MAT 1:1 Xujun vihi ne, setaha xujun ñihi rë xutachanga rë Jesucristu, me xi tjë rë David, hacuaha tjë rë Abraham.
MAT 1:2 Abraham ne, me vëhë xi xutachanga xi má nahmi rë Isaac. Isaac ne, me vëhë xi xutachanga xi má nahmi rë Jacob. Jacob ne, me vëhë xi xutachanga xi má nahmi rë Judá cojo hntsë cha.
MAT 1:3 Judá ne, nahmi má me tsëhë Fares cojo Zara; naa rë me ne, Tamar hmí rë. Fares ne, me vëhë xi xutachanga xi má nahmi rë Esrom. Esrom ne, me vëhë xi xutachanga xi má nahmi rë Aram.
MAT 1:4 Aram ne, me vëhë xi xutachanga xi má nahmi rë Aminadab me xi xutachanga xi má nahmi rë Naasón, me vëhë xi xutachanga xi má nahmi rë Salmón.
MAT 1:5 Salmón ne, nahmi rë Booz me; hane Rahab ne, naa rë me. Booz ne, nahmi má me tsëhë Obed. Naa rë me vë; má Rut. Obed ne, me vëhë xi xutachanga xi má nahmi rë Isaí.
MAT 1:6 Isaí ne, me vëhë xi xutachanga xi má nahmi rë David. David jan ne, me vëhë xi cavitexa nangui rë Israel. Hane David ne, me vëhë xi xutachanga xi má nahmi rë Salomón. Naa rë Salomón ne, titjun chjuun rë Urías camá me.
MAT 1:7 Salomón ne, me vëhë xi xutachanga xi má nahmi rë Roboam. Roboam ne, me vëhë xi xutachanga xi má nahmi rë Abías. Abías ne, me vëhë xi xutachanga xi má nahmi rë Asa.
MAT 1:8 Asa ne, me vëhë xi xutachanga xi má nahmi rë Josafat. Josafat ne, me vëhë xi xutachanga xi má nahmi rë Joram. Hane Joram ne, me vëhë xi xutachanga xi má nahmi rë Uzías.
MAT 1:9 Uzías ne, me vëhë xi xutachanga xi má nahmi rë Jotam. Jotam ne, me vëhë xi xutachanga xi má nahmi rë Acaz. Acaz ne, me vëhë xi xutachanga xi má nahmi rë Ezequías.
MAT 1:10 Ezequías ne, me vëhë xi xutachanga xi má nahmi rë Manasés. Manasés ne, me vëhë xi xutachanga xi má nahmi rë Amón. Amón ne, me vëhë xi xutachanga xi má nahmi rë Josias.
MAT 1:11 Josias ne, me vëhë xi xutachanga xi má nahmi rë Jeconías cojo hntsë cha. Nixtin hya ne, xutaxín ne, cafahaxin me xuta nangui rë Israel, quijicojo me xuta jan nangui Babilonia.
MAT 1:12 Hane xi cama quiji me Babilonia, Jeconías vë ne, camá me vëhë xutachanga xi má nahmi rë Salatiel. Salatiel ne, me vëhë xi xutachanga xi má nahmi rë Zorobabel.
MAT 1:13 Zorobabel ne, me vëhë xi xutachanga xi má nahmi rë Abiud. Abiud ne, me vëhë xi xutachanga xi má nahmi rë Eliaquim. Eliaquim ne, me vëhë xi xutachanga xi má nahmi rë Azor.
MAT 1:14 Azor ne, me vëhë xi xutachanga xi má nahmi rë Sadoc. Sadoc ne, me vëhë xi xutachanga xi má nahmi rë Aquim. Aquim ne, me vëhë xi xutachanga xi má nahmi rë Eliud.
MAT 1:15 Eliud ne, me vëhë xi xutachanga xi má nahmi rë Eleazar. Eleazar ne, me vëhë xi xutachanga xi má nahmi rë Matán. Matán ne, me vëhë xi xutachanga xi má nahmi rë Jacob.
MAT 1:16 Jacob ne, má me nahmi rë José, xihin rë María naa rë Jesús me xi hacuaha yaha ñihi rë Mesías.
MAT 1:17 Cuatjin camá xi cavatju teñuju ndiya xi cavatju xi cjín xuta tisetsin me nixtin rë Abraham hisca nixtin rë David. Hacuaha cama teñuju ndiya xi cjín xuta tisetsin me nixtin rë David hisca hya xi xutaxín jan ne, cafahaxin me xuta nangui rë Israel, quijicojo me xuta nangui Babilonia. Hane hacuaha camá teñuju ndiya tsëhë nixtin hya hisca nixtin xi catsin Mesías.
MAT 1:18 Cuitjin camá nixtin xi catsin Jesucristu: María, naa rë Jesús ne, tacun vasen cjuavixan rë na cojo José. Peru chaja sa xi cjuaha xicjin na cojo me ne, casacu rë na quihndi ngatsë rë Hasen rë Nina.
MAT 1:19 José, me xi cuixan cojo na jan ne, tyjahi me cojo cjuatacun rë me xcun Nina. Hane xi mijí scandi me cjuasava rë na, catsingatahacacun me xi taha hma ni ne tsismicacun me na.
MAT 1:20 Cuatjin catsingatahacacun me xi sahmi me peru hora hya ne, cafehetsejen ngu ángel rë Nina ngajñi chini rë me, hane cuitjin cachja ángel: ―‍José, ngaye quihndi tjë rë David, ximacjintacuin xi chjehentse María cuma chjuun riji na ta, sacuaha quihndi xi yaha na ne, ngatsë rë Hasen rë Nina, camá xi casacu rë na.
MAT 1:21 Tsin rë na ngu quihndi xihin. Quihndi vë ne, tehe ñihi rë Jesús. Cuatjin cjuaha ñihi ta, tsëhë xi cuaxëtje rë xuta rë tsëhë jyë́ rë me.
MAT 1:22 Yëjë xcusun vihi ne cuatjin cama, cojo sa xi cuetjucaa jain cjua xi cachja profeta nixtin hatsëë cuitjin:
MAT 1:23 Ngayujun ni nutsujun ta ngu chjuun xungun ne, sacu rë na ngu quihndi xihin. Quihndi jan ne, suañihi me Emanuel. Emanuel ne, vëhë cjua xi vijne: Nina ne, jiya me ngajñi naja.
MAT 1:24 Ngajan xi hya xi cavasca rë José ne, casahmi me tutjin cachja ángel cojo me. Cafahatsja me María ne xi camá chjuun rë me na.
MAT 1:25 Peru hisca xi cavatju catsin quihndi ne, sehe caviyuju cojo xicjin me. Hane casuañihi rë me quihndi jan, Jesús.
MAT 2:1 Nixtin xi catsin Jesús nangui Belén, distritu Judea, nixtin hya ne, Herodes vitexa me xuta nangui vë. Hacuaha nixtin hya ne, ngu jo cha xi vechutaha cjuatacun rë ne, cavetjun cha ladu vetjucaa tsuhi cafehe cha nandya Jerusalén.
MAT 2:2 Hane cuitjin cachja cha: ―‍¿Jani sacu niji quihndi xi cuitexa nangui Israel? ta cahyin xi cavetjucaa niñú rë me ngajan ladu vetjucaa tsuhi. Hane nduvintjenguin me xi chjihinrcuin me.
MAT 2:3 Hya xi cama ne, jemu cama xti rë Herodes xi tu cahndë me cjua jan; cojo xuta nangui Jerusalén ne, cama xti rë me.
MAT 2:4 Hya xi cama ne, Herodes ne, cajindayavaha me yëjë ni nahmi xi matitjun cojo yëjë cha vicuya cjuachacun rë xuta nangui Israel. Sehe cavinenguise me ¿jani xi tsin xu me xi má Cristu?
MAT 2:5 Hane cuitjin cafayangui me: ―‍Ngajan nandya Belén, distritu Judea tsin ta cuatjin catsihindu profeta tsëhë nandya jan xi ngajan tsin quihndi:
MAT 2:6 Ngaye, nandya Belén, ngaye nandya tsëhë xuta tjë rë Judá, hacuaha vengui chji ri xcun xuta matitjun nangui Judá. Ta ngajñi rë xuta riji ne cuetjutsejen ngu me xi cuitexa rë xuta naha, xuta nangui Israel.
MAT 2:7 Hya xi camá ne, Herodes ne, cajindayahma me cha xi vechu cjuatacun rë jan. Cafahataha rë me cha. ¿Mé hora cjuaquixi tsëhë mé nixtin camatsejen niñú jan?
MAT 2:8 Ngaxtun vëhë ne, sehe cavitexa me cha xi cjue cha Belén. Hacuaha cuitjin cachja me cojo cha: ―‍Tangun ngajan Belén. Chjinengunsunndujun yëjë tsëhë quihndi. Hane xi sacu nuju cjuaquixi ne, ningatjun ná cjua sehe cojo ngahan ne hacuaha cjuë́ cjuahárcun quihndi.
MAT 2:9 Xi cavihndë cha xi cuicun vi cjua jan, cavetju cha quiji cha. Hane niñú xi cavetjucaa ngajan ladu vetjucaa tsuhi jan ne, hacuaha quiji titjun hisca xi cavechu cahndë́ hiscan xi jiña quihndi, hane ngajan cavasén.
MAT 2:10 Hane xi cavëë cha niñú xi ngajan cavasen ne, jercu tu ndama camaha ni rë cha.
MAT 2:11 Hane xi cavisehen cha ndihya hiscan siu me ne, cavëë cha quihndi jan. Hacuaha cavëë cha naa rë me, xi hmí rë María. Sehe quiji cavixcuhnchi cha cafaharcun cha quihndi jan. Hane sehe cavuxaha cha hiscan hincha rë cha cuatjo, hane casua cha oro cojo tyjungunsa cojo tyjungunjne xi hmí rë mira.
MAT 2:12 Hya xi cavatju vëhë ne, tsëhë xi cachja chini cojo rë cha xi cuyaain cha taha ladu hiscan tacun Herodes ne, tahaxin cavuya cha nangui rë cha.
MAT 2:13 Hya xi quiji cha xi vechu cjuatacun rë jan ne, cafehetsejen ngu ángel rë Nina ngajñi chini rë José, hane cachja cuitjin: ―‍Tisatjinhngue, tihincueje quihndi cojo naa rë. Tiyun hiscan nangui Egipto. Hane ngajan cuinechun hisca xi tsingátju cjua xi cuyun. Cuatjin nihñu ta tsëhë xi Herodes ne, cuanguise me quihndi xi tsiquehen me.
MAT 2:14 Hane cavisatjenhnga me nixten quijicojo me quihndi jan cojo naa rë, cafe me Egipto.
MAT 2:15 Hane xi cafehe me ngajan Egipto ne, ngajan caviyujutaha me hisca nixtin xi cahme Herodes. Cuatjin cama sehe hatuxa camachihin cjua xi catsingatju Nina cojo profeta rë me hatsëë nixtin. Cuitjin chja cjua jan: “Cajindáya rë quihndi naha xi nduvaniji tsëhë nangui Egipto.”
MAT 2:16 Hya xi camachaya rë Herodes xi camá cavindacha cha xi vechu cjuatacun rë jan ne, jercu cama cjan rë me. Hane cavitexa me yo xi tsiquehen rë yëjë ni quihndi xihin xi cjëë cjuë jyan nu, yëjë ni quihndi nandya Belén cojo distritu rë.
MAT 2:17 Vëhë cjua xi cachja Nina xi catsihindu profeta Jeremías:
MAT 2:18 Vinuhya rë cjuava ngajan nandya Ramá. Jemu tjin cjuandusin. Na Raquel ne, jihndava na ngatsë rë quihndi rë na. Hane tsajin cjuetacun xi cuma rë na ta tsëhë xi ha cafë quihndi.
MAT 2:19 Hane xi cavatju cahme Herodes ne, cavuya cafehetsejen nga ángel rë Nina ngajñi chini rë José ngajan Egipto ne,
MAT 2:20 cuitjin cachja: ―‍Tisatjinhngue tihincueje quihndi cojo naa rë. Tihinniji nandya Israel. Tihin ta tsëhë xi ha cahme cha xi meje tsiquehen rë quihndi. Cuatjin cachja.
MAT 2:21 Hya xi camá ne, cavisatjenhnga José ne, sehe cavetju me quijicojo me quihndi cojo naa rë, hane sehe cavisehen nga me nangui Israel.
MAT 2:22 Peru xi cahndë José xi Archelaus vitexa me distritu Judea ta me vëhë vitexa me ngojo rë nahmi rë me, Herodes, vëhë xi camacjincacun José mijí cjue me ngajan. Hane xi cachja chini cojo rë me ne, sehe cavisehen me distritu Galilea.
MAT 2:23 Caviyujutaha me ngajan ngu nandya xi hmí rë Nasaret. Cuatjin cama sehe cuetjucaa cjua xi catsihindu profeta tsëhë me xi xuta ne, cuichja me xi Jesús ne, xuta Nasaret me.
MAT 3:1 Nixtin hya ne, cavetjucaa tsejen Juan Vitenda rë Xuta ngajan nguijña tsëhë distritu Judea.
MAT 3:2 Cuitjin catsiquihndë me xuta: ―‍Nindeyun cjuatacun nuju ta, camatiña nixtin xi Nina ne, cuitexa me ngasunhndë.
MAT 3:3 Cuatjin tsëhë cha Juan vihi, cha vihi xi camahindu tsëhë cha xcun xujun xi chja cjua rë profeta Isaías xi chja cuitjin: Cuitjin jercu hñu tsiquihndë ngu xuta ngajan hiscan jemu xín tsëhë nandya: “Tuhun chjinu ndiya xi cuinduva Nina; hacuaha ninguixun cjuatacun nuju tsëhë me.” Cuatjin cachja me.
MAT 3:4 Tsjian rë Juan jan ne, tsja rë chu camellu camá hacuaha cojo ngu cinturón chuxin tsihñu me cahntsua me. Hane xi jinë me ne, chu nchahva cojo tsjen rë chu tusen.
MAT 3:5 Hane jemu cjín xuta quijitjengui me Juan, xuta nandya Jerusalén, xuta distritu Judea cojo xuta xi siutahandee rë ndajyë Jordán.
MAT 3:6 Xuta jan, xi cavijacun me jyë́ rë me cojo Nina camá cavitenda Juan me ngajan ndajyë Jordán.
MAT 3:7 Peru xi cavutsejen Juan xi cjín xuta tifehe tixtenda me; cha tsëhë partidu fariseo cojo cha tsëhë partidu saduceo ne cachja me cojo cha cuitjin: ―‍¡Ngayujun ni ngayun quihndi rë chu tsehen matsejen ne!, ¿yo cavinchangui nuju xi nihñu ngahñu xi cjuetjuntjun tsëhë castigu xi hatuxa tsingatju Nina?
MAT 3:8 Sá xi meje jain cjuetjuntjun matsejen ne, nihñu suvá cjuandaja sacuatjin sahmi xuta xi catsindeya jain me cjuatacun rë me.
MAT 3:9 Xicanujuun cahntsua xahasen nuju cjua vihi: “Ngayaan ne, tsajin mé cuma naja ta, tsëhë xi tjë rë Abraham ngayaan.” Xicanujuun cuatjin matsejen ta, nguehe cuichjá cojo nuju ta Nina ne, hisca cojo ndyojo xi cuicun vi ne, cuma sahmi me xi cumá tjë rë Abraham.
MAT 3:10 Chutsujun ta ngayun matsejen ne, tangun ngayun cojo yatjë xi ha quitahachjine quicharcu tyjama rë xi cuetsihin xti rë. Yëjë ni yatjë xi suaain tu xi ndaja matsejen ne, xtí rë, sehe cueti.
MAT 3:11 Ngahan matsejen ne, cojo nandá ni tiviténda nuju, peru sehe cuinduva me xi hitsë sa jyë ngahñu tjin rë cjuatacun rë xi cuma ná ngahan, me xi hitsë sa jyë hnga cojo cjuatacun rë xi cuma ná ngahan. Hane me vëhë cueya me Hasen rë Nina cahntsua xahasen nuju, hacuaha tangun me sacuaha ngu ndihi xi tsityjahi rë cjuatacun nuju.
MAT 3:12 Me vëhë matsejen ne, sacuaha xi ha yahatsja me quicha xi tsicaha rë xtë rë trigu cojo sa xi cuma tyjahi ndaja trigu xi casechun rë tsëhë me, hacuaha cjuaya me trigu tyjahi xi cuinchandaja me, hane xtë rë jan matsejen ne, cuaca me xcun ndihi xi tsajin nixtin coho. ―‍Cuatjin cachja Juan.
MAT 3:13 Nixtin hya ne, hacuaha cavetju Jesús tsëhë distritu Galilea hane cafehe me ndajyë Jordán xi xtenda me.
MAT 3:14 Peru mijí sua Juan cahndë́ ta cachja me: ―‍Hitsë sa ndaja xi ngayun cuitendun ná. Hacuiin xi ngahan cuitenda nuju.
MAT 3:15 Ngajan xi cafayangui Jesús cuitjin: ―‍Jéya, cuatjin ndatjin xi cuma quihndë ta mameje rë xi cumachihin yëjë xcusun xi cavitexa Nina. Hane catsingatihin Juan ne, cavitenda me Jesús.
MAT 3:16 Xi cama caxtenda Jesús ne, xi tu tivetju me tsëhë nandá jan ne, ngajan cavëë me xi ngahnga ne, catuxaha. Hane Hasen rë Nina ne, canduvajnetsejen casesun rcu me. Hane sacuajyihi xcusun rë ngu paloma jyihi.
MAT 3:17 Hacuaha canuhya rë ngu cjua ngajan ngahnga xi cachja cuitjin: ―‍Cha vihi xi quihndi naha xi hmú cácun. Jemu ndama ná ngatsë rë cha.
MAT 4:1 Hya xi camá ne, Hasen rë Nina ne, quijiniji xu cojo Jesús ngajan ngu xín tsëhë nandya ta ngajan cjuahachuva xitsehen me.
MAT 4:2 Hya xi cama ne, Jesús ne, yachan nixtin cojo yachan nixten cajinii me niñu. Hya xi cavatju vëhë ne, jercu camavojo rë me.
MAT 4:3 Sehe camatiñataha xu xitsehen xi cjuahachuva rë me. Cachja cojo rë me cuitjin: ―‍Sá xi ngaye jain xi Quihndi rë Nina ngaye ne, tinoje cojo ndyojo vihi ne, catama niñu. ―‍Cuatjin xu cachja xitsehen cojo rë me.
MAT 4:4 Peru cuitjin cafayangui me tsëhë xitsehen jan: ―‍Xcun xujun rë Nina ne, cuitjin camahindu: “Hacuiin suvá ngatsë rë niñu xi siu xuta cjuahñu ta hacuaha mameje rë me tsëhë yëjë ni cjua xi catsingatju Nina.”
MAT 4:5 Sehe xitsehen jan quijicojo xu rë me nandya Jerusalén, nandya ximinchacun, quijisun xu me rcu cjin yungun xi matitjun
MAT 4:6 sehe ngajan xi cachja xu xitsehen: ―‍Sá xi ngaye jain xi Quihndi rë Nina ngaye ne, ningatjin yojo riji tsëhë ndyá ne hisca nangui. Ndaja hye ta tsajin mé cuma ri ta xcun xujun rë Nina ne, cuitjin chja: Nina ne cuitexa me ángel rë me xi sahmi ri cuidadu. Cjuahántsa ri, cojo sa xi ntsacui ne, sacuinhmuaain rë cojo hisca ngu ndyojo.
MAT 4:7 Ngajan xi cafayangui xu Jesús tsëhë xitsehen cuitjin: ―‍Hacuaha cuitjin chja xcun xujun rë Nina: “Mijí rë xi chjuhunchuvun Nina nuju.” ―‍Cuatjin xu cachja Jesús.
MAT 4:8 Hane ngu ndiya nga quijicojo xitsehen Jesús, quijicojo rë me ngu ndetjún hnga ne, sehe catsingacun xitsehen jan me jingujyë ni nandya tsëhë ngasunhndë cojo yëjë ni cjuanchina xi tjin rë.
MAT 4:9 Ngajan xi cachja xitsehen cojo rë me cuitjin: ―‍Suá ri yëjë nandya xi cuacún vë cojo cjuanchina rë. Hatuxa suá ri sa xi cuindove cuiticjexcuin nguehe xi chjehercuin ná.
MAT 4:10 Sehe cafayangui Jesús tsëhë xitsehen cuitjin: ―‍Tihinxin Satanás, ta tsëhë xi xcun xujun rë Nina ne, cuitjin camahindu: “Meje rë xi chjuhunrcun Nina naja, hacuaha ngu ni me vëhë xi meje rë xi nihñuchuhun hacutjin xi meje rë me.”
MAT 4:11 Xi cuatjin xu cachja Jesús cojo xitsehen jan ne, cavetjuxin tsëhë me. Hane cafehe tjengui ángel me xi cjuahacuenda rë me.
MAT 4:12 Xi camachaya rë Jesús xi jiya Juan Vitenda rë Xuta ndavaya ne, quiji me distritu Galilea.
MAT 4:13 Hane cavetjuxin me tsëhë nandya Nasaret, quiji cavejña me nandya Capernaum. Nandya jan ne, tacun tjehen rë ndajyë. Hane nandya jan ne tsëhë xuta tjë rë Zabulón cojo Neftalí.
MAT 4:14 Cuatjin cama sehe camachihin cjua xi camahindu xcun xujun xi chja cjua rë profeta Isaías xi chja cuitjin:
MAT 4:15 Xuta xi viyuju me nangui rë Zabulón cojo Neftalí, nangui ngajan ngunda ndajyë Jordán, ngajan tjehen rë ndachacun, tsëhë distritu Galilea, nangui rë xutaxín.
MAT 4:16 Xuta jan xi jñu cjuatacun rë me, cavëë me ngu me xi sacuaha ngu ndihi seti xi sua rë me cjuahasen. Xuta xi jemu tsavi siu me tsëhë cjuaveya, ndihi jan ne casua rë me hasen rë.
MAT 4:17 Nixtin hya ne, Jesús ne, cavetsihin catsujyihiya me cachja me cojo xuta cjua rë Nina. Cuitjin cachja me: ―‍Nindeyun cjuatacun nuju ta tsëhë xi camatiña nixtin xi Nina ne cuitexa me ngasunhndë.
MAT 4:18 Cama ngu nixtin xi tsujyihiya me ngajan tjehen laguna tsëhë Galilea ne, cavëë me jo me xi hntsë, ngu me xi hmí rë Simón cojo ngu me xi hmí rë Andrés. Titsingatjenya me changa ngajñi ndachacun, tsëhë xi hatuxa xá rë me xi faha me chu ti.
MAT 4:19 Hane Jesús ne, cachja me cojo me cuitjin: ―‍Nduvun cuanguen cojo ná. Hane cuicuyá nuju xi cuangun nuvun xuta xi cuisehen me ladu naha ngojo rë xi nuvun chu ti. ―‍Cuatjin cachja me.
MAT 4:20 Hane hora vëhë ni caviyuju me changa jan, hane cavetju me quiji me cojo Jesús.
MAT 4:21 Hitsë sa nguvan ne, cavëë Jesús jo cha xi hacuaha hntsë: Jacobo cojo Juan, cha quihndi rë Zebedeo. Hincha cha cahntsua barcu cojo nahmi rë cha, ngajan tifuyataha cha changa rë cha. Hacuaha cajindaya Jesús cha xi cjuecojo me cha.
MAT 4:22 Sehe caviyuju cha barcu jan, hane cavejña cha nahmi rë cha quiji cha cojo Jesús.
MAT 4:23 Hane Jesús ne, catsujyihiya me yëjë ni ladu tsëhë distritu Galilea. Xi cavisehen me yungun ne, cavicuya me xuta, cachja me cojo xuta cjuandajyihi tsëhë gubiernu xi sahmi Nina. Hacuaha catsirqui me xuta hmu rë; camandaja xuta tsëhë yëjë ni chíhin cojo tsëhë yëjë ni cjuahmu rë me.
MAT 4:24 Hane cavitsojo cjua tsëhë cjuarcun xi casahmi Jesús. Cavitsojo cjua jan hisca yëjë nangui xi hmí rë Siria. Hane xuta ne, cafehetjengui me Jesús yaha me xuta hmu rë tsëhë yëjë xcusun chíhin hane catsirqui me. Hacuaha catsirqui me xuta xi hincha xitsehen cahntsua xahasen rë me cojo xuta xi má rë me chajan cojo xuta xi cahme yojo rë.
MAT 4:25 Hane quijitjengui xutacjín jan Jesús ne, xuta tsëhë cahndë́ xi cuicun vi: tsëhë të nandya xi tsëhë Decápolis, cojo nandya Jerusalén, cojo yahnga sa xuta tsëhë distritu Judea, cojo xuta tsëhë nangui ngunda tsëhë ndajyë Jordán.
MAT 5:1 Hya xi cavutsejen Jesús xi camatangun xutacjín jan ne, quijiniji me ngu ndetjun, hane xi cavéjña Jesús ne, casahmitiña xuta tsëhë Jesús.
MAT 5:2 Sehe cavetsihin cavicuya me xuta jan cuitjin:
MAT 5:3 ―‍Jemu ndaja tsëhë me xi machaya rë me xi tsichaja sa rë cjuatacun rë me xcun Nina matsejen ta satë rë me gubiernu xi sahmi Nina.
MAT 5:4 ’Jemu ndaja tsëhë me xi jihndava me tsëhë cjuachoho matsejen ta Nina sua rë me cjuetacun.
MAT 5:5 ’Jemu ndaja tsëhë xuta jeya, xuta xi hacuiin xta me matsejen ta, cjuahatsja me nangui xi sua Nina.
MAT 5:6 ’Jemu ndaja tsëhë me xi sacuaha sahmi yahnga xuta xi vojo rë xi fi tjengui rë comida, cuanitjin tjengui me xcusun xi cuma tyjahi cjuatacun rë me xcun Nina matsejen ta, cuechu nixtin xi cuiyujuchihin cjuatacun rë me.
MAT 5:7 ’Jemu ndaja tsëhë me xi tjin rë cjuayumatacun cojo xuta, ta hacuaha cjuahatsja me cjuayumatacun tsëhë Nina.
MAT 5:8 ’Jemu ndaja tsëhë me xi tjin ngu cjuatacun tyjahi cahntsua xahasen rë me matsejen ta, scuëë me Nina.
MAT 5:9 ’Jemu ndaja tsëhë me xi tsinguejyu rë xuta xi chohovëë xicjin me matsejen ta, me vëhë jan ne, cuichja Nina xi quihndi rë me.
MAT 5:10 ’Jemu ndaja tsëhë me hya xi tsujyihiya tjengui xuta me cojo cjuahngatacun ngatsë rë xi tjin rë me ngu cjuatacun cojo Nina matsejen, ta satë rë me gubiernu xi sahmi Nina.
MAT 5:11 ’Jemu ndaja tsujun ngayun ne sá xi ngatsë naha choho cuichja xuta tsujun o sá xi tsujyihiya tjengui nuju xuta cojo cjuahngatacun o sá xi cojo cjuandesu tsicanijijyë me ngayun.
MAT 5:12 Nixtin hya ne, jemu catama sua rë xahasen nuju ngatsë rë cjuañihi vë ta jemu jyë ngu cjuandaja xi tacunya nuju ngajan ngahnga. Cuanitjin ni choho casahmi xutachanga naja cojo profeta rë Nina xi caviyuju hatsëë nixtin.
MAT 5:13 ’Ngayun, tjin hacutjin machji rëhë ngayun ngajñi rë xuta sacuaha sahmi naxa xi sahmi xtya rë ngu xichine. Ta sá xi naxa cjuë xtya rë ne, tsajin sa ngu xcusun xi cuma sahmi xtya rë. Hane sá xi cjuë xtya rë ne, tsajin me machji rëhë ta, scandi ni xuta, ngajan ni sune me.
MAT 5:14 ’Cuanitjin ne, tjin hacutjin machji rëhë ngayun ngajñi rë xuta sacuaha machji rëhë ngu ndihi xi sua hasen rë. Ta sá xi ndetjun tacun nandya matsejen ne, hatuxa tsejen; tsajin me xi cuatsa rë.
MAT 5:15 Cuanitjin ne, hacuaha tsajin ngu xuta xi ha xcun xi ha cavetaha rë me ngu ndihi ne, sehe cjuaha me cueyahma me ngahma rë ngu caxa. Hatuxa cjuaha me cuejñatsejen me cahndë́ rë cojo sa xi xuta xi siu me hiscan xi seti ndihi jan ne, cuechu hasen rë.
MAT 5:16 Hacuanitjin chuva vëhë, meje rë xi nihñu cjuandaja xi scuëë xuta xcusun xi nihñu hane ngatsë rë xcusun jan ne, sahmi jyë me sahmi hnga me Nahmi nuju xi tacun me ngahnga.
MAT 5:17 ’Xi caningatuuntacuun matsejen xi nduvá tsinguétsun ngahñu rë ley xi catsihindu xutachanga naja Moisés o cjua xi cachja profeta. Cahndë́ rë xi tsinguétsun ne, sahmechihin cjua jan.
MAT 5:18 Hatuxa cuichjá cojo nuju cjuaquixi ta hya xi tacun cuaha ngahnga ne tacun cuaha ngasunhndë ne, cumaji chjahanxin rë cjua rë ley jan cojo yëjë ni letra rë ta, cuejña cuaha hiscan cumachihin cjua rë.
MAT 5:19 Vëhë xi tu yo ni xi sahmicuendaain tsëhë hisca ngu rquí cjua rë, hane sá cuinchangui me yahnga xuta xi cuanitjin sahmi me, chuva cuengui chji rë me hya xi sahmi Nina gubiernu. Peru tu yo ni me xi cjuahacuenda me hacuaha tsingacun me xuta xi cjuahacuenda me ley jan, me vëhë cuma titjun me hya xi sahmi Nina gubiernu.
MAT 5:20 Nguehe cuichjá cojo nuju ngayun ta meje rë xi hitsë sa tyjahi cjuatacun nuju xi cumá rë cjuatacun rë xuta xi vicuya me ley o sá xi xuta partidu fariseo, ta sá tsajin ne, satiin nuju gubiernu xi sahmi Nina.
MAT 5:21 ’Ha hyun cjua xi cafaha xuta hatsëë nixtin xi chja xi canicuun xingun hacuaha chja xi yo xi tsiquehen xicjin matsejen ne, cjue me xcun juez xi tsichuva me jyë́ rë me.
MAT 5:22 Peru cuichjá cojo nuju xi hisca yo xi macjan rë cojo xicjin ne, satë rë xi tsichuva me. Hane yo xi chjataha xicjin ne, cjue xcun juez xi matitjun. Cuanitjin yo me xi cuichja tsëhë xuta: “Ngarca ngayun”, cuechji me tsëhë jyë́ rë me ngajan xcun ndihi xi tsajin nixtin coho.
MAT 5:23 ’Ngatsë rë vihi, sá xi hora xi vejñu chjë nuju ngasunscun ne, sá xi tu ñahñu ni vitsjen nuju xi choho canihñu cojo xingun
MAT 5:24 ngajan catejñavasen chjë nuju, titjun cuangun tjengun xingun, hane chjayun rë me cjuaninchataha hane xi camandaja yun cojo me, sehe cuyun cuejñu chjë nuju jan.
MAT 5:25 ’Sá ndiya tivangun cojo xuta xi meje cuinchajyë nuju xcun xutaxa rë ne, meje rë xi cuisiajmuchuhun cojo me, cojo sa xi ngajñi nuju cuma chihin ta sá tsajin ne, cjuecojo nuju me xcun juez. Hane juez matsejen ne, squindaya me mayu sehe sahmi nuju me entregadu, hane cjue cueya nuju me ndavaya.
MAT 5:26 Ta cuichjá cojo nuju cjuaquixi ta hatuxa tsajin nixtin xi cuetjun tsëhë ngajan jinguyëjë rë xi cjëë cuechjun yëjë ni tujún xi quitjun.
MAT 5:27 ’Ha hyun cjua xi cafaha xuta hatsëë nixtin xi chja cuitjin: “Xicanihñuu cjuatsehen cojo rë ngu chjuun o cojo rë ngu xihin xi hacuiin tsujun.”
MAT 5:28 Peru cuichjá cojo nuju xi hisca xi ngu xihin xi vutsejen me ngu chjuun xi macacun me cojo na, ngajñi cjuatacun rë me ne, ha casahmi me cjuatsehen cojo ran.
MAT 5:29 ’Hindë sá xi cjuatacun nuju meje rë xi nihñu ngu jyë́ tsëhë xcusun xi chutsujun cojo tuxcuun ladu quixi, hitsë sa ndaja tsujun sá xi chjuhunxun tuxcuun jan chandunxun cojo sa xi hacuiin tsitsehen nuju, ta hitsë sa vengui chji rëhë xi ma chaja nuju ngu rquí yojo nuju hane hacuiin xi cuangun jingu hiscan xi má hasen rë nima castigu.
MAT 5:30 Cuanitjin ne, sá xi cjuatacun nuju meje rë xi nihñu ngu jyë́ cojo ntsun quixi ne, hitsë sa venguichji rëhë xi chandunxun ntsun jan ta hitsë sa ndaja tsujun xi machaja ngu rquí yojo nuju tsëhë xi cuangun jingu hiscan xi má hasen rë nima castigu.
MAT 5:31 ’Hacuaha cafaha xuta hatsëë nixtin cjua xi chja cuitjin: “Ngu cha xi tsismi chjuun rë ne catejña cha ngu xujun tsja chjuun jan xi ha quihndë mijí rë cha na.”
MAT 5:32 Peru nguehe cuichjá cojo nuju ta yo xi tsismi chjuun rë handasa ndastu mé cjuatsehen casahmi chjuun jan cojo ngu xihin xi hacjahi, hacuaha tjin rë me jyë́ ta sehe ngatsë rë xi catsismi me na ne sahmi chjuun jan cjuatsehen. Hacuaha yo xi cuixan cojo chjuun jan ne, tangun jyë́ rë cojo ngu xi sahmi cjuatsehen cojo ngu chjuun xi hacuiin chjuun rë.
MAT 5:33 ’Hacuaha hyun cjua xi cafaha xuta hatsëë nixtin xi chja cuitjin: Hya xi cuinújun: “Vëë Nina”, hatuxa sahmi ngujyë xi nihñuchuhun cjua xi canújun.
MAT 5:34 Peru nguehe cuichjá cojo nuju ta hora xi cuisiajmu cojo xingun ne, hacuiin cuinújun xi vëë Nina, hacuiin cuinújun xi vëë sa jingu sa quihndi ngasunhndë. Cuinujuun xi vëë ngahnga ta ngahnga ne, tacun Nina xi vitexa me.
MAT 5:35 Hacuaha cuinujuun xi vëë ngasunhndë ta ngasunhndë ne, tangun sacuaha ngu yatë hiscan xi tine ntsacu Nina. Cuinujuun xi vëë Jerusalén ta Jerusalén ne, nandya xi tsëhë Nina, Me xi Matitjun.
MAT 5:36 Cuinujuun cuitjin: “Sá xi quixiin jain cjua naha ne, catinduva ngu cjuacjintacun xi cuatjun”, ta tsëhë xi ngayun ne, hisca hitsë cumaji cuitexun sá xi cuma jma tsjarcun o sá xi cuma tyjava.
MAT 5:37 Hya xi cuisiajmu, sá xi “joho” nújun ne, cuanitjin ni cuitejña; o sá xi “jéya” nújun, hacuaha cuanitjin ni ndatjin ta, sá xi vetjutë visiajmu cjua cjín jan ne, cjua cjín jan ne, nduva tsëhë cjuatsehen.
MAT 5:38 ’Hyun cjua xi cafaha xuta hatsëë xi chja cuitjin: Cha xi cuahaxin tuxcun xicjin ne, hacuaha chjahaxin rë tsëhë cha. Cuanitjin cha xi cuahaxin nehñu xicjin ne, hacuaha cuanitjin ni chjahaxin rë nehñu cha.
MAT 5:39 Peru nguehe cuichjá cojo nuju ta, canicuyuun cjuatsehen. Sá xi tjin yo xi vanguihmu nuju, yo xi vajaya ngu ladu tsa nuju matsejen ne, nicuyun sa ngu ladu catajaya.
MAT 5:40 Cuanitjin ne, sá xi tjin yo xi cjuecojo nuju xcun juez xi fahataha chingá nuju matsejen ne, hacuaha tuhun rë me cojo yëjë ni tsjian hasu nuju.
MAT 5:41 Cuanitjin ne sá xi ngu xuta ne, sahmi nuju me ngujyë xi chanuju chaha rë me ngu kilómetro, cahndë́ rë ngu ni, tanguncujun jo kilómetro.
MAT 5:42 Yëjë ni xuta xi fehya nuju me mé xi machaja rë me matsejen ne, tuhun rë me. Hane sá xi scuxetaha nuju me, tuhun rë me.
MAT 5:43 ’Hyun cjua xi cafaha xuta hatsëë nixtin xi chja cuitjin: “Nihmutacún xuta xi siutahndee nuju; choho hyun xuta xi má condra nuju.”
MAT 5:44 Peru cuichjá cojo nuju ta, hacuaha nihmutacún xuta xi má condra nuju; ndaja nihñu cojo xuta xi choho vëë nuju me. Nújunyumuntuhun rë xuta xi tsujyihiya tjengui nuju me cojo cjuahngatacun.
MAT 5:45 Sá xi cuatjin nihñu ne, cumatsejen xi chjayunngun sacuaha sahmi Nahmi nuju xi tacun ngahnga ta, Nina ne, sahmi me xi ngu chihin ni vetjucaa tsuhi xi casahmi me hane vechu hasen rë hiscan siu xuta tsehen hacuaha hiscan siu xuta ndaja. Hacuaha sahmi me xi vaha tsi xcun jnu rë xuta xi tjin xi cun rë me, hane hacuaha xcun jnu rë xuta xi tsajin xi cun rë me xcun Nina.
MAT 5:46 Tsajin yo xi sua chjí nuju tsëhë xi hmutacún xuta xi hmucacun nuju me matsejen, tsëhë xi hacuaha hisca cha faha tujúnsa (xi jemu vaxë cha tujún) matsejen ne, hmucacun cha xuta xi hmucacun rë cha.
MAT 5:47 Hacuanitjin ne, sá xi suvun cuinújun nina cojo xuta nuju ne, ¿há hitsë sa ndaja yun xi cuma rë yahnga xuta? ¡Jéya! Hisca xuta xi macjaain rë me Nina ne, tjin rë me xcusun ndaja vë.
MAT 5:48 Vëhë xi mameje rë xi tangun cojo ngasunhndë nuju cojo ngu xcusun xi tyjahi chichihin ni, cumatangun xcusun nuju cojo xcusun rë Nina xi tyjahi chichihin cjuatacun rë me.
MAT 6:1 ’Hya xi nihñu ngu cjuandaja ne, nihñu nguñajatacun, hacuiin nihñu tsëhë xi scuëë nuju xuta; ta sá tsajin ne, ndastu me chji sacu tsëhë Nahmi nuju xi tacun ngahnga.
MAT 6:2 Cuanitjin ni sacuaha cjua vë, hya xi tuhun ngu caridad matsejen ne, xi canijanuu ngu tyjo xi tuhun cumachaya rë xuta cjuandaja jan. Hacuaha cuatjin sahmi xuta xi jo xcun jo hntsua me hya xi sua me caridad ngajan yungun o ndiya ngatsë rë xi vaxëndaja xuta me. Tichjá cojo nuju ta ha vëhë ni chji sacu rë me.
MAT 6:3 Vëhë xi ngayun ne, hya xi tuhun caridad ne, catuun cumachaya rë ntsun ladu xcun mé xi tuhun cojo ntsun ladu quixi.
MAT 6:4 Cuatjin hya xi tuhun caridad ne, tuhunhmu matsejen ne, hane xi cuatjin nihñu ne, Nahmi nuju xi tacun ngahnga ne xi cavëë me cjuandaja xi canihñu ne, sua me chji nuju.
MAT 6:5 ’Hacuaha hya xi nihñu oración, xi canihñuu sacuaha xuta xi jo xcun jo hntsua me ta me vëhë ne, jemu meje sahmi me oración cahntsua yungun cojo sa hiscan sahmi cru ndiya të hiscan xi scuëë xuta me. Nguehe cuichjá cojo nuju ta ha vëhë ni chji sacu rë me.
MAT 6:6 Vëhë xi ngayun ne, hya xi nihñu oración ne, techjun tingotjo ndya nuju hane tangun cahnchun, ngajan hma nihñu oración cojo Nahmi nuju xi tacun ngahnga ta ngu ni me vëhë xi tacun me cojo nuju. Hane Nahmi nuju jan xi vëë me yëjë xcusun xi hincha hma ne, sua me chji nuju.
MAT 6:7 ’Hacuaha hya xi nihñu oración, caveyunnanguun ngu cjua xi hisca suvun vijniircun sacuaha xcusun xi sahmi xuta xi hvíin me cjua rë Nina, ta xi má rë me vë ne, xi hitsë cjín cjua cuichja me ne, hacuaha hitsë sa cuahacuenda Nina tsëhë me.
MAT 6:8 Mijí rë xi nihñu xcusun vëhë, ta hisca chaja sa xi chjahyun rë Nahmi nuju xi tacun ngahnga ne, ha vëë me mé xcusun xi mameje nuju.
MAT 6:9 Cuanitjin nújun hya xi nihñu oración: Ngayun Nahmi niji xi nechun ngahnga ne, meje rë xi ngayijin ni xuta ngasunhndë chjihinrcuin nuju.
MAT 6:10 Nduvun nihñu niji gubiernu. Catamachihin cjuatacun nuju nguehe ngasunhndë sacuaha ngahnga xi ha camachihin.
MAT 6:11 Nchunchujun ni ne, tuhun niñu xi xini.
MAT 6:12 Ninchatuhun niji tsëhë yëjë ni jyë́ niji ta hacuaha ngayin suvin ni tininchatihin rë xuta xi choho sahmi me cojo niji.
MAT 6:13 Caningatjuun xi chjaháchuva niji cojo cjuatacun niji ta, tuhun niji ngahñu xi cuma cuetjinxin tsëhë cjuatsehen. Tsujun suvun gubiernu cojo ngahñu, hacuaha tsujun ni hasen rë ngahñu cjua nuju. Tsujun yëjë vë, yëjë nu, yëjë nixtin.
MAT 6:14 ’Hya xi cajnetaha oración jan, cachja sa Jesús cuitjin: sá xi ninchatuhun xuta xi choho casahmi me cojo nuju ne, hacuaha Nahmi nuju xi tacun ngahnga ne, tsinchataha me jyë́ nuju,
MAT 6:15 peru sá xi ninchatuun xuta xi choho casahmi me cojo nuju ne, hacuaha Nahmi nuju jan ne, tsinchataain me jyë́ nuju.
MAT 6:16 ’Ngayun ne, nixtin xi nechun xun rë Nina ne, nihñuu va xcusun nuju sacuaha sahmi xuta xi jo xcun jo hntsua me ta sahmi va me xcusun rë me, ta me vëhë ne, hisca catsindeya me xcusun rë me sehe cumatsejen xi tacun me xun rë Nina. Cuichjá quixi cojo nuju ta ha vëhë chji xi sacu rë me.
MAT 6:17 Vëhë xi ngayun ne, hya xi nechun xun rë Nina ne, tinchacjun, nihñu tyjahi yojo nuju.
MAT 6:18 Cuatjin nihñu cojo sa xi tsajin yo vëë rë xi nechun xun rë Nina, ta suva Nina, Nahmi nuju vëë me. Hane me vëhë ne cuechji me yun.
MAT 6:19 ’Cavetjuun cjuanchina nuju nguehe ngasunhndë, ta nguehe ne, sahmi dañu chu xavi cojo xutsë. Nguehe ne cuma scuxahaya cha chëjë, hane sehe tsichëjë cha.
MAT 6:20 Hitsë sa ndaja ne, tetjún cjuanchina ngajan ngahnga ta ngajan ne tsajin dañu xi sahmi chu xavi cojo sa xutsë. Ngajan ne scuxaain cha sehe xi tsichëjë cha.
MAT 6:21 Cuatjin meje rë xi ngajan cuetjun tsujun ta, tsëhë xi hiscan tetjo cjuanchina nuju ne, hacuaha ngajan quitaha cjuatacun nuju cojo.
MAT 6:22 ’Tuxcuun matsejen ne, vëhë xi sacuaha ndihi rë yojo naja. Vëhë xi hya xi tuxcuun ndacun ne, hatuxa seya cjuahasen cahntsua yojo naja.
MAT 6:23 Peru sá xi tuxcuun hmu matsejen ne, hacuaha ma jñu cahntsua yojo naja. Sacuaha hasen xi jiya cahntsua yojo naja ne, sá xi hacuiin hasen xi cjuaquixi jain ta, suva jñú ne, ¡jercu tu jñú camahani cuma sa!
MAT 6:24 ’Tsajin yo xi ma fahacuenda xa tsëhë jo patrón ta, tsëhë xi choho scuëë rë patrón xi tjun hane tsihmu cacun rë patrón xi majo jan. O sá tsajin ne, jemu cuetaha yojo rë cojo patrón xi tjun hane patrón xi majo jan ne, hisca sahmicuendaain rë. Vëhë xi xi ngu tangun ni ne, cumaji nihñu hacutjin xi meje rë Nina cojo hacutjin meje rë cjuanchina tsehen xi tsëhë ngasunhndë.
MAT 6:25 ’Vëhë xi cuichjá cojo nuju ta hacuiin cuityjanguntacun sá sacu o sá sacuiin mé xcusun xi xinu xi sua nuju ngahñu. Hacuaha hacuiin cuityjanguntacun sá sacu o sá sacuiin tsjian xi chujun. Hitsë sa vengui chji rë cjuahñu nuju xi cumá rë xi chinu, hacuaha hitsë sa vengui chji rë yojo nuju xi cumá rë tsjian xi chujun.
MAT 6:26 Chutsujun chu nisë xi vitjen chu ngahnga ta hacuiin tsitjë chu, hacuiin fanchi chu, hacuaha tsajin rë chu ndyahnga hiscan cuinchandaja chu xi sinë chu, peru Nahmi nuju xi tacun me ngahnga ne, tsicjen me chu. Ngayun ne, hitsë sa vengui chji nuju xi cumá rë chu nisë vë.
MAT 6:27 Hacuaha tsajin hisca xi ngu xuta xi cuma cuesuntaha me cjuahñu rë me hisca ngu hora ta hacuiin cavatsë chji me cjuahñu rë me. Tu mahya ne xi tjercu vityanguicacun me.
MAT 6:28 ’Cuanitjin ne, ¿mé má chji rëhë xi cuityjanguntacun tsëhë tsjian xi chujun? Chutsujun naxu liriu xi vetju nguijña ta tsihyaain nachjun hacuaha fahyaain tsjian rë.
MAT 6:29 Peru ngahan cuichjá cojo nuju ta tsjian rë xutachanga naja Salomón ne, handasa jercu ndacun camahani, peru hitsë sa ndajyihi tsejen ngu naxu vëhë xi cuma rë tsjian jan.
MAT 6:30 Sá xi cuatjin tsicaja Nina xca nguijña xi ngu nixtin ne siutaha nguijña, hane xi tu cuma nchujun nga ne, cueti ne, hitsë guan sa ngayun xi hatuxa tsicaja nuju me. Peru ngayun ne, cjëë cumangutacunndujun cojo me.
MAT 6:31 Vëhë xi hacuiin cumacjintacún hane cuinengunsuun cuitjin: “¿Mé comida xini? o sá ¿jani sacu niji xi sihin? o sá ¿mé tsjian chijin?”
MAT 6:32 Hacuiin ta, tsëhë xi xcusun vëhë ne, xuta xi hvíin me cjua rë Nina ne, me vëhë xi vityanguicacun me xcusun vëhë. Peru ngayun ne, Nina Nahmi naja ne, ha vëë me xi machaja nuju xcusun vëhë.
MAT 6:33 Tityjanguntacun hacuaha nechunyun rë gubiernu xi sahmi Nina, hacuaha catama tangun cjuatacun nuju cojo cjuatacun rë me ne, hane yëjë ni xcusun vëhë ne, quitahacoo sa sacú nuju.
MAT 6:34 Cuanitjin ne, hacuiin cumacjintacún tsëhë mé xi cuma cuatju nchujuni, ta xi cumá rë nchujuni matsejen ne, hya yaha cjuacjintacun rë. Ngu nixtin ngu nixtin ne, chjuhun cuendun cjuacjintacun rë ta jima ngu nixtin cojo tsëhë.
MAT 7:1 ’Hacuiin nichuvun jingu sa xuta cojo cjuatacun rë me, sehe hacuiin tsichuva Nina ngayun.
MAT 7:2 Canichuvuun ta sá tsajin ne, chuva xi quixi yun cojo xuta ne, hacuaha cuanitjin quixi Nina cojo nuju; hacuaha chuva xi nichuvunyun matsejen ne, vëhë ni tsichuva Nina yun.
MAT 7:3 ¿Hacutjin má xi matsejen nuju xtë xi jiya tuxcun xingun? ta ngayun ne hitsë sa jyë xi jiya túxcun.
MAT 7:4 ¿Hacutjin má xi cuma cuinújun cojo xingun xi meje naxun xtë xi jiya tuxcun me jinguyëjë rë xi suvun matsejen ne, machayiin nuju xi hitsë sa jyë xta xi jiya túxcun vë ni?
MAT 7:5 Ngayun xuta xi jo xcun jo hntsua ne, naxun titjun xtë jyë xi jiya túxcun vë, sehe cumatsejenndaja nuju xtë xi jiya tuxcun xingun cojo sa xi cuma naxun.
MAT 7:6 ’Sá xi tjin nuju mé xi venguichji rëhë sacuaha tjin rë cjuandaja xi casua Nina yun, tetjuhunndujun hacuiin tu yo ni tuhun rë ta sá tsajin ne, xuta jan ne, tsitjungui me xi ngayun jemu ximinchacun xi cuma nuju. Hacuaha cuichjataha nuju me.
MAT 7:7 ’Chjahyun rë Nina, hane sua nuju me. Tinchunsun, hane sacú nuju. Tinújun hacuaha chjahyun cahndë́, hane Nina sua me cahndë́ xi cuisuhun cuinújun cjuacjintacun nuju.
MAT 7:8 Cuatjin nihñu ta, yëjë ni xuta xi fehya rë me ne, cuahatsja me, hane yo xi vanguise ne, sacu rë me, hane yo xi chja hacuaha fehya cahndë́ me ne, sacu cahndë́ cuisehen me.
MAT 7:9 ’¿Há tjin ngu nahmi xi, hya xi quihndi rë me cjuehya ngu niñu ne, cahndë́ rë xi vëhë ne, sua me ngu ndyojo,
MAT 7:10 o sá xi cjuehya quihndi yojo rë chu ti ne, cahndë́ rë vëhë ne, sua me ngu yë?
MAT 7:11 Sá xi ngayun xi xuta jyë́ yun ma tuhun rë quihndi nuju xcusun xi ndaja. Hitsë guan sa Nina Nahmi naja xi tacun me ngahnga xi jyë hnga me cojo cjuandaja rë me ne, me vëhë vëë me mé cuatjo ndaja xi cuma sua me xuta xi cjuehya rë me.
MAT 7:12 ’Sacuatjin xi meje nuju xi sahmi xuta cojo nuju matsejen ne, hacuaha cuanitjin ni nihñu cojo rë me: cuatjin nihñu ta cojo ngu xcusun ni xi tinihñu vëhë ne, ngayun tinihñuchuhun yëjë ni cjua rë ley cojo yëjë ni cjua xi catsihindu profeta.
MAT 7:13 ’Cuisuhun hiscan sahmi Nina gubiernu sá xi cuisuhun tingotjo xcu ta, tsëhë xi sá xi cuisuhun táha tingotjo të o ndiya xi cjín me vatjun me ne; vëhë ni cjuecojo nuju cjuaveya hiscan xi jemu cjín xuta cjue me.
MAT 7:14 Ta tingotjo xcu o ndiya hndë ne, vëhë xi cjue cojo nuju hisca xi sacu nuju cjuahñu. Jemu chuva xuta xi sacu rë me tingotjo xcu jan.
MAT 7:15 ’Cuidadu tsëhë profeta ndacha ta xi tjengui nuju me, jeya tsejen xcusun rë me sacuaha xcusun rë chu tsánga, peru quixiin vëhë ta suva cjuandacha ta xahasen rë me ne, quitsë rë cjuatsehen sacuaha cahntsua xahasen rë chu lobo.
MAT 7:16 Tsejen mé xcusun xuta me ngatsë rë xcusun xi sahmi me. Sacuaha ngu ya ne, tsejen mé xcusun rë ngatsë rë tu xi sua. Sacuiin rë xuta uva tsëhë ya nahyálatu, hacuaha sacuiin rë xuta tuhaxi xi hmí higo tsëhë nahyándehya.
MAT 7:17 Quixi jain ta ngu yatjë xi ndaja ne, sua tú xi ndaja, hacuaha ngu ya xi machjiriin ne, hacuaha machjiriin tu rë.
MAT 7:18 Vëhë xi ngu yatjë ndaja ne, cumaji sua tú xi machjiriin, hacuaha ngu ya xi machjiriin ne, cumaji sua tú xi ndaja.
MAT 7:19 Hane yatjë xi machjiriin tú rë ne, xtíjñi rë tsëhë xi ndaja sehe cueti.
MAT 7:20 Cuanitjin xuta ne, tutjin rë yatë vë ne, cuatjin rë me ta, tsejen xcusun rë xahasen rë me ngatsë rë xcusun xi sahmi me.
MAT 7:21 ’Tjin yo me xi cuichjacojo ná ta nai rë me ngahan, peru cuisiin me gubiernu xi sahmi Nina nahmi naha; ta ngajan cuisehen suva xuta xi sahmichihin me cjuatacun xi vitexa Nahmi naha xi tacun me ngahnga.
MAT 7:22 Vëhë xi handasa xi jemu cjín me cuichja me nixtin hya jan cuitjin ta: “Nai naha, ngatsë rë xi hñu ngayun, vëhë xi caveyinnangui ñihi nuju ne canújin cjua rë Nina, hacuaha xi canújin ñihi nuju ne, canaxinxin xitsehen, hane cojo ngahñu rë ñihi nuju cama canihñi cjuarcun.” Cuatjin cuichja me nixtin hya.
MAT 7:23 Ngajan xi ngahan ne, cuitjin cjuayanguë tsëhë me nixtin hya: “Tángunxun tsahan ta hveen yo ngayun, ngayun xi nihñu cjuatsehen.”
MAT 7:24 ’Yahnga xuta xi visiñuju me cjua naha hacuaha sahmi me sacuatjin chjá cojo rë me matsejen ne, tangun me cojo ngu cha quicun xi hya xi casahmi cha ngu ndihya matsejen ne, hiscan xcun nanguihñu casahmi cha.
MAT 7:25 Hane hya xi cavaha tsi, camajyë ndajyë hacuaha casesuntë nandá, hacuaha cavanga tjo hñu ne, jercu hñu catsivaha rë ndihya jan, peru caticjaainjnii tsëhë xi xcun nanguihñu secun.
MAT 7:26 Peru yahnga nga xuta xi visiñujuu me cjua naha hacuaha sahmii me sacuatjin chjá cojo rë me matsejen ne, tangun me cojo ngu cha ngarca xi hya xi casahmi cha ngu ndihya matsejen ne, hiscan xcun nangui tsumi casahmi cha.
MAT 7:27 Hane hya xi cavaha tsi, camajyë ndajyë hacuaha casesuntë nandá, hacuaha cavanga tjo hñu ne, jercu hñu catsivaha rë ndihya jan, hane tu ngu ñahñu ne caticja ndihya jan, ngu cafë cavetsunya.
MAT 7:28 Xi cajnetaha cachja Jesús ne, xutacjín ne jercu quijircun rë me tsëhë cjua xi cavicuya Jesús ta,
MAT 7:29 tsëhë xi cjua xi vicuya me ne, jercu tjin rë ngahñu, hacuiin sacuatjin cjua xi vicuya maestru xi vicuya ley.
MAT 8:1 Hya ha cavijne me tsëhë ndetjun jan, jemu cjín xuta tjengui rë me.
MAT 8:2 Hya xi camá ne, cafehe ngu cha xi jingujyë ni chuxin rë yaha rë ngu chíhin xi vitaha, caticjaxcun cha cafaharcun cha Jesús hane cachja cha cuitjin cojo rë me: ―‍Tatá. Sá xi meje nuju ne, cuma chjuhunxun chíhin xi yaha ná vi. ―‍Cuatjin cachja cha.
MAT 8:3 Hane xi catsixinga Jesús tsja me ne cavetahatsja me cha ne, sehe cachja me cuitjin: ―‍Meje ná. Catamandaja ngaye. ―‍Cuatjin cachja me. Hane chíhin jan ne, ngutjen ni cafëya.
MAT 8:4 Sehe cavitexa me cha cuitjin: ―‍Hisca xi ngu ni canujiin cojo. Tihin ningacuin yojo riji xcun nahmi sehe catutsejen me xi camandaja ye. Sehe tihinchjehe cjuatjo riji xi tehe rë Nina ngatsë rë xi camandaja ngaye tsëhë chihin jan, sacuaha cavitexa Moisés xutachanga naja. Cuatjin nihñi cojo sa xi cumatsejen xi camandaja jain ngaye.
MAT 8:5 Xi cavatju vihi ne, sehe rë cavisehen me nandya Capernaum, hane ngajan cafehe tjengui rë me ngu capitán cafehya cha me favor
MAT 8:6 cuitjin cachja cha: ―‍Tatá. Tjin ná ngu cha mosu xi jiñahmu ndya naha. Cahme yojo rë cha hane jemu jiñañihi cha.
MAT 8:7 Ngajan cafayangui Jesús: ―‍Cjuë́ ngahan, tsírquë rë cha.
MAT 8:8 Ngajan xi cafayangui capitán jan cuitjin: ―‍Hisca hacuiin sahmi ngujyë xi ngayun cuinduvun ndya naha ta tsëhë xi hitsë sa hñu cjua yun xi cuma ná ngahan. Quihndë ne, ndastu tinújun xi cumandaja mosu naha hane cuma ndaja cha.
MAT 8:9 Hacuaha ngahan ne, tjin ná xuta xi matitjun tsahan, hane hacuaha tjin ná ngu cientu sindadu xi siu ngahma gubiernu naha xi sahmi hacutjin xi meje ná. Hya xi chjá cojo ngu xi cjue ne, fi; hacuaha xi chjá cojo ngu nga xi cuinduva ne, nduva, hane mosu naha ne, xi chjá cojo xi sahmi mé xi meje ná ne, sahmi. ―‍Cuatjin cafayangui capitán.
MAT 8:10 Hane xi cahndë Jesús cjua vëhë ne, jemu quijircun rë me tsëhë capitán jan, hane cachja me cojo xuta xi tjengui rë me cuitjin: ―‍Cuichjá cojo nuju ngu cjua ta, ngajñi naja ngayejen ni ngayaan xuta tjë rë Israel ne, cjëë scuëë ngu xuta xi cuatjin ndaja mangucacun me cojo ná sacuaha capitán vihi xi hacuiin xuta tjë naja me.
MAT 8:11 Hacuaha cuichjá cojo nuju ta cuinduva xutaxín tsëhë táha ladu vetjucaa tsuhi cojo táha ladu vetje tsuhi cuiyuju me sinësuhi me cojo Abraham cojo Isaac cojo Jacob ngajan hiscan sahmi Nina gubiernu,
MAT 8:12 Peru xuta tjë rë Abraham xi quihndi cjuaquixi ne, cuma tsingatju me hiscan jñu ngajan candatsen. Ngajan ne, jemu squihnda me hacuaha tsijanerii me nehñu me.
MAT 8:13 Hya xi camá cachja Jesús cuatjin cojo xuta ne, sehe cachja Jesús cojo capitán jan cuitjin: ―‍Cuma cuangun ta tsëhë xi xcusun xi vetjutacun xi má sahme, camachihin. Hane hora xi cachja me cuatjin ne, camandaja cha.
MAT 8:14 Hya xi cama ne, cavisehen Jesús ndava Pedru ne, hane cavëë me xi jiñahmu nahya rë Pedru cojo chíhin suë.
MAT 8:15 Ngajan xi cavetahatsja Jesús tsja na, hane ngutjen cavetjuxin chíhin jan tsëhë na. Hane hora vëhë ni ne, cavisatjenhnga na hisca cama cafahacuenda na me.
MAT 8:16 Hane hora xi tivetje tsuhi ne, xuta ne, quijicojo me cjín xuta xi hincha rë xitsehen hane quiji me hiscan tacun Jesús. Hane Jesús ne, cavaxëxin me xitsehen jan cojo cjua ni, hacuaha catsirqui me yëjë xuta hmu rë.
MAT 8:17 Cuatjin casahmi me sehe cumachihin cjua xi cachja profeta Isaías xi cachja me cuitjin: “Cafaha suva me yëjë chíhin hinda xi tjin rë yojo naja, hane suva me cavaha me chíhin naja.”
MAT 8:18 Xi cavëë Jesús xi jemu tsë xuta hiscan tacun me ne, casua me cjua cojo xicjin me xi cjuexin cojo rë me ngunda laguna.
MAT 8:19 Ngajan cafehe tjengui rë me ngu cha maestru rë ley sehe cachja cha cuitjin: ―‍Maestro. Tu yani ni xi cuangun ne, cjuë́ cojo nuju. ―‍Cuatjin cachja cha.
MAT 8:20 Sehe Jesús ne, cafayangui me cuitjin: ―‍Chu ninda ne, tjin nguijo hiscan viyuju chu, hane nisë xi vitjen chu ngahnga ne, tjin ndava chu, peru ngahan xi hatuxa Quihndi rë Xuta ngahan ne, hisca ndya naha tsajin. ―‍Cuatjin cachja me.
MAT 8:21 Ngu nga xuta xi tjengui rë me cachja cojo rë me cuitjin: ―‍Tatá. Cuanguen cojo nuju peru hya xi cuatju seyaniji nahmi naha.
MAT 8:22 Peru cafayangui Jesús cuitjin: ―‍Hanguen. Tehe vëhë catisahmi xuta xi cahme cjuatacun rë me, me vëhë catinchaniji me nima.
MAT 8:23 Hya xi camá ne, cavisehen Jesús cahntsua ngu barcu hane ngajan quiji tjengui rë me xuta ladu rë me.
MAT 8:24 Hora xi cjui barcu jan ne, canduva ngu tjohñu xi cavanga xcun laguna jan, hane hisca meje tsa rë barcu jan cojo tsindyu rë nandan xi satë rë jan. Peru hora vëhë Jesús ne, jiñafë me.
MAT 8:25 Sehe xuta ladu rë me ne, catsingasca rë me, hane cuitjin cachja me: ―‍¡Tatá, tatá! ¡Naxuntjun naja! ¡Nguehe cjuëyan! ―‍Cuatjin cachja me cojo Jesús.
MAT 8:26 Hane cachja Jesús cuitjin: ―‍¿Mé má cuatjin jemu rcun ngayun, ngayun xi cjëë cumangutacún cojo ná? Hya xi cachja me cuatjin ne, cavisatjenhnga me cavatëcja me ngahñu rë tjo jan cojo tsindyu rë nandan jan, hane jingujyë ni jan ne, cavejñajyuu.
MAT 8:27 Hya xi camá ne, xuta jan ne, jercu quijircun rë me hane cachja me cuitjin: ―‍¿Yo xuta me vihi xi hisca tjo hisca tsindyu rë nandan vihndë tsëhë me?
MAT 8:28 Hya xi camá ne, cafehe Jesús cojo cha ladu rë me ngunda vëhë, hisca ladu rë xuta nandya Gadara ne, ngajan jo me xi hincha xitsehen xahasen rë quiji tiña me tsëhë Jesús. Catsijo me xi cuacun jan ne, siu cahndë́ me ngojo naxi hisca xi sacuaha tsjun. Hacuaha jemu cjan rë me hisca tsajin yo xi tsujyihiya taha vë jan.
MAT 8:29 Hya xi cavechu me hiscan tacun Jesús, cojo ngahñu rë xitsehen jan, cavetsihin cachja me cuitjin: ―‍Mé má cuatjin ninguisuhunjñu cojo niji ngayun Jesús, Quihndi rë Nina. ¿Há tuhun niji cjuañihi handasa chaja sa nixtin rë?
MAT 8:30 Nixtin hya ne, ngajan tiñataha ne, tacun ngu cahndë́ hiscan jemu cjín chu chinga hinchataha chu tijine chu.
MAT 8:31 Hane xitsehen jan ne, ña yuma chja cojo Jesús cachja cuitjin: ―‍Sá xi hatuxa naxunxun niji tsëhë xahasen rë cha xi cuicun vi, ningatjun niji hiscan siutaha chinga, hacuaha ningatuhun niji xi cuisihin cahntsua xahasen rë chu.
MAT 8:32 Hane cachja Jesús ta: ―‍Joho, tangun. Hya xi camá ne, cavetjuxin xitsehen tsëhë cahntsua xahasen rë cha jan, hane cavisehen cahntsua xahasen rë chu chinga jan. Hya xi camá ne, yëjë ni chu chinga jan ne, cavanga chu quijijne chu taha rcu ndetjún, hane ngajan cavixuya chu ngajñi nandá tsëhë laguna, hane ngajan cafë chu, cahme chu.
MAT 8:33 Hane ngatsë rë chircun jan ne, cha xi sahmi cuidadu rë chu chinga jan, cavanga cha quiji cha nandya. Hane xi cavisehen cha nandya, casua cha camachaya rë xuta tsëhë xcusun xi camá rë chu chinga jan cojo xcusun xi cavatju jo cha xi hincha rë xitsehen jan.
MAT 8:34 Hya xi camá ne, yëjë xuta tsëhë ladu tsëhë nandya Gadara ne, quijitjengui me Jesús hiscan tacun me, hane xi cavechutaha xuta me ne, cafehya me Jesús xi catje me tsëhë ladu rë me jan.
MAT 9:1 Hya xi camá ne, cavisehen nga Jesús barcu, cafe me nangui rë me ta tacun ngunda laguna.
MAT 9:2 Hya xi camá ne, ngutjen ni quijitjengui xuta me hane xuta jan ne, yahahnga me ngu cha xi cahme yojo rë cha, jiña cha xcun nijña rë cha. Hane xi cavëë Jesús xi cuatjin mangu cacun xuta xi cuacun jan cojo rë me ne, sehe cachja xu me cojo cha hmu rë jan cuitjin: ―‍Tuhun cjuasua xahasen nuju ta jyë́ nuju, tsan ne, ha camanchataha. ―‍Cuatjin cachja me.
MAT 9:3 Ngajan xi ngu jo maestru xi vicuya cjuachacun ne, cavetsihin catsingataha cacun me cuitjin: “Nina tsixcuehyu cha.”
MAT 9:4 Hane tsëhë xi vëë Jesús cjua xi tsingatahacacun maestru jan ne, cuitjin cavinenguise me cha: ―‍¿Mé má cuatjin chojyihi ningatuhuntacun?
MAT 9:5 Xi má nuju, ¿jarë cjua xi hitsë sa tsaviin fi xi cuichjá: há xi “Jyë́ nuju ne, ha camanchataha” o há tsajin ne; há “Tisatjunhngun ne, tujyuhunyun?”
MAT 9:6 Peru nguehe suá cumachaya nuju ta ngahan xi Quihndi rë Xuta Jain ngahan ne, yahá xá xi tsinchátaha jyë́ rë xuta nguehe ngasunhndë. Sehe ngajan cachja xu Jesús cojo cha hmu rë jan: ―‍Quihndë ne, ngayun tsan ne, tisatjunhngun chjuhun nijña nuju vë, sehe tjangun ndya nuju.
MAT 9:7 Hya xi camá ne, cavisatjenhnga cha quiji cha ndava cha.
MAT 9:8 Xi cavëë xuta xcusun xi camá ne, quijircun rë me, sehe casahmi hnga me Nina ta Nina ne, casua me cahndë́ Jesús xi cuatjin casahmi me.
MAT 9:9 Xi quiji sa xu Jesús ne, cavechu me hiscan cavëë me ngu xihin xi tacun cahndë́ hiscan xi faha tujúnsa. Mateo hmí rë me. Ngajan xi cachja Jesús cojo me cuitjin: ―‍Nduvun, cuanguen cona. Hane Mateo jan ne, cavetju me quiji me cojo Jesús.
MAT 9:10 Ha nixtin vëhë ne, tijine Jesús niñu ndava Mateo. Hane jemu cjín sa cha xi faha tujúnsa cojo yahnga cha xi tsitjungui xuta nangui vë ne, hacuaha tijine cha niñu ngajan.
MAT 9:11 Peru xi cavëë cha partidu fariseo xcusun jan, sehe cavinenguise cha cojo cha ladu rë Jesús cuitjin: ―‍¿Mé má jinë hvi maestru nuju cojo cha xi faha tujúnsa cojo ngujo sa cha xi hacuaha cha tsehen cha? ―‍Cuatjin cachja cha.
MAT 9:12 Peru cavihndë Jesús cjua xi cachja cha, hane cafayangui me cuitjin: ―‍Xuta xi hacuiin hmu rë me ne, mamijí rë me xi cjuahacuenda rë me doctor ta suvá ni xuta xi hmu rë me ne, me vëhë meje rë xi cjuahacuenda rë me doctor.
MAT 9:13 ¿Há vijnii rcun mé vijne cjua rë Nina vihi?: “Hitsë sa ndama ná xi mayuma nuju xingun xi cuma rë xi nicuhun chu sacuaha cjuatjo xi tuhun ná.” Hacuanitjin ná ngahan ta ngahan ne, hacuiin canduvá xi squindáyavaha rë xuta xi tsajin xi cun rë me xcun Nina, ta xa xi canduvá ne, xi squindáyavaha rë xuta tsehen, hane cuichjá cojo me xi tsindeya me cjuatacun rë me. ―‍Cuitjin cachja Jesús.
MAT 9:14 Ngajan xi xuta ladu rë Juan ne, cafehe me cavinenguise me Jesús cuitjin: ―‍Ngayijin ni, vinechin xun rë Nina hacuaha cha partidu fariseo hacuaha viyuju cha xun rë Nina. ¿Mé tsëhë xi xuta ladu nuju ne, sahmii me cuatjin ne?
MAT 9:15 Ngajan xi Jesús ne, cuitjin cachja me cojo cha: ―‍Cumaji xi xuta rë cha xi tivixan ne, sahmi me xun rë Nina jinguyëjë rë xi cha xi tivixan ne, tacun cha cojo rë me. Peru cuechú nixtin xi cha xi tivixan jan ne, chjaháxin rë cha tsëhë xuta rë cha, hane hya cuma sahmi me xun rë Nina. ―‍Cuatjin cachja Jesús.
MAT 9:16 Hacuaha cachja sa me ta: ―‍Tsajin yo xi cueyacoo ngu tsjian changa cojo ngu rquí tsjian xi cjëë cjueyu ta sá xi cuatjin sahmi me, xi cjueyu tsjian xatsë jan ne, cuicheya rë tsjian changá jan hane sahmi jyë sa rë hiscan xi ntsun.
MAT 9:17 Cuanitjin ne, tsajin yo xi vincha xan xatsë cahntsua chuxin changá ta, sá xi cuatjin sahmi me ne, tsitsingá rë chuxin jan. Hane cjuë cuixu xan jan, hacuaha cuetsun chuxin jan. Xi meje rë ne, xan xatsë ne, xincha cahntsua chuxin xatsë ta cuatjin ne, catsijo ni ne tsajin mé cuma rë.
MAT 9:18 Hora xi tivisiajmi me cuatjin ne, canduva ngu me xi xutaxa rë yungun. Hane quiji caticjaxcun me xcun Jesús cachja me cuitjin: ―‍Ndicumaha ni cahme na lihndi naha. Peru sa xi cuanguen ne, cuisanu ntsun na ne, cuya nga na cjuahñu.
MAT 9:19 Hya xi camá ne, cavetju Jesús quiji me cojo nahmi rë na lihndi jan hacuaha quiji xuta ladu rë Jesús.
MAT 9:20 Hane ngajñi cjui me ne, ngu na xi tjin rë tejó nu xi yaha rë na chíhin xahmajni quiji tiña na táha ngaxtun Jesús ne, quiji cavetahatsja na ntsacu tsjian rë me ta,
MAT 9:21 catsingatahacacun na cuitjin: “Sá xi cuetahantsa ndastu tsjian rë me ne, cumandaja ngahan.”
MAT 9:22 Peru cavuya Jesús taha ngaxtun me ne, sehe cavutsejen me na hane cachja me cojo na cuitjin: ―‍Tuhun cjuasua xahasen nuju, tsan, camandaja ngayun ta camacjain nuju. Hane ngutjen ni ne, camandaja na.
MAT 9:23 Hya xi camá ne, cafehe Jesús ndava xutaxa rë jan. Ngajan cavëë me xi ha siu cha chjinetyjo cojo xutacjín xi jihnda me ngatsë rë cjuandusin.
MAT 9:24 Sehe cachja me cojo xuta cuitjin: ―‍Tjangunxun. Na lihndi vë ne, hacuiin cahme na ta jiñafë ni na. ―‍Cuatjin cachja me. Ngajan xi xuta jan ne, tu cavejnucëë me Jesús.
MAT 9:25 Peru xi casahmi me xi cavetju xin xuta jan, sehe cavisehen Jesús hiscan jiña nima lihndi jan ne, cafaha me tsja na hane catsisatjenhnga me na.
MAT 9:26 Hya xi camá ne, cavitsojo cjua rë xcusun jan jingujyë nangui vë.
MAT 9:27 Xi cavetju Jesús quiji me tsëhë ngajan ne, canduva tjengui rë me jo cha rcá hane cajindaya cha cachja cha cuitjin: ―‍¡Ngayun Jesús, tjë rë David! Catamayuma nuju ngayin. ―‍Cuitjin cachja cha.
MAT 9:28 Xi cavisehen Jesús ndihya ne, sehe cavechutaha cha rcá me, hane cavinenguise Jesús cha cjua vi: ―‍Xi má nuju, ¿há cuma sahme xcusun xi chjayun? Cafayangui cha cuitjin: ―‍Macjain niji, Tatá, cuma nihñu.
MAT 9:29 Hya xi camá ne, cavetahatsja me tuxcun cha hane cachja me cojo cha cuitjin: ―‍Cuatjin catama cojo nuju xcusun sacuaha xi macjain nuju.
MAT 9:30 Hane ha hora vëhë ni ne, catuxaha tuxcun cha hane camatsejen rë cha. Ngajan xi Jesús ne, cavitexa me cha cuitjin: ―‍Tsajin yo cuinújun cojo tsëhë xcusun vihi.
MAT 9:31 Peru cavatju xi quiji cha jan ne, cavitsojo cjua tsëhë me jingujyë nandya jan.
MAT 9:32 Hora xi ha quiji jo cha jan ne, cafehe xuta xi canduva me cojo ngu cha xi hincha rë xitsehen; hane xitsehen jan ne, casahmi lihmi rë cha.
MAT 9:33 Hane hya xi cavetju xitsehen tsëhë cha lihmi jan, cavetsihin cachja cha. Hane xutacjín xi cavutsejen me ne, jemu quijircun rë me ne cachja me cuitjin: ―‍Nguehe nangui naja Israel ne, tsajin ngu nixtin xi tsejen cjuarcun sacuaha tijimá quihndë.
MAT 9:34 Peru cha partidu fariseo ne, cachja cha cuitjin: ―‍Xitsehen xi matitjun ne, vëhë casua rë cha xa xi vaxëxin cha xitsehen.
MAT 9:35 Jesús ne, catsujyihiya me jemu cjín nandya cojo ranchun ne, ngajan cavicuya me xuta cahntsua yungun rë me. Casua me camachaya rë me cjuandajyihi xi chja tsëhë gubiernu xi sahmi Nina. Hacuaha catsirqui me xuta tsëhë yëjë ni chíhin cojo yëjë ni xcusun xi cjuahmu.
MAT 9:36 Peru xi cavëë Jesús xutacjín ne, camayuma rë me xuta jan ta tsëhë xi jemu va tjin rë xahasen rë me, jemu camachohocacun me sacuaha chu tsánga xi tsajin yo xi cjuahacuenda rë chu.
MAT 9:37 Vëhë xi cuitjin cachja me cojo cha ladu rë me: ―‍Xutacjín vi ne siu me sacuaha siu niji ngajan nguijña xi jemu ndaja camá peru tsajin cha mosu xi cuanga rë.
MAT 9:38 Vëhë xi meje rë xi chjahyun rë Nai naja xi tsingatju me xuta xi cuanga me.
MAT 10:1 Cavechú ngu nixtin xi casahmitangun Jesús xuta ladu rë me xi tejó jan ne, sehe casua rë me ngahñu hacuaha casua rë me xá xi me xi cuacún vë, cuitexa me yëjë xitsehen hane cuaxëxin me xitsehen tsëhë xuta; hacuaha sahmi me xi xuta xi hmu rë me ne cuma ndaja me tsëhë tu me ni chíhin xi yaha rë me.
MAT 10:2 Cha xi tejó jan ne, cuitjin hmí rë cha: titjun ne, Simón, me xi hacuaha yaha ñihi rë Pedru, cojo Andrés hntsë Simón, Jacobo quihndi rë Zebedeo cojo Juan hntsë Jacobo,
MAT 10:3 Felipe cojo Bartolomé, Tomás cojo Mateo, cha xi faha tujúnsa, Jacobo quihndi rë Alfeo cojo Tadeo,
MAT 10:4 Simón xi tsëhë partidu cananayu cojo Judas Iscariote, me xi sahmi entregadu rë Jesús.
MAT 10:5 Tejó xuta jan ne, catsingatju Jesús me ne, cavitexa me cuitjin: ―‍Tanguun ngajan ndiya xi fi xuta xi hvíin me cjua rë Nina, hacuaha cuisuun nandya rë distritu Samaria ta;
MAT 10:6 tángun hiscan siu xuta nandya rë Israel, xuta jan ne tangun me cojo ngu chu tsánga rë Nina xi cachaja chu.
MAT 10:7 Tuhun cumachaya rë xuta cjuandajyihi rë Nina xi jima tiña gubiernu xi sahmi me.
MAT 10:8 Nihñu xi cuma ndaja xuta hmu rë, nicuyun cjuahñu rë nima, nihñu xi cuma ndaja xuta xi yaha chuxin rë me chihin vitaha, hacuaha naxunxun xitsehen. Ngahñu xi meje nuju xi cuatjin nihñu ne, tu cuatjo ni sacu nuju, vëhë xi hacuaha tu cuatjo ni tuhun ngahñu jan.
MAT 10:9 ’Xicachjuun oro o sá quicha tyava o tu mé ni tujún xi cuinchunndujun cahntsua tsá tujún nuju xi tsëhë gastu nuju.
MAT 10:10 Xicachjuun changa, xicachjuun ngu xúta tsjian, hacuaha xicachjuun ngu xúta chuxinxtë o sá ngu bastón ta, xuta xi sahmi me xá ne, tsëhë xá jan sacu rë me gastu rë me.
MAT 10:11 ’Cuanitjin ne, tu mé ni nandya o sá tu mé ni ranchun xi cuisuhun ne, ngajan cuinchunsun ngu xuta xi ndaja xahasen rë me, ngajan ndava me ne, nechuncahndun hisca xi cuetjunxun tsëhë nangui jan.
MAT 10:12 Hane hya xi cuisuhun ngu ndihya ne, tinújun ngu nina cuitjin: “Nina sua nuju me cjuandaja cjuajeya.”
MAT 10:13 Hane sá xi nai rë ndihya jan ndaja vëë me yun ne, catisatë rë ndava me jan cjuajeya; peru sá xi hacuiin ndaja vëë me yun ne, satiin rë me cjuajeya jan.
MAT 10:14 Hane hiscan xi tjin xuta xi cjuahatsjaain nuju me, xi chjuhun ndiya xi cuetjunxun tsëhë nandya vëhë ne, titsunu chojo rë ntsacu.
MAT 10:15 Cuichjá cojo nuju ngu cjuaquixi ta hya xi cuechú nixtin xi tsichuva Nina xuta tsëhë jyë́ rë me ne, hitsë sa jyë castigu cuatju xuta tsëhë nandya xi cafahatsjaain nuju jan, xi cumá rë xuta tsëhë nandya Sodoma cojo xuta nandya Gomorra.
MAT 10:16 ’Ngahan titsingátju nuju ngayun xuta jeya xi cuangun ngajñi rë xuta hnga cacun sacuaha cjue ngu chu tsánga ngajñi rë chu cjan rë. Vëhë xi meje rë xi ndaja quicuntacun sacuaha quicuncacun chu yë, peru hacuiin tsavi yun sacuaha tsajin tsavi chu paloma.
MAT 10:17 Peru nechun cuidadu ta, cjuaha nuju xuta cjuecojo nuju me xcun xutaxa rë ndihyavasen, hacuaha cuaja nuju me ngajan yungun rë me,
MAT 10:18 hisca cjuecojo nuju me xcun gobernador, hacuaha cjuecojo nuju me xcun me xi vitexa me jingujyë ni nandya. Cuatjin cuangun ngatsë rë xi ladu naha má ngayun. Ngatsë rë vëhë sacu nuju cahndë́ xi ninguixun cjua xi cavicuyá nuju xcun xuta jan cojo xuta xi hvíin me cjua rë Nina.
MAT 10:19 Hya xi cuatjin cjuecojo nuju me ne, hacuiin cuityjanguntacun tsëhë hacutjin xi ninguixun ta, tsëhë xi hora vëhë ne, Nina sua me ngayun cjua xi nicuyun.
MAT 10:20 Ta tsëhë xi hacuiin cjua nuju xi cuinújun ta tsëhë Hasen rë Nina cuinduva cjua xi cuinújun.
MAT 10:21 ’Hacuaha xuta ladu naha ne, hntsë me, cuinchajyë rë me, xutacha rë me, cuinchajyë rë me, quihndi rë me cuinchajyë rë me cojo sa xi xutaxa rë ne, cjuaha rë me me ne, tsiquehen rë me.
MAT 10:22 Yëjë ni xuta ne, choho scuëë nuju me, tsëhë xi ladu naha ngayun. Peru jarë ngayun xi scaa nuju cojo cjuacjintacun vëhë hisca xi cueyun ne, cuechun xcun Nina.
MAT 10:23 Hya xi tsujyihiyatjengui nuju me ngu nandya ne, tangun ngu nandya tiñataha ta, cuichjá quixë cojo nuju ta xi chaja sa cuatjun jingujyë ni nandya tsëhë nangui rë Israel ne, cúya ngahan Quihndi rë Xuta.
MAT 10:24 ’Ngu cha xi sehe tivutaya matsejen ne, hacuiin hitsë sa matitjun cha xi cumá rë maestru rë cha, cuanitjin ne, ngu cha hndixahan ne, chuva venguichji rë cha xi cumá rë nai rë cha.
MAT 10:25 Catamangucacun cha tsëhë xi cuechú nixtin xi tangun cuenguichji rë cha cojo maestru rë cha o tangun cuenguichji rë hndixahan cojo nai rë. Ha chuva vëhë ni cuatjun ta sá xi choho cuichja xuta nai rë ndihya ne, ngu xitsehen me, hitsë sa choho cuichja me tsëhë xuta rë nai rë ndihya jan.
MAT 10:26 ’Xicarcuun xuta condra nuju. Yëjë ni xcusun xi casetsangui ne, cuechú nixtin xi chjaháxin rë xi titsangui rë. Vëhë xi yëjë ni xcusun xi hma ne, handasa sahmangui ne, peru cuechú nixtin xi cuetjucaa tsejen.
MAT 10:27 Yëjë ni cjua xi cuichjá cojo nuju hiscan jñu ne, cuinújunsun hiscan hasen. Yëjë ni cjua xi cuichjáhma ne, cuechú nixtin xi cuinuhya rë jinguyëjë ni nandya.
MAT 10:28 Xicarcuun xuta xi cuma tsiquehen yojo nuju, peru ngaxtun vëhë ne, tsajin me dañu ma sahmi me cojo hasen nuju. Hitsë sa ndaja ne, rcun Nina, me xi tjin rë chuva rë xi tsiquehen me yojo nuju hane hacuaha tsingatjenya nuju me hiscan xi má hasen nuju castigu.
MAT 10:29 ’Chutsujun ta jo chu nisë langa ne, ngu ni tujún chji rë chu, peru handasa cuatjin ne, hiscan ngu chu cumaji cueya chu sá xi suaain Nina cahndë́.
MAT 10:30 Hane ngayun ne, hisca jimangu tsjarcun ne xqui tjin rë Nina.
MAT 10:31 Vëhë xi xicarcuun ta, tsëhë xi jimangu ngayun ne, hitsë sa jercu vengui chji nuju xi cumá rë chu nisë vë, handasa jemu cjín chu.
MAT 10:32 ’Yëjë xuta xi tsinguixi me xcun yahnga xuta xi xuta ladu naha má me ne, hacuaha ngahan tsinguixë xcun Nahmi naha xi tacun ngahnga xi xuta ladu naha má me.
MAT 10:33 Peru yëjë xuta xi tsinguixiin me xcun yahnga xuta xi hacuiin xuta ladu naha má me ne, hacuaha hacuanitjin ni tsinguixë ngahan xcun Nahmi naha xi tacun ngahnga.
MAT 10:34 ’Xi má nuju ngayun ne, ¿há cjuajeya canduvácojo xi cumá rë xuta ngasunhndë? Hacuiin cuatjin. Ngahan ne, si canduvá cojo.
MAT 10:35 Canduvá tsinguetsuntaha xicjin xuta. Cha quihndi ne, sahmi condra cha nahmi rë cha, hane na quihndi ne, sahmi condra na naa rë na, hane jahnda ne, sahmi condra na nahya rë na.
MAT 10:36 Cuatjin xuta condra rë me ne, cuma ni xuta rë me.
MAT 10:37 ’Sá xi ngu me ne hitsë sa tsihmu cacun me nahmi rë o sá xi naa rë me xi cumá ná ngahan ne, vechiin chuva rë xi tsahan cuma me. Hacuaha sá xi ngu me ne hitsë sa tsihmu cacun me quihndi rë me sá xihin sá chjuun xi cuma rë xi tsihmu cacun me ngahan ne, vechiin chuva rë xi tsahan cumá me.
MAT 10:38 Ha cuanitjin ne, sá xi ngu me ne mijí cjuejñahñu xahasen rë me xi cjuecojo me ndiya naha handasa cueya me xcun cru ne, cumaji cuechu me chuva rë xi tsahan cumá me.
MAT 10:39 Xuta xi nguehe ni ngasunhndë meje cjuenduju me cojo cjuahñu rë me ne, titsichajá me cjuahñu xatsë xi sua Nina me. Peru xuta xi titsichajá me cjuahñu rë me nguehe ngasunhndë ne ngatsë naha ne, hatuxa sacú rë me cjuahñu xatsë xi sua Nina me.
MAT 10:40 ’Xuta xi cjuahatsja me yun, tangun sacuaha xi cjuahatsja ná me ngahan suva, hane xuta xi cjuahatsja ná me ne, tangun sacuaha xi cjuahatsja me Nahmi naha, me xi catsingatju ná.
MAT 10:41 Xuta xi cjuahatsja me ngu me xi chja me cjua rë Nina ne ngatsë xi chja me jan cjua rë Nina ne, tangun chji sacu rë me cojo me jan. Hacuaha xuta xi cjuahatsja me ngu xihin xi tyjahi cjuatacun rë me xcun Nina ngatsë rë ndaja xihin jan ne, tangun chji sacu rë me cojo xihin jan.
MAT 10:42 Cuanitjin ne, xuta xi sua me ndastu ngu vasu nandá cjuahatsja tu yo ni xi xuta ladu naha ne handasa jemu yuma jyihi me ne, sacu chji rë me ngatsë rë xi cuatjin sahmi me cojo xuta xi tjengui ná.
MAT 11:1 Hya xi camá ne, xi cajnetaha cjua xi cavitexa Jesús cha xi tejó má jan, sehe cavetjuxin me quiji me nandya xi siutahndee, ngajan cavicuya me xuta cachja me cojo tsëhë cjuandajyihi rë Nina.
MAT 11:2 Nixtin hya ne, ha jiya Juan Vitenda rë Xuta ndavaya, hane ngajan camachaya rë me tsëhë xcusun xi sahmi Jesús. Vëhë xi catsingatju me ngujo cha ladu rë me xi quiji cha
MAT 11:3 cavinenguise cha Jesús cuitjin: ―‍¿Há ngayun xi tsingatju nuju Nina, o há tsajin ne, há cuinechinyin xi cuinduva nga ngu? ―‍Cuatjin cavinenguise xuta xi catsingatju Juan jan.
MAT 11:4 Hya xi camá ne, catsicuya Jesús cjua cojo cha xi cuacun jan hane cuitjin cachja me: ―‍Tjangun ne, sehe tinújun cojo Juan yëjë cjua xi canuhyun cojo yëjë xcusun xi cahyun.
MAT 11:5 Tinújun ta xuta rcá ne, camá camatsejen rë me; xuta rengun ne, camá quijindaja me; xuta xi yaha rë chíhin vitaha xi setaha yojo naja ne, camandaja me; nima ne, cavuya nga cjuahñu; xuta yuma ne, casacu camachaya rë me cjuandajyihi rë Nina.
MAT 11:6 Hacuaha jemu ndaja tsëhë tu yo ni xuta xi hacuiin tsismicacun me xi mangu cacun me cojo ná. ―‍Cuatjin cachja Jesús.
MAT 11:7 Hane hya xi cavetju quiji xuta ladu rë Juan jan ne, sehe cavetsihin cachja Jesús cojo xutacjín jan cuitjin tsëhë Juan: ―‍Hya xi cavetjun catsangun ngajan ngu xín tsëhë nandya catsangun tjengun Juan matsejen ne, ¿há caningatuhuntacún xi cuechuntuhun ngu xihin xi hacuiin ngu ni cjuatacun rë me, sacuatjin rë ngu ndeje xi fi nguehe fi ngajan rcu sacuatjin cjui tjo?
MAT 11:8 O há tsajin ne, ¿há caningatuhuntacún xi cuechuntuhun ngu xihin xi yaja ngu tsjian xi jemu tu ndajyihi camahani? Hacuiin cuatjin. Ha hyaan matsejen ta xuta xi jercu tu ndacun camahani tsjian vaja me ne, sacuiin naja ngajan xin jan, ta sacu naja ndava ngu xuta nchina.
MAT 11:9 Peru ngayun matsejen ne, catsangun cachutsujun ngu profeta. Hacuaha cjuaquixi xi vëhë cachutsujun. Peru profeta Juan vë matsejen ne, hitsë sa vengui chji rë me xi cumá rë yëjë sa profeta xi yahnga.
MAT 11:10 Hacuaha me vëhë xi cachja Nina tsëhë me xcun xujun rë me cuitjin: Ngahan ne, tsingátju titjun ngu cha xi scuxaha cjuatacun rë xuta tsëhë xi cjuehe ngaye.
MAT 11:11 Cuichjá cojo nuju matsejen ta ngajñi rë yëjë xuta xi catsin me tsëhë naa rë me matsejen ne, tsajin ngu xi hitsë sa vengui chji rë xi cumá rë Juan. Peru hya xi cuetsihin Nina sahmi me gubiernu nguehe ngasunhndë matsejen ne, xuta xi chuva cuengui chji rë me nixtin hya matsejen ne, hitsë sa cuengui chji rë me nixtin hya, xi cuma rë xi vengui chji rë Juan quihndë.
MAT 11:12 ’Hisca nixtin xi caxtenda Juan hisca nixtin quihndë ne, má cjuasuë xi satë rë gubiernu xi sahmi Nina; xuta ne, meje cuisehen me ngajan, handasa cojo cjuachan.
MAT 11:13 Xi chaja sa nduva Juan ne, yëjë ni xujun xi catsihindu profeta cojo xujun rë ley ne, suva casua camachaya rë xuta tsëhë gubiernu xi sahmi Nina.
MAT 11:14 Sá xi meje nuhyun cjuaquixi ne: Juan ne, hacui Elías, xi sehe nduva xu.
MAT 11:15 Yo ngayun xi tjin nuju cjuasua xi cuinuhyun cjua vihi matsejen ne, ndaja tetuhunrcun.
MAT 11:16 ’Ngayun xuta tsëhë nixtin vihi matsejen ne, ¿mé xi tangun ngayun cojo? Tangun ngayun cojo langa xi siu ngajan ndetsin, xi jindaya xicjin
MAT 11:17 cojo cjua vihi: “Canijani tsujun ne, mijí xtun; casin va ne, mijí chjihndun.” Cuatjin jindaya langa.
MAT 11:18 Cuatjin chjá cojo nuju matsejen ta, Juan xi vitenda nuju ne jinii me niñu hacuaha hviin me xan, hane nújun ta jiya xitsehen xahasen rë me.
MAT 11:19 Hane ngahan xi Quihndi rë Xuta Jain matsejen ne, jinë hacuaha hvë, hane nújun ta ngu cha cahntsuaniñu ngahan, ngu cha cahntsuaxan ngahan, hacuaha ngu cha amigu rë cha xi faha tujúnsa cojo jingu sa xuta tsehen ngahan. Tsejen xi ndaja ngu cjuatacun xi casacu rë ngatsë rë xi ndaja tivetjucaa tsujun xi tinihñuchuhun.
MAT 11:20 Hya xi cama ne, cavetsihin Jesús chjataha me xuta nandya jani hitsë sa jemu casahmi me cjuarcun camá, ta catsindeyaain me cjuatacun rë me. Cuitjin cachja me:
MAT 11:21 ―‍¡Jemu chojyihi tsujun xuta nandya Corazín! ¡Hacuaha jemu chojyihi tsujun xuta nandya Betsaida! Jemu chojyihi tsujun ta, tsëhë xi sá xi xutaxín tsëhë Tiro cojo xutaxín tsëhë Sidón cavëë me cjuarcun xi cahyun ne, ha catsindeya me cjuatacun rë me, hacuaha ha cavajá me tsjian xi sacuaha tsánaxá hacuaha caviyuju me ngajñi ndesu, sacuaha xcusun naja hya xi choho má naja.
MAT 11:22 Vëhë xi hya xi tsichuva Nina yëjë xuta tsëhë jyë́ rë me ne, xuta nandya Tiro cojo xuta nandya Sidón ne, hitsë sa chuva castigu cuatju me cumá xi cumá nuju ngayun xuta nandya Corazín cojo ngayun xuta nandya Betsaida.
MAT 11:23 Hane ngayun xuta nandya Capernaum ne, ¿há cuangun hisca ngahnga hiscan tacun Nina? ¡Hacuiin! Hatuxa cuangun nduchin, cahndë́ hiscan fi hasen rë nima ta, tsëhë xi sá xi xuta tsehen tsëhë Sodoma cavëë me cjuarcun xi cahyun ne, ha catsindeya me cjuatacun rë me, hane tacun cuaha nandya jan hisca quihndë.
MAT 11:24 Vëhë xi hya xi tsichuva Nina xuta ne, hitsë sa chuva castigu cuatju xuta Sodoma xi cumá nuju ngayun xuta nandya Capernaum.
MAT 11:25 Nixtin hya ne, cachja Jesús cojo Nina cuitjin: ―‍Ngayun nahmi naha ne, sahme jyë sahme hnga nuju, ngayun xi Nai rë ngahnga cojo nangui, ngayun, tsëhë xi ngayun caveyúnhmu cjuatacun vëhë xi cuma rë xuta xi jemu vechú cjuatacun rë, hane catuhun camachaya rë xuta xi jñu tsëhë me.
MAT 11:26 Ngayun nahmi naha, cuatjin canihñu ta, tsëhë xi cuatjin xi cachuya nuju. ―‍Cuatjin cachja Jesús cojo Nina.
MAT 11:27 Cachja me cojo xuta: ―‍Yëjë ngarca matsejen ne, Nina Nahmi naha casua ná me. Tsajin hisca ngu xi vëë yo xi Quihndi rë Nina matsejen ta suvá ni Nina Nahmi naha xi vëë me. Hacuaha tsajin yo xi vëë Nahmi naha matsejen ne ta, suva ni ngahan xi Quihndi rë me ngahan xi hvë, cojo tu yo ni xi ngahan meje suá cumachaya rë.
MAT 11:28 Ngayun xi fenda rë xahasen nuju, ngayun xi hai tjin tacun tsëhë jyë́ nuju ne, nduvun tjengun ná, hane cjuaháxen vëhë xi sahmi hai nuju.
MAT 11:29 Ningatuhun xi chjuhun yugu naha sacuaha má cojo ndyaja hya xi cjuaha chu xa sahmi chu, hacuaha chjayunngun tsahan. Ta ngahan ne, tjin ná cjuandaja cjuajeya, hane sacu hñu rë xahasen nuju.
MAT 11:30 Ta yugu xi suá nuju vihi ne, hacuiin hai, tanguaain cojo tsëhë chu ndyaja, hane xa xi suá nuju ne, hacuaha hacuiin hai.
MAT 12:1 Nixtin hya ne, cuatjin camá ngu nixtin xi chjahájenda rë. Hora xi tivatju Jesús cojo xuta ladu rë me hiscan tjin tjë trigu ne, cama vojo rë xuta ladu rë me, cavetsihin cavotohosun xuta jan tsë tsë trigu jan ne, catsufëtsja me cajine me.
MAT 12:2 Hane cha tsëhë partidu fariseo xi cavëë cha xi cuatjin casahmi me, cachja cha cojo Jesús cuitjin: ―‍Chutsujun ni, xuta ladu nuju ne, tisahmi me xa quihndë nixtin xi chjahájenda rë, handasa chja ley naja xi cumaji xi cuatjin nihña.
MAT 12:3 Hane cafayangui Jesús cuitjin: ―‍Ngayun, ha cachutayun xcusun xi casahmi xutachanga naja David hatsëë nixtin hya xi jercu camá vojo rë me cojo xuta xi siu cojo me.
MAT 12:4 Cavisehen me ndava Nina, hane cafaha me pan xi viyuju xcun Nina xi tsajin cahndë́ xi tu yo ni sinë ta suvá ni nahmi xi cuma sinë me. Peru David ne, cajinë me hacuaha casua me cajinë xuta xi siu cojo me.
MAT 12:5 Cuanitjin ne, ha cachutayun xi chja cjua rë ley naja xi nahmi xi sahmi xa ndava Nina ne, ngajan tjin xa xi satë rë me nixtin xi chjahájenda rë peru tsajin jyë́ xi cuma rë me handasa tisahmi me xa nixtin hya.
MAT 12:6 Cuichjá quixë cojo nuju ta nguehe tacun ngu xi hitsë sa meje rë xi chjahanrcun rë xi cumá rë yungun xi matitjun.
MAT 12:7 Cjëë cuijnercun cjua xi chja: “Hitsë sa ndama ná xi cumayuma nuju xingun tsëhë xi cumá rë xi nicuhun chu sacuaha cjuatjo xi tuhun ná.”
MAT 12:8 Hacuaha cachja sa Jesús cuitjin: Ngahan xi Quihndi rë Xuta Jain ngahan ne, ngahan xi vitéxa mé xi cuma nixtin xi chjahájenda rë.
MAT 12:9 Hya xi camá ne, xi quiji sa Jesús ne, cavisehen me yungun ngajan.
MAT 12:10 Hane tacun ngu cha cahntsua yungun jan xi quixíhñu tsja quixi cha. Hane cha xi vicuya cjuachacun cojo cha fariseo ne, cavinenguise cha Jesús cuitjin: ―‍¿Mé xi tsingatihi ley xi nihña nixtin xi chjahájenda rë? ¿Há sua cahndë́ xi nirquen rë xuta hmu rë? ―‍Cuatjin cafinenguise cha me xi sehe cuma cuinchajyë cha me.
MAT 12:11 Hane cuitjin cafayangui Jesús tsëhë cha: ―‍¿Há cuma xi ngu ngayun handasa hya xi nixtin xi chjahájenda rë ne, cuanguun naxun chu tsánga nuju sá xi cjuinenguiya chu ngu ngojo xi jemu nungun?
MAT 12:12 Sá cuatjin vengui chji rë ngu chu tsánga ne, hitsë sa cjín vengui chji rë ngu xihin. Vëhë xi tsingatihi ley xi nixtin xi chjahájenda rë ne nihña cjuandaja.
MAT 12:13 Sehe cachja Jesús cojo cha hmu rë cuitjin: ―‍Nixingun ntsun. ―‍Cuatjin cachja me. Hane cuatjin casahmi cha. Hane tsja cha xi quixi ne, ha camandaja sacuatjin jyihi tsja cha xingu.
MAT 12:14 Hya xi camá ne, cha partidu fariseo jan ne, cavetju cha quiji cha, cachja cha ngajñi rë cha cojo xicjin cha xi meje rë xi sacuya ra xcusun hacutjin cuma tsiquehen cha Jesús.
MAT 12:15 Peru Jesús ne, machaya rë me cjuatacun jan, hane cavetju me quiji me tsëhë ngajan. Hacuaha cjín xuta quiji tjengui cojo rë me, hane catsindaja me yëjë ni xuta tsëhë chíhin xi má rë me,
MAT 12:16 sehe cachja me cojo me xi cuichjaain të me yo me jan.
MAT 12:17 Cuatjin casahmi Jesús xi cuetjucaa cjua xi catsihindu profeta Isaías xi chja cuitjin:
MAT 12:18 Cha vihi ne, cha mosu naha, cha xi cavitéxa ngahan, cha xi tsihmúcacun, cha xi ndama ná tsëhë. Suá cha Hasen naha, cuichja cha cojo xutaxín tsëhë hacutjin quixi Nina hya xi tsichuva me xuta.
MAT 12:19 Cha vihi ne, hacuiin cjin cuisiajmi cha cojo xuta; hacuiin jindaya të cha xi chja cha. Cuichjaain hñu cha cojo sa xi jemu catjaha cuenda rë cha xuta xi tsujyihiya me ndiya të.
MAT 12:20 Xcotaain cha cjuatacun rë hisca ngu xuta yuma xi tangun me cojo ngu ndeje xi caxtane, hacuaha sahmi chuvaain cha cjuatacun rë xuta yuma xi tangun me cojo ngu candil xi ha ndiya coho. Yëjë xcusun vihi ne, sahmii cha hisca xi cumatsejen cjuaquixi rë gubiernu rë cha.
MAT 12:21 Hane xuta ngasunhndë ne, cuetahacacun me cha.
MAT 12:22 Cavechú ngu nixtin xi cafehe tjengui xuta Jesús hane yaha me ngu cha xi jiya xitsehen xahasen rë cha. Rcá cha jan hacuaha lihmi cha. Hya xi camá ne, Jesús ne casahmi me xi camandaja cha jan hisca cama cachja cha hisca cavutsejen ndaja cha.
MAT 12:23 Hane xutacjín ne, jemu quijircun rë me cachja me cuitjin: ―‍¿Há cumacacun xi cha vihi hacui quihndi tjë rë David xi tsingatju Nina?
MAT 12:24 Peru cha partidu fariseo xi camachaya rë cha cjua jan ne, cachja cha cuitjin: ―‍Hacuiin suvá cha vaxëxin cha xitsehen ta Beelzebú, xitsehen xi matitjun ne, vëhë casuaxá rë cha xi vaxëxin cha xitsehen.
MAT 12:25 Peru Jesús ne, tsëhë xi ha vëë me mé xi tsingataha cacun xuta xi cuacún jan ne, cuitjin cachja me cojo cha: ―‍Hya xi xuta tsëhë ngu nandya ticjan me ngajñi rë me cojo xicjin me, cjuë ngahñu cjua rë, hane cjuincanii rë me. Hacuaha sá xi xuta tsëhë ngu ndihya ne, scaan me ngajñi rë me ne, ngajan chajá ngahñu cjua rë ndihya jan.
MAT 12:26 Ha cuanitjin rë Satanás ta, sá xi Satanás ne vaxëxin xitsehen xi yahnga ne, cavatëcja ngahñu cjua rë, hane cumaji cuitexa xicjin.
MAT 12:27 Vëhë xi sá xi Beelzebú casua ná xa xi vaxë́xen xitsehen ne, hacuaha ha Beelzebú vëhë casua rë ngu ngu xuta ladu nuju xa xi hacuaha vaxëxin me xitsehen. Vëhë xi me vëhë ni cuma cuichja me xi cuaaintjin cjua xi nújun xi Beelzebú casua ná xa.
MAT 12:28 Peru sá xi hacuiin Beelzebú casua ná xa ta Nina casua me ne, ngajan matsejen xi gubiernu xi sahmi Nina ne, ha tivetsihin.
MAT 12:29 ’Hisca ngu cha chëjë cumaji tu cuisehen ni cha ndava ngu xuta xi hñu cjua rë sá xi tacun me. Titjun tsihñu cha xuta xi ndava ta cuatjin xi cuma tsichëjë cha tsëhë me.
MAT 12:30 ’Xuta xi fiin me favor naha ne, condra naha má me. Hane xuta xi visecuaain ná me xi nihñi tangun cjuatacun rë xuta cojo Nina ne, tsinguetsun me cjuatacun rë xuta.
MAT 12:31 ’Hacuaha cuichjá cojo nuju cjuaquixi ta tu mé ni jyë́ xi sahmi xuta hacuaha tu mé ni cjua xi choho cuichja me tsëhë xuta ne, sacú rë me cjuaninchataha sa xi cuijacun me jyë́ jan. Peru tu yo ni xi choho cuichja tsëhë Hasen rë Nina ne, tsajin cjuaninchataha xi cuma rë.
MAT 12:32 Cuanitjin ne, tu mé ni cjua xi choho cuichja xuta tsëhë Quihndi rë Xuta Jain ne, cuma sacú rë me cjuaninchataha. Peru tu yo ni xi choho cuichja tsëhë Hasen rë Nina ne, tsajin cjuaninchataha nguehe nixtin vi, hacuaha tsajin cjuaninchataha nixtin xi nduva.
MAT 12:33 ’¿Jarë xi meje nuju?, ¿há xi ndaja ya hacuaha ndaja tu rë? o há tsajin ne, ¿há xi ndajin ya hane ndajin tu rë? Jima ngu ya ne, cuma tsejen sá xi ndaja o sá xi ndajin ngatsë rë tu xi sua.
MAT 12:34 Ngayun quihndi rë chu tsehen, maji nújun cjua xi ndaja. Maji ta tsëhë xi cjua xi quitsë rë xahasen nuju ne, vëhë cjua xi vetju nújun.
MAT 12:35 Vëhë xi xuta ndaja ne, tsëhë cjuandaja xi tetjo rë me cahntsua xahasen rë me cojo cahntsua cjuatacun rë me ne, tsëhë ngajan vetju cjuandaja. Cuanitjin ne xuta tsehen ne, tsëhë cjuatsehen xi tetjo rë me ne, ngajan vetju cjuatsehen.
MAT 12:36 Cuichjá cojo nuju ta tu mé ni cjua xi cuinújun, handasa tu visiajmu ni ne, tuhuncuenda rë Nina cjua jan nixtin xi tsichuva me yaan.
MAT 12:37 Cuatjin ta cojo cjua xi canújun ne, cjua jan cuma testigu xi cuetjunxun tsëhë castigu, o sá tsajin ne, cjua xi canújun vëhë cuma testigu tsëhë castigu xi cueyun.
MAT 12:38 Ngajan xi ngujo cha xi vicuya cjuachacun cojo ngujo cha partidu fariseo catsicuya cha tsëhë me, cuitjin cachja cha: ―‍Maestro, ningacun niji ngu cjuarcun xi sua seña yo ngayun.
MAT 12:39 Ngajan cafayangui Jesús cuitjin: ―‍Ngayun xuta tjë rë Israel xi nechun nixtin vihi matsejen ne, tsehen cjuatacun nuju, hacuaha majotacun xcun Nina. Vëhë xi chjahyun ná ngu seña xi sua Nina. Peru seña vëhë ne, sacuiin nuju ta ngu ni seña xi sacú nuju matsejen ne, vëhë seña xi casua profeta Jonás hatsëë nixtin.
MAT 12:40 Sacuatjin rë profeta Jonás ne, jyan nixtin cojo jyan nixten caseya me cahntsua chu ti jyë, hane ha cuanitjin ni ne cumá rë Quihndi rë Xuta Jain, ta jyan nixtin cojo jyan nixten seya me ngahma nangui.
MAT 12:41 Hya xi cuechú nixtin xi tsichuva Nina jyë́ nuju, ngayun xi nechun nixtin vihi ne, yëjë ni xuta nandya Nínive matsejen ne, cjue cuinchajyë nuju me; ta me vëhë ne catsindeya me cjuatacun rë me hya xi casua profeta Jonás camachaya rë me cjua rë Nina. Peru nguehe ne ha tejña ngahan sacuaha ngu seña xi hitsë sa vengui chji rë xi cuma rë profeta Jonás.
MAT 12:42 Hacuaha nixtin hya ne, na xi cavitexa ngajan nangui Sabá ne, cjue cuinchajyë nuju ta, tsëhë xi jemu cjuañihi cavatju na tsëhë xi jercu cjin hiscan canduva na xi cuihndë na cjuatacun ndacun rë Salomón, me xi cavitexa xuta naja nixtin hatsëë. Peru nguehe tejña ngahan xi hitsë sa vengui chji rë cjuatacun naha xi cumá rë cjuatacun rë Salomón.
MAT 12:43 ’Hya xi vetjuxin xitsehen tsëhë xahasen rë ngu xuta hiscan xi camá sacuaha ndava xitsehen jan ne, fi táha hiscan jemu nangui quixí camahani, vanguise cahndë́ hiscan xi cuejñajenda.
MAT 12:44 Hane xi sacuiin rë cahndë́ hiscan cuejñajenda ne, cuitjin tsingatahacacun: “Cúya rë cjuë́ ndya naha hiscan xi cavétjuxen.” Cuatjin tsingataha cacun xitsehen jan. Hane hya xi vuya fehe xitsehen jan cahntsua xahasen jan ne, vutsejen xitsehen jan cahntsua xahasen jan sacuaha ngu ndihya tiya, ngu xi caxtecha tyjahi tyjahi, hacuaha siundaja chichihin ngu tsë́ ngu xtí.
MAT 12:45 Xi vutsejen xitsehen xi cuatjin jyihi jan ne, sehe fi jaha sa rë yatu sa xitsehen xi hitsë sa tsehen xi cumá rë vëhë ne, sehe visehen nga viyujucahndë́ jan. Peru xi má ngascan ne, hitsë sa chojyihi tsëhë xuta vëhë xi cumá rë titjun. Cuitjin cumá tsëhë xuta xi siu nixtin vihi. ―‍Cuatjin cachja Jesús.
MAT 12:46 Hya xi tichja me cojo xutacjín ne, naa rë me cojo xicjin me ne, cafehetjengui me Jesús, hane maji vechútahacjin me xi cuichja me cojo ta tsëhë xi jemu quitsë xuta.
MAT 12:47 Ngajan xi cachja ngu xi cachja cuitjin: ―‍Nutsujun ni. Ná nuju cojo nixti xingun ne, hinchacun me ngajan candatsen, xi meje nduvatjengui nuju me cuichja me cojo nuju. ―‍Cuatjin casacu camachaya rë me.
MAT 12:48 Hya xi camá ne, cavuya me catsicuya me cjua cuitjin: ―‍¿Yo xi má nuju xi ná naha cojo xingueen?
MAT 12:49 Hya xi cuatjin cachja me ne, catsingacun tsja me xuta ladu rë me sehe cachja me cuitjin: ―‍Ngayun xi nechun nguehe ne, ngayun xi sacuaha ná naha cojo sacuaha xingueen ngayun ta,
MAT 12:50 tu yo ni me xi sahmi me sacuaha meje rë Nahmi naha xi tacun me ngahnga ne, me vëhë tangun ni cojo xingueen, cojo ná naha.
MAT 13:1 Nixtin hya ne, cavetjuxin Jesús tsëhë ndihya ne, quiji me tjehen laguna ngajan cavejña me.
MAT 13:2 Hane ngajan camatangun xutacjín. Vëhë xi cavisehen me ngu barcu ngajan cavéjña me. Hane xutacjín jan ne, caviyuju me nangui quixí tjehen nandan jan.
MAT 13:3 Sehe cavicuya Jesús me jemu cjín cjua sacuaha xcusun rë ejemplu. Cuitjin cachja me: ―‍Cuejñaa ne xi ngu cha xi tsitjë cha trigu matsejen ne, cavetju cha quiji cha xi tsitjë cha trigu.
MAT 13:4 Hane jinguyëjë rë xi titsitjë cha matsejen ne, ngujo matsejen ne, cavixu ndiya. Hane canduva chu nisë, catsicjë chu cajine chu.
MAT 13:5 Hane ngujo nga matsejen ne, cavixu hiscan xi jemu naxindya, hacuaha jemu chuva nihndë quisun. Ngajan jemu xati cavetju ta tsëhë xi hacuiin tjain nihndë quisun.
MAT 13:6 Hane xi cavetjucaa tsuhi ne, cavaca rë cojo ndavá jan. Hane tsëhë xi tsajin tyjama rë xi nungun matsejen ne, caxintsen.
MAT 13:7 Ngujo nga ne, cavixu ngajñi nahyá. Hane xi camacha tangun matsejen ne, nahyá jan ne, vëhë casahmi hndë rë catsixi rë.
MAT 13:8 Hane xi yahnga matsejen ne, cavixu hiscan nihndë ndaja. Hane camayehe ne, ngujo ne casua tutjë rë ngu cientu sa cuatjin sacuatjin xi camatjë́, ngujo nga ne, yachantë sa, hane ngujo nga ne, cantë sa sacuatjin xi camatjë́.
MAT 13:9 Yo ngayun xi tjin nuju cjuasua xi cuinuhyun cjua naha ne, ndaja tetuhunrcun. ―‍Cuatjin cachja me.
MAT 13:10 Hya xi camá ne, cafehetiña xuta ladu rë me cavinenguise me Jesús tsëhë ejemplu xi chja me ta, ¿mé tsëhë xi ejemplu ni vicuya me cojo?
MAT 13:11 Hane cafayangui me tsëhë xuta jan cuitjin: ―‍Nina ne casua me cahndë́ xi ngayun ne, cuijne rcu cjuatacun tsëhë gubiernu xi sahmi Nina, cjuatahahma xi titjun ne tsajin yo machaya rë. Peru yëjë sa me xi yahnga ne, casuaain me cahndë́ xi cuijnercu me.
MAT 13:12 Me xi ha tjin rë cjuatacun jan ne, sua sa Nina me, ndaja cuijne rcu me. Hane me xi tsajin cjín rë cjuatacun jan ne, cjuahataha Nina hitsë xi tjin rë me.
MAT 13:13 Vëhë xi suvá ejemplu tichjá cojo rë me ta, handasa vutsejen me, peru sahmicuendaain me; visiñuju me ne, peru sahmi me sacuaha xi vihndiin me hacuaha vijnii rcu me.
MAT 13:14 Xi cuatjin sahmi me ne, sahmichihin me cjua xi catsihindu profeta Isaías xi catsihindu cjua vihi: Handasa cuisiñuju ngayun ne, peru ha tuxa cuijnii rcun; Handasa chutsujun ne, peru cumatsijiin nuju.
MAT 13:15 Xuta xi cuacun vë ne, tichjá cjuatacun rë me, tyjavañuju me cojo tuxcun me ne, cavechja me, ta sá tu scuëë me cojo tuxcun me, hane sá cuihndë me cojo tyjavañuju me, hacuaha cuijne rcu me cojo cjuatacun rë me, sehe cuya me ladu naha xi cuaxë́tjë me.
MAT 13:16 ’Peru ngayun ne, jemu ndaja tsujun ngayujun ni tsëhë xi hatuxa tichutsujun cojo tuxcun; hacuaha visiñuju cojo tyjavañuju.
MAT 13:17 Nguehe cuichjá quixë cojo nuju ta jemu ndaja tsujun ta, tsëhë xi hacuaha jemu cjín profeta hacuaha jemu cjín xuta xi matitjun xi caviyuju titjun ne, jemu meje scuëë me xcusun xi ngayun tichutsujun, peru casacuiin cavëë me. Hacuaha jemu meje cuisiñuju me cjua xi tivisiñuju ngayun, peru casacuiin cavisiñuju me ta, tsëhë xi cjëë cuechu nixtin.
MAT 13:18 ’Cuatjin hindë ne, nuhyun mé meje cuichja ejemplu tsëhë cha xi catsitjë trigu.
MAT 13:19 Hya xi visiñuju ngu xuta cjua tsëhë gubiernu xi sahmi Nina ne, peru vijniircu me cjua jan, sehe vinduva Satanás ne, fahataha cjua jan tsëhë xahasen rë me. Cjua vi ne, hacui sacuaha trigu xi cavixu ndiya.
MAT 13:20 Hane tsëhë trigu xi cavixu hiscan jemu naxindya ne, hacui sacuaha hya xi vihndë xuta cjua rë Nina, hane fahatsja me cojo cjuasua.
MAT 13:21 Peru trigu xi cuacun vë ne, jemu chúva tyjama rë vetju. Hacuanitjin ni vatju ngujo xuta má. Macjain rë me ngujo nixtin peru hya xi vechú ngu nixtin xi satë rë me cjuañihi o cjuandya xi sua xuta me ngatsë rë cjua rë Nina ne, fëcacun me cojo cjua jan.
MAT 13:22 Hane tsëhë trigu xi cavixu ngajñi nahyá ne, hacui sacuaha hya xi vihndë xuta cjua rë Nina, peru ha xcun xi cjuinduju me cojo nixtin rë me ne, tsingataha cacun me tsëhë cjuatacun xi satë naja nguehe ngasunhndë, hacuaha meje rë me cjuanchina xi cjuicanii rë, hane vëhë suaain cahndë́ xi cumajyë cjua rë Nina cahntsua xahasen rë me, hacuaha sahmii me ngu cjuandaja xi tsingacun xi xuta rë Nina má me.
MAT 13:23 Hane hya xi vixu yahnga trigu hiscan nihndë ndaja ne, hacuaha hacui sacuaha hya xi vihndë xuta cjua rë Nina hane vijne rcu me mé vitexa Nina, hane sahmi me cjuandaja. Tjin me xi jercu quisun cjuandaja sahmi, hane tjin nga me ne, chuva cjuandaja sahmi me, hane yahnga me, hitsë sa chuva cjuandaja sahmi me.
MAT 13:24 Sehe cachja nga me ngu ejemplu cojo me, hane cuitjin cachja me: ―‍Gubiernu xi sahmi Nina ne, cumá sacuaha camá hya xi catsitjë ngu xuta tutjë rë trigu ndaja xcun nangui rë.
MAT 13:25 Peru nixten ne, hya xi jiñafë xuta ne, cafehe ngu xi condra rë me catsitjë cha ngu ndiji xi meje tanguncun cojo trigu. Ngajan ngajñi rë trigu jan catsitjë hma cha sehe quiji cha.
MAT 13:26 Hya xi camá ne, hisca xi cavetju xca rë, cavetju tú rë, sehe camachaya rë me tsëhë ndiji jan.
MAT 13:27 Hya xi camachaya rë me ne, cafehe mosu rë me xi tsëhë nangui jan, cavinenguise mosu me: “Nai, tutjë ndaja xi camá canitjun, ¿há cutjin cavetjun xi casecjan cojo ndiji ne?”
MAT 13:28 Ngajan cafayangui me tsëhë mosu jan: “Ngu me xi condra naha casahmi me.” Hane cafayangui mosu jan cuitjin: “¿Há hanguin chjanijñi ndiji jan?”
MAT 13:29 Peru cafayangui me cuitjin: “¡Jéya! Caveni chjanujñu ndiji jan ta sá tsajin ne, hacuaha chjanu trigu xi ndaja.
MAT 13:30 Catamacha catsijo, sehe cuichja hya xi tjune rë xi tjun ni cjuanejñi cha ndiji, sahmi cha xtë rë xi cuaca cha. Sehe cjuaya cha trigu, cuinchandaja cha cahndë́ rë.” Cuatjin fi ejemplu xi cachja Jesús.
MAT 13:31 Jesús ne, cachja nga me ngu ejemplu cuitjin: ―‍Gubiernu xi sahmi Nina ne, hacuaha cumajyë tangun cojo ngu tutjë ya mostasa ta jemu lihndi camahani ne. Tutjë jan ne, cafaha ngu cha catsitjë cha xcun nangui rë cha;
MAT 13:32 Tutjë rë ya mostasa ne, handasa hitsë sa lihndi má xi cumá rë yëjë ni tutjë xi yahnga ne, hya xi camá cha ni, hitsë sa jyë camá xi cumá rë yëjë ni ya xi yahnga. Cuma ngu ya xi hiscan nisë xi vitjen chu ngahnga ne, cuma sahmi chu ndava chu rcu ya jan.
MAT 13:33 Cavuya cachja nga Jesús cuitjin: ―‍Gubiernu xi sahmi Nina ne, hacuaha tangun sahmi sacuaha san rë pan xi visecjan ngu chjuun ngajñi rë jyan chuva rë nahyu rë pan cojo sa xi sahmixa ngajñi rë yëjë ni nahyu cjín jan.
MAT 13:34 Cuatjin cachja Jesús cojo xutacjín, ta ejemplu ni cachja me cojo xuta ne, cachjaain me chichihin ta, suvá cojo ejemplu.
MAT 13:35 Cuatjin cavicuya me sehe cuetjucaa cjua xi catsihindu profeta ta: Cjua xi vetju ntsuva ne, suva ejemplu ni; Cuichjá cjua xi hinchahma hisca ntsacu cavetsihin ngasunhndë.
MAT 13:36 Hya xi cavatju cachja me, sehe catsicjë Jesús cjua cojo xutacjín jan, cavisehen me cahntsua ndihya hane ngajan cafehe tjengui rë me cha ladu rë me, cavinenguise cha me ¿mé vijne ejemplu tsëhë ndiji nguijña jan?
MAT 13:37 Sehe cafayangui Jesús cuitjin: ―‍Cha xi catsitjë trigu ne, hacui Quihndi rë Xuta Jain.
MAT 13:38 Hane nguijña ne, hacui ngasunhndë. Tutjë ndaja ne, vëhë xuta xi vihndë me tsëhë Nina, hane ndiji jan ne, hacui xuta xi vihndë tsëhë xitsehen.
MAT 13:39 Cha condra xi catsitjë cha ndiji jan ne, hacui xitsehen xi matitjun cha. Hacuaha nixtin xi cjuanga ne, hya xi cjuë ngasunhndë. Hane cha xi cjuanga ne, hacui ángel.
MAT 13:40 Cuanitjin sacuaha ndiji xi casahmi cha xtë rë xi cueti, cuatjin cumá cojo xuta xi hndiin tsëhë Nina hya xi cjuë ngasunhndë.
MAT 13:41 Hya ne Quihndi rë Xuta Jain ne, tsingatju me ángel rë me xi cuahaxin me yëjë ni xuta xi candiya xicjin me ngajñi rë cjuatsehen cojo xuta xi sahmi me cjuatsehen, cuaxëxin me tsëhë gubiernu xi sahmi Nina.
MAT 13:42 Hya xi camá cavaxëxin me ne, scandiya me xuta hiscan cuaca me ngu ndihi jyë, ngajan jemu squihnda me hacuaha jemu cuanerii nehñu me.
MAT 13:43 Peru xuta xi tyjahi cjuatacun rë me xcun Nina ne, cumá me sacuaha tsuhi xi seti xi sua hasen rë camá ngajan gubiernu xi sahmi Nina nahmi rë me. Yo ngayun xi tjin nuju cjuasua xi cuinuhyun cjua naha ne, ndaja tetuhunrcun. ―‍Cuatjin cachja me.
MAT 13:44 ’Xuta xi meje cuisehen gubiernu xi sahmi Nina ne, hacuaha tangun me sacuaha ngu cha xi casacu rë cha ngu cahndë́ hiscan xi caseyanijihma tujún cjín. Hane hya xi camá ne, cavetsa nga cha tujún jan, sehe quiji cha cojo cjuasua ne, caviteña cha yëjë xi tjin rë cha sehe cavechutaha cha chji rë xáhva jan.
MAT 13:45 ’Hacuaha xuta xi meje cuisehen me gubiernu xi sahmi Nina ne, tangun me sacuaha ngu cha viteña xi vanguise cha ngu tuseti xi hitsë sa ndaja seti.
MAT 13:46 Hane xi sacu rë cha ngu xi jercu tu vengui chji rë ne, quiji cha caviteña cha yëjë xi tjin rë cha sehe cavechutaha cha chji rë tuseti jan.
MAT 13:47 ’Hacuaha gubiernu xi sahmi Nina ne, cumá sacuaha ngu changa jyë xi catsingatjeya xuta ndachacun. Hane hya xi camá ne, ngajan cahntsua changa jan camá tangun yëjë xcusun chu ti.
MAT 13:48 Vëhë xi hora xi catsë rë ne, cajuvë nga xuta changa jan ne cavejña me tjehen rë ndachacun ngajan cavaxijin me chu. Chu xi chine ne, cavinchanndaja me, peru cacandi me chu xi yahnga.
MAT 13:49 Cuanitjin ne cumá hya xi cjuë ngasunhndë, ta cuinduva ángel ne, cuatëcja me xuta xi tsehen cjuatacun rë me tsëhë xuta xi tyjahi cjuatacun rë me,
MAT 13:50 sehe scandi me xuta tsehen hiscan cuaca me ngu ndihi jyë. Hane ngajan ne, jemu squihnda me hacuaha jemu cuanerii nehñu me.
MAT 13:51 Hya xi camá ne, Jesús ne, cavinenguise me xicjin me: ―‍¿Há cavijne rcu cjua vi? Ngajan cafayangui me: ―‍Juun, cavijnircuin.
MAT 13:52 Sehe ngajan cachja Jesús cuitjin: ―‍Hya xi ngu maestru xi vicuya me ley ne, sá xi scutaya me xi meje cuisehen me ladu tsëhë gubiernu xi sahmi Nina ne, sahmi me sacuaha nai rë ngu ndihya jyë. Xuta jan ne, vaxë me xcusun xatsë ne, hacuaha vaxë me xcusun changá tsëhë cahndë́ xi cavinchandaja me.
MAT 13:53 Hya xi camá cajnetaha cachja Jesús ejemplu vihi ne, sehe cavatju quijixin me.
MAT 13:54 Hane xi quiji me ne, cafehe me nangui rë me, ngajan cavicuya me xuta cahntsua yungun rë. Hya xi camá ne, jercu cavëhërcun me Jesús, hane cachja me cuitjin: ―‍¿Jani cavutaya cha vihi ta jemu tjin rë cha cjuatacun? ¿Jani casacu rë cha cahndë́ xi sahmi cha cjuarcun?
MAT 13:55 Cha vihi ne, quihndi rë cha chjineya jan. Naa ra ne, María hmí na. Hacuaha xicjin cha ne, hacui Jacobo, José, Simón cojo Judas.
MAT 13:56 Hacuaha tichjá cha ne, xuta nandya naja. Ha hyun ta cuatjin peru, ¿jani casacu rë cha cjua xi tichja cha?
MAT 13:57 Cuatjin ne mijí cjuaha cuenda me cjua rë Jesús tsëhë xi tangun nangui rë me. Sehe cachja Jesús cuitjin: ―‍Ngu profeta ne, macjain rë xuta me, peru hatuxa xuta nangui rë me macjaain rë me tsëhë me. Hacuaha xuta ndava me ne, macjaain rë me tsëhë me.
MAT 13:58 Cuatjin camá ta tsëhë xi ngatsë rë xi macjaain rë xuta me ne, ndastu cjín cjuarcun casahmi me ngajan.
MAT 14:1 Nixtin hya ne, camachaya rë me xi matitjun xi hmí rë Herodes cjua xi tichja xuta tsëhë Jesús.
MAT 14:2 Ngajan xi cachja me cojo xuta xi faha cuenda rë me ta: ―‍Cha vëhë ne, hacui nima Juan Vitenda Xuta. Handasa cahme nima, peru ha cavascaya rë, vëhë xi tjin rë cha ngahñu xi má sahmi cha cjuarcun.
MAT 14:3 Ta Herodes jan ne, ha catsingatju me cachjaha rë Juan ne, catsihñu me cha xi quiji cha ndavaya. Cuatjin casahmi Herodes ta tsëhë xi cuatjin cachuya rë na Herodía, chjuun rë hntsë Herodes.
MAT 14:4 Tsëhë na vë cachja Juan cojo Herodes cuitjin: ―‍Chja ley ta ndajintjin camahani xi chjahan chjuun rë xingueen.
MAT 14:5 Herodes ne, meje tsiquehen me Juan jan, peru camaji ta tsëhë xi xi má rë xuta ne, cha Juan ne, hacui profeta má cha. Hane Herodes ne, tsacjun me xuta.
MAT 14:6 Cuatjin camá xi hya xi cavechu nixtin rë suhi tsëhë Herodes, na quihndi rë na Herodía ne, catë na ngajñi xuta xi siu suhi jan. Hane jemu cachuya rë Herodes xi cuatjin catë na.
MAT 14:7 Sehe ngajan xi Herodes casua na me cjua quixi rë me xi sua me na tu mé ni xi meje cjuehya na.
MAT 14:8 Ngajan xi na vë ne, hya xi ha cavinchangui na naa rë na ne, cachja na cuitjin: ―‍Meje ná xi cahntsua ngu tyuva ne, tuhun ná rcu Juan Vitenda Xuta.
MAT 14:9 Hya xi camá ne, jercu choho cama rë Herodes. Peru tsëhë xi hisca Nina caveyanangui me hane tsëhë xi xcun cjín xuta jan casua me cjua ne, catsingatju me cjua xi cuatjin cumá.
MAT 14:10 Hane cavitexa me sindadu cavatësun cha rcu Juan ngajan ndavaya.
MAT 14:11 Hya xi camá ne, cafehe cha cojo rcu jan xcun ngu tyuva hane casua me na. Sehe quijitjengui na naa rë na, casua na naa rë na.
MAT 14:12 Hya xi camá ne, xuta ladu rë Juan jan, cafehya me nima caveyaniji me. Sehe quiji me casua me camachaya rë Jesús.
MAT 14:13 Hane xi camachaya rë Jesús ne, cavetju me ngajan cavisehen me ngu barcu quiji me ngu cahndë́ xín. Peru xi camachaya rë xuta ne, cavetju me tsëhë nandya ne, quiji ntsacu me tjehen laguna quiji tjengui me Jesús.
MAT 14:14 Xi tu cavetju Jesús tsëhë barcu ngunda ne, cavutsejen me xutacjín jan, hane camayuma rë me xuta jan. Hane catsindaja me xuta hmu rë.
MAT 14:15 Hane hya xi jimá nguixun ne, cafehe xuta ladu rë me cachja cojo me cuitjin: ―‍Jemu xín camahani cahndë́ vi, hane ha quiji hora. Ninguijnutuhun cjua cojo xutacjín vë ne, sehe catji me nandya xi siu tiñataha catatsë me comida xi sinë me.
MAT 14:16 Peru Jesús ne, cuitjin cachja me cojo cha xi tejó jan: ―‍Sahmii ngujyë xi cjuexin me ne, ngayun tuhun xi sinë me.
MAT 14:17 Sehe ngajan xi cachja cha ladu rë me cuitjin: ―‍Hñu pan ne cojo jo ti tjin naja. ―‍Cuatjin cachja cha.
MAT 14:18 Sehe cachja Jesús cuitjin: ―‍Nduvuncujun.
MAT 14:19 Hya xi camá ne, casahmi Jesús xi catiyuju xutacjín jan xcun ndiji; sehe cafahatsja me hñu rquí pan jan cojo jo ti jan. Hane tivutsejenniji me ngahnga ne, casua me nacuechji rë Nina, sehe cavotoho langa me pan casua me pan jan cha ladu rë me xi cjue sua cha sinë xuta.
MAT 14:20 Hane xuta ne, yëjë ni me cajinë me hacutjin cachuya rë xahasen rë me. Hane xi cachjaya rë xi cavangui cajinë xuta jan ne, catsë tejó chajne.
MAT 14:21 Me xi cajinë pan jan ne, hñú mil má me xi xihin. Ha xin yachjin cojo langa xi hacuiin cojo camaxqui.
MAT 14:22 Hya xi camá ne, Jesús ne, casahmi rë me ngujyë xuta ladu rë me xi cuisehen me barcu hane cjue titjun ni me ngunda vëhë, jinguyëjë rë xi tsinguijnetaha me cjua cojo xutacjín jan.
MAT 14:23 Hane hya xi camá quiji xutacjín ne, sehe camijixin Jesús rcu ndetjún xi cuisiajmi me cojo Nina. Hane hora xi camá nguixun ne, tacun suvá me.
MAT 14:24 Peru barcu jan ne, vasentjin laguna cjui, hane jemu chja cjui ngatsë rë tsindyu rë nandá xi tsivaha rë barcu ta, tsëhë xi tjo ne, taha hiscan cjui ne, ngajan nduva.
MAT 14:25 Hane hya xi tiña sahasen ne, quiji ntsacu Jesús xcun nandan ne quiji tjengui me me tsëhë me.
MAT 14:26 Hya xi cavëë xuta ladu rë me xi nduva ntsacu me xcun nandan ne, jemu camá xti rë me cachja me ta nima xi meje cuincharcun rë me, hane cajindayatë me.
MAT 14:27 Ngajan xi cachja Jesús cojo me ta: ―‍¡Xi carcuun! ¡Tuhun cjuetacun xahasen nuju ta ngahan vi!
MAT 14:28 Hya xi camá ne, cafayangui Pedru tsëhë Jesús cuitjin: ―‍Nai, sá xi quixi xi ngayun ne, tuhun ná cahndë́ nduvá tjenguë nuju.
MAT 14:29 Sehe cachja Jesús cuitjin: ―‍Nduvun. Hane cavitjujne Pedru tsëhë barcu jan, quiji ntsacu me quiji tjengui me Jesús.
MAT 14:30 Peru xi camachaya rë me tjoxtin ne, catsacju me camá, sehe cavetsihin cavisehen ngahma me ngajñi nandan. Hya xi camá ne cajindayatë me Jesús cachja me cuitjin: ―‍¡Nai, naxuntjun ná!
MAT 14:31 Hya xi camá ne, ngutjen cafahatsja Jesús me, cavaniji me me ne, cachja me cojo me cuitjin: ―‍Ngayun ne, cjëë cumangutacunndujun cojo ná, ¿mé má macjaain nuju?
MAT 14:32 Hya xi camá ne, cavisehen catsijo me cahntsua barcu jan, hane hora vëhë ne casejyu tjo jan.
MAT 14:33 Ngajan xi xuta xi hincha barcu jan ne, cavixcuhnchi me cafaharcun me Jesús cachja me cuitjin: ―‍Ngayun ne, quixi jain xi Quihndi rë Nina yun.
MAT 14:34 Xi quiji sa me cojo barcu ne, cafehe me tjehen laguna hiscan nandya xi hmí Genesaret.
MAT 14:35 Hane xi camachaya rë xuta xi Jesús xi cafehe me, catsingatju me cjua rë yëjë ni nandya xi siutahndee, hane xuta ne quijicojo me xuta hmu rë me hiscan tacun Jesús.
MAT 14:36 Sehe cafehya me cojo Jesús xi ndastu satëtaha xuta hmu rë jan ntsacu tsjian rë Jesús. Hane yëjë ni xuta hmu rë xi casatëtaha ntsacu tsjian rë Jesús ne, camandaja me.
MAT 15:1 Ngu ndiya ne, ngujo cha tsëhë partidu fariseo cojo ngujo cha maestru rë ley ne, canduva cha tsëhë nandya Jerusalén, quiji cha hiscan tacun Jesús, cachja cha cojo me cuitjin:
MAT 15:2 ―‍¿Hacutjin cumá xi cha ladu nuju ne, sahmii cha sacuaha yaha xcusun rë xutachanga naja? Ta cuatjin vanii cha tsja cha hora xi jinë cha niñu.
MAT 15:3 Ngajan xi Jesús cafayangui me tsëhë cha cuitjin: ―‍Hane ngayun ne, ¿hacutjin cumá xi vejñuxun cjua xi cavitexa Nina ngatsë rë xi nihñu xu xcusun rë xutachanga naja?
MAT 15:4 Cachja Nina ta: “Chjuhunrcun na nuju, chjuhunrcun nahmi nuju”, hacuaha chja ta: “Yo xi choho chja tsëhë xutacha rë ne, xuta ne tsiquehen rë.”
MAT 15:5 Peru ngayun tuhun cahndë́ xi cuichja xuta cojo xutacha rë ta: “Ha quihndë cumaji cuisécoo nuju ta yëjë ni xcusun xi tjin ná ne, ha cavejñá tsja Nina.”
MAT 15:6 ¿Mé má cuatjin tuhun cahndë́ xi faharcuiin cha nahmi rë cha? Cuitjin ne, ngatsë rë xcusun nuju sacuaha xi venguichjiin rë cjua rë Nina xi cuma rë xuta.
MAT 15:7 Ngayun ne, xuta jo xcun jo hntsua ngayun. Cachja quixi profeta Isaías xi cuitjin catsihindu me tsujun:
MAT 15:8 Xuta xi cuacun vi ne, ndaja chja me tsahan peru xi cojo xahasen rë me ne, hisca tsinguitsjiin me ngahan.
MAT 15:9 Tu mahya xi faharcun ná me ta, Xi vicuya xicjin me ne, hacuiin cjua naha ta tu cjua rë xuta.
MAT 15:10 Hya xi camá cachja me cuatjin ne, cajindaya Jesús xutacjín cachja me cojo cuitjin: ―‍Ngayujun ngarca ni ne, nuhyun ndaja cjua vi:
MAT 15:11 Xcusun xi tsitsehen rë xuta ne, hacuiin xcusun xi chine xi visehen hntsua me, ta xcusun xi tsitsehen rë xuta ne, xcusun xi vetjun tsëhë hntsua me.
MAT 15:12 Sehe cafehe xuta ladu rë Jesús ne, cavinenguise me cuitjin: ―‍¿Há hyun xi canicjun rë cha partidu fariseo ne xi cuatjin canújun?
MAT 15:13 Peru cafayangui Jesús cuitjin: ―‍Tu mé ni tutjë xi catsitjiin nahmi naha xi tacun ngahnga ne, tjune rë hisca cojo tyjama rë.
MAT 15:14 ¡Caveni! ¡Nihñuu cuendun me! Me vëhë tangun me cojo xuta rcá xi cjuecani xicjin me. Hane sá xi cuatjin ne, cuixuya catsijo me xanga.
MAT 15:15 Sehe cachja Pedru cuitjin: ―‍Ningacun niji mé vijne ejemplu jan.
MAT 15:16 Ngajan xi Jesús cachja cojo me ta: ―‍¿Há hiscan ngayun cajnii rcun cjua xi cachjá ni?
MAT 15:17 ¿Há hyuun xi xcusun xi jinë xuta ne visehen cahntsua me? Fë ne, vetjutaha ndatsen.
MAT 15:18 Peru xcusun xi vetju chja me ne, nduva tsëhë xahasen rë me, hane vëhë tsitsehen rë me,
MAT 15:19 ta tsëhë xi tsëhë xahasen rë xuta ne, nduva cjuatacun tsehen sacuaha jyë́ xi tsiquehen xicjin xuta, sacuaha jyë́ xi sahmi chjuunnahñu rë me jingu sa chjuun, sacuaha yachjin xi viteña yojo rë, sacuaha cjuachëjë, sacuaha testigu xi vindacha me, sacuaha cjuachjataha.
MAT 15:20 Yëjë cjuatsehen xi cuacun vëhë ne, nduva tsëhë xahasen rë xuta, hane vëhë tsitsehen rë me; peru sá jinë me niñu cojo tsja me xi cjëë cuane me ne, tsitsiin rë me.
MAT 15:21 Hane Jesús ne, cavetju me ngajan, quiji me ngu nanguixin táha distritu nandya Tiro cojo nandya Sidón.
MAT 15:22 Hya xi camá ne, cafehetjengui rë me ngu chjuun cananea xi tsëhë ngajan. Cajindaya na cachja na cojo Jesús cuitjin: ―‍¡Nai! Ngayun, quihndindaicjin rë David, ¡catamayuma nuju ngahan! ta na quihndi naha ne, jiya xitsehen xi jemu suandya rë na cahntsua xahasen rë na.
MAT 15:23 Peru Jesús ne, ndastu me cjua catsicuya me. Hane xuta ladu rë me ne, cafehya me Jesús cuitjin: ―‍Ningatjunxun na, ta jemu si nduvatjengui na yaan fehyataha na yun. ―‍Cuatjin cachja me.
MAT 15:24 Ngajan xi cafayangui Jesús cuitjin: ―‍Nina ne, catsingatju me ngahan ngatsë rë xuta rë nangui Israel, ta me vëhë sacuaha tsánga xi cachaja má me.
MAT 15:25 Hya xi camá ne, cafehetiña na tsëhë Jesús cavixcuhnchi na xcun Jesús xi cafaharcun na me. Cachja nga na cuitjin: ―‍Tatá, nihñu favor tisecun ná.
MAT 15:26 Ngajan xi cachja Jesús ejemplu vi: ―‍Sechiye ne catijnetaha catjine nixti ta, hacuiin ndatjin xi chjahantahan niñu tsëhë nixti hane sehe tahan rë naña.
MAT 15:27 Hane cafayangui na cuitjin: ―‍Quixi jain xi nújun, peru naña xi siu ngahma maxë ne, sacu xi rë pan xi vixuhndu ngahma maxë rë nai rë chu hane jinë chu.
MAT 15:28 Sehe cafayangui Jesús cachja me cojo na cuitjin: ―‍Ngaye chjuun, jemu ndaja mangutacuin cojo ná. Catamandaja quihndi riji sacuaha xi meje ri. Hya xi camá ne, hora hya ne, camandaja quihndi rë na.
MAT 15:29 Hya xi camá ne, cavetju Jesús taha vëhë quiji me tahndee rë laguna Galilea sehe ngajan camiji me ngu ndetjún, ngajan cavejña me.
MAT 15:30 Hane jemu quijitjengui rë me xutacjín, yaha me xuta rengun, xuta rcá, xuta lihmi, xuta yoho cojo xuta xi má rë hacjahi chíhin ne caviyujutë me xuta jan xcun Jesús hane Jesús ne, casahmi me xi camandaja me.
MAT 15:31 Xi cavëë xutacjín xi cuatjin camá ta, cama cachja xuta lihmi, camajingu xuta yoho, findaja xuta rengun hacuaha tsejen rë xuta rcá ne, sehe jercu quijircun rë me, hane casahmi hnga me, casahmi jyë me Nina, Nina jan xi faharcun xuta nangui Israel.
MAT 15:32 Ngajan cajindaya Jesús xuta ladu rë me, cafehe me cachja Jesús cojo rë me cuitjin: ―‍Jemu yuma má ná xutacjín vi ta ha quihndë jyë nixtin hinchataha me cojo naja, hane ha quihndë tsajin camahani mé xi sinë me. Tsajin mangucacun xi tsingátju me cjue me xi cjëë sinë me niñu ta, sá tsajin ne, cjuaha rë me hinda ndiya.
MAT 15:33 Sehe ngajan xi xuta ladu rë me ne cafayangui me tsëhë me cuitjin: ―‍Peru nguehe nangui xín ne ¿jani cuma sacú niji pan xi sinë xutacjín vi?
MAT 15:34 Ngajan xi cavinenguise Jesús cojo xuta cuitjin: ―‍¿Há cjín pan tjin nuju? Ngajan xi cachja me ta: ―‍Yatu má pan hacuaha siu ngujo ti langa.
MAT 15:35 Ngajan xi Jesús ne cavitexa me xutacjín xi cuiyujutë me nangui.
MAT 15:36 Hya xi camá casahmi xuta ne, sehe cafaha Jesús yatu pan cojo ti jan ne sehe casua me nacuechji rë Nina. Hane cavotoho langa me pan cojo ti jan, casua me xuta ladu rë me xi cavatëcja me ne cafaha xutacjín.
MAT 15:37 Cuatjin camá cajine xuta jan, hane jemu ndaja cama rë xahasen rë me. Hane xi cafaya xuta xi cavangui cajinë xuta jan ne catsë yatu nisinya.
MAT 15:38 Xuta xi cajinë ne, sacuaha ñuju mil má me xi xihin me, hacjahi má xuta chjuun cojo quihndi.
MAT 15:39 Hya xi cajnetaha vëhë ne, catsingatju Jesús xuta cafe me, hane suvá ni me, cavisehen me ngu barcu quiji me taha nandya Magadán.
MAT 16:1 Xi cafehe me ngajan ne, hacuaha cafehe cha tsëhë partidu fariseo cojo cha partidu saduceo hane ta tsëhë xi meje cjuahachuva cha me, cafehya cha me ngu cjuarcun xi nduva ngahnga, cojo sa xi scuëë cha xi Nina catsingatju rë Jesús.
MAT 16:2 Peru Jesús ne, cafayangui me cojo ejemplu vi cuitjin: ―‍Nguehe ne, hya xi chutsujun xi má haní ngahnga ne, nújun jain, ta: “Tyjahi nchujun ni, ndajyihi nixtin.”
MAT 16:3 Cuanitjin hya xi sahasen ne, sá xi má haní ngahnga hane hincha yufí jma ne, nújun ta: “Va cumá nixtin.” Jo má tacun. ¿Hacutjin cuma xi jemu hyun mé vijne xcusun xi cún ngahnga, peru vijniircun mé vijne xcusun xi tijima nguehe nixtin vihi ni?
MAT 16:4 Xuta tsëhë nixtin vihi ne, xuta xi tsehen cjuatacun rë me, xi tjenguiin me Nina cojo ngu ni cjuatacun, xuta vë xi fehya me ngu seña. Peru sacuiin rë me seña ta seña xi sacu rë me ne, sacuaha seña xi ha catsingacun profeta Jonás hatsëë nixtin. Sehe xi cajnetaha cachja Jesús cjua vëhë ne, caviyuju me xuta jan ne, quiji me.
MAT 16:5 Hya xi cafehe xuta ladu rë me ngunda laguna ne, hacuaha cachaya rë me cjuaha me pan.
MAT 16:6 Sehe Jesús cachja cojo me: ―‍Nechun cuidadu tsëhë san rë pan tsëhë cha partidu fariseo cojo xi tsëhë cha partidu saduceo.
MAT 16:7 Sehe cha ladu rë me ne, cavisiajmi cha cojo xicjin cha cuitjin: ―‍Tsëhë xi cachaya naja pan ne, vëhë xi cuatjin chja me.
MAT 16:8 Peru xi camachaya rë Jesús xi veyanangui cha xi tsajin rë cha pan ne, cachja me cojo cha cuitjin: ―‍Ngayun ne, cjëë cumangutacun nduju cojo ná. ¿Mé má cuatjin nújun xi chjá ta tsëhë xi tsajin nuju pan?
MAT 16:9 ¿Há nuhyuun? ¿Há vitsjiin nuju? Hya xi cajinë hñu mil xuta hñu pan ne, ¿há cjín chajne cachjayun tsëhë pan xi cavangui jan?
MAT 16:10 Hacuaha hya xi cajinë ñuju mil xuta yatu pan ne, hya ne ¿há cjín chajne cachjayun?
MAT 16:11 ¿Hacutjin cuma xi nuhyuun xi hacuiin tsëhë pan xi cachjá cjua jan? Xi chjá ne, nechun cuidadu tsëhë san rë pan tsëhë cha partidu fariseo cojo xi tsëhë cha partidu saduceo.
MAT 16:12 Hya xi camá ne, camachaya rë me xi cachjaain me xi meje cuidadu cojo san xi sahmixa pan ta cachjá me tsëhë xi meje cuidadu cojo cjuachacun xi sahmixa cha partidu fariseo cojo cha partidu saduceo.
MAT 16:13 Ngu ndiya xi ha cavisehen Jesús distritu tsëhë nandya Cesarea tsëhë Filipo ne, cavinenguise me xuta ladu rë me cuitjin: ―‍Mé chja xuta tsahan, ¿yo ngahan, Quihndi rë Nina Jain? ―‍Cuatjin cavinenguise me cha.
MAT 16:14 Sehe ngajan xi cachja cha cojo Jesús cuitjin: ―‍Yahnga me ne, chja me ta nima Juan Vitenda rë Xuta ngayun, hane yahnga nga me ne, chja me ta Elías, hane yahnga nga me ne, chja me ta nima Jeremías, hane me xi yahnga nga ne, chja me ta ngayun ne, ngu profeta xi hacjahi.
MAT 16:15 ―‍Hane ngayun ne, ¿mé nújun ni, yo ngahan? ―‍Cuatjin cavinenguise Jesús.
MAT 16:16 Ngajan xi cafayangui Símon Pedru cuitjin: ―‍Ngayun ne, Mesías xi catsingatju nuju Nina; ngayun, Quihndi rë Nina, Nina quicun jain.
MAT 16:17 Sehe cachja Jesús cuitjin: ―‍Ndatjin tsujun, Símon, quihndi rë Jonás. Tsajin ngu xuta xi casua camachaya nuju cjua jan, ta Nahmi naha xi tacun me ngahnga ne, me vëhë xi casua me xi camachaya nuju tsëhë.
MAT 16:18 Hane ngahan ne, suá cumachaya nuju xi ngayun ne, ngayun xi hmí nuju Pedru. Hane ñihi nuju ne, vijne ndyojo. Hane xcun ndyojo vihi sahme yungun naha; yungun jan ne, hisca cjuaveya ne tsajin ngahñu xi tsicjëya rë.
MAT 16:19 Suá nuju quicha tsëhë gubiernu xi sahmi Nina, ngajan xi xcusun xi nihñucjun nguehe ngasunhndë ne, hacuaha cumahñucjan ngajan ngahnga, hacuaha xcusun xi chundecjun nguehe ngasunhndë ne, hacuaha tundecjan ngajan ngahnga.
MAT 16:20 Sehe Jesús ne, cavitexa me xuta jan xi tsajin camahani yo xi cuichja me cojo tsëhë xi Mesías má me.
MAT 16:21 Hya xi camá ne, sehe cavetsihin vicuya Jesús xuta ladu rë me tsëhë xi sahmi ngujyë xi cjue me nandya Jerusalén, hane ngajan ne, jemu cjín cjuañihi cuátju me cuma xi sahmi xuta changá cojo nahmi xi matitjun tsëhë nahmi cojo cha xi vicuya cjuachacun ne. Tsitjungui cha me, tsiquehen cha me; peru xi cumá jyan nixtin ne, tsicuya Nina me cjuahñu.
MAT 16:22 Ngajan xi Pedru ne, quijixin me cojo Jesús. Sehe cavetsihin cachjataha me Jesús cuitjin: ―‍Tatá, ¡catamamiji rë Nina! ¡Hatuxa cumaji cuatjun cuatjin!
MAT 16:23 Hane xi cavuya Jesús cavutsejen me Pedru, ngajan cachja cojo me cuitjin: ―‍Tihinxin ngaye Satanás, ngaye ne, sacuaha ngu ndyojo xi meje xtenguiya ná ngajní cjuatsehen tsëhë xi ningatiintacuin ngaye sacuaha tsingatahacacun Nina ta ningatehetacuin sacuaha ngu xuta ngasunhndë ni.
MAT 16:24 Sehe cachja Jesús cojo cha ladu rë me cuitjin: ―‍Sá xi tjin yo xi meje rë xi cuma cuisehen me ladu naha ne, ha quihndë mijí rë xi sahmi me hacutjin xi meje rë suvá me ta nchunchujun ni meje rë xi catejñahñu xahasen rë me xi cjuenduju me cojo ndiya naha, handasa hisca cueya me xcun cru.
MAT 16:25 Yo xi mijii cuisehen ladu naha tsëhë xi tsacjun me xi cueya me ne, cahndë́ xi vetjo me cjuahñu rë me ne, tsichaja me cjuahñu xatsë xi sacu rë me. Peru yo xi ngatsë rë xi cavisehen ladu naha cueya ne, sacu rë cjuahñu jan.
MAT 16:26 ¿Mé machji rëhë rë yo xi sacú rë yëjë cjuanchina rë ngasunhndë peru sehe cueya ne cumá castigu? Tsajin mé xi cuma tsindeya xicjin me cojo cjuahñu xatsë.
MAT 16:27 Ta ngahan, quihndi rë Xuta Jain, cuinduvá cojo hasen ndajyihi tsëhë Nahmi naha hacuaha cojo ángel naha cuinduvá; hane hya ne, cuechji me jimangu me, ¿há ndaja há ndajin casahmi me?
MAT 16:28 Cuichjá quixë cojo nuju ta tjin yahnga ngayun xi sechun nguehe xi cueyuun jinguyëjë rë xi cjëë chun xi cuitexa Quihndi rë Xuta Jain gubiernu xi sahmi Nina.
MAT 17:1 Hya xi camá cavatju jyun nixtin ne, quijixin Jesús quijicojo me Pedru cojo Jacobo cojo Juan, hntsë Jacobo, quijiniji me ngu naxi hnga.
MAT 17:2 Ngajan camá xi cavëë me xi cavindeya xcusun rë Jesús: Xcun me ne, camaseti sacuaha seti tsuhi, hacuaha tsjian rë me ne, jemu tu tyava camahani camá sacuaha hasen rë ndihi.
MAT 17:3 Hacuaha ngajan cavëë me xi cafehetsejen nima profeta Moisés cojo profeta Elías, me xi caviyuju hatsëë nixtin ne, tivisiajmi me cojo Jesús.
MAT 17:4 Sehe cachja Pedru cojo Jesús cuitjin: ―‍Nai, tu ma rë xi nguehe nechin ne, sá xi meje nuju ne, sahme jyan puestu; ngu cuma tsujun ne, ngu cuma tsëhë Moisés, hane cojo ngu cuma tsëhë Elías. ―‍Cuatjin cachja me.
MAT 17:5 Hane hora xi tichja Pedru ne, canduva ngu yufí xi seti tsejen casahmi tjahnguen rë tsëhë me, hane canuhya rë ngujo cjua xi cavetju ngajñi yufí jan xi cachja cuitjin: ―‍Cha vihi xi Quihndi naha cha xi jemu hmu cacún. Jemu ndama ná ngatsë rë cha. Tinuhyun cjua xi chja cha.
MAT 17:6 Hya xi cahndë xuta rë me cjua jan ne, caticaxcun me. Hane jemu catsacjun camahani me camá.
MAT 17:7 Ngajan xi cafehe Jesús cavetahatsja me me, hane cuitjin cachja me: ―‍Tisatjunhngun. Xicarcuun. ―‍Cuatjin cachja me.
MAT 17:8 Hane xi cavutsejenniji me ngajan ne, ndastu yo siu ta suva ni Jesús tacun me.
MAT 17:9 Xi tu tivijne me tsëhë rcu naxi jan cojo xuta ladu rë me xi quijicojo me jan ne, ngajan xi cachja me cojo me ta tsajin yo xi cuichja me cojo xcusun xi cavëë me. Xi cuatju cueya Quihndi rë Xuta Jain, sehe cuya nga me cjuahñu ne, hya cuichja me.
MAT 17:10 Ngajan xi cavinenguise me cojo Jesús cuitjin: ―‍¿Mé má cuatjin chja maestru tsëhë ley xi titjun Elías cuinduva me, sehe cuinduva Mesías?
MAT 17:11 Ngajan cafayangui Jesús cuitjin: ―‍Quixi xi Elías cuinduva me titjun ta me vëhë cuiyujuchihin me yëjë ni xcusun.
MAT 17:12 Peru cuichjá cojo nuju ta ha canduva me, peru xuta ne, hvíin me xi hacui me, hane choho casahmi xuta cojo me hacutjin meje rë xahasen rë me. Hane hacuanitjin sahmi me xi cuátju cjuañihi Quihndi rë Xuta Jain.
MAT 17:13 Ngajan xi camachaya rë xuta rë me ta tichja me tsëhë Juan Vitenda xuta hya xi chja me Elías.
MAT 17:14 Hane xi quiji me ne cavechutaha me xutacjín ne, ngajan cafehetjengui rë me ngu xihin, cavixcuhnchitaha cha Jesús cachja cha cuitjin:
MAT 17:15 ―‍Nai. ¡Catamayuma nuju cha lihndi naha ta, jemu faha rë cha chajan hane jemu choho sahmi cojo cha. Jiya hora ne, finenguiya cha ngajñi ndacahi, hane jiya hora nga ne, viticjaya cha ngajñi nandan.
MAT 17:16 Cëjëcojo cha xcun xuta ladu nuju xi tsirqui me cha peru camaji casahmi me.
MAT 17:17 Sehe ngajan xi Jesús ne, cuitjin cafayangui me: ―‍Ngayujun ni ne, xuta xi macjaain rë ngayun hacuaha xuta xi cavetjuxin tsëhë ndiya ndajyihi ngayun. ¿Há jyë sa xi cuitejña cojo nuju? ¿Há jyë sa nixtin xi scaa ná cojo nuju? Nduvuncujun cha nguehe. ―‍Cuatjin cachja me.
MAT 17:18 Hya xi camá ne, cachjataha Jesús xitsehen xi hincha xahasen rë cha, hane cavetjuxin xitsehen jan, hane hora hya ne, camandaja cha.
MAT 17:19 Hya xi camá ne, xi cafehe xuta ladu rë Jesús cavinenguise me me cuitjin: ―‍¿Mé má ngayin ne xi camaji canaxinxin xitsehen jan tsëhë xahasen rë cha vë?
MAT 17:20 Ngajan xi cachja Jesús cojo me ta: ―‍Camaji ta hacuiin ndaja macjain nuju. Ta cuichjá quixë cojo nuju ta sá xi mangutacún cojo ná ndastu hitsë ne, hacuaha cuma cuinújun cojo naxi vihi: “Catjixin, catjin catisecun ngajan tavëhë.” Hane cuihndë tsujun. Hisca sá xi mangutacún cojo ná ndastu hitsë ne, tsajin me xi cumaji nihñu.
MAT 17:21 Peru sacuaha xitsehen xi cuacun vë ne, meje rë xi titjun chjahyan rë Nina hacuaha cuinechan xun rë me, cojo sa xi cuma naxexeen.
MAT 17:22 Nixtin xi caviyuju Jesús cojo xuta ladu rë me ngajan distritu Galilea ne, cachja Jesús cojo me ngu nixtin cuitjin: ―‍Ngahan xi Quihndi rë Xuta Jain ngahan ne, hatuxa tjin xi cuma ngahan entregadu tsja xuta
MAT 17:23 xi tsiquehen ná me. Peru xi cjuë xi jyan nixtin ne, cuya nga cjuahñu. Hane xi cahndë me cjua jan ne, jemu cafaha me cjuachoho.
MAT 17:24 Hya xi cafehe me nandya Capernaum, cafehe xuta xi faha me tujúnsa rë yungun, camatiña me tsëhë Pedru cachja me cojo me cuitjin: ―‍Maestru nuju ne, ¿há vechjitje me tujúnsa rë yungun?
MAT 17:25 Ngajan cafayangui Pedru cuitjin: ―‍Juun, vechjitje me. Hya xi camá ne, xi cavisehen Pedru ndihya ne, peru chajasa xi cuichja me ne, ngajan xi cachja Jesús cojo me cuitjin: ―‍Simón, ¿mé nújun? Sacuaha me xi matitjun tsëhë nandya ngasunhndë ne, ¿yo vitexa me xi satë rë xi cuechjitje tujúnsa? ¿Há quihndi rë me? ¿Há xutaxín?
MAT 17:26 Ngajan xi cachja Pedru cuitjin: ―‍Xutaxín cuechji me. Cachja nga Jesús cuitjin: ―‍Sá xi cuatjin ne, quihndi rë me xi matitjun jan ne, ha cavatjuhnga tsëhë.
MAT 17:27 Quixi vë, peru cojo sa hacuiin ngatsë rë vëhë cumacjan rë me o maxti rë me cojo naja ne, tangun laguna ne, chandunyun tsitin ngajñi nandan ne, hane hya xi faha tsitin ngu ti ne, chu xi tjun faha rë ne, chjuhun chu nuxuhun hntsua chu hane ngajan cahntsua hntsua chu jan ne, sacú tujún xi stetaha cuechjun tujúnsa xi satë ná cojo xi satë nuju.
MAT 18:1 Hya ne, xuta ladu rë Jesús cafehe tjengui me me, cavinenguise me cuitjin: ―‍¿Yo xi hitsë sa cumatitjun hya xi sahmi Nina gubiernu?
MAT 18:2 Hya xi camá ne, cajindaya Jesús ngu lihndi, cavejña me cavasencja.
MAT 18:3 Sehe cachja me cuitjin: ―‍Hisca ngu ngayun cumaji cuisuhun gubiernu xi sahmi Nina ne, sá xi hacuiin nindeyun cjuatacun nuju hisca cuma yun sacuaha ngu quihndi.
MAT 18:4 Vëhë xi yo xi tsinguijne suvá me yojo rë me xi cuihndë me sacuaha vihndë ngu quihndi ne, me vëhë xi hitsë sa cumatitjun me hya xi sahmi Nina gubiernu.
MAT 18:5 Hane tu yo ni xi cjuahatsja rë ngu quihndi xi cuacun vë ngatsë rë xi ladu naha má ne; vëhë cuma sacuaha xi cafahatsja me ngahan.
MAT 18:6 ’Peru yo xi nduvacojo xcusun xi sahmi xi tsismicacun ngu quihndi ndiya naha ne, hitsë sa ndaja tsëhë xuta vëhë xi xtyangui ngu ndyojo natsi nguisin me sehe ningatjeya rë me ngajñi ndachacun.
MAT 18:7 Jemu choho vatju xuta ngasunhndë ngatsë rë xcusun xi tsitsehen rë me xi sahmi me cjuatsehen. Hatuxa cuinduva xcusun xi meje sahmi xi tsismicacun xuta ndiya rë Nina, peru jemu chojyihi tsëhë xuta xi nduvacojo me xcusun vëhë.
MAT 18:8 ’Hane sá xi cjuatacun nuju meje rë xi nihñu ngu jyë́ cojo ntsun o sá xi cojo ntsacu ne, vengui sa chji rë xi chandunxun, ta hitsë sa ndaja tsujun xi cuma yoho yun xi cuma rë xi cuechun jingu cojo catsijo ntsun o catsijo ntsacu xcun ndihi xi tsajin nixtin tsajin nixten xi coho.
MAT 18:9 Hacuaha sá xi cjuatacun nuju meje rë xi nihñu ngu jyë́ cojo xcusun xi chutsujun cojo tuxcun ne, chjuhunxun tuxcun jan chandunxun, ta tsëhë xi hitsë sa ndaja tsujun xi sacu nuju cjuahñu xatsë handasa cojo ngu ni tuxcun xi cuma xi cojo catsijo tuxcun cuechun xcun ndihi xi sahmi castigu rë nima.
MAT 18:10 Cojo yëjë ni ne, nihñu cuidadu xi nitjunguun ngu quihndi sacuaha quihndi vihi, ta tsëhë xi ángel xi sahmi cuenda me ne, yëjë nixtin yëjë hora ne, siu tangun me cojo Nahmi naha hane sahmii ngujyë xi cjuehya me cahndë́ xi cuichja me cojo.
MAT 18:11 ’Quihndi rë Xuta Jain ne, canduvá me xi cuaxëtje me xuta xi cachajá.
MAT 18:12 ¿Mé xi nújun? Cuejñaa ne xi ngu xihin tjin rë me ngu cientu chu tsánga. Hane sá xi chajá ngu chu rë me, ¿há hyuun xi cuiyujutaha me chu xi ñujuchan tyjuhun ñuju jan nguijña ne, sehe cjue me cuanguise me ngu chu xi cachajá jan?
MAT 18:13 Hane hya xi sacú rë me chu ne, hitsë sa jyë cjuasua tjin rë xahasen rë me ngatsë rë xi casacu rë me chu xi cachaja xi cuma rë cjuasua tsëhë ñujuchan tyjuhun ñuju chu xi tetjo.
MAT 18:14 Cuanitjin xi cuma rë Nahmi nuju xi tacun ngahnga, ta mijí rë me xi chajá hisca ngu quihndi rë me cuatjin.
MAT 18:15 ’Hane sá xi ngu xingun choho sahmi cojo nuju ne, tangun suvun tinújuntuhun rë, hane sá xi tsindeya cjuatacun rë ne, ndatjin, ta hacuiin cuetsuntaha cjuandaja xi tjin nuju cojo me.
MAT 18:16 Peru sá xi vihndiin me tsujun ne, tangun chjuhun ngujo xuta tanguncujun xi tinújuntuhun rë tsëhë xi hya xi cuma me testigu nuju tsëhë, sehe cumatsejen cjuaquixi.
MAT 18:17 Sá xi hisca cojo me vë vihndiin me tsëhë me ne, tangun tinújun tsëhë xcun xuta yungun, hane sá xi hacuaha vihndiin me cjuatacun rë xuta yungun jan, cumá me xi cuma nuju sacuaha ngu xutaxín o sacuaha ngu xuta ndacha xi faha rë tujúnsa.
MAT 18:18 ’Cuichjá quixë cojo nuju ta xcusun xi nihñucjun nguehe ngasunhndë ne, hacuaha mahñucjan ngajan ngahnga, hacuaha xcusun xi nihñu ndaya nguehe, hacuaha mandaya ngajan ngahnga.
MAT 18:19 Hacuaha cuichjá cojo nuju ta sá nguehe ngasunhndë ne matangun cjuatacun rë jo ngayun tsëhë ngu xcusun xi chjahyun rë Nina ne, cuetjucaa jain tsujun ta sahmi chihin Nahmi naha xi tacun me ngahnga.
MAT 18:20 Ta tu mé ni cahndë́ xi cuiyujuntangun ngu jo jyan xuta xi ngajan veyanangui ñihi naha, hacuaha ngajan ngajñi rë me tejña ngahan.
MAT 18:21 Sehe cafehe Pedru cachja cojo me cuitjin: ―‍Nai, ¿há cjín ndiya sahmi ngujyë xi tsinchátaha xingueen sá xi choho sahmi me cojo ná? ¿Há ndatjin xi yatu ndiya?
MAT 18:22 Ngajan cafayangui Jesús cuitjin: ―‍Hacuiin yatu ndiya ni, ta cuichjá cojo nuju ta mameje rë xi jyanchan të cuatjin xi yatu ndiya ninchatuhun rë me.
MAT 18:23 ’Ngajan tsejen xi hya xi Nina sahmi me gubiernu ne, cumá sacuaha ngu me xi matitjun xi meje cuaxëchihin me cuenta xi tjin rë me cojo xuta rë me.
MAT 18:24 Hane hora xi tijima ne, cajindaya rë ngu cha xi cafehe cha hane cha jan ne, të mil tujún quitjen cha.
MAT 18:25 Hane ngatsë rë xi tsajin camahani cha rë tujún xi sahmingojo cha, cachja me xi matitjun jan xi xteña cha xi cuma cha ngu mosu, xteña suva cha, hacuaha cojo chjuun rë cha cojo quihndi rë cha cojo yëjë ni xi tjin rë cha, hane sehe cuatjin cuma cuechji cha tsëhë xi quitjen cha.
MAT 18:26 Hya xi camá ne, cavixcuhnchi cha xcun me cafaharcun cha me cafehya cha me cuitjin: “Nai, catijnehnchan cjuacjan nuju, tuhun ná hitsë cahndë́ hane cuechjë tsujun.”
MAT 18:27 Ngajan xi me xi matitjun jan ne, camayuma rë me cha, catsijyëcacun me tsëhë cha tsëhë cjuacjintacun jan, catsinchataha me cha.
MAT 18:28 ’Peru xi cavetju quiji cha jan, cavechutaha cha jan ngu cha xicjin cha xi quitjen tsëhë cha hitsë tujún, hane cafaha cha nguisin xicjin cha jan, cachja cha cuitjin: “Nihñi ngojo yëjë xi quitjin tsahan.”
MAT 18:29 Hane xi cavixcuhnchi xicjin cha xcun cha ne, cachja xicjin cha jan cuitjin: “Catijnehnchan cjuacjan nuju, tuhun ná hitsë cahndë́ ta cuechjë tsujun.”
MAT 18:30 Peru mijí sua cha cahndë́, hane quiji caveya cha xicjin cha ndavaya, ngajan seya xicjin hisca xi cuma sahmingojo tujún.
MAT 18:31 Hya xi cavëë yahnga mosu xcusun xi camá cavatjun jan, jemu camá xti rë me quiji casuacuenda me tsëhë cojo me xi matitjun tsëhë me.
MAT 18:32 Ngajan xi cajindayavaha me xi matitjun cha jan, cachja me cuitjin: “Ngaye, jemu choho xcusun riji. Catsinchátaha yëjë ni xi quitjin tsahan, tsëhë xi jemu cachjahye.
MAT 18:33 Hane ngaye, ¿hacutjin cumá xi tsajin ri cjuayuma cojo xinguin? ta ngahan ne, cama yuma ná ngaye.”
MAT 18:34 Cuatjin camá xi jemu camacjan rë me xi matitjun cojo cha jan, catsingatju me cha cjuañihi ngajan ndavaya jñu hisca nixtin xi cjuë cuechji cha xi quitjen cha.
MAT 18:35 ’Hane cuatjin sahmi Nahmi naha xi tacun ngahnga cojo nuju, sá xi ninchatuun xingun cojo yëjë xahasen nuju.
MAT 19:1 Hya xi cajnetaha cachja Jesús cjua vi, sehe cavetju me distritu Galilea ne, cavisehen me distritu Judea ngajan tahndee ndajyë Jordán ladu vetjucaa tsuhi.
MAT 19:2 Hacuaha quiji tjengui rë me xutacjín hane casahmi me xi camandaja xuta hmu rë.
MAT 19:3 Hya xi camá ne, ngajan cafehe cha tsëhë partidu fariseo ne, quiji cha hiscan tacun Jesús hane tsëhë xi meje cjuahachuva cha me cojo cjua rë me ne, cachja cha cuitjin: ―‍¿Há tsingatihi ley xi ngu xihin ne, tsismi chjuun rë ngatsë rë tu mé ni xcusun xi chuyiin rë me tsëhë?
MAT 19:4 Ngajan xi cafayangui me cuitjin: ―‍Ngayun ne, ¿há cachutayuun ta tsëhë xi hisca ntsacu cavetsihin casahmi Nina ngasunhndë ne, casahmi me xi chjuun xi xihin xuta?
MAT 19:5 Cachja Nina ta ngatsë rë xi cuatjin casahmi me xuta ne: “Vëhë xi ngu xihin ne, cuejña cha nahmi rë cha, hacuaha cuejña cha naa rë cha, hane cumatangun cha cojo chjuun rë cha sacuaha ngu ni xahasen.”
MAT 19:6 Ha quihndë hacuiin jo ta sacuaha xi ngu ni xahasen. Hane tsëhë xi ha Nina cachja me xi cuatjin cuma ngu xahasen me ne, ndajintjin xi xuta ne, tsinguetsuntaha me tsëhë xicjin me. ―‍Cuatjin cachja Jesús.
MAT 19:7 Ngajan cavinenguise cha cuitjin: ―‍Sá xi cuatjin ne, ¿mé má casua Moisés cahndë́ xi ngu xihin cuma cuejña cha ngu xujun tsja chjuun rë cha xi ha quihndë mijí rë cha na? Hane xi cuatjin ne, cuma tsismi cha na.
MAT 19:8 Sehe ngajan xi Jesús ne, cachja me cojo cha ta: ―‍Ngatsë rë cjuataja rë xahasen nuju ne, vëhë xi Moisés ne casua me cahndë́ xi nismu chjuun nuju, peru hacuiin cuatjin cavitexa Nina ntsacu cavetsihin.
MAT 19:9 Cuichjá cojo nuju ta yo xi tsismi chjuun rë handasa ndastu mé cjuatsehen casahmi chjuun jan cojo ngu xihin hacjahi, hane cuixan cojo ngu nga chjuun ne, tjin jyë́ rë me ta tsëhë xi ngatsë rë cjua rë me sahmi chjuun jan cjuatsehen.
MAT 19:10 Ngajan xi cachja xuta ladu rë Jesús cuitjin: ―‍Sá xi cuatjin sacuaha xi nújun, ndajintjin tsajan xi cuixan.
MAT 19:11 Cachja nga Jesús cuitjin: ―‍Hacuiin yëjë ni xuta ma vijnercu me cjua vi, suva xuta xi Nina casua cahndë́ xi vijnercu me ne, me vëhë vihndë me.
MAT 19:12 Tjin xuta xi cumaji cuixan me, sacuaha xihin xi hisca chaja sa catsin me ne, maji matangun me cojo ngu chjuun. Hacuaha tjin yahnga me xi catsixindë xuta me, hacuaha tjin yahnga me xi faain me ngu chjuun ngatsë rë xi sahmixa rë gubiernu xi sahmi Nina. Catjahatsja cjua vi tu yo ni xi cuma cjuahatsja rë.
MAT 19:13 Hacuaha quijicojo xuta nixti rë me hiscan tacun Jesús xi cuisanetsja me nixti jan hacuaha cjuehya me cjuandaja rë Nina ngatsë rë me. Peru hya xi cavëë xuta ladu rë Jesús xi cuatjin tijima ne, cavatëcja me cjuatacun rë xuta jan.
MAT 19:14 Peru Jesús ne, cachja me cojo xuta ladu rë me cuitjin: ―‍Tuhun rë nixti cahndë́ catinduva tjengui ná. Xicanichuun rë cahndë́ ta, tsëhë xi gubiernu xi sahmi Nina ne, má tsëhë nixti xi cuacun vë.
MAT 19:15 Hane ngajan cavisanetsja me nixti jan sehe cavetju me tsëhë cahndë́ jan.
MAT 19:16 Hya xi camá ne, cafehe ngu cha nixti xi cavinenguise cha Jesús cuitjin: ―‍Ngayun Maestro, ¿mé cjuandaja meje rë xi sahme cojo sa xi sacú ná cjuahñu xatsë xcun Nina? ―‍Cuatjin cachja cha. Ngajan xi cachja Jesús cuitjin:
MAT 19:17 ―‍¿Mé má noje tsahan xi ndaja ngahan? Ngu ni Nina xi ndaja me. Peru sá xi meje sacú ri cjuahñu xatsë jan, nohye cjua rë ley xi cavitexa Nina.
MAT 19:18 Ngajan cafayangui cha cuitjin: ―‍¿Jarë cjua jan? Hane cachja Jesús ta: ―‍Xicanicuun xuta, xicanihñuu cjuatsehen cojo rë ngu chjuun o cojo rë ngu xihin xi hacuiin tsujun, xicanihñuu cjuachëjë, xicanujuun cjuandesu tsëhë xuta,
MAT 19:19 chjuhunrcun nahmi nuju hacuaha chjuhunrcun na nuju. Hacuaha nihñu hmutacun xingun sacuaha hmutacun suva yojo nuju.
MAT 19:20 Ngajan cachja cha nixti jan ta: ―‍Yëjë ni cjua vëhë ne, ha cáhndë tsëhë hisca cjualihndi naha. ¿Mé sa meje rë xi sahme? ―‍Cuatjin cachja cha.
MAT 19:21 Ngajan cafayangui Jesús cuitjin: ―‍Tjin sa ngu cjua sehe cuma chihin yëjë ni: yëjë ni xcusun xi tjin ri ne, titeñi, hane sehe tichecje tujún rë ngajñi rë xuta yuma. Hane xi cuatjin nihñi ne, jemu jyë cjuanchina sacú ri ngajan ngahnga. Hane xi cjuë cuichecje tujún vëhë ne, sehe ndove tisecue ná.
MAT 19:22 Peru xi cahndë cha nixti cjua xi cachja Jesús ne, jemu va camá cacun cha hane quiji cha, tsëhë xi jemu nchina camahani cha.
MAT 19:23 Hya xi camá quiji cha ne, cachja Jesús cojo xuta ladu rë me cuitjin: ―‍Cuichjá quixë cojo nuju ta jemu chja xi ngu xuta xi tjin rë me cjuanchina cuisehen me hiscan sahmi Nina gubiernu.
MAT 19:24 Hisca cuichjá nga xi hitsë sa chjaain cuatju ngu chu camellu ngojo rë ngu níndu xi cuma rë xi cuisehen ngu xuta nchina hiscan sahmi Nina gubiernu.
MAT 19:25 Ngajan xi xuta ladu rë me ne jemu quijircun rë me cjua rë me tsëhë xi cachja me tsëhë xuta nchina hane cavinenguise me Jesús cuitjin: ―‍Sá cuatjin ne, ¿yo xi cuma cuetjutje ni?
MAT 19:26 Ngajan xi Jesús ne, cavutsejen me hiscan siu xuta jan ne, cachja me cojo me cuitjin: ―‍Xuta ne, maji sahmi me; peru yëjë ni xi maji sahmi xuta ne, Nina ne, hatuxa ma sahmi me.
MAT 19:27 Sehe cachja Pedru cojo me cuitjin: ―‍Chutsujun ni. Ngayin ne, ha canismitacuin yëjë ni xcusun xi tjin niji, hane tivisecuin nuju. Hindë ne, ¿mé sacu niji?
MAT 19:28 Sehe cachja Jesús cuitjin: ―‍Cuichjá cojo nuju cjuaquixi ta hya xi cuechu nixtin xi cumá xatsë yëjë ni ne, nixtin xi cuejña Quihndi rë Xuta Jain xcun silla xi sahmi me gubiernu ne, ngayun xi tejó ne, ngayun xi cavisuhun ladu naha hacuaha cuinechun xcun silla nichuvun cjuatacun rë yëjë tejó tjë naja, ngayaan xi tjë rë xutachanga naja Israel ngayaan.
MAT 19:29 Hacuaha yëjë xuta xi tsismicacun me ndava me, tsismicacun me xicjin me, tsismicacun me xutacha rë me, tsismicacun me quihndi rë me, tsismicacun me nangui rë xitjë rë me, ngatsë naha; sacú rë me ngu cientu sa quisun tsëhë hane hacuaha sacú rë me cjuahñu xatsë.
MAT 19:30 Peru xuta xi matitjun quihndë ne, jemu cjín me xi cumachjiriin me hya, hane xuta xi hacuiin matitjun quihndë ne, hya ne cumachji rëhë me xi cumatitjun me.
MAT 20:1 ’Sua Nina cahndë́ xi cuisehen xuta gubiernu xi sahmi me ne, sacuaha casahmi ngu me xi nai rë ngu ranchun. Xati nguitajñu quiji me cavanguise me mosu xi sahmi xá hiscan catsitjë me uva.
MAT 20:2 Hya xi casacu rë me ngujo cha, casahmi me compromisu hane cavejña chji rë cha xi ngu tujún xi hmí rë denario xi ngu nixtin. Hane hora hya casua me cha xá quiji cha nguijña xitjë.
MAT 20:3 Hya xi camá ne, sacuaha fane ñaja ne, cavuya nai jan ndetsin hane ngajan cavëë me cha xi hacjahi hane mahya rë cha.
MAT 20:4 Sehe cachja me cojo cha cuitjin: “Hacuaha tangun xitjë naha, sehe sua nuju hacutjin satë nuju.” Hane quiji cha jan.
MAT 20:5 Hane jo ndiya nga ne, sacuaha nchisen hane sacuaha fane jyan ne, quiji nai jan ndetsin, tangun casahmi me tangun cachja me.
MAT 20:6 Hane xi cavechu sacuaha fane hñu nguixun ne, quiji nga me ndetsin, ngajan casacu rë me yahnga cha xi mahya rë, sehe cachja me cojo cha cuitjin: “¿Mé má tu nechun ni nguehe cuahanixtin?”
MAT 20:7 Hane cafayangui cha cuitjin: “Tsëhë xi tsajin yo xi casua niji xa.” Sehe cachja me cuitjin: “Hacuaha tangun nihñu xa xitjë naha.”
MAT 20:8 Hane hya xi ha camá nguixun, nai rë xitjë ne, cachja me cojo cha xi fahacuenda rë xitjë jan cuitjin: “Chjindayun rë mosu ne, tuhun rë me chji rë yëjë ni me, titjun ne tuhun chji rë cha xi cafehe ngascan hane cuatjin ne hisca xi cuijnetaha ne, sehe tuhun rë cha xi tjun cafehe.”
MAT 20:9 Hane xi cafehe cha xi casacu rë xa sacuaha fane hñu nguixun ne, cafahatsja cha chji ra xi ngu denario.
MAT 20:10 Hane xi camachaya rë cha xi tjun casacu rë xá ne, xi má rë cha ne, hitsë sa hnga cumá chji rë cha, peru hacuaha cafahatsja cha ngu denario ni.
MAT 20:11 Hane xi cafahatsja cha chji rë cha ne, cachjataha cha nai jan cuitjin:
MAT 20:12 “Cha vë ne, ngascan cafehe cha, ngu ni hora casahmi cha xa, hane tangun catuhun chji rë cha cojo niji. Ngayin ne, canihñi xa cuaha nixtin hacuaha cacaa niji ndavá.”
MAT 20:13 Peru nai rë xitjë jan ne, cafayangui me tsëhë cha jan cuitjin: “Tai, tsajin me cjuachan, ¿há quixi, há quixiin xi cavisiajme xi chji nuju ne, ngu denario?
MAT 20:14 Chjuhun tujún xi satë nuju hane cuangun; ta ngahan ne, cachuya ná ngahan xi ngu chichihin suá rë cha hacuaha suá nuju.
MAT 20:15 Ngahan xi tsahan ne, ngahan cuitexa. ¿O há tsajin ne, há machinitacun tsëhë xi casahme cuatjin?”
MAT 20:16 Hacuaha chuva vëhë ni, xuta xi matitjun quihndë ne, cumachjiriin hya, hane xuta xi hacuiin matitjun me quihndë ne, cumachji rëhë me xi cumatitjun me. Jemu cjín má me xi cachjindaya rë xi canduva me, peru tsëhë yëjë me jan ne, chuva má me xi catuxijin rë.
MAT 20:17 Hya xi camá ne, hora xi jiya ndiya Jesús xi cjui me nandya Jerusalén, quijixin me cojo xuta ladu rë me xi tejó ni cachja me cojo me cuitjin:
MAT 20:18 ―‍Chutsujun ni, tivanguen Jerusalén, hane ngajan ne, ngahan xi Quihndi rë Xuta jain ne, cuma ngahan entregadu tsja nahmi xi matitjun cojo maestru tsëhë ley; hane cuichja me jyë́ naha ne, vechu chuva rë xi cueya ngahan.
MAT 20:19 Sehe sahmi entregar me ngahan xutaxín, cuejnucëë ná xuta, cuëhënatya ná me, cuaja ná me ne, sehe cuetaha ná me xcun cru. Peru xi má jyan nixtin ne, cúya nga cjuahñu.
MAT 20:20 Hya xi camá ne, naa rë quihndi rë Zebedeo quijitjengui na Jesús cojo cha quihndi rë na. Cavixcuhnchi na xcun Jesús tsëhë xi fehya na ngu favor.
MAT 20:21 Sehe cavinenguise Jesús na cuitjin: ―‍¿Mé xi meje rë xahasen nuju? Hane cuitjin cafayangui na: ―‍Tuhun cahndë́ xi cuiyujutaha cha quihndi naha ngu ngu ladu tjehen nuju, hya xi nihñu gubiernu nuju.
MAT 20:22 Ngajan cachja Jesús cojo cha cuitjin: ―‍Ngayun ne, hyuun mé xi chjayun. ¿Há scaa nuju cuatjun cjuañihi xi cuátju ngahan ni? Sehe cafayangui catsijo cha: ―‍Juun, scaa niji.
MAT 20:23 Ngajan xi cachja nga Jesús cojo cha cuitjin: ―‍Cjuañihi xi cuátju ngahan cuma ne, hatuxa hacuaha cojo ngayun cuatjun cuma. Peru xi cuinechuntuhun ngu ngu ladu tjehen naha ne, hacuiin ngahan cuichjá ta Nina cuichja me yo xuta xi sua rë me cahndë́ xi cuiyujutaha me.
MAT 20:24 Xi cahndë yahnga xuta xi të jan cjua xi cachja Jesús ne, cavetsihin camacjan rë me cojo jo me xicjin me jan.
MAT 20:25 Ngajan xi cajindaya Jesús yëjë ni me, cachja cojo me cuitjin: ―‍Ngayun ne ha hyun ta yëjë ni xuta xi matitjun nguehe ngasunhndë ne, jemu sahmi yehe me yojo rë me sacuaha xi me vëhë xi nai rë xuta, hacuaha jercu meje cuitexa me.
MAT 20:26 Peru hacuiin cojo ngayun cuatjin nihñu ta xi meje rë ne, ngu ngayun xi meje nihñi yehe yojo nuju ne; ninguijnu yojo nuju tisecun xingun.
MAT 20:27 Hane ngu ngayun xi meje cumatitjun ngayun, nihñu xi cuma yun sacuaha ngu mosu rë xingun.
MAT 20:28 Ta cuanitjin ne, casahme ngahan Quihndi rë Xuta Jain, ta canduvá ne, peru hacuiin canduvá xi xuta cuisecoo ná me ta ngahan cuisécoo rë xuta, hacuaha tsingatehen xi tsiquehen ná xuta, cojo sa xi ngatsë rë vëhë cjín xuta cuaxëtje Nina me. ―‍Cuatjin cachja Jesús.
MAT 20:29 Hya xi cavetju me nandya Jericó ne, jemu xutacjín quijitjengui rë me.
MAT 20:30 Hane ngajan hiscan cavatju me siu jo cha rcá xi viyuju cha tjehen ndiya, hane xi canuhya rë xi Jesús tivatju me, cajindaya cha cachja cha cuitjin: ―‍¡Nai, ngayun tjë rë David! Catamayuma nuju ngayin. ―‍Cuatjin cachja cha.
MAT 20:31 Hane xuta xi siu ne, cavisiajmicjan me cojo cha xi sejyu cha, peru cha vëhë ne, hitsë sa jercu cajindaya cha chja cha ta: ―‍¡Nai, ngayun tjë rë David! Catamayuma nuju ngayin.
MAT 20:32 Hya xi camá ne, ngajan casecunhñu Jesús, cajindaya me cha xi nduva cha. Sehe cavinenguise me cha cuitjin: ―‍¿Mé xi meje nuju xi sahme cojo nuju ni?
MAT 20:33 Ngajan xi cachja cha rcá jan ta: ―‍Tatá, xi meje niji ne, xi cuma tsejen niji.
MAT 20:34 Hane Jesús ne, camayuma rë me cha; cavisanetsja me tuxcun cha. Hane ngutjen ni, camatsejen nga rë cha, sehe quiji cha cojo Jesús.
MAT 21:1 Hane hya xi ha jima tiña Jesús xi cjuehe me Jerusalén, cavechu me nandya Betfajé, ngajan ndetjún xi hmí rë Ndetjún Olivu ne, sehe catsingatju me jo xuta ladu rë me xi cjue tixa rë me,
MAT 21:2 hane cuitjin cachja me cojo me: ―‍Tángun nandya xi tsejen tacun vë. Hane ngutjen xi cjuhun tjehen rë ne, sacú nuju ngu burru xi tjihñu chu cojo quihndi rë chu. Hane chundecjun chu, nduvuncujun chu.
MAT 21:3 Hane sá xi tjin yo xi cuichja cojo nuju tsëhë chu, sehe tinújun ta: “Maestru niji ne, meje rë me chu.” Hane sehe sua me cahndë́.
MAT 21:4 Cuatjin camá cojo sa xi cuetjucaa jain cjua xi cachja profeta cuitjin:
MAT 21:5 Tinújun cojo xuta nangui Sion: “Chutsujun ne, nduva me xi matitjun tsujun hiscan nechun. Hacuiin xta me ne, nduva me quisun me chu burru, quisun me quihndi rë chu xi vaniji chaha.”
MAT 21:6 Sehe xuta ladu rë me jan, cavetju quiji me hane casahmi me hacutjin cachja Jesús,
MAT 21:7 canduvacojo me chu burru cojo quihndi rë chu hiscan tacun Jesús. Hane caviyujusun me tsjian rë me ngaxtun chu, sehe camiji Jesús burru jan.
MAT 21:8 Hane xi quiji Jesús ne, quisun me burru jan, hane xutacjín ne, táha cacandi me tsjian rë me ndiya hiscan cjui Jesús. Hane yahnga me ne, quiji cavotohosun me xca xcuen hane hacuaha cacandi me ndiya hacutjin cjui Jesús.
MAT 21:9 Hane yëjë ni me xi cjui tjun cojo yëjë me xi tjengui jan ne, cavetsihin jercu cajindaya me cachja me: ―‍¡Hosana! ¡Nacuechji rë Nina xi cafehe me xi cuitexa naja sacuaha cavitexa David hatsëë! ¡Jemu catsinchacun Nina me xi nduva vi tsëhë xi Nina catsingatju rë me! ¡Hisca ngahnga ne, cuechu cjua rë cjuandaja rë Nina!
MAT 21:10 Hya xi camá ne, xi cavisehen me nandya Jerusalén jercu jyë cjuandya camá hane cavinenguise xuta nandya cuitjin: ―‍¿Yo me vihi?
MAT 21:11 Ngajan cafayangui xutacjín jan cuitjin: ―‍Me vihi, hacui profeta Jesús, xuta Nasaret tsëhë distritu Galilea.
MAT 21:12 Hya xi camá ne, quiji me yungun xi matitjun. Hane hya xi cavisehen me ndatsen yungun jan; cavaxë me xuta xi sahmi me ndetsin. Hacuaha catsindefa me maxë xi xinchasun tujún xi tsindeya cha cojo tujún rë xuta ngu nangui cojo puestu rë cha xi viteña nisëtyava.
MAT 21:13 Sehe cachja me cojo cha jan cuitjin: ―‍Chja cjua rë Nina ta: “Ndya naha ne, tacunxa xi cjue xuta sahmi me oración rë me. Peru ngayun ne, tinihñuxun cojo sacuaha ngu cahndë́ xi matangun xuta xi sahmi cjuamaña.”
MAT 21:14 Hya xi ha cavatju vëhë ne, ngajan yungun xi matitjun ne, cavechutaha me xuta rcá cojo xuta rengun; hane casahmi me xi camandaja me.
MAT 21:15 Ngajan xi cavëë nahmi xi matitjun cojo cha xi vicuya cjuachacun ne cjuarcun xi casahmi Jesús, hacuaha cahndë me xi jindaya nixti ta: “¡Hosana! ¡Nacuechji rë Nina xi cafehe me xi cuitexa naja sacuaha cavitexa David hatsëë!”; hane jemu cama xti rë me.
MAT 21:16 Cachja me cojo Jesús cuitjin: ―‍¿Há nuhyun cjua xi tichja me? Ngajan xi cafayangui Jesús cuitjin: ―‍Juun, vihndë. Hane ngayun ne, ¿há cjëë chutahanyun cjua rë Nina xi chja tsëhë? Chja cjua ta: Hisca cjua rë nixti hisca cjua rë quihndinda ne canihñu xi cuetju xi sahmi hnga nuju.
MAT 21:17 Hya xi camá cachja me ne, cavetju Jesús tsëhë Jerusalén quiji me nandya Betania cavejña me nguixun.
MAT 21:18 Xi camanchujun jan ne, xi cavuya nga Jesús Jerusalén ne, cama vojo rë me.
MAT 21:19 Hya xi camá ne, tjehen ndiya ne, cavëë me ngu yaxujun xi chine tú rë, peru xi cavechu me ngajan ne, ndastu me tú yaja rë, ta suva xca ni yaja rë. Ngajan xi cachja Jesús tsëhë: ―‍Quihndë tsajin nixtin xi cuaquí tú riji. Hane ngutjen ne, caxintsen ya jan.
MAT 21:20 Hya xi cavëë xuta ladu rë me xi cuatjin camá ne, cafaharcun me Jesús cachja me cuitjin: ―‍¿Hacutjin cumá xi jemu xati caxintsen yaxujun jan?
MAT 21:21 Ngajan cafayangui Jesús tsëhë me cuitjin: ―‍Cuichjá quixë jain cojo nuju ta sá xi macjain nuju Nina hane hacuiin jo cjuatacun nuju ne, cumá nihñu sacuaha casahme cojo yaxujun vi. Hacuaha hisca sá xi cuinújun cojo ndetjún vihi ta: “Tihinxin tsëhë nguehe. Tihin tisihin ngajñi ndachacun.” Hane cuatjin cumá.
MAT 21:22 Yëjë ni xcusun ne, tu mé ni xi chjahyun cojo Nina hane sá xi macjain nuju xi sacú nuju ne, cuetjucaa quixi.
MAT 21:23 Hane xi vicuya Jesús ngajan ndatsen yungun xi matitjun ne, camatangun nahmi xi matitjun cojo xuta changá, hane cuitjin cavinenguise me Jesús: ―‍¿Yo cavitexa nuju xi nihñu xa vi? ¿Yo casuaxa nuju?
MAT 21:24 Hane xi cafayangui Jesús ne, cuitjin cachja me: ―‍Hacuaha cuinenguësë nuju ngu cjua, hane sá xi chjayunngun tsahan ne, sehe cuichjá cojo nuju yo cavitexa ná xi sahme xcusun vihi.
MAT 21:25 ¿Yo cavitexa rë Juan xi cuitenda me xuta? ¿Há Nina ne, o há tsajin ne, há xuta? ―‍Cuatjin cachja me. Sehe ngajan xi xuta xi cuacun jan ne, cavisiajmicjín me ngajñi rë me, cachja me cuitjin: ―‍Sá xi cuinújan xi Nina cavitexa me cha Juan vë ne, cjuinenguise naja me: “Sá cuatjin ne, ¿mé má camacjaain nuju cha?”
MAT 21:26 Hane sá xi cuinújan xi xuta cavitexa rë cha ne, tsajin yo hvë mé sahmi xuta cojo naja ta, tsëhë xi yëjë ni xuta ne, ha macjain rë me xi cha vëhë ne, profeta cha.
MAT 21:27 Hane xi cafayangui xuta jan tsëhë Jesús ne chja me ta: ―‍Hyiin. Ngajan xi hacuaha Jesús ne, cachja me ta: ―‍Hacuaha cuichjaan cojo nuju yo cavitexa ná xi sahme xá vihi.
MAT 21:28 ’Peru ¿mé nújun tsëhë cuentu vi? Ngu xihin ne, jo má cha quihndi rë me. Hya xi camá ne, cafehe cachja me cojo ngu cha cuitjin: “Tsan, tihin nihñi xá ngajan hiscan camatjë xca rë uva.”
MAT 21:29 Peru cha quihndi jan ne, cafayangui cha cuitjin: “¡Jéya! ¡Mijí cjuë́!” Peru hya xi camá ne, cavindeya cjuatacun rë cha hane quiji cha xcun xá jan.
MAT 21:30 Sehe hacuanitjin cachja nahmi jan cojo quihndi xi má jo, hane cuitjin cafayangui cha jan cachja cha: “Tatá, ngahan ne, cjuë́.” Peru quijiin cha.
MAT 21:31 Hindë ne, ¿jarë cha xi casahmi chihin cha xcusun xi meje rë nahmi rë cha? Ngajan cafayangui me ta: ―‍Cha xi tjun cachja. Sehe cachja Jesús cojo me cuitjin: ―‍Cuichjá quixë cojo nuju ta xuta xi cojo cjuamaña faha tujúnsa cojo chjuun xi viteña na yojo ran hitsë sa tjun cuisehen me gubiernu xi sahmi Nina xi cuma nuju ngayun,
MAT 21:32 ta cafehe Juan cavicuya me ngayun hacutjin nihñu xcun Nina hane camacjaain nuju cjua rë me. Peru xuta xi faha tujúnsa cojo chjuun xi viteña yojo rë na, me vëhë camacjain rë me. Ngayun ne, handasa cahyun yëjë xcusun vëhë ne, canindeyuun cjuatacun nuju; camacjaain nuju.
MAT 21:33 ’Nuhyun sa ngu ejemplu xi cuitjin fi: Ngu nai rë ngu ranchun matsejen ne, catsitjë me xcun nangui rë me xca rë uva. Hacuaha casahmi me hnchua xondyojo tahndee rë xitjë jan, hane ngajan ni ne, cafahnguiya me ngu ndyojotë hiscan cuaxë nandá rë uva jan. Hacuaha casahmi me ngu cahndë́ hiscan xi cavesun me ngu nachan ngahnga xi sesun xuta xi sahmi cuidadu xitjë rë me. Sehe casua me ngujo cha sahmixa xi cjuahacuenda cha. Sehe cjuaha tsë tsë me cojo cha. Hane hya xi camá ne, cavetju me quiji me ngu nangui xin.
MAT 21:34 Xi cavechú nixtin rë tútjë jan matsejen ne, sehe catsingatju me mosu rë me xi quiji cachja cha cojo cha xi fahacuenda xitjë jan xi sua cha hitsë tutjë xi satë rë me.
MAT 21:35 Peru cha xi sahmixa jan ne, cafaha cha mosu jan tu cavaja cha ngu mosu, catsiquehen cha ngu nga, hane cavetaha cha ndyojo xcun ngu nga.
MAT 21:36 Sehe catsingatju nga me mosu hacjahi xi hitsë sa cjín má cha tsëhë mosu xi tjun catsingatju me, peru cha xi sahmixa jan ne, ha chuva vëhë ni casahmi cha cojo yëjë ni.
MAT 21:37 ’Hya xi camá ne, hisca catsingatju me suva quihndi rë me ta catsingatahacacun me cuitjin: “Tuxa cjuaharcun rë cha, xi quihndi naha.”
MAT 21:38 Peru xi cavëë cha xi hatuxa quihndi rë me xi nduva ne, cavisiajmicjín cha cojo xicjin cha cuitjin: “Cha vihi ne, quihndi xi cjuahatsja xitjë vi cha. Niquen cha, cojo sa xi tsajan cuma nangui vi.” Cuatjin cavisiajmicjín cha.
MAT 21:39 Hya xi camá ne, cafaha cha cha quihndi jan quijicojo cha ndatsen cahndë́ jan, sehe catsiquehen cha cha.
MAT 21:40 ’Hindë ne, xi má nuju ne, ¿mé sahmi nai rë xitjë jan cojo cha xi cuacun fahacuenda jan?
MAT 21:41 Ngajan cafayangui me tsëhë Jesús cuitjin: ―‍Cjue tsiquehen me cha xi tsehen cjuatacun rë jan, sehe sua me xitjë jan cjuahacuenda jingu sa cha sahmixa, cha xi sua cha xitjë xi satë rë me hya xi cuechú nixtin rë. ―‍Cuatjin cafayangui me.
MAT 21:42 Sehe cachja Jesús cojo me cuitjin: ―‍¿Há cachutayuun xujun rë Nina xi chja cuitjin?: Ndyojo xi catsitjungui chjinevexo ne, vëhë ndyojo xi cavéjña tjun tjun yuju rë xihndënaña. Cuatjin casahmi Nina xi cuma. Hane xi chutsejen ngayaan ne, jemu chjahanrcun xahasen naja.
MAT 21:43 Vëhë xi cuichjá cojo nuju ta, chjahataha nuju cahndë́ xi cuisuhun gubiernu xi sahmi Nina, hane sua Nina xuta nanguixin cahndë́ jan, xuta xi sua me xi satë rë me.
MAT 21:44 Hane ndyojo jan ne, hya xi ngu xuta cjuinenguisun me xcun ndyojo vëhë matsejen ne, cuatëlanga rë me. Hane hya xi ndyojo vëhë cuinenguisun rë ngu xuta matsejen ne, ña cumá të me.
MAT 21:45 Hane xi cahndë nahmi xi matitjun cojo cha partidu fariseo ejemplu xi cachja Jesús tsëhë xuta vë ne, camachaya rë me xi condra rë me tichja Jesús.
MAT 21:46 Vëhë xi cavangui me chuva rë hacutjin cuma xi cjuaha me Jesús peru camaji ta tsacjun me xuta, ta xi má rë xuta ne, ngu profeta má Jesús.
MAT 22:1 Sehe quijinduju sa cachja Jesús ejemplu cojo rë me cuitjin:
MAT 22:2 ―‍Nina ne sahmi me cojo xuta xi cuisehen me gubiernu xi sahmi me sacuaha casahmi ngu xihin xi matitjun tsëhë ngu nangui hya xi casahmi me suhi xi cuixan quihndi rë me.
MAT 22:3 Hya xi casune hora rë, catsingatju me mosu hndixahan rë me quiji cha ndava xuta xi ha casua me camachaya rë xi nduva me cjuavixan, peru canduvaain me suhi.
MAT 22:4 Sehe catsingatju me hndixahan xi hacjahi ne, cuitjin cavitexa me: “Tinoje cojo xuta xi nduva cuitjin: Chutsujun ni tai, ha tjin chihin comida, ha cahme chu xi tetjo ná tsëhë suhi vi, hane cachjan yojo. Tjin chihin yëjë ni: nduvun ne, xinëësuhi.”
MAT 22:5 Peru casahmi cuendaain me cjua jan, hane quijixin me cafahacuenda me cjuacjintacun rë me. Ngu me quiji me xcun xitjë rë me, ngu nga me hiscan sahmi me negocio.
MAT 22:6 Hane yahnga nga me ne, cafaha me mosu hndixahan jan, choho casahmi me cojo cha hisca catsiquehen me cha.
MAT 22:7 Hya xi camá ne, me xi matitjun jan ne, cama cjan rë me. Catsingatju me sindadu rë me. Catsiquehen sindadu cha tsiquehen jan hane cavaca me nandya rë cha.
MAT 22:8 Hya xi camá ne, cachja nga me cojo hndixahan rë me cuitjin: “Ha tjin ndaja xcusun rë cjuavixan. Peru xuta xi cuinduva ne, hacuiin ndaja cjuatacun rë me ndajintjin xi nduva me.
MAT 22:9 Vëhë xi tihin hisca cruci ndiyatë ne, hane tu hacutjin cjín má xuta xi sacu ri, noje cojo yëjë ni me xi catinduva me catjinesuhi me.”
MAT 22:10 Ngajan xi quiji hndixahan jan hiscan ndiyatë rë nandya ne, hane yëjë ni xuta xi cavechutaha cha, sá xuta tsehen, o sá xuta ndaja ne, casahmi cha xi camatangun me quiji me suhi. Hane ña catsëxtin xuta ndava suhi.
MAT 22:11 ’Hya xi tijima suhi ne, xi cavisehen me xi matitjun jan xi scutsejen me xuta xi cafehe me, cavutsejen me ngu cha xi yuma jyihi cojo tsjian rë.
MAT 22:12 Ngajan xi cachja me cojo cha cuitjin: “Tai, ¿hacutjin cama xi cavisuhun nguehe handasa jemu yuma jyihi tsjian nuju?” Peru cavejñajyuu cha vë cachjaain cha.
MAT 22:13 Sehe cachja me xi matitjun jan cojo hndixahan rë me cuitjin: “Tetuhunhñu tsja cha cojo ntsacu cha sehe naxun cha ndatsen hiscan jñu. Ngajan hiscan hincha xuta xi tijihnda me, hacuaha titsijanerii me nehñu me.”
MAT 22:14 Cjín má me xi cachjinda rë xi nduva me, peru chuva má me xi tuxijijñi rë.
MAT 22:15 Hya xi camá ne, cha partidu fariseo ne, cavisiajmichihin cha casacuse rë cha ngu cjuacjintacun xi tsavi fi xi cjuayangui Jesús tsëhë.
MAT 22:16 Hya xi camá ne, catsingatju cha ngujo cha ladu jan, cojo cha ladu rë Herodes ne, cachja cha cojo Jesús cuitjin: ―‍Maestro, ngayin ne, hyin ta ngayun ne xuta ndaja ngayun. Vicuyun ndiya rë Nina cojo cjuaquixi. Ha tuxa cjuaquixindaja xi nújun, ha ndasa cojo xuta nchina visiajmu o sá cojo xuta yuma.
MAT 22:17 Xi má nuju ne, mé xi ndaja cuinújan. Sacuaha ley rë Moisés ne, ¿há tsingatihi xi cuechjen tujúnsa naja cojo César, me xi matitjun, o há tsingatiin?
MAT 22:18 Peru Jesús ne, tsëhë xi ha vacun rë me xi jemu choho xcusun rë cha ne, cachja me cojo cha cuitjin: ―‍¿Mé má cuatjin meje chjuhunchuvun ná? Xuta ndacha ngayun.
MAT 22:19 Ningacun ná ngu tujún jan scutsejen. Hane canduvacojo cha ngu tujún tyava.
MAT 22:20 Sehe cavinenguise me cha cuitjin: ―‍¿Yo xcusun rë hacuaha yo ñihi rë xi quitaha xcun tujún vë? ―‍Cuatjin cavinenguise Jesús.
MAT 22:21 Hane cha xi cuacun vë ne, cuitjin cafayangui cha: ―‍Tsëhë César. Sehen ngajan xi Jesús ne, cuitjin cachja me cojo cha: ―‍Cuatjin ne, tuhun rë César xi tsëhë me, hane tuhun rë Nina xi tsëhë me.
MAT 22:22 Hya xi cahndë cha cjua xi cachja Jesús ne, quijircun rë cha, sehe cavetju cha quiji cha tsëhë cahndë́ xi tacun me.
MAT 22:23 Sehe nixtin hya ne, cafehe tjengui Jesús cha partidu saduceo, cha xi vicuya cjuachacun xi chja xi xuta xi cahme ne, cuyaain nga me cjuahñu. Sehe cavinenguise cha Jesús cuitjin:
MAT 22:24 ―‍Maestro, Moisés ne cachja me ta: “Sá xi ngu xihin cueya, hane tsajin rë chjuun rë hisca ngu quihndi ne, hntsë nima vëhë ne, meje rë xi cjuaha rë chjuun cahan vëhë, cojo sa xi sacú rë na quihndi xi cuma sacuaha quihndi rë nima vëhë.”
MAT 22:25 Quihndë ne, siu yatu cha cojo hntsë cha. Hane cha tjun ne, cafaha cha chjuun. Peru cahme cha, hane tsëhë xi tsajin quihndi rë cha, hntsë nima vë ne, cafaha cha chjuun jan.
MAT 22:26 Hane cuanitjin cavatju cha xi majo cojo cha xi majyan hisca chuva ngu chuva ngu cha hisca cojo cha xi má yatu.
MAT 22:27 Hane xi cajnetaha ne, sehe cahme chjuun jan.
MAT 22:28 Quihndë ne, hya xi cuya yëjë nima cjuahñu ne, ¿jarë cha xi cuacún vë xi chjuun rë cha na xi cjuaquixi ta, tsëhë xi yëjë ni xi yatu cha ne, camá chjuun rë cha na? ―‍Cuatjin cachja cha.
MAT 22:29 Ngajan xi cachja Jesús cojo cha ta: ―‍Ngayun ne, cuaaintjin xi nújun, tsëhë xi vijnii rcun cjua xi chja xujun tsëhë Nina, hacuaha hyuun xi Nina ne, jemu hñu cjuatacun rë me.
MAT 22:30 Ta hya ne, cumaji cjuavixan hacuaha tsinguixaain xicjin me hya ta, sacuaha ángel xi siu ngahnga ne, cuatjin cuiyuju me.
MAT 22:31 Quihndë xi tinújun tsëhë nima xi cuya cjuahñu ne, cuinenguësë nuju ne, ¿há cjëë chutayun cjua xi cachja Nina cojo nuju xcun xujun rë me tsëhë nima xutachanga nuju xi cuicun vi?
MAT 22:32 “Ngahan xi Nina rë Abraham ngahan, Nina rë Isaac hacuaha cojo Nina rë Jacob.” Cuatjin cachja Nina. Peru ndaja hyun ta Nina ne, hacuiin Nina rë nima ta Nina rë xuta xi quicun me.
MAT 22:33 Hya xi cahndë xutacjín cjua jan, jercu tu quijircun rë me cjua xi catsicuya Jesús.
MAT 22:34 Peru cha partidu fariseo xi camachaya rë cha xi catsinguejyu Jesús cjua rë cha partidu saduceo ne, camatangun cha cojo xicjin cha,
MAT 22:35 hane sehe cavitexa cha ngu maestru rë ley xi cavinenguise cha me cjua vi cojo sa xi cuma cjuahachuva cha me. Cuitjin cachja maestru jan:
MAT 22:36 ―‍Maestro, tsëhë yëjë ni cjua xi cavitexa Nina naja xcun xujun ley ne, ¿jarë artículo xi hitsë sa matitjun?
MAT 22:37 Ngajan xi cafayangui Jesús cuitjin: ―‍“Meje rë xi nihmutacún Nina naja cojo nguñajatacún, cojo yëjë ni xahasen nuju, cojo yëjë ni ngahñu nuju, cojo yëjë ni cjuatacun nuju.”
MAT 22:38 Cjua vë xi hitsë sa venguichji rë ne, hitsë sa matitjun xi cumá rë yëjë ni cjua rë ley.
MAT 22:39 Hane xi má jo ni: “Meje rë xi nihmutacún xingun sacuatjin hmutacún suvun yojo nuju.”
MAT 22:40 Tsëhë jo artículo vi ne vetjun sa yëjë cjua rë ley xi catsihindu Moisés cojo yëjë cjua xi catsihindu profeta. ―‍Cuatjin cachja Jesús cojo cha.
MAT 22:41 Hya xi ha camá tangun cha partidu fariseo ne, sehe cavinenguise Jesús cha cuitjin:
MAT 22:42 ―‍¿Mé nújun? Mesías o sa Cristu ne, ¿yo tjë rë má me? Cafayangui me ta: ―‍Tjë rë David má me.
MAT 22:43 Sehe cachja Jesús cuitjin: ―‍Sá xi quixi xi cuatjin ne, ¿hacutjin cavátju xi suva David ne, hya xi catsihindu me cjua xi cachja Hasen tsëhë Nina cojo rë me, “Nai” cachja me tsëhë Mesias? ta cuitjin catsihindu me:
MAT 22:44 Nina ne, cachja me cojo Nai naha cuitjin: “Tinechin nguehe ladu quixi naha, hisca hya xi yëjë ni xi sahmi ri condra ne, cuiyúju ngahan ngahma gubiernu riji.”
MAT 22:45 Quihndë ne, sá xi suvá David chja me xi Nai rë me má me xi tsingatju Nina ne, ¿hacutjin má ne xi hacuaha tjë rë me má me vëhë?
MAT 22:46 Ngajan camá xi ndastu mé cafayangui cha, hacuaha hisca hya ne, tsacjun cha cjuinenguise sa cha me.
MAT 23:1 Hya xi camá ne, cachja Jesús cojo xutacjín hacuaha cojo xuta ladu rë me cuitjin:
MAT 23:2 ―‍Cha xi vicuya cjuachacun cojo cha partidu fariseo ne, casatë rë cha xá rë ley xi casatë rë Moisés hatsëë.
MAT 23:3 Vëhë xi meje rë xi nuhyun cjua rë cha hacuaha nihñuchuhun yëjë ni xi vicuya cha; peru nihñuu sacuaha sahmi cha ta, ndaja chja cha jan peru hacjahi sahmi cha.
MAT 23:4 Cjua xi vicuya cha jemu chja sahmi chihin xuta ta tangun sacuaha ngu chaha xi hai vaniji tyja rë me, peru suva ni cha ne, visecuaain cha me hisca hitsë.
MAT 23:5 Yëjë ni xi sahmi cha ne, sahmi cha ngatsë rë xi scuëë xuta cha, sahmihnga xuta cha. Vatjutaha cha chuva rë xujun xi chja ley xi setaha xten xuta, cojo tsjahya xi tsingaqui cha ntsacu tsjian rë cha.
MAT 23:6 Hacuaha jemu chuya rë cha hya xi satë rë cha cahndë́ xi matitjun tsëhë ngu ndava suhi o tsëhë yungun.
MAT 23:7 Hacuaha hora xi fi tsujyihiya cha, jemu chuya rë cha xi cuatjin fi xuta chja me nina cojo cha ngajan ngajñi ndetsin, maestro chja xuta tsëhë cha.
MAT 23:8 ’Peru ngayun ne, xi cuichjaain xuta tsujun Maestro ta ngu ni me xi Maestru nuju, hane ngajñi nuju ngayun ne, xingun má yun.
MAT 23:9 Hacuaha xuta ngasunhndë ne, canujuun tsëhë me xi Nahmi ta ngu ni me xi tacun me ngahnga ne, hacui Nahmi nuju.
MAT 23:10 Cuanitjin ne, xi cuichjaain xuta tsujun Nai ta ngu ni me xi Nai nuju, me vëhë ne, Cristu.
MAT 23:11 Hane ngu ngayun xi meje cumatitjun ngayun ne, sahmi me sacuaha ngu mosu rë xicjin.
MAT 23:12 Tsëhë xi yëjë xuta xi sahmi yehe suvá me yojo rë me ne, cuechu nixtin xi Nina ne, tsinguijne me cjuatacun rë. Hane xuta xi tsinguijne suvá me cjuatacun rë me, hya ne, Nina ne, sahmi yehe rë me.
MAT 23:13 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. ¡Xuta ndacha yun!, ta vechjun tingotjo hisca visehen gubiernu xi sahmi Nina cojo sa xi cumaji cuisehen xuta. Tivisuun suvun, hacuaha tituun cahndë́ xi cuisehen xuta xi meje cuisehen me.
MAT 23:14 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. Jemu cjín tujún naxun yachjin cahan xi hisca ndava na tsajin. Hane hya xi nújunyumun ne jemu nduju hora nihñu, peru hacuiin nguñaja tacun nújun ta, vindachun ni. Vëhë xi hitsë sa jyë cuma castigu xi cumá nuju.
MAT 23:15 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. ¡Xuta ndacha yun! ta cuangun jingujyë ni ngasunhndë xi sacu ngu ni me xi cuisehen ladu nuju. Peru hya xi cavicuyun rë me, hitsë sa jyë castigu satë rë me xi cuma nuju.
MAT 23:16 ’Jemu chojyihi tsujun, ¡xuta rcá yun xi meje ningacun ndiya! Nújun ta: “Sá xi tuhun cjua nuju hane cuinújun ta: Quixi, vëë yungun xi matitjun ne, sahmii ngujyë xi nihñu chihin cjua nuju, peru sá xi tuhun cjua nuju cojo oro xi jiya yungun xi matitjun ne, vëhë sahmi ngujyë xi tuhun xi canújun.”
MAT 23:17 ’¡Ngarca ni ngayun! ¡Rcá yun! ¿Jarë xi meje rë xi chjaanrcun? ¿Há oro jan? o sá tsajin ne, ¿há yungun xi matitjun? ta, ngatsë rë yungun ne, vëhë xi camanchacun oro xi hincha cahntsua.
MAT 23:18 Hacuaha nújun ta: “Sá xi tuhun cjua nuju hane cuinújun xi ngasunscun yungun cuma testigu ne, sahmii ngujyë xi nihñu chihin cjua nuju, peru sá xi nújun ta cuatjo xcun ngasunscun jan cuma testigu ne, sehe sahmi ngujyë xi tuhun xi canújun.”
MAT 23:19 ¡Rcá yun! ¿Jarë xi meje rë xi chjaanrcun? ¿Há cuatjo jan? o sá tsajin ne, ¿há ngasunscun ta, tsëhë xi xcun vëhë ngajan camachacun cuatjo?
MAT 23:20 Vëhë xi yo xi cuisiajmi hane cuichja me xi vëë ngasunscun ne, hacuaha tichja me xi vëë yëjë xi hinchasun xcun;
MAT 23:21 hacuaha yo xi cuisiajmi hane cuichja me xi vëë yungun xi matitjun ne, hacuaha tichja me xi vëë Nina xi tacun me ngajan.
MAT 23:22 Hane yo xi cuisiajmi hane cuichja me xi vëë ngahnga ne, hacuaha tichja me xi vëë cahndë́ hiscan sahmi Nina gubiernu hane hacuaha xi vëë Nina xi sahmi me.
MAT 23:23 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. ¡Xuta ndacha yun! Ngayun ne, handasa tuhun diezmu nuju hisca cojo nchurca cojo ruda cojo yëjë sa xcusun ndeya ne, peru nihñucuenduun xi nihñuchihin artículo rë ley xi hitsë sa meje rë Nina xi nihñuchuhun sacuaha xi chja cuitjin: nihñu hacutjin xi cjuaquixi cojo xingun, sacuaha xi mayuma nuju xingun, hane sacuaha xi ngu ni má cjua nuju; hitsë sa ndaja sa canihñu yëjë xcusun vihi, hane canihñucuendun tsëhë xcusun xi canihñu.
MAT 23:24 ¡Ngayun ne xuta rcá yun xi meje ningacun ndiya! Nihñu sacuaha sahmi ngu xuta xi tsicaha me vinu rë me, sehe cuetjuxin ngu chu xihi xi jiya ngajñi rë. Peru cuma tsinguijne jingu me ngu chu camellu.
MAT 23:25 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. ¡Jo xcun jo ntsuvun yun! Nihñu tyjahi táha ngaxtun ngu vasu cojo ngu tyuva, peru cahntsua ne, quitsë camahani rë cjuachëjë cojo cjuatacun xi nimuju yëjë ni xcusun.
MAT 23:26 Fariseo rcá, titjun nihñu tyjahi cahntsua vasu cojo tyuva jan ta tsëhë xi cuatjin ne, hacuaha cuma tyjahi táha ngaxtun.
MAT 23:27 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. ¡Jemu ndacha yun! Ngayun ne, tangun cun cojo ngu tsjun xi cahvi rë xujñu, ta ndaja tsejen tsjun jan, peru cahntsua ne, quitsë rë cojo ninda rë nima cojo yëjë ni xi jehndu.
MAT 23:28 Cuanitjin cun ngayun ta xi vutsejen xuta yun, tsejen sacuaha xuta ndaja tyjahi yun, peru cahntsua xahasen nuju ne, quitsë rë cojo cjuandacha cojo cjuatsehen.
MAT 23:29 ’Jemu chojyihi tsujun, ngayun cha xi vicuya cjuachacun cojo ngayun cha partidu fariseo. Ngayun ne, nindujun tsjun ndacun tsëhë yëjë ni nima profeta, hacuaha nihñu ndacun tsjun tsëhë nima xi tsajin xi cun rë me xcun Nina.
MAT 23:30 Hacuaha ngayun nújun ta: “Sá xi ngayin cavinechin nixtin hatsëë xi quicun xutachanga niji ne, cavisecuiin rë me xi tsiquehen me profeta xi cuacun vë ta cumacjain niji.”
MAT 23:31 Quihndë ne, cahyun ta cojo cjua nuju vë, tuhun testigu condra nuju ta tsëhë xi ngayun ne hatuxa quihndi rë xutachanga nuju ngayun, hane me vëhë ne xi catsiquehen me profeta jan.
MAT 23:32 Quihndë ngayun ne, ¡tangun cuéchun chuva rë cjuatsehen xi casahmi xutachanga nuju!
MAT 23:33 ’Sacuaha cun yë chacun cuatjin cun ngayun, ¡quihndi rë yë yun! ¿Hacutjin cumá cuetjuntjun tsëhë castigu xi má hasen rë nima?
MAT 23:34 Vëhë xi tsingátju sa nuju profeta cojo xuta xi quicun cjuatacun rë me cojo maestru ne, hane ngujo me ne, ngayun ne nicuhun me hacuaha cuetuhun me xcun cru. Ngujo nga me cujun rë me ngayun ngajan ndatsen yungun hacuaha tuhun rë me cjuañihi xi cuatju me sehe cuanga me ngu nandya ngu nandya.
MAT 23:35 Cojo chuva vëhë ne, chanujujyun cjuaveya rë yëjë ni xuta xi tyjahi cjuatacun rë me xi cahme nguehe ngasunhndë. Chanujujyun cjuaveya rë xutachanga naja Abel cojo hisca cjuaveya rë xutachanga naja Zacarías quihndi rë Berequías, me xi canicuhun tiña ngasunscun hiscan ndatsen rë ndava Nina.
MAT 23:36 Cuichjá quixë cojo nuju ta tsëhë cjuaveya rë yëjë ni me vë chanujujyun ngayujun ni xi nechun quihndë.
MAT 23:37 ’¡Ngayun xuta Jerusalén, ngayun xi cojo ndyojo nicuhun profeta xi tsingatju Nina ngajñi nuju! ¡Jemu choho má ná tsujun! ¡Mé hitsë ndiya xi meje scávëvaha nuju sacuaha javëvaha ngu nisë quihndi rë chu xi cuincha chu ngahma tyjunga rë chu! Peru ngayun ne, mijí nuju.
MAT 23:38 Chutsujun ni, Nina ne, catsismicacun me ngayun.
MAT 23:39 Cuichjá cojo nuju ta chuun camahani ná hisca hya xi cuechú nixtin xi cuinújun cuitjin: “¡Catsinchacun Nina me xi titsingatju me ngajñi naja!” ―‍Cuatjin cachja Jesús.
MAT 24:1 Hora xi tivetju Jesús tsëhë ndatsen yungun xi matitjun jan xi cjui xin me ne, ngajan cafehe xuta ladu rë me caveyanangui me hane catsingacun tsja me xi yungun jan ne, jemu ndajyihi.
MAT 24:2 Hya xi camá ne, cuitjin cachja Jesús tsëhë yungun jan: ―‍Sacuaha yëjë ni ndihya vihi xi chutsujun tsëhë yungun ne, cuichjá cojo nuju ta cuechú nixtin xi hisca ngu ndyojo ndacun xi cuicun vi ne, tsajin xinchasuncoo xicjin ta cjuë yëjë cuixujne. ―‍Cuitjin cachja Jesús.
MAT 24:3 Xi cafë cachja Jesús cuitjin ne, sehe cafehe me tiña rcu Ndetjún Olivu. Hane xi tacun suvá me, ngajan cafehe xuta ladu rë me, cavinenguise rë me cuitjin: ―‍¿Mé nújun? ¿Janihya cuetjucaa xcusun vëhë ni? ¿Hane hacutjin cuma sacú niji cjuaquixi xi ha tivechú nixtin xi nduvun ngayun tivechú hora xi cjuë nixtin rë ngasunhndë vi?
MAT 24:4 Ngajan xi cachja Jesús cojo rë me cuitjin: ―‍Nechun cuidadu, cojo sa xi hacuiin cuma ndacha ngayun ta,
MAT 24:5 tsëhë xi jemu cjín xuta cuetjucaa me xi cuichja me xi hacui me xi catsingatju Nina me. “Ngahan Cristu”, cuichja me. Hane cuatjin jemu cjín xuta cumacjain rë me cjuandacha rë me xi cuacun vë.
MAT 24:6 Hacuaha hya xi cumachaya nuju cjua xi jemu yehe si tijima ngu nación o sá xi tjin cjuacjintacun xi jemu yehe si nduva ne, xicarcuun ta, hatuxa tjin xi titjun xcusun vëhë cuma. Peru hacuiin ha hya cuijnetaha nixtin vihi.
MAT 24:7 Hacuiin hya cuma ta, titjun ne, scaan xuta ngu nación cojo jingu sa nación. Hacuaha scaan xuta ngu nandya cojo ngu nga nandya. Hacuaha jemu cjín cahndë́ xi cuma cuechu jindya. Jemu cjín cahndë́ xi cjuani nangui.
MAT 24:8 Peru xi cuatjin cumá yëjë ni xcusun vihi ne, sehe ntsacu tivetsihin cjuañihi xi cuatju xuta.
MAT 24:9 ’Sehe cjuaha nuju xuta, cjuecojo nuju me xi cuatjun cjuañihi, xi tsiquehen me ngayun. Hacuaha jemu chohovëë xuta rë yëjë nangui yun ngatsë naha.
MAT 24:10 Hya xi cumá ne, cjín xuta tsismicacun me ladu naha, hane tsindeya me cjuatacun rë me. Sehe cojo cjua ni cuiteña xicjin me.
MAT 24:11 Hacuaha jemu cjín profeta xi vindacha me xuta cuetjucaa me. Hane cuatjin jemu cjín xuta cumacjain rë me cjuandacha rë me.
MAT 24:12 Hacuaha cjuatsehen ne, jemu cumayehetaha. Vëhë xi hya ne, cumachuva cjuahmutacun xi tjin rë xuta.
MAT 24:13 Peru jarë ngayun xi scaa nuju cojo cjuacjintacun vëhë hisca xi cueyun ne, cuechun xcun Nina.
MAT 24:14 Hane xuta ne, cjue me jingujyë ni ngasunhndë cuichja me cjuandajyihi vihi tsëhë gubiernu xi sahmi Nina, xi cumachaya rë xuta ngasunhndë. Hane hisca xi cuma chihin yëjë xcusun vëhë cuijnetaha nixtin vihi.
MAT 24:15 ’Profeta Daniel ne, catsihindu me xcun xujun rë Nina tsëhë ngu xcusun tsehen xi tsinguetsun. Cuechún nixtin xi cuejña vëhë xu cahndë́ ximinchacun ―‍xuta xi vutaya cjua vi, catjahacuenda me cjua―‍. Hya xi cuatjin tsejen ne,
MAT 24:16 hya ne, xuta xi siu yëjë nandya tsëhë distritu Judea ne, catanga me hane catangahma me hiscan ndetjún.
MAT 24:17 Hacuaha jarë me xi hinchasun me rcu ndava me ne, mé tsëhë me xi siu cahntsua ndihya ne, mijí rë xi cjuejaha me.
MAT 24:18 Hacuaha ha chuva vëhë ni ne, xuta xi siutaha me nguijña ne, mijí rë xi cuya cjuejaha me tsjanga rë me ndava me.
MAT 24:19 ¡Jemu chojyihi tsëhë yëjë yachjin xi hinchahma quihndi rë cojo yëjë me xi tjin rë quihndi vaqui xi cojo me cuanga me nixtin hya!
MAT 24:20 Chjahyun rë Nina xi cjuañihi vëhë ne, hacuiin cuinduva nixtin chan hnchan o sá nixtin xi chjahájenda rë ta,
MAT 24:21 tsëhë xi cjuañihi jyë xi cuma ne, ngu cjuandya jyë xi cjëë camahani camá hisca ntsacu cavetsihin ngasunhndë. Hacuaha cuyaain cuma nga.
MAT 24:22 Jemu jyë cjuañihi jan, sá tsajin xi ha camachuva nixtin rë cjuañihi vëhë ne, hisca ngu xuta ne, cuetjintjiin me. Peru ngatsë rë cjuahmutacun xi tjin rë Nina cojo xuta xi cavaxijin me xi cuma ladu rë me ne, casahmichuva me nixtin vëhë.
MAT 24:23 ’Hya ne, sá xi cuichja yahnga me cojo nuju ta: “Cuajyihi Cristu nguehe”, o sá “Cuajyihi me ngajan.” Xi camacjaain nuju cjua jan ta,
MAT 24:24 tsëhë xi nixtin hya ne, jemu cjín xuta cuetjucaa me xi cuichja me cuindacha me ta Cristu me o sá profeta me. Hacuaha jemu sahmi me cjuarcun tsëhë xi meje cuindacha me xuta, hisca cojo xuta xi cavaxijin Nina.
MAT 24:25 Quihndë ne cojo chaja sa xi cuechu nixtin vëhë ne, ngahan ne, ha cachjá cojo nuju.
MAT 24:26 Vëhë xi sá xi cuichja yahnga me cojo nuju ta: “Jemu xín tsëhë nandya tacun me”, hacuiin cuangun cojo me. O sá xi cuichja me ta: “Ndihya cahnchun tacun me”, camacjain nuju tsëhë me ta,
MAT 24:27 sacuaha sahmi hasen ndihichuhún xi ha tu ñahñu sahmi hasen rë jingujyë ni ngahnga, hiscan ladu vetjucaa tsuhi hiscan ladu vetje tsuhi ne, cuatjin ha tu ñahñu scutsejen ná yëjë ni xuta hya xi cuinduvá nga ngahan xi Quihndi rë Xuta jain.
MAT 24:28 Cuatjin cuma nixtin hya sacuaha chja cjua ta hiscan jiña chu xi cahme ne, hacuaha ngajan matangun chu lote.
MAT 24:29 ’Ngutjen xi camá cavatju cjuañihi jan ne, cuinduva nixtin xi cjuë ndavá rë tsuhi. Hacuaha sá ne, ha quihndë suaain ndavá rë. Hane niñú ne, cuixu tsëhë ngahnga. Hisca ngahñu xi tjin ngahnga ne, cjuiniyaya.
MAT 24:30 Hya xi camá ne, ngajan cuma tsejen seña tsëhë Quihndi rë Xuta Jain. Hane yëjë xuta xi siu ngasunhndë ne, jindayava me. Sehe hya scuëë xuta ngahan, xi Quihndi rë Xuta Jain ngahan, xi cuinduvá ngajñi rë yufí cojo jemu jyë ngahñu, hisca seti hisca vatë jyihi ngahan xi cuinduva.
MAT 24:31 Hya ne, tsingátju ángel naha, hane xi ndaja hñu cuinuhya rë xi fane ngu tyjo, sehe cjuejaha rë yëjë ni xuta naha xi cavaxejen, sahmitangun rë me tsëhë jinguyëjë ni ladu ngasunhndë.
MAT 24:32 ’Quihndë ne, ningatuhuntacún tsëhë ejemplu xi sua yaxujún: Hya xi cuetsihin cumá xcuen tsja rë tsëhë xi ha jemu camatiña cuetsihin cuetjusehen ne, ngayun ne, ha hyun ta ha jemu camatiña chan tsin.
MAT 24:33 Hacuaha chuva vëhë ni ne, hya xi chun xi cuetsihin cumá yëjë xcusun xi cachjá cojo nuju vë ne, vëhë sua cumachaya nuju xi ha camatiña nixtin rë, hisca meje cumá.
MAT 24:34 Cuichjá cjuaquixi cojo nuju ta xuta xi siu nixtin vihi ne siu cuaha me hya xi cuetjucaa xcusun xi cachjá cojo nuju jan.
MAT 24:35 Ngahnga cojo nguehe ngasunhndë ne, hatuxa cjuë. Peru hisca ngu cjua naha ne, tsajin xi cuetjincaain.
MAT 24:36 ’Sacuaha nixtin xi cuetjucaa cjuatacun vëhë ne, tsajin yo vëë rë. Hisca víin ángel xi siu ngahnga. Hisca hveen ngahan xi Quihndi rë Xuta Jain. Suva tutu ni Nina nahmi naja ne, me vëhë xi vëë me.
MAT 24:37 ’Sacuaha casahmi xuta hya xi cavéjña xutachanga naja Noé ne, hacuanitjin ni sahmi xuta hya xi cuinduva Quihndi rë Xuta Jain.
MAT 24:38 Tsëhë xi hya ne, xi chaja sa casesuntë nandan ngasunhndë ne, jine tjihvi xuta, vixan me, tsinguixan me quihndi rë me. Cuatjin casahmi cuaha me hisca nixtin xi cavisehen Noé cahntsua barcu.
MAT 24:39 Hacuaha camachayiin rë me hisca xi casesuntë nandá quijicojo rë yëjë ni me jan. Hacuaha cuanitjin ni sahmi xuta hya xi cuinduvá ngahan xi Quihndi rë Xuta Jain ngahan.
MAT 24:40 Jo cha ne, cuiyujutaha cha nguijña. Ngu cha ne, chjaháxin rë cha, hane cha xingu jan ne, cuejña cha.
MAT 24:41 Hacuaha jo nga yachjin ne, cuiyujutaha na coho na. Ngu na ne, chjaháxin rë na, hane na xingu jan ne, cuejña na.
MAT 24:42 ’Vëhë xi nechun cuidadu. Hacuaha ningascun rë cjuatacun nuju ta ngayun ne, hyúun janihya cjuehe Nai nuju.
MAT 24:43 Hacuaha meje rë xi cumachaya nuju cjuatacun vihi: sá xi nai rë ngu ndihya ha machaya rë me hora xi cuinduva cha chëjë ndava me ne, suaain me cahndë́ xi scuxaha cha ndava me ne, sehe tsichëjë cha.
MAT 24:44 Hacuanitjin ni meje rë xi ngayujun ni ngayun ne, tuhun chjinu yojo nuju ta, tsëhë xi hora xi ningatuuntacún xi cjuëhë ngahan xi Quihndi rë Xuta jain ngahan ne, hora vëhë cjuëhë.
MAT 24:45 ’¿Yo ngayun xi nihñu sacuaha sahmi ngu mosu hndixahan xi jemu quicun cacun xi sahmichihin yëjë ni hacutjin xi meje rë nai rë? Ngu hndixahan xi cjuahaxa xi cjuahacuenda rë yëjë sa hndixahan xi hora tjin sua xi sinë.
MAT 24:46 Jemu ndaja tsëhë ngu hndixahan jan xi tisahmi tutjin xi casuaxa rë nai rë.
MAT 24:47 Cuichjá cojo nuju cjuaquixi ta, nai rë hndixahan vëhë ne, suaxa me hndixahan vëhë xi hacuaha cjuahacuenda yëjë sa xcusun xi tjin rë me.
MAT 24:48 Peru cuejñaa ne xi hndixahan vëhë ne, jemu choho xcusun rë me, tsingataha cacun cojo cjuatacun rë cuitjin: “Nai naha ne, tijima tafi sa xi cjuehe me.” Cuatjin tsingataha cacun.
MAT 24:49 Sehe cuetsihin cuaja rë hndixahan xi yahnga jan, hacuaha cuatjutaha sinë cuihi hisca cuma chihi.
MAT 24:50 Peru cuechú ngu nixtin xi tsajin tacunya hndixahan vëhë, ngu hora xi hisca hvíin ne, hya cjuehe nai rë.
MAT 24:51 Hane jemu jyë castigu sahmi me, sehe tsingatju me cuatju tangun cjuañihi cojo xuta xi jo xcun jo hntsua me. Ngajan ne, jemu squihnda me, hacuaha tsijanerii me nehñu me.
MAT 25:1 ’Hya xi cuechú nixtin xi sahmi Nina gubiernu ne, cumá sacuaha cavatju të na nixti xi cafaha na ndihi tsëhë aceite, sehe quiji na xi cuejñaya na cha xi cuixan hora xi nduva cha.
MAT 25:2 Hya xi camá ne, hñu na jan ne, rcu taja na, hacuiin ndaja tsingatahacacun na. Peru hñu nga na jan ne, ndaja quicun na.
MAT 25:3 Cavejña xi na rcu taja ne, hora xi cafaha na ndihi ne, cafaain na aceite xi cuya cuincha na tsëhë.
MAT 25:4 Peru sacuaha na quicun jan ne, cafaha na ndihi ne, hacuaha xin cafaha na aceite.
MAT 25:5 Hane xi ma tafi xi nduva cha xi cuixan jan ne, cafaha rë na nijña ne, caviyujufë na.
MAT 25:6 Hya xi camá ne, sacuaha vasen nixten ne, canuhya rë xi jindaya xuta ta: “¡Nduva cha xi cuixan! Tangun tjengun cha xi cuanguncujun.”
MAT 25:7 Xi cuatjin canuhya rë ne, cavisatjenhnga na nixti jan ne, cavëhëchjine na ndihi jan.
MAT 25:8 Hya xi camá ne, cachja na xi taja rcu cojo na quicun cuitjin: “Tuhun niji hitsë aceite nuju ta meje cjuë xi tsijin ne, coho ndihi niji.”
MAT 25:9 Peru cafayangui na quicun cuitjin: “Cumaji tihin nuju ta sá cuatjin ne, cuechutaain tsëhë xi cuma meje nuju hacuaha tsëhë xi cuma meje niji. Hitsë sa ndaja ne, tangun hiscan xi xteña ne, hiscan ngajan chuhun.”
MAT 25:10 Cuatjin camá xi hora xi quiji cavatsë na jan aceite ne, cafehe cha xi cuixan. Hane na xi siuya ne, cojo na cavisehen na ndava suhi. Sehe casechjahñu tingotjo ndihya.
MAT 25:11 Hya xi camá ne, cafehe na nixti xi quiji jan, hane cajindaya na tingotjo ndihya cuitjin: “Tatá, chuxuhun tingotjo tsijin.”
MAT 25:12 Peru me vëhë jan ne, cafayangui me cuitjin: “Hveen jani nduvun ngayun.”
MAT 25:13 ’Vëhë xi nechun cuidadu, hacuaha ningascun rë cjuatacun nuju ta ngayun ne, hyúun mé hora, hyúun mé nixtin xi cumá.
MAT 25:14 ’Cuejña ne xi ngu xuta jan ne, quiji me ngu nangui cjin. Hane chaja sa xi cjue me ne, cajindaya me mosu hndixahan rë me casua me xi cuejñatsja cha xi tsëhë me.
MAT 25:15 Hora xi casua me ne, ngu cha, casua me cha hñu mil tujún, hane ngu nga cha ne jo mil, hane ngu nga cha ne ngu mil. Cuatjin casua me cha hatucutjin tsejen xi chutaha cha. Hya xi camá ne, cavetju me quiji me.
MAT 25:16 Ngajan camá xi cha xi cafahatsja cha hñu mil tujún ne, casahmi cha ngu negocio. Hane ngajan cavesun rë cha hñu cuatjin sa.
MAT 25:17 Hacuaha cha xi cafahatsja cha jo mil tujún ne, cuanitjin ne cavesun rë cha jo cuatjin sa.
MAT 25:18 Peru cha xi cafahatsja cha ngu mil tujún tsëhë nai rë cha ne, quiji cha cafahangui cha ngu ngojo nangui. Hane ngajan caveyanijihma cha tujún jan.
MAT 25:19 ’Hya xi jercu cavatju nixtin xi quiji nai jan, cavuya cafehe me, cajindaya me cha xi sua cuenda cha tsëhë tujún jan.
MAT 25:20 Ngajan xi cha xi cafahatsja cha hñu mil tujún ne, yaha cha hñu mil sa. Hane cachja cha cojo me ta: “Tatá, hñu mil catuhun ná, hindë ne, cavesun ná hñu cuatjin sa.”
MAT 25:21 Ngajan xi nai rë hndixahan jan ne, cuitjin cachja me cojo: “Ndatjin ri. Ngaye ne, ngu hndixahan ndaja ngaye. Ngatsë rë xi jemu ndaja canihñi xa lihndi vëhë ne, hitsë sa quisun xa xi sua ri. Quihndë ne, tehe cjuasua xahasen riji cojo ná.”
MAT 25:22 Sehe cafehe cha xi cafahatsja cha jo mil tujún. Hane cachja cha cuitjin: “Tatá, jo mil catuhun ná, hindë nguehe tacun tsujun jo cuatjin sa xi cavesun ná.”
MAT 25:23 Ngajan cachja nai jan cuitjin: “Ndatjin. Ngaye ne, ngu hndixahan ndaja ngaye. Ngatsë rë xi jemu ndaja canihñi xa lihndi vëhë ne, hitsë sa quisun xa xi sua ri. Quihndë ne, tehe cjuasua xahasen riji cojo ná.”
MAT 25:24 ’Hacuaha cafehe cha xi cafahatsja cha ngu mil tujún. Hane cuitjin cachja cha: “Tatá, ha machaya ná xi ngayun ne, jemu hñu cjua nuju. Nangun xitjë handasa hacuiin ngayun xi canitjun. Ngayun ne, hacjahi sahmi xa ne, ngayun chjuhunntsun chji rë.
MAT 25:25 Vëhë xi tsácjun ngahan. Hane cëjë caveyaneje hma tujún nuju. Cuajyihi tujún nuju nguehe.”
MAT 25:26 Ngajan xi nai rë cha ne, catsicuya me tsëhë cha cuitjin: “Ngaye ne, machjiriin ngaye. Ngaye ne, mosu hndixahan tsehen. Sá xi hye xi fanga handasa hacuiin ngahan xi catsitjë, hye xi hacjahi sahmi xa ne, peru ngahan fahántsa chji rë,
MAT 25:27 hitsë sa ndaja xi xcun bancun cahmi chani tujún xi casuá ri, cojo sa xi hya xi cjuëhë ne, cúya cjuahántsa tujún naha, peru cojo quihndi rë.”
MAT 25:28 Sehe cachja me cojo me xi hinchacun jan cuitjin: “Chjuhuntuhun tujún xi yaha cha vë. Sehe tuhun rë cha xi tjin rë të mil tujún ta,
MAT 25:29 me xi ha tjin rë ne, sua sa Nina me, hisca vesun tsëhë. Hane me xi tsajin cjín jan ne, cjuahataha Nina hitsë xi tjin rë me.
MAT 25:30 Hacuaha chandunxin hndixahan xi machjiriin hiscan jñu ngajan candatsen. Ngajan ne, jemu squihnda me hacuaha tsijanerii me nehñu me.”
MAT 25:31 ’Hya xi cuya Quihndi rë Xuta Jain cuinduva me cojo hasen ndajyihi tsëhë Nina hacuaha cojo ángel rë Nina cuinduva me, cuejña me cahndë́ hñu hiscan tsichuva me xuta.
MAT 25:32 Hane ngajan xcun me ne, cumatangun xuta rë jinguyëjë ni ngasunhndë ne, sehe scuxijin me xuta sacuaha sahmi ngu cha xi faha cuenda rë chu hora xi vaxijin cha chu tsanga tsëhë ngajñi rë chu tentsun.
MAT 25:33 Vinchaxin cha chu tsánga taha quixi rë cha, hane vinchaxin cha chu tentsun taha xcun.
MAT 25:34 Hya xi cumá ne, me xi matitjun jan, cuichja me cojo xuta taha quixi ta: “Nduvun nechun, ngayun xi catsinchacun Nina Nahmi naha. Ngayun xi satë nuju cuisuhun gubiernu xi Nina cavëhëchjini me tsujun hisca ntsacu cavetsihin ngasunhndë.
MAT 25:35 Cuatjin satë nuju ta tsëhë xi hya xi vojo ná, canicjun ná. Hya xi xinda ná, catuhun ná nandá; xutaxín ngahan, peru catuhun cahndë́ cavitejñajenda ndya nuju.
MAT 25:36 Tsajin ná tsjian, peru catuhun ná tsjian xi mameje; hmu ná hane cafuhun cachusuhunyun ná; tejñaya ndavaya hane cafuhun cachutsujun ná.”
MAT 25:37 Sehe xuta tyjahi jan, tsicuya me cjua cuitjin: “Tatá, ¿janihya camachaya niji xi vojo nuju, hane canicjin nuju? ¿O sá xi xinda nuju, hane catihin nuju nandá?
MAT 25:38 ¿O janihya cachutsijin nuju nujyuhunyun sacuaha xutaxín hane catihin cahndë́ nechunjendun ndya niji? ¿Janihya cahyin xi tsajin nuju tsjian hane catihin?
MAT 25:39 Hacuaha ¿janihya cahyin xi hmu nuju o nechunyun ndavaya xi canduvintjenguin nuju?”
MAT 25:40 Sehe cuichja me xi matitjun jan ta: “Cuichjá quixi cojo nuju ta hya xi canihñu cjuandaja vë xi cavisecun rë tuyoni xuta yuma ladu naha ne, cavisecun ná ngahan.”
MAT 25:41 ’Hya xi camá ne, cachja me xi matitjun jan cojo xuta xi siu ladu scun rë me cuitjin: “Tangunxun ngayun xi cuatjun castigu rë Nina ne, tangun cuechún xcun ndihi xi catsindaja Nina xi cuisehen xitsehen xi matitjun cojo ángel rë. Ndihi jan ne, tsajin nixtin tsajin nixten xi coho.
MAT 25:42 Cuatjin satë nuju ta tsëhë xi hya xi vojo ná, ha canicjuun ná; hya xi xinda ná, catuun ná nandá; xutaxín ngahan, peru catuun cahndë́ cavitejñajenda ndya nuju;
MAT 25:43 Tsajin ná tsjian, peru catuun ná tsjian xi mameje; hmu ná hane cafuun cachusuunyuun ná; tejñaya ndavaya hane cafuun chutsuun ná.”
MAT 25:44 Sehe cuinenguise me cuitjin: “Tatá, ¿janihya camachaya niji xi vojo nuju, o sá xi xinda nuju? ¿O janihya canutsijin nuju nujyuhunyun sacuaha xutaxín, o xi tsajin nuju tsjian? Hacuaha ¿janihya cahyin xi hmu nuju o nechunyun ndavaya? ¿Janihya cahyin vë xi cavisecuiin nuju?”
MAT 25:45 Sehe cuichja me xi matitjun jan ta: “Cuichjá quixë cojo nuju ta tsëhë xi mijí nihñu cjuandaja vë xi cuisecun rë tuyoni xuta yuma ladu naha ne, mijí cuisecun ná ngahan.”
MAT 25:46 Sehe xuta jan ne, cuisehen me castigu xi nixtin nixten cumá, peru xuta xi tyjahi cjuatacun rë me ne, satë rë me cjuahñu xatsë xcun Nina.
MAT 26:1 Hya xi camá ne, xi cajnetaha cachja Jesús yëjë cjua cuatjin ne, sehe cachja me cojo xuta ladu rë me cuitjin:
MAT 26:2 ―‍Ha hyun xi chaja sa jo nixtin xi cuechú suhi tsëhë pascua ne hane ngahan xi Quihndi rë Xuta Jain ngahan ne, hatuxa hya cumá ngahan entregadu tsja xuta xi cuetaha ná xcun cru. ―‍Cuatjin cachja me.
MAT 26:3 Nixtin hya ne, yëjë nahmi xi matitjun cojo xuta changá rë xuta tjë rë Israel ne, casahmi me ngu junta ngajan ndihya jyë rë Caifás, me xi vitexa yëjë nahmi xi matitjun.
MAT 26:4 Ngajan xi caviyuju me cjuatacun rë me hacutjin xi cuma cuindacha me Jesús cojo sa xi cuma cjuahahma me me xi tsiquehen me me.
MAT 26:5 Peru cachja me ta: ―‍Ndatjin xi cuinechanyan ne cuatju suhi, sehe chjahanhma cha, sá tu cumacjan rë xutacjín, hane cumá ngu suë jyë.
MAT 26:6 Hya ne, Jesús ne, nandya Betania quitaha me. Tacun me ndava cha Simú, cha xi camandaja tsëhë chíhin vitaha xi casatë chuxin rë cha.
MAT 26:7 Hane ngajan camá xi cafehetjengui rë me ngu chjuun xi yaha na ngu frascu xi ndyojo camá, hincha ngu aceite ndaja xi jercu hnga chji rë. Hya xi camá ne, cavitejnu na aceite jan rcu Jesús hora xi tijinë me niñu.
MAT 26:8 Peru xi cavutsejen cha ladu rë me xi cuatjin casahmi na jan ne, camacjan rë cha cachja cha cuitjin: ―‍¿Mé má tu mahya ni catsichaja na aceite vë?
MAT 26:9 Sá xi xteña ne ndaja sacú tujún rë. Hane tujún vëhë ne cuma cuisecoo rë xuta yuma. ―‍Cuatjin cachjataha cha na.
MAT 26:10 Peru xi camachaya rë Jesús xi cuatjin chja cha ne, catsicuya me cjua cuitjin: ―‍¿Mé má cuatjin tivichuncjun tsëhë na ta jemu vengui chjí rë xcusun xi casahmi na cojo ná?
MAT 26:11 Xuta yuma ne, yëjë nu yëjë nixtin ne, siu me cojo nuju. Peru ngahan ne, hacuiin yëjë nu yëjë nixtin tejña cojo nuju.
MAT 26:12 Tsëhë xi xi cavitejnu ná na aceite jan ne cojo tjun ni ne cuëhëchjine na yojo naha xi seyaniji ngahan.
MAT 26:13 Cuichjáquixë cojo nuju ta tuyani ni tsëhë jingujyë ni ngasunhndë xi cuichja xuta cjua tsëhë Nina ne, hacuaha cueyanangui me na vihi, cojo sa xi xuta xi yahnga ne, cumachaya rë me xcusun xi casahmi na cojo ná. ―‍Cuatjin cachja Jesús.
MAT 26:14 Hya xi camá ne, ngu cha tsëhë ngajñi rë me xi tejó xi má ladu rë Jesús, cha xi hmí rë Judas Iscariote ne, quiji cavisiajmi cha cojo nahmi xi matitjun
MAT 26:15 cavinenguise cha me cuitjin: ―‍¿Há cjín tujún tuhun ná sá xi sahme entregadu nuju Jesús? Ngajan xi cavexqui me hane casua me cha cantë tujún tyava.
MAT 26:16 Hane ngajan cavejñaya cha ngu hora xi ndaja xi cuma sahmi cha entregadu Jesús cojo xuta xi cuacun jan.
MAT 26:17 Hya xi camá ne, nixtin xi tjun tjun tsëhë suhi xi chinë pan xi tsajin san rë, cafehe xuta ladu rë Jesús xi tejo jan, cachja cha cojo me cuitjin: ―‍¿Jani meje nuju xi cuihinchjini xi xine nguixun tsëhë suhi?
MAT 26:18 Sehe cafayangui Jesús cuitjin: ―‍Tangun nandya Jerusalén. Hane xi cuechú ndava ngu cha xi cuacun jan ne, tinújun cojo rë cha cuitjin: “Chja maestru naja cuitjin: Meje cuechú hora naha, hindë ne, ndya nuju ne sínë niñu tsëhë pascua cojo xuta ladu naha.”
MAT 26:19 Sehe quiji xuta ladu rë me ne, casahmi cha sacuaha xi cavitexa Jesús cha, hane cavëhëndaja cha xi sinënguixun me tsëhë pascua.
MAT 26:20 Hya xi quiji hora jan ne, tijinë me niñu cojo xuta ladu rë me xi tejó jan,
MAT 26:21 hane ngajñi hora xi tijinë me ne, cachja Jesús cuitjin: ―‍Cuichjá cojo nuju cjuaquixi ta ngu ngayun ne, nihñu ná entregadu. ―‍Cuatjin cachja me.
MAT 26:22 Ngajan xi jemu choho camá rë cha, cavetsihin cha cachja chuva ngu chuva ngu cha cojo rë me cuitjin: ―‍Nai, ¿há cumácacun xi ngahan sahme?
MAT 26:23 Hya xi camá ne, cafayangui Jesús cuitjin: ―‍Ngu cha xi ngu ni tyuva tsinguísehenquinda niñu naha cojo ne, cha vëhë xi sahmi ná entregadu.
MAT 26:24 Ngahan xi Quihndi rë Xuta Jain ngahan ne, hatuxa tjin ná xi cueya sacuatjin ha camá camahindu xcun xujun tsahan, peru jemu chojyihi tsëhë cha xi sahmi ná entregadu. Vengui sa chji rë xi catsiin cha.
MAT 26:25 Sehe Judas, cha xi sahmi rë me entregadu cachja cha ta: ―‍Maestro, ¿há cumácacun xi ngahan sahme? Ngajan xi cafayangui Jesús tsëhë cha cuitjin: ―‍Juun, quixi.
MAT 26:26 Hora xi tijinë me comida ne, cafaha me ngu niñutsju hacuaha casua me nacuechji rë Nina ne, sehe cavotohocja me niñutsju jan, casua rë me xi tejó jan ne, sehe cachja me cuitjin: ―‍Chjuhun xinu. Vihi ne, yojo naha vi.
MAT 26:27 Hya xi camá ne, cafaha me ngu vasu ne, sehe casua me nacuechji rë Nina, sehe cachja me cuitjin: ―‍Juhun vihi sehe siuhun ngajñi ngayujun ni,
MAT 26:28 ta xan rë uva vihi ne, vihi jni naha xi cuetju ngatsë rë xuta sehe cuma chihin compromisu xi cuaxëtje rë xuta tsëhë jyë́ rë me.
MAT 26:29 Hacuaha cuichjá cojo nuju ta quihndë cojo nixtin xi cjuiniji sa ne, ha quihndë cuyaan cuëhë xan rë uva. Cuëhë, peru hisca hya xi cuëhë nga cojo nuju ngajan hiscan sahmi Nina gubiernu.
MAT 26:30 Xi cajnetaha cajinë me ne, casë me ngu tsëhë Nina. Sehe cavetju me quiji me Naxi Olivu.
MAT 26:31 Hane sehe ngajan cachja Jesús cojo xuta ladu rë me cuitjin: ―‍Ngayujun ni ngayun ne, nismutacun ná hacuaha cuma ndaya cjuatacun nuju quihndë nguixun vi ne, hane cuejñu ná suva ta cumá sacuaha camahindu xcun xujun rë Nina xi chja xi: “Nina ne, tsiquehen me cha xi sahmi cuidadu rë chu tsánga, hane chu tsánga vë ne cuitsojo chu.”
MAT 26:32 Cuatjin cumá, peru hya xi cúya nga cjuahñu naha ne cjuë́ titjun tsujun hisca distritu Galilea.
MAT 26:33 Pedru ne, cafayangui cha cuitjin: ―‍Ha ndasa ngayëjë cha xi cuicun vi cuejña suva cha ngayun, hatuxa tsajin nixtin xi cojo ngahan sahme cuatjin.
MAT 26:34 Hya xi camá ne, cuitjin cachja Jesús cojo cha: ―‍Cuichjáquixë cojo ri ta tajñu ni xi chaja squihnda xahnda ne, ha jyan ndiya cuinoje xi hyiin yo ngahan. ―‍Cuatjin cachja Jesús.
MAT 26:35 Cachja Pedru cuitjin: ―‍Ha ndasa hisca cueya cojo nuju ne, peru cuichjaan xi hveen yo ngayun. Hacuaha cuanitjin ni cachja cha xi yahnga.
MAT 26:36 Sehe quiji Jesús cojo cha xi tejó jan ne, cafehe me ngu cahndë́ xi hmí rë Getsemaní. Ngajan cachja Jesús cuitjin: ―‍Nechun ni nguehe. Cjuë́ nguvan hitsë ni cuisiajme cojo Nina. ―‍Cuatjin cachja me.
MAT 26:37 Hya xi camá ne, cavaxë me Pedru cojo jo cha quihndi rë Zebedeo xi quiji cojo me cha. Hane xi cjui me ne, cavetsihin jemu camá va rë me, hacuaha jemu macjincacun me.
MAT 26:38 Sehe cachja me cojo cha cuitjin: ―‍Jercu choho camahani má rë xahasen naha, sacuaha xi vëhë ni tsiquehen ná. Nguehe nechuncun ngayun cojo ná.
MAT 26:39 Sehe ngajan xi Jesús ne, quiji me hitsë nguvan. Hane ngajan cafañatsacjan me, cafehya rë me Nina cuitjin: ―‍Ngayun Nahmi naha, sá tjin sa ngu chuva rë ne, catisatiin ná cjuañihi xi cuátju cuma vi. Peru catama sacuatjin xi meje nuju ngayun, hacuiin sacuatjin xi meje ná ngahan.
MAT 26:40 Hya xi camá ne, cavuya cafehe me hiscan siu jyan xuta ladu rë me xi quijicojo me jan ne, casacutsja me xi siufë me. Ngajan xi cachja Jesús cojo Pedru cuitjin: ―‍Cahyun ni, ¿há camaji cavacun ngayun cojo ná hisca ngu hora ni?
MAT 26:41 Nechuncun ngayun, nihñu oración nuju, sátu chjaháchuva nuju cojo cjuatacun nuju. Xahasen nuju ne, ndaja meje rë xi nihñu, peru yojo nuju ne, chuvacacun.
MAT 26:42 Hya xi camá ne, camá jo ndiya xi quiji me nguvan cafehya me Nina cuitjin: ―‍Nahmi naha, sá xi cumaji cuatju chuva rë xi satiin ná cjuañihi ne, catama sacuatjin xi meje nuju ngayun.
MAT 26:43 Hya xi camá ne, cavuya nga cafehe me hiscan siu jyan xuta jan casacutsja me xi siufë me ta jemu hai nijña rë me.
MAT 26:44 Hya xi camá ne, camá jyan ndiya xi quiji me nguvan ne hacuaha cojo vëhë nga ne, cafehya me Nina.
MAT 26:45 Sehe cavuya nga me cafehe me hiscan siu xuta jan ne, cachja Jesús cuitjin: ―‍¿Há tsjuñufun cuhun? Chutsujun ne, ha cavechú hora xi ngahan Quihndi rë Xuta Jain ne, cjuaha ná xuta xi sahmi ná entregadu cojo xuta tsehen.
MAT 26:46 Tisatjunhngun, cuanguen chutsejen ta ha nduva cha xi sahmi ná entregadu.
MAT 26:47 Jinguyëjë rë xi tichja cuaha Jesús ne, cafehe Judas, cha xi cojo jiyajñi ngajñi rë cha xi tejó xi catsujyihiya cojo me. Hacuaha jemu cjín xuta tivisecoo rë cha, xuta xi cavitexa nahmi xi matitjun cojo xuta changá xi quijijaha me Jesús. Hane yaha me quicha, yaha me ya.
MAT 26:48 Chaja sa xi cjuehe cha jan xi sahmi cha entregadu Jesús ne, cachja cha cojo xutacjín jan cuitjin: ―‍Cha xi cjuë́ cuitatsuha xi suá rë nina ne, cha vëhë xi hacui cha.
MAT 26:49 Xi tu cavechu cha hiscan nduva Jesús ne, ngutjen quiji casahmitiña cha tsëhë me hacuaha casua cha me nina cachja cha cuitjin: ―‍Cuhndanu, maestro ―‍chja cha. Hane quiji cavitatsuha cha me.
MAT 26:50 Ngajan xi cachja Jesús cojo cha cuitjin: ―‍Tai, Nihñichihin xa vëhë xi candove. Hya xi camá ne, quiji xuta jan ne, cafaha me Jesús.
MAT 26:51 Ngajan xi ngu cha xi secun cha cojo Jesús ne, cavaxë cha quichanduju rë cha, hane cavaja rë cha ngu cha mosu rë nahmi xi matitjun, hane cavatësun cha ngu ladu tyjavañuju.
MAT 26:52 Ngajan xi cachja Jesús cojo cha cuitjin: ―‍Teyendeje quicha riji vë. Xuta xi tsicojo me quicha ne, hacuaha cojo quicha cueya me.
MAT 26:53 ¿Há hyuun ta sá xi cjuehya rë Nahmi naha ne, jemu cjín mil ángel tsingatju me cuisecoo ná?
MAT 26:54 Peru sá xi cuatjin sahme ne, ¿hacutjin cumachihin cjua rë xujun rë Nina? ta cuitjin meje rë xi cumá.
MAT 26:55 Hya xi cajnetaha cachja Jesús cojo xuta ladu rë me ne, sehe cachja me cojo xutacjín cuitjin: ―‍¿Há nduvun chjuhun ná sacuaha ngu xuta xi chëjë me, xi cuatjin nduvun cojo ya cojo quicha vë ni? Xi cavitejñaya cojo nuju nchunchujun ni ndatsen yungun jan ne, cavetuhunntsuun ná cachjuun ná.
MAT 26:56 Peru cuitjin tijima cojo sa xi cuetjucaa jain hacutjin camahindu xcun xujun rë Nina xi catsihindu profeta.
MAT 26:57 Hya xi camá ne, xi cafaha xuta jan Jesús ne, quijicojo me me ndava Caifás, nahmi xi matitjun tsëhë yëjë ni nahmi ta tsëhë xi ngajan ha camá tangun yëjë ni cha xi vicuya cjuachacun cojo yëjë ni xuta changá.
MAT 26:58 Pedru ne, hacuaha tjengui cha cjui cha tu cjin tu cjin ni hacutjin cjui xuta jan cojo Jesús hisca xi cavisehen cha ndatsen rë ndava nahmi xi matitjun jan. Hane ngajan cavéjña cha cojo cha nísë rë yungun cojo sa xi cumachaya rë cha mé cumá.
MAT 26:59 Hane nahmi xi matitjun jan cojo yëjë sa xuta xi matitjun ne, cavangui me xuta ndacha xi tsinguixi jyë́ rë Jesús, cojo sa xi cuma tsiquehen me me.
MAT 26:60 Peru tsajin mé jyë́ rë Jesús xi casacu rë me handasa jemu cjín má xuta ndacha xi cachja me. Hisca xi ha tisacuiiyiin rë me hacutjin cuma, sehe cafehe jo cha ndacha xi cachja cha
MAT 26:61 cuitjin: ―‍Cha vi cuitjin cachja cha ta: “Ngahan ne, cuma tsinguétsun yungun xi matitjun vi xi casahmi xuta tsëhë Nina, hane cahntsua xi jyan nixtin ne, sahme nga ngu.”
MAT 26:62 Ngajan xi nahmi xi matitjun tsëhë nahmi xi yahnga jan ne casecunvasen me, cavinenguise me Jesús cuitjin: ―‍¿Há chjayinnguiin hisca ngu cjua? ¿Mé noje tsëhë jyë́ xi vincha xuta jan?
MAT 26:63 Hane Jesús ne, tu jyuu ni casecun me. Sehe cachja nahmi xi matitjun jan cojo Jesús cuitjin: ―‍Cuitexa ri ngatsë rë xi macjain ri tsëhë ngu ni Nina quicun xi hora xi cjuahataha ri ne cuinoje cjuaquixi. ¿Há ngaye xi Quihndi rë Nina? ¿Há ngaye xi Cristu?
MAT 26:64 Ngajan cafayangui Jesús tsëhë me ta: ―‍Sacuatjin nújun vë ne, cuatjin jain. Hacuaha cjuehe nixtin xi chutsujun ná xi tejña ladu quixi tsëhë ngahñu rë Nina. Hacuaha chutsujun ná xi cuinduvajne ngajñi rë yufí tsëhë ngahnga.
MAT 26:65 Hane ngajan xi nahmi xi matitjun tsëhë nahmi xi yahnga jan ne xi jemu camacjan rë me ne, hisca tsjian rë me cavicheya me. Hacuaha cuitjin cachja me: ―‍Tsixcuehyu cha Nina. Tsajin sa cjua testigu xi mameje. Ngayun ne, ha canuhyun hacutjin tsixcuehyu cha Nina.
MAT 26:66 ¿Mé nújun quihndë? Ngajan cafayangui me cuitjin: ―‍¡Meje rë xi cueya cha!
MAT 26:67 Hya xi camá ne, ngu jo me cavetsihin me cavëhënatya me Jesús hacuaha cavajaya me xcun. Yahnga nga me ne, cojo cahntsua tsja me cavaja me xcun Jesús.
MAT 26:68 Cachja me cuitjin: ―‍Tinoje, ngaye Cristu, ¿yo xi cavaja ri?
MAT 26:69 Jinguyëjë rë xi cuatjin tijima ne, Pedru ne, tacun me ndatsen ndihya. Hya xi camá ne canduva ngu na mosu hndixahan tsëhë nahmi jan, cafehe cachja na cojo Pedru cuitjin: ―‍Ngaye ne, ladu rë Jesús tsëhë distritu Galilea má ye.
MAT 26:70 Peru xcun yëjë me xi siu me ne, cafahahma me cachja me cuitjin: ―‍Hisca hveen mé xi noje.
MAT 26:71 Hya xi camá ne, sehe cavetju me quiji me casecun me hiscan tu cuiseen ni tsëhë ndatsen ndihya. Hane ngajan xi ngu nga na cachja na cojo xuta xi siu ta: ―‍Cha vihi ne, ladu rë Jesús nandya Nasarét má cha.
MAT 26:72 Hya xi camá ne, ngu ndiya nga ne cafahahma me cuitjin: ―‍Vëë Nina xi hveen xuta jan.
MAT 26:73 Hya xi cavatju ngu hora ne, sehe camatiña xuta xi hinchacun cojo Pedru jan cachja me cuitjin: ―‍Ha cjuaquixindaja ta ngaye ne, cojo ngaye nechin cojo cha xi cuajyihi vë, ta tsëhë xi cjua riji tsingacun xi xuta distritu vë ngaye.
MAT 26:74 Ngajan xi cavetsihin nga Pedru cafahahma me cjuaquixi hisca cachja me xi catinduva ngu cjuacjintacun xi cuatju me sá xi tichja me ngu ndesu. Cuitjin cachja me: ―‍Vëë Nina jain xi hveen yo me xi nújun vë. Hane hora vëhë ne, cajihnda ngu xahnda.
MAT 26:75 Hane Pedru ne, catsinguitsjen me cjua xi cachja Jesús cojo rë me xi cachja me cuitjin: “Chaja sa xi squihnda ngu xahnda ne, hacuaha camá jyan ndiya nújun xi hyúun yo ngahan.” Hane xi cavetju me candatsen ne, cajihnda susu me.
MAT 27:1 Hya xi camá nchujun ni ne, yëjë ni nahmi xi matitjun cojo yëjë xuta changá ne camatangun nga me xi sacuya rë me xcusun hacutjin cuma tsiquehen me Jesús.
MAT 27:2 Sehe catsihñu me Jesús ne, quijicani me xcun gobernador xi hmí rë Pilatu.
MAT 27:3 Hya xi camá ne, Judas ne, cha xi casahmi rë me entregadu, camachaya rë cha xi cueya Jesús. Ngajan xi choho camá rë cha hane catsindeya cha cjuatacun rë cha. Quiji cha catsicuya cha catë tujún tyava jan cojo nahmi xi matitjun cojo xuta changá.
MAT 27:4 Cuitjin cachja cha: ―‍Jemu tjin jyë́ naha ta tsëhë xi casahme entregadu ngu me xi tsajin xi cun rë. Peru cafayangui me cuitjin: ―‍¡Mé tsijin vë! Cjuacjintacun vë hatuxa tsiji sove.
MAT 27:5 Hya xi camá ne, ngajan yungun xi matitjun ne, cacandi cha tujún tyava jan sehe cavatju cha quiji cha hiscan ngu cahndë́ xi cavityjangui cha yojo rë cha hisca xi camá cahme cha.
MAT 27:6 Nahmi xi matitjun jan cafaha me tujún tyava jan peru cachja me cuitjin: ―‍Cumaji cuinchan tujún vi cahntsua caxa tujún rë yungun ta tsëhë xi tujún vi ne, cavengui chji rë jni rë cha.
MAT 27:7 Hya xi camá ne, cachuya rë me xi cuatsë me ngu xáhva xi chja xuta Nangui rë Cha Chjinetiji. Xáhva jan ne cumachji rëhë xi xinchaniji xutaxín xi cueya me nangui vë.
MAT 27:8 Ngatsë rë xi cuatjin casacu xahva jan ne, hisca nixtin quihndë ne cahndë́ vëhë ne yaha ñihi xi Cahndë́ Tsëhë Jni.
MAT 27:9 Xi cuatjin camá ne, camachihin cjua xi catsihindu profeta Jeremías xi cuitjin chja: “Cafaha me catë tujún tyava, xi cavejña chji rë cha xi cafehya xuta nangui Israel,
MAT 27:10 sehe casua me tujún jan xi cjuaha me nangui rë cha chjinetiji. Cuatjin casahmi me sacuaha cavitexa Nina.”
MAT 27:11 Hya xi camá ne, Jesús ne secun me xcun gobernador. Ngajan cavinenguise me Jesús cuitjin: ―‍¿Há ngaye xu matitjun ngaye tsëhë xuta tjë rë Israel? ―‍Cuatjin cavinenguise me. Hane Jesús ne, cuitjin cafayangui me: ―‍Cuatjin sacuatjin nújun vë. ―‍Cuatjin cafayangui me.
MAT 27:12 Peru hora xi nahmi xi matitjun cojo xuta changá jan cavincha jyë́ me Jesús ne, ndastu mé cafayangui Jesús.
MAT 27:13 Ngajan xi cachja Pilatu cojo me cuitjin: ―‍¿Há nuhyiin cjua xi chja me? Jercu cjín jyë́ riji cavincha me.
MAT 27:14 Peru Jesús ne ha quihndë cafayanguiin me hisca ngu cjua. Hane Pilatu ne, jemu quijircun camahani rë me.
MAT 27:15 Tjin ngu xcusun xi nu nu ni, hya xi cumá nixtin rë suhi jan ne, tsismi gobernador ngu presu xi xuta vaxijin me.
MAT 27:16 Nixtin hya ne, jiya ngu presu xi jemu tjin cjua tsëhë, Barrabás hmí rë cha.
MAT 27:17 Ngajan xi camá xi hya xi camatangun xutacjín ne, ngajan cavinenguise Pilatu xuta cuitjin: ―‍¿Jarë cha xi meje nuju xi tsisme? ¿Há Barrabás ne? ¿Há Jesús xi Mesías xu?
MAT 27:18 Cuatjin cachja me cojo xuta ta tsëhë xi ha vëë me xi ngatsë ni rë cjuaxin sahmi nahmi xi matitjun jan cojo Jesús, vëhë xi casahmi me entregadu xi meje rë me xi cueya.
MAT 27:19 Hora xi tijimá vë, tacun Pilatu xcun silla hiscan vejña me hora xi vitexa me, ngajan xi chjuun rë me ne, catsingatju na cjua xi cuitjin chja: “Caninguisuunjñuu cjuacjintacun tsëhë cha vë xi tyjahi cjuatacun rë cha, ta nguchjin ne ngajñi nijña naha jemu cjín xcusun xi chocun camá ná chini ngatsë rë cha.” Cuatjin fi cjua xi catsingatju na.
MAT 27:20 Hya xi camá ne, nahmi xi matitjun cojo xuta changá jan jemu cachja me cojo sa xi cama cuinchahaxi me xuta xi cjuehya xuta Pilatu jan xi tsismi me Barrabás ne, tsiquehen me Jesús.
MAT 27:21 Ngajan cachja nga gobernador cuitjin: ―‍Tsëhë jo cha vë ne, ¿jarë cha xi meje nuju xi tsisme? Ngajan cafayangui xutacjín jan cuitjin: ―‍Nismu Barrabás.
MAT 27:22 Sehe cachja nga Pilatu cuitjin: ―‍Sá cuatjin ne, ¿mé xi sahme cojo Jesús xi Cristu xu? Ngajan xi cafayangui yëjë xutacjín jan cuitjin: ―‍¡Tetuhun cha xcun cru!
MAT 27:23 Ngajan xi cachja Pilatu cojo rë me ta: ―‍Peru ¿mé xi rcu jyë́ casahmi cha? Peru xutacjín ne hitsë sa hñu cajindaya me cachja me cuitjin: ―‍¡Tetuhun cha xcun cru!
MAT 27:24 Hya xi camachaya rë Pilatu xi sahmi cuendaain xuta xi chja me ta tu hitsë sa tijima ngu suë jyë ne, cafehya me nandá sehe cavane me tsja me xcun xutacjín jan. Sehe cachja me cuitjin: ―‍Quitjeen jyë́ tsëhë cjuaveya rë cha vihi ta, tsajin jyë́ rë cha. Vëhë ne, ha chaha nuju vëhë.
MAT 27:25 Hya xi camá ne, yëjë xutacjin jan ne, ngu tangun ni cafayangui me cuitjin: ―‍Tsëhë cjuaveya rë cha vëhë ne, chanijijyin cojo quihndi niji. ―‍Cuatjin cachja me.
MAT 27:26 Hya xi camá ne, catsismi me Barrabás, peru casahmi me xi Jesús ne casehen rë me sehe casua Pilatu me xi cjue cueya me xcun cru.
MAT 27:27 Hya xi camá ne cha sindadu xi vitexa gobernador ne, quiji cojo cha Jesús taha cahntsua ndava gobernador jan. Hane sehe casahmitangun sa cha yëjë sindadu cjín.
MAT 27:28 Hya xi camá ne, cavaxë cha tsjian rë Jesús, hane sehe catsicaja cha me ngu tsjian hani.
MAT 27:29 Hacuaha catsihya cha ngu corona nahyá sehe cavesun cha rcu Jesús hane cavisengui cha ngu bastón tsja me. Hya xi camá ne, cavixcuhnchi cha xcun me, catsixcuehyu cha me, cuitjin cachja cha: ―‍¡Viva! Me xi matitjun tsëhë xuta tjë rë Israel.
MAT 27:30 Hacuaha cavëhënatya cha me, hacuaha cafaha cha bastón jan xi yaha tsja me hane cavaja cha rcu me.
MAT 27:31 Hya xi camá xi cuatjin catsixcuehyu cha me ne, cafahaxin cha tsjian hani jan, catsicaja nga cha me tsjian rë me. Hya xi camá ne, sehe quijicojo cha me xi cuetaha cha me xcun cru.
MAT 27:32 Hya xi cavetjun cjuicojo sindadu Jesús ne, cavechutaha cha ngu me xi hmí rë Simón tsëhë nandya Cirene. Sehe sindadu jan ne, casahmi cha ngujyë xi cuaniji me cru jan.
MAT 27:33 Hane xi cafehe cha cojo Jesús hiscan xi hmí rë Gólgota, cjua xi meje cuichja Naxi Nínda Rcuun.
MAT 27:34 Hya xi camá ne, casua cha me xan rë uva xi tecjan rë nandá rë tyjungunsa xi cuihi Jesús. Peru xi cavutaha me hitsë ne, cahviin me.
MAT 27:35 Ngajan xi sindadu jan ne, xi cavatju casetaha me xcun cru ne, sehe cafaha cha tsjian rë me hane cavaxë cha suerte tsëhë ne, jarë cha xi satë rë cha jima ngu tsjian.
MAT 27:36 Sehe ngajan ne cavejñataha cha cavutsejensun cha Jesús xcun cru.
MAT 27:37 Hacuaha camahindu ngujo cjua xi casetaha xcun cru ngatihin rcu Jesús sacuaha xcusun rë me xi setaha xujun jyë́ rë xuta, hane cuitjin chja cjua jan: “Jesús, me xi Matitjun Tsëhë Xuta Israel.”
MAT 27:38 Hacuaha cavityangui cha ngu chëjë ngu ngu ladu tjehen rë me, jima ngu cojo cru rë.
MAT 27:39 Hya xi camá ne, xuta xi cavatju jan ne, catsixcuehyu me Jesús ne, catsitjiya rcu me, hacuaha cuitjin cachja me:
MAT 27:40 ―‍Ngaye xi ha canoje xi cuma ninguetsin yungun xi matitjun, hane cahntsua xi jyan nixtin ne; cama nga canindeje ngu. Quihndë ne, sá cuatjin cuma nihñi ne, naxetje sove yojo riji. Sá xi Quihndi Jain rë Nina ngaye, titujni tsëhë cru vë.
MAT 27:41 Ha chuva vëhë ni ne, nahmi xi matitjun ne cojo cha vicuya cjuachacun rë ley cojo xuta changá ne cachja me cuitjin:
MAT 27:42 ―‍Cavaxëtje xu cha xuta, peru quihndë ne, cumaji cuaxëtje suva cha yojo rë cha. Sá xi hacui jain cha xi Matitjun Tsëhë Xuta Israel ne, catitujne cha tsëhë cru chutsejen, cojo sa xi cumacjain naja tsëhë cha.
MAT 27:43 Macjain xu rë cha tsëhë Nina, quihndë ne cataxëtje Nina cha sá xi Nina meje rë me cha; ta cachja cha ta: “Quihndi rë Nina, ngahan.”
MAT 27:44 Hacuaha cha chëjë xi cojo caxtyangui taha cru jan ne, cojo cha choho cachja cha tsëhë Jesús.
MAT 27:45 Hane hora vëhë ne, camajñu jingujyë ni. Cavetsihin xi camanchisen ne, quiji cani rë hisca fane jyan.
MAT 27:46 Hya xi camá ne, jercu hñu camahani cachja Jesús cuitjin: ―‍Elí, Elí, ¿lama sabactani? -cjua vëhë meje cuichja ta: Ngayun Nina naha, mé má canismutacun ná.
MAT 27:47 Hane ngujo xuta xi hinchacun jan ne, xi cajnii rcu me hne jan hane cachja me cuitjin: ―‍Tijindaya me profeta Elías.
MAT 27:48 Hya xi camá ne, ngutjen ni, cavanga ngu me, quiji catsicahnchi me ngu tsjian hinda cojo xan rë uva xi ha sán, sehe cavetaha me rcu ngu ya nduju, sehe cavetaha me hntsua Jesús xi cuihingui me.
MAT 27:49 Ngajan xi yahnga xuta ne, cachja me cuitjin: ―‍Caveni tuhun. Cuinechanyan hitsë ne, ¿há cuinduva jain Elías cuaxëtje me cha?
MAT 27:50 Hane Jesús ne, hora vëhë ne, jercu cajindaya nga me hane cahme me.
MAT 27:51 Hacuaha hora vëhë ni ne, tsjian nduju xi tyjangui cahntsua yungun xi matitjun jan ne, hisca rcu hisca ntsacu canduva catiyavasen. Hacuaha cafani nangui. Hacuaha cavacjan ndyojo.
MAT 27:52 Hacuaha hora vëhë ni ne, catuxaha tsjun rë nima, hane jemu cjín xuta xi tyjahi cjuatacun rë me xcun Nina ne, cavuya cjuahñu rë me.
MAT 27:53 Cavetjun xuta jan tsëhë tsjun. Hane hya xi ha cavuya cjuahñu rë Jesús ne, sehe cavisehen me nandya Jerusalén hane ngajan ne, cjín xuta ne, cavëë rë me.
MAT 27:54 Hora xi cahme Jesús ne, cha capitán tsëhë cha sindadu cojo yahnga sindadu xi hinchacun me ngajan vutsejensun me Jesús ne, camachaya rë cha xi fani nangui cojo cjin xcusun sa xi cavatju camá. Hane jercu quijircun camaha ni rë cha. Hacuaha cachja cha cuitjin: ―‍Hacui jain me vihi xi Quihndi Jain rë Nina, me.
MAT 27:55 Hacuaha ngajan ne, tsëhë cjin ne hinchacun cuaha cjín yachjin xi tivutsejen me. Yachjin jan ne quijitjengui me Jesús xi cuisecoo me Jesús, sahmi cuenda me.
MAT 27:56 Ngajñi yachjin jan ne, hinchajñi na xi cuicun vi: na María na Mágdala, hacuaha na María naa rë Jacobo cojo José, hacuaha cojo naa rë cha quihndi rë Zebedeo.
MAT 27:57 Hya xi cajne hora ne, ngu cha nchina xi hmí rë José, ngu xuta Arimatea cha xi hacuaha xuta ladu rë Jesús cha.
MAT 27:58 Cha vëhë quiji cha xcun Pilatu, cafehya cha cahndë́ sá xi cuma cjuahaxin cha nima Jesús. Hane Pilatu ne, casua me cha cahndë́.
MAT 27:59 Ngajan xi cafahatsja cha nima jan ne, sehe catsitjingui rë cha tsjian tyjahi, sacuaha xcusun rë me.
MAT 27:60 Sehe caveya cha nima cahntsua ngu tsjun xatsë rë suva cha xi ha casahmi cha xi camá catjuhngui rë taha naxi. Sehe catsindefajne cha ngu ndyojo jyë xi cuechja rë tingotjo rë tsjun jan. Hya xi camá casahmi cha ne, quiji cha cojo xuta ra.
MAT 27:61 Peru na María na Mágdala cojo na María xi hacjahi ne, caviyujutaha na xcun tsjun.
MAT 27:62 Hya xi cumá nchujun ni ne, hya nixtin xi cjuahajenda rë me ne, hya camatangun nahmi xi matitjun cojo cha partidu fariseo sehe cachja cha cojo Pilatu.
MAT 27:63 Cuitjin cachja cha tsëhë Jesús: ―‍Nai, ngayin ne vitsjen niji xi hya xi chaja sa cueya cha cachja cha ndacha vë cuitjin: “Cahntsua jyan nixtin ne, cuya cjuahñu naha.”
MAT 27:64 Ngatsë rë vëhë ne, meje rë xi nihñu cuendun xi sehñu ndaja tsjun rë cha hisca xi ha cavatju jyan nixtin jan, cojo sa xi cumaji nduva cha ladu rë nima vë ne, cjuahaxin cha nima tsëhë tsjun jan, sehe cuichja cha xi cavuya cjuahñu rë nima. Cuatjin nihñu ta tsëhë xi sá xi cuatjin sahmi cha, hisca hitsë sa choho cuatjuun cumá.
MAT 27:65 Ngajan xi cachja Pilatu cojo rë me cuitjin: ―‍Sacu nuju sindadu jan xi sahmi cuidadu rë tsjun, sehe tanguncujun ne, hacuaha ndaja techjunhñu tsjun vë hacutjin cuma xi nihñu.
MAT 27:66 Sehe quiji me cojo sindadu jan, cavechjahñu me tsjun, cojo sa xi cumatsejen sa xi cuaxë cha nima, hacuaha caviyuju cha sindadu xi sahmi cuidadu rë.
MAT 28:1 Xi cavatju nixtin xi chjahájenda rë jan ne, xi tu casahasen ni tsëhë nixtin ngu tsëhë totje ne, na María na Mágdala jan cojo na María xi hacjahi ne, cavetju na quiji vutsejen na xcun tsjun rë nima Jesús.
MAT 28:2 Hya xi camá ne, jercu cafani nangui ta tsëhë xi canduvajne ngu ángel rë Nina tsëhë ngahnga. Hane ángel jan ne, quiji catsivahaxin ndyojo xi cavechja rë tingotjo rë tsjun jan, sehe cavejña xcun.
MAT 28:3 Ángel jan ne, sacuaha ndihi chuhun ne, cuatjin jyihi ángel. Hacuaha tsjian rë ne, jemu tu tyava camahani jyihi, sacuaha jyihi hnchan xi hmí rë nieve.
MAT 28:4 Xi camachaya rë me tsëhë ángel jan ne, jemu catsacjun sindadu xi siu cuidadu ngajan, hisca cafatsë hnchan cha hisca sacuaha cahme yojo ra cojo chircun.
MAT 28:5 Ngajan xi cachja ángel cojo yachjin xi siutaha jan cuitjin: ―‍Xicarcuun. Ha hvë xi Jesús vinchunsun me, me xi cavetaha xuta xcun cru.
MAT 28:6 Me vëhë ne, tsajin me nguehe ta cavuya me cjuahñu sacuaha cachja me. Nduvun chutsujun cahndë́ hiscan cafaña me.
MAT 28:7 Quihndë ne tangun sanii ne, tuhuncuendun rë xuta ladu rë me cuitjin: “Ha cavuya cjuahñu rë me; hane cjue titjun me tsujun Galilea. Hane ngajan sacu xingueen.” Hindë ne, vëhë cjua xi cuichjá cojo nuju.
MAT 28:8 Hya xi camá ne, cavetju quiji yachjin jan. Jercu quijircun rë na peru hacuaha jercu ndama rë na. Cuatjin quiji na xi suacuenda na xuta ladu rë Jesús tsëhë cjua xi cachja ángel.
MAT 28:9 Hane hora xi tifi na ndiya ne, Jesús ne cavechutaha me na jan, casua me na nina. Sehe chjuun jan ne, cafehetiña na tsëhë Jesús, caticjaxcun na cafaha na ntsacu Jesús hane cafaharcun na me.
MAT 28:10 Hya xi camá ne, Jesús ne, cachja me cojo na cuitjin: ―‍Xicarcuun. Tangun tuhuncuendun rë hermano naja, tinújun cojo me xi cjue me distritu Galilea. Hane ngajan sacu xingueen.
MAT 28:11 Jinguyëjë rë xi quiji yachjin jan ne, ngujo cha sindadu jan cavisehen cha nandya Jerusalén, casuacuenda cha nahmi xi matitjun tsëhë xcusun xi camá.
MAT 28:12 Sehe nahmi jan ne, hya xi ha camátangun me cojo xuta changá hane cavisiajmi cjin me tsëhë mé xi sahmi me. Hane xi cama chihin cjua ne, jemu cjín camahani tujún casua me cha sindadu jan,
MAT 28:13 hacuaha cachja me cojo sindadu cuitjin: ―‍Vihi cjua xi cuinújun ni. Cuinújun ta xuta ladu rë me ne, nguixun ne, hora xi catsuñufun ne, cafehe me. Hane tahahma ne catsichëjë me nima.
MAT 28:14 Hane sá xi cumachaya rë gobernador tsëhë cjua jan ne, ngayin ne, cuanguin cuinújin cojo rë me cojo sa xi cuijnecacun me tsajin mé sahmi me cojo nuju.
MAT 28:15 Cuatjin camá xi cafahatsja cha tujún jan, hane cachja cha sacuaha cavitexa nahmi jan. Cjua vëhë ne, cavitsojo ngajñi rë xuta nangui Israel. Hane cuatjin chja cjua hisca nixtin quihndë.
MAT 28:16 Hya xi camá ne, xuta ladu rë Jesús xi má tengu me ne, quiji me distritu Galilea, hisca naxi xi cachja Jesús.
MAT 28:17 Hya xi camá ne, ngajan cavëë me Jesús ne, cafaharcun me me. Peru ngujo ni me macjaain rë me.
MAT 28:18 Ngajan xi camatiña Jesús tsëhë me, cachja me cojo me cuitjin: ―‍Ha cafahantsa ngahñu xi cumá sahme tu mé ni xcusun sá xi tsëhë ngahnga o sá xi tsëhë ngasunhndë.
MAT 28:19 Ngatsë rë ngahñu vëhë ne, tsingátju nuju ne, tangun jinguyëjë rë nandya ngasunhndë, cuinújun cojo xuta jan cojo sa xi cuisehen me ladu naha. Catiseyanangui ñihi rë Nina Nahmi, cojo ñihi naha, Quihndi rë Nina, cojo ñihi rë Hasen rë Nina hora xi xtenda me.
MAT 28:20 Hacuaha ticuyun rë me xi cuihndë me ne, sahmichihin me yëjë xcusun xi cavitéxa nuju ngahan. Hane xi cuatjin ne, hacuaha cuitejñacuaha cojo nuju yëjë ni hora hisca cuijnetaha nixtin rë ngasunhndë.
MAR 1:1 Cuitjin cavetsihin cjua tsëhë Jesucristu, me xi Quihndi rë Nina Jain.
MAR 1:2 Isaías ne, ngu xutachanga xi cama cafaha cjua rë Nina hacuaha cachja me cojo xuta hatsëë nixtin. Cuitjin catsihindu me, hacutjin cachja Nina cojo me: Tsingátju titjun ngu cha xi cjuaha cjua naha, cojo sa xi scuxaha cha cjuatacun rë xuta, tsëhë xi cjuehe ngaye.
MAR 1:3 Hane hiscan jemu xín tsëhë nandya ne, ngajan cuejña cha. Hane cuitjin cuichja cha: “Sacuatjin matyjahi ndiya hya xi nduva ngu xuta rcun ne, cuatjin nihñu tyjahi cjuatacun nuju tsëhë xi cuinduva me xi matitjun tsajan.” Cuatjin cuichja cha.
MAR 1:4 Sacuatjin jain catsihindu Isaías ne, cuatjin jain camá ta cafehe cha xi catsingatju Nina, cha xi hmí rë Juan, ngajan hiscan jemu xín tsëhë nandya. Casua cha camachaya rë xuta ta meje rë xi tsindeya me cjuatacun rë me hacuaha xtenda me, cojo sa xi tsinchataha Nina me tsëhë jyë́ rë me.
MAR 1:5 Hane jercu cjín xuta quijitjengui me cha, xuta tsëhë distritu Judea cojo nandya Jerusalén. Hane cavitenda cha me xi cavijacun jyë́ rë cojo Nina ngajan ndajyë Jordán.
MAR 1:6 Tsjian rë cha Juan jan ne, tsja rë chu camellu camá. Cojo ngu cinturón chuxin quitaha cahntsua cha. Xi camá niñu rë cha ne, chu nchahva. Cojo tsjen rë chu tusen cahvi cha.
MAR 1:7 Cuitjin cachja cha: ―‍Canduvá ngahan titjun. Peru sehe cuinduva ngu me xi hitsë sa vechu cjuatacun rë xi cumá ná ngahan, xi hisca chuxinxtë rë me cumaji tsinguisehercu sahme tyjahi.
MAR 1:8 Ngahan ne, tu caviténda ni nuju. Peru me vëhë ne, cueya me Hasen rë Nina cahntsua xahasen nuju.
MAR 1:9 Sacuaha nixtin vëhë ne, cavetju Jesús tsëhë nandya Nasaret, distritu Galilea. Quijitjengui me cha Juan xi cuitenda cha me. Hane cavitenda cha me ngajan ndajyë Jordán.
MAR 1:10 Xi camá caxtenda me ne, xi tu tivetju me tsëhë nandan jan ne, cavëë me xi ngahnga ne tituxaha, hacuaha Hasen rë Nina ne, nduvajne sacuaha tsejen ngu paloma, quiji cavisehen cahntsua xahasen rë me.
MAR 1:11 Hacuaha canuhya rë ngu cjua ngajan ngahnga xi chja cuitjin: ―‍Ngaye ne, quihndi naha ngaye. Jercu hmucacun ri. Jercu ndama ná ngatsë riji.
MAR 1:12 Ngajan xi Jesús ne, ngutjen ni quiji me ngajan ngu xín ta tsëhë xi Hasen rë Nina ne, cavaxëxin rë me.
MAR 1:13 Casetaha me ngajan xín yachan nixtin. Hacuatjin cojo Satanás quijitjengui rë me. Hane handasa jercu cavangui Satanás chuva rë xi choho sahmi Jesús ne, peru casahmii me. Hacuaha quiji ángel caviyujutaha xi cjuahacuenda rë me.
MAR 1:14 Hacuaha camá nga ngu xcusun xi xuta xi matitjun ne, caveya me cha Juan ndavaya. Cavatju vëhë ne, sehe cavuya cafe nga Jesús distritu Galilea, cachja me cojo xuta cjua rë Nina.
MAR 1:15 Cuitjin cachja me: ―‍Camatiña nixtin xi Nina ne, cuitexa me ngasunhndë. Vëhë xi meje rë xi nindeyun cjuatacun nuju hacuaha catamacjain nuju cjua xi tichjá cojo nuju.
MAR 1:16 Nixtin xi catsujyihiya me hya ne, cavatju me tjehen laguna tsëhë Galilea. Hora hya ne, cavëë me cha Simón cojo cha Andrés hntsë cha. Titsingatjenya cha nahya ngajñi laguna jan, tsëhë xi ha tuxa xa vëhë sahmi cha.
MAR 1:17 Hane ngajan xi cachja me cojo cha ta: ―‍Nduvun cuanguen cojo ná. Hane cuicuyá nuju xi nuvun xuta xi cuisehen me ladu naja ngojo rë xi chu ti nuvun. ―‍Cuatjin cachja me.
MAR 1:18 Hane hora vëhë ni caviyuju cha nahya jan ne, quiji cha cojo me.
MAR 1:19 Ha xcun xi ha cjui Jesús cojo cha xi cuacun jan hitsë ni nguvan ne, cavëë me cha Jacobo cojo cha Juan hntsë cha, quihndi rë Zebedeo. Hincha cha cahntsua barcu, tifuyataha cha nahya.
MAR 1:20 Hane hacuaha cajindaya me cha. Sehe caviyuju cha nahmi rë cha xi hmí Zebedeo cojo mosu rë me ngajan cahntsua barcu. Sehe quiji cha cojo Jesús.
MAR 1:21 Hya xi camá ne, cafehe me cojo catsiñuju cha xi cuacun vëhë nandya Capernaum. Hane hya xi cavechu nixtin xi chjahájenda rë ne, quiji me yungun, cavicuya me xuta.
MAR 1:22 Hane xuta jan ne, quijircun rë me hacutjin vicuya Jesús ta, tsëhë xi tivicuya me sacuaha ngu xi matitjun jain, hacuiin sacuatjin maestru xi vicuya ley rë xuta tsëhë nangui Israel.
MAR 1:23 Hacuaha ha tu ñahñu canduva ngu cha xi jiya xitsehen cahntsua xahasen rë cha ngajan cahntsua yungun jan.
MAR 1:24 Hane cuitjin cajindaya cha: ―‍Ngayun ne, ¿mé cuenda nuju tsijin? ¿Há nduvun nicjun niji? Ngayun ne, Jesús tsëhë nandya Nasaret ngayun. Hacuaha hvë xi ngayun xi tsajin jyë́ nuju ngayun xi catsingatju nuju Nina.
MAR 1:25 Hane Jesús ne, cachja cjan me cojo xitsehen xi jiya xahasen rë cha jan. Cuitjin cachja me: ―‍Jyuu nechin. Hacuaha tetjixin tsëhë cha vi.
MAR 1:26 Xi tu cahmexcuen cha xi casahmi xitsehen ne, hisca cajindaya, hane cavetjuxin tsëhë cha.
MAR 1:27 Yëjë ni xuta jan ne, jemu quijircun rë me, hisca cavisiajmi me cojo xicjin me cuitjin: ―‍¿Mé nga xcusun vihi ni? Ngu cjua xatsë xi vicuya me vihi, ta hisca xitsehen, hacuaha hndë tsëhë me.
MAR 1:28 Hacuaha marcu macjain canuhya rë tsëhë me jinguyëjë ni ladu tsëhë distritu Galilea.
MAR 1:29 Hya xi camá ne, cavetju me yungun jan, quiji me ndava cha Simón. Quiji me cojo cha Jacobo cojo cha Juan, hacuaha cojo cha Andrés hntsë cha Simón.
MAR 1:30 Hane nahya rë cha Simón ne, jiña na xi hmu rë na cojo chihinsuë. Hane ngutjen cachja cha cojo Jesús xi hmu rë na.
MAR 1:31 Ngajan xi quiji tiña Jesús hiscan jiña na, cafaha me tsja na, catsisatjen me na. Hane hora vëhë ni, casejyu suë xi má rë na. Hisca cafaha cuenda na xi sinë me cojo xicjin me.
MAR 1:32 Hane xi cavetje tsuhi ne, jemu cjín xuta quijicojo me xuta hmu rë hiscan tacun Jesús, hacuaha cojo me xi hincha xitsehen xahasen rë,
MAR 1:33 camatangun me cojo xuta nandya ngajan tingotjo ndihya.
MAR 1:34 Hane jemu cjín xuta hmu rë camandaja me xi casahmi Jesús, xuta xi má rë me tu mé ni chíhin xi má rë xuta. Hacuaha jemu cjín xitsehen cavaxëxin me tsëhë xahasen rë xuta. Hane casuaain me cahndë́ xi cachja xitsehen ta tsëhë xi ha vëë rë me. Hane ngutjen cuichja ta me vëhë xi catsingatju Nina me.
MAR 1:35 Xi camá nchujuni, jñu sa nguitajñu cavisatjenhnga me. Hane cavetju me ndihya quiji me ngu cahndë́ hiscan xin. Hane ngajan cavisiajmi me cojo Nina.
MAR 1:36 Ngajan xi cha Simón cojo cha xi yahnga jan ne, cavanguise cha Jesús.
MAR 1:37 Hane xi casacu rë cha me ne, sehe cachja cha cojo me ta: ―‍Jemu cjín xuta cafehetjengui nuju me. ―‍Cuatjin chja cha.
MAR 1:38 Ngajan xi cachja me cojo cha ta: ―‍Cuanguen sa nandya xi siu tahndee, cojo sa xi hacuaha cuichjá cojo xuta vëhë cjua rë Nina ta tsëhë xi xa vëhë canduvá. ―‍Cuatjin cachja me.
MAR 1:39 Hane sehe quiji sa me yungun xi siu yëjë ni nandya tsëhë Galilea. Cachja me cojo xuta cjua rë Nina, hacuaha cavaxëxin me xitsehen xi hincha xahasen rë ngujo xuta xi siu nandya jan.
MAR 1:40 Hya xi catsujyihiya me nandya xi cuacun vëhë, hya cachja ngu cha xi yaha rë ngu chíhin vitaha xi setaha chuxin naja. Hane cachjajyë cha cojo Jesús, hisca cavixcuhnchi cha xcun me, sehe cachja cha cuitjin: ―‍Sá xi nihñu favor ne, cuma naxunxun chíhin xi yaha ná.
MAR 1:41 Jesús ne, camayuma rë me cha. Hane cavetahatsja me cha. Sehe cachja me cojo cha cuitjin: ―‍Joho. Ha camandaja ngaye. ―‍Cuatjin cachja me.
MAR 1:42 Hane ngutjen ni cavetjuxin chíhin jan ne, camandaja cha.
MAR 1:43 Hane sehe casua me cha cuidadu. Hane ngutjen ni catsingatju me cha, quiji cha.
MAR 1:44 Cuitjin cachja me: ―‍Ndaja cuidadu xi canujiin camahani xcusun vi cojo hisca ngu. Peru tihin ningacuin yojo riji cojo nahmi ngajan yungun. Hane tejñi ngu cjuatjo sacuatjin chja ley tsëhë Moisés ta camandaja ngaye, cojo sa xi xuta ne, cumacjain rë me. ―‍Cuatjin cachja me cojo cha.
MAR 1:45 Peru xi cavetju cha quiji cha ne, cavetsihin casua cha camachaya rë xuta. Jercu cachjatë cha tsëhë xcusun vëhë. Vëhë xi Jesús ne, ha quihndë cavisiin me nandya ta tsëhë xi ha ngutjen jercu tsë xuta. Hane ngajan ni nguijña casetaha me. Peru xuta ne, yëjë ni ladu cavetju me, quijitjengui me Jesús.
MAR 2:1 Hane cahntsua xi ngujo nixtin ne, cavuya quiji nga Jesús cojo cha ladu rë me ngajan nandya Capernaum.
MAR 2:2 Hane xi casacu cjua xi tacun ndihya me ne, jercu camatangun xuta, hisca tingotjo ndihya quitsë me. Hane sehe cachja Jesús cjua rë Nina.
MAR 2:3 Ngajan xi canduva ñuju cha hiscan tacun Jesús, yahahnga cha ngu cha xi cahme yojo rë.
MAR 2:4 Hane xi maji ficojo cha cha hisca hiscan tacun Jesús, tsëhë xi jemu quitsë xuta ne, cavuxaha cha rcu ndihya quixi rë hiscan tacun me. Sehe ngajan catsinguisehen cha cha hmu rë jan cojo ni nachan xi quisun cha.
MAR 2:5 Hya xi cavëë Jesús hacutjin xi macjain rë cha me ne, sehe cachja me cojo cha hmu rë jan ta: ―‍Jyë́ riji tsan ne, ha camanchataha. ―‍Cuatjin cachja me.
MAR 2:6 Hora vëhë ne, hacuaha tivisiñuju ngujo cha maestru tsëhë ley, hacuaha taha titsingatahacacun cha cuitjin:
MAR 2:7 “¿Mé má cuitjin chja cha xi cuijyihi vi?, ta Nina tsixcuehyu cha. Tsajin yo xi cuma tsinchataha jyë́ rë ngu xuta ta suva ni Nina má sahmi me.”
MAR 2:8 Jesús ne, ha hisca vëë me cojo cjuatacun rë me xi cuatjin tsingatahacacun cha xi cuacún vë, hane sehe cavinenguise me cuitjin: ―‍¿Mé má cuatjin ningatuhuntacun cjuatacun vëhë?
MAR 2:9 ¿Jarë xi hitsë sa tsavi xi cuichjá cojo cha hmu rë vi? ¿Há xi: “Jyë́ riji ne, ha camanchataha?” O há tsajin ne, ¿há xi: “Tisatjinhngue ne, chjaye nijña riji, hane tjihin?”
MAR 2:10 Hindë cojo sa xi cumachaya nuju xi Nina cavitexa me ngahan xi tsinchátaha jyë́ rë xuta nguehe ngasunhndë ne, nguehe chutsujun hacutjin cuichjá cojo cha hmu rë vi. Sehe cachja me cojo cha hmu rë cuitjin:
MAR 2:11 ―‍Tisatjinhngue tsan. Chjaye nijña riji ne, tjihin ndya riji. ―‍Cuatjin cachja me.
MAR 2:12 Ngajan xi cha hmu rë jan ne, ngutjen ni cavisatjenhnga cha, cafaya cha nijña rë cha, sehe cafe cha xcun ni ngayëjë xuta. Vëhë xi ngayëjë ni xuta jan ne, jemu quijircun rë me. Hacuaha cachja me ta: ―‍Jemu cjuarcun jain Nina. Vëhë xi cuatjin camá casahmi me. Cjëë camahani chaan xcusun sacuaha vëhë. ―‍Cuatjin cachja xuta.
MAR 2:13 Ngu nixtin nga ne, cavatju Jesús tjehen laguna. Hane jemu cjín xuta quijitjengui rë me. Hane cavicuya me xuta jan.
MAR 2:14 Hane hya xi cjui cjui me ne, cavechu me hisca tacun cha Leví, quihndi rë cha Alfeo. Tacun cha ndihya hiscan faha cha xi machjitje tsëhë xi xteña. Sehe cachja Jesús cojo cha cuitjin: ―‍Cuanguen cojo ná. Hya xi camá ne, cavetju cha, quiji cha cojo me.
MAR 2:15 Cuitjin camá nga ngu nixtin jan, tijinë Jesús niñu ndava cha Leví. Hacuaha jemu cjín sa cha xi faha tujúnsa cojo jingu sa cha tsehen tijinë cha cojo Jesús cojo cha ladu rë me, ta hacuaha jemu cjín xuta xi cuacún vë xi tjengui rë me.
MAR 2:16 Peru cha maestru tsëhë ley cojo cha tsëhë partidu fariseo ne xi tu cavëë cha xi tijinë Jesús cojo cha xi cuacún jan ne, sehe cavinenguise cha cojo cha ladu rë me cuitjin: ―‍¿Mé má cuatjin tijinë Jesús cojo cha xi choho xcusun rë vë ni?
MAR 2:17 Xi tu cahndë Jesús cjua rë cha ne, sehe ngajan xi cachja me cojo cha ngu ejemplu cuitjin: ―‍Xuta xi hacuiin hmu rë me ne, mijí rë me doctor. Me xi hmu ni rë me ne, me vëhë xi mameje rë me. Hacuaha ha chuva vëhë ni canduvá ngahan. Canduvá cuanguë xuta xi choho cjuatacun rë, cuichjá cojo rë me cjua rë Nina. Peru hacuiin cojo me xi ha tyjahi cjuatacun rë. ―‍Cuatjin cachja me.
MAR 2:18 Camá xi cha ladu rë cha Juan cojo cha tsëhë partidu fariseo ne, nixtin hya ne siu cha xun tsëhë Nina. Hane cafehe ngujo cha xi cavinenguise rë Jesús cuitjin: ―‍¿Mé má cha ladu rë cha Juan cojo cha tsëhë partidu fariseo ne, tijinii cha quihndë ta, siu cha xun rë Nina, hane cha ladu nuju ne, faharcuiin cha cuatjin ni?
MAR 2:19 Sehe catsicuya Jesús cjua cojo ngujo ejemplu cuitjin: ―‍Jinguyëjë rë xi cha xi cuixan ne, tacun cha cojo xuta rë cha ne, cumaji cuiyuju me xun rë Nina.
MAR 2:20 Peru cuinduva nixtin hya xi cha xi vixan ne, cojo cjuachan cjuecojo condra rë cha cha. Hane hya cuiyuju xuta rë me xun rë Nina.
MAR 2:21 Hacuaha cachja me cojo cha cuitjin: ―‍Tsajin yo xi fuyataha tsjian changá cojo ngu rquí tsjian xatsë ta tsëhë xi cjëë cjueyu. Cuatjin ta, sá xi cuatjin sahmi me ne, xi cjueyu tsjian xatsë jan ne, cuicheya rë tsjian xi changá jan hane sahmi jyë sa rë hiscan xi ntsun.
MAR 2:22 Hacuaha tsajin yo xi vincha xan xatsë cahntsua chuxin changá ta, sá xi cuatjin sahmi me ne xan jan ne, tsitsinga rë chuxin jan. Hane xan jan ne, chajan. Hacuaha cuetsun chuxin jan. Vëhë xi xan xatsë ne meje rë chuxin xi xatsë. Maji secjan jo xcusun.
MAR 2:23 Cuitjin camá nga ngu nixtin xi chjahájenda rë. Hora xi tivatju Jesús cojo cha ladu rë me hiscan tjin tjë trigu ne, cavetsihin cavotohosun cha tsë tsë trigu jan.
MAR 2:24 Sehe cha tsëhë partidu fariseo cavinenguise cha me cuitjin: ―‍¿Mé má cuatjin quihndë nixtin xi chjahájenda rë ne, sahmi cha ladu nuju xa xi chja ley xi cumaji nihña?
MAR 2:25 Sehe Jesús ne, cafayangui me tsëhë cha cuitjin: ―‍¿Há cjëë camahani chutayun xujun hiscan chja tsëhë xcusun xi casahmi David hya xi tjin rë me cjuandya xi jemu vojo rë me cojo cha xi siutaha cojo me?
MAR 2:26 Hya xi Abiatar má me nahmi xi matitjun jan ne, hya cavisehen me ndava Nina. Hane David ne, cajinë me pan xi viyuju xcun Nina. Hacuaha casua me cajinë cha xi siu cojo me. Cuatjin casahmi me handasa xi chja ley ta suva ni nahmi tjin cahndë́ xi cuma sinë me pan xi cuacún vë. ―‍Cuatjin cachja Jesús.
MAR 2:27 Ngajan xi cachja me cojo cha ta: ―‍Xi má nuju ngayun ne, ¿há titjun cavejña Nina nixtin xi chjahájenda rë, sehe catsindaja me xuta xi cjuaharcun rë nixtin vëhë? ¡Hacuiin cuatjin camá! Nina ne, titjun catsindaja me xuta, hane xi camá ngascan ne, cavajña me nixtin xi cjuahajenda xuta.
MAR 2:28 Cuatjin ne, ngahan xi tsëhë Nina canduvá ne, hacuaha satë ná ngahan sacuaha nai rë xi cuichjá mé xi ndatjin xi cuma nixtin xi chjahájenda rë. ―‍Cuatjin cachja Jesús.
MAR 3:1 Ngu nixtin nga xi quiji Jesús ngu yungun ne, ngajan tacun ngu xihin xi quixihñu ngu ladu tsja cha.
MAR 3:2 Hane cha tsëhë partidu fariseo ne, cojo sa xi cuma cuinchajyë cha Jesús ne, siu cha cuidadu, ¿há tsindaja Jesús hiscan hmu rë xihin jan nixtin xi chjahájenda rë?
MAR 3:3 Hane ngajan xi cachja Jesús cojo cha xi quixihñu tsja jan cuitjin: ―‍Xcun ni yëjë xuta vi ne, tisechin.
MAR 3:4 Sehe cavinenguise me xuta xi siu me cuitjin: ―‍¿Mé xi sacu cahndë́ nixtin xi chjahájenda rë? ¿Há xi ndaja ne, o há xi ndajin, há xi naxentjen xuta o há xi niquen me? Peru cafayinnguiin me hisca hitsë.
MAR 3:5 Vëhë xi Jesús ne, cama cjan rë me. Hacuaha cama vacacun me ta, tsëhë xi sahmi yumahasen xuta. Xi tu cavutsejen Jesús yëjë ni xuta ne, sehe cachja me cojo xihin hmu rë jan cuitjin: ―‍Nixingun ntsun. Xi tu catsixinga cha tsja cha ne, ha camandaja.
MAR 3:6 Ngajan xi cha tsëhë partidu fariseo ne, cavetju cha yungun. Quiji casahmitangun cha cjua cojo cha tsëhë partidu Herodes xi tsiquehen cha Jesús.
MAR 3:7 Ngajan xi Jesús cojo cha ladu rë me ne, quiji nga me laguna. Hacuaha jemu cjín xuta tsëhë distritu Galilea quijitjengui me Jesús.
MAR 3:8 Hane xi camachaya rë xuta xcusun xi casahmi Jesús ne, canduva camaha sa xuta tsëhë cahndë́ xi cuicun vi: nandya Jerusalén cojo yëjë sa nandya tsëhë distritu Judea, cojo distritu Idumea, cojo ngunda vëhë tsëhë ndajyë Jordán cojo hisca tahndee rë nandya Tiro cojo nandya Sidón.
MAR 3:9 Sehe ngajan xi cachja me cojo cha ladu rë me ta meje rë xi cuejña cha ngu barcu tiña hiscan tacun me, ta jemu cuehnchun xuta me.
MAR 3:10 Hane tsëhë xi jemu cjín xuta camandaja me xi casahmi Jesús ne, vëhë xi yëjë ni me xi hmu rë catsëxti me ne, cojo sa xi ndastu satë tsja me Jesús.
MAR 3:11 Hane xi cavëë xitsehen xi hincha xahasen rë xuta jan Jesús ne, quiji caticja xuta jan hisca tacun Jesús. Sehe ña jindayatë xuta jan, ta xitsehen casahmi xi cachja me cuitjin: ―‍Ngayun xi Quihndi rë Nina ngayun. ―‍Cuatjin cajindaya me.
MAR 3:12 Ngajan xi Jesús ne, cavitexa me xitsehen xi tsajin yo cuichja cojo yo me.
MAR 3:13 Hya xi camá ne, camiji Jesús ngu naxi. Sehe catsingatju me cjua rë cha xi meje rë me. Hane quijitjengui cha me.
MAR 3:14 Hane cavaxijin me tejó cha xi cuisecoo rë me, hane hacuaha tsingatju me cha cjue cuicuya cha xuta cjua rë Nina,
MAR 3:15 hacuaha cuaxëxin cha xitsehen xi hincha xahasen rë xuta.
MAR 3:16 Cha xi tejó tsëhë cha ladu rë me cuitjin hmí ra: cha Simón ne, hacui cha xi cachja Jesús xi hmí rë Pedru,
MAR 3:17 cha Jacobo cojo cha Juan hntsë cha ne, xi quihndi rë Zebedeo, cha xi casuañihi me Boanergerne, ngu ñihi xcuehyu xi meje cuichja Jemu Xti Naja,
MAR 3:18 cha Andrés, cha Felipe, cha Bartolomé, cha Mateo, cha Tomás, cha Jacobo, quihndi rë Alfeo, cha Tadeo, cha Simón xi tsëhë partidu cananayu,
MAR 3:19 hane cha Judas tsëhë nandya Queriote, cha xi cuiteña rë Jesús cojo condra rë me.
MAR 3:20 Hya xi camá ne, cavuya quiji nga Jesús ndihya hiscan véjña me. Hacuanitjin nga camatangun xuta cjín. Hisca xi sinë Jesús niñu cojo cha ladu rë me maji.
MAR 3:21 Hya xi camachaya rë xuta rë me cjua vëhë ne, quiji me xi cuaxëxin rë me, tsëhë xi há sa má rë me, sca rë Jesús.
MAR 3:22 Hane cha maestru tsëhë ley ne, canduva cha tsëhë Jerusalén. Sehe cavisiajmi cha cojo xicjin cha cuitjin: ―‍Jiya Satanás xahasen rë me. Hane ngatsë rë xitsehen xi matitjun vë ne, vëhë xi ma vaxëxin Jesús xitsehen. ―‍Cuatjin cachja cha.
MAR 3:23 Ngajan xi casahmi tangun Jesús cha xi cuacun vëhë ne, sehe cojo ngujo ejemplu cachja me cojo cha cuitjin: ―‍Jemu yuma hasen rë Satanás sá xi suva ni cuaxëxin xicjin.
MAR 3:24 Ha hyan ta sá xi xutaxa rë tsëhë ngu nandya scaan me ngajñi rë me ne, cjuicanii rë me.
MAR 3:25 Hacuaha sá xi xuta xi ngu ndava me ne, scaan me ngajñi rë me ne, ngajan chaja.
MAR 3:26 Ha cuanitjin rë Satanás ta sá xi scaan cojo xicjin ne, ha quihndë cumachjiriin xi matitjun ta, tsëhë xi ha quihndë cuihndiin xicjin tsëhë.
MAR 3:27 ’Hacuanitjin ne, hisca ngu cha chëjë cumaji tu cuisehen ni cha ndava ngu xuta xi hñu ngahñu rë me xi tsichëjë cha tsëhë me. Cumaji sa xi hacuiin titjun tsihñu cha me ta cuatjin xi cuma tsichëjë cha tsëhë me.
MAR 3:28 ’Cuichjá cojo nuju cjuaquixi ta tu mé ni jyë́ xi sahmi xuta hacuaha tu mé ni cjua xi choho cuichja me ne, sacu rë me cjuaninchataha, sá xi cuijacun me jyë́ rë me cojo Nina.
MAR 3:29 Peru tu yo ni xi choho cuichja tsëhë Hasen rë Nina ne, tsajin ngu nixtin xi sacu rë cjuaninchataha ta jemu jyë jyë́ rë.
MAR 3:30 Cuatjin cachja Jesús ta tsëhë xi cachja cha jan xi jiya xitsehen xahasen rë me.
MAR 3:31 Hane cafehe naa rë me cojo hntsë me ne, ngajan ni ndatsen hinchacun me ne, catsingatju me cjua xi meje cuisiajmi me cojo Jesús.
MAR 3:32 Vëhë ta jemu cjín xuta siundee me Jesús ne, sehe cachja xuta cojo rë me cuitjin: ―‍Nutsujun ni. Ná nuju cojo tsuhun cojo tichjun ne, jindaya nuju me ngajan candatsen.
MAR 3:33 Sehe cafayangui Jesús cuitjin: ―‍¿Yo xi má nuju xi ná naha cojo xingueen?
MAR 3:34 Cavutsejen me xuta xi siundee rë me, sehe cachja me cuitjin: ―‍Ngayun xi nechun nguehe, ngayun xi sacuaha ná naha cojo xingueen
MAR 3:35 ta, tu yo ni xi sahmi sacuatjin chja Nina ne, vëhë xi sacuaha ná naha sacuaha xingueen.
MAR 4:1 Ngu ndiya nga ne, cavetsihin cavicuya Jesús xuta tjehen laguna. Hane ngu cuatjin nga jercu tu catsë camahani xuta hiscan tacun me. Vëhë xi cavisehen me ngu barcu cavéjña me. Hane quijicojo rë me hitsë xcun nandá, ngajan cavéjña. Hane yëjë ni xutacjín jan ne, caviyuju me nangui quixí tjehen nandan.
MAR 4:2 Sehe cavicuya Jesús me jemu cjín cjua. Cuitjin cachja me ngu ejemplu:
MAR 4:3 ―‍Cuejña ni xi ngu xihin ne, quiji catsitjë cha trigu.
MAR 4:4 Hane hora xi ticandi cha tjë rë ne, ngujo ne, cavixu ndiya. Hane canduva nisë ne, cajinë chu.
MAR 4:5 Ngujo nga ne, cavixu hiscan xi jemu ndyojotë, hacuaha jemu chuva nihndë quisun. Hane jemu xati cavetju ta tsëhë xi hacuiin tjain nihndë quisun.
MAR 4:6 Hane xi jemu suë camá ne, caxiya tsëhë xi jemu chuva tyjama rë.
MAR 4:7 Ngujo nga ne, cavixu ngajñi rë nahyá. Xi tu camayehe nahyá ne, casahmihndë rë xitjë, hane camayiin.
MAR 4:8 Hane ngujo nga ne, cavixu hiscan ndajyihi nangui. Vëhë ne, jemu ndaja camá, hisca yehe hnga camá ya rë. Ngujo ne jemu ndaja camá. Ngujo nga jan ne, hitsë sa ndaja camá. Hane xi yahnga jan ne, jercu vatjutaha ndaja camá. Cuatjin fi ejemplu tsëhë cha xi tsitjë trigu.
MAR 4:9 ’Jarë ngayun xi meje nuju cuma nuju ne, ningatuhuntacun nduju mé vijne cjua vë.
MAR 4:10 Hya xi cafe xutacjín jan ne, ngajan xi me xi siundee cuaha jan cojo cha xi tejó jan ne, cavinenguise me tsëhë cuentu jan.
MAR 4:11 Sehe cafayangui Jesús cuitjin: ―‍Ngayun ne casua nuju Nina cahndë́ xi vijne rcun cjuatahahma tsëhë gubiernu xi sahmi me. Peru me xi hacuiin ladu naja ne, cojo suva ejemplu tichjá cojo rë me,
MAR 4:12 cojo sa xi handasa cuihndë me ne, peru cuijnii rcu me ta, sá tu tsindeya me cjuatacun rë me ne, hacuaha cumanchataha me. ―‍Cuatjin cachja Jesús.
MAR 4:13 Sehe ngajan xi cachja Jesús cojo cha ladu rë me ta: ―‍Sá xi ha canuhyuun ejemplu vëhë ne, hacutjin cuinuhyun sa xi yahnga ni. Nguehe cuichjá cojo nuju mé vijne ejemplu xi cachjá cojo nuju vë.
MAR 4:14 Cha xi tsitjë trigu ne, sacuaha ngu cha xi chja cjua rë Nina cojo xuta.
MAR 4:15 Ngujo me xi vihndë cjua vëhë ne, sacuaha tjë rë trigu xi cavixu ndiya ta cjua ndajyihi xi vihndë me ne, ngutjen ni nduva Satanás ne, fahataha cjua xi caseya cahntsua xahasen rë me.
MAR 4:16 Yahnga nga me xi vihndë cjua vëhë ne, sacuaha tjë xi cavixu hiscan jemu ndyojotë ta hya xi vihndë me cjua ndajyihi ne, ngutjen ni jemu cojo cjuasua macjain rë me cjua.
MAR 4:17 Peru tsëhë xi hacuiin nguñaja cacun me macjain rë me ne, vëhë xi seyaain cahntsua xahasen rë me hya xi má cjuandya, sacuaha cumá rë tjë xi jemu chuva tyjama rë ne ta, cain rë xi jyë nixtin.
MAR 4:18 Hane ngujo nga me xi vihndë cjua vëhë ne, sacuaha tjë xi cavixu ngajñi nahyá. Vihndë me cjua.
MAR 4:19 Peru tsëhë xi jemu tjin rë me cjuandya hacuaha jercu meje rë me xi cuma nchina me, vëhë xi chuva cuenda sahmi me cjua ndajyihi xi cavisiñuju me. Fë ne, tsajin mé vetjucaa.
MAR 4:20 Ngujo nga me xi vihndë cjua ndajyihi vëhë ne sacuaha tjë xi camatjë hiscan ndajyihi nangui ta xi tu vihndë me cjua vëhë ne, faha nguñajacacun me. Vëhë xi ngujo me ne, ndaja cuiyujuchihin cjuatacun rë me. Ngujo nga me ne, hitsë sa ndaja cuiyujuchihin cjuatacun rë me. Hane me xi yahnga jan ne, jercu tu ndaja camahani cuiyujuchihin cjuatacun rë.
MAR 4:21 Hacuaha cachja me cojo rë me cuitjin: ―‍Hya xi setaha rë candil ne, ¿jani cuejña? ¿Há ngahma caxa ne? o ¿há ngahma nachan? Hacuiin cuatjin nihñu ta, cuejña cahndë́ rë.
MAR 4:22 Sacuaha ndaja tsejen ndihi jan ne, hatuxa cuechu nixtin xi cuijne rcu xuta cjua naha xi hacuiin ndaja vijne rcun me quihndë.
MAR 4:23 Jarë ngayun xi meje nuju cumá nuju ne, ningatuhuntacunndujun mé vijne cjua vë.
MAR 4:24 Hacuaha cachja sa me cojo xutacjín cuitjin: ―‍Ndaja tetuhunrcun xi tivisiñuju. Chuva xi tuhun ne, ha chuva vëhë sua nuju Nina. Hisca quisun sa sua nuju me.
MAR 4:25 Me xi ha tjin rë ne, sua sa Nina me, hane me xi tsajin cjín rë ne, cjuahataha Nina xi tjin rë me.
MAR 4:26 Sehe cachja Jesús cojo xutacjín jan ngu ejemplu cuitjin: ―‍Xuta xi cuisehen me ladu rë Nina ne, ha tuxa cumá cjín me sacuaha tjë tsëhë trigu xi tsitjë ngu xihin xcun nangui rë me.
MAR 4:27 Fañafë cha nguixun ne, visatjenhnga cha nguitajñu. Hane tjë ne, vetju, hacuaha mayehe xitjë. Peru xihin jan ne, hvíin hacutjin camá xi camayehe xitjë jan.
MAR 4:28 Nangui ne, ha tuxa má xitjë. Titjun ne, cuetju xca rë. Xi cuijin sa ne, cuetju tú chihndë rë. Hiscan xi cuijnetaha ne, jemu cjín tutjë rë cuetju.
MAR 4:29 Hane hya xi camacha tutjë rë ne, sehe tsingatju xihin jan mosu xi cjue cuatë ta tsëhë xi ha cavechu nixtin xi xtí rë.
MAR 4:30 Sehe cachja Jesús cuitjin: ―‍Nguehe cuichjá cojo nuju ngu nga ejemplu tsëhë gubiernu xi sahmi Nina.
MAR 4:31 Xuta xi cuisehen ladu rë Nina ne, cumacjín me sacuaha majyë ngu ya mostasa. Tutjë rë ya vëhë ne, hitsë sa langa xi cumá rë yëjë ni tutjë xi tjin ngasunhndë.
MAR 4:32 Peru hya xi matjë ngu ne, sehe cuetju xca rë hacuaha hitsë sa jyë má xi cuma rë yëjë ni xca xi chine. Hane tsja rë ne, hacuaha yehe, hisca nisë ma sahmi chu ndava chu xcun tsja rë hiscan tjahnguen.
MAR 4:33 Jemu cjín ejemplu sacuaha vëhë cachja Jesús hya xi tivicuya me xuta cjua rë Nina, hatucutjin hora xi cama cavetaharcu xuta. Hane cojo xuta ne, cachja me suva ejemplu.
MAR 4:34 Peru hya xi suva siu cha ladu rë me ne, casua cuenda me cha mé vijne yëjë ejemplu jan.
MAR 4:35 Xi quiji hora tsëhë nixtin vëhë ne, Jesús ne, cachja me cojo cha ladu rë me cuitjin: ―‍Cuanguen ngunda vëhë. ―‍Cuitjin cachja me.
MAR 4:36 Ngajan xi caviyuju ni me xutacjín jan ne, sehe cha ladu rë me ne, quiji cha cojo me tu cuanitjin ni. Hacuaha cojo sa barcu xi yahnga jan ne, quiji tangun cojo rë me.
MAR 4:37 Hora xi cjui barcu ne, canduva ngu tjo xi jercu tu hñu camahani. Hane tsindyu rë laguna jan ne, vixuya cahntsua barcu, hisca meje tsë rë barcu cojo nandá.
MAR 4:38 Hane Jesús ne, hisca cahnchun barcu jan jiñafë me, tijiña me xcun tsjian sanercu me. Hya xi camá ne, catsingasca cha me, sehe cachja cha cojo me cuitjin: ―‍Maestro. Xati nihñutacun catasca nuju. ¿Há tsajin mé cuenda nuju ta, meje xtyusehen barcu cojo naja?
MAR 4:39 Hane cavasca rë me ne, cachja me cojo tjo cojo laguna cuitjin: ―‍Jyuu nechun. Xi tu cachja me cuatjin ne, casejyu yëjë ni.
MAR 4:40 Ngajan xi cachja me cojo rë cha cuitjin: ―‍¿Mé má cuatjin jemu rcun? ¿Hacujyihi ni xi hisca cjëë cumacjain ndaja nuju ngahan?
MAR 4:41 Hya xi camá ne, jercu catsacjun camahani cha ladu rë me jan. Hane sehe ngajñi rë cha jan ne, cavisiajmi cha cuitjin: ―‍¿Yo me xi cuijyihi vi? ta, hisca tjo hisca laguna hndë tsëhë me.
MAR 5:1 Hya xi camá ne, cafehe Jesús cojo cha ladu rë me ngunda vëhë tsëhë laguna, hiscan ladu rë xuta nandya Gadara.
MAR 5:2 Hane xi cavetju me barcu jan, canduva tiña ngu xihin xi hincha xitsehen xahasen rë, canduva cha tsëhë ngajñi rë tsjun ngajan tahndë.
MAR 5:3 Hacuaha ha ngajan tacun cahndë cha tahndë. Hacuaha tjihñu cha xi sejyu cha hisca cojo cadena.
MAR 5:4 Jemu cjan rë cha, cjín ndiya camahñu tsja camahñu ntsacu cha cojo cadena, peru tu cavicheya ni cha. Vëhë xi tsajin yo xi cama casahmi cojo cha.
MAR 5:5 Catsujyihiya cha nixtin nixten ngajan tahndë cojo ngajñi nguijña cha. Hane cajindayatëcjin ni cha, hacuaha cavanguihmucjin ni cha yojo rë cha cojo ndyojo.
MAR 5:6 Hane hora xi cavëë cha Jesús ne, cjin sa nduva cha ne, vanga cha quiji cavixcuhnchi cha xcun Jesús xi cjuaharcun cha me.
MAR 5:7 Ña cajindayatë cha cachja cha cuitjin: ―‍¿Mé cuenda nuju tsahan, Jesús, Quihndi rë Nina xi matitjun? Catamaniji rë Nina xi tuhundyun ná.
MAR 5:8 Cuatjin cachja cha ta tsëhë xi ha tichja Jesús xi cuetjuxin xitsehen jan tsëhë xahasen rë cha.
MAR 5:9 Sehe cavinenguise me ñihi rë cha. Hane cafayangui cha tsëhë me cuitjin: ―‍Ñihi naha ne, Sindadu Cjín, tsëhë xi jemu cjín ngayin.
MAR 5:10 Sehe jercu cafehya cha cojo Jesús xi hacuiin cjín camaha tsingatju me xitsehen jan tsëhë cahndë́ vëhë.
MAR 5:11 Jinguyëjë rë xi cuatjin tijima ne, ngajan tiñataha ne, tacun ngu cahndë́ hiscan chu chinga hinchataha chu tijinë chu.
MAR 5:12 Hane xitsehen jan ne, ña yuma chja cojo Jesús cachja cuitjin: ―‍Ningatjun niji hiscan siutaha chinga, xi cuisihin cahntsua xahasen rë chu.
MAR 5:13 Hane Jesús ne, joho cachja me. Hane hora xi cavetju xitsehen xahasen rë xihin jan ne, quiji cavisehen cahntsua xahasen rë chinga jan. Sehe yëjë ni chinga jan, xi meje jo mil jan ne, cavanga chu quiji cavetje chu ngu ndetjun tsëhë rcu naxi hane ngajan cavixuya chu ngajñi laguna. Ngajan camiji rë chu, hane cahme chu.
MAR 5:14 Hane cha xi titsicjén rë chinga jan ne, cavanga cha quiji cha. Casua cha camachaya rë xuta xi siutaha nguijña, cavechu hisca nandya cachja cha. Ngajan xi xuta xi cahndë cjua jan ne, quiji cavutsejen me mé xi camá jan.
MAR 5:15 Cafehe me hisca tacun Jesús, hane cavëë me cha xi jemu cjín xitsehen caxincha xahasen rë, tacun cha, yaja cha tsjian rë cha, hacuaha ha quihndë tsajin mé má rë cjuatacun rë cha. Hane xuta jan ne, jemu catsacjun me camá.
MAR 5:16 Hacuaha xuta xi cavëë hacutjin cavatju cha camá hacuaha hacutjin cavatju chinga camá ne, cachja me cojo xuta xi yahnga.
MAR 5:17 Sehe cavetsihin cachja me cojo Jesús xi catje me tsëhë ladu rë me xi cuicun vi.
MAR 5:18 Hya xi camá ne, hora xi tivisehen Jesús barcu ne, jercu cafehya cha xi caxincha xitsehen xahasen rë jan xi cjue cha cojo me.
MAR 5:19 Peru Jesús ne casuaain me cahndë́ xi cjue cha. Hane cuitjin cachja me cojo cha: ―‍Tjihin ndya riji. Tjihin tjengui xuta riji, hane tinoje cojo rë me xi Nina ne, camayuma rë me ngaye. Hacuaha tinoje tsëhë cjuandaja xi casahmi me cojo ri.
MAR 5:20 Ha xcun xi cafë cahndë cha cjua xi cachja Jesús ne, sehe cavetju cha quiji cha ladu hiscan xi hmí rë Të Nandya. Hane cavetsihin cha casuacuenda cha cjuandaja xi casahmi Jesús cojo cha. Sehe xuta xi siu cahndë́ jan ne, jemu quijircun rë me.
MAR 5:21 Xi tu cavuya nga Jesús cojo barcu ladu vihi tsëhë laguna ne, jercu catsë nga xuta hiscan cafehe me tjehen laguna.
MAR 5:22 Hacuaha cafehe ngu xutaxa rë yungun rë ngu nandya. Cha vëhë ne, Jairo hmí rë cha. Hya xi cavëë cha Jesús ne, quiji cavixcuhnchi cha xcun me.
MAR 5:23 Sehe jercu cafehya cha favor cojo me. Cuatjin cachja cha: ―‍Quihndi naha ne, ha tu hora sa xi cueya na. Cuanguen ne, cuisanu ntsun na ne, cojo sa xi cumandaja na, hane cuejña sa na cjuahñu.
MAR 5:24 Xi tu cahndë Jesús cjua rë cha ne, sehe quiji me cojo cha. Hacuaha jemu cjín camahani xuta quiji me hacutjin quiji Jesús. Quiji hnchun hnchun me cojo me.
MAR 5:25 Hane ngajñi rë xuta jan ne, jiyajñi ngu chjuun xi ha nduva tejó nu xi hmu rë na tsëhë chíhin xahmajni.
MAR 5:26 Hane jemu jyë cjuañihi cavatju na camá ta ha ndasa jemu cjín doctor catsirqui me na, tu mahya catsicjë na tujún rë na ta tsajin mé cavetjucaa. Tu hitsë sa jyë camá chíhin rë na.
MAR 5:27 Xi tu cahndë na cjua tsëhë xcusun xi casahmi Jesús ne, quiji tiña na taha ngaxtun me, cavetahatsja na tsjian rë me.
MAR 5:28 Cuatjin casahmi na ta catsingatahacacun na cuitjin: “Sá xi cuetaha ntsa ndastu tsjian rë me ne, cumandaja ngahan.”
MAR 5:29 Hane ngutjen ni caxiya jni xi vixu rë na. Hane hacuaha camachaya rë na ta camandaja na tsëhë chíhin xi má rë na.
MAR 5:30 Jesús ne, camachaya rë me xi tjin xa xi casahmi ngahñu rë me. Cavuya me taha ngaxtun me ne, cavutsejen me xuta jan ne, sehe cavinenguise me cuitjin: ―‍¿Yo xi casatëtsja tsjian naha?
MAR 5:31 Sehe ngajan xi cha ladu rë me jan ne, cachja cha cojo me cuitjin: ―‍¿Hacutjin meje nuju xi cuinújin yo xi casahmi? ta ha chutsujun xutacjín xi ña tisatëtaha me ngayun ndya jan.
MAR 5:32 Sehe cavutsejen nga me xuta tahndee rë me ne, ¿yo xi cuatjin casahmi?
MAR 5:33 Sehe chjuun xi casahmi jan ne ta ha vëë na hacutjin cavatju na camá ne, ña fatsë na xi catsacjun na camá. Sehe quiji cavixcuhnchi na xcun Jesús, hane cachja na yëjë ni hacutjin xi cjuaquixi.
MAR 5:34 Sehe ngajan xi Jesús ne, cachja me cojo na cuitjin: ―‍Ha camandaja ngayun ta camacjain nuju. Tjangun cojo cjuasua ta chíhin vë ne, ha quihndë cuyaain suaxti nuju.
MAR 5:35 Jinguyëjë rë xi Jesús tichja cuaha me ne, canduva ngujo me tsëhë ndava xutaxa rë yungun jan. Hane cuitjin cachja me: ―‍Ha cahme quihndi nuju. Tahanndyaan sa rë maestru.
MAR 5:36 Peru Jesús ne, handasa cahndë me cjua xi cachja me xi cafehe jan ne, sehe cachja me cojo xutaxa rë yungun jan ta: ―‍Xi camacjiintacun. Ningatuhuntacun ni xi cumandaja na. ―‍Cuatjin cachja Jesús.
MAR 5:37 Sehe casuaain me cahndë́ xi cjue yëjë xuta jan. Suva ni cha Pedru, cha Jacobo cojo cha Juan hntsë cha Jacobo, cha vëhë quiji cha cojo me.
MAR 5:38 Xi cafehe me ndava xutaxa rë yungun jan ne, ngajan siu xutacjín xi jihnda me jindaya me ngatsë rë cjuandusin.
MAR 5:39 Hane xi cavisehen Jesús ndihya ne, sehe cachja me cojo xuta jan cuitjin: ―‍¿Mé má cuatjin va má ngayun chjihndun? Na lihndi vë ne, hacuiin cahme na ta jiñafë na. ―‍Cuatjin cachja me.
MAR 5:40 Sehe ngajan xi xuta xi siu jan ne, tu vejnucjëë me tsëhë cjua xi cachja Jesús. Sehe ngajan xi Jesús ne, catsitëë me xuta xi siu jan candatsen. Hane suva ni nahmi rë nima quihndi cojo naa rë cojo cha xi ticojo me cavisehen me cojo hiscan jiña.
MAR 5:41 Sehe cafaha me tsja nima quihndi jan ne, sehe cachja me cojo cuitjin: ―‍Talita cumi ―‍cjua xi meje cuichja: Tichjá cojo ri, tsan, tisatjinhngue.
MAR 5:42 Xi cafë cachja Jesús cuatjin ne, cavuya cjuahñu rë na lihndi jan hacuaha ngutjen ni cavisatjenhnga na catsujyihiya na. Na lihndi jan ne, tejó nu tjin rë na. Hane me xi siu jan ne, jercu quijircun camahani rë me.
MAR 5:43 Hya xi camá ne, jemu cachja camahani Jesús cojo xuta rë na xi tsajin yo cuichja me cojo xcusun jan. Hacuaha cachja me cojo xuta rë na xi sua me xi sinë na.
MAR 6:1 Hya xi cavetju Jesús tsëhë Capernaum ne, cavuya cafe me cojo cha ladu rë me nandya Nasaret, hiscan xi camacha me.
MAR 6:2 Hya xi cavechu nixtin xi chjahájenda rë ne, cavetsihin cavicuya me xuta ngajan yungun. Hane xutacjín xi tivisiñuju cjua rë Jesús jan ne, jemu quijircun rë me. Sehe cachja me ngajñi rë me cuitjin: ―‍¿Jani cavutaya cha xi cuijyihi vi cjua xi tichja cha? Jemu tjin rë cha cjuatacun. Hacuaha jemu yehe cjuarcun sahmi cha.
MAR 6:3 Há hyan ngayaan xi cha vihi xi chjineya jan ni, cha xi quihndi rë na María. Hntsë cha ne, hacui cha Jacobo, cha José, cha Judas cojo cha Simón. Hacuaha nandya naja tacun ndava tíchja cha. Hane jemu xti rë xuta jan, tsëhë xi ha vëë me Jesús.
MAR 6:4 Vëhë xi Jesús ne, cachja me cojo xuta jan cuitjin: ―‍Xuta ne, ha tuxa faharcun me ngu xihin xi suacuenda cjua rë Nina. Suva ni xuta rë xihin jan cojo xuta xi tangun nangui rë cojo, me vëhë xi faharcuaain me xihin jan.
MAR 6:5 Ngajan ne, hacuiin cjín cjuarcun casahmi me, tsëhë xi macjaain rë xuta me. Tu cavisanetsja ni me ngujo xuta hmu rë, hane camandaja xuta hmu rë jan.
MAR 6:6 Hane Jesús ne quijircun rë me ta, tsëhë xi xuta jan ne, cuatjin camacaain rë me. Hane sehe quiji catsujyihiya Jesús nandya tahndee rë jan, cavicuya me xuta.
MAR 6:7 Sehe casahmitangun me cha xi tejó jan hane cavetsihin catsingatju me jo jo cha jima ngu ladu. Hacuaha casua me cha ngahñu xi cuma cuaxëxin cha xitsehen.
MAR 6:8 Hacuaha cachja me cojo yëjë ni cha xi tsajin mé xi cjuaha cha xi cjue cha. Suva ni ngu ya xi cuisecoo rë cha. Hacuiin niñu ne, hacuiin morra, hacuiin xi tujún.
MAR 6:9 Chuxinxtë ni catincha ntsacu cha. Hacuaha cuaain cha chingá.
MAR 6:10 Ngajan xi cachja me cojo yëjë ni cha cuitjin: ―‍Hya xi cjuhun ngu ndihya ne, xi cuisuhun ne, ha ngajan ni tinechun nguixun nguixun ni hisca xi cuetjun tsëhë nandya hiscan xi casatë nuju.
MAR 6:11 Tuyani ni xi tsingatiin nuju me hacuaha hisca cuisiñijii me tsujun ne, tetjun tsëhë ngajan ne, titsunu chojo rë ntsacu. Vëhë cuma ngu seña tsëhë jyë́ rë me.
MAR 6:12 Xi cajnetaha cachja Jesús cuatjin ne, sehe cavetju cha quiji cha hiscan xi casatë rë cha. Cachja cha cojo xuta xi tsindeya me cjuatacun rë me.
MAR 6:13 Hacuaha jemu cjín xitsehen cavaxëxin cha. Hane xuta hmu rë ne, aceite tsëhë tuxine xi hmí olivu catsufë cha xten me hane camandaja me jan.
MAR 6:14 Me xi matitjun xi hmí rë Herodes ne, cahndë me cjua tsëhë Jesús, tsëhë xi xuta ne, jercu cachja me tsëhë Jesús. Hane ngujo me ne, cuitjin cachja me: ―‍Nima Juan, cha xi cavitenda rë xuta ne, ha ndasa cahme cha, peru cavascaya rë cha. Vëhë xi ma sahmi cha cjuarcun.
MAR 6:15 Hane ngujo nga me ne, cachja me ta Jesús ne, hacui rë Elías, ngu xutachanga xi casuacuenda cjua rë Nina hatsëë. Hane cachja sa yahnga me ta Jesús ne, hacui rë ngu profeta, sacuaha me xi casuacuenda xutachanga xi caviyuju titjun.
MAR 6:16 Peru Herodes ne, hya xi cahndë me cjua vëhë ne, sehe cachja me ta: ―‍Nima Juan má me. Catsingátju catisun rë rcu cha, hane cavuya rë cjuahñu rë cha. ―‍Cuatjin cachja Herodes.
MAR 6:17 Herodes ne, ha catsingatju me cachjaha rë cha Juan xi cjue cha ndavaya. Cuatjin casahmi me ngatsë rë na Herodía. Na vëhë cafaha Herodes, camá chjuun rë me ha ndasa xi ha chjuun rë cha Felipe hntsëjñu me má na.
MAR 6:18 Hane ngatsë rë vëhë, cuitjin cachja cha Juan cojo rë me: ―‍Chja ley ta ndajintjin camahani xi chjahan chjuun rë xingueen. Vëhë xi ngayun ne, ndajintjin xi cuatjin canihñu. ―‍Cuatjin cachja cha Juan.
MAR 6:19 Ngajan xi na Herodía ne, caveyacacun na cavutsejen na cha Juan. Hane meje rë na xi cueya cha. Peru camaji ta tsëhë xi
MAR 6:20 Herodes ne, cafaharcun me cha, tsëhë xi vëë me ta Juan ne, ngu xihin xi tyjahi cjuatacun rë cha, hane cavéjña cha tsëhë Nina. Hane vëhë xi casahmi me cha cuidadu. Hacuaha hya xi Herodes cavisiñuju me cjua rë cha Juan ne, jercu cachuya rë me ha ndasa casecjan cjuatacun rë me.
MAR 6:21 Peru casacu rë na Herodía cahndë́ tsëhë xi meje rë na hya xi cavechu nixtin tsëhë suhi rë Herodes. Hya cachja Herodes cojo ngujo xutaxa rë ndihyavasen cojo me xi matitjun tsëhë sindadu, cojo sa ngujo xuta changá xi matitjun tsëhë distritu Galilea, xi cjue me ta casehenchjine ngu comida tsëhë suhi rë me.
MAR 6:22 Hane hora xi tijinë me ne, cavisehen na quihndi rë na Herodía, catë na. Hane jercu cachuya rë Herodes cojo me xi yahnga jan hacutjin catë na. Sehe ngajan xi Herodes, me xi matitjun jan ne, cachja me cojo na cuitjin: ―‍Tu mé ni xi meje ri ne, chjahye ná, hane suá ri.
MAR 6:23 Vëë Nina jain ta suá ri hisca vasentjin nandya xi siu ntsa. ―‍Cuatjin cachja me.
MAR 6:24 Xi tu cavetju na quiji na hiscan tacun naa rë na ne, cavinenguise na cuitjin: ―‍¿Mé xi ndatjin cjuéhya rë me? Sehe ngajan xi chja naa rë na ta: ―‍Chjaye rcu cha Juan, cha xi vitenda rë xuta. ―‍Cuatjin cavinchangui naa rë na na.
MAR 6:25 Xi tu cavuya cavisehen na hiscan tacun Herodes ne, ngajan xi cachja na cuitjin: ―‍Meje ná xi ngutjen ni ne, cahntsua ngu tyuva ne tuhun ná rcu cha Juan. ―‍Cuatjin cachja na quihndi jan.
MAR 6:26 Ngajan xi Herodes ne, jemu choho camá rë me peru tsëhë xi hisca Nina caveyanangui me xi casua me cjua rë me, hacuaha tsëhë xi yëjë ni amigu rë me cahndë me cjua jan, vëhë sahmi xi má sava rë me tsindeya me cjua rë me cojo na.
MAR 6:27 Ngajan xi Herodes ne, ngutjen catsingatju me ngu sindadu hiscan jiya cha Juan. Hacuaha cavitexa me xi cuinduva cojo cha rcu cha Juan. Sehe ngajan xi cha sindadu jan ne, quiji cha ndavaya, cavatësun cha rcu cha Juan.
MAR 6:28 Sehe caveya cha cahntsua tyuva, quijicojo cha. Xi cafehe cha cojo ne, casua cha na quihndi rë na Herodía. Hane sehe casua na naa rë na.
MAR 6:29 Sehe hya xi cahndë cha ladu rë cha Juan tsëhë mé xi cavatju cha cama ne, sehe quiji cha cafaha cha nima caveyaniji cha.
MAR 6:30 Hya xi cajnetaha catsujyihiya cha apóstol xi catsingatju Jesús jan ne, cavuya camatangun nga cha cojo me. Sehe cachja cha hacutjin casahmi cha hacuaha hacutjin cavicuya cha.
MAR 6:31 Sehe ngajan xi Jesús ne, cachja me cojo cha cuitjin: ―‍Nduvun suvun ni ne, cuanguen hiscan xín, chjahanjeyan hitsë. Cuatjin meje cjue cjuahajeya me ta tsëhë xi jemu cjín xuta xi cjui nduva me hiscan tacun Jesús. Hisca maxatiin jinë me niñu.
MAR 6:32 Sehe quiji me cojo cha ladu rë me cojo barcu ngajan hiscan xín.
MAR 6:33 Hane xuta jan ne, cavëë me xi cjui me cojo cha ladu rë me. Hacuaha vëë me xi hacui Jesús. Sehe xuta tsëhë nandya tahndee jan ne, cavanga me quiji me taha vëhë. Hisca tjun sa me cafehe me, sehe cafehe Jesús cojo cha ladu rë me.
MAR 6:34 Xi tu cavetju Jesús tsëhë barcu jan ne, cavëë me xi jemu cjín xuta siu me. Hane camayuma rë me xuta jan ta tsëhë xi siu me sacuaha chu tsánga xi tsajin yo xi cjuahacuenda rë chu. Sehe cavetsihin cavicuya me xuta jan, jemu cjín cjua cavicuya me.
MAR 6:35 Hya xi ha quiji hora jan ne, ngajan xi cachja cha ladu rë me cojo me ta: ―‍Nguehe ne jemu xín camahani. Hacuaha jemu quiji hora.
MAR 6:36 Ninguijnutuhun cjua cojo xutacjín vi cojo sa xi catji me nandya xi siu tiñataha, hane catatsë me xi sinë me. ―‍Cuatjin cachja cha.
MAR 6:37 Hane cuitjin cafayangui Jesús: ―‍Tuhun ngayun xi sinë me. Sehe ngajan xi cachja cha ladu rë me cuitjin: ―‍¿Hacutjin sacú niji xi sinë me xi cuarcu cjín me? Xi cuatjin cjín pan chihin ne, meje miji chji rë jo cientu mosu. ―‍Cuatjin cachja cha.
MAR 6:38 Sehe cachja Jesús cuitjin: ―‍Tangun chutsujun ¿há cjín pan tjin ngajñi nuju ngayujun ni? Xi tu cavëë cha há cjín pan tjin ra ne, sehe cachja cha cojo me cuitjin: ―‍Hñú pan, cojo jo ti má.
MAR 6:39 Sehe ngajan xi cachja Jesús cojo cha ta catichja cha cojo xuta, catiyuju me xcun ndiji, ngujo ngujo me ngu ngu cahndë́.
MAR 6:40 Hane caviyuju me ngu cientu me ngu cahndë́, o vasen cientu ngu cahndë́ hisca xi cafë yëjë me caviyujuchihin me.
MAR 6:41 Sehe Jesús ne, cafaha me xi hñu pan cojo jo ti jan, cavutsejenniji me ngahnga ne, casua me nacuechji rë Nina, sehe cavotoho langa me pan jan. Hane casua me cha ladu rë me xi sua cha sinë xuta. Hacuaha cojo catsijo ti jan cavatëcja Jesús xi sinë xuta.
MAR 6:42 Jercu caxuva pan cojo ti jan. Hane yëjë ni me cajinë me hacutjin xi cachuya rë xahasen rë me.
MAR 6:43 Xi cavatju cajinë xuta jan ne, sehe cafaya cha pan cojo ti xi cafiin jan ne, hane catsinguitsë cha tejó chajne cojo.
MAR 6:44 Me xi cajinë pan jan ne, hñu mil má me xi xihin. Hacuaha xin má yachjin cojo langa xi cajinë me.
MAR 6:45 Ngajan xi Jesús ne, catsingatju me cha ladu rë me cojo barcu jan xi cjue titjun ni cha ngunda vëhë, hiscan nandya Betsaida, jinguyëjë rë xi tsinguijnetaha me cjua cojo xuta.
MAR 6:46 Hya xi camá catsinguijnetaha me cjua jan, sehe camiji me ngu ndetjún xi cuisiajmi me cojo Nina.
MAR 6:47 Hane hora xi camá nguixun ne, barcu jan ne, vasencja laguna cjui. Hane Jesús ne, tacun suva cuaha me nangui quixí.
MAR 6:48 Hacuaha cavutsejen me ta jemu chja tivatju cha xi cjui cha cojo barcu, tsëhë xi tjo ne, taha hiscan cjui cha ne, ngajan nduva. Hane xi tiña sahasen ne, camatiña Jesús tsëhë cha, cjui me xcun nandan. Hane cuatjin cjui me sacuaha xi meje cuatjutaha me cha.
MAR 6:49 Xi tu cavëë cha xi cjui me xcun nandan ne, catsingatahacacun cha ta nima xi meje cuincharcun rë cha. Hane jercu cajindayatë cha,
MAR 6:50 tsëhë xi catsacjun cha xi cavëë cha me. Hane ngutjen ni cachja Jesús cojo cha cuitjin: ―‍Xi carcuun.
MAR 6:51 Hane sehe cavisehen Jesús barcu hiscan siu cha. Hora vëhë ne, casejyu tjo. Ngajan xi jemu quijircun camahani rë cha ta,
MAR 6:52 ha ndasa cavëë cha cjuarcun xi casahmi Jesús cojo pan jan ne, peru cajnii rcu cha, tsëhë xi vechiin cjuatacun rë cha.
MAR 6:53 Xi quiji sa me cojo barcu ne, cafehe me tjehen laguna, tiña nandya xi hmí Genesaret. Hane ngajan catsihñu me barcu.
MAR 6:54 Hya xi cavetju Jesús tsëhë barcu ne, cavëë xuta ta hacui Jesús.
MAR 6:55 Hane xuta jan ne, marcu macjain quiji me yëjë ni ladu tsëhë nandya jan, xi quiji jaha me xuta hmu rë, caviyuju me xcun Jesús.
MAR 6:56 Hane tuyani ni xi quiji Jesús, há nandya langa ne, há nandya hñu, o há xi ranchun, caviyuju me xuta hmu rë hiscan ndetsin. Sehe cafehya me cojo Jesús xi ndastu satëtaha xuta hmu rë jan tsjian rë Jesús. Hane yëjë ni xuta hmu rë xi casatë tsjian rë Jesús ne, camandaja me.
MAR 7:1 Ngujo cha tsëhë partidu fariseo cojo ngujo cha maestru tsëhë ley ne canduva cha tsëhë nandya Jerusalén quiji cha ngajan hiscan tacun Jesús, ngajan camatangun cha.
MAR 7:2 Xi cafehe cha ngajan ne, cavëë cha xi ngujo cha ladu rë Jesús ne tjin sa jyë́ rë tsja cha ne, tijinë cha niñu ta cavanii cha tsja cha.
MAR 7:3 Hane cachuyiin rë cha ta tsëhë xi ngayëjë ni xuta nangui niji ne, sahmi ngujyë xi cuane me tsja me sehe sinë me niñu. Yaha me xcusun rë xutachanga niji.
MAR 7:4 Hacuaha hisca sa xi fehe me xi fi me ndetsin ne, sá xi cjëë cuane me tsja me ne, sinii me niñu. Hacuaha jemu cjín sa xcusun rë xutachanga niji xi yaha me ta sacuaha xi ha tyjahi trasti ne, cuane nga me. Hacuaha cuanitjin sahmi me cojo nachan.
MAR 7:5 Ngajan xi cha tsëhë partidu fariseo cojo cha maestru tsëhë ley ne, cachja cha cojo Jesús cuitjin: ―‍¿Mé má cuatjin sahmiichiin cha ladu nuju ley rë xutachanga naja? ta, tsëhë xi vanii cha tsja cha xi jinë cha niñu.
MAR 7:6 Ngajan xi cafayangui Jesús cuitjin: ―‍Ngayun ne, jo xcun jo ntsuvun yun. Jemu quixi cjua xi catsihindu Isaías tsujun xcun xujun rë me sacuatjin cachja Nina xi xuta ne, jemu ndacha me. Cuitjin fi cjua jan: Xuta xi cuicun vi ne, ndaja chja me tsahan, peru xi cojo xahasen rë me ne, hisca tsinguitsjiin me ngahan.
MAR 7:7 Tu mahya xi faharcun ná me ta xi vicuya xicjin me ne, hacuiin cjua naha cuicuya me ta, tu cjua rë xuta.
MAR 7:8 Cuanitjin ngayun ta nismutacun cjua rë Nina, hane hitsë sa tivetuhunrcun xcusun rë xutachanga naja.
MAR 7:9 Cachja sa me cuitjin: ―‍Xi má nuju ne, jemu ndatjin casacuse nuju hacutjin vejñuxun cjua rë Nina cojo sa xi nihñuchuhun xcusun rë xutachanga naja.
MAR 7:10 Moisés ne, cuitjin catsihindu me hacutjin xi cachja Nina xi nihña ngayaan xuta rë me: “Chjuhunrcun ná nuju, chjuhunrcun nahmi nuju”, hacuaha: “Yo xi choho chja tsëhë xutacha rë ne, xuta ne tsiquehen rë.”
MAR 7:11 Peru ngayun ne, cjuatacun rë xutachanga naja vicuyun ta, nújun ta ngu cha ne cuma cuichja cha cojo xutacha rë cha cuitjin: “Ha quihndë cumaji cuisecoo nuju ta yëjë ni xcusun xi tjin ná ne, ha cavejñá tsja Nina.”
MAR 7:12 Hane xi cuatjin cuichja cha ne, ha quihndë sahmii ngujyë xu xi cuisecoo cha xutacha rë cha.
MAR 7:13 Xi cuatjin ne, ha camachjiriin nuju cjua rë Nina ta, nihñu sacuaha xcusun rë xutachanga naja, hacuaha vicuyun rë jingu sa. Hacuaha cjín sa xcusun ndacha sacuaha vëhë nihñu. ―‍Cuatjin cachja Jesús cojo maestru jan.
MAR 7:14 Hacuaha cajindaya Jesús xuta xi cumatangun me. Hya xi camá ne cuitjin cachja me cojo: ―‍Ngayujun ngarcun ni ne, tinuhyun cjua xi cuichjá vi.
MAR 7:15 Xcusun xi vixuya cahntsua xuta ne, hacuiin vëhë tsitsehen rë me ta, cjuatacun xi nduva rë me ne, vëhë tsitsehen rë me.
MAR 7:16 Jarë ngayun xi meje nuju xi cumá nuju ne, tetuhunrcun.
MAR 7:17 Xi cavatju cachja me vëhë ne, caviyuju xuta ngajan ne, sehe cavisehen me cojo cha ladu rë me cahntsua ndihya. Ngajan xi cha ladu rë me ne, cavinenguise cha me tsëhë cjua vëhë.
MAR 7:18 Ngajan xi cachja me cuitjin: ―‍¿Há hisca ngayun cajnii rcun cjua xi cachjá ni? Nguehe cuichjá cojo nuju mé vijne cjua vëhë. Cuma xinëë yëjë xcusun comida ta tsajin ngu xcusun xi jinë xuta xi cuma tsitsehen rë me
MAR 7:19 ta xi sinë me ne, hacuiin cahntsua xahasen rë me cjui ta cahntsua me. Fi ne vetjutaha ndatsen.
MAR 7:20 Hacuaha cachja sa Jesús cuitjin: ―‍Cjuatacun xi nduva tsëhë xahasen rë xuta ne, vëhë tsitsehen rë me ta,
MAR 7:21 tsëhë xi xi nduva tsëhë xahasen rë me ne, cjuatacun tsehen, sacuaha yachjin xi viteña yojo rë, sacuaha jyë́ tsëhë xi sahmi me chjuunnahñu rë me jingu sa chjuun, cojo cjuachëjë, cojo xi tsiquehen xicjin,
MAR 7:22 cojo xi jercu meje rë me cjuanchina, cojo xi sahmi me cjuatsehen, sahmi me cjuandacha, choho sahmi me, tjin rë me cjuaxin, sahmi me cjuachjataha, tjin rë me cjuaxihin, sahmi me cjuangarca.
MAR 7:23 Yëjë cjuatsehen xi cuacun vëhë ne, nduva tsëhë xahasen rë xuta, hane vëhë tsitsehen rë me.
MAR 7:24 Xi cavetju me tsëhë distritu Galilea, cafe me ladu tsëhë nandya Tiro cojo nandya Sidón. Xi cafehe me ngajan ne, cavisehen me cahntsua ngu ndihya, tsëhë xi mijí rë me xi scuëë xuta xi cafehe me. Peru camaji cavejñahma me.
MAR 7:25 Xi cafehe Jesús ngajan ne, ngutjen camachaya rë naa rë ngu na xi jiya xitsehen cahntsua xahasen rë na. Hane quiji na cavixcuhnchi na xcun Jesús xi cjuaharcun na me.
MAR 7:26 Na vëhë jan ne, xutaxin na, na ladu tsëhë distritu Sirofenisia, hacuiin na xuta tjë rë Israel. Hane cafehya na cojo Jesús xi cuaxë me xitsehen xi jiya cahntsua xahasen rë na quihndi rë na.
MAR 7:27 Hane xi cafayangui Jesús tsëhë na jan ne, cuitjin cachja me ngu ejemplu cojo rë na. ―‍Sechiye ni, catijnetaha catjinë nixti ta hacuiin ndatjin xi chjahatahan niñu tsëhë nixti hane sehe tahan rë naña.
MAR 7:28 Ngajan xi naa rë na hmu rë jan ne, cuitjin cajnercu na xi tichja me tsëhë xuta tjë rë Israel cojo xutaxin. Hane cafayangui na cuitjin: ―‍Nai. Quixi xi nújun, peru naña xi siu ngahma maxë ne, sacu xi vixuhya hntsua nixti, sehe jinë chu.
MAR 7:29 Hane sehe cachja Jesús cojo rë na cuitjin: ―‍Ndatjin xi canoje. Quihndë ta cuatjin ne, cuma cjuihin ta xitsehen xi caseya cahntsua xahasen rë na quihndi riji ne, ha cavetjuxin.
MAR 7:30 Xi cavuya cafe na ndava na ne, quihndi rë na ne, ha jyuu jiña na hacuaha xitsehen xi caseya cahntsua xahasen rë na ne, ha cavetjuxin.
MAR 7:31 Sehe cavetju Jesús ladu tsëhë nandya Tiro, cavatju me nandya Sidón cojo ladu xi hmí Të Nandya, vëhë cafehe me laguna tsëhë Galilea.
MAR 7:32 Hane cafehecojo nga xuta ngu cha xi loho hacuaha lihmi cha. Hane cafehya xuta jan cojo Jesús xi cuetahatsja me cha, sehe cumandaja cha.
MAR 7:33 Ngajan xi Jesús ne cavaxëxin me cha tsëhë ngajñi rë xuta ne, sehe caviyujutaha me rcu tsja me ngu ngu ladu ngojo tyjavañuju cha. Hane hacuaha cavëhënatya me rcu tsja me sehe cavetaha me neje cha.
MAR 7:34 Hya xi camá ne, cavutsejenniji me ngahnga hane cafëcacun me. Sehe cachja me cuitjin: ―‍¡Efata! ―‍cjua xi meje cuichja: ¡Nuxuhunyun!
MAR 7:35 Hane xi tu cachja me cuatjin ne, catuxaha tyjavañuju cha xi loho. Hacuaha hora vëhë ni ne, camá ndandaja cachja cha.
MAR 7:36 Sehe ngajan xi cachja Jesús cojo xuta xi tsajin yo cuichja cojo me xcusun vëhë. Peru xuta jan ne, hitsë sa jercu cachjatë me tsëhë xcusun xi casahmi Jesús.
MAR 7:37 Jercu quijircun camahani rë xuta. Cuitjin cachja me: ―‍Tu mé xcusun ni jercu ndaja sahmi Jesús. Xuta xi loho ne, vihndë sahmi me, hacuaha xuta xi lihmi ne, sahmi me xi ma chja.
MAR 8:1 Nixtin hya ne, hacuaha jercu cjín xuta siu me hisca tacun Jesús. Hane tsëhë xi tsajin camahani mé xi sinë me ngajan ne, vëhë xi Jesús ne, cajindaya me cha ladu rë me, sehe cachja me cojo cha cuitjin:
MAR 8:2 ―‍Jemu yuma má ná xutacjín vi ta ha quihndë jyan nixtin hinchataha me cojo naja, hane ha quihndë tsajin camahani mé xi sinë me.
MAR 8:3 Sá xi tsingátju me cjue me xi cjëë sinë me niñu ne, cjuaha rë me hinda ndiya. Ngujo xuta xi cuicun vi ne, jemu cjin canduva me. ―‍Cuatjin cachja me.
MAR 8:4 Sehe ngajan xi cha ladu rë me ne, cafayangui cha tsëhë me cuitjin: ―‍¿Jani cuma sacú naja xi sinë xuta vi ta nguehe ne, jemu xín camahani tsëhë nandya?
MAR 8:5 Ngajan xi cavinenguise Jesús cojo cha cuitjin: ―‍¿Há cjín pan tjin nuju? Ngajan xi chja cha ta: ―‍Yatu má.
MAR 8:6 Ngajan xi Jesús ne, cavitexa me xutacjín jan xi cuiyuju me nangui. Xi cafë xuta caviyuju me nangui ne, sehe cafaha Jesús pan jan sehe casua me nacuechji rë Nina. Hane cavotoho langa me pan jan, casua me cha ladu rë me xi cuiyuju cha sinë xutacjín jan. Hane cuatjin casahmi cha.
MAR 8:7 Hacuaha tjin ra ngujo ti. Hane Jesús ne casua me nacuechji rë Nina tsëhë ti jan, hane sehe cachja me cojo cha ladu rë me xi sua cojo ti jan sinë xuta.
MAR 8:8 Xi camá cajinë xuta jan ne, jemu ndaja camá rë xahasen rë me. Hane xi cafaya cha ladu rë Jesús xi cavangui cajinë xuta jan ne, catsë yatu nisinya.
MAR 8:9 Xuta jan ne, sacuaha chuva rë ñuju mil má me.
MAR 8:10 Hane hisca xi cajnetaha cjuandaja vëhë ne, sehe catsingatju Jesús xuta, cafe xuta ndava me. Hya xi camá ne, cavisehen me barcu cojo cha ladu rë me, hane cavuya me ngunda vihi taha ladu rë hiscan xi hmí rë Dalmanuta.
MAR 8:11 Xi cafehe me ngajan ne, hacuaha cafehe cha tsëhë partidu fariseo. Hane cavetsihin cha cavisiajmi cha cojo Jesús ta meje cjuahachuva cha me. Cafehya cha cojo rë me xi tsingacun me ngu cjuarcun xi nduva ngahnga, cojo sa xi scuëë cha xi Nina catsingatju jain rë me.
MAR 8:12 Ngajan xi Jesús ne, cojo cjuachohotacun ne, cachja me cojo cha cuitjin: ―‍¿Mé má cuatjin chjahyun xi sahme ngu cjuarcun xi nduva ngahnga? Cuichjá quixë cojo nuju ta hisca ngu xcusun vëhë ne, sahmee xi xcun cojo xcun.
MAR 8:13 Ngajan xi caviyuju me cha xi cuacun jan ne, cavisehen me barcu cojo cha ladu rë me. Hane sehe cavuya quiji me ngunda vëhë tsëhë laguna.
MAR 8:14 Peru cha ladu rë me ne, cachaya rë cha xi cjuaha cha pan, hane cahntsua barcu ne, ngu tutu sa pan jiya ndaja.
MAR 8:15 Sehe ngajan xi chja Jesús cojo cha cuitjin: ―‍Nechun cuidadu cojo san rë pan tsëhë cha tsëhë partidu fariseo cojo cha ladu rë Herodes.
MAR 8:16 Sehe ngajan xi cavisiajmicjín cha ngajñi rë cha cuitjin: ―‍¿Há tsëhë xi tsajin naja pan ne, há tsëhë vëhë xi cuatjin chja me?
MAR 8:17 Xi camachaya rë Jesús xi veyanangui cha xi tsajin rë cha pan ne, cachja me cojo cha cuitjin: ―‍¿Mé má cuatjin nújun xi tsajin pan? ¿Há nuhyuun? ¿Há vijnii rcun? ¿Há jemu taja rcun?
MAR 8:18 Tjin nuju túxcun hacuaha tjin tyjavañuju. ¿Mé má matsijin nuju? hacuaha ¿mé má nuhyuun? ¿Há vitsjiin nuju?
MAR 8:19 Hya xi cavótoho langa hñú pan ngajñi rë xi hñú mil xuta, ¿há cjín chajne sa quitsë cachjayun tsëhë pan xi cavangui jan? ―‍Cuatjin cavinenguise me. Ngajan xi cafayangui cha ladu rë me ta: ―‍Tejó.
MAR 8:20 ―‍Hane hya xi cavótoho langa yatu pan jan xi cajinë ñuju mil xuta, ¿ha cjín nisinya sa cavangui? Ngajan xi cha ladu rë me ne, cuitjin cachja nga cha: ―‍Yatu.
MAR 8:21 Ngajan xi cavinenguise Jesús cojo cha cuitjin: ―‍¿Há cjëë camahani cuijne rcun cjua xi cachjá tsëhë san rë pan?
MAR 8:22 Hya xi camá ne, cavechu barcu tjehen laguna. Hane xi cavitujne me barcu ne, cafehe me nandya xi hmí Betsaida. Xi cafehe me ngajan ne, cafehe nga xuta cojo ngu cha xi rcá. Hane jercu cachja xuta jan cojo Jesús xi cuetahatsja me cha, hane sehe cumatsejen rë cha.
MAR 8:23 Hya xi camá ne, cafaha me tsja cha hane quijicojo me cha ngajan tjehen nandya. Xi cafehe me cojo cha ngajan ne, cavëhë natya me tuxcun cha hacuaha cavetahatsja me tuxcun cha, sehe cavinenguise me cha cuitjin: ―‍¿Há tsejen ri hitsë quihndë?
MAR 8:24 Xi catsiquijin cha xcun cha cavutsejen cha ne, chja cha ta: ―‍Vutsejen xuta. Peru sacuaha tsejen ya, cuatjin tsejen me xi cjui me.
MAR 8:25 Ngajan xi Jesús ne, cavetahatsja nga me tuxcun cha. Sehe casahmi cha ngujyë cavutsejen ndaja cha, hane camandaja cha, camatsejen ndaja rë cha. Hane sehe catsingatju me cha cafe cha ndava cha.
MAR 8:26 Hacuaha cachja me cojo cha cuitjin: ―‍Xi cavisiin ngajñi nandya xi cuinoje cojo xuta jan xcusun xi casahme cojo ri.
MAR 8:27 Hya xi camá ne, cavetju nga Jesús tsëhë ngajan cojo cha ladu rë me ne, quiji me ngujo nandya xi siu tahndee rë nandya xi hmí Cesarea Felipe. Hane ndiya jiya me cojo cha ne, cavinenguise me cha cuitjin: ―‍¿Mé chja xuta, yo ngahan? ―‍Cuatjin cachja me.
MAR 8:28 Ngajan xi cafayangui cha ladu rë me cuitjin: ―‍Ngujo me ne, chja me ta ngayun xi cha Juan ngayun, cha xi cavitenda rë xuta. Ngujo nga me ne, chja me ta Elías. Hane ngujo nga me ne, chja me ta ngu profeta xi suacuenda cjua rë Nina. ―‍Cuatjin cafayangui cha.
MAR 8:29 Ngajan xi cachja nga Jesús cojo cha ta: ―‍Hane ngayun ne, ¿mé nújun? ¿Yo ngahan? Ngajan xi cha Pedru ne, cuitjin cafayangui cha: ―‍Ngayun xi tjin cjua xi tsingatju nuju Nina. Ngayun xi Cristu.
MAR 8:30 Ngajan xi Jesús ne, cavitexa me cha ta tsajin yo xi cuichja cha cojo tsëhë.
MAR 8:31 Hya xi camá ne, cavetsihin cavicuya me cha tsëhë xi ha ndasa xi Cristu, Quihndi rë Xuta Jain má me ne, peru jemu cjín cjuañihi cuatju me cumá ta tsingatiin xuta changá me, hacuaha tsiquehen xuta changá jan me, peru xi cjuë jyan nixtin ne, cuya nga me cjuahñu.
MAR 8:32 Cjua vëhë ne cachja quixi camahani me cojo cha. Ngajan xi cha Pedru ne, quijixin cha cojo Jesús. Sehe cavetsihin cachja cha cojo me xi ¿mé má cuatjin chja me?
MAR 8:33 Ngajan xi cavuya Jesús cavutsejen me hiscan siu cha ladu rë me. Sehe cachja me cojo cha Pedru cuitjin: ―‍Tihinxin ngaye Satanás, tsëhë xi ningatiintacuin ngaye sacuaha tsingatahacacun Nina ta, ningatehetacuin sacuaha ngu xuta.
MAR 8:34 Ngajan xi Jesús ne, cajindaya me xutacjín jan cojo cha ladu rë me xi cuinduva me hiscan tacun Jesús, sehe cachja me cuitjin: ―‍Sá xi tjin yo xi meje cuisehen ladu naha ne, meje rë xi nichuvun cjuatacun nuju, hane hacuaha tejñuhñu xahasen nuju xi cuanguncujun ndiya naha handasa xi cueyun xcun cru.
MAR 8:35 Yo ngayun xi mijí cuisuhun ladu naha tsëhë xi rcun xi cueyun ne, cahndë́ xi ndaja ne, nichujun xahasen nuju. Peru yo ngayun xi ngatsë naha o sá xi ngatsë rë cjua rë Nina cueyun ne, hacuiin nichujun xahasen nuju ta Nina ne, cuaxëtje me.
MAR 8:36 Mé ndaja cuma nuju xi sacu nuju yëjë xi tjin ngasunhndë, sá xi cueyun hane cuma nuju castigu,
MAR 8:37 ta sá xi cuaxintiin Nina xahasen nuju hya xi cueyun ne, ha quihndë tsajin rqui rë.
MAR 8:38 Yo ngayun xi ma sava nuju ngatsë naha o sá xi ngatsë rë cjua naha nguehe xcun xuta tsehen xi manguaaincacun cojo cjua rë Nina ne, hacuaha cojo ngahan xi canduvá tsëhë Nina ne, cuma sava ná ngahan ngatsë nuju ngayun, hya xi cuinduvá cojo cjuandajyihi tsëhë nahmi naha ne, hacuaha cojo ángel xi vejña tsëhë Nina cuinduvá cojo.
MAR 9:1 Hacuaha cachja sa Jesús cuitjin: ―‍Cuichjá quixë cojo nuju ta tecjan yahnga xuta nguehe xi hisca xi scuëë me xi cuitexa jain Nina ne, sehe cueya me.
MAR 9:2 Xi cafë jyun nixtin jan ne, quijixin Jesús ngu rcu naxi hnga cojo cha Pedru cojo cha Jacobo cojo cha Juan. Xi cafehe me cojo cha ngajan ne, cavëë cha xi cavindeya xcusun rë me.
MAR 9:3 Tsjian rë me ne, ña seti tsejen, tsëhë xi jercu tu tyava camahani, hisca xi ngu xuta cumaji cuane me xi cuatjin tyava.
MAR 9:4 Hya xi camá ne, ha tu ñahñu camatsejen hasen rë Elías cojo hasen rë nima Moisés, tivisiajmi cojo Jesús.
MAR 9:5 Ngajan xi cachja cha Pedru cojo Jesús ta: ―‍Maestro, tu ma rë xi nguehe nechin cojo nuju ne, nihñi jyan puestu: ngu tsujun ne, cojo ngu ngu tsëhë Moisés cojo Elías.
MAR 9:6 Cuatjin cachja cha Pedru ta, sacuinyiin rë cha mé sa cuichja cha ta tsëhë xi jercu catsacjun camahani cha camá.
MAR 9:7 Hora vëhë ne, canduva ngu yufí casahmi tjahnguen rë. Hane ngajñi rë yufí jan ne, canuhya rë ngujo cjua xi cachja cuitjin: ―‍Cha vihi xi quihndi naha cha. Jercu hmucacun cha. Tinuhyun xi chja cha.
MAR 9:8 Xi tu cahndë cha ladu rë Jesús cjua vëhë ne, vutsejen nguehe vutsejen ngajan cha, hane suva sa Jesús tacun me xi cavëë cha.
MAR 9:9 Xi tu tivitujne me tsëhë rcu naxi jan cojo cha ladu rë me xi quijicojo me jan ne, ngajan xi chja xu me cojo cha ta tsajin yo xi cuichja cha cojo xcusun xi cavëë cha. Xi cuatju cueya Quihndi rë Xuta Jain ne, cuya nga me cjuahñu, sehe hya cuichja cha.
MAR 9:10 Vëhë xi cavaha cha cjua jan cahntsua xahasen rë cha. Ngajñi rë ni cha cojo xicjin cha cavisiajmicjín cha ¿mé vijne cjua xi cuya nga me cjuahñu?
MAR 9:11 Ngajan xi cavinenguise cha cojo Jesús cuitjin: ―‍¿Mé má cuatjin chja maestru tsëhë ley xi titjun Elías cuinduva me, sehe cuinduva me xi cuaxëtje naja?
MAR 9:12 Ngajan xi cafayangui Jesús cuitjin: ―‍Quixi xi Elías cuinduva me titjun ta, me vëhë cuiyujuchihin me yëjë ni xcusun. Peru ha canduva me, handasa hacuiin cojo ñihi rë me ta cojo ñihi rë cha Juan. Hane choho casahmi xuta cojo me sacuatjin chja xujun rë Nina. Hacuaha chja xujun xi cuacun vëhë ta handasa xi Quihndi rë Xuta Jain ngahan ne, hacuanitjin ne jemu jyë cjuañihi cuátju hacuaha tsitjungui xuta ngahan.
MAR 9:14 Xi tu cavuya cafehe Jesús cojo cha xi quijicojo me hiscan siu yahnga cha ladu rë me xi tejó jan ne, cavëë me xi tjercu siu xuta jan cojo ngujo cha maestru tsëhë ley siu me visiajmi me cojo cha.
MAR 9:15 Xi tu cavëë xuta jan xi cafehe Jesús ne, jemu quijircun rë me, vanga sanii me quiji cachja me nina cojo Jesús.
MAR 9:16 Ngajan xi Jesús ne, cavinenguise me cojo cha ladu rë me cuitjin: ―‍¿Mé xi visiajmu cojo xuta xi cuacun vë?
MAR 9:17 Hane ngajan ngajñi rë xutacjín xi siu jan ne, cavetjujñi ngu me xi cachja me cuitjin: ―‍Maestro, canduvá cojo quihndi naha, tsëhë xi jiya xitsehen cahntsua xahasen rë cha. Hane tsëhë vëhë xi sahmi lihmi rë cha.
MAR 9:18 Hora xi faha xitsehen jan cha ne, ngutjen tsiticjahñu rë cha, hacuaha vaxë natyaxu hntsua cha, hisca tsijanerii nehñu cha jiña cha. Hane ngatsë rë vëhë ne, jemu jima ndaya cha. Hacuaha cachjá cojo cha ladu nuju xi cuaxëxin cha xitsehen tsëhë quihndi naha. Peru camaji cavaxëxin cha. ―‍Cuatjin cachja me.
MAR 9:19 Ngajan xi Jesús ne, cachja me cojo xuta xi siu jan cuitjin: ―‍¿Mé camá nuju ngayun xi macjaain camahani nuju? ¿Há jyë sa nixtin meje rë xi cuitejña cojo nuju? Nduvun cojo cha nguehe. ―‍Cuatjin cachja me.
MAR 9:20 Hya xi camá ne, cafehe xuta cojo cha hiscan tacun Jesús. Xi tu cavëë xitsehen jan Jesús ne, marcu macjain catsiticja rë cha nixti jan. Hane xi caticja cha ne, cavuya cavindefa cha cafaña cha. Hacuaha cavetju natyaxu hntsua cha.
MAR 9:21 Ngajan xi Jesús ne, cavinenguise me cojo nahmi rë cha cuitjin: ―‍¿Há tsëë xi cuitjin má rë cha? Ngajan xi chja nahmi rë cha ta: ―‍Hisca cjuaquihndi rë cha, cuatjin má rë cha.
MAR 9:22 Jiya hora xi faha xitsehen jan cha ne, tsingatjeya rë cha xcun ndacahi. Tjin nga ne, tsingatjenya rë cha ngajñi nandan, ta meje tsiquehen rë cha. Vëhë xi sá xi tsejen xi ha hyun mé nihñu cojo cha ne, catamayuma nuju ngahan cojo quihndi naha, hane tisecun niji.
MAR 9:23 Ngajan xi cachja Jesús cojo nahmi rë cha ta: ―‍Há xa vë xi hvë. Sá xi macjain nuju ne, yëjë ni ne, cuma.
MAR 9:24 Ngajan xi nahmi rë cha ne, ngutjen cachja me cuitjin: ―‍Tatá. Macjain ná. Peru tisecun ná cojo sa xi cumacjain sa ná.
MAR 9:25 Xi vutsejen Jesús xi jercu tijima tangun xuta ne, cacjan me cojo xitsehen jan. Cuitjin cachja me: ―‍Ngaye xitsehen loho lihmi, tetjixin tsëhë cha vi. Hacuaha ha quihndë cuyiin cuisihin cahntsua xahasen rë cha.
MAR 9:26 Ngajan xi xitsehen jan ne, hisca cajindaya xi catsicuya catsindefa rë cha. Sehe cavetju quiji. Hane cha vëhë ne, jiña cahme cha.
MAR 9:27 Peru Jesús ne, cafaha me tsja cha catsisatjenhnga me cha, hane casecun cha.
MAR 9:28 Hya xi camá ne, quiji Jesús cojo cha ladu rë me, hane cavisehen me cahntsua ndihya. Xi cavisehen me jan ne, sehe ngajan xi chja cha cojo rë me cuitjin: ―‍¿Mé má ngayin xi camaji canaxinxin xitsehen jan tsëhë cahntsua xahasen rë cha vë?
MAR 9:29 Ngajan xi cachja Jesús cojo cha cuitjin: ―‍Cuatjin camá nuju ta tsëhë xi xitsehen xi cuacun vë ne, meje rë xi titjun chjahyan rë Nina hacuaha cuinechan xun rë me, cojo sa xi cuma naxenxen.
MAR 9:30 Hya xi camá ne, sehe cavetju me quiji me taha distritu Galilea. Hacuaha mijí rë me xi cumachaya rë xuta jani taha tsujyihiya me ta,
MAR 9:31 tsëhë xi tivicuya me cha ladu rë me hacutjin cuatju me cumá. Cuitjin cavicuya me: ―‍Ha ndasa tsëhë Nina canduva Quihndi rë Xuta Jain ne, peru cjuaha xuta me ne, tsiquehen me me. Peru xi cjuë xi jyan nixtin ne, cuya nga me cjuahñu.
MAR 9:32 Peru cha ladu rë me ne, vijnii rcu cha tsëhë xi cueya Jesús, hacuaha cuya me cjuahñu. Hacuaha tsacjun cha cuinenguise cha me cjua jan.
MAR 9:33 Hya xi camá ne, cafehe me nandya Capernaum. Hya xi cafehe me jan ne, cavisehen me cahntsua ndihya hisca cuiyuju me. Sehe ngajan xi cavinenguise me cojo cha ladu rë me mé xi cavisiajmi cha cojo xicjin cha ngajan ndiya.
MAR 9:34 Hane tu jyuu ni caviyuju cha ta xi cavisiajmi cha ndiya jan ne, cuitjin cachja cha: ―‍¿Jarë ngayaan xi hitsë sa venguichji naja?
MAR 9:35 Hya xi camá ne, quiji Jesús cavéjña me. Sehe ngajan xi cajindaya me yëjë tejó cha ladu rë me jan ne, sehe ngajan xi cachja me cojo cha cuitjin: ―‍Sá xi tjin ngu yun xi meje nuju xi cumatitjun ngayun ne, meje rë xi hacuiin jemu jyë nihñu yojo nuju hacuaha cuisecun xingun.
MAR 9:36 Hya xi camá ne, cafaha me ngu lihndi, cavejña me cavasencja, hane sehe cavataha me. Hane ngajan xi cachja me cojo cha cuitjin:
MAR 9:37 ―‍Jarë ngayun xi ndaja nihñu cojo ngu lihndi sacuaha vihi xi ngatsë naha ne, sacuaha xi ngahan ndaja nihñu cojo ná. Hacuaha jarë ngayun xi ndaja nihñu cojo ná ne, hacuiin ngahan ni ta, hacuaha cojo Nahmi naha xi catsingatju ná me, cojo me vëhë ndaja nihñu cojo rë me.
MAR 9:38 Ngajan xi cachja cha Juan cojo Jesús cuitjin: ―‍Maestro, cahyin ngu cha xi tijima tivaxëxin xitsehen tsëhë xahasen rë xuta, hane xi sahmi cha ne, cojo ñihi nuju veyanangui cha. Peru tsëhë xi hacuiin cha ladu naja cha ne, canújin cojo cha ta ha quihndë sahmii cha cuitjin.
MAR 9:39 Ngajan xi Jesús ne, cachja me cuitjin: ―‍Xi cavichecjiin tsëhë cha ta xuta xi cuma sahmi me cjuandaja vëhë, sacuaha xi ngahan jain cavitéxa rë me ne, cumaji xi ngutjen choho cuichja me tsahan.
MAR 9:40 Xuta xi hacuiin choho vëë naja me ne, chuya rë me tsajan.
MAR 9:41 Cuichjá quixë cojo nuju ta yo me xi sua ngu vasu nandá siuhun, tsëhë xi vëë me xi xuta ladu naha ngayun, hacuaha vëë me xi ngahan xi catsingatju ná Nina ne, me vëhë ne, sacu rë me ngu cjuandaja xi sua Nina.
MAR 9:42 ’Peru yo xi nduvacojo xcusun xi sahmi xi tsismicacun ngu quihndi ndiya naha ne, hitsë sa ndaja tsëhë xuta vëhë xi xtyangui ngu ndyojo natsi nguisin me sehe ningatjeya rë me ngajñi ndachacun.
MAR 9:43 Hane sá xi cjuatacun nuju meje rë xi nihñu ngu jyë́ cojo ntsun ne, vengui sa chji rë xi chandunxun ntsun ta, jemu sa ndaja tsujun xi cuma yoho yun xcun Nina, xi cumá rë xi cuechun xcun xitsehen cojo ntsun ngajñi rë ndihi jyë xi tsajin nixtin hvo.
MAR 9:44 Ngajan cuinechun, hiscan xi cjuiin nuju cjuañihi ta ndihi ne, tsajin nixtin xi hvo.
MAR 9:45 Sá xi cjuatacun nuju meje rë xi nihñu ngu jyë́ jani xi cuangun ne, vengui sa chji rë xi chandunxun ntsacun ta, jemu sa ndaja cuechun xcun Nina xi yoho yun xi cuma rë xi cuechun xcun xitsehen cojo ntsacun.
MAR 9:46 Ngajan xcun xitsehen vëhë ne, cjuiin nuju cjuañihi ta ndihi ne, tsajin nixtin hvo.
MAR 9:47 Hacuaha sá xi cjuatacun nuju meje rë xi chutsujun xcusun xi ndajintjin xi chutsujun ne, chuhunxun tuxcun jan chandunxun, ta tsëhë xi hitsë sa ndaja tsujun xi sacu nuju cahndë́ ngajan hiscan sahmi Nina gubiernu handasa cojo ngu ni tuxcun xi cuma rë xi cojo catsijo tuxcun cuechun xcun ndihi xi sahmi castigu rë nima.
MAR 9:48 Ngajan xcun xitsehen ne, ngajan cjuiin nuju cjuañihi ta ndihi ne, tsajin nixtin hvo.
MAR 9:49 ’Hya xi tsichuva Nina ngayëjë ni xuta há ndaja há ndajin casahmi me ne, me xi tsajin mé casahmi ne, Nina ne, jemu chuya rë me. Hya xi Nina cjuahatsja me ngu cjuatjo xi tahan rë me ne, sá xi cojo naxa sehen ndaja ne, jemu chuya rë me.
MAR 9:50 ’Naxa ne, jemu ndaja. Peru sá xi cjuë xtya rë ne, machjiriin. Cjuandaja rë Nina ne, hacuaha jemu ndaja. Vëhë xi chjuhun cjuandaja rë Nina, teyun cahntsua xahasen nuju, hacuaha ndaja tinechun cojo xingun.
MAR 10:1 Hya xi camá ne, cavetju Jesús tsëhë nandya Capernaum quiji me distritu Judea cojo ngunda ndajyë Jordán. Hacuaha jercu cjín nga xuta quijitjengui rë me. Hane sacuaha xcusun xi ha sahmi Jesús ne, cavetsihin cavicuya nga me xuta jan.
MAR 10:2 Hya xi camá ne, ngujo cha tsëhë partidu fariseo ne, quiji cha hiscan tacun Jesús. Vinenguise cha me tsëhë xi ngu xihin, ¿há ndatjin xi tsismi chjuun rë? Cuatjin cachja cha ta tsëhë xi meje cjuahachuva cha me cojo cjua rë me.
MAR 10:3 Ngajan xi cafayangui me tsëhë cha cuitjin: ―‍Moisés ne, xutachanga naja ne, ¿mé cavitexa naja me?
MAR 10:4 Ngajan xi cafayangui cha tsëhë me cuitjin: ―‍Moisés ne, casua me cahndë́ xi ngu xihin ne, cuma cuejña cha ngu xujun tsja chjuun rë cha xi ha quihndë mijí rë cha na. Hane xi cuatjin ne, cuma tsismi cha na.
MAR 10:5 Sehe ngajan xi Jesús ne, cachja me cojo cha cuitjin: ―‍Ngatsë rë cjuataja rë xahasen nuju ne, vëhë xi Moisés ne, casua me cahndë́ xi cuatjin nihñu.
MAR 10:6 Peru hya xi casahmi Nina ngasunhndë ne: “Casahmi me xi chjuun xi xihin xuta.”
MAR 10:7 “Vëhë xi ngu xihin ne, cuejña cha nahmi rë cha, hacuaha cuejña cha naa rë cha,
MAR 10:8 hane cumatangun cha cojo chjuun rë cha sacuaha ngu ni xahasen.”
MAR 10:9 Ha quihndë hacuiin jo ta sacuaha xi ngu ni xahasen. Hane tsëhë xi ha Nina cachja me xi cuatjin cuma ngu xahasen me ne, ndajintjin xi xuta ne, tsinguetsuntaha me tsëhë xicjin me. ―‍Cuatjin cachja Jesús.
MAR 10:10 Ngajan xi hya xi Jesús tacun ndihya me cojo cha ladu rë me ne, cavinenguise nga cha me ngu ndiya tsëhë cjuavisiajmi vëhë.
MAR 10:11 Ngajan xi cachja me cojo cha cuitjin: ―‍Yo xi tsismi chjuun rë hane cuixan cojo ngu sa chjuun ne, jemu jyë jyë́ rë xi cuatjin sahmi.
MAR 10:12 Hacuaha sá xi ngu chjuun tsismi na xihin rë na hane cuixan na cojo ngu sa xihin ne, hacuaha jemu jyë jyë́ rë na.
MAR 10:13 Jinguyëjë rë xi tivisiajmi Jesús cojo cha ladu rë me ne, cavetsihin tjemu canduva xuta cojo quihndi rë me, xi cuisanetsja Jesús nixti jan cojo sa xi sacú rë cjuandaja rë me. Peru cha ladu rë Jesús jan ne, cacjan cha cojo xuta jan ta, xi má rë cha ladu rë me ne, mahyiin rë Jesús.
MAR 10:14 Hya xi cavëë Jesús xi cuatjin sahmi cha ladu rë me ne, camacjan rë me cojo cha. Ngajan xi cachja me cuitjin: ―‍Tuhun cahndë́ catinduva tjengui suva ná nixti. Xi canichuun cahndë́ xi cuma rë ta, xuta xi sahmi me yojo rë me sacuaha ngu quihndi ne, xuta vëhë xi sahmi me sacuatjin vitexa Nina.
MAR 10:15 Cuichjá cojo nuju cjuaquixi ta yo xi meje cuisehen gubiernu rë Nina ne, cuma cuisehen peru sacuaha ngu quihndi. Sá sahmii cuatjin ne, cumaji cuisehen.
MAR 10:16 Ngajan xi Jesús ne, cavataha me nixti jan. Hane hora xi cavisanetsja me ne, cachja me cjuandaja rë me cojo.
MAR 10:17 Hya xi camá ne, cavetju me quiji me jingu sa cahndë́. Hane ndiya cjui me ne, vanga ngu cha cafehe cha cavixcuhnchi cha xcun me xi faharcun cha me. Sehe chja cha cojo me cuitjin: ―‍Ngayun maestro. Jemu ndaja ngayun. Nújun, ¿mé xi sahme xi cuma sacú ná cjuahñu xatsë? ―‍Cuatjin cachja cha.
MAR 10:18 Ngajan xi Jesús ne, cafayangui me tsëhë cha cuitjin: ―‍¿Mé má cuatjin noje xi ndaja ngahan? Tsajin xuta xi ndaja suva ni Nina xi ndaja me.
MAR 10:19 Ha hye cjua xi cavitexa Nina: “Xi caniquiin xuta. Xi canihñii chjuun nahñu riji jingu sa chjuun. Hacuiin mé chjehehmi tsëhë xuta. Xi canujiin cjuandesu tsëhë xuta. Xi cavindachiin rë xuta. Chjehercuin nahmi riji hacuaha chjehercuin ná riji.” Vëhë cjua xi cavitexa Nina.
MAR 10:20 Ngajan xi cachaja cha cojo Jesús ta: ―‍Maestro, yëjë cjua vëhë ne, hisca cjuanixti naha ne, ha cahndë.
MAR 10:21 Xi cahndë Jesús cjua rë cha ne, jemu cachuya rë me tsëhë cha. Ngajan xi chja me cojo cha ta: ―‍Machaja sa ri ngu xcusun. Tjihin ne, titeñi yëjë xi tjin ri hane tujún xi sacu ri ne, tehe rë xuta yuma. Hane sehe ndovetjengui ná. Sá xi nihñi cuatjin ne, xi cjuehe xcun Nina ne, ngajan sacú ri cjuanchina xi ndajyihi.
MAR 10:22 Xi cahndë cha cjua vëhë ne, jemu choho camá rë cha. Va va má cacun cha, cavetju cha cafe cha ta, tsëhë xi jemu nchina cha.
MAR 10:23 Ngajan xi Jesús ne, vutsejen me yëjë ni ladu hiscan siu cha ladu rë me ne, sehe cachja me cojo cha cuitjin: ―‍Jemu chja tsëhë ngu xuta nchina xi cuisehen me ladu rë Nina.
MAR 10:24 Ngajan xi cha ladu rë me ne, jemu quijircun rë cha xi cuatjin cachja me. Ngajan xi cachja nga Jesús cojo cha cuitjin: ―‍Compañeru, jercu chja tsëhë xuta xi cuisehen me ladu rë Nina.
MAR 10:25 Sacuatjin rë naxin xi cumaji cuatju chu ngojo rë nindu ne, cuatjin rë xuta xi jemu meje rë me cjuanchina ta, cumaji cuisehen me ladu rë Nina.
MAR 10:26 Xi cahndë cha ladu rë me cjua vëhë ne, jemu quijircun camahani rë cha. Ngajan xi cachja cha ngajñi rë cha cojo xicjin cha: ―‍¿Peru yo ni xi cuma cuetjutje ni?
MAR 10:27 Xi cavuya me vutsejen me hiscan siu cha ne, ngajan xi cachja me cuitjin: ―‍Yëjë ni xi maji sahmi xuta ne, Nina ne, hatuxa ma sahmi me.
MAR 10:28 Ngajan xi cavetsihin cachja cha Pedru cojo Jesús cuitjin: ―‍Chutsujun ni. Ngayin ne, canismitacuin yëjë ni xcusun, hane cavisihin ladu nuju.
MAR 10:29 Ngajan xi cachja Jesús ta: ―‍Cuichjá quixë cojo nuju ta, tu yo ni xi tsismicacun ndava, tsismicacun hntsë, tsismicacun tichja, tsismicacun naa rë o sá nahmi rë o sá quihndi rë, hacuaha tsismicacun nangui rë xitjë rë ngatsë naha cojo ngatsë rë cjua rë Nina ne, jinguyëjë rë xi ngasunhndë vihi tacun me ne,
MAR 10:30 sacú rë me ngu cientu sa quisun tsëhë ngu ngu xcusun xi catsismicacun me. Cjín ndava me sacu rë me. Cjín hntsë me sacu rë me. Cjín tichja me sacu rë me. Cjín naa rë me sacú rë me. Cjín quihndi rë me sacú rë me. Hacuaha cjín nangui rë xitjë rë me sacu rë me. Handasa cojo cjuañihi, peru sacú rë me. Hane hya xi cueya me ne, cuechú me cjuahñu xatsë xcun Nina.
MAR 10:31 Tsëhë xuta xi matitjun quihndë ne, jemu cjín me xi cumachjiriin hya xi cuinduva Nina ngasunhndë. Hane xuta xi hacuiin matitjun quihndë ne, hya ne, cumachji rë me xi cuma titjun me. ―‍Cuatjin cachja me.
MAR 10:32 Hya xi camá ne, hora xi jiya ndiya Jesús cjui me cojo cha ladu rë me nandya Jerusalén ne, titjun Jesús cjui me. Hane cha ladu rë me ne, jercu fircun ra, tsëhë xi tsacjuiin Jesús xi cjui me. Hane xuta xi tjengui cjui cojo me jan ne, hacuaha jemu tsacjun me má. Ngajan xi Jesús ne, cajindaya nga me cha ladu rë me xi tejó ni jan, sehe cavetsihin cachja me cojo cha xcusun xi ha tacun xati xi cuatju me cuma.
MAR 10:33 Cuitjin cachja me: ―‍Tinuhyun ni, tivanguen nandya Jerusalén. Hane ngajan ne, tjin yo me xi cuiteña ná ngajan cojo nahmi xi matitjun cojo cha maestru tsëhë ley. Cuatjin sahmi me ha ndasa xi ngahan xi Quihndi rë Xuta Jain. Hane xuta xi cuacun vë cuichja me xi cueya ngahan, hacuaha sua nga me ngahan cojo xuta rë jingu sa nandya.
MAR 10:34 Sehe tsixcuehyu me ngahan. Cuëhënatya me ngahan, cuaja me ngahan, hisca tsiquehen me ngahan. Peru xi cjuë jyan nixtin ne, cúya nga cjuahñu.
MAR 10:35 Xi cajnetaha cachja Jesús cuatjin ne, sehe quiji cha Jacobo cojo cha Juan, quihndi rë Zebedeo, quiji tjengui tiña cha Jesús. Ngajan xi chja cha cojo rë me cuitjin: ―‍Maestro. Nihñu favor ne, cjua xi chjahyin nuju ne, ningatuhun niji.
MAR 10:36 Ngajan xi cachja me cojo cha cuitjin: ―‍¿Mé xi meje nuju xi sahme ni?
MAR 10:37 Ngajan xi chja cha cojo rë me cuitjin: ―‍Tuhun cahndë́ xi ngu ngu ngayin ne, cuinechintihin ngu ngu ladu tjehen nuju, hya xi nihñu gubiernu nuju.
MAR 10:38 Ngajan xi cachja Jesús cojo cha cuitjin: ―‍Ngayun ne, hyuun mé xi chahyun. ¿Há scaa nuju cuatju cjuañihi xi cuátju ngahan ni?
MAR 10:39 Ngajan xi cachja cha ta: ―‍Scaa niji. Ngajan xi cachja nga Jesús cojo cha cuitjin: ―‍Cjuañihi xi cuatju ngahan cumá ne, hacuaha cojo ngayun cuatjun cumá.
MAR 10:40 Peru xi cuinechuntuhun ngu ngu ladu tjehen naha ne, hacuiin ngahan cuichjá ta xcusun vëhë ne, sacu rë xuta xi cuichja Nina xi sacu rë me cahndë́.
MAR 10:41 Xi cahndë cha xi të jan cjua xi cachja Jesús ne, cavetsihin camacjan rë cha cojo cha Jacobo cojo cha Juan.
MAR 10:42 Hya xi camá ne, cajindaya Jesús cha xi të jan ne, cachja me cojo cha cuitjin: ―‍Ngayun ne, ha hyun ta xuta matitjun nguehe ngasunhndë jemu sahmi yehe me yojo rë me, ta jercu meje cuitexa me.
MAR 10:43 Peru hacuiin cojo ngayun cuatjin nihñu ngajñi nuju ta xi meje rë ne, jarë ngayun xi meje nuju xi cumatitjun ngayun ne, nihñu xa rë xingun sacuaha mosu.
MAR 10:44 Hane jarë ngayun xi meje nuju xi xingun ne, cjuaharcun me yun ne, nihñu xa rë xingun sacuaha mosu xi caxteña.
MAR 10:45 Hisca ngahan ne, Quihndi rë Xuta Jain má ngahan, peru hacuiin canduvá xi xuta cuisecoo ná me ta ngahan cuisecoo rë xuta. Hisca tsingatehen xi tsiquehen ná xuta, cojo sa xi cjín xuta cuaxëtje Nina me. ―‍Cuatjin cachja Jesús.
MAR 10:46 Hya xi camá ne, cjui cjui me cojo cha ladu rë me ne, cavechu me nandya Jericó. Xi cavatju me tsëhë nandya vëhë cojo xutacjín xi ticojo me ne, cavechutaha me cha quihndi rë Timeu, cha xi hmí rë Bartimeo, ngu cha rcá, hane tifehya cha caridad tjehen ndiya.
MAR 10:47 Xi cahndë cha rcá jan xi Jesús tsëhë nandya Nasaret hacui me xi nduva me, jercu cachja cha: ―‍Jesús, quihndindaicjin rë David, catamayuma nuju ngahan.
MAR 10:48 Hane cavisiajmicjan xuta jan cojo cha ta, catisejyu cha. Peru hitsë sa hñu chja cha cuitjin: ―‍Quihndindaicjin rë David, catamayuma nuju ngahan.
MAR 10:49 Ngajan xi casecunhñu Jesús. Sehe ngajan xi chja me cojo cha ladu rë me cuitjin: ―‍Chjindayun rë cha. Hya xi camá ne, cha ladu rë me jan ne, cajindaya cha cha rcá jan, sehe cachja cha cojo cha cuitjin: ―‍Tehe cjuetacun xahasen riji quen. Tisatjinhngue ta, jindaya me ngaye.
MAR 10:50 Cuatjin camá xi cafaha cha tsjanga rë cha catsingatjenxin cha. Sehe marcu macjain casecun cha. Sehe quijitjengui cha Jesús.
MAR 10:51 Hane xi cavechutaha cha me ne, ngajan xi cachja me cojo cha cuitjin: ―‍¿Mé xi meje ri xi sahmi cojo ri? Ngajan xi cachja cha rcá jan ta: ―‍Maestro, xi meje ná ne, xi cuma tsejen ná.
MAR 10:52 Ngajan xi cachja Jesús cojo cha cuitjin: ―‍Ndatjin. Cuma cjuihin ta, camandaja ye, tsëhë xi camacjain ri ngahan. Hane ha hora vëhë ni ne, camatsejen rë cha. Hane quiji cha cojo rë me hacutjin cjui me.
MAR 11:1 Hane xi camatiña me Jerusalén xi ha cjuaha me nandya Betfajé cojo Betania, quiji me ndetjun xi hmí rë Ndetjun Olivu, ngu ndetjún xi tiña tacun cojo nandya xi cuacun vëhë ne, catsingatju me jo cha ladu rë me quiji cha tixa.
MAR 11:2 Cuatjin cachja me cojo cha: ―‍Tangun nandya xi tsejen vë. Hane xi tu cjuhun tjehen nandya ne, sacú nuju ngu burru xatsë xi hisca ngu cjëë cuijin rë chu, quitahahñu chu ngajan. Hane chundecjun chu, sehe nduvuncujun chu.
MAR 11:3 Sá xi yo xi cuichja cojo nuju ta: “¿Mé má cuatjin chundecjun chu ne?”, cuitjin tinújun: “Me xi matitjun tsijin meje rë me chu. Peru sehe tsicuya nga me chu.” ―‍Cuatjin cachja Jesús cojo cha.
MAR 11:4 Hya xi camá ne, quiji cha tixa xi cachja Jesús cojo cha. Xi tu cafehe cha ngajan ne, casacu rë cha ngu chu burru xatsë quitahahñu chu ngajan ndiya tiña tingotjo ndihya. Hane cavundecja cha chu.
MAR 11:5 Hane ngujo cha xi hinchacun jan ne, cachja cha cojo cha ladu rë Jesús cuitjin: ―‍¿Mé má cuatjin cachundecjun chu burru vë?
MAR 11:6 Ngajan xi cachja cha ladu rë Jesús hacutjin cachja me cojo cha. Sehe cha xi cuacun jan ne, casua cha cahndë́ quijicojo cha cha ladu rë Jesús chu burru jan.
MAR 11:7 Hane sehe quijicojo cha chu hiscan tacun Jesús. Hacuaha casua cha tsjian rë cha casesun ngaxtun chu sehe camiji me chu.
MAR 11:8 Hya xi camá ne, jemu cjín xuta xi cacandi me tsjian xcun rë me ndiya hacutjin cjui Jesús. Hane ngujo nga me ne quiji cavotohosun me xca xcuen ngajan nguijña, hane hacuaha cacandi me ndiya hacutjin cjui Jesús cojo sa xi tifaharcun me me.
MAR 11:9 Hane yëjë me xi cjui titjun cojo yëjë me xi tjengui jan ne, cavetsihin jercu cajindaya me cachja me: ―‍Nacuechji rë Nina ta cafehe me xi catsingatju Nina.
MAR 11:10 Catsinchacun me me xi cuitexa naja sacuaha cavitexa David xutachanga naja. Jemu catsinchacun Nina me xi nduva tsëhë xi Nina catsingatju rë me. ―‍Cuatjin cajindaya xuta.
MAR 11:11 Xi tu cavisehen me nandya Jerusalén ne, quiji me yungun xi matitjun. Xi tu cavutsejen nguehe cavutsejen ngajan me ne, mé ta quiji hora ne, cavetju nga me cojo cha ladu rë me xi tejó jan ne, cavuya cafehe nga me nandya Betania.
MAR 11:12 Xi camá nchujun jan ne, cavuya cavetju nga Jesús tsëhë nandya Betania. Hane ha jemu vojo rë me hora xi cavetju me.
MAR 11:13 Hya xi camá ne, tsëhë cjin ni cavëë me ngu yaxujun xi chine tú rë xi jemu ndaja tsejen yaha xca rë. Hane quiji me hiscan secun, sá sacu sinë me. Peru xi cafehe me ngajan ne, tsajin camahani mé xi casacu rë me, tsëhë xi hacuiin nixtin rë tuhaxi jan.
MAR 11:14 Ngajan xi cachja me cojo ya jan cuitjin: ―‍Quihndë tsajin nixtin xi cuaqui tú riji xi sinë xuta. Hane cha ladu rë me ne, cahndë cha cjua rë me.
MAR 11:15 Hya xi camá ne, cafehe me nandya Jerusalén. Xi cafehe me ngajan ne, quiji me ndatsen yungun xi matitjun jan. Hane cavetsihin cavaxë me xuta xi sahmi ndetsin ngajan. Catsindefa me maxë rë xuta xi tsindeya tujún. Hacuaha cacandi me siya rë xuta xi viteña nisë tyava.
MAR 11:16 Hane casuaain me cahndë́ xi tjin mé xi cjuaha xuta xi cuatjuvasen me ndatsen yungun jan.
MAR 11:17 Sehe cavetsihin cavicuya me xuta jan cuitjin: ―‍Ngayujun ni ne, ha hyun xi cuitjin cachja Nina xcun xujun rë me: “Ndya naha ne, ngu ndihya xi vinduva xuta tsëhë yëjë ni nandya cuisiajmi me cojo ná.” Peru ngayun ne, tinihñu ndava Nina vi sacuaha ndava chëjë. ―‍Cuatjin cachja Jesús.
MAR 11:18 Hya xi camá ne, xi cahndë nahmi xi matitjun cojo maestru tsëhë ley cjua jan ne, cavetsihin cavangui me chuva rë xi cuma tsiquehen me Jesús. Cuatjin meje rë me tsëhë cjuaxin xi tjin rë me, tsëhë xi yëjë xuta ne, jemu quijircun rë hacutjin cavicuya Jesús.
MAR 11:19 Xi quiji hora ne, cavetju nga Jesús tsëhë nandya jan cojo cha ladu rë me.
MAR 11:20 Hane xi camá nchujun jan ne, cavuya cafe nga me nandya Jerusalén. Hane xi cavatju nga me hiscan secun ya xujun jan ne, cavëë me xi ya xujun jan ne, cafë caxi hisca rcu hisca ntsacu.
MAR 11:21 Ngajan xi cha Pedru ne, catsinguitsjen cha cjua xi cachja Jesús cojo ya jan ngujña ne, sehe ngajan xi cachja cha cojo Jesús cuitjin: ―‍Maestro. Chutsujun ta ya xujun xi canújuncjun cojo jan ne, cafë caxi.
MAR 11:22 Ngajan xi cafayangui Jesús tsëhë cha cuitjin: ―‍Catamacjain nuju tsëhë Nina.
MAR 11:23 Cuichjá cojo nuju ngu cjuaquixi ta tu yo ni xi cuichja cojo naxi vëhë cuitjin: “Tihinxin tsëhë nguehe, tihin tisihin ngajñi ndachacun”, sá xi hacuiin majo cacun, sá xi macjain jain rë hacutjin xi cachja ne, cuatjin jain cuma.
MAR 11:24 Vëhë xi chjá cojo nuju ta yëjë ni xi chjahyun cojo Nina ne, ningatuhuntacun sacuaha xi ha casacu nuju ta xi cuatjin ne, sacu jain nuju.
MAR 11:25 Hora xi chjahyun rë Nina ne, sá xi tjin yo xi choho cachja tsujun, o sá xi choho casahmi tsujun ne, ninchatuhun rë, cojo sa xi Nahmi naja xi tacun ngahnga ne, hacuaha tsinchataha nuju me tsëhë jyë́ nuju ta,
MAR 11:26 sá xi ninchatuun rë me ne, Nahmi naja xi tacun ngahnga ne, hacuaha tsinchataain nuju me. ―‍Cuatjin cachja me.
MAR 11:27 Cjui cjui me ne, cafehe me nandya Jerusalén. Hane xi cafehe me jan ne, quiji me yungun xi matitjun. Hora xi tsujyihiya me ndatsen yungun jan ne, nahmi xi matitjun cojo maestru tsëhë ley cojo sa xuta changá xi yahnga jan ne, cafehe tjengui me Jesús.
MAR 11:28 Hane cuitjin cavinenguise me: ―‍¿Yo cavitexa ri xi cuatjin nihñi xcusun vë? ¿Yo casuaxa ri?
MAR 11:29 Ngajan xi Jesús ne, cachja me cojo xuta jan cuitjin: ―‍Cjuinenguësë nuju ngu cjua. Hane sá xi nicuyun tsahan ne, sehe cuichjá cojo nuju yo cavitexa ná xi sahme xcusun vëhë.
MAR 11:30 Ngayun mé nújun, ¿Yo xi cavitexa rë cha Juan xi cavitenda cha xuta? ¿Há Nina cavitexa me cha ne, há xuta cavitexa me cha? Tinújun cojo ná.
MAR 11:31 Ngajan xi vetsihin visiajmi xuta jan ngajñi rë me cojo xicjin me cuitjin: ―‍Sá xi cuinújan xi Nina cavitexa me ne, cuichja me vihi cojo naja cuitjin: “Sá xi cuatjin ne, ¿mé má camacjaain nuju xi cachja cha ni?”
MAR 11:32 Peru ¿há cuma cuinújan xi xuta cavitexa me cha? Cuatjin casacuinyiin rë xuta xi cuacun vë mé cjua xi tsicuya me tsëhë Jesús ta, tsëhë xi tsacjun me xutacjín, tsëhë xi yëjë ni xuta jan ne, macjain rë me xi cha Juan ne, Nina cavitexa jain me cha xi suacuenda cha cjua rë Nina.
MAR 11:33 Vëhë xi hya xi cafayangui me tsëhë Jesús ne, cachja me cuitjin: ―‍Hyiin. Ngajan xi hacuaha Jesús ne, cachja me ta: ―‍Sá xi cuatjin ne, ta mijí nicuyun cjua tsahan ne, hacuaha cuichjaain cojo nuju yo cavitexa ná xi sahme xcusun vihi.
MAR 12:1 Sehe cavetsihin cavicuya Jesús xuta jan ngujo cjua, peru cojo suva ejemplu cachja me. Cuitjin cavetsihin me cjua: ―‍Cuejñaa xi ngu xihin ne, catsitjë me nahñu rë uva ngu rquí nangui. Hacuaha casahmi me hnchua xondyojo rë tahndee rë xitjë jan. Ha ngajan ne ne, cafahanguiya me ngu ndyojotë hiscan cuaxë nandá rë tuhaxi jan. Hacuaha casahmi me ngu cahndë́ hiscan xi cavesun me ngu nachan ngahnga xi sesun xuta xi sahmi cuidadu xitjë rë me. ’Hya xi camá ne, casuatsja me cojo jingu sa xuta xi sahmi cha cuidadu rë, hane cjuaha me tsë tsë cojo rë cha. Sehe cavetju me quiji me ngu nanguicjin.
MAR 12:2 Xi cavechú nixtin tsëhë tutjë jan ne, catsingatju me xi tsëhë jan ngu mosu hiscan xi quitaha xitjë rë me, xi cjuahatsja cha tsëhë xi satë rë me.
MAR 12:3 Hya xi camá ne, xi cavechu cha mosu jan ne, cavaja xuta xi tacun tsja xitjë jan cha mosu jan. Hane catsicuya cha cha cafe cha.
MAR 12:4 Ngajan xi me xi tsëhë jan ne, cavuya catsingatju nga me ngu mosu quiji. Hane xi cavechu mosu vëhë ngajan ne, me xi siutaha jan ne, cavanguihmu me rcu cha, hacuaha choho cachja me cojo cha.
MAR 12:5 Cafë ne, me xi tsëhë jan ne, cavuya catsingatju nga me ngu mosu. Peru mosu jan ne, catsiquehen me xi cuacun jan cha. Cafë vëhë ne, catsingatju camaha sa cha mosu. Hane ngujo mosu jan ne, tu cavaja ni cha. Hane ngujo nga ne, catsiquehen camahani cha.
MAR 12:6 ’Quihndë me xi tsëhë cahndë́ jan ne, ngu ni quihndi tjin rë me ne, vëhë sa tacun. Handasa jemu hmucacun me cha ne, peru catsingatju me cha, tsëhë xi cuitjin catsingatahacacun me: “Quihndi naha vi ne, cjuaharcun me cha.”
MAR 12:7 Peru xi cafehe cha quihndi rë me ngajan ne, ngajan xi chja xuta xi sahmi cuidadu xitjë jan cojo xicjin me ta: “Cha vihi quihndi xi cjuahatsja cha cahndë́ vihi. Quihndë ne, niquen cha, cojo sa xi cumá tsajan nangui.”
MAR 12:8 Hya xi camá ne, cafaha me cha catsiquehen me cha, sehe catsingatjexin me cha tsëhë cahndë́ jan. Cuatjin casahmi me xi cuacun vë.
MAR 12:9 ’Hindë ne, me xi tsëhë nangui jan ne, ¿mé sahmi me cojo xuta xi siutaha cuidadu rë xitjë jan? Hatuxa cjue me ne, tsiquehen me me, hane sua me cahndë́ jan cojo jingu sa xuta.
MAR 12:10 ’Quihndë, ngayun ne, ha chutayuun cjua tsëhë xujun rë Nina xi chja cuitjin: Ndyojo xi chja cha chjinevexo xi machjiriin ne, ndyojo vëhë xi cachja Nina xi cuejña tjun tjun yuju rë xihndënaña.
MAR 12:11 Cuatjin casahmi Nina xi cumá hacuaha jemu chuya rë xahasen naja xi cuatjin camá.
MAR 12:12 Hya xi camá ne, xuta changá xi cafehe tjengui rë Jesús jan ne, meje cjuaha me me, tsëhë xi camachaya rë me xi condra rë me xi cachja Jesús. Ha ndasa meje cjuaha xuta changá jan Jesús ne, peru xi tsacjun me tsëhë xutacjín jan ne, ha quihndë tsajin mé casahmi me, hane cafe me.
MAR 12:13 Hya xi camá ne, xuta changá xi cuacun jan ne, catsingatju me ngujo cha tsëhë partidu fariseo cojo ngujo cha ladu rë Herodes xi cjuahangahma cha Jesús, cojo sa xi xuta changá jan ne, cuma cuinchajyë me me. Xi tu cafehe cha ne, ngajan xi cachja cha cojo rë me ta:
MAR 12:14 ―‍Maestro. Ngayin ne, hyin ta ngayun ne, quixi cjua tsujun. Ha tuxa cjuaquixi xi nújun ha ndasa xi cojo xuta nchina visiajmu o sá cojo xuta yuma. Tu yo ni ne tangun ni visiajmu cojo ta tsëhë xi ngayun ne, vicuyun ndiya rë Nina cojo cjuaquixi camahani. Quihndë ne, sacuaha ley rë Moisés ne, ¿há sua cahndë́ xi cuechjen tujúnsa naja cojo César, me xi matitjun, o há suaain cahndë́? ―‍Cuatjin cavinenguise cha.
MAR 12:15 Peru Jesús ne, tsëhë xi ha vacun rë me xi jemu ndacha cha ne, cuitjin xu cachja me cojo cha: ―‍¿Mé má cuatjin meje chuhunchuvun ná? Nduvuncujun ngu tujún scutséjen.
MAR 12:16 Hya xi camá ne, cha xi cuacun jan ne, canduvacojo cha ngu tujún tyava. Ngajan xi cachja me cojo cha cuitjin: ―‍¿Yo xcusun rë hacuaha yo ñihi rë xi quitahá xcun tujún vë? ―‍Cuatjin cavinenguise Jesús. Ngajan xi chja cha cojo rë me cuitjin: ―‍Tsëhë César. ―‍Chja xu cha.
MAR 12:17 Sehe ngajan xi Jesús ne, cuitjin xu cachja me cojo cha: ―‍Sá xi cuatjin ne, tuhun rë César xi tsëhë me; hane tuhun rë Nina xi tsëhë me. ―‍Cuatjin cachja Jesús. Hya xi camá ne, jemu quijircun rë cha xi cuatjin ndaja cachja Jesús.
MAR 12:18 Hacuaha canduva tjengui rë me ngujo cha tsëhë partidu saduceo, cha xi vicuya ngu cjuachacun xi chja xi hya xi cueyan ne, ha quihndë cuyaain cjuahñu naja. Hane cuitjin cachja cha ngujo cjua cojo Jesús:
MAR 12:19 ―‍Maestro. Moisés ne, catsihindu me xcun xujun rë Nina xi sá xi ngu xihin cueya, hane tsajin rë chjuun rë hisca ngu quihndi ne, hntsë nima vëhë ne, meje rë xi cjuaha rë chjuun cahan vëhë, cojo sa xi sacú rë na quihndi xi cuma sacuaha quihndi rë nima vëhë.
MAR 12:20 Quihndë ne, cuejña xi ngu ndihya ne, siu yatu cha cojo hntsë cha. Hane cha tjun ne, cafaha cha chjuun. Peru cahme cha, hane chjuun rë cha vëhë ne, casacuiin rë na hisca ngu quihndi cojo cha.
MAR 12:21 Hya xi camá ne, hntsë nima vëhë, cha xi majo ne, cafaha cha na cahan vëhë camá chjuun rë cha na, peru hacuaha cahme cha hane casacuiin rë na quihndi. Hacuanitjin ni cafaha cha xi majyan jan na,
MAR 12:22 hisca xi cafë yëjë xi yatu cha cafaha cha na. Peru yëjë cha xi cuacun vëhë ne, cafë cha cahme cha chuva ngu chuva ngu cha. Hane na vëhë ne, casacuiin rë na hisca ngu quihndi cojo cha xi cuacun vëhë. Hiscan xi cajnetaha ne, hacuaha cahme na.
MAR 12:23 Quihndë ne, ¿mé nújun? Hya xi cuya yëjë nima cjuahñu ne, ¿jarë jain cha xi chjuun rë cha na xi cjuaquixi? ta yëjë xi yatu cha ne, cavixan cha cojo rë na. ―‍Cuatjin cavinenguise cha.
MAR 12:24 Ngajan xi cachja Jesús cojo cha cuitjin: ―‍Ngayun ne, cuaaintjin xi nújun, tsëhë xi vijnii rcun cjua xi chja xujun rë Nina, hacuaha hyuun xi Nina ne, jemu hñu cjuatacun rë me.
MAR 12:25 Hya xi cuya cjuahñu rë nima ne, ha quihndë hacuiin cuixan me hacuaha hacuiin tsinguixan me, ta tangun cumá sacuaha xi siu ángel ngahnga ne, cuatjin cuiyuju me.
MAR 12:26 Hacuaha quihndë xi tinújan tsëhë nima xi cuya cjuahñu rë ne, ngayun ne, sacuaha xi cjëë chutayun xujun xi catsihindu Moisés hacutjin cahndë́ me cjua rë Nina xi cavetju tsëhë cahntsua ngu ya lihndi xi seti. Cuitjin cachja Nina cojo me hya: “Ngahan xi Nina rë Abraham ngahan. Nina rë Isaac, hacuaha cojo Nina rë Jacobo má ngahan.” Cuatjin cachja Nina tsëhë xuta xi ha cahme me.
MAR 12:27 Peru Nina ne, hacuiin nina rë nima ta nina rë xuta xi quicun me. Hane sá xi quicun nima jan, ngajan tsejen xi cjuachacun xi nújun ne, quixiin.
MAR 12:28 Hacuaha cafehe ngu cha maestru tsëhë ley hiscan tacun Jesús. Hane xi cahndë́ cha cjuavisiajmi rë me ne, xi ndaja cama catsicuya Jesús, ngajan xi cavinenguise cha me cuitjin: ―‍Maestro, tsëhë yëjë ni cjua xi cavitexa Nina naja xcun xujun ley ne, ¿jarë artículo xi hitsë sa matitjun?
MAR 12:29 Ngajan xi cafayangui Jesús cuitjin: ―‍Xi matitjun ne, cuitjin chja: “Ngayujun ni ngayun xuta ladu rë nangui Israel, Nina naja ne, ngu tu tu ni me.
MAR 12:30 Meje rë xi nihña hmutacun Nina, me xi matitjun tsajan, cojo ngayëjë ni cjuatacun naja, cojo ngayëjë ni xahasen naja, hacuaha cojo ngayëjë ni ngahñu naja.”
MAR 12:31 Hane xi má jo ne hacui vihi: “Meje rë xi nihña hmutacun xingueen sacuatjin hmutacun suvaan yojo naja.” Tsëhë yëjë ni artículo xi cavitexa Nina ne, jo ni cjuatacun vëhë xi matitjun. ―‍Cuatjin cachja Jesús.
MAR 12:32 Ngajan xi cachja cha maestru tsëhë ley cojo rë me cuitjin: ―‍Ndatjin canújun, maestro. Canújun cjuaquixi ta Nina naja ne, ngu tu tu ni me.
MAR 12:33 Hacuaha ndatjin canújun xi meje rë xi nihña hmutacun Nina cojo ngayëjë ni cjuatacun naja, cojo ngayëjë ni ngahñu naja, hacuaha meje rë xi nihña hmutacun xingueen sacuaha nihña hmutacun yojo naja suvaan. Cjua vëhë ne, tjercu venguichji rë. Hisca vengui sa chji rë xi cuma rë yëjë ni cjuandaja cojo yëjë cjuatjo xi cjue xcun Nina.
MAR 12:34 Xi tu cahndë Jesús ta ndatjin cafayangui cha maestru jan ne, ngajan xi cachja me cojo cha cuitjin: ―‍Ha jemu hitsë sa chaja xi cuisuhun ladu rë Nina. Ha quihndë tsajin yo xi macacun sa cjuinenguise rë me ngu cjua.
MAR 12:35 Ngajan xi Jesús ne, hora xi tivicuya me xuta ngajan yungun xi matitjun ne, cachja me cojo xuta cuitjin: ―‍Maestru tsëhë ley ne, chja cha ta Cristu, me xi tsingatju Nina xi cumatitjun tsajan ne, tjë rë David má me.
MAR 12:36 Peru suva David ne, catsihindu me cjua xi cachja Hasen rë Nina cojo rë me cuitjin: Nina ne, cachja me cojo Nai naha cuitjin: “Tinechin ladu quixi naha hiscan hya xi yëjë xi sahmi condra ne, cuiyuju ngahan ngahma gubiernu riji.”
MAR 12:37 Ndatjin, sá xi cuatjin cachja David tsëhë me ne, ¿há cuma xi hisca tjë rë David má me ni, hacuaha matitjun nga me tsëhë David ni? ―‍Cuatjin cachja Jesús. Hane xutacjín ne, jemu cojo cjuasua cavisiñuju me cjua rë Jesús.
MAR 12:38 Hacuaha cuatjin cachja nga me ngu ndiya xi tivicuya me xuta: ―‍Tjin nuju cuidadu. Hacuiin cojo ngayun nihñu sacuatjin sahmi cha maestru tsëhë ley. Cha xi cuacun vëhë ne, jemu meje tsujyihiya chacun cha hacuaha meje rë cha xi cuichja xuta nina cojo cha ngajñi ndetsin.
MAR 12:39 Hacuaha hora xi fi cha yungun ne, cjue cha cuiyuju cha ngu cahndë́ ndatjin hiscan viyuju xuta xi matitjun. Ha cuanitjin ni hiscan xi cjue sinë cha ngu ndava suhi ne, fi cha viyuju cha cahndë́ ndatjin hiscan viyuju xuta xi matitjun.
MAR 12:40 Hacuaha yachjin cahan ne, jemu cjín tujún vaxë cha na. Hisca ndava na tsajin. Hane hisca xi chjayuma cha ne, jemu nduju hora chja cha, peru hacuiin nguñaja cacun cha chja cha. Vëhë xi cha xi cuacun vë ne, hitsë sa jyë castigu cuatjun cha, xi cuma rë jingu sa xuta.
MAR 12:41 Sehe quiji cavéjña me tiña hiscan xi tacun caxa xi xincha tujún chjë rë Nina, vutsejen me hacutjin vincha xuta tujún. Hane jemu cjín xuta nchina quiji cavincha me chjë rë, jercu cjín tujún cavincha me.
MAR 12:42 Hya xi camá ne, cojo ngu na cahan xi jemu yuma camahani quiji cavincha na jo tujún siné xi jemu chuva chji rë cahntsua caxa jan.
MAR 12:43 Ngajan xi Jesús ne, casahmitangun me cha ladu rë me, sehe cachja me cojo cha cuitjin: ―‍Cuichjá cojo nuju cjuaquixi ta xuma chjuun cahan vihi ne, hitsë sa vengui chji rë tujún xi cavincha na, xi cumá rë tujún xi jemu cjín cavincha cha nchina jan ta,
MAR 12:44 tsëhë xi cha xi cuacun vëhë ne, xi vangui rë cha ne, vëhë xi cavincha cha. Hane ha ndaja na vëhë ne, cojo cjuayuma xi tacun na ne, tujún xi cavincha na jan ne, ha vëhë yëjë ni xi tjin rë na. ―‍Cuatjin cachja Jesús.
MAR 13:1 Hya xi camá ne, hora xi tivetju Jesús tsëhë ndatsen yungun xi matitjun jan cojo cha ladu rë me ne, ngajan xi chja nga cha ladu rë me jan cojo rë me cuitjin: ―‍Maestro, chutsujun ndyojo xi texo yungun vihi ta tjercu tu ndacun camahani. Hacuaha ndihya tsëhë ne, jercu tu cun camahani.
MAR 13:2 Ngajan xi chja Jesús cojo cha cuitjin: ―‍Sacuaha ndihya ndacun xi chutsujun ne, cuechu nixtin xi hisca xi ngu ndyojo vi ne, tsajin hinchasuncoo xicjin ta, cjuë yëjë cuixujne.
MAR 13:3 Cafë cachja me cuitjin ne, sehe cavetju me quiji me cojo cha ladu rë me, cafehe me tiña rcu Naxi Olivu, quixi rë tingotjo yungun xi matitjun jan. Hane xi quijixin me cojo cha Pedru cojo cha Jacobo cojo cha Juan cojo cha Andrés, sehe cavinenguise cha me cuitjin:
MAR 13:4 ―‍¿Janihya cuetjucaa xcusun vëhë xi canújun?
MAR 13:5 Ngajan xi cachja Jesús cojo cha cuitjin: ―‍Nechun cuidadu cojo sa xi hacuiin cuma ndacha ngayun ta,
MAR 13:6 tsëhë xi jemu cjín xuta cjuehe me xi cuichja me cueyanangui me ñihi naha cuichja me xi hacui me xi Cristu me. Hane cuatjin jemu cjín xuta cumacjain rë me cjuandacha rë me xi cuacun vë.
MAR 13:7 ’Hacuaha hya xi cumachaya nuju cjua xi jemu yehe si tijima ne o sá xi tjin cjuacjintacun ta jemu yehe si nduva ne, hacuiin cumacjintacun ta ha tuxa cuatjin cuma. Peru hacuiin ha hya cjuë nixtin rë ngasunhndë vihi.
MAR 13:8 Xuta nandya scaan cojo xuta xi hacjahi. Ngu nación cojo ngu nga ne, scaan. Hacuaha cjín cahndë́ xi cjuani nangui. Hacuaha cjín cahndë́ ne, cuma jindya. Cuatjin cumá xi cuetsihin cjuañihi xi cuatju xuta.
MAR 13:9 ’Nechun cuidadu ta, cuechu nixtin xi xuta nandya ne, cjue cani nuju me xcun xutaxa rë yungun ne, hacuaha cuaja nuju me. Hacuaha tjin nuju xi cuangun xcun xutaxa rë ndihyavasen cojo xcun gobernador ngatsë rë xi macjain nuju ngahan. Hane ngajan ninguixun yëjë cjua hacutjin cavicuyá nuju.
MAR 13:10 Peru chaja sa xi cjuë ngasunhndë ne, meje rë xi cuichja xuta ladu naha cjua rë Nina jingujyë ni nandya tsëhë ngasunhndë.
MAR 13:11 Hora xi cjui chani nuju xcun xutaxa rë ne, hacuiin cumacjintacun tsëhë cjua xi cuinújun jan ta, Hasen rë Nina ne, scuxaha cjuatacun nuju hora vëhë hacutjin cuinújun. Hacuaha vëhë ni cuinújun ta tsëhë xi hacuiin cjuatacun nuju xi cuinújun ta cjuatacun rë Nina xi sua nuju Hasen rë Nina.
MAR 13:12 Xuta nandya ne, cuinchajyë me hntsë me, cuinchajyë me xutacha rë me, hacuaha cuinchajyë me quihndi rë me, cojo sa xi xutaxa rë ne, cjuaha me xuta xi cuacun vë ne, tsiquehen me.
MAR 13:13 Hane yëjë xuta ne, choho scuëë nuju me ngatsë naha. Peru jarë ngayun xi scaa nuju cojo cjuacjintacun vëhë hisca xi cueyun ne, cuechun xcun Nina. ―‍Cuatjin cachja Jesús.
MAR 13:14 ’Yo xi scutaya cjua xi sehe nduva vi ne, meje rë xi ndaja catetaharcun. Tjin xcusun xi tsinguetsun rë cahntsua yungun xi matitjun. Hane hya xi cjuehe ngu xcusun xi cuacun vë hiscan xi ndajintjin xi cjuehe ne, yëjë ni xuta xi siu ladu tsëhë distritu Judea nixtin hya ne, ngutjen ni catangahma me hiscan ndetjun.
MAR 13:15 Hacuaha jarë me xi hinchasun rcu ndava xi cuitujne me, hacuiin cuijne me xi cuisehen me cahntsua ndihya cjuaha me mé tsëhë me xi cjuaha me.
MAR 13:16 Hacuaha yo xi hinchataha me nguijña ne, mijí rë xi cuya cjue me ndava me xi cjuejaha ndastu tsjanga rë.
MAR 13:17 Jemu chojyihi tsëhë yëjë ni yachjin xi hinchahma quihndi rë cojo yëjë me xi tjin rë quihndi vaqui ne nixtin hya.
MAR 13:18 Chjahyun rë Nina xi cjuañihi vëhë ne, hacuiin cuinduva nixtin chan hnchan ta,
MAR 13:19 cjuañihi xi cuma ne, ngu cjuañihi jyë xi cjëë camahani cumá hisca ntsacu cavetsihin ngasunhndë hacuaha cuyaain cuatjin cuma.
MAR 13:20 Sá xi jemu cjín nixtin cjuecani rë cjuañihi vëhë ne, hisca ngu xuta ne, cuetjintjiin me. Peru ngatsë rë cjuahmutacun xi tjin rë Nina cojo xuta xi cavaxijin me xi cumá me ladu rë me ne, sahmichuva me nixtin vëhë.
MAR 13:21 ’Nixtin vëhë ne, sá xi yo xi cuichja cojo nuju xi ngajan o sá xi nguehe tacun me xi má Cristu, xi camacjaain nuju ta quixiin xi chja me.
MAR 13:22 Ngujo xuta vindacha ne, cuichja me ta: “Ngahan xi Cristu xi cumatitjun ngahan tsujun.” Ngujo nga me ne, cuichja me ta: “Ngahan xi chjá cjua rë Nina.” Peru vindacha ni me, quixiin cjua xi cuichja me. Hacuaha sahmi me xcusun sacuaha cjuarcun, tsëhë xi hisca cojo xuta xi cavaxijin Nina meje cuindacha me.
MAR 13:23 Nechun cuidadu ta cojo chaja sa xi cuechu nixtin vëhë ne, ngahan ne, ha casua camachaya nuju xi cuatju vë.
MAR 13:24 ’Xi cuatjun nixtin tsëhë cjuañihi jan ne, cuinduva nixtin xi cjuë ndavá rë tsuhi. Sá ne, hacuaha ha quihndë suaain ndavá rë.
MAR 13:25 Hane niñu ne, cuixu tsëhë ngahnga. Hisca ngahñu xi yaha ngahnga ne, cjuiniyaya.
MAR 13:26 Xcun cjuacjintacun vëhë ne, scuëë xuta xi ngahan, Quihndi rë Xuta Jain, cuinduvá ngajñi rë yufí cojo jemu jyë ngahñu hisca seti tsejen ngahan xi nduvá.
MAR 13:27 Hya ne, tsingátju ángel naha yëjë ni ladu tsëhë ngasunhndë, cjuejaha rë yëjë xuta naha xi cavaxejen, sahmi tangun rë hiscan tejña.
MAR 13:28 ’Quihndë ne, cuetaharcun ngujo cjua tsëhë yaxujun xi chine tú rë. Hya xi cuetsihin cumá xcuen tsja rë yaxujun jan tsëhë xi cuetsihin cuetjusehen ne, ngayun ne ha hyun ta ha jemu camatiña chan tsi.
MAR 13:29 Hacuaha xi cjuehe cjuañihi xi cachjá cojo nuju ne, vëhë sua cumachaya nuju ta ha tiña tacun xi cjuë ngasunhndë, hisca meje cumá.
MAR 13:30 Cuichjá cjuaquixi cojo nuju ta xuta xi siu quihndë ne, siu cuaha me hya xi cuetjucaa xcusun xi cachjá cojo nuju.
MAR 13:31 Cuechu nixtin xi cjuë nangui, cjuë ngahnga. Peru cjua naha ne, tsajin nixtin xi cjuë.
MAR 13:32 ’Sacuaha nixtin xi cuetjucaa cjuatacun vëhë ne, tsajin yo vëë rë janihya cuetjucaa. Hisca hvíin ángel xi siu ngahnga. Hisca hveen ngahan xi Quihndi rë Nina. Suva ni Nina ngu tutu nahmi naja ne, me vëhë xi vëë me janihya cumá.
MAR 13:33 ’Vëhë xi nechun cuidadu, hacuaha ningascun rë hitsë cjuatacun nuju ta, ngayun ne, hyuun janihya xi cjuehe Nai nuju. Vëhë xi chjá cojo nuju ta ningascun rë hitsë cjuatacun nuju ta ngayun ne, hyuun janihya cúya, ¿há jñu ne?, ¿há ñahñu cjuëhë?
MAR 13:34 Ngahan ne, sacuaha ngu xuta xi cuetju cjue ngu nangui cjin. Chaja sa xi cuetjun me tsëhë ndava me, cuichja me cojo mosu rë me mé xa sahmi jimangu mosu. Hacuaha cuitexa ngu mosu xi cuahacuenda tingotjo ndava me. Cuatjin sahme.
MAR 13:35 Vëhë xi chjá cojo nuju ta ningascun rë hitsë cjuatacun nuju ta ngayun ne, hyuun janihya cúya, ¿há jñu ne, há nixten ne, há tiña sahasen, o sa sahasen camahani cúya? Sa xi ñahñu cjuëhë hane tsajin tjin chjine ngayun.
MAR 13:36 Cuidadu sá xi ngu ñahñu nduvá hane ngayun ne, tsajin tjin chine ngayun.
MAR 13:37 Xi chjá cojo nuju ne, ha cuanitjin ni chjá cojo yëjë ni xuta: Meje rë xi catitsingasca me hitsë cjuatacun rë me. ―‍Cuatjin cachja Jesús.
MAR 14:1 Hya xi camá ne, casahmi chaja sa jo nixtin xi cuechu suhi tsëhë pascua ne, sacuaha xcusun niji ne, hya chini pan xi tsajin san rë. Ngajan xi nahmi xi matitjun jan cojo cha maestru tsëhë ley ne, jemu tivangui me chuva rë xi cuindacha me Jesús, cojo sa xi cuma cjuaha me me tsiquehen me me.
MAR 14:2 Peru cachja me cojo xicjin me cuitjin: ―‍Ndatjin xi cuinechanyan ne, cuatju suhi sehe chjahanhma cha, ta sá xi tsajin ne, tu cumacjan rë xutacjín hane cumá ngu suë jyë.
MAR 14:3 Hya ne, Jesús ne, nandya Betania quitaha me. Tacun me ndava cha Simón, cha xi camandaja tsëhë chíhin cjan rë xi cafaha rë chuxin yojo rë. Hora xi tacun me tijinë me niñu ne, cafehe ngu na xi yaha na ngu frascu ndyojo, hincha aceite tsëhë nardo xi jercu hnga chjí rë. Hane xi cavotohosun na rcu frascu hiscan hincha aceite jan ne, sehe quiji cavitejnu na aceite jan rcun Jesús.
MAR 14:4 Ngujo me xi siu jan ne, camacjan rë me xi cuatjin casahmi na. Hane sehe cachja me ngajñi rë me cojo xicjin me cuitjin: ―‍¿Mé má cuatjin tu catsinguetsun na aceite vë?
MAR 14:5 Sá xi xteña vë, sacú tujún sacuaha tujún xi sacu rë ngu mosu xi casahmi xa ngu nu, hane tujún vëhë ne, cuma cuisecoo rë xuta yuma. ―‍Cuatjin cachjataha me na.
MAR 14:6 Ngajan xi cachja Jesús cuitjin: ―‍Xi canujuun tsëhë na. ¿Mé má cuatjin tivichuncjun tsëhë na? ta, jemu venguichji rë xcusun xi casahmi na cojo ná.
MAR 14:7 Xuta yuma ne, yëjë nu yëjë nixtin siu me ngajñi nuju. Peru ha ndaja ngahan ne, hacuiin jyë nixtin tejña cojo nuju.
MAR 14:8 Na vihi ne, casahmi na hacutjin xi chutaha na. Hane cojo chaja sa xi cueya ngahan ne, cavitejnu ná na aceite xi cuëhëchjine ni na yojo naha xi seyaniji ngahan.
MAR 14:9 Cuichjá quixë cojo nuju ta tuyani tsëhë jingujyë ngasunhndë xi cuichja xuta cjua tsëhë Nina ne, hacuaha cueyanangui me na vihi cojo sa xi xuta xi yahnga ne, cumachaya rë me xcusun xi casahmi na cojo ná. ―‍Cuatjin cachja Jesús.
MAR 14:10 Hya xi camá ne, cha Judas tsëhë nandya Queriote, cha ladu rë Jesús tsëhë cha xi tejó jan ne, quiji cha xcun nahmi xi matitjun ne, cavëhë chihin cha cjua cojo rë me xi sahmi me entregadu cha Jesús cojo rë nahmi jan.
MAR 14:11 Hya xi cahndë nahmi xi matitjun jan cjua rë Judas ne, jercu ndama camahani rë me. Hacuaha ngutjen ni cachja me ta, sua me cha tujún. Hane ngajan xi cha Judas jan ne, cavetsihin cavangui cha chuva rë hacutjin xi cuma sahmi entregadu cha Jesús.
MAR 14:12 Hya xi camá ne, nixtin tjun tjun tsëhë suhi xi chini pan xi tsajin san rë, nixtin xi hacuaha niquihin chu tsánga tsëhë suhi tsëhë pascua ne, hya ne, cha ladu rë Jesús ne, cavinenguise cha cojo rë me cuitjin: ―‍¿Jani hiscan xi meje nuju xi cuanguin cuihinchjini xi xinëë nguixun tsëhë suhi vi?
MAR 14:13 Ngajan xi catsingatju me jo cha ladu rë me quiji cha tixa. Hane cuitjin cachja me cojo cha: ―‍Tangun nandya Jerusalén. Hane ngajan cuechuntuhun ngu cha xi nduva ne, quisun rcu cha ngu nisa nandá. Tangun cojo cha hacutjin cjui cha.
MAR 14:14 Hane ndihya xi cuisehen cha ne, tinújun cojo me xi nai rë ndihya jan cjua vihi: “Cuitjin chja maestru ta, ¿jarë cuartu hiscan xi sinë nguixun me cojo niji tsëhë pascua?” Cuatjin tinújun cojo me.
MAR 14:15 Hane me vëhë ne, cjue tsingacun nuju me ngu cuartu jyë ngajan ndihya ngahnga hiscan xi ha tjin chjine. Hane ngajan tuhunndujun xi xinëë.
MAR 14:16 Hane ngajan xi cavetju cha xi cuacun jan quiji cha. Xi cafehe cha nandya Jerusalén ne, cuatjin camá tu tjin cachja Jesús cojo cha. Hane cavëhë ndaja cha xi sinë nguixun me cojo rë cha.
MAR 14:17 Xi quiji hora jan ne, cafehe Jesús cojo yëjë tejó cha ladu rë me. Hane quiji me caviyuju me.
MAR 14:18 Sehe cavetsihin cajinë me. Hora xi tijinë me jan ne, ngajan xi cachja Jesús cuitjin: ―‍Nguehe cuichjá cojo nuju cjuaquixi ta ngu ngayun xi nechan tichine cojo nuju nguehe ne, nihñu ná entregadu. ―‍Cuatjin cachja me.
MAR 14:19 Ngajan xi jemu choho camá rë cha, cavetsihin cha cachja cha chuva ngu chuva ngu cha, cuitjin cachja cha: ―‍Hacuiin ngahan.
MAR 14:20 Ngajan xi cachja Jesús cuitjin: ―‍Ngajñi nuju xi tejó ngayun, ngajan jiyajñi ngu xi sahmi cuitjin. Ngu me xi ngu ni tyuva tsinguísehen quinda niñu naha cojo ne, me vëhë xi sahmi ná me entregadu.
MAR 14:21 Ngahan xi Quihndi rë Xuta Jain ne, hatuxa tjin xi cueyá ta, xujun rë Nina ne, cuatjin chja. Peru xuma cha xi cuiteña ná. Vengui sa chji rë sá xi catsiin camahani cha.
MAR 14:22 Hora xi ha camatiña xi cuijnetaha sinë me niñu ne, cafaha Jesús ngu niñutsju, hane casua me nacuechji rë Nina, sehe cavotohocja me niñutsju jan. Hane sehe casua me ngu rquí ngu rquí niñu jan cha ladu rë me, hane cuitjin cachja me cojo cha: ―‍Juhun vihi ta, vihi ne, yojo naha. ―‍Cuatjin cachja me.
MAR 14:23 Hacuaha cafaha nga me ngu vasu xi hincha xan rë uva, hane casua nga me nacuechji rë Nina. Hane sehe casua me tsë tsë cahvi cha jima ngu cha ladu rë me.
MAR 14:24 Hacuaha cachja me cojo cha cjua vihi: ―‍Vihi jni naha xi cuetju ná ngatsë rë xuta. Xcusun vihi ne, ngu compromisu xatsë xi sehe tivëhëchihin Nina cojo xuta cojo sa xi jni naha ne, vëhë cuaxëtje rë xuta.
MAR 14:25 Cuichjá quixë cojo nuju ta ha quihndë cueen xan rë uva nguehe ngasunhndë. Cuëhë, peru hisca hya xi nduva Nina cuitexa me ngasunhndë, hya cuëhë, peru hacuiin tangun cumá. ―‍Cuatjin cachja Jesús cojo cha ladu rë me.
MAR 14:26 Xi cajnetaha cajinë me ne, casë me ngu tsëhë Nina. Sehe cavetju me quiji me Naxi Olivu.
MAR 14:27 Hane sehe ngajan xi chja me cojo cha ladu rë me cuitjin: ―‍Ngayujun ni ngayun cumanguaintacuun cojo ná ta cuma sacuaha camahindu xcun xujun rë Nina xi chja cuitjin: “Nina ne, tsiquehen me cha xi sahmi cuidadu rë chu tsánga. Hane chu tsánga ne, cuitsojo chu.”
MAR 14:28 Cuatjin cumá, peru hya xi cúya nga cjuahñu naha ne, cjué titjun tsujun hiscan distritu Galilea.
MAR 14:29 Ngajan xi cachja cha Pedru cojo Jesús cuitjin: ―‍Ha ndasa ngayëjë cha xi cuicun vi cuejña suva cha ngayun ne, peru ngahan ne, cuejñaa nuju suvun.
MAR 14:30 Ngajan xi cachja Jesús cojo cha cuitjin: ―‍Cuichjá quixë cojo ri ta tajñu ni xi chaja sa squindaya xahnda ne, ha jyan ndiya cuinoje xi hyiin yo ngahan. ―‍Cuatjin cachja me.
MAR 14:31 Peru cha Pedru ne, cavuya cachja nga cha cjua vihi: ―‍Ha ndasa hisca cueya cojo nuju ne, peru cuichjaain xi hveen yo ngayun. ―‍Cuatjin cachja cha. Hacuaha cuanitjin ni cachja cha xi yahnga.
MAR 14:32 Hya xi camá ne, cavetju me quiji me ngu cahndë́ xi hmí rë Getsemaní. Ngajan xi cachja me cojo cha ladu rë me cuitjin: ―‍Nechun ni nguehe ne, cjuë́ cuisiajme cojo Nina. ―‍Cuatjin cachja me.
MAR 14:33 Hya xi camá ne, cavaxë me cha Pedru cojo cha Jacobo cojo cha Juan, quiji me cojo cha. Ha xcun xi ha cjui cjui me jan ne, cavetsihin jemu casercun rë me, hacuaha macjincacun me.
MAR 14:34 Ngajan xi cachja me cojo cha cuitjin: ―‍Jercu choho má camahani rë xahasen naha. Xi má ná ne, cueya tsëhë. Nechun ni nguehe cuacun ngayun cojo ná. ―‍Cuatjin cachja me.
MAR 14:35 Sehe ngajan xi Jesús ne, quiji me hitsë ni nguvan. Hane ngajan cafañatsacjan me, cafehya rë me Nina sá xi tjin tu mé ni xi cumá cojo sa xi cuatjiin me cjuacjintacun xi cuatju me jan.
MAR 14:36 Hane cuitjin cafehya rë me Nina: ―‍Papá. Xi cumá nuju ngayun ne, yëjë ni xcusun ne, hacuiin chja cuma. Vëhë xi tiféhya nuju xi naxuntjun ná tsëhë cjuacjintacun xi cuátju cumá. Cuatjin meje ná, peru cjua xi cuinújun ne, cuatjin catama. ―‍Cuatjin cafehya rë me Nina.
MAR 14:37 Hya xi camá ne, cavuya cafehe nga me hiscan siu cha ladu rë me xi quijicojo me jan. Hane xi vutsejen me ne, siufë cha. Ngajan xi chja me cojo cha Pedru cuitjin: ―‍Simón, ¿mé má tsjuñife? ¿Há camaji cavacun ngayun cojo ná hisca ngu hora?
MAR 14:38 Nechun quicun, hacuaha chjahyun rë Nina cjuandaja rë me, cojo sa xi hacuiin chjaha chuva nuju cojo cjuatacun nuju. Xahasen nuju ne, ndaja meje rë xi nihñu, peru yojo nuju ne, chuva caa rë. ―‍Cuatjin cachja me cojo cha.
MAR 14:39 Hya xi camá ne, quiji nga me ngu ndiya hitsë ni nguvan. Hane ha cjua vëhë nga ni cavuya cafehya rë me Nina.
MAR 14:40 Hya xi cavuya nga me ne, siufë nga cha ladu rë me xi jyan jan, tsëhë xi ha quihndë ticaain rë cha xi jemu nijña rë cha. Xi catsingasca Jesús cha ne, sacuinyiin rë cha mé cuichja cha cojo me.
MAR 14:41 Xi cavuya me xi quiji me má jyan ndiya ne, cachja me cojo cha ladu rë me jan cuitjin: ―‍Ha tsjuñufun cuaha. Juun, peru ha camá. Ha cavechu hora xi ngahan, Quihndi rë Xuta Jain, cjuaha ná xuta tsehen ta, ha caxteña ngahan.
MAR 14:42 Tisatjunhngun, cuanguen chutsejen ta, ha nduva cha xi sahmi ná entregadu. ―‍Cuatjin cachja me.
MAR 14:43 Ha tu tichja cuaha Jesús cojo cha ladu rë me ne, cafehe cha Judas, cha xi cojo jiyajñi ngajñi rë cha xi tejó jan. Hacuaha jercu cjín xuta tivisecoo rë cha hora xi nduva cha. Yaha me quicha. Yaha me ya. Nahmi xi matitjun cojo cha maestru tsëhë ley cojo xuta changá jan ne, me vëhë cavitexa me xutacjín jan xi quiji jaha me Jesús.
MAR 14:44 Chaja sa xi cjuehe cha Judas cojo xutacjín jan hiscan tacun Jesús ne, ha cachja cha cojo xuta jan cjua vihi: ―‍Cha xi cjuë́ cuitátsuha xi suá rë nina ne, cha vëhë xi hacui cha. Chjuhun cha, hacuaha nihñu cha, sehe tangun cojo cha. ―‍Cuatjin cachja cha.
MAR 14:45 Xi tu cavechu cha hiscan nduva Jesús cojo cha ladu rë me xi yahnga jan ne, ngutjen quiji casahmi tiña cha tsëhë me, hacuaha casua cha me nina cuitjin: ―‍Cuhndanu, Maestro. ―‍Cuatjin cachja cha. Cafë cachja cha cuitjin ne, sehe cavitatsuha cha Jesús.
MAR 14:46 Hya xi camá ne, quiji xuta jan ne, cafaha me Jesús.
MAR 14:47 Ngajan xi ngu cha xi secun jan ne, cavaxë cha quicha nduju rë cha, hane cavaja rë cha ngu cha mosu rë nahmi xi matitjun ne, cavatësun cha ngu ladu tyjavañuju.
MAR 14:48 Ngajan xi cachja Jesús cuitjin: ―‍¿Mé má sacuaha vangun chjuhun xuta chëjë ne, cuatjin nduvun chjuhun ná? ta, quichuhun quicha quichuhun ya.
MAR 14:49 Ngahan ne, nchunchujun ni cavitejñaya yungun xi matitjun, cavicuyá rë xuta, hane ¿mé má cachjuun ná ngajan? Juun, peru cuatjin tijima cojo sa xi cuetjucaa jain hacutjin camahindu xcun xujun rë Nina.
MAR 14:50 Hya xi camá ne, cha ladu rë Jesús ne, cavejña suva cha me, hane cafë yëjë cha cavanga cha.
MAR 14:51 Ngu sa cha jan yaja cha ngu tsjian tu të ni. Hane xi tu meje cjuaha xuta cha jan ne, tsjian ni rë cha cama cafaha me.
MAR 14:52 Peru cha vëhë ne, cama cavanga cha tu quixti ni.
MAR 14:53 Hya xi camá ne, quijicojo xuta jan Jesús xcun nahmi xi matitjun. Hane xi cafehe cha cojo Jesús jan ne, sehe camatangun yëjë ni nahmi xi matitjun cojo xuta changá cojo cha maestru tsëhë ley.
MAR 14:54 Ngajan xi cha Pedru ne, quijitjengui cha Jesús tu cjin tu cjin ni. Cafehe cha hiscan ndatsen ndava nahmi xi matitjun jan. Hane ngajan cavéjña cha cojo cha nísë tjehen ndava ndihi, tsihasu rë cha yojo rë cha cojo cha nísë jan.
MAR 14:55 Hane nahmi xi matitjun jan cojo yëjë sa xuta xi matitjun ne, cavangui me xuta xi tsinguixi jyë́ rë Jesús, cojo sa xi cuma tsiquehen me me. Peru tsajin mé jyë́ rë Jesús casacu rë me.
MAR 14:56 Ha ndasa jemu cjín xuta xi cavinchajyë me Jesús ne, peru suva cjuandesu yëjë ni cjua xi cachja me ta, hacjahi chja ngu ne, hacjahi chja ngu. Hacuiin tangun má cjua rë me.
MAR 14:57 Ngujo me ne, chja me ta cahndë me xi cuitjin cachja Jesús:
MAR 14:58 “Ngahan ne, tsinguétsun yungun xi matitjun xi casahmi xuta vë, hane cahntsua xi jyan nixtin ne, sahme nga ngu. Peru hacuiin cojo tsja xuta xi cuma hya.” Cuahaxutjin cahndë me xi cachja Jesús.
MAR 14:59 Hisca me xi cuacun jan ne, hacuaha hacuiin tangun camá cjua rë me.
MAR 14:60 Ngajan xi nahmi xi matitjun tsëhë nahmi xi yahnga jan ne, casecunvasen me, hane sehe cavinenguise me Jesús cuitjin: ―‍¿Há chjayinnguiin hisca xi ngu cjua tsëhë jyë́ riji xi vincha xuta xi cuicun vi? ―‍Cuatjin cachja me.
MAR 14:61 Hane Jesús ne, tu jyuu ni casecun me. Hisca ngu cjua cafayanguiin me. Hya xi camá ne, cavinenguise nga nahmi xi matitjun jan ngu ndiya cojo Jesús cuitjin: ―‍¿Há ngaye xi Quihndi rë Nina naja? ¿Há ngaye xi catsingatju me xi cumá titjun tsijin?
MAR 14:62 Ngajan xi cafayangui Jesús cuitjin: ―‍Juun, ngahan. Hacuaha cjuehe nixtin xi chutsujun ná xi tejña ladu quixi tsëhë Nina. Hacuaha chutsujun ná xi cuinduva ngajñi rë yufí, xi cúya nga tsëhë Nina.
MAR 14:63 Hane ngajan xi nahmi xi matitjun jan ne, jemu camacjan rë me ne, hisca tsjian rë me cavicheya me. Hane cuitjin cachja me: ―‍¿Mé sa cjua xi mameje?
MAR 14:64 Ngayun ne, ha canuhyun hacutjin xi tsixcuehyu cha Nina. ¿Mé xi nújun quihndë? Ngajan xi yëjë xuta jan ne, cachja me ta meje rë xi cueya Jesús.
MAR 14:65 Hane cavetsihin ngujo me cavëhë natya me Jesús. Hane hacuaha cavatsa me xcun Jesús, sehe cavetsihin cavaja me. Sehe ngajan xi cachja me cuitjin: ―‍Tinoje yo xi cavaja ri. Hya xi camá ne, cavetsihin xi cha nísë jan ne, jemu cavaja cha me.
MAR 14:66 Jinguyëjë rë xi cuatjin tijima ne, cha Pedru ne, tacun cha ndatsen ndihya. Hya xi camá ne, hora vëhë canduva ngu na xi sahmi xa ndava nahmi xi matitjun jan.
MAR 14:67 Hane cavëë na xi tacun cha Pedru tsihasu rë cha yojo rë cha hiscan tacun ndava ndihi. Hane casecun na cafahacuenda na cha. Sehe ngajan xi cachja na cojo cha cuitjin: ―‍Ngayun ne, ladu rë Jesús tsëhë nandya Nasaret ngayun.
MAR 14:68 Ngajan xi cachja cha Pedru cuitjin: ―‍Hisca hveen mé xi noje. Hya xi camá ne, sehe cavetju cha quiji cha casecun cha hiscan tu cuiseen ni tsëhë ndatsen ndihya.
MAR 14:69 Hane ngajan xi na xi sahmi xa tsëhë nahmi jan ne, cafahacuenda nga na cha hiscan quisecun cha. Hacuaha cavetsihin nga na cachja na cojo xuta xi hinchacun jan cuitjin: ―‍Cha vëhë ne, ladu rë Jesús má cha.
MAR 14:70 Xi tu cahndë cha Pedru xi cuatjin cachja na jan ne, ngutjen cafayangui cha xi quixiin xi chja na. Xi cafë ngu hora lihndi ne, hacuaha cachja xuta xi hinchacun jan cojo cha cuitjin: ―‍Quixi jain xi ladu rë Jesús má ngaye ta distritu Galilea ne, ngajan nangui riji.
MAR 14:71 Sehe ngajan xi hisca Nina caveyanangui cha Pedru ne, cachja cha xi hvíin cha me, cuitjin cachja cha: ―‍Vëë Nina jain xi hveen yo me xi nújun vë.
MAR 14:72 Hane hora vëhë ne, cajihnda xahnda. Hya xi camá ne, catsinguitsjen cha Pedru cjua xi cachja Jesús cojo cha xi cachja me cuitjin: “Chaja sa xi squihndajo xahnda ne, ngaye ne, ha jyan ndiya cuinoje xi hyiin yo ngahan.” Hora xi catsinguitsjen cha cjua vëhë ne, cajihnda cha.
MAR 15:1 Hya xi casahasen xi camá nchujun jan ne, camatangun nga nahmi xi matitjun cojo xuta changá cojo cha maestru tsëhë ley cojo yahnga sa xutaxa rë xi hinchajñi me. Sehe catsihñu me Jesús ne, sehe quijicani me xcun gobernador xi hmí rë Pilatu.
MAR 15:2 Xi cafehe me cojo Jesús xcun Pilatu ne, sehe cavinenguise Pilatu cojo Jesús cuitjin: ―‍¿Há ngaye xi matitjun ngaye tsëhë xuta nangui Israel? Ngajan xi cafayangui Jesús cuitjin: ―‍Cuatjin sacuaha canújun vë.
MAR 15:3 Hane ngajan xi nahmi xi matitjun jan ne, jemu cjín xcusun jyë́ xi cavincha me tsëhë Jesús.
MAR 15:4 Ngajan xi Pilatu ne, cavuya cavinenguise nga me Jesús cuitjin: ―‍¿Há chjayinnguiin camahani? Jercu cjín jyë́ riji cavincha me.
MAR 15:5 Peru Jesús ne, ha quihndë cafayinnguiin camahani me. Hane Pilatu ne, jemu quijircun camahani rë me.
MAR 15:6 Suhi vëhë ne, Pilatu ne, ha tuxa xcusun rë me xi nu nu ni vëhëndaya me ngu presu xi meje rë xuta xi cumandaya.
MAR 15:7 Ndavaya ne, jiya ngu presu xi hmí rë Barrabás cojo ngujo sa presu xi catsiquehen rë xuta tsëhë ngu si.
MAR 15:8 Hya xi camá ne, canduva xutacjín ne, cafehya me cojo Pilatu xi sahmi me vëhë sacuatjin xi ha xcusun rë me.
MAR 15:9 Ngajan xi cachja Pilatu cojo rë xuta jan cuitjin: ―‍¿Há meje nuju xi cuáxë cha xi matitjun tsujun?
MAR 15:10 Cuatjin cachja Pilatu ta tsëhë xi ha vëë me xi ngatsë rë cjuaxin sahmi nahmi xi matitjun jan cojo Jesús, vëhë xi quijicani me Jesús ngajan.
MAR 15:11 Peru nahmi xi matitjun jan ne, quiji cavinchangui me xutacjín jan xi meje rë me xi cuichja xuta jan xi catëhëndaya Pilatu Barrabás.
MAR 15:12 Ngajan xi cavinenguise nga Pilatu cojo xutacjín jan cuitjin: ―‍¿Mé sahme cojo cha xi nújun xi matitjun tsujun ni?
MAR 15:13 Ngajan xi xuta jan ne, cuitjin jercu cachja me: ―‍Tetuhun cha xcun cru.
MAR 15:14 Ngajan xi cachja Pilatu cojo rë me cuitjin: ―‍Peru ¿mé xi choho casahmi cha? Peru xuta jan ne, hitsë sa rcu cachja me cuitjin: ―‍Tetuhun cha xcun cru.
MAR 15:15 Hya xi camá ne, ta meje rë Pilatu xi cumangucacun xuta ne, cavëhëndaya me Barrabás. Hane xi cavatju catsingatju me Jesús casehen rë ne, sehe cavuya casua nga me cojo cha sindadu xi cjue cuetaha cha me xcun cru.
MAR 15:16 Hya xi camá ne, quijicojo cha Jesús taha cahntsua hnchua hiscan ndatsen ndava Pilatu. Hane sehe casahmi tangun sa cha yëjë sindadu cjín.
MAR 15:17 Hya xi camá ne, cavaxë cha tsjian rë Jesús, hane sehe catsicaja cha me ngu tsjian hani. Hacuaha catsihya cha ngu corona nahyá xi cavesun cha rcu me.
MAR 15:18 Sehe cavetsihin cavincha cha viva rë me xi tsixcuehyu cha me, sacuaha xi macjain rë me xi me vëhë matitjun me tsëhë xuta tsëhë nangui Israel.
MAR 15:19 Hya xi camá ne, sehe cavaja cha ngu rquí ya rcu me. Cavëhë natya cha me. Hacuaha cavixcuhnchi cha xcun me, sacuaha xi faharcun cha me.
MAR 15:20 Hya xi cajnetaha catsixcuehyu cha me cuatjin ne, sehe cavaxë cha tsjian hani xi catsicaja cha me, hane sehe cavuya catsicaja nga cha me tsjian rë me xi tsëhë jain me. Hya xi camá ne, sehe quijicojo cha me xi cuetaha cha me xcun cru.
MAR 15:21 Ndiya cjui cha cojo me ne, cavechutaha cha ngu xuta changá xi hmí rë Simón tsëhë nandya Cirene, nahmi rë cha Alejandru cojo cha Rufu. Nduva me xi quiji me nguijña. Hane xi cavechutaha cha me, casahmi cha me ngujyë xi cuesuntyja me cru rë Jesús. Hya xi camá ne, cavesuntyja me, sehe quiji me cojo.
MAR 15:22 Sehe cavechu yëjë xuta jan hiscan xi hmí rë Gólgota, cjua xi meje cuichja Naxi Nínda Rcuun.
MAR 15:23 Sehe xuta jan ne, tisua me xan rë uva xi tecjan rë nandá rë tyjungunsa xi cuihi Jesús, peru cahviin me.
MAR 15:24 Hya xi camá ne, cavetaha cha me xcun cru. Hane tsjian rë me ne, cavincha rë cha ngu suerte ne, sehe cumatsejen mé xcusun tsjian rë me xi satë rë xingu xingu cha.
MAR 15:25 Hya ne, chuva rë fane ñaja tsëhë nguitajñu.
MAR 15:26 Hane camahindu ngu letreru cojo jyë́ rë me xi chja cuitjin: “Me xi Matitjun tsëhë Xuta nangui Israel.” Sehe quiji casetaharcu cru.
MAR 15:27 Hacuaha cavityangui cha ngu chëjë ngu ngu ladu rë tjehen rë me, jimangu cojo cru rë.
MAR 15:28 Cuatjin cavetjucaa cjua xi camahindu xcun xujun rë Nina xi chja cuitjin: “Cuichja xuta ta me vihi ne, ngu xuta tsehen me.”
MAR 15:29 Hya xi camá ne, xuta xi cavatju jan ne, xi catsixcuehyu me Jesús ne, catsiniya me rcu me, hacuaha cuitjin cachja me: ―‍Canoje xi cuma ninguetsin yungun xi matitjun, hane cahntsua xi jyan nixtin ne, cama nga canindeje sove.
MAR 15:30 Quihndë ne, sá cuatjin cuma nihñi ne, naxetje sove yojo riji, titujni tsëhë cru vë. ―‍Cuatjin cachja xuta.
MAR 15:31 Ha chuva vëhë ni, cavisiajmi nahmi xi matitjun cojo cha maestru tsëhë ley ne, ngajñi rë me cojo xicjin me xi tsixcuehyu me Jesús. Cuitjin chja me: ―‍Cavaxëtje cha xuta, peru quihndë ne, maji vaxëtje cha yojo rë cha.
MAR 15:32 Sá xi hacui jain cha xi catsingatju Nina xi cumatitjun tsajan ne, catitujne cha tsëhë cru chutsejen, cojo sa xi cumacjain naja tsëhë cha. ―‍Cuatjin cachja me tsëhë Jesús. Hacuaha cha chëjë xi cojo xtyangui taha cru jan ne, cojo cha choho cachja cha tsëhë me.
MAR 15:33 Xi camanchisen tsëhë nixtin vëhë ne, jingujyë ni ladu vëhë ne, camajñu. Jyan hora quijicani rë.
MAR 15:34 Xi cafë jyan hora vëhë ne, jercu cajindaya Jesús, cachja me hne rë me cuitjin: ―‍Eloí. Eloí, ¿lama sabactani? ―‍cjua xi meje cuichja cuitjin: Ngayun, Nina naha, ¿mé má canismutacun ná?
MAR 15:35 Hane ngujo xuta xi hinchacun jan ne, xi cavijniinrcu me hne rë Jesús ne, xi má rë xuta jan ne, nima Elías, ngu profeta tsëhë nixtin hatsëë, jindaya Jesús me.
MAR 15:36 Hane sehe cavanga ngu me quiji catsicahnchi me ngu tsjian hinda cojo xan rë uva xi ha san. Sehe cavetaha me rcu ngu ya nduju, sehe cavetaha me hntsua Jesús xi cuihingui me. Hacuaha chja me cojo xicjin me cuitjin: ―‍Cuinechanyan hitsë ne, ¿há cuinduva jain Elías tsitujne me Jesús tsëhë cru?
MAR 15:37 Peru Jesús ne, hora vëhë jercu cajindaya me, hane cahme me.
MAR 15:38 Hacuaha hora vëhë ni ne, tsjian nduju xi tyjangui cahntsua yungun xi matitjun ne, hisca rcu hiscan ntsacu canduva catiyavasen.
MAR 15:39 Hya xi camá ne, ngu cha capitán tsëhë sindadu xi secun tiña cru hisca tyjangui Jesús jan ne, xi cavëë cha hacutjin xi cahme Jesús ne, ngajan xi chja cha cuitjin: ―‍Cjuaquixindaja xi me vihi xi Quihndi rë Nina me.
MAR 15:40 Hacuaha hinchacun sa ngujo yachjin, vutsejen na tsëhë cjin ni. Ngajñi rë na xi cuacun vëhë ne, quisecun na Salomé cojo na María tsëhë nandya Mágdala cojo na María naa rë cha Jacobo lihndi cojo cha José.
MAR 15:41 Na yachjin xi cuacun vë ne, cojo na cavisecoo na catsindaja na xi cajinë Jesús cojo cha ladu rë me, hya xi catsujyihiya me ngajan ladu tsëhë distritu Galilea. Hacuaha jercu cjín sa yachjin hinchacun na jan xi hacuaha cojo na quiji na ngajan nandya Jerusalén cojo Jesús.
MAR 15:42 Nixtin xi cahme Jesús ne, hacuaha hya vispra tsëhë nixtin xi chjahájenda rë. Hane xi quiji hora jan ne,
MAR 15:43 ngu xutaxa rë xi tjemu chjahanrcun rë, xi hmí rë José tsëhë nandya Arimatea, me xi hacuaha tacunya nixtin xi cjuehe Nina cuma titjun me tsëhë yëjë Israel, cavejñahñu me cjuatacun rë me sehe quiji me ndava Pilatu. Hane cafehya me cahndë́ cojo Pilatu xi cjuahaxin me nima Jesús.
MAR 15:44 Hya xi camá ne, Pilatu ne, quijircun rë me xi cuatjin cachja José xi ha cahme nima ta, tsëhë xi cjëë jyë hora xi casetaha Jesús xcun cru. Hane vëhë xi catsingatju me quiji chjaha rë cha capitán. Hane sehe cavinenguise me cha sá xi quixi xi ha cahme jain Jesús.
MAR 15:45 Xi tu camachaya rë me cjua tsëhë cha capitán jan xi ha cahme jain Jesús ne, sehe ngajan xi cachja me cojo José ta cuma cjue tsitjujne me nima.
MAR 15:46 Ngajan xi José ne, vëhë ta cavatsë me ngu tsjiantë xatsë ne, sehe quiji catsitujne me nima Jesús tsëhë cru, sehe cavaxtë rë me tsjian jan. Hane sehe cavaha me nima quijicojo me hiscan tacun rë me ngu tsjun xi cafahanguitaha me cahntsua ngu naxi. Hane ngajan caveya me nima. Sehe catsindefajne me ngu ndyojo jyë xi cavechja rë tingotjo tsjun jan.
MAR 15:47 Hane na María tsëhë nandya Mágdala cojo na María naa rë cha José ne, cavëë na hiscan caseya nima.
MAR 16:1 Xi camá nguixun tsëhë nixtin xi chjahájenda rë jan ne, na Salomé cojo na María tsëhë nandya Mágdala cojo na María naa rë cha Jacobo ne, cavatsë na rqui xi ndaja jne xi cuitejnu na nima.
MAR 16:2 Xi casahasen domingu ne, hora xi tivetjucaa tsuhi ne, cavatju na yachjin jan quiji na hiscan tacun tsjun rë nima.
MAR 16:3 Hane ngajñi cjui na jan ne, ngajan xi chja na cojo xicjin na cuitjin: ―‍¿Yo cuisecoo naja xi nindefajne ndyojo xi quitaha tingotjo rë tsjun jan?
MAR 16:4 Peru xi tu cafehe na jan ne, ndyojo jyë xi quitaha tingotjo rë tsjun jan ne, ha quihndë tsajin quitaha cahndë́ rë ta ha xin jiña.
MAR 16:5 Xi cavisehen na cahntsua tsjun jan ne, cavëë na ngu cha xi tacun cha taha ladu quixi, yaja cha ngu tsjian tyava nduju. Hya xi camá ne, jemu catsacjun camahani na.
MAR 16:6 Ngajan xi cachja cha cojo rë na cuitjin: ―‍Xicarcuun. Ngahan ne, ha hvë xi Jesús tsëhë nandya Nasaret vinchunsun me, me xi cavetaha xuta xcun cru. Peru me vëhë ne, tsajin me nguehe ta cavuya cjuahñu rë me. Chutsujun cahndë́ hiscan xi cafaña xuta me.
MAR 16:7 Quihndë ne, tjangun sanii ne, tinújun cojo cha ladu rë me, cha Pedru ne cojo cha xi yahnga ta, Jesús ne, hisca tjun cuechutaha me yun ngajan distritu Galilea sacuahatjin xi ha cachja me cojo nuju.
MAR 16:8 Xi tu cavetju na tsëhë tsjun jan ne, ña fatsë na xi jemu catsacjun na camá. Hane vanga sanii na cafe na. Hane hisca xi ngu cachjaain na cojo, tsëhë xi jemu catsacjun na camá.
MAR 16:9 Jesús ne, xati camaha sa tsëhë nixtin domingu ne, hya cavuya cjuahñu rë me. Hya xi camá ne, tjun sa na María tsëhë nandya Mágdala cavëë na me, na xi cavaxë me yatu xitsehen xahasen rë hatsëë.
MAR 16:10 Hane na vëhë quiji quicun na xuta ladu rë me xi jemu jihnda tsëhë cjuachoho.
MAR 16:11 Hane xi cahndë me cjua ta Jesús tacun nga me cjuahñu hane na vëhë ne, cavëë na me, camacjaain rë xuta jan.
MAR 16:12 Hya xi cavatju vëhë ne, jo cha ladu rë Jesús ne cjui cha nguijña. Hane cojo Jesús cjui me cojo cha, peru ha ngu xcusun jyihi me.
MAR 16:13 Hane cha xi cuacun jan ne, xi tu cavëë cha xi hacui me ne, cavuya cha ne, quiji cachja cha cojo cha xi yahnga xi cavëë cha me. Peru hacuaha camacjaain rë cha xi yahnga jan.
MAR 16:14 Ngu ndiya nga ne, cafehe nga me hiscan siu cha ladu rë me xi tengu jan, tijinë cha niñu. Hane cachjataha me yëjë ni cha ngatsë rë xi jemu taja rcu cha, tsëhë xi camacjaain rë cha tsëhë xuta xi cavëë rë me xi tacun nga me cjuahñu.
MAR 16:15 Cavatju cacjan me cojo cha ne, sehe ngajan cavetsihin cachja me cojo cha cuitjin: ―‍Tangún jingujyë ni ngasunhndë ne, tinújun cojo yëjë ni xuta cjua rë Nina.
MAR 16:16 Yo xi cumacjain rë cjua vëhë hacuaha xtenda ne, cuechu xcun Nina. Yo xi cumacjaain rë ne, cuechu me castigu xi sahmi Nina xi cueyun.
MAR 16:17 Hane xuta xi cumacjain rë me ne, sahmi me xcusun vihi xi cueyanangui me ñihi naha ne: cuma cuaxë me xitsehen xi hincha xahasen rë xuta; cuma cuichja me ngu ngu xcusun hne;
MAR 16:18 yë ne, sá xi cjuahatsja me chu, o sá xi cuihi me ngu venenu ne, tsajin mé cumá rë me; hane tu cuetahatsja ni me xuta hmu rë ne, cumandaja xuta hmu rë jan.
MAR 16:19 Xi cajnetaha cachja Jesús, me xi Nai naja, cojo cha ladu rë me cjua vëhë ne, quiji me ngahnga, cavéjña me ladu quixi tsëhë Nina.
MAR 16:20 Hane cha ladu rë me ne, cavetju cha quiji cha, cachja cha cjua rë Nina yëjë ni ladu. Hacuaha Nai naja ne, cavisecoo me cha. Hane ngatsë rë xcusun xi cavëë xuta xi casahmi cha jan ne, vëhë xi tsejen xi quixi cjua xi cachja cha.
LUK 1:1 Jemu cjín xuta xi ha catsihindu me cjua xi chja tsëhë yëjë xcusun xi sehe casahmi Nina ngajñi naja ngayaan xuta ngasunhndë.
LUK 1:2 Meje tsihindu me cjua vëhë sacuatjin camahani casua camachaya naja me xi cavëëndaja cojo tuxcun hisca ntsacu cavetsihin sehe cafahaxa me xi tsinguitsojo me cjua jan.
LUK 1:3 Hisca hatsëë ne, ngahan ne, hacuaha ha jemu ndaja cavinenguësë yëjë ni hacutjin camá. Vëhë xi xi má ná ne, hacuaha ndatjin xi tsihindu chichihin nuju cjua tsëhë yëjë hacutjin camá, ngayun tatá Teófilo,
LUK 1:4 cojo sa xi sacúndaja nuju cjuaquixi tsëhë cjua xi ha camachaya nuju jan.
LUK 1:5 Nixtin hya xi Herodes cavitexa me yëjë ni xuta tjë rë Israel ne, cavéjña xu ngu nahmi xi hmí rë Zacarías, me xi má ladu rë Abías. Hane chjuun rë Zacarías ne, Elisabet hmí rë me, hacuaha tjë rë Aarón xu má me.
LUK 1:6 Hane Zacarías cojo Elisabet ne, tyjahi cjuatacun rë me xcun Nina ta, tsëhë xi tsajin xu jyë́ rë me xi tisahmichihin me yëjë ni sacuatjin cavitexa Nina.
LUK 1:7 Hane tsajin rë me quihndi ta, tsëhë xi Elisabet ne, hatuxa maji xu sacu rë me quihndi, hacuaha catsijo ni me ne, ha jemu changá xu me.
LUK 1:8 Hya xi camá ne, cavechú nixtin xi casatë rë Zacarías cojo yëjë sa nahmi xi má ladu rë Abías xi sahmi xu me xá xcun Nina xi má me nahmi.
LUK 1:9 Hane sacuaha xcusun rë nahmi ne, catsintsavë xu me ngu suerte cojo sa xi cuma tsejen ne, jarë xu me xi satë rë xi cuisehen ndava Nina, cuaca tyjungunsa. Hya xi camá ne, casatë xu rë Zacarías.
LUK 1:10 Hane yëjë xutacjín jan ne, caviyuju xu me candatsen sahmi me oración rë me, hora xi tivaca xu Zacarías tyjungunsa cahntsua ndava Nina.
LUK 1:11 Hane hora xi tivaca me tyjungunsa jan ne, camatsejen xu ngu ángel secun taha ladu quixi tsëhë ngasunscun hiscan xi tí tyjungunsa.
LUK 1:12 Hane xi cavëë Zacarías ángel jan ne, jemu quijircun rë me hacuaha jemu catsacjun xu me camá.
LUK 1:13 Ngajan xi ángel jan ne, cuitjin xu cachja cojo rë me: ―‍Xicarcuiin ngaye Zacarías ta, cjua xi cachjahye ne, cahndë Nina. Vëhë xi na Elisabet chjuun riji ne, sacú rë na ngu quihndi, hane quihndi vëhë ne, Juan tehe ñihi rë.
LUK 1:14 Hane jemu cjue ri cjuasua hacuaha jemu ndaja cuma ri, hacuaha jemu cjín xuta xi jercu tjin rë me cjuasua xi catsin quihndi vëhë ta,
LUK 1:15 tsëhë xi jemu jyë hnga cuma cojo cjuatacun rë ngajan xcun Nina. Hacuaha cuiin camahani xan hacuaha cuiin camahani nandá machihi. Hacuaha hisca hya xi caseya quihndi vë cahntsua naa rë ne, Hasen rë Nina quitsë rë xahasen rë.
LUK 1:16 Hacuaha quihndi vëhë sahmi xi jemu cjín xuta tjë rë Israel cuya nga me ndiya rë Nina rë me.
LUK 1:17 Quihndi vë ne, vëhë cuinduva titjun, sehe cuinduva Nina. Hane sacuatjin jyë hnga profeta Elías cojo cjuatacun rë me hatsëë nixtin ne, hacuanitjin ni jyë hnga cuma quihndi vëhë cojo cjuatacun rë, cojo sa xi quihndi vëhë ne, sahmi xi cuya cuma ndaja cacun nga yëjë ni nahmi rë nixti cojo nixti rë me, hacuaha sahmi xi yëjë xuta xi vihndiin me tsëhë Nina ne, cuma tangun cjuatacun rë me cojo cjuatacun rë xuta xi tyjahi cjuatacun rë me. Hane cuatjin chuva vëhë ne, cuëhëchjine quihndi vëhë xuta xi cuihndë me tsëhë Nina. ―‍Cuahaxutjin cachja ángel.
LUK 1:18 Sehe ngajan xi Zacarías ne, cuitjin xu cavinenguise me ángel: ―‍¿Hacutjin sacú ná cjuaquixi xi cuatjin jain cuma ni? ta ngahan ne, ha jemu changá ngahan, hacuanitjin ni chjuun naha ta jemu changá na. ―‍Cuahaxutjin cachja me.
LUK 1:19 Sehe ngajan xi ángel jan ne, cuihixutjin cafayangui nga: ―‍Ngahan xi Gabriel ngahan; ngahan xi tejña ngajan xcun Nina. Hacuaha ngahan xi catsingatju ná Nina xi cuisiajme cojo ri hacuaha suá cumachaya ri cjuandajyihi vëhë.
LUK 1:20 Chutsijin ni, quihndë ta camacjaain ri tsëhë cjua xi cachjá cojo ri ne, cumaji cuinoje, tsëhë xi cuma lihmi ngaye hisca hya xi cuetjucaa cjua xi cachjá cojo ri. Cjua vëhë ne, hatuxa cuetjucaa hya xi cuechú nixtin rë. ―‍Cuahaxutjin cafayangui ángel.
LUK 1:21 Jinguyëjë rë ne, xutacjín jan ne, jercu siuya xu me Zacarías, hisca fircun rë me tsëhë xi cuatjin jercu vindeya rë Zacarías xi cavisehen xu me ndava Nina.
LUK 1:22 Hane hya xi cavetju me ne, maji xu chja me cojo xuta. Hane xuta jan ne, cavacun rë me ta Zacarías ne, tjin mé xi cavëë me. Hacuaha tu tisahmitsja ni me ta, tsëhë xi lihmi cuaha xu me.
LUK 1:23 Hya xi cavatju nixtin xi satë rë me xi sahmi me xá xi má me nahmi ne, cavuya cafe xu me ndava me.
LUK 1:24 Hya xi camá ne, xi cavatju sa nixtin ne, casacu xu rë chjuun rë me quihndi, hane cahntsua hñú sá xi jiya quihndi rë Elisabet jan ne, cuatjin caseyahma xu me ndava me. Hane cuitjin xu cachja suvá me:
LUK 1:25 “Cuitjin casahmi Nina cojo ná ngu cjuandaja, quihndë xi camayuma rë me ngahan hane cafahaxin me cjuasava xi má ná ngajñi rë xuta tsëhë xi sacuiin ná quihndi.” Cuahaxutjin cachja me.
LUK 1:26 Xi ma jyun sá xi jiya xu quihndi rë Elisabet ne, catsingatju Nina ángel xi hmí rë Gabriel ngu nandya xi hmí rë Nasaret, tsëhë distritu Galilea,
LUK 1:27 ndava ngu chjuun xungun xi hmí xu rë María. Hane María jan ne, tacunvasen cjuavixan rë me cojo ngu xihin xi hmí rë José, ngu me xi tjë rë David, ngu xutachanga xi camatitjun xu tsëhë xuta tjë rë Israel.
LUK 1:28 Hane xi cavisehen ángel ndava María jan ne, sehe cachja xu cuitjin: ―‍Cuhndari, tsan. Nina ne, catsinchacun me ngaye, hacuaha tacun me cojo ri. Ngajñi rë yëjë ni yachjin ne, ngaye xi jercu catsinchacun ri Nina. ―‍Cuatjin xu cachja ángel.
LUK 1:29 Xi cahndë xu María cjua xi cachja ángel jan ne, catsacjun me camá, sehe catsingataha cacun xu me mé xcusun nina xi casua ángel me.
LUK 1:30 Sehe ngajan xi ángel ne, cuitjin xu cachja cojo rë me: ―‍Xicarcuiin María ta Nina ne, jemu tjin rë me cjuandaja cojo ri.
LUK 1:31 Quihndë ne, sacú ri ngu quihndi, hane hacuaha cuechú nixtin xi tsin ri quihndi vëhë. Quihndi vëhë ne, tehe ñihi rë Jesús.
LUK 1:32 Hacuaha jemu jyë hnga cuma cojo cjuatacun rë, hacuaha Quihndi rë Nina xi Matitjun cjuahañihi. Hacuaha Nina sahmi me xi cuitexa quihndi vëhë sacuatjin cavitexa xutachanga rë, me xi hmí rë David.
LUK 1:33 Hane vëhë cuitexa rë xuta tjë rë Israel, hane gubiernu rë ne, tsajin nu tsajin nixtin cuijnetaha. ―‍Cuatjin xu cachja ángel.
LUK 1:34 Sehe ngajan xi María ne, cavinenguise xu me ángel cuitjin: ―‍¿Hacutjin cuma xcusun vi? ta ngahan ne, cjëë sacú xihin naha. ―‍Cuatjin xu cachja me.
LUK 1:35 Hane xi cafayangui ángel ne, cuitjin xu cachja: ―‍Hasen rë Nina xi Matitjun ne, cuinduva cuaxtë ri sacuaha ngu tjahnguen. Vëhë xi quihndi xi tsin ri ne, hatuxa tyjahi cojo cjuatacun rë, hacuaha Quihndi rë Nina Jain.
LUK 1:36 Hacuaha na Elisabet xinguin ne, handasa ha jemu changá na ne, hacuaha casacu rë na ngu quihndi. Ha quihndë jyun sá yaha na quihndi, na xi chja cjua xi hatuxa maji sacu rë quihndi.
LUK 1:37 Cuatjin camá ta, xi cuma rë Nina ne, tsajin camahani mé xi cumaji cuma. ―‍Cuatjin xu cachja ángel.
LUK 1:38 Ngajan xi María ne, cuitjin xu cafayangui me: ―‍Ngahan ne, sacuaha ngu hndixahan rë Nina ngahan. Catisahmi Nina cojo ná sacuatjin cjua xi canújun. ―‍Cuatjin xu cachja me. Ngaxtun vëhë ne, sehe cafe ángel.
LUK 1:39 Nixtin hya ne, cavetju xu María, ngu quixi ni quiji me ngu nandya ngajan nangui ndetjún tsëhë distritu Judea.
LUK 1:40 Hane xi cafehe me ngajan ne, cavisehen xu me ndava Zacarías, sehe cachja me nina cojo Elisabet.
LUK 1:41 Hane xi cahndë xu Elisabet xi cachja María nina ne, cafiniya xu quihndi xi jiya cahntsua Elisabet. Ngajan xi Elisabet ne, catsë rë xahasen rë me cojo Hasen rë Nina.
LUK 1:42 Hane sehe jercu hñu xu cachja me cjua vihi cojo María: ―‍Ngajñi rë yëjë ni yachjin ne, ngaye xi jercu catsinchacun ri Nina, hacuaha catsinchacun me quihndi xi tsin ri.
LUK 1:43 ¡Mé má ngahan xi tu ngaye xi naa rë nai naha ngaye, ndove tichusihinye ná!
LUK 1:44 Xi tu cahndë xi canoje nina cojo ná ne, hora vëhë cafiniya quihndi xi jiya cahntsuá xi ndama rë.
LUK 1:45 Jemu ndaja tsiji xi macjain ri xi yëjë ni cjua xi cachja Nina cojo ri ne, cuetjucaa jain. ―‍Cuatjin xu cachja Elisabet.
LUK 1:46 Sehe ngajan xi María ne, cuitjin xu cachja me: Ngahan ne, jercu sahme jyë sahme hnga Nina;
LUK 1:47 hacuaha jercu ndama ná tsëhë Nina, me xi vaxëtje ná.
LUK 1:48 Casahmicuenda Nina ngahan, ngahan xi sacuaha ngu hndixahan rë me ngahan ta, quihndë cojo nixtin xi cjui sa ne, cuichja yëjë xuta xi siu cojo xuta xi sehe tsin sa xi jemu ndaja tsahan;
LUK 1:49 tsëhë xi Nina xi jemu jyë hnga me cojo ngahñu rë me ne, jemu vengui chji rë xcusun xi casahmi me cojo ná. ¡Jemu tyjahi me cojo cjuatacun rë me!
LUK 1:50 Nina ne, hatuxa jemu tjin rë me cjuayumatacun cojo yëjë xuta xi faharcun rë me ha tucutjin cjín xuta tisetsin me jima ngundiya jima ngundiya.
LUK 1:51 Nina ne, sahmi me hacutjin xi meje sahmi me cojo ngahñu jyë xi tjin rë me: tsinguitsojo me yëjë xuta xi jemu tjin rë cjuaxta cahntsua xahasen rë;
LUK 1:52 tsinguijne me xuta xi matitjun tsëhë xcun xá rë, hacuaha sahmi yehe sahmi hnga me xuta yuma.
LUK 1:53 Xuta xi machaja rë me ne, jemu yehe cjuandaja sua Nina me, peru xuta nchina ne, suvá tsja tiya me tsicuya Nina me cjue me.
LUK 1:54 Nina ne, cuisecoo naja me ngayejen ni xuta tjë rë Israel, ngayaan xi tsëhë me ngayaan, hacuaha tsinguitsjen me xi cumayuma rë me ngayaan.
LUK 1:55 Xi cuatjin ne, cuetjucaa jain sacuatjin xi ha cachja me cojo xutachanga naja Abraham, cojo yëjë sa tjë rë me. Cuatjin xu cachja María.
LUK 1:56 Hya xi camá ne, María jan ne, cavéjña xu me jyan sá ndava Elisabet, sehe cavuya cafe me nangui rë me hiscan tjin ndava me.
LUK 1:57 Quihndë ne, cavechú nixtin xi tsin rë Elisabet quihndi, hane catsin rë me ngu quihndi xihin.
LUK 1:58 Xi camachaya rë yëjë xuta xi siu tahndee ndava me cojo yëjë xicjin Elisabet xi jercu camayuma rë Nina Elisabet ne, jercu ndaja camá rë me xingu xingu me cojo Elisabet.
LUK 1:59 Hya xi camá xu ne, xi cavetjucaa quihndi jan jyin nixtin ne, cafehe nga me xi siu tahndee ndava me jan cojo xicjin Elisabet xi cuma suhi tsëhë xi xtí chuxin rë quihndi. Hane meje suañihi me quihndi jan Zacarías, tsëhë xi cuatjin hmí rë nahmi rë.
LUK 1:60 Ngajan xi cachja xu naa rë quihndi jan cuitjin: ―‍Hajín ta quihndi vi ne, Juan cjuahañihi. ―‍Cuatjin xu cachja me.
LUK 1:61 Hane xuta jan ne, cuitjin xu cachja me: ―‍Peru ngayun ne, tsajin hisca ngu xingun xi cuatjin hmí rë. ―‍Cuatjin xu cachja xuta jan.
LUK 1:62 Ngajan xi xuta xi cuacun jan ne, tu casahmi tsjá xu ni me cojo nahmi rë quihndi xi cavinenguise me hacutjin meje rë nahmi rë quihndi xi cjuahañihi quihndi jan.
LUK 1:63 Ngajan xi Zacarías ne, cafehya xu me ngu pizarra, sehe ngajan catsihindu me cjua vihi: “Juan cjuahañihi.” Cuatjin xu catsihindu me. Hya xi camá ne, yëjë ni me ne, jemu quijircun xu rë me.
LUK 1:64 Hane hora vëhë ni ne, camá xu cachja Zacarías, hane jemu ndaja cavaxëndaja me Nina.
LUK 1:65 Ngajan xi xuta xi siu tahndee ndava me jan ne, jemu catsacjun xu me camá, hane jingujyë ni ladu nangui ndetjún tsëhë distritu Judea hiscan xi siu xuta ne, jercu cavisiajmi xu me tsëhë cjuacjintacun vëhë.
LUK 1:66 Hane yëjë xuta xi camachaya rë cjuacjintacun vëhë ne, jercu cjín catsingataha cacun me, hisca cachja xu me cuitjin: ―‍¡Cuechú nixtin xi quihndi vi ne, cuma ngu xihin xi jyë hnga cojo cjuatacun rë! Cuatjin xu cachja xuta xi cuacun jan ta, tsëhë xi quihndi vëhë ne, Nina yahangui jain me.
LUK 1:67 Zacarías, nahmi rë quihndi jan ne, ña catsë rë me cojo Hasen rë Nina, hane cachja xu me cuitjin cjua xi cafahatsja me tsëhë Nina:
LUK 1:68 ¡Tjemu ndaja Nina naja ngayaan xuta tjë rë Israel! tsëhë xi cuinduva me cjuaha naja me xi cuma yaan xuta rë me.
LUK 1:69 Nina sahmi me xi ngajñi rë tjë rë David, ngu xuta rë Nina ne, cuetjujñi ngu xihin xi cuaxëtje naja,
LUK 1:70 sacuatjin xi ha cachja profeta xi cavejña me tsëhë Nina, hya xi cachja me cojo xutachanga naja cjua rë Nina hatsëë nixtin.
LUK 1:71 Hacuaha cachja Nina xi cuaxëtje naja me tsëhë condra naja, hacuaha cuaxëtje naja me tsëhë yëjë xuta xi choho vëë naja,
LUK 1:72 hacuaha cumayuma rë me tsëhë xutachanga naja hacuaha tsinguitsjen me compromisu ximinchacun xi casahmi me cojo xutachanga naja.
LUK 1:73 Nina ne, cachja me: “Ngahan suva hvë”, hya xi casahmi me compromisu jan cojo xutachanga naja Abraham.
LUK 1:74 Hya xi casahmi me compromisu vëhë ne, cachja me xi cuëhëndaya naja me tsëhë condra naja, cojo sa xi ngayaan ne, hacuiin cojo chircun chjahanrcun me ta
LUK 1:75 chjahanrcun me cojo ngu cjuatacun tyjahi, xi tsajin jyë́ naja xcun me hacutjin nixtin xi nechan xcun cjuahñu naja.
LUK 1:76 Ngaye tsan ne, hacuaha cuma ngaye ngu profeta tsëhë Nina xi Matitjun ta, tsëhë xi ngaye cuihintitjin, choxehe ndiya tsëhë Nina,
LUK 1:77 hacuaha tehe cumachaya rë xuta rë Nina xi cuaxëtje Nina me, cuma cuinújan ne, tsinchataha me tsëhë jyë́ rë
LUK 1:78 ngatsë rë ta tsëhë xi Nina ne, jemu tjin rë me cjuayumatacun cojo naja. Hacuaha ngatsë rë cjuayumatacun vëhë ne, Nina tsingatju me tsëhë ngahnga ngu xi sacuaha tsuhi,
LUK 1:79 cojo sa xi sua hasen rë ngajñi naja xi nechan cojo ngu cjuacjintacun jyë xi hisca sacuinyiin naja hacutjin naxentjeen yojo naja, ngayaan xi tjemu tsavi nechantahan tsëhë cjuaveya, hacuaha cojo sa xi cjuecojo naja ndiya tsëhë cjuajeya. Cuatjin cachja xu Zacarías.
LUK 1:80 Hya xi camá ne, quihndi jan ne, camajyë, hacuaha cavejñahñu xu cjuatacun rë. Hane xi camá ngu xihin jyë ne, quiji cavéjña xu ngajan ngu xín camahani tsëhë nandya, hisca hya xi cavechú nixtin xi cavetsihin cachja cjua rë Nina cojo xuta tjë rë Israel.
LUK 2:1 Cuitjin xu camá nga ngunixtin hya xi Herodes vitexa me xuta tjë rë Israel. Me xi matitjun camahani xi hmí rë César Augusto ne, cavitexa xu me xi yëjë ni xuta xi siu ngahma gubiernu rë me ne, cjue me cuiyujutahaxujun me xi cuechjitje me.
LUK 2:2 Hacuaha hya xi cuatjin tjuntjun caviyujutaha xujun xuta ne, hya vitexa xuta Cirene ngajan distritu Siria.
LUK 2:3 Ngajan xi yëjë ni xuta ne, quiji xu me caviyujutaha xujun me, jima ngu me hiscan nangui rë xutachanga rë me.
LUK 2:4 Cuatjin camá xi José ne, cavetju xu me tsëhë nandya Nasaret, distritu Galilea, quiji me distritu Judea, nangui rë xutachanga rë me David, hiscan xi hmí rë Belén, tsëhë xi José ne, tjë rë David xu má me.
LUK 2:5 Quiji casetahaxujun tangun me cojo María, me xi tacunvasen cjuavixan rë me cojo. Hane María ne, jiya xu quihndi rë me hya xi quiji me.
LUK 2:6 Hya xi camá ne, jinguyëjë rë xi siutahá xu me ngajan ne, cavechú nixtin xi tsin xu quihndi rë me,
LUK 2:7 hane catsin rë me ngu quihndi xihin, xi quihndi tjun rë me. Hane xi cavatju catsin quihndi jan ne, sehe cafaha me cavaxtë me ngu tsjian, sehe cafaña xu me quihndi jan cahntsua hiscan jineyá chu ta, tsëhë xi casacuiin xu cahndë́ cahntsua ndihya xi cuiyuju me, tsëhë xi jemu quitsë camahani xuta.
LUK 2:8 Ha taha ladu vëhë ni ne, siutahá ngujo cha nguixun ngajan nguijña, xi sahmi cuidadu xu cha chu tsánga rë cha.
LUK 2:9 Hya xi camá ne, ha tu ñahñu camatsejen xu ngu ángel tsëhë Nina hiscan xi siutahá cha, hane hora vëhë ni ne, hasen ndajyihi rë Nina ne, jercu casahmi hasen xu rë jingujyë ni hiscan xi siutahá cha, hane jemu catsacjun camahani cha camá.
LUK 2:10 Ngajan xi cachja xu ángel cojo cha cuitjin: ―‍Xicarcuun ta, nguehe nduva tisuá cumachaya nuju ngu cjuandajyihi xi hisca yëjë xuta tjë rë Israel jercu ndaja cuma rë me
LUK 2:11 ta nguehe Belén, nangui rë xutachanga nuju David ne, quihndë catsin ngu quihndi xi cuaxëtje nuju, quihndi xi Nina catsingatju rë xi cumatitjun tsujun.
LUK 2:12 Hane cuitjin sacú nuju cjuaquixi tsëhë cjua xi cachjá cojo nuju vë: xi cjuhun jan ne, cuechun hiscan xi chun ngu quihndi tixtë rë tsjian, jiña cahntsua hiscan jineyá chu. ―‍Cuatjin xu cachja ángel.
LUK 2:13 Hane ha tu ñahñu camatsejen sa jercu cjín camahani ángel xi nduva xu ngahnga, cafehe hiscan xi secun ángel xi cafehe titjún, tivaxëndaja rë Nina cojo cjua vihi:
LUK 2:14 ¡Jemu jyë hnga Nina cojo Hasen rë me ngajan ngahnga! ¡Hane nguehe nangui ne, cuisehen cjuajeya rë Nina cahntsua xahasen rë xuta xi chuya rë Nina tsëhë! Cuatjin xu cachja ángel cjín jan.
LUK 2:15 Hya xi camá ne, hya xi cavuya quiji nga ángel jan ngahnga ne, cha xi sahmi cuidadu chu tsánga rë jan ne, cuitjin cachja cha cojo xicjin cha: ―‍¡Cjuanguen ni! Cjuanguen hisca nandya, cuanguen chutsejen xcusun xi camá vi, sacuatjin casua Nina camachaya naja. ―‍Cuatjin xu cachja cha cojo xicjin cha.
LUK 2:16 Hya xi camá ne, ngusun xu ni cafe cha, hane xi cafehe cha nandya ne, casacuse rë cha hiscan tacun María cojo José, cojo quihndi jan, jiña cahntsua hiscan jineyá chu.
LUK 2:17 Hya xi cavëë xu cha quihndi jan ne, sehe cavetsihin casuacuenda cha yëjë cjua xi cachja ángel cojo rë cha tsëhë quihndi vëhë.
LUK 2:18 Hane xi cahndë xuta cjua xi cachja cha xi cuacun jan cojo rë me ne, jemu quijircun xu rë me.
LUK 2:19 Peru María ne, cavetjo cavetjo ni me yëjë ni cjua vëhë cahntsua xahasen rë me, hacuaha jercu cjín xu catsingataha cacun me.
LUK 2:20 Hane xi cavuya quiji nga cha xi sahmi cuidadu chu rë jan ngajan nguijña ne, taha tisahmi jyë tisahmi hnga xu cha Nina hacuaha taha tivaxëndaja cha me tsëhë yëjë cjua xi cahndë cha cojo xcusun xi cavëë cha, sacuatjin cachja ángel cojo rë cha.
LUK 2:21 Xi cavechú xu jyin nixtin quihndi ne, hacuaha hatuxa hya cavechú nixtin xi xtí chuxin rë, hane cuatjin camá cojo quihndi. Hacuaha Jesús cafahañihi xu quihndi, ñihi xi ha cachja ángel hisca chaja sa xi seyahma quihndi cahntsua naa rë.
LUK 2:22 Hya xi camá ne, xi cavechú xu nixtin xi cjue naa rë quihndi yungun xi matitjun cojo quihndi xi cuma tyjahi me xcun Nina tutjin chja ley rë Moisés ne, quiji José cojo María Jerusalén, quiji cani me ngu cjuatjo ta, tsëhë xi chja ley rë Nina ta meje rë xi cjue jo chu tucjin, o sá xi jo chu paloma chihndë. Hacuaha quijicojo xu me quihndi jan Jerusalén xi tsingacun me quihndi jan cojo Nina. Quitahá xujun xcun ley rë Nina xi yëjë ni quihndi tjun xi xihin ne, hatuxa tsëhë Nina cuma.
LUK 2:25 Cavéjña xu ngu xihin xi hmí rë Simeón ngajan Jerusalén. Xihin vëhë ne, tyjahi xu me cojo cjuatacun rë me ngajan xcun Nina, hacuaha jemu faharcun me Nina. Hacuaha jemu meje xu rë me xi cjuehe xuta xi yaha cjuetacun jan xi cuma rë xuta tjë rë Israel. Hacuaha Hasen rë Nina ne, jiya cahntsua xahasen rë Simeón.
LUK 2:26 Hane Hasen rë Nina jan ne, casua xu camachaya rë me xi jinguyëjë rë xi cjëë scuëë me xuta xi tsingatju Nina jan ne, hatuxa cueyaain xu me.
LUK 2:27 Hane quiji me yungun xi matitjun, tsëhë xi cuatjin cachja Hasen rë Nina cojo rë me. Hacuaha xutacha rë quihndi xi hmí rë Jesús jan ne, quijicojo xu me quihndi jan yungun vëhë, xi sahmichihin me sacuaha xcusun xi vitexa ley rë Moisés hacutjin cuatju quihndi cuma.
LUK 2:28 Hya xi camá ne, cafaha xu Simeón quihndi jan cavataha me, sehe hacuaha cavaxëndaja me Nina cojo cjua vihi:
LUK 2:29 Ngayun Nina naha, ngayun ne, ha cuma tuhun cahndë́ xi ngahan hndixahan nuju ne, cueya cojo cjuandaja cojo cjuajeya sacuatjin xi ha canújun.
LUK 2:30 Cuma cueya ta, tsëhë xi quihndë ne, cahvë suva xuta xi caningatjun xi cuaxëtje niji,
LUK 2:31 me xi caningatjun xcun cojo xcun yëjë ni xuta,
LUK 2:32 me xi cuinduva sacuaha ngu ndihi xi sua me cjuahasen xi cuma rë xutaxín, hacuaha cuinduva me xi sahmi yehe sahmi hnga niji me, ngayin xuta nuju, xuta tjë rë Israel. Cuatjin xu cachja Simeón.
LUK 2:33 Hane xutacha rë quihndi jan ne, jemu quijircun xu rë me tsëhë xi cuatjin cachja Simeón tsëhë quihndi jan.
LUK 2:34 Hane Simeón ne, catsinchacun me me xi cuacun jan, sehe cachja xu me cojo María naa rë quihndi jan cuitjin: ―‍Quihndi vihi ne, hacuaha sahmi xi jemu cjín xuta tjë rë Israel chajá me, hacuaha sahmi xi jemu cjín xuta tjë rë Israel cuetjutje me. Hacuaha quihndi vihi ne, sua cumachaya rë xuta mé xi meje rë Nina, hacuaha jemu choho cuichja xuta tsëhë quihndi.
LUK 2:35 Cuatjin cuma cojo sa xi ngajan sesunhngatsejen yëjë hacutjin xi tsingataha cacun jemu cjín xuta cojo cjuatacun rë me. Hacuaha ngayun ne, jercu cuma rë xahasen nuju, sacuaha xi quicha casehen rë xahasen nuju. ―‍Cuatjin xu cachja Simeón.
LUK 2:36 Hacuaha tacun xu ngu chjuun xi hmí rë Ana ngajan yungun, quihndi rë Fanuel, tjë rë xutachanga xi hmí rë Aser. Chjuun jan ne, profeta xu má me. Hacuaha jercu changá xu me. Xi cavixan me ne, cavéjña me cojo xihin rë me yatu nu.
LUK 2:37 Ngaxtun vëhë ne, cavéjña cahan me. Hane xi casacu xicjin xu me cojo xutacha rë Jesús ne, ñujuchan ñuju nu xu tjin rë me. Hacuaha jemu quiji camaha xu ni me yungun xi matitjun. Jemu cjín ndiya ne, cajinii xu me niñu xi faharcun me Nina. Hacuaha jercu sahmi xu me oración rë me. Nixtin nixten faharcun me Nina.
LUK 2:38 Hacuaha ha hora xi siu xu ni xutacha rë Jesús ngajan yungun jan ne, cafehe Ana. Hane xi cavëë me quihndi Jesús jan ne, casua xu me nacuechji rë Nina. Ngaxtun vëhë ne, sehe cavetsihin cachja xu me tsëhë Jesús cojo yëjë xuta xi jemu meje rë xi cuechú nixtin xi cuaxëtje Nina nandya Jerusalén.
LUK 2:39 Xutacha rë Jesús ne, hya xi ha cafë casahmichihin xu me yëjë xcusun xi vitexa ley rë Nina ne, cavuya cafe me nangui rë me, hiscan xi hmí Nasaret, distritu Galilea.
LUK 2:40 Quihndi jan ne, camajyë hacuaha casacuhñu rë, hacuaha jercu cavechútáha cjuatacun rë, hacuaha jercu cavisehen xu cjuandaja rë Nina cahntsua xahasen rë.
LUK 2:41 Chuva nu chuva nu ne, xutacha rë Jesús ne, fi xu me suhi tsëhë Pascua ngajan Jerusalén.
LUK 2:42 Hane hya xi Jesús cavechú me tejó nu ne, sacuaha xcusun rë xuta cojo suhi vëhë ne, quiji xu Jesús cojo xutacha rë me ngajan Jerusalén.
LUK 2:43 Xi cavatju suhi jan ne, xutacha rë Jesús ne, cavetju xu me tsëhë Jerusalén xi cuya cjue me nangui rë me. Peru Jesús ne, hisca camachayiin rë xutacha rë me ne, casetaha suvá xu me Jerusalén.
LUK 2:44 Xi má rë xutacha rë me ne, jiyajñi me ngajñi rë xutacjín tife me. Hane xi cafë ngu nixtin tife xutacha rë me ndiya ne, cavetsihin cavanguise xu me Jesús jan ngajñi rë xuta rë me cojo ngajñi rë yëjë xuta xi vinga rë me.
LUK 2:45 Hane xi casacuiin rë me Jesús jan ngajñi rë xutacjín jan ne, cavuya quiji xu me hisca Jerusalén, xi tivanguise me me.
LUK 2:46 Hya xi camá ne, xi majyan nixtin jan ne, sehe casacu xu rë me Jesús ngajan yungun xi matitjun, tacun me ngajñi rë maestru xi vicuya cjuachacun, tivisiñuju me cjua rë maestru hacuaha tivinenguise xu rë me jingu sa cjuachacun.
LUK 2:47 Hane yëjë ni xuta xi tivisiñuju cjua rë Jesús jan ne, jercu fircun xu rë me, tsëhë xi cuarcu quicun cacun me hacuaha tsëhë xi jercu ndaja titsicuya me cjua tsëhë maestru jan.
LUK 2:48 Hane hya xi cavëë xu xutacha rë Jesús xi ngajan tacun me ne, tu quiji tsëhë me, sehe cachja naa rë me cuitjin: ―‍¿Mé má cuatjin canihñi cojo niji, tsan? Chutsijin ta cuajyihi ngahan cojo nahmi riji ne, cojo cjín cjuacjintacun niji ne, catujyihinyin cavinchinsin ri. ―‍Cuatjin xu cachja me.
LUK 2:49 Ngajan xi Jesús ne, cuitjin xu cachja me cojo xutacha rë me: ―‍¿Mé má cuatjin tu nguehe tu ngajan cavinchunsun ná ni? ¿Há hyúun ta hatuxa meje rë xi cuitejña ndava nahmi naha? ―‍Cuatjin xu cachja Jesús.
LUK 2:50 Peru xutacha rë Jesús ne, cajnii xu rcu me cjua xi cachja Jesús cojo rë me.
LUK 2:51 Hya xi camá ne, cavuya cafe xu Jesús cojo xutacha rë me nangui rë me ngajan Nasaret. Hacuaha cahndë me tsëhë xutacha rë me hacutjin xi quiji sa nixtin rë me. Hane naa rë Jesús ne, cavetjo cavetjo xu ni me yëjë ni cjua vëhë cahntsua xahasen rë me.
LUK 2:52 Sacuaha Jesús ne, jima jyë xu me cojo yojo rë me, hacuaha jima jyë jima hnga me cojo cjuatacun rë me. Hacuaha tichuya sa xu rë Nina tsëhë me, hacuaha tichuya sa rë xuta tsëhë me.
LUK 3:1 Cuitjin xu camá hya xi cafë tyjuhun nu jiya me xi matitjun camaha ni xi hmí rë Tiberio César xcun xá rë me xi vitexa me jingu ni ladu. Poncio Pilatu ne, me vëhë vitexa xu me distritu Judea, hane Herodes ne, me vëhë xu vitexa me distritu Galilea, hane hntsëjñu me xi hmí rë Felipe ne, me vëhë xu vitexa me distritu Iturea cojo distritu Traconite, hacuaha Lisanias ne, me vëhë xu vitexa me distritu Abilinia.
LUK 3:2 Hane sacuaha nahmi xi matitjun xu ne, Anás cojo Caifás má me. Hane sacuaha nixtin vëhë ne, Juan quihndi rë Zacarías ne, hya xi quitahá me ngajan ngu xín tsëhë nandya ne, cafahatsja me cjua xi catsingatju xu Nina.
LUK 3:3 Hane quiji catsujyihiya me yëjë ni ladu tiña tsëhë ndajyë Jordán, tichja me xi meje rë xi tsindeya xu xuta cjuatacun rë me hacuaha xtenda me, cojo sa xi tsinchataha Nina xuta tsëhë jyë́ rë me.
LUK 3:4 Xi cuatjin xu casahmi Juan ne, casahmichihin me sacuatjin camahindu hatsëë nixtin xcun xujun xi chja cjua rë profeta Isaías xi chja cuitjin: Cuitjin jercu hñu cuichja ngu xuta ngajan hiscan jemu xín tsëhë nandya: “Tuhunchjinu ndiya tsëhë Nai naja; ninguixun ndiya tsëhë me.
LUK 3:5 Yëjë ni hiscan nangui cahntsua ne, tsë́ya rë, yëjë ni ndetjún cojo yëjë ni naxi ne, cuijnenangui, yëjë ni ndiya lahñi ne, cuma quixi, yëjë ni ndiya xi hacuiin chihin ne, cuma chihin.
LUK 3:6 Hane yëjë ni xuta ne, scuëë me hacutjin vaxëtje Nina xuta rë me.” Cuatjin xu catsihindu Isaías cjua xi jercu hñu cuichja xuta jan.
LUK 3:7 Ngajan xi hya xi quiji xutacjín xi xtenda me ne, cuitjin xu cachja Juan cojo xuta: ―‍¡Ngayujun ni ngayun quihndi rë chu tsehen matsejen ne!, ¿yo cavinchangui nuju xi nihñu ngahñu xi cuetjuntjun tsëhë castigu xi hatuxa tsingatju Nina?
LUK 3:8 Sá xi meje jain cuetjuntjun matsejen ne, nihñu suvá cjuandaja sacuatjin sahmi xuta xi catsindeya jain me cjuatacun rë me. Xicanujuun cahntsua xahasen nuju cjua vihi: “Ngayaan ne, tsajin mé cuma naja ta, tsëhë xi tjë rë Abraham ngayaan.” Xicanujuun cuatjin matsejen ta, nguehe cuichjá cojo nuju ta Nina ne, hisca ndyojo xi cuicun vi ne, cuma sahmi me tjë rë Abraham.
LUK 3:9 Chutsujun ta ngayun matsejen ne, tangun ngayun cojo yatjë xi ha quitaháchjine quicharcu tyjama rë xi cuetsihin xtí. Yëjë ni yatjë xi suaain tu xi ndaja matsejen ne, xtí rë, sehe cjue cueti. ―‍Cuatjin xu cachja Juan.
LUK 3:10 Ngajan xi xutacjín jan ne, cuitjin xu cavinenguise rë me Juan: ―‍¿Hacutjin ndatjin nihñi xi cuma nihñi cjuandaja xi nújun vë ni? ―‍Cuatjin xu cavinenguise me.
LUK 3:11 Hane xi cafayangui Juan ne, cuitjin xu cachja me: ―‍Jarë ngayun xi tjin nuju jo tsjian nuju ne, tuhun rë ngu yo xi tsajin rë. Jarë ngayun xi tjin xi chinu ne, ha chuva vëhë ni tuhun hitsë catjinë me xi tsajin xi sinë. ―‍Cuatjin xu cachja me.
LUK 3:12 Hacuaha canduva sa xu ngujo cha xi faha tujúnsa xi meje rë cha xi xtenda cha, hane cuitjin xu cavinenguise cha: ―‍Tatá, ¿mé xi ndatjin nihñi ngayin? ―‍Cuatjin xu cavinenguise cha.
LUK 3:13 Sehe ngajan xi Juan ne, cuitjin xu cachja me cojo cha: ―‍Hacuiin cjín sa tujún chjahyun rë xuta. Chjahyun rë me hacutjin xi casatëxa ni nuju. ―‍Cuatjin xu cachja me.
LUK 3:14 Hacuaha cavinenguise nga ngujo sindadu me cuitjin: ―‍Hane ngayin ne, ¿mé xi ndatjin nihñi? ―‍Cuatjin xu cavinenguise cha. Sehe cachja xu me cojo cha cuitjin: ―‍Xicanaxuun rë xuta tujún cojo cjuachan, o sá xi cojo ngu cjuandacha. Catamangutacún ni cojo tujún xi ha ma chji nuju. ―‍Cuatjin xu cachja me.
LUK 3:15 Xuta ne, jercu siuya camahani me mé xi cuma, hacuaha vinenguise xu me cahntsua xahasen rë me cuitjin: “Hyaan sa xi Juan rë vi Xihin xi Tsingatju Nina xi cuaxëtje naja me.” Cuatjin xu cavinenguise me.
LUK 3:16 Sehe ngajan xi Juan ne, cuitjin xu cachja me cojo yëjë xuta jan: ―‍Ngahan matsejen ne, cojo nandá ni tiviténda nuju, peru sehe cuinduva me xi cueyá me Hasen rë Nina cahntsua xahasen nuju, hacuaha cuaha me sacuaha ngu ndihi xi tsityjahi rë cjuatacun nuju. Me vëhë ne, hitsë sa jyë hnga me cojo cjuatacun rë xi cumá ná ngahan, hisca cumaji tsinguisehercu sahme tyjahi chuxinxtë rë me.
LUK 3:17 Me xi tsingatju Nina jan matsejen ne, sacuaha xi ha yahatsja me quicha xi tsinguitjen rë xtë rë trigu cojo sa xi cuma tyjahi ndaja trigu xi casechun rë tsëhë me, hacuaha cjuaya me trigu tyjahi xi cuinchandaja me, hane xtë rë jan matsejen ne, cuaca me xcun ngu ndihi xi tsajin nixtin hvo. ―‍Cuatjin xu cachja Juan.
LUK 3:18 Hacuaha hacuiin suvá xu ni cjua vëhë cachja Juan cojo xuta hya xi cachja me cjuandajyihi rë Nina ta cachja sa xu me jemu cjín cjua.
LUK 3:19 Herodes, me xi cavitexa ngajan distritu Galilea ne, hacuaha cachjataha xu Juan me ngatsë rë xi cafaha Herodes na Herodía, chjuun rë hntsëjñu me, xi cumá chjuun rë me na. Hacuaha cachjataha sa xu Juan me tsëhë jingu sa xcusun tsehen xi casahmi me.
LUK 3:20 Peru xcun yëjë cjuatsehen vëhë ne, cavetahacoo sa Herodes xcusun vihi: caveya xu me Juan ndavaya.
LUK 3:21 Hane hya xi chaja sa xu cjue Juan ndavaya ne, ngu nixtin xi caxtenda yëjë ni xuta ne, hacuaha cojo xu Jesús caxtenda me. Hane xi cavatju caxtenda me ne, hora xi tisahmi xu me oración rë me ne, ngahnga ne, catuxaha,
LUK 3:22 hane Hasen rë Nina ne, canduvajnetsejen casesun rcu me. Sacuajyihi ngu paloma jyihi. Hacuaha hora vëhë ni ne, canuhya xu rë ngu cjua ngajan ngahnga xi cachja xu cuitjin: “Ngaye xi quihndi naha ngaye xi jemu hmú cácun ri. Jemu ndama ná ngatsë riji.” Cuatjin xu cachja.
LUK 3:23 Quihndë ne, Jesús ne, tjin xu rë me sacuaha cantë nu hya xi cavetsihin me cojo xá rë me. Hacuaha xi má xu rë xuta ne, quihndi rë José má me. Hane José ne, quihndi rë Elí.
LUK 3:24 Elí ne, quihndi rë Matat. Matat ne, quihndi rë Leví. Leví ne, quihndi rë Melqui. Melqui ne, quihndi rë Jana. Jana ne, quihndi rë José.
LUK 3:25 José ne, quihndi rë Matatías. Matatías ne, quihndi rë Amós. Amós ne, quihndi rë Nahum. Nahum ne, quihndi rë Esli. Esli ne, quihndi rë Nagai.
LUK 3:26 Nagai ne, quihndi rë Maat. Maat ne, quihndi rë Matatías. Matatías ne, quihndi rë Semei. Semei ne, quihndi rë José. José ne, quihndi rë Judá.
LUK 3:27 Judá ne, quihndi rë Joana. Joana ne, quihndi rë Resa. Resa ne, quihndi rë Zorobabel. Zorobabel ne, quihndi rë Salatiel. Salatiel ne, quihndi rë Neri.
LUK 3:28 Neri ne, quihndi rë Melqui. Melqui ne, quihndi rë Adi. Adi ne, quihndi rë Cosam. Cosam ne, quihndi rë Elmodam. Elmodam ne, quihndi rë Er.
LUK 3:29 Er ne, quihndi rë Jesús. Jesús ne, quihndi rë Eliezer. Eliezer ne, quihndi rë Jorim. Jorim ne, quihndi rë Matat.
LUK 3:30 Matat ne, quihndi rë Leví. Leví ne, quihndi rë Simeón. Simeón ne, quihndi rë Judá. Judá ne, quihndi rë José. José ne, quihndi rë Jonán. Jonán ne, quihndi rë Eliaquim.
LUK 3:31 Eliaquim ne, quihndi rë Melea. Melea ne, quihndi rë Mainán. Mainán ne, quihndi rë Matata. Matata ne, quihndi rë Natán.
LUK 3:32 Natán ne, quihndi rë David. David ne, quihndi rë Isaí. Isaí ne, quihndi rë Obed. Obed ne, quihndi rë Booz. Booz ne, quihndi rë Salmón. Salmón ne, quihndi rë Naasón.
LUK 3:33 Naasón ne, quihndi rë Aminadab. Aminadab ne, quihndi rë Aram. Aram ne, quihndi rë Esrom. Esrom ne, quihndi rë Fares. Fares ne, quihndi rë Judá.
LUK 3:34 Judá ne, quihndi rë Jacob. Jacob ne, quihndi rë Isaac. Isaac ne, quihndi rë Abraham. Abraham ne, quihndi rë Taré. Taré ne, quihndi rë Nacor.
LUK 3:35 Nacor ne, quihndi rë Serug. Serug ne, quihndi rë Ragau. Ragau ne, quihndi rë Peleg. Peleg ne, quihndi rë Heber. Heber ne, quihndi rë Sala.
LUK 3:36 Sala ne, quihndi rë Cainán. Cainán ne, quihndi rë Arfaxad. Arfaxad ne, quihndi rë Sem. Sem ne, quihndi rë Noé. Noé ne, quihndi rë Lamec.
LUK 3:37 Lamec ne, quihndi rë Matusalén. Matusalén ne, quihndi rë Enoc. Enoc ne, quihndi rë Jared. Jared ne, quihndi rë Mahalaleel. Mahalaleel ne, quihndi rë Cainán.
LUK 3:38 Cainán ne, quihndi rë Enós. Enós ne, quihndi rë Set. Set ne, quihndi rë Adán. Adán ne, me vëhë xi Nina casahmi rë me.
LUK 4:1 Hya xi camá ne, hya xi catsë rë Jesús cojo Hasen rë Nina hya xi caxtenda me ne, cavuya xu me tsëhë ndajyë Jordán xi cjue me ndava me, peru Hasen rë Nina ne, quiji nguehe quiji ngajan xu cojo rë me ngajan ngu xín tsëhë nandya
LUK 4:2 cahntsua yachan nixtin. Hacuaha yasen ni tifahachuva xitsehen xi matitjun me. Hacuaha Jesús ne, tsajin camaha xu ni mé xi cajinë me cahntsua nixtin xi cuacun vëhë. Hane xi cavatju nixtin xi cuacun vë ne, jercu camavojo xu rë me.
LUK 4:3 Sehe ngajan xi xitsehen jan ne, cuitjin xu cachja cojo Jesús: ―‍Sá xi Quihndi jain rë Nina ngaye ne, tinoje cojo ndyojo vihi ne, catama niñu. ―‍Cuatjin xu cachja xitsehen.
LUK 4:4 Hane Jesús ne, cuitjin xu cafayangui me tsëhë xitsehen jan: ―‍Xcun xujun rë Nina ne, cuitjin camahindu: “Hacuiin suvá ngatsë rë niñu xi siu xuta cjuahñu.” ―‍Cuatjin xu cafayangui Jesús.
LUK 4:5 Hane xi quijicojo xitsehen me ngu ndetjún hnga ne, sehe nguhñusasa xu catsingacun ni xitsehen jan me jingujyë ni nandya tsëhë ngasunhndë.
LUK 4:6 Sehe cachja xu xitsehen cuitjin cojo rë me: ―‍Suá ri yëjë nandya xi cuacun vë cojo yëjë cjuanchina rë xi ngaye nihñi gubiernu. Cuma suá ri ta, tsëhë xi hatuxa ngahan cafahántsa, hane ha tu yo ni xi meje suá rë ne, suá rë.
LUK 4:7 Quihndë ne, sá xi cuindove cuiticjexcuin nguehe xi chjehercuin ná ne, cumá tsiji yëjë ni nandya vë. ―‍Cuatjin xu cachja xitsehen.
LUK 4:8 Sehe ngajan xi cafayangui xu Jesús cuitjin: ―‍Xcun xujun rë Nina ne, cuitjin camahindu: “Meje rë xi chjuhunrcun Nina naja, hacuaha suvá ni me vëhë meje rë xi nihñu hacutjin xi meje rë me.” ―‍Cuatjin xu cachja Jesús cjua vëhë.
LUK 4:9 Hya xi camá ne, xitsehen jan ne, quijicojo xu rë Jesús ngajan Jerusalén, hane quijicani rë me hisca rcu cjin yungun xi matitjun. Sehe cachja xu cojo rë me cuitjin: ―‍Sá xi Quihndi jain rë Nina ngaye ne, ningatjin yojo riji ndyá hisca nangui.
LUK 4:10 Ha hye ta tsajin mé cuma ri ta xcun xujun rë Nina ne, cuitjin chja: Nina cuitexa me ángel rë me xi sahmi ri cuidadu.
LUK 4:11 Cuahatsjá ri, cojo sa xi hisca ntsacui ne, sacuinhmaain rë cojo ngu ndyojo. Cuatjin xu cachja xitsehen cjua vëhë.
LUK 4:12 Hane Jesús ne, cuitjin xu cafayangui me tsëhë xitsehen: ―‍Xujun rë Nina ne, cuitjin chja: “Mijí rë xi chjuhunchuvun Nina naja.”
LUK 4:13 Hya xi camá ne, xi cajnetaha cafahachuva xitsehen jan Jesús ne, cavetjuxin xu tsëhë me hisca janihya cuya nga.
LUK 4:14 Ngajan xi Jesús ne, cojo ngahñu rë Hasen rë Nina ne, quijinduju sa xu me xi cjue me ndava me ngajan distritu Galilea. Hane xi cafehe xu me jan ne, jercu cachja xuta tsëhë me ngajan Galilea cojo jingujyë ni nandya xi siu tahndee rë.
LUK 4:15 Hane quiji me yungun rë jimangu nandya tsëhë Galilea, cavicuya me xuta. Hane yëjë ni xuta jan ne, casahmi jyë casahmi hnga xu me Jesús.
LUK 4:16 Cavechú ngu nixtin xi quiji xu Jesús ngajan nandya Nasaret hiscan xi camacha me. Hane sacuaha xcusun xi tjin rë me ne, nixtin xi chjahájenda rë ne, quiji xu me yungun. Sehe quiji casecunvasen me xi cuichjasun xu me xujun rë Nina.
LUK 4:17 Hya xi camá ne, casengui tsja me xujun xi hincha cjua rë Nina xi catsihindu profeta Isaías. Hane xi titsixinga xu me xujun jan ne, táha tivanguise me cahndë́ xi quitahá cjua xi meje rë me. Hane xi casacu rë me cahndë́ vëhë ne, sehe cavetsihin cachjasun xu me cjua vihi xcun xuta:
LUK 4:18 Hasen rë Nina ne, jiya cahntsua xahasen naha, vëhë xi casuaxa ná Nina xi suá cumachaya rë xuta yuma cjuandajyihi rë me: catsingatju ná me xi suá cumachaya rë xuta xi hincha ndavaya ta hatuxa cuma ndaya me, suá cumachaya rë xuta xi rcá me ta hatuxa cuya cuma tsejen nga rë me; cuëhëndaya xuta xi jemu choho sahmi jingu sa xuta cojo rë me.
LUK 4:19 Hacuaha suá cumachaya rë xuta xi cavechú nu xi jercu sahmi Nina cjuandaja cojo xuta rë me. Cuatjin chja cjua rë xujun xi cachjasun Jesús.
LUK 4:20 Hane xi cavuya catsijeyu nga Jesús xujun jan ne, sehe cavuya casua nga me me xi sahmi xá cahntsua yungun jan. Sehe cavéjña Jesús xi cuicuya rë me xuta. Hane yëjë ni xuta xi siu cahntsua yungun jan ne, jercu cavëhërcun me Jesús.
LUK 4:21 Sehe ngajan xi Jesús ne, cavetsihin cachja me cuitjin cojo xuta: ―‍Quihndë, jinguyëjë rë xi cavinuhyun cjua xi camahindu xcun xujun rë Nina xi cavutaya jan ne, ngajan cavetjucaa cjua vëhë. ―‍Cuatjin xu cachja Jesús.
LUK 4:22 Yëjë ni xuta ne, jemu ndaja xu cachja me tsëhë Jesús, hacuaha hisca quijircun rë me tsëhë xi jemu ndaja camahani cjua xi cachja Jesús. Sehe cachja xuta jan cuitjin: ―‍¡Peru cha vihi xi quihndi rë cha José jan! ―‍Cuatjin xu cachja me.
LUK 4:23 Hane Jesús ne, cuitjin xu cachja me cojo xuta jan: ―‍Ngahan matsejen ne, ha hvë ta ngayun ne, cuinújun cojo ná cjua vihi: “Doctor, nircun suvun rë yojo nuju.” Hacuaha cuinújun nga cuitjin: “Xcusun xi camachaya niji xi canihñu ngajan Capernaum matsejen ne, hacuaha nihñu xcusun vëhë nguehe xi nangui nuju.”
LUK 4:24 Cuichjá cojo nuju cjuaquixi ta hisca xi ngu profeta matsejen ne, hatuxa macjaain rë xuta nangui rë me tsëhë me.
LUK 4:25 Hacuaha ha cjuaquixi ta jemu cjín chjuun cahan xi caviyuju na nguehe Israel hya xi cavéjña profeta Elías hatsëë nixtin. Hacuaha nixtin vëhë matsejen ne, cavaain camahani tsi sacuaha jyan nu vasen, hane jercu jyë camahani jindya cavéjña jingujyë ni ladu.
LUK 4:26 Peru catsingatjiin Nina profeta Elías xi cjue cuisecoo me hisca ngu na cahan xi cuacun vë matsejen ta ngu ni na cahan xi hisca hacuiin na tjë rë Israel na catsingatju Nina profeta xi cuisecoo me na ngajan nandya Sarepta, ladu tsëhë nandya Sidón.
LUK 4:27 Hacuaha nguehe Israel matsejen ne, jemu cjín xuta xi yaha rë ngu chíhin vitaha xi setaha yojo naja caviyuju me hya xi cavéjña profeta Eliseo hatsëë nixtin. Peru hisca xi ngu me xi cuacun vë camandajin me matsejen ta ngu ni Naamán xi hisca hacuiin xuta tjë rë Israel ta xuta Siria me matsejen ne, me vëhë ni xi camandaja me. ―‍Cuatjin xu cachja Jesús.
LUK 4:28 Hane yëjë ni xuta xi siu xu cahntsua yungun jan ne, hya xi cahndë me cjua xi cachja Jesús jan ne, jemu camacjan rë me.
LUK 4:29 Hya xi camá ne, xi caxinchacun xuta jan ne, cavaxëxin xu me Jesús, quijicojo me me hisca ngajan ngu xín tsëhë nandya, ngu rcu ndetjún hnga hiscan xi cavéjña nandya rë me, xi meje tsingatjen me Jesús.
LUK 4:30 Peru Jesús ne, cavatju xu me ngajñi rë xuta jan quijixin me.
LUK 4:31 Hya xi camá ne, quiji xu Jesús Capernaum, ngu nandya tsëhë distritu Galilea. Hane nixtin xi chjahájenda rë ne, quiji xu me yungun cavicuya me xuta.
LUK 4:32 Hane yëjë xuta xi siu jan ne, jercu quijircun xu rë me tsëhë cjua xi vicuya Jesús ta, tsëhë xi cjua xi vicuya me ne, sacuaha cjua xi chja ngu xi matitjun jain.
LUK 4:33 Hacuaha cahntsua yungun jan ne, tacun xu ngu cha xi jiya xitsehen cahntsua xahasen rë cha. Hane xitsehen jan casahmi xi jercu cajindaya cha cachja cha cuitjin:
LUK 4:34 ―‍¡Ja! ¿Mé má cuatjin ninguisuhunjñu cojo niji ngayun Jesús, xuta Nasaret? ¿Há canduvun xi nicjun niji? Ngahan ne, ha hvë yo ngayun. Ngayun xi hatuxa vinechun tsëhë Nina ngayun. ―‍Cuatjin xu casahmi xitsehen xi cachja cha.
LUK 4:35 Hya xi camá ne, cuitjin xu cachja Jesús xi cavatëcja me cjua rë xitsehen xi jiya cahntsua xahasen rë cha: ―‍¡Jyuu nechin, hacuaha tetjixin tsëhë cha vë! ―‍Cuatjin xu cachja Jesús. Hya xi camá ne, catsiticja xu xitsehen jan cha ngajñi rë xuta, sehe cavetju quiji tsëhë xahasen rë cha, peru tsajin camahani mé cavanguihmu rë cha.
LUK 4:36 Hya xi camá ne, yëjë xuta jan ne, jercu quijircun rë me, hisca cachja xu me ngajñi rë me cojo xicjin me cuitjin: ―‍¿Mé nga xcusun cjua vihi xi cojo yëjë ni ngahñu vitexa rë hisca xitsehen, hacuaha vetjuxin ni? ―‍Cuatjin xu cachja xuta ngajñi rë me cojo xicjin me.
LUK 4:37 Hya xi camá ne, jingujyë ni ladu tahndee rë cahndë́ jan ne, cavitsojo xu cjua xi cachja xuta tsëhë Jesús.
LUK 4:38 Xi cavetju Jesús tsëhë yungun ne, quiji xu me ndava ngu me xi hmí rë Simón. Hane nahya rë Simón ne, jemu hmu xu rë me xi yaha rë me chíhinsuë. Hane yëjë xuta rë me ne, cafehya me cojo Jesús xi cuisecoo Jesús nahya rë Simón.
LUK 4:39 Hane xi quiji cavutsejenya xu Jesús xcun nahya rë Simón ne, cavatëcja me chíhinsuë xi má rë xuta changá vëhë, hane cavetjuxin xu chíhin jan tsëhë me. Hane hora vëhë ni ne, cavisatjenhnga nahya rë Simón cavetsihin cafahacuenda me cjuandaja xi sahmi me cojo yëjë ni me xi cafehe jan.
LUK 4:40 Hane hora xi tivetje tsuhi xu ne, yëjë ni xuta xi tjin rë me xutahmu rë tsëhë tu mé ni xcusun chíhin ne, quijicojo me xutahmu rë jan nixtin hya hiscan tacun Jesús. Hane xi cavisanetsja xu Jesús jima ngu xutahmu rë jan ne, camandaja me.
LUK 4:41 Hacuaha jemu cjín xu xuta xi siu jan cavetjuxin xitsehen xi hincha rë me. Hane xi cavetju xitsehen jan quiji ne, jercu cachja camahani cuitjin: ―‍¡Ngayun xi Quihndi jain rë Nina ngayun! ―‍Cuatjin xu cachja xitsehen jan. Peru cavatëcja xu Jesús cjua xi tichja xitsehen jan, casuaain me cahndë́ xi cuichja xitsehen ta, tsëhë xi ha vëë xu xitsehen xi me vëhë xi catsingatju Nina me.
LUK 4:42 Hane xi casahasen jan ne, cavetju xu Jesús quiji me ngajan ngu xín tsëhë nandya. Hane xutacjín jan ne, cuatjin quiji cavanguise xu me Jesús, hane xi cavechú me hiscan tacun Jesús ne, meje tsinguijnehai me Jesús cojo sa xi hacuiin cuetjuxin me tsëhë xuta jan.
LUK 4:43 Peru Jesús ne, cuitjin xu cachja me cojo xuta jan: ―‍Hacuaha sahmi ná ngujyë xi cjuë́ jingu sa cahndë́, suá cumachaya rë xuta cjuandajyihi tsëhë gubiernu xi sahmi Nina ta ngatsë rë vëhë xi catsingatju ná Nina. ―‍Cuatjin xu cachja Jesús.
LUK 4:44 Hane cuatjin xu catsujyihiya casua me camachaya rë xuta cjuandajyihi vëhë yëjë ni yungun tsëhë ladu vëhë.
LUK 5:1 Cuitjin xu camá nga ngu nixtin jan. Jercu cjín camahani xuta quijitjengui me Jesús xi cuihndë me cjua rë Nina. Na cavehnchun xu me Jesús xi secun me tjehen laguna Genesaret, xi hacuaha hmí rë laguna Galilea.
LUK 5:2 Hya xi camá ne, cavëë Jesús jo barcu ngajan tjehen rë laguna jan, hane cha xi tsëhë barcu jan ne, ha cavitujne xu cha tsëhë barcu, hane hincha vane cha nahya rë cha.
LUK 5:3 Hane Jesús ne, quiji cavisehen xu me ngu barcu xi cavëë me jan. Barcu jan ne, tsëhë Simón. Sehe cachja me cojo Simón xi cjuecojo me hitsë barcu ngajñi nandá. Hya xi camá ne, quiji cavéjña me sehe cavicuya xu me xutacjín jan tsëhë ngajan ni cahntsua barcu.
LUK 5:4 Hane xi cajnetaha cavicuya me xuta jan ne, sehe ngajan xi cachja xu me cojo Simón cuitjin: ―‍Tángunvuhun sa cojo barcu vi hiscan nungun nandá, sehe ngajan ningatjunyun nahya xi chjuhun ti. ―‍Cuatjin xu cachja me.
LUK 5:5 Sehe ngajan xi cafayangui xu Simón tsëhë Jesús cuitjin: ―‍Tatá, cuaha nixten tinihñí xá vëhë ne, ndastu mé sacu niji. Peru sá xi cuatjin nújun ne, cuichjá cojo compañeru naha ne, ningatjinyin nahya. ―‍Cuatjin cafayangui xu Simón.
LUK 5:6 Hane xi casahmi me cuatjin ne, jercu tu cjín camaha xu ni ti cafaha me, ña meje xtiya nahya rë me.
LUK 5:7 Hya xi camá ne, casahmitsja xu me cojo xicjin me xi hincha barcu xingu jan xi cjue cuisecoo xicjin me. Sehe quiji me xi cuacun jan. Hya xi camá ne, catsinguitsë me catsijo barcu cojo ti xi cafaha me jan. Hane xi jercu catsë barcu ne, ña meje xtyusehen.
LUK 5:8 Hane xi cavëë Simón Pedru xcusun xi camá jan ne, sehe quiji caticjaxcun me xcun Jesús, sehe cachja xu me cuitjin: ―‍Tatá. Tángunxun hitsë tsahan ta, ngahan ne, ngu xuta tsehen ngahan. ―‍Cuatjin xu cachja Simón Pedru.
LUK 5:9 Cuatjin cachja me ta, tsëhë xi jercu quijircun camahani rë me cojo compañeru rë me ngatsë rë ti xi jemu cjín camahani chu cafaha me.
LUK 5:10 Hacuanitjin xu ni quijircun rë yahnga compañeru rë Simón, me xi hmí rë Jacobo cojo Juan, me xi quihndi rë Zebedeo. Sehe ngajan xi Jesús ne, cuitjin xu cachja me cojo Simón: ―‍Xicarcuun ta quihndë cojo nixtin xi cjuiniji sa vi ne, ngayun cuangun nuvun xuta xi cuisehen me ladu naha ngojo rë xi nuvun chu ti. ―‍Cuatjin xu cachja me.
LUK 5:11 Hya xi camá ne, Simón cojo compañeru rë me ne, cavaxëxin xu me barcu jan tsëhë xcun nandá, caviyuju me nangui quixí. Sehe caviyuju me yëjë ni tsëhë me ne, sehe quiji me cojo Jesús.
LUK 5:12 Cuitjin camá nga xu hya xi casetaha Jesús ngu nandya jan. Cafehe xu ngu cha xi jingujyë ni yojo rë yaha rë ngu xcusun chíhin vitaha. Hane xi cavëë xu cha Jesús ne, quiji cha caticjaxcun cha xcun Jesús cafehya cha cjuandaja xi sahmi me cojo rë cha, cuitjin xu cachja cha: ―‍Tatá. Sá xi meje nuju ne, cuma chjuhunxun chíhin xi yaha ná. ―‍Cuatjin xu cachja cha.
LUK 5:13 Hane xi catsixinga xu Jesús tsja me cavetahatsja me cha ne, cachja me cuitjin: ―‍Meje ná. Catamandaja ngayun. ―‍Cuatjin xu cachja me. Hane chíhin jan ne, ngutjen xu ni cavetjuxin.
LUK 5:14 Sehe cavitexa me cha cuitjin: ―‍Tsajin camahani yo xi cuinújun cojo xcusun vihi. Nihñu sacuatjin cavitexa Moisés xutachanga naja hatsëë nixtin. Tángun ningacun yojo nuju cojo nahmi, sehe tángun chjuhun ngu cjuatjo xi tuhun rë Nina tsëhë xi camandaja ngayun. Cuatjin nihñu cojo sa xi cumatsejen xi camandaja jain ngayun. ―‍Cuatjin xu cachja me.
LUK 5:15 Peru handasa cuatjin xu cachja Jesús cojo cha ne, hitsë sa jercu cavitsojo cjua tsëhë xcusun xi casahmi me. Hya xi camá ne, jercu tu cjín camahani xuta quijitjengui xu me Jesús xi cuihndë me cjua rë Jesús hacuaha cumandaja me tsëhë chíhin xi ma rë me.
LUK 5:16 Peru Jesús ne, yasen xu ni cavaxëxin me yojo rë me fi me ngajan ngu xín camahani, sahmi me oración rë me cojo Nina.
LUK 5:17 Cuitjin camá nga xu ngu nixtin hya xi tivicuya Jesús xuta. Hacuaha siu xu ngujo cha fariseo cojo ngujo cha xi vicuya cjuachacun xi canduva cha yëjë ni nandya tsëhë distritu Galilea cojo distritu Judea, cojo nandya Jerusalén. Hacuaha jercu yaha Jesús ngahñu rë Nina xi sahmi me xi cumandaja xuta hmu rë.
LUK 5:18 Hya xi camá xu ne, hora vëhë cafehe ngu cha xi cahme yojo rë, quichahahnga rë cha cojo nijña rë cha. Hane cha xi yahahnga rë cha ne, casahmi cha cjuandya xi cuisehen cha cahntsua ndihya xi cuejña cha cha hmu rë jan hiscan tacun Jesús.
LUK 5:19 Peru xi casacuiin xu rë cha chuva rë hacutjin cuisehen cha ngatsë rë xuta xi jercu quitsë camahani me jan ne, camiji xu cha rcu ndihya, hane cafahaxin cha tyjavanitja, sehe catsitujne cha cha hmu rë jan taha rcu ndihya cojo ni nijña rë cha, xi camá cavejña cha cha ngajñi rë xuta hiscan tacun Jesús.
LUK 5:20 Hane xi cavëë Jesús xi cuatjin mangucacun cha xi cuacun jan cojo rë me ne, sehe cachja xu me cuitjin cojo cha hmu rë jan: ―‍Jyë́ nuju tsan ne, ha camanchataha. ―‍Cuatjin xu cachja me.
LUK 5:21 Hya xi camá xu ne, cha xi vicuya cjuachacun cojo cha fariseo xi cuacun jan ne, cavetsihin catsingataha cacun cha cachja xu cha cuitjin cojo xicjin cha: ―‍¿Yo cha xi cuijyihi vi xi tsixcuehyu cha Nina? ¡Hatuxa tsajin yo xi cuma tsinchataha jyë́ rë xuta ta suvá ni Nina xi cuma tsinchataha me! ―‍Cuatjin xu cachja cha cojo xicjin cha.
LUK 5:22 Peru tsëhë xi Jesús ne, ha vëë me mé xi titsingataha cacun cha xi cuacun jan ne, cachja xu me cojo cha cuitjin: ―‍¿Mé xi tiningatuhuntacún cojo cjuatacun nuju?
LUK 5:23 ¿Jarë cjua xi hitsë sa tsaviin xi cuichjá? ¿Há xi: “Jyë́ nuju ne, ha camanchataha?”, o ¿há xi: “Tisatjunhngun ne, tujyuhunyun?”
LUK 5:24 Peru nguehe suá cumachaya nuju xi ngahan xi Quihndi rë Xuta Jain ngahan ne, yahá xá xi tsinchátaha jyë́ rë xuta nguehe ngasunhndë. Sehe ngajan xi cachja xu Jesús cojo cha hmu rë jan: ―‍Quihndë ne, ngayun tsan ne, tisatjunhngun, chjuhun nijña nuju vë ne, sehe tjangun ndya nuju. ―‍Cuatjin xu cachja Jesús.
LUK 5:25 Hya xi camá ne, ngutjen ni cavisatjenhnga xu cha ngajñi rë yëjë ni xuta, sehe cafaha cha nijña rë cha, cafe cha, taha sahmi jyë sahmi hnga cha Nina.
LUK 5:26 Hane yëjë ni xuta jan ne, jercu quijircun xu rë me, hacuaha cojo me casahmi jyë casahmi hnga xu me Nina, hisca catsacjun me camá. Hacuaha cachja xu me cuitjin: ―‍Quihndë cahyan xcusun xi tsajin nixtin xi hyan. ―‍Cuatjin xu cachja me.
LUK 5:27 Hya xi camá xu ne, xi cavetju Jesús jan ne, cavechú me ngu cahndë́ hiscan xi tacun ngu me xi faha tujúnsa, me xi hmí rë Leví. Sehe cachja xu me cojo me cuitjin: ―‍Nduvun, cuanguen cona. ―‍Cuatjin xu cachja me.
LUK 5:28 Hya xi camá ne, Leví jan ne, caviyuju yëjë mé xcusun xi sahmixa me cojo jan ne, sehe cavetju xu me quiji me cojo Jesús.
LUK 5:29 Hane xi cavatju vëhë ne, sehe casahmi xu me ngu suhi ngajan ndava me ngatsë rë Jesús. Hacuaha jercu cjín camaha xu ni cha xi faha tujúnsa cojo jingu sa xuta tijinë me niñu cojo Jesús cojo Leví.
LUK 5:30 Hane cha fariseo cojo cha xi vicuya cjuachacun cavetsihin cachjataha xu cha xuta ladu rë Jesús cuitjin: ―‍¿Mé má cuatjin chinu hyun tangun cojo cha xi faha tujúnsa cojo ngujo sa cha xi hacuaha cha tsehen cha? ―‍Cuatjin xu cachjataha cha.
LUK 5:31 Hane xi cafayangui Jesús tsëhë cha ne, cuitjin xu cachja me: ―‍Xuta xi hacuiin hmu rë me ne, mijí rë xi cjuahacuenda rë me doctor ta suvá ni xuta xi hmu rë me ne, me vëhë xi meje rë xi cjuahacuenda rë me doctor.
LUK 5:32 Hacuanitjin ná ngahan ta ngahan ne, hacuiin canduvá nguehe xi squindáyavaha rë xuta xi tsajin jyë́ rë me ta xi canduvá ne, xi squindáyavaha rë xuta tsehen. Cuichjá cojo rë me xi tsindeya me cjuatacun rë me. ―‍Cuatjin xu cachja me.
LUK 5:33 Ngajan xi cha fariseo cojo cha xi vicuya cjuachacun ne, cachja xu cha cuitjin cojo Jesús: ―‍Yëjë xuta ladu rë Juan ne, yasen ni sahmi me xun rë me hacuaha sahmi me oración rë me cojo Nina. Hacuanitjin ni yëjë xuta ladu rë cha fariseo. Peru xuta ladu nuju ne, jinë jihvi me. ―‍Cuatjin xu cachja cha.
LUK 5:34 Ngajan xi Jesús ne, cuitjin xu cachja me cojo cha: ―‍Cumaji xi xuta rë cha xi tivixan ne, sahmi me xun rë me jinguyëjë rë xi cha xi tivixan ne, tacun cha cojo rë me.
LUK 5:35 Peru cuechú nixtin xi cha xi tivixan chjaháxin rë cha tsëhë xuta rë cha ne, hya sahmi me xun rë me. ―‍Cuatjin xu cachja Jesús.
LUK 5:36 Hacuaha cachja nga xu me ngu ejemplu vihi cojo cha xi cuacun jan: ―‍Tsajin yo xi cuicheya ngu rquí tsjian xatsë sehe cueyacoo cojo ngu tsjian changá ta sá xi cuatjin sahmi me ne, tsjian xatsë jan ne, tsinguetsun me. Hacuaha cumatanguaain ngu rquí tsjian xatsë cojo tsjian changá jan.
LUK 5:37 Hacuaha tsajin yo xi cuincha xan xatsë cahntsua chuxin changá ta sá xi cuatjin sahmi ne, xan xatsë jan ne, tsitsinga rë chuxin jan. Hane cjuë cuixu xan, hacuaha chuxin jan ne, cuetsun.
LUK 5:38 Xi meje rë ne, xan xatsë ne, xincha cahntsua chuxin xatsë.
LUK 5:39 Hacuaha ngu xuta xi ha cahvi me xan changá ne, ha quihndë mijí cuihi me xan xatsë, tsëhë xi chja me ta xan changá ne, vëhë xi ndaja hyun. ―‍Cuatjin xu cachja Jesús.
LUK 6:1 Hacuaha cuitjin camá nga xu ngu nixtin xi chjahájenda rë. Hya xi tivatju xu Jesús cojo xuta ladu rë me hiscan tjin tjë trigu ne, cavotohosun xuta ladu rë me tsë tsë trigu jan, sehe catsufëtsja me, sehe cajinë me.
LUK 6:2 Sehe ngajan xi ngujo cha fariseo xi cojo cjui jan ne, cachjataha xu cha me cuitjin: ―‍¿Mé má cuatjin tisahmi xuta ladu nuju xá, handasa chja ley naja xi tsajin cahndë́ xi nihña xá nixtin xi chjahájenda rë? ―‍Cuatjin xu cachja cha.
LUK 6:3 Ngajan xi Jesús ne, cuitjin xu cafayangui me tsëhë cha: ―‍Ngayun ne, ha cachutayun xcusun xi casahmi xutachanga naja David hatsëë nixtin. Hya xi jercu camavojo rë me cojo xuta xi siu cojo me ne,
LUK 6:4 cavisehen me ndava Nina, hane cafaha me pan xi viyuju xcun Nina xi tsajin cahndë́ xi tu yo ni sinë ta suvá ni nahmi xi cuma sinë me. Peru me vëhë ne, cajinë me hacuaha casua me cajinë xuta xi siu cojo rë me.
LUK 6:5 Hacuaha cachja sa Jesús cuitjin: ―‍Ngahan xi Quihndi rë Xuta Jain ngahan ne, ngahan xi vitéxa mé xi cuma nixtin xi chjahájenda rë. ―‍Cuatjin xu cachja Jesús.
LUK 6:6 Cuitjin camá nga xu ngu nixtin xi chjahájenda rë. Quiji Jesús yungun ne, cavicuya me. Hane tacun xu ngu cha cahntsua yungun jan xi quixíhñu tsja quixi cha.
LUK 6:7 Hane cha xi vicuya cjuachacun cojo cha fariseo xu ne, siu tifahachuva xu ni cha Jesús, ¿há sahmi me xi cumandaja xuta nixtin xi chjahájenda rë?, cojo sa xi cuma cuinchajyë cha me tsëhë xi sahmi me xá nixtin xi chjahájenda rë.
LUK 6:8 Peru Jesús ne, ha vëë me mé xi tsingataha cacun cha xi cuacun jan. Sehe cachja xu me cojo cha xi quixíhñu tsja jan cuitjin: ―‍Tisatjunhngun, hane tisechun nguehe cavasencja. ―‍Cuatjin xu cachja Jesús. Hane sehe cavisatjenhnga xu cha cavisecun cha.
LUK 6:9 Sehe ngajan xi cachja xu Jesús cojo cha xi cuacun jan cuitjin: ―‍Sahme nuju ngu cjuachjinenguise vihi: Nixtin xi chjahájenda rë ne, ¿mé xi sua cahndë́ ley xi nihña?, ¿há xi cjuandaja ne?, o ¿há xi cjuatsehen? ¿Há xi naxentjeen cjuahñu rë xingueen ne?, o ¿há xi nicjeen? ―‍Cuatjin xu cachja Jesús.
LUK 6:10 Xi cavutsejen Jesús xuta jingujyë ni tahndee rë me ne, sehe cachja xu me cojo cha xi hmu tsja jan cuitjin: ―‍Nixingun ntsun. ―‍Cuatjin xu cachja me. Hane cuatjin casahmi cha. Hane tsja cha ne, ha camandaja xu sacuatjin xi jyihi titjún.
LUK 6:11 Hya xi camá ne, cha xi cuacun jan ne, jemu camacjan camaha xu ni rë cha, hisca cachja cha ngajñi rë cha cojo xicjin cha mé xi ndatjin sahmi xu cha cojo Jesús.
LUK 6:12 Hacuaha cuitjin camá nga xu ngu nixtin nixtin xi cuacun vë. Cavetju Jesús quiji xu me ngu ndetjún xi sahmi me oración, hane ngajan cavéjña me cuaha nixten sahmi me oración rë me cojo Nina.
LUK 6:13 Hane xi casahasen ne, cajindayavaha xu me xuta ladu rë me, hane ngajñi rë xuta xi cuacun vë ne, cavaxijinjñi xu me tejó xihin. Hane me xi tejó vëhë ne, me vëhë xu xi cachja Jesús tsëhë me apóstol.
LUK 6:14 Me xi cuicun vi xi tejó me xi cavaxijin Jesús: Simón, me xi hacuaha casuañihi me me Pedru, cojo Andrés hntsë Simón, Jacobo cojo Juan, Felipe cojo Bartolomé,
LUK 6:15 Mateo cojo Tomás, Jacobo quihndi rë Alfeo cojo Simón, me xi tsëhë partidu zelota,
LUK 6:16 Judas xuta rë Jacobo cojo Judas Iscariote, me xi sahmi entregadu rë Jesús.
LUK 6:17 Hane xi cavuya canduvajne xu Jesús tsëhë naxi jan cojo xuta ladu rë me jan ne, xi cafehe xu me ngu ngasun ne, ngajan caxinchacunhñu xu me cojo xuta jan. Hacuaha jercu cjín sa xuta ladu rë me xi siuya jan, siuya tangun cojo jemu cjín camaha xu ni xuta tsëhë nandya Jerusalén cojo tsëhë yëjë sa nación Israel, hisca cojo xu xuta xi nduva tsëhë nandya Tiro cojo Sidón, xi siu ladu tsëhë tjehen ndachacun.
LUK 6:18 Yahnga xu xuta xi cuacun vë ne, canduva me xi meje cuisiñuju me cjua rë Jesús, hacuaha yahnga nga me ne, canduva me xi meje rë me xi cumandaja me tsëhë chíhin xi yaha rë me. Hacuaha me xi jemu tivatju cjuañihi xi hincha xitsehen cahntsua xahasen rë me ne, hacuaha camandaja xu me.
LUK 6:19 Yëjë ni xutacjín jan ne, cavanguise me chuva rë xi satëtsja me Jesús ta, tsëhë xi Jesús ne, jemu tjin rë me ngahñu rë Nina, hane ngahñu vëhë tisahmi xi mandaja xu yëjë xuta hmu rë.
LUK 6:20 Ngajan xi ngaxtun vëhë xu ne, cavutsejen Jesús xuta ladu rë me, sehe cachja xu me cojo cuitjin: ―‍Jemu ndaja tsujun ngayun xi yumu matsejen ta, tsëhë xi ngayun matsejen ne, satë nuju gubiernu xi sahmi Nina.
LUK 6:21 ’Jemu ndaja tsujun ngayun xi vojo nuju quihndë matsejen ta, tsëhë xi cuechú nixtin xi jemu chuya rë xahasen nuju. ’Jemu ndaja tsujun ngayun xi tichjihndun quihndë matsejen ta, tsëhë xi cuechú nixtin xi cuéjnu.
LUK 6:22 ’Hacuaha jemu ndaja tsujun ngayun hya xi choho scuëë nuju xuta, o hya xi cuaxëxin nuju me tsëhë ngajñi rë me, o hya xi choho cuichja me cojo nuju, o hya xi tsitjungui nuju me, ngatsë rë xi tjin tangun cjuatacun nuju cojo ná ngahan xi Quihndi rë Xuta Jain ngahan.
LUK 6:23 Hisca chijihngun xi ndama nuju xi cuatjin tivatjun tijima nixtin hya matsejen ta, tsëhë xi jemu jyë ngu cjuandaja xi tacunya nuju ngajan ngahnga. Jemu ndaja tsujun matsejen ta, tsëhë xi cuanitjin ni choho casahmi xutachanga naja cojo profeta hatsëë nixtin, hane jemu cachuya rë Nina tsëhë profeta xi cuacun vë.
LUK 6:24 ’Peru jemu chojyihi tsujun ngayun xi nchina ngayun matsejen ta, tsëhë xi ha casacu nuju cjuetacun xi cuma nuju.
LUK 6:25 ’Jemu chojyihi tsujun ngayun xi ha jemu chuya rë xahasen nuju quihndë matsejen ta, tsëhë xi cuechú nixtin xi cuma vojo nuju. ’Jemu chojyihi tsujun ngayun xi tivéjnu quihndë matsejen ta, tsëhë xi cuechú nixtin xi jercu chjihndun xi cuma va rë xahasen nuju.
LUK 6:26 ’Hacuaha jemu chojyihi tsujun ngayun hya xi ndaja cuichja yëjë xuta tsujun matsejen ta, tsëhë xi cuanitjin ni ndaja casahmi xutachanga naja cojo profeta ndacha hatsëë nixtin, hane profeta ndacha xi cuacun vë ne, cachuyiin rë Nina tsëhë me.
LUK 6:27 ’Peru ngayun xi tinuhyun xi chjá matsejen ne, cuichjá cojo nuju cuitjin: Nihmutacún xuta xi má condra nuju, ndaja nihñu cojo xuta xi choho vëë nuju me,
LUK 6:28 chjahyun rë Nina cjuandaja xi cuma rë xuta xi fehya rë me Nina cjuahngatacun xi cuatjun cuma. Ngajñi rë oración nuju matsejen ne, chjahyun rë Nina cjuandaja xi cuma rë xuta xi vangui nuju me si.
LUK 6:29 Yo xi vajaya ngu ladu tsa nuju matsejen ne, nicuyun sa ngu ladu catajaya. Yo xi fahatahá chingá nuju matsejen ne, xicanichuun rë hisca chingá ngahma nuju.
LUK 6:30 Yëjë ni xuta xi fehya nuju me mé xi fehya nuju me matsejen ne, tuhun rë me. Yo xi fahatahá mé xi fahatahá tsuhun matsejen ne, xicanujuun xi tsicuya nga me.
LUK 6:31 Sacuatjin xi meje nuju xi sahmi xuta cojo nuju matsejen ne, hacuaha cuanitjin ni nihñu cojo rë me.
LUK 6:32 ’Tsajin yo sua nacuechji nuju tsëhë xi hmutacún xuta xi hmucacun nuju me matsejen ta, tsëhë xi hacuaha hisca xuta tsehen matsejen ne, hmucacun me xuta xi hmucacun rë me.
LUK 6:33 Hacuaha tsajin yo sua nacuechji nuju tsëhë xi ndaja nihñu cojo xuta xi ndaja sahmi me cojo nuju matsejen ta, tsëhë xi hacuaha hisca xuta tsehen matsejen ne, hacuanitjin ni sahmi me.
LUK 6:34 Hacuaha tsajin yo sua nacuechji nuju tsëhë xi tuhun vuxetaha xuta xi vetuhun tacún xi ngascan matsejen ne, sua me nuxetuhun matsejen ta, tsëhë xi hacuaha hisca xuta tsehen matsejen ne, sua me vuxetaha xicjin me, cojo sa xi cuya cjuahatsja nga me chuva vëhë ni.
LUK 6:35 Cúya cuichjá nga cojo nuju, nihmutacún xuta xi má condra nuju. Ndaja nihñu, hacuaha tuhun tuxetaha rë, peru xicavetuun tacún xi cuya chjuhunntsun nga. Sá xi cuatjin nihñu matsejen ne, jemu jyë cjuandaja xi sua nuju Nina ngascan, hane cjuandaja xi nihñu ngayun matsejen ne, tangun cojo cjuandaja xi sahmi Nina matsejen ta, tsëhë xi me vëhë matsejen ne, hatuxa jemu ndaja me cojo xuta tsehen xi hisca nacuechji rë Nina suaain me.
LUK 6:36 Meje rë xi tjin nuju cjuayumatacun sacuatjin tjin rë Nina Nahmi naja cjuayumatacun.
LUK 6:37 ’Hacuiin nichuvun jingu sa xuta cojo cjuatacun rë me, sehe hacuiin tsichuva Nina ngayun. Hacuiin ninguixun jyë́ rë jingu sa xuta, sehe hacuiin tsinguixi Nina jyë́ nuju. Ninchatuhun rë jingu sa xuta matsejen ne, sehe hacuaha tsinchataha nuju Nina.
LUK 6:38 Tuhun rë jingu sa xuta matsejen ne, sehe hacuaha sua nuju Nina. Sua nuju me chuva xi cjuaquixi, hisca tsuquihine me, hisca tsiniyaya me chuva rë, hacuaha hisca xotje rë chuva xi sua nuju me. Cuatjin nihñu matsejen ta, tsëhë xi chuva xi nichuvun matsejen ne, hacuaha chuva vëhë tsichuva Nina xi sua nuju me. ―‍Cuatjin xu cachja Jesús cojo xuta ladu rë me.
LUK 6:39 Hya xi camá ne, cachja sa xu me ngu ejemplu cuitjin: ―‍Ngu cha rcá matsejen ne, cumaji cjuecani cha ngu nga cha rcá matsejen ta, sá xi cuatjin matsejen ne, catsijo ni cha cuixuya cha xanga.
LUK 6:40 Ngu cha xi sehe tivutaya matsejen ne, hacuiin hitsë sa vengui chjí rë cha xi cuma rë maestru rë cha matsejen ta hya xi ha ndaja cavutaya cha yëjë ni matsejen ne, sehe ngajan xi cuechútáha cjuatacun rë cha sacuaha cjuatacun rë maestru rë cha.
LUK 6:41 ’¿Hacutjin má xi matsejen nuju xtë xi jiya tuxcun xingun, hane machayiin nuju tsëhë yasin xi jiya túxcun suvun ni?
LUK 6:42 ¿Hacutjin má xi cuma cuinújun cojo xingun xi meje naxun xtë xi jiya tuxcun me jinguyëjë rë xi suvun matsejen ne, matsijin nuju yasin xi jiya túxcun vë ni? Ngayun xuta ndacha, naxun titjun yasin xi jiya túxcun vë, sehe cumatsejenndaja nuju xtë xi jiya tuxcun xingun cojo sa xi cuma naxun.
LUK 6:43 ’Ha hyan matsejen ta tsajin hisca xi ngu yatjë xi ya ndaja xi sua tú xi ndajin, hacuaha tsajin hisca xi ngu ya xi ya machjiriin xi sua tú xi ndaja matsejen ta,
LUK 6:44 jima ngu ya ne, cuma tsejen sá xi ndaja o sá xi ndajin ngatsë rë tú xi sua. Hatuxa sacuiin naja tú xi hmí higo rcu ngu yanahyálatu, hacuaha sacuiin naja uva rcu ngu yanahyátindu.
LUK 6:45 Cuanitjin ni rë xuta matsejen ta sacuaha xuta ndaja matsejen ne, tsëhë cjuandaja xi tetjo rë me cahntsua xahasen rë me cojo cahntsua cjuatacun rë me matsejen ne, tsëhë ngajan vetju cjuandaja. Peru xuta tsehen matsejen ne, tsëhë cjuatsehen xi tetjo rë me matsejen ne, tsëhë ngajan vetju cjuatsehen. Cuatjin matsejen ta, tsëhë xi yëjë ni xuta ne, cjua xi quitsë rë xahasen rë me cojo cjuatacun rë me matsejen ne, vëhë cjua xi vetju hntsua me.
LUK 6:46 ’Yasen ni nújun xi nai nuju ngahan, peru ¿mé má nihñuu sacuatjin xi chjá cojo nuju ni?
LUK 6:47 Yahnga ngayun xi nduvuntjengun ná hacuaha visiñuju cjua naha hacuaha nihñu sacuatjin chjá cojo nuju matsejen ne, nguehe cuichjá cojo nuju yo xi tangun ngayun cojo:
LUK 6:48 tangun ngayun cojo ngu cha xi hya xi casahmi cha ngu ndihya matsejen ne, ndaja nungun cafahngui cha, sehe ngajan cavejña cha xihndënaña rë hisca xcun ndyojohñu. Hane hya xi camajyë ndajyë hacuaha casesuntë nandá matsejen ne, jercu hñu catsivaha rë ndihya jan, peru hisca catsiniyaain rë, tsëhë xi jemu ndatjin casecun.
LUK 6:49 Peru yahnga nga ngayun xi visiñuju cjua naha peru nihñuu sacuatjin xi chjá matsejen ne, tangun ngayun cojo ngu cha xi casahmi ngu ndihya suvá xcun nangui ni, xi tsajin xihndënaña rë. Hane hya xi camá ne, xi camajyë ndajyë matsejen ne, catsivaha rë ndihya jan, hane ngutjen ni caticja. Hane cavetsun camahani ndihya vëhë. Cuatjin xu cajnetaha cavicuya Jesús.
LUK 7:1 Xi cajnetaha xu cachja Jesús yëjë ni cjua xi meje cuichja me cojo xuta ne, sehe cavuya quiji nga me nandya Capernaum.
LUK 7:2 Hane nandya jan ne, ngajan xu tacun ngu capitán xi tjin rë me ngu hndixahan xi cavatsë me xi jiñahmú, ha ña meje cueya camaha xu ni. Capitán jan ne, jemu hmucacun xu me hndixahan jan.
LUK 7:3 Hane xi camachaya xu rë capitán jan xi tacun Jesús ne, catsingatju xu me ngujo xuta changá rë xuta tjë rë Israel xi quiji cachja me cojo Jesús xi cjue sahmi me xi cumandaja hndixahan rë capitán jan.
LUK 7:4 Hane xi cafehe xuta changá jan hiscan tacun Jesús ne, nguñaja camahani cacun me cafehya me xi cjue xu Jesús. Cachja me cuitjin: ―‍Nihñu favor ne, tisecun rë capitán hitsë ta, tsëhë xi jemu ndaja me.
LUK 7:5 Handasa hisca hacuiin tjë rë xutachanga naja me ne, peru jemu hmucacun me ngayaan xuta tjë rë Israel, hacuaha casahmi me yungun niji cojo ngahñu rë suva me. ―‍Cuatjin xu cachja xuta changá jan.
LUK 7:6 Hya xi camá ne, quiji xu Jesús cojo rë me. Hane xi ha jima tiñataha me ne, sehe catsingatju xu capitán ngujo xuta ndaja rë me xi quijitjengui me Jesús. Hane xi cavechútáha xu me Jesús ngajan ndiya ne, cuitjin cachja me sacuatjin cachja capitán cojo rë me xi cuichja me cojo Jesús: ―‍Tatá. Xicatuhunndyuun yojo nuju. Ngahan ne, vechiin chuva rë xi ngayun cuinduvun ndya naha ta, tsëhë xi ngayun xi jemu jyë hnga ngayun cojo cjuatacun nuju.
LUK 7:7 Vëhë xi hacuaha tsingátaha cácun xi jemu chúva ngahan cojo cjuatacun naha xi cjuë́ cuichjá cojo nuju. Quihndë ne, ndastu nihñu favor ne, tinújun xi cumandaja hndixahan naha.
LUK 7:8 Ngahan ne, hvë xi cuma nihñu xcusun vëhë ta, ngahan ne, hacuaha tjin xuta xi matitjun tsahan, hane hacuaha tjin ná sindadu xi siu ngahma gubiernu naha xi sahmi hacutjin xi meje ná. Hya xi chjá cojo ngu xi cjue ne, fi. Hacuaha hya xi chjá cojo ngu nga xi cuinduva ne, nduva. Hane hndixahan naha ne, xi chjá cojo xi sahmi mé xi meje ná ne, sahmi. ―‍Cuatjin xu cachja xuta ndaja rë capitán jan cjua rë capitán cojo Jesús.
LUK 7:9 Hane xi cahndë xu Jesús cjua vëhë ne, jemu quijircun rë me tsëhë capitán jan. Hane xi cavuya me cavutsejen me xutacjín xi tjengui rë me jan ne, cachja xu me cuitjin: ―‍Cuichjá cojo nuju ta, ngajñi naja ngayejen ni ngayaan xuta tjë rë Israel ne, cjëë scuëë ngu xuta xi cuatjin ndaja mangucacun me cojo ná. ―‍Cuatjin xu cachja Jesús.
LUK 7:10 Hane xi cavuya xu me xi quiji tixa jan ne, cavëë me xi ha camandaja cha hndixahan jan.
LUK 7:11 Xi cavatju vëhë ne, quiji nga xu Jesús ngu nandya xi hmí rë Naín. Cavisecoo xuta ladu rë me me quiji me, cojo jingu sa xutacjín xi cojo me quiji me.
LUK 7:12 Hane xi tijima tiña xu me tsëhë tingotjo hnchua tsëhë nandya jan ne, cjui seyaniji xu ngu nima, ngu nima xi quihndi ngu tsëhë naa rë. Hacuaha naa rë nima jan ne, cahan xu me. Jercu cjín camahani xuta nandya visecoo me chjuun jan cjui me.
LUK 7:13 Hane xi cavëë xu Nai naja chjuun jan ne, camayuma rë me me. Sehe cachja me cojo chjuun jan cuitjin: ―‍Ha quihndë xicachjihnduun. ―‍Cuatjin xu cachja me.
LUK 7:14 Hane xi quiji tiña xu Jesús hiscan xi cjui me cojo nima jan ne, sehe quiji cavetahatsja xu me nachan xi quisun nima jan. Hane xuta xi yahahnga rë nima jan ne, caxinchacunhñu me. Sehe ngajan xi Jesús ne, cachja xu me cuitjin: ―‍Quihndë ne, ngayun tsan ne, tisatjunhngun. ―‍Cuatjin xu cachja me.
LUK 7:15 Hane nima jan ne, cavisatjenhnga xu cha cavéjña cha. Sehe cavetsihin cachja cha. Sehe cachja Jesús cojo naa rë cha jan xi cjuahatsja nga me quihndi rë me.
LUK 7:16 Hya xi camá xu ne, yëjë ni xuta jan ne, jemu catsacjun me camá. Hacuaha casahmi jyë casahmi hnga me Nina, cuitjin xu cachja me: ―‍Cavetjujñi ngajñi naja ngu profeta xi jercu vengui chji rë me, hacuaha casahmi Nina cjuandaja rë me cojo naja ngayaan xuta rë me. ―‍Cuatjin xu casahmi jyë casahmi hnga me Nina.
LUK 7:17 Hya xi camá ne, cavitsojo xu cjua vëhë tsëhë Jesús jingujyë ni ladu vëhë cojo jingujyë ni nación Israel.
LUK 7:18 Cuitjin xu camá nixtin xi cuacun vë. Xuta ladu rë Juan ne, casua me camachaya rë me yëjë xcusun xi casahmi Jesús. Sehe ngajan xi Juan ne, cajindaya xu me jo xuta ladu rë me jan ne,
LUK 7:19 sehe catsingatju me me xi cjue cjuinenguise xu me Nai naja sá xi me vëhë xi chja xujun rë Nina xi tsingatju Nina me, o sá xi meje rë xi cuiyujuya rë xi cuinduva nga ngu.
LUK 7:20 Hane xi cafehe xuta xi catsingatju Juan jan hiscan quitahá Jesús ne, cachja xu me cuitjin: ―‍Juan Vitenda rë Xuta ne, catsingatju niji me xi nduvin vinenguisin nuju ¿há ngayun xi tsingatju nuju Nina, o há tsajin ne, há cuinechinyin xi cuinduva nga ngu? ―‍Cuatjin xu cavinenguise xuta xi catsingatju Juan jan.
LUK 7:21 Hane ha hora vëhë ni ne, Jesús ne, casahmi me xi jemu cjín xu xuta camandaja me tsëhë tu mé ni xcusun chíhin xi má rë me. Hacuaha jemu cjín sa xuta xi cavaxëxin Jesús xitsehen xi hincha cahntsua xahasen rë. Hacuaha jemu cjín sa xu xuta rcá xi casahmi Jesús xi camá camatsejen rë me.
LUK 7:22 Hya xi camá ne, xi catsicuya me cjua cojo xuta ladu rë Juan ne, cuitjin xu cachja me: ―‍Tjangun ne, sehe tinújun cojo Juan yëjë xcusun xi cahyun cojo yëjë cjua xi canuhyun. Tinújun ta xuta rcá ne, camá camatsejen rë me; xuta rengun ne, camá quijindaja me; xuta xi yaha rë chíhin vitaha xi setaha yojo naja ne, camandaja me; xuta xi loho me ne, camá cahndë me; nima ne, cavuya nga cjuahñu; xuta yuma ne, casacu camachaya rë me cjuandajyihi rë Nina.
LUK 7:23 Hacuaha jemu ndaja tsëhë tu yo ni xuta xi hacuiin tsismicacun me xi mangu cacun me cojo ná. ―‍Cuatjin xu cachja Jesús.
LUK 7:24 Hane hya xi cavuya cafe xu xuta ladu rë Juan jan ne, sehe cachja Jesús cojo xutacjín jan cuitjin tsëhë Juan: ―‍Hya xi cavetjun catsangun ngajan ngu xín tsëhë nandya catsanguntjengun Juan matsejen ne, ¿há caningatuhuntacún xi cuechuntuhun ngu xihin xi hacuiin ngu ni cjuatacun rë me?, sacuatjin rë ngu ndeje xi fi nguehe fi ngajan rcu sacuatjin cjui tjo.
LUK 7:25 O há tsajin ne, ¿há caningatuhuntacún xi cuechuntuhun ngu xihin xi yaja ngu tsjian xi jemu tu ndajyihi camahani? Hacuiin cuatjin. Ha hyan matsejen ta xuta xi jercu tu ndacun camahani tsjian vaja me hacuaha hatuxa jemu cjuasua siu me matsejen ne, sacuiin naja me ngajan ngu xín camaha ni tsëhë nandya matsejen ta hiscan xi sacu naja me ne, ndava ngu xuta nchina.
LUK 7:26 Peru ngayun matsejen ne, catsangun cachutsujun ngu profeta. Hacuaha cjuaquixi xi vëhë cachutsujun. Peru profeta Juan vë matsejen ne, hitsë sa vengui chji rë me xi cuma rë yëjë sa profeta xi yahnga.
LUK 7:27 Hacuaha me vëhë xi cachja Nina tsëhë me xcun xujun rë me cuitjin: Ngahan ne, tsingátju titjun ngu cha xi scuxaha cjuatacun rë xuta tsëhë xi cjuehé ngaye. Cuatjin cachja Nina cojo Quihndi rë me.
LUK 7:28 Cuichjá cojo nuju matsejen ta ngajñi rë yëjë xuta xi catsin me tsëhë naa rë me matsejen ne, tsajin ngu xi hitsë sa vengui chji rë xi cuma rë Juan. Peru hya xi cuetsihin Nina sahmi me gubiernu nguehe ngasunhndë matsejen ne, xuta xi chuva cuengui chji rë me quihndë matsejen ne, hitsë sa cuengui chji rë me nixtin hya, xi cuma rë xi ha vengui chji rë Juan quihndë.
LUK 7:29 Hane hya xi yëjë ni xuta hisca cojo cha xi faha tujúnsa cahndë me cjua xi cachja Juan matsejen ne, catsingatihin me xi cuitenda Juan me. Hane chuva vëhë matsejen ne, catsingacun me xi macjain rë me xi Nina matsejen ne, yëjë xcusun xi sahmi me matsejen ne, hatuxa cjuaquixindaja jain.
LUK 7:30 Peru jemu cjín cha fariseo cojo cha vicuya cjuachacun matsejen ne, catsingatiin cha xi cuitenda Juan cha. Hane chuva vëhë matsejen ne, catsitjungui cha xcusun xi meje sahmi Nina xi cuma tsëhë cha.
LUK 7:31 ’Ngayun xuta tjë rë Israel tsëhë nixtin vihi matsejen ne, ¿mé xi tangun ngayun cojo?
LUK 7:32 Tangun ngayun cojo langa xi siu ngajan ndetsin, xi jindaya xicjin cojo cjua vihi: “Canijani tsujun ne, mijí xtun; casin va ne, mijí chjihndun.” Cuatjin jindaya langa.
LUK 7:33 Cuatjin chjá cojo nuju matsejen ta, Juan xi vitenda nuju ngayun matsejen ne, jinii me niñu hacuaha hviin me xan, hane ngayun nújun ta jiya xitsehen xahasen rë me.
LUK 7:34 Hane ngahan xi Quihndi rë Xuta Jain matsejen ne, jínë hacuaha hvë, hane nújun xi ngahan matsejen ne, ngu cha cahntsuaniñu ngahan, ngu cha cahntsuaxan ngahan, hacuaha ngu cha amigu rë cha xi faha tujúnsa cojo jingu sa xuta tsehen ngahan.
LUK 7:35 Peru xuta xi fitjengui me cjuatacun rë Nina matsejen ne, xuta xi cuacun vëhë xi tsingacun naja me xi cjuatacun vëhë matsejen ne, ndaja jain. ―‍Cuatjin xu catsinguijnetaha Jesús cjua rë me cojo xuta.
LUK 7:36 Ngu nixtin nga jan ne, cuitjin xu camá. Ngu cha fariseo ne, cachja xu cha cojo Jesús xi cjue sinë me cojo cha niñu ndava cha. Hane xi cavisehen me ndava cha fariseo jan ne, sehe quiji cafaha xu me cahndë́ rë me xcun maxë xi sinë me niñu.
LUK 7:37 Ngajan xi ngu chjuun tsehen tsëhë nandya vëhë ne, camachaya xu rë na xi Jesús ne, tacun me ndava ngu cha fariseo tijinë me niñu cojo cha ne, yaha xu na ngu frascu xi ndyojo camá, hincha ngu xcusun aceite ndaja xi jercu hnga chji rë.
LUK 7:38 Quiji xu na secun na táha ntsacu me, jihnda na. Hane cojo ndatuxcun na ne, cavetsihin catsicahnchi xu na ntsacu me. Hane cojo tsjarcu na ne, cavujnu na, sehe cavitatsuha na. Hya xi camá xu ne, sehe cavitejnu na aceite.
LUK 7:39 Peru xi cavëë xu cha fariseo xi quijicojo rë me jan xi cuatjin casahmi na ne, catsingataha cacun cha cuitjin: “Cha xi cuijyihi vihi ne, sá xi profeta jain cha ne, ha vëë cha mé xcusun chjuun na xi cuatjin satëtsja rë cha ta, tsëhë xi na vëhë ne, ngu chjuun tsehen na.” Cuatjin catsingataha cacun xu cha.
LUK 7:40 Sehe ngajan xi Jesús ne, catsicuya xu me cjua tsëhë cjuatacun xi catsingataha cacun cha fariseo jan, cuitjin xu cachja me: ―‍Simón, tjin ná ngujo cjua xi cuichjá cojo nuju. ―‍Cuatjin xu cachja me. Ngajan xi cha Simón jan ne, cuitjin xu cafayangui cha tsëhë me: ―‍Maestro, tinújun. ―‍Cuatjin xu cachja cha.
LUK 7:41 Hya xi camá xu ne, cachja Jesús cuitjin cojo cha ngu ejemplu: ―‍Cuejña ne xi jo cha jan ne, quitjen cha tujún tsëhë ngu cha nchina. Ngu cha ne, quitjen cha tujún tsëhë hñu cientu nixtin xi sahmi ngu mosu xá. Hane ngu nga cha ne, quitjen cha tujún tsëhë yachan të nixtin.
LUK 7:42 Hane xi tsajin rë cha xi cuacun vë tujún xi sahmingojo cha ne, cha nchina jan ne, catsinchataha cha catsijo cha. ¿Jarë cha xi cuicun vi xi hitsë sa tsihmu cacun cha cha nchina jan, xi má nuju? ―‍Cuatjin xu cachja me.
LUK 7:43 Sehe ngajan xi cafayangui xu cha Simón cuitjin: ―‍Xi má ná ne, cha xi hitsë sa cjín quitjen. ―‍Cuatjin xu cachja cha Simón. Sehe ngajan xi cachja xu Jesús cojo cha cuitjin: ―‍Jemu ndaja canichuvun cjua xi canújun. ―‍Cuatjin xu cachja Jesús.
LUK 7:44 Hane xi cavuya xu me cavutsejen me chjuun jan ne, sehe cachja nga me cojo cha Simón cuitjin: ―‍Chutsujun hacutjin casahmi chjuun vihi cojo ná. Ngayun ne, hora xi cavísehen ndya nuju ne, catuun nandá xi cjuengui ntsacú. Peru chjuun vihi ne, cojo ndatuxcun na catsicahnchi na ntsacú, hane cojo tsjarcu na ne, cavujnu na.
LUK 7:45 Hacuaha ngayun ne, cavitatsuun ná. Peru na vihi ne, hisca hora xi cavísehen ne, cjëë cuejñaxin na xi vitatsuha na ntsacú.
LUK 7:46 Ngayun ne, cavitejnuu aceite rcú. Peru chjuun vihi ne, cavitejnu na aceite ntsacú, aceite xi jemu ndaja jne camahani.
LUK 7:47 Vëhë xi cuichjá cojo nuju ta tsejen xi ha camanchataha na tsëhë jyë́ cjín xi tjin rë na ta, tsëhë xi jemu tjin rë na cjuahmutacun. Peru yo xi manchataha tsëhë hitsë jyë́ xi tjin rë ne, hacuaha chúva cjuahmutacun tjin rë. ―‍Cuatjin xu cachja Jesús.
LUK 7:48 Ngajan xi cachja xu Jesús cojo chjuun jan cuitjin: ―‍Jyë́ nuju ne, ha camanchataha. ―‍Cuatjin xu cachja me.
LUK 7:49 Hane xuta xi tijinë xu cojo rë me jan ne, cavetsihin cavinenguise me ngajñi rë me cojo xicjin me cuitjin: ―‍¿Yo rë cha xi cuijyihi vi xi hisca jyë́ rë xuta tsinchataha cha? ―‍Cuatjin xu cachja me.
LUK 7:50 Peru Jesús ne, cachja nga xu me cojo rë chjuun jan cuitjin: ―‍Ngayun ne, ha cavetjuntjun ta, tsëhë xi camangutacún cojo ná. Cuma cuangun cojo cjuasua. ―‍Cuatjin xu cachja me.
LUK 8:1 Cuitjin camá nga xu ngu nixtin. Jesús ne, titsujyihiya xu me jemu cjín nandya cojo ranchun tisua me tijimachaya rë xuta cjuandajyihi xi chja tsëhë gubiernu xi sahmi Nina. Hacuaha cojo tejó xuta ladu rë me jan cavisecoo xu rë me.
LUK 8:2 Hacuaha cojo sa ngujo yachjin xi cavetju xitsehen xi hincha xahasen rë me hacuaha camandaja me tsëhë chíhin xi má rë me ne, cojo xu me quiji me. María, na xi hacuaha hmí rë na Mágdala, ngu chjuun xi cavetju yatu xitsehen xahasen rë,
LUK 8:3 cojo Juana, chjuun rë Chuza, ngu cha xi sahmixa ndava Herodes, me xi cavitexa ngajan distritu Galilea, cojo Susana cojo jemu cjín sa yachjin xi hacjahi. Yëjë ni yachjin xi cuacun vë ne, cojo xcusun xi tjin rë suvá me ne, cafahacuenda xu me Jesús cojo yëjë ni xuta xi ticojo me.
LUK 8:4 Cuitjin camá xu ngu ndiya nga. Hya xi jemu cjín xuta camatangun me xi canduva nguehe canduva ngajan me jingu sa nandya xi nduva tjengui xu me Jesús ne, cachja Jesús cojo xuta jan ngu ejemplu vihi:
LUK 8:5 ―‍Cuejñaa ne xi ngu cha xi tsitjë trigu matsejen ne, cavetju cha quiji cha xi tsitjë cha trigu. Hane jinguyëjë rë xi titsitjë cha matsejen ne, ngujo matsejen ne, cavixu ndiya, hane canune rë. Hane xi canduva chu nisë matsejen ne, catsicjë chu cajinë chu.
LUK 8:6 Hane ngujo nga matsejen ne, cavixu hiscan xi jemu naxindya. Hane xi cavetsihin tijima yehe ne, caxintsen matsejen ta, tsëhë xi tsajin mé xcuen rë.
LUK 8:7 Hane ngujo nga matsejen ne, cavixu ngajñi nahyá. Hane xi camachatangun matsejen ne, nahyá jan matsejen ne, vëhë casahmi hndë rë catsixi rë.
LUK 8:8 Hane xi yahnga nga matsejen ne, cavixu hiscan nihndë ndaja. Hane xi camayehe matsejen ne, casua tutjë́ rë, ngu cientu sa cuatjin sacuatjin xi camatjë́. Xi cafë cachja me cjua vëhë ne, sehe jercu hñu xu cachja me cuitjin: ―‍Yo ngayun xi tjin nuju cjuasua xi cuinuhyun cjua naha ne, ndaja tinuhyun. ―‍Cuatjin xu cachja me.
LUK 8:9 Ngajan xi xuta ladu rë me jan ne, cavinenguise xu me mé meje cuichja ejemplu xi cachja Jesús jan.
LUK 8:10 Hane Jesús ne, cachja xu me cuitjin: ―‍Nina ne, casua me cahndë́ xi ngayun ne, cuijne rcun cjuatacun tsëhë gubiernu xi sahmi Nina, cjuatacun xi titjún ne, tsajin yo machaya rë. Peru yëjë sa me xi yahnga ne, tichjá cojo rë me cojo suvá ejemplu, cojo sa xi handasa cuihndë me cjua naha ne, peru cuijnii rcu me.
LUK 8:11 ’Quihndë ne, nguehe cuichjá cojo nuju mé meje cuichja ejemplu vëhë. Trigu xi tsitjë ngu cha jan ne, vëhë xi sacuaha cjua rë Nina.
LUK 8:12 Hane hya xi vixu ngujo trigu ndiya ne, hacui sacuaha hya xi visiñuju xuta cjua rë Nina. Sehe vinduva Satanás ne, fahatahá cjua rë Nina tsëhë xahasen rë me, cojo sa xi cuetjintjiin me ngatsë rë xi cumacjain rë me.
LUK 8:13 Hane hya xi vixu ngujo trigu hiscan xi jemu naxindya ne, hacui sacuaha hya xi vihndë xuta cjua rë Nina, hane fahatsja me cojo cjuasua. Peru trigu xi cuacun vë ne, jemu chúva tyjama rë vetju. Hacuanitjin ni vatju ngujo xuta má. Macjain rë me ngujo nixtin ni, peru hya xi vechú ngunixtin xi chjaháchuva rë me ne, fi ngaxtun me.
LUK 8:14 Hane hya xi vixu ngujo trigu ngajñi nahyá ne, hacui sacuaha hya xi vihndë xuta cjua rë Nina, peru ha xcun xi ha cjuinduju me cojo nixtin rë me ne, tsingataha cacun me tsëhë cjuacjintacun tsëhë cahntsua ndava me, tsingataha cacun me tsëhë cjuanchina, hacuaha tsingataha cacun me tsëhë cjuasua xi tjin ngasunhndë, hane vëhë suaain cahndë́ xi cumajyë cjua rë Nina cahntsua xahasen rë me, hacuaha sahmii me ngu cjuandaja xi tsingacun xi xuta rë Nina me.
LUK 8:15 Hane hya xi vixu yahnga trigu hiscan nihndë ndaja ne, hacuaha hacui sacuaha hya xi vihndë xuta cjua rë Nina cojo ngu xahasen ndaja, ngu xahasen tyjahi, hacuaha tsismicacuaain me. Hane cuatjin cojo jeya ne, caa rë me sahmi me cjuandaja.
LUK 8:16 ’Hacuaha tsajin hisca xi ngu xuta xi ha xcun xi ha cavetaha rë me ngu ndihi ne, sehe faha me veyahma me ngahma rë ngu tyucu o sá xi faha me vejña me ngahma nachan ta, hatuxa faha me vejña me cahndë́ rë, cojo sa xi yëjë xuta xi visehen me hiscan setí ndihi jan ne, scuëë me hasen rë.
LUK 8:17 Hacuanitjin ni chuva vëhë, yëjë cjua rë Nina xi tivicuyá nuju suvun ni ngayun xuta ladu naha ne, handasa hinchahma yëjë cjua vëhë quihndë ne, peru cuechú nixtin xi cuetjucaa tsejen, hacuaha cuicuyun rë yëjë xuta.
LUK 8:18 ’Vëhë xi meje rë xi nihñu ngahñu xi ndaja cuisiñuju cjua rë Nina ta, tsëhë xi tu yo ni xi tjin rë cjua vëhë ne, Nina ne, sua sa rë me. Hane tu yo ni xi tsajin rë cjua vëhë ne, hitsë cjua vëhë xi má rë xi tjin rë ne, chjahátahá rë. ―‍Cuatjin xu cavicuya Jesús xuta ladu rë me.
LUK 8:19 Ngajan xi naa rë Jesús cojo xicjin me ne, cafehetjengui xu me Jesús. Hane maji vechútahacjin rë me ta, tsëhë xi jercu quitsë camaha xu ni xuta.
LUK 8:20 Hane tjin xu yo casua camachaya rë Jesús cuitjin: ―‍Naa nuju cojo nixti xingun ne, hinchacun me ngajan candatsen, xi nduvatjengui nuju me. ―‍Cuatjin xu casacu camachaya rë me.
LUK 8:21 Peru Jesús ne, cuitjin xu cafayangui me: ―‍Xuta xi vihndë me cjua rë Nina hacuaha sahmi me sacuatjin chja cjua vëhë ne, hacuaha tangun ni hmú cácun me sacuatjin hmú cácun naa naha cojo xingueen. ―‍Cuatjin xu cafayangui me.
LUK 8:22 Cuitjin camá nga xu ngu nixtin jan. Cavisehen Jesús cahntsua ngu barcu cojo xuta ladu rë me, sehe cachja xu me cojo xuta jan cuitjin: ―‍Cuanguen ngunda vëhë. ―‍Cuatjin xu cachja me. Sehe quiji me.
LUK 8:23 Hane ngajñi cjui xu barcu cojo rë me ne, Jesús ne, cafañafë xu me. Hya xi camá ne, canduva ngu tjo hñu xi jercu tu cjuachan camahani vanga xcun laguna jan. Hane barcu jan ne, jercu tivisehen xu nandá cahntsua, hane me xi cuacun jan ne, jemu tsavi camahani xi cuma rë me.
LUK 8:24 Hane xi quiji tiña xu me hiscan jiñafë Jesús ne, sehe catsingasca me me, cuitjin xu cachja me: ―‍¡Tatá, tatá! ¡Nguehe tifë ngayaan! ―‍Cuatjin xu cachja xuta ladu rë Jesús jan. Hane xi cavasca xu rë Jesús ne, cavatëcja me ngahñu rë tjo jan cojo cjuasca rë nandá jan. Sehe casejyu tjo casejyu nandá, jemu ndaja cavéjñajyuu jingujyë ni.
LUK 8:25 Sehe ngajan xi Jesús ne, cuitjin xu cachja me cojo xuta ladu rë me jan: ―‍¿Há manguaaintacún cojo ná ni? ―‍Cuatjin xu cachja me. Hane xi catsacjun xuta jan camá ne, jemu quijircun rë me. Sehe cachja xu me ngajñi rë me cojo xicjin me cuitjin: ―‍¡Mé xcusun xuta me vi xi hisca tjo hisca nandá vitexa me, hacuaha vihndë tsëhë me ni! ―‍Cuatjin xu cachja xuta ladu rë me jan.
LUK 8:26 Hya xi camá xu ne, cafehe me nandya Gadara, ngu nandya xi tacun ngunda vëhë tsëhë laguna Galilea.
LUK 8:27 Hane xi cafehe xu Jesús nangui quixí cojo xuta ladu rë me ne, cavechútáha me ngu cha tsëhë nandya vëhë xi hincha xitsehen xahasen rë cha. Cha vëhë ne, ha jemu tsëë xu xi vajin cha tsjian, hacuaha hacuiin cahntsua ndihya véjña cha ta ngajan tahndë véjña cha.
LUK 8:28 Xi cavëë xu cha Jesús ne, jercu cajindaya cha quiji caticjaxcun cha xcun me, hacuaha jercu hñu cachja cha cuitjin: ―‍¿Mé má cuatjin ninguisuhunjñu cojo ná ngayun Jesús, Quihndi rë Nina xi hatuxa jyë hnga cojo Hasen rë? Nihñu favor ne, xicatuun ná cjuañihi. ―‍Cuatjin xu cachja cha.
LUK 8:29 Cuatjin cachja cha ta, tsëhë xi Jesús ne, ha cavitexa me xitsehen xi cuetjuxin tsëhë cha. Ha jemu tsëë xu nduva nixtin xi visehen xitsehen xahasen rë cha. Hane xuta ne, tsihñu tsja tsihñu ntsacu me cha cojo cadena cojo sa xi ha quihndë cuetjiin cha cjue cha. Peru xi vicheya cha cadena ne, xitsehen ne, ficojo cjuachan rë cha ngajan ngu xín camahani tsëhë nandya. Jemu cjín ndiya xu xi cavatju cha camá cuatjin.
LUK 8:30 Ngajan xi Jesús ne, cuitjin xu cavinenguise me cha: ―‍¿Hacutjin hmí nuju? ―‍Cuatjin xu cachja me. Hane cha vëhë ne, cuitjin cafayangui cha: ―‍Sindadu Cjín. ―‍Cuatjin xu cachja cha. Cuatjin cachja cha ta, tsëhë xi jemu cjín xitsehen cavisehen xahasen rë cha.
LUK 8:31 Hane ngajan xi xitsehen xi cuacun jan ne, jemu cafehya xu favor cojo Jesús xi hacuiin cuitexa me xi cjue ngajan nduchin.
LUK 8:32 Hane tiña ngajan ne, jemu cjín xu chinga hinchataha chu tijinë chu ngajan ngu ndetjún. Hane xitsehen jan ne, cafehya cojo Jesús xi sua me cahndë́ xi cuisehen xitsehen jan xahasen rë chinga. Hane casua xu me cahndë́.
LUK 8:33 Hane xi cavetju xu xitsehen jan tsëhë xahasen rë cha vëhë ne, quiji cavisehen xahasen rë chinga. Hya xi camá xu ne, chinga jan ne, cavanga chu quijijne chu tsëhë rcu ndetjún, hane ngajan cavixuya xu chu ngajñi nandá tsëhë laguna, hane ngajan camiji rë chu nandá ne, ngajan cafë xu chu.
LUK 8:34 Ngajan xi xi cavëë xu cha xi sahmi cuidadu rë chu chinga jan xcusun xi camá ne, cavanga cha quiji casua cha camachaya rë nandya cojo ranchun xcusun vëhë.
LUK 8:35 Hya xi camá ne, xuta jan ne, cavetju xu me quiji cavutsejen me xcusun xi camá jan. Hane xi cavechútáha me Jesús ne, hacuaha cavëë me cha xi cavetju xitsehen xahasen rë jan, yaja xu cha ngu tsjian, hacuaha ha cavéjña chihin cjuatacun rë cha, tacun cha tiña ntsacu Jesús. Hane xuta jan ne, jemu catsacjun me camá.
LUK 8:36 Hane xuta xi cavëë xu xcusun xi camá jan ne, casuacuenda me cojo xuta xi yahnga jan hacutjin camá xi camandaja cha xi caxincha xitsehen xahasen rë jan.
LUK 8:37 Hya xi camá ne, yëjë xuta tsëhë ladu tsëhë nandya Gadara ne, cafehya xu me cojo Jesús xi cuetjuxin Jesús tsëhë xuta xi cuacun jan ta, tsëhë xi jemu catsacjun camaha ni yëjë me camá. Hane ngajan xi Jesús cojo xuta ladu rë me ne, cavisehen xu me barcu sehe cavuya nga me ngunda vihi.
LUK 8:38 Hane chaja sa xi cjue Jesús ne, cha xi cavetju xitsehen xahasen rë jan ne, cafehya cha cojo rë me xi cjue cha cojo rë me. Peru Jesús ne, catsinguijnetaha xu me cjua cojo rë cha, cachja me cuitjin:
LUK 8:39 ―‍Tuyun tjangun ndya nuju ne, hacuaha tinújun cojo xuta tsëhë cjuandaja xi cuacun casahmi Nina cojo nuju. ―‍Cuatjin xu cachja Jesús. Ngajan xi xi cavuya cafehe xu cha nandya ne, sehe cavetsihin catsujyihiya casuacuenda cha xuta jingujyë ni ngajñi nandya yëjë ni cjuandaja xi cuacun casahmi Jesús cojo cha.
LUK 8:40 Hya xi cavuya Jesús ngunda vihi ne, yëjë ni xutacjín jan ne, jemu ndaja cafahatsja xu me Jesús ta, tsëhë xi hatuxa siuya me me.
LUK 8:41 Hane hora vëhë ne, canduva xu ngu me xi hmí rë Jairo, me xi má xutaxa rë yungun. Hane quiji caticjaxcun xu me xcun Jesús. Hane cafehya me favor cojo Jesús xi cjue Jesús ndava me ta,
LUK 8:42 tsëhë xi me vëhë ne, tjin xu rë me ngu na lihndi xi quihndi ngu tsëhë me. Hane na lihndi vë ne, sacuaha tejó na nu. Hane meje cueya xu na. Ngajan xi Jesús ne, quiji xu me. Hane ngajñi cjui me ne, jemu tivehnchun xu xuta me.
LUK 8:43 Hane ngu na jan ne, tjin rë tejó nu xi yaha rë na chíhin xahmajni. Hane cafë tujún rë na cavechji na xcun doctor. Peru tsajin xu yo camá cafahaxin chíhin xi má rë na.
LUK 8:44 Hane xi quiji tiña na táha ngaxtun Jesús ne, quiji na casatëtsja na ntsacu tsjian rë me. Hya xi camá xu ne, ha tu ñahñu cavasen xi vanga rë na jni.
LUK 8:45 Ngajan xi Jesús ne, cachja xu me cuitjin: ―‍¿Yo xi casatëtsja ná? ―‍Cuatjin xu cachja me. Hane xi cachja yëjë xuta xi hacuiin me casatëtsja me ne, sehe cachja xu Pedru cuitjin: ―‍Tatá, xutacjín ne, tivehnchun nuju me, hacuaha hisca titsivaha nuju me. ―‍Cuatjin xu cachja Pedru.
LUK 8:46 Peru Jesús ne, cachja nga xu me cuitjin: ―‍Peru tjin yo xi casatëtsja ná ta ngahan ne, camachaya ná xi cavetju ná hitsë ngahñu. ―‍Cuatjin xu cachja Jesús.
LUK 8:47 Hane xi vutsejen na xi cumaji seyahma na ngajñi rë xuta ne, ña fatsë xu na quiji caticjaxcun na xcun Jesús. Sehe catsinguixi na xcun yëjë ni xuta mé má cuatjin quiji na casatëtsja na Jesús, cojo tsëhë xi ngutjen ni camandaja na.
LUK 8:48 Sehe ngajan xi Jesús ne, cuitjin cachja xu me cojo rë na: ―‍Ngayun tsan ne, camandaja ngayun ta, tsëhë xi camangutacún cojo ná. Cuma cuangun cojo cjuasua. ―‍Cuatjin xu cachja Jesús.
LUK 8:49 Tu tichja cuaha xu Jesús cojo na xi camandaja jan ne, cafehe nga ngu me xi canduva me tsëhë ndava xutaxa rë yungun jan, hane cuitjin xu cachja me cojo xutaxa rë jan: ―‍Quihndi nuju ne, ha cahme na. Ha quihndë xicatuhunndyuun rë maestru. ―‍Cuatjin xu cachja me.
LUK 8:50 Hane hya xi cahndë Jesús cjua vëhë ne, sehe cachja xu me cojo xutaxa rë jan cuitjin: ―‍Xicarcuun. Catamangutacún ni cojo ná ne, quihndi nuju ne, cumandaja na. ―‍Cuatjin xu cachja me.
LUK 8:51 Hya xi camá xu ne, xi cafehe Jesús ndava xutaxa rë yungun jan ne, casuaain me cahndë́ xi cojo jingu sa xuta cuisehen me. Suvá ni Jesús cojo Pedru cojo Juan cojo Jacobo cojo naa cojo nahmi rë nima lihndi jan cuisehen me cahntsua ndihya.
LUK 8:52 Hane yëjë ni xuta ne, hisca chja hisca jihnda xu me tsëhë nima jan. Ngajan xi Jesús ne, cuitjin xu cachja me cojo xuta jan: ―‍Ha quihndë xicachjihnduun. Na lihndi vë ne, hacuiin cahme na ta jiñafë na. ―‍Cuatjin xu cachja me.
LUK 8:53 Peru xuta jan ne, tu cavejnucëë xu me Jesús ta, tsëhë xi vëëndaja me xi cahme jain nima.
LUK 8:54 Hane xi cavisehen Jesús hiscan jiña nima lihndi jan ne, sehe quiji me cafaha me tsja, sehe ndaja hñu cachja xu me cuitjin: ―‍¡Tisatjinhngue, tsan! ―‍Cuatjin xu cachja me.
LUK 8:55 Hya xi camá xu ne, cavuya hasen rë nima, sehe ngutjen ni cavisatjenhnga na. Hane sehe cavitexa xu Jesús xi sua xuta rë na lihndi jan niñu sinë na.
LUK 8:56 Hya xi camá xu ne, xutacha rë na lihndi jan ne, jemu quijircun rë me. Ngajan xi Jesús ne, cachja xu me cojo xutacha rë na lihndi jan xi tsajin camahani yo cuichja me cojo xcusun xi camá.
LUK 9:1 Cavechú ngu nixtin xi casahmitangun xu Jesús xuta ladu rë me xi tejó jan ne, sehe casua rë me ngahñu hacuaha casua rë me xá xi me xi cuacun vëhë cuitexa xu me yëjë xitsehen hacuaha sahmi me xi xuta hmu rë ne, cuma ndaja xu me.
LUK 9:2 Hya xi camá xu ne, sehe catsingatju Jesús me xi sua me cumachaya rë xuta tsëhë gubiernu xi sahmi Nina hacuaha sahmi xuta xi cuacun vë xi xuta hmu rë ne, cuma ndaja xu me.
LUK 9:3 Hane cuitjin xu cachja Jesús cojo rë me: ―‍Xi cuetjun cuangun ne, tsajin camahani mé xi chuhun, hacuiin bastón ne, hacuiin changa, hacuiin niñu, hacuiin tujún, hacuaha hacuiin jo tsjian ngahma chuhun jima ngu ngayun.
LUK 9:4 Hacuaha xi cjuhun ngu ndihya ne, ha ngajan ni tinechun nguixun nguixun ni, hisca xi cuetjunxun tsëhë nandya vëhë.
LUK 9:5 Hya xi xuta tsëhë ngu nandya cjuahatsjaain nuju me ne, xi cuetjun tsëhë nandya vëhë ne, titsunu chojo rë ntsacun cojo sa xi cuma tsejen xi xuta jan cún rë me. ―‍Cuatjin xu cachja Jesús.
LUK 9:6 Sehe ngajan xi cavetju xu xuta ladu rë Jesús jan, quiji catsujyihiya me yëjë ni nandya tsëhë distritu Galilea, casua me camachaya rë xuta tsëhë cjuandajyihi xi chja tsëhë gubiernu xi sahmi Nina hacuaha casahmi me xi xuta hmu rë ne, camandaja xu me jingujyë ni ladu vëhë.
LUK 9:7 Hane Herodes, me xi cavitexa ngajan distritu Galilea ne, camachaya xu rë me yëjë xá xi tisahmi Jesús cojo xuta ladu rë me. Hane ngu cachajá xu cjuatacun rë me ta, tsëhë xi ngujo xuta ne, chja me ta Jesús ne, hacui nima Juan Vitenda rë Xuta, hacuaha handasa cahme xu nima Juan vë ne, peru cavuya cjuahñu.
LUK 9:8 Ngujo nga me ne, chja me ta profeta Elías xi cavuya, hane yahnga nga me ne, chja xu me ta ngu nima profeta xi hacjahi, xi cavéjña hatsëë nixtin ne, handasa cahme ne, peru cavuya cjuahñu.
LUK 9:9 Peru Herodes ne, catsingataha cacun xu me cuitjin: “Nima Juan ne, ha cavitéxa xi catisun rcu. Peru quihndë ¿yo rë cha xi cuajyihi vë xi jemu cjín cjua nuhya rë tsëhë cha?” Cuatjin xu catsingataha cacun me. Jemu casahmi xu me ngujyë xi scuëë me Jesús.
LUK 9:10 Hane xi cavuya xu apóstol tsëhë hiscan xi quiji me jan ne, sehe casuacuenda xu me Jesús xcusun xi casahmi me. Ngajan xi Jesús ne, quijicojo xu me suvá ni apóstol jan ngu cahndë xín, tiña tsëhë ngu nandya xi hmí Betsaida.
LUK 9:11 Peru xi camachaya rë xutacjín jan ne, quijitjengui xu me Jesús. Hane Jesús ne, jemu ndaja cafahatsja me xuta jan, hane sehe cachja me cojo xuta jan tsëhë gubiernu xi sahmi Nina. Hane xuta xi meje rë xi cuma ndaja me ne, casahmi xu Jesús xi camandaja me.
LUK 9:12 Hane xi quiji hora jan ne, xuta ladu rë Jesús xi tejó jan ne, quijivaha me xcun Jesús sehe cachja xu me cojo cuitjin: ―‍Tinújun cojo xutacjín vë ne, catji me nandya xi siu tiñataha o sá xi ranchun xi siu tiñataha, cojo sa xi cuanguise me cahndë́ xi cuiyuju me hacuaha cuanguise me xi sinë me ta, tsëhë xi jemu xín tsëhë nandya hiscan xi nechantahan vi. ―‍Cuatjin xu cachja apóstol.
LUK 9:13 Ngajan xi Jesús ne, cuitjin xu cachja me cojo apóstol jan: ―‍Ngayun tuhun xi sinë me. ―‍Cuatjin xu cachja me. Ngajan xi apóstol ne, cafayangui xu me cuitjin: ―‍Hñú tutu pan cojo jo ti tjin naja. ¿Há cuanguin chíhin niñu xi sinë yëjë xuta xi cuicun vi ni? ―‍Cuatjin xu cachja me.
LUK 9:14 Cuatjin cachja me ta, tsëhë xi ngajñi rë yëjë xuta xi siutahá jan ne, sacuaha hñú mil má xuta xi xihin. Sehe ngajan xi cachja xu Jesús cojo xuta ladu rë me jan cuitjin: ―‍Tinújun cojo rë xuta vë ne, catiyuju me sacuaha yachantë me ngu ngu cahndë́. ―‍Cuatjin xu cachja me.
LUK 9:15 Ngajan xi xuta ladu rë Jesús jan ne, cuatjin casahmi me, hane caviyuju xu yëjë xuta.
LUK 9:16 Hya xi camá ne, cafaha xu Jesús hñú pan cojo jo ti jan ne, hane xi cavutsejenniji me ngahnga ne, casua me nacuechji rë Nina, sehe cavotoho langa me pan hacuaha cavatëlanga me ti jan, sehe casua xu me cojo xuta ladu rë me xi cjue sua rë me xutacjín jan.
LUK 9:17 Hane xuta ne, yëjë ni me cajinë me hacutjin xi cachuya rë xahasen rë me. Hane xi cachjaya rë xi cavangui cajinë xuta jan ne, catsë xu tejó chajne.
LUK 9:18 Cuitjin camá nga ngundiya. Hya xi tisahmi xu Jesús oración rë me ne, xuta ladu rë me ne, hacuaha cojo me siu me cojo rë me. Sehe ngajan xi cavinenguise xu Jesús me cuitjin: ―‍¿Mé chja xutacjín jan ne, yo ngahan? ―‍Cuatjin xu cachja me.
LUK 9:19 Sehe ngajan xi cachja xu me cojo Jesús cuitjin: ―‍Yahnga me ne, chja me ta Juan Vitenda rë Xuta ngayun. Hane yahnga nga me ne, chja me ta profeta Elías ngayun. Hane me xi yahnga nga ne, chja me ta ngayun ne, ngu profeta xi hacjahi, xi cavéjña hatsëë nixtin, xi handasa cahme ne, peru cavuya cjuahñu. ―‍Cuatjin xu cachja xuta ladu rë Jesús.
LUK 9:20 Sehe Jesús ne, cuitjin xu cavinenguise nga me: ―‍Hane ngayun ne, ¿mé nújun ni, yo ngahan? ―‍Cuatjin xu cavinenguise Jesús. Ngajan xi Pedru ne, cuitjin xu cafayangui me: ―‍Ngayun xi catsingatju nuju Nina xi cumatitjun ngayun tsijin. ―‍Cuatjin xu cafayangui Pedru.
LUK 9:21 Peru Jesús ne, cavitexa xu me xuta jan xi tsajin camahani yo xi cuichja cojo me cjuatacun jan.
LUK 9:22 Cuitjin xu cachja me: ―‍Ngahan xi Quihndi rë Xuta Jain ngahan ne, hachu meje rë xi jemu cjín cjuañihi cuátju cuma; xuta changá cojo nahmi xi matitjun tsëhë nahmi cojo cha xi vicuya cjuachacun ne, tsitjungui me ngahan, tsiquehen me ngahan. Peru xi ma jyan nixtin ne, tsicuya Nina ngahan cjuahñu. ―‍Cuatjin xu cachja Jesús cojo xuta ladu rë me.
LUK 9:23 Hane sehe cavuya cachja nga me cojo yëjë ni xuta jan cuitjin: ―‍Sá xi tjin yo xi meje rë xi cuma xuta ladu naha matsejen ne, ha quihndë mijí rë xi sahmi hacutjin xi meje rë suvá matsejen ta nchunchujun ni matsejen ne, catejñahñu xahasen rë xi cjuecojo ndiya naha, handasa hisca cueya xcun cru.
LUK 9:24 Cuatjin matsejen ta, tsëhë xi yo xi meje cjuenduju cojo ngasunhndë rë cojo cjuatacun rë suvá matsejen ne, cuechintaain cjuahñu xatsë. Peru yo xi cuatju cjuañihi o hisca cueya ngatsë naha matsejen ne, vëhë xi cuechútáha cjuahñu xatsë.
LUK 9:25 ¿Mé machjirëhë rë yo xi sacú rë yëjë cjuanchina rë ngasunhndë sá xi cueya hacuaha cuma castigu?
LUK 9:26 Machjiriin matsejen ta, tsëhë xi yo xi ma sava rë ngatsë naha cojo ngatsë rë cjua naha matsejen ne, ngahan xi Quihndi rë Xuta Jain ngahan matsejen ne, hacuaha cuma sava ná tsëhë hya xi cuinduva cojo hasen ndajyihi naha hacuaha tsëhë Nahmi naha hacuaha tsëhë ángel xi vejña tsëhë me.
LUK 9:27 Nguehe cuichjá cojo nuju cjuaquixi matsejen ta tjin yahnga ngayun xi sechun nguehe xi cueyuun jinguyëjë rë xi cjëë chun gubiernu xi sahmi Nina. ―‍Cuatjin xu cachja Jesús.
LUK 9:28 Cuitjin camá nga xu ngundiya hya xi cavatju sacuaha jyin nixtin xi cavicuya Jesús cjua vëhë. Quijicojo me Pedru cojo Juan cojo Jacobo quijiniji xu me ngu ndetjún xi sahmi me oración rë me.
LUK 9:29 Hora xi tisahmi xu Jesús oración rë me ne, xcun me ne, cavindeya xcusun rë. Hane tsjian rë me ne, jercu tu tyava camahani camá, ña setí jyihi.
LUK 9:30 Hacuaha camatsejen xu jo xihin hinchacun visiajmi cojo rë me. Xihin jan ne, hacui xu nima profeta Moisés cojo profeta Elías.
LUK 9:31 Me xi cuacun vëhë ne, camatsejen me cojo ngu hasen ndajyihi, tivisiajmi xu me tsëhë cjuaveya xi hatuxa tjin rë xi cuechútáha Jesús ngajan Jerusalén.
LUK 9:32 Peru Pedru cojo jo sa me xi yahnga jan ne, ha siufë me, tsëhë xi jercu nijñá rë me. Peru xi cavascandaja xu rë me ne, cavëë me hacutjin jercu setí camahani tsejen hiscan secun Jesús, hacuaha cavëë xu me jo me jan hinchacuntangun me cojo Jesús.
LUK 9:33 Hya xi camá ne, hora xi tivetjuxin me xi cuacun vë tsëhë Jesús ne, sehe cachja xu Pedru cojo Jesús cuitjin: ―‍Tatá. Tu ma rë xi nguehe nechin ne, nihñi jyan puestu; ngu cuma tsujun ne, ngu cuma tsëhë Moisés, hane cojo ngu cuma tsëhë Elías. ―‍Cuatjin xu cachja Pedru, peru hisca hvíin me mé xi chja me.
LUK 9:34 Hane hora xi tichja xu Pedru cuatjin ne, canduva ngu yufí casahmi tjahnguen rë tsëhë me. Hane jemu catsacjun me camá xi caxinchavasen me tsëhë yufí jan.
LUK 9:35 Hya xi camá ne, canuhya xu rë ngujo cjua xi cavetju ngajñi yufí jan xi cachja cuitjin: ―‍Cha vihi xi Quihndi naha cha, cha xi ngahan cavejñá cácun xi tsingátju. Tinuhyun cjua xi chja cha. ―‍Cuatjin xu cachja cjua jan.
LUK 9:36 Hane xi cavatju cachja cjua jan ne, Jesús ne, camasuvá sa me secun me. Hya xi camá xu ne, jyan xuta ladu rë Jesús jan ne, tu caviyujujyuu ni me. Hane nixtin hya ne, cachjaain camaha xu ni me cojo hisca ngu tsëhë xcusun xi cavëë me.
LUK 9:37 Cuitjin camá nga xu camá nchujun hya xi canduvajne Jesús tsëhë ndetjún cojo jyan xuta ladu rë me jan. Tjercu cjín camahani xuta canduvatjengui xu rë me ndiya.
LUK 9:38 Hane ngajñi rë xutacjín jan ne, cavetjujñi ngu xihin xi jercu cajindaya xu cachja cojo Jesús cuitjin: ―‍Maestro, nihñu favor ne, nduvun chutsujun cha lihndi naha ta ngu tutu má cha vi xi tacun ná cha.
LUK 9:39 Hane cuitjin sahmi ngu xitsehen cojo rë cha: faha rë cha, hane tu ñahñu jindaya, sehe vitsuneya rë cha, ña vetju natyaxu hntsua cha, hane hisca hya xi ndiya cjuë cha ne, sehe vetjuxin tsëhë cha.
LUK 9:40 Xuta ladu nuju, caféhya rë me favor xi cuaxëxin me, peru camaji cavaxëxin me. ―‍Cuatjin xu cachja xihin jan cojo Jesús.
LUK 9:41 Sehe ngajan xi Jesús ne, cuitjin xu cafayangui me: ―‍Ngayujun ni ne, xuta xi macjaain rë ngayun hacuaha xuta xi cavetjuxin tsëhë ndiya ndajyihi ngayun. ¿Jani hisca hya xi tjin ná xi cuitejña cojo nuju? ¿Jani hisca hya xi tjin ná xi scaa ná cojo nuju? Nduvuncujun quihndi nuju nguehe. ―‍Cuatjin xu cafayangui me.
LUK 9:42 Hane hora xi tijima tiña xu cha lihndi jan tsëhë Jesús ne, xitsehen ne, catsiticja rë cha, hacuaha vitsuneya rë cha. Hya xi camá ne, cavatëcja Jesús tsëhë xitsehen, hane casahmi me xi camandaja xu cha lihndi jan. Sehe casua me cha cojo nahmi rë cha.
LUK 9:43 Hane yëjë ni xuta jan ne, jemu quijircun camaha xu ni rë me xi cuatjin jyë hnga Nina cojo Hasen rë me. Hane jinguyëjë rë xi cuatjin tifircun rë xutacjín jan tsëhë yëjë ni xcusun xi sahmi Jesús ne, cachja xu me cojo xuta ladu rë me cuitjin:
LUK 9:44 ―‍Ndaja tetuhunrcun cjua xi tichjá cojo nuju vi: Ngahan xi Quihndi rë Xuta Jain ngahan ne, hatuxa tjin xi cuma ngahan entregadu tsja xuta. ―‍Cuatjin xu cachja me.
LUK 9:45 Peru xuta ladu rë Jesús jan ne, cavijnii rcu me mé vijne cjua jan ta, tsëhë xi casetsa xu rë cjuatacun rë me, cojo sa xi cuijnii rcu me. Hacuaha tsacjun xu me xi cjuinenguise me Jesús mé vijne cjua vëhë.
LUK 9:46 Ngu nixtin jan ne, cavetsihin sacuaha xi meje scaanya xu xuta ladu rë Jesús ngajñi rë me yo xi hitsë sa matitjun.
LUK 9:47 Peru Jesús ne, xi ha vëë me hacutjin tsingataha cacun xuta ladu rë me jan ne, sehe cafaha me ngu lihndi cavisecun me ndaya rë me,
LUK 9:48 sehe cachja xu me cojo xuta ladu rë me jan cuitjin: ―‍Tu yo ni xi cjuahatsja rë lihndi vihi tsëhë xi ladu naha má ne, hacuaha hora vëhë cjuahatsja ná ngahan. Hacuaha xi cuatjin cjuahatsja ná ngahan ne, hacuaha cjuahatsja rë Nina xi catsingatju ná. Hane tu yo ni xi má nuju xi ma tjengui tsëhë ngajñi nuju ngayujun ni ne, vëhë xi matitjun xi má rë Nina. ―‍Cuatjin xu cachja Jesús.
LUK 9:49 Ngajan xi Juan ne, cachja xu me cojo Jesús cuitjin: ―‍Tatá, cahyin ngu me xi tivaxëxin xitsehen sacuaha xi suvun catuhun rë me xá. Hane canújin cojo rë me xi ha quihndë sahmii me cuatjin ta, tsëhë xi me vëhë ne, tsujyihintjenguiin me ngayun sacuatjin niji ngayin. ―‍Cuatjin xu cachja me.
LUK 9:50 Hane Jesús ne, cuitjin xu cafayangui me: ―‍Xicanujuun cojo rë me cuatjin ta, tsëhë xi xuta xi hacuiin condra naja má me ne, hatuxa favor naja fi me. ―‍Cuatjin xu cachja Jesús.
LUK 9:51 Hya xi camá ne, xi tijima tiña xu nixtin xi cjueniji Jesús ngajan ngahnga ne, cavejñahñu me cjuatacun rë me xi cjue me ngajan Jerusalén.
LUK 9:52 Vëhë xi catsingatju titjun xu me jo xuta ladu rë me. Xi quiji me ne, cafehe me ngu nandya tsëhë xuta Samaria, xi cuanguise me cahndë́ xi cuejña Jesús cojo xuta ladu rë me.
LUK 9:53 Peru xuta jan ne, cafahatsjaain xu me Jesús ta, tsëhë xi Jesús ne, hatuxa tjin cacun me xi cjue me hisca Jerusalén.
LUK 9:54 Peru hya xi camachaya xu rë Jacobo cojo Juan, xuta ladu rë Jesús, cjua vëhë ne, cachja xu me cojo Jesús cuitjin: ―‍Tatá. ¿Há nihña sacuatjin casahmi profeta Elías hatsëë nixtin? ¿Há cuitexan xi cuinduva ndihi tsëhë ngahnga, tsicjë rë xuta xi cuicun vi? ―‍Cuatjin xu cachja me.
LUK 9:55 Ngajan xi Jesús ne, cavuya vutsejen me xuta ladu rë me jan ne, sehe cavatëcja xu me cjuatacun xi tsingataha cacun me xi cuacun jan, cuitjin cachja me: ―‍Ngayun ne, hyúun mé xcusun Hasen xi tsëhë nuju.
LUK 9:56 Ngahan xi Quihndi rë Xuta Jain ngahan ne, hacuiin canduvá xi tsicjë́ xuta ta xi canduvá ne, xi cuáxëtjë me. ―‍Cuatjin xu cachja Jesús. Sehe quiji xu me ngu nga nandya.
LUK 9:57 Hane ndiya cjui Jesús cojo xuta ladu rë me ne, cachja xu ngu me jan cojo rë me cuitjin: ―‍Tatá. Tu yani ni xi cuangun ne, cjuë́ cojo nuju. ―‍Cuatjin xu cachja me.
LUK 9:58 Sehe ngajan xi Jesús ne, cuitjin xu cachja me cojo xuta jan: ―‍Chu ninda ne, tjin nguijo hiscan viyuju chu, hane nisë xi vitjen chu ngahnga ne, tjin ndava chu, peru ngahan xi Quihndi rë Xuta Jain ngahan ne, hisca ndya naha tsajin. ―‍Cuatjin xu cachja me.
LUK 9:59 Cachja sa xu me cuitjin cojo ngu nga xuta jan: ―‍Nduvun, cuanguen cojo ná. ―‍Cuatjin xu cachja me. Peru xuta jan ne, cuitjin xu cachja me: ―‍Tatá. Tuhun ná cahndë́, titjun cjuë́ xi seyaniji nahmi naha. ―‍Cuatjin xu cachja ngu nga xuta jan.
LUK 9:60 Ngajan xi Jesús ne, cuitjin xu cachja me: ―‍Xuta xi sacuaha xi cahme cjuatacun rë me xi sahmicuendaain me Nina ne, me vëhë catinchaniji me nima rë me. Peru ngayun ne, tángun tuhun cumachaya rë xuta tsëhë gubiernu xi sahmi Nina. ―‍Cuatjin xu cachja me.
LUK 9:61 Ngu nga xuta ne, cachja xu me cojo Jesús cuitjin: ―‍Tatá. Ngahan ne, hacuaha cjuë́ cojo nuju. Peru tuhun ná cahndë́, cjuë́ tsinguíjnetaha cjua cojo xuta naha. ―‍Cuatjin xu cachja xuta jan.
LUK 9:62 Peru Jesús ne, cuitjin xu cachja me cojo xuta jan: ―‍Ngu xuta xi ha cavejña cacun me xi cjuetjengui me ndiya rë Nina sehe cumangu cumajo cacun me ¿há cjue, há cjuiin me ne?, tangun me cojo ngu cha xi ha cafaha cha ndetsihin latu xi cuetsihin cuacjan cha nangui peru tivutsejen sa cha taha ngaxtun cha. Sacuatjin machjiriin cha vihi xi cuacjan cha nangui ne, hacuanitjin ni machjiriin me vëhë xi cuisecoo me Nina hiscan xi sahmi Nina gubiernu. ―‍Cuatjin xu cachja Jesús.
LUK 10:1 Xi cavatju xu vëhë ne, sehe casuaxa Nai naja jyanchan tejó sa xuta ladu rë me, sehe catsingatju titjun me chuva jo chuva jo xuta jan yëjë ni nandya cojo yëjë ni cahndë́ xi catsingataha cacun Jesús xi sehe cjue me.
LUK 10:2 Hane cuitjin xu cachja me cojo: ―‍Jemu tjin camahani xuta xi meje cuisiñuju me cjua rë Nina, peru me xi sua cumachaya rë xuta ne, jemu chuva má me. Vëhë xi meje rë xi chjahyun rë Nina favor xi tsingatju me me xi cjue sua cumachaya rë xuta cjua rë Nina.
LUK 10:3 Tángun ni. Ngahan titsingátju nuju ngayun xuta jeya ngajñi rë xuta hnga cacun, sacuaha cjue ngu chu hnditsánga ngajñi rë chu cjan rë.
LUK 10:4 Xicachjuun tujún, xicachjuun changa, hacuaha xicachjuun chuxinxtë. Xicavisiajmuu cojo xuta hora xi sacu xingun cojo rë me ndiya.
LUK 10:5 Hane tu jarë ni ndihya xi cuisuhun ne, titjun tinújun ngu nina cuitjin: “Nina sua nuju me cjuandaja cjuajeya.” Cuatjin tinújun.
LUK 10:6 Hane sá xi ndihya vëhë tjin quihndi tsëhë cjuajeya ne, hacuaha sacú rë me cjuajeya. Peru sá xi hacuiin quihndi tsëhë cjuajeya xi siu jan ne, sacuiin rë me.
LUK 10:7 Hane xi cuisuhun ngu ndihya ne, ha ngajan ni tinechun, xinu siuhun cojo rë me mé xi sua me. Cuatjin nihñu ta, tsëhë xi ngu xuta xi sahmi me xá ne, vechú chuva rë xi sacú chji rë me. Vëhë xi mijí rë xi cuangun nguehe cuangun ngajan cuinechun.
LUK 10:8 Hane tu jarë ni nandya xi cuisuhun hiscan xi cjuahatsja nuju xuta ne, xinu xcusun xi sua me xinu,
LUK 10:9 hacuaha nihñu xi xutahmu rë tsëhë nandya jan ne, cumandaja me, hacuaha cuitjin tinújun cojo yëjë xuta: “Ha camatiña nixtin xi cuma nuju xi sahmi Nina gubiernu.” Cuatjin tinújun.
LUK 10:10 Hane tu jarë ni nandya xi cuisuhun hiscan xi cjuahatsjaain nuju xuta ne, xi chjuhun ndiya xi cuetjunxun tsëhë nandya vëhë ne, cuitjin tinújun cojo xuta:
LUK 10:11 “Hisca chojo rë ngajñi nandya nuju xi cavaqui rë ntsacuin ne, cuitsuni cojo sa xi cuma tsejen xi ngayun cún nuju. Peru meje rë xi cuijne rcun xi ha camatiña nixtin xi sahmi Nina gubiernu.” Cuatjin tinújun.
LUK 10:12 Cuichjá cojo nuju ta hya xi cuechú nixtin xi tsichuva Nina xuta tsëhë jyë́ rë me ne, hitsë sa jyë castigu cuatju xuta tsëhë nandya xi fahatsjaain nuju, xi cuma rë xuta tsëhë nandya Sodoma xi jercu tu casahmi camahani me cjuatsehen.
LUK 10:13 ’¡Jemu chojyihi tsëhë xuta nandya Corazín! ¡Hacuaha jemu chojyihi tsëhë xuta nandya Betsaida! Jemu chojyihi tsëhë me ta, tsëhë xi miji tsindeya me cjuatacun rë me, handasa cavëë me cjuarcun xi casahme ngajñi rë me. Xuta nandya Tiro cojo xuta nandya Sidón ne, hisca hacuiin xuta ladu rë Nina má me sacuatjin rë xuta Corazín cojo Betsaida. Peru sá xi xuta Tiro cojo Sidón cavëë me cjuarcun xi cuacun vë ne, ha catsindeya me cjuatacun rë me, hacuaha ha cavajá me tsjian xi sacuaha tsánaxá hacuaha caviyuju me ngajñi ndesu, sacuaha xcusun naja, cojo sa xi cuma tsejen xi jemu choho má jain rë me tsëhë jyë́ rë me.
LUK 10:14 Vëhë xi hya xi tsichuva Nina yëjë xuta tsëhë jyë́ rë me ne, xuta nandya Tiro cojo xuta nandya Sidón ne, hitsë sa chúva castigu cuatju me cuma xi cuma rë xuta Corazín cojo xuta Betsaida.
LUK 10:15 Hane xuta nandya Capernaum ne, ¿há cjue me hisca ngahnga hiscan tacun Nina? ¡Hacuiin! Hatuxa cjue me nduchin, cahndë́ hiscan ma hasen rë nima castigu.
LUK 10:16 ’Xuta xi cuihndë me tsujun ne, hacuaha tivihndë me tsahan. Hane xuta xi tsitjungui nuju me ne, hacuaha titsitjungui me ngahan. Hane xuta xi tsitjungui ná me ne, hacuaha titsitjungui me Nina xi catsingatju ná. Cuatjin xu cachja Jesús cojo xuta ladu rë me, sehe cavetju xuta ladu rë me jan quiji me.
LUK 10:17 Hya xi camá ne, xi cavuya xu xuta ladu rë Jesús xi jyanchan tejó jan ne, jercu sua rë xahasen rë me. Hane cuitjin xu cachja me cojo Jesús: ―‍¡Tatá! ¡Xi veyinnanguin ñihi nuju hora xi tinihñí xá xi cavitexun niji ne, hisca xitsehen vihndë tsijin! ―‍Cuatjin xu cachja xuta xi cuacun jan.
LUK 10:18 Sehe ngajan xi Jesús ne, cuitjin xu cachja me cojo xuta jan: ―‍Jinguyëjë rë xi tivutsején ngahnga hiscan tacun Nina ne, cjanengui Satanás sacuaha camá ni ngu ndihichuhún. Hane cuatjin cahvë xi tichjahátáha rë gubiernu xi sahmi Satanás.
LUK 10:19 Chutsujun ni, ngahan casuá nuju chuva rë xi tsajin mé cuatjun cuma, handasa nunú chu yë o sá nunú chu naya o sá xi suvá camahani Satanás choho meje sahmi cojo nuju.
LUK 10:20 Hacuiin ndaja cuma nuju tsëhë xi vihndë xitsehen tsujun ta xi meje rë ne, ndaja catama nuju tsëhë xi ha quitaháxujun ñihi nuju ngajan ngahnga. ―‍Cuatjin xu cachja Jesús cojo xuta ladu rë me jan.
LUK 10:21 Hane ha hora vëhë ni ne, Hasen rë Nina casahmi xi jemu sua camahani camá rë xahasen rë Jesús, sehe cachja xu me cuitjin cojo Nina: ―‍Ngayun nahmi naha ne, sahmejyë sahmehnga nuju cojo Hasen nuju, ngayun xi Nai rë ngahnga cojo nangui ngayun, tsëhë xi ngayun caveyúnhmu cjuatacun vëhë xi cuma rë xuta xi jemu vechú cjuatacun rë, hane catuhun camachaya rë xuta xi hvíin camahani. Ngayun nahmi naha, cuatjin canihñu ta, tsëhë xi cuatjin xi cachuya nuju. ―‍Cuatjin xu cachja Jesús cojo Nina.
LUK 10:22 Hane xi cojo yëjë ni xuta ne, cuitjin xu cachja me: ―‍Yëjë ngarca ni matsejen ne, Nina Nahmi naha casua ná me. Tsajin hisca ngu xi vëë yo xi Quihndi rë Nina matsejen ta suvá ni Nina Nahmi naha xi vëë me. Hacuaha tsajin hisca xi ngu xi vëë yo xi Nahmi naha matsejen ta suva ni ngahan xi Quihndi rë me ngahan xi hvë, cojo tu yo ni xi ngahan meje suá cumachaya rë. ―‍Cuatjin xu cachja me cojo yëjë xuta.
LUK 10:23 Cavuya vutsejen nga me hiscan siu xuta ladu rë me ne, sehe cachja xu me cojo suvá ni me xi cuacun vëhë cuitjin: ―‍Jemu ndaja tsujun ngayujun ni xi tichutsujun xcusun xi tijima nixtin vihi.
LUK 10:24 Nguehe cuichjá cojo nuju ta jemu ndaja tsujun ta, tsëhë xi hacuaha jemu cjín profeta hacuaha jemu cjín xuta xi matitjun xi caviyuju titjún ne, jemu meje scuëë me xcusun xi ngayun tichutsujun, peru casacuiin cavëë me. Hacuaha jemu meje cuisiñuju me cjua xi tivisiñuju ngayun, peru casacuiin cavisiñuju me ta, tsëhë xi cjëë cuma xcusun vëhë nixtin hya. ―‍Cuatjin xu cachja Jesús cojo xuta ladu rë me.
LUK 10:25 Ngundiya nga hya xi tacun xu Jesús cojo xuta ne, casecun ngu cha xi vicuya cjuachacun cavinenguise xu cha cuitjin xi cjuahachuva cha me: ―‍Maestro. ¿Mé ndatjin xi sahme cojo sa xi cuéchutáha cjuahñu xatsë xcun Nina? ―‍Cuatjin xu cavinenguise cha me.
LUK 10:26 Ngajan xi Jesús ne, cuitjin xu cachja me cojo cha: ―‍¿Hacutjin camahindu xcun ley rë Moisés? ¿Mé xi chutayun jan? ―‍Cuatjin xu cachja me.
LUK 10:27 Hane xi cafayangui cha ne, cuitjin xu cachja cha: ―‍“Meje rë xi nihmutacún Nina naja cojo nguñajatacún, cojo yëjë xahasen nuju, cojo yëjë ngahñu nuju, cojo yëjë cjuatacun nuju, hacuaha cuatjin nihmutacún xingun sacuatjin hmutacún suvun yojo nuju.” ―‍Cuatjin xu cachjasun cha cjua rë ley.
LUK 10:28 Hane cuitjin xu cachja Jesús cojo cha: ―‍Cjuaquixi cjua xi canújun. Cuatjin nihñu, sehe cuechuntuhun cjuahñu xatsë. ―‍Cuatjin xu cachja Jesús.
LUK 10:29 Ngajan xi cha xi vicuya cjuachacun jan ne, xi meje tsingacun cha xi jemu quixi cha cojo cjuatacun rë cha ne, cuitjin xu cavinenguise cha cojo Jesús: ―‍¿Yo xi xingueen ni? ―‍Cuatjin xu cachja cha.
LUK 10:30 Hane ngajan xi Jesús ne, cojo ngu ejemplu cafayangui xu me tsëhë cha cuitjin: ―‍Cuejña ne xi ngu xuta jan ne, cavetju me tsëhë nandya Jerusalén ne, cjui me nandya Jericó. Hane ndiya cjui me ne, cavechútáha ngujo cha chëjë me. Hane cafahatahá cha yëjë tsëhë me xi yaha me, sehe cavaja cha me. Ña catsiquehenñaja cha me, hane sehe cavanga cha.
LUK 10:31 Hya xi camá ne, hora vëhë canduva ngu nahmi cavatju me ndiya vëhë, hane xi cavëë me xuma xuta xi casacuhmu rë jan ne, tjehen ndiya ladu xingu cavatju me quiji me.
LUK 10:32 Ha chuva vëhë ni ne, cafehe ngu sangrista cahndë́ vëhë. Hane xi cavëë cha xi jiña me xi casacuhmu rë jan ne, cavetahaxin cha hitsë ndiya rë cha sehe cavatju cha quiji cha.
LUK 10:33 Peru ngu cha tsëhë distritu Samaria xi quiji cha ndiya vëhë ne, cafehe cha hiscan jiña xutahmu rë jan. Hane xi cavëë cha me ne, jemu camayuma rë cha me.
LUK 10:34 Hane xi quijivaha cha xcun me ne, catsirqui cha me, cavitejnu cha aceite cojo xan hiscan casacuhmu rë me sehe catsitjinguiya cha me tsjian. Hya xi camá ne, sehe catsiquijin cha me naxin rë cha, sehe quijicojo cha me ngu ndihya hiscan xi hatuxa ndihya viyuju xuta, hane ngajan casahmi cha me cuidadu.
LUK 10:35 Hane xi camá nchujun jan ne, cavaxë cha jo denario, tujún xi faha ngu mosu xi sahmixa jo nixtin, sehe casua cha me xi nai rë ndihya jan, sehe cachja cha cojo rë me cuitjin: “Nihñu cjuandaja ne, chjuhuncuendun xuma xutahmu rë vi. Hane xi quisun sa nicujun tsëhë xcun tujún xi suá nuju vi ne, xi cúya ne, sehe cuechjë tsujun.” Cuatjin cachja cha Samaria.
LUK 10:36 Ngajan xi Jesús ne, xi cuatjin cajnetaha ejemplu xi cachja me ne, sehe cachja xu me cojo cha xi vicuya cjuachacun jan cuitjin: ―‍¿Jarë tsëhë catsijyan xuta xi cuacun vë xi má nuju xi cjuaquixi xi camá xicjin me xi cavanguihmu chëjë jan? ―‍Cuatjin xu cachja Jesús.
LUK 10:37 Ngajan xi cha xi vicuya cjuachacun jan ne, cuitjin xu cafayangui cha tsëhë Jesús: ―‍Cha xi ngatsë rë cjuayuma ne, casahmi cjuandaja cojo me xi casacuhmu rë jan. ―‍Cuatjin xu cachja cha. Hane Jesús ne, cuitjin cachja nga xu me cojo cha: ―‍Quihndë xi cuangun ne, hacuaha cuatjin nihñu. ―‍Cuatjin xu cachja Jesús.
LUK 10:38 Hane xi cjui sa xu Jesús cojo xuta ladu rë me ne, xi cavisehen me ngu nandya jan ne, ngu na xi hmí rë Marta ne, cafahatsja na Jesús ndava na.
LUK 10:39 Na Marta jan ne, tjin ngu tíchja na xi hmí rë María. Hane na María jan ne, quiji xu na cavéjña na táha ntsacu Jesús, tivisiñuju na cjua xi tivicuya me.
LUK 10:40 Peru na Marta ne, jemu cjín xcunya xá xi tisahmi na. Hane xi cavatju na hiscan tacun Jesús ne, cuitjin xu cachja na: ―‍Tatá. ¿Há marcuaain nuju xi na tichja ne, cavejñasuva ná na cojo xá xi tacunvasen tisahme? Tinújun cojo rë na, catisecoo na ngahan. ―‍Cuatjin xu cachja na.
LUK 10:41 Ngajan xi Jesús ne, cuitjin xu cafayangui me tsëhë na: ―‍Marta, jercu marcun nuju tsëhë jemu cjín xcusun.
LUK 10:42 Peru ngu xcusun ni xi sahmi ngujyë. Na María ne, cavaxijin na xcusun xi ndaja vë, hane hacuiin chjahátahá rë tsëhë na. ―‍Cuatjin xu cachja me.
LUK 11:1 Cuitjin camá xu ngundiya hya xi tisahmi Jesús oración rë me ngu cahndë́ jan. Hane xi cajnetaha casahmi me oración rë me ne, ngu xuta ladu rë me jan ne, cuitjin xu cachja me cojo Jesús: ―‍Tatá. Ticuyun niji hacutjin nihñi oración niji, sacuatjin cavicuya Juan xuta ladu rë me. ―‍Cuatjin xu cachja me.
LUK 11:2 Ngajan xi Jesús ne, cuitjin xu cafayangui me: ―‍Hya xi nihñu oración ne, cuitjin tinújun: Ngayun Nahmi niji, meje niji xi ngayijin ni xuta ngasunhndë chjihinrcuin nuju. Meje niji xi cuinduvun nihñu niji gubiernu.
LUK 11:3 Nchunchujun ni tuhun niñu xi xiní.
LUK 11:4 Ninchatuhun niji tsëhë jyë́ xi jemu quitjin ta ngayin suvin ne, hacuaha tininchatihin rë yëjë ni xuta xi quitjen me jyë́ tsijin. Xicatuun cahndë́ xi chjaháchuva niji cojo cjuatacun niji. Cuatjin tinújun. ―‍Cuatjin xu cachja Jesús cojo xuta ladu rë me.
LUK 11:5 Hya xi camá ne, cachja nga xu Jesús ngu ejemplu cojo xuta ladu rë me. Cuitjin xu cachja me: ―‍Cuejña ne xi ngayun tjin nuju ngu xuta xi vinga nuju, hane vasen nixten cuangun ndava me, cuinújun cojo rë me cuitjin: “Amigu, nihñu favor tuhun jyan niñu scuxétaha ta,
LUK 11:6 tsëhë xi ngu amigu naha cafehe ndya naha xi cjui me ngu nangui, hane tsajin ná mé xi suá sinë me.” Cuatjin cuinújun cojo rë me.
LUK 11:7 ¿Há cjuayangui me tsujun cuitjin tsëhë hisca cahntsua ndihya?: “Xicatuhunndyuun ná ta tingotjo ndihya ne, ha tichjá, hacuaha quihndi naha ne, nguehe siufë cojo ná. Cumaji cuisátjenhnga suá nuju.” ¿Há cuatjin cjuayangui me tsujun? Hacuiin cuatjin.
LUK 11:8 Cuichjá cojo nuju ta handasa amigu nuju me, peru hacuiin ngatsë rë vëhë xi cuisatjenhnga me sua nuju me ta ngatsë rë xi ngajan cjui ngajan nduva cuinújun ne, cuisatjenhnga me sua nuju me ha tucutjin xi chjahyun.
LUK 11:9 Hacuaha cuichjá cojo nuju cuitjin: Chjahyun rë Nina, hane sua nuju me. Tinchunsun, hane sacú nuju. Tinújun, hane Nina ne, sua me cahndë́ cuisuhun.
LUK 11:10 Cuatjin nihñu ta, yëjë ni xuta xi fehya me ne, fahatsja me, hane yo xi vanguise ne, sacu rë, hane yo xi chja ne, sacu cahndë́ visehen.
LUK 11:11 ’Tsajin ngu nahmi xi, hya xi quihndi rë me cjuehya ngu niñu ne, cahndë́ rë xi sua me ngu niñu ne, sua me ngu ndyojo, o sá xi hya xi quihndi cjuehya ngu chu ti ne, cahndë́ rë xi sua me ngu chu ti ne, sua me ngu chu yë,
LUK 11:12 o sá xi hya xi quihndi cjuehya ngu chjoo ne, sua me ngu chu naya.
LUK 11:13 Ngayun xi tsehen cjuatacun nuju ne, ma tuhun rë quihndi nuju xcusun xi ndaja. Hitsë guan Nahmi naja xi tacun me ngahnga ta hitsë sa jercu meje sua me Hasen rë me cojo xuta xi cjuehya rë me. ―‍Cuatjin xu cachja Jesús.
LUK 11:14 Cavechú xu ngu nixtin xi cavaxëxin Jesús ngu xitsehen xi casahmi lihmi rë ngu cha jan. Hane hya xi cavetju xitsehen jan ne, cha lihmi jan ne, cavetsihin cachja cha. Hane xutacjín jan ne, jemu quijircun rë me.
LUK 11:15 Hya xi camá ne, ngujo xuta jan ne, cuitjin xu cachja me: ―‍Beelzebú, xitsehen xi matitjun ne, vëhë casua rë cha xá xi vaxëxin cha xitsehen. ―‍Cuatjin xu cachja xuta jan.
LUK 11:16 Hane ngujo nga xuta ne, xi meje cjuahachuva me Jesús ne, cafehya me me xi sahmi me ngu cjuarcun xi cuinduva ngajan ngahnga.
LUK 11:17 Peru Jesús ne, tsëhë xi ha vëë me mé xi tsingataha cacun xuta xi cuacun jan ne, cuitjin xu cachja me: ―‍Hya xi xuta tsëhë ngu nandya ticjan me ngajñi rë me cojo xicjin me ne, nandya vëhë ne, ha tivéjña xahva, hisca ndihya ne, tivixusun xcun xicjin.
LUK 11:18 Hacuanitjin ni sá xi Satanás scaan cojo xitsehen xi yahnga xi hacuaha Satanás má nai rë ne, tsichajá ngahñu rë xi vëhë matitjun. Cuatjin chjá ta, tsëhë xi nújun xi Beelzebú casua ná xá xi vaxë́xen xitsehen.
LUK 11:19 Peru sá xi Beelzebú casua ná xá xi vaxë́xen xitsehen ne, hacuaha ha Beelzebú vëhë casua rë ngu ngu xuta ladu nuju xá xi hacuaha vaxëxin me xitsehen. Vëhë xi ha me vëhë ni cuichja me xi cuaaintjin xi nújun xi Beelzebú casua ná xá.
LUK 11:20 Peru sá xi Nina casua ná me xá xi vaxë́xen xitsehen ne, ngajan matsejen xi gubiernu xi sahmi Nina ne, ha tivetsihin.
LUK 11:21 ’Satanás ne, tangun cojo ngu cha xi jemu hñu ngahñu rë. Hya xi ha ndaja tjin chjine cha cojo quicha rë cha xi sahmi cuidadu cha ndava cha ne, yëjë xcusun xi tjin rë cha ne, hacuaha ha ndaja cuidadu tjin.
LUK 11:22 Peru ngahan ne, tangun ngahan cojo ngu me xi hitsë sa jemu hñu camahani ngahñu rë. Hya xi me xi hitsë sa hñu ngahñu rë scaan me cojo cha xi hñu ngahñu rë jan hacuaha tsinguijne me cha ne, cjuahatahá me quicha xi vetaha cacun cha xi cuaxëtje rë cha, hane sehe cuatëcja me yëjë xcusun xi tjin rë cha jan ngajñi rë me cojo xicjin me.
LUK 11:23 ’Xuta xi fiin me favor naha ne, condra naha má me. Hane xuta xi visecuaain ná me xi nihñi tangun cjuatacun rë xuta cojo Nina ne, tsinguetsun me cjuatacun rë xuta. ―‍Cuatjin xu cachja Jesús.
LUK 11:24 Hya xi camá ne, Jesús ne, quijinduju sa xu cachja me cuitjin: ―‍Hya xi vetjuxin xitsehen tsëhë xahasen rë ngu xuta hiscan xi camá sacuaha ndava xitsehen jan ne, fi táha hiscan jemu nangui quixí camahani, vanguise cahndë́ hiscan xi cuejñajenda. Hane xi sacuiin rë cahndë́ hiscan cuejñajenda ne, cuitjin tsingataha cacun: “Cúya rë cjuë́ ndya naha hiscan xi cavétjuxen.” Cuatjin tsingataha cacun xitsehen jan.
LUK 11:25 Hane xi vuya fehe xitsehen jan cahntsua xahasen rë xuta jan ne, vutsejen xitsehen jan cahntsua xahasen jan sacuaha ngu ndihya xi caxtecha tyjahi tyjahi, hacuaha siundaja chichihin ngu tsë́ ngu xtí.
LUK 11:26 Xi vutsejen xitsehen jan xi cuatjin jyihi jan ne, sehe fi jaha sa rë yatu sa xitsehen xi hitsë sa tsehen xi cuma rë vëhë ne, sehe visehen nga viyujucahndë́ jan. Peru xi ma ngascan ne, hitsë sa chojyihi tsëhë xuta vëhë xi cuma rë titjún. ―‍Cuatjin xu cachja Jesús.
LUK 11:27 Peru jinguyëjë rë xi tichja xu Jesús cjua vëhë ne, ngu na xi jiyajñi ngajñi rë xutacjín jan ne, cajindaya na cachja xu na cuitjin: ―‍Jemu ndaja tsëhë chjuun xi catsin rë ngayun, hacuaha jemu ndaja tsëhë ndanisin xi cavacuntuhun. ―‍Cuatjin xu cachja na.
LUK 11:28 Peru Jesús ne, cuitjin xu cafayangui me tsëhë na: ―‍Quixi, peru hitsë sa ndaja tsëhë xuta xi visiñuju me cjua rë Nina hacuaha vihndë me tsëhë. ―‍Cuatjin xu cafayangui Jesús.
LUK 11:29 Vëhë ta jima tangun camaha sa xutacjín jan ne, cavetsihin cachja xu Jesús cuitjin: ―‍Ngayujun ni ngayun xuta tjë rë Israel tsëhë nixtin vihi matsejen ne, hatuxa tsehen cjuatacun nuju. Tichjahyun ngu seña xi sahmi Nina, peru sacuiin nuju matsejen ta ngu ni seña xi sacú nuju matsejen ne, sacuaha seña xi catsingacun profeta Jonás hatsëë nixtin.
LUK 11:30 Sacuatjin rë profeta Jonás xi me vëhë camá me ngu seña xi cuma rë xuta nandya Nínive hatsëë nixtin matsejen ne, ha cuanitjin ni ná ngahan xi Quihndi rë Xuta Jain ngahan matsejen ta ngahan cuma ngahan seña xi cuma nuju ngayujun ni xi nechun nixtin vihi.
LUK 11:31 Hya xi cuechú nixtin xi tsichuva Nina xuta tsëhë jyë́ rë me matsejen ne, na xi cavitexa ngajan nangui Sabá hatsëë nixtin matsejen ne, cjue cuinchajyë nuju na ngayujun ni ngayun xuta tjë rë Israel xi nechun nixtin vihi. Cuatjin sahmi na matsejen ta, tsëhë xi jercu tu cjin camahani xi canduva na xi cuihndë na cjuatacun ndacun xi jercu tu ma camahani rë Salomón, me xi cavitexa rë xutachanga naja hatsëë nixtin. Peru ha tejña ngahan nguehe sacuaha ngu seña xi hitsë sa vengui chji rë xi cuma rë Salomón.
LUK 11:32 Hacuaha hya xi cuechú nixtin xi tsichuva Nina xuta tsëhë jyë́ rë me matsejen ne, yëjë xuta nandya Nínive matsejen ne, cjue cuinchajyë nuju me ngayujun ni ngayun xuta tjë rë Israel xi nechun nixtin vihi. Cuatjin sahmi me matsejen ta, tsëhë xi me xi cuacun vëhë matsejen ne, catsindeya me cjuatacun rë me hya xi casua profeta Jonás camachaya rë me cjua rë Nina. Peru ha tejña ngahan nguehe sacuaha ngu seña xi hitsë sa vengui chji rë xi cuma rë profeta Jonás. ―‍Cuatjin xu cachja Jesús.
LUK 11:33 Hane xi quijinduju sa cachja me ne, cuitjin xu cachja me: ―‍Tsajin hisca xi ngu xuta xi ha xcun xi ha cavatju cavetaha rë me ngu ndihi matsejen ne, faha me veyahma me o sá xi faha me veya me ngahma ngu caxa matsejen ta faha me vejña me cahndë́ rë, cojo sa xi yëjë xuta xi visehen me hiscan setí ndihi jan matsejen ne, scuëë me hasen rë.
LUK 11:34 Tuxcuun matsejen ne, vëhë xi sacuaha ndihi rë yojo naja. Vëhë xi hya xi tuxcuun ndacun matsejen ne, hatuxa ma hasen cahntsua yojo naja. Peru sá xi tuxcuun chocun matsejen ne, hacuaha ma jñu cahntsua yojo naja.
LUK 11:35 Ndandaja ningatuhuntacún matsejen ne, sacuaha hasen xi jiya cahntsua yojo nuju matsejen ne, ¿há hasen xi cjuaquixi jain?, o há tsajin ne, ¿há jñú?
LUK 11:36 Quihndë matsejen ne, sá xi jingujyë ni yojo nuju jiya hasen, hisca xi hitsë jñú tsajin rë matsejen ne, jingujyë ni yojo nuju matsejen ne, jiya hasen sacuaha hya xi sahmi hasen tsajan hasen rë ngu ndihi. ―‍Cuatjin xu cachja Jesús.
LUK 11:37 Hane xi cajnetaha xu cachja Jesús ne, ngu cha fariseo ne, cachja cha cojo Jesús xi cjue sinë me cojo cha niñu. Xi cavisehen Jesús ndihya ne, quiji xu me cafaha me cahndë́ rë me xcun maxë.
LUK 11:38 Peru xi cavëë xu cha fariseo xcusun rë Jesús ne, jemu quijircun rë cha tsëhë xi hacuiin titjun cavane xu me tsja me sehe sinë me niñu sacuaha vitexa xcusun rë xutachanga rë me.
LUK 11:39 Ngajan xi Nai naja ne, cachja xu me cojo cha cuitjin: ―‍Ngayujun ni ngayun xuta fariseo ne, xcusun nuju xi nihñu tyjahi táha ngaxtun ni ngu vasu o sá xi ngu tyuva, peru cahntsua xahasen nuju ne, quitsë camahani rë cjuatsehen cojo cjuatacun xi nimuju yëjë ni xcusun.
LUK 11:40 Sca nuju ngayun. Catijne rcun ta ha me xi casahmi ni táha ngaxtun ne, hacuaha ha me vëhë ni casahmi me táha cahntsua.
LUK 11:41 Peru xi hincha cahntsua ne, vëhë tuhun sacuaha caridad. Sá xi cuatjin nihñu ne, yëjë ni xcusun ne, tyjahi xi cuma nuju.
LUK 11:42 ’Peru jemu chojyihi tsujun ngayun xuta fariseo, tsëhë xi ngayun ne, handasa nihñu cuidadu xi tuhun diezmu nuju hisca cojo nchurca cojo ruda cojo yëjë sa xcusun ndeya ne, peru nihñucuenduun xi nihñu hacutjin xi cjuaquixi cojo xingun, hacuaha nihñucuenduun xi nihmutacún Nina. Ngayun ne, meje rë xi ha canihñucuendun Nina, peru hacuaha hacuiin nichayun diezmu nuju vë.
LUK 11:43 ’Hacuaha jemu chojyihi tsujun ngayun xuta fariseo, tsëhë xi ngayun ne, jemu ndama nuju xi cuatjin satë nuju cahndë́ xi matitjun tsëhë cahntsua yungun. Hacuaha jemu ndama nuju xi cuatjin fi chja xuta nina cojo nuju ngajan ngajñi ndetsin.
LUK 11:44 ’Hacuaha jemu chojyihi tsujun ta, handasa matsijin ne, peru jemu chocun xahasen nuju. Vëhë xi tangun ngayun cojo tsjun xi hisca matsijin, hane xuta ne, hisca machayiin rë me cjui nduva me sune me xcun. ―‍Cuatjin xu cachja Jesús.
LUK 11:45 Ngajan xi ngu cha xi vicuya cjuachacun ne, cachja xu cha cuitjin cojo Jesús: ―‍Maestro, hya xi nújun cjua vëhë ne, hacuaha cojo ngayin choho nújun tsijin. ―‍Cuatjin xu cachja cha.
LUK 11:46 Hane Jesús ne, cuitjin xu cachja me: ―‍Hacuaha cojo ngayun cha xi vicuya cjuachacun, jemu chojyihi tsujun, tsëhë xi vicuyun rë xuta jemu cjín xcusun xi jemu chja camahani cuma sahmichihin me, hane suvun ne, visecuún rë me hisca hitsë.
LUK 11:47 ’Jemu chojyihi tsujun ngayun ta, tsëhë xi ngayun ne, nindujun tsjun ndacun tsëhë yëjë ni nima profeta xi xutachanga nuju catsiquehen me hatsëë nixtin.
LUK 11:48 Ngayun suvun ningacun xi chuya nuju xcusun xi casahmi xutachanga nuju ta, tsëhë xi ngu ladu ne, me vëhë catsiquehen me profeta xi cuacun vë, hane ngu ladu nga ne, ngayun nindujun tsjun rë.
LUK 11:49 ’Vëhë xi Nina, me xi jemu vechútaha cjuatacun rë me ne, cachja me cuitjin: “Tsingátju profeta cojo apóstol ngajñi rë xuta xi siu nixtin vihi, hane yahnga me xi cuacun vë ne, tsiquehen xuta me, hane yahnga me ne, sua xuta cjuañihi xi cuatju me xi cuacun vë.” Cuatjin cachja Nina.
LUK 11:50 Hane cojo chuva vëhë ne, xuta xi siu nixtin vihi ne, me vëhë cháha rë me tsëhë cjuaveya rë yëjë profeta xi cahme hisca ntsacu cavetsihin ngasunhndë,
LUK 11:51 vetsihin cojo hisca cjuaveya rë xutachanga naja Abel vijnetaha cojo hisca cjuaveya rë xutachanga naja Zacarías, me xi catsiquehen rë xuta tiña ngasunscun hiscan ndatsen rë ndava Nina. Cuichjá nga cojo nuju ta yëjë cjuaveya xi cuacun vë ne, cháha rë xuta xi siu nixtin vihi.
LUK 11:52 ’Jemu chojyihi tsujun, ngayun cha vicuya cjuachacun ta, tsëhë xi cavejñuxun cjuatacun rë Nina. Canitjungun cjuatacun rë me, hacuaha hisca catuun cahndë́ xi sacú rë xuta xi meje rë me cjuatacun rë Nina jan. ―‍Cuatjin xu cachja Jesús.
LUK 11:53 Hane hya xi tivetju xu Jesús tsëhë cahndë́ hiscan cajinë me niñu jan ne, cha xi vicuya cjuachacun cojo cha fariseo jan ne, jemu cjan rë cha, jemu cjín cjua cafahataha xu cha me,
LUK 11:54 hacuaha jemu cavangui xu cha chuva rë hacutjin xi sacú rë cha ngu cjua rë me xi cuaaintjin cuichja me.
LUK 12:1 Jinguyëjë rë xi tichja sa xu Jesús cojo cha xi cuacun jan ne, jercu jima tangun camahani xuta, ña vehnchun xicjin me. Sehe ngajan xi Jesús ne, cavetsihin cachja xu me tjutjun cojo xuta ladu rë me cuitjin: ―‍Xicaninguisuhunjñuu cojo cha fariseo xi cuacun vë ta, tsëhë xi cjuandacha xi sahmi cha ne, tangun cojo san rë pan xi hatuxa vitsojo ngajñi rë yëjë ni nahyu.
LUK 12:2 Yëjë ni xcusun xi casetsangui ne, cuechú nixtin xi chjaháxin rë xi titsangui rë. Vëhë xi yëjë ni xcusun xi hma ne, handasa sehmangui ne, peru cuechú nixtin xi cuetjucaa tsejen.
LUK 12:3 Yëjë ni cjua xi má hiscan jñu ne, cuechú nixtin xi cuinuhya rë hiscan hasen. Vëhë xi yëjë ni cjua xi má táha hma ne, cuechú nixtin xi cuinuhya rë táha tsejen.
LUK 12:4 ’Nguehe cuichjá cojo nuju, ngayujun ni. Xicarcuun xuta xi tsiquehen nuju me, hane ngaxtun vëhë ne, ha quihndë tsajin mé sa xi cuma sahmi me cojo nuju.
LUK 12:5 Peru nguehe cuichjá cojo nuju yo xi meje rë xi rcún. Meje rë xi Nina xi rcún me. Me xi ngaxtun xi ha catsiquehen nuju ne, tjin rë me cahndë xi tsingatjenya nuju me hiscan xi má hasen rë nima castigu. Cuichjá nga cojo nuju ta hatuxa me vëhë xi meje rë xi rcún me.
LUK 12:6 ’Chutsujun ta hñú chu nisë langa ne, jemu xtengui chji rë chu. Peru Nina ne, tsichayaain me hisca xi ngu chu.
LUK 12:7 Hacuaha ngayun ne, hisca tsjarcun xqui tjin rë Nina. Vëhë xi xicarcuun ta, tsëhë xi jima ngu ngayun ne, hitsë sa jercu vengui chji nuju xi cuma rë xi jemu cjín chu nisë vë.
LUK 12:8 ’Nguehe cuichjá cojo nuju ta yëjë xuta xi tsinguixi me xcun xuta xi yahnga xi xuta ladu naha má me ne, hacuaha ngahan xi Quihndi rë Xuta jain ngahan ne, tsinguixë xcun yëjë ni ángel rë Nina xi xuta ladu naha má xuta xi cuacun vë.
LUK 12:9 Peru yëjë xuta xi tsinguixi me xcun xuta xi yahnga xi hacuiin xuta ladu naha má me ne, hacuaha hacuanitjin ni tsinguixë ngahan xcun ángel rë Nina.
LUK 12:10 ’Hacuaha yëjë xuta xi choho chja me tsahan, ngahan xi Quihndi rë Xuta Jain ngahan ne, tsinchataha Nina me, sá xi cjuehya me cjuaninchataha. Peru yëjë xuta xi choho chja me tsëhë Hasen rë Nina ne, tsajin cjuaninchataha xi cuma rë me.
LUK 12:11 ’Hya xi xuta nandya cjuaha nuju me cjuecojo nuju me xcun xutaxa rë yungun o sá xi xcun xutaxa rë ndihyavasen ne, hacuiin cumacjintacún tsëhë chuva rë hacutjin xi chjayunngun o tsëhë xi cuinújun ta,
LUK 12:12 tsëhë xi ha hora vëhë ni ne, Hasen rë Nina cuichja cojo nuju mé cjua xi meje rë xi cuinújun. ―‍Cuatjin xu cachja Jesús.
LUK 12:13 Hya xi camá ne, ngu xuta tsëhë ngajñi rë xutacjín jan ne, cachja xu me cojo Jesús cuitjin: ―‍Maestro, tinújun cojo cha vëhë xingueen, catisua cha ngahan xcusun xi satë ná xi cavejña nahmi niji hya xi cahme me. ―‍Cuatjin xu cachja me.
LUK 12:14 Sehe ngajan xi Jesús ne, cuitjin xu cachja me: ―‍Peru ngahan ne, hacuiin xá naha xi ngahan cuátëcja xcusun xi satë nuju xingu xingu ngayun. ―‍Cuatjin xu cachja Jesús cojo xuta jan.
LUK 12:15 Sehe cachja nga xu me cojo xutacjín jan cuitjin: ―‍Nechun cuidadu, hacuiin jercu nimuju cjuanchina matsejen ta, tsëhë xi hacuiin ngatsë rë cjuanchina xi tjin naja matsejen ne, vëhë xi ndacun cjuahñu naja. ―‍Cuatjin xu cachja me.
LUK 12:16 Ngaxtun vëhë ne, sehe cachja xu Jesús ngu ejemplu cojo xuta cuitjin: ―‍Cuejña ne xi ngu cha nchina jan matsejen ne, jercu ndaja camá xitjë xcun nangui rë cha.
LUK 12:17 Hya xi camá ne, cuitjin catsingataha cacun cha: “¿Mé xi ndatjin sahme quihndë? Ha quihndë tsajin ná cahndë́ hiscan xinchandaja tutjë́ naha.
LUK 12:18 Ndatjin rë xi cuitjin sahme. Tsinguétsun ndihya hiscan hinchandaja tutjë́ naha, hane tsindaja xi hitsë sa yehe. Hane ngajan cuínchandaja yëjë tutjë́ naha cojo ngu tsë́ ngu xtí sa xi tjin ná.
LUK 12:19 Hane sehe cuichjá cojo xahasen naha cuitjin: Jercu cjín camahani xcusun hinchandaja ná quihndë, hacuaha jemu cjín nu cjuecani rë. Cuitejñajenda quihndë. Sínë cuëhë tsahan. Suá cjuasua xahasen naha.” Cuatjin catsingataha cacun cha nchina jan.
LUK 12:20 Ngajan xi Nina matsejen ne, cuitjin cachja me cojo cha: “Sca ri ngaye. Nguixun quihndë ne, cueye. Hane yëjë xcusun xi cavetje ne, tsajin mé sacú ri tsëhë.” Cuatjin cachja Nina.
LUK 12:21 Cuatjin rë xuta xi jercu vetjo cjuanchina xi cuma rë suvá me, peru xcun Nina matsejen ne, tsajin mé xi tjin rë me. ―‍Cuatjin xu cachja Jesús ejemplu vëhë.
LUK 12:22 Ngajan xi Jesús ne, cuitjin cachja xu me cojo xuta ladu rë me: ―‍Vëhë xi cuichjá cojo nuju ta: Hacuiin cumacjintacún tsëhë xcusun xi xinu xi sua nuju ngahñu. Hacuaha hacuiin cumacjintacún tsëhë tsjian xi chujun.
LUK 12:23 Hacuiin cumacjintacún ta, tsëhë xi hitsë sa vengui chji rë cjuahñu nuju xi cuma rë xi chinu. Hacuaha hitsë sa vengui chji rë yojo nuju xi cuma rë tsjian xi chujun.
LUK 12:24 Chutsujun chu chenda ta hacuiin tsitjë chu, hacuiin fanga chu, hacuaha tsajin rë chu ndyahnga hiscan cuinchandaja chu xi sinë chu. Peru Nina tsicjen me chu. Ngayun ne, hitsë sa jercu vengui chji nuju xi cuma rë chu nisë.
LUK 12:25 Hacuaha tsajin hisca xi ngu xuta xi cuma cuesuntaha me cjuahñu rë me hisca ngu hora ngatsë rë xi ma cjín cacun me.
LUK 12:26 Sá xi hitsë lihndi xcusun vëhë maji nihñu ne, ¿mé má jercu macjintacún tsëhë xcusun xi yahnga jan ni?
LUK 12:27 ’Chutsujun naxu liriu ta tsihyaain nachjun hacuaha fahyaain tsjian. Peru ngahan cuichjá cojo nuju ta tsjian rë xutachanga naja Salomón ne, handasa jercu ndacun camahani, peru hitsë sa ndajyihi ngu naxu vëhë.
LUK 12:28 Sá xi cuatjin tsicaja Nina xca nguijña xi ngu nixtin ne siutahá nguijña, hane xitu ngu nixtin ne cueti ne, hitsë sa ngayun ta hatuxa tsicaja nuju me, ngayun xi cjëë cumangutacúnndujun cojo me.
LUK 12:29 Hacuiin jercu nijendun rë xahasen nuju xi vinchunsun xi xinu xi siuhun ta,
LUK 12:30 tsëhë xi xcusun vëhë ne, yëjë xutaxín tsëhë jingujyë ni ngasunhndë ne, me vëhë xi vangui me xcusun vëhë. Peru ngayun ne, Nina Nahmi naja ne, ha vëë me xi hatuxa sahmi ngujyë xi sacú nuju xcusun vëhë.
LUK 12:31 Catamarcun nuju tsëhë gubiernu xi sahmi Nina, hane xcusun vëhë ne, quitahácoo sa sacú nuju.
LUK 12:32 ’Xicamacjiintacún ngayun xuta ladu naha xi jemu chúva má ngayun ta, tsëhë xi Nina Nahmi naja ne, ha cavejña cacun me xi cojo cjuandaja rë me ne, sua nuju me xá xi nihñu gubiernu hiscan xi sahmi me gubiernu.
LUK 12:33 Titeñu xcusun xi tjin nuju, hane tujún xi sacú nuju ne, tuhun rë xuta xi tsajin rë me, sacuaha tuhun ngu caridad. Nihñu ngujyë xi sacú nuju cjuanchina xi jercu cjuecani rë. Cuma cuinújan ne, ngu cjuanchina xi tsajin nixtin cjuë xi cuetjún ngajan ngahnga hiscan xi cha chëjë ne, maji ma tiña cha, hisca chu quixún ne, tsinguetsiin chu.
LUK 12:34 Cuatjin meje rë xi nihñu ta, tsëhë xi hiscan tetjo cjuanchina nuju ne, hacuaha ngajan quitahá cjuatacun nuju.
LUK 12:35 ’Tuhunchjinu yojo nuju, hacuaha catisetí ni ndihi nuju, tsëhë xi cjuehe Nai nuju.
LUK 12:36 Nihñu sacuatjin sahmi hndixahan xi viyujuya me nai rë me, hya xi nai rë me quiji ngu ndava suhi. Siuchjine ni me cojo sa xi hora xi cjuehe nai rë me ne, xi tu cuichja ne, ngutjen cjue scuxaha me tingotjo xi cuisehen nai rë me.
LUK 12:37 Jemu ndaja tsëhë yëjë hndixahan xi, hora xi cjuehe nai rë ne, sacútsja rë xi siu quicun. Nguehe cuichjá cojo nuju cjuaquixi ta, xi scuëë nai rë hndixahan jan xi cuatjin quicun hndixahan ne, cuëhëchjine me yojo rë me, sehe cjuecojo me hndixahan xcun maxë, sehe cuiyuju me xi sinë me.
LUK 12:38 Jemu ndaja tsëhë hndixahan xi sacútsja rë nai rë xi siu quicun, handasa nixten cjuehe me o sá hisca tiña sahasen cjuehe me.
LUK 12:39 Hacuaha meje rë xi cumachaya nuju cjuatacun vihi: sá xi nai rë ngu ndihya ha machaya rë me hora xi cuinduva cha chëjë ndava me ne, suaain me cahndë́ xi scuxaha cha ndava me, sehe tsichëjë cha.
LUK 12:40 Hacuanitjin ni meje rë xi ngayujun ni ngayun ne, tuhunchjinu yojo nuju ta, tsëhë xi hora xi ningatuuntacún xi cjuëhë ngahan xi Quihndi rë Xuta Jain ngahan ne, hora vëhë rë cjuëhë. ―‍Cuatjin xu cachja Jesús.
LUK 12:41 Hya xi camá ne, Pedru ne, cuitjin xu cachja me cojo Nai naja: ―‍Tatá. Ejemplu xi canújun vë ne, ¿há suvin ni ngayin xuta ladu nuju meje rë xi cuetihinrcuin?, o há tsajin ne, ¿há cojo yëjë sa xuta xi yahnga cuetaharcu me? ―‍Cuatjin xu cachja Pedru.
LUK 12:42 Ngajan xi Nai naja ne, cuitjin xu cafayangui me: ―‍Ngayujun ni ne, meje rë xi nihñu sacuaha sahmi ngu hndixahan xi jemu quicun cacun xi sahmichihin yëjë ni hacutjin xi meje rë nai rë, ngu hndixahan xi cjuahaxa xi cjuahacuenda rë yëjë sa hndixahan xi hora tjin sua xi sinë.
LUK 12:43 Jemu ndaja tsëhë ngu hndixahan xi, hora xi cjuehe nai rë ne, sacútsja me hndixahan jan xi tisahmi tutjin xi casuaxa rë nai rë.
LUK 12:44 Cuichjá cojo nuju cjuaquixi ta, nai rë hndixahan vëhë ne, suaxa me hndixahan vëhë xi hacuaha cjuahacuenda yëjë sa xcusun xi tjin rë me.
LUK 12:45 Peru cuejña ne xi hndixahan vëhë ne, tsingataha cacun cojo cjuatacun rë cuitjin: “Nai naha ne, tijima tafi sa xi cjuehe me.” Cuatjin tsingataha cacun. Sehe cuetsihin cuaja rë hndixahan xi yahnga jan, hacuaha cuetsihin cuatjutaha sinë cuihi hisca cuma chihi.
LUK 12:46 Peru cuechú ngu nixtin xi tsajin tacunya hndixahan vëhë, ngu hora xi hisca hvíin ne, hya cjuehe nai rë, hane jemu jyë castigu sahmi me. Sehe tsingatju me cuatjutangun cjuañihi cojo hndixahan xi yahnga xi casahmichiin tutjin xi casatëxa rë.
LUK 12:47 ’Hndixahan xi ha ndaja vëë hacutjin xi meje rë nai rë hane cavihinchjinii, hacuaha casahmii tutjin meje rë nai rë ne, jemu sehen camahani rë.
LUK 12:48 Peru hndixahan xi hvíin hacutjin xi meje rë nai rë hane casahmi xcusun xi vechú chuva rë xi cuma castigu ne, chúva sehen rë. Hane yëjë ni hndixahan xi jemu cjín xcusun xá casua nai rë xi sahmi ne, hacuaha cuatjin jercu cjín cjua chjahya rë hya xi sahmi entregadu cuenta rë.
LUK 12:49 ’Ngahan ne, canduvá ne xi cuétaha rë sacuaha ngu ndihi ngasunhndë, ngu ndihi xi tsingacun mé cún cjuatacun rë xuta. Hacuaha jemu meje ná xi ha hisca ha casetaha rë.
LUK 12:50 Ngahan ne, tjin ná xi cuátju ngu cjuañihi sacuatjin rë ngu xuta xi tjin rë me xi satë rë me nandá hya xi xtenda me. Hacuaha jercu choho má ná hisca xi cuma chihin cjuacjintacun vëhë.
LUK 12:51 Xi má nuju ngayun ne, ¿há cjuajeya canduvácojo xi cuma rë xuta ngasunhndë? Hacuiin cuatjin. Ngahan ne, canduvá ne xi sahme xi sahmi condra xuta xicjin me. Cuatjin sahmi condra xicjin me ta, tsëhë xi ngujo me ne, cumangu cacun me cojo ná, hane ngujo nga me ne, cumanguaain cacun me cojo ná.
LUK 12:52 Xi cuetsihin nixtin vihi ne, hisca cojo xi cjuiniji sa ne, cuejña ne xi ngu ndihya ne, siu hñú xuta cojo xicjin me. Hane jyan me ne, sahmi condra me me xi jo jan. Hane me xi jo jan ne, sahmi condra me me xi jyan jan.
LUK 12:53 Nahmi ne, sahmi condra me cha quihndi rë me, hane cha quihndi rë me jan ne, sahmi condra cha nahmi rë cha. Naa ne, sahmi condra me na quihndi rë me, hane na quihndi rë me ne, sahmi condra na naa rë na. Nahya ne, sahmi condra me jahnda rë me, hane jahnda rë me ne, sahmi condra na nahya rë na. ―‍Cuatjin xu cachja Jesús cojo xuta ladu rë me.
LUK 12:54 Hya xi camá ne, cachja nga xu Jesús cojo xutacjín jan cuitjin: ―‍Nguehe nangui naja matsejen ne, hya xi chutsujun xi tivisecún ngu yufí ngajan táha ladu vetje tsuhi matsejen ne, ngutjen nújun ta cuaha ngu tsi hñu, hane cuatjin jain má.
LUK 12:55 Hane hya xi vanga ngu tjo xi cjui táha ladu ngatihin matsejen ne, ngayun matsejen ne, nújun ta cuma suë, hane cuatjin jain má.
LUK 12:56 Jemu hyun mé vijne xcusun xi cún nangui cojo xcusun xi cún ngahnga. ¿Mé má nújun xi hyúun mé vijne xcusun xi tijima nixtin vihi ni? ¡Jemu ndacha ngayun!
LUK 12:57 ’Hane ngayun matsejen ne, ¿mé má nichuvuun suvun cojo cjuatacun nuju xcusun xi cjuaquixi ni?
LUK 12:58 Ndiya tivangun cojo xuta xi meje cuinchajyë nuju ngajan xcun xutaxa rë matsejen ne, nihñu ngahñu xi cuisuhun cjuandaja cojo me, cojo sa xi xticja si xi tacun ngajñi nuju cojo rë me matsejen ta, sá tsajin ne, cjuecojo nuju me xcun juez. Hane juez matsejen ne, squindaya me mayu sehe sahmi nuju me entregadu, hane mayu jan matsejen ne, cjue cueyá nuju me ndavaya.
LUK 12:59 Hane cuichjá cojo nuju cjuaquixi matsejen ta hatuxa cuetjuun tsëhë ngajan jinguyëjë rë xi cjëë cuechjun yëjë ni tujún xi quitjun. ―‍Cuatjin xu cachja Jesús.
LUK 13:1 Ha hora vëhë ni ne, cafehe xu ngujo xuta hiscan tacun Jesús. Hane cachja xu me cojo Jesús tsëhë ngujo xuta tsëhë distritu Galilea xi cavitexa Pilatu xi cueya hya xi titsiquehen xuta xi cuacun vë chu rë me xi sua me cjuatjo cojo Nina.
LUK 13:2 Ngajan xi Jesús ne, cuitjin xu cachja me cojo xuta xi cachja cojo rë me jan: ―‍Hane tsëhë xi cuatjin cahme ngujo xuta Galilea xi cuacun vë ne, ¿há vëhë xi má nuju xi hitsë sa tsehen me xi cuma rë yëjë sa me xi yahnga?
LUK 13:3 Jéya, hacuiin cuatjin. Peru sá xi ngayun nindeyuun cjuatacun nuju ne, ngayujun ni ne, hacuaha cuatjin cueyun.
LUK 13:4 O há tsajin ne, xuta xi tyjuhunjyan xi cahme hya xi caticjane rë torre tsëhë Siloé jan ne, ¿há má nuju xi hitsë sa tsehen me xi cuma rë yëjë sa xuta xi caviyuju ngajan Jerusalén?
LUK 13:5 Jéya, hacuiin cuatjin. Peru sá xi ngayun nindeyuun cjuatacun nuju ne, ngayujun ni ne, hacuaha cuatjin cueyun. ―‍Cuatjin xu cachja Jesús.
LUK 13:6 Sehe ngajan xi Jesús ne, cachja sa xu me ngu ejemplu cojo xuta jan, cojo sa xi sua me cumachaya rë xuta xi jemu chúva camá nixtin xi cuma tsindeya xuta cjuatacun rë me. Cuitjin cachja me: ―‍Cuejñaa ne xi ngu ya túhaxi jan ne, secun xcun nangui rë ngu cha jan. Hane xi canduva cha xi tsëhë jan, vanguise cha tú rë ne, casacuiin rë cha.
LUK 13:7 Sehe ngajan xi cachja cha cojo cha mosu rë cha cuitjin: “Ha tjin rë jyan nu xi vinduva vanguësë tú rë ya vi ne, sacuiin ná. Tiche. ¿Mé má tu cuenda cuisecun tsinguetsun rë nangui?” Cuatjin cachja cha xi tsëhë jan.
LUK 13:8 Ngajan xi cha mosu jan ne, cuitjin cafayangui cha: “Tatá. Tuhun rë cahndë́ catisecun ndastu ngu nu sa, hane cuacján nangui rë, hacuaha cuíncha rë abono.
LUK 13:9 Xi cuatjin ne, ¿há suaain tú rë nduva nga ngu nu? Hane sá xi hacuaha ni suaain tú rë ne, sehe cuichan.” Cuatjin cafayangui mosu jan. Cuatjin xu fi ejemplu xi cachja Jesús.
LUK 13:10 Ngu nixtin xi chjahájenda rë, hya xi tivicuya xu Jesús cahntsua ngu yungun jan ne,
LUK 13:11 ngajan tacun ngu chjuun xi ha cjui tyjuhunjyan nu xi camaticua na hane ha quihndë maji xu ma quixi nínda ngaxtun na.
LUK 13:12 Xi cavëë Jesús na ne, cajindaya xu me na, sehe cachja me cojo na cuitjin: ―‍Ngayun tsan ne, ha camandaya ngayun tsëhë xi cuatjin jyihi ngayun vë. ―‍Cuatjin xu cachja Jesús.
LUK 13:13 Hane ha hora vëhë ni cavisanetsja xu me na, hane ngutjen ni camaquixi nínda ngaxtun na. Hya xi camá ne, casahmi jyë casahmi hnga xu na Nina.
LUK 13:14 Peru presidente rë yungun jan ne, jemu camacjan xu rë me tsëhë xi casahmi Jesús xi camandaja ngu chjuun nixtin xi chjahájenda rë. Vëhë xi cachja xu me cojo xutacjín jan cuitjin: ―‍Tjin naja jyun nixtin xi nihña xá. Vëhë xi meje rë xi ngajñi rë jyun nixtin vëhë matsejen ne, hya nduvun xi cumandaja ngayun, hacuiin xi tu nixtin xi chjahájenda rë matsejen ne, hya cuinduvun. ―‍Cuatjin xu cachja presidente rë yungun jan.
LUK 13:15 Peru Nai naja ne, cuitjin xu cachja me: ―‍¡Jercu choho ningatuhuntacún! Jima ngu ngayun matsejen ne, hatuxa vuhunndayun ndyaja vuhunndayun burru nuju tsëhë cahndë́ rë chu xi cuangun nicuhun chu nandá, handasa nixtin xi chjahájenda rë.
LUK 13:16 Hane na vihi xi xuta ladu rë Nina na hacuaha tjinhñu rë Satanás na cahntsua tyjuhunjyan nu matsejen ne, ¿há ndaintjin xi sehenndaya na nixtin xi chjahájenda rë ni? ―‍Cuatjin xu cachja Nai naja.
LUK 13:17 Hane xi cafë xu cachja Jesús cjua vëhë ne, yëjë ni xuta xi má condra rë me ne, jemu camasava xu rë me. Peru yëjë sa xuta xi yahnga ne, jercu ndaja camá xu rë me tsëhë yëjë ni xcusun ndaja xi casahmi Jesús.
LUK 13:18 Hacuaha cachja sa xu Jesús ejemplu vihi: ―‍Gubiernu xi sahmi Nina ne, ¿mé xi tangun cojo?
LUK 13:19 Tangun cojo ngu tutjë́ xi jemu lihndi camahani. Hya xi ngu xuta tsitjë me tutjë́ vëhë xcun nangui rë me ne, cuetju, cuma ngu ya, hisca nisë xi vitjen chu ngahnga ne, sahmi chu ndava chu rcu. ―‍Cuatjin xu cachja Jesús.
LUK 13:20 Cavuya cachja nga xu Jesús cuitjin: ―‍Gubiernu xi sahmi Nina ne, ¿mé xi tangun cojo?
LUK 13:21 Tangun cojo san rë pan xi visecjan ngu chjuun ngajñi rë nahyu rë pan cojo sa xi sahmixa ngajñi rë yëjë ni nahyucjín jan. ―‍Cuatjin xu cachja Jesús.
LUK 13:22 Ndiya cjui xu Jesús ngajan Jerusalén ne, cavatju xu me nandya cojo ranchun xi siu ndiya cjui me jan, hane cachja me cojo xuta cjua rë Nina.
LUK 13:23 Hya xi camá ne, cavinenguise xu ngu me xi cavinenguise rë Jesús cuitjin: ―‍Tatá. ¿Há jemu chúva xuta xi tivetjutje me? ―‍Cuatjin xu cavinenguise xuta jan. Sehe ngajan xi Jesús ne, cachja xu me cojo xuta xi siu jan cuitjin:
LUK 13:24 ―‍Nihñu ngahñu xi cuma cuisuhun hiscan sahmi Nina gubiernu táha tingotjo xi xcu ta, tsëhë xi nguehe cuichjá cojo nuju ta cuechú nixtin xi jemu cjín xuta xi cuma meje cuisehen me jan, peru cumaji.
LUK 13:25 Ta hya xi ngahan xi nai rë cahndë́ vëhë ngahan, cuinduva cuéchja tingotjo ne, ngayun ne, cuinechun candatsen, sehe cujunntsun tingotjo jan hacuaha cuitjin cuinújun: “Tatá. Chuxuhun tingotjo tsijin.” Cuatjin cuinújun. Hane xi cjuayanguë tsujun ne, cuitjin cuichjá: “Hveen jani canduvun ngayun.” Cuatjin cuichjá cojo nuju.
LUK 13:26 Hane ngayun ne, cuitjin cuinújun nga: “Cachini cahyin tangun cojo nuju, hacuaha nangui niji canujyuhunyun cavicuyun cjua rë Nina.” Cuatjin cuinújun.
LUK 13:27 Hane cuitjin cuichjá nga cojo nuju: “Hveen jani nandya nuju. Tángunxun tsahan, ngayujun ni ngayun xuta sahmi cjuatsehen.” Cuatjin cuichjá.
LUK 13:28 Ngajan ni ne, jemu chjihndun hacuaha nijanurii nehñu, hya xi chutsujun Abraham cojo Isaac cojo Jacob, cojo yëjë profeta xi siu me ngajan hiscan xi sahmi Nina gubiernu, peru ngayun ne, caviyujú nuju candatsen.
LUK 13:29 Hane cuinduva xuta tsëhë táha ladu vetjucaa tsuhi cojo táha ladu vetje tsuhi cojo yëjë sa ladu, cuinduva me sinë tangun me hiscan xi sahmi Nina gubiernu.
LUK 13:30 Nguehe cuichjá cojo nuju ta yahnga xuta xi tjengui me quihndë ne, me vëhë cuma titjun me, hane yahnga me xi titjun quihndë ne, me vëhë cuma tjengui me hya xi cuejña Nina gubiernu rë me jan. ―‍Cuatjin xu cachja Jesús.
LUK 13:31 Ha hora vëhë ni ne, cafehe xu ngujo cha fariseo, hane cuitjin xu cachja cha cojo Jesús: ―‍Ndatjin xi tetjunxun tsëhë nguehe ta, tsëhë xi Herodes ne, meje tsiquehen nuju me. ―‍Cuatjin xu cachja cha xi cuacun jan.
LUK 13:32 Hane ngajan xi Jesús ne, cuitjin cafayangui xu me: ―‍Tángun ne tinújun cojo rë chu ninda vë cuitjin: “Chutsujun ni, quihndë cojo nchujun ni ne, cuáxëxen xitsehen hacuaha sahme xi cuma ndaja xuta hmu rë, hane nguini ne, tsinguíjnetaha xá xi tisahme.” Cuatjin tinújun.
LUK 13:33 Peru hacuaha sahmi ná ngujyë xi cjuë́ sa quihndë nchujun ni cojo nguini hisca xi cjuëhë hiscan xi tifë́ ta, tsëhë xi profeta ngahan, hane ngu profeta ne, cumaji xi cueya jingusa nandya xi hacuiin nandya Jerusalén.
LUK 13:34 ’¡Ngayun xuta Jerusalén, ngayun xi cojo ndyojo nicuhun profeta xi tsingatju Nina ngajñi nuju! ¡Jemu choho má ná! ¡Mé hitsë ndiya xi meje scávëvaha nuju sacuaha javëvaha ngu nisë quihndi rë chu xi cuincha chu ngahma tyjunga rë chu, peru ngayun ne, mijí nuju!
LUK 13:35 Chutsujun ni, Nina ne, catsismicacun me ngayun. Cuichjá cojo nuju ta chuun camahani ná hisca hya xi cuechú nixtin xi cuinújun cuitjin: “¡Catsinchacun Nina me xi titsingatju me ngajñi naja!” ―‍Cuatjin xu cachja Jesús.
LUK 14:1 Cuitjin camá xu ngu nixtin xi chjahájenda rë hya xi quiji cajinë Jesús niñu ndava ngu cha xi matitjun ngajñi rë cha fariseo. Xi cafehe Jesús jan ne, cha xi siu jan ne, siu tifahachuva xu ni cha Jesús.
LUK 14:2 Hacuaha hiscan tacun Jesús ne, ngajan xu tacun ngu cha xi yaha rë chíhinsquee.
LUK 14:3 Ngajan xi Jesús ne, cavinenguise xu rë me cha xi vicuya cjuachacun cojo cha fariseo cuitjin: ―‍¿Há tjin cahndë́ nixtin xi chjahájenda rë xi nihña xi cumandaja xuta, o há tsajin cahndë́? ―‍Cuatjin xu cavinenguise Jesús.
LUK 14:4 Hane cha xi cuacun jan ne, tu caviyujujyuu xu ni cha. Hya xi camá ne, cafaha xu Jesús cha hmu rë jan, hane casahmi me xi camandaja cha, sehe catsingatju me cha cafe cha.
LUK 14:5 Sehe cavinenguise xu me cha xi siu jan cuitjin: ―‍¿Há tjin ngu ngayun xi nixtin xi chjahájenda rë ne, cuanguun marcu macjain naxun quihndi nuju o sá ndyaja nuju sá xi cjuinenguiya ngu ndava nandá xi jemu nungun? ―‍Cuatjin xu cavinenguise me.
LUK 14:6 Hane cha xi cuacun jan ne, camaji cafayangui xu cha hisca xi ngu cjua xi meje rë Jesús.
LUK 14:7 Hya xi camá ne, tsëhë xi vutsejen xu Jesús xi xuta xi cachjindaya rë tsëhë suhi jan ne, tivaxijin me cahndë́ xi matitjun ngajan xcun maxë ne, vëhë xi cachja xu me cojo xuta jan cuitjin:
LUK 14:8 ―‍Hya xi chjindaya nuju cuangun xinu ngu comida ne, xicachjuun cahndë́ xi matitjun ngajan xcun maxë ta sá tu hacuaha cachjindaya rë ngu me xi hitsë sa meje rë xi chjahárcun rë xi cuma nuju ngayun.
LUK 14:9 Hane cuinduva me xi cajindaya nuju catsijotjun ni ne, cuichja me cojo nuju cuitjin: “Tuhun rë me vihi cahndë́ nuju vë.” Cuatjin cuichja me cojo nuju. Ngajan xi ngayun ne, cojo jyë cjuasava ne, cuangun chjuhun cahndë́ xi ma tjengui.
LUK 14:10 Xi meje rë ne, hya xi cuatjin chjindaya nuju ne, tángun chjuhun cahndë́ xi ma tjengui, cojo sa xi hya xi cuinduva me xi cajindaya nuju ne, cuichja me cojo nuju cuitjin: “Ngayun ne, nduvun chjuhun ngu cahndë́ xi hitsë sa matitjun.” Cuatjin cuichja me. Ngajan xi ngayun ne, jercu sahmi jyë sahmi hnga nuju me ngajñi rë yëjë xuta xi siu jan.
LUK 14:11 Cuatjin cuma ta, tsëhë xi yëjë xuta xi sahmi yehe suvá me yojo rë me ne, cuechú nixtin xi Nina ne, tsinguijne me cjuatacun rë. Hane xuta xi tsinguijne suvá me yojo rë me ne, Nina ne, sahmi yehe rë me.
LUK 14:12 Hacuaha cachja nga xu Jesús cuitjin cojo me xi cajindaya rë me: ―‍Hya xi nihñu ngu suhi ne, xicachjindayuun rë amigu nuju, xicachjindayuun rë xingun, hacuaha xicachjindayuun rë xuta nchina xi siu tahndee ndya nuju, sá tu hacuaha squindaya nuju me xi cuangun ndava suhi rë me, hane cojo vëhë ni ne, ha camangojo cjuandaja nuju.
LUK 14:13 Cahndë́ rë vëhë ne, hya xi nihñu ngu suhi ne, chjindayun rë xuta yuma, chjindayun rë xuta xi yoho me, chjindayun rë xuta rengun, hacuaha chjindayun rë xuta rcá.
LUK 14:14 Sá xi cuatjin nihñu ne, jemu ndaja tsujun ta, tsëhë xi xuta xi cuacun vë ne, tsajin rë me mé cojo sahmingojo me cjuandaja nuju. Peru Nina sahmingojo me tsujun hya xi tsicuya me cjuahñu xuta xi tsajin jyë́ rë. ―‍Cuatjin xu cachja Jesús.
LUK 14:15 Hane xi cahndë xu ngu cha xi cojo tijinë jan cjua xi cachja Jesús ne, cuitjin xu cachja cha cojo rë me: ―‍¡Jemu ndaja tsëhë xuta xi sinë me niñu hiscan xi sahmi Nina gubiernu! ―‍Cuatjin xu cachja cha.
LUK 14:16 Ngajan xi Jesús ne, casuacuenda xu me cha ngu ejemplu vihi: ―‍Cuejña ne xi ngu cha jan ne, casahmi cha ngu suhi jyë, hacuaha jemu cjín xuta cajindaya rë cha me.
LUK 14:17 Xi casune hora xi sinë cha cojo xuta ne, sehe catsingatju cha hndixahan rë cha ndava xuta xi ha cachja cha cojo xi cuichja hndixahan jan cojo rë xuta cjua vihi: “¿Há cuangun xu ta, ha tjin chjine yëjë ni?” Cuatjin cachja hndixahan jan.
LUK 14:18 Hya xi camá ne, cavetsihin jima ngu me cachja me mé tsëhë xi cumaji cjue me. Hane me xi tjutjun ne, cuitjin cachja me cojo hndixahan jan: “Ngu rquí nangui cavátsë ne, sahmi ná ngujyë xi cjuë́ scutséjen. Vëhë xi cumaji cjuë́ ndava suhi.” Cuatjin cachja me.
LUK 14:19 Hane ngu nga me ne, cuitjin cachja me: “Cavátsë hñú ninchin ndyaja, hane cjuë́ cjuaháchuva chu. Vëhë xi cumaji cjuë́ ndava suhi.” Cuatjin cachja me.
LUK 14:20 Hane ngu nga me ne, cuitjin cachja me: “Cumaji cjuë́ ta, tsëhë xi ngahan ne, ha cavíxan.” Cuatjin cachja me.
LUK 14:21 Hya xi camá ne, hndixahan jan ne, quiji cachja cojo nai rë cjua xi cachja xuta xi cuacun jan. Hane xi camacjan rë nai rë ndihya jan ne, cuitjin cachja cha cojo hndixahan rë cha: “Tetji ne, tihin sanii ngajan ndiyatë cojo ndiyahndë tsëhë ngajñi nandya ne, chjindaye rë xuta yuma cojo xuta yoho cojo xuta rcá cojo xuta rengun ne, ndovecueje me.” Cuatjin cachja cha.
LUK 14:22 Hane xi cavuya hndixahan jan ne, cuitjin cachja: “Tatá. Camá tutjin xi cavitexun ná, peru tjin sa cahndë́.” Cuatjin cachja hndixahan jan.
LUK 14:23 Ngajan xi cachja nga nai rë hndixahan jan cojo rë cuitjin: “Tihin nga hisca ndiya nguijña, hane nihñi rë xuta ngujyë ndovecueje me, cojo sa xi catitsë rë ndya naha.
LUK 14:24 Nguehe cuichjá cojo ri ta hisca xi ngu me xi cajindáya rë tjun tjun ne, satiin rë me sinë me tsëhë suhi xi tisahme.” Cuatjin cachja nai rë hndixahan jan. ―‍Vëhë cajnetaha xu ejemplu xi casuacuenda Jesús.
LUK 14:25 Ngajan xi hya xi quiji sa xu Jesús ndiya rë me xi cjui me Jerusalén ne, jemu cjín camahani xuta cjui me cojo rë me. Hane xi cavuya me cavutsejen me xutacjín jan ne, cuitjin xu cachja me:
LUK 14:26 ―‍Sá xi tjin ngu ngayun xi meje cuinduvuntjengun ná matsejen ne, meje rë xi hitsë sa nihmutacún ná ngahan xi cuma rë xi nihmutacún nahmi nuju, naa nuju, chjuun nuju, quihndi nuju, xingun, hisca cojo yojo nuju suvun. Sá tsajin ne, cumaji cuma ngayun ngu xuta ladu naha.
LUK 14:27 Jarë ngayun xi nduvuntjengun ná matsejen ne, sá xi cuejñuhñuun xahasen nuju xi cuanguncujun ndiya naha handasa hisca cueyun xcun cru matsejen ne, cumaji cuma ngayun ngu xuta ladu naha.
LUK 14:28 Ha hyan matsejen ta hya xi ngu xuta meje sahmi me ngu ndihya jyë ne, titjun sahmi me cuenta rë me, há chutaha tujún rë me hisca xi tsinguijnetaha me sahmi me ndihya.
LUK 14:29 Cuatjin sahmi me cuenta rë me matsejen ta sá tsajin ne, sá xi ngutjen sahmi me xihndënaña rë hane cumaji tsinguijnetaha me sahmi me ndihya matsejen ne, yëjë ni xuta xi scuëë me matsejen ne, jemu cuejnucëë me me.
LUK 14:30 Cuitjin cuichja me: “Cha xi cavetsihin casahmi ngu ndihya jyë vi ne, camaji catsinguijnetaha cha casahmi cha.” Cuatjin cuichja xuta.
LUK 14:31 Hacuaha ha hyan matsejen ta hya xi ngu me xi matitjun cjue sahmi me ngu si jyë cojo jingu sa me xi matitjun xi condra rë me matsejen ne, titjun tsingataha cacun ndaja me, ¿há scaa rë me cojo të mil xuta rë me xi sahmi me si cojo condra rë me xi ticojo can mil xuta rë?
LUK 14:32 Sá xi vutsejen me ta scaain rë me matsejen ne, jinguyëjë rë xi cjin sa nduva condra rë me matsejen ne, tsingatju me ngujo xuta xi tsinguijnehnchan cjua.
LUK 14:33 Vëhë xi ngayujun ni matsejen ne, meje rë xi cuatjin titjun ndaja ningatuhuntacún ¿há scaa nuju, há scaain nuju? matsejen ta, tsëhë xi yëjë ni ngayun xi nismutacuun yëjë ni xcusun xi tjin nuju matsejen ne, cumaji cuma ngayun xuta ladu naha. Cuatjin xu cachja Jesús.
LUK 14:34 Hacuaha cachja sa xu Jesús cojo xutacjín jan cuitjin: ―‍Ngayejen ni matsejen ne, ha hyan matsejen ta naxa matsejen ne, ndaja. Peru sá xi cjuë xtya rë matsejen ne, ¿hacutjin cuma xincha nga tutju rë ni?
LUK 14:35 Ha quihndë tsajin mé cumachjirëhë. Cumaji nicojonxan sacuaha nihndë, hacuaha cumaji nicojonxan sacuaha abono. Chjahá rë cuixu candatsen. Yo ngayun xi tjin nuju cjuasua xi cuinuhyun cjua naha matsejen ne, ndaja tinuhyun. ―‍Cuatjin xu cachja Jesús.
LUK 15:1 Ngundiya jan ne, jemu cjín xu cha faha tujúnsa cojo xuta tsehen xi yahnga jan quiji casahmi tiña me tsëhë Jesús, xi meje cuisiñuju me cjua xi cuichja Jesús.
LUK 15:2 Hane cha fariseo cojo cha xi vicuya cjuachacun ne, cachjahma xu cha cojo xicjin cha cuitjin: ―‍Cha xi cuijyihi vi ne, tsingatihin cha visiajmi cha cojo xuta tsehen hacuaha jinëtangun cha cojo me. ―‍Cuatjin xu cachjahma cha.
LUK 15:3 Sehe ngajan xi Jesús ne, cachja xu me ngu ejemplu cojo cha xi cuacun vë cuitjin:
LUK 15:4 ―‍Cuejña ne xi ngu ngayun tjin nuju ngu cientu chu tsánga. Hane sá xi chajá ngu chu tsujun ne, hatuxa cuiyujuntuhun chu xi ñujuchan tyjuhunñuju jan nguijña ne, sehe cuangun cuinchunsun ngu chu xi cachajá jan hisca xi sacú nuju chu.
LUK 15:5 Hane xi sacú nuju chu ne, chjuhun chu cuesuntuhun chu xi jercu ndama nuju.
LUK 15:6 Hane xi cjuhun ndya nuju ne, nihñutangun yëjë xuta xi vinga nuju cojo me xi siu tahndee ndya nuju, hane cuitjin cuinújun cojo rë me: “Cuinechan cojo ná cjuasua ta casacu ná chu tsánga naha xi cachajá.” Cuatjin cuinújun.
LUK 15:7 Nguehe cuichjá cojo nuju ta hacuaha hitsë sa jyë cjuasua cuejña ngajan ngahnga ngatsë rë ngu xuta tsehen xi tsindeya me cjuatacun rë me xi cuma rë ngatsë rë ñujuchan tyjuhunñuju xuta ndaja xi tsajin mé má tsindeya me cjuatacun rë me. Cuatjin xu cachja Jesús.
LUK 15:8 Hya xi camá ne, cuitjin cachja nga xu Jesús ngu ejemplu: ―‍Cuejña ne xi ngu chjuun jan ne, tjin rë me të tujún quicha xi jercu hnga chji rë. Hane sá xi tsichajá me ngu ne, hatuxa cuetaha rë me ndihi, sehe cuitecha me ndihya sehe cuanguise chichihin me hisca xi sacú rë me.
LUK 15:9 Hane xi sacú rë me ne, sahmitangun me yëjë xuta xi vinga rë me cojo me xi siu tahndee ndava me ne, hane cuitjin cuichja me cojo rë me: “Cuinechan cojo ná cjuasua ta casacu ná tujún naha xi catsichajá.” Cuatjin cuichja me.
LUK 15:10 Nguehe cuichjá cojo nuju ta hacuaha jemu jyë cjuasua cuiyuju ángel tsëhë Nina ngatsë rë ngu xuta tsehen xi tsindeya me cjuatacun rë me. Cuatjin xu cachja Jesús.
LUK 15:11 Hya xi camá ne, cuitjin cachja nga xu Jesús ngu ejemplu: ―‍Cuejña ne xi ngu me jan ne, tjin rë me jo quihndi.
LUK 15:12 Hane cavechú ngunixtin xi cha quihndi ngascan tsëhë me vihi ne, cachja cha cojo rë me cuitjin: “Papá, tsëhë yëjë ni xcusun xi satë ná hya xi cueyun ne, meje ná xi tuhun ná quihndë.” Cuatjin cachja cha. Sehe ngajan xi nahmi rë cha jan ne, cavatëcja me hacutjin xi satë rë xingu xingu quihndi rë me.
LUK 15:13 Hane hacuiin tsëë ni jan ne, cha quihndi ngascan jan ne, xi casahmi tangun cha yëjë xcusun xi casatë rë cha jan ne, sehe cavetju cha quiji cha ngu nangui cjin. Hane xi cafehe cha jan ne, sehe cavetsihin cha tujyë catsicojo cha tujún rë cha, casahmi cha yëjë ni hacutjin xi ndama rë xahasen rë cha.
LUK 15:14 Hane xi cafë catsicojo cha tujún jan ne, hya canduva ngu jindya jyë jingujyë ni ladu vëhë. Hya cavetsihin camachaja rë cha.
LUK 15:15 Hya xi camá ne, cavetsihin casahmi cha xá sacuaha mosu rë ngu me tsëhë nandya jan. Hane me vëhë catsingatju me cha xi cjue sahmi cuidadu cha chu chinga rë me ngajan ranchun.
LUK 15:16 Hane tsëhë xi jemu vojo camahani rë cha ne, hisca meje sinë cha xi tijinë chu chinga jan, peru tsajin yo casua rë cha.
LUK 15:17 Hane hya xi catsingataha cacun ndaja cha ne, cuitjin catsingataha cacun cha: “Yëjë mosu rë nahmi naha ne, tsajin mé machaja rë xi sinë, hane ngahan ne, tivéya jindya nguehe xi vojo ná.
LUK 15:18 Jemu sa rë ndaja ne, cúya cjuë́ nga ndava nahmi naha, hane cuitjin cuichjá cojo rë me: Cahndeen tsëhë Nina hacuaha cahndeen tsujun.
LUK 15:19 Ha quihndë vechiin chuva rë xi cuitejña cojo nuju sacuaha quihndi nuju. Nihñucuendun sacuaha xi mosu nuju ngahan quihndë xi cavúya.” Cuatjin catsingataha cacun cha.
LUK 15:20 Hya xi camá ne, sehe cavuya cafe cha nangui rë cha xi cjue cha ndava nahmi rë cha. ’Peru cjin sa cjui cha tsëhë ndava nahmi rë cha ne, cavëë nahmi rë cha xi nduva cha, hane jemu camayuma rë me cha. Sehe vanga me quijitjengui me cha, catsuvacja me cha hisca cavitatsuha me cha.
LUK 15:21 Sehe ngajan xi cavetsihin cachja cha cojo nahmi rë cha cuitjin: “Papá, cahndeen tsëhë Nina hacuaha cahndeen tsujun. Ha quihndë vechiin chuva rë xi cuitejña cojo nuju sacuaha quihndi nuju.” Cuatjin cavetsihin cachja cha.
LUK 15:22 Peru nahmi rë cha ne, cachja me cuitjin cojo ngujo hndixahan rë me: “Tángunsanii, tángun chjuhun ngu tsjian xi tsjian ndaja jan ne, sehe nduvun nicujún cha quihndi naha vi. Hacuaha nduvuncujun ngu xtungun sehe teyun rcutsja cha, hacuaha nduvuncujun chuxinxtë xi cuinchun ntsacu cha.
LUK 15:23 Xi camá vëhë ne, sehe tángun chjuhun ngu ndyaja xi ndaja hñu cacun chu cueya chu xinëë chu. Nihña ngu suhi, tahan cjuasua xahasen naja ta,
LUK 15:24 tsëhë xi cha quihndi naha vi ne, sacuaha xi cahme cha hane sehe cavuya cha cjuahñu, sacuaha xi cachajá cha hane sehe casacu nga cha.” Cuatjin cachja nahmi rë cha. Hya xi camá ne, sehe cavetsihin casahmi me suhi.
LUK 15:25 ’Peru cha quihndi tjun rë me vihi ne, tsajin cha ta nguijña quiji cha. Hane xi camatiña cha tsëhë ndava cha xi cavuya cha xi quiji cha nguijña ne, cahndë cha xi fane tyjó ndava cha hacuaha titë́ xuta.
LUK 15:26 Hya xi camá ne, sehe cajindaya cha ngu cha hndixahan rë nahmi rë cha, sehe cavinenguise cha mé jima jan.
LUK 15:27 Hane cha hndixahan jan ne, cuitjin cafayangui cha: “Cha tsuhun cavuya cha. Hane hacuaha cavitexa nahmi nuju xi cahme ngu ndyaja xi ndaja hñu cacun xi cuma suhi, tsëhë xi cavuya cafahatsja nga me xingun cojo ngu cjuahñu ndajyihi.” Cuatjin cafayangui hndixahan jan.
LUK 15:28 Peru cha quihndi tjun jan ne, jemu camacjan rë cha, hisca ndihya mijí cuisehen cha. Hane xi cavetju nahmi rë cha ne, jercu cjín cachja me cojo cha xi cuisehen cha ndihya.
LUK 15:29 Ngajan xi cha vëhë ne, cuitjin cafayangui cha tsëhë nahmi rë cha: “Chutsujun ni, ngahan ne, ha jemu tsëë nduva nixtin xi tivisécoo nuju, hacuaha tsajin ngu cjua xi cahndeen tsujun xi canújun. Peru ngahan ne, hisca ngu tentsun catuun chu xi cueya chu xi sahme ngu suhi cojo amigu naha.
LUK 15:30 Peru quihndë xi cafehe cha quihndi nuju vë xi tu ngajan quiji catsicjë cha cjuanchina nuju cojo yachjin tsehen jan ne, canicuhun ngu ndyaja hñu cacun xi xinu cojo cha.” Cuatjin cafayangui cha.
LUK 15:31 Hya xi camá ne, cuitjin cachja nga nahmi rë cha: “Ngaye tsan xi nchunchujun ni nechin cojo ná ne, yëjë ni xi tsahan ne, hacuaha tsiji.
LUK 15:32 Ndatjin xi nihña ngu suhi cuitjin, cuinechan cjuasua ta, cha tsajan vi ne, sacuaha xi cahme cha peru cavuya cha cjuahñu, sacuaha xi cachajá cha peru casacu nga cha.” Cuatjin cachja nahmi rë cha. Vëhë xu ejemplu xi cachja Jesús cojo cha fariseo cojo cha xi vicuya cjuachacun.
LUK 16:1 Hacuaha cachja nga xu Jesús cojo xuta ladu rë me ngu ejemplu cuitjin: ―‍Cuejña ne xi cavéjña ngu xuta nchina xi hacuaha tjin rë me ngu cha xi matitjun tsëhë yëjë ni xa rë me. Hane cha xi matitjun tsëhë xa jan ne, cavinchajyë ngu xi cavinchajyë rë cha cojo me xi tsëhë xa tsëhë xi jemu catsicojo cha tujún rë me xi matsijin mé casahmi cha cojo.
LUK 16:2 Hane xi cajindaya me xi tsëhë xa jan cha ne, sehe cachja me cojo cha cuitjin: “Ngaye ne, cafahántsa ngu jyë́ riji. Quihndë ne, nihñi ná entregadu cuenta tsëhë xa xi tacun ntse ta, ngaye ne, ha quihndë cumaji cuihinnduju cojo xa xi nechintehe.” Cuatjin cachja me.
LUK 16:3 Sehe ngajan xi cha xi matitjun tsëhë xa jan ne, cuitjin catsingataha cacun cha: “¿Mé xi ndatjin sahme quihndë xi tivaxëxin ná nai naha tsëhë xa xi tejñataha? Ngahan ne, maji sahme xa xi hai. Hacuaha sava ná cjuë́ cjuéhya caridad.
LUK 16:4 Haan, ha hvë mé xi sahme cojo sa xi cjuahatsja ná xuta ndava me hya xi cuétjuxen tsëhë xa xi tejñataha.” Cuatjin catsingataha cacun cha.
LUK 16:5 Hya xi camá ne, cajindaya cha chuva ngu chuva ngu xuta xi quitjen tsëhë nai rë cha. Hane cuitjin cachja cha cojo ngu me: “Ngayun ne, ¿hacutjin quitjun tsëhë nai naha?” Cuatjin cachja cha.
LUK 16:6 Sehe ngajan xi me xi quitjen jan ne, cuitjin cafayangui me: “Ngu cientu tonel tsëhë aceite.” Cuatjin cafayangui me. Hane cha xi matitjun tsëhë xa jan ne, cuitjin cachja cha cojo rë me: “Juhun xujun tsëhë cuenta nuju vi ne, tinechun sanii, nihñu sa ngu, hane tetuhun yachantë ni.” Cuatjin cachja cha.
LUK 16:7 Hya xi camá ne, cachja nga cha cojo ngu nga me cuitjin: “Ngayun ne, ¿há cjín quitjun tsëhë nai naha?” Cuatjin cachja cha. Hane cuitjin cafayangui me xi quitjen jan: “Ngu cientu xutsu trigu.” Cuatjin cafayangui me. Hane cha xi matitjun tsëhë xa jan ne, cuitjin cachja cha: “Juhun xujun tsëhë cuenta nuju vi ne, nihñu sa ngu, hane tetuhun ñujuchan ni.” Cuatjin cachja cha.
LUK 16:8 Ngajan xi xuta nchina xi nai rë xa jan ne, cavaxëndaja me cha tsehen xi matitjun tsëhë xa ngatsë rë xi jemu quicun cacun cha xi cuatjin casahmi cha. Hitsë sa quicun cacun xuta tsehen cojo ngasunhndë rë me, xi cuma rë xuta xi fitjengui me ndiya rë Nina.
LUK 16:9 ’Nguehe cuichjá cojo nuju ngayun xuta ladu naha ta hacuaha meje rë xi chjuhun tujún nuju, handasa hatuxa tsehen ta tsëhë xi tsëhë ngasunhndë, hane nicujunxun, cojo sa xi cuinga rë xuta ngayun. Cuatjin nihñu cojo sa xi hya xi cuechú nixtin xi cueyun hacuaha ha quihndë cumachjiriin nuju tujún ne, cjuahatsja nuju Nina ngajan hiscan xi cuinechan cojo rë me yëjë nu yëjë nixtin.
LUK 16:10 ’Yo xi tjin rë cjuaquixi xi ndaja sahmi ngu xa xi chúva ne, hacuaha hatuxa tjin rë cjuaquixi xi ndaja sahmi ngu xa xi jyë. Hacuaha yo xi vindacha hya xi sahmi ngu xa xi chúva ne, hacuaha hatuxa vindacha hya xi sahmi ngu xa xi jyë.
LUK 16:11 Vëhë xi ngayun ne, sá xi vindachun hya xi nicujunxun tujún tsehen xi tsëhë ngasunhndë ne, hatuxa cuejñaai Nina ntsun cjuanchina xi cjuaquixi, xi tsëhë me.
LUK 16:12 Hacuaha sa xi vindachun hya xi nicujunxun cjuanchina tsëhë jingu sa ne, Nina ne, hatuxa suaain nuju me cjuanchina xi cuma tsujun suvun.
LUK 16:13 ’Tsajin ngu hndixahan xi ma fahacuenda xa tsëhë jo nai rë xa ta, tsëhë xi choho scuëë rë ngu nai rë hane tsihmu cacun nai rë xi majo jan. O sá tsajin ne, jemu cuetaha yojo rë cojo ngu nai rë, hane nai rë xi majo jan ne, hisca sahmicuendaain rë. Vëhë xi xi ngu ñahñu ni ne, maji nihñu hacutjin xi meje rë Nina cojo hacutjin meje rë cjuanchina tsehen xi tsëhë ngasunhndë. Cuatjin xu cachja Jesús cojo xuta ladu rë me.
LUK 16:14 Cha fariseo, xi hacuaha jemu chuya rë cha tsëhë tujún ne, cahndë xu cha yëjë cjua xi cachja Jesús cojo xuta ladu rë me jan. Hane cavejnucëë cha Jesús.
LUK 16:15 Ngajan xi Jesús ne, cachja xu me cojo cha cuitjin: ―‍Ngayun xi nújun cojo xuta xi jemu ndaja xuta ngayun, peru Nina ne, vëë me cjuatacun xi jiya cahntsua xahasen nuju. Hane cjuatacun xi sahmi yehe sahmi hnga xuta ne, Nina ne, chuyiin camahani rë me tsëhë.
LUK 16:16 ’Hya xi chaja sa tsujyihiya Juan Vitenda Xuta ne, yëjë xuta ne, casacu camachaya rë me cjua rë Nina ngatsë rë ley xi cavejña Nina tsja Moisés, cojo ngatsë rë profeta xi hacuaha cachja me cjua rë Nina. Hisca nixtin rë Juan ne, hisca quihndë ne, tisuá ngahan tijimachaya rë xuta cjuandajyihi xi chja xi Nina ne, sahmi me gubiernu. Hane yëjë ni xuta ne, meje cuisehen me hiscan sahmi Nina gubiernu, handasa cojo cjuachan.
LUK 16:17 ’Ngahnga cojo nangui ne, hitsë sa chjaain cjuë xi cuma rë xi chjaháxin rë ngu cjua tsëhë ley rë Nina.
LUK 16:18 ’Ngu xuta xi tsismi me chjuun rë me sehe cuixan me cojo jingu sa chjuun ne, tangun me cojo ngu xi sahmi cjuatsehen cojo ngu chjuun xi hacuiin chjuun rë. Hacuaha yo xi cuixan cojo ngu chjuun xi xihin rë na ne, catsismi cha na ne, tangun cojo ngu xi sahmi cjuatsehen cojo ngu chjuun xi hacuiin chjuun rë.
LUK 16:19 ’Cuejña ne xi cavéjña ngu cha xi jemu nchina, xi jercu ndaja camahani tsjian vajá. Nchunchujun ni ne, jemu ndajyihi suhi sahmi cha.
LUK 16:20 Hacuaha cavéjña ngu xuma cha yuma xi hmí rë Lázaro, xi jingujyë ni yojo rë cha camatsë. Hane jiña cha ngajan tingotjo ndava cha nchina jan.
LUK 16:21 Hane hacuaha cojo cha yuma jan jemu meje sinë cha hitsë xi vangui jinë cha nchina jan. Hatuxa jemu choho vatju cha má, hisca vinduva naña chimajnu chu tsë xi yaja rë cha.
LUK 16:22 Hya xi camá ne, xi cahme xuma cha yuma jan ne, quijicojo ángel hasen rë cha ngajan cahndë́ ndajyihi, cavéjña tangun cojo hasen rë nima Abraham. Hane cha nchina jan ne, hacuaha cahme cha, hane caseyaniji cha.
LUK 16:23 ’Hane hya xi jiya hasen rë cha nchina jan cahndë́ hiscan xi fi hasen rë nima ne, jercu tivatju cjuañihi. Hane xi cavuya cavutsejenniji hasen rë cha ne, cavëë rë hasen rë nima Abraham tsëhë cjin ni, hacuaha cavëë rë hasen rë nima Lázaro, tacun tangun cojo hasen rë nima Abraham.
LUK 16:24 Hya xi camá ne, cajindaya hasen rë cha nchina jan tsëhë hasen rë nima Abraham, cuitjin cachja: “Tatá Abraham, catamayuma nuju ngahan ne, tinújun cojo cha Lázaro vë ne, catitsicahnchi cha rcutsja cha cojo nandá, sehe ningatjun cha catinduva catitsinguijnehnchan cha hitsë neje ta, tsëhë xi jercu má camahani ná cojo ndihi vi.” Cuatjin cachja hasen rë cha nchina jan.
LUK 16:25 Peru hasen rë nima Abraham ne, cuitjin cafayangui: “Ninguitsjin tsan ta xcun cjuahñu riji ne, jemu ndaja cavatji camá, hane xuma cha Lázaro vi ne, jemu choho cavatju cha camá. Peru quihndë ne, tisacu rë cha cjuetacun nguehe, hane ngaye ne, tivatji cjuañihi.
LUK 16:26 Hacuaha tjin sa ngu cjua xi cuichjá cojo ri: Nina ne, cavejña me ngu xanga jyë xi jiyavasen tsëhë hiscan xi nechintihin ngayin cojo tsëhë hiscan xi nechintehe ngaye, cojo sa xi yo ngayin xi meje cuátjin xi cuinduvin ndyá ne, cumaji, hacuaha yo ngayun xi meje cuatjun cuinduvun nguehe ne, hacuaha cumaji.” Cuatjin cafayangui hasen rë nima Abraham.
LUK 16:27 Sehe ngajan xi hasen rë cha nchina jan ne, cuitjin cachja: “Tatá, nihñu favor ne, ningatjun cha Lázaro ngajan ndava nahmi naha,
LUK 16:28 cojo sa xi sua cha cumachaya rë catsihñú xingueen xi siu jan, cojo sa xi hacuiin cojo cha cuechú cha cahndë́ vihi hiscan xi tacun cjuañihi xi tivatjin tijima.” Cuatjin cachja hasen rë cha nchina.
LUK 16:29 Hane hasen rë nima Abraham ne, cuitjin cachja: “Peru cha xi cuacun vë ne, cuma cuisiñuju cha cjua xi ha catsihindu Moisés cojo cjua xi ha catsihindu profeta hatsëë nixtin. Vëhë catetaharcu cha.” Cuatjin cachja hasen rë nima Abraham.
LUK 16:30 Ngajan xi hasen rë cha nchina jan ne, cuitjin cafayangui: “Tatá Abraham, cumaji xi cojo cjua vëhë ni. Peru sá xi yo cuetju tsëhë ngajñi rë nima xi cjue cuichja cojo cha ne, ngajan xi tsindeya cha cjuatacun rë cha.” Cuatjin cafayangui hasen rë cha nchina jan.
LUK 16:31 Peru hasen rë nima Abraham ne, cuitjin cachja: “Sá xi mijí cuihndë cha tsëhë cjua xi catsihindu Moisés cojo cjua xi catsihindu profeta ne, hacuanitjin ni cumacjaain rë cha, handasa ngu nima cuya cjuahñu, cjue cuichja cojo rë cha.” Cuatjin cachja hasen rë nima Abraham. Cuatjin xu fi cjua xi cachja Jesús cojo cha fariseo cojo xuta ladu rë me.
LUK 17:1 Ngu nixtin jan ne, hacuaha cachja xu Jesús cojo xuta ladu rë me cuitjin: ―‍Hatuxa cuinduva xcusun xi meje sahmi xi nismetacuun ndiya rë Nina, peru jemu chojyihi tsëhë xuta xi nduvacojo xcusun vëhë.
LUK 17:2 Hitsë sa ndaja tsëhë xuta vëhë xi xtyangui ngu ndyojo natsi nguisin me sehe ningatjenya rë me ngajñi ndachacun, xi cuma rë xi sahmi me xi ngu xuta ladu naha tsismicacun me ndiya rë Nina.
LUK 17:3 ’Nechun cuidadu tsëhë xcusun xi nihñu. Sá xi ngu xingun choho sahmi cojo nuju ne, tinújuntuhun rë. Hane sá xi tsindeya cjuatacun rë ne, ninchatuhun rë.
LUK 17:4 Hane sá xi hisca yatu ndiya choho sahmi cojo nuju ngu nixtin, hane hacuaha jima ngu ndiya vëhë cjue cuichja cojo nuju xi tsindeya cjuatacun rë ne, ninchatuhun rë. ―‍Cuatjin xu cachja Jesús.
LUK 17:5 Ngajan xi apóstol ne, cuitjin xu cachja me cojo Nai naja: ―‍Nihñu xi hitsë sa ndaja cumangu tacuín cojo nuju. ―‍Cuatjin xu cachja me.
LUK 17:6 Sehe ngajan xi Nai naja ne, cuitjin xu cafayangui me: ―‍Sá xi mangutacún cojo ná ndastu hitsë ne, hacuaha cuma cuinújun cojo ya vihi catjixin tsëhë cahndë́ hiscan secun, hane catji catisecun ngajan ngajñi ndachacun, hane hacuaha cuihndë tsujun.
LUK 17:7 ’Cuejña ne xi ngu ngayun ne, tjin nuju ngu hndixahan xi vacjan nangui tsujun o sá xi sahmi cuidadu rë chu nuju. Hane xi cjuehe hndixahan vëhë xi quiji nguijña ne, ¿há cuinújun cojo cuitjin: “Ndove sanii ne, xini niñu”?
LUK 17:8 Jéya, hacuiin ta cuitjin cuinújun cojo: “Tehe chjini xi sínë, hacuaha tehe chjini yojo riji xi cuindove chani xi sínë xi cuëhë, hane xi cuijnetaha sínë ne, sehe xini sihi ngaye.” Cuatjin cuinújun.
LUK 17:9 Hacuaha tuun nacuechji rë hndixahan vëhë tsëhë xi casahmi yëjë ni hacutjin xi cavitexun rë.
LUK 17:10 Hacuanitjin nuju ngayun ta hya xi ha cafë canihñu yëjë ni hacutjin cavitexa nuju Nina ne, cuitjin meje rë xi ningatuhuntacún: “Ngahan ne, ngu hndixahan tujyë ni ngahan ta xi casahme ne, hacutjin xi casatëxa ná ne, vëhë ni xi casahme. Cuatjin meje rë xi ningatuhuntacún.” Vëhë xu cjua xi cachja Jesús cojo xuta ladu rë me.
LUK 17:11 Hane hya xi tivatju xu Jesús vasencja tsëhë distritu Samaria cojo distritu Galilea xi cjui me ngajan Jerusalén ne, cuitjin camá.
LUK 17:12 Hora xi ha cuisehen me ngu nandya jan ne, nduvatjengui xu të cha me, cha xi yaha rë ngu xcusun chíhin vitaha xi setaha yojo naja. Hane caxinchacunhñu xu cha hitsë jan,
LUK 17:13 hane tsëhë cjin ni cajindaya xu cha cachja cha cuitjin: ―‍¡Tatá Jesús! ¡Catamayuma nuju ngayin! ¡Nihñu xi cumandaja ngayin! ―‍Cuatjin xu cajindaya cha cachja cha.
LUK 17:14 Hane xi cavëë Jesús cha ne, cuitjin xu cachja me: ―‍Tángun hiscan xi siu nahmi, ningacun rë me yojo nuju xi tsajin mé cún ngayun. ―‍Cuatjin xu cachja me. Hane ndiya cjui cha ne, camandaja xu cha.
LUK 17:15 Hya xi camá ne, xi cavëë xu ngu cha xi camandaja cha ne, cavuya quijitjengui xu cha Jesús, jindaya cha chja cha xi tisahmi jyë tisahmi hnga xu cha Nina.
LUK 17:16 Hane xi cafehe xu cha hiscan secun Jesús ne, quiji caticjaxcun cha xcun me, xi tisua cha nacuechji rë me. Cha xi cuajyihi jan ne, cha Samaria cha.
LUK 17:17 Sehe ngajan xi Jesús ne, cuitjin xu cavinenguise me xuta ladu rë me: ―‍¿Hacuiin yëjë të cha xi cuicun vi xi camandaja cha ni? ¿Cha xi ñaja sa ne, jarë cha ne?
LUK 17:18 ¿Há suvá ni cha xi cuijyihi vi xi ngu xutaxín cha xi cavuya cha xi sahmi jyë sahmi hnga cha Nina ni?
LUK 17:19 Sehe cachja xu me cojo cha xi camandaja jan cuitjin: ―‍Tisatjunhngun, hane tjangun. Ngatsë rë xi camangutacún cojo ná ne, vëhë xi camandaja ngayun. ―‍Cuatjin xu cachja Jesús.
LUK 17:20 Cuitjin xu camá nga ngundiya. Cha fariseo ne, cavinenguise cha Jesús janihya cuinduva Nina sahmi me gubiernu. Sehe ngajan xi Jesús ne, cuitjin xu cafayangui me tsëhë cha: ―‍Nina ne, hya xi cuinduva me sahmi me gubiernu ne, hacuiin titjun sua me cumachaya naja sehe cuinduva me.
LUK 17:21 Tsajin yo cuichja: “Cuajyihi Nina nguehe”, o sá: “Cuajyihi Nina ngajan”; ta Nina ne, ha tisahmi me gubiernu ngajñi nuju. ―‍Cuatjin xu cachja me cojo cha fariseo.
LUK 17:22 Hya xi camá ne, cuitjin xu cachja me cojo xuta ladu rë me: ―‍Cuechú nixtin xi jemu cuma meje chutsujun ná ndastu ngu hora, ngahan xi Quihndi rë Xuta jain ngahan, peru cumaji.
LUK 17:23 Yahnga me cuichja me cojo nuju: “Cuajyihi me nguehe”, o sá: “Cuajyihi me ngajan”; peru hacuiin cuangun cojo me, hacuiin cuanguntjengun me ta
LUK 17:24 sacuaha sahmi hasen ndihichuhún xi ha tu ñahñu sahmi hasen rë jingujyë ni ngahnga, hisca nguehe hisca ngajan ne, cuatjin ha tu ñahñu scutsejen ná xuta tsëhë yëjë ni ladu hya xi cuechú nixtin xi cuinduva nga ngahan xi Quihndi rë Xuta Jain ngahan.
LUK 17:25 Peru chaja sa xi cuechú nixtin vëhë ne, hatuxa meje rë xi jemu cjín cjuañihi cuátju cuma, hacuaha xuta xi siu nixtin vihi ne, tsitjungui ná me.
LUK 17:26 Sacuatjin casahmi xuta nixtin hya xi cavéjña xutachanga naja Noé ne, hacuanitjin ni sahmi xuta hya xi ngahan cuinduva.
LUK 17:27 Nixtin rë Noé vë ne, jinë jihvi xuta, vixan me, tsinguixan me quihndi rë me. Cuatjin sahmi cuaha me hisca nixtin xi cavisehen Noé cahntsua barcu, hacuaha casesuntë nandá, hane ngajan cafë yëjë xuta cahme me.
LUK 17:28 Hacuanitjin ni xcusun vëhë casahmi xuta nixtin hya xi cavéjña ngu xutachanga xi hmí rë Lot: jinë hvi me, vatsë me, viteña me, vincha me tjë, hacuaha sahmi me ndihya.
LUK 17:29 Peru nixtin xi cavetju Lot tsëhë nandya Sodoma ne, cavixu ndihi tsëhë ngahnga, hacuaha cavixu ndyojo xi yaha rë ndihi, sacuaha xi cavaha ngu tsihñu, hane ngajan cafë yëjë xuta cahme me.
LUK 17:30 Hacuaha cuanitjin ni sahmi xuta hya xi cuinduva ngahan xi Quihndi rë Xuta Jain ngahan.
LUK 17:31 ’Nixtin hya ne, xuta xi hinchasun me rcu ndava me ne, mé tsëhë me xi siu cahntsua ndihya ne, miji rë xi cuitujne me cjue jaha me. Hacuaha ha chuva vëhë ni ne, xuta xi siutahá me nguijña ne, miji rë xi cuya cjue me ndava me.
LUK 17:32 Ninguitsjun sacuaha xcusun xi cavatju nima chjuun rë Lot.
LUK 17:33 Yo xi meje cjuenduju cojo ngasunhndë rë cojo ngahñu rë suvá ne, cuechintaain cjuahñu xatsë; peru yo xi cuatju cjuañihi o hisca cueya ngatsë naha ne, vëhë xi cuechútáha cjuahñu xatsë.
LUK 17:34 ’Nguehe cuichjá cojo nuju ta nguixun nixtin hya ne, jo xuta cuiyujufë tangun me ngu nachan. Ngu me ne, chjaháxin rë me, hane me xingu jan ne, cuejña me.
LUK 17:35 Hacuaha jo nga yachjin ne, cuiyujutahá na coho na. Ngu na ne, chjaháxin rë na, hane na xingu jan ne, cuejña na.
LUK 17:36 Hacuaha jo nga cha ne, cuiyujutahá cha nguijña. Ngu cha ne, chjaháxin rë cha, hane cha xingu jan ne, cuejña cha. ―‍Cuatjin xu cachja Jesús.
LUK 17:37 Hane xuta ladu rë me ne, cuitjin xu cavinenguise rë me: ―‍¿Hane jani cuma xcusun vëhë ni, tatá? ―‍Cuatjin xu cavinenguise me. Sehe ngajan xi Jesús ne, cachja xu me ngu ejemplu cuitjin: ―‍Hiscan jiña chu xi cahme ne, hacuaha ngajan matangun chu lote. ―‍Cuatjin xu cachja Jesús.
LUK 18:1 Hacuaha cachja sa xu Jesús ngu ejemplu cojo xuta ladu rë me xi sua me cumachaya rë xi meje rë xi yasen ni ne, sahmi me oración rë me, miji rë xi sahmi chúva cacun me.
LUK 18:2 Cuitjin xu cachja me: ―‍Cuejñaa ne xi ngu nandya jan ne, tjin ngu juez xi tsacjuiin rë Nina hacuaha faharcuaain rë xuta.
LUK 18:3 Hacuaha nandya jan ne, tacun ngu chjuun cahan. Hane nchunchujun ni quiji na xcun juez jan ne, cachja na cuitjin: “Meje ná xi nihñucuendun jyë́ xi vincha xuta tsahan.” Cuatjin cachja na.
LUK 18:4 Peru juez jan ne, jemu jyë nixtin xi mijí sahmicuenda me tsëhë na. Peru xi camá ngascan ne, cuitjin catsingataha cacun me: “Handasa tsacjuun Nina hacuaha faharcuun xuta ne,
LUK 18:5 peru ngatsë rë xi jemu tisuaxti na cahan vi ngahan ne, vëhë xi cjuahácuenda cjuacjintacun rë na, sá tsajin ne, jemu tsijenda na ngahan xi ngajan cjui ngajan nduva na.” Cuatjin xu catsingataha cacun me.
LUK 18:6 Sehe ngajan xi Nai naja ne, cachja sa xu me cuitjin: ―‍Chutsujun hacutjin chja juez tsehen vë.
LUK 18:7 Nina ne, ¿hacuiin hatuxa cjuahacuenda me cjuacjintacun rë xuta xi cavaxijin me, xi nguixun nguitajñu fehya rë me xi cjuahacuenda me tsëhë? ¿Há jemu cuindeya cjuahacuenda me?
LUK 18:8 Nguehe cuichjá cojo nuju ta Nina ne, ngutjen ni cjuahacuenda me. Peru hya xi cuinduva nga ngahan xi Quihndi rë Xuta Jain ngahan ne, ¿há tjin xuta xi mangucacun cojo ná nguehe ngasunhndë? ―‍Cuatjin xu cachja Nai naja.
LUK 18:9 Hacuaha siu sa xu ngujo xuta xi tsingataha cacun suvá me xi tsajin jyë́ rë me xcun Nina hacuaha sahmi xta me cojo xuta xi yahnga. Hane xuta xi cuacun vë ne, cuitjin xu cachja Jesús ngu ejemplu cojo rë me:
LUK 18:10 ―‍Cuejña ne xi jo cha jan ne, quiji cha yungun xi matitjun xi sahmi cha oración rë cha. Ngu cha ne, cha fariseo cha, hane cha xingu ne, cha faha tujúnsa cha.
LUK 18:11 Cha fariseo jan ne, cavisecun cha casahmi cha oración rë cha cahntsua xahasen ni rë cha, cachja cha cuitjin: “Ngayun Nina, suá nacuechji nuju ta ngahan ne, hacuiin tangun ngahan cojo jingu sa cha xi ndacha cha, tsehen cha, tsindesu cha cojo jingu sa chjuun, hacuaha hisca tanguaain ngahan cojo cha faha tujúnsa vi.
LUK 18:12 Sahme xun naha jo ndiya xi ngu totje, hacuaha vátëcja të cahndë́ tsëhë yëjë ni xi sacu ná, hane suá nuju ngu cahndë́.” Cuatjin casahmi cha fariseo oración rë cha.
LUK 18:13 Peru cha faha tujúnsa ne, hitsë ni cjin secun cha, hacuaha hisca cavuyaain cavutsejen cha ngahnga ta tu cavisanetsja ni cha rcu cha, cachja cha cuitjin: “Ngayun Nina, catamayuma nuju ngahan xi jemu tjin jyë́ naha.” Cuatjin cachja cha.
LUK 18:14 Cuichjá cojo nuju ta cha faha tujúnsa jan ne, xi tu cavuya cafe cha ndava cha ne, ha cafë jyë́ rë cha xcun Nina, peru cha fariseo jan ne, hacuiin cuatjin cafë jyë́ rë cha. Cuatjin camá ta, tsëhë xi yëjë xuta xi sahmi yehe suvá me yojo rë me ne, cuechú nixtin xi Nina ne, tsinguijne me cjuatacun rë. Hane xuta xi tsinguijne suvá me yojo rë me ne, Nina ne, sahmi jyë rë me. ―‍Cuatjin xu cachja Jesús.
LUK 18:15 Hacuaha cjuicojo xu xuta nixti rë me hiscan tacun Jesús xi cuisanetsja me nixti jan. Peru hya xi cavëë xu xuta ladu rë Jesús xi cuatjin cjui xuta cojo nixti rë me ne, cavatëcja xu me cjuatacun rë xuta jan.
LUK 18:16 Peru Jesús ne, cajindaya xu me nixti jan xi cjuetjengui rë me, sehe ngajan xi cachja xu me cojo xuta ladu rë me cuitjin: ―‍Tuhun rë nixti cahndë́ catinduva tjengui ná. Xicanichuun rë cahndë́ ta, tsëhë xi nixti xi cuacun ne, hatuxa visehen ngajan hiscan xi sahmi Nina gubiernu.
LUK 18:17 Cuichjá cojo nuju cjuaquixi ta suvá ni xuta xi tsingatihin me xi sahmi Nina me gubiernu sacuatjin tsingatihin nixti ne, me vëhë ni xi cuisehen me hiscan xi sahmi Nina gubiernu. ―‍Cuatjin xu cachja Jesús.
LUK 18:18 Ngu xuta xi matitjun ne, cavinenguise xu me Jesús cuitjin: ―‍Ngayun Maestro, jemu ndaja ngayun. ¿Mé xi meje rë xi sahme cojo sa xi sacú ná cjuahñu xatsë? ―‍Cuatjin xu cachja me.
LUK 18:19 Sehe ngajan xi Jesús ne, cuitjin xu cafayangui me: ―‍¿Mé má cuatjin nújun xi ndaja ngahan? Tsajin yo xi ndaja. Ngu ni Nina xi ndaja me.
LUK 18:20 Ngayun ne, ha hyun hacutjin chja ley rë Nina xi chja cuitjin: “Xicanihñuu cjuatsehen cojo rë ngu chjuun o cojo rë ngu xihin xi hacuiin tsujun, xicanicuun xuta, xicanihñuu cjuachëjë, xicanujuun cjuandesu tsëhë xuta, chjuhunrcun nahmi nuju hacuaha chjuhunrcun na nuju.” ―‍Cuatjin xu cachja Jesús cjua rë ley rë Nina.
LUK 18:21 Hane ngajan xi xuta xi matitjun jan ne, cuitjin xu cachja me cojo Jesús: ―‍Yëjë cjua vëhë ne, ha cáhndë tsëhë hisca cjualihndi naha. ―‍Cuatjin xu cachja me.
LUK 18:22 Hane xi cahndë xu Jesús cjua rë me ne, sehe cachja xu me cuitjin: ―‍Tjin sa ngu cjua xi machaja nuju: yëjë ni xcusun xi tjin nuju ne, titeñu, hane sehe tichuncjun tujún rë ngajñi rë xuta yuma. Hane xi cuatjin nihñu ne, jemu jyë cjuanchina sacú nuju ngajan ngahnga. Hane xi cjuë cuichuncjun tujún vëhë ne, sehe nduvun tisecun ná. ―‍Cuatjin xu cachja Jesús.
LUK 18:23 Peru xi cahndë xu xuta xi matitjun jan cjua xi cachja Jesús ne, jemu va camá cacun me, tsëhë xi jercu nchina camahani me.
LUK 18:24 Hane xi vutsejen xu Jesús xi jemu va camá cacun xuta xi matitjun jan ne, sehe cachja xu me cuitjin: ―‍Jemu chja xi ngu xuta xi tjin rë me cjuanchina cuisehen me hiscan sahmi Nina gubiernu.
LUK 18:25 Ha hitsë sa chjaain cuatju ngu chu camellu ngojo rë ngu níndu xi cuma rë xi cuisehen ngu xuta nchina hiscan sahmi Nina gubiernu. ―‍Cuatjin xu cachja Jesús.
LUK 18:26 Ngajan xi xuta xi cahndë me cjua jan ne, cuitjin xu cachja me: ―‍Sá cuatjin ne, ¿yo xi cuma cuetjutje ni? ―‍Cuatjin xu cachja me.
LUK 18:27 Hane Jesús ne, cuitjin xu cafayangui me: ―‍Yëjë ni xi maji sahmi xuta ne, Nina ne, hatuxa ma sahmi me. ―‍Cuatjin xu cafayangui Jesús.
LUK 18:28 Ngajan xi Pedru ne, cuitjin xu cachja me cojo Jesús: ―‍Chutsujun ni. Ngayin ne, ha canismitacuín yëjë ni xcusun xi tjin niji, hane tivisecuin nuju. ―‍Cuatjin xu cachja Pedru.
LUK 18:29 Hane Jesús ne, cuitjin xu cachja me: ―‍Cuichjá cojo nuju cjuaquixi ta yëjë xuta xi tsismicacun me ndava me, tsismicacun me chjuun rë me, tsismicacun me xicjin me, tsismicacun me xutacha rë me, tsismicacun me quihndi rë me, xi cjuetjengui me ndiya rë Nina ne,
LUK 18:30 hatuxa cjín sa cahndë́ sacú rë me xi cuma sacuaha ndava me, hacuaha hatuxa cjín sa xuta sacú rë me xi cuma sacuaha xuta rë me, quihndë xi siu me ngasunhndë vihi, hane hya xi cueya me ne, sacú rë me ngu cjuahñu xatsë. ―‍Cuatjin xu cachja Jesús.
LUK 18:31 Hya xi camá xu ne, quijicojoxin Jesús tejó xuta ladu rë me, sehe cachja xu me cojo cuitjin: ―‍Quihndë ne, tivanguen Jerusalén. Hane xi cjuehen jan ne, cuetjucaa yëjë sacuatjin catsihindu profeta tsahan, ngahan xi Quihndi rë Xuta Jain ngahan.
LUK 18:32 Ngahan ne, cuma ngahan entregadu tsja xutaxín, cuejnucëë ná xuta, choho cuichja me tsahan, cuëhënatya ná me.
LUK 18:33 Hane xi cjuë cuaja ná me ne, sehe tsiquehen ná me. Peru xi ma jyan nixtin ne, cúya nga cjuahñu. ―‍Cuatjin xu cachja Jesús.
LUK 18:34 Peru xuta ladu rë me jan ne, hisca ngu xu cjua vëhë cajnii rcu me ta tjihma cjuatacun vëhë xi cuma rë me. Vëhë xi hvíin xu me mé vijne cjua xi cachja Jesús jan.
LUK 18:35 Hya xi camá ne, xi camatiña xu Jesús tsëhë nandya Jericó cojo xuta ladu rë me ne, ngajan tacun xu ngu cha rcá tjehen ndiya, fehya cha caridad.
LUK 18:36 Hane xi cahndë cha xi jercu cjín xuta fane ntsacu me ne, sehe cavinenguise xu cha mé jima jan.
LUK 18:37 Hane tjin xu yo cachja cojo cha xi Jesús tsëhë nandya Nasaret tivatju me cojo xuta ladu rë me.
LUK 18:38 Hane cha rcá jan ne, cuitjin xu cajindaya cha cachja cha: ―‍¡Ngayun Jesús, tjë rë David! Catamayuma nuju ngahan. ―‍Cuatjin xu cachja cha.
LUK 18:39 Hane xuta xi cjui titjun jan ne, cavisiajmi cjan xu me cojo cha xi sejyu cha. Peru cha vëhë ne, hitsë sa jercu cajindaya xu cha cachja cha, cuitjin cachja cha: ―‍¡Ngayun tjë rë David! Catamayuma nuju ngahan. ―‍Cuatjin xu cachja cha.
LUK 18:40 Ngajan xi Jesús ne, xi casecunhñu xu me ne, sehe cavitexa me xi cuinduva cojo xuta cha rcá jan hiscan xi secun me. Hane xi camatiña cha tsëhë Jesús ne, sehe cavinenguise xu me cha cuitjin:
LUK 18:41 ―‍¿Mé xi meje nuju xi sahme cojo nuju ni? ―‍Cuatjin xu cavinenguise me. Sehe ngajan xi cha rcá jan ne, cuitjin xu cachja cha: ―‍Tatá. Meje ná xi cuma tsejen nga ná. ―‍Cuatjin xu cachja cha.
LUK 18:42 Hane Jesús ne, cuitjin xu cachja me cojo cha: ―‍Catamatsejen nga nuju. Ngayun ne, camandaja túxcun ta, tsëhë xi camangutacún cojo ná. ―‍Cuatjin xu cachja Jesús.
LUK 18:43 Hane ha hora vëhë ni ne, camatsejen nga xu rë cha. Sehe quiji xu cha cojo Jesús táha sahmi jyë sahmi hnga cha Nina. Hane xi cavëë yëjë xuta xcusun xi camá jan ne, jemu cavaxëndaja xu me Nina.
LUK 19:1 Hya xi camá ne, cavisehen xu Jesús nandya Jericó xi cuatju me vasencja nandya.
LUK 19:2 Hane ngajan tacun xu ngu cha xi hmí rë Zaqueo, ngu cha xi matitjun tsëhë cha faha tujúnsa, hacuaha jemu nchina cha.
LUK 19:3 Hane cha vëhë ne, jemu meje scuëë xu cha yo xi Jesús, peru camaji ta, tsëhë xi jercu cjín camahani xuta quitsë me, hacuaha cha vëhë ne, jemu patú xu cha.
LUK 19:4 Hane xi cavangatitjun cha ne, quiji camiji xu cha ngu ya jyë, cojo sa xi cuma scuëë cha Jesús ta, tsëhë xi hatuxa ngajan cuatju me.
LUK 19:5 Hane xi cafehe xu Jesús jan ne, sehe cavuya cavutsejenniji me rcu ya hiscan quisun cha ne, sehe cachja xu me cojo cha cuitjin: ―‍Zaqueo, nduvunjnu sanii ta, tsëhë xi sahmi ná ngujyë xi ndya nuju cuitejña quihndë. ―‍Cuatjin xu cachja me.
LUK 19:6 Ngajan xi cha Zaqueo ne, marcu macjain xu cavitujne cha, cafahatsja cha Jesús cojo yëjë ni cjuasua, quijicojo cha me ndava cha.
LUK 19:7 Hane xi cavëë yëjë xuta xi cuatjin casahmi Jesús ne, sehe cachjahma xu me cojo xicjin me cuitjin: ―‍Quiji cavéjña me cojo ngu cha tsehen. ―‍Cuatjin xu cachjahma me.
LUK 19:8 Hya xi camá ne, xi ha tacun Jesús ndava cha Zaqueo ne, cavisatjenhnga xu cha, sehe cachja xu cha cojo Nai naja cuitjin: ―‍Chutsujun ni, tatá. Vasentjin tsëhë yëjë ni xcusun xi tjin ná ne, suá rë xuta yuma. Hane sá xi tjin yo xi cavaxë́ rë tujún cojo cjuandacha ne, ñuju cuatjin sacuatjin xi cafahá ne, tsicúya tsëhë me. ―‍Cuatjin xu cachja cha.
LUK 19:9 Ngajan xi Jesús ne, cuitjin xu cachja me: ―‍Quihndë ta cuatjin ne, ngayujun ni tsëhë ndihya vihi ne, cavetjuntjun ta, me xi cuijyihi vi ne, hacuaha cojo me má me xuta ladu rë Nina.
LUK 19:10 Hane ngahan xi Quihndi rë Xuta Jain ngahan ne, canduvá xi cuanguësë hacuaha cuaxë́tjë xuta ladu rë Nina xi cachajá me tsëhë ndiya rë Nina. ―‍Cuatjin xu cachja Jesús.
LUK 19:11 Xi tu cajnetaha cavisiñuju xuta cjua vëhë ne, Jesús ne, cachja sa xu me ngu ejemplu cojo xuta jan ta, tsëhë xi tiña siutahá me cojo nandya Jerusalén, hane má xu rë xuta ta ha hisca tacun xati xi cuinduva Nina sahmi me gubiernu.
LUK 19:12 Hane cuitjin xu cachja me: ―‍Cuejña ne xi ngu xuta chacun jan ne, quiji me ngu nangui cjin, xi cjuahaxa me xi cumatitjun me tsëhë estadu rë me, sehe cuya nga me.
LUK 19:13 Hane chaja sa xi cjue me ne, cajindaya me të hndixahan rë me, sehe casua rë me jima ngu hndixahan jan tujún. Sehe cachja me cojo cuitjin: “Nihñu xa cojo tujún vihi jinguyëjë rë xi cjuë́ sehe cúya.” Cuatjin cachja me.
LUK 19:14 Peru xuta tsëhë estadu rë me ne, jemu choho vëë rë me. Vëhë xi hya xi ha quiji xuta chacun ja ne, catsingatju xuta estadu rë me jan ngujo cha xi cuichja cha cuitjin cojo xuta xi suaxa rë xuta chacun jan: “Mamijí niji xi me xi cuajyihi vë cumatitjun me tsijin.” Cuatjin cuichja cha.
LUK 19:15 Hya xi camá ne, xi cavuya xuta chacun jan xi cafë cafahatsja me xa ne, cavitexa me xi chjindaya rë cha hndixahan rë me xi casua rë me tujún jan, cojo sa xi sua cha cumachaya rë me há cjín cavesun rë cha jima ngu cha xi casahmi cha xa cojo tujún xi casua me cha.
LUK 19:16 Hane cha hndixahan xi canduva titjun ne, cuitjin cachja cha: “Tatá. Sacuatjin tujún xi catuhun ná ne, cavesun ná të cuatjin sa.” Cuatjin cachja cha.
LUK 19:17 Sehe ngajan xi nai rë hndixahan jan ne, cuitjin cachja me cojo: “Ndatjin ri. Ngaye ne, ngu hndixahan ndaja ngaye. Ngatsë rë xi jemu ndaja canihñi xa xi chúva vë ne, suá ri të nandya xi cumatitjun ngaye tsëhë.” Cuatjin cachja me.
LUK 19:18 Hane xi canduva cha xi majo ne, cuitjin cachja cha: “Tatá. Sacuatjin tujún xi catuhun ná ne, cavesun ná hñú cuatjin sa.” Cuatjin cachja cha.
LUK 19:19 Hane nai rë hndixahan jan ne, cuitjin cachja me: “Ngaye ne, cumatitjun ngaye tsëhë hñú nandya.” Cuatjin cachja me.
LUK 19:20 Hya xi camá ne, xi canduva nga ngu cha ne, cuitjin cachja cha: “Tatá. Cuajyihi tujún xi catuhun ná nguehe. Tujún vi ne, cavinchándaja cahntsua ngu pañutu ta,
LUK 19:21 tsëhë xi tsácjun nuju. Ta ngayun ne, jemu hñu cjua nuju. Tangun ngayun cojo ngu xuta xi fanga me handasa hacuiin me vëhë catsitjë me ta, tsëhë xi ngayun ne, hacjahi sahmi xa ne, ngayun chjuhunntsun chji rë.” Cuatjin cachja cha hndixahan vëhë.
LUK 19:22 Ngajan xi xuta chacun jan ne, cuitjin cachja me cojo hndixahan vëhë: “Ngaye, hndixahan tsehen ne, cojo cjua riji sove ni tsichúva ri. Ngaye xi noje xi hye xi jemu hñu cjua naha, hacuaha tangun ngahan cojo ngu xuta xi fanga me handasa hacuiin me catsitjë me, tsëhë xi ngahan ne, hacjahi sahmi xa ne, ngahan fahántsa chji rë.
LUK 19:23 Sá xi hye xi cuatjin ne, ¿mé má hacuiin xcun bancun cahmi chani tujún xi casuá ri, cojo sa xi hya xi cjuëhë ne, cúya cjuahántsa tujún naha, peru cojo quihndi rë ni?” Cuatjin cachja xuta chacun jan cojo hndixahan rë me.
LUK 19:24 Sehe cachja sa me cojo ngujo hndixahan rë me xi hinchacun jan cuitjin: “Chjuhuntuhun tujún xi yaha cha vë ne, sehe tuhun rë cha xi cavesun rë të cuatjin sa sacuatjin tujún xi casuá rë.” Cuatjin cachja xuta chacun jan.
LUK 19:25 Hane hndixahan jan ne, cuitjin cafayangui: “Tatá. ¡Peru cha vëhë ne, ha tjin rë cha të cuatjin sa!” Cuatjin cachja cha.
LUK 19:26 Ngajan xi xuta chacun jan ne, cuitjin cachja me: “Nguehe cuichjá cojo nuju ta yëjë xuta xi cavesun rë me xcun xi ha tjin rë me ne, suá sa rë me. Hane xuta xi tsajin mé cavesun rë me ne, hisca xi tjin rë me ne, cjuahátahá.
LUK 19:27 Hane sacuaha condra naha xi mijí rë xi ngahan cumatitjun ngahan tsëhë ne, tángun chjuhun, nduvuncujun nguehe, sehe nicuhun nguehe xcún.” Cuatjin cachja xu xuta chacun xcun ejemplu xi cachja Jesús.
LUK 19:28 Hya xi camá xu ne, xi cavatju cachja Jesús cjua vëhë ne, sehe cavetju me quiji sa xu me xi cjuehe me Jerusalén.
LUK 19:29 Hane hya xi camatiña me tsëhë nandya Betfajé cojo nandya Betania, nandya xi siu tiña tsëhë ndetjún xi hmí rë Ndetjún Olivu ne, sehe catsingatju xu me jo xuta ladu rë me xi cjue tixa rë me,
LUK 19:30 hane cuitjin xu cachja me: ―‍Tángun nandya xi tsejen tacun vë. Hane xi cjuhun jan ne, ngajan cuechuntuhun ngu chu burru xatsë, xi hisca ngu cjëë cuijin rë chu, tjihñu chu. Hane chundecjun chu, nduvuncujun chu.
LUK 19:31 Hane sá xi yo cjuinenguise nuju mé má cuatjin chundecjun chu ne, sehe tinújun cuitjin: “Nai niji meje rë me chu.” Cuatjin tinújun. ―‍Cuatjin xu cachja Jesús.
LUK 19:32 Hane me xi casatëxa rë jan ne, quiji xu me, hane cavetjucaa jain sacuatjin cachja Jesús cojo rë me.
LUK 19:33 Hane jinguyëjë rë xi tivundecja me burru jan ne, nai rë chu ne, cuitjin xu cachja me: ―‍¿Mé má cuatjin chundecjun burru vë? ―‍Cuatjin xu cachja me.
LUK 19:34 Hane xuta ladu rë Jesús jan ne, cuitjin xu cafayangui me: ―‍Nai niji meje rë me chu. ―‍Cuatjin xu cachja me.
LUK 19:35 Sehe quijicojo xu me chu hiscan tacun Jesús. Hane caviyujusun me tsjian rë me ngaxtun chu, sehe catsiquijin xu me Jesús burru jan.
LUK 19:36 Hane xi cjui Jesús quisun me burru jan ne, táha ticandi xu xuta tsjian rë me hiscan cjui Jesús.
LUK 19:37 Ngajan xi xi jima tiña xu Jesús cojo yëjë xutacjín jan nandya Jerusalén, hiscan xi cafaha rë xi ha cuitsingaxten ndiya tsëhë Ndetjún Olivu ne, yëjë ni xutacjín xi xuta ladu rë Jesús jan ne, jercu ndama xu rë me, hisca cavetsihin cajindaya me cachja me xi cavaxëndaja me Nina tsëhë yëjë ni cjuarcun xi cavëë me.
LUK 19:38 Cuitjin xu cachja me: ―‍Jemu catsinchacun Nina me xi nduva vi xi cuma titjun tsajan, tsëhë xi Nina catsingatju rë me. Ngahnga ne, hatuxa jemu tjin cjuandaja cjuajeya, hacuaha Nina ne, hatuxa jyë hnga me cojo Hasen rë me. ―‍Cuatjin xu cavaxëndaja xuta Nina.
LUK 19:39 Hane ngujo cha fariseo xi hinchajñi ngajñi rë xutacjín jan ne, cachja xu cha cojo Jesús cuitjin: ―‍Maestro, tichuncjun cjua xi tichja xuta ladu nuju vë. ―‍Cuatjin xu cachja cha.
LUK 19:40 Hane xi cafayangui Jesús ne, cuitjin xu cachja me: ―‍Nguehe cuichjá cojo nuju ta sá xi xuta xi cuicun vi sejyu me ne, ndyojo vi cuetsihin squindaya cuichja nga. ―‍Cuatjin xu cafayangui me.
LUK 19:41 Hane xi camatiña sa xu Jesús tsëhë Jerusalén ne, xi cavëë me nandya jan ne, cajihnda xu me ngatsë rë.
LUK 19:42 Sehe cachja xu me sacuaha xi tichja me cojo xuta Jerusalén, cuitjin xu cachja me: ―‍¡Sá mé ni xi hacuaha cojo ngayun hyun cjuatacun xi yaha cjuandaja cjuajeya! Peru quihndë matsejen ne, cjuatacun vëhë matsejen ne, jiyahma xi cuma nuju. Vëhë xi hyúun.
LUK 19:43 Peru cuechú nixtin xi yëjë ni condra nuju matsejen ne, sahmi me ngujyë xi cuma cuisehen me nandya nuju, xinchandee nuju me yëjë ni ladu xi cuinchahñu nuju me.
LUK 19:44 Tsixujne me yëjë ni ndihya tsëhë nandya nuju, tsicanguiin me hisca ngu ndyojo xi tinecoo, hacuaha tsiquehen nuju me ngayujun ni xi nechun nandya nuju. Cuatjin cuatjun cuma matsejen ta, tsëhë xi ngayun matsejen ne, cajnii rcun hya xi cafehe Nina xi cuaxëtje nuju me. Cuatjin xu cachja Jesús.
LUK 19:45 Hane xi cafehe me nandya Jerusalén ne, sehe quiji xu me yungun xi matitjun. Hane xi cavisehen me ndatsen yungun jan ne, cavetsihin cavaxë me xuta xi sahmi ndetsin jan.
LUK 19:46 Cuitjin xu cachja me: ―‍Cuitjin camahindu xcun xujun rë Nina sacuatjin xi cachja me: “Ndya naha ne, vejña xa xi cjue xuta sahmi me oración rë me.” Cuatjin chja Nina. Peru ngayun ne, tinihñuxun cojo sacuaha ngu cahndë́ hiscan xi matangun xuta chëjë. ―‍Cuatjin xu cachja Jesús.
LUK 19:47 Hya xi camá ne, nchunchujun xu ni quiji Jesús cavicuya me xuta ngajan ndatsen yungun xi matitjun. Hane yëjë ni nahmi xi matitjun cojo yëjë cha xi vicuya cjuachacun cojo yëjë sa xuta xi matitjun ne, jemu cavangui xu me chuva rë xi tsiquehen me Jesús,
LUK 19:48 peru casacuinyiin xu rë me mé sahmi me ta, tsëhë xi yëjë ni xuta ne, tivisiñuju xu me cjua rë Jesús nguñaja cacun me.
LUK 20:1 Cuitjin camá xu ngu nixtin hya xi tivicuya Jesús xuta hacuaha tisua me jimachaya rë cjuandajyihi rë Nina ngajan ndatsen yungun xi matitjun. Hacuaha camatangun xu nahmi xi matitjun cojo cha xi vicuya cjuachacun cojo xuta changá,
LUK 20:2 hane cuitjin xu cavinenguise me Jesús: ―‍Tinújun cojo niji ne, ¿yo cavitexa nuju xi cuatjin nihñu? ¿Yo casuaxa nuju? ―‍Cuatjin xu cavinenguise me.
LUK 20:3 Hane xi cafayangui Jesús ne, cuitjin xu cachja me: ―‍Hacuaha cjuinenguësë nuju ngu cjua, hane chjayunngun tsahan:
LUK 20:4 ¿Yo cavitexa rë Juan xi cuitenda me xuta? ¿Há Nina ne, o há tsajin ne, há xuta? ―‍Cuatjin xu cachja me.
LUK 20:5 Sehe ngajan xi xuta xi cuacun jan ne, cavisiajmicjín me ngajñi rë me, cachja xu me cuitjin: ―‍Sá xi cuinújan xi Nina cavitexa me cha Juan vë ne, cjuinenguise naja me: “¿Mé má camacjaain naja cha?”
LUK 20:6 Hane sá xi cuinújan xi xuta cavitexa rë cha ne, yëjë ni xuta ne, tsiquehen naja me cojo ndyojo ta, tsëhë xi yëjë ni xuta ne, ha macjain rë me xi cha vëhë ne, profeta cha. ―‍Cuatjin xu cavisiajmicjín me.
LUK 20:7 Ngajan xi xuta xi cuacun jan ne, cachja me xi hvíin me.
LUK 20:8 Sehe ngajan xi Jesús ne, cuitjin xu cachja me: ―‍Sá cuatjin ne, ngahan ne, hacuaha cuichjaan cojo nuju yo cavitexa ná xi cuitjin sahme. ―‍Cuatjin xu cachja Jesús.
LUK 20:9 Hya xi camá ne, cavetsihin cachja xu Jesús cojo yëjë ni xuta jan ejemplu vihi: ―‍Cuejña ne xi ngu me jan matsejen ne, catsitjë me xcun nangui rë me xca rë uva. Sehe casua me ngujo cha sahmixa xi cjuahacuenda cha sehe cjuaha tsë tsë me cojo cha. Hya xi camá ne, sehe cavetju me quiji me ngu nangui jemu tsëë camahani.
LUK 20:10 Hane xi cavechú nixtin rë tutjë́ jan matsejen ne, sehe catsingatju me ngu mosu hndixahan rë me xi quiji cachja cha cojo cha xi fahacuenda xitjë jan xi sua cha hitsë tutjë́ xi satë rë me xi casacu rë cha xcun nangui rë me jan. Peru cha xi fahacuenda xitjë jan matsejen ne, tu cavaja cha cha hndixahan jan, sehe catsingatju cha cafe, ndastu mé casua rë cha.
LUK 20:11 Hya xi camá ne, cavuya catsingatju nga me ngu hndixahan rë me. Hndixahan vëhë matsejen ne, jemu cavaja rë cha, jemu choho cachja cha cojo, sehe catsingatju cha cafe, ndastu mé casua rë cha.
LUK 20:12 Hya xi camá ne, cavuya catsingatju nga me ngu hndixahan xi majyan. Hndixahan vëhë matsejen ne, jemu cavanguihmu rë cha, sehe cavaxëxin cha tsëhë ngajan.
LUK 20:13 ’Ngajan xi nai rë xitjë jan matsejen ne, cuitjin catsingataha cacun me: “¿Mé xi ndatjin sahme quihndë? Ndatjin rë xi tsingátju quihndi naha xi jemu hmú cácun. Cjuaharcun rë cha, xi quihndi naha.” Cuatjin catsingataha cacun me.
LUK 20:14 Peru xi cavëë cha xi fahacuenda xitjë jan cha vëhë matsejen ne, sehe cavisiajmicjín cha cojo xicjin cha cuitjin: “Cha vihi ne, quihndi rë me xi cuahatsja cha xitjë vi. Niquen cha, cojo sa xi tsajan cuma nangui vi.” Cuatjin cavisiajmicjín cha.
LUK 20:15 Hane xi cavaxëxin cha cha tsëhë nangui jan matsejen ne, sehe catsiquehen cha. ’Xi má nuju matsejen ne, ¿mé sahmi nai rë xitjë jan cojo cha xi cuacun fahacuenda jan?
LUK 20:16 Cjue tsiquehen me cha, sehe sua me xitjë jan cjuahacuenda jingu sa cha sahmixa. ―‍Cuatjin xu cachja Jesús. Hane xi cahndë yëjë xuta cjua vëhë ne, cachja xu me cuitjin: ―‍¡Catamamiji cacun Nina xi cuatjin cuma! ―‍Cuatjin xu cachja me.
LUK 20:17 Ngajan xi xi cavuya vutsejen Jesús xuta jan ne, cuitjin xu cachja me: ―‍¿Mé vijne xi cuitjin camahindu xcun xujun rë Nina?: Ndyojo xi catsitjungui chjinevexo ne, vëhë ndyojo xi cavéjña tjun tjun yuju rë xihndënaña. Cuatjin camahindu.
LUK 20:18 Hya xi ngu xuta cjuinenguisun me xcun ndyojo vëhë matsejen ne, cuatëlanga rë me. Hane hya xi ndyojo vëhë cjuinenguisun rë ngu xuta matsejen ne, ña cuma të me. ―‍Cuatjin xu cachja Jesús.
LUK 20:19 Vëhë xi cha xi vicuya cjuachacun cojo nahmi xi matitjun ne, jemu cavangui xu me chuva rë hacutjin cuma xi cjuaha me Jesús hora vëhë ni, tsëhë xi vëë me xi ejemplu xi cachja Jesús ne, condra rë me chja. Peru tsëhë xi tsacjun xu me xuta ne, vëhë xi cafaain xu me Jesús ngutjen.
LUK 20:20 Tu siu xu ni me cuidadu tsëhë cjua rë Jesús, hisca catsingatju xu me ngujo cha xi tsejen sacuaha xuta ndaja, xi cuangui cha chuva rë xi cuaxë rë cha Jesús ngu cjua xi cuaaintjin, cojo sa xi cuma chjahá rë me cjuechani rë me xcun xutaxa rë ndihyavasen.
LUK 20:21 Hane cha xi cuacun jan ne, cuitjin xu cachja cha cojo Jesús. ―‍Maestro, ngayin ne, hyin ta ngayun ne, vicuyun rë xuta cojo cjuaquixi. Hacuaha tangun ni nújun cojo yëjë xuta ta, tsëhë xi ngayun ne, hatuxa vicuyun ndiya rë Nina cojo cjuaquixi.
LUK 20:22 Quihndë ne, sacuaha ley rë Moisés ne, ¿há sua cahndë́ xi cuechjen tujúnsa naja cojo César, me xi matitjun, o há suaain cahndë́? ―‍Cuatjin xu cachja cha.
LUK 20:23 Peru Jesús ne, tsëhë xi ha vacun rë me xi jemu ndacha cha ne, cuitjin xu cachja me cojo cha:
LUK 20:24 ―‍Ningacun ná ngu tujún. Quihndë ne, ¿yo xcusun rë hacuaha yo ñihi rë xi quitahá xcun tujún vë? ―‍Cuatjin xu cavinenguise Jesús. Hane cha xi cuacun vë ne, cuitjin xu cafayangui cha: ―‍Tsëhë César. ―‍Chja xu cha.
LUK 20:25 Sehe ngajan xi Jesús ne, cuitjin xu cachja me cojo cha: ―‍Sá xi cuatjin ne, tuhun rë César xi tsëhë me, hane tuhun rë Nina xi tsëhë me. ―‍Cuatjin xu cachja me.
LUK 20:26 Hane camaji cavaxë xu rë cha Jesús ngu cjua xi cuaaintjin xi cuihndë xuta. Hane xi quijircun xu rë cha tsëhë cjua xi cafayangui Jesús ne, tu caviyujujyuu xu ni cha.
LUK 20:27 Hya xi camá ne, cafehe xu ngujo cha saduceo hiscan tacun Jesús. Cha xi cuicun vi ne, vicuya cha cjuachacun xi chja xi xuta xi cahme ne, cuyaain nga me cjuahñu. Ngajan xi cha xi cuacun cafehe jan ne, cachja xu cha cojo Jesús cuitjin:
LUK 20:28 ―‍Maestro, Moisés ne, catsihindu me xcun xujun rë Nina xi sá xi ngu xihin cueya, hane tsajin rë chjuun rë hisca ngu quihndi ne, hntsë nima vëhë ne, meje rë xi cjuaha rë chjuun cahan vëhë, cojo sa xi sacú rë na quihndi xi cuma sacuaha quihndi rë nima vëhë.
LUK 20:29 Quihndë ne, cuejña xi ngu ndihya ne, siu yatu cha cojo hntsë cha. Hane cha tjun ne, cafaha cha chjuun. Peru cahme cha, hane chjuun rë cha vëhë ne, casacuiin rë na hisca ngu quihndi cojo cha.
LUK 20:30 Hya xi camá ne, hntsë nima vëhë, cha xi majo ne, cafaha cha na cahan vëhë camá chjuun rë cha na, peru hacuaha cahme cha hane casacuiin rë na quihndi.
LUK 20:31 Hacuanitjin ni cafaha cha xi majyan jan na hisca xi cafë yëjë xi yatu cha cafaha cha na. Peru yëjë cha xi cuacun vë ne, cafë cha cahme cha chuva ngu chuva ngu cha. Hane na vëhë ne, casacuiin rë na hisca ngu quihndi cojo cha xi cuacun vë.
LUK 20:32 Hiscan xi cajnetaha ne, na vëhë ne, hacuaha cahme na.
LUK 20:33 Quihndë ne, hya xi cuya yëjë nima cjuahñu ne, ¿jarë cha xi cuacun vë xi chjuun rë cha na xi cjuaquixi ta, tsëhë xi yëjë ni xi yatu cha ne, camá chjuun rë cha na? ―‍Cuatjin xu cachja cha saduceo cojo Jesús.
LUK 20:34 Sehe ngajan xi Jesús ne, cuitjin xu cachja me cojo cha: ―‍Xuta xi siu me ngasunhndë quihndë ne, tsinguixan me hacuaha vixan me.
LUK 20:35 Peru xuta xi vechú chuva rë xi cuya me cjuahñu xi ha cuatju cueya me hacuaha sacú rë me cjuahñu xatsë ne, cuixaain me hacuaha tsinguixaain me hya ta,
LUK 20:36 tsëhë xi ha quihndë cueyaain nga me, tsëhë xi tangun cuma me cojo ángel. Hacuaha cuma me quihndi rë Nina, tsëhë xi cuya me cjuahñu.
LUK 20:37 Hacuaha hya xi chutayan cjua xi cachja Moisés ngajan hiscan xi catí yanahyá xcuen ne, hya sacu machaya naja tsëhë xi nima ne, cuya cjuahñu ta, tsëhë xi cachja Moisés xi Nina naja ne, Nina rë Abraham, Nina rë Isaac, cojo Nina rë Jacob má me.
LUK 20:38 Peru Nina ne, hacuiin nina rë nima ta nina rë xuta xi quicun me ta, tsëhë xi xi cuma rë Nina ne, yëjë ni xuta ne, quicun me, handasa cahme yahnga me. ―‍Cuatjin xu cachja Jesús.
LUK 20:39 Ngajan xi ngujo cha vicuya cjuachacun ne, cuitjin xu cachja cha: ―‍Maestro, ndatjin cjua xi canújun.
LUK 20:40 Cuatjin xu cachja cha ta, tsëhë xi tsacjun xu cha cjuinenguise sa cha me.
LUK 20:41 Sehe ngajan xi Jesús ne, cachja nga xu me cuitjin: ―‍¿Hacutjin má xi cuatjin chja xuta xi me xi tsingatju Nina ne, tjë rë David má me?
LUK 20:42 Ta suvá David ne, cachja me cuitjin xcun xujun tsëhë Salmo: Nina ne, cachja me cojo Nai naha cuitjin: “Tinechin nguehe ladu quixi naha,
LUK 20:43 hisca hya xi yëjë ni xi sahmi ri condra ne, cuiyujú ngahan ngahma gubiernu riji.” Cuatjin cachja David cjua xi cachja Nina.
LUK 20:44 Quihndë ne, sá xi suvá David chja me xi Nai rë me má me xi tsingatju Nina ne, ¿hacutjin má ne xi hacuaha tjë rë me ni? ―‍Cuatjin xu cachja Jesús.
LUK 20:45 Jinguyëjë rë xi tivisiñuju yëjë xuta jan ne, Jesús ne, cachja xu me cuitjin cojo xuta ladu rë me:
LUK 20:46 ―‍Xicaninguisuhunjñuu cojo cha xi vicuya cjuachacun, xi jemu ndama rë cha xi cuatjin vajá cha tsjian nduju, hora xi fi tsujyihiya cha, jemu chuya rë cha xi cuatjin fi chja xuta nina cojo cha ngajan ngajñi ndetsin, hacuaha jemu chuya rë cha xi cuatjin satë rë cha cahndë́ xi matitjun tsëhë cahntsua yungun, o hiscan ngu ndava suhi.
LUK 20:47 Cha xi cuacun vë ne, hacuaha jemu cjín tujún vaxë cha yachjin cahan. Hisca xi chjayuma cha ne, hacuaha jemu nduju hora, peru hacuiin nguñaja cacun cha chja cha. Vëhë xi cha xi cuacun vë ne, hitsë sa jyë castigu cuatju cha xi cuma rë jingusa xuta. ―‍Cuatjin xu cachja Jesús.
LUK 21:1 Ngu nixtin jan ne, jinguyëjë rë xi tivutsejen xu Jesús xi tivincha xuta nchina tujún cahntsua alcancía tsëhë cjuandaja rë me cojo Nina ne;
LUK 21:2 hacuaha cavëë xu me xi canduva ngu chjuun cahan xi jemu yuma, hane hacuaha cavincha na jo tujún langa cahntsua alcancía jan.
LUK 21:3 Sehe ngajan xi cachja xu Jesús cojo xuta ladu rë me cuitjin: ―‍Cuichjá cojo nuju cjuaquixi ta na cahan vë xi jemu yuma na ne, hitsë sa vengui chji rë tujún xi cavincha na xi cuma rë tujún xi jemu cjín cavincha yëjë xuta nchina xi cuacun vë ta,
LUK 21:4 tsëhë xi me xi cuacun vë ne, tsëhë cjuanchina xi tjin rë me ne, ngajan cavaxë me tujún xi cavincha me. Peru na vëhë ne, handasa jemu tjin rë na cjuachaja ne, hitsë lihndi tujún xi tjin rë na ne, cavincha na yëjë cahntsua alcancía. ―‍Cuatjin xu cachja Jesús.
LUK 21:5 Ngu ndiya, hya xi ngujo xuta jan cachja xu me xi yungun xi matitjun ne, jemu ndacun ndyojo camá cojo, hacuaha jercu camaxcuen cojo tu mé ni xcusun cjuatjo xi casua xuta ne, cachja xu Jesús cuitjin:
LUK 21:6 ―‍Sacuaha xcusun xi chutsujun vi ne, cuechú nixtin xi hisca ngu ndyojo ndacun xi cuicun vi ne, tsajin hinchasuncoo xicjin ta cjuë yëjë cuixujne. ―‍Cuatjin xu cachja Jesús.
LUK 21:7 Ngajan xi xuta jan ne, cavinenguise xu me cojo Jesús cuitjin: ―‍Maestro, hane ¿janihya cuetjucaa xcusun vëhë ni? ¿Hacutjin cuma sacú niji cjuaquixi xi xcusun vëhë ne, ha tivechú nixtin xi cuetjucaa ni? ―‍Cuatjin xu cavinenguise me.
LUK 21:8 Ngajan xi Jesús ne, cuitjin xu cachja me: ―‍Nechun cuidadu, cojo sa xi hacuiin cuma ndacha ngayun ta, tsëhë xi jemu cjín xuta cuetjucaa me xi cuichja me xi hacui me xi catsingatju Nina me, hacuaha cuichja me xi ha camatiña nixtin. Peru xicatsanguntjenguun me.
LUK 21:9 Hacuaha hya xi cuma chaya nuju cjua xi jemu yehe si tijima ngu nación ne, o sá xi tjin cjuatacun xi jemu yehe si nduva ne, xicarcuun ta, hatuxa tjin xi titjun xcusun vëhë cuma. Peru hacuiin ngutjen hya cuijnetaha nixtin vihi.
LUK 21:10 Hacuaha quijinduju sa xu cachja me cuitjin: ―‍Scaan xuta tsëhë ngu nación cojo jingu sa nación, hacuaha scaan xuta tsëhë ngu nandya cojo ngu nga nandya.
LUK 21:11 Hacuaha jemu cjín cahndë́ xi cjuani nangui, jemu cjín cahndë́ xi cuatju chíhin vitaha, jemu cjín cahndë́ xi cuma jindya, hacuaha jemu yehe chircun cuma tsejen ngajan ngahnga xi sua cumachaya nuju mé xi cuma.
LUK 21:12 ’Peru chaja sa xi cuma yëjë xcusun vëhë ne, xuta ne, tsujyihiyatjengui nuju me cojo cjuahngatacun. Cjuaha nuju me cjuecojo nuju me xcun xutaxa rë yungun, hisca cuincha nuju me ndavaya. Cjuecojo nuju me xcun xutaxa rë ndihyavasen, hisca xcun gobernador, ngatsë rë xi ladu naha má ngayun.
LUK 21:13 Xi cuatjin cuatjun cuma ne, vëhë sua nuju cahndë́ xi ninguixun yëjë cjua hacutjin cavicuyá nuju.
LUK 21:14 Tejñungutacún xi hacuiin titjun jemu cjín ningatuhuntacún hacutjin chjayunngun tsëhë xutaxa rë ta,
LUK 21:15 tsëhë xi ngahan suá nuju cjuatacun xi cuinújun ngu cjua xi condra nuju ne, cumaji tsitjungui me hacuaha cumaji cuichja me xi quixiin.
LUK 21:16 Hacuaha hisca xutacha nuju, o sá xi xingun, o sá xi xuta nuju, o sá xi amigu nuju ne, cuinchajyë nuju me. Hacuaha tjin yahnga ngayun ne, hisca tsiquehen nuju me.
LUK 21:17 Yëjë ni xuta ne, choho scuëë nuju me, tsëhë xi ladu naha ngayun.
LUK 21:18 Peru xicamacjiintacún ta tsajin camahani mé xi nichujun.
LUK 21:19 Caticaa nuju ta, tsëhë xi cuatjin xi cuetjuntjun.
LUK 21:20 ’Peru hya xi chun xi jemu cjín xuta nduvacjin cuetsihin xinchandee me nandya Jerusalén xi sahmi me ngu si jyë cojo nuju ne, vëhë sua machaya nuju xi camatiña nixtin xi nandya Jerusalén ne, cjuë tsinguetsun xuta nduvacjin vë.
LUK 21:21 Nixtin hya ne, ngayujun ni xi nechun yëjë nandya tsëhë distritu Judea ne, tiyun tángun hiscan ndetjún. Hacuaha ngayujun ni xi nechun nguehe nandya Jerusalén ne, tetjunxun. Hacuaha ngayujun ni xi nechun ranchun rë Jerusalén ne, xicatsanguun nandya xi naxuntjun yojo nuju.
LUK 21:22 Cuatjin meje rë xi nihñu ta, tsëhë xi nixtin hya ne, sahmi Nina castigu nandya vihi, cojo sa xi xi cuatjin ne, cuetjucaa yëjë hacutjin camahindu xcun xujun rë Nina.
LUK 21:23 Jemu chojyihi tsëhë yëjë yachjin xi hinchahma quihndi rë me cojo yëjë me xi tjin rë quihndi vaqui nixtin hya ta, tsëhë xi cuatju ngu cjuandya jyë nación vihi, hacuaha cuatju xuta nguehe ngu castigu.
LUK 21:24 Hacuaha jemu cjín xuta nguehe cueya me cojo quicha, hacuaha jemu cjín xuta nguehe tsihñu xuta tsëhë jingu sa nación me sehe tsingatju me me yëjë ni nación. Hane xi cuatju vëhë ne, suvá xutaxín cjue nduva me sunesun me xcun nangui tsëhë nandya Jerusalén, hisca xi cjuë nixtin xi xuta xi cuacun vë cuitexa me nandya Jerusalén vi.
LUK 21:25 ’Nixtin hya ne, hacuaha cuma tsejen cjuarcun xi cuma xcun tsuhi cojo sá cojo niñú. Hane nguehe ngasunhndë ne, jercu cjín tsingataha cacun xuta tsëhë yëjë ni nación, ña cuya sca me tsëhë xi jercu cjuane ndachacun, hacuaha jercu tsiquijin rë tsindyu rë.
LUK 21:26 Yëjë xuta ne, ña cuma ndaya cacun me xi tsacjun me, xi tsingataha cacun me tsëhë chircun xi cuma nguehe ngasunhndë ta, tsëhë xi hisca ngahñu xi yaja ngahnga ne, cjuiniyaya.
LUK 21:27 Sehe hya scuëë xuta ngahan, xi Quihndi rë Xuta Jain ngahan, xi cuinduva ngajñi rë yufí cojo jemu jyë ngahñu, hisca setí hisca vatë jyihi ngahan xi cuinduva.
LUK 21:28 Hya xi xcusun xi cuacun vë cuetsihin cuma ne, tisechun chutsujun ngahnga ta camatiña nixtin xi cuetjuntjun.
LUK 21:29 Xi quijinduju sa cjuavisiajmi rë Jesús ne, cachja xu me ngu ejemplu vihi: ―‍Quihndë ne, ningatuhuntacún tsëhë yaxujún o sá yahnga sa ya xi vixu xca rë.
LUK 21:30 Xi tu chun xi cuetjusehen ya xi cuacun vë ne, ha hyun ta ha camatiña chan tsi.
LUK 21:31 Hacuaha chuva vëhë ni ne, hya xi chun xi cuetsihin cuma yëjë xcusun xi cachjá cojo nuju vë ne, vëhë sua cumachaya nuju xi ha camatiña nixtin xi nduva Nina sahmi me gubiernu.
LUK 21:32 ’Cuichjá cojo nuju cjuaquixi ta ngayujun ni xi nechun nixtin vihi ne, hacuiin ngayujun caveyun chaja sa xi cuatju yëjë xcusun xi cachjá cojo nuju jan.
LUK 21:33 Ngahnga cojo nguehe ngasunhndë ne, hatuxa cjuë. Peru hisca ngu cjua naha ne, tsajin xi cuetjincaain.
LUK 21:34 ’Nechun cuidadu tsëhë xcusun xi nihñu. Xicatuun cahndë́ xi cjuatacun nuju ne, tsë́ rë cojo cjuatacun tsëhë cjuachihi, cojo cjuacjintacun tsëhë xcusun xi mameje nuju xcun ngasunhndë nuju, sá tu tsajin tjin chjine ngayun hya xi cuechú nixtin vëhë,
LUK 21:35 sacuatjin tsajin tjin chjine ngu chu hya xi finenguisun rë chu chen. Vëhë xi nechun cuidadu ta, tsëhë xi hatuxa cuechú nixtin vëhë, hya xi sahmi Nina gubiernu yëjë ni xuta jingujyë ni ngasunhndë.
LUK 21:36 Nechun cuidadu. Yasen ni chjahyun rë Nina xi cuechú chuva rë xi cuetjuntjun tsëhë yëjë ni cjuacjintacun xi ha tu hora sa xi cuinduva. Hacuaha chjahyun rë Nina xi cuma cuetjunndujun hora xi cuisechun xcún xi cjuaháchuva nuju cojo cjuatacun nuju, ngahan xi Quihndi rë Xuta Jain ngahan. ―‍Cuatjin xu cachja Jesús.
LUK 21:37 Nguinixtin ne, ndatsen yungun xi matitjun xu véjña Jesús vicuya me xuta. Hane nguixun ne, vetju xu me fi véjña me ndetjún xi hmí rë Ndetjún Olivu.
LUK 21:38 Hane yëjë ni xuta ne, tajñu tajñu xu ni fi me yungun jan xi cuisiñuju me cjua xi vicuya Jesús.
LUK 22:1 Hya xi camá xu ne, camatiña suhi tsëhë pan xi hacuiin cojo san rë pan má, suhi xi hmí rë Pascua.
LUK 22:2 Hane nahmi xi matitjun cojo cha vicuya cjuachacun ne, jemu tivangui xu me chuva rë hacutjin xi tsiquehen me Jesús. Peru táhahma xu tisahmi me xcusun vëhë ta, tsëhë xi tsacjun xu me xuta.
LUK 22:3 Hya xi camá xu ne, Satanás ne, cavisehen xu cahntsua xahasen rë Judas, cha xi hacuaha hmí rë Iscariote, ngu cha ngajñi rë me xi tejó xi má ladu rë Jesús.
LUK 22:4 Ngajan xi Judas jan ne, quiji cavisiajmicjín xu cha cojo ngujo nahmi xi matitjun cojo ngujo cha mayu yungun hacutjin cuma xi cjuaha xuta xi cuacun vë Jesús.
LUK 22:5 Hane nahmi xi matitjun cojo mayu jan ne, jemu ndaja camá xu rë me, hisca caviyuju cacun me xi sua me cha tujún.
LUK 22:6 Hane Judas ne, cojo cjuatacun vëhë ne, camangu cacun cha, sehe ngajan xi cavangui xu cha ngu hora xi tsajin cjín xuta, xi sahmi cha entregadu Jesús cojo xuta xi cuacun jan.
LUK 22:7 Cavechú xu nixtin tsëhë suhi rë pan xi hacuiin cojo san rë pan má, nixtin hya xi meje rë xi cueya chu tsánga.
LUK 22:8 Sehe ngajan xi Jesús ne, catsingatju xu me Pedru cojo Juan ngu tixa, hane cuitjin xu cachja me: ―‍Tángun tuhunchjinu xi xinëënguixuun tsëhë suhi. ―‍Cuatjin xu cachja me.
LUK 22:9 Sehe ngajan xi me xi cuacun jan ne, cavinenguise xu me Jesús cuitjin: ―‍¿Hane jani meje nuju xi cuihinchjini ni? ―‍Cuatjin xu cavinenguise me.
LUK 22:10 Hane Jesús ne, cuitjin xu cachja me: ―‍Chutsujun ni, xi cjuhun tjehen nandya jan ne, ngajan cuechuntuhun ngu cha xi yaniji ngu nisa nandá, hane tánguntjengun cha hisca xi cjuhun ndihya hiscan cjui cha,
LUK 22:11 sehe tinújun cojo nai rë ndihya jan cuitjin: “Cuitjin cjua xi catsingatju maestru tsujun: ¿Jarë cuartu xi tuhun, sehe ngajan sínë niñu tsëhë suhi cojo xuta ladu naha?” Cuatjin tinújun cojo rë me.
LUK 22:12 Hane me vëhë ne, tsingacun nuju me ngu cuartu jyë xi tacun ngahnga hiscan xi ha tjin chjine ndihya. Hane ngajan tuhunchjinu xi xinëë. ―‍Cuatjin xu cachja Jesús.
LUK 22:13 Hane xi quiji me xi jo jan ne, cavetjucaa jain yëjë cjua xi cachja Jesús cojo rë me. Hane ngajan cavëhëndaja xu me xi sinë nguixun Jesús cojo rë me tsëhë suhi.
LUK 22:14 Hane xi cavechú hora ne, cafaha xu Jesús cahndë́ rë me xcun maxë cojo xingu xingu apóstol.
LUK 22:15 Hane sehe cachja xu me cojo apóstol jan cuitjin: ―‍Jemu meje sínë cojo nuju comida tsëhë suhi vihi chaja sa xi cjuehe cjuaveya naha ta,
LUK 22:16 tsëhë xi nguehe cuichjá cojo nuju ta ha quihndë tsajin nixtin xi cúya sínë nga comida tsëhë suhi vihi. Sínë nga, peru hisca hya xi cuinduva Nina sahmi me gubiernu ta, tsëhë xi cjuatacun xi vicuya naja suhi vihi ne, hya cuetjucaa jain. ―‍Cuatjin xu cachja Jesús.
LUK 22:17 Hane xi cafahatsja xu me ngu vasu ne, sehe casua me nacuechji rë Nina, sehe cachja xu me cuitjin: ―‍Juhun vihi ne, sehe siuhun tsë tsë cojo xingun ta,
LUK 22:18 hacuaha cuichjá nga cojo nuju ta quihndë cojo nixtin xi cjuiniji sa ne, ha quihndë cuyaan cuëhë xan rë uva. Cuëhë, peru hisca hya xi cuinduva Nina sahmi me gubiernu. ―‍Cuatjin xu cachja Jesús.
LUK 22:19 Hane xi cafaha me ngu niñutsju hacuaha casua me nacuechji rë Nina ne, sehe cavotohocja xu me niñutsju jan. Hane xi casua rë me apóstol jan ne, sehe cachja xu me cuitjin: ―‍Vihi ne, yojo naha vi, xi tisuá xi cueya ngatsë nuju. Cuitjin nihñu xcusun vihi yasen ni, cojo sa xi ninguitsjun ná. ―‍Cuatjin xu cachja Jesús.
LUK 22:20 Hane xi cajnetaha cajinë nguixun me ne, hacuanitjin xu ni casahmi me cojo vasu. Hora xi casua rë me apóstol ne, cuitjin xu cachja me: ―‍Xan vihi ne, vihi jni naha xi cuetju ngatsë nuju. Cuatjin xi cuma chihin compromisu xatsë xi tisahmi Nina cojo xuta.
LUK 22:21 ’Peru chutsujun ni, cha xi sahmi ná entregadu ne, nguehe tacun cha ngajñi naja.
LUK 22:22 Hane ngahan xi Quihndi rë Xuta Jain ngahan ne, hatuxa tjin ná xi cueya sacuatjin cavichaya Nina tsahan. Peru jemu chojyihi tsëhë cha xi sahmi ná entregadu. ―‍Cuatjin xu cachja Jesús.
LUK 22:23 Ngajan xi yëjë xu apóstol jan ne, cavetsihin cavinenguise xicjin me jarë me xi sahmi xcusun vëhë.
LUK 22:24 Hya xi camá xu ne, cavetsihin sacuaha xi meje scaanya me ngajñi rë me yo xi chja xuta xi hitsë sa matitjun.
LUK 22:25 Ngajan xi Jesús ne, cuitjin xu cachja me: ―‍Yëjë ni xuta xi matitjun nguehe ngasunhndë ne, jercu sahmi yehe me yojo rë me sacuaha xi me vëhë má me nai rë xuta. Hacuaha jercu meje rë me xi yëjë xuta ne, cuichja me xi jemu ndaja me xi matitjun vë.
LUK 22:26 Peru ngayun ne, mijí rë xi cuatjin nihñu ta xi meje rë ne, ngu xi matitjun tsëhë ngajñi nuju ne, catitsinguijne yojo rë sacuaha ngu xi chúva nu rë. Hane ngu xi vitexa tsëhë ngajñi nuju ne, hacuaha catitsinguijne yojo rë sacuaha ngu hndixahan.
LUK 22:27 ¿Yo xi hitsë sa matitjun ni? ¿Há ngu xi tijinë ne, o há tsajin ne, há ngu hndixahan xi cjui cani comida? Xi tijinë ne, hatuxa vëhë xi hitsë sa matitjun. Peru ngahan ne, tejña ngajñi nuju sacuaha ngu hndixahan nuju.
LUK 22:28 ’Ngayun ne, ngayun xi cacaa nuju cojo yëjë cjuañihi xi cavatjuun camá.
LUK 22:29 Vëhë xi sacuaha casuaxa ná Nahmi naha xi ngahan sahme gubiernu ne, cuatjin suáxa nuju xi nihñu gubiernu,
LUK 22:30 cojo sa xi ngayun ne, hacuaha xinu siuhun cojo ná ngajan hiscan sahme gubiernu. Hacuaha suáxa nuju xi nichuvun cjuatacun rë yëjë tejó tjë naja, ngayaan xi tjë rë xutachanga naja Israel ngayaan. ―‍Cuatjin xu cachja Jesús.
LUK 22:31 Hacuaha cachja sa xu Jesús cuitjin cojo Pedru xi hacuaha hmí rë me Simón: ―‍Chutsujun ni Simón. Satanás ne, casacu rë cahndë́ xi tsichuva cjuatacun nuju ngayujun ni.
LUK 22:32 Peru ngayun Simón ne, caféhya rë Nina ngatsë nuju, cojo sa xi hacuiin cumandaya tacún sacuatjin xi mangutacún cojo ná. Hane hya xi ngayun cuyun nga ndiya naha ne, tuhun ngahñu xingun. ―‍Cuatjin xu cachja Jesús.
LUK 22:33 Ngajan xi Pedru ne, cachja xu me cojo Jesús cuitjin: ―‍Tatá. Ngahan ne, tsingatehen cjuë́ ndavaya cojo nuju hisca tsingatehen cueya cojo nuju. ―‍Cuatjin xu cachja Pedru.
LUK 22:34 Ngajan xi Jesús ne, cuitjin xu cafayangui me tsëhë Pedru: ―‍Nguehe cuichjá cojo nuju, Pedru. Chaja sa xi squihnda ngu xahnda ne, ha jyan ndiya canújun xi hyúun yo ngahan. ―‍Cuatjin xu cachja Jesús.
LUK 22:35 Hacuaha cachja me cojo xuta ladu rë me cuitjin: ―‍Hya xi catsingátju nuju xi cachjá cojo nuju xi chuun tujún, chuun changa hacuaha chuun chuxinxtë ne, ¿há quixi xi tsajin mé camachaja nuju? ―‍Cuatjin xu cachja Jesús. Hane xuta ladu rë me jan ne, cuitjin xu cachja me: ―‍Juun, tsajin mé. ―‍Cuatjin xu cachja me.
LUK 22:36 Hane Jesús ne, cachja nga xu me cuitjin: ―‍Peru quihndë ne, jarë ngayun xi tjin nuju tujún, tjin nuju changa ne, chuhun, tángun cojo. Hane yo xi tsajin rë ngu quichandujú ne, catiteña tsjanga rë ne, sehe catatsë ngu quichandujú.
LUK 22:37 Cuatjin meje rë ta, tsëhë xi nguehe cuichjá cojo nuju ta hacutjin xi camahindu tsahan xcun xujun rë Nina ne, hatuxa tjin rë xi cuetjucaa, cjua xi chja cuitjin: “Cuichja xuta tsëhë me xi ngu xuta tsehen me.” Cuatjin camahindu. Hatuxa cuetjucaa sacuatjin camahindu. ―‍Cuatjin xu cachja Jesús.
LUK 22:38 Sehe ngajan xi xuta ladu rë Jesús jan ne, cuitjin xu cachja me: ―‍Chutsujun ni, tatá. Nguehe ne, ha siu jo quichandujú. ―‍Cuatjin xu cachja me. Sehe ngajan xi Jesús ne, cuitjin xu cafayangui me: ―‍Cojo vëhë ne, ha cuma. ―‍Cuatjin xu cachja me.
LUK 22:39 Hya xi camá ne, xi cavetju xu me tsëhë nandya Jerusalén ne, sacuatjin xi ha xcusun rë me ne, quiji xu me Ndetjún Olivu. Hacuaha cojo yëjë xuta ladu rë me quiji xu me cojo rë me.
LUK 22:40 Hane xi cafehe me jan ne, cachja xu me cojo xuta jan cuitjin: ―‍Chjahyun rë Nina xi hacuiin chjaháchuva nuju cojo cjuatacun nuju. ―‍Cuatjin xu cachja me.
LUK 22:41 Hane xi quijixin me hitsë tsëhë xuta ladu rë me jan ne, sehe ngajan cavixcuhnchi xu me xi sahmi me oración rë me,
LUK 22:42 cuitjin xu cachja me: ―‍Ngayun Nahmi naha, sá mé ni xi meje nuju ne, chjuhunxun cjuañihi xi cuátju cuma vi. Peru catama sacuatjin xi meje nuju ngayun, hacuiin sacuatjin xi meje ná ngahan. ―‍Cuatjin xu cachja me.
LUK 22:43 Hya xi camá ne, cavëë xu me ngu ángel xi canduva tsëhë ngahnga, casua rë me ngahñu.
LUK 22:44 Hane xi jemu jima ndaya cacun xu me ne, hitsë sa jercu cafehya rë me Nina. Hacuaha ndasueya xi cavetju rë me ne, sacuaha jni xu cún xi cavixu nangui.
LUK 22:45 Hane xi cavisatjenhnga xu Jesús xi cajnetaha casahmi me oración rë me ne, xi cavuya quiji me hiscan siu xuta ladu rë me jan ne, casacutsja xu me xi siufë, ngatsë rë cjuachoho rë.
LUK 22:46 Sehe ngajan xi Jesús ne, cuitjin xu cachja me cojo xuta jan: ―‍¿Mé má cuatjin tsjuñufun ni? Tisatjunhngun ne, nihñu oración nuju, sátu chjaháchuva nuju cojo cjuatacun nuju. ―‍Cuatjin xu cachja Jesús.
LUK 22:47 Jinguyëjë rë xi tichja cuaha xu Jesús ne, ha tu ñahñu jercu cjín xuta cafehe me. Hane cha xi hmí rë Judas, ngu cha ngajñi rë me xi tejó xi má ladu rë Jesús jan ne, titjun xu cha xcun xuta cjín jan cjui cha. Hane xi cafehe cha jan ne, sehe quijitiña xu cha xi cuitatsuha cha Jesús xi sua cha me nina.
LUK 22:48 Ngajan xi Jesús ne, cuitjin xu cachja me cojo cha: ―‍Judas, ¿há cuatjin cuitatsuhun ná xi nihñu ná entregadu, ngahan xi Quihndi rë Xuta Jain ngahan? ―‍Cuatjin xu cachja me.
LUK 22:49 Hane xi cajne rcu xuta xi siu cojo Jesús xcusun xi cuma jan ne, sehe cachja xu me cuitjin: ―‍Tatá. ¿Há cuíjin rë me quicha? ―‍Cuatjin xu cachja me.
LUK 22:50 Hya xi camá xu ne, ngutjen cavaja ngu me jan cha hndixahan rë nahmi xi matitjun tsëhë yëjë ni nahmi, hane cavatësun xu me tyjavañuju quixi cha.
LUK 22:51 Hane ngajan xi Jesús ne, cuitjin xu cachja me: ―‍Camá ni. ―‍Cuatjin xu cachja me. Hane xi cavetahatsja xu me hiscan cati rë cha ne, camandaja xu cha casahmi Jesús.
LUK 22:52 Hane nahmi xi matitjun cojo cha mayu yungun xi matitjun cojo xutachanga, xi cafehe me xi cjuaha me Jesús ne, cachja xu Jesús cojo rë me cuitjin: ―‍¿Há nduvun chjuhun ná sacuaha ngu xuta xi chëjë me, xi cuatjin nduvun cojo ya cojo quicha vë ni?
LUK 22:53 Xi cavitejñaya cojo nuju nchunchujun ni ndatsen yungun jan ne, cavetuhunntsuun ná. Peru quihndë cavechú hora xi casua Nina cahndë́ xi nihñu cojo ná tu mé ni xi meje nuju, cavechú hora xi Satanás cuitexa. ―‍Cuatjin xu cachja Jesús.
LUK 22:54 Hya xi camá xu ne, xi cafaha xuta jan Jesús ne, quijicojo me me ndava nahmi xi matitjun tsëhë yëjë ni nahmi. Pedru ne, hacuaha tjengui xu me cjui me tu cjin tu cjin ni hacutjin cjui xuta jan cojo Jesús.
LUK 22:55 Hane xi cafehe xu me jan ne, casahmi me ngu ndava ndihi ngajan ndatsen ndihya, sehe ngajan quiji me caviyuju tangun me. Hacuaha cojo xu Pedru quiji me cavéjña tangun me cojo xuta jan.
LUK 22:56 Hane xi cavëë xu na hndixahan rë nahmi jan Pedru, tacun me xcun ndihi jan ne, xi cavutsejenndaja na me ne, sehe cachja xu na cuitjin: ―‍Me xi cuijyihi vi ne, cojo me tacun me cojo me xi cuajyihi vë hya. ―‍Cuatjin xu cachja na.
LUK 22:57 Hane Pedru ne, cavitijaya me cachja xu me cuitjin: ―‍Hveen yo vë. ―‍Cuatjin xu cachja me.
LUK 22:58 Xi cavatju nga ngu hora lihndi ne, xi cavëë nga ngu cha Pedru ne, cachja xu cha cuitjin: ―‍Ngayun ne, hacuaha ladu rë me xi cuacun vë má ngayun. ―‍Cuatjin xu cachja cha. Ngajan xi Pedru ne, cuitjin xu cachja me: ―‍¡Jéya, hacuiin! ―‍Cuatjin xu cachja me.
LUK 22:59 Xi cavatju sacuaha ngu hora nga xu ne, cachja nga ngu cha xi tacun jan cuitjin: ―‍Ha cjuaquixindaja ta cha xi cuijyihi vi ne, cojo cha tacun cha cojo cha xi cuajyihi vë, tsëhë xi hacuaha cha Galilea cha. ―‍Cuatjin xu cachja cha.
LUK 22:60 Ngajan xi Pedru ne, cuitjin xu cafayangui me: ―‍Hveen mé xi nújun vë. ―‍Cuatjin xu cachja me. Hane ha tu tichja cuaha xu Pedru ne, ha tu ñahñu cajindaya ngu xahnda jan.
LUK 22:61 Ngajan xi Nai naja ne, cavuya vutsejen xu me Pedru. Hane Pedru ne, catsinguitsjen xu me cjua xi cachja Nai naja cojo rë me, xi cachja me cuitjin: “Chaja sa xi squihnda ngu xahnda ne, hacuaha camá jyan ndiya nújun xi hyúun yo ngahan.” Cjua vëhë xi catsinguitsjen xu Pedru.
LUK 22:62 Hane xi cavetju xu me candatsen ne, cajihnda susu me.
LUK 22:63 Hane cha xi siutahá sahmi cuidadu rë Jesús jan ne, titsixcuehyu xu cha me hacuaha tivaja cha me.
LUK 22:64 Hane xi cavetsa xu cha tuxcun me ne, sehe cavaja sa cha me, sehe cachja xu cha cuitjin: ―‍¡Tinoje! ¿Yo xi tivaja ri? ―‍Cuatjin xu cachja cha.
LUK 22:65 Hacuaha jemu cjín sa xu cjua cachja cha xi choho chja cha tsëhë me.
LUK 22:66 Hane xi camá nchujun jan ne, camatangun xu xuta changá tsëhë nandya jan cojo nahmi xi matitjun cojo cha xi vicuya cjuachacun. Sehe quiji chani xu rë Jesús xcun xuta xi cuacun jan xi chjahácuenda rë jyë́ rë me.
LUK 22:67 Hane xi cafehe Jesús jan ne, sehe cavinenguise xu xuta jan cuitjin: ―‍Sá xi ngaye xi catsingatju Nina ngaye ne, tinoje cojo niji. ―‍Cuatjin xu cavinenguise xuta jan. Sehe ngajan xi Jesús ne, cuitjin xu cafayangui me: ―‍Sá xi cuichjá cojo nuju ne, hatuxa cumacjaain nuju xi cuichjá.
LUK 22:68 Hacuaha sá xi cjuinenguësë nuju ngu cjua ne, hatuxa chjayunnguun tsahan.
LUK 22:69 Peru cuetsihin cojo quihndë ni ne, ngahan xi Quihndi rë Xuta Jain ngahan ne, cuitejña ladu quixi tsëhë Nina, me xi jemu hñu ngahñu rë. ―‍Cuatjin xu cafayangui Jesús.
LUK 22:70 Ngajan xi yëjë ni xuta jan ne, cavinenguise xu me Jesús cuitjin: ―‍¿Há ngaye xi Quihndi rë Nina ngaye ni? ―‍Cuatjin xu cavinenguise me. Hane Jesús jan ne, cuitjin xu cafayangui me: ―‍Sacuatjin nújun vë ne, cuatjin jain. ―‍Cuatjin xu cafayangui Jesús.
LUK 22:71 Ngajan xi xuta xi cuacun jan ne, cuitjin xu cachja me cojo xicjin me: ―‍¿Mé sa nihña xuta xi tsinguixi me jyë́ rë cha? Ha canuhyaan suvaan xi hntsua cha cavetju xi cachja cha. ―‍Cuatjin xu cachja xuta.
LUK 23:1 Hya xi camá ne, cavisatjenhnga yëjë xu xuta xi matitjun jan ne, sehe quijicojo me Jesús xcun Pilatu.
LUK 23:2 Hane cavetsihin xu cavinchajyë me cuitjin: ―‍Casacuntsin cha xi cuijyihi vi tivisecjan cha cjuatacun rë xuta. Hacuaha mijí rë cha xi cuechjin tujúnsa niji cojo César, me xi matitjun. Hacuaha chja sa cha ta hacui cha xi catsingatju Nina cha, hacuaha matitjun xu cha. ―‍Cuatjin xu cachja me xi cavinchajyë me Jesús.
LUK 23:3 Sehe ngajan xi Pilatu ne, cavinenguise xu me Jesús cuitjin: ―‍¿Há ngaye xu matitjun ngaye tsëhë xuta tjë rë Israel? ―‍Cuatjin xu cavinenguise Pilatu. Hane Jesús ne, cuitjin xu cafayangui me: ―‍Cuatjin sacuatjin nújun vë. ―‍Cuatjin xu cafayangui me.
LUK 23:4 Ngajan xi Pilatu ne, cuitjin xu cachja me cojo nahmi xi matitjun cojo yëjë xutacjín jan: ―‍Sacuiin ná hisca ngu jyë́ rë cha xi cuijyihi vi. ―‍Cuatjin xu cachja Pilatu.
LUK 23:5 Peru quijinduju sa xu cachja xuta xi matitjun jan cuitjin: ―‍Jemu tivisecjan cha cjuatacun rë xuta ngatsë rë cjua xi tivicuya cha jingujyë ni distritu Judea vi. Cavetsihin cha hisca ngajan distritu Galilea, hisca nguehe cafehe cha. ―‍Cuatjin xu cachja me.
LUK 23:6 Hane xi cahndë Pilatu cjua vëhë ne, sehe cavinenguise xu me xuta jan cuitjin: ―‍¿Há cha Galilea cha xi cuijyihi vi ni? ―‍Cuatjin xu cavinenguise me.
LUK 23:7 Hane xi casacu xu rë Pilatu cjuaquixi xi hiscan xi vitexa Herodes canduva Jesús ne, sehe catsingatju xu Pilatu me xcun Herodes, tsëhë xi Herodes ne, hacuaha quitahá xu me ngajan Jerusalén nixtin hya.
LUK 23:8 Hane hya xi cavëë Herodes Jesús ne, jemu ndaja camá xu rë me, tsëhë xi ha titjun sa ne, jemu meje scuëë me Jesús, tsëhë xi ha machaya rë me cjua tsëhë Jesús, hacuaha meje scuëë xu me xi sahmi Jesús ngu cjuarcun.
LUK 23:9 Hane jercu cjín cjuachjinenguise casahmi xu me Jesús, peru Jesús ne, tsajin camahani mé xi cafayangui xu me.
LUK 23:10 Hane nahmi xi matitjun cojo cha xi vicuya cjuachacun ne, jemu tivincha xu me jyë́ rë Jesús.
LUK 23:11 Ngajan xi Herodes cojo sindadu rë me ne, jemu casahmixta xu me cojo Jesús, hacuaha catsixcuehyu me me. Hane xi catsicaja xu me Jesús ngu tsjian xi jemu ndajyihi camahani ne, sehe cavuya catsingatju nga xu me Jesús xcun Pilatu.
LUK 23:12 Hane nixtin hya ne, Herodes cojo Pilatu ne, jemu cavinga xu rë me xicjin me, handasa titjún xu ne, maji vëë xicjin me.
LUK 23:13 Hya xi camá ne, xi casahmitangun xu Pilatu nahmi xi matitjun cojo xutaxa rë cojo xuta nandya ne,
LUK 23:14 sehe cachja xu me cojo cuitjin: ―‍Ngayujun ni matsejen ne, canduvuncujun cha xi cuijyihi vi nguehe matsejen, tsëhë xi xi má nuju matsejen ne, tivisecjan cha cjuatacun rë xuta. Peru quihndë matsejen ne, chutsujun ta, xcún ni matsejen ne, cafahátaha rë cha, peru casacuiin ná hisca xi ngu jyë́ rë cha sacuatjin jyë́ xi cavinchun.
LUK 23:15 Hacuanitjin ni Herodes matsejen ta, casacuiin rë me jyë́ rë cha, vëhë xi catsicuya nga me cha. Chutsujun ta tsajin camahani mé casahmi cha xi vechú chuva rë xi niquen cha.
LUK 23:16 Vëhë xi cuitéxa sehen ni rë cha matsejen ne, sehe tsisme cha. ―‍Cuatjin xu cachja Pilatu.
LUK 23:17 Hatuxa xcusun xu rë Pilatu xi tsismi me ngu presu xi xuta vaxijin me nu nu ni nixtin rë suhi.
LUK 23:18 Peru yëjë ni xuta xi matitjun jan ne, ngu tangun ni camá xu me cajindaya me cachja me cuitjin: ―‍¡Nicuhun cha vi ne, Barrabás nismu cha! ―‍Cuatjin xu cajindaya me.
LUK 23:19 Cha Barrabás ne, quiji cha ndavaya ngatsë rë xi casahmi xu cha ngu si cojo xutaxa rë, hacuaha catsiquehen xu cha.
LUK 23:20 Peru ngu ndiya nga cachja xu Pilatu cojo xuta xi matitjun jan, tsëhë xi Pilatu ne, meje tsismi me Jesús.
LUK 23:21 Peru xuta xi matitjun jan ne, cavuya cajindaya nga me cachja xu me cuitjin: ―‍¡Tetuhun cha, tetuhun cha xcun cru! ―‍Cuatjin xu cajindaya me.
LUK 23:22 Hane xi ma jyan ndiya ne, cavinenguise xu Pilatu xuta xi matitjun jan cuitjin: ―‍Peru ¿mé xi jemu choho casahmi cha ni? Tsajin camahani mé jyë́ rë cha casacu ná xi vechú chuva rë xi niquen cha. Vëhë xi cuitéxa sehen ni rë cha matsejen ne, sehe tsisme cha. ―‍Cuatjin xu cachja Pilatu.
LUK 23:23 Peru yëjë ni xuta xi matitjun jan ne, quijinduju sa xu cajindaya me cafehya me xi setaha Jesús xcun cru. Vëhë xi cajne cacun xu Pilatu,
LUK 23:24 hacuaha cavejña cacun xu me xi sahmi me hacutjin xi fehya xuta jan.
LUK 23:25 Hya xi camá ne, catsismi xu me cha xi cafehya xuta xi matitjun jan, ngu cha xi quiji ndavaya tsëhë xi casahmi xu si cojo xutaxa rë hacuaha catsiquehen xu cha. Peru Jesús ne, casua xu Pilatu me xi cjue cueya me, sacuatjin meje rë xuta xi matitjun jan.
LUK 23:26 Hane xi cjuicojo sindadu Jesús ne, ngajan ndiya jan cavechútáha xu cha ngu me xi hmí rë Simón tsëhë nandya Cirene, xi nduva xu me quiji me nguijña. Hane cafaha xu sindadu jan me, catsicaniji xu cha me cru xi cjue me cojo hacutjin cjui Jesús.
LUK 23:27 Hane jercu cjín camaha xu ni xuta quiji me cojo Jesús hacuaha jercu cjín xu yachjin xi hisca chja hisca jihnda na xi jemu choho má rë na ngatsë rë Jesús quiji xu na cojo me.
LUK 23:28 Hane xi cavuya Jesús cavutsejen me na ne, sehe cachja xu me cuitjin: ―‍Ngayun na quihndi nandya Jerusalén, xicachjihnduun ngatsë naha. Chjihndun ngatsë nuju suvun cojo ngatsë rë quihndi nuju ta,
LUK 23:29 cuechú nixtin xi cuichja xuta cuitjin: “Jemu ndaja tsëhë yachjin xi hatuxa maji sacu rë na quihndi; jemu ndaja tsëhë yachjin xi hisca ngu quihndi casacuiin rë na; hacuaha jemu ndaja tsëhë yachjin xi casacuiin quihndi catsicha na.” Cuatjin cuichja xuta.
LUK 23:30 Nixtin hya ne, hacuaha cuichja xuta cojo ndetjún cuitjin: “Tjinengunsun niji.” Hane naxi ne, cuitjin cuichja me cojo: “Tatsun niji.” Cuatjin cuichja me ta,
LUK 23:31 sá xi cuitjin choho tisahmi xuta vi cojo ná quihndë, ngahan xi tangun ngahan sacuaha ngu ya xcuen ne, hatuxa hitsë sa choho sahmi me cojo nuju nchujun ni nguini, ngayun xi tangun ngayun sacuaha ngu ya quixí. ―‍Cuatjin xu cachja Jesús.
LUK 23:32 Hacuaha cojo sa xu jo cha tsehen quijicojo sindadu jan cha, xi tsiquehen tangun cha cha cojo Jesús.
LUK 23:33 Hane xi cafehe cha cojo Jesús hiscan xi hmí rë Nínda Rcuun ne, ngajan cavetaha xu cha Jesús xcun cru hacuaha caviyujutaha sa cha catsijo cha tsehen jan xcun cru rë cha. Ngu cru xi quitahá ngu cha ne, casecun xu táha xcun tsëhë Jesús, hane ngu nga ne, táha quixi.
LUK 23:34 Ngajan xi Jesús ne, cachja xu me cuitjin: ―‍Ngayun Nahmi naha. Ninchatuhun rë xuta vi ta, hvíin me mé xi tisahmi me. ―‍Cuatjin xu cachja Jesús. Hane xi cuatëcja sindadu tsjian rë Jesús jan ne, cavaxë xu cha ngu suerte.
LUK 23:35 Hane xutacjín jan ne, caxinchacun xu me cavutsejen me xcusun xi tijima jan. Hacuaha xutaxa rë jan ne, cavejnucëë me Jesús, cuitjin xu cachja me: ―‍Cavaxëtje cha jingu sa xuta. Quihndë ne, cataxëtje suvá cha yojo rë cha, sá xi hacui jain cha xi cavaxijin Nina hacuaha catsingatju me. ―‍Cuatjin xu cachja xutaxa rë.
LUK 23:36 Hacuaha sindadu jan ne, catsixcuehyu xu cha Jesús. Quijitiña cha hiscan tyjangui me xcun cru, hane meje sua xu cha xan yufa cuihi me,
LUK 23:37 sehe cachja xu cha cuitjin cojo rë me: ―‍Sá xi ngaye jain matitjun ngaye tsëhë xuta tjë rë Israel ne, naxetje sove yojo riji. ―‍Cuatjin xu cachja cha.
LUK 23:38 Hacuaha camahindu xu ngujo cjua rcu cru rë Jesús xi chja cuitjin: “Matitjun cha vihi tsëhë xuta tjë rë Israel.” Cuatjin xu camahindu. Jyan hne camahindu cjua xi cuacun vë: hne griego cojo latín cojo hebreo.
LUK 23:39 Hane ngu cha tsehen xi cojo casetaha xcun cru jan ne, cuitjin xu choho cachja cha tsëhë Jesús: ―‍¿Hacuiin ngaye xi catsingatju ri Nina ni? ¡Naxetje sove yojo riji ne, hacuaha naxetje niji! ―‍Cuatjin xu cachja cha.
LUK 23:40 Hane xi cavatëcja xu cha xingu jan cjua rë cha xi choho chja tsëhë Jesús ne, cuitjin xu cachja cha: ―‍¿Há rcuiin Nina, quihndë xi tivatjun castigu sacuatjin tivatju me vëhë tijima?
LUK 23:41 Ngayaan ne, cojo cjuaquixi xi tivatjun tijima ta, ngatsë rë xcusun xi canihña ne, vëhë xi vechú chuva rë xi cuitjin tivatjun castigu. Peru me vihi ne, tsajin mé xi jemu choho casahmi me. ―‍Cuatjin xu cachja cha.
LUK 23:42 Sehe cachja xu cha cojo Jesús cuitjin: ―‍Jesús, ninguitsjun ná hya xi cuinduvun nihñu gubiernu. ―‍Cuatjin xu cachja cha.
LUK 23:43 Hane Jesús ne, cuitjin xu cafayangui me: ―‍Cuichjá cojo nuju cjuaquixi ta ha cojo quihndë ni ne, cuinechun cojo ná ngajan cahndë́ ndajyihi hiscan xi hmí rë Paraíso. ―‍Cuatjin xu cafayangui Jesús.
LUK 23:44 Hane hora vëhë ne, camajñu xu jingujyë ni. Cavetsihin xi camanchisen ne, quiji cani rë hisca fane jyan,
LUK 23:45 tsëhë xi tsuhi ne, ha quihndë casuaain xu ndavá rë. Hacuaha ngajan cahntsua yungun xi matitjun, tsjian xi vitechja rë tingotjo rë Ndava Nina ne, catiyavasen xu.
LUK 23:46 Hya xi camá ne, jercu hñu camaha xu ni cachja Jesús cuitjin: ―‍Ngayun Nahmi naha. Ntsun cuejñá hasen naha. ―‍Cuatjin xu cachja me. Hane xi cavatju cachja me cuatjin ne, cahme xu me.
LUK 23:47 Hane ngu capitán xi secun tiña xu jan ne, xi cavëë cha xcusun xi camá jan ne, casahmi jyë casahmi hnga cha Nina, cachja xu cha cuitjin: ―‍Quixi jain xi cha xi cuijyihi vi ne, tsajin jyë́ rë cha. ―‍Cuatjin xu cachja cha.
LUK 23:48 Hane yëjë ni xutacjín xi camatangun me xi scutsejen xu me xcusun jan ne, xi cavatju cavëë me yëjë xcusun xi camá jan ne, cavuya me cafe xu me, ña yaha xu me rcu me ngatsë rë cjuachoho rë me.
LUK 23:49 Peru yëjë ni xuta xi cavinga xu rë Jesús cojo yëjë yachjin xi cavetju me tsëhë distritu Galilea cojo Jesús ne, tsëhë cjin ni hinchacun cuaha xu me tivutsejen me xcusun xi tivatju Jesús.
LUK 23:50 Hane tacun ngu xu me xi hmí rë José, ngu xuta nandya Arimatea, ngu nandya rë xuta tjë rë Israel. Me vëhë ngu xihin ndaja me hacuaha tsajin xu mé jyë́ rë me tjin.
LUK 23:51 Hacuaha cachuyiin xu rë me sacuatjin caviyuju xutaxa rë xi yahnga jan cjuatacun rë me cojo xcusun xi casahmi me. Hacuaha José jan ne, jemu meje xu rë me xi cuinduva Nina sahmi me gubiernu.
LUK 23:52 Ngajan xi me vëhë ne, quiji xu me xcun Pilatu, hane cafehya xu me nima Jesús.
LUK 23:53 Hane xi casacu cahndë́ ne, quiji catsitujne me, sehe cavaxtë xu me ngu tsjian. Hya xi camá ne, quiji caveya xu me cahntsua ngu tsjun xi catjuhngui rë taha naxi, hacuaha hisca ngu xu nima cjëë seyaniji.
LUK 23:54 Nixtin hya ne, vispra xu. Ha hisca meje cuechú xu hora xi cuisehen nixtin xi chjahájenda rë.
LUK 23:55 Hane yachjin xi cojo xu me cavetjutangun me cojo Jesús ngajan Galilea ne, tjengui xu me quiji me cojo nima. Hane cavëë me tsjun hacuaha cavëë xu me hacutjin caseya nima.
LUK 23:56 Hane xi cavuya me ne, cavëhëchjine xu me rqui cojo aceite xi ndaja jne tsëhë nima. Hane xi camá nchujun jan, xi cavechú xu nixtin xi chjahájenda rë ne, caviyujujyuu xu me, sacuatjin vitexa ley rë Moisés.
LUK 24:1 Peru tu casahasen ni tsëhë nixtin ngu tsëhë totje ne, yachjin jan ne, cavuya quiji nga xu me xcun tsjun jan hacuaha cavaha xu me rqui xi ha cavëhëchjine me jan.
LUK 24:2 Hane xi cafehe me jan ne, cavëë xu me xi ndyojo xi cavechja rë tingotjo rë tsjun jan ne, ha canivahaxin rë.
LUK 24:3 Hane xi cavisehen me cahntsua tsjun jan ne, cavëë xu me xi tsajin nima Nai naja Jesús.
LUK 24:4 Hane jinguyëjë rë xi sacuinyiin rë me mé sahmi me ne, ha tu ñahñu camatsejen xu jo ángel jan, xi jercu tu setí camaha xu ni tsjian rë.
LUK 24:5 Hane xi jemu catsacjun me camá ne, catsiquindi xu me xcun me. Sehe ngajan xi ángel jan ne, cuitjin xu cachja cojo rë me: ―‍¿Mé má ngajñi rë nima vinchunsun me xi quicun?
LUK 24:6 Me vëhë ne, tsajin me nguehe ta cavuya me cjuahñu. Ninguitsjun hacutjin cachja me cojo nuju hya xi tacun cuaha me ngajan Galilea,
LUK 24:7 hya xi cachja me xi me xi Quihndi rë Xuta Jain ne, hatuxa tjin xi cuma me entregadu tsja xuta tsehen, sehe cueya me xcun cru, hane xi cuma jyan nixtin ne, cuya nga me cjuahñu. ―‍Cuatjin xu cachja ángel jan.
LUK 24:8 Sehe ngajan xi yachjin jan ne, catsinguitsjen xu me cjua rë Jesús.
LUK 24:9 Hane xi cavuya me xi quiji me xcun tsjun jan ne, quiji casua xu me camachaya rë xuta ladu rë Jesús xi tengu jan cojo yëjë sa me xi yahnga tsëhë yëjë ni hacutjin cavatju me camá.
LUK 24:10 Quihndë ne, yachjin xi casua camachaya rë apóstol jan ne, hacui xu na María na Mágdala cojo na Juana cojo na María naa rë Jacobo cojo sa yachjin xi yahnga.
LUK 24:11 Peru apóstol jan ne, xi má xu rë me ne, suvá cjuangarca xi chja yachjin jan, vëhë xi camacjaain xu rë me.
LUK 24:12 Peru Pedru ne, vangasanii xu me quiji me hiscan tacun tsjun jan. Hane xi cafehe me jan ne, catsiquindi xu me yojo rë me, sehe cavutsejenya xu me cahntsua tsjun jan ne, hane cavëë xu me suvá tsjian jan siu. Sehe cavuya cafe xu me. Jercu quijircun xu rë me tsëhë xcusun xi camá jan.
LUK 24:13 Hya xi camá ne, ha nixtin hya xu ni ne, jo cha ladu rë Jesús jan ne, cavetju xu cha quiji cha ngu nandya xi hmí rë Emaús, xi tacun sacuaha chuva rë tengu kilómetro tsëhë Jerusalén.
LUK 24:14 Hane ndiya cjui cha jan ne, cavisiajmi xu cha ngajñi rë cha tsëhë yëjë xcusun xi camá.
LUK 24:15 Hane jinguyëjë rë xi tivisiajmi cha jan ne, cavechútáha xu Jesús cha, hane quijitangun xu me cojo cha.
LUK 24:16 Peru handasa vutsejen cha me ne, casuaain xu Nina cahndë́ xi scuëë cha xi hacui me.
LUK 24:17 Sehe ngajan xi Jesús ne, cavinenguise xu me cha cuitjin: ―‍¿Mé cjua xi tivisiajmu xi táha tivangun? ―‍Cuatjin xu cavinenguise me. Hane cha xi cuacun jan ne, caxinchacunhñu xu cha, hacuaha jemu va tjin cacun cha.
LUK 24:18 Hane ngu cha xi cuacun jan xi hmí rë Cleofas ne, cachja xu cha cojo Jesús cuitjin: ―‍¿Há ngu tu tu ngayun xi nechuntuhun nguehe Jerusalén xi cuatjin hyúun mé xi sehe cavatju camá ni? ―‍Cuatjin xu cachja cha cojo Jesús.
LUK 24:19 Sehe ngajan xi Jesús ne, cuitjin xu cachja me cojo cha: ―‍¿Mé xcusun jan? ―‍Cuatjin xu cachja me. Hane cha xi cuacun jan ne, cuitjin xu cachja cha: ―‍Xcusun xi cavatju ngu me xi hmí rë Jesús camá, ngu me xi canduva tsëhë nandya Nasaret. Me vëhë ne, xi camá rë Nina cojo xi camá rë yëjë ni xuta ne, ngu profeta me, xi jemu tjin rë me ngahñu xi casahmi me yëjë ni xcusun xi casahmi me, hacuaha xi cavicuya me yëjë ni cjua xi cavicuya me.
LUK 24:20 Hacuaha nahmi xi matitjun cojo xutaxa rë yungun naja ne, casahmi me entregadu me vëhë cojo xutaxa rë Roma xi cueya me. Hane cuaha jain tjin cavetaha me xcun cru.
LUK 24:21 Ngayin ne, ha cavetihin tacuín xi me vëhë xi cuaxëtje naja me ngayejen ni ngayaan xuta tjë rë Israel. Cojo yëjë sa ne, quihndë ne, ha camá jyan nixtin cavatju xcusun xi cuacun vë.
LUK 24:22 Hacuaha ngujo yachjin tsëhë ladu niji ne, catsisca na cjuatacun niji, tsëhë xi xati sa nguitajñu ne, quiji xu na xcun tsjun,
LUK 24:23 hane xi casacuiin rë na nima ne, cafehe cachja na cojo niji xi cavëë na sacuaha ángel ngajan, hane cachja cojo rë na xi me vëhë ne, tacun me cjuahñu.
LUK 24:24 Hya xi camá ne, ngujo cha xi siu cojo niji ne, quiji cha xcun tsjun jan, cavëë cha xi quixi jain cjua xi cachja na, peru me vëhë ne, cahviin cha me. ―‍Cuatjin xu cachja cha cojo Jesús.
LUK 24:25 Sehe ngajan xi Jesús ne, cuitjin xu cachja me cojo cha: ―‍Ngayun yuma hasen, ngayun xi jemu tafi sehe macjain nuju yëjë cjua xi cachja profeta.
LUK 24:26 ¿Hacuiin hatuxa casahmi ngujyë xi me xi catsingatju Nina ne, cuatjin cavatju me cjuañihi, sehe camajyë camahnga me cojo hasen ndajyihi rë me? ―‍Cuatjin xu cachja Jesús.
LUK 24:27 Hane sehe ngajan xi Jesús ne, casuacuenda xu me cha mé vijne yëjë ni cjua xi camahindu tsëhë me xcun yëjë ni xujun rë Nina, cavetsihin me cojo cjua xi catsihindu Moisés, hane cajnetaha me cojo hisca cjua xi catsihindu yëjë sa profeta.
LUK 24:28 Hya xi camá ne, xi camatiña xu cha cojo Jesús nandya hiscan cjui cha jan ne, Jesús ne, casahmi xu me sacuaha xi cjuenduju sa me.
LUK 24:29 Peru cha xi cuacun jan ne, jercu cjín xu cachja cha cojo rë me cuitjin: ―‍Tinechun cojo niji ta quihndë ne, ha quiji hora hacuaha hisca meje cjuë nixtin. ―‍Cuatjin xu cachja cha. Ngajan xi Jesús ne, quiji xu me cojo cha, hane cavisehen me ndava cha xi cuejña me cojo cha.
LUK 24:30 Hane xi ha cafaha me cahndë́ rë me xcun maxë xi sinë me niñu cojo cha ne, sehe cafaha xu me ngu niñu, hane casua me nacuechji rë Nina, sehe cavatëlanga me, casua xu me cha.
LUK 24:31 Hane hora vëhë xu casua Nina cahndë́ xi camá cavëë cha xi hacui Jesús. Hya xi camá ne, ha tu ñahñu cafëya xu me.
LUK 24:32 Hane sehe cachja xu cha ngajñi rë cha cojo xicjin cha cuitjin: ―‍¡Jercu ndaja camahani camá rë xahasen naja, hora xi tichja me cojo naja ngajan ndiya jan mé vijne cjua xi hincha xcun xujun rë Nina! ―‍Cuatjin xu cachja cha cojo xicjin cha.
LUK 24:33 Hane hora vëhë ni ne, cavisatjenhnga xu cha tsëhë maxë jan, sehe cavuya quiji cha Jerusalén. Hane xi cafehe cha jan ne, casacutsja xu cha me xi tengu jan, tjintangun me cojo me xi yahnga sa.
LUK 24:34 Hane sehe cachja xu me cojo cha cuitjin: ―‍Quixi jain xi cavuya Nai naja cjuahñu, hacuaha cha Simón ne, cavëë cha me. ―‍Cuatjin xu cachja me.
LUK 24:35 Ngajan xi cha xi cuacun jan ne, casuacuenda xu cha hacutjin cavatju cha camá ngajan ndiya, hacuaha hacutjin camá cavëë cha xi hacui Jesús hya xi cavatëlanga me niñu.
LUK 24:36 Hane tu tichja cuaha xu cha xi cuacun jan cojo me vëhë cjua jan ne, ha tu ñahñu cavëë xu yëjë me Jesús, secun me ngajñi rë me. Hane Jesús ne, cachja xu me nina cojo rë me cuitjin: ―‍Nina sua nuju me cjuandaja cjuajeya. ―‍Cuatjin xu cachja me.
LUK 24:37 Hane yëjë xuta ladu rë Jesús jan ne, jemu catsacjun camaha xu ni me camá tsëhë xi xi má rë me ne, tivutsejen me ngu hasen.
LUK 24:38 Ngajan xi Jesús ne, cachja xu me cuitjin: ―‍¿Mé má cuatjin jemu fircun nuju? Hacuaha ¿mé má cuatjin mangu majo tacún?
LUK 24:39 Chutsujun ntsa cojo ntsacú ta ngahan vi. Nduvun tetuhun ntsun ná, hacuaha chutsujun ná ta ngu hasen ne, tsajin yojo rë hacuaha tsajin nínda rë sacuatjin chutsujun ná ngahan cojo yojo cojo nínda naha. ―‍Cuatjin xu cachja Jesús.
LUK 24:40 Hane xi cavatju cachja me cjua vëhë ne, sehe catsingacun xu me tsja me cojo ntsacu me.
LUK 24:41 Hane xuta ladu rë Jesús jan ne, hisca maji xu macjain rë me ngatsë rë xi jercu tu ndaja má camahani rë me hacuaha hisca fircun rë me. Ngajan xi Jesús ne, cavinenguise xu me xuta jan cuitjin: ―‍¿Há tjin nuju hitsë xi xinëë nguehe? ―‍Cuatjin xu cavinenguise me.
LUK 24:42 Hane ngu me jan ne, casua xu me ngu rquí ti camatsju.
LUK 24:43 Hane xi cafaha me ne, cajinë xu me xcun yëjë ni xuta.
LUK 24:44 Sehe cachja xu me cuitjin: ―‍Yëjë xcusun xi cavátju camá ne, tsëhë vëhë cjua xi cachjá cojo nuju hya xi tejña cuaha ngajñi nuju. Cachjá cojo nuju ta hatuxa meje rë xi cuetjucaa yëjë hacutjin camahindu tsahan xcun xujun xi catsihindu Moisés cojo xcun xujun xi catsihindu profeta, cojo xcun xujun tsëhë Salmo. ―‍Cuatjin xu cachja Jesús.
LUK 24:45 Sehe ngajan xi Jesús ne, cavuxaha xu me cjuatacun rë xuta jan, cojo sa xi cuijnercu me cjua xi camahindu xcun xujun rë Nina.
LUK 24:46 Hacuaha cachja xu me cuitjin: ―‍Cuitjin camahindu xi me xi catsingatju Nina ne, hatuxa cuatju me cjuañihi, hane xi cjuë jyan nixtin xi cueya me ne, cuya nga me cjuahñu,
LUK 24:47 hacuaha sacú cumachaya rë yëjë ni xuta tsëhë ngasunhndë xi sá xi mangucacun me cojo me vëhë hacuaha tsindeya me cjuatacun rë me ne, tsinchataha Nina me tsëhë jyë́ rë me. Jerusalén vi ne, nguehe cuetsihin cuitsojo cjua vëhë.
LUK 24:48 Ngayun cuinújun cojo xuta cjua vihi ta ngayun xi cahyun hacutjin camá.
LUK 24:49 Chutsujun ni, ngahan tsingátju nuju Hasen xi ha cachja Nahmi naha xi sua nuju me. Peru ha tinechun ni nguehe nandya vihi hisca xi chjuhunntsun Hasen vëhë, xi cuinduva hisca ngahnga. ―‍Cuatjin xu cachja Jesús.
LUK 24:50 Hya xi camá ne, cavaxëxin xu Jesús xuta ladu rë me tsëhë nandya Jerusalén, quijicojo me me hisca nandya Betania. Hane xi cafehe me jan ne, catsiquijin xu Jesús tsja me hane catsinchacun me xuta jan.
LUK 24:51 Hane ngajñi rë xi titsinchacun me xuta jan ne, cavetjuxin xu me quiji me ngahnga.
LUK 24:52 Hane xuta ladu rë Jesús jan ne, xi cavatju cafaharcun me Jesús ne, sehe cavuya nga xu me Jerusalén cojo jemu jyë cjuasua.
LUK 24:53 Hacuaha nchunchujun ni quiji xu me yungun xi matitjun, vaxëndaja me Nina.
JOH 1:1 Ntsacu cavetsihin ngasunhndë ne, ha tacun ngu me xi hmí rë Cjua. Me vëhë ne, tacun me cojo Nina, hacuaha Nina me.
JOH 1:2 Me vëhë ne, hisca ntsacu cavetsihin ne, ha cuatjin tacun me cojo Nina.
JOH 1:3 Yëjë ni xi tjin ne, cojo me vëhë catsindaja Nina. Tsajin mé xi camandaja xi cuajin me vëhë camandaja.
JOH 1:4 Me vëhë xi hatuxa tjin rë me cjuahñu, hane cjuahñu vëhë ne, vëhë sua cjuahasen xi cuma rë xuta.
JOH 1:5 Hane cjuahasen vëhë ne, vitsojo ngajñi rë cjuatsehen sacuatjin sahmi hasen ngu ndihi ngajñi jñú, peru cjuatsehen ne, cacaain rë catsicjë rë cjuahasen jan.
JOH 1:6 Cavéjña ngu me xi hmí rë Juan, xi Nina catsingatju rë.
JOH 1:7 Me vëhë ne, cavetjujñi me xi cuichja me cojo xuta hane tsinguixi me tsëhë cjuahasen jan, cojo sa xi ngatsë rë cjua xi cuichja me ne, cumacjain rë yëjë ni xuta.
JOH 1:8 Hacuiin me vëhë xi cjuahasen jan me ta me vëhë ne, cavetjujñi me cojo sa xi cuichja me tsëhë cjuahasen jan.
JOH 1:9 Cjuahasen xi cjuaquixi jan ne, xi visehen ngajñi rë cjuatacun rë yëjë xuta ne, sehe canduva nguehe ngasunhndë.
JOH 1:10 Me xi hmí rë Cjua jan ne, cavéjña me ngasunhndë. Hacuaha handasa cojo me xi catsindaja Nina ngasunhndë ne, peru xuta ne, hvíin me yo.
JOH 1:11 Canduva me ngasunhndë rë suvá me, peru xuta nangui rë suvá me ne, cafahatsjaain rë me.
JOH 1:12 Peru ngu jo xuta nangui rë me xi cafahatsja rë me hacuaha camangu cacun cojo rë me ne, me xi Cjua jan ne, casua me chuva rë xi cuma xuta xi cuacun jan quihndi rë Nina.
JOH 1:13 Xuta xi cuacun jan ne, hacuiin camá me quihndi rë Nina chuva rë xi meje rë ngu xihin ngu quihndi ta suvá Nina casahmi me xi camá xuta xi cuacun jan quihndi rë me.
JOH 1:14 Me xi Cjua jan ne, camá me ngu xuta, hacuaha cavéjñacahndë me ngajñi niji. Hatuxa quitsë rë xahasen rë me cjuandaja, quitsë rë xahasen rë me cjuaquixi. Ngayin ne, cahyin hacutjin xi jemu jyë hnga me cojo hasen rë me. Jyë hnga me sacuatjin casahmi rë me Nahmi rë me.
JOH 1:15 Juan Vitenda rë Xuta ne, cachja me cojo xuta tsëhë me xi Cjua jan, cuitjin cachja me: ―‍Me vihi xi cachjá tsëhë, xi me xi sehe cuinduva ne, handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan.
JOH 1:16 Tsëhë xi hatuxa jemu quitsë rë xahasen rë me cjuandaja ne, vëhë xi ngayejen ni ne, hacuaha jemu cachjahanntsan cjuandaja.
JOH 1:17 Ley rë Nina ne, nima Moisés casua naja me, peru cjuandaja cojo cjuaquixi ne, Jesucristu casua naja me.
JOH 1:18 Tsajin camahani yo xi cavëë rë Nina. Suvá ni Quihndi ngu rë Nina xi hacuaha nina me hacuaha tacun tangun me cojo Nina Nahmi naja ne, me vëhë casua me camachaya naja yo xi Nina.
JOH 1:19 Cuitjin cachja Juan hya xi catsingatju xutaxa rë tsëhë nandya Jerusalén ngu jo nahmi cojo sacristán xi cjue cjuinenguise rë me Juan cuitjin: ―‍Ngayun ne, ¿yo ngayun? ―‍Cuatjin cjuinenguise me.
JOH 1:20 Hane hora xi cuatjin cavinenguise me ne, Juan ne, catsinguixi me, hacuiin cavetsangui me, cuitjin catsinguixi me: ―‍Hacuiin ngahan Xihin xi Tsingatju Nina. ―‍Cuatjin cachja me.
JOH 1:21 Ngajan xi cavinenguise nga nahmi xi cuacun jan cuitjin: ―‍¿Mé ni ni? ¿Há xutachanga naja Elías ngayun? ―‍Cuatjin cavinenguise me. Ngajan xi Juan ne, cuitjin cafayangui me: ―‍Hacuiin ngahan. ―‍Cuatjin cafayangui me. Ngajan xi cavinenguise nga nahmi xi cuacun jan cuitjin: ―‍¿Há ngayun profeta xi jemu nechanyan rë? ―‍Cuatjin cavinenguise me. Hane Juan ne, cuitjin cafayangui nga me: ―‍Jéya. ―‍Cuatjin cafayangui nga me.
JOH 1:22 Ngajan xi nahmi xi cuacun jan ne, cavinenguise nga me cuitjin: ―‍¿Yo ngayun ni? Tinújun cojo niji ne, cojo sa xi cuma nicuyin ngu cjua tsëhë me xi catsingatju niji. ¿Mé nújun tsujun suvun? ―‍Cuatjin cachja me.
JOH 1:23 Ngajan xi Juan ne, cuitjin cafayangui me: ―‍Ngahan ne, xuta xi jercu hñu chjá nguehe hiscan jemu xín tsëhë nandya, xi catitsinguixi xuta ndiya tsëhë Nai naja, sacuatjin cachja profeta Isaías hatsëë nixtin. ―‍Cuatjin cafayangui me.
JOH 1:24 Quihndë ne, xuta xi cuacun catsingatju cha partidu fariseo xi cuichja me cojo Juan ne,
JOH 1:25 cuitjin cavinenguise me: ―‍¿Mé má cuatjin vitendun xuta sa xi hacuiin ngayun xi Tsingatju Nina ngayun, hacuiin ngayun xi profeta Elías ngayun, hacuiin ngayun xi profeta xi jemu nechanyan rë ngayun ni? ―‍Cuatjin cavinenguise me.
JOH 1:26 Ngajan xi Juan ne, cuitjin cafayangui me: ―‍Ngahan ne, cojo nandá tiviténda nuju, peru ngajñi nuju secun ngu me xi hyúun yo.
JOH 1:27 Ngahan ne, canduvá titjun, sehe canduva me vëhë, peru hisca tsajin mé cumachjirëhë ngahan xi cuma rë me. ―‍Cuatjin cafayangui Juan.
JOH 1:28 Xcusun vëhë ne, camá ngajan ngu cahndë́ hiscan xi hmí Betania, ngunda vëhë tsëhë ndajyë Jordán, hiscan tivitenda Juan xuta.
JOH 1:29 Xi camá nchujun jan ne, cavëë Juan xi nduva Jesús hiscan secun me. Hane cuitjin cachja Juan cojo xuta: ―‍¡Chutsujun ni! Cuajyihi me xi sacuaha chu tsánga xi sua Nina xi tsicjë jyë́ rë xuta.
JOH 1:30 Me vëhë xi cachjá cojo nuju xi me xi sehe cuinduva. Handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan.
JOH 1:31 Ngahan suva ne, hveen yo me. Peru cojo sa xi ngayaan xuta tjë rë Israel cumachaya naja yo me ne, vëhë xi cuitjin tiviténda xuta. ―‍Cuatjin cachja Juan.
JOH 1:32 Hacuaha cachja Juan cuitjin tsëhë Jesús: ―‍Ngahan ne, cahvë Hasen rë Nina xi canduvajne tsëhë ngahnga sacuaha ngu paloma, quiji casesun rcu me.
JOH 1:33 Ngahan suva ne, hveen yo me, peru me xi cavitexa ná xi cuiténda xuta cojo nandá ne, cuitjin cachja me cojo ná: “Me xi che xi cuinduvajne Hasen naha cjue sesun rcu ne, me vëhë xi cuitenda me xuta cojo Hasen naha.” Cuatjin cachja Nina cojo ná.
JOH 1:34 Ngahan ne cahvë hacuaha cachjá cojo xuta xi me vëhë xi Quihndi rë Nina me. ―‍Cuatjin cachja Juan.
JOH 1:35 Xi camá nchujun nga jan ne, secun Juan cojo jo xuta ladu rë me.
JOH 1:36 Hane xi cavëë Juan Jesús xi tivatju me jan ne, cachja me cuitjin: ―‍¡Chutsujun ni! Cuajyihi me xi sacuaha chu tsánga xi sua Nina. ―‍Cuatjin cachja me.
JOH 1:37 Xi cahndë jo xuta ladu rë Juan cjua jan ne, quijitjengui me Jesús.
JOH 1:38 Xi cavuya Jesús cavutsejen me xi cjuitjengui xuta jan me ne, sehe cavinenguise Jesús me cuitjin: ―‍¿Mé meje nuju ngayun? ―‍Cuatjin cavinenguise me. Ngajan xi xuta jan ne, cuitjin cafayangui me: ―‍Maestro, ¿jani nechun? ―‍Cuatjin cavinenguise me.
JOH 1:39 Ngajan xi Jesús ne, cuitjin cachja me cojo jo xuta jan: ―‍Nduvun chutsujun. ―‍Cuatjin cachja me. Hane xi quiji vutsejen xuta jan ne, sehe cavëë me hiscan véjña Jesús. Sacuaha chuva rë fane ñuju hora vëhë. Hane caviyuju me ngajan cojo Jesús nixtin hya.
JOH 1:40 Ngu xuta ladu rë Juan xi cahndë sacuatjin cachja me hacuaha quijitjengui rë Jesús ne, hacui Andrés, me xi hntsë Simón Pedru.
JOH 1:41 Me vëhë titjun quiji jaha me hntsë me Simón, hane xi casacu rë me ne, cuitjin cachja me cojo: ―‍¡Cahyin Mesías! ―‍Cuatjin cachja me. (Mesías ne, hacui cjua xi meje cuichja: Me xi Tsingatju Nina.)
JOH 1:42 Hya xi camá ne, Andrés ne, quijicojo me Simón xicjin me ngajan hiscan tacun Jesús. Hane xi cafehe me jan ne, cavutsejenya Jesús xcun Simón ne, sehe cachja me cuitjin cojo rë me: ―‍Ngayun ne, Simón hmí nuju, peru chjuhunñuhu Cefas. ―‍Cuatjin cachja Jesús. (Ñihi xi Cefas ne, tangun vijne cojo ñihi xi Pedru ta catsijo ni ne, ndyojo, meje cuichja.)
JOH 1:43 Hane xi camá nchujun jan ne, cavejña cacun Jesús xi cjue me ngu nandya tsëhë distritu Galilea. Chaja sa xi cjue me ne, cavechútáha me Felipe, hane cachja me cojo cuitjin: ―‍Nduvun, cuanguen cojo ná. ―‍Cuatjin cachja me.
JOH 1:44 Felipe ne, Betsaida nangui rë me, hiscan nangui rë Andrés cojo Pedru.
JOH 1:45 Hya xi camá ne, Felipe ne, quiji jaha me Natanael, hane xi casacu rë me ne, cachja me cuitjin: ―‍Cahyin ngu xuta Nasaret xi hmí rë Jesús, quihndi rë José. Me vëhë xi catsihindu Moisés cojo jingu sa profeta tsëhë, ngajan xcun xujun rë Nina. ―‍Cuatjin cachja Felipe cojo Natanael.
JOH 1:46 Ngajan xi Natanael ne, cavinenguise me cojo Felipe cuitjin: ―‍¡Ja! ¿Há cuma cuetjujñi ngajan Nasaret ngu xuta xi jemu venguichji rë ni? ―‍Cuatjin cavinenguise Natanael. Ngajan xi cafayangui Felipe cuitjin: ―‍Ndove chutsijin ni. ―‍Cuatjin cafayangui me.
JOH 1:47 Hane xi cavëë Jesús xi camatiña Natanael ne, sehe cachja me cuitjin tsëhë: ―‍Chutsujun ni, cuajyihi ngu me xi xuta tjë rë Israel xi cjuaquixi jain, ngu me xi tsajin cjuandacha cahntsua xahasen rë. ―‍Cuatjin cachja Jesús tsëhë Natanael.
JOH 1:48 Ngajan xi Natanael ne, cuitjin cavinenguise me Jesús: ―‍¿Hacutjin má xi cuatjin hyun yo ngahan ni? ―‍Cuatjin cavinenguise Natanael. Ngajan xi Jesús ne, cuitjin cafayangui me: ―‍Chaja sa xi cuichja Felipe cojo nuju ne, ngahan ne, ha cahvë nuju hya xi sechun ngahma yaxujun jan. ―‍Cuatjin cafayangui Jesús.
JOH 1:49 Hane Natanael ne, cuitjin cachja me: ―‍Maestro, Ngayun xi Quihndi rë Nina ngayun, ngayun xi matitjun ngayun tsajan ngayaan xuta tjë rë Israel. ―‍Cuatjin cachja Natanael.
JOH 1:50 Ngajan xi Jesús ne, cachja me cuitjin: ―‍Ngayun ne, camangu tacún cojo ná, tsëhë xi cachjá xi cahvë nuju hya xi nechun ngahma ya higo jan. Peru sehe chutsujun sa xcusun xi cuetjucaa xi hitsë sa venguichji rë.
JOH 1:51 Hacuaha cachja sa Jesús cjua vihi: ―‍Cuichjá cojo nuju cjuaquixi ta ngayujun ni ne, cuechú nixtin xi chutsujun xi ngahnga ne, sacuaha xi tixaha, hacuaha ángel rë Nina ne, sacuaha xi cjuijne cjuiniji hiscan tejña ngahan xi Quihndi rë Xuta Jain ngahan. ―‍Cuatjin cachja Jesús.
JOH 2:1 Hane xi cavatju jyan nixtin ne, camá ngu cjuavixan ngajan Caná, distritu Galilea. Naa rë Jesús ne, ngajan quitahá me ndava suhi.
JOH 2:2 Hacuaha Jesús cojo xuta ladu rë me ne, hacuaha camá me invitar xi cjue me ndava suhi, hane quiji me.
JOH 2:3 Hya xi camá ne, cafë xan xi tsëhë suhi jan. Sehe ngajan xi naa rë Jesús ne, cuitjin cachja me cojo Jesús: ―‍Ha quihndë tsajin rë me xan nguehe. ―‍Cuatjin cachja me.
JOH 2:4 Ngajan xi Jesús ne, cuitjin cafayangui me: ―‍Hacuiin cuenda naha xi ngahan nújun cojo ná. Cjëë cuechú hora xi sahme mé xi sahme. ―‍Cuatjin cafayangui Jesús.
JOH 2:5 Ngajan xi naa rë Jesús ne, cuitjin cachja me cojo cha xi vincha xan jan: ―‍Tu mé ni xi cuichja cha cojo nuju ne, cuatjin nihñu. ―‍Cuatjin cachja naa rë Jesús.
JOH 2:6 Quihndë ne, siu ngajan jyun tiji xi ndyojo camá, xi xincha nandá xi vitejnu xuta tjë rë Israel hitsë tu mé ni xcusun xi sahmixa me cojo, sacuatjin xi ha xcusun rë yungun rë me. Jima ngu tiji jan ne, xincha sacuaha yachantë o sa jyanchantë litru nandá.
JOH 2:7 Ngajan xi cachja Jesús cojo cha xi vincha xan cuitjin: ―‍Ninguitsun rë tiji xi cuacun vë cojo nandá. ―‍Cuatjin cachja me. Ngajan xi cha xi cuacun jan ne, catsinguitsë camahani rë cha tiji jan cojo nandá.
JOH 2:8 Hya xi camá ne, sehe cachja nga Jesús cuitjin cojo cha: ―‍Quihndë ne, chjuhun hitsë xi cavinchun tiji vë ne, tángun chanu rë xutacha. ―‍Cuatjin cachja me. Hane cuatjin casahmi cha xi cuacun jan.
JOH 2:9 Hya xi camá ne, cavutaha xutacha jan nandá xi camá xan jan. Me vëhë ne, hisca hvíin me jani canduva xan jan, peru cha xi vincha xan xi cafaha quijicojo jan ne, vëë cha. Ngajan xi xutacha jan ne, cajindaya me cha xutavixan jan ne,
JOH 2:10 sehe cachja me cojo cha cuitjin: ―‍Xcusun naja ne, titjun xan xi ndajyihi taan hvi xuta, hane ha xcun xi ha cjín cahvi me ne, sehe taan rë me xan xi ha va jyihi. Peru ngaye ne, hisca ndicumaha ni titehe xan xi ndajyihi. ―‍Cuatjin cachja xutacha jan.
JOH 2:11 Cjuarcun xi tjun tjun casahmi Jesús vë ne, casahmi me ngajan Caná, distritu Galilea. Cuatjin catsingacun me xi jemu jyë hnga me cojo hasen rë me. Hane xuta ladu rë me ne, camangu cacun me cojo rë me.
JOH 2:12 Xi cavatju vëhë ne, cavetju me quijijne me nandya Capernaum. Quiji me cojo naa rë me cojo xicjin me cojo xuta ladu rë me. Hane ngajan caviyujutaha me ngujo nixtin.
JOH 2:13 Cavechú nixtin xi camatiña suhi xi hmí rë Pascua, ngu suhi xi sahmi xuta tjë rë Israel. Ngajan xi Jesús ne, quijiniji me ngajan nandya Jerusalén.
JOH 2:14 Hane xi cafehe me jan ne, quiji me yungun xi matitjun. Ngajan cavëë me xuta xi tiviteña chu ndyaja cojo chu tsánga cojo chu nisëtyava, hacuaha cavëë me xuta xi siu titsindeya tujún tsëhë xuta cojo tujún rë yungun.
JOH 2:15 Hane xi cavëë Jesús xi cuatjin tisahmi xuta jan ne, cafaha me ngu nahñu xi jiña ne, casahmi me ngu cuarta, sehe catsicanga me yëjë ni chu xteña, sa ndyaja sa tsánga. Hacuaha cacandi me tujún rë xuta xi tsindeya tujún, hacuaha catsindefa me maxë xi xinchasun tujún jan.
JOH 2:16 Hane xuta xi tiviteña chu nisëtyava jan ne, cuitjin cachja Jesús cojo rë me: ―‍Tángunxun cojo chu xi cuicun vi. Xicanihñuu ndava Nahmi naha sacuaha ngu ndetsin. ―‍Cuatjin cachja Jesús.
JOH 2:17 Ngajan xi xuta ladu rë Jesús jan ne, catsinguitsjen me xi camahindu xcun xujun rë Nina cuitjin: “Ngayun Nina naha, xi jemu hmú cácun camahani ndya nuju ne, ña sca má rë xahasen naha.” Cuatjin camáhindu.
JOH 2:18 Ngajan xi xutaxa rë yungun jan ne, cuitjin cachja me: ―‍Quihndë ne, ¡jarë ngu cjuarcun xi nihñu cojo sa xi cumachaya niji xi tjin jain nuju chuva rë xi cuatjin nihñu! ―‍Cuatjin cachja me.
JOH 2:19 Ngajan xi Jesús ne, cuitjin cafayangui me: ―‍Ninguetsun yungun vihi ne, cahntsua xi jyan nixtin ne, ngahan sahme ndaja nga. ―‍Cuatjin cafayangui Jesús.
JOH 2:20 Hane xutaxa rë yungun xi matitjun ne, cuitjin cachja nga me: ―‍Yachan jyun nu quiji cani rë xi camandaja yungun naja vi. Hane sehe ngayun nujún ne, ¡cahntsua xi jyan nixtin ne, cuyun nindujun nga ni! ―‍Cuatjin cachja xutaxa rë yungun jan.
JOH 2:21 Peru Jesús ne, hya xi cachja me tsëhë yungun jan ne, tsëhë yojo rë suvá me xi cachja me.
JOH 2:22 Vëhë xi hya xi cavuya Jesús cjuahñu ne, xuta ladu rë me ne, catsinguitsjen me xi cuatjin cachja Jesús, hane camacjain rë me cjua xi chja xujun rë Nina hacuaha camacjain rë me cjua xi cachja Jesús jan.
JOH 2:23 Jinguyëjë rë xi cuatjin quitahá Jesús ngajan Jerusalén nixtin rë suhi tsëhë Pascua ne, jemu cjín xuta camangu cacun me cojo rë me, xi cavëë me cjuarcun xi Jesús tisahmi me.
JOH 2:24 Peru suvá Jesús ne, camanguaain cacun me cojo xuta xi cuacun jan ta, tsëhë xi ha vëë me xahasen rë yëjë me xi cuacun vë.
JOH 2:25 Hacuaha cuatjin camanguaain cacun me cojo xuta jan ta, tsëhë xi hacuiin sahmi ngujyë xi tjin yo xi cuichja cojo rë me tsëhë xuta ta, tsëhë xi ha vëë me mé cjua xi hincha cahntsua xahasen rë xuta.
JOH 3:1 Cavéjña ngu xuta fariseo xi hmí rë Nicodemo. Me vëhë ne, ngu xuta matitjun me tsëhë ngajñi rë xuta tjë rë Israel.
JOH 3:2 Ngundiya jan ne, nguixun quiji cavisiajmi me cojo Jesús, hane cuitjin cachja me: ―‍Maestro, ngayin ne, hyin ta ngayun ne, ngu maestru xi Nina catsingatju rë. Cuatjin hyin ta, tsëhë xi tsajin yo xi cuma sahmi cjuarcun xi nihñu ngayun sa xi hacuiin Nina visecoo rë. ―‍Cuatjin cachja Nicodemo cojo Jesús.
JOH 3:3 Ngajan xi Jesús ne, cuitjin cafayangui me: ―‍Cuichjá cojo nuju cjuaquixi ta sa xi ngu xuta tsiin me ngu ndiya nga ne, cumaji cuisehen me hiscan sahmi Nina gubiernu. ―‍Cuatjin cafayangui Jesús.
JOH 3:4 Hane Nicodemo ne, cavinenguise me Jesús cuitjin: ―‍¿Peru hacutjin cuma xi ngu xihin xi ha changá ne, cuya tsin nga ni? ¿Há cuma cuisehen nga cahntsua naa rë sehe tsin nga ngu ndiya? ―‍Cuatjin cavinenguise Nicodemo.
JOH 3:5 Ngajan xi Jesús ne, cuitjin cafayangui me: ―‍Cuichjá cojo nuju cjuaquixi ta hatuxa sahmi ngujyë xi cuisehen xuta ngu cjuahñu xatsë ngatsë rë nandá cojo ngatsë rë Hasen rë Nina ta, ha chuva rë vëhë ni xi cuma cuisehen me hiscan sahmi Nina gubiernu.
JOH 3:6 Hya xi ngu xuta tsin me ngatsë rë xutacha rë me ne, sacu rë me cjuahñu xi tsëhë ngasunhndë. Peru hya xi tsin me ngatsë rë Hasen rë Nina ne, sacu rë me cjuahñu xatsë xi tsëhë Nina.
JOH 3:7 Hacuiin cjuercun nuju xi cuatjin cachjá cojo nuju xi mameje rë xi tsin nga ngayun ngu ndiya.
JOH 3:8 Tjo ne, hatuxa vanga hiscan meje rë, peru suva machaya naja xi vanga ta nuhya rë xi fane vanga, ta matsijin hiscan nduva o hiscan vechú. Hane xuta xi tsin me ngatsë rë Hasen rë Nina ne, tjin rë me sacuaha tjo jan, ta tsin me ngu ndiya nga, peru matsijin hacutjin. ―‍Cuatjin cafayangui Jesús.
JOH 3:9 Ngajan xi Nicodemo ne, cuitjin cavinenguise me cojo Jesús: ―‍Peru ¿hacutjin cuma sacuatjin nújun vë ni?
JOH 3:10 Hane Jesús ne, cuitjin cafayangui me: ―‍¿Hacutjin nga ne xi ngayun ne, maestru má ngayun tsëhë xuta tjë rë Israel, hane sehe hyúun mé vijne cjua xi cachjá cojo nuju vë ni?
JOH 3:11 Cuichjá cojo nuju cjuaquixi ta ngayin ne, nújin cjua xi hyin hacuaha nújin tsëhë xcusun xi cachutsijín, peru cjua xi nújin cojo nuju ne, mijí chjuhunntsun.
JOH 3:12 Sa xi camacjaain nuju hya xi cachjá cojo nuju cjua tsëhë xcusun tsëhë ngasunhndë ne, ¿hacutjin cumacjain nuju sa xi cuichjá cojo nuju cjua tsëhë xcusun tsëhë ngahnga ni?
JOH 3:13 ’Tsajin hisca ngu xuta xi quiji cavutsejen me hacutjin jyihi ngahnga sehe cavuya me xi sua cuenda nuju me. Suvá ni me xi ha tsëhë ngajan canduva me ne, me vëhë xi cuma sua cuenda nuju me, suvá ni me xi Quihndi rë Xuta Jain.
JOH 3:14 Chuva rë xi casahmi Moisés hatsëë nixtin xi cavunihnga me ngu quicha xcusun rë chu yë taha rë ngu ya ngajan ngu xín camahani jan ne, ha chuva vëhë ni ne, me xi Quihndi rë Xuta Jain ne, meje rë xi tjunihnga rë me taha rë ngu ya.
JOH 3:15 Cuatjin meje rë, cojo sa xi yëjë ni xuta xi cumangu cacun me cojo rë me vëhë ne, sacú rë me cjuahñu xatsë. ―‍Cuatjin cafayangui Jesús tsëhë Nicodemo.
JOH 3:16 ―‍Tsëhë xi jemu catsihmu cacun Nina xuta ne, hisca casua me Quihndi ngu rë me, cojo sa xi yëjë ni xuta xi cumangu cacun me cojo me vëhë ne, hacuiin cjue hasen rë me xcun cjuañihi ta sacú rë me cjuahñu xatsë xcun Nina.
JOH 3:17 Nina ne, catsingatju me Quihndi rë me nguehe ngasunhndë, peru hacuiin xi cjuahachuva rë xuta ngasunhndë ta xi cuaxëtje rë xuta.
JOH 3:18 ’Xuta xi mangucacun cojo Quihndi rë Nina ne, hacuiin chjaháchuva rë me. Peru me xi hacuiin mangucacun cojo Quihndi rë Nina ne, ha cachjaháchuva rë me ta, tsëhë xi hacuiin mangucacun me cojo me xi Quihndi ngu rë Nina.
JOH 3:19 Hane cuitjin fahachuva Nina xuta ngasunhndë: Nina ne, ha catsingatju me Quihndi rë me ngasunhndë sacuaha ngu ndihi xi sua hasen rë. Peru xuta ne, hitsë sa cachuya rë me tsëhë jñu xi cuma rë hasen ta, tsëhë xi xcusun xi casahmi me ne, suvá cjuatsehen.
JOH 3:20 Yëjë ni xuta xi sahmi xcusun tsehen ne, hatuxa chuyiin rë me tsëhë hasen, hisca sahmitiñaai me hiscan xi hasen, sa tu sesunhnga xcusun xi sahmi me.
JOH 3:21 Peru xuta xi ndiya rë cjuaquixi xcusun xi sahmi me ne, sahmitiña me hiscan xi hasen, cojo sa xi sesunhnga xi xcusun xi sahmi me ne, vëhë xcusun xi meje rë Nina.
JOH 3:22 Hya xi camá ne, quiji Jesús cojo xuta ladu rë me ngajan nguijña tsëhë distritu Judea. Hane ngajan caviyujutahá cojo me xuta xi cuacun vë. Hane cavitenda me xuta.
JOH 3:23 Hacuaha ha nixtin hya ni ne, Juan Vitenda rë Xuta ne, tivitenda me xuta ngajan hiscan xi hmí rë Enón, tiña tsëhë Salim. Ngajan quitahá me ta, tsëhë xi ngajan ne, jemu yehe nandá tjin. Hane hacuaha quiji xuta caxtenda me.
JOH 3:24 Nixtin hya ne, cjëë cjue Juan jan ndavaya.
JOH 3:25 Quihndë ne, ngujo xuta ladu rë Juan ne, cavetsihin ticjanjo cjua rë me cojo ngu xutaxa rë yungun tsëhë xcusun changá rë me xi ma tyjahi me xcun Nina.
JOH 3:26 Hya xi camá ne, quiji cachja me cojo Juan cuitjin: ―‍Maestro, ¿Há vitsjen nuju me xi casetaha cojo nuju ngunda vëhë tsëhë ndajyë Jordán, me xi canújun cojo niji tsëhë jan? ¡Chutsujun ta hacuaha cojo me vëhë tivitenda me, hane yëjë ni xuta cjuitjengui rë me! ―‍Cuatjin cachja xuta xi cuacun jan.
JOH 3:27 Ngajan xi Juan ne, cuitjin cafayangui me: ―‍Tsajin mé xi sacú cjuahatsja ngu xuta sa xi Nina suaain rë me.
JOH 3:28 Ngayun suvun ne, ha canuhyun xi cachjá xi hacuiin ngahan Xihin xi Tsingatju Nina ta ngahan ne, cha xi catsingatju titjun Nina, sehe catsingatju Nina me vëhë.
JOH 3:29 Chutsujun ta na xutavixan ne, tsëhë cha xutavixan na. Peru ngu cha amigu ndaja rë cha xutavixan xi secun tivisiñuju cjua rë cha xutavixan jan ne, jercu ndama rë cha tsëhë cjua rë cha vëhë. Vëhë xi ngahan xi sacuaha cha amigu rë cha xutavixan vë ne, jercu tu ndaja camahani má ná.
JOH 3:30 Me vëhë ne, meje rë xi quihndë nga nchujun cuma jyë cuma hnga sa me cojo xa rë me, peru ngahan ne, hacuiin cuatjin ta xi meje rë ne, cuijnetaha xa naha. ―‍Cuatjin cafayangui Juan.
JOH 3:31 Me xi nduva tsëhë ngahnga ne, me vëhë xi hitsë sa jemu vengui chji rë me xi cuma rë yëjë xuta. Ngayaan xi tsëhë ngasunhndë ngayaan ne, ha xuta ngasunhndë ni ngayaan, hacuaha suvá cjuatacun rë ngasunhndë xi visiajme. Me xi nduva tsëhë ngahnga ne, me vëhë xi hitsë sa jemu vengui chji rë me xi cuma rë yëjë xuta.
JOH 3:32 Me vëhë ne, sua me machaya naja tsëhë xcusun xi cavëë me cojo tsëhë cjua xi cahndë me, peru xuta ne, fahatsjaain me cjua xi chja me vëhë.
JOH 3:33 Peru ngujo xuta ne, fahatsja me cjua rë me vëhë, hane cuatjin maquixi xi Nina ne, quixi jain me cojo cjua rë me.
JOH 3:34 Me xi Nina catsingatju rë ne, cjua rë Nina chja me ta, tsëhë xi Nina ne, hacuiin chuva hitsë sua me Hasen rë me.
JOH 3:35 Nina Nahmi naja ne, jemu hmu cacun me Quihndi Ngu rë me, hacuaha yëjë ni xcusun ne, cavejña me tsja Quihndi rë me jan.
JOH 3:36 Xuta xi mangucacun me cojo Quihndi rë Nina jan ne, tjin rë me cjuahñu xatsë. Peru xuta xi vihndiin me tsëhë Quihndi rë me jan ne, sacuiin rë me cjuahñu xatsë ta castigu rë Nina cuatju me cuma.
JOH 4:1 Quihndë ne, cha fariseo ne, camachaya rë cha xi Jesús ne, hitsë sa cjín jima xuta ladu rë me xi cuma rë xuta ladu rë Juan, hacuaha hitsë sa cjín xuta tivitenda me xi cuma rë xuta xi tivitenda Juan.
JOH 4:2 Peru suvá Jesús ne, cavitendaain me ta xuta ladu rë me ne, me vëhë xi cavitenda me xuta.
JOH 4:3 Hane xi camachaya rë Jesús xi cuatjin camachaya rë cha fariseo xi cuacun vë ne, cavetjuxin me tsëhë distritu Judea. Hane cavuya quiji nga me ngu nandya tsëhë distritu Galilea.
JOH 4:4 Hane ndiya xi cjui me jan ne, tjin xi cuatju me ngujo nandya tsëhë distritu Samaria.
JOH 4:5 Hya xi camá ne, cafehe me ngu nandya tsëhë distritu Samaria xi hmí rë Sicar, ngu nandya xi tacun tiña tsëhë nangui xi casua Jacob quihndi rë me José jemu hatsëë camahani.
JOH 4:6 Hane cahndë́ vëhë ne, tacun ngu ndava nandá xi casahmi Jacob. Hane tsëhë xi jemu cafenda rë Jesús tsëhë ndiya xi nduva me ne, quiji me cavéjña me hiscan ndava nandá jan. Sacuaha chuva rë nchisen xi cafehe me jan.
JOH 4:7 Hora vëhë ne, canduva ngu na samaritana, canduva jaha na nandá. Hane cuitjin cachja Jesús cojo rë na: ―‍Tuhun hitsë nandá cuëhë. ―‍Cuatjin cachja me.
JOH 4:8 Hora vëhë ne, tsajin xuta ladu rë Jesús ta nandya quiji me xi cuatsë me xi sinë me cojo Jesús.
JOH 4:9 Ngajan xi na samaritana jan ne, cuitjin cachja na cojo Jesús: ―‍Ngayun xi xuta tjë rë Israel ngayun ne, ¿hacutjin má xi tichjahyun ná nandá, ngahan xi na samaritana ngahan ni? ―‍(Cuatjin cachja na ta, tsëhë xi xuta tjë rë Israel ne, hatuxa tsinguisihinjñii me cojo xuta samaritana.)
JOH 4:10 Ngajan xi Jesús ne, cuitjin cafayangui me tsëhë na: ―‍Sa xi ngayun hyun cjuatjo xi Nina sua me hacuaha hyun yo ngahan xi tifehya nuju nandá ne, ngahan cachjahyun ná nandá, hane ngahan casuá nuju nandá xi sua cjuahñu. ―‍Cuatjin cafayangui Jesús.
JOH 4:11 Hane na vëhë ne, cuitjin cachja na: ―‍Tatá, peru ndava nandá vi ne, jemu nungun, hane tsajin quichuhun mé xi naxun cojo nandá. ¿Jani naxun nandá xi sua cjuahñu vë ni?
JOH 4:12 Xutachanga naja Jacob casua niji me ndava nandá vi. Hacuaha cojo me cojo quihndi rë me cojo chu rë me cahvi me nandá tsëhë ndava nandá vihi. ¡Ja! Peru ¿há hitsë sa matitjun ngayun xi cuma rë me vëhë ni? ―‍Cuatjin cachja na.
JOH 4:13 Hane xi cafayangui Jesús ne, cuitjin cachja me cojo rë na: ―‍Yëjë ni xuta xi hvi me nandá vihi ne, cuma xinda nga rë me.
JOH 4:14 Peru xuta xi cuihi me nandá xi suá ngahan ne, hatuxa ha quihndë tsajin nu tsajin nixtin xi cuya cumaxinda nga rë me ta nandá xi suá ngahan ne, cuma sacuaha ngu nandá xi ña vangatë xi sua rë me cjuahñu xatsë. ―‍Cuatjin cachja me.
JOH 4:15 Ngajan xi na vëhë ne, cuitjin cachja na cojo Jesús: ―‍Tatá, tuhun ná hitsë nandá xi nújun vë, cojo sa xi cumaxindaain ná hacuaha ha quihndë cuinduvaan jaha nandá. ―‍Cuatjin cachja na.
JOH 4:16 Hane Jesús ne, cuitjin cachja me cojo rë na: ―‍Tángun chjuhun xihin nuju, sehe nduvuncujun me nguehe. ―‍Cuatjin cachja me.
JOH 4:17 Ngajan xi na vëhë ne, cuitjin cafayangui na: ―‍Tsajin xihin naha. ―‍Cuatjin cafayangui na. Hane cuitjin cachja Jesús cojo rë na: ―‍Ndaja nújun xi tsajin xihin nuju ta
JOH 4:18 hñú cha xi cavinechuncujun, hane cha xi nechuncujun quihndë ne, hacuiin xihin nuju cha. Canújun cjuaquixi. ―‍Cuatjin cachja Jesús cojo rë na.
JOH 4:19 Ngajan xi na vëhë ne, cuitjin cafayangui na: ―‍Tatá. Xi má ná ne, ngayun ne, ngu profeta ngayun.
JOH 4:20 Xutachanga niji ne, nguehe ndetjún vihi canduva cafaharcun me Nina. Hane ngayujun ni xuta nangui rë Israel ne, nújun ta Jerusalén ne, ngajan tacun cahndë́ xi meje rë xi cjue chjahárcun rë Nina. ―‍Cuatjin cafayangui na.
JOH 4:21 Ngajan xi cachja Jesús cojo rë na cjua vihi: ―‍Ngayun chjuun, catamacjain nuju cjua xi cuichjá vi: cuechú nixtin xi hacuiin ndetjún vihi hacuiin Jerusalén chjuhunrcun Nina Nahmi naja.
JOH 4:22 Ngayun xuta samaritano ne, chjuhunrcun Nina, peru hyúun me xi ndandaja. Ngayin ne, ha hyinndijin Nina ta, tsëhë xi me xi cuaxëtje rë xuta ne, cuetjujñi me ngajñi niji ngayin xuta nangui Israel.
JOH 4:23 Cuechú nixtin o ha hisca cavechú nixtin xi xuta xi cjuaquixi xi faharcun me Nina Nahmi naja ne, Hasen rë Nina cuisecoo rë me xi cjuaharcun me Nina cojo cjuaquixi. Ha cjuaquixi ta xuta xi cuatjin sahmi me ne, me vëhë xi meje rë Nina Nahmi naja xi cjuaharcun rë me.
JOH 4:24 Nina ne, Hasen me. Hane xuta xi faharcun rë me ne, hatuxa meje rë xi Hasen rë Nina cuisecoo rë me xi cjuaharcun me Nina cojo cjuaquixi. ―‍Cuatjin cachja Jesús.
JOH 4:25 Hane chjuun jan ne, cuitjin cachja na cojo Jesús: ―‍Ngahan ne, ha hvë xi cuinduva Me xi Tsingatju Nina, me xi hmí rë Cristu. Hane hya xi cuinduva me vëhë ne, suacuenda naja me yëjë ni cjuatacun. ―‍Cuatjin cachja na.
JOH 4:26 Ngajan xi Jesús ne, cuitjin cachja me cojo rë na: ―‍Ngahan xi tichjá cojo nuju vi ne, ha ngahan xi nújun vë. ―‍Cuatjin cachja me.
JOH 4:27 Hane hora vëhë cavuya xuta ladu rë Jesús xi quiji jaha me comida. Hane jemu quijircun rë me xi cavëë me xi visiajmi Jesús cojo rë ngu chjuun. Peru hisca ngu me xi cuacun vë cavinenguisiin me cuitjin: “¿Mé xi meje nuju?” o “¿mé xi visiajmu cojo rë na?” Cuatjin camá.
JOH 4:28 Chjuun jan ne, cavejña na nisa rë na, sehe cavuya quiji na nandya, hane cuitjin cachja na cojo xuta:
JOH 4:29 ―‍Nduvun cuanguen chutsejen ngu me xi cachja cojo ná yëjë xcusun xi casahme. ¿Hacuiin hacui me vëhë xi Tsingatju Nina? ―‍Cuatjin cachja na.
JOH 4:30 Hya xi camá ne, cavetju xuta quiji me cojo rë na hiscan quitahá Jesús.
JOH 4:31 Jinguyëjë rë ne, xuta ladu rë Jesús jan ne, cuitjin cachja me: ―‍Maestro, xinu niñu. ―‍Cuatjin cachja me.
JOH 4:32 Peru Jesús ne, cuitjin cafayangui me: ―‍Ngahan ne, ha tjin xi sínë xi ngayun ne, hyúun mé jan. ―‍Cuatjin cafayangui me.
JOH 4:33 Ngajan xi xuta ladu rë Jesús jan ne, cuitjin cavinenguise xicjin me xingu xingu me: ―‍¿Há cuma cacun sa xi tjin yo xi cafehe cani xi cajinë me? ―‍Cuatjin cavinenguise xicjin me.
JOH 4:34 Hane Jesús ne, cuitjin cachja me cojo xuta ladu rë me jan: ―‍Jemu chuya rë xahasen naja xi chinë niñu. Peru ngahan ne, hitsë sa chuya rë xahasen naha xi sahme sacuatjin meje rë me xi catsingatju ná, hacuaha hitsë sa chuya rë xahasen naha xi tsinguíjnetaha xa xi casua ná me.
JOH 4:35 Chja ngu cjua ta: “Chaja sa ñuju sá, sehe tjunihnga rë xitjë.” Peru ngahan cuichjá cojo nuju ta chutsujun xuta ta, tsëhë xi tangun me cojo xitjë xi ha camacha, ha cuma tjunihnga rë.
JOH 4:36 Me xi tivunihnga xitjë ne, ha tifaha me chji rë me, cuma cuinújan ne, tisahmi tangun me xuta xi sacú rë xuta xi cuacun vë cjuahñu xatsë. Cuatjin tijima cojo sa xi tangun cuiyujusua me xi vincha tjë cojo me xi vunihnga xitjë.
JOH 4:37 Quixi cjua xi chja xi: “Hacjahi cha xi vincha tjë ne, hacjahi cha xi vunihnga xitjë.”
JOH 4:38 Ngahan catsingátju nuju chunihngun xitjë hiscan xi hacuiin ngayun canihñu xa. Jingusa me casahmi me xa, hane ngayun cavisuhunjñu ngajñi rë xa rë me. ―‍Cuatjin cachja Jesús cojo xuta ladu rë me.
JOH 4:39 Jemu cjín xuta samaritano tsëhë nandya jan camangu cacun me cojo Jesús, ngatsë rë cjua xi cachja chjuun jan cuitjin: “Cachja me cojo ná yëjë xcusun xi casahme.”
JOH 4:40 Ngajan xi hya xi cafehe xuta samaritano ngajan hiscan quitahá Jesús ne, cachja xuta jan cojo rë me xi cjue cuejña me cojo rë me. Hane Jesús ne, quiji cavéjña me jo nixtin cojo xuta xi cuacun jan.
JOH 4:41 Hane jemu cjín sa xuta xi camangu cacun me ngatsë rë cjua rë suvá Jesús.
JOH 4:42 Hane chjuun jan ne, cuitjin cachja xuta jan cojo rë na: ―‍Ha quihndë hacuiin ngatsë rë cjua riji xi mangutacuín ta, tsëhë xi suvin canuhyin cjua rë me, hane ngayin ne, hyin ta cjuaquixindaja xi me vihi xi cuaxëtje me xuta. ―‍Cuatjin cachja xuta jan.
JOH 4:43 Xi cavatju jo nixtin jan ne, cavetju Jesús cojo xuta ladu rë me, quiji me ngu nandya tsëhë distritu Galilea.
JOH 4:44 Ta suvá Jesús cachja me xi quixi xi xuta ne, faharcuaain me profeta xi tsëhë nangui rë me.
JOH 4:45 Vëhë xi hya xi tivatju Jesús ngujo nandya tsëhë distritu Galilea ne, ndaja cafahatsja xuta me ta, tsëhë xi hacuaha cojo xuta jan quiji me suhi ngajan Jerusalén, hane ngajan cavëë me yëjë xcusun xi casahmi Jesús nixtin rë suhi jan.
JOH 4:46 Hya xi camá ne, cavuya cafehe me Caná, ngu nandya tsëhë distritu Galilea, hiscan xi casahmi me xi nandá ne, cavuya camá xan rë uva. Hane ngajan nandya Capernaum ne, cavéjña ngu xutaxa rë xi hmu rë cha quihndi rë me.
JOH 4:47 Hane xi camachaya rë me xi cafehe Jesús ngajan Caná ne, cavetju me quijitjengui me Jesús. Hane xi cafehe me jan ne, cafehya me favor cojo Jesús xi cjue Jesús cojo rë me nangui rë me xi sahmi Jesús xi cumandaja quihndi rë me ta ha tu hora sa xi cueya.
JOH 4:48 Ngajan xi Jesús ne, cachja me cuitjin cojo xutaxa rë jan: ―‍¡Ngayujun ni ngayun ne, sa xi chuun cjuarcun ne, cumanguaain camahani tacún cojo ná! ―‍Cuatjin cachja Jesús.
JOH 4:49 Ngajan xi xutaxa rë jan ne, cuitjin cafayangui me: ―‍Tatá, cuanguen sanii, chaja sa xi cueya quihndi naha. ―‍Cuatjin cafayangui me.
JOH 4:50 Hane Jesús ne, cuitjin cachja me: ―‍Cuma cuangun ta, quihndi nuju ne, jimandaja cha. ―‍Cuatjin cachja Jesús. Hya xi camá ne, xutaxa rë jan ne, camacjain rë me cjua xi cachja Jesús, hane cavetju me quiji me.
JOH 4:51 Hane ndiya cjui me ne, cavechútáha me ngujo cha mosu hndixahan rë me, hane cachja cha cojo rë me xi cha quihndi rë me ne, tijimandaja cha.
JOH 4:52 Ngajan xi xutaxa rë jan ne, cavinenguise me cojo cha hndixahan rë me jan mé hora cavetsihin camandaja cha hmu rë jan. Hane cha hndixahan rë me jan ne, cuitjin cachja cha: ―‍Ngujña fane ngu cavetjuxin chíhinsuë xi sahmi cojo cha. ―‍Cuatjin cachja cha.
JOH 4:53 Hane nahmi rë quihndi jan ne, ha vëë me ta hora vëhë xi cachja Jesús cojo rë me xi quihndi rë me ne, tijimandaja cha. Cuatjin camá xi xutaxa rë jan cojo yëjë xuta rë me ne, camangu cacun me cojo Jesús.
JOH 4:54 Cuatjin camá xi, hya xi cavetju Jesús tsëhë ladu rë distritu Judea hane cafehe me Caná, distritu Galilea ne, casahmi me cjuarcun xi majo xi casahmi me ngajan.
JOH 5:1 Xi cavatju nixtin xi cuacun vë ne, quiji Jesús ngajan Jerusalén xi cjue me suhi xi cuma ngajan yungun xi matitjun.
JOH 5:2 Quihndë ne, ngajan Jerusalén ne, tiña tingotjo Chu Tsánga ne, ngajan tacun ngu ndava nandá xi tjin rë hñú cahndë́ ngahma ndihya. Hane ndava nandá vëhë ne, xi hne hebreo ne, Betesda hmí rë.
JOH 5:3 Cahndë́ jan ne, jemu cjín xuta siuhmu me. Siu xuta rcá, siu xuta rengun, siu xuta xi quixíhñu yojo rë xi tacunya rë me xi cuiniya nandan
JOH 5:4 ta jiya hora jiya hora ne, finiya nandan ta ngu ángel ne, vijne tsiniya nandan jan. Sehe cha xi tjun cuisehen ne, marqui rë tsëhë chíhin xi má rë.
JOH 5:5 Hane ngajñi rë xuta hmu rë xi cuacun jan ne, jiña ngu cha xi ha tjin rë can tyjuhunjyan nu xi hmu rë cha.
JOH 5:6 Hane xi cavëë Jesús xi cuatjin jiña cha hacuaha ha vëë me xi ha jemu tsëë hmu rë cha ne, cavinenguise me cha cuitjin: ―‍¿Há meje nuju xi cuma ndaja ngayun? ―‍Cuatjin cavinenguise Jesús.
JOH 5:7 Hane cha hmu rë jan ne, cuitjin cafayangui cha: ―‍Tatá, tsajin yo xi tsinguisehen ná ndava nandá hora xi finiya nandá. Jinguyëjë rë xi tifë́ tiña ne, hacjahi me xi ha cavisehen. ―‍Cuatjin cafayangui cha.
JOH 5:8 Ngajan xi Jesús ne, cuitjin cachja me cojo cha: ―‍Tisatjunhngun, chjuhun nijña nuju, sehe tujyuhunyun. ―‍Cuatjin cachja Jesús.
JOH 5:9 Cha vëhë ne, ha tu ñahñu camandaja cha, cafaha cha nijña rë cha, cavetsihin catsujyihiya cha. Nixtin vëhë ne, nixtin xi chjahájenda rë.
JOH 5:10 Ngajan xi xutaxa rë yungun ne, cachja me cojo cha xi camandaja jan cuitjin: ―‍Quihndë ne, nixtin xi chjahájenda rë. Ndajintjin xi cuatjin quichehe nijña riji. ―‍Cuatjin cachja me.
JOH 5:11 Hane cha xi camandaja jan ne, cuitjin cafayangui cha: ―‍Me xi casahmi xi camandaja ngahan ne, me vëhë cachja me cojo ná xi cjuahá nijña naha sehe tsujyëhëya. ―‍Cuatjin cachja cha.
JOH 5:12 Ngajan xi xutaxa rë jan ne, cavinenguise nga me cuitjin: ―‍¿Hane yo xi cachja cojo ri xi chjehe nijña riji ne, sehe tujyihiye? ―‍Cuatjin cavinenguise me.
JOH 5:13 Peru cha xi camandaja jan ne, hvíin cha yo ta, tsëhë xi Jesús ne, cavetjuxin me tsëhë cahndë́ vëhë, tsëhë xi jemu xutacjín quitsë me.
JOH 5:14 Hane xi cavatju vëhë ne, cavechútáha Jesús cha ngajan yungun xi matitjun, hane cachja me cojo cha cuitjin: ―‍Chutsujun ni, camandaja ngayun. Quihndë ne, xicavinechunyuun sa ndiya rë cjuatsehen, sa tu choho sa cuatjun cuma. ―‍Cuatjin cachja Jesús cojo cha.
JOH 5:15 Sehe cavetju cha quiji cachja cha cojo xutaxa rë ta me xi casahmi xi camandaja cha ne, Jesús.
JOH 5:16 Vëhë xi xutaxa rë jan ne, tsujyihiyatjengui me Jesús cojo cjuahngatacun ta, tsëhë xi casahmi Jesús xcusun vëhë nixtin xi chjahájenda rë.
JOH 5:17 Ngajan xi Jesús ne, cuitjin cachja me cojo xutaxa rë jan: ―‍Nahmi naha ne, hisca quihndë tisahmi me xa, hacuaha ngahan ne, tisahme xa. ―‍Cuatjin cachja Jesús.
JOH 5:18 Ngatsë rë cjua vëhë ne, xutaxa rë jan ne, hitsë sa cavangui me chuva rë xi tsiquehen me Jesús. Cuatjin casahmi xutaxa rë ta, tsëhë xi hacuiin suvá ni cafaharcuaain Jesús nixtin xi chjahájenda rë ta hacuaha cachja me xi Nahmi rë me ne, Nina. Hane xi cuatjin cachja Jesús ne, tsingacun me xi tangun me cojo Nina.
JOH 5:19 Ngajan xi Jesús ne, cuitjin cachja me cojo xutaxa rë xi cuacun jan: ―‍Cuichjá cojo nuju cjuaquixi ta ngahan xi Quihndi rë Nina ngahan ne, tsajin mé xi cuma sahme xi cojo cjuatacun naha suva ta xi vutsején xi sahmi Nahmi naha ne, vëhë xi sahme. Xcusun xi sahmi me vëhë ne, hacuaha xcusun vëhë sahme ngahan Quihndi rë me.
JOH 5:20 Nahmi naha ne, hmu cacun ná me, ngahan Quihndi rë me, hacuaha tsingacun ná me yëjë xcusun xi sahmi me. Hane xcusun xi sehe tsingacun ná me ne, hisca yehe sa xi cuma rë xcusun xi casahme xi camandaja cha hmu rë jan. Cuatjin cuma cojo sa xi ngayun ne, cjuercun nuju.
JOH 5:21 Sacuatjin faha Nahmi naha nima sehe sua nga rë me cjuahñu ne, hacuanitjin ni ngahan Quihndi rë me ta suá rë cjuahñu yo xi meje suá rë.
JOH 5:22 Nahmi naha ne, tsajin yo tsichuva me cojo cjuatacun rë ta ntsa ngahan cavejña me yëjë xa vëhë,
JOH 5:23 cojo sa xi yëjë ni xuta ne, cjuaharcun me ngahan sacuatjin faharcun me Nahmi naha. Yo xi cjuaharcuaain ná ngahan ne, faharcuaain rë Nahmi naha, me xi catsingatju ná.
JOH 5:24 ’Cuichjá cojo nuju cjuaquixi ta xuta xi vihndë me cjua xi chjá hacuaha mangucacun me cojo rë Nina, me xi catsingatju ná ne, tjin rë me cjuahñu xatsë. Hacuaha cumachuvaain me cojo cjuatacun rë me ta sacuaha xi ha cahme me hacuaha ha casacu rë me cjuahñu xatsë.
JOH 5:25 Cuichjá cojo nuju cjuaquixi ta cuechú nixtin o ha hisca cavechú nixtin xi xuta xi hndiin tsëhë Nina sacuaha nima ne, cuihndë me xta naha, ngahan xi Quihndi rë Nina ngahan. Hane me xi cuihndë tsahan ne, sacú rë me cjuahñu xatsë.
JOH 5:26 Cjuahñu xi tjin rë Nina ne, tsajin yo casua rë me, ta nduva tsëhë cjuandaja rë suva me. Hane hacuanitjin ná ngahan, ta casua ná cahndë́ xi hacuaha tjin ná cjuahñu tsëhë cjuandaja rë suvá.
JOH 5:27 Hacuaha casua ná me xa xi tsichúva xuta cojo jyë́ rë me ta, tsëhë xi ngahan ne, Quihndi rë Xuta Jain ngahan.
JOH 5:28 Hacuiin cjuercun nuju tsëhë cjua naha. Cuechú nixtin xi yëjë ni nima xi hincha cahntsua tsjun rë ne, cuihndë xta naha,
JOH 5:29 sehe cuetju tsëhë tsjun rë. Hane nima xi ndaja xcusun casahmi xcun cjuahñu rë ne, sacú rë cjuahñu xatsë. Hane nima xi choho xcusun casahmi ne, cuatju castigu.
JOH 5:30 Ngahan ne, hatuxa tsajin mé xi sahme xi cojo cjuatacun naha suva ta, sacuatjin cjua xi víhndë xi chja Nahmi naha ne, cuatjin tsichúva xuta cojo cjuatacun rë me. Hane hatuxa quixi ngahan cojo cjuatacun naha ta, tsëhë xi sahmee hacutjin xi meje ná suva ta sacuatjin xi meje rë Nahmi naha, me xi catsingatju ná ne, cuatjin xi sahme. ―‍Cuatjin cachja Jesús.
JOH 5:31 Cjuinduju sa tichja Jesús cojo xutaxa rë yungun cuitjin: ―‍Sa xi ngahan cuichjá favor naha suva ne, cuinújun ta quixiin cjua xi chjá.
JOH 5:32 Peru tjin sa ngu xi tichja favor naha, hane hvë ta cjua xi chja me vëhë tsahan ne, cjuaquixi.
JOH 5:33 Ngayun ne, caningatjun xuta quiji cavinenguise rë me Juan ngu cjua, hane Juan ne, catsicuya me cjua xi cjuaquixi.
JOH 5:34 Peru ngahan ne, me xi tichja me favor naha hacuiin xuta me, peru cjua xi tichjá vi ne, tichjá cojo sa xi ngayun ne, cuetjuntjun.
JOH 5:35 Juan vë ne, sacuaha ngu ndihi xi setí xi sua hasen rë camá me. Hane ngayun ne, cachuya nuju tsëhë xi cavinechun sua ngujo nixtin ngajñi rë cjuahasen rë Juan.
JOH 5:36 Peru ngahan ne, tjin xcusun xi hitsë sa ndaja tsingacun yo ngahan xi cuma rë cjua xi cachja Juan tsahan. Xa xi casua Nahmi naha ngahan xi sahmechehen ne, cuma cuinújan ne, xa xi ha tisahme ne, suvá xa vëhë tsingacun xi Nahmi naha catsingatju ná me.
JOH 5:37 Hacuaha Nahmi naha, me xi catsingatju ná ne, chja me favor naha. Ngayun ne, hisca xta rë me cjëë cuinuhyun, hacuaha cjëë chun hacutjin jyihi me.
JOH 5:38 Hisca cjua rë me ne, tsajin tetjo ngajñi rë cjuatacun nuju ta, tsëhë xi ngahan xi catsingatju ná me vëhë ne, manguaain tacún cojo ná.
JOH 5:39 Ngayun ne, jemu chutayun xujun rë Nina ta, tsëhë xi ningatuhun tacún ta xi cuatjin chutayun ne, sacú nuju cjuahñu xatsë. Hane xujun vëhë ne, vëhë xi chja favor naha.
JOH 5:40 Hane ngayun ne, mijí cuisuhun ladu naha xi sacú nuju cjuahñu xatsë.
JOH 5:41 ’Ngahan ne, hacuiin sahmi ngujyë xi xuta sahmi jyë sahmi hnga ná me.
JOH 5:42 Hacuaha ngahan ne, ha hvë xcusun nuju ta tsajin cjuahmutacun rë Nina jiya cahntsua xahasen nuju.
JOH 5:43 Ngahan ne, canduvá ta, tsëhë xi Nahmi naha casuaxa ná me, peru ngayun ne, mijí chjuhunntsun ná. Hane sa xi jingu sa xuta cuinduva me cojo cjuatacun rë suvá me ne, ha hvë ta me vëhë ne, hatuxa chjuhunntsun me.
JOH 5:44 Tsajin nixtin xi cumangu tacún cojo ná ngahan jinguyëjë rë xi tivinchun chuva rë xi ngajñi nuju cojo xingun ni ne, sahmi yehe sahmi hnga nuju me hane vinchunsuun xi Nina xi ngu tu tu ni ne, me vëhë sahmi yehe sahmi hnga nuju me.
JOH 5:45 Xicaningatuun tacún xi ngahan cuíncha jyë nuju xcun Nahmi naha ta xutachanga naja Moisés, me xi jemu vetuhun tacun ne, me vëhë xi cuincha jyë́ nuju me.
JOH 5:46 Sa xi camacjain nuju cjua xi catsihindu Moisés ne, hacuaha camacjain nuju cjua naha ta Moisés vë catsihindu me tsahan.
JOH 5:47 Peru sa xi macjaain nuju cjua xi catsihindu Moisés ne, ¿hacutjin cumacjain nuju cjua xi chjá ngahan ni?
JOH 6:1 Xi cavatju yëjë xcusun vëhë ne, cavetju Jesús quiji me ngunda vëhë tsëhë laguna Galilea, xi hacuaha hmí rë laguna Tiberias.
JOH 6:2 Hane jemu xutacjín camahani xi quijitjengui me Jesús ta, tsëhë xi cavëë me cjuarcun xi casahmi Jesús cojo xuta hmu rë.
JOH 6:3 Hane Jesús ne, quijiniji me ngu ndetjún, hane ngajan cavéjña me cojo xuta ladu rë me.
JOH 6:4 Hane Pascua, suhi xi sahmi xuta tjë rë Israel ne, hacuaha ha camatiña.
JOH 6:5 Hane xi vutsejen Jesús xi jemu xuta cjín nduvatjengui rë me ne, sehe cachja me cojo Felipe cuitjin: ―‍¿Jani cuanguen chaan niñu xi sinë xuta xi cuacun vë? ―‍Cuatjin cachja Jesús.
JOH 6:6 Cuatjin cachja me xi cjuahachuva me Felipe ta, tsëhë xi Jesús ne, ha vëë me mé xi sahmi me.
JOH 6:7 Ngajan xi Felipe ne, cuitjin cafayangui me: ―‍Sa xi chaan niñu cojo tujún xi chji rë xuta jo cientu nixtin ne, hisca chutaain xi sacú tsë tsë sinë jima ngu xuta vë. ―‍Cuatjin cafayangui Felipe.
JOH 6:8 Ngajan xi ngu xuta ladu rë Jesús, Andrés hntsë Simón Pedru ne, cuitjin cachja me cojo Jesús:
JOH 6:9 ―‍Nguehe secun ngu cha lihndi xi yaha hñú niñu cojo jo chu ti. Peru ¿mé chutaha vë xi sinë xuta xi cuarcumu cjín me? ―‍Cuatjin cachja Andrés.
JOH 6:10 Ngajan xi Jesús ne, cuitjin cachja me: ―‍Tinújun cojo xuta vë ne, catiyuju me. ―‍Cuatjin cachja me. Quihndë ne, ngajan cahndë́ vëhë ne, jemu jyë cahndë́ tjin ndiji. Hya xi camá ne, ngajan caviyuju sacuaha hñú mil xihin.
JOH 6:11 Ngajan xi Jesús ne, cafaha me niñu jan, hane, xi cafë casua me nacuechji rë Nina ne, sehe cavatëcja me niñu jan ngajñi rë xuta xi siu jan. Hacuanitjin ni casahmi me cojo chu ti jan. Casua me ha tucutjin xi meje sinë xuta jan.
JOH 6:12 Hane hya xi ha catsë rë xuta xi cajinë me ne, sehe cachja Jesús cojo xuta ladu rë me jan cuitjin: ―‍Quihndë ne, chjayun yëjë xi cavángui vë ne, cojo sa xi hacuiin chajá hisca hitsë. ―‍Cuatjin cachja Jesús.
JOH 6:13 Hane xi cafaya xuta ladu rë Jesús yëjë ni xi cavángui tsëhë hñú niñu xi cajinë yëjë xutacjín jan ne, catsinguitsë me tejó chajne.
JOH 6:14 Hane xi cavëë xuta cjuarcun xi casahmi Jesús jan ne, cuitjin cachja me: ―‍Cjuaquixi xi me vihi profeta xi cuinduva ngasunhndë. ―‍Cuatjin cachja xuta jan.
JOH 6:15 Peru Jesús ne, ha vëë me xi ha tu hora sa xi cjuaha xuta me cojo ngujyë camahani xi suaxa rë me xi cuma titjun me. Vëhë xi Jesús ne, cavetjuxin nga me, quiji suvá ni me hisca rcu ndetjún.
JOH 6:16 Quihndë ne, xi quiji hora jan ne, quijijne xuta ladu rë Jesús tjehen laguna.
JOH 6:17 Hane xi cavisehen me ngu barcu ne, cavuya canduva nga me ngunda vihi tsëhë laguna xi cjue me nandya Capernaum. Hya xi camá ne, camajñu, peru Jesús ne, cjëë cjuetjengui me xuta ladu rë me jan.
JOH 6:18 Hane hora vëhë ne, xi jercu tu hñu camahani tivanga tjo ne, sacuaha xi sexu nandá tsëhë laguna jan.
JOH 6:19 Ha xcun xi ha quiji me xi cuacun jan cojo barcu sacuaha hñú o sa jyun kilómetro xcun nandá jan ne, cavëë me xi nduva ntsacu Jesús xcun nandá, tisahmitiña me tsëhë barcu. Hane xuta ladu rë me jan ne, catsacjun me camá.
JOH 6:20 Peru Jesús ne, cachja me cuitjin cojo xuta ladu rë me jan: ―‍Ngahan vi. Xicarcuun. ―‍Cuatjin cachja me.
JOH 6:21 Ngajan xi xuta ladu rë Jesús jan ne, cojo yëjë ni cjuasua ne, cafahatsja me Jesús cahntsua barcu. Hane ha tu ñahñu cafehe barcu cojo rë me nangui quixí, cahndë́ hiscan cjui me.
JOH 6:22 Hane xi camá nchujun jan ne, xutacjín xi caviyuju ngunda vëhë tsëhë laguna jan ne, catsinguitsjen me xi ngujña ne, ngu tu tu barcu tacun jan. Hacuaha vëë me xi Jesús ne, quijiin me cojo xuta ladu rë me barcu vëhë ta suvá ni xuta ladu rë Jesús quiji me.
JOH 6:23 Peru ngujo barcu xi canduva tsëhë nandya Tiberias ne, cafehe tiña hiscan xi cajinë xutacjín jan niñu hora xi cafë casua Nai naja nacuechji rë Nina.
JOH 6:24 Hane xi cavëë xutacjín jan xi hacuiin Jesús hacuiin xuta ladu rë me siu cuaha me jan ne, sehe cavisehen me barcu xi sehe cafehe jan, quiji me nandya Capernaum xi cuanguise me Jesús.
JOH 6:25 Hane xi casacu rë xuta xi cuacun jan Jesús ngunda vihi tsëhë laguna jan ne, cavinenguise me cuitjin: ―‍Maestro, ¿janihya canduvun nguehe ni? ―‍Cuatjin cavinenguise xuta xi cuacun jan.
JOH 6:26 Ngajan xi Jesús ne, cuitjin cafayangui me: ―‍Cuichjá cojo nuju cjuaquixi ta ngayujun ni ngayun ne, nduvuntjengun ná, peru hacuiin ngatsë rë xi cahyun cjuarcun xi casahme ta ngatsë rë xi cachinu niñu jan hisca xi catsë nuju.
JOH 6:27 Nihñu ngatsë rë xichine, peru hacuiin xichine xi vetsun ta xichine xi hacuiin vetsun hacuaha hisca sua cjuahñu xatsë. Vëhë xichine xi suá nuju ngahan xi Quihndi rë Xuta Jain ngahan, ngahan xi sahme cjuarcun cojo sa xi cumatsejen xi cjuaquixi jain xi Nina Nahmi naha catsingatju ná me. ―‍Cuatjin cafayangui Jesús.
JOH 6:28 Ngajan xi xuta xi cuacun jan ne, cuitjin cavinenguise me cojo Jesús: ―‍¿Hacutjin ndatjin nihñi, cojo sa xi nihñi hacutjin xi chuya rë Nina? ―‍Cuatjin cavinenguise xuta jan.
JOH 6:29 Hane Jesús ne, cuitjin cafayangui me: ―‍Cuitjin meje rë Nina xi nihñu: catamangu tacún cojo ná, ngahan xi catsingatju ná me. ―‍Cuatjin cafayangui Jesús.
JOH 6:30 Ngajan xi xuta jan ne, cuitjin cavinenguise me Jesús: ―‍¿Mé cjuarcun nihñu xi sacú chutsijín, cojo sa xi cumangu tacuín cojo nuju? ¿Mé xi nihñu?
JOH 6:31 Yëjë ni xutachanga naja ne, cajinë me niñu xi camá cojo scuan maná ngajan ngu xín camahani tsëhë nandya, sacuatjin camahindu xcun xujun rë Nina xi chja cuitjin: “Nina ne, tsëhë ngahnga catsingatju me niñu xi cajinë xuta.” Cuatjin camahindu. ―‍Vëhë cjua xi cavinenguise xuta xi cuacun jan Jesús.
JOH 6:32 Ngajan xi Jesús ne, cuitjin cachja me cojo xuta jan: ―‍Cuichjá cojo nuju cjuaquixi ta hacuiin Moisés xi casua me niñu xi nduva tsëhë ngahnga ta Nahmi naha xi sua nuju me niñu jain xi nduva tsëhë ngahnga.
JOH 6:33 Niñu xi sua Nina ne, vëhë niñu xi nduvajne tsëhë ngahnga hacuaha sua rë xuta cjuahñu. ―‍Cuatjin cachja Jesús.
JOH 6:34 Hane xuta xi cuacun jan ne, cuitjin cafehya me cojo Jesús: ―‍Tatá, tuhun niji niñu vëhë nchunchujun ni. ―‍Cuatjin cafehya xuta jan.
JOH 6:35 Ngajan xi Jesús ne, cuitjin cachja me: ―‍Ngahan xi sacuaha niñu jan xi sua cjuahñu ngahan. Xuta xi cuisehen me ladu naha xi mangucacun me cojo ná ne, ña tsë rë xahasen rë me cjuandaja, sacuaha xi ha quihndë cumavajin rë me cumaxindaain rë me ngundiya nga.
JOH 6:36 Ngahan ne, ha cachjá cojo nuju ta ha tichutsujun xcusun xi sahme peru manguaain tacún cojo ná.
JOH 6:37 Yëjë ni xuta xi Nahmi naha casua ná me ne, cuinduvatjengui ná me. Hane me xi cuinduvatjengui ná ne, hatuxa tsitjungueen me ta,
JOH 6:38 tsëhë xi ngahan ne, xi canduvajne tsëhë ngahnga ne, hacuiin xi sahme sacuatjin xi meje ná ta sacuatjin xi meje rë me xi catsingatju ná.
JOH 6:39 Hane me xi catsingatju ná vë ne, meje rë me xi hisca ngu xuta tsëhë yëjë ni me xi casua ná me ne, tsichajan me ta tsicúya me cjuahñu nixtin xi chjaháchuva rë sa nima sa xuta cojo cjuatacun rë.
JOH 6:40 Hacuaha Nahmi naha ne, meje rë me xi yëjë ni xuta xi vijnercu me yo ngahan xi Quihndi rë Nina ngahan hacuaha cumangu cacun me cojo ná ne, sacú rë me cjuahñu xatsë. Hane ngahan tsicúya me cjuahñu nixtin xi tsichuva Nina sa nima sa xuta. ―‍Cuatjin cachja Jesús.
JOH 6:41 Vëhë xi xutaxa rë yungun xi cuacun jan ne, cavetsihin cavisiajmihma me tsëhë Jesús ta, tsëhë xi cachja Jesús ta: “Ngahan sacuaha niñu xi nduvajne tsëhë ngahnga ngahan.”
JOH 6:42 Cuitjin cavisiajmihma me: ―‍¿Hacuiin cha Jesús vihi, xi quihndi rë José? ¿Hacuiin ha hyan nahmi rë cha hacuaha ha hyan naa rë cha? ¿Hacutjin má xi quihndë ne, chja cha xi tsëhë ngahnga canduvajne cha ni? ―‍Cuatjin cavisiajmihma me.
JOH 6:43 Ngajan xi Jesús ne, cuitjin cachja me cojo xutaxa rë jan: ―‍Camá ni cuinújunhmú cojo xingun xingu xingu ngayun.
JOH 6:44 Xuta xi cuma cuisehen me ladu naha ne, suvá ni xuta xi cuisecoo Nahmi naha, me xi catsingatju ná. Me vëhë xi cuma cuisehen me, hane ngahan tsicúya me cjuahñu nixtin xi tsichuva Nina sa nima sa xuta.
JOH 6:45 Cuitjin camahindu xcun xujun rë Nina xi catsihindu profeta: “Suvá Nina scuxaha me cjuatacun rë yëjë ni xuta.” Cuatjin camahindu. Hane xuta xi vetaharcu cjua rë Nina hacuaha Nina vuxaha me cjuatacun rë ne, visehen me ladu naha.
JOH 6:46 ’Hacuiin xi ha tjin yo xi cavutsejen rë Nahmi naha ta suva ni ngahan xi tsëhë Nina canduva ne, ngahan xi cahvë Nahmi naha.
JOH 6:47 Cuichjá cojo nuju cjuaquixi ta yo xi mangucacun cojo ná ne, tjin rë cjuahñu xatsë.
JOH 6:48 Ngahan xi sacuaha niñu xi sua cjuahñu ngahan.
JOH 6:49 Yëjë ni xutachanga nuju ne, cajinë me niñu xi camá cojo scuan maná ngajan ngu xín camahani tsëhë nandya, peru cavechú nixtin xi cahme me.
JOH 6:50 Peru niñu xi nduvajne tsëhë ngahnga xi chjá ngahan tsëhë ne, sa xi yo sinë niñu vëhë ne, cueyaain.
JOH 6:51 Ngahan xi quicun ngahan ne, ngahan xi sacuaha niñu xi canduvajne tsëhë ngahnga jan ngahan. Sa xi ngu xuta sinë me niñu vëhë ne, handasa cueya me ne, peru hasen rë me ne, cjue xcun Nina. Niñu xi suá ngahan vë ne, hacui yojo naha xi suá cojo sa xi xuta ngasunhndë ne, sacú rë me cjuahñu xatsë. ―‍Cuatjin cachja Jesús cojo xutaxa rë.
JOH 6:52 Hya xi camá ne, xutaxa rë jan ne, cavetsihin cavisiajmicjan me tsëhë Jesús ngajñi rë me cojo xicjin me, cuitjin cachja me: ―‍¿Hacutjin cuma sua cha xi cuajyihi vë yojo rë cha xi xinëë ni? ―‍Cuatjin cachja xutaxa rë jan.
JOH 6:53 Hane Jesús ne, cuitjin cachja me cojo xuta xi cuacun jan: ―‍Cuichjá cojo nuju cjuaquixi ta sa xi ngayun xinuu yojo naha ngahan xi Quihndi rë Xuta Jain ngahan hacuaha siuun jni naha ne, tsajin nuju cjuahñu xi cjuaquixi.
JOH 6:54 Xuta xi jinë me yojo naha hacuaha hvi me jni naha ne, tjin rë me cjuahñu xatsë, hacuaha ngahan tsicúya me cjuahñu nixtin xi tsichuva Nina sa nima sa xuta.
JOH 6:55 Cuatjin cuma ta, tsëhë xi yojo naha ne, vëhë comida xi cjuaquixi, hane jni naha ne, vëhë nandá xi cjuaquixi.
JOH 6:56 Me xi jinë yojo naha hacuaha hvi me jni naha ne, visehen me yojo naja, hacuaha ngahan ne, visehen yojo rë.
JOH 6:57 Nahmi naha, me xi hatuxa tjin rë cjuahñu ne, catsingatju ná me, hane ngatsë rë me vëhë xi tejña cjuahñu ngahan. Ha chuva vëhë ni ne, xuta xi jinë ná ne, cuejña me cjuahñu ngatsë naha.
JOH 6:58 Cuatjin sahmi niñu xi canduvajne tsëhë ngahnga. Hacuiin tangun cojo niñu xi cajinë xutachanga nuju ta cavechú nixtin xi cahme me. Ha ndaja xuta xi sinë me niñu xi chjá ngahan ne, handasa cueya me ne, peru hasen rë me ne, cjue xcun Nina.
JOH 6:59 ―‍Cuatjin cachja Jesús hya xi cavicuya me xuta ngu yungun ngajan nandya Capernaum.
JOH 6:60 Hya xi camá ne, jemu cjín xuta ladu rë Jesús xi cuitjin cachja me hya xi cahndë me cjua jan: ―‍¡Jemu choho visiajmi me! ¡Scaain naja cojo cjua vëhë! ―‍Cuatjin cachja me.
JOH 6:61 Peru Jesús ne, ha vëë me cojo cjuatacun rë me xi cuatjin visiajmihma xuta ladu rë me xi cuacun jan. Vëhë xi cachja me cuitjin: ―‍Sa xi meje cuetjunxun tsëhë ndiya naha ngatsë rë cjua xi cachjá cojo nuju vë ne,
JOH 6:62 ¿mé ningatuhun tacún sa xi chutsujun xi cúya cjuë́neje nga ngahnga hiscan xi cavitejña titjun, ngahan xi Quihndi rë Xuta Jain ngahan?
JOH 6:63 Hasen rë Nina ne, vëhë xi sua cjuahñu. Peru ngu xuta ngasunhndë ne, hatuxa cumaji sahmi me cuatjin. Yëjë ni cjua xi ngahan cachjá cojo nuju ne, vëhë sua machaya nuju tsëhë Hasen rë Nina cojo tsëhë cjuahñu xi sua.
JOH 6:64 Peru tjin yahnga ngayun xi manguaain tacún cojo ná. ―‍Cuatjin cachja Jesús ta, tsëhë xi hisca ntsacu cavetsihin ne, ha vëë me yo xuta xi cumanguaain cacun cojo rë me hacuaha ha vëë me yo xi sahmi rë me entregadu.
JOH 6:65 Hacuaha cachja sa me cuitjin: ―‍Vëhë xi cuatjin cachjá cojo nuju xi xuta xi cuma cuisehen me ladu naha ne, suvá ni xuta xi cuichja Nahmi naha xi cuisehen. ―‍Cuatjin cachja Jesús.
JOH 6:66 Ngatsë rë vëhë xi jemu cjín xuta ladu rë Jesús ne, quiji ngaxtun me, hacuaha ha quihndë catsujyiin me cojo Jesús.
JOH 6:67 Ngajan xi Jesús ne, cavinenguise me xuta ladu rë me xi tejó jan cuitjin: ―‍¿Hacuiin cojo ngayun meje cuangunxun? ―‍Cuatjin cavinenguise me.
JOH 6:68 Hane Simón Pedru ne, cuitjin cafayangui me: ―‍Ngayun nai naha, ¿yo cuanguintjenguin?, ta ngayun ne, tjin nuju cjua xi sua machaya niji tsëhë cjuahñu xatsë.
JOH 6:69 Hacuaha ngayin ne, mangutacuín cojo nuju hacuaha hyin xi tsëhë jain Nina ngayun. ―‍Cuatjin cafayangui Simón Pedru.
JOH 6:70 Ngajan xi Jesús ne, cuitjin cachja me: ―‍Handasa ngahan suva cavaxejen nuju ngayujun ni xi tejó ngayun, peru ngajñi nuju ne, jiyajñi ngu xi ha jiya xitsehen xahasen rë. ―‍Cuatjin cachja Jesús.
JOH 6:71 Jesús ne, tichja me tsëhë ngu cha tsëhë ngajñi rë xi tejó xuta ladu rë me, ngu cha xi hmí rë Judas, quihndi rë Simón Iscariote. Cuatjin cachja me ta, tsëhë xi cha vëhë sahmi cha me entregadu cojo condra rë me.
JOH 7:1 Xi cavatju vëhë ne, catsujyihiya Jesús ngujo nandya tsëhë distritu Galilea. Mijí tsujyihiya me nandya xi siu ladu tsëhë distritu Judea ta, tsëhë xi xutaxa rë yungun ne, tivanguise me Jesús xi tsiquehen me.
JOH 7:2 Quihndë ne, ha camatiña suhi tsëhë Ndihya Tsjian, suhi xi sahmi xuta tjë rë Israel.
JOH 7:3 Ngajan xi me xi xicjin Jesús jan ne, cuitjin cachja me cojo Jesús: ―‍Tihin ngajan distritu Judea, cojo sa xi hacuaha cojo xuta ladu riji xi siu jan ne, scuëë me xcusun xi nihñi ta
JOH 7:4 tsëhë xi ngu cha xi meje rë xi cumachaya rë xuta xcusun xi sahmi cha ne, hacuiin táha hma sahmi cha. Ngaye ta cuatjin jemu nihñi cjuandaja ne, ningacuin rë yëjë xuta cjuandaja vëhë. ―‍Cuatjin cachja xicjin Jesús cojo rë me ta,
JOH 7:5 tsëhë xi me xi cuacun vë ne, camanguaain cacun me cojo Jesús.
JOH 7:6 Ngajan xi Jesús ne, cuitjin cafayangui me: ―‍Cjëë cuechú nixtin xi sahme mé xi sahme. Peru ngayun ne, tu mé ni nixtin ne, ndatjin xi cuma nuju.
JOH 7:7 Ngayun ne, cumaji choho scuëë nuju xuta, peru ngahan ne, choho vëë ná me ta, tsëhë xi ngahan ne, chjá cjuaquixi xi xcusun xi sahmi me ne, hatuxa tsehen.
JOH 7:8 Tángun ni ngayun ta ngahan ne, cjueen suhi vëhë. Cjueen ta cjëë cuetjucaa nixtin xi sahme mé xi sahme. ―‍Cuatjin cafayangui Jesús.
JOH 7:9 Xi cavatju cachja me cojo xicjin me cjua vëhë ne, cavéjña ni me nangui rë me.
JOH 7:10 Hane xi cavatju quiji xicjin Jesús suhi jan ne, hacuaha cojo Jesús quiji me. Peru hacuiin táha tsejen ta sacuaha xi táha hma quiji me.
JOH 7:11 Hya xi camá ne, xutaxa rë yungun jan ne, cavanguise me Jesús hiscan jima suhi jan. Cuitjin cavinenguise me: ―‍¿Jani tacun cha vëhë? ―‍Cuatjin cavinenguise me.
JOH 7:12 Hane xutacjín jan ne, jercu visiajmihma me ngajñi rë me tsëhë Jesús. Ngujo me ne, cuitjin cachja me: ―‍Ngu xuta ndaja me. ―‍Cuatjin cachja me. Peru ngujo nga xuta ne, cuitjin cachja me: ―‍¡Jéya, vindacha cha xutacjín! ―‍Cuatjin cachja me.
JOH 7:13 Peru tsajin hisca ngu xuta xi cachjatë me tsëhë Jesús ta, tsëhë xi tsacjun me xutaxa rë yungun.
JOH 7:14 Quihndë ne, hya xi camavasen tijima suhi jan ne, quiji Jesús yungun xi matitjun, sehe cavetsihin cavicuya me xuta cjua rë Nina.
JOH 7:15 Hane xutaxa rë yungun jan ne, quijircun rë me xi cuatjin jemu ndaja chja Jesús. Cuitjin cachja me ngajñi rë me cojo xicjin me: ―‍¿Hacutjin má xi cuarcu vechú cjuatacun rë cha vë xi hisca hacuiin cavutaya cha? ―‍Cuatjin cachja me.
JOH 7:16 Ngajan xi Jesús ne, cuitjin cachja me cojo xutaxa rë xi cuacun jan: ―‍Cjua xi vicuyá rë xuta ne, hacuiin cjua naha suva ta cjua rë me xi catsingatju ná.
JOH 7:17 Sa xi ngu xuta meje sahmi me sacuatjin xi meje rë me xi catsingatju ná ne, ngajan sacú cumachaya rë me tsëhë cjua xi vicuyá, ¿há xi tsëhë Nina ne? o ¿há xi nduva tsëhë cjuatacun naha suva?
JOH 7:18 Xuta xi chja me cjua xi nduva tsëhë cjuatacun rë suvá me ne, meje sahmi jyë sahmi hnga suvá me yojo rë me. Peru xuta xi meje sahmi jyë sahmi hnga me me xi catsingatju rë me ne, me vëhë ne, quixi me cojo cjua rë me hacuaha tsajin cjuatsehen cahntsua xahasen rë me.
JOH 7:19 ’Moisés ne, casua nuju me ley rë Nina, peru hisca ngu ngayun nihñuchuun sacuatjin chja ley vëhë. ¡Tsëhë vëhë rë xi meje nicuhun ná! ―‍Cuatjin cachja Jesús.
JOH 7:20 Ngajan xi xutacjín jan ne, cuitjin cafayangui me: ―‍¿Yo xitsehen xi cachja cojo nuju? ta nguehe ne, tsajin yo xi meje tsiquehen nuju. ―‍Cuatjin cafayangui xutacjín jan.
JOH 7:21 Hane xi cafayangui Jesús ne, cuitjin cachja me: ―‍Ngayujun ni ngayun ne, quijircun nuju ngatsë rë ngu xcusun xi casahme nixtin xi chjahájenda rë.
JOH 7:22 Peru suvá Moisés hacuaha cavejña me xcusun xi xtí chuxin rë quihndi xihin. (Xi cjuaquixi ne, hacuiin Moisés ta xutachanga nuju xi cavejña me xcusun vëhë.) Hane vëhë xi ngayun ne, vichun chuxin rë quihndi xihin handasa nixtin xi chjahájenda rë.
JOH 7:23 Sa xi vichun chuxin rë quihndi xihin nixtin xi chjahájenda rë cojo sa xi nihñuchuhun sacuatjin cjua xi chja ley rë Moisés ne, ¿mé má cuatjin ma cjan nuju cojo ná xi casahme xi camandaja camahani ngu xuta nixtin xi chjahájenda rë ni?
JOH 7:24 Ha quihndë hacuiin tujyë nichuvun ná ta nichuvun ná cojo ngu cjuatacun xi cjuaquixi. ―‍Cuatjin cachja Jesús.
JOH 7:25 Ngajan xi ngujo xuta nandya Jerusalén ne, cuitjin cachja me ngajñi rë me: ―‍¿Hacuiin me vihi xi vinchise rë xi cueya ni?
JOH 7:26 Peru chutsujun ta cuajyihi me secun me tichja tichja me cojo xuta, hane ndastu ngu cjua chja xutaxa rë cojo rë me. ¡Hyaan sa xi vëëndaja xutaxa rë xi me vihi xi catsingatju jain Nina me!
JOH 7:27 Me vihi ne, ha hyan jani canduva me, peru hya xi cuinduva me xi Nina tsingatju rë ne, tsajin yo vëë jani cuetju me cuinduva me. ―‍Cuatjin cachja xuta xi cuacun jan.
JOH 7:28 Ngajan xi Jesús ne, xi quijinduju sa cavicuya me xuta ngajan yungun xi matitjun ne, jercu hñu cachja me cuitjin: ―‍¿Há quixi xi hyun ná hacuaha hyun jani canduva? Peru ngahan ne, hacuiin cjuatacun naha suva xi canduva. Me xi catsingatju ná ne, hatuxa quixi me cojo cjua rë me, peru ngayun ne, hyúun me.
JOH 7:29 Ngahan ne, hvë me ta, tsëhë xi hiscan tacun me ne, ngajan canduvá. Hacuaha me vëhë catsingatju ná me. ―‍Cuatjin cachja Jesús.
JOH 7:30 Tsëhë xi cuatjin cachja Jesús cjua vëhë ne, vëhë xi meje cjuaha xuta xi cuacun jan me. Peru tsajin yo xi cavetahatsja rë me ta, tsëhë xi cjëë cuetjucaa nixtin xi cuatjin cuma.
JOH 7:31 Hane jemu cjín xuta ngajñi rë xutacjín jan ne, camangu cacun me cojo Jesús. Cuitjin cachja me: ―‍Hya xi cuinduva me xi Nina tsingatju rë ne, ¿há hitsë sa cjín cjuarcun sahmi me xi cuma rë cjuarcun xi casahmi me vihi? ―‍Cuatjin cachja xuta xi cuacun jan.
JOH 7:32 Hane ngujo cha fariseo ne, cahndë cha xi visiajmihma xutacjín jan ngajñi rë me cojo xicjin me cjua vëhë. Ngajan xi yëjë ni nahmi xi matitjun cojo cha fariseo jan ne, catsingatju me mayu cojo nisë rë cha xi chjahá rë Jesús.
JOH 7:33 Hane Jesús ne, cuitjin cachja me: ―‍Ngujo nixtin sa xi cuitejña cojo nuju, sehe cúya cjuë́ nga hiscan tacun me xi catsingatju ná.
JOH 7:34 Ngayun ne, cuinchunsun ná, peru sacuiin nuju ngahan ta, tsëhë xi hiscan xi cuitejña ne, cumaji cuangun. ―‍Cuatjin cachja Jesús.
JOH 7:35 Ngajan xi xutaxa rë jan ne, cavinenguise xicjin me cuitjin: ―‍¿Jani cjue cha xi cuijyihi vi xi sacuiin naja cha? ¿Há cjue cha ngu nangui cjin, cjue tjengui cha xuta naja xi cavitsojo ngajñi rë xutaxín hane ngajan cuicuya cha xutaxín jan ni?
JOH 7:36 ¿Mé vijne cjua xi chja cha xi cuinchaseen cha ne, sacuiin naja cha, tsëhë xi hiscan cuejña cha ne, cumaji cuanguen? ―‍Cuatjin cavinenguise xicjin xutaxa rë jan.
JOH 7:37 Quihndë ne, nixtin xi cajnetaha suhi jan ne, vëhë nixtin jyë tsëhë suhi jan. Hane casecun Jesús cachjahñu me cojo xuta cuitjin: ―‍Sa xi tjin yo xi xinda rë ne, catinduva tjengui ná catihi.
JOH 7:38 Xuta xi mangucacun me cojo ná ne, cuatju me sacuatjin chja xujun rë Nina xi chja cuitjin: “Cuetju tsëhë xahasen rë me sacuaha nandá xi ña vangatë xi sua rë me cjuahñu xatsë.” ―‍Cuatjin cachjahñu Jesús.
JOH 7:39 Xi cuatjin cachja Jesús ne, cachja me tsëhë Hasen rë Nina xi sehe sacú rë xuta xi mangucacun me cojo Jesús. Cuatjin cachja Jesús ta, tsëhë xi Nina ne, cjëë sua me Hasen rë me, tsëhë xi Jesús ne, cjëë cuma jyë cuma hnga me cojo Hasen rë me.
JOH 7:40 Hane xi cahndë xutacjín jan cjua vëhë ne, ngujo me ne, cuitjin cachja me: ―‍Me vëhë ne, cjuaquixi xi me vëhë profeta xi jemu nechanyan rë. ―‍Cuatjin cachja ngujo me.
JOH 7:41 Hane ngujo nga me ne, cuitjin cachja me: ―‍Me vëhë xi Tsingatju Nina. ―‍Cuatjin cachja me. Peru ngujo nga me ne, cachja me cuitjin: ―‍¡Peru Me xi Tsingatju Nina ne, hacuiin ngajñi rë xuta Galilea cuetjujñi me!
JOH 7:42 ¡Ha hyan xi xujun rë Nina ne, chja ta Me xi Tsingatju Nina ne, cuinduva me tsëhë tjë rë xutachanga naja David, ngajan Belén hiscan nangui rë David! ―‍Cuatjin cachja me xi cuacun jan.
JOH 7:43 Cuatjin camá xi ngatsë rë Jesús ne, hacuiin ngu ni cjuatacun catsingataha cacun xutacjín jan.
JOH 7:44 Vëhë xi ngujo xuta jan ne, meje cjuaha me Jesús cjuecojo me ndavaya. Peru tsajin yo xi cavetahatsja rë me.
JOH 7:45 Hya xi camá ne, mayu cojo nisë rë cha ne, cavuya quiji nga cha xcun nahmi xi matitjun cojo xcun cha fariseo xi cuacun jan, hane xutaxa rë xi cuacun jan ne, cuitjin cachja me cojo mayu jan: ―‍¿Mé má canduvuun cojo cha? ―‍Cuatjin cachja me.
JOH 7:46 Ngajan xi cha mayu cojo nisë rë cha jan ne, cuitjin cafayangui cha: ―‍¡Cjëë camahani cuinuhyin xi chja ngu xuta sacuatjin chja me vëhë! ―‍Cuatjin cafayangui cha.
JOH 7:47 Hane cha fariseo jan ne, cuitjin cachja cha cojo cha xi cuacun jan: ―‍¡Tu ma rë sa xi cojo ngayun camandacha ngayun!
JOH 7:48 ¡Ngayun ne, hyun ta hisca ngu xutaxa rë, hisca xi ngu xuta fariseo ne, cjëë cumangu cacun me cojo cha xi cuajyihi vë!
JOH 7:49 Peru xutacjín xi cuacun hisca hvíin hacutjin chja ley rë Moisés ne, ¡mijí rë Nina me! ―‍Cuatjin cachja cha fariseo jan.
JOH 7:50 Ngajan xi ngu cha fariseo xi hmí rë Nicodemo, cha xi quiji tjengui rë Jesús hatsëë ne, cuitjin cachja cha cojo cha xi cuacun vëhë:
JOH 7:51 ―‍Chja ley naja ta cumaji nihña castigu ngu xuta xi cjëë cuinuhyan mé cuichja me hacuaha sacú naja cjuaquixi mé casahmi me. ―‍Cuatjin cachja cha Nicodemo.
JOH 7:52 Ngajan xi cha fariseo xi cuacun jan ne, cuitjin cafayangui cha: ―‍¿Hacuaha cojo ngayun má ngayun xuta rë distritu rë Galilea ni? Chutayun xujun rë Nina ne, sehe ngajan sacú cumachaya nuju ta ngajan Galilea ne, cuetjinjñii hisca ngu profeta. ―‍Cuatjin cafayangui cha fariseo xi cuacun jan.
JOH 7:53 Hya xi camá ne, jima ngu xuta jan cafe me ndava me.
JOH 8:1 Peru Jesús ne, cavetju me quiji me ndetjún Olivu.
JOH 8:2 Hane xi casahasen camá nchujun jan ne, cavuya quiji nga Jesús ndatsen yungun xi matitjun. Hane yëjë xuta jan ne, casahmitiña me tsëhë Jesús. Hane xi quiji cavéjña Jesús ne, sehe cavetsihin cavicuya me xuta jan.
JOH 8:3 Ngajan xi ngujo cha vicuya cjuachacun cojo ngujo cha fariseo ne, cafehecojo cha ngu chjuun xi cachjahá rë na xcun cjuatsehen xi tisahmi na cojo ngu xihin xi hacuiin xihin rë na. Hane cha xi cuacun jan ne, quiji cavisecun cha na ngajñi rë xuta hiscan tacun Jesús,
JOH 8:4 sehe cachja cha cojo Jesús cuitjin: ―‍Maestro, chjuun vihi ne, cachjahá rë na xcun cjuatsehen xi tisahmi na cojo ngu xihin xi hacuiin xihin rë na.
JOH 8:5 Quihndë ne, xcun ley xi cavejña naja Moisés ne, cavitexa me xi tu yo ni xuta xi sahmi xcusun vëhë ne, cueya me cojo ndyojo. Ngayun ne, ¿mé xi cuinújun?
JOH 8:6 ―‍Cuatjin cavinenguise cha xi cuacun vëhë, xi tifahachuva cha Jesús, cojo sa xi sacú rë cha chuva rë xi cuinchajyë cha me. Ngajan xi Jesús ne, catsiquindi me yojo rë me, sehe cavetsihin catsihindu me nangui cojo rcutsja me.
JOH 8:7 Hane tsëhë xi cjuinduju sa tivinenguise cha xi cuacun jan Jesús ne, catsinguixi me yojo rë me, sehe cachja me cojo cha cuitjin: ―‍Tu jarë ni ngayun xi tsajin jyë́ nuju ne, ngayun tjun tjun tetuhun rë na ndyojo. ―‍Cuatjin cachja Jesús.
JOH 8:8 Hane sehe catsiquindi nga me yojo rë me, hane catsihindu sa me nangui.
JOH 8:9 Hane xi cahndë cha xi cuacun jan xi cuatjin cachja Jesús ne, ta vëë me xi hacuiin tyjahi cjuatacun rë me, chuva ngu chuva ngu cha cavetju cha cafe cha. Cavetsihin cavetju tjun tjun cha xi hitsë sa changá. Hane camá suvá sa Jesús, cojo chjuun xi secun ngajñi rë xutacjín jan.
JOH 8:10 Hane xi catsinguixi me yojo rë me ne, cavinenguise me chjuun jan cuitjin: ―‍Ngayun chjuun, ¿jarë me ne? ¿Há tsajin yo xi casahmi nuju castigu? ―‍Cuatjin cavinenguise Jesús.
JOH 8:11 Ngajan xi chjuun jan ne, cuitjin cafayangui na: ―‍Tsajin yo, tatá. ―‍Cuatjin cafayangui na. Ngajan xi Jesús ne, cuitjin cachja me: ―‍Ngahan ne, hacuaha sahmee nuju castigu. Cuma cuangun, peru ha quihndë xicanihñuu sa cjuatsehen. ―‍Cuatjin cachja Jesús.
JOH 8:12 Hya xi camá ne, cachja nga Jesús cojo xutacjín jan cuitjin: ―‍Ngahan ne, sacuaha hasen xi cuma rë xuta ngasunhndë ngahan. Xuta xi cuisehen me ladu naha ne, hatuxa cuiyijin me ngajñi jñú ta ngajñi hasen xi sua cjuahñu xatsë cuiyuju me. ―‍Cuatjin cachja Jesús.
JOH 8:13 Ngajan xi cha fariseo xi cuacun jan ne, cuitjin cachja cha cojo Jesús: ―‍Ngayun ne, tinújun favor nuju suvun. Vëhë xi cjua xi nújun ne, tsajin rë cjuaquixi. ―‍Cuatjin cachja cha.
JOH 8:14 Hane xi cafayangui Jesús ne, cuitjin cachja me: ―‍Handasa chjá favor naha suva ne, cjua xi chjá ne, cjuaquixi ta, tsëhë xi ngahan ne, hvë jani canduva hacuaha hvë jani cúya cjuë́ nga. Peru ngayun ne, hyúun jani canduva hacuaha hyúun jani cúya cjuë́ nga.
JOH 8:15 Ngayun ne, xi nichuvun xuta cojo cjuatacun rë me ne, chuva xi tsingatahacacun xuta ngasunhndë ne, cuatjin ningatuhuntacún. Ngahan ne, titsichuvaan hisca ngu xuta cojo cjuatacun rë me.
JOH 8:16 Peru sa xi tsichúva ngu xuta ne, hatuxa cjuaquixi cjua xi cuichjá ta, tsëhë xi hacuiin suva sahme ta ngahan cojo me xi catsingatju ná nihñi tangun.
JOH 8:17 Xcun ley xi vitexa nuju ne, hacuaha camahindu xi hya xi jo xuta sua me cjuaquixi rë me xcun xutaxa rë hane ngu tangun ni cjua chja me ne, cjuaquixi cjua xi chja me.
JOH 8:18 Ngahan xi chjá favor naha suva, hane Nahmi naha xi catsingatju ná me ne, hacuaha cojo me chja me favor naha. ―‍Cuatjin cafayangui Jesús.
JOH 8:19 Ngajan xi cha fariseo jan ne, cuitjin cavinenguise cha Jesús: ―‍¿Jani tacun nahmi nuju ni? ―‍Cuatjin cavinenguise cha. Hane Jesús ne, cuitjin cafayangui me: ―‍Hacuiin ngahan hyun ná ne, hacuiin Nahmi naha hyun me. Sa xi ngahan hyun ná ne, hacuaha hyun Nahmi naha. ―‍Cuatjin cafayangui Jesús.
JOH 8:20 Cjua vëhë ne, cachja Jesús hya xi tivicuya me xuta ngajan yungun xi matitjun, ngu ndihya hiscan xi siu alcancía. Peru hisca ngu xuta cafaain rë me, tsëhë xi cjëë cuetjucaa nixtin xi cuatjin cuma.
JOH 8:21 Hya xi camá ne, quijinduju sa cachja Jesús cojo xuta cuitjin: ―‍Ngahan ne, cuétju cjuë́, hane ngayun ne, cuinchunsun ná. Peru ngatsë rë cjuatsehen xi cún ngayun ne, cuechuun xcun Nina hya xi cueyun. Hiscan xi cjuë́ ne, ngayun ne, cumaji cuangun. ―‍Cuatjin cachja Jesús.
JOH 8:22 Ngajan xi xutaxa rë xi cuacun jan ne, cuitjin cachja me ngajñi rë me cojo xicjin me: ―‍Tu ma rë sa xi cjue tsiquehen suvá me yojo rë me xi cuatjin chja me xi hiscan cjue me ne, cumaji cuanguen. ―‍Cuatjin cachja xutaxa rë xi cuacun jan.
JOH 8:23 Ngajan xi Jesús ne, cuitjin cachja me cojo me xi cuacun vë: ―‍Ngayun ne, tsëhë nguehe nangui ngayun. Ngahan ne, tsëhë ngahnga ngahan. Ngayun ne, tsëhë ngasunhndë vihi ngayun. Ngahan ne, hacuiin tsëhë ngasunhndë vihi ngahan.
JOH 8:24 Vëhë xi cuatjin cachjá cojo nuju xi ngatsë rë cjuatsehen xi cún ngayun ne, cuechuun xcun Nina hya xi cueyun. Sa xi macjaain nuju xi Ngahan Vi, hmí ná ne, ngatsë rë cjuatsehen xi cún ngayun ne, cuechuun xcun Nina hya xi cueyun. ―‍Cuatjin cachja Jesús.
JOH 8:25 Ngajan xi xuta xi cuacun jan ne, cavinenguise me Jesús cuitjin: ―‍¿Yo ngayun ni? ―‍Cuatjin cavinenguise me. Hane Jesús ne, cuitjin cachja me: ―‍¡Sacuatjin cachjá cojo nuju hisca ntsacu cavetsihin!
JOH 8:26 Jemu tjin ná cjua xi cuichjá tsujun, hacuaha jemu tjin xi cjuaháchuva tsujun. Peru me xi catsingatju ná ne, quixi jain me cojo cjua rë me, hane ngahan ne, cjua xi cáhndë xi cachja me ne, cjua vëhë xi chjá nguehe ngasunhndë. ―‍Cuatjin cachja Jesús.
JOH 8:27 Peru xutaxa rë xi cuacun jan ne, cajnii rcu me xi Jesús ne, tsëhë Nina Nahmi naja xi tichja me.
JOH 8:28 Vëhë xi Jesús ne, cuitjin cachja me: ―‍Hya xi ngayun chjunihngun ná ngahan xi Quihndi rë Xuta Jain ngahan ne, hya cuijne rcun xi Ngahan Vi hmí ná. Hane ngahan ne, hatuxa tsajin mé xi sahme xi cojo cjuatacun naha suva ta sacuaha cjua xi cachja Nahmi naha cojo ná ne, cjua vëhë xi chjá.
JOH 8:29 Hacuaha me xi catsingatju ná ne, tacun me cojo ná, cavejñaai ná me xi suva ta, tsëhë xi ngahan ne, hatuxa sahme tutjin xi chuya rë me. ―‍Cuatjin cachja Jesús.
JOH 8:30 Hane xi cachja Jesús cjua vëhë ne, jemu cjín xuta camangu cacun me cojo rë me.
JOH 8:31 Ngajan xi Jesús ne, cachja me cuitjin cojo xutaxa rë yungun xi camacjain rë tsëhë cjua rë me: ―‍Sa xi ngayun cuangun nduju xi quitahá rcun cjua naha ne, quixi xi ha camá ngayun xuta ladu naha.
JOH 8:32 Hacuaha cuijne rcun xi hmí rë cjuaquixi, hane cjuaquixi jan ne, cuëhëndaya nuju. ―‍Cuatjin cachja Jesús.
JOH 8:33 Ngajan xi xutaxa rë xi cuacun jan ne, cuitjin cafayangui me: ―‍Peru ngayaan ne, tjë rë xutachanga naja Abraham má ngayaan, hane cjëë camahani cuma ngayaan mosu hndixahan rë xuta. ¿Mé má nújun xi cumandaya ngayin? ―‍Cuatjin cafayangui me.
JOH 8:34 Hane Jesús ne, cuitjin cafayangui me: ―‍Cuichjá cojo nuju cjuaquixi ta yëjë ni xuta xi hincha me ndiya rë cjuatsehen ne, hatuxa tjinhñu me cojo cjuatsehen sacuatjin tjinhñu ngu mosu hndixahan cojo nai rë.
JOH 8:35 Ngu mosu hndixahan ne, hacuiin hatuxa cuiyujucahndë ngajñi xuta xi ndava, peru ngu quihndi xi cjuaquixi ne, hatuxa tsëhë xuta xi ndava.
JOH 8:36 Vëhë xi sa xi Quihndi rë Nina cuëhëndaya nuju ne, cumandaya jain ngayun cojo cjuaquixi.
JOH 8:37 Ngahan ne, hacuaha hvë xi tjë rë Abraham má ngayun. Peru ngayun ne, tivinchun chuva rë xi nicuhun ná, tsëhë xi tuun cahndë́ xi cuisehen cjua naha cahntsua xahasen nuju.
JOH 8:38 Ngahan ne, xcusun xi cahvë hiscan tacun Nahmi naha ne, tsëhë vëhë xi tichjá. Peru ngayun ne, sacuatjin canuhyun xi cachja nahmi nuju ne, cuatjin tinihñu. ―‍Cuatjin cafayangui Jesús.
JOH 8:39 Ngajan xi xutaxa rë xi cuacun jan ne, cuitjin cachja me: ―‍Nahmi niji ne, hacui xutachanga naja Abraham. ―‍Cuatjin cachja me. Ngajan xi Jesús ne, cuitjin cachja me: ―‍Sa xi quixi xi quihndi rë Abraham má ngayun ne, sacuatjin casahmi Abraham ne, hacuaha cuatjin nihñu.
JOH 8:40 Ngahan ne, cachjá cojo nuju cjuaquixi xi cáhndë xi cachja Nina, peru quihndë ne, tivinchun chuva rë xi nicuhun ná. Xutachanga naja Abraham ne, casahmii me cuatjin.
JOH 8:41 Ngayun ne, sacuatjin casahmi nahmi nuju ne, hacuanitjin ni tinihñu. ―‍Cuatjin cachja Jesús. Ngajan xi xutaxa rë xi cuacun jan ne, cachja me cuitjin: ―‍Ngayin ne, hacuiin quihndi xca ngayin. Nina ne, ngu ni me vëhë xi Nahmi niji. ―‍Cuatjin cachja xutaxa rë xi cuacun jan.
JOH 8:42 Hane Jesús ne, cuitjin cachja me: ―‍Sa xi quixi xi Nahmi nuju Nina ne, hacuaha canihñu hmu tacún ná ta, tsëhë xi ngahan ne, Nina catsingatju ná me, hane quihndë ne, nguehe tejña. Ngahan ne, hacuiin cjuatacun naha suva xi canduvá ta me vëhë catsingatju ná me.
JOH 8:43 ¿Mé má vijnii rcun cjua xi chjá? Cuatjin vijnii rcun ta, tsëhë xi caain nuju visiñuju cjua naha.
JOH 8:44 Ngayun ne, quihndi rë nahmi nuju Satanás ngayun, hane xcusun xi meje rë nahmi nuju ne, xcusun vëhë xi meje nihñu. Xitsehen xi matitjun vë ne, hisca ntsacu cavetsihin ne, hatuxa tsiquehen vë xuta. Hatuxa tsajin jiya vë ngajñi rë cjuaquixi ta, tsëhë xi tsajin cjuaquixi ngajñi rë cjuatacun rë. Hya xi chja xitsehen vë cjuandacha ne, chja sacuatjin xcusun rë suvá ta, tsëhë xi hatuxa ndacha, hacuaha nahmi rë yëjë ni cjuandacha.
JOH 8:45 Peru ngahan ne, tsëhë xi chjá cjuaquixi ne, vëhë xi macjaain nuju ngahan.
JOH 8:46 ¿Jarë ngayun xi cuma ninguixun xi ngahan ne, tjin jyë́ naha? Sa xi chjá xi cjuaquixi ne, ¿mé má macjaain nuju ngahan?
JOH 8:47 Me xi tsëhë jain Nina ne, vetaharcu me cjua rë Nina. Ngayun ne, tsëhë xi hacuiin tsëhë Nina ngayun ne, vëhë xi mijí cuetuhunrcun cjua rë me. ―‍Cuatjin cachja Jesús.
JOH 8:48 Hane xutaxa rë xi cuacun jan ne, cuitjin cachja me cojo Jesús: ―‍¡Hatuxa cjuaquixi xi nújin hya xi nújin xi ngayun ne, ngu xuta samaritano ngayun hacuaha jiya xitsehen xahasen nuju! ―‍Cuatjin cachja xutaxa rë jan.
JOH 8:49 Ngajan xi Jesús ne, cuitjin cafayangui me: ―‍Tsajin xitsehen xahasen naha. Ngahan ne, fahárcun Nahmi naha, hane ngayun ne, choho nújun tsahan.
JOH 8:50 Hacuaha mijí sahme jyë sahme hnga suva yojo naha. Tjin ngu me xi meje sahmi jyë sahmi hnga ná, hane me vëhë ne, tsichuva naja me cojo cjuatacun naja.
JOH 8:51 Cuichjá cojo nuju cjuaquixi ta xuta xi cuihndë me tsëhë cjua naha ne, hatuxa tsajin nu tsajin nixtin xi cueya me. ―‍Cuatjin cafayangui Jesús.
JOH 8:52 Hane xutaxa rë xi cuacun jan ne, cuitjin cachja me cojo Jesús: ―‍Quihndë matsejenndaja xi jiya jain xitsehen xahasen nuju. Xutachanga naja Abraham ne, cahme me, hacuaha yëjë profeta ne, cahme me, hane sehe ngayun nújun xi xuta xi cuihndë me tsëhë cjua nuju ne, hatuxa tsajin nu tsajin nixtin xi cueya me.
JOH 8:53 ¡Ja!, peru ¿há hitsë sa matitjun ngayun xi cuma rë xutachanga naja Abraham, me xi cahme ni? ¡Hacuaha cahme yëjë profeta! ¡Ngayun tinihñu yojo nuju sacuaha xi jemu matitjun ngayun! ―‍Cuatjin cachja xutaxa rë jan.
JOH 8:54 Hane Jesús ne, cuitjin cafayangui me: ―‍Sa xi sahme jyë sahme hnga suva yojo naha ne, cjua xi cuichjá tsahan ne, cuenguiin camahani chji rë. Peru Nahmi naha, me xi nújun xi Nina nuju ne, me vëhë xi sahmi jyë sahmi hnga ná me.
JOH 8:55 Ngayun ne, hyúun me, peru ngahan ne, hvë me. Sa xi ngahan cuichjá xi hveen me ne, tangun ndacha ngahan cojo nuju ngayun. Peru ngahan ne, hvë me, hacuaha víhndë tsëhë cjua rë me.
JOH 8:56 Xutachanga naja Abraham ne, jemu ndaja camá rë me xi satë rë me xi scuëë me nixtin xi cuinduva ngahan. Hane cavëë jain me, hacuaha jemu sua camá rë me. ―‍Cuatjin cafayangui Jesús.
JOH 8:57 Ngajan xi xutaxa rë xi cuacun jan ne, cuitjin catsixcuehyu me Jesús: ―‍Hisca cjëë yachantë nu tjin nuju. ¿Há cahyun xutachanga naja Abraham ni? ―‍Cuatjin cachja me.
JOH 8:58 Hane Jesús ne, cuitjin cachja me: ―‍Cuichjá cojo nuju cjuaquixi ta hisca chaja sa xi tsin xutachanga naja Abraham ne, ngahan ne, Ngahan Vi hmí ná. ―‍Cuatjin cachja Jesús.
JOH 8:59 Vëhë xi xutaxa rë yungun xi cuacun jan ne, cafaha me ndyojo xi cuetaha me Jesús xi meje tsiquehen me. Peru Jesús ne, cavetjuhmá me tsëhë yungun xi matitjun jan.
JOH 9:1 Hya xi camá ne, xi cavatju Jesús ngu cahndë́ jan ne, cavëë me ngu cha rcá xi ha cuatjin rcá cha hisca hya xi catsin cha.
JOH 9:2 Hane xuta ladu rë me jan ne, cuitjin cavinenguise me: ―‍Maestro, ¿yo casahmi cjuatsehen xi cuatjin rcá cha xi catsin cha? ¿Há suvá cha vihi ne?, o há tsajin ne, ¿há xutacha rë cha? ―‍Cuatjin cavinenguise me.
JOH 9:3 Ngajan xi Jesús ne, cuitjin cafayangui me: ―‍Hacuiin cha vihi ne, hacuiin xutacha rë cha casahmi me cjuatsehen ta cuatjin camá cojo sa xi ngatsë rë cjuandaja xi sahmi Nina cojo cha vihi ne, cumatsejen xa xi sahmi Nina.
JOH 9:4 Meje rë xi nihña xa rë me xi catsingatju ná jinguyëjë rë xi hasen sa ta cuechú hora xi cumajñu, hane tsajin yo xi cuma sahmi xa.
JOH 9:5 Jinguyëjë rë xi tejña nguehe ngasunhndë ne, sacuaha hasen xi cuma rë xuta ngasunhndë ngahan. ―‍Cuatjin cafayangui Jesús.
JOH 9:6 Xi cavatju cachja Jesús cjua vëhë ne, sehe cacandi me natya rë me nangui, hane casahmi me hitsë ndasi, sehe catsufë me tuxcun cha rcá jan.
JOH 9:7 Sehe cachja me cojo cha cuitjin: ―‍Tángun tinchacjun ngajan nda Siloé. ―‍Cuatjin cachja Jesús. (Siloé ne, meje cuichja Caningatjun rë.) Hya xi camá ne, quiji cha cavinchacjan cha. Xi tu cavuya cafe cha ndava cha ne, ha tsejen rë cha.
JOH 9:8 Ngajan xi xuta xi siu tahndee ndava cha cojo me xi cavëë rë cha xi casahmi cha caridad ne, cavinenguise xicjin me cuitjin: ―‍¿Hacuiin cha vëhë xi véjña sahmi caridad jan ni? ―‍Cuatjin cavinenguise me xi cuacun jan.
JOH 9:9 Ngujo me jan ne, cuitjin cachja me: ―‍Juun, hacui cha vë. ―‍Cuatjin cachja me. Hane ngujo nga me ne, cuitjin cachja me: ―‍Cuatjin tsejen, peru hacuiin cha. ―‍Cuatjin cachja me. Hane suvá cha ne, cuitjin cachja cha: ―‍Ngahan vi. ―‍Cuatjin cachja cha.
JOH 9:10 Ngajan xi xuta xi cuacun jan ne, cavinenguise me cha cuitjin: ―‍¿Hacutjin camá xi camandaja túxcun ngayun? ―‍Cuatjin cachja me.
JOH 9:11 Ngajan xi cha vëhë ne, cuitjin cafayangui cha: ―‍Me xi hmí rë Jesús ne, casahmi me hitsë ndasi, sehe catsufë me túxcun, sehe cachja me cojo ná xi cjuë́ cuínchacjan nda Siloé. Hane xi cëjë cavinchácjan jan ne, camatsejen ná. ―‍Cuatjin cafayangui cha.
JOH 9:12 Cavinenguise nga me cha cuitjin: ―‍¿Jani tacun me ni? ―‍Cuatjin cavinenguise me. Hane cha vëhë ne, cuitjin cachja cha: ―‍Hveen. ―‍Cuatjin cachja cha.
JOH 9:13 Ngajan xi xuta xi cuacun jan ne, quijicojo me cha xi sehe camatsejen rë jan hiscan xi siu cha fariseo.
JOH 9:14 Quihndë ne, nixtin xi casahmi Jesús ndasi hane casahmi me xi camandaja tuxcun cha rcá jan ne, nixtin xi chjahájenda rë.
JOH 9:15 Ngajan xi cha fariseo xi cuacun jan ne, hacuaha cavinenguise cha cha xi camandaja tuxcun jan hacutjin camá xi camatsejen rë cha. Hane cuitjin cafayangui cha: ―‍Ndasi catsufë me túxcun, sehe cëjë cavinchácjan, hane cama camatsejen ná. ―‍Cuatjin cafayangui cha.
JOH 9:16 Hane ngujo cha fariseo xi cuacun jan ne, cuitjin cachja cha: ―‍Me vëhë ne, tsejen xi hacuiin Nina catsingatju rë me, tsëhë xi faharcuaain me nixtin xi chjahájenda rë. ―‍Cuatjin cachja cha. Peru ngujo nga cha ne, cuitjin cachja cha: ―‍Cumaji sahmi me cjuarcun xi cuacun vëhë sa xi ngu cha tsehen me. ―‍Cuatjin cachja cha. Hacuiin ngu tangun ni camá cjua rë cha.
JOH 9:17 Hane ngajan xi cavuya cachja nga cha cojo cha xi camandaja tuxcun jan cuitjin: ―‍Quihndë ta casahmi me xi camandaja tuxcuin ne, ¿mé noje tsëhë me? ―‍Cuatjin cachja cha. Hane cha xi camandaja tuxcun jan ne, cuitjin cafayangui cha: ―‍Ngu profeta me. ―‍Cuatjin cafayangui cha.
JOH 9:18 Peru xutaxa rë yungun jan ne, macjaain rë me xi titjun ne, rcá cha hane quihndë ne, tsejen rë cha. Hisca xi cajindaya me xutacha rë cha xi camandaja tuxcun jan ne,
JOH 9:19 sehe cafahatáha rë me cuitjin: ―‍¿Há cha vihi xi quihndi nuju, cha xi nújun xi ha cuatjin rcá hisca hya xi catsin? ¿Hacutjin camá xi quihndë ne, tsejen rë cha? ―‍Cuatjin cafahatáha me.
JOH 9:20 Ngajan xi xutacha rë cha ne, cuitjin cafayangui me: ―‍Hyin xi cha vihi xi quihndi niji cha, hacuaha ha cuatjin rcá cha hisca hya xi catsin cha.
JOH 9:21 Peru hyíín hacutjin camá xi quihndë ne, tsejen rë cha. Hacuaha hyíín yo xi casahmi xi camandaja tuxcun cha. Chjinengunsun rë cha ta ha jiya nu rë cha. Suvá cha sua nuju cha cjuaquixi rë cha. ―‍Cuatjin cafayangui me.
JOH 9:22 Cuatjin cachja xutacha rë cha ta, tsëhë xi tsacjun me xutaxa rë jan ta, xutaxa rë xi cuacun jan ne, ha casahmi tangun me cjua xi yo xi cuichja xi Nina catsingatju me Jesús ne, tsichohotje rë me yungun.
JOH 9:23 Vëhë xi xutacha rë cha ne, cachja me: “Ha jiya nu rë cha ne, chjinengunsun rë cha.”
JOH 9:24 Vëhë xi cajindaya nga xutaxa rë majo ndiya cha xi camandaja tuxcun jan, hane sehe cachja me cojo cha cuitjin: ―‍“Vëë Nina”, noje xi cuatjin camá. Ngayin ne, hyin xi me xi casahmi xi camandaja tuxcuin ne, ngu cha tsehen me. ―‍Cuatjin cachja xutaxa rë jan.
JOH 9:25 Ngajan xi cha vëhë ne, cuitjin cafayangui cha: ―‍Ngahan ne, hveen sa xi ngu cha tsehen me. Ngu xcusun ni xi hvë ne, titjun ne, rcá ngahan, peru quihndë ne, tsejen ná. ―‍Cuatjin cafayangui cha.
JOH 9:26 Hane xutaxa rë jan ne, cavinenguise me cha cuitjin: ―‍¿Mé casahmi me cojo ri? ¿Hacutjin casahmi me xi camandaja tuxcuin? ―‍Cuatjin cavinenguise me.
JOH 9:27 Hane cha vëhë ne, cuitjin cafayangui cha: ―‍Ha cachjá cojo nuju ne, mijí cuetuhunrcun. ¿Mé má meje cuisiñuju nga ngundiya? ¿Há cojo ngayun meje cuisuhun ladu rë me? ―‍Cuatjin cafayangui cha.
JOH 9:28 Hane xutaxa rë jan ne, cacjan me cojo cha, cuitjin cachja me: ―‍¡Ngaye xi ladu rë cha vëhë má ngaye! ¡Ngayin ne, ladu rë Moisés má ngayin!
JOH 9:29 Ngayin ne, hyin xi Moisés ne, cachja me cjua xi casua Nina me, peru cha vëhë ne, hisca hyíín jani cavetju cha canduva cha. ―‍Cuatjin cachja me.
JOH 9:30 Ngajan xi cha vëhë ne, cuitjin cafayangui cha: ―‍¡Jemu sihya xi ngayun ne, hyúun jani cavetju me canduva me, handasa casahmi me xi camandaja túxcun ngahan!
JOH 9:31 Ha hyan ta Nina ne, fahacuendaain me cjua xi chja xuta tsehen. Peru sa xi ngu xuta faharcun me Nina hacuaha sahmi me hacutjin xi meje rë Nina ne, me vëhë ne, fahacuenda Nina cjua xi chja me.
JOH 9:32 Cjëë camahani cuinuhya rë xi ngu xuta sahmi me xi mandaja tuxcun ngu xuta xi rcá me hisca hya xi catsin me.
JOH 9:33 Sa xi hacuiin Nina catsingatju rë me vëhë ne, tsajin camahani mé xi cuma sahmi me. ―‍Cuatjin cafayangui cha.
JOH 9:34 Ngajan xi xutaxa rë jan ne, cuitjin cachja me: ―‍¡Ngaye ne, ngajñi rë cjuatsehen camahani catsin ngaye! ¡Machjiriin camahani ngaye xi cuicoye niji! ―‍Cuatjin cachja me. Sehe cavaxë me cha candatsen.
JOH 9:35 Hya xi camá ne, camachaya rë Jesús xi cavaxë xutaxa rë yungun cha xi camandaja tuxcun jan candatsen. Hane xi casacu xicjin Jesús cojo cha ne, cachja me cojo cha cuitjin: ―‍¿Há mangutacún ngayun cojo me xi Quihndi rë Xuta Jain? ―‍Cuatjin cachja me.
JOH 9:36 Hane cha vëhë ne, cuitjin cafayangui cha: ―‍Tatá, tinújun cojo ná yo me vë ne, cojo sa xi cumangu cácun cojo rë me. ―‍Cuatjin cafayangui cha.
JOH 9:37 Ngajan xi Jesús ne, cuitjin cachja me cojo cha: ―‍Ngayun ne, ha cahyun me ta, ngahan xi tichjá cojo nuju vi ne, ha ngahan xi Quihndi rë Xuta Jain ngahan. ―‍Cuatjin cachja me.
JOH 9:38 Hane cha vëhë ne, cuitjin cachja cha: ―‍Mangucácun, Tatá. ―‍Cuatjin cachja cha, sehe cafaharcun cha me.
JOH 9:39 Ngajan xi Jesús ne, cuitjin cachja me: ―‍Canduvá ngahan ngasunhndë vi ne, xi tsichúva xuta cojo cjuatacun rë me, sehe ngajan xi xuta xi cjëë ndaja cuijne rcu me cjua rë Nina ne, cuijnercundaja me, hane xuta xi cuenda chja me xi jemu ndaja vijne rcu me cjua rë Nina ne, cumajñu tsëhë me. ―‍Cuatjin cachja Jesús.
JOH 9:40 Hane ngujo cha fariseo xi hinchacun tiña hiscan secun Jesús ne, cahndë cha cjua vëhë, hane cuitjin cachja cha: ―‍¿Peru hacuiin cojo ngayin jñu tsijin? ―‍Cuatjin cachja cha.
JOH 9:41 Ngajan xi Jesús ne, cuitjin cachja me: ―‍Sa xi jñu tsujun ne, tsajin jyë́ nuju. Peru quihndë xi nújun xi hacuiin jñu tsujun ne, ngajan matsejen xi tjin jyë́ nuju. ―‍Cuatjin cachja Jesús.
JOH 10:1 Ngajan xi Jesús ne, cachja sa me cuitjin: ―‍Cuichjá cojo nuju cjuaquixi ta xuta xi visiin me táha tingotjo hnchua rë chu tsánga ta tu táha xín mijisun me hnchua ne, me vëhë ne, chëjë me hacuaha fahatahá cjuachan me.
JOH 10:2 Peru me xi visehen táha tingotjo hnchua ne, me vëhë xi paxtu rë chu tsánga.
JOH 10:3 Cha xi quitahá cuidadu rë tingotjo hnchua ne, vuxaha cha tingotjo tsëhë me vëhë. Chu tsánga ne, vihndë chu xta rë me, hane jindaya me chu xi tsëhë me, jimangu chu cojo ñihi rë chu, sehe vaxë me chu.
JOH 10:4 Hane hya xi ha cavaxë me yëjë chu xi tsëhë me ne, sehe cjui titjun me, hane chu tsánga ne, fitjengui chu me, tsëhë xi vëë chu xta rë me.
JOH 10:5 Peru jingu sa xuta ne, hatuxa cjuiin tjenguiin chu me ta tu cuanga chu tsëhë me, tsëhë xi hvíin chu xta rë jingu sa xuta jan.
JOH 10:6 Cuatjin cachja Jesús ejemplu vëhë cojo xuta xi cuacun vë, peru cajnii rcu me mé vijne cjua xi cachja Jesús.
JOH 10:7 Jesús ne, cachja sa me cojo xutaxa rë xi cuacun jan cuitjin: ―‍Cuichjá cojo nuju cjuaquixi ta ngahan ne, sacuaha tingotjo xi vatju chu tsánga ngahan.
JOH 10:8 Yëjë ni cha xi cavetjujñi ngajñi rë xuta xi meje cumatitjun cha hya xi chaja sa cjuëhë ngahan ne, sacuaha cha chëjë cha, cha fahatahá cjuachan cha. Peru xuta ladu rë Nina ne, casahmicuendaain me cha, sacuatjin rë chu tsánga xi fitjenguiin chu jingu sa xuta.
JOH 10:9 Ngahan ne, sacuaha tingotjo ngahan. Sa xi ngu xuta cuisehen me táha tingotjo jan ne, cuetjutje me. Hacuaha tsajin mé cumacjín cacun me cuetju cuisehen me jan, hane tsajin mé cuma chaja rë me.
JOH 10:10 Cha chëjë ne, xi vinduva cha ne, suvá ni xi tsichëjë cha, tsiquehen cha, hacuaha tsinguetsun cha. Peru ngahan ne, canduvá cojo sa xi sacú rë xuta cjuahñu xatsë, hacuaha jercu sacú camahani rë me cjuahñu vëhë.
JOH 10:11 ’Ngahan ne, sacuaha paxtu rë chu xi jemu ndaja fahácuenda chu tsánga. Paxtu ndaja jan ne, hisca sua me yojo rë me xi cueya me ngatsë rë chu tsánga.
JOH 10:12 Ngu mosu xi hacuiin paxtu rë chu má cha, hacuiin tsëhë cha chu tsánga ne, xi scuëë cha xi nduva tiña chu lobo ne, viyujutahá ni cha chu tsánga jan, hane vanga cha. Hane chu lobo jan ne, faha chu ngujo chu tsánga, sehe tsicangacojo chu chu xi yahnga jan tu nguehe tu ngajan.
JOH 10:13 Cuatjin sahmi cha ta, tsëhë xi mosu ni má cha, hane marcuaain rë cha tsëhë chu tsánga.
JOH 10:14 Ngahan ne, sacuaha paxtu ndaja jan ngahan. Sacuatjin vëë ná Nahmi naha hane ngahan ne, hvë Nahmi naha ne, ha chuva vëhë ni ne, ngahan ne, hvë chu tsahan hane chu tsahan ne, vëë chu ngahan. Hacuaha suá yojo naha xi cueya ngatsë rë chu.
JOH 10:16 Tjin sa ná chu tsánga xi hacuiin tsëhë hnchua vihi chu. Chu xi cuacun vë ne, hacuaha meje rë xi sahme chu cuidadu. Xi cuihndë chu xta naha ne, cuinduvatjengui chu ngahan, hane cuma tangun chu cojo chu xi ha tisahme cuidadu, hacuaha ngu ni ngahan xi paxtu rë chu.
JOH 10:17 ’Ngahan ne, hmu cacun ná Nahmi naha, tsëhë xi suá yojo naha xi cueya, hane sehe sahme xi cúya nga cjuahñu.
JOH 10:18 Tsajin yo xi cjuahatahá cjuahñu naha ta ngahan ne, cojo cjuatacun naha suva suá yojo naha xi cueya. Tjin ná chuva rë xi suá yojo naha, hacuaha tjin ná chuva rë xi sahme xi cúya nga cjuahñu. Cuatjin cavitexa ná Nahmi naha xi sahme. ―‍Cuatjin cachja Jesús.
JOH 10:19 Hya xi camá ne, ngu ndiya nga hacuiin ngu tangun ni camá nga cjua rë xutaxa rë jan ngatsë rë cjua vëhë.
JOH 10:20 Hane jemu cjín me xi cuacun jan ne, cuitjin cachja me: ―‍¡Jiya xitsehen xahasen rë cha, vëhë xi sca rë cha! ¡Venguiin chji rë xi cuatjin visiñuju cjua rë cha! ―‍Cuatjin cachja me.
JOH 10:21 Peru yahnga nga me ne, cuitjin cachja me: ―‍Cjua vëhë ne, hacuiin cjua rë ngu xuta xi jiya xitsehen xahasen rë me. ¿Ngu xitsehen ne, cumaji sahmi xi cumandaja tuxcun ngu xuta xi rcá me? ―‍Cuatjin cachja yahnga me jan.
JOH 10:22 Quihndë ne, hya xi cavechú nixtin rë chan hnchan ne, camá suhi rë yungun xi matitjun ngajan Jerusalén.
JOH 10:23 Hane Jesús ne, tsujyihiya me ndatsen yungun xi matitjun, ngajan Ngahma Ndihya tsëhë Salomón.
JOH 10:24 Hane xutaxa rë yungun jan ne, quiji caxinchacunndee me Jesús, sehe cachja me cojo me cuitjin: ―‍¿Jani hisca hya tuhun niji cjuaquixi? Sa xi ngayun jain xi tsingatju Nina ngayun ne, tinújunquixun cojo niji. ―‍Cuatjin cachja xutaxa rë jan.
JOH 10:25 Ngajan xi Jesús ne, cuitjin cafayangui me: ―‍Ha cachjá cojo nuju, peru macjaain nuju. Xcusun xi tisahme sacuatjin tivitexa ná Nahmi naha ne, xcusun vëhë ni tsingacun yo ngahan. Peru ngayun ne, macjaain nuju,
JOH 10:26 tsëhë xi hacuiin xuta ladu naha má ngayun.
JOH 10:27 Xuta xi ladu naha má me ne, tangun me sacuaha chu tsánga. Me xi cuacun vë ne, vëë me xta naha, hacuaha ngahan ne, hvë me, hane fitjengui ná me.
JOH 10:28 Ngahan ne, suá rë me cjuahñu xatsë, hane hatuxa tsajin nu tsajin nixtin xi cjue hasen rë me xcun cjuañihi, hacuaha tsajin yo cuaxëxin rë me xi siu ntsa me.
JOH 10:29 Xuta xi cuacun casua ná Nahmi naha ne, hitsë sa venguichji rë me xi cuma rë yëjë sa xcusun. Hacuaha tsajin yo cuma cuaxëxin rë me xi siu tsja Nahmi naja me.
JOH 10:30 Ngahan cojo Nahmi naja ne, ngu ni xahasen niji, ngu ni cjuatacun niji, ngu ni hasen niji. ―‍Cuatjin cafayangui Jesús.
JOH 10:31 Ngajan xi xutaxa rë xi cuacun jan ne, cafaha nga me ndyojo xi cuetaha me Jesús xi tsiquehen me me.
JOH 10:32 Hane Jesús ne, cuitjin cachja me: ―‍Ngahan ne, jemu cjín xcusun ndaja casahme ngajñi nuju sacuatjin cavitexa ná Nahmi naja. Hane ¿jarë xcusun vëhë tsëhë xi cuetuhun ná ndyojo ni? ―‍Cuatjin cachja Jesús.
JOH 10:33 Ngajan xi xutaxa rë jan ne, cuitjin cafayangui me: ―‍Hacuiin tsëhë ngu xcusun ndaja xi canihñi xi cuetihin ri ndyojo ta ngatsë rë xi nixcuehyi Nina, ngatsë rë xi handasa ngu xuta ni ngaye ne, peru noje xi tangun ngaye cojo Nina. ―‍Cuatjin cafayangui me.
JOH 10:34 Ngajan xi Jesús ne, cuitjin cachja me: ―‍Ley rë Moisés xi vitexa nuju ne, ha ndaja hyun xi camahindu cjua vihi xi cachja Nina: “Ngayujun ni ne, nina ngayun.” Cuatjin camahindu.
JOH 10:35 Ngayejen ni ne, ha hyan ta cjua xi chja xcun xujun rë Nina ne, hatuxa cjuaquixi jain. Hane Nina ne, cachja me nina tsëhë xuta xi cuacun cafahatsja cjua rë me.
JOH 10:36 Quihndë ta Nina cavaxijin ná me hacuaha catsingatju ná me nguehe ngasunhndë ne, ¿hacutjin má xi nújun xi ngahan ne, choho chjá, tsëhë xi cachjá xi Quihndi rë Nina ngahan ni?
JOH 10:37 Sa xi ngahan tisahmee xcusun xi cavitexa Nahmi naha xi sahme ne, xicamacjaain nuju ngahan.
JOH 10:38 Peru sa xi tisahme ne, handasa cumacjaain nuju ngahan ne, ndastu tsëhë xcusun xi sahme ne, catamacjain nuju, cojo sa xi cuijne rcun ngundiyaxa ni xi Nahmi naja ne, jiya me xahasen naha, hane ngahan ne, tejñaya xahasen rë me. ―‍Cuatjin cachja Jesús.
JOH 10:39 Ngajan xi casahmi nga xutaxa rë jan cjuandya xi cjuaha me Jesús, peru Jesús ne, cavetjutje me tsëhë xuta jan quiji me.
JOH 10:40 Hya xi camá ne, cavetju Jesús quiji nga me ngunda vëhë tsëhë Ndajyë Jordán, ngajan hiscan xi casetaha Juan cavitenda me xuta ntsacu cavetsihin. Hane ngajan casetaha me.
JOH 10:41 Hane jemu cjín xuta quijitjengui me Jesús. Hane cuitjin cachja xingu xingu me cojo xicjin me: ―‍Juan ne, handasa casahmii me cjuarcun, peru yëjë ni cjua xi cachja me tsëhë me vihi ne, cjuaquixi jain.
JOH 10:42 Hane jemu cjín xuta camangu cacun me cojo Jesús ngajan cahndë́ vëhë.
JOH 11:1 Tacun ngu cha hmu rë xi hmí rë Lázaro, ngu cha Betania, nangui rë na María cojo na Marta tíchja na.
JOH 11:2 Na María vëhë ne, na vëhë xi cavitejnu na ntsacu Nai naja ngu xcusun aceite xi jemu ndaja jne camahani hacuaha jercu hnga chji rë, sehe catsixiya na cojo tsjarcu na. Na vëhë xi hmu rë cha Lázaro hntsë na.
JOH 11:3 Ngajan xi catsijo na vëhë ne, catsingatju na cjua vihi tsëhë Jesús: ―‍Tatá, chutsujun ni, cha xi jemu vinga nuju jan ne, jemu hmu rë cha. ―‍Vëhë cjua xi catsingatju na.
JOH 11:4 Hane xi cahndë Jesús cjua vëhë ne, cuitjin cachja me: ―‍Chíhin vëhë ne, cuetjincaain cjuaveya rë cha Lázaro cojo ta xi cuetjucaa ne, cuma jyë cuma hnga Nina cojo Hasen rë me, cojo sa xi Quihndi rë Nina ne, hacuaha cuma jyë cuma hnga me cojo Hasen rë me ngatsë rë chíhin vëhë. ―‍Cuatjin cachja Jesús.
JOH 11:5 Quihndë ne, Jesús ne, jemu vinga rë me na Marta cojo tíchja na cojo cha Lázaro.
JOH 11:6 Peru xi camachaya rë Jesús xi hmu rë cha ne, casetaha me jo nixtin sa hiscan xi ha quitahá me jan.
JOH 11:7 Xi cavatju vëhë ne, sehe cachja me cojo xuta ladu rë me jan cuitjin: ―‍Cuyan cuanguen nga ngu cahndë́ tsëhë distritu Judea. ―‍Cuatjin cachja me.
JOH 11:8 Ngajan xi xuta ladu rë me jan ne, cuitjin cachja me: ―‍Maestro, xutaxa rë yungun jan ne, ¡sehe tiña nixtin xi casahmi me cjuandya xi tsiquehen nuju me cojo ndyojo! ¡Xi meje rë ne, cuanguun ngajan! ―‍Cuatjin cachja me.
JOH 11:9 Hane Jesús ne, cuitjin cafayangui me: ―‍¿Hacuiin tejó hora tjin rë xi ngu nixtin ni? Quihndë xi cjëë cuechú hora xi cuichja Nina xi cueya ngahan ne, tsajin mé cuma ná, sacuatjin xtenguiin naja xi nguinixtin tsëhë xi tsejen naja hasen rë tsuhi.
JOH 11:10 Peru xi cuechú hora xi cuichja Nina xi cueya ngahan ne, cueya, sacuatjin xtengui naja xi nixten tsëhë xi tsajin hasen xi cuma naja.
JOH 11:11 Cuatjin cafayangui Jesús cjua vëhë, hane sehe cachja sa me cuitjin: ―‍Cha amigu naja, cha Lázaro ne, cafañafë cha. Peru cjuë́ ngahan tsingásca rë cha. ―‍Cuatjin cachja Jesús.
JOH 11:12 Ngajan xi xuta ladu rë me jan ne, cuitjin cachja me: ―‍Tatá, sa xi cafañafë jain cha ne, vëhë tsejen xi cumandaja cha. ―‍Cuatjin cachja xuta ladu rë me jan.
JOH 11:13 Quihndë ne, cjua xi cachja Jesús vë ne, tsëhë cjuaveya rë cha Lázaro. Peru xi má rë xuta ladu rë me jan ne, tichja me tsëhë nijñá ni rë cha.
JOH 11:14 Ngajan xi Jesús ne, cachja quixi me cuitjin: ―‍Cha Lázaro ne, cahme cha.
JOH 11:15 Hane ngahan ne, jemu ndama ná xi hacuiin ngajan tejña hora vëhë ta, xi chutsujun hacutjin cuma ne, cumangu tacún cojo ná. Peru cuanguen tjenguen nima. ―‍Cuatjin cachja Jesús.
JOH 11:16 Ngajan xi Tomás, me xi chja me tsëhë cha Lihma ne, cuitjin cachja me cojo xuta ladu rë Jesús xi yahnga jan: ―‍Hacuaha cuanguen ngayaan, cojo sa xi cueyan tangun cojo rë me. ―‍Cuatjin cachja Tomás. Sehe cavetju yëjë me quiji me cojo Jesús.
JOH 11:17 Hya xi camá ne, xi cafehe me ngajan Betania ne, camachaya rë Jesús xi ha tjin rë ñuju nixtin xi jiyaniji nima Lázaro.
JOH 11:18 Betania jan ne, sacuaha chuva rë jyan kilómetro tacun tsëhë Jerusalén.
JOH 11:19 Hane jemu cjín xuta quiji tjengui me na Marta cojo na María xi sua me na cjuetacun tsëhë cjuaveya rë hntsë na.
JOH 11:20 Hane xi camachaya rë na Marta xi nduva Jesús ne, cavetju na quiji cafahatsja na me. Peru na María ne, cavéjña ni na ndava na.
JOH 11:21 Hya xi camá ne, xi casacu xicjin na Marta cojo Jesús ne, cuitjin cachja na cojo rë me: ―‍Tatá, sa ngayun nechun nguehe ne, cahmii nima xingueen.
JOH 11:22 Peru hvë ta hisca quihndë ne, tu mé ni xi chjahyun rë Nina ne, sua nuju me. ―‍Cuatjin cachja na.
JOH 11:23 Ngajan xi Jesús ne, cuitjin cachja me cojo rë na: ―‍Nima xingun ne, cuya cjuahñu. ―‍Cuatjin cachja Jesús.
JOH 11:24 Hane na Marta ne, cuitjin cachja na: ―‍Hvë ta cuya nima xingueen cjuahñu hya xi hacuaha yëjë nima cuya cjuahñu, nixtin xi tsichuva Nina sa nima sa xuta. ―‍Cuatjin cachja na.
JOH 11:25 Ngajan xi Jesús ne, cuitjin cachja me cojo rë na: ―‍Ngahan xi suá cjuahñu hacuaha tsicúya nima cjuahñu. Xuta xi mangucacun me cojo ná ne, ha ndasa cueya me ne, peru cuya me cjuahñu.
JOH 11:26 Hane yëjë xuta xi tjin rë me cjuahñu xatsë hacuaha mangucacun me cojo ná ne, hatuxa tsajin nu tsajin nixtin xi cjue hasen rë me xcun cjuañihi. ¿Há macjain nuju cjua vëhë? ―‍Cuatjin cachja Jesús.
JOH 11:27 Ngajan xi na vëhë ne, cuitjin cafayangui na: ―‍Juun, macjain ná, Tatá. Macjain ná xi ngayun xi catsingatju nuju Nina, ngayun xi Quihndi rë Nina ngayun. Hacuaha ngayun xi jemu cavinechinyin nuju xi cuinduvun ngasunhndë. ―‍Cuatjin cafayangui na Marta.
JOH 11:28 Xi cafë cachja na Marta cuatjin ne, sehe cavuya na quiji jaha na na María tíchja na. Hane xi cafehe na jan ne, sehe cajindayahma na na María, cuitjin cachja na: ―‍Cafehe maestru, hane jindaya me ngaye. ―‍Cuatjin cachja na.
JOH 11:29 Xi tu cahndë na María cjua vëhë ne, marcu macjain cavisatjen na quiji tjengui na Jesús.
JOH 11:30 Quihndë ne, cjëë sa cuisehen Jesús nandya ta secun cuaha me cahndë́ hiscan cavechútaha na Marta me.
JOH 11:31 Hane xuta xi siu cojo na María ndava na xi tisua me na cjuetacun ne, xi cavëë me xi marcu macjain cavisatjen na quiji na ne, quiji tjengui me na. Xi má rë me ne, xcun tsjun cjui na, cojo sa xi ngajan squihnda na.
JOH 11:32 Hane xi cafehe na María hiscan secun Jesús ne, xi cavëë na me ne, quiji caticjaxcun na xcun me, sehe cachja na cuitjin: ―‍Tatá, sa xi ngayun nechun nguehe ne, cahmii nima xingueen. ―‍Cuatjin cachja na.
JOH 11:33 Hane xi cavëë Jesús xi cuatjin jihnda na hacuaha jihnda yëjë xuta xi ticojo na jan ne, camandya cacun me, jemu choho camahani camá rë xahasen rë me.
JOH 11:34 Hane cuitjin cavinenguise me: ―‍¿Jani tacun tsjun xi caveyun nima? ―‍Cuatjin cavinenguise me. Hane xuta jan ne, cuitjin cafayangui me: ―‍Tatá, nduvun chutsujun. ―‍Cuatjin cafayangui me.
JOH 11:35 Hane cajihnda Jesús.
JOH 11:36 Ngajan xi xuta jan ne, cuitjin cachja me ngajñi rë me: ―‍Chutsujun ni hacutjin catsihmu cacun me nima. ―‍Cuatjin cachja me.
JOH 11:37 Peru ngujo me ne, cuitjin cachja me: ―‍Me vihi xi casahmi me xi camandaja tuxcun cha rcá jan ne, ¿há camaji casahmi me xi cahmii nima vëhë? ―‍Cuatjin cachja ngujo xuta jan.
JOH 11:38 Ngajan xi Jesús ne, ngu ndiya nga jemu camandya cacun me. Sehe quiji me xcun tsjun. Tsjun jan ne, ngu nguijo, hane tingotjo rë ne, titsa ngu ndyojo.
JOH 11:39 Ngajan xi Jesús ne, cuitjin cachja me: ―‍Chjuhunxun ndyojo vë. ―‍Cuatjin cachja me. Ngajan xi na Marta, tíchja nima ne, cuitjin cachja na: ―‍Tatá, ha choho jne vë ta, ha tjin rë ñuju nixtin. ―‍Cuatjin cachja na.
JOH 11:40 Hane Jesús ne, cuitjin cachja me cojo rë na: ―‍Ha cachjá cojo nuju ta sa xi cumacjain nuju cjua naha ne, ngayun ne, chutsujun hacutjin jyë hnga Nina cojo Hasen rë me. ―‍Cuatjin cachja Jesús.
JOH 11:41 Hya xi camá ne, cachjaháxin rë ndyojo jan. Hane hora vëhë cavutsejenniji Jesús ngahnga, sehe cachja me cuitjin: ―‍Ngayun Nahmi naha, suá nacuechji nuju ta canihñucuendun cjua xi cachjá cojo nuju.
JOH 11:42 Hacuaha ha hvë ta ngayun ne, hatuxa nihñucuendun cjua naha. Vëhë xi hacuiin ngujyë xi cuichjá cojo nuju cjua vihi, peru ngatsë rë xuta xi hinchacunndee vi ne, vëhë xi cuitjin tichjá, cojo sa xi cumacjain rë me xi ngayun caningatjun ná. ―‍Cuatjin cachja Jesús.
JOH 11:43 Hane xi cajnetaha cachja me cuatjin ne, sehe ña cajindaya me cachja me cuitjin: ―‍¡Lázaro, tetjun! ―‍Cuatjin cachja me.
JOH 11:44 Hya xi camá ne, cavetju Lázaro tsëhë tsjun jan, tjinguiya tsjian ntsacu me, tjinguiya tsjian tsja me, hacuaha tjihñu xcun me cojo ngu pañutu. Hane Jesús ne, cuitjin cachja me cojo xuta jan: ―‍Chundecjun tsjian vë sehe cumandaya me. ―‍Cuatjin cachja Jesús.
JOH 11:45 Quihndë ne, jemu cjín xuta quiji cavusehenya rë na María hacuaha cavëë me hacutjin casahmi Jesús. Hane xuta xi cuacun jan ne, camangu cacun me cojo Jesús.
JOH 11:46 Peru ngujo xuta ne, quiji cachja me cojo cha fariseo hacutjin casahmi Jesús.
JOH 11:47 Ngajan xi yëjë nahmi xi matitjun cojo cha fariseo xi cuacun jan ne, casahmi me ngu junta. Hane xcun junta jan ne, cuitjin cachja me: ―‍¿Mé ndatjin nihña? ta cha xi cuajyihi vë ne, jemu tisahmi cha cjuarcun.
JOH 11:48 Sa xi tsajin mé xi nihña ne, yëjë xuta ne, cumangu cacun me cojo cha. Hane vëhë xi xutaxa rë Roma ne, cuma cjan rë me, hane cjuahatahá me yungun xi matitjun naja hacuaha cjuahatahá me gubiernu xi tinihña. ―‍Cuatjin cachja me xi cuacun jan.
JOH 11:49 Peru ngu me xi cuacun jan xi hmí rë Caifás, me xi hacuaha má nahmi xi matitjun tsëhë yëjë nahmi nu vëhë ne, cachja me cuitjin: ―‍Ngayun ne, hyúun camahani.
JOH 11:50 Vijnii rcun xi ndaja tsujun xi ngu xihin ni cueya ngatsë rë yëjë ni xuta, hane hacuiin yëjë xuta cueya me. ―‍Cuatjin cachja Caifás.
JOH 11:51 Peru me vëhë ne, hacuiin cachja me cojo cjuatacun rë suvá me ta, ngatsë rë xi má me nahmi xi matitjun nu vëhë ne, cachja me cjua xi casua Nina me xi Jesús cueya me ngatsë rë xuta.
JOH 11:52 Peru hacuiin ngatsë rë suvá ni xuta tjë rë Israel ta hacuaha cueya me cojo sa xi sahmi tangun me yëjë quihndi rë Nina xi tinguitsojo, sehe cuma yëjë me sacuaha ngu ni xcusun xuta.
JOH 11:53 Ngajan xi hisca nixtin xi cachja Caifás cuatjin ne, nahmi xi matitjun cojo cha fariseo xi cuacun jan ne, caviyuju me cjuatacun rë me xi tsiquehen me Jesús.
JOH 11:54 Vëhë xi Jesús ne, catsujyihiyaaintë me nandya xi siu ladu rë distritu Judea ta cavetjuxin me tsëhë ngajan, quiji me ngu nandya xi hmí rë Efraín, tiña hiscan xi faha rë xi ha jemu xín camahani tsëhë nandya. Hane ngajan casetaha me cojo xuta ladu rë me.
JOH 11:55 Quihndë ne, ha camatiña suhi tsëhë Pascua. Hane jemu cjín xuta quiji me Jerusalén chaja sa nixtin rë suhi jan xi cuma tyjahi me sacuatjin xi ha xcusun rë xutachanga.
JOH 11:56 Jemu siu me cuidadu há cjuehe Jesús suhi jan. Hane jinguyëjë rë xi hinchacun me yungun xi matitjun jan ne, vinenguise xicjin me xingu xingu me cuitjin: ―‍¿Mé xi má nuju? ¿Há cuinduvaain me suhi? ―‍Cuatjin cavinenguise xicjin me.
JOH 11:57 Quihndë ne, nahmi xi matitjun cojo cha fariseo xi cuacun jan ne, ha cavitexa me xi yo xi vëë hiscan tacun Jesús ne, sua cumachaya rë me, cojo sa xi chjahá rë Jesús.
JOH 12:1 Jyun nixtin chaja sa xi cuechú suhi tsëhë Pascua ne, cavuya quiji Jesús ngajan Betania, hiscan xi tacun cha Lázaro, cha xi catsicuya Jesús cjuahñu hya xi cahme cha.
JOH 12:2 Hane ngajan casehenndaja ngu comida xi sinë me. Na Marta tivincha na comida, peru cha Lázaro ne, cojo cha tijinë cha cojo Jesús cojo me xi yahnga sa.
JOH 12:3 Hane na María ne, cafaha na ngu frascu xi hincha jo cuartu aceite nardo xi jemu ndaja jne hacuaha jemu hnga chji rë, quiji cavitejnu na ntsacu Jesús, sehe catsixiya na cojo tsjarcu na. Hane cahntsua ndihya jan ne, ña catsë rë cojo xta rë aceite jan.
JOH 12:4 Ngajan xi Judas Iscariote, ngu cha ladu rë Jesús, cha xi sahmi rë me entregadu ne, cuitjin cachja cha:
JOH 12:5 ―‍¿Mé má cuatjin casahmi na? Aceite vë ne, cuma xteña hane sacú chji rë jyan cientu nixtin xa xi sahmi ngu xuta, hane tujún vëhë ne, tahan rë xuta yuma. ―‍Cuatjin cachja cha.
JOH 12:6 Peru Judas ne, hacuiin tsëhë xi marcun rë cha tsëhë xuta yuma xi cuatjin cachja cha ta tsëhë xi chëjë cha, hacuaha cha vëhë tjin tsja cha tsá xi hincha yëjë tujún, hane jiya hora ne, tsichëjë cha tsë tsë.
JOH 12:7 Ngajan xi Jesús ne, cuitjin cachja me: ―‍Xicanújiin cojo rë na. Catetjo na xi tjin rë na hisca hya xi seyaniji ngahan.
JOH 12:8 Xuta yuma ne, yëjë nu yëjë nixtin ne, siu me cojo nuju, peru ngahan ne, hacuiin yëjë nu yëjë nixtin tejña cojo nuju. ―‍Cuatjin cachja Jesús.
JOH 12:9 Hya xi camá ne, jemu xutacjín tsëhë nandya xi siu distritu Judea ne, camachaya rë me xi Jesús ne, Betania quitahá me. Ngajan xi quiji xuta ngajan, hacuiin tsëhë xi meje scuëë ni me Jesús ta hacuaha tsëhë xi meje scuëë me cha Lázaro, cha xi catsicuya Jesús cjuahñu.
JOH 12:10 Hane nahmi xi matitjun jan ne, caviyuju cacun me xi hacuaha cojo cha Lázaro tsiquehen me cha,
JOH 12:11 tsëhë xi ngatsë rë cha vëhë ne, jemu cjín xuta titsitjungui me nahmi jan, hane tijimangu cacun me cojo Jesús.
JOH 12:12 Xi camá nchujun jan ne, xutacjín xi cafehe suhi jan ne, camachaya rë me xi Jesús ne, hacuaha nduva me Jerusalén.
JOH 12:13 Hane cafaha me xca jne, sehe cavetju me quijitjengui me Jesús hiscan nduva me. Hane hisca jindaya me cachja me cuitjin: ―‍¡Jemu ndaja Nina! ¡Jemu catsinchacun Nina me xi nduva vi tsëhë xi Nina catsingatju rë me, me xi cumatitjun tsajan ngayaan xuta tjë rë Israel! ―‍Cuatjin cajindaya me cachja me.
JOH 12:14 Hane xi casacu rë Jesús ngu burru chihndë ne, sehe camiji me chu, sacuatjin camahindu tsëhë me xcun xujun rë Nina hiscan xi chja cuitjin:
JOH 12:15 ¡Xicarcuun ngayun xuta Jerusalén; chutsujun ni, me xi matitjun tsujun ne, nduva me quisun me ngu burru chihndë!
JOH 12:16 Hya xi cuatjin camá ne, xuta ladu rë Jesús ne, cajnii rcu me. Peru hya xi Jesús cama jyë cama hnga me cojo Hasen rë me ne, hya xi cavuya cjuahñu rë me hya catsinguitsjen xuta xi cuacun jan xi cuatjin camahindu tsëhë Jesús hane cuatjin jain cavatju me camá.
JOH 12:17 Xuta xi siu cojo Jesús hya xi cajindaya me cha Lázaro xi cuetju cha tsëhë tsjun hacuaha catsicuya me cha cjuahñu ne, casua me camachaya rë jingu sa xuta hacutjin camá.
JOH 12:18 Vëhë xi xutacjín jan ne, cavetju me quijitjengui me Jesús, tsëhë xi camachaya rë me xi casahmi Jesús cjuarcun vëhë.
JOH 12:19 Vëhë xi cha fariseo ne, cachja cha ngajñi rë cha cojo xicjin cha cuitjin: ―‍Cahyun ni ne, tsajin mé xi cuma nihña. Chutsujun ta yëjë ni xuta ne, tjengui rë cha. ―‍Cuatjin cachja cha.
JOH 12:20 Quihndë ne, ngajñi rë xuta xi quiji me suhi xi cjuaharcun me Nina ne, hinchajñi ngujo xutaxín.
JOH 12:21 Hane me xi cuacun vëhë ne, quijitjengui me Felipe, xuta Betsaida, ngu nandya tsëhë distritu Galilea, hane cuitjin cachja me: ―‍Tatá, ngayin ne, meje cuisiajmí cojo Jesús. ―‍Cuatjin cachja me.
JOH 12:22 Ngajan xi Felipe ne, quiji cachja me cojo Andrés, sehe catsijo ni me quiji casua me camachaya rë Jesús.
JOH 12:23 Ngajan xi Jesús ne, cuitjin cachja me cojo rë me: ―‍Cavechú hora xi ngahan xi Quihndi rë Xuta Jain ngahan ne, cuma jyë cuma hnga ngahan cojo hasen naha.
JOH 12:24 Cuichjá cojo nuju cjuaquixi ta ngu tú rë trigu xi cjuinengui nangui ne, sa xi cueyaain ne, ha ngu tu tu ni má yëjë nu yëjë nixtin. Peru sa xi cueya ne, jemu cjín tjë sua.
JOH 12:25 Xuta xi vangui me suvá ni xi ndaja cjuahñu rë me nguehe ngasunhndë ne, titsichajá me cjuandaja xi sua Nina me cjuahñu xatsë. Peru xuta xi marcuaain rë me tsëhë suvá ni xi ndaja cjuahñu rë me nguehe ngasunhndë ne, hatuxa sacú rë me cjuandaja xi sua Nina me cjuahñu xatsë.
JOH 12:26 Xuta xi meje cuisehen me ladu naha ne, catinduva tjengui ná me. Hane hiscan xi cuitejña ngahan ne, hacuaha ngajan cuejña me xi má ladu naha. Xuta xi má me ladu naha ne, sahmi jyë sahmi hnga Nina Nahmi naja me. ―‍Cuatjin cachja Jesús.
JOH 12:27 Cachja sa Jesús cuitjin: ―‍Quihndë ne, jemu macjín cácun. Peru ¿mé cuichjá ni? ¿Há cuichjá cuitjin: “Ngayun Nahmi naha, naxuntjun ná tsëhë xcusun xi cuátju cuma quihndë?” Peru cuichjaan cuatjin ta, tsëhë xi hatuxa canduvá xi cuatjin cuátju cuma.
JOH 12:28 Ngayun Nahmi naha, tuhun cumachaya rë xuta hacutjin jyë hnga ngayun cojo Hasen nuju. ―‍Cuatjin cachja Jesús. Ngajan xi canuhya rë ngu xta xi canduva ngajan ngahnga xi cachja cuitjin: ―‍Ha casuá camachaya rë me, hacuaha cúya suá nga cumachaya rë me. ―‍Cuatjin cachja xta jan.
JOH 12:29 Hane ngujo xuta xi hinchacun jan xi cahndë me xta jan ne, cachja me ta chuhun xi catsingá. Hane ngujo nga me ne, cachja me xi ngu ángel cachja cojo Jesús.
JOH 12:30 Ngajan xi Jesús ne, cuitjin cachja me cojo xuta jan: ―‍Hacuiin xi cuíhndë ngahan xi cachja xta vëhë ta xi cuinuhyun ngayun.
JOH 12:31 Cavechú nixtin xi cuma chuva xuta cojo cjuatacun rë me. Cavechú nixtin xi cjuahatahá Nina gubiernu xi tisahmi Satanás.
JOH 12:32 Hane ngahan ne, hya xi tjunihnga ná tsëhë nangui ne, sahme xi xuta ne, cuisehen me ladu naha. ―‍Cuatjin cachja Jesús.
JOH 12:33 Xi cuatjin cachja Jesús ne, casua me camachaya rë xuta mé chuva rë cueya me.
JOH 12:34 Ngajan xi xuta jan ne, cuitjin cafayangui me tsëhë Jesús: ―‍Ngayin ne, hyin xi chja ley ta me xi Nina tsingatju rë ne, tsajin nixtin xi cueya me. ¿Hacutjin má xi nújun ngayun xi me xi Quihndi rë Xuta Jain ne, tjunihnga rë me? ¿Yo me xi Quihndi rë Xuta Jain vë ni? ―‍Cuatjin cafayangui xuta jan.
JOH 12:35 Ngajan xi Jesús ne, cuitjin cachja me cojo xuta jan: ―‍Ha tu chúva sa nixtin xi ngahan xi sacuaha hasen ngahan ne, tejña ngajñi nuju. Tángun xcun sa cojo ndiya xi ha tivangun jinguyëjë rë xi tacun sa hasen ngajñi nuju, sa tu cuechútáha nuju jñú. Xuta xi cjui me ngajñi jñú ne, hvíin me jani cjui me.
JOH 12:36 Vëhë xi jinguyëjë rë xi tejña ngajñi nuju ne, catamangu tacún cojo ná, cojo sa xi tsë rë xahasen nuju cojo cjuahasen naha. ―‍Cuatjin cachja Jesús. Hane xi cavatju cachja Jesús cjua vëhë ne, cavetju me quijihma me tsëhë xuta jan.
JOH 12:37 Handasa cavëë xuta xi jemu cjín cjuarcun casahmi Jesús ne, peru camanguaain cacun me cojo rë me.
JOH 12:38 Cuatjin camá xi cavetjucaa cjua rë profeta Isaías xi camahindu xcun xujun rë Nina hiscan xi chja cuitjin: Ngayun Nina niji, tsajin yo camacjain rë cjua xi canújin; Tsajin yo cajne rcu hacutjin xi hñu ngahñu rë Nina. Cuatjin cachja profeta Isaías.
JOH 12:39 Vëhë xi xuta jan ne, camaji camangu cacun me cojo Jesús ta, tsëhë xi hacuaha cachja nga profeta Isaías cuitjin:
JOH 12:40 Sacuaha ngu xuta xi tsihñu me xcun ngu nga xuta cojo sa xi cumatsijin rë me ne, cuatjin casahmi jñu Nina tsëhë cjuatacun rë xuta, cojo sa xi cuijnii rcu me hacuaha cuyaain me ladu rë Nina xi sahmi Nina xi cumandaja me.
JOH 12:41 Cuatjin cachja Isaías cjua vëhë ta, tsëhë xi cavëë me hacutjin jyë hnga Jesús cojo hasen rë me hane cuatjin cachja me tsëhë Jesús.
JOH 12:42 Handasa cuatjin casahmi Nina ne, jemu cjín xutaxa rë camangu cacun me cojo Jesús. Peru tsëhë xi tsacjun me cha fariseo ne, catsinguixiin me ngajñi rë xuta, sa tu cumachohotje rë me yungun.
JOH 12:43 Xutaxa rë xi cuacun vë ne, hitsë sa meje rë me xi sahmi yehe sahmi hnga xuta me, xi cuma rë xi sahmi yehe sahmi hnga Nina me.
JOH 12:44 Ngu ndiya nga jan ne, jemu hñu cachja Jesús cuitjin: ―‍Xuta xi mangucacun me cojo ná ne, hacuiin suva ni mangucacun me cojo ná ta hacuaha mangucacun me cojo Nina Nahmi naja, me xi catsingatju ná.
JOH 12:45 Hane xuta xi vijne rcu me yo ngahan ne, hacuaha vijne rcu me yo me xi catsingatju ná.
JOH 12:46 Ngahan xi sacuaha hasen xi cuma rë xuta ngahan ne, canduvá nguehe ngasunhndë, cojo sa xi yëjë xuta xi mangucacun me cojo ná ne, cjuë xi jñu tsëhë cjuatacun rë me.
JOH 12:47 Hane sa xi ngu xuta vetaha rcu me cjua xi chjá peru faharcuaain me ne, ngahan ne, tsichuvaan me cojo cjuatacun rë me ta, tsëhë xi ngahan ne, hacuiin canduvá xi tsichúva xuta cojo cjuatacun rë me ta canduvá xi cuáxëtje me.
JOH 12:48 Xuta xi tsitjungui ná me hacuaha fahatsjaain me cjua naha ne, ha tjin yo xi tsichuva rë me. Cjua xi cachjá ne, cjua vëhë xi tsichuva rë me nixtin xi tsichuva Nina sa nima sa xuta.
JOH 12:49 Ngahan ne, cjua xi cachjá ne, hacuiin cachjá cojo cjuatacun naha suva ta Nina Nahmi naja, me xi catsingatju ná ne, suvá me cavitexa ná me hacutjin meje rë xi cuichjá.
JOH 12:50 Hane hvë ta cjua xi vitexa me vëhë ne, sua naja cjuahñu xatsë. Vëhë xi cjua xi chjá ne, suvá cjua xi cavitexa Nina Nahmi naja.
JOH 13:1 Quihndë ne, cavechú nixtin xi chaja sa ngu nixtin xi cuma suhi tsëhë Pascua. Hane Jesús ne, ha vëë me xi cavechú hora xi cuetju me tsëhë ngasunhndë vihi, cjue tjengui me Nina Nahmi naja. Hatuxa catsihmu cacun me xuta ladu rë me xi siu ngasunhndë vihi, hacuaha hacuanitjin ni catsihmu cacun me hisca xi cahme me.
JOH 13:2 Jesús cojo xuta ladu rë me ne, tijinë nguixun me. Hane cha Judas, quihndi rë Simón Iscariote ne, ha casahmi Satanás xi cuejña cacun cha xi sahmi entregadu cha Jesús.
JOH 13:3 Peru Jesús ne, ha vëë me xi ha cavejña Nina yëjë xcusun tsja me. Hacuaha ha vëë me xi hiscan tacun Nina canduva me, hane hacuaha ngajan ni cuya cjue nga me.
JOH 13:4 Hya xi camá ne, cavejña Jesús xi tijinë me jan ne, cavisatjenhnga me, sehe cavaxë me chingá rë me cavejñaxin me, hane cafaha me ngu toalla cavityanguitaha me.
JOH 13:5 Sehe cafaha me nandá cojo nisu, hane cavetsihin cavane me ntsacu xuta ladu rë me hacuaha catsixiya me cojo toalla xi tyjanguitaha rë me jan.
JOH 13:6 Hane xi cafehe me xcun Simón Pedru ne, cachja Pedru cuitjin: ―‍Tatá, ¿há xi ngayun cuanu ntsacú? ―‍Cuatjin cachja Pedru.
JOH 13:7 Ngajan xi Jesús ne, cuitjin cafayangui me: ―‍Xcusun xi tisahme vi ne, vijnii rcun quihndë, peru ngascan ne, hya cuijne rcun. ―‍Cuatjin cafayangui Jesús.
JOH 13:8 Hane Pedru ne, cuitjin cachja me: ―‍¡Hatuxa tsajin nu tsajin nixtin xi ngayun cuanu ntsacú! ―‍Cuatjin cachja me. Ngajan xi Jesús ne, cuitjin cafayangui me: ―‍Sa xi cuánee ntsacun ne, hacuiin xuta ladu naha ngayun. ―‍Cuatjin cafayangui Jesús.
JOH 13:9 Ngajan xi Simón Pedru ne, cuitjin cachja me cojo Jesús: ―‍Tatá, sa cuatjin ne, ¡hacuiin suvá ni ntsacú ta hacuaha cojo ntsa cojo rcú tanu! ―‍Cuatjin cachja me.
JOH 13:10 Ngajan xi Jesús ne, cuitjin cafayangui me tsëhë Pedru: ―‍Xuta xi ha cavinduya me ne, suvá ni ntsacu me meje rë xi cjuengui ta, tsëhë xi ha tyjahi me. Ngayujun ni ne, ha tyjahi ngayun. Peru ngu ngayun ne, hacuiin cuatjin. ―‍Cuatjin cafayangui Jesús.
JOH 13:11 Tsëhë xi ha vëë Jesús yo xi sahmi rë me entregadu, vëhë xi cachja me xi: “Hacuiin ngayujun xi tyjahi ngayun.”
JOH 13:12 Hane xi cavatju cavane Jesús ntsacu xuta ladu rë me ne, sehe cavuya cavajá me chingá rë me, sehe quiji cafaha nga me cahndë́ rë me xcun maxë. Hane sehe cachja me cojo xuta ladu rë me cuitjin: ―‍¿Há vijne rcun xcusun xi casahme cojo nuju vë?
JOH 13:13 Ngayun ne, maestru niji hacuaha nai niji nújun tsahan. Hane ndatjin xi cuatjin nújun ta, tsëhë xi cuatjin jain.
JOH 13:14 Quihndë ne, quihndë ta ngahan xi nai nuju hacuaha maestru nuju ngahan cavane ntsacun ne, hacuaha meje rë xi cuatjin cuanu ntsacu xingun xingu xingu ngayun.
JOH 13:15 Ngahan ne, cavejñá nuju ngu ejemplu vë, cojo sa xi sacuaha xcusun xi casahme cojo nuju vë ne, hacuaha cuatjin nihñu.
JOH 13:16 Cuichjá cojo nuju cjuaquixi ta ngu mosu hndixahan ne, hacuiin hitsë sa venguichji rë xi cuma rë nai rë, hacuaha ngu xi ningatjun rë ne, hacuiin hitsë sa matitjun xi cuma rë me xi catsingatju rë.
JOH 13:17 Quihndë ta ha vijne rcun cjua vëhë ne, jemu ndaja tsujun sa xi nihñu cuatjin.
JOH 13:18 ’Peru ngahan ne, hacuiin tichjá tsujun ngayujun ni ta ngahan ne, ha hvë yo xi cavaxejen. Peru meje rë xi cuetjucaa cjua xi camahindu xcun xujun rë Nina xi chja cuitjin: “Cha xi cajinë tangun cojo ná ne, camá cha condra naha.” Cuatjin camahindu.
JOH 13:19 Tichjá cojo nuju cjua vëhë quihndë chaja sa xi cuetjucaa, cojo sa xi hya xi cuetjucaa ne, ngayun ne, cumacjain nuju xi Ngahan Vi hmí ná.
JOH 13:20 Cuichjá cojo nuju cjuaquixi ta xuta xi cjuahatsja me tu yo ni xi tsingátju ne, tangun sacuaha xi cjuahatsja ná me ngahan suva. Hane xuta xi cjuahatsja ná me ne, tangun sacuaha xi cjuahatsja me Nahmi naha xi catsingatju ná me. ―‍Cuatjin cachja Jesús cojo xuta ladu rë me.
JOH 13:21 Xi cavatju cachja Jesús cuatjin ne, jemu camandya cacun me, hane cuitjin cachja me: ―‍Cuichjá cojo nuju cjuaquixi ta ngu ngayun ne, nihñu ná entregadu. ―‍Cuatjin cachja me.
JOH 13:22 Hane xuta ladu rë Jesús xi cuacun jan ne, cavutsejenya me xcun xicjin me xingu xingu me. Hvíin camahani me yo tsëhë xi cuatjin cachja Jesús.
JOH 13:23 Hane ngu cha ladu rë Jesús xi jemu vinga rë me ne, tjehen rë Jesús ne, ngajan tijinë cha niñu.
JOH 13:24 Vëhë xi Simón Pedru ne, casahmi rcu me cojo cha vëhë, sehe cachja me cuitjin: ―‍Chjinengunsun rë me yo tsëhë xi chja me. ―‍Cuatjin cachja Pedru.
JOH 13:25 Hane xi catsicuya cha vëhë xcun cha tiña xcun Jesús ne, sehe cavinenguise cha me cuitjin: ―‍Tatá, ¿yo xi nújun vë? ―‍Cuatjin cavinenguise cha.
JOH 13:26 Ngajan xi Jesús ne, cuitjin cafayangui me: ―‍Cha xi suá rë ngu rquí niñu vi hora xi cjuë tsinguísehen quinda ne, cha vëhë xi hacui cha. ―‍Cuatjin cafayangui me. Hane hora xi camá catsinguisehen quinda me niñu jan ne, sehe casua me cha Judas, quihndi rë Simón Iscariote.
JOH 13:27 Hane xi cavatju cafaha Judas ngu rquí niñu jan ne, hora vëhë cavisehen Satanás xahasen rë cha. Ngajan xi Jesús ne, cuitjin cachja me cojo cha: ―‍Xcusun xi nihñu ne, nihñu ni ngu ndiya xa. ―‍Cuatjin cachja Jesús cojo cha.
JOH 13:28 Peru hisca ngu me xi tijinë niñu jan hvíin me mé má cuatjin cachja Jesús cojo cha.
JOH 13:29 Yahnga me ne, catsingataha cacun me xi tsëhë xi Judas yaha cha tsá tujún ne, vëhë xi cachja Jesús cojo cha xi cjue cuatsë cha xi mameje tsëhë suhi o sa xi sua cha tsë tsë xuta yuma.
JOH 13:30 Hane xi cavatju cafaha cha ngu rquí niñu jan ne, ngutjen ni cavetju cha quiji cha. Hora vëhë ne, ha camajñu.
JOH 13:31 Ngajan xi, xi cavetju Judas quiji cha ne, sehe cachja Jesús cuitjin: ―‍Ngahan xi Quihndi rë Xuta Jain Ngahan ne, quihndë cuetsihin cuma jyë cuma hnga ngahan cojo hasen naha, hacuaha ngahan tsingácun hacutjin jemu jyë hnga Nina cojo hasen rë me.
JOH 13:32 Hane sa xi ngahan tsingácun hacutjin jemu jyë hnga Nina cojo Hasen rë me ne, Nina ne, hacuaha tsingacun me hacutjin jemu jyë hnga ngahan cojo hasen naha. Hane ngutjen ni sahmi me cuatjin.
JOH 13:33 Jemu chúva sa nixtin xi cuitejña cojo nuju, tsan. Ngayun ne, cuinchunsun ná, peru quihndë cuichjá cojo nuju sacuatjin cachjá cojo xutaxa rë yungun xi hiscan xi cjuë́ ne, cumaji cuangun.
JOH 13:34 Nguehe cuitéxa nuju ngu cjua xatsë cuitjin: “Meje rë xi nihñu hmu tacún xingun xingu xingu ngayun. Sacuatjin casahme hmu cácun nuju ngahan, cuatjin meje rë xi nihñu hmu tacún xingun.”
JOH 13:35 Hane xi cuatjin tjin cjuahmutacun ngajñi nuju cojo xingun ne, ngajan cumachaya rë yëjë xuta ta ngayun ne, xuta ladu naha má ngayun. ―‍Cuatjin cachja Jesús.
JOH 13:36 Ngajan xi Simón Pedru ne, cuitjin cavinenguise me: ―‍Tatá, ¿jani cuangun ni? ―‍Cuatjin cavinenguise me. Ngajan xi Jesús ne, cuitjin cafayangui me: ―‍Hiscan xi cjuë́ ne, quihndë ne, cumaji cuanguntjengun ná. Peru xi cuma ngascan ne, cuanguntjengun ná. ―‍Cuatjin cafayangui Jesús.
JOH 13:37 Hane Pedru ne, cuitjin cachja me cojo Jesús: ―‍Tatá, tsajin mé má cumaji cjuë́ tjënguë nuju quihndë. Hisca yojo naha suá ngatsë nuju. ―‍Cuatjin cachja Pedru.
JOH 13:38 Ngajan xi Jesús ne, cuitjin cafayangui me: ―‍¿Há xi tuhun yojo nuju ngatsë naha? Cuichjá cojo nuju cjuaquixi ta chaja sa xi squihnda xahnda ne, ngayun ne, ha jyan ndiya cuinújun xi hyúun yo ngahan. ―‍Cuatjin cafayangui Jesús.
JOH 14:1 Quijinduju sa cachja Jesús cojo xuta ladu rë me cuitjin: ―‍Xicamandyaain tacún. Catamangu tacún sa cojo Nina, hacuaha catamangu tacún sa cojo ná.
JOH 14:2 Ngajan ngahnga hiscan tacun Nahmi naha ne, jemu cjín cahndë́ tjin xi cuiyuju yëjë xuta ladu rë me. Sa xi hacuiin cuatjin ne, ngahan ne, ha cachjá cojo nuju. Peru xicamacjiin tacún ta cjuë́ cuë́hëndaja cahndë́ xi cuma nuju.
JOH 14:3 Hane hya xi ha cëjë cavëhë́ndaja cahndë́ xi cuma nuju ne, sehe cúya nga, hane cjuë́cojo nuju, cojo sa xi hiscan xi cuitejña ne, hacuaha ngajan cuinechun.
JOH 14:4 Hacuaha hiscan xi cjuë́ ne, ngayun ne, ha hyun ndiya. ―‍Cuatjin cachja Jesús.
JOH 14:5 Hane Tomás ne, cuitjin cachja me cojo Jesús: ―‍Tatá, hyíín jani cuangun. ¿Hacutjin má xi nújun xi ha hyin ndiya ni? ―‍Cuatjin cachja me.
JOH 14:6 Hane Jesús ne, cuitjin cafayangui me tsëhë Tomás: ―‍Ngahan ne, sacuaha ndiya xi cjui xcun Nina ngahan. Ngahan ne, hatuxa tjin ná cjuaquixi rë Nina, hatuxa tjin ná cjuahñu. Suvá ni xuta xi visehen me ladu naha ne, me vëhë ni xi cuma cuechú me xcun Nina Nahmi naja.
JOH 14:7 Ngatsë rë xi ha hyun ná ne, vëhë xi hatuxa chun Nahmi naha. Quihndë ne, hyun me, hacuaha ha cachutsujun me. ―‍Cuatjin cafayangui Jesús.
JOH 14:8 Ngajan xi Felipe ne, cuitjin cachja me cojo Jesús: ―‍Tatá, ningacun niji Nina Nahmi naja, hane cojo vëhë cumangu tacuín. ―‍Cuatjin cachja Felipe.
JOH 14:9 Ngajan xi Jesús ne, cuitjin cachja me: ―‍Ngahan ne, ha jemu jyë nixtin tejña cojo nuju, hane ¿há hyúun ná ni, Felipe? Xuta xi ha cavëë ná me ne, ha cavëë me Nina Nahmi naja. ¿Hacutjin má xi nújun xi tsingácun nuju Nina Nahmi naja ni?
JOH 14:10 ¿Há macjaain nuju xi ngahan ne, tejñaya xahasen rë Nina Nahmi naja, hane me vëhë ne, jiya me xahasen naha? Cjua xi chjá cojo nuju ne, hacuiin chjá cojo cjuatacun naha suva. Nina Nahmi naja xi jiya me xahasen naha ne, me vëhë sahmi me xa rë me.
JOH 14:11 Catamacjain nuju xi ngahan ne, tejñaya xahasen rë Nina Nahmi naja hacuaha me vëhë ne, jiya me xahasen naha. O sa xi macjaain nuju cjua naha ne, catamacjain nuju ngahan ndastu ngatsë rë cjuarcun xi casahme.
JOH 14:12 Cuichjá cojo nuju cjuaquixi ta xuta xi mangucacun me cojo ná ne, cjuarcun xi sahme ngahan ne, hacuaha cojo me sahmi me. Ha hisca yehe sa cjuarcun sahmi me ta, ngahan ne, cjuë́ tjënguë Nina Nahmi naja.
JOH 14:13 Hane tu mé ni xi chjahyun rë Nina ngatsë rë xi ladu naha ngayun ne, vëhë sahme, cojo sa xi cuma jyë cuma hnga Nina Nahmi naja cojo Hasen rë me ngatsë rë xcusun xi sahme, ngahan xi Quihndi rë me ngahan.
JOH 14:14 Sa xi chjahyun ná ngu cjuandaja ngatsë rë xi ladu naha ngayun ne, ngahan ne, sahme. ―‍Cuatjin cachja Jesús cojo xuta ladu rë me.
JOH 14:15 Quijinduju sa cachja Jesús cuitjin: ―‍Sa xi ngayun nihñu hmu tacún ná ne, hacuaha cuinuhyun sacuatjin vitéxa nuju,
JOH 14:16 hane ngahan cuichjá cojo Nina Nahmi naja, hane tsingatju me ngu nga xi cuisecoo nuju, xi cuejña cahndë́ cojo nuju yëjë nu yëjë nixtin.
JOH 14:17 Hane vëhë ne, vëhë Hasen xi hatuxa tjin rë cjuaquixi rë Nina. Xuta xi marcuaain rë me tsëhë Nina ne, cumaji xi cuisehen Hasen vëhë xahasen rë me ta, tsëhë xi tsijin rë me Hasen vëhë hacuaha hvíin me Hasen vëhë. Peru ngayun ne, hyun Hasen vëhë ta, tsëhë xi tacun cahndë́ cojo nuju hacuaha cuisehen xahasen nuju.
JOH 14:18 ’Ngahan ne, hacuiin cuiyuju nuju suvun ta cúya nga cuitejñacahndë cojo nuju.
JOH 14:19 Ha tu hitsë sa ne, ha quihndë scuiin ná xuta. Peru ngayun ne, chun ná. Hane tsëhë xi ngahan ne, hatuxa tjin ná cjuahñu ne, vëhë xi ngayun ne, hatuxa sacú nuju cjuahñu xatsë.
JOH 14:20 Nixtin hya ne, cuijne rcun xi ngahan ne, tejñaya xahasen rë Nahmi naha, hane ngayun ne, nechunyun xahasen naha, hane ngahan ne, tejñaya xahasen nuju.
JOH 14:21 ’Xuta xi tivihndë sacuatjin vitéxa ne, me vëhë xi hmu cacun ná me. Hane xuta xi cuatjin hmu cacun ná me ne, hacuaha sahmi hmu cacun Nahmi naha me. Ngahan ne, hacuaha sahme hmú cácun me, hacuaha suá cumachaya rë me yo ngahan. ―‍Cuatjin cachja Jesús.
JOH 14:22 Judas, me xi hacuiin cha Judas Iscariote jan ne, cavinenguise me cuitjin: ―‍Tatá, ¿hacutjin má xi tuhun cumachaya niji yo ngayun, hane hacuiin cojo yëjë sa xuta ni? ―‍Cuatjin cavinenguise me.
JOH 14:23 Ngajan xi Jesús ne, cuitjin cafayangui me: ―‍Xuta xi hmu cacun ná me ne, hacuaha cuihndë me tsëhë cjua naha. Hane sahmi hmu cacun Nahmi naha me, hacuaha cuinduvin cuinechinyincahndin xahasen rë me.
JOH 14:24 Xuta xi hacuiin hmu cacun ná me ne, vihndiin me tsëhë cjua naha. Cjua xi tinuhyun vi ne, hacuiin cjua naha suva ta cjua rë Nina Nahmi naja, me xi catsingatju ná.
JOH 14:25 ’Jemu cjín cjua tichjá cojo nuju jinguyëjë rë xi tejña sa cojo nuju.
JOH 14:26 Peru Hasen rë Nina xi tsingatju Nina Nahmi naja xi cuejña cahndë́ naha ne, vëhë cuisecoo nuju, tsinguixi cojo nuju yëjë sa cjua xi machaja, hacuaha tsinguitsjen nuju tsëhë yëjë cjua xi ha cachjá cojo nuju.
JOH 14:27 ’Cjuandaja cjuajeya cuejñá nuju. Cjuandaja cjuajeya naha suá nuju. Peru hacuiin sacuatjin sua xuta ngasunhndë suá nuju. Xicamandyaain tacún, xicamacjiin tacún.
JOH 14:28 Ha canuhyun xi cachjá cojo nuju ta cjuë́ peru cúya nga cuinduva tjënguë nuju. Sa xi ndaja jain hmu tacún ná ne, hacuaha ndama nuju xi cjuë́ tjënguë Nina Nahmi naja ta, Nina Nahmi naja ne, hitsë sa venguichji rë me xi cuma ná ngahan.
JOH 14:29 Ha cachjá cojo nuju quihndë, chaja sa xi cuetjucaa cjua vëhë, cojo sa xi hya xi cuetjucaa ne, ngayun ne, cumacjain nuju.
JOH 14:30 Ha quihndë cuichjaan sa cojo nuju cjín cjua ta, ha nduva Satanás, xi matitjun tsëhë ngasunhndë. Peru ngahan ne, tsajin mé xi cuma sahmi cojo ná.
JOH 14:31 Ngahan ne, sahme sacuatjin cavitexa Nina Nahmi naja, cojo sa xi yëjë xuta ne, cumachaya rë me xi hmú cácun Nina Nahmi naja. ’Nduvun ne, cuanguenxeen tsëhë nguehe. ―‍Cuatjin cachja Jesús.
JOH 15:1 Hacuaha cachja sa Jesús cuitjin: ―‍Ngahan ne, sacuaha nahñu naa cjuaquixi rë xca rë uva ngahan, hane Nahmi naha ne, sacuaha me xi tsicha xcatjë vëhë me.
JOH 15:2 Jima ngu nahñu tsja rë xi vaquiin tú rë ne, vatë me. Hane jima ngu nahñu tsja rë xi vaquí tú rë ne, vatëjñi me tsja langa rë, cojo sa xi cjín sa tú rë cuaquí.
JOH 15:3 Hacuanitjin ni nuju ngayun xi sacuaha nahñu tsja rë jan ngayun ta, cjua xi cachjá cojo nuju ne, ha catsityjahi rë cjuatacun nuju.
JOH 15:4 Nihñutangun sa cjuatacun nuju cojo ná, hane ngahan ne, sahmetangun cjuatacun naha cojo nuju. Ha hyan ta nahñu tsja rë ne, cumaji sua tú rë sa xi tsajin quitahácoo cojo nahñu naa rë. Hacuanitjin ni nuju ngayun ta cumaji ninguitsujun cjuandaja rë Nina sa xi tsajin tjin tangun cjuatacun nuju cojo ná.
JOH 15:5 ’Ngahan ne, sacuaha nahñu naa rë xca rë uva ngahan, hane ngayun ne, sacuaha nahñu tsja rë. Xuta xi tjin tangun cjuatacun rë me cojo ná hacuaha tjin tangun cjuatacun naha cojo rë me ne, me vëhë ne, jercu tsinguitsojo me cjuandaja rë Nina. Vëhë xi sa xi tsajin tjin tangun cjuatacun nuju cojo ná ne, cumaji camahani ninguitsujun cjuandaja rë Nina.
JOH 15:6 Xuta xi tsajin tjin tangun cjuatacun rë me cojo ná ne, cuatju me cuma sacuatjin vatju nahñu tsja rë xca rë uva xi tijñi jan má: chandi rë, sehe xi; sehe chjaya rë cjue cueti.
JOH 15:7 Sa xi nihñu tangun sa cjuatacun nuju cojo ná hacuaha cuiyujucahndë sa cjua naha ngajñi rë cjuatacun nuju ne, chjahyun tu mé ni xi meje nuju, hane sacú nuju.
JOH 15:8 Nahmi naha ne, ma jyë ma hnga me cojo Hasen rë me hya xi ningacun xi xuta ladu naha jain má ngayun xi ninguitsujun cjuandaja rë me.
JOH 15:9 Sacuatjin hmu cacun ná Nahmi naja ne, hacuaha cuanitjin hmú cácun nuju. Xicanichayuun cjuahmutacun naha.
JOH 15:10 Sa xi vinuhyun tsëhë cjua xi vitéxa nuju ne, ngayun ne, hatuxa nichayuun cjuahmutacun naha, sacuatjin ná ngahan xi cavíhndë tsëhë cjua xi cavitexa ná Nahmi naha hacuaha tsichayaan cjuahmutacun rë me.
JOH 15:11 ’Cuatjin chjá cojo nuju, cojo sa xi cjuasua xi tjin ná ne, cuejña cahntsua xahasen nuju, sehe jercu tu ndaja camahani cuma nuju.
JOH 15:12 Vihi cjua xi vitéxa nuju: nihñu hmu tacún xingun xingu xingu ngayun, sacuatjin sahme hmú cácun nuju ngahan.
JOH 15:13 Tsajin yo xi hitsë sa jyë cjuahmutacun tjin rë xi cuma rë ngu xuta xi sua me yojo rë me ngatsë rë amigu rë me.
JOH 15:14 Hane ngayun ne, amigu naha má ngayun, sa xi nihñu sacuatjin xi vitéxa nuju.
JOH 15:15 Ha quihndë cuichjaan xi hndixahan naha ngayun ta, tsëhë xi ngu mosu hndixahan ne, hvíin mé xi sahmi nai rë. Ngayun ne, amigu naha chjá tsujun ta, tsëhë xi yëjë cjua xi cáhndë xi cachja Nahmi naha ne, casuá camachaya nuju.
JOH 15:16 Hacuiin ngayun canaxujun ná ta ngahan cavaxejen nuju. Hacuaha casuáxa nuju xi cuangun ninguitsujun cjuandaja rë Nina. Hane cjuandaja vëhë ne, tsajin nu tsajin nixtin xi cjuë. Xi cuatjin nihñu ne, tu mé ni xi chjahyun rë Nina Nahmi naja ngatsë rë xi xuta ladu naha má ngayun ne, sua nuju me.
JOH 15:17 Vihi cjua xi vitéxa nuju: nihñu hmu tacún xingun xingu xingu ngayun. ―‍Cuatjin cachja Jesús.
JOH 15:18 Quijinduju sa cachja Jesús cuitjin: ―‍Sa xi choho vëë nuju xuta xi marcuaain rë tsëhë Nina ne, suá cumachaya nuju ta chaja sa xi choho scuëë nuju me ne, ngahan ne, ha choho vëë ná me.
JOH 15:19 Sa xi hacuaha xuta xi marcuaain rë tsëhë Nina má ngayun ne, xuta xi cuacun vë ne, sahmi hmu cacun nuju me ta, ngayun ne, ladu rë me ngayun. Peru tsëhë xi ngayun ne, hacuiin xuta xi marcuaain rë tsëhë Nina má ngayun ta ngahan cavaxejen nuju xi cuetjunxun tsëhë xuta xi cuacun vë, vëhë xi choho vëë nuju me.
JOH 15:20 Ninguitsjun cjua xi cachjá cojo nuju hya xi cachjá cojo nuju cuitjin: “Ngu mosu hndixahan ne, hacuiin hitsë sa venguichji rë xi cuma rë nai rë.” Sa xi catsujyihiya tjengui ná xuta cojo cjuahngatacun ne, hacuaha tsujyihiyatjengui nuju me cojo cjuahngatacun. Sa xi cahndë me tsëhë cjua naha ne, hacuaha cuihndë me tsëhë cjua nuju ngayun.
JOH 15:21 Yëjë xcusun vëhë sahmi xuta xi cuacun vë cojo nuju ngatsë naha ta, tsëhë xi hvíin me Nina, me xi catsingatju ná.
JOH 15:22 Tsajin mé jyë́ quitjen xuta xi cuacun vë sa xi canduvaan cachjá cojo rë me. Peru quihndë ne, sacuinyiin rë me mé xi cuichja me xi cuaxëtje me yojo rë me.
JOH 15:23 Xuta xi choho vëë ná ngahan ne, hacuaha cojo Nahmi naha choho vëë me.
JOH 15:24 Tsajin mé jyë́ quitjen xuta xi cuacun vë sa xi casahmee ngajñi rë me cjuarcun xi tsajin sa ngu xuta xi ha casahmi me. Peru quihndë ne, ha cavëë me cjuarcun xi casahme, hane choho vëë ná me cojo Nahmi naha.
JOH 15:25 Peru cuatjin camá cojo sa xi cuetjucaa cjua xi camahindu xcun xujun rë Nina xi chja xuta xi cuacun vë xi jemu vihndë me tsëhë, cjua xi chja cuitjin: “Choho cavëë ná me, handasa vechiin chuva rë.” Cuatjin chja cjua jan.
JOH 15:26 ’Cuinduva Hasen rë Nina, xi hatuxa tjin rë cjuaquixi rë Nina, hane cuisecoo nuju. Ngahan tsingátju nuju Hasen vëhë xi cuetju hiscan tacun Nina Nahmi naja, hane xi cjuehe ne, cuichja tsahan.
JOH 15:27 Hacuaha ngayun ne, cuinújun tsahan cojo xuta, tsëhë xi ngayun ne, ha nechun cojo ná hisca ntsacu cavetsihin.
JOH 16:1 ’Cuatjin tichjá cojo nuju, cojo sa xi hacuiin cuetjunxun tsëhë ndiya naha.
JOH 16:2 Cuechú nixtin xi cumachohotje nuju yungun. Cuechú nixtin xi xuta xi tsiquehen nuju me ne, tsingataha cacun me xi jemu ndaja faharcun me Nina xi cuatjin sahmi me.
JOH 16:3 Cuatjin sahmi me ta, tsëhë xi hvíin me Nina Nahmi naja, hacuaha vijnii rcu me yo ngahan.
JOH 16:4 Cachjá cojo nuju cjua vëhë, cojo sa xi hya xi cuechú hora xi cuetjucaa ne, ninguitsjun xi cuatjin cachjá cojo nuju. ―‍Cuatjin cachja Jesús. Quijinduju sa cachja Jesús cuitjin: ―‍Cachjaan cojo nuju cjua vëhë ntsacu cavetsihin ta, tsëhë xi ngahan ne, tejña cuaha cojo nuju.
JOH 16:5 Peru quihndë ne, cjuë́tjënguë me xi catsingatju ná, hane hisca ngu ngayun ne, chjinengunsuun ná jani cjuë́.
JOH 16:6 Hane tsëhë xi cuatjin cachjá cojo nuju cjua vëhë ne, ña catsë rë xahasen nuju cjuachoho.
JOH 16:7 Peru ngahan ne, cuichjá cojo nuju cjuaquixi ta tsujun ndaja xi cjuë́ ta, sa xi cjueen ne, Hasen xi cuisecoo nuju jan ne, hatuxa cuinduvaain. Peru sa xi cjuë́ ne, tsingátju nuju Hasen rë Nina vë.
JOH 16:8 Hane hya xi Hasen vëhë cuinduva ne, vëhë tsinguixi xi hacuiin cuatjin xi tsingataha cacun xuta tsëhë cjuatsehen, hacuiin cuatjin xi tsingataha cacun me tsëhë cjuandaja, hacuiin cuatjin xi tsingataha cacun me tsëhë chuva rë xi cjuahachuva Nina xuta cojo cjuatacun rë me.
JOH 16:9 Hacuiin cuatjin xi tsingataha cacun xuta tsëhë cjuatsehen ta, tsëhë xi manguaain cacun me cojo ná.
JOH 16:10 Hacuiin cuatjin xi tsingataha cacun xuta tsëhë cjuandaja ta, tsëhë xi ngahan ne, cjuë́tjënguë Nina Nahmi naja hane ngayun ne, ha quihndë chuun ná.
JOH 16:11 Hacuiin cuatjin xi tsingataha cacun xuta tsëhë xi cjuahachuva Nina xuta cojo cjuatacun rë me ta, tsëhë xi Satanás, xi matitjun tsëhë ngasunhndë vihi ne, ha catsichuva Nina cojo cjuatacun rë.
JOH 16:12 ’Jemu tjin sa ná cjua xi cuichjá cojo nuju, peru ngayun ne, scaain nuju cuinuhyun quihndë.
JOH 16:13 Peru hya xi cuinduva Hasen xi hatuxa tjin rë cjuaquixi rë Nina ne, vëhë cuinchandiyandaja nuju ndiya rë cjuaquixi. Hacuiin cojo cjuatacun rë suvá xi cuichja ta sacuatjin cjua xi chja Nina cojo ne, cjua vëhë cuichja. Hacuaha vëhë cuichja cojo nuju hacutjin cuma nixtin nduva.
JOH 16:14 Hasen vëhë ne, vëhë sahmi jyë sahmi hnga ná cojo cjuatacun naha ta, tsëhë xi vëhë cjuaha xi tsahan sehe sua cumachaya nuju tsahan.
JOH 16:15 Yëjë ni xi tsëhë Nina Nahmi naja ne, hacuaha tsahan. Vëhë xi cachjá xi Hasen jan ne, cjuaha xi tsahan sehe sua cumachaya nuju tsahan. ―‍Cuatjin cachja Jesús.
JOH 16:16 Hacuaha cachja sa Jesús cuitjin: ―‍Ha tu hitsë sa ne, ha quihndë chuun ná, hane ha tu hitsë nga sa ne, chun ná. ―‍Cuatjin cachja Jesús.
JOH 16:17 Ngajan xi ngujo xuta ladu rë Jesús jan ne, cuitjin cachja me cojo xicjin me: ―‍¿Mé vijne cjua xi cuatjin chja me cojo naja? Chja me xi: “Ha tu hitsë sa ne, chuun ná, hane ha tu hitsë nga sa ne, chun ná”, hacuaha chja sa me xi: “Tsëhë xi cjuë́ tjënguë Nina Nahmi naja”.
JOH 16:18 ¿Mé vijne cjua xi “ha tu hitsë sa”? Vijnii rcuun mé xi chja me. ―‍Cuatjin cachja me cojo xicjin me.
JOH 16:19 Jesús ne, ha vëë me xi meje cjuinenguise xuta xi cuacun jan me tsëhë cjua vëhë, vëhë xi Jesús ne, cachja me cojo rë xuta jan cuitjin: ―‍¿Há tichjinengunsun xingun tsëhë xi cachjá xi ha tu hitsë sa ne, chuun ná hane ha tu hitsë nga sa ne, chun ná?
JOH 16:20 Cuichjá cojo nuju cjuaquixi ta ngayun ne, chjihndun hacuaha chjihndunsun, peru xuta xi marcuaain rë me tsëhë Nina ne, jercu ndaja cuma rë me. Ngayun ne, jemu choho cuma nuju, peru cjuachoho nuju ne, cuya sua.
JOH 16:21 Hya xi ngu chjuun tsin rë me quihndi ne, jemu tjin rë me cjuachoho ta, tsëhë xi cavechú hora xi cuatju me cjuañihi. Peru hya xi cavatju catsin quihndi ne, ha quihndë vitsjiin rë me tsëhë cjuañihi jan, ngatsë rë cjuasua rë me xi catsin ngu quihndi.
JOH 16:22 Cuatjin nuju ngayun ta quihndë ne, tjin nuju cjuachoho. Peru ngahan ne, cúya scuëë nga nuju, hane ngayun ne, jemu ndaja cuma rë xahasen nuju, hane cjuasua nuju jan ne, tsajin yo cuma cjuahatahá.
JOH 16:23 Hane nixtin hya ne, chjinengunsuun ná hisca ngu cjua. ’Cuichjá cojo nuju cjuaquixi ta tu mé ni xi chjahyun rë Nina Nahmi naja ne, sua nuju me tsëhë xi ladu naha má ngayun.
JOH 16:24 Hisca quihndë ne, cjëë chjahyun ná ngu cjuandaja tsëhë xi ladu naha má ngayun. Chjahyun ne, sehe sacú nuju, cojo sa xi xahasen nuju ne, tsë rë cjuasua. ―‍Cuatjin cachja Jesús.
JOH 16:25 Quijinduju sa cachja Jesús cuitjin: ―‍Ngahan ne, cojo ejemplu cachjá cojo nuju. Peru cuechú nixtin xi ha quihndë hacuiin cojo ejemplu cuichjá cojo nuju ta cuichjáquixë cojo nuju tsëhë Nina Nahmi naja.
JOH 16:26 Nixtin hya ne, hatuxa chjahyun cjuandaja tsëhë xi ladu naha má ngayun. Hane chjaan cojo nuju xi cuichjá ngatsë nuju cojo Nina Nahmi naja ta,
JOH 16:27 suvá Nina Nahmi naja ne, jemu meje rë me ngayun, tsëhë xi ngayun ne, hacuaha jemu meje nuju ngahan hacuaha macjain nuju xi ngahan ne, Nina catsingatju ná me.
JOH 16:28 Ngahan ne, hiscan tacun Nina cavétju canduvá nguehe ngasunhndë. Quihndë ne, cuétju tsëhë ngasunhndë, cúya cjuë́tjënguë Nina Nahmi naja. ―‍Cuatjin cachja Jesús.
JOH 16:29 Ngajan xi xuta ladu rë Jesús ne, cuitjin cachja me: ―‍Chutsujun ni. Quihndë ne, hacuiin cojo ejemplu tinújun ta tinújunquixun.
JOH 16:30 Quihndë ne, hyin ta ngayun ne, hyun yëjë ni cjuatacun, hacuaha hacuiin sahmi ngujyë xi cjuinenguise nuju xuta ngu cjua cojo sa xi cumachaya nuju mé xi tsingataha cacun xuta jan. Ngatsë rë vëhë xi macjain niji xi Nina catsingatju nuju me. ―‍Cuatjin cachaja xuta ladu rë Jesús.
JOH 16:31 Ngajan xi Jesús ne, cuitjin cafayangui me: ―‍¿Há macjain jain nuju quihndë?
JOH 16:32 Chutsujun ni. Cuechú hora o ha hisca cavechú xi cuitsojo ngayun, jima ngu ngayun cojo ndya nuju, hane cuejñu ná suva. Peru ngahan ne, hacuiin suva tejña ta Nina Nahmi naja tacun me cojo ná.
JOH 16:33 Cuatjin chjá cojo nuju cojo sa xi sacú nuju cjuandaja cjuajeya ngatsë rë xi tjin tangun cjuatacun nuju cojo ná. Nguehe ngasunhndë ne, vatjun cjuañihi. Peru tuhun cjuasua xahasen nuju ta, ngahan ne, hacuaha cacaa ná catsinguíjne cjuatsehen rë ngasunhndë. ―‍Cuatjin cachja Jesús cojo xuta ladu rë me jan.
JOH 17:1 Xi cavatju cachja Jesús cuatjin ne, sehe cavutsejenniji me ngahnga, hane cachja me cuitjin: ―‍Ngayun Nahmi naha, ha cavechú hora. Nihñu jyë nihñu hnga ná cojo Hasen naha ngahan xi Quihndi nuju ngahan, cojo sa xi ngahan ne, hacuaha sahme jyë sahme hnga nuju cojo Hasen nuju.
JOH 17:2 Ngayun catuhunxun ná xi matitjun ngahan tsëhë yëjë xuta, cojo sa xi yëjë me xi catuhun ná ne, suá rë me cjuahñu xatsë.
JOH 17:3 Hane cuitjin xi sacú rë me cjuahñu xatsë, xi vëë me ngayun, ngayun xi ngu ni ngayun xi Nina xi cjuaquixi ngayun, hacuaha xi vëë ná me, ngahan xi Jesucristu ngahan, ngahan xi ngayun caningatjun ná.
JOH 17:4 Ngahan ne, casahme jyë casahme hnga nuju nguehe ngasunhndë ta, catsinguíjnetaha xa xi catuhun ná xi sahme.
JOH 17:5 Quihndë ne, nihñu jyë nihñu hnga ná cojo Hasen naha ndyá hiscan nechun, ngayun Nahmi naha. Tuhun ná Hasen ndajyihi xi ha tjin ná hya xi nechan tangun cojo nuju hisca hya xi chaja sa cuejña ngasunhndë.
JOH 17:6 ’Ngahan ne, casuá camachaya rë xuta xi catuhun ná nguehe ngasunhndë yo ngayun. Me xi cuacun vë ne, tsujun me, peru catuhun ná me. Hane cahndë me tsëhë cjua nuju.
JOH 17:7 Ha vëë me quihndë xi yëjë ni xcusun xi catuhun ná ne, ngayun caningatjun.
JOH 17:8 Cuatjin vëë me ta, tsëhë xi yëjë ni cjua xi catuhun ná ne, hacuaha casuá rë me. Hane me xi cuacun vë ne, cafahatsja me cjua vëhë, hacuaha vëëndaja me xi hiscan nechun cavétju canduvá nguehe, hacuaha macjain rë me xi ngayun caningatjun ná.
JOH 17:9 ’Ngahan ne, tichjá cojo nuju ngatsë rë me xi cuacun vë. Tichjaan ngatsë rë xuta xi marcuaain rë tsujun ta tichjá ngatsë rë me xi catuhun ná, tsëhë xi tsujun me.
JOH 17:10 Yëjë ni xi tsahan ne, hacuaha tsujun, hane xi tsujun ne, hacuaha tsahan. Hane ngahan ne, cama jyë cama hnga ngahan cojo Hasen naha ngatsë rë xi tjin tangun cjuatacun rë me xi cuacun vë cojo ná.
JOH 17:11 Ha quihndë cuitejñaa sa nguehe ngasunhndë. Me xi cuacun vë ne, siu me ngasunhndë, peru ngahan ne, cuinduvatjënguë nuju. Ngayun Nahmi naha, ngayun xi hatuxa tyjahi cjuatacun nuju ne, nihñu me cuidadu cojo ngahñu nuju, ngahñu xi catuhun ná, cojo sa xi tjin tangun cjuatacun rë me cojo xicjin me, sacuatjin naja ngayaan.
JOH 17:12 Hya xi tejña cojo rë me ne, casahme cuidadu me cojo ngahñu nuju xi catuhun ná. Casahme cuidadu me, hane hisca ngu me cachajin me. Suvá ni cha xi hatuxa chajá ne, cha vëhë xi cachajá cha, cojo sa xi cuetjucaa cjua xi camahindu xcun xujun nuju.
JOH 17:13 Peru quihndë ne, cuinduvatjënguë nuju. Hane tichjá cjua vihi nguehe ngasunhndë, cojo sa xi xuta ladu naha ne, tsë́ rë xahasen rë me cojo cjuasua xi quitsë rë xahasen naha suva.
JOH 17:14 Ngahan ne, casuá camachaya rë me cjua nuju. Hane xuta ngasunhndë xi marcuaain rë tsujun ne, choho vëë rë me, tsëhë xi hacuiin tsëhë ngasunhndë má me, sacuatjin ná ngahan xi hacuiin tsëhë ngasunhndë má ngahan.
JOH 17:15 Cjuehyaan nuju xi naxunxun me tsëhë ngasunhndë ta tiféhya nuju xi nihñu me cuidadu tsëhë Satanás.
JOH 17:16 Xuta ladu naha jan ne, hacuiin tsëhë ngasunhndë má me, sacuatjin ná ngahan xi hacuiin tsëhë ngasunhndë má ngahan.
JOH 17:17 Nihñu tsujun jain me cojo cjua xi hatuxa cjuaquixi. Cjua nuju ne, vëhë xi hmí rë cjuaquixi.
JOH 17:18 Sacuatjin caningatjun ná ngahan ngajñi rë xuta xi marcuaain rë tsujun ne, hacuaha cuatjin catsingátju xuta ladu naha ngajñi rë xuta xi cuacun vë.
JOH 17:19 Hane ngatsë rë xuta ladu naha ne, suá nuju yojo naha, cojo sa xi me xi cuacun vë ne, hacuaha tsujun jain cuma me cojo cjuaquixi.
JOH 17:20 ’Quihndë ne, hacuiin ngatsë rë suvá ni xuta ladu naha vi xi tichjá cojo nuju ta hacuaha cojo ngatsë rë me xi sehe cumangu cacun cojo ná xi cuihndë me cjua xi chja xuta ladu naha tsahan.
JOH 17:21 Ngahan ne, xi meje ná ne, xi yëjë ni me xi cuacun vë ne, cuma tangun cjuatacun rë me cojo xicjin me. Sacuatjin nuju ngayun, Nahmi naha, xi nechunyun xahasen naha hane ngahan ne, tejñaya xahasen nuju ne, meje ná xi me xi cuacun vë ne, hacuaha hincha me xahasen naja, cojo sa xi xuta ngasunhndë ne, cumacjain rë me xi ngayun caningatjun ná.
JOH 17:22 Ngahan ne, casahme yehe casahme hnga me cojo cjuatacun rë me sacuatjin canihñu jyë canihñu hnga ná ngahan cojo cjuatacun naha, cojo sa xi cuma tangun cjuatacun rë me cojo xicjin me, sacuatjin tjin tangun cjuatacun naja ngayaan cojo xingueen.
JOH 17:23 Meje ná xi ngahan ne, cuitejñaya xahasen rë me, sacuatjin nechunyun xahasen naha. Meje ná xi cuma tangun camahani cjuatacun rë me cojo xicjin me, cojo sa xi xuta ngasunhndë ne, cuijne rcu me xi ngayun caningatjun ná, hacuaha xi nihñu hmu tacún me sacuatjin nihñu hmu tacún ná ngahan.
JOH 17:24 ’Ngayun, Nahmi naha, xuta xi catuhun me xi cuma me ladu naha ne, meje ná xi hiscan xi cuitejña ne, hacuaha ngajan cuiyuju me cojo ná, cojo sa xi scutsejen me hacutjin jyë hnga ngahan cojo hasen ndajyihi naha xi ngayun catuhun ná, tsëhë xi canihñu hmu tacún ná hisca chaja sa xi cuejña ngasunhndë.
JOH 17:25 Ngayun Nahmi naha, ngayun xi quixi ngayun cojo cjuatacun nuju, xuta ngasunhndë ne, hvíin nuju me, peru ngahan ne, hvë nuju, hane xuta ladu naha vi ne, vëë me xi ngayun caningatjun ná.
JOH 17:26 Ngahan casuá camachaya rë me yo ngayun, hane suá sa cumachaya rë me, cojo sa xi cjuahmutacun xi tjin nuju cojo ná ne, cuejña cahntsua xahasen rë me hacuaha ngahan ne, cuitejña cahntsua xahasen rë me. ―‍Cuatjin cafehya Jesús cjuandaja cojo Nina.
JOH 18:1 Hya xi camá ne, xi cavatju cachja Jesús cjua vëhë ne, sehe cavetju me quiji me cojo xuta ladu rë me ngunda vëhë tsëhë caniña Cedrón. Hane ngajan cavisehen Jesús cojo xuta ladu rë me ngu ngajñi yatjë xi tjin jan.
JOH 18:2 Quihndë ne, cha Judas, cha xi sahmi rë entregadu Jesús ne, hacuaha vëë cha cahndë́ vëhë ta, jemu quiji Jesús cahndë́ vëhë camatangun me cojo xuta ladu rë me.
JOH 18:3 Ngajan xi cha Judas ne, quijicojo cha ngujo sindadu cojo cha mayu cojo cha nisë rë cha, cha xi catsingatju nahmi xi matitjun cojo cha fariseo. Quiji cha xi cuacun jan ngajan cojo ndihi cojo quicha.
JOH 18:4 Hane Jesús ne, tsëhë xi ha vëë me yëjë xcusun xi cuatju me cuma ne, quijivaha me xcun cha xi cuacun jan, sehe cavinenguise me cha cuitjin: ―‍¿Yo xi meje nuju? ―‍Cuatjin cavinenguise me.
JOH 18:5 Ngajan xi cha xi cuacun jan ne, cuitjin cafayangui cha: ―‍Xuta Nasaret xi hmí rë Jesús. ―‍Cuatjin cafayangui cha. Hane Jesús ne, cuitjin cachja me: ―‍Ngahan xi nújun vë. ―‍Cuatjin cachja me. Quihndë ne, Judas, cha xi sahmi rë me entregadu ne, cojo cha secun cha cojo cha xi cuacun vë.
JOH 18:6 Hane hya xi cachja Jesús xi: “Ngahan xi nújun vë” ne, quijingaxtun yëjë cha xi cuacun jan, hane caticja cha.
JOH 18:7 Ngajan xi Jesús ne, cavinenguise nga me cha cuitjin: ―‍¿Yo xi meje nuju? ―‍Cuatjin cavinenguise me. Hane cha xi cuacun jan ne, cuitjin cachja nga cha: ―‍Xuta Nasaret xi hmí rë Jesús. ―‍Cuatjin cachja cha.
JOH 18:8 Hane Jesús ne, cuitjin cafayangui me: ―‍Ha cachjá cojo nuju ta ngahan xi nújun vë. Sa xi ngahan meje nuju ngahan ne, tuhun cahndë́ catje me xi cuicun vi. ―‍Cuatjin cafayangui me.
JOH 18:9 Cuatjin cachja Jesús cjua vëhë cojo sa xi cuetjucaa cjua xi ha cachja me cuitjin: “Xuta xi catuhun ná me ne, hisca ngu me catsichajan me.”
JOH 18:10 Ngajan xi Simón Pedru ne, cavaxë me quichandujú xi yaha me, hane cavatësun me tyjavañuju quixi mosu hndixahan rë nahmi xi matitjun jan, cha xi hmí rë Malco.
JOH 18:11 Ngajan xi Jesús ne, cuitjin cachja me cojo Pedru: ―‍Teyunndujun quicha nuju vë. Hatuxa tsingatehen xi cuátju cjuañihi sacuatjin xi meje rë Nina Nahmi naja. ―‍Cuatjin cachja Jesús.
JOH 18:12 Hya xi camá ne, cha sindadu cojo capitán rë cha, cojo mayu cojo cha nisë rë cha, cha xi catsingatju xutaxa rë yungun jan ne, cafaha cha Jesús, catsihñu cha me,
JOH 18:13 sehe quiji cani cha me titjun xcun Anás. Anás vë ne, nahmichahya rë Caifás má me. Hane nu vëhë ne, nahmi xi matitjun tsëhë yëjë ni nahmi má Caifás.
JOH 18:14 Quihndë ne, Caifás vë ne, me vëhë xi cavinchangui me xutaxa rë xi ndaja tsëhë xutaxa rë xi ngu xihin ni cueya ngatsë rë yëjë ni xuta.
JOH 18:15 Quihndë ne, Simón Pedru cojo ngu sa cha ladu rë Jesús jan ne, tjengui me quiji me cojo Jesús. Hane cha ladu rë Jesús xingu jan ne, tsëhë xi vëë nahmi xi matitjun jan cha ne, cojo cha cavisehen cha cojo Jesús cahntsua hnchua ndatsen ndava nahmi xi matitjun jan.
JOH 18:16 Peru Pedru ne, casecun ni me ngajan candatsen tingotjo hnchua jan. Ngajan xi cha ladu rë Jesús xi vëë nahmi jan ne, cavetju nga cha quiji cachja cha cojo na xi quitahá cuidadu rë tingotjo hnchua jan. Hane sehe catsinguisehen cha Pedru cahntsua hnchua.
JOH 18:17 Hane na xi sahmi cuidadu tingotjo hnchua jan ne, cuitjin cavinenguise rë na Pedru: ―‍¿Hacuiin cojo ngayun má ngayun ladu rë me xi cuajyihi vë? ―‍Cuatjin cavinenguise na. Hane Pedru ne, cuitjin cafayangui me: ―‍Jéya, hacuiin. ―‍Cuatjin cafayangui me.
JOH 18:18 Hane mosu rë nahmi jan cojo cha sindadu jan ne, cavejña cha ngu ndava ndihi, tsëhë xi jemu hnchan. Sehe hinchacun cha tijima hasu rë cha jan. Hacuaha cojo Pedru secun me jan, jima hasu rë me.
JOH 18:19 Hane xi cafehe cha xi cuacun jan cojo Jesús jan ne, sehe cavetsihin cafahatáha nahmi xi matitjun jan me tsëhë xuta ladu rë me cojo tsëhë cjuachacun rë me.
JOH 18:20 Hane Jesús ne, cuitjin cafayangui me: ―‍Ngahan ne, xcun cojo xcun cachjá cojo yëjë ni xuta, hacuaha cavicuyá rë me ngajan yungun langa o sa xi ngajan yungun xi matitjun, hiscan xi matangun ngayejen ni xuta tjë rë Israel. Tsajin mé xi cachjá xi táhahma.
JOH 18:21 Hane ¿mé má ngahan chjuhuntuhun ná ni? Chjuhuntuhun rë me xi cahndë cjua naha. Chjinengunsun rë me mé xi cachjá cojo rë me. Me xi cuacun vë ne, vëë me cjua xi cachjá. ―‍Cuatjin cafayangui Jesús.
JOH 18:22 Hane xi cuatjin cachja Jesús cjua vëhë ne, ngu cha mayu xi secun tiña jan ne, cavajaya cha ngu xcun Jesús, sehe cachja cha cuitjin cojo rë me: ―‍¿Há cuatjin chjayengui tsëhë nahmi xi matitjun? ―‍Cuatjin cachja cha.
JOH 18:23 Ngajan xi Jesús ne, cuitjin cafayangui me tsëhë cha: ―‍Sa xi choho cachjá ne, tinújun cojo yëjë xuta mé xi choho cachjá. Peru sa xi ndaja cachjá ne, ¿mé má cuatjin vujun ná ni? ―‍Cuatjin cafayangui me.
JOH 18:24 Ngajan xi Anás ne, hacuanitjin ni tjihñu cuaha Jesús ne, catsingatju me Jesús xcun nahmi xi matitjun tsëhë yëjë ni nahmi.
JOH 18:25 Jinguyëjë rë xi tichjahátáha rë Jesús jan ne, Pedru ne, secun me xcun ndihi tijima hasu rë me. Hane cachjahátáha rë me cuitjin: ―‍¿Hacuiin cojo ngayun má ngayun ladu rë me vëhë? ―‍Cuatjin cachjahátáha rë me. Hane Pedru ne, cavetsangui me, cuitjin cachja me: ―‍Jéya, hacuiin. ―‍Cuatjin cachja me.
JOH 18:26 Ngajan xi ngu mosu rë nahmi xi matitjun jan, cha xi xicjin rë cha xi cavatësun Pedru tyjavañuju jan ne, cuitjin cachja cha cojo Pedru: ―‍¿Há cahveen nuju cojo rë me ngajñi yatjë jan ni? ―‍Cuatjin cachja cha.
JOH 18:27 Cavetsangui nga Pedru ngu ndiya. Hane ha hora vëhë ni ne, cajihnda xahnda.
JOH 18:28 Ngajan xi xuta matitjun tsëhë xuta tjë rë Israel jan ne, cavaxë me Jesús tsëhë ndava Caifás, hane quijicojo me ndihya jyë hiscan tacun Pilatu, xutaxa rë xi matitjun. Nguitajñu xati hora vëhë. Hane xuta xi quijicojo rë Jesús jan ne, cavisiin me cahntsua ndihya jyë jan, ngatsë rë xcusun rë me xi ma chocun yojo rë me xcun Nina hya xi visehen me ndava xutaxín. Hane sa xi cuatjin cuma chocun yojo rë me ne, cumaji sinë nguixun me comida suhi tsëhë Pascua.
JOH 18:29 Vëhë xi cavetju Pilatu quijitjengui rë me candatsen. Hane cuitjin cavinenguise me: ―‍¿Mé jyë́ vinchun tsëhë cha xi cuijyihi vi? ―‍Cuatjin cavinenguise Pilatu.
JOH 18:30 Hane xuta xi cuacun jan ne, cuitjin cafayangui me: ―‍Sa xi hacuiin choho tisahmi cha ne, canduvinchanii nuju cha. ―‍Cuatjin cafayangui me.
JOH 18:31 Hane Pilatu ne, cuitjin cachja me: ―‍Chjuhun cha ne, chjuhunchuvun suvun cha cojo jyë́ rë cha sacuatjin chja ley nuju. ―‍Cuatjin cachja Pilatu. Ngajan xi xutaxa rë yungun xi cuacun jan ne, cuitjin cachja me: ―‍Ley nuju ngayun ne, chja ta ngayin ne, cumaji niquihin xuta. ―‍Cuatjin cachja xuta xi cuacun jan.
JOH 18:32 Cuatjin camá cojo sa xi cuetjucaa cjua xi cachja Jesús hya xi cachja me mé chuva rë cueya me.
JOH 18:33 Ngajan xi Pilatu ne, cavuya cavisehen nga me ndihya. Hane cajindaya me Jesús, sehe cavinenguise me cuitjin: ―‍¿Há ngaye xu matitjun ngaye tsëhë xuta tjë rë Israel? ―‍Cuatjin cavinenguise me.
JOH 18:34 Hane Jesús ne, cuitjin cafayangui me: ―‍¿Há cojo cjuatacun nuju suvun chjinengunsun ná cjua vëhë?, o há tsajin ne, ¿há tjin yo cachja cojo nuju tsahan? ―‍Cuatjin cafayangui me.
JOH 18:35 Ngajan xi Pilatu ne, cuitjin cafayangui me: ―‍¡Peru ngahan ne, hacuiin xuta Israel ngahan! Suvá xuta nangui riji cojo nahmi xi matitjun casahmi ri me entregadu cojo ná. ¿Mé canihñi? ―‍Cuatjin cafayangui Pilatu.
JOH 18:36 Ngajan xi Jesús ne, cuitjin cafayangui me: ―‍Xa naha xi sahme gubiernu ne, hacuiin ngasunhndë vihi cafahántsa. Sa xi ngasunhndë vihi cafahántsa xa xi sahme gubiernu ne, xuta ladu naha ne, scaan me cojo sa xi cumaji cuma ngahan entregadu tsja xutaxa rë yungun. Peru xa naha xi sahme gubiernu ne, hacuiin nguehe cafahántsa. ―‍Cuatjin cafayangui Jesús.
JOH 18:37 Hane Pilatu ne, cuitjin cachja me cojo Jesús: ―‍¿Ngajan xi ngaye xi matitjun ngaye ni? ―‍Cuatjin cachja me. Hane Jesús ne, cuitjin cafayangui me: ―‍Cuatjin sacuatjin nújun vë. Ngahan ne, canduvá nguehe ngasunhndë hacuaha catsin ngahan cojo sa xi cuichjá cojo xuta cjua xi cjuaquixi. Yëjë xuta xi marcun rë me tsëhë cjuaquixi ne, hatuxa vetaharcu me cjua naha. ―‍Cuatjin cafayangui Jesús.
JOH 18:38 Hane Pilatu ne, cuitjin cachja me: ―‍¿Mé xi hmí rë cjuaquixi ni? ―‍Cuatjin cachja Pilatu. Hane xi cafë cachja Pilatu cjua vëhë ne, sehe cavetju nga me quiji cachja me cojo xutaxa rë yungun, cuitjin cachja me: ―‍Sacuiin ná hisca ngu jyë́ rë cha xi cuajyihi vë.
JOH 18:39 Peru ngayun ne, tjin nuju ngu xcusun xi tsisme ngu presu nixtin rë suhi rë Pascua. ¿Há meje nuju xi tsisme me xi matitjun tsujun? ―‍Cuatjin cachja me.
JOH 18:40 Hane xuta xi cuacun jan ne, cajindaya me cachja me cuitjin: ―‍¡Hacuiin cha vëhë ta Barrabás nismu cha! ―‍Cuatjin cajindaya me cachja me. Quihndë ne, Barrabás jan ne, ngu cha fahataha cjuachan cha.
JOH 19:1 Ngajan xi Pilatu ne, catsingatju me Jesús casehen rë me.
JOH 19:2 Hane cha sindadu xi cuacun jan ne, xi camá catsihya cha ngu corona nahyá ne, sehe cavesun cha rcu Jesús, hacuaha catsicaja cha me ngu tsjian moradu.
JOH 19:3 Hya xi camá ne, quijivaha cha jima ngu cha xcun me, sehe cavetsihin cavincha cha viva rë me xi tsixcuehyu cha me sacuaha xi me vëhë matitjun me tsëhë xuta tjë rë Israel. Hacuaha cavajaya cha xcun me.
JOH 19:4 Hya xi camá ne, Pilatu ne, cavetju nga me candatsen, hane cuitjin cachja me cojo xuta xi cuacun jan: ―‍Chutsujun ni, cuáxë cha nguehe, cojo sa xi cumachaya nuju ta sacuiin ná hisca ngu jyë́ rë cha. ―‍Cuatjin cachja Pilatu.
JOH 19:5 Ngajan xi Jesús ne, cavetju me candatsen, quisun rcu me corona nahyá hacuaha yaja me tsjian moradu jan. Sehe cachja Pilatu cojo xuta cuitjin: ―‍Chutsujun ni, cuajyihi cha nguehe. ―‍Cuatjin cachja me.
JOH 19:6 Hane hya xi cavëë nahmi xi cuacun matitjun jan cojo cha mayu cojo nisë rë cha Jesús ne, cajindaya cha cachja cha cuitjin: ―‍¡Tetuhun cha xcun cru! ¡Tetuhun cha xcun cru! ―‍Cuatjin cajindaya cha cachja cha. Ngajan xi Pilatu ne, cuitjin cachja me: ―‍¡Chjuhun suvun cha, tetuhun cha xcun cru ta, ngahan ne, sacuiin ná hisca ngu jyë́ rë cha! ―‍Cuatjin cachja Pilatu.
JOH 19:7 Ngajan xi xutaxa rë xi cuacun jan ne, cuitjin cachja me: ―‍Ngayin ne, tjin ngu ley xi vitexa niji, hane sacuatjin chja ley vëhë ne, vechú chuva rë xi cueya cha ta, tsëhë xi cachja suvá cha xi Quihndi rë Nina cha. ―‍Cuatjin cachja xutaxa rë jan.
JOH 19:8 Hane xi cahndë Pilatu cjua vëhë ne, hitsë sa catsacjun me camá.
JOH 19:9 Sehe cavuya cavisehen nga me cahntsua ndihya, hane sehe cafahatáha me Jesús cuitjin: ―‍Ngayun ne, ¿jani canduvun? ―‍Cuatjin cafahatáha me Jesús. Peru Jesús ne, cafayanguiin me tsëhë Pilatu.
JOH 19:10 Ngajan xi Pilatu ne, cuitjin cavinenguise me cojo Jesús: ―‍¿Há chayunnguun tsahan? ¿Há hyúun ta ngahan ne, cuma tsisme nuju hacuaha cuma cuitéxa xi setaha ngayun xcun cru? ―‍Cuatjin cavinenguise Pilatu.
JOH 19:11 Hane Jesús ne, cuitjin cafayangui me: ―‍Ngayun ne, cuma nihñu cojo ná cuatjin, peru suvá ni ngatsë rë xi Nina casua nuju me cahndë́. Vëhë xi me xi casahmi ná entregadu cojo nuju ne, hitsë sa jyë jyë́ rë me xi cuma nuju ngayun. ―‍Cuatjin cafayangui Jesús.
JOH 19:12 Xi cahndë Pilatu cjua vëhë ne, cavangui me chuva rë xi tsismi me Jesús. Peru xutacjín jan ne, cajindaya me cachja me cuitjin: ―‍Sa xi nismu cha xi cuajyihi vë ne, hacuiin amigu rë César, me xi matitjun camahani, má ngayun. Ngu xuta xi chja suvá me xi matitjun me ne, hatuxa condra rë César má me. ―‍Cuatjin cajindaya me cachja me.
JOH 19:13 Hane xi cahndë Pilatu cjua vëhë ne, sehe cavaxë nga me Jesús candatsen, sehe quiji me cavéjña me hiscan sahmi cuenda me jyë́ rë xuta, cahndë́ hiscan hmí rë Texondaja rë, hane xi hne hebreo ne, Gabata hmí rë.
JOH 19:14 Hora vëhë ne, sacuaha nchisen tsëhë nixtin vispra rë suhi tsëhë Pascua. Ngajan xi Pilatu ne, cuitjin cachja me cojo xuta: ―‍¡Chutsujun ni, cuajyihi me xi matitjun tsujun nguehe! ―‍Cuatjin cachja me.
JOH 19:15 Hane xuta jan ne, cuitjin cajindaya me cachja me: ―‍¡Naxunxun cha, naxunxun cha tsëhë nguehe! ¡Tetuhun cha xcun cru! ―‍Cuatjin cajindaya me cachja me. Ngajan xi Pilatu ne, cuitjin cavinenguise me: ―‍¿Há cuétaha me xi matitjun tsujun xcun cru ni? ―‍Cuatjin cavinenguise me. Ngajan xi nahmi xi cuacun matitjun jan ne, cuitjin cafayangui me: ―‍¡Ngu ni César, me vëhë xi matitjun me tsijin! ―‍Cuatjin cafayangui me.
JOH 19:16 Ngajan xi Pilatu ne, cajne cacun me. Hane casahmi me entregadu Jesús xi cjue setaha me xcun cru xi cueya me. Sehe cafahatsja xuta xi cuacun jan me.
JOH 19:17 Hya xi camá ne, quisuntyja suvá Jesús cru, cavetju me quiji me cojo xuta cahndë́ hiscan xi hmí rë Nínda Rcuun, hane xi hne hebreo ne, Gólgota hmí rë.
JOH 19:18 Hane ngajan casetaha me xcun cru. Hacuaha cojo sa jo cha caviyujutaha cha xcun cru rë cha, ngu ngu cha ngu ngu ladu tjehen rë me. Hane Jesús ne, cavasen caseya me.
JOH 19:19 Hacuaha catsihindu Pilatu ngujo cjua xi casetaha rcu cru rë Jesús, cuitjin camahindu: “Jesús, Xuta Nasaret, Xi Matitjun Tsëhë Xuta Israel.”
JOH 19:20 Cjua vëhë ne, jemu cjín xuta cavutaya me, tsëhë xi cahndë́ hiscan casetaha Jesús xcun cru ne, tiña tacun nandya. Camahindu cjua vëhë cojo hne hebreo cojo latín cojo griego.
JOH 19:21 Ngajan xi nahmi xi matitjun tsëhë xuta tjë rë Israel jan ne, cuitjin cachja me cojo Pilatu: ―‍Ndajintjin xi cuatjin canihindun “Xi Matitjun Tsëhë Xuta Israel” ta, xi ndatjin ne, “Cachja Cha: Ngahan Matitjun Ngahan Tsëhë Xuta Israel.” ―‍Cuatjin cachja me.
JOH 19:22 Hane Pilatu ne, cuitjin cafayangui me: ―‍Ha catsihindu cjua xi meje tsihindu. ―‍Cuatjin cafayangui me.
JOH 19:23 Ngajan xi sindadu jan ne, xi cavatju cavetaha cha Jesús xcun cru ne, sehe cafaha cha tsjian xcun rë me cojo yëjë sa xi tsë́ xi xtí xi sahmixa cojo me, cavatëcja cha ngajñi catsiñuju cha. Hacuaha cafaha cha tsjian ngahma rë me. Quihndë ne, tsjian vëhë ne, hacuiin casehencoo ta tsjian tu të ni.
JOH 19:24 Ngajan xi cha sindadu jan ne, cachja cha cojo xicjin cha cuitjin: ―‍Tsjian vëhë ne, hacuiin cuichan ta naxeen suerte tsëhë ne, jarë ngayaan xi satë naja. ―‍Cuatjin cachja cha. Cuatjin camá cojo sa xi cuetjucaa cjua xi camahindu xcun xujun rë Nina xi chja cuitjin: Cavatëcja cha tsjian naha ngajñi rë cha, hacuaha cavaxë cha suerte ngatsë rë tsjian naha. Cuatjin casahmi cha sindadu jan.
JOH 19:25 Quihndë ne, tiña cru rë Jesús jan ne, secun naa rë me, cojo tíchja naa rë me, cojo na María chjuun rë Cleofas, cojo na María na Mágdala.
JOH 19:26 Hane xi cavëë Jesús naa rë me cojo cha ladu rë me xi jemu vinga rë me jan xi secun tangun cha cojo naa rë me ne, sehe cachja me cuitjin cojo naa rë me: ―‍Ngayun chjuun, cuajyihi quihndi nuju ndyá.
JOH 19:27 Hane cha ladu rë me jan ne, cuitjin cachja me cojo rë cha: ―‍Cuajyihi naa nuju ndyá. ―‍Cuatjin cachja Jesús. Ha nixtin hya ni ne, quijicojo cha ladu rë Jesús jan naa rë me ndava cha, ngajan cavéjñacahndë me.
JOH 19:28 Hane xi camá ngascan ne, Jesús ne, ha vëë me xi camachihin yëjë xa xi cachja Nina xi sahmi me. Hane cojo sa xi cuetjucaa cjua xi camahindu xcun xujun rë Nina ne, cuitjin cachja me: ―‍Jemu xinda ná. ―‍Cuatjin cachja me.
JOH 19:29 Quihndë ne, tacun jan ngu hiscan jemu hincha xan yufa. Ngajan xi sindadu jan ne, catsicahnchi cha ngu tsjian hinda cojo xan jan ne, sehe catsitjinguiya cha rcu ngu ya nduju, sehe catsiquijin cha cavetaha cha hntsua Jesús.
JOH 19:30 Hane xi camá cahvi Jesús xan jan ne, sehe cachja me cuitjin: ―‍Camachihin quihndë. ―‍Cuatjin cachja Jesús. Hane xi catsiquindi me rcu me ne, hora vëhë cahme me.
JOH 19:31 Hya xi camá ne, xutaxa rë yungun ne, cafehya me favor cojo Pilatu xi cuitexa me ne, xtotoho ntsacu me xi caviyujutaha xcun cru rë jan, sehe chjaháxin rë nima. Cuatjin cafehya me ta, tsëhë xi nixtin hya ne, vispra tsëhë suhi, hane mijí rë me xi cuiyujutaha nima xcun cru rë hisca cuma nchujun, tsëhë xi, xi cuma nchujun jan ne, nixtin chjahájenda rë hacuaha jemu nixtin jyë.
JOH 19:32 Ngajan xi sindadu jan ne, quiji cavotoho cha ntsacu catsijo ni cha xi hacuaha cojo caviyujutaha xcun cru rë cojo Jesús.
JOH 19:33 Peru xi cafehe cha xcun cru rë Jesús ne, xi cavëë cha xi ha cahme me ne, cavotaain cha ntsacu me.
JOH 19:34 Peru ngu cha sindadu jan ne, quiji cavitengui cha quicha ngu ladu ntsacu ndanisin rë Jesús, hane ngutjen ni cavetju jni cojo nandá.
JOH 19:35 Cha xi cavëë ne, chja cha tsëhë xcusun vëhë, cojo sa xi ngayujun ni ngayun ne, cumacjain nuju. Cjua xi chja cha ne, cjuaquixi, hacuaha cha vëhë ne, vëë cha ta cjuaquixi cjua xi chja cha.
JOH 19:36 Cuatjin camá xcusun vëhë, cojo sa xi cuetjucaa cjua xi chja xujun rë Nina xi chja cuitjin: “Hisca ngu nínda rë me xtotaain.”
JOH 19:37 Hacuaha chja nga ngu cahndë́ xujun rë Nina cuitjin: “Scuëë xuta me xi caxtengui rë quicha.” Cuatjin chja xujun rë Nina.
JOH 19:38 Xi cavatju xcusun vëhë ne, José, ngu xuta Arimatea ne, cafehya me cahndë́ cojo Pilatu xi cjuahaxin me nima Jesús. José jan ne, hacuaha xuta ladu rë Jesús má me, handasa catsingacuiin me xi xcun cojo xcun, tsëhë xi tsacjun me xutaxa rë yungun. Hane Pilatu ne, casua me cahndë́. Hya xi camá ne, quiji cafahaxin José nima.
JOH 19:39 Nicodemo, me xi quiji cavisiajmi cojo Jesús ngu nguixun jan ne, hacuaha cojo me quiji me cojo José. Yaha me sacuaha cantë kilu aceite xi jemu ndaja jne xi cuëhëchjine me yojo rë nima jan.
JOH 19:40 Ngajan xi, xi cafaha me nima jan ne, sehe cavitejnu rë me aceite hacuaha catsitjingui rë me tsjian, sacuatjin xcusun rë xuta tjë rë Israel hya xi vinchaniji me nima rë me.
JOH 19:41 Quihndë ne, tiña hiscan cavetaha xuta Jesús xcun cru xi catsiquehen me ne, tjin ngu ngajñi yatjë. Hane ngajñi yatjë jan ne, tacun ngu tsjun xatsë, xi hisca ngu nima cjëë seya.
JOH 19:42 Ngajan ni caveya me nima Jesús, tsëhë xi ngajan xi tiña, hacuaha ha vispra tsëhë suhi nixtin hya.
JOH 20:1 Quihndë ne, nixtin xi tjun tjun tsëhë totje jan ne, na María na Mágdala jan ne, nguitajñu jñu sa ne, cavetju na quiji na xcun tsjun rë nima Jesús. Hane xi cafehe na jan ne, cavëë na xi ndyojo xi quitahá tingotjo rë tsjun jan ne, cachjaháxin rë.
JOH 20:2 Ngajan xi vangasanii na quiji na hiscan tacun Simón Pedru cojo cha ladu rë Jesús xingu jan, cha xi jemu vinga rë Jesús. Hane xi cafehe na jan ne, cuitjin cachja na: ―‍Cavaxë me nima Nai naja tsëhë tsjun rë, hane hyaan jani quiji chani rë. ―‍Cuatjin cachja na.
JOH 20:3 Ngajan xi Pedru cojo cha xingu jan ne, cavetjusanii me, quiji me xcun tsjun jan.
JOH 20:4 Vanga me catsijo me quiji me, peru cha xingu jan ne, hitsë sa hñu cavanga cha xi cuma rë Pedru, hane tjun cha vëhë cafehe cha xcun tsjun.
JOH 20:5 Hane xi cafehe cha jan ne, catsiquindi cha yojo rë cha, hane cavëë cha tsjian xi cavitjingui rë nima Jesús, siu jan. Peru cavisiin cha.
JOH 20:6 Hane xi cafehe Simón Pedru xi camá ngascan ne, cavisehen me cahntsua tsjun jan. Hane cavëë me tsjian jan siu,
JOH 20:7 hane pañutu xi camahñu rcu nima jan ne, hacuiin tacun tangun cojo tsjian jan ta tjeyu ne, xín tacun.
JOH 20:8 Ngajan xi cha ladu rë Jesús xi cafehe titjun xcun tsjun jan ne, hacuaha cavisehen cha. Hane cavëë cha hacuaha camacjain rë cha.
JOH 20:9 Nixtin hya ne, cjëë sa cuijne rcu cha xi chja xujun rë Nina xi nima Jesús ne, meje rë xi cuya me cjuahñu.
JOH 20:10 Hya xi camá ne, xuta ladu rë Jesús jan ne, cavuya cafe me.
JOH 20:11 Hane na María ne, hacuaha cavuya quiji nga na xcun tsjun jan, hane ngajan casecun na tingotjo cajihnda na. Hane táha tijihnda na ne, catsiquindi na yojo rë na, cavutsejenya na cahntsua tsjun jan.
JOH 20:12 Hane cavëë na jo ángel xi tyava tsjian rë, siu hiscan cafaña nima; ngu ne, táha hiscan cafaña rcu nima hane xingu ne, táha hiscan caviyuju ntsacu.
JOH 20:13 Ngajan xi ángel jan ne, cuitjin cavinenguise rë na: ―‍Ngaye chjuun, ¿mé má chjihnde? ―‍Cuatjin cavinenguise ángel jan na. Hane na vëhë ne, cuitjin cachja na: ―‍Cavaxë me maestru naha ne, hveen jani quiji chani rë. ―‍Cuatjin cachja na.
JOH 20:14 Hane xi cavatju cachja na cjua vëhë ne, sehe cavuya na táha ngaxtun na, hane cavëë na Jesús secun me jan. Peru hvíin na xi hacui Jesús.
JOH 20:15 Ngajan xi Jesús ne, cuitjin cachja me: ―‍Ngaye chjuun, ¿mé má cuatjin chjihnde? ¿Yo xi vinchise? ―‍Cuatjin cachja me. Hane xi má rë na vëhë ne, cha xi sahmi cuidadu yatjë jan xi cachja. Vëhë xi cachja na cuitjin: ―‍Tatá, sa xi ngayun canaxun nima ne, tinújun jani catsangun chanu, sehe cjuë́ jaha. ―‍Cuatjin cachja na.
JOH 20:16 Ngajan xi Jesús ne, cuitjin cachja me cojo rë na: ―‍¡María! ―‍Cuatjin cachja me. Hane xi cavuya na ne, sehe cachja na hne hebreo cuitjin: ―‍¡Rabuni! ―‍Cuatjin cachja na cjua xi meje cuichja Maestro.
JOH 20:17 Ngajan xi Jesús ne, cuitjin cachja me cojo rë na: ―‍Ha quihndë xicachunhñuu sa ná ta cjëë cjuë́neje cjuë́tjënguë Nina Nahmi naja. Peru tánguntjengun xuta ladu naha xi yahnga, hane cuitjin tinújun cojo rë me: “Cjuë́neje, cjuë́tjënguë Nahmi naha, me xi hacuaha Nahmi nuju, me xi Nina naha hacuaha Nina nuju ngayujun ni.” Cuatjin tinújun. ―‍Cuatjin cachja Jesús.
JOH 20:18 Ngajan xi na María na Mágdala jan ne, quiji cachja na cojo xuta ladu rë Jesús cuitjin: ―‍¡Cahvë maestru naja! ―‍Cuatjin cachja na. Hacuaha cachja na cjua xi cachja Jesús cojo rë na.
JOH 20:19 Hane xi camajñu ndaja tsëhë nixtin tjun tjun tsëhë totje jan ne, tjin tangun xuta ladu rë Jesús jan. Hane tichjáhñu tingotjo ndihya siu me, tsëhë xi tsacjun me xutaxa rë yungun jan. Hya xi camá ne, cafehetsejen Jesús casecun me ngajñi rë xuta ladu rë me, hane cuitjin cachja me: ―‍Cjuandaja cjuajeya catejña cojo nuju. ―‍Cuatjin cachja me.
JOH 20:20 Hane xi cavatju cachja me cjua vëhë ne, sehe catsingacun me tsja me hacuaha catsingacun me ngu ladu ntsacu ndanisin rë me. Ngajan xi xuta ladu rë me jan ne, jemu ndaja camá rë me hora xi cavëë me maestru naja.
JOH 20:21 Hane cachja nga Jesús cojo rë me xi cuacun jan cuitjin: ―‍Cjuandaja cjuajeya catejña cojo nuju. Sacuatjin catsingatju ná Nina Nahmi naja ne, hacuaha cuatjin tsingátju nuju ngayun. ―‍Cuatjin cachja Jesús.
JOH 20:22 Hane xi cavatju cachja me cjua vëhë ne, sehe cachimatjo me xuta jan, sehe cachja me cuitjin: ―‍Chjuhunntsun Hasen rë Nina cahntsua xahasen nuju.
JOH 20:23 Xuta xi ninchatuhun jyë́ rë me ne, ha camanchataha. Hane xuta xi ninchatuun jyë́ rë ne, ha camanchataain. ―‍Cuatjin cachja Jesús.
JOH 20:24 Tomás, me xi chja me tsëhë Cha Lihma, ngu xuta ladu rë Jesús ngajñi rë me xi tejó jan ne, cuajin me tacun me hya xi cafehe Jesús hiscan xi tjin tangun xuta ladu rë me xi yahnga jan.
JOH 20:25 Ngajan xi xuta ladu rë Jesús xi yahnga jan ne, cuitjin cachja me cojo Tomás: ―‍Cahyin Nai naja. ―‍Cuatjin cachja me. Peru Tomás ne, cuitjin cachja me: ―‍Sa xi scueen hiscan cavanguihmu rë xin tsja me hacuaha tsinguiseen rcuntsa hiscan cavisehen xin jan hacuaha cuetahanntsaan ngu ladu ntsacu ndanisin rë me ne, cumacjaain camahani ná. ―‍Cuatjin cachja Tomás.
JOH 20:26 Xi cavatju jyin nixtin jan ne, tjin tangun nga xuta ladu rë Jesús cahntsua ndihya, hacuaha cojo Tomás tacun me cojo me xi cuacun vë. Hane cafehe nga Jesús casecun me ngajñi rë me xi cuacun vë, ha ndasa tichjá tingotjo ndihya. Hane sehe cachja Jesús cuitjin: ―‍Cjuandaja cjuajeya catejña cojo nuju.
JOH 20:27 Sehe cachja me cojo Tomás cuitjin: ―‍Jarë rcuntsun. Chutsujun ntsa ne. Hacuaha jarë ntsun. Ninguisuhun ngu ladu ntsacu ndanisin naha. Tejñuxun xi cuatjin macjaain nuju. Catamacjain nuju. ―‍Cuatjin cachja Jesús.
JOH 20:28 Ngajan xi Tomás ne, cuitjin cafayangui me tsëhë Jesús: ―‍¡Ngayun Nai naha! ¡Ngayun Nina naha! ―‍Cuatjin cafayangui me.
JOH 20:29 Hane Jesús ne, cuitjin cachja me: ―‍¿Há macjain nuju ngatsë rë xi tichutsujun ná? Ndatjin, peru jemu ndaja tsëhë me xi macjain rë, ha ndasa vutsijin ná me. ―‍Cuatjin cachja Jesús.
JOH 20:30 Quihndë ne, jemu cjín sa cjuarcun casahmi Jesús xcun xuta ladu rë me xi camahindiin xcun xujun vihi.
JOH 20:31 Peru cjuarcun vihi ne, camahindu cojo sa xi ngayujun ni ngayun ne, cumacjain nuju xi Jesús ne, hacui me xi Catsingatju Nina, hacuaha hacui Quihndi rë Nina me. Hacuaha camahindu cojo sa xi, xi cuatjin cumacjain nuju ne, sacú nuju cjuahñu xatsë ngatsë rë xi ladu rë me má ngayun.
JOH 21:1 Xi camá ngascan ne, cavetjucaatsejen nga Jesús ngajñi rë xuta ladu rë me ngajan tjehen laguna Tiberias, xi hacuaha hmí rë laguna Galilea. Hane cuitjin camá.
JOH 21:2 Siu tangun me xi cuicun vi: Simón Pedru, cojo Tomás, me xi chja me tsëhë Cha Lihma, cojo Natanael, xuta Caná, ngu nandya tsëhë distritu Galilea, cojo quihndi rë Zebedeo, cojo jo sa xuta ladu rë Jesús jan.
JOH 21:3 Hane Simón Pedru ne, cuitjin cachja me cojo xicjin me: ―‍Ngahan ne, cjuë́ cúaxë chu ti. ―‍Cuatjin cachja me. Hane me xi yahnga jan ne, cuitjin cachja me: ―‍Hacuaha cuanguin ngayin cojo nuju. ―‍Cuatjin cachja me. Sehe cavetju me quiji me cojo xicjin me, cafaha me barcu, quiji me xcun nandá. Peru nguixun hya ne, casacuiin camahani rë me chu ti.
JOH 21:4 Hane hora xi tisahasen jan ne, cavëë me Jesús secun me tjehen laguna jan, peru hvíin me xi hacui Jesús.
JOH 21:5 Ngajan xi Jesús ne, cuitjin cajindaya me cavinenguise rë me me xi cuacun jan: ―‍¿Há sacuiin nuju chu ti, tsan? ―‍Cuatjin cavinenguise Jesús. Hane me xi cuacun jan ne, cuitjin cajindaya me cafayangui me: ―‍¡Sacuiin niji chu! ―‍Cuatjin cafayangui me.
JOH 21:6 Ngajan xi Jesús ne, cuitjin cajindaya me cachja nga me cojo rë me: ―‍¡Ningatjunyun nahya vë táha ladu quixi tsëhë barcu ne, sehe sacú nuju chu! ―‍Cuatjin cachja me. Hane xi catsingatjenya xuta ladu rë me jan nahya táha ladu quixi ne, caain rë me cavaxë me nahya jan, ngatsë rë ti xi jemu cjín chu hincha chu.
JOH 21:7 Ngajan xi cha ladu rë Jesús xi jemu vinga rë Jesús jan ne, cuitjin cachja cha cojo Pedru: ―‍¡Nai naja vë! ―‍Cuatjin cachja cha. Ngajan xi Simón Pedru ne, xi cahndë me cjua xi hacui Nai naja ne, cavajásanii me tsjian rë me, tsëhë xi quixti me xi sahmi me xa jan. Hane sehe catsingatjenya me yojo rë me ngajñi nandá xi cjuetjengui me Jesús tjehen laguna jan.
JOH 21:8 Peru xuta ladu rë Jesús xi yahnga jan ne, quijitjengui me Jesús cojo barcu jan, táha javë me nahya, ña quitsë rë cojo chu ti. Hacuiin cjin hincha me tsëhë tjehen nandá ta sacuaha ngu cientu metru ni cjin.
JOH 21:9 Hane xi cafehe me tjehen nandá jan ne, sehe cavetju me barcu, hane ngajan cavëë me ngu ndava ndihi tacun, quisun ngu ti xcun ndixuhi, hacuaha cavëë me niñu.
JOH 21:10 Ngajan xi Jesús ne, cuitjin cachja me cojo me xi cuacun vë: ―‍Tuhun ngujo chu ti xi sehe canaxun vë. ―‍Cuatjin cachja Jesús.
JOH 21:11 Sehe quiji Simón Pedru cajavë me nahya jan cavaxë me nangui quixí, quitsë rë cojo suvá ti yehe, sacuaha ngu cientu cojo yachan tejyan má chu. Hane handasa cuatjin cjín chu ti hincha chu nahya jan ne, catiyaain.
JOH 21:12 Ngajan xi Jesús ne, cuitjin cachja me cojo xuta ladu rë me jan: ―‍Nduvun xinu tajñu. ―‍Cuatjin cachja me. Peru hisca ngu xuta ladu rë me cavetjiin cacun me cavinenguise me cuitjin: “Yo ngayun”, tsëhë xi ha vëë me xi hacui Nai naja.
JOH 21:13 Ngajan xi Jesús ne, cafaha me niñu jan, casua me xuta ladu rë me. Hacuaha cuanitjin ni casua me chu ti jan.
JOH 21:14 Vihi majyan ndiya xi cavetjucaatsejen Jesús ngajñi rë xuta ladu rë me, quihndë xi cavuya nga me cjuahñu.
JOH 21:15 Hane xi cajnetaha cajinë tajñu me ne, sehe cavinenguise Jesús Simón Pedru cuitjin: ―‍Ngayun Simón, quihndi rë Jonás, ¿há hitsë sa hmu tacún ná ngayun xi cuma rë me xi cuicun vi? ―‍Cuatjin cavinenguise me. Hane Pedru ne, cuitjin cafayangui me tsëhë Jesús: ―‍Juun. Tatá, ngayun ne, hyun ta hmú cácun nuju. ―‍Cuatjin cafayangui Pedru. Hane Jesús ne, cuitjin cachja me cojo Pedru: ―‍Nihñu cuidadu xuta ladu naha sacuatjin ndaja cuidadu sahmi ngu paxtu rë chu hnditsánga rë me. ―‍Cuatjin cachja Jesús.
JOH 21:16 Cavinenguise nga Jesús Pedru majo ndiya cuitjin: ―‍Ngayun Simón, quihndi rë Jonás. ¿Há hmu tacún ná? ―‍Cuatjin cavinenguise Jesús. Hane Pedru ne, cuitjin cafayangui me: ―‍Juun. Tatá, ngayun ne, hyun ta hmú cácun nuju. ―‍Cuatjin cafayangui Pedru. Hane Jesús ne, cuitjin cachja me cojo Pedru: ―‍Nihñu cuidadu xuta ladu naha sacuatjin ndaja cuidadu sahmi ngu paxtu rë chu hnditsánga rë me. ―‍Cuatjin cachja Jesús.
JOH 21:17 Cavinenguise nga Jesús xi majyan ndiya Simón Pedru cuitjin: ―‍Ngayun Simón, quihndi rë Jonás. ¿Há hmu tacún ná? ―‍Cuatjin cavinenguise Jesús. Ngajan xi Pedru ne, choho camá rë me xi cuatjin cavinenguise Jesús me xi majyan ndiya sa xi hmu cacun me Jesús, hane cuitjin cachja me: ―‍Tatá, ngayun ne, yëjë ni ne, hyun. Ngayun ne, hyun ta hmú cácun nuju. ―‍Cuatjin cachja Pedru. Hane Jesús ne, cuitjin cachja me cojo Pedru: ―‍Nihñu cuidadu xuta ladu naha sacuatjin ndaja cuidadu sahmi ngu paxtu rë chu hnditsánga rë me.
JOH 21:18 Hacuaha cuichjá cojo nuju cjuaquixi ta hya xi chúva sa nixtin nuju ne, cachujun suvun tsjian nuju sehe catsangun hiscan xi meje cuangun. Peru hya xi cuma changá ngayun ne, nicujun tyja nuju, hane hacjahi xuta tsihñu me cahntsua nuju, sehe cjuecojo nuju me hiscan xi mijí cuangun. ―‍Cuatjin cachja Jesús cojo Pedru.
JOH 21:19 Xi cuatjin cachja Jesús ne, casua me camachaya rë Pedru mé chuva rë cueya Pedru, hacuaha casua me camachaya rë me xi sahmi jyë sahmi hnga me Nina xi cuatjin cueya me. Xi cavatju cachja Jesús cjua vëhë ne, sehe cachja me cuitjin cojo Pedru: ―‍Nduvun cuanguen cojo ná. ―‍Cuatjin cachja Jesús.
JOH 21:20 Xi cavuya cavutsejen Pedru táha ngaxtun me ne, cavëë me xi tjengui cha xi jemu vinga rë Jesús jan nduva cha, cha xi quijivaha tiña xcun Jesús hya xi tijinë me comida jan hacuaha cavinenguise cha me cjua vihi: “Tatá, ¿yo xi sahmi nuju entregadu ni?”
JOH 21:21 Hane xi cavëë Pedru cha vëhë ne, cavinenguise me cuitjin cojo Jesús: ―‍Tatá, hane me vëhë ne, ¿mé cuatju me cuma ni? ―‍Cuatjin cavinenguise Pedru.
JOH 21:22 Ngajan xi Jesús ne, cuitjin cachja me cojo Pedru: ―‍Sa xi ngahan meje ná xi cuejña me hisca hya xi cúya nga ne, ¿mé cuenda nuju ngayun ni? Ngayun ne, nduvun cuanguen cojo ná. ―‍Cuatjin cachja Jesús.
JOH 21:23 Hane cavitsojo ngajñi rë xuta ladu rë Jesús cjua xi cha xi jemu vinga rë Jesús jan ne, cueyaain cha. Peru Jesús ne, hacuiin cachja me cojo Pedru xi cueyaain cha vëhë ta xi cachja me ne, cjua vihi: “Sa xi ngahan meje ná xi cuejña me hisca hya xi cúya nga ne, ¿mé cuenda nuju ngayun ni?” Vëhë cjua xi cachja me.
JOH 21:24 Cha xi cuajyihi jemu vinga rë Jesús jan ne, cha vëhë xi cachja cha cjua vëhë hacuaha cha vëhë catsihindu cha. Hacuaha ngayin xi tinihindin ngujo cjua vihi ne, hyin ta cjuaquixi cjua xi cachja cha.
JOH 21:25 Hacuaha jemu cjín sa xcusun xi casahmi Jesús. Peru sa xi cumahindu yëjë ni xcusun vëhë chuva ngu chuva ngu ne, xi má ná ne, chutaain cahndë́ setjo yëjë ni libru xi cumahindu, handasa jingujyë ni ngasunhndë.
ACT 1:1 Ngayun Teófilo, xcun xujun naha xi catsihindu nuju tjun tjun ne, cachjá cojo nuju yëjë ni hacutjin cavetsihin casahmi xu Jesús cojo hacutjin cavetsihin cavicuya me. Cavétsehen hisca ntsacu cuetsihin ne,
ACT 1:2 catsinguíjnetaha hisca hya xi quiji me ngahnga. Hya xi chaja sa cjue me ngahnga ne, cachja xu me cojo apóstol xi ha cavaxijin me xi camá ladu rë me jan, hacutjin sahmi. Hacuaha cojo ngahñu rë Hasen rë Nina xi cachja xu me.
ACT 1:3 Hya xi ha cavatju nixtin xi cahme me ne, cavuya cafehetjengui nga me apóstol jan, casua me camachaya xu rë ta quixi jain xi tacun quicun nga me. Hane ngajñi rë xi yachan nixtin ne, cavëë apóstol jan Jesús, hacuaha cachja sa Jesús cojo me ngujo cjua tsëhë hacutjin cuma hya xi cuinduva Nina sahmi me gubiernu.
ACT 1:4 Hane xi tacun Jesús cojo apóstol jan ngajan Jerusalén ne, cavitexa xu me me cuitjin: ―‍Hacuiin cuetjunxun tsëhë nandya vi ta nechunyun rë cjuandaja xi sua nuju Nahmi naha, sacuatjin xi ha cachjá cojo nuju.
ACT 1:5 Cuatjin nihñu ta, xuta ne, handasa cojo nandá cavitenda Juan me, peru ngayun ne, xtenda ngayun cojo Hasen rë Nina cahntsua xi ngujo sa nixtin. ―‍Cuatjin cavitexa me.
ACT 1:6 Hya xi camá ne, ngu nixtin xi siu tangun xu apóstol cojo Jesús ne, cavinenguise me Jesús cuitjin: ―‍Tatá, ¿há cavechú nixtin xi tuhun cahndë́ xi xutaxa rë nangui naja ne, cuya cuitexa nga me nguehe nangui naja cojo jingu sa nangui, sacuatjin xi cavitexa me hatsëë ni? ―‍Cuatjin cavinenguise me.
ACT 1:7 Ngajan xi cafayangui xu Jesús cuitjin: ―‍Satiin nuju ngayun xi cumachaya nuju jarë nixtin xi Nina cavejña cacun me cojo cjuatacun rë suvá me xi cuma yëjë ni xcusun vëhë.
ACT 1:8 Peru hya xi cuinduva Hasen rë Nina cuisehen cahntsua xahasen nuju ne, hya sacú sa nuju ngahñu, sehe cuinújun cjua naha cojo xuta nguehe nandya Jerusalén, cojo yëjë ni nandya distritu Judea cojo Samaria, hisca cojo yëjë sa nangui xi siu ngasunhndë. ―‍Cuatjin xu cafayangui me.
ACT 1:9 Xi cafë cachja xu Jesús cjua vëhë ne, tivutsejen ni apóstol ne, cavetsihin quiji me ngahnga. Sehe cavisehen me ngajñi rë yufí, ha quihndë camatsijin sa me.
ACT 1:10 Ha tu tivutsejen cuaha xu apóstol ngahnga hacutjin cjui Jesús ne, xi tu camachaya rë me ne, hinchacun jo xihin xi tyava tsjian rë hiscan siu me.
ACT 1:11 Hane cuitjin cavinenguise xu xihin jan me: ―‍Ngayun, cha Galilea. ¿Mé má cuatjin chutsujun ngahnga? Jesús, me xi quiji ngahnga vë ne, cuatjin tutjin xi cahyun xi quiji me ne, tjin ngu nixtin ne, ha cuanitjin ni cuya nga me. ―‍Cuatjin cachja xu xihin jan.
ACT 1:12 Hya xi camá xu ne, apóstol jan ne, cavetjuxin me tsëhë ndetjún xi hmí ndetjún Ya Olivu, hane cavuya quiji nga me Jerusalén, xi tacun sacuaha ngu mil metru tsëhë ndetjún vëhë.
ACT 1:13 Hya xi cafehe me ngajan ne, quiji me ndihya hiscan xi viyuju me, hane quijiniji me pisu ngahnga. Me xi cuicun xu vi xi viyuju me ngajan: Pedru, Jacobo, Juan, Andrés, Felipe, Tomás, Bartolomé, Mateo, Jacobo xi quihndi rë Alfeo, Simón xi tsëhë partidu zelota, cojo Judas xi xuta rë Jacobo.
ACT 1:14 Yëjë ni me xi cuacun jan, cojo yëjë ni me xi xicjin Jesús, cojo María naa rë me, cojo yachjin xi yahnga ne, nchunchujun ni camatangun me xi sahmi me oración rë me.
ACT 1:15 Ngu ndiya hya xi camatangun xu sacuaha chuva rë ngu cientu cojo can xuta xi cuacun ladu rë Jesús ne, casecunvasen Pedru ne, sehe cachja me cojo xuta jan cjua vihi:
ACT 1:16 ―‍Ngayujun ngarcun ni ngayun xuta ladu rë Jesús. Cavetjucaa jain cjua xi catsihindu xutachanga naja David xcun xujun rë Nina hatsëë. Hatuxa cuatjin camameje rë xi cuma ta, tsëhë xi chaja sa xi cuma matsejen ne, Hasen rë Nina ne, ha casua camachaya rë xutachanga naja jan hacutjin sahmi nima Judas, nima xi cavisecoo rë xuta xi cafaha rë Jesús, catsihñu rë me.
ACT 1:17 Nima Judas jan matsejen ne, hacuaha camá ladu rë Jesús sacuaha ngayaan matsejen ta, tsëhë xi cavaxijin Jesús nima xi cuisecoo rë me xcun xa rë Nina xi sahmi me. ―‍Cuahaxutjin cachja Pedru.
ACT 1:18 ’Nima Judas jan ne, cavatsë xu ngu rquí nangui cojo tujún xi cafaha tsëhë xcusun tsehen xi casahmi xi casahmi rë entregadu Jesús. Hane ha xcun nangui xi cavatsë xu nima jan ne, caticja xcun, hane catsingá xu cahntsua nima, hisca cavetju yëjë ni ntsehen rë.
ACT 1:19 Sacuatjin camá xu xi cahme nima ne, yëjë cjua vëhë ne, cavechútáha rë yëjë xuta ngajan Jerusalén. Vëhë xi xuta ngajan ne, casuañihi xu rë me cahndë́ jan Acéldama, ñihi xi meje cuichja xi hne rë me ne, Cahndë́ Tsëhë Jni.
ACT 1:20 Hacuaha quijinduju sa cachja Pedru cuitjin: ―‍Hacuaha xcun xujun tsëhë Salmo matsejen ne, cuitjin camahindu: Catejña cuatjin ndava cha, hacuaha hisca ngu cuiyijin jan. Hacuaha camahindu sa cuitjin: Xa rë cha ne, catjaha jingu sa xuta. Cuatjin camahindu matsejen.
ACT 1:21 ’Vëhë xi meje rë xi cuinchise rë ngu cha xi cuma tangun cojo niji matsejen, ngu cha xi ha cuatjin cavisecoo niji yëjë ni nixtin xi canujyihinyin cojo Nai naja Jesús,
ACT 1:22 hisca nixtin xi cavitenda Juan me cojo hisca nixtin xi quiji me ngahnga. Cha vëhë matsejen ne, cuma tangun cha cojo niji, xi tsinguixi cha hacutjin camá xi cavuya Jesús cjuahñu. ―‍Cuatjin cachja Pedru.
ACT 1:23 Hya xi cajnetaha cachja Pedru cuatjin ne, catuxijin xu rë jo xihin: José cojo Matías. José jan ne, hacuaha hacui me xi hmí rë Barsabás cojo Justo.
ACT 1:24 Sehe cafehya rë me Nina cuitjin: ―‍Ngayun Nai niji, ngayun xi hyun cjuatacun rë ngayëjë ni xuta ne, tsëhë jo cha xi cuicun vihi ne, naxujun jarë cha xi chuya nuju ngayun
ACT 1:25 xi cuisehen cha xa sacuaha apóstol cahndë́ rë nima Judas ta, tsëhë xi nima vëhë ne, cavéjña tiya cahndë́ rë xi quiji hiscan xi casatë rë. ―‍Cuatjin cafehya rë me Nina.
ACT 1:26 Xi cajnetaha cachja apóstol cuatjin ne, sehe cavaxë xu me ngu suerte, hane Matías casatë rë me. Ngajan xi Matías ne, camatangun me cojo tengu apóstol jan.
ACT 2:1 Hya xi camá ne, xi cavechú nixtin tsëhë suhi xi hmí Pentecostés ne, ngu cahndë́ ni camatangun xu yëjë ni xuta ladu rë Jesús.
ACT 2:2 Xi siu tangun me jan ne, ha tu ñahñu cahndë xu me xi jercu cafane ngajan ngahnga, sacuaha nuhya rë xi fane vanga tjo xi jemu hñu camahani. Sehe yëjë ni xuta jan ne, cahndë xu me xi canduva cafane hisca cahntsua ndihya hiscan siu me.
ACT 2:3 Hacuaha cavëë xu me ndihi xi langa sacuaha neje xuta, hane cavitsojo quiji casatë xu rë jima ngu jima ngu me.
ACT 2:4 Hya xi camá ne, catsë xu rë Hasen rë Nina xahasen rë jima ngu me jan, hacuaha cavetsihin cachja xu me jima ngu me cjuandaja rë Nina ne, cachja xu me jingu sa hne xi maji rë me, tucutjin xi Hasen jan casahmi xi camá cachja me.
ACT 2:5 Ngajan Jerusalén ne, siu xuta tjë rë Israel xi faharcun jain me Nina, canduva me tsëhë yëjë ni nangui xi tjin ngasunhndë.
ACT 2:6 Hane hya xi canuhya rë xi cuatjin jercu fane ne, jercu xutacjín camatangun xu me xi quiji cavutsejen me mé xi camá. Hane xutacjín jan ne, jemu quijircun xu rë me, tsëhë xi hora xi tichja xuta ladu rë Jesús ne, xuta jan ne, hne ni rë suva me cahndë me jima ngu me xi cuacun jan.
ACT 2:7 Ngajan xi cachja xu me cojo xicjin me cuitjin: ―‍¿Mé nga vihi ni? ¡Yëjë ni me xi tichja vi ne, xuta distritu Galilea me!
ACT 2:8 ¿Hacutjin má xi jima ngu ngayaan ne, tinuhyan hne naja suvaan ta,
ACT 2:9 tsëhë xi jemu cjín nangui canduvan? Ngujo ngayaan ne, xuta Partia ngayaan. Ngujo nga ngayaan ne, xuta Media ngayaan. Cojo sa xuta Elam, xuta Mesopotamia, xuta Judea, xuta Capadocia, xuta Ponto, xuta Asia,
ACT 2:10 xuta Frigia, xuta Panfilia, xuta Egipto, xuta ladu Libia, tiñataha nandya xi hmí Cirene, xuta Roma,
ACT 2:11 xuta Creta, xuta Arabia. Ngayaan xuta ngu nangui xi macjain naja Nina rë xuta tjë rë Israel ne, jemu cjín ngayaan xi nechanyanjñe nguehe ngajñi rë xuta tjë rë Israel. Hacuaha ngayejen ngarca ni tinuhyan xi tichja me hne naja. Tichja me tsëhë cjuandaja xi jercu casahmi Nina. ―‍Cuatjin xu cachja xuta xi cuacun jan.
ACT 2:12 Hane tsëhë xi cuatjin camacjíncacun me xi jemu quijircun camahani rë me ne, cavinenguise xicjin xu me cuitjin: ―‍¿Mé rë meje cuichja xcusun vi? ―‍Cuatjin cavinenguise me.
ACT 2:13 Peru yahnga me ne, catsixcuehyu me xuta ladu rë Jesús, hane cachja xu me ta chihi xuta jan.
ACT 2:14 Hya xi camá ne, caxinchacun yëjë tengu apóstol jan ne, sehe cachja xu Pedru cojo xutacjín jan cuitjin: ―‍Ngayujun ngarcun ni ngayun xuta tjë rë Israel xi nechun nguehe Jerusalén matsejen ne, tinuhyun ngujo cjua xi cuichjá cojo nuju vi, cojo sa xi cumachaya nuju.
ACT 2:15 Ngayujun ni matsejen ne, nújun ta me xi cuicun vi ne, chihi me. Peru quixiin xi nújun ta ndicumaha ni ne, sehe fane ñaja tsëhë nguitajñu.
ACT 2:16 Peru xcusun xi sehe cavatju camá nguehe matsejen ne, cavetjucaa cjua xi cachja xutachanga naja profeta Joel hatsëë nixtin, hya xi catsihindu me cjua xi casua Nina. Cuitjin catsihindu me:
ACT 2:17 Cjua xi cuicun vi xi chja Nina cojo naja: Hya xi cuma tiña nixtin xi cjuë ngasunhndë ne, hya tsingátju Hasen naha xi cuisehen xahasen rë xuta jingujyë ni ngasunhndë; hane quihndi nuju, sa chjuun sa xihin ne, suacuenda me cjua naha, hacuaha cha nixti nuju cojo xuta changá nuju ne, cuichja chini cojo rë me tsëhë cjuatacun naha.
ACT 2:18 Hacuaha nixtin hya ne, tsingátju Hasen naha xi cuisehen xahasen rë me xi sahmi cjuatacun naha, sa chjuun, sa xihin, hane me vëhë ne, suácuenda me cjua naha.
ACT 2:19 Hya sahme xcusun cjuarcun vihi ngajan ngahnga, cojo nguehe nangui xi chutsujun: cuáxëcaa jni, cojo ndihi, cojo nihndi cjín.
ACT 2:20 Tsuhi ne, cuma jma; sá ne, cuma hani sacuaha jni. Cuatjin cuma hya xi chaja sa xi cuechú nixtin xi ngahan xi Nina ngahan ne, tsichúva yëjë ni xuta cojo cjuatacun rë me; ngu nixtin jyë ngu nixtin ndajyihi nixtin vëhë.
ACT 2:21 Hane nixtin hya ne, yëjë ni xuta xi cjuehya ná me cjuandaja naha ngahan xi Nina ngahan ne, cuetjutje me. Cuatjin catsihindu profeta Joel cjua xi cachja Nina.
ACT 2:22 Cjuinduju sa tichja Pedru cjua vihi: ―‍Quihndë matsejen ne, tinuhyun cjua xi cuichjá cojo nuju, ngayujun ngarcun ni xuta tjë rë Israel. Jesús, me Nasaret matsejen ne, camachaya naja xi Nina catsingatju rë me matsejen ta, tsëhë xi jemu cjín xcusun cjuarcun casahmi me ngajñi naja sacuatjin xi ha ndaja hyun. Camá casahmi me cjuarcun jan matsejen ta, ngatsë rë xi Nina casua rë me cahndë́ xi cuatjin casahmi me.
ACT 2:23 Nina matsejen ne, ha vëë me yëjë ni xcusun. Vëhë xi cojo tjun sa ne, ha catsingataha cacun me ta Jesús vë ne, cuma me entregadu cojo xuta tsehen. Cuatjin cavejña Nina cjuatacun rë me hisca chaja sa xi cuetjucaa xcusun vëhë. Sacuaha xi ngayun canicuhun Jesús ta, ngatsë nuju xi cavetaha xuta tsehen me xcun cru.
ACT 2:24 Peru cavëhëndaya Nina me tsëhë cjuaveya, catsicuya me me cjuahñu ta, tsëhë xi hatuxa camaji xi cavéjña me ngahma gubiernu rë cjuaveya.
ACT 2:25 Xutachanga naja David matsejen ne, catsihindu me tsëhë Jesús cuitjin: Cahvë Nina xi cjui titjun me tsahan yëjë ni nixtin; ticojo ná me, cojo sa xi tsajin mé cuma ná.
ACT 2:26 Vëhë xi xahasen naha ne, jemu sua rë, hacuaha ntsuva ne, suvá cjuandaja chjá. Hacuaha vëhë xi ngahan ne, vetahá cácun Nina.
ACT 2:27 Cuatjin sahme ta, tsëhë xi ngayun Nina ne, hacuiin nismutacun hasen naha xi cuejña ngajan Hades hiscan siu nima, hacuaha hatuxa tuun cahndë́ xi cjuehndu yojo naha, ngahan xi hatuxa tjënguë nuju cojo yëjë xahasen naha.
ACT 2:28 Ngayun ne, catuhun camachaya ná ndiya xi cuéchu hiscan sacú ná cjuahñu ndajyihi. Hacuaha ninguitsun rë xahasen naha cjuasua xi cuéchutaha nuju hiscan nechun. Cuatjin catsihindu David.
ACT 2:29 Hacuaha cachja sa Pedru cuitjin: ―‍Ngayujun ngarcun ni matsejen ne, nguehe cuichjáquixë cojo nuju matsejen ta, xutachanga naja David ne, cahme me, hacuaha caseyaniji me hatsëë nixtin. Hane tsjun rë me ne, tacun cuaha hisca quihndë hiscan xi cavéjña.
ACT 2:30 Peru xi chaja sa xi cueya David jan matsejen ne, ngu profeta me, hacuaha ha vëë me xi ha cachja Nina cojo rë me cuitjin: Ngahan suva hvë xi ngu xuta tjë riji ne, cuitexa rë xuta, sacuatjin tivitexe ngaye. Cuatjin cachja Nina cojo David.
ACT 2:31 Vëhë xi camachaya rë David xcusun xi sahmi Nina ngascan. Ha vëë me xi cuya nga cjuahñu me xi tsingatju Nina, hane vëhë xi cachja me ta hacuaha hacuiin cuejña me vëhë ngajan Hades ngajñi rë nima, hacuaha hacuiin cjuehndu yojo rë me.
ACT 2:32 Hane ngayijin ni matsejen ne, cahyin suvin xi Jesús, me xi catsingatju Nina vë ne, catsicuya Nina me cjuahñu.
ACT 2:33 Hane quihndë matsejen ne, ha catsiquijin Nina me xi cavechú me ngahnga hiscan véjña suvá Nina. Hacuaha cafahatsja me Hasen rë Nina sacuatjin xi cachja Nina Nahmi rë me xi sua rë me. Vëhë xi Jesús matsejen ne, tisahmi me xcusun xi tijima nguehe ngajñi niji.
ACT 2:34 Xi tsejen ne, cachjaain David tsëhë suvá me ta, tsëhë xi hacuiin quiji me ngahnga sacuatjin quiji Jesús matsejen ta, catsihindu sa me cuitjin: Nina ne, cachja me cojo Nai naha cuitjin: “Tinechin nguehe, ladu quixi naha,
ACT 2:35 hisca hya xi yëjë ni xi sahmi ri condra ne, cuiyujú ngahan ngahma gubiernu riji.” Cuatjin catsihindu David hatsëë nixtin.
ACT 2:36 ’Vëhë xi ngayujun ni xuta nangui Israel matsejen ne, ndaja catijne rcun cjua xi chjá cojo nuju vi: Jesús vë, me xi ngayun catuhun xi cahme xcun cru matsejen ne, Nina casahmi me xi me vëhë ne, camá me Nai naja hacuaha catsingatju Nina me xi cuaxëtje naja me. ―‍Cuahaxutjin cachja Pedru cojo xutacjín jan.
ACT 2:37 Xi cahndë xutacjín jan cjua vëhë ne, jemu choho camá rë me. Ngajan xi cavinenguise me Pedru cojo apóstol xi yahnga jan cuitjin: ―‍Xi má nuju ngayun ne, ¿mé xi ndatjin nihñi? ―‍Cuatjin cavinenguise xuta jan.
ACT 2:38 Ngajan xi cachja xu Pedru cojo rë me cuitjin: ―‍Nindeyun cjuatacun nuju. Hacuaha jima ngu ngayun ne, catixtenda ngayun, ngatsë rë xi camangu tacún cojo Jesucristu, sehe ngajan xi tsinchataha nuju Nina tsëhë jyë́ nuju. Xi cuatjin ne, hacuaha sahmi me cjuandaja xi sua nuju me Hasen rë me.
ACT 2:39 Cjuandaja vëhë ne, ha cachja Nina xi sua nuju me ngayun cojo quihndi nuju, hisca cojo yëjë xuta tjë nuju. Nina naja ne, sua me cjuandaja vëhë xi cuma rë yëjë ni xuta xi cuaxijin me. ―‍Cuahaxutjin cachja Pedru.
ACT 2:40 Hacuaha jemu cjín sa cjua cachja me cuitjin, hacutjin meje rë xi sahmi xuta jan: ―‍Naxunxun yojo nuju tsëhë xuta tsehen xi siu quihndë. ―‍Cuatjin cachja xu me.
ACT 2:41 Ngajan xi xuta xi cachuya rë me cjua xi cachja Pedru ne, caxtenda me. Hane cuatjin xi nixtin vëhë xu ne, sacuaha jyan mil xuta xi cavisehen me ladu rë Jesús.
ACT 2:42 Casua me yojo rë me cojo cjua xi tivicuya apóstol jan, hacuaha nguñaja cacun xu me xi ma tangun me cojo yëjë sa xuta ladu rë Jesús. Nchunchujun ni ne, camatangun me cojo xicjin me xi sahmi me oración, cojo xi sinë tangun me niñu.
ACT 2:43 Jemu cjín xcusun xu cjuarcun casahmi apóstol ngatsë rë ngahñu xi casua Nina me, hane vëhë xi yëjë ni xuta xi hacuiin ladu rë Jesús ne, jemu tsacjun me.
ACT 2:44 Peru yëjë ni xuta ladu rë Jesús ne, camatangun xu cjuatacun rë me, hacuaha yëjë ni xcusun xi tsëhë jima ngu xu me ne, hacuaha camá tsëhë yëjë ni me xi yahnga jan.
ACT 2:45 Caviteña xu me xcusun xi tjin rë me ne, sehe cavatëcja xu me tujún ngajñi rë yëjë ni me xi casahmi chaja rë.
ACT 2:46 Nchunchujun xu ni ne, camatangun me nguñaja cacun me ngajan yungun xi matitjun xi cjuaharcun me Nina. Hacuaha xi cajinë xu me niñu ndava me cojo xicjin me ne, jemu cojo cjuasua, cojo cjuandaja cojo cjuajeya.
ACT 2:47 Hacuaha jemu cavaxëndaja me Nina. Hane yëjë xuta xi yahnga jan ne, xi cavëë xu me xcusun rë xuta ladu rë Jesús jan ne, cachja xu me ta xuta ndaja me xi cuacun vë. Hacuaha nchunchujun ni ne, tivaxëtje Nai naja ngujo ngujo sa xuta. Vëhë xi nchunchujun ni ne, jima cjín sa xuta yungun jan.
ACT 3:1 Ngu nixtin jan ne, Pedru cojo Juan ne, quijiniji tangun xu me yungun xi matitjun chuva rë fane jyan, hora xi fi chjayuma xuta.
ACT 3:2 Hane ngu cha xi maji fi, tsëhë xi tsehen ntsacu cha hisca hya xi catsin cha ne, hacuaha hora vëhë cjuicojo xuta rë cha cha yungun. Nchunchujun ni quiji chani rë cha ngajan tingotjo hnchua xondyojo rë yungun xi hmí Tingotjo Ndajyihi, xi sahmi cha caridad tsëhë xuta xi visehen ndatsen yungun jan.
ACT 3:3 Hane xi cavëë cha hmu rë jan xi camatiña Pedru cojo Juan hiscan tacun cha xi cuisehen me ndatsen yungun jan ne, cafehya xu cha me cjuandaja rë me.
ACT 3:4 Ngajan xi cavutsejenndaja me cha. Hane Pedru ne, cuitjin cachja me cojo cha: ―‍Chutsijin niji hitsë ―‍Chja xu me.
ACT 3:5 Hane cavutsejen cha me ta, xi má rë cha ne, tjin mé xi sua me cha.
ACT 3:6 Ngajan xi cavuya cachja nga Pedru cojo rë cha cuitjin: ―‍Tsajin camahani ná tujún. Peru xi tjin ná, tsan ne, suá ri. Jesucristu, me Nasaret ne, casua ná me ngahñu, hane vëhë xi chjá cojo ri ta, tisechin, hane tujyihiye. ―‍Cuatjin cachja xu me cojo cha.
ACT 3:7 Sehe cafaha me tsja quixi cha hmu rë jan hane catsisatjenhnga xu me cha. Hane ngutjen ni casacuhñu rë ntsacu cha cojo ndyojo naxa rë cha.
ACT 3:8 Xi tu cafaha Pedru tsja cha ne, cacaahnga cha, hacuaha casecun cha. Sehe cavetsihin catsujyihiya cha. Hacuaha cavisehen cha yungun xi matitjun cojo me xi cuacun jan, cjui cha, hisca chijihnga cha, taha tivaxëndaja cha Nina.
ACT 3:9 Yëjë ni xuta xi siu ndatsen yungun jan ne, cavëë me xi cjui cha, hacuaha cahndë me xi tivaxëndaja cha Nina.
ACT 3:10 Hane jemu quijircun rë xuta jan tsëhë xcusun xi cavatju cha camá ta, tsëhë xi ha vëë me xi ha hacui cha vëhë xi véjña cha sahmi cha caridad ngajan tingotjo yungun xi hmí Tingotjo Ndajyihi.
ACT 3:11 Cha xi camandaja xu jan ne, mijí cjuexin cha tsëhë Pedru cojo Juan. Hane tsëhë xi jemu quijircun rë xuta ne, cavanga me quiji me hiscan siu me xi cuacun jan, camatangun me ngajan ngu ngahma ndihya tsëhë yungun, cahndë́ xi hmí Tsëhë Salomón.
ACT 3:12 Xi cavëë xu Pedru xi cuatjin camatangun xuta ne, cuitjin cachja me: ―‍Ngayujun ngarcun ni xuta tjë rë Israel matsejen ne, ¿mé má cuatjin fircun nuju tsëhë cha xi cuijyihi vi? ¿Mé má cuatjin jercu chutsujun niji sacuaha xi ngatsë rë cjuatacun niji suvin o ngatsë rë xi jemu ndaja chjihinrcuin Nina ne, vëhë xi camá canihñi xi camandaja cha? ¡Jéya! Hacuiin cuatjin.
ACT 3:13 Nina rë Abraham cojo Isaac cojo Jacob, Nina rë xutachanga naja matsejen ne, casahmi jyë casahmi hnga me Jesús, me xi casahmi xa rë Nina. Hane ngatsë rë me cama cjuarcun vi. Peru ngayun matsejen ne, catuhun Jesús cojo xutaxa rë. Hane ngajan xcun gobernador Pilatu matsejen ne, hora xi meje tsismi me Jesús ne, catuun cahndë́.
ACT 3:14 Jesús jan ne, hatuxa tjengui me Nina cojo yëjë xahasen rë me, hatuxa cjuaquixi xi sahmi me. Peru ngayun matsejen ne, canitjungun me. Hane cahndë́ rë xi chjahyun rë Pilatu xi tsismi me Jesús matsejen ne, cachjahyun rë me xi tsismi me ngu cha tsiquehen.
ACT 3:15 Hane Jesús, me xi sua cjuahñu naja ne, ngayun catuhun me xi cahme me. Peru Nina matsejen ne, catsicuya me Jesús jan cjuahñu. Hane ngayin ne, hisca cahyin me quihndë xi tacun nga me cjuahñu.
ACT 3:16 Cha xi cuijyihi tichutsujun vi ne, ha hyun yo cha. Casacu rë ntsacu cha ngahñu ta, tsëhë xi ngayin matsejen ne, mangutacuín cojo Jesús. Hacuaha ngatsë rë xi cuatjin mangutacuín cojo Jesús ne, vëhë casahmi xi camandaja cha sacuahatjin xi cahyun ngayujun ni.
ACT 3:17 ’Quihndë ne, ha hvë ta ngayujun ni cojo yëjë xutaxa rë yungun naja matsejen ne, hya xi catuhun Jesús xi cahme me ne, hyúun yo xi canihñu cojo.
ACT 3:18 Peru Nina matsejen ne, cuatjin casahmi me xi cavetjucaa cjua xi cachja yëjë ni profeta cojo xutachanga naja hatsëë nixtin hya xi cachja profeta jan, tsëhë cjuañihi xi cuatju ngu me xi tsingatju naja Nina nchujun ni nguini.
ACT 3:19 Vëhë xi meje rë xi nindeyun cjuatacun nuju, tisuhun ndiya rë Nina, cojo sa xi Nina matsejen ne, cjuahaxin me yëjë ni jyë́ nuju.
ACT 3:20 Xi cuatjin nihñu ne, Nina ne, sua me cahndë́ xi cjuahajenda hitsë xahasen naja. Hacuaha xi cuatjin ne, tsingatju nga naja me Jesús ta, tsëhë xi ha me vëhë xi cachja Nina hisca hatsëë xi cjuaha me xa xi cuaxëtje naja me.
ACT 3:21 Peru Jesús jan ne, meje rë xi cuejña sa me ngajan ngahnga hisca xi Nina ne, cuya sahmi ndaja nga me yëjë ni xcusun, sacuatjin xi ha cachja profeta rë me, hya xi cachja me cojo xutachanga naja cjua rë Nina hatsëë nixtin.
ACT 3:22 Xutachanga naja Moisés matsejen ne, cuitjin cachja me ngu cjua xi catsingatju Nina tsëhë me hatsëë: “Nina ne, sahmi me xi cuetjujñi ngajñi nuju ngu xi cuma profeta sacuaha ngahan. Tetuhunrcun yëjë cjua xi cuichja me cojo nuju ta,
ACT 3:23 sa xi yo xi cuetaharcuaain cjua rë profeta jan ne, hatuxa cueya, ha quihndë cuejñaai ngajñi naja ngayaan xuta rë Nina.” Cuahaxutjin cachja Pedru cjua rë Moisés.
ACT 3:24 Sehe cachja sa Pedru cojo xuta cuitjin: ―‍Hacuahanitjin yëjë profeta, xi cavetsihin cojo xutachanga naja Samuel cojo xi canduvaniji sa ne, jemu cachja me tsëhë xcusun xi camá nixtin xi nechan vi.
ACT 3:25 Cjuandaja xi cachja Nina xi sua me xutachanga naja nchujun ni nguini ne, vëhë cjuandaja xi tisua naja me quihndë. Hacuaha compromisu xi casahmi me cojo xutachanga naja matsejen ne, tisahmichihin me cojo naja quihndë. Nina ne, casahmi me compromisu jan nixtin xi cachja me cojo xutachanga naja Abraham cuitjin: “Ngatsë rë ngu xuta tjë riji ne, ngahan ne, tsinchácun yëjë ni xuta ngasunhndë.” Cuatjin cachja Nina cojo Abraham.
ACT 3:26 Sehe ngajan xi Nina matsejen ne, hya xi cavaxijin me Jesús xi cjuaha xa rë me ne, tjun tjun ngayaan xuta tjë rë Israel catsingatju naja Nina me. Cuatjin xi tsinchacun naja me xi cuetjunxeen jima ngu ngayaan tsëhë ndiya tsehen xi tivanguen. ―‍Cuahaxutjin cachja Pedru cojo xuta.
ACT 4:1 Hya xi camá ne, Pedru cojo Juan ne, tichja cuaha sa me cojo xutacjín jan, hora xi cafehe xu ngujo nahmi. Hacuaha cha mayu rë yungun xi matitjun cojo ngujo sa cha saduceo ne, cafehe xu cha cojo nahmi xi cuacun jan.
ACT 4:2 Hane jemu xti má rë yëjë me ta, tsëhë xi tivicuya apóstol jan xuta, tichja me xi ngatsë rë xi catsicuya Nina Jesús cjuahñu ne, vëhë xi machaya naja xi cuechú nixtin ne, tsicuya nga Nina yëjë ni nima cjuahñu.
ACT 4:3 Hya xi camá ne, cachjaha rë Pedru cojo Juan. Peru tsëhë xi ha quiji xu hora ne, tu caxincha ni me ndavaya.
ACT 4:4 Peru jemu cjín xuta xi cahndë cjua rë apóstol jan ne, camacjain xu rë me. Vëhë xi yëjë xuta xihin xi macjain rë ne, sacuaha hñú mil xu camá me, cojo me xi hatsëë camacjain rë cojo me xi sehe camacjain rë.
ACT 4:5 Xi camá nchujun jan ne, ngujo xutaxa rë yungun cojo ngujo xuta changá cojo ngujo cha xi vicuya cjuachacun ne, camatangun xu me ngajan Jerusalén.
ACT 4:6 Camatangun me cojo Anás, me xi matitjun tsëhë yëjë ni nahmi, cojo Caifás, cojo Juan, cojo Alejandru, cojo yëjë sa me xi xuta rë me xi matitjun tsëhë nahmi jan.
ACT 4:7 Hya xi camá xu ne, catsingatju me quiji chjahá rë Pedru cojo Juan, caviyuju me me cavasencja jan ne, sehe cavinenguise me me cuitjin: ―‍¿Hacutjin canihñu xi camá camandaja cha hmu rë jan? ¿Yo casua nuju chuva rë xi cuatjin canihñu? ―‍Cuatjin cavinenguise me.
ACT 4:8 Ngajan xi Pedru ne, cojo ngahñu rë Hasen rë Nina xi quitsë rë xahasen rë me ne, cuitjin cafayangui xu me: ―‍Ngayun xi má ngayun xutaxa rë tsajan, ngayun xi má ngayun xuta changá naja matsejen ne,
ACT 4:9 quihndë xi meje cumachaya nuju hacutjin canihñi ngu cjuandaja xi camandaja ngu cha hmu rë.
ACT 4:10 Nguehe cuinújin cojo nuju cojo sa xi cumachaya rë yëjë ni xuta tjë rë Israel ta cha hmu rë vi ne, nguehe secun cha xcun ngayujun ni matsejen ta, tsëhë xi camandaja cha ngatsë rë ngahñu rë Jesucristu, me xi tsëhë nandya Nasaret. Ngayun ne, catuhun me xi cahme me xcun cru, peru Nina matsejen ne, catsicuya rë me cjuahñu.
ACT 4:11 Me vëhë xi canitjungun ta, tsëhë xi xi má nuju matsejen ne, machjiriin camahani Jesucristu. Canitjungun me sacuaha tsitjungui chjinevexo ngu ndyojo xi chuyiin rë me tsëhë. Peru quihndë matsejen ne, camatitjun me tsajan ngayejen ni, sacuaha ndyojo ngahñu rë ndihya.
ACT 4:12 Tsajin sa yo xi cuaxëtje naja. Tsajin sa ngu xuta nguehe ngasunhndë xi catsingatju Nina xi cuma cuaxëtje naja. ―‍Cuahaxutjin cachja Pedru.
ACT 4:13 Hya xi camá xu ne, cavëë xuta xi cuacun jan xi Pedru cojo Juan ne, tsacjuiin camahani me xi sua me cjuaquixi rë me, hacuaha cavacun rë xuta jan xi Pedru cojo Juan ne, xuta yuma me, xi hisca cavutayaain me cjuachacun. Ngajan xi xuta jan ne, jemu quijircun rë me. Hacuaha ha vëë me xi Pedru cojo Juan ne, hacui me xi catsujyihiya cojo Jesús.
ACT 4:14 Hane tsëhë xi cha xi camandaja jan ne, ngajan secun tangun xu cha cojo Pedru cojo Juan ne, vëhë xi sacuinyiin rë xuta xi cuacun jan hacutjin cuma xi cuichja me condra tsëhë Pedru cojo Juan.
ACT 4:15 Hya xi camá ne, cavaxë me Pedru cojo Juan cojo cha xi camandaja jan candatsen. Sehe cavisiajmicjín sa me cojo xicjin me.
ACT 4:16 Cuitjin cachja me: ―‍¿Mé xi ndatjin nihña cojo cha xi cuacun vë? Yëjë ni xuta nandya ne, ha camachaya rë me tsëhë cjuarcun jyë xi casahmi cha. Hane cumaji cuinújan xi quixiin.
ACT 4:17 Peru cojo sa xi hacuiin cuitsojo sa cjuacjintacun vihi ngajñi rë xuta nandya ne, cuinchanrcun rë cha. Cuinújan cojo rë cha ta ha quihndë cuichjaain sa cha tsëhë nima vëhë cojo xuta. ―‍Cuahaxutjin cavisiajmicjín xuta xi cuacun jan cojo xicjin me.
ACT 4:18 Hya xi camá ne, cajindaya nga xuta xi cuacun jan Pedru cojo Juan, sehe cachja xu me cojo me xi ha quihndë cuyaain cuichja me tsëhë Jesús cojo xuta.
ACT 4:19 Peru Pedru cojo Juan ne, cuitjin cafayangui me: ―‍Xi má nuju suvun ne, ¿jarë xi hitsë sa chuya rë Nina? ¿Há xi cuinuhyin tsujun ne?, o há tsajin ne, ¿há xi cuinuhyin tsëhë me?
ACT 4:20 Peru ngayin matsejen ne, hatuxa cumajin nisejyin xi cuinújin cjuandaja xi canuhyin cojo xcusun xi cahyin. ―‍Cuatjin xu cafayangui me.
ACT 4:21 Hya xi camá ne, xuta xi cuacun jan ne, cavincharcun sa xu me Pedru cojo Juan, sehe cavëhëndaya xu me. Casacuinyiin rë me hacutjin sahmi me castigu me ta, tsëhë xi yëjë ni xuta tichja me xi jemu jyë hnga Nina cojo Hasen rë me, ngatsë rë cjuarcun xi cuatjin camá jan.
ACT 4:22 Cha xi camandaja ngatsë rë cjuarcun jan ne, ha vatju yachan nu xu tjin rë cha.
ACT 4:23 Hya xi camá ne, xi tu camandaya Pedru cojo Juan ne, quijitjengui sa xu me xuta xi yahnga xi hacuaha ladu rë Jesús, sehe casuacuenda me yëjë cjua xi cachja xuta xi cuacun jan cojo rë me.
ACT 4:24 Hya xi cahndë me xi yahnga jan cjua xi cachja Pedru cojo Juan ne, ngu tangun ni cachja me xi cafehya rë me Nina cuitjin: ―‍Ngayun Nai niji. Ngayun xi canihñu ngahnga, canihñu nangui, canihñu ndachacun, hacuaha canihñu yëjë ni xcusun xi siu jan ne,
ACT 4:25 cojo Hasen nuju ne, cachuxuhun cjuatacun rë xutachanga niji David, me xi casahmi xa nuju. Hane me vëhë ne, cuitjin cachja me cjua xi catuhun rë me: ¿Má rcu hngacacun xuta? ¿Mé má cuatjin tsingatahacacun me ngu cjuatacun tsehen xi tsajin mé machjirëhë?
ACT 4:26 Me xi matitjun tsëhë jingu sa nangui, cojo xutaxa rë jingu sa nandya ne, matangun me xi sahmi me condra Nina hacuaha sahmi me condra me xi tsingatju Nina xi cuaxëtje naja. Cuatjin cachja xutachanga niji David.
ACT 4:27 ’Hacuaha cavetjucaa jain cjua vëhë ta, tsëhë xi ha nguehe nandya vihi ne, cuatjin camatangun Herodes cojo Poncio Pilatu cojo xutaxín cojo xuta tjë rë Israel. Camatangun me xi cuacun vëhë xi sahmi condra me Jesús, me xi hatuxa sahmi xa nuju cojo yëjë xahasen rë, me xi ngayun caningatjun ngasunhndë.
ACT 4:28 Cuatjin casahmi me yëjë hacutjin xi ha cavejñu cjuatacun nuju hatsëë xi cuma ta, tsëhë xi cuatjin meje nuju ngayun.
ACT 4:29 Quihndë ne, ngayun xi Nai niji ngayun ne, chjuhuncuendun cjua xi cachja xuta xi cuacun vë hacutjin xi choho sahmi me cojo niji. Hane ngayin xi má ngayin mosu hndixahan nuju ne, tuhun niji hitsë ngahñu xi rcuiin camahani xi cuinújin cjua nuju cojo xuta.
ACT 4:30 Hacuaha cojo ngahñu nuju ne, nihñu xi cuma ndaja xuta hmu rë, hacuaha nihñu hitsë cjuarcun xi cueyinnanguin ñihi rë Jesús, me xi hatuxa sahmi xa nuju cojo yëjë xahasen rë. ―‍Cuatjin xu cafehya rë me Nina.
ACT 4:31 Hane xi cajnetaha casahmi xuta ladu rë Jesús jan oración ne, cafani nangui ngajan hiscan tjin tangun xu me. Hane cojo Hasen rë Nina ne, catsë rë xahasen rë yëjë ni me, sehe cavetsihin cachja me nguñaja cacun me cjua rë Nina cojo xuta.
ACT 4:32 Quihndë ne, ngayëjë ni me xi cuatjin camangu cacun me cojo Jesús ne, ngu cjuatacun ni rë me, ngu xahasen xu ni rë me. Hacuaha hisca ngu me cachjaain me xi yëjë ni xi tjin rë me ne, tsëhë suvá me ta xi tsëhë me ne, hacuaha tsëhë xu yëjë xicjin me.
ACT 4:33 Hane cojo ngahñu jyë xi casua Nina apóstol xi cuacun jan ne, cuatjin quijinduju me casua me camachaya rë xuta hacutjin catsicuya Nina Nai naja Jesús cjuahñu. Hane jercu casua Nina cjuandaja rë me cojo yëjë xuta ladu rë me.
ACT 4:34 Hacuaha ngajñi rë me xi cuacun jan ne, tsajin xu hisca ngu me xi tjin rë cjuachaja ta, tsëhë xi yëjë me xi nai rë ngu rquí nangui o sa xi ngu ndihya ne, viteña me, sehe fi cani me chji rë jan
ACT 4:35 tsja apóstol. Sehe ngajan xi apóstol xi cuacun jan ne, vatëcja xu me ngajñi rë yëjë xuta, ha tucutjin cjuachaja xi tjin rë xuta jan.
ACT 4:36 Hacuaha cuatjin casahmi ngu cha xi hmí rë José, ngu cha xi casuañihi apóstol ngu ñihi xi ma jo xi hmí Bernabé, ñihi xi meje cuichja cuitjin: Ngu Cha Xi Sua Cjuetacun. Cha vëhë ne, tjë rë Leví má cha, peru catsin xu cha ngajan ngu nangui hiscan xi hmí rë Chipre.
ACT 4:37 Hane cha vëhë ne, caviteña cha ngu rquí nangui xi tjin rë cha, sehe quiji cani cha chji rë, cafahatsja apóstol.
ACT 5:1 Peru ngu nga cha xi hmí rë Ananías cojo na Safira chjuun rë cha ne, hacuaha caviteña xu cha ngu rquí nangui.
ACT 5:2 Peru cafahaxin suvá cha hitsë tujún jan, sehe quiji cani cha hitsë tujún xi cavangui jan tsja apóstol, sacuaha xi ha vëhë yëjë ni chji rë nangui jan. Hane na chjuun rë cha jan ne, hacuaha vëë xu na xi cuatjin casahmi cha.
ACT 5:3 Ngajan xi cachjataha xu Pedru cha cuitjin: ―‍¿Mé má cuatjin caningatihin xi catsë Satanás xahasen riji, ngaye Ananías? ¡Xitsehen vëhë casahmi xi cachjehexin sove hitsë tujún tsëhë chji rë nangui xi caviteñi! ¡Xitsehen vëhë casahmi xi meje cuindache rë Hasen rë Nina!
ACT 5:4 Xi chaja sa cuiteñi nangui jan ne, ha hye ta tsiji. Hacuaha ngu ndiya xi ha caviteñi ne, hacuaha hye ta tujún rë ne, tsiji. ¿Mé má cuatjin caningatehetacuin xi nihñi ngu cjuatacun tsehen vi ni? Hacuiin ngayin ni xuta xi meje cuindache niji ta hisca cojo Nina meje cuindache rë me. ―‍Cuatjin cachja Pedru.
ACT 5:5 Xi tu cahndë cha Ananías cjua jan ne, caticja cha, hane cahme xu cha. Hane yëjë xuta xi camachaya rë cjuacjintacun jan ne, jemu catsacjun camaha xu ni me camá.
ACT 5:6 Ngajan xi ngujo cha ne, cavaxtë cha nima ngu tsjian ne, sehe cafaha cha quiji caveyaniji cha.
ACT 5:7 Hya xi camá ne, xi cavatju sacuaha chuva rë jyan hora xi cahme nima jan ne, cafehe xu chjuun rë nima ngajan hiscan siu apóstol jan. Peru cjëë cumachaya rë na hacutjin xi cavatju nima xihin rë na camá.
ACT 5:8 Ngajan xi cavinenguise xu Pedru na cuitjin: ―‍Tinoje cojo ná. ¿Há caviteñu nangui sacuatjin chji vihi? ―‍Juun. Chji vëhë caviteñi. ―‍Cuahaxutjin cachja na.
ACT 5:9 Sehe ngajan xi cavinenguise nga xu Pedru na cuitjin: ―‍¿Mé má cuatjin sacuaha catsingataha cacun nima xihin riji ne, cuatjin caningatehetacuin xi meje cuindachun Hasen rë Nina? Chutsijin ta cuacun cha xi quiji caveyaniji rë nima xihin riji nduva cha jan. Quihndë ne, hacuaha cojo ngaye cuatjin cuatji cuma. ―‍Cuatjin cachja Pedru.
ACT 5:10 Ha hora vëhë ni ne, caticja xu na hiscan secun Pedru, hane cahme na. Xi tu cavisehen nga cha xi cuacun jan ne, ha cahme xu na xi tu cavëë cha. Sehe ngajan xi cafaha cha nima jan, quiji caveyaniji cha tjehen rë hiscan caseyaniji nima xihin rë.
ACT 5:11 Hya xi camá ne, yëjë xuta rë yungun cojo yëjë sa xuta xi camachaya xu rë cjuacjintacun jan ne, jemu catsacjun camahani me camá.
ACT 5:12 Hacuaha apóstol xi cuacun jan ne, jemu cjín cjuarcun xi casahmi xu me ngajñi rë xuta nandya. Hane ngajan ndatsen yungun xi matitjun, hiscan ngahma Ndihya Tsëhë Salomón ne, ngajan xu ma tangun yëjë xuta ladu rë Jesús.
ACT 5:13 Peru xuta xi hacuiin ladu rë Jesús me ne, hisca vetjiin cacun me xi cuma tiña me ngajan, handasa yëjë xuta jemu ndaja chja me tsëhë xuta ladu rë Jesús jan.
ACT 5:14 Peru hacuaha jemu cjín sa xuta sa chjuun sa xihin me ne, jimangu cacun xu me cojo Jesús, hacuaha jima tangun me cojo xuta ladu rë Jesús.
ACT 5:15 Hacuaha jemu cjín xuta ne, vaxë me xuta hmu rë, viyuju me me xcun nijña ngajan ndiyatë, cojo sa xi hora xi cuatju xu Pedru ne, ndastu tjahnguen rë me satë rë xuta hmu rë xi cuacun jan, hane cumandaja me.
ACT 5:16 Hacuaha jemu cjín camaha xu ni xuta nandya tahndee rë Jerusalén ne, ficojo me xuta hmu rë hacuaha cojo me xi hincha xitsehen xahasen rë, ngajan Jerusalén. Hane camandaja ngayëjë xu ni me.
ACT 5:17 Hya xi camá ne, nahmi xi matitjun tsëhë yëjë ni nahmi, cojo yëjë sa xuta saduceo xi tjin tangun cojo rë me ne, jercu camaxín camaha xu ni rë me.
ACT 5:18 Vëhë xi cachjaha rë apóstol, caxincha me ndavaya.
ACT 5:19 Peru hya xi camanguixun ne, ngu ángel tsëhë Nina quiji cavuxaha xu tingotjo ndavaya, sehe cavaxë rë apóstol xi cuacun jan. Hya xi cavetju me ne, cachja ángel jan cojo rë me cuitjin:
ACT 5:20 ―‍Tángun yungun xi matitjun ne, tuhuncuendun rë xuta yëjë ni cjua tsëhë ndiya xatsë xi tisua nuju Nina. ―‍Cuatjin cachja ángel jan.
ACT 5:21 Ngajan xi apóstol jan ne, casahmi me sacuatjin cachja ángel. Vëhë xi, xi casahasen xi camá nchujun ne, quiji xu me yungun xi matitjun. Hane xi cafehe me ndatsen yungun jan ne, cavetsihin casuacuenda me xuta cjua tsëhë ndiya xatsë jan. Hacuaha sacuaha hora vëhë ne, nahmi xi matitjun cojo xuta xi tjin tangun cojo rë me ne, casahmi tangun xu me yëjë xuta changá tsëhë xuta tjë rë Israel xi cuma ngu junta jyë. Sehe catsingatju me ngujo cha nísë xi cjue cuaxë xu cha apóstol tsëhë ndavaya, cjuecojo cha me hiscan tijima junta.
ACT 5:22 Peru xi cafehe cha ngajan ndavaya jan ne, casacuiin xu rë cha me. Ngajan xi cavuya quiji casuacuenda cha xuta changá jan cuitjin:
ACT 5:23 ―‍Xi cafihin tingotjo ndavaya jan ne, nda ndaja tichjáhñu, hacuaha cha xi sahmi cuidadu jan ne, hinchacun cha tingotjo jan. Peru xi catuxaha tingotjo ne, tsajin yo casacu niji xi hincha cahntsua. ―‍Cuatjin casuacuenda cha.
ACT 5:24 Ngajan xi cha mayu yungun cojo yëjë nahmi xi matitjun ne, hya xi cahndë xu me cjua vëhë ne, jemu cavinenguise xicjin me tsëhë xcusun xi camá jan.
ACT 5:25 Hane ha hora vëhë ni ne, cafehe xu ngu cha xi cachja cojo rë me cuitjin: ―‍Nijyun tacún. Ngu xa xi nduva ngahan ne, cha xi cuacun cavinchun ndavaya jan ne, hinchatahá cha ndatsen yungun, tichja cha cojo xuta. ―‍Cuatjin cachja cha xi cafehe jan.
ACT 5:26 Sehe ngajan xi cha mayu yungun jan ne, quiji cha cojo cha nísë, quijijaha xu cha apóstol xi cuacun jan. Hane xi cafaha cha me ne, quijicojo cha me hiscan tijima junta, peru hacuiin cojo cjuachan ta, tsëhë xi jemu tsacjun xu cha xuta nandya, sá tu cuetaha me cha ndyojo.
ACT 5:27 Hya xi cafehecojo cha me jan ne, sehe caviyuju cha me xcun nahmi cojo xuta changá xi cuacun jan. Ngajan xi nahmi xi matitjun ne, cachja xu me cojo rë me cuitjin:
ACT 5:28 ―‍Ha canújin cojo nuju ta ha quihndë cuyuun cuinújun tsëhë nima vëhë cojo xuta. Peru quihndë ne, caninguitsujun sa cjuachacun nuju jingujyë nandya Jerusalén, hacuaha meje ningatjunsun jyë́ tsëhë cjuaveya rë nima vëhë ngaxtin ngayin.
ACT 5:29 Ngajan xi Pedru cojo apóstol xi yahnga xu jan ne, cuitjin cafayangui me: ―‍Meje rë xi cuinuhyan tsëhë Nina cahndë́ rë xi cuinuhyan tsëhë xuta.
ACT 5:30 Ngayun matsejen ne, catuhun Jesús xi catyangui me xcun ngu cru, hane ngajan cahme me. Peru Nina rë xutachanga naja matsejen ne, catsicuya me Jesús cjuahñu.
ACT 5:31 Hane Jesús vë matsejen ne, casahmi jyë casahmi hnga Nina me, hacuaha cavejña me Jesús ladu quixi tsëhë me, xi cumatitjun Jesús tsajan hacuaha cuaxëtje naja me. Cuatjin casahmi Nina, cojo sa xi ngayaan xuta tjë rë Israel matsejen ne, nindeyan cjuatacun naja hacuaha tsinchataha naja me tsëhë jyë́ naja.
ACT 5:32 Ngayin matsejen ne, cahyin xcusun vëhë, vëhë xi titihín jimachaya rë xuta. Hacuaha Hasen rë Nina matsejen ne, cuatjin tisua jimachaya rë xuta tsëhë xcusun xi camá jan. Hane Nina ne, casua me Hasen rë me cojo xuta xi vihndë tsëhë me. ―‍Cuatjin cafayangui apóstol jan.
ACT 5:33 Ngajan xi yëjë me xi cuacun tisahmi xu junta jan ne, hya xi cahndë me cjua xi cachja apóstol jan ne, jercu camacjan camahani rë me. Hisca meje tsiquehen xu me apóstol jan.
ACT 5:34 Peru ngajñi rë xuta xi sahmi junta jan ne, jiyajñi ngu me xi vicuya cjuachacun xi hmí rë Gamaliel, ngu xuta fariseo. Hane yëjë ni xuta ne, jemu faharcun xu me me. Gamaliel jan ne, casecunvasen me, sehe cavitexa me xi cuetjuxin apóstol ngu hora lihndi candatsen.
ACT 5:35 Sehe cachja xu me cojo xuta xi tisahmi junta jan cuitjin: ―‍Ngayujun ngarcun ni xuta tjë rë Israel matsejen ne, nechun cuidadu sa xi mé meje nihñu cojo cha xi cuacun vë.
ACT 5:36 Ninguitsjun ta hatsëë nixtin matsejen ne, cavetjujñi nima cha Teudas ngajñi rë xuta. Jercu cachja nima xi jemu cha venguichji rë cha, hane sacuaha ñuju cientu xihin cavisehen ladu rë nima. Hya xi camá ne, catsiquehen xuta nima, hane yëjë ni xuta ladu rë nima jan ne, cavitsojo me, hane ngajan cafë cjuandya xi casahmi me.
ACT 5:37 Hane xi camá ngascan ne, sacuaha nixtin xi camá censu matsejen ne, hacuaha cavetjujñi nima Judas, cha Galilea. Cavindacha nima xuta, hane jemu cavisehen me ladu rë nima. Peru nima vëhë matsejen ne, hacuanitjin ni cahme. Hane yëjë ni xuta ladu rë nima jan ne, cafë me cavitsojo me.
ACT 5:38 Vëhë xi nguehe cuichjá cojo nuju ta mijí rë xi nihñu cjuahngatacun cojo cha xi cuacun vë. Mijí rë xi chasen cha ta, sa xi suvá cjuatacun ni rë xuta xi tijima matsejen ne, cjuëya suvá vë.
ACT 5:39 Peru sa xi cjuatacun rë Nina xi tijima ne, cumaji cuichancjan cjuatacun rë cha. Ndaja cuidadu, sá tu cuechú nixtin xi cumachaya naja ne, Nina tichicjaan cojo rë me. ―‍Cuatjin cachja Gamaliel. Hya xi cajnetaha cachja Gamaliel cuatjin ne, yëjë ni xuta xi tisahmi junta jan ne, cajne cacun me.
ACT 5:40 Ngajan xi cajindaya nga me apóstol jan, sehe cavitexa me casehen rë. Hya xi camá ne, cachja xu me cojo rë apóstol xi ha quihndë cuyaain cuichja me tsëhë Jesús cojo xuta, sehe cavëhëndaya xuta jan me.
ACT 5:41 Ngajan xi apóstol jan ne, cavetjuxin xu me tsëhë hiscan jima junta jan. Hane jemu ndama camahani rë me xi cavechú chuva rë xi choho cavatju me camá ngatsë rë Jesús.
ACT 5:42 Peru nchunchujun ni ne, ngajan ndatsen yungun cojo ndava xuta ne, casejyiin xu xi casua me camachaya rë xuta cjuandajyihi xi chja xi Jesús ne, hacui me xi catsingatju Nina.
ACT 6:1 Hya xi camá ne, xi quiji sa nixtin ne, camacjín sa xuta ladu rë Jesús. Hane ngajñi rë me xi cuacun vëhë ne, me xi visiajmi hne griego ne, cavetsihin cavinchajyë xu me me xi visiajmi hne rë xuta tjë rë Israel. Jyë́ xi cavincha xu me ne, yachjin cahan tsëhë ngajñi rë me ne, ndajin xu má cuenda me nchunchujun ni hora xi ticja xcusun xi satë rë me xingu xingu me xi tjin rë cjuachaja.
ACT 6:2 Ngajan xi apóstol xi tejó jan ne, cajindayavaha me yëjë sa xuta ladu rë Jesús, sehe cachja xu ngu apóstol jan cuitjin: ―‍Ndajintjin xi tu fë tu vetsihin vejñixin cjua rë Nina ngatsë rë xi chjihincuendin cjuacjintacun xi ma cuenda nchunchujun ni.
ACT 6:3 Vëhë xi ngayujun ni ne, naxujun ngajñi nuju yatu xihin xi tsajin mé cún mé má hacuaha quitsë rë xahasen rë cojo Hasen rë Nina hacuaha vechútaha cjuatacun rë. Sehe tahan rë xa xi cjuahacuenda cjuacjintacun vëhë.
ACT 6:4 Xi cuatjin ne, ngayin ne, tihín yojo niji cojo xa xi nihñi oración hacuaha tihín cumachaya rë xuta cjua rë Nina. ―‍Cuatjin cachja apóstol jan.
ACT 6:5 Hane jemu cachuya xu rë yëjë xuta xi cuacun jan cjua xi cachja apóstol jan. Sehe ngajan xi cavaxijin xu me yatu xihin xi cuicun vi: Esteban, ngu xihin xi jemu mangucacun cojo Jesús hacuaha quitsë rë xahasen rë cojo Hasen rë Nina; Felipe; Prócoro; Nicanor; Timón; Parmenas; cojo Nicolás, ngu xutaxín xi hacuiin xuta tjë rë Israel, peru camacjain rë me Nina rë xuta tjë rë Israel. Nicolás jan ne, canduva me ngu nandya xi hmí rë Antioquía.
ACT 6:6 Hya xi camá xu ne, quijicojo xuta jan xihin xi cavaxijin me jan xcun apóstol. Sehe apóstol jan ne, casahmi me oración, sehe cavisanetsja xu me xihin xi cuacun jan xi suaxa rë me.
ACT 6:7 Xi quiji sa nixtin ne, xuta Jerusalén ne, jemu jima chaya sa xu rë me cjua rë Nina, hacuaha jercu jima cjín sa xuta ladu rë Jesús ngajan Jerusalén. Hisca nahmi ne, jemu cjín me xi jimangu cacun xu me cojo cjuandajyihi xi chja tsëhë Jesús.
ACT 6:8 Nixtin hya ne, Esteban, ngu xihin xi hacuaha cojo cavaxijin xuta jan ne, quitsë rë xahasen rë me cjuandaja rë Nina, hacuaha quitsë rë me ngahñu rë Nina. Vëhë xi jemu tisahmi xu me cjuarcun ngajñi rë xuta.
ACT 6:9 Peru ngujo cha tsëhë yungun xi hmí rë Yungun Rë Hndixahan Xi Ha Ndaya Tjin ne, cojo xu cha ma tangun cha cojo cha nandya Cirene, cha nandya Alejandría, cha estadu Cilicia, cojo cha estadu Asia, xi cuisiajmi cha. Cavechú ngu nixtin xi camatangun xu cha xi cuacun vë cojo Esteban ne, cavetsihin cafahataha cha me.
ACT 6:10 Peru ngatsë rë xi Hasen rë Nina jemu casua rë me cjuatacun xi cuisiajmi me cojo cha ne, cacaain xu rë cha casahmi condra cha cjua rë me.
ACT 6:11 Hya xi camá ne, cavanguisehma xu cha ngujo cha xi cuichja cjuandesu cuitjin: ―‍Canuhyin xi choho cachja cha xi cuajyihi vë tsëhë Moisés hacuaha choho cachja cha tsëhë Nina. ―‍Cuatjin cuichja cha.
ACT 6:12 Hane xi cachja cha cjuandesu vëhë ne, casahmi cha xi yëjë xuta cojo xuta changá cojo cha xi vicuya cjuachacun ne, jemu camaxti xu rë me. Ngajan xi cachjahá rë Esteban, quiji chani rë me xcun yëjë xuta xi matitjun. Sehe casahmi me xi matitjun jan ngu junta.
ACT 6:13 Ngajan xi cha xi cuacun jan ne, cuitjin cachja xu cha cjuandesu hora xi cavinchajyë cha Esteban: ―‍Cha xi cuijyihi vi ne, sejyiin cha xi choho chja cha tsëhë yungun rë Nina xi matitjun vi. Sejyiin cha xi choho chja cha tsëhë ley rë yungun naja.
ACT 6:14 Hacuaha canuhyin xi cachja cha xi Jesús, cha Nasaret vë ne, tsinguetsun cha yungun naja vi hacuaha tsindeya cha xcusun xi cavejña xutachanga naja Moisés hatsëë hacutjin nihña. ―‍Cuatjin cavinchajyë cha me.
ACT 6:15 Ngajan xi yëjë xuta xi siu xu xcun junta jan ne, cavutsejenndaja me Esteban. Hane cavëë me xi xcun Esteban ne, tangun jyihi xu cojo xcun ngu ángel.
ACT 7:1 Hya xi camá ne, nahmi xi matitjun xu jan ne, cavinenguise me Esteban cuitjin: ―‍¿Há quixi cjua xi chja cha xi cuacun vë? ―‍Cuatjin xu cachja me.
ACT 7:2 Hane Esteban ne, cuitjin xu cavetsihin casua me cjuaquixi rë me: ―‍Ngayujun ni quihndi nandya, ngayujun ni xuta changá matsejen ne, tisiñuju cjua xi cuichjá cojo nuju vi. Nina naja, xi jemu jyë hnga camahani me cojo hasen rë me matsejen ne, cajnetsejen me cachja me cojo xutachanga naja Abraham, hya xi tacun cuaha Abraham táha ladu tsëhë nangui Mesopotamia, hya xi chaja sa cjue setaha cahndë́ me ngajan Harán.
ACT 7:3 Hane cachja Nina cojo rë me cuitjin: “Nismitacuin nangui riji. Nismitacuin xuta riji. Hane tihin ngajan ngu nangui cjin, tuyani ni hiscan xi ngahan tsingácun ri.” Cuatjin cachja Nina.
ACT 7:4 Ngajan xi Abraham matsejen ne, cavetju me tsëhë nangui rë me, nangui xi hmí Mesopotamia, hiscan xi caviyuju xuta nangui rë me, xuta Caldea. Cavetju me quiji casetahacahndë me ngajan nandya Harán. Hane xi cavatju cahme nahmi rë me ne, Nina casahmi me xi cavetju nga Abraham tsëhë Harán, canduva casetahacahndë me nguehe nangui hiscan xi nechan quihndë.
ACT 7:5 Peru xi ngutjen ni ne, casuaain Nina me hisca hitsë nangui vihi xi cuma tsëhë me ta xi cachja me ne, hisca xi cuma ngascan ne, sehe sua me nangui vihi xi cuma tsëhë Abraham, cojo yëjë sa xuta tjë rë me xi cuinduva ngascan. Hya xi cachja Nina cojo rë me cuatjin ne, cjëë sacú rë chjuun rë Abraham quihndi.
ACT 7:6 Hacuaha cachja sa Nina cojo Abraham cuitjin: “Cuechú nixtin xi xuta tjë riji ne, cjue cuiyujutaha me ngu nangui cjin. Hane xuta xi nangui rë jan ne, sahmi me mosu hndixahan rë me xuta xi cuacun tjë riji vë, hacuaha jemu choho sahmi me cojo rë me. Ñuju cientu nu xi cuatjin sahmi me xcusun vëhë.
ACT 7:7 Peru cuechú nixtin xi ngahan ne, sahme castigu xuta xi nangui rë jan. Hane xi cuatju xcusun vëhë ne, sehe cuetju xuta tjë riji ne, cuya cuinduva nga me nguehe cahndë́ vihi, hane nguehe cjuaharcun cjuahajeya ná me.” Cuatjin cachja Nina cojo Abraham.
ACT 7:8 Hane cojo sa xi cuma tsejen xi camangu cacun Abraham cojo compromisu xi casahmi Nina cojo rë me matsejen ne, cavejña Nina ngu xcusun xi xtí chuxin naja ngayaan xi xihin ngayaan. Ngajan xi hya xi cavechú jyin nixtin xi catsin Isaac, quihndi rë Abraham ne, cavatë me chuxin rë quihndi jan sacuatjin xi cachja Nina. Hane hacuanitjin ni casahmi Isaac cojo quihndi rë me Jacob. Hacuaha Jacob ne, cuatjin casahmi me cojo yëjë tejó quihndi rë me xi xutachanga naja.
ACT 7:9 ’Hane xi camá ngascan matsejen ne, cavechú ngu nixtin xi xutachanga naja xi quihndi rë Jacob jan ne, jemu casahmi xín cacun me cojo hntsë me xi hmí rë José. Vëhë xi caviteña me José. Hane quijicojo xuta xi cavatsë rë José jan me hisca nangui Egipto. Peru Nina ne, cavisecoo me José jan,
ACT 7:10 hacuaha cavaxëtje Nina me tsëhë yëjë cjuacjintacun xi cavatju me camá. Jemu casua Nina me cjuatacun, hacuaha jemu casua me me cjuandaja. Vëhë xi me xi matitjun tsëhë yëjë ni nación Egipto ne, jemu cachuya rë me tsëhë José jan. Vëhë xi me xi matitjun jan ne, casua me José xa xi cuitexa me jingujyë ni nación jan hacuaha cjuahacuenda me yëjë cjuacjintacun xi tjin ndava me xi matitjun jan.
ACT 7:11 ’Hya xi camá ne, jercu camajindya camahani jingujyë ni ladu tsëhë Egipto cojo Canaán. Jercu jyë camahani ngu cjuañihi xi cavatju xuma xutachanga naja camá. Casacuiin rë me mé xi sinë me.
ACT 7:12 Peru hya xi camachaya rë xutachanga naja Jacob xi jemu tjin xichinë ngajan Egipto matsejen ne, ngajan catsingatju me quihndi rë me ngu ndiya titjun xi cjue cuatsë me xichinë.
ACT 7:13 Hane hya xi ma jo ndiya quiji quihndi rë Jacob ngajan Egipto ne, cachja quixi José cojo hntsë me cuitjin: “Ngahan xi tsuhun ná.” Cuatjin cachja me. Hacuaha nixtin hya ne, me xi matitjun tsëhë Egipto matsejen ne, camachaya rë me yo tjë rë má José.
ACT 7:14 Sehe ngajan xi José ne, catsingatju me hntsë me jan xi cjue jaha me Jacob, nahmi rë me, cojo yëjë sa xuta rë me. Xi yëjë xuta xi cuacun vëhë ne, jyanchan tyjuhun xuta má me.
ACT 7:15 Ngajan xi Jacob cojo xuta rë me matsejen ne, quiji caviyujutaha cahndë́ me ngajan Egipto. Hane xi camachangá me ne, ngajan cahme me. Hacuaha yëjë sa xutachanga naja xi cuacun jan ne, hacuaha ngajan cahme me.
ACT 7:16 Xi camá ngascan ne, quiji chani rë yojo rë nima Jacob ngajan nandya Siquem. Ngajan caseyaniji nima tsjun xi cavatsë Abraham hatsëë, hya xi caviteña xuta rë ngu cha xi hmí rë Hamor, ngajan Siquem.
ACT 7:17 ’Hya xi camá ne, xi camatiña nixtin xi cuetjucaa sacuaha cjua xi ha cachja Nina cojo Abraham matsejen ne, yëjë xutachanga naja xi siutaha cahndë́ ngajan nangui Egipto ne, ha jercu cjín camahani camá me.
ACT 7:18 Sehe cavisehen nga ngu me xi xatsë xi camatitjun me ngajan nangui Egipto jan. Hane me vëhë ne, hvíin me hacutjin casahmi nima José hatsëë.
ACT 7:19 Hacuaha me vëhë ne, jemu cavindacha me xutachanga naja. Jemu choho casahmi me cojo rë me ta casahmi me ngujyë xi xutachanga jan ne, cuaxë me quihndinda rë me, cuiyuju me candatsen cojo sa xi cueya. Hane cuatjin xi ha quihndë hacuiin cuma cjín sa me.
ACT 7:20 Ngajñi rë cjuacjintacun vëhë matsejen ne, hya catsin Moisés, ngu quihndi xi jemu ndajyihi camahani. Hane quihndi jan ne, ndava nahmi rë camacha sacuaha chuva rë jyan sá.
ACT 7:21 Peru hya xi cavaxë me quihndi jan xi cueya ne, na quihndi rë me xi matitjun jan ne, cafaha na quihndi jan, hane catsicha na sacuaha quihndi rë suvá na.
ACT 7:22 Hane xi quiji sa nixtin ne, cavetsihin cavutaya Moisés yëjë ni cjuahasen xi tjin rë xuta Egipto, sehe ngajan xi camá me ngu xihin xi jercu vengui chji rë xi chja me cojo xi sahmi me.
ACT 7:23 ’Hya xi cavechú Moisés yachan nu matsejen ne, catsingataha cacun me xi cjue scusehenya me xuta tjë rë Israel, xuta xi tangun xutachanga rë me cojo.
ACT 7:24 Hya xi camá ne, cavëë Moisés xi ngu cha Egipto ne, tisahmi cha cjuahngatacun cojo ngu cha tjë rë Israel. Ngajan xi Moisés ne, cavisecoo me cha xi choho tivatju tijima jan. Catsiquehen me cha Egipto jan, hane cuatjin casahmingojo me.
ACT 7:25 Xi má rë Moisés matsejen ne, cuijnercu yëjë xuta tjë rë Israel xi Nina tsingatju me Moisés xi cuaxëtje me xuta jan. Peru cajnii rcu me.
ACT 7:26 Xi camá nchujun jan ne, cavechútaha me jo cha tjë rë Israel xi ticjan cha cojo xicjin cha. Hane meje cuatëcja me si xi tisahmi cha. Vëhë xi cachja me cojo cha cuitjin: “¿Mé má cuatjin nihñu cjuahngatacun cojo xingun? ta ngayun ne, tangun xutachanga nuju.” Cuatjin xu cachja Moisés.
ACT 7:27 Peru cha xi tisahmi cjuahngatacun cojo cha xingu jan ne, catsivaha cha Moisés, sehe cachja cha cojo me cuitjin: “¿Yo casuaxa nuju xi nduvun vitexun niji hacuaha nduvun nichuvun jyë́ niji?
ACT 7:28 ¿Há meje nicuhun ná ngahan sacuatjin canicuhun cha Egipto ngujña?” Cuatjin cachja cha.
ACT 7:29 Hane xi cuatjin cachja cha cojo Moisés ne, catsacjun me camá. Vëhë xi quiji cavanga me hiscan ngu nangui cjin xi hmí rë Madián, ngajan casetahacahndë me. Hane xi quiji nixtin matsejen ne, camá me nahmi rë jo quihndi xihin.
ACT 7:30 ’Hane hya xi cafë nga yachan nu xi casetaha Moisés ngajan ne, cavechú ngu nixtin xi cavëë me sacuaha ngu ángel ngajñi rë ndihi tsëhë ngu ya lihndi xi seti ngajan ngu xín camahani tsëhë nandya, tiña Naxi Sinaí.
ACT 7:31 Hane jemu quijircun rë Moisés xi cavëë me xcusun jan. Hane xi quijitiña sa me xi scutsejenndaja me matsejen ne, cahndë me cjua rë Nina xi cachja cuitjin:
ACT 7:32 “Ngahan xi Nina rë xutachanga riji ngahan, Nina rë Abraham cojo Isaac cojo Jacob.” Cuatjin cachja cjua rë Nina jan. Ngajan xi Moisés ne, cavetsihin ña cafatsë me xi catsacjun me camá; ha hisca quihndë cavetjiin cacun me xi scutsejen sa me.
ACT 7:33 Sehe cachja nga Nina cojo rë me cuitjin: “Naxe chuxinxtë riji ta cahndë́ hiscan sechin ne, catsinchácun.
ACT 7:34 Hacuaha nguehe cuichjá cojo ri ta ngahan ne, ha cahvë hacutjin choho tisahmi xuta Egipto cojo xuta ladu naha, hacuaha ha cahndë hacutjin tifë cacun xuta ladu naha xi choho tivatju me tijima. Vëhë xi ngahan ne, canduvajne xi cuaxëtjë me. Quihndë ne, ndove ta tsingátju ri ngajan Egipto.” Cuatjin cachja Nina cojo Moisés.
ACT 7:35 ’Moisés vë ne, hacui me xi catsitjungui xuta hya xi cachja xuta cuitjin: “¿Yo casuaxa nuju xi nduvun vitexun niji, hacuaha nduvun nichuvun jyë́ niji?”, chja me. Hacuaha hacui me xi Nina catsingatju rë xi cuma titjun hacuaha cuëhëndaya rë xuta. Hane sacuaha ángel xi camatsejen ngajñi ndihi rë ya lihndi jan ne, cavisecoo rë Moisés xi cuatjin casahmi me.
ACT 7:36 Hacuaha hacui me xi cavaxë rë xutachanga naja tsëhë nangui Egipto. Jemu casahmi me cjuarcun ngajan Egipto, cojo ngajan ndachacun Hani, cojo ngajan ngu xín camahani tsëhë nandya. Cahntsua yachan nu xi cuatjin casahmi me.
ACT 7:37 Moisés vë ne, hacui me xi cachja cojo xutachanga naja cuitjin: “Nina ne, cuya tsingatju nga nuju me ngu profeta xi cuetjujñi ngajñi nuju. Tsingatju nuju Nina profeta vëhë sacuatjin catsingatju ná me ngahan.” Cuatjin cachja Moisés.
ACT 7:38 Hacuaha ha hacui ni me xi casetaha cojo xutachanga naja, hya xi caviyujutaha me ngajan ngu xín camahani tsëhë nandya. Hacui me xi cachja ángel cojo rë ngajan Naxi Sinaí. Hacuaha hacui me xi cafahatsja cjua rë Nina xi sacú rë xutachanga naja hacuaha hisca cojo xi sacú naja ngayaan quihndë.
ACT 7:39 ’Peru xutachanga naja xi cuacun jan ne, mijí cuihndë me tsëhë Moisés. Catsitjungui me Moisés, hisca cavuya catsinguitsjen nga me nangui Egipto cahntsua xahasen rë me.
ACT 7:40 Ngajan xi cachja me cjua vihi cojo xutachanga naja Aarón, hntsë Moisés: “Nindujun sa nina xi scuxaha ndiya tsajan ta, cha Moisés vë, cha xi cavaxë naja tsëhë nación Egipto ne, hyaan mé camá rë cha xi vuyaain cha.” Cuatjin cachja xuta jan.
ACT 7:41 Ngajan xi nixtin hya ne, catsindaja xuta jan ngu nina rë me xi xcusun rë ngu hndindyaja. Hya xi camá ne, catsiquehen me ngujo chu, sehe quiji caviyuju me chu xcun nina jan. Hacuaha casahmi me suhi tsëhë nina xi catsindaja suvá me jan.
ACT 7:42 Vëhë xi Nina naja ne, catsismi cacun me xutachanga jan, cojo sa xi cjuaharcun xuta jan niñú xi siutaha ngahnga, sacuatjin catsihindu profeta xcun xujun rë Nina cjua xi cachja Nina hya xi cachja me cuitjin: Ngayujun ngarcun ni xuta tjë rë Israel matsejen ne, hya xi canicuhun chu sacuaha cjuatjo xi tuhun ná ngahan cahntsua yachan nu xi cavinechuntuhun ngajan ngu xín camahani tsëhë nandya matsejen ne, hacuiin ngahan xi cuatjin cachjuhunrcun ná ta ngayun ne, ha canindujun suvun nina xi chjuhunrcun.
ACT 7:43 Ndava nina nuju xi hmí Moloc cojo niñú rë nina nuju xi hmí Refán, jo vëhë xi cachuhunhngun catsanguncujun xi má nina nuju. Vëhë xi ngahan sahme xi cjuecojo cjuachan nuju xuta cjin sa tsëhë hiscan xi hmí Babilonia. Cuatjin catsihindu profeta cjua xi cachja Nina.
ACT 7:44 ’Hya xi caviyujutaha xutachanga naja hatsëë ngajan ngu xín camahani tsëhë nandya matsejen ne, cavejña rë me ngu ndihya tsjian hiscan camá acuerdu cojo Nina. Hane vëhë xi vëë me xi cavejña Nina cojo rë me. Ndava Nina jan matsejen ne, camandaja tutjin xi cachja Nina cojo Moisés, camandaja sacuatjin xcusun xi catsingacun Nina Moisés.
ACT 7:45 Hane hya xi cafahatsja xutachanga naja ndava Nina jan ne, hacuaha cuatjin quijicojo me ha tuyani ni xi quiji caviyujutaha nga me. Hane xi camá ngascan ne, cavechú nixtin xi cafehecojo Josué xutachanga naja nguehe nangui naja vi, nangui xi Nina cavisecoo rë xutachanga naja xi cavaxëxin me xuta xi nangui rë. Hacuaha nixtin hya xi camá cuatjin ne, hacuaha cafehecojo me ndava Nina jan. Cuatjin camá sa hisca hya xi cavechú nixtin rë xutachanga naja David.
ACT 7:46 Hane David jan matsejen ne, jemu cachuya rë Nina tsëhë me. Ngajan xi cafehya David cahndë́ cojo Nina xi tsindaja me ngu ndihya hiscan cuejña Nina.
ACT 7:47 Hane hisca xi camá ngascan ne, xutachanga naja Salomón catsindaja me ndava Nina.
ACT 7:48 Peru Nina xi matitjun matsejen ne, hacuiin vejñacahndë me ngu ndihya xi tsindaja xuta ta ¿há vitsjiin nuju hacutjin cachja ngu profeta xi cachja me cjua rë Nina cuitjin?:
ACT 7:49 Ngahnga ne, sacuaha ngu silla ndajyihi hiscan xi vitejña, hane nangui ne, sacuaha ngu yatë hiscan xi visane ntsacu, chja Nina. Tsajin yo cuma tsindaja ngu ndihya hiscan xi cuitejñacahndë, Tsajin ngu cahndë́ xi cuacun vë xi cuma cjuahájenda.
ACT 7:50 Ngahan catsindaja yëjë ni xcusun xi tjin ngasunhndë. Cuatjin cachja profeta jan cjua rë Nina.
ACT 7:51 ’Ngayujun ni ne, jercu taja camahani rcun. Xahasen nuju cojo cjuatacun nuju ne, tangun cojo xutaxín xi hatuxa macjaain rë Nina. Hatuxa nihñu condra Hasen rë Nina. Tangun camahani ngayun cojo xutachanga naja.
ACT 7:52 Hacuaha xutachanga naja ne, jercu catsujyihiya tjengui me yëjë profeta cojo cjuahngatacun. Hisca catsiquehen me profeta xi casua camachaya rë me xi sehe cuinduva ngu me xi hatuxa tyjahi jain cojo cjuatacun rë. Hane quihndë xi cafehe jain me ne, ngayun canihñu me entregadu, ngayun catuhun me xi catsiquehen xuta me.
ACT 7:53 Ngayun xi casua ángel xutachanga nuju ley rë Nina ne, hisca nuhyuun tsëhë ley vëhë. ―‍Cuatjin casua Esteban cjuaquixi rë me xcun yëjë xuta xi matitjun ngajan xcun junta.
ACT 7:54 Ngajan xi yëjë xuta xi matitjun xi cuacun tisahmi junta jan ne, hya xi cahndë me cjua xi cachja Esteban jan ne, hisca catsijanerii me nehñu me xi jercu tu camacjan camahani rë me.
ACT 7:55 Peru Esteban ne, quitsë rë xahasen rë me cojo Hasen rë Nina. Hane xi cavutsejenniji me ngahnga ne, cavëë me hasen ndajyihi rë Nina xi jercu seti camahani. Hacuaha cavëë me Jesús, secun me cojo Nina.
ACT 7:56 Ngajan xi cachja Esteban cuitjin: ―‍Chutsujun ni. Ngahan ne, xi tivutsején ngahnga vë ne, tsejen xi tixaha sacuaha tingotjo rë, hacuaha tsejen xi me xi Quihndi rë Xuta Jain ne, secun me cojo Nina. ―‍Cuatjin cachja Esteban.
ACT 7:57 Peru me xi cuacun jan ne, cavetsihin cajindayatë me hacuaha cavahahñu me tyjavañuju me, tsëhë xi mijí sa cuihndë me xi tichja Esteban. Sehe ngutjen ni ne, ngu tangun ni cavanga me quiji cavehnchun me Esteban xi cafaha me me.
ACT 7:58 Sehe cavaxëxin me me ngajan tjehen nandya, sehe cavitexa me ngujo cha xi cavetsihin cavetaha cha ndyojo Esteban. Cha xi cuacun casahmi jan ne, cavaxë cha tsjian xcun rë cha, caviyuju cha hiscan xi secun ngu cha xi hmí rë Saulo, xi casahmi cha cuidadu.
ACT 7:59 Jinguyëjë rë xi tisatë rë Esteban ndyojo xi tivetaha cha xi cuacun jan ne, cafehya me cjuandaja cojo Jesús cuitjin: ―‍Jesús, ngayun Nai naha, chjuhunntsun hasen naha. ―‍Cuatjin cachja me.
ACT 7:60 Hya xi camá ne, cavixcuhnchi me, hane sehe jercu cajindaya me, cachja me cjua vihi: ―‍¡Ngayun Nai naha, ninchatuhun rë xuta xi cuicun vi tsëhë cjuatsehen xi tisahmi me cojo ná! ―‍Cuatjin cajindaya me cachja me. Xi cafë cachja me cjua vëhë ne, cahme me.
ACT 8:1 Hane Saulo ne, hacuaha cachuya rë me xi cuatjin catsiquehen cha xi cuacun jan Esteban. Ha nixtin hya ni ne, cavetsihin catsujyihiya tjengui xuta xi matitjun jan yëjë xuta ladu rë Jesús cojo cjuahngatacun ngajan Jerusalén. Hya xi camá ne, yëjë xuta ladu rë Jesús jan ne, cafë cavitsojo me táha ladu tsëhë distritu Judea cojo distritu Samaria. Suvá sa apóstol xi tsajin cavitsojo xu me.
ACT 8:2 Hane ngujo cha xi faharcun jain rë Nina ne, cavinchaniji cha nima Esteban, hacuaha jemu cajihnda xu cha tsëhë nima.
ACT 8:3 Peru Saulo ne, cavetsihin catsujyihiya tjengui me xuta ladu rë Jesús cojo cjuahngatacun. Quiji cavisehen xu me ndava xuta xi cuacun jan, cajuvëjne me cavaxë me sa chjuun sa xihin, quijicani me ndavaya. Vëhë xi cuatjin cavitsojo xuta jan.
ACT 8:4 Quihndë ne, xuta xi cavitsojo tsëhë Jerusalén jan ne, catsujyihiya casua xu me camachaya rë xuta cjuandajyihi xi chja tsëhë Jesucristu.
ACT 8:5 Hane Felipe ne, quiji xu me ngu nandya táha distritu Samaria, hane ngajan casua me camachaya rë xuta ta ha cafehe me xi catsingatju Nina xi cuaxëtje naja.
ACT 8:6 Hane xi cavisiñuju xuta cjua xi cachja Felipe cojo xi cavutsejen me cjuarcun xi casahmi me ne, jemu ndaja cavetaharcu me cjua xi cachja Felipe jan.
ACT 8:7 Jemu cjín xuta xi hincha xitsehen xahasen rë me ne, camandaja xu me. Hisca cajindaya xitsehen jan hora xi cavetjuxin. Hacuaha jemu cjín xuta xi cahme yojo rë me cojo cjín sa xuta xi rengun me ne, camandaja xu me.
ACT 8:8 Vëhë xi xuta nandya vëhë ne, jercu ndaja camá xu rë me.
ACT 8:9 Peru ngu cha xi hmí rë Simón ne, ha quitahá cha ngajan, tisahmi xu cha cjuasurqui. Hane yëjë xuta distritu Samaria ne, jemu quijircun rë me xi casahmi cha. Hacuaha cachja xu suvá cha xi jemu jyë hnga cha cojo cjuatacun rë cha.
ACT 8:10 Yëjë xuta Samaria jan, sa quihndi sa changá me ne, jemu ndaja cavetaharcu xu me tsëhë cha Simón jan. Hisca cachja xu me tsëhë cha cuitjin: ―‍Cha vihi ne, hacui cha xi tjin rë ngahñu rë Nina, ngahñu xi hmí rë ngahñu jyë. ―‍Cuatjin cachja xuta jan.
ACT 8:11 Vëhë xi jemu ndaja cavetaharcu xu xuta tsëhë cha ta, tsëhë xi ha jemu jyë nixtin xi casahmi cha xi quijircun rë xuta tsëhë cjuasurqui xi casahmi cha.
ACT 8:12 Peru hya xi camacjain rë xuta tsëhë Felipe, hya xi casua me camachaya rë xuta tsëhë cjuandajyihi xi chja xi cuinduva Nina sahmi me gubiernu hacuaha cojo cjuandajyihi xi chja tsëhë Jesucristu ne, caxtenda xu me, sa chjuun sa xihin me.
ACT 8:13 Hacuaha hisca cha Simón jan ne, camacjain xu rë cha tsëhë Felipe. Hane xi cavatju caxtenda cha ne, sehe catsihñu cha yojo rë cha cojo Felipe. Hane xi cavutsejen cha yëjë cjuarcun yehe xi jima ne, jemu quijircun rë cha.
ACT 8:14 Hya xi camachaya rë apóstol xi siu ngajan Jerusalén xi xuta Samaria ne, camacjain xu rë me cjua rë Nina ne, catsingatju me Pedru cojo Juan quijitjengui rë xuta jan.
ACT 8:15 Hya xi cafehe jo apóstol jan ngajan ne, casahmi xu me oración tsëhë xuta jan cojo sa xi sacú rë me Hasen rë Nina.
ACT 8:16 Cuatjin casahmi me ta, tsëhë xi hisca xi ngu xuta jan ne, cjëë cuinduva xu Hasen rë Nina cuisehen xahasen rë me. Suvá ni ñihi rë Nai naja Jesús caseyanangui hora xi caxtenda me.
ACT 8:17 Ngajan xi Pedru cojo Juan ne, cavisanetsja me xuta Samaria jan, sehe cavisehen xu Hasen rë Nina cahntsua xahasen rë me.
ACT 8:18 Xi cavëë cha Simón xi casacu rë xuta jan Hasen rë Nina ngatsë rë xi cavisanetsja apóstol jan me ne, meje sua xu cha me tujún,
ACT 8:19 hacuaha cuitjin cachja xu cha cojo rë me: ―‍Tuhun ná cjuatacun vëhë, cojo sa xi tu yo ni xi cuisanentsa ne, sacú rë Hasen rë Nina. ―‍Cuatjin cachja cha.
ACT 8:20 Ngajan xi Pedru ne, cuitjin cafayangui xu me: ―‍¡Tujún riji ne, catjë tangun cojo ri! ta, tsëhë xi caningatehetacuin xi cjuandaja rë Nina ne, cuma chaha rë cojo tujún.
ACT 8:21 Ngaye ne, satiin camahani ri xa vëhë ta, tsëhë xi hacuiin tyjahi xahasen riji xcun Nina.
ACT 8:22 Nindeye cjuatacun riji. Tejñixin cjuatsehen riji vë. Hacuaha chjahye rë Nina cjuandaja rë me, há tsinchataain me ngaye tsëhë cjuatacun xi jiya ngajñi rë cjuatacun riji.
ACT 8:23 Ngahan ne, vacun ná xi ngaye ne, cuma ngaye ngu xuta xi ngundiyaxa ni tsihñu me yojo rë me cojo cjuatsehen. ―‍Cuatjin cafayangui Pedru.
ACT 8:24 Ngajan xi cha Simón ne, cuitjin cafehya xu cha: ―‍Nihñu favor ne, chjahyun rë Nina ngatsë naha cojo sa xi hisca xi ngu cjua xi canújun vë ne, cuatjuun cuma. ―‍Cuatjin cafehya cha.
ACT 8:25 Hya xi camá ne, Pedru cojo Juan ne, xi cavatju cachja xu me cojo xuta Samaria jan cjua xi chja tsëhë Nai naja ne, cavuya quiji nga me ngajan Jerusalén. Peru yëjë ni nandya xi vatju me hacutjin cjui me jingunduju ni ndiya ngajan distritu Samaria ne, ha cuatjin cachja sa me cjuandajyihi jan cojo xuta.
ACT 8:26 Camá nga ngu nixtin xi ngu ángel tsëhë Nina ne, cachja cojo Felipe ngajan Jerusalén cuitjin: ―‍Tihinjni ndiya Gaza. ―‍Cuatjin cachja ángel. Ndiya vëhë ne, vatju ngajan ngu xín camahani tsëhë nandya.
ACT 8:27 Ngajan xi cavetju xu Felipe, quiji me. Hane ndiya cjui me ne, cavechútaha xu me ngu xutaxa rë nación Etiópia, ngu xihin xindë xi fahacuenda yëjë cjuanchina rë na xi matitjun tsëhë yëjë xuta Etiópia jan. Xihin jan ne, quiji me ngajan Jerusalén xi cjuaharcun me Nina.
ACT 8:28 Hane xi cavuya tife me nangui rë me ne, jiya me carreta rë me cjue me, táha tivutaya me xujun rë Nina xi catsihindu profeta Isaías.
ACT 8:29 Ngajan xi cachja xu Hasen rë Nina cojo Felipe cuitjin: ―‍Tihinvehe hiscan cjui carreta xi cuajyihi vë, nihñitanguin cojo. ―‍Cuatjin cachja Hasen rë Nina.
ACT 8:30 Ngajan xi cuatjin casahmi Felipe. Xi tu camatiña me hiscan cjui carreta jan ne, cahndë xu me xi cjua rë xujun xi catsihindu profeta Isaías ne, vëhë tivutaya me xi jiya carreta jan. Sehe cavinenguise Felipe me cuitjin: ―‍¿Há vijnercun cjua xi tichutayun vë? ―‍Cuatjin cavinenguise Felipe.
ACT 8:31 Ngajan xi cuitjin cafayangui xu me: ―‍Ngahan ne, vijniircú ta, tsëhë xi tsajin yo cuicuya ná. ―‍Cuatjin cafayangui me. Sehe ngajan xi cachja xu me cojo Felipe xi cuisehen cuejñatangun xu me cojo rë me.
ACT 8:32 Tivutaya me xujun rë Nina hiscan xi chja cuitjin: Sacuaha ficojo xuta ngu chu tsánga xi tsiquehen me chu ne, cuatjin cjuecojo xuta me; hacuaha sacuaha jindayaain ngu hnditsánga hora xi secun chu xcun me xi cuejnu rë chu ne, cuatjin tsajin camahani mé xi cuichja me hora xi secun me xcun me xi cjuahataha rë me.
ACT 8:33 Sahmichuva xuta me, hacuaha tsichoho xuta cjuandaja xi cuma rë me; Tsajin cuichja xuta tsëhë quihndi rë me ta, casacuiin rë me tsëhë xi cjuahñu xi casacu rë me nguehe ngasunhndë ne, quijicanii rë me. Vëhë cjua rë Nina xi tivutaya xihin jan.
ACT 8:34 Hya xi camá ne, sehe cafinenguise me cojo Felipe cuitjin: ―‍Xi má nuju ne, ¿yo tsëhë xi cuatjin chja profeta vë? ¿Há tsëhë suvá me ne?, o há tsajin ne, ¿há tsëhë jingu sa xuta? ―‍Cuatjin cafinenguise me.
ACT 8:35 Ngajan xi Felipe ne, cavetsihin me cojo cjua rë Nina xi tivutaya xihin jan, hane casua xu me camachaya rë xihin jan yëjë ni cjuandajyihi xi chja tsëhë Jesús.
ACT 8:36 Xi cjui me ndiya ne, cavechú xu me hiscan jiya ngu nandá. Ngajan xi chja xihin jan cojo Felipe cuitjin: ―‍Chutsujun ni. Nguehe jiya ngu nandá. ¿Há cumaji xtenda ngahan? ―‍Cuatjin cachja xihin jan.
ACT 8:37 Ngajan xi cachja xu Felipe cojo rë me cuitjin: ―‍Sa xi nguñaja xahasen nuju xi macjain nuju ne, cuma. ―‍Cuatjin cachja Felipe. Hane xihin xi cuajyihi jan ne, cuitjin cafayangui me: ―‍Macjain ná xi Jesucristu ne, hacui jain me xi Quihndi rë Nina me. ―‍Cuatjin cafayangui me.
ACT 8:38 Hya xi camá ne, cachja xu xihin jan cojo cha xi ficojo carreta xi secunhñu cha cojo, hane sehe cavitujne me cojo Felipe, sehe quiji catsijo me xcun nandá, hane caxtenda xu xihin jan.
ACT 8:39 Xi cavetju me tsëhë nandá ne, Hasen rë Nina ne, ngutjen quijicojo xu rë Felipe. Hane xihin jan ne, ha quihndë cavuyaain cavëë rë Felipe ta, cavuya cafaha me ndiya rë me cafe me cojo cjuasua.
ACT 8:40 Hya xi camá ne, cavechú Felipe nandya Azoto. Hane xi cavetju me ngajan ne, jima ngu nandya xi cavatju me ne, ha cuatjin casua me camachaya rë xuta cjuandajyihi xi chja tsëhë Jesucristu hisca xi cafehe me nandya Cesarea.
ACT 9:1 Jinguyëjë rë xi cuatjin tijima ne, Saulo ne, hacuaha ni cjuinduju sa me vincharcun me xuta ladu rë Nai naja ta tsiquehen me. Quiji me xcun nahmi xi matitjun ne,
ACT 9:2 cafehya me ngu carta cojo sa xi cumacjain rë tsëhë me xutaxa rë yungun ngajan nandya Damasco. Hane cojo xujun jan sa xi sacú rë me xuta Damasco xi tjengui ndiya rë Jesús, sa chjuun sa xihin ne, tsihñu me cjuecojo me ngajan Jerusalén.
ACT 9:3 Hya xi camá ne, cavetju me quiji me. Hane xi tijima tiña me Damasco ne, ha tu ñahñu canduva ngu ndihi tsëhë ngahnga casahmi hasen rë hiscan cjui me.
ACT 9:4 Hane xi caticja me ne, cahndë me ngu cjua xi cachja cojo rë me cuitjin: ―‍Saulo, Saulo, ¿mé má cuatjin nujyihiye tjengui ná cojo cjuahngatacun? ―‍Cuatjin cachja.
ACT 9:5 Ngajan xi Saulo ne, cuitjin cafayangui me: ―‍¿Yo ngayun, Tatá? ―‍Cuatjin cafayangui me. Ngajan xi cjua jan ne, cuitjin cafayangui tsëhë me: ―‍Ngahan xi Jesús ngahan, xi tinujyihiye tjengui ná cojo cjuahngatacun.
ACT 9:6 Tisatjinhngue ne, tisihin nandya Damasco, hane ngajan sacú ri cjua mé xi meje rë xi nihñi. ―‍Cuatjin cachja cjua jan.
ACT 9:7 Ngajan xi xuta xi cjuicojo Saulo jan ne, caxinchacun lihmi ni me ngajan. Cahndë me cjua jan, peru tsajin yo xi cavëë me.
ACT 9:8 Hya xi camá ne, cavisatjenhnga Saulo, hane xi cavuxaha me tuxcun me ne, matsijin camahani rë me. Sehe ngajan xi cavaha xuta jan tsja me ne, quijicojo me me hisca nandya Damasco.
ACT 9:9 Jyan nixtin cavéjña me jan xi matsijin rë me, hacuaha tsajin mé cajinë me, tsajin mé cahvi me.
ACT 9:10 Hane ngajan Damasco ne, ngajan tacun ngu xuta ladu rë Jesús xi hmí rë Ananías. Ha tu ñahñu cavëë me Nai naja ne, cachja cojo rë me cuitjin: ―‍¿Há nechin, Ananías? ―‍Cuatjin cachja Nai naja. Ngajan xi Ananías ne, cuitjin cafayangui me: ―‍Juun, tejña, Nai naha. ―‍Cuatjin cafayangui me.
ACT 9:11 Ngajan xi Nai naja ne, cuitjin cachja me cojo Ananías: ―‍Tihin ndiya xi hmí rë Taha Quixi. Hane ndava cha Judas ne, ngajan chjinenguise ngu cha Tarso xi hmí rë Saulo. Cha vëhë ne, tisahmi cha oración rë cha,
ACT 9:12 hane sacuaha xi ngajñi nijñá rë cha ne, cavëë cha ngu xihin xi hmí rë Ananías xi cavisehen hiscan tacun cha, hane cavisanetsja rë cha xi cuma tsejen nga rë cha. ―‍Cuatjin cachja Nai naja.
ACT 9:13 Ngajan xi Ananías ne, cuitjin cafayangui me: ―‍Ngayun Nai naha, jemu cjín xuta chja me hacutjin xi jemu choho casahmi cha xi cuajyihi vë cojo xuta ladu nuju ngajan Jerusalén.
ACT 9:14 Quihndë ne, hacuaha hisca nahmi xi matitjun catsingatju rë cha nguehe xi cjuaha cha xuta xi fehya nuju me cjuandaja nuju. ―‍Cuatjin cafayangui me.
ACT 9:15 Peru Nai naja ne, cuitjin cachja nga me cojo rë me: ―‍Tihin ta, cha xi cuajyihi vë ne, ngahan cavaxejen cha xi cjue sua cha cumachaya rë xutaxín, cojo xuta xi vitexa, cojo xuta tjë rë Israel, cuichja cha yo ngahan.
ACT 9:16 Ngahan tsingácun rë cha há cjín cjuacjintacun xi meje rë xi cuatju cha cuma ngatsë naha. ―‍Cuatjin cachja Nai naja.
ACT 9:17 Hya xi camá ne, cavetju Ananías quiji me ndava Judas. Hane xi cavisehen me ndava Judas ne, cavisanetsja me Saulo, cuitjin cachja me: ―‍Ngayun Saulo, Nai naja Jesús, me xi cahyun ndiya nduvun jan ne, catsingatju ná me, cojo sa xi ngayun ne, cuma tsejen nga nuju hacuaha tsë nuju cojo Hasen rë Nina. ―‍Cuatjin cachja me.
ACT 9:18 Hane ha hora vëhë ni ne, cavixu tsëhë tuxcun Saulo ngu xcusun sacuaha tujún rë ti, hane camatsejen nga rë me. Hya xi camá ne, caxtenda me.
ACT 9:19 Hane xi cajinë me niñu ne, casacuhñu rë me. Hya xi camá ne, cavéjña Saulo ngujo nixtin ngajan Damasco cojo xuta ladu rë Jesús.
ACT 9:20 Quiji me yëjë ni yungun, casua me camachaya rë xuta xi Jesús ne, hacui me xi Quihndi rë Nina, xi Mesías.
ACT 9:21 Hane yëjë xuta xi cavisiñuju cjua jan ne, jemu quijircun rë me, cuitjin cachja me cojo xicjin me: ―‍¡Peru me vihi xi jemu casahmi cjuahngatacun cojo xuta xi veyanangui ñihi vëhë ngajan Jerusalén! ¡Hacuaha ha xa vëhë canduva me nguehe, xi cjuaha me xuta xi cuacun vë, cjuecojo me xcun nahmi xi matitjun! ―‍Cuatjin cachja xuta jan.
ACT 9:22 Peru Saulo ne, hitsë sa casacuhñu rë me xi tichja me cojo xuta, hisca quijircun rë xuta tjë rë Israel casahmi me ta, tsëhë xi tsejen xi cjuaquixi xi chja me xi Jesús ne, me vëhë jain xi catsingatju Nina.
ACT 9:23 Hane xi ha jemu cavatju nixtin jan ne, casahmichihin xuta tjë rë Israel cjua xi tsiquehen me Saulo.
ACT 9:24 Peru cjua vëhë ne, casacu camachaya rë Saulo. Xuta xi cuacun jan ne, nixtin nixten jemu casahmi me cuidadu tingotjo hnchua rë nandya jan cojo sa xi cuma tsiquehen me Saulo.
ACT 9:25 Peru xuta ladu rë Saulo ne, nguixun quiji catsitujne me Saulo taha ngaxtun hnchua cojo nahñu jiya me cahntsua ngu nisinya. Cuatjin camá, sehe cavetjutje me.
ACT 9:26 Hya xi camá ne, xi cafehe Saulo ngajan Jerusalén ne, meje cjue sahmitangun me cojo xuta ladu rë Jesús. Peru yëjë ni xuta xi cuacun jan ne, jemu tsacjun me Saulo. Macjaain rë me xi hacuaha xuta ladu rë Jesús camá me.
ACT 9:27 Ngajan xi Bernabé ne, quijicojo me Saulo xcun apóstol, hane ngajan casuacuenda me hacutjin xi ngajan ndiya ne, cavëë Saulo Nai naja, hacuaha cachja Nai naja cojo rë me. Hacuaha casuacuenda Bernabé apóstol jan hacutjin tsacjuiin Saulo xi cachja me tsëhë Jesús.
ACT 9:28 Cuatjin camá xi cjui nduva me catsujyihiya tangun me ngajan Jerusalén cojo xuta ladu rë Jesús. Hatuxa tsacjuiin me chja me tsëhë Jesús.
ACT 9:29 Hacuaha jercu cavisiajmi me cojo xuta xi visiajmi hne griego. Peru xuta xi cuacun jan ne, casahmi me ngujyë xi tsiquehen me Saulo.
ACT 9:30 Peru hya xi camachaya rë xuta ladu rë Jesús cjua vëhë ne, quijicojo me Saulo nandya Cesarea, hane ngajan catsingatju me me quiji me nandya Tarso.
ACT 9:31 Cuatjin camá xi yëjë xuta ladu rë Jesús ngajan estadu Judea, cojo Galilea cojo Samaria ne, cafë rë me cjuacjintacun hacuaha camajyë sa cjuandaja rë Nina ngajñi rë me. Hane xi cuatjin quijinduju me cafaharcun me Nai naja hacuaha xi cuatjin cavisecoo rë me Hasen rë Nina ne, camacjín sa xuta ladu rë Jesús.
ACT 9:32 Pedru ne, catsujyihiya me jingu ni ladu. Hya xi camá ne, quiji cavusehenya me xuta ladu rë Nina xi siu ngajan Lida.
ACT 9:33 Hane ngajan cavechútaha me ngu xihin xi hmí rë Eneas, xi ha tjin rë jyin nu xi jiña xi cahme yojo rë.
ACT 9:34 Ngajan xi Pedru ne, cuitjin cachja me cojo xihin jan: ―‍Ngayun Eneas, Jesucristu tisahmi me xi cumandaja ngayun. Tisatjunhngun, chjayun nijña nuju vë. ―‍Cuatjin cachja Pedru. Hane ngutjen ni cavisatjenhnga xihin jan.
ACT 9:35 Hane yëjë ni xuta xi siu ngajan Lida cojo xuta xi siu ngajan Sarón cavëë me Eneas hane hacuaha cavisehen me ladu rë Nai naja.
ACT 9:36 Ngajan nandya Jope ne, cavéjña ngu chjuun ladu rë Jesús xi hmí rë Tabita. Hane xi hne griego ne, Dorcas hmí rë me. Chjuun vëhë ne, jemu sahmi me cjuandaja, hacuaha jemu visecoo me xuta xi tjin rë cjuachaja.
ACT 9:37 Hya xi camá ne, nixtin xi quitahá Pedru ngajan nandya Lida ne, chjuun vëhë ne, camahmu rë me, hane cahme me. Hane xuta jan ne, catsinduya me nima. Hane xi cafë catsinduya me ne, sehe quiji catsijaña me cahntsua ndihya ngahnga.
ACT 9:38 Vëhë ta nandya Lida ne, tiña tacun tsëhë nandya Jope. Hane hya xi camachaya rë xuta ladu rë Jesús ngajan Jope xi Pedru ne, quitahá me ngajan Lida ne, catsingatju me jo xihin quijijaha rë Pedru, cuitjin cachja me: ―‍Nihñu cjuandaja ne, cuanguen cojo niji ngajan Jope marcu macjain.
ACT 9:39 Ngajan xi Pedru ne, cavetju me quiji me cojo xihin jan. Xi tu cafehe me ngajan ndava nima ne, quijicojo me me ndihya ngahnga hiscan jiña nima. Hane jemu cjín yachjin cahan ne, quiji caxinchacun me xcun Pedru, hisca chja hisca jihnda me titsingacun me tsjian xi casahmi nima Dorcas hya xi tacun nima cjuahñu.
ACT 9:40 Ngajan xi Pedru ne, cachja me cojo yëjë xuta xi cuetju xuta candatsen. Hane xi cafë xuta cavetju me candatsen ne, sehe cavixcuhnchi Pedru, casahmi me oración rë me. Hane xi cavuya cavutsejen me nima ne, sehe cachja me cuitjin: ―‍Tabita, tisatjunhngun. ―‍Cuatjin cachja me. Hane chjuun jan ne, cavuxaha tuxcun. Hane xi cavëë rë Pedru ne, cavisatjenhnga cavéjña.
ACT 9:41 Hane xi casua Pedru ngu tsja me chjuun jan ne, catsisatjenhnga me. Xi tu cajindaya me xuta ladu rë Jesús cojo chjuun cahan jan ne, sehe catsingacun me chjuun jan xi tacun quicun nga.
ACT 9:42 Hane cjua vëhë ne, casacu camachaya rë xuta jingujyë ni Jope. Hane jemu cjín me xi camangu cacun me cojo Nai naja.
ACT 9:43 Ngajan xi Pedru ne, jemu cjín nixtin casetaha me ngajan Jope, cavéjña me ndava cha Simón, ngu cha vechjanchuxin.
ACT 10:1 Ngajan nandya Cesarea ne, cavéjña ngu xihin xi hmí rë Cornelio. Capitán má me tsëhë sindadu tsëhë nangui Italia.
ACT 10:2 Me vëhë ne, jemu ndaja faharcun me Nina cojo yëjë xuta xi siu ndava me, hacuaha jemu sua me cjuandaja cojo xuta tjë rë Israel, hacuaha yëjë ni hora fehya rë me Nina cjuandaja rë me.
ACT 10:3 Ngu nixtin jan sacuaha chuva rë fane jyan tsëhë nguinixtin ne, cavëëndaja me xi cafehe ngu ángel rë Nina cachja cojo rë me cuitjin: ―‍Cornelio. ―‍Cuatjin cachja.
ACT 10:4 Hane xi cavutsejenndaja sa me ángel jan ne, jemu catsacjun me camá, sehe cachja me cuitjin: ―‍¿Mé jan, Tatá? ―‍Cuatjin cachja me. Ngajan xi ángel jan ne, cuitjin cafayangui: ―‍Ngatsë rë oración riji cojo ngatsë rë cjuandaja xi jemu tehe ne, Nina ne, hacuaha tsinguitsjen me ngaye.
ACT 10:5 Quihndë ne, ningatji ngujo xihin ngajan Jope, chjindaye rë cha Simón, cha xi hacuaha hmí rë Pedru.
ACT 10:6 Cha Simón vëhë ne, ngajan tacun cha ndava ngu cha vechjanchuxin, xi hacuaha hmí rë Simón, cha xi tacun ndava tiña ndachacun. ―‍Cuatjin cafayangui ángel jan.
ACT 10:7 Hane xi cavatju cafe ángel xi cachja cojo rë me jan ne, sehe cajindaya me jo mosu hndixahan rë me cojo ngu sindadu xi sahmixa ndava me hacuaha faharcun rë Nina.
ACT 10:8 Hane xi cafë casuacuenda me yëjë ni cjuacjintacun rë me ne, sehe catsingatju me cjue ngajan Jope.
ACT 10:9 Hane xi camá nchujun xi ha jima tiña cha xi cuacun jan nandya Jope ne, sacuaha chuva rë nchisen ne, sehe camiji Pedru ngajan xcun ndihya xi sahmi me oración.
ACT 10:10 Hya xi camá ne, camavojo rë me, meje sinë me hitsë tu mé ni xi sinë me. Hane jinguyëjë rë xi tisehenchjine xi sinë me ne, sacuaha xi canduva cachja ngu chini cojo rë me.
ACT 10:11 Tivutsejen me xi ngahnga ne, catuxaha, hane nduvajne sacuaha ngu tsjian jyë, quichahahñu rë catsiñuju yuju rë xi nduvajne nangui.
ACT 10:12 Cahntsua tsjian jan ne, ngajan hincha yëjë xcusun chu xi tsujyihiya nangui cojo chu xi vitjen ngahnga xi tsavi xi sinë xuta nangui Israel.
ACT 10:13 Hya xi camá ne, Pedru ne, cahndë me ngu cjua xi cachja cojo rë me cuitjin: ―‍Pedru, tisatjinhngue. Niquihin ngu chu ne, sehe xini chu. ―‍Cuatjin cachja cjua jan.
ACT 10:14 Hane Pedru ne, cuitjin cachja me: ―‍Cumaji, Tatá, ta ngahan ne, cjëë camahani sínë ngu xcusun xi tsavi vë. ―‍Cuatjin cachja me.
ACT 10:15 Peru xi ma jo ndiya ne, cuitjin cachja nga cjua jan cojo rë me: ―‍Xi ha Nina cachja me xi hacuiin tsavi ne, xi canujiin ngaye xi tsavi. ―‍Cuatjin cachja cjua jan.
ACT 10:16 Jyan ndiya camá xcusun vëhë. Hya xi camá ne, ngutjen ni cavuya quiji nga tsjian jan ngahnga.
ACT 10:17 Hane jinguyëjë rë xi titsingataha cacun Pedru mé vijne xcusun xi cavëë me jan ne, tivinenguise cha xi catsingatju Cornelio jan jani xi ndava Simón. Hane xi cafehe cha jan ne, caxinchacun ni cha tingotjo,
ACT 10:18 sehe cafinenguise cha há ngajan tacun Simón xi hacuaha hmí rë Pedru.
ACT 10:19 Hane jinguyëjë rë xi titsingataha cacun Pedru tsëhë xcusun xi cavëë me jan ne, cuitjin cachja Hasen rë Nina cojo rë me: ―‍Chutsijin ni. Hinchacun jo jyan cha xi tivanguise ri.
ACT 10:20 Tihinjni ne, tihin cojo cha. Xicamacjiin tacuin ta cha xi cuacun vë ne, ngahan catsingátju cha. ―‍Cuatjin cachja Hasen rë Nina.
ACT 10:21 Hane xi quijijne Pedru hiscan hinchacun cha xi cuacun jan ne, cuitjin cachja me: ―‍Ngahan xi vinchunsun ná. ¿Mé xa canduvun? ―‍Cuatjin cachja Pedru.
ACT 10:22 Ngajan xi cha xi cuacun jan ne, cuitjin cachja cha: ―‍Ngu capitán xi hmí Cornelio catsingatju niji me xi canduvin nguehe. Me vëhë ne, ngu xihin ndaja me, hacuaha jemu faharcun me Nina. Yëjë ni xuta tjë rë Israel ne, ndaja chja me tsëhë Cornelio. Ngu ángel rë Nina cachja cojo rë me xi squindaya me ngayun xi cuangun ndava me cojo sa xi cuisiñuju me cjua xi cuinújun cojo rë me. ―‍Cuatjin cachja cha xi cuacun jan.
ACT 10:23 Hya xi camá ne, cachja me cojo cha xi cuisehen cha cahntsua ndihya, hacuaha casua me cahndë́ xi cuiyuju cha ngajan. Hane xi camá nchujun jan ne, cavetju me quiji me cojo cha, hacuaha cojo sa ngujo xuta ladu rë Jesús xi siu ngajan Jope quiji me cojo rë me.
ACT 10:24 Hane xi camá nchujun nga jan ne, cafehe me nandya Cesarea. Cornelio ne, ha casahmitangun me xuta rë me cojo amigu ndaja rë me, siuya me Pedru.
ACT 10:25 Hane xi ha cuisehen Pedru jan ne, cavechútaha Cornelio me. Cornelio ne, quiji cafañatsacjan me xcun Pedru xi cafaharcun me.
ACT 10:26 Peru Pedru ne, catsisatjenhnga me Cornelio, hacuaha cachja me cojo cuitjin: ―‍Tisatjunhngun ta ngahan ne, hacuaha ngu xuta ni ngahan. ―‍Cuatjin cachja me.
ACT 10:27 Hane taha visiajmi me cojo Cornelio ne, cavisehen me ndihya, ngajan cavëë me xi jemu cjín xuta tjin tangun me jan.
ACT 10:28 Sehe ngajan xi cachja Pedru cojo rë xuta jan cuitjin: ―‍Ngayun ne, ha ndaja hyun xi ngu xuta tjë rë Israel ne, sacuiin cahndë́ xi tsihñu me yojo rë me cojo xutaxín, hacuaha sacuiin cahndë́ xi cuisehen me ndava. Peru ngahan ne, casua Nina camachaya ná xi mijí rë xi cuichjá xi tsavi cojo ngu xcusun xuta.
ACT 10:29 Vëhë xi xi tu quiji chjahá ná ne, ngutjen canduvá ni, hisca ngu cjua cachjaan. Quihndë ne, meje ná cumachaya ná mé nihñu ná xi cachjindayun ná. ―‍Cuatjin cachja Pedru.
ACT 10:30 Ngajan xi Cornelio ne, cuitjin cachja me: ―‍Cuyatje fane jyan, sacuaha hora vihi ne, tisahme oración naha nguehe ndya naha. Hane ha tu ñahñu cahvë ngu xihin, secun xcun, yaja ngu tsjian xi jemu tu seti camahani,
ACT 10:31 hane cuitjin cachja cojo ná: “Cornelio, Nina ne, cahndë me oración riji, hacuaha ngatsë rë cjuandaja xi jemu tehe ne, Nina ne, hacuaha tsinguitsjen me ngaye.
ACT 10:32 Quihndë ne, ningatji cjua ngajan Jope, hane chjindaye rë cha Simón, cha xi hacuaha hmí rë Pedru. Cha vëhë ne, tacun cha ndava cha Simón, ngu cha vechjanchuxin, xi tacun cha tiña ndachacun.” Cuatjin cachja xihin jan cojo ná.
ACT 10:33 Vëhë xi marcu macjain catsingátju cjua nuju, hane jemu ndatjin canihñu xi canduvun. Vëhë xi quihndë ne, ha tjin tangun ngayin ngayijin ni nguehe xcun Nina xi cuisiñiji yëjë cjua xi casua nuju Nina xi cuinújun cojo niji. ―‍Cuatjin cachja Cornelio.
ACT 10:34 Ngajan xi Pedru ne, cuitjin cachja me: ―‍Ngahan vutsején ne, Nina ne, hatuxa quixi jain me cojo cjuatacun rë me xi tsichuva me yëjë ni xuta cojo cjuatacun rë ta
ACT 10:35 yëjë ni nación ne, tu jarë ni xuta xi faharcun me Nina hacuaha sahmi me cjuandaja ne, jemu chuya rë Nina tsëhë me.
ACT 10:36 Nina ne, catsingatju me cjuandajyihi rë me tsijin, ngayin xuta tjë rë Israel; casua me camachaya niji xi ngatsë rë Jesucristu ne, sacú niji cjuandaja cjuajeya. Me vëhë xi Nai rë yëjë ni xuta.
ACT 10:37 Ngayun ne, ha machaya nuju tsëhë xcusun xi camá jingujyë ni nación Judea. Cavetsihin hisca distritu Galilea, hya xi cavatju cachja nima Juan xi meje rë xi xtenda xuta.
ACT 10:38 Hacuaha ha hyun xi Jesús, xuta Nasaret ne, Nina ne, catsinguitsë rë me cojo Hasen rë me hacuaha cojo ngahñu rë me. Jesús vë ne, catsujyihiya casahmi me cjuandaja hacuaha casahmi me xi camandaja yëjë xuta xi jemu tisuaxti Satanás. Cuatjin casahmi me ta, tsëhë xi Nina ne, hacuaha tacun cojo rë me.
ACT 10:39 Ngayin tihín machaya rë xuta tsëhë yëjë xcusun xi cahyin xi casahmi me ngajan Jerusalén, cojo jingujyë ni nación Judea. Xi cavetaha xuta tjë rë Israel jan me xcun ngu cru ne, catsiquehen xuta jan me.
ACT 10:40 Me vëhë ne, Nina catsicuya rë me cjuahñu xi ma jyan nixtin, hacuaha casua Nina cahndë́ xi cavuya camatsejen nga me.
ACT 10:41 Peru hacuiin ngajñi rë yëjë xuta camatsejen me ta suvá ni ngajñi rë me xi Nina cavaxijin rë cojo tjun sa, cuma cuinújan ne, ngajñi niji ngayin, xi cachini cahyin tangun cojo rë me hya xi cavatju cavuya me cjuahñu.
ACT 10:42 Hacuaha me vëhë cavitexa niji me xi tihín cumachaya rë xuta xi me vëhë xi casuaxa Nina me xi tsichuva me xuta cojo cjuatacun rë, sa siu quicun me o sa cahme me.
ACT 10:43 Yëjë ni profeta ne, cachja me ta yëjë ni xuta xi cumangu cacun cojo Jesús ne, sacú rë me cjuaninchataha tsëhë jyë́ rë me, xi cuatjin mangucacun me. ―‍Cuatjin cachja Pedru.
ACT 10:44 Hora xi tichja cuaha Pedru cjua vëhë ne, canduva Hasen rë Nina cavisehen xahasen rë yëjë xuta xi tivisiñuju cjua xi tichja Pedru jan.
ACT 10:45 Hane xuta ladu rë Jesús xi tjë rë Israel xi cojo me canduva me cojo Pedru ne, jemu quijircun rë me xi cojo xutaxín casua Nina Hasen rë me xi cuma rë me.
ACT 10:46 Cuatjin quijircun rë me ta, tsëhë xi cahndë me xi xutaxín jan ne, tichja me ngujo hne xi hisca hvíin xutaxín vë xi tisahmi jyë tisahmi hnga me Nina.
ACT 10:47 Ngajan xi Pedru ne, cuitjin cachja me: ―‍Cumaji nichoon ngayaan nandá xi xtenda xuta, ta me xi cuicun vi ne, hacuaha casacu rë Hasen rë Nina sacuatjin casacu naja ngayaan. ―‍Cuatjin cachja Pedru.
ACT 10:48 Sehe cavitexa me xi caxtenda xuta xi cuacun vë xi cavisehen me ladu rë Jesucristu. Ngajan xi xuta jan ne, cafehya sa rë me Pedru xi cuejña sa me ngujo nixtin cojo rë me.
ACT 11:1 Quihndë ne, apóstol cojo xuta ladu rë Jesús xi siu jingujyë ni Judea ne, camachaya rë me cjua xi cojo xutaxín cafahatsja me cjua rë Nina.
ACT 11:2 Hane hya xi cavuya quiji Pedru ngajan Jerusalén ne, xuta ladu rë Jesús xi tjë rë Israel ne, cacjan me cojo,
ACT 11:3 cuitjin cachja me: ―‍¿Mé má cuatjin catsangun ndava xuta xi hacuiin tjë rë Israel hacuaha hisca cachinu niñu cojo rë me? ―‍Cuatjin cachja me.
ACT 11:4 Ngajan xi Pedru ne, cavetsihin casuacuenda chichihin me cuitjin:
ACT 11:5 ―‍Ngahan ne, tisahme oración naha hya xi tejñataha Jope. Hane sacuaha xi cachja ni chini cojo ná xi cahvë ngu xcusun sacuaha ngu tsjian jyë, quichahahñu rë catsiñuju yuju rë xi nduvajne nangui, camatiña tsahan.
ACT 11:6 Hane xi cavutsejénndaja cahntsua ne, cahvë chu xi tsujyihiya nangui, chu xi cjaain rë cojo chu xi cjan rë, cojo chu xi vitjen ngahnga hincha chu cahntsua.
ACT 11:7 Hacuaha cahndë ngu cjua xi cachja cojo ná cuitjin: “Pedru, tisatjinhngue. Niquihin ngu chu ne, sehe xini chu.” Cuatjin cachja cjua jan.
ACT 11:8 Ngajan xi ngahan ne, cuitjin cachjá: “Cumaji, Tatá, ta ngahan ne, cjëë camahani cuíncha ntsuva ngu xcusun xi tsavi vë.”
ACT 11:9 Ngajan xi cjua xi nduva ngahnga jan ne, cachja nga cojo ná ma jo ndiya cuitjin: “Xi ha Nina cachja me xi hacuiin tsavi ne, xi canujiin ngaye xi tsavi.” Cuatjin cachja cjua jan cojo ná.
ACT 11:10 Jyan ndiya camá xcusun vëhë. Hya xi camá ne, sehe cavuya cachjuvë nga rë tsjian jan, quiji yëjë hisca ngahnga.
ACT 11:11 Hya xi camá ne, ha tu ñahñu cafehe jyan xihin ndihya hiscan xi tejña. Hisca nandya Cesarea casatëxa rë xihin jan xi canduvatjengui ná.
ACT 11:12 Hane Hasen rë Nina cachja cojo ná xi cumacjiin cácun xi cjuë́ cojo xihin xi cuacun jan. Hya xi camá ne, cëjë cojo rë, hacuaha cavisecoo ná jyun xuta ladu naja xi cuicun vi xi catsanguin. Hane xi cafihin jan ne, cavisihin ndava Cornelio.
ACT 11:13 Hane me vëhë ne, casuacuenda niji me hacutjin xi cavëë me ngu ángel cahntsua ndava me, cuitjin cachja cojo rë me: “Ningatji cjua ngajan Jope, chjindaye rë cha Simón, cha xi hacuaha hmí rë Pedru.
ACT 11:14 Hane cha vëhë cuichja cha cojo ri ngujo cjua hacutjin cuma xi cuetjitje ngaye cojo yëjë ni xuta xi siu ndya riji.” Cuatjin cachja ángel jan.
ACT 11:15 Hane xi cavetsehen cachjá cjua rë Nina cojo rë me ne, cavisehen Hasen rë Nina cahntsua xahasen rë me sacuatjin cavisehen cahntsua xahasen naja ntsacu cavetsihin, ngayaan xuta tjë rë Israel.
ACT 11:16 Ngajan xi ngahan ne, catsinguítsjen cjua rë Nai naja xi cachja me cuitjin: “Juan ne, cojo nandá cavitenda me, peru ngayun ne, cojo Hasen rë Nina xtenda ngayun.” Cuatjin cachja me.
ACT 11:17 Vëhë xi hya xi suvá Nina casua rë me cjuandaja xicjin xi casua naja me ngayaan hya xi camangu tacuun cojo Nai naja Jesucristu ne, hatuxa camaji cavátëcja xcusun xi Nina casahmi me. ―‍Cuatjin casuacuenda Pedru.
ACT 11:18 Xi cahndë me xi cuacun jan xi cuatjin cachja Pedru ne, cajnehnchan cjuatacun rë me, sehe cavetsihin casahmi jyë casahmi hnga me Nina, cuitjin cachja me: ―‍Xi matsejen ne, cojo xutaxín casua Nina cahndë́ xi tsindeya me cjuatacun rë me cuisehen me ndiya rë Nina cojo sa xi sacú rë me cjuahñu xatsë.
ACT 11:19 Quihndë ne, xuta ladu rë Jesús xi cavitsojo me ngatsë rë cjuañihi xi camá hya xi cahme Esteban ne, cavechú me hiscan nangui xi hmí rë Fenicia. Ngujo nga me cavechú me nandya Chipre, ngu cahndë́ xi vetjucaa tsëhë ndachacun. Hane me xi yahnga ne, cavechú me nandya Antioquía xi cavanga me. Hane casuaain me camachaya rë xutaxín cjuandajyihi xi chja tsëhë Jesucristu ta suvá ni xuta tjë rë Israel casua me camachaya rë.
ACT 11:20 Peru tjin yahnga xuta ladu rë Jesús xi canduva me tsëhë Chipre cojo Cirene. Xi cafehe me nandya Antioquía ne, cachja me cojo xuta xi chja hne Griego, casua me camachaya rë xuta cjuandajyihi xi chja tsëhë Nai naja Jesús.
ACT 11:21 Hane Nina ne, jemu casua rë me ngahñu. Hacuaha jemu cjín xuta camacjain rë me, hane cavisehen me ladu rë Nai naja.
ACT 11:22 Hane xuta ladu rë Jesús xi siu ngajan Jerusalén ne, hya xi camachaya rë me xcusun vëhë ne, catsingatju me Bernabé xi cjuetjengui me xuta ngajan Antioquía.
ACT 11:23 Hane xi cafehe me jan ne, xi cavëë me hacutjin tisahmi Nina cjuandaja cojo xuta xi cuacun vë ne, jemu ndaja camá rë me. Sehe ngajan xi cachja me cojo yëjë xuta jan xi catjinduju me cojo yëjë xahasen rë me ndiya rë Nai naja.
ACT 11:24 Cuatjin casahmi me ta, tsëhë xi me vëhë ne, ngu xihin ndaja me, ña quitsë rë me Hasen rë Nina, hacuaha jercu mangucacun me cojo Nina. Nixtin hya ne, jemu camacjín sa xuta ladu rë Nai naja.
ACT 11:25 Hya xi camá ne, cavetju Bernabé quiji me ngajan Tarso, cavanguise me Saulo.
ACT 11:26 Hane xi casacu rë me Saulo ne, cavuya quijicojo me me ngajan Antioquía. Caviyuju catsijo me ngajan ngu nu jingu, casahmitangun me cojo xuta rë yungun jan. Jemu cjín xuta cavicuya rë me cjua rë Nina. Hacuaha ngajan Antioquía xi tjuntjun cachja xuta tsëhë yëjë xuta ladu rë Jesús xi xuta rë Cristu xi meje cuichja cjua vë cristiano.
ACT 11:27 Nixtin hya ne, cafehe ngujo profeta ngajan Antioquía xi canduva me tsëhë Jerusalén.
ACT 11:28 Ngajan xi cavetjujñi ngu me ngajñi rë profeta xi cuacun vë, ngu me xi hmí rë Agabo, hane cachja me cjua xi Hasen rë Nina casua rë me xi ha tu hitsë sa ne, cuinduva ngu jindya jyë jingujyë ni ngasunhndë. Jindya vë ne, cavetjucaa jain hya xi Claudio matitjun camahani me.
ACT 11:29 Ngajan xi xuta ladu rë Jesús ngajan Antioquía ne, caviyuju me cjuatacun rë me jima ngu me xi cuisecoo me ha tucutjin xi chutaha me hane tsingatju me tsëhë xuta ladu rë Jesús xi siu ngajan Judea.
ACT 11:30 Hya xi camá ne, cuatjin casahmi me. Catsingatju me cjuandaja vëhë, cavaha Bernabé cojo Saulo xi sua me tsja xuta changá xi siu ngajan Judea.
ACT 12:1 Hane ngajñi rë nixtin xi cuacun vë ne, Herodes, me xi matitjun ne, cavitexa me cachjahá rë ngujo xuta rë yungun xi sahmi me cojo cjuahngatacun.
ACT 12:2 Hacuaha cavitexa me xi cueya Jacobo, hntsë Juan, cojo quicha.
ACT 12:3 Xi vutsejen me xi cachuya rë xuta tjë rë Israel xcusun vëhë ne, hacuaha cavitexa me cachjahá rë Pedru, nixtin rë suhi rë pan xi tsajin san rë.
ACT 12:4 Sehe caveya me ndavaya, hacuaha cavitexa me tyjuhunngu sindadu xi cjue sahmi rë me cuidadu nixtin nixten chuva ñuju chuva ñuju sindadu jima ngu ndiya. Xi catsingataha cacun me ne, xi cuatju suhi tsëhë Pascua ne, sehe cuaxë me xcun yëjë ni xuta.
ACT 12:5 Cuatjin camá xi Pedru ne, casetjo me ndavaya. Peru xuta rë yungun ne, cafehya me cojo nguñaja xahasen rë me cjuandaja rë Nina xi cuma rë Pedru.
ACT 12:6 Ngu nguixun chaja sa xi cuitexa Herodes xi cuetju Pedru xi cumacuenda jyë́ rë me ne, Pedru ne, jiñafë me, tjinhñu me cojo jo cadena ngajñi rë jo sindadu. Hacuaha siu sa jo sindadu tingotjo ndavaya xi sahmi cuidadu.
ACT 12:7 Hya xi camá ne, cafehe ngu ángel tsëhë Nina, hane jercu camahasen cahntsua ndavaya. Hane xi quiji cavëhëtsja ángel jan ndanisin rë Pedru ne, catsisatjenhnga rë me, sehe cachja cojo rë me cuitjin: ―‍Tisatjinhngue sanii. ―‍Cuatjin cachja. Hane hora vëhë ne, cavixuhndu cadena xi tjinhñu tsja me.
ACT 12:8 Sehe ngajan xi ángel ne, cachja nga cojo rë me cuitjin: ―‍Cheje tsjian riji, hacuaha tinche chuxinxtë riji. ―‍Cuatjin cachja. Hane Pedru ne, cuatjin casahmi me. Cachja nga ángel cuitjin: ―‍Cheje tsjanga riji, hane ndove hacutjin cjuë́. ―‍Cuatjin cachja ángel jan.
ACT 12:9 Hane xi cavetju me ne, quiji me hacutjin quiji ángel. Peru hvíin me xi xcusun xi tisahmi ángel jan ne, cjuaquixi ta xi má rë me ne, chini tichja cojo rë me.
ACT 12:10 Hane xi cavatjutaha me ngu cavatjutaha me jo sindadu ne, sehe cafehe me tingotjo quicha xi cuétjuun xi cuanguen ngajñi nandya. Tingotjo vëhë ne, catuxaha suvá. Xi cavetju me ne, sehe quiji me. Hane xi cafehe me hiscan xi faha rë ngu nga ndiya ne, ha tu ñahñu quijixin ángel tsëhë me.
ACT 12:11 Sehe ngajan xi cajnercu Pedru xi cjuaquixi xcusun xi camá, hane cachja me cuitjin ngajñi rë suvá me: ―‍Quihndë ne, hvë jain xi Nina ne, catsingatju me ángel rë me, hane cavaxëtje ná me tsëhë Herodes, hacuaha cavaxëtje ná me tsëhë yëjë xcusun xi meje sahmi xuta tjë rë Israel cojo ná. ―‍Cuatjin cachja me ngajñi rë suvá me.
ACT 12:12 Hane xi tu catsingataha cacun me cuatjin ne, sehe quiji me ndava María naa rë Juan, me xi hacuaha hmí rë Marcos. Ngajan ne, jercu tjin tangun xuta xi tisahmi me oración.
ACT 12:13 Hane xi cafehe me jan ne, catsijane me tingotjo. Hane sehe canduvavaha ngu na hndixahan xi hmí rë Rode xi cjuinenguise na yo xi titsijane.
ACT 12:14 Hane xi camachaya rë na xi xta rë Pedru xi tichja ne, tsëhë xi jercu ndaja camá rë na ne, hisca cavuxaain na tingotjo ta marcu macjain cavuya na quiji cachja na cojo me xi yahnga jan xi Pedru ne, secun me tingotjo taha candatsen.
ACT 12:15 Peru me xi cuacun jan ne, cuitjin cachja me cojo rë na: ―‍Sca ri ngaye. ―‍Cuatjin cachja me. Peru na vëhë ne, cachja sa na xi hatuxa cjuaquixi xi hacui me. Hane me xi cuacun vë ne, cachja me cuitjin: ―‍¿Hacuiin ángel xi sahmi rë me cuidadu? ―‍Cuatjin cachja me.
ACT 12:16 Hane Pedru ne, quijinduju sa me titsijane me tingotjo jan. Hane xi cavuxaha me tingotjo jan ne, cavëë me xi hacui jain Pedru, hane jemu quijircun rë me.
ACT 12:17 Ngajan xi Pedru ne, casahmitsja me cojo rë me xi cuiyujujyuu me, sehe cavetsihin casua cuenda me hacutjin camá xi Nai naja ne, cavaxë rë me ndavaya. Sehe ngajan xi cachja me cuitjin: ―‍Tuhun cumachaya rë Jacobo cojo sa xuta ladu rë Jesús xi yahnga tsëhë xcusun xi camá vi. ―‍Cuatjin cachja me. Hya xi camá ne, sehe cavetju me quiji me jingu sa cahndë́.
ACT 12:18 Hane xi casahasen jan ne, ngu cjuandya jyë casahmi sindadu jan, tsëhë xi hvíin cha mé hacutjin camá rë Pedru.
ACT 12:19 Hane Herodes ne, cavitexa me quiji cavinchise rë Pedru, peru casacuiin me. Hane vëhë xi cafahataha rë me sindadu xi casahmi cuidadu jan, sehe cavitexa me cachjaha rë sehe cueya cha. Hya xi camá ne, cavetju Herodes cavuya quiji me ngajan Cesarea, cavejña me.
ACT 12:20 Quihndë ne, Herodes me xi matitjun ne, jemu cjan rë me cojo xuta nandya Tiro cojo nandya Sidón. Ngajan xi xuta xi cuacun vë ne, camatangun me, sehe quijitjengui me Herodes. Xi tjun tjun ne, camá casahmi me xi cavinga rë Blasto me. Blasto ne, me vëhë xi fahacuenda me ndava Herodes. Hya xi camá ne, xuta xi cuacun jan ne, cafehya rë me Herodes xi cuijnetaha si ngajñi rë me cojo me vëhë. Cuatjin cafehya me xi cuacun vë ta, tsëhë xi nangui rë Herodes ne, ngajan vinduva xichinë tsëhë nandya Tiro cojo Sidón.
ACT 12:21 Cavechú nixtin xi cavejña Herodes xi cuichja me cojo xuta xi cuacun jan ne, sehe cavaja me tsjian tsëhë xi matitjun me, sehe quiji me cavéjña me cahndë́ rë me xi cuichja me cojo xuta.
ACT 12:22 Hane xi cajnetaha cachja Herodes ne, ngajan xi xuta ne, cuitjin cajindaya me cachja me: ―‍¡Cjua vëhë ne, cjua rë ngu nina, hacuiin cjua rë ngu xuta! ―‍Cuatjin cajindaya me cachja me.
ACT 12:23 Ha hora vëhë ni ne, ngu ángel tsëhë Nina ne, casahmi xi cafaha rë Herodes ngu chíhin, tsëhë xi hacuiin casahmi jyë casahmi hnga me Nina. Hya xi camá ne, cajinë rë me chundu, hane cahme me.
ACT 12:24 Peru cjua rë Nina ne, quijinduju sa cavitsojo.
ACT 12:25 Ngajan xi Bernabé cojo Saulo ne, casahmichihin me cjuandaja rë xuta yuma sehe cavuya me tsëhë Jerusalén. Hacuaha canduvacojo me Juan, xi hacuaha hmí rë me Marcos.
ACT 13:1 Quihndë ne, ngajñi rë xuta rë yungun xi tacun ngajan Antioquía ne, hinchajñi me xi má profeta hacuaha hinchajñi me xi vicuya cjuachacun. Cuitjin hmí rë xuta xi cuacun vë: Bernabé, Simeón, me xi cachja xuta tsëhë Nchava Jma, Lucio, ngu xuta Cirene, Manaén, me xi camacha tangun cojo Herodes, me xi matitjun, hacuaha cojo Saulo.
ACT 13:2 Hane jinguyëjë rë xi tisahmi me xi cuacun vë xa rë Nina hacuaha tisahmi me xun rë me ne, Hasen rë Nina ne, cuitjin cachja cojo rë me: ―‍Tuhunxun rë Bernabé cojo Saulo, cojo sa xi sahmi me xa xi ha casuáxa rë me.
ACT 13:3 Ngajan xi casahmi me xi cuacun jan xun rë me, hacuaha casahmi me oración rë me ne, sehe cavisanetsja me Bernabé cojo Saulo hane chuva vëhë cafaha me xa rë Nina. Hya xi camá ne, sehe catsinguijnetaha me cjua cojo xicjin me.
ACT 13:4 Ngajan xi Bernabé cojo Saulo ne, quiji me sacuatjin cachja Hasen rë Nina cojo rë me. Cavetju me quiji me nandya Seleucia. Hane xi cafehe me ngajan ne, cavisehen me ngu barcu, sehe quiji me Chipre, ngu rquí nangui xi vetjucaa xcun ndachacun.
ACT 13:5 Hane xi cafehe me Salamina, ngu nandya tsëhë Chipre ne, casua me camachaya rë xuta cjua rë Nina ngajan yungun rë xuta tjë rë Israel. Hacuaha cavisecoo Juan Marcos me xi quiji me jan.
ACT 13:6 Hane xi quiji me jingujyë ni ladu vëhë ne, cavechú me hisca nandya Pafos. Hane ngajan cavechútaha me ngu cha surqui xi hmí rë Barjesús. Cha vëhë ne, ngu profeta ndacha cha, hacuaha tjë rë Israel cha.
ACT 13:7 Hane tangun tsujyihiya cha cojo me xi matitjun xi hmí rë Sergio Paulo, ngu me xi jemu vechú cjuatacun rë. Me vëhë ne, cajindaya me Bernabé cojo Saulo tsëhë xi meje cuihndë me cjua rë Nina.
ACT 13:8 Peru cha surqui jan ne, xi hacuaha hmí rë Elimas xi hne griego ne, casahmi condra cha me xi cuacun vë, tsëhë xi mijí rë cha xi me xi matitjun jan ne, cumangucacun me cojo Jesucristu.
ACT 13:9 Peru Saulo, me xi hacuaha hmí rë Pablo ne, catsë rë me cojo Hasen rë Nina. Cavutsejenndaja me cha surqui jan ne, sehe cachja me cojo cha cuitjin:
ACT 13:10 ―‍¡Ngaye xindesu, ngaye cha ndacha, ngaye quihndi rë xitsehen, ngaye condra rë yëjë ni cjuandaja ne! ¿Hatuxa cuihinnduju sa ninguetsin ndiya ndajyihi rë Nina?
ACT 13:11 Quihndë chutsijin ta Nina ne, sahmi ri me castigu. Cuma rcá ngaye, cumatsijin ri ndavá rë tsuhi ngujo nixtin. ―‍Cuatjin cachja me. Hane ngutjen ni camá rë cha sacuaha xi canduva ngu yufí xi cavetsa rë tuxcun cha, hane cama rcá cha. Hane cjui nguehe cjui ngajan cha vanguisetsja cha yo xi cuaha tsja cha.
ACT 13:12 Ngajan xi me xi matitjun jan ne, xi cavëë me xcusun xi camá ne, camacjain rë me cjuachacun xi chja tsëhë Nina ta, tsëhë xi jemu quijircun rë me tsëhë cjuachacun vëhë.
ACT 13:13 Hya xi camá ne, xi cavetju Pablo cojo me xi siutaha cojo me ngajan Pafos ne, sehe cavisehen me ngu barcu, quiji me nandya Perge, ngajan distritu Panfilia. Hane ngajan cavetjuxin Juan Marcos tsëhë me, hane cavuya nga me Jerusalén.
ACT 13:14 Hane Pablo cojo Bernabé ne, cavetju me tsëhë Perge, hane cafehe me Antioquía, ngajan distritu Pisidia. Hane xi cavechú nixtin xi chjahájenda rë ne, quiji me cavisehen me yungun ne, quiji me caviyuju me.
ACT 13:15 Hane xi cavatju cachutaya rë ngujo cjua xi catsihindu Moisés cojo ngujo cjua xi catsihindu profeta ne, xutaxa rë yungun jan ne, catsingatju me cjua tsëhë Pablo cojo Bernabé, hane cuitjin cachja me: ―‍Ngayun ne, sa xi tjin mé cjuandajyihi xi meje cuinújun cojo xuta ne, cuma cuinújun. ―‍Cuatjin cachja me.
ACT 13:16 Hane xi casecun Pablo ne, casahmitsja me cojo xuta sehe cachja me cuitjin: ―‍Ngayujun ngarcun ni xuta tjë rë Israel cojo sa ngayujun ni xi hacuaha chjuhunrcun Nina ne, tisiñuju cjua xi cuichjá cojo nuju.
ACT 13:17 Nina naja ngayaan tjë rë Israel ne, cavaxijin me xutachanga naja, hane tsëhë me vëhë casahmi cjín sa Nina xuta. Sehe tsëhë me casahmi me ngu nación xi hñu vetju cjua rë hya xi caviyujutaha me ngajan nación Egipto. Hane cojo ngahñu xi tjin rë Nina ne, cavaxë me xuta xi cuacun vë tsëhë ngajan.
ACT 13:18 Hane Nina ne, cacaa rë me cojo xuta xi cuacun vë, hya xi catsujyihiya me ngajan ngu xín tsëhë nandya sacuaha yachan nu.
ACT 13:19 Hane xi cavatju catsinguetsun Nina yatu nación ngajan nangui Canaán ne, sehe casua me xutachanga naja jan xi cuma tsëhë me
ACT 13:20 sacuaha ñuju cientu vasen nu. Hane xi cavatju vëhë ne, sehe cavaxijin me xuta xi camá me juez, hisca nixtin xi cavéjña profeta Samuel.
ACT 13:21 Hya xi cavatju vëhë ne, cafehya xutachanga naja jan ngu me xi cumatitjun tsëhë me. Cuatjin camá xi Nina ne, casuaxa me xutachanga naja Saúl, quihndi rë Cis, ngu xihin tjë rë Benjamín, xi cumatitjun me cahntsua yachan nu.
ACT 13:22 Hane xi cafahaxin Nina me vëhë xi matitjun me ne, cavejña me xutachanga naja David xi cuma titjun me. Cuitjin cachja Nina tsëhë David: “Ngahan vutsején ne, cha David, quihndi rë cha Isaí ne, cha vëhë ngu cha xi jemu chuya ná tsëhë, ngu cha xi sahmi yëjë hacutjin xi meje ná.” Cuatjin cachja Nina.
ACT 13:23 Ngu xuta tjë rë xutachanga naja David, me vëhë ne, xi hacui Jesús, me xi catsingatju Nina xi cuaxëtje naja ngayaan xuta tjë rë Israel, sacuatjin xi ha cachja me.
ACT 13:24 Hane xi chaja sa xi cjuehe Jesús ne, nima Juan ne, cachja me cojo yëjë xuta tjë rë Israel xi meje rë xi tsindeya me cjuatacun rë me, hacuaha xtenda me.
ACT 13:25 Quihndë ne, hya xi ha camatiña nixtin xi cueya nima Juan ne, cuitjin cachja me: “Hacuiin ngahan xi tsingatju Nina, xi nechunyun rë ta ngaxtun ne, nduva ngu me xi hitsë sa vechu cjuatacun rë xi hisca cumajin tsinguisehercu sahme tyjahi chuxinxtë rë.” Cuatjin cachja nima Juan.
ACT 13:26 ’Ngayejen ngarca ni ngayaan xuta tjë rë xutachanga naja Abraham cojo sa ngayujun ni xi hacuaha chjuhunrcun Nina ne, ngayaan catsingatju naja Nina cjuandajyihi vihi xi chja hacutjin cuetjuntjeen.
ACT 13:27 Yëjë xuta xi siu ngajan Jerusalén cojo xutaxa rë jan ne, hvíin me xi Jesús ne, hacui me xi catsingatju Nina, hacuaha cajnii rcu me cjua rë yëjë ni profeta xi chutaya rë yëjë ni nixtin xi nixtin chjahájenda rë. Vëhë xi hya xi catsicanijijyë xuta xi cuacun vë Jesús ne, casahmi me xi cavetjucaa cjua xi cachja profeta vë.
ACT 13:28 Hane handasa casacuiin rë me jyë́ xi vechú chuva rë xi cueya Jesús ne, peru cafehya rë me Pilatu xi cuitexa me xi cueya Jesús.
ACT 13:29 Hane xi cajnetaha casahmi me yëjë xcusun sacuatjin camahindu tsëhë Jesús ne, sehe catsitujne me tsëhë cru, sehe caseyaniji cahntsua ngu tsjun.
ACT 13:30 Peru Nina catsicuya rë me cjuahñu.
ACT 13:31 Hya xi camá ne, jemu cjín nixtin xi camatsejen me ngajñi rë xuta xi cavetju tangun me cojo ngajan Galilea hane hacuaha quiji tangun me cojo ngajan Jerusalén. Quihndë ne, xuta xi cuacun vë ne, tisua me jimachaya rë xuta tsëhë Jesús.
ACT 13:32 ’Hane ngayin ne, hacuaha titihín jimachaya nuju ta cjuandajyihi xi ha cachja Nina cojo xutachanga naja ne,
ACT 13:33 cjua vëhë Nina casahmi me xi cavetjucaa ngajñi naja ngayaan tjë rë xutachanga naja hya xi catsicuya me Jesús cjuahñu. Hacuaha cuitjin camahindu xcun Salmo xi ma jo: “Ngaye xi quihndi naha ngaye; quihndë ngahan suá ri cjuahñu.” Cuatjin cachja Nina xcun Salmo vëhë.
ACT 13:34 Hacuaha Nina ne, ha cachja me xi tsicuya me Jesús cjuahñu, hacuaha yojo rë Jesús ne, hacuiin cjuehndu, cuitjin cachja me xcun xujun rë me: “Hatuxa suá ri ximinchacun naha, sacuatjin xi ha cachjá xi suá rë David.” Cuatjin cachja Nina.
ACT 13:35 Hacuaha catsihindu sa David xcun ngu nga Salmo cuitjin: “Tuun cahndë́ xi cjuehndu yojo rë me, xi hatuxa tjengui nuju cojo yëjë xahasen rë me.” Cuatjin camahindu.
ACT 13:36 Peru David ne, xcun xi ha cavatju casahmi me sacuatjin meje rë Nina ne, cahme me, caseyaniji tangun me cojo nima xutachanga rë me, hacuaha cafehndu yojo rë me.
ACT 13:37 Peru Jesús, me xi Nina catsicuya rë cjuahñu ne, cafehndiin yojo rë me.
ACT 13:38 Vëhë xi ngayujun ngarcun ni ne, meje rë xi cuijnercun xi ngatsë rë me vëhë ne, tisacu jimachaya nuju xi tjin cjuaninchataha tsëhë jyë́ nuju,
ACT 13:39 hacuaha ngatsë ni rë me vëhë ne, yëjë ni xuta xi mangucacun cojo rë me ne, tsicjë Nina yëjë jyë́ rë me ta xcun ley rë Moisés ne, sacuiin rë cjuaninchataha.
ACT 13:40 Vëhë xi meje rë xi cuinechun cuidadu, sá tu cuatjun cuma sacuatjin xi catsihindu profeta xcun xujun rë Nina hatsëë nixtin, cuitjin catsihindu me:
ACT 13:41 Chutsujun ni, ngayun xi macjaain nuju ne, catjircun nuju, sehe tjangun ta jinguyëjë rë xi nechun ne, sahme ngu chircun xi hisca cumacjaain nuju sa xi yo cuichja cojo nuju. Cuatjin catsihindu profeta. Hacuaha cojo cjua vëhë ne, catsinguijnetaha Pablo cachja me.
ACT 13:42 Hane hora xi tivetju Pablo cojo Bernabé tsëhë yungun jan ne, cachja xuta cojo me xi cuetjucaa totje nga ne, meje rë me xi cuya cuichja nga Pablo tsëhë cjuacjintacun vëhë.
ACT 13:43 Hane hya xi cavetju xuta tsëhë yungun ne, jemu cjín xuta tjë rë Israel hacuaha jemu cjín xutaxín xi hacuaha faharcun me Nina ne, quiji me cojo Pablo cojo Bernabé. Hane Pablo cojo Bernabé ne, cachja me cojo xuta xi cuacun jan xi catjinduju sa me cojo ndiya rë cjuandaja rë Nina.
ACT 13:44 Hane xi cavetjucaa nga totje nixtin xi chjahájenda rë ne, ha ña meje yëjë ni xuta nandya camatangun me xi cuisiñuju me cjua rë Nina.
ACT 13:45 Peru hya xi cavëë yahnga xuta tjë rë Israel xutacjín jan ne, catsë rë xahasen rë me cojo cjuachini, hacuaha cachja me condra tsëhë cjua xi cachja Pablo, hisca choho cachja me tsëhë me.
ACT 13:46 Ngajan xi Pablo cojo Bernabé ne, cachja me cojo xuta tjë rë Israel jan cuitjin: ―‍Hatuxa ngayun titjun camameje rë xi canújin cojo nuju cjua rë Nina. Peru quihndë ta nitjungun hacuaha xi má nuju ne, machjiriin ngayun xi cojo ngayun satë nuju cjuahñu xatsë ne, cuanguin tihín cumachaya rë xutaxín cjuandajyihi vëhë.
ACT 13:47 Cuatjin nihñi ta, tsëhë xi cuitjin cavitexa niji Nina: Ngahan tsingátju ri sacuaha ngu ndihi xi tehe cjuahasen xi cuma rë xutaxín, cojo sa xi ngatsë rë cjuandajyihi xi cuinoje ne, cuetjutje xuta jingujyë ni, hisca hiscan vijnetaha ngasunhndë. Cuatjin cavitexa niji Nina. ―‍Cuatjin catsacjuiin Pablo cojo Bernabé, cachja me.
ACT 13:48 Hane xi cahndë xutaxín jan cjua vëhë ne, jemu ndaja camá rë me, hacuaha casahmi jyë casahmi hnga me cjua rë Nina. Hane yëjë ni xuta xi cavaxijin Nina xi sacú rë cjuahñu xatsë ne, camacjain rë me cjuandajyihi vëhë.
ACT 13:49 Hya xi camá ne, jercu cavitsojo cjuandajyihi xi chja tsëhë Nai naja jingujyë ni ladu vëhë.
ACT 13:50 Peru xuta tjë rë Israel jan ne, cavisiajmi me cojo ngujo yachjin nchina tsëhë yungun jan, cojo ngujo xuta xi matitjun tsëhë nandya jan, sehe cavetsihin casua me ngu cjuañihi xi cuma rë Pablo cojo Bernabé, sehe cavaxëxin me tsëhë nangui rë me.
ACT 13:51 Peru Pablo cojo Bernabé ne, cavitsune me chojo rë ntsacu me, xi sua me machaya rë xuta xi cuacun jan xi vutsejen me me sacuaha xutaxín xi hvíin cjua rë Nina. Sehe cavetju me quiji me nandya Iconio.
ACT 13:52 Hane xuta ladu rë Jesús ne, quitsë rë me cjuasua hacuaha quitsë rë me tsëhë Hasen rë Nina.
ACT 14:1 Hya xi camá ne, Pablo cojo Bernabé ne, quiji tangun me yungun rë xuta tjë rë Israel ngajan nandya Iconio. Hane xi cachja me cojo xuta ne, jercu cjín camahani xuta tjë rë Israel cojo xutaxín camacjain rë me cjua jan.
ACT 14:2 Peru xuta tjë rë Israel xi ha mijí cumacjain rë ne, cachja me cojo xutaxín, catsinguetsun me cjuatacun rë me xi cuacun vë condra tsëhë apóstol xi cuacun jan.
ACT 14:3 Peru jemu jyë nixtin caviyujutaha me hacuaha hacuiin catsacjun me xi cachja me tsëhë Nai naja. Hane Nai naja ne, casua me cahndë́ xi casahmi apóstol cjuarcun, cojo sa xi cumatsejen xi quixi cjua xi chja me tsëhë cjuandaja rë Nai naja.
ACT 14:4 Peru xuta nandya jan ne, hacuiin tangun camá cjuatacun rë me ta ngujo me ne, cachuya rë me tsëhë xuta tjë rë Israel, peru yahnga nga me ne, cachuya rë me tsëhë apóstol jan.
ACT 14:5 Hya xi camá ne, xutaxín cojo xuta tjë rë Israel cojo xutaxa rë jan ne, caviyujucacun me xi choho sahmi me cojo apóstol xi cuacun jan hacuaha tsiquehen me cojo ndyojo.
ACT 14:6 Peru apóstol jan ne, camachaya rë me cjua jan, hane cavanga me quiji me ngajan nandya Listra cojo nandya Derbe, ngajan distritu Licaonia, cojo ngujo sa cahndë́ tahndee jan.
ACT 14:7 Hane yëjë cahndë́ hacutjin catsujyihiya me ne, cachja me cojo xuta cjuandajyihi xi chja tsëhë Jesucristu.
ACT 14:8 Cavéjña ngu cha ngajan nandya Listra, ngu cha xi tsajin rë ngahñu ntsacu, tsëhë xi tsehen hisca hya xi catsin cha. Maji camahani fi cha.
ACT 14:9 Tacun cha tivisiñuju cha cjua xi tichja Pablo. Ngajan xi xi cavutsejenndaja Pablo cha ne, cavacun rë me xi mangucacun cha xi hatuxa cumandaja cha,
ACT 14:10 sehe ngajan xi cachja me cojo cha cuitjin: ―‍Tisechunquixun. ―‍Cuatjin cachja me. Hya xi camá ne, hisca cacaahnga cha xi casecun cha, sehe cavetsihin quiji ntsacu cha.
ACT 14:11 Ngajan xi xutacjín jan ne, xi cavëë me xcusun xi casahmi Pablo ne, cavetsihin cajindaya me cachja me hne rë me, xi hmí rë hne Licaonia, cuitjin cachja me: ―‍¡Me xi cuicun vi ne, nina me vi, xi canduva me tsëhë ngahnga, canduvatjengui naja me, tu xi tsejen me sacuaha xuta! ―‍Cuatjin cachja me.
ACT 14:12 Bernabé ne, xi má rë xuta jan ne, nina Zeus me, hane Pablo ne, nina Hermes me, tsëhë xi me vëhë xi hitsë sa jercu cachja me.
ACT 14:13 Ngajan xi nahmi tsëhë nina Zeus jan, me xi tacun yungun rë tjehen nandya ni ne, canduvacojo me chu ndyaja hacuaha canduvacojo me naxu ngajan hiscan tingotjo tsëhë nandya. Hane nahmi cojo xutacjín jan ne, meje tsiquehen me ndyaja jan hacuaha sua me naxu jan xi cjuaharcun me Pablo cojo Bernabé.
ACT 14:14 Hya xi apóstol Bernabé cojo Pablo camachaya rë me hacutjin tisahmi xuta jan ne, cajavë me tsjian rë me cavicheya me, ta cuatjin xcusun rë xuta tjë rë Israel hya xi cjan rë me. Sehe cavanga me quiji me ngajñi rë xutacjín jan, cajindaya me cachja me cuitjin:
ACT 14:15 ―‍Ngayujun ni ne, ¿mé má cuitjin tinihñu? Ngayin ne, hacuaha xuta ni ngayin sacuatjin nuju ngayun. Canújin cojo nuju ngu cjuandajyihi xi quichihin, cojo sa xi cuejñuxun xcusun xi machjiriin vi, hacuaha cojo sa xi cuisuhun ndiya rë ngu Nina xi quicun, me xi casahmi ngahnga cojo nangui cojo ndachacun, cojo yëjë ni xi tjin jan.
ACT 14:16 Nina ne, casua me cahndë́ xi, nixtin xi cavatju ne, xuta tsëhë yëjë ni nación ne, casahmi me hacutjin xi ha xcusun rë suvá me.
ACT 14:17 Peru tsëhë xi casahmi me cjuandaja ne, casua me camachaya nuju xi me vëhë xi Nina me; catsingatju me tsi tsëhë ngahnga xi cuma nuju, hacuaha casua nuju me nixtin rë tutjë nuju, casua me xi chinu, hacuaha catsinguitsë me xahasen nuju cjuasua. ―‍Cuatjin cajindaya me cachja me.
ACT 14:18 Handasa cachja me cuatjin ne, peru ha tu hitsë sa ne, camaji cavatëcja me xi tsiquehen xutacjín jan chu xi sua me cjuatjo cojo apóstol jan sacuaha nina rë me.
ACT 14:19 Hya xi camá ne, canduva ngujo xuta tjë rë Israel tsëhë nandya Antioquía cojo nandya Iconio. Hane catsinguetsun me cjuatacun rë xutacjín jan, sehe cavetaha me ndyojo Pablo hane cajavëjne me cavaxë me ngajan xín tsëhë nandya, tsëhë xi xi má rë me ne, ha cahme Pablo.
ACT 14:20 Peru xi tu catsëxtin xuta ladu rë Jesús jan hiscan jiña Pablo ne, cavisatjenhnga me quiji me cavisehen nga me nandya. Hane xi camá nchujun jan ne, cavetju me quiji me cojo Bernabé ngajan nandya Derbe.
ACT 14:21 Hane xi cafehe me jan ne, casua me camachaya rë xuta cjuandajyihi xi chja tsëhë Jesucristu. Hane jemu cjín xuta xi cavisehen me ladu rë Jesús. Hya xi camá ne, cavuya nga me Listra cojo Iconio cojo Antioquía, distritu Pisidia.
ACT 14:22 Caviyujuhñu me cjuatacun rë xuta ladu rë Jesús, hacuaha cachja me cojo rë me xi catjinduju me xi mangucacun me cojo Jesús. Hacuaha cachja sa me cojo rë me cuitjin: ―‍Meje rë xi jemu cjín cjuañihi cuatjuun cuma sehe cuiseen hiscan sahmi Nina gubiernu. ―‍Cuatjin cachja me.
ACT 14:23 Hacuaha casuaxa rë me ngujo xuta changá jima ngu yungun jan, xi cjuahacuenda me xuta rë yungun. Hane xi cavatju casahmi me oración hacuaha casahmi me xun rë me ne, sehe caviyuju me xuta rë yëjë yungun jan tsja Nai naja, me xi camangucacun xuta jan cojo.
ACT 14:24 Hya xi camá ne, cavuya cavatju nga me distritu Pisidia, sehe cafehe me nandya Perge, distritu Panfilia.
ACT 14:25 Hane xi cafë cachja me cojo xuta jan cjuandajyihi ne, sehe cavetju me quiji me nandya Atalia. Hane xi cavetju me ngajan ne, sehe cavisehen me barcu cavuya quiji me Antioquía,
ACT 14:26 nandya hiscan xi caviyuju xuta me ngahma cjuandaja rë Nina xi sahmi me xa xi sehe cajnetaha casahmi me jan.
ACT 14:27 Hane xi cafehe Pablo cojo Bernabé jan ne, sehe casahmitangun me yëjë xuta rë yungun, casuacuenda me yëjë hacutjin xi casahmi Nina, nixtin xi quiji casahmi me xa rë Nina. Hacuaha casuacuenda me xi Nina ne, cavuxaha me ndiya xi cumangucacun xutaxín cojo Jesús.
ACT 14:28 Hane hacuiin hitsë nixtin caviyujutaha me jan cojo xuta ladu rë Jesús.
ACT 15:1 Hya xi camá ne, ngujo me xi xuta tjë rë Israel ne, cavetju tsëhë Judea hane cafehe me Antioquía, cachja me cojo yahnga xuta ladu rë Jesús cuitjin: ―‍Sa xi xtiin rë chuxin nuju sacuaha xcusun xi cavejña Moisés ne, cumaji cuetjuntjun. ―‍Cuatjin cachja me.
ACT 15:2 Ngajan xi Pablo cojo Bernabé ne, hacuiin hitsë casecjan cjua rë me cojo xuta xi cachja cuatjin jan. Vëhë xi xuta rë yungun jan ne, casuaxa me Pablo cojo Bernabé cojo ngujo sa me xi cjue me xcun apóstol cojo xcun xuta changá rë Jerusalén, xi ha vëë me cjua rë Nina xi cuinenguise me tsëhë cjuacjintacun xi casuandya rë me ngajan.
ACT 15:3 Ngajan xi xuta xi cuacun cavitexa xuta rë yungun jan ne, cavatju me distritu Fenicia cojo distritu Samaria. Hane cuatjin tisuacuenda me hacutjin xi xutaxín ne, hacuaha cavisehen me ndiya rë Jesús. Hane yëjë xuta ladu rë Jesús xi cavisiñuju cjua jan ne, jemu ndaja camá rë me.
ACT 15:4 Hane xi cafehe me Jerusalén ne, jemu ndaja cafahatsja xuta rë yungun jan me. Hacuaha jemu ndaja cafahatsja apóstol cojo xuta changá jan me. Hya xi camá ne, sehe casuacuenda me yëjë hacutjin xi casahmi Nina, nixtin xi quiji casahmi me xa rë Nina.
ACT 15:5 Peru ngujo xuta fariseo xi hacuaha camá me ladu rë Jesús ne, cavetjujñi me cachja me cuitjin: ―‍Xutaxín xi visehen ladu rë Jesús ne, meje rë xi xtí chuxin rë me hacuaha cuinújan cojo rë me xi sahmi me yëjë sacuatjin chja ley rë Moisés. ―‍Cuatjin cachja me.
ACT 15:6 Hya xi camá ne, camatangun apóstol cojo xuta changá xi cjuahacuenda me cjuacjintacun vëhë.
ACT 15:7 Hane ha xcun xi ha jemu cavisiajmicjín me ngajñi rë me ne, sehe ngajan xi cavetjujñi Pedru, cachja me cuitjin: ―‍Ngayujun ngarcun ni matsejen ne, ngayun ne, ha hyun ta hisca nixtin titjun ne, ngahan cavaxijin ná Nina ngajñi nuju cojo sa xi ngatsë naha ne, cumachaya rë xutaxín cjuandajyihi xi chja tsëhë Jesucristu hane cumacjain rë me.
ACT 15:8 Hane Nina, me xi vëë yëjë cjuatacun rë xuta matsejen ne, catsingacun me xi cachuya rë me tsëhë xutaxín, hya xi casua me Hasen rë me xi cuma rë xuta xi cuacun vë, sacuatjin casua naja me ngayaan.
ACT 15:9 Tangun ni casahmi Nina cojo rë me sacuatjin casahmi Nina cojo naja ngayaan, xi catsityjahi me cjuatacun rë xuta xi cuacun vë ta, tsëhë xi camangucacun me cojo Nina.
ACT 15:10 Quihndë ta cuatjin ne, ¿mé má cuatjin meje chjuhunchuvun rë Nina cojo chuva rë ley rë Moisés, xi cuatjin tivitexun rë xuta ladu rë Jesús xi cuacun jan xi sahmichihin me ngu xcusun xi hisca xutachanga naja cacaain rë me casahmichihin me hacuaha hisca ngayaan matsejen ne, cacaain naja canihñachehen?
ACT 15:11 Peru hacuiin cuatjin ta ngayaan ne, macjain naja xi cuetjuntjeen ngatsë rë cjuandaja rë Nai naja Jesús sacuatjin rë me xi cuacun vëhë. ―‍Cuatjin cachja Pedru.
ACT 15:12 Ngajan xi xutacjín jan ne, ngu caviyujujyuu me cavisiñuju me cjua xi cachja Bernabé cojo Pablo hora xi casuacuenda me hacutjin casahmi Nina cjuarcun ngajñi rë xa xi casahmi me ngajan nangui rë xutaxín.
ACT 15:13 Hane hora xi cajnetaha cachja Bernabé cojo Pablo cjua vëhë ne, sehe cachja Jacobo cuitjin: ―‍Ngayujun ngarcun ni matsejen ne, tinuhyun cjua xi cuichjá cojo nuju.
ACT 15:14 Sehe cajnetaha casuacuenda Simón hacutjin camá xi tjuntjun catsingacun Nina xi hacuaha meje rë me xutaxín, hya xi cavaxijin me ngujo xutaxín jan xi cuma xuta ladu rë me.
ACT 15:15 Cjua rë Nina xi catsihindu profeta hatsëë nixtin matsejen ne, tjin tangun cjuatacun rë cojo cjua xi cafë cachja Simón. Cuitjin camahindu:
ACT 15:16 Xi cuatju xcusun vëhë ne, cúya nga, hane sahme xatsë ndava David xi cavetsun; cúya sahmendaja nga xi cavixujne, tsindaja nga ngundiya,
ACT 15:17 cojo sa xi xuta xi yahnga ne, sahmi me ngahñu xi cuisehen me ladu naha, cuma cuinújan ne, yëjë xutaxín xi ngahan cavaxejen xi cuma tsahan me.
ACT 15:18 Cuatjin chja Nina, me xi ha casua cjua vëhë hatsëë nixtin. Cuatjin camahindu.
ACT 15:19 ’Vëhë xi xi má ná ngahan matsejen ne, mijí rë xi tahan xti rë xutaxín xi visehen ladu rë Nina.
ACT 15:20 Xi meje rë xi nihña ne, xi nihinduun rë me xi sinii me xichinë xi caviyuju xcun nina ndyojo, sahmii me cjuatsehen xi sahmi xuta cojo ngu xi hacuiin chjuun rë hacuiin xihin rë me, sinii me yojo rë chu xi caxinchahndu rë xi cahme, hacuaha sinii me jni.
ACT 15:21 Cuatjin meje rë ta, tsëhë xi hisca jemu nu tsëë jan hisca quihndë ne, jima ngu nandya ngajñi xuta tjë rë Israel ne, tjin me xi sua machaya rë xuta cjua tsëhë ley rë Moisés. Ley vëhë ne, chutaya rë yëjë ni yungun jima ngu nixtin xi nixtin chjahájenda rë. ―‍Cuatjin cachja Jacobo.
ACT 15:22 Ngajan xi apóstol cojo xuta changá cojo yëjë sa xuta rë yungun ne, caviyujucacun me xi tuxijin rë ngujo xihin ngajñi rë me xi tsingatju me ngajan Antioquía, cjue tangun cojo Pablo cojo Bernabé. Me xi cuicun vi xi catuxijin rë: Judas, me xi hacuaha hmí rë Bársabas, cojo Silas, jo xihin xi jemu chjaharcun rë ngajñi rë xuta ladu rë Jesús.
ACT 15:23 Sehe ngajan xi catsihindu me ngu xujun catsingatju me cojo me xi jo xi cuacun vë. Cuitjin chja xujun jan: “Ngayin xuta ladu rë Jesús, apóstol cojo xuta changá ne, ningatjin ngu nina niji tsujun ngayujun ni ngayun xuta ladu rë Jesús xi hacuiin xuta tjë rë Israel ngayun, xi nechun nandya Antioquía cojo distritu Siria cojo distritu Cilicia.
ACT 15:24 Ngayin ne, camachaya niji xi cavetju ngujo xihin ngajñi niji xi cafehe ndya casuaxti nuju cojo cjua rë hacuaha cavisecjan cjuatacun nuju. Me xi cuacun vë ne, ngayin ne, cavitexiin rë me xi quiji me.
ACT 15:25 Vëhë xi ngu tangun ni camá cjua niji hane cavejñi tacuín xi tuxijin rë xihin xi ningatjin xi nduvatjengui nuju, cuinduvatangun cojo Bernabé cojo Pablo, me xi jemu vinga niji.
ACT 15:26 Me xi cuacun vë ne, casua me yojo rë me xi caviyujutaha tsavi me xi sahmi me xa rë Nai naja Jesucristu.
ACT 15:27 Cuatjin xi Judas cojo Silas ne, ningatjin nuju me. Hane me vëhë ne, cuichja me cojo nuju cjua hntsua me, cjua xi ningatjin nuju vi.
ACT 15:28 Ngayin ne, ngu tangun ni camá cjua niji cojo Hasen rë Nina xi cuitexin nuju xi nihñu suvá ni xcusun xi hitsë sa sahmi ngujyë vi:
ACT 15:29 xicachinuu xichinë xi caviyuju xcun nina ndyojo, xicachinuu jni, xicachinuu yojo rë chu xi caxinchahndu rë xi cahme, xicanihñuu cjuatsehen xi sahmi xuta cojo ngu xi hacuiin chjuun rë hacuiin xihin rë. Sa xi nihñuu yëjë xcusun vëhë ne, ndatjin nihñu. Vëhë ni cjua xi nújin cojo nuju.” Cuatjin chja xujun jan.
ACT 15:30 Hya xi camá ne, cavetju me xi cuacun jan quiji me Antioquía. Hane xi cafehe me jan ne, casahmitangun me yëjë ni xuta rë yungun, sehe casua me xujun xi yaha me.
ACT 15:31 Hane xi cavutaya xuta ladu rë Jesús xujun jan ne, jemu ndaja camá rë me tsëhë cjua jan.
ACT 15:32 Hane Judas cojo Silas jan ne, tsëhë xi tjin rë me chuva xi cuichja me cjua xi cafahatsja me tsëhë Nina ne, jercu cachja me cojo xuta jan, hacuaha jemu casua rë me cjuetacun.
ACT 15:33 Hane xi ha caviyujutaha me ngujo nixtin jan ne, xuta rë yungun jan ne, catsingatju me cafe nga cojo yëjë ni cjuandaja cjuajeya ngajan hiscan xi cavetju me.
ACT 15:34 Hane Silas, xi má rë me ne, hitsë sa ndaja xi ngaja caviyujutaha me.
ACT 15:35 Peru Pablo cojo Bernabé ne, caviyujutaha sa me ngajan Antioquía, cavicuya me cjuachacun rë cjua rë Nina, hacuaha casua me camachaya rë xuta cjuandajyihi xi chja tsëhë Nai naja. Hacuaha jemu cjín sa xuta xi cuatjin casahmi me.
ACT 15:36 Hya xi camá ne, xi cavatju ngujo nixtin ne, Pablo ne, cuitjin cachja me cojo Bernabé: ―‍Cuyan cuanguen tjenguen nga xuta ladu rë Jesús yëjë ni nandya hiscan xi ha catahan camachaya rë me cjuandajyihi xi chja tsëhë Nai naja, cuanguen chutsejen ne, hacutjin tivatju me tijima.
ACT 15:37 Hane Bernabé ne, meje cjuecojo me Juan, me xi hacuaha hmí rë Marcos.
ACT 15:38 Peru Pablo ne, mijí cjuecojo me, tsëhë xi Marcos ne, catsismicacun me xicjin me hane cavetjuxín me tsëhë Pablo cojo Bernabé ngajan Panfilia, quijiinndujain me cojo xa.
ACT 15:39 Hane cojo cjuatacun vëhë ne, cavetjucaa ngu si ngajñi rë Pablo cojo Bernabé. Cuatjin camá xi cavetjuxin me tsëhë xicjin me. Hya xi camá ne, Bernabé ne, quijicojo me Marcos jan ne, cavisehen me ngu barcu, hane quiji me Chipre.
ACT 15:40 Peru Pablo ne, cavaxijin me Silas xi cjuecojo me. Hane xuta ladu rë Jesús ne, caviyuju me me xi cuacun jan ngahma cjuandaja rë Nai naja. Hya xi camá ne, cavetju Pablo cojo Silas,
ACT 15:41 quiji me yëjë ni nandya tsëhë distritu Siria cojo Cilicia, casua rë me ngahñu xuta rë yungun jan.
ACT 16:1 Hane xi cavatju vëhë ne, cafehe me nandya Derbe cojo Listra. Ngajan ne, tacun ngu xuta ladu rë Jesús xi hmí rë Timoteo, quihndi rë ngu chjuun xuta tjë rë Israel xi hacuaha cavisehen me ndiya rë Jesucristu. Nahmi rë Timoteo jan ne, xutaxín me.
ACT 16:2 Xuta ladu rë Jesús ngajan nandya Listra cojo Iconio ne, jemu ndaja chja me tsëhë Timoteo vë.
ACT 16:3 Pablo ne, meje rë me xi cjue Timoteo cojo rë me. Vëhë xi quijicojo me Timoteo hiscan xi ti chuxin rë xuta tjë rë Israel. Cuatjin casahmi me ngatsë rë xi nandya xi cuacun vëhë ne, siu xuta jan, hane yëjë xuta xi cuacun jan ne, vëë me xi nahmi rë Timoteo ne, ngu xutaxín me.
ACT 16:4 Ngajan xi cavetju Pablo cojo Silas cojo Timoteo, quiji me. Hane jima ngu nandya xi tivatju me ne, casua me camachaya rë xuta tsëhë cjua xi caviyuju apóstol cojo xuta changá ngajan Jerusalén, cojo sa xi xuta ne, cuihndë me tsëhë cjua vëhë.
ACT 16:5 Cuatjin camá xi xuta tsëhë yëjë yungun jan ne, casacuhñu rë me xi mangucacun me cojo Jesús. Hane nchunchujun ni ne, cuatjin jima cjín sa me.
ACT 16:6 Hya xi camá ne, cavatju me distritu Frigia cojo distritu Galacia ta, tsëhë xi Hasen rë Nina ne, casuaain cahndë́ xi cuichja me cojo xuta cjua rë Nina ngajan distritu Asia.
ACT 16:7 Hane xi cafehe me tiña distritu Misia ne, meje cjue me distritu Bitinia, peru Hasen rë Jesús ne, casuaain cahndë́.
ACT 16:8 Cuatjin camá xi cavatjutaha me Misia, hane quiji me nandya Troas.
ACT 16:9 Hane ngu nguixun xi siutaha me ngajan ne, cachja ngu nijñá cojo rë Pablo. Cavëë me ngu xihin tsëhë distritu Macedonia xi secun tichja cojo rë me cuitjin: “Nduvun nguehe Macedonia ne, cuisecun niji.” Cuatjin cachja nijñá jan.
ACT 16:10 Cuatjin camá xi xi tu cachja nijñá cojo Pablo cuatjin ne, ngutjen ni cavinchin chuva rë hacutjin cuma xi cuanguin Macedonia ta, tsëhë xi xi má niji ne, Nina cajindaya niji me xi cuanguin cuinújin cojo xuta jan cjuandajyihi xi chja tsëhë Jesús.
ACT 16:11 Hya xi camá ne, xi cavetjin nandya Troas ne, cachjihin ngu barcu sehe catsanguin ngu quixi rë nandya Samotracia. Hane xi camá nchujun jan ne, catsanguin nandya Neápolis.
ACT 16:12 Hane tsëhë ngajan ne, catsanguin nandya Filipos, ngu nandya xi hitsë sa matitjun tsëhë ngu cahndë́ tsëhë distritu Macedonia. Jemu cjín xuta Roma siu me jan. Hane cavinechintihin nandya vëhë ngujo nixtin.
ACT 16:13 Hane xi cavechú nixtin xi nixtin chjahájenda rë ne, cavetjin tingotjo hnchua tsëhë nandya jan hiscan jiya ndajyë. Xi má niji ne, ngajan tjin ngu cahndë́ xi má oración. Hane cavinechin ngajan, canújin cjua rë Nina cojo yachjin xi camatangun me jan.
ACT 16:14 Hane ngu chjuun xi cahndë cjua xi cachja Pablo ne, Lidia hmí rë na, ngu na tsëhë nandya Tiatira, viteña na tsjian moradu. Na vëhë ne, hacuaha faharcun na Nina, hane Nai naja ne, cavuxaha me cjuatacun rë na xi ndaja cavetaharcu na cjua xi cachja Pablo.
ACT 16:15 Hane hya xi caxtenda na cojo yëjë xuta rë na ne, cachja na cojo niji cuitjin: ―‍Quihndë ta ha hyun xi ngahan ne, camangucácun cojo Nai naja ne, nduvun ndya naha, hane ngajan cuinechun. ―‍Cuatjin jemu cjín cachja na cojo niji, vëhë xi catsangui.
ACT 16:16 Cavechú ngu nixtin hya xi tivanguin cahndë́ hiscan xi má oración ne, cavechútaha niji ngu na hndixahan rë xuta, xi jiya xitsehen xahasen rë. Hane nai rë na hndixahan jan ne, jemu cjín tujún sacu rë me, tsëhë xi chja na cojo xuta mé xi cuatju me cuma.
ACT 16:17 Na vëhë ne, catsujyihiya tjengui na ngayin cojo Pablo, jindaya na chja na cuitjin: ―‍Xuta xi cuicun vi ne, mosu rë Nina xi matitjun má me, hacuaha sua me machaya nuju cjua hacutjin cuetjuntjun. ―‍Cuatjin cajindaya na cachja na.
ACT 16:18 Jemu cjín nixtin xi cuatjin casahmi na. Hya xi camá ne, tsëhë xi jemu camaxti rë Pablo ne, cavuya me cavutsejen me na, sehe cachja me cojo xitsehen jan cuitjin: ―‍Tsëhë xi Jesucristu casuaxa ná me ne, ¡tetjixin tsëhë na! ¡Vëhë xi chjá cojo ri! ―‍Cuatjin cachja Pablo. Hane hora vëhë ni ne, cavetjuxin xitsehen jan.
ACT 16:19 Hya xi camá ne, xi vutsejen nai rë na hndixahan jan xi ha quihndë tsajin cjuetacun xi sacú sa rë me tujún ne, cafaha me Pablo cojo Silas, cajavëjne me quijicani me ngajan hiscan ma tangun xutaxa rë ngajan hiscan má ndetsin.
ACT 16:20 Hane xi cafehe me ngajan xcun xutaxa rë ne, cuitjin cavinchajyë me: ―‍Cha xi cuicun tjë rë Israel vi ne, jemu tivisecjan cha cjuatacun rë xuta nangui naja.
ACT 16:21 Meje rë cha xi nihña xcusun rë xutachanga rë cha, peru ngayaan xuta Roma ne, ndajintjin xi cuanguentjengueen xcusun xi cuacun vë.
ACT 16:22 Hane hacuaha cojo xutacjín jan, cavetsihin cavinchajyë me Pablo cojo Silas. Ngajan xi xutaxa rë ne, cavaxëhndu me tsjian rë me xi cuacun jan, sehe cavitexa me xi sehen rë.
ACT 16:23 Hane ha xcun xi ha jercu cavaja rë me ne, sehe cavincha me ndavaya. Hacuaha cachja me cojo cha xi sahmi cuidadu ndavaya xi ndaja cuidadu cuma me xi cuacun jan.
ACT 16:24 Hane hya xi cafahatsja mayu cjua vëhë ne, quiji cavinchahñu cha me cahntsua ndavayajñu, hacuaha cavinchanguihñu cha ntsacu me ngojo xi casehenchjine tsëhë jo ya xi sahmi rë me castigu hacuaha hitsë sa cjuaquixi jiya me.
ACT 16:25 Hane sacuaha chuva rë vasen nixten ne, Pablo cojo Silas ne, tisahmi me oración hacuaha tisë me tsëhë Nina. Hane presu xi yahnga jan ne, tu tivisiñuju ni me.
ACT 16:26 Hane ha tu ñahñu jercu cafani nangui, hisca xihndënaña rë ndavaya jan vitsuneya rë. Hacuaha yëjë ni tingotjo ndavaya jan ne, ngutjen ni catuxaha, hane cadena xi tjinhñu xingu xingu presu ne, cavixuhndu.
ACT 16:27 Hya xi camá ne, cavasca rë cha xi sahmi cuidadu ndavaya jan. Hane xi cavëë cha xi tixaha yëjë tingotjo tsëhë ndavaya jan ne, cavaxë cha quicha rë cha hane ha tu hitsë sa ne, catsiquehen cha yojo rë cha ta, tsëhë xi xi má rë cha ne, yëjë presu ne, cavanga.
ACT 16:28 Peru Pablo ne, jercu cajindaya me cachja me cuitjin: ―‍Xicanihñuu cuatjin ta ngayijin ni nechinyin nguehe. ―‍Cuatjin cachja Pablo.
ACT 16:29 Ngajan xi cha xi sahmi cuidadu jan ne, cafehya cha ngu ndihi, sehe vangasanii cha quiji cha cahntsua ndavaya, ña fatsë cha xi tsacjun cha, quiji cafañatsacjan cha xcun Pablo cojo Silas xi faharcun cha me.
ACT 16:30 Hane xi cavaxë cha me tsëhë ndavayajñu jan ne, sehe cafinenguise cha cuitjin: ―‍Tatá, ¿mé xi meje rë xi sahme, cojo sa xi cuétjutjë? ―‍Cuatjin cafinenguise cha.
ACT 16:31 Hane me xi cuacun jan ne, cuitjin cachja me: ―‍Catamangu tacún cojo Nai niji Jesús, sehe cuetjuntjun ngayun cojo yëjë xuta xi siu ndya nuju. ―‍Cuatjin cachja me.
ACT 16:32 Sehe ngajan xi cha vëhë ne, cajindaya cha yëjë xuta xi siu ndava cha, hane Pablo cojo Silas ne, casua me camachaya rë cha cjua rë Nina cojo yëjë xuta xi cajindaya rë cha jan.
ACT 16:33 Ha hora vëhë ni tsëhë nixten vëhë ne, cafaha cha me ne, cavane cha hiscan casacuhmu rë me. Hya xi camá ne, ngutjen ni caxtenda cha cojo yëjë xuta rë cha jan.
ACT 16:34 Sehe quijiniji cha cojo Pablo cojo Silas ndava cha, hane casua cha niñu cajinë me. Hacuaha jercu ndaja camá rë cha cojo yëjë xuta xi siu ndava cha, tsëhë xi camangucacun cha cojo Nina.
ACT 16:35 Hya xi camá ne, xi casahasen jan ne, catsingatju xutaxa rë jan nísë, quiji cachja cojo cha xi sahmi cuidadu ndavaya jan cuitjin: ―‍Naxun xu cha xi caxincha ndavaya nguchjin jan. ―‍Cuatjin cachja cha.
ACT 16:36 Ngajan xi cha xi sahmi cuidadu ndavaya jan ne, quiji cachja cha cojo Pablo cjua vihi: ―‍Catsingatju xutaxa rë cjua xi cuáxë xu nuju. Vëhë xi cuma cuetjun ne, cuangun cojo cjuandaja cjuajeya. ―‍Cuatjin cachja cha.
ACT 16:37 Peru Pablo ne, cuitjin cachja me cojo cha xi cuacun jan: ―‍Xutaxa rë ne, cavitexa me casehen niji xcun yëjë ni xuta, handasa cjëë cjuahacuenda me jyë́ niji, ngayin xi xuta Roma ngayin. Sehe cavinchaniji me ndavaya. ¿Há taha hma meje cuaxë niji me quihndë? ¡Cumaji xi cuatjin! Catinduva suvá me cataxë niji me. ―‍Cuatjin cachja Pablo.
ACT 16:38 Hane cha nísë jan ne, catsicuya cha cjua cojo xutaxa rë cuatjin. Hane xi camachaya rë xutaxa rë xi xuta Roma má me xi cuacun jan ne, catsacjun me camá.
ACT 16:39 Ngajan xi xutaxa rë ne, quiji cachja me cojo Pablo cojo Silas xi tsijyëcacun me xi cuatjin camá. Sehe cavaxë me me, sehe cafehya rë me xi sahmi me cjuandaja ne, cuetjuxin me tsëhë nandya jan.
ACT 16:40 Hane xi cavetju Pablo cojo Silas tsëhë ndavaya ne, cavuya quijitjengui me na Lidia. Hane xi cavëë me yëjë xuta ladu rë Jesús jan ne, sehe cachja me cojo xuta jan xi catjinduju me cojo ndiya rë Jesús, sehe cavetju Pablo cojo Silas quiji me.
ACT 17:1 Hya xi camá ne, Pablo cojo Silas jan ne, cavatju me nandya Anfípolis cojo nandya Apolonia, sehe cafehe me nandya Tesalónica, hiscan xi tacun ngu yungun rë xuta tjë rë Israel.
ACT 17:2 Hane sacuatjin xi ha xcusun rë Pablo ne, ngajan quijitjengui me xuta tjë rë Israel jan nixtin xi chjahájenda rë. Hane jyan nixtin, tsëhë jyan totje ne, Pablo ne, cavicuya me xuta cjua rë Nina.
ACT 17:3 Casua me camachaya rë xuta xi chja cjua rë Nina xi Me xi Tsingatju Nina ne, hatuxa tjin xi cueya me sehe cuya nga me cjuahñu. Hacuaha cachja Pablo cuitjin: ―‍Jesús, me xi tisuá jimachaya nuju tsëhë ne, me vëhë xi catsingatju Nina. ―‍Cuatjin cachja me.
ACT 17:4 Ngajan xi ngujo xuta xi cuacun jan ne, camacjain rë me, hane cavisehen me ladu rë Pablo cojo Silas. Hane ngajñi rë me xi cuacun camacjain rë vë ne, hacuaha jemu cjín xutaxín xi faharcun rë Nina hinchajñi me cojo hacuiin hitsë yachjin xi matitjun jan hinchajñi me.
ACT 17:5 Ngajan xi ngujo xuta tjë rë Israel xi camacjaain rë jan ne, camachini me. Hane hora xi camá casahmitangun me ne, jemu cjín xuta tsehen xi tujyë tsujyihiya jan ne, cavetsihin casahmi me ngu suë jyë ngajñi nandya xi cjue jaha me Pablo cojo Silas. Quiji me ndava Jasón xi vanguise me me xi cuacun vë xi cuaxë me xcun xutacjín jan.
ACT 17:6 Hane xi casacuiin rë me Pablo cojo Silas ngajan ne, cajavëjne me Jasón cojo ngujo sa xuta ladu rë Jesús, quijicojo me xcun xutaxa rë, jindaya me cachja me, cavincha me jyë́ cuitjin: ―‍Cha xi cuacun jemu casuaxti jingujyë ni ngasunhndë ne, hacuaha cojo nguehe cafehe cha.
ACT 17:7 Hane cha Jasón vi ne, cafahatsja cha cha xi cuacun jan ngajan ndava cha. Hane yëjë cha xi cuacun vë ne, tisahmi cha condra ley rë emperador Romano xi hmí rë César, me xi matitjun camahani, ha chja cha xi tjin sa ngu me xi matitjun xi hmí rë Jesús. ―‍Cuatjin cavinchajyë xutacjín jan me xi cuacun jan xcun xutaxa rë.
ACT 17:8 Ngajan xi xutacjín cojo xutaxa rë jan ne, xi cahndë me cjua jan ne, jemu camacjíncacun me.
ACT 17:9 Hane ha xcun xi cavechji Jasón cojo xuta xi yahnga jan tujún cojo xutaxa rë ne, sehe catsismi xutaxa rë jan me.
ACT 17:10 Ngajan xi xuta ladu rë Jesús ne, xi tu camá nguixun jan ne, catsingatju me Pablo cojo Silas ngajan nandya Berea. Hane xi cafehe me ngajan ne, quiji me yungun rë xuta tjë rë Israel.
ACT 17:11 Hane xuta jan ne, hitsë sa tixaha cjuatacun rë me xi cuma rë xuta xi siu ngajan Tesalónica. Hane me xi cuacun jan ne, cafahatsja me cjua rë Nina cojo nguñaja xahasen rë me. Hacuaha nchunchujun ni ne, cavutaya me xujun rë Nina, cojo sa xi sacú rë me cjuaquixi tsëhë cjua xi cachja Pablo.
ACT 17:12 Cuatjin camá xi jemu cjín xuta jan camacjain rë me. Ngajñi rë xuta jan ne, hacuaha hacuiin hitsë xutaxín nchina sa chjuun sa xihin me hinchajñi me jan.
ACT 17:13 Peru hya xi camachaya rë xuta tjë rë Israel ngajan Tesalónica xi cojo nandya Berea tisua Pablo jimachaya rë xuta cjua rë Nina ne, hacuaha quiji xuta xi cuacun jan casua me cjuacjintacun xutacjín xi siu jan.
ACT 17:14 Ngajan xi xuta ladu rë Jesús xi siu jan ne, catsingatju me Pablo hisca ndachacun. Peru Silas cojo Timoteo ne, caxinchataha ni me ngajan.
ACT 17:15 Hane xuta xi quijicani rë Pablo jan ne, quijicojo me me hisca nandya Atenas. Xi tu cafehe me ngajan ne, cachja Pablo cojo xuta xi quijicani rë me jan ne, catji catichja me cojo Silas cojo Timoteo ne, marcu macjain catjitjengui me Pablo. Hya xi camá ne, sehe cafe xuta xi cuacun jan.
ACT 17:16 Jinguyëjë rë xi tacunya Pablo Silas cojo Timoteo ngajan Atenas ne, jemu camaxti rë xahasen rë me, tsëhë xi tivutsejen me nandya jan xi ña quitsë rë cojo nina ndyojo.
ACT 17:17 Vëhë xi Pablo ne, cachja me cojo xuta tjë rë Israel cojo xutaxín xi faharcun rë Nina ngajan yungun. Hane ngajan ndetsin ne, nchunchujun ni cachja sa me cojo xuta xi fehe jan.
ACT 17:18 Hacuaha cojo maestru xi tjengui cjuatacun xi hmí epicúreo cojo ngujo sa maestru xi tjengui cjuatacun xi hmí estóico cavisiajmi me cojo Pablo. Hane ngujo me ne, cachja me cuitjin: ―‍Cha machjiriin xi cuajyihi vë ne, ¡tsajin camahani mé vengui chji rë cjua xi chja cha! ―‍Cuatjin cachja maestru xi cuacun jan. Ngujo nga me ne, cuitjin cachja me: ―‍Cha xi cuajyihi vë ne, tisua cha jimachaya naja tsëhë nina rë jingu sa xuta. Cuatjin cachja ngujo nga me ta, tsëhë xi Pablo ne, tisua me jimachaya rë xuta cjuandajyihi xi chja tsëhë Jesús cojo tsëhë hacutjin cavuya me cjuahñu.
ACT 17:19 Ngajan xi xuta jan ne, quijicojo me Pablo ngajan Areópago, cahndë́ hiscan matangun me xi sahmi me junta, sehe cachja me cojo me cuitjin: ―‍Tinújun cojo niji mé cjuachacun xatsë xi quichuhun ta
ACT 17:20 jemu ha ngu xcusun cjua xi canuhyin xi canújun. Vëhë xi meje cumachaya niji mé vijne cjua vëhë. Cuatjin cachja xuta Atenas jan ta,
ACT 17:21 tsëhë xi yëjë xuta xi cuacun vë cojo xuta ngu nangui xi siu cahndë́ jan ne, hatuxa chuya rë me xi cuisiñuju me ngu cjua xatsë hacuaha jemu nduju cuichja me cojo xicjin me.
ACT 17:22 Hya xi camá ne, sehe casecunvasen Pablo cahndë́ vëhë, sehe cachja me cuitjin: ―‍Ngayujun ngarcun ni xuta Atenas matsejen ne, vutsején jingujyë ni ne, ngayun ne, hacuaha jemu chjuhunrcun nina nuju.
ACT 17:23 Ta jinguyëjë rë xi catsujyëhëya ngajñi nandya nuju hacuaha tivutsején yëjë cahndë́ hiscan chjuhunrcun nina nuju ne, cavéchutaha ngu yungun lihndi hiscan xi camahindu ngujo cjua xi chja cuitjin: “Tsëhë ngu nina xi hyaan me.” Cuatjin camahindu. Vëhë xi nina xi chjuhunrcun xi hisca hyuun ne, me vëhë xi nduva tisuá jimachaya nuju tsëhë me.
ACT 17:24 Nina xi casahmi ngasunhndë cojo yëjë xi tjin xcun, me xi nai rë ngahnga cojo nangui ne, hacuiin véjñacahndë me yungun xi sahmi xuta.
ACT 17:25 Hacuaha me vëhë ne, tsajin mé xi ma chaja rë me xi ngayaan xuta cuma tahan rë me ta, me vëhë xi sua naja me cjuahñu, sua me xta naja, hacuaha sua naja me yëjë ni xi mameje naja.
ACT 17:26 ’Hane tjë rë xi ngu ni xuta ne, casahmi Nina yëjë xcusun xuta, xi cuiyuju me jingujyë ni ngasunhndë. Hacuaha Nina cachja me janihya xi cumatitjun jimangu xcusun xuta hacuaha jani hiscan xi cuiyuju me.
ACT 17:27 Cuatjin casahmi Nina cojo sa xi ngayaan xuta ne, cuinchaseen me, hane xi cuatjin cuinchaseen me ne, hyaan sa xi sacú naja me, handasa hacuiin cjin tacun Nina xi cuma naja xingu xingu ngayaan.
ACT 17:28 Sacuatjin chja ngu cjua xi chja cuitjin: “Nina ne, sua naja me cjuahñu, sahmi me xi ma finiya ngayaan, hacuaha sua naja me xi nechan cojo cjuahñu naja.” Cuatjin chja cjua. Hacuaha yahnga xuta tsëhë ngajñi nuju xi tsihindu me cjua xi jemu ndaja fi ne, cuitjin catsihindu me: “Ngayaan ne, tjë rë Nina ngayaan.” Cuatjin catsihindu me.
ACT 17:29 Quihndë ta quihndi rë nina ngayaan ne, mijí rë xi cuma tacuun xi Nina ne, tangun me cojo nina oro o sa xi nina quicha tyava, o sa xi nina ndyojo, xi xuta casahmi me cojo cjuatacun rë suvá me.
ACT 17:30 Nina ne, catsingatjuhnga me nixtin xi xuta ne, hvíin me. Peru quihndë ne, Nina ne, tivitexa me xi yëjë ni xuta tsëhë jingujyë ni ladu ne, tsindeya me cjuatacun rë me ta,
ACT 17:31 tsëhë xi Nina ne, ha cavejña me ngu nixtin xi tsichuva me xuta tsëhë ngasunhndë cojo cjuaquixi tu cutjin jyë́ rë ne, cuatjin sahmi me cojo. Hacuaha ha cavaxijin me ngu xuta xi sahmi xa vëhë. Hacuaha ha hyan xi cjuaquixi xi cuatjin cuma, tsëhë xi Nina catsicuya me cjuahñu xuta vëhë. ―‍Cuatjin cachja Pablo.
ACT 17:32 Hane hya xi cahndë xuta jan cjua xi ngu nima ne, cavuya cjuahñu ne, ngujo me ne, catsixcuehyu me cjua jan, peru ngujo nga me ne, cuitjin cachja me: ―‍Cuisiñiji xi cuinújun nga ngundiya cjua vëhë. ―‍Cuatjin cachja ngujo me jan.
ACT 17:33 Ngajan xi Pablo ne, cavetju me tsëhë ngajñi rë xuta jan.
ACT 17:34 Hane ngujo xuta ne, cavisehen me ladu rë Pablo sehe camacjain rë me cjua jan. Hane ngajñi rë me xi cuacun vë ne, jiyajñi me xi hmí rë Dionisio, ngu xutaxa rë tsëhë nandya, hacuaha cojo sa ngu chjuun xi hmí rë Dámaris jiyajñi me jan, cojo ngujo sa me.
ACT 18:1 Hya xi camá ne, hya xi cavatju xcusun vëhë ne, cavetju Pablo tsëhë nandya Atenas, hane quiji me nandya Corinto.
ACT 18:2 Hane xi cafehe Pablo ngajan ne, cavechútaha me ngu xihin tjë rë Israel xi hmí rë Aquila. Aquila jan ne, tsëhë distritu Ponto má me, peru hacuaha sehe cafehe me Corinto cojo chjuun rë me xi hmí rë Priscila, xi quiji caviyujucahndë me ngajan nación Italia. Cavetjuxin me tsëhë Italia ta, tsëhë xi me xi matitjun jan, me xi hmí rë Claudio ne, cavitexa me xi yëjë ni xuta tjë rë Israel ne, hatuxa cuetjuxin me tsëhë nandya Roma. Hane Pablo ne, quijitjengui me Aquila.
ACT 18:3 Hane tsëhë xi ha ngu xcusun ni xa xi sahmi catsijo ni me ne, cavejñatangun me cojo me xi cuacun vë, hacuaha tangun casahmi me xa. Xa xi sahmi me ne, xi tsindaja me ndihya tsjian.
ACT 18:4 Ngajan xi Pablo ne, cachja me cjua rë Nina ngajan yungun rë xuta tjë rë Israel jima ngu nixtin xi chjahájenda rë ta, tsëhë xi meje rë me xi sa xuta tjë rë Israel o sa xi xutaxín ne, cumacjain rë me cjua vëhë.
ACT 18:5 Hane xi cafehe Silas cojo Timoteo xi cavetju me tsëhë distritu Macedonia ne, Pablo ne, cavetsihin xi nchunchujun ni tichja me cojo xuta cjua rë Nina, tichja me cojo xuta tjë rë Israel xi Jesús ne, me vëhë xi catsingatju Nina.
ACT 18:6 Peru hya xi casahmi xuta xi cuacun jan condra Pablo hacuaha choho cachja me tsëhë me ne, cavitsune Pablo chojo rë tsjian rë me sacuaha xi tivaxë me xuta xi mijí cuihndë cjua rë Nina, sehe cachja me cojo xuta jan cuitjin: ―‍Ngayun suvun cún nuju tsëhë xcusun xi cuátju cuma. Hacuiin ngahan cún ná. Quihndë cojo nixtin xi cjui sa ne, cjuë́ cuichjá cojo xutaxín cjua rë Nina. ―‍Cuatjin cachja me.
ACT 18:7 Hane xi cavetjuxín me tsëhë xuta xi cuacun vë ne, quiji me ndava ngu me xi hmí rë Ticio Justo, ngu xutaxín xi hacuaha faharcun me Nina. Ndava me vëhë ne, ngu ndaya ni rë yungun rë xuta tjë rë Israel jan tacun.
ACT 18:8 Hane Crispo, me xi xutaxa rë yungun jan ne, camangucacun me cojo Nai naja Jesucristu, hacuaha cojo yëjë sa me xi siu ndava me camangucacun me. Hacuaha jemu cjín xuta Corinto ne, xi cahndë́ me cjua ndajyihi rë Nina jan ne, camacjain rë me sehe caxtenda me.
ACT 18:9 Hane ngu nguixun jan ne, ngajñi nijña rë Pablo ne, cachja Nai naja cojo rë me cuitjin: ―‍Xicarcuiin. Tinoje sa. Xicanisejyiin cjua xi noje.
ACT 18:10 Cuatjin nihñi ta, tsëhë xi ngahan ne, tejña cojo ri, hane tsajin yo xi cuma choho sahmi cojo ri ta ngahan ne, jemu tjin ná xuta ladu naha nguehe nandya vihi. ―‍Cuatjin cachja Nai naja.
ACT 18:11 Hane cavéjña Pablo ngajan ngu nu vasen, xi vicuya rë me xuta cjua rë Nina.
ACT 18:12 Peru hya xi Galión matitjun me tsëhë distritu Acaya ne, camatangun xuta tjë rë Israel jan ne, cafaha me Pablo, quijicani me xcun xutaxa rë,
ACT 18:13 cuitjin cachja me: ―‍Cha xi cuijyihi vi ne, tsujyihiya cha tichja cha cojo xuta xi hacjahi xcusun meje rë xi nihña xi chjahanrcun Nina. Peru xcusun vëhë ne, condra tsëhë ley naja. ―‍Cuatjin cachja xuta jan.
ACT 18:14 Hane ha tu hora sa xi cuichja Pablo ne, cachja Galión cojo xuta xi cuacun jan cuitjin: ―‍Ngayun xuta tjë rë Israel, sa xi ngu cjuatsehen o sa xi ngu jyë́ jyë xi casahmi cha ne, tjin ná chuva rë xi scaa ná cojo nuju.
ACT 18:15 Peru xi tsëhë ngu cjuachacun cojo tsëhë ñihi rë ngu xuta cojo tsëhë ley nuju suvun ne, ndyá chutsujun suvun hacutjin cuma chihin ta, tsëhë xi ngahan ne, hatuxa sahmecuendaan cjuacjintacun xi cuacun vë. ―‍Cuatjin cachja Galión.
ACT 18:16 Ngajan xi Galión ne, catsicanga cojo me xuta tjë rë Israel jan tsëhë ndihyavasen.
ACT 18:17 Ngajan xi yëjë xuta jan ne, cafaha me Sóstenes, me xi matitjun tsëhë yungun rë xuta tjë rë Israel, cavaja rë me ngajan ndatsen ndihyavasen. Peru Galión ne, casahmicuendaain camahani me yëjë ni cjuacjintacun vëhë.
ACT 18:18 Peru hya xi ha jemu cavatju nixtin xi quitaha Pablo ngajan Corinto ne, catsinguijnetaha me cjua cojo xuta ladu rë Jesús, sehe cafaha me ngu barcu xi cjue me ngajan distritu Siria. Priscila cojo Aquila ne, hacuaha cojo me quiji me cojo Pablo. Hane xi cafehe me nandya Cencrea ne, ngajan casejnu rë rcu Pablo ta, tsëhë xi casahmichihin me ngu cjua cojo Nina.
ACT 18:19 Hane xi cavatju vëhë ne, sehe quiji me nandya Efeso. Hane Pablo ne, ngajan caviyujutaha me Priscila cojo Aquila. Hya xi camá ne, Pablo ne, quiji me yungun, cachja me cojo xuta tjë rë Israel jan cjua rë Nina.
ACT 18:20 Hane xi cafehya xuta me xi setaha sa me ngujo nixtin ngajan ne, catsingatiin me.
ACT 18:21 Hya xi camá ne, catsinguijnetaha me cjua cojo xuta jan, cuitjin cachja me: ―‍Sa xi Nina meje rë me ne, cúya nga, nduvatjënguë nuju. ―‍Cuatjin cachja me. Ngajan xi cafaha me ngu barcu xi cavetju me tsëhë Efeso.
ACT 18:22 Hane xi cafehe me Cesarea ne, ngajan cavetju me quiji me Jerusalén xi sua me ngu nina xuta rë yungun ngajan. Hya xi camá ne, sehe cavuya cafehe me nandya Antioquía.
ACT 18:23 Hane xi ha casetaha me ngujo nixtin jan ne, sehe cavetju nga me quiji me yëjë ni nandya tsëhë distritu Galacia cojo distritu Frigia, casua rë me ngahñu yëjë ni xuta ladu rë Jesús.
ACT 18:24 Ngajan nandya Efeso ne, cafehe ngu xuta tjë rë Israel xi hmí rë Apolos. Nangui rë me ne, Alejandría. Jemu ndaja tsichihin me cjua xi chja me, hacuaha jemu vëë me tsëhë cjua rë xujun rë Nina.
ACT 18:25 Me vëhë ne, tjin yo xi casuacuenda rë me tsëhë ndiya rë Nai naja. Cojo nguñaja xahasen rë me ne, chichihin ni casua me camachaya rë xuta cjuandajyihi xi chja tsëhë Jesús. Peru hvíin me mé vijne xi xtenda xuta sacuatjin tixtenda xuta ladu rë Jesús ta xi vëë me ne, suvá ni mé vijne xi xtenda xuta sacuatjin cavitenda Juan Vitenda rë Xuta.
ACT 18:26 Apolos vë ne, hacuiin cojo chircun rë me cuetsihin cuichja me cojo xuta cjua rë Nina ngajan yungun rë xuta tjë rë Israel. Hane xi cahndë Priscila cojo Aquila sacuatjin cachja Apolos ne, cavaxëxin me ne, sehe casuacuenda ndaja sa me tsëhë ndiya rë Nina.
ACT 18:27 Hya xi camá ne, catsingatahacacun Apolos xi cjue me ngajan distritu Acaya. Hane xuta ladu rë Jesús jan ne, cachuya rë me hacuaha catsihindu me ngu xujun tsëhë xuta ladu rë Jesús ngajan, cachja me cojo xuta jan xi ndaja cjuahatsja me Apolos. Hane xi cafehe me jan ne, jemu cavisecoo me xuta xi cojo cjuandaja rë Nina ne, ha camangucacun me cojo Jesús.
ACT 18:28 Hane xcun ni yëjë xuta ne, jercu catsitjungui me cjua rë xuta tjë rë Israel. Jemu cjín cahndë́ tsëhë xujun rë Nina xi cachja me cojo xuta, xi tsingacun me xuta xi Jesús ne, me vëhë xi catsingatju Nina me.
ACT 19:1 Cuitjin camá jinguyëjë rë xi quitahá cuaha Apolos ngajan Corinto. Xi cavatju catsujyihiya Pablo taha ladu ngatihin ne, cafehe me nandya Efeso, hane ngajan cavechútaha me ngujo xuta ladu rë Jesús.
ACT 19:2 Hane cuitjin cachja me cojo xuta jan: ―‍¿Há cavisehen Hasen rë Nina cahntsua xahasen nuju hya xi camangutacún cojo Jesús? ―‍Cuatjin cachja me. Hane xuta jan ne, cuitjin cafayangui me: ―‍Hisca camachayiin niji cjua xi tjin xi hmí rë Hasen rë Nina. ―‍Cuatjin cafayangui me.
ACT 19:3 Ngajan xi Pablo ne, cuitjin cachja nga me: ―‍¿Hacutjin caxtenda ngayun ni? ―‍Cuatjin cachja me. Hane xuta jan ne, cuitjin cafayangui me: ―‍Caxtenda ngayin sacuatjin cavitenda nima Juan. ―‍Cuatjin cafayangui me.
ACT 19:4 Ngajan xi Pablo ne, cuitjin cachja nga me: ―‍Juan vë ne, cavitenda me xuta hya xi xuta jan ne, catsindeya me cjuatacun rë me, hacuaha cachja me cojo xuta jan xi catamangucacun me cojo me xi sehe cjuehe, me xi hacui Jesús. ―‍Cuatjin cachja nga Pablo.
ACT 19:5 Xi cahndë xuta jan cjua vëhë ne, caxtenda me xi cumatangun cjuatacun rë me cojo Nai naja Jesús.
ACT 19:6 Hane xi cavisanetsja Pablo xuta jan ne, canduva Hasen rë Nina, cavisehen cahntsua xahasen rë xuta, hane cachja me hne xi hisca hvíin me, hacuaha cachja me cjua xi casua Nina me.
ACT 19:7 Hane má sacuaha tejó xihin me xi yëjë me.
ACT 19:8 Hya xi camá ne, quiji Pablo yungun rë xuta tjë rë Israel, cachja me cojo xuta. Hane cahntsua jyan sá ne, cuatjin fi me yungun, hane hacuiin cojo chircun rë me chja me cojo xuta tsëhë gubiernu xi sahmi Nina.
ACT 19:9 Peru ngujo xuta jan ne, casahmitaja rcu me, hane camacjaain rë me, hane choho cachja me tsëhë ndiya rë Jesús xcun yëjë ni xuta. Vëhë xi Pablo ne, cavetjuxin me tsëhë xuta jan, hacuaha quijicojo me xuta ladu rë Jesús. Cavetsihin me nchunchujun ni cachja me cojo xuta ngajan scuela rë ngu me xi hmí rë Tirano.
ACT 19:10 Cuatjin casahmi me cahntsua jo nu, vëhë xi yëjë xuta xi siu ngajan Asia ne, camachaya rë me tsëhë cjua rë Nai naja, sa xuta tjë rë Israel ne, o sa xutaxín.
ACT 19:11 Jemu jyë cjuarcun casahmi Nina ngajñi rë xa xi casahmi Pablo.
ACT 19:12 Hisca tsjian xi sahmixa cojo Pablo ne, quijicojo xuta casua rë me xuta hmu rë, hane chíhin rë me ne, cavetjuxin, hisca xitsehen xi hincha xahasen rë yahnga me ne, hacuaha cavetjuxin.
ACT 19:13 Peru ngujo cha tjë rë Israel xi tsujyihiya vaxëxin cha xitsehen xi hincha xahasen rë xuta ne, hacuaha camameje cueyanangui cha ñihi rë Nai naja Jesús hora xi tivaxëxin cha xitsehen, hane cuitjin cachja cha: ―‍Tsëhë xi Jesús casuaxa ná me, me xi chja Pablo tsëhë ne, tivitéxa nuju xi cuetjunxun. ―‍Cuatjin cachja cha.
ACT 19:14 Cha xi cuatjin sahmi vë ne, hacui yatu cha quihndi rë ngu nahmi xi hmí rë Sceva, ngu nahmi xi matitjun tsëhë xuta tjë rë Israel.
ACT 19:15 Hane ngu ndiya xi cuatjin cachja cha ne, cuitjin cafayangui xitsehen jan: ―‍Jesús ne, hvë me vëhë. Hacuaha hvë Pablo. Peru ngayun ne, ¿yo ngayun? ―‍Cuatjin cafayangui xitsehen jan.
ACT 19:16 Hya xi camá ne, me xi hincha xitsehen xahasen rë jan ne, cacaataha me cha, hane cacaa rë me catsinguijne me yëjë yatu cha, tsëhë xi jemu hñu ngahñu rë me. Cuatjin camá xi jemu casacuhmu rë cha xi cuacun jan, hane cavanga cha tu quixti ni tsëhë ndihya hiscan siu cha jan.
ACT 19:17 Xcusun xi camá vë ne, camachaya rë yëjë xuta nandya Efeso, sa xuta tjë rë Israel ne, o sa xutaxín. Hane ngayëjë ni me ne, jemu catsacjun me camá, hane camá jyë camá hnga Nai naja Jesús.
ACT 19:18 Hane jemu cjín xuta xi ha cavisehen me ladu rë Jesús ne, fitjengui me Pablo vijacun me tsëhë cjuasurqui xi sahmi me.
ACT 19:19 Hya xi camá ne, jemu cjín xuta xi sahmi cjuasurqui ne, quijicojo me xujun rë me jan, cavaca me ngajan xcun yëjë ni xuta. Hane xi casahmi me cuenta chji rë yëjë xujun rë me jan ne, jemu jyë camahani tujún cavetju chji rë.
ACT 19:20 Cuatjin camá xi cjua rë Nai naja ne, jercu cavitsojo sa hacuaha casacuhñu sa rë.
ACT 19:21 Hane xi cavatju camá yëjë xcusun vëhë ne, cavejñacacun Pablo xi cjue me Jerusalén, cuatju me yëjë nandya tsëhë distritu Macedonia cojo yëjë nandya tsëhë distritu Acaya. Hacuaha cachja me cuitjin: ―‍Xi cuatju cjuë́ Jerusalén ne, hacuaha tjin ná xi cjuë́ hisca nandya Roma. ―‍Cuatjin cachja me.
ACT 19:22 Ngajan xi catsingatju me jo xuta xi visecoo rë me jan, Timoteo cojo Erasto, ngajan distritu Macedonia. Peru me vëhë ne, casetaha sa me ngajan distritu Asia.
ACT 19:23 Ngu nixtin xi quitahá me jan ne, cavechú ngu cjuandya jyë tsëhë ndiya rë Jesús.
ACT 19:24 Ngu xihin xi hmí rë Demetrio ne, sahmi me yungun langa cojo suvá quicha tyava, xcusun rë yungun rë nina Diana. Hane xuta xi sahmi xa rë Demetrio ne, jemu casacu rë me tujún tsëhë xa vëhë.
ACT 19:25 Ngajan xi Demetrio ne, casahmi tangun me yëjë xuta xi sahmi xa rë me cojo jingu sa xuta xi sahmi me xa vëhë ni ne, sehe cachja me cuitjin: ―‍Ngayujun ni ne, ha hyun ta tsëhë xa vihi ne, sacu naja yëjë tujún xi tjin naja.
ACT 19:26 Ngayun ne, chutsujun hacuaha machaya nuju cjua xi hacuiin suvá ni nguehe ta cojo jingujyë ni distritu Asia ne, tsujyihiya cha Pablo vë, sahmi cha xi vijnecacun xuta cjín hacuaha tsismicacun me nina naja ta, tsëhë xi chja cha xi nina xi nindajan cojo ntsan ne, hacuiin nina jain me.
ACT 19:27 Jemu tsavi ta hacuiin suvá ni xa naja chajá ta cojo yungun rë nina naja Diana ne, cuechú hora xi cuenguiin chji rë, hacuaha hisca suvá nina naja ne, chajá me xi jyë hnga me cojo cjuatacun rë me ta me vëhë ne, yëjë ni xuta tsëhë jingujyë ni distritu Asia cojo xuta tsëhë jingujyë ni ngasunhndë ne, jemu faharcun rë me. ―‍Cuatjin cachja me.
ACT 19:28 Xi cahndë xuta cjua jan ne, jemu camacjan camahani rë me, sehe cajindaya me cachja me cuitjin: ―‍Jemu jyë hnga nina Diana naja. ―‍Cuatjin cajindaya me cachja me.
ACT 19:29 Jingujyë ni ngajñi nandya ne, jemu jyë suë cavejña. Ngajan xi xuta jan ne, vanga me cjui cuma tangun me ngajan ndatsen ndihyavasen, taha tijuvëhya me Gayo cojo Aristarco, jo me tsëhë distritu Macedonia, me xi visecoo rë Pablo.
ACT 19:30 Ngajan xi Pablo ne, meje cuisehenjñi me ngajñi rë xuta cjín jan, peru xuta ladu rë Jesús ne, casuaain me cahndë́.
ACT 19:31 Hacuaha ngujo xutaxa rë xi vinga rë Pablo ne, catsingatju me cjua tsëhë Pablo xi cjuiin me ngajan ndatsen ndihyavasen.
ACT 19:32 Ngujo xutacjín jan ne, jindaya me chja me cuitjin, ngujo nga me ne, jindaya me chja me cuatjin ta, tsëhë xi yëjë ni xuta ne, jemu camasuë rë cjuatacun rë me. Jercu cjín me xi hisca hvíin me mé má cuatjin quiji camatangun me jan.
ACT 19:33 Peru ngujo xutacjín jan ne, casuacuenda me Alejandru mé tsëhë xi cuatjin tijima, hya xi catsivaha xuta tjë rë Israel me xi secun me xcun. Ngajan xi Alejandru ne, casahmi tsja me cojo xutacjín jan xi sejyu me cojo sa xi cuma cuichja Alejandru ngatsë rë xuta tjë rë Israel.
ACT 19:34 Peru xi cavëë xutacjín jan xi Alejandru ne, xuta tjë rë Israel má me ne, ngu tangun ni cajindaya me, vatju sa jo hora cachja me cuitjin: ―‍¡Jemu jyë hnga nina Diana naja! ―‍Cuatjin cajindaya me cachja me.
ACT 19:35 Hya xi camá ne, xi camá catsinguejyu secretariu xutacjín jan ne, sehe cachja me cuitjin: ―‍Ngayujun ngarcun ni ngayun xuta nandya matsejen ne, ha hyun ta tsajin hisca ngu xuta xi hvíin me xi nguehe Efeso tacun yungun rë nina Diana hacuaha nguehe tacun suvá nina xi cjanengui nguehe xi canduva ngahnga.
ACT 19:36 Tsëhë xi tsajin yo xi cuma cuichja xi hacuiin cuatjin ne, vëhë xi meje rë xi catisejyu ni ngayun, tsajin mé xi nihñu sa xi cjëë ningatuhuntacúnndujun.
ACT 19:37 Cha xi cuicun canduvuncujun nguehe ne, tsajin mé xi choho casahmi cha cojo yungun naja, hacuaha tsajin mé xi choho chja cha tsëhë nina naja.
ACT 19:38 Peru sa xi Demetrio cojo xuta xi sahmi xa rë me tjin yo xi sahmi si me cojo ne, tacun ndihyavasen, hacuaha tjin xutaxa rë. Ngajan catinchajyë xicjin me, jima ngu me.
ACT 19:39 Hane sa xi tjin sa mé xi meje nuju ne, nixtin xi satë rë junta xi sehe cuma ne, hya cuma chihin.
ACT 19:40 Sacuaha xcusun xi tijima vi ne, cuma tsingatahacacun me xi matitjun xi ngayaan ne, tinihña ngu si jyë condra tsëhë gubiernu. Ta sa xi cjuinenguise naja me mé má cuatjin canihña ne, sacuiin naja chuva rë hacutjin cuinújan mé má cuitjin tinihña ngu suë jyë vi.
ACT 19:41 Cuatjin cachja secretariu, sehe catsinguijnetaha me cjua cojo xutacjín ne, sehe cafe xingu xingu me.
ACT 20:1 Hya xi camá ne, xi cavatju suë jyë jan ne, cajindaya Pablo xuta ladu rë Jesús, casua rë me cjuetacun. Sehe catsinguijnetaha me cjua, sehe cavetju quiji me distritu Macedonia.
ACT 20:2 Hane jima ngu nandya xi cavatju me xi cafehe me Macedonia ne, hacuaha jercu cachja me cojo xuta ladu rë Jesús hacuaha casua rë me cjuetacun. Hane xi cavatju me yëjë nandya vëhë ne, cafehe me distritu Acaya.
ACT 20:3 Hane ngajan casetaha me jyan sá. Hane hya xi ha cjuaha me barcu xi cjue me distritu Siria ne, casacu camachaya rë me xi xuta tjë rë Israel ne, caviyuju me xi tsiquehen rë me. Vëhë xi catsingatahacacun me xi hitsë sa ndatjin cuya cjue ntsacu me xi táha ladu tsëhë Macedonia.
ACT 20:4 Hane cojo me xi cuicun vihi quiji me cojo rë me: Sópater, ngu xuta Berea xi quihndi rë Pirro; cojo Aristarco cojo Segundo, jo xuta Tesalónica; cojo Gayo, ngu xuta Derbe; cojo Timoteo; cojo Tíquico cojo Trófimo, jo xuta tsëhë distritu Asia.
ACT 20:5 Me xi cuacun vë ne, camatitjun me quiji me, hane ngajan caviyujuya niji me nandya Troas.
ACT 20:6 Peru ngayin ne, xi cavatju suhi tsëhë pan xi tsajin san rë ne, sehe cachjihin barcu xi cavetjin tsëhë Filipos, hane xi cafë hñú nixtin ne, sehe cavechintihin me ngajan Troas. Hane ngajan cavinechintihin yatu nixtin.
ACT 20:7 Ngajan xi nixtin ngu tsëhë totje ne, camatangun ngayin xi xinitanguin niñu ngayijin ni. Hane Pablo ne, cachja me cojo xuta. Hane tsëhë xi cuetju me cjue me xi cuma nchujun jan ne, quijinduju cachja me hisca cavechú vasen nixten.
ACT 20:8 Jemu cjín ndihi seti ngajan ndihya ngahnga hiscan camatangun ngayin.
ACT 20:9 Hane ngu cha xi hmí rë Eútico ne, tacun cha xcun ventana. Hane xi quijinduju sa cachja Pablo ne, jemu camanijñá rë cha. Hane tsëhë xi cacaain rë cha nijñá ne, cafañafë tjain camahani cha, hane cjanengui cha hisca xi má jyan pisu ndihya jan. Hane xi quiji catjunihnga rë cha ne, ha cahme cha.
ACT 20:10 Hane xi quijijne Pablo hiscan jiña nima ne, catsiquindi me yojo rë me sehe catsuvacja me nima. Hacuaha cachja me cuitjin: ―‍Xicamacjiin tacún ta, quicun cha vi. ―‍Cuatjin cachja Pablo.
ACT 20:11 Ngajan xi Pablo ne, cavuya quijiniji me, sehe cajinë me niñu. Sehe cavisiajmi camaha sa me hisca xi casahasen, sehe cavetju me quiji me.
ACT 20:12 Hacuaha quicun cha xi cjanengui jan, cafecojo xuta cha. Hane jercu casacu rë me cjuetacun xi quicun cha.
ACT 20:13 Ngayin ne, camatitjun ngayin catsanguin cavisihin barcu, hane sehe catsanguin nandya Aso, cojo sa xi chjihinntsin Pablo cahntsua barcu ngajan ta, tsëhë xi ha cuatjin camachihin cjua ta, tsëhë xi me vëhë ne, meje cjue ntsacu me.
ACT 20:14 Hane xi casacu xinguin cojo rë me ngajan Aso ne, cavisehen me barcu, sehe catsanguin tangun Mitilene.
ACT 20:15 Hane xi cavetjin ngajan ne, xi camá nchujun ne, cavatjin quixi rë Quío. Hane xi camá nchujun nga ne, cafihin Samos. Hane camá nchujun nga ne, cafihin nandya Mileto,
ACT 20:16 tsëhë xi Pablo ne, cavejñacacun me xi cuátjincjin tsëhë nandya Efeso, cojo sa xi hacuiin cuma tafi me ngajan distritu Asia, tsëhë xi me vëhë ne, jemu meje xati rë me cojo sa xi xati cuechú me ngajan Jerusalén, hane ngajan tsingatju me suhi Pentecostés.
ACT 20:17 Hane jinguyëjë rë xi quitahá Pablo ngajan Mileto ne, catsingatju me quiji chjahá rë xuta changá rë yungun ngajan Efeso.
ACT 20:18 Hane xi cafehe xuta changá jan xcun Pablo ne, cuitjin cachja Pablo cojo rë me: ―‍Ngayun ne, ha hyunndujun hacutjin cavitejñataha cojo nuju yëjë ni nixtin hisca hya xi sehe tu cafëhë nguehe distritu Asia.
ACT 20:19 Ha hyun hacutjin casahme xa rë Nai naja: catsinguíjne yojo naha, hisca cajíhnda, hacuaha jemu cjín cjuañihi cavátju camá ta, tsëhë xi xuta tjë rë Israel ne, jemu choho meje sahmi me cojo ná.
ACT 20:20 Ngayun ne, ha hyun hacutjin xi cachjá yëjë cojo nuju yëjë cjua xi ndaja xi cuma nuju. Hacuaha ha hyun hacutjin casuá camachaya nuju cjuachacun hya xi camatangun ngayun ngayujun ni, hacuaha cëjë ndya nuju jima ngu ngayun, cachjá cojo nuju.
ACT 20:21 Cachjá cojo xuta tjë rë Israel hacuaha cachjá cojo xutaxín xi meje rë xi tsindeya me cjuatacun rë me hacuaha cuisehen me ladu rë Nina hacuaha meje rë xi cumangucacun me cojo Nai naja Jesús.
ACT 20:22 Quihndë ne, ngahan ne, tifë́ Jerusalén sacuatjin cavitexa ná Hasen rë Nina. Hveen mé xi cuátju cuma jan.
ACT 20:23 Peru Hasen rë Nina ne, yëjë ni nandya xi vátju ne, chja cojo ná xi hatuxa cjuë́ ndavaya hacuaha jemu cuátju cjuañihi.
ACT 20:24 Xi má ná ne, tangun ni xi tejña cjuahñu o sa xi cueya. Xi meje ná ne, xi tsinguíjnetaha xa xi casua ná Nai naja Jesús, xa xi suá cumachaya rë xuta cjuandajyihi xi chja tsëhë cjuandaja rë Nina.
ACT 20:25 ’Quihndë ne, ha hvë ta ha quihndë cuyuun chun ná, ngayujun ni xi casuá camachaya nuju tsëhë gubiernu xi sahmi Nina.
ACT 20:26 Vëhë xi nguehe cuichjá cojo nuju ta, sa xi tjin ngu ngayun xi cuechuun xcun Nina ne, hacuiin ngahan quítjen jyë́ ta,
ACT 20:27 tsëhë xi ngahan ne, casuácuenda chichihin nuju yëjë hacutjin xi cavejña Nina cjuatacun rë me.
ACT 20:28 Nechun cuidadu, hacuaha nihñucuidadun yëjë xuta ladu rë Jesús, xi suvá Hasen rë Nina casuaxa nuju xi cuma titjun ngayun tsëhë sacuaha obispos, cojo sa xi ngayun nihñu cuidadu xuta rë yungun rë Nina. Me xi cuacun vë ne, casacu rë Nina me cojo jni rë Quihndi rë suvá me hya xi cahme me.
ACT 20:29 Hya xi ha cavatju cavétjuxen tsujun ne, ngahan hvë ta cuinduva xuta, xi meje tsinguetsun me cjuatacun rë yëjë xuta ladu rë Jesús, sacuatjin tsiquehen chu lobo cjan rë chu tsánga.
ACT 20:30 Hacuaha ngajñi nuju suvun ne, cuetjujñi xuta xi cuichja me cjuandacha, cojo sa xi cuaxëxin me xuta ladu rë Jesús xi cuma ladu rë me.
ACT 20:31 Nechun cuidadu. Hacuaha ninguitsjun ta, cahntsua jyan nu ne, nguixun nguitajñu cavicuyá nuju jima ngu ngayun. Jiya hora ne, hisca cajíhnda.
ACT 20:32 ’Quihndë ne, nguehe cuiyujú nuju tsja Nai naja, cojo sa xi sahmi nuju me cuidadu cojo cjuandaja rë me. Me vëhë xi ma sahmi me xi cuma yehe sa cjuatacun nuju, hacuaha sua tangun nuju me cjuahñu xatsë cojo yëjë sa xuta xi cavaxijin me.
ACT 20:33 Ngahan ne, hacuiin catsihmucacun tujún o sa tsjian rë jingu sa xuta.
ACT 20:34 Ngayun ne, hyun ta ngahan ne, casahmexa cojo ntsa vi xi casacu cjuachaja naha cojo me xi cavisecoo ná.
ACT 20:35 Ngajñi rë yëjë ni xcusun xi casahme ne, ngahan ne, catsingácun nuju xi, xi cuatjin hñu nihña xa ne, meje rë xi cuisecoon rë xuta xi jemu tjin rë cjuachaja. Hacuaha meje rë xi ninguitsjen cjua rë Nai naja Jesús, hya xi cachja me cuitjin: “Hitsë sa sua má naja xi tahan, xi cuma rë xi chjahanntsan.” Cuatjin cachja Nai naja.
ACT 20:36 Hane xi cafë cachja Pablo cuatjin ne, sehe cavixcuhnchi me, casahmi me oración cojo yëjë xuta jan.
ACT 20:37 Yëjë ni me jemu cajihnda me, quiji me catsuvacja me Pablo, hisca cavitatsuha me.
ACT 20:38 Cjua xi hitsë sa casua rë me cjuachoho ne, cjua xi cachja Pablo xi ha quihndë cuyaain scuëë xuta jan me. Sehe quiji me cojo Pablo hiscan cavisehen Pablo barcu.
ACT 21:1 Hya xi camá ne, xi cavejñi xuta jan ne, sehe ngu quixi ni quiji barcu cojo niji ne, cafihin Cos. Hane xi camá nchujun jan ne, cafihin Rodas. Hane xi cavetjin ngajan ne, cafihin Pátara.
ACT 21:2 Hane xi casacu niji ngu barcu xi cjue distritu Fenicia ne, cavisihin sehe catsanguin.
ACT 21:3 Hane xi cachutsijin Chipre ne, cavatjin taha ladu quixi tsëhë jan, catsanguin nduju xi cafihin quixi rë distritu Siria, sehe cafihin nandya Tiro ta, tsëhë xi ngajan cuitujne chaha xi hincha cahntsua barcu.
ACT 21:4 Hane xi casacu xinguin cojo xuta ladu rë Jesús jan ne, cavinechintihin ngajan yatu nixtin. Hane ngujo profeta xi siu ngajan Tiro ne, tjin mé cachja Hasen rë Nina cojo rë me, sehe cachja profeta jan cojo Pablo xi cjuiin me Jerusalén.
ACT 21:5 Xi cavechú nixtin xi cuetjin jan ne, sehe cavetjin catsanguin. Hane yëjë xuta jan, cojo chjuun rë me cojo quihndi rë me ne, quiji cani niji me hisca tjehen ndachacun, hiscan fë nandya. Sehe ngajan cavixcuhnchin, sehe canihñi oración.
ACT 21:6 Hane xi caninguijnitihin cjua cojo rë me ne, sehe cavisihin barcu, hane me vëhë ne, cavuya cafe me ndava me xingu xingu me.
ACT 21:7 Hane ngayin ne, catsanguin cojo barcu xi cavétjin tsëhë Tiro, hane cafihin Tolemaida. Hane xi catsanguin catihin rë xuta ladu rë Jesús nina ne, ngajan cavinechin cojo rë me ngu nixtin.
ACT 21:8 Hane xi camá nchujun jan ne, cavetjin catsanguin, hane cafihin Cesarea. Sehe catsanguin ndava Felipe, me xi sua machaya rë xuta cjuandajyihi xi chja tsëhë Jesús. Me vëhë ne, ngu me tsëhë me xi ma yatu xi cavaxiji me xi visecoo rë apóstol. Hane ngajan cavinechin cojo rë me.
ACT 21:9 Me vëhë ne, tjin rë me ñuju na nixti quihndi rë me, xi má na profeta.
ACT 21:10 Hane jinguyëjë rë xi nechintihin ngajan ngujo nixtin ne, cafehe ngu profeta xi canduva tsëhë Judea, ngu me xi hmí rë Agabo.
ACT 21:11 Hane xi cafehetjengui niji me ne, quiji me cafaha me cinturón rë Pablo, sehe catsihñu me tsja me cojo ntsacu me cinturón jan, sehe cachja me cuitjin: ―‍Cuitjin chja Hasen rë Nina: “Xihin xi tsëhë cinturón vi ne, cuitjin tsihñu xuta tjë rë Israel me ngajan Jerusalén, hacuaha sahmi me entregadu xihin vëhë tsja xutaxín.” ―‍Cuatjin cachja profeta jan cjua rë Nina.
ACT 21:12 Xi canuhyin cjua vëhë ne, ngayin cojo xuta xi siu jan ne, canújin cojo Pablo xi cjuiin me Jerusalén.
ACT 21:13 Ngajan xi Pablo ne, cuitjin cafayangui me: ―‍¿Mé má cuatjin chjihndun? ¿Mé má cuatjin nihñuchuvun cjuatacun naha? Ngahan ne, ha tjin chjine ngahan, hacuiin suvá ni xi cjuë́ ndavaya ta hacuaha hisca cueya ngajan Jerusalén ngatsë rë xi ladu rë Nai naja Jesús ngahan. ―‍Cuatjin cafayangui Pablo tsijin.
ACT 21:14 Hane xi catsingatiin me cjua xi canújin ne, ha quihndë canujiin sa cjua vëhë ta cuitjin canújin: ―‍Catama sacuatjin Nai naja meje rë me. ―‍Cuatjin canújin.
ACT 21:15 Xi cavatju nixtin xi cuacun vë ne, sehe cavihinchjini tsijin, sehe catsanguin Jerusalén.
ACT 21:16 Hacuaha cojo ngujo xuta ladu rë Jesús ngajan Cesarea quiji me cojo niji. Me xi cuacun vë quijicojo niji me hiscan xi cuinechin, ndava ngu xuta Chipre xi siutaha me Jerusalén, xi hmí rë Mnasón. Me vëhë ne, ha jemu hatsëë camahani xi xuta ladu rë Jesús má me.
ACT 21:17 Xi cafihin ngajan Jerusalén ne, xuta ladu rë Jesús jan ne, cafahatsja niji me cojo yëjë ni cjuasua.
ACT 21:18 Hane xi camá nchujun jan ne, Pablo ne, quiji me cojo niji xi cuisiajmi me cojo Jacobo. Hacuaha ha tjin tangun yëjë xuta changá rë yungun jan.
ACT 21:19 Hane xi cavatju cachja Pablo nina cojo rë me ne, sehe casuacuenda chichihin me yëjë ni xcusun xi casahmi Nina ngajñi rë xa rë Nina xi casahmi Pablo ngajñi rë xutaxín.
ACT 21:20 Hane xi cavatju cahndë xuta jan cjua xi cachja Pablo ne, casahmi jyë casahmi hnga me Nina, sehe cachja me cojo Pablo cuitjin: ―‍Ngayun ne, ha hyun xi ngajñi rë xuta tjë rë Israel ne, chuva mil xuta tjin me xi cavisehen me ndiya rë Jesús. Hacuaha yëjë ni me ne, jemu ndaja faharcun me ley rë Moisés.
ACT 21:21 Hacuaha xuta xi cuacun vë ne, casacu camachaya rë me xi ngayun ne, nújun cojo yëjë xuta tjë rë Israel xi siu ngajan nangui rë xutaxín xi meje rë xi tsismicacun me ley rë Moisés, hacuaha mijí rë xi cuatë me chuxin rë quihndinda xi xihin, ha quihndë mijí rë xi cjuetjengui sa me xcusun changá naja.
ACT 21:22 ¿Mé xi cuma ni? Hatuxa jyihi ni ne, sacú cumachaya rë me xi cafuhun.
ACT 21:23 Vëhë xi quihndë ne, nihñu tutjin xi cuinújin cojo nuju. Nguehe ngajñi niji ne, siu ñuju xihin xi casahmichihin me ngu cjua cojo Nina.
ACT 21:24 Chjuhun cha vihi ne, tangun cojo cha yungun xi matitjun, cojo sa xi ngajan cuma tyjahi cha tangun cojo ngayun tsëhë xcusun xi tsavi xi cojo Nina sacuatjin xi ha xcusun naja. Hacuaha techjun tsëhë cha, cojo sa xi cuma sejnu rë rcu cha. Hane xi cuatjin nihñu ne, yëjë ni xuta ne, cumachaya rë me xi yëjë cjua xi camachaya rë me tsujun ne, quixiin ta ngayun ne, hacuaha ha tuxa nihñuchuhun sacuatjin chja ley rë Moisés.
ACT 21:25 Hane sacuaha xutaxín xi cojo cavisehen ladu rë Jesús ne, ha caningatjin ngu xujun tsëhë me, hane xujun vëhë ne, chja xi meje rë xi sinii me xichinë xi caviyuju xcun ninandyojo, sinii me jni, sinii me yojo rë chu xi caxinchahndu rë xi cahme, sahmii me cjuatsehen xi sahmi xuta cojo ngu xi hacuiin chjuun rë hacuiin xihin rë. ―‍Cuatjin cachja xuta changá jan cojo Pablo.
ACT 21:26 Hane xi camá nchujun jan ne, sehe quijicojo Pablo cha xi cuacun jan, sehe catsityjahi tangun me yojo rë me cojo cha, sacuatjin xi ha xcusun rë xuta tjë rë Israel. Sehe ngajan xi Pablo cojo cha xi cuacun jan ne, cavisehen me yungun xi matitjun, xi cuichja me há cjín sa nixtin xi cuijnetaha xi cuma tyjahi camahani me, hane hacuaha cjue cjuatjo xcun Nina ngatsë rë jima ngu me.
ACT 21:27 Hya xi camá ne, xi ha meje cuechú xi cuma yatu nixtin jan ne, xuta tjë rë Israel xi canduva tsëhë distritu Asia jan ne, cavëë me Pablo ngajan cahntsua yungun xi matitjun tsëhë xi nchunchujun ni quiji me yungun tsëhë nixtin jan. Catsisuë me cjuatacun rë xutacjín jan, sehe quiji cafaha me Pablo,
ACT 21:28 hisca cajindaya me cachja me cuitjin: ―‍¡Ngayujun ni ngayun xuta tjë rë Israel, nduvun tisecuun niji! ¡Cha vihi xi tsujyihiya chja cha condra naja ngayaan xuta rë Nina, cojo condra rë ley xi vitexa naja, cojo condra tsëhë cahndë́ vihi! Cuatjin tsujyihiya chja cha cojo yëjë xuta jingujyë ni. Hacuaha catsinguetsun cha cahndë́ rë Nina vi, tsëhë xi canduvacojo cha xutaxín nguehe cahntsua yungun xi matitjun vi. Cuatjin cajindaya me cachja me ta,
ACT 21:29 tsëhë xi titjun ne, ha cavëë me Pablo cojo ngu xutaxín xi hmí rë Trófimo ngajan ngajñi nandya, hane xi má rë me ne, quijicojo Pablo me cahntsua yungun.
ACT 21:30 Hane yëjë xuta nandya ne, camasuë rë cjuatacun rë me. Hane vanga me quiji camatangun me yungun xi matitjun hiscan secun Pablo, sehe cafaha me cajavëjne me, cavaxë me tsëhë yungun jan. Sehe ngutjen ni casechja yëjë tingotjo jan.
ACT 21:31 Hane jinguyëjë rë xi tisahmi xutacjín jan cjuandya xi tsiquehen me Pablo ne, quiji cjua rë capitán tsëhë sindadu xi yëjë xuta Jerusalén ne, tjemu jyë suë tisahmi me.
ACT 21:32 Ngajan xi capitán jan ne, ngutjen ni quijijne me cojo sindadu rë me hiscan xi hinchataha xutacjín jan. Hane xi cavëë xutacjín jan sindadu cojo capitán rë cha ne, sehe casejyu me xi tivaja rë me Pablo.
ACT 21:33 Hane xi quiji tiña capitán jan ne, sehe cafaha me Pablo. Sehe cavitexa me xi cumahñu Pablo cojo jo cadena. Hya xi camá ne, sehe cavinenguise capitán jan cojo xuta jan yo xuta Pablo jan, hacuaha mé casahmi me.
ACT 21:34 Hane ngujo xuta jan ne, hisca jindaya me chja me cuitjin, ngujo nga me ne, hisca jindaya me chja me cuatjin. Peru tsëhë xi casacuiin rë capitán jan cjuaquixi ngatsë rë suë jyë xi tijima jan ne, cavitexa me xi cjuecojo sindadu Pablo ngajan hiscan hincha sindadu.
ACT 21:35 Hane xi cafehe sindadu cojo Pablo hiscan ndë rë ne, hisca cavahahnga cha Pablo ngatsë rë cjuahngatacun xi sahmi xutacjín jan ta,
ACT 21:36 tsëhë xi tjengui me cjui me jindaya me chja me cuitjin: ―‍¡Nicuhun cha! ―‍Cuatjin chja me.
ACT 21:37 Hya xi ha tsinguisehen sindadu jan Pablo cahntsua ndihya ne, cachja Pablo cuitjin cojo capitán: ―‍¿Há tuun cahndë́ cuichjá cojo nuju ngujo cjua? ―‍Cuatjin cachja Pablo. Ngajan xi capitán jan ne, cuitjin cachja me: ―‍¡Han, peru ma noje griego!
ACT 21:38 Hane ngajan xi hacuiin ngaye cha Egipto xi sehe tiña nixtin cavunihnga ngu si jyë hacuaha quijicojo rë ñuju mil cha tsiquehen ngajan ngu xín tsëhë nandya jan ni. ―‍Cuatjin cachja capitán jan.
ACT 21:39 Ngajan xi Pablo ne, cuitjin cachja me: ―‍Ngahan ne, ngu cha tjë rë xuta Israel ngahan. Nangui naha ne, ngu nandya xi hacuaha jemu vengui chji rë xi hmí rë Tarso, tsëhë distritu Cilicia. Nihñu favor ne, tuhun cahndë́ cuichjá cojo xuta xi cuicun vi. ―‍Cuatjin cachja Pablo.
ACT 21:40 Hane xi casua capitán jan cahndë́ xi cuichja Pablo ne, hora xi secun Pablo hiscan ndë jan ne, casahmitsja me cojo xuta xi sejyu me hitsë. Hane hora xi cafë xuta caviyujujyuu me ne, ngajan xi Pablo ne, cachja me cojo xuta jan hne hebreo, cuitjin cachja me:
ACT 22:1 ―‍Ngayujun ngarcun ni xi hacuaha xingueen nuju ne, nihñu favor ne, tisiñuju hacutjin suá cjuaquixi naha quihndë xcun ngayujun ni. ―‍Cuatjin cavetsihin cachja me.
ACT 22:2 Hane xi cahndë xutacjín jan xi hne hebreo cachja Pablo cojo rë me ne, hitsë sa jercu caviyujujyuu me. Sehe cachja sa Pablo cuitjin:
ACT 22:3 ―‍Ngahan ne, ngu cha tjë rë Israel ngahan. Hacuaha catsin ngahan ngajan nandya Tarso tsëhë distritu Cilicia. Peru xi camacha ne, nguehe Jerusalén. Hane maestru Gamaliel cavicuya ná me sacuatjin camahani chja ley rë xutachanga naja. Hatuxa jemu ndaja fahárcun Nina, sacuatjin tinihñu ngayujun ni quihndë.
ACT 22:4 Ngahan ne, cojo cjuahngatacun ne, catsujyëhëya tjënguë xuta xi tjengui ndiya xatsë vihi. Hisca cavitéxa xi cueya me. Cafahá me cëjëcojo me ndavaya, sa chjuun sa xihin me.
ACT 22:5 Hisca nahmi xi matitjun cojo yëjë xuta changá rë yungun ne, cuma sua me cjuaquixi rë me tsëhë cjua vihi ta, tsëhë xi hacuaha me xi cuacun vëhë casua ná me xujun xi suá rë xuta naja ngajan Damasco. Vëhë xi cëjë ngajan xi cjuahá xuta xi tjengui ndiya xatsë vihi, hane tsíhñu me cuinduva cojo me nguehe Jerusalén, cojo sa xi cuma me castigu.
ACT 22:6 ’Hya xi camá ne, hora xi ha tijima tiña ngayin xi tivanguin Damasco, sacuaha chuva rë nchisen ne, ha tu ñahñu canduva ngu ndihi jyë tsëhë ngahnga casahmi hasen rë hiscan tifë́.
ACT 22:7 Ña catícja, hane cahndë ngu cjua xi cachja cojo ná cuitjin: “Saulo, Saulo, ¿mé má cuatjin nujyihiye tjengui ná cojo cjuahngatacun?” Cuatjin cachja cjua jan.
ACT 22:8 Ngajan xi ngahan ne, cuitjin cafayanguë: “¿Yo ngayun, Tatá?” Cuatjin cafayanguë. Sehe cachja nga cjua jan cojo ná cuitjin: “Ngahan xi Jesús tsëhë nandya Nasaret ngahan, xi tinujyihiye tjengui ná cojo cjuahngatacun.” Cuatjin cachja nga cjua jan cojo ná.
ACT 22:9 Yëjë xuta xi cavisecoo ná xi tivanguin ne, cavëë me ndihi jyë jan, peru cahndiin me cjua xi cachja cojo ná jan.
ACT 22:10 Sehe ngajan xi ngahan ne, cachjá cuitjin: “¿Mé xi meje rë xi sahme, Tatá?” Cuatjin cachjá. Hane Nai naja ne, cuitjin cachja me cojo ná: “Tisatjinhngue ne, tisihin Damasco. Hane ngajan cumachaya ri yëjë xcusun xi meje rë Nina xi nihñi.” Cuatjin cachja Nai naja cojo ná.
ACT 22:11 Peru tsëhë hasen jyë xi cavisehen túxcun jan ne, camatsijin ná. Ngajan xi xuta xi tivisecoo ná xi tivanguin ne, cavaha me ntsa, sehe camá cafëhë Damasco.
ACT 22:12 ’Hya xi camá ne, ngu xihin xi hmí rë Ananías, xi jemu faharcun rë Nina hacuaha sahmi yëjë sacuatjin chja ley xi vitexa naja ne, ndaja chja yëjë xuta tjë rë Israel xi siu jan tsëhë.
ACT 22:13 Hane cafehetjengui ná me hiscan tejña, hane cachja me cojo ná cuitjin: “Ngayun Saulo, catamatsejen nga nuju ngundiya.” Cuatjin cachja me. Hane ha hora vëhë ni ne, camatsejen nga ná hane cahvë me.
ACT 22:14 Hya xi camá ne, sehe cachja me cojo ná cuitjin: “Nina rë xutachanga naja ne, cojo tjun sa ne, casuaxa nuju me xi cumachaya nuju mé xi meje rë me, hacuaha chun me xi hatuxa tyjahi cojo cjuatacun rë, hacuaha cuinuhyun cjua xi chja me cojo nuju.
ACT 22:15 Cuatjin camá ta, tsëhë xi Nina meje rë me xi ngayun tuhun cumachaya rë yëjë xuta tsëhë me, cojo tsëhë xcusun xi cahyun cojo tsëhë cjua xi canuhyun.
ACT 22:16 Quihndë ne, ¿mé nechunyun rë ni? Tángun ni catixtenda ngayun, chjindayun rë Jesús cahntsua xahasen nuju, cojo sa xi cjuë jyë́ nuju.” Cuatjin cachja Ananías cojo ná.
ACT 22:17 ’Hane xi cavatju vëhë ne, cavúya nga Jerusalén. Hane ngu ndiya hya xi tejñaya yungun xi matitjun tisahme oración naha ne, sacuaha xi camá ná xi cachja ngu chini cojo ná.
ACT 22:18 Cahvë Nina, hane cachja me cojo ná cuitjin: “Xati nihñi tacuin ne, tetjixin tsëhë Jerusalén ta, tsëhë xi xuta nguehe ne, cumacjaain rë me cjua xi noje tsahan.” Cuatjin cachja Nina.
ACT 22:19 Hane ngahan ne, cuitjin cachjá: “Ngayun Nina naha, xuta nguehe ne, vëë me xi ngahan ne, catsujyëhëya yungun jingujyë ni, cafahá xuta xi tjengui me ndiya nuju, cavajá rë me, hacuaha cavinchá me ndavaya.
ACT 22:20 Hane hora xi titsiquehen xuta Esteban, me xi cachja cjua nuju ne, hacuaha cojo ngahan sécun jan, tichuya ná, hacuaha hisca ngahan tisahme cuidadu tsjian rë cha xi titsiquehen rë Esteban jan.” Cuatjin cachjá.
ACT 22:21 Sehe ngajan xi Nina ne, cuitjin cachja me cojo ná: “Tihin ta, ngahan tsingátju ri hisca nangui cjin, cuihin cuinoje cojo xutaxín cjua naha.” Chja Nina cojo ná. ―‍Cuatjin cachja Pablo.
ACT 22:22 Hisca ngajan ni cacaa rë xutacjín cavisiñuju me cjua xi cachja Pablo, sehe cavetsihin me cajindayataha me cachja me cuitjin: ―‍¡Nicuhun cha xi cuajyihi vë ta ha quihndë vechiin chuva rë xi cuejña sa cha cjuahñu! ―‍Cuatjin cajindaya me cachja me.
ACT 22:23 Jinguyëjë rë xi cuatjin jercu tijindayataha xuta, titsiniya me tsjian rë me, hacuaha titsicjin me nihndë scuan ne,
ACT 22:24 capitán jan ne, cavitexa me xi cjue chani rë Pablo cahntsua hiscan hincha sindadu. Hacuaha cavitexa me xi chjahátaha rë Pablo táha sehen rë me, cojo sa xi sacú cjuaquixi mé má cuatjin jindayataha xuta Pablo.
ACT 22:25 Hane hya xi ha camahñu me xi sehen rë me ne, sehe cachja me cuitjin cojo sindadu xi secun jan: ―‍¿Há chja ley xi cuma sehen rë ngu xuta Roma jinguyëjë rë xi cjëë cuma cuenda jyë́ rë me? ―‍Cuatjin cachja me.
ACT 22:26 Hane xi cahndë sindadu cjua vëhë ne, quiji cachja me cojo capitán cuitjin: ―‍¿Há hyun mé xi nihñu ni? Cha vëhë ne, cha Roma cha. ―‍Cuatjin cachja sindadu jan.
ACT 22:27 Ngajan xi capitán jan ne, quijitjengui me Pablo, sehe cachja me cuitjin: ―‍Tinoje cojo ná ne, ¿há xuta Roma jain ngaye? ―‍Cuatjin cachja me. Ngajan xi Pablo ne, cuitjin cafayangui me: ―‍Juun. ―‍Cuatjin cafayangui me.
ACT 22:28 Ngajan xi capitán jan ne, cuitjin cachja me: ―‍Ngahan ne, jemu jyë tujún cavechjë xi camá ngahan xuta Roma. ―‍Cuatjin cachja me. Ngajan xi Pablo ne, cuitjin cachja me: ―‍Peru ngahan ne, xuta Roma ngahan hisca xi catsin ngahan. ―‍Cuatjin cachja me.
ACT 22:29 Hya xi camá ne, sindadu xi cjuahataha rë Pablo jan ne, ngutjen quijixin cha tsëhë Pablo. Hacuaha capitán jan ne, jemu catsacjun me camá xi cuatjin catsihñu me Pablo tsëhë xi camachaya rë me xi Pablo ne, xuta Roma me.
ACT 22:30 Hane xi camá nchujun jan ne, tsëhë xi meje cumachaya rë capitán jan cjuaquixi mé má cuatjin cavinchajyë xuta tjë rë Israel Pablo ne, cavitexa me quiji casehenndaya Pablo, hacuaha cavitexa me xi cumatangun yëjë nahmi xi matitjun cojo yëjë sa xuta xi matitjun. Hane xi cafehecojo sindadu Pablo jan ne, sehe quijicani capitán me xcun yëjë xuta xi matitjun jan.
ACT 23:1 Ngajan xi Pablo ne, xi cavutsejenya me xcun yëjë xuta xi matitjun jan ne, sehe cachja me cuitjin: ―‍Ngayujun ni ne, nguehe cuichjá cojo nuju ta ngahan ne, hisca ntsacu cavetsihin hisca quihndë ne, hatuxa tyjahi cjuatacun naha xcun Nina. ―‍Cuatjin cachja me.
ACT 23:2 Hane Ananías, nahmi xi matitjun jan ne, cavitexa me xi xuta xi hinchacun hiscan secun Pablo xi cuajaya me hntsua Pablo.
ACT 23:3 Ngajan xi Pablo ne, cachja me cuitjin: ―‍¡Nina cuaja nuju me, ngayun xuta ndacha! ¡Nechun ndyá xi chjuhunchuvun ná cojo ley rë Moisés, sehe vitexun xi cuajaya xuta ntsuva, handasa chja ley xi ndajintjin xi cuatjin nihñu! ―‍Cuatjin cachja me.
ACT 23:4 Hane xuta xi hinchacun hiscan secun Pablo jan ne, cuitjin cachja me: ―‍Haján, ¿há cuatjin choho noje cojo nahmi xi matitjun xi Nina casuaxa rë? ―‍Cuatjin cachja me.
ACT 23:5 Sehe ngajan xi Pablo ne, cuitjin cafayangui me: ―‍Haan, peru ngahan ne, hveen xi me vëhë xi nahmi xi matitjun me ta, ngahan ne, ha hvë xi xcun xujun rë Nina ne, cuitjin camahindu: “Mijí rë xi choho cuinújun cojo me xi matitjun tsujun.” ―‍Cuatjin cachja Pablo cjua xi camahindu xcun xujun rë Nina.
ACT 23:6 Hane ha vëë Pablo xi ngujo xuta xi matitjun jan ne, xuta saduceo me, hane ngujo nga me ne, xuta fariseo me. Vëhë xi cachjahñu me xcun junta cuitjin: ―‍Ngayujun ni ne, nguehe cuichjá cojo nuju ta ngahan ne, xuta fariseo ngahan, hacuaha quihndi rë xuta fariseo. Ngatsë rë xi vetahácácun xi nima ne, cuya cjuahñu ne, vëhë xi tichjahachuva ná. ―‍Cuatjin cachjahñu Pablo.
ACT 23:7 Hane xi cachja Pablo cuatjin ne, cavetsihin cacjan xuta fariseo cojo xuta saduceo, hane hacuiin tangun camá me cojo cjuatacun rë me.
ACT 23:8 Xuta fariseo ne, chja me ta nima ne, cuya cjuahñu, hacuaha chja sa me xi tjin ángel hacuaha tjin hasen naja. Peru xuta saduceo ne, chja me ta quixiin.
ACT 23:9 Hya xi camá ne, cavisatjenhnga ngu suë jyë. Ngajan xi cavetjujñi ngujo cha xi vicuya cjuachacun xi hacuaha fariseo cha ne, cachja cha cuitjin: ―‍Sacuiin niji hisca ngu jyë́ rë cha xi cuijyihi vi. ¿Há ngayaan hyan sa xi ngu ángel o sa xi ngu hasen cachja cojo rë cha? ―‍Cuatjin cachja cha.
ACT 23:10 Hane hya xi suë xi tacun jan camajyë sa ne, jemu catsacjun capitán jan tsëhë xi tsiquehen xuta Pablo. Hane vëhë xi cavitexa me sindadu xi cjuejne, cuaxëxín cha Pablo tsëhë ngajñi rë xuta jan, cjuecojo cha me cahntsua hiscan hincha sindadu.
ACT 23:11 Hane xi camá nguixun nchujun jan ne, quijitjengui Nai naja Pablo, cuitjin cachja me cojo rë me: ―‍Tejñi hñu xahasen riji ta, tsëhë xi sacuatjin canoje ngatsë naha nguehe Jerusalén ne, hacuaha cuatjin tjin ri xi cuinoje ngajan Roma. ―‍Cuatjin cachja Nai naja.
ACT 23:12 Hane xi camá nchujun nga jan ne, ngujo xuta tjë rë Israel jan ne, casahmitangun me cjua xi hacuiin sinë hacuiin cuihi me jinguyëjë rë xi cjëë tsiquehen me Pablo.
ACT 23:13 Quisun sa xi yachan xuta xi cuatjin caviyujucacun me.
ACT 23:14 Hya xi camá ne, quiji me xcun yëjë nahmi xi matitjun cojo xuta changá jan, hane cachja me cojo me cuitjin: ―‍Ngayin ne, canihñitanguín cjua xi xinii siín jinguyëjë rë xi cjëë niquihin cha Pablo.
ACT 23:15 Quihndë ne, ngayun cojo sa me xi yahnga xi matitjun ne, tuhun cumachaya rë capitán ne, cataxë me cha Pablo, catinduvacojo me cha xcun junta xi cuma, sacuaha xi meje sa nuju cjuaquixi tsëhë jyë́ rë cha. Hane ngayin ne, ha tjin chjine ngayin xi niquihin cha chaja sa xi cjuehe cha xcun junta. ―‍Cuatjin cachja xuta jan.
ACT 23:16 Peru cha quihndi rë na tichja Pablo ne, xi camachaya rë cha tsëhë cjuandacha jan ne, quiji cha hiscan hincha sindadu hane casuacuenda cha Pablo tsëhë cjua xi camachaya rë cha.
ACT 23:17 Sehe ngajan xi Pablo ne, cajindaya me ngu cha xi matitjun tsëhë sindadu, sehe cachja me cojo cha cuitjin: ―‍Tángun cojo cha vihi xingueen xcun capitán tsëhë xi tjin cjua xi cuichja cha cojo rë me. ―‍Cuatjin cachja Pablo.
ACT 23:18 Ngajan xi sindadu jan ne, quijicojo cha cha xicjin Pablo jan xcun capitán, sehe cachja cha cuitjin: ―‍Cha Pablo xi jiya ndavaya jan ne, cajindaya cha ngahan, sehe cachja cha cojo ná xi cuinduva cojo cha vihi nguehe ta, tsëhë xi tjin xu cjua xi cuichja cha cojo nuju. ―‍Cuatjin cachja cha sindadu jan.
ACT 23:19 Ngajan xi capitán jan ne, cafaha me tsja cha xicjin Pablo ne, sehe quijixin me cojo cha ngu ladu sehe ngajan cafinenguise me cha cuitjin: ―‍¿Mé cjua xi cuinoje cojo ná? ―‍Cuatjin cafinenguise me.
ACT 23:20 Hane cha xicjin Pablo jan ne, cuitjin cachja cha: ―‍Ngujo xuta tjë rë Israel ne, casahmitangun me cjua xi cuichja me cojo nuju xi cuanguncujun tsini naha xcun me xi matitjun tsëhë me, sacuaha xi tjin sa cjua xi meje cjuinenguise rë me.
ACT 23:21 Peru xicamacjaain nuju cjua rë me ta, vatju sa yachan xuta xi hinchaya rë me ngajan ndiya, xi casahmichihin me cjua xi sinii cuiin me jinguyëjë rë xi cjëë tsiquehen me tsini naha. Ndicumaha ni ne, siuya me xi cuinújun xi ndatjin. ―‍Cuatjin cachja cha xicjin Pablo.
ACT 23:22 Ngajan xi capitán jan ne, cuitjin cachja me cojo rë cha: ―‍Tjihin ne, tsajin yo xi cuinoje cojo xi catehe camachaya ná cjua vihi. ―‍Cuatjin cachja me.
ACT 23:23 Hya xi camá ne, capitán jan ne, cajindaya me jo sindadu rë me, sehe cachja me cojo cha cuitjin: ―‍Tuhunchjinu jo cientu sindadu cojo jyanchan të cha xi miji naxin cojo jo cientu sa cha xi vaha lanza ne, cojo sa xi fane ñaja tsëhë nguixun ne, cuetju cha, cjue cha hisca nandya Cesarea.
ACT 23:24 Hacuaha tuhunchjinu ngujo naxin xi cuijin Pablo, xi cuangun chanu me xcun Félix, me xi matitjun. ―‍Cuatjin cachja capitán.
ACT 23:25 Sehe catsihindu me ngu xujun xi chja cuitjin:
ACT 23:26 “Ngahan, Claudio Lisias ne, tsingátju ngu nina naha tsujun, ngayun Félix, ngayun xi matitjun ngayun tsahan.
ACT 23:27 Cha xi cuijyihi vi ne, cafaha xuta Israel cha. Hitsë sa ne, catsiquehen me cha. Hane xi camachaya ná xi cha Roma cha ne, cëjë cojo sindadu naha, cavaxëtjë cha.
ACT 23:28 Hane tsëhë xi meje cumachaya ná mé má cuatjin vinchajyë́ xuta cha ne, cëjëcojo cha xcun xutaxa rë yungun cojo xcun xuta changá rë xuta Israel.
ACT 23:29 Hane ngahan ne, camachaya ná ta vinchajyë́ me cha, tsëhë xi faharcuaain cha ley rë suvá me. Peru jyë́ xi vincha me tsëhë cha ne, vechiin chuva rë xi cueya cha o sa cjue cha ndavaya.
ACT 23:30 Hane xi camachaya ná xi casahmichihin xuta cjua xi tsiquehen me cha ne, ngutjen ni catsingátju cha xcun ngayun, hacuaha cavitéxa rë xuta xi vinchajyë́ rë cha cuinduva me ndyá cuichja me cojo nuju mé má cuatjin vinchajyë́ me cha.” Cuatjin chja xujun jan.
ACT 23:31 Hya xi camá ne, cafaha sindadu jan Pablo, quijicojo cha me nguixun hya nandya Antípatris, sacuatjin cjua xi cachja capitán cojo cha.
ACT 23:32 Hane xi camá nchujun jan ne, cavuya sindadu xi fi ntsacu jan ngajan Jerusalén, hane cha xi hinchasun naxin jan ne, quiji sa cha cojo Pablo.
ACT 23:33 Hane xi cafehe cha cojo rë me Cesarea ne, casahmi entregadu cha xujun xi yaha cha, hacuaha casahmi entregadu cha Pablo tsja me xi matitjun.
ACT 23:34 Hya xi camá ne, xi cafë cavutaya me xujun jan ne, sehe cavinenguise me jani distritu rë Pablo. Hane xi camachaya rë me xi Pablo ne, distritu Cilicia distritu rë me ne,
ACT 23:35 cuitjin cachja me: ―‍Hya xi cjuehe xuta xi vincha me jyë́ riji ne, hya cuíhndë cjua riji. ―‍Cuatjin cachja me. Sehe cavitexa me xi setjo Pablo ngajan ngu cahndë́ tsëhë ndihya jyë xi casahmi Herodes, hiscan xi má ndava me xi matitjun.
ACT 24:1 Hane xi cavatju hñú nixtin jan ne, cafehe nahmi xi matitjun xi hmí rë Ananías ngajan Cesarea, cojo ngujo xuta changá cojo ngu me xi cuichjatje ngatsë rë xuta xi cuacun vë, ngu me xi hmí rë Tértulo. Me xi cuacun vë ne, quiji cavinchajyë me Pablo xcun me xi matitjun.
ACT 24:2 Hane xi cachjindaya rë Pablo ne, cavetsihin cavinchajyë Tértulo me, cuitjin cachja me: ―‍Ngatsë nuju ngayun ne, jemu tjin cjuandaja cjuajeya ngajñi niji. Hacuaha tsëhë xi jemu ndaja chjuhuncuendun yëjë ni nandya niji ne, vëhë xi cjui xcun nandya.
ACT 24:3 Jemu tihín camahani nacuechji nuju, ngayun Félix, tsëhë yëjë cjuandaja xi tinihñu vë.
ACT 24:4 Cojo sa xi ha quihndë suaan sa nuju cjuandya ne, nihñu favor ne, nihñujyun tacún cojo niji ne, tisiñuju hitsë ngujo cjua xi cuinújin.
ACT 24:5 Cha xi cuijyihi vi ne, jemu cjuaxti camahani cha. Jingujyë ni ngasunhndë ne, titsujyihiya tivunihnga cha si ngajñi niji ngayijin ni xuta tjë rë Israel. Hacuaha cha vihi ngu cha xi matitjun ngajñi rë xuta ladu rë cha Nasaret.
ACT 24:6 Hisca cahntsua yungun xi matitjun meje sahmi cha ngu xcusun xi ndajin tjin xi nihña, vëhë xi cachjihin cha. Ngayin ne, meje chjihinchuvin cha sacuatjin vitexa ley niji,
ACT 24:7 peru cafehe capitán Lisias ne, cafahatahá me cha, hacuaha cavitexa niji me xi ngayin xi vinchin jyë́ rë cha ne, cuinduvin hisca nguehe xcun ngayun.
ACT 24:8 Hora xi chjuhuntuhun rë cha ne, ngayun suvun ni sacú nuju cjuaquixi tsëhë yëjë ni jyë́ xi vinchin tsëhë cha. ―‍Cuatjin cavinchajyë Tértulo.
ACT 24:9 Yëjë xuta tjë rë Israel xi cojo siu jan ne, hacuaha cachja me xi cuatjin jain.
ACT 24:10 Hane hora xi casahmitsja me xi matitjun cojo Pablo xi cuichja me ne, Pablo ne, cuitjin cachja me: ―‍Ngayun ne, ha hvë xi jemu tsëë chjuhunchuvun xuta nación naha tsëhë jyë́ rë me. Vëhë xi ngahan ne, cojo yëjë ni cjuasua ne, suá cjuaquixi naha cojo nuju.
ACT 24:11 Sa xi chjinengunsun suvun ne, cuma sacú nuju cjuaquixi ta ngahan ne, sehe tjin rë tejó nixtin xi cëjë Jerusalén xi cjuahárcun Nina.
ACT 24:12 Peru casacuintsjaain ná me xi tivisiajmecjen o sa tisuá suë rë cjuatacun rë xuta, sa cahntsua yungun xi matitjun, sa cahntsua tu jarë ni yungun langa, o sa jingujyë ni ngajñi nandya.
ACT 24:13 Hacuaha hisca cumaji tsinguixi me xi cjuaquixi jain tsëhë jyë́ xi vincha me tsahan quihndë.
ACT 24:14 Peru ngu nga ne, nguehe cuichjá cojo nuju cjuaquixi ta ngahan ne, hatuxa fahárcun jain Nina rë xutachanga naha, sacuatjin faharcun xuta xi hincha ndyá xi chja me xi cuicun vihi xi ngu ndiya ndacha. Hacuaha macjain ná yëjë ni cjua tsëhë ley rë Moisés cojo yëjë cjua xi catsihindu profeta.
ACT 24:15 Hacuaha vétahacácun Nina sacuatjin vetahacacun me xi cuicun vi xi nima ne, cuya cjuahñu, sa tyjahi o sa xi hacuiin tyjahi cjuatacun rë.
ACT 24:16 Vëhë xi ngahan ne, yëjë ni hora ne, sahme ngujyë xi tyjahi cjuatacun naha xi cuma rë Nina cojo xi cuma rë xuta.
ACT 24:17 Hane xi ha jemu cavatju nixtin ne, cavúya canduvatjënguë xuta naha, yahá tujún xi cuisécoo rë me hacuaha suá cjuatjo xi cjue xcun Nina.
ACT 24:18 Hane xi cuatjin canduva ne, me xi cuicun vi ne, cavëë ná me ngajan yungun xi matitjun, tyjahi ngahan sacuatjin xi ha xcusun niji. Hacuaha hacuiin jemu cjín xuta siu me cojo ná hacuaha tsajin ngu suë jyë xi tijima.
ACT 24:19 Peru siu ngujo xuta tjë rë Israel xi canduva me tsëhë distritu Asia. Me xi cuacun vë xi sa tjin mé jyë́ meje cuincha me tsahan ne, catinduva catincha me jyë́ naha nguehe xcun ngayun.
ACT 24:20 O sa tsajin ne, suvá me xi cuicun vi catichja me mé cjuatsehen naha casacu rë me, hya xi cavisécun xcun xutaxa rë yungun niji.
ACT 24:21 Ngu tu tu ni cjua xi cajindáya cachjá hya xi sécun ngajñi rë me ne, cuitjin cachjá: “Ngatsë rë xi macjain ná xi nima ne, cuya cjuahñu ne, vëhë xi tichjahachuva ná quihndë xcun ngayun.” Cuatjin cachjá. ―‍Cjua vëhë xi cachja Pablo xcun Félix, me xi matitjun.
ACT 24:22 Hya xi camá ne, tsëhë xi ha vëë ndaja Félix cjua tsëhë Ndiya Xatsë ne, xi cuejñavasen me cjuacjintacun vëhë ne, cuitjin cachja me: ―‍Hya xi cjuehe Capitán Lisias ne, sehe sahmechehen cjuacjintacun nuju vi. ―‍Cuatjin cachja me.
ACT 24:23 Hane sehe cavitexa me sindadu rë me xi cuetjo cha Pablo, peru sahmi cha cjuandaja ne, hacuiin cuitijaya rë cha xuta rë Pablo xi cjue cjuahacuenda rë me.
ACT 24:24 Hane xi cavatju ngujo nixtin ne, cavuya cafehe Félix, xi quiji me ngu nangui. Cafehe me cojo Drusila, chjuun rë me, ngu chjuun xuta tjë rë Israel. Hya xi camá ne, catsingatju me quiji chjahá rë Pablo, sehe cavisiñuju me cjua xi cachja Pablo tsëhë hacutjin xi cumangutacuun cojo Jesucristu.
ACT 24:25 Jinguyëjë rë xi tichja Pablo tsëhë ngu cjuatacun tyjahi, tsëhë ngu xahasen tyjahi, cojo tsëhë nixtin xi tsichuva Nina xuta tsëhë jyë́ rë me ne, Félix ne, catsacjun me camá, sehe cachja me cojo Pablo cuitjin: ―‍Quihndë ne, cuma cjuihin. Hane hya xi cumahya ná ne, sehe squindáya nga ri. ―‍Cuatjin cachja me.
ACT 24:26 Peru hacuaha tsingatahacacun me sa xi sua Pablo me tujún. Vëhë xi jemu cjín ndiya cajindaya me Pablo, cavisiajmi me cojo.
ACT 24:27 Xi cavatju jo nu ne, cavetju Félix tsëhë xcun xa rë me, hane cavisehen nga ngu cahndë́ rë me, ngu me xi hmí rë Porcio Festo. Peru tsëhë xi Félix ne, meje sahmi me cjuandaja cojo xuta tjë rë Israel ne, caseya cuaha Pablo ndavaya.
ACT 25:1 Hya xi camá ne, cafehe Festo xi cjuahaxa me ngajan Cesarea. Hane xi cafë jyan nixtin ne, cavetju me quiji me Jerusalén.
ACT 25:2 Hane xi cafehe Festo ngajan Jerusalén ne, nahmi xi matitjun cojo me xi matitjun tsëhë ngajñi rë xuta tjë rë Israel ne, casua me camachaya rë Festo tsëhë jyë́ xi vincha me tsëhë Pablo.
ACT 25:3 Hane cafehya me favor xi tsingatju Festo cjue chjahá rë Pablo xi cjue me ngajan Jerusalén. Cuatjin meje rë me xi cuma ta, tsëhë xi ha cavisiajmichihin me xi tsiquehen me Pablo ngajan ndiya.
ACT 25:4 Ngajan xi Festo ne, cachja me ta Pablo ne, tacunñihi me ngajan Cesarea, hacuaha suvá Festo ne, ha cjue xati me ngajan.
ACT 25:5 Hacuaha cachja sa me cuitjin: ―‍Catji xutaxa rë yungun nuju cojo ná, hane sa xi tjin mé jyë́ rë cha ne, ngajan catincha me jyë́ rë cha cojo ná. ―‍Cuatjin cachja me.
ACT 25:6 Hya xi camá ne, cavejña sa Festo ngajan Jerusalén sacuaha jyin o sa të nixtin, sehe cafe me Cesarea. Hane camá nchujun tsëhë nixtin xi cafehe me jan ne, quiji me cavéjña me xcun xa rë me, sehe cavitexa me cjue chjahá rë Pablo.
ACT 25:7 Hane xi cafehe Pablo ne, quiji caxinchacunndee xuta tjë rë Israel xi canduva tsëhë Jerusalén jan tjehen rë me, hane jemu cjín xcusun jyë́ rë Pablo xi cavincha me, peru hisca camaji catsinguixi me xi cjuaquixi jain.
ACT 25:8 Hane Pablo ne, xi casua me cjuaquixi rë me ne, cuitjin cachja me: ―‍Tsajin camahani mé jyë́ xi casahme, hacuiin condra rë ley niji ngayin xuta tjë rë Israel ne, hacuiin condra rë yungun xi matitjun tsijin ne, hacuiin condra rë César, me xi matitjun tsajan. ―‍Cuatjin cachja Pablo.
ACT 25:9 Hane xi meje sahmi Festo cjuandaja cojo xuta tjë rë Israel ne, cuitjin cafinenguise me Pablo: ―‍¿Há meje cuihin Jerusalén, cojo sa xi ngajan tsichúva ri cojo jyë́ riji vi? ―‍Cuatjin cafinenguise me.
ACT 25:10 Ngajan xi Pablo ne, cuitjin cafayangui me: ―‍Ha ndihyavasen rë César, me xi matitjun camahani, sécun, hane ha nguehe xi meje rë xi chjahachuva ná cojo jyë́ naha. Xuta tjë rë Israel ne, tsajin camahani mé xi choho sahme cojo rë me. Ngayun ne, ha ndaja hyun.
ACT 25:11 Sa xi tsejen ta casahme ngu xcusun xi vechú chuva rë xi cueya ne, tsingatehen xi cueya. Peru sa xi tsajin cjuaquixi tsëhë hisca ngu jyë́ xi vincha me tsahan ne, tsajin yo xi cuma sahmi ná entregadu tsja xuta xi cuacun vë. Ngahan ne, féhya nuju xi nihñu ná consina tsja César, me xi matitjun camahani. ―‍Cuatjin cafayangui me.
ACT 25:12 Ngajan xi Festo ne, xi cavisiajmicjín me cojo yëjë me xi visecoo rë me ne, sehe cachja me cuitjin cojo Pablo: ―‍Cachjahye xi sahme ri consina tsja César ne, tsja César tsingátju ri. ―‍Cuatjin cachja Festo.
ACT 25:13 Hane xi cavatju ngujo nixtin jan ne, ngu me xi matitjun tsëhë jingu sa distritu, me xi hmí Agripa ne, cafehe me Cesarea cojo Berenice na xicjin me, xi sua me ngu nina Festo.
ACT 25:14 Hane tsëhë xi caviyuju me ngujo nixtin jan ne, cachja Festo cojo rë me tsëhë cjuacjintacun xi tacun tsja me tsëhë Pablo. Cuitjin cachja me: ―‍Nguehe ne, tacunñihi ngu cha xi cavejñavasen Félix cjuacjintacun rë.
ACT 25:15 Hya xi cëjë Jerusalén ne, nahmi xi matitjun cojo xuta changá tsëhë xuta tjë rë Israel ne, casua me camachaya ná tsëhë cha vëhë, hacuaha cafehya me xi cuichjá xi cuma cha castigu.
ACT 25:16 Peru ngahan ne, cachjá cojo rë me ta ngayin xuta Roma ne, tsajin niji xcusun xi nihñi castigu ngu xuta xi hincha jyë́ rë me jinguyëjë rë xi cjëë cuisehen me xcun cojo xcun cojo me xi vincha jyë́ rë me, hacuaha sacú rë me cahndë́ xi sua me cjuaquixi rë me tsëhë jyë́ xi hincha tsëhë me.
ACT 25:17 Hane hya xi cafehe yëjë xuta xi cuacun vë nguehe ne, catsichajan hora ta xi tu camá nchujun jan ne, cëjë ndihyavasen ne, catsingatju quiji chjahá rë cha.
ACT 25:18 Hane xi caxinchacun xuta xi cuacun jan cachja me ne, hisca ngu jyë́ jyë sacuatjin tsingátaha cácun ne, cavinchaain me tsëhë cha ta,
ACT 25:19 suvá ni cjua tsëhë xcusun rë yungun rë me xi casahmichiin xu cha, cojo cjua tsëhë ngu nima xi hmí rë Jesús, xi chja cha ta tacun quicun.
ACT 25:20 Peru ngahan ne, casacuinyiin ná hacutjin sacú ná cjuaquixi tsëhë cjuacjintacun vëhë ne, cafinenguësë rë cha sa xi meje cjue cha Jerusalén hane ngajan chjahachuva rë cha tsëhë cjuacjintacun xi yaha rë cha.
ACT 25:21 Peru tsëhë xi cafehya cha xi seyañihi sa cha hisca xi suvá me xi matitjun camahani tsichuva me cjuacjintacun rë cha ne, cavitéxa xi quiji caseyañihi sa cha hisca hya xi cuma tsingátju cha tsja me. ―‍Cuatjin cachja Festo.
ACT 25:22 Ngajan xi Agripa ne, cuitjin cachja me cojo Festo: ―‍Ngahan ne, hacuaha catsingátahacácun xi cuisiñujú cjua rë cha xi cuajyihi vë. ―‍Cuatjin cachja me. Hane Festo ne, cuitjin cafayangui me: ―‍Sa cuatjin ne, nchujun ni cuisiñuju cjua rë cha. ―‍Cuatjin cafayangui me.
ACT 25:23 Hane xi camá nchujun jan ne, ngu cjuandya jyë tjin xi cafehe Agripa cojo Berenice. Hane quiji cavisehentangun me ndihyavasen cojo yëjë capitán cojo yëjë xuta xi matitjun tsëhë nandya jan. Sehe cavitexa Festo quiji chjahá rë Pablo.
ACT 25:24 Hane xi cafehe Pablo ne, sehe cachja Festo cuitjin: ―‍Ngayun Agripa, cojo ngayujun ni xi tjin tangun ngayaan nguehe ne, nguehe tacun cha vihi xi yëjë xuta tjë rë Israel ne, cavinchajyë me cha cojo ná ngajan Jerusalén, hacuaha cavinchajyë me cha hisca nguehe. Jindaya me chja me ta ha quihndë mijí rë xi cuejña sa cha cjuahñu.
ACT 25:25 Peru ngahan ne, casacuiin ná hisca ngu xcusun xi casahmi cha xi vechú chuva rë xi cueya cha. Hane xi cafehya suvá cha xi cuma cha consina tsja me xi matitjun camahani ne, cavejñá cácun xi tsingátju cha.
ACT 25:26 Peru tsajin ngu cjua xi cuma tsihindu rë nai naha, ¿há vihi ne, há vëhë casahmi cha? Vëhë xi cavitéxa xi cuisehen cha xcun ngayun, Agripa, cojo sa xi cjuë chjahantahan rë cha ne, sacú ná cjua xi tsihindu.
ACT 25:27 Xi má ná ne, tsajin ná cjuatacun sa xi tsingátju ngu presu hacuaha cuichjaan mé jyë́ xi caxincha tsëhë. ―‍Cuatjin cachja Festo.
ACT 26:1 Hya xi camá ne, cuitjin cachja Agripa cojo Pablo: ―‍Quihndë ne, tjin cahndë́ xi cuinoje ngatsë riji. ―‍Cuatjin cachja me. Ngajan xi Pablo ne, catsiquijin me tsja me, sehe casua me cjuaquixi rë me cuitjin:
ACT 26:2 ―‍Agripa, ngayun xi matitjun ngayun ne, jemu ndaja tsahan xi xcun ngayun suá cjuaquixi naha quihndë tsëhë yëjë jyë́ xi vincha xuta tjë rë Israel tsahan.
ACT 26:3 Jemu ndaja tsahan ta, tsëhë xi ngayun ne, ha hyun yëjë xcusun naja cojo cjuacjintacun naja ngayaan xuta tjë rë Israel. Vëhë xi nihñu cjuandaja ne, nihñu jyë tacún xi cuisiñuju ngujo cjua naha.
ACT 26:4 ’Quihndë ne, yëjë xuta tjë rë Israel ne, vëë me hacutjin xcusun naha hisca cjua lihndi naha, hya xi cavitejña nangui naha cojo hya xi cavitejña Jerusalén.
ACT 26:5 Hacuaha, sa xi meje cuichja me cojo nuju ne, cuma cuichja me ta ha vëë me xi ngahan ne, hatuxa xuta fariseo ngahan, xuta xi chinchihin tjengui me ndiya rë Nina naja.
ACT 26:6 Quihndë ne, nguehe sécun tichjaháchuva ná cojo cjuatacun naha ngatsë rë xi vétahacácun cjua xi cachja Nina cojo xutachanga naja.
ACT 26:7 Ngayejen ni xi tjë rë tejó xutachanga naja ne, vetahantacun xi cuechuntahan cjua vëhë. Vëhë xi cojo yëjë ni xahasen naja ne, chjahanrcun Nina nixtin nixten. Hane tsëhë xi vetahácácun cjua vëhë ne, vëhë xi vinchajyë́ ná xuta tjë rë Israel.
ACT 26:8 Ngayujun ni ne, ¿mé má macjaain nuju xi Nina ne, tsicuya me nima cjuahñu?
ACT 26:9 ’Titjun ne, ngahan ne, catsingátahacácun xi jemu cjín xcusun meje rë xi sahme condra tsëhë Jesús, xuta Nasaret.
ACT 26:10 Hane cuatjin casahme ngajan Jerusalén. Ngahan ne, jemu cjín xuta ladu rë Nina cavinchá me ndavaya ta, tsëhë xi nahmi xi matitjun casuaxa ná me xi cuatjin casahme. Hane hya xi cavitexa xutaxa rë xi cueya xuta ladu rë Nina xi cuacun jan ne, cojo ngahan cachjá xi ndatjin.
ACT 26:11 Jemu cjín ndiya cëjë yëjë yungun naja, cavitéxa xi cuma xuta castigu, hacuaha jemu casahme ngahñu xi choho cuichja me tsëhë Jesús. Tjemu camacjan ná cojo rë me, hacuaha catsujyëhëya tjënguë me cojo cjuahngatacun hisca cojo jingu sa nandya rë xutaxín.
ACT 26:12 ’Ngayun Agripa, ngu nixtin jan ne, tifë́ Damasco xi sahme cjuahngatacun jan, yahá xa xi ha casua ná nahmi xi matitjun.
ACT 26:13 Hane ndiya jan ne, sacuaha chuva rë nchisen ne, cahvë ngu ndihi xi canduva ngahnga, xi hitsë sa hñu ndavá rë xi cuma rë ndavá rë tsuhi, xi cavaja rë hasen rë jingundee ni hiscan tifë́ cojo me xi tifë́ cojo.
ACT 26:14 Hane xi ha caticjin ngayijin ni ne, ngahan ne, cahndë ngu cjua xi cachja cojo ná hne hebreo, cuitjin cachja: “Saulo, Saulo, ¿mé má cuatjin nujyihiye tjengui ná cojo cjuahngatacun? Sacuahatjin tjin rë chu ndyaja tjin ri, ta chu vë ne, tsun chu nahñu quicha nahya ne, vanguihmu suva chu yojo ru hya xi vëhë hñu chu yojo ru xi vihndiin chu. Hane cuanitjin ni tjin ri, ye.” Cuatjin cachja cjua jan.
ACT 26:15 Ngajan xi ngahan ne, cuitjin cavinenguësë: “¿Yo ngayun, Tatá?” Cuatjin cavinenguësë. Hane Nai naja ne, cuitjin cafayangui me: “Ngahan ne, Jesús ngahan, xi nujyihiye tjengui ná cojo cjuahngatacun.
ACT 26:16 Tisatjinhngue, tisechin ta, tsëhë xi canduvá tjënguë ri cojo sa xi suáxa ri xi cuisecuee ná hacuaha cuinoje cojo xuta xi cuitjin cahye ná, hacuaha cuinoje cojo xuta hacutjin camá hya xi ha canduvá tjënguë nga ri ngujo ndiya.
ACT 26:17 Ngahan cuáxëtjë ri tsëhë xuta tjë rë Israel. Hacuaha cuáxëtjë ri tsëhë xutaxín. Tsingátju ri ngajñi rë xuta xi cuacun vë,
ACT 26:18 cojo sa xi choxehe cjuatacun rë me, sehe cuetjuxin me tsëhë cjuatsehen, hane cuisehen me ndiya rë cjuandaja, cuetjuxin me tsëhë ladu rë Satanás hane cuisehen me ladu rë Nina. Choxehe cjuatacun rë me, sehe sacú rë me cjuaninchataha tsëhë jyë́ rë me, hacuaha cuisehen me ladu rë xuta xi ha camá tsëhë Nina me ngatsë rë xi camangucacun me cojo ná.” Cuatjin cafayangui Nai naja.
ACT 26:19 ’Ngayun Agripa, ngahan ne, hatuxa cahndë tsëhë cjua xi cachja Jesús hya xi canduvatjengui ná me xi canduva me tsëhë ngahnga.
ACT 26:20 Tjun tjun ne, cachjá cojo xuta ngajan Damasco, sehe cachjá cojo xuta ngajan Jerusalén cojo jingujyë ni nación Israel, hisca cojo xutaxín. Cachjá cojo rë me xi tsindeya me cjuatacun rë me hacuaha cuisehen me ladu rë Nina. Hacuaha cachjá cojo rë me xi catisahmi me cjuandaja xi tsingacun xi catsindeya jain me cjuatacun rë me.
ACT 26:21 Ngatsë rë vëhë xi cafaha ná xuta tjë rë Israel ngajan yungun xi matitjun hisca casahmi me cjuandya xi tsiquehen ná me.
ACT 26:22 Peru Nina ne, visecoo ná me, vëhë xi tifë́xcun hisca quihndë, tichjá cojo xuta sa quihndi sa changá me. Tichjá suvá cjua xi cachja profeta cojo cjua xi cachja Moisés tsëhë yëjë xcusun xi sehe cuetjucaa.
ACT 26:23 Cachja me xi cuacun vë xi Cristu ne, Me xi Tsingatju Nina ne, tjin rë me xi cueya me, hacuaha tjin rë me xi tjun tjun me cuya me cjuahñu, sehe sua me cumachaya rë xuta tjë rë Israel cojo xutaxín tsëhë xi cuaxëtje Nina xuta xi cuacun vë. ―‍Cuatjin cachja Pablo.
ACT 26:24 Hane xi cuatjin cachja Pablo xi vaxëtje me yojo rë me ne, cavisehenjñi Festo cojo cjua rë me, cachjahñu me cuitjin: ―‍¡Sca ri, Pablo! ¡Tsëhë xi jercu chutaye ne, vëhë sahmi sca rë cjuatacun riji! ―‍Cuatjin cachja Festo.
ACT 26:25 Ngajan xi Pablo ne, cuitjin cafayangui me: ―‍Hacuiin sca ná, ngayun Festo. Ngahan ne, tichjá cjua xi cjuaquixi.
ACT 26:26 Agripa, me xi matitjun vë ne, hacuaha ndaja vëë me cjua vihi. Vëhë xi tsacjuun xi chjá cojo rë me. Xi má ná ne, tsajin ngu cjua xi cuicun vi xi hvíin me ta, tsëhë xi xcusun vihi ne, hacuiin ngu cahnchun camá.
ACT 26:27 Ngayun Agripa, ¿há macjain nuju cjua xi catsihindu profeta? Ha hvë ta macjain nuju. ―‍Cuatjin cafayangui Pablo.
ACT 26:28 Ngajan xi Agripa ne, cuitjin cachja me cojo Pablo: ―‍Cojo hitsë cjua xi canoje vë ne, meje ri xi cuísehen ladu rë Cristu. ―‍Cuatjin cachja me.
ACT 26:29 Hane Pablo ne, cuitjin cafayangui me: ―‍Nina meje rë me xi há hitsë o há cjín cjua xi cuichjá ne, hacuiin suvun ni ta cojo yëjë me xi tivisiñuju cjua xi tichjá quihndë ne, cuma me sacuaha ngahan, peru hacuiin cojo cadena vihi. ―‍Cuatjin cafayangui me.
ACT 26:30 Hya xi camá ne, cavisatjenhnga Agripa, me xi matitjun, cojo Festo, hacuaha cojo sa Berenice cojo yëjë me xi caviyujutangun me cojo, cavisatjenhnga me.
ACT 26:31 Sehe quijixin me, cachja me cojo xingu xingu me cuitjin: ―‍Cha xi cuajyihi vë ne, tsajin mé sahmi cha xi vechú chuva rë xi cueya cha o sa xi cjue cha ndavaya. ―‍Cuatjin cachja me.
ACT 26:32 Sehe ngajan xi Agripa ne, cachja me cojo Festo cuitjin: ―‍Cha xi cuajyihi vë ne, sá tsajin xi cafehya cha xi cuma cha consina xcun me xi matitjun camahani ne, cuma nismi rë cha. ―‍Cuatjin cachja me.
ACT 27:1 Hane hya xi cavechú nixtin xi cavejñacacun me xi matitjun jan xi cuanguin ngajan Italia ne, Pablo cojo yahnga sa presu jan ne, camá me entregadu tsja ngu capitán xi hmí rë Julio, capitán tsëhë sindadu rë me xi matitjun camahani.
ACT 27:2 Hane xi cavisihin ngu barcu xi cavetju tsëhë nandya Andramitio xi cjue jingunduju ni ndaya tsëhë distritu Asia ne, sehe quiji barcu cojo niji. Hacuaha quiji cha Aristarco cojo niji, ngu cha Tesalónica tsëhë distritu Macedonia.
ACT 27:3 Hane xi camá nchujun jan ne, cafehe barcu cojo niji nandya Sidón. Hane Julio ne, casahmi me cjuandaja cojo Pablo, casua me cahndë́ xi cjue Pablo ndava amigu rë me xi cjuahacuenda amigu jan xcusun xi ma chaja rë Pablo.
ACT 27:4 Hane xi quiji barcu cojo niji tsëhë ngajan ne, cavatjin jingunduju ni taha ngaxtun Chipre, ngu rquí nangui xi vetjucaa xcun ndachacun, tsëhë xi tjo ne, casuaain cahndë́ xi ngu quixi ni cjue barcu cojo niji.
ACT 27:5 Hane xi cavatjin xcun ndachacun quixi rë distritu Cilicia cojo distritu Panfilia ne, cafihin nandya Mira, ngajan distritu Licia.
ACT 27:6 Hane ngajan casacu rë capitán ngu barcu tsëhë Alejandría xi cjue Italia. Sehe catsinguisehen niji me barcu vëhë.
ACT 27:7 Hane xi catsanguin tafi tafi ngujo nixtin sa ne, cojo jemu jyë cjuandya ne, cafihin quixi rë nandya Gnido. Hane tsëhë xi casuaain tjo cahndë́ xi ngu quixi ni quiji barcu cojo niji ne, cavatjin taha ngaxtun Creta, quixi rë Salmón.
ACT 27:8 Handasa jemu chja cavatjin camá, peru quiji barcu cojo niji tafi tafi hisca xi cafihin ngu cahndë́ xi hmí rë Cahndë́ Ndajyihi, tiña nandya Lasea.
ACT 27:9 Jemu tivatju nixtin, hacuaha jemu tsavi xi cjue barcu xcun nandá, tsëhë xi camatiña chan hnchan. Vëhë xi Pablo ne, cachja me cojo xuta jan cuitjin:
ACT 27:10 ―‍Ngayujun ni ne, nguehe cuichjá cojo nuju ta vutsején ne, xi tivanguen vi ne, jemu tsavi, jemu jyë nichajan tsëhë chaha cojo tsëhë barcu, hacuaha hisca tjin yahnga ngayaan xi chajá yaan. ―‍Cuatjin cachja me.
ACT 27:11 Peru capitán jan ne, hitsë sa casahmicuenda me cjua xi cachja cha xi cjuicojo barcu jan xi cuma rë cjua xi cachja Pablo.
ACT 27:12 Hane tsëhë xi cahndë́ xi tacun barcu jan ne, machjiriin xi ngajan cuejña barcu nixtin rë chan hnchan, vëhë xi hitsë sa cjín xuta xi cachja me xi cuetjuxin ni barcu cojo rë me tsëhë ngajan tuxa ma sa xi cuma cuechú me hisca Fenice, ngu nandya ngajan Creta, xi ndatjin cahndë́ tacun, hane ngajan cuma cuiyuju me yëjë nixtin rë chan hnchan.
ACT 27:13 Hya xi camá ne, cavetsihin cavanga ngu tjo jeya jeya ni xi canduva táha ladu xi ndatjin. Sehe ngajan xi xi má rë me ne, cuma sahmi me sacuatjin xi ha catsingatahacacun me. Vëhë xi cavetju me quiji me, ndaya ndaya rë Creta.
ACT 27:14 Peru sehe tu hitsë cjui barcu jan ne, canduva ngu tjo hñu ladu xi choho tjin,
ACT 27:15 catsivaha rë barcu. Hane tsëhë xi maji fi barcu taha hiscan nduva tjo ne, catihin cahndë́ quiji barcu hacutjin xi cjui tjo.
ACT 27:16 Hane xi cavatjin taha ngaxtun ngu rquí lihndi nangui quixí xi hmí rë Clauda hiscan xi yiin cjuachan vanga tjo ne, cojo chja ne, peru camá cachjihin barcu lihndi xi tjengui jan,
ACT 27:17 sehe cachjuvinniji caveyín cahntsua barcu jyë. Sehe ngajan xi cha xi cjuicojo barcu jan ne, camá catsihñuhñu cha barcu jyë. Hane tsëhë xi tsacjun me xi cjuecojo tjo jan barcu ngu cahndë́ chojyihi hiscan xi jemu tsavi xi cjue barcu ne, catsitujne me tsjian xi faha rë tjo, casua me cahndë́ quiji barcu hacutjin cjui tjo.
ACT 27:18 Peru tsëhë xi quijinduju sa cavanga tjo hñu jan ne, xi camá nchujun jan ne, cavetsihin cacandiya me chaha xi hincha barcu jan ngajñi ndachacun.
ACT 27:19 Hane xi camá nguini, cojo tsja ni me, cafaha me yëjë ni xcusun xi tsëhë barcu jan, cavetsihin cacandiya me ngajñi ndachacun.
ACT 27:20 Hane xi ha jemu cjín nixtin xi cahyiin tsuhi cahyiin niñu hacuaha tjo jan ne, cjuinduju sa tivanga jercu tu hñu camahani ne, ngajan cafë cjuetacun xi cuetjintjin.
ACT 27:21 Hane tsëhë xi ha jemu cjín nixtin xi cjëë sinë xuta jan niñu ne, cavetjujñi Pablo ngajñi rë me, cachja me cuitjin: ―‍Ngayujun ni ne, nguehe cuichjá cojo nuju ta hitsë sa ndatjin sa xi cavetuhun rcun cjua xi cachjá cojo nuju hane cavetjuun ni tsëhë Creta. Tsajin mé cjuañihi xi cuitjin cuatjun cuma hacuaha tsajin mé xi cuitjin nichajan.
ACT 27:22 Quihndë ne, tuhun cjuetacun xahasen nuju ta hisca xi ngu ngayun ne, chajin ngayun. Xi chajá ne, barcu.
ACT 27:23 Hvë xi cuatjin cuma ta, nguchjin ne, cafehe ngu ángel rë Nina xi Nai naha hacuaha xi fahárcun.
ACT 27:24 Hane cachja cojo ná cuitjin: “Xi carcuiin Pablo. Hatuxa tjin ri xi cuechi xcun César, me xi matitjun camahani. Hacuaha Nina ne, sahmi me cjuandaja cojo ri xi cuetjutje yëjë xuta xi cjui cojo ri.” Cuatjin cachja ángel cojo ná.
ACT 27:25 Vëhë xi tuhun cjuetacun xahasen nuju ngayujun ni ta, tsëhë xi ngahan ne, mangucácun cojo Nina, hane hatuxa cuatjin cuma sacuatjin cachja ángel cojo ná.
ACT 27:26 Peru tjin rë xi scandi naja tjo jan xcun ngu rquí nangui quixí. ―‍Cuatjin cachja Pablo.
ACT 27:27 Xi cavatju teñuju nguixun xi cuatjin cjui nguehe cjui ngajan tjo cojo barcu xi nechinyin xcun ndachacun xi hmí rë Adriático ne, sacuaha chuva rë vasen nixten ne, catsingatahacacun cha xi cjuicojo barcu jan xi ha jima tiña barcu tsëhë nangui quixí.
ACT 27:28 Hane catsichuva cha hacutjin nungun nandá hiscan quisun barcu, hane casacuse rë cha xi can tyjuhun ngu metru nungun nandá jan. Hane xi quiji sa barcu hitsë ni nguvan ne, catsichuva nga cha nandá, hane can yatu metru nungun nandá jan.
ACT 27:29 Hane tsëhë xi tsacjun cha xi satëcoo barcu jan cojo ngu naxi ne, cacandiya cha ñuju quicha hai xi machjirëhë xi cuiyujuhñu barcu ngajñi nandá xi tsuvahñu rë, hacuaha jercu cafehya rë cha Nina xi sahasen sanii.
ACT 27:30 Hya xi camá ne, yahnga cha xi cjuicojo barcu jan ne, meje cuetjuxin cha tsëhë barcu xi cuetjutje cha. Vëhë xi catsitujne cha barcu lihndi jan xcun ndachacun, sacuaha xi meje scandiya sa cha quicha ngajñi nandá taha xcun barcu.
ACT 27:31 Sehe ngajan xi Pablo ne, cachja me cojo capitán cojo sindadu xi yahnga jan cuitjin: ―‍Sa xi cuiyijin cha xi cuacun vë cahntsua barcu jyë ne, ngayun ne, cumaji cuetjuntjun. ―‍Cuatjin cachja me.
ACT 27:32 Ngajan xi sindadu jan ne, cavatë cha nahñu xi yaha rë barcu lihndi jan, sehe catsismi cha.
ACT 27:33 Hya xi ha tiña sahasen ne, cachja Pablo cojo yëjë xuta jan xi sinë me niñu, cuitjin cachja me: ―‍Ha quihndë teñuju nixtin xi nechunyun rë mé xi cuatjuun cuma hacuaha hisca hitsë niñu cjëë xinu.
ACT 27:34 Vëhë xi tichjá cojo nuju ta, xinu niñu. Xi cuatjin ne, scaa nuju cuetjuntjun ta hisca ngu ngayun ne, chajin hisca ngu tsjarcun. ―‍Cuatjin cachja Pablo.
ACT 27:35 Hane xi cafë cachja me cuatjin ne, cafaha me niñu ne, sehe casua me nacuechji rë Nina xcun yëjë ni xuta jan. Hane xi cavatëcja me niñu jan ne, sehe cavetsihin cajinë me.
ACT 27:36 Hya xi camá ne, yëjë ni xuta jan ne, casacu rë me cjuetacun, hane hacuaha cojo me cajinë me niñu.
ACT 27:37 Ngayijin ni xi nechinyin barcu jan ne, jo cientu cojo jyanchan tyjuhun ngu má ngayin.
ACT 27:38 Hane hya xi ha ndaja camá rë xahasen rë me xi cajinë me niñu jan ne, cacandiya me trigu jan ngajñi ndachacun xi cuma nguijna sa barcu.
ACT 27:39 Hane xi casahasen ne, cavëë me ngu cahndë́ hiscan xi hvíin me jani jan. Peru hacuaha cavëë me ngu cahnchun xi jemu jyë tsumi jiña tjehen rë. Hane caviyujucacun me xi sahmi me cjuandya xi barcu ne, ngajan cuechú.
ACT 27:40 Hya xi camá ne, cavatë me nahñu xi yaha rë quicha hai jan, sehe caxincha ni ngajan ngajñi nandá. Hacuaha cavëhëndaya me ya xi veyaquixi rë barcu hacutjin cjue. Hane xi catsiquijin me tsjian xi faha rë tjo jan ne, sehe cavetsihin quiji barcu jan quixi rë tsumi jan.
ACT 27:41 Peru xi cafehe barcu ngu cahndë́ hiscan tacun ngu naxi ngahma nandá ne, ngajan casatë. Hane taha xcun barcu jan ne, ngajan casetahahñu, ha quihndë camaji quiji. Peru taha ngaxtun barcu jan ne, jercu tivetsun tsëhë tsindyu rë nandá xi vaja rë.
ACT 27:42 Hane sindadu jan ne, catsingatahacacun cha xi tsiquehen cha presu, sá tu cuatë́ presu jan nandá ne, cuanga.
ACT 27:43 Peru capitán jan ne, tsëhë xi meje cuaxëtje me Pablo ne, casuaain me cahndë́ xi sahmi sindadu jan hacutjin xi meje rë cha. Hya xi camá ne, cavitexa me yëjë ni xuta xi ma vatë́ nandá ne, tjun tjun me caticandiya me yojo rë me ngajñi nandá, catji me quixi rë tsumi jan.
ACT 27:44 Hane me xi yahnga xi maji vatë́ nandá jan ne, catjaha me ngu rquí yatë o sa ngu ya tsëhë barcu jan. Cuatjin camá xi ngayijin ni ne, cafihin nangui quixí, hacuaha cavetjintjin.
ACT 28:1 Hane xi ha cavatju cavetjintjin ne, sehe casacu camachaya niji xi ngu rquí nangui xi vetjucaa xcun ndachacun jan ne, Malta hmí rë.
ACT 28:2 Hane xuta xi nangui rë jan ne, hacuiin hitsë cjuandaja casahmi me cojo niji. Cavejña me ngu ndava ndihi jyë ne, sehe cajindaya niji me ngayijin ni, tsëhë xi hacuaha cavetsihin cavaha tsi hane jemu hnchan.
ACT 28:3 Hane xi cafaha Pablo ngu tyjá chaquin quiji caviyujusun me xcun ndihi jan ne, tsëhë suë rë ndihi jan ne, vanga ngu yë cavetju chu ngajñi rë chaquin xi caviyujusun me jan, hane cafaha chu tsja me, hane catsismii chu ngutjen.
ACT 28:4 Hane xi cavëë xuta xi nangui rë jan xi tyjanguitaha cuaha yë jan tsja Pablo ne, sehe cachja me cojo xicjin me cuitjin: ―‍Ngu cha tsiquehen jain rë cha vi, vëhë xi handasa cavetjutje cha tsëhë ndachacun ne, peru nina ne, suaain me cahndë́ xi cuejña sa cha cjuahñu. ―‍Cuatjin cachja xuta jan.
ACT 28:5 Hane xi cavitsune Pablo tsja me ne, cjanenguiya chu ngajñi ndihi jan. Peru me vëhë ne, tsajin mé camá rë me xi cafaha chu me.
ACT 28:6 Xuta jan ne, xi má rë me ne, cuijin squee Pablo o sa xi tu ñahñu ne, cueya me. Peru xi ha jemu jyë hora vutsejen xuta jan xi tsajin mé má rë Pablo ne, catsindeya me cjua rë me, hane sehe cavetsihin cachja me xi Pablo ne, ngu nina me.
ACT 28:7 Hane tiña tsëhë cahndë́ jan ne, siutahá nangui rë me xi matitjun tsëhë nangui xi vetjucaa xcun ndachacun jan, me xi hmí rë Publio. Me vëhë cafahatsja niji me, hacuaha casahmi me cjuandaja xi casua niji me cahndë́ ndava me xi cavinechin jan jyan nixtin.
ACT 28:8 Hya xi camá ne, nahmi rë Publio jan ne, jiña me xi hmu rë me tsëhë chíhin suë cojo chíhin jni. Hane Pablo ne, quiji vutsejen me me, hane cafehya rë me Nina ngatsë rë xuta hmu rë jan. Hane xi cavisanetsja Pablo me ne, camandaja me.
ACT 28:9 Xi cavatju vëhë ne, hacuaha canduva tjengui yëjë sa xuta hmu rë tsëhë nangui vëhë Pablo ne, camandaja me.
ACT 28:10 Xuta jan ne, jemu casahmi me cjuandaja cojo niji, hane xi cavetjin catsanguin nga cojo barcu ne, casua me hacutjin xcusun xi machaja niji.
ACT 28:11 Xi cavatju jyan sá ne, cavetjin catsanguin cojo ngu barcu xi cavéjña jan yëjë nixtin tsëhë chan hnchan. Barcu jan ne, nandya Alejandría canduva, hacuaha Nina Lihma hmí rë.
ACT 28:12 Hane xi catsanguin sa hitsë ne, cafihin nandya Siracusa, hane ngajan cuinechin jyan nixtin.
ACT 28:13 Hane xi cavetjin ngajan ne, quiji nduju sa barcu cojo niji ne, cafihin nandya Regio. Hane xi cafë ngu nixtin xi nechintihin jan ne, cavetsihin cavanga ngu tjo xi ndatjin cjui, sehe quiji nga barcu cojo niji, hane xi camá nchujun ne, cafihin nandya Puteoli.
ACT 28:14 Hane xi cafihin jan ne, cavechintihin ngujo xuta ladu rë Jesús, hane cachja me xi cuinechintihin ngu totje cojo rë me jan. Hane ha cuatjin chuva vëhë ne, cavetjin Cesarea hane cafihin hisca Roma.
ACT 28:15 Hane xuta ladu rë Jesús xi siu ngajan Roma ne, xi camachaya rë me xi ha jima tiña ngayin ne, canduvatjengui niji me ndiya. Ngujo me ne, cafehe me hisca hiscan hmí rë Ndetsin Apio. Hane ngujo nga me ne, cafehe me hiscan hmí rë Jyan Cantina. Hane xi cavëë Pablo xuta jan ne, casua me nacuechji rë Nina, hacuaha casacu rë me cjuetacun.
ACT 28:16 Hane xi cafihin Roma ne, xutaxa rë jan ne, casua me cahndë́ xi cjuiin Pablo ndavaya hane cjue me ndava ngu xuta cuejña me, peru cojo ngu sindadu xi sahmi cuidadu xi hacuiin cuanga me.
ACT 28:17 Hya xi camá ne, xi cafë jyan nixtin quitahá Pablo jan ne, casahmi tangun me xuta xi matitjun tsëhë ngajñi rë xuta tjë rë Israel. Hane xi camatangun xuta jan ne, sehe cachja Pablo cojo rë me cuitjin: ―‍Ngayujun ni ngayun xuta tjë rë Israel matsejen ne, nguehe cuichjá cojo nuju ta handasa tsajin mé casahme condra yëjë xuta naja o condra rë xcusun rë xutachanga naja ne, peru cafaha ná me, casahmi ná me entregadu tsja xutaxa rë Roma ngajan Jerusalén.
ACT 28:18 Hane xi cafahataha ná xutaxa rë jan ne, meje tsismi ná me, tsëhë xi tsajin jyë́ naha xi vechú chuva rë xi cueya.
ACT 28:19 Peru xi cachja xutaxa rë yungun naja xi ndajintjin xi cuma ndaya ngahan ne, casahmi ná ngujyë xi caféhya xi cuma ngahan consina tsja César, me xi matitjun camahani. Cuatjin casahme, handasa tsajin mé jyë́ meje cuíncha tsëhë xuta naja.
ACT 28:20 Ngatsë rë cjuacjintacun vëhë ne, vëhë xi cachjá xi cuinduvun tjengun ná, cojo sa xi cuichjá cojo ngu ngujo cjua ta, tsëhë xi ngatsë rë me xi vetahantacun ngayejen ni ngayaan xuta tjë rë Israel ne, vëhë xi cuitjin tjinhñu ngahan vi. ―‍Cuatjin cachja Pablo.
ACT 28:21 Ngajan xi xuta xi cuacun jan ne, cuitjin cafayangui me: ―‍Peru ngayin ne, hisca ngu xujun xi chja condra nuju xi nduva tsëhë Jerusalén ne, cjëë chjihinntsin. Hacuaha tsajin hisca ngu xuta naja xi nduva me tsëhë ngajan xi choho chja me tsujun cojo niji.
ACT 28:22 Quihndë ne, meje cuisiñiji hacutjin fi cjuatacun nuju ta, tsëhë xi sacuaha cjuatacun vihi ne, hyin ta jingujyë ni ne, choho chja xuta tsëhë. ―‍Cuatjin cafayangui xuta xi cuacun jan.
ACT 28:23 Hya xi camá ne, cavejña xuta xi cuacun jan ngu nixtin xi cuya nga me. Hane xi cavuya me ne, hitsë sa jercu cjín me xi cafehe me hiscan tacun Pablo. Ngajan xi Pablo ne, cuaha nixtin cachja me cojo xuta jan tsëhë gubiernu xi sahmi Nina. Hacuaha casahmi Pablo ngahñu xi cumacjain rë yëjë xuta jan xi Jesús ne, me vëhë xi catsingatju Nina me, sacuatjin chja xujun rë Nina xi catsihindu Moisés cojo xi catsihindu profeta hatsëë nixtin.
ACT 28:24 Ngujo me ne, camacjain rë me cjua xi cachja Pablo, peru ngujo nga me ne, camacjaain rë me.
ACT 28:25 Hane tsëhë xi hacuiin tangun camá cjuatacun rë me ne, cavetju me cafe me. Peru chaja sa xi cjue me ne, Pablo ne, cachja me cuitjin: ―‍Jemu quixi cjua rë Hasen rë Nina xi cachja profeta Isaías cojo xutachanga naja, cjua xi cachja cuitjin:
ACT 28:26 Tihin tjengui xuta naha hane tinoje cojo rë me xi hatuxa cuihndë me, peru cuijnii rcu me hisca hitsë. Hatuxa scuëë me, peru hvíin me mé jan.
ACT 28:27 Cuatjin cuma ta, tsëhë xi cjuatacun rë me ne, tichjá, tyjavañuju me cojo tuxcun me ne, cavechja me, sá tu scuëë me cojo tuxcun me hane cuihndë me cojo tyjavañuju me hacuaha cuijne rcu me cojo cjuatacun rë me, sehe cuya me ladu naha xi cuaxëtjë me. Cuatjin cachja cjua jan.
ACT 28:28 Sa xi mijí cuisiñuju ngayun sacuatjin camamiji cuisiñuju xutachanga naja xi cuacun jan ne, nguehe suá cumachaya nuju ta Nina ne, cjua xi cuaxëtje me xuta ne, quihndë catsingatju me cjua vëhë tsëhë xutaxín. Me xi cuacun vë ne, cuisiñuju me. ―‍Cuatjin cachja Pablo.
ACT 28:29 Hya xi camá ne, xuta tjë rë Israel xi cahndë me cjua rë Pablo ne, quiji cavetju me, tichja cjín me cojo xicjin.
ACT 28:30 Ngajan xi Pablo ne, jo nu jingu cavéjña me ndihya xi cafehya me cojo renta jan. Hane ngajan cafahatsja me xuta xi quiji tjengui rë me,
ACT 28:31 casua me camachaya rë xuta tsëhë gubiernu xi sahmi Nina, hacuaha cavicuya rë me xuta cjua xi chja tsëhë Nai naja Jesucristu. Hisca ngu quijiin cavatëcja tsëhë me xi cuatjin casahmi me.
ROM 1:1 Ngahan, Pablo ne, visécoo rë Jesucristu sacuaha ngu mosu hndixahan rë me, hacuaha Nina cavaxijin ná me xi cuma ngahan apóstol, casuaxa ná me xi suá cumachaya rë xuta cjuandajyihi rë me.
ROM 1:2 Hane ha jemu hatsëë casahmi Nina xi profeta rë me ne, tsihindu me cjuandajyihi vë xcun xujun rë Nina.
ROM 1:3 Cjuandajyihi vë ne, hacui cjua xi sua machaya naja tsëhë Quihndi rë Nina, Nai naja Jesucristu. Hya xi catsin Jesucristu, sacuaha ngu xuta tjë rë David, catsin me. Peru Hasen rë Nina ne, jemu ndaja casua camachaya naja xi hatuxa Quihndi rë Nina me ta catsingacun naja hya xi cavuya me cjuahñu hya xi cavatju cahme me.
ROM 1:5 Hane ngatsë rë Jesucristu ne, casacu niji cjuandaja rë Nina xi camá ngayin apóstol, cojo sa xi cuisecuin rë xuta yëjë ni nangui, sehe cumangucacun me cojo Nina hacuaha cuihndë me tsëhë Nina. Hane xi cuatjin ne, cuma jyë cuma hnga Jesucristu.
ROM 1:6 Hacuaha cojo ngayujun ni xi xuta nanguixin ngayun ne, cavaxijin nuju Nina xi camá tsëhë Jesucristu ngayun.
ROM 1:7 Ngahan ne, titsihíndu nuju ngayujun ni xi nechun ngajan nandya Roma, ngayujun ni xi hmucacun nuju Nina, ngayujun ni xi cavaxijin nuju me xi camá ngayun xuta rë me. Nina Nahmi naja cojo Nai naja Jesucristu ne, catisua nuju me cjuandaja cjuajeya.
ROM 1:8 Quihndë ne, hora xi sahme oración naha cojo Jesucristu ne, suá nacuechji rë Nina naha ngatsë nuju ngayujun ni ta jingu ni ladu ne, jimachaya rë xuta hacutjin xi mangutacún cojo Jesucristu.
ROM 1:9 Ngahan ne, nguñaja xahasen naha sahme xa rë Nina xi suá cumachaya rë xuta cjuandajyihi xi chja tsëhë Quihndi rë Nina. Hane vëë Nina jain xi hatuxa veyanangë nuju,
ROM 1:10 yëjë ni hora xi sahme oración naha. Féhya rë Nina xi sua me cahndë́ xi cuechú hora cuechú nixtin xi cuma cjuëtjëngë nuju, sa xi cuatjin meje rë me.
ROM 1:11 Hatuxa meje cjuëtjëngë nuju, cojo sa xi suá nuju ngu cjuandaja rë Nina. Sehe ngayun ne, hitsë sa ndaja cumangutacun cojo Jesucristu.
ROM 1:12 Cuma cuinújan ne, meje cjuëtjëngë nuju, cojo sa xi tahan cjuasua xahasen naja xingu xingu ngayaan, ngatsë rë xi ndaja mangutacun xingu xingu ngayaan cojo Jesucristu.
ROM 1:13 Ngayujun ni ne, meje ná xi cumachaya nuju ta jemu cjín ndiya cavejñá cjuatacun naha xi cjuëtjëngë nuju, peru hisca quihndë ne, camaji. Meje ná xi ngujo xuta nangui nuju ne, cuisehen me ndiya rë Jesucristu ngatsë rë xi ngahan suá cumachaya rë me cjua xi yahá, sacuatjin xi ha camá jingu sa nangui.
ROM 1:14 Xi má na ne, hatuxa sahmi ná ngujyë xi cuichjá cjua jan cojo yëjë ni xuta; sa xuta rcun, sa xuta yuma; o sa xuta vechu cjuatacun rë, sa xuta yuma hasen.
ROM 1:15 Vëhë xi hacuaha jemu meje cjuëtjëngë nuju ngajan Roma, suá cumachaya rë xuta nangui nuju cjuandajyihi xi chja tsëhë Jesucristu.
ROM 1:16 Ngahan ne, ma savaain ná tsëhë cjuandajyihi xi chja tsëhë Jesucristu ta, tsëhë xi cjua vëhë ne, sua machaya rë xuta ta vaxëtje Nina yëjë ni xuta xi mangucacun cojo Jesucristu. Tjun tjun xuta Israel cuaxëtje me, peru hacuaha cuaxëtje me xutaxín.
ROM 1:17 Cjuandajyihi vëhë ne, sua machaya naja ta Nina ne, tsicjë me jyë́ xi quitjen, peru suvá ni hya xi mangutacun cojo Jesucristu. Hacuaha cuatjin chja ngu cjua xi camahindu xcun xujun rë Nina: “Xuta xi tsajin jyë́ rë me ngatsë rë xi mangucacun me cojo Nina ne, sacú rë me cjuahñu xatsë.” Cuatjin camahindu.
ROM 1:18 Nina xi tacun me ngahnga ne, sua me machaya naja hacutjin jemu cjan rë me ngatsë rë xi faharcuain xuta me, cojo ngatsë rë yëjë ni cjuatsehen xi sahmi xuta. Hacuaha cojo cjuatsehen xi sahmi xuta jan ne, vetsa me cjua xi cjuaquixi.
ROM 1:19 Cjuatacun xi cuma cumachaya naja tsëhë Nina ne, hatuxa vëë xuta xi cuacun tsehen jan ta, tsëhë xi Nina ne, ha casua me camachaya rë xuta cjuatacun vëhë.
ROM 1:20 Nina ne, matsijin me; peru hisca nixtin xi catsindaja me ngasunhndë cojo hisca nixtin quihndë ne, matsejen ta hacui jain me xi Nina me hacuaha tjin rë me ngahñu xi tsajin nuju tsajin nixtin cjuë. Cuatjin ma vijne rcu tu yo ni xuta hya xi vutsejen me yëjë ni xcusun xi catsindaja Nina. Vëhë xi xuta xi cuacun tsehen jan ne, sacuiyiin rë me mé xi cuichja me hya xi sua me cjuaquixi rë me xcun Nina.
ROM 1:21 Handasa vëë xuta xi tacun jain Nina ne, peru casahmijyiin casahmihngaain me Nina, hacuaha hisca casuaain me nacuechji rë Nina. Vëhë xi camachjiriin cjuatacun rë me. Hacuaha cjuatacun yuma hasen rë me ne, camajñu tsëhë.
ROM 1:22 Chja suvá me xi jemu vechu cjuatacun rë me, peru ngajñi rë xi chja me cuatjin ne, hitsë sa ngarca cavuya me cojo cjuatacun rë me.
ROM 1:23 Hacuaha catsitjungui me Nina xi hatuxa jyë hnga me cojo cjua rë me, Nina xi hatuxa hmii me. Sehe cavetsihin cafaharcun xuta xi cuacun jan tu mé ni nina ndyojo xi catsindaja suvá me. Cafaharcun me xcusun rë xuta xi hatuxa hme me, cojo xcusun rë chu nisë, cojo xcusun rë chu yë, cojo jingu sa xcusun rë chu xi yahnga.
ROM 1:24 Vëhë xi Nina ne, catsismicacun me xuta xi cuacun tsehen jan, cojo sa xi sahmi xuta cjuatsehen xi fehya rë xahasen tsehen xi tjin rë me. Hane casahmi xuta jan cjuatsehen cojo yojo rë me ngajñi rë me cojo xicjin me.
ROM 1:25 Catsitjungui me Nina xi cjuaquixi. Cafaharcun me nina ndyojo xi nina ndacha ni. Hacuaha cahndë́ rë xi cjuaharcun me Nina, cafaharcun me hacuaha casahmi cuidadu rë xcusun xi Nina casahmi me. Peru mameje jain xi chjaharcun rë Nina yëjë ni nu yëjë ni nixtin. Cuatjin jain.
ROM 1:26 Vëhë xi Nina ne, catsismicacun me xuta xi cuacun tsehen jan, cojo sa xi cuma tsehen sa xahasen rë me. Hisca yachjin ne, catsitjungui ne xcusun xi ndatjin xi sacú xihin rë ne, hane casahmi na xcusun xi cuaaintjin.
ROM 1:27 Hacuaintjin ni casahmi cha xi xihin; catsitjungui cha xcusun xi ndatjin xi sacu chjuun rë cha, hane jercu cavetju suë cha xi cuatjin meje sahmi cha cjuatsehen ngajñi rë cha cojo xicjin cha. Xihin cojo xihin cha casahmi cha cjuasava jan, hacuaha casacu rë cha jima ngu cha castigu xi cavangui xcusun tsehen xi casahmi cha jan.
ROM 1:28 Xi má rë xuta xi cuacun tsehen jan ne, machjiriin xi tsinguitsjen me nina. Vëhë xi Nina ne, catsismicacun me xuta jan, cojo sa xi hatuxa cumachjiriin cjuatacun rë me, hacuaha sahmi me xcusun xi ndajintjin xi nihña.
ROM 1:29 Quitsë rë xahasen rë me cojo yëjë ni cjuatsehen xi fehya xahasen rë me sacuaha xcusun vi: jemu choho tsingatahacacun me; ña quitsë rë xahasen rë me cojo cjuaxin; meje tsiquehen xicjin me; jemu meje scaanya me tu mé ni xcusun; jemu ndacha me; jemu tsehen me; jemu ndesu me;
ROM 1:30 choho chja me tsëhë xicjin me; choho vëë me Nina; jemu hnga cacun me; jemu xta me; vaxëndaja suvá me yojo rë me; tsindajaya me cjuatsehen; vihndiin me tsëhë xutacha rë me;
ROM 1:31 machjiriin cjuatacun rë me; sahmiichiin me ngu cjua xi chja me; tsajin rë me cjuahmutacun; tsajin rë me cjuayumatacun.
ROM 1:32 Nina ne, cavitexa me xi yëjë ni xuta xi cuatjin sahmi xcusun tsehen vë ne, hatuxa vechú chuva rë xi cueya me. Hane xuta xi cuacun tsehen jan ne, handasa ha vëë me xi cuatjin cavitexa Nina, peru sahmicuendaain me ta finduju me cojo cjuatsehen jan, hisca ndama rë me tsëhë xuta xi yahnga xi cuatjin sahmi.
ROM 2:1 Tu yo ni ngayun xi nichuvun jingu sa xuta cojo cjuatacun rë me ne, sacuiyiin nuju mé xi cuinújun hya xi tuhun cjuaquixi nuju xcun Nina ta, tsëhë xi hora xi nichuvun xuta ne, cjuachojyihi xi sahmi ni me ne, ha xcusun vëhë ni nihñu.
ROM 2:2 Ha hyan ta xuta xi cuatjin sahmi xcusun tsehen vëhë ne, hya xi tsichuva Nina me cojo cjuatacun rë me ne, tsichuva me hacutjin xi cjuaquixi.
ROM 2:3 Peru ngayun xi nichuvun xuta xi cuatjin sahmi xcusun tsehen vëhë ne, ¿há má nuju xi cuatjuhnga ngayun xi tsichuvaain nuju Nina xi cojo ngayun nihñu xcusun tsehen vëhë?
ROM 2:4 O há tsajin ne, ¿há cuendaain nuju tsëhë cjuandaja xi sua nuju Nina? ¿Há cuendaain nuju xi Nina ne, jemu jyë cacun me cojo nuju? ¿Há hyuun xi cuatjin sahmi Nina cjuandaja cojo nuju, cojo sa xi nindeyun cjuatacun nuju?
ROM 2:5 Peru ngayun ne, jemu taja rcun, hatuxa mijí nindeyun cjuatacun nuju. Xi cuatjin nihñu ne, tinihñu xi jima cjan sa rë Nina cojo nuju, hisca xi cuechú nixtin xi Nina ne, jemu cuma cjan rë me hacuaha sua me cumachaya nuju hacutjin tsichuva nuju me cojo cjuaquixi.
ROM 2:6 Nina ne cuechji me xingu xingu xuta tu cutjin xcusun xi casahmi xuta jan.
ROM 2:7 Xuta xi scaa rë me sahmi me cjuandaja ngatsë rë xi meje rë me xi cuma yehe cuma hnga me, hacuaha meje rë me xi chuya rë Nina tsëhë me. Meje rë me xi cuechiin nixtin xi cueya me ne, me vëhë xi sua Nina me cjuahñu xatsë.
ROM 2:8 Peru xuta xi meje rë me xi suvá ni me xi ndaja tsëhë me, hacuaha vihndiin me tsëhë cjuaquixi ta suvá cjuatsehen yëjë ni xi sahmi me ne, me vëhë xi jemu cuma cjan camahani rë Nina cojo rë me.
ROM 2:9 Yëjë ni xuta xi sahmi cjuatsehen ne, sacú rë me cjuañihi, hisca sacuiin rë me chuva rë hacutjin cuaxëtje me yojo rë me. Tjun tjun xuta Israel cuatju me cuma cuatjin, peru hacuaha cojo xutaxín cuatjin cuatju me cuma.
ROM 2:10 Peru yëjë ni xuta xi sahmi cjuandaja ne, me vëhë xi jemu cuma yehe cuma hnga me, hacuaha jemu chuya rë Nina tsëhë me, hacuaha jemu sacú rë me cjuajeya. Me vëhë xi má xuta tjë rë Israel ne, tjun tjun cuatju me cuma cuatjin, peru hacuaha cojo xutaxín cuatju me cuma.
ROM 2:11 Ta Nina ne, hatuxa quixi jain me cojo cjuatacun rë me xi tsichuva me yëjë ni xuta cojo cjuatacun rë.
ROM 2:12 Yëjë xuta xi tsajin rë me ley rë Moisés hacuaha sahmi me cjuatsehen ne, hacuiin ley vëhë vitexa mé castigu xi cuma me; peru hatuxa cuetjintjiin me. Hane yëjë xuta xi tjin rë me ley jan hacuaha sahmi me cjuatsehen ne, tsichuva Nina me tu cutjin xi vitexa ley vëhë.
ROM 2:13 Xuta xi tu visiñuju ni sacuatjin chja ley ne, hacuiin me vëhë xi tsajin jyë́ quitjen me xcun Nina ta xuta xi sahmi sacuatjin chja ley jan ne, me vëhë xi cuichja Nina ta tsajin jyë́ quitjen me.
ROM 2:14 Xutaxín xi tsajin rë me ley rë Moisés jan ne, hya xi sahmi me sacuatjin chja ley vëhë cojo cjuatacun rë suvá ni me ne, ngajan ma tsejen xi sacuaha xi me vëhë má me ley rë suvá ni me.
ROM 2:15 Xcusun xi sahmi me tsingacun naja xi cjua xi vitexa ley ne, ha hincha cahntsua cjuatacun rë me. Ha vëë suvá me cojo cjuatacun rë me mé xi ndaja, mé xi ndajin. Vëhë xi vinchajyë́ cjuatacun rë me me, o sa tsajin ne, chjatje cjuatacun rë me ngatsë rë me.
ROM 2:16 Ngajan xi hatuxa cuechji Nina xuta nixtin hya xi Nina tsingatju nga me Jesucristu xi tsichuva me cjua xi hinchahma rë xuta. Hacuaha cuatjin chjá hya xi suá machaya rë xuta cjuandajyihi xi chja tsëhë Jesucristu.
ROM 2:17 Quihndë ne, ngayun xi nújun xi xuta tjë rë Israel ngayun ne, jemu vetuhuntacun ley rë Moisés. Jemu naxunndujun yojo nuju ngatsë rë xi Nina xi cjuaquixi ne, me vëhë xi nina nuju me.
ROM 2:18 Ha hyun hacutjin xi meje rë Nina xi nihñu; hacuaha ngatsë rë xi cachutayun ley ne, chuya nuju tsëhë cjuandaja.
ROM 2:19 Xi má nuju ne, jemu ndaja ninguixun cjuatacun rë xutaxín xi hvíin me Nina; jemu ndaja chuxuhun cjuatacun rë xutaxín xi tsajin hincha me ndiya rë Nina.
ROM 2:20 Xi má nuju ngayun ne, sacuaha maestru rë xutaxín xi hvíin camahani me má ngayun. Cuatjin ningatuhuntacun ta, tsëhë xi tjin nuju ley rë Moisés jan xi yaha cjuatacun xi cjuaquixi.
ROM 2:21 Ngayun xi vicuyun rë jingu sa ne, ¿há vicuyuun suvun rë yojo nuju ni? Ngayun xi chuyiin nuju tsëhë nina ndyojo ne, ¿há nichujun cjuanchina rë yungun rë ni?
ROM 2:22 Ngayun xi nújun xi ndajintjin xi nindesun cojo rë ngu chjuun, o cojo ngu xihin xi hacuiin tsajan ne, ¿há cuatjin nihñu suvun ni? Ngayun xi chuyiin nuju tsëhë nina ndyojo ne, ¿há nichujun cjuanchina rë yungun rë ni?
ROM 2:23 Ngayun xi jemu naxunndujun yojo nuju xi tjin nuju ley rë Moisés ne, ¿há choho chja xuta tsëhë Nina ngatsë rë xi nihñuchuun cjua xi vitexa ley vë ni?
ROM 2:24 Hacuaha cuatjin camahindu xcun xujun rë Nina: “Xutaxín ne, choho chja me tsëhë Nina, ngatsë rë xcusun nuju ngayun xuta tjë rë Israel.” Cuatjin chja xujun.
ROM 2:25 Sa xi nihñuchuhun jain sacuatjin vitexa ley ne, cumachji rëhë nuju xi cati chuxin nuju ngatsë rë xi ngu xuta rë Nina ngayun; peru sa xi nihñuchuun sacuatjin vitexa ley ne, ngayun ne, tangun ngayun sacuaha xi cjëë xtí chuxin nuju.
ROM 2:26 Vëhë xi xutaxín xi vatiin me chuxin rë me ne, sa xi sahmi me cjuandaja sacuatjin vitexa ley ne, tangun chuya rë Nina tsëhë me sacuaha xi ngu xuta xi cati chuxin rë me.
ROM 2:27 Hane xutaxín xi sahmi me sacuatjin vitexa ley ne, handasa hatuxa vatiin me chuxin rë me, peru cuatjutaha nuju me, ngayun xi nihñuchuun sacuatjin chja ley handasa tjin nuju ley jan hacuaha cati chuxin nuju.
ROM 2:28 ¿Yo xi má ngu xuta tjë rë Israel xi cjuaquixi? Hacuiin ngu xuta xi suvá ni xi sahmi me sacuaha xcusun rë xuta jan, hacuiin ngu xuta xi suvá ni xi cati rë chuxin rë ta,
ROM 2:29 ngu xuta xi yaha cjuatacun rë xuta tjë rë Israel, ngu xuta xi cjuë me cojo ngasunhndë rë me sacuaha xi cati chuxin rë me, me vëhë xi ngu xuta tjë rë Israel xi cjuaquixi. Hane tsajin rë ley ngahñu xi cuma sahmi cuatjin cahntsua xahasen naja ta suvá Hasen rë Nina xi cuma sahmi cuatjin. Xi cuatjin nihña ne, hacuiin xuta xi cuaxëndaja me tsajan ta Nina ne, me vëhë xi chuya rë me tsajan.
ROM 3:1 Sa quixi cuatjin ne, cuma cuinenguisen ta, ¿mé vengui chjí rë xi xuta tjë rë Israel má ngayaan? ¿Mé vengui chjí rë xi cuatjin cati chuxin naja?
ROM 3:2 Peru jemu vengui camahani chjí rë. Titjun ne, vengui chjí rë ta, tsëhë xi Nina ne, casuatsja naja me cjua rë me.
ROM 3:3 Peru sa xi ngujo xuta tjë rë Israel catsismicacun me Nina ne, ¿mé xi cuma? ¿Há vëhë ni sahmi xi tsismicacun Nina ngayaan xuta rë me?
ROM 3:4 ¡Jéya! Meje rë xi cuinújan xi Nina ne, hatuxa sahmichihin me yëjë ni cjua xi chja me. Sahmi me handasa yëjë ni xuta ne, jemu ndacha me. Xcun xujun rë Nina ne, cuitjin camahindu: Ngayun, Nina naha ne, tsëhë yëjë ni cjua xi nújun ne, tsajin camahani mé jyë́ quitjin, hacuaha hatuxa scaa rë cjua nuju cjue xcun tsëhë cjua rë xuta xi tsichuva nuju me cojo cjuatacun nuju. Cuatjin camahindu.
ROM 3:5 Sa xi ngatsë rë cjuatsehen xi nihña ne, vëhë tsingacun jain xi Nina ne, tsajin camahani jyë́ quitjen me ne, ¿mé cumá cuinújan? ¿Há cuinújan xi Nina ne, hacuaha jyë́ quitjen me ta sahmi naja me castigu? (Tichjá cojo nuju sacuaha cjuatacun rë ngu xutajyë.)
ROM 3:6 ¡Jéya! quixiin vë ta, sa xi jyë́ quitjen Nina ne, sehe cumaji tsichuva me xuta ngasunhndë cojo cjuatacun rë me.
ROM 3:7 Cuejña xi cuichja sa ngu xuta cuitjin: Sa xi hitsë sa cuaxë́ndaja Nina cojo cjuaquixi rë me hya xi sahmi jain me sacuatjin chja me hacuaha hitsë sa ndaja tsejen xi jyë hnga Nina cojo Hasen rë me ngatsë rë cjuandacha naha ne, ¿mé má sehe cuatjin tsichuva ná me sacuaha ngu xuta tsehen?
ROM 3:8 O sa tsajin ne, cuejña xi cuichja sa ngu xuta cuitjin: Cuanguen nihña cjuatsehen, cojo sa xi cuma cuetjucaa sa cjuandaja. Hisca tjin yahnga xuta xi choho chja me tsijin ta chja me xi cjuatacun vëhë vicuyin, peru quixiin vë. Xuta xi cuacun vë ne, hatuxa satë rë me castigu xi vitexa jyë́ rë me.
ROM 3:9 Sa cuatjin ne, ¿há hitsë sa vengui chjí naja ngayaan xuta tjë rë Israel xi cuma rë xutaxín? ¡Jéya! Ha sehe cachjá ta ngayejen ni, sa xuta tjë rë Israel o sa xutaxín ne, ha nechan ngayejen ni ngajñi rë cjuatsehen.
ROM 3:10 Cuatjin camahindu xcun xujun rë Nina hiscan xi chja cuitjin: Tsajin xuta xi tsajin jyë́ quitjen, hisca ngu me tsajin me;
ROM 3:11 tsajin yo xi vijne rcu, tsajin yo xi vanguise ndiya rë Nina.
ROM 3:12 Yëjë ni xuta ne, cavetjuxin me tsëhë ndiya rë Nina, yëjë ni me ne, camachjiriin me. Tsajin yo xi ndaja sahmi me. Ndastu ngu ni me tsajin me.
ROM 3:13 Cahntsua hntsua me ne, chojyihi sacuaha ngu tsjun xi catuxaha; neje me ne, suvá cjuandacha visiajmi, chuxin hntsua me ne, xan rë chu yë hincha ngahma rë;
ROM 3:14 hntsua me ne, suvá cjuahngatacun quitsë rë.
ROM 3:15 Cojo ntsacu me ne, ngu hñu sasa cjue tsiquehen xicjin me;
ROM 3:16 Ndiya xi hincha me ne, suvá xi tsinguetsun ni me cjuatacun rë xuta, hacuaha sua me xuta cjuachoho.
ROM 3:17 Hvíin camahani me ndiya tsëhë cjuajeya.
ROM 3:18 Tsajin ngu hora xi tsingatahacacun me xi tsacjun me Nina. Cuatjin chja xujun rë Nina.
ROM 3:19 Ha hyan ta yëjë ni cjua xi chja ley rë Nina ne, chja cojo xuta xi siu ngahma rë ley vëhë. Cuatjin xi tsajin yo cuma cuichja xi tsajin mé jyë́ quitjen. Hacuaha cuatjin xi yëjë ni xuta ngasunhndë vi ne, tsichuva Nina me cojo cjuatacun rë me.
ROM 3:20 Nina ne, cuichjaain me tsëhë ngu xuta xi tsajin jyë́ rë me ngatsë rë xi casahmichihin me sacuatjin chja ley ta, ley ne, sua machaya naja xi ngayejen ne ne, xuta tsehen ngayaan.
ROM 3:21 Peru Nina ne, casua me camachaya naja hacutjin tsicjë me jyë́ naja. Hane hacuiin ngatsë rë ley xi cuatjin sahmi me. Cjuatacun rë Nina vë ne, hisca hatsëë camahindu xcun xujun rë me.
ROM 3:22 Cjuatacun vëhë ne, cuitjin fi: Nina ne, tsicjë me jyë́ rë xuta xi mangucacun cojo Jesucristu. Cuatjin sahmi Nina cojo yëjë ni xuta xi cuatjin mangucacun me cojo Jesucristu ta Nina ne, tangun ni vutsejen me xutaxín cojo xuta tjë rë Israel.
ROM 3:23 Yëjë ni xuta ne, sahmi me cjuatsehen, hacuaha chaja camaha sa xi cuechutaha me sacuatjin jyë hnga Nina cojo Hasen rë me.
ROM 3:24 Peru cojo cjuandaja rë Nina ne, tu cjuatjo ni tsicjë me jyë́ rë xuta, ngatsë rë xi Jesucristu ne, cavechjitje me jyë́ xi quitjen xuta.
ROM 3:25 Nina ne, catsingatju me Jesucristu xi cueya me xi cuechjitje me jyë́ rë yëjë ni xuta xi cumangucacun cojo rë me. Cuatjin casahmi Nina, cojo sa xi sua me cumachaya naja xi me vëhë ne, jemu tyjahi me cojo cjuatacun rë me hya xi jemu catsijyëcacun me cojo xuta xi caviyuju titjun hacuaha catsingatjuhnga me jyë́ rë xuta xi cuacun vë.
ROM 3:26 Hacuanitjin ni sua me machaya naja xi jemu tyjahi me cojo cjuatacun rë me quihndë xi titsicjë me jyë́ xi quitjen xuta xi mangucacun cojo Jesús.
ROM 3:27 Xi cuatjin ne, ¿há cuma naxenndajan yojo naja? ¡Jéya, cumaji! Nina ne, hacuiin tsicjë me jyë́ naja ngatsë rë xcusun xi nihña ta suvá ngatsë rë xi mangutacun cojo Jesucristu. Vëhë xi choho nuhya rë sa xi naxenndajan yojo naja.
ROM 3:28 Vëhë xi tsejen xi meje rë xi ningatahantacun cuitjin: Nina tsicjë me jyë́ rë ngu xuta ngatsë rë xi mangucacun xuta jan cojo Jesucristu, hacuiin ngatsë rë ngu ley xi vihndë me.
ROM 3:29 Nina ne, ¿há cuma xi suvá ni xuta tjë rë Israel xi Nina rë me má me? ¿O há cojo xutaxín má me Nina tsëhë? Juun, cojo me.
ROM 3:30 Ngu ni Nina xi tacun me. Hane me vëhë tsicjë me jyë́ rë xuta tjë rë Israel ngatsë rë xi mangucacun xuta jan cojo Jesucristu, hacuaha tsicjë me jyë́ rë xutaxín xi vatiin me chuxin rë me ngatsë rë xi mangucacun xutaxín cojo Jesucristu.
ROM 3:31 Quihndë xi tinújan xi jemu vengui chjí rë xi mangutacun cojo Jesucristu ne, ¿há tininguetsun ngahñu rë ley xi cavitexa Nina? ¡Jéya! Ha hyan ta ley rë Nina ne, hatuxa vengui chjí rë.
ROM 4:1 Sa cuatjin ne, ¿mé cuinújan tsëhë xutachanga naja Abraham? ¿Mé xi casacu rë me xi caviyuju me nguehe ngasunhndë?
ROM 4:2 Sa xi cachja Nina ta tsajin jyë́ rë Abraham ngatsë rë cjuandaja xi casahmi Abraham ne, tjin rë Abraham chuva rë xi cuaxëndaja suvá me yojo rë me. Peru cumaji sahmi me cuatjin xcun Nina ta,
ROM 4:3 xujun rë Nina ne, chja cuitjin: “Abraham ne, camangucacun me cojo cjua xi cachja Nina cojo rë me, hane ngatsë rë vëhë xi catsicjë Nina jyë́ rë me.” Cuatjin chja xujun rë Nina.
ROM 4:4 Ngu xuta xi casahmi me ngu xa naja ne, chjí rë me ne, hacuiin catahan rë me sacuaha ngu cjuandaja xi nihña cojo rë me ta catahan rë me tsëhë xi quitjen tsëhë xa xi casahmi me tsajan.
ROM 4:5 Peru sacuaha ngu xuta xi hacuiin vihi hacuiin vëhë sahmi me xi meje rë me xi chuya rë Nina tsëhë me ta tu mangucacun ni me cojo Nina, Nina tsicjë jyë́ rë xuta tsehen jan. Ngatsë rë xi cuatjin mangucacun xuta jan ne, hatuxa tsicjë Nina jyë́ rë me.
ROM 4:6 Xutachanga naja David ne, hacuaha cachja me hatsëë nixtin tsëhë cjuasua xi tjin rë ngu xuta xi Nina tsicjë jyë́ rë me, hane tsimii sahmi rë há ndaja há ndajin casahmi xuta jan.
ROM 4:7 Cuitjin cachja David: Jemu ndaja tsëhë ngu xuta xi catsinchataha Nina jyë́ rë me, hacuaha xi cafahacuendaain Nina cjuatsehen xi casahmi me.
ROM 4:8 Jemu ndaja tsëhë ngu xuta xi hatuxa tsicjë Nai naja jyë́ rë me. Cuatjin cachja David.
ROM 4:9 Cjuandaja vëhë ne, ¿há suvá cuma tsëhë xuta xi cati chuxin rë? ¡Jéya! ta, hacuaha cojo xuta xi vatiin me chuxin rë cuma ta, tsëhë xi ha cachjá ta Nina catsicjë me jyë́ rë Abraham ngatsë rë xi camangucacun Abraham cojo Nina.
ROM 4:10 ¿Janihya catsicjë Nina jyë́ rë Abraham? ¿Há cachja me cjua jan hya xi cavatju cati chuxin rë me ne?, o há tsajin ne, ¿há hya xi cjëë xtí chuxin rë me? Hacuiin hya xi ha cati chuxin rë me ta cachja me hya xi chaja sa xtí.
ROM 4:11 Hisca xi camá ngascan ne, sehe cati chuxin rë Abraham sacuaha ngu sellu xi casetaha rë me xi tsejen xi Nina ne, catsicjë me jyë́ rë Abraham ngatsë rë xi ha camangucacun me cojo Nina. Cuatjin xi Abraham ne, camatitjun me sacuaha nahmi tsëhë yëjë xuta xi cjuë jyë́ rë me ngatsë rë xi cumangucacun me cojo Nina handasa hacuiin xtí chuxin rë me.
ROM 4:12 Hacuaha Abraham ne, camatitjun me sacuaha nahmi tsëhë yëjë ni xuta xi xtí chuxin rë me hane hacuaha cumangucacun me cojo Nina, ta xuta jan ne, vetjungui cjuatacun rë xutachanga naja Abraham hya xi chaja sa xtí chuxin rë me.
ROM 4:13 Nina ne, cachja me cojo Abraham ta yëjë ngasunhndë ne, cuma tsëhë me cojo xuta xi nduva tjë rë me. Peru hacuiin ngatsë rë xi casahmi Abraham sacuatjin vitexa ley xi cuatjin cachja Nina cojo rë me ta cachja me cuatjin ngatsë rë xi camangucacun me cojo Nina. Vëhë xi Nina ne, catsicjë me jyë́ rë Abraham.
ROM 4:14 Cuatjin chjá ta, sa xi suvá xuta xi sahmi sacuatjin chja ley cuma satë rë me cjuandaja xi cachja Nina jan ne, venguiin chjí rë xi mangutacun cojo Nina, hacuaha machjiriin cjua xi cachja Nina jan.
ROM 4:15 Cachjá xi hacuiin ngatsë rë ley xi cuatjin cachja Nina cojo Abraham ta, tsëhë xi hiscan xi sahmixa ley rë Nina ne, ngajan xi cuma xuta castigu. Peru hiscan xi tsajin ley ne, hacuaha tsajin yo xi vinchajyë́ rë xuta ta casahmichiin me cjua xi vitexa ley.
ROM 4:16 Vëhë xi cavejña ngu cacun Nina xi sahmichihin me cjua rë me cojo xuta xi cumangucacun cojo rë me, cojo sa xi tsejen ta suvá ngatsë rë cjuandaja rë Nina xi cuatjin sahmichihin me cjua rë me cojo xuta. Ngajan xi tjin cjuaquixi xi sahmichihin jain Nina cjua rë me cojo yëjë xuta xi nduva tjë rë Abraham, hacuiin tu suvá cojo xuta xi tjin rë me ley ta hacuaha cojo xuta xi mangucacun me cojo Nina, sacuatjin casahmi Abraham. Cuatjin xi Abraham ne, camatitjun me tsajan sacuaha nahmi naja ngayejen ni ngayaan ngajan xcun Nina.
ROM 4:17 Nina ne, me vëhë xi camangucacun Abraham cojo me, me vëhë xi sua cjuahñu rë nima, me vëhë xi handasa chaja sa tsindaja me ngu xcusun ne, chja me tsëhë xcusun vëhë sacuaha xi ha catsindaja me. Camahindu xcun xujun rë Nina hiscan xi cachja me cojo Abraham cuitjin: “Cavejña ri ne, xi cuma titjun ngaye sacuaha nahmi tsëhë jemu cjín xuta.” Cuatjin camahindu.
ROM 4:18 Peru Abraham ne, handasa matsijin hacutjin cuma sahmichihin Nina cjua xi cachja me cojo rë me ne, camangucacun me cojo cjua jan, cavetaha cacun me Nina. Cuatjin xi camatitjun me tsëhë jemu cjín xuta, sacuatjin xi ha cachja Nina cojo rë me hya xi cachja me ta: “Cuitjin cjín cuma xuta xi tjë riji.” Cuatjin cachja Nina.
ROM 4:19 Hane hacuiin quiji ngaxtun Abraham xi mangucacun me cojo Nina handasa xi ha ngu cientu nu tjin rë me, hacuaha ha vëë me xi jemu changá camahani camá me cojo chjuun rë me xi sacú rë me quihndi.
ROM 4:20 Peru hacuiin quiji ngaxtun me xi mangucacun me cojo cjua xi cachja Nina cojo rë me ta hitsë sa ndaja camangucacun me. Hacuaha casahmi jyë casahmi hnga me Nina
ROM 4:21 ta, xi tsingatahacacun me ne, hatuxa tjin rë Nina chuva rë xi sahmi chihin me yëjë ni cjua xi cachja me xi sahmi me.
ROM 4:22 Vëhë xi Nina ne, catsicjë me jyë́ rë Abraham.
ROM 4:23 Quihndë ne, hacuiin suvá tsëhë Abraham xi cuatjin camahindu xi catsicjë Nina jyë́ rë me ta
ROM 4:24 hacuaha cojo tsajan ngayaan, xi sehe tsicjë Nina jyë́ naja, ngayaan xi mangutacun cojo Nina, me xi catsicuya Nai naja Jesucristu cjuahñu.
ROM 4:25 Cahme me ngatsë rë cjuatsehen xi nihña, hacuaha cavuya me cjuahñu cojo sa xi cuma cjuë jyë́ naja.
ROM 5:1 Quihndë ne, tsëhë xi catsicjë Nina jyë́ naja ngatsë rë xi camangutacun cojo rë me ne, vëhë xi ngayaan ne, ha hindë tsajin sa cjuachan cojo Nina ngatsë rë xi cavaxëtje naja Nai naja Jesucristu.
ROM 5:2 Hacuaha ngatsë rë xi camangutacun cojo rë me ne, vëhë xi casacu naja cjuandaja rë me. Hacuaha jemu sua rë xahasen naja cojo ngu cjuetacun xi cuechú nixtin xi cuechuntahan hitsë sacuatjin jyë hnga Nina cojo Hasen rë me.
ROM 5:3 Hane hacuiin suvá ngatsë rë cjuetacun vëhë ni ta hacuaha ma sua rë xahasen naja ngatsë rë cjuañihi xi vatjun ta, tsëhë xi ha hyan ta cjuañihi ne, vëhë vicuya naja hacutjin scaa naja tu mé ni cjuacjintacun.
ROM 5:4 Hane xi scaa naja ne, vëhë sahmi xi chuya rë Nina tsajan, hane xi chuya rë Nina tsajan ne, vëhë sahmi xi cuetahan tacun Nina.
ROM 5:5 Hane xi cuatjin cuetahan tacun Nina ne, tsajin nixtin cuetju sava ngayaan ta, tsëhë xi Hasen rë Nina xi casua naja me ne, jemu caveya cjuahmutacun rë Nina cahntsua xahasen naja.
ROM 5:6 Hya xi tsajin mé camá canihña suvaan xi naxentjen yojo naja ne, hya cahme Jesucristu xi cuaxëtje me ngayaan xuta tsehen. Cahme me nixtin xi cachja Nina xi cueya me.
ROM 5:7 Tsajin cjuaquixi xi ngu xuta sua me yojo rë me xi cueya me ngatsë rë ngu me xi tsajin jyë́ rë. Hisca ngu xuta ndaja jain ne, hyan sa xi sacu yo xi cuetjucacun xi sua yojo rë xi cueya ngatsë rë me.
ROM 5:8 Peru Nina ne, casua me camachaya naja cjuahmutacun xi tjin rë me cojo naja hya xi Jesucristu casua me yojo rë me xi cahme me ngatsë naja, handasa xuta tsehen ngayaan.
ROM 5:9 Hane quihndë xi cafë jyë́ naja ngatsë rë cjuaveya rë Jesucristu ne, ngajan xi hacuaha tjin cjuaquixi xi ngatsë rë me ne, cuetjuntjen tsëhë castigu.
ROM 5:10 Hya xi condra rë Nina má ngayaan ne, hya camá xutandaja rë me ngayaan ngatsë rë cjuaveya rë Quihndi rë me. Hane quihndë xi camá xutandaja rë me ngayaan ne, tjin cjuaquixi xi ngayaan ne, cuetjuntjen ngatsë rë xi tacun quicun nga me quihndë.
ROM 5:11 Hacuaha jemu sua ma rë xahasen naja ngatsë rë cjuahmutacun rë Nina, cojo ngatsë rë Nai naja Jesucristu, me xi quihndë casahmi xi camá xutandaja rë Nina ngayaan.
ROM 5:12 Ntsacu cavetsihin ne, cavisehen xi hmí cjuatsehen cahntsua cjuatacun rë xuta nguehe ngasunhndë vihi ngatsë rë ngu xuta xi hmí rë Adán. Hane ngatsë rë cjuatsehen ne, cavisehen xi hmí cjuaveya nguehe ngasunhndë. Cuatjin xi yëjë ni xuta ngasunhndë ne, hatuxa hme me ta, tsëhë xi yëjë ni me ne, sahmi me cjuatsehen.
ROM 5:13 Chaja sa xi sua Nina Moisés ley rë me ne, ha hinchajñi cjuatsehen ngajñi rë cjuatacun rë xuta ngasunhndë. Peru sahmicuendaain me cjuatsehen xi má hiscan xi tsajin ngu ley.
ROM 5:14 Peru yëjë ni xuta xi caviyuju me ngasunhndë hisca nixtin rë Adán hisca nixtin rë Moisés ne, cahme me. Hisca xuta xi hacuiin tangun cjuatsehen xi casahmi me cojo cjuatsehen xi casahmi Adán ne, hacuaha cojo me cahme me. Hane Adán ne, tjin ngu xcusun hacutjin matangun me cojo Cristu, me xi sehe cuinduva me ta, ngatsë rë Adán ne, cavisehen ngu xcusun nguehe ngasunhndë, hacuaha ngatsë rë Jesucristu, me xi camangascan canduva ne, cavisehen ngu nga xcusun ngasunhndë.
ROM 5:15 Peru cjuandaja xi sua Nina ne, hacuiin tangun cojo cjuatsehen xi casahmi Adán. Ngatsë rë cjuatsehen xi casahmi ngu ni xuta vëhë ne, jemu cjín xuta cahme me. Peru cjuandaja rë Nina cojo cjuandaja xi tisua naja ngu ni xuta xi hmí Jesucristu ne, hitsë sa vengui chjí rë hacuaha jemu ndaja cama rë tsëhë jemu cjín xuta.
ROM 5:16 Cuichjá nga ngu ndiya ta hacuiin tangun cavetju tsëhë cjuandaja vëhë cojo tsëhë cjuatsehen xi casahmi ngu ni Adán. Hya xi Adán casahmi me cjuatsehen vëhë ne, sehe cachja Nina xi sacuaha castigu ne, cuechú nixtin xi cueya Adán. Peru quihndë ne handasa xi jemu cjín cjuatsehen sahmi xuta ne, Nina ne, hacuaha sahmi me cjuandaja xi tsicjë me jyë́ rë xuta.
ROM 5:17 Ngatsë rë cjuatsehen xi casahmi ngu ni xuta ne, hatuxa cuma rë xuta cjuaveya. Cuanitjin hitsë sa ndaja ta, ngatsë rë ngu ni Jesucristu ne, xuta xi jemu tisacu rë me cjuandaja rë Nina xi tsicjë Nina jyë́ rë me tu cjuatjo ni ne, hatuxa sacú rë me cjuahñu xatsë.
ROM 5:18 Vëhë xi sacuatjin xi cavetjucaa castigu xi cuma rë yëjë ni xuta ngatsë rë ngu cjuatsehen jan ne, hacuanitjin ni cuetjucaa xi cjuë jyë́ rë yëjë ni xuta, hacuaha sacú rë me cjuahñu xatsë, ngatsë rë ngu ni cjuandaja jan.
ROM 5:19 Hacuaha sacuatjin xi jemu cjín xuta camatsehen cjuatacun rë me ngatsë rë xi ngu ni xuta cahndiin me tsëhë Nina ne, hacuanitjin ni jemu cjín xuta cuma me xuta xi tsajin jyë́ rë ngatsë rë xi ngu ni me xi cahndë me tsëhë Nina.
ROM 5:20 Cavejña Nina ley hane ngajan xi cama cjín sa cjuatsehen xi sahmi xuta. Peru hiscan xi camacjín sa cjuatsehen ne, ngajan xi cjín sa camatsejen cjuandaja rë Nina.
ROM 5:21 Sacuatjin xi hatuxa casahmi xuta cjuatsehen hane cahme me ne, hacuanitjin ni hatuxa sacú rë xuta cjuandaja rë Nina, hane cjuë jyë́ rë me, sehe sacú rë me cjuahñu xatsë, ngatsë rë Nai naja Jesucristu.
ROM 6:1 Xi cuatjin ne, ¿há quixi sa xi cuinújan xi ndatjin xi nihña sa cjuatsehen cojo sa xi vetjutsejen sa cjuandaja rë Nina?
ROM 6:2 ¡Jéya, ndajintjin! Ngayaan ne, sacuaha xi caveyan xi cuma rë cjuatsehen. Hane xi ha cavetjuxen tsëhë cjuatsehen ne, ha quihndë cumaji camahani cuinechan sa ngajñi rë cjuatsehen.
ROM 6:3 ¿Há hyuun ta ngayejen ni ne, hya xi caxtenda ngayaan xi cumatangun ngayaan cojo Jesucristu ne, hacuiin tu xi cuma tangun ni ngayaan cojo rë me ta hacuaha cojo xi cuma tangun ngayaan cojo cjuaveya rë me?
ROM 6:4 Ngajan xi sacuaha xi caxinchaniji tangun ngayaan cojo Jesucristu hya xi caxtenda ngayaan, cojo sa xi cuma tsejen xi camatangun ngayaan cojo cjuaveya rë me. Cuatjin caxinchaniji ngayaan cojo sa xi sacuatjin xi cavuya Jesucristu cjuahñu ngatsë rë Nahmi naja xi jemu jyë hnga me cojo Hasen rë me ne, hacuanitjin ni ngayaan ta sacú naja cjuahñu xatsë xi tivanguen cojo ngasunhndë naja.
ROM 6:5 Sa xi camatangun ngayaan cojo ngu cjuaveya sacuaha cjuaveya rë Jesucristu ne, hacuaha cama tangun ngayaan cojo ngu cjuahñu sacuaha cjuahñu xatsë rë me.
ROM 6:6 Hacuaha hyan ta ngayaan ne, sacuaha xi casetaha tangun ngayaan cojo Jesucristu xcun cru, cojo sa xi cjuë cuetsun yojo tsehen naja, hane cuatjin xi ha quihndë hacuiin cuanguen nduju sa ndiya rë cjuatsehen.
ROM 6:7 Ta yo xi ha cahme ne, ha camandaya tsëhë cjuatsehen.
ROM 6:8 Sa xi cuatjin caveyan cojo Jesucristu ne, vetahantacun xi hacuaha cuatjin cuinechan cjuahñu cojo rë me.
ROM 6:9 Hacuaha hyan ta Jesucristu ne, quihndë xi ha cavuya me cjuahñu ne, ha quihndë cuyaain cueya nga me ngu ndiya. Cjuaveya ne, ha quihndë vitexaain rë me.
ROM 6:10 Xi cahme me ne, ngu ndiya ni cahme me xi cuma rë cjuatsehen; peru quihndë xi tacun nga me cjuahñu ne, tacun me xi cuma rë Nina.
ROM 6:11 Cuatjin nuju ngayun ne, nihñucuendun ni xi caveyun camahani xi cuma rë cjuatsehen, nihñucuendun xi nechun cjuahñu xi cuma rë Nina xi tjin tangun cjuatacun nuju cojo Jesucristu.
ROM 6:12 Vëhë xi ngayun ne, xicatuun sa cahndë xi cjuatsehen cuitexa nuju; xicanihñuu sa yëjë ni hacutjin meje rë yojo jyë́ nuju.
ROM 6:13 Xicatuun sa yojo nuju cojo cjuatsehen ta tuhun yojo nuju cojo Nina, sacuaha nima xi cavuya cjuahñu ngayun. Yojo nuju ne, mijí rë xi sahmi xa rë cjuatsehen ta meje rë xi sahmi xa rë cjuandaja.
ROM 6:14 Sacuaha cjuatsehen ne, ha quihndë vitexaain nuju ta, tsëhë xi hacuiin ley tivitexa nuju ta cjuandaja rë Nina ne, vëhë tivitexa nuju.
ROM 6:15 Sa cuatjin ne, ¿mé xi ndatjin nihña? ¿Há nihña sa cjuatsehen tsëhë xi hacuiin ley tivitexa naja ta cjuandaja rë Nina tivitexa naja? ¡Jéya, hacuiin cuatjin!
ROM 6:16 Ngayun ne, ha ndaja hyun ta sa xi tuhun yojo nuju cojo cjuatsehen xi cuinuhyun tsëhë yëjë ni hacutjin vitexa nuju cjuatsehen ne, hatuxa tjihñu ngayun cojo cjuatsehen jan, hacuaha sacú nuju cjuaveya. Peru sa xi tuhun yojo nuju cojo Nina xi cuinuhyun tsëhë me ne, hatuxa tjihñu ngayun cojo Nina, hacuaha nujyuhunyun ndiya rë cjuandaja.
ROM 6:17 Titjun ne, hatuxa tjihñu ngayun cojo cjuatsehen. Peru nacuechji rë Nina ta quihndë ne, ha canuhyun cojo ngu ñaja xahasen nuju tsëhë cjuachacun xi casahmi Nina xi camachaya nuju.
ROM 6:18 Hane xi ha camandaya ngayun tsëhë cjuatsehen ne, catuhun yojo nuju cojo ndiya rë cjuandaja.
ROM 6:19 Tichjá cojo nuju cojo cjua xi chjaain cuijne rcun, ngatsë rë xi hvë xi jemu chja cuijne rcun cjuatacun xi tichjá cojo nuju. Titjun ne, catuhun yojo nuju cojo cjuatsehen, cojo sa xi suvá cjuatsehen yëjë ni xi nihñu. Peru quihndë ne, cuatjin meje rë xi tuhun yojo nuju cojo ndiya rë cjuandaja cojo sa xi cuma cjuë jyë́ nuju xcun Nina.
ROM 6:20 Hya xi tjihñu ngayun cojo cjuatsehen ne, ndaya tjin ngayun xi cuma rë ndiya rë cjuandaja.
ROM 6:21 Peru ¿mé ndajyihi casacu nuju hya? Tsajin, ta quihndë ne, tu ma sava nuju xi ninguitsjun xcusun xi canihñu ta, tsëhë xi hya xi cuatjin nihña ne, suvá cjuaveya sacu naja.
ROM 6:22 Peru quihndë ne, camandaya ngayun tsëhë cjuatsehen hacuaha catuhun yojo nuju cojo Nina. Vëhë xi tisacu nuju ngu cjuatacun tyjahi xi tsajin cun rë, tisacu nuju ngu xahasen tyjahi, hacuaha hya xi cuijnetaha ne, sacú nuju ngu cjuahñu xatsë.
ROM 6:23 Sacuaha chjí xi sacu naja tsëhë cjuatsehen ne, hacui cjuaveya. Peru cjuandaja xi Nina sua naja me, tu cjuatjo ni sacu naja hya xi tjin tangun cjuatacun naja cojo Nai naja Jesucristu. Hane sacu naja cjuahñu xatsë.
ROM 7:1 Ngayujun ni matsejen ne, ha hyun xi hmí rë ley. Vëhë xi ha hyun xi ley ne, vitexa naja jinguyëjë rë xi nechan cjuahñu.
ROM 7:2 Sacuaha ngu chjuun xi cavixan na cojo xihin rë na ne, chja ley rë Moisés ta sacuaha xi tjihñu na cojo cha jinguyëjë rë xi tacun cha cjuahñu. Peru sa xi xihin rë na cueya cha ne, na vëhë ne, ha ndaya tjin na tsëhë cjuavixan xi camá na cojo xihin rë na jan.
ROM 7:3 Vëhë xi sa xi tacun cuaha xihin rë na, hane na vëhë ne, cjuaha na jingu sa xihin ne, jemu jyë jyë́ rë na. Peru sa xi cueya xihin rë na jan ne, ndaya tjin na tsëhë cjuavixan xi camá na, hacuaha tsajin mé jyë́ rë na sa xi cuixan nga na ngu ndiya cojo jingu sa xihin.
ROM 7:4 Cuanitjin nuju ngayun, sacuaha xi caveyun xi cuma rë ley ngatsë rë Jesucristu cojo sa xi cuma ndaya ngayun tsëhë ley, hane cuma tsëhë jingu sa me ngayun. Me vëhë ne, hacui Jesucristu, me xi cavuya cjuahñu. Cuatjin cavuya me cjuahñu cojo sa xi cuma nihña cjuandaja xi meje rë Nina.
ROM 7:5 Titjun hya xi cavinechan cojo yojo jyë́ naja ne, ley ne, catsingasca rë cjuatsehen ngajñi rë cjuatacun naja cojo sa xi nihña cjuatsehen. Hane ngatsë rë cjuatsehen xi canihña ne, vëhë xi cuechuntahan cjuaveya.
ROM 7:6 Peru quihndë ne, sacuaha xi caveyan xi cuma rë xcusun xi catsihñu naja, sehe ndaya tjin ngayaan tsëhë ley. Cuatjin xi ha quihndë hacuiin tjihñu ngayaan cojo ley changá vëhë ta, tjihñu ngayaan cojo cjua xatsë tsëhë Hasen rë Nina.
ROM 7:7 Tsëhë xi quixi cuatjin ne, ¿há cuinújan xi jemu tsehen ley rë Moisés jan? ¡Jéya, hacuiin cuatjin! Peru hveen mé xi hmí rë cjuatsehen hisca xi camachaya ná cjua rë ley jan. Hya ne hveen xi ndajin tjin xi tsimeje xcusun xi tjin rë jingu sa xuta, hveen hisca xi camachaya ná cjua rë ley xi chja cuitjin: “Xicanimiji xcusun xi tjin rë jingu sa xuta.”
ROM 7:8 Ngajan xi ngatsë rë xi camachaya ná cjua rë ley jan ne, cjuatsehen ne, catsingasca rë cjuatacun naha, hane casahmi xi ngahan ne, jemu catsimeje xcusun xi tjin rë jingu sa xuta. Suva hya xi cjëë cumachaya ná cjua rë ley ne, hya xi tsajin mé casahmi cjuatsehen cojo ná.
ROM 7:9 Titjun xi hveen xi hmí ley ne, sacuaha xi jemu ndajyihi tejña. Peru hya xi camachaya ná tsëhë cjua rë ley jan ne, cavascaya rë cjuatsehen ngajñi rë cjuatacun naha,
ROM 7:10 hane sacuaha xi cavéya ngahan. Hane cjua rë ley vëhë ne, cahndë́ rë xi cavisecoo ná xi sacú ná ngu cjuahñu xatsë ne, sacuaha xi catsiquehen ná.
ROM 7:11 Cuatjin camá ta, tsëhë xi ngatsë rë xi camachaya ná cjua rë ley jan ne, cjuatsehen ne, cavindacha ná. Hane cojo cjua rë ley jan ne, casacu ná cjuaquixi xi xín cavitejña tsëhë Nina.
ROM 7:12 Ngajan xi yëjë ni cjua xi vitexa ley jan ne, hatuxa cjua rë Nina, hatuxa cjuaquixi, hatuxa cjuandaja.
ROM 7:13 Xi cuatjin ne, ley xi ndaja jan ne, ¿há cuma xi vëhë catsiquehen ná? ¿Há cuma xi vëhë cavaxëxin ná tsëhë Nina? ¡Jéya, hacuiin cuatjin cama! Cjuatsehen ne, cojo sa xi cumatsejen xi tsehen jain ne, casahmi xa cojo ngu xcusun ndaja cojo sa xi tsiquehen ná. Cuma cuinújan ne, hya xi machaya naja cjua rë ley jan ne, ngajan ma tsejen xi jemu tsehen camahani cjuatsehen.
ROM 7:14 Ha hyan ta ley rë Moisés jan ne, tsëhë Nina vë. Peru ngahan xi tsëhë ngasunhndë ngahan ne, sacuaha xi caxteña ngahan xi cuíhndë tsëhë cjuatsehen.
ROM 7:15 Hisca vijniircú xcusun xi sahme. Sahmee xcusun xi meje sahme ta sahme xcusun xi chuyiin camahani ná.
ROM 7:16 Quihndë xi sahme xcusun xi mijí sahme ne, ha ngajan ma tsejen ta ha hvë ta ley ne, jemu ndaja.
ROM 7:17 Peru xi cuatjin ne, hacuiin ngahan xi sahme cuatjin ta cjuatsehen xi hincha ngajñi yojo naha ne, vëhë xi sahmi cuatjin.
ROM 7:18 Ha hvë ta sacuaha ngajñi yojo jyë́ naha vi ne, tsajin camahani hincha rë cjuandaja. Jemu meje sahme cjuandaja, peru maji.
ROM 7:19 Sahmee cjuandaja xi meje sahme ta tu cjuatsehen xi mijí sahme ne, vëhë sahme.
ROM 7:20 Peru quihndë xi sahme xcusun xi mijí sahme ne, ha ngajan ma tsejen ta hacuiin ngahan xi sahme cuatjin ta, cjuatsehen xi hincha ngajñi yojo naha ne, vëhë xi sahmi cuatjin.
ROM 7:21 Ngajan xi ngahan ne, hatuxa cuitjin vátju má: hya xi meje sahme ngu cjuandaja ne, hya vutsején ta tjin mé xi sahmi xi ma sahme cjuatsehen.
ROM 7:22 Ngahan cojo cjuatacun naha ne, jemu chuya ná ley rë Nina.
ROM 7:23 Peru vutsején ta ngajñi yojo jyë́ naha ne, jiya sa ngu ley xi hacjahi. Hane ley xi hacjahi jan ne, sacuaha xi ticjan cojo ley xi jiya ngajñi cjuatacun naha. Hacuaha ley xi hacjahi jan ne, hacui ley rë cjuatsehen xi hincha ngajñi yojo naha. Hane vutsején ta ley jan ne, sacuaha xi titsihñu ná.
ROM 7:24 ¡Jemu choho camahani má ná ngahan! ¿Yo xi cuaxëtje ná tsëhë yojo jyë́ naha vi ni? ta, ngatsë rë yojo naha vi ne, sacú ná cjuaveya.
ROM 7:25 Suá nacuechji rë Nina ngatsë rë Nai naja Jesucristu ta me vëhë cuaxëtje ná me. Ngajan xi ngahan ne, ngu ladu ne, tjihñu cjuatacun naha cojo ley rë Nina, peru ngu ladu nga ne, tjihñu yojo naha cojo ley rë cjuatsehen.
ROM 8:1 Quihndë ne, tsajin camahani castigu xi cuma naja ngayaan xi tjin tangun cjuatacun naja cojo Jesucristu ta,
ROM 8:2 tsëhë xi quihndë xi tjenguen ndiya rë Nina xi sua naja cjuahñu xatsë ngatsë rë xa xi casahmi Jesucristu ne, vëhë xi ha tjin ndaya ngayaan tsëhë ndiya rë cjuatsehen xi sua naja cjuaveya.
ROM 8:3 Xcusun xi camaji casahmi ley rë Moisés ngatsë rë xi caain rë xutajyë sahmi chihin me sacuatjin chja ley ne, Nina ne, camá casahmi me. Nina catsingatju me Quihndi rë me xi cuma me ngu xuta sacuatjin ngayaan xutajyë. Catsingatju Nina Quihndi rë me jan xi tsicjë me cjuatsehen. Vëhë xi quihndi jan xi hmí rë Jesucristu ne, cahme me sacuaha castigu ngatsë rë yëjë ni cjuatsehen xi sahmi xuta jyë́.
ROM 8:4 Cuatjin casahmi Nina cojo sa xi cuma nihña sacuatjin vitexa ley ta ngayaan ne, hacuiin tjenguen ndiya hacutjin xi meje rë yojo jyë́ naja ta tjenguen ndiya hacutjin xi meje rë Hasen rë Nina.
ROM 8:5 Xuta xi tjengui me ndiya hacutjin xi meje rë yojo jyë́ rë me ne, sahmi tangun me cjuatacun rë me cojo xcusun xi meje rë yojo jyë́ rë me. Peru xuta xi tjengui me ndiya rë Hasen rë Nina ne, sahmi tangun me cjuatacun rë me cojo Hasen rë Nina.
ROM 8:6 Xuta xi tsiniya cacun me hacutjin xi meje rë yojo jyë́ rë me ne, hatuxa sacú rë me ngu cjuaveya ta tsajin jiya Hasen rë Nina cahntsua xahasen rë me, cuechiin me xcun Nina. Peru xuta xi tsiniya cacun me hacutjin meje rë Hasen rë Nina ne, hatuxa sacú rë me ngu cjuahñu xatsë cojo ngu cjuajeya ta ha jiya Hasen jan xahasen rë me hacuaha cuechú me xcun Nina.
ROM 8:7 Ngajan xi xuta xi tsiniya cacun me hacutjin xi meje rë yojo jyë́ rë me ne, hatuxa choho vëë me Nina ta, tsëhë xi mijí cuihndë me tsëhë cjua xi vitexa Nina. Hisca maji vihndë me tsëhë cjua xi vitexa Nina.
ROM 8:8 Xuta xi tjengui me ndiya hacutjin xi meje rë yojo jyë́ rë me ne, maji sahmi me sacuatjin chuya rë Nina.
ROM 8:9 Peru ngayun ne, hacuiin tjengun ndiya hacutjin xi meje rë yojo jyë́ nuju ta tjengun ndiya rë Hasen rë Nina, sa xi jiya Hasen rë Nina cahntsua cjuatacun nuju. Peru sa xi ngu xuta tsajin rë me Hasen rë Jesucristu ne, xuta vëhë ne, hacuiin tsëhë Jesucristu me.
ROM 8:10 Peru sa xi jiya Hasen xi sua Jesucristu ngajñi rë cjuatacun nuju ne, yojo nuju ne, sacuaha xi cahme ngatsë rë cjuatsehen, peru hasen nuju ne, sacú rë ngu cjuahñu xatsë ngatsë rë xi Nina ne, tsicjë me jyë́ nuju.
ROM 8:11 Ha hyan ta Nina ne, catsicuya me Jesús cjuahñu. Hane sa xi jiya Hasen rë Nina ngajñi rë cjuatacun nuju ne, vëhë sahmi xi sua sa Nina cjuahñu rë yojo jyë́ nuju xi hatuxa hme.
ROM 8:12 Vëhë xi ngayaan ne, tjin xcusun xi hatuxa meje rë xi nihña, peru mijí rë xi nihña sacuatjin vitexa yojo jyë́ naja ta
ROM 8:13 ngu xuta xi tisahmi me sacuatjin vitexa yojo jyë́ rë me ne, hatuxa cueya me. Peru ngu xuta xi cojo ngahñu xi sua Hasen rë Nina me ne, titsitjungui me xcusun xi meje rë yojo rë me ne, hatuxa sacú rë me ngu cjuahñu xatsë.
ROM 8:14 Yëjë ni xuta xi vihndë me tsëhë Hasen rë Nina ne, me vëhë xi cjuaquixi xi quihndi rë Nina me.
ROM 8:15 Hasen xi casacu nuju ne, hacuiin ngu hasen xi tsihñu nuju cojo sa xi rcun nga cuma ngu ndiya ta, hasen vëhë ne, hacui ngu xi sahmi xi cjuaquixi xi cuma ngayun quihndi rë Nina. Hya xi nujan “¡Papá!” Nina Nahmi naja ne,
ROM 8:16 hya tichja Hasen rë Nina cojo hasen naja xi ngayaan ne, ha quihndi rë Nina ngayaan.
ROM 8:17 Hane tsëhë xi quihndi rë Nina ngayaan ne, vëhë xi hatuxa cuechú nixtin xi satë naja cjuandaja rë me. Hacuaha cojo ngayaan satë naja tsëhë cjuandaja xi satë rë Jesucristu ta, tsëhë xi quihndë ne, tivatjun cjuañihi sacuatjin cavatju Jesucristu. Vëhë xi hya xi cuma ngascan ne, hacuaha cojo ngayaan cuma yehe cuma hnga ngayaan cojo cjuatacun naja sacuatjin cama jyë cama hnga Jesucristu cojo Hasen rë me.
ROM 8:18 Xi má ná ngahan ne, tsimii sahmi rë xi tivatjun ngayaan cjuañihi quihndë ta, tsëhë xi cjuandaja rë Nina xi sacú naja xi cuma ngascan ne, jercu tu ndaja camahani.
ROM 8:19 Yëjë ni xcusun xi casahmi Nina nguehe ngasunhndë ne, jemu siuya xi meje xati scuëë hacutjin cún hacutjin má cuma ngayaan quihndi rë Nina.
ROM 8:20 Ta ngasunhndë ne, tu mahya xi siu yëjë ni xi siu. Peru hacuiin hatuxa xcusun xi cacún vë camameje rë xi cuatjin camá ta Nina ne, cuatjin meje rë me xi cuma. Peru tjin ngu cjuetacun.
ROM 8:21 Cuechú nixtin xi yëjë ni xi casahmi Nina nguehe ngasunhndë ne, hisca cojo vëhë cuma ndaya ne, ha quihndë hacuiin hatuxa cjuehndu sa ta cuma ndaya sacuatjin cuma ndaya yëjë ni quihndi rë Nina. Hacuaha sacú rë cjuandaja sacuatjin sacú rë quihndi rë Nina cjuandaja.
ROM 8:22 Ha hyan ta hisca quihndë nixtin vihi ne, yëjë ni xi casahmi Nina ngasunhndë vi ne, sacuaha xi tivitsine sacuaha xi vitsine ngu chjuun xi meje tsin rë na quihndi.
ROM 8:23 Hane hacuiin suvá ni ngasunhndë xi cuatjin tivitsine ta hacuaha cojo ngayaan ne, tivitsine. Ha tjin naja Hasen rë Nina sacuaha hitsë tsëhë yëjë ni xi sacú naja xi cuma ngascan. Peru vitsine ta, tsëhë xi jemu meje naja xi Nina sahmi naja me quihndi rë me xi cjuaquixi hya xi cuaxëtje me yojo jyë́ naja.
ROM 8:24 Ngayaan ne, cavetjuntjen cojo sa xi cuetahan tacun Nina. Peru sa xi ha tjin naja ngu xcusun ne, ha quihndë hacuiin cuetahan tacun xi sehe sacú naja xcusun xi ha tjin naja jan.
ROM 8:25 Peru hya xi vetahan tacun xi sacú naja ngu xcusun xi cjëë sacú naja ne, jemu jyë tacun xi nechayan rë.
ROM 8:26 Hacuaha ha chuva vëhë ni ne, Hasen rë Nina ne, visecoo naja, ngayaan xi caain naja nihña cjuandaja. Hisca hyaan jarë cjuandaja rë Nina xi ndatjin xi chjahyan. Peru suvá Hasen rë Nina ne, chjatje ngatsë naja cojo cjuatacun xi hisca cumaji cuinújan cojo cjua naja. Vëhë xi sacuaha xi tu fëtacun ni.
ROM 8:27 Hane Nina, me xi vëë yëjë ni xi hincha cjuatacun naja ne, hacuaha vëë me cjuatacun rë Hasen rë me jan ta, tsëhë xi Hasen rë me jan ne, hatuxa chjatje ngatsë rë xuta ladu rë Nina sacuatjin meje rë Nina xi cuma.
ROM 8:28 Ha hyan ta yëjë ni xcusun xi má nguehe ngasunhndë vi ne, sahmi Nina xi ndaja tsëhë xuta xi hmucacun me Nina, xuta xi cavaxijin Nina sacuatjin xi meje rë me.
ROM 8:29 Hisca ntsacu cavetsihin ne, ha tjin chjinë rë Nina cjuatacun rë yo xi meje rë me xi cuma xuta ladu rë me, hacuaha hisca hya cavejña ngu cacun me xi cuma xuta xi cuacun jan sacuaha Jesucristu Quihndi rë me. Cuatjin meje rë Nina cojo sa xi cuma titjun Jesucristu ngajñi rë jemu cjín xuta xi cuma sacuaha xicjin me.
ROM 8:30 Hacuaha xuta xi cuacun cavejña ngu cacun Nina jan ne, me vëhë xi cavaxijin Nina me; hacuaha xuta xi cuacun catsicjë Nina jyë́ rë jan ne, me vëhë xi casahmi yehe casahmi hnga Nina me cojo cjuatacun rë me.
ROM 8:31 Quihndë ne, nguehe cuichjá sa ngu cjua cojo nuju. Tsëhë xi Nina tacun me ngatsë naja ne, tsajin camahani yo xi cuma sahmi naja condra.
ROM 8:32 Nina ne, catsichuvaain naja me Quihndi rë suvá me ta casua me Quihndi rë me xi cahme ngatsë naja ngayejen ni. Hane vëhë xi hacuaha hatuxa sua naja me yëjë sa xcusun xi ndaja.
ROM 8:33 Tsajin yo xi cuinchajyë naja, ngayaan xi Nina cavaxijin naja me ta, Nina ne, me vëhë xi tsicjë me jyë́ naja.
ROM 8:34 Vëhë xi tsajin camahani yo xi ma cjan rë xi ngayaan cún naja. Tsajin ta, Jesucristu ne, me vëhë xi ha cahme me hacuaha ha cavuya me cjuahñu, hane me vëhë xi jemu casahmi jyë casahmi hnga Nina me cojo Hasen rë me ngajan hiscan tacun me cojo rë Nina. Hacuaha me vëhë xi tichjatje me ngatsë naja.
ROM 8:35 Ngajan xi tsajin camahani mé xcusun xi cuaxëxin naja tsëhë cjuahmutacun rë Jesucristu, handasa cuatjun cjuañihi, handasa sacuiyiin hacutjin naxentjen yojo naja, handasa yo tsujyihiya tjengui naja cojo cjuahngatacun, handasa cuma jindya nangui naja, handasa cumachaja naja tsjian naja, handasa cuinechantahan tsavi xi mé xi cuma naja, handasa tsiquehen naja xuta. Hatuxa tsajin mé xcusun xi cuacun vë xi cuma cuaxëxin naja tsëhë cjuahmutacun rë Jesucristu.
ROM 8:36 Hacuaha camahindu ngujo cjua xcun xujun rë Nina xi chja cuitjin: Yëjë ni hora ne, titsiquehen niji xuta ngu jo ngayin ngatsë rë xi ladu nuju ngayin; xi má rë xuta ne, ngayin ne, sacuaha chu tsánga xi cjue cueya chu ngayin. Cuatjin camahindu. Sacuatjin camahindu tsëhë xuma xuta xi cuacun jan ne, hacuaha cuatjin tivatjun tijima.
ROM 8:37 Peru caa naja yëjë ni cjuacjintacun vëhë, hisca vetjun ndaja sa ta, tsëhë xi Jesucristu ne, visecoo naja me, tsëhë xi hmucacun naja me.
ROM 8:38 Hane ngahan ne, camangucácun ta tsajin mé xcusun xi cuma cuaxëxin naja tsëhë cjuahmutacun rë Nina: sa cjuaveya sa cjuahñu, sa ángel sa xuta xi ma titjun, sa cjuacjintacun xi tivatjun tijima, sa cjuacjintacun xi sehe nduva, sa xutacjín xi choho vëë naja sa chircun,
ROM 8:39 sa ngajan ngahnga nduva, sa nguehe nangui nduva, o sa tu mé ni xcusun xi yahnga xi casahmi Nina ne, cumaji cuaxëxin naja tsëhë cjuahmutacun xi tjin rë Nina cojo naja ngatsë rë xi tjin tangun cjuatacun naja cojo Nai naja Jesucristu.
ROM 9:1 Quihndë ne, sacuaha ngahan xi tsëhë Jesucristu ngahan ne, nguehe cuichjá cjuaquixi, hacuiin vindácha nuju. Hane tsëhë xi jiya Hasen rë Nina ngajñi rë cjuatacun naha ne, vëhë xi hvë cojo cjuatacun naha ta cjua xi chjá ne, cjuaquixi hya xi chjá xi
ROM 9:2 jercu tu choho camahani má ná, jemu jyë cjuava xi jiya cahntsua xahasen naha.
ROM 9:3 Hisca má cácun ne, cjuéhya rë Nina xi cuaxëxin ná me tsëhë Jesucristu sa xi cojo cjuatacun vëhë ne, yëjë ni xuta xi tangun xutachanga naha cojo ne, cuma sacú rë me cjuandaja rë Nina.
ROM 9:4 Xuta xi cuacun vë ne, xuta Israel me. Me vëhë xi camá me quihndi rë Nina, camachaya rë me hacutjin jemu jyë hnga Nina cojo Hasen rë me, camachihin ngu jo compromisu rë Nina cojo rë me, casacu rë me ley rë Nina, camachaya rë me hacutjin meje rë xi chjaharcun rë Nina, casacu rë me cjua rë Nina hacutjin sua Nina me cjuandaja.
ROM 9:5 Me vëhë xi canduva me tjë rë xutachanga niji, hacuaha tjë rë me vëhë ne, canduva Jesucristu sacuaha ngu xuta. Hane Jesucristu jan ne, me vëhë xi Nina me tsëhë jingujyë ni ngasunhndë, hacuaha chjaharcun rë me yëjë nu yëjë nixtin. Cuatjin jain.
ROM 9:6 Hacuiin chjá xi cavetjincaain cjua xi cachja Nina cojo xuta Israel. Ha hyun ta xuta xi canduva tjë rë xutachanga xi hmí rë Israel ne, hacuiin yëjë me xi xuta ladu rë Israel xi cjuaquixi me.
ROM 9:7 Hacuaha xuta xi canduva tjë rë Abraham ne, hacuiin yëjë me xi ladu rë Abraham me xi cjuaquixi, ta cuitjin cachja Nina cojo Abraham: “Suvá tjë rë quihndi riji Isaac ne, vëhë ni xuta xi cuma tjë riji xi cjuaquixi.” Cuatjin cachja Nina.
ROM 9:8 Cuma cuinújan ne, hacuiin yëjë ni xuta xi canduva tjë rë Abraham xi jni xi yojo rë me xi cuma quihndi rë Nina ta, suvá xuta xi tsin me sacuatjin cachja Nina cojo Abraham ne, me vëhë xi cuichja Nina xi tjë rë Abraham xi cjuaquixi.
ROM 9:9 Cuitjin cachja Nina cojo Abraham hatsëë: “Nixtin xi cuejñá xi cúya nga ne, hya tsin rë na Sara ngu quihndi xihin.” Cuatjin cachja Nina.
ROM 9:10 Hacuaha hacuiin vëhë ni má yëjë cjua vë ta sacuaha catsijo quihndi rë Rebeca ne, ngu ni nahmi rë, me xi xutachanga niji xi hmí Isaac.
ROM 9:11 Hane hisca hya xi cjëë tsin quihndi xi cuacun jan, hacuaha cjëë sahmi xi ndaja xi ndajin ne, hya cachja Nina cojo Rebeca cuitjin: “Quihndi riji xi ngascan ne, cuma titjun tsëhë quihndi tjun.” Cuatjin cachja Nina. Cuatjin camá cojo sa xi cuma tsejen xi Nina ne, tjin rë me chuva rë xi cuaxijin suvá me tu yo ni xi meje rë me, hacuaha tsimii sahmi rë tu mé ni xcusun xi casahmi xuta jan.
ROM 9:13 Hacuaha camahindu xcun xujun rë Nina cuitjin: “Cha Jacob ne, catsíhmucacun cha, peru cha Esaú ne, choho cahvë cha.” Cuatjin camahindu.
ROM 9:14 Xi cuatjin ne, ¿há cuinújan xi Nina ne, cuaaintjin xi sahmi me? ¡Jéya, hacuiin! ta
ROM 9:15 Nina ne cuitjin cachja me cojo Moisés: “Ngahan ne, sahme cjuandaja cojo yo xi meje sahme cjuandaja cojo, hacuaha cumayuma ná yo xi meje cuma yuma ná.”
ROM 9:16 Vëhë xi xuta xi sacu rë cjuandaja rë Nina ne, hacuiin xuta xi jemu meje rë, hacuiin xuta xi jemu sahmi vihi sahmi vëhë ta suvá Nina vaxijin me yo xi sua me cjuandaja rë me.
ROM 9:17 Xcun xujun rë Nina ne, chja Nina cojo me xi ma titjun tsëhë xuta Egipto cuitjin: “Ngahan ne, casahme xi camatitjun ngaye cojo sa xi cuatjin tsingácun rë xuta ngahñu naha, hacuaha cojo sa xi xuta tsëhë yëjë ni ladu ne, cumachaya rë me yo ngahan.” Cuatjin cachja Nina.
ROM 9:18 Ngajan xi Nina ne, sahmi me cjuandaja cojo yo xi meje sahmi me cjuandaja cojo, hacuaha sahmi me xi mijí cuijne rcu yo xi meje rë me xi cuijnii rcu.
ROM 9:19 Peru ngu ngayun ne, cuinújun cojo ná cuitjin: “Sa cuatjin ne, ¿mé má chaha rë xuta sahmi Nina? ta, tsëhë xi tsajin yo xi catsingatiin rë xcusun xi meje rë Nina xi cuma.” Cuatjin cuinújun.
ROM 9:20 Peru ngayun xi ngu xutajyë ni ngayun ne, ¿yo ngayun xi cuatjin meje cuinújun cojo Nina? Sacuaha ngu xcusun xi casahmi xuta ne, ¿há cuichja cojo xuta xi casahmi jan cuitjin: “¿Mé má cuitjin jyihi canihñu ná?” Cuatjin cuichja.
ROM 9:21 Sacuaha ngu cha chjinetiji ne, hatuxa tjin rë cha xa xi cjuaha cha ngu xtin ndasi ne, tsindaja cha jo tiji. Ngu tiji jan ne, jemu ndajyihi ngu xa xi satë rë, hane tiji xingu jan ne, ngu xa xi chojyihi satë rë.
ROM 9:22 Nina ne, tsëhë xi meje sua me cumachaya rë xuta hacutjin xi jemu cuma cjan rë me hacuaha jemu hñu ngahñu rë me ne, vëhë xi cojo yëjë cjuajeya xi tjin rë me ne, cacaa rë me cojo xuta xi hatuxa cuma cjan rë me cojo, xuta xi cavaxijin me xi hatuxa tsicjë me.
ROM 9:23 Cuatjin casahmi jyë cacun Nina, cojo sa xi sua me cumachaya rë xuta hacutjin xi jemu tjin rë me cjuandaja cojo xuta xi hatuxa sua me cjuandaja rë me, xuta xi caviyuju chjine Nina cojo tjun sa, cojo sa xi sacú rë xuta jan cjuandaja rë me.
ROM 9:24 Hane xuta xi cuacun vëhë ne, hacui ngayaan xi cavaxijin naja Nina. Hacuiin suvá ngajñi rë xuta Israel cavaxijin me ta hacuaha cojo ngajñi rë xutaxín cavaxijin me.
ROM 9:25 Sacuaha cjua rë Nina xi catsihindu profeta Oseas ne, cuitjin chja: Xuta xi hacuiin xuta ladu naha me ne, cuechú nixtin xi sahme xuta ladu naha me; hacuaha cojo na xi hacuiin tsíhmucacun ne, cuechú nixtin xi jemu tsíhmucacun na. Cuatjin chja cjua rë Nina.
ROM 9:26 Hacuaha cachja nga Oseas cuitjin: Ngu cahndë́ jan ne, cuitjin cachja Nina cojo xuta: “Ngayujun ni ne, hacuiin xuta ladu naha ngayun.” Cuatjin cachja Nina. Hane handasa cuatjin cachja Nina, peru cuechú nixtin xi ngajan ne, cuma xuta xi cuacun jan quihndi rë Nina quicun. Cuatjin cachja profeta Oseas.
ROM 9:27 Hacuaha cachja profeta Isaías tsëhë xuta tjë rë Israel cuitjin: “Handasa sacuatjin cjín tsumi tsëhë ndachacun cuatjin cjín cuma xuta tjë rë Israel ne, peru jemu chuva me xi cuetjutje me ta,
ROM 9:28 Nina ne, hatuxa sahmi me castigu nguehe ngasunhndë, hane xi cuechú nixtin vëhë ne, ngutjen ni sahmi me yëjë ni hacutjin xi cavejña me xi sahmi me.” Cuatjin cachja profeta Isaías.
ROM 9:29 Hacuaha hatsëë ne, cachja nga Isaías cuitjin: Nina, me xi hatuxa matitjun tsëhë yëjë ni xi tjin, sa ngahnga sa ngasunhndë ne, sa xi casuaain naja me xuta xi cuma tjë naja ne, tangun ni cafë ngayaan sacuatjin cafë camahani xuta nandya Sodoma cojo xuta nandya Gomorra. Cuatjin cachja Isaías.
ROM 9:30 Xi cuatjin ne, cuma cuinújan xi Nina ne, catsicjë me jyë́ rë xutaxín ngatsë rë xi camangucacun xutaxín jan cojo Jesucristu, handasa hatsëë ne, hisca cuendaain rë xutaxín jan hacutjin sahmi Nina cojo jyë́ rë me.
ROM 9:31 Peru xuta tjë rë Israel ne, handasa jemu casahmi me ngahñu xi meje rë me xi tsicjë Nina jyë́ rë me ne, peru catsicjiin Nina jyë́ rë me.
ROM 9:32 ¿Mé má cuatjin catsicjiin Nina jyë́ rë me? Catsicjiin Nina jyë́ rë me ta, tsëhë xi xuta tjë rë Israel xi cuacun jan ne, meje rë me xi tsicjë Nina jyë́ rë me ngatsë rë xcusun xi casahmi me xcun ngasunhndë rë me. Peru tsëhë xi mijí cumangucacun me cojo Jesucristu ne, vëhë xi sacuaha xi caxtenguiya rë me “ndyojo xi xtenguiya rë xuta”.
ROM 9:33 Cjua vëhë ne, sacuaha cjua xi cachja Nina xcun xujun rë me xi chja cuitjin: “Ngahan vejñávasen ngu xihin ngajan ndetjún Sión, hane xihin jan ne, sacuaha ngu ndyojo xi xtenguiya rë xuta; peru xuta xi cumangucacun cojo xihin jan ne, tsajin nu tsajin nixtin xi cuetju sava me.”
ROM 10:1 Ngayujun ni matsejen ne, cuichjá cojo nuju ta xahasen naha ne, jemu meje rë xi xuta tjë rë Israel ne, cuetjutje me tsëhë jyë́ rë me. Hacuaha cuatjin féhya rë Nina.
ROM 10:2 Cuma cuichjá cojo nuju ta xuta tjë rë Israel ne, hacuaha jercu tsiniya cacun me xi meje rë me Nina. Peru hacuiin ndaja vijnercu me hacutjin chuya rë Nina.
ROM 10:3 Hvíin me hacutjin tsicjë Nina jyë́ rë xuta. Peru jemu meje tsicjë suvá me jyë́ rë me. Vëhë xi casuaain me yojo rë me cojo ndiya rë Nina, cojo sa xi Nina tsicjë me jyë́ rë me.
ROM 10:4 Jesucristu ne, me vëhë xi casahmichihin me yëjë ni cjua xi vitexa ley rë Moisés, cojo sa xi yëjë ni xuta xi cumangucacun me cojo Jesucristu ne, cjuë jyë́ rë me.
ROM 10:5 Moisés jan ne, hatsëë catsihindu me cjua vihi tsëhë xuta xi meje rë me xi cjuë jyë́ rë me ngatsë rë xi sahmi me hacutjin vitexa ley rë Moisés. Cuitjin catsihindu me: “Xuta xi sahmi me sacuatjin vitexa ley ne, sacú rë me cjuahñu xatsë ngatsë rë xi cuatjin sahmi me.” Cuatjin catsihindu Moisés.
ROM 10:6 Peru hacuaha cuitjin cachja nga Moisés tsëhë xuta xi cjuë jyë́ rë me ngatsë rë xi mangucacun me cojo Nina: “Mijí rë xi ningatehetacuin cuitjin: ¿Yo xi cjueniji hisca ngahnga?” ―‍sacuaha xi cuinduvajne cojo Jesucristu―‍;
ROM 10:7 o ¿Yo xi cjuejne cahntsua nduchin? ―‍sacuaha xi cuinduvaniji cojo Jesucristu xi jiya me ngajñi rë nima.
ROM 10:8 ¿Hacutjin chja Moisés xcun cjua rë Nina ni? Cuitjin chja: “Cjua rë Nina ne, ha jemu tiña tacun xi cuma nuju; ha hincha ntsuvun xi cuinújun, hacuaha ha hincha cahntsua xahasen nuju.” Cuatjin cachja Moisés. Cjua rë Nina jan ne, hacui cjua tsëhë hacutjin meje rë xi cumangutacun cojo Jesucristu, vëhë cjua xi titihín jimachaya rë xuta.
ROM 10:9 Sa xi ninguíxun cojo ntsuvun xi Jesucristu ne, Nina me, Nai nuju me, hacuaha sa xi cojo xahasen nuju macjain nuju xi catsicuya Nina Jesucristu cjuahñu ne, cuétjuntjun tsëhë jyë́ nuju.
ROM 10:10 Cuatjin cuma ta, tsëhë xi macjain naja cojo xahasen naja, sehe tsicjë Nina jyë́ naja, hacuaha ninguixen cojo ntsuvan hacutjin macjain naja, sehe cuaxëtje naja Nina.
ROM 10:11 Cuatjin ta, cjua rë Nina ne, cuitjin chja: “Yëjë xuta xi mangucacun cojo Nina ne, hatuxa cuetjin savaain me.” Cuatjin chja xujun rë Nina.
ROM 10:12 Nina ne, tangun ni vutsejen me xuta tjë rë Israel cojo xutaxín ta me xi Nai naja ne, hacui ni me xi Nai rë yëjë ni xuta. Me vëhë xi jemu sua me cjuandaja rë me xi cuma rë yëjë xuta xi fehya rë me.
ROM 10:13 Hisca xujun rë Nina ne, cuitjin chja: “Yëjë xuta xi fehya me Nai naja cjuandaja ne, cuetjutje me.” Cuatjin chja xujun rë Nina.
ROM 10:14 Tjin rë yo xi cuichja cojo ná cuitjin: “Peru ¿hacutjin cuma cjuehya xuta cjuandaja rë ngu xi hisca cjëë cumangucacun me cojo ni? Hane ¿hacutjin cumangucacun me cojo ngu xi hisca cjëë cumachaya rë me yo ni? Hane ¿hacutjin cumachaya rë me yo jan, sa xi tsajin yo sua cumachaya rë me ni?
ROM 10:15 Hane ¿hacutjin cuma cjue sua me cumachaya rë xuta yo jan, sa xi cjëë tsingatju Nina me ni?” Cuatjin cuichja. Xujun rë Nina ne, cuitjin chja: “Jemu ndatjin camahani hya xi fehe ngu me xi nduvacojo ngu cjuandajyihi.”
ROM 10:16 Peru chjá ngahan ta hacuiin yëjë xuta cavihndë me tsëhë cjuandajyihi jan. Hacuaha cuatjin chja profeta Isaías xcun xujun rë Nina: “Ngayun, Nai niji, jemu chúva me xi camangucacun cojo cjua niji.” Cuatjin chja Isaías.
ROM 10:17 Ngajan xi cumangutacun hya xi ha camachaya naja ngu cjua, hane cumachaya naja hya xi yo cuinduva sua cumachaya naja ngu cjua xi chja hacutjin casahmi Cristu.
ROM 10:18 Peru ¿há cjëë cumachaya rë xuta? chjá han. ¡Jéya, hatuxa camachaya rë me! Chja nga xujun rë Nina cuitjin: Jingujyë ni ngasunhndë ne, quiji cjua rë me, hisca hiscan vijnetaha ngasunhndë cavechu cjua rë me. Cuatjin chja.
ROM 10:19 Cúya cuichjá nga ngu ndiya: Xuta tjë rë Israel ne, ¿há hvíin me ni? ¡Jéya! hatuxa vëë me ta, tsëhë xi catsihindu Moisés cjua xi cachja Nina cuitjin: Ngahan ne, sahme xi jemu nihñu cjuaxín ngatsë rë xi sahme cjuandaja cojo xutaxín; tsicján nuju ngatsë rë xi sahme cjuandaja cojo xuta xi hvíin me yo ngahan. Cuatjin catsihindu Moisés cjua rë Nina.
ROM 10:20 Hacuaha catsacjuiin Isaías hya xi catsihindu me cuitjin: Xuta xi hacuiin cavanguise ná me ne, me vëhë casacu rë me ngahan; hacuaha xuta xi cuendaain rë me tsahan ne, me vëhë xi casuá camachaya rë me yo ngahan. Cuatjin cachja Isaías.
ROM 10:21 Peru catsihindu Isaías cjua xi cachja Nina tsëhë xuta Israel cuitjin: “Yëjë nixtin tsahan, xuta xi catsitjungui ná me.” Cuatjin catsihindu Isaías cjua rë Nina.
ROM 11:1 Quihndë ne, tsëhë xi cuatjin catsitjungui xuta Israel ndiya rë Nina ne, cuinengësë nuju ngu cjua: ¿há catsitjungui Nina xuta rë me ni? ¡Jéya, hacuiin cuatjin! Ta ngahan ne, hacuaha ngu xuta Israel ngahan, tjë rë Abraham ngahan, hacuaha tjë rë Benjamín ngahan.
ROM 11:2 Hisca ntsacu cavetsihin ne, ha vëë Nina yo xi meje rë me xi cuma xuta ladu rë me, hacuaha tsitjunguiin me xuta xi cuacun vë quihndë. ¿Há vitsijiin nuju hacutjin chja xcun xujun rë Nina hiscan xi catsihindu profeta Elías cjua xi cachjajyë me cojo Nina tsëhë xuta Israel? Cuitjin cachja Elías:
ROM 11:3 “Ngayun, Nai naha, ha catsiquehen xuta profeta nuju hacuaha ha catsinguetsun me cahndë́ hiscan xi cjue cjuatjo xi cuma nuju. Ha tu suva sa tejña, peru hacuaha hisca cojo ngahan tivanguise ná me xi tsiquehen ná me.” Cuatjin cachja Elías.
ROM 11:4 Peru ¿hacutjin catsicuya Nina cjua cojo Elías? Cachja Nina: “Ngahan ne, ha cavaxëxen yatu mil xuta, hane xuta xi cuacun jan ne, cjëë cjue cuixcuhnchi me xcun nina ndyojo xi hmí Baal.” Cuatjin cachja Nina cojo Elías.
ROM 11:5 Hacuanitjin ni quihndë ta handasa jemu camachuva me peru tjin sa me xi hincha ndiya rë Nina ta, tsëhë xi cavaxijin Nina xuta jan ngatsë rë cjuandaja rë Nina cojo rë me.
ROM 11:6 Peru camá ngatsë rë cjuandaja ni rë Nina cojo rë xuta xi cuacun vë, hacuiin ngatsë rë xcusun xi casahmi xuta jan. Ta sa xi cavaxijin Nina me ngatsë rë xcusun xi casahmi me ne, cjuandaja rë Nina ne, sacuaha xi venguiin chjí rë.
ROM 11:7 Ngajan xi cuma cuinújan xi hacuiin yëjë xuta Israel xi casacu rë me xi vanguise me ta ngujo ni xuta Israel xi cavaxijin Nina ne, me vëhë ni casacu rë me. Hane me xi yahnga jan ne, Nina casahmi me xi mijí cuijnercu me.
ROM 11:8 Camá sacuatjin camahindu xcun xujun rë Nina hiscan xi chja cuitjin: “Nina ne, casua me xuta xi cuacun vë ngu cjuatacun sacuaha cjuatacun rë ngu cha chihi. Vetaain rcu me hacuaha vijnii rcu me. Hisca quihndë ne, cuatjin cún me.” Cuatjin camahindu.
ROM 11:9 Hacuaha hatsëë cachja David cuitjin cojo Nina: Meje ná xi yëjë ni cjuandaja xi tuhun rë xuta ne, catuya sacuaha ngu chen, sacuaha ngu changa, sacuaha ngu xcusun xi xtenguiya rë me, sacuaha ngu castigu xi vangui suvá me.
ROM 11:10 Meje ná xi catama rcá me, cojo sa xi cumatsijin rë me; hacuaha catindi ngaxtun me, cojo sa xi tsajin nu tsajin nixtin xi cuma quixi ngaxtun me. Cuatjin cachja David.
ROM 11:11 Quihndë ne, cuinengësë nuju ngu cjua vi: Hya xi cavetjuxin xuta tjë rë Israel tsëhë ndiya rë Nina ne, ¿há ngu ndiya xa ni cachaja camahani me? ¡Jéya, hacuiin cuatjin! ta ngatsë rë cjuatsehen rë xuta tjë rë Israel xi cuacun jan ne, casua Nina cahndë́ xi cuetjutje xutaxín, cojo sa xi xuta tjë rë Israel ne, sahmi me cjuachini.
ROM 11:12 Ngajan xi ngatsë rë cjuatsehen rë xuta tjë rë Israel jan ne, jemu casacu rë xuta ngasunhndë cjuandaja rë Nina. Ngatsë rë xi cachaja xuta tjë rë Israel ndiya rë Nina ne, jemu casacu rë xutaxín cjuandaja rë Nina. Peru sa xi cuatjin camá ne, hya xi sacú nga rë xuta tjë rë Israel ndiya rë Nina ne, jercu sacú sa rë xuta ngasunhndë cjuandaja rë Nina.
ROM 11:13 Quihndë ne, ngayun xi xutaxín ngayun ne, nguehe cuichjá sa cojo nuju ngu jo cjua matsejen. Ngahan ne, casuaxa ná Nina xi cjuë suá cumachaya rë xutaxín cjua rë Nina. Vëhë xi jemu sahme nguñajacacun xa naha,
ROM 11:14 cojo sa xi cuma chini xuta xi tjë rë xutachanga naha cojo nuju. Hane xi cuatjin ne, cuisécoo rë xi cuetjutje ngu jo me.
ROM 11:15 Ngatsë rë xi catsitjungui Nina xuta tjë rë Israel ne, vëhë cavuxaha ndiya xi cuma xticja si xi tacun ngajñi rë Nina cojo xutaxín. Ngajan xi hya xi cjuahatsja nga Nina xuta tjë rë Israel jan ne, jercu ndajyihi camahani ngu cjuandaja xi cuetjucaa ta, sacuaha xi ngu nima cuya cjuahñu.
ROM 11:16 Sa xi chjahan ngu rquí nahyu hane cuinújan ta nahyu vëhë ne, cuma tsëhë Nina, hacuaha cojo yëjë ni nahyu xi vaqui jan ne, hacuaha tsëhë Nina. Hacuaha sa xi cuinújan xi tyjama rë ngu ya ne, cuma tsëhë Nina, hacuaha hisca cojo tsja rë ya jan ne, hacuaha tsëhë Nina.
ROM 11:17 Hacuaha sa xi xtisun ngujo tsja rë ngu ya olivu ndaja hane cuinduva tsja rë ngu ya olivu nguijña setahacoo cojo ya olivu ndaja jan ne, sehe xi cuatjin cuma ne, tsja rë ya olivu nguijña jan ne, hacuaha sacú rë cjuahñu rë tyjama rë ya olivu ndaja jan. Ngayun xi xutaxín ngayun ne, sacuaha tsja rë ya olivu nguijña má ngayun, xi casacu nuju cjuandaja rë Nina cahndë́ rë xuta tjë rë Israel xi sacuaha tsja rë ya olivu ndaja má me.
ROM 11:18 Peru mijí rë xi nihñu yehe yojo nuju hane choho cuinújun tsëhë xuta Israel ta, sa xi meje nihñu cuatjin ne, ninguitsjun ta hacuiin tsja rë ya xi tsuvangui rë tyjama rë ta tyjama ne, vëhë tsuvangui rë tsja rë ya.
ROM 11:19 Cuma cuinújun cojo ná cuitjin: “Peru catsitjungui Nina ngu jo xuta tjë rë Israel cojo sa xi ngahan ne, cuma tsëhë Nina ngahan.”
ROM 11:20 Cuatjin cuma cuinújun hane cjuaquixi cjua vëhë. Ngatsë rë xi camanguaaincacun me cojo Jesucristu ne, vëhë xi catsitjungui Nina me. Hane ngayun ne, ngatsë ni rë xi camangutacun cojo Jesucristu ne, vëhë xi casacu nuju cahndë́ vë. Peru mijí rë xi nihñu jyë yojo nuju ta xi meje rë ne, rcun cuma hitsë.
ROM 11:21 Cuatjin meje rë ta, tsëhë xi Nina ne, sa xi catsinchataain me xuta tjë rë Israel xi hatuxa xuta ladu rë me ne, hacuaha tsinchataain nuju me.
ROM 11:22 Cahyun ni ne, Nina ne, jemu ndaja me peru hacuaha jemu cjan rë me. Ngu ladu ne, jemu cjan rë me cojo xuta xi cavetjuxin me tsëhë ndiya rë Nina. Hane ngu ladu nga ne, jemu ndaja Nina cojo nuju, sa xi cuangunxcun cojo cjuandaja rë me. Peru sa tsajin ne, cojo ngayun tsitjungui nuju me.
ROM 11:23 Hane xuta tjë rë Israel xi cuacun jan ne, sa xi cuiyujuxín me xi manguaaincacun me cojo Nina ne, sacú nga rë me cahndë́ rë me ta Nina ne, hatuxa cuma sua nga me cahndë́ vëhë.
ROM 11:24 Ngayun xi xutaxín ngayun, hacuiin xuta ladu rë Nina ngayun titjun ne, peru Nina casahmi me ngayun xuta ladu rë me. Hane xi cuatjin sahmi me ne, hitsë sa chjaain sahmi me xi xuta tjë rë Israel ne, cuma nga me xuta ladu rë Nina ta, tsëhë xi xuta tjë rë Israel ne, hatuxa xuta ladu rë Nina me titjun.
ROM 11:25 Ngayujun ni ne, meje ná xi cumachaya nuju ngu cjua xi sehe casua Nina, cjuatahahma xi cjëë cumachaya naja. Meje ná xi cumachaya nuju cojo sa xi hacuiin nihñu yehe yojo nuju. Cjua xi cuichjá cojo nuju ne, cuitjin fi: jemu cjín xuta tjë rë Israel ne, vijnii rcu me cjua rë Nina. Cuatjin cuijnii rcu me hisca hya xi yëjë xutaxín xi cavaxijin Nina ne, cuisehen me ndiya rë Nina.
ROM 11:26 Sehe yëjë xuta tjë rë Israel ne, cuetjutje me tsëhë jyë́ rë me sacuatjin camahindu xcun xujun rë Nina: Ngajñi rë xuta tjë rë Israel ne, cuetjujñi ngu me xi cuaxëtje rë xuta, hane cuaxëxín me xcusun rë xuta xi tjë rë Jacob xi faharcuaain rë Nina.
ROM 11:27 Hatuxa sahmechehen compromisu naha cojo xuta, hya xi cjuaháxen cjuatsehen rë me. Cuatjin cachja Nina.
ROM 11:28 Ngu ladu ne, tsëhë xi catsitjungui xuta tjë rë Israel cjuandajyihi xi chja tsëhë Jesucristu ne, vëhë xi choho vëë Nina me, cojo sa xi ngayun xi xutaxín ngayun ne, satë nuju cjuandajyihi vëhë. Peru ngu ladu nga ne, tsëhë xi ha cavaxijin Nina me ne, vëhë xi Nina ne, hmucacun me xuta Israel jan, ngatsë rë xutachanga rë me.
ROM 11:29 Cuatjin ta tsëhë xi hya xi vaxijin Nina ngu xuta cojo hya xi sua rë me cjuandaja ne, hatuxa sehe tsindeyaain Nina cjuatacun rë me.
ROM 11:30 Ngayun xi má yun xutaxín, titjun ne, canuhyun tsëhë Nina. Peru quihndë ne, camayuma rë Nina ngayun ngatsë rë xi xuta tjë rë Israel ne, hacuaha vihndiin me tsëhë Nina.
ROM 11:31 Hacuanitjin rë xuta tjë rë Israel jan ta quihndë ne, hacuaha vihndiin me tsëhë Nina, cojo sa xi sacú rë me cjuayumatacun rë Nina ngatsë rë xi ngayun ne, casacu nuju cjuayumatacun rë Nina.
ROM 11:32 Nina ne, catsismicacun me yëjë ni xuta, cojo sa xi cuihndiin xuta tsëhë me, hane cojo sa xi hacuaha cumayuma rë me ngayëjë ni xuta.
ROM 11:33 Nina ne, jercu jyihi cjuanchina xi tjin rë me, jercu jyihi cjuatacun xi vechutaha me, jercu vëë me. Maji vijnercun hacutjin tsingatahacacun me. Maji vijnercun hacutjin sahmi Nina.
ROM 11:34 Sacuatjin chja xujun rë Nina ne: “Tsajin yo vëë cjuatacun rë Nina. Tsajin yo camá catsinguixi rë Nina cojo cjua rë me.
ROM 11:35 Tsajin yo xi cojo tjun sa ne, casua rë Nina ngu cjuatjo, cojo sa xi Nina ne, hatuxa sahmi ngojo me cjuatjo rë xuta jan.” Cuatjin chja xujun rë Nina.
ROM 11:36 Yëjë ni xcusun xi tjin ne, Nina catsingatahacacun me sehe catsindaja me ta, tsëhë xi meje rë me xcusun xi cuacun vë. Meje rë xi nihña jyë nihña hnga Nina yëjë ni nu yëjë ni nixtin. Cuatjin jain.
ROM 12:1 Ngayujun ni ne, ngatsë rë yëjë ni xi sehe cachjá cojo nuju ne, vëhë xi meje ná xi ngundiyaxa ni tuhun yojo nuju cojo Nina sacuaha ngu cjuatjo, peru ngu cjuatjo xi quicun, ngu cjuatjo xi hatuxa tsëhë Nina, ngu cjuatjo xi chuya rë me. Cuatjin nihñu ta, tsëhë xi Nina ne, jemu tjin rë me cjuayumatacun, hacuaha hatuxa ndatjin xi cuatjin chjahanrcun Nina.
ROM 12:2 Mijí rë xi cuangun tjengun ndiya rë xuta ngasunhndë vi ta cahndë́ rë vëhë ne, yëjë ni hora ne, tuhun cahndë́ xi Nina ne, tsindeya me ngayun xi sua nuju me ngu cjuatacun xatsë. Xi cuatjin ne, sacú nuju cjuaquixi mé xi meje rë Nina xi nihñu, mé xi ndaja, mé xi chuya rë Nina, mé xi cjuaquixi.
ROM 12:3 Nina ne, casuaxa ná me xi cuichjá cojo xuta. Hane vëhë xi chjá cojo nuju ngayujun ni ta, mijí rë xi jemu nihñu yehe yojo nuju ta meje rë xi ningatuhuntacun hacutjin xi cjuaquixi, tu cutjin cjuandaja xi casua nuju Nina xi camá camangutacun jima ngu ngayun cojo Jesucristu.
ROM 12:4 Ha hyun ta yojo rë ngu xuta ne, tjin tsja, tjin ntsacu, tjin nguisin, tjin jingu sa xcusun tsëhë, peru hacuiin tangun xa xi sahmi yëjë xcusun xi cuacun vë.
ROM 12:5 Hacuanitjin naja ngayaan, handasa cjín má ngayaan ne, peru sacuaha ngu ni yojo má ngayaan hya xi tjin tangun cjuatacun naja cojo Jesucristu. Ngu ngu ngayaan ne, sacuaha ntsan má ngayaan ne, ngu ngu ngayaan ne, sacuaha ntsacu má ngayaan, ngu ngu ngayaan ne, sacuaha nguisen má ngayaan, peru ngu ni yojo má ngayaan.
ROM 12:6 Vëhë xi xa xi casacu naja jima ngu ngayaan ne, hacuiin tangun ta tu tjin cjuandaja xi casua naja Nina ne, hacuanitjin ni xa xi satë naja. Sa xi casua nuju Nina xa xi cuinújun cjuatacun rë me cojo xuta ne, tinújun, peru sacuatjin cojo ngahñu xi tjin nuju xi mangutacún cojo Jesucristu ne, cuatjin tinújun.
ROM 12:7 Sa xi casua nuju Nina xa xi cuisecun rë jingusa xingueen ne, tisecun rë me. O sa xi casua nuju Nina xa xi cuicuyun cjua rë me ne, ticuyun.
ROM 12:8 Sa xi casua nuju Nina xa xi tuhun rë jingu sa xingueen ngu ndiya ndajyihi ne, cuatjin nihñu. Sa xi casua nuju Nina xa xi cuisecun rë jingu sa xingueen cojo tujún xi ma chaja rë me ne, tisecun rë me cojo ngu xahasen tyjahi, cojo ngu cjuatacun tyjahi. Sa xi casua nuju Nina xa xi chjuhunntsun ngu xa xi satë nuju ne, nihñu xa jan nguñajatacun. Sa xi casua nuju Nina xa xi chjuhuncuendun xuma xingueen xi mé má rë me o mé cjuacjintacun xi tivatju me tijima ne, sehe chjuhuncuendun me cojo cjuasua.
ROM 12:9 Mijí rë xi jo xcun jo ntsuvun xi nihmutacún xingu xingu xingueen. Catamachohotacun cojo ndiya rë cjuatsehen, hane tuhun yojo nuju cojo ndiya rë cjuandaja.
ROM 12:10 Nihmutacun xingun sacuatjin nihñu hmu tacún tsuhun jain. Hacuaha chjuhunrcun xingun sacuaha xi me vëhë xi hitsë sa ma titjun me tsujun.
ROM 12:11 Chjuhuncuendun nguñajatacun cuidadu nuju, hacuiin nihñu tsëhë. Meje rë xi sacuaha xi quisechun ngayun xi tisecuun nihñu xa rë Nai naja.
ROM 12:12 Tuhun cjuasua xahasen nuju ngatsë rë xi Nina vetuhun tacun me. Caticaa nuju yëjë ni cjuañihi xi vatjun má. Hacuaha yëjë ni hora ne, nihñu oración nuju cojo Nina.
ROM 12:13 Tisecun rë xuta ladu rë Nina hya xi tjin rë me cjuachaja. Hacuaha cojo cjuandaja chjuhunntsun xuta ngu nangui hya xi fehe me ndya nuju.
ROM 12:14 Chjahyun cjuandaja rë Nina xi cuma rë xuta xi tsujyihiyatjengui nuju me cojo cjuahngatacun. Hacuiin chjahyun ngu cjuaxti xi cuma rë me ta ngu cjuandaja chjahyun.
ROM 12:15 Tuhun cjuasua xahasen nuju cojo xuta xi sua rë me, hane xuta xi jihnda me ne, hacuaha chjihndun cojo rë me. Xi cuatjin nihñu ne, tsejen xi hmutacún jain me.
ROM 12:16 Nihñu tangun cjuatacun nuju cojo xingun xingu xingu ngayun. Hacuiin nihñu yehe yojo nuju ta xi meje rë ne, nihñu tangun cojo, handasa xuta xi yuma cjuatacun rë. Hacuaha hacuiin nihñu sacuaha xi jercu vechutaha cjuatacun nuju.
ROM 12:17 Mijí rë xi nicuyun ngu cjuachan xi casahmi xuta cojo nuju ta xi meje rë ne, nihñu ngujyë xi nihñu cjuandaja xcun yëjë ni xuta.
ROM 12:18 Sa xi cuma ne, nihñu ngujyë hisca hiscan vechu cjuatacun nuju, cojo sa xi cuma cuinechun ngu cjuandaja ngu cjuajeya cojo yëjë ni xuta.
ROM 12:19 Cuichjá cojo nuju sacuaha xi quihndi naha ngayun: xicanihñundujun suvun ngu cjuahngatacun xi sahmi xuta cojo nuju ta tuhun cahndë́ xi Nina ne, cuma cjan rë me cojo xuta xi casahmi jan. Ta Nina ne, cachja me xcun xujun rë me cuitjin: “Ngahan satë ná xi sahme ngojo cojo xuta tsehen; hatuxa ngahan sahme ngojo.” Cuatjin chja Nai naja.
ROM 12:20 Nihñu sacuatjin chja xujun rë Nina xi chja cuitjin: “Xuta xi choho vëë ri me ne, sa xi vojo rë me ne, tehe xi sinë me; hacuaha sa xi xinda rë me ne, tehe xi cuihi me; sa xi cuatjin nihñi cjuandaja vëhë ne, nihñi xi cuma sava rë me.” Cuatjin chja xcun xujun rë Nina.
ROM 12:21 Xicatuun cahndë́ xi cjuatsehen ne, tsinguetsun rë cjuatacun nuju. Cahndë́ rë vëhë ne, cojo cjuandaja xi nihñu ne, ninguetsun cjuatsehen.
ROM 13:1 Meje rë xi ngayejen ni ne, cuinuhyan tsëhë xutaxa rë ta, tsëhë xi tsajin xutaxa rë xi viyuju me sa xi suaain Nina cahndë́ cuiyuju me. Hane xutaxa rë xi siu ne, cuatjin siu me ta, tsëhë xi casuaxa Nina me.
ROM 13:2 Vëhë xi xuta xi sahmi condra me xutaxa rë ne, sahmi me condra cjua xi Nina cavitexa me. Hacuaha xuta xi cuatjin sahmi condra ne, sacú rë me ngu castigu.
ROM 13:3 Xuta xi sahmi cjuandaja ne, hacuiin tsacjun me xutaxa rë ta xuta xi sahmi cjuatsehen ne, me vëhë xi tsacjun me. ¿Há meje nuju xi tsajin mé rcun xutaxa rë? Nihñu cjuandaja, sehe xutaxa rë ne, cuaxëndaja me ngayun.
ROM 13:4 Cuatjin sahmi xutaxa rë ta, tsëhë xi casuaxa Nina me xi cuisecoo nuju me. Peru sa xi nihñu cjuatsehen ne, meje rë xi rcun xutaxa rë ta, tsëhë xi hacuiin tu mahya xi yaha me xa xi sahmi me castigu ta, tsëhë xi casuaxa Nina me xi sahmi me castigu xuta xi hatuxa sahmi cjuatsehen.
ROM 13:5 Vëhë xi meje rë xi cuinuhyan tsëhë xutaxa rë, hacuiin suvá ni ngatsë rë castigu xi cuatjun cuma ta hacuaha cojo ngatsë rë xi cojo cjuatacun naja ne, ha hyan ta ndatjin xi cuatjin nuhyan tsëhë me.
ROM 13:6 Hacuaha vëhë xi vechjun tujúnsa nuju ta, tsëhë xi hatuxa Nina caviyuju rë me xi fahacuenda me cjuacjintacun vë.
ROM 13:7 Tuhun rë jima ngu xutaxa rë xi satë rë me. Me xi faha tujúnsa ne, techjun cojo rë me; me xi faha tujún tsëhë xi xteña ne, hacuaha techjun cojo rë me. Cuatjin tinuhyun tsëhë me xi satë rë xi cuinuhyan tsëhë, hacuanitjin chjuhunrcun me xi satë rë xi chjahanrcun.
ROM 13:8 Mijí rë xi yëjë ni nixtin quitjun tsëhë xuta, ta ngu ni xcusun xi hatuxa quitjen ne, xi nihña hmu tacun xingueen. Cuatjin ta, yo xi sahmi hmu cacun rë xuta ne, ha cojo vëhë ni ne, sahmichihin sacuatjin chja ley rë Moisés.
ROM 13:9 Ley vëhë ne, cuitjin chja: “Xicanindesuun cojo rë ngu chjuun o cojo rë ngu xihin xi hacuiin tsujun, xicanicuun xuta, xicanihñuu cjuachëjë, xicanimuju ngu xcusun xi hacuiin tsujun.” Cjua vëhë cojo yëjë sa cjua xi chja ley jan ne, cuitjin vijne: “Meje rë xi nihñu hmu tacún xuta sacuatjin nihñu hmu tacún suvun yojo nuju.”
ROM 13:10 Cuatjin chja ley ta, ngu xuta xi tjin rë me cjuahmutacun ne, hacuiin choho sahmi me cojo xuta. Vëhë xi hya xi nihña hmu tacun xuta ne, ha nihñachehen sacuatjin chja ley xi cavitexa Nina.
ROM 13:11 Cuatjin meje rë xi nihñu ta, tsëhë xi ha hyun ta ha cavechú nixtin xi ningascun rë cjuatacun nuju ta, tsëhë xi nixtin xi cuetjutjen tsëhë jyë́ naja ne, hacuiin cjin sa tacun, sacuatjin hya xi sehe tu camangutacun cojo cjua xi chja tsëhë Jesucristu.
ROM 13:12 Sacuaha xi nixten ne, ha tivatju, hane meje sahasen. Vëhë xi meje rë xi cuejñaxen xcusun xi má nixten, hane cuetseen nihña xcusun xi má nguinixtin.
ROM 13:13 Meje rë xi cuetseen nihña cjuandaja, sacuatjin meje rë xi nihña hya xi tujyehenyan nguinixtin. Mijí rë xi nihña cjuachihi, mijí rë xi va má ngayaan nechan sacuaha xi cheen hya xi tinihña ngu suhi, mijí rë xi nihña cjuachini, mijí rë xi nihña cjuatsehen cojo jingu sa yachjin, o sa xi hisca cojo jingu sa xihin, mijí rë xi chicjanyan tu mé ni xcusun, mijí rë xi nihña cjuaxintacun.
ROM 13:14 Peru nihñu tangun cjuatacun nuju cojo Nai naja Jesucristu, hane ha quihndë mijí rë xi ningatuhuntacun xi nihñu yëjë ni hacutjin fehya yojo jyë́ nuju.
ROM 14:1 Sacuaha ngu xuta ladu rë Jesucristu xi cjëë ndaja cuijnercu me yëjë ni cjuachacun xi macjain naja ne, tuhun cahndë́ xi cuisehen me ladu nuju, peru hacuiin xi chicjun cojo me ngajñi rë cjuavisiajmi nuju cojo rë me.
ROM 14:2 Cuichjá cojo nuju ngu cjua. Yahnga xuta xi ndaja vijne rcu me cjuachacun naja ne, jinë me tu mé ni xcusun comida. Peru yahnga me xi cjëë ndaja cuijne rcu me ne, ndeya ni jinë me.
ROM 14:3 Peru xuta xi jinë me yëjë ni xcusun ne, mijí rë xi sahmi xta me cojo xuta xi jinii yëjë ni xcusun. Hacuaha xuta xi jinii me yëjë ni xcusun ne, mijí rë xi cuichjataha me xuta xi jinë yëjë ni xcusun ta, tsëhë xi ha cafahatsja Nina xuta jan.
ROM 14:4 Cuma cuinújin: ¿mé cuenda nuju ngayun xi nújuntuhun rë mosu rë jingu sa xuta ni? Nai rë mosu jan ne, me vëhë cuichja me há ndaja há ndajin xa casahmi mosu rë me. Hane xuta ladu rë Nai naja jan ne, hatuxa cuetju ndaja me ta, tsëhë xi Nai naja ne, ma sahmi me xi cuetju ndaja xuta ladu rë me.
ROM 14:5 Cuichjá nga cojo nuju ngu cjua. Yahnga xuta ne, tjin ni nixtin xi jemu faharcun me. Hane yahnga me ne, tangun yëjë ni nixtin xi cuma rë me. Meje rë xi jima ngu xuta ne, catamangucacun me cojo cjuatacun rë suvá me hacutjin meje sahmi me.
ROM 14:6 Me xi faharcun nixtin jan ne, hacuaha faharcun me Nai naja xi faharcun me nixtin hya. Hane me xi jinë yëjë ni xcusun comida ne, faharcun me Nai naja xi cuatjin jinë me ta, tsëhë xi sua me nacuechji rë Nina. Hane me xi jinii yëjë xcusun comida ne, hacuaha faharcun me Nai naja xi cuatjin jinii me ta hacuaha sua me nacuechji rë Nina.
ROM 14:7 Hisca ngu ngayaan ne, hacuiin nechan cjuahñu ngatsë rë cjuatacun naja suvaan, hacuaha hacuiin cueyan ngatsë rë cjuatacun naja suvaan ta,
ROM 14:8 sa xi nechan cjuahñu ne, nechan ngatsë rë Nai naja, o sa xi cueyan ne, cueyan ngatsë rë Nai naja. Vëhë xi hatuxa tsëhë Nai naja ngayaan ne, sa xi cuinechan cjuahñu o sa xi cueyan.
ROM 14:9 Jesucristu ne, cahme me sehe cavuya nga me cjuahñu cojo sa xi cuma me Nai rë nima cojo Nai rë xuta xi siu quicun me.
ROM 14:10 Vëhë xi tsajin mé tsëhë xi cuatjin nújantahan rë xingueen, tsajin mé tsëhë xi cuatjin nihña xta cojo xingueen ta, tsëhë xi ngayejen ni ne, hatuxa tjin xi cuechun xcun Nina ne, xi tsichuva me ngayaan cojo cjuatacun naja.
ROM 14:11 Cuitjin camahindu xcun xujun rë Nina cjua xi cachja me: Tu tjin xi cjuaquixi xi tejña ngahan ne, hacuanitjin ni tjin cjuaquixi cuechú nixtin xi yëjë ni xuta ne, cuinduva cuixcuhnchi me xcun, hacuaha yëjë ni xuta ne, cuichja me ta ngahan xi Nina ngahan. Cuatjin cachja Nina.
ROM 14:12 Ngajan xi jima ngu jima ngu ngayaan ne, taancuendan rë Nina xcusun xi canihña.
ROM 14:13 Vëhë xi ha quihndë mijí rë xi nichuvan xingueen cojo cjuatacun rë. Xi meje rë ne, xi cuejñangutacun xi tsajin nixtin xi nihña ngu xcusun xi sahmi xi cjuinenguiya xingueen ngajñi rë cjuatsehen.
ROM 14:14 Ngahan ne, tjin tangun cjuatacun naha cojo Nai naja Jesús. Hane ha hvë, hacuaha camangucacun ta tsajin hisca ngu xcusun comida xi hatuxa tsavi xi xinëë. Peru sa xi ngu xuta tsingatahacacun me xi tsavi vihi o tsavi vëhë xi xinëë ne, xi cuma rë suvá me vëhë xi tsavi.
ROM 14:15 Sa xi cuetsun cjuatacun rë xingun ngatsë rë ngu xcusun xi scuëë me xi xinu ne, ha quihndë tsajin nechunyun ndiya rë cjuahmutacun. Mijí rë xi ninguetsun cjuatacun rë xingun ngatsë rë ngu xcusun xi chinu ta, Jesucristu ne, cahme me ngatsë rë me vëhë.
ROM 14:16 Vëhë xi xicatuun cahndë xi choho cuichja xuta tsëhë xcusun xi ndaja xi nihñu ta,
ROM 14:17 tsëhë xi hya xi nechan ngahma gubiernu rë Nina ne, cuendaain rë tsëhë tu mé ni xcusun xi chinë o sa xi hyun. Xi sahmi ngujyë ne, xi tjin naja ngu xahasen tyjahi, ngu cjuajeya, ngu cjuasua xi sua naja Hasen rë Nina.
ROM 14:18 Xuta xi cuatjin sahmi me xa rë Jesucristu chuva vëhë ne, hatuxa chuya rë Nina tsëhë me, hacuaha ndaja cuichja xuta tsëhë me.
ROM 14:19 Vëhë xi cuanguen tjenguen ndiya rë cjuajeya, hacuaha cuisecoon xingueen cojo sa xi cuma jyë sa cjuandaja rë Nina cahntsua xahasen naja xingu xingu ngayaan.
ROM 14:20 Cjuandaja xi casahmi Nina cojo xingueen ne, mijí rë xi ninguetsun ngayaan ngatsë rë xcusun xi chinë. Xi cjuaquixi ne, yëjë ni xcusun comida ne, ndatjin xi xinë. Peru ndajintjin xi xinëë ngu xcusun sa xi vëhë sahmi xi cuixuya ngu xingueen ngajñi rë cjuatsehen.
ROM 14:21 Xi ndatjin ne, hacuiin xinë yojo, hacuiin siuhun xan, hacuiin nihña tu mé ni xcusun xi sahmi xi cuixuya ngu xingueen ngajñi rë cjuatsehen.
ROM 14:22 Cjua xi ha macjain nuju ne, catamacjain sa nuju, peru tetjún cjua jan cahntsua cjuatacun nuju suvun cojo sa xi suvá ni Nina vëë me. Jemu ndaja tsëhë xuta xi cjuatacun rë me ne, vinchaainjyë́ rë me tsëhë cjua xi macjain rë me.
ROM 14:23 Peru sacuaha ngu xuta xi mangu majo cacun me tsëhë ngu xcusun xi cajinë me ne, quitjen me jyë́ xi cuatjin cajinë me ta, tsëhë xi hacuiin ngatsë rë xi mangucacun me cojo Jesucristu ne, vëhë xi cajinë me ta mangu majo cacun me xi cajinë me. Hya xi hacuiin ngatsë rë xi mangutacun cojo Jesucristu xi nihña ngu xcusun xi nihña ne, hatuxa quitjen jyë́.
ROM 15:1 Sacuaha ngayaan xi ndaja vijne rcun cjuatacun xi macjain naja ne, meje rë xi nijyentacun, meje rë xi cuisecoon rë xingueen xi cjëë ndaja cuijne rcu me yëjë ni cjuachacun vëhë. Mijí rë xi nihña sa xcusun xi chuya naja suvaan ni.
ROM 15:2 Jima ngu ngayaan ne, meje rë xi nihña xcusun xi chuya rë xingueen, cojo sa xi hacuaha cojo me ndaja tsëhë me, cojo sa xi cuma jyë sa cjuandaja rë Nina cahntsua xahasen rë me.
ROM 15:3 Hisca Jesucristu ne, hacuiin casahmi me tu cutjin xi cachuya rë suvá me, sacuatjin cjua xi camahindu xcun xujun rë Nina hiscan xi cachja ngu xuta cojo Nina cuitjin: “Cjua xi cachja xuta xi choho cachja tsujun ne, ngahan choho cachja me tsahan.” Cuatjin camahindu.
ROM 15:4 Yëjë ni cjua xi camahindu xcun xujun rë Nina hatsëë nixtin ne, cuatjin camahindu cojo sa xi sacú naja cjuatacun. Hacuaha camahindu cojo sa xi scaa naja hacuaha sacú naja cjuetacun, sehe hitsë sa ndaja cuetahan tacun Nina.
ROM 15:5 Nina xi sahmi xi caa naja, Nina xi sua naja cjuetacun ne, catisua nuju me ngu cjuatacun xi cumatangun cjuatacun nuju cojo xingun xi tjengun ndiya rë Jesucristu.
ROM 15:6 Catisua nuju Nina cjuatacun vëhë, cojo sa xi ngayujun ni ne, ngu tangun cuma cjuatacun nuju xi nihñu jyë nihñu hnga Nina Nahmi rë Nai naja Jesucristu.
ROM 15:7 Vëhë xi meje rë xi hatuxa chjuhunntsun xingun xingu xingu ngayun sacuatjin cafahatsja naja Jesucristu, cojo sa xi cuma jyë cuma hnga Nina cojo Hasen rë me.
ROM 15:8 Chjá cojo nuju ta Jesucristu ne, canduva me xi cuisecoo me ngayun xuta tjë rë Israel. Hane cuatjin sahmichihin Jesucristu cjua xi cachja Nina cojo xutachanga niji. Canduva me xi tsingacun niji me xi Nina ne, hatuxa quixi me cojo cjua xi chja me.
ROM 15:9 Hacuaha canduva me cojo sa xi xutaxín ne, sahmi jyë sahmi hnga me Nina ngatsë rë cjuandaja rë Nina. Camahindu xcun xujun rë Nina cuitjin: Ngahan ne, sahme jyë sahme hnga nuju ngajñi rë xutaxín, hacuaha hisca së́ tsujun. Cuatjin camahindu.
ROM 15:10 Hacuaha chja nga ngu cahndë́ cuitjin: Ngayun xi xutaxín ngayun ne, hacuaha tuhun cjuasua xahasen nuju cojo xuta rë Nina. Cuatjin chja.
ROM 15:11 Hacuaha chja nga cuitjin: Ngayun xi xutaxín ngayun, nihñu jyë nihñu hnga Nina. Ngayejen ni xuta ngasunhndë ne, meje rë xi nihña jyë nihña hnga Nina. Cuatjin chja.
ROM 15:12 Hacuaha catsihindu Isaías xcun xujun rë Nina cuitjin: Cuetjucun ngu xuta, tjë rë Isaí, hane cuma titjun me tsëhë yëjë ni xutaxín. Hane xutaxín jan ne, cuetahacacun me xuta jan. Cuatjin catsihindu Isaías.
ROM 15:13 Nina, me xi sahmi xi ma vetahantacun Nina ne, catisua nuju me cjuasua cojo cjuajeya, ngayujun xi tjin ngu tacún cojo rë Jesucristu, cojo sa xi Hasen rë Nina ne, sua nuju ngahñu xi ndaja cuetuhun tacún Nina.
ROM 15:14 Ngayujun ni matsejen ne, ha hvë cojo cjuatacun naha ta ngayun ne, quitsë rë xahasen nuju cojo cjuandaja, ha jemu vechú cjuatacun nuju, hacuaha ma ninguixun cjuatacun rë xingun xingu xingu ngayun.
ROM 15:15 Ngahan ne, cavetjucácun catsihindu nuju ngu jo cjua vëhë ta, tsëhë xi mijí ná xi chaya nuju cjua jan. Cuatjin catsihindu nuju ngatsë rë cjuandaja xi casua ná Nina,
ROM 15:16 xi sahme xa rë Jesucristu ngajñi rë xutaxín. Tisahme xa sacuaha ngu nahmi, xi tisuá jimachaya rë xutaxín cjuandajyihi xi catsingatju Nina. Cuatjin sahme cojo sa xi cuma suá rë Nina ngu cjuatjo xi chuya rë me. Cjuatjo vëhë ne, hacui xutaxín, xi ha Hasen rë Nina cavaxëxin rë me xi cuma tyjahi cjuatacun rë me xcun Nina.
ROM 15:17 Vëhë xi ngahan, xi tjin tangun cjuatacun naha cojo Jesucristu ne, ma vaxë́ndaja hitsë yojo naha tsëhë xa rë Nina xi tisahme.
ROM 15:18 Vetjiincácun xi cuichjá cojo nuju tu mé ni cjua ta, suvá ni cjua tsëhë hacutjin cjuatacun xi casua ná Jesucristu xi cachjá cojo xi casahme, cojo sa xi xutaxín ne, cavihndë me tsëhë Nina.
ROM 15:19 Cuatjin camá ta, tsëhë xi cojo Hasen rë Nina ne, jemu camá cjuarcun. Cuatjin xi ngahan ne, ha chichihin casuá camachaya rë xuta cjuandajyihi xi chja tsëhë Jesucristu, cavétsehen hisca Jerusalén ne, cavéchu hisca hiscan ladu xi hmí Iliria.
ROM 15:20 Hatuxa casahme ngahñu xi casuá camachaya rë xuta cjuandajyihi jan hiscan xi cjëë camahani cumachaya rë xuta yo xi Jesucristu, cojo sa xi hacuiin hiscan xi tacunvasen xa xi jingu sa casahmi ne, ngajan cjuë́ sahmejyë.
ROM 15:21 Casahme sacuatjin camahindu xcun xujun rë Nina hiscan xi chja cuitjin: Xuta xi cjëë cumachaya rë me tsëhë me ne, cumachaya rë me; hacuaha xuta xi cjëë cuihndë me ne, cuijnercu me. Cuatjin camahindu.
ROM 15:22 Ngatsë rë vëhë xi casacuiin camahani ná cahndë́ xi cjuë́ tjëngë nuju.
ROM 15:23 Peru quihndë xi cajnetaha xa xi sahme ladu vihi, hacuaha jemu hatsëë xi meje cjuë́ tjëngë nuju ne,
ROM 15:24 meje scusehenya nuju xi cuátju nangui nuju hya xi cjuë́ ngajan nación xi hmí España. Hane nixtin xi cuitejñataha hitsë cojo nuju ne, meje ná xi cuisecun ná hitsë xi cjuë́ hisca España.
ROM 15:25 Peru ndicumaha ni ne, cjuë́ nandya Jerusalén, xi cuisécoo rë xuta ladu rë Nina jan ta,
ROM 15:26 tsëhë xi xuta ladu rë Nina ngajan estadu Macedonia cojo xuta ladu rë Nina nguehe estadu Acaya ne, ndaja catsingatahacacun me xi tsingatju me ngu cjuandaja xi cuma rë xuta yuma xi siu ngajñi rë xuta ladu rë Nina ngajan Jerusalén.
ROM 15:27 Ndatjin xi cuatjin catsingatahacacun xuta xi cuacun vë ta, tsëhë xi sacuaha xi quitjen me tsëhë xuta nangui Israel. Tsëhë xi xutaxín ne, casatë rë me cjuandajyihi xi casua Nina camachaya rë xuta tjë rë Israel, vëhë xi hacuaha satë rë me xi cuisecoo me xuta nangui Israel tsë tsë tujún xi tjin rë me.
ROM 15:28 Ngajan xi hya xi ha casahmechehen cjuacjintacun vëhë hacuaha ha casahme entregadu tujún jan ne,
ROM 15:29 sehe cuétju cjuë́ España. Hane xi cuátju nangui nuju ne, cjuë́ scusehenya nuju. Hacuaha hvë ta jemu sua naja Jesucristu cjuandaja rë me hya xi cjuë́ tjëngë nuju.
ROM 15:30 Ngayujun ni matsejen ne, ngatsë rë xi tjin tangun cjuatacun nuju cojo Nai naja Jesucristu hacuaha ngatsë rë cjuahmutacun xi sua nuju Hasen rë Nina ne, vëhë xi féhya nuju xi nihñu tangun cjuatacun nuju cojo ná, hane chjahyun rë Nina cjuandaja rë me xi cuma ná.
ROM 15:31 Cuatjin nihñu ngatsë naha, cojo sa xi cuaxëtje ná Nina tsëhë xuta xi vihndiin me tsëhë Nina ngajan Judea. Hacuaha chjahyun rë Nina cjuandaja xi cuma ná cojo sa xi hya xi cjuë́cane tujún ngajan Jerusalén ne, chuya rë xuta ladu rë Nina xi cuatjin sahme.
ROM 15:32 Cuatjin chjahyun rë Nina cojo sa xi, sa meje rë me ne, cuma cjuë́tjëngë nuju cojo cjuasua hacuaha cuitejñajenda hitsë cojo nuju xi cuéchutaha nuju.
ROM 15:33 Nina, me xi sua naja cjuandaja cjuajeya ne, catsicoo nuju me ngayujun ni. Cuatjin jain.
ROM 16:1 Nguehe cuichjá cojo nuju ta na Febe xingueen ne, jemu xuta ndaja na. Casatë rë na xa xi visecoo na xuta ladu rë Jesucristu xi ma tangun me nguehe nandya Cencrea.
ROM 16:2 Vëhë xi chjá cojo nuju ta, chjuhunntsun na sacuatjin xi meje rë xi nihña ngayaan xi ladu rë Nina ngayaan. Chjuhunntsun na ta, tsëhë xi na vëhë ne, hacuaha tjin tangun cjuatacun rë na cojo Nai naja. Hacuaha tisecun rë na tu mé ni xcusun xi cuma meje rë na ta, tsëhë xi na vëhë ne, jemu cjín xingueen xi cavisecoo na. Hacuaha hisca ngahan ne, jemu cavisecoo na ngahan.
ROM 16:3 Tuhun nina naha na Priscila cojo cha Aquila xihin rë na. Xuta xi cuacun vë ne, jemu sahmi me xa rë Jesucristu sacuatjin sahme ngahan,
ROM 16:4 hacuaha hisca caviyujutaha tsavi me yojo rë me xi cavaxëtje ná me. Vëhë xi jemu suá nacuechji rë Nina. Hacuaha hacuiin ngahan suva ni ta cojo yëjë xutaxín xi matangun me tsëhë xi camá me ladu rë Jesucristu ne, hacuaha sua me nacuechji rë Nina.
ROM 16:5 Hacuaha tuhun nina naha yëjë xuta ladu rë Jesucristu xi matangun me ndava na Priscila cojo cha Aquila. Hacuaha ngu cha xi jemu vinga ná ne, cha Epeneto ne, tuhun rë cha nina naha. Cha vëhë xi tjun tjun camangucacun cha cojo Jesucristu ngajan estadu Asia.
ROM 16:6 Hacuaha tuhun nina naha na María, na xi jemu cavisecoo nuju jan.
ROM 16:7 Hacuaha tuhun nina naha Andrónico cojo Junias xingueen, me xi cavitejñaya tangun cojo ndavaya jan. Me vëhë ne, jemu jyë hnga me cojo cjuatacun rë me ngajñi rë yëjë ni apóstol, hacuaha hitsë sa tjun me cavisehen me ladu rë Jesucristu xi cuma ná ngahan.
ROM 16:8 Tuhun nina naha cha Amplias, cha xi jemu vinga ná, tsëhë xi tjin tangun cjuatacun niji cojo Nai naja.
ROM 16:9 Tuhun nina naha cha Urbano, cha xi jemu sahmi xa rë Jesucristu sacuatjin tinihña ngayaan. Hacuaha tuhun nina naha cha Estaquis, cha xi jemu vinga ná jan.
ROM 16:10 Tuhun nina naha cha Apeles, cha xi suvá tsejen xi jemu ndaja tjin tangun cjuatacun rë cojo Jesucristu. Hacuaha tuhun nina naha yëjë ni xuta rë cha Aristóbulo.
ROM 16:11 Tuhun nina naha cha Herodián xingueen. Tuhun nina naha yëjë xuta rë Narciso, me xi hacuaha tjin tangun cjuatacun rë cojo Nai naja.
ROM 16:12 Tuhun nina naha na Trifena cojo na Trifosa, na xi jemu sahmi xa rë Nai naja. Tuhun nina naha na Pérsida, na xi jemu vinga naja jan. Na vëhë ne, hacuaha jemu casahmi na xa rë Nai naja.
ROM 16:13 Tuhun nina naha cha Rufo, cha xi cavaxijin Nina xi tjin tangun cjuatacun rë cojo Nai naja. Hacuaha tuhun ngu nina naha cojo naa rë cha ta, me vëhë ne, sacuaha naa naha me.
ROM 16:14 Tuhun nina naha cha Asíncrito, cha Flegonte, cha Hermas, cha Patrobas, cha Hermes, hacuaha cojo sa yëjë xingueen xi siu me cojo cha xi cuacun vë.
ROM 16:15 Tuhun nina naha cha Filólogo, na Julia, cha Nereo cojo na tichja cha, cha Olimpas, hacuaha cojo sa yëjë xuta ladu rë Nina xi siu me cojo me xi cuacun vë.
ROM 16:16 Tuhun rë xingun nina, cojo cjuandaja cojo cjuahmutacun cuitatsuhun xingun, sacuatjin xcusun naja. Yëjë xuta ladu rë Jesucristu ne, hacuaha tsingatju me nina nuju.
ROM 16:17 Ngayujun ni ne, cuichjá cojo nuju ta meje rë xi chuhuncuendun yo xuta xi sahmi xi chicjun cojo xingun, yo xuta xi sahmi xi cjuinenguiya ngu xingueen ngajñi rë cjuatsehen ta, tsëhë xi xcusun xi sahmi me ne, sahmi condra rë cjuachacun xi ha cachutayun. Naxunxun yojo nuju tsëhë xuta xi cuacun vë ta,
ROM 16:18 tsëhë xi vihndiin me tsëhë Nai naja Jesucristu ta xi meje ni rë xahasen rë suvá me ne, vëhë ni xi vihndë me tsëhë. Hane cojo cjuahaxi xi visiajmi me ne, vindacha me xuta xi hvíin ndiya rë cjuatsehen.
ROM 16:19 Yëjë ni xuta ne, ha machaya rë me cjua tsëhë hacutjin xi ngayujun ni ne, jemu ndaja nuhyun tsëhë Nai naja. Vëhë xi jemu ndama ná. Jemu meje ná xi cuechutaha sa cjuatacun nuju, peru xi nihñu cjuandaja. Hane cjuatsehen ne, meje ná xi sacuaha xi hyuun ndiya rë.
ROM 16:20 Hane cuechú nixtin xi Nina, me xi sua naja cjuandaja cjuajeya ne, ngutjen cuatëcja me cjuatsehen xi sahmi Satanás ngajñi nuju. Cjuandaja rë Nai naja Jesús ne, catisehen cahntsua xahasen nuju.
ROM 16:21 Cha Timoteo, cha xi sahmi tangun cojo ná xa rë Jesucristu ne, tsingatju cha nina nuju. Cojo cha Lucio, cha Jasón, cojo cha Sosípater xingueen ne, hacuaha tsingatju cha nina nuju.
ROM 16:22 Ngahan, Tercio, xi titsihindu cjua rë Pablo xcun xujun vihi ne, hacuaha tsingátju nina nuju ngayujun ni xi tjin tangun cjuatacun nuju cojo Nai naja.
ROM 16:23 Cha Gayo, cha xi casua ndava xi tejña ngahan ne, hacuaha sua cha ndava cha xi ma tangun yëjë ni xuta ladu rë Jesucristu ne, tsingatju cha nina nuju. Cha Erasto, cha xi má tesorero tsëhë nandya vihi ne, tsingatju cha nina nuju. Cha Cuarto xingueen ne, hacuaha tsingatju cha nina nuju.
ROM 16:24 Cjuandaja rë Nai naja Jesucristu ne, catama tsujun ngayujun ni. Cuatjin jain.
ROM 16:25 Tahan nacuechji rë Nina ta, Nina ne, ma sahmi me xi viyuju cahndë́ cjuatacun nuju cojo cjuandajyihi xi chja tsëhë Jesucristu, cjuandajyihi xi ngahan cojo jingu sa apóstol ne, tihín machaya rë xuta. Cjuandajyihi vëhë ne, hacui ngu cjua xi jiyahma hisca hya xi cjëë cumandaja ngasunhndë.
ROM 16:26 Peru hisca quihndë casua Nina camachaya naja cjuandajyihi jan, quihndë xi casahmi me xi profeta ne, camá catsihindu cjua rë me. Hane Nina xi tsajin nu tsajin nixtin cjuë me ne, ngatsë rë xi cuatjin cavitexa me ne, vëhë xi camachaya rë xuta tsëhë yëjë ni nación yëjë ni ladu cjuandajyihi vëhë, cojo sa xi yëjë ni xuta ne, cumangucacun me hacuaha cuihndë me tsëhë Nina.
ROM 16:27 Ngu ni Nina xi vëë yëjë ni cjuatacun ne, nihña jyë nihña hnga me yëjë nu yëjë nixtin ngatsë rë Jesucristu. Cuatjin jain.
1CO 1:1 Ngahan Pablo ne, casuaxa ná Jesucristu xi má ngahan apóstol tsëhë me, tsëhë xi cuatjin xi meje rë Nina. Hane ngahan cojo cha Sóstenes xingueen ne,
1CO 1:2 ningatjin ngu xujun vi tsujun, ngayujun ni xuta Corinto xi hacuaha xuta ladu rë Nina ngayun, ngayun xi cavaxijin Nina ngayun, tsëhë xi tjin tyjahi cjuatacun nuju cojo Jesucristu. Hacuaha ningatjin xujun vihi tsëhë yëjë xuta xi faharcun me Nai naja Jesucristu jingujyë ni cahndë́. Jesucristu jan ne, Nai rë xuta xi cuacun vëhë me, hacuaha Nai naja ngayaan me.
1CO 1:3 Nina Nahmi naja cojo Nai naja Jesucristu ne, catisua nuju me cjuandaja cjuajeya.
1CO 1:4 Yasen ni suá nacuechji rë Nina ngatsë nuju ngayujun ni cojo ngatsë rë cjuandaja rë Nina xi casua nuju me quihndë xi tjin tangun cjuatacun nuju cojo Jesucristu.
1CO 1:5 Suá nacuechji rë Nina ta, quihndë xi tjin tangun cjuatacun nuju cojo Jesucristu ne, casua nuju Nina yëjë ni. Casua nuju me chuva rë hacutjin ndaja cuinújun hacuaha ndaja cuijnercun cjua rë me.
1CO 1:6 Cjuandajyihi xi chja tsëhë Jesucristu ne, jemu ndaja cavisehen cahntsua xahasen nuju.
1CO 1:7 Vëhë xi ngayun ne, tsajin ngu cjuandaja rë Nina xi machaja nuju, jinguyëjë rë xi cuinechunyun rë nixtin xi cumatsejen nga Nai naja Jesucristu.
1CO 1:8 Cuisecoo nuju Nina xi cuejñu hñu cjuatacun nuju jinguyëjë rë xi nechun cjuahñu, cojo sa xi ngayun ne, tsajin mé jyë́ tjin nuju nixtin hya xi cuya nga Nai naja Jesucristu.
1CO 1:9 Nina ne, hatuxa sahmichihin me yëjë cjua xi chja me, hacuaha me vëhë xi cavaxijin nuju me xi nihñu tangun cjuatacun nuju cojo Quihndi rë me, Nai naja Jesucristu.
1CO 1:10 Ngatsë rë xi casuaxa ná Nai naja Jesucristu ne, cuichjá cojo nuju ta meje ná xi ngu tangun ni cjua cuinújun ngayujun ni, hacuiin xi cuisecjun cjua nuju. Nihñu tangun cjuatacun nuju cojo xingun.
1CO 1:11 Cuatjin chjá cojo nuju ta, tsëhë xi xuta rë Cloé ne, casua me camachaya ná xi tjin si ngajñi nuju cojo xingun.
1CO 1:12 Cuma cuinújan ne, ngujo ngayun ne, nújun cuitjin: “Ladu rë Pablo ngayin”; hane ngujo nga ngayun ne: “Ladu rë Apolos ngayin”; hane ngujo nga ngayun ne: “Ladu rë Pedru ngayin”; hane ngujo nga ngayun ne: “Ladu rë Cristu ngayin.” Cuatjin nújun.
1CO 1:13 Peru ¿há tjin jo jyan Cristu? ¿Há Pablo casetaha me xcun cru ngatsë nuju? ¿Há tsajin ne, há caxtenda ngayun xi ladu rë Pablo cuma ngayun? ¡Hacuiin cuatjin!
1CO 1:14 Hisca suá nacuechji rë Nina ta hisca ngu ngayun ne, cavitendaan nuju, suvá ni cha Crispo cojo cha Gayo xi caviténda cha.
1CO 1:15 Xi cuatjin camá ne, tsajin yo xi cuichja xi caxtenda ngayun xi cuma ngayun xuta ladu naha.
1CO 1:16 Haan, hacuaha caviténda sa xuta rë Estéfanas. Peru hveen há tjin sa xi caviténda.
1CO 1:17 Cuatjin casahme ta, tsëhë xi hacuiin catsingatju ná Jesucristu xi cuiténda xuta ta catsingatju ná me xi suá cumachaya rë xuta cjuandajyihi xi chja tsëhë me. Hacuaha hacuiin catsingatju ná me xi cuichjá sacuaha chja ngu xuta xi jemu ndaja nuhya rë, hane cuahacuenda xuta cjua naha cahndë rë xi cuahacuenda me ngahñu rë cjuaveya rë Jesucristu ngajan xcun cru.
1CO 1:18 Cuatjin mijí rë xi chjahátahá rë ngahñu rë cjua rë cjuaveya rë Jesucristu xcun cru ta, tsëhë xi cjua vëhë ne, handasa ngu cjuaveya cjuangarca xi má rë xuta xi tivetjintjiin me, peru xi cuma naja ngayaan xi tivetjuntjeen ne, cjua vëhë ne, tjin rë ngahñu rë Nina.
1CO 1:19 Cuitjin camahindu xcun xujun rë Nina cjua xi cachja Nina: Tsinguétsun cjuatacun rë xuta xi jemu vechú cjuatacun rë, hacuaha cjuatacun rë xuta xi jemu ndaja vijnercu me ne, tsinguejñu rë. Cuatjin camahindu.
1CO 1:20 ¿Jarë cha xi jemu vechú cjuatacun rë? ¿Jarë cha xi vicuya cjuachacun? Hacuaha ¿jarë cha xi jemu ndaja ma visiajmi nixtin vihi? ¡Nina ne, catsicuya me suvá cjuangarca cjuatacun xi jemu vëë xuta ngasunhndë vi!
1CO 1:21 Nina ta vechutaha jain cjuatacun rë me ne, cavejña ngu cacun me xi xuta ngasunhndë ne, cumaji sacúse rë me cojo suva ni cjuatacun rë me yo xi Nina. Cahndë́ rë vëhë ne, Nina ne, camameje cuaxëtje me xuta xi mangu cacun cojo rë me ngatsë rë cjuandajyihi xi nújin, handasa xi má rë xuta ne, ngu cjuangarca cjuandajyihi vëhë.
1CO 1:22 Xuta tjë rë Israel ne, meje rë me xi sahmi Nina cjuarcun, hane xutaxín ne, vanguise me xi jemu cuechú cjuatacun rë me.
1CO 1:23 Peru ngayin ne, tihin machaya rë xuta cjua tsëhë me xi catsingatju Nina, me xi cahme xi casetaha xcun cru. Ngu ladu ne, cjua vëhë sahmi xi xuta tjë rë Israel ne, sahmi condra me Nina. Hane ngu ladu nga ne, cjua vëhë ne, ngu cjuangarca xi má rë xutaxín.
1CO 1:24 Peru xi cuma rë xuta xi Nina cavaxijin rë me, sa xuta tjë rë Israel o sa xutaxín ne, me xi Nina catsingatju rë jan ne, tjin rë me ngahñu rë Nina hacuaha tjin rë me cjuatacun rë Nina.
1CO 1:25 Hya xi machaya rë yahnga xuta yëjë xcusun xi choho cavatju Jesucristu camá ne, tsingataha cacun me xi Nina ne, jemu ngarca me hacuaha jemu ndaya cacun me. Peru hacuiin cuatjin ta, xcusun xi cuacun vë ne, tsingacun naja xi Nina ne, hitsë sa jercu vechú cjuatacun rë me xi cuma rë xuta xi jercu vechú cjuatacun rë, hacuaha hitsë sa jercu tjin rë me ngahñu xi cuma rë xuta xi jercu tjin rë ngahñu.
1CO 1:26 Ngayujun ni ngayun ne, ha hyun ta Nina cavaxijin nuju me handasa hacuiin cjín ngayun xi vechú cjuatacun nuju, hacuiin cjín ngayun xi jercu tjin nuju ngahñu, hacuaha hacuiin cjín ngayun xi nchina ngayun.
1CO 1:27 Peru Nina ne, cavaxijin me xuta ngasunhndë xi ngarca, cojo sa xi tsisava me xuta xi jercu vechú cjuatacun rë. Hane cavaxijin me xuta ngasunhndë xi ndaya cacun, cojo sa xi tsisava me xuta xi jercu hñu ngahñu rë.
1CO 1:28 Hacuaha Nina ne, cavaxijin me xuta ngasunhndë xi yuma, xuta xi maxta tsëhë, xuta xi venguiin chji rë, cojo sa xi tsinguetsun Nina cjuatacun rë xuta xi jemu vengui chji rë xi má rë xuta ngasunhndë.
1CO 1:29 Xi cuatjin ne, yëjë xuta ne, cumaji cuaxëndaja me yojo rë me xcun Nina.
1CO 1:30 Hane ha suvá Nina casahmi tangun me cjuatacun nuju cojo Jesucristu. Hacuaha Nina vuxaha me cjuatacun naja, xi mangutacun cojo Jesucristu. Hacuaha ngatsë rë Jesucristu ne, fë jyë́ naja xcun Nina, tsëhë Nina má ngayaan, hacuaha vetjuntjeen.
1CO 1:31 Cuatjin jain má cojo sa xi nihña sacuatjin quitaha xcun xujun rë Nina hiscan xi chja cuitjin: “Sa xi yo xi meje cuaxëndaja yojo rë ne, cataxëndaja yojo rë, peru xi tsëhë Nai naja.”
1CO 2:1 Peru ngayujun ni ne, hya xi cëjë nangui nuju ne, cachjaan cojo nuju cjua rë Nina sacuaha xi jemu ma chjá o sa sacuaha xi jemu vechú cjuatacun naha.
1CO 2:2 Cuatjin casahme ta, tsëhë xi cavejñá cjuatacun naha xi ngu ni Jesucristu xi cahme me xcun cru tsingátaha cacún tsëhë me, jinguyëjë rë xi cuitejñataha cojo nuju.
1CO 2:3 Hacuaha hya xi cavitejñataha cojo nuju ne, jemu ndaya cacún, hisca fatsë ngahan xi tsácjun.
1CO 2:4 Hacuaha hya xi cachjá cojo nuju cjua rë Nina ne, hacuiin jemu cjua yehe casahmexa cojo xi meje sahme xi cuijne tacún ta cajne tacún ngatsë rë ngahñu xi tjin rë Hasen rë Nina.
1CO 2:5 Cuatjin camá cojo sa xi cumangu tacún cojo Nina, peru hacuiin ngatsë rë cjuatacun rë xuta ta ngatsë rë ngahñu xi tjin rë Nina.
1CO 2:6 Peru cojo xuta xi vechútaha cjuatacun rë me xi mangucacun me cojo Jesucristu ne, nújin cjuatacun xi jemu vengui chjí rë. Peru cjuatacun vëhë ne, hacuiin cjuatacun tsëhë xuta ngasunhndë vihi hacuaha hacuiin cjuatacun tsëhë xuta xi vitexa nguehe ngasunhndë vihi, me xi titsinguetsun Nina cjuatacun rë.
1CO 2:7 Cjuatacun vëhë ne, vëhë cjuatacun rë Nina xi jiyahma titjun. Peru Nina ne, hisca chaja sa xi cuejña ngasunhndë ne, ha tjin chjine rë me cjuatacun vëhë xi ndaja tsajan.
1CO 2:8 Hisca xi ngu xuta xi vitexa quihndë nixtin vihi ne, vijniircu me cjuatacun vëhë. Sa xi cajnercu me ne, hacuaha catsiquiin me Nai naja, me xi jemu jyë hnga camahani me cojo Hasen rë me.
1CO 2:9 Peru tivetjucaa sacuatjin camahindu xcun xujun rë Nina hiscan xi chja cuitjin: Xcusun xi cjëë camahani scuëë xuta, hisca cjëë camahani cuihndë me cjua tsëhë, hacuaha hisca cjëë camahani tsingatahacacun me tsëhë ne, vëhë xcusun xi cavëhëchjine Nina xi cuma rë xuta xi hmu cacun rë me. Cuatjin camahindu.
1CO 2:10 Xcusun vëhë ne, ngayin casua Hasen rë Nina camachaya niji. Hasen rë Nina jan ne, vëë yëjë ngarca ni, hisca cjuatacun rë Nina xi hitsë sa hma jiya.
1CO 2:11 Ngajñi rë yëjë xuta ne, tsajin yo xi ma vëë cjuatacun rë ngu xuta ta suvá ni hasen rë me xi jiya ngajñi yojo rë me ne, vëhë xi vëë. Ha chuva vëhë ni ne, tsajin yo xi vëë cjuatacun rë Nina ta suvá ni Hasen rë Nina ne, vëhë xi vëë.
1CO 2:12 Ngayaan ne, hacuiin cachjahanntsan ngu hasen tsëhë ngasunhndë ta cachjahanntsan Hasen xi catsingatju Nina, cojo sa xi cumachaya naja yëjë ni cjuandaja xi Nina casua naja me.
1CO 2:13 Nújan tsëhë cjuandaja vëhë, peru hacuiin cojo cjua yehe xi nduva tsëhë cjuatacun rë xuta ngasunhndë ta cojo cjua xi nduva tsëhë Hasen rë Nina. Hane cuatjin xi tahan cjuatacun rë Nina machaya rë xuta xi tjin rë me Hasen rë Nina.
1CO 2:14 Xuta xi tsajin rë me Hasen rë Nina ne, maji fahatsja me cjuandaja xi sua Hasen rë Nina ta xi má rë me xi cuacun vë ne, suvá cjuangarca cjuandaja xi cuacun vë, hacuaha maji vijnercu me cjuandaja xi cuacun vë, tsëhë xi suvá Hasen rë Nina sahmi xi vijnercuun.
1CO 2:15 Xuta xi tjin rë me Hasen rë Nina ne, ma tsichuva me yëjë ngarca ni, peru me xi cuacun vëhë ne, tsajin yo xi ma tsichuva rë me.
1CO 2:16 Cuitjin camahindu xcun xujun rë Nina: “¿Yo xi vëë cjuatacun rë Nina? ¿Yo xi cuicuya rë?” Cuatjin camahindu. Peru ngayaan ne, tjin naja cjuatacun rë Jesucristu.
1CO 3:1 Ngayujun ni ne, camaji cachjá cojo nuju sacuaha chjá cojo xuta xi ha tjin rë me Hasen rë Nina ta, tjin ná xi cachjá cojo nuju sacuaha chjá cojo xuta ngasunhndë, sacuaha xuta xi sehe cavisehen ladu rë Jesucristu.
1CO 3:2 Sacuaha xi casuá nuju lechi xi siuhun. Hacuiin niñu casuá xi xinu ta, tsëhë xi nixtin hya ne, tangun ngayun cojo quihndi chihndë xi cjëë cuma sinë niñu. Hacuanitjin ni cjëë cuma chjuhunntsun yëjë cjua rë Nina hisca quihndë,
1CO 3:3 tsëhë xi xuta ngasunhndë sa má ngayun. Cuatjin chjá cojo nuju ta jinguyëjë rë xi tjin sa cjuachini hacuaha tjin sa si ngajñi nuju ne, xuta ngasunhndë cuaha sa má ngayun, hacuaha tivanguntjengun sa ndiya rë xuta ngasunhndë.
1CO 3:4 Hya xi ngu ngayun nújun: “Ngahan ne, ladu rë Pablo ngahan”, hane ngu nga ngayun ne, nújun: “Ngahan ne, ladu rë Apolos ngahan” ne, ngajan matsejen xi xuta ngasunhndë cuaha má ngayun.
1CO 3:5 Xi matsejen ne, ¿mé má Apolos ne, mé má Pablo ni? Ngayin ne, xuta sahmixa rë Nina ni ngayin, xi canújin cojo nuju cjua rë Nina xi camacjain nuju. Jima ngu ngayin ne, canihñi xa xi casua niji Nai naja.
1CO 3:6 Sacuaha xi ngahan catsítjë, hane Apolos cavitejnu me nandá, peru Nina casahmi me xi camayehe xitjë.
1CO 3:7 Ngajan xi, xi matsejen ne, cha xi tsitjë cojo cha xi vitejnu nandá ne, hacuiin jemu vengui chji rë cha ta me xi vengui jain chji rë ne, Nina, me xi sahmi xi ma yehe xitjë.
1CO 3:8 Cha xi tsitjë cojo cha xi vitejnu nandá ne, tangun ni vengui chji rë cha. Jimangu cha ne, cjuahatsja cha chji rë cha, sacuatjin xa xi casahmi jimangu cha.
1CO 3:9 Ngayin ne, tangun tinihñi xa rë Nina, hane ngayun ne, sacuaha nangui rë Nina xi tijimaxa cojo má ngayun. Hacuaha ngayun ne, sacuaha ngu ndihya xi Nina tsindaja me má ngayun.
1CO 3:10 Ngahan ne, tsëhë cjuandaja xi casua ná Nina ne, casahme sacuaha ngu chjine vexo ne, cavejña ngu xihndënaña, peru xcun xihndënaña xi casahme jan ne, jingu sa xuta canduva casahmi me ngu ndihya. Peru jima ngu xuta xi sahmi me ndihya xcun xihndënaña vëhë ne, meje rë xi tjin rë me cuidadu hacutjin xi sahmi me ta,
1CO 3:11 tsëhë xi tsajin sa cjín xihndënaña xi tjin ta ngu tu tu ni má. Hane xihndënaña xi ha tacun vë ne, hacui Jesucristu.
1CO 3:12 Quihndë ne, xi nihña xa rë Nina ne, cuejña xi yahnga xuta sahmixa me cojo oro, o sa quicha tyava, o sa ndyojo xi jercu vengui chji rë. Hane yahnga nga me ne, sacuaha sahmixa me cojo ya, o sa cojo ndiji, o sa cojo xca ni.
1CO 3:13 Peru nixtin hya xi tsichuva naja Nina ne, hya cuma cumatsejen xcusun rë xa xi casahmi jima ngu xuta xi cuacun vë. Nixtin hya ne, cuejña Nina ngu ndihi xi tsichuva xa xi casahmi jima ngu me, cojo sa xi cumatsejen mé xcusun xa vëhë.
1CO 3:14 Sa xi xa xi casahmi ngu xuta scaa rë cojo suë rë ndihi vëhë ne, sacú rë me ngu cjuandaja rë xi sua Nina.
1CO 3:15 Peru sa xi xa xi casahmi ngu xuta jan cjuëya cojo suë rë ndihi vëhë ne, tsichajá me yëjë, peru me vëhë ne, cuetjutje me sacuaha ngu xi vetjutje tsëhë ngu ndihi.
1CO 3:16 Ngayujun ni ne, ha ndaja hyun xi sacuaha yungun rë Nina má ngayun, ta Hasen rë Nina ne, hacuaha tacuncahndë́ cahntsua xahasen nuju.
1CO 3:17 Sa xi yo xi tsinguetsun yungun rë Nina, Nina ne, hacuaha jercu sahmi me castigu xuta jan, tsëhë xi yungun rë Nina ne, hatuxa tsëhë Nina. Hane ngayun ne, hacuaha yungun rë Nina má ngayun.
1CO 3:18 Xicavindachuun suvun rë yojo nuju. Sa xi tjin ngu ngayun xi ningatuhun tacún xi jemu vechú cjuatacun nuju sacuaha cjuatacun rë xuta ngasunhndë vihi ne, nihñucuendun chjuhunxun cjuatacun vëhë sacuaha xi vechiin cjuatacun nuju. Hane xi cuatjin nihñu ne, sehe cuechú tuhun cojo cjuaquixi ngu cjuatacun nuju.
1CO 3:19 Cuatjin meje rë ta, tsëhë xi cjuatacun rë xuta ngasunhndë vihi ne, xi cuma rë Nina ne, suvá cjuangarca. Hisca camahindu xcun xujun rë Nina cuitjin: “Nina ne, sahmi me xi xuta xi jemu vechú cjuatacun rë me vetju sava me xcun cjuandacha xi sahmi me.”
1CO 3:20 Hacuaha camahindu nga cuitjin: “Nina ne, vëë me xi cjuatacun rë xuta xi jemu vechú cjuatacun rë ne, tu mahya.”
1CO 3:21 Vëhë xi hisca ngu ngayaan ne, mijí rë xi naxenndajan cjuatacun rë xuta ngasunhndë ta, tsëhë xi yëjë ngarca ni ne, tsujun:
1CO 3:22 há xi Pablo, há xi Apolos, há xi Pedru, há ngasunhndë, há cjuahñu, há cjuaveya, há xi nixtin quihndë, há xi nixtin nduva ne, ta yëjë ngarca ni ne, tsujun vë.
1CO 3:23 Hane ngayun ne, tsëhë Jesucristu ngayun, hane Jesucristu ne, tsëhë Nina me.
1CO 4:1 Meje rë xi nihñucuendun xi ngayin ne, xuta sahmi xa rë Jesucristu má ngayin, hacuaha cachjihinntsin xa xi tihin cumachaya rë xuta tsëhë cjuatahahma xi sehe tisua Nina jimachaya naja.
1CO 4:2 Hacuaha jemu sahmi ngujyë xi ngu xuta xi tjin tsjá me xa ne, tsejen tsëhë me xi cuma cumangu tacuun cojo rë me.
1CO 4:3 Xi cuma ná ngahan ne, tsajin mé sahmi rë sa xi chjuhunchuvun ná cojo cjuatacun naha, o sa xi cjuahachuva ná xuta ngasunhndë. Hisca ngahan suva ne, fahachuvaan cjuatacun naha.
1CO 4:4 Xi má ná ne, tsajin jyë́ naha. Peru hacuiin ngatsë rë vëhë xi hatuxa tsajin jyë́ naha. Nai naja ne, me vëhë xi tsichuva ná me.
1CO 4:5 Vëhë xi mijí rë xi yo chjuhunchuvun, xi chaja sa cuechú nixtin xi cuinduva Nai naja ta, tsëhë xi me vëhë cuaxëcaatsejen me yëjë ni cjua xi tsajin yo vëë. Hacuaha cuaxëcaatsejen me yëjë cjuatacun rë xuta. Nixtin hya ne, cuaxëndaja Nina jima ngu xuta sacuatjin vechú chuva rë tsëhë jima ngu me.
1CO 4:6 Ngayujun ni ne, cachjá cojo nuju yëjë cjua vëhë tsahan suva cojo tsëhë Apolos, cojo sa xi ndaja tsujun, cojo sa xi cuijnercun mé meje cuichja cjua xi chja cuitjin: “Nihñuchuhun sacuatjin chja cjua xi camahindu.” Cuatjin chja cjua. Cuatjin meje rë cojo sa xi hacuiin nihñu yehe yojo nuju ngatsë rë ngu xi tjengun cjua rë, hane me xi yahnga ne, nitjungun me.
1CO 4:7 ¿Yo casahmi xi hitsë sa vengui chjí nuju ngayun xi cuma rë me xi yahnga? Hacuaha ¿mé tjin nuju xi hacuiin Nina casua nuju me? Sa xi Nina casua nuju me ne, ¿mé má naxunndujun yojo nuju sacuaha xi tsajin yo xi casua nuju ni?
1CO 4:8 ¡Sacuaha xi ngayun ne, má nuju xi ha tjin nuju yëjë xi meje rë xahasen nuju, ha jemu nchina camá ngayun! Ha xuta xi matitjun camá ngayun xi má nuju. Hacuaha quihndë tsajin mé xi machaja nuju xi cumatihin nuju. Jemu ndatjin sa xi matitjun jain ngayun, cojo sa xi ngayin ne, hacuaha cojo ngayin cumatitjun tangun ngayin cojo nuju.
1CO 4:9 Xi má ná ngahan ne, casahmi Nina xi venguiin chji niji ngayin xi má ngayin apóstol, sacuaha xuta xi cjue cueya me ngatsë rë jyë́ rë me. Tivutsejen yëjë ni xuta cojo yëjë ni ángel hacutjin tivatjin tijima.
1CO 4:10 Ngatsë rë xi tjenguin rë Jesucristu ne, má rë xuta sacuaha xi jemu ngarca ngayin. Peru ngayun ne, xi má nuju ne, jemu quicun tacún ngatsë rë xi tjengun rë Jesucristu. Ngayin ne, jemu ndaya tacuín, peru ngayun ne, jemu hñu ngahñu nuju. Ngayun ne, chjahárcun nuju, hane ngayin ne, chjaharcuaain niji.
1CO 4:11 Hisca quihndë sa ne, jindya niji tsëhë xi xini xi sihin, hacuiin ndaja tsjian chijín, choho sahmi xuta cojo niji, hacuaha tu nujyihinsin ni.
1CO 4:12 Nihñi xa xi hai. Hora xi choho chja xuta cojo niji ne, ndaja nújin cojo rë me. Hora xi tsujyihiya tjengui niji me cojo cjuahngatacun ne, caa niji cojo xcusun xi sahmi me. Tsajin mé nihñi cojo rë me.
1CO 4:13 Hora xi choho chja xuta tsijin ne, nindijin cjua cojo rë me. Camá ngayin sacuaha xtë xi tjin ngasunhndë. Hitsë sa chuva vengui chjí niji xi cuma rë yëjë ni xcusun xi tjin. Hisca quihndë ne, cuanitjin vatjin má.
1CO 4:14 Xi titsihindu nuju cuitjin ne, hacuiin xi tsisava nuju ta xi suá nuju conseju sacuaha quihndi naha suva xi jemu hmú cacún.
1CO 4:15 Handasa tjin nuju të mil xuta xi vicuya nuju cjua xi chja tsëhë Jesucristu ne, peru nahmi nuju ne, ngu ni ngahan, tsëhë xi hya xi casuá camachaya nuju cjuandajyihi xi chja tsëhë Jesucristu hacuaha cavisuhun ladu rë me ne, hya camá ngahan sacuaha nahmi nuju.
1CO 4:16 Vëhë xi ngayujun ni ne, meje ná xi nihñu sacuatjin sahme ngahan.
1CO 4:17 Ngatsë rë vëhë ne, titsingátju nuju cha Timoteo, cha vëhë xi sacuaha quihndi naha xi jemu hmú cacún hacuaha jemu ndaja sahmi chihin me xa tsëhë Nai naja. Me vëhë sahmi me xi cuitsjen nuju hacutjin tifë́ cojo ndiya rë Jesucristu, sacuatjin vicuyá rë xuta rë yëjë ni yungun jingujyë ni.
1CO 4:18 Quihndë ne, yahnga ngayun ne, canihñu yehe yojo nuju xi cuatjin caningatuhun tacún xi cjueen cjuë́ scútsejen nuju.
1CO 4:19 Peru ngahan ne, cuinduva xati scútsejen nuju, sa Nai naja meje rë me. Hane hya cumachaya ná hacuiin sacuatjin xi visiajmi xuta xi cuacun casahmi yehe yojo rë jan ta sacuatjin ngahñu xi tjin rë me.
1CO 4:20 Cuatjin sahme ta sacuaha gubiernu xi sahmi Nina ne, hacuiin cojo suvá cjua ni rë me xi sahmi me ta cojo ngahñu xi tjin rë me.
1CO 4:21 ¿Hacutjin meje nuju xi nduva scútsejen nuju, há xi cojo ngu castigu ne, o há tsajin ne, há cojo ngu cjuahmutacun, cojo cjuandaja cjuajeya?
1CO 5:1 Tjin cjua xi ngajñi nuju ngayujun ni ne, jiyajñi ngu cjuatsehen xi hisca xutaxín sa ne, sahmii me. Chja cjua ta ngu ngayun ne, cachjuhun chjuun rë nahmi nuju, camá chjuun nuju.
1CO 5:2 ¡Hane ngayujun ni ne, jercu naxunndujun yojo nuju! Cahndë́ rë vëhë ne, meje rë xi choho cuma nuju. Cha xi cuatjin sahmi xcusun vëhë ne, catetjuxin cha tsujun.
1CO 5:3 Handasa tsajin ngahan tejña cojo nuju ndyá ne, peru cjuatacun naha ne, sacuaha xi ndyá tacun cojo nuju. Hane sacuaha xi tejña cojo nuju ne, ngahan ne, ngatsë rë xi sahme xa rë Nai naja Jesús ne, chjá cojo nuju ta meje rë xi cuma castigu cha xi cuatjin sahmi xcusun vëhë.
1CO 5:4 Hya xi cuma tangun ngayun, hacuaha cjuatacun naha ne, sacuaha xi tacun cojo nuju ne, cojo ngahñu xi sua naja Nai naja Jesús ne,
1CO 5:5 nihñu entregadu cha xi cuajyihi vë cojo Satanás, cojo sa xi cueya cha. Cuatjin nihñu, cojo sa xi cuetjutje hasen rë cha nixtin hya xi cuya nga Nai naja.
1CO 5:6 Ndajin tjin xi cuatjin nihñu yehe yojo nuju. Ha hyun cjua xi chja cuitjin: “Hitsë lihndi ni san rë pan ne, caa rë tsisatjen rë yëjë nahyu.” Cuatjin chja cjua.
1CO 5:7 Meje rë xi chjuhunxun cjuatsehen vëhë, xi sahmi sacuaha san rë pan, cojo sa xi cuma tyjahi cjuatacun nuju, sacuaha nahyu xi tsajin san rë. Hacuaha hvë ta hatuxa tyjahi cjuatacun nuju ta, tsëhë xi Jesucristu ne, me xi sacuaha chu tsánga tsëhë suhi rë Pascua naja ne, ha cahme me.
1CO 5:8 Vëhë xi meje rë xi nihña suhi, peru hacuiin cojo san rë pan xi changá, cuma cuinújan ne, hacuiin cojo cjuatsehen ta, cojo nahyu xi tsajin san rë, cuma cuinújan ne, cojo cjuandaja cojo cjuaquixi.
1CO 5:9 Catsihindu nuju xcun xujun xi ha catsingátju nuju ta mijí rë xi nihñu tangun cojo xuta xi sahmi cjuatsehen cojo ngu chjuun o sa cojo ngu xihin.
1CO 5:10 Xi cachjá cojo nuju cuatjin ne, hacuiin meje cuichja xi meje rë xi cuetjunxun camahani tsëhë xuta ngasunhndë xi hincha ndiya rë cjuatsehen vëhë, o sa tjenguitaha me xi hacuiin tsëhë, o sa ndacha, o sa faharcun me nina ndyojo. Sa xi cuatjin nihñu ne, meje rë xi cuetjun camahani tsëhë ngasunhndë.
1CO 5:11 Xi vijne cjua xi catsihindu nuju vë ne, xi hacuiin nihñu tangun cojo ngu xuta xi chja me xi ladu rë Jesús má me hane sahmi me cjuatsehen cojo ngu chjuun o sa cojo ngu xihin, o sa tjenguitaha me xi hacuiin tsëhë me, o sa faharcun me nina ndyojo, o sa ndesu me, o sa cha chihi me, o sa xi ndacha me. Ngu xuta rë yungun xi cuatjin xcusun rë ne, hisca mijí rë xi xinu niñu cojo rë me.
1CO 5:12 Satiin ná ngahan xi tsichúva xuta xi hacuiin xuta rë yungun má me. Nina ne, me vëhë xi tsichuva rë me. Peru ngayun ne, meje rë xi nichuvun xuta xi xuta rë yungun me. Vëhë xi hacuaha meje rë xi naxunxun cha tsehen vë tsëhë ngajñi nuju.
1CO 6:1 Hya xi tjin ngu ngayun xi tjin ngu jyë́ xi meje cuinchun tsëhë xingun ne, ¿mé má cuatjin vetju tacún xi xcun xuta xi hisca sahmicuendaain me Nina vangun chjahyun xi cumacuenda tsujun, cahndë́ xi cuangun xcun xuta xi ladu rë Nina me?
1CO 6:2 ¿Há hyuun xi cuechú nixtin xi ngayaan xuta ladu rë Nina nichuvan xuta ngasunhndë cojo cjuatacun rë me? Hane sa xi ngayun cuatjin nichuvun xuta ngasunhndë ne, ¿há maji nichuvun ngu jyë́ lihndi quihndë ni?
1CO 6:3 ¿Há hyuun xi ngayaan nichuvan ángel cojo cjuatacun rë ni? ¡Hitsë guan cjuacjintacun rë ngasunhndë vihi!
1CO 6:4 Vëhë xi sa tjin ngu jyë́ xicjin vëhë xi meje cuinchun ne, ¿há cuangun cuejñu jyë́ vëhë xcun ngu xutaxín xi faharcuaain me xcusun rë yungun?
1CO 6:5 Nguehe cuichjá cojo nuju ngujo cjua cuitjin, cojo sa xi cuma sava nuju: ¿há tsajin ndastu ngu xuta xi vechú hitsë cjuatacun rë me xi cuma sahmi cuenda me tu mé ni si xi nihñu cojo xingun?
1CO 6:6 Peru ngu ngayun xuta ladu rë Jesús ne, vinchun jyë́ rë jingu sa xuta ladu rë Jesús, ¡hane hisca vanguncujun jyë́ vëhë xcun xuta xi sahmicuendaain me Nina!
1CO 6:7 Xi cuatjin vinchun jyë́ rë xingun xingu xingu ngayun ne, ngajan matsejen xi ngayun canichujún. Hitsë sa ndaja xi ningatuhun xi cumandacha ngayun. Hitsë sa ndaja xi ningatuhun xi cjue chëjë tsujun.
1CO 6:8 Cahndë́ rë xi cuatjin ningatuhun ne, tu ngayun vindachun hacuaha nichujun tsëhë xingun ngajñi nuju ngayun xuta rë yungun.
1CO 6:9 ¿Há hyuun ta xuta tsehen ne, cumaji cuisehen me hiscan sahmi Nina gubiernu? Ha quihndë xicatuun cahndë́ xi cuma ndacha sa ngayun ta, yëjë xcusun xuta xi cuicun vi ne, cumaji cuisehen me hiscan sahmi Nina gubiernu: xuta xi sahmi me cjuatsehen cojo chjuun o sa cojo xihin xi hacuiin tsëhë me, xuta xi faharcun me nina ndyojo, cha xi chuya rë ngu xihin,
1CO 6:10 xuta xi chëjë me, xuta xi tjenguitaha me xi hacuiin tsëhë me, xuta xi hatuxa xuta chihi me, xuta xi ndesu me, xuta xi ndacha me, yëjë xcusun xuta xi cuacun vë ne, cumaji cuisehen me hiscan sahmi Nina gubiernu.
1CO 6:11 Yahnga ngayun ne, cuatjin cún ngayun titjun. Peru fahaxin me jyë́ nuju, camá tyjahi cjuatacun nuju, cafë jyë́ nuju. Cuatjin camá cojo nuju ngatsë rë Nai naja Jesucristu cojo ngatsë rë Hasen rë Nina naja.
1CO 6:12 Yahnga ngayun ne, nújun cuitjin: “Cuma nihña yëjë ni xcusun.” Cuatjin nújun. Cuma, peru hacuiin yëjë xcusun xi ndaja tsajan. “Cuma nihña yëjë ni xcusun”, peru ngahan ne, suaan cahndë́ xi scaa rë suhi rë tu mé ni xcusun cojo ná.
1CO 6:13 Yahnga nga ngayun ne, nújun cuitjin: “Casahmi Nina xi hatuxa matangun xi chinë cojo cahntsuan, hacuaha cahntsuan ne, hatuxa ma tangun cojo xi chinë.” Cuatjin nújun. Quixi jain, peru cuechú nixtin xi tsicjë Nina catsijo xcusun vëhë. Peru hacuiin casahmi Nina xi hatuxa matangun yojo naja cojo cjuatsehen ta casahmi me xi hatuxa matangun cojo Nai naja, hacuaha hatuxa matangun Nai naja cojo yojo naja.
1CO 6:14 Nina ne, catsicuya me Nai naja cjuahñu, hacuaha cojo ngahñu rë suvá me ne, hacuanitjin ni tsicuya naja me ngayaan cjuahñu.
1CO 6:15 ¿Há hyuun ta yojo nuju ne, tjin tangun cojo Jesucristu? Quihndë ne, yojo naja xi tjin tangun cojo Jesucristu ne, ¿há nihña tangun cojo ngu na viteña yojo rë ni? ¡Jéya! ¡Catamamiji rë Nina!
1CO 6:16 Hacuaha ¿há hyuun ta ngu xuta xi sahmi cjuatsehen cojo ngu na xi viteña yojo rë ne, sacuaha xi ngu yojo ni rë me cojo rë na? Cuatjin ma ta chja xujun rë Nina cuitjin: “Catsijo me ne, cuma ngu yojo ni rë me cojo xicjin me.” Cuatjin chja xujun rë Nina.
1CO 6:17 Peru ngu xuta xi sahmi tangun me cjuatacun rë me cojo Nai naja ne, cuma ngu cjuatacun ni rë cojo rë me.
1CO 6:18 Naxunxun yojo nuju tsëhë cjuatsehen xi sahmi ngu xuta cojo ngu chjuun o sa cojo ngu xihin xi hacuiin tsëhë me. Yëjë sa cjuatsehen xi sahmi ngu xuta ne, hacuiin cojo yojo rë me sahmi me. Peru xuta xi sahmi cjuatsehen cojo ngu chjuun o sa ngu xihin xi hacuiin tsëhë ne, cojo yojo rë me sahmi me cjuatsehen vëhë.
1CO 6:19 ¿Há hyuun ta yojo nuju ne, sacuaha ngu yungun rë Hasen rë Nina xi caveya Nina cahntsua xahasen nuju? Ngayun ne, hacuiin tsujun suvun yojo nuju ta,
1CO 6:20 tsëhë xi ngayun ne, cojo chji cachaha nuju. Vëhë xi meje rë xi cojo yojo nuju nihñu jyë nihñu hnga Nina.
1CO 7:1 Quihndë ne, nguehe tsicúya cjua tsujun tsëhë cjua xi canihindun ná. Ndatjin xi cuixaain xuta.
1CO 7:2 Peru ngatsë rë cjuatsehen ne, catisacu chjuun rë jima ngu xihin, hacuaha jima ngu chjuun ne, catisacu xihin rë na.
1CO 7:3 Sa chjuun sa xihin me ne, catisahmi chihin me sacuatjin mameje rë cjuavixan xi casahmi me.
1CO 7:4 Sacuaha chjuun ne, hacuiin na vëhë vitexa na yojo rë na ta xihin rë na vitexa cha. Hacuanitjin ni xihin ta hacuiin cha vëhë vitexa cha yojo rë cha ta chjuun rë cha vitexa na.
1CO 7:5 Mijí rë xi nichuhun rë xingun yojo nuju sa chjuun sa xihin ngayun. Cuma nihñu cuatjin, peru sa xi catsijo ni ngayun canihñu tangun cjua xi cuejñuxun ngujo nixtin, tsëhë xi meje nuju xi ngujo nixtin vëhë ne, nihñu oración nuju cojo Nina. Hane xi cuatju vëhë ne, sehe tuyun nihñuchuhun sacuatjin mameje rë cjuavixan xi canihñu, sá tu ngatsë rë xi scaain nuju ne, sahmi Satanás ngahñu xi nihñu cjuatsehen.
1CO 7:6 Cuatjin cachjá cojo nuju cojo sa xi hacuiin chja cuatjun, cachjaan sacuaha xi hatuxa vitéxa nuju.
1CO 7:7 Xi má ná ngahan ne, ndatjin sa xi yëjë ni xuta ne, scaa rë me sacuaha ngahan. Peru jima ngu xuta ne, casacu rë me jima ngu xcusun cjuandaja xi casua Nina me: ngu me ne, casacu rë me xcusun vihi, ngu nga me ne, casacu rë me xcusun vëhë.
1CO 7:8 Quihndë ne, ngu ngu ngayun xi cjëë sacú chjuun nuju, cjëë sacú xihin nuju, hacuaha cojo ngayun xi cahan ngayun ne, cuichjá cojo nuju ta ndatjin xi cuinechun suvun sacuaha ngahan.
1CO 7:9 Peru sa xi scaain nuju ne, tixun. Hitsë sa ndaja xi cuixun xi cuma rë xi nicjun suvun yojo nuju cjuandya rë xihin.
1CO 7:10 Hane ngu ngu ngayun xi cavixun ne, cuichjá cojo nuju ta ngu chjuun ne, mijí rë xi tsismi na xihin rë na.
1CO 7:11 Hane sa xi tacun xín na ne, catejña suvá na, o sa tsajin ne, catisehen nga na cjuandaja cojo xihin rë na. Hacuaha ngu xihin ne, mijí rë xi tsismi cha chjuun rë cha. Hacuiin ngahan xi chjá cuatjin ta Nai naja chja me.
1CO 7:12 Quihndë ne, hacuiin Nai naja cuichja me ta ngahan cuichjá cojo nuju ngayujun ni xi cjëë cuichjá cojo nuju. Sa xi cachjuhun ngu chjuun xi manguaain cacun na cojo Nai naja, hane tsingatihin na cuejña sa na cojo nuju ne, xicanismuu na.
1CO 7:13 O sa xi cachjuhun ngu xihin xi manguaain cacun cha cojo Nai naja, hane tsingatihin cha cuejña sa cha cojo nuju ne, xi canismuu xihin nuju vë.
1CO 7:14 Cuatjin nihñu ta, xihin nuju xi manguaain cacun cojo Nai naja jan ne, ngatsë nuju ngayun ne, hacuaha cojo cha cumá cha ladu rë Nina. Hacuanitjin ni chjuun nuju xi manguaain cacun cojo Nai naja jan ne, ngatsë nuju ngayun xi ladu rë Jesús ne, hacuaha cojo na cumá na ladu rë Nina. Sa xi hacuiin cuatjin ne, quihndi nuju ne, hacuiin ladu rë Nina má. Peru xi cjuaquixi ne, quihndi nuju ne, ladu rë Nina má.
1CO 7:15 Peru sa chjuun sa xihin xi manguaain cacun cojo Nai naja ne, sa xi meje tsismi nuju ne, catitsismi nuju. Sa xi cuatjin cuatjun cuma ne, ngayun xi ladu rë Jesús ngayun ne, ha ndaya tjin ngayun tsëhë cjuavixan. Cuatjin meje rë xi nihñu ta, tsëhë xi Nina cajindaya nuju me xi cuangun ndiya rë cjuandaja cjuajeya.
1CO 7:16 Tsajin yo vëë rë há cuma naxuntjun chjuun nuju o sa xihin nuju.
1CO 7:17 Meje rë xi ngayujun ni ne, nihñu xa xi casua Nina xi nihñu jima ngu ngayun, hacuaha ha sacuanitjin ni cún ngayun hya xi cavaxijin nuju Nina ne, hacuanitjin ni tángun nduju cojo. Cuatjin chjá cojo xuta tsëhë yëjë ni yungun.
1CO 7:18 Sa xi ha cati rë chuxin nuju hya xi cavaxijin nuju Nina ne, xicavinchuun chuva rë xi nindeyun xcusun vëhë. O sa xi cjëë xtí rë chuxin nuju hya xi cavaxijin nuju Nina ne, xicanihñuu.
1CO 7:19 Xi xti rë chuxin naja o sa xtiin rë ne, tsajin mé vengui chjí rë ta xi vengui chjí rë ne, xi cuinuhyan cjua xi vitexa Nina.
1CO 7:20 Ha sacuanitjin ni cún jima ngu ngayun hya xi cavaxijin nuju Nina ne, hacuanitjin ni tángun nduju cojo.
1CO 7:21 Sa xi ngu mosu hndixahan ngayun nixtin hya ne, xicamacjiin tacún. Peru sa xi cuma cuetjuntjun tsëhë xi má ngayun mosu hndixahan ne, naxuntjun yojo nuju ta,
1CO 7:22 tsëhë xi ngu mosu hndixahan xi Nai naja vaxijin me ne, ndaya tjin xi cuma rë Nai naja. Hacuanitjin ni ngu xuta xi hacuiin mosu hndixahan me peru Nai naja cavaxijin rë me ne, mosu hndixahan rë Jesucristu má me.
1CO 7:23 Cojo chjí cavatsë nuju Nina. Vëhë xi mijí rë xi mosu hndixahan rë xuta cuma ngayun.
1CO 7:24 Ngayujun ni ne, ha sacuanitjin ni cún jima ngu ngayun hya xi cavaxijin nuju Nina ne, hacuanitjin ni tángun nduju cojo, xi tjin tangun cjuatacun nuju cojo Nina.
1CO 7:25 Quihndë ne, sacuaha tsëhë xuta xi cjëë cjuaha me chjuun cjëë cjuaha me xihin ne, tsajin ngu cjua xi cavitexa ná Nai naja xi cuichjá cojo nuju. Peru cuichjá cojo nuju sacuatjin tsingátaha cacún, tsëhë xi ngatsë rë cjuandaja xi casua ná Nai naja ne, cuma cumangu tacún cojo ná.
1CO 7:26 Xi má ná ne, ngatsë rë cjuandya xi tjin naja quihndë ne, ngu xihin ne, ndatjin xi cuejña ni cha chuva xi ha tacun cha.
1CO 7:27 Sa xi ha tjin chjuun nuju ne, xicanismuu ná. Hane sa xi tsajin chjuun nuju ne, xicachjuun chjuun.
1CO 7:28 Peru sa xi cuixun ne, tsajin mé jyë́ nuju tjin, hacuaha sa xi ngu na nixti cuixan na ne, tsajin mé jyë́ rë na tjin. Peru sa xi ngayun cuixun ne, hatuxa tjin nuju cjuacjintacun nchunchujun ni cahntsua ndya nuju, hane vëhë ngu cjuacjintacun xi mijí ná xi cuatjun cuma.
1CO 7:29 Peru meje cuichjá cojo nuju ngayujun ni ta ha jemu camachúva nixtin. Vëhë xi hacuiin jercu nicjun yojo nuju tsëhë cjuandya rë nguehe ngasunhndë ta xuta xi tjin chjuun rë me ne, catisahmi cuenda me sacuaha xi tsajin chjuun rë me;
1CO 7:30 xuta xi jihnda me ne, catisahmi cuenda me sacuaha xi hacuiin jihnda me; xuta xi jemu tjin rë me cjuasua ne, catisahmi cuenda me sacuaha xi hacuiin jemu tjin rë me cjuasua; xuta xi vatsë me ne, catisahmi cuenda me sacuaha xi hacuiin tsëhë me xi cavatsë me;
1CO 7:31 hane xuta xi jemu sahmixa cojo yëjë ni xcusun xi tjin ngasunhndë ne, hacuiin cuatjutaha sahmixa me cojo. Cuatjin meje rë xi tsingataha cacun xuta ta, tsëhë xi ngasunhndë xi chutsejen vi ne, hatuxa cjuë.
1CO 7:32 Ngahan ne, meje ná xi ngayun ne, tsajin nuju mé cjuandya. Xuta xi tsajin chjuun rë me ne, marcun rë me tsëhë xa rë Nai naja ta, tsëhë xi meje sahmi me hacutjin xi chuya rë Nai naja.
1CO 7:33 Peru xuta xi tjin chjuun rë me ne, marcun rë me tsëhë cjuandya rë ngasunhndë ta, tsëhë xi meje sahmi me hacutjin xi chuya rë chjuun rë me.
1CO 7:34 Hane xi cuatjin sahmi me ne, ma jo cjuatacun rë me. Hane ngu chjuun xi tsajin xihin rë o sa xi ngu chjuun xungun ne, marcun rë na tsëhë xa rë Nai naja, cojo sa xi cuma tsëhë Nina na cojo yojo rë na cojo hasen rë na. Peru na xi cavixan ne, marcun rë na tsëhë xa rë ngasunhndë ta, tsëhë xi meje sahmi na hacutjin xi chuya rë xihin rë na.
1CO 7:35 Cachjá cuatjin cojo nuju, peru hacuiin xi cuátëcja cjuatacun nuju ta xi ndaja tsujun. Meje ná xi cuanguncujun ngu ndiya rë cjuandaja. Hacuaha meje ná xi tuhun yojo nuju ngundiyaxa ni xi nihñu xa rë Nai naja.
1CO 7:36 Peru sa xi ngu xuta tsingataha cacun me xi cuaaintjin xi sahmi me xi cjëë cuixan me cojo rë na xi tacunvasen cjuavixan rë me cojo, hane na vëhë ne, ha cavechú nixtin rë na xi cuma cuixan na, hacuaha sa xi ha tuxa meje rë xi cuixan na ne, catisahmi me mé xi meje sahmi me. Catixan me cojo rë na ta, tsajin mé jyë́ rë me xi cuatjin sahmi me.
1CO 7:37 Peru ngu sa xuta xi hacuiin sahmi ngujyë xi cuixan me hacuaha ma vëhëhñu me yojo rë me ne, sa xi ha cavejña cacun me xi cuixaain me ne, ndaja sahmi me xi cuixaain me.
1CO 7:38 Vëhë xi me xi vixan cojo rë na xi tacunvasen cjuavixan rë me cojo ne, ndaja sahmi me. Hane me xi vixaain ne, hitsë sa ndaja sahmi me.
1CO 7:39 Ngu chjuun ne, tsajin ndaya tjin na tsëhë xihin rë na jinguyëjë rë xi tacun cha cjuahñu. Peru sa xi cueya xihin rë na ne, ha ndaya tjin na xi cuixan na cojo tu yo ni xi meje rë na, ndastu xi ladu rë Nai naja má cha.
1CO 7:40 Peru xi má ná ne, hitsë sa ndaja cuma rë xahasen rë na sa xi cuejña cuanitjin ni na. Hane tsingátaha cacún xi ngahan ne, hacuaha cojo ngahan jiya Hasen rë Nina cahntsua xahasen naha.
1CO 8:1 Quihndë ne, nguehe cuichjá cojo nuju tsëhë xichinë xi viyuju xcun nina ndyojo. Ha hyan ta ngayejen ni ne, tjin cjuatacun xi hyan. Hya xi jemu cjín cjuatacun xi hyan ne, nihña yehe yojo naja suvaan, peru hya xi tjin naja cjuahmutacun ne, nihña yehe xingueen.
1CO 8:2 Sa xi ngu xuta tsingataha cacun me xi ndaja vëë me ngu cjuatacun ne, cjëë sa cuijnercu me sacuatjin xi meje rë.
1CO 8:3 Peru sa xi ngu xuta hmu cacun me Nina ne, me vëhë ne, vëë Nina me.
1CO 8:4 Quihndë ne, sacuaha cjuatacun tsëhë xichinë xi viyuju xcun nina ndyojo ne, ha hyan ta tsajin camahani mé vengui chjí rë nina ndyojo jingujyë ni ngasunhndë, hacuaha ha hyan ta ngu tutu ni Nina xi tacun me.
1CO 8:5 Handasa xi jemu tjin xi hmí rë nina, sa ngahnga sa nangui ne, hacuaha handasa jemu cjín nina xi cuacun vë hacuaha jemu cjín nai vihi nai vëhë tjin ne,
1CO 8:6 peru xi cuma naja ngayaan ne, ngu tutu ni Nina xi tacun me, me xi Nahmi naja. Me vëhë xi casahmi me ngayëjë ni, hacuaha ngayaan ne, nechan nguehe ngasunhndë xi nihña tutjin xi meje rë me. Hacuaha ngu tutu ni Nai naja Jesucristu xi tacun me, me xi hacuaha cojo casahmi Nina jinguyëjë ni. Hacuaha ngayaan ne, nechan nguehe ngasunhndë ngatsë rë xi cuatjin meje rë Jesucristu.
1CO 8:7 Peru hacuiin yëjë xuta vëë me cjuatacun vëhë. Yahnga xuta ne, ngatsë rë xi cuatjin xcusun rë me hatsëë ne, vutsejen me xichinë vëhë sacuaha ngu cjuatjo xi tsëhë cuaha nina ndyojo. Hane hya xi jinë me ne, jemu choho má cacun me, tsëhë xi, xi má rë me ne, jemu tsavi.
1CO 8:8 Peru xcusun xi chinë ne, visecuaain naja xi chuya rë Nina tsajan. Sa xi xinë ngu xcusun ne, tsajin mé nichajan, hacuaha sa xi xinëë ne, tsajin mé ndaja sacú naja.
1CO 8:9 Nechun cuidadu, ngayun xi vijne rcun xi tsajin mé sahmi rë xi xinë ngu xcusun xi caviyuju xcun nina ndyojo. Nechun cuidadu, sá tu cuechú nixtin xi ngu xuta ladu rë Jesús xi cjëë ndaja cuijnercu cjuachacun rë Nina ne, tsismi cacun me ndiya rë Nina ngatsë rë xcusun xi nihñu.
1CO 8:10 Cuatjin nechun cuidadu ta, tsëhë xi ngayun xi vijnercun ne, sa xi yo scuëë nuju xi tichinu niñu yungun rë nina ndyojo ne, me vëhë ne, ngatsë rë xi cjëë ndaja cuijnercu cjuatacun rë me ne, cojo me cuetju cacun me sinë me xi chinu xi caviyuju xcun nina ndyojo.
1CO 8:11 Xi cuatjin cuma ne, xuta ladu rë Jesús xi cjëë cuijnercu ndaja jan ne, chajá me ngatsë rë cjuatacun nuju xi cuatjin nihñu, handasa Jesucristu cahme me ngatsë rë xuta vëhë.
1CO 8:12 Vëhë xi, xi cuatjin ninguetsun cjuatacun rë xuta xi cuacun cjëë cuijnercu ndaja me ne, hacuiin suvá ni me xi cuacun vëhë xi choho nihñu cojo rë me ta hacuaha cojo Jesucristu.
1CO 8:13 Vëhë xi sa xi xichinë sahmi xi tsismi cacun ngu xuta ladu rë Jesús ndiya rë Nina ne, tsajin nu tsajin nixtin xi cúya sínë sa vëhë, cojo sa xi sahmee xi tsismi cacun ngu xuta ladu rë Jesús jan ndiya rë Nina.
1CO 9:1 Ngahan ne, ngu apóstol ngahan, hane vechú chuva rë xi sahme yëjë ni xcusun xi sahmi ngu apóstol, tsëhë xi ngahan ne, cahvë Nai naja Jesús. Ngayun ne, camá ngayun ladu rë Nai naja, ngatsë rë xi cëjë casahme xa rë me ngajñi nuju.
1CO 9:2 Handasa mijí cumacjain rë yahnga xuta xi apóstol má ngahan ne, peru ngayun ne, macjain nuju ta, tsëhë xi tsejen xi apóstol ngahan ngatsë rë xi ngayun ne, cavisuhun ladu rë Nai naja ngatsë rë cjua xi cachjá cojo nuju.
1CO 9:3 Cuitjin tsicúya cjua vihi tsëhë xuta xi sahmi chuva ná me ndyá ngajñi nuju:
1CO 9:4 Tjin ná chuva rë xi tuhun xi xini xi sihin.
1CO 9:5 Tjin ná chuva rë xi chjihín chjuun xi cuma chjuun niji, sacuatjin rë apóstol xi yahnga cojo xicjin Nai naja cojo Pedru.
1CO 9:6 ¿Há Bernabé cojo ngahan tutu ni xi meje rë xi nihñi xa sehe sacú xi xini xi sihin?
1CO 9:7 Ngu xuta xi má me sindadu ne, ¿há tujún rë suvá me tsicojo me xi sahmi me xa vëhë? Ngu xuta xi sahmi me xitjë ne, ¿há jinii me xitjë xi vunihnga me jan? Ngu xuta xi sahmi cuidadu chu tsánga ne, ¿há hviin me lechi rë chu?
1CO 9:8 Ngahan ne, hacuiin suvá cjuatacun rë xuta xi tichjá ta ley rë Moisés ne, hacuaha cuatjin chja.
1CO 9:9 Xcun ley rë Moisés ne, cuitjin camahindu: “Ngu ndyaja xi visecoo nuju ne, hacuiin nichaan xi sinë chu ta, hacuaha tjin ru chuva rë xi sinë chu tsëhë xa xi sahmi chu.” Cjua vëhë ne, hacuiin meje cuichja xi vityangui cacun Nina tsëhë chu ndyaja ta
1CO 9:10 xi vityangui cacun me ne, tsijin ngayin. Cjua vëhë ne, camahindu ngatsë niji ngayin. Xuta xi vacjan me nangui cojo xuta xi vechjunne me tutjë́ ne, hya xi sahmi me xa vëhë ne, meje rë xi cuetaha cacun me xi sacú rë me hitsë tutjë́ vëhë.
1CO 9:11 Ngayin canitjin cjua rë Nina cahntsua xahasen nuju xingu xingu ngayun. Vëhë xi hacuiin choho tjin sa xi tuhun niji hitsë cjuachaja niji.
1CO 9:12 Sa xi vechú chuva rë xi tuhun cjuachaja rë jingu sa apóstol ne, ¡hitsë sa guan ngayin! Peru ngayin ne, cjëë camahani mé xi chjahyin nuju. Cahndë́ rë vëhë ne, cacaa niji cojo jemu cjín cjuacjintacun, cojo sa xi hacuiin nihñi xi tjin yo xi tsitjungui cjuandajyihi xi chja tsëhë Jesucristu.
1CO 9:13 Ngayun ne, ha hyun ta nahmi xi sahmi me xa cahntsua yungun xi matitjun ne, hacuaha ngajan vaxë me cjuachaja rë me. Cuma cuinújan ne, nahmi xi sahmixa me cojo chu xi sua xuta cjuatjo ngajan ngasunscun ne, hacuaha ngajan faha me xi jinë me.
1CO 9:14 Ha chuva vëhë ni ne, cavitexa Nai naja xi me xi sua machaya rë xuta tsëhë cjuandajyihi xi chja tsëhë Jesús ne, ha xcun xa vëhë ne, ngajan cuaxë me cjuachaja rë me.
1CO 9:15 Peru ngahan ne, cjëë camahani mé xi cjuéhya rë xuta rë yungun. Hane cjua xi titsihindu nuju vi ne, hacuiin tsëhë xi féhya nuju cjuachaja naha. Xi má ná ne, hitsë sa ndaja tsahan xi cueya, xi cuma rë xi chjahátahá rë cjuasua naha xi sahme xa rë Nina tu cjuatjo.
1CO 9:16 Xi suá machaya rë xuta cjuandajyihi xi chja tsëhë Jesucristu ne, tsajin mé má vaxë́ndaja suva yojo naha ta, hatuxa tjin ná xi sahme cuatjin. Jemu chojyihi tsahan sa xi suaan cumachaya rë xuta cjuandajyihi vëhë.
1CO 9:17 Vëhë xi, sa xi ngatsë rë xi meje ná suva xi cuatjin suá machaya rë xuta cjuandajyihi vëhë ne, ha tjin chjí naha. O sa xi sahme handasa mijí ná ne, peru Nina casua ná me xa vëhë.
1CO 9:18 Peru ¿jarë xi chjí naha ni? Chjí naha ne, xi tu cjuatjo ni suá machaya rë xuta cjuandajyihi xi chja tsëhë Jesucristu. Vëhë xi chjí naha, vëhë xi sua rë xahasen naha cjuasua. Cuma cuinújan xi handasa xi tjin ná chuva rë ne, cjëë camahani cjuéhya rë xuta rë yungun xi sua me cjuachaja naha xi sahme xa rë Nai naja.
1CO 9:19 Ngahan ne, ha ndaya tjin ngahan. Hacuiin mosu hndixahan rë xuta má ngahan. Peru sahme sacuaha xi mosu hndixahan rë yëjë ni xuta má ngahan, cojo sa xi cjín sa xuta cuisécoo rë me xi cuisehen me ladu rë Jesucristu.
1CO 9:20 Hya xi tejñayajñe ngajñi rë xuta tjë rë Israel ne, sahme sacuaha sahmi xuta xi cuacun vë, cojo sa xi cjín sa xuta tjë rë Israel cuisécoo rë me xi cuisehen me ladu rë Jesucristu. Hya xi tejñayajñe ngajñi rë xuta xi tjengui me ley rë Moisés ne, sahme sacuaha sahmi xuta xi cuacun vë, handasa hacuiin ngahma gubiernu rë ley vëhë tejña. Cuatjin sahme, cojo sa xi cjín sa xuta xi tjengui ley vë cuisécoo rë me xi cuisehen me ladu rë Jesucristu.
1CO 9:21 Hya xi tejñayajñe ngajñi rë xuta xi faharcuaain ley rë Moisés ne, sahme sacuaha sahmi xuta xi cuacun vë, handasa fahárcun ngahan ley rë Nina, tsëhë xi tejña ngahma gubiernu rë ley rë Jesucristu. Cuatjin sahme, cojo sa xi cjín sa xuta xi faharcuaain ley rë Moisés vë cuisécoo rë me xi cuisehen me ladu rë Jesucristu.
1CO 9:22 Hya xi tejñayajñe ngajñi rë xuta xi cjëë ndaja cuijnercu me cjuachacun rë Nina ne, sahme sacuaha sahmi xuta xi cuacun vë, cojo sa xi cjín sa xuta xi cjëë ndaja cuijnercu me cjuachacun rë Nina cuisécoo rë me xi ndaja cuisehen me ladu rë Jesucristu. Cuma cuinújan ne, sahme sacuaha sahmi yëjë ni xuta, cojo sa xi sacú ná chuva rë xi cuma cuáxëtjë ngujo me.
1CO 9:23 Cuatjin sahme yëjë xcusun vëhë ngatsë rë cjuandajyihi xi chja tsëhë Jesucristu, cojo sa xi hacuaha cojo ngahan satë ná.
1CO 9:24 Ngayaan ne, ha hyan ta cha xi vincha carrera ne, yëjë ni cha sahmi cha ngahñu, peru ngu ni cha caa rë cha xi fehe titjun cha, hane cha vëhë xi fahatsja cha cjuatjo rë. Ha chuva vëhë ni meje rë xi ngayujun ni ne, nihñu ngahñu, cojo sa xi hacuaha sua nuju Nina ngu premiu xi cuma ngascan.
1CO 9:25 Quihndë ne, cha xi cuatjin vincha carrera ne, hya xi vëhëchjine cha yojo rë cha ne, hatuxa jemu viyuju cha cuidadu tsëhë yëjë ni xcusun xi choho sahmi cojo cha. Cuatjin sahmi cha, cojo sa xi sacú rë cha ngu premiu xi ficanii rë. Peru ngayaan xi ladu rë Jesucristu ngayaan ne, cuatjin nihña, cojo sa xi Nina ne, sua naja me ngu premiu xi tsajin nixtin vetsun.
1CO 9:26 Vëhë xi ngahan ne, hacuiin tujyë vánga, hacuiin tujyë sahme ta
1CO 9:27 jemu tsijénda rë yojo naha, hacuaha sahme rë ngujyë xi sahmi hacutjin xi meje ná. Cuatjin sahme, sá tu ha xcun xi ha casuá camachaya rë xuta cjuandajyihi xi chja tsëhë Jesucristu ne, ngahan suva tsichajá.
1CO 10:1 Ngayujun ni ne, meje ná xi hacuiin nichayun xcusun xi cavatju xutachanga naja xi caviyuju nixtin rë Moisés. Ngayëjë ni me xi cuacun vë ne, quiji me sacuatjin quiji yufí, hacuaha yëjë ni me cavatjucja me ndachacun Hani.
1CO 10:2 Hane xi casahmi me cuatjin ne, cuatjin camá xi yëjë ni me cavisehen me ladu rë Moisés.
1CO 10:3 Hacuaha yëjë ni me cajinë me niñu xi casua Nina.
1CO 10:4 Hacuaha yëjë ni me cahvi me nandá xi casua Nina. Cahvi me nandá xi cavetju rë naxi xi casua Nina xi cjue cojo rë me. Hane naxi vëhë ne, hacui Jesucristu.
1CO 10:5 Peru jemu cjín xuta xi cuacun vë xi cachuyiin rë Nina tsëhë me. Vëhë xi ngajan ngu cahndë xín camahani cahme nguehe cahme ngajan me.
1CO 10:6 Cuatjin camá yëjë xcusun vëhë sacuaha ngu ejemplu xi cuma naja, cojo sa xi hacuiin cumameje naja cjuatsehen, sacuatjin camameje rë me xi cuacun vëhë.
1CO 10:7 Hacuaha mijí rë xi chjuhunrcun nina ndyojo sacuatjin casahmi ngujo me xi cuacun vëhë. Cuitjin camahindu xcun xujun rë Nina: “Caviyuju xuta cajinë cahvi me, sehe cavisatjenhnga me quiji casua me cjuasua xahasen rë me.” Cuatjin camahindu.
1CO 10:8 Mijí rë xi nihña cjuatsehen cojo ngu chjuun o sa cojo ngu xihin sacuatjin casahmi ngujo me xi cuacun vëhë. Hane ha nixtin vëhë ni ne, cahme can jyan mil me.
1CO 10:9 Hacuaha mijí rë xi chjahanchuvan Nai naja sacuatjin casahmi ngujo me xi cuacun vëhë, hane cahme me xi cafaha chu yë me.
1CO 10:10 Hacuaha mijí rë xi choho cuisiajmuhmu tsëhë Nina sacuatjin casahmi ngujo me xi cuacun vëhë, hane catsiquehen rë me ángel xi hatuxa tsiquehen naja.
1CO 10:11 Yëjë xcusun vëhë ne, cavatju me xi cuacun vëhë camá sacuaha ejemplu xi cuma naja. Hacuaha camahindu cjua vëhë cojo sa xi sua naja conseju, ngayaan xi nechan quihndë xi ha meje cuijnetaha ngasunhndë.
1CO 10:12 Vëhë xi xuta xi má rë me xi jemu hñu siu cjuatacun rë me xi mangucacun me cojo Nina ne, catiyuju me cuidadu, sá tu chajá me tsëhë ndiya rë Nina.
1CO 10:13 Ngayun ne, hya xi chjaháchuva nuju ne, chjaháchuva nuju sacuaha chjaháchuva rë yëjë xuta. Peru Nina ne, hatuxa cuma cumangu tacuun cojo rë me ta, tsëhë xi me vëhë ne, suaain me cahndë́ xi chjaháchuva nuju cojo ngu chuva rë xi scaain nuju cojo. Hya xi chjaháchuva nuju ne, me vëhë sua me chuva rë hacutjin cuetjuntjun, cojo sa xi scaa nuju hisca xi cuetjuntjun.
1CO 10:14 Vëhë xi ngayujun ni ne, xicavisuhunjñuu cojo xuta xi faharcun me nina ndyojo.
1CO 10:15 Cuitjin tichjá cojo nuju, tsëhë xi jemu xuta quicun cacun ngayun. Nichuvun suvun cjua xi chjá cojo nuju.
1CO 10:16 Ngayaan ne, hya xi hyuun xi hincha copa rë Nai naja ne, jemu ndaja tsajan. Nihña tangun cjuatacun naja cojo Jesucristu xi ninguitsjen hacutjin cavanga jni rë me hya xi cahme me. Hane hya xi chinë pan xi chotooncjan ne, nihña tangun cjuatacun naja cojo Jesucristu xi ninguitsjen hacutjin cavatju me camá xcun cru.
1CO 10:17 Sacuatjin rë pan xi ngu ni má handasa jemu cjín rquí xtotoho ne, hacuanitjin naja ngayaan ta tjin tangun cjuatacun naja cojo xingueen, handasa jemu cjín má ngayaan. Cuatjin ta, tsëhë ngu ni pan ne, chinë ngayejen ni hacuaha ngu ni má ngayaan.
1CO 10:18 Ningatuhun tacún hitsë tsëhë xuta tjë rë Israel. Xuta xi vejña me chu xi cahme sacuaha cjuatjo xcun Nina ne, sahmi tangun me cjuatacun rë me cojo Nina.
1CO 10:19 Xi chjá cuatjin ne, ¿há chjá xi nina ndyojo ne, jemu vengui chjí rë? ¿Há chjá xi yojo xi cavejña xcun nina ndyojo ne, jemu vengui chjí rë?
1CO 10:20 Hacuiin ta, yojo xi vejña me ne, xcun xitsehen vejña me, hacuiin xcun Nina. Quihndë ne, mijí ná xi ngayun ne, nihñu tangun cjuatacun nuju cojo xitsehen.
1CO 10:21 Ngayujun ni ne, cumaji siuhun xi xincha copa rë Nai naja hane hacuaha siuhun xi xincha copa rë xitsehen. Hacuaha cumaji xinu xi viyuju xcun Nina hane hacuaha xinu xi viyuju xcun xitsehen.
1CO 10:22 ¿Há ndatjin xi nihña xi cuma chini Nai naja? ¿Há hitsë sa hñu ngayaan xi cuma rë me? ¡Hacuiin!
1CO 10:23 Yahnga ngayun ne, nújun cuitjin: “Cuma nihña yëjë ni xcusun.” Cuatjin nújun. Cuma, peru hacuiin yëjë xcusun xi ndaja tsajan. “Cuma nihña yëjë ni xcusun”, peru hacuiin yëjë xcusun xi cuisecoo naja xi cuanguen nduju cojo cjua rë Nina.
1CO 10:24 Mijí rë xi jima ngu ngayaan nihña ngahñu xi ndaja tsajan suvaan ta xi meje rë ne, nihña ngahñu xi ndaja tsëhë xingueen.
1CO 10:25 Xinu tu mé ni hiscan xi xteña yojo. Xicachjinengunsuun vihi vëhë tsëhë yojo jan ngatsë rë xi chuyiin rë cjuatacun nuju tsëhë yojo xi cavejña xcun nina ndyojo.
1CO 10:26 Cuatjin nihñu ta, xcun xujun rë Nina ne, cuitjin camahindu: “Ngasunhndë cojo yëjë ni xi tjin ngasunhndë ne, tsëhë Nina.” Cuatjin camahindu.
1CO 10:27 Sa xi ngu xuta xi manguaain cacun cojo Jesucristu cuichja me xi cuangun xinu niñu ndava me ne, tángun. Hacuaha xinu tu mé ni xcusun xi cuiyuju me xi xinu. Xicachjinengunsuun vihi vëhë tsëhë xi caviyuju me jan ngatsë rë xi chuyiin rë cjuatacun nuju tsëhë yojo xi caviyuju xcun nina ndyojo.
1CO 10:28 Peru sa xi yo sua cumachaya nuju xi yojo jan ne, cavejña xcun ngasunscun ne, xicachinuu yojo jan ngatsë rë me xi casua camachaya nuju hacuaha ngatsë rë xi chuyiin rë cjuatacun rë me tsëhë yojo xi viyuju xcun nina ndyojo. Hacuiin ngatsë rë xi chuyiin nuju suvun. Peru tjin yahnga xuta xi cuma cjuinenguise me cuitjin: “¿Mé má chjaháchuva rë xcusun xi ngahan cuma sahme ngatsë rë xi chuyiin rë cjuatacu rë jingu sa xuta tsëhë?
1CO 10:30 Sa xi suá nacuechji rë Nina tsëhë xcusun xi jínë ne, ¿mé má choho chja me tsahan ngatsë rë xi cuatjin jínë ni?” Cuatjin cjuinenguise me.
1CO 10:31 Vëhë xi, sa xi xinu o sa xi siuhun o sa xi tu mé ni xcusun xi nihñu ne, meje rë xi nihñu yëjë cojo sa xi nihñu jyë nihñu hnga Nina.
1CO 10:32 Mijí rë xi nicjun rë xuta, há xi xuta tjë rë Israel ne, o há xi xutaxín ne, o há xi xuta rë yungun rë Nina.
1CO 10:33 Hya xi sahme tu mé ni xcusun ne, sahme ngahñu xi chuya rë yëjë xuta tsahan. Sahmee ngahñu xi ndaja tsahan suva ta sahme ngahñu xi ndaja tsëhë jemu cjín xuta, cojo sa xi cuetjutje me.
1CO 11:1 Vëhë xi ngayujun ni ne, meje rë xi nihñu sacuatjin sahme ngahan, sacuaha ngahan xi sahme sacuatjin casahmi Jesucristu.
1CO 11:2 Ngayujun ni ne, ngahan ne, vaxë́ndaja nuju ta, tsëhë xi yëjë ni hora ne, vitsjen nuju ngahan, hacuaha tivangun nduju cojo yëjë xcusun xi casuá camachaya nuju.
1CO 11:3 Peru meje ná xi cumachaya nuju ta me xi matitjun tsëhë jima ngu xihin ne, hacui Jesucristu, hane xi matitjun tsëhë ngu chjuun ne, hacui xihin rë na, hane xi matitjun tsëhë Jesucristu ne, hacui Nina.
1CO 11:4 Sa xi ngu xihin titsa rcu cha hora xi sahmi cha oración rë cha o sa hora xi chja cha cjua rë Nina cojo xuta ne, jemu choho sahmi cha cojo Jesucristu, me xi matitjun tsëhë cha.
1CO 11:5 Hane sa xi ngu chjuun tsajin titsa rcu na hora xi sahmi na oración rë na o sa hora xi chja na cjua rë Nina cojo xuta ne, jemu choho sahmi na cojo xihin rë na, cha xi matitjun tsëhë na. Ha tangun ni sacuaha xi casejnu rë rcu na.
1CO 11:6 Sa xi ngu chjuun vetsaain na rcu na ne, hacuaha catisejnu rë. Peru sa xi sava tsejen xi xtisun rë tsjarcu na o sejnu rë ne, catetsa na rcu na.
1CO 11:7 Xuta xi xihin ne, mijí rë xi titsa rcu me ta, me vëhë ne, matitjun me sacuatjin matitjun Nina hacuaha tsingacun me hacutjin jyë hnga Nina cojo Hasen rë me. Peru yachjin ne, tsingacun na hacutjin yehe hnga xuta xi xihin cojo cjuatacun rë me.
1CO 11:8 Cuatjin ta hya xi casahmi Nina xuta ne, titjun casahmi me ngu xihin, sehe cafaha me ngu rquí ninda rë xihin jan casahmi me ngu chjuun.
1CO 11:9 Hacuaha xuta xi xihin ne, hacuiin catsindaja Nina me ngatsë rë yachjin ta yachjin ne, catsindaja Nina ngatsë rë xuta xi xihin.
1CO 11:10 Vëhë xi ngatsë rë xi tivutsejen ángel ne, yachjin ne, meje rë xi cuetsa na rcu na, cojo sa xi tsingacun na xi ngahma gubiernu rë xihin ran siu na.
1CO 11:11 Ngayejen ni ngayaan xuta ladu rë Jesucristu ne, hacuiin suvá ni chjuun o sa xi suvá ni xihin xi vengui chjí rë me ta catsijo xcusun ni ngayaan vengui chjí naja.
1CO 11:12 Quixi xi cafaha Nina ngu rquí ninda rë xihin xi casahmi me chjuun xi tjun tjun casahmi me. Peru quihndë ne, ngayaan xihin ne, hacuaha tsin ngayaan tsëhë yachjin. Peru Nina casahmi me ngayëjë ngarca.
1CO 11:13 Ngayujun ni ne, ha hyun ta ngu chjuun ne, ndajin tjin xi cuetsaain na rcu na hya xi sahmi na oración rë na cojo Nina.
1CO 11:14 Suvá tsejen xi jemu cjuasava xi cuma rë ngu xihin sa xi nduju tsjarcu cha.
1CO 11:15 Peru yachjin ne, ndaja tsejen na xi nduju tsjarcu na ta, tsëhë xi Nina casua me xi cuetsa rë rcu na.
1CO 11:16 Peru sa xi yo meje cuichja xi ndajin tjin xcusun vëhë ne, catamachaya rë ta ngayin cojo ngayujun ni xuta rë yungun ne, ha vëhë ni xcusun naja.
1CO 11:17 Nguehe tsihindu nuju ngujo cjua. Vaxeenndajan nuju ta, tsëhë xi hya xi matangun ngayun xi chjuhunrcun Nina ne, cahndë́ rë xi ndaja cuetjucaa tsujun ne, tu chohotjin vetju.
1CO 11:18 Xi tjutjun ne, fehe cjua tsahan xi hya xi cuatjin matangun ngayun ne, hacuiin ngu tangun ni má cjuatacun nuju. Hane ngahan ne, macjain ná hitsë.
1CO 11:19 Xi má nuju ne, ¡hatuxa meje rë xi cuatjin cuma, cojo sa xi cuma tsejen yo xi tsëhë jain Nina!
1CO 11:20 Hya xi matangun ngayun ne, hacuiin comida rë Nai naja xi chinu ta,
1CO 11:21 hora xi chinu niñu ne, jima ngu ngayun vangun titjun chjuhun comida nuju suvun xinu. Hane ngujo ngayun ne, hisca vojo sa nuju. Hane ngujo nga ngayun ne, hisca camachuhun.
1CO 11:22 ¡Sacuaha xi tsajin ndya nuju xinu siuhun! O sa tsajin ne, sacuaha xi nihñuchuvun xuta ladu rë Nina hacuaha chandunsavun xuma me xi tsajin rë. ¿Mé cuichjá cojo nuju ni? ¿Há cuáxëndaja nuju? ¡Xi cuatjin nihñu ne, cumaji!
1CO 11:23 Cjua xi casuá camachaya nuju ne, hacui cjua xi cafahántsa tsëhë Nai naja xi chja cuitjin: Nguixun xi camá entregadu Nai naja Jesús ne, tacun me cojo tejó xuta ladu rë me xi sinë nguixun me tsëhë suhi Pascua. Hane hora vëhë ne, cafaha me ngu pan.
1CO 11:24 Hane xi cafë casua me nacuechji rë Nina ne, cavotohocja me pan jan, sehe cachja me cuitjin: “Vihi ne, yojo naha xi cueya ngatsë nuju. Cuitjin nihñu xcusun vihi yasen ni, cojo sa xi ninguitsjun ná.” Cuatjin cachja Jesús.
1CO 11:25 Hane xi cajnetaha cajinë nguixun me ne, hacuanitjin ni cafaha me copa, sehe cachja me cuitjin: “Xan vihi ne, vihi jni naha xi sahmichihin rë compromisu xatsë xi tisahmi Nina cojo xuta. Cuitjin nihñu xcusun vihi jima ngu ndiya xi siuhun cuitjin, cojo sa xi ninguitsjun ná.” Cuatjin cachja me.
1CO 11:26 Vëhë xi jima ngu ndiya xi tichinu pan vëhë hacuaha tjihyún xi hincha copa vëhë ne, tininguitsjun tsëhë cjuaveya rë Nai naja. Hane cuanitjin cjín ni cumá hisca hya xi cuinduva nga me.
1CO 11:27 Ngajan xi tu yo ni xi tujyë jinë pan vëhë o sa xi hvi xan vëhë xcun Comida tsëhë Nai naja ne, quitjen jyë́ xi tsixcuehyu yojo rë Nai naja, quitjen jyë́ xi tsixcuehyu jni rë me.
1CO 11:28 Vëhë xi meje rë xi jima ngu ngayaan ne, nichuvan suvaan cjuatacun naja, sehe xinë pan jan hacuaha siuhun xan jan ta,
1CO 11:29 tsëhë xi yo xi tsinguitsjiin yojo rë Nai naja hora xi sinë cuihi xcusun vëhë ne, sacú rë ngu castigu xi cuatjin tujyë jinë hvi.
1CO 11:30 Vëhë xi jemu cjín xuta tsëhë ngajñi nuju ne, ndaya tjin cacun me hacuaha hmu rë me; yahnga nga me ne, hisca cahme me.
1CO 11:31 Peru sa xi ngayaan ndaja nichuvan suvaan cjuatacun naja ne, Nai naja ne, hacuaha sahmii naja me castigu.
1CO 11:32 Peru sa xi Nai naja sahmi naja me castigu ne, cuatjin sahmi me cojo sa xi cueyaquixi naja me ndiya hane hacuiin tangun cuma ngayaan castigu cojo xuta tsehen.
1CO 11:33 Vëhë xi ngayujun ni ne, hya xi cumatangun ngayun xi xinu niñu ne, tinechunyun xingun xingu xingu ngayun.
1CO 11:34 Sa xi tjin yahnga ngayun xi jemu vojo nuju ne, cojo tjun ni xinu ngajan ndya nuju, cojo sa xi hacuiin sahmi nuju Nina castigu xi cuatjin vinechunyuun xingun. Quihndë ne, sacuaha cjuacjintacun xi yahnga ne, hya xi cuinduvatjëngë nuju ne, hya sahmechehen.
1CO 12:1 Ngayujun ni ne, meje ná xi cuijnercun sacuaha tsëhë cjuatjo xi cuacun sua naja Nina.
1CO 12:2 Ngayun ne, ndaja hyun xi hya xi cjëë cuisuhun ladu rë Nina ne, tujyë caningatuhun cachjuhunrcun nina ndyojo xi hatuxa tsajin cjuahñu rë.
1CO 12:3 Vëhë xi meje ná xi cuijnercun xi ngu xuta xi tichja me ngu cjua xi casua Hasen rë Nina me ne, hatuxa cuichjaain me cjua vihi: “¡Jesús ne, catji me cojo xitsehen!” Hacuaha suvá ni xuta xi jiya Hasen rë Nina cahntsua cjuatacun rë me xi cuma cuichja me cjua vihi: “¡Jesús ne, Nai naha me!”
1CO 12:4 Quihndë ne, jemu cjín xcusun cjuatjo xi tjin, peru suvá ni Hasen rë Nina xi sua naja yëjë cjuatjo vëhë.
1CO 12:5 Hacuaha jemu cjín xcusun xa rë Nina xi tjin, peru suvá ni Nai naja xi suaxa naja me.
1CO 12:6 Hacuaha hacuiin ngu chihin xcusun xa xi Nina sahmi me xcun cjuahñu naja, peru ngu ni Nina sahmi me vëhë ngajñi jima ngu jima ngu ngayaan.
1CO 12:7 Nina sahmi me xi ma tsejen xi jiya Hasen rë me cahntsua xahasen naja xingu xingu ngayaan, cojo sa xi ndaja tsajan ngajñi naja ngayejen ni.
1CO 12:8 Ngu xuta ne, jemu vechú cjuatacun rë me hya xi chja me ngu cjua xi sua Hasen rë Nina me. Hane ngu nga xuta ne, jemu ndaja vijnercu me hya xi chja me ngu cjua xi sua Hasen rë Nina me.
1CO 12:9 Hane ngu nga xuta ne, ha Hasen vëhë ni ne, sahmi xi ndaja mangucacun me cojo Nina. Hane ngu nga xuta ne, ha Hasen vëhë ni sahmi xi ma sahmi me xi mandaja xuta hmu rë.
1CO 12:10 Hane ngu nga xuta ne, fahatsja me cjuatacun xi sahmi me cjuarcun, hane ngu nga xuta ne, fahatsja me cjuatacun xi cuichja me ngu cjua xi sua Nina me. Ngu nga me ne, fahatsja me cjuatacun xi cuijnercu me mé xcusun hasen catsingatju ngu cjuatacun xi cafahatsja ngu xuta, ¿há hasen ndaja?, o ¿há hasen tsehen? Ngu nga xuta ne, fahatsja me cjuatacun xi cuichja me ngujo xcusun hne xi hvíin me. Hane ngu nga me ne, fahatsja me cjuatacun xi sua me machaya naja mé vijne xi cuacun vëhë.
1CO 12:11 Ngu tu tu ni Hasen rë Nina xi sahmi yëjë cjuandaja vëhë, hacuaha hacui ni Hasen rë Nina xi sua naja jima ngu ngayaan hacutjin xi chuya rë.
1CO 12:12 Ha hyan ta yojo rë ngu xuta ne, tjin tsja, tjin ntsacu, tjin nguisin, tjin jingusa cahndë́ tsëhë. Peru yëjë ni cahndë́ vëhë ne, má ngu ni yojo rë xuta. Hacuaha cuanitjin rë Jesucristu.
1CO 12:13 Hacuaha cuanitjin naja ngayaan ta ngayejen ni ne, hya xi caxtenda ngayaan, handasa xuta ladu rë Nina o sa xutaxín, handasa mosu hndixahan o sa xuta xi ndaya tjin má ngayaan ne, peru camá ngayaan sacuaha ngu ni yojo ngatsë rë ngu tu tu ni Hasen rë Nina. Hacuaha ngayejen ni ne, ngu tu tu ni Hasen rë Nina xi cavisehen cahntsua xahasen naja.
1CO 12:14 Cuatjin ta yojo rë ngu xuta ne, hacuiin ngu cahndë́ ni tjin rë ta jemu cjín cahndë́ tjin rë.
1CO 12:15 Ntsacun ne, cuma cuichja cuitjin: “Ngatsë rë xi hacuiin ntsun má ngahan ne, vëhë xi hacuiin tsëhë yojo nuju má ngahan.” Cuatjin cuichja. Peru handasa cuatjin cuichja ne, hacuiin vëhë sahmi xi hacuiin tsëhë yojo naja má.
1CO 12:16 Hacuaha tyjavañujú nga ne, cuma cuichja cuitjin: “Ngatsë rë xi hacuiin túxcun má ngahan ne, vëhë xi hacuiin tsëhë yojo nuju má ngahan.” Cuatjin cuichja. Peru handasa cuatjin cuichja ne, hacuiin vëhë sahmi xi hacuiin tsëhë yojo naja má.
1CO 12:17 Sa xi suvá tuxcun má yëjë yojo naja ne, ¿hacutjin cuinuhyan? O sa xi suvá tyjavañujú má yëjë yojo naja ne, ¿hacutjin cuijné naja?
1CO 12:18 Peru Nina ne, caviyujutahá me jima ngu cahndë́ tsëhë yojo naja tucutjin ni xi cachuya rë me.
1CO 12:19 Sa xi yëjë ni yojo naja má ngu ni ntsan o sa xi ngu ni tuxcun ne, vëhë ne, hisca hacuiin yojo naja hmí rë.
1CO 12:20 Cuatjin xi jemu cjín cahndë́ xi cuacun vëhë xi má ngu ni yojo naja.
1CO 12:21 Quihndë ne, tuxcun ne, cumaji cuichja xi mamijí rë ntsan, o sa rcuun ne, cumaji cuichja xi mamijí rë ntsacun ta,
1CO 12:22 xi cjuaquixi ne, cahndë́ tsëhë yojo naja xi má naja xi hitsë sa tsavi ne, vëhë cahndë́ xi hitsë sa mameje.
1CO 12:23 Hane cahndë́ tsëhë yojo naja xi hitsë sa chjaharcuaain rë ne, vëhë cahndë́ xi hitsë sa ndaja nicaja rë. Hane cahndë́ tsëhë yojo naja xi má naja xi mijí rë xi ningacun rë ne, vëhë cahndë́ xi hitsë sa ndaja cuidadu má.
1CO 12:24 Peru hacuiin sahmi ngujyë nihña cuatjin cojo cahndë́ tsëhë yojo naja xi ma ningacun rë. Nina ne, hya xi catsindaja me yojo naja ne, casahmi me xi hitsë sa chjahárcun rë cahndë́ xi hitsë sa tsavi.
1CO 12:25 Cuatjin casahmi Nina yojo naja, cojo sa xi ngu chihin ni sahmixa yëjë yojo naja, hacuaha yëjë ni cahndë́ tsëhë yojo naja ne, ngu tangun ni marcun rë tsëhë xicjin.
1CO 12:26 Hane sa xi ngu cahndë́ tsëhë yojo naja choho vatju má ne, hacuaha cojo sa yëjë cahndë́ tsëhë yojo naja choho má rë. O sa xi ngu cahndë́ tsëhë yojo naja vaxëndaja xuta ne, hacuaha cojo yëjë sa cahndë́ tsëhë yojo naja ndamá rë.
1CO 12:27 Quihndë ne, ngayejen ni xuta ladu rë Nina ne, sacuaha yojo rë Jesucristu má ngayaan, hane jima ngu ngayaan ne, má ngayaan sacuaha ngu cahndë́ tsëhë yojo rë me.
1CO 12:28 Hane ngajñi naja ngayaan xuta ladu rë Nina ne, tjuntjun ne, caviyuju me apóstol; xi ma jo ne, caviyuju me profeta; xi ma jyan ne, caviyuju me xuta xi vicuya cjua rë me; hane xi cjui sa ne, caviyuju me xuta xi ma sahmi cjuarcun, cojo xuta xi ma sahmi xi mandaja xuta hmu rë, xuta xi visecoo me jingu sa xuta, xuta xi vitexa naja, xuta xi ma chja me ngu hne xi hvíin me mé vijne.
1CO 12:29 Tsëhë cjuatjo vihi ne, hacuiin yëjë vihi satë naja jimangu yaan ta, ¿há ngayejen ni má ngayaan apóstol ni? ¿Há ngayejen ni má ngayaan profeta ni? ¿Há ngayejen ni vicuyan cjua rë Nina ni? ¿Há ngayejen ni ma nihña cjuarcun ni?
1CO 12:30 ¿Há ngayejen ni ma nihña xi mandaja xuta hmu rë ni? ¿Há ngayejen ni ma nújan hne xi hisca núhyaan mé vijne ni? ¿Há ngayejen ni ma tahan machaya rë xuta mé vijne hne vëhë ni?
1CO 12:31 Vëhë xi meje rë xi ngayun ne, catamameje nuju cjuatjo rë Nina xi hitsë sa vengui chji rë. Quihndë ne, tsingácun nuju ngu ndiya xi hitsë sa jercu ndaja.
1CO 13:1 Ngahan ne, sa xi cuichjá yëjë hne rë xuta hacuaha cuichjá hne rë ángel, peru tsajin ná cjuahmutacun ne, tangun ngahan cojo ngu quicha xi choho fane o sa ngu quicha xi hmí platillu xi jercu fane camahani.
1CO 13:2 Sa xi cuichjá ngu cjua xi sua ná Nina, sa xi vijnercú yëjë cjua rë Nina xi tjihma, sa xi hvë yëjë cjuatacun, hacuaha sa xi ma tsiniya ngu naxi ngatsë rë xi jercu ndaja mangucacún cojo Nina, peru tsajin ná cjuahmutacun ne, tsajin mé vengui chjí naha.
1CO 13:3 Sa xi suá rë xuta yuma yëjë xi tjin ná, hacuaha hisca suá yojo naha xi cueti, peru tsajin ná cjuahmutacun ne, tsajin mé machjirëhë ná xi cuatjin sahme.
1CO 13:4 Hya xi tjin naja cjuahmutacun ne, hacuaha jyë tacun, ndaja ngayaan, hacuiin chini ngayaan, hacuiin xta ngayaan, hacuiin nihña yehe suvaan yojo naja,
1CO 13:5 hacuiin xcuahya ngayaan, hacuiin meje naja xi suvaan ni ndaja tsajan, hacuiin ma cjan naja, hacuiin veyantacun cjuatsehen xi sahmi xuta cojo naja.
1CO 13:6 Xi tjin naja cjuahmutacun ne, tsajin mé ndama naja tsëhë cjuatsehen ta xi ndama naja ne, tsëhë cjuaquixi.
1CO 13:7 Xi tjin naja cjuahmutacun ne, ngajñi rë tu mé ni cjuacjintacun ne, hatuxa jyë tacuun, hatuxa mangu tacuun, hatuxa vetahan tacun, hatuxa caa naja.
1CO 13:8 Cjuahmutacun ne, tsajin nixtin xi cjuë. Peru cuechú nixtin xi ha quihndë suaain sa Nina cjua xi cuichja profeta, ha quihndë cuichjaain sa xuta hne xi vijnii rcu me, hacuaha ha quihndë suaain sa Nina cjuatacun xi ndaja cuijnercu ngu xuta cjua rë me.
1CO 13:9 Cuatjin cuma ta cjua rë Nina ne, sehe hitsë xi vijnercuun, hacuaha sehe hitsë cjua rë Nina xi chja profeta.
1CO 13:10 Peru hya xi cjuehe me xi vëë chichihin yëjë cjua rë Nina ne, hya cjuë xi tsë tsë ni hyan.
1CO 13:11 Hya xi lihndi ngahan ne, cavisiajme sacuaha visiajmi langa, catsingátaha cacún sacuaha tsingataha cacun langa, hacuaha cjuatacun naha ne, sacuaha cjuatacun rë langa. Peru xi camachangá ngahan ne, cavejñáxen xcusun rë langa.
1CO 13:12 Quihndë ne, sehe hitsë vijnercuun cjua rë Nina sacuaha tsejen naja hya xi chutsejenyan ni ngu speju xi hacuiin ndaja tsejen. Peru cuechú nixtin xi chutsejen xcun cojo xcun. Quihndë ne, sehe hitsë xi vijnercú. Peru cuechú nixtin xi chichihin ni cuijnercú, sacuatjin vëë ndaja ná Nina.
1CO 13:13 Quihndë ne, tjin jyan xcusun xi nihña xi tsajin nixtin xi cjuë. Tjun ne, xi mangu tacuun cojo Nina. Xi má jo ne, xi vetahan tacun Nina. Xi má jyan ne, xi tjin naja cjuahmutacun. Peru xi hitsë sa matitjun ngajñi rë xi catsijyan vëhë ne, xi tjin naja cjuahmutacun.
1CO 14:1 Quihndë ne, nihñu ngahñu xi tjin nuju cjuahmutacun. Hacuaha catamameje nuju xi sua nuju Nina cjuatjo rë me. Peru hitsë sa chjahyun rë me cjuatacun xi cuinújun cojo xuta ngu cjua xi sua nuju me ta,
1CO 14:2 xuta xi chja me ngu hne xi hvíin me mé vijne ne, hacuiin chja me cojo xuta ta suvá ni Nina chja me cojo ta, tsëhë xi tsajin yo vijnercu. Hasen rë me sahmi xi chja me cjua xi tsajin yo vëë.
1CO 14:3 Peru me xi chja cjua xi casua Nina me ne, chja me cojo xuta, cojo sa xi cuisecoo me xuta hacuaha sua rë me cjuetacun.
1CO 14:4 Xuta xi chja me ngu hne xi hvíin me mé vijne ne, visecoo suvá rë me yojo rë me. Peru xuta xi chja me ngu cjua xi casua Nina me ne, visecoo rë yëjë xuta rë yungun.
1CO 14:5 Ngayujun ni ne, meje ná xi cuma cuinújun hne xi vijniircun, peru hitsë sa meje ná xi chjuhunntsun cjuatacun xi cuinújun cojo xuta ngu cjua xi sua nuju Nina ta xuta xi chja me cojo xuta ngu cjua xi sua Nina me ne, hitsë sa matitjun me xi cuma rë me xi chja hne xi vijniircuun. Peru sa xi cuma cuichja me cojo naja mé vijne hne vëhë ne, ndatjin ta cuisecoo naja ngayejen ni xuta rë yungun xi cuatjin sahmi me.
1CO 14:6 Vëhë xi hya xi cjuë́tjëngë nuju ne, venguiin chjí rë xi cuichjá cojo nuju ngu hne xi vijniircun. Xi vengui chjí rë ne, hacui xi suá cumachaya nuju ngu cjua xi casua ná Nina, o sa xi cuichjá cojo nuju ngu cjuatacun xi sua Nina, o sa xi cuicuyá nuju ngu cjua rë Nina o ngu cjuachacun.
1CO 14:7 Cuma cuinújan ne, sa xi ngu tyjo o sa ngu arpa hacuiin ndaja fane ne, hisca hyaan mé pieza fane.
1CO 14:8 Hacuaha sa xi ngu tyjo rë sindadu hacuiin ndaja sua xta rë ne, tsajin yo cuëhëchjine rë xi cjue xcun si.
1CO 14:9 Hacuanitjin nuju ngayun ta sa xi cojo ntsuvun nújun ngu cjua xi nuhyaain rë ne, tsajin yo xi cuijnercu cjua vëhë ta sacuaha xi ngajñi tjo ni nújun.
1CO 14:10 Nguehe ngasunhndë ne, hisca hyaan há cjín xcusun hne tjin, hane yëjë ni ne, tjin mé vijne.
1CO 14:11 Peru sa xi vihndeen ngu hne ne, sacuaha ngu xuta ngu nangui ngahan xi cuma rë xuta xi tichja cojo ná jan, hacuaha me vëhë ne, sacuaha xuta ngu nangui me xi cuma ná ngahan.
1CO 14:12 Vëhë xi quihndë ta ngayujun ni jemu meje nuju cjuatjo rë Nina ne, nihñu ngahñu xi sacú nuju ngu cjuatjo xi visecoo rë yëjë sa xuta rë yungun.
1CO 14:13 Vëhë xi xuta xi chja me ngu hne xi hvíin me mé vijne ne, catjehya rë me Nina cojo sa xi cuma suacuenda me mé vijne.
1CO 14:14 Sa xi sahme oración naha cojo ngu hne xi vijniircú ne, hasen naha ne, sahmixa, peru cjuatacun naha ne, sahmixaain.
1CO 14:15 ¿Hacutjin sahme ni? Sahme oración naha cojo hasen naha, hacuaha sahme oración naha cojo cjuatacun naha. Së́ cojo hasen naha, hacuaha së́ cojo cjuatacun naha.
1CO 14:16 Sa xi ngayun nihñuu cuatjin ne, hya xi tuhun nacuechji rë Nina cojo hasen nuju ne, cumaji cuichja xuta xi yahnga sa: “Cuatjin jain” ta, tsëhë xi cjua xi nújun ne, vijniircu me.
1CO 14:17 Handasa jemu ndaja tuhun nacuechji rë Nina, peru xuta xi yahnga ne, visecuaain camahani rë me.
1CO 14:18 Súa nacuechji rë Nina ta hitsë sa chjá ngahan hne xi vijniircú xi cuma nuju ngayujun ni.
1CO 14:19 Peru hya xi ma tangun ngahan cojo xuta ngajan yungun ne, hitsë sa chuya ná xi cuichjá ndastu hñú cjua cojo cjuatacun naha cojo sa xi cuicuyá rë xuta, xi cuma rë xi cuichjá të mil cjua cojo ngu hne xi vijniircu me.
1CO 14:20 Ngayujun ni ne, ha quihndë xicaningatuun tacún sa sacuatjin tsingataha cacun quihndi. Sacuatjin rë ngu quihndi xi hisca hvíin mé xi hmí rë cjuatsehen ne, cuatjin meje rë xi hacuaha hyuun. Peru xi cojo cjuatacun nuju ne, meje rë xi ningatuhun tacún sacuaha tsingataha cacun ngu xuta changá.
1CO 14:21 Xcun xujun rë Nina ne, camahindu cjua xi cachja me cuitjin: “Ngahan ne, tsingátju xuta ngu nangui xi chja jingu sa hne, hane hne rë me cuichja me cjua naha cojo yëjë xuta ladu naha. Peru handasa cuatjin sahme ne, cuetaharcuaain me cjua naha, chja Nina.” Cuatjin camahindu.
1CO 14:22 Vëhë xi cjuatjo xi casua naja Nina xi ma nújan hne xi hisca hyaan mé vijne ne, hacuiin ngatsë rë xuta xi ha mangu cacun cojo Nina xi casua me ta ngatsë rë xuta xi tsitjungui cjua rë me. Hane cjuatjo xi ma nújan ngu cjua xi sua naja Nina ne, hacuiin ngatsë rë xuta xi tsitjungui cjua rë me xi casua me ta ngatsë rë xuta xi ha mangu cacun me cojo rë me.
1CO 14:23 Vëhë xi hya xi matangun ngayujun ni ngayun xuta rë yungun, sa xi ngayujun ni nújun ngu hne xi hisca hyuun mé vijne hane cjuehe ngujo cha xi hvíin cjua rë Nina hacuaha hisca manguaain cacun cha cojo me ne, ¿hácuiin tsingataha cacun cha xi sca nuju ni?
1CO 14:24 Peru sa xi ngayujun ni ngayun nújun ngu cjua xi sua nuju Nina hane cjuehe ngu cha xi manguaain cacun cojo Nina hacuaha hisca hvíin cha cjua rë me ne, xi vihndë cha yëjë cjua vëhë ne, cuijnercu cha xi jemu tjin jyë́ rë cha, suvá ni cha tsichuva cha cjuatacun rë cha,
1CO 14:25 hacuaha cjua xi hinchahma ngajñi rë cjuatacun rë cha ne, cuitsjen rë cha. Ngajan xi cjue cuiticjaxcun cha, cjuaharcun cha Nina. Hacuaha tsinguixi cha xi tacun jain Nina nguehe ngajñi nuju.
1CO 14:26 Ngayujun ni ne, cuitjin vijne cjua xi titsihíndu nuju. Hya xi matangun ngayujun ni ne, ngu ngayun ne, sun tsëhë Nina, ngu nga ngayun ne, vicuyun ngu cjua rë Nina, ngu nga ngayun ne, nújun ngu cjua xi casua nuju Nina, ngu nga ngayun ne, nújun ngu hne xi hisca hyuun mé vijne, hane ngu nga ngayun ne, nújun mé vijne cjua rë hne jan. Xi meje rë ne, yëjë ni xcusun xi nihñu vë ne, cuatjin nihñu cojo sa xi cuisecuun xingun ngajñi nuju.
1CO 14:27 Sa xi tjin xuta xi cuichja me hne xi vijniircun ne, catichja jo o sa xi jyan ni me, hacuaha chuva ngu me catichja me. Hane meje rë xi cuinújun ngu ngayun mé vijne cjua xi cachja xuta xi cuacun jan.
1CO 14:28 Peru sa xi tsajin ngu ngayun xi cuma nihñu cuatjin ngajan yungun ne, catiyujujyuu ni xuta xi cuacun vë. Catichja suvá ni me cahntsua xahasen rë me, o sa suvá ni Nina catichja me cojo me.
1CO 14:29 Hacuanitjin ni sa xi tjin xuta xi cjuahahtsja me ngu cjua tsëhë Nina ne, jo jyan ni me catichja me, hane yëjë sa ngayun ne, nichuvun cjua vëhë.
1CO 14:30 Sa xi ngu ngayun xi nechun ndyá chjuhunntsun ngu cjua tsëhë Nina ne, catisejyu me xi titjun tichja jan.
1CO 14:31 Xi cuatjin ne, ngayujun ni cuma cuinújun chuva ngu chuva ngu ngayun ngu cjua xi chjuhunntsun tsëhë Nina, cojo sa xi hacuaha cojo yëjë sa ngayun ne, cumachaya nuju hacuaha sacú nuju cjuetacun.
1CO 14:32 Xuta xi chja me ngu cjua xi fahatsja me tsëhë Nina ne, cjua vëhë cuitexa me cjuatacun rë suvá me ta,
1CO 14:33 tsëhë xi Nina ne, chuyiin rë me xi tujyë nihña ta xi chuya rë me ne, ngu cjuandaja cjuajeya. Sacuatjin xcusun xi nihña ngayejen ni xuta ladu rë Nina ne,
1CO 14:34 yachjin ne, mijí rë xi cojo na cuichja na hya xi tjin tangun ngayaan yungun ta, tsëhë xi tsajin cahndë́ xi cuichja na. Xi meje rë ne, catiyuju na ngahma gubiernu rë xihin rë na, sacuatjin vitexa ley rë Nina.
1CO 14:35 Sa xi tjin ngu cjua xi meje cumachaya rë na ne, ndava na catinenguise na xihin rë suvá na ta, tsëhë xi jemu cjuasava xi ngu chjuun cuichja na hya xi tjin tangun ngayaan ngajan yungun.
1CO 14:36 ¿Há tjutjun ngayun canújun cjua rë Nina cojo xuta? ¿Há suvun ni catsingatju nuju Nina cjua vëhë ni?
1CO 14:37 Sa xi tjin ngu xuta xi má rë me xi profeta me o sa quitsë rë xahasen rë me cojo Hasen rë Nina ne, catijnercu me ta cjua xi titsihindu nuju vi ne, Nai naja vitexa me.
1CO 14:38 Peru sa xi mijí sahmicuenda me cjua naha ne, hacuaha xicanihñucuenduun cjua rë me.
1CO 14:39 Vëhë xi ngayujun ni ne, catamameje nuju xi cuma ngayun profeta, hacuaha xicanichuun rë xuta cahndë́ xi cuichja me hne xi vijniircu me.
1CO 14:40 Xi meje rë ne, yëjë ni xcusun xi nihñu ne, ndandaja nihñu hacuaha chichihin ni nihñu yëjë.
1CO 15:1 Ngayujun ni ne, meje tsinguitsjen nuju tsëhë cjuandajyihi xi casuá camachaya nuju, cjuandajyihi xi chja tsëhë Jesucristu. Cachjuhunntsun cjuandajyihi vëhë, hacuaha ndaja sa tijimangu tacún cojo.
1CO 15:2 Hane ngatsë rë cjuandajyihi vëhë ne, tivetjuntjun tsëhë jyë́ nuju, sa xi nismutacuun cjuandajyihi vëhë. Cuatjin tivetjuntjun sa xi hacuiin tu mahya camangu tacún cojo.
1CO 15:3 Ngahan ne, casuá camachaya nuju cjua xi matitjun xi cafahántsa. Cachjá ta Jesucristu ne, cahme me cojo sa xi tsicjë me jyë́ naja, sacuatjin camahindu xcun xujun rë Nina.
1CO 15:4 Hacuaha cachjá cojo nuju ta caseyaniji me hane xi ma jyan nixtin ne, cavuya nga me cjuahñu, sacuatjin camahindu xcun xujun rë Nina.
1CO 15:5 Hacuaha cachjá cojo nuju ta cavëë Pedru Jesucristu, sehe cavëë yëjë tejó apóstol jan me.
1CO 15:6 Sehe ngu tangun ni cavëë nga vatju sa hñú cientu xuta ladu rë me me. Hane handasa cahme yahnga me ne, peru jemu cjín me xi siu quicun sa hisca quihndë.
1CO 15:7 Sehe cavëë Jacobo me, sehe cavëë nga yëjë apóstol me.
1CO 15:8 Hane xi camá ngascan xi cavuya cjuahñu rë me ne, ngahan cahvë me. Ngahan xi sacuaha ngu quihndi xi cavatjutaha tsëhë nixtin rë, sehe catsin.
1CO 15:9 Cuatjin chjá ta, tsëhë xi ngahan ne, hitsë sa chúva vengui chji naha xi cuma rë apóstol xi yahnga. Ngahan ne, hisca vechiin chuva rë xi apóstol cuichja xuta tsahan ta, tsëhë xi jemu jyë cjuañihi casuá rë xuta ladu rë Nina titjun.
1CO 15:10 Peru ngatsë rë cjuandaja rë Nina ne, ngahan ne, apóstol má ngahan. Hane cjuandaja xi casahmi me cojo ná ne, hacuiin tu mahya ta hitsë sa hñu casahme xa xi cuma rë yëjë sa apóstol. Peru hacuiin suva casahme ta cjuandaja rë Nina cavisecoo ná.
1CO 15:11 Quihndë ne, cuendaain rë ¿há ngahan? o ¿há me vëhë ne?, peru cjuandajyihi vëhë xi catihin camachaya nuju, hacuaha cjua vëhë xi camangu tacún cojo.
1CO 15:12 Quihndë ne, quihndë ta tihin machaya rë xuta xi Jesucristu ne, cahme me sehe cavuya nga me cjuahñu ne, ¿hacutjin má xi nújun yahnga ngayun xi nima ne, vuyaain nga cjuahñu ni?
1CO 15:13 Sa xi vuyaain nima cjuahñu ne, ngajan xi Jesucristu ne, hacuaha cavuyaain nga me cjuahñu.
1CO 15:14 Hane sa xi cavuyaain Jesucristu cjuahñu ne, ngajan xi tu mahya xi cuatjin tihin machaya rë xuta, hacuaha ngayun ne, tu mahya xi cuatjin mangu tacún.
1CO 15:15 Sa xi cuatjin ne, ngajan xi hacuiin cuatjin cjua xi nújin tsëhë Nina ta, tsëhë xi nújin xi Nina ne, catsicuya me Jesucristu cjuahñu. Peru quixiin xi catsicuya Nina Jesucristu cjuahñu sa xi hatuxa vuyaain nima cjuahñu.
1CO 15:16 Sa xi hatuxa tsicuyaain Nina nima cjuahñu ne, ngajan xi hacuaha catsicuyaain me Jesucristu cjuahñu.
1CO 15:17 Hane sa xi catsicuyaain me Jesucristu cjuahñu ne, ngajan xi tsajin mé vengui chji rë xi cuatjin mangu tacún cojo rë me, hacuaha cjëë camahani cjuë jyë́ nuju.
1CO 15:18 Hacuaha nima xi camangu cacun cojo Jesucristu ne, hacuaha cachajá me.
1CO 15:19 Sa xi suvá ni quihndë xi nechan cjuahñu machjirëhë xi cuitjin vetahan tacun Jesucristu ne, hitsë sa jemu chojyihi tsajan xi cuma rë yëjë sa xuta.
1CO 15:20 Peru xi cjuaquixi ne, Jesucristu ne, Nina catsicuya rë me cjuahñu. Tsëhë yëjë nima xi cahme ne, me vëhë tjutjun me cavuya me cjuahñu.
1CO 15:21 Sacuatjin xi ngatsë rë ngu xihin cavisehen cjuaveya ngasunhndë ne, hacuanitjin ni ngatsë rë ngu xihin ne, cavisehen cjuatacun xi nima ne, cuya cjuahñu.
1CO 15:22 Ngatsë rë xi tjë rë Adán má xuta ne, vëhë xi yëjë ni me ne, hme me. Hacuanitjin ni ngatsë rë xi sahmitangun xuta cjuatacun rë me cojo Jesucristu ne, vëhë xi yëjë ni me xi cuacun vë sacú rë me cjuahñu xatsë.
1CO 15:23 Peru cuatjin sacú rë jima ngu me hacutjin xi satë rë me: tjutjun ne, Jesucristu; ngaxtun vëhë ne, hya xi cuya nga Jesucristu ne, xuta xi ladu rë me ne, tsicuya me cjuahñu, sacú rë me cjuahñu xatsë.
1CO 15:24 Ngaxtun vëhë nga ne, tsicjë Jesucristu yëjë xutaxa rë xi jemu tsehen, hacuaha tsicjë me yëjë xitsehen. Hane xi matjenguicjin ne, sahmi me entregadu cojo Nina Nahmi naja gubiernu xi sahmi me. Hane hya cuijnetaha ngasunhndë.
1CO 15:25 Cuatjin cuma ta meje rë xi Jesucristu ne, sahmi me gubiernu hisca hya xi cuiyuju Nina ngahma gubiernu rë Jesucristu yëjë ni xi sahmi rë me condra.
1CO 15:26 Hane xi cuatju tsicjë Nina yëjë sa xi sahmi rë Jesucristu condra ne, sehe tsicjë me cjuaveya ta, tsëhë xi hatuxa yëjë ngarca ni caviyuju Nina ngahma gubiernu rë Jesucristu.
1CO 15:27 Chja xujun rë Nina xi caviyuju me yëjë ngarca ni ngahma gubiernu rë Jesucristu. Peru ha suvá tsejen xi hacuiin cojo Nina, me xi caviyuju yëjë ngarca ni jan, cavéjña me.
1CO 15:28 Peru hya xi ha yëjë ngarca ni cuiyuju ngahma gubiernu rë Jesucristu, me xi Quihndi rë Nina ne, hya cuejñá suvá Jesucristu yojo rë me ngahma gubiernu rë Nina, me xi caviyuju yëjë ngarca ni ngahma gubiernu rë Jesucristu. Cuatjin cuma, cojo sa xi Nina ne, cuma titjun camahani me tsëhë yëjë ngarca ni.
1CO 15:29 Quihndë ne, sacuaha xuta xi cuatjin xtenda me ngatsë rë nima ne, ¿mé machjirëhë? Sa xi hatuxa vuyaain nima cjuahñu sacuatjin chja yahnga xuta ne, ¿mé má cuatjin xtenda xuta ngatsë rë nima?
1CO 15:30 Hane sacuaha ngayin ne, ¿mé má yëjë ni hora nechintihin tsavi?
1CO 15:31 Nina vëë me xi hacuaha ngahan ne, ngu nixtin ngu nixtin ne, tejñataha tsavi tsëhë cjuaveya. Ngayujun ni ne, jemu vaxë́ndaja nuju ngatsë rë xi tjin tangun cjuatacun naja cojo Nai naja Jesucristu.
1CO 15:32 Sa xi ngahan cavitejñataha tsavi nguehe Efeso sacuaha ngu xuta xi hacuiin ladu rë Nina má me ne, ¿mé ndaja tsahan ni? Sa xi hatuxa vuyaain nima cjuahñu ne, sacuatjin chja cjua ne: “¡Jemu sa ndaja xi xinëë siuun ta, nchujun ni nguini ne, cueyan!”
1CO 15:33 Ha quihndë xicatuun cahndë́ xi cumandacha sa ngayun ta, tjin ngu cjua xi chja cuitjin: “Xi nihña tangun cojo xuta tsehen ne, vëhë tsinguetsun rë xcusun ndaja xi nihña.”
1CO 15:34 Catuya nga catejña chihin cjuatacun nuju, hacuaha ha quihndë xicanihñuu sa cjuatsehen. Tjin yahnga ngayun ne, hisca hyuun Nina. Cuatjin chjá cojo nuju cojo sa xi cuma sava nuju.
1CO 15:35 Peru tjin rë yahnga ngayun xi chjinengunsun cuitjin: “¿Hacutjin nga cuya nima cjuahñu? ¿Mé xcusun yojo rë me xi cuya?” Cuatjin chjinengunsun.
1CO 15:36 ¡Ngarca, xan! Hya xi nitjen ngu tutjë́ ne, titjun cueya sehe cuetju.
1CO 15:37 Xcusun xi nitjen ne, hacuiin xcusun xi sehe cuma jyë jan, ta ngu tutjë́ ni xi nitjen, sacuaha ngu trigu o sa tu mé sa xcusun tutjë́.
1CO 15:38 Peru Nina sua me xcusun rë hacutjin jyihi xi cachuya rë me. Jima ngu tutjë́ ne, sua rë me xcusun rë xi tsëhë suvá.
1CO 15:39 Yojo ne, hacuiin ngu xcusun ni tjin ta hacjahi xcusun yojo rë xuta, hacjahi xcusun yojo rë chu, hacjahi xcusun yojo rë chu nisë, hacuaha hacjahi xcusun yojo rë chu ti.
1CO 15:40 Tjin hasen xi tjin ngajan ngahnga hacuaha tjin hasen rë yëjë xi tjin nguehe nangui. Peru hacjahi tsejen xcusun xi tjin ngajan ngahnga hacuaha hacjahi tsejen yëjë xi tjin nguehe nangui.
1CO 15:41 Hacjahi hasen ndajyihi rë tsuhi, hacjahi hasen ndajyihi rë sá, hacuaha hacjahi hasen ndajyihi rë niñú. Hisca ngajñi rë niñú ne, hacjahi hacjahi hasen rë jima ngu.
1CO 15:42 Hacuaha cuatjin cuma hya xi nima cuya cjuahñu. Hya xi seyaniji nima jan ne, hatuxa fë fehndu yojo rë. Peru hya xi nima cuya nga cjuahñu ne, tsajin nu tsajin nixtin xi cjuehndu yojo rë.
1CO 15:43 Hya xi seyaniji ne, tsajin camahani mé ndajyihi, peru hya xi cuya nga cjuahñu ne, jercu ndajyihi camahani. Hya xi seyaniji ne, tsajin camahani ngahñu rë, peru hya xi cuya nga cjuahñu ne, jemu hñu camahani ngahñu rë.
1CO 15:44 Hya xi seyaniji ne, seyaniji ngu yojo naja xi hatuxa tsëhë cjuahñu xi tjin nguehe ngasunhndë vihi, peru hya xi cuya nga cjuahñu ne, cuya ngu yojo naja xi hatuxa tsëhë cjuahñu xi tjin ngajan ngahnga. Quihndë ta tjin yojo naja xi tsëhë cjuahñu xi tjin nguehe ngasunhndë ne, ngajan xi hatuxa tjin yojo naja xi tsëhë cjuahñu xi tjin ngajan ngahnga.
1CO 15:45 Hacuaha cuatjin camahindu xcun xujun rë Nina hiscan chja cuitjin: “Adán, xihin xi tjutjun camá ne, casua Nina me cjuahñu.” Peru Jesucristu, me xi canduva camá ngascan ne, me vëhë Hasen xi sua cjuahñu.
1CO 15:46 Hacuiin titjun sacu naja cjuahñu xi tsëhë ngahnga ta tsëhë ngasunhndë titjun sacu naja, sehe sacu naja cjuahñu xatsë xi tsëhë ngahnga.
1CO 15:47 Xihin xi tjutjun camá jan ne, cojo nihndë camá. Vëhë xi tsëhë ngasunhndë má. Peru Jesucristu, xihin xi majo jan ne, canduva me tsëhë ngahnga.
1CO 15:48 Yëjë xuta xi tsëhë ngasunhndë me ne, hatuxa tangun me cojo xihin xi nihndë camá jan. Hane yëjë xuta xi tsëhë ngahnga me ne, hatuxa tangun me cojo xihin xi canduva tsëhë ngahnga.
1CO 15:49 Sacuatjin xi camá ngayaan sacuaha xihin xi nihndë camá jan ne, hacuanitjin cuma ngayaan sacuaha xihin xi canduva tsëhë ngahnga jan.
1CO 15:50 Ngayujun ni ne, nguehe cuichjá cojo nuju ta yojo naja xi yojo cojo jni camá ne, cumaji cuisehen hiscan sahmi Nina gubiernu. Hacuaha ngu xcusun xi hatuxa fehndu ne, cumaji cuisehen hiscan tsajin camahani mé xi fehndu.
1CO 15:51 Chutsujun ni. Nguehe cuichjá cojo nuju ngu cjuatacun xi jiyahma titjun: Hacuiin ngayejen ngayaan cueyan. Peru ngayejen ni sacú yojo xatsë naja
1CO 15:52 ngu marcu macjain ni, sacuaha xi ngu cuechjan ngu chuxahan ni tuxcun, hya xi cjuane sacuaha ngu tyjo xi meje cuijnetaha fane ta, cjuane sacuaha ngu tyjo, sehe cuya nima cjuahñu cojo yojo xatsë rë xi tsajin nu tsajin nixtin cjuehndu. Hane ngayaan ne, hacuaha sacú naja yojo xatsë naja.
1CO 15:53 Cuatjin cuma ta, yojo naja vi xi hatuxa fehndu ne, meje rë xi cuya ngu yojo xi hatuxa fehndiin. Yojo naja vi xi hatuxa hme ne, meje rë xi cuya ngu yojo xi hatuxa hmii.
1CO 15:54 Hane hya xi cuatjin cuma ne, hya cuetjucaa cjua xi camahindu xcun xujun rë Nina xi chja cuitjin: “Cjuaveya ne, cjuë camahani. Cjuahñu xatsë xi fehndiin ne, vëhë scaa rë cuetjundaja.
1CO 15:55 ¡Cjuaveya ne, ha quihndë tsajin camahani rë ngahñu! ¡Cjuaveya ne, ha quihndë tsajin camahani mé cjuahngatacun xi cuma sahmi cojo naja!”
1CO 15:56 Cjuaveya ne, sahmi cjuahngatacun cojo xuta ngatsë rë cjuatsehen, hacuaha cjuatsehen ne, tjin rë ngahñu ngatsë rë ley rë Moisés.
1CO 15:57 Peru nacuechji rë Nina, me xi sahmi xi vetjunndajan ngatsë rë yëjë ni xi casahmi Nai naja Jesucristu.
1CO 15:58 Vëhë xi ngayujun ni ne, ngayun xi jemu hmú cacún nuju ne, tejñuhñu xahasen nuju, xicavetjunxuun tsëhë ndiya rë Nina. Yëjë ni nixtin ne, tángun nduju camaha sa nihñu xa xi casua nuju Nai naja. Ha hyun ta yëjë xa xi nihñu ne, hacuiin tu mahya, xi cuatjin tjin tangun cjuatacun nuju cojo Nai naja.
1CO 16:1 Quihndë ne, sacuaha tujún xi jima tangun xi cjue cuisecoo rë xuta ladu rë Jesucristu, me xi jemu choho tivatju tijima ngajan Jerusalén ne, sacuatjin cachjá cojo xuta rë yungun ngajan distritu Galacia ne, cuatjin nihñu.
1CO 16:2 Jima ngu domingu ne, meje rë xi ngayujun ni ne, tejñuxun tsë tsë tujún xi nihñu ganar tsëhë xa xi nihñu. Tetjún ne, cojo sa xi hya xi cjuëhë ndyá ne, mijí rë xi chjahya nga rë tujún.
1CO 16:3 Hane hya xi cjuëhë ndyá ne, yo xuta xi cuinújun xi cjue ne, tsihindu ngahan xujun xi cuaha me, sehe tsingátju me cjuecani me cjuatjo nuju ngajan Jerusalén.
1CO 16:4 Hane sa xi tsejen ta ndatjin xi ngahan cjuë́ ne, cuma cjue me cojo ná.
1CO 16:5 Cuechú nixtin xi cjuë́tjëngë nuju, peru hya xi ha cavátju distritu Macedonia, tsëhë xi hatuxa tjin ná xi cuátju ngajan.
1CO 16:6 Cuma rë cuitejñataha cojo nuju ngujo nixtin, o sa xi yëjë nixtin rë chan hnchan. Hane xi cuatjin ha cavitejñataha cojo nuju hitsë ne, cuma cuisecuun ná hitsë xi cjuë́ sa hiscan xi cjuë́.
1CO 16:7 Cuatjin tsingátaha cacún ta, tsëhë xi mijí ná xi nduva scútsejen nuju xi tu ñaja cuátju ni ta xi vetahá cácun ne, xi cuitejñataha cojo nuju jyë nixtin, sa xi sua Nai naja cahndë́.
1CO 16:8 Peru cuitejñataha nguehe Efeso hisca xi cuechú suhi tsëhë Pentecostés ta,
1CO 16:9 tsëhë xi jemu casacu ná cahndë́ xi sahme xa xi ndatjin cuetjucaa, handasa hacuaha jemu tjin xuta xi sahmi ná me condra.
1CO 16:10 Quihndë ne, sa xi cjue scusehenya nuju Timoteo ne, nihñu xi hacuiin cumacjín cacun me xi cuejña me ngajñi nuju ta, tsëhë xi sahmi me xa rë Nai naja sacuatjin sahme ngahan.
1CO 16:11 Vëhë xi hisca ngu yun ne, mijí rë xi nihñuchuvun me. Tisecuun rë me xi cjue sa me cojo cjuandaja cjuajeya, cojo sa xi cuma cuinduvatjengui ná me ta, tsëhë xi nguehe tejñaya rë me cojo sa ngujo xuta ladu rë Nai naja xi nduva cojo me.
1CO 16:12 Quihndë ne, sacuaha Apolos ne, jemu cachjá cojo rë me xi cjue me cojo ngujo sa xuta ladu rë Nai naja jan, cjuetjengui nuju me, peru mijí cjue me xi ngutjen. Peru cjue me nixtin hya xi sua rë me chuva rë.
1CO 16:13 Nechun cuidadu. Ndaja sa catamangu tacún cojo cjuachacun xi macjain naja. Tiyujunhñu cjuatacun nuju hacuaha tuhun ngahñu xahasen nuju.
1CO 16:14 Yëjë ni xi nihñu ne, nihñu cojo cjuahmutacun.
1CO 16:15 Ngayujun ni ne, ha hyun ta yëjë me xi siu ndava Estéfanas ne, me xi cuacun vë tjutjun cavisehen me ladu rë Jesucristu ndyá Acaya, hacuaha casua suvá me yojo rë me xi cuisecoo me xuta ladu rë Jesucristu.
1CO 16:16 Meje ná xi ngayujun ni ne, tinuhyun tsëhë xuta xi cuatjin sahmi, hacuaha tinuhyun tsëhë xuta xi visecoo me xcun xa rë me xi cuacun vëhë.
1CO 16:17 Jemu ndama ná xi cafehe Estéfanas nguehe, cojo Fortunato cojo Acaico. Handasa tsajin ngayujun ni nguehe,
1CO 16:18 peru ndastu me xi jyan vi ne, casua ná me cjuetacun, sacuatjin casua nuju me ngayun cjuetacun. Xuta xi cuatjin sahmi ne, meje rë xi chjuhunrcun me.
1CO 16:19 Xuta tsëhë yëjë ni yungun nguehe distritu Asia ne, tsingatju me ngu nina rë me tsujun ngayujun ni. Aquila cojo Priscila, cojo yëjë sa xuta ladu rë Jesucristu xi ma tangun me ndava me vëhë ne, hacuaha tsingatju me ngu nina rë me tsujun ngayujun ni xi hacuaha tjin tangun cjuatacun nuju cojo Jesucristu.
1CO 16:20 Yëjë ni xuta ladu rë Jesucristu nguehe ne, tsingatju me ngu nina rë me tsujun. Tuhun rë xingun nina, cojo cjuandaja cojo cjuahmutacun chutatsuhun xingun, sacuatjin xcusun naja.
1CO 16:21 Suva ngahan, Pablo, tsihindu nuju ngu cjua vihi, xi tisuá nuju ngu nina.
1CO 16:22 Sa xi ngajñi nuju tjin ngu me xi hmaai cacun me Nai naja ne, catisatiin rë me cjuandaja rë Nai naja. ¡Ngayun Nai naja, nduvun!
1CO 16:23 Nai naja Jesucristu catisua nuju me cjuandaja rë me.
1CO 16:24 Ngahan ne, hacuaha tsingátju cjuahmutacun naha xi cuma nuju ngayujun ni, ngatsë rë xi tjin tangun cjuatacun naja cojo Jesucristu.
2CO 1:1 Ngahan Pablo ne, casuaxa ná Jesucristu xi má ngahan apóstol tsëhë me, tsëhë xi cuatjin xi meje rë Nina. Hane ngahan cojo cha Timoteo xingueen ne, ningatjin ngu xujun vi tsujun, ngayujun ni xuta Corinto xi xuta ladu rë Nina ngayun. Hacuaha ningatjin xujun vi xi scutaya yëjë sa xuta ladu rë Nina jingujyë ni estadu Acaya vë.
2CO 1:2 Nina Nahmi naja cojo Nai naja Jesucristu ne, catisua nuju me cjuandaja cjuajeya.
2CO 1:3 Nina Nahmi rë Nai naja Jesucristu ne, jemu tjin rë me cjuandaja. Me vëhë ne, hatuxa tjin rë me cjuayumatacun cojo niji hacuaha hatuxa sua niji me cjuetacun.
2CO 1:4 Sua niji me cjuetacun ngajñi rë yëjë ni cjuañihi xi vatjin má, cojo sa xi ngayin ne, hacuaha cuatjin cuma tihín rë xuta xi yahnga cjuetacun vëhë ngajñi rë yëjë cjuañihi xi vatju me má.
2CO 1:5 Chuva rë xi vatjin cjuañihi sacuatjin xi cavatju Jesucristu camá ne, hacuaha cuatjin sua niji me cjuetacun.
2CO 1:6 Hya xi cuatjin vatjin cjuañihi ne, hatuxa cuatjin má cojo sa xi ngayun ne, sacú nuju cjuetacun hacuaha cuetjuntjun tsëhë jyë́ nuju. Hacuaha hya xi cuatjin sacu niji cjuetacun ne, cuatjin má cojo sa xi hacuaha cojo ngayun ne, sacú nuju cjuetacun. Hane sacú nuju cjuetacun vëhë ngatsë rë xi hacuaha caa nuju cojo cjuañihi sacuaha cjuañihi xi vatjin má.
2CO 1:7 Ngayin ne, jemu vetihin tacuin nuju ta, tsëhë xi hyin ta sacuatjin xi tivatjun cjuañihi ne, hacuaha tisacu nuju cjuetacun.
2CO 1:8 Ngayujun ni ne, meje niji xi cumachaya nuju cjuacjintacun xi cavatjin camá ngajan estadu Asia. Jemu jyë camahani cjuañihi xi cavatjin camá, hisca ngahñu sa tsajin niji xi scaa niji cojo cjuañihi vëhë; quihndë tsajin niji cjuetacun xi cojo cjuahñu cuijnitihin.
2CO 1:9 Peru ngayin ne, hisca hatsëë camangu tacuin cojo cjuaveya niji. Cuatjin camá cojo sa xi hacuiin cuetihin tacuin cjuatacun niji suvin ta cuetihin tacuin Nina, me xi tsicuya cjuahñu rë nima.
2CO 1:10 Nina ne, cavaxëtje niji me tsëhë cjuacjintacun jyë xi meje tsiquehen niji jan, hacuaha cuaxëtje sa niji me. Cavetihin tacuin Nina xi cuatjin cuaxëtje sa niji me,
2CO 1:11 tsëhë xi ngayun ne, hacuaha tivisecuun niji xi tichjahyun rë Nina ngatsë niji. Hane xi cjín xuta sahmi me cuatjin ne, hacuaha jemu cjín cuma ngayun xi tuhun nacuechji rë Nina tsëhë cjuandaja xi sua niji me.
2CO 1:12 Ngayin ne, nihñi yehe yojo niji ngatsë rë xi ha hyin cojo cjuatacun niji ta tyjahi xahasen niji hacuaha nechin nguñaja tacuin xi tivanguin cojo ngasunhndë niji. Peru hacuiin cojo cjuatacun niji suvin xi cuatjin cun ngayin ta cojo cjuandaja rë Nina. Hacuaha hatuxa cuatjin cun ngayin hya xi nechin ngajñi nuju.
2CO 1:13 Sacuaha cjua xi nihindin nuju ne, suvá cjua xi ma chutayun hacuaha vijnercun. Ha vijnercun hitsë, peru meje niji xi ndaja sa cuijnercun cjuetacun vihi: Cuma nihñu yehe yojo nuju ngatsë niji sacuatjin xi cuma nihñi yehe yojo niji ngatsë nuju, hya xi cuya nga Nai naja Jesucristu.
2CO 1:15 Xi cuatjin catsingátaha cácun ne, cavejñá xi cjuë́ scusehenya nuju titjun, cojo sa xi jo ndiya sacú nuju cjuandaja.
2CO 1:16 Meje cuátju nangui nuju hya xi canduvá nguehe estadu Macedonia. Hane xi cuijnetaha cjuacjintacun naha nguehe Macedonia ne, hacuaha meje cúya scusehenya nga nuju ngu ndiya. Sehe ngajan xi ngayun ne, cuma cuisecun ná cojo sa xi cuma cjuë́ ngajan distritu Judea.
2CO 1:17 Xi cuatjin cavejñá cjuatacun naha sehe casahmee ne, ¿há tsajin rë cjuaquixi cjua naha, má nuju? ¿Há má nuju ngayun ne, hya xi vejñá xi sahme ngu xcusun xi sahme ne, tangun han cojo ngu xuta ngasunhndë xi xcun cojo xcun ne, chja me ta cuma, hane xi taha ngaxtun ne, chja me ta cumaji? ¡Jéya, hacuiin cuatjin!
2CO 1:18 Nina, me xi hatuxa cjuaquixi ne, vëë me ta hacuiin jo ma tacuin xi nújin cojo nuju.
2CO 1:19 Sacuaha Jesucristu, Quihndi rë Nina, me xi catihin camachaya nuju cjua rë, cojo cha Silvanu cojo cha Timoteo ne, hacuiin jo tjin cacun me ta, yëjë ni cjua xi cachja me ne, hatuxa cjuaquixi.
2CO 1:20 Hane Jesucristu vë ne, me vëhë xi sahmi chihin me yëjë ni cjua xi ha cachja Nina xi cuma. Vëhë xi hora xi chjahanrcun Nina xi nújanyuman cojo Jesucristu ne, nújan “Amén” (O sa tsajin ne, nújan “Cuatjin jain.”)
2CO 1:21 Nina ne, hacui me xi sahmi xi viyujucahndë́ cjuatacun naja xi macjain naja Jesucristu. Hacui ni me xi cavaxijin me ngayaan.
2CO 1:22 Sacuaha xi cavisane me sellu rë me ngayaan; caveya me Hasen rë me cahntsua xahasen naja cojo sa xi ngutjen tsejen ta quixi jain xi, hya xi cuma ngascan ne, sua jain naja me yëjë ni xi ha cachja me.
2CO 1:23 Quihndë ne, quejen cavusehenya nuju sacuatjin xi ha cachjá cojo nuju ngatsë rë xi mijí tsisava nuju xi cuichjátaha nuju. Sa xi quixiin xi chjá ne, catitsingatju Nina cjuaveya xi cuma ná.
2CO 1:24 Hacuiin xi meje cuitexin nuju jarë ngu cjua xi hatuxa meje rë xi cumacjain nuju ta, tsëhë xi ngayun ne, ha siucahndë cjuatacun nuju cojo cjuachacun xi macjain naja. Ta ngayin ne, tivisecuiin nuju cojo sa xi cuma sua sa rë xahasen nuju.
2CO 2:1 Hya xi camá ne, cavejñá cjuatacun naha xi hacuiin ngutjen cjuë scusehenya nuju sá tu choho cuma rë xahasen nuju ngatsë rë cjua xi cuichjá cojo nuju.
2CO 2:2 Cuatjin cavejñá cjuatacun naha ta, ngayun tinihñu xi ma sua rë xahasen naha. Vëhë xi sa xi sahme xi cuma va rë xahasen nuju ne, ndajin tjin ta, xi cuatjin sahme ne, sahme xi cuma va rë xahasen rë xuta xi tisahmi xi ma sua rë xahasen naha.
2CO 2:3 Vëhë xi cuatjin catsihindu nuju nixtin hya, cojo sa xi hya xi cuinduva ndyá ne, hacuiin cuma va rë xahasen naha ngatsë nuju ta, xi meje rë ne, tuhun rë xahasen naha cjuasua. Hacuaha mangu cácun cojo nuju ngayujun ni. Mangu cácun xi tu mé ni xi sahmi xi jemu sua ma rë xahasen naha ne, hacuaha vëhë ni ne, sahmi xi jemu sua ma rë xahasen nuju.
2CO 2:4 Hya xi catsihindu nuju cjua vëhë ne, jemu choho ma ná, jercu cjín catsingátaha cácun ngatsë nuju, hisca jercu cajíhnda; mijí ná xi cuma va tacún ta xi meje ná ne, xi cumachaya nuju ta cjuahmutacun xi tjin ná cojo nuju ne, jemu jyë camahani.
2CO 2:5 Quihndë ne, sacuaha ngu xuta xi cavinchachoho vë ne, hacuiin ngahan ni choho camá ná ta, ngayujun ni ne, hacuaha choho camá nuju hitsë. “Hitsë ni” chjá ta, mijí cuátjutaha xi tichjátaha nuju.
2CO 2:6 Quihndë xi cjín ngayun canújuntuhun rë xuta jan ne, cojo vëhë ni ne, ha cuma.
2CO 2:7 Cahndë́ rë xi cuinújuntuhun sa rë me ne, ninchatuhun rë me, tuhun rë me cjuetacun, sá tu scaain rë me cojo cjuachoho jyë vëhë.
2CO 2:8 Vëhë xi chjá cojo nuju ta tuhun nga catamachaya rë me tsëhë cjuahmutacun xi tjin nuju cojo me.
2CO 2:9 Vëhë jain xi cuatjin catsihindu nuju ta, tsëhë xi meje cjuaháchuva nuju ne, há tjin ngu tacún xi nihñu yëjë ni hacutjin chjá cojo nuju.
2CO 2:10 Quihndë ne, yo xi ninchatuhun rë tsëhë ngu jyë́ xi sahmi ne, ngahan ne, hacuaha tsinchátaha rë ta, tu mé ni xi catsinchátaha ne, vëë Jesucristu ta ngatsë nuju ngayun ne, vëhë xi cuatjin catsinchátaha,
2CO 2:11 cojo sa xi cumaji sahmi Satanás xi meje sahmi cojo naja. Ngayaan ne, ha ndaja hyan hacutjin meje sahmi xitsehen vë cojo naja.
2CO 2:12 Hya xi camá ne, cëjë ngajan Troas xi cuichjá cojo xuta cjuandajyihi xi chja tsëhë Nai naja Jesucristu. Hane xi cafëhë ngajan ne, vutsején ne, jemu casacu ná cahndë́ xi cuichjá cojo xuta cjuandajyihi jan.
2CO 2:13 Peru hacuiin ndaja má cácun xi casacuiin ná cha Titu xingueen sacuatjin xi catsingátaha cácun. Vëhë xi catsinguíjnetaha cjua cojo xuta jan sehe cavétju canduvá nguehe estadu Macedonia.
2CO 2:14 Peru nacuechji rë Nina ta hatuxa sahmi me xi caa niji vetjintjin ngatsë rë xi tjin tangun cjuatacun niji cojo Jesucristu. Chuva vëhë xi Nina ne, sahmi me xi cumachaya rë xuta cjuatacun rë me jingujyë ni.
2CO 2:15 Ta ngayin ne, sacuaha xta rë tyjungunsa ngayin xi tisua Jesucristu xi cuma rë Nina. Xta ndajyihi vëhë ne, vitsojo vechutaha rë yëjë ni xuta, sa xuta xi tivetjutje me tsëhë jyë́ rë me o sa xuta xi tivetjintjiin me.
2CO 2:16 Xi vutsejen niji xuta xi cuacun tivetjintjiin jan ne, sacu rë me cjuaquixi ta quixi jain xi cuechiin me xcun Nina. Peru xi vutsejen niji xuta xi cuacun tivetjutje jan ne, sacu rë me cjuaquixi xi quixi jain xi cuechu me xcun Nina. Ngayin ne, cumaji nihñi cojo cjuatacun niji suvin xa vë xi sacu rë xuta cjuaquixi jan.
2CO 2:17 Ngayin ne, hacuiin tiviteñi cjua rë Nina sacuatjin jemu cjín xuta tisahmi me ta ngayin ne, nechin nguñaja tacuin xi nújin cojo xuta cjua vëhë. Nina casua niji me xa hacuaha vutsejen me xa xi nihñi. Hacuaha tinihñi xa vëhë ta tsëhë xi tjin tangun cjuatacun niji cojo Jesucristu.
2CO 3:1 ¿Há má nuju xi tinaxinndijin suvin nga yojo niji xi cuatjin nújin? O há tsajin ne, ¿há mameje rë xi tihín nuju o sa xi chjahyin nuju ngu carta xi chja ngatsë niji, sacuatjin sahmi yahnga xuta?
2CO 3:2 ¡Jéya! mamijí rë ta, ngayun xi má ngayun sacuaha carta niji, sacuaha ngu carta xi camahindu cahntsua xahasen niji, ngu carta xi cuma scutsejen yëjë ni xuta ne, hacuaha cuma scutaya me.
2CO 3:3 Hane suvá tsejen xi Jesucristu catsihindu me carta jan, hane ngayin ne, tu canihñi entregadu ni. Hacuiin cojo tinta camahindu ta cojo Hasen rë Nina xi quicun me. Hacuaha hacuiin xcun ndyojo të camahindu ta cahntsua xahasen rë xuta.
2CO 3:4 Cuatjin nújin cojo nuju ta, tsëhë xi mangu tacuin cojo Nina ngatsë rë Jesucristu.
2CO 3:5 Hacuiin cjuatacun niji suvin, hacuiin ngahñu niji suvin xi ma nihñi mé xi nihñi ta Nina casua niji me cjuatacun, Nina casua niji me ngahñu.
2CO 3:6 Me vëhë casahmi me xi machjirëhë rë me ngayin xi tihín cumachaya rë xuta compromisu xatsë xi sehe tivetsihin tisahmi Nina cojo xuta, hane compromisu xatsë vëhë ne, hacuiin ngu ley xi cuinuhyan tsëhë ta ngu ndiya ndajyihi xi tsingacun naja Hasen rë Nina xi cuanguencojon. Cuatjin casahmi Nina ta tsëhë xi xuta xi cumaji sahmichihin me yëjë ni cjua xi vitexa ley ne, sacú rë me ngu castigu xi cuetsun cjuatacun rë me hacuaha tsajin nu tsajin nixtin xi cuechu me xcun Nina. Peru xuta xi tjengui me Hasen rë Nina ne, sacú rë me ngu cjuahñu ndajyihi, hacuaha cuechu me xcun Nina.
2CO 3:7 Ngayujun ni ne, ha hyun ta sacuaha ley rë Nina xi catsihindu Moisés ne, catiya xcun ndyojo të hya xi camahindu, hacuaha xuta xi maji sahmi me yëjë hacutjin vitexa ley jan ne, cumaji cuechu me xcun Nina. Hane sacuaha xa xi casahmi Moisés hya xi casua me camachaya rë xuta cjua rë ley jan ne, hacuaha ha hyun xi jercu vengui chji rë ta, tsëhë xi camatsejen ngu hasen ndajyihi xi hisca camaji cavutsejenndaja xuta Israel xcun Moisés ta jercu tu seti camahani jyihi xcun me. Peru hasen ndajyihi vëhë ne, tafi tafi ne, cafëya suvá.
2CO 3:8 Hacuaha ha hyun ta ngayin ne, titihín tijimachaya rë xuta cjua tsëhë hacutjin sua naja Nina Hasen rë me. Quihndë ne, sa xi cuatjin jemu cavengui chjí rë xa xi casahmi Moisés jan ne, hitsë sa jercu vengui chjí rë xa xi tinihñi ngayin.
2CO 3:9 Cuma cuinújan ne, sa xi jemu cavengui chjí rë xa xi casahmi Moisés, hya xi casua me ley xi chja xi sacú naja ngu castigu sa xi hacuiin nihña chehen cjua rë ne, hitsë sa jemu vengui chjí rë xa xi tinihñi ngayin, quihndë xi tinújin cojo xuta xi cuma sacú naja ngu xahasen tyjahi, ngu cjuatacun tyjahi.
2CO 3:10 Cuma cuinújan ne, sacuaha xa rë Nina xi casahmi Moisés xi jemu ndajyihi titjun ne, quihndë ne, sacuaha xi ha quihndë tsajin mé ndajyihi tsëhë ta, xa rë Nina xi tinihñi ne, jercu tu ndajyihi camahani.
2CO 3:11 Sa xi jercu ndajyihi ngu xcusun xi hacuiin cuejña tsëë ne, hitsë sa ndajyihi ngu xi cuejña tsëë.
2CO 3:12 Ngatsë rë xi cuatjin vetihin tacuin Nina ne, vëhë xi ngayin ne, rcuiin camahani xi nújin cojo xuta.
2CO 3:13 Hacuiin nihñi sacuatjin casahmi Moisés, hya xi cavetsa me xcun me cojo ngu tsjian cojo sa xi xuta tjë rë Israel ne, scuiin me hacutjin tifëya suvá hasen ndajyihi xi jyihi xcun Moisés jan.
2CO 3:14 Peru xuta jan ne, camajñu tsëhë cjuatacun rë me. Hisca quihndë nixtin vihi ne, hya xi visiñuju me cjua rë ley changa vëhë ne, maji vijnercu me cjua rë, sacuaha xi titsa rë cjuatacun rë me cojo tsjian jan. Hisca hya xi cumacjain rë me Jesucristu ne, hya sacuaha xi cuetjuxin tsjian jan, hya cuma cuijnercu me.
2CO 3:15 Peru hisca quihndë ne, hya xi visiñuju me cjua xi catsihindu Moisés ne, sacuaha xi tsjian jan vechja rë cjuatacun rë me, hane maji vijnercu me.
2CO 3:16 Peru hya xi ngu xuta cuisehen me ndiya rë Nai naja ne, sacuaha tsjian jan ne, cjuexin tsëhë me, hane cuma cuijnercu me.
2CO 3:17 Nai naja ne, hacui me xi Hasen rë Nina, hane hiscan xi tacun Hasen rë Nai naja ne, tsajin mé xi vechja rë cjuatacun naja.
2CO 3:18 Vëhë xi ngayejen ngarcan ni ne, tsajin titsa rë cjuatacun naja cojo tsjian vëhë, hacuaha xi vutsejen xuta ngayaan ne, ma vutsejen me cjuandaja rë Nai naja sacuaha tsejen mé xi tsejen xcun ngu speju. Hane ngayaan ne, jima tiña jima tiña sa cjuatacun naja cojo cjuatacun rë Nai naja ta, tsëhë xi jima ngu ndiya ne, tisacu sa naja cjuandaja rë me. Nai naja ne, suvá hasen me, hane hacui me xi cuatjin tisahmi.
2CO 4:1 Nina casahmi me cjuandaja cojo niji, hane casua me xa vëhë xi nihñi. Vëhë xi hatuxa hacuiin machuva tacuin.
2CO 4:2 Ngayin ne, cavejñi tacuin xi nihñii yëjë ni xi ticojo rë cjuasava xi tahahma má; hacuiin vindachin, hacuiin nindeyin cjua rë Nina ta, suvá cjuaquixi yëjë ni xi nújin cojo xuta. Cuatjin nihñi cojo sa xi scuëë yëjë ni xuta ta cuatjin jain xi nújin. Hacuaha vëë Nina xi cuatjin nújin.
2CO 4:3 Hane sa xi vijniircu xuta cjuandajyihi xi chja tsëhë Jesucristu xi titihín cumachaya rë me ne, peru suvá xuta xi tivetjintjiin me ne, me vëhë xi cuatjin vijniircu me.
2CO 4:4 Xitsehen xi matitjun xi tacun nixtin vihi ne, cavetsa cjuatacun rë xuta xi cuacun macjaain rë Nina xi cjuaquixi, cojo sa xi cuisiin rë me cjuahasen rë cjuandajyihi xi chja hacutjin xi jyë hnga Jesucristu cojo cjuatacun rë me. Hya xi machaya naja tsëhë Jesucristu ne, hacuaha hyan hacutjin jemu ndaja camahani Nina.
2CO 4:5 Ngayin ne, hacuiin nújin cojo xuta xi nai nuju ngayin ta xi nújin ne, Jesucristu xi Nai naja me; hane ngayin ne, tivisecuin nuju sacuaha ngu mosu hndixahan nuju ta, tsëhë xi cuatjin cavitexa niji Jesucristu.
2CO 4:6 Hane ntsacu cavetsihin ne, cachja Nina ta ngajñi rë jñu ne, cuma hasen. Hane hacui ni me xi caveya me cjuahasen ngajñi rë cjuatacun niji, cojo sa xi ngayin ne, tihín cumachaya rë xuta, cuijnercu me hacutjin jemu ndaja camahani Nina. Hane hya xi machaya naja tsëhë Jesucristu ne, hacuaha hyan hacutjin jemu ndaja camahani Nina.
2CO 4:7 Cjuahasen xi casua niji Nina jan ne, quichihin ngajñi rë cjuatacun niji, sacuatjin xi jiya cjuanchina cahntsua ngu tiji xi nihndë ni camá. Cuatjin casahmi Nina cojo sa xi matsejen xi jemu hñu camahani ngahñu xi sua niji Nina. Hacuiin cojo ngahñu niji suvin xi caa niji nihñi yëjë ni xi tinihñi ta Nina ne, me vëhë xi casua niji me ngahñu; hacuaha jemu ndaja camahani ngahñu xi sua niji me.
2CO 4:8 Ha tu yani ni xi vanguin ne, jemu yehe cjuacjintacun vatjin má, peru sacuya niji chuva rë hacutjin xi naxintjin yojo niji; hisca hyiin mé xi ndatjin nihñi. Peru nihñichuviin cjuatacun niji;
2CO 4:9 jemu suaxti niji xuta hacuaha choho sahmi me cojo niji, peru Nina ne, tsismicacuaain niji me; vaja niji xuta, hisca viticjin, peru hacuiin tsiquehen niji me.
2CO 4:10 Xi nujyihinyin cojo cjua rë Nina ne, hatuxa meje tsiquehen niji xuta, sacuatjin catsiquehen me Jesucristu. Cuatjin tijima ne, cojo sa xi xuta ne, xi scutsejen me hacutjin ticaa niji ne, cumachaya rë me ta quixi jain xi tisacu niji cjuahñu sacuaha cjuahñu rë Jesucristu.
2CO 4:11 Ngayin xi quicun ngayin ne, tjin xuta xi jemu meje tsiquehen niji me ngatsë rë xi quichihin cjuandajyihi xi chja tsëhë Jesús. Cuatjin tijima ne, cojo sa xi cuma tsejen xi yojo jyë́ niji vi xi hatuxa cueya ne, hacuaha tisacu rë cjuahñu sacuaha cjuahñu rë Jesús.
2CO 4:12 Ngajan xi ngayin ne, tisacu niji cjuaveya; peru ngayun ne, tisacu nuju cjuahñu xatsë.
2CO 4:13 Tjin hiscan xi chja xcun xujun rë Nina cuitjin: “Camacjain ná, vëhë xi cachjá”; hane ngayin ne, tangun macjain niji cojo me xi cuatjin catsihindu cjua jan. Vëhë xi hacuanitjin ni nújin ngayin: “Macjain niji, vëhë xi nújin.”
2CO 4:14 Hacuaha hyin ta Nina, me xi catsicuya cjuahñu rë Nai naja Jesús hya xi cahme me ne, hacuaha cuechu nixtin xi cuatjin tsicuya me cjuahñu niji, hane sahmi tangun me ngayin ngajan hiscan tacun Jesús. Hacuaha cuatjin sahmi me cojo nuju.
2CO 4:15 Yëjë ni xcusun xi tivatjin tijima ne, ngayun ndaja tsujun ta, xi cuma cjín sa ngayun xi sacu nuju cjuandaja rë Nina ne, ha cuatjin cjín sa cuma ngayun xi tuhun nacuechji rë me. Hane cuatjin cuma tsejen xi Nina ne, jemu ndaja camahani me.
2CO 4:16 Vëhë xi hatuxa nihñichuviin cjuatacun niji. Handasa tivetsun hitsë tivetsun hitsë yojo niji xi jima changa ngayin ne, peru cjuatacun niji ne, jima xatsë ngu nixtin ngu nixtin.
2CO 4:17 Hane cjuacjintacun xi tivatjin tijima nguehe ngasunhndë ne, sacuaha xi hacuiin yehe camahani ta, tsëhë xi hya xi ha cacaa niji ne, hya sacú niji cjuandaja, sacú rë xahasen niji ngu cjuasua xi jemu ndajyihi camahani, hacuaha tsajin nixtin xi cjuë.
2CO 4:18 Ngayin ne, hacuiin tivetihin rcuin yëjë ni xi tsejen ta xi vetihin rcuin ne, xi cjëë cuma tsejen. Cuatjin nihñi ta, tsëhë xi yëjë ni xi tsejen ne, cuechu nixtin xi cjuë, peru xi cjëë cuma tsejen ne, tsajin nu tsajin nixtin cjuë.
2CO 5:1 Hacuaha nihñichuviin cjuatacun niji ta, tsëhë xi ha hyin ta sa xi cueya yojo niji sacuatjin vetsun ngu ndihya yuma ne, sacú niji ngu xcusun yojo xatsë ngajan ngahnga xi tsajin nu tsajin nixtin cueya, sacuaha ngu ndihya ndajyihi xi suvá Nina casahmi me xi cuma niji.
2CO 5:2 Vëhë xi ngayin ne, hisca fë tacuin ta, tsëhë xi jercu meje chjihinntsin sacuaha yojo xatsë niji xi sua Nina jan,
2CO 5:3 cojo sa xi chijin yojo xatsë vëhë sacuatjin chajá rë ngu tsjian. Xi cuatjin ne, cuechiin ngu nixtin xi siu suvá hasen niji xi tsajin yojo niji.
2CO 5:4 Ngayin xi nechin cojo yojo jyë́ niji vi ne, hisca fë tacuin ngatsë rë xi jercu meje niji yojo xatsë xi sehe sacú niji. Hacuiin meje niji xi cueyin ta xi meje niji ne, yojo xatsë niji. Cuatjin meje niji cojo sa xi yojo jyë́ xi hatuxa cueya ne, cjuëya; hane suvá cjuahñu xatsë vëhë cuejña.
2CO 5:5 Quihndë ne, me xi cuatjin cavejña cjuatacun rë xi cuitjin cun cuma ngayin ne, hacui Nina. Hacuaha me vëhë xi caveya me Hasen rë me cahntsua xahasen niji, cojo sa xi ngutjen tsejen ta quixi jain xi, hya xi cuma ngascan ne, sua jain niji me yojo xatsë vëhë.
2CO 5:6 Vëhë xi hatuxa tihín ngahñu xahasen niji. Hyin ta jinguyëjë rë xi nechincahndin cojo yojo jyë́ niji vi ne, sacuaha xi nechintihin ngu nangui ta, tsëhë xi cjëë cuechin hiscan xi cuinechincahndin cojo Nai naja.
2CO 5:7 Ngayin ne, mangu tacuin cojo Nai naja xi tivanguin cojo ngasunhndë niji, handasa matsijin me.
2CO 5:8 Cuyin cuinújin cojo nuju ta ngayin ne, titihín ngahñu xahasen niji. Hacuaha xi má niji ne, hitsë sa ndatjin xi cuetjinxin tsëhë yojo jyë́ niji, hane cjuanguin cuinechincahndin cojo Nai naja.
2CO 5:9 Vëhë xi sa xi cuinechintihin sa nguehe ngasunhndë, o sa xi cuinechincahndin cojo Nai naja ne, jemu meje nihñi yëjë ni hacutjin chuya rë me ta,
2CO 5:10 tsëhë xi ngayejen ni ne, cuechu nixtin xi cuma tsejen xi cun xi má ngayaan hya xi cuechuun xcun Jesucristu, xi cjuahacuenda me xcusun xi canihña, cojo sa xi jima ngu ngayaan ne, sacú naja xi satë naja ha tucutjin xcusun xi canihña xi cavinechan ngasunhndë, há ndaja ne, há ndajin.
2CO 5:11 Ngayin ne, ha hyin mé vijne xi rcuin Nina. Vëhë xi meje nihñi xi cuijne cacun xuta. Nina ne, ha vëë me xi cun xi má ngayin. Hacuaha cojo ngayun ne, vetihin tacuin xi cumachaya nuju xi cun xi má ngayin.
2CO 5:12 Hacuiin tivétsihin tinihñi yehe suvin nga yojo niji ta tu titihín cumachaya nuju hacutjin cuma naxunndujun niji, cojo sa xi cuma nicuyun cjua tsëhë xuta xi chuya rë me tsëhë xcusun xi jyihi ngu cha, hane sahmicuendaain me cjuatacun rë cha.
2CO 5:13 Chja yahnga xuta ta sca niji, hane yahnga me ne, jemu xta ngayin; peru há sca niji o há xta ngayin ne, peru nihñi yëjë ni ngatsë rë xi tsëhë Nina ngayin, hacuaha ngatsë rë xi meje cuisecuin nuju.
2CO 5:14 Cuatjin nihñi ta tsëhë xi cjuahmutacun xi tjin rë Jesucristu cojo niji ne, vëhë xi vitexa niji. Cuitjin ningatihin tacuin: ngu ni Jesucristu xi cahme me ngatsë rë jyë́ naja ngayejen ni, vëhë xi ngayejen ni ne, sacuaha xi ha caveyan xi cuma rë jyë́ xi cuacun vë.
2CO 5:15 Jesucristu ne, cahme me ngatsë naja ngayejen ni ne, cojo sa xi ngayaan xi casacu naja cjuahñu xatsë ne, hacuiin nihñacuendan suvá ni yojo naja ta hacuaha nihñacuendan tsëhë me vëhë, me xi cahme hacuaha cavuya me cjuahñu ngatsë naja.
2CO 5:16 Vëhë xi ha quihndë hacuiin nutsijin xuta sacuatjin vutsejen ngu xuta xicjin me cojo cjuatacun rë ngasunhndë. Hatsëë ne, cuatjin canutsijin Jesucristu, peru quihndë ne, hacuiin cuatjin nutsijin me.
2CO 5:17 Yëjë xuta xi tjin tangun cjuatacun rë me cojo cjuatacun rë Jesucristu ne, ngu xuta xatsë camá me. Xcusun changá xi tjin rë me ne, cafë, ha cama xatsë.
2CO 5:18 Nina ne, me vëhë xi tisahmi me yëjë cjuatacun xatsë vëhë. Ngayin xi condra rë Nina camá ngayin hatsëë ne, casahmi me xi camatangun cjuatacun niji cojo cjuatacun rë me ngatsë rë cjuacjintacun xi cavatju Jesucristu. Hacuaha casua niji me xa xi tihín cumachaya rë xuta hacutjin tisahmi tangun me cjuatacun rë xuta cojo cjuatacun rë me.
2CO 5:19 Cojo cjuacjintacun xi cavatju Jesucristu camá ne, cavetsihin casahmi Nina xi cuma tangun cjuatacun rë xuta cojo rë me, cavetsihin cafahacuendaain me tsëhë cjuatsehen xi casahmi xuta, hacuaha cavetsihin casua niji me cjuandajyihi xi tinújin cojo xuta xi Nina ne, meje rë me xi cuma tangun cjuatacun naja cojo rë me.
2CO 5:20 Vëhë xi ngayin ne, cuatjin nújin cojo xuta cjua rë Jesucristu ta, Jesucristu casua niji me xa xi cuatjin nújin, sacuaha xi tichja suvá Nina cojo xuta ngajñi rë cjua xi nújin. Vëhë xi sacuatjin xi vitexa niji Jesucristu ne, chjahyin rë xuta xi catisahmi tangun me cjuatacun rë me cojo Nina.
2CO 5:21 Jesucristu ne, tsajin mé jyë́ rë me xi tjin, peru ngatsë naja ngayaan ne, Nina casahmi me xi Jesucristu ne, sacuaha xi jercu tjin camahani jyë́ rë me. Cuatjin casahmi Nina cojo sa xi ngayaan xi tjin tangun cjuatacun naja cojo Jesucristu ne, hacuaha jemu tyjahi camahani cuma cjuatacun naja sacuatjin tyjahi cjuatacun rë Nina.
2CO 6:1 Hane xi tinihñi tangun xa cojo Nina ne, hacuaha nújin cojo nuju ta, mijí rë xi tu mahya xi casacu nuju cjuandaja rë Nina.
2CO 6:2 Cachja Nina cuitjin xcun xujun rë me: Ngu hora ndajyihi ne, cahndë cjua xi canoje cojo ná; ngu nixtin xi vetjutje xuta ne, cavisécoo ri. Quihndë ne, ha cavechu ngu hora ndajyihi vëhë, sacuatjin cachja Nina; ha cavechu ngu nixtin xi tivetjutje xuta.
2CO 6:3 Ngayin ne, nihñii camahani xcusun xi sahmi xi secjan cjuatacun rë xuta, sá tu choho cuichja xuta tsëhë xa xi tinihñi.
2CO 6:4 Yëjë xcusun xi tivatjin tijima xcun xa xi tinihñi ne, tsingacun rë xuta ta ngayin ne, tivisecuiin jain rë Nina cojo xa xi meje rë me xi nihñi. Jemu cjín cjuacjintacun xi cacaa niji: tjin hora ne, jemu cavatjin cjuañihi, tjin hora ne, cavatjin ngu cjuandya jyë, tjin hora ne, casacuinyiin niji hacutjin naxintjin yojo niji.
2CO 6:5 Tjin hora ne, cavaja niji xuta, tjin hora ne, cavincha niji me ndavaya, tjin hora ne, choho casahmi xutacjín cojo niji, tjin hora ne, jemu chja xa canihñi, tjin hora ne, camaji catsjuñifin, tjin hora ne, hisca casacuiin mé xi xiní.
2CO 6:6 Hacuaha tsejen xi tivisecuiin jain rë Nina ngatsë rë xi tyjahi xahasen niji, vechu cjuatacun niji, jemu jyë tacuin, jemu nihñi cjuandaja, jiya Hasen rë Nina cahntsua xahasen niji, nguñaja tacuin xi hmu tacuin xinguin,
2CO 6:7 hacuaha suvá cjuaquixi tjin rë cjuatacun niji, Nina ne, sua niji me ngahñu. Hatuxa cjuaquixi cjua xi nújin, há xi titihín jimachaya rë xuta cjua rë Nina, o há xi tinaxintjin yojo niji tsëhë xuta xi choho chja tsijin.
2CO 6:8 Yahnga xuta ne, faharcun me ngayin, yahnga me ne, faharcuaain me ngayin. Yahnga xuta ne, ndaja chja me tsijin, yahnga me ne, choho chja me tsijin. Xi má rë ngujo xuta ne, jemu ndacha ngayin, handasa quixi ngayin cojo ngasunhndë niji xi tivanguin cuijin.
2CO 6:9 Yahnga xuta ne, hisca hvíin me yo ngayin, peru yahnga me ne, vëë me ngayin. Ngayin ne, sacuaha xi ha tiveyin, peru cjëë cueyin ta nechincuihin cjuahñu. Sahmi xuta ngayin castigu, peru hacuiin tsiquehen niji me.
2CO 6:10 Sacuaha xi jemu choho má rë xahasen niji, peru xahasen niji ne, hatuxa jemu sua rë. Sacuaha xi jemu yumi ngayin, peru jemu nihñi nchina xuta cojo cjua rë Nina. Sacuaha xi tsajin camahani mé xi tjin niji, peru ha tsijin yëjë ni xi tjin ngasunhndë.
2CO 6:11 Ngayun xuta Corinto ne, ha canújin cojo nuju yëjë ni hacutjin ningatihin tacuin, hacuaha jemu hmu tacuin nuju.
2CO 6:12 Ngayin ne, hacuiin camachuva cjuahmutacun xi tjin niji cojo nuju ta ngayun xi camachuva cjuahmutacun xi jiya cahntsua xahasen nuju.
2CO 6:13 Vëhë xi chjá cojo nuju sacuaha xi quihndi naha ngayun, catamajyë sa cjuahmutacun xi tjin nuju sacuaha cjuahmutacun xi tjin niji cojo nuju.
2CO 6:14 Peru mijí rë xi nihñu tangun cojo xuta xi macjaain rë me cjua rë Jesucristu sacuatjin ma hñu jo chu ndyaja xi tangun cjue chu. Sacuaha cjuandaja ne, matanguaain camahani cojo cjuatsehen. Hacuaha cumaji cuma jñu hiscan xi jemu hasen.
2CO 6:15 Cumaji camahani cumatangun cjuatacun rë Jesucristu cojo cjuatacun rë Satanás. Hacuaha cumaji camahani cumatangun cjuatacun rë ngu xuta xi macjain rë me cjua rë Jesucristu cojo cjuatacun rë ngu xuta xi macjaain rë me cjua rë Jesucristu.
2CO 6:16 Sacuaha yungun rë Nina xi cjuaquixi ne, cumaji cuiyuju nina xi tsindaja xuta. Hane ngayaan ne, sacuaha yungun rë Nina xi quicun me ngayaan ta, tsëhë xi suvá Nina cachja me cuitjin: Ngahan ne, cuitejñacahndë cahntsua xahasen rë me, hacuaha tsujyëhëya ngajñi rë me; hane ngahan cuma nina rë me ngahan, hacuaha me xi cuacun vëhë ne, cuma me xuta naha.
2CO 6:17 Hacuaha cachja sa Nina cuitjin: Vëhë xi tetjunxun tsëhë xuta xi cuacun faharcun me nina xi mandaja, hacuaha nechunxun tsëhë me; mijí rë xi nicujun sa xcusun xi chjá cojo nuju xi tsavi. Xi cuatjin nihñu ne, cuitejña ngatsë nuju
2CO 6:18 hacuaha ngahan ne, cuma ngahan nahmi nuju, hane ngayujun ni ne, hacuaha cuma ngayun quihndi naha, chja Nai naja, me xi ma sahmi yëjë ni xcusun.
2CO 7:1 Quihndë ngayujun ni tsan ne, tsëhë xi cuatjin cachja Nina xi sahmi me cojo naja ne, meje rë xi cuiyujunxen yëjë ni cjuatsehen xi meje rë yojo naja o sa xi ningatahan tacun. Hane xi rcun ngayaan Nina ne, meje rë xi nihña ngahñu xi cuma tyjahi xahasen naja, cuma tyjahi cjuatacun naja.
2CO 7:2 Nuxuhun xahasen nuju xi cuma niji. Hisca ngu ngayun ne, hacuiin choho canihñi cojo nuju; hisca ngu ngayun ne, hacuiin caninguetsin cjuatacun nuju; hisca ngu ngayun ne, hacuiin cavindachin nuju.
2CO 7:3 Hacuiin titsicaneje jyë́ nuju xi cuatjin chjá cojo nuju. Ha cachjá cojo nuju ta hatuxa jemu vinga niji ngayun, hisca tihín yojo niji ngatsë nuju sa xi cuatjin meje rë.
2CO 7:4 Jemu camangu cácun cojo nuju, hacuaha hya xi visiajme cojo xuta ne, jemu vaxë́ndaja nuju. Jemu casacu ná cjuetacun. Jemu sua ma rë xahasen naha ngajñi rë yëjë cjuañihi xi cavatjin camá.
2CO 7:5 Hisca nixtin xi cafihin nguehe estadu Macedonia hisca quihndë ne, cjëë cjuahajenda xahasen niji, ta yëjë ni nixtin vihi ne, jercu cjín cjuañihi tivatjin tijima. Ticjan xuta cojo niji, hacuaha jemu macjín tacuin.
2CO 7:6 Peru Nina xi sua cjuetacun xuta yuma ne, hacuaha cuatjin casua niji me cjuetacun hya xi cafehe cha Tito.
2CO 7:7 Hacuiin tsëhë xi cafehe ni cha xi casacu niji cjuetacun ta, hacuaha ngatsë rë cjua xi cachja cha hacutjin xi casacu rë cha cjuetacun ngajñi nuju. Cachja cha cojo niji ta jemu meje nuju xi sacú xingueen. Hacuaha casuacuenda niji cha tsëhë cjuachoho xi tjin nuju. Hacuaha cachja cha ta jemu meje nihñu xcusun xi chuya ná. Vëhë xi hitsë sa camasua rë xahasen naha quihndë.
2CO 7:8 Hacuiin choho ma ná xi cuatjin catsihindu nuju xujun vëhë, handasa choho camá nuju ngatsë rë cjua xi cachjá cojo nuju. Choho camá ná hitsë ta, tsëhë xi cahvë ta cjua naha jan ne, casua nuju cjuachoho ndastu ngu hora.
2CO 7:9 Peru quihndë ne, jemu ndama ná, hacuiin ngatsë rë xi choho camá nuju ta ngatsë rë xi sacuaha cjuachoho xi camá nuju ne, vëhë casahmi xi canindeyun cjuatacun nuju. Hacuaha hya xi choho camá nuju ne, canihñu hacutjin chuya rë Nina, vëhë xi tsajin mé xi choho cavatjun camá ngatsë rë cjua xi canihindin nuju.
2CO 7:10 Hya xi nihñachehen hacutjin chuya rë Nina hora xi choho ma naja ne, vëhë sahmi xi nindeyan cjuatacun naja cojo sa xi cuetjuntjen tsëhë jyë́ naja. Hane xi cuatjin sahmi ngu xuta ne, tsajin yo xi chuyiin rë. Peru hya xi tu choho má naja hora xi vatjun ngu cjuachoho sacuatjin sahmi xuta ngasunhndë ne, vëhë sahmi xi cueyan.
2CO 7:11 Chutsujun hacutjin canihñu hya xi canihñu hacutjin chuya rë Nina ngajñi rë cjuachoho xi cavatjun camá: jemu nguñaja tacún; jemu ndaja catuhun cjuaquixi nuju; hisca camacjan nuju; hisca carcun camá; canújun ta jemu meje chun ná ngu ndiya nga; jemu meje nihñu xcusun xi chuya ná; ngutjen canihñu castigu xuta xi choho casahmi me. Cuatjin camatsejen xi tyjahi jain cjuatacun nuju hacuaha tyjahi jain xahasen nuju.
2CO 7:12 Vëhë xi hya xi cuatjin catsihindu nuju xujun vëhë ne, hacuiin ngatsë rë xuta xi cavangui jyë́, hacuiin ngatsë rë xuta xi choho cavatju me camá ta xi cuatjin catsihindu nuju ne, ngatsë rë xi meje ná xi cuma tsejen hacutjin xi meje nihñu xcusun xi chuya niji ta, tsëhë xi hyun ta cuatjin xi meje rë Nina.
2CO 7:13 Hane hacuaha ngatsë rë vëhë xi ngayin ne, casacu niji cjuetacun. Peru hacuiin suvá cjuetacun vëhë ni xi casacu niji ta hacuaha jemu ndaja camá rë xahasen niji ngatsë rë cjuasua xi tjin rë cha Tito. Cuatjin tjin rë cha cjuasua ta, tsëhë xi ngayujun ni ne, catuhun rë cha cjuandaja cjuajeya.
2CO 7:14 Jemu cavaxë́ndaja nuju hya xi cachjá cojo cha Tito, hane hacuiin cavétju sava ngahan xi camá ngascan. Hatuxa cjuaquixi yëjë ni cjua xi canújin cojo nuju. Hacuanitjin ni cjua xi canújin tsujun cojo cha Tito ta hacuaha cavetjucaa cjuaquixi.
2CO 7:15 Hacuaha jemu hmu cacun nuju cha, xi tsinguitsjen cha hacutjin canihñu yëjë hacutjin xi cachja cha cojo nuju, cojo hacutjin jemu ndaja cachjuhunrcun cha hya xi cachjuhunntsun cha.
2CO 7:16 Jemu ndama ná ta tsëhë xi hvë ta ngayun ne, mangu tacún cojo ná.
2CO 8:1 Ngayujun ni ne, nguehe tihín cumachaya nuju hacutjin casua Nina cjuandaja rë me cojo xuta xi matangun me yëjë ni yungun xi siu taha ladu tsëhë estadu Macedonia vi.
2CO 8:2 Xuta xi cuicun vi ne, handasa jercu cavatju me cjuañihi, peru jemu sua ma rë xahasen rë me. Handasa jemu yuma camahani me ne, peru jemu jyë cjuatjo xi cavisecoo me.
2CO 8:3 Cahvë xi casua me tucutjin xi camá casua me, hisca quisun sa casua me. Hacuaha cjuatacun rë suvá me
2CO 8:4 xi cafehya me xi tihín cahndë́ xi cojo me sahmi me cjuandaja xi cuisecoo me xuta ladu rë Jesucristu ngajan Jerusalén.
2CO 8:5 Hitsë sa ndaja casahmi me xi cuma rë sacuatjin caningatihin tacuin ngayin. Titjun ne, casua me yojo rë me cojo Nai naja ne, sehe casua me yojo rë me cojo niji ngayin, sacuatjin meje rë Nina.
2CO 8:6 Vëhë xi canújin cojo cha Tito xi, sacuatjin xi ha cavetsihin casahmi tangun cha ngu cjuatjo vëhë ngajñi nuju hatsëë ne, quihndë ne, hacuanitjin ni catitsinguijnetaha cha hiscan xi cavejñavasen.
2CO 8:7 Ngayujun ni ne, jemu tjin ngu tacún cojo Jesucristu; jemu ndaja nújun cjua rë Nina; jemu vechu cjuatacun nuju; jemu nguñaja tacún xi meje cuisecun; jemu tjin nuju cjuahmutacun cojo niji. Sacuatjin tivangun xcun cojo yëjë ni cjuatacun vëhë ne, hacuaha meje niji xi cuanitjin ni cuangun xcun cojo ngu cjuandaja vi xi cuisecun rë xuta yuma.
2CO 8:8 Hacuiin tivitéxa nuju xi cuitjin tichjá cojo nuju ta, tu titsingácun ni nuju hacutjin sahmi nguñaja cacun xuta Macedonia, cojo sa xi cuma tsejen há nechun nguñaja tacún jain cojo cjuahmutacun xi tjin nuju.
2CO 8:9 Ha ndaja hyun hacutjin casahmi Nai naja Jesucristu cjuandaja. Handasa jemu tjin rë me cjuanchina peru catsiyuma me yojo rë me ngatsë rë xi hmu cacun nuju me, cojo sa xi ngatsë rë xi camayuma me ne, ngayun xi cuisuhun ladu rë me ne, sacú nuju cjuanchina xi sua Nina.
2CO 8:10 Nguehe cuichjá cojo nuju hacutjin xi tsingátaha cácun. Ngayun xi hatuxa meje cuisecun hacuaha hisca cuyanu cavetsuhun cavisecun ne,
2CO 8:11 quihndë ne, meje rë xi ninguijnutuhun cjuandaja vëhë. Tuhun hitsë xi tjin nuju sacuatjin canihñu titjún xi cojo cjuasua catuhun.
2CO 8:12 Sa xi ngu ngayaan meje jain tahan ngu cjuatjo ngu cjuandaja ne, cuma tahan tucutjin xi tjin naja xi tahan ta, vëhë xi chuya rë Nina. Nina ne, fehyaain me hisca cojo xi tsajin naja.
2CO 8:13 Hacuiin meje rë xi ngayun ne, hisca cuma chaja nuju ngatsë rë xi cuisecun rë jingu sa xuta. Xi meje rë ne, tangun ni cuatjun ngayejen ni.
2CO 8:14 Ngayun xi cjín tjin nuju quihndë ne, cuma cuisecun rë me xi tsajin rë, cojo sa xi hya xi ngayun tsajin nuju ne, me xi cuacun vë ne, cuma cuisecoo nuju me. Cuatjin xi tangun cuatjun ngayun cuma cojo rë me.
2CO 8:15 Cuitjin chja ngu cjua xcun xujun rë Nina: “Xuta xi cjín cafaya me ne, cavanguiin rë me; hane xuta xi chuva cafaya me ne, camachajin rë me.”
2CO 8:16 Suá nacuechji rë Nina xi cavuxaha me cjuatacun rë cha Tito cojo sa xi cuma meje cuisecoo nuju cha sacuatjin xi meje ná ngahan.
2CO 8:17 Hya xi cachjá cojo rë cha xi cjuetjengui nuju cha ne, jemu cachuya rë cha cjua jan. Hane tsëhë xi jemu tjin rë cha cjuasua xi sahmi cha tu mé ni xi satëxa rë cha ne, vëhë xi cojo cjuatacun rë suvá ni cha ne, cjuetjengui nuju cha.
2CO 8:18 Hacuaha ningatjin sa ngu cha ladu naja cojo cha Tito. Xuta xi matangun me yëjë ni yungun ne, jemu vaxëndaja me cha xi cuajyihi vë, xi jemu ndaja xa sahmi cha xi tsinguitsojo cha cjuandajyihi xi chja tsëhë Jesucristu.
2CO 8:19 Hacuaha xuta xi cuacun jan ne, casua me cha xa xi cuisecoo niji cha xi cuanguin chani ngu cjuandaja vihi ngajan Jerusalén. Cuitjin tinihñi cjuandaja vihi cojo sa xi cuma tsejen ta Nai naja ne, jemu jyë hnga me cojo cjuatacun rë me hacuaha cojo sa xi cuma tsejen ta nguñaja tacuin xi visecuin xinguin.
2CO 8:20 Jemu nechin cuidadu, sá tu yo choho cuichja tsijin tsëhë cjuatjo rë xuta vi xi tacun ntsin.
2CO 8:21 Meje nihñi cjuandaja, hacuiin suvá xcun Nina ni ta hacuaha cojo xcun xuta.
2CO 8:22 Hacuaha cojo cha xi cuacun jan ne, ningatjin sa ngu cha ladu naja. Jemu cjín xcusun casahmi cha xi camatsejen xi jemu nguñaja cacun cha. Quihndë ne, hitsë sa nguñaja cacun cha xi meje cjue cha ta, tsëhë xi jemu camangu cacun cha cojo nuju.
2CO 8:23 Sacuaha cha Tito ne, jemu visecoo ná cha xi cuatjin visecuin nuju. Sacuaha cha ladu naja xi cuacun vë ne, xuta rë yungun catsingatju me cha hacuaha sahmi jyë sahmi hnga cha Jesucristu.
2CO 8:24 Vëhë xi meje ná ngahan xi tuhun cumachaya rë cha xi cuacun vë cjuahmutacun xi tjin nuju, cojo sa xi yëjë ni xuta rë yungun cumachaya rë me ta quixi jain cjua xi nújin xi cuatjin naxinndijin nuju.
2CO 9:1 Quihndë ne, hacuiin hatuxa meje rë xi tsihindu nuju hacutjin tijima tsëhë cjuatjo xi cjue cuisecoo rë xuta ladu rë Jesucristu ngajan Jerusalén ta,
2CO 9:2 tsëhë xi ha hvë ta jemu meje cuisecun rë xuta xi cuacun vë. Vëhë xi ha cachjá cojo xuta nguehe Macedonia xi ngayun xuta Acaya ne, hisca cuyanu cavetsuhun canihñu tangun tujún. Hane tsëhë xi jemu nguñaja tacún xi cuatjin canihñu ne, vëhë casahmi xi jemu cjín xuta Macedonia xi hacuaha caviyujungu cacun me xi cuisecoo me.
2CO 9:3 Vëhë xi tsingátju nuju ngujo cha ladu naja xi ha cachjá cojo nuju jan, sá tu cuetjicaain yëjë ni cjua xi cachjá tsujun tsëhë cjuacjintacun vëhë. Meje ná xi tjin chjine ngayun sacuatjin xi ha cachjá tsujun,
2CO 9:4 tuxa má sa xi cojo ngujo xuta Macedonia cuinduva me cojo ná ndyá, hane tsajin tjin chjine ngayun ne, jemu cuixu sava ngayin, hisca cojo ngayun cuixu sava ngayun ta, tsëhë xi cuatjin camangu tacuin cojo nuju.
2CO 9:5 Vëhë xi catsingátaha cácun xi casahmi ná ngujyë xi caféhya cha xi cuacun vë xi cjuetjengui cha ngayun cojo chaja sa, cuisecoo nuju cha xi ninguixunñuju tujún xi canújun jan. Xi cuatjin tjin chjine cjuandaja nuju vë ne, ngajan cuma tsejen xi hacuiin ngujyë canihñi nuju ta cojo cjuasua nuju xi canihñu.
2CO 9:6 Ha hyun ta yo xi chuva tjë cuincha ne, hacuaha chuva tutjë sacú rë; hane yo xi cjín tjë cuincha ne, hacuaha cjín tutjë sacú rë. Hacuanitjin ni ngayun cojo cjuatjo nuju.
2CO 9:7 Jima ngu ngayun ne, meje rë xi tuhun hacutjin xi cavejñu tacún xi tuhun, peru hacuiin taha choho ma tacún, hacuiin cojo ngujyë. Cuatjin nihñu ta ngu xuta xi cojo cjuasua sua me ne, xuta vëhë xi jemu chuya rë Nina tsëhë me.
2CO 9:8 Nina ne, cuma sua nuju me yëjë ni cjuandaja rë me, cojo sa xi tsajin nixtin xi cuma chaja nuju; hisca cuangui sa nuju, cojo sa xi cjín xcusun cjuandaja cuma nihñu.
2CO 9:9 Xcun xujun rë Nina ne, cuitjin chja: Xuta ndaja jan ne, chuva cjín sua me xuta yuma. Hane cjuandaja xi sahmi me vëhë ne, tsajin nu tsajin nixtin xi chaya rë Nina.
2CO 9:10 Nina, me xi sua tjë xi nitjen cojo niñu xi chinë ne, hacuaha sua nuju me yëjë ni tjë xi mameje nuju, hacuaha me vëhë sahmi me xi cuma cjín sa tutjë xi sacu nuju. Hacuaha sahmi me xi cuma yehe sa yëjë ni cjuandaja xi nihñu.
2CO 9:11 Cuatjin sahmi Nina xi jemu ndaja cuatjun cuma, cojo sa xi yehe cjuandaja cuma nihñu. Hane xi nihñi entregadu cjuandaja nuju jan cojo xuta yuma ne, sua me nacuechji rë Nina.
2CO 9:12 Xi cuitjin cuanguinchani ngu cjuandaja nuju vë ne, hacuiin suvá xi nicjen cjuachaja xi tjin rë xuta ladu rë Jesucristu ta, hacuaha nihña xi jemu cjín xuta ne, sua me nacuechji rë Nina.
2CO 9:13 Xi cuitjin nihñi ngu cjuandaja vë ne, ngajan cuma tsejen xi ngayun ne, tinihñu jain sacuatjin xi nújun xi macjain nuju cjuandajyihi xi chja tsëhë Jesucristu. Hacuaha cuma tsejen ta jemu ndaja tivisecun rë xuta Jerusalén, hacuaha jemu ndaja visecun rë yëjë ni xuta yuma xi ladu rë Jesucristu. Vëhë xi ngahan cojo yëjë ni me xi visecoo ná ne, jemu nihñi jyë Nina.
2CO 9:14 Hacuaha xuta ladu rë Jesucristu ngajan Jerusalén ne, sahmi me oración rë me cojo Nina ngatsë nuju, hacuaha jemu cuinga rë me ngayun xi cumachaya rë me tsëhë cjuandaja xi jemu casua nuju Nina.
2CO 9:15 Nacuechji rë Nina xi casua naja me ngu cjuandaja ngu cjuatjo xi hisca hyaan hacutjin cuinújan xi venguichji rë.
2CO 10:1 Ngahan Pablo ne, nguehe cuichjá cojo nuju cojo cjuandaja cjuajeya rë Jesucristu. Chja yahnga xuta ta ngahan ne, hya xi tejñataha tangun cojo nuju ne, jemu jeya ngahan; peru hya xi cjin tejñataha tsujun ne, jemu hñu cjua naha cojo nuju.
2CO 10:2 Ndatjin, peru nguehe cjuéhya nuju ngu cjuandaja: xicanihñuu xcusun xi sahmi xi sahme hñu cjua naha hya xi cjuë́tjëngë nuju. Ha hvë ta cuma sahme hñu cjua naha cojo xuta xi chja cojo nuju xi ngayin ne, suvá cjuatacun rë xuta ngasunhndë xi quichihin.
2CO 10:3 Quixi jain xi xuta ngasunhndë ngayin, peru hacuiin sí rcuin sacuatjin sí rcu xuta ngasunhndë.
2CO 10:4 Hacuiin chicjin cojo quicha ta Nina ne, sua niji me ngahñu xi caa niji ninguetsinyin cjuatacun rë xuta xi tsitjungui me Nina; xi visiajmí ngayin cojo xuta xi cuacun jan ne, ngutjen tsejen ta machjiriin cjuatacun rë me.
2CO 10:5 Ninguetsinyin cjuaxin xi sahmi xi maji vijnercu me yo xi Nina, hacuaha ninguíxin cjuatacun rë xuta cojo sa xi tsingataha cacun me sacuatjin meje rë Jesucristu.
2CO 10:6 Hane hya xi cuechu nixtin xi ngayun ne, jemu ndaja camahani cuinuhyun tsëhë Nina ne, ha tjin ngu tacuin xi nihñi castigu yëjë ni me xi vihndiin tsëhë Nina.
2CO 10:7 Ngayun ne, tiningatuhun tacún sacuaha tsingataha cacun xuta ngasunhndë. Sa xi tjin yahnga xuta xi tsingataha cacun me xi ladu rë Jesucristu me ne, ndatjin; peru hacuaha catitsingataha cacun me xi, sacuatjin xi ladu rë Jesucristu me ne, ngayin ne, hacuaha cojo ngayin ladu rë Jesucristu ngayin.
2CO 10:8 Handasa cuátjutaha hitsë xi cuichjá cojo nuju sacuaha tsëhë xa xi casua niji Nai naja ne, peru hacuiin cuma sava ná. Nai naja casua niji me xa vëhë, cojo sa xi cuisecuin nuju xi cuangunndujun xi mangu tacún cojo cjua rë Nina, hacuiin xi ninguetsin cjuatacun nuju.
2CO 10:9 Hacuaha mijí ná xi ningatuhun tacún xi meje cuinchárcun nuju cojo yëjë cjua xi tsihindu nuju.
2CO 10:10 Cuinújun ngu ngayun ta jemu hñu cjua naha xi tsihindu nuju, peru hya xi tejñataha cojo nuju ne, jemu yuma hasen ngahan, hacuaha hisca chuyiin nuju chuva rë xi visiajme.
2CO 10:11 Peru cuidadu xi cuatjin nújun ta, chuva rë xi nújin cojo nuju xcun xujun xi nihindin nuju quihndë xi xín nechintihin tsujun ne, ha chuva vëhë ni nihñi hya xi cuéchintihin nuju.
2CO 10:12 Ngayin ne, vetjiin tacuin xi cuinújin xi tangun ngayin cojo ngujo me xi vaxëndaja suvá me yojo rë me. Xi cuatjin tsichuva me cjuatacun rë me ngajñi rë suvá me ne, jemu ngarca me.
2CO 10:13 Ngayin ne, cuinujiin xi jemu ndaja canihñi ngu xa xi hisca canihñii. Ha tucutjin xa xi canihñi ne, ha vëhë ni xi cuinújin. Nina ne, me vëhë xi vitexa niji me jani hiscan cuechin xi nihñi xa, hacuaha me vëhë cavitexa niji me xi catsanguin hisca ngajan nangui nuju.
2CO 10:14 Vëhë xi hya xi ndaja nújin tsujun ne, hacuiin sacuaha xi vatjintihin rë xa xi casua niji Nina ta, tjun tjun ngayin cafihin nangui nuju cojo cjuandajyihi xi chja tsëhë Jesucristu.
2CO 10:15 Hacuaha hacuiin naxinndijin yojo niji tsëhë ngu xa xi casahmi jingu sa xuta. Peru vetihin tacuin xi sacuatjin xi cuangun xcun xi hitsë sa ndaja cumacjain nuju Jesucristu ne, hacuaha hitsë sa jyë xa cuma nihñi ngajñi nuju.
2CO 10:16 Ngajan xi cuma cuanguin tihín cumachaya rë xuta cjuandajyihi tsëhë Jesucristu hisca ngajan sa tsëhë nangui nuju. Xi cuatjin ne, tsajin yo cuichja xi ngayin ne, naxinndijin yojo niji tsëhë ngu xa xi jingu sa xuta casahmi me.
2CO 10:17 Yo xi meje cuaxëndaja rë tu yo ni ne, cataxëndaja me Nai naja, sacuatjin chja xujun rë Nina.
2CO 10:18 Cuatjin ta, xi naxenndajan suvaan yojo naja ne, machjiriin camahani. Xi machjirëhë ne, xi Nai naja cuaxëndaja naja me.
2CO 11:1 Nijyun tacún. Caticaa nuju ndastu ngujo cjuasca xi cuichjá cojo nuju. Handasa hacuiin sca ná peru cuichjá cjuasca ta,
2CO 11:2 tsëhë xi jemu chini ngahan tsujun. Nina ne, casua ná me cjuatacun xi cuatjin chini ngahan ta, tsëhë xi ngayujun ni ne, sacuaha ngu quihndi naha xi chjuun xi casuá xi cuixan cojo ngu ni xihin. Cuatjin nuju ngayun. Hane xihin jan ne, hacui Jesucristu.
2CO 11:3 Hatsëë ne, chu yë cavindacha chu na Eva cojo cjuatacun tsehen rë chu. Hane hacuaha jemu macjín cácun tsujun ta sá tu cuatjin ningatuhun cumandacha ngayun, hane ha quihndë hacuiin nguñaja tacún cuangunndujun cojo ndiya rë Jesucristu xi tivanguncujun.
2CO 11:4 Hya xi fehe ngu cha xi sua cumachaya nuju ngu cjua xi chja tsëhë Jesús xi hacuiin tangun cojo cjua xi cachjá cojo nuju ntsacu cavetsihin ne, ¿mé má cha vëhë xi jemu ndaja caa nuju cojo cjua rë cha? O sa xi chjuhunntsun ngu cjuatacun xi hacjahi, xi hacuiin tangun cojo cjuatacun xi cachjuhunntsun ntsacu cavetsihin ne, ¿mé má cjuatacun vëhë xi jemu ndaja caa nuju cojo? O sa xi fehe ngu cjuandajyihi xi hacjahi, xi hacuiin tangun cojo cjuandajyihi xi cachjuhunntsun ntsacu cavetsihin ne, ¿mé má cjua vëhë xi jemu caa nuju cojo?
2CO 11:5 Quihndë ne, nguehe cuetsehen cuichjá cojo nuju cjuasca. Caticaa nuju hitsë ta, tsëhë xi xi má ná ngahan ne, hacuiin tjëngë ngahan xi cuma rë cha xi cuacun nújun xi apóstol yehe cha.
2CO 11:6 Handasa cjëë scutaya hacutjin xi jemu ndaja cuma cuichjá cojo xuta, peru jemu cavutaya cjuatacun rë Nina. Hane ngajñi rë yëjë ni xcusun xi canihñi, ngajñi rë yëjë ni cjua xi canújin ne, cahyun suvun hacutjin vechu cjuatacun niji.
2CO 11:7 Catsinguíjne suva yojo naha cojo sa xi ngayun ne, cuma yehe cuma hnga ngayun cojo cjuatacun nuju. Hane xi casuá camachaya nuju cjuandajyihi xi chja tsëhë Nina ne, cafaan camahani chjí tsujun. ¿Mé jyë́ quítjen xi cuatjin casahme?
2CO 11:8 Ngahan ne, cafahá tujún tsëhë xuta xi matangun yungun xi yahnga. Me vëhë cavechji ná me cojo sa xi cuma cuisécoo nuju ngayun.
2CO 11:9 Hora xi camachaja ná hya xi cavitejñataha cojo nuju ne, hisca ngu ngayun ne, casuandyaan nuju xi cuisecun ná ta, ngujo cha xingueen xi canduva cha tsëhë Macedonia ne, cha vëhë casua ná cha mé xi casahmi chaja ná. Hatuxa cavitejña cuidadu xi tsajin camahani mé cjuandya xi suá nuju, hacuaha ha cuanitjin ni sahme nchujunni nguini.
2CO 11:10 Jiya cjuaquixi rë Jesucristu cahntsua xahasen naha. Hatuxa cuichjá sa cojo xuta ngajan yëjë ladu tsëhë estadu Acaya hacutjin casuandyaan camahani nuju.
2CO 11:11 ¿Mé má cuatjin cuichjá sa? ¿Há tsëhë xi mijí ná ngayun? Vëë Nina ta jercu meje ná ngayun.
2CO 11:12 Peru sacuatjin xcusun xi ha sahme ne, ha cuatjin cjuë́nduju sa sahme, cojo sa xi tsinguétsun cjua rë cha xi cuacun vanguise chuva rë xi cuichja cha xi xa xi sahmi cha ne, tangun cojo xa xi nihñi.
2CO 11:13 Cha vëhë ne, hacuiin apóstol xi cjuaquixi cha. Tu vindacha ni cha xi chja cha xi apóstol tsëhë Jesucristu má cha.
2CO 11:14 Peru hacuiin fircun ná xi cuatjin ma vindacha cha ta, hisca Satanás ne, ma vindacha naja xi sahmi yojo rë sacuaha ngu xi catsingatju Nina.
2CO 11:15 Vëhë xi cojo cha xi cuacun sahmi xa rë xitsehen vë ne, hacuiin chja ma sahmi cha xi cuma cha sacuaha cha xi sahmi cjuaquixi jain. Peru cha xi cuacun vë ne, ha cuatjin cjuë cha sacuatjin meje rë xcusun xi sahmi cha.
2CO 11:16 Cuichjá nga cojo nuju ngu ndiya ta, xicaningatuun tacún xi sca ná. O sa tsajin ne, handasa sacuaha xi sca ná má nuju ne, peru tuhun cahndë́ xi hacuaha cojo ngahan ne, cuaxë́ndaja hitsë yojo naha sacuatjin sahmi cha xi vaxëndaja yojo rë vë.
2CO 11:17 Xi cuitjin vaxë́ndaja yojo naha ne, hacuiin tichjá sacuatjin chja Nai naja ta tichjá sacuaha xi sca ná.
2CO 11:18 Jemu cjín xuta xi vaxëndaja me yojo rë me ngatsë rë xcusun xi cun xi má suvá me hacuaha xi vatju suvá me má, vëhë xi hacuaha cojo ngahan ne, cuatjin cuaxë́ndaja hitsë yojo naha.
2CO 11:19 Xi má nuju ngayun ne, jemu quicuntacun. Peru jemu ndaja caa nuju cojo cjua rë xuta sca rë.
2CO 11:20 Jemu caa nuju tu yo ni xi vitexa nuju hacuaha xi mosu rë ngayun, sacuaha xi matitjun me tsujun; tu yo ni xi sahmi jyë sahmi hnga suvá yojo rë, tu yo ni xi sahmi chuva nuju.
2CO 11:21 Peru savaain camahani ná xi cuichjá cojo nuju xi ngayin ne, sacuaha xi jemu yuma hasen ngayin xi cuatjin nihñi cojo nuju. Peru sacuatjin vetju cacun cha xi cuacun jan xi vaxëndaja cha yojo rë cha ne, hacuaha ngahan ne, cuatjin vetju cácun xi cuaxë́ndaja yojo naha. Peru sacuaha xi sca ná xi cuitjin tichjá cojo nuju.
2CO 11:22 ¿Há ma chja cha hne hebreo? Ngahan ne, hacuaha ma chjá. ¿Há xuta tjë rë Israel cha? Ngahan ne, hacuaha xuta tjë rë Israel ngahan. ¿Há tjë rë Abraham cha? Ngahan ne, hacuaha tjë rë Abraham ngahan.
2CO 11:23 ¿Há sahmi cha xa rë Jesucristu? Sacuaha xi jercu sca ná xi cuitjin chjá, peru ngahan ne, hitsë sa ndaja sahme xa rë Jesucristu. Hitsë sa jercu casahme xa xi cuma rë cha xi cuacun vë. Hitsë sa cjín ndiya cëjë ndavaya. Hitsë sa cjín ndiya casehen ná. Jemu cjín ndiya xi hitsë sa ne, caveya ngahan.
2CO 11:24 Xutaxa rë xuta Judea ne, hñú ndiya casahmi ná me castigu xi cavaja ná me can tyjuhun ñuju can tyjuhun ñuju cuarta xi ngu ngundiya.
2CO 11:25 Jyan ndiya ne, ya cavaja ná xuta; ngundiya ne, cavetaha ná me ndyojo; jyan ndiya nga ne, quijingahma barcu xi cjuicojo ná; ngundiya tsëhë jyan ndiya vëhë ne, cavitejñaya ngu nixtin cojo ngu nixten ngajñi ndachacun.
2CO 11:26 Jercu fë́ camahani ngu nangui; hane xi cuatjin tsujyëhëya ne, hacuaha jemu tsavi xi vátju ndajyë, jemu tsavi tsëhë cha chëjë, jemu tsavi cojo cjuahngatacun xi sahmi xuta nangui naha, hacuaha tsavi cojo cjuahngatacun xi sahmi xutaxín; jemu cojo tsavi xi tejñataha ngu nandya; jemu cojo tsavi xi tejñataha ngu nguijña; jemu tsavi xi vátju ndachacun; jemu tsavi xi tsujyëhëya cojo cha ndacha xi chja cha xi cha ladu naja cha.
2CO 11:27 Jemu chja camahani xa xi casahme hacuaha jemu chja cavátju camá; jemu cjín ndiya xi hisca camaji cafáñafë; tjin hora ne, jemu vojo ná, jemu xinda ná; jemu cjín ndiya xi cajinëë niñu; tjin hora xi jemu hnchan ná, hacuaha camachaja tsjian naha.
2CO 11:28 Hane tsëhë yëjë ni cjuacjintacun xi cuacun vëhë ne, nchu nchujunni ne, sesuntaha sa ngu: jemu vityanguë cácun tsëhë xuta xi ma tangun me yëjë ni yungun, hacutjin tivatju me tijima.
2CO 11:29 Sa xi choho vatju ngu xingueen má ne, ngahan ne, hacuaha choho ma ná. Sa xi yo sahmi xi cjuinenguiya ngu xingueen ngajñi rë cjuatsehen ne, hacuaha ngahan ne, jemu cuma cjan camahani ná.
2CO 11:30 Sa xi meje rë xi cuaxë́ndaja yojo naha ne, cuichjá cojo nuju hacutjin yuma hasen ngahan.
2CO 11:31 Nina Nahmi rë Nai naja Jesús ne, me vëhë xi hatuxa jyë hnga me yëjë nu yëjë nixtin ne, me vëhë xi vëë jain me ta hacuiin tivindácha xi cuitjin tichjá cojo nuju.
2CO 11:32 Ngundiya hya xi cavitejñataha ngajan nandya Damasco hiscan vitexa Aretas ne, ngu xutaxa rë xi catsingatju Aretas ne, caviyujutaha me sindadu tingotjo rë nandya jan xi cjuaha cha ngahan cjuecojo ná cha.
2CO 11:33 Peru ngujo xingueen ne, quijicojo ná me xcun ngu ventana tsëhë taha xihndë tsëhë hnchua rë nandya jan, caveya ná me cahntsua ngu changa jyë, sehe catsitujne ná me taha candatsen. Cuatjin camá xi cavétjutjë tsëhë gobernador jan.
2CO 12:1 Tjin ná xi cuaxë́ndaja sa yojo naha. Hacuaha handasa tsajin mé machjirëhë xi cuitjin sahme ne, peru nguehe cuichjá cojo nuju hacutjin casahmi Nai naja xi cuichja nijñá cojo ná ngu jo ndiya.
2CO 12:2 Ngahan ne, hvë ngu xihin xi ma ladu rë Jesucristu, hane camateñuju nu jan ne, quijicojo rë cha hisca hiscan majyan ngahnga hisca hiscan tacun Nina. (Xihin xi quijicojo rë ne, hacui Pablo.) Hveen ne, ¿há xi cojo yojo rë cha quiji cha? ne, o ¿há xi hasen ni rë cha xi quiji? ta, suvá Nina ni vëë me hacutjin camá. Mé ta cha xi cuajyihi vë ne,
2CO 12:4 quijicojo rë cha ngajan ngahnga ngu cahndë́ ndajyihi xi hmí paraíso, hane ngajan cahndë cha cjua xi hisca sacuiin chuva rë hacutjin cuichja nga cha cojo xuta, hacuaha hisca sacuiin cahndë́ xi cuya cuichja nga cha cjua jan cojo xuta.
2CO 12:5 Cuaxë́ndaja xcusun xi casahmi Nina cojo rë cha vëhë, peru hacuiin cuaxë́ndaja yojo naha suva; sa xi cuichjá tsahan ne, cuichjá hacutjin xi yuma hasen ngahan.
2CO 12:6 Sa xi meje cuaxë́ndaja sa yojo naha ne, hacuiin sca ná ta, tsëhë xi suvá cjuaquixi xi cuichjá. Peru ha quihndë sahmee sa cuatjin ta, tsëhë xi mijí ná xi ngatsë rë cjua vëhë ne, tsingataha cacun ngu xuta xi jemu ngu cha machjirëhë ngahan. Xi meje ná ne, xi catutsejen xuta jan xcusun xi sahme hacuaha catisiñuju me cjua xi chjá, sehe tsingataha cacun me ne, há machjirëhë ne, o há machjiriin ngahan.
2CO 12:7 Hacuaha cojo sa xi hacuiin cuátjutaha xi ndaja tsingátaha cácun tsahan suva ngatsë rë cjuandaja xi casahmi Nina cojo ná xi cuatjin cachja nijñá cojo ná ne, vëhë xi casua me cahndë́ xi Satanás ne, suandya ná sacuatjin suandya naja ngu nahyá xi maji naxenxen, cojo sa xi hacuiin cuátjutaha xi ndaja tsingátaha cácun tsahan suva.
2CO 12:8 Jyan ndiya caféhya rë Nai naja xi cuetjuxin cjuandya jan;
2CO 12:9 peru cachja me cojo ná cuitjin: “Cjuandaja xi suá ri ne, vëhë yëjë ni xi mameje ri ta, tsëhë xi hiscan xi yuma hasen xuta ne, ngajan xi ma visehen ngahñu naha.” Cuatjin cachja me. Vëhë xi hisca nguñaja cácun xi vaxë́ndaja yojo naha ngatsë rë xi yuma hasen ngahan, cojo sa xi ngahñu rë Jesucristu ne, cuma cuisehen ngajñi rë cjuatacun naha.
2CO 12:10 Vëhë xi hisca ndama ná xi jeya ngahan, ndama ná hya xi choho chja xuta tsahan, ndama ná xi vátju ngu cjuandya jyë, ndama ná hya xi vátju cjuañihi, ndama ná hya xi sacuiyiin ná hacutjin cuaxë́tjë yojo naha. Jemu ndama ná xi cuatjin vátju má cjuacjintacun vëhë ngatsë rë Jesucristu ta, tsëhë xi hya xi jemu yuma hasen ngahan ne, hya jemu sacu ná ngahñu rë Nina.
2CO 12:11 Ngahan ne, sacuaha xi sca ná, peru ngayun quitjun jyë́ xi cuitjin tichjá cojo nuju. Xi meje rë ne, ngayun ndaja cuinújun tsahan ta, tsëhë xi handasa chja yahnga xuta ta tsajin mé venguichji ná, peru cumaji cuatjutaha ná cha xi nújun xi apóstol yehe vë.
2CO 12:12 Xcusun xi casahme ngajñi nuju ne, casua machaya nuju ta ngu apóstol xi cjuaquixi ngahan. Jemu cacaa ná cojo nuju xi cuatjin cavisécoo nuju hya. Ngayun ne, jemu quijircun nuju hisca carcun xi cahyun cjuarcun xi casahme.
2CO 12:13 Tangun casahme ngajñi nuju cojo xi casahme ngajñi rë yëjë xuta rë yungun xi yahnga, cuenda xi casuandyaan nuju xi cuisecun ná tsëhë gastu naha. Sa xi cuaaintjin xi casahme cojo nuju xi má nuju ne, nijyun tacún cojo ná.
2CO 12:14 Quihndë ne, cuma jyan ndiya xi cjuë́tjëngë nuju ne, hacuaha suandyaan camahani nuju ta, hacuiin xcusun xi tjin nuju xi meje ná ta suvun xi meje ná ngayun. Mijí rë xi nixti cuetjo tujún xi cuisecoo rë xutacha rë ta xutacha rë cuetjo me tujún xi cuisecoo rë nixti rë me.
2CO 12:15 Ngahan ne, cojo yëjë ni cjuasua tsicojó tujún naha ngatsë nuju, hisca tsicjë ngahñu naha ngatsë nuju. Xi má ná ne, tucutjin xi hitsë sa vinga ná ngayun ne, ngayun ne, hitsë sa chuva vinga nuju ngahan.
2CO 12:16 Cuichja yahnga xuta tsahan ne: “Jéya. Hacuiin casuandya naja cha tsëhë gastu rë cha, peru tsëhë xi jemu quicun cacun cha ne, jemu cavindacha naja cha.” Cuatjin cuichja yahnga xuta tsahan.
2CO 12:17 ¿Há cavindácha nuju xi catsingátju nuju ngujo cha xi quijitjengui nuju cojo cjua naha?
2CO 12:18 Cachjá cojo cha Tito xi cjuetjengui nuju cha, hacuaha catsingátju sa ngu cha xingueen cojo cha Tito. ¿Há cavindacha nuju cha Tito vë? Jéya. Ha ndaja hyun ta cha vëhë ne, hya xi quitaha cha cojo nuju ne, tangun cjuatacun rë cha cojo cjuatacun naha, hacuaha tangun xcusun xi casahmi cha cojo xcusun xi ha casahme ngahan.
2CO 12:19 Ngu ngu ngayun ne, ningatuhun tacún xi cojo nuju ngayun titihín cjuaquixi niji. Peru hacuiin cuatjin ta, xcun Nina ne, cuitjin tinújin ngatsë rë xi tjin tangun cjuatacun niji cojo Jesucristu. Peru yëjë ni cjua xi tinújin ne, tinújin ngatsë nuju ngayujun ni, tsan, cojo sa xi cuma yehe sa cjuatacun rë Nina xi tjin nuju.
2CO 12:20 Jemu macjín cácun, sá nihñuu tutjin xi meje ná, hacuaha sá sahmee tutjin xi meje nuju, hya xi cjuëhë nangui nuju. Jemu macjín cácun, sá tacun si ngajñi nuju, sá tjin cjuachini ngajñi nuju, sá cjan nuju cojo xingun, sá hnga tacún, sá tjin cjuandesu ngajñi nuju, sá tjin cjuachjataha ngajñi nuju, sá tjin cjuaxta ngajñi nuju, sá tujyë tinihñu.
2CO 12:21 Jemu macjín cácun sá sahmi chuva Nina ngahan ngajñi nuju hya xi cjuëhë nga ngundiya nangui nuju; hacuaha jemu macjín cácun, sa choho cuma rë xahasen naha ngatsë rë ngu ngu ngayun xi mijí nindeyun cjuatacun nuju hacuaha hacuiin caviyujunxun cjuatsehen xi nihñu, hacuaha cjuatsehen xi sahmi xuta cojo ngu xi hacuiin chjuun rë me, hacuiin xihin rë me.
2CO 13:1 Quihndë ne, cuma jyan ndiya xi cjuë́tjëngë nuju. Sacuatjin camahindu xcun xujun rë Nina xi jo o sa xi jyan xuta sua me cjuaquixi rë me tsëhë ngu cha xi caxincha jyë́ rë ne, sehe cuma chihin cjua jan, há cuma cha castigu o há xi cumaji cha castigu.
2CO 13:2 Hya xi cavitejñataha cojo nuju xi ma jo ndiya ne, cachjátaha rë xuta xi casahmi cjuatsehen; hane quihndë xi xín tejñataha ne, cúya cuichjá nga cuatjin cojo nuju ngayujun ni xi cjëë cuichjá cojo nuju ta, hya xi cuinduva nga ngundiya ne, ha quihndë tsajin yo cuetjutje tsëhë castigu xi fehya jyë́ rë.
2CO 13:3 Cuatjin sahme ta, tsëhë xi ngayun ne, tivinchunsun chuva rë xi meje cumachaya nuju há cjuaquixi xi Jesucristu ne, sua ná me cjua xi chjá cojo nuju. Me vëhë ne, hya xi tsichuva nuju me ne, hacuiin jemu yuma hasen me ta jemu hñu ngahñu rë me, jemu hñu cjuatacun rë me ngajñi nuju.
2CO 13:4 Cjuaquixi xi jemu yuma hasen me hya xi catsiquehen xuta me xcun cru; peru tjin rë me ngahñu rë Nina quihndë xi tacun nga me cjuahñu. Hacuaha ngayin ne, xi tjin tangun cjuatacun niji cojo rë me ne, jemu yuma hasen ngayin. Peru cuinechin cjuahñu cojo rë me cojo ngahñu rë Nina cojo sa xi cuma cuisecuin nuju.
2CO 13:5 Chjuhunchuvun suvun ni yojo nuju, ¿há nechunyun jain ndiya rë Jesucristu? Nichuvun suvun ni yojo nuju. Ngayun ne, hatuxa machaya nuju suvun xi Jesucristu ne, jiya me cahntsua xahasen nuju, jiya me ngajñi rë cjuatacun nuju. Sa xi tsajin ne, cuetjun ndesu ngayun.
2CO 13:6 Hacuaha vetahá cácun ta ngayun ne, cumachaya nuju ta ngayin ne, hacuiin ndacha ngayin.
2CO 13:7 Tichjahyin rë Nina cojo sa xi ngayun ne, hacuiin nihñu cjuatsehen. Cuatjin chjahyin, peru hacuiin ngatsë rë xi meje niji xi cuichja xuta ta jemu ndaja xa canihñi ta, xi meje niji ne, xi nihñu cjuandaja, handasa cuichja xuta xi ngayin ne, sacuaha xuta ndacha ngayin.
2CO 13:8 Ngayin ne, tsajin mé venguichji rë xi nihñi xcusun xi hacuiin cjuaquixi ta xi venguichji rë xi nihñi ne, xcusun xi cjuaquixi.
2CO 13:9 Jemu ndama niji hya xi jemu yuma hasen ngayin hane ngayun ne, jemu hñu cjuatacun nuju. Hacuaha chjahyin rë Nina xi xcun ngasunhndë nuju ne, cuiyujuchihin cjuatacun nuju, cuma tyjahi xahasen nuju.
2CO 13:10 Vëhë xi cuatjin titsihindu nuju cjua vëhë xcun xujun vihi quihndë xi chaja sa cjuë́tjëngë nuju, cojo sa xi hya xi cjuëhë ngajan ne, hacuiin jemu hñu cjua naha cojo nuju ta Nai naja ne, casua ná me xa xi cuisécoo nuju, hacuiin xi tsinguétsun cjuatacun nuju.
2CO 13:11 Quihndë ne, ngayujun ni ne, catama sua rë xahasen nuju; tiyujunchuhun cjuatacun nuju; tuhun cjuetacun xahasen nuju; nihñu tangun cjuatacun nuju cojo xingun; tinechun cojo cjuandaja cojo cjuajeya; hacuaha xicamacjiin tacún ta Nina xi sua cjuahmutacun sua cjuajeya ne, cuisecoo nuju me.
2CO 13:12 Tuhun rë xingun nina, cojo cjuandaja cojo cjuahmutacun chutatsuhun xingun, sacuatjin xcusun naja.
2CO 13:13 Yëjë xuta ladu rë Jesucristu ne, tsingatju me ngu nina tsujun.
2CO 13:14 Jesucristu, Nai naja ne, catisua nuju me cjuandaja rë me; Nina ne, catisua nuju me cjuahmutacun rë me; hane Hasen rë Nina ne, catisecoo nuju ngayujun ni.
GAL 1:1 Ngahan Pablo ne, má ngahan apóstol, hacuiin ngatsë rë xi xuta catsingatju ná me o sa xi cavetahaxa ná me ta ngatsë rë xi cavetahaxa ná Jesucristu cojo Nina Nahmi naja, me xi catsicuya nga rë Jesucristu cjuahñu tsëhë ngajñi rë nima.
GAL 1:2 Ngahan cojo yëjë sa xuta ladu naja xi siu cojo ná nguehe ne, ningatjin nuju carta vihi, ngayujun ni xuta ladu rë Nina xi tsëhë yëjë ni nandya ngajan distritu Galacia.
GAL 1:3 Nina Nahmi naja cojo Nai naja Jesucristu ne, catisua nuju me cjuandaja cjuajeya.
GAL 1:4 Jesucristu ne, casua me yojo rë me xi cueya me ngatsë rë yëjë ni jyë́ naja, cojo sa xi cuëhëndaya naja me tsëhë nixtin tsehen vihi, sacuatjin meje rë Nina Nahmi naja.
GAL 1:5 Catamajyë catamahnga Nina cojo Hasen rë me yëjë ni nu yëjë ni nixtin. Cuatjin jain.
GAL 1:6 Jercu fircun ná xi ngayujun ni ne, jercu xati tinihñu cjin tsëhë Nina, me xi cajindaya nuju cojo cjuandaja rë Cristu, hane tinihñu tiña tsëhë ngu nga cjuachacun.
GAL 1:7 Xi cjuaquixi ne, tsajin sa ngu cjuachacun ndajyihi xi hacjahi xi cuaxëtje naja. Peru tjin yahnga me xi tisuandya nuju hacuaha meje tsindeya me cjuandajyihi xi chja tsëhë Jesucristu.
GAL 1:8 Peru sa xi tjin ngu me xi sua cumachaya nuju ngu cjuandajyihi xi tanguaain cojo xi ha catihín camachaya nuju ne, ¡catji me cojo nai rë me! Cuatjin catama, handasa ngahan suva o sa xi ngu ángel tsëhë ngahnga cuichja cjua jan.
GAL 1:9 Sacuatjin canújin cojo nuju titjun ne, hacuanitjin ni cúya cuichjá cojo nuju quihndë cjua vihi: Sa xi tjin ngu me xi tisua tijimachaya nuju ngu cjuandajyihi xi tanguaain cojo xi ha camacjain nuju ne, ¡catji me cojo nai rë me!
GAL 1:10 Ngahan ne, tsajin jercu meje ná xi chuya rë xuta tsahan ta xi meje ná ne, xi Nina chuya rë me tsahan. Sa xi meje sa ná xi xuta chuya rë me tsahan sacuatjin camameje ná hatsëë ne, hacuaha hacuiin mosu hndixahan rë Cristu ngahan.
GAL 1:11 Nguehe cuichjá cojo nuju ngayujun ni xi cjuandajyihi xi suá machaya rë xuta ne, hacuiin cjuatacun rë xuta.
GAL 1:12 Hacuiin xuta casua ná me cjuandajyihi vë, hacuaha hacuiin xuta cavicuya ná me ta Jesucristu ne, me vëhë xi casua me camachaya ná.
GAL 1:13 Ngayujun ni ne, ha camachaya nuju hacutjin xi casahme hatsëë, hya xi jemu cavétaha yojo naha cjuachacun rë xuta tjë rë Israel. Camachaya nuju tsëhë hacutjin jercu tisuá rë xuta ladu rë Nina cjuañihi nixtin hya hacuaha jercu tisahme ngahñu xi tsicjë́ya me.
GAL 1:14 Hane ngahan ne, tsëhë yëjë xuta xi hacuaha tjë rë Israel xi tangun nu naha cojo ne, cavátjutaha rë xi casahmechehen yëjë ni xcusun rë xuta naha ta, tsëhë xi jercu tu cavétaha camahani yojo naha cojo xcusun rë xutachanga naha.
GAL 1:15 Peru Nina ne, cavaxijin ná me chaja sa xi tsin ngahan, hane cojo cjuandaja rë me ne, casuaxa ná me. Hya xi Nina cavejña ngu cacun me
GAL 1:16 xi tsingacun me ngahan Quihndi rë me, cojo sa xi suá cumachaya rë xutaxín tsëhë cjuandajyihi tsëhë me ne, hya tsajin yo xuta xi cëjë cavinengësë rë,
GAL 1:17 hacuaha cejen ngajan Jerusalén xi cjuë́tjëngë me xi ha má apóstol chaja sa xi cuma ngahan apóstol. Cahndë́ rë vëhë ne, ngutjen cëjëxen ngajan distritu Arabia, sehe cavúya nga nandya Damasco.
GAL 1:18 Hya xi camá ne, xi cavatju jyan nu ne, cëjë ngajan Jerusalén, cëjëtjëngë Pedru, hane cavitejñataha cojo rë me tyjuhun nixtin.
GAL 1:19 Peru cahveen apóstol xi yahnga ta ngu ni Jacobo, xicjin Nai naja, xi cahvë.
GAL 1:20 Cjua xi tichjá cojo nuju ne, vëë Nina ta hacuiin vindácha.
GAL 1:21 Hya xi camá ne, cëjë distritu Siria cojo distritu Cilicia.
GAL 1:22 Hane xuta ladu rë Cristu ngajan distritu Judea ne, hisca cjëë sa scuëë me ngahan.
GAL 1:23 Sehe tu vihndë me cjua vihi: “Cha xi jercu casua naja cjuañihi hatsëë ne, quihndë ne, tisua cha tijimachaya rë xuta tsëhë cjuachacun xi jercu casahmi cha ngahñu xi tsicjëya cha.” Cuatjin vihndë me.
GAL 1:24 Hane casahmi jyë casahmi hnga me Nina cojo Hasen rë me ngatsë naha.
GAL 2:1 Hya xi camá ne, xi cavatju teñuju nu ne, cavúya ngahan nga ngu ndiya ngajan Jerusalén. Hacuaha Bernabé ne, quijitangun me cojo ná. Hacuaha cëjëcojo cha Tito.
GAL 2:2 Cëjë ta cuatjin cachja Nina. Hane xcun ngu junta xi camá cojo suvá xuta matitjun ne, cachjá cojo rë me hacutjin fi cjuandajyihi xi suá machaya rë xutaxín. Cuatjin casahme, tsëhë xi mijí ná xi xa xi tisahme o xi ha casahme ne, tu mahya ni.
GAL 2:3 Peru hisca cha Tito xi quitahátangun cha cojo ná ne, handasa xutaxín má cha ne, camaji cha ngujyë xi xtí chuxin rë cha.
GAL 2:4 Ngujo cha ndacha xi chja cha xi ladu rë Jesucristu má cha ne, cavisehen tahahma cha ngajñi niji xi scutsejen cha hacutjin xcusun niji xi tjin ndaya ngayin ngatsë rë xi tjin tangun cjuatacun niji cojo Jesucristu. Meje rë cha xi cuetihin nga yojo niji cojo ley rë Moisés.
GAL 2:5 Peru ngayin ne, caningatiin rë cha hisca hitsë, cojo sa xi cjuandajyihi xi hatuxa cjuaquixi ne, chajin xi cuma nuju.
GAL 2:6 Peru me xi chjahárcun rë sacuaha xuta xi matitjun jan ne, (cuatjin chjá ta xa xi quitahá me jan ne, hisca cuendaain ná ta, Nina ne, texta ni vutsejen naja me ngayejen ni), me xi cuacun matitjun jan ne, cavesintaain me hisca ngu cjua tsëhë cjuandajyihi xi chjá cojo xuta, tsëhë xi ha tjin chihin.
GAL 2:7 Hacuaha cajnercu me xi Nina casua ná me xa xi cuichjá cjuandajyihi cojo xutaxín, sacuahatjin rë Pedru xi casatë rë me xi cuichja me cojo xuta tjë rë Israel.
GAL 2:8 Nina ne, me xi catsingatju rë Pedru xi cuma me apóstol ngajñi rë xuta tjë rë Israel ne, hacuaha hacui ni me xi catsingatju ná xi cuma ngahan apóstol ngajñi rë xutaxín.
GAL 2:9 Hane Jacobo cojo Pedru cojo Juan, me xi chjahárcun rë sacuaha xuta xi matitjun ne, hya xi cuatjin cajnercu me xi Nina casua ná me cjuandaja jan ne, cafaha me ntsin, ngahan cojo Bernabé, hane cuatjin catsingacun me xi ngayin ne, tinihñitangun cojo rë me xa rë Nina. Hane camangu tacuín xi ngayin ne, nihñi xa ngajñi rë xutaxín, hane me xi cuacun jan ne, sahmi me xa ngajñi rë xuta tjë rë Israel.
GAL 2:10 Ngu tu tu ni xi cafehya niji me ne, xi cuisecuin ngajñi rë cjuachaja rë xuta yuma xi hinchajñi ngajñi me. Sacuatjin xcusun vëhë ne, hatuxa jercu vejñá xi sahme.
GAL 2:11 Peru hya xi quiji Pedru ngajan nandya Antioquía ne, cachjátáha rë me xcun cojo xcun ta, tsëhë xi suvá tsejen xi cuaain tjin xi tisahmi me.
GAL 2:12 Chaja sa xi cjuehe ngujo cha xi catsingatju Jacobo ne, tijinë tangun Pedru niñu cojo xutaxín xi ladu naja. Peru tu ngu cafehe cha xi cuacun jan ne, cavetsihin cavejñaxin me xi jinë tangun me cojo xutaxín xi cuacun jan ta, tsëhë xi tsacjun me yahnga xuta tjë rë Israel xi ladu naja xi meje rë xi xtí chuxin rë yëjë ni xuta xi visehen ladu rë Nina.
GAL 2:13 Hacuaha yëjë sa xuta tjë rë Israel xi siu ngajan ne, cavetsihin casahmi jo xcun jo hntsua me sacuatjin rë Pedru, hane hisca cojo Bernabé camatangun me cojo me xi cuacun jan cojo xcusun xi casahmi me.
GAL 2:14 Peru hya xi cahvë xi xcusun xi tisahmi me ne, matanguaain cojo cjuaquixi xi vicuya naja cjuandajyihi ne, xcun yëjë ni xuta jan ne, cuitjin cachjá cojo rë Pedru: “Ngayun xi ngu xuta tjë rë Israel má ngayun ne, sa xi nihñu sacuaha sahmi xutaxín, hacuiin sacuaha sahmi xuta tjë rë Israel ne, ¿hacutjin meje nihñu ngujyë xi xutaxín jan ne, sahmi me sacuaha nihña ngayaan xuta tjë rë Israel?”
GAL 2:15 Ngayaan ne, hatuxa xuta tjë rë Israel má ngayaan, hacuiin xuta tsehen má ngayaan.
GAL 2:16 Handasa cuatjin ne, ha hyan xi ngu xuta ne, tsicjiin Nina jyë́ rë me ngatsë rë xi vihndë me tsëhë ley rë Moisés ta suvá ni ngatsë rë xi mangu cacun me cojo Jesucristu. Hane cojo ngayaan ne, hacuaha camangu tacun cojo Jesucristu, cojo sa xi tsicjë Nina jyë́ naja ngatsë rë xi mangu tacun cojo rë Cristu, hacuiin ngatsë rë xi canuhyaan tsëhë ley jan ta, tsëhë xi tsajin camahani yo xi cjuë jyë́ rë ngatsë rë xi vihndë tsëhë ley rë Moisés jan.
GAL 2:17 Hya xi canihña tangun cjuatacun naja cojo Cristu cojo sa xi cjuë jyë́ naja ne, sa xi hya camatsejen xi hacuaha ngayaan xuta tsehen yaan ne, ¿há vëhë vijne xi Cristu ne, casahmi me xi caxincha ngayaan ndiya rë cjuatsehen? ¡Jéya, hacuiin cuatjin vijne!
GAL 2:18 Sa xi cúya tsindaja nga xcusun xi ha catsinguétsun ne, ngajan matsejen xi xuta tsehen má ngahan.
GAL 2:19 Ngahan ne, xi cuma rë ley rë Moisés ne, sacuaha xi cavéya, sacuaha xi suvá ley jan catsiquehen ná. Cuatjin camá cojo sa xi cuma ngahan tsëhë Nina. Sacuaha xi casetaha tangun ngahan xcun cru cojo Cristu.
GAL 2:20 Ngajan xi sacuaha xi ha quihndë hacuiin cjuahñu naha xi tjin ná ta sacuaha cjuahñu rë Cristu. Peru quihndë xi tjin ná cjuahñu cojo yojo naha ne, mangu cacún cojo Quihndi rë Nina, me xi catsihmu cacun ná hacuaha casua me yojo rë me xi cueya ngatsë naha.
GAL 2:21 Hacuiin tsitjungë cjuandaja rë Nina. Sa xi cuma cjuë jyë́ rë xuta ngatsë rë xi vihndë me tsëhë ley rë Moisés ne, ha tu mahya ni cahme Cristu.
GAL 3:1 Ngayujun ni xuta Galacia ne, ¡jercu yuma hasen yun! ¿Há tjin yo cafehya cacun tsujun xi cuatjin ningatuhuntacún? Jercu tu ndaja camachaya nuju hacutjin xi cahme Jesucristu xcun cru.
GAL 3:2 Ngu tu tu ni cjua xi meje cuinengësë nuju ne: ¿Há cachjuhunntsun Hasen rë Nina ngatsë rë xi canihñu sacuatjin vitexa ley jan, o sa tsajin ne, há ngatsë rë xi camacjain nuju cjuandajyihi xi cavisiñuju?
GAL 3:3 ¿Há tuxa yuma hasen ngayun? Quihndë xi cavetsuhun cojo Hasen rë Nina ne, ¿há meje nihñuchuhun cojo ngahñu nuju suvun ni?
GAL 3:4 ¿Há tu mahya ni xi cuatjin cjín xcusun cavatjun ni? ¡Hatuxa hacuiin tu mahya!
GAL 3:5 Hya xi Nina sua nuju me Hasen rë me hacuaha sahmi me cjuarcun ngajñi nuju ne, ¿mé má cuatjin casahmi me? Hacuiin ngatsë rë xi nihñu sacuatjin vitexa ley ta, ngatsë rë xi macjain nuju cjuandajyihi xi visiñuju.
GAL 3:6 Xcun xujun rë Nina ne, cuitjin camahindu: “Abraham ne, camangu cacun me cojo cjua xi cachja Nina cojo rë me, hane ngatsë rë vëhë xi catsicjë Nina jyë́ rë me.” Cuatjin camahindu.
GAL 3:7 Ngajan xi meje rë xi cuijnercun xi xuta xi mangu cacun me cojo Nina ne, me vëhë jain xi quihndi rë Abraham me.
GAL 3:8 Xujun rë Nina jan ne, ha tjun sa vëë xi tsicjë Nina jyë́ rë xutaxín ngatsë rë xi cumangu cacun xutaxín jan cojo rë me. Vëhë xi xcun xujun rë Nina ne, camahindu cjua xi cuitjin cachja Nina cojo Abraham: “Ngatsë riji ngaye ne, cumanchacuntihin yëjë ni xuta ngasunhndë.”
GAL 3:9 Ngajan xi yëjë ni xuta xi mangu cacun me cojo Nina ne, cumanchacun tangun me cojo Abraham, me xi hacuaha camangu cacun.
GAL 3:10 Yëjë ni xuta xi mangu cacun me cojo ley rë Moisés ne, hatuxa cuatju me castigu, tsëhë xi xcun xujun rë Nina ne, cuitjin camahindu: “Nina ne, sahmi rë me castigu yëjë ni xuta xi vihndiin me tsëhë yëjë ni cjua xi camahindu xcun xujun rë ley rë Moisés.” Cuatjin camahindu.
GAL 3:11 Ngajan xi suvá tsejen xi xcun Nina ne, cjuiin jyë́ rë hisca xi ngu xuta ngatsë rë xi cahndë me tsëhë ley jan, tsëhë xi xcun xujun rë Nina ne, cuitjin camahindu: “Xuta xi tsajin jyë́ rë me ngatsë rë xi mangu cacun me cojo Nina ne, sacú rë me cjuahñu xatsë.” Cuatjin camahindu.
GAL 3:12 Peru ley rë Moisés jan ne, cuendaain camahani rë xi mangu tacuun cojo Nina ta, xcun xujun rë Nina ne, cuitjin camahindu: “Xuta xi sahmi me sacuatjin vitexa ley ne, sacú rë me cjuahñu xatsë sa xi sahmi chihin me ley jan.” Cuatjin camahindu.
GAL 3:13 Cristu ne, cavëhëndaya naja me tsëhë castigu xi vitexa ley jan, hya xi cavatju me castigu jan ngatsë naja. Camahindu nga cuitjin xcun xujun rë Nina: “Yëjë nima xi xtyangui tsëhë ngu ya ne, hatuxa cuatju me castigu rë Nina cuma.” Cuatjin camahindu.
GAL 3:14 Cristu ne, cuatjin cavëhëndaya naja me, cojo sa xi cjuaninchacuntihin xi cachja Nina xi sua me Abraham ne, hacuaha satë rë xutaxín ngatsë rë Jesucristu, hacuaha cojo sa xi ngatsë rë xi mangu tacuun cojo Jesucristu ne, sacú naja Hasen rë Nina xi cachja Nina xi sua me.
GAL 3:15 Ngayujun ni ne, cuichjá cojo nuju ngu ejemplu xi ha ndaja hyan. Hya xi ha camachihin xujun tsëhë ngu compromisu ne, tsajin yo xi tsicjëya rë o sa cuesuntaha sa rë ngu cjua.
GAL 3:16 Nina ne, cachja me cojo Abraham xi sua me cjuandaja rë me xi cuma rë Abraham cojo tjë rë me. Chjaain xujun rë Nina xi “yëjë tjë rë”, sacuaha xi jercu cjín xuta tichja tsëhë ta xi chja ne, “cojo tjë riji”, sacuaha xi ngu ni xuta tichja tsëhë. Hane tjë vëhë ne, hacui Cristu.
GAL 3:17 Xi meje cuichjá ne, Nina ne, casahmi me ngu compromisu cojo Abraham titjun. Vëhë xi ley rë Moisés, xi cavejña Nina xi cavatju ñuju cientu cojo cantë nu ne, maji tsicjëya rë compromisu jan, maji tsinguetsun rë cjua xi cachja Nina jan.
GAL 3:18 Sa xi sacú naja cjuandaja xi sua Nina ngatsë rë xi vinuhyan tsëhë ley rë Moisés ne, ngajan xi hacuiin ngatsë ni rë xi cuatjin cachja Nina xi sacú naja. Peru Nina ne, casua me cjuandaja jan Abraham ngatsë ni rë xi cuatjin cachja me titjun.
GAL 3:19 Sa xi cuatjin ne, ¿mé machjirëhë ley rë Moisés? Xi camá ngascan ni, Nina casua me ley jan, cojo sa xi cumatsejen xi xuta ne, hatuxa vihndiin me cjua xi vitexa Nina. Ley jan ne, cavitexa hisca xi cafehe tjë rë Abraham jan, me xi cachja Nina xi sacú rë cjuandaja. Hacuaha ley jan ne, casahmi entregadu ángel tsja Moisés, me xi cavéjña vasentjin ngajñi rë Nina cojo xuta.
GAL 3:20 Peru hindë ne, tsëhë cjua rë Nina ne, mamijí sa ngu me xi véjña vasentjin, ta ngu tu tu ni me ne, tifahacuenda me.
GAL 3:21 ¿Há vëhë vijne xi ley rë Moisés ne, sahmi rë condra cjua xi cachja Nina jan ni? ¡Jéya, hacuiin cuatjin! ta, sa xi ley jan camá casua naja cjuahñu xatsë ne, ha cafë jyë́ naja ngatsë rë xi canuhyan tsëhë ley jan.
GAL 3:22 Peru xujun rë Nina ne, chja xi cjuatsehen vitexa rë yëjë ngarca ni, cojo sa xi xuta xi mangu cacun me cojo Jesucristu ne, cuma cjuahatsja me cjuandaja xi cachja Nina xi sua me.
GAL 3:23 Peru chaja sa xi nduva nixtin xi camá camangu tacun cojo Jesucristu ne, ley jan ne, cavinchahñu naja sacuaha xi ndavaya cavinechanyaan, hisca nixtin xi casacu camachaya naja xi fë jyë́ naja ngatsë rë xi mangu tacuun cojo Jesucristu.
GAL 3:24 Cuatjin xi ley ne, cavitexa naja hisca xi canduva Cristu cojo sa xi cjuë jyë́ naja ngatsë rë xi mangu tacuun cojo Jesucristu.
GAL 3:25 Peru quihndë xi ha cafehe nixtin xi mangu tacuun cojo Jesucristu ne, ha quihndë vitexaain sa naja ley rë Moisés jan.
GAL 3:26 Cuatjin ta, tsëhë xi quihndë xi tjin tangun cjuatacun nuju cojo Jesucristu ne, ngayujun ni ne, quihndi rë Nina má ngayun ngatsë rë xi mangu tacún cojo rë me.
GAL 3:27 Ngayujun ni xi caxtenda ngayun xi nihñutangun cjuatacun nuju cojo Cristu ne, hacuaha cavisehen nuju cjuatacun rë me jan sacuaha xi cachujun ngu tsjian xatsë.
GAL 3:28 Ngajan xi cuendaain rë sa xi xuta tjë rë Israel o sa xi xutaxín ngayun, cuendaain rë sa xi xuta caxteña o sa xi xuta tjin ndaya ngayun, cuendaain rë sa xi chjuun o sa xi xihin ngayun ta, tsëhë xi ngayujun ni ne, xi tjin tangun cjuatacun nuju cojo Jesucristu ne, ngu tangun ni cún yun xi cuma rë Nina.
GAL 3:29 Hane sa xi tsëhë Cristu má yun ne, ngajan xi hacuaha tjë rë Abraham má yun, hane satë nuju cjuandaja xi cachja Nina xi sua me.
GAL 4:1 Cuma cuinújan ne, sacuaha cha xi cjuahatsja cjuanchina rë xutacha rë ne, nguyëjë rë xi chúva nu rë cha ne, tangun cha cojo ngu mosu xi cachahá rë, handasa cjuaquixindaja xi cha vëhë má cha nai rë yëjë ni cjuanchina jan.
GAL 4:2 Tjin xuta xi sahmi rë cha cuidadu hacuaha fahacuenda me cjuacjintacun rë cha, hisca nixtin xi cachja nahmi rë cha xi cuatjin cuma cojo cha.
GAL 4:3 Cuanitjin ni naja ngayaan ta, hya xi cjualanga naja ne, hatuxa cavinuhyan tsëhë xitsehen xi vitexa rë ngasunhndë, sacuaha xi má ngayaan hndixahan xi cachahá rë.
GAL 4:4 Peru hya xi cavechútáha rë nixtin rë ne, Nina ne, catsingatju me Quihndi rë me, xi catsin sacuaha tsin ngayaan xuta ngasunhndë, hacuaha ley rë Moisés cavitexa rë jan.
GAL 4:5 Cuatjin catsingatju me, cojo sa xi Quihndi rë me jan ne, cuëhëndaya naja ngayejen ni xi cavitexa naja ley jan, hacuaha cojo sa xi cuma ngayaan quihndi rë Nina.
GAL 4:6 Cojo sa xi cumatsejen xi quihndi rë Nina má ngayun ne, Nina ne, caveya me Hasen rë Quihndi rë me cahntsua cjuatacun naja. Hane Hasen jan ne, cuitjin chja cojo Nina: “¡Papá, Nahmi naha!”
GAL 4:7 Vëhë xi ngayun ne, hindë hacuiin má ngayun mosu hndixahan xi caxteña ta quihndi rë Nina. Hane xi cuatjin quihndi rë me ngayun ne, Nina ne, sua nuju me yëjë ni xi satë rë quihndi rë me.
GAL 4:8 Hatsëë nixtin ne, hya xi chaja sa cumachaya nuju yo xi Nina ne, jemu cavetuhun yojo nuju cojo jemu cjín xcusun nina xi hatuxa hacuiin nina.
GAL 4:9 Peru quihndë xi ha camachaya nuju yo xi Nina ne, o cuma cuinújan ne, quihndë xi Nina ne, vutsejen nuju me cojo cjuandaja ne, ¿hacutjin nga meje cuyun cuisuhun cojo cjuahasen xi chúva ngahñu rë hacuaha yuma cojo cjuatacun rë ni? ¿Hacutjin nga meje cuetuhun yojo nuju cojo cjuahasen xi cuacun jan ni?
GAL 4:10 Jercu nihñu suhi. Tjin nixtin xi jercu chjuhunrcun, tjin suhi xi nihñu chuva sá o sa xi chuva nu.
GAL 4:11 Macjín cacún, sá tu xa xi casahme ngajñi nuju ne, tu mahya ni camá.
GAL 4:12 Ngayujun ni ne, cjuéhya nuju favor ne, catama ngayun sacuaha ngahan ta, tsëhë xi ngahan ne, ha camá ngahan sacuaha ngayun. Tsajin mé xi choho canihñu cojo ná.
GAL 4:13 Hacuaha hyun xi titjun ne, casuá camachaya nuju tsëhë cjuandajyihi xi chja tsëhë Jesucristu ngatsë rë ngu chíhin xi yaha ná.
GAL 4:14 Peru handasa casuándya nuju cojo chíhin naha jan ne, ngayun ne, tsajin canitjungun ná hacuaha tsajin canihñuchuvun ná. Cahndë́ rë vëhë ne, cachjuhunntsun ná sacuaha xi ngu ángel xi catsingatju Nina má ngahan, o sacuaha xi suvá Jesucristu má ngahan.
GAL 4:15 ¿Mé camá cojo cjuandaja xi tjin nuju hatsëë ni? Ngahan ne, tsinguixë xi ngayun ne, hisca canaxun túxcun tuhun ná nixtin hya, sa xi camá canaxun.
GAL 4:16 ¿Há camá ngahan condra nuju ngatsë rë xi cachjá cojo nuju cjuaquixi?
GAL 4:17 Tjin xuta xi jercu meje cuisecoo nuju me, peru hacuiin cojo cjuandaja ta xi meje rë me ne, xi cuaxëxin nuju mé tsahan, cojo sa xi ngayun ne, ninguisuhunjñurcun cojo rë me.
GAL 4:18 Jercu ndatjin xi meje cuisecoon rë xingueen, hya xi cojo cjuandaja. Peru meje rë xi yëjë ni nixtin cuatjin nihña, hacuiin suvá ni hya xi tejñataha cojo nuju.
GAL 4:19 Ngayujun ni tsan, jercu jyë cjuahmu xi tivátju nga tijima ngatsë nuju, sacuaha vatju ngu chjuun xi tsin quihndi rë me. Hacuaha cuatjin cjuë́ndujú cojo cjuahmu vihi hisca xi cumatsejen xi jiya të Cristu ngajñi cjuatacun nuju hacuaha cuitexa me cjuatacun nuju tsëhë yëjë ni xcusun xi nihñu.
GAL 4:20 Jercu meje cuitejña cojo nuju ndicumaha ni, cojo sa xi cuma tsindéya cjuavisiajmi naha cojo nuju ta, tsëhë xi jercu vityangë cacún tsujun.
GAL 4:21 Ngayujun ni xi meje nuju xi ley rë Moisés cuitexa nuju ne, tinújun cojo ná, ¿há cjëë cuinuhyun cjua rë ley jan?
GAL 4:22 Camahindu xi Abraham ne, jo xu camá quihndi rë me: ngu ne, tsëhë na mosu hndixahan xi sahmi xa rë chjuun rë me, hane xingu jan ne, tsëhë chjuun rë suvá me, na xi hacuiin hndixahan ta hatuxa xuta ndaya tjin.
GAL 4:23 Quihndi rë na mosu hndixahan jan ne, catsin sacuaha tsin yëjë ni langa; peru quihndi rë na ndaya jan ne, camá tsëhë cjuarcun rë Nina.
GAL 4:24 Cjua xi cuicun vi ne, sacuaha ngu ejemplu: jo chjuun jan ne, sacuaha jo compromisu má na. Ngu na ne, Agar hmí rë na, hane yëjë ni quihndi rë na ne, hatuxa hndixahan cachahá rë. Hane chjuun jan ne, sacuaha compromisu xi casahmi Nina cojo Moisés ngajan Naxi Sinaí.
GAL 4:25 Na Agar, na xi sacuaha Naxi Sinaí ngajan Arabia ne, sacuaha ngu ejemplu tsëhë nandya Jerusalén xi tacun quihndë. Hane yëjë ni xuta tsëhë Jerusalén vëhë ne, sacuaha hndixahan cachahá rë má me.
GAL 4:26 Peru yëjë ni xuta tsëhë Jerusalén xi tacun ngahnga ne, hatuxa ndaya tjin me. Hane ngayaan ne, quihndi rë nandya Jerusalén vëhë má ngayaan.
GAL 4:27 Cuitjin chja xujun rë Nina: Catamasua ri ngaye chjuun xi maji sacu ri quihndi; chjindaye cjuasua, ngaye xi cjëë cuatji cjuahmu xi tsin ri quihndi. Tsëhë xi ngaye xi cavixin cojo ra, hitsë sa cjín cuma ye cojo quihndi riji xi cuma ran xi fi vejña na cojo cha.
GAL 4:28 Ngayujun ni ne, hacuaha quihndi rë Nina má ngayun, sacuatjin rë Isaac, ngatsë rë xi cuatjin cachja Nina.
GAL 4:29 Nixtin hya ne, cha xi catsin sacuaha tsin yëjë ni langa ne, catsujyihiya tjengui cha cojo cjuahngatacun cha xi catsin ngatsë rë Hasen rë Nina. Quihndë ne, ha cuanitjin ni tijima.
GAL 4:30 Peru ¿mé chja xujun rë Nina? Cuitjin chja: “Naxendihye na mosu hndixahan jan cojo quihndi rë na ta, tsëhë xi quihndi rë na hndixahan jan ne, hatuxa cumaji sacu tangun rë cjuanchina rë nahmi rë cojo quihndi rë na xi ndaya tjin.” Cuatjin chja xujun rë Nina.
GAL 4:31 Vëhë xi ngayejen ni ne, hacuiin quihndi rë na mosu hndixahan má ngayaan ta quihndi rë na xi ndaya tjin.
GAL 5:1 Cristu ne, cavëhëndaya naja me, cojo sa xi ndaya tjin ngayaan. Vëhë xi tiyujunhñu cjuatacun nuju, xicaninguisunjñuu rcun nga cojo ngu xcusun xi sahmi xi cuyun nga ngayun sacuaha hndixahan.
GAL 5:2 Nutsujun ni. Ngahan Pablo ne, cuichjá cojo nuju ta, sa xi xtí chuxin nuju sacuatjin xcusun rë xuta tjë rë Israel ne, Cristu ne, cumachjiriin nuju me.
GAL 5:3 Cúya cuichjá cojo nuju ta yëjë ni xihin xi cuatjin xtí chuxin rë ne, hatuxa tjin rë xi sahmi yëjë ni hacutjin chja ley rë Moisés.
GAL 5:4 Ngayun xi meje nuju xi cjuë jyë́ nuju ngatsë rë xi vinuhyun tsëhë ley rë Moisés ne, hindë tsajin tjin tangun cjuatacun nuju cojo Cristu, hacuaha jemu cjin nechun tsëhë cjuandaja rë Nina.
GAL 5:5 Peru ngayin ne, jercu vetihin tacuín xi tsicjë Nina jyë́ niji. Hacuaha jercu nechinyin xi cuatjin sahmi Nina ta, tsëhë xi Hasen rë Nina ne, visecoo niji xi mangu tacuín cojo Jesucristu.
GAL 5:6 Hya xi tjin tangun cjuatacun naja cojo Jesucristu ne, venguiin chji rë sa cati rë o sa xi catiin rë chuxin naja. Xi vengui chji rë ne, xi mangu tacuun cojo Jesucristu, hane ngatsë rë vëhë ne, xi hacuaha tjin naja cjuahmutacun.
GAL 5:7 Ngayun ne, ha jercu ndaja titsangun titjun. ¿Yo xi casuandya nuju xi mijí cuangunndujun xi cuinuhyun tsëhë cjuaquixi rë Nina?
GAL 5:8 Nina xi tsingatju me cjua nuju ne, hacuiin me vëhë xi cuatjin casuandya nuju.
GAL 5:9 Ha hyan cjua xi chja cuitjin: “Hitsë lihndi ni san rë pan ne, caa rë tsisatjen rë yëjë nahyu.” Cuatjin chja cjua.
GAL 5:10 Macjiin cacún tsujun ta, ngatsë rë xi tjin tangun cjuatacun naja cojo Nai naja ne, xi má ná ne, ningatuhun tacún sacuatjin tsingátaha cacún ngahan. Hane tu yo ni xi tisuandya nuju ne, cuatju castigu cuma.
GAL 5:11 Sacuaha ngahan ne, sa xi quixi xi tichjá sa cojo xuta xi sahmi ngujyë xi xtí chuxin naja ne, ¿mé tsëhë xi yahnga me ne, tsujyihiyatjengui sa ná me cojo cjuahngatacun? Sa xi quixi xi cuatjin sahme sa ne, ngajan xi hya xi chjá cojo xuta tsëhë hacutjin cahme Jesucristu xcun cru ne, tsajin cjuandya xi cuma rë yahnga xuta xi cuacun jan.
GAL 5:12 ¡Jercu ndatjin sa xi xuta jan xi cuatjin tisuandya nuju me ne, catatëxin suvá me yojo rë me ngu ndiya xa ni!
GAL 5:13 Sacuaha ngayujun ni ne, catsingatju Nina cjua nuju, cojo sa xi cumandaya ngayun. Peru hacuiin tu cuaain rë xi cavëhëndaya nuju Nina xi ningatuhun rë cjuatacun nuju yëjë ni xcusun tsehen xi vitexa nuju. Cahndë́ rë vëhë ne, tisecun xingun ngatsë rë cjuahmutacun xi tjin ngajñi nuju.
GAL 5:14 Cuatjin nihñu ta, yëjë ni cjua xi vitexa ley rë Moisés ne, cumachihin hya xi nihña ngu ni cjua vihi: “Meje rë xi nihmu tacún xingun sacuatjin nihmu tacún suvun yojo nuju.”
GAL 5:15 Peru sa xi choho nihñu cojo xingun sacuatjin sahmi chu xi cjan rë xi jinëxcuen xicjin chu ne, nechun cuidadu, sá tu nicjuyun cjuandaja xi tjin ngajñi nuju.
GAL 5:16 Nutsujun ni. Tuhun cahndë́ xi Hasen rë Nina ne, cuitexa rë cjuatacun nuju. Hane xi cuatjin ne, hatuxa nihñuu yëjë ni xi fehya cjuatacun tsehen nuju.
GAL 5:17 Cjuatacun tsehen naja ne, sahmi condra cojo Hasen rë Nina, hacuaha Hasen rë Nina ne, sahmi condra cojo cjuatacun tsehen naja. Catsijo ni vihi ne, sahmi condra cojo xicjin. Ngajan xi ngayujun ni ne, maji nihñu tu mé ni xcusun xi meje nihñu.
GAL 5:18 Sa xi Hasen rë Nina vitexa rë cjuatacun nuju ne, ngajan xi cuitexaain nuju ley rë Moisés.
GAL 5:19 Quihndë ne, ha ndaja ni hyan xcusun tsehen xi nihña hya xi vitexa naja cjuatacun tsehen naja. Nihña cjuatsehen xi sahmi ngu xuta cojo ngu xi hacuiin chjuun rë me, hacuiin xihin rë me, o sa xi ngajñi ni xihin me, o ngajñi ni chjuun me, o tu mé sa xcusun cjuatsehen jan.
GAL 5:20 Chjahanrcun nina ndyojo, hacuaha nihña cjuasurqui. Choho hyaan xingueen, nihña si ngajñi naja cojo xingueen, hacuaha tjin naja cjuachini. Jercu ma cjan naja, jercu hnga tacun, jercu chicjan cojo xingueen, ngujo yaan ne, naxenxeen yojo naja tsëhë xingueen.
GAL 5:21 Jercu tjin naja cjuaxin, jercu xuta chihi má ngayaan, jercu maxti nuju ngayaan hya xi nihñu ngu suhi, cojo jercu cjín sa xcusun vëhë xi nihña. Cojo tjun sa ne, cuichjá cojo nuju sacuatjin xi ha cachjá cojo nuju ta xuta xi sahmi me sacuahatjin rë xcusun vëhë ne, satiin rë me xi cuisehen me hiscan xi sahmi Nina gubiernu.
GAL 5:22 Peru hya xi Hasen rë Nina vincha cjuandaja ngajñi rë cjuatacun naja ne, jercu tjin naja cjuahmutacun, tjin naja cjuasua, tjin naja cjuajeya, yehe tacun, tjin naja cjuandaja, cuma cumangu cacun xuta cojo naja,
GAL 5:23 jeya ngayaan, caa naja xi hacuiin ningatehen rë cjuatacun tsehen naja cojo xcusun xi fehya xi nihña. Sacuaha yëjë ni cjuandaja vëhë ne, tsajin camahani ley xi vitexa xi cumaji nihña.
GAL 5:24 Hane yëjë ni xuta ladu rë Jesucristu ne, ha caviyujuxin me cjuatacun tsehen rë me cojo yëjë ni xcusun tsehen xi fehya rë me xi sahmi me.
GAL 5:25 Sa xi Hasen rë Nina casua naja cjuahñu xatsë ne, meje rë xi hacuaha ningatehen xi Hasen jan cuitexa rë cjuatacun naja.
GAL 5:26 Mijí rë xi xta ngayaan, mijí rë xi si rcun, mijí rë xi tjin naja cjuaxin cojo xingueen.
GAL 6:1 Ngayujun ni ne, sa xi yo sacutsja rë ngu xuta xi tisahmi me cjuatsehen ne, ngayun xi ningatuhun xi vitexa Hasen rë Nina cjuatacun nuju ne, meje rë xi cuisecun rë me xi cuya ndaja me, peru tisecun rë me cojo yëjë ni cjuandaja cjuajeya. Hacuaha meje rë xi tjin nuju cuidadu, sá tu cojo ngayun cuinengunyun ngajñi rë cjuatsehen.
GAL 6:2 Tisecun xingun cojo sa xi scaa nuju cojo cjuacjintacun xi quichuhun xingu xingu ngayun. Hane xi cuatjin nihñu ne, ngajan xi machihin ley xi cavicuya naja Cristu.
GAL 6:3 Sa xi yo sahmi jyë yojo rë handasa tsajin mé vechú ne, vindacha suvá yojo rë.
GAL 6:4 Xingu xingu ngayaan ne, meje rë xi nichuvan suvaan yojo naja cojo xcusun naja. Xi cuatjin nihña ne, cumasua naja cojo xcusun ndaja xi canihña suvaan, hisca sahmii ngujyë xi nutsejen xcusun xi sahmi xingueen.
GAL 6:5 Xingu xingu ngayaan ne, tjin naja xi chaan cjuacjintacun naja suvaan.
GAL 6:6 Xuta xi vutaya cjuandajyihi xi chja tsëhë Jesucristu ne, hacuaha meje rë xi cuisecoo me xuta xi tivicuya rë me jan cojo yëjë ni xcusun ndaja xi tjin rë me.
GAL 6:7 Xicavindachuun suvun rë yojo nuju ta Nina ne, cumaji cumandacha me. Xcusun xi nitjen ne, ha vëhë ni sacú naja.
GAL 6:8 Xuta xi fi tjengui me ndiya rë cjuatacun tsehen xi fehya yojo rë me ne, cuechú nixtin xi sacú chjí rë me xi yojo rë me jan ne, cjuehndu. Peru xuta xi fi tjengui me ndiya rë Hasen rë Nina ne, cuechú nixtin xi sacú chjí rë me xi Hasen rë Nina ne, sua rë me cjuahñu xatsë.
GAL 6:9 Sacuaha ngayaan ne, mijí rë xi nihñachuvan ngajñi rë yëjë ni cjuandaja xi tinihña ta, tsëhë xi hya xi cuechú jain nixtin rë ne, sacú chjí naja, sa xi scaa naja.
GAL 6:10 Vëhë xi nguyëjë rë xi tjin sa nixtin ne, ha tuxa meje rë xi nihña cjuandaja cojo yëjë ni me xi sacuaha xingueen tsëhë xi hacuaha mangucacun me cojo Jesucristu. Hacuaha meje rë xi nihña cjuandaja cojo ngayëjë ni xuta.
GAL 6:11 Ngayujun ni ne, ¡nutsujun letra yehe vihi xi titsihindu nuju cojo hntsa suva!
GAL 6:12 Xuta xi meje rë me xi ndaja cuichja xuta tsëhë me ne, me vëhë xi meje sahmi nuju me ngujyë xi xtí chuxin nuju. Cuatjin sahmi me, cojo sa xi tsajin cuatju me cjuañihi ngatsë rë xi chja me tsëhë cru rë Cristu.
GAL 6:13 Hisca me xi ti chuxin rë ne, vihndiin me tsëhë ley rë Moisés. Peru meje rë me xi xtí chuxin nuju, cojo sa xi cuaxëndaja me yojo rë me xi cuatjin camá cojo nuju.
GAL 6:14 Peru sacuaha ngahan ne, ngatsë ni rë cru rë Nai naja Jesucristu xi cuáxëndaja yojo naha. Cuatjin sahme, tsëhë xi ngatsë rë cru rë Cristu jan ne, sacuaha xi cahme ngasunhndë xi cuma ná ngahan, hacuaha ngahan ne, sacuaha xi cavéya xi cuma rë ngasunhndë.
GAL 6:15 Tsajin mé vengui chjí rë xi cati o xi catiin rë chuxin naja ta xi vengui chji rë ne, xi cuma ngayaan xuta xatsë.
GAL 6:16 Ngayujun ni xi tsangunndujun cojo cjuatacun xi sehe cachjá cojo nuju jan ne, Nina catisua nuju me cjuajeya cojo cjuayumatacun. Hacuaha cojo yëjë sa me xi má xuta ladu rë Nina ne, cuatjin catisua Nina me.
GAL 6:17 Nchujun ni nguini ne, mijí ná xi yo sua sa ná cjuandya ta, tsëhë xi yëjë yanda xi yaha yojo naha ne, vëhë tsingacun xi sahme xa rë Jesús sacuaha mosu hndixahan rë me.
GAL 6:18 Nai naja Jesucristu ne, catisua nuju me cjuandaja ngayujun ni. Cuatjin jain.
EPH 1:1 Ngahan Pablo ne, apóstol tsëhë Jesucristu ngahan ta, tsëhë xi cuatjin camameje rë Nina. Tsingátju nuju carta vihi ngayun xuta nandya Efeso, ngayujun ni xuta ladu rë Nina xi jercu ndaja titsangunndujun cojo ndiya rë me.
EPH 1:2 Nina Nahmi naja cojo Nai naja Jesucristu ne, catisua nuju me cjuandaja cjuajeya rë me xi cuma nuju.
EPH 1:3 ¡Nina ne, me vëhë xi Nina rë hacuaha nahmi rë Jesucristu me xi matitjun tsajan, jemu jyë hnga camahani me cojo hasen rë me! Me vëhë ne, ngatsë rë xi tsëhë Cristu ngayaan ne, catsinchacun naja me cojo yëjë ni xcusun cjuandaja xi siu tsja me.
EPH 1:4 Nihña jyë hnga Nina cojo hasen rë me ta hisca hya xi chajasa casahasen ngasunhndë ne, hya cavaxijin naja Nina ngatsë rë xi tsëhë Cristu ngayaan, hane ngatsë rë xi casahmi tsëhë me ngayaan ne, camatyjahi cjuatacun naja hacuaha tsajin xi cún naja. Hacuaha Nina cojo cjuahmutacun xi tjin rë me cojo naja ne,
EPH 1:5 vëhë xi ha tjin chjine rë me cjuatacun xi ngatsë rë mé xi casahmi Jesucristu ne, ngayaan ne, quihndi ndaja jain rë me má ngayaan. Cuatjin tjin cacun me xi cumá, cuatjin cavejñacacun me.
EPH 1:6 Cuatjin nihña jyë hnga me cojo hasen rë me tsëhë cjuandaja rë me. Jemu cavincha naja me cjuandaja ngatsë rë xi ngayaan ne, tsëhë Cristu yaan; hane Nina ne, hmucacun me Cristu.
EPH 1:7 Cojo jni rë Cristu xi cavanga hya xi cahme me, vëhë machji rë xi camandaya yaan tsëhë castigu xi satë naja, cavaxëtje rë cjuatsehen xi canihña, tucu cjuahmucacun rë me xi jercu jyë camahani.
EPH 1:8 Tjercu tu ndaja casahmi me cjuandaja cojo naja xi cavuxaha ndaja me cjuatacun naja xi vijnercun cjua rë me ta,
EPH 1:9 casua camachaya naja tsëhë cjuatahahma xi tjin cacun me xi cumá, tsëhë cjuatacun xi cavejñangucacun suva me xi cumachihin.
EPH 1:10 Cjuatahahma vë ne, cumachihin hya xi cuetjucaa xi cuechu nixtin rë. Hya ne, Nina sahmitangun me ngu nguyëjë ni ngahma Cristu, me xi matitjun rë. Sahmitangun me yëjë xi siu ngahnga hacuaha yëjë xi siu nangui, hane sacuaha ngu ni cjuatacun cuma.
EPH 1:11 Hacuaha ngatsë rë xi tsëhë Cristu ngayaan ne, Nina cavaxijin niji xi satë niji hitsë tsëhë mé xi satë rë Cristu ta, Nina sahmichihin me yëjë ni mé xi sua má rë me sacuahatjin ha cavejñacacun me xi cumá.
EPH 1:12 Cuatjin casahmi me cojo sa xi ngayin xuta tjë rë Israel xi tjun tjun cavinechinyin rë xi nduva Cristu ne, nihñi jyë hnga Nina cojo hasen rë me ngajñi rë yëjë ni mé xi nihñi.
EPH 1:13 Hacuaha ngayun ni, hya xi canuhyun rë cjuaquixi cjuandajyihi xi chja hacutjin cuma cuetjuntjun tsëhë jyë́ nuju ne, camatangun cjuatacun nuju cojo Cristu. Hane sacuaha xi setaha sellu ngu xujun rë nangui xi tsejen xi quixi xi tsëhë me, cuatjin caveya Nina Hasen rë me sacuaha cavejña me cjua xi sua nuju me, cojo sa xi tsejen xi tsëhë me yun.
EPH 1:14 Hane tsëhë xi hincha naja Hasen rë Nina ne, vëhë tsinguixi rë xi chjahanntsan yëjë xi cavejñacacun Nina xi cumá tsajan, tsinguixi rë xi sahmi ndaya me yaan tsëhë jyë́ naja, hane ngatsë rë vëhë ne, me vëhë cuma jyë hnga sa me cojo hasen rë me.
EPH 1:15 Hindë ta cuatjin catsinchacun Nina yaan ne, vëhë xi ngahan, hisca xi camachaya ná xi naxunndujun Jesucristu hane xi tjin nuju cjuahmutacun cojo yëjë ni xuta xi tsëhë Nina me,
EPH 1:16 suá cuaha nacuechji rë Nina ngatsë nuju. Hane yëjë ni hora xi tisahme oración naha, veyanangë nuju, chjayuma ngatsë nuju.
EPH 1:17 Féhya rë Nina rë Nai naja Jesucristu, Nina Nahmi naja xi jemu hnga me cojo hasen rë me. Féhya rë me xi sua me yun cjuatacun rë Hasen rë me cojo sa xi cuijnercun mé xi tsëhë me hane xi hitsë sa ndaja chun yo me.
EPH 1:18 Féhya rë Nina xi scuxaha me cjuatacun nuju cojo sa xi cumachaya nuju tsëhë xcusun vëhë xi vetahan tacun ngatsë rë xi cavaxijin naja Nina. Xi machaya nuju xi jercu vatjutaha ndajyihi cjuatjo rë me xi cuatëcja me ngajñi xuta ladu rë me.
EPH 1:19 Hacuaha xi machaya nuju ta ngahñu rë me ne, tsajin chuva rë ne, hane tacunntsaan. Hacuaha ngahñu jan catsingacun me ta jemu hñu cjua.
EPH 1:20 Catsingacun me chuva rë ngahñu jan hya xi catsicuya me cjuahñu rë Cristu tsëhë cjuaveya hane hacuaha hya xi casahmi jyë hnga me Cristu xi cavejña me cahndë́ ladu quixi rë me ngajan ngahnga.
EPH 1:21 Jercu hñu camahani cjua rë Jesucristu xi cumá rë yëjë ni hasen, yëjë ni ángel, yëjë ni rey hasen xi hacuaha vitexa ngajan sa xi nixtin quihndë o sa xi nixtin xi nduva ngascan. Hacuaha hitsë sa jyë hnga ñihi rë xa xi tacuntsja me.
EPH 1:22 Hacuaha yëjë xcusun xi siu, Nina ne, caviyuju me ngahma gubiernu rë Cristu. Hacuaha ha Cristu nga ni, casua me xi cumá titjun me tsëhë yëjë ni xuta rë yungun hane vitexa me xuta ladu rë Nina sacuatjin rë rcuun xi vitexa rë yojo naja.
EPH 1:23 Hane sacuaha vitsojo cjuatacun rë rcuun ngajñi yëjë yojo naja ne, cuatjin vitsojo Cristu ngajñi rë jingujyë ni xuta yungun, hane cojo Cristu ne, majingu jinguyëjë ni xcusun.
EPH 2:1 Hacuaha ngayun ne, catsingasca Nina cjuatacun nuju ta, titjun ne, camá ngayun sacuaha xi caveyun xi cumá rë Nina ngatsë rë xi canuhyuun tsëhë Nina hane canihñu cjuatsehen.
EPH 2:2 Cavanguntengun cjuatsehen sacuaha xcusun rë xuta tsehen rë ngasunhndë. Canuhyun tsëhë rey xi hacui hasen tsehen xi vitexa rë yahnga hasen tsehen ngajan ngahnga, rey jan xi vitexa rë xuta xi vihndiin me tsëhë Nina.
EPH 2:3 Hacuaha ngayëjë ni ngayaan ni, cuatjin xcusun naja hatsëë. Canihña yëjë cjuatsehen xi cafehya rë yojo jyë́ naja, xi masua rë xahasen naja. Tsëhë xi hatuxa xuta tsehen yaan, ngatsë rë vëhë ne, tacunya castigu xi cuma naja sacuaha yëjë sa yahnga xuta.
EPH 2:4 Peru Nina ne, tjercu tu tjin rë me cjuayumatacun ngatsë rë xi jemu tu jyihi camahani cjuahmutacun xi tjin rë me cojo naja.
EPH 2:5 Hane handasa xi camá sacuaha xi caveyan ngayaan xi cuma rë Nina ta canuhyaan tsëhë me, peru hindë ne, sacuaha xi casacu naja cjuahñu xatsë tangun cojo Cristu. (Cjuanijyutacun rë Nina ne, vëhë casahmi xi cavaxëtje nuju me tsëhë cjuatsehen xi canihñu.)
EPH 2:6 Hacuaha sacuaha catsicuya nga naja Nina cjuahñu tangun cojo Cristu hane casahmi jyë hnga me yaan xi cavejña me yaan cojo Cristu ngajan ngahnga ngatsë rë xi tsëhë Jesucristu yaan.
EPH 2:7 Cuatjin casahmi me cojo sa xi hisca nixtin xi sehe nduva ne, cumatsejen xi jercu vatjutaha cjuanijyëtacun xi tjin rë me cojo naja, cjuanijyëtacun vë xi matsejen ngajñi rë cjuahmutacun xi tsingacun me yaan ngatsë rë Jesucristu.
EPH 2:8 Cuatjin jan ne, cjuanijyëtacun rë Nina ne, vëhë casahmi xi cavaxëtje nuju me tsëhë jyë́ nuju hya xi camacjain nuju ta, hacuiin suvun cavinchunsun chuva rë xi cavetjuntjun ta tsëhë xi Nina ne, tu cuatjo ni casua nuju me cahndë́.
EPH 2:9 Hacuiin tsëhë xi canihñu suvun xi jemu ndaja xi cavéchuntuhun xcusun vë ne, ngatsë rë vëhë ne, hisca ngu xuta cumaji sahmi jyë me yojo rë me.
EPH 2:10 Ta sacuajyihi ngayaan ne, Nina casahmi naja me. Hane ngatsë rë xi tsëhë Jesucristu yaan, vëhë xi catsindaja me ngayaan cojo sa xi ndaja nihña, sacuatjin xi ha cojo tjun sa cavejñacacun me xi má xcusun naja.
EPH 2:11 Ngajan xi ninguitsjun ta, ngayun ne, xutaxín yun ta hacuiin tsëhë xuta tjë rë Israel catsin ngayun. Hacuaha xuta tjë rë Israel jan ta casahmi suva me sacuaha vitexa ley rë Moisés, me vëhë chja me tsujun ta, xuta xi catiin rë chuxin rë; hane chja me suva me ta, xuta xi cati rë chuxin rë.
EPH 2:12 Hacuaha hya ne, hisca tsajin quitahatacun xi sacuse nuju Cristu. Casatiin nuju cahndë́ cojo xuta tjë rë Israel hacuaha casatiin nuju compromisu xi vetaha cacun me. Jemu va cavinechun cojo ngasunhndë nuju ta hacuiin vinga nuju Nina xi cjuaquixi.
EPH 2:13 Peru quihndë xi camá tsëhë Cristu yun, handasa xi hya jemu xin nechun xi cuma rë Nina, peru hindë casacu cahndë́ camatiña yun ngatsë rë jni rë Cristu xi cavanga hya xi cahme me.
EPH 2:14 Ta Cristu ne, me vëhë casahmi me xi cavisehen naja ngayëjë ni cjuandaja cjuajeya. Hane xi cuatjin casahmi me ne, sa xuta tjë rë Israel yaan o sa xutaxín yaan, sacuaha ngu ni xuta má ngayaan. Ta hya xi cahme me, cafahaxin me cjuachan xi vetsuntaha naja.
EPH 2:15 Catsicjë me ngahñu rë ley rë Moisés cojo yëjë ni cjua xi vitexa jan. Hane cuatjin ne, tsëhë catsijo tjë rë xuta jan ne, tsajin sa cjuachan ta casahmitangun Cristu me xi sacuaha ngu ni xuta má me xi tsëhë me suva me. Cuatjin cavisehen me cjuandaja tsëhë xcusun xi cavetsutaha rë me titjun.
EPH 2:16 Hacuaha cuatjin casahmitangun me catsijo tjë jan xi cumá ngu ni hane tangun catsindajacacun me me jan cojo Nina ngatsë rë xi cahme me xcun cru. Hane cuatjin cavatëcja me cjuachan xi tjin ngajñi rë me jan.
EPH 2:17 Cuatjin camá xi canduva Jesucristu cachja me cjuandajyihi tsëhë cjuajeya cojo nuju ngayun xutaxín xi xín nechun xi cuma rë Nina, hacuaha cojo xuta nangui Israel xi tiña siu me xi cuma rë Nina.
EPH 2:18 Vëhë xi ngatsë rë mé xi casahmi Cristu hane cojo ngu ni Hasen rë Nina ne, xingu xingu ngayaan ne tjin naja cahndë́ cojo Nina Nahmi naja.
EPH 2:19 Vëhë xi ngayun ne, hindë hacuiin xutaxín yun hacuiin xín tujyuhunyun ni xi cumá rë xuta rë Nina ta hindë ne, sacuaha camá ngu nangui nuju ngayujun ni hacuaha cojo rë me ne xuta rë Nina má ngayun.
EPH 2:20 Cojo rë me ne, ngayun ne tangun ngayun sacuaha xihndë rë ngu yungun xi sehe tjunihnga rë. Xihndënaña rë ne, vëhë casahmi apóstol cojo profeta hya xi cachja me cjua rë Nina. Hane Jesucristu ne, me vëhë má me ndyojo xi matitjun xi vejña yuju rë,
EPH 2:21 ta sacuaha ndyojo jan vaniji hai rë ndihya xi ndaja hñu cuejña xihndë rë xi cuijin, hacuaha ngatsë rë Jesucristu sacuaha ndaja setahacoo ngu xihndë ne, cuatjin vetahacoo Jesucristu xuta rë yungun hya xi scunihnga me xi cuma me sacuaha ngu yungun quicun xi camanchacun tsëhë me.
EPH 2:22 Hacuaha cuanitjin ngayun ne, cavinchajñi me yun sehe cojo yun cumá ngayun sacuaha yungun quicun jan rë Nina hiscan cuejña me.
EPH 3:1 Cuatjin camá xi ngahan Pablo ne, tejñaya ndavaya ngatsë rë xa rë Jesucristu, xa jan xi sahme ngajñi nuju xutaxín.
EPH 3:2 Cuejña ni xi há machaya nuju tsëhë cjuanijyëtacun xi Nina cavincha ná me xi satë ná sahme xa ngatsë nuju ta,
EPH 3:3 Nina casua me camachaya ná tsëhë cjuatacun hma jan sacuaha xi ha catsíhindu nuju hitsë tsëhë.
EPH 3:4 Hane xi chutahayun tsëhë ne, mangutacun xi ngahan ne vijnercu cjuatahahma jan xi sahmichihin Jesucristu.
EPH 3:5 Cjuatacun jan ne, hatsëë nixtin tsajin yo camachaya rë tsëhë. Peru hindë ne, cojo Hasen rë me catsingacun me tsëhë xi cumachaya rë apóstol cojo profeta xi cavaxijin me.
EPH 3:6 Cjuatacun hma jan ne, cuatjin fi: Camá xi cojo cjuandajyihi rë Nina ne, xutaxín ne, fahatsja tangun me cuatjo rë Nina cojo xuta tjë rë Israel, hacuaha cojo me ngu xuta má me. Hacuaha ngatsë rë xi tsëhë Jesucristu me ne, hacuaha satë rë me compromisu xi vetahacacun xuta tjë rë Israel.
EPH 3:7 Sacuaha cjuatahahma vëhë ne, casatë ná ngahan xi sahme xa xi cuichja tsëhë. Cuatjin casatë ná ngatsë rë cjuanijyëtacun xi casua Nina ngahan xi cojo ngahñu rë me cuma.
EPH 3:8 Ngahan ne, handasa tsajin chuva rë xi ngahan sahme xi cuma rë xi sahmi tu yo sa yahnga xuta tsëhë Nina, peru casua ná Nina cjuanijyëtacun xi satë ná xa xi cuichjá cojo xutaxín xi cumachaya rë me tsëhë cjuanchina ndajyihi rë Cristu xi tsajin cojo chuva rë.
EPH 3:9 Hacuaha cavetahaxa ná Nina xi scuxáha cjuatacun rë xuta cojo sa xi cumachaya rë me cjuatacun hma jan. Nina, xi casahmi me yëjë ni ne, hisca ntsacu cavetsihin cavejñacacun hma me xi cuatjin cumá.
EPH 3:10 Cuatjin camá cojo sa xi nixtin quihndë ne, ngajñi xuta yungun rë Nina ne, tsingacun rë cjuahasen rë Nina, cojo sa xi yëjë ni hasen, yëjë ni ángel xi hacuaha vitexa ngajan ngahnga, machaya rë xi jemu cjín xcusun rë cjuahasen jan ta,
EPH 3:11 cjuatacun jan ne, hisca ntsacu cavetsihin cuatjin cavejñacacun me, hane casahmichihin me cojo Cristu Jesús, me xi matitjun tsajan.
EPH 3:12 Hacuaha ngatsë rë xi tsëhë Cristu yaan hane ngatsë rë xi mangutacun cojo me ne, rcuun nihña tiña tsëhë Nina cuinújan cojo me ta, tjin ngutacun xi sacu naja cahndë́.
EPH 3:13 Vëhë xi cojo cjuatacun vëhë ne, cuichjá cojo nuju ta hacuiin nihñuchuvuntacun ngatsë naha ngahan xi choho tivatju tijima tsëhë xa xi sahme ngatsë nuju, ta ngajñi rë xi cuatjin tivatju ngahan ne, hitsë sa tivaxëndaja nuju.
EPH 3:14 Cuatjin camá xi ngatsë rë vëhë ne, vixcuhnchëtaha xcun Nina nahmi rë Jesucristu me xi matitjun tsajan.
EPH 3:15 Yëjë ni tjë rë xuta o sa ángel, sa ngahnga o sa ngasunhndë viyuju me ne, faha ñihi me tsëhë Nina sacuaha tsëhë Nahmi rë me.
EPH 3:16 Nina Nahmi naja ne, tjemu tjin rë me ngahñu xi casahmi hnga hasen me ngajan ngahnga. Chjáhya rë me xi tucu chuva rë yëjë cjuandaja rë me jan ne, sua nuju me xi cuiyujuhñu xahasen nuju cojo ngahñu rë Hasen rë me.
EPH 3:17 Hane ngatsë rë xi cuatjin macjain nuju Cristu ne, hacuaha cuejña cahndë́ me cahntsua xahasen nuju. Hane cjuahmutacun xi hincha nuju ne, cuma sacuaha ngu tyjama xi sua nuju ngahñu hane tsuvangui nuju,
EPH 3:18 cojo sa xi hacuaha cuijnercunndujun ngayun cojo yëjë yahnga xuta xi macjain rë me, ta tsajin hisca cjuë ta jemu tu jyë hnga cjuahmutacun xi tjin rë Cristu cojo naja.
EPH 3:19 Hacuaha cjuehyá xi sacuse nuju cjuahmutacun xi tjin rë Cristu cojo nuju, ngu cjuahmutacun xi jercu vatjutaha rë hisca tsajin chuva rë xi hatuxa hyan, cojo sa xi ma tsë rë cjuatacun nuju suva cojo yëjë ni xi tsëhë Nina.
EPH 3:20 Quihndë ne, catama jyë catama hnga Nina. Me vëhë cojo ngahñu rë me xi sahmixa ngajñi naja ne, hitsë sa cjín cuma sahmi me tsëhë xi cuma chjahyan o sa xi matacun xi ma sahmi me.
EPH 3:21 Catama jyë catama hnga me ngajñi xuta yungun rë me hacuaha ngajñi Jesucristu; catama jyë catama hnga me yëjë ni nu yëjë ni nixtin. Cuatjin jain.
EPH 4:1 Ngatsë rë vëhë ne, ngahan xi tejñaya ndavaya ngatsë rë xa xi sahme tsëhë Nina, ngahan fehya nuju xi tangun nduju cojo ngasunhndë nuju sacuaha meje rë xi sahmi me xi cavaxijin Nina, sacuahatjin ngayun xi catuxijin nuju.
EPH 4:2 Tjin nuju cjuajeya hacuaha ninguijnu yojo nuju cojo xingun. Hacuaha jyëtacun xingu xingu yun cojo xingun ngatsë rë cjuahmutacun xi tjin nuju.
EPH 4:3 Nihñu ngujyë xi yëjë nixtin tjin tangun yun, cojo ngahñu rë cjuajeya xi sua Hasen rë Nina xi sahmi tangun nuju ngayun ngayujun ni.
EPH 4:4 Ngayaan ne, ngu ni yojo má yaan, hacuaha ngu ni má Hasen rë Nina. Hacuaha cuanitjin ne, ngu ni cjua xi cuetaha tacun xi sacu naja cjuahñu xatsë, ngayaan xi cajindaya naja me.
EPH 4:5 Hacuaha ngu ni Jesucristu xi Nai naja, ngu ni cjuachacun xi macjain naja, hacuaha ngu cjuatacun ni xi xtenda yaan.
EPH 4:6 Ngu ni Nina Nahmi naja ngayejen ni. Hane Nina ne, matitjun me tsëhë ngayëjë ngarca ni ne, tsinguitsojo me jingujyë ni ngajñi yojo naja, hacuaha tacun me ngajñi naja.
EPH 4:7 Peru jimangu yaan ne, ha casua naja me cjuatjo cjuatacun xi satë naja xa xi nihña jimangu yaan, sacuaha chuva rë xi casua Cristu.
EPH 4:8 Vëhë xi xujun rë Nina chja cuitjin: Hya xi camiji me ngahnga, hacuaha quiji cojo me xuta presu xi cafaha me. Hane casua me cjuatjo xi cafahatsja xuta rë me.
EPH 4:9 ¿Hane mé vijne cjua xi camiji me? Cjua vëhë ne, vijne xi titjun ne cajne me hiscan xi hitsë sa nangui tsëhë ngasunhndë.
EPH 4:10 Hane xi cajne jan ne, hacui ni me xi hacuaha camiji hiscan xi hitsë sa hnga tsëhë ngahnga, cojo sa xi jingujyë ni cuejña cahndë́ me.
EPH 4:11 Ha me vëhë ni casua me cjuatjo cjuatacun xingu xingu. Casua me xi yahnga me ne, cumá me apóstol, yahnga me ne xi sua me xi cumachaya rë xuta cjua xi cafahatsja me tsëhë Nina, hane yahnga nga me ne, cuichja me cojo xuta tsëhë cjua xi cuaxëtje naja, hane yahnga nga me ne, pastor xi vicuya.
EPH 4:12 Cuatjin cavëhëchjine me xuta rë me jan cojo sa xi xa xi sahmi me jan ne, cuisecoo rë xuta yungun xi sacu hñu rë me.
EPH 4:13 Hisca xi ngayejen ni ne, cuma tangun yaan cojo ngu ni cjuachacun xi macjain naja hacuaha cojo yëjë cjua xi machaya naja tsëhë me xi Quihndi rë Nina. Hane xi cuatjin cuma tangun yaan, cumacha yaan hane cuiyuju cahndë́ cjuatacun naja sacuaha tjin chihin yëjë cjuatacun rë Cristu.
EPH 4:14 Hane sehe hacuiin tangun yaan cojo langa xi tsindeya cjuatacun rë hane fi tjengui ndiya rë tu mé ni cjuachacun xatsë sehe vixuya ngajñi cjuandacha rë xuta xi vincha haxi me.
EPH 4:15 Hitsë sa ndaja xi cuinújan cjuaquixi ngatsë rë cjuahmutacun xi tjin naja cojo rë me cojo sa xi cumacha yaan cojo sa xi yëjë ni xcusun naja cuma yaan sacuaha Cristu, me xi matitjun tsajan.
EPH 4:16 Hane ngatsë rë ngahñu rë me vëhë ne, yëjë xuta xi macjain rë me Nina ne, ndaja yahangui xicjin me, sacuaha naxahñu naja ne, tsuvangui rë yojo naja, ngatsë rë xi hincha xicjin. Hacuaha ngatsë rë xi jima ngu xuta jan ndaja sahmi me xa ne, ngu tangun ni cuma yehe me, hacuaha sacu hñu rë me ngajñi rë cjuahmutacun jan.
EPH 4:17 Ha cuanitjin ne, sacuaha tichjá cojo nuju cojo cjua rë Nai naja Jesucristu xi quihndë hacuiin cuinechun sa sacuaha siu xuta xi hvíin me yo xi Nina, ta me vëhë ne, siu me cojo cjuatacun jñu rë me xi tsajin me vetjuncaa.
EPH 4:18 Vijniircu me ta tsëhë xi tsajin rë me cjuahñu xi sua Nina ta, tsëhë xi taja rcu me ngatsë rë xi taja xahasen rë me.
EPH 4:19 Hacuaha cachaja cjuatacun rë me, hane casuatë me yojo rë me, vëhë xi jercu macacun me xi sahmi me yëjë xcusun cjuatsehen xi tjin ngasunhndë.
EPH 4:20 Peru ngayun ne, hacuiin cuatjin camá nuju tsëhë Cristu
EPH 4:21 ta ngayun ne, hatuxa cachutayun jain tsëhë me, hacuaha camá nuju tsëhë me, cojo cjuaquixi xi tjin rë Cristu.
EPH 4:22 Sacuaha cjuatacun changá xi canduvuncujun ne, tejñuxun ta tsëhë xi vëhë xi tsitsehen cojo cjuandacha xi jercu matacun cojo.
EPH 4:23 Meje rë cuma xatsë yun cojo cjuatacun nuju hacuaha cojo hasen nuju.
EPH 4:24 Hane nihñu tsujun cjuatacun xatsë xi ha tjin ndaja xi fayangui xcusun xi tsëhë Nina ta xcusun vëhë ne, tsingacun ngu cjuahñu xi hatuxa cjuaquixi hacuaha tyjahi.
EPH 4:25 Quihndë ta cuatjin ne, canújuun cjuandacha cojo cjuandesu ta, jima ngu yun ne, tinújun cjuaquixi cojo xingun tsëhë xi ngayëjë ni ngayaan ne, camatangun yaan ta ngu ni yojo má ngayaan.
EPH 4:26 Handasa cjan nuju ne, cavinchun ngu jyë́, hane cjuacjan jan ne, hacuiin xi cjuecani rë cuaha nixtin,
EPH 4:27 hane hisca xi hitsë ne, caningatjuun rë xitsehen xi sahmi xi nihñu ngu jyë́.
EPH 4:28 Xuta xi catsichëjë me ne, catejñaxin me xcusun vëhë, hane catisahmi me xa nguñajacacun me cojo sa xi cuechutaha me yëjë xcusun xi machaja rë me. Hane hacuaha cuma cuisecoo me xuta xi machaja rë.
EPH 4:29 Canújuun cjuatsehen. Nújun ngu cjua xi ndajyihi xi cuincha ndiya rë xuta xi cuiseñuju me cojo sa xi tsëhë me ndaja.
EPH 4:30 Xi canihñuu xi cuma va rë Hasen rë Nina ta, cojo Hasen rë me jan ne, ngayun ne, casetaha nuju chuva xi tsingacun xi sacu nuju cjuahñu xatsë nixtin xi cuaxëtje nuju me tsëhë jyë́ nuju.
EPH 4:31 Hacuaha tiyujunxun yëjë ni cjuachan, yëjë ni cjuasuë, yëjë ni cjuahnga, yëjë ni cjuachjataha cojo yëjë sa xcusun cjuatsehen
EPH 4:32 ta cahndë́ rë vëhë ne, nihñu cjuandaja cjuajeya xingu xingu yun cojo xingun. Tjin nuju cjuayumatacun cojo xingun. Hacuaha ninchatuhun xingun sacuaha catsinchataha Nina yun ngatsë rë Cristu.
EPH 5:1 Ngatsë rë xi jemu hmucacun nuju Nina ta, tsëhë xi quihndi rë me yun, vëhë xi chjayunngun tsëhë me.
EPH 5:2 Hane nechun cojo cjuahmutacun xi catsihmucacun naja Cristu hane hisca casua me yojo rë me ngatsë naja sacuaha ngu tsánga ndajyihi xi cueya chu hane cuma tsëhë Nina sacuaha ngu cuatjo xi chuya rë me.
EPH 5:3 Quihndë ta ngayun ne, tsëhë Nina yun ne, hisca xi caveyunnanguun cjuatsehen xi matacun cojo yojo jyë́ nuju ngajñi nuju. Caveyunnanguun hisca ngu sa cjuatacun chocun cojo cjuachan ta, ngayun ne, tsajin chuva rë xi nihñu xcusun vëhë.
EPH 5:4 Cavisiajmuun xcusun xi cjuasava, cojo cjuangarca cojo cjuaxcuehyu hya xi hacuiin mameje rë ta cahndë́ rë vëhë ne, tuhun nacuechji rë Nina.
EPH 5:5 Ha hyun ta xuta xi sahmi me cjuatsehen xi sahmi ngu xuta cojo ngu xi hacuiin tsëhë me, o sa ngajñi ni xihin me o ngajñi ni chjuun me o tu mé sa xcusun cjuatsehen jan o sa xi choho me, tangun cún me sacuaha me xi faharcu me nina ndyojo hane sacuiin rë me cahndë́ hiscan sahmi gubiernu Cristu cojo Nina.
EPH 5:6 Cuidadu cojo sa xi tsajin yo xi cuindacha nuju cojo cjuangarca ta, hatuxa ngatsë rë cjuachocun xi cuicun vihi ne, vinduva castigu jyë xi sua Nina xi cuma rë xuta xi vihndiin tsëhë me.
EPH 5:7 Vëhë xi ngayun ne, caninguisuunjñuu cojo rë me.
EPH 5:8 Ta handasa xi hatsëë ne, ngayun cavinechun ngajñi jñu vë, peru quihndë xi tjin tangun yaan cojo Nai naja ne, camá hasen tsujun, hane nihñu sacuaha sahmi xuta xi cama hasen cjuatacun rë me.
EPH 5:9 Ta tsëhë hasen jan ne, vetjucun xi jemu ndaja xuta jan hacuaha tyjahi cjuatacun rë me, hacuaha quixi me cojo xcusun rë me.
EPH 5:10 Nihñu xatitacun xi cuma nuju mé xi chuya rë Nina.
EPH 5:11 Caninguisuunjñuu cojo xcusun xi venguichjiin rëhë xcun Nina xi sahmi xuta xi jñu cjuatacun rë me. Hitsë sa ndaja ne, ningacun tsejen cjuatsehen vëhë ta,
EPH 5:12 tsëhë xi cjuatsehen vëhë xi sahmihma me ne, hisca mijí rë xi cueyananguen ta sava tsejen.
EPH 5:13 Ta hya xi vetjucaa tsejen xcusun xi sahmihma me jan ne, matsejen ndaja xi hatuxa cjuatsehen.
EPH 5:14 Cuatjin ta hya xi vetjucaatsejen ne, ma quixi yëjë xcusun, sa xi cjuatsehen o sa xi cjuandaja. Vëhë xi chja cjua cuitjin: Ningascun rë cjuatacun nuju, ngayun xi catuhun rë cahndë́ xi cjuahajenda hane nduvunxun tsëhë xuta xi cachaja cjuatacun rë me, hane sehe Cristu ne, sua hasen nuju me.
EPH 5:15 Vëhë xi ngatsë rë yëjë ni cjua vëhë ne, chjuhun chuvun hacutjin cuangun cojo ngasunhndë nuju, hacuiin nechun sacuaha xuta xi jñu cjuatacun rë me, ta nechun sacuaha siu xuta xi jemu chutaha cjuatacun rë me.
EPH 5:16 Chjavunvuhun hora nuju ne, tetjún cjuandaja ta nixtin vihi ne, jemu tjin cjuatsehen.
EPH 5:17 Vëhë xi hacuiin ngarca yun ta, nihñu xati tacun xi cuma nuju mé xi chuya rë Nina.
EPH 5:18 Hacuiin nihñu cjuachihi ta, vëhë ne, tsinguetsun rë cjuatacun nuju ne, hane cahndë́ rë xi ningatjuntuhun xi siuhun nandá xi cuitexa rë cjuatacun nuju jan ne, tuhun cahndë́ xi Hasen rë Nina ne, cuitexa rë cjuatacun nuju.
EPH 5:19 Vëhë xi ngajñi cjuavisiajmi nuju ne, teyunnangun cjua rë salmo, cojo himno cojo yëjë sa xcusun xi sen xi tsëhë Nina, quitaha tisun ne, cojo vëhë ne, hacuaha nihñu jyë nihñu hnga Nina cojo nguñajatacun.
EPH 5:20 Hacuaha tuhun nacuechji rë Nina Nahmi naja yasen ni tsëhë yëjë ni xcusun xi vatjun má, hane nihñu cojo ñihi rë Nai naja Jesucristu.
EPH 5:21 Ninguijnu yojo nuju cojo sa xi cuma chjuhunrcun xingu xingu ngayun, cuatjin nihñu ngatsë rë xi chjuhun rcun Nina.
EPH 5:22 Ngayun yachjin ne, ninguijnu yojo nuju tinuhyun tsëhë xihin nuju ta, cuatjin vitexa Nai naja.
EPH 5:23 Ta xihin nuju ne, vitexa nuju me sacuaha rcun, cuanitjin sacuaha Cristu vitexa rë yëjë xuta xi macjain rë me sacuaha rcu me. Hane Cristu cavaxëtje me xuta yungun jan sacuaha xi hacui yojo rë suva me.
EPH 5:24 Cuanitjin ne, sacuaha xuta yungun ne, vihndë me tsëhë Cristu ne, cuanitjin ni ngayun yachjin ne, yëjë xi nihñu xcun cjuahñu nuju ne, tinuhyun tsëhë xihin nuju.
EPH 5:25 Hacuaha ngayun xihin ne, nihmutacun chjuun nuju, sacuatjin Cristu ne, catsihmucacun me xuta rë yungun hane casua me yojo rë me ngatsë rë xuta jan.
EPH 5:26 Cuatjin casahmi me cojo sa xi sahmi tyjahi me cjuatacun rë xuta yungun jan cojo sa xi cuma xatsë me, hane catsityjahi me cojo cjua rë me sacuaha má xi matyjahi cojo nandá.
EPH 5:27 Cojo sa xi cuma tsingacun suva me xi xuta yungun jan ne, cun tyjahi tyjahi me, ta hisca hitsë tsajin mé camá chojyihi cjuatacun rë me.
EPH 5:28 Vëhë xi ngayun xihin ne, meje rë xi nihmutacun chjuun nuju sacuaha yojo nuju suvun ta, yo xi tsihmucacun chjuun rë ne, tsihmucacun suva yojo rë.
EPH 5:29 Tsajin yo xi tsitjunngui suva yojo rë ta, hatuxa vangui me xi xinë me sehe sacuhñu rë yojo rë me, hacuaha sahmi me cuidadu tsëhë. Hacuaha Cristu ne, cuanitjin ni sahmi me cojo xuta rë yungun ta,
EPH 5:30 tsëhë xi sacuaha yojo rë me má xuta jan. Cuatjin ngayaan ta camá yaan tsëhë yojo tsëhë ninda rë me casahmi me yaan sacuaha xcusun rë suva me.
EPH 5:31 Ngatsë rë vihi ne, xihin ne, cuiyuju cha nahmi ra cojo naa rë cha, sehe cumatangun cha cojo chjuun ra, hane catsijo ni jan ne, cumatangun sacuaha xi ngu ni yojo.
EPH 5:32 Vihi ngu cjuatacun xi jemu chja vinuhya rë peru hacuaha jemu ndajyihi ta, chjá cojo nuju ta cjua vëhë ne, tichja tsëhë Cristu cojo xuta yungun.
EPH 5:33 Peru handasa cuatjin vijne cjua vëhë ne, hacuaha sahmi ngujyë xi jimangu yun ne, nihmutacun chjuun nuju, sacuaha yojo nuju suvun. Hane ngayun chjuun ne, mameje rë xi chjuhunrcun xihin nuju.
EPH 6:1 Ngayun quihndi ne, xi vitexa tsujun sacuaha xuta xi macjain rë me Nina ne, tinuhyun tsëhë xutacha nuju ta, tsëhë xi cuatjin mameje rë ta,
EPH 6:2 cuitjin chja cjua tsëhë ley: “Chjuhunrcun chjuhunjeyun nahmi nuju cojo naa nuju.” Hane cjua rë ley jan, vihi xi tjun cachja Nina xi hacuaha ticojo rë ngu cjuandaja xi hacui vi:
EPH 6:3 “Cuatjin nihñu cojo sa xi ndatjin cuinechun hacuaha jyë nixtin cjuecani nuju nguehe xcun cjuahñu nuju.”
EPH 6:4 Hacuaha ngayun nahmi ne, hacuiin xi tuhun xti rë quihndi nuju ta, xi hitsë sa ndaja ne, nichun hacuaha tinújuntuhun rë cojo cjuandaja cojo cjuajeya hacuaha ningacun rë xi cumacjain rë Nina.
EPH 6:5 Hacuaha ngayun xi nihñu xa handasa mosu xi cavatsë me yun ne, tinuhyun tsëhë patrón nuju nguehe xcun cjuahñu vihi, tjin ngutacun xi nihñu xa, hacuaha nihñu nguñajatacun, sacuaha xi tinihñu ngatsë rë Cristu.
EPH 6:6 Nihñu nguñajatacun, hacuiin suva hya xi tivutsejen nuju me cojo sa xi cuichja ndaja me tsujun ta, nihñu sacuaha meje rë xi sahmi mosu xi cachaha rë xi sahmi xa rë Cristu.
EPH 6:7 Nihñu nguñaja ni cjuasua, sacuaha xi tinihñu tsëhë Nina, hane hacuiin tsëhë ngu xuta.
EPH 6:8 Cuatjin nihñu ta, ha hyun ta yëjë xcusun ndaja xi nihñu ne, Nina ne, sua me chjí nuju.
EPH 6:9 Hacuaha ngayun patrón ne, ha chuva vëhë ni nihñu cojo mosu xi siu ntsun hane hacuiin cojo cjuachan ta, ninguitsun ta sa ngayun sa me vëhë ne, Nina siu tsja nuju me. Hane Nina ne, texta ni vutsejen naja me ngayëjë ni.
EPH 6:10 Sacuaha ngu sa cjua xi cuichjá cojo nuju ngayun xingueen, cojo ngahñu xi sua me xi tjercu hñu camahani ne, tiyujuhñu cjuatacun nuju xi tjin tangun yun cojo Nai naja.
EPH 6:11 Chjuhun yëjë ni xcusun xi siu ntsun xi casua Nina yun cojo sa xi cuiyujunhñu cjuatacun nuju tsëhë cjuandacha xi sahmi xitsehen xi matitjun ta,
EPH 6:12 si xi nihña ne, hacuiin cojo ngu xuta ngasunhndë má ta, cojo jingu sa hasen tsehen xi matitjun hacuaha cojo yëjë xi vitexa rë ngasunhndë jñu vi cojo yëjë sa xi siu ngahnga.
EPH 6:13 Vëhë xi quihndë ne, chjuhun yëjë ni xcusun xi siu ntsun xi casua Nina yun cojo sa xi scaa nuju cuangun xcun hya xi nduva cjuacjintacun vë, hane handasa cuatjun vëhë ne, cuiyujunhñu cuaha cjuatacun nuju.
EPH 6:14 Cuiyujuhñu cjuatacun nuju sacuaha ngu sindadu xi tjin chjine cha. Nechun cojo cjuaquixi rë Nina ta, vëhë cumachji rëhë nuju sacuaha ngu cinturón xi cuetuhun cahntsua nuju. Hacuaha quixi yun cojo cjuatacun nuju ta, vëhë sahmi chjí rëhë nuju sacuaha chingá quicha rë sindadu xi cuetjo rë ndanisin rë cha.
EPH 6:15 Hacuaha tjin chjine yun cojo cjua rë Nina xi chja tsëhë cjuajeya sacuaha tjin chjine cha sindadu xi vincha ntsacu cha zapatu.
EPH 6:16 Hacuaha cojo yëjë sa vihi ne, ndaja catamacjain nuju cojo sa xi cuma tsicangui rë yojo nuju hane tsicjë ngahñu rë cjuañihi xi sahmi si xitsehen cojo nuju, sacuaha sahmi ngu quichatë xi yahatsja sindadu xi tsicangui rë yojo rë cha.
EPH 6:17 Chjuhunntsun cjuaninchataha rë Nina xi vetahatacun xi cumachji rëhë sacuaha ngu cascu xi vaxëtje rë rcuun, hacuaha chjuhunntsun cjua rë Nina sacuaha ngu espada xi sua nuju Hasen rë Nina.
EPH 6:18 Hacuaha quitaha tinihñu oración nuju yëjë ni hora. Tinújun hacuaha chjahyun rë Nina ngatsë rë Hasen rë Nina. Cojo sa xi cuma nihñu vihi, quitaha nechun cuidadu, hacuaha tinihñu oración nuju ngatsë rë yëjë xuta ladu rë Nina.
EPH 6:19 Hacuaha tinihñu oración ngatsë naha. Chjahyun xi Nina ne, sua sa ná me cjua hya xi cuichjá, hane cuma cuichjá nguñajacacun cojo sa xi suá cumachaya rë xuta tsëhë cjua ndajyihi rë Nina xi cuaxëtje rë xuta ta,
EPH 6:20 ngatsë rë cjua vëhë ne, Nina catsingatju me ngahan, hacuaha ngatsë rë cjua vëhë ne, tejñaya ndavaya quihndë. Vëhë xi nihñu oración cojo sa xi cuma cuichjá cjua vihi cojo xuta cojo yëjë ngahñu xi mameje rë.
EPH 6:21 Tíquico, xingueen, xi vinga ná hacuaha ndaja cjuinduju me cojo xa rë Nai naja ne, sua me vëhë xi cumachaya nuju tsëhë yëjë ni xcusun xi tivatju tijima, cojo tsëhë yëjë ni xcusun xi tisahme.
EPH 6:22 Vëhë xi tsingátju nuju me cojo sa xi cuichja me cojo nuju hacutjin nechin hane cojo vëhë ne, cuma suatacun.
EPH 6:23 Hane Nina nahmi naja ne cojo Nai naja Jesucristu ne, catisua nuju me ngayun xingueen cjuandaja cjuajeya cojo cjuahmutacun ngajñi xi cumangutacun.
EPH 6:24 Hane Nina ne, catsinchacuntihin me yëjë xuta xi hmucacun me Nai naja Jesucristu cojo ngu cjuahmutacun xi tsajin nixtin fëya. Cuatjin jain.
PHI 1:1 Ngahan Pablo cojo Timoteo ne, sacuaha mosu hndixahan rë Jesucristu ngayin. Ningatjin nuju ngu nina niji, ngayujun ni xi tsëhë Nina ngayun, hacuaha macjain nuju Jesucristu ndyá nandya Filipos. Hacuaha cojo me xi matitjun tsujun sacuaha obispos hacuaha cojo me xi visecoo rë me ne, ningatjin nina niji tsëhë me.
PHI 1:2 Nina Nahmi naja cojo Jesucristu, me xi matitjun tsajan ne, catisua nuju me cjuandaja cjuajeya rë me.
PHI 1:3 Hya xi tsingátahacacun ngatsë nuju ne, suá nacuechji rë Nina.
PHI 1:4 Hya xi féhya rë Nina ngatsë nuju ngayujun ni ne, hatuxa tjin ná cjuasua ta,
PHI 1:5 tsëhë xi ngayun ne, cuatjin visecun ná xi cumachaya rë xuta cjua ndajyihi tsëhë Jesucristu. Cuatjin visecun ná hisca hya xi cafëhë tjëngë nuju ne, hisca quihndë.
PHI 1:6 Cavetsihin casahmi ndajyihi Nina cjuatacun nuju. Vëhë xi ngahan ne, tjin ngucacun xi cuatjincjin ni sahmi me hisca nixtin xi cuya Jesucristu.
PHI 1:7 Hacuaha ndatjin xi cuatjin tsingátahacacun ngatsë nuju ngayujun ni ta, tsëhë xi jemu vinga ná ngayun. Vinga ná ngayun ta, tsëhë xi ngayujun ngarcun ni ne, cojo ngayun tinihñu tsë tsë xa xi casua ná Nina cojo cjuandaja rë me, quihndë xi tejñaya ndavaya nguehe, hora xi tisuá cjuaquixi naha cojo xutaxa rë, xi cjua ndajyihi tsëhë Jesucristu ne, jemu ndaja camahani hacuaha hatuxa cjuaquixi.
PHI 1:8 Hisca vëë jain me ta jemu meje cuinduva tjëngë nga nuju ta, tsëhë xi ngahan ne, hmú cacún nuju ngayujun ni sacuatjin hmucacun nuju Jesucristu.
PHI 1:9 Féhya rë Nina xi cuma jyë sa cjuahmutacun xi tjin nuju, hacuaha féhya rë me xi cuechutaha sa cjuatacun nuju,
PHI 1:10 cojo sa xi cuijnercun jarë xcusun xi ndatjin xi nihñu. Sehe ngajan xi cuma tyjahi xahasen nuju, hacuaha ha cafë jyë́ nuju nixtin xi cuya nga Jesucristu ta,
PHI 1:11 tsëhë xi Jesucristu ne, ha casua nuju me cjuandaja xi cuma nihñu hacutjin xi cjuaquixi. Xi cuatjin ne, xuta ne, cjuaharcun me Nina hacuaha jemu ndaja cuichja me tsëhë me.
PHI 1:12 Meje ná xi cumachaya nuju tsan, ta handasa cuitjin tejñaya ndavaya ne, hacuiin ndajintjin ta xuta ne, hitsë sa tijima chaya rë me cjua ndajyihi tsëhë Jesucristu.
PHI 1:13 Hisca yëjë sindadu xi jiyahñu rë ngahan cojo yëjë ni xuta xi yahnga ne, vëë me xi tsëhë xi jemu xuta rë Jesucristu ngahan ne, vëhë xi caveya ná me ndavaya.
PHI 1:14 Hacuaha jemu cjín xingueen ne, tsëhë xi camachaya rë me hacutjin vátju quihndë xi tejñaya ndavaya ne, hitsë sa mangucacun me cojo Nina. Hane vëhë xi macjiin cacun me xi chja me cjua rë Nina.
PHI 1:15 Quixi ta hacuaha tjin xuta xi sua me machaya rë xuta cjua tsëhë Jesucristu. Peru tsëhë xi sahmi xín cacun me cojo ná, hacuaha mijí rë me xi cjua naha cjuexcun, vëhë xi cojo me chja me. Peru yahnga nga me ne, cuatjin chja me ta, tsëhë xi jemu tjin rë me cjuandaja.
PHI 1:16 Cuma cuinújan ne, me xi cuacun tjin rë cjuandaja jan ne, sua me machaya rë xuta cjua tsëhë Jesucristu ngatsë rë cjuahmutacun xi tjin rë me cojo ná, tsëhë xi ha vëë me ta Nina ne, casua ná me xa xi cuichjátë ngatsë rë cjua ndajyihi tsëhë Jesucristu.
PHI 1:17 Peru me xi cuacun tjin rë cjuaxintacun jan ne, sua me machaya rë xuta cjua vëhë ngatsë rë xi meje sahmi yehe suvá me yojo rë me. Tsajin rë me ngu cjuatacun xi ndajyihi xi cuatjin chja me. Xi má rë me ne, ngahan ne, xi tejñaya ndavaya nguehe ne, cumacjíncacun ngatsë rë xcusun xi tisahmi me.
PHI 1:18 Tsimii sahmi rë xi cuatjin cjuatacun rë me xi chja me cjua rë Nina, ¿há xi nguñajacacun me ne?, o ¿há xi hacuiin nguñajacacun me ne?, ndastu cuenda xi cjua tsëhë Jesucristu ne, tijimachaya rë xuta. Vëhë xi jemu ndama ná.
PHI 1:19 Hya xi ha cuatju cjuacjintacun naha ne, hacuaha ndaja cuma ná ta tsëhë xi ha hvë ta hya cuma tsejen xi tsajin jyë́ naha. Cuatjin cuma ta tsëhë xi tichjahyun rë Nina ngatsë naha, hacuaha tsëhë xi Hasen xi casua naja Jesucristu ne, cuisecoo ná.
PHI 1:20 Jemu meje ná xi ngajñi rë yëjë ni xcusun xi sahme ne, tsajin mé xi sua sava ná. Hacuaha meje ná xi cumacjiin cacún ngajñi rë tu mé ni cjuacjintacun, cojo sa xi xuta ne, hatuxa sahmi jyë hnga me Jesucristu ngatsë naha, sa xi tsismi ná xutaxa rë ne, o sa tsajin ne, sa xi tsiquehen ná me.
PHI 1:21 Peru jinguyëjë rë xi tejña cjuahñu ne, hatuxa meje sahme nguñajacacun yëjë ni hacutjin xi Jesucristu meje rë me. Hacuaha sa xi cueya ne, jemu ndaja tsahan.
PHI 1:22 O sa xi cuitejña sa cjuahñu ne, xa xi sahme ngatsë rë Jesucristu ne, ndatjin cuetju. Vëhë xi hisca hveen ne, jarë xi hitsë sa chuya ná, ¿há xi cueya ne?, ¿há xi cuitejña cjuahñu?
PHI 1:23 Cuma cuinújan ne, jemu chja sacuse ná jarë xcusun xi ndatjin. Jercu meje cjuë́ tjëngë Jesucristu ngajan hiscan tacun me ta, jemu sa ndaja tsahan xi cuatjin.
PHI 1:24 Peru hitsë sa mameje rë xi cuitejña cjuahñu ngatsë nuju.
PHI 1:25 Tsëhë xi cajnecacún tsëhë cjuatacun vëhë ne, vëhë xi hvë ta cuitejña sa cjuahñu. Cuitejña sa cojo nuju ngayujun ni ne, cojo sa xi cuisécoo nuju xi tuxaha sa cjuatacun nuju xi chutayun cjuachacun xi macjain naja, hacuaha hitsë sa ndaja cuma rë xahasen nuju tsëhë cjua vëhë.
PHI 1:26 Hacuaha hya xi cuinduvá cuitejña nga cojo nuju ne, cuinújun ta jemu ndaja Jesucristu, ngatsë rë xi cavétju ndavaya.
PHI 1:27 Nihñu yëjë ni hacutjin xi meje rë xi sahmi xuta xi ha macjain jain rë me cjua ndajyihi tsëhë Jesucristu. Cuatjin nihñu, cojo sa xi ndaja cjua sacu ná tsujun, ¿há xi cuinduvá tjëngë nuju?, o sa tsajin ne, ¿há xi tejñataha jingu sa ladu? Peru meje cumachaya ná xi ngayun ne, tjin tangun cjuatacun nuju, hacuaha visecuun xingun xi nújun tjun ngatsë rë cjua ndajyihi xi macjain naja.
PHI 1:28 Hacuaha meje cumachaya ná xi ngayun ne, rcuun camahani tsëhë xuta xi sahmi nuju me condra. Xi cuatjin rcuun ne, cuma tsejen xi Nina ne, tacun jain me cojo nuju. Hacuaha cuma tsejen xi cuechu nixtin xi Nina ne, tsingatju me xuta xi cuacun jan xcun ndihi, peru ngayun ne, cuaxëtje nuju me.
PHI 1:29 Nina ne, ndaja casahmi me cojo nuju xi hacuiin suvá xi cumacjain ni nuju Jesucristu ta hacuaha cuatjun cjuañihi ngatsë rë xi macjain nuju me.
PHI 1:30 Titjun ne, cahyun cjuañihi xi cavátju camá. Quihndë ne, camachaya nga nuju xi ha cuanitjin ni tivátju tijima. Hacuaha ngayun ne, hacuanitjin ni tivatjun tijima quihndë.
PHI 2:1 Tjin rë xahasen nuju cjuasua ta, tsëhë xi tjin tangun cjuatacun nuju cojo Jesucristu. Tjin nuju cjuetacun ta, tsëhë xi me vëhë ne, hmucacun nuju me. Tjin tangun cjuatacun nuju cojo Hasen rë Nina. Hacuaha tjin nuju cjuahmutacun cjuayumatacun cojo xingun, xingu xingu ngayun.
PHI 2:2 Quihndë ne, cojo sa xi cuma chihin cjuasua xi tjin rë xahasen naha ne, cuitjin nihñu. Nihñu tangun cjuatacun nuju cojo xingun. Hacuaha ngajñi nuju ne, nihmutacun xingun cojo ngu ni cjuatacun nuju.
PHI 2:3 Sa xi meje nuju xi suvun ni xi ndajyihi cuatjun cuma ne, ndajin tjin. Hacuaha mijí rë xi nihñu yehe yojo nuju ta, xi meje rë ne, jeya ngayun. Hacuaha meje rë xi chutsujun xingun sacuaha xi hitsë sa vengui chjí rë me xi cumá nuju ngayun.
PHI 2:4 Mijí rë xi tsujun suvun ni cuinchunsun xi ndaja ta, hacuaha meje rë xi tinchunsun xi ndaja xi cumá rë jingu sa xuta.
PHI 2:5 Meje rë xi ningatuhuntacun sacuaha catsingatahacacun Jesucristu.
PHI 2:6 Me vëhë ne, handasa ha Nina me ne, peru hacuiin casahmi jyë hnga me yojo rë me xi meje cuejña me sacuaha Nina ta,
PHI 2:7 cahndë́ rë vëhë ne, cavejñaxin me cahndë́ rë me xcun Nina, hane casahmicuenda me xuta camá me ngu xuta sacuaha yaan, cojo sa xi sahmi me yëjë ni hacutjin cuitexa Nina me. Hya xi ha camá me xuta ne,
PHI 2:8 cahndë me yëjë ni hacutjin cachja Nina, hacuaha catsingatihin me xi catsisava xuta me, hisca catsingatihin me xi catsiquehen xuta me xcun cru, sacuaha xi jemu jyë jyë́ rë me.
PHI 2:9 Vëhë xi Nina ne, hya xi catsicuya me Jesucristu cjuahñu ne, hya casahmi jyë hnga me Jesucristu, hacuaha ngu ni me vëhë xi jemu vengui chjí rë ñihi rë me.
PHI 2:10 Cuatjin casahmi Nina, cojo sa xi yëjë ni ángel, yëjë ni xuta, cojo yëjë ni xitsehen ne, cuechú nixtin xi cuixcuhnchi xcun Jesucristu xi cjuaharcun rë me.
PHI 2:11 Hacuaha cuichja ta Jesucristu ne, hatuxa matitjun jain me. Xi cuatjin ne, cumatsejen xi Nina Nahmi naja ne, hatuxa jemu jyë hnga me cojo cjuatacun rë me.
PHI 2:12 Sacuatjin ndaja canuhyun tsahan hya xi cavinechan cojo nuju, tsan ne, cuatjin hitsë sa nguñajatacun tinuhyun tsahan quihndë xi xín tejñataha. Hacuaha meje rë xi nihñu yëjë ni hacutjin xi chuya rë Nina ta, tsëhë xi me vëhë xi vaxëtje nuju me. Ndaja cuidadu cojo sa xi cumachihin cjuatacun vëhë.
PHI 2:13 Hacuaha scaa nuju nihñu cuatjin ta, tsëhë xi Nina sahmi me xi meje nihñu yëjë ni hacutjin xi chuya rë me, hacuaha sua nuju me ngahñu xi scaa nuju nihñu cuatjin.
PHI 2:14 Ngajñi rë yëjë ni cjuacjintacun xi tjin nuju ne, xi canújunjyuun cojo xingun xi chuyiin nuju, xi canujuun cuitjin cuatjin.
PHI 2:15 Xi cuatjin ne, tsajin jyë́ nuju hacuaha tyjahi xahasen nuju. Cuma cuinújan ne, ngayun xi ha quihndi rë Nina ngayun ne, tsajin jyë́ nuju, xi nechun ngajñi rë xuta tsehen xuta ndajin xi siu ngasunhndë. Meje rë xi cumatsejen xi jemu ndaja ngayun ngajñi rë xuta tsehen,
PHI 2:16 xi tuhun machaya rë xuta cjua ndajyihi xi sua naja cjuahñu xatsë. Cuatjin nihñu ne, cojo sa xi ndaja cuma ná ngatsë nuju nixtin xi cuya nga Jesucristu ta, tsëhë xi xi cuatjin ne, hya cumatsejen xi hacuiin tu mahya casahme ngahñu xi sahme hacutjin xi chuya rë Jesucristu, hacuaha hacuiin tu mahya casahme xá.
PHI 2:17 Ha ndasa tsiquehen ná xutaxa rë tsëhë xi ngahan cavisécoo nuju xi cumacjain nuju Jesucristu hacuaha cavisécoo nuju xi nihñu xa rë me, peru ndaja cuma ná. Hacuaha ndama ná xi ngayujun ni ne, casua nuju Nina cjuandaja rë me.
PHI 2:18 Ha chuva vëhë ni ne, ndaja catama nuju ngatsë rë cjuandaja vë, hacuaha ndaja catama nuju ngatsë naha.
PHI 2:19 Sa xi meje rë Jesucristu, me xi matitjun tsajan, sacuatjin xi meje ná ne, tsingátju nuju Timoteo. Meje tsingátju nuju me cojo xati, cojo sa xi ngahan ne, hacuaha ndaja cuma rë xahasen naha, hya xi cuya nga me cojo cjua hacutjin tivatjun tijima.
PHI 2:20 Me vëhë tsingátju me ta, tsëhë xi tsajin sa ná ngu xuta xi vinga nuju sacuaha me vëhë. Me vëhë ne, jemu meje rë me xi ndaja cuatjun cuma.
PHI 2:21 Peru yëjë me xi yahnga ne, sahmi cuenda me cjuandya rë suvá ni me, sahmi cuendaain me xa xi meje rë Jesucristu xi cumá.
PHI 2:22 Peru ha hyun xcusun rë Timoteo. Ha hyun ta hya xi cavisecoo ná me xi catihin cumachaya rë xuta cjua rë Nina ne, cavisecoo ná me sacuaha visecoo ngu quihndi nahmi rë.
PHI 2:23 Vëhë xi, xi tu sacú cumachaya ná mé xi cuátju cuma ne, me vëhë xi meje tsingátju nuju me.
PHI 2:24 Hacuaha xi má ná ne, me xi matitjun tsajan ne, sua me cahndë́ xi cojo xati ne, cuinduvá tjëngë nuju.
PHI 2:25 Peru xi má ná ne, hacuaha sahmi ngujyë xi tsingátju nuju Epafrodito xingueen. Me vëhë ne, casahmi me coná xa, hane cojo me vëhë cacaa niji cojo cjuahngatacun rë xuta xi chohovëë naja. Hacuaha cavisecoo ná me sacuatjin xi meje nuju ngayun xi caningatjun me.
PHI 2:26 Hane me vëhë ne, jemu tjin cacun me xi meje scuëë nuju me ngayujun ni ta, tsëhë xi choho camá rë me xi camachaya nuju cjua xi hmu rë me.
PHI 2:27 Hacuaha quixi xi jemu cama hmu rë Epafrodito. Ña meje cueya me. Peru cahmii me ta, tsëhë xi camayuma rë Nina me. Hacuaha camayuma rë Nina ngahan ta, tsëhë xi mijí rë me xi cuma jyë sa cjuachoho xi tivátju tijima.
PHI 2:28 Vëhë xi cojo xati ne, tsingátju nuju Epafrodito, sehe cuma sua rë xahasen nuju xi chun nga me ngu ndiya. Hacuaha ngahan ne, cuma chuva hitsë cjuachoho xi tivátju tijima.
PHI 2:29 Vëhë xi chjuhunntsun me cojo cjuasua, tsëhë xi me vëhë ne, hacuaha macjain rë me me xi matitjun tsajan. Hacuaha chjuhunrcun yëjë ni xuta xi tangun cjuatacun rë cojo rë me.
PHI 2:30 Me vëhë ne, tsëhë xi jercu casahmi me xa tsëhë cjua rë Jesucristu ne, vëhë xi hitsë sa ne, cahme me. Handasa cavetaha tsavi me yojo rë me xi cavisecoo ná me ne, peru camacjiincacun me xi cavisecoo ná me cahndë́ nuju ngayun.
PHI 3:1 Quihndë tsan ne, catamasua rë xahasen nuju ngatsë rë me xi matitjun tsajan. Ngahan ne, hacuiin ndya ma ná xi cúya tsihindu nga nuju cjua xi ha cachjá cojo nuju ta, tsëhë xi cjua vëhë ne, cuisecoo nuju xi tsajin yo tsinguetsun cjuatacun nuju xi macjain nuju Jesucristu.
PHI 3:2 Nechun cuidadu cojo xuta machjiriin xi vindacha xi chja xi hachu meje rë xi xtí yojo naja, sehe tsejen xi tsëhë Nina ngayaan.
PHI 3:3 Quixiin cjua rë me ta ngayaan xi tsejen xi tsëhë Nina ngayaan. Hane Hasen rë Nina ne, visecoo naja xi ma chjahanrcun Nina, hacuaha nechan cjuasua ngatsë rë Jesucristu. Ha hyan ta hatuxa cumaji cuetjuntjen ngatsë rë xcusun xi cun ngayaan cojo xcusun xi nihña.
PHI 3:4 Peru sa xi cuatjin cuma cuetjuntjen suvaan ne, ngahan ne, hitsë sa tjin ná chuva rë xi cuétjutjë xi cumá rë xuta xi yahnga.
PHI 3:5 Ngahan ne, hacuaha cati ná xi cavéchu xi jyin nixtin, sacuaha xcusun rë xutachanga naha. Ngahan ne, tjë rë xuta nangui Israel ngahan. Hacuaha quihndindai cjin rë Benjamín ngahan. Ha tuxa xuta tjë rë Israel ngahan ta xutacha naha ne, hacuaha xuta tjë rë Israel me. Ngahan ne, tsëhë partidu fariseo ngahan hacuaha casahme yëjë ni hacutjin chja ley rë yungun naha.
PHI 3:6 Ngahan ne, jercu cavétaharcu xcusun rë xutachanga naha, hane vëhë xi hisca casuá cjuañihi xi cuma rë xuta xi macjain rë Jesucristu. Ngahan ne, tsëhë xi casahme sacuatjin chja ley rë yungun naha ne, vëhë xi camaji catsicaniji ná xuta hisca ngu jyë́.
PHI 3:7 Xi catsingátahacacun hatsëë ne, jemu vengui chjí rë yëjë xcusun vëhë. Peru ngatsë rë Jesucristu ne, xi má ná quihndë ne, venguiin camahani chjí rë xcusun vëhë ta, cumaji cuaxëtje ná.
PHI 3:8 Hisca venguiin chjí rë yëjë sa xcusun, má ná ta, tsëhë xi jercu vengui chjí rë xi tjin tangun cjuatacun naha cojo Jesucristu, me xi matitjun tsajan. Ngatsë rë me vëhë ne, ngahan ne, cacandëxen yëjë ni xcusun, sacuaha xi chanden xtë, cojo sa xi ngahan ne, cuma tsëhë Jesucristu ngahan.
PHI 3:9 Hacuaha cuma tangun cjuatacun naha cojo rë me. Xi cuatjin ne, cjuë jyë́ naha, hacuiin ngatsë rë xi sahme hacutjin chja ley rë yungun ta ngatsë rë xi macjain ná Jesucristu. Nina ne, tsicjë me jyë́ naja ngatsë rë xi macjain naja Jesucristu.
PHI 3:10 Jemu meje ná xi ndaja cuma tangun cjuatacun naha cojo Jesucristu. Hacuaha meje ná xi cojo ngahan sacu ná ngahñu xi catsingacun Nina, hya xi camá catsicuya me Jesucristu cjuahñu. Sa xi meje rë Nina ne, ngahan ne, tsingatehen xi cuátju cjuañihi hacuaha hisca tsingatehen xi tsiquehen ná xuta ta, tsëhë xi cuatjin cavatju Jesucristu camá.
PHI 3:11 Hane hya xi cueya ne, meje rë Nina xi hacuaha tsicuya ná me cjuahñu xi tejña ngajñi rë nima.
PHI 3:12 Cjëë cuma chihin yëjë ni cjuatacun xi meje ná vë, hacuaha chaja sa cuma tyjahi cjuatacun naha. Peru tisahme sa ngahñu, cojo sa xi cuma sahme chehen cjuatacun vëhë. Cuatjin sahme ta, tsëhë xi Jesucristu ne, ha casahmi tsëhë me ngahan.
PHI 3:13 Cúya cuichjá cojo nuju tsan ta, cjëë sahme chehen cjuatacun vëhë. Peru cuitjin meje sahme: tsicháya xcusun xi ha cavátju camá, hacuaha sahme ngahñu xi cuma sahme xcusun xi vengui chjí rë xi sehe nduva.
PHI 3:14 Tisahme ngahñu xi cuma sahme chehen xcusun vëhë, cojo sa xi sacú ná cuatjo xi sua ná Nina ngatsë rë xi macjain ná Jesucristu. Nina ne, cuaxijin ná me xi cuitejña ngajan ngahnga hiscan tacun me.
PHI 3:15 Vëhë xi ngayaan xi ha ndaja macjain naja Jesucristu ne, meje rë xi cuatjin cuiyujun cjuatacun naja. Hane sa xi tjin yahnga ngayun xi hacuiin cuatjin cuiyujun cjuatacun nuju ne, Nina tsingacun nuju me hacutjin xi cjuaquixi.
PHI 3:16 Ndastu sahmi ngujyë xi nihña cuenda tsëhë cjuaquixi xi ha hyan ne, cuatjin meje rë xi nihña.
PHI 3:17 Vëhë xi meje rë xi nihñu hacutjin xi sahme, tsan. Hacuaha tetuhunrcun xcusun rë xuta xi sahmi hacutjin xi sahme.
PHI 3:18 Ha jemu cachjá cojo nuju ta jemu cjín xuta xi condra me tsëhë cjua ndajyihi xi sua machaya naja hacutjin cahme Jesucristu xcun cru. Ña tijíhnda xi tichjá nga ngu ndiya cojo nuju cjua vëhë.
PHI 3:19 Peru xuta xi sahmi me condra cjua ndajyihi vë ne, cjue me xcun ndihi. Cahndë́ rë xi cjuaharcun me Nina xi cjuaquixi ne, hitsë sa faharcun me tu mé ni xcusun xi chuya rë me. Cahndë́ rë xi cuma sava rë me tsëhë xcusun xi sahmi me ne, tu hitsë sa sahmi yehe me yojo rë me. Cuma cuinújan ne, tjin tangun cjuatacun rë me cojo cjuatacun rë ngasunhndë.
PHI 3:20 Peru ngayaan ne, xuta tsëhë ngahnga ngayaan. Hacuaha ha nechayan rë Jesucristu, me xi matitjun tsajan, ta cuinduva me tsëhë ngajan xi cuaxëtje naja me.
PHI 3:21 Me vëhë tsindeya me yojo jyë́ naja xi tsajin mé machji rëhë, hane sahmi me sacuaha yojo rë suvá me xi jercu vengui chjí rë. Cojo ngahñu rë suvá me ne, sahmi me ta, tsëhë xi me vëhë matitjun me tsëhë yëjë ni xcusun.
PHI 4:1 Vëhë xi sacuatjin xi ha macjain nuju me xi matitjun tsajan tsan ne, cuatjin tangun cojo ngasunhndë nuju. Jercu meje cuinduvá tjëngë nuju tsan. Jemu ma sua rë xahasen naha ta, tsëhë xi ngayun ne, tivangun nduju cojo cjuatacun nuju xi macjain nuju Jesucristu.
PHI 4:2 Quihndë ne, féhya nuju ngayun Evodia cojo ngayun Síntique nihñu favor ne, ngu tangun ni catama cjuatacun nuju cojo xingun, sacuatjin meje rë xi nihña ngayejen ni xi tsëhë me xi matitjun tsajan ngayaan.
PHI 4:3 Hacuaha ngaye xi ndaja compañeru naha ngaye ne, nihñi favor ne, tisecuee rë na xi cuacun vë, xi cuijnetaha si xi tisahmi na cojo xicjin na. Ta na xi cuacun vë ne, jercu casahmi na cojo ná xa, hya xi catihin camachaya rë xuta cjua ndajyihi tsëhë Jesucristu. Hacuaha cojo cha Clemente cojo sa yahnga compañeru naha ne, cavisecoo ná me. Xuta xi cuacun vë ne, hatuxa sacú rë me cjuahñu xatsë ta, tsëhë xi ha tsëhë Nina me.
PHI 4:4 Ndaja catama rë xahasen nuju ngatsë rë xi tjin tangun cjuatacun nuju cojo me xi matitjun tsajan. Cúya cuichjá nga cojo nuju, ndaja catama rë xahasen nuju.
PHI 4:5 Meje rë xi cuma tsejen xi tjin nuju cjuandaja cojo yëjë ni xuta ta, tsëhë xi me xi matitjun tsajan ne, ha tacun xati xi cuinduva nga me.
PHI 4:6 Ngajñi rë yëjë ni cjuacjintacun nuju ne, xi camacjiintacun. Tinújun cojo Nina hacuaha chjahyun rë me cjuandaja rë me. Hacuaha tuhun nacuechji rë me. Cuatjin meje rë xi tuhun cumachaya rë Nina tu mé ni xi meje nuju.
PHI 4:7 Ngajan xi cjuajeya xi sua nuju Nina ne, vëhë cuetjo nuju, cojo sa xi cumacjiintacun, xi tjin tangun cjuatacun nuju cojo Jesucristu. Sacuaha cjuajeya xi sua nuju Nina jan ne, hisca vijniircun ndandaja ta, tsëhë xi jemu tu ndaja camahani cjuajeya vëhë.
PHI 4:8 Quihndë tsan ne, nihñu tangun cjuatacun nuju cojo cjuatacun xi cuicun vihi: cjuatacun xi cjuaquixi, cjuatacun xi chjaharcun rë, cjuatacun xi ndatjin, cjuatacun xi tyjahi, cjuatacun xi ndacun, cjuatacun xi chuya rë xuta ndaja. Cuma cuinújan ne, tu jarë ni cjuatacun xi jemu ndaja o sa xi hatuxa tjin chuva rë xi chjaharcun rë ne, vëhë nihñu tangun cjuatacun nuju cojo.
PHI 4:9 Hacuaha nihñu yëjë ni hacutjin xi camá nuju hya xi cavicuyá nuju hacutjin meje rë xi nihñu. Peru hacuiin suvá cjua xi cachjá cojo nuju ta hacuaha cojo xcusun xi casahme ngajñi nuju ne, cojo vëhë meje rë xi nihñu. Hane cuatjin ne, Nina xi sua naja cjuajeya ne, tacun me cojo nuju.
PHI 4:10 Ngatsë rë me xi matitjun tsajan ne, jercu ndama ná ta, handasa jemu cavatju nixtin ne, hindë cavuyun caningatuhuntacun nga ngatsë naha. Hacuiin hatuxa canichayun ná ta, cuenda xi casacuinyiin nuju hacutjin cuma xi cuisecun ná hisca quihndë.
PHI 4:11 Hacuiin tichjá cojo nuju cuatjin ngatsë rë xi tjin mé xi ma chaja ná ta, ngahan ne, ha casacu ná chuva rë hacutjin cumangucacún cojo tu mé ni cjuacjintacun xi nduva.
PHI 4:12 Sa yuma sa nchina ngahan ne, hatuxa mangucacún. ¿Há tjin xi sínë?, o ¿há tsajin xi sínë?; ¿há xi jercu tjin ná?, o ¿xi ma chaja ná?, tsimii sahmi rë ta ngahan ne, ha catuxaha cjuatacun naha xi cumangucacún cojo tu mé ni cjuacjintacun xi nduva.
PHI 4:13 Scaa ná cojo tu mé ni cjuacjintacun ta, tsëhë xi Jesucristu ne, tisua ná me ngahñu.
PHI 4:14 Peru, jemu ndaja canihñu xi cavisecun ná ngajñi rë cjuañihi xi tivátju tijima.
PHI 4:15 Ngayun xuta nandya Filipo ne, ha hyun ta hya xi tjutjun casuá camachaya nuju cjua ndajyihi tsëhë Jesucristu hacuaha sehe cavétju tsëhë distritu Macedonia ne, hisca ngu yungun cavisecuaain ná cojo tujún hya. Suvun tutu xi cavisecun ná.
PHI 4:16 Hacuaha hya xi tejñataha ngajan nandya Tesalónica ne, ngu jo ndiya ne, caningatjun tujún tsëhë cjuachaja xi tjin ná.
PHI 4:17 Hacuiin jercu meje ná cjuandaja xi ningatjun ná ta xi hitsë sa meje ná ne, xi sacu nuju cjuandaja rë Nina ngatsë rë cjuandaja xi nihñu.
PHI 4:18 Ha cafahántsa yëjë ni xi caningatjun ná cojo Epafrodito. Vëhë xi ha tjin ná yëjë ni xi mameje ná. Hisca vangui sa xi tjin ná. Cuatjo nuju vë ne, tangun cojo ngu cuatjo xi ndaja jne, xi vejñaa xcun ngasunscun. Hane Nina ne, fahatsja me cuatjo jan ta jemu chuya rë me tsëhë.
PHI 4:19 Hacuaha Nina naja ne, tsëhë cjuanchina ndajyihi xi tjin rë me ne, hatuxa sua nuju me tu mé ni xi machaja nuju, ngayujun ni xi tjin tangun cjuatacun nuju cojo Jesucristu.
PHI 4:20 Quihndë ne, catichja xuta ta Nina Nahmi naja ne, jercu ndaja camahani me yëjë ni nu yëjë ni nixtin. Cuatjin jain.
PHI 4:21 Yëjë ni xuta xi tjin tangun cjuatacun rë cojo Jesucristu ndyá ne, tuhun rë me nina naha. Hacuaha xingueen xi siu cojo ná nguehe ne, tsingatju me ngu nina nuju.
PHI 4:22 Hacuaha cojo sa yëjë me xi tsëhë Nina, hisca cojo me xi siu ngajan ndava me xi matitjun camahani tsëhë xuta Roma ne, tsingatju me nina nuju.
PHI 4:23 Cjuandaja rë Jesucristu, me xi matitjun tsajan ne, catejña cojo nuju.
COL 1:1 Ngahan Pablo ne, apóstol tsëhë Jesucristu ngahan ta, tsëhë xi cuatjin camameje rë Nina. Ngahan cojo Timoteo xingueen ne,
COL 1:2 ningátjin nuju carta vihi ngayun xuta nandya Colosas, ngayujun ni xuta ladu rë Nina xi jercu ndaja titsangunndujun cojo ndiya rë me hacuaha tjin tangun cjuatacun nuju cojo Jesucristu. Nina Nahmi naja ne, catisua nuju me cjuandaja cjuajeya.
COL 1:3 Jercu tihín nacuechji rë Nina Nahmi rë Nai naja Jesucristu yasen yasen ni, hya xi nihñi oración ngatsë nuju.
COL 1:4 Tihín nacuechji rë Nina ta camachaya niji hacutjin xi ngayun ne, mangutacún cojo Jesucristu hacuaha nihmutacún yëjë ni xuta ladu rë Nina.
COL 1:5 Cuatjin tinihñu ta, jercu vetuhun tacún cjuandaja xi Nina tacunxin rë me ngajan ngahnga xi cuma nuju ngayujun ni. Cavetsuhun cavetuhun tacún cuatjin, hatsëë hya xi canuhyun cjuandajyihi xi cjuaquixi, xi chja tsëhë Jesucristu.
COL 1:6 Cjuandajyihi jan ne, casacu camachaya nuju sacuatjin sa rë yahnga xuta tsëhë jercu cjín sa cahndë́. Hane xi macjain rë xuta cjuandajyihi jan ne, jercu tisahmi me cjuandaja, hacuaha jercu cjín sa xuta tijimacjain rë me. Cuanitjin tivatju ngajñi nuju ngayujun ni, hisca hya xi camachaya nuju cjua jan hacuaha ndaja cavijnercun xi Nina ne, jercu sahmi me cjuandaja.
COL 1:7 Cuatjin cachja cojo nuju Epafras, me xi jercu vinga niji hacuaha tangun fahacuenda me cojo niji xa xi vitexa Jesucristu. Me vëhë ne, jercu ndaja cjuinduju me tifahacuenda me tsëhë xa jan cojo sa xi tsujun ndaja.
COL 1:8 Hacuaha casua me camachaya niji xi ngayujun ni ne, tjin nuju cjuahmutacun cojo yëjë ni xuta ladu rë Nina, cojo cjuahmutacun xi sua nuju Hasen rë Nina.
COL 1:9 Ngatsë rë xi cuatjin camachaya niji tsëhë cjua xi chja tsujun ngayujun ni ne, vëhë xi tinihñi oración tsujun ngayujun ni yasen yasen ni hisca hya xi camachaya niji. Tichjahyin rë Nina xi cuijnercun yëjë hacutjin xi meje rë Nina xi nihñu. Tichjahyin rë me xi ndaja tuxaha cjuatacun nuju hacuaha cuijnercun cojo cjuatacun xi sua nuju Hasen rë Nina.
COL 1:10 Cuatjin tichjahyin rë me, cojo sa xi ngayujun ni ne, cuangunndujun cojo ngasunhndë nuju sacuatjin meje rë xi sahmi xuta ladu rë Nai naja, cojo sa xi chuya rë me tsëhë yëjë ni xi nihñu. Cuatjin tichjahyin rë me, cojo sa xi ngayujun ni ne, nihñu yëjë ni xcusun cjuandaja, hacuaha ndaja sa chun Nina ngu nixtin ngu nixtin.
COL 1:11 Nina catisua nuju me ndaja cjín ngahñu, tucu ngahñu xi tjin rë me, cojo sa xi yëjë ni nixtin scaa nuju cojo yëjë ni xcusun xi vatjun má hacuaha nijyun tacún cojo xuta, táha tijimasua nuju.
COL 1:12 Cuatjin tichjahyin rë Nina, cojo sa xi ngayujun ni ne, tuhun nacuechji rë Nahmi naja ngatsë rë xi me vëhë ne, cavëhëchjine nuju me cojo sa xi cojo ngayun satë nuju cjuandaja xi sua me xuta ladu rë me ngajan ngahnga.
COL 1:13 Nina Nahmi naja ne, cavaxëtje naja me tsëhë xitsehen xi matitjun tsëhë yëjë ni cjuatsehen, hane cavejña naja me tsja Quihndi rë me xi jercu hmucacun me.
COL 1:14 Cojo xcusun xi casahmi Quihndi rë me jan ne, Nina ne, cavechjitje me yëjë ni jyë́ xi quitjen xuta, hane catsinchataha me ngayaan.
COL 1:15 Quihndi rë me jan ne, tsingacun naja hacutjin xcusun rë Nina cojo Hasen rë me, handasa maji matsejen Nina. Quihndi rë me jan ne, hatuxa matitjun me tsëhë yëjë ni xi casahmi Nina ta,
COL 1:16 tsëhë xi cojo me ne, Nina ne, casahmi me yëjë ni xi tjin ngasunhndë xi tsejen, cojo yëjë ni xi tjin ngahnga xi matsijin, sacuaha yëjë ni xcusun hasen xi matitjun sa hasen ndaja sa hasen tsehen. Cojo me vëhë ne, casahmi Nina yëjë ni, cojo sa xi yëjë ni xi cuacun jan ne, sahmi jyë sahmi hnga rë me.
COL 1:17 Quihndi rë me jan ne, hatuxa matitjun me tsëhë yëjë ni xi casahmi Nina ta, tsëhë xi me vëhë xi tjun sa tacun me xi cuma rë yëjë ni hacuaha ngatsë rë me vëhë ne, siuchihin yëjë ni.
COL 1:18 Me vëhë ne, vitexa me xuta ladu rë Nina sacuatjin rë rcuun xi vitexa rë yojo naja. Hacuaha sua me cjuahñu xatsë xuta ladu rë Nina ta, tsëhë xi me vëhë tjun tjun me cavuya me cjuahñu tsëhë ngajñi rë yëjë nima, cojo sa xi cumatitjun camahani me.
COL 1:19 Quihndi rë Nina jan ne, tsingacun naja hacutjin xcusun rë Nina cojo Hasen rë me ta, tsëhë xi cachuya rë Nina xi cuisehentë me cuejñacahndë suvá me cahntsua xahasen rë Quihndi rë me.
COL 1:20 Nina Nahmi naja ne, cavejña naja me tsja Quihndi rë me, tsëhë xi cavejñangucacun me xi cojo Quihndi rë me ne, tsicuya me ladu rë me ngayëjë ngarca ni, sa ngahnga sa ngasunhndë, cojo sa xi cumajyë cumahnga Quihndi rë me jan. Hane ngatsë rë jni rë Quihndi rë me xi cavanga xcun cru ne, hindë tsajin mé cjuachan.
COL 1:21 Ngayujun ni ne, handasa hatsëë ne, jemu cjin nechun tsëhë Nina hacuaha condra nuju me ngatsë rë xi jemu tsehen cjuatacun nuju hacuaha jemu tsehen xcusun xi canihñu,
COL 1:22 peru quihndë ne, casahmi Nina xi cavuya nga camandaja yun cojo rë me. Cuatjin casahmi me cojo cjuaveya tsëhë yojo rë Quihndi rë me, cojo sa xi ngayujun ni ne, tsëhë me yun hacuaha tsajin camahani jyë́ nuju, hya xi squindaya nuju me xi cuangun xcun me.
COL 1:23 Cuatjin cuma sa xi cjuenduju xi siu cahndë́ cjuatacun nuju xi macjain nuju cjuandajyihi xi chja tsëhë Cristu, hacuaha cjuenduju xi vetuhun tacún cjuandajyihi xi canuhyun jan. Hane cjuandajyihi jan ne, casacu camachaya rë xuta tsëhë jercu cjín cahndë́. Hane ngahan Pablo ne, casatëxa ná xi suá machaya rë xuta cjuandajyihi jan.
COL 1:24 Quihndë ne, ma sua ná xi tivátju cjuañihi cojo sa xi tsujun ndaja. Tisahmechehen tsëhë yëjë ni cjuañihi xi cachja Cristu xi cuátju cuma cojo yojo naha, cojo sa xi tsëhë xuta ladu rë me ndaja, hane ngayejen ni xi ladu rë me ne, sacuaha yojo rë me ngayaan.
COL 1:25 Ngahan ne, camá ngahan ngu xuta xi visécoo rë xuta ladu rë Cristu, tsëhë xi Nina casuaxa ná me xi cuisécoo nuju ngayun xutaxín, cojo sa xi suá cumachaya nuju tsëhë yëjë ni cjuandajyihi xi cachja me.
COL 1:26 Cjuandajyihi jan xi cachja me ne, hacui cjuatahahma. Cjua vëhë ne, cavetjo Nina tsëhë yëjë ni xuta xi caviyuju me yëjë ni nixtin xi cavatju, peru quihndë ne, casua me camachaya rë yëjë ni xuta ladu rë me.
COL 1:27 Nina ne, cavejñangucacun me xi sua me cumachaya rë xuta xi cuacun jan xi cjuatahahma vihi ne, chja xi jercu tsinchacuntihin Nina xutaxín jan. Cuma cuinújan ne, Cristu ne, cuejñacahndë me cahntsua xahasen nuju ngayun xutaxín. Hane cuetuhun tacún xi sehe cuaxëndaja me yun.
COL 1:28 Ngayin ne, tihín cumachaya rë xuta tsëhë cjua xi chja tsëhë Cristu. Yëjë ni xcusun xuta ne, viyijin me cuidadu hacuaha vicuyin rë me cojo yëjë ni cjuahasen xi tjin niji. Cuatjin nihñi, cojo sa xi yëjë ni xuta xi cuacun jan ne, tyjahi camahani me xi tjin tangun cjuatacun rë me cojo Cristu, hya xi ningacuin me xcun Nina.
COL 1:29 Ngatsë rë vëhë ne, ngahan ne, hacuaha hñu tisahme xa, hacuaha tisahme ngahñu cojo yëjë ni ngahñu xi tisua ná Cristu.
COL 2:1 Hacuaha meje ná xi cumachaya nuju xi jercu tisahme ngahñu ngatsë nuju cojo ngatsë rë me xi siu ngajan nandya Laodicea cojo tsëhë yëjë sa me xi cjëë scuëë ná.
COL 2:2 Cuatjin sahme, cojo sa xi ngayujun ni ne, sacú hñu rë xahasen nuju ngatsë rë xi tjin tangun cjuatacun nuju cojo xingun cojo yëjë ni cjuahmutacun. Hacuaha cuatjin sahme, cojo sa xi sacúndaja cumachaya nuju hacuaha jercu ndaja camahani cuijnercun cjuatahahma ndajyihi rë Nina, xi chja tsëhë Cristu.
COL 2:3 Cristu ne, suvá ni me vëhë cuma sua naja me cjuatacun xi jercu ndaja cuijnercun yëjë ni cjuatahahma ndajyihi jan.
COL 2:4 Cuitjin tichjá cojo nuju, cojo sa xi tsajin yo cuma cuindacha nuju cojo cjua xi matanguaain cojo cjua xi cjuaquixi, handasa jercu ndaja nuhya rë, xi má nuju.
COL 2:5 Handasa tsajin tejñataha cojo nuju ne, peru jercu vityangë cacún tsujun ngayujun ni. Hacuaha ma sua ná, tsëhë xi hvë xi ngayujun ni ne, tjin tangun cjuatacun nuju cojo xingun hacuaha jercu ndaja mangu tacún cojo Cristu.
COL 2:6 Vëhë xi, sacuatjin xi camacjain nuju cjuandajyihi xi chja tsëhë Jesucristu, me xi Nai naja ne, cuatjin tángunndujun cojo ngasunhndë nuju xi tjin tangun cjuatacun nuju cojo rë me.
COL 2:7 Catjinduju xi ndaja macjain nuju cjua jan, hacuaha ndaja sa catamacjain nuju ngu nixtin ngu nixtin. Catjinduju xi siu cahndë́ cjuatacun nuju cojo cjuachacun xi macjain naja, sacuatjin cavicuya nuju Epafras. Hacuaha catjinduju xi jercu tuhun nacuechji rë Nina Nahmi naja.
COL 2:8 Nechun cuidadu, sá tu yo sahmi xi cuisuhun ladu rë ngatsë rë xi cuindacha nuju cojo ngu cjuachacun xi venguiin chjí rë, tsëhë xi cjuachacun jan ne, nduva tsëhë xcusun rë xuta ngasunhndë ni, hacuaha tsëhë suvá ngasunhndë vihi yëjë ni cjua rë jan, hacuiin tsëhë Cristu.
COL 2:9 Nihñu cuidadu ta, yëjë xcusun rë Nina ne, tjin Cristu, ta Nina ne, vejñacahndë me yojo rë Cristu,
COL 2:10 hacuaha ngayun ne, tsajin mé xi chaja rë hasen nuju, tsëhë xi tjin tangun cjuatacun nuju cojo Cristu, me xi matitjun camahani tsëhë yëjë ni hasen xi hacuaha vitexa, sa hasen ndaja sa hasen tsehen.
COL 2:11 Ngatsë rë xi tjin tangun cjuatacun nuju ngayujun ni cojo rë me ne, ha sacuaha xi me vëhë cavatë me chuxin nuju. Hane vëhë ne, hacuiin vijne xi cati jain chuxin nuju sacuaha sahmi xuta cojo quihndi langa ta xi vijne jan ne, yëjë ni cjuatsehen xi tjin naja cojo yojo naja ne, cavaxëxin camahani Cristu.
COL 2:12 Hya xi caxtenda ngayun ne, ha sacuaha xi caveyun ne, hacuaha Nina caveyaniji nuju me tangun cojo Cristu, sehe catsicuya nuju me cjuahñu nga cojo rë me, ngatsë rë xi camangu tacún cojo ngahñu rë Nina, me xi catsicuya rë Cristu cjuahñu tsëhë ngajñi rë yëjë nima.
COL 2:13 Hatsëë ne, ha sacuaha xi nima má ngayun ngatsë rë jyë́ nuju hacuaha ngatsë rë yëjë cjuatsehen xi tjin nuju cojo yojo nuju. Peru quihndë ne, ngayujun ni xi catsicuya nga nuju Nina cjuahñu tangun cojo Cristu, Nina ne, catsinchataha naja me cojo yëjë jyë́ naja.
COL 2:14 Cuma cuinújan ne, sacuaha xi cavujnu Nina cjua xi hincha xcun xujun xi tsicaniji jyë́ naja. Sacuaha xi catsicjëya me xujun jan, hya xi cahme Cristu xcun cru.
COL 2:15 Nina ne, cafahaxin me xa xi siutahá yëjë ni hasen ndaja cojo hasen tsehen xi cavitexa, hane catsingacuntë me xi cuatjin casahmi me. Cacaa rë me cavinchangahma me hasen xi cuacun jan, cojo yëjë ni xi casahmi Cristu.
COL 2:16 Xicachjasuun tsëhë xuta xi tsicanijijyë me ngayun ngatsë rë xcusun xi chinu o xi hyun, o ngatsë rë suhi xi nihñu, há chuva nu, há chuva sá, o há chuva totje.
COL 2:17 Xicachasuun ta yëjë ni xcusun xi cuacun jan ne, sacuaha tjahnguen ni rë yëjë ni cjuandaja xi casua nuju Cristu.
COL 2:18 Xicachasuun tsëhë xuta xi cuatjin tsicanijijyë nuju me xi chja me xi hatuxa meje rë xi ninguijnu yojo nuju hacuaha chjuhunrcun ángel. Xuta xi cuacun jan ne, chja me xi chja xu nijñá cojo rë me hacuaha sahmi yehe me yojo rë me suvá me ngatsë rë cjuatacun tsehen xi vitexa rë me.
COL 2:19 Cuatjin sahmi me ta, vicuyaain me cjuachacun cjuaquixi tsëhë Cristu, me xi sahmi xi cumatangun cjuatacun rë yëjë ni xuta ladu rë Nina cojo xicjin hacuaha sahmi xi cuijin xcun xi cjuenduju me cojo ndiya rë Nina sacuatjin xi meje rë Nina.
COL 2:20 Ngayujun ni ne, ngatsë rë xi tjin tangun cjuatacun nuju cojo Cristu, me xi cahme ne, vëhë xi camandaya ngayun tsëhë xcusun rë xuta ngasunhndë, sacuaha mandaya ngu xuta tsëhë yëjë ni cjuandya rë me hya xi hme me. Vëhë xi mijí rë xi cuanguntjengun xcusun rë xuta xi chja xi cumaji chjahan vihi, cumaji xinëë vëhë, cumaji nicojon xingu vë, sacuaha xi tuxa sahmi ngujyë xi cuinuhyun jan.
COL 2:22 Mijí rë xi cuanguntjengun xcusun xi cuacun jan ta, tsëhë xi xichinë cojo xi hyun ne, hatuxa fë hya xi nicojo rë. Hacuaha xcusun xi cuacun jan ne, nduva tsëhë cjua xi vitexa xuta ngasunhndë ni, nduva tsëhë cjua xi vicuya xuta ngasunhndë ni.
COL 2:23 Hacuaha xcusun xi cuacun jan ne, sahmi xi xuta ne, sahmi me yëjë ni xi meje rë cjuatacun tsehen xi vitexa rë me, handasa tsejen sacuaha xcusun ndaja, ngatsë rë xi vitexa naja xi chjahanrcun nina sacuatjin meje rë xuta ngasunhndë ni hacuaha xi ninguijne yojo naja hacuaha xi chjahanñehe cojo yojo naja. Peru xcusun xi cuacun jan ne, vitexaain camahani xi nihña cjuandaja.
COL 3:1 Ngayujun ni ne, casua nuju Nina cjuahñu xatsë, ha sacuaha xi catsicuya nuju me cjuahñu tangun cojo Cristu. Vëhë xi yëjë ni hora ne, catamameje nuju yëjë ni xi tsëhë ngahnga, hiscan tacun Cristu, me xi Nina casahmi jyë casahmi hnga rë xi cuitexa me ngayëjë ni.
COL 3:2 Catamameje nuju yëjë ni xi tsëhë ngahnga, hacuiin cjuatsehen xi tsëhë ngasunhndë ta,
COL 3:3 tsëhë xi ngayun ne, ha caviyujunxun xcusun xi canihñu hatsëë, sacuatjin rë nima xi ha quihndë tsajin mé cuma sahmi sacuaha hya xi tacun sa xcun cjuahñu. Hacuaha quihndë ne, tjin nuju cjuahñu xatsë tangun cojo Cristu, me xi tacun xcun Nina. Hane xcusun vëhë ne, hatuxa matsijin.
COL 3:4 Hya xi Nina tsingacuntë me Cristu, me xi sua nuju cjuahñu xatsë ne, hya tsingacuntë nuju me hacuaha sahmi jyë sahmi hnga nuju me tangun cojo rë Cristu jan.
COL 3:5 Vëhë xi xicanihñuu cjuatsehen, sacuatjin rë nima xi maji sahmi cjuatsehen. Xicanihñuu cjuatsehen sacuaha cjuatsehen xi sahmi xuta cojo ngu xi hacuiin chjuun rë me, hacuiin xihin rë me, o sa xi ngajñi ni xihin me, o ngajñi ni chjuun me. Hisca ndajin tjin xi meje nihñu xcusun xi cuacun vë, cojo yëjë sa xcusun cjuatsehen. Mijí rë xi jercu nihmu tacún cjuanchina ta, sa xi cuatjin nihñu ne, hitsë sa nihmu tacún cjuanchina jan xi cuma rë Nina.
COL 3:6 Nina ne, sahmi me castigu yëjë ni xuta xi vihndiin tsëhë me, xi cuatjin sahmi.
COL 3:7 Hacuaha ngayujun ni ne, cuatjin canihñu hatsëë, hya xi tivinuhyuun tsëhë Nina.
COL 3:8 Peru quihndë ne, mijí rë xi nihñu yëjë ni xcusun xi cuichjá cojo nuju vihi: hacuiin cumacjan nuju, hacuiin nihñu cjuatsehen, hacuiin choho cuinújun tsëhë xingun,
COL 3:9 hacuiin cuinújun cjuandacha cojo xingun. Xicanihñuu cuatjin ta, tsëhë xi ha caviyujunxun cjuatacun changá cojo yëjë ni xcusun xi canihñu xi cavitexa nuju cjuatacun jan,
COL 3:10 hane ha cavisehen nuju cjuatacun xatsë xi Nina tisahmi me xi cuijin xcun xi cuma sacuaha cjuatacun rë suvá me xi catsindaja cjuatacun jan, cojo sa xi ngayujun ni ne, cumachaya ndaja sa nuju nguñaja cjuaquixi yo me.
COL 3:11 Ngajan xi cuendaain rë ¿há xutaxín o há xuta tjë rë Israel má ngayaan?, ¿há cati chuxin naja o há catiin rë?, ¿há xuta ngu nangui ngayaan?, ¿há tichjá cjuatacun naja?, ¿há xuta caxteña ngayaan, o há xuta ndaya tjin ngayaan? ta Cristu ni ne, me vëhë xi jercu tu vengui chjí camahani rë me.
COL 3:12 Ngayujun ni ne, tsëhë xi cavaxijin nuju Nina, hacuaha caviyujuxin nuju me, hacuaha hmu cacun nuju me ne, vëhë xi meje rë xi tjin nuju cjuayumatacun cojo xingun, meje rë xi tjin nuju cjuandaja cojo xingun, meje rë xi tjin nuju cjuajeya cojo xingun, meje rë xi yehe tacún cojo xingun.
COL 3:13 Hacuaha meje rë xi scaa nuju cojo xingun hacuaha ninchatuhun xingun, sa xi tjin mé tsëhë xi cuinchunjyun xingun. Sacuatjin rë Nai naja xi catsinchataha nuju me ne, cuanitjin ni nuju ngayujun ni cojo xingun.
COL 3:14 Peru xi jercu vengui chjí sa rë xi cuma rë yëjë ni cjua xi cachjá cojo nuju jan ne, meje rë xi tjin nuju cjuahmutacun cojo xingun ta, xi cuatjin nihñu ne, hatuxa jercu ndaja cuma tangun cjuatacun nuju cojo xingun xingu xingu ngayun.
COL 3:15 Cjuajeya xi casua nuju Cristu ne, catitexa rë cjuatacun nuju ta, tsëhë xi Nina ne, cavaxijin nuju me cojo sa xi cuinechun cojo cjuajeya ngajñi nuju cojo xingun. Hane meje rë xi yasen yasen ni ne, tuhun nacuechji rë Nina.
COL 3:16 Cjuandajyihi xi chja tsëhë Cristu ne, catiyujucahndë́ cahntsua xahasen nuju. Ticuyun xingun hacuaha tiyujun xingun cuidadu xingu xingu ngayun cojo yëjë cjuahasen xi sua nuju Nina. Sún nguñaja tacún tsëhë Nina, sacuaha salmo cojo himno cojo yëjë sa xcusun xi sen xi tsëhë Nina, sacuaha ngu nacuechji rë me xi tuhun.
COL 3:17 Tu mé ni xi cuinújun o xi nihñu ne, catama sacuatjin meje rë xi sahmi xuta xi tjin tangun cjuatacun rë me cojo Nai naja Jesús. Hacuaha tuhun nacuechji rë Nina Nahmi naja, xi nihñu oración cojo Jesús.
COL 3:18 Ngayujun ni yachjin ne, tinuhyun tsëhë xihin nuju ta, tsëhë xi cuatjin ndatjin xi cuma ta, tjin tangun cjuatacun nuju cojo Nai naja.
COL 3:19 Ngayujun ni xihin ne, hacuaha meje rë xi nihmu tacún chjuun nuju, hacuiin choho xcusun nuju cojo rë me.
COL 3:20 Ngayujun ni xi siucuaha xutacha nuju ne, tinuhyun tsëhë me tsëhë yëjë ni xi cuichja me cojo nuju ta, hya xi cuatjin nihñu ngayujun ni xi tjin tangun cjuatacun nuju cojo Nai naja Jesús ne, jercu chuya rë Nina.
COL 3:21 Ngayujun ni xi má yun nahmi ne, xicaningatjuntuun xi cuinújuntuhun rë quihndi nuju, ta sá tu sahmi chúvacacun.
COL 3:22 Ngayujun ni xi má yun mosu hndixahan ne, tinuhyun tsëhë xuta xi má me nai nuju tsëhë yëjë ni xi cuichja me cojo nuju, hacuiin suvá hya xi tivutsejen me ngayun, sacuatjin sahmi yahnga xuta xi meje cuaxëndaja suvá me yojo rë me xcun xuta, ta tinuhyun tsëhë me cojo ngu xahasen tyjahi ngatsë rë xi chjuhunrcun Nai naja.
COL 3:23 Tu mé ni xcusun xi nihñu ne, nihñu nguñaja tacún, sacuaha xi tinihñu tsëhë Nai naja, hacuiin tsëhë xuta ni.
COL 3:24 Cuatjin nihñu, tsëhë xi ha hyun ta Cristu Nai naja ne, me vëhë cuechji nuju me ta hacui me xi tivisecun rë.
COL 3:25 Peru sa xi tjin ngajñi nuju xi hatuxa choho tisahmi ne, Nina sahmi rë me castigu tucu xcusun tsehen xi casahmi me, hacuaha Nina ne, hatuxa quixi jain me cojo cjuatacun rë me xi tsichuva me yëjë ni xuta cojo cjuatacun rë me.
COL 4:1 Ngayujun ni xi má yun nai tsëhë mosu hndixahan ne, ndaja nihñu cojo mosu hndixahan xi siu ntsun, sacuatjin mameje rë ta, tsëhë xi ha hyun xi hacuaha cojo ngayun ne, tjin nai nuju xi tacun ngajan ngahnga.
COL 4:2 Ngayujun ni ne, nihñu oración yasen yasen ni. Mijí rë xi cuma tsëhë́ tacún. Tuhun nacuechji rë Nina.
COL 4:3 Hacuaha nihñu oración ngatsë niji. Chjahyun rë Nina xi tuxaha ndiya xi cuisiajmi cojo xuta, cojo sa xi cuma tihín cumachaya rë me tsëhë cjuatahahma ndajyihi xi chja tsëhë Cristu. Hane ngatsë rë cjuandajyihi jan ne, tejñaya ndavaya.
COL 4:4 Nihñu oración ngatsë naha, cojo sa xi ngahan ne, cuichjátë cjuatahahma jan, sacuatjin meje rë xi cuichjá.
COL 4:5 Hacuaha yëjë ni xuta xi hacuiin ladu rë Nai naja me ne, meje rë xi ndaja nihñu cojo rë me cojo yëjë ni cjuahasen xi tjin nuju, yëjë ni hora xi cuma.
COL 4:6 Hacuaha yëjë ni cjuavisiajmi nuju ne, meje rë xi cojo cjuandaja cuinújun yëjë ni hora. Xi cuatjin nihñu ne, sacú cumachaya nuju hacutjin chjayunngun cjua tsëhë xingu xingu xuta xi cuacun jan.
COL 4:7 Yëjë ni xi tivátju tijima ne, Tíquico ne, sua me cumachaya nuju. Me vëhë ne, ngu xuta ladu rë Jesús xi jercu vinga ná, hacuaha jercu ndaja cjuinduju me tivisecoo me ngahan xi tangun fahacuenda me cojo ná xa xi vitexa Cristu.
COL 4:8 Titsingátju nuju me, cojo sa xi ngayujun ni ne, cumachaya nuju tsijin hacuaha cojo sa xi sua nuju me cjuajyëtacun.
COL 4:9 Hane cojo me vëhë ne, titsingátju nuju cha Onésimo, cha nangui nuju. Cha vëhë ne, cha ladu rë Nina xi jercu ndaja cjuinduju cha cojo ndiya rë me, hacuaha jercu vinga ná cha. Catsijo me xi cuacun vë ne, sua me cumachaya nuju tsëhë yëjë ni xi cavatju nguehe camá.
COL 4:10 Aristarco ne, me xi jiyatangun cojo ná nguehe ndavaya ne, tsingatju me nina nuju. Hacuanitjin ni Marcos, xicjin Bernabé. Ha cachjá cojo nuju tsëhë Marcos jan. Vëhë xi sa xi cjuehe me nangui nuju ne, chjuhunntsun me cojo cjuandaja.
COL 4:11 Jesús, me xi hacuaha hmí rë Justo ne, hacuaha tsingatju me nina nuju. Ngajñi rë yëjë ni xuta tjë rë Israel ne, jyan tu tu ni me vëhë xi tisahmitangun cojo ná xa, cojo sa xi xuta ne, tsingatihin me xi Nina cuitexa rë me. Jyan me xi cuacun jan ne, casua ná me cjuajyëtacun.
COL 4:12 Hacuaha Epafras, me xi tangun nangui nuju cojo hacuaha fahacuenda tsëhë xa xi vitexa Cristu ne, tsingatju me nina nuju. Me vëhë ne, jercu sahmi me oración ngatsë nuju yasen yasen ni, cojo sa xi ngayujun ni ne, cuma tyjahi camahani ngayun xcun Nina, hacuaha cojo sa xi ndaja cuijnercun yëjë ni hacutjin xi meje rë Nina.
COL 4:13 Ngahan ne, cuichjá cojo nuju ta Epafras jan ne, jercu vityanguicacun me tsujun cojo xuta Laodicea cojo xuta Hierápolis.
COL 4:14 Hacuaha tsingatju nina nuju Demas cojo Lucas, me xi doctor xi jercu vinga ná.
COL 4:15 Tuhun rë ngu nina yëjë ni xuta ladu rë Nina ngajan nandya Laodicea. Hacuaha tuhun rë Ninfa ngu nina cojo yëjë sa me xi matangun me ndava na.
COL 4:16 Hane xi cjuë chutahaya të rë xujun vi ngajñi nuju ne, nihñu xi hacuaha catichutahaya të rë ngajñi rë xuta ladu rë Nina ngajan nandya Laodicea. Hacuaha xujun xi catsingátju tsëhë xuta Laodicea ne, hacuaha chutahayun të ngajñi nuju.
COL 4:17 Hane tinújun cojo Arquipo cjua vihi: “Catjiniya tacún xi nihñuchuhun xa xi casatëxa nuju, xi tjin tangun cjuatacun nuju cojo Nai naja.” nina vi.
COL 4:18 Ngahan, Pablo ne, titsihindu nuju cojo hntsa ngahan ngu nina vi. Ninguitsjun ná nguehe ndavaya. Nina ne, catisua nuju me cjuandaja.
1TH 1:1 Ngayin, Pablo cojo Silvanu cojo Timoteo ne, ningatjin ngu xujun vi tsujun, ngayujun ni xi matangun ngayun tsëhë xi macjain nuju Nina Nahmi naja cojo Nai naja Jesucristu, ngajan nandya Tesalónica. Catisua nuju Nina cjuandaja cjuajeya.
1TH 1:2 Jercu tihin nacuechji rë Nina Nahmi naja ngatsë nuju ngayujun ni, hacuaha hatuxa veyinnanguin nuju tu ya ni hya xi nihñi oración.
1TH 1:3 Hya ninguitsjin hacutjin jercu nihñu xa tsëhë xi ndaja macjain nuju, hacutjin jercu nihñu cjuandaja tsëhë xi hmu tacún Nina cojo xuta yumacujun, hacuaha hacutjin jercu ndaja ticaa nuju xi tinechunyun rë Nai naja Jesucristu.
1TH 1:4 Ngayun ne, jemu hmucacun nuju Nina, hacuaha hyin xi cavaxijin nuju me.
1TH 1:5 Cuatjin ta xi catihin camachaya nuju cjua rë Nina ne, hacuiin suvá cjua ta hacuaha Hasen rë Nina ne, casua niji ngahñu xi cuatjin canújin cojo nuju cjua jan xi hatuxa cjuaquixi. Ngayun ne, ha hyun hacutjin xcusun niji ngajñi nuju, xi ndajyihi xi cuma nuju.
1TH 1:6 Ngayun ne, sacuaha canihñi hacuaha sacuaha casahmi Nai naja ne, ha cuanitjin ni canihñú xi cachjuhunntsun cjua jan cojo cjuasua xi casua nuju Hasen rë Nina, handasa jemu choho cavatjun camá.
1TH 1:7 Cuatjin camá xi ngayëjë ni me xi macjain rë Nina ngajan ladu tsëhë Macedonia cojo Acaya ne, hisca casahmi me sacuatjin canihñú ngayun.
1TH 1:8 Hisca hya xi titjun ngayun cachjuhunntsun cjua rë Nai naja ne, sehe jercu cjin quiji cjua jan, peru hacuiin tu ngajan ni Macedonia cojo Acaya ta hisca jingujyë ni. Hacuaha camachaya rë xuta xi jemu ndaja camacjain nuju tsëhë Nina. Cuatjin ne, ha quihndë tsajin sa mé xi cuinújin ta
1TH 1:9 suvá xuta ne, chja me hacutjin cojo cjuandaja cachjuhunntsun niji hacuaha hacutjin caviyujunxun nina xi macjain nuju titjun, hane camacjain nuju ngu Nina xi cjuaquixi xi quicun.
1TH 1:10 Hacuaha chja me hacutjin tinechunyun rë Jesús, Quihndi rë Nina, xi cuya me tsëhë ngahnga. Jesús jan ne, me vëhë xi catsicuya Nina cjuahñu rë me xi cavaxë Nina me ngajñi rë nima, hacuaha me vëhë ni xi cuaxëtje naja me tsëhë castigu xi nduva.
1TH 2:1 Ngayun ne, ha hyun ta xi catsanguin tjenguin nuju ne, hacuiin tu mahya ta
1TH 2:2 handasa jemu choho cavatjin camá ngajan nandya Filipos sacuatjin xi ha hyun, peru camacjiin tacuin xi canújin cojo nuju cjua rë Nina ta, tsëhë xi Nina jan ne, cavisecoo niji me, handasa jemu camacjan rë yahnga xuta.
1TH 2:3 Hacuaha xi nújin cojo nuju ne, hatuxa cojo cjuaquixi cojo cjuandaja. Hacuiin vindachin.
1TH 2:4 Nina ne, me vëhë xi cafahachuva niji me, hane cachuya rë me tsijin, hacuaha casua me ngayin xa xi cuinújin cjua rë me cojo xuta. Vëhë xi cuatjin nújin. Hacuiin xi xuta chuya rë me ta xi Nina chuya rë me, tsëhë xi Nina ne, me vëhë xi vëë me cjuatacun niji cojo xahasen niji.
1TH 2:5 Ngayun ne, ha hyun ta hacuiin cjuahaxi xi canújin cojo nuju, hacuaha vëë Nina jain ta hacuiin xi tujún meje niji.
1TH 2:6 Hacuiin jemu meje niji xi cjuaharcun niji xuta, sa ngayun sa xuta xi yahnga, handasa tjin niji chuva rë xi chjaharcun niji tsëhë xi apóstol rë Cristu ngayin.
1TH 2:7 Peru jemu cojo cjuajeya cavinechin ngajñi nuju, sacuaha xi sahmi ngu naa xi sahmi cuidadu me quihndi rë me.
1TH 2:8 Jemu cavinga niji ngayun. Hacuaha meje niji xi hacuiin tu suvá cjua rë Nina xi canújin cojo nuju ta hisca mé sa cjuacjintacun ne, cavejñitacuin xi cuisecuin nuju ta, tsëhë xi jemu cachuya niji tsujun.
1TH 2:9 Ngayun ne, vitsjen rë nuju tsëhë xi jemu jyë xa canihñi. Canihñi nixtin nixten, tsëhë xi hisca ngu ngayun mijí tihin nuju ngu cjuandya hya xi canújin cojo nuju cjua rë Nina.
1TH 2:10 Ngayun xi macjain nuju Nina ne, cahyun, hacuaha hisca Nina ne, vëë jain me ta jemu ndaja cavinechin cojo nuju. Hisca ngu jyë́ cumaji nicanuju niji.
1TH 2:11 Hacuaha ngayun ne, ha hyun hacutjin canújin cjuandaja cojo nuju jima ngu ngayun, sacuaha chja ngu nahmi cojo quihndi rë me.
1TH 2:12 Hacuaha catihin nuju cjua xi nchunchujun ni ne, nihñu cjuandaja sacuatjin meje rë ndiya rë Nina ta, Nina ne, me vëhë xi vaxijin me ngayun xi sacú nuju cahndë́ hiscan xi me vëhë tacun tsja me. Ngajan ne, jemu cahndë́ ndajyihi camahani.
1TH 2:13 Vëhë xi jercu tihin nacuechji rë Nina, tsëhë xi hya xi canuhyun cjua rë Nina xi canújin cojo nuju ne, camacjain nuju cjua jan. Hane ndatjin sacuatjin caningatuhuntacun ta cjua rë Nina jain, hacuiin cjua rë ngu xuta. Hacuaha jemu ndajyihi tsujun xi cuatjin macjain nuju cjua jan.
1TH 2:14 Hacuaha ngayun ne, cavatjun camá sacuaha cavatju me camá titjun, me xi camacjain rë Jesucristu ngajan nangui Judea. Sacuaha xuta nangui rë me ne, jercu casuandya rë me, hacuanitjin ni xuta nangui nuju ne, jercu casuandya nuju me.
1TH 2:15 Nai naja Jesús ne, catsiquehen xuta nangui Judea me, hacuanitjin catsiquehen xuta jan xutachanga xi cachja cjua rë Nina hatsëë. Hisca cojo ngayin ne, hacuaha casuandya niji me. Chuyiin rë Nina tsëhë xuta jan xi cuatjin sahmi me. Hacuaha choho vëë me me xi yahnga sa ta,
1TH 2:16 tsëhë xi mijí sua me cahndë́ xi cuinújin cjua rë Nina cojo xuta xi hacuiin tsëhë nangui Judea ne, catamacjain rë me hacuaha cuetjutje me. Jercu tu jyë camahani jyë́ rë me xi cuatjin sahmi me. Peru quihndë ne, cavechu nixtin xi cuma me castigu xi cuichja Nina.
1TH 2:17 Hya xi ha catsanguinxin ngu jo nixtin tsujun ne, handasa cahyiín nuju, peru hatuxa ninguitsjin nuju cojo xahasen niji. Hacuaha jercu meje cuanguin tjenguin nga nuju.
1TH 2:18 Cavejñi xi cuanguin. Ngahan Pablo ne, ngu jo ndiya ne, cavejñá xi cjuë́, peru Satanás ne, casuaain cahndë́.
1TH 2:19 ¿Mé ngatsë rë xi tivinechinyin rë Jesús? ¿Mé ngatsë rë xi tjin niji cjuasua? ¿Mé ngatsë rë xi ndaja cuichja xuta tsijin? Ngatsë nuju ngayun xi camacjain nuju cjua rë Nina xi canújin cojo nuju. Ngatsë rë vëhë xi hya xi cuinduva Jesús Nai naja ne, jemu ndaja cuichja xuta tsijin hacuaha jercu ndaja cuma niji.
1TH 3:1 Xi camá ne, tsëhë xi ha quihndë cacain niji xi meje niji cumachaya niji hacutjin tivatjun tijima ne, vëhë xi camangutacuin xi cuinechin suvin ngajan nandya xi hmí Atenas.
1TH 3:2 Hane caningatjin cha Timoteo xingueen xi quiji tjengui cha ngayun. Cuatjin caningatjin cha ta, tsëhë xi mosu rë Nina cha, xi chja cha cjua ndajyihi tsëhë Cristu. Cuatjin caningatjin cha, cojo sa xi tsinguixi nuju cha hacuaha cuichja sa cha cjua cojo nuju, cojo sa xi hitsë sa ndaja cumacjain nuju
1TH 3:3 hacuaha hacuiin cuma chuva tacún ngajñi rë cjuacjintacun xi tivatjun tijima. Hane ngayun ne, ha hyun xi hatuxa cuatjin cuatjuun cjuacjintacun xi choho scuëë naja xuta,
1TH 3:4 tsëhë xi hisca hya xi cavinechin cojo nuju ne, hya catihin camachaya nuju xi hatuxa cuatjun cjuañihi. Xi camá ne, cuatjin camá, sacuatjin xi ha hyun.
1TH 3:5 Hane ngahan ne, xi meje xati ná cumachaya ná hacutjin tivatjun tijima, vëhë xi catsingátju cha Timoteo, quiji cjaha cha cjua sa xi ngayun ne, macjain cuaha nuju. Cuatjin casahme, tsëhë xi camacjíncácun ngatsë nuju tsëhë xi sa cavindacha nuju naain xi cuinengun ngajñi cjuatsehen ne, xa xi canihñi ne, tu mahya.
1TH 3:6 Peru quihndë ne, cavuya cha Timoteo xi quiji tjengui cha ngayun. Hane ndajyihi cjua yaha cha tsujun, tsëhë xi macjain cuaha nuju cjua rë Nina hacuaha hmutacun cuaha yëjë ni xuta. Hacuaha cachja cha cojo niji ta ninguitsjun cuaha niji cojo cjuandaja, hacuaha xi jercu meje chun niji sacuahatjin jercu meje chin nuju.
1TH 3:7 Cuatjin xi handasa jemu ndya tivatjin tijima cojo cjuañihi cojo cjuaxti, peru jemu casacu niji cjuetacun, tsëhë xi ngayun ne, macjain cuaha nuju.
1TH 3:8 Quihndë ne, jercu tu ndaja camahani cuma niji ngayin, sa xi ngayun ne, ha ndatjin siu nuju cjuatacun nuju cojo Nai naja.
1TH 3:9 Hacuaha jemu meje tihin nacuechji rë Nina naja tsëhë yëjë ni cjuasua xi casua niji me ngatsë nuju.
1TH 3:10 Nixtin nixten ne, jemu tichjahyin rë Nina xi sua me cahndë́ xi tjin ngu hora tjin ngu nixtin sacú xingueen ne, cuicuyin sa nuju cjua rë Nina xi cjëë cumachaya nuju.
1TH 3:11 Meje niji xi Nina Nahmi naja cojo Nai naja Jesús ne, catisecoo niji me xi cuechintihin nuju.
1TH 3:12 Hacuaha Nai naja meje rë me xi catamajyë sa cjuahmutacun ngajñi nuju cojo xingun hacuaha cojo xuta xi yahnga sa, sacuatjin ngajñi naja cojo nuju.
1TH 3:13 Nina Nahmi naja catisahmi me cuatjin, cojo sa xi tsajin jyë́ nuju xcun me hya xi cuya Nai naja Jesús cojo yëjë ni ángel rë me.
1TH 4:1 Quihndë ne, ha tinihñú hacutjin xi cavicuyin nuju xi meje rë xi cumá, cojo sa xi chuya rë Nina tsujun. Vëhë xi jemu nújin cojo nuju tsan ta hitsë sa nihñu cuatjin ta, tsëhë xi hatuxa cuatjin meje rë Nai naja Jesús.
1TH 4:2 Hane ngayun ne, ha hyun cjua rë Nai naja Jesús xi ha cavicuyin nuju.
1TH 4:3 Cjuatacun xi meje rë Nina ne; xi cuma tyjahi cjuatacun nuju, xi canindesuun cojo chjuun xi xín, xi canindesuun cojo xihin xi xín.
1TH 4:4 Meje rë me xi jima ngu ngayun ne, catisacu chjuun nuju, peru cojo cjuandaja, xi tyjahi cjuatacun nuju.
1TH 4:5 Mijí rë xi cojo cjuatsehen, sacuatjin sahmi xuta xi hvíin me Nina.
1TH 4:6 Sacuaha cjuacjintacun vëhë ne, xi canihñuu xi cuindachun rë xingun ta, tsëhë xi Nai naja ne, sahmi me castigu ngayëjë ni cjuatsehen vëhë, sacuatjin xi ha canújin cojo nuju.
1TH 4:7 Hacuaha hacuiin cajindaya naja Nina xi cjuatsehen nihña ta cajindaya naja me xi fë jyë́ naja.
1TH 4:8 Vëhë xi me xi tsitjungui cjuatacun vëhë ne, hacuiin xuta tsitjungui me ta Nina xi tisua nuju Hasen rë ne, vëhë tsitjungui me.
1TH 4:9 Quihndë ne, tsajin sahmi ngu jyë xi nihindin nuju xi nihñu hmutacun xingun ta, tsëhë xi suvá Nina ne, ha cavicuya nuju me hacutjin meje rë me xi nihñu hmutacun xingun.
1TH 4:10 Hacuaha tinihñú jain hmutacun yëjë ni xuta xi macjain rë Nina ngajan yëjë ni nandya tsëhë distritu Macedonia. Peru nújin cojo nuju ta cuatjin ndaja sa nihñu.
1TH 4:11 Hacuaha tejñu tacún xi jyuu nechun, nihñucuendun xi tsujun. Peru nihñu xa, sacuatjin xi ha cavicuyin nuju.
1TH 4:12 Sa xi cuatjin nihñu ne, hisca cojo xuta xi macjaain rë Nina ne, cjuaharcun nuju me, hacuaha sacú nuju yëjë ni xi cuma meje nuju.
1TH 4:13 Quihndë ne, meje niji xi cuma chaya nuju hacutjin cuatju nima xi ha cahme, cojo sa xi hacuiin jemu choho cuma nuju sacuatjin rë xuta xi sacuiin rë me ngu cjuetacun, tsëhë xi macjaain rë me Nina.
1TH 4:14 Tsëhë xi macjain naja xi cahme jain Jesús hacuaha cavascaya nga rë me ne, vëhë xi hacuaha macjain naja xi Nina ne, tsingascaya rë me nima xi xcun cjuahñu rë camacjain rë me Jesús.
1TH 4:15 Vëhë xi nguehe tihin cumachaya nuju ngu cjua tsëhë Nai naja ta jarë ngayaan xi nechan quicun hisca xi cuya Nai naja ne, hacuiin cuma titjun ngayaan tsëhë me xi ha cahme.
1TH 4:16 Tsëhë xi suvá Nai naja ne, cuinduvajne me tsëhë ngahnga. Cuinuhya rë sacuaha cjua rë ngu me xi vitexa jain. Cuinuhya rë sacuaha cjua rë ngu ángel xi ma titjun. Cuinuhya rë sacuaha xta rë tyjo xi tsëhë Nina. Xi camá ne, nima xi camacjain rë me Cristu ne, tjun tjun me cuascaya rë me,
1TH 4:17 sehe ngayaan xi nechan quicun ne, cjuaha Nina ngayaan ngajñi rë yufí, hacuaha cojo nima xi cuacun jan, cumatangun ngayejen ni cojo Nai naja ngajan ngajñi tjo. Sehe yëjë ni hora yëjë ni nixtin cuinechan cojo rë Nai naja.
1TH 4:18 Vëhë xi meje rë xi tinújun cojo xingun cjua vihi ne, sacú nuju cjuetacun.
1TH 5:1 Peru sacuaha nixtin xi cuma cjuacjintacun vëhë ne, sáhmii ngujyë nihindin nuju ta,
1TH 5:2 tsëhë xi ngayun ne, ha hyun ta, hya xi cuya Nai naja ne, jemu cjuercun camahani rë ngayëjë ni xuta, tsëhë xi tu ñahñu ni cuinduva me.
1TH 5:3 Hya xi cuichja xuta xi macjain rë Nina ta: “Jemu ndatjin ta jemu jyuu tjin”, peru hya ne, tu ñahñu ni ne cuatju me ngu cjuañihi, sacuatjin vatju ma ngu chjuun xi tu ñahñu meje tsin quihndi rë me. Hane cuatjin cuatju me ta hisca ngu me cuatjinhngaain me.
1TH 5:4 Xi nguixun cjuehe ngu chëjë ne, jemu cjuercun naja. Peru ngayun ne, hacuiin jñu camaha tsujun xi nihñu cjuatsehen, xi cjuercun nuju hya xi cuechutaha nixtin xi cuya Nai naja ta,
1TH 5:5 ngayujun ni ne, nechun sacuaha hasen rë nguinixtin. Ngayaan ne, hacuiin jñu camaha tsajan xi nihña cjuatsehen.
1TH 5:6 Cuatjin xi mijí rë xi nechan sacuaha xi titsjuñafen, sacuaha viyuju yahnga xuta xi macjain rë me Jesús ta, meje rë xi nechan quicun, nguñajatacun.
1TH 5:7 Hatuxa xcusun naja xi nguixun xi tsjuñafen. Hacuaha xcusun rë xuta chihi ne, nguixun ma chihi me.
1TH 5:8 Peru ngayaan ne, tsëhë xi nechan sacuaha ndavá rë nguinixtin ne, vëhë xi meje rë xi nechan nguñajatacun. Meje rë xi ndaja cumacjain naja hacuaha nihña hmu tacun xingueen. Xi cuatjin nihña ne, hacuaha vëhë ne, cuisecoo naja ta cuetjo naja Nina. Hacuanitjin ni meje rë xi cuetahan tacun ta cjuaquixi xi cuaxëtje naja Nina.
1TH 5:9 Cuatjin meje rë ta, tsëhë xi Nina ne, hacuiin cavaxijin me ngayaan xi cuatjun castigu rë me ta, cavaxijin naja me xi cuaxëtje naja me, ngayaan xi macjain naja Nai naja Jesucristu ta,
1TH 5:10 Jesucristu ne, cahme me ngatsë naja, cojo sa xi tangun cuinechan cojo rë me, sa xi nechancuaan cjuahñu o sa xi nima camá ngayaan.
1TH 5:11 Vëhë xi meje rë xi tinújun cojo xingun cjua vëhë, hane sacu nuju cjuetacun, sacuatjin xi ha tinihñú.
1TH 5:12 Ngayun ne, nihñu favor ne, chjuhunrcun rë xuta xi cavaxijin Nai naja xi cuma titjun tsujun, xi sahmi xa ngajñi nuju, xi tsinguixi nuju.
1TH 5:13 Jemu meje rë xi chjuhunrcun me hacuaha nihñu hmu tacun me tsëhë xi tisahmi me xa vëhë. Ndaja tinechun cojo xingun.
1TH 5:14 Hacuaha nújin cojo nuju ta xuta xi mijí sahmi xa ne, tinújun cojo rë me catisahmi me xa. Hane xuta xi jima chuvacacun ne, tinújun cojo rë me, hane sacú rë me cjuetacun. Hacuaha tisecuun rë me xi cjëë ndaja cumacjain rë. Hane tjin nuju cjuajeya cojo ngayëjë ni me.
1TH 5:15 Hacuaha nechun cuidadu xi hacuiin choho nihñu cojo rë me xi choho sahmi cojo nuju ta, xi meje rë ne, yëjë ni hora yëjë ni nixtin ne, suvá cjuandaja nihñu cojo xingun hacuaha cojo yëjë ni xuta.
1TH 5:16 Ndaja catama nuju yëjë ni nixtin.
1TH 5:17 Meje rë xi jemu nihñu oración.
1TH 5:18 Hacuaha hatuxa tuhun nacuechji rë Nina, handasa choho cuatjun cuma. Cuatjin meje rë Nina xi nihñu, ngayujun ni xi macjain nuju Jesucristu.
1TH 5:19 Hacuiin nitjunngun xcusun xi sahmi Hasen rë Nina ngajñi nuju.
1TH 5:20 Hacuiin nitjunngun cjua rë me xi chja cjua xi casua Nina.
1TH 5:21 Peru chjuhunchuvun ngayëjë ni cjua. Hane jarë cjua xi ndaja ne, vëhë tiseñuju hacuaha tinuhyun.
1TH 5:22 Peru tétjunxun tsëhë ngayëjë ni cjuatsehen.
1TH 5:23 Nina xi tsicjë me cjuachan ne, catisahmi tyjahi tyjahi me hasen nuju cojo cjuatacun nuju cojo yojo nuju, cojo sa xi nixtin hya xi cuya Nai naja Jesucristu ne, tsajin camahani jyë́ nuju.
1TH 5:24 Me xi tivaxijin nuju ne, cjuaquixi xi chja me. Hatuxa sahmichihin me hacutjin xi chja me.
1TH 5:25 Ngayun ne, nihñu oración ngatsë niji.
1TH 5:26 Nuvuncjun yëjë ni me xi macjain rë Jesús xi tuhun rë me ngu nina niji, sacuaha xcusun naja.
1TH 5:27 Tsëhë xi cavaxijin ná Nai naja ne, vëhë xi vitéxa nuju xi nújun cojo xujun vi xi cuihndë yëjë ni me xi macjain rë Jesús.
1TH 5:28 Cjuandaja rë Nai naja Jesucristu ne, catisehen xahasen nuju.
2TH 1:1 Ngayin, Pablo cojo Silvanu cojo Timoteo ne, ningatjin ngu xujun vi tsujun, ngayujun ni xi ma tangun ngayun tsëhë xi macjain nuju Nina Nahmi naja cojo Nai naja Jesucristu, ngajan nandya Tesalónica.
2TH 1:2 Nina Nahmi naja cojo Nai naja Jesucristu ne, catisua nuju me cjuandaja cjuajeya.
2TH 1:3 Hachu tjin niji xi tihin nacuechji rë Nina ngatsë nuju ngayun. Hacuaha ndatjin xi cuatjin nihñi ta, tsëhë xi jemu xcun tivangun xi macjain nuju, hacuaha hitsë sa jima tsejen cjuahmutacun xi tjin nuju jima ngu ngayun cojo xingun.
2TH 1:4 Vëhë xi ngayin ne, hya xi ma tangun me xi macjain rë Nina ne, nújin cojo rë me ta jemu sua má niji tsëhë xi ngayun ne, jemu yehe tacún hacuaha jemu macjain nuju, handasa jemu yehe cjuañihi xi tivatjun tijima.
2TH 1:5 Cuatjin ma tsejen xi Nina ne, fahachuva naja me cojo cjuaquixi. Hane xi cuijnetaha ne, cuichja Nina ta sacú nuju ngu cahndë́ hiscan xi me vëhë má titjun me, ta ngatsë rë vëhë xi jercu choho tivatjun tijima.
2TH 1:6 Xi tsingatahacacun Nina ne, yëjë ni xuta xi choho tisahmi cojo nuju ne, ndatjin xi hacuaha cuma ngojo cojo rë me,
2TH 1:7 hacuaha ndatjin xi ngayaan xi choho tivatjuun tijima ne, sacú naja ngu cahndë́ xcun Nina xi chjahanjendan, hya xi Nai naja Jesús cuya me tsëhë ngahnga ngajñi rë ngu ndihi jyë cojo ángel rë me xi jercu hñu ngahñu rë.
2TH 1:8 Hya sahmingojo me cojo xuta xi macjaain rë Nina, xi hacuaha hndiin me tsëhë cjua ndajyihi tsëhë Nai naja Jesús.
2TH 1:9 Hane castigu xi cuma xuta xi cuacun vë ne, cuaxëxin Nina me ngu ladu hiscan xín, xi tsajin nu tsajin nixtin xi cuechu me xcun Nai naja. Cuatjin ne, xi scuiin me hasen ndajyihi cojo ngahñu rë Nai naja.
2TH 1:10 Cuatjin cumá nixtin xi cuinduva Nai naja xi cuma jyë cuma hnga me. Hya ne, cuinduva me, cojo sa xi ngayëjë ni xuta xi camacjain rë me ne, cjuaharcun rë me hacuaha cjuercun rë me, hisca cojo ngayujun ni ta tsëhë xi camacjain nuju cjua ndajyihi xi canújin cojo nuju.
2TH 1:11 Vëhë xi ngayin ne, jercu chjahyin rë Nina naja xi ngayun xi má yun ladu rë me ne, catamachji rëhë rë me ngayun. Hacuaha chjahyin rë Nina xi cojo ngahñu rë me ne, cuetjucaa jain yëjë ni cjuandaja xi ningatuhuntacun hacuaha yëjë ni xa xi nihñu tsëhë xi macjain nuju me.
2TH 1:12 Hacuaha xi cuatjin cumá ne, xuta xi vutsejen me ne, sahmi jyë sahmi hnga me Nai naja Jesús, hacuaha ngayun ne, cuma yehe cuma hnga ngayun ngatsë rë cjuandaja rë Nina naja cojo cjuandaja rë Nai naja Jesucristu.
2TH 2:1 Quihndë ne, ha hyun xi Nai naja Jesucristu ne, cuinduva nga me xi sahmi tangun naja me. Vëhë xi nújin cojo nuju ta
2TH 2:2 hacuiin ngutjen cumacjintacun, hacuiin rcun cuma, sa xi sacú nuju cjua xi ha cavechu nixtin xi cafehe Nai naja. Handasa cuatjin cuichja xuta cojo nuju, o sa xi cuichja me xi cuatjin casua Nina me cjuatacun, o sa xi chjuhunntsun ngu xujun xi cuichja cuatjin sacuaha xi ngayin caningatjin, peru hacuiin cumacjain nuju ta, quixiin.
2TH 2:3 Catuun camahani cahndë́ xi cumandacha ngayun, tsëhë xi chaja sa xi cuechu nixtin vëhë ne, titjun ne, jemu sahmi xuta condra Nina, hacuaha cuinduva ngu cha tsehen xi hatuxa cuechiin cha xcun Nina.
2TH 2:4 Cha tsehen jan ne, choho scuëë cha yëjë ni xi hmí nina, hacuaha choho scuëë cha yëjë ni xi vechu chuva rë xi chjaharcun rë. Hane hisca cjue cha cuejña cha cahntsua yungun xi matitjun xi tsëhë Nina, hane cuichja cha ta cha vëhë nina cha.
2TH 2:5 ¿Há vitsjiin nuju ta ha cachjá cojo nuju cjua vihi, hya xi cavitejña nandya nuju?
2TH 2:6 Hacuaha ha hyun ta xi ngutjen ne, tsajin cahndë́ cuinduva cha tsehen jan ta, cuinduva cha hisca xi cuechu nixtin xi Nina sua me cahndë́.
2TH 2:7 Hacuaha cjuatsehen ne, hisca hyan, ta jemu tijima yehe. Hane hisca xi cjuexin me xi tivechja cahndë́ ne,
2TH 2:8 sehe hya cuinduva cha tsehen jan. Peru Nai naja Jesús ne, tsiquehen me cha cojo tjo hntsua ni me, hacuaha tsicjë me cha, hya xi cuinduva me.
2TH 2:9 Hya xi cuinduva cha tsehen jan ne, tsëhë xi Satanás tsingatju rë cha ne, jemu hñu ngahñu rë cha hacuaha jemu cjín xcusun cjuarcun ndacha xi sahmi cha.
2TH 2:10 Hacuaha sahmi cha yëjë ni xcusun cjuatsehen xi cuindacha cha xuta. Cuindacha cha xuta xi cuechiin xcun Nina ta, tsëhë xi mijí rë me chuyiin rë me cjuaquixi xi vaxëtje naja.
2TH 2:11 Ngatsë rë vëhë ne, sua Nina cahndë́ xi cumandacha xuta jan, cojo sa xi cumacjain rë me cjuandesu jan.
2TH 2:12 Ngajan xi cuma me castigu, ngayëjë ni me xi camacjaain rë cjuaquixi jan ta, tu cjuatsehen jan cachuya rë me.
2TH 2:13 Peru ngayin ne, meje rë xi jercu tihin nacuechji rë Nina ngatsë nuju ngayun xi hmucacun nuju Nai naja ta, tsëhë xi Nina ne, cavaxijin nuju me xi tjun tjun ngayun cuetjuntjun. Ngatsë rë xi Hasen rë Nina ne, titsityjahi rë xahasen nuju xi tsajin xi cún nuju xcun Nina, hacuaha ngatsë rë xi macjain nuju cjuaquixi ne, vëhë xi cuetjuntjun.
2TH 2:14 Hya xi canújin cojo nuju cjuandajyihi rë Nina ne, hya cavaxijin nuju me xi cuetjuntjun. Cavaxijin nuju me xi sacú nuju cjuahñu ndajyihi sacuaha xi tjin rë Nai naja Jesucristu.
2TH 2:15 Vëhë xi nújin cojo nuju ta xi camacjiintacun, hacuaha xi canichayuun cjua xi cavicuyin nuju, cjua xi canújin jan cojo cjua xi canihindín jan.
2TH 2:16 Nai naja Jesucristu cojo Nina Nahmi naja ne, casahmi hmucacun me ngayaan, hacuaha cojo cjuandaja rë me casua naja me cjuetacun xi tsajin hora tsajin nixtin xi cjuë, hacuaha casua naja me ngu cjua ndajyihi xi nechayan ni rë nixtin xi cuetjucaa.
2TH 2:17 Me vëhë ne, catisua me cjuetacun xahasen nuju, hacuaha catisua nuju me ngahñu xi cuinújun hacuaha xi nihñu yëjë ni cjuandaja.
2TH 3:1 Quihndë ne, nihñu oración ngatsë niji, cojo sa xi cjua rë Nai naja ne, xati cuechu jingujyë ni, hacuaha cojo cjuasua cjuahatsja xuta cjua rë me, sacuatjin camá ngajñi nuju.
2TH 3:2 Hacuaha nihñu oración, cojo sa xi cuetjintjin tsëhë xuta tsehen ta, hacuiin ngayëjë xuta xi macjain rë me Nina.
2TH 3:3 Peru Nai naja ne, hatuxa quixi me cojo cjua rë me. Sua me yun ngahñu xi scaa nuju, hacuaha cuetjo nuju me, cojo sa xi tsajin mé cuma sahmi Satanás cojo nuju.
2TH 3:4 Ngatsë rë Nai naja ne, fë mangutacuin ta ngayun ne tinihñú jain, hacuaha nihñu sa cjua xi vitexin nuju.
2TH 3:5 Nai naja ne, catincha me cjuahmutacun rë Nina xahasen nuju, hacuaha catisua nuju me ngahñu rë Cristu xi scaa nuju tsëhë yëjë ni cjuacjintacun.
2TH 3:6 Quihndë ne, sacuahatjin meje rë Nai naja Jesucristu ne, vitexin nuju xi naxunxun yojo nuju tsëhë yëjë ni me xi jemu tsëhë́ me sahmi me xa, hacuaha xi sáhmii hacutjin xi cavicuyin nuju xi nihñu.
2TH 3:7 Ngayun ne, ha hyun ta meje rë xi nihñu ngu xa sehe sacú xi xinu, sacuatjin xi cahyun xi canihñí. Hacuiin tu jyuu ni cavinechinyinjñi ngajñi nuju ne,
2TH 3:8 hacuiin tu cjuatjo ni casacu niji niñu xi cachini ta, nixtin nixten ne, jercu canihñí xa, cojo sa xi hacuiin ngayun nihñu gastu ngatsë niji.
2TH 3:9 Handasa satë niji cahndë́ xi chjahyin nuju xi cuisecun niji, peru cachjahyiin ta canihñíxin xa, xi cuejñí ngu xcusun xi cuatjin nihñu.
2TH 3:10 Hacuaha hya xi cavinechintihin cojo nuju ne, hya canújin cojo nuju ta: Me xi mijí sahmi xa ne, xi catuun sinë me.
2TH 3:11 Cuitjin tinújin cojo nuju ta, tsëhë xi casacu niji cjua xi ngajñi nuju ne, hinchajñi me xi sáhmii xa. Tu tsinguisehenjñi me xcun cjuacjintacun xi ña cuendaain rë me.
2TH 3:12 Ngajan xi vitexin rë me xi cuacun vë, sacuatjin meje rë Nai naja Jesucristu, xi catiyujujyuu cjuatacun rë me, hane catisahmi me xa xi sacú sinë me.
2TH 3:13 Hacuaha ngayun ne, xi camacjiintacun tsëhë cjuandaja xi tinihñú.
2TH 3:14 Sa xi tjin jarë me xi mijí cuihndë cjua xi tinújin xcun xujun vihi ne, chjuhuncuendun jarë me jan, hacuaha xi caninguisuunjñuu cojo rë me, sehe me vëhë ne, cuma sava rë me.
2TH 3:15 Peru hacuiin choho chun me ta, tuhun rë me cjua cojo cjuandaja ta, tsëhë xi xingun me.
2TH 3:16 Hane Nai naja, me xi tsëhë cjuajeya ne, catisua nuju me cjuajeya yëjë ni nixtin hacuaha xcun yëjë ni cjuacjintacun. Hacuaha Nai naja yaha nuju me ngayujun ni.
2TH 3:17 Suva ngahan, Pablo, tsihindu nuju ngu cjua vi, xi tisuá nuju ngu nina. Hatuxa xcusun naha xi cuitjin tsihindu xcun yëjë ni xujun xi tsingátju.
2TH 3:18 Cjuandaja rë Nai naja Jesucristu ne, catisehen xahasen nuju ngayujun ni.
1TI 1:1 Ngahan Pablo ne, apóstol tsëhë Cristu Jesús má ngahan ta, tsëhë xi cuatjin cavitexa Nina, me xi vaxëtje naja, hacuaha cuatjin cavitexa Cristu Jesús, me xi vetahan tacun.
1TI 1:2 Tsihindu ri xujun vihi, ngaye Timoteo. Ngaye ne, sacuaha quihndi ndaja naha ngaye ta, tsëhë xi camacjain ri cjua rë Nina, hora xi cachjá cojo ri cjua jan. Nina Nahmi naja cojo Nai naja Cristu Jesús ne, catamayuma rë me ngaye, catisua ri me cjuandaja cjuajeya.
1TI 1:3 Sacuahatjin xi ha cachjá cojo ri, hora xi cavétju cëjë hiscan ladu tsëhë Macedonia ne, tinechintehe sa ngajan nandya Efeso. Tjin ngu jo cha ngajan xi tivicuya cha cjuachacun xi hacjahi. Hane ngaye ne, titexe rë cha xi cuacun vë ta ha quihndë cuicuyaain sa cha cuatjin.
1TI 1:4 Hacuaha titexe rë cha ne, hacuiin cuetaharcu cha yëjë cuentu rë xutachanga naja ta, tsëhë xi hacuiin yëjë xi cjuaquixi. Ngu jo cuentu xi cuacun vëhë ne, jemu nduju fi, hane tsajin mé machjirëhë ta suvá ni xi si vangui, hacuaha tsajin mé visecoo naja xi nihña hacutjin xi meje rë Nina. Tsëhë xi macjain naja cjua rë Nina ne, vëhë xi hyan hacutjin xi Nina meje rë me xi nihña.
1TI 1:5 Tichjá cojo ri xi cuatjin titexe rë cha xi cuacun vë, sehe cuma tyjahi xahasen rë cha, cuma ndajyihi cjuatacun rë cha, hacuaha cumacjain nguñajacacun rë cha. Xi cuatjin ne, hacuaha sacú rë cha cjuandaja xi cuma tsihmucacun xicjin cha.
1TI 1:6 Peru ngu jo cha xi cuacun vë ne, cachaja cha ndiya rë cjuaquixi, cavetjuxin cha tsëhë cjuandaja jan, hane tu cjua xi machjiriin, vëhë tivisiajmi cha.
1TI 1:7 Meje sahmi cha maestru tsëhë cjua xi cavitexa Nina xutachanga naja. Peru hvíin cha mé vijne cjua xi visiajmi cha, hisca suvá cha vijniircu cha cjua xi vicuya nguñaja nguñajacacun cha.
1TI 1:8 Quihndë ne, ha hyan ta cjua xi cavitexa Nina jan ne, jemu ndaja. Peru meje rë xi cuijnercun, mé ngatsë rë xi Nina ne, cavitexa me cjua jan.
1TI 1:9 Nina ne cavitexa me cjua jan, peru hacuiin ngatsë rë xuta xi ndaja sahmi ta, ngatsë rë xuta xi choho sahmi, xuta xi hndiin tsëhë ngu xuta xi matitjun tsëhë, xuta xi cuendaain rë tsëhë Nina, xuta xi sahmi cjuatsehen, cojo xuta xi faharcuaain rë Nina, xuta xi macjaain rë cjua rë Nina, xuta xi tsiquehen nahmi rë, tsiquehen naa rë, cojo sa tsiquehen xicjin.
1TI 1:10 Hacuaha cavitexa Nina cjua jan ngatsë rë xuta xihin xuta chjuun xi tjin chjuunnahñu rë, xuta xi xanda, xuta xi vinchahma ngu xuta sehe fehya tujún xuta rë, xuta xi chja cjuandacha cojo xicjin, xuta xi chja cjuandacha hisca xcun xutaxa rë, hacuaha xuta xi sahmi vihi sahmi vëhë xi matanguaain cojo cjuaquixi.
1TI 1:11 Peru cjuaquixi jan ne, matangun cojo cjua ndajyihi tsëhë Nina. Hacuaha Nina xi jercu ndaja me ne, me vëhë casua ná me cjua xi cuatjin cuichjá.
1TI 1:12 Suá nacuechji rë Nai naja Cristu Jesús ta, tsëhë xi camangucacun me cojo ná xi casua ná me xa rë me, hacuaha tisua ná me ngahñu cjua xi scaa ná sahme xa jan.
1TI 1:13 Cuatjin casahmi me cjuandaja cojo ná quihndë, handasa hatsëë ne, jemu choho cachjá tsëhë me hacuaha jemu choho casahme, xi jemu yehe cjuañihi casuá rë xuta ladu rë me. Peru Nai naja ne, cama yuma rë me ngahan ta, tsëhë xi cjëë xi cumacjain ná me, hane vëhë xi hveen mé xi casahme.
1TI 1:14 Hane jemu casahmi camahani me cjuandaja cojo ná, xi casua me cahndë́ xi camacjain ná me hacuaha xi caveya me cjuahmutacun cahntsua xahasen naha. Cuatjin sahmi me cojo naja xi nihña tangun cjuatacun naja cojo Cristu Jesús.
1TI 1:15 Cjua xi cuichjá nguehe ne, jemu cjuaquixi, hacuaha ndaja tjin xi cumacjain rë ngayëjë ni xuta ta, Cristu Jesús ne, canduva me nguehe ngasunhndë xi cuaxëtje me xuta xi sahmi cjuatsehen. Tsëhë yëjë xuta tsehen xi cuacun jan ne, ngahan hitsë sa tsehen ngahan.
1TI 1:16 Peru Jesucristu ne, camayuma rë me ngahan ta, tsëhë xi meje rë me xi cumachaya rë yëjë ni xuta ta jemu sahmi jyë cacun me cojo ngu xuta xi jercu sahmi cjuatsehen. Sacuatjin xi casahmi me cjuandaja cojo ná ne, hacuaha ni tjin sahmi me cjuandaja cojo yëjë ni xuta xi cumacjain rë cjua rë me. Sehe sacú rë xuta jan cjuahñu xatsë xcun Nina.
1TI 1:17 Vëhë xi meje rë xi hatuxa chjahanrcun rë Nina, ndaja cuinújan tsëhë Nina yëjë ni nixtin ta, me vëhë xi matitjun me, xi vitexa me yëjë ni nixtin ta, suvá ni me vëhë xi Nina me, hacuaha matsijin naja me. Hacuaha tsajin nixtin tsajin hora cueya me. Cuatjin jain.
1TI 1:18 Ngaye Timoteo ne, sacuatjin cjuatacun xi ha cachja me xi hmí profeta tsiji hatsëë nixtin tsan ne, ha chuva vëhë ni tivitéxa ri xi nihñi. Hane cjuatacun vëhë ne, cumachjirëhë riji xcun xa rë Nina xi tinihñi sacuaha tjin machjirëhë ngu quicha ngajñi rë ngu si.
1TI 1:19 Mijí rë xi cuihin ngaxtin xi macjain ri cjua rë Nina ta, meje rë xi nihñicuende cjuatacun ndajyihi xi quichehe. Ngu jo xuta ne, casahmi cuendaain me cjuatacun ndajyihi xi cavaha me, hane cuatjin catsichaja me cjuatacun rë me, hacuaha ha quihndë macjaain rë me Jesucristu.
1TI 1:20 Cuatjin cavatju cha Himeneo cojo cha Alejandro camá. Vëhë xi ngahan ne, casuá cahndë́ xi suandya hitsë Satanás cha xi cuacun vë, sehe cumachaya rë cha ta cuaaintjin camahani xi choho chja cha tsëhë Nina.
1TI 2:1 Vëhë xi nguehe cuichjá cojo ri ta jemu meje rë xi chjahyan rë Nina cjuandaja, meje rë xi tahan nacuechji rë me, hacuaha meje rë xi nihña oración ngatsë rë yëjë ni xuta.
1TI 2:2 Meje rë xi nihña oración ngatsë rë xutaxa rë, hacuaha ngatsë rë ngayëjë ni xuta xi vitexa naja, sehe ngayaan ne, tsajin yo suandya naja suaxti naja, xi tsejen xi chjahanrcun rë Nina, hacuaha xi nihña cjuandaja.
1TI 2:3 Jercu ndaja tjin xi cuatjin nihña oración ta, Nina, me xi vaxëtje naja ne, cuatjin chuya rë me.
1TI 2:4 Meje rë me xi ngayejen ni xuta ne, cuetjuntjen hacuaha ndaja cuijnercun cjua xi cjuaquixi.
1TI 2:5 Ngu ni Nina xi tacun me, hacuaha ngu ni me xi sahmi xi matangun cjuatacun naja ngayaan xuta cojo Nina. Me xi cuatjin sahmi jan ne, hacui ngu xuta xi hmí Cristu Jesús.
1TI 2:6 Me vëhë xi casua me yojo rë me xi cuechjitje me jyë́ naja ngayejen ni ngayaan. Hane hya xi cavetjucaa nixtin ne, cuatjin cama tsejen xi Nina ne, meje rë me xi cuetjuntjen.
1TI 2:7 Vëhë xi casatë ná xi má ngahan apóstol, xi cuicuyá rë xuta xi xín nangui rë me, cuichjá cojo rë me cjua xi cjuaquixi xi macjain naja. Hatuxa cjuaquixi cjua xi chjá cojo ri. Hacuiin vindácha.
1TI 2:8 Hacuaha meje ná xi xuta xihin ne, sahmi me oración ha tu jani ni hiscan xi matangun me. Hya xi scunitjen me tsja me xi sahmi me oración ne, meje rë cojo ngu xahasen tyjahi. Mijí rë xi quitaha cjan rë me, hacuaha mijí rë xi cojo si.
1TI 2:9 Hacuaha yachjin ne, cataja me tsjian rë me hacutjin xi ndaja tjin, hacuiin ngu xcusun xi jemu nchina tsejen. Mijí rë xi cuircu cun sahmi me tsjarcu me. Mijí rë xi tsindaja me yojo rë me cojo oro, cojo tuseti xi jemu hnga chjí rë, cojo tsjian hnga chjí rë.
1TI 2:10 Meje rë xi sahmi me cjuandaja ta, cuatjin ndaja tsejen tsëhë yachjin xi macjain rë me Nina.
1TI 2:11 Hacuaha hya xi viseñuju me ngu cjua rë Nina ne, catitsinguijne me yojo rë me, jyuu ni catiyuju me.
1TI 2:12 Hacuaha suaan cahndë́ xi yachjin ne, cuicuya me ngajñi rë xuta cjín, hacuaha suaan cahndë́ xi me vëhë cuitexa me xuta xihin. Xi meje rë ne, tu catiseñuju ni me.
1TI 2:13 Cuatjin meje rë ta, tsëhë xi hya xi casahmi Nina xuta ne, titjun casahmi me xutachanga naja Adán, sehe má jo ne, casahmi me Eva.
1TI 2:14 Hane Adán ne, hacuiin camandacha me ta, chjuun jan ne, me vëhë xi camandacha me, hane cuatjin camá xi casahmichiin chjuun jan cjua xi cavitexa Nina.
1TI 2:15 Peru yachjin ne, meje rë xi catisacu rë me quihndi. Cuatjin xi cuetjutje me, sa xi macjain rë me Nina, sa xi tsihmu cacun xicjin me, sa xi tyjahi xahasen rë me, hacuaha sa xi vetjo me cjuatacun rë me.
1TI 3:1 Nguehe cuichjá cojo ri ngu cjua xi cuatjin jain: yo xi meje cuitexa sacuaha obispo ngajñi rë xuta ladu rë Nina ne, jemu ndaja xa xi meje rë xuta jan.
1TI 3:2 Ngajan xi me xi cuitexa ngajñi rë xuta ladu rë Nina ne, meje rë xi ngu xuta ndaja xi tsajin mé choho sahmi. Meje rë xi ngu xuta xi ngu ni chjuun rë, hacuaha xi vetjo yojo rë, xi tacun cahndë́ cjuatacun rë. Mijí rë xi tujyë sahmi me. Meje rë xi ngu xuta xi cojo cjuandaja cjuahatsja me xuta xi nduva tjengui rë me ndava me. Hacuaha meje rë xi chutaha cjuatacun rë me xi cuicuya me xuta.
1TI 3:3 Mijí rë xi ngu xuta chihi. Mijí rë xi choyo xuta me ta, meje rë xi tjin rë me cjuandaja cjuajeya. Mijí rë xi jercu tsimeje me tujún.
1TI 3:4 Hacuaha me xi vitexa ngajñi rë xuta ladu rë Nina jan ne, meje rë xi ngu xuta xi ndaja sahmi gubiernu ndava, hacuaha quihndi rë ne, vihndë tsëhë hacuaha faharcun rë.
1TI 3:5 Ta sa xi hacuiin ndaja ma sahmi me gubiernu ndava me ne, ¿hacutjin cuma cjuahacuenda me xuta ladu rë Nina?
1TI 3:6 Hacuaha mijí rë xi ngu xuta xi sehe tiña nixtin cavisehen me ndiya rë Nina, sá tu jemu sahmi jyë xuta jan yojo rë me, cjuë ne, cuatju me castigu rë Nina, sacuaha tjin cavatju xitsehen matitjun camá.
1TI 3:7 Hane meje rë xi ngu xuta xi ha chjaharcun rë me, xi hisca cojo xuta xi hacuiin ladu rë Nina ne, ha tifaharcun rë me. Cuatjin xi xuta xi vitexa jan ne, hacuiin cuetju sava me, hacuaha hacuiin tsinguetsun xitsehen xi matitjun cjuatacun rë me.
1TI 3:8 Hacuaha ni tjin ni xuta xi visecoo rë ngu me xi vitexa jan ne, meje rë xi ngu xuta xi ha chjaharcun rë, ngu xuta xi hacuiin jo xcun jo hntsua. Mijí rë xi ngu xuta xi jercu hvi xan. Mijí rë xi ngu xuta xi jercu tsimeje tujún.
1TI 3:9 Meje rë xi ngu xuta xi cojo ngu cjuatacun tyjahi macjain rë cjua xi cama ngascan casuacuenda naja Nina, cjua xi tsajin yo vëë rë hatsëë nixtin.
1TI 3:10 Tjun tjun ne, meje rë xi chjahachuva rë xuta jan. Hane sa xi tsejen ta tsajin mé jyë́ rë xuta jan ne, cuma cjue me xa xi cuisecoo me xuta xi vitexa.
1TI 3:11 Hacuaha chjuun rë me ne, meje rë xi ngu chjuun xi ha chjaharcun rë, ngu chjuun xi visiajmii cjuandesu. Meje rë xi ngu chjuun xi vetjo me cjuatacun rë me, ngu chjuun xi ha sahmi chihin xa rë.
1TI 3:12 Hane xuta xi visecoo rë ngu me xi vitexa jan ne, meje rë xi ngu ni chjuun rë me. Hacuaha meje rë xi ngu xuta xi ndaja sahmi me gubiernu ndava me cojo quihndi rë me.
1TI 3:13 Hane me xi jemu ndaja jain xa sahmi ne, jercu cjuaharcun xuta me, hacuaha hitsë sa tsacjuiin me xi cuichja me cjua ndajyihi tsëhë Cristu Jesús xi macjain naja.
1TI 3:14 Quihndë xi titsihindu ri cjua vihi ne, vetahá cácun ta xati cuma cjuë́ tjëngë ri.
1TI 3:15 Peru sa xi cuindeya ná ne, cjua xi titsingátju ri vi ne, sua cumachaya ri hacutjin xi mameje rë xi sahmi xuta rë Nina. Hane xuta rë Nina jan ne, hacui ngayaan xi macjain naja Nina xi quicun, hacui ngayaan xi nújantjen ngatsë rë cjuaquixi.
1TI 3:16 Cjuatacun rë Nina xi tsajin yo vëë, xi macjain naja vi ne, suvá tsejen ta jemu vengui chjí rë: Cristu Jesús ne, hya xi canduva me nguehe ngasunhndë vihi ne, camá me ngu xuta sacuahatjin ngayaan xuta. Peru tsajin camahani jyë́ rë me, chja Hasen xi tsëhë Nina. Hacuaha cavëë ángel me. Hane camachaya rë xuta tsëhë me yëjë ni nangui. Hacuaha camacjain rë xuta me jingujyë ni ngasunhndë. Hacuaha cafahatsja Nina me ngajan ngahnga.
1TI 4:1 Quihndë ne, Hasen rë Nina ne, chja quixi ta cuechu nixtin xi yahnga xuta ne, cuiyujuxin me cjua tsëhë Cristu Jesús, cjua xi macjain naja, hane tu cjua tsëhë xitsehen xi vindacha ne, vëhë scutaya me hacuaha vëhë cuetaharcu me.
1TI 4:2 Hacuaha cuetaharcu me cjua xi cuicuya xuta xi jo xcun jo hntsua xi vindacha. Sacuahatjin má taja chuxin rë ndyaja hiscan xi faha chu quicha ne, cuatjin cuetsun cjuatacun rë xuta ndacha xi cuacun vë.
1TI 4:3 Cjuavixan ne, suaain me cahndë́ cuma, hacuaha cuichja me ta tjin yahnga xcusun xi ndajin xi xinë. Peru Nina ne, casahmi me yëjë ni xcusun ne, cuma xinë ngayejen ni xi macjain naja me, ngayejen ni xi cavijnercun cjuatacun xi cjuaquixi. Peru meje rë xi tahan nacuechji rë me ta,
1TI 4:4 yëjë ni xcusun xi Nina casahmi me ne, jemu ndaja. Vëhë xi mijí rë xi nitjunnguen tu mé ni xcusun, ta meje rë xi chjahanntsan, peru tahan nacuechji rë Nina.
1TI 4:5 Hane ngatsë rë cjua rë Nina cojo cjua xi nújan hya xi tahan nacuechji rë me ne, vëhë sahmi xi tsajin tsavi tsëhë tu mé ni xcusun.
1TI 4:6 Sa xi tehe rë xuta ladu rë Nina yëjë ni cjua xi sehe catsihindu ri vë ne, jemu ndaja nihñi, xi tinihñi xa rë Cristu Jesús. Hacuaha hitsë sa cuma jyë cjuatacun riji ngatsë rë cjua xi macjain naja, hacuaha ngatsë rë cjuandaja xi cachutaye xi nihñi.
1TI 4:7 Peru xi canihñicuendiin yëjë ni cuentu rë xutachanga naja ta, hacuiin yëjë xi machjirëhë ta, ngu jo ne, suvá ni xutachanga naja, me vëhë xi cavaxëcun me. Cahndë́ rë vëhë ne, ngaye ne, nihñi ngahñu yëjë ni nixtin xi tsejen xi chjehercuin rë Nina nguñajatacuin.
1TI 4:8 Xi niniyan yojo naja ne, jemu ndaja tjin. Peru hitsë sa ndaja tjin xi tsejen xi chjahanrcun rë Nina ta, tsëhë xi hya xi cuatjin nihña ne, sacu naja cjuandaja rë Nina quihndë nguehe xcun cjuahñu naja, hacuaha ni tjin ngajan xcun Nina.
1TI 4:9 Cjua xi titsihindu vi ne, hatuxa vechu chuva rë xi cumacjain naja ta, tsëhë xi jemu cjuaquixi.
1TI 4:10 Vëhë xi jercu tinihña xa, tsëhë xi ha vetahan tacun Nina xi quicun, Nina xi vaxëtje naja ngayejen ni ngayaan xuta, hacutjin ngayejen ni ngayaan xi macjain naja me.
1TI 4:11 Ticoye rë xuta cjuatacun xi catsihindu vë, hane hisca titexe rë me.
1TI 4:12 Nihñi cjuandaja ne, sehe tsajin yo xi chuyiin rë tsiji ngatsë rë xi chuva nu riji. Nihñi cjuandaja ne, sehe xuta xi macjain rë Nina ne, xi scuëë me hacutjin nihñi ne, hacuaha ni tjin sahmi me; sacuaha tjin xi ha noje, sacuaha tjin xi nihñi, sacuaha tjin xi hmu tacuin xinguin, sacuaha tjin xi macjain ri Nina, sacuaha tjin xi ndajyihi xahasen riji.
1TI 4:13 Nguyëjë rë xi cjëë cjuëhë ne, hñu tinoje cojo xujun rë Nina, hya xi ma tangun xuta ngajan yungun. Ndaja tinoje cojo rë me ne, catisahmi me cjuandaja, hacuaha ticoye rë me.
1TI 4:14 Nihñixe cojo cjuatjo xi Nina casua ri me, nixtin hya xi me xi vitexa xuta ladu rë Nina ne, cavetahatsja ri me. Cuatjin camá ta, tsëhë xi cuatjin cachja Nina cojo ngu xuta xi hmí profeta xi cuatjin meje rë me xi cuma.
1TI 4:15 Nihñi nguñajatacuin ngayëjë ni hacutjin xi vitexa xujun vi. Xi cuatjin ne, ngayëjë ni xuta scuëë me hacutjin tihmi xcun cojo cjuandaja rë Nina.
1TI 4:16 Cuidadu ni tjin ri tsiji sove, hacuaha cojo cjuatacun xi vicoye. Tu chihin ni tihincueje cjuatacun vë. Sa xi cuatjin nihñi ne, cuma naxetje yojo riji, hacuaha cuma naxetje me xi cuiseñuju cjua xi vicoye.
1TI 5:1 Sa xi ngu me xi ha nchava ne, choho sahmi me ne, hacuiin cuinojetehe rë me ta, cojo jeya tinoje cojo rë me, hacutjin xi sahmi me cjuandaja, sacuaha tjin xi nújan cojo nahmi naja. Hacuaha cojo xuta xihin, me xi vasen xuta ni ne, tinoje cojo rë me sacuaha tjin xi nújan cojo tseen.
1TI 5:2 Hane yachjin xi ha chicuhun me ne, cojo cjuandaja tinoje cojo rë me sacuaha tjin xi nújan cojo naa naja. Hacuaha cojo yachjin xi vasen xuta ni me ne, tinoje cojo rë me sacuaha tjin xi nújan cojo na xi tíchjan, cojo ngu xahasen ndajyihi.
1TI 5:3 Yachjin cahan xi cjuaquixi xi tsajin yo ngatsë rë me ne, meje rë xi chjahanrcun rë me, cuisecoon rë me.
1TI 5:4 Peru ngu chjuun cahan ne, sa xi tjin rë na quihndi o quihndindai ne, catisahmi nixti jan cjuandaja, catisecoo rë na, cojo sa xi cuatjin sahmingojo nixti jan cojo xutacha rë. Xi cuatjin cuma ne, hatuxa chuya rë Nina.
1TI 5:5 Tjin chjuun xi cjuaquixi xi cahan me, me xi ha siu suvá. Me vëhë xi vetaha cacun me Nina, hane sahmi me oración, fehya me cjuandaja rë Nina nixtin nixten.
1TI 5:6 Peru hacuaha tjin chjuun cahan xi sahmi ni me hacutjin xi ma sua rë xahasen rë me. Hane chjuun cahan xi cuatjin sahmi jan ne, handasa ndaja cun cjuahñu rë me ne, peru cjuatacun xi sahmi me ne, tsajin mé machjirëhë.
1TI 5:7 Cuatjin tinoje cojo xuta ladu rë Cristu, sehe tsajin mé jyë́ rë me cojo xutacha rë me.
1TI 5:8 Peru sa xi ngu xuta marcuaain rë me tsëhë xuta rë me, o sa xi marcuaain rë me tsëhë cahntsua ndava me ne, vëhë tsingacun naja xi catsitjungui me cjua rë Nina xi macjain naja. Hacuaha hitsë sa choho sahmi me xi cuma rë ngu xuta xi hatuxa macjaain rë Nina.
1TI 5:9 Xcun xujun xi yaja ñihi rë yëjë ni yachjin cahan ne, cumahindu ñihi rë na xi ha cafahá rë xi jyanchan nu, na xi cavejña cojo ngu ni xihin,
1TI 5:10 na xi ha vëë xuta xi ndaja xcusun rë, xi ha casahmi yëjë ni cjuandaja vihi: ha catsicha na quihndi, ha cafahatsja na cojo cjuandaja xuta xi quiji tjengui me na ndava na, ha cavisecoo na yahnga me xi ladu rë Cristu, ha casua na cjuetacun me xi tjin rë ngu cjuacjintacun, hacuaha ha casahmi na jingu sa xcusun xi ndatjin.
1TI 5:11 Peru xcun xujun jan ne, mijí rë xi cuaquí ñihi rë na cahan xi chuva nu rë, sá cuechu ngu nixtin xi ha quihndë sahmii na xa rë Cristu nguñajacacun na, hane meje nga cuixan na ngu ndiya.
1TI 5:12 Xi cuatjin sahmi na ne, cuetjucaa jyë́ rë na, tsëhë xi tsichaja na cjua xi ha catsinguisehenjñi na.
1TI 5:13 Hacuaha cuma tsëhë na xi tu tsujihya ni na ndava xuta. Hane hacuiin tu suvá ni cuma tsëhë na ta, hisca cuetsihin cuichja na cjuandesu, cuetsihin tsinguisehenjñi na jingu sa cjuatacun xi cuendaain rë na, hacuaha cuetsihin cuisiajmi na cjua xi mamijí rë xi cuichja na.
1TI 5:14 Vëhë xi meje ná xi catixan nga na cahan xi chuva nixtin rë. Catisacu rë na quihndi, hacuaha catjahacuenda na cahntsua ndava na. Sehe xuta xi chuyiin rë me tsajan ne, sacuiin rë me hacutjin choho cuichja me tsëhë xcusun xi ndaja sahmi na yachjin cahan jan.
1TI 5:15 Cuatjin chjá ta, tsëhë xi tjin ngu jo na cahan xi ha cavetjuxin na tsëhë ndiya rë Nina, cavisehen na ndiya rë Satanás.
1TI 5:16 Ngu chjuun xi ladu rë Cristu me ne, sa xi tjin ngu chjuun xi xicjin me xi cahan ne, mijí rë xi xuta ladu rë Cristu sahmi me gastu ngatsë rë chjuun cahan jan ta, me xi xicjin ni na ne, catisecoo me na. Xi cuatjin ne, xuta ladu rë Cristu ne, cuma cuisecoo me yachjin cahan xi tsajin yo ngatsë rë.
1TI 5:17 Yëjë ni xuta changá xi ndaja vitexa me ngajñi rë xuta ladu rë Cristu ne, vechu chuva rë xi chjaharcun rë me hacuaha ndaja chjí sacu rë me. Peru me xi sahmi ngujyë xi chjaharcun rë hacuaha ndaja chjí sacú rë me ne, me xi sua machaya rë xuta cjua tsëhë Jesús cojo me xi vicuya naja cjuachacun.
1TI 5:18 Cuatjin chjá ta, tsëhë xi xcun xujun rë Nina ne, cuitjin camahindu cjua vihi: “Mijí rë xi cueyún changa hntsua ngu ndyaja hya xi sahmi chu xa nuju xi sunesun chu naxu rë trigu xi cuetju trigu rë.” Hacuaha: “Ngu mosu ne, tjin rë cha chuva rë xi cjuaha cha chjí rë cha.”
1TI 5:19 Hya xi xinchajyë rë ngu xuta changá xi vitexa me xuta ladu rë Cristu ne, xi canihñicuendiin jyë́ jan sa xi ngu ni cha tichja cha. Hisca xi cjuehe jo jyan cha xi cavëë cha xcusun xi casahmi xuta changá jan ne, sehe nihñicuende jyë́ xi vincha cha.
1TI 5:20 Peru me xi tisahmi jain cjuatsehen ne, tinoje cojo rë me xcun ni ngayëjë xuta ne, hacuaha yëjë ni xuta jan ne, tsacjun me cuma, hane sahmii me cjuatsehen.
1TI 5:21 Nihñi ngayëjë ni cjua hacutjin xi titsihindu ri. Hacuaha meje rë xi chuva xi nihñi cojo ngu ne, nihñi cojo ngayëjë ni xuta, sa xi vinga ri me o sa xi vingaain ri me. Hisca Nina cojo Cristu Jesús cojo ángel xi cavaxijin me ne, vëë me hacutjin xi titsihindu ri vi.
1TI 5:22 Cuechu nixtin xi cuma meje sa xuta xi cjuahatsja me xa ngajñi rë xuta ladu rë Cristu, sacuaha ngu me xi cuitexa, o ngu me xi sahmi tu mé ni ngu xa xi cuma meje. Peru hacuiin marcu macjain cuinoje yo xuta xi satë rë xa jan. Ndaja ningatehetacuin titjun yo xuta xi ndaja me ta, tsëhë xi mijí rë xi ninguisihinjñi cojo xuta tsehen. Hisca sove ne, mijí rë xi nihñi cjuatsehen.
1TI 5:23 Ha quihndë xi cahyiin suvá ni nandá ta, sihi hitsë xan rë uva ngatsë rë cahntsue, hacuaha ngatsë rë chíhin xi tu quitaha tu quitaha sacu ri.
1TI 5:24 Tjin xuta xi suvá tsejen tsëhë me xi sahmi me cjuatsehen. Hane cjuatsehen ni rë me jan ne, vëhë sahmi xi cuma me castigu. Hacuaha tjin yahnga xuta xi matsijin tsëhë me xi sahmi me cjuatsehen. Peru xi cuma ngascan ne, cuma tsejen xi cun xi má me cojo jyë́ rë me.
1TI 5:25 Hacuaha ni tjin xcusun xi ndaja ta suvá tsejen. Hane ha ndaja sa hacuiin ngutjen cuma tsejen, peru hatuxa cumaji cuiyujuhma ta, tjin xi cuma tsejen.
1TI 6:1 Xuta ladu rë Cristu xi má mosu hndixahan rë ngu xuta ne, jemu meje rë xi cjuaharcun me xuta xi má nai rë me. Sa tsajin ne, choho cuma cuichja xuta tsëhë Nina hacuaha cojo tsëhë cjuachacun xi vicuyan.
1TI 6:2 Hane me xi nai rë mosu hndixahan jan ne, sa xi macjain rë me Cristu ne, mijí rë xi choho scuëë hndixahan jan me, tsëhë xi tangun ni macjain rë me Cristu. Cahndë́ rë xi choho scuëë rë me ne, meje rë xi cuisecoo hndixahan jan me yëjë ni xa xi cuitexa me ta, tsëhë xi me xi cuma tsëhë yëjë ni cjuandaja xi sahmi hndixahan jan ne, xuta ladu rë Cristu me. Hane vëhë xi jemu hmucacun hndixahan jan me. Tinoje cojo xuta yëjë ni cjua vëhë, hya xi cuicoye rë me.
1TI 6:3 Sa xi ngu xuta vicuya me ngu cjuachacun xi hacjahi fi ne, sa xi manguaaincacun me cojo cjua xi cjuaquixi xi cachja Nai naja Jesucristu ne, hacuaha manguaaincacun me cojo cjuachacun xi tsëhë Nina ne,
1TI 6:4 me vëhë ne, ngu xuta xi jemu sahmi jyë me yojo rë me. Peru hvíin camaha ni me, hacuaha machjiriin cjuatacun rë me ta, tsëhë xi jemu meje cuisiajmi me tsëhë tu mé ni cjua: “Cuitjin vijne cjua vëhë; jéya, cuatjin vijne”, chja me. Hatuxa jemu meje scaan me cojo cjua ngajñi rë cjuavisiajmi rë me. Hane xi cuatjin visiajmi me ne, vetjucaa cjuaxintacun, vetjucaa cjuahngatacun, hacuaha choho chja me tsëhë xicjin me, choho tsingatahacacun me tsëhë xicjin me,
1TI 6:5 hacuaha ngajan fë ngajan vetsihin ticjan me cojo cjua, xi tsajin hiscan cuijnetaha. Cuatjin sahmi me ta, tsëhë xi ha cavetsun cjuatacun rë me ne, cjua xi cjuaquixi ne, hvíin camahani me. Xi tsingatahacacun me ne, xuta xi faharcun rë Nina ne, jemu ndaja cuatju me cuma ta, jercu sacú rë me cjuanchina.
1TI 6:6 Bueno, quixi ta ndaja cuátjun cuma xi tsejen xi chjahanrcun rë Nina, sa xi cumangutacun cojo xi tjin naja.
1TI 6:7 Ta tsajin camahani mé quichahan xi catsin yaan xi cafehen ngasunhndë vi, hacuaha tsajin camahani mé xi cuma cuanguencojon, hya xi cueyan.
1TI 6:8 Peru sa xi ha tjin naja xi xinë cojo xi chajan ne, meje rë xi cojo vëhë ne, cumangutacun.
1TI 6:9 Peru xuta xi jemu meje rë me cuma nchina me ne, ndaya ndaya ni tsingatihin me xi cumandacha me xi sahmi me cjuatsehen. Xitu tsinguisehenjñi me ngajñi rë cjuatsehen jan ne, ha quihndë cumaji cuetjuxin me, sacuatjin rë ngu chu xi jiyahñu cahntsua ngu chen. Hacuaha jemu cjín xcusun yumahasen xi meje rë me. Peru machjiriin xcusun jan ta, tu tsichaja tu tsinguetsun ni rë cjuatacun rë me.
1TI 6:10 Sacuaha xuta xi jercu meje rë me tujún ne, jemu cjín xcusun cjuatsehen sahmi me xi sacú rë me tujún. Yahnga me xi cuacun jan ne, hisca caviyujuxin me cjuachacun xi macjain naja. Hane ngatsë rë xi cavetjuxin me ne, vëhë xi jemu choho tivatju me jima.
1TI 6:11 Peru ngaye xi ladu rë Nina ngaye ne, tihinxin tsëhë xcusun xi cuacun vëhë. Tihin tjengui ndiya xi tsëhë cjuaquixi, hacuaha nihñi hacutjin xi Nina chuya rë me. Ndaja catamacjain ri me, hacuaha ndaja nihmutacuin me. Caticaa ri xcun ngayëjë ni cjuacjintacun xi cuátji cuma, hacuaha nihñi jeya cjuatacun riji.
1TI 6:12 Nihñi ngahñu xi yëjë ni xcusun xi nihñi ne, cumatangun cojo cjuatacun xi macjain ri, sehe sacú ri cjuahñu xatsë ngajan xcun Nina xi tsajin nixtin cjuë. Tsëhë vëhë xi Nina cavaxijin ri me. Hacuaha ha catehe cjuaquixi riji xcun jemu cjín xuta hacutjin xi macjain jain ri Nina.
1TI 6:13 Nina xi tisua me cjuahñu rë ngayëjë ni xi tjin ne, vëë me hacutjin tivitéxa ri. Hacuaha Cristu Jesús, me xi casua cjuaquixi rë xcun Poncio Pilatu ne, vëë me hacutjin tivitéxa ri.
1TI 6:14 Cjua xi tivitéxa ri ne, tinohye. Hacuiin nindeye cjua vë ta nihñichihin, hisca xi cuechu nixtin xi cuinduva nga Nai naja Jesucristu.
1TI 6:15 Hane hya xi cuechutaha nixtin vëhë ne, Nina tsingatju nga me Jesucristu. Nina ne, me vëhë xi ndaja me, me vëhë xi tyjahi me. Ngu ni me vëhë xi matitjun me. Matitjun me tsëhë ngayëjë ni xi matitjun. Matitjun me tsëhë ngayëjë ni xi vitexa.
1TI 6:16 Ngu ni me vëhë xi tsajin nixtin cueya me. Tacun me xcun ngu ndavá seti ndajyihi, xi tsajin yo cuma cuechu. Hacuaha tsajin yo cavëë rë me, hacuaha hisca ngu cumaji scutsejen rë me. Me vëhë xi catjaharcun xuta me. Me vëhë xi catitexa me yëjë ni nixtin yëjë ni hora. Cuatjin jain.
1TI 6:17 Xuta xi jemu tjin rë me cjuanchina rë ngasunhndë vihi ne, titexe rë me xi hacuiin sahmi yehe me yojo rë me. Hacuiin cuetaha cacun me cjuanchina xi tjin rë me ta, vëhë ne, tsajin cjuaquixi xi cjuecani rë. Peru catetaha cacun me Nina ta, Nina ne, hacuiin choho me ta, me vëhë xi sua naja me yëjë ni xcusun xi ndajyihi tsajan.
1TI 6:18 Hacuaha tinoje cojo rë xuta nchina xi cuacun jan ne, yehe cjuandaja catisahmi me cojo ngayëjë ni xuta. Mijí rë xi choho me.
1TI 6:19 Xi cuatjin sahmi me ne, tivetjo me cjuandaja xi sehe cumachjirëhë rë me, hacuaha sacú rë me cjuahñu xi cjuaquixi.
1TI 6:20 Ngaye Timoteo ne, chjehecuende cjua xi ha ntse siu. Xi cavetinrcuiin cjuavisiajmi yumahasen xi chuyiin rë Nina tsëhë. Hacuaha xi cavetinrcuiin yëjë ni cjua rë xuta xi hisca ngajñi rë me matanguaain cjua rë me, handasa chja me xi jemu vechu cjuatacun rë me xi vijnercu me cjua.
1TI 6:21 Peru me xi cuatjin chja ne, ha cavetjuxin me tsëhë cjuachacun xi macjain naja. Nina catisua nuju me ngayujun ni cjuandaja rë me.
2TI 1:1 Ngahan Pablo ne, apóstol tsëhë Cristu Jesús má ngahan ta, tsëhë xi cuatjin meje rë Nina. Vëhë xi catsingatju ná me, xi cuichjá cojo xuta ta sua naja me ngu cjuahñu ndajyihi, sa xi nihña tangun cjuatacun naja cojo Cristu Jesús.
2TI 1:2 Ngaye Timoteo ne, tsihindu ri xujun vihi ta, tsëhë xi sacuaha quihndi ndaja naha ngaye. Nina Nahmi naja cojo Cristu Jesús Nai naja ne, catamayuma rë me ngaye, catisua ri me cjuandaja, cjuajeya.
2TI 1:3 Nixtin nixten, hora xi sahme oración naha ne, jercu veyanangë ri, hacuaha suá nacuechji rë Nina. Hacuaha sahme xa rë Nina cojo ngu cjuatacun tyjahi, sacuahatjin casahmi xutachanga naha.
2TI 1:4 Vitsjen ná hacutjin cachjihnde, ngatsë rë xi cavétju cëjë tsiji. Hacuaha jemu meje ná xi ndove tjengui ná, sehe ngahan ne, jemu ndaja cuma ná.
2TI 1:5 Hacuaha vitsjen ná hacutjin xi jemu ndaja macjain ri cjua rë Nina, sacuaha tjin xi titjun camacjain rë chicuhun riji, chicuhun Loida, cojo na Eunice naa riji. Hane fëmangúcacun xi cojo ngaye ne, ha cuatjin ndaja macjain ri.
2TI 1:6 Vëhë xi chjá cojo ri ta xi catiin cahndë́ xi cjuë cjuatacun xi casua ri Nina, hya xi cavétahantsa ri.
2TI 1:7 Ta Nina ne, hacuiin casua naja me ngu cjuatacun xi ngayaan ne, cumacjintacun ta, casua naja me ngu cjuatacun xi sacú naja ngahñu, xi nihña hmu tacuun xingueen, hacuaha xi scaa naja cuetjoon yojo naja.
2TI 1:8 Vëhë xi hacuiin nihñi savá, hya xi cuinoje cjuandajyihi tsëhë Nai naja. Hacuaha hacuiin nihñi savá ngatsë naha ngahan xi tejñaya ndavaya, ngatsë rë xi chjá cjua rë me. Hacuiin nihñi savá ta, nihñi ngahñu cojo yëjë ni cjuañihi xi cuátji cuma, ngatsë rë cjuandajyihi xi tinoje. Cuatjin nihñi hacutjin chutaha ngahñu xi tisua ri Nina.
2TI 1:9 Nina ne, cavaxëtje naja me hacuaha cavaxijin naja me, xi cuma tsëhë me ngayaan. Hacuiin ngatsë rë xi jemu ndaja canihña xi cuatjin casahmi me ta ngatsë rë xi cuatjin meje rë me, tsëhë xi jemu ndaja me. Hisca xi chaja sa cuejña ngasunhndë ne, ha catsingatahacacun Nina xi sua naja me cjuandaja rë me, ngayejen ni xi tsëhë Cristu Jesús ngayaan.
2TI 1:10 Hane hya xi cafehe Cristu Jesús, me xi vaxëtje naja ne, hya camachaya jain naja cjuandaja rë Nina jan. Hane Cristu jan ne, catsicjë me ngahñu rë cjuaveya, hacuaha casuacuenda naja me ta sua naja Nina ngu cjuahñu ndajyihi, xi tsajin nu tsajin nixtin cueyan nga. Vëhë cjuatacun xi vicuya naja cjuandajyihi rë me.
2TI 1:11 Nina ne, casua ná me xa xi suá cumachaya rë xuta hacuaha cuicuyá rë xuta cjuandajyihi rë me.
2TI 1:12 Ngatsë rë xa vëhë ne, jemu cjín cjuañihi tivátju jima. Peru ma savaain ná, tsëhë xi ha hvë Cristu, hacuaha camangucácun cojo rë me. Hacuaha tjin ná cjuaquixi xi me vëhë ne, jyë me cojo cjuatacun rë me xi cuetjo ná me, hisca nixtin xi cuinduva nga me nguehe ngasunhndë.
2TI 1:13 Nihñi sacuaha tjin cjuaquixi xi ha cachjá cojo ri. Hacuaha nguñajatacuin catamacjain ri Nina, hacuaha nihñi hmutacuin xinguin, tsëhë xi ngaye ne, ladu rë Cristu ngaye.
2TI 1:14 Nihñicuende cjuaquixi xi casua ri Nina. Hane Hasen rë Nina xi tacun cahntsua xahasen naja ngayejen ni xi macjain naja me ne, Hasen vëhë xi sua ri ngahñu xi cuatjin nihñi.
2TI 1:15 Ngaye ne ha hye xi ngayëjë ni xuta xi tsëhë ladu xi hmí rë Asia ne, casmicacun ná me. Ngajñi rë xuta xi cuacun jan ne, hinchajñi cha Figelo cojo cha Hermógenes.
2TI 1:16 Peru cha Onesíforo ne, catamayuma rë Nina yëjë ni ndava cha ta, tsëhë xi jemu cjín ndiya xi casahmi cha cjuandaja xi cavisecoo ná cha. Hane cama savaain rë cha xi tejñaya ndavaya.
2TI 1:17 Xi tu cafehe cha nguehe nandya Roma ne, cavetsihin cavanguise cha ngahan, hisca xi casacu rë cha ngahan.
2TI 1:18 Nai naja ne, catamayuma rë me cha, nixtin hya xi cuinduva nga me nguehe ngasunhndë. Ta ngaye ne, ha ndaja hye hacutjin xi jemu cavisecoo ná cha ngajan nandya Efeso.
2TI 2:1 Peru ngaye tsan ne, catisua ri Cristu Jesús cjuandaja rë me, xi cuma cuinechin nguñajatacuin.
2TI 2:2 Jemu cjín xuta xi hacuaha caviseñuju me yëjë ni cjua xi cachjá cojo ri. Peru quihndë ne, meje rë xi ticoye rë ngujo cha cjua jan, cha xi tsejen xi mangutacuin cojo rë hacuaha chutaha cjuatacun rë, sehe cha xi cuacun jan ne, hacuaha cuicuya cha xuta xi yahnga.
2TI 2:3 Ngaye ne, nihñi ngahñu xi scaa ri cojo yëjë ni cjuañihi xi cuátji cuma ngatsë rë Cristu Jesús, sacuaha tjin caa rë ngu sindadu xcun ngu si.
2TI 2:4 Hane sindadu xi hinchajñi cha tsëhë xa xi yaha cha ne, cumaji tsinguisehenjñi cha tu mé ni xa ta, tjin rë cha xi sahmi cha hacutjin xi chuya rë me xi matitjun tsëhë cha.
2TI 2:5 Hacuaha ngu cha xi cuisehen xcun ngu juegu xi ntsavë cha ne, sa xi chohotjin ntsavë cha ne, sacuiin rë cha cjuatjo, handasa tjun cha cuetju cha.
2TI 2:6 Hacuaha cha xi sahmi xa nguijña ne, meje rë xi cha vëhë xi titjun satë rë cha tsëhë xitjë xi casahmi cha.
2TI 2:7 Ndaja ningatehetacuin hacutjin cjua xi tichjá cojo ri. Sehe Nai naja ne, me vëhë sahmi me xi cuijnercui cjua vë.
2TI 2:8 Ninguitsjin xi Jesucristu ne, cavascaya rë me ngajñi rë nima, hacuaha canduva tjë rë me xutachanga naja David. Vëhë cjuandajyihi xi ngahan visiajme cojo xuta.
2TI 2:9 Hane ngatsë rë xi cuatjin visiajme cjuandajyihi jan ne, vëhë xi choho tivátju jima. Hisca quitahahñu rë xuta ngahan nguehe ndavaya, sacuaha tjin rë ngu xuta tsehen xi yehe jyë́ rë. Peru cjua rë Nina ne, hacuiin quitahahñu.
2TI 2:10 Vëhë xi ticaa ná ngayëjë ni cjuañihi xi tivátju jima, cojo sa xi yëjë ni xuta xi cavaxijin Nina ne, cuetjutje me ngatsë rë xi macjain rë me Cristu Jesús, hacuaha cuechu me xcun Nina ngajan cuiyuju me nu cjui nu nduva.
2TI 2:11 Cjua vihi ne jemu cjuaquixi: Sa xi ha macjain naja Cristu hya xi cueyan ne, hacuaha cuinechan quicun nga cojo rë me;
2TI 2:12 sa xi ha cacaa naja ne, hacuaha cuisecoon rë me cuitexan. Sa xi ha canújan xi hyaan yo me ne, hacuaha ni tjin cuichja me ta hvíin me yo ngayaan.
2TI 2:13 Handasa ngayaan ne, nihñacheen cjua naja, peru me vëhë ne, hatuxa sahmi chihin me cjua rë me ta, tsëhë xi hatuxa vindachaain me.
2TI 2:14 Ninguitsjin rë xuta jan cjua xi chjá cojo ri. Hacuaha tinojetehe rë me xi ha quihndë scaain me cojo cjuavisiajmi rë me ta, tsëhë xi cuatjin meje rë Nina. Venguiin camahani chjí rë xi cuatjin ticjan me cojo cjua ta, xi cuatjin sahmi me ne, tu titsinguetsun me cjuatacun rë xuta xi viseñuju.
2TI 2:15 Nihñi ngujyë xi Nina ne, chuya rë me tsëhë xa xi tinihñi. Xi cuatjin ne, tsajin mé nihñi sava ta, tsëhë xi ha chihin tivicoye rë xuta cjua xi cjuaquixi.
2TI 2:16 Xi caninguisinjñii ngajñi rë cjuavisiajmi ngarca xi tsajin mé machjirëhë xi visiajmi xuta ta, me xi cuatjin visiajmi ne, quihndë nga nchujun ne, tijima yehe sa cjuatsehen xi tjin rë me.
2TI 2:17 Hacuaha cjuavisiajmi rë me xi cuacun jan ne, tangun cojo hiscan xi hmu, xi quihndë nga nchujun ne, tijima tojo sa. Cuatjin tivatju cha Himeneo cojo cha Fileto ta,
2TI 2:18 tsëhë xi ha cavetjuxin cha tsëhë ndiya rë cjuaquixi. Chja cha ta quixiin xi cuascaya naja hya xi ha caveyan. Hane cojo cjua vëhë ne, titsinguetsun cha cjuatacun rë ngujo xuta xi macjain rë me Nina.
2TI 2:19 Peru Nina ne, cavejña me ngu cjuatacun xi hatuxa cjuaquixi, xi tsajin yo cuma tsinguetsun rë. Hacuaha jo cjua rë Nina xi hatuxa cjuaquixi. Ngu ne, chja cuitjin: “Nai naja ne, vëë me jarë xuta xi tsëhë me”; ngu nga ne, chja cuitjin: “Yëjë ni xuta xi chja me xi ladu rë Nai naja me ne, meje rë xi catiyujuxin me tsëhë cjuatsehen.”
2TI 2:20 Ndava ngu xuta xi ndaja vatju me ne, jemu cjín xcusun trasti xi tjin. Tjin trasti xi tsëhë oro cojo xi tsëhë quicha. Hacuaha tjin xi tsëhë ya cojo xi tsëhë nihndë. Ngujo trasti jan ne, jemu machjirëhë. Hane ngujo nga ne, chuva machjirëhë.
2TI 2:21 Cuatjin naja ngayaan xuta ladu rë Cristu ta, jemu tecjanjñi ngayaan. Peru xi cuma yaan xuta xi vengui chjí rë ne, meje rë xi cuiyujuxen yëjë ni cjuatsehen. Xi cuatjin ne, cuma tyjahi cjuatacun naja, cumachjirëhë rë Nai naja ngayaan, hacuaha tjin ndaja ngayaan xi nihña yëjë ni cjuandaja.
2TI 2:22 Yëjë ni cjuatacun tsehen xi meje rë xuta xi chihndë me ne, ngaye ne, tiyijixin. Tihin tjengui ndiya rë cjuaquixi. Catjë catamacjain ri. Tihin tjengui cjuahmutacun. Tihin tjengui cjuajeya, sacuaha tjin sahmi yëjë ni xuta xi cojo ngu cjuatacun tyjahi fehya rë me Nai naja xi cuisecoo rë me.
2TI 2:23 Hya xi tivinenguise xicjin xuta tsëhë cjua ngarca xi venguiin chjí rë ne, xi canihñicuendiin cjua xi chja me. Tsëhë xi ha hye ta tsëhë cjua vëhë ne, hatuxa cuetjucaa ngu si.
2TI 2:24 Hane xuta xi sahmi xa rë Nai naja ne, mijí rë xi sircu me ta meje rë xi ndaja me cojo ngayëjë ni xuta. Meje rë xi quicun cacun me xi cuicuya me xuta. Meje rë xi yehe cacun me.
2TI 2:25 Hacuaha xuta xi chuyiin rë me tsëhë cjuaquixi ne, meje rë xi cuma quixi me, peru cojo cjuandaja cojo cjuajeya. Xi cuatjin ne, cuma xi sua Nina cahndë́ xi cuindeya cjuatacun rë xuta xi cuacun jan, hacuaha xi cuijnercu jain me cjua xi cjuaquixi.
2TI 2:26 Sehe hacuaha sacú nga rë me cjuatacun ndajyihi, hacuaha cuetjutje me tsëhë xitsehen matitjun xi cavindacha rë me. Cavindacha xitsehen xuta jan, xi casahmi me yëjë ni hacutjin xi meje rë xitsehen jan.
2TI 3:1 Catijnercui cjua vihi: hya xi cuma tiña nixtin xi cjuë ngasunhndë ne, jemu choho cuatju xuta cuma ta,
2TI 3:2 tsëhë xi xuta ne, cuitjin sahmi me: meje rë me xi suvá ni me ndajyihi cuatju me cuma; jercu sahmi me cojo tujún; jemu haxi me ta jercu cuichja me xi ndaja vatju me. Hacuaha jercu sahmi hngacacun me; choho cuichja me tsëhë xicjin me hacuaha choho cuichja me tsëhë Nina. Cuihndiin me tsëhë xutacha rë me. Hisca ngu nacuechji naja suaain me, hisca ngu nacuechji rë Nina suaain me. Cuendaain rë me tsëhë Nina;
2TI 3:3 tsajin rë me cjuahmutacun; tsajin rë me cjuayumatacun; cuichja me cjuandesu. Hacuiin cuetjo me yojo rë me; jemu sahmi xcuahya me; chuyiin rë me tsëhë yëjë ni cjuandaja.
2TI 3:4 Jo xcun jo hntsua me ta, cuiteña xicjin me; jemu tujyë sahmi me; jemu sahmi yehe me yojo rë me. Chuyiin rë me tsëhë Nina ta cjuasua xi tsëhë ngasunhndë ne, vëhë jemu chuya rë me tsëhë.
2TI 3:5 Hacuaha sahmi me xcusun rë xuta xi macjain jain rë Nina, peru tsitjungui me hacutjin xi cjuaquixi. Xi caninguisinjñii cojo xuta xi cuacun vë ta,
2TI 3:6 tsëhë xi ngajñi rë me ne, hinchajñi cha xi vanguise chuva rë xi cuma cuisehen ndava xuta, hane cuindacha cha yachjin xi ha tsingatihin mandacha. Tsingatihin na mandacha na ta, tsëhë xi jemu va tjin cacun na tsëhë jyë́ rë na, xi tisahmi na yëjë ni hacutjin xi xahasen rë na meje rë.
2TI 3:7 Hacuaha yachjin jan ne, jemu vutaya na yëjë ni cjuatacun xatsë, peru hatuxa vijniircu na cjua xi cjuaquixi.
2TI 3:8 Ha hye ta hatsëë nixtin ne, jo cha surqui xi hmí Janes cojo Jambres ne, casahmi cha condra xutachanga naja Moisés. Hacuaha ni tjin rë cha ndacha xi cuacun jan ne, sahmi cha condra cjua xi cjuaquixi ta, cavetsun cjuatacun rë cha, hacuaha machjiriin cha xi cumacjain rë cha Nina.
2TI 3:9 Hane hacuiin jemu xcun cuma cjue cha cojo cjua ndacha rë cha ta, tsëhë xi ngayëjë ni xuta ne, cjuahacuenda me xcusun yumahasen xi cun cha, sacuatjin cama tsejen xcusun yumahasen xi cun cha surqui xi cuacun jan hatsëë nixtin.
2TI 3:10 Peru ngaye ne, jemu ndaja tichutaye cjua xi vicuyá cojo xcusun xi sahme cojo cjuatacun xi tjëngë. Hacuaha jemu ndaja hye hacutjin xi fë macjain ná, hacutjin xi jyë cácun, hacutjin xi hmu cácun, cojo hacutjin xi ndaja ticaa ná.
2TI 3:11 Hacuaha ndaja camachaya ri tsëhë yëjë ni cjuañihi xi cavátju camá. Jercu choho cavátju camá ngajan nandya Antioquía cojo Iconio cojo Listra. Peru Nai naja ne, cavaxëtje ná me tsëhë yëjë ni cjuañihi xi cavátju camá jan.
2TI 3:12 Hacuaha yëjë ni xuta xi meje cjuaharcun me Nina ta tsëhë xi macjain rë me Cristu Jesús ne, hatuxa tjin xi cuatju me cjuañihi.
2TI 3:13 Peru xuta tsehen cojo xuta ndacha ne, quihndë nga nchujun ne, tichaja sa cjuatacun rë me, xi vindacha me yahnga xuta ne, hacuaha jima ndacha suvá me.
2TI 3:14 Ngaye ne, hacuiin cuejñixin cjua xi cachutaye, cjua xi cafë ma ngu tacuin cojo. Ha hye yo xi cavicuya ri ta,
2TI 3:15 tsëhë xi hisca cjuaquihndi riji ne, cachutaye xujun rë Nina. Hane xujun jan ne, vëhë sua machaya ri xi Nina ne, cuaxëtje naja me, ngayaan xi macjain naja Cristu Jesús.
2TI 3:16 Nina ne, casua me cjuatacun rë me ngujo xuta, sehe xuta jan ne, catsihindu me xujun rë Nina. Vëhë xi xujun jan ne, jemu machjirëhë xi cuicuya naja, xi cuichjataha naja, xi tsinguixi naja, xi cuincha naja ndiya rë cjuaquixi,
2TI 3:17 cojo sa xi ngayaan xuta ladu rë Nina ne, cuechutaha cjuatacun naja xi cuma nihña yëjë ni cjuandaja.
2TI 4:1 Tivutsejen naja Nina. Hacuaha tivutsejen naja Cristu Jesús, me xi tsichuva naja ngayëjë ni ngayaan xuta, sa xi quicun cuaha ngayaan, o sa xi caveyan. Tsëhë xi cuinduva nga me, hacuaha tsëhë xi cuitexa naja me ne, vëhë xi chjá cojo ri ta
2TI 4:2 tinoje cjua rë Nina cojo xuta. ¿Há chuya rë me? ¿há chuyiin rë me? peru tsimii sahmi rë, tinoje cojo rë me. Hacuaha tinojetehe rë me. Ninguixi me. Ticoye rë me. Peru nijyëtacuin cojo rë me.
2TI 4:3 Cuatjin nihñi ta, tsëhë xi cuetjucaa nixtin xi xuta ne, ha quihndë chuyiin rë me tsëhë cjua xi cjuaquixi. Sahmi me hacutjin xi meje rë me, hane cuihndë me tu mé ni cjua xi cuicuya maestru xi yahnga ta, maestru xi cuacun jan ne, suvá cjua xi chuya rë xuta ne, vëhë cuicuya me.
2TI 4:4 Cuatjin xi xuta ne, sahmi ngaxtun me cjua xi cjuaquixi ne, tu cuentu xi machjiriin ne, vëhë cuetaha rcu me.
2TI 4:5 Peru ngaye ne, meje rë xi tacun cahndë́ cjuatacun riji ngajñi rë tu mé ni ngu cjuacjintacun. Hacuaha tehe tacuin tsëhë yëjë ni cjuañihi. Tinoje cojo xuta cjua rë Nina, nihñichihin xá xi casua ri me.
2TI 4:6 Ngahan ne, chuva sa nixtin xi cjuë ngahan. Ha cama tiña nixtin xi cueya.
2TI 4:7 Ndaja casahme xa, casahmechehen xa xi casua ná Nina. Hacuaha ndaja macjain cuaha ná Nina.
2TI 4:8 Vëhë xi ha tjin ndaja cjuatjo xi sacú ná, tsëhë xi tyjahi cjuatacun naha. Nai naja, me xi tsichuva naja cojo cjuaquixi ne, me vëhë xi sua ná me cjuatjo jan hya xi cuechutaha nixtin. Hacuaha hacuiin tu suva ni ngahan xi sua ná me ta cojo ngayëjë ni xuta xi jemu meje rë me xi cuya nga Nai naja.
2TI 4:9 Nihñi xati tacuin ndove tjengui ná ta,
2TI 4:10 tsëhë xi cha Demas ne, cavetjuxin cha tsahan, quiji cha ngajan nandya Tesalónica. Cuatjin casahmi cha ta, tsëhë xi hitsë sa chuya rë cha tsëhë xcusun rë ngasunhndë. Cha Crescente ne, quiji cha ladu tsëhë Galacia. Hane cha Tito ne, quiji cha ladu tsëhë Dalmacia.
2TI 4:11 Hane suvá ni cha Lucas quitaha cha cojo ná. Noje cojo cha Marcos ne, sehe ndove cojo cha ta, tsëhë xi jemu machjirëhë cha xi cuisecoo ná cha tsëhë xa xi sahme.
2TI 4:12 Cha Tíquico ne, catsingátju cha ngajan nandya Efeso.
2TI 4:13 Hya xi cuindove ne, ndovecueje tsjian tsangá naha xi cavejñá ndava cha Carpo, ngajan nandya Troas. Hacuaha cojo xujun naha, hacuaha cojo yëjë ni sa xujun naha ne, ndovecueje.
2TI 4:14 Cha Alejandro chjine quicha ne, jemu choho casahmi cha cojo ná. Peru Nai naja ne, sehe sahmingojo me cojo rë cha, chuva rë jyë́ xi tjin rë cha.
2TI 4:15 Hane ngaye ne, tjin ri cuidadu tsëhë cha ta, tsëhë xi jemu casahmi cha condra cjua rë Nina xi canújin.
2TI 4:16 Hya xi tjun tjun casuá cjuaquixi naha xcun xutaxa rë ne, tsajin yo cavisecoo ná. Yëjë ni amigu naha ne, cavetjuxin me tsahan. Hane catitsijyëcacun Nina cojo me xi cuacun cavetjuxin tsahan jan.
2TI 4:17 Peru Nina ne, cavisecoo ná me, casua ná me ngahñu, xi cama cachjá cjua rë me cojo yëjë ni xuta xi hacuiin tsëhë nación tsëhë Israel. Hacuaha Nina ne, cavaxëtje ná me tsëhë xuta xi meje tsiquehen ná.
2TI 4:18 Hacuaha cuaxëtje ná Nai naja tsëhë ngayëjë ni cjuatsehen, sehe cjuahatsja ná me ngajan ngahnga hiscan xi vitexa me. Me vëhë xi hatuxa jyë me, hatuxa hñu me yëjë ni nixtin. Cuatjin jain.
2TI 4:19 Cha Aquila cojo chjuun rë cha, na Prisca ne, tehe rë me ngu nina naha. Hacuaha cojo xuta rë cha Onesíforo ne, tehe rë me ngu nina naha.
2TI 4:20 Cha Erasto ne, casetaha cha nandya Corinto. Hane cha Trófimo ne, tsëhë xi hmu rë cha ne, cafaña cha ngajan nandya Mileto.
2TI 4:21 Nihñi xati tacuin, ndove tjengui ná quihndë xi chaja sa chan hnchan. Cha Eubulo ne, cha Pudente ne, cha Lino ne, na Claudia ne, cojo ngayëjë ni xuta xi macjain rë cjua rë Cristu Jesús ne, tsingatju me nina riji.
2TI 4:22 Nai naja yaha ri me. Nina catisua nuju me cjuandaja rë me ngayujun ni.
TIT 1:1 Ngahan Pablo, sacuaha ngu mosu hndixahan tsëhë Nina ngahan, hacuaha apóstol tsëhë Jesucristu ngahan. Jesucristu casuaxa me ngahan xi cuisécoo rë xuta xi cavaxijinjñi Nina, cojo sa xi cumacjain rë me tsëhë Jesucristu, hacuaha cojo tsëhë xi cumachaya rë me cjuaquixi rë Nina hane ndaja tsejen xi má me tsëhë Nina.
TIT 1:2 Jercu vetahan tacun xi sacú naja cjuahñu xatsë, tsëhë xi cuatjin cachja Nina hisca hya xi chaja sa cuma ngasunhndë. Hacuaha Nina ne, vindachaain me cojo cjua rë me.
TIT 1:3 Quihndë ne, jercu nixtin rë xi casua me camachaya naja tsëhë cjua rë me. Ngahan ne, casatëxa ná xi suá cumachaya rë xuta tsëhë cjua vëhë, tsëhë xi Nina xi vaxëtje naja ne, cuatjin cavitexa me.
TIT 1:4 Tito, tsihindu ri carta vihi, ngaye xi sacuaha quihndi naha ngaye, tsëhë xi tangun mangutacun cojo Jesucristu. Nina Nahmi naja cojo Jesucristu xi vaxëtje naja ne, catisua ri me cjuandaja cjuajeya.
TIT 1:5 Cavejñá ri hiscan distritu Creta, cojo sa xi ngaye nihñichihin yëjë xi caviyuju vasen, hacuaha cojo sa xi tehe xa ngu jo xuta xi cumatitjun me tsëhë yungun tsëhë jima ngu nandya sacuahatjin cavitéxa ri.
TIT 1:6 Xuta xi cuatjin tehe xa rë me ne, meje rë xi jercu tyjahi xahasen rë me, hacuaha ngu ni chjuun rë xingu xingu me. Hacuaha meje rë xi quihndi rë me ne, ladu rë Jesucristu me, hacuaha xi tsajin cjua rë me xi choho sahmi me o sa xi vihndiin me.
TIT 1:7 Cuatjin meje rë, tsëhë xi xuta xi matitjun me sacuaha obispo ngajñi rë xuta rë yungun ne, me vëhë fahacuenda me tsëhë ngu tsë́ ngu xtí tsëhë Nina. Vëhë xi meje rë xi jercu tyjahi xahasen rë me. Mijí rë xi xta me, mijí rë xi ngutjen ma xti rë me, mijí rë xi cha chihi me, mijí rë xi hngacacun me, mijí rë xi jercu vetahacacun me tujún xi sacu rë me ngajñi rë ngu cjuandacha cojo xicjin me.
TIT 1:8 Xi meje rë ne, xuta xi cumatitjun me jan ne, tjin rë me cjuandaja cojo xuta hincha ndiya, hatuxa sahmi me cjuandaja, yehe cacun me, tsajin jyë́ rë me, hacuaha jiya me ndiya rë Nina, hacuaha jercu yehe xahasen rë me.
TIT 1:9 Hacuaha meje rë xi cuetaha me yojo rë me tsëhë cjua xi cjuaquixi xi ha camá rë me, cojo sa xi cuma cueya me xahasen rë xingu xingu sa xuta cjuachacun xi cjuaquixi, hacuaha cojo sa xi cuma sahmi me xi cuijnecacun xuta xi chjataha me tsëhë cjuachacun vëhë.
TIT 1:10 Meje rë xi xuta xi cuacun vë ne, tsëhë xi jercu tjin xuta xi vihndiin me tsëhë xutaxa rë yungun ne, jercu tjin xuta xi tujyë visiajmi me, jercu tjin xuta xi vindacha. Hatuxa ngajñi rë xuta tjë rë Israel xi cavisehen ladu tsëhë Jesucristu ne, jercu tjin xuta xi cuacun vë.
TIT 1:11 Sahmi ngujyë xi nihña xi hindë cuichjaain me, tsëhë xi tsinguetsun me cjuatacun rë xuta tsëhë yëjë ngu ndihya. Cuatjin sahmi me hya xi vicuya me ngu cjua xi hisca mijí rë xi cuatjin cuicuya me. Hane cuatjin sahmi me, cojo sa xi sacú rë me tujún ngajñi rë ngu cjuandacha.
TIT 1:12 Ngu profeta tsëhë distritu Creta ne, ha suvá me vëhë xi cachja me tsëhë xuta rë nangui rë me cuitjin: Yëjë ni xuta Creta ne, hatuxa ndacha me, jercu chu me, jercu vatjutaha jinë me, hacuaha jercu tsëhë́ me. Cuatjin cachja me.
TIT 1:13 Hane jercu quixi xi cachja me. Vëhë xi hñu nojetehe rë me, cojo sa xi ndaja cumacjain rë me cjuachacun,
TIT 1:14 hacuaha cojo sa xi cuetaharcuaain me tsëhë cuentu tsëhë xuta tjë rë Israel o sa xi cjua xi vitexa xuta xi tsindeya me cojo cjuandacha cjua xi cjuaquixi.
TIT 1:15 Me xi tyjahi cjuatacun rë ne, tsajin mé xi tsavi xi cuma rë me. Peru me xi macjaain rë cjuachacun ne, tsajin mé xi tsaviin xi cuma rë me ta hisca cjuatacun cojo xahasen rë me ne, ha camachocun.
TIT 1:16 Chja me xi vëë me Nina, peru yëjë ni xi sahmi me ne, tsingacun me xi quixiin. Xuta xi cuatjin cun ne, sahmi xi choho vëë Nina me. Hatuxa vihndiin me, hane machjiriin me xi sahmi me cjuandaja.
TIT 2:1 Cjua xi noje ne, meje rë xi matangun cojo cjuachacun xi cjuaquixi.
TIT 2:2 Tinoje cojo yëjë ni xihin changá, hacuiin tsingatjutaha me xi cuihi me o sa xi sinë me, hacuaha meje rë xi cuma chjahárcun rë me, meje rë xi yehe cacun me. Meje rë xi ndaja cumangucacun me cojo Nina, hacuaha ndaja tjin rë me cjuahmutacun, hacuaha ndaja scaa rë me tu mé ni cjuacjintacun.
TIT 2:3 Hacuanitjin ni tinoje cojo yëjë ni yachjin changá ne, meje rë xi jeya me, hacuaha mijí rë xi ndesu me, hacuaha mijí rë xi cuetaha me yojo rë me vinu. Meje rë xi cuicuya me yëjë ni xi ndaja.
TIT 2:4 Meje rë xi cuicuya me yëjë yachjin xi hitsë ni chuva nu rë ta meje rë xi tsihmucacun me xihin rë me cojo quihndi rë me,
TIT 2:5 hacuaha xi yehe cacun me, tyjahi xahasen rë me, hacuaha xi ndaja cjuahacuenda me cahntsua ndava me, hacuaha xi ndaja me, hacuaha xi cuihndë me tsëhë xihin rë me. Cuatjin meje rë xi cuicuya na me, cojo sa xi tsajin yo choho cuichja tsëhë cjua rë Nina.
TIT 2:6 Hacuaha ni tjin ni tinoje cojo yëjë ni xuta xi xihin xi hitsë ni chúva nu rë ta hacuaha meje rë xi yehe cacun me.
TIT 2:7 Hacuaha ngaye sove tejñi ntsacu tsëhë cjuandaja. Hane hya xi cuicoye ne, meje rë xi jercu tyjahi cjuatacun riji, hacuiin xcuehyu cuinoje ta
TIT 2:8 suvá cjua xi ndaja, xi tsajin yo cuma cuichjataha tsëhë. Cuatjin meje rë, cojo sa xi xuta condra riji ne, cuma sava rë me, tsëhë xi tsajin mé xi choho cuichja me tsajan.
TIT 2:9 Tinoje cojo mosu hndixahan ne, meje rë xi cuihndë me tsëhë yëjë cjua xi cuichja nai rë me. Meje rë xi ndaja me, hacuiin choho cjuayangui me tsëhë nai rë me.
TIT 2:10 Mijí rë xi tsichëjë me ta meje rë xi tsingacun me xi cuma cumangutacun cojo rë me. Cuatjin meje rë xi sahmi me, cojo sa xi yëjë xuta ne, cumachaya rë me xi jercu ndajyihi cjuachacun rë Nina, me xi vaxëtje naja.
TIT 2:11 Nina ne, catsingacun me cjuandaja rë me, hane cjuandaja vë ne, hacui xi cuaxëtje naja ngayejen ni xuta.
TIT 2:12 Hacuaha cjuandaja vëhë ne, vicuya naja xi meje rë xi cuejñaxen yëjë ni cjuatsehen cojo yëjë ni xcusun tsëhë ngasunhndë xi meje naja, hacuaha vicuya naja xi meje rë xi tyjahi cjuatacun naja, meje rë xi tsajin jyë́ naja, meje rë xi nechanyan ndiya rë Nina xi tivanguen cojo ngasunhndë naja.
TIT 2:13 Meje rë xi cuatjin nihña nguyëjë rë xi nechanyan rë nixtin ndajyihi xi jercu vetahantacun, nixtin xi cuetjucaatsejen cjuahasen ndajyihi rë Nina naja Jesucristu, me xi cuaxëtje naja, me xi jercu jyë hnga me cojo hasen rë me.
TIT 2:14 Me vëhë ne, casua me yojo rë me xi cueya me ngatsë naja, cojo sa xi cuaxëtje naja me tsëhë yëjë ni cjuatsehen, hacuaha tsityjahi me ngayaan ne, sehe sahmi tsëhë me ngayaan, hane ngayaan ne, jercu meje nihña cjuandaja.
TIT 2:15 Tinoje yëjë cjua vëhë. Tinche ndiya xuta hacuaha tinojetehe rë me nguñajatacuin. Catiin cahndë́ xi yo sahmi chúva ri cojo cjuatacun riji.
TIT 3:1 Ninguitsjin rë yëjë xuta ladu rë Jesucristu xi meje rë xi cuihndë me tsëhë xutaxa rë xi vitexa, hacuaha meje rë xi yëjë ni nixtin ne, tjin ngu cacun me xi sahmi me cjuandaja.
TIT 3:2 Tinoje cojo rë me ta mijí rë xi choho cuichja me tsëhë hisca ngu xuta. Meje rë xi hacuiin hngacacun me ta xi meje rë ne, jeya me, hacuaha ndaja me cojo xcusun rë me cojo yëjë ni xuta.
TIT 3:3 Cuatjin noje cojo rë me, tsëhë xi ngayaan ne, hacuaha jemu chúva ningatahantacun hatsëë, hacuaha cavinuhyaan tsëhë Nina, hacuaha cavinechanyaan ngu ndiya xi hacuiin hacui. Caninguisehen rcun cojo yëjë ni xcusun cjuasua. Cavinechanyan ngu ndiya rë cjuatsehen, ngu ndiya rë cjuaxin. Xuta ne, choho cavëë me ngayaan, hacuaha choho cahyan xingueen xingu xingu ngayaan.
TIT 3:4 Peru Nina, me xi vaxëtje naja ne, hya xi catsingacun me cjuandaja rë me cojo cjuahmutacun xi tjin rë me xi cuma rë yëjë ni xuta ngasunhndë ne,
TIT 3:5 cavaxëtje me ngayaan. Hacuiin tsëhë xi jercu ndaja canihña ta tsëhë xi yuma camá rë me ngayaan xi cavaxëtje me ngayaan. Cuatjin cavaxëtje me ngayaan hya xi casahmi me xi cavuya catsin ngayaan hya xi catsityjahi me ngayaan. Hacuaha cuatjin cavaxëtje me ngayaan hya xi casua naja me cjuahñu xatsë hya xi casua me ngayaan Hasen rë me.
TIT 3:6 Hane ngatsë rë cjuandaja xi casahmi Jesucristu, me xi vaxëtje naja ne, vëhë xi cuatjin jemu casua Nina ngayaan Hasen rë me,
TIT 3:7 cojo sa xi cjuë jyë́ naja ngatsë rë cjuandaja rë Jesucristu, hacuaha chjahanntsan cjuahñu xatsë xi jercu vetahan tacun.
TIT 3:8 Yëjë ni cjua xi cachjá cojo ri vëhë ne, jemu cjuaquixi. Hacuaha meje ná xi cuinoje yasen yasen ni yëjë cjua vëhë cojo xuta xi camangucacun me cojo Nina, cojo sa xi me xi cuacun jan ne, sahmi me ngahñu xi sahmi me suvá cjuandaja. Yëjë ni cjua vëhë ne, jercu ndaja hacuaha jercu machjirëhë rë xuta.
TIT 3:9 Xín tejñi yëjë ni cjuavisiajmi xi hacuiin machjirëhë; xín tejñi cjuavisiajmi tsëhë ñihi rë yëjë xutachanga rë xingu xingu me; xín tejñi yëjë ni cjuavisiajmi tsëhë xuta xi cjan cojo xicjin; xín tejñi yëjë ni cjuavixcan tsëhë ley rë Moisés. Yëjë ni cjuavisiajmi vëhë ne, machjiriin hacuaha tu mahya cuisiajme.
TIT 3:10 Ngu xuta xi vaxë me ngu ngu xuta tsëhë ngajñi rë xuta yungun xi cjue ladu rë me ne, tinojetehe rë me ngu ndiya o hisca jo ndiya. Xi cjuë vëhë ne, hindë xicachasiin tsëhë me,
TIT 3:11 tsëhë xi ngaye ne, ha hye xi ngu xuta xi cuatjin sahmi ne, jiya me ngu ndiya xi xín cjui, hacuaha sahmi me cjuatsehen. Hane cjuatsehen rë me jan ne, vëhë tsingacun xi cuaaintjin xi sahmi me.
TIT 3:12 Hya xi tsingátju Artemas o sa Tíquico xi cjuetjengui ri ne, nihñi ngujyë xi cuindove tjengui ná ngajan Nicópolis, tsëhë xi tuxa ngajan cavejñángucácun xi tsingátju chan hnchan.
TIT 3:13 Tisecuee rë Zenas, me xi abogado me, cojo Apolos ne, catjindujú me cojo ndiya rë me, hane chjehecuende xi tsajin mé tsichaja rë me ndiya.
TIT 3:14 Hacuaha meje rë xi xuta naja ne, cuma rë me hacutjin sahmi me cjuandaja, cojo sa xi cuisecoo me ngajñi rë ngu cjuachaja xi jercu sahmi ngujyë. Meje rë xi cuengui chjí rë me cojo ngasunhndë rë me.
TIT 3:15 Yëjë ni me xi siutahá cojo ná ne, tsingatju me ngu nina riji. Hacuaha tehe rë xuta xi hmucacun me ngayaan ngatsë rë xi tjin tangun cjuatacun naja cojo Jesucristu ngu nina. Nina ne, catisua nuju me cjuandaja ngayujun ni. Cuatjin jain.
PHM 1:1 Ngahan Pablo, xi tejñaya ndavaya ngatsë rë xi sahme xa rë Jesucristu ne, tsihindu cojo Timoteo xingueen xujun vihi xi ningatjin nuju ngayun Filemón, ngayun xi jemu hmutacuin nuju, ngayun xi visecun niji xcun xa xi nechantahan.
PHM 1:2 Hacuaha ningatjin nuju xujun vihi ngayun Apia, ngayun xi hacuaha xinguin nuju, cojo ngayun Arquipo, ngayun xi tangun canihña cojo nuju ngahñu ngatsë rë cjua rë Nina, cojo ngayujun sa xuta ladu rë Nina xi ma tangun ngayun ngajan ndava me vëhë.
PHM 1:3 Nina Nahmi naja cojo Nai naja Jesucristu ne, catisua nuju me cjuandaja cjuajeya.
PHM 1:4 Ngayun Filemón, hya xi veyanangë nuju ngajñi rë oración naha xi tisahme ne, nchunchujun ni ne, suá nacuechji rë Nina naha ta,
PHM 1:5 tsëhë xi tivechutaha ná cjua xi jemu tjin nuju cjuahmutacun cojo yëjë xuta ladu rë Nina hacuaha jemu tjin ngu tacún cojo Nai naja Jesús.
PHM 1:6 Hacuaha féhya rë Nina xi ngayun xi mangutacun cojo Nai naja sacuatjin niji ngayin ne, catuxaha sa me cjuatacun nuju xi cuijnercun yëjë ni cjuandaja xi tjin naja ngatsë rë xi tjin tangun cjuatacun naja cojo Jesucristu.
PHM 1:7 Jemu ndama ná, tai, hacuaha jemu sacu ná cjuetacun ngatsë rë cjuahmutacun xi tjin nuju ta, tsëhë xi ngatsë nuju ne, casacu rë xahasen rë xuta ladu rë Nina cjuetacun.
PHM 1:8 Vëhë xi handasa tsacjun xi cuitéxa nuju mé xi ndatjin nihñu tsëhë xi tjin tangun cjuatacun naha cojo Jesucristu ne,
PHM 1:9 peru hitsë sa chuya ná xi cjuéhya nuju tsëhë xi ngajñi naja ne, jiya vasen xi hmí cjuahmutacun. Ngahan, Pablo ne, jemu changá ngahan hacuaha tejñaya ndavaya quihndë ngatsë rë xi sahme xa rë Jesucristu ne,
PHM 1:10 tiféhya nuju ngu cjuandaja xi cuma rë cha Onésimo, cha xi sacuaha quihndi naha tsëhë xi camá cafaha cha cjuandajyihi xi chja tsëhë Jesucristu xi casuá rë cha nguehe ndavaya.
PHM 1:11 Handasa camachjiriin nuju cha mosu hndixahan nuju cha Onésimo hatsëë nixtin jan ne, peru quihndë ne, hisca ngayun hisca ngahan ne, jemu machjirëhë naja cha.
PHM 1:12 Quihndë ne, titsingátju nga nuju cha, hane meje ná xi chjuhunntsun cha sacuaha xi ngahan suva xi chjuhunntsun ná.
PHM 1:13 Hacuaha meje ná xi cuejña cha cojo ná, cojo sa xi cjuahacuenda ná cha ngojo nuju jinguyëjë rë xi tejñaya ndavaya ngatsë rë cjuandajyihi xi chja tsëhë Jesucristu.
PHM 1:14 Peru mijí sahme tu mé ni hya xi chaja sa cuinújun mé xi ndatjin xi sahme. Cuatjin ta, tsëhë xi meje ná xi cjuandaja xi nihñu ne, hacuiin cojo cjuachan ta suvá cojo cjuasua nuju.
PHM 1:15 Cavetjuxin rë xuma quihndi tsujun ngujo nixtin cojo sa xi quihndë xi cuya cha ne, cuejñacahndë nga cha cojo nuju yëjë ni nu yëjë ni nixtin.
PHM 1:16 Peru ha quihndë hacuiin sacuaha ngu mosu hndixahan nuju cha xi cuejña cha cojo nuju ta sacuaha ngu xuta xi jemu vengui sa chjí rë me, sacuaha ngu xingun xi jercu hmutacún. Ngahan ne, jercu hmú cacún cha, hacuaha ngayun ne, hitsë sa ndaja hmutacún cha, hacuiin suvá sacuaha ngu xuta ni ta sacuaha ngu xuta ladu rë Nai naja.
PHM 1:17 Quihndë ne, ngayun Filemón ne, ngatsë rë xi ha hyun ta ngayaan ne, tangun ni mangutacun cojo Jesucristu ne, vëhë xi quihndë ne, chjuhunntsun cha sacuaha xi chjuhunntsun ná ngahan.
PHM 1:18 Hane sa xi mé choho casahmi cha cojo nuju, o sa xi quitjen cha tsujun ne, vëhë ne, tejñu ladu naha.
PHM 1:19 Ngahan Pablo ne, cojo letra naha suva titsihindu cjua vihi; ngahan cuejñángojo vëhë. Mijí tsinguitsjén nuju xi ngayun ne, jemu quitjun camahani tsahan, tsëhë xi casuá camachaya nuju cjuandajyihi xi chja tsëhë Jesucristu.
PHM 1:20 Quihndë tai ne, tisecun ná hitsë ta ngayaan ne, tjin tangun cjuatacun naja cojo Nai naja; tuhun hitsë cjuetacun xahasen naha ta ngayaan ne, tjin tangun cjuatacun naja cojo Jesucristu.
PHM 1:21 Cuitjin tsihindu nuju ta, tsëhë xi tjin ngu cácun cojo nuju ta cuinuhyun tsahan, hacuaha hvë ta hisca quisun sa nihñu tsëhë cjua xi chjá cojo nuju.
PHM 1:22 Hacuaha tuhunndujun ngu cahndë́ hiscan xi cuitejña ta, ngahan ne, vetahácacun xi Nina ne, sua me cahndë́ cjuë́tjëngë nga nuju ngatsë rë xi cuatjin chjahyun rë me.
PHM 1:23 Epafras, me xi hacuaha jiya ndavaya cojo ná ngatsë rë xi sahmi me xa rë Jesucristu ne, hacuaha tsingatju me ngu nina tsujun ngayun Filemón.
PHM 1:24 Hacuanitjin ni Marcos, Aristarco, Demas, cojo Lucas, me xi cuacun tangun sahmi xa cojo ná ne, hacuaha tsingatju me ngu nina tsujun.
PHM 1:25 Catisehen cjuandaja rë Nai naja Jesucristu cahntsua xahasen nuju ngayujun ni. Cuatjin jain.
HEB 1:1 Nixtin titjun ne, jemu cjín ndiya hacuaha jemu cjín chuva rë xi casua Nina camachaya rë xutachanga naja ngu cjua hya xi catsingatju me cjua cojo profeta rë me.
HEB 1:2 Peru quihndë nixtin vihi ne, casua me camachaya naja hya xi catsingatju me cjua cojo Quihndi rë me. Hane me vëhë xi cachja Nina xi cuma Nai rë yëjë ni xcusun xi tjin ngasunhndë, hacuaha casuaxa Nina Quihndi rë me jan xi me vëhë casahmi me ngasunhndë.
HEB 1:3 Hacuaha sacuatjin jemu jyë hnga Nina cojo hasen ndajyihi rë me ne, cuatjin jyë hnga Quihndi rë me cojo hasen rë. Hacuaha sacuajyihi suvá Nina ne, cuajyihi camahani Quihndi rë me. Hacuaha Quihndi rë Nina jan ne, yahangui me yëjë ni xcusun xi tjin ngasunhndë cojo cjua rë me xi jemu hñu ngahñu rë. Hane xi cafë catsityjahi me xuta tsëhë jyë́ rë ne, sehe quiji me ngahnga, cavejña me taha ladu quixi tsëhë Nina.
HEB 1:4 Hacuaha tu tjin xi hitsë sa jemu ndajyihi xa xi casacu rë Quihndi rë Nina xi cumá rë xa xi casacu rë ángel ne, hacuanitjin ni cavechutaha me xi hitsë sa jemu camatitjun me tsëhë ángel xi cuacun jan, hya xi quiji cavejña me cojo Nina.
HEB 1:5 Hisca xi ngu ángel ne, cachjaain Nina cojo cjua vihi, sacuatjin cachja me cojo Quihndi rë me: Ngaye xi quihndi naha ngaye; hacuaha quihndë casuáxa ri. Cuatjin cachja me. Hacuaha cachjaain me tsëhë ngu ángel cuitjin: Ngahan cumá ngahan nahmi rë cha, hane cha vëhë ne, cumá cha quihndi naha. Cachjaain me cuatjin cojo ángel.
HEB 1:6 Hane ngu ndiya nga, hya xi tsingatju me Quihndi ngu rë me ngasunhndë ne, cuitjin chja me tsëhë Quihndi rë me: Yëjë ni ángel naha ne, catjaharcun rë me. Cuatjin cachja me.
HEB 1:7 Hane xi tsëhë ángel rë me ne, cuitjin chja me: Ngahan sahme xi ángel naha ne, tangun xcusun rë cojo tjo, hane ángel xi fahacuenda xa naha ne, sahme xi tangun xcusun rë cojo ndihi. Cuatjin cachja me.
HEB 1:8 Peru xi tsëhë Quihndi rë me ne, cuitjin chja me: Ngayun Nina, tsajin nu tsajin nixtin cuijnetaha gubiernu nuju, hacuaha gubiernu xi nihñu ne, hatuxa cjuaquixi.
HEB 1:9 Canihmutacun cjuaquixi hane choho cahyun cjuatsehen; hane vëhë xi ngahan Nina nuju ne, cavaxejen nuju, hacuaha hitsë sa jyë cjuasua casuá nuju ngayun xi cuma rë xingun. Cuatjin cachja me.
HEB 1:10 Hacuaha chja nga me cuitjin: Ngayun, Nai naha, ntsacu cavetsihin ne, ngayun canindujun nangui; hacuanitjin ni ngahnga, hacuaha ngayun canindujun.
HEB 1:11 Yëjë xcusun vëhë ne, cuechu nixtin xi cjuë, peru ngayun ne, tsajin nu tsajin nixtin xi cjuë ngayun. Hacuaha yëjë xcusun vëhë ne, cuma changá sacuatjin rë ngu tsjian xi chajá rë;
HEB 1:12 hacuaha cuechu nixtin xi nijeyun xcusun xi cuacun vë sacuaha ngu tsjian tsjanga, hacuaha nindeyun sacuaha vindeya ngu tsjian xi chajá rë. Peru ngayun ne, hatuxa vindeyaain ngayun; hacuaha nixtin nuju ne, hatuxa cuijnitaain. Cuatjin cachja me.
HEB 1:13 Hacuaha hisca ngu ángel ne, cachjaain Nina cojo rë cjua vihi, sacuatjin cachja me cojo Quihndi rë me: Tinechin nguehe ladu quixi naha, hisca hya xi yëjë ni xi sahmi ri condra ne, cuiyujú ngahan ngahma gubiernu riji.
HEB 1:14 Sacuaha ángel ne hacui hasen xi tsujyihiya tixa tsëhë Nina. Nina tsingatju me ángel xi cuacun vë xi fehe visecoo naja ngayaan xi cuetjuntjen tsëhë jyë́ naja.
HEB 2:1 Vëhë xi meje rë xi hitsë sa ndaja cuetahanrcun cjuandajyihi xi cavisiñuju, cojo sa xi hacuiin tu hitsë tu hitsë ne, cuetjunxen tsëhë ndiya ndajyihi xi tivanguen.
HEB 2:2 Ta sacuaha ley rë Nina xi cachja ángel hatsëë nixtin ne, tjin jain rë ngahñu. Hane yëjë xuta xi casahmi cjuatsehen hacuaha cahndiin me tsëhë ley jan ne, camá me castigu sacuatjin xi mameje rë jyë́ rë me.
HEB 2:3 Hacuaha ngayaan ne, cumaji cuatjuhnga ngayaan tsëhë castigu xi satë naja, sa xi chasen cjuandajyihi xi jercu tu ndajyihi camahani xi chja hacutjin cuetjuntjen. Cjuandajyihi vëhë ne, titjun Nai naja cachja me, hane xuta xi cahndë me cjua rë Nai naja ne, hacuanitjin ni cachja me cojo naja xi camá ngascan.
HEB 2:4 Hacuaha Nina ne, cojo jemu cjín cjuarcun xi ña quijircun naja hisca carcun cachutsejen ne, casua me camachaya naja xi cjuandajyihi vëhë ne, cjuaquixi jain. Hacuaha hya xi casua naja Nina Hasen rë me sacuatjin cavejñangucacun me ne, cuatjin xi casua me camachaya naja xi cjuandajyihi vëhë ne, cjuaquixi jain.
HEB 2:5 Nina ne, cachjaain me xi ngahma gubiernu rë ángel cuejña ngasunhndë, hya xi cuinduva me sahmi me gubiernu ngasunhndë xi tinújan tsëhë vi.
HEB 2:6 Tjin ngu cahndë́ tsëhë xujun rë Nina xi cachja ngu xuta cojo Nina cuitjin: ¿Mé vengui chjí niji ngayin xuta, xi cuatjin ninguitsjun niji? ¿Mé vengui chji niji xi cuatjin chjuhuncuendun niji?
HEB 2:7 Ngayun ne, ngujo nixtin ne, hitsë sa caninguijnu niji xi cuma rë ángel, peru canihñu yehe canihñu hnga niji cojo cjuatacun niji hacuaha canihñu xi chjihinjendin;
HEB 2:8 yëjë ni xcusun xi tjin ngasunhndë ne, caviyujun ngahma gubiernu niji ngayin xuta. Cuatjin cachja ngu xuta cojo Nina. Hya xi cuatjin caviyuju Nina yëjë xcusun xi cuacun vë ngahma gubiernu rë xuta ne, yëjë ni caviyuju me, hisca ngu xcusun catsicanguiin me. Peru hisca quihndë ne, cjëë chan xi yëjë xcusun xi cuacun vë ne, cuiyuju ngahma gubiernu rë xuta.
HEB 2:9 Peru xi hyan ne, Jesús, xi ngu jo nixtin ne, hitsë sa catsinguijne Nina me xi cumá rë ángel, peru quihndë ne, casahmi jyë casahmi hnga Nina me cojo hasen rë me hacuaha casahmi me xi Jesús ne, cjuahájenda me. Cuatjin casahmi Nina cojo rë me tsëhë xi jemu jyë cjuañihi cavatju me hya xi cahme me. Cuatjin camá cojo sa xi cojo cjuandaja rë Nina ne, Jesús cueya me ngatsë rë yëjë ni xuta.
HEB 2:10 Nina ne, casahmi me yëjë ni xcusun xi tjin, tsëhë xi cuatjin chuya rë me. Hacuaha meje rë me xi jemu cjín quihndi rë me xi cuma yehe cuma hnga cojo cjuatacun rë. Vëhë xi ndatjin xi sahmi Nina xi ngajñi rë cjuañihi xi cavatju Jesús, me xi vaxëtje naja ne, cuechutaha me yëjë ni hacutjin xi meje rë Nina xi cuechutaha me.
HEB 2:11 Me xi tiviyujuxin rë xuta xi cumá tsëhë Nina me cojo yëjë ni xuta xi tiviyujuxin ne, ngu ni nahmi rë me. Hane vëhë xi me xi Quihndi rë Nina ne, ma savaain rë me xi chja me xi xicjin me xuta xi cuacun jan,
HEB 2:12 sacuatjin chja me xcun xujun rë Nina xi chja me cuitjin: Suá cumachaya rë yëjë xingueen yo ngayun, hacuaha cuaxëndaja nuju së́ tsujun ngajñi rë me hiscan xi matangun me. Cuatjin cachja Quihndi rë Nina.
HEB 2:13 Hacuaha chja nga me cuitjin: Hacuaha ngayun xi cumangu cácun cojo nuju. Cuatjin cachja nga me. Chja nga me cuitjin: Nguehe cuajyihi ngahan cojo yëjë quihndi nuju xi catuhun ná. Cuatjin cachja me.
HEB 2:14 Tsëhë xi ngayaan quihndi rë Nina ne, tjin jni tjin yojo naja ne, vëhë xi Jesús ne, hacuaha casacu rë me jni casacu rë me yojo rë me, cojo sa xi ngatsë rë cjuaveya rë me ne, cjuahataha me ngahñu rë xitsehen xi matitjun xi vitexa rë cjuaveya.
HEB 2:15 Hacuaha ngatsë rë cjuaveya rë me ne, ma sahmi ndaya naja me ngayejen ni xuta xi rcun cjuaveya. Hane tsëhë xi cuatjin rcun cjuaveya ne, vëhë xi sacuaha xi cjuaveya ne, cavitexa naja xcun cjuahñu naja.
HEB 2:16 Ha cjuaquixi ta hacuiin canduva me xi cuisecoo me ángel ta xi canduva me ne, tsëhë xi cuisecoo naja me ngayaan xuta tjë rë Abraham.
HEB 2:17 Hane ngatsë rë vëhë xi casahmi ngujyë xi camá me sacuaha ngayaan cojo ngayëjë ni chuva rë sacuatjin cun ngayaan xicjin me, cojo sa xi hacuaha cuma me ngu nahmi xi matitjun xi tjin rë me cjuayumatacun, hacuaha jemu ndaja sahmichihin me xa rë Nina, hacuaha cojo sa xi cuechjitje me jyë́ naja.
HEB 2:18 Hane tsëhë xi cuatjin suvá Jesús cavatju me cjuañihi hya xi cafahachuva xitsehen me ne, vëhë xi quihndë ne, hacuaha cuma cuisecoo naja me ngayaan hya xi tifahachuva naja xitsehen.
HEB 3:1 Ngayujun ni xuta ladu rë Nina xi cavaxijin nuju me xi cuma tsëhë me ngayun ne, cuisiajme hitsë tsëhë Jesús, me xi catsingatju Nina xi sua cumachaya naja tsëhë cjuachacun xi nújan xi macjain naja, me xi hacuaha má nahmi xi matitjun tsëhë cjuachacun xi nújan xi macjain naja.
HEB 3:2 Jesús ne, jemu ndaja casahmichihin me yëjë hacutjin xi meje rë Nina xi casuaxa rë me, sacuatjin casahmi xutachanga naja Moisés hatsëë xi hacuaha jemu ndaja casahmichihin me xa xi cavisecoo me xuta rë Nina.
HEB 3:3 Jesús ne, vechú chuva rë xi hitsë sa cuma jyë cuma hnga me cojo hasen rë me xi cuma rë Moisés. Má sacuatjin rë ngu cha xi sahmi ngu ndihya, xi vechú chuva rë xi hitsë sa chjaharcun rë cha xi cuma rë ndihya xi casahmi cha jan ta,
HEB 3:4 tsëhë xi yëjë ni ndihya ne, tjin ngu xuta xi casahmi me, vëhë xi camá, peru me xi casahmi yëjë ni xcusun xi tjin ngasunhndë ne, hacui Nina.
HEB 3:5 Moisés ne, ngu xuta xi sahmi xa rë Nina ni má me, hane jemu ndaja chihin casahmi me xa xi casatëxa rë me ngajñi rë yëjë ni xuta rë Nina. Hane xa xi casahmi me jan ne, xi catsingasca rë me cjuatacun rë xuta tsëhë cjua xi cuichja Nina cuma ngascan.
HEB 3:6 Peru Cristu ne, Quihndi rë Nina camahani má me, hane jemu ndaja chihin casahmi me cuidadu yëjë ni xuta rë Nina. Xuta xi cuacun vë ne, hacui ngayaan, sa xi hacuiin nismetacun cjuatacun xi rcun camahani hacuaha sa xi hacuiin nismetacun cjuasua xi tjin rë xahasen naja xi vetahan tacun Nina.
HEB 3:7 Vëhë xi meje rë xi cuetuhunrcun cjua xi chja Hasen rë Nina xi chja cuitjin: Sa xi cuisiñuju cjua xi chjá quihndë ne,
HEB 3:8 hacuiin nihñu taja tacún sacuatjin casahmi xuta hya xi cachjataha me Moisés hacuaha cafahachuva ná me ngajan hiscan jemu xín tsëhë nandya.
HEB 3:9 Hane ngajan cafahachuva ná xutachanga nuju, handasa ha cavëë me yëjë cjuandaja xi casahme cahntsua yachan nu xi catsujyihiya me jan.
HEB 3:10 Vëhë xi camacjan ná cojo yëjë xuta xi caviyuju nixtin hya, cuitjin cachjá tsëhë me: “Cjuatacun rë me ne, hatuxa hacjahi ndiya fi, hvíin me ndiya naha.” Cuatjin cachjá.
HEB 3:11 Vëhë xi camacjan ná cojo rë me hane cachjá quixi xi tsajin nu tsajin nixtin xi cuisehen cjuahajenda tangun me cojo ná. Cuatjin cachja Hasen rë Nina.
HEB 3:12 Nechun cuidadu, ngayujun ni, cojo sa xi tsajin hisca ngu ngayun xi cumatsehen cjuatacun nuju hacuaha cumacjaain nuju tsëhë me, sa tu cjuatacun tsehen jan ne, cuaxëxin nuju tsëhë Nina xi quicun me.
HEB 3:13 Cahndë́ rë vëhë ne, nchunchujun ni ne, tuhun cjuetacun xingun xingu xingu ngayun jinguyëjë rë xi tjin sa hora quihndë, cojo sa xi tsajin ngu ngayun xi cuma taja cjuatacun nuju ngatsë rë cjuandacha xi sahmi cjuatsehen.
HEB 3:14 Ta cojo ngayaan satë naja cjuandaja xi tjin rë Cristu, sa xi scaa jain naja cumangutacun hisca xi cuijnetaha nixtin naja, sacuatjin camangutacun ntsacu cavetsihin.
HEB 3:15 Tetuhunrcun nga sacuatjin chja xujun rë Nina xi chja cuitjin: Sa xi cuisiñuju cjua xi chjá quihndë ne, hacuiin nihñu taja tacún sacuatjin casahmi xuta hya xi cachjataha me Moisés. Cuatjin chja xujun rë Nina.
HEB 3:16 ¿Yo me xi cuatjin cachjataha rë Moisés hya xi cavatju cavisiñuju me cjua rë Nina ni? Yëjë ni xutachanga naja xi cavaxëxin Moisés tsëhë nangui Egipto.
HEB 3:17 Hane ¿yo me xi camacjan rë Nina cojo rë cahntsua yachan nu ni? Ha hacui ni me changá xi cuacun vë xi casahmi cjuatsehen hane cahme me ngajan hiscan jemu xín tsëhë nandya.
HEB 3:18 Hane ¿yo me xi cachja quixi Nina cojo xi tsajin nu tsajin nixtin xi cuisehen cjuahajenda tangun cojo me ni? Ha hacui ni me changá xi cuacun vë xi cahndiin tsëhë Nina.
HEB 3:19 Hane cuatjin camá xi camaji cavisehen cafahajenda me ngajan, tsëhë xi camacjaain rë me.
HEB 4:1 Vëhë xi jinguyëjë rë xi tacun quicun cjua xi cachja Nina xi cuisen chjahanjendan tangun cojo rë me ne, meje rë xi cumacjíntacun sá tu tjin ngu ngayun xi cuechuntuun xcusun ndajyihi vëhë.
HEB 4:2 Ngayaan ne, hacuaha cojo ngayaan camachaya naja cjuandajyihi vëhë sacuatjin camachaya rë xutachanga naja xi cuacun jan; peru me xi cuacun jan ne, tsajin mé camachjirëhë rë me cjua xi cavisiñuju me jan ta, tsëhë xi hya xi cavisiñuju me cjua jan ne, camacjaain rë me.
HEB 4:3 Peru ngayaan xi camacjain naja ne, cuma cuiseen chjahanjendan tangun cojo rë Nina. Sacuatjin xi ha cachja me tsëhë cjuandajyihi vëhë, xi cachja me cuitjin: Vëhë xi camacjan ná cojo rë me hane cachjá xi tsajin nu tsajin nixtin xi cuisehen cjuahajenda tangun me cojo ná. Cuatjin cachja me. Nina ne, catsinguijnetaha me xa xi sahmi me hisca hya xi casahmi me ngasunhndë;
HEB 4:4 hacuaha tjin ngu cahndë́ tsëhë xcun xujun rë me ne, cachja me tsëhë nixtin xi má yatu jan cuitjin: Ngahan ne, nixtin xi má yatu ne, cafahájenda tsëhë yëjë ni xa xi casahme. Cuatjin cachja me.
HEB 4:5 Hacuaha ha xujun vëhë ni ne, cachja nga me cuitjin: Tsajin nu tsajin nixtin xi cuisehen cjuahajenda tangun me cojo ná. Cuatjin cachja me.
HEB 4:6 Hane tsëhë xi chaja sa cuisehen yahnga xuta xi cjuahajenda tangun me cojo Nina ne, hacuaha tsëhë xi xutachanga naja xi cojo tjun camachaya rë cjuandajyihi jan ne, cavisiin me cafahajenda tangun me, ngatsë rë xi cahndiin me tsëhë cjua xi tjun camachaya rë me jan ne,
HEB 4:7 vëhë xi Nina ne, cavejña nga me ngu nixtin, xi hacui quihndë. Jemu tsëë cavatju nixtin xi cavitexa Moisés, hya xi catsihindu xutachanga naja David cjua rë Nina xi ha canújan titjun xi chja cuitjin: Sa xi cuisiñuju cjua xi chjá quihndë ne, hacuiin nihñu taja tacún. Cuatjin cachja Nina.
HEB 4:8 Sa xi xutachanga naja Josué quijicojo me xuta xi cjuahajenda tangun cojo Nina ne, Nina ne, hacuaha cachjaain me xi camangascan xi tjin sa ngu nixtin xi cuiseen chjahanjendan tangun cojo rë me.
HEB 4:9 Ngajan xi tjin sa ngu nixtin xi cuisehen xuta rë Nina cjuahajenda tangun me cojo Nina.
HEB 4:10 Ta xuta xi visehen fahajenda tangun cojo Nina ne, hacuaha fahajenda me tsëhë xa xi casahmi me sacuatjin cafahajenda Nina tsëhë xa xi casahmi me.
HEB 4:11 Ngajan xi meje rë xi nihña ngahñu xi cuma cuiseen chjahanjendan cojo rë Nina, cojo sa xi hisca ngu ngayaan ne, hacuiin nihña sacuatjin casahmi xuta xi cahndiin me tsëhë Nina.
HEB 4:12 Cjua xi chja Nina ne, quicun jain, hacuaha jemu tjin rë ngahñu, hatuxa vetjucaa. Sacuaha xi hitsë sa yuju xi cumá rë quicha xi jo yuju rë, xi vatjucja rë hisca hasen naja, hacuaha handasa hiscan hinchacoo ninda naja ne, cuatju, cuechu hisca ngajñi rë xineninda naja. Cjua xi chja Nina jan ne, vëë hacutjin ningatahantacun, hacuaha vëë hacutjin má rë xahasen naja.
HEB 4:13 Hisca ngu xcusun xi Nina catsindaja me ne, cumaji chahma xi cumá rë me; yëjë ni xcusun vëhë ne, tjin tsejen xi cuma rë Nina, me xi tahancuendan rë yëjë ni xcusun xi canihña.
HEB 4:14 Jesús, Quihndi rë Nina ne, hacui me xi nahmi xi matitjun xi tjin naja. Jemu ndaja camahani me, hacuaha cavatjutaha me ngahnga, sehe cavechu me xcun Nina. Vëhë xi meje rë xi hacuiin nismetacun cjuachacun xi nújan xi macjain naja. Cuatjin meje rë ta,
HEB 4:15 tsëhë xi nahmi xi matitjun xi tjin naja ne, ma mayuma rë me ngayaan xi jemu chuva tacun ta, tsëhë xi me vëhë ne, hacuaha cavatju me camá yëjë ni cjuacjintacun sacuatjin vatjun ngayaan má. Peru handasa cuatjin cavatju me camá ne, hisca ngu cjuatsehen ne, casahmii me.
HEB 4:16 Vëhë xi meje rë xi rcun camahani xi nihña tiña tsëhë Nina, me xi sahmi naja gubiernu cojo cjuandaja. Nihña tiña cojo sa xi chjahanntsan cjuayumatacun rë me, hane hacuaha sacú naja cjuandaja rë me xi cuisecoo naja hora xi mameje rë.
HEB 5:1 Yëjë ni nahmi xi matitjun xi tuxijin rë ngajñi rë xuta ne, satë xa rë me xi visecoo me xuta, cojo sa xi sahmi tiña xuta tsëhë Nina. Hacuaha nahmi xi cuacun vë ne, satëxa rë me xi sua me yëjë ni xcusun cjuatjo cojo Nina ngatsë rë cjuatsehen xi sahmi xuta.
HEB 5:2 Nahmi xi cuacun vë ne, ma tsijyëcacun me cojo xuta xi hvíin camahani hacuaha cachaja tsëhë ndiya rë Nina ta, tsëhë xi nahmi vë ne, hacuaha chuva cacun me.
HEB 5:3 Vëhë xi tjin rë me xi sua me cjuatjo cojo Nina ngatsë rë cjuatsehen xi casahmi suvá me, cojo ngatsë rë cjuatsehen xi casahmi jingu sa xuta.
HEB 5:4 Tsajin ngu xuta xi cojo cjuatacun rë suvá ni me ne, cjuaha me ngu xa ndajyihi vëhë ta me xi cjuaha ne, me xi suvá Nina cuichja me xi satë rë, sacuatjin cavatju xutachanga naja Aarón camá.
HEB 5:5 Hacuanitjin ni rë Cristu ta, hacuiin casahmi jyë casahmi hnga suvá me yojo rë me xi cuma me ngu nahmi xi matitjun ta me xi cachja xi cuma me nahmi ne, hacui Nina, xi cachja me cuitjin: Ngaye xi quihndi naha ngaye; hacuaha quihndë casuá xa ri. Cuatjin cachja Nina.
HEB 5:6 Hacuaha chja me jingu sa cahndë́ tsëhë xujun rë me cuitjin: Ngaye xi nahmi ngaye yëjë nu yëjë nixtin sacuaha camá Melquisedec hatsëë nixtin. Cuatjin cachja Nina.
HEB 5:7 Hane jinguyëjë rë xi Cristu tacun sa me cjuahñu cojo yojo rë me ne, hora xi cafehya rë me Nina, Nina xi tjin rë chuva rë xi cuaxëtje rë me tsëhë cjuaveya ne, jercu cajindaya me hacuaha jercu cajihnda me. Hane cafahacuenda Nina cjua rë me ta, tsëhë xi jemu cafaharcun me Nina.
HEB 5:8 Cristu ne, handasa Quihndi rë Nina me xi cjuaquixi, peru cjuañihi xi cavatju me camá nguehe ngasunhndë ne, vëhë hitsë sa cavicuya rë me mé vijne xi nuhyan tsëhë Nina.
HEB 5:9 Hane xi cuatjin casahmi Nina xi cavechutaha Jesús yëjë ni hacutjin xi meje rë Nina xi cuechutaha me ne, vëhë xi Jesús ne, ma vaxëtje me yëjë ni xuta xi vihndë tsëhë me, hacuaha tsajin nu tsajin nixtin xi cuatju xuta xi cuacun vë castigu.
HEB 5:10 Hane hacuaha Nina casuaxa me Jesús xi má me nahmi xi matitjun sacuaha camá Melquisedec hatsëë nixtin.
HEB 5:11 Sacuaha tsëhë cjuatacun vëhë ne, jemu tjin cjua xi cuinújin cojo nuju, peru jemu chja cuátjin xi tihincuendin nuju ta, tsëhë xi hacuiin ndaja meje cuisiñuju.
HEB 5:12 Ngayun xi ha jemu tsëë nduvun chutayun cjua rë Nina ne, ha tivicuyun rë xuta cjua rë Nina. Peru cahndë́ rë xi ha tivicuyun ne, tu ngayun meje rë ngu xi cuicuya nga nuju cjua xi tjun tjun chutaya rë tsëhë cjua rë Nina. Sacuaha xi mameje rë xi cuyun siuhun nga lechi, cahndë́ rë xi xinu niñu.
HEB 5:13 Sacuaha quihndi langa ne, vëhë xi suvá lechi hvi, hacuaha hvíin camahani mé xi ndaja o mé xi ndajin.
HEB 5:14 Peru sacuaha niñu xi chinë ne, xuta changá xi jinë me, xuta xi ha vëë me mé xi ndaja mé xi ndajin ta, tsëhë xi cjuatacun rë me ne, ha jemu nduva sahmixa.
HEB 6:1 Quihndë ne, meje rë xi cuejñaxen hitsë cjuachacun xi cachutayan hya xi tjun tjun camangutacun cojo Cristu, hane chutayan jingu sa cjua xi hitsë sa chja, cojo sa xi cuejñachihin ndaja cjuatacun naja. Mijí rë xi cuyan chutayan nga cjua xi ha cama naja titjun, sacuaha cjua xi chja xi meje rë xi cuejñaxen rë yëjë xcusun xi machjiriin xi nihña; sacuaha cjua xi chja xi meje rë xi cumangutacun cojo Nina;
HEB 6:2 sacuaha cjua xi chja xi meje rë xi cuma tyjahi vihi cuma tyjahi vëhë xi cuma rë Nina; sacuaha cjua xi chja xi meje rë xi cuisanentsan ngu xuta; sacuaha cjua xi chja xi cuya nima cjuahñu; sacuaha cjua xi chja xi cuechu nixtin xi Nina ne, tsichuva naja me ngayejen ni cojo cjuatacun naja.
HEB 6:3 Vëhë xi quihndë ne, cuejñaxen hitsë cjua xi cuacun vë, hane chutayan jingu sa cjua xi hitsë sa chja cuijnercuun, sa xi sua Nina cahndë́.
HEB 6:4 Xuta xi ha cavisehen cjuahasen rë Nina ngajñi rë cjuatacun rë me ne, hacuaha casacu rë me hitsë cjuandaja xi Nina sua me, hacuaha cavisehen Hasen rë Nina cahntsua xahasen rë me,
HEB 6:5 hacuaha cavejña rë me hitsë cjuandajyihi rë Nina, hacuaha camachaya rë me hitsë cjuarcun xi hitsë sa rcu cjín cuma nixtin xi sehe nduva.
HEB 6:6 Sa xi xuta xi cuacun vë tsismicacun me ndiya rë Nina ne, cumaji cuisecoon rë me xi tsindeya me cjuatacun rë me ngu ndiya nga ta, xcusun xi tisahmi me ne, titsixcuehyu me Quihndi rë Nina, sacuaha xi tivuya tivetaha suvá me me xcun cru.
HEB 6:7 Xuta xi cuacun vë ne, tangun me cojo nangui xi hvi rë tsi xi vaha xcun: sa xi nangui vëhë ma ngu xcusun xitjë xi cumachjirëhë rë xuta xi nai rë ne, tsinchacun Nina nangui vëhë;
HEB 6:8 peru sa xi suvá nahyá cuetju xcun nangui vëhë ne, venguiin camahani chjí rë. Hacuaha choho cuichja Nina cojo, hane hiscan xi cuijnetaha ne, cueti.
HEB 6:9 Peru handasa cuatjin nújin cojo nuju, ngayujun ni xi jemu hmutacuin nuju ne, peru ha hyin cojo cjuatacun niji xi ngayun ne, ndaja tivatjun tijima, cuma cuinújan ne, ha tivanguncujun ndiya xi cuaxëtje nuju.
HEB 6:10 Nina ne, quixi me cojo cjua rë me. Vëhë xi tsichayaain me yëjë xcusun xi canihñu, hacuaha tsichayaain me cjuahmutacun xi camatsejen xi tjin nuju cojo rë me, hya xi cavisecun rë xuta ladu rë me, sacuatjin xi tinihñu hisca quihndë.
HEB 6:11 Xi meje niji ngayin ne, jima ngu ngayun ne, hacuanitjin ni tinechun ngunajatacún jinguyëjë rë xi nechun cjuahñu, cojo sa xi sacú nuju yëjë cjuandaja rë Nina xi vetuhun tacun.
HEB 6:12 Hacuaha meje niji xi hacuiin cuma tsëhë́ ngayun ta xi meje niji ne, nihñu sacuatjin sahmi xuta xi ngatsë rë xi jemu ndaja ticaa rë me xi mangucacun me cojo Nina ne, vëhë xi tifahatsja me cjuandaja xi ha cachja Nina xi sacú rë me.
HEB 6:13 Hya xi cachja quixi Nina cojo Abraham xi sua rë me ngu cjuandaja ne, tsëhë xi ha quihndë tsajin sa yo xi matitjun xi cuma rë Nina ne, vëhë xi cachja me cuitjin: “Ngahan suva hvë xi cjuaquixi xi tsinchácun ri, hacuaha jemu cjín sahme ri cojo xuta riji.” Cuatjin cachja me.
HEB 6:15 Hane xi cuatjin cacaa rë Abraham cavejñaya me cojo cjuajeya cjua xi cachja Nina ne, cavechu nixtin xi casacu jain rë me cjuandaja xi ha cachja Nina xi sua rë me.
HEB 6:16 Hya xi ngu xuta sua me ngu cjua rë me xi cjuaquixindaja ne, hisca veyanangui me ngu xi hitsë sa matitjun xi cumá rë me, xi hacui Nina; hane hya xi jo xuta tisua cjua rë me ne, sa xi cuetjujñi ngu me xi cuacun vë xi cuichja me: “Vëë Nina jain xi quixi” ne, ngajan ma chihin cjuavisiajmi rë me.
HEB 6:17 Vëhë xi hya xi cachja Nina xi sua rë me Abraham ngu cjuandaja ne, cuitjin cachja me: “Ngahan suva hvë.” Cuatjin cachja me cojo sa xi ngayaan xi chjahanntsan cjuandaja vëhë ne, cumachayandaja naja ta Nina ne, hya xi cuichja me ngu cjua ne, tsindeyaain me cjuatacun rë me.
HEB 6:18 Cuatjin cachja Nina cojo sa xi jercu ndaja sacú naja cjuetacun ngatsë rë jo xcusun xi hatuxa cumaji cuindeya. Ngu xcusun jan ne, hacui suvá Nina, hane xi ma jo jan ne, hacui cjua xi cachja me cojo Abraham. Hacuaha Nina ne, hatuxa maji vindacha me. Hane ngayaan xi vetahan tacun Nina ne, sacú naja cjuetacun vëhë, cojo sa xi cumangutacun cojo cjua xi Nina cachja me xi cuechu nixtin xi cuiseen chjahanjendan tangun cojo rë me.
HEB 6:19 Hane xi cuatjin vetahan tacun Nina ne, tsajin camahani mé cuma rë hasen naja, hacuaha cuma cuechun hisca hiscan tacun Nina,
HEB 6:20 hiscan xi quiji Jesús cavuxaha me ndiya tsajan. Hane Nina casua xa me Jesús xi camá Jesús nahmi xi matitjun xi tsajin nu tsajin nixtin xi cjuë xa rë me, sacuaha camá Melquisedec hatsëë nixtin.
HEB 7:1 Melquisedec vë ne, matitjun me tsëhë nandya Salem, hacuaha má me nahmi xi sahmi me xa tsëhë Nina xi hatuxa jyë hnga cojo Hasen rë. Hane hya xi cavuya Abraham xi quiji cavaxëtje me quihndi rë hntsë me tsëhë condra rë ne, cavetju Melquisedec tsëhë nandya Salem quijitjengui me Abraham hiscan nduva, hane xi casacu xicjin me ndiya ne, catsinchacun Melquisedec Abraham.
HEB 7:2 Hya xi camá ne, të cahndë́ cavatëcja Abraham yëjë ni xcusun xi camá sa cafaha me tsëhë xuta xi cuacun condra jan ne, casua rë me Melquisedec ngu cahndë́ tsëhë të cahndë́ jan, tsëhë xi Abraham ne, faharcun me Nina. Ñihi xi Melquisedec ne, meje cuichja “ngu me xi matitjun xi vitexa cojo yëjë ni cjuaquixi”; hacuaha ñihi xi chja Me xi Matitjun tsëhë Salem ne, meje cuichja “ngu me xi matitjun xi vitexa cojo yëjë ni cjuajeya.”
HEB 7:3 Xcun xujun rë Nina ne, tsajin camahani hiscan xi chja tsëhë naa tsëhë nahmi rë Melquisedec. Hisca tsëhë xutachanga rë me ne, tsajin hiscan xi chja. Hacuaha chjaain hacutjin catsin me ne, chjaain hacutjin cahme me. Cuatjin xi Melquisedec ne, meje tangun me cojo Quihndi rë Nina, tsëhë xi hacuaha ngu nahmi má me xi tsajin nu tsajin nixtin fë xa rë me.
HEB 7:4 Chutsujun hacutjin jercu vengui chjí rë Melquisedec, xi hisca xutachanga naja Abraham ne, casua me me ngu cahndë́ tsëhë yëjë xcusun xi cavatëcja me të cahndë́ jan.
HEB 7:5 Ley xi casua Nina rë Moisés xi camá ngascan ne, chja ta nahmi xi nduva tjë rë Leví ne, tjin rë me chuva rë xi cjuehya me cojo naja ngayaan xuta tjë rë xuta Israel xi cuichancjan të cahndë́ yëjë ni xcusun xi tjin naja, cjuaha nahmi vëhë ngu cahndë́ tsëhë të cahndë́ jan. Cuatjin chja ley rë Moisés xi cuechjen diezmu naja, handasa xicjin nahmi jan má ngayaan, hacuaha tjë rë Abraham ngayejen ni.
HEB 7:6 Melquisedec ne, handasa hacuiin tjë rë Leví má me, peru cafahatsja me ngu cahndë́ tsëhë xi camá të cahndë́ jan, xi casua Abraham. Hacuaha catsinchacun Melquisedec Abraham, me xi ha cachja Nina xi sacú rë cjuandaja.
HEB 7:7 Ngayejen ni ne, ha hyan ta me xi tsinchacun ne, me vëhë xi matitjun me tsëhë me xi manchacun.
HEB 7:8 Nguehe xcun cjuahñu naja vi ne, nahmi xi fahatsja me diezmu tsëhë yëjë xcusun xi ticja të cahndë́ ne, hacuaha xuta ngayaan ni me xi hacuaha hme me; peru xcun xujun rë Nina ne, chja tsëhë Melquisedec sacuaha xi tacun cuaha me.
HEB 7:9 Nahmi xi nduva tjë rë Leví xi hacuaha cojo me tifahatsja me diezmu ne, cuma cuinújan ne, sacuaha xi cojo me cavechji me diezmu rë me hya xi casua Abraham cojo Melquisedec jan diezmu rë me.
HEB 7:10 Cuatjin sacuaha xi cavechji nahmi xi cuacun jan ta, tsëhë xi Abraham ne, ha cojo tjë xi cuacun vë yaha me hya xi casua me diezmu rë me cojo Melquisedec.
HEB 7:11 Xuta Israel ne, cafahatsja me cjua xi chja hacutjin meje rë Nina xi sahmi yëjë xuta xi tjë rë Leví xi sahmi me xa sacuaha nahmi. Quihndë ne, sa xi nahmi xi cuacun vë camá casahmi me xi cavechutaha xuta yëjë ni hacutjin xi meje rë Nina xi sahmi me ne, ha quihndë hacuiin sahmi ngujyë xi cuetjujñi sa ngu nahmi xi hacjahi xcusun rë, ngu nahmi xi hacuiin tangun xcusun rë cojo Aarón ta ngu nahmi xi tangun xcusun rë cojo Melquisedec.
HEB 7:12 Hane hya xi vindeya xcusun rë xa xi sahmi nahmi ne, hacuaha hatuxa vindeya ley xi vitexa rë me.
HEB 7:13 Hane Nai naja, me xi cuatjin chja xujun rë Nina tsëhë ne, hacjahi tjë me, hane sacuaha tjë vëhë ne, hisca ngu nahmi cjëë cuetjujñi me.
HEB 7:14 Hacuaha ha hyan ta Nai naja ne, tsëhë tjë rë Judá canduva me, hane Moisés ne, cachjaain camahani me xi tjë vëhë ne, ngajan cuetjujñi ngu nahmi.
HEB 7:15 Yëjë cjua xi tinújan vi ne, tsejen xi jemu cjuaquixi, hya xi vetjujñi sa ngu nahmi sacuaha Melquisedec.
HEB 7:16 Hane nahmi xingu jan ne, hacui Nai naja, me xi cavechutaha xi camá nahmi, hacuiin ngatsë rë ngu ley xi chja yo tjë rë xi cuma nahmi ta ngatsë rë ngahñu rë ngu cjuahñu xi tjin rë me xi tsajin nu tsajin nixtin vetsun. Ngatsë rë vëhë xi cavechutaha me xi camá me nahmi.
HEB 7:17 Hacuaha Nina ne, cuitjin chja me tsëhë Nai naja: Ngaye xi nahmi ngaye yëjë nu yëjë nixtin sacuaha camá Melquisedec hatsëë nixtin. Cuatjin cachja Nina.
HEB 7:18 Sacuaha cjua rë ley xi cavitexa titjun ne, cavetsunya, tsëhë xi hatuxa tsajin rë ngahñu hacuaha machjiriin ta,
HEB 7:19 tsëhë xi camaji casahmi xi cavechutaha xuta yëjë ni hacutjin xi meje rë Nina xi cuechutaha me. Hane cahndë́ rë ley vëhë ne, vetahan tacun ngu cjua xi hitsë sa ndajyihi, hane ngatsë rë xi cuatjin vetahan tacun ne, vëhë xi nihña tiña tsëhë Nina.
HEB 7:20 Hya xi casua xa Nina Jesús xi cuma me nahmi xi matitjun ne, cachja me cjua vihi: “Ngahan suva hvë.” Cuatjin cachja me. Peru hya xi cafaha xa nahmi xi yahnga jan ne, cachjaain Nina: “Ngahan suva hvë.”
HEB 7:21 Peru sacuaha tsëhë Nai naja ne, xujun rë Nina ne, cuitjin chja: Nai naja ne, cachja me cjua vihi: “Ngahan suva hvë.” Cuatjin cachja me, hacuaha tsajin hora tsindeya me cjuatacun rë me xi cachja me cjua vihi: “Ngaye xi nahmi ngaye yëjë nu yëjë nixtin sacuaha camá Melquisedec.” Cuatjin cachja me.
HEB 7:22 Hane xi cuatjin casua xa Nina Jesús xi camá me nahmi xi matitjun tsajan ne, vëhë xi sacu naja cjuaquixindaja xi Nina ne, sahmichihin jain me compromisu xi sehe tisahmi me. Hane compromisu vëhë ne, hitsë sa ndajyihi xi cuma rë xi casahmi me titjun.
HEB 7:23 Sacuatjin rë nahmi xi yahnga jan ne, sacuiin rë me cahndë́ xi cjuenduju me sahmi me xa yëjë nu yëjë nixtin ta, tsëhë xi hatuxa hme me. Vëhë xi hisca ntsacu cavetsihin hisca quihndë ne jemu cjín camá me cojo yëjë sa tjë rë me xi yahnga xi hacuaha camá nahmi.
HEB 7:24 Peru Jesús ne, tsëhë xi tsajin nu tsajin nixtin xi cueya me ne, vëhë xi hacuaha tsajin nu tsajin nixtin xi jingu sa cjuahatsja xa rë me xi má me nahmi.
HEB 7:25 Vëhë xi ma vaxëtje me xuta xi sahmi tiña tsëhë Nina ngatsë rë xi camangucacun xuta jan cojo Jesús. Hane hya xi vaxëtje me xuta xi cuacun vë ne, ha quihndë tsajin nu tsajin nixtin xi cumameje nga cuetjutje me ta, tsëhë xi Jesús ne, tacun me yëjë nixtin xi cjuehya rë me Nina ngatsë rë xuta xi cuacun vë.
HEB 7:26 Jemu ndatjin xi tjin naja ngu nahmi xi matitjun xi cuatjin xcusun rë me. Jesús, nahmi xi matitjun jan ne, jemu tyjahi me, tsajin rë me cjuatsehen, tsajin mé jyihi mé má me, cavetjuxin me tsëhë xuta tsehen, quiji me hisca ngajan sa tsëhë ngahnga.
HEB 7:27 Me vëhë ne, hacuiin tangun me cojo nahmi xi matitjun xi yahnga jan ta, me vëhë ne, tsajin mé má xi cojo me nchunchujun ni sua rë me Nina ngu chu xi cahme ngatsë rë jyë́ rë suvá me, hane xi cuma ngascan ne, sua nga me ngu chu xi cahme ngatsë rë jyë́ rë xuta. Jesús ne, ngu ndiya ni casua me ngu cjuatjo cojo Nina ngatsë rë jyë́ rë xuta, hya xi casua me yojo rë me xi cahme me.
HEB 7:28 Sacuaha ley rë Moisés ne, sua xa rë xuta xi cuma me nahmi xi matitjun tsëhë yëjë ni nahmi. Hane xuta ne, hatuxa caain rë cjuatacun rë me xi suvá cjuandaja sahmi me. Peru sacuaha cjua xi cachja Nina hya xi cachja me xi “Ngahan suva hvë” ne, cjua vëhë casua xa rë Quihndi rë Nina xi cuma me ngu nahmi xi matitjun. Hane cjua xi cachja Nina jan ne, camá ngascan canduva xi cuma rë ley. Hacuaha Quihndi rë Nina ne, tsajin nu tsajin nixtin xi caain rë cjuatacun rë me xi suvá cjuandaja sahmi me.
HEB 8:1 Quihndë ne, cjua xi hitsë sa matitjun tsëhë yëjë ni cjua xi tinújan vi ne, hacui cjua vihi: tjin naja ngu nahmi xi matitjun xi cuatjin xcusun rë me. Quiji me ngahnga, cavejña me taha ladu quixi tsëhë Nina xi jemu jyë hnga cojo hasen rë.
HEB 8:2 Ngajan sahmi me xa xi má me nahmi ngajan ndava Nina. Peru ndava Nina jan ne, hacuiin ngu ndihya xi catsindaja ngu xuta ta cahndë́ vëhë ne, suvá Nai naja catsindaja me.
HEB 8:3 Yëjë ni nahmi xi matitjun ne, hatuxa xa rë me xi sua me cjuatjo cojo Nina sua me ngu chu xi tsiquehen xuta. Vëhë xi cojo Jesús camameje rë xi tjin mé xi sua me cjuatjo cojo Nina.
HEB 8:4 Sa xi nguehe ngasunhndë tacun cuaha me quihndë ne, hacuiin cojo me má me nahmi ta nguehe ne ha tjin nahmi xi sua cjuatjo cojo Nina sacuatjin vitexa ley rë Moisés.
HEB 8:5 Sacuaha xa xi sahmi nahmi nguehe ngasunhndë vi ne, hacuiin tangun cojo xa xi má ngajan ngahnga ta, sacuaha ejemplu o tjahnguen ni rë xa xi má jan ne, vëhë xi má nguehe. Hya xi ha cuetsihin sahmi Moisés ndava Nina jan ne, cuitjin cachja Nina cojo rë me: “Nechin cuidadu ne ndandaja nihñi yëjë ni xcusun vë sacuaha xcusun xi ha catsingácun ri ngajan hiscan naxi jan.” Cuatjin cachja Nina.
HEB 8:6 Quihndë ne, Jesús casacu rë me ngu xa xi hitsë sa ndaja, tsëhë xi hacuaha me vëhë sahmi tangun me xuta cojo Nina ngatsë rë ngu compromisu vëhë hane hitsë sa ndaja cjua cachja me.
HEB 8:7 Sa xi ndatjin tjin chihin compromisu xi casahmi Nina titjun ne, sehe camamiji rë ngu nga compromisu xi ma jo xi hitsë sa ndaja.
HEB 8:8 Peru Nina ne, cavëë me xi xutachanga naja ne, quitjen me jyë́, vëhë xi cachja me cuitjin: Ngahan Nai nuju ne, cuichjá cojo nuju ta cuechu nixtin xi sahme nga ngu compromisu xatsë cojo nuju ngayun xuta tjë rë Israel cojo xuta tjë rë Judá.
HEB 8:9 Peru ha quihndë hacuiin sacuaha compromisu xi casahme titjun cojo xutachanga nuju, hya xi cojo cjuahmutacun naha ne, cavaxëxen me tsëhë nangui Egipto; hane tsëhë xi hacuiin quiji nduju me sacuatjin compromisu xi casahme cojo rë me ne, vëhë xi ngahan ne, casahmecuendaan me, cuatjin chjá ngahan, Nai nuju.
HEB 8:10 Sacuaha compromisu xatsë xi sahme cojo nuju ngayun xuta tjë rë Israel hya xi cuma ngascan tsëhë nixtin vëhë ne, hacui vihi: Cueyá ley naha cahntsua cjuatacun nuju, sacuaha xi cuma hindu cjua rë ley vëhë cahntsua cjuatacun nuju. Hacuaha ngahan cuma ngahan Nina nuju hane ngayun cuma ngayun xuta naha.
HEB 8:11 Tsajin yo xi cuicuya xicjin, tsajin yo xi cuichja cojo xicjin cuitjin: “Meje rë xi cumachaya ri yo xi Nai naja.” Tsajin yo xi cuichja cuatjin ta tsëhë xi yëjë ni sa quihndi sa changá ne, ha camachaya rë yo ngahan.
HEB 8:12 Nixtin hya ne, jemu tjin ná cjuaninchataha cojo cjuatsehen xi cún me hacuaha ha quihndë tsajin nixtin tsinguítsjen jyë́ rë me. Cuatjin cachja Nina.
HEB 8:13 Hya xi chja Nina tsëhë ngu compromisu xi tjun jan ne, casahmi changá me. Hane xcusun xi ha jima changá jan ne, ha meje cjuëya.
HEB 9:1 Quihndë ne, ngajñi rë cjua tsëhë compromisu xi casahmi Nina titjun ne, cachja me hacutjin xi chjahanrcun rë me, cojo xi cuma ndava me nguehe ngasunhndë.
HEB 9:2 Vëhë xi camá ngu ndihya tsjian xi camá ndava Nina. Ngu cahntsua xi tjun tjun tacun, xi hmí rë Cahndë́ Rcun ne, ngajan tacun candeleru, tacun maxë, siu pan xi viyuju xcun Nina.
HEB 9:3 Ngu cahntsua xi tacun cahnchun taha cahntsua tsjian xi tyjangui má jo cahndë́ jan ne, ngajan tacun cahndë́ xi hmí Cahndë́ Xi Jercu Tu Rcun Camahani.
HEB 9:4 Ngajan tacun ngasunscun xi suvá oro camá hiscan xi tí tyjungunsa. Hacuaha ngajan tacun caxa tsëhë compromisu xi suvá oro casaxtë rë yëjë ni ladu rë. Hane cahntsua caxa jan ne, ngajan jiya tilu xi suvá oro cama, hane cahntsua tilu jan hinchandaja scuan cjuarcun xi hmí rë maná. Hacuaha bastón tsëhë Aarón xi cavetjusehen jan ne, cahntsua caxa jan jiyandaja. Hacuaha ngajan hinchandaja ndyojo të xi camahindu cjua rë ley.
HEB 9:5 Xcun caxa jan ne, hinchacun jo quicha, xi sacuaha ángel rë Nina, xi fehma rë tyjunga rë xcun caxa jan. Hane xcun tyjavaxcun caxa jan ne, ngajan tsejen hasen rë ngahñu cjua rë Nina hiscan tsicjë me jyë rë xuta. Peru quihndë ne, tsëhë cjua xi ha cachjá cojo nuju vë ne, ha quihndë cuichjaan chichihin sa cojo nuju.
HEB 9:6 Quihndë xi ha caviyuju chihin yëjë ni xcusun vëhë cuatjin ne, yëjë ni nahmi ne, visehen me nchunchujun ni cahntsua xi tjun tjun tacun tsëhë ndihya tsjian jan, xi sahmi me xa rë me sacuaha nahmi.
HEB 9:7 Peru cahntsua xi má jo tacun tsëhë ndihya jan ne, suvá ni nahmi xi matitjun visehen me ngu ndiya xi ngu nu, hane hatuxa vaha me jni rë chu xi sua me cjuatjo cojo Nina ngatsë rë cjuatsehen xi casahmi suvá me, cojo ngatsë rë cjuatsehen xi casahmi xuta xi hisca hvíin me xi tjin rë me jyë́.
HEB 9:8 Cojo cjuatacun vëhë ne, Hasen rë Nina ne, sua machaya naja xi ndiya xi cjuecani naja xcun Nina ne, cjëë tuxaha, jinguyëjë rë xi ndava Nina jan ne, tisahmi xa cuaha.
HEB 9:9 Yëjë cjuatacun xi cuatjin má vë ne, machjirëhë naja ngayaan sacuaha ngu ejemplu ni, quihndë nixtin vihi. Ta sacuaha cjuatjo xi sua me cojo Nina ngajan ndihya vëhë cojo chu xi tsiquehen xuta ne, maji tsityjahi rë cjuatacun rë xuta xi cuatjin faharcun me Nina.
HEB 9:10 Yëjë cjuatacun vëhë ne, vitexa suvá tsëhë xi chinë xi hyun ni cojo tsëhë xi ma tyjahi vihi ma tyjahi vëhë xi cumá rë Nina. Cjuatacun vëhë ne, vitexa suvá ni tsëhë taha xcun, hacuiin tsëhë cahntsua xahasen naja. Peru cjuatacun vëhë ne, cuitexa hisca nixtin xi Nina tsindeya me cjuatacun vëhë.
HEB 9:11 Peru Cristu ne, ha cavetjucun me xi má me nahmi xi matitjun xi sua naja me yëjë ni cjuandaja xi titsingatju Nina. Sacuaha cahndë́ hiscan xi tisahmi me xa xi má me nahmi ne, hitsë sa vengui chjí rë hacuaha hitsë sa tjin rë cjuaquixi. Hacuaha hacuiin xuta casahmi me, cuma cuinújan ne, hacuiin nguehe ngasunhndë vihi tacun.
HEB 9:12 Hacuaha hacuiin ngatsë rë jni rë chu tentsun cojo jni rë chu ndyaja chihndë xi cavisehen me xcun Nina ta ngatsë rë jni rë suvá me. Hane ngu ndiya cavisehen ni me, hya xi ha cavaxëtje naja me xi quihndë tsajin nu tsajin nixtin chajá ngayaan.
HEB 9:13 Hane jni rë chu tentsun cojo jni rë chu ndyaja cojo ndesu rë chu ndyaja chihndë ne, hora xi xinchutaha rë xuta xi camachocun yojo rë ne, caa rë tsityjahi rë yojo rë xuta jan cojo sa xi cuma tyjahi me xcun Nina.
HEB 9:14 Ha hitsë sa jni rë Cristu, me xi tsajin nu tsajin nixtin cjuë Hasen rë, hacuaha casua suvá me yojo rë me cojo Nina, ngu cjuatjo xi hatuxa jercu tu tyjahi camahani. Jni rë me jan ne, tsityjahi rë cjuatacun naja tsëhë yëjë xcusun xi machjiriin xi nihña, cojo sa xi cuma nihña xa rë Nina, me xi quicun.
HEB 9:15 Vëhë xi Cristu ne, me vëhë xi sahmi tangun me xuta cojo Nina ngatsë rë ngu compromisu xatsë. Cahme me xi cuaxëtje me xuta tsëhë cjuatsehen xi casahmi xuta jinguyëjë rë xi sahmi xa cuaha compromisu xi tjun casahmi Nina. Hane ngatsë rë xi cuatjin cahme Cristu ne, vëhë xi xuta xi cavaxijin Nina ne cuma cjuahatsja me cjuandaja xi ha cachja Nina xi sua rë me, cjuandaja xi tsajin nu tsajin nixtin chjahataha rë.
HEB 9:16 Hiscan xi tjin rë xuta ngu testamentu ne, cuma sahmi xa, peru hisca hya xi ha tjin cjuaquixi xi ha cahme me xi casahmi xujun jan.
HEB 9:17 Ta ngu testamentu ne, vetsihin sahmi xa ngatsë rë ngu cjuaveya ta, tsëhë xi jinguyëjë rë xi tacun quicun me xi casahmi ne, hatuxa tsajin rë ngahñu.
HEB 9:18 Vëhë xi hisca compromisu xi tjun casahmi Nina cojo xutachanga naja ne, hacuaha cojo jni rë chu camachihin.
HEB 9:19 Xi cavatju casua Moisés camachaya rë yëjë ni xuta yëjë ni cjua tsëhë ley xi casua Nina ne, sehe cafaha me hitsë tsanga hani cojo ngu tsja rë ya xi hmí rë hisopo, sehe catsicahnchi me cojo jni rë chu hndindyaja cojo jni rë chu tentsun, cavisecjan rë me nandá ne, sehe cavinchutaha rë me libru tsëhë ley hacuaha cavinchutaha rë me yëjë ni xuta.
HEB 9:20 Ngajan xi cachja Moisés cojo xuta cuitjin: “Vihi jni xi sahmichihin rë compromisu xi cavitexa Nina hacutjin xi meje rë me xi nihña.” Cuatjin cachja me.
HEB 9:21 Hacuanitjin ni cojo yëjë ni xcusun xi sahmi xa cahntsua ndihya jan.
HEB 9:22 Sacuatjin vitexa ley ne, ha ña meje yëjë ni xcusun ne, ma tyjahi ngatsë rë jni. Hane sa xi cuangaain jni ne, hacuaha sacuiin cjuaninchataha.
HEB 9:23 Vëhë xi camameje rë xi cuatjin camatyjahi rë yëjë xcusun xi sacuaha tjahnguen rë xcusun xi tjin ngajan hiscan tacun Nina. Peru xcusun xi tjin ngajan hiscan tacun Nina ne, camameje rë xi camatyjahi ngatsë rë cjuaveya xi hitsë sa ndacun xi cuma rë cjuaveya xi cuacun vë.
HEB 9:24 Cristu ne, hacuiin cavisehen me ndava Nina xi xuta catsindaja me, ndihya xi tu cavetjutaha ni tsëhë hiscan xi cjuaquixi xi tacun Nina ta hisca ngahnga hiscan xi tacun Nina ne, ngajan xi cavisehen me. Cuatjin cavisehen me cojo sa xi quihndë ne, cuejña me xcun Nina, cuichjatje me ngatsë naja.
HEB 9:25 Peru hacuiin cavisehen me xi sua me yojo rë me cojo Nina jemu cjín ndiya, sacuatjin sahmi nahmi xi matitjun xi chuva nu chuva nu visehen me ndava Nina cojo jni xi hacuiin jni rë me.
HEB 9:26 Sa xi cuatjin cjín ndiya cavisehen Cristu ne, hacuaha cuatjin cjín ndiya camameje rë xi cueya me hisca hya xi cavetsihin ngasunhndë ne hisca quihndë. Peru quihndë xi ha tivijnetaha nixtin changá vëhë ne, Cristu ne, ngu ndiya canduva ni me xi sua me yojo rë me xi cueya me cojo sa xi cjuahaxin me cjuatsehen.
HEB 9:27 Ngayejen ni ne, hatuxa ngu ndiya ni cueyan. Ngaxtun vëhë ne, sehe tsichuva naja Nina cojo cjuatacun naja.
HEB 9:28 Hacuanitjin ni Cristu ta hacuaha ngu ndiya ni casua me yojo rë me xi cjuahaxin me jyë́ rë jemu cjín xuta. Ngaxtun vëhë ne, cuinduva nga me xi ma jo ndiya, peru ha quihndë hacuiin tsëhë jyë́ rë xuta ta tsëhë xi cuaxëtje me xuta xi siuya rë me.
HEB 10:1 Peru ley rë Moisés ne, sacuaha tjahnguen ni rë yëjë cjuandaja xi sehe sua naja Nina. Hacuiin ndandaja sua ley vëhë machaya naja hacutjin jain cun cjuandaja vëhë. Vëhë xi ley ne, tsajin nixtin xi cuma tsityjahi rë cjuatacun rë xuta xi tu nu tu nu fi me ndava Nina cojo chu xi tsiquehen me jan xi sua me cjuatjo cojo Nina.
HEB 10:2 Sa xi cjuaveya rë chu vëhë cacaa rë catsityjahi jain rë cjuatacun rë xuta xi cafaharcun rë me ne, hacuaha ha quihndë tsiquiin sa me chu ta, tsëhë xi xi má rë me ne, ha quihndë tsajin jyë́ rë me.
HEB 10:3 Peru xi cuatjin tsiquehen xuta chu ne, tu nu tu nu tsinguitsjen rë me tsëhë jyë́ rë me ta,
HEB 10:4 tsëhë xi jni rë chu ndyaja cojo jni rë chu tentsun ne, hatuxa maji fahaxin rë jyë́ rë xuta.
HEB 10:5 Vëhë xi hya xi cavéjña Cristu ngasunhndë ne, cachja me cojo Nina cuitjin: Ngayun ne, hacuiin suvá cjuaveya rë chu xi meje nuju, hacuiin suvá cjuatjo xi meje nuju, vëhë xi canihñu yojo naha.
HEB 10:6 Hacuiin suvá cjuatjo xi tí xi chuya nuju tsëhë, hacuaha hacuiin suvá ni jingu sa cjuatjo xi sua nuju xuta ngatsë rë jyë́ rë me xi chuya nuju tsëhë.
HEB 10:7 Sehe ngajan xi cachja nga Cristu: “Cuajyihi ngahan nguehe, xi sahme yëjë ni hacutjin xi meje nuju, ngayun Nina naha, sacuatjin camahindu tsahan xcun xujun nuju.” Cuatjin cachja Cristu cojo Nina.
HEB 10:8 Xi tjun tjun ne, cachja Cristu xi Nina ne, mijí rë me hacuaha chuyiin rë me tsëhë cjuaveya rë chu cojo jingu sa cjuatjo, cojo cjuatjo xi tí, cojo cjuatjo xi sua xuta ngatsë rë jyë́ rë me, handasa cuatjin vitexa ley xi cuatjin sahmi xuta.
HEB 10:9 Ngaxtun vëhë ne, cachja nga me xi tacun me xi sahmi me yëjë ni hacutjin xi meje rë Nina. Cuma cuinújan ne, tsicjë me xcusun changá xi hme chu, cojo sa xi cuejña me ngu xcusun xatsë xi sahmi xuta yëjë hacutjin xi meje rë Nina.
HEB 10:10 Nina ne, catsityjahi me cjuatacun naja ngatsë rë xi Jesucristu ne, casahmi me yëjë ni hacutjin xi meje rë Nina, ngatsë rë cjuatjo xi casua Jesucristu xi casua me yojo rë me ngu ndiya ni.
HEB 10:11 Yëjë ni nahmi ne, nchunchujun ni hinchacun me fahacuenda me xa rë me xi má me nahmi, hacuaha cuatjin cjín ndiya vuya sua me cjuatjo xi tu vëhë tu vëhë ni, xi hatuxa tsajin nixtin xi ma fahaxin rë jyë́ rë xuta.
HEB 10:12 Peru Cristu ne, xi cavatju casua me ngu ni cjuatjo cojo Nina ngatsë rë jyë́ rë xuta ne, sehe quiji me ngahnga cavejña me taha ladu quixi tsëhë Nina. Hane cjuatjo xi casua me jan ne, tsajin nu tsajin nixtin xi meje rë xi cuya cjue nga xcun Nina.
HEB 10:13 Hane quiji me ngajan, cojo sa xi nixtin xi cjui sa ne, ngajan cuejñaya me hisca hya xi yëjë ni xi sahmi rë me condra ne, cuiyuju ngahma gubiernu rë me.
HEB 10:14 Vëhë xi ngatsë rë ngu ni cjuatjo vëhë ne, catsityjahi Cristu cjuatacun rë xuta xi ha Nina tiviyujuxin rë me xi cuma tsëhë me me, hane tsajin nu tsajin nixtin xi cuya cuetsun nga cjuatacun rë xuta xi cuacun vë.
HEB 10:15 Hasen rë Nina ne, ha cuanitjin ni sua machaya naja cuitjin:
HEB 10:16 Sacuaha compromisu xi sahme cojo xuta xi cuacun vë hya xi cuma ngascan tsëhë nixtin vëhë ne, hacui vihi: Cueyá ley naha cahntsua cjuatacun rë me, sacuaha xi cumahindu cjua rë ley vëhë cahntsua cjuatacun rë me.
HEB 10:17 Hacuaha jyë́ rë me cojo cjuatsehen xi sahmi me ne, ha quihndë tsajin nixtin xi tsinguítsjen. Cuatjin cachja Hasen rë Nina.
HEB 10:18 Hya xi ha camanchataha jyë́ ne, ha quihndë mamijí rë xi cjue sa cjue sa cjuatjo xcun Nina ngatsë rë jyë́ vëhë.
HEB 10:19 Vëhë xi ngayejen ni ne, rcuun camahani xi cuiseen xcun Nina quihndë ngatsë rë jni rë Jesús.
HEB 10:20 Jesús ne, cavuxaha me ngu ndiya xatsë xi cuma naja, ngu ndiya xi cjuecojo naja xcun cjuahñu, ngu ndiya xi cjuecojo naja xcun Nina ngatsë rë cjuaveya rë Jesús.
HEB 10:21 Jesús ne, me vëhë má me nahmi xi jercu tu vengui camahani chjí rë, hacuaha sahmi naja me cuidadu ngayejen ni xi má ngayaan ladu rë Nina.
HEB 10:22 Ngatsë rë yëjë cjuatacun vëhë ne, meje rë xi nihña tiña tsëhë Nina cojo nguñajatacun, meje rë xi tjin ngu tacun xi macjain naja Jesús ta, tsëhë xi cjuatacun naja ne, cachjahaxin rë cjuatsehen xi cún tsëhë xi sacuaha xi caxinchutaha rë jni, hane yojo naja ne, sacuaha xi cafengui cojo nandá tyjahi.
HEB 10:23 Meje rë xi hacuiin nismetacun cjuandaja xi nújan xi vetahan tacun ta, tsëhë xi me xi cachja cojo naja yëjë cjuandaja xi sahmi me ngascan ne, hatuxa sahmichihin me yëjë cjuandaja vëhë.
HEB 10:24 Meje rë xi cuinchan chuva rë hacutjin cuisecoon xingueen xingu xingu ngayaan cojo sa xi tjin naja cjuahmutacun hacuaha nihña cjuandaja.
HEB 10:25 Mijí rë xi cuejñaxen xi ma tangun ngayaan sacuaha xcusun rë jingu sa xingueen. Xi meje rë ne, cuma tangun ngayaan cojo sa xi tahan cjuetacun xingueen xingu xingu ngayaan, hitsë guan ta nixtin xi cuinduva Jesús ne, chutsejen ta ha tijima tiña.
HEB 10:26 Cuatjin meje rë xi nihña ta sa xi ngu xingueen xi ha ndaja cafahatsja me cjua xi ha cjuaquixi cjuenduju me cojo ngu ndiya rë cjuatsehen ne, ha quihndë tsajin sa mé cjuatjo xi cuma cjue ngatsë rë jyë́ rë me.
HEB 10:27 Cahndë́ rë vëhë ne, hatuxa sacú rë me castigu, cjue cuetí me xcun ndihi xi ha jima tiña nixtin xi tsicjë rë yëjë xi choho vëë rë Nina.
HEB 10:28 Hya xi ngu xuta tsitjungui me ley rë Moisés ne, cojo jo cojo jyan ni xuta xi tsinguixi me xi cuaaintjin sahmi xuta vëhë ne, chja ley ta hatuxa cueya me, hacuaha hisca ngu tsajin yo cumayuma rë tsëhë me.
HEB 10:29 Ngayun ne, ha ndaja hyun ta hitsë sa jercu jyihi camahani castigu meje rë xi cuma xuta xi sune tsufë me Quihndi rë Nina, hacuaha tsingatahacacun me xi tsajin mé vengui chjí rë jni rë Quihndi rë Nina jan, hacuaha choho chja me tsëhë Hasen rë Nina xi jercu casua rë xuta jan cjuandaja. Jni xi tsitjungui xuta jan ne, jni vëhë xi casahmichihin rë compromisu xi cachja Nina, hacuaha ngatsë rë jni vëhë ne, camatyjahi cjuatacun rë xuta jan.
HEB 10:30 Ngayaan ne, ha hyan Nai naja, hane me vëhë xi cachja me cuitjin: “Ngahan satë ná xi sahmengojo cojo xuta tsehen; hatuxa ngahan sahmengojo.” Hacuaha chja nga me ngu ndiya cuitjin: “Ngahan Nai nuju ne, cjuahá chuva xuta naha.” Cuatjin cachja Nai naja.
HEB 10:31 ¡Jemu jyë chircun sa xi ngayaan cjuinenguenyan ngajñi rë castigu xi sahmi Nina, me xi quicun!
HEB 10:32 Peru ninguitsjun nixtin titjun, hya xi ha cafë cachjuhunntsun cjuahasen rë Nina sehe cacaa nuju cojo ngu cjuacjintacun jyë xi casua nuju cjuañihi xi cavatjun camá.
HEB 10:33 Jiya hora ne, xcun cojo xcun ni choho cachja xuta tsujun hacuaha casua nuju me cjuañihi, hacuaha jiya hora nga ne, cavisecuun rë xuta xi cuatjin cavatju me camá.
HEB 10:34 Chjá cuatjin ta hacuaha hvë xi hacuaha camayuma nuju me xi hincha ndavaya. Hacuaha hisca cojo cjuasua caningatuhun xi cachjahataha cjuachan rë yëjë ni xcusun xi ngayun tsujun, tsëhë xi ha hyun ta ngajan ngahnga ne, ha tjin nuju ngu xcusun xi hitsë sa ndaja, xi tsajin nu tsajin nixtin cjuë.
HEB 10:35 Xicanismutacuun cjuatacun xi rcun camahani, ta xi cuatjin cuanguncujun cjuatacun vëhë ne, Nina ne, hatuxa jemu jyë cjuatjo xi sua nuju me.
HEB 10:36 Ngayun ne, meje rë xi scaa nuju cojo cjuacjintacun xi vatjun má, cojo sa xi hya xi cuatjin cafë canihñu hacutjin xi meje rë Nina ne, sacú nuju cjuandaja xi ha cachja Nina xi sua nuju me.
HEB 10:37 Xujun rë Nina ne, cuitjin chja: Ha tu chúva sa nixtin ne, me xi cuinduva ne, hatuxa cuinduva me, ha quihndë cuindeyaain rë me.
HEB 10:38 Xuta naha xi tsajin jyë́ rë me ne, sacú rë me cjuahñu xatsë ngatsë rë xi mangucacun me cojo ná; peru sa xi cuya me cjue ngaxtun me ne, chuyiin ná tsëhë me. Cuatjin chja xujun rë Nina.
HEB 10:39 Peru ngayaan ne, hacuiin tangun ngayaan cojo xuta xi vuya fi ngaxtun me sehe tsicjë Nina me ta ngayaan ne, tangun ngayaan cojo xuta xi mangucacun me cojo Nina sehe cuaxëtje Nina me.
HEB 11:1 Quihndë ne, hya xi ha camangutacun cojo ngu cjua ne, sacuaha xi ha tjin naja cjuaquixi xi hatuxa sacú naja ngu xcusun xi vetahan tacun, sacuaha xi ha hyan xi xcusun xi matsijin ne, hacuaha cjuaquixi.
HEB 11:2 Tsëhë xi xutachanga naja ne, camangucacun me cojo Nina, vëhë xi Nina cachja tsëhë me xi tsajin xi cún rë me xcun Nina.
HEB 11:3 Tsëhë xi mangutacun cojo Nina ne, vijnercun xi Nina cojo cjua ni rë me ne, catsindaja me ngasunhndë, hacuiin cafaha me ngu xcusun xi matsejen xi catsindaja me ngasunhndë vi xi tsejen naja.
HEB 11:4 Tsëhë xi camangucacun xutachanga naja Abel cojo Nina ne, hitsë sa ndaja cjuatjo xi casua rë me Nina xi cuma rë cjuatjo xi casua xutachanga naja Caín. Vëhë xi Nina ne, cachja me xi Abel ne, tyjahi me cojo cjuatacun rë me. Hacuaha suvá Nina catsingacun me xi cjuatjo xi casua Abel ne, jemu ndaja. Hane tsëhë xi cuatjin camangucacun Abel cojo Nina ne, vëhë xi handasa cahme me, peru hisca quihndë ne, cumachjirëhë sa naja cjuatacun rë me.
HEB 11:5 Tsëhë xi camangucacun xutachanga naja Enoc cojo Nina ne, cachjahataha rë me tsëhë ngasunhndë vi, cojo sa xi cueyaain me. Hane ha quihndë casacuiin me ta, tsëhë xi Nina cafahataha rë me. Peru chaja sa xi cjuahataha Nina me ne, ha camatsejen xi Nina ne, jemu cachuya rë me tsëhë Enoc.
HEB 11:6 Peru sa xi manguaaintacuun cojo Nina ne, cumaji nihña xi chuya rë me tsajan. Xuta xi sahmi tiña me tsëhë Nina ne, meje rë xi macjain rë me xi tjin jain Nina, hacuaha Nina vëhë xi jemu jyë cjuatjo xi sua rë me xuta xi cuacun vangui rë me.
HEB 11:7 Tsëhë xi camangucacun xutachanga naja Noé cojo Nina ne, hya xi casua Nina camachaya rë me tsëhë xcusun xi cjëë cuma ne, casahmi me ngu barcu cojo sa xi cuetjutje me cojo xuta rë me. Cuatjin casahmi me ta, tsëhë xi faharcun me Nina. Hane xi cuatjin camangucacun me cojo Nina hacuaha casahmi me cuatjin ne, ngajan camatsejen xi yëjë sa xuta tsëhë ngasunhndë ne, chajá me. Hane Noé ne, cuatjin camatyjahi me cojo cjuatacun rë me sacuatjin matyjahi ngayaan cojo cjuatacun naja xi mangutacun cojo Nina.
HEB 11:8 Tsëhë xi camangucacun xutachanga naja Abraham cojo Nina ne, hya xi cachja Nina xi cuetjuxin me tsëhë nangui hiscan xi tacun me xi cjue me ngu cahndë́ hiscan xi sua Nina xi cuma tsëhë me ne Abraham ne, cahndë me tsëhë Nina hane cavetju me quiji me, handasa hvíin me jani cuechú me.
HEB 11:9 Tsëhë xi camangucacun Abraham cojo Nina ne, caviyujutaha me ngu nangui xín xi cachja Nina xi sua rë me. Hane ndihya tsjian ni caviyuju me cojo quihndi rë me, Isaac cojo Jacob, quihndi xi hacuaha cojo cjuahatsja cjuandaja xi ha cachja Nina xi sua me jan.
HEB 11:10 Cuatjin caviyuju Abraham ta, tsëhë xi jemu meje rë me xi cuechú me ngu nandya xi ndaja hñu cun ndihya rë cojo xihndënaña rë, ngu nandya xi Nina cavejña me cjuatacun rë me hacutjin cuma, hacuaha me vëhë casahmi me.
HEB 11:11 Tsëhë xi camangucacun Abraham cojo Nina ne, Nina casua rë me ngahñu xi cuma sacú rë chjuun rë me quihndi, handasa Sara chjuun rë me ne, hatuxa maji sacu rë me quihndi hacuaha Abraham ne, jemu changá me xi sehe sacú rë chjuun rë me quihndi. Cuatjin camá ta, tsëhë xi camangucacun Abraham xi Nina ne, hatuxa sahmichihin me cjua xi cachja me.
HEB 11:12 Vëhë xi ngatsë rë ngu ni Abraham ne, handasa hatuxa ha quihndë tsajin rë me ngahñu xi sacú rë chjuun rë me quihndi ne, peru tjë rë me ne, tangun cjín camá cojo niñú xi yaja ngahnga, tangun cojo tsumi rë tjehen ndachacun xi maji maxqui.
HEB 11:13 Yëjë ni xutachanga naja xi cuacun vë ne, mangucacun cuaha me cojo Nina hya xi cahme me. Casacuiin rë me cjuandaja xi cachja Nina xi sua rë me, peru sacuaha xi ha cavëë me cjuandaja vëhë hane jemu ndama rë me. Cachja quixi me xi sacuaha xuta ngu nangui me xi caviyujutaha me nguehe ngasunhndë.
HEB 11:14 Hane xuta xi chja cuatjin ne, jemu quixi sua me machaya naja xi tivangui sa me ngu nangui xi cuma tsëhë suvá me.
HEB 11:15 Sa xi catsinguitsjen sa me nangui hiscan cavetju me ne, tjin sa rë me chuva rë xi camá cavuya me jan.
HEB 11:16 Peru me xi cuacun vë ne, xi meje rë me ne, ngu nangui xi cuma tsëhë suvá me ngajan ngahnga hiscan tacun Nina. Vëhë xi Nina ne, ma savaain rë me xi hmí rë me Nina rë xutachanga naja xi cuacun vë, tsëhë xi ha tjin ndaja rë Nina ngu nandya xi cumá rë me.
HEB 11:17 Tsëhë xi camangucacun xutachanga naja Abraham cojo Nina ne, hya xi catsichuva Nina me cojo cjuatacun rë me ne, casua Abraham cojo Nina quihndi rë me Isaac. Hane Abraham, me xi cachja Nina xi sua rë cjuandaja ne, cavejñangucacun me xi sua me quihndi ngu rë me,
HEB 11:18 handasa cuitjin cachja Nina cojo rë me: “Suvá tjë rë quihndi riji Isaac ne, vëhë ni xuta xi cumá tjë riji xi cjuaquixi.” Cuatjin cachja Nina.
HEB 11:19 Abraham ne, camacjain rë me xi Nina ne, tjin jain rë me chuva rë xi hisca nima ne, tsicuya me cjuahñu. Cuatjin camá xi sacuaha xi ngajñi rë nima jain cavuya cafahatsja Abraham quihndi rë me.
HEB 11:20 Tsëhë xi camangucacun xutachanga naja Isaac cojo Nina ne, catsinchacun me quihndi rë me Jacob cojo Esaú. Cachja me yëjë mé xi nduva ngascan xi cuma rë quihndi rë me.
HEB 11:21 Tsëhë xi camangucacun xutachanga naja Jacob cojo Nina ne, hya xi ha meje cueya me ne, catsinchacun me jima ngu quihndindai rë me xi quihndi rë xutachanga naja José, hacuaha cafaharcun me Nina taha yahangui me bastón rë me.
HEB 11:22 Tsëhë xi camangucacun José cojo Nina ne, hya xi ha meje cueya me ne, caveyanangui me xi cuechú nixtin xi yëjë ni xutachanga naja ne, cuetjuxin me tsëhë nangui Egipto, hacuaha cavitexa me hacutjin cuma cojo rë ninda rë me hya xi ha cahme me.
HEB 11:23 Tsëhë xi camangucacun xutacha rë xutachanga naja Moisés cojo Nina ne, hya xi catsin Moisés ne, jyan sá caveyahma me, tsëhë xi cavëë me xi quihndinda jan ne, jemu ndajyihi camahani, hane cavincharcuaain rë me yojo rë me tsëhë cjua xi cavitexa me xi matitjun xi cueya yëjë ni quihndinda xi xihin tsëhë xutachanga naja.
HEB 11:24 Tsëhë xi camangucacun Moisés cojo Nina ne, hya xi camachangá me ne, catsitjungui me cahndë́ rë me xi má me quihndi rë na quihndi rë me xi matitjun tsëhë nangui Egipto.
HEB 11:25 Hitsë sa cachuya rë me xi cjue me choho cuatju me cuma cojo xuta rë Nina, xi cuma rë xi sua me cjuasua xahasen rë me nguhñu ngu hora ni ngajñi rë cjuatsehen.
HEB 11:26 Catsingatahacacun me xi hitsë sa vengui chjí rë xi scaa rë me xi choho cuichja xuta tsëhë me ngatsë rë xi sahmi tangun me cojo xutachanga naja xi ha Nina cavaxijin me, xi cuma rë xi sacú rë me cjuanchina rë Egipto. Cuatjin catsingatahacacun me ta, tsëhë xi hatuxa quitahacacun me cjuatjo xi sua Nina me ngascan.
HEB 11:27 Tsëhë xi mangucacun me cojo Nina ne, cavetjuxin me tsëhë nangui Egipto, hacuaha hisca cavincharcuaain rë me yojo rë me tsëhë xi cjan rë me xi matitjun jan. Cacaa rë me cojo yëjë ni cjuacjintacun vëhë sacuaha xi tivutsejen me Nina xi matsijin.
HEB 11:28 Tsëhë xi mangucacun me cojo Nina ne, casahmi me suhi tsëhë Pascua, hane cavitexa me yëjë ni xutachanga naja xi cuinchataha me jni rë chu ngajan ya ngahñu rë tingotjo ndava me xingu xingu me, cojo sa xi hora xi cjuehe hasen xi tsiquehen rë quihndi tjun rë yëjë ni xuta ne, tsiquiin rë hisca xi ngu quihndi tjun rë xutachanga naja.
HEB 11:29 Tsëhë xi mangucacun xutachanga naja cojo Nina ne, cavatjucja me Ndachacun Hani sacuaha vatju me nangui quixí. Hya xi camá ne, xi canduva xuta Egipto tivatju me ne, hora vëhë cavuya camatangun nga nandá hane ngajan cafë xuta xi cuacun vë.
HEB 11:30 Tsëhë xi mangucacun xutachanga naja cojo Nina ne, cavitijñundee me hnchua xondyojo tsëhë nandya Jericó, hane xi cavatju yatu nixtin ne, cavixujne hnchua vëhë.
HEB 11:31 Hacuaha tsëhë xi mangucacun ngu na Jericó xi hmí rë Rahab cojo Nina ne, hacuiin hya xi cahme yëjë sa xuta Jericó xi cahndiin tsëhë Nina, hya cahme na xi viteña yojo rë vë ta, tsëhë xi cojo cjuandaja cafahatsja na ngu jo xutachanga naja xi quiji cavutsejensun me nandya Jericó jan.
HEB 11:32 ¿Mé sa xi meje nuju xi cuichjá cojo nuju? ta hisca chutaain sa hora xi cuichjá cojo nuju tsëhë xutachanga naja Gedeón, cojo Barac, cojo Sansón, cojo Jefté, cojo David, cojo Samuel, cojo yëjë sa profeta.
HEB 11:33 Xuta xi cuacun vë ne, tsëhë xi camangucacun me cojo Nina ne, cacaa rë me hya xi casahmi me si cojo xuta tsëhë jingu sa nandya, casahmi me xi ndiya rë cjuaquixi, cavetjucaa ngu jo cjua xi cachja Nina cojo rë me. Camaji cavuxaha chu xa hntsua chu hora xi meje sinë chu me.
HEB 11:34 Catiin me hya xi cavincha xuta me ngajñi ndihi xi meje cuaca me me. Cavatjuhnga me tsëhë xuta xi meje tsiquehen rë me cojo quicha. Handasa jemu ndaya tjin cacun me ne, casacu rë me ngahñu. Jemu casacu rë me ngahñu hya xi casahmi me si cojo xuta tsëhë jingu sa nandya, cacaa rë me catsinguijne me xuta xi choho vëë rë me.
HEB 11:35 Ngu jo yachjin ne, cavuya cafahatsja me xuta rë me xi cavuya cjuahñu hya xi cahme. Peru ngu jo nga xutachanga naja ne, jercu cavaja xuta me. Peru catsingatiin me xi sehenndaya me ta, tsëhë xi mijí tsismicacun me Nina hacuaha meje rë me xi sacú rë me ngu cjuahñu xatsë xi hitsë sa ndajyihi. Vëhë xi cacaa rë me hya xi cavaja xuta me hisca xi cahme me.
HEB 11:36 Hane ngu jo nga me ne, catsixcuehyu xuta me, hacuaha cavaja xuta me cojo cuarta rë chu, hisca quiji me ndavaya hacuaha camahñu me cojo cadena.
HEB 11:37 Catsiquehen xuta me cojo ndyojo, cavatëcja vasen xuta me cojo quicha nehñu, catsiquehen xuta me cojo quicha, catsujyihiya nguehe catsujyihiya ngajan me tixtë rë me chuxin rë chu tsánga cojo chuxin rë chu tentsun. Jemu camachaja rë me, jemu jyë cjuañihi cavatju me camá, choho casahmi xuta cojo rë me.
HEB 11:38 Xutachanga naja xi cuacun vë ne, hisca vechiin chuva rë xi sacú rë ngasunhndë me. Catsujyihiya me ngajan ngu xín camahani hiscan naxindya, hiscan nguijo, hisca ngu ngojo naxi caviyuju me.
HEB 11:39 Peru xuta xi cuacun vë ne, handasa ha cavetjundaja me ngatsë rë xi mangucacun me cojo Nina ne, peru hisca xi ngu me casacuiin rë me cjuandaja xi ha cachja Nina xi sua rë me,
HEB 11:40 tsëhë xi Nina ne, hya xi catsingatahacacun me ngatsë naja ne, ha cavejñangucacun me xi sahmi me ngu xcusun xi hitsë sa ndaja, xi hisca nixtin quihndë ne, sahmi Nina xi cuechutaha xutachanga naja xi cuacun vë yëjë ni hacutjin xi meje rë Nina xi cuechutaha me, sacuatjin tisahmi Nina cojo naja ngayaan quihndë.
HEB 12:1 Vëhë xi ngayaan ta ha jemu cjín xutachanga naja xi machaya naja xi camangucacun me cojo Nina ne, meje rë xi cuejñaxen yëjë ni xcusun xi sahmindya naja, hacuaha cuejñaxen cjuatsehen xi mijí cjuexin tsajan, hacuaha nihña ngahñu xi scaa naja cuanguen nduju cojo ndiya xi Nina cavejña me xi cuma naja.
HEB 12:2 Hacuaha meje rë xi cuejñahñu cjuatacun naja cojo Jesús, me xi cavejña ntsacu cjuachacun xi macjain naja hacuaha catsichihin me. Ngatsë rë cjuasua xi cavejña Nina xi cuma rë Jesús ne, cacaa rë me cojo cjuañihi xi casetaha me xcun cru, hisca casahmicuendaain me xi jemu cjuasava xi cuatjin cahme me. Hya xi camá ne, sehe quiji me ngahnga, hane ngajan tacun me taha ladu quixi tsëhë Nina.
HEB 12:3 Vëhë xi ninguitsjun Jesús, me xi cacaa rë cojo yëjë xcusun xi casahmi xuta tsehen hya xi catsitjungui me Jesús. Ninguitsjun me, cojo sa xi hacuiin cjuenda rë cjuatacun nuju, hacuiin cuma ndaya tacún.
HEB 12:4 Ta ngayun ne, hisca cjuaveya cjëë cuechuntuhun xi nihñu ngahñu xi ningatuun rë cjuatsehen.
HEB 12:5 Sacuaha xi ngayun ne, canichayun cjua xi chja Nina cojo nuju sacuaha chja ngu nahmi cojo quihndi rë me xi chja cuitjin: Hacuiin tu xcuehyu ni cumacjain ri hya xi Nai naja tiveyaquixi me ngaye ndiya, tsan, hacuaha hacuiin cuma ndaya tacuin hya xi tichjataha me ngaye.
HEB 12:6 Ta Nai naja ne, quihndi xi hmucacun me ne, veyaquixi me ndiya, hacuaha sahmi me castigu yëjë ni xuta xi fahatsja me sacuaha quihndi rë me. Cuatjin chja cjua jan.
HEB 12:7 Ngayun ne, caticaa nuju cojo yëjë ni cjuacjintacun, ta xi cuatjin vatjun má ne, Nina tiveyaquixi nuju me ndiya. Nina ne, vutsejen me ngayun sacuaha quihndi rë me ta, cjuaquixi xi tsajin ngu quihndi xi nahmi rë ne, veyaquixiin rë ndiya.
HEB 12:8 Peru sa xi Nina cueyaquixiin nuju me ndiya sacuatjin veyaquixi me ndiya tsajan ngayejen ni ne, ngajan matsejen xi hacuiin quihndindaja rë me ngayun.
HEB 12:9 Ngayaan ne, hacuaha tjin xutacha naja nguehe ngasunhndë xi cavinchaquixi naja me ndiya, hacuaha cachjahanrcun me. Peru hitsë sa meje rë xi cuinuhyan tsëhë Nina Nahmi naja xi tacun me ngahnga. Xi cuatjin ne, cuechuntahan ngu cjuahñu xatsë.
HEB 12:10 Me xi cuacun vë ne, cavinchaquixi naja me ndiya ngu jo nixtin ni hacutjin xi má rë me xi ndatjin. Peru xi vinchaquixi naja Nina ndiya ne, ngayaan ndaja tsajan, cojo sa xi cuma tyjahi cjuatacun naja sacuatjin tyjahi cjuatacun rë suvá me.
HEB 12:11 Hya xi tjin yo vinchaquixi naja ndiya ne, hacuiin ndama naja ta choho má naja, hora xi tichja me cojo naja. Peru sa xi cuinuhyan ne, xi cuma ngascan ne, sacú naja cjuandaja cjuajeya xi cuma tyjahi cjuatacun naja.
HEB 12:12 Vëhë xi ngayun xi ndaya tjin tacún xi tivangun cojo ndiya rë Jesús ne, tuhun ngahñu xahasen nuju.
HEB 12:13 Ngu quixi tángun ni cojo ndiya rë Jesús, cojo sa xi yo xi ndaya tjin cacun ne, hacuiin chajá tsëhë ndiya rë Jesús ta sacú rë ndiya xi cjuaquixi.
HEB 12:14 Nihñu ngahñu xi cuinechun ngu cjuandaja ngu cjuajeya cojo yëjë ni xuta, hacuaha nihñu ngahñu xi cuma tyjahi cjuatacun nuju, ta hisca xi ngu xuta ne, cuechiin me xcun Nai naja sa xi hacuiin tyjahi cjuatacun rë me.
HEB 12:15 Nechun cuidadu cojo sa xi tsajin ngu xuta xi cuechintaain me cjuandaja rë Nina, ta ngaxtun vëhë ne, choho cuma rë me hane tu hitsë tu hitsë ne, tsinguetsun me cjuatacun rë jemu cjín xuta.
HEB 12:16 Nechun cuidadu cojo sa xi tsajin ngu xuta xi sahmi me cjuatsehen cojo ngu xi hacuiin chjuun rë me. Hacuaha nechun cuidadu cojo sa xi tsajin ngu xuta xi hisca sahmicuendaain me Nina, sacuatjin rë xutachanga naja Esaú, xi casua me yëjë cjuanchina xi satë rë me xi má me quihndi tjún, ngatsë rë ngu comida xi cajinë me.
HEB 12:17 Ngayun ne, ha hyun ta xi camá ngascan hya xi meje cjuahatsja me ximinchacun rë nahmi rë me ne, cavitjungui me, tsëhë xi ha quihndë tsajin chuva rë xi tsindeya me cjuatacun rë me, handasa hisca cajihnda me xi meje rë me xi cuatjin cuma.
HEB 12:18 Ha jemu hatsëë xi xutachanga naja ne, quiji casahmi tiña me tsëhë ngu naxi xi tacun nguehe ngasunhndë hiscan xi catí ngu ndihi jyë, hiscan xi jemu jñu camahani, hiscan xi jercu hñu camahani cavanga tjo,
HEB 12:19 hiscan xi canuhya rë xi fane ngu tyjo, hiscan xi canuhya rë cjua xi cachja Nina. Hane xuta xi cahndë me cjua vëhë ne, jercu cafehya rë me xutachanga naja Moisés xi ha quihndë cuichjaain sa Nina cojo xuta xi cuacun vë.
HEB 12:20 Cuatjin cachja me ta, tsëhë xi cacaain rë me cojo cjua xi cachja Nina hya xi cachja me cuitjin: “Yo xi cjue cuisane ntsacu hiscan naxi vë ne, meje rë xi cueya cojo ndyojo, handasa ngu chu.” Cuatjin cachja Nina.
HEB 12:21 Xcusun vëhë ne, ngu chircun jyë, vëhë xi hisca Moisés ne, cuitjin cachja me: “Jemu tsácjun, ña fatsë ngahan.” Cuatjin cachja me.
HEB 12:22 Peru ngayun ne, casatiin sa nuju cjuacjintacun vëhë ta ngayun ne, canihñutangun cjuatacun nuju cojo Nina xi quicun, me xi tacun ngajan ngahnga, sacuaha nandya xi hmí rë Jerusalén, ndetjún xi hmí Sión. Canihñutangun cjuatacun nuju cojo yëjë jercu tu cjín camahani ángel xi tjin tangun xi sahmi jyë sahmi hnga rë Nina.
HEB 12:23 Ngayun ne, canihñutangun cjuatacun nuju cojo yëjë xuta xi cahme xi quihndi rë Nina xi tjin tangun ngajan ngahnga hiscan xi siutahaxujun ñihi rë. Yëjë nima vëhë ne, vëhë xi sacuaha quihndi tjun rë Nina. Canihñutangun cjuatacun nuju cojo Nina, Nina xi tsichuva rë yëjë ni xuta cojo cjuatacun rë me. Ngayun ne, canihñutangun cjuatacun nuju cojo hasen rë xuta xi tsajin jyë́ rë, xi casahmi Nina xi cavechutaha me yëjë ni hacutjin xi meje rë Nina xi cuechutaha me.
HEB 12:24 Ngayun ne, canihñutangun cjuatacun nuju cojo Jesús, me xi sahmitangun rë xuta cojo Nina ngatsë rë ngu compromisu xatsë. Hacuaha canihñutangun cjuatacun nuju cojo jni rë Jesús jan ne, hitsë sa ndaja sua machaya naja tsëhë cjuandaja rë Nina xi cuma rë jni rë xutachanga naja Abel.
HEB 12:25 Nechun cuidadu, hacuiin nitjungun Nina, me xi tichja cojo naja. Ta sa xi xutachanga naja cavatjinhngaain me tsëhë castigu hya xi catsitjungui me Moisés, me xi cachja cjua rë Nina cojo xuta nguehe ngasunhndë ne, hitsë guan ngayaan, sa xi nicuyan taha ngaxtuun tsëhë Jesús, me xi tichja cojo naja hisca ngajan ngahnga.
HEB 12:26 Sacuaha nixtin rë xutachanga naja jan ne, ña nangui cafiniya cojo cjua xi cachja Nina, peru quihndë ne, chja me cuitjin: “Ngu ndiya sa tsiniya nangui, peru hacuiin suvá nangui ni tsiniya ta cojo ngahnga tsiniya.” Cuatjin chja Nina.
HEB 12:27 Hya xi chja me cjua xi “ngu ndiya sa” ne, sua machaya naja xi chjahaxin rë yëjë ni xcusun xi finiya, cuma cuinújan ne, yëjë ni xcusun xi Nina casahmi me, cojo sa xi cuiyuju xcusun xi maji finiya.
HEB 12:28 Vëhë xi quihndë ne, tahan nacuechji rë Nina ngatsë rë xi tiviseen ngahma gubiernu rë me; gubiernu vëhë ne, vëhë xi maji finiya. Hane xi cuatjin nihña ne, chjahanrcun Nina sacuatjin xi chuya rë me, cojo yëjë ni cjuandaja cjuajeya tsëhë xi ngayaan ne, rcun me.
HEB 12:29 Cuatjin meje rë xi nihña ta Nina naja ne, tsicjë me yëjë ni xi cjuatsehen sacuatjin rë ngu ndihi jyë xi tsicjë cuaca rë yëjë ni xcusun xi ma tí.
HEB 13:1 Tángun nduju cojo xcusun naja xi nihñahmutacun xingueen sacuaha xi ngu jni ngu yojo naja.
HEB 13:2 Hacuiin nichayun xi cojo cjuandaja chjuhunntsun xuta ngu nangui xi cjuehe nangui nuju ta tjin ngu jo xutachanga naja ne, cuatjin cafahatsja me xuta ngu nangui xi cafehe nangui rë me ne, hisca hvíin me ne, ángel xi cafahatsja me jan.
HEB 13:3 Ninguitsjun xuta xi hincha me ndavaya. Nihñucuendun sacuaha xi cojo ngayun nechunyun cojo rë me ndavaya. Hacuaha ninguitsjun xuta xi choho sahmi jingu sa xuta cojo ta, tsëhë xi ngayun ne, tjin ngu nixtin ne, hacuaha cuma cuatjun cuatjin.
HEB 13:4 Ngayujun ni ne, meje rë xi chjuhunrcun xi hmí rë cjuavixan. Hisca ngu ngayun ne, mijí rë xi ninguetsun ngu cjuavixan xi ha tjin ndaja ta cuechu nixtin xi Nina ne, sahmi me castigu xuta xi sahmi me cjuatsehen cojo ngu xi hacuiin chjuun hacuiin xihin rë me, há tjin chjuun tjin xihin rë me ne, o há tsajin chjuun tsajin xihin rë me.
HEB 13:5 Hacuiin jercu meje nicujun tujún xi tivangun cojo nixtin nuju. Catamangutacun ni cojo xi ha tjin nuju. Cuatjin nihñu ta, tsëhë xi Nina ne, cuitjin cachja me: “Hatuxa tsajin nixtin xi tsismecácun nuju.” Cuatjin cachja me.
HEB 13:6 Vëhë xi jemu ndama naja xi cuitjin nújan: Nai naja ne, me vëhë xi visecoo ná me; vëhë xi tsacjuun. ¡Ndastu mé sahmi xuta cojo ná ngahan! Cuatjin nújan.
HEB 13:7 Ninguitsjun me xi matitjun ngajñi nuju, me xi cuacun cachja cojo nuju cjua rë Nina. Ningatuhuntacún tsëhë cjuandaja xi cavetjucaa tsëhë xcusun xi casahmi me, hacuaha catamangutacún cojo Nina sacuatjin camangucacun me xi cuacun vë.
HEB 13:8 Yëjë ni cjuatacun xi tjin rë Jesucristu hisca ntsacu cavetsihin ne, cjuatacun vëhë tjin rë me hisca quihndë, hacuaha cjuatacun vëhë tjin rë me yëjë nixtin xi cjui sa.
HEB 13:9 Xicatsanguun ndiya rë jingu sa cjuachacun xi hacuiin tangun cojo cjuachacun xi cjuaquixi. Hitsë sa ndaja xi ngayaan ne, cumangutacun cojo Nina ngatsë rë cjuandaja rë me, xi cuma rë ngatsë rë cjuachacun xi vicuya yahnga xuta hacutjin xi meje rë xi xinë xi siuhun ta, tsëhë xi cjuachacun xi vicuya xuta xi cuacun vë ne, tsajin mé machjirëhë rë xuta xi tjengui me cjuachacun vëhë.
HEB 13:10 Cjuaveya rë Jesucristu ne, tangun hitsë cojo cjuatjo xi tu nu tu nu ni cjue xcun Nina ngatsë rë jyë́ rë yëjë ni xuta. Tangun hitsë ta, tsëhë xi sacuaha nahmi xi sahmi me xcusun rë xutachanga naja ne, hatuxa cumaji sinë me yojo rë chu xi hme xi sua me sacuaha ngu cjuatjo vëhë.
HEB 13:11 Ngayujun ni ne, ha ndaja hyun ta nahmi xi matitjun ne, vaha me jni rë chu xi cahme, ficojo me ngajan Cahndë́ Rcun, xi sua rë me Nina sacuaha ngu cjuatjo ngatsë rë jyë́ rë xuta, peru yojo rë chu ne, cahndë́ rë xi sinë me ne, cjue ngajan ngu xín tsëhë nandya, hane ngajan cjuë cueti.
HEB 13:12 Cuanitjin rë Jesús ta ngajan ngu xín tsëhë nandya cahme me. Cahme me cojo sa xi tsityjahi me cjuatacun rë xuta ngatsë rë jni rë suvá me.
HEB 13:13 Ngajan xi ngayaan ne, cuetjunxen tsëhë nandya, cuma cuinújan ne, cuetjunxen tsëhë xcusun rë xutachanga naja, cuanguentjenguen Jesús, hacuaha meje rë xi scaa naja xi choho chja xuta tsajan sacuatjin choho cachja me tsëhë Jesús.
HEB 13:14 Cuma cuetjunxen tsëhë nandya vë ta, tsëhë xi nguehe ngasunhndë vi ne, tsajin naja ngu nandya xi cuejña yëjë nu yëjë nixtin ta ngayaan ne, tivinchasen sa nandya xi tsindaja Nina xi cuma ngascan, cuma cuinújan ne, ngajan ngahnga.
HEB 13:15 Vëhë xi ngayaan ne, xi tivanguen ndiya rë Jesús ne, meje rë xi yëjë ni hora naxenndajan Nina, sacuaha xi titahan ngu cjuatjo xi cuma rë me, cuma cuinújan ne, meje rë xi ndaja cuinújan tsëhë me, meje rë xi cuinújanquixen xi tsëhë me ngayaan.
HEB 13:16 Hacuiin nichayun xi nihñu cjuandaja hacuaha cuisecun xingun xingu xingu ngayun ta xi cuatjin nihñu ne, sacuaha xi tituhun rë Nina ngu cjuatjo xi jemu chuya camahani rë me tsëhë.
HEB 13:17 Tinuhyun tsëhë me xi matitjun ngajñi nuju, hacuaha nihñu yëjë hacutjin xi meje rë me xi cuacun vë ta me vëhë xi sahmi cuidadu nuju me hacuaha vëë me xi cuechu nixtin xi sua me cuenta cojo Nina. Nihñu ngahñu xi me xi cuacun vë ne, cuma sua rë xahasen rë me, hacuiin choho cuma rë me xi tisahmi me xa cuatjin ta sa xi choho cuma rë me ne, tsajin mé machjirëhë xi cuma nuju.
HEB 13:18 Nihñu oración ngatsë niji ta, tsëhë xi ngayin ne, hyin cojo cjuatacun niji xi cjuatacun niji ne, tyjahi, hacuaha hatuxa meje nihñi cjuandaja ngajñi rë tu mé ni cjuacjintacun.
HEB 13:19 Hacuaha ngahan ne, jercu cjuéhya sa nuju xi cuatjin nihñu oración ngatsë niji, cojo sa xi sua Nina cahndë́ xi hitsë sa xati cuinduvatjëngë nuju.
HEB 13:20 Quihndë ne, ngayaan ne, ha hyan ta Nina ne, sua naja me cjuandaja cjuajeya, hacuaha catsicuya me Nai naja cjuahñu, me xi cavejña ngajñi rë nima. Nai naja ne, hacuaha jemu ndaja sahmi naja me cuidadu sacuaha sahmi cuidadu ngu xuta chu tsánga rë me. Cuatjin ma sahmi Nai naja ngatsë rë jni rë me xi cavetju hya xi cahme me, jni xi casahmichihin rë compromisu xi yëjë nu yëjë nixtin sahmi xa.
HEB 13:21 Nina catisua nuju me yëjë cjuandaja rë me, cojo sa xi ngayun ne, cuma nihñu yëjë hacutjin xi meje rë me. Hacuaha catisahmi me cojo naja hacutjin xi chuya rë me, ngatsë rë xi ngayaan ne, tjin tangun cjuatacun naja cojo Jesucristu. Hane ngayaan ne, meje rë xi nihña jyë nihña hnga Jesucristu yëjë nu yëjë nixtin. Cuatjin jain.
HEB 13:22 Ngayujun ni ne, nihñu favor ne, tisiñuju cojo cjuasua cjua xi catsihindu nuju vë ta hacuaha hacuiin cjín cjua vë xi catsihindu nuju.
HEB 13:23 Nguehe tisuá tijimachaya nuju ta cha Timoteo xingueen ne, ha camandaya cha tsëhë cjuañihi. Sa xi cjuehe xati cha ne, cuinduvintjenguin nuju ndyá, hane ndyá sacú xingueen.
HEB 13:24 Tuhun ngu nina naha cojo yëjë me xi matitjun ngajñi nuju cojo yëjë sa me xi má ladu rë Nina. Xuta Italia xi xuta rë Nina ne, hacuaha tsingatju me ngu nina nuju.
HEB 13:25 Nina catisua nuju me cjuandaja rë me. Cuatjin jain.
JAM 1:1 Ngahan Santiago, xi mosu hndixahan tsëhë Nina cojo tsëhë Nai naja Jesucristu ne, tsingátju ngu nina tsujun, ngayujun ni xi xuta ladu rë Nina ngayun, ngayujun ni xi cavitsojo yun ngasunhndë.
JAM 1:2 Ngayujun ni tsan ne, ngajñi rë yëjë ni xcusun cjuacjintacun xi cuátjun cuma ne, meje rë xi ndaja catama rë xahasen nuju ta,
JAM 1:3 tsëhë xi ha hyun ta, hya xi cavatju xi cacaa nuju cojo ngu cjuacjintacun jan ne, sa xi hacuiin canismutacún cjuachacun xi macjain nuju ne, vëhë cuisecoo nuju xi hitsë sa scaa nuju tu mé ni cjuacjintacun xi cuátjun sa cuma.
JAM 1:4 Peru nihñu ngujyë xi scaa nuju cojo yëjë ni cjuacjintacun jan hisca xi cuijnetaha. Sehe ngajan xi cuma yun xuta tyjahi xi chutaha cjuatacun rë xi cuma sahmi yëjë ni cjuandaja.
JAM 1:5 Peru sa xi yo yun xi sahmi chaja nuju cjuatacun ne, chjahyun rë Nina, hane sacú nuju ta, tsëhë xi Nina ne, hisca sesuntaha sa hya xi sua naja me, hacuaha hacuiin chjahnga me cojo naja, hya xi chjahyan rë me.
JAM 1:6 Peru meje rë xi catamangutacún hora xi chjahyun rë me, hacuiin jo cuma tacún ta, tsëhë xi xuta xi jo má cacun me ne, tangun me cojo tsindyu rë ndachacun xi ficojo rë tjo, xi fi nguehe fi ngajan.
JAM 1:7 Xuta xi cuatjin cun me ne, catijnercu me ta tsajin mé xi sua Nina me ta,
JAM 1:8 tsëhë xi jo má cacun me, jo xcun jo hntsua me tsëhë yëjë ni xcusun xi sahmi me.
JAM 1:9 Peru xuta yuma xi ladu rë Nina me ne, ndaja catama rë xahasen rë me ta, xcun Nina ne, jercu vengui chjí rë me.
JAM 1:10 Hane xuta nchina xi ladu rë Nina me ne, hacuaha ndaja catama rë xahasen rë me, hya xi cuijnercu me xi yëjë ni cjuanchina rë me ne, hisca venguiin chjí rë xi cuma rë Nina. Xuta nchina ne, cjuë me sacuatjin fë naxu ndexin.
JAM 1:11 Hya xi tjercu ma suë chan ndavá ne, xca jan ne, fë yëjë xi. Hacuaha naxu rë ne, fë vixu. Xcusun rë ne, handasa tjercu ndajyihi camahani ne, fë vetsun. Hacuanitjin ni cjuë xuta nchina ngajñi rë cjuayuma xi sahmi me.
JAM 1:12 Jemu ndaja tsajan ngayaan, sa xi scaa naja cojo yëjë ni cjuacjintacun xi cuátjun cuma ta, hya xi cavatju xi cacaa naja ne, hya sacú naja ngu cjuahñu ndajyihi ngajan xcun Nina. Ta cachja Nina xi, sa xi hmutacun me ne, sua naja me ngu cjuahñu ndajyihi jan.
JAM 1:13 Hya xi xahasen naja meje rë xi nihña ngu cjuatacun tsehen ne, mijí rë xi cuinújan xi Nina casua naja me cjuatacun tsehen jan, ta Nina ne, hatuxa tsajin rë me cjuatacun tsehen, hacuaha hatuxa suaain naja me cjuatacun tsehen xi nihña.
JAM 1:14 Peru cjuatacun tsehen xi meje nihña ne, hatuxa vetju tsëhë xahasen naja suvaan.
JAM 1:15 Hya xi ningatahantacun xi meje nihña cjuatsehen ne, cjuatacun jan sahmi xi nihña cjuatsehen. Hane sa xi hatuxa ningatehen rë yëjë ni cjuatsehen xi nihña ne, sacuiin cahndë́ cuechun xcun Nina.
JAM 1:16 Ngayujun ni tsan ne, mijí ná xi cuma ndacha ngayun.
JAM 1:17 Yëjë ni cjuandaja ndajyihi xi sacu naja ne, nduva tsëhë ngahnga ta, Nina xi casahmi me yëjë ni ndihi xi siutaha ngahnga ne, me vëhë sua naja me yëjë ni cjuandaja jan. Ndihi xi siutaha ngahnga jan ne, vindeya xcusun rë ta, tjin hora sua ndavá rë ne, tjin hora suaain ndavá rë. Peru Nina ne, chuva xi tacun ni me, tsajin vindeya cjuatacun rë me.
JAM 1:18 Hane hora xi camacjain naja cjua xi cjuaquixi ne, hora hya casua naja me ngu cjuahñu xatsë. Cuatjin casua naja me ta, tsëhë xi meje rë me xi ngayaan ne, tjun tjun cuma yaan xuta ladu rë me. Sehe ngaxtun vëhë ne, cjín sa xuta xi hacuaha cuma me ladu rë Nina.
JAM 1:19 Ngayujun ni tsan ne, hya xi yo cuichja cojo nuju ngu cjua ne, titjun tinuhyunndujun mé cjua xi cuichja me. Hacuiin ngutjen chjayunngun, hacuiin ngutjen cuma cjan nuju.
JAM 1:20 Ta sa xi cjan nuju ne, nihñuu cjuandaja sacuahatjin xi meje rë Nina.
JAM 1:21 Peru yëjë ni cjuatsehen ne, meje rë xi tiyujunxun. Hane cjua rë Nina xi camacjain nuju ne, tetjún cojo cjuandaja cojo cjuajeya cahntsua xahasen nuju ta, tsëhë xi cjua vëhë ne, cuma cuaxëtje nuju.
JAM 1:22 Hane sa xi tu cuisiñuju ni cjua rë Nina jan, hane nihñuu hacutjin xi chja ne, tu cuindachun suvun ni rë yojo nuju. Vëhë xi hacuiin tu cuisiñuju ni ta, meje rë xi nihñu yëjë ni hacutjin xi vitexa cjua rë Nina.
JAM 1:23 Sa xi tu cuisiñuju ni hane nihñuu hacutjin xi vitexa cjua jan ne, tangun yun cojo ngu cha xi vutsejenya cha xcun cha cojo espeju.
JAM 1:24 Cavutsejenya cha xcun cha hacutjin jyihi cha ne, peru xi cafe cha ne, ngutjen cachaya rë cha hacutjin jyihi cha.
JAM 1:25 Peru hya xi cuisiñuju cjua xi vitexa Nina jan ne, sa xi chutayun sa cjua, sa xi chayaain nuju cjua, sa xi nihñu jain hacutjin xi vitexa cjua jan ne, sacú nuju cjuandaja rë Nina xcun ngasunhndë nuju. Cjua rë Nina xi cuacun jan ne, hatuxa cjuaquixi, hacuaha cjua vëhë xi vëhëndaya naja tsëhë ngajñi rë cjuatsehen.
JAM 1:26 Sa xi tiningatuhuntacún xi jemu ndaja tichjuhunrcun jain rë Nina, ngajñi rë xi tujyë choho vetju ntsuvun nújun ne, tu mahya xi chjuhunrcun rë Nina ta, tu tivindachun suvun ni rë yojo nuju.
JAM 1:27 Jyan xcusun vihi xi chuya rë Nina Nahmi naja xi nihña: ngu ne, xi chjahanrcun jain me cojo ngu xahasen xi tyjahi; má jo ne, xi cuisecoon rë hndixahan cojo chjuun cahan ngajñi rë cjuacjintacun rë me; xi ma jyan ne, xi hacuiin nihña cjuatsehen.
JAM 2:1 Ngayujun ni tsan ne, quihndë xi macjain nuju Nai naja Jesucristu, me xi tjemu tjin rë cjuandaja ne, mijí rë xi nihñu jyë ngu xuta ne, hane nihñu chuvun nga ngu me.
JAM 2:2 Sa xi cuisehen ngu xuta nchina cahntsua yungun nuju, xi hisca oro xtungun rë me hacuaha tjercu ndajyihi tsjian rë me ne, hacuaha cuisehen nga ngu xuta xi yuma cojo tsjian rë me xi jyihi ntsun ntsun me ne, ¿mé cuinújun cojo rë me?
JAM 2:3 Me xi ndajyihi tsjian rë jan ne, ¿há jemu chjuhunrcun me, xi cuitjin cuinújun cojo rë me?: “Tinechun nguehe cahndë́ ndajyihi vihi.” Hane me xi yuma jan ne, ¿há cuitjin cuinújun cojo rë me?: “Ngaye ne, ngajan nechin jan”, o sa tsajin ne: “Nguehe nechin nguehe nangui.”
JAM 2:4 Sa xi cuatjin cuinújun ne, ngajan matsejen xi hisca ngajñi nuju ne, hacuiin tangun xcusun nuju xi nihñu cojo ngayëjë ni xuta. Tinichuvun xingun ni ne, peru cojo ngu cjuatacun tsehen.
JAM 2:5 Ngayujun ni tsan ne, tinuhyun cjua vihi. Nina ne, cavaxijin me xuta xi yuma xcun ngasunhndë, cojo sa xi tjemu ndaja cumacjain rë xuta jan me, hacuaha sacú rë xuta jan cahndë́ ndajyihi nixtin xi cuetsihin cuitexa jain me ngajñi rë yëjë ni xuta ngasunhndë, sacuatjin xi ha cachja me xi sacú rë yëjë ni xuta xi tsihmucacun me Nina.
JAM 2:6 Peru ngayun ne, nisavun rë xuta yuma. Peru ¿yo xi choho sahmi cojo nuju ni? ¿Yo xi faha nuju, fi vinchajyë́ nuju xcun xutaxa rë? Xuta nchina xi cuatjin sahmi cojo nuju.
JAM 2:7 Hacui jain me. Hacuaha xuta xi nchina ne, me vëhë xi choho chja me tsëhë Jesucristu. Hane Jesucristu jan ne, hacui me xi casua naja ñihi xi tsëhë suvá me.
JAM 2:8 Xcun xujun rë Nina ne, camahindu ngu cjua xi cavitexa Nina, xi chja cuitjin: “Meje rë xi nihmitacuin xinguin sacuahatjin nihmitacuin yojo riji.” Sa xi cuatjin jain nihñu ne, jemu ndaja tjin.
JAM 2:9 Peru sa xi nihñu jyë ngu xuta hane nihñu chuvun nga ngu me ne, ha canichujún cjua xi cavitexa Nina. Hacuaha suvá cjua jan ne, vëhë cuinchajyë nuju ta canihñuu hacutjin chja cjua jan.
JAM 2:10 Ta sa xi nichujún ngu cjua xi cavitexa Nina ne, handasa nihñu yëjë ni cjua xi yahnga ne, peru tangun jyë́ nuju cojo jyë́ rë ngu xuta xi hndiin camahani tsëhë yëjë ni cjua xi cavitexa Nina jan.
JAM 2:11 Cuatjin ta, tsëhë xi ngu ni Nina xi cavitexa me catsijo cjua vihi. Ngu ne: “Xi canindesiin cojo rë ngu chjuun, o cojo rë ngu xihin xi xín.” Ngu nga ne: “Xi caniquiin xuta.” Vëhë xi handasa hacuiin nindesun cojo rë ngu chjuun, peru sa xi nicuhun ngu xuta ne, ha canichujún cjua xi cavitexa Nina jan, hane tjin jyë́ nuju xcun cjua vëhë.
JAM 2:12 Ngajan xi meje rë xi tinújun hacuaha nihñu cjuandaja, sacuaha xi ha ndiya tsichuva nuju Nina, scutsejen me hacutjin canihñu xi vitexa cjua xi vëhëndaya naja.
JAM 2:13 Hane sa xi tsajin nuju cjuayumatacun cojo jingu sa ne, hacuaha tsajin rë Nina cjuayumatacun cojo nuju nixtin hya xi tsichuva nuju me. Peru sa xi tjin nuju cjuayumatacun ne, hacuaha tjin rë Nina cjuayumatacun cojo nuju nixtin hya.
JAM 2:14 Ngayujun ni tsan ne, sa xi cuinújun xi macjain nuju Jesucristu, peru nihñuu cjuandaja ne, hisca vengui chjiin rë ta, tsëhë xi Nina ne, cuaxintjiin nuju me xi cuatjin nihñu.
JAM 2:15 Hya xi sacú xingun cojo ngu xuta ladu rë Jesucristu xi jemu yuma camahani, xi jercu ntsun tsjian rë me, hacuaha hisca tsajin niñu xi sinë me ne,
JAM 2:16 ¿há cuitjin cuinújun cojo rë me? “Tangún ni tsan. Xicamacjiintacún. Ndaja tetsun yojo nuju ta jemu hnchan, hacuaha ndaja xinu niñu ta quiji hora.” Peru sa xi tsajin mé catuhun rë me xi cuaja xi sinë me ne, vengui chjiin camahani rë xi cuatjin cuinújun cojo rë me.
JAM 2:17 Vëhë xi vengui chjiin rë xi tu suvá cuinújan ni xi macjain naja Jesucristu nguyëjë rë xi mijí nihña cjuandaja.
JAM 2:18 Peru tjin ngu cha xi cuichja cuitjin: “Hacjahi xuta xi macjain rë me Jesucristu, handasa sahmii me cjuandaja. Hacjahi xuta xi sahmi me cjuandaja, handasa macjaain rë me Jesucristu.” Peru ngahan cuichjá cojo rë cha jan ta hacuiin hacjahi xuta ta ¿hacutjin cuma xi macjain jain naja, sa xi hacuiin nihña cjuandaja? Ngatsë rë cjuandaja xi nihña ne, vëhë tsejen xi macjain jain naja Jesucristu.
JAM 2:19 Cha vëhë ne, ¿há macjain jain rë cha xi tjin ngu ni Nina? Tjemu ndaja tjin xi cuatjin macjain rë cha. Peru hacuaha xitsehen ne, cuatjin macjain rë, hane ña fatsë xitsehen má xi tsacjun.
JAM 2:20 Tjemu yumahasen cha xi cuatjin cuichja jan. Peru nguehe cuichjá cojo rë cha ngu jo cjua, cojo sa xi cuijnercu cha ta, vengui chjiin rë xi cuinújan xi jercu macjain naja Jesucristu, sa xi mijí nihña cjuandaja.
JAM 2:21 Sacuaha xutachanga naja Abraham ne, ha hyan xi hatsëë nixtin ne, camangucacun me xi tsiquehen me quihndi rë me xi hmí Isaac ngajan xcun ngasunscun, sacuatjin xi ha cachja Nina cojo rë me. Hane ngatsë rë xi cuatjin cahndë me tsëhë Nina ne, vëhë xi cachja Nina xi ngu xuta ndaja me, ngu xuta tyjahi me.
JAM 2:22 Ngajan matsejen ta xcusun xi casahmi me ne, cama tangun cojo cjua xi macjain rë me. Hacuaha ngatsë rë xi cuatjin casahmi me ne, vëhë xi camatsejen ta macjain jain rë me.
JAM 2:23 Cuatjin camá sacuatjin chja ngu cjua xi camahindu xcun xujun rë Nina, xi chja cuitjin: “Abraham ne, camacjain rë me Nina. Vëhë xi Nina cachja me xi ngu xuta ndaja me, ngu xuta tyjahi me.” Hacuaha cachja Nina tsëhë me ta amigu rë me.
JAM 2:24 Cuatjin xi hyan xi chja Nina xi xuta tyjahi yaan sa xi nihña cjuandaja, hacuiin sa xi tu suvá ni macjain naja.
JAM 2:25 Hacuaha ni tjin ni cavatju na xi hmí rë Rahab, na xi caviteña na yojo rë na. Cama tyjahi xahasen rë na ta, tsëhë xi casahmi na ngu cjuandaja, hya xi cojo cjuandaja casua na cahndë́ xi caviyuju xuta ndava na, xuta xi catsingatju xutachanga naja ngajan nangui rë na. Hacuaha hacjahi ndiya xi catsingacun na me, xi cuetju me cjue me hiscan xi tsajin condra rë me.
JAM 2:26 Sacuatjin xi machjiriin yojo rë ngu nima ta tsajin hasen rë ne, ha cuatjin machjiriin xi macjain naja Jesucristu, sa xi tsajin cjuandaja xi nihña.
JAM 3:1 Mijí rë xi cjín ngayun cuma yun maestru tsëhë cjuachacun tsan ta, ha hyun ta ngayin xi vicuyin cjuachacun ne, hitsë sa tsichuva niji Nina xi cuma rë xuta xi yahnga.
JAM 3:2 Ngayejen ni ne, hatuxa cjín cjuatsehen xi nihña. Peru sa xi suvá cjuandaja chja ngu xuta, hane hisca ngu cjua chojyihin chjaain me ne, me vëhë ne, ngu xuta ndaja me, ngu xuta tyjahi me. Hacuaha ma vetjo me yojo rë me.
JAM 3:3 Sacuaha ngu naxin ne, sa xi cueyan frenu hntsua chu cojo sa xi cuihndë chu tsajan ne, vëhë sahmi xi cuma cuanguen cojo chu tu cutjin hiscan xi meje naja.
JAM 3:4 Hacuaha sacuaha tjin barcu ne, handasa tjercu jyihi, handasa jemu hñu ngahñu rë tjo xi tsivaha rë ne, peru cha xi cjuicojo barcu jan ne, ngu sasa ni tsiniya cha ngu ya lihndi xi hmí rë timú, sehe ficojo cha tu cutjin hiscan xi meje cjue cha.
JAM 3:5 Hacuaha ni tjin ni neje ta, ngu rquí lihndi ni tsëhë yëjë ni yojo naja. Peru handasa lihndi ne, tjemu yehe cjuahaxi xi nújan cojo rë. Sacuaha ngayaan ne, xi cuetahan rë ngu ndihi ne, handasa ngu ndihi lihndi ni ne, peru cuma cuaca rë yëjë ni ngu nguijñacha.
JAM 3:6 Hane neje ne, tangun cojo ndihi ta tjemu cjan rë. Tjercu ma chja cjuatsehen. Handasa tjin cahndë́ rë xi quitaha ngajñi yojo naja ne, peru caa rë tsinguetsun naja. Vëhë xi tjercu choho vatjun má xcun ngasunhndë naja ta, tsëhë xi xitsehen ne, vëhë sahmi xi choho nújan.
JAM 3:7 Ngayaan xuta ne, camá canimaxun yëjë ni xcusun chu, sacuaha chu nguijña, chu nisë, chu yë, cojo chu ti.
JAM 3:8 Peru neje ne, tsajin yo cuma tsimaxu rë ta, hatuxa tsehen yojo vëhë. Suaain cahndë́ xi cuma maxu. Hacuaha sacuaha nehñu chu yë cjan rë, xi quitsë rë xan rë chu xi tsiquehen naja hya xi faha chu ne, cuatjin neje ta, quitsë rë cjuatsehen xi choho nújan.
JAM 3:9 Ha cojo neje ni ne, ndaja nújan tsëhë Nina Nahmi naja, hane ha cojo vëhë ni ne, nchaten tsëhë xingueen, handasa casahmi naja Nina sacuaha jyihi suvá ni me.
JAM 3:10 Tsëhë ntsuvan ni ne, tecjan cjuandaja cojo cjuatsehen xi vetju nújan. Cuaaintjin camahani xi nújan, tsan.
JAM 3:11 Ngu nandan ne, hatuxa cumaji cuetju tangun nandá xi hyun cojo nandá xi sa.
JAM 3:12 Hane ngu ya laxa ne, cumaji cuaqui rë tsë. Hacuaha ngu nahñu tutsëjë ne, cumaji sua laxa rë. Hacuaha ni tjin ni nandá xtya ne, suaain nandá yufa.
JAM 3:13 Sa xi tjin ngajñi nuju ngu ngayun xi tjemu vechutaha cjuatacun nuju ne, meje rë xi nihñu cjuandaja. Meje rë xi cuma tsejen xi xuta ndaja xuta jeya ngayun, ngatsë rë xi nihñu cjuandaja xi vitexa cjuatacun nuju.
JAM 3:14 Peru sa xi tjin nuju cjuaxin cahntsua xahasen nuju, hane sa xi meje nuju xi suvun ni ngayun xi ndajyihi cuátjun cuma ne, meje rë xi hacuiin nihñu yehe yojo nuju, hacuiin nújun xi tjercu vechutaha cjuatacun nuju ta, quixiin vë.
JAM 3:15 Ta cjuatacun vëhë ne, hacuiin ngu cjuatacun xi casua Nina ta cjuatacun ni rë xutajyë ngasunhndë vihi, sacuaha cjuatacun rë xitsehen.
JAM 3:16 Hiscan xi tjin cjuaxin, hiscan xi tjemu choho me, ngajan ne, tjemu tujyë sahmi xuta, tjemu sahmi me yëjë ni cjuatsehen.
JAM 3:17 Peru sa xi tjin naja cjuatacun xi nduva tsëhë Nina ne, tjemu tyjahi xahasen naja, tjemu tjin rë cjuajeya xahasen naja, nihña yëjë ni ngu cjuandaja, tjin naja cjuayumatacun cojo xuta, tacun cahndë́ cjuatacun naja, hacuiin jo má tacun.
JAM 3:18 Hane sa xi ngatsë rë cjuandaja xi nihña cuma cuijnetaha si xi tjin ngajñi rë xingueen ne, cjuandaja cuinechan cojo xingueen, hane yahnga sa xuta ne, hacuaha cuetsihin sahmi me cjuandaja.
JAM 4:1 ¿Mé má cuatjin tjercu nihñu si ngajñi nuju? ¿Mé má cuatjin chicjun cojo xingun? Nihñu ngatsë rë yëjë ni cjuatsehen xi tjercu meje rë xahasen nuju.
JAM 4:2 Tu mé ni ne, meje nuju, peru ngatsë rë xi sacuiin nuju ne, vëhë xi nicuhun xingun. Tjin nuju ngu cjuaxin tsëhë tu mé ni, peru ngatsë rë xi sacuiin nuju ne, vëhë xi vetsuhun si cojo xingun, vetsuhun chicjun cojo xingun. Sacuiin nuju xi meje nuju ta, tsëhë xi chjahyuun rë Nina.
JAM 4:3 Hacuaha handasa chjahyun ne, peru sacuiin nuju ta, tsëhë xi hacuiin tsëhë cjuandaja xi chjahyun ta, xi chjahyun ne, tu nicujun ngajñi rë ngu cjuasua xi fehya xahasen nuju.
JAM 4:4 Ngayun xi jo xcun jo ntsuvun ne, ¿há hyuun ta sa xi tjenguen xcusun rë xuta ngasunhndë ne, má yaan condra tsëhë Nina? Vëhë xi tu yo ni xi vejñangucacun xi tjengui xcusun rë xuta ngasunhndë ne, sahmi me condra Nina.
JAM 4:5 Hacuiin tu cuenda camahindu xcun xujun rë Nina, hiscan xi chja cuitjin: “Nina ne, casua naja me ngu hasen xi tacun cahndë́ cahntsua xahasen naja. Vëhë xi mijí rë Nina xi cuetjunxen tsëhë ladu rë me.”
JAM 4:6 Hacuaha Nina ne, visecoo naja me cojo yëjë ni cjuandaja rë me, ta tjin sa ngu cahndë́ ngajan xujun rë me xi chja cjua rë me cuitjin: “Nina ne, chuyiin rë me tsëhë xuta xi sahmi yehe yojo rë, peru xuta xi jeya me ne, sua Nina me cjuandaja.”
JAM 4:7 Vëhë xi meje rë xi tinuhyun tsëhë Nina. Sa xi nihñuu hacutjin xi meje rë xitsehen ne, cuetjuxin xitsehen tsujun.
JAM 4:8 Tejñutsja Nina cjuatacun nuju, hane sehe Nina ne, cuaha nuju me. Tiyujunxun cjuatsehen xi tinihñu, hane ngayun xi jo má tacún ne, nihñu tyjahi xahasen nuju.
JAM 4:9 Catamavatacún, hacuaha chjihndun, tsëhë xi canihñu cjuatsehen. Cahndë́ rë xi cuéjnu ne, chjihndun, hane cahndë́ rë xi sua ma nuju ne, choho catama nuju.
JAM 4:10 Ninguijnu cjuatacun nuju xi chjuhunrcun Nai naja, sehe Nai naja ne, sahmi yehe nuju me.
JAM 4:11 Hacuiin choho nújun tsëhë xingun tsan ta, sa xi choho nújun tsëhë xingun ne, tangun vëhë cojo xi choho nújun tsëhë cjua xi vitexa Nina. O sa xi nichuvun xingun ne, tangun vëhë cojo xi nichuvun cjua xi vitexa Nina. Hane sa xi nichuvun cjua xi vitexa Nina jan ne, hacuiin tinihñu hacutjin xi vitexa ta, tinihñu yojo nuju sacuaha ngu xutaxa rë.
JAM 4:12 Peru ngu ni me xi cavitexa hacutjin xi nihña, hane ngu ni me vëhë xi tsichuva me. Me vëhë ni xi cuma cuaxëtje naja me, me vëhë ni xi cuma tsinguetsunya naja me. Peru ngayun ne, ¿yo cavitexa nuju xi nichuvun xingun?
JAM 4:13 Nguehe cuichjá ngu cjua. Tjin ngu jo yun xi cuitjin nújun cojo xingun: “Nchujun ni nguini ne, cuétjun cuanguen ngu nangui. Ngajan cuinechan ngu nu xi nihña cjuayuma naja. Cuatjin nihña, sehe sacú naja tujún.”
JAM 4:14 Peru hisca hyúun hacutjin cuátjun cuma nchujun ni nguini. Ngayaan xcun ngasunhndë naja ne, tangun yaan cojo yufí nangui ta, yufí jan ne, tsejen hora xi nduva. Peru xi tu ngu hora ne, ha cavatjucjin, cafëya.
JAM 4:15 Vëhë xi hitsë sa ndatjin xi cuitjin cuinújun: “Sa xi Nai naja meje rë me ne, sua sa me cjuahñu naja xi nihña cuitjin cuatjin xa.”
JAM 4:16 Peru ngayun ne, tjercu nihñu yehe yojo nuju xi nújun cojo xingun hacutjin xi meje nihñu. Hane xi cuatjin nihñu yehe yojo nuju ne, ngu cjuatsehen vëhë.
JAM 4:17 Hane sa xi ha hyan hacutjin fi yëjë ni cjuandaja, peru mijí nihña ne, tjin jyë́ naja xcun Nina.
JAM 5:1 Quihndë ne, ngayujun ni xi nchina yun ne, meje rë xi chjindayun chjihndun, ngatsë rë yëjë ni cjuachoho xi cuátjun cuma.
JAM 5:2 Yëjë ni cjuanchina nuju ne, cuenguichjiin rë ta, tsëhë xi cjuë yëjë cjuehndu. Sacuaha tsjian ndaja nuju ne, cjuë sinë chu quixún.
JAM 5:3 Sacuaha tujún ndaja nuju ne, cuma xutsë. Hane tsëhë xi cuatjin xutsë tujún nuju ne, vëhë tsejen xi canihñuu cjuandaja cojo tujún jan, hane ngatsë rë vëhë ne, cuátjun castigu cuma. Tjercu tivetjun camahani cjuanchina nuju quihndë, nixtin xi ha ndiya cuijnetaha cjuë ngasunhndë.
JAM 5:4 Cjëë cjuë cuechjun yëjë ni chjí rë mosu nuju xi casahmi xa nguijña nuju, hane Nai naja ne, me xi ma titjun tsëhë yëjë ni ne, vihndë me cjua xi tivinchajyë yëjë ni mosu nuju xi quitjun tsëhë.
JAM 5:5 Nguehe ngasunhndë vihi ne, tjercu ndajyihi cavatjun camá, tjercu catuhun rë cjuasua yojo nuju. Peru sacuatjin xi hatuxa vechu nixtin xi cueya chu chinga xi jercu hñucacun chu ne, hacuaha ni tjin ni cuechu nixtin xi cuátjun castigu cuma.
JAM 5:6 Ngayun ne, canihñu castigu canicuhun xuta ndaja xuta tyjahi. Hane xuta ndaja xi cuacun jan ne, joho ni rë me xi canihñu cojo rë me.
JAM 5:7 Vëhë xi tinechunyun cojo jeya tsan, hisca xi cuinduva nga Nai naja. Cha xi sahmi xa nguijña ne, xi cjuë cuincha cha tjë ne, cuejñaya cha cojo jeya hisca xi cuatju chan tsi ne, sehe cuma sacú rë cha ngu cosecha xi ndajyihi tsëhë xitjë rë cha.
JAM 5:8 Hacuaha ni tjin ni, meje rë xi tinechunyun cojo jeya, hacuaha tejñuhñu xahasen nuju ta, tsëhë xi jima tiña nixtin xi cuinduva nga Nai naja.
JAM 5:9 Sa xi cuinchunjyun xingun tsan ne, hacuaha cojo ngayun cuma yun castigu. Vëhë xi mijí rë xi cuinchunjyun xingun ta, tsëhë xi me xi tsichuva naja ne, chaja sa hitsë xi cuinduva nga me.
JAM 5:10 ¿Há vitsjiin nuju hacutjin cacaa rë yëjë ni xutachanga naja xi cachja me cjua xi caveya Nina cjuatacun rë me hatsëë nixtin? Me xi cuacun vëhë ne, casahmi me cjuetacun ngajñi rë yëjë ni cjuañihi xi cavatju me camá. Hacuaha cuatjin meje rë xi nihñu tsan.
JAM 5:11 Hatuxa nújan xi tjercu ndaja tsëhë me xi cacaa rë cojo cjuañihi. Ngayujun ni ne, ha machaya nuju cjua xi chja hacutjin cacaa rë ngu xutachanga naja xi hmí rë Job, hya xi cavatju me cjuañihi camá. Hacuaha ha hyun ta, hya xi cajnetaha cjuañihi xi cavatju me camá ne, tjemu ndaja casahmi Nai naja cojo rë me ta, tsëhë xi Nai naja ne, hatuxa tjin rë me cjuandaja, tjin rë me cjuayumatacun.
JAM 5:12 Nguehe cuichjá cojo nuju ngu cjua xi tjemu vengui chjí rë tsan. Hora xi tivisiajmu cojo xingun ne, hacuiin cuinújun xi vëë Nina, vëë tsuhi, hacuiin cuinújun xi vëë tu mé sa ni xcusun. Meje rë xi yëjë ni xi cuinújun ne, cjuaquixi, hacuiin cuindachun. Sehe ngajan xi Nina ne, sahmii nuju me castigu.
JAM 5:13 Sa xi choho tivatjun jima ne, chjahyun cjuandaja rë Nina. Sa xi tjemu sua nuju ne, sun ngu xi nihñu jyë nihñu hnga Nina.
JAM 5:14 Sa xi hmu nuju ne, chjindayun rë xuta changá xi vitexa ngajñi rë xuta ladu rë Nina, xi tsufë nuju me aceite hacuaha cjuehya me cjuandaja rë Nai naja ngatsë nuju.
JAM 5:15 Sa xi nguñajatacun hora xi chjahyan cjuandaja rë Nina ne, xuta hmu rë jan ne, cumandaja me ta, Nai naja ne, sua rë me cjuahñu. Hane sa xi casahmi xuta hmu rë jan ngu cjuatsehen ne, Nina tsinchataha jyë́ rë me.
JAM 5:16 Vëhë xi tijacun jyë́ nuju cojo xingun, hacuaha chjahyun cjuandaja rë Nina ngatsë rë xingun, sehe cumandaja me. Ngu xuta xi tyjahi cjuatacun rë me xcun Nina ne, hya xi fehya me cjuandaja rë Nina ne, tjercu vengui chjí rë cjua rë me ta, Nina ne, visecoo rë me.
JAM 5:17 Ngu xutachanga naja xi hmí rë Elías ne, vëhë ngu xuta sacuaha ngayaan. Peru cafehya nguñajacacun me cojo Nina xi cuaain tsi. Hane chuva rë jyan nu vasen ne, cavaain camahani tsi xcun nangui.
JAM 5:18 Hya xi camá ne, cafehya nga rë me Nina xi cataha tsi, hane cavuya cavaha nga tsi, hacuaha camá nga yëjë ni xitjë.
JAM 5:19 Ngayujun ni tsan ne, sa xi tjin ngu xuta ngajñi nuju xi cuetjuxin me tsëhë ndiya rë cjuaquixi, hane sa xi tjin ngu yun xi cuisecun rë me xi cuya cuisehen nga me ndiya rë cjuaquixi ne,
JAM 5:20 ninguitsjun cjua vihi: yo yun xi cuisecun rë ngu xuta tsehen xi cuetjuxin me tsëhë cjuatsehen xi sahmi me ne, ngatsë nuju ne, cuetjutje me tsëhë castigu xi cuatju me cuma. Hacuaha ngatsë nuju ne, tjercu cjín jyë́ xi cumanchataha.
1PE 1:1 Ngahan Pedru, apóstol tsëhë Jesucristu ne, tsingátju carta vihi xi cuma nuju ngayujun ni xi cavitsojo ngayun ngajan distritu Ponto, distritu Galacia, distritu Capadocia, distritu Asia, cojo distritu Bitinia, cahndë́ xi nechuntuhun.
1PE 1:2 Hisca hatsëë ne, Nina ne, cavejñangucacun me cavaxijin me ngayun, hacuaha Hasen rë me ne, caviyujuxin nuju, cojo sa xi cuinuhyun tsëhë Jesucristu hacuaha cuma tyjahi xahasen nuju ngatsë rë jni rë me. Nina ne, catitsixuva me cjuandaja cjuajeya xi cuma nuju ngayujun ni.
1PE 1:3 Nihña jyë nihña hnga me xi Nina Nahmi rë Nai naja Jesucristu cojo Hasen rë me. Jercu hmu camá rë Nina ngayaan, hane ngatsë rë xi Jesucristu cavuya me cjuahñu tsëhë ngajñi rë nima. Nina ne, casahmi me xi cavuya catsin ngayaan cojo sa xi cuetahan tacun ngu cjuahñu xatsë,
1PE 1:4 hacuaha cojo sa xi satë naja ngu cjuandaja rë Nina xi tsajin nixtin xi cuetsun, hatuxa tyjahi, hacuaha tsajin nixtin cjuëya. Hane yëjë ni cjuandaja vëhë ne, tetjo vëhë ngahnga xi cuma nuju ngayujun ni.
1PE 1:5 Hane tsëhë xi ngayujun ne, mangutacun cojo Nina ne, vëhë xi me vëhë tisahmi me cuidadu ngayujun ni cojo ngahñu rë me, cojo sa xi cuechuntuhun cjuandaja xi cuaxëtje me ngayun. Hane cjuandaja vëhë ne, ha tjin ndaja rë Nina cojo sa xi tsingacun me hya xi cjuë nixtin xi nechantahan ngasunhndë.
1PE 1:6 Tsëhë vëhë xi ngayujun ni ndama nuju, handasa hitsë sa nixtin ne, sahmi ngujyë xi jemu cuatjun cjuañihi cuma.
1PE 1:7 Cuatjin meje rë xi chutaha nuju, cojo sa xi cumatsejenquixi xi ndaja mangutacun cojo Nina. Sacuaha oro xi ma vetsun ne, ma chutahachuva rë cojo ndihi. Hacuaha ni tjin ni nuju ngayun ne, meje rë xi chutaha chuva rë xi mangutacun cojo Nina. Hane xi cuatjin mangutacun cojo Nina ne, jercu sa vengui chjí rë xi cuma rë oro. Hane xi cuatjin ndaja mangutacun cojo Nina ne, Nina ne, sahmi jyë sahmi hnga me ngayun, jemu ndajyihi cjuandaja xi sua nuju me, hacuaha cjuaharcun nuju me nixtin hya xi cuya cumatsejen nga Jesucristu.
1PE 1:8 Ngayun ne, hmutacún Jesucristu handasa cahyuun me, hacuaha mangutacun cojo rë me handasa hacuiin tinutsujun me. Vëhë xi jercu ndama rë xahasen nuju ne, xi hisca maji nújun mé xi má nuju cojo xahasen nuju.
1PE 1:9 Ngajan xi Nina ne, cuaxëtje me ngayun, ngatsë rë xi jercu ndaja camangutacun cojo rë me.
1PE 1:10 Profeta ne, jercu cavutahahya camahani me hacutjin xi Nina cuaxëtje me xuta. Hacui me vëhë xi ha tjun sa cachja me tsëhë cjuandaja xi ngascan sua Nina ngayujun ni.
1PE 1:11 Jercu cavutaya profeta xi cuacun jan janihya hacuaha hacutjin cuechú nixtin xi cachja Hasen rë Cristu xi jiya cahntsua xahasen rë me, hya xi tjun sa casua me camachaya rë xuta tsëhë yëjë ni cjuañihi xi ngascan cuatju Cristu cuma cojo cjuandaja ndajyihi xi satë rë me ngascan.
1PE 1:12 Nina ne, casua me camachaya rë profeta xi cuacun jan ta cjua xi cachja me ne, hacuiin tsëhë me ndaja ta tsujun ndaja. Hane cjua vëhë ne, hacui cjua xi cachja xuta xi casua me camachaya nuju cjuandajyihi xi chja tsëhë Jesucristu ngatsë rë xi Hasen rë Nina xi caningatjun rë tsëhë ngahnga ne, cuatjin casua rë me chuva rë xi cuichja me. Cjua vëhë ne, hisca ángel ne, jercu meje cuijnercu.
1PE 1:13 Vëhë xi meje rë xi tjin chjine ngayujun ni, hacuaha catiyuju chihin cjuatacun nuju. Ndaja tetuhun tacún tsëhë cjuandaja xi sua nuju Nina nixtin hya xi cuya cumatsejen nga Jesucristu.
1PE 1:14 Sacuaha quihndi xi ndaja vihndë ne, xicatuun cahndë́ xi cuitexa nuju cjuatacun tsehen xi tjin nuju hatsëë, hya xi jñu cjuatacun nuju.
1PE 1:15 Cahndë́ rë vëhë ne, ngajñi rë yëjë xi nihñu ne, naxunxun yojo nuju tsëhë cjuatsehen cojo sa xi tsëhë Nina cuma ngayun, sacuahatjin Nina, me xi cavaxijinjñi nuju ne, tuxa jercu xín me tsëhë yëjë ni cjuatsehen.
1PE 1:16 Tsëhë xi xcun xujun rë Nina ne, cuitjin camahindu cjua xi cachja Nina: “Meje rë xi naxunxun yojo nuju tsëhë cjuatsehen cojo sa xi tsahan cuma ngayun ta, ngahan ne, tuxa jercu xín ngahan tsëhë yëjë ni cjuatsehen.”
1PE 1:17 Ngayujun ni ne, tsëhë xi “Nahmi” nújun tsëhë me xi texta ni tsichuva cjuatacun rë xingu xingu tucu xcusun xi sahmi me ne, vëhë xi meje rë xi ndaja chjuhunrcun Nina nguyëjë rë xi nechuntuhun nguehe ngasunhndë vi.
1PE 1:18 Ha hyun xi Nina ne, cavaxëtje nuju me tsëhë ndiya xi hacuiin machjirëhë, ndiya xi caviyuju nuju xutachanga nuju. Hacuaha hyun xi hacuiin ngatsë rë ngu xcusun xi cuma cuetsun sacuaha plata cojo oro xi cuatjin casahmi Nina ta
1PE 1:19 ngatsë rë jni rë Cristu xi cavanga xi jercu machjirëhë, sacuahatjin machjirëhë jni rë cjuaveya rë ngu chu hnditsánga xi tsajin camahani mé má rë chu.
1PE 1:20 Cristu jan ne, casuaxa Nina me hisca chaja sa xi cuejña ngasunhndë, peru quihndë xi tijima chuva nixtin xi nechantahan ngasunhndë vi ne, casua Nina xi catimachaya naja tsëhë me cojo sa xi ndaja cuatjun.
1PE 1:21 Ngatsë rë me vëhë ne, ngayun ne, camangutacun cojo Nina, me xi catsicuya Cristu cjuahñu tsëhë ngajñi rë yëjë nima hacuaha casahmi jyë casahmi hnga me Cristu. Vëhë xi mangutacun cojo Nina hacuaha vetuhun tacun me.
1PE 1:22 Ngayujun ni ne, xi tivinuhyun cjuaquixi rë Nina ne, cuatjin canitsiuhun xahasen nuju cojo cjuatacun nuju, cojo sa xi nihmutacún cojo nguñaja ni cjuandaja yëjë sa me xi ladu rë Jesucristu. Ngajan xi meje rë xi hñu nihmutacún xingun cojo nguñaja xahasen nuju.
1PE 1:23 Ngayujun ni ne, hacuaha cavuya catsin nga ngayun, peru hacuiin tsëhë xuta xi hatuxa hme ta tsëhë ngu tjë xi cueyaain ta cjua rë Nina, cjua xi sua naja cjuahñu hacuaha tsajin nixtin cjuëya.
1PE 1:24 Xujun rë Nina ne, cuitjin chja: Yëjë ni xuta ne, sacuaha xca nguijña me, yëjë ni xi ndaja tsëhë me ne, sacuaha naxu rë xca jan. Xca nguijña jan ne, xí ne, naxu ne, vixu,
1PE 1:25 peru cjua rë Nai naja ne, tsajin nixtin xi cjuëya. Hane cjua vëhë ne, hacui cjuandajyihi xi casacu camachaya nuju.
1PE 2:1 Vëhë xi ngayujun ni ne, meje rë xi tiyujunxun yëjë ni cjuatsehen, yëjë ni cjuandacha, yëjë xcusun xi sahmi xuta xi jo xcun jo hntsua tjin rë me, yëjë ni cjuaxin, yëjë ni cjuachjataha.
1PE 2:2 Sacuatjin rë ngu quihndinda xi meje rë suvá lechi ne, cuatjin catamameje nuju cjua rë Nina, cojo sa xi nguyëjë rë xi tivisehen nuju cjua jan ne, tuxaha sa cjuatacun nuju hisca xi cuetjuntjun.
1PE 2:3 Cuatjin nihñu, sa xi ha camachaya nuju xi Nai naja ne, jercu ndaja me.
1PE 2:4 Nihñutiñu tsëhë me ta me vëhë ne, quicun me. Me vëhë ne, sacuaha ngu ndyojo xi handasa catsitjungui xuta ne, peru xi cuma rë Nina ne, hatuxa catuxijin rë hacuaha jercu vengui chjí rë.
1PE 2:5 Hacuaha ngayujun ni ne, sacuaha ndyojo xi quicun ne, tuhun cahndë́ xi cjuaha nuju Nina, cojo sa xi cuma ngayun sacuaha ngu yungun hiscan xi nechunxun, hane satëxa nuju nihñu xa rë Nina sacuaha nahmi, xi tuhun cjuandaja nuju xcun Nina. Hane yëjë ni cjuandaja vëhë ne, chuya rë Nina ngatsë rë Jesucristu.
1PE 2:6 Xcun xujun rë Nina ne, cuitjin camahindu cjua xi cachja Nina: Ngahan vejñávasen ngu xihin ngajan ndetjún Sión, hane xihin jan ne, sacuaha ngu ndyojo xi jercu vengui chjí rë, xi hacuaha catuxijin rë xi cuma titjun tsëhë xihndënaña; hane xuta xi cumangucacun cojo xihin jan ne, tsajin nu tsajin nixtin xi cuetju sava me.
1PE 2:7 Hane xi cuma nuju ngayujun ni xi mangutacun cojo Jesucristu jan ne, jercu vengui chjí rë me. Peru xi cuma rë xuta xi manguaaincacun me ne, cuetjucaa cjua xi camahindu xcun xujun rë Nina xi cuitjin chja: Me xi catsitjungui xuta sacuaha tsitjungui chjinevexo ngu ndyojo xi chuyiin rë me tsëhë ne, me vëhë ne, camatitjun me tsajan ngayejen ni. Cuatjin camahindu.
1PE 2:8 Hacuaha cuetjucaa cjua vihi: Xihin jan ne, sacuaha ngu ndyojo xi xtenguiya rë xuta, ngu ndyojo xi sahmi xi tsichaja me ndiya rë me. Cuatjin chja cjua. Xuta xi manguaaincacun me ne, xtenguiya rë me, tsëhë xi vihndiin me cjuandajyihi xi chja tsëhë Jesucristu. Hatuxa cuatjin cavejña Nina xi cuatjin cuatju me cuma.
1PE 2:9 Ngayujun ni ne, ngu tjë xi cavaxijin Nina ngayun, sacuaha nahmi xi fahacuenda yëjë ni xi tsëhë Nina ngayun, xuta xi hatuxa siuxin rë Nina ngayun, hacuaha xuta xi hatuxa tsëhë Nina ngayun. Cuatjin cun ngayujun ni, cojo sa xi ninguitsujun cjuandajyihi xi chja tsëhë yëjë ni cjuandaja xi casahmi Nina, me xi cajindaya nuju xi cavetjunxun tsëhë ngajñi jñu, xi cuisuhun ngajñi hasen ndajyihi rë me.
1PE 2:10 Hatsëë ne, hisca hacuiin xuta rë Nina ngayun, peru quihndë ne, xuta rë Nina camá ngayun. Hatsëë ne, hisca tsajin camayuma rë Nina ngayun, peru quihndë ne, camayuma rë me ngayun.
1PE 2:11 Ngayujun ni xi sacuaha xuta ngu nangui xi nechunyun ndiya nguehe ngasunhndë vihi ne, vinchangë nuju xi nechunxun tsëhë yëjë ni cjuatsehen xi fehya rë xahasen naja, tsëhë xi sacuaha ngayaan xi vixcaan cojo xingueen ne, cuatjin rë yëjë ni cjuatsehen vëhë cojo hasen naja.
1PE 2:12 Ndaja nihñu ngajñi rë xuta xi hvíin me Nina, cojo sa xi me xi cuacun vë ne, handasa choho cuichja me tsujun quihndë sacuaha xi ngayun xuta tsehen má yun ne, peru scuëë me yëjë ni cjuandaja xi tinihñu, sehe sahmi jyë sahmi hnga me Nina nixtin hya xi cjuahataha Nina jyë́ rë xingu xingu me.
1PE 2:13 Ngatsë rë Nai naja ne, tinuhyun tsëhë yëjë ni xutaxa rë ngasunhndë vihi, há xi me xi matitjun camahani,
1PE 2:14 há xi xuta xi tsingatju me xi sahmi castigu rë xuta xi choho sahmi hacuaha cuaxëndaja me xuta xi ndaja sahmi.
1PE 2:15 Cuatjin nihñu ta, tsëhë xi Nina ne, meje rë me xi cjuandaja xi ngayun nihñu ne, sahmi xi xuta xi hvíin ne, cumaji choho cuichja me tsujun.
1PE 2:16 Tángun cojo ngasunhndë nuju sacuaha xuta xi tsajin camahani mé xi tjin tsavi xi cuma rë me, peru hacuiin ngatsë rë vëhë xi nihñu ngu xcusun cjuatsehen ta, xi meje rë ne, tángun cojo ngasunhndë nuju sacuaha xi mosu hndixahan rë Nina má ngayujun ni.
1PE 2:17 Chjuhunrcun ni yëjë xuta. Nihmu tacún yëjë ni xi hacuaha ladu rë Jesucristu me, meje rë xi rcún Nina, hacuaha chjuhunrcun me xi matitjun camahani.
1PE 2:18 Ngayujun ni mosu hndixahan ne, tinuhyun tsëhë nai nuju, hacuaha chjuhunrcun me, hacuiin suvá me xi xuta ndaja cojo me xi jeya ta cojo me xi hngacacun.
1PE 2:19 Cuatjin nihñu ta jercu chuya rë Nina sacuatjin rë ngu me xi caa rë cojo ngu cjuañihi ngatsë rë xi vihndë me tsëhë Nina, handasa tsajin jyë́ rë me xi cuatjin vatju me má.
1PE 2:20 Sa xi ngayun choho nihñu hane má yun castigu ne, ¿yo ndaja cuichja tsujun xi scaa nuju castigu jan? Peru sa xi ngayun ndaja nihñu hane má ngayun castigu ne, jercu chuya rë Nina sa xi ngayun scaa nuju.
1PE 2:21 Nina ne, cajindaya me ngayun xi cuatjin cuatjun cuma. Cristu ne, cavatju me cjuañihi camá ngatsë nuju, hane cuatjin cavejña me ntsacu, cojo sa xi ngayun nihñu sacuatjin casahmi me.
1PE 2:22 Me vëhë ne, hisca ngu cjuatsehen casahmii me, hacuaha hisca ngu cjuandacha ne, cavetjiin cachja me.
1PE 2:23 Hya xi xuta choho cachja cojo rë me ne, me vëhë ne, hacuiin choho catsicuya me tsëhë xuta jan. Hya xi cavatju me cjuañihi ne, hacuiin cavincharcun me xuta jan ta cavetahacacun me Nina, me xi tsichuva rë xuta cojo cjuatacun rë me cojo cjuaquixi.
1PE 2:24 Suvá Cristu jan ne, cavaha me yëjë cjuatsehen naja ngajñi yojo rë me, ngajan xcun cru, cojo sa xi cuma cuetjunxen tsëhë cjuatsehen, hane cuma cuangentjenguen ndiya rë cjuaquixi. Ngayun ne, cavetjuntjun ngatsë rë cjuahmu xi me vëhë cavatju me camá.
1PE 2:25 Titjun ne, sacuaha chu tsánga xi cachaja tjin nuju ngayun, peru quihndë ne, cavuyun nga ladu rë Cristu, me xi fahacuenda nuju sacuaha ngu xuta xi fahacuenda rë chu tsánga, cuatjin sahmi nuju me cuidadu.
1PE 3:1 Quihndë ne, ngayujun ni yachjin ne, tinuhyun tsëhë xihin nuju xingu xingu ngayun, cojo sa xi yahnga me xi vihndiin me tsëhë cjua rë Nina ne, cuijnecacun me, xi scuëë me xcusun nuju, handasa tsajin mé xi nújun,
1PE 3:2 cuenda xi scuëë me xcusun ndaja xcusun jeya nuju.
1PE 3:3 Mijí rë xi jercu nihñuxun cojo yëjë ni ngu xcusun xi sahmi ndacun nuju cojo yojo nuju sacuatjin hya xi vatjutaha nihñu ndacun tsjarcun, hacuaha cojo hya xi nihñuxun cojo adorno tsëhë oro, hacuaha cojo hya xi chujun ngu tsjian hnga chjí rë.
1PE 3:4 Cahndë́ rë vëhë ne, meje rë xi nihñuxun cojo yëjë ni ngu xcusun xi hincha cahntsua xahasen nuju sacuatjin hya xi ningacun cjuajeya xi cun yun ta yëjë cjuandaja vëhë ne, jercu vengui chjí rë xcun Nina.
1PE 3:5 Hatsëë ne, cuatjin casahmi yachjin xi siuxin me xi cuma rë Nina, yachjin xi cavetaha cacun me Nina. Me xi cuacun jan ne, cavihndë me tsëhë xihin rë me.
1PE 3:6 Nima Sara ne, cuatjin cahndë me tsëhë xutachanga naja Abraham, xihin rë me, hane “nai naha” cachja me tsëhë me. Hane ngayujun ni ne, quihndi rë me ngayun, sa xi nihñu yëjë ni cjuandaja hacuaha tsajin mé xi rcún.
1PE 3:7 Cuanitjin ni nuju ngayujun ni xihin, xi nechun tangun cojo chjuun nuju xingu xingu yun ne, meje rë xi hyun xi hitsë ni chúva ngahñu rë yachjin. Chjuhunrcun me ta, me xi cuacun vë ne, hacuaha chjuhunntsun tangun cojo rë me cjuahñu xatsë xi sua nuju Nina cojo cjuandaja rë me. Cuatjin nihñu ngayun ne, cojo sa xi tsajin mé sahmíndya rë oración xi nihñu.
1PE 3:8 Quihndë xi tsinguíjnetaha cuichjá cojo nuju ne, ngayujun ni ne, meje rë xi tjin tangun cjuatacun nuju cojo xingun, meje rë xi tjin tangun xahasen nuju cojo xingun, meje rë xi nihmutacún xingun xingu xingu ngayun sacuaha xi ngu naa ngu nahmi nuju ngayujun ni. Meje rë xi tjin nuju cjuayumatacun, hacuaha meje rë xi jeya ngayun cojo cjuatacun nuju.
1PE 3:9 Hacuaha cuéyanangë nuju xi mijí rë xi choho nihñu cojo yo xi choho sahmi cojo nuju, hacuaha sa xi yo choho cuichja cojo nuju ne, mijí rë xi choho chjayunngun tsëhë ta xi meje rë ne, ninchacuntuhun rë. Cuatjin meje rë xi nihñu ta, Nina ne, cajindaya me ngayujun ni xi chjuhunntsun ngu cjuaninchacuntihin.
1PE 3:10 Tjin ngu cahndë́ xcun xujun rë Nina xi chja cuitjin: Me xi meje rë xi ndaja cjue cojo ngasunhndë rë hacuaha meje rë xi ndaja cuatju cuma ne, mijí rë xi choho cuichja me hacuaha mijí rë xi cuichja me cjuandacha;
1PE 3:11 catetjuxin me tsëhë ndiya rë cjuatsehen, hane catisahmi me cjuandaja, catanguise me ndiya rë cjuajeya, hane vëhë catjicojo me.
1PE 3:12 Cuatjin meje rë ta Nai naja ne, fahacuenda me xuta xi tsajin jyë́ rë, hacuaha vihndë me oración xi sahmi xuta jan, peru Nai naja ne, chuyiin camahani rë me tsëhë xuta xi sahmi cjuatsehen. Cuatjin chja xujun rë Nina.
1PE 3:13 ¿Yo choho sahmi cojo nuju sa xi ngayun hatuxa nihñu cjuandaja?
1PE 3:14 Peru handasa cuatjun cjuañihi cuma ngatsë rë xi nihñu cjuandaja ne, tsimii sahmi rë ta ha tsujun ndaja. Hane xicarcuun hisca xi ngu, hacuaha hacuiin cumacjintacún.
1PE 3:15 Meje rë xi chjuhunrcun Cristu cojo cjuatacun nuju ta me vëhë xi Nai nuju me. Hacuaha meje rë xi yëjë ni hora ne, tjin chjine ngayujun ni, cojo sa xi tuhun cjuaquixi nuju cojo tu yo ni xi cjuinenguise nuju mé má cuatjin vetuhun tacún Nina,
1PE 3:16 peru tinújun cojo nguñaja ni cjuandaja cjuajeya. Tángun cojo ngasunhndë nuju cojo ngu xcusun xi ngascan ne, hisca hitsë tsajin cuma sava nuju, cojo sa xi xuta xi choho cuichja me tsëhë cjuandaja xi nihñu ngatsë rë xi tjin tangun cjuatacun nuju cojo Cristu ne, cuetju sava me tsëhë yëjë xi choho chja me tsujun.
1PE 3:17 Hitsë sa ndaja xi cuatjun cjuañihi ngatsë rë xi nihña ngu cjuandaja, sa xi cuatjin meje rë Nina, xi cuma rë xi cuatjun cjuañihi ngatsë rë xi nihña ngu cjuatsehen.
1PE 3:18 Cristu ne, ngundiya ni cahme me ngatsë rë jyë́ naja. Me vëhë ne, tsajin xi cún rë me xcun Nina, peru cahme me ngatsë naja xi tjercu tjin jyë́ naja, cojo sa xi cuma cuiseen ladu rë Nina. Cristu ne, sacuaha xihin xi má me ne, catsiquehen xuta me, peru sacuaha hasen xi hacuaha má me ne, catsicuya Nina me cjuahñu.
1PE 3:19 Hane sacuaha hasen me jan ne, quiji cachja me ngu cjua cojo yëjë ni hasen xi hinchahñu.
1PE 3:20 Hane hasen xi cuacun jan ne, hacui xi cahndiin tsëhë Nina, hya xi tacunya tacunya Nina cojo jeya nguyëjë rë xi Noé titsindaja me barcu rë me. Hane ngu jo me xi caxincha me cahntsua barcu jan ne, chuva rë jyin má me xi yëjë me, cavetjutje me hya xi cavatju me xcun nandá.
1PE 3:21 Hane nandá jan ne, sacuaha nandá xi xtenda yaan xi vaxëtje naja quihndë. Hya xi xtenda yaan ne, hacuiin xi tinityjahin yojo naja ta tichjahyan rë Nina ngu cjuatacun tyjahi, ngu cjuatacun ndaja, hane cuatjin vetjuntjen ngatsë rë xi Jesucristu ne, cavuya nga me cjuahñu.
1PE 3:22 Me vëhë ne, quiji me ngahnga, hane tacun me ladu quixi rë Nina. Quihndë ne, me vëhë vitexa me ángel cojo jingu sa xcusun hasen sa hasen ndaja sa hasen tsehen xi hacuaha matitjun ngajan ngahnga.
1PE 4:1 Vëhë xi, sacuatjin Cristu cavatju me cjuañihi nguehe ngasunhndë vihi ne, cuanitjin ni ngayujun ni, meje rë xi taha catamangutacun cojo cjuañihi quihndë, tuxa má sa xi ngascan cuatjun cuma. Cuatjin meje rë ta, me xi ha cavatju cjuañihi camá ne, ha quihndë cuitexaain rë me cjuatsehen,
1PE 4:2 hane cjuenduju me cojo ngasunhndë rë me sacuatjin meje rë Nina, hacuiin sacuaha meje rë cjuatacun naja ngayaan xuta ngasunhndë.
1PE 4:3 Ha jercu canichujun nixtin hatsëë, hya xi canihñu xcusun xi chuya rë xutaxín tsëhë. Jercu choho ndiya cavinechunyun, jercu camameje nuju cjuatsehen, jercu camachuhun, jercu catsangun suhi hisca xi jercu si rcu xuta hacuaha jercu vatjutaha hvi me, hacuaha jercu cachjuhunrcun nina ndyojo, xcusun xi hatuxa ndajintjin.
1PE 4:4 Quihndë ne, xutaxín jan ne, fircun rë me hisca choho chja me, hya xi ngayun ne, matanguaain yun cojo rë me hya xi me vëhë findujú me cojo ndiya rë cjuatsehen xi hincha me.
1PE 4:5 Peru me vëhë ne, cuechú ngu nixtin xi sua me cuenta xcun me xi ha tjin chjine xi tsichuva me xuta xi quicun cojo xuta xi cahme cojo cjuatacun rë xingu xingu.
1PE 4:6 Vëhë xi hisca yëjë nima ne, casacu camachaya rë tsëhë cjuandajyihi xi chja tsëhë Jesucristu, cojo sa xi, sacuaha hasen xi má jan ne, sacú rë cjuahñu sacuaha cjuahñu rë Nina. Cuatjin camá handasa, sacuaha xuta ngasunhndë xi má nima xi cuacun jan ne, ha cachjaháchuva rë xingu xingu cojo cjuatacun rë, sacuaha chjaháchuva rë yëjë xuta ngasunhndë.
1PE 4:7 Quihndë ne, ha camatiña nixtin xi cjuë ngasunhndë. Vëhë xi meje rë xi ngayujun ni ne, tiyujun chihin cjuatacun nuju hacuaha tjin chjine ngayun, xi nihñu oración.
1PE 4:8 Hitsë meje sa rë xi nihmutacún xingun xingu xingu ngayun nguñajatacún ta, tsëhë xi cjuahmutacun ne, vujnu rë jercu cjín jyë́ naja.
1PE 4:9 Hacuaha chjuhunntsun xingun xingu xingu ngayun ndya nuju, xi hisca hitsë tsajin choho cuma tacún hya xi chjuhunntsun xingun.
1PE 4:10 Ngayun xi jercu cachjuhunntsun cjuandaja rë Nina hacuaha satëxa nuju xi ninguitsujun cjuandaja jan ne, meje rë xi xingu xingu ngayun ne, cuisecun rë xuta xi yahnga, ha chuva rë xi casua nuju Nina ngu cjuandaja.
1PE 4:11 Yo ngayun xi cuinújun ne, tinújun sacuaha ngu xi chja cjua rë Nina. Hane yo ngayun xi cuisecun xingun ne, tisecun rë me cojo yëjë ni ngahñu xi sua nuju Nina. Cuatjin meje rë xi nihñu, cojo sa xi ngajñi rë tu mé ni cjuacjintacun ne, Nina ne, cuma jyë cuma hnga me cojo Hasen rë me ngatsë rë Jesucristu. Me vëhë ne, hatuxa jyë hnga me cojo Hasen rë me hacuaha jercu hñu me cojo cjuatacun rë me yëjë nu yëjë nixtin. Cuatjin jain.
1PE 4:12 Ngayujun ni ne, mijí rë xi cjuercun nuju tsëhë cjuañihi jyë xi vatjun má xi chutahachuva nuju ta, tsëhë xi hacuiin hacui ngu xcusun xi cjuercun naja.
1PE 4:13 Cahndë́ xi cjuercun nuju ne, meje rë xi catamasua nuju táha hacutjin tivatjun cjuañihi tijima sacuaha cjuañihi xi cavatju Jesucristu camá. Cuatjin catamasua nuju, cojo sa xi hacuaha jercu cumasua nuju nixtin hya xi cumatsejen hacutjin jyë hnga Jesucristu cojo Hasen rë me.
1PE 4:14 Sa xi xuta choho chja me tsujun ngatsë rë xi tjin tangun cjuatacun nuju cojo Cristu ne, tsujun ndaja ta, vëhë meje cuichja xi Hasen rë Nina xi jercu jyë hnga ne, tivéjña cojo nuju. (Xuta xi cuacun jan ne, hatuxa choho chja me tsëhë Jesucristu, peru ngayun ne, nihñu jyë nihñu hnga me.)
1PE 4:15 Sa xi yahnga ngayun cuatjun cjuañihi ne, mijí rë xi tsëhë xi caniquhun ngu xuta o sa tsëhë xi canihñu cjuachëjë o sa tsëhë xi tu mé sa ngu cjuatsehen o sa tsëhë xi visuhunjñu ngajñi rë cjuacjintacun rë xuta xi yahnga.
1PE 4:16 Peru sa xi yahnga ngayun cuatjun cjuañihi ngatsë rë xi ladu rë Cristu ngayun ne, mijí rë xi cumasava nuju ta meje rë xi nihñu jyë nihñu hnga Nina ngatsë rë vëhë.
1PE 4:17 Ha cavechú nixtin xi cuetsihin tsichuva Nina xuta cojo cjuatacun rë xingu xingu me, hane cuetsihin me cojo naja ngayaan quihndi rë me. Hane sa xi tjun ngayaan tsichuva Nina ngayaan cojo cjuatacun naja ne, ¿hacutjin cuatju me xi vihndiin tsëhë cjuandajyihi xi cachja Nina?
1PE 4:18 Hacuaha tjin ngu cahndë́ xcun xujun rë Nina xi cuitjin chja: Sa xi xuta xi cafë jyë́ rë sehe tu ma vetjutje me ne, ¿hacutjin cuatju me xi hisca cuendaain rë tsëhë Nina cojo me xi jercu sahmi cjuatsehen? Cuatjin chja xujun rë Nina.
1PE 4:19 Vëhë xi yëjë me xi vatju cjuañihi tsëhë xi cuatjin meje rë Nina ne, meje rë xi catjindujú me cojo cjuandaja xi sahmi me hacuaha catejña me yojo rë me tsja Nina, me xi catsindaja rë me ta, Nina ne, hatuxa sahmi chihin me yëjë cjua rë me.
1PE 5:1 Quihndë ne, meje cuichjá cojo nuju ngayujun ni xuta changá xi vitexun ngajñi rë yëjë xuta ladu rë Jesucristu. Ngahan ne, hacuaha xuta changá ngahan xi cavëë hacutjin cavatju Jesucristu cjuañihi camá. Hacuaha satë ná ngahan sacuatjin rë me xi cuacun jan cjuandaja xi cuetjucaa ngascan.
1PE 5:2 Cuichjá cojo nuju xi hacuaha meje rë xi chjuhuncuendun xuta ladu rë Nina xi siuntsun, sacuaha ngu cha xi fahacuenda rë chu tsánga. Cuatjin nihñu nguñaja cjuasua sacuatjin meje rë Nina, hacuiin cjuachan hacuaha hacuiin ngatsë rë xi jercu meje nuju tujún. Chjuhuncuendun me nguñajatacún,
1PE 5:3 hacuiin sacuaha xi ngayun má yun nai tsëhë me ta meje rë xi tejñu ntsacu, cojo sa xi xuta ne, tjengui me ngayun cojo xcusun nuju.
1PE 5:4 Ngajan xi hya xi cuinduva nga me xi matitjun ne, ngayun ne, chjuhunntsun cjuandaja xi sua nuju Nina, cjuandaja xi tsajin nu tsajin nixtin cjuëya.
1PE 5:5 Cuatjin ngayujun ni xihin xi hitsë ni chúva nu nuju ne, tinuhyun tsëhë xuta changá. Hane ngayujun ni ne, meje rë xi jeya ngayun cojo cjuatacun nuju hacuiin xta yun ngajñi nuju cojo xingun ta tjin ngu cahndë́ xcun xujun rë Nina xi cuitjin chja: Nina ne, tsitjungui me xuta xi jercu tjin rë cjuaxta cahntsua xahasen rë, peru xuta xi jercu tjin rë cjuajeya cahntsua xahasen rë me ne, Nina ne, jercu sua rë me cjuandaja. Cuatjin chja xcun xujun rë Nina.
1PE 5:6 Vëhë xi ngayujun ni ne, meje rë xi ninguijnu yojo nuju xi cuinuhyun tsëhë Nina, me xi jercu hñu cojo cjuatacun rë. Cuatjin nihñu cojo sa xi me vëhë ne, sahmi jyë sahmi hnga me yun, hya xi cuechú nixtin rë.
1PE 5:7 Tiyujunxun yëjë ni cjuacjintacun nuju, tiyujun tsja Nina, tsëhë xi me vëhë ne, vutsejen me ngatsë nuju.
1PE 5:8 Ngayujun ni ne, meje rë xi tjin chjine yun hacuaha nechun quicun ta, tsëhë xi Satanás ne, xitsehen xi maji vëë nuju ne, tsujyihi sacuaha ngu chu xa xi jercu titsichan chu, xi vangui chu yo xi sacú ru xi sinë chu.
1PE 5:9 Xicaningatuun rë, hane tiyujunhñu cjuatacun nuju xi mangutacún cojo Nina. Cuatjin nihñu ta ha hyun xi yëjë sa me xi hacuaha cojo ladu rë Cristu hincha jingujyë ni ngasunhndë ne, hatuxa tjin rë me xi cuatju me yëjë ni cjuañihi vëhë cuma.
1PE 5:10 Peru xi ha cavatjun cjuañihi hitsë nixtin ne, Nina ne, tsityjahi me cjuatacun nuju, cuiyujuchihin me cjuatacun nuju, cuiyujuhñu me xahasen nuju, hacuaha cuiyuju cahndë́ me cjuatacun nuju. Nina xi sahmi cuatjin jan ne, hacui me xi tjin rë yëjë ni cjuandaja, hacui me xi cajindaya nuju me xi satë nuju cjuahasen ndajyihi rë me xi tsajin nu tsajin nixtin xi cjuëya, ngayujun ni xi tjin tangun cjuatacun nuju cojo Cristu.
1PE 5:11 Nina ne, hatuxa jemu hñu me cojo cjuatacun rë me yëjë nu yëjë nixtin. Cuatjin jain.
1PE 5:12 Ngahan ne, catsihindu nuju ngu jo cjua vëhë, cojo sa xi cuinchangë nuju hacuaha tsinguixë nuju xi cjua vëhë ne, hacui cjuandaja jain rë Nina. Tiyujunhñu cjuatacun nuju xi cuangunndujun cojo cjuandaja vëhë. Silvanu ne, me xi ndaja fitjengui rë ndiya rë Cristu ne, cavisecoo ná me xi catsihindu nuju.
1PE 5:13 Xuta rë yungun nguehe Babilonia, xi hacuaha cavaxijin rë me Nina ne, tsingatju me nina nuju. Hacuaha Marcos xi sacuaha quihndi naha ne, tsingatju cha nina nuju.
1PE 5:14 Tuhun rë xingun ngu nina, cojo cjuandaja cojo cjuahmutacun tindatsuhun xingun, sacuahatjin xcusun naja. Catisua nuju Nina cjuandaja cjuajeya ngayujun ni xi tjin tangun cjuatacun nuju cojo Cristu.
2PE 1:1 Ngahan xi hmí ná Simón Pedru, mosu rë Jesucristu, hacuaha apóstol tsëhë me ne, tsingátju carta vihi tsujun ngayujun ngayun xi Nina naja Jesucristu cavaxëtje nuju me xi casua nuju ngu cjuatacun xi macjain nuju cuanitjin sacuahatjin ngayin. Cuatjin casahmi me ta Nina hatuxa jyihi tyjahi tyjahi cjuatacun rë me.
2PE 1:2 Nina ne, catitsixuva me cjuandaja cjuajeya xi cuma nuju ngayujun ni ngatsë rë xi ndaja hyun Nina cojo Jesús, Nai naja.
2PE 1:3 Jesucristu xi cojo ngahñu ndajyihi rë me, jyë hnga me ne, cajindaya me yaan xi chan yo me. Hane cuatjin casua naja me yëjë ni xi mameje rë tsëhë cjuahñu xatsë hacuaha tsëhë ngu cjuatacun tyjahi.
2PE 1:4 Cojo ngahñu vëhë casua naja Nina cjua rë me xi tjercu tu ndaja vengui chjí rë. Cojo sa xi ngatsë rë cjua vë ne, ngayun ne cuechuntuhun ngu cjuatacun sacuaha Nina, hacuaha cojo sa xi cuetjuntjun tsëhë xi cuetsun cjuatacun nuju cojo cjuatsehen xi fehya rë xuta.
2PE 1:5 Hindë ngatsë rë vihi ne, ndaja nihñu ngahñu cojo sa xi ha macjain nuju Nina ne, má tyjahi cjuatacun nuju.
2PE 1:6 Hane hacuiin cuanitjin ni, ta hacuaha ningascunyun cjuatacun nuju. Sehe tuhun hñu yojo nuju tsëhë cjuatsehen. Hacuaha cuanitjin ne cojo xi nihñu jyë tacún.
2PE 1:7 Hacuaha cojo xi chjuhunrcun Nina, hacuaha cojo xi chjuhunrcun xingun, hane hacuiin tu cuanitjin chjuhunrcun xingun ta cojo ngu cjuahmutacun.
2PE 1:8 Sa xi cuatjin ndaja xcusun nuju, hane sa xi nihñu jain sacuatjin vitexa ne, xcun cjuahñu nuju ne, tjercu cuengui chjí nuju hacuaha hacuiin tu mahya ni camachaya nuju tsëhë Nai naja Jesucristu.
2PE 1:9 Peru xuta xi cuaaintjin jyihi xcusun rë me ne, cumá jñu cjuatacun rë me sacuaha ngu rcá me o sacuaha ngu cha xi vutsejen hiscan xi cjin peru hvíin cha mé xi tivutsejen cha. Ngatsë rë xi cachaya rë me xi camanchataha jyë́ rë me xi ha casahmi me.
2PE 1:10 Vëhë xi ngayujun ni xingueen ne, sa xi nihñu jain sacuatjin vitexa xcusun ndaja jan ne, ngajan machihin cjua ta Nina ne, cajindaya nuju me hacuaha cavaxijin nuju me ne, hane cuatjin ha tuxa tsajin ngu nixtin xi cuetjunxun tsëhë ndiya rë Nina.
2PE 1:11 Cuahatjin jemu ndaja sacu nuju cahndë́ xi cuisuhun hiscan xi sahmi gubiernu Nai naja Jesucristu, me xi vaxëtje naja, hane tsajin nu tsajin nixtin cuetjunxun.
2PE 1:12 Vëhë xi vejñacacun xi cúya tsinguitsjen nuju cjuandaja vihi ha ndasa ha hyun hane hacuaha quitahatacún cjuatacun nuju yëjë ni cjuaquixi xi camachaya nuju.
2PE 1:13 Peru jinguyëjë rë xi tjin ná cjuahñu ne, xi má ná ne, sahmi ngujyë xi cuascaya rë cjuatacun nuju xi tsinguitsjen nuju vi ta,
2PE 1:14 tsëhë xi tacun xati nixtin xi cuejñá ngasunhndë vi, sacuaha ha casua Nai naja Jesucristu camachaya ndaja ná.
2PE 1:15 Hisca hacuaha xati tisahmecácun ne sehe ngajan xi handasa cavéya ne tu mé ni hora cuma cuitsjen nuju tsëhë yëjë ni cjua vihi.
2PE 1:16 Catihin camachaya nuju cjua sacuaha tsëhë ngahñu xi tjin rë Nai naja Jesucristu cojo tsëhë hya xi cuinduva me. Cjua vëhë hacuiin ngu cuentu ndacha xi ndaja nuhya rë peru cjuaquixi jain. Quixi ta cahyin cojo tuxcuin ta Jesucristu ne, jemu rcun me ta jemu jyë hnga hasen rë me.
2PE 1:17 Hya ne, Nina nahmi naja ne cafaharcun rë me hacuaha cavaxëndaja me Jesús ta cjua rë Nina ne canduva tsëhë ngahnga xi cachja cojo rë me cuitjin: “Vihi quihndi naha xi hmucácun ne, xi ngatsë rë me ne tjercu ndaja má ná.”
2PE 1:18 Hindë ngayin suvin canuhyin cjua vë ta canduva tsëhë ngahnga hya xi cavinechintihin ngajan cojo Nai naja rcu naxi hiscan cavatju camá.
2PE 1:19 Cojo xcusun xi cahyin ne, vëhë catsinguixi rë cjua changá xi catsihindu profeta. Ngayujun ni ne jemu ndaja nihñu xi tivetuhun rcun yëjë ni cjua changá jan. Cjua jan ne, tangun sahmi sacuaha ngu ndihi xi sua hasen rë hiscan xi jñu, hane cjuecani rë hisca xi sahasen ne. Hane sacuaha sua hasen rë tiña sahasen xi cuetju niñú seti ne hacuaha Jesucristu sua hasen rë xahasen nuju.
2PE 1:20 Cjua xi hitsë sa sahmi ngujyë xi meje rë xi machaya nuju ne, cjua vihi má: sacuaha yëjë cjua xi catsihindu profeta xcun xujun rë Nina ne, cumajin sesuntaha sa ngu cjuatacun rë xuta ta,
2PE 1:21 hisca ngu cjua jan tsajin xi catsihindu profeta cojo cjuatacun rë suva ni me, ta Hasen rë Nina casua rë me cjuatacun xi cuichja me cjua jan xi tsëhë Nina.
2PE 2:1 Peru nixtin hatsëë ne ngajan nangui rë Israel ne, hacuaha cavetjujñi xuta xi tsejen sacuaha profeta peru tu vindacha me. Hacuaha cuanitjin hindë ne cuetjucun maestru xindacha xi xinchajñi me ngajñi nuju. Me xi cuacun vë ne, tsinguisehenhma me cjuanchacun ndacha. Hisca tsitjungui me Nai naja xi cavaxëtje rë me. Vëhë xi nguhñusasa cuechutaha rë me castigu xi satë rë me.
2PE 2:2 Ngajan xi tjemu cjín xuta cuisehen cojo me ndiya tsehen vëhë, hacuaha ngatsë rë me ne, choho cuichja yahnga xuta tsëhë ndiya rë cjuaquixi xi cjuecojo naja xcun Nina.
2PE 2:3 Maestru xi cuacun ne, jercu sahmi me cojo tujún. Vëhë xi cuaxë me tsujun cojo cjuandacha xi ndaja nuhya rë. Peru me xi cuacun ne, hisca hatsëë ne tacunvasen castigu xi cuechutaha rë me, tacun cuaha hatuxa maji cuetjutje me tsëhë.
2PE 2:4 Cahyun ni ta Nina ne catsinchataain me ángel hya xi casahmi ángel cjuatsehen, ta cacandiya me catsihñu me cojo cadena hiscan jñu cojo sa xi siucuaha hisca cuechutaha nixtin xi sahmi cuenda me tsëhë.
2PE 2:5 Hacuanitjin ne, catsinchataain Nina xuta ngasunhndë hatsëë nixtin ta hisca catsingatju me ngu tsi cjuarcun xi catsicjë rë ngayëjë ni xuta tsehen jan. Cavetjutje me ngu tu tu xihin xi hmí rë Noé, ngu xihin xi casua camachaya rë xuta tsëhë ndiya rë cjuaquixi. Hacuaha yatu sa xuta cavetjutje me hya.
2PE 2:6 Hacuanitjin ne, casahmi Nina xi cavetsunya nandya Sodoma cojo nandya Gomorra, cavaca me ne hisca xi camá suva ndesu sa rë. Vëhë camá sacuaha ngu ejemplu xi chja xi cuatjin cuatju yëjë ni xuta xi sahmi me cjuatsehen.
2PE 2:7 Peru hya ne, cavaxëtjejñi Nina ngu cha xi tyjahi cjuatacun rë xi hmí rë Lot, cha vëhë ne jemu choho má rë xahasen rë cha tsëhë yëjë ni cjuatsehen xi casahmi xuta nandya jan.
2PE 2:8 Jemu camá rë cha jan cjuaxti ta, tyjahi cjuatacun rë cha hane nchunchujun ni cavutsejen cha cavihndë cha xcusun tsehen xi casahmi xuta ta tsëhë xi cha vëhë jan ne, jiyajñi cha ngajñi rë me.
2PE 2:9 Cuatjin tsejen ta Nina ne, ma vaxëtjejñi me xuta tyjahi tsëhë cjuañihi hacuaha ma viyujuvasen me xuta tsehen nguihma castigu rë me xi cuejñaya me hisca xi cuechutaha nixtin xi cumacuenda tsëhë me.
2PE 2:10 Quixi jain ta xuta xi sahmi me cjuatsehen xi fehya yojo jyë́ rë me hacuaha xuta xi tsitjungui me xi tjin rë Nai naja derechu xi vitexa me ne, xuta vëhë ne, viyujuvasen me nguihma castigu. Me xi cuacun jan ne, jemu hñu jni rë me, sehñu me cojo cjuatacun rë me hane tsacjuiin me xi choho cuichja me tsëhë ángel xi siu cojo Nina.
2PE 2:11 Peru ha ndasa sa xi ángel ne hitsë sa hñu cjua me xi cumá rë me xi cuacun jan, hacjahi xcusun sahmi ángel ta vetjiincacun cuinchajyë xcun Nai naja.
2PE 2:12 Xuta tsehen xi cuacun vë ne, jemu chu me, ta ngu chu ne, cjuatacun rë chu xi vitexa ru, hacuiin tsingatahatacun chu. Hacuaha siu chu cojo sa xi chjaha ru sehe cueya chu, hane cuatjin cumachjirëhë chu. Cuanitjin ne xuta jan choho chja me tsëhë yëjë ni xcusun xi vijniircu me ta, tsingataaincacun me hacuaha sacuatjin catsijehnduya me cjuatacun hacuaha cjuë cjuehndu me suva me tangun me cojo ngu chu.
2PE 2:13 Cuatjin cuatju me ngu cjuañihi sacuaha casahmi me xi cavatju ñihi xuta. Xi má rë me ne, tjemu tjin rë me cjuasua xi tisahmi me ha tu cutjin ni xi masua rë xahasen rë me hora hya. Nguyëjë rë xi tichinu tangun tsëhë suhi xi tjin nuju ne, me xi cuacun vëhë ne, ngu cjuasava me, ngu xcuehyu hinchajñi me cojo nuju xi tisua me cjuasua yojo rë me cojo ngu cjuandacha.
2PE 2:14 Xi tu scutsejen ni me jan ngu chjuun ne, hachu cuehya ran xahasen rë me. Fendaain rë me xi sahmi me cjuatsehen. Tsitsehen me xuta xi ndaya cacun. Yëjë fehya rë xahasen rë me ta cuatjin camanga rë. Ha tjinchihin xujun jyë́ rë me xcun Nina.
2PE 2:15 Cachaja me ndiya ta, tsëhë xi cavetjuxin me tsëhë ndiya quixi rë Nina. Cafayangui me xcusun xi casahmi Balaam quihndi rë cha Beor. Cha vë ne, jercu casahmi cha cojo tujún, hisca meje rë cha chjí rë cjuatsehen.
2PE 2:16 Hacuaha Nina casahmi me xi ngu chu burra xi majin tsingatahacacun chu cojo cjuatacun ru, peru cojo xta rë xuta cachjataha chu cha jan hane casuaain chu cahndë́ xi cjue sa cha cojo cjuasca rë cha.
2PE 2:17 Maestru jan ne, machjiriin cjua rë me. Tangun me cojo ngu ndava nandá xi quixíya, hacuaha tangun me cojo yufí xi ficojo rë tjojne. Nina tjin ndaja rë me ngu cahndë́ xi cuisehen me hiscan xi jñu cjín ni.
2PE 2:18 Maestru jan ne, jindayatë me cjua xi sahmi yehe me xi ndastu venguichji rë. Hacuaha tsingascaya rë me cjuatacun rë jingu sa xuta xi cuma meje rë me cjuatsehen xi fehya yojo rë me. Xuta jan ne, sehe tisahmi me ngahñu xi tivetjutje me tsëhë ngajñi rë xuta xi hincha ndiya rë cjuandacha.
2PE 2:19 Chja ndacha maestru xi cuacun ta cuma ndaya xuta jan tsëhë cjua xi vitexa ley, cuatjin chja me. Peru suva ni me ne, cjëë cuma ndaya me tsëhë cjuatsehen. Hane jima ngu ngayaan ne, ha tu jarë ni xi scaa rë tsinguijne naja ne, vëhë scaa rë cuitexa naja tsihñu cjuatacun naja.
2PE 2:20 Cuatjin ne, xuta xi ha vëë me yo xi Nai naja Jesucristu xi vaxëtje naja hane yo xi cavetjuxin me tsëhë yëjë ni ngu cjuatsehen tsëhë ngasunhndë ne, sa xi tsingatihin me xi cuixuya nga me ngajñi cjuatsehen jan ngu ndiya nga ne, hane cjuatsehen jan scaa rë cuitexa rë me ne, hitsë sa sahmi yehe me jyë́ rë me xi cuma rë titjun.
2PE 2:21 Hya hitsë sa ndatjin tsëhë me sa xi camachayiin rë me ndiya quixi jan tsëhë xi cuma rë xi titjun quiji ndaja me ne, peru sehe catsismicacun me tsëhë cjua ndajyihi rë Nina xi cafahatsja me.
2PE 2:22 Hya xi cuatjin sahmi xuta ne, ngajan tsejen xi quixi jain cjua xi chja cuitjin: “Naña xi cavesu rë chu ne, vuya jinë chu tsëhë chu hane chu chinga xi sehe tu cafë catsinduya me chu ne, vuya vinduyachojo chu ngajñi ndasi.”
2PE 3:1 Vihi má jo carta xi tsihindú nuju, ngayujun ni xingueen. Catsijo carta vi ne, yaha conseju xi ha hyun peru xi meje ná xi tsingascaya rë cjuatacun nuju cojo.
2PE 3:2 Ninguitsjun tsëhë cjua xi hatsëë cachja profeta rë Nina, hacuaha ninguitsjun tsëhë cjua xi cachja Nai naja xi vaxëtje naja, cjua jan xi apóstol cavicuya nuju.
2PE 3:3 Hacuaha hatuxa nihñucuendun tsëhë cjua vihi: nixtin ngascan rë ngasunhndë ne, hya cumatsejen xuta xi sahmi me cjuatsehen tu cutjin cuehya rë yojo rë me. Me vëhë ne, cuejnucëë me
2PE 3:4 cuinenguise me cuitjin: “¿Jani tsejen Cristu? ta, tacunvasen cuaha cjua xi cuinduva nga me. Peru cafë cahme xuta changá naja ne, hane ha nduva ni chuva xi nduva, cuanitjin sacuahatjin camá hisca xi casahasen ngasunhndë.” Cuatjin chja me.
2PE 3:5 Peru quixiin cjua xi chja me ta, hatuxa mijí cjuahacuenda me tsëhë xcusun xi cama vi: cojo cjua xi cachja Nina ne, ngasunhndë ne, ha tacun cuaha hisca hatsëë nixtin. Nangui ne, camatangun ngajñi nandá, hacuaha nandá ni ne, casua ngahñu rë ngasunhndë.
2PE 3:6 Sehe hacuaha nandá vëhë ni ne, catsinguetsun rë hya xi casesuntë nandá ngasunhndë nixtin vë.
2PE 3:7 Hindë ne hacuaha cojo cjua rë Nina jan ne, ngahnga cojo nangui xi tsejen quihndë ne, ha tetjo cuaha rë Nina peru cojo cjua vëhë ni ne, sehe cueti cojo ndihi. Ndihi vëhë ne cuaca rë hya xi cjuaháchuva Nina yëjë ni xuta tsehen nixtin xi cjuëya me xi cuma rë Nina.
2PE 3:8 Peru ngayun xingueen, chjuhuncuendun tsëhë cjuaquixi vi: xi má rë Nai naja ne, ngu nixtin ne, tangun ni nduju sacuaha ngu mil nu, hane xi ngu mil nu ne, tangun chuva sacuaha ngu nixtin.
2PE 3:9 Handasa xi ma tsingatahacacun xuta xi jemu tivindeya rë Nina xi cuma chihin cjua xi cachja me ne, peru quixiin vë. Nina ne, ta tsijyëcacun me cojo nuju, tisua sa nuju cahndë́ cojo sa xi tsajin hisca ngu xuta xi chaja me ta, meje rë me xi yëjë ni xuta ne, tsindeya me cjuatacun rë me hane cuisehen me ndiya ndajyihi.
2PE 3:10 Peru xi cuechun nixtin xi cuinduva Nai naja ne, ha sacutsja rë cjuehe me sacuaha xi cjuehe ngu chëjë xi má nguixun. Sehe ngajan cumá xi ngahnga ne, cuetsunya cojo ngu chircun xi tjercu cjuaneya camahani, hane yëjë xcusun xi camá cojo ne, cjuëya tundecjaya cojo ndihi. Hacuaha nangui ne, cjuë cueti cojo yëjë xcusun xi tjin rë.
2PE 3:11 Tsëhë xi quixi jain xi hatuxa cuatjin cjuë cuetsunya yëjë xcusun vë ni, ngajan xi sahmi ngujyë xi ngayun ne, ndandaja nihñu ngayun hacuaha tyjahi cjuatacun nuju.
2PE 3:12 Nechunyun rë nixtin xi cuinduva Nina hane nihñu xati tacun xi xati cumá cjuehe. Nixtin vëhë ne, ngahnga ne cuetsunya cojo ndihi, hane yëjë xcusun xi camá cojo ne, tundecjaya rë ne, cjuëya.
2PE 3:13 Peru ngayaan ne, nechayan rë cahndë́ xi cachja Nina xi cuiseen, ngu ngahnga xatsë, ngu nangui xatsë hiscan cuinechancahnden cojo suva mé xi tsajin jyë́ rë.
2PE 3:14 Vëhë xi ngayujun ni xingueen ne, jinguyëjë rë xi nechunyun rë yëjë ni xcusun vihi ne, nihñu nguñajatacun xi ndandaja nihñu cojo sa xi hya xi cuechutaha me yun ne, tyjahi cjuatacun nuju, tsajin xi cún nuju, hane hacuiin mé cjuachan tjin.
2PE 3:15 Ningatuhuntacun ngayun ta hindë xi titsijyëcacun Nai naja cojo naja ne xi jemu tafi me ne, vaxëcun rë xi xuta ne, cuetjutje me. Tangun ni chja Pablo xingueen ne, hane hacuanitjin catsihindu nuju tsëhë, sacuahatjin cjuatacun ndajyihi xi casua Nina me.
2PE 3:16 Ngajan xi xcun yëjë ni carta xi catsihindu me ne, hacuaha chja me cojo nuju tsëhë yëjë ni xcusun vihi, handasa hinchajñi yahnga cjua xi tjemu chja vijnercu. Xuta ngarca ne, xuta xi hacuiin nguñajacacun me ne, titsindeya me cjuatacun rë cjua jan xi chja vijnercu hane hacuaha tsindeya me cjuatacun rë yahnga xujun rë Nina. Xi cuatjin sahmi me ne, tivangui me suva me jyë́ rë me.
2PE 3:17 Ngajan xi ngayun, xingueen, hangu ta hya xi chaja sa cumá ne ha camachaya nuju tsëhë cjuacjintacun vihi, nechun cuidadu tsëhë. Sehe ngajan hacuiin mahinda tacun cojo cjuandacha tsëhë xuta tsehen ta sehñu cuaha cojo cjuatacun quixi.
2PE 3:18 Peru catamajyë sa tsujun cjuandaja rë Nina hacuaha catuxaha sa cjuatacun xi tjin nuju tsëhë Nai naja Jesucristu, me xi vaxëtje naja. Catama jyë catama hnga me yëjë nu yëjë nixtin. Cuatjin jain.
1JO 1:1 Tihín cumachaya nuju ngujo cjua tsëhë Jesucristu, me xi sua cjuahñu xatsë. Me vëhë xi ha tacun me hisca xi casahasen ngasunhndë. Canuhyin cjua xi cachja me. Cahyin yëjë ni hacutjin xi casahmi me. Hisca casatë ntsin me.
1JO 1:2 Me xi sua cjuahñu jan ne, camatsejen me. Hane ngayin ne, cahyin me. Vëhë xi titihín cjuaquixi niji, xi titihín tijimachaya nuju ta me vëhë ne, tsajin nu tsajin nixtin xi cavetsihin cjuahñu rë me, hacuaha tsajin nu tsajin nixtin xi cuijnetaha cjuahñu rë me. Ha tacun me ngajan cojo Nahmi rë me ne, peru canduva me nguehe, cama tsejen me ngajñi niji.
1JO 1:3 Vëhë xi titihín tijimachaya nuju cjua xi canuhyin cojo xcusun xi cahyin, sehe ngajan xi cuma tangun cjuatacun nuju cojo Nina sacuatjin tjin tangun cjuatacun niji cojo Nina Nahmi naja cojo Jesucristu, Quihndi rë me.
1JO 1:4 Vëhë xi cuitjin tinihindin nuju, cojo sa xi jemu ndaja cuma rë xahasen niji.
1JO 1:5 Cjua xi cachja Jesucristu cojo niji ne, cuitjin fi: Nina ne, hatuxa tjemu ndaja me. Tsajin camahani cjuatsehen hiscan tacun me. Hane ha cjua vëhë ni xi tinújin cojo nuju.
1JO 1:6 Sa xi cuinújan xi tjin tangun cjuatacun naja cojo Nina hya xi tinihña cjuatsehen ne, tu vindachan ni ta, cjuatsehen xi tinihña ne, chuyiin rë Nina tsëhë.
1JO 1:7 Peru sa xi nechan ngajñi rë cjuandaja, sacuatjin rë Nina xi hatuxa tacun me ngajñi rë cjuandaja ne, cuatjin xi cuma tangun cjuatacun naja. Hacuaha cuatjin xi cjuengui xahasen naja tsëhë yëjë ni jyë́ naja, ngatsë rë xi cahme Jesús, Quihndi rë Nina.
1JO 1:8 Sa xi cuinújan xi tsajin jyë́ naja ne, tu cuindachan suvaan ni rë yojo naja ta, quixiin xi nújan.
1JO 1:9 Peru sa xi cuijacun jyë́ naja cojo Nina ne, tsinchataha naja me, hacuaha cuaxëxin me yëjë ni cjuatsehen xi hincha xahasen naja. Cuatjin sahmi me ta tjercu ndaja me. Yëjë ni cjua xi chja me ne, hatuxa sahmi chihin me.
1JO 1:10 Sa xi cuinújan xi hisca ngu cjuatsehen cjëë camahani nihña ne, tangun vëhë cojo xi cuinújan xi Nina ne, jemu ndacha me xi chja me xi tjin jyë́ naja, hacuaha cuatjin cumatsejen xi cjua rë Nina ne, cavisiin camahani ngajñi rë cjuatacun naja.
1JO 2:1 Titsihindu nuju yëjë ni cjua vihi tsan ta, tsëhë xi cjua vihi ne, cuicuya nuju xi hacuiin nihñu cjuatsehen. Peru sa xi tjin yo yaan xi nihña ngu cjuatsehen ne, hacuaha tjin naja ngu me xi cuichjatje ngatsë naja xcun Nahmi naja. Me vëhë ne, hacui Jesucristu, me xi hatuxa tyjahi.
1JO 2:2 Hacuaha me vëhë ne, cavechjitje me tsëhë yëjë ni jyë́ naja. Peru hacuiin tu suvá ni jyë́ naja ta hacuaha cojo jyë́ rë yëjë sa xuta.
1JO 2:3 Sa xi nihña jain hacutjin xi vitexa Nina ne, ngajan matsejen xi cjuaquixi xi xuta rë me ngayaan.
1JO 2:4 Peru sa xi cuinújan xi hatuxa xuta rë Nina ngayaan hya xi mijí nihña hacutjin vitexa me ne, tjercu ndacha yaan ta quixiin xi nújan.
1JO 2:5 Peru hya xi nihña jain hacutjin xi vitexa me ne, hya matsejen xi nihmutacun jain me. Sa cuatjin ne, hyan ta tjin tangun cjuatacun naja cojo me.
1JO 2:6 Sa xi cuinújan xi tjin tangun cjuatacun naja cojo me ne, meje rë xi nechan ngajñi rë cjuandaja sacuatjin cavejña Jesucristu.
1JO 2:7 Cjua xi titsihindu nuju vihi tsan ne, hacuiin ngu cjuatacun xatsë xi sehe tivitéxa nuju xi nihmutacun xingueen ta, ha hacui ni cjuatacun xi cavitéxa nuju hya xi tjun tjun camacjain nuju.
1JO 2:8 Peru cjuatacun xi titsihindu nuju vihi ne, cuma cuinújan xi sacuaha ngu cjuatacun xatsë ta, hiscan xi ha cavechu cjuatacun jan ne, tivetsihin tisahmi xuta cjuandaja. Hane vëhë sahmi xi tivetsihin tifë cjuatsehen xi tjercu tjin ngasunhndë. Jesucristu ne, casahmi jain me yëjë ni hacutjin xi vitexa cjuatacun xatsë vihi, hacuaha ngayujun ni ne, tinihñu hacutjin vitexa cjuatacun xatsë jan.
1JO 2:9 Sa xi cuinújan xi nechan ngajñi rë cjuandaja, hya xi choho hyan xingueen ne, quixiin xi nújan ta nechancuaan ngajñi rë cjuatsehen.
1JO 2:10 Peru sa xi hmutacun xingueen ne, cuatjin matsejen xi nechan ngajñi rë cjuandaja. Hane tsajin mé nihña xi sahmi xi cuixuya xingueen ngajñi rë cjuatsehen jan.
1JO 2:11 Peru sa xi choho hyan xingueen ne, nechan ngajñi rë cjuatsehen, hacuaha sacuiyiin naja hacutjin ndatjin nihña ta tsëhë xi cjuatsehen xi tinihña ne, sahmi jñu tsajan.
1JO 2:12 Ngayujun ni tsan ne, tsihindu nuju ta, jyë́ nuju ne, ha camanchataha ngatsë rë Jesucristu.
1JO 2:13 Ngayujun ni xi xuta changá yun ne, tsihindu nuju ta, tsëhë xi ha hyun me xi ha tacun hisca xi casahasen ngasunhndë. Hane ngayujun ni xi cjëë cuma changá yun ne, hacuaha tsihindu nuju ta ha cacaa nuju cojo xitsehen má titjun.
1JO 2:14 Ngayujun ni tsan ne, tsihindu nuju ta ha hyun Nina Nahmi naja. Ngayujun ni xi xuta changá yun ne, tsihindu nuju ta ha hyun me xi ha tacun hisca xi casahasen ngasunhndë. Hane ngayujun ni xi hacuiin changá yun ne, hacuaha tsihindu nuju ta nechun nguñajatacún xi macjain nuju cjua rë Nina, cjua xi quichuhun cahntsua xahasen nuju, hacuaha cacaa nuju cojo xitsehen ma titjun.
1JO 2:15 Mijí rë xi chuya naja cjuatacun xi tjin ngasunhndë ta, sa xi chuya naja ne, cumaji nihmutacun Nina Nahmi naja.
1JO 2:16 Cuatjin ta, tsëhë xi yëjë ni cjuatacun xi tjin ngasunhndë vihi, sacuaha cjuatacun tsehen xi ningatahantacun, sacuaha cjuatacun xi tjercu meje naja yëjë ni xcusun xi chutsejen, sacuaha cjuatacun xi tjercu nihña yehe yojo naja ne, yëjë ni cjuatacun xi cuacun vëhë ne, hacuiin nduva tsëhë Nina Nahmi naja ta nduva tsëhë suvá ngasunhndë vihi.
1JO 2:17 Hane xcusun rë ngasunhndë vihi ne, cojo yëjë ni cjuatacun xi tjercu chuya rë xuta ne, cjuëya. Peru xuta xi sahmi jain me hacutjin meje rë Nina ne, me vëhë ne, tsajin nu tsajin nixtin cjuëya me.
1JO 2:18 Ngayujun ni tsan ne, ha tijima tiña nixtin xi cjuë ngasunhndë. Ha canuhyun ta cuinduva xu ngu cha xi sahmi condra tsëhë Cristu. Peru quihndë ne, tjemu cjín xuta xi ha tijimatsejen xi condra tsëhë Cristu me. Hane vëhë xi ha hyin ta cama tiña nixtin xi cjuë ngasunhndë.
1JO 2:19 Xuta xi cuacun jan ne, cavetjuxin me tsajan. Peru hatuxa hacuiin ladu naja me ta, sa xi quixi xi ladu naja me ne, caviyuju me ngajñi naja. Peru cavetjuxin me tsajan, cojo sa xi cuma tsejen ta hacuiin ladu naja me.
1JO 2:20 Ngayujun ni ne, casua nuju Jesucristu Hasen xi tsëhë Nina. Vëhë xi vijnercun cjua xi cjuaquixi.
1JO 2:21 Hacuiin tsingátahacacun xi vijniircun cjua xi cjuaquixi ta ha hvë xi vijnercun. Hacuaha hyun ta cjuandacha ne, hatuxa sacuiin naja ngajñi rë cjua xi cjuaquixi. Vëhë xi cuitjin tsihindu nuju cjua vihi.
1JO 2:22 Tjin xuta xi chja xi Jesús ne, hacuiin Cristu me, hacuiin me xi cavaxijin Nina xi cuaxëtje naja. Hane xuta xi cuatjin chja me ne, hatuxa tjemu ndacha me. Hacuaha xuta xi tsitjungui me Nahmi naja xi tacun ngahnga cojo Quihndi rë ne, me vëhë xi sahmi condra tsëhë Cristu.
1JO 2:23 Yëjë ni xuta xi tsitjungui Quihndi rë Nina jan ne, tsajin tjin tangun cjuatacun rë me cojo Nahmi rë Quihndi jan. Peru xuta xi macjain rë Quihndi jan ne, hacuaha tjin tangun cjuatacun rë me cojo Nahmi jan.
1JO 2:24 Ninguitsjun yëjë ni cjua xi canuhyun hisca nixtin hya xi tjun tjun camacjain nuju. Sa xi quichuhun cjua jan cahntsua xahasen nuju ne, hacuatjin tjin tangun cjuatacun nuju cojo Quihndi cojo Nahmi rë.
1JO 2:25 Hacuaha cachja Cristu xi sua naja me ngu cjuahñu xatsë.
1JO 2:26 Cuitjin tsihindu nuju ta, tsëhë xi tjin xuta xi meje cuindacha nuju me.
1JO 2:27 Peru ngayun ne, Hasen xi tsëhë Nina xi casua Cristu ngayun ne, quichuhun cahntsua xahasen nuju. Vëhë xi hacuiin sahmi ngujyë xi cuinduva xuta cuicuya nuju me ta, tsëhë xi Hasen xi casua me jan ne, tivicuya nuju yëjë ni cjua. Hane cjua xi tivicuya nuju ne, hatuxa cjuaquixi, hacuiin cjuandacha. Quihndë ne, cuatjin tangunndujun cojo xi ha macjain nuju Jesucristu, sacuatjin xi ha cavicuya nuju Hasen xi tsëhë Nina jan.
1JO 2:28 Quihndë tsan ne, cúya cuichjá cojo nuju ta tangun nduju cojo xi ha macjain nuju Jesucristu, sehe ngajan xi nixtin xi cuinduva nga me ne, ngayaan ne, hacuiin rcun cuma, hacuaha hacuiin tsisava naja me.
1JO 2:29 Ha hyan ta Cristu ne, hatuxa tyjahi me. Vëhë xi cumangutacun ta yëjë ni xuta ndaja xuta tyjahi ne, me vëhë xi ha camá me quihndi rë Nina.
1JO 3:1 Tjercu tsihmucacun naja Nina Nahmi naja. Hisca chja me xi quihndi rë me ngayaan. Peru hacuiin tu suvá chja ni me ta cjuaquixi jain xi quihndi rë me ngayaan. Peru xuta tsehen ne, hvíin me xi quihndi rë Nina ngayaan ta, tsëhë xi hacuiin xuta rë Nina me.
1JO 3:2 Ngayaan tsan ne, quihndë ne, quihndi rë Nina ngayaan. Peru cjëë cumachaya naja mé xcusun xuta cuma ngayaan xi cuma ngascan. Peru ha hyan ta, hya xi cuinduva Cristu ne, cuma ngayaan sacuaha me vëhë ta, tsëhë xi hya ne, chan jain me hacutjin xi jyihi me.
1JO 3:3 Yëjë ni xuta xi tivetahacacun me Cristu ne, sahmi tyjahi suvá me xahasen rë me, sacuatjin tyjahi xahasen rë Cristu.
1JO 3:4 Peru yëjë ni xuta xi hinchajñi ngajñi rë cjuatsehen ne, hatuxa hndiin me tsëhë cjua xi cavitexa Nina. Ta xi hacuiin nuhyaan tsëhë cjua xi cavitexa Nina ne, vëhë xi hmí cjuatsehen.
1JO 3:5 Peru ha hyun ta Cristu ne, canduva me nguehe ngasunhndë, xi cjuahaxin me yëjë ni jyë́ naja. Hane me vëhë ne, hatuxa tsajin camahani jyë́ rë me.
1JO 3:6 Vëhë xi yëjë ni xuta xi cjui nduju me cojo xi macjain rë me Jesucristu ne, ha quihndë tsajin hinchajñi me ngajñi rë cjuatsehen. Peru yëjë ni xuta xi hinchajñi cuaha me ngajñi rë cjuatsehen ne, me vëhë xi hatuxa cavijniircu me hacutjin cjuatacun rë Jesucristu, hacuaha hacuiin xuta rë Jesucristu me.
1JO 3:7 Ngayujun ni tsan ne, nechun cuidadu xi tsajin yo cuindacha nuju. Xuta xi hatuxa hinchajñi me ngajñi rë cjuandaja ne, me vëhë xi tyjahi xahasen rë me, sacuatjin tyjahi xahasen rë Cristu.
1JO 3:8 Peru xuta xi hatuxa hinchajñi me ngajñi rë cjuatsehen ne, tsëhë xitsehen matitjun me ta, tsëhë xi xitsehen matitjun jan ne, hatuxa hisca ntsacu cavetsihin ne, sahmi cjuatsehen. Vëhë xi canduva Quihndi rë Nina ta, tsëhë xi meje tsicjëya me yëjë ni cjuatsehen xi sahmi xitsehen matitjun jan.
1JO 3:9 Xuta xi camá me quihndi rë Nina ne, tsajin hinchajñi me ngajñi rë cjuatsehen ta, tsëhë xi yaha me cjuatacun rë Nina. Hatuxa cumaji xinchajñi me ngajñi rë cjuatsehen ta, tsëhë xi quihndi rë Nina me.
1JO 3:10 Suvá tsejen yo xi quihndi rë Nina, hacuaha suvá tsejen yo xi quihndi rë xitsehen. Ta tu yo ni xi tsajin hinchajñi ngajñi rë cjuandaja, tu yo ni xi tsihmaaicacun xicjin ne, hacuiin quihndi rë Nina.
1JO 3:11 Cjua rë Nina xi canuhyun hisca ntsacu cavetsihin ne, cuitjin chja: meje rë xi nihmutacun xingueen.
1JO 3:12 Mijí rë xi nihña sacuatjin casahmi cha Caín ta cha vëhë ne, quihndi rë xitsehen cha, hacuaha catsiquehen cha hntsë cha. Peru ¿há hyun mé ngatsë rë xi cuatjin catsiquehen cha hntsë cha ni? Catsiquehen cha hntsë cha ngatsë rë cjuaxin ta, tsëhë xi yëjë ni xi casahmi cha ne, hatuxa suvá cjuatsehen, hane xi casahmi hntsë cha ne, hatuxa suvá cjuandaja.
1JO 3:13 Vëhë xi hacuiin cjuercun nuju tsan, hya xi choho scuëë nuju xuta tsehen.
1JO 3:14 Ngayaan ne, nihmutacun xingueen. Hane cuatjin matsejen xi ha cavetjunxen tsëhë ngajñi rë cjuatsehen, caviseen ndiya rë cjuandaja. Peru yo xi tsihmaaicacun xicjin ne, hincha cuaha ngajñi rë cjuatsehen.
1JO 3:15 Yëjë ni xuta xi choho vëë xicjin ne, tangun me cojo xuta xi tsiquehen xicjin. Hane ha hyun ta, yëjë ni xuta xi tsiquehen xicjin ne, tsajin rë me cjuahñu xatsë.
1JO 3:16 Cristu ne, ngatsë rë xi tsihmucacun naja me ne, joho ni rë me xi catsiquehen xuta me. Cuatjin camatsejen xi hmí cjuahmutacun. Hane hacuatjin ngayaan ne, meje rë xi ningatehen xi tsiquehen naja xuta, sa xi cuatjin mameje rë, ngatsë rë xi nihmutacun xingueen.
1JO 3:17 Ngayaan xi tjin chinë tjin hyun ne, sa xi tsajin naja cjuayumatacun hya xi ma chaya naja xi tjin ngu xingueen xi tsajin mé sinë me tsajin mé cuihi me ne, cuatjin matsejen ta tsajin camahani cjuahmutacun rë Nina cahntsua xahasen naja.
1JO 3:18 Mijí rë xi tu cuinújan ni xi nihmutacun xingueen tsan ta meje rë xi nihña cjuandaja, cojo sa xi cumatsejen xi tjin jain naja cjuahmutacun cojo xingueen.
1JO 3:19 Sa xi cuatjin nihña ne, vëhë matsejen xi tsëhë Nina xi cjuaquixi jain ngayaan, hacuaha vëhë xi cumangutacun tu ya ni ni hya xi chjahyan rë me cjuandaja rë me.
1JO 3:20 Hane ha ndasa xahasen naja cuinchajyë naja xcun Nina xi choho nihña ne, peru mijí rë xi cumacjintacun ta, tsëhë xi Nina ne, hitsë sa jyë me cojo cjuatacun rë me xi cumá rë xahasen naja ta, tsëhë xi me vëhë ne, vëë me yëjë ni cjuatacun.
1JO 3:21 Ngajan xi sa xi tsajin mé cuinchajyë naja xahasen naja ne, hacuiin cumacjintacun hya xi chjahyan rë me cjuandaja rë me.
1JO 3:22 Hane me vehe ne, sua naja me yëjë ni xi chjahyan rë me ta, tsëhë xi tinihña yëjë ni hacutjin xi cavitexa me, hacuaha tsëhë xi yëjë ni xi chuya rë me ne, cuatjin tinihña.
1JO 3:23 Cjua xi cavitexa naja Nina ne, cuitjin chja: meje rë me xi catamacjain naja Jesucristu, Quihndi rë me, hacuaha meje rë me xi nihmutacun xingueen. Cuatjin cavitexa me.
1JO 3:24 Hane yëjë ni xuta xi vihndë cjua xi cavitexa Nina ne, tjin tangun cjuatacun rë me cojo Nina, hacuaha Nina ne, jiya cahntsua xahasen rë me. Ngayaan ne, hyan xi jiya Nina cahntsua xahasen naja ta, tsëhë xi casua naja me Hasen rë me.
1JO 4:1 Ngayujun ni tsan ne, mijí rë xi ngutjen cumacjain nuju tsëhë yëjë ni cjuatacun xi cuichja xuta cojo nuju ta titjun chjuhunchuvun cjuatacun jan, ¿há ma tangun cojo cjuatacun rë Nina? Cuatjin meje rë ta, tsëhë xi ngasunhndë ne, tjemu cjín xuta xi tivindacha me. Chja suvá me ta cjuatacun xi vicuya me ne, cjuatacun rë Nina, peru quixiin vë.
1JO 4:2 Peru sa xi ngu xuta cuichja quixi me ta Jesucristu ne, camá me ngu xuta ngasunhndë vihi ne, cumangutacún ta, ngajan matsejen xi me vëhë ne, chja jain me cjuatacun rë Nina.
1JO 4:3 Peru xuta xi hacuiin cuatjin chja quixi tsëhë Jesús ne, hatuxa tsajin camahani rë me cjuatacun rë Nina ta tjin rë me cjuatacun tsëhë xuta xi sahmi condra tsëhë Cristu. Ha canuhyun ta hatuxa cuechu nixtin xi cjuehe ngu cjuatacun xi sahmi condra tsëhë Cristu, peru cuichjá cojo nuju ta cjuatacun vëhë ne, ha hisca hinchajñi ngajñi naja nguehe ngasunhndë.
1JO 4:4 Ngayujun ni tsan ne, tjin tangun cjuatacun nuju cojo Nina. Vëhë xi cacaa nuju xi camacjaain nuju tsëhë xuta ndacha xi cuacun jan. Camá cacaa nuju cuatjin ta, tsëhë xi Nina xi jiya xahasen nuju ne, hitsë sa jyë me xi cuma rë xitsehen matitjun xi jiya xahasen rë xuta xi macjaain rë Jesucristu.
1JO 4:5 Xuta ndacha xi cuacun jan ne, hatuxa tjin rë me cjuatacun rë xuta xi macjaain rë Jesucristu. Vëhë xi cjuatacun xi vicuya me ne, cjuatacun rë xuta xi macjaain rë Jesucristu, hacuaha yëjë ni xuta xi macjaain rë Jesucristu ne, vetaharcu me cjua jan.
1JO 4:6 Peru ngayaan ne, tjin tangun cjuatacun naja cojo Nina. Yëjë ni xuta xi hacuaha tjin tangun cjuatacun rë me cojo Nina ne, vetaharcu me cjua xi vicuyan. Peru yëjë ni xuta xi tsajin tjin tangun cjuatacun rë me cojo Nina ne, vetaharcuaain me cjua xi vicuyan. Cuatjin xi ma sacuse naja yo xi chja cjuaquixi ne, o yo xi vindacha.
1JO 4:7 Meje rë xi nihmutacun xingueen tsan ta, yëjë ni cjuahmutacun ne, hatuxa nduva tsëhë Nina. Yëjë ni xuta xi tjin rë me cjuahmutacun ne, quihndi rë Nina me, hacuaha amigu rë Nina me.
1JO 4:8 Peru me xi hacuiin tsihmucacun xicjin ne, hacuiin amigu rë Nina me ta, Nina ne, hatuxa tjin rë me cjuahmutacun.
1JO 4:9 Nina ne, ngu tutu ni Quihndi xi tjin rë me. Hane ngayaan ne, hyan ta Nina ne, tjin rë me cjuahmutacun cojo naja, tsëhë xi catsingatju me Quihndi rë me nguehe ngasunhndë. Cuatjin catsingatju me Quihndi rë me, cojo sa xi sacú naja cjuahñu xatsë ngatsë rë Quihndi jan.
1JO 4:10 Ngayaan ne, nihmutacun Nina. Peru Nina ne, hitsë sa tsihmucacun naja me. Vëhë xi hisca catsingatju me Quihndi rë me xi cuechjitje ngatsë rë yëjë ni jyë́ naja.
1JO 4:11 Hane tsëhë xi cuatjin catsihmucacun naja Nina tsan ne, vëhë xi hacuaha meje rë xi nihmutacun xingueen.
1JO 4:12 Nina ne, hatuxa tsajin yo xi cavëë rë me. Peru sa xi nihmutacun xingueen ne, Nina ne, jiya me cahntsua xahasen naja, hane cuatjin matsejen xi tjin jain naja sacuaha cjuahmutacun xi tjin rë Nina.
1JO 4:13 Ngayaan ne, hyan ta tjin tangun cjuatacun naja cojo Nina hacuaha hyan ta jiya me cahntsua xahasen naja, tsëhë xi casua naja me Hasen rë me.
1JO 4:14 Hane ngayin ne, cahyin jain cojo tuxcuin Quihndi rë Nina. Vëhë xi tinújin cojo cjuaquixi ta Nina Nahmi naja ne, catsingatju me Quihndi rë me, xi cuaxëtje rë xuta ngasunhndë.
1JO 4:15 Tu yo ni xi chja cjuaquixi xi Jesús ne, Quihndi rë Nina jain me ne, me vëhë ne, jiya Nina cahntsua xahasen rë, hacuaha tjin tangun cjuatacun rë cojo Nina.
1JO 4:16 Ngayaan ne, macjain naja hacuaha ha hyan ta Nina ne, hmucacun jain me ngayaan. Nina ne, hatuxa tjin rë me cjuahmutacun. Hane xuta xi tjin rë cjuahmutacun ne, tjin tangun cjuatacun rë me cojo Nina, hacuaha Nina ne, jiya cahntsua xahasen rë me.
1JO 4:17 Hane hya xi cumachihin cjuahmutacun xi tjin naja ne, ngajan xi hacuiin rcun cuma, hya xi cuechutaha nixtin xi tsichuva naja Nina. Cuatjin ta, tsëhë xi nguehe ngasunhndë ne, hacuaha quihndi rë Nina ngayaan sacuatjin rë Jesucristu, xi Quihndi rë Nina me.
1JO 4:18 Hiscan xi tjin cjuahmutacun ne, tsajin mé chircun hinchajñi ta hya xi ha tjin chihin cjuahmutacun xi tjin naja ne, hisca hitsë ne, tsajin rcun cuma. Sa xi ningatahantacun xi Nina sahmi naja me castigu ne, vëhë xi rcun cuma. Peru sa xi cuatjin rcun cuma ne, ngajan matsejen xi tsajin tjin chihin cjuahmutacun xi tjin naja.
1JO 4:19 Ngayaan ne, tjin naja cjuahmutacun ta, tsëhë xi Nina ne, tjun me catsihmucacun naja me.
1JO 4:20 Peru sa xi nújan xi nihmutacun Nina, hane choho hyan xingueen ne, tu vindachan ni xi nújan. Cuatjin ta, tsëhë xi sa xi hacuiin nihmutacun xingueen xi tsejen naja cojo tuxcun ne, hacuaha cumaji nihmutacun Nina xi cjëë camahani chaan me.
1JO 4:21 Nina ne, cavitexa naja me cjua vihi: yo xi tjin rë cjuahmutacun cojo Nina ne, hacuaha meje rë xi tjin rë cjuahmutacun cojo xicjin.
1JO 5:1 Jesús ne, hacui me xi Cristu, me xi cavaxijin Nina xi cuaxëtje naja. Hane ngayejen ni xi cuatjin macjain naja tsëhë cjua vëhë ne, quihndi rë Nina ngayaan. Yëjë ni xuta xi tsihmucacun me xi má xutacha rë ngu quihndi ne, hacuaha cojo quihndi jan tsihmucacun me.
1JO 5:2 Sa xi nihmutacun jain Nina hacuaha nihña sacuatjin xi cavitexa me ne, ngajan matsejen xi tjin naja cjuahmutacun cojo yëjë ni xuta xi quihndi rë Nina me.
1JO 5:3 Hacuaha sa xi chjahanrcun jain yëjë ni cjua xi cavitexa Nina ne, ngajan matsejen xi nihmutacun jain me. Hane yëjë ni cjua xi cavitexa me ne, hacuiin jercu chja xi nihña ta,
1JO 5:4 tsëhë xi yëjë ni xuta xi quihndi rë Nina ne, scaa rë me cojo yëjë ni cjuatsehen xi tjin nguehe ngasunhndë. Cuatjin caa naja cojo cjuatsehen jan ta, tsëhë xi macjain naja Jesucristu.
1JO 5:5 Hane suvá ni xuta xi macjain rë tsëhë Jesús xi Quihndi rë Nina jain me ne, me vëhë xi caa rë me cojo yëjë ni cjuatsehen xi tjin ngasunhndë.
1JO 5:6 Hya xi canduva Jesucristu ne, camatsejen xi Quihndi rë Nina me nixtin xi cojo nandá caxtenda me cojo nixtin xi cavixu jni rë me hya xi cahme me. Peru hacuiin suvá ni nixtin xi caxtenda ni me ta cojo nixtin xi cahme me ne, hya camatsejen xi Quihndi rë Nina me. Hasen xi tsëhë Nina ne, cuatjin tisua naja cjuaquixi ta, tsëhë xi Hasen jan ne, hatuxa cjuaquixi xi chja.
1JO 5:7 Siu jyan xcusun xi tisua machaya naja ta Jesús ne, Quihndi rë Nina jain me.
1JO 5:8 Ngu ne, cuatjin chja quixi Hasen xi tsëhë Nina. Ma jo ne, cuatjin camatsejen hya xi caxtenda Jesús. Ma jyan ne, hacuaha cuatjin cama tsejen hya xi cahme me. Hane catsijyan xcusun xi cuacun jan ne, tjin rë ngu ni cjuatacun.
1JO 5:9 Ngayaan ne, macjain naja tsëhë cjua xi chja xuta cojo naja. Peru hitsë sa vengui chjí rë cjua xi chja Nina. Hane Nina ne, casua me camachaya naja yo xi Quihndi rë me.
1JO 5:10 Xuta xi macjain rë me tsëhë Quihndi rë Nina ne, hatuxa vëë me cojo cjuatacun rë me ta quixi jain cjua xi cachja Nina. Xuta xi macjaain rë me tsëhë cjua xi cachja Nina ne, sacuaha xi cuichja me xi Nina ne, jemu ndacha me. Cuatjin chja me tsëhë Nina ta, tsëhë xi macjaain rë me tsëhë cjua xi cachja quixi Nina, yo xi Quihndi rë me.
1JO 5:11 Hane Nina ne, cachja cjuahñu xatsë jan ngatsë rë Quihndi rë me.
1JO 5:12 Xuta xi tjin tangun cjuatacun rë me cojo Quihndi jan ne, tjin rë me cjuahñu xatsë vëhë. Peru xuta xi tsajin tjin tangun cjuatacun rë me cojo Quihndi rë Nina jan ne, hacuaha tsajin rë me cjuahñu xatsë jan.
1JO 5:13 Vëhë xi cuitjin titsihindu nuju ngayujun ni xi macjain nuju tsëhë Quihndi rë Nina. Titsihindu nuju yëjë ni cjua vihi, cojo sa xi cumangutacun ta quixi xi tjin jain nuju ngu cjuahñu xatsë xi tsajin nu tsajin nixtin xi cjuë.
1JO 5:14 Ngayaan ne, mangutacun jain cojo Nina ta, tsëhë xi ha hyan ta sa xi tjin tangun cjuatacun naja cojo rë me hora xi tichjahyan rë me ne, cuihndë me xi cuinújan.
1JO 5:15 Hane tsëhë xi hyan ta vihndë me yëjë ni cjua xi nújan cojo rë me ne, vëhë xi hacuaha hyan ta sacú naja xi cachjahyan rë me.
1JO 5:16 Yo ngayaan xi chutsejen xi tivixuya ngu xingueen ngajñi rë ngu cjuatsehen xi cuma cumanchataha ne, meje rë xi cuinújanyumatahan tsëhë me, hane cuatjin sacú rë me cjuahñu xatsë. Peru tjin cjuatsehen xi cumaji cumanchataha. Hane hacuiin tichjá cojo nuju xi cuinújunyumuntuhun tsëhë xuta xi tjin rë me jyë́ vëhë.
1JO 5:17 Yëjë ni cjuatsehen ne, Nina ne, chja me ta hatuxa jyë́ hmí rë. Peru tjin cjuatsehen xi cuma cumanchataha.
1JO 5:18 Ngayaan ne, hyan ta yëjë ni xuta xi cjuaquixi xi quihndi rë Nina me ne, hatuxa tsajin hinchajñi me ngajñi rë cjuatsehen. Cuatjin ta, tsëhë xi Quihndi rë Nina ne, sahmi rë me cuidadu, hane xitsehen matitjun ne, cumaji mé sahmi cojo rë me.
1JO 5:19 Ngayaan ne, ha hyan ta tsëhë Nina ngayaan. Hane yëjë sa xuta xi yahnga ne, tsëhë xitsehen má titjun me.
1JO 5:20 Ngayaan ne, hacuaha hyan ta ha canduva Quihndi rë Nina. Hacuaha casua naja me cjuatacun, cojo sa xi cuijnercun yo xi Nina xi hatuxa cjuaquixi. Tjin tangun cjuatacun naja cojo me xi hatuxa cjuaquixi ta, tsëhë xi tjin tangun cjuatacun naja cojo Jesucristu, Quihndi rë me. Me vëhë xi Nina xi hatuxa cjuaquixi, hacuaha me vëhë xi sua naja cjuahñu xatsë xi tsajin nu tsajin nixtin xi cjuë.
1JO 5:21 Ngayujun ni tsan ne, mijí camahani rë xi chjuhunrcun nina xi hacuiin cjuaquixi.
2JO 1:1 Ngahan, ngu xuta changá matitjun tsëhë yungun ne, tsihindu nuju ngayun, ngu chjuun xi cavaxijin Nina. Hacuaha cojo yëjë ni quihndi nuju ne, tsingátju nuju ngayujun ni ngu nina naha ta, tsëhë xi tjemu hmú cácun nuju cojo nguñaja cjuaquixi. Peru hacuiin tu suva ni ngahan ta yëjë ni me xi vëë jain me cjua xi hatuxa cjuaquixi ne, hacuaha tsihmucacun nuju me.
2JO 1:2 Cuatjin nihmitacuin nuju, ngatsë rë cjuaquixi xi ha siu cahndë́ ngajñi rë cjuatacun naja. Hane cjuaquixi xi cuacun jan ne, tsajin nu tsajin nixtin xi cuetjuxin tsajan.
2JO 1:3 Nina nahmi naja cojo Jesucristu Quihndi rë me ne, hatuxa sua naja me cjuandaja cjuajeya cojo cjuayumatacun, cuatjin xi ma vanguen tjenguen cjua xi cjuaquixi, hacuaha ma nihmutacun jain xingueen.
2JO 1:4 Tjemu ndaja camá rë xahasen naha ta, tsëhë xi cavéchutaha ngu jo quihndi nuju xi hatuxa hinchajñi me ngajñi rë cjuaquixi, sacuahatjin Nina Nahmi naja cavitexa naja me.
2JO 1:5 Quihndë ne, nguehe cuichjá cojo nuju tsan ta meje rë xi ngayejen ni ne, nihmutacun xingueen. Hane cjua vihi xi tichjá cojo nuju ne, hacuiin ngu cjua xatsë xi sehe cavitexa naja Nina ta cjua vihi ne, hacui xi tacun hisca hya xi sehe cavetseen camacjain naja cjua rë Nina.
2JO 1:6 Hane sa xi nihña jain yëjë ni cjua xi cavitexa naja Nina ne, ngajan matsejen xi tjin jain naja cjuahmutacun. Hane cjua xi cavitexa Nina ne, hacui vihi: meje rë xi nihmutacun xingueen. Hacuaha hacui cjua vëhë xi camachaya nuju hisca hya xi sehe cavetsuhun camacjain nuju cjua rë Nina.
2JO 1:7 Cuatjin chjá cojo nuju ta, tsëhë xi ngasunhndë vihi ne, tjemu tjin xuta ndacha xi macjaain rë me xi Jesucristu ne, camá jain me ngu xuta ngasunhndë vihi. Xuta ndacha jan ne, hacui me xi vindacha, hacuaha hacui me xi má condra rë Cristu.
2JO 1:8 Tjin nuju cuidadu, sehe ngajan xi hacuiin nichayun cjuandaja xi canihñí ngajñi nuju. Cahndë́ rë vëhë ne, sacú nuju yëjë ni cjuatjo xi sua nuju Nina.
2JO 1:9 Yëjë ni xuta xi vatjutaha me tsëhë cjua xi cavicuya Cristu ne, tsajin tjin tangun cjuatacun rë me cojo Nina. Peru yëjë ni xuta xi vetaharcu me suvá ni cjua xi cavicuya Cristu jan ne, me vëhë ne, tjin tangun cjuatacun rë me cojo Nina Nahmi naja cojo Quihndi rë me.
2JO 1:10 Hya xi cjuehe ngu me xi cuichja xi vicuya me cjua rë Nina, peru sa xi cuicuyaain me cjua xi cavicuya Cristu ne, xi catuun cahndë́ cuisehen me cuejña me ndya nuju. Hisca ngu nina cachjayunnguun tsëhë me ta,
2JO 1:11 sa xi cuatjin tuhun rë me nina ne, sacuaha xi ma tangun yun cojo cjuatsehen xi sahmi me.
2JO 1:12 Tjemu cjín sa cjuavisiajmi xi meje cuichjá cojo nuju ngayujun ni. Peru tsihinduun sa nuju sacuahatjin xcun ngu xujun vihi ta, tsëhë xi hatuxa vejñá xi cjuë tjëngë nuju, sehe cuinújan xcun cojo xcun, sehe ngajan xi tjemu ndaja cuma rë xahasen naja.
2JO 1:13 Na tichjun, xi hacuaha cavaxijin Nina na ne, tsingatju quihndi rë na ngu nina tsujun.
3JO 1:1 Ngahan, ngu xuta changá matitjun tsëhë yungun ne, tsihindu ri ngaye Gayo, ta ngaye ne, tjemu vinga ná ngaye, tjemu hmú cácun ri cojo nguñaja cjuaquixi.
3JO 1:2 Catisecoo ri Nina, tsan, xi cuma cuihin xcun cojo yëjë ni cjuandaja, hacuaha xi ndajyihi cjuahñu riji, sacuahatjin xi ha ndajyihi xahasen riji.
3JO 1:3 Tjemu ndaja camá rë xahasen naha ta, tsëhë xi jima ngu ndiya xi cafehe ngu ngu xingueen ne, tjemu ndaja cachja me tsiji. Ha tuxa chja me ta ngaye ne, nguñajatacuin hmi tjengui ndiya rë cjuaquixi.
3JO 1:4 Tjemu ndaja má camahani rë xahasen naha, hya xi machaya ná xi yëjë ni xingueen xi sacuaha quihndi naha ne, cjui tjengui me ndiya rë cjuaquixi.
3JO 1:5 Tjemu ndaja tinihñi, tsan, xi cuatjin tivisecue rë jingu sa xingueen, hisca cojo sa xingueen xi hyiin yo jan ta, tsëhë xi cjin nandya nduva me.
3JO 1:6 Hane ngujo me xi cuacun vëhë ne, sehe cavuya cafehe nga me nguehe. Hane hya xi cama tangun ngayin yungun ne, cachja me cojo niji ngayijin ni xi tjemu tjin ri cjuahmutacun. Quihndë ne, tu jani hya ni xi cuatju nga me nandya riji ne, tjemu ndatjin xi cuisecue rë me, cojo sa xi tsajin mé xi sahmi chaja rë me xi cuetju me cjue me ndiya ta, tsëhë xi cuatjin chuya rë Nina xi nihña.
3JO 1:7 Cuatjin meje rë xi nihña ta, tsëhë xi xuta xi cuacun jan ne, cavetju quiji me ngu nangui xi cuichja me cjua rë Jesucristu. Hane hisca ngu hñú ngu të ne, faain me tsëhë xuta xi macjaain rë Nina.
3JO 1:8 Vëhë xi ngayaan ne, meje rë xi cuatjin cuisecoon rë me xi cuacun jan ta, tsëhë xi cuatjin ne, hacuaha cuisecoon rë cjua xi cjuaquixi.
3JO 1:9 Ha catsihindu ngu xujun xi tsingátju rë xuta xi ma tangun ngajan yungun. Peru cha Diótrefes, xi tjemu meje sahmi tjun cha ngajñi rë me ne, handasa hacuaha xingueen cha, peru faharcuaain cha cjua xi nújin.
3JO 1:10 Vëhë xi hya xi cjuëhë ndyá ne, cuichjájyë cojo nuju ngayujun ni yëjë ni xcusun xi sahmi cha jan. Cuichjá quixë hacutjin choho chja cha tsijin. Hane manguaaincacun cha cojo xi choho chja ni cha ta hacuaha tsitjungui cha ngu ngu xingueen xi nduva jingu sa nandya. Hane hya xi yahnga me xi meje sahmi me cjuandaja cojo xingueen xi cuacun nduva jan ne, mijí sua cha cahndë́, hacuaha hisca mijí rë cha xi cuisehen nga me yungun.
3JO 1:11 Xi canihñii cjuatsehen xi tisahmi yahnga xuta, tsan, ta tu tjin tisahmi xuta xi tisahmi cjuandaja ne, cuatjin meje rë xi nihñi. Xuta xi sahmi cjuandaja ne, tsëhë Nina me. Peru xuta xi sahmi cjuatsehen ne, hacuiin amigu rë Nina me.
3JO 1:12 Yëjë ni xuta ne, ndaja chja me tsëhë cha Demetrio. Hacuaha suvá tsejen xi sahmi jain cha sacuaha tjin vitexa Nina. Hisca ngayin ne, ndaja nújin tsëhë cha. Hane ngaye ne, ha hye ta xi nújin ne, ha tuxa cjuaquixi.
3JO 1:13 Tjemu tjin vasen sa xi meje cuichjá cojo ri, peru mijí cuichjá cojo ri sacuaha tjin xcun ngu xujun vihi.
3JO 1:14 Cahndë́ rë vëhë ne, tu tjenhñu ni ne, vejñá xi cjuë tjëngë ri, sehe cuisiajme xcun cojo xcun.
3JO 1:15 Quihndë ne, tsingátju ngu nina tsiji, hacuaha yëjë ni amigu riji ne, tsingatju me ngu nina tsiji. Nihñi favor ne, yëjë ni amigu niji xi siutaha ndyá ne, tehe rë me ngu nina niji jima ngu jima ngu me.
JUD 1:1 Ngahan Judas, xi mosu hndixahan rë Jesucristu, hacuaha xi hntsë cha Jacobo ne, tsihindu xujun vihi xi chutayun ngayujun ni xi cavaxijin nuju Nina Nahmi naja, tsëhë xi tjercu hmucacun me ngayun. Hane ngayujun ni xi camacjain nuju Jesucristu ne, Nina tisahmi cuidadu nuju me.
JUD 1:2 Yëjë ni cjuandaja cojo cjuajeya cojo cjuahmutacun tsëhë Nina ne, catamacjín sa ngajñi nuju.
JUD 1:3 Ngayujun ni tsan ne, casahme xati cacun xi tsihindu nuju tsëhë cjuandaja rë Nina xi cuaxëtje naja. Peru quihndë ne, hacuaha sahmi ngujyë xi tsihindu nuju, cojo sa xi cuichjá cojo nuju xi cuinújuntjun ngatsë rë cjuachacun xi ha casua Nina ngayaan xi macjain naja me.
JUD 1:4 Tsëhë xi tjin xuta xi cavindacha xi caxinchajñi me ngajñi nuju. Peru hatsëë nixtin ne, camahindu xcun xujun rë Nina tsëhë castigu xi cuatju me cuma. Hatuxa xuta tsehen me, xi handasa tsejen sacuaha xi tjin rë me cjuandaja rë Nina naja ne, peru vatjutaha me yëjë ni cjuatsehen xi sahmi me, hacuaha tsitjungui me ngu ni Nai naja Jesucristu.
JUD 1:5 Quihndë ne, handasa ha hyun cjua vihi ne, cúya cuichjá cojo nuju hacutjin casahmi Nai naja. Ngu ne, xuta nangui Israel ne, handasa cavaxëtje Nai naja me tsëhë nangui Egipto ne, peru cama ngascan ne, ngajñi rë xuta nangui Israel jan ne, hacuaha casahmi me castigu xuta xi camacjaain rë tsëhë me.
JUD 1:6 Ma jo ne, ángel xi caviyijin hiscan xi cachja Nai naja xi cuiyuju ta tu cavetjuxin tsëhë cahndë́ rë ne, cavinchahñu me hiscan jñu, hisca xi cuechutaha nixtin xi cuichja Nai naja mé castigu cuatju ángel jan cuma nu cjui nu nduva.
JUD 1:7 Hane xi ma jyan ne, xuta nandya xi hmí rë Sodoma cojo xuta nandya Gomorra cojo sa xuta xi siu tahndee rë jan ne, hacuanitjin ni cahndiin me tsëhë Nina. Tjercu casahmi me cjuatsehen xi tjin chjuunnahñu rë me. Hisca cavatjutaha sa me cjuatsehen ta ngajñi xihin ni me ne, casahmi me cjuatsehen sacuaha xi chjuunnahñu rë me xicjin me. Vëhë xi suvá sa cahndë́ rë nandya xi cuacun vëhë ne, siu cuaha xi ninguitsjen tsëhë castigu xi cavatju camá, xi cafë catí cojo ndihi rë Nina.
JUD 1:8 Hacuanitjin ni tisahmi xuta tsehen xi hinchajñi ngajñi nuju jan ta, ngajñi rë cjuatacun rë me ne, tichja cojo rë me xi catisahmi me cjuatsehen jan, xi sahmii me cjua xi vitexa Nai naja, hacuaha xi choho catichja me tsëhë ángel xi siu cojo Nina.
JUD 1:9 Peru suvá ángel matitjun xi hmí Miguel ne, hya xi ticjanya cojo xitsehen matitjun yojo rë Moisés ne, cavetjiincacun xi choho cuichja cojo xitsehen jan ta tu cuinitjin cachja: “Nina catichjataha me ngaye.”
JUD 1:10 Peru xuta tsehen xi cuacun vë ne, choho chja me tsëhë yëjë ni xcusun xi vijniircu me. Hane hitsë sa chu me xi cuma rë chu ta, handasa vëë me xi hmí rë cjuatsehen ne, hatuxa sahmi me. Hane cjuatsehen xi sahmi me jan ne, vëhë xi tsinguetsun rë cjuatacun rë me.
JUD 1:11 Jemu choho cuatju me cuma, tsëhë xi fi me ndiya tsehen sacuatjin quiji xutachanga naja Caín, sahmi me cjuatsehen ngatsë rë tujún xi jercu meje rë me sacuatjin casahmi cha Balaam, hacuaha cueya me sacuatjin cahme cha Coré, ngatsë rë xi meje cjuahaxin cha xutaxa rë.
JUD 1:12 Xuta tsehen xi cuacun jan ne, ngu cjuasava me hora xi tichinutangun tsëhë cjuahmutacun xi tjin nuju cojo xingun ta, tsëhë xi hisca jinë hisca hvi me cojo nguñaja ni cjuasua, peru fahacuendaain me yo xi cajinë yo xi cajinii ta tu tsëhë suvá ni me fahacuenda me. Sacuaha yufí xi cavaain ta cavatjucjin xi cavaha rë tjo quiji ne, hacuaha cuatjin machjiriin me. Sacuaha ya xi machjiriin xi vaquiin tú rë nixtin rë ne, tjune ni rë hisca tyjama rë sehe xi ne, hacuaha cuatjin machjiriin me.
JUD 1:13 Machjiriin me sacuaha tsindyu rë ndachacun xi hisca xu jima xcun xi cjan rë ne, hacuaha cuanitjin ni hisca xu jima cjuasava ngajñi rë me. Machjiriin me sacuaha machjiriin niñú xi siutaha ngahnga xi vejñaai cahndë́ rë ne, hacuaha cuatjin machjiriin me. Hane castigu xi cuatju me cumá ne, xi tsajin nu tsajin nixtin xi cuma ndaya me tsëhë hiscan xi tjercu tu jñu camahani.
JUD 1:14 Hane ngu xutachanga niji xi hmí rë Enoc, xi quihndindaicjin rë Adán ne, hya xi cachja me ngu cjua xi caveya Nina cjuatacun rë me xi cuma ne, hacuaha cachja me tsëhë xuta tsehen xi cuacun vë, cuitjin cachja me: “Cahvë Nai naja xi nduva me ngajñi rë ángel rë me xi tjercu tu cjín camahani.
JUD 1:15 Nduva me xi cjuahachuva me ngayejen ni, sehe cuichja me mé castigu xi cuatju yëjë ni xuta tsehen tsëhë yëjë ni cjuatsehen xi casahmi me, hacuaha tsëhë yëjë ni cjua xi choho cachja xuta tsehen xi cuacun jan tsëhë Nina.”
JUD 1:16 Xuta tsehen jan ne, hatuxa choho chja me tsëhë yëjë ni, hacuaha sahmi me tu cutjin xi macacun me. Sahmi yehe suvá me yojo rë me, hacuaha chja me cjuahaxi cojo xuta, tsëhë xi meje rë me xi sahmi yehe xuta me.
JUD 1:17 Peru ngayujun ni tsan ne, ninguitsjun cjua xi ha cachja apóstol tsëhë Nai naja Jesucristu,
JUD 1:18 xi cachja me cuitjin: “Hya xi ha jima tiña cuya Nai naja ne, hya tjin xuta xi cuejnucëë me tsëhë yëjë ni cjuandaja rë Nina, hacuaha sahmi me yëjë ni cjuatsehen xi cuetju tsëhë xahasen rë me.”
JUD 1:19 Xuta tsehen xi hinchajñi ngajñi nuju jan ne, vatëcja me ngajñi rë yëjë ni ngu cjuandaja xi cuma. Tsingatahacacun ni me xi sinë xi cuihi me, hane Hasen rë Nina ne, tsajin camahani rë me.
JUD 1:20 Peru ngayujun ni tsan ne, sacuaha cjua rë Nina xi ha camacjain nuju ne, nihñu ngujyë xi catamacjain sa nuju. Tinújunyumu ha tu cutjin xi visecoo nuju Hasen rë Nina.
JUD 1:21 Nihñu cuidadu xi hacuiin nichayun cjuahmutacun rë Nina. Hacuaha tinechunyun rë nixtin xi Nai naja Jesucristu ne, cojo cjuandaja rë me ne, sua naja me cjuahñu naja xi tsajin nu tsajin nixtin xi cueyan.
JUD 1:22 Xuta xi jo má cacun me tsëhë cjuandaja rë Nina ne, nújun cojo rë me ne, cojo sa xi hacuiin jo cuma cacun me.
JUD 1:23 Naxuntjun me sacuaha ngu xuta xi naxentjen me xi ha ndiya cueti me. Hane yahnga me ne, tjin nuju cjuayumatacun cojo rë me, peru cojo cuidadu, xi satiin nuju jyë́ rë me.
JUD 1:24 Ngu ni Nina xi vaxëtje naja ngatsë rë Nai naja Jesucristu ne, me vëhë xi cuma sahmi cuidadu me ngayun xi tsajin xtundiya yun ngajñi rë cjuatsehen, hacuaha cuiyuju me ngayun xcun me xi cun tyjahi tyjahi xahasen nuju ne, cojo yëjë ni cjuasua. Me vëhë xi tjin rë me yëjë ni ngu cjuandaja, hacuaha jyë me, hacuaha ma vitexa me, hacuaha ma sahmi me, hisca xi chaja sa xi cumandaja ngasunhndë, hisca quihndë, hacuaha hisca xi cuatju xi cjuë ngasunhndë. Cuatjin jain.
REV 1:1 Cjua vihi ne, cjua tsëhë Jesucristu xi casua Nina cojo sa xi tsingacun Jesucristu xuta ladu rë me xcusun xi hatuxa sahmi ngujyë xi cuatjú. Cjua jan ne, ngu ángel cafehecani ná, ngahan xi hmí ná Juan, ngu mosu hndixahan rë me.
REV 1:2 Hane ngahan ne, tsinguíxë ta cjuaquixi yëjë xcusun xi cahvë hya, xcusun tsëhë cjua rë Nina cojo tsëhë cjuaquixi xi chja Jesucristu.
REV 1:3 Jemu ndaja tsëhë me xi cuichjasun me cjua rë xujun vihi, hacuaha jemu ndaja tsëhë me xi cuihndë me cuincha me xahasen rë me cjua xi camahindu xcun xujun vihi, tsëhë xi ha camá tiña nixtin xi cuma chihin cjua rë.
REV 1:4 Ngahan Juan ne, tsihindú cjua vihi xi cjuahatsja yatu yungun xi tjin ngajan nangui Asia. Chjuhunntsun cjuandaja cjuajeya tsëhë Nina, me xi hacui, hacui ni me xi cavejña me hatsëë, hacuaha hacui ni me xi cuejña cuaha, hane cojo tsëhë Hasen rë me xi siu xcun me xi hacui sacuaha yatu hasen.
REV 1:5 Hacuaha cojo tsëhë Jesucristu, me xi má testigu cjuaquixi, me xi tjun tjun cavuya cjuahñu tsëhë ngajñi rë nima, me xi hacuaha matitjun tsëhë yëjë ni xuta xi matitjun tsëhë ngasunhndë, hane me xi hmucacun naja hacuaha cavaxëtje naja tsëhë jyë́ naja hya xi cavanga jni rë me xi cahme me.
REV 1:6 Hacuaha Jesucristu ne, casahmi me xi ngayaan ne, satë naja xi cuitexan ne, hacuaha cuma yaan sacuaha nahmi xi chjahancuendan Nina, Nina xi hacuaha má me nahmi rë me. Me vëhë ne, catimá jyë hnga me hacuaha catimá titjun me yëjë ni nu, yëjë ni nixtin. Cuatjin jain.
REV 1:7 ¡Nutsujun, ta cuinduva me cojo yufí! Hacuaha yëjë ni tuxcun ne, scuëë rë me. Hisca cojo me xi cahndiin tsëhë me ne, scuëë rë me. Hane yëjë xuta tsëhë jimangu tjë rë xuta ngasunhndë ne, cuatju me cjuandusin ngatsë rë me. ¡Cuatjin cumá! ¡Cuatjin jain!
REV 1:8 Cuitjin chja Nina: “Ngahan sacuaha letra xi vetsihin cojo A ne, vijnetaha cojo zeta. Hacui ni ngahan xi ntsacu vetsihin. Ngahan xi tejña, hane ngahan xi vijnetaha. Cavéjña hatsëë, hacuaha cuéjña cuaha. Yëjë ni má sahme.”
REV 1:9 Ngahan Juan ne, xingun má ngahan, tangun satë naja cjuañihi, tangun nechan ngahma gubiernu hacuaha tangun caa naja ngatsë rë xi mangutacun cojo Jesús. Ngahan cavitejñataha ngu nandya xi hmí rë Patmos xi vetjucaa tsëhë ndachacun. Ngajan tejñataha ngatsë rë xi cachjá cjua rë Nina cojo tsëhë cjuaquixi xi chja Jesús.
REV 1:10 Hya xi camá ne, nixtin xi chjaharcun Nina ne, Hasen rë Nina ne, cavisehentë cjuatacun naha. Hora vëhë ni ne, tsëhë taha ngaxtun ne, cahndë ngu xta xi jemu hñu camahani nuhya rë, nuhya rë sacuaha xta rë tyjo
REV 1:11 hane cuitjin cachja: ―‍Ngahan sacuaha letra xi vetsihin cojo A ne, vijnetaha cojo zeta. Hacui ni ngahan xi ntsacu vetsihin ne, hacui ni ngahan xi vijnetaha. Chjehe ngu xtë xujun ne, nihndi xcusun xi tichutsijin hane sehe ningatjin catahatsja xuta yungun xi siu yatu nandya Asia xi cuicun vi: Efeso, cojo Esmirna, cojo Pérgamo, cojo Tiatira, cojo Sardis, cojo Filadelfia cojo Laodicea. ―‍Cuitjin cachja xta jan.
REV 1:12 Hya xi camá ne, cavuya xi scutséjen yo xi tichja cojo ná, peru xi tu cavuya ne, xi cahvë ni ne, yatu candeleru xi camá tsëhë oro.
REV 1:13 Hane vasencja rë candeleru jan ne, jiyajñi ngu xihin xi tsejen sacuaha Quihndi rë Xuta Jain. Yaja me ngu tsjian tjin të ni xi vechu hisca ntsacu me, hane tjihñucja hiscan ndanisin rë me cojo ngu pañu nduju camá cojo nachjun tsëhë oro.
REV 1:14 Hane rcu cojo tsjarcu me ne, tyava tsejen sacuaha tsejen tyava tsja rë chu tsánga o sacuaha tsejen hnchan xi vixu. Hane tuxcun me ne, tsejen sacuaha ndihi xi ña vitjen.
REV 1:15 Ntsacu me ne, seti sacuaha quicha sine xi catsicjë ndihi xutsë rë; hane xta rë ne, nuhya rë sacuaha xta rë nandan xi tjemu hñu vanga.
REV 1:16 Tsja xi ladu quixi ne, vahangui me yatu niñú. Hane tsëhë hntsua me ne, vetju ngu espada yuju xi vatë taha xcun cojo taha ngaxtun. Hane xcun ne, tsejen sacuaha tsuhi hya xi sua hasen cojo yëjë ni ngahñu rë.
REV 1:17 Ngajan xi ngahan ne, xi cahvë xcusun rë me ne, catícja taha ntsacu me sacuaha xi cahme ngahan. Ngajan xi cavisane me tsja me ladu quixi xcun yojo naha, sehe cachja me cojo ná cuitjin: ―‍Xi carcuiin. Ngahan xi ntsacu vetsihin ne, hacui ni ngahan xi vijnetaha.
REV 1:18 Ngahan, quicun ngahan. Cavéya, peru quihndë tacunntsa llavi tsëhë cjuaveya cojo tsëhë Hades, cahndë́ hiscan siu nima.
REV 1:19 Hindë ngaye ne, nihindi xcusun xi cahye vi cojo xcusun xi tijima quihndë cojo xcusun xi sehe cumá.
REV 1:20 Sacuaha yatu niñú xi cahye hntsa ladu quixi naha cojo yatu candeleru xi camá tsëhë oro jan ne, cuitjin vijne cjuatacun hma jan: yatu niñú jan ne, hacui ángel xi sua cumachaya rë xuta rë yatu yungun jan cjua rë Nina, hane yatu candeleru jan ne, hacui yatu yungun jan.
REV 2:1 ’Hindë nihindi cjua vi xi cjuahatsja ángel rë yungun ngajan nandya Efeso. Cuitjin nihindi: “Cjua vihi ne, cjua rë cha xi vahangui yatu niñú jan tsja ladu quixi cha hacuaha tsujyihiya cha vasencja rë yatu candeleru jan xi camá tsëhë oro:
REV 2:2 Ha ndaja hvë tsëhë xa nuju sacuaha cjuandaja xi nihñu, jemu chja tivatjun peru ticaa nuju titsangun nduju cojo. Hvë xi tuun rë xuta tsehen cahndë́ ta, nichuvun cjuatacun rë xuta xi vindacha me sacuaha xi má me apóstol. Hane camachaya nuju xi tu vindacha ni me.
REV 2:3 Hacuaha titsangun nduju hacuaha ticaa nuju cojo cjuacjintacun xi tivatjun ngatsë rë xi veyunnangun ñihi naha, hacuaha machuvaain cjuatacun nuju ngajñi rë cjuacjintacun jan.
REV 2:4 Peru cojo yëjë sa ne, tjin ná vihi condra nuju ta, hacuiin jemu nihmutacún ná sacuaha xi canihmutacún ná hya xi titjun camangutacún cojo ná.
REV 2:5 Vëhë xi ninguitsjun hacutjin cavatjun hya xi tjin nuju cjuahmutacun vëhë, hane nindeyun cjuatacun nuju ne, cuyun nihñu nga xcusun sacuaha xi canihñu titjun. Cuatjin nihñu ta, sa tsajin ne, cuinduvá tjëngë nuju ne, cuaxëxen candeleru xi satë nuju tsëhë cahndë́ rë.
REV 2:6 Peru hacuaha tjin sa nuju ngu xcusun xi ndaja tsujun ta, ndaja tsujun tsëhë xi choho hyun xcusun xi sahmi xuta xi tjengui me cjuachacun tsëhë Nicolás, ta cjuachacun jan ne, hacuaha cojo ngahan ne, choho hvë.
REV 2:7 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun. Cuitjin chja: Yo xi scaa rë cjue xcun tsëhë cjuatsehen ne, suá rë cahndë́ xi sinë tuhaxi xi sua cjuahñu xi vaqui rë ya xi secun cahndë́ ndajyihi xi tsëhë Nina.”
REV 2:8 ’Hindë nihindi cjua vi xi cjuahatsja ángel rë yungun ngajan nandya Esmirna. Cuitjin nihindi: “Cjua vihi ne, cjua rë cha xi matitjun hacuaha matjengui. Cjua rë cha xi cahme jan hane hacuaha cavuya nga cjuahñu. Hacui cjua vihi:
REV 2:9 Ha hvë cjuacjintacun xi tivatjun cojo cjuayuma nuju. Peru ngajñi rë vëhë ne, ¡nchina ngayun! Hacuaha hvë cjua chjataha rë xuta vë xi chja me xi xuta tjë rë Israel, o sa xuta rë Nina, má me, peru quixiin ta, xuta ladu rë Satanás má me.
REV 2:10 Xi carcuun tsëhë xcusun xi cúatjun cuatjin. Naain ne, tsitsehen cha xuta cojo sa xi scandiya me yahnga ngayun ndavaya sehe chjahachuva nuju. Hacuaha tsujihihya tjengui nuju xuta jan cojo cjuañihi xcun të nixtin ni. Peru tangunnduju cojo cjuatacun nuju handasa xi cueyun, hane ngahan ne, suá nuju corona rë cjuahñu.
REV 2:11 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun. Cuitjin chja: Yo me xi scaa rë cjue xcun ne, tsajin mé choho cuatju me tsëhë cjuaveya xi majo.”
REV 2:12 ’Quihndë nihindi cjua vi xi cuahatsja ángel rë yungun ngajan nandya Pérgamo. Cuitjin nihindi: “Cjua vihi ne, cjua rë cha xi tjin rë quicha yuju, xi vatë taha xcun cojo taha ngaxtun. Cuitjin chja cha:
REV 2:13 Ha hvë cahndë́ jani hisca nechuntuhun, ta cahndë́ vëhë ne, cahndë́ hñu xi vitexa Satanás. Peru cojo yëjë sa ne, ndaja mangutacún cojo ná. Handasa hya xi catsiquehen me Antipas, me xi catsinguixi cjuaquixi naha ngajan cahndë́ hñu xi vitexa Satanás ne, hisca hya ne, hacuiin cavitijayun ndiya rë xuta xi macjain rë me ngahan.
REV 2:14 Peru hacuiin yëjë tsujun ndaja ta, tjin ná ngu jo xcusun condra nuju ta nijyuntacún tsëhë ngu jo me ngajñi nuju xi tjengui me cjuachacun rë cha Balaam. Cha vëhë catsingacun cha Balac chuva rë hacutjin tsitsehen cha xuta nangui Israel nixtin hatsëë. Hane casahmi me jyë́ xi cajinë me yojo tsëhë cjuatjo rë nina ndyojo, hacuaha xi casahmi me cjuatsehen xi satë rë cjuachacun jan.
REV 2:15 Hane hacuanitjin ngayun, ta ngajñi nuju siu me xi hacuaha tjengui rë cjuachacun jan, cjuachacun rë cha Nicolás.
REV 2:16 ¡Nindeyun cjuatacun nuju! ta, sa tsajin ne, ha nduvá tjëngë nuju, hane sahme si cojo rë me xi cuacun vë cojo quicha rë cjua xi vetju ntsuva.
REV 2:17 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun. Cuitjin chja: Yo xi scaa rë cjue xcun ne, suá rë comida cjuarcun xi hmí rë maná xi jiyahma, hacuaha suá rë ngu ndyojo lihndi tyava hiscan camahindu ngu ñihi xatsë, ngu ñihi xi tsajin yo vëë rë, ta suva me xi cjuahatsja rë ne, suva ni me vëë me.”
REV 2:18 ’Hacuaha nihndi cjua vihi xi cjuahatsja ángel rë yungun ngajan nandya Tiatira. Cuitjin fi cjua: “Vihi cjua rë Quihndi rë Nina Jain, me vëhë ne, tuxcun me, sacuaha ndihi tsejen, hane ntsacu me sacuaha quicha sine xi catsicjë ndihi xutsë rë:
REV 2:19 Ha machaya ná tsëhë xa sacuaha cjuandaja xi nihñu, sacuaha cjuahmutacun nuju, cojo xi mangutacún, hvë xa xi tinihñu cojo sa xi ndaja cjuecani nuju. Cjuandaja xi nihñu quihndë ne, quisun sa xi cuma rë xi canihñu ntsacu cavetsihin.
REV 2:20 Peru cojo yëjë sa ne, tjin ná vihi condra nuju ta, nijyuntacún tsëhë na chjuun Jezabel vë, na xi chja suva na xi profeta má na. Na vëhë ne, cojo cjuachacun rë na ne, tsinguetsun na hacuaha tsitsehen na xuta ladu naha cojo sa xi sahmi me cjuatsehen ngajñi xicjin ni me, hacuaha sinë me yojo rë chu xi cahme sacuaha ngu cjuatjo rë nina ndyojo.
REV 2:21 Na vëhë ne, casuá ran cahndë́ xi tsindeya na cjuatacun ran, peru mijí choho cuma ran tsëhë xcusun tsehen rë xi sahmi na cojo xicjin na.
REV 2:22 Vëhë xi tsijaña rë na xcun ngu cahndë́ tsëhë cjuahmu, hane me xi sahmi cjuatsehen cojo na ne, suá rë me ngu cjuañihi jyë, sa tsajin choho cuma rë me hane cuindeyaain cjuatacun rë me tsëhë xcusun chocun rë na xi catsitsehen rë me xi casahmi me cjuatsehen jan.
REV 2:23 Hane me xi má sacuaha quihndi tjë rë na ne, cjuë́ tsiquéhen me, cojo sa xi cuatjin ne, cumachaya rë yëjë sa xuta yungun naha xi ngahan ne, ndaja tsichúva cjuatacun cojo xahasen nuju, hane suá nuju jima ngu yun tucu satë nuju tsëhë xcusun xi canihñu.
REV 2:24 Peru yahnga ngayun xuta Tiatira xi hacuiin cojo ngayun cachjuhunntsun cjuachacun jan ne, ngayun hyuun mé xi vijne cjua xi cahntsua nungun tsëhë Satanás. Ngayun ne, ndastu mé sa cuichjá xi nihñu ta,
REV 2:25 xi sahmi ngujyë ne, xi cuangunndujun tuhunhñu mé xi tjin nuju tsëhë Nina hisca hya xi nduvá ngahan.
REV 2:26 Yo xi scaa rë xi cjue xcun, hacuaha sahmi chihin me cjuandaja naha hisca xi cuijnetaha ne, suá rë me ngahñu xi sahmi me gubiernu rë nanguicjín.
REV 2:27 Hane me vëhë ne, cuitexa rë me xuta nanguicjín jan cojo ngahñu xi tjin rë me, sacuaha cojo ngu cuarta xi camá tsëhë quicha, hane sacuaha cuma xuva rë ngu tiji xi nihndë camá ne, cuatjin cumá cojo xuta cjín jan. Sacuaha ngahan ne, cafahántsa xa jan tsëhë nahmi naha, cuanitjin suáxa rë me xi sahmi me gubiernu.
REV 2:28 Hane suá rë me hasen rë niñú seti xi vetjucaa nguitajñu.
REV 2:29 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun.”
REV 3:1 ’Cjua vihi nihindi cojo sa xi cjuahatsja ángel tsëhë yungun ngajan nandya Sardis. Cuitjin fi cjua: “Cjua vihi xi cachja me xi tsuvangui rë yatu hasen rë Nina cojo yatu niñú: Hvë xa nuju. Tjin cjua nuju xi quicun yun, peru quixiin ta hvë ta cahme yun.
REV 3:2 ¡Catasca nuju! Mé tsujun xi siu quicun handasa ndiya cueya ne, tuhun rë ngahñu ta, xi má rë Nina naha ne, xa xi nihñu ne, hacuiin tsejen sacuaha xi ha camá chihin xa jan.
REV 3:3 Tetuhunrcun nguyëjë ni cjua xi ha cachjuhunntsun tsëhë Nina, tangunndujun cojo, hane nindeyun xcusun nuju. Cuatjin nihñu ta, sa xi cuascaain rë cjuatacun nuju ne, sehe cjuë́ tjëngë nuju sacuaha cjue tjengui rë xuta ngu cha chëjë, ta hyuun hora xi cuinduva tjëngë nuju.
REV 3:4 Peru cojo yëjë sa ne, tjin ngajñi nuju ngu jo xuta ngajan Sardis xi cjëë tsinguetsun me tsjian rë me cojo cjuatsehen. Me xi cuacun vë ne, cojo ná tsujyihiya me; hane cojo ngahan ne, cuaja me tsjian tyava tyjahi, tsëhë xi cuatjin ndatjin vechu chuva rë xi casahmi me.
REV 3:5 Me xi scaa rë cjue xcun ne, cojo me nicaja rë me tsjian tyava, sacuaha me xi cuacun vë. Hacuaha tsajin nixtin xi scujñu ñihi rë me tsëhë libru xi yaha ñihi rë xuta xi sacu rë cjuahñu ta, hisca cueyanangë ñihi rë me xcun Nahmi naha cojo xcun ángel rë me.
REV 3:6 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun.”
REV 3:7 ’Cjua vihi nihndi cojo sa xi cjuahatsja ángel tsëhë yungun ngajan nandya Filadelfia. Cuitjin fi cjua: “Cjua vihi ne, cjua rë me xi ndastu mé cjuatsehen tjin rë, hacuaha quixi me. Me vëhë ne, tacuntsja me llavi xi casatë rë nima David, me xi cavitexa. Hane cahndë́ xi vuxaha me jan ne, tsajin yo xi cuma cuechja. Hane sa xi vechja me ne, tsajin yo cuma scuxaha.”
REV 3:8 Cuatjin fi cjua: “Hvë xa nuju. Casuá nuju cahndë́ xi tixaha tingotjo xi cumá nuju, hane tsajin yo cuma cuechja xi cumá nuju. Hacuaha hvë ta, chuva má ngahñu nuju, peru handasa cuatjin ne, cavetjun cjua naha hacuaha cjëë cjuahmu ñihi naha.
REV 3:9 Tuhun cjuasua ta, chutsujun mé cumá rë xuta jan xi vihndë me tsëhë Satanás. Xuta jan ne, chja me xi tjë rë Israel má me, peru hacuiin xuta naha me ta, xuta ndacha me. Sahme xi xuta jan ne, cuinduva me cuiticjaxcun me ntsacun, hane scuëë me ta ngahan ne, meje ná ngayun.
REV 3:10 Cavetjun cjuajeya xahasen nuju sacuaha xi ngahan catsingácun nuju. Ngatsë rë vëhë ne, ngahan ne, hacuaha cuetjo nuju cojo sa xi satiin nuju cjuacjintacun tsëhë hora xi chjahachuva rë xuta. Hora vëhë ne, ha tacun xati xi nduva xcun jingujyë ni ngasunhndë, hane hya chjahachuva rë jinguyëjë ni me.
REV 3:11 Ngutjen ni cjuëhë. Tangunndujun cojo cjua xi ha camachaya nuju tsëhë, cojo sa xi tsajin yo cjue cojo corona xi satë nuju.
REV 3:12 Yo xi scaa rë cjue xcun tsëhë cjuatsehen, ngahan ne, sahme xi cumá me sacuaha xihndë xi secun vasencja rë yungun xi vaniji hai rë yungun rë Nina. Hane quihndë cuetjuxiin me. Setaha rë me ñihi rë Nina naha cojo ñihi rë nandya rë Nina, Jerusalén xatsë. Nandya jan ne, sahmi Nina xi nduvajne tsëhë ngahnga. Hacuaha hisca setaha rë me ñihi xatsë naha.
REV 3:13 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun.”
REV 3:14 ’Cjua vihi nihndi cojo sa xi cjuahatsja ángel tsëhë yungun ngajan nandya Laodicea: “Cjua vihi ne, cjua rë me xi cjuaquixindaja, cjua xi chja me ne, quixi hacuaha cuatjin jain. Ngatsë rë me vë jan ne, cavetjucaa yëjë xi casahmi Nina. Cuitjin fi cjua jan:
REV 3:15 Ndaja machaya ná hacutjin nihñu xa nuju. Hacuiin jemu ndaja peru hacuaha hacuiin jemu chojyihi, tu vasentjin siu. Xi má ná ne, hitsë sa ndaja sa xi hatuxa ndaja o sa xi hatuxa chojyihi.
REV 3:16 Ngayun ne, ha maji sa tu ngu tsë vë ngayun, peru ngayun ne, jemu va xcusun nuju, vëhë xi cuaxëxin nuju sacuaha xi cuëhë natya cojo ntsuva.
REV 3:17 Vihi cjua xi nújun: Ngayin ne, nchina ngayin. Jercu cavetjin tujún hane tsajin mé machaja niji. Cuatjin nújun. Peru machayiin nuju tsëhë cjuaquixi ta, xi quixi ne, jemu chojyihi tsujun, cojo cjuatsehen nuju, yuma yun, rcá yun, hane hacuaha quixti ngayun.
REV 3:18 Vinchajyë́ nuju xi chuhun tsahan. Tjin ná oro ndaja xi catsicjë ndihi xutsë rë, hane cojo vëhë cuma nchina jain yun. Tjin ná tsjian tyava xi cuma chujun cojo sa xi hacuiin tu yo ni scuëë cjuasava nuju xi quixti ngayun. Hacuaha tjin ná rqui xi cuincha tuxcun, hane cumatsejen jain nuju.
REV 3:19 Tichjátaha nuju ta, hya xi tjin yo me xi ngahan meje ná me ne, chjátaha rë me hacuaha vicuya rë me. Tsëhë vëhë ne, catamachinitacun hane choho catama nuju, nindeyun xcusun nuju.
REV 3:20 Nguehe tejña xi tichjá cojo nuju. Tu yo ni xi cuihndë xta naha ne, sehe sua cahndë́ ne, ngahan ne, cuisehen ngajan, hacuaha sinë niñu cojo me, hane me vëhë ne, sinë me cojo ná ngahan.
REV 3:21 Yo ngayun xi scaa nuju cuangun xcun tsëhë cjuatsehen, suá nuju cahndë́ xi cuinechun cojo ná cahndë́ hñu naha. Cuatjin cumá cojo nuju tangun ni sacuaha xi ngahan ta, hacuaha cacaa ná cëjë xcun, hane tejña cojo Nahmi naha cahndë́ hñu rë me.
REV 3:22 Yo ngayun xi tjin nuju cjuasua xi cuinuhyun cjua xi chja Hasen rë Nina cojo yungun jan ne, ndaja tetuhunrcun.”
REV 4:1 Hya xi cavatju vihi ne, cahvë xi ngajan ngahnga ne, tsejen ngu tingotjo xi tixaha. Hane xta rë me xi cahndë xi cachja cojo ná titjun jan xi nuhya rë sacuaha nuhya rë ngu tyjo, xta vëhë cachja cojo ná cuitjin: ―‍Ndoveniji nguehe sehe tsingácun ri xcusun xi sehe cumá.
REV 4:2 Hora vëhë ne, catsuva ná ngahñu rë Hasen rë Nina, ngajan cahvë xi ngajan ngahnga ne, tacun ngu cahndë́ rcun cojo ngu me xi tacun xcun.
REV 4:3 Hane me xi tacun xcun jan ne, xcusun rë me ne, seti tsejen sacuaha ndyojo seti xi hmí rë jaspe o cornalina. Hane ngu yejña sacuaha ndyojo seti xi hmí rë esmeralda, vëhë vindee rë cahndë́ rcun jan.
REV 4:4 Tahndee rë cahndë́ rcun jan ne, siu sa can ñuju cahndë́ rcun, hane xcun jan ne, siu can ñuju xuta changá. Me vëhë ne, yaja me tsjian tyava hacuaha hinchasun rcu me corona tsëhë oro.
REV 4:5 Tsëhë cahndë́ rcun jan ne, vatë ndihichuhún hacuaha tsingá chuhun. Hacuaha xcun cahndë́ rcun jan ne, ti ndihi rë yatu lámpara xi hacui yatu Hasen rë Nina.
REV 4:6 Hacuaha nangui xcun cahndë́ rcun jan ne, tsejen sacuaha ngu ndachacun tsëhë vidriu xi hasen sacuaha hasen ndyojo tsin. Hane tsëhë tahndee rë cahndë́ rcun jan ne, chuva ngu yuju rë, siu ñuju xcusun xi quicun. Hane xcusun jan ne, yaja tuxcun jingujyë yojo rë, sa taha xcun, sa taha ngaxtun.
REV 4:7 Ngu xi quicun jan ne, xcusun rë ne, sacuaha chu xa tsejen. Xi majo ne, sacuaha ndyaja, hane xi má jyan ne, sacuaha xcun xuta jyihi xcun. Xi má ñuju ne, sacuaha ngu chu jya xi tivitjen chu, cuatjin tsejen.
REV 4:8 Jima ngu xi quicun jan ne, tjin jyun tyjunga rë. Hane jingujyë ni tsëhë yaja tuxcun, taha xcun cojo taha ngaxtun. Hane xi quicun jan ne, sa nixtin, sa nixten, sejyiin ta, chja cuitjin: Tyjahi, tyjahi, tyjahi camahani Nina xi jemu hñu cjua. Nina tacun me, cavejña me hatsëë, hacuaha cuejña cuaha me. Cuitjin chja.
REV 4:9 Hane sahmi jyë hnga ñihi rë Nina hacuaha sua nacuechji rëhë hacuaha vaxëndaja rë Nina xi tacun xcun cahndë́ rcun jan, Nina xi tacun cuaha me yëjë nu, yëjë nixtin. Hane jimangu ndiya xi vaxëndaja rë Nina ne, hora hya ne,
REV 4:10 can ñuju xuta changá xi siu jan, viticjaxcun me xcun me xi tacun cahndë́ rcun jan, hane faharcun me me xi tacun nu cjui nu nduva. Hacuaha xuta changá jan ne, candisun me corona rë me xcun cahndë́ rcun jan, sehe chja me cuitjin:
REV 4:11 Ngayun Nai niji, ngayun Nina niji, vechu chuva rë xi cuma jyë cuma hnga yun hacuaha sacu nuju ngahñu cjua. Ngayun canihñu yëjë ni xcusun, hane ngatsë rë cjuandaja nuju siu yëjë ni hacuaha camá yëjë ni.
REV 5:1 Sehe cahvë xi tsja ladu quixi me xi tacun xcun cahndë́ rcun jan, yaha me ngu xtë xujun xi camahindu xcun cojo ngaxtun, hacuaha xujun jan ne, tine rë yatu sellu.
REV 5:2 Hane hya ne, cahvë ngu ángel xi jemu hñu cjua, hane titsiquindë cojo yëjë ni ngahñu rë cjua vihi: ―‍¿Yo ngayun xi vechu chuva rë xi cuicheyun sellu rë sehe nixingun xtë xujun vihi?
REV 5:3 Hya xi camá ne, ndastu yo, sa xi siu ngahnga, sa xi siu nangui, o sa xi siu ngahma nangui, ndastu yo cavetjucacun xi tsixinga xtë rë xujun jan, o sa xi scutsejen mé xi chja.
REV 5:4 Hane ngahan ne, cajíhnda nguñajacácun, tsëhë xi casacuiin yo xi cuechu chuva rë xi tsixinga xtë rë xujun jan, sehe scutsejen mé xi chja.
REV 5:5 Ngajan xi ngu xuta changá jan ne, cachja me cojo ná cuitjin: ―‍¡Xi cachjihndiin sa! Chutsijin ta, me xi hmí rë Chu Xa tsëhë tjë rë cha Judá ne, me xi cavetjusehen tsëhë David xi cavitexa hatsëë ne, me vëhë cacaa rë me quiji me xcun. Hane me vëhë cuma tsixinga me xtë rë xujun cojo yatu sellu rë.
REV 5:6 Xi cavutsejen, ngajan secun vasencja rë cahndë́ rcun jan cojo tahndee rë, ngajñi rë ñuju xi quicun jan cojo xuta changá jan, ngajan secunhñu ngu xihin sacuaha Chu Tsánga, xi tsejen sacuaha ngu chu xi cahme. Me xi sacuaha tsánga jan ne, tjin yatu ndyaja rë cojo yatu tuxcun xi hacui yatu hasen rë Nina xi visehen jingujyë ni ngasunhndë.
REV 5:7 Hane me xi sacuaha tsánga jan ne, canduva me cafaha me xtë rë xujun tsëhë tsja quixi me xi tacun xcun cahndë́ rcun jan.
REV 5:8 Hane hora xi cafahatsja me xtë rë xujun jan ne, catsiñuju xcusun xi quicun jan cojo can ñuju xuta changá jan ne, caticjaxcun me xcun Tsánga jan. Jimangu me ne, yaha me ngu arpa hacuaha jimangu me hinchangui tsja me tyucu ndixuhi tsëhë oro xi quitsë rë cojo tyjungunsa. Hane tyjungunsa jan ne, hacui oración rë me xi nguñajacacun macjain rë me.
REV 5:9 Hane me vëhë ne, tisë me ngu sun xatsë xi cuitjin fi cjua rë: Vechu chuva rë xi chjuhun xtë rë xujun vë, hane nuxuhun sellu rë; tsëhë xi catsiquehen me yun, hane cojo jni nuju xi cavanga ne, cachuhun xi cumá rë Nina xuta tsëhë yëjë ni tjë, yëjë ni hne, yëjë ni nandya, cojo yëjë nación.
REV 5:10 Hacuaha ngayun ne, canihñu xi xuta jan ne, cumá me xuta xi vitexa me, hacuaha cumá me sacuaha nahmi xi cjuahancuenda rë Nina xi faharcun me, hane cuitexa me nguehe xcun nangui.
REV 5:11 Sehe cavutsejen jemu cjín camahani ángel xi cavindee rë cahndë́ hñu hiscan siu xcusun xi quicun jan cojo xuta changá jan. Hane tjin xqui sacuaha tsëhë të mil ndiya xi të mil. Hacuaha cahndë xta rë ángel cjín jan
REV 5:12 cachja hñu cuitjin: Me xi má Tsánga xi catsiquehen xuta me ne, vechu chuva rë xi cjuahatsja me ngahñu xi cuitexa me, cojo cjuanchina, cojo cjuahasen, hacuaha hñu cumá cjua rë me, tjin rë me cjuandaja rë xuta, cuma jyë hnga me hane yëjë ni me ne, tsinchacuntihin rë me.
REV 5:13 Sehe cahndë xi nguyëjë ni xi siu ngahnga cojo nguyëjë ni xi siu ngasunhndë cojo nguyëjë ni xi siu nguihma nangui cojo ngajñi ndachacun, yëjë ngarca xi cuacun vë ne, tichja cuitjin: Cuitjin cumá tsëhë me xi tacun cahndë́ rcun hacuaha cumá tsëhë Tsánga jan: ¡Catama tsëhë me xi tsinchacuntihin rë me, xi chjaharcun rë me, xi cuma jyë hnga me, xi tjin rë me ngahñu! ¡Cuatjin catama me tsëhë me nu cjui nu nduva!
REV 5:14 Hane catsiñuju xcusun xi quicun jan ne, cachja cuitjin: ―‍¡Cuatjin jain! Hane xuta changá jan ne, caticjaxcun me sehe cafaharcun rë me.
REV 6:1 Cavutsejen ngahan hya xi Tsánga jan ne, cavuxaha me ngu sellu tsëhë yatu sellu jan. Hane tsëhë catsiñuju xcusun xi quicun jan ne, cahndë ngu xta xi nuhya rë sacuaha xi faneya. Cuitjin cachja: ―‍¡Ndove!
REV 6:2 Hane cavutsejen xi cavetjutsejen ngu naxin tyava. Hane me xi quisun rë chu jan ne, yaha me ngu yanchijnu, sehe casacu rë me ngu corona hane cavetju me sacuaha ngu cha xi cjue sahmi si xi tjin ngucacun cha xi scaa rë cha xi cjue cha xcun.
REV 6:3 Hane hya xi cavuxaha Tsánga jan sellu xi majo ne, cahndë́ ta, xcusun xi majo xi quicun jan ne, cajindaya cuitjin: ―‍¡Ndove!
REV 6:4 Ngajan cavetjutsejen ngu nga naxin xi hani hñu xcusun ru. Hane me xi quisun rë chu vë ne, ngu me xi casatë xa rë xi cjuahaxin me cjuajeya xi tjin nangui, cojo sa xi xuta ne, tsiquehen xicjin me ngajñi rë me. Hane suva me vëhë ne, cafahatsja me ngu quicha jyë.
REV 6:5 Hya xi cavuxaha me sellu xi majyan ne, cahndë xcusun xi quicun xi majyan jan, hane cuitjin cachja: ―‍¡Ndove! Hane cavutsejen xi cavetjutsejen ngu naxin jma. Hane me xi quisun rë chu vë ne, yahatsja me ngu nisu chuva.
REV 6:6 Sehe cahndë sacuaha ngu xta xi vetju tsëhë ngajñi rë catsiñuju xcusun xi quicun jan xi cachja cuitjin: ―‍Ngu ni kilu trigu sacu chjí rë mosu, o sa jyan kilu ni cebada sacu rë me; peru aceite cojo xan rë uva ne, cumachajiin.
REV 6:7 Hane xi cavuxaha me sellu xi má nuju ne, cahndë xcusun xi quicun xi má nuju jan, hane cuitjin cachja: ―‍¡Ndove!
REV 6:8 Hane cavutsejen xi cavetjutsejen ngu naxin xi jemu va jyihi. Hane me xi quisun rë chu jan ne, Cjuaveya hmí rë me, hane tjengui tiña rë me, me xi hmí rë Hades, cahndë́ hiscan xi má hasen rë nima castigu. Hane me vëhë jan ne, tjin rë me cahndë́ xi tsëhë ngu tsëhë ñuju rquí xuta ngasunhndë xi cuma tsiquehen me ngu rquí vë cojo espada o cojo jindya o cojo chíhin o sa xi cojo chu cjan rë xi tjin xcun nangui.
REV 6:9 Hya xi catuxaha sellu xi má hñu ne, ngajan ngahma rë ngasunscun ne, cahvë hasen rë nima xi catsiquehen xuta ngatsë rë xi camacjain rë me cjua rë Nina cojo ngatsë rë cjuaquixi rë me xi casua me.
REV 6:10 Me vëhë ne, cajindaya me cachja me cuitjin: ―‍Ngayun Nai rë yëjë ni, jemu tyjahi yun, quixi cjua nuju. ¿Janihya nihñu cuendun jyë́ rë xuta xi siu me xcun nangui, hane nihñu ngojo jni niji? ―‍Cuatjin cachja me.
REV 6:11 Ngajan xi cafahatsja me jimangu me ngu tsjian tyava, hane cafaha me cjua xi cuejñajyuu me ngu jo nixtin sa. Vindeya sa rë hisca hya xi cumachihin xqui rë xuta ladu rë me cojo me xi hacuaha tangun cueya sahmi xuta sacuaha cavatju me suva me.
REV 6:12 Hacuaha cavutsejen hya xi cavuxaha me sellu xi má jyun. Hya ne, jercu cjuachan cafani nangui. Tsuhi ne, camá jma. Jemu va jyihi camá, sacuaha ngu tsjian jma. Hane sá xatsë ne, camá hani sacuaha jni.
REV 6:13 Hane niñú tsëhë ngahnga ne, cavixu xcun nangui sacuaha vixu tu rë ya higo hya xi vanga tjo hñu.
REV 6:14 Ngahnga ne, cafëya sacuaha ngu xujun të xi catsijeyu, hane hisca tjin ngu naxi o ngu nangui xi hincha vasencja rë ndachacun ne, catjune rë cahndë́ rë.
REV 6:15 Ngajan xi xuta xi vitexa me ngu nangui, cojo yahnga me xi cojo me vitexa me, cojo xuta nchina, cojo sindadu capitán, cojo xuta xi hñu cjua, cojo yëjë sa xuta, sa xuta xi caxteña o sa xuta xi ndaya tjin, nguyëjë ni me quiji cavangahma me cahntsua nguijo cojo ngajñi naxindya rë nguijña cha.
REV 6:16 Sehe cafehyataha rë me nguijña cojo naxindya jan cuitjin: ―‍¡Catixusun niji cojo sa xi tinchunhmu niji! Cuatjin cuma cuinechinhmi tsëhë xcun me xi tacun cahndë́ rcun hane satiin niji cjuaxti rë Tsánga jan.
REV 6:17 Cuatjin cumá ta cavechu nixtin xi jercu choho cumá ngatsë rë cjuaxti rë me, hane ¿há tjin yo scaa rë cojo?
REV 7:1 Xi cavutsejen vihi ne, cahvë ñuju ángel xi hinchacun quixi catsiñuju yuju rë ngasunhndë. Hane ángel jan ne, casuaain cahndë́ xi cuanga catsiñuju tjo xi vanga ngasunhndë ta, hisca xi ngu tjo ne, cuangaain xcun nangui, o xcun ndachacun, o hisca rcu ngu ya.
REV 7:2 Sehe cahvë ngu ángel xi hacjahi. Hane camiji ángel jan hiscan xi vetjucaa tsuhi, hacuaha yaha ángel sellu rë Nina quicun. Hane cajindayahñu ángel jan cojo catsiñuju vë ta tacuntsja ángel vë xi choho sahmi cojo nangui cojo ndachacun.
REV 7:3 Cuitjin cachja me cojo: ―‍Ndastu mé dañu nihñu cojo nangui, cojo ndachacun, cojo ya. Ndastu mé nihñu hisca xi cajnetaha cavetaha sellu xten xuta xi cavatsë Nina naja.
REV 7:4 Ngajan xi cahndë xi cachja me xqui rë me xi casetaha rë chuva cojo sellu jan: ngu cientu cojo yachan ñuju mil má me tsëhë yëjë xuta tjë rë Israel.
REV 7:5 Tsëhë xuta tjë rë Judá ne, tejó mil má me xi yaha sellu; hacuaha tejó mil má me tsëhë xuta tjë rë Rubén, tejó mil tsëhë xuta tjë rë Gad.
REV 7:6 Tejó mil má me tsëhë xuta tjë rë Aser, tejó mil tsëhë xuta tjë rë Neftalí, hacuaha tejó mil tsëhë xuta tjë rë Manasés.
REV 7:7 Tsëhë xuta tjë rë Simeón ne, tejó mil má me xi yaha sellu; hacuaha tejó mil má me tsëhë xuta tjë rë Leví, tejó mil tsëhë xuta tjë rë Isacar.
REV 7:8 Tsëhë xuta tjë rë Zebulón ne, tejó mil má me xi yaha sellu; hacuaha tejó mil má me tsëhë xuta tjë rë José, tejó mil tsëhë xuta tjë rë Benjamín.
REV 7:9 Xi cavatju xcusun vihi ne, cavutsejen, hane cahvë xutacjín. Hisca tsajin yo cuma cuexqui rë me. Canduva me tsëhë ngajñi rë jimangu nación, jimangu tjë rë xuta, jimangu nandya cojo jimangu hne. Hane cafehe me hinchacun me xcun cahndë́ rcun cojo xcun Tsánga jan. Yaja me tsjian tyava hacuaha yahatsja me jne.
REV 7:10 Hane jindaya me cojo ngu xta hñu, tichja me cuitjin: Xi cavetjuntjen ne, camá ngatsë rë Nina naja xi tacun me cahndë́ rcun cojo ngatsë rë Tsánga jan. Cuatjin cachja me.
REV 7:11 Ngajan xi yëjë ni ángel ne, hinchacun quixi tahndee rë cahndë́ rcun jan hacuaha cavindee rë xuta changá jan cojo catsiñuju xcusun xi quicun jan. Hane caticjaxcun ángel xcun cahndë́ rcun hane cafaharcun rë Nina,
REV 7:12 tichja cuitjin: ¡Cuitjin jain! Nina ne, yëjë ni tsinchacuntihin me. Jyë hnga me. Tjin rë me cjuahasen. Taan nacuechji rë me. Xuta ne, vaxëndaja me. Vechu chuva rë xi cjuahatsja me ngahñu xi cuitexa me. Hacuaha hñu cjua rë me. Cuanitjin cjue me yëjë nu yëjë nixtin. ¡Cuatjin jain!
REV 7:13 Hya xi camá ne, ngu xuta changá jan, cafinenguise me ngahan cuitjin: ―‍Me xi cuicun xi yaja tsjian tyava ne, ¿yo má me? hane ¿hisca jani canduva me?
REV 7:14 Ngajan xi cafayanguë cuitjin: ―‍Tatá, xcusun vëhë ne, ngayun hyun, hacuiin ngahan. Sehe cachja me cojo ná cuitjin: ―‍Me vihi cacaa rë me cjuañihi cjuacjintacun jyë. Cavane me tsjian rë me, camá tyava cojo jni rë Tsánga.
REV 7:15 Vëhë xi tjin rë me cahndë́ xcun cahndë́ rcun rë Nina, hane fahacuenda me nixtin nixten cahntsua yungun rë me. Hane Nina xi tacun xcun cahndë́ rcun ne, ngu tangun ni cuejnándaja me cojo xuta jan.
REV 7:16 Hindë tsajin nu tsajin nixtin cuma vojo rë me. Cuma xindaain rë me, cuacaain rë me tsuhi; hacuaha tsijendaain rë me cojo hnde rë,
REV 7:17 ta cahndë́ rë vëhë ne, Tsánga xi tacun cavasencja rë cahndë́ rcun ne, cuahacuenda rë me, hane cuincha ndiya rë me xcun nandá xi sua cjuahñu. Hane Nina ne, tsixiya me yëjë ndatuxcun xuta jan.
REV 8:1 Hane xi cavuxaha me xi sacuaha Tsánga jan sellu xi má yatu ne, ngahnga ne, cavejña jyuu camahani sacuaha chuva rë vasen hora.
REV 8:2 Cuatjin camá. Sehe cahvë xi yatu ángel vë xi siucahndë xcun Nina ne, cafahatsja yatu tyjo.
REV 8:3 Sehe canduva sa ngu ángel xi yaha ngu tyucu ndixuhi tsëhë oro, hane casecunquixi cojo tiña ngasunscun. Ngajan cafahatsja me cjín tyjungunsa cojo sa xi cuaca me xcun ngasunscun tsëhë oro jan xi tacun xcun Nina. Hane hnde rë ne, camatangun cojo oración rë yëjë me xi tyjahi cjuatacun rë me cojo sa xi cuma chihin cjua.
REV 8:4 Hane nihndi rë tyjungunsa xi yahatsja ángel jan ne, casecjan cojo oración rë me xi tyjahi cjuatacun rë me, hane camiji tangun hiscan tacun Nina.
REV 8:5 Ngajan xi ángel jan ne, cafaha tyucu ndixuhi jan, catsinguitsë rë cojo ndihi tsëhë ngasunscun jan hane catsingatjen rë xcun ngasunhndë. Hane hora vëhë cafaneya cjuachan cavatë hacuaha cafani nangui.
REV 8:6 Hya xi camá ne, yatu ángel xi yaha yatu tyjo jan ne, caviyujucacun xi tsijane tyjo rë.
REV 8:7 Ángel xi tjun jan ne, catsijane tyjo rë. Hane jercu cavaha tsi ndyojo xcun nangui. Hacuaha cavixu ndihi xi tecjan cojo jni. Cojo vëhë ne, tsëhë yëjë ni ya xi tjin ne, tsëhë chuva jyan ne, ngu cati. Hisca cojo jingujyë nguijña xi xcuen ne, cafë cati.
REV 8:8 Sehe catsijane ángel xi majo jan tyjo rë. Hane hora vëhë ne, camatsejen sacuaha ngu nguijñacha jyë xi yaha rë ndihi xi cjanenguiya ngajñi ndachacun. Hane tsëhë yëjë ndachacun ne, tsëhë chuva jyan cahndë́, ngu ni cavuya jni.
REV 8:9 Ngajan xi tsëhë yëjë chu xi hincha nandá jan, tsëhë chuva jyan chu ne, ngu chu cahme chu; hacuaha tsëhë chuva jyan barcu xi hinchasun ne, ngu cafë cati.
REV 8:10 Sehe catsijane ángel xi majyan jan tyjo rë. Hane hora vëhë ne, canenguiya tsëhë ngahnga ngu niñú jyë xi jercu ndaja seti sacuaha seti ngu ndihi jyë. Hane niñú jan ne, casatë rë ndajyë cojo hiscan vetju nandá. Hane tsëhë yëjë nandan jan ne, ngu tsëhë chuva jyan cahndë́ casatë rë.
REV 8:11 Niñú jan ne, yaha ñihi rë xca sa xi hmí rë Ajenjo, ta cavuya sa nandá hiscan cjanenguiya niñú. Hane jemu cjín xuta cahme me xi cahvi me nandá sa jan.
REV 8:12 Sehe catsijane ángel xi ma ñuju tyjo rë, hane choho casahmi cojo tsuhi cojo sá ta jemu camachuva hasen rë. Hacuaha chuva rë jyan niñú ne, ngu ni cafë ngahñu rë cahvo. Ngajan xi tsëhë ngu cuaha nixtin o tsëhë ngu cuaha nixten ne, ngu tsëhë chuva jyan cahndë́ ne, camajñu hane casacuiin hasen rë.
REV 8:13 Hya xi camá ne, ngajan vasencja rë ngahnga tivitjen ngu chu jya. Hane cuitjin sahmi sen chu cajindaya chu cojo ngu xta hñu: ―‍Cojo cjuatsehen nuju, ngayun xuta xi nechun ngasunhndë ta, tsëhë xi vangui sa jyan sa ángel xi chaja sa tsijane tyjo rë.
REV 9:1 Hya xi camá ne, catsijane ángel xi má hñu jan tyjo xi yaha, hane cahvë ngu niñú xi cjanengui tsëhë ngahnga xcun nangui. Hane cafahatsja niñú jan llavi tsëhë ngojo rë nduchin.
REV 9:2 Sehe cavuxaha nduchin ne, hane jemu camiji nihndi rë sacuaha nihndi rë ngu hornu jyë. Hisca tsuhi cojo jingujyë ni tjo ne, tsejen jñu ngatsë rë nihndi xi vetju tsëhë nduchin jan.
REV 9:3 Hane tsëhë ngajñi rë nihndi jan ne, cavixu chu nchahva xcun nangui. Hane chu jan ne, tsavi cojo chu sacuaha tsavi cojo chu naya xi siu ngasunhndë.
REV 9:4 Hane cafaha chu cjua xi tsajin mé sahmi chu cojo nguijña o cojo xca o sa cojo ya ta, suva xi satë chu xuta xi siutaain xten me sellu rë Nina.
REV 9:5 Casacuiin rë chu cahndë́ xi tsiquehen chu xuta jan ta, cuenda jemu cuiyujuhmu me cahntsua hñu sa. Hane cjuahmu xi cuiyuju me cojo ne, jineya sacuaha jineya hiscan cjuaha chu naya.
REV 9:6 Nixtin hya ne, xuta jan ne, tsimeje me cjuaveya, peru sacuiin cjuaveya xi cuma rë me. Xuta jan ne, cjuehyacacun me cjuaveya, peru sacuiin.
REV 9:7 Chu nchahva jan ne, tjin chjine chu sacuaha naxin xi tjin chjine chu xi cjue chu si. Hinchasun rcu chu ngu xcusun sacuaha ngu corona tsëhë oro, hane xcun chu ne, tsejen sacuaha xcusun rë xcun xuta.
REV 9:8 Tsa rë chu ne, sacuaha tsarcu yachjin, hane nehñu chu ne, sacuaha nehñu xa cjan rë.
REV 9:9 Tixtë cun ru cojo ngu xcusun sacuaha chinga quicha, hane xi nuhya rë xi fane tyjunga ru ne, hñu nuhya rë sacuaha cjín camahani carreta xi tijuvë naxin xi cuetsihin si.
REV 9:10 Ndetsihin chu yaha quicha rë chu naya. Hane cojo quicha jan ne, tjin ru cahndë́ xi sua chu cjuañihi xuta xcun xi hñu sa jan.
REV 9:11 Hane sacuaha rey rë chu ne, má ángel rë nduchin jan. Ángel jan ne, Abedón hmí rë sa xi hne hebreo o Apollyon sa xi hne griego. Catsijo cjua vë ne, vijne Ngu xi Tsiqueya rë.
REV 9:12 Vëhë má cjuañihi xi tjun cuma. Jo sa má xi ha meje cuatju.
REV 9:13 Hya xi camá ne, catsijane ángel xi má jyun tyjo rë. Ngajan xi canuhya rë ngu xta xi cavetju tsëhë tjehen rë ngasunscun xi tacun xcun Nina, hiscan xi jyihi sacuaha ndyaja ru.
REV 9:14 Xta jan ne, cachja cojo ángel xi má jyun xi catsijane tyjo jan. Cuitjin cachja: ―‍Nismi catsiñuju ángel xi tjihñu tjehen rë ndajyë jyë xi hmí rë Eufrates.
REV 9:15 Hane camandaya catsiñuju ángel jan. Ángel jan ne, caviyujuya hisca xi cuechu nu, cuechu sa, hane cuechu nixtin xi cuma meje rë xi tsiquehen rë xuta. Chuva jyan chuva jyan xuta ne, ngu ngu me cueya me.
REV 9:16 Hane xqui rë sindadu xi vitexa ángel jan ne, jo cientu millón má xi hinchasun naxin. Hane ngahan suva cahndë xqui rë.
REV 9:17 Naxin cojo cha xi hinchasun rë chu xi cahvë ngajñi nijña naha ne, cuitjin cun. Cha xi hinchasun rë chu ne, yaja cha chinga quicha xcusun hani rë ndihi, xcusun rë susë hñu hacuaha xcusun sine. Hane rcu chu naxin jan ne, sacuaha rcu chu xa cjan rë cun. Hane tsëhë hntsua chu ne, tivetju ndihi tivetju nihndi cojo azufre.
REV 9:18 Hane ngatsë rë jyan cjuañihi jan xi vetju tsëhë hntsua chu matsejen ne, ngatsë rë ndihi, cojo nihndi cojo azufre ne, ngu cahndë tsëhë chuva jyan cahndë xuta cahme me.
REV 9:19 Jemu tsavi cojo hntsua chu, peru hacuaha tsavi cojo ndetsihin chu. Ndetsihin chu ne, sacuaha chu yë cun ta, tjin rcu. Hane rcu vëhë ne, má sahmi chu dañu cojo.
REV 9:20 Peru handasa cuatjin camá, xuta xi cacaa rë me ta cahmii me cojo cjuacjintacun vëhë ne, tsajin camacjincacun me tsëhë cjuatsehen xi casahmi me ta, cafaharcun cuaha me xitsehen cojo nina xi camá tsëhë oro, tsëhë plata, tsëhë quicha sine, tsëhë ndyojo, cojo tsëhë ya. Cafaharcun cuaha me nina jan xi maji vutsejen, maji hndë, maji tsujyihiya.
REV 9:21 Hacuaha tsajin camacjincacun me tsëhë xi catsiquehen xicjin me, o tsëhë xcusun xi sahmi me ngatsë rë xi ma rë me cjua surqui, o tsëhë cjuatsehen xi sahmi ngajñi rë me sa chjuun cojo chjuun o sa xihin cojo xihin, o sa tsëhë cjuachëjë rë me. Catsindeyaain me xcusun rë me.
REV 10:1 Hya xi camá ne, ngajan cahvë ngu ángel xi hñu cjua, nduvajne tsëhë ngahnga tixtëcun rë yufí. Hacuaha ngu yejña cavindee rë rcu ángel jan. Xcun ne, seti sacuaha tsuhi; hane tyuhmi rë ne, tsejen sacuaha ngu ndihi hndë xi vitjen.
REV 10:2 Hane yahatsja ngu xtë lihndi xujun xi cavixinga. Hacuaha cavisane ntsacu quixi xcun ndachacun hane xi scun ne, xcun nangui quixí.
REV 10:3 Ángel jan ne, cajindaya cojo ngu xta hñu, hane nuhya rë sacuaha xi tsichan ngu chu xa. Hacuaha hora xi cajindaya ne, cachja xta rë yatu chuhun vatë.
REV 10:4 Hora xi cachja yatu chuhun jan ne, cavéjñacácun xi tsihindú cjua jan peru casahmee ta, cahndë ngu xta tsëhë ngahnga xi cachja cojo ná cuitjin: ―‍Caveni nihindi cjua rë yatu chuhun vë ta, cuiyujuhma cjua vë.
REV 10:5 Hya xi camá ne, ángel xi cahvë xi secun xcun ndachacun cojo xcun nangui quixí jan ne, catsiquijin tsja quixi ngahnga.
REV 10:6 Hane casua cjuaquixi rë hisca caveyanangui rë Nina xi tacun yëjë nu yëjë nixtin, me xi hacuaha catsicha rë ngahnga cojo yëjë ni xi tjin rë, cojo nangui cojo yëjë xi tjin rë, cojo ndachacun cojo yëjë xi tjin rë. Cuitjin cachja xi casua cjuaquixi rë: ―‍Vindeyaain sa rë ta,
REV 10:7 ha ndiya jiya nixtin xi suacuenda ángel xi má yatu. Hya tsijane tyjo rë ne, hane cumachihin cjua xi jiyahma rë Nina, cjua xi casua me camachaya rë profeta xi sahmi xa rë me.
REV 10:8 Hya xi camá ne, ngajan cahndë́ nga xta xi cachja tsëhë ngahnga cojo ná cuitjin: ―‍Tihin chjehe xujun lihndi xi tjin të jan tsëhë tsja ángel xi secun xcun ndachacun cojo xcun nangui quixí. ―‍Cuatjin cachja xta cojo ná.
REV 10:9 Vëhë xi cëjëtjëngë ángel hane cafehya rë xi catisua ná xujun lihndi jan. Hane cachja cojo ná cuitjin: ―‍Juhun, chjehe xini cjua rë cojo sa xi titehercui. Cjua jan ne, sahmi sa rë cahntsue, peru ntsove ne, sahmi haxi rë.
REV 10:10 Sehe cafaha xujun lihndi jan tsëhë tsja ángel, hane cajínë. Hane ntsuva ne, camá haxi rë sacuaha xi cajínë tsjen, peru xi cafë cajínë ne, cahntsua canangui naha ne, camahmu.
REV 10:11 Sehe cavuya cachja nga cojo ná cuitjin: ―‍Tjin xi cuinoje ngu ndiya nga ngatsë rë Nina. Cuinoje tsëhë xutacjín, xuta xi hacjahi hacjahi nación rë me, xuta xi hacjahi hne chja me, hacuaha cojo xuta xi hñu cjua me ngatsë rë xi vitexa me.
REV 11:1 Hya xi camá cajinë ne, casua ná ngu rquí ya naxu xi machjirëhë sacuaha ngu ya chuva. Sehe cachja ángel jan cojo ná cuitjin: ―‍Tihin chjehe chuva rë yungun xi matitjun rë Nina cojo tsëhë ngasunscun. Hacuaha texqui me xi faharcun ngajan.
REV 11:2 Xi nichove yungun xi matitjun ne, hacuiin cojo cahndë́ xi má ndatsen rë nichove. Xi canichuviin vë. Cahndë́ vëhë ne, satëtsja xutaxín xi macjaain rë me Nina. Me xi cuacun vë ne, tsinguetsun rë vë, hacuaha tsinguetsun rë nandya rë Nina xcun xi yachan jo sá cojo xcusun tsehen xi cún me.
REV 11:3 Xcun nixtin vëhë ne, tsingátju jo testigu naha, hane me xi cuacun vë ne, cuichja me xcusun xi sehe cumá. Ngu mil cojo jo cientu cojo jyanchan nixtin jan ne, cuichja me cjua naha, hacuaha cuaja me tsjian rë cjuachoho.
REV 11:4 Jo me vëhë ne, hacui jo ya olivu xi tjin cjua tsëhë, hacuaha hacui me xi jo candeleru xi siu xcun Nina, me xi vitexa ngasunhndë.
REV 11:5 Sa tjin ngu xuta xi meje sahmi me dañu me ne, cuetju ndihi tsëhë hntsua me hane tsicjëya rë xi chohovëë rë me. Chuva vëhë cueya tu yo ni xi meje xi choho sahmi cojo rë me.
REV 11:6 Jo me vëhë ne, siutsja me ngahñu xi cuechja me ngahnga sehe cuaain tsi nixtin xi cuehya me. Hacuaha satë rë me ngahñu xi sahmi me xi nandá ne cuya jni o xi cuanguihmu rë me nangui cojo yëjë xcusun cjuacjintacun. Cuatjin cumá tu cutjin cjín ndiya cuma meje sahmi me.
REV 11:7 Ndatjin, peru hya xi cafë casua me cjuaquixi rë me ne, ngu me sacuaha ngu chu chojyihi xi miji tsëhë nduchin ne, sahmi chu si cojo rë me, hane scaa ru cjue chu xcun hane tsiquehen chu me.
REV 11:8 Hane nima jan ne, hacuiin xinchaniji ta cuiyuju ndiyatë rë ciudad jyë. Ciudad jyë jan ne, sa xi chjahanchuvan ne, cuma cuinújan xi hmí rë Sodoma cojo Egipto. Ngajan ni ne, cahme Nai naja xcun cru, hane ngajan cuiyuju nima.
REV 11:9 Xcun xi jyan nixtin vasen ne, jemu cjuehe xuta. Cjuehe me tsëhë yëjë ni nandya, tsëhë yëjë ni tjë, tsëhë yëjë ni hne cojo tsëhë yëjë ni nación. Cjuehe me scutsejen me nima, hane tsingatiin me xi xinchaniji nima.
REV 11:10 Hane xuta xi siu ngajan ne, jercu ndama rë me ngatsë rë cjuaveya jan. Hisca cuiyuju me suhi hane tsingatju me cuatjo ngajñi xicjin me. Cuatjin sahmi me ta tjin rë me cjuasua xi cafë jo profeta jan xi jercu casua me cjuañihi.
REV 11:11 Peru xi cafë jyan nixtin vasen jan ne, xta xi sua Nina xi tsëhë cjuahñu ne, cavisehen nga rë nima. Hane caxinchacun quixi me. Ngajan xi ngu chircun jyë cavisehen rë xuta xi cavutsejen rë me.
REV 11:12 Hya xi camá ne, me xi cavuya xta rë ne, cahndë me ngu xta hñu xi cachja tsëhë ngahnga cuitjin: ―‍Nduvun nuju nguehe. Ngajan xi quijiniji me ngahnga ngajñi ngu yufí. Hane cavëë xuta xi chohovëë rë me ta quijiniji me.
REV 11:13 Ha hora vëhë ni ne, jercu cjuachan cafani nangui hane tsëhë chuva rë të rquí tsëhë ciudad jan ne, cavixujne ngu. Hane ngatsë rë me vëhë ne, yatu mil xuta cahme. Ngajan xi xuta xi cavangui me ne, jercu catsacjun me camá. Sehe casahmi jyë casahmi hnga me Nina xi tacun ngahnga.
REV 11:14 Cojo vëhë cajnetaha cjuacjintacun xi majo. Peru ha cjuehe xi ma jyan.
REV 11:15 Hya xi camá ne, catsijane ángel xi má yatu tyjo rë, sehe canuhya rë tsëhë ngahnga xta hñu xi cachja cuitjin: Jingujyë rë nandya xi vitexa xuta ngasunhndë xi matitjun ne, cavisehen gubiernu rë Nina naja cojo Cristu, me xi catsingatju me. Hane me vëhë sahmi me gubiernu yëjë nu yëjë nixtin.
REV 11:16 Ngajan xi catsiyëjë can ñuju xuta changá xi siu me xcun cahndë́ rcun rë me ngajan xcun Nina ne, caticjan xcun me, hane cafaharcun me Nina.
REV 11:17 Hane cuitjin cachja me: Tihin nacuechji nuju, Tatá Nina. Ngayun jercu hñu camahani ngayun. Hacui ni yun hya, hacui ni yun quihndë, hane hacui ni yun yëjë nixtin. Hindë ticujun ngahñu jyë nuju xi satë nuju hane ha tivetsuhun nihñu gubiernu.
REV 11:18 Xuta ne, choho hvë me yun, peru cavechu nixtin xi macjan nuju cojo cjuahngatacun rë me. Cafehe hora xi nihñu cuendun tsëhë nima. Tuhun chjí rë me xi casahmi xa nuju sacuaha profeta, sacuaha xuta nuju, sacuaha xutaxín xi faharcun me ñihi nuju. Tuhun rë yëjë ni me, sa yehe sa langa me. Hane me xi tsicjëya rë cojo xcusun rë ne, tuhun rë me xi cjueya me.
REV 11:19 Ngajan xi cachjahaxin rë tsjian rë tingotjo rë yungun rë Nina ngajan ngahnga, hane cahntsua yungun jan ne, camatsejen caxa ximinchacun xi yaha contratu xi casahmi Nina cojo xuta rë me. Cavatë ndihichuhún, cafaneya, catsinga chuhun, cafani nangui hacuaha cavaha ngu tsi ndyojo xi jercu hñu camahani. Cuatjin camá.
REV 12:1 Hya xi camá ne, camatsejen cjuarcun xi sahmi sen ngajan ngahnga. Camatsejen ngu chjuun xi tixtëcun ran tsuhi. Hane sá ne, tacun ngahma rë ntsacu na. Hane ngu corona xi camá tsëhë tejó niñú ne, vëhë quitaha xten na.
REV 12:2 Hane chjuun jan ne, meje tsin quihndi ran. Jercu jindaya na ngatsë rë cjuahmu cojo cjuachoho tsëhë hacutjin tivatju ran.
REV 12:3 Hane camatsejen nga ngu sen ngajan ngahnga ta, camatsejen ngu yë xi jercu jyihi chu; hani xcusun ru. Chu jan ne, yatu má rcu chu, të má ndyaja ru. Hane jima ngu rcu chu hincha sun ngu corona.
REV 12:4 Cojo ndetsihin chu ne cajavëjne chu ngu cahndë́ tsëhë jyan cahndë́ rë niñú rë ngahnga, hane cacandi chu nangui. Hane yë jan ne, cafaña vasen chu xcun chjuun xi ha hindëya tsin quihndi ran cojo sa xi tsinguijne jingu chu quihndi rë na hora xi tsin.
REV 12:5 Hya xi camá ne, na vëhë ne, catsin rë na ngu quihndi xihin. Hane quihndi xihin jan ne, yaha bastón xi cuitexa me cojo yëjë ni nación cojo ngahñu cjua xi tjin rë me. Hane quihndi ran jan ne, cachjaha rë xcun Nina, ngajan xcun cahndë́ rcun rë me.
REV 12:6 Hane chjuun jan ne, cavanga na quiji na ngu xín. Ngu cahndë́ xi Nina tjin chjine rë me xi cumá ran. Hane ngajan sacu xi sinë na xcun ngu mil cojo jo cientu cojo jyanchan nixtin.
REV 12:7 Hya xi camá ne, cavetsihin ngu si ngajan ngahnga. Miguel cojo yahnga ángel ladu rë me ne, casahmi me si cojo yë xitsehen jan hacuaha cojo ángel ladu rë xitsehen.
REV 12:8 Hane cacaain rë yë jan cojo ángel ru, hacuaha catsichaja chu cahndë́ ru ngajan ngahnga.
REV 12:9 Vëhë xi caningatjen ru xcun ngasunhndë. Yë jan ne, jemu changá chu. Xitsehen xi matitjun o Satanás hmí ru. Chu ndacha chu, vindacha ru xuta ngasunhndë. Hane caningatjexin ru cojo ángel ru hiscan ngasunhndë.
REV 12:10 Hya xi camá ne, cahndë ngu xta xi jemu hñu cachja ngajan ngahnga cuitjin: ―‍Quihndë cavechu nixtin xi Nina cuaxëtje me xuta, cumatsejen ngahñu rë me cojo gubiernu rë me. Hacuaha tsejen xi hñu cjua rë Cristu, me xi catsingatju me ta, cama catsingatjexin me chu xi vinchajyë́ xingueen. Nixtin nixten cavinchajyë rë me xcun Nina naja, peru hindë tsajin.
REV 12:11 Hane xingueen jan ne, cacaa rë quiji me xcun ngatsë rë jni rë Tsánga jan cojo ngatsë rë cjuaquixi rë me xi casua me tsëhë Nina ta, hacuiin machuvacacun me xi cjue xcun me cojo Nina handasa cjueya me.
REV 12:12 Hane ngatsë rë vëhë ne, ¡catama sua rë ngahnga cojo me xi siu xcun! Peru ¡ay tsëhë nangui cojo ndachacun! ta, tsëhë xi canduva tjengui rë xitsehen xi matitjun. Hacuaha jemu quitsë rë cjuaxti tsëhë xi vëë xi nixtin rë ne, meje cuijnetaha. ―‍Cuatjin cachja xta jan.
REV 12:13 Hya xi camachaya ru xi caningatjen ru nangui ne, cavetsihin cavanga cojo chu chjuun xi catsi ran quihndi xihin jan.
REV 12:14 Peru chjuun jan ne, cafahatsja na jo tyjunga rë chu jya xi jercu jyihi cojo sa xi cuma cuitjen na tsëhë chu yë hiscan cahndë́ xi tjin chjine xi cuma ran ngajan ngu xín. Hane ngajan sacu xi sinë na xcun ngu chan cojo jo chan cojo vasen chan, hane cuechiintaain chu yë na.
REV 12:15 Ngajan xi chu yë jan ne, cavaxë chu tsëhë hntsua chu nandá sacuaha ngu ndajyë cojo sa xi cuechutaha rë chjuun jan ne, cjue tyjava na cojo ngahñu rë ndajyë.
REV 12:16 Peru nangui ne, cavisecoo rë chjuun jan, hane caseya tsjuhun ne, cavingui rë ndajyë xi cavetju rë yë jan.
REV 12:17 Vëhë xi yë jan ne, jercu camaxti ru cojo chjuun jan hane sehe quiji casahmi chu si cojo tjë rë na xi cavangui. Casahmi chu si cojo xuta ran xi vetjo cjua xi cavitexa Nina hacuaha sua me cjuaquixi rë Jesús.
REV 13:1 Hya xi camá ne, cavejña chu yë jan tjehen ndachacun, hane cahvë xi ngu chu chojyihi ne, tivetju chu tsëhë ndachacun. Të má ndyaja ru hacuaha yatu má rcu chu. Hane të corona seya xcun ndyaja ru. Hane jima ngu rcu chu ne, yaja ngu ñihi xi tsitjungui rë Nina.
REV 13:2 Chu chojyihi xi cahvë vë ne, sacuaha ngu xa hindu jyë cuatjin jyihi chu, peru ntsacu chu cojo tsja chu ne, sacuaha ntsacu cojo tsja chu oso; hane hntsua chu ne, sacuaha hntsua chu xa sine cjan rë. Hane yë jan ne, casua chu vë ngahñu ru cojo cahndë́ rcun rë chu, hacuaha casua xa rë chu.
REV 13:3 Hane ngu rcu chu jan ne, casacuhmu rë hane tsejen xi tsajin rqui rë, ta cueya. Peru cojo yëjë sa ne, camandaja. Hane jingujyë ni xuta ngasunhndë ne, jercu quijircun rë me xi camandaja. Hane cojo cjuasua tjengui me chu.
REV 13:4 Hane xuta ne, caticjan xcun me cafaharcu me chu yë jan ta, tsëhë xi casua yë cahndë́ xi vitexa chu. Hacuaha cafaharcun me chu chojyihi jan. Cuitjin cachja me tsëhë chu: ―‍Ndastu yo xi cuechu xi cumá sacuaha chu vi. Ndastu yo cuma scaanya cojo chu. ―‍Cuatjin cachja xuta tsëhë chu.
REV 13:5 Chu jan ne, casetaha ngu hntsua chu xi jemu cojo cjuaxta chja chu hacuaha tsitjungui ru Nina. Hane casacu ru cahndë́ xi cuitexa chu xcun xi yachan jo sá.
REV 13:6 Hane cavetsihin xi choho cachja chu tsëhë Nina, canchati chu tsëhë ñihi rë cojo tsëhë cahndë́ hiscan viyuju Nina, hane tsëhë yëjë sa me xi siu me ngahnga.
REV 13:7 Hane cafahaxa chu xi sahmi si chu cojo xuta xi tyjahi cjuatacun rë me cojo me xi ndaja cjuinduju me cojo Nina. Hane caa ru cjue chu xcun. Hacuaha cafaha xa chu xi cuitexa chu xuta rë yëjë ni tjë, yëjë nandya, yëjë hne cojo yëjë nangui.
REV 13:8 Hane jinguyëjë me xi viyuju me ngasunhndë ne, cafaharcun me chu. Yëjë ni me xi tsajin ñihi rë me xcun xujun rë Tsánga rë Nina xi hisca ntsacu cavetsihin ngasunhndë ne, cavejña xi cueya. Tsajin ñihi rë me jan ta, tsajin rë me ngahñu xatsë. Hane me vëhë cafaharcun me chu.
REV 13:9 Yo ngayun xi tjin nuju cjuasua xi cuinuhyun cjua vihi, ndaja tetuhunrcun.
REV 13:10 Me xi satë rë xi cuma me presu, cuatjin cumá. Me xi satë rë me xi cueya me cojo quicha, cuetjucaa jain. Jinguyëjë rë vëhë ne, mameje rë xi xuta xi macjain rë me Nina ne, cjuecani rë xi cumacjain sa rë me.
REV 13:11 Ngaxtun vëhë ne, cahvë nga ngu chu chojyihi, hane tivetju chu tsëhë nangui. Chu chojyihi xi majo ne, tjin jo ndyaja ru sacuaha tjin chu tsánga, peru chja chu sacuaha ngu yë jyë.
REV 13:12 Hane hacuaha cojo chu vëhë casatë rë chu ngahñu xi casatë rë chu xicjin cojo ñihi ru. Hane casahmi chu vë xi yëjë ni xuta xi siu ngasunhndë ne, cjuaharcun me chu chojyihi xi tjun jan, chu xi handasa cueya chu xi casacuhmu rë ne, camandaja.
REV 13:13 Hane cama casahmi chu vë cjuarcun yehe cojo seña. Casahmi chu xi cuixu ndihi tsëhë ngahnga, hane xuta ngasunhndë ne, cavutsejen me cjuarcun.
REV 13:14 Cuatjin cavindacha chu vë xuta ngasunhndë cojo cjuarcun xi cama casahmi chu ngatsë rë chu xi tjun. Hane cavitexa chu xi xuta ne, cuaxëtaha me ngu xcusun rë chu tjun jan xi casacuhmu rë cojo quicha peru cojo yëjë sa ne, quicun chu. Hane cuatjin casahmi me.
REV 13:15 Hane chu xi majo jan ne, casacu ru cahndë́ xi sua chu xta rë xcusun jan cojo sa xi cuma cuichja xcusun jan, hacuaha cuma sahmi xcusun jan xi cueya tu cutjin cjín me xi tsingatiin xi cjuarcun xcusun jan.
REV 13:16 Hane xcusun jan ne, casahmi ngujyë xi yëjë ni xuta ne, setaha ngu sellu tsja ladu quixi o sa xten me. Cuatjin casetaha rë xuta, sa quihndi, sa changá me, sa nchina, sa yuma me, sa xuta ndaya tjin o sa xi mosu hndixahan; yëjë ni me casetaha rë me.
REV 13:17 Hane chuva vëhë ne, sacuiin cahndë́ xteña hacuaha sacuiin cahndë́ cuatsë sa xi casetaain rë me sellu jan cojo ñihi rë chu chojyihi jan o cojo xqui rë letra rë ñihi ru.
REV 13:18 Cjuatacun vihi ne, tjin mé vijne, peru meje rë xi cuacjantaha me cjuatacun rë me ta cuitjin fi cjua: Catitsichuva me xqui rë chu jan ta, hatuxa xqui rë ngu xuta xihin. Hane xqui rë jan ne, jyan cientu cojo jyanchan jyun má.
REV 14:1 Hya xi camá ne, cavutsejen nga, hane ngajan secun Tsánga jan, secun quixi xcun naxi xi hmí rë Sion. Hacuaha siu cojo me ngu cientu cojo yachan ñuju mil xuta xi casetaha xten me ñihi rë Tsánga jan cojo ñihi rë Nahmi rë me.
REV 14:2 Hacuaha canuhya rë ngu xta tsëhë ngahnga xi nuhya rë sacuaha fane jemu cjín nandan xi vanga o sacuaha xi jemu hñu faneya. Hacuaha nuhya rë sacuaha xi tsijane cha chjine arpa rë cha.
REV 14:3 Hane xuta jan ne, tisë me ngu sun xatsë xcun cahndë́ rcun rë Nina hacuaha xcun ñuju xcusun xi quicun cojo can ñuju xuta changá xi viyuju me ngajan. Hacuiin yëjë me xi tjin rë me cahndë́ xi cuma rë me sun jan ta, suvá ngu cientu cojo yachan ñuju mil me xi cuacun jan xi cachaha rë me tsëhë ngasunhndë, me vëhë cuma rë me.
REV 14:4 Me xi cuacun vë ne, catsinguetsiin me cjuatacun rë me cojo yachjin, ta caviyuju suva me. Me xi cuacun vë ne, tjengui me Tsánga tu jani xi cjui. Me xi cuacun vë ne, hacuaha me xi cachjahaxin rë tsëhë ngajñi rë yahnga xuta xi cuma me sacuaha ngu cuatjo xi cumá rë Nina cojo Tsánga.
REV 14:5 Me xi cuacun vë ne, hisca xi ngu cjuandesu cavetjiin tsëhë hntsua me; ta tsajin xi cún rë me.
REV 14:6 Sehe cahvë ngu ángel xi hacjahi xi vitjen vasencja rë ngahnga. Ángel vëhë ne, cjuecani rë cjuandajyihi rë Nina xi machuvaain ngahñu rë. Hane sua rë xuta ngasunhndë tsëhë yëjë ni nación, o tjë, o hne, o nandya xi cumachaya rë me cjua jan.
REV 14:7 Hane cachja cojo xta hñu cuitjin: ―‍Chjuhunrcun rë Nina hacuaha nihñu jyë nihñu hnga me ta, tsëhë xi ha cavechu hora xi sahmicuenda me yëjë ni. Chjuhunrcun me xi casahmi ngahnga cojo nangui cojo ndachacun cojo nanda yufa.
REV 14:8 Sehe tjengui rë me ngu ángel xi majo, hane cachja cuitjin: ―‍Camá cafë ngahñu cjua rë gubiernu xi vitexa rë nandya Babilonia. Xuta rë nandya jan ne, catsitsehen yahnga xuta tsëhë xi sacuaha catsichihi rë me cojo xan xi hacui cjuatsehen xi sahmi ngu xihin cojo chjuun xi hacuiin tsëhë.
REV 14:9 Sehe tjengui rë me ngu ángel xi majyan, hane cachja hñu cuitjin: ―‍Yo xi cjuaharcun rë chu chojyihi o sa xi cjuaharcun rë xcusun ru, hane setaha sellu ru xten o sa tsja me ne,
REV 14:10 xuta jan ne, tjin rë me xi cuihingui me xan xi hacui cjuacjan rë Nina, hane tsajin mé xi tsinguijne rë ngahñu rë cjuacjan jan. Xuta jan ne, cuatju me cjuahmu tsëhë ndihi tsëhë azufre xi seti, cuatjin cuatju me xcun ángel cojo Tsánga.
REV 14:11 Hane nihndi rë ndihi rë cjuahmu rë me ne, cuiji yëjë nu yëjë nixtin. Sa nixtin sa nixten ne, sacuiin rë me cahndë́ cjuahajenda me tsëhë. Cuatjin cumá cojo me xi faharcun ru cojo xcusun ru. Cuatjin cumá cojo me xi siutaha rë sellu ru.
REV 14:12 Jinguyëjë rë xi vatju vëhë ne, mameje rë xi xuta xi macjain rë me Nina ne, cjuecani rë xi cuetjo me cjua xi cavitexa Nina hacuaha cumacjain sa rë me.
REV 14:13 Hya xi camá ne, cahndë ngu xta tsëhë ngahnga xi cachja cojo ná cuitjin: ―‍Nihndi cjua vihi: “Xuta xi ha cueya me quihndë cojo nixtin xi sehe nduva ne, jercu ndaja tsëhë me sa xi tjengui me ndiya rë Nina.” Hasen rë Nina ne, chja tsëhë me cuitjin: ―‍Juun, cjuahajenda me tsëhë xi tsijenda rë me ta, tsëhë xi cumatsejen chjí rë xa xi casahmi me. ―‍Cuatjin chja Hasen rë Nina.
REV 14:14 Hya xi camá ne, cavutsejen ngu yufí tyava, hane xcun yufí ne, tacun ngu xi tsejen sacuaha quihndi rë xuta. Quisun rcu me ngu corona tsëhë oro hane yahatsja me quicha yuju ta cuatë me xitjë.
REV 14:15 Ngajan xi cavetju nga ngu ángel tsëhë ndava Nina hane hñu cajindaya cojo ángel xi tacun xcun yufí jan. Cuitjin cachja: ―‍Chjuhun quicha nuju nangun ta, ha cavechu nixtin xi xtí ta, tsëhë xi camá quichji cosecha tsëhë ngasunhndë.
REV 14:16 Hya xi camá ne, me xi tacun xcun yufí jan ne, cavaja me nangui cojo quicha rë me, hane tjë rë ngasunhndë ne, camá cachaya rë.
REV 14:17 Hya xi camá ne, hacuaha cavetju ngu ángel xi cavetju tsëhë ndava Nina xi tacun ngahnga ne, hacuaha yaha ngu quicha yuju.
REV 14:18 Hane cavetju ngu ángel xi majo. Ángel vë ne, tacuntsja rë ndihi. Hane ángel vë ne, hñu cajindaya cojo ángel xi yaha quicha yuju. Hane cuitjin cachja cojo: ―‍Chehe quicha yuju riji ne, tiche yëjë hne rë uva tsëhë xcun ngasunhndë ta tsëhë xi uva rë ne, jemu quichji.
REV 14:19 Hya xi camá ne, ángel jan ne, catsingatju quicha rë xcun nangui ne, cavatë rë uva xi hacui xuta tsehen. Hane cavincha rë cahndë́ hiscan xinune rë cojo sa xi cumatsyuhun ne cuetju nandá rë sacuaha satë rë matsyuhun cjuacjan rë Nina.
REV 14:20 Camatsyuhun hiscan xín hitsë tsëhë nandya, hane jemu cavetju jni hiscan camatsyuhun uva jan. Xi camiji jni ne, cavechutaha rë hiscan frenu rë chu naxin hacuaha cavanga ngu chuva rë jyan cientu cojo can kilómetro.
REV 15:1 Hya xi camá ne, cahvë ngajan ngahnga ngu nga sen cjuarcun xi jemu fircun naja. Cahvë yatu ángel cojo yatu cjuacjintacun. Hane cojo cjuacjintacun jan ne, cuijnetaha cjuañihi xi cumá ta, sejyu cjuacjan rë Nina.
REV 15:2 Hacuaha cahvë sacuaha ngu ndachacun hasen sacuaha hasen ndyojo tsin, hane tsejen sacuaha tecjan cojo ndihi. Hane ngajan hinchacun xuta xi cacaa rë me quiji xcun tsëhë chu chojyihi cojo xcusun ru cojo xqui rë ñihi ru. Secun me cojo arpa xi cafahatsja me tsëhë Nina.
REV 15:3 Me vëhë ne, së me sun xi tsëhë Moisés, me xi casahmi xa rë Nina hane hacuaha tsëhë Tsánga. Cuitjin fi cjua rë: Jemu má nihñu xa, jemu fircun niji tsëhë. Nai niji ngayun. Ngayun, tsajin mé xi maji nihñu. Quixi nújun, hacuaha chichihin ndiya nuju. Ngayun vitexun jinguyëjë ni nación.
REV 15:4 ¿Yo xi tsacjuiin nuju, tatá? Tsajin yo. Yëjë ni me sahmi jyë sahmi hnga me yun ta tsëhë xi ngu ni ngayun xi tyjahi cjuatacun nuju. Vëhë xi yëjë ni nación cuinduva cuiticja xcun nuju tsëhë xi cumatsejen ndaja xa cjuaquixi nuju.
REV 15:5 Hya xi camá xi cavatju vihi ne, cavutsejen nga ngahnga ne, hane tixaha hiscan cahndë́ rcun rë ndihya tsjian rë Nina hiscan hincha acuerdu xi camá cojo Nina.
REV 15:6 Hane tsëhë ngajan ne, cavetju yatu ángel xi cuacun jan xi siutsja me xa rë yatu cjuacjintacun xi cumá. Ángel jan ne, yaja tsjian rë nachjun ndaja xi ndaja tyjahi. Hacuaha tjihñucja ndanisin rë cojo cinturón tsëhë oro.
REV 15:7 Ngajan xi ngu xi quicun jan xi ñuju má ne, casua rë yatu ángel xi cuacun jan ngu ngu tyucu rë oro xi ndaja teya. Hane tyucu jan ne, quitsë rë cojo cjuacjan rë Nina, Nina xi tacun cuaha me yëjë nu yëjë nixtin.
REV 15:8 Hane ndihya tsjian rë Nina jan ne, catsë rë cojo nihndi xi nduva tsëhë cjuahasen rë Nina xi seti cojo ngahñu rë me. Cuatjin camá xi tsajin yo ma visehen ngajan hisca xi cuijnetaha nixtin rë cjuañihi xi yahatsja yatu ángel jan.
REV 16:1 Hya xi camá ne, cahndë ngu xta hñu xi vetju tsëhë ndava Nina hane cachja xta jan cojo yatu ángel jan cuitjin: ―‍Tangun titejnu tyucu jan cojo sa xi cjuacjan rë Nina ne, satë rë ngasunhndë.
REV 16:2 Cojo vëhë ne, quiji ángel xi tjun jan ne, cavitsingaxten rë tyucu rë xcun nangui. Hane yëjë xuta xi yaha me sellu rë chu hacuaha faharcun me xcusun ru ne, casetaha rë me ngu xcusun chíhin vetju xi jemu cjan rë.
REV 16:3 Sehe ángel xi majo ne, cavitsingaxten tyucu rë xcun ndachacun. Hane ndachacun ne, cavuya jni sacuaha jni rë ngu nima. Ngajan cafë cahme xi hincha rë ndachacun.
REV 16:4 Sehe ángel xi majyan ne, cavitsingaxten tyucu rë cojo sa xi casatë rë nandan ndajyë cojo hiscan xi vetjun nandá. Hane nandan jan ne, hacuaha cavuya jni.
REV 16:5 Ngajan xi cahndë xi cachja ángel xi tacuntsja nandan jan cuitjin: ―‍Quixi yun chuva vihi. Ngayun nechun cuaha, hacuaha cavinechun.
REV 16:6 Quixi yun chuva vihi ta catsinguitsojo me jni rë xuta nuju cojo profeta xi chja cjua nuju. Hane canicuyun chuva rë ta hacuaha cavanga jni rë me.
REV 16:7 Hacuaha canuhya rë xi ngasunscun rë yungun ne, cafayangui cuitjin: ―‍Juun, cuatjin camameje rë. Tatá, Nina yun, hane tu mé ni ne, ma nuju. Jemu quixi cjua xi vitexun.
REV 16:8 Hya xi camá ne, ángel xi má ñuju ne, cavitsingaxten rë tyucu rë xcun tsuhi. Ngajan casacu rë ngahñu xi jemu cuaca rë xuta cojo ndavá rë.
REV 16:9 Hane xuta ngasunhndë ne, cati me cojo ndavá hñu. Peru cahndë́ xi sahmi jyë sahmi hnga me Nina ne, canchati me tsëhë ñihi rë Nina, me xi vitexa me xcun yëjë cjuacjintacun vihi.
REV 16:10 Hya xi camá ne, ángel xi má hñu ne, cavitsingaxten rë tyucu rë xcun cahndë́ rcu rë chu jan. Hane ngajan camá xi nación xi sahmi chu gubiernu tsëhë ne, jemu jñu camahani camá jingujyë ni. Hane xuta ne, cajinëne me neje me tsëhë xi jercu má rë me.
REV 16:11 Hane nchati me tsëhë Nina rë ngahnga ngatsë rë cjuahmu rë me cojo tsëhë nindu xi vetju yojo rë me. Nchati me tsëhë Nina cahndë́ rë xi choho camá rë me tsëhë cjuatsehen rë me.
REV 16:12 Hya xi camá ne, ángel xi má jyun ne, cavitsingaxten rë tyucu rë xcun ndajyë jyë xi hmí rë Eufrates. Ngajan xi nandan jan ne, caxiya hane camandaja ndiya rë cojo sa xi ma vatjucja rey xi nduva ladu vetjucaa tsuhi.
REV 16:13 Sehe cahvë jyan hasen tsehen xi cun sacuaha licuen, cavetju tsëhë hntsua chu yë jyë jan, tsëhë hntsua chu tjun cojo tsëhë hntsua chu ndacha.
REV 16:14 Hane hasen jan ne, hacui hasen tsehen xi ma sahmi seña cjuarcun hacuaha hacui xi sahmi tangun rey, xuta matitjun rë jingujyë ni ngasunhndë cojo sa xi xuta jan ne, sahmi si condra rë Nina xi ma sahmi me yëjë ni hya xi cuetjucaa nixtin rë Nina.
REV 16:15 Tetuhunrcun cjua rë Nina xi chja cuitjin: “Tjin chjine yun ta, tu ñahñu ni nduvá sacuaha nduva ngu chëjë. Jercu ndaja tsëhë yo xi tacun quicun, sacuaha ngu me xi tacun chjine tsjian rë me xi cuaja me cojo sa xi tsajin yo sacutsejentë cjuasava rë me.” Cuatjin chja cjua jan.
REV 16:16 Hane casahmi xi cama tangun rey jan ngajan ngu cahndë́ xi hne hebreo ne, hmí rë Armagedón.
REV 16:17 Hya xi camá ne, ángel xi má yatu ne, cavitejnu tsëhë tyucu rë ngajñi tjo. Ngajan xi hiscan ndava Nina, hiscan cahndë́ rcun rë me, canuhya rë ngu xta hñu xi chja cuitjin: ―‍¡Ha camá cajnetaha!
REV 16:18 Ngajan xi sehe cavetsihin cavatë ndihi chuhun, cafaneya, catsinga chuhun, cojo xi jemu hñu cafani nangui. Hisca cjëë cjuani nangui cuatjin jinguyëjë rë xi caviyuju xuta xcun ngasunhndë ta, jercu cjuachan camahani cafani nangui.
REV 16:19 Hane ciudad jyë ne, jyan rquí caseya tsuhun. Hacuaha yahnga nandya rë ngasunhndë ne, cavixujne. Hane Nina ne, catsinguitsen me cjuatsehen rë nandya Babilonia jyë hane casahmi me xi hacuaha cuma rë nandya jan castigu tsëhë cjuacjan rë Nina xi hincha tyucu.
REV 16:20 Hacuaha nangui xi vetju vasencja ndachacun cojo naxi ne, hya cafëya.
REV 16:21 Hane tsëhë ngahnga ne, tsi ndyojo yehe cavixusun rë xuta jan. Hane chuva ngu tsi ndyojo vë ne, sacuaha yachan kilu hai. Hane xuta ne, canchati me choho cachja me tsëhë Nina ngatsë rë cjuacjintacun tsëhë tsi ndyojo jan ta, cjuacjintacun jan ne, jemu chircun camahani.
REV 17:1 Hya xi camá ne, ngu tsëhë yatu ángel jan xi yaha tyucu ne, canduva tjengui ná ne, cachja cuitjin: ―‍Ndove ne, tsingácun ri castigu rë na xi viteña yojo rë, na xi tacun na xcun jemu cjín nandá.
REV 17:2 Cojo na vëhë ne, rey tsëhë nangui ne, casahmi me cjuatsehen; hane xuta ngasunhndë ne, catsichihi rë me cojo xan xi hacui cjuatsehen ran. ―‍Cuatjin cachja ángel cojo ná.
REV 17:3 Ngajan xi ángel ne, quijicojo ná ngajñi nguijña ngu cahndë́ xín. Hane ngajan cahvë ngu chjuun xi quisun na ngu chu chojyihi xi hani xi yatu rcu chu cojo të ndyaja ru. Hane chu jan ne, yaha ñihi xi tsitjungui rë Nina.
REV 17:4 Chjuun jan ne, yaja na tsjian chacun xi moradu cojo hani. Hacuaha tsjian vëhë hisca seti jyihi cojo oro cojo ndyojo ndacun hane cojo tu seti xi cavaqui rë. Hane yahatsja na ngu tyucu tsëhë oro xi quitsë rë cojo xcusun tsehen cojo xi chocun rë cjuatsehen rë na.
REV 17:5 Hane xten na ne, camahindu cjua vihi: “Ngu cjua xi meje rë cjuatacun: Babilonia, nangui xi matitjun. Nangui xi hacui na xi viteña yojo rë cojo yahnga xuta xi sahmi me cjuatsehen ne, fayangui xuta xcusun rë na.” Cuatjin camahindu.
REV 17:6 Hane camachaya ná ta na vëhë ne, chihi na ta cahvi na jni rë nima xi cahme me ngatsë rë xi macjain rë me Nina cojo jni rë nima xi casua cjuaquixi rë Jesús. Hane hya xi cahvë na ne, ngahan ne, jercu quijircu camahani ná.
REV 17:7 Ngajan xi cachja ángel cojo ná: ―‍¿Mé má fircun ri? Ngahan ne, suacuenda ri cjuatacunhma tsëhë chjuun jan cojo tsëhë chu chojyihi xi quisun na, chu xi tjin yatu rcu chu cojo të ndyaja ru.
REV 17:8 Chu chojyihi jan ne, quicun chu hatsëë, peru quihndë tsajin chu. Hane xi cuinduvaniji chu tsëhë nduchin ne, jiya ndiya chu xi cjuëya chu. Hane xuta xi viyuju me ngasunhndë ne, me xi casetaain ñihi rë xcun xujun, xujun xi hisca ntsacu cavetsihin ngasunhndë, hincha ñihi rë me xi satë rë me cjuahñu xatsë xi sua Nina ne, me vëhë cjuercun rë me. Cjuercun rë me hya xi scuëë me chu ta quicun chu hatsëë, tsajin chu quihndë, peru cuya cuejña nga chu.
REV 17:9 ’Mameje rë cjuatacun ta chja nuhya rë, peru yatu rcu chu ne, nuhya rë xi má yatu ndetjun hiscan quisun na o sa nandya hiscan vitexa na jan. Hacuaha nuhya rë xi má yatu me xi vitexa ngajan.
REV 17:10 Hñu me vëhë ne, ha cajnetaha nixtin xi cavitexa me. Ngu nga me ne, tivitexa me. Hane ngu sa me jan ne, hya xi cuitexa me, sahmi ngujyë xi hacuiin cjín nixtin scaa rë me.
REV 17:11 Hane chu chojyihi xi quicun chu hatsëë, peru quihndë tsajin chu, cojo chu vëhë cuma jyin me xi cuitexa me ngajan. Chu jan ne, ma jyin, peru hacuiin xín cuinduva chu ta, tsëhë ngajñi rë me xi yatu jan ne, ngajan cuinduva chu hane cjui hiscan cjuëya cha.
REV 17:12 ’Hane të ndyaja ru xi cahye ne, hacui të xuta xi cjëë cjuahatsja me xa xi cuitexa me. Hane me vëhë ne, sacu rë me cahndë́ xi cuitexa me tangun cojo chu, peru ngu hora ni cjuecani rë nixtin rë me.
REV 17:13 Hane me vëhë ne, cama sacuaha ngu ni cjuatacun rë me. Hane sahmi tangun me ngahñu rë me cojo gubiernu rë me sehe sua me xi cjuahatsja chu chojyihi.
REV 17:14 Hane hya xi sahmi me si cojo Tsánga jan, scaa rë xi cjue xcun Tsánga cojo xuta xicjin. Hane xuta xicjin Tsánga ne, hacui me xi cavuxijin Nina, me xi ndaja finduju xi tjengui rë ta, Tsánga jan ne, Nai rë yëjë ni nai má me. Hacuaha vitexa me xuta xi vitexa. ―‍Cuatjin cachja ángel cojo ná tsëhë na vëhë.
REV 17:15 Cachja sa ángel cojo ná cuitjin: ―‍Sacuaha nandá xi cahye hiscan xi tacun na xi viteña yojo rë na, nuhya rë xi má xuta tsëhë yëjë ni tjë, yëjë nandya, xuta cjín, xuta xi chja yëjë hne.
REV 17:16 Hane me xi sacuaha të ndyaja ru ne, cuya xi choho scuëë me na xi viteña yojo rë, tsismi me na, hacuaha cuejña cuatjin na. Hane xi cavejña suva na ne, sehe sinë chu yojo ran sehe cuaca ran cojo ndihi.
REV 17:17 Të me jan ne, cojo ngu ni cjuatacun meje sua me xa rë me cojo ngahñu cjua rë me xi cjuahatsja chu chojyihi jan. Xi cuatjin casahmi me ne, camá hacuatjin cavincha Nina xahasen rë me xi cumá hisca nixtin xi cuma chihin hacutjin cavejñacacun Nina xi cumá.
REV 17:18 Hane sacuaha chjuun xi cahye jan ne, nuhya rë xi má ciudad rcun xi satë rë xi cumatitjun tsëhë yëjë ni xuta xi vitexa xuta ngasunhndë.
REV 18:1 Hya xi cavatju vihi ne, cahvë nga ngu ángel xi nduvajne tsëhë ngahnga xi jemu tjin rë ngahñu cjua rë. Hane nangui ne, casahasen rë cojo hasen rë ngahñu jan.
REV 18:2 Hane ángel jan ne, cojo ngu xta hñu cajindaya cuitjin: ―‍¡Cjanengui! ¡Cafë ngahñu rë Babilonia jyë! Quihndë suva machji rë tsëhë xitsehen. Ngajan tsujyihiya hasen tsehen, ngajan vangui yëjë chu nisë xi jinë chu ngu xcusun chocun, chu xi chohovëë xuta chu.
REV 18:3 Cuatjin camá rë ta tsëhë xi xuta ngasunhndë ne, cavincha sca rë me cojo xan rë cjuatsehen ran. Cojo na vëhë ne, me xi vitexa me ne, casahmi me cjuatsehen. Hacuanitjin tsëhë xuta xi sahmi me negocio ta, camanchina me ngatsë rë cjuatsehen ran. ―‍Cuatjin cachja ángel.
REV 18:4 Sehe cahndë nga ngu xta tsëhë ngahnga xi cachja cuitjin: ―‍Ngayun xi xuta naha ne, tetjun tsëhë nandya vihi. Tangunxun cojo sa xi cuajiin yun cuatjunxcun jyë́ rë, hane satiin nuju cjuañihi xi satë rë xuta vëhë.
REV 18:5 Jyë́ rë na xi hacui nandya vëhë ne, casexohnga rë hisca cavechu ngahnga. Hane Nina ne, cjuaha cuenda me tsëhë cjuatsehen ran.
REV 18:6 Nicuyun tsëhë na chuva xi casahmi na. Jo cuatjin vechutaha castigu xi cumá ran. Tisecjun rë copa ran jo cuatjin sa sehe hitsë sa cumá cjan xi cuma rë copa xi cavincha na tsëhë xuta.
REV 18:7 Ngojo rë cjuaxta rë na xi jercu sahmi na mé xi fehya cjuatacun tsehen rë na ne, ndaja tuhun ran cjuañihi cjuachoho. Cuatjin cumá ran ta, cuitjin catsingatahacacun na cachja na: “Tejña cahndë́ rcun ta matitjun ngahan. Hacuiin cahan ngahan, satiin ná cjuachoho.” Cuatjin tsingatahacacun na.
REV 18:8 Vëhë xi xcun ngu ni nixtin, cuechutaha ran yëjë ni, ta cuechutaha ran cjuachoho, cuechutaha ran jindya. Hacuaha tsicjëya ran ndihi. Cuatjin cumá ta, tsëhë xi Nina, me xi sahmi cuenda rë jyë́ ran ne, ma sahmi me yëjë ni.
REV 18:9 Ngajan xi xuta xi rcun xi casahmi cjuatsehen ngajan hacuaha casua cjuasua xahasen rë ngajan ne, scuëë me nihndi rë, hane squihnda me hacuaha cuiyuju va me.
REV 18:10 Hane cjuercun rë me ngatsë rë chircun xi tivatju ngajan, sehe squindaya me cuichja me cuitjin: ―‍¡Ay! Jercu choho cavatju ciudad ndajyihi, ciudad rcun. Tu ñahñu ni ne casatë rë yëjë ni cjuacjintacun xi cuma castigu rë.
REV 18:11 Hacuaha xuta xi sahmi me negocio ne, squihnda me hacuaha choho cumá rë me tsëhë xi quihndë ne, tsajin yo cuatsë chaha xi viteña me,
REV 18:12 chaha xi camá tsëhë oro, tsëhë quicha tyava, cojo ndyojo ndacun, cojo tu seti, cojo tsjian ndacun sa lino sa seda, sa xcusun hani sa moradu. Chaha rë ya xi ndaja jne, chaha xi camá tsëhë nehñu elefante, o tsëhë ya xi hnga chjí rë o tsëhë quicha sine, quicha hinda o tsëhë ndyojo seti.
REV 18:13 Tsajin yo cuatsë rë chaha rë canela cojo yahnga xcusun xi sahmi xi ndaja chinë comida o sa tyjungunsa, sa balsamo xi hmí rë muro, sa vinu, sa aceite, sa ndyaja, sa chu tsánga, sa naxin o sa carreta, sa mosu cachaha rë xi hacui cjuahñu rë xuta. Tsajin yo cuatsë tsëhë me.
REV 18:14 Cuitjin chja tsëhë nandya jan: ―‍Xcusun ndacun xi jercu cafehya xahasen riji ne, quijixin tsijin. Yëjë ni cjuanchina riji xi ndajyihi ne, cafëya, hane tsajin nu tsajin nixtin cuya sacu ri.
REV 18:15 Ngajan xi me xi caviteña ngajan hane cojo vëhë cama nchina me ne, cjuercun rë me ngatsë rë chircun xi tivatju ngajan, xinchacun me cjin tsëhë, hane squihnda me hacuaha choho cumá rë me.
REV 18:16 Cuitjin cuichja me tsëhë: ―‍¡Jemu va jyihi nandya! Camá ngu nandya jyë, jemu ndacun tsjian catsicaja rë xuta rë. Tsjian ndaja xcusun hani moradu. Tsjian xi cavaqui rë nachjun oro cojo ndyojo ndacun cojo tu seti.
REV 18:17 Peru xcun xi ngu hora ne, cafë cavetsunya cjuanchina vë. Hane yëjë me xi matitjun xi vitexa tsëhë barcu cojo xuta xi hincha me cahntsua, cojo cha xi sahmi xa xcun barcu o sa xuta xi sahmi negocio cojo, cumamijí sahmi tiña me tsëhë.
REV 18:18 Squindayava me hya xi scuëë me nihndi rë xi seti hane cuichja me cuitjin: ―‍Hatuxa tsajin sa ngu ciudad xi cuanitjin ndajyihi sacuaha camá ciudad jyë vi.
REV 18:19 Hane cuitejnu me scuan rcu me ta jemu choho má rë me hacuaha squihndava me cuichja me cuitjin: ―‍¡Cojo cjuatsehen rë xuta nandya vi! Ngatsë rë cjuanchina rë me ne, tu yo ni me xi tjin rë ngu barcu rë chaha ne, cama nchina me. Peru ngu ñahñu ne, cavetsunya.
REV 18:20 Catamasua nuju tsëhë na, ngahnga. Catamasua nuju ngayun xi tyjahi cjuatacun nuju, ngayun xi má apóstol cojo ngayun xi má profeta. Catamasua nuju ta hindë casahmi Nina castigu na, casahmi cuenda me tsëhë na chuva xi casahmi na cojo nuju.
REV 18:21 Ngajan xi ngu ángel xi jercu tjin rë ngahñu ne, cafaha me ngu ndyojo jyë chuva rë natsi rë molinu, hane catsingatjeya rë ngajñi ndachacun. Sehe cachja cuitjin: ―‍Chuva ngahñu vihi, cuanitjin ngahñu xi cjuinengui cojo nandya jyë xi hmí rë Babilonia. Hane tsajin nixtin xi cuya cumá.
REV 18:22 Tsajin nixtin xi cuinuhya rë xi tsijane cha chjine arpa ngajan, o sa ngu sun, o sa fane chiruvi o sa fane tyjo. Hisca ngu cha chjine tsëhë tu mé ni xcusun ne, cuyaain sahmi xa ngajan. Hacuaha cuyaain nuhya rë ndyojo rë molinu xi sahmi scuan rë pan.
REV 18:23 Ndihi rë ngu lámpara ne, cuyaain tsejen hasen rë ngajan. Tsajin nu tsajin nixtin xi ngajan cuma cjuavixan. Cuatjin cumá cojo ta, xuta xi casahmi me negocio ngajan ne, jemu hñu cjua rë me cojo yëjë ni xuta ngasunhndë. Hane cavincha sca me xuta ne, cavindacha me cojo xcusun rë me.
REV 18:24 Hacuaha ngajan cavanga jni rë profeta cojo tsëhë xuta xi tyjahi cjuatacun rë me xcun Nina cojo jni rë yëjë ni xicjin me xi camá catsiquehen me nguehe ngasunhndë.
REV 19:1 Hya xi camá cavatju vihi ne, cahndë sacuaha xta rë xutacjín ngajan ngahnga xi chja cuitjin: ¡Catama jyë, catama hnga Nina! Nina ne, vaxëtje me xuta, tjin rë me hasen ndajyihi xi seti, hacuaha ma sahmi me yëjë ni.
REV 19:2 Jemu quixi cjua xi vitexa me ta, casahmi me xujun jyë́ rë na xi caviteña yojo rë, na xi hñu cjua na. Na vëhë ne, catsinguetsun na cjuatacun rë ngayëjë ni cojo cjuatsehen rë na. Hane Nina ne, casahmingojo me cojo rë na jni rë xuta xi sahmi xa rë me. Jni rë me xi casahmi na xi cavanga.
REV 19:3 Sehe cavuya cachja me cuitjin: ―‍¡Catama jyë, catama hnga Nina! ta, nihndi ran ne, miji nchunchujun ni, nu nu ni.
REV 19:4 Ngajan xi can ñuju xuta changá cojo catsiñuju xcusun xi quicun ne, caviticja xcun Nina xi cjuaharcun rë me xi tacun me cahndë́ rcun. Cuitjin cachja me: ―‍¡Cuatjin jain! ¡Nihñu jyë nihñu hnga Nina!
REV 19:5 Sehe cavetju tsëhë cahndë́ rcun ngu xta xi chja cuitjin: Nihñu jyë nihñu hnga Nina, ngayun xi nihñu xa rë me. Nihñu jyë hnga me sa quihndi sa changá yun.
REV 19:6 Hya xi camá ne, cahndë sacuaha xi tisë xutacjín. Nuhya rë sacuaha fane nandan xi jemu hñu vanga o sacuaha faneya xi tsinga chuhun. Hane cjua rë ne cuitjin chja: ¡Catamajyë catamahnga Nina naja ta, ha cavetsihin sahmi me gubiernu hane ma sahmi me yëjë ni!
REV 19:7 Catamasua naja. Tahan cjuasua xahasen naja. Nihña jyë hnga me tsëhë xi cavechu cjuavixan rë Tsánga. Chjuun rë ne, ha catsindaja na yojo ran.
REV 19:8 Casacu rë na cahndë́. Hane cuaja na tsjian ndaja xi seti, xi tyjahi. Tsjian jan ne, hacui xcusun ndaja xi sahmi xuta xi tyjahi cjuatacun rë me xcun Nina. Cuatjin cachja xutacjín jan.
REV 19:9 Hya xi camá ne, cachja ángel cojo ná cuitjin: ―‍Nihndi cjua vi: “Jercu ndaja tsëhë me xi camachaya rë xi nduva me sinësuhi me tsëhë cjuavixan rë Tsánga.” Hane cachja sa ángel cuitjin: ―‍Cjua xi cachjá ne, cjuaquixi jain rë Nina.
REV 19:10 Hane ngahan ne, caticjátaha ntsacu ángel xi cjuahárcun rë. Peru cachja cojo ná cuitjin: ―‍¡Xicanihñii! ta, tangun ni chjí naja, ta xa naha ne, tangun cojo xa xi nihñu cojo xingun xi sua cumachaya rë cjuaquixi rë Jesús ne, hacui xa xi vitexa Nina. Nina ne, me vëhë chjuhunrcun me. Hacuaha cjuaquixi rë Jesús ne, vëhë sacuaha cacun rë cjua xi cachja profeta.
REV 19:11 Sehe cahvë xi tixaha ngahnga, hane ngajan ne, cahvë ngu chu naxi tyava. Hane me xi quisun rë chu ne, chja tsëhë me ta, sahmi chihin me cjua rë me hacuaha quixi me. Jemu quixi cjua me hya xi tsichuva me xuta cojo sa xi hya xi sahmi me si.
REV 19:12 Tuxcun me ne, sacuaha ndihi xi ña vitjen. Rcu me ne, jercu hinchasun corona. Hane camahindu ngu ñihi rë me xi tsajin yo vëë rë, peru suva me vëë me.
REV 19:13 Yaja me ngu tsjian xi tjintë ni ne, xi caseyaquinda cojo jni. Hane sacuaha ñihi rë me ne, Cjua rë Nina hmí rë me.
REV 19:14 Hane tjengui rë me sindadu cjín tsëhë ngahnga. Sindadu jan ne, cuaja me tsjian ndaja xi tyava, xi tyjahi. Hane hacuanitjin hinchasun me naxin tyava.
REV 19:15 Hane suva me ne, tsëhë hntsua me ne, vetju ngu quicha yuju xi cuanguihmu rë xutacjín. Hane hacuiin yuma cumá rë me xuta ta, cuitexa rë me cojo yaxti rë quicha. Hane sune me cahndë́ hisca nune rë uva cojo sa xi cuaxë me xan rë cjuacjan rë Nina, me xi ma sahmi yëjë ni.
REV 19:16 Hacuaha xcun tsjian rë me cojo tyjuhmi rë me ne, camahindu ñihi vi: “Me xi matitjun tsëhë ngayëjë ni xi matitjun. Me xi matitjun tsëhë ngayëjë ni xi vitexa.”
REV 19:17 Hane cahvë xi ngu ángel ne, secun xcun tsuhi. Hane jindayahñu tsëhë nisë xi jemu hnga vitjen chu. Cuitjin cachja cojo chu: ―‍Nduvun. Catamatangun yun tsëhë suhi jyë rë Nina.
REV 19:18 Ngajan xinu yojo rë xuta xi camatitjun, cojo yojo rë capitán rë sindadu cojo yojo rë xuta xi hñu cjua, cojo yojo rë chu naxin cojo yojo rë xuta xi caxinchasun rë chu. Xinu yojo rë xuta, sa ndaya tjin me o sa xi caxteña me, sa langa me, sa changá me, xinu yojo rë me. ―‍Cuatjin cachja me cojo chu nisë jan.
REV 19:19 Hane cahvë chu chojyihi jan cojo xuta xi vitexa me cojo sindadu cjín rë, hane camatangun cojo sa xi sahmi si cojo me xi hinchasun chu naxin tyava jan.
REV 19:20 Hane ngajñi si vëhë ne, cachjaha rë chu chojyihi jan camá presu chu. Hacuanitjin ne camá presu chu xi casahmi cjuarcun ngatsë rë chu chojyihi cojo sa xi cavindacha chu xuta sehe setaha sellu rë chu xten me hacuaha faharcun me xcusun ru. Sehe cacandiya quicu me catsijo chu ngajñi ndachacun xi ti cojo azufre.
REV 19:21 Hane xicjin chu xi cavangui ne, catsiquehen me cojo quicha xi vetju tsëhë hntsua me xi miji rë naxin. Sehe yëjë ni nisë ne, cajinësua chu hisca xi cavechu rë xahasen ru cojo yojo rë xi cuicun vi.
REV 20:1 Sehe cahvë ngu ángel xi nduvajne tsëhë ngahnga, hane yahatsja ángel vë llavi tsëhë nduchin hacuaha yahatsja ngu cadena jyë.
REV 20:2 Hane cafaha rë yë jyë jan. Chu vëhë ne, hisca hatsëë tacun chu. Chu vëhë ne, hacui naain o sa Satanás. Hane xi cafaha rë chu ne, catsihñu rë chu cojo cadena xcun xi ngu mil nu.
REV 20:3 Hacuaha catsingatjenya ru cahntsua nduchin. Sehe casechjahñu tingotjo rë cojo llavi hane casetaha xcun ngu sellu. Cuatjin camá cojo sa xi sacuiin sa cahndë́ cuindacha ru xutacjín hisca xi cuijnetaha ngu mil nu. Hane xi cuatju vëhë ne, cumandaya nga chu ngu jo nixtin.
REV 20:4 Hya xi camá ne, cahvë cahndë́ rcun hane xcun silla jan ne, siu me xi casatë rë xa xi cuitexa me. Hacuaha cahvë hasen rë me xi catisun rë rcu ngatsë rë cjuaquixi rë me xi casua me tsëhë Jesús hacuaha ngatsë rë cjua rë Nina. Me vëhë ne, cafaharcuaain rë me chu chojyihi cojo xcusun ru, hacuaha casetaain rë me sellu rë chu sa xten me o sa tsja me. Hane cahvë xi cavuya nga cjuahñu rë me sehe cojo Cristu casahmi me gubiernu xcun ngu mil nu.
REV 20:5 (Yahnga nima ne, cuyaain cjuahñu hisca xi cjuë mil nu jan.) Matsejen ta vëhë nixtin xi tjun cuya cjuahñu rë nima.
REV 20:6 Jercu ndaja tsëhë me hacuaha tyjahi cjuatacun rë me xi cojo me satë rë me xi tjun cuya me cjuahñu. Cjuaveya xi majo ne, satiin rë me ta, tsajin mé ma sahmi cojo me. Cumá me sacuaha nahmi xcun Nina cojo Cristu hane sahmi me gubiernu cojo me xcun ngu mil nu.
REV 20:7 Hane xi cuijnetaha mil nu jan ne, cumandaya nga Satanás tsëhë ndavaya hiscan caveya me.
REV 20:8 Sehe cuya cuindacha xutacjín rë jingujyë ni ngasunhndë, cuindacha me xuta rë Gog cojo xuta rë Magog, cojo sa xi sahmitangun rë tsëhë si. Hane xqui rë me xi cumatangun me ne, cuechu sacuaha tsumi tjehen rë ndajyë.
REV 20:9 Hane xi camatangun me condra jan ne, cjue me jingujyë ni xcun nangui. Hane ngajñi si ne, cuiyujuhndee rë me cahndë́ xi siu sindadu cjín rë Nina cojo nandya xi tsihmucacun me. Peru ndihi ne, cuijne tsëhë ngahnga hane cjue cueti xuta condra jan.
REV 20:10 Hane Naain xi cavindacha rë ne, ningatjenya rë ngajñi laguna tsëhë azufre xi seti. Hane ha cuanitjin ne catundiya chu chojyihi jan cojo chu xi cavindacha. Hane ngajan ne, cuatju chu cjuañihi nixtin nixten, nu cjui, nu nduva.
REV 20:11 Hya xi camá ne, cahvë nga cahndë́ rcun tyava xi matitjun cojo me xi tacun xcun. Hane ngatsë rë cavatjuxcun me, cafëya nangui cojo ngahnga, hane casacuiin cahndë́ xi cuma rë.
REV 20:12 Hacuaha cahvë nima. Sa changá, sa quihndi, hinchacun yëjë ni nima xcun cahndë́ rcun jan. Hya xi camá ne, ngu jo libru ne catuxaha. Hacuaha catuxaha ngu libru xi hacjahi. Hane libru vëhë ne, libru rë cjuahñu. Sehe camacuenda tsëhë, sacuaha xcusun xi casahmi nima, hacutjin xi camahindu xcun libru tjun.
REV 20:13 Ndachacun ne, casua nima xi tjintsja. Cjuaveya cojo tsjun ne, hacuaha casua nima xi tjintsja. Hane jima ngu nima ne, camacuenda tsëhë hacutjin xcusun xi casahmi me.
REV 20:14 Hya xi camá ne, tsajin sa cjuaveya, tsajin Hades, cahndë́ xi viyuju nima ta, catundiya ngajñi laguna xi seti cojo ndihi. Hane ndihi vëhë ne, hacui cjuaveya majo.
REV 20:15 Ngajan xi nima xi casetaain ñihi rë me xcun libru tsëhë cjuahñu ne, cavixuya ngajñi laguna tsëhë ndihi jan.
REV 21:1 Xi cavatju vëhë ne, cahvë ngu ngahnga xatsë cojo ngu ngasunhndë xatsë ta, tsëhë xi ngahnga xi tjun cojo nangui xi tjun ne, cafëya. Hane sacuaha ndachacun ne, tsajin.
REV 21:2 Hane ngahan, Juan, cahvë nandya xi catsinchacun Nina xi hmí rë Jerusalén xatsë. Canduvajne tsëhë Nina ngajan ngahnga. Jemu ndaja tsejen nandya vë ta, tsejen sacuaha ngu na xi cuixan xi canicaja rë na tsjian ndajyihi tsëhë xi nduva cha xi cuixan cojo rë na.
REV 21:3 Sehe cahndë ngu xta hñu xi cachja tsëhë cahndë́ rcun. Cuitjin cachja: ―‍Ha quihndë cjue cuiyuju tangun Nina cojo xuta. Hane xuta jan ne, cumá xuta rë me, hane suva me ne, cumá me Nina rë me.
REV 21:4 Hane Nina ne, tsixiya me yëjë ndatuxcun me. Quihndë tsajin sa cjuaveya. Tsajin sa cjuachoho. Tsajin mé má squihnda me. Tsajin cjuahmu. Cuatjin cumá ta, tsëhë xi xcusun changá ne, ha cavatju.
REV 21:5 Hane me xi tacun xcun cahndë́ rcun ne, cachja me cuitjin: ―‍¡Tisahme xatsë yëjë ni xcusun! Hane cachja me cojo ná cuitjin: ―‍Nihindi cjua vihi ta, hacui cjuaquixindaja hane macjain naja tsëhë.
REV 21:6 Hane cachja sa cojo ná cuitjin: ―‍Ha camachihin. Sacuaha letra xi vetsihin cojo letra A ne, vijnetaha cojo zeta. Hacui ni ngahan xi ntsacu vetsihin ne, hacui ni ngahan xi vijnetaha. Me xi xinda rë xahasen rë me ne, tu cuatjo ni suá cuihi me tsëhë nandá xi sua cjuahñu xatsë.
REV 21:7 Me xi scaa rë cjue xcun ne, sacu rë me cjuatjo rë Nina. Hane cumá ngahan Nina rë me, hacuaha cumá me quihndi naha.
REV 21:8 Peru yo xi tsacjun, yo xi macjaain rë, yo xi hngacacun, cha tsiquehen, me xi sahmi cjuatsehen ngajñi xihin o sa ngajñi chjuun, o xi sahmi surqui, o xi faharcun nina ndacha, o xi chjaain me cjuaquixi ne, yëjë ni me vëhë ne, sacu rë me cahndë́ ngajñi laguna tsëhë ndihi xi ti cojo azufre. Hane vëhë ne, hacui cjuaveya xi majo.
REV 21:9 Hane ngu ángel tsëhë yatu jan xi yahatsja tyucu të xi quitsë rë cojo yatu cjuacjintacun xi vijnetaha jan ne, canduvatjengui ná ne, cachja cojo ná cuitjin: ―‍Ndove ta, tsingácun ri na xuta vixan, na xi camá chjuun rë Tsánga.
REV 21:10 Hane ángel jan ne, quijicojo ná ngajñi nijña naha hiscan ngu ndetjun naxi hnga. Sehe catsingacun ná nandya xi catsinchacun Nina, nandya xi hmí rë Jerusalén ta tinduvajne tsëhë Nina ngajan ngahnga.
REV 21:11 Hane ña tsejen xi seti cojo hasen tsëhë ngahñu rë Nina, hisca sua hasen rë sacuaha ngu ndyojo seti xi yufa sacuaha ndyojo tsin.
REV 21:12 Hane cavindee rë ngu xondyojo teya hacuaha hnga. Tejó má tingotjo rë, hane jimangu tingotjo jan ne, ngajan siu ngu ángel. Hacuaha ngajan camahindu ñihi rë tejó tjë rë xuta nangui Israel.
REV 21:13 Xondyojo jan ne, tjin jyan tingotjo jimangu ladu. Jyan má ladu vetjucaa tsuhi. Jyan má ladu ngatihin. Jyan má ladu canangui. Hacuaha jyan má ladu vetje tsuhi.
REV 21:14 Xondyojo rë ne, tacun xcun tejó xihndë naña. Hane xihndë naña ne, yaha ñihi rë tejó apóstol rë Tsánga xi camahindu xcun.
REV 21:15 Ángel xi chja cojo ná ne, yaha ngu ya naxu tsëhë oro xi machjirëhë sacuaha ya chuva xi cjuahachuva rë nandya cojo xondyojo cojo tingotjo rë.
REV 21:16 Nandya jan ne, cuadradu jyihi. Jimangu tjehen rë ne, jo mil jo cientu kilómetro má xi nduju. Hane hacuanitjin ne má xi hnga.
REV 21:17 Hane catsichuva xondyojo rë. Vëhë tjin rë ngu cientu cojo yachan ñuju nda sacuaha chuva rë xuta ta vëhë casahmixa ángel cojo.
REV 21:18 Sacuaha xondyojo rë ne, camá cojo ndyojo seti xi hmí rë jaspe, hane nandya ne, suva oro camá hane seti sacuaha ndyojo tsin.
REV 21:19 Xihndë naña rë xondyojo rë nandya ne, camá cojo ndyojo seti rë yëjë ni xcusun xi sacuaha xcusun rë yejña. Xihndë naña rë xi tjun ne, camá tsëhë jaspe. Xi majo ne, tsëhë zafiro. Xi majyan ne, tsëhë ágata, má ñuju ne, tsëhë esmeralda,
REV 21:20 má hñu ne, tsëhë ónice, má jyun ne, tsëhë cornalina, má yatu ne, tsëhë crisólito, má jyin ne, tsëhë berilo, má ñaja ne, tsëhë topacio, má të ne tsëhë cirsopraso, má tengu ne, tsëhë jacinto, hane má tejó ne, tsëhë amatista.
REV 21:21 Sacuaha tejó tingotjo jan ne, camá tsëhë tu seti xi hmí perla. Hane jimangu tingotjo camá tsëhë ngu perla. Hane ndiyatë rë nandya jan, tsëhë suva oro camá peru sacuaha ndyojo seti xi ña hasen tsejen.
REV 21:22 Ngajan ciudad vëhë ne, cahveen ngu yungun. Mamijí rë ta tsëhë xi ngajan cuiyuju Nina, Nai naja xi ma sahmi me yëjë ni, cojo Tsánga xi hacui me sacuaha yungun.
REV 21:23 Cuanitjin ne, mamijí rë tsuhi cojo sá xi sua hasen rë ta, tsëhë xi hasen rë ngahñu rë Nina ne, sua hasen rë ngajan, hane Tsánga ne, má ndihi rë.
REV 21:24 Yëjë xutacjín ne, tsujyihiya me cojo ndihi vë xi cjue me cojo ngasunhndë rë me, hane xuta matitjun rë me ne, ngajan cjue cani me ngahñu rë xa xi vitexa me cojo xi cuaxëndaja me.
REV 21:25 Ngajan hisca xi ngu nixtin ne, sechjaain tingotjo rë, tsëhë xi ngajan ne, tsajin nixtin cuma nguixun.
REV 21:26 Hane xutacjín tsëhë ngasunhndë ne, cjue cani me ngahñu cjua rë me cojo cjuanchina rë me.
REV 21:27 Hatuxa tsajin cahndë́ xi cuma rë tu mé ni xi hacuiin tyjahi xcun Nina. Tsajin yo xi sahmi cjuatsehen, tsajin yo xi cuichja ndesu. Suva ni me xi casetaha ñihi rë xcun libru rë Tsánga, libru xi yaha ñihi rë me xi sacu rë cjuahñu xatsë ne, me vëhë sacu rë me cahndë́.
REV 22:1 Sehe ángel ne, catsingacun ná ndajyë xi hacui nandá xi sua cjuahñu. Nandá vëhë ne, nandá yufa xi hasen sacuaha ndyojo tsin. Hane nandá vëhë ne, vetju tsëhë cahndë́ rcun rë Nina cojo Tsánga,
REV 22:2 hane vanga taha ndiyatë cavasen nandya. Xingu xingu ladu tsëhë ndajyë ne, secun ya tsëhë cjuahñu. Ya vëhë ne, tejó ndiya xi ngu nu tjin chan tsëhë tu rë ta, chuva sá sua tu rë. Hane xca rë ya ne, machjirëhë xi tsirqui rë xutacjín jan.
REV 22:3 Ngajan ne, tsajin mé xi chohovëë Nina tsëhë. Ngajan nandya vë tacun cahndë́ rcun xi tsëhë Nina cojo Tsánga. Hane ngajan ne, me xi tacun xi xa rë me ne, cjuahacuenda rë me.
REV 22:4 Scuëë me xcun Nina, hane ñihi rë Nina ne, setaha xten me.
REV 22:5 Mamijí rë ndihi, sa ndihi rë lámpara o sa tsëhë tsuhi ta, Nina Nai naja ne, sua rë me hasen rë me. Hacuaha gubiernu xi sahmi me ne, cjuecani rë yëjë nu, yëjë nixtin.
REV 22:6 Hya xi camá ne, cachja ángel jan cojo ná cuitjin: ―‍Cjua vihi ne, cumacjain nuju tsëhë ta, quixi jain. Nina, Nai naja ne, catsingatju me ángel rë me xi sua cumachaya rë hasen rë xuta xi chja cjua rë me tsëhë xcusun xi xati cumá.
REV 22:7 Chja cjua ta: ―‍Tuhuncuendun xi ngutjen cuinduvá. Jercu ndaja tsëhë xuta xi vetjondaja me sahmichihin me cjua rë libru vihi xi chja tsëhë xcusun xi sehe cumá.
REV 22:8 Juan hmí ná. Cahndë́, hacuaha cahvë xcusun vihi. Hane hya xi camá cahndë́ cahvë ne, caticjaxcun taha ntsacu ángel jan xi catsingacun ná xcusun vihi ta, cjuaharcun ángel jan.
REV 22:9 Peru cachja ángel cuitjin: ―‍¡Xicanihñii! ta, tangun ni chjí naja, ta xa naha ne, tangun cojo xa xi nihñu cojo xingun xi má profeta cojo yahnga xingun xi vetjo me cjua rë libru vihi. Nina ne, me vëhë chjuhunrcun me.
REV 22:10 Hacuaha cachja me cuitjin: ―‍Xicavisaniin sellu cjua xi sehe cumachihin xi hincha libru vihi, ta nixtin rë ne, ha meje cuechu.
REV 22:11 Cuejña xi xuta xi choho sahmi me ne, catjinduju xi choho sahmi me, hane xuta tsehen ne, catjinduju me cojo cjuatsehen rë me, hacuanitjin ni xuta xi quixi me ne, catjinduju me cojo ndiya rë cjuaquixi, hane xuta xi tyjahi cjuatacun rë me, catjinduju me cojo ndiya rë cjuatacun tyjahi.
REV 22:12 Chja me cuitjin: ―‍Tuhuncuendun xi ngutjen cúya. Hane xi cúya ne, nduva cojo chjí nuju. Suá rë jimangu me chuva rë hacutjin xi casahmi me.
REV 22:13 Ngahan ne, sacuaha letra xi vetsihin cojo letra A ne, vijnetaha cojo zeta. Hacui ni ngahan xi ntsacu vetsihin ne, hacui ni ngahan xi vijnetaha. Tejña hisca ntsacu cavetsihin yëjë ni, hane tejña cuaha hya xi cjuë. Matitjun, matjengui ngahan.
REV 22:14 Jemu ndaja tsëhë xuta xi catsityjahi me tsjian rë me cojo sa xi sacu rë me cahndë́ xi sinë me tsëhë ya rë cjuahñu xatsë. Xi cuatjin ne, cuma cuisehen me taha tingotjo rë nandya jan.
REV 22:15 Peru xuta tsehen cuiyuju me ndatsen cojo xuta xi sahmi cjuasurqui, o xi sahmi cjuatsehen ngajñi xihin o sa ngajñi chjuun, o xi tsiquehen, o xi faharcun nina ndyojo o me xi tsihmucacun cjuandacha. Yëjë ni me vëhë cuiyuju me ndatsen nandya.
REV 22:16 ―‍Ngahan, Jesús ne, catsingátju ángel naha xi tsinguixi xcun ngayun xuta yungun cjuaquixi vihi. Ngahan ne, tjë rë David má ngahan. Quihndindaicjin rë David má ngahan. Niñú seti tsëhë nguitajñu má ngahan. ―‍Cuatjin chja Jesús.
REV 22:17 Ngajan xi Hasen rë Nina cojo na xi cuixan cojo Tsánga ne, cjuayangui me cuitjin: ―‍Nduvun. Hacuaha me xi cuihndë cjua vëhë ne, cuichja me cuinitjin ni: ―‍Nduvun. Sa xi xinda nuju ne, nduvun. Sa xi cjueyatacun ne, siuhun tu cuatjo ni nandá rë cjuahñu.
REV 22:18 Suá cumachaya nuju ngayun xi visiñuju cjua rë xujun vihi xi sehe cumachihin ta, sa xi tjin yo xi cuesuntaha sa cjua cojo cjua xi camahindu nguehe, Nina ne, cuesúntaha me cjuañihi xi camahindu xcun xujun vi.
REV 22:19 Hacuanitjin ne, sa xi tjin yo xi cjuahataha rë cjua vihi xi sehe cumachihin, Nina ne, cjuahaxin me cahndë́ xi cumá rë me xcun xujun rë cjuahñu cojo tsëhë nandya xi catsinchacun Nina cojo tsëhë xcusun ndaja xi camahindu xcun libru vihi.
REV 22:20 Hane me xi sua cjuaquixi xi cuicun vi ne, chja me cuitjin: ―‍Hatuxa nduva xati. Cuatjin chja me. Cuatjin ndatjin. Nduvun, Tatá Jesús.
REV 22:21 Quihndë ne, catisatë nuju cjuandaja rë Nai naja, Jesucristu. Cuatjin jain cumá.
