﻿TÀ TADHÁLÉ DHƗ Ɨ.
7.
Àmvolásà dhɨ, má dré ángéló su dhɨ kɨ nòzo, adréràꞌa àyɨ kɨ totó bvò nɨ pá su dhɨ ɨ ꞌásè. Ɨ̀ adré tá lyǎandre su bvò àdhya kɨ kɨkɨ́, ɨ̀ kòviró bvò mi yà, yǐandre mi yà, kó ngalè fa àlo rú yà dhɨ ko. 
Gò má dré ángéló àzya nòzo adréràꞌa angálé kìtú dré apfǒrà lésè. Akódhɨ nda tá ngá adrézó Gìká lɨ́drɨ̀ ro dhɨ nɨ àngɨ̀ lwa móndɨ́ kɨ kándrágá ɨ ꞌásè dhɨ ɨ́be ɨ́ drɨ́gá. Dɨ dré yòzoá kúlí ꞌuꞌù sè ángéló su rìnyí fèzo àyɨ dré bvò kɨ ꞌòzo kònzɨ yǐandre be dhɨ ɨ dré dhɨ: 
«Mɨ̀ kòꞌo bvò ꞌɨ yà, yǐandre ꞌɨ yà, kó ngalè fa ꞌɨ yà dhɨ ɨ kònzɨ ko, tsàle lókyá mà dré dra àngɨ̀ lwàzo àma kɨ Gìká nɨ màrábà kɨ kándrágá ɨ ꞌásè dhɨ ꞌá.» 
Gò má dré móndyá àngɨ̀ nda kɨ lwàzo àyɨ kɨ kándrágá ɨ ꞌásè dhɨ ɨ tá ángopɨ́ ya dhɨ nɨ yìzo: Àyɨ nda ɨ tá móndɨ́ ngùlù-kámá-àlo-drì-nyadhɨ-rì-drì-su, angábhá Ɨ̀sèrélè ànzɨ kɨ súrú títí ɨ lésè dhɨ ꞌɨ. 
Móndyá angábhá Yúdà nɨ súrú lésè, àngɨ̀ lwàzo àyɨ kɨ kándrágá ɨ ꞌásè dhɨ ɨ tá ngùlù-mudrí-drì-rì, móndyá Rùbénà nɨ súrú lésè dhɨ ɨ tá ngùlù-mudrí-drì-rì, móndyá Gádà nɨ súrú lésè dhɨ ɨ tá ngùlù-mudrí-drì-rì, 
móndyá Àsérà nɨ súrú lésè dhɨ ɨ tá ngùlù-mudrí-drì-rì, móndyá Nèfàtálì nɨ súrú lésè dhɨ ɨ tá ngùlù-mudrí-drì-rì, móndyá Mànásè nɨ súrú lésè dhɨ ɨ tá ngùlù-mudrí-drì-rì, 
móndyá Sìmèyónà nɨ súrú lésè dhɨ ɨ tá ngùlù-mudrí-drì-rì, móndyá Lévì nɨ súrú lésè dhɨ ɨ tá ngùlù-mudrí-drì-rì, móndyá Ɨ̀sàkárà nɨ súrú lésè dhɨ ɨ tá ngùlù-mudrí-drì-rì, 
móndyá Zàbùlónà nɨ súrú lésè dhɨ ɨ tá ngùlù-mudrí-drì-rì, móndyá Yòséfà nɨ súrú lésè dhɨ ɨ tá ngùlù-mudrí-drì-rì, móndyá Bènyàmínà nɨ súrú lésè dhɨ ɨ tá ngùlù-mudrí-drì-rì. 
Àmvolásà dhɨ, má dré móndɨ́ lɨ̀zólɨ̀zo kɨtswálé nàle bwà ko, angábhá bvò títí ɨ lésè, súrú títí ɨ lésè, móndyá títí ɨ lésè, ɨ̀ndɨ̀ ti títí ɨ lésè dhɨ kɨ nòzo, adréràꞌa àyɨ kɨ totó lɨrɨ́rà òpɨ̀ àdhya kandrá, ɨ̀ndɨ̀ Kábilígyà Mvá kandrá. À tosó tá àyɨ kánzò kemvekemve dhɨ ɨ sè, ɨ̀ndɨ̀ ɨ̀ ru tá mbíra bí àyɨ drɨ́gá. 
Ɨ̀ adré tá loyóá kúlí ꞌuꞌù sè dhɨ: Rìnyí adrézó móndɨ́ kɨ tɨdrɨ́ dhɨ adré angálé àma kɨ Gìká adrélépi lɨrɨ́lé lɨrɨ́rà òpɨ̀ àdhya dri dhɨ vélésè, ɨ̀ndɨ̀ Kábilígyà Mvá vélésè! 
Ángéló títí dhɨ ɨ̀ totó tá àyɨ adrélé lɨrɨ́rà òpɨ̀ àdhya làgásè kúrú, bhàgo ɨ làgásè kúrú, ɨ̀ndɨ̀ ngá su lɨ́drɨ̀ ro dhɨ ɨ làgásè kúrú. Dɨ ɨ̀ dré ledhézó àyɨ kɨ mì bha kìní mi lɨrɨ́rà òpɨ̀ àdhya kandrá, adrézó Gìká nɨ lɨndrɨ̀ bha, 
adrézó tàá dhɨ: «Kàdré kònɨ̀nɨ! Rúku, mìlanzìlanzì, tògyá, àwoyà, lɨndrɨ̀, tsàle rìnyí be dhɨ ɨ̀ kàdré àma kɨ Gìká dré kóná vésè kólyá! Kònɨ̀nɨ!» 
Gò bhàgo kɨ àlo dré áma lizízó tàzoá dhɨ: «Àyɨ tosólé kánzò kemvekemve dhɨ ɨ sè kònɨ ɨ, àdhibhá ꞌɨ? Ɨ̀ angá ángolésè?» 
Má logó drá dhɨ: «Atálágó, mɨ́ nì be mɨ.» Dɨ akódhɨ tà dhɨ: «Àyɨ nda ɨ móndyá apfòbhá kɨzà kàdrɨ̀ lésè dhɨ ꞌɨ. Ɨ̀ dzɨ̀ àyɨ kɨ kánzò ɨ temvélé Kábilígyà Mvá nɨ kàrɨ́ na dre. 
Dɨ ásà dhɨ, ɨ̀ totó àyɨ Gìká nɨ lɨrɨ́rà òpɨ̀ àdhya kandrá, adrélé lɨ̀sámbò ꞌo akódhɨ dré kìtú be ɨ̀ndɨ̀ ngátsi be akódhɨ nɨ tépelò na. Dɨ dhya adrélépi lɨrɨ́lé lɨrɨ́rà òpɨ̀ àdhya dri nda nɨ bhà mo adrézó túmä́ní àyɨ ɨ́be. 
Tàbirí kɨtswá gòle vélé àyɨ kɨ ꞌo ko, yǐ lovó kɨtswá kpà gòle àyɨ kɨ nde ko. Kìtú àtsɨ́ ꞌɨ yà, kó ngalè àtsɨ́ àzya ꞌɨ yà dhɨ kɨtswá kpà gòle vèle àyɨ rú ko. 
Tàko ko, Kábilígyà Mvá adrélépi lɨrɨ́rà òpɨ̀ àdhya nɨ kɨ́tó ꞌá dhɨ nɨ àyɨ kɨ lɨkɨ́, ngóró kábilígyà lɨkɨ́lépi dré adrélé ꞌòle dhɨ tɨ́nɨ. A nɨ àyɨ kɨ dri lɨ̀zo àyɨ ɨ́be yǐ kidrì adrébhá lɨ́drɨ̀ fe dhɨ ɨ ꞌásè. Dɨ Gìká nɨ mìndra atrì àyɨ misè títí.» 
