﻿Moɓiso ɓɛyɔ ɓukpikilya ndɨ mino Ɓebelenia.
1.
Ka ɓʉndɛlɨ, Kunzi ʉnzɨnɨlya ndɨ ɓotitosu nganga ɓɨkyɔ, na ka ɓopisi dididi pisi ka ɓogyalandʉ. 
Luki limoti, mbɨya-mbɨya yi nɨmʉ, ka masyɛ ma muliɓo mi nɨmana to mino ma, akatɨnzɨnɨlya pisi ko Mikakɨ. Agya ndɨ ɔɓɨlɨ pisi ko Mikakɨ, abiso ɓɛ ɨyɨ nɔ ika ndɛkɛ mombukwana makpʉmʉka masɨ. 
Miki yi nɨnɔ a ɓʉngbanganya ɓa ɨbɨba ko Kunzi, a likingyosi la lɨngʉnʉ ko Kunzi ɓɨkpɛ. Akpokyonisogo ɔɓɨlɨ ɓɛyɔ okwononi mino pisi ka mʉnzɨna kakɨ mo ngu. Nɨyɔ asʉkʉsaga ɓʉnyɛ ka ɓambanzʉ, ika kʉwa ka kʉmbanzɨkanɨkɔ ko Kunzi nɨnɔ wo Ngu. 
Miki a mʉtʉ mudingi kaʉkɨtaga ɓamalaika, kinili, Kunzi apóni lino lidingi kʉgbɛ kakɨtaga nɨlɔ kaɓʉ. 
A ɓɛyɔ, Kunzi kaɓɨkyagʉ ndɨ malaika gʉtʉgʉ ɓemoti aka ɓɛ: «Ɨwɛ, wa mikamɨ, na lɨsyɛ li nɨlɨ, ɨmɨ kʉwa nɨ abakʉ.» Kanaɓikyigʉ ndɛkɛ malaika gʉtʉgʉ ɓemoti aka ɓɛ: «Ɨmɨ, nika ndɛkɛ abakɨ, ɨyɨ Mikamɨ.» 
Luki limoti, wa Kunzi a ndɨ mino katikoku Mikakɨ wa mambwa ka ɔɓɨlɨ, aɓɨkya ndɨ ɓɛ: «Ɓamalaika ɓasɨ ko Kunzi ɓokwononi kabibiso.» 
Aɓɨkya kʉwa ndɨ ko bulya ka ɓamalaika ɓɛ: «Kunzi ʉgyaga ɓamalaika kakɨ kaiko abɛ muvivi ɓagya-ligubo kakɨ abɛ lɨɗaɗa lo ɓuku.» 
Luki limoti, aɓɨkya ndɨ gɔnɨ ko bulya ko Mikakɨ ɓɛ: «Kunziooo, ɓuliki kakʉ ɓa ɓʉngama, a ɓa ɓɛnzɛ na ɓɛnzɛ. Wokpokyonisa ɓʉngama kakʉ ka ɓungbingbili. 
Wapa lɨkpʉmʉka longbingbili, wakya nɨlɔ lanyɛ. Kinili, Kunzi, Kunzi kakʉ, umomosa ndɨ, ugboɗya molingo, ʉpʉnaga ɨwɛ aka luga ka ɓawai-dakʉ.» 
Aɓɨkya ndɨ gɔnɨ ɓɛ: «Katʉkya ka mʉpʉnganagɨ, ɨwɛ, Mombukwono-dosu nɔ wagya ndɨ ɔɓɨlɨ, kʉgʉ wa lɨsyɛ a ligubo la maɓɔkʉ kakʉ. 
Masɨ nɨmɔ olimikatʉ ndɛkɛ, luki limoti, ɨwɛ wika ka ɓɛnzɛ na ɓɛnzɛ. Lɨtɔmbʉ na lɨsyɛ oɓuɓa ndɛkɛ ɓitu abɛ ɨnzanza ya kutuko. 
Oɗukufaga ndɛkɛ abɛ ɓotu, a ɓɛyɔ, ɓigomosyana ndɛkɛ abɛ ɓotu. Luki limoti, ɨwɛ wika ndɛkɛ mʉɗɔngɔnɨ aka, ɔɓɨlɨ kakʉ kikigʉ ndɛkɛ na muliɓo.» 
«Kunzi kaɓɨkyagʉ ndɨ malaika gʉtʉgʉ ɓemoti aka ɓɛ: Wika ka kʉmbanzɨkanɨkɔ kamɨ, kadwɛ kʉ kwa kʉ nubisa ndɛkɛ mino ɓomuyoniso kakʉ kusili wa ɓakagba kakʉ.» 
Ambɛ, ɓamalaika ɓakɛgʉ mbɛyɨ asɨ mambɛngɨ nɨmɔ aka mɔ agugubyaga Kunzi? Ʉtɨkaga kausingya ɓatʉ nɨɓɔ ɓokwononi kainisono na muhukuso. 
