MAT 1:1 ᤕᤧᤛᤢ ᤂᤪᤡᤛ᤻ᤋᤧᤴ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤘᤕᤧᤖᤥ॥ ᤁᤱᤃ ᤂᤢᤏᤧ᤹ ᤁᤢᤎᤠ᤺ᤰᤜᤠ᤹ᤖᤧ ᤂᤢᤏᤡ᤹ ᤔᤡᤱᤛᤪᤠᤖᤥ–
MAT 1:2 ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤀᤡᤛᤜᤠᤁ ᤘᤕᤧ. ᤀᤡᤛᤜᤠᤁᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ ᤘᤕᤧ. ᤕᤠᤁᤢᤒᤖᤧ ᤁᤢᤛ᤻ᤛᤠ᤺ᤜᤠ᤹ ᤕᤜᤢᤍᤠ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤔᤧᤘᤕᤧᤖᤥ॥
MAT 1:3 ᤜᤧᤰᤁᤩᤠᤱ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤐᤣᤖᤣᤈ ᤏᤢ ᤈᤡᤖᤠᤜ ᤘᤕᤧᤳᤇᤡ (ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠ᤺ᤸᤗᤧ ᤁᤢᤔᤡᤱ ᤋᤠᤔᤠᤖ ᤘᤕᤧ). ᤑᤠᤖᤧᤛᤖᤧ ᤁᤢᤛ᤻ᤛᤠ᤺ ᤜᤧᤛᤪᤥᤏ ᤘᤕᤧ. ᤜᤧᤛᤪᤥᤏᤖᤧ ᤁᤢᤛ᤻ᤛᤠ᤺ ᤀᤠᤖᤠᤔ ᤘᤕᤧᤖᤥ॥
MAT 1:4 ᤜᤧᤰᤁᤩᤠᤱ ᤀᤠᤖᤠᤔᤖᤧ ᤁᤢᤛ᤻ᤛᤠ᤺ ᤀᤶᤔᤡᤏᤠᤍᤠᤒ ᤘᤕᤧ. ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ᤺ ᤏᤜᤛᤥᤏ ᤘᤕᤧ. ᤏᤜᤛᤥᤏᤖᤧ ᤁᤢᤛ᤻ᤛᤠ᤺ ᤛᤸᤔᤥᤏ ᤘᤕᤧᤖᤥ॥
MAT 1:5 ᤜᤧᤰᤁᤩᤠᤱ ᤛᤸᤔᤥᤏᤖᤧ ᤁᤢᤛ᤻ᤛᤠ᤺ ᤒᤥᤀᤈ ᤘᤕᤧ (ᤒᤥᤀᤈᤖᤧ ᤁᤢᤶᤔᤠᤖᤧ ᤁᤢᤔᤡᤱ ᤖᤠᤜᤠᤒ ᤘᤕᤧ). ᤒᤥᤀᤈᤖᤧ ᤁᤢᤛ᤻ᤛᤠ᤺ ᤀᤥᤒᤣᤍ ᤘᤕᤧ (ᤂᤧᤸᤗᤧ ᤁᤢᤶᤔᤠᤖᤧ ᤁᤢᤔᤡᤱ ᤖᤢᤌ ᤘᤕᤧ). ᤀᤥᤒᤣᤍᤖᤧ ᤁᤢᤛ᤻ᤛᤠ᤺ ᤕᤡᤛᤤ ᤘᤕᤧ॥
MAT 1:6 ᤜᤧᤰᤁᤩᤠᤱ ᤕᤡᤛᤤᤖᤧ ᤁᤢᤛ᤻ᤛᤠ᤺ ᤍᤠᤀᤢᤍ ᤜᤠᤱᤅᤡᤴ ᤘᤕᤧ॥ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤛᤥᤗᤥᤔᤏ ᤘᤕᤧ (ᤛᤥᤗᤥᤔᤏᤖᤧ ᤁᤢᤶᤔᤠ ᤒᤣᤳᤛᤣᤒᤠ᤺ᤴ ᤀᤢᤖᤡᤕᤠᤜᤖᤧ ᤁᤢᤔᤣ᤺ᤳ ᤘᤕᤧᤖᤥ॥)
MAT 1:7 ᤜᤧᤰᤁᤩᤠᤱ ᤛᤥᤗᤥᤔᤏᤖᤧ ᤁᤢᤛ᤻ᤛᤠ᤺ ᤖᤜᤥᤒᤠᤔ ᤘᤕᤧ. ᤖᤜᤥᤒᤠᤔᤖᤧ ᤁᤢᤛ᤻ᤛᤠ᤺ ᤀᤒᤡᤕᤠ ᤘᤕᤧ. ᤀᤒᤡᤕᤠᤖᤧ ᤁᤢᤛ᤻ᤛᤠ᤺ ᤀᤠᤛᤠ ᤘᤕᤧᤖᤥ॥
MAT 1:8 ᤜᤧᤰᤁᤩᤠᤱ ᤀᤠᤛᤠᤖᤧ ᤁᤢᤛ᤻ᤛᤠ᤺ ᤕᤜᤥᤛᤠᤐᤠᤋ ᤘᤕᤧ. ᤕᤜᤥᤛᤠᤐᤠᤋᤖᤧ ᤁᤢᤛ᤻ᤛᤠ᤺ ᤕᤜᤥᤖᤠᤔ ᤘᤕᤧ. ᤕᤜᤥᤖᤠᤔᤖᤧ ᤁᤢᤛ᤻ᤛᤠ᤺ ᤀᤢᤈ᤻ᤈᤡᤕᤠᤜ ᤘᤕᤧᤖᤥ॥
MAT 1:9 ᤜᤧᤰᤁᤩᤠᤱ ᤀᤢᤈ᤻ᤈᤡᤕᤠᤜᤖᤧ ᤁᤢᤛ᤻ᤛᤠ᤺ ᤕᤥᤋᤠᤔ ᤘᤕᤧ. ᤕᤥᤋᤠᤔᤖᤧ ᤁᤢᤛ᤻ᤛᤠ᤺ ᤀᤠᤜᤠᤈ ᤘᤕᤧ. ᤀᤠᤜᤠᤈᤖᤧ ᤁᤢᤛ᤻ᤛᤠ᤺ ᤜᤡᤈᤁᤡᤕᤠ ᤘᤕᤧᤖᤥ॥
MAT 1:10 ᤜᤧᤰᤁᤩᤠᤱ ᤜᤡᤈᤁᤡᤕᤠᤖᤧ ᤁᤢᤛ᤻ᤛᤠ᤺ ᤔᤏᤛ᤻ᤛᤣ ᤘᤕᤧ. ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ᤺ ᤀᤶᤔᤥᤏ ᤘᤕᤧ. ᤀᤶᤔᤥᤏᤖᤧ ᤁᤢᤛ᤻ᤛᤠ᤺ ᤕᤥᤛᤡᤕᤠᤜ ᤘᤕᤧᤖᤥ॥
MAT 1:11 ᤜᤧᤰᤁᤩᤠᤱ ᤕᤥᤛᤡᤕᤠᤜᤖᤧ ᤁᤢᤛ᤻ᤛᤠ᤺ᤜᤠ᤹ ᤕᤁᤥᤏᤡᤕᤠᤛ ᤏᤢ ᤁᤢᤴᤛᤠ᤹ᤛᤡ ᤔᤧᤘᤕᤧᤖᤥ (ᤂᤧᤱᤜᤠ᤹ᤃ ᤀᤡᤛᤪᤠᤀᤡᤗᤡᤜᤠ᤹ ᤒᤧᤒᤡᤗᤥᤏ ᤗᤠᤈᤣ᤹ᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤃᤳᤋᤢᤛᤡᤒᤠ ᤕᤧᤶᤔᤥ ᤛᤠᤔᤧᤘᤠ᤺ᤴᤇᤡᤱᤅᤠᤱ ᤔᤧᤘᤕᤧᤖᤥ)॥
MAT 1:12 ᤒᤧᤒᤡᤗᤥ᤺ᤴᤏᤥ ᤔᤧᤍᤣ᤹ᤖᤢᤛᤡᤀᤠᤱ ᤕᤠᤱᤛᤡ ᤕᤁᤥᤏᤡᤕᤠᤛᤖᤧ ᤁᤢᤛ᤻ᤛᤠ᤺ ᤛᤠᤗᤋᤡᤀᤣᤗ ᤘᤕᤧ. ᤜᤧᤰᤁᤩᤠᤱ ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ᤺ ᤕᤖᤢᤒᤠᤒᤣᤗ ᤘᤕᤧᤖᤥ॥
MAT 1:13 ᤜᤧᤰᤁᤩᤠᤱ ᤕᤖᤢᤒᤠᤒᤧᤗᤖᤧ ᤁᤢᤛ᤻ᤛᤠ᤺ ᤀᤒᤡᤀᤢᤍ ᤘᤕᤧ. ᤀᤒᤡᤀᤢᤍᤖᤧ ᤁᤢᤛ᤻ᤛᤠ᤺ ᤀᤣᤗᤡᤕᤠᤁᤡᤔ ᤘᤕᤧ. ᤀᤣᤗᤡᤕᤠᤁᤡᤔᤖᤧ ᤁᤢᤛ᤻ᤛᤠ᤺ ᤀᤠᤈᤥᤖ ᤘᤕᤧᤖᤥ॥
MAT 1:14 ᤜᤧᤰᤁᤩᤠᤱ ᤀᤠᤈᤥᤖᤖᤧ ᤁᤢᤛ᤻ᤛᤠ᤺ ᤛᤠᤍᤥᤁ ᤘᤕᤧ. ᤛᤠᤍᤥᤁᤖᤧ ᤁᤢᤛ᤻ᤛᤠ᤺ ᤀᤠᤂᤡᤔ ᤘᤕᤧ. ᤀᤠᤂᤡᤔᤖᤧ ᤁᤢᤛ᤻ᤛᤠ᤺ ᤀᤣᤗᤡᤀᤢᤍ ᤘᤕᤧᤖᤥ॥
MAT 1:15 ᤜᤧᤰᤁᤩᤠᤱ ᤀᤣᤗᤡᤀᤢᤍᤖᤧ ᤁᤢᤛ᤻ᤛᤠ᤺ ᤀᤣᤗᤠᤈᤠᤖ ᤘᤕᤧ. ᤀᤣᤗᤠᤈᤠᤖᤖᤧ ᤁᤢᤛ᤻ᤛᤠ᤺ ᤔᤳᤋᤠᤏ ᤘᤕᤧ. ᤔᤳᤋᤠᤏᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ ᤘᤕᤧᤖᤥ॥
MAT 1:16 ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤢᤛᤢᤑ ᤘᤕᤧ॥ ᤕᤢᤛᤢᤑᤧᤴ ᤔᤖᤡᤕᤔᤖᤧ ᤁᤢᤕᤧᤶᤒᤠ᤹ ᤘᤕᤧ. ᤜᤧᤰᤁᤩᤠᤱ ᤜᤠᤒᤠ ᤁᤴ ᤔᤖᤡᤕᤶᤔᤡᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠ ᤕᤧᤛᤢ᤺ᤴ ᤛᤠᤘᤠ᤺ᤴᤇᤡᤱᤗᤥ॥
MAT 1:17 ᤀᤰᤂᤣᤗ᤹ᤖᤡᤰ ᤀᤒᤪᤠᤜᤠᤔᤗᤠᤶ ᤍᤠᤀᤢᤍ ᤜᤠᤱ ᤌᤠᤖᤡᤰ ᤌᤡᤰ-ᤗᤡ (᥇᥊) ᤌᤠ᤺ᤰ ᤔᤧᤘᤕᤧ. ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤗᤠᤶ ᤒᤧᤒᤡᤗᤥᤏ ᤗᤠᤈᤣ᤹ᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤃᤳᤋᤢᤛᤡᤒᤠ ᤕᤧᤶ ᤌᤠᤖᤡᤰ ᤌᤡᤰ-ᤗᤡ (᥇᥊) ᤌᤠ᤺ᤰ ᤔᤧᤘᤕᤧ. ᤜᤧᤰᤁᤩᤠᤱ ᤒᤧᤒᤡᤗᤥ᤺ᤴᤏᤥ ᤐᤢᤱᤗᤠᤎᤠᤒᤠ ᤔᤧᤈᤥᤃᤢᤛᤡᤀᤠᤱ ᤔᤧᤍᤣ᤹ᤖᤢᤛᤡᤒᤠ ᤕᤧᤶᤔᤠᤱᤎᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤛᤠᤘᤠ᤺ᤴᤇᤡᤱᤒᤠ ᤕᤧᤶ ᤌᤠᤖᤡᤰ ᤌᤡᤰ-ᤗᤡ (᥇᥊) ᤌᤠ᤺ᤰ ᤔᤧᤘᤕᤧᤖᤥ॥
MAT 1:18 ᤀᤠᤸᤗ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤠᤘᤠ᤺ᤴᤇᤡᤱᤔᤠᤴ ᤀᤰᤂᤣᤗ᤹ᤖᤡᤰ ᤐᤥ᤺ᤰᤂᤧᤖᤥ–ᤁᤢᤶᤔᤠ ᤔᤖᤡᤕᤔᤖᤧ ᤁᤢᤔᤣ᤺ᤰᤂᤡᤶ ᤐᤥ᤺ᤱᤔᤠ ᤐᤠ᤺ᤴᤏᤡᤴ ᤕᤢᤛᤢᤑᤧᤴᤏᤢ ᤐᤢ᤹ᤖᤧᤀᤠᤱ ᤘᤕᤧ. ᤁᤖ ᤂᤢᤴᤇᤡ᤹ ᤔᤣ᤺ᤰᤂᤡᤶ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤖᤥ॥
MAT 1:19 ᤂᤢᤏᤧ᤹ᤏᤢ ᤁᤢᤔᤣ᤺ᤰᤂᤡᤶ ᤐᤠ᤺ᤴ ᤁᤧᤒᤢ᤹ᤒᤠ ᤕᤢᤛᤢᤑᤧᤱᤃ ᤛᤠᤶᤕᤥᤏᤡᤒᤠ ᤔᤏᤠ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤁᤢᤈᤠ᤺ᤳᤌᤡ ᤔᤧᤒᤣ᤺ᤰᤏᤧᤴᤗ ᤑᤠ᤹ᤀᤠᤱ ᤂᤧᤸᤗᤧ ᤛᤫᤠ᤺ᤳᤋᤠᤱ ᤏᤠ᤹ᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥
MAT 1:20 ᤁᤖ ᤜᤧᤰᤁᤣ ᤀᤡ᤺ᤳᤋᤢᤖ ᤘᤕᤧᤸᤗᤧ ᤛᤧᤵᤔᤠᤱᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤖᤥ. “ᤍᤠᤀᤢᤍᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤢᤛᤢᤵᤑᤣ. ᤂᤧᤏᤧ᤹ ᤔᤖᤡᤕᤶᤔᤡᤴ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤠᤱ ᤜᤡᤶᤔᤥ ᤋᤠ᤺ᤵᤔᤠ ᤔᤧᤃᤡᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥᤒᤠ ᤀᤅᤧ᤺ᤰᤘᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶᤒᤠ ᤜᤠᤱᤛᤡᤱᤒᤠᤖᤥ॥
MAT 1:21 ᤂᤢᤏᤧ᤹ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤳᤋᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤡᤱᤅᤡᤴ ᤕᤧᤛᤢ ᤘᤠ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤋᤠᤱᤛᤧ᤺ᤵᤋᤢᤛᤡ᤹ᤖᤥ॥”
MAT 1:22 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤗᤠᤶ ᤕᤜᤘᤣ ᤍᤠᤱᤒᤠᤸᤗᤧ ᤀᤢᤴᤇᤣ᤺ᤴ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤒᤠᤖᤥ–
MAT 1:23 “ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴ ᤔᤧᤴᤇᤢᤰᤔᤠ ᤐᤥ᤺ᤱᤅᤠᤱ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤳᤋᤢ᤹. ᤜᤧᤰᤁᤩᤠᤱ ᤂᤧᤴ ᤀᤡᤶᤔᤠᤏᤢᤀᤣᤗ ᤔᤧᤔᤧᤳᤋᤢ᤹ᤖᤥ॥ ‘ᤀᤡᤶᤔᤠᤏᤢᤀᤣᤗ’ ᤑᤠ᤹ᤀᤡᤱᤃ ‘ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤏᤢ ᤘᤠ᤹’ ᤐᤥ᤺ᤱᤗᤥ॥”
MAT 1:24 ᤀᤠᤸᤗ ᤕᤢᤛᤢᤑᤧᤴ ᤛᤧᤵᤔᤠᤱᤔᤥᤗᤠᤶ ᤛᤥᤖᤧᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤖᤡᤕᤶᤔᤡᤴ ᤔᤣ᤺ᤰᤂᤡᤶ ᤔᤧᤳᤋᤢ. ᤜᤧᤰᤁᤩᤠᤱ ᤁᤢᤜᤡᤶᤔᤥ ᤋᤠᤖᤢᤖᤥ॥
MAT 1:25 ᤁᤖ ᤔᤖᤡᤕᤶᤔᤡᤴ ᤔᤧᤴᤇᤢᤰᤔᤠ ᤘᤕᤧᤖ ᤌᤠᤖᤡᤰ ᤂᤢᤴᤇᤡ᤹ ᤛᤥᤖᤡᤰ ᤔᤧᤀᤡᤵᤛᤧᤳᤇᤡᤴᤗᤥ॥ ᤕᤠᤱᤛᤡ ᤔᤖᤡᤕᤶᤔᤡᤸᤗᤧ ᤛᤠ᤺ ᤁᤳᤋᤢᤀᤠᤱ ᤕᤢᤛᤢᤑᤖᤧ ᤂᤧᤴ ᤀᤅᤧ᤺ᤰᤘᤠ᤺ᤴ ᤕᤧᤛᤢ ᤔᤡᤱ ᤘᤠ᤺ᤳᤋᤢᤖᤥ॥
MAT 2:1 ᤀᤠᤸᤗ ᤕᤧᤛᤢ᤺ᤴ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤒᤧᤌᤗᤣᤜᤧᤔ ᤐᤠᤱᤈᤢᤶᤔᤥ ᤛᤠᤘᤠ᤺ᤴᤇᤡᤱᤒᤠ ᤕᤧᤶᤔᤥ ᤜᤧᤖᤥᤍ ᤜᤠᤱᤅᤡᤸᤗᤧ ᤂᤧᤵᤔᤥ ᤜᤠᤱ ᤆᤥᤃᤢᤖ ᤘᤕᤧᤖᤥ॥ ᤕᤧᤛᤢ᤺ᤴ ᤛᤠᤘᤠ᤺ᤴᤇᤡᤱᤅᤠᤱ ᤏᤠᤶᤃᤧᤴ ᤐᤡᤛᤠᤱᤒᤠ ᤗᤠᤈᤣ᤹ᤗᤠᤶ ᤛᤡᤰᤁᤢᤶᤏᤡᤒᤠ ᤂᤠᤃᤧᤀᤡᤰᤐᤠᤜᤠ᤹ ᤕᤖᤢᤛᤗᤧᤶᤔᤥ ᤔᤧᤍᤩᤧ. ᤜᤧᤰᤁᤩᤠᤱ
MAT 2:2 ᤀᤰᤂᤣᤗ᤹ᤖᤡᤰ ᤐᤠ᤺ᤴ ᤛᤣ᤺ᤴᤔᤧᤍᤥᤛᤢ. “ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤁᤧᤒᤥ᤺ᤱᤒᤠᤀᤠᤱ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤀᤠᤳᤋᤥ ᤘᤠ᤹ᤒᤣ᥅ ᤀᤠᤏᤡᤃᤧ ᤏᤠᤶᤃᤧᤴ ᤐᤡᤛᤠᤱ ᤁᤢᤛᤠᤘᤠ᤺ᤴᤇᤡᤱᤔᤠᤸᤗᤧᤴ ᤔᤡᤰᤛᤣ᤺ᤴ ᤁᤧᤒᤡᤒᤠ ᤂᤣ᤺ᤶᤛᤡᤰᤁᤡᤴ ᤏᤡ᤺ᤛᤢᤶᤒᤧᤀᤠᤱ ᤂᤢᤏᤧ᤹ ᤁᤢᤛᤣᤘᤠ ᤆᤥ᤺ᤰᤛᤧ ᤋᤩᤧ᤹ᤀᤡᤃᤧᤒᤠᤖᤥ॥”
MAT 2:3 ᤜᤧᤖᤥᤍ ᤜᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤏᤡᤱᤘᤠ᤹ᤒᤠᤸᤗᤧ ᤛᤠ᤹ᤖᤡᤰ ᤕᤧ᤺ᤰᤂᤢ. ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ᤏᤢᤀᤣ ᤕᤖᤢᤛᤗᤧᤶᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ᤒᤠᤸᤗᤧ ᤛᤠ᤹ᤖᤡᤰ ᤕᤧ᤺ᤰᤂᤢᤛᤡᤖᤥ॥
MAT 2:4 ᤜᤧᤖᤥᤍ ᤜᤠᤱᤅᤡᤸᤗᤧ ᤁᤧᤖᤧᤰ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠᤴ ᤀᤠᤳᤋᤥ ᤛᤠᤘᤠ᤺ᤴᤇᤡᤱᤔᤠ ᤁᤧᤒᤥ᤺ᤱᤒᤠ ᤘᤠ᤹ᤒᤣ ᤗ᤹ᤖᤡᤰ ᤛᤣ᤺ᤴᤍᤥᤛᤢᤛᤡ॥
MAT 2:5 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤕᤜᤢᤍᤡᤕᤠ ᤌᤢᤶᤔᤥᤒᤠ ᤒᤧᤌᤗᤣᤜᤧᤶᤔᤥ ᤂᤢᤏᤧ᤹ ᤛᤠᤘᤠ᤺ᤴᤇᤡᤱᤔᤠ ᤁᤧᤒᤥ᤺ᤱᤒᤠ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ­ –
MAT 2:6 ‘ᤕᤜᤢᤍᤡᤕᤠ ᤌᤢᤶᤔᤥᤒᤠ ᤒᤧᤌᤗᤣᤜᤧᤶᤔᤣ. ᤂᤧᤏᤧ᤹ᤃ ᤕᤜᤢᤍᤡᤕᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤛᤠ᤹ᤖᤡᤰ ᤁᤧᤕᤧᤰᤐᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤒᤠᤱᤈᤢᤶᤗᤠᤶ ᤜᤠᤱᤕᤢᤰᤐᤠᤎᤡᤰ ᤋᤠ᤺ᤖᤥ. ᤂᤢᤏᤧ᤹ᤃ ᤔᤧᤸᤗᤢᤰᤁᤶᤒᤠ ᤁᤢᤀᤡᤛᤡ᤺ᤰ ᤐᤥ᤺ᤱᤅᤠᤱ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤐᤥ᤺ᤱᤗᤥ॥’”
MAT 2:7 ᤜᤧᤖᤥᤍ ᤜᤠᤱᤅᤡᤸᤗᤧ ᤂᤧᤴ ᤛᤡᤰᤁᤢᤶᤏᤡᤒᤠ ᤂᤠᤃᤧᤀᤡᤰᤐᤠᤜᤠ᤹ ᤛᤫᤠ᤺ᤳᤋᤠᤱ ᤀᤢ᤺ᤳᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤂᤣ᤺ᤶᤛᤡᤰᤐᤠᤴ ᤌᤠ᤺ᤶᤛᤡᤱᤒᤠ ᤁᤢᤈᤧᤰ ᤕᤧᤶᤔᤡᤴ ᤏᤡᤱᤘᤠ᤹ ᤂᤥ᤺ᤛᤢ॥
MAT 2:8 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤒᤧᤌᤗᤣᤜᤧᤶᤔᤥ ᤐᤠᤱᤄᤢᤍᤣ᤺ᤛᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤀᤅᤧ᤺ᤰᤘᤠ᤺ᤴ ᤁᤥ᤺ᤳᤋᤧᤶᤔᤧ᤹॥ ᤂᤧᤴ ᤀᤅᤧ᤺ᤰᤘᤠ᤺ᤴ ᤁᤧᤄᤥ᤺ᤛᤢᤶᤏᤧ ᤑᤠ᤹ᤃᤪ ᤑᤧᤖᤧᤶᤔᤧ᤹ᤀᤠᤱ ᤀᤡᤱᤃᤠ᤹ ᤀᤠᤔᤧᤳᤋᤧᤶᤔᤧ᤹ᤀᤥ॥ ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤛᤣᤘᤠ ᤔᤧᤳᤋᤢᤱᤗᤥ॥”
MAT 2:9 ᤜᤧᤖᤥᤍ ᤜᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤔᤧᤎᤠᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤂᤣ᤺ᤶᤛᤡᤰᤐᤠᤴ ᤕᤠᤶᤔᤥ ᤔᤧᤏᤡ᤺ᤛᤢ ᤜᤧᤰᤁᤩᤠᤱ ᤂᤢᤏᤡ᤹ ᤋᤃᤡ ᤋᤃᤡ ᤐᤣᤀᤠᤱ ᤀᤅᤧ᤺ᤰᤘᤠ ᤘᤕᤧᤒᤠ ᤜᤡᤶ ᤁᤢᤍᤥ᤺ᤵᤔᤠ ᤁᤧᤖᤧᤀᤠᤱ ᤑᤴᤇᤡᤱᤗᤥ॥
MAT 2:10 ᤂᤧᤱᤜᤠ᤹ᤖᤧ ᤂᤧᤴ ᤂᤣ᤺ᤶᤛᤡᤰᤐᤠᤴ ᤕᤠᤶᤔᤥ ᤔᤧᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧ॥
MAT 2:11 ᤜᤡᤶ ᤛᤡᤃᤠᤱ ᤔᤧᤗᤠ᤺ᤛ᤻ᤛᤧᤸᤗᤧ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ ᤔᤖᤡᤕᤶᤔᤡᤴ ᤔᤧᤏᤡ᤺ᤛᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤛᤠᤶᤒᤥ᤺ᤴᤏᤠᤱ ᤀᤅᤧ᤺ᤰᤘᤠ᤺ᤴ ᤛᤣᤘᤠ ᤔᤧᤔᤧᤳᤋᤢ. ᤜᤧᤰᤁᤩᤠᤱ ᤛᤢ᤺ᤰᤘᤠ᤺ᤴ ᤔᤧᤓᤠ᤺ᤰᤂᤢᤀᤠᤱ ᤛᤠᤶᤔᤩᤠᤱ. ᤌᤡᤰ ᤐᤖᤡᤰᤐᤠ ᤀᤡᤔᤧᤸᤗᤢᤱᤒᤠ ᤛᤠᤱᤛᤡᤱ ᤏᤢ ᤁᤢᤏᤠᤶ ᤁᤧᤏᤢ᤹ᤒᤠ ᤔᤢᤷᤖᤜᤠ᤹ ᤔᤧᤍᤥ᤺ᤴᤍᤢ ᤔᤧᤒᤡᤖᤢᤖᤥ॥
MAT 2:12 ᤜᤧᤰᤁᤩᤠᤱ ᤛᤧᤵᤔᤠᤱᤔᤥ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤜᤧᤖᤥᤍ ᤜᤠᤱᤅᤡᤸᤗᤥ ᤔᤧᤏᤢ᤺ᤰᤂᤧᤶ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ ᤗ᤹ᤖᤡᤰ ᤛᤠᤶᤍᤡᤱ ᤐᤡᤖᤢᤛᤡᤒᤠᤸᤗᤧ ᤂᤧᤱᤜᤠ᤹ ᤘᤣ᤹ᤗᤠᤶ ᤀᤠᤒᤠᤅᤣ ᤗᤠᤈᤣ᤹ᤀᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
MAT 2:13 ᤂᤧᤴ ᤛᤡᤰᤁᤢᤶᤏᤡᤒᤠ ᤂᤠᤃᤧᤀᤡᤰᤐᤠᤜᤠ᤹ ᤔᤧᤒᤣ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤕᤢᤛᤢᤑᤖᤧ ᤁᤢᤛᤧᤵᤔᤠᤱᤔᤥ ᤌᤠ᤺ᤴᤇᤡᤱᤅᤠᤱ ᤀᤰᤂᤣ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ᤺ᤴ ᤋᤣ᤹ᤖᤧᤛᤧ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤂᤧᤳᤇᤡᤱ ᤐᤣᤃᤧ᤹. ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤶᤔᤧᤳᤋᤣ ᤌᤠᤖᤡᤰ ᤂᤧᤏᤧ᤹ ᤂᤧᤵᤔᤥᤀᤣ ᤘᤕᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤀᤅᤧ᤺ᤰᤘᤠ᤺ᤴ ᤛᤧᤵᤔᤠ ᤑᤠ᤹ᤀᤠᤱ ᤁᤥ᤺ᤳᤋᤢᤖ ᤘᤠ᤹ᤖᤥ॥”
MAT 2:14 ᤒᤠ ᤂᤧᤴ ᤛᤧᤴᤍᤡᤰᤛᤠ ᤕᤢᤛᤢᤑᤖᤧ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ᤺ᤴ ᤋᤣ᤹ᤖᤢᤛᤡᤀᤠᤱ ᤔᤡᤛᤪᤀᤥ ᤂᤧᤳᤇᤡᤱ ᤐᤣᤖᤥ॥
MAT 2:15 ᤜᤧᤖᤥᤍ ᤜᤠᤱᤅᤡᤴ ᤔᤧᤴᤇᤡ᤺ᤀᤣ ᤌᤠᤖᤡᤰ ᤂᤢᤏᤧ᤹ ᤂᤧᤵᤔᤥᤀᤣ ᤕᤠ᤺ᤰᤋᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤗᤠᤶ ᤀᤡᤱᤃᤠ᤹ ᤀᤠᤛ᤻ᤛᤠ᤺ᤴ ᤔᤡᤛᤪᤗᤠᤶ ᤗᤠ᤺ᤰᤁᤠᤳ ᤀᤢ᤺ᤳᤋᤢᤱᤗᤥ ᤗ᤹ᤖᤡᤰ ᤀᤢᤴᤇᤣ᤺ᤴ ᤐᤠ᤺ᤳᤋᤢᤒᤠᤴ ᤁᤧᤖᤧᤖᤥ॥
MAT 2:16 ᤀᤠᤸᤗ ᤜᤧᤖᤥᤍ ᤜᤠᤱᤅᤡᤸᤗᤧ ᤛᤡᤰᤁᤢᤶᤏᤡᤒᤠ ᤂᤠᤃᤧᤀᤡᤰᤐᤠᤜᤠ᤹ᤖᤧ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤀᤡᤱᤔᤧᤗᤧᤰᤋᤢᤀᤠᤱ ᤘᤣ᤹ ᤗᤠᤶ ᤔᤧᤒᤣᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤒᤧᤌᤗᤣᤜᤧᤔ ᤏᤢ ᤂᤧᤴ ᤂᤡᤖᤡᤒᤠ ᤋᤱᤒᤣ ᤏᤧᤳᤇᤡᤀᤠᤱ ᤕᤥᤒᤠ ᤕᤧᤶᤒᤡᤳᤇᤠ᤹ ᤀᤅᤧ᤺ᤰᤘᤠ ᤛᤠ᤺ᤜᤠ᤹ ᤁᤧᤖᤧᤰ ᤛᤧᤵᤐᤠᤱᤄᤢᤛᤡᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤡᤰᤁᤢᤶᤏᤡᤒᤠ ᤂᤠᤃᤧᤀᤡᤰᤐᤠᤜᤠ᤹ᤗᤠᤶ ᤂᤣ᤺ᤶᤛᤡᤰᤐᤠᤴ ᤋᤱᤒᤣ ᤏᤧᤳᤇᤡᤀᤠᤱᤎᤥ ᤋᤃᤡ ᤌᤠ᤺ᤶᤛᤡᤱᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤘᤕᤧᤖᤥ॥
MAT 2:17 ᤂᤧᤱᤃ ᤕᤷᤔᤡᤕᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤴᤇᤣ᤺ᤴ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ–
MAT 2:18 “ᤁᤧᤜᤠ᤺ᤵᤔᤠ ᤁᤧᤓᤡ᤺ᤰᤔᤠ ᤏᤢ ᤔᤣᤖᤡᤱ ᤁᤧᤎᤰᤔᤠ ᤕᤶᤒᤠ ᤀᤡᤰᤗᤠ᤺ᤴ ᤖᤠᤔᤠ ᤐᤠᤱᤈᤢᤶᤔᤥ ᤂᤧᤶᤍᤧᤳᤗᤥ. ᤖᤠᤜᤧᤗᤖᤧ ᤁᤢᤛ᤻ᤛᤠ᤺ᤜᤠ᤹ ᤜᤠ᤺ᤵᤋᤢᤛᤡ᤹ᤖᤥ॥ ᤂᤧᤱᤃ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤔᤧᤍᤧᤴᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤁᤧᤖᤧᤰ ᤔᤧᤛᤩᤧᤖᤥ॥”
MAT 2:19 ᤀᤠᤸᤗ ᤜᤧᤖᤥᤍ ᤜᤠᤱᤅᤡᤴ ᤛᤩᤧᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤕᤢᤛᤢᤑᤧᤴᤏᤢ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤁᤢᤛᤧᤵᤔᤠᤱᤔᤥ ᤌᤠ᤺ᤴᤇᤡᤱᤅᤠᤱ
MAT 2:20 ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ᤺ᤴ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤋᤣ᤹ᤖᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤅᤧ᤺ᤰᤘᤠ᤺ᤴ ᤛᤧᤵᤔᤠ ᤁᤧᤃᤥ᤺ᤵᤐᤧᤴ ᤛᤩᤧᤀᤠᤱ ᤜᤥ᤺ᤵᤗᤥ॥”
MAT 2:21 ᤂᤧᤸᤗᤧ ᤆᤥᤃᤢᤸᤗᤧ ᤕᤢᤛᤢᤑᤖᤧ ᤀᤅᤧ᤺ᤰᤘᤠ᤺ᤴ ᤏᤢ ᤁᤢᤶᤔᤠ᤺ᤴ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤋᤣ᤹ᤖᤢᤛᤡ॥
MAT 2:22 ᤁᤖ ᤜᤧᤖᤥᤍ ᤜᤠᤱᤅᤡᤴ ᤛᤩᤧᤀᤠᤱ ᤂᤢᤏᤧ᤹ ᤁᤢᤗᤧᤰᤘᤠ ᤁᤢᤛ᤻ᤛᤠ᤺ ᤀᤷᤂᤡᤗᤠᤀᤢᤛᤖᤧ ᤕᤜᤢᤍᤡᤕᤠ ᤌᤢᤶᤔᤥ ᤜᤠᤱ ᤆᤥᤃᤢᤖ ᤘᤠ᤹ ᤁᤧᤗ᤹ᤒᤠᤴ ᤕᤢᤛᤢᤑᤖᤧ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤢᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤁᤡ᤺ᤛᤧ॥ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤕᤠᤶᤔᤥ ᤛᤧᤵᤔᤠᤱᤔᤥ ᤛᤠᤶᤍᤡᤱ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤃᤠᤗᤡᤗ ᤌᤢᤶᤔᤥ ᤐᤣᤀᤠᤱ
MAT 2:23 ᤏᤠᤛᤖᤋ ᤐᤠᤱᤈᤢᤶᤔᤥ ᤘᤠ᤹ᤔᤠ ᤜᤣ᤺ᤰᤋᤧᤖᤥ॥ ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤢᤰᤋᤢᤒᤠᤱᤃ ᤏᤠᤛᤖᤡ ᤔᤧᤔᤧᤳᤋᤢ” ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ॥
MAT 3:1 ᤂᤧᤴ ᤕᤧᤶᤔᤥ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤔᤧᤵᤔᤏᤠᤒᤠ ᤔᤏᤠ᤺ᤴ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤖ ᤋᤩᤧ.
MAT 3:2 “ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥”
MAT 3:3 ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥ᤺ᤴ ᤆᤥᤃᤧᤶᤔᤧ᤹᥄’”
MAT 3:4 ᤀᤠᤸᤗ ᤕᤢᤜᤢᤴᤏᤠ᤺ᤸᤗᤧ ᤀᤢᤔᤣᤖᤧ ᤁᤢᤔᤢᤖᤡᤰᤗᤠᤶ ᤌᤠᤰᤔᤏᤠᤒᤠ ᤋᤣ᤺ᤳᤋᤡᤴ ᤆᤠᤰᤂᤢᤀᤠᤱ ᤛᤧᤜᤥᤒᤠ ᤑ᤹ᤀᤡ ᤕᤢᤵᤛᤢᤖᤥ॥ ᤂᤢᤏᤧ᤹ ᤁᤢᤈᤠᤔᤠᤱᤃ ᤏᤡ᤺ᤱᤄᤢ᤺ᤰᤘᤠ ᤏᤢ ᤋᤠᤶᤓᤢᤱ ᤛᤰᤘᤠᤄᤢ ᤘᤕᤧᤖᤥ॥
MAT 3:5 ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤏᤢ ᤕᤜᤢᤍᤡᤕᤠ ᤌᤢᤶ ᤜᤧᤰᤁᤩᤠᤱ ᤕᤷᤍᤏ ᤕᤱᤄᤱ ᤂᤡᤖᤡᤒᤠ ᤁᤧᤖᤧᤰ ᤌᤢᤶᤜᤠ᤹ᤀᤥᤗᤠᤶ ᤔᤏᤠᤜᤠ᤹ ᤁᤢᤍᤢᤶᤛᤧ
MAT 3:6 ᤔᤧᤍᤩᤧᤀᤠᤱ ᤀᤡᤱᤃᤠ᤹ ᤗᤠᤕᤥᤒᤠᤀᤠᤖᤥ ᤔᤧᤒᤠ᤺ᤳᤋᤢᤖ ᤕᤷᤍᤏ ᤕᤱᤄᤱᤅᤥ ᤂᤢᤏᤧ᤹ᤗᤠᤶ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥
MAT 3:7 ᤁᤖ ᤕᤖᤡᤰ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤢᤏᤧ᤹ᤀᤥ ᤔᤧᤍᤩᤧᤖ ᤔᤧᤒᤳᤇᤧᤒᤠ ᤏᤡ᤺ᤛᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤑᤧ᤺ᤰᤋᤢᤛᤡ. “ᤀᤛᤣ᤺ᤰᤛᤠᤛᤣ. ᤂᤡᤏᤡ᤹ ᤁᤴ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤂᤧᤳᤇᤡᤱᤅᤧᤶᤔᤧ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤡᤒᤣ᥅
MAT 3:8 ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥
MAT 3:9 ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ᤛᤡᤃᤧ. ᤂᤧᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱᤗᤠᤶ ᤂᤧᤳᤇᤡᤱᤔᤠ ᤛᤢᤰᤋᤡᤃᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ᤖᤥ॥
MAT 3:10 ᤀᤠᤸᤗᤥᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤡᤸᤗᤧ ᤋ᤺ᤴᤍᤡᤱᤃ ᤛᤡᤱᤒᤢᤱᤔᤥ ᤂᤠ ᤆᤢᤰᤔᤠ ᤀᤡ᤺ᤳᤋᤧᤀᤠᤱ ᤘᤠ᤹॥ ᤏᤢ᤺ᤒᤠ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠᤒᤠ ᤛᤡᤱᤒᤢᤱᤜᤠ᤹ ᤁᤧᤖᤧᤰ ᤋᤠᤱᤔᤠᤀᤠᤱ ᤔᤡᤀᤥ ᤗᤠᤵᤑᤢᤔᤠ ᤐᤥ᤺ᤱᤗᤥ॥
MAT 3:11 ᤗᤠᤕᤥᤗᤠᤶ ᤁᤧᤜᤡᤴᤍᤡᤀᤠᤱ ᤀᤡᤱᤃᤠ᤹ᤃ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤏᤡᤱᤗᤥ. ᤁᤖ ᤀᤠᤀᤣᤃᤠᤱ ᤁᤧᤍᤠ᤺ᤒᤧᤱᤃ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤔᤢᤰᤛᤠᤶᤛᤠᤒᤠ ᤆᤥ᤺ᤰᤗᤥ॥ ᤂᤢᤏᤧ᤹ ᤁᤢᤗᤠᤱᤛᤢ᤺ᤵᤜᤠ᤹ ᤀᤡᤱᤃᤠ᤹ ᤕᤥ᤺ᤰ ᤁᤢᤀᤡᤛᤡ᤺ᤰ ᤐᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤢᤏᤧ᤹ ᤛᤣᤛᤣᤔᤠᤱ ᤏᤢ ᤔᤡ᤺ᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ᤹ᤖᤥ॥
MAT 3:12 ᤁᤢᤓ᤹ᤀᤣ᤺ᤳᤋᤡᤸᤗᤧ ᤛᤡ᤺ᤴ ᤀᤠ᤺ᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤕᤠᤖᤡᤵ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤃᤢᤖ ᤛᤢᤵᤛᤢᤀᤠᤱ ᤛᤡ᤺ᤴ ᤆᤠᤎᤥ᤺ᤰᤗᤠᤀᤥ ᤆᤡᤰᤂᤢ᤹ ᤜᤧᤰᤁᤩᤠᤱ ᤁᤢᤜᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠᤒᤠ ᤔᤡᤀᤥ ᤜᤠ᤺ᤴᤍᤢᤍᤣ᤺ᤛᤢ᤹ᤖᤥ॥”
MAT 3:13 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤷᤍᤏ ᤕᤱᤄᤱᤅᤥ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤕᤢᤜᤢᤴᤏᤠᤖᤥ ᤋᤩᤧᤖᤥ.
MAT 3:14 ᤁᤖ ᤕᤢᤜᤢᤴᤏᤠᤖᤧ ᤀᤳᤋᤢᤖ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ᤏᤧ ᤂᤧᤏᤧ᤹ᤏᤢ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤁᤧᤒᤥ᤺ᤱᤒᤠ. ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤁᤧᤍᤩᤧᤒᤠᤒᤣ᥅”
MAT 3:15 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥᤖᤧ ᤗᤠᤃᤡ ᤀᤰᤂᤣᤀᤣ ᤐᤥ᤺ᤱᤗᤖᤥ. ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤧᤳᤗᤖᤥ॥” ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴ ᤋᤧᤴᤍᤧᤀᤠᤱ ᤂᤢᤏᤧ᤹ ᤒᤵᤋᤡᤛ᤻ᤔᤠ ᤐᤡᤖᤢᤖᤥ॥
MAT 3:16 ᤕᤧᤛᤢ᤺ᤴ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤀᤠᤱ ᤆᤫᤠ᤺ᤳᤋᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤋᤠᤱᤛᤠᤰᤐᤧᤴ ᤜᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤂᤢᤏᤧ᤹ ᤁᤢᤛᤶᤍᤠᤱ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤖᤥ॥
MAT 3:17 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤰᤂᤣᤗ᤹ᤖᤡᤰ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤖᤥ. ᤀᤡᤱᤃᤠ᤹ ᤂᤢᤏᤧ᤹ᤏᤢ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥”
MAT 4:1 ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤕᤧᤛᤢ᤺ᤴ ᤔᤠᤑᤧᤴᤛᤠᤶᤗᤠᤶ ᤁᤢᤏᤡᤱᤘᤠ᤹ ᤛᤠ᤹ᤛᤧ ᤀᤣ᤺ᤰᤛᤠᤍᤧᤴᤏᤥ ᤋᤣ᤹ᤖᤢᤖᤥ॥
MAT 4:2 ᤂᤧᤵᤔᤥ ᤂᤢᤏᤧ᤹ ᤗᤡᤒᤥ᤺ᤱ (᥊᥆) ᤛᤧᤴᤍᤡᤰ ᤏᤢ ᤗᤧᤴᤍᤡᤰ ᤌᤠᤖᤡᤰ ᤌᤣᤀᤠᤱ ᤔᤧᤈᤏᤧᤴᤏᤠᤱ ᤛᤠ᤹ᤖᤡᤰ ᤁᤢᤛᤧᤳᤗᤠ᤺ᤰᤋᤧᤖᤥ॥
MAT 4:3 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤂᤧᤵᤔᤥ ᤋᤩᤧᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤖ ᤁᤢᤏᤡᤱᤘᤠ᤹ ᤛᤠ᤹ᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤁᤴ ᤗᤢᤱᤜᤠ᤹ ᤂᤖᤧ᤺ᤱ ᤐᤥ᤺ᤰᤂᤧ᤹ ᤑᤠ᤹ᤀᤠᤱ ᤔᤧᤳᤋᤧ᤹॥”
MAT 4:4 ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤜᤧᤰᤁᤣ ᤔᤧᤈᤥ᤺ᤰᤁᤠᤴ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤔᤥᤛᤠᤖᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤁᤢᤈᤠ᤺ᤸᤗᤧᤖᤰ ᤔᤧᤜᤡᤱᤏᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤏᤡᤸᤗᤧ ᤜᤡᤱ॥’”
MAT 4:5 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤋᤣ᤹ᤖᤢᤀᤠᤱ ᤔᤠᤱᤜᤡᤶᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤆᤶᤈᤶᤒᤠ ᤋᤧᤴᤏᤥ ᤕᤧᤵᤛᤢᤀᤠᤱ ᤔᤧᤳᤋᤢ
MAT 4:6 “ᤂᤧᤏᤧ᤹ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤐᤡᤴᤍᤧ ᤌᤩᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤧᤏᤧ᤹ ᤌᤠ᤺ᤱᤎᤠ᤺ᤱᤅᤣ ᤂᤢᤏᤡ᤹ ᤜᤢᤰᤁᤥ ᤁᤧᤶᤍᤠ᤺ᤰᤁᤠᤱ ᤁᤧᤗᤠᤱᤅᤡᤴ ᤗᤢᤱᤅᤥ ᤔᤧᤎᤠᤶᤛᤡᤱᤅᤡᤴᤗᤥ॥’”
MAT 4:7 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤖ ᤛᤠᤶᤕᤥᤛᤠᤵᤗᤠᤀᤥ ᤕᤠᤶᤔᤥ ᤀᤰᤂᤣᤗ᤹ᤖᤡᤰᤁᤠᤱ ᤛᤠᤵᤋᤧᤀᤠᤱ ᤐᤳ. ‘ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤧᤴᤏᤧ᤹॥’”
MAT 4:8 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤆᤶᤈᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤐᤕᤶ ᤕᤶᤒᤠ ᤏᤢ ᤏᤢ᤺ᤒ᤻ᤏᤢ᤺ᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤰᤋᤢᤀᤠᤱ
MAT 4:9 ᤔᤧᤳᤋᤢ. “ᤂᤧᤏᤧ᤹ ᤛᤠᤶᤒᤥ᤺ᤴ ᤁᤧᤓᤴᤇᤡᤱᤅᤠᤱ ᤀᤡᤱᤃᤠ᤹ ᤛᤣᤘᤠ ᤁᤧᤔᤧᤳᤋᤠᤏᤧ ᤑᤠ᤹ᤃᤪ ᤁᤱᤜᤠ᤹ ᤁᤧᤖᤧᤰ ᤐᤡᤏᤧ᤹॥”
MAT 4:10 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤛᤤᤋᤠᤏᤣ. ᤁᤵᤔᤥᤗᤠᤶ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤂᤧᤏᤧ᤹ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤣᤘᤠ ᤔᤧᤳᤋᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤡᤴᤗᤰ ᤁᤢᤛᤣᤘᤠ ᤆᤥᤃᤧ᤹ᤀᤥ॥’”
MAT 4:11 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤕᤧᤛᤢ᤺ᤴ ᤗᤧᤖᤢᤎᤀᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤍᤩᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤶᤒᤪᤠᤱ ᤔᤧᤔᤧᤳᤋᤢ॥
MAT 4:12 ᤀᤠᤸᤗ ᤕᤧᤛᤢᤖᤧ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤀᤠᤱ ᤕᤠᤰ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤢᤏᤧ᤹ ᤃᤠᤗᤡᤗ ᤌᤢᤶᤔᤥ ᤏᤢ᤺ᤰᤂᤧ ᤐᤣ॥
MAT 4:13 ᤂᤢᤏᤧ᤹ ᤏᤠᤛᤖᤋ ᤐᤠᤱᤈᤢᤶᤔᤡᤴ ᤗᤧᤖᤢᤀᤠᤱ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤘᤠ᤹ᤛᤧ ᤐᤣᤖᤥ॥ ᤂᤧᤱᤃ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤒᤣᤛᤠᤱ ᤏᤠᤵᤋᤠᤗᤡ ᤏᤢ ᤈᤒᤢᤗᤢᤏ ᤌᤢᤶᤔᤥ ᤏᤧᤖᤥ॥
MAT 4:14 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ–
MAT 4:15 “ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤒᤣᤛᤠᤱᤒᤠ ᤏᤠᤵᤋᤠᤗᤡ ᤏᤢ ᤈᤒᤢᤗᤢᤏ ᤁᤧᤕᤢᤱᤒᤠ ᤕᤠᤵᤔᤡᤛᤣ. ᤃᤠᤗᤡᤗ ᤌᤢᤶᤔᤥ ᤁᤧᤘᤠ᤹ᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤣ.
MAT 4:16 ᤂᤠᤍᤠᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤐᤕᤶ ᤕᤶᤒᤠ ᤀᤥ᤺ᤳᤋᤡ᤺ᤴ ᤔᤧᤏᤡ᤺ᤛᤢᤖᤥ॥ ᤛᤡ᤺ᤔᤧᤸᤗᤧᤴ ᤂᤠᤔᤠᤰᤔᤠᤀᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤥ᤺ᤳᤋᤡᤎᤡᤰ ᤀᤥ᤺ᤳᤗᤥ॥”
MAT 4:17 ᤂᤧᤴ ᤕᤧᤶᤔᤠᤱᤎᤥ ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤓᤥ᤺ᤔᤠ ᤜᤣ᤺ᤰᤋᤢ. “ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥”
MAT 4:18 ᤌᤡᤰ ᤕᤧᤴ ᤕᤧᤛᤢ᤺ᤴ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤗᤠᤱᤄᤣᤃᤧᤖ ᤘᤕᤧᤸᤗᤧ ᤐᤋᤪᤢᤛ ᤔᤧᤵᤔᤏᤠᤒᤠ ᤛᤡᤔᤥᤏᤧᤴ ᤏᤢ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤴ ᤏᤡ᤺ᤛᤢᤛᤡ॥ ᤂᤧᤱᤜᤠ᤹ ᤘᤖᤰᤁᤥ ᤕᤥ᤺ᤱ ᤗᤧᤵᤋᤧᤳᤇᤢᤖ ᤕᤠᤃᤧᤳᤇᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤥ᤺ᤱ ᤁᤧᤗᤧᤵᤐᤠ ᤘᤕᤧᤳᤇᤡᤖᤥ॥
MAT 4:19 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤀᤣᤃᤠᤱ ᤌᤠᤏᤧᤳᤇᤧ᤹ᤀᤥ. ᤂᤡᤴᤇᤡ᤹ ᤅᤠ ᤁᤧᤍᤧᤶᤛᤢ ᤁᤧᤍᤠ᤺ᤳᤇᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤥ ᤔᤏᤠ ᤁᤧᤍᤠ᤺ᤵᤐᤠ ᤆᤥ᤺ᤰᤏᤧᤳᤇᤡᤱᤗᤥ॥”
MAT 4:20 ᤂᤡᤔᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤥ᤺ᤱᤅᤡᤴ ᤏᤧᤛ᤻ᤛᤧᤳᤇᤢ ᤌᤩᤧᤛᤧᤳᤇᤢᤀᤠᤱ ᤂᤢᤏᤧ᤹ᤏᤢ ᤐᤣᤛᤡ॥
MAT 4:21 ᤂᤧᤵᤔᤥᤗᤠᤶ ᤔᤡᤛᤠᤰ ᤏᤠᤏᤠᤰ ᤐᤣ᤺ᤸᤗᤧ ᤕᤧᤛᤢᤖᤧ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ ᤏᤢ ᤂᤧᤸᤗᤧ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴ ᤏᤡ᤺ᤛᤢᤛᤡ॥ ᤂᤧᤱᤜᤠ᤹ ᤂᤢᤴᤇᤡ᤹ ᤐᤠ᤺ᤴᤏᤢ ᤂ᤺ᤱᤒᤣᤀᤥ ᤕᤥ᤺ᤱ ᤗᤧᤶᤍᤧᤳᤇᤢᤖ ᤕᤠᤃᤧᤳᤇᤡ॥ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤏᤢᤔᤧ᤺ᤴᤏᤣ
MAT 4:22 ᤂ᤺ᤱᤒᤣᤴ ᤏᤢ ᤂᤢᤴᤇᤡ᤹ ᤐᤠ᤺ᤴ ᤗᤧᤖᤧᤳᤇᤢ ᤌᤩᤧᤛᤧᤳᤇᤢᤀᤠᤱ ᤕᤧᤛᤢ᤺ᤴᤏᤢ ᤐᤣᤛᤡᤖᤥ॥
MAT 4:23 ᤕᤧᤛᤢᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤏᤡᤛᤠᤶ ᤜᤢ᤹ᤖᤢᤛᤡᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧ᤺ᤛᤢ. ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤗᤧᤴ ᤋᤢᤰᤔᤠ ᤕ᤹ᤔᤠᤗᤠᤶ ᤁᤧᤍᤢᤰᤐᤠᤜᤠ᤹ ᤘᤣ᤺ᤴᤍᤢᤛᤡᤖ ᤃᤠᤗᤡᤗ ᤌᤢᤶᤔᤥ ᤂᤠᤖᤠᤰ ᤋᤠᤰᤁᤴᤍᤧᤖᤥ॥
MAT 4:24 ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱᤅᤡᤴ ᤛᤡᤖᤡᤕᤠ ᤗᤠᤈᤣ᤹ ᤂᤠᤖᤠᤰ ᤛᤧ᤺ᤖᤧ. ᤜᤧᤰᤁᤩᤠᤱ ᤕᤖᤡᤰ ᤐᤖᤡᤰᤗᤧᤴ ᤋᤢᤰᤔᤠᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹. ᤁᤧᤍᤢᤰᤐᤠᤜᤠ᤹. ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤛᤡᤒᤠᤜᤠ᤹. ᤜᤧᤰᤁᤩᤠᤱ ᤌᤵᤔᤠ ᤁᤧᤔ᤺ᤒᤠᤜᤠ᤹ ᤏᤢ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤠᤖᤢᤛᤡᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤏᤢᤛᤢᤛᤡᤖᤥ॥
MAT 4:25 ᤜᤧᤰᤁᤩᤠᤱ ᤃᤠᤗᤡᤗ ᤌᤢᤶ. ᤌᤡᤒᤥ᤺ᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶ. ᤕᤖᤢᤛᤗᤧᤔ. ᤕᤜᤢᤍᤡᤕᤠ ᤏᤢ ᤕᤷᤍᤏ ᤕᤱᤄᤱ ᤏᤠᤎᤠ᤺ᤶᤒᤡᤒᤠ ᤌᤢᤶᤔᤥᤗᤠᤶ ᤁᤧᤍᤠ᤺ᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥
MAT 5:1 ᤀᤠᤸᤗ ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤏᤡ᤺ᤛᤢᤛᤡᤀᤠᤱ ᤁᤥ᤺ᤰᤔᤠᤀᤥ ᤌᤠ᤺ᤱ ᤐᤣᤀᤠᤱ ᤕᤢᤱᤛᤡᤱ. ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤂᤧᤳᤌᤥ ᤔᤧᤒᤣᤀᤠᤱ ᤁᤢᤄᤡᤖᤡ ᤔᤧᤕᤢᤱᤛᤡᤱ॥
MAT 5:2 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ –
MAT 5:3 “ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤠᤜᤠᤒᤠ ᤁᤧᤈᤥ᤺ᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤂᤧᤱᤜᤠ᤹ᤖᤧᤴᤏᤣᤖᤥ॥
MAT 5:4 ᤔᤣᤖᤡᤱ ᤁᤧᤎᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤜᤠᤱᤜᤠᤱ ᤔᤧᤳᤇᤡᤱᤔᤠᤴ ᤔᤧᤄᤥ᤺ᤛᤢ᤹ᤖᤥ॥
MAT 5:5 ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤔᤏᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤧᤱᤜᤠ᤹ᤖᤧᤴᤏᤣᤖᤥ॥
MAT 5:6 ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤛᤩᤠᤱᤔᤧᤴᤍᤠᤱ ᤁᤧᤒᤵᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤂᤧᤱᤜᤠ᤹ ᤑᤠ᤹ᤖᤢᤛᤡ᤹ᤖᤥ॥
MAT 5:7 ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡ᤹ᤖᤥ॥
MAT 5:8 ᤛᤡᤰᤗᤢᤱᤔᤥ ᤛᤣᤛᤣ ᤁᤧᤘᤠ᤹ᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤏᤡ᤺ᤛᤢ᤹ᤖᤥ॥
MAT 5:9 ᤏᤠᤍᤱ ᤁᤧᤈᤥ᤺ᤰᤐᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤛᤠ᤺ ᤔᤧᤒᤥ᤺ᤱᤗᤥ॥
MAT 5:10 ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤂᤧᤱᤜᤠ᤹ᤖᤧᤴᤏᤣᤖᤥ॥
MAT 5:11 ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤡᤏᤠ᤺ᤴᤍᤡ ᤁᤧᤶᤒᤡᤖᤡ᤹. ᤋᤢᤰᤂᤣ ᤁᤧᤶᤈᤠ᤺ᤳᤋᤡᤀᤠᤱ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤑᤥᤋᤩᤠᤒᤠ ᤑᤧᤴ ᤐᤠ᤺ᤴᤜᤠ᤹ ᤔᤧᤒᤠ᤺ᤳᤋᤢᤸᤗᤧ ᤔᤢ᤹ᤀᤡᤛᤠᤒᤠ ᤁᤧᤒᤥ᤺ᤰᤂᤡᤖᤥ॥
MAT 5:12 ᤂᤧᤴ ᤕᤧᤶᤔᤥ ᤐᤛ᤺ᤳ ᤛ᤺ᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ ᤌᤢᤶᤄᤥ᤺ᤴ ᤕᤶᤒᤠ ᤆᤥ᤺ᤰᤗᤥ॥ ᤀᤢᤴᤇᤣ᤺ᤴᤛ᤻ᤔᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤔᤏᤠᤜᤠ᤹ᤖᤧ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤖᤥ॥
MAT 5:13 ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤥᤒᤠ ᤕᤢᤶᤏᤡᤱᤗᤥ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠ᤺ᤒᤣ᤺ᤰᤏᤧ ᤑᤠ᤹ᤃᤪ ᤕᤠᤶᤔᤥ ᤁᤧᤗᤡᤶᤒᤠ ᤆᤥ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ ᤂᤧᤸᤗᤧ ᤁᤢᤕᤠ᤺ᤶᤒᤰ ᤌᤣᤀᤠᤱ ᤜᤥ᤺ᤵᤗᤥ. ᤁᤖ ᤂᤧᤱᤃ ᤗᤠᤵᤑᤢᤔᤠ ᤐᤥ᤺ᤱᤅᤠᤱ ᤔᤏᤠᤜᤠ᤹ᤖᤧ ᤔᤧᤍᤥ᤹ᤖᤢᤖᤥ॥
MAT 5:14 ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤏᤡᤱᤗᤥ॥ ᤁᤥ᤺ᤰᤔᤠᤀᤥᤒᤠ ᤕᤧᤰᤕᤰᤁᤡᤴ ᤌᤣ᤺ᤸᤗᤧᤀᤠᤱ ᤀᤡ᤺ᤵᤔᤠ ᤔᤧᤛᤢᤰᤋᤢᤴ॥
MAT 5:15 ᤀᤠᤳᤋᤡᤸᤗᤧᤀᤠᤱ ᤛᤣᤔᤡ᤺ᤴ ᤜᤠ᤺ᤴᤍᤢᤀᤠᤱ ᤏᤀᤡᤔᤠᤸᤗᤧ ᤔᤧᤛᤢ᤺ᤵᤋᤢᤴ. ᤁᤖ ᤜᤡᤶ ᤛᤡᤃᤠᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤠᤏᤡ᤺ᤔᤠ ᤔᤧᤛᤢᤰᤗ ᤑᤠ᤹ᤀᤠᤱ ᤌᤥ ᤛᤣᤔᤡ ᤕᤢᤱᤍᤧᤴᤏᤥ ᤕᤢᤰᤂᤢ᤹ᤖᤥ॥
MAT 5:16 ᤜᤧᤰᤁᤣᤗ᤹ᤖᤡᤰ ᤛᤣᤔᤡ᤺ᤴ ᤀᤥ᤺ᤵᤐᤠ ᤜᤧᤰᤁᤣᤀᤣ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤛᤢᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤋᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ᤹ᤖᤥ॥
MAT 5:17 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴ ᤐᤡᤖᤢᤒᤠ ᤛᤠᤶᤕᤥᤌᤡᤶᤔᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤢᤶ ᤔᤧᤴᤍᤶᤏᤠᤒᤠ ᤆᤥ᤺ᤰᤛᤧ ᤋᤩᤠᤱᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤀᤡᤱᤃᤠ᤹ᤃ ᤁᤢᤛᤢᤶ ᤔᤧᤴᤍᤶᤏᤠᤒᤠ ᤆᤥ᤺ᤰᤛᤧ ᤔᤧ᤺ᤴ. ᤁᤖ ᤂᤧᤱᤜᤠ᤹ ᤁᤢᤗᤡᤱᤎᤥ ᤁᤧᤳᤇᤧᤏᤧ ᤋᤩᤠᤱᤒᤠᤖᤥ॥
MAT 5:18 ᤛᤧᤰᤂᤠᤀᤣ ᤀᤡᤱᤃᤠ᤹ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤠᤱᤛᤠᤰᤐᤧᤴ ᤔᤠ᤺ᤔᤠ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤛᤠᤶᤕᤥᤌᤡᤶᤔᤥ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤏᤡᤴ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤵᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤐᤠ᤺ᤴᤎᤡᤰᤁᤠᤱ ᤔᤧᤔᤠ᤺ᤏᤧᤴᤗᤥ॥
MAT 5:19 ᤜᤠ᤺ᤳᤗᤧ ᤁᤴ ᤀᤡᤱᤈᤠ᤺ᤱᤜᤠ᤹ᤀᤥᤒᤠ ᤆᤢᤰᤛᤠ ᤐᤠ᤺ᤴᤎᤡᤰ ᤑᤣ᤺ᤴᤍᤢᤀᤠᤱ ᤘᤣᤜᤠ᤹ ᤒᤠ ᤜᤧᤰᤁᤣ ᤆᤥ᤺ᤰᤔᤠ ᤜᤢ᤹ᤖᤢᤛᤡ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤂᤧᤴ ᤆᤢᤰᤛᤠ ᤐᤥ᤺ᤱᤗᤥ. ᤁᤖ ᤜᤠ᤺ᤳᤗᤧ ᤁᤴ ᤀᤡᤱᤈᤠ᤺ᤱᤜᤠ᤹ ᤀᤡ᤺ᤳᤋᤢ-ᤏᤠ᤺ᤳᤋᤢᤀᤠᤱ ᤘᤣ᤹ᤜᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤜᤢ᤹ᤖᤢᤛᤡ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤂᤧᤴ ᤐᤕᤶ ᤕᤶᤒᤠ ᤐᤥ᤺ᤱᤗᤥ॥
MAT 5:20 ᤁᤖ ᤂᤧᤵᤛᤧᤶᤔᤧ᤹ᤀᤥ. ᤑᤖᤡᤛᤡᤜᤠ᤹ ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤜᤠ᤹ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤁᤧᤴᤗᤠᤛᤡᤴᤗᤥ॥”
MAT 5:21 ᤀᤠᤸᤗ. “ᤀᤢᤴᤇᤣ᤺ᤴ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ‘ᤔᤏᤠ ᤔᤧᤛᤧᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤏᤠ ᤁᤧᤛᤧᤵᤐᤠᤸᤗᤧ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ.’
MAT 5:22 ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤜᤠ᤺ᤳ ᤁᤢᤴᤛᤠ᤹ᤀᤡᤴᤏᤢ ᤁᤢᤕᤠ᤺ᤰ ᤗᤧ᤹. ᤂᤧᤸᤗᤧ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ॥ ᤕᤠᤶᤔᤥ ᤜᤠ᤺ᤳᤗᤧ ᤁᤢᤴᤛᤠ᤹ᤀᤡᤴ ‘ᤀᤍᤱ’ ᤔᤧᤳᤋᤢ᤹. ᤂᤧᤱᤃ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤕᤜᤢᤍᤡ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢ᤹. ᤁᤖ ᤜᤠ᤺ᤳᤗᤧ ᤁᤢᤴᤛᤠ᤹ᤀᤡᤴ ᤛᤠᤰᤔᤢᤖᤠ ᤔᤧᤳᤋᤢ᤹. ᤂᤧᤱᤃ ᤂᤧᤔᤠᤕᤱᤛᤱᤅᤥᤒᤠ ᤔᤡᤀᤥ ᤐᤣ᤺ᤰᤔᤠ ᤛᤢᤰᤗᤥ॥
MAT 5:23 ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤔᤠᤱᤜᤡᤶᤔᤥᤒᤠ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥ ᤗᤧᤳᤋᤡᤱᤅᤡᤴ ᤋᤥ᤺ᤶᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ᤏᤢ ᤁᤧᤴᤍᤣ᤺ᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤒᤠ ᤁᤧᤏᤡᤱᤘᤠ᤹ ᤛᤢᤶᤔᤥ ᤋᤠᤏᤧ ᤑᤠ᤹ᤃᤪ
MAT 5:24 ᤁᤧᤗᤧᤳᤋᤡᤱᤅᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤏᤧᤛ᤻ᤛᤧ ᤌᤩᤧ᤹ᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤴᤍᤣ᤺ᤱᤒᤠᤸᤗᤥ ᤐᤣᤃᤧ᤹ᤀᤠᤱ ᤏᤠᤍᤱ ᤆᤥᤃᤧᤳᤇᤧ᤹ᤀᤥ॥ ᤜᤧᤰᤁᤩᤠᤱᤗᤰ ᤋᤩᤧ᤹ᤀᤠᤱ ᤁᤧᤗᤧᤳᤋᤡᤱᤅᤡᤴ ᤋᤥ᤺ᤴᤍᤧ᤹ᤀᤥ॥
MAT 5:25 ᤀᤠᤵᤋᤡᤰ ᤁᤧᤃᤢ᤺ᤵᤐᤠᤸᤗᤧ ᤂᤧᤏᤧ᤹ ᤂᤠᤛᤧᤴᤍᤧᤴᤏᤥ ᤋᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ᤏᤢ ᤏᤠᤍᤱ ᤆᤥᤃᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤁᤧᤍᤣ᤹ᤀᤠᤱ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤋᤡᤗᤡᤱᤃᤠᤜᤠ᤹ᤖᤥ ᤜᤢᤰᤁᤧᤛᤢᤵ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤢᤱᤗᤠᤜᤡᤶᤔᤥ ᤁᤧᤶᤛᤠᤰᤗᤥ॥
MAT 5:26 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤂᤧᤵᤔᤥ ᤛᤠᤶᤒᤠ᤺ᤴᤕᤠᤱ ᤁᤧᤖᤧᤰ ᤔᤧᤴᤜᤢᤱᤅᤣ ᤌᤠᤖᤡᤰ ᤂᤧᤵᤔᤥᤀᤣ ᤁᤧᤕᤠᤰᤗᤥ॥”
MAT 5:27 ᤀᤠᤸᤗ. “ᤂᤡᤏᤡ᤹ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ. ‘ᤂᤧᤏᤧ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤥ’
MAT 5:28 ᤁᤖ ᤀᤡᤱᤃᤠ᤹ ᤔᤧᤳᤏᤡᤱ ᤀᤠᤳᤋᤡᤸᤗᤧ ᤑᤧᤴ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤔᤧᤴᤇᤢᤔᤠ᤹ᤀᤡᤴ ᤀᤥᤔᤧᤳᤋᤢ᤹. ᤂᤧᤸᤗᤧᤃ ᤋᤃᤡᤀᤣ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤁᤢᤏᤡᤱᤘᤠ᤹ᤒᤥ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢᤍᤣ᤺ᤛᤢᤖᤥ॥
MAT 5:29 ᤂᤧᤏᤧ᤹ ᤆᤢᤵᤛᤠᤱ ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤗ᤺ᤳᤋᤧ᤹ᤀᤠᤱ ᤗᤠᤵᤑᤢ᤺ᤛᤧ᤹ᤀᤥ॥ ᤁᤧᤖᤧᤰ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠᤏᤢ᤺ᤸᤗᤧ ᤔᤡᤰᤌᤡᤰ ᤔᤧ᤺ᤴᤏᤣ ᤘᤠ᤹ᤔᤠᤀᤣ ᤏᤢ᤺ᤒᤠᤖᤥ॥
MAT 5:30 ᤜᤧᤰᤁᤩᤠᤱ ᤆᤢᤵᤛᤠᤱ ᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤧᤴᤏᤠᤱ ᤂᤰᤋᤧ᤹ᤀᤠᤱ ᤗᤠᤵᤑᤢ᤺ᤛᤧ᤹ᤀᤥ॥ ᤁᤧᤖᤧᤰ ᤏᤠᤛᤡᤱᤃᤧᤴ ᤌᤰᤁᤡᤴ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠᤏᤢ᤺ᤸᤗᤧ ᤜᤢᤰᤌᤡᤰ ᤔᤧ᤺ᤴᤏᤣ ᤘᤠ᤹ᤔᤠᤀᤣ ᤏᤢ᤺ᤒᤠᤖᤥ॥”
MAT 5:31 “ᤕᤠᤶᤔᤥ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤳᤋᤡᤸᤗᤧ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢ. ᤂᤧᤸᤗᤧ ᤏᤠ᤹ᤏᤧᤒᤠᤖᤥ ᤑᤠ᤹ᤀᤠᤱ ᤛᤠᤵᤗᤠ ᤛᤠᤵᤔᤠ ᤐᤡᤔᤠ ᤐᤥ᤺ᤱ॥’
MAT 5:32 ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤜᤠ᤺ᤳᤗᤧ ᤘᤣ᤹ᤜᤠ᤹ᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢ᤹ ᤂᤧᤸᤗᤧ ᤂᤧᤴ ᤁᤢᤔᤣ᤺ᤳᤋᤡᤴ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹ ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥”
MAT 5:33 “ᤕᤠᤶᤔᤥ ᤂᤡᤏᤡ᤹ ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ‘ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤔᤠᤱᤜᤧᤰᤁᤡᤴ ᤔᤧᤓᤣ᤺ᤴᤍᤧᤶᤔᤧᤴᤏᤧ᤹. ᤁᤖ ᤕᤜᤘᤣ ᤍᤠᤱᤒᤠᤴᤏᤢ ᤁᤧᤈᤥᤃᤢᤶᤒᤠ ᤔᤠᤱᤜᤧᤰᤁᤡᤴ ᤁᤧᤃᤧᤳᤋᤢᤶᤗᤀᤣ ᤐᤥ᤺ᤱᤗᤥ॥’
MAT 5:34 ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤀᤠᤵᤑᤠᤸᤗᤧᤀᤠᤱ ᤔᤠᤱᤔᤧᤜᤧᤰᤁᤠᤛᤡᤶᤔᤧᤴᤏᤧ᤹॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧ ᤁᤢᤔᤡᤱᤅᤥᤀᤠᤱ ᤔᤧ᤺ᤴ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱ ᤕᤢᤰᤏᤠᤖᤥ॥
MAT 5:35 ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤔᤡᤱᤅᤥᤀᤠᤱ ᤔᤠᤱᤔᤧᤜᤧᤰᤁᤠᤛᤡᤶᤔᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤂᤢᤏᤧ᤹ ᤁᤢᤗᤠᤱ ᤋᤥ᤹ᤓᤣ᤺ᤳᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤖᤢᤛᤗᤧᤶᤔᤡᤸᤗᤧ ᤁᤢᤔᤡᤱᤅᤥᤀᤠᤱ ᤔᤠᤱᤔᤧᤜᤧᤰᤁᤠᤛᤡᤶᤔᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤐᤕᤶ ᤕᤶᤒᤠ ᤜᤠᤱᤅᤡᤸᤗᤧ ᤁᤢᤕᤧᤰᤕᤰᤗᤥ॥
MAT 5:36 ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤌᤧᤃᤣ᤺ᤰᤐᤠᤸᤗᤧᤴ ᤔᤠᤱᤔᤧᤜᤧᤰᤁᤠᤛᤡᤶᤔᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤑ᤺ᤃᤧᤗ᤹ᤒᤠ ᤀᤡᤃᤪ ᤔᤠᤰᤁᤧᤗ᤹ᤒᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥
MAT 5:37 ᤂᤡᤏᤡ᤹ ᤐᤠ᤺ᤴᤏᤡᤱᤃ ‘ᤀᤥ’ ᤏᤧ ᤑᤠ᤹ᤃᤪ ‘ᤀᤥ’ ᤐᤠ᤺ᤳᤋᤧᤶᤔᤧ᤹. ‘ᤔᤧ᤺ᤴ’ ᤏᤧ ᤑᤠ᤹ᤃᤪ ‘ᤔᤧ᤺ᤴ’ ᤐᤠ᤺ᤳᤋᤧᤶᤔᤧ᤹॥ ᤂᤧᤴᤏᤠᤱᤎᤥᤒᤠᤱᤃ ᤔᤠᤑᤧᤴᤛᤠᤶᤗᤠᤶ ᤁᤧᤍᤠ᤺ᤒᤠᤖᤥ॥”
MAT 5:38 “ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ‘ᤔᤡᤰᤁᤡᤸᤗᤧ ᤁᤢᤗᤧᤰᤘᤠ ᤔᤡᤰ. ᤜᤧᤰᤁᤩᤠᤱ ᤜᤠᤒᤥ᤹ᤒᤠᤸᤗᤧ ᤁᤢᤗᤧᤰᤘᤠ ᤜᤠᤒᤥ᤹ᤒᤠ’ ᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹.
MAT 5:39 ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤔᤏᤠᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤸᤗᤧ ᤂᤧᤱᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹॥ ᤀᤠᤳᤋᤡᤸᤗᤧ ᤆᤢᤵᤛᤠᤱ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤴ ᤘᤣ᤹ᤛ᤻ᤔᤠᤴᤏᤠᤱ ᤋᤥ᤺ᤴᤍᤧ ᤐᤡᤖᤧ᤹॥
MAT 5:40 ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤁᤧᤈᤠᤱᤔᤠ ᤋᤣ᤺ᤳᤋᤡᤴ ᤏᤠᤵᤔᤠᤖᤧ ᤗᤠᤃᤡ ᤂᤠᤛᤧᤴᤍᤧᤴᤏᤥ ᤁᤧᤍᤣ᤹. ᤂᤧᤴ ᤁᤧᤄᤠᤶᤔᤠ ᤁᤧᤗᤥᤔᤠᤜᤠ᤹ᤀᤠᤱ ᤐᤡᤖᤧᤍᤣ᤺ᤛᤧ᤹ᤀᤥ॥
MAT 5:41 ᤌᤰᤛᤢᤒᤠᤸᤗᤧ ᤂᤧᤏᤧ᤹ ᤁᤧᤴᤍᤧᤴᤏᤧᤴᤇᤠᤱ ᤁᤡᤗᤥᤔᤡᤋᤖ ᤌᤡᤰ ᤌᤠᤖᤡᤰ ᤁᤢᤃᤰᤁᤡᤴ ᤁᤢ᤺ᤵᤔᤠ ᤋᤣ᤹ᤔᤠ ᤁᤧᤃᤥ᤺ᤳᤏᤧ ᤑᤠ᤹ᤃᤪ ᤂᤧᤴᤏᤢ ᤁᤡᤗᤥᤔᤡᤋᤖ ᤏᤧᤳᤇᤡ ᤌᤠᤖᤡᤰ ᤐᤣᤃᤧ᤹ᤀᤥ॥
MAT 5:42 ᤁᤧᤏᤠ᤺ᤰᤐᤠᤜᤠ᤹ ᤂᤧᤏᤧ᤹ ᤐᤡᤖᤧᤛᤧ᤹. ᤀᤠᤳᤋᤡᤸᤗᤧ ᤌᤧᤳᤗᤠ ᤁᤧᤏᤠ᤺ᤰ ᤂᤧᤴ ᤐᤡᤖᤧ᤹ᤀᤥ॥”
MAT 5:43 “ᤔᤥᤛᤠᤖᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤠᤱ ᤁᤧᤏᤡᤱᤔᤡᤜᤠ᤹ ᤆᤡ᤺ᤳᤋᤧᤛᤧ᤹ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹.
MAT 5:44 ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤠᤱ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥
MAT 5:45 ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤛᤶᤍᤠᤱ ᤏᤠᤶᤛᤧ᤺ᤰ ᤐᤠᤱᤄᤢᤀᤠᤱ ᤛᤠᤶᤕᤥᤏᤡᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤀᤥ ᤐᤠᤱᤃᤧᤴᤍᤡᤱ ᤘᤠᤜᤡ᤺ᤳ ᤌᤠ᤺ᤔᤠ ᤐᤠᤱᤄᤢᤖᤥ॥
MAT 5:46 ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ᤖᤰ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤌᤣ ᤜᤠᤱᤛᤧᤶᤔᤡᤴ ᤁᤧᤄᤥ᤺ᤛᤢᤶᤔᤠᤱᤒᤣ᥅ ᤜᤧᤰᤋᤱᤒᤠ ᤕᤠ᤺ᤶᤒᤰᤁᤡᤱᤃ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤖᤧᤀᤠᤱ ᤔᤧᤈᤥᤃᤢᤖᤥ॥
MAT 5:47 ᤑᤢ᤹ᤏᤢᤛᤠ᤹ᤜᤠ᤹ᤏᤢᤖᤰ ᤂᤡᤏᤡ᤹ ᤛᤣᤘᤠ ᤁᤧᤔ᤺ᤀᤡᤏᤧ ᤑᤠ᤹ᤃᤪ ᤘᤣ᤹ᤜᤠ᤹ᤏᤢ᤺ᤸᤗᤧ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥅ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ᤖᤧᤀᤠᤱ ᤔᤧᤈᤥᤃᤢᤖᤥ॥
MAT 5:48 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤐᤠ᤺ᤴᤏᤥ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤜᤧᤰᤋᤱᤒᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥”
MAT 6:1 ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤂᤡᤏᤡ᤹ ᤏᤠᤖᤠ ᤔᤧᤓᤥ᤺ᤛᤢᤖ ᤑᤠ᤹ᤀᤠᤱ ᤔᤏᤠ ᤋᤃᤡ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤌᤣᤀᤠᤱ ᤁᤧᤱᤄᤥ᤺ᤛᤢᤶᤔᤡᤴᤗᤥ॥
MAT 6:2 ᤜᤧᤰᤁᤣᤗ᤹ᤖᤡᤰ ᤔᤧᤱᤃᤵᤔᤏᤠᤒᤠᤜᤠ᤹ ᤁᤢᤈᤠ ᤁᤧᤒᤡᤖᤢᤛᤡᤸᤗᤧ ᤘᤣ᤹ᤜᤠ᤹ᤖᤧ ᤔᤧᤄᤧᤵᤛᤢᤖ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤔᤢᤰᤗᤠ ᤔᤧᤔᤢᤰᤂᤧᤴᤏᤧ᤹ᤀᤥ॥ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤗᤠᤶᤗᤠᤶᤔᤥ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤠᤖᤠ ᤔᤧᤓᤥ᤺ᤛᤢᤖ ᤑᤠ᤹ᤀᤠᤱ ᤜᤧᤰᤁᤣ ᤔᤧᤈᤥᤃᤢ᤹॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤛᤧᤶᤔᤡᤱᤃ ᤋᤃᤡᤛᤠ ᤔᤧᤄᤥ᤺ᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹॥
MAT 6:3 ᤁᤖ ᤂᤧᤏᤧ᤹ ᤔᤧᤱᤃᤵᤔᤏᤠᤒᤠᤜᤠ᤹ ᤁᤧᤒᤡᤖᤢᤛᤡᤸᤗᤧ ᤘᤣ᤹ᤜᤠ᤹ᤖᤧ ᤔᤧᤴᤏᤡᤀᤣ ᤐᤡᤖᤧᤛᤧ᤹ᤀᤥ॥
MAT 6:4 ᤜᤧᤰᤁᤣᤗ᤹ᤖᤡᤰ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤛᤫᤠ᤺ᤳᤋᤠᤱ ᤐᤥ᤺ᤱᤗᤖᤥ॥ ᤜᤧᤰᤁᤩᤠᤱᤗᤰ ᤛᤫᤠ᤺ᤳᤋᤠᤱ ᤁᤧᤈᤥᤃᤢᤒᤠ ᤐᤠ᤺ᤴ ᤁᤧᤏᤡ᤺ᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥”
MAT 6:5 “ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡ᤺ᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤖᤧᤃ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤗᤠᤶᤗᤠᤶᤔᤥ ᤕᤧᤵᤔᤠᤀᤠᤱ ᤋᤢᤘᤠ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧᤴ ᤜᤠᤱᤛᤧᤶᤔᤡᤴ ᤋᤃᤡᤀᤣ ᤔᤧᤄᤥ᤺ᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥
MAT 6:6 ᤁᤖ ᤂᤧᤏᤧ᤹ ᤋᤢᤘᤠ ᤁᤧᤈᤥᤃᤢᤸᤗᤧ ᤁᤧᤜᤡᤶᤗᤰᤛᤡᤱ ᤛᤡᤃᤠᤱ ᤗᤠ᤺ᤛᤧ᤹ᤀᤠᤱ ᤗᤠᤶᤎᤣ᤺ᤵᤐᤠᤴ ᤛᤢᤒᤧ᤹. ᤜᤧᤰᤁᤩᤠᤱ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠᤏᤢ ᤀᤣ᤺ᤰ ᤋᤢᤘᤠ ᤆᤥᤃᤧ᤹ᤀᤥ॥ ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤕᤠ᤺ᤶᤒᤰ ᤁᤧᤏᤡ᤺ᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡᤖᤥ॥
MAT 6:7 ᤜᤧᤰᤁᤩᤠᤱ ᤋᤢᤘᤠ ᤁᤧᤈᤥᤃᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ ᤜᤧᤰᤁᤣ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤔᤢᤏᤢᤏᤢ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤕᤖᤡᤰ ᤔᤧᤒᤠ᤺ᤳᤋᤡᤸᤗᤧᤖᤰ ᤔᤠᤱᤅᤡᤸᤗᤧ ᤂᤢᤏᤡ᤹ ᤋᤢᤘᤠ᤺ᤴ ᤂᤧᤵᤛᤢ᤹ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ᤹ᤖᤥ॥
MAT 6:8 ᤁᤖ ᤂᤡᤏᤡ᤹ ᤂᤧᤱᤜᤠ᤹ ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤠ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤛᤠᤱᤃᤪᤠᤶᤒᤠ ᤐᤠᤏᤢᤍᤡᤱ ᤂᤡᤏᤡ᤹ ᤐᤠ᤺ᤸᤗᤧ ᤁᤧᤱᤃᤳᤋᤢᤶᤔᤡᤴᤒᤠᤴ ᤏᤡ᤺ᤛᤢ᤹ᤖᤥ॥”
MAT 6:9 “ᤂᤧᤸᤗᤧ ᤆᤥᤃᤢᤸᤗᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤶᤔᤧ᤹ᤀᤥ– ‘ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤏᤡᤃᤧ ᤐᤠᤏᤢᤍᤡᤱ ᤐᤠᤀᤣ. ᤔᤏᤠᤜᤠ᤹ᤖᤧ ᤁᤧᤔᤡᤱᤅᤡᤴ ᤛᤣᤛᤣ ᤔᤧᤀᤡ᤺ᤳᤋᤢᤖ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤶᤒᤡᤖᤖᤥ॥
MAT 6:10 ᤁᤧᤜᤠᤱᤈᤢᤶᤔᤡᤴ ᤋᤠᤖᤖᤥ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤧᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤔᤧᤈᤥᤃᤢᤖᤖᤥ॥
MAT 6:11 ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠ᤺ᤴ ᤀᤠᤒᤡᤖᤧ᤹ᤀᤥ॥
MAT 6:12 ᤀᤠᤏᤡᤃᤧ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤐᤡᤖᤢᤶᤛᤡᤶᤒᤧᤒᤠ ᤜᤧᤰᤁᤣᤀᤣ ᤀᤠᤏᤡᤃᤧ ᤆᤥᤃᤢᤶᤒᤧᤒᤠ ᤗᤠᤕᤥ᤺ᤴ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥
MAT 6:13 ᤜᤱᤛᤠ᤹ᤔᤥ ᤀᤠᤴᤎᤠ᤺ᤛᤧᤴᤏᤧ᤹ᤀᤥ. ᤁᤖ ᤔᤠᤑᤧᤴᤛᤠᤶᤗᤠᤶ ᤀᤠᤛᤧ᤺ᤵᤋᤧ᤹ᤀᤥ॥ ((ᤌᤣᤀᤠᤱᤓᤧᤸᤗᤧ ᤜᤠᤱᤈᤢᤶ. ᤔᤢᤰᤛᤠᤶ ᤏᤢ ᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤂᤧᤏᤧ᤹ᤀᤡᤴᤏᤣᤖᤥ॥))’
MAT 6:14 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥
MAT 6:15 ᤁᤖ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤶᤒᤡᤖᤡᤴᤗᤥ॥”
MAT 6:16 “ᤜᤧᤰᤁᤩᤠᤱ ᤂᤡᤏᤡ᤹ ᤆᤠ᤺ᤏᤧᤳ ᤁᤧᤕᤢᤱᤅᤡᤸᤗᤧ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤠ ᤔᤧᤔᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠ᤺ᤏᤧᤳ ᤔᤧᤕᤢᤱᤅᤡᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤂᤢᤏᤡ᤹ ᤏᤠᤖᤠ᤺ᤴ ᤔᤧᤃᤡ᤺ᤴᤍᤢᤖ ᤔᤧᤕᤢᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤜᤠᤱᤛᤧᤶᤔᤡᤴ ᤁᤧᤖᤧᤰ ᤔᤧᤄᤥ᤺ᤛᤢ ᤔᤧᤛᤢᤖᤢᤀᤠᤱ ᤔᤧᤘᤠ᤹ᤖᤥ॥
MAT 6:17 ᤁᤖ ᤂᤧᤏᤧ᤹ ᤆᤠ᤺ᤏᤧᤳ ᤁᤧᤕᤢᤱᤅᤡᤸᤗᤧ ᤂᤧᤏᤧ᤹ ᤁᤧᤎᤧᤃᤣ᤺ᤰᤐᤥ ᤏᤡ᤺ᤱᤃᤣ᤹ ᤜᤢ᤺ᤳᤋᤧ᤹ᤀᤠᤱ ᤁᤧᤏᤠᤖᤠ᤺ᤴ ᤘᤠᤜᤵᤋᤧ᤹ᤀᤥ॥
MAT 6:18 ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤆᤠ᤺ᤏᤧᤳ ᤁᤧᤕᤢᤱᤒᤠᤴ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥ᤺ᤛᤢᤴᤗᤖᤥ. ᤁᤖ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤐᤠᤏᤢᤍᤡᤱ ᤁᤧᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡ᤺ᤛᤢᤖᤖᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤆᤥ᤺ᤰᤔᤏᤠᤒᤠ ᤁᤧᤏᤡ᤺ᤒᤠ ᤐᤠᤏᤢᤍᤡᤱ ᤁᤧᤶᤒᤠᤖᤧ ᤜᤠᤱᤛᤧᤶ ᤁᤧᤒᤡ᤹ᤖᤥ॥”
MAT 6:19 “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤠᤱᤛᤠᤁᤢᤴᤎᤣ ᤔᤧᤗᤢᤵᤛᤧᤴᤏᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤈ᤹᤺. ᤜᤡᤱᤎᤥ᤺ᤰᤁᤡᤸᤗᤧ ᤕ᤺ᤴᤍᤢ᤹. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤔᤧᤄᤢ᤺ᤳᤋᤢ᤹ᤖᤥ॥
MAT 6:20 ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤗᤢᤵᤛᤧᤶᤔᤧ᤹ᤀᤥ॥ ᤂᤧᤵᤔᤥᤃ ᤌᤰᤐᤠᤜᤠ᤹ᤖᤧ ᤔᤧᤴᤈᤏᤧᤴ. ᤜᤡᤱᤎᤥ᤺ᤰᤁᤡᤸᤗᤧᤀᤠᤱ ᤔᤧᤕ᤺ᤳᤇᤢᤴ. ᤜᤧᤰᤁᤩᤠᤱ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧᤀᤠᤱ ᤔᤧᤴᤄᤢ᤺ᤳᤋᤢᤴᤗᤥ॥
MAT 6:21 ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ᤺ᤴ ᤘᤠ᤹. ᤂᤧᤵᤔᤥᤀᤣ ᤂᤡᤏᤡ᤹ ᤏᤡᤱᤘᤠ᤹ᤀᤡᤴᤏᤠᤱ ᤐᤣ᤺ᤰᤗᤥ॥
MAT 6:22 ᤔᤡᤰᤁᤡᤱᤃ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤛᤣᤔᤡᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤁᤧᤔᤡᤰᤁᤡᤴ ᤏᤢ᤹ᤏᤧ ᤑᤠ᤹ᤃᤪ. ᤁᤧᤖᤧᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤀᤥ᤺ᤳᤗᤥ॥
MAT 6:23 ᤁᤖ ᤂᤧᤏᤧ᤹ ᤁᤧᤔᤡᤰᤁᤡᤴ ᤑᤧᤴᤏᤧ ᤑᤠ᤹ᤃᤪ ᤁᤧᤖᤧᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤂᤠᤍᤠᤶᤔᤥ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ᤀᤥᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴᤏᤣ ᤂᤠᤍᤠᤶᤏᤧ ᤑᤠ᤹ᤃᤪ ᤂᤧᤴ ᤂᤠᤍᤠᤶᤔᤠᤴ ᤀᤠᤰᤂᤧᤴ ᤛᤠ᤹ᤖᤡᤰ ᤐᤥ᤺ᤱᤒᤡᤗᤠ॥
MAT 6:24 ᤀᤠᤳᤋᤡᤸᤗᤧᤀᤠᤱ ᤏᤧᤵᤑᤢ ᤍᤠᤱᤒᤠᤜᤠ᤹ ᤛᤣᤘᤠ ᤆᤥ᤺ᤰᤔᤠᤛᤡ ᤔᤧᤛᤢᤰᤋᤢᤴᤛᤡᤴᤗᤥ॥ ᤂᤧᤸᤗᤧ ᤌᤡᤰᤁᤡᤴ ᤏᤢ᤺ᤖᤡᤰ ᤔᤧᤳᤋᤢ᤹ᤀᤠᤱ ᤘᤣ᤹ᤛ᤻ᤔᤠᤴ ᤆᤡ᤺ᤳᤋᤢ᤹ᤖᤥ. ᤔᤧ᤺ᤱᤃᤪ ᤌᤡᤰᤁᤡᤴ ᤀᤡᤱᤎᤠ᤺ᤱ ᤐᤡᤖᤢᤀᤠᤱ ᤘᤣ᤹ᤛ᤻ᤔᤠᤴ ᤀᤡᤱᤎᤠ᤺ᤱ ᤔᤧᤒᤡᤖᤢᤴᤗᤥ॥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤕᤠᤱᤛᤠᤁᤢᤴᤎᤣ᤺ᤴ ᤛᤥᤛᤥᤖᤡᤰ ᤛᤣᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴᤗᤥ॥”
MAT 6:25 “ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤏᤠᤛᤡᤱᤃᤧᤴ ᤌᤰᤁᤥᤀᤠᤱ ᤌᤣ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧ ᤏᤢ᤺ᤒᤠ ᤔᤧᤈᤥ᤺ᤰᤏᤧᤴᤒᤡ᥅
MAT 6:26 ᤐᤢᤛᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹. ᤂᤧᤱᤜᤠ᤹ᤖᤧ ᤆᤠ ᤔᤧᤴᤍᤣ᤺ᤛᤢᤴ ᤔᤧᤴᤇᤢᤵᤛᤢᤴ ᤜᤧᤰᤁᤩᤠᤱ ᤕᤠᤱᤔᤧᤱᤄᤥ᤺ᤳᤋᤢᤴᤇᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤂᤧᤱᤜᤠ᤹ ᤆᤠᤔᤠ ᤐᤡᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤴᤈᤥᤃᤡᤶᤒᤡ᥅
MAT 6:27 ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤁᤢᤔᤢᤰᤌᤡᤰ ᤑᤥ᤺ᤔᤠ ᤁᤧᤴᤇᤢᤰᤋᤢᤶᤔᤡᤴ॥
MAT 6:28 ᤜᤧᤰᤁᤣ᤺ᤸᤗᤧ ᤌᤧᤔᤠ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤌᤣᤀᤠᤱ ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤒᤠᤒᤣ᥅ ᤋᤠᤶᤓᤢᤱᤔᤥ ᤁᤧᤗᤡᤱᤒᤠ ᤑᤢᤱᤅᤡᤴ ᤀᤥᤔᤧᤳᤋᤧᤶᤔᤧ᤹. ᤂᤧᤱᤜᤠ᤹ ᤕᤠ᤺ᤶᤒᤰ ᤔᤧᤴᤈᤥ᤺ᤰᤏᤧᤴ ᤂᤡ᤺ᤀᤠᤱ ᤔᤧᤴᤗ᤺ᤴᤏᤧᤴ॥
MAT 6:29 ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤛᤥᤗᤥᤔᤏ ᤜᤠᤱᤅᤡᤴ ᤔᤡᤱᤛᤥᤎᤠ᤺ᤱᤛᤥᤀᤥ ᤔᤢᤰᤋᤧᤀᤠᤱ ᤘᤕᤧᤛᤠᤱ ᤂᤧᤴ ᤕᤠᤖᤡᤰᤁᤠᤱ ᤏᤢ᤺ᤒᤠ ᤋᤣ᤺ᤳ ᤔᤧᤈᤠᤰᤛᤡᤱᤅᤡᤴᤗᤥ॥
MAT 6:30 ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ. ᤀᤠᤀᤡᤴ ᤁᤧᤗᤡᤱᤒᤠᤀᤠᤱ ᤋᤠ᤺ᤴᤍᤡᤰ ᤔᤡᤀᤥ ᤗᤠᤵᤑᤢᤔᤠ ᤁᤧᤒᤥ᤺ᤱᤒᤠ ᤕᤠ᤺ᤴ ᤑᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤠᤖᤡᤰ ᤏᤢ᤺ᤒᤠ ᤆᤥᤃᤢᤛᤡᤸᤗᤧ ᤂᤧᤴᤏᤢ᤺ᤸᤗᤧ ᤏᤢ᤺ᤖᤡᤰᤁᤠᤱ ᤋᤣ᤺ᤳ ᤂᤡᤏᤡ᤹ ᤁᤧᤴᤈᤠ᤺ᤰᤋᤡᤶᤒᤡ᥅
MAT 6:31 ᤂᤧᤸᤗᤧ ᤆᤥᤃᤢᤸᤗᤧ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤒᤣ. ᤌᤣ᤺ᤴ ᤆᤠᤱᤔᤠ ᤘᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥
MAT 6:32 ᤌᤣᤀᤠᤱᤓᤧᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤒᤠ ᤂᤧᤴ ᤐᤠ᤺ᤴᤜᤠ᤹ᤀᤥ ᤐᤳᤗᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤠᤜᤠᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤏᤡ᤺ᤛᤢᤖᤥ॥
MAT 6:33 ᤁᤖ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤈᤢᤶ ᤏᤢ ᤁᤢᤛᤠᤶᤕᤥᤏᤡᤔᤠᤴ ᤁᤥ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤧᤒᤡᤖᤡ᤹ᤖᤥ॥
MAT 6:34 ᤂᤧᤸᤗᤧ ᤆᤥᤃᤢᤸᤗᤧ ᤋᤠ᤺ᤴᤍᤡᤰ ᤌᤣ ᤐᤥ᤺ᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤐᤠ ᤋᤢᤰᤂᤣ᤺ᤴ ᤋᤠ᤺ᤴᤍᤡᤰᤁᤣ ᤐᤥ᤺ᤱ. ᤜᤧᤰᤁᤩᤠᤱ ᤀᤠᤀᤡᤴᤒᤠ ᤋᤢᤰᤂᤣ᤺ᤴ ᤀᤠᤀᤡᤴᤇᤠ ᤕᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
MAT 7:1 ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤔᤏᤠᤜᤠ᤹ ᤐᤠ᤺ᤴ ᤔᤧᤎᤡᤰᤋᤧᤶᤛᤡᤶᤔᤧᤴᤏᤧ᤹. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠ᤺ᤴ ᤁᤧᤴᤎᤡᤰᤋᤡᤴᤗᤥ॥
MAT 7:2 ᤘᤣ᤹ᤜᤠ᤹ ᤐᤠ᤺ᤴ ᤁᤧᤎᤡᤰᤋᤢᤶᤛᤡᤶᤒᤠ ᤜᤧᤰᤁᤣᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠ᤺ᤴ ᤁᤧᤎᤡᤰᤋᤡ᤹ᤖᤥ॥ ᤀᤠᤰᤂᤣᤗ᤹ᤖᤡᤰ ᤘᤣ᤹ᤜᤠ᤹ ᤁᤧᤔᤧᤳᤋᤢᤶᤛᤡᤶ. ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤁᤧᤔᤧᤳᤋᤡ᤹ᤖᤥ॥
MAT 7:3 ᤀᤠᤒᤠᤅᤣ ᤔᤡᤰᤁᤥ ᤛᤡᤱᤄᤱ ᤔᤧᤴᤏᤡ᤺ᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤖᤧ ᤁᤢᤔᤡᤰᤁᤥᤒᤠ ᤛᤠᤵᤛᤣ᤺ᤰᤁᤡᤴ ᤁᤧᤏᤡ᤺ᤛᤢᤒᤣ᥅
MAT 7:4 ᤀᤠᤒᤠᤅᤣ ᤔᤡᤰᤁᤥ ᤛᤡᤱᤄᤱ ᤔᤧᤴᤏᤡ᤺ᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤀᤡᤴ ᤁᤧᤔᤡᤰᤁᤥᤒᤠ ᤛᤠᤵᤛᤣ᤺ᤰᤁᤡᤴ ᤗ᤺ᤳᤋᤢᤱ ᤐᤡᤏᤧ ᤑᤠ᤹ᤀᤠᤱ ᤔᤧᤵᤔᤠ ᤁᤧᤛᤢᤰᤋᤢᤒᤣ᥅
MAT 7:5 ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤁᤧᤔᤡᤰᤁᤥᤒᤠ ᤛᤡᤱᤄᤱᤅᤡᤴ ᤗ᤺ᤳᤋᤧᤍᤣ᤺ᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤁᤧᤴᤛᤠ᤹ᤖᤧ ᤁᤢᤔᤡᤰᤁᤥᤒᤠ ᤛᤠᤵᤛᤣ᤺ᤰᤁᤡᤴ ᤏᤢ᤺ᤖᤡᤰ ᤁᤧᤏᤡ᤺ᤛᤢᤀᤠᤱ ᤗ᤺ᤵᤔᤠ ᤁᤧᤛᤢᤰᤋᤢ᤹ᤖᤥ॥
MAT 7:6 ᤛᤣᤛᤣ ᤆᤡᤃ᤺ᤰᤘᤠ᤺ᤴ ᤂᤩᤠᤒᤠᤜᤠ᤹ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ ᤜᤡᤸᤗᤡᤰ ᤔᤧᤜᤡᤛᤡᤱ ᤜᤧᤰᤁᤩᤠᤱ ᤁᤧᤶᤓᤳᤋᤡ᤹ᤀᤠᤱ ᤁᤧᤶᤜᤠ᤹ᤖᤡᤖᤥ॥ ᤜᤧᤰᤁᤩᤠᤱ ᤑᤠᤰᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤧᤰᤛᤣ᤺ᤰᤁᤡᤴ ᤔᤧᤛᤧᤛᤧᤶᤔᤡᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤔᤧᤍᤥ᤹ᤖᤢ ᤔᤧᤗᤠ᤺ᤰᤋᤢ᤹ᤖᤥ॥”
MAT 7:7 “ᤏᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤒᤡᤖᤡ᤹॥ ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤄᤥ᤺ᤛᤢᤶ॥ ᤗᤠᤶᤎᤣ᤺ᤵᤐᤥ ᤐᤣᤃᤧᤶᤔᤧ᤹ᤀᤠᤱ ᤂᤰ ᤂᤰ ᤔᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤜᤴᤗᤥ॥
MAT 7:8 ᤌᤣᤀᤠᤱᤓᤧᤸᤗᤧ ᤁᤧᤏᤠ᤺ᤰᤐᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡ᤹. ᤁᤧᤃᤥ᤺ᤵᤐᤠᤜᤠ᤹ᤖᤧ ᤔᤧᤄᤥ᤺ᤛᤢ᤹. ᤜᤧᤰᤁᤩᤠᤱ ᤗᤠᤶᤎᤣ᤺ᤵᤐᤥ ᤁᤧᤒᤣ᤺ᤰᤐᤠᤀᤠᤱ ᤂᤰ ᤂᤰ ᤁᤧᤔᤧᤵᤐᤠᤜᤠ᤹ ᤂᤢᤏᤧ᤹ ᤗᤠᤶᤎᤣ᤺ᤵᤐᤧᤴ ᤜᤴᤍᤢ ᤐᤡᤖᤢᤛᤡ᤹ᤖᤥ॥
MAT 7:9 ᤀᤠᤳᤋᤡᤸᤗᤧ ᤁᤢᤛ᤻ᤛᤠ᤺ᤴ ᤁᤢᤈᤠ ᤏᤠ᤺ᤰᤁᤡᤸᤗᤧ ᤗᤢᤱᤅᤡᤴ ᤐᤡᤖᤢᤒᤣ᥅
MAT 7:10 ᤀᤡᤃᤪ ᤅᤠᤛᤠ᤺ᤴ ᤏᤠ᤺ᤰᤋᤢᤸᤗᤧ ᤀᤛᤣ᤺ᤰᤐᤧᤴ ᤐᤡᤖᤢᤒᤣ᥅
MAT 7:11 ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤧ᤹ᤒᤠ ᤁᤧᤈᤥᤃᤡᤛᤠᤱ ᤂᤡᤏᤡ᤹ ᤛᤠ᤺ᤜᤠ᤹ᤖᤧ ᤔᤧᤏᤠ᤺ᤰᤋᤢᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤐᤡᤔᤠ ᤁᤧᤗᤧᤛ᤻ᤛᤢᤶᤏᤧ ᤑᤠ᤹ᤃᤪ. ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤢᤏᤧ᤹ ᤁᤧᤏᤠ᤺ᤰᤐᤠᤜᤠ᤹ ᤏᤢ᤺ᤒᤠ ᤐᤠ᤺ᤴᤜᤠ᤹ ᤐᤡᤖᤢᤛᤡ᤹ᤖᤥ॥”
MAT 7:12 “ᤁᤧᤖᤧᤰ ᤐᤠ᤺ᤴᤏᤥ ᤔᤏᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤶᤔᤧᤳᤋᤡ ᤁᤧᤶᤀᤡ᤺ᤳᤋᤡᤒᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤂᤧᤱᤜᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤌᤡᤶᤔᤥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗᤥ॥”
MAT 7:13 “ᤆᤡᤓᤡ᤺ᤵᤑᤡ᤺ᤵᤐᤠ ᤗᤠ᤺ᤵᤔᤠᤍᤧᤴᤏᤥᤗᤠᤶ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤶᤒᤠ ᤗᤠ᤺ᤵᤔᤠᤍᤧᤴ ᤏᤢ ᤋᤠᤶᤍᤠᤶᤒᤠ ᤗᤠᤶᤔᤡᤸᤗᤧᤃ ᤔᤧᤰᤔᤠᤀᤥ ᤁᤧᤍᤣ᤹ᤖᤡ᤹ᤖᤥ॥ ᤂᤧᤴᤗᤠᤶᤒᤠ ᤕᤖᤡᤰ ᤔᤏᤠᤜᤠ᤹ ᤔᤧᤗᤠ᤺ᤳᤗᤥ॥
MAT 7:14 ᤁᤖ ᤆᤢᤰᤛᤠ ᤗᤠ᤺ᤵᤔᤠᤍᤧᤴ ᤏᤢ ᤆᤡᤓᤡ᤺ᤵᤑᤡ᤺ᤵᤐᤠ ᤗᤠᤶᤔᤡᤸᤗᤧᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤁᤧᤍᤣ᤹ᤖᤡ᤹ᤖᤥ॥ ᤂᤧᤴ ᤁᤧᤄᤥ᤺ᤒᤠᤜᤠ᤹ᤃ ᤔᤡᤛᤠᤰᤗᤰ ᤔᤧᤒᤥ᤺ᤱᤗᤥ॥”
MAT 7:15 “ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤧᤱᤜᤠ᤹ᤃ ᤗᤠ᤺ᤰᤁᤠᤳᤗᤠᤶ ᤔᤧᤸᤗᤢᤰ ᤁᤢᤀᤡᤛᤡ᤺ᤰ ᤔᤧᤗᤧᤱᤛᤡᤱᤅᤠᤱ ᤂᤡᤏᤡ᤹ᤀᤥ ᤔᤧᤍᤠᤖᤥ. ᤁᤖ ᤛᤡᤃᤠᤱᤃ ᤂᤧᤱᤜᤠ᤹ ᤁᤡᤵᤔᤠ ᤁᤧᤄᤢ᤺ᤒᤠ ᤐᤖᤠᤒᤠᤛᤡᤖᤥ॥
MAT 7:16 ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤂᤧᤱᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤛᤡᤶᤗᤥ॥ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤋᤡᤱᤃᤪᤣ᤺ᤰ ᤐᤥ᤺ᤰᤗᤠᤀᤥᤗᤠᤶ ᤆᤧᤸᤗᤧᤰᤛᤣ᤹ ᤏᤢ ᤛᤡᤎᤪᤠ᤺ᤰᤐᤥᤗᤠᤶ ᤐ᤺ᤳᤇᤣ᤹ᤀᤡᤴ ᤔᤧᤴᤍᤢᤒᤢᤴᤗᤥ॥
MAT 7:17 ᤜᤧᤰᤁᤣᤗ᤹ᤖᤡᤰᤁᤣ ᤁᤧᤖᤧᤰ ᤏᤢ᤺ᤒᤠ ᤛᤡᤱᤒᤢᤱᤅᤥ ᤏᤢ᤺ᤒᤠᤀᤣ ᤛᤡᤱᤛᤣ᤹ᤀᤡᤴ ᤌᤥ᤺ᤰᤗᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥ ᤋᤠᤵᤑᤧ᤺ᤶᤒᤠᤀᤣ ᤛᤡᤱᤛᤣ᤹ᤀᤡᤴ ᤌᤥ᤺ᤰᤗᤥ॥
MAT 7:18 ᤜᤧᤰᤁᤩᤠᤱ ᤏᤢ᤺ᤒᤠ ᤛᤡᤱᤒᤢᤱᤅᤥ ᤋᤠᤵᤑᤧ᤺ᤶᤒᤠ ᤛᤡᤱᤛᤣ᤹ᤀᤡᤴ ᤔᤧᤎᤥ᤺ᤰᤏᤧᤴᤗᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥ ᤏᤢ᤺ᤒᤠ ᤛᤡᤱᤛᤣ᤹ᤀᤡᤴ ᤔᤧᤎᤥ᤺ᤰᤏᤧᤴᤗᤥ॥
MAT 7:19 ᤜᤧᤰᤁᤣᤗ᤹ᤖᤡᤰ ᤏᤢ᤺ᤒᤠ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤋᤠᤱᤔᤠᤀᤠᤱ ᤔᤡᤀᤥ ᤗᤠᤵᤑᤢᤔᤠ ᤐᤥ᤺ᤱᤗᤥ॥
MAT 7:20 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤛᤡᤶᤗᤥ॥”
MAT 7:21 ᤀᤠᤸᤗ “‘ᤀᤠᤍᤠᤱᤒᤣ. ᤀᤠᤍᤠᤱᤒᤣ’. ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤔᤧᤴᤗᤠ᤺ᤳᤏᤧᤴᤗᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤰ ᤔᤧᤗᤠ᤺ᤳᤗᤥ॥
MAT 7:22 ᤂᤠᤛᤧᤴ ᤕᤧᤴᤏᤥ ᤕᤖᤡᤰ ᤔᤏᤠᤜᤠ᤹ ᤔᤧᤍᤠᤀᤠᤱ ᤀᤰᤂᤣ ᤔᤧᤔᤧᤳᤋᤠᤖᤥ. ‘ᤀᤠᤍᤠᤱᤒᤣ. ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤡᤃᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤶ ᤗ᤺ᤳᤋᤢᤶᤛᤡᤶᤒᤧᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤶᤒᤧᤖᤥ॥’
MAT 7:23 ᤁᤖ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ. ‘ᤂᤡᤏᤡ᤹ᤃ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤒᤠ ᤜᤥ᤺ᤵᤗᤥ॥ ᤂᤡᤏᤡ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤴᤈᤥ᤺ᤰᤁᤣ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤣ. ᤁᤵᤔᤥᤗᤠᤶ ᤐᤣᤃᤧᤶᤔᤧ᤹᥄’”
MAT 7:24 ᤀᤠᤸᤗ “ᤂᤧᤸᤗᤧ ᤆᤥᤃᤢᤸᤗᤧ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰ ᤁᤧᤄᤧᤶᤒᤠᤀᤠᤱ ᤜᤧᤰᤁᤣ ᤁᤧᤈᤥ᤺ᤰᤐᤧᤱᤃ ᤐᤕᤶ ᤕᤶᤒᤠ ᤗᤢᤱᤛᤶᤍᤠᤱ ᤜᤡᤶᤐᤠᤱᤕᤰ ᤁᤧᤏᤧᤒᤠᤀᤠᤱ ᤜᤡᤶ ᤁᤧᤈᤥ᤺ᤰᤐᤠ ᤛᤡᤰᤁᤢᤶᤒᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
MAT 7:25 ᤜᤧᤰᤁᤩᤠᤱ ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤩᤧᤀᤠᤱ. ᤕᤱᤄᤱᤅᤡᤴ ᤁᤢᤰᤂᤧ ᤕᤧ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤖᤧᤀᤠᤱ ᤂᤧᤴ ᤜᤡᤶᤔᤡᤴ ᤜᤡᤵᤋᤢᤛᤠᤱ ᤔᤧᤈᤥ᤺ᤴᤍᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤜᤡᤶᤔᤡᤸᤗᤧᤴ ᤜᤡᤶᤐᤠᤱᤕᤰᤁᤡᤱᤃ ᤐᤕᤶ ᤕᤶᤒᤠ ᤗᤢᤱ ᤛᤶᤍᤠᤱ ᤏᤧᤛ᤻ᤛᤧᤖᤥ॥
MAT 7:26 ᤁᤖ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤜᤧᤰᤁᤣ ᤔᤧᤴᤈᤥ᤺ᤰᤔᤏᤠᤒᤠᤱᤃ ᤕᤧ᤺ᤱᤄᤠᤀᤥ ᤜᤡᤶᤐᤠᤱᤕᤰ ᤁᤧᤏᤧᤒᤠᤀᤠᤱ ᤜᤡᤶ ᤁᤧᤈᤥ᤺ᤰᤐᤠ ᤀᤍᤱ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
MAT 7:27 ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤩᤧᤀᤠᤱ. ᤕᤱᤄᤱᤅᤡᤴ ᤁᤢᤰᤂᤧ ᤕᤧ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤖᤧᤀᤠᤱ ᤂᤧᤴ ᤜᤡᤶᤔᤡᤴ ᤜᤡᤵᤋᤢᤸᤗᤧ ᤕᤖᤧᤒᤣᤖᤥ॥”
MAT 7:28 ᤕᤧᤛᤢᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢ. ᤜᤧᤰᤁᤩᤠᤱ ᤁᤢᤏᤡᤛᤠᤶ ᤁᤧᤄᤧᤶᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ.
MAT 7:29 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤜᤢ᤹ᤖᤢᤛᤡᤖᤥ॥
MAT 8:1 ᤕᤧᤛᤢ᤺ᤴ ᤁᤥ᤺ᤰᤔᤠᤀᤥᤗᤠᤶ ᤕᤥ ᤌᤩᤧ᤺ᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥
MAT 8:2 ᤜᤰᤆᤄᤳ ᤂᤧᤵᤔᤥ ᤗᤥᤃᤣ᤹ ᤋᤢᤰᤔᤠᤸᤗᤧ ᤋᤖᤢᤒᤠ ᤔᤏᤠᤎᤡᤰ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤂᤧᤸᤗᤧ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”
MAT 8:3 ᤕᤧᤛᤢᤖᤧ ᤁᤢᤜᤢᤰᤁᤡᤴ ᤛᤴᤇᤢᤖ ᤂᤧᤴ ᤔᤏᤠ᤺ᤴ ᤛᤢ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤏᤧ᤹ ᤏᤢᤖᤧ᤹ᤀᤥ᥄” ᤂᤡᤔᤥ ᤂᤧᤴ ᤔᤏᤠ᤺ᤴ ᤗᤥᤃᤣ᤹ ᤋᤢᤰᤔᤠᤗᤠᤶ ᤏᤢ᤺ᤖᤧᤖᤥ॥
MAT 8:4 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤁᤴ ᤐᤠ᤺ᤴᤏᤡᤴ ᤔᤧᤔᤧᤳᤋᤧᤴᤏᤧ᤹ᤀᤥ. ᤁᤖ ᤔᤠᤱᤜᤡᤶᤔᤥ ᤐᤣᤃᤧ᤹ᤀᤠᤱ ᤏᤢ᤺ᤖᤠᤱᤗᤥ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹ᤀᤥ. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤢᤖᤧᤒᤠᤴ ᤔᤧᤏᤡ᤺ᤛᤢᤖᤖᤥ॥”
MAT 8:5 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤁᤧᤖᤧᤖ ᤐᤳᤇᤧᤸᤗᤧ ᤖᤥᤔᤡ ᤌᤰᤋᤢᤶᤒᤠᤎᤡᤰ ᤂᤢᤏᤧ᤹ᤀᤥ ᤋᤩᤧᤀᤠᤱ ᤀᤰᤂᤣ ᤔᤧᤳᤋᤢᤖ ᤁᤢᤓᤠ᤹ ᤏᤠ᤺ᤰᤋᤢ.
MAT 8:6 “ᤍᤠᤱᤒᤣ. ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤴ ᤜᤡᤶᤔᤥ ᤐᤥ᤺ᤰᤔᤠ ᤕᤢᤱᤔᤠ ᤔᤧᤴᤇᤢᤰᤁᤣ ᤌᤠᤖᤡᤰ ᤋᤢᤰᤁᤠᤱ ᤏᤧᤖᤥ॥”
MAT 8:7 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤐᤣ᤺ᤰᤁᤠᤀᤠᤱ ᤏᤢᤛᤢᤱᤗᤥ॥”
MAT 8:8 ᤁᤖ ᤌᤰᤋᤢᤶᤒᤠᤸᤗᤧ ᤏᤥᤃᤵ ᤐᤡᤖᤢ “ᤍᤠᤱᤒᤣ. ᤂᤧᤏᤧ᤹ ᤀᤠᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤀᤡᤱᤃᤠ᤹ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤏᤢ᤹ᤖ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤛᤠᤱ ᤀᤠᤛᤣᤘᤠᤖᤥᤒᤠᤴ ᤏᤢ᤹ᤖᤥ॥
MAT 8:9 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤎᤢᤱᤎᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤘᤠ᤹ᤒᤠ ᤔᤏᤠᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤢᤰᤁᤥ ᤌᤰᤛᤢᤒᤠᤜᤠ᤹ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤌᤰᤛᤢᤒᤠᤴ ‘ᤐᤣᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤐᤣ᤺ᤰ. ᤘᤣ᤹ᤛ᤻ᤔᤠᤴ ‘ᤑᤧᤖᤧ᤹’ ᤔᤧᤳᤋᤢᤱᤅᤡᤸᤗᤧ ᤑᤧᤴ. ᤜᤧᤰᤁᤩᤠᤱ ᤀᤠᤛᤣᤘᤠᤖᤥᤒᤠᤴ ‘ᤂᤧᤴ ᤆᤥᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤂᤧᤸᤗᤧ ᤆᤥᤃᤢ᤹ᤖᤥ॥”
MAT 8:10 ᤕᤧᤛᤢᤖᤧ ᤁᤴ ᤂᤧᤵᤛᤢᤸᤗᤧ ᤁᤢᤏᤡᤱᤘᤠ᤹ ᤔᤕᤧᤖ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤁᤧᤍᤡᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤰᤋᤱᤒᤠ ᤕᤶᤒᤠ ᤏᤛᤠ᤺ᤴ ᤁᤧᤃᤵᤐᤠ ᤔᤏᤠ᤺ᤱᤃ ᤀᤡᤛᤪᤠᤀᤡᤗᤥᤀᤠᤱ ᤀᤡᤱᤃᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ᥄
MAT 8:11 ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤁᤧᤖᤧᤰ ᤐᤡᤛᤠᤱᤒᤠ ᤗᤠᤈᤣ᤹ᤗᤠᤶ ᤕᤖᤡᤰ ᤔᤏᤠᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤔᤧᤍᤠᤀᤠᤱ ᤛᤠᤓᤠᤱᤈᤠ ᤆᤠᤛᤧ ᤂᤡᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ. ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤛᤥᤖᤡᤰ ᤔᤧᤕᤢᤱᤛᤡᤱᤗᤥ॥
MAT 8:12 ᤁᤖ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤘᤠ᤹ᤔᤠ ᤑᤠ᤹ᤀᤠᤱ ᤔᤧᤛᤣᤃᤧᤒᤠ ᤀᤡᤛᤪᤠᤀᤡᤗᤡᤜᤠ᤹ᤃ ᤂᤧᤵᤔᤥᤗᤠᤶ ᤗᤠ᤺ᤰᤁᤠᤳ ᤂᤠᤔᤠᤰ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢ᤹ᤖᤥ॥ ᤂᤧᤵᤔᤥᤃ ᤜᤠ᤺ᤵᤔᤠ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴᤗᤰ ᤐᤥ᤺ᤱᤗᤥ॥”
MAT 8:13 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤌᤰᤋᤢᤶᤒᤧᤴ ᤔᤧᤳᤋᤢ. “ᤐᤣᤃᤧ᤹ᤀᤥ. ᤏᤛᤠ᤺ᤴ ᤁᤧᤈᤥᤃᤢᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥” ᤜᤧᤰᤁᤩᤠᤱ ᤂᤧᤴ ᤁᤢᤛᤣᤘᤠᤖᤥᤒᤠᤴ ᤒᤠ ᤂᤧᤴ ᤕᤧᤶᤔᤥᤀᤣ ᤏᤢ᤺ᤖᤧᤖᤥ॥
MAT 8:14 ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤋᤪᤢᤛᤖᤧ ᤁᤢᤜᤡᤶᤔᤥ ᤋᤩᤧ᤺ᤸᤗᤧ ᤂᤧᤵᤔᤥ ᤐᤋᤪᤢᤛᤖᤧ ᤁᤢᤴᤏᤥ᤺ᤵᤔᤧᤴ ᤋᤢᤱᤅᤡᤸᤗᤧ ᤋᤖᤢᤀᤠᤱ ᤏᤧᤛ᤻ᤛᤧᤖᤥ॥
MAT 8:15 ᤕᤧᤛᤢᤖᤧ ᤂᤧᤸᤗᤧ ᤁᤢᤜᤢᤰᤁᤥ ᤛᤢ᤺ᤛᤢᤸᤗᤧᤛᤠ ᤋᤢᤱᤅᤡᤸᤗᤧ ᤗᤧᤖᤢᤖᤥ. ᤜᤧᤰᤁᤩᤠᤱ ᤂᤧᤴ ᤐᤥᤃᤧᤀᤠᤱ ᤋᤖᤣ ᤋᤥᤔᤠ ᤜᤣ᤺ᤰᤋᤢᤛᤡᤖᤥ॥
MAT 8:16 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤀᤠᤱ ᤕᤖᤡᤰ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤛᤡᤒᤠ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤠᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤴᤈᤠᤰᤁᤡᤸᤗᤧ ᤂᤧᤴ ᤑᤧᤴᤛᤠᤶᤜᤠ᤹ ᤁᤧᤖᤧᤰ ᤏᤠ᤺ᤳᤋᤢ ᤗ᤺ᤳᤋᤢᤛᤡᤀᤠᤱ ᤁᤧᤖᤧᤰ ᤁᤧᤍᤢᤰᤐᤠᤜᤠ᤹ ᤏᤢᤛᤢᤛᤡᤖᤥ॥
MAT 8:17 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ– “ᤂᤢᤏᤧ᤹ ᤀᤠᤒᤠᤅᤣ ᤀᤠᤏᤡ᤹ ᤋᤢᤰᤂᤣᤜᤠ᤹ ᤕᤠᤱᤛᤡᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤋᤢᤰᤔᤠ ᤕ᤹ᤔᤠᤜᤠ᤹ ᤁᤢᤕᤢ ᤋᤣ᤹ᤖᤢᤖᤥ॥”
MAT 8:18 ᤀᤠᤸᤗ ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤁᤢᤃᤒᤪᤡᤱ ᤏᤡ᤺ᤛᤢᤛᤡᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤐᤣᤃᤧᤶᤔᤧ᤹ ᤔᤧᤳᤋᤢᤛᤡ॥
MAT 8:19 ᤂᤧᤱᤜᤠ᤹ᤖᤧ ᤐᤣ᤺ᤰᤔᤠ ᤕᤠᤖᤡᤵ ᤔᤧᤈᤥᤃᤢᤖ ᤔᤧᤕᤠᤃᤧᤸᤗᤧ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰ ᤑᤧᤖᤧᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤂᤧᤏᤧ᤹ᤏᤢ ᤐᤣ᤺ᤰᤁᤠᤖᤥ॥”
MAT 8:20 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤡᤎᤡᤒᤠᤜᤠ᤹ᤖᤧ ᤗᤢᤱᤄᤢᤖᤡ ᤔᤧᤃᤳᤋᤢ᤹. ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤃ ᤌᤧᤃᤣ᤺ᤰ ᤏᤠ᤺ᤶᤔᤠ ᤋᤧᤴᤏᤠᤱ ᤔᤧᤃᤳᤋᤠᤴᤗᤥ॥”
MAT 8:21 ᤘᤣ᤹ᤛ᤻ᤔᤠ ᤜᤢ᤹ᤛᤠᤶᤒᤠᤎᤡᤰᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤣ. ᤋᤃᤡ ᤀᤡᤱᤃᤠ᤹ ᤁᤧᤛᤡ᤺ᤒᤠ ᤀᤠᤶᤒᤠ᤺ᤴ ᤀᤡᤵᤐᤢᤱᤅᤥ ᤆᤡᤱᤛᤧ ᤐᤣ᤺ᤰᤔᤠ ᤐᤠᤱᤄᤠᤱᤅᤧ᤹ᤀᤥ॥”
MAT 8:22 ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ. ᤜᤧᤰᤁᤩᤠᤱ ᤜᤠᤖᤠ᤹ ᤕᤠᤶᤛᤠᤶᤔᤥ ᤁᤧᤛᤡ᤺ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤆᤣᤜᤠ᤹ ᤀᤡᤵᤐᤢᤱᤅᤥ ᤔᤧᤈᤡᤰᤂᤢᤛᤡᤖᤖᤥ॥”
MAT 8:23 ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤥᤃᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤎᤠᤛᤡᤱ॥
MAT 8:24 ᤜᤰᤆᤄᤳ ᤘᤖᤰᤁᤥ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤧᤈᤈᤱᤅᤡᤴ ᤜᤢ᤺ᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤸᤗᤧ ᤂ᤺ᤱᤒᤣᤴ ᤘᤧᤳᤗᤧᤰ ᤋᤡᤶᤛᤧᤖᤥ॥ ᤁᤖ ᤕᤧᤛᤢ᤺ᤱᤃ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤖᤥ॥
MAT 8:25 ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤀᤠᤱ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤓᤥ᤺ᤰᤂᤢ. “ᤀᤠᤍᤠᤱᤒᤣ. ᤕᤠᤵᤔᤡ ᤋᤠᤱᤛᤧ᤺ᤵᤋᤧ᤹ᤀᤥ᥄ ᤀᤠᤏᤡᤃᤧᤃ ᤜᤢᤶᤔᤠ ᤛᤡ᤺ᤔᤠ ᤀᤡ᤺ᤳᤋᤡᤃᤧᤖᤥ᥄”
MAT 8:26 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ. ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤁᤧᤃᤡ᤺ᤛᤡᤒᤠᤒᤣ᥅” ᤜᤧᤰᤁᤩᤠᤱ ᤂᤢᤏᤧ᤹ ᤐᤥᤃᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤴ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤁᤧᤖᤧᤰ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤖᤥ॥
MAT 8:27 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤛᤣ᤺ᤴᤔᤧᤍᤥ᤺ᤛᤡᤱ “ᤂᤢᤏᤧ᤹ᤃ ᤀᤠᤰᤋᤱᤒᤠ ᤔᤏᤠ᤺ᤴᤒᤣ᥅ ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤅᤡᤴ ᤘᤠᤓᤣᤸᤗᤧᤱ ᤏᤢ ᤛᤢᤖᤡᤳ ᤁᤣᤈᤱᤅᤡᤸᤗᤧᤀᤠᤱ ᤂᤧᤵᤛᤢᤱᤃ᥄”
MAT 8:28 ᤜᤧᤰᤁᤩᤠᤱ ᤂᤢᤏᤧ᤹ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤃᤍᤖᤡᤏᤡ ᤗᤠᤈᤣ᤹ᤀᤥ ᤁᤧᤖᤧ. ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤀᤡᤵᤐᤢᤱᤍᤧᤴᤗᤠᤶ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤛᤡᤒᤠ ᤏᤧᤵᤑᤢ ᤔᤏᤠᤜᤠ᤹ ᤁᤢᤍᤢᤶᤛᤧ ᤑᤧᤖᤧᤳᤇᤡ॥ ᤂᤧᤱᤜᤠ᤹ ᤁᤶᤔᤩᤠᤰ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤆᤥᤃᤧᤳᤇᤡ ᤀᤠᤳᤋᤡᤴᤏᤠᤱ ᤂᤧᤴ ᤋᤧᤴᤏᤥ ᤐᤥ᤺ᤱᤔᤠᤖ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤋᤧᤴᤗᤥ॥
MAT 8:29 ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤳᤇᤡ. “ᤏᤡᤱᤘᤠ᤹ᤑᤢᤛᤠ᤺ᤀᤣ. ᤂᤧᤏᤧ᤹ ᤀᤠᤴᤇᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤠᤛᤧᤴ ᤕᤧᤶᤔᤡᤴᤏᤣ ᤔᤧᤴᤍᤠᤀᤣ ᤀᤠᤴᤇᤡᤃᤧ ᤋᤢᤰᤂᤣ ᤆᤠ᤺ᤳᤇᤧ ᤁᤵᤔᤥ ᤁᤧᤍᤩᤧᤒᤠᤒᤡ᥅”
MAT 8:30 ᤂᤧᤵᤔᤥᤗᤠᤶ ᤔᤡᤛᤠᤰ ᤏᤠᤏᤠᤰ ᤕᤖᤡᤰ ᤑᤠᤰᤜᤠ᤹ ᤆᤠᤔᤧᤖᤠᤔᤧᤖ ᤔᤧᤕᤧᤒᤧ॥
MAT 8:31 ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤕᤧᤛᤢ᤺ᤴ ᤕᤠᤵᤔᤡ ᤗᤠ᤺ᤰᤁᤠᤳ ᤁᤧᤗ᤺ᤵᤐᤠᤏᤧ ᤑᤠ᤹ᤃᤪ ᤂᤧᤴ ᤑᤠᤰᤜᤠ᤹ᤀᤥ ᤗᤠ᤺ᤵᤔᤠ ᤀᤠᤒᤠᤱᤄᤧ᤹ᤀᤥ ᤗ᤹ᤖᤡᤰ ᤐᤣᤗᤡ ᤔᤧᤓᤠᤰᤋᤢ॥
MAT 8:32 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹᥄” ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ᤗᤠᤶ ᤂᤧᤱᤜᤠ᤹ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤑᤠᤰᤜᤠ᤹ᤀᤥ ᤔᤧᤗᤠ᤺ᤛᤧ॥ ᤜᤧᤰᤁᤩᤠᤱ ᤂᤧᤴ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥
MAT 8:33 ᤂᤧᤴ ᤑᤠᤰ ᤁᤧᤃᤶᤒᤠᤜᤠ᤹ ᤏᤡ᤺ᤳᤋᤠᤱᤒᤠ ᤐᤠᤱᤈᤢᤶᤔᤥ ᤔᤧᤒᤣᤀᤠᤱ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤛᤡᤒᤠ ᤏᤧᤵᤑᤢ ᤔᤏᤠᤜᤠ᤹ᤖᤥ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤈᤧᤰᤋᤢᤛᤡᤖᤥ॥
MAT 8:34 ᤜᤧᤰᤁᤩᤠᤱ ᤐᤠᤱᤈᤢᤶᤔᤥᤒᤠ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤖᤥ ᤔᤧᤍᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤠᤏᤡᤃᤧ ᤌᤢᤶᤔᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
MAT 9:1 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤏᤠᤜᤠᤱᤍᤠᤱᤒᤠ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤁᤧᤖᤧᤖᤥ॥
MAT 9:2 ᤂᤧᤵᤔᤥ ᤁᤢᤓᤠ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠᤎᤡᤰ ᤁᤢᤏᤧᤳᤏᤠ᤺ᤴᤏᤢᤀᤣ ᤂᤢᤏᤧ᤹ᤀᤥ ᤔᤧᤍᤠᤖᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤘᤣ᤺ᤵᤔᤠ ᤛᤢᤰ ᤁᤧᤗ᤹ᤒᤠ ᤏᤛᤠ᤺ᤴ ᤔᤧᤃᤳᤋᤢᤒᤠ ᤕᤧᤛᤢᤖᤧ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤠᤛ᤻ᤛᤠ᤺ᤀᤣ. ᤜᤠᤱᤜᤠᤱ ᤗ᤹ᤖᤧ᤹ᤀᤥ. ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥”
MAT 9:3 ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤔᤏᤠ᤺ᤸᤗᤧᤃ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤗᤠᤕᤥ ᤗᤧᤵᤔᤡ ᤁᤧᤒᤡᤒᤠ ᤗᤧᤱᤛᤡᤱᤅᤠᤱ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤴᤏᤧ ᤐᤠ᤺ᤳᤋᤢᤖ ᤐᤳᤗᤥ᥄”
MAT 9:4 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤌᤣᤀᤠᤱ ᤜᤧᤰᤁᤣᤗ᤹ᤖᤡᤰ ᤑᤧᤴ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅
MAT 9:5 ‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’. ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ. ᤀᤡ ‘ᤐᤥᤃᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅
MAT 9:6 ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤜᤠ᤹ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢᤱ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤏᤡᤱᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤔᤧᤳᤋᤢ. “ᤐᤥᤃᤧ᤹. ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”
MAT 9:7 ᤜᤧᤰᤁᤩᤠᤱ ᤂᤧᤴ ᤐᤥᤃᤧᤀᤠᤱ ᤁᤢᤜᤡᤶᤔᤥ ᤌᤠᤛᤡᤱᤗᤥ॥
MAT 9:8 ᤔᤏᤠᤜᤠ᤹ᤖᤧ ᤁᤴ ᤔᤧᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ᤺ᤴ ᤀᤰᤋᤱᤒᤠ ᤔᤢᤰᤛᤠᤶ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥
MAT 9:9 ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤔᤳᤋᤡ ᤔᤧᤵᤔᤏᤠᤒᤠ ᤔᤏᤠ᤺ᤴ ᤀᤣ᤺ᤱᤕᤠᤱ ᤑᤥ᤺ᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥” ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤂᤢᤏᤧ᤹ᤏᤢ ᤌᤠᤛᤡᤱᤗᤥ॥
MAT 9:10 ᤂᤧᤴ ᤕᤢ᤺ᤴᤇᤡᤰ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤳᤋᤡᤖᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤔᤧᤕᤢᤱᤛᤡᤱᤅᤡᤸᤗᤧ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤕᤖᤡᤰ ᤔᤏᤠᤜᤠ᤹ ᤏᤢ ᤘᤣ᤹ “ᤗᤠᤕᤥᤒᤠᤜᤠ᤹” ᤔᤧᤍᤩᤧᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤆᤠᤈᤠᤛᤧ ᤔᤧᤕᤢᤱᤛᤡᤱ॥
MAT 9:11 ᤜᤧᤰᤁᤣ᤺ᤸᤗᤧ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤔᤧᤳᤋᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤛᤡᤰᤛᤠᤶᤒᤠᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤜᤧᤰᤁᤩᤠᤱ ᤘᤣ᤹ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰ ᤆᤠᤈᤠᤒᤠᤒᤣ᥅”
MAT 9:12 ᤕᤧᤛᤢᤖᤧ ᤁᤴ ᤂᤧᤵᤛᤢᤀᤠᤱ ᤔᤧᤳᤋᤢᤛᤡ. “ᤛᤡᤍᤠ᤹ᤛᤠᤶᤒᤧᤱᤃ ᤔᤧᤴᤍᤢᤰᤔᤏᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤁᤧᤍᤢᤰᤐᤠᤜᤠ᤹ᤖᤧ ᤗᤠᤃᤡᤖᤥ॥
MAT 9:13 ᤛᤠᤶᤕᤥᤛᤠᤵᤗᤠᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ᤃ ᤛᤡᤍᤢᤱᤈᤓᤠ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴ. ᤁᤖ ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ. ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤜᤢ᤹ᤀᤠᤛᤡᤶᤔᤧ᤹ᤀᤥ॥ ᤀᤡᤱᤃᤠ᤹ᤃ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤗᤠᤕᤥᤒᤠᤜᤠ᤹ ᤗᤠᤕᤥᤗᤠᤶ ᤔᤧᤏᤢ᤺ᤱᤅᤠᤱ ᤋᤠᤱᤔᤧᤛᤧ᤺ᤵᤗ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥”
MAT 9:14 ᤜᤧᤰᤁᤩᤠᤱ ᤌᤡᤰᤗᤧᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤀᤠᤏᤡᤃᤧ ᤏᤢ ᤑᤖᤡᤛᤡᤜᤠ᤹ ᤆᤠ᤺ᤏᤧᤳᤋᤥ ᤀᤧᤳᤗᤧᤱ ᤕᤢᤅᤡᤃᤧ᤹ ᤁᤖ ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ ᤆᤠ᤺ᤏᤧᤳᤋᤥ ᤔᤧᤴᤕᤢᤱᤏᤧᤴᤒᤠᤒᤣ᥅”
MAT 9:15 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤣ᤺ᤰᤂᤡᤶᤛᤠᤒᤧᤴ ᤁᤢᤴᤈᤢᤶᤜᤠ᤹ᤏᤢ ᤘᤠ᤹ᤖ ᤌᤠᤖᤡᤰ ᤂᤢᤏᤧ᤹ ᤁᤢᤴᤈᤢᤶᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤅᤠᤱ ᤔᤣᤖᤡᤱ ᤔᤧᤎᤰᤐᤡ᥅ ᤁᤖ ᤂᤧᤱᤜᤠ᤹ᤗᤠᤶ ᤔᤣ᤺ᤰᤂᤡᤶᤛᤠᤒᤧᤴ ᤛᤠᤰᤁᤧᤸᤗᤧᤰ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤸᤗᤧᤖᤰ ᤂᤧᤱᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤗᤥ॥
MAT 9:16 ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤡᤖᤡᤰᤁᤡᤸᤗᤧ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤗᤧᤶᤍᤢᤴᤗᤥ. ᤗᤧᤶᤍᤢᤏᤧ ᤑᤠ᤹ᤃᤪ ᤂᤧᤴ ᤁᤡᤱᤅᤠᤱ ᤀᤠᤸᤗᤛᤠᤱ ᤕᤶᤒᤠ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ॥
MAT 9:17 ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤔᤧᤕᤢᤰᤂᤢᤴ. ᤁᤖ ᤕᤢᤰᤂᤢᤏᤧ ᤑᤠ᤹ᤃᤪ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠ᤺ᤴ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ. ᤜᤧᤰᤁᤩᤠᤱ ᤌᤡ᤺ᤴ ᤘᤧᤳ ᤐᤣ᤺ᤰᤁᤠᤱ ᤆᤠᤛᤥ᤺ᤰᤗᤥ॥ ᤁᤖ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤛᤱ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤕᤠᤰᤔᤠ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤏᤢ ᤛᤧᤜᤥᤒᤠ ᤛᤢ᤺ᤰᤘᤠ᤺ᤴ ᤏᤧᤵᤔᤠᤱ ᤋᤠᤱᤗᤥ॥”
MAT 9:18 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤖ ᤐᤳᤇᤧᤸᤗᤧ ᤛᤢᤜᤠᤱᤕᤢᤰᤐᤠᤎᤡᤰ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤀᤰᤂᤣ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤛ᤻ᤛᤠ᤺ ᤆᤢᤰᤔᤧᤴ ᤂᤠᤖᤰ ᤛᤩᤧᤖᤥ. ᤁᤖ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤁᤢᤛᤶᤍᤠᤱ ᤁᤧᤜᤢᤰᤁᤡᤴ ᤏᤧᤛ᤻ᤛᤧ ᤐᤡᤖᤧ᤹. ᤜᤧᤰᤁᤩᤠᤱ ᤂᤧᤴ ᤜᤡᤱᤗᤥ॥”
MAT 9:19 ᤕᤧᤛᤢ᤺ᤴ ᤐᤥᤃᤧᤀᤠᤱ ᤂᤧᤴᤏᤢ ᤌᤠᤛᤡᤱ. ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤔᤧᤎᤠᤛᤡᤱᤗᤥ॥
MAT 9:20 ᤒᤠ ᤂᤧᤴ ᤕᤧᤶᤔᤥ ᤋᤱᤒᤣ ᤌᤡᤰ-ᤏᤧᤳᤋᤠᤱᤎᤥ (᥇᥈) ᤔᤠᤰᤂᤡ᤹ ᤘᤕᤢ᤺ᤔᤠᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤕᤧᤛᤢᤖᤧ ᤁᤢᤀᤣᤃᤠᤱ ᤋᤩᤧᤀᤠᤱ ᤁᤢᤍᤣ᤺ᤳᤋᤡᤸᤗᤧ ᤁᤢᤕᤠ᤺ᤴ ᤛᤢ᤺ᤛᤢ॥
MAT 9:21 ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤂᤢᤏᤧ᤹ ᤁᤢᤍᤣ᤺ᤳᤋᤡᤸᤗᤧ ᤁᤢᤕᤠ᤺ᤴᤗᤰ ᤛᤢ᤺ᤛᤢᤱᤛᤠᤱ ᤀᤡᤱᤃᤠ᤹ ᤘᤣ᤺ᤳᤋᤠᤖᤥ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ॥
MAT 9:22 ᤕᤧᤛᤢ᤺ᤴ ᤜᤡᤸᤗᤡᤰ ᤜᤡᤛᤡᤱᤅᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤔᤠᤔᤢᤀᤣ. ᤜᤠᤱᤜᤠᤱ ᤗ᤹ᤖᤧ᤹ᤀᤥ. ᤏᤛᤠ᤺ᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤘᤣ᤺ᤳᤋᤧᤖᤥ॥” ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤜᤠᤒᤠ ᤂᤧᤴ ᤕᤧᤶᤔᤥ ᤘᤣ᤺ᤳᤋᤧᤖᤥ॥
MAT 9:23 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴ ᤗᤠᤶᤗᤥ᤺ᤒᤠᤸᤗᤧ ᤁᤢᤜᤡᤶᤔᤥ ᤁᤧᤖᤧᤸᤗᤧ ᤂᤧᤵᤔᤥ ᤆᤣ ᤗᤢᤵᤔᤠ ᤕᤧᤶᤔᤥ ᤔᤧᤵᤑᤪᤠᤔᤠ ᤁᤧᤔᤢ᤺ᤵᤐᤠᤜᤠ᤹ ᤏᤢ ᤔᤣᤖᤡᤱ ᤁᤧᤎᤰᤐᤠ ᤕᤖᤡᤰ ᤔᤏᤠᤜᤠ᤹ ᤏᤡ᤺ᤛᤢᤛᤡ॥
MAT 9:24 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤥ. ᤁᤴ ᤆᤢᤰᤔᤧᤱᤃ ᤔᤧᤴᤇᤡ᤺ᤀᤣ ᤘᤠ᤹ ᤀᤡᤵᤛᤧᤀᤠᤱᤗᤰ ᤏᤧᤖᤥ”. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤀᤣ᤺ᤳᤋᤢᤖᤥ॥
MAT 9:25 ᤂᤧᤴ ᤔᤏᤠᤜᤠ᤹ ᤂᤧᤵᤔᤥᤏᤢ ᤔᤧᤗ᤺ᤳᤋᤢᤛᤡᤀᤠᤱ ᤕᤧᤛᤢ᤺ᤴ ᤛᤡᤃᤠᤱ ᤗᤠ᤺ᤛᤧ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤸᤗᤧ ᤁᤢᤜᤢᤰᤁᤡᤴ ᤋᤧᤶᤛᤢᤸᤗᤧ ᤂᤧᤴ ᤆᤢᤰᤔᤧᤴ ᤔᤢᤳᤌᤪᤡᤰ ᤐᤥᤃᤧᤖᤥ॥
MAT 9:26 ᤁᤴ ᤀᤡᤱᤄᤱᤅᤡᤴ ᤂᤧᤴ ᤌᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤛᤧ᤺ᤖᤧᤖᤥ॥
MAT 9:27 ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤏᤧᤵᤑᤢ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤋᤡᤶᤍᤧᤳᤇᤢᤖ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤳᤇᤡ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤠᤴᤇᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ॥”
MAT 9:28 ᤜᤧᤰᤁᤩᤠᤱ ᤕᤧᤛᤢ᤺ᤴ ᤗᤠ᤺ᤛᤧᤒᤠ ᤜᤡᤶᤔᤥ ᤐᤣᤛᤡᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤴᤇᤡ᤹ ᤔᤡᤰ ᤏᤡ᤺ᤔᤠ ᤁᤧᤛᤢᤰᤛᤢᤖ ᤆᤥ᤺ᤰᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤛᤢᤒᤡ᥅” ᤆᤥ᤺ᤰᤛᤢᤃᤧ᤹ᤖᤥ. ᤀᤠᤍᤠᤱᤒᤣ ᤑᤠ᤹ᤀᤠᤱ ᤏᤥᤃᤵ ᤐᤡᤖᤧᤳᤇᤢ॥
MAT 9:29 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤜᤠ᤹ ᤛᤢ᤺ᤛᤢ ᤐᤡᤖᤢᤛᤡᤖ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤏᤛᤠ᤺ᤴ ᤁᤧᤈᤥᤃᤧᤳᤇᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤖᤥ॥”
MAT 9:30 ᤂᤧᤱᤜᤠ᤹ ᤔᤡᤰ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤳᤇᤡ॥ ᤕᤧᤛᤢᤖᤧ ᤂᤧᤱᤜᤠ᤹ “ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤴᤗᤖᤥ” ᤔᤧᤳᤋᤢᤛᤡ॥
MAT 9:31 ᤁᤖ ᤂᤧᤱᤜᤠ᤹ ᤐᤣᤛᤡᤀᤠᤱ ᤂᤧᤴ ᤌᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱ ᤛᤧ᤺ᤛᤧᤳᤇᤢᤖᤥ॥
MAT 9:32 ᤜᤧᤰᤁᤩᤠᤱ ᤂᤧᤱᤜᤠ᤹ ᤗ᤺ᤴᤍᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤁᤢᤓᤠ ᤔᤏᤠᤜᤠ᤹ᤖᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠᤸᤗᤧ ᤆᤥᤃᤢᤸᤗᤧ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠ ᤔᤏᤠᤎᤡᤰ ᤕᤧᤛᤢᤖᤥ ᤔᤧᤍᤠᤖᤢ॥
MAT 9:33 ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤴ ᤕᤧᤛᤢᤖᤧ ᤏᤠ᤺ᤳᤋᤢ ᤗ᤺ᤳᤋᤢ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥ ᤂᤧᤴ ᤔᤧᤏᤡ᤺ᤛᤢᤀᤠᤱ ᤂᤧᤴ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤡᤛᤪᤠᤀᤡᤗ ᤗᤠᤈᤣ᤹ ᤂᤠᤖᤠᤰ ᤀᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”
MAT 9:34 ᤁᤖ ᤑᤖᤡᤛᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧᤃ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡ᤹ᤖᤥ॥”
MAT 9:35 ᤕᤧᤛᤢ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤜᤢ᤹ᤖᤢᤛᤡᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧ᤺ᤛᤢᤖ ᤁᤧᤖᤧᤰ ᤐᤖᤡᤰᤗᤧᤴ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤢᤛᤡᤖ ᤕᤧᤰᤕᤰ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤗᤠᤶᤍᤡ᤺ᤰ ᤆᤥᤃᤧᤖᤥ॥
MAT 9:36 ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤏᤡ᤺ᤛᤢᤛᤡᤸᤗᤧ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤔᤧᤸᤗᤢᤰᤁᤶᤒᤠ ᤔᤧ᤺ᤴᤏᤣᤒᤠ ᤔᤧᤸᤗᤢᤰ ᤜᤧᤰᤁᤣ ᤗᤠᤶ ᤁᤧᤒᤥ᤺ᤵᤐᤠᤀᤠᤱ ᤋᤢᤰᤂᤣ ᤁᤧᤈᤠᤒᤠ ᤁᤢᤀᤡᤛᤡ᤺ᤰ ᤔᤧᤈᤥᤃᤧᤖᤥ॥
MAT 9:37 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤴ ᤕᤖᤡᤰ ᤏᤧ᤹᤺. ᤁᤖ ᤆᤠ ᤁᤧᤛᤢᤶᤒᤠ ᤕᤠ᤺ᤗᤡᤰᤜᤠ᤹ ᤔᤧᤛᤢ᤺ᤴᤗᤥ॥
MAT 9:38 ᤜᤧᤰᤁᤣ᤺ᤸᤗᤧ ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤕᤖᤡᤰ ᤕᤠ᤺ᤗᤡᤰᤜᤠ᤹ ᤆᤠ ᤛᤢᤶᤛᤧ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”
MAT 10:1 ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤑᤧᤴᤛᤠᤶᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤶᤔᤠ ᤕᤢᤰ ᤐᤡᤖᤢᤛᤡᤖᤥ॥
MAT 10:2 ᤂᤧᤴ ᤌᤡᤰ-ᤏᤧᤳ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤃ ᤀᤰᤋᤱᤒᤠ ᤆᤥ᤺ᤰ – ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛᤀᤠᤱ ᤔᤧᤔᤧᤳᤋᤢ). ᤀᤠᤴᤍᤪᤡᤕᤠᤛ (ᤐᤋᤪᤢᤛᤖᤧ ᤁᤢᤴᤛᤠ᤹). ᤕᤠᤁᤢᤒ (ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺). ᤕᤢᤜᤢᤴᤏᤠ (ᤕᤠᤁᤢᤒᤖᤧ ᤁᤢᤴᤛᤠ᤹).
MAT 10:3 ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ. ᤌᤥᤔᤠ. ᤔᤳᤋᤡ (ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ). ᤕᤠᤁᤢᤒ (ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺). ᤌᤧᤍᤡᤕᤛ ᤜᤧᤰᤁᤩᤠᤱ
MAT 10:4 ᤛᤡᤔᤥᤏ (ᤂᤢᤏᤧ᤹ “ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ” ᤔᤧᤔᤧᤳᤋᤢ॥ ᤂᤧᤴ ᤑᤠ᤹ᤀᤡᤴ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤘᤕᤧ). ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ (ᤂᤢᤏᤧ᤹ ᤕᤧᤛᤢᤖᤧ ᤁᤢᤏᤛᤠ᤺ᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤖᤥ)॥
MAT 10:5 ᤕᤧᤛᤢᤖᤧ ᤁᤴ ᤌᤡᤰ-ᤏᤧᤳ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡᤖᤥ– “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤛᤠᤔᤖᤡᤜᤠ᤹ᤖᤧ ᤂᤢᤏᤡ᤹ ᤐᤠᤱᤈᤢᤶᤜᤠ᤹ᤀᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ.
MAT 10:6 ᤁᤖ ᤗᤠᤶ ᤁᤧᤒᤥ᤺ᤵᤐᤠ ᤔᤧᤸᤗᤢᤰ ᤜᤧᤰᤋᤱᤒᤠ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤥ ᤐᤣᤃᤧᤶᤔᤧ᤹ᤀᤥ॥
MAT 10:7 ᤂᤡᤏᤡ᤹ ᤁᤧᤒᤣᤃᤡᤸᤗᤧ ᤁᤴ ᤛᤢᤏᤠᤀᤡᤱᤅᤡᤴ ᤛᤧ᤺ᤛᤧᤶᤔᤧ᤹ᤀᤥ–‘ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹॥’
MAT 10:8 ᤁᤧᤍᤢᤰᤐᤠᤜᤠ᤹ ᤏᤢᤛᤧᤶᤛᤡᤶᤔᤧ᤹. ᤁᤧᤛᤡ᤺ᤒᤠᤜᤠ᤹ ᤁᤢᤜᤡᤱᤘᤧᤳ ᤆᤥᤃᤧᤶᤛᤡᤶᤔᤧ᤹. ᤗᤥᤃᤣ᤹ ᤋᤢᤰᤔᤠᤸᤗᤧ ᤕᤠᤱᤄᤢᤛᤡᤒᤠᤜᤠ᤹ ᤏᤢᤛᤧᤶᤛᤡᤶᤔᤧ᤹. ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤧᤶᤗ᤺ᤳᤋᤧᤶᤛᤡᤶᤔᤧ᤹॥ ᤀᤠᤶᤓᤠ ᤁᤧᤄᤥ᤺ᤛᤢᤶ. ᤀᤠᤶᤓᤠᤀᤣ ᤐᤡᤖᤧᤶᤛᤡᤶᤔᤧ᤹ᤀᤥ॥
MAT 10:9 ᤕᤠᤱ ᤔᤧ᤺ᤴᤏᤣ ᤂᤡᤏᤡ᤹ ᤐᤣᤃᤧᤶᤔᤧ᤹.
MAT 10:10 ᤜᤧᤰᤁᤩᤠᤱ ᤛᤢ᤺ᤰᤘᤠ. ᤗᤧᤰᤛᤡᤱᤔᤠ ᤆᤠᤱ ᤏᤢ ᤗᤠᤱᤛᤢ᤺ᤵ. ᤜᤧᤰᤁᤩᤠᤱ ᤋᤰᤁᤠ᤺ᤳ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤸᤗᤧ ᤂᤢᤏᤧ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤂᤥ᤺ᤔᤠᤀᤣ ᤐᤥ᤺ᤱᤗᤥ॥
MAT 10:11 ᤂᤡᤏᤡ᤹ ᤁᤧᤒᤣᤃᤡᤒᤠ ᤐᤠᤱᤈᤢᤶ ᤐᤠᤱᤓᤣ᤹ᤜᤠ᤹ᤀᤥ ᤛᤢᤶᤒᤥᤎᤠᤒᤠ ᤔᤏᤠ᤺ᤴ ᤁᤥ᤺ᤳᤋᤧᤶᤔᤧ᤹ᤀᤠᤱ ᤂᤧᤵᤔᤥᤗᤠᤶ ᤁᤧᤴᤗ᤺ᤴᤍᤡᤴ ᤁᤧᤶᤒᤣᤃᤡᤴᤗ ᤌᤠᤖᤡᤰ ᤁᤢᤜᤡᤶᤔᤥᤀᤣ ᤕᤠ᤺ᤰᤋᤧᤶᤔᤧ᤹ᤀᤥ॥
MAT 10:12 ᤂᤧᤴ ᤜᤡᤶᤔᤥ ᤁᤧᤗᤠ᤺ᤛ᤻ᤛᤡᤸᤗᤧ ᤔᤏᤠᤜᤠ᤹ᤏᤢ ‘ᤛᤏᤠᤖᤢᤱ ᤁᤧᤄᤥ᤺ᤛᤢᤶᤏᤡᤖᤥ’ ᤗ᤹ᤖᤡᤰ ᤛᤣᤘᤠ ᤔᤕᤧᤶᤔᤧ᤹ᤀᤥ॥
MAT 10:13 ᤂᤧᤴ ᤜᤡᤶᤛᤕᤱᤅᤡᤴ ᤂᤡᤏᤡ᤹ ᤛᤏᤠᤖᤢᤱ ᤂᤥ᤺ᤔᤠ ᤁᤧᤗᤠ᤹ᤒᤠ ᤆᤥ᤺ᤰᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤧᤵᤔᤥ ᤕᤠ᤺ᤰᤗᤠ᤺ᤳᤗᤖᤥ॥ ᤁᤖ ᤁᤧᤗᤠ᤹ᤒᤠ ᤔᤧᤈᤥ᤺ᤰᤏᤧᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤀᤥᤀᤣ ᤏᤢ᤺ᤱᤗᤖᤥ॥
MAT 10:14 ᤀᤠᤳᤋᤡᤸᤗᤧ ᤂᤡᤏᤡ᤹ ᤗᤠᤱᤍᤠ᤺ᤰᤔᤠ ᤁᤧᤶᤒᤡᤖᤡᤴᤏᤠᤱ ᤂᤡᤏᤡ᤹ ᤐᤠ᤺ᤴᤏᤠᤱ ᤔᤧᤄᤧᤵᤛᤢᤴ. ᤂᤧᤴ ᤜᤡᤶ ᤀᤡᤃᤪ ᤐᤠᤱᤈᤢᤶᤔᤥᤗᤠᤶ ᤂᤡᤏᤡ᤹ ᤁᤧᤒᤣᤃᤡᤸᤗᤧ ᤂᤡᤏᤡ᤹ ᤗᤠᤱᤅᤥ ᤁᤧᤄᤡᤵᤐᤠ ᤂᤠᤶ ᤜᤡ᤺ᤰᤁᤡᤴ ᤒᤠ ᤂᤧᤵᤔᤥᤀᤣ ᤌᤠᤵᤛᤧᤶᤎᤩᤧᤶᤔᤧ᤹ᤀᤥ॥
MAT 10:15 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤋᤠ᤺ᤴᤍᤡ ᤂᤠᤛᤧᤴ ᤕᤧᤴᤏᤥᤃ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤢᤰᤂᤣ᤺ᤴᤏᤢ᤺ᤸᤗᤧ ᤛᤍᤥᤔ ᤏᤢ ᤃᤔᤥᤖᤠᤒᤠ ᤐᤠᤱᤈᤢᤶᤜᤠ᤹ᤀᤥ ᤁᤧᤍᤠ᤺ᤒᤠ ᤋᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥”
MAT 10:16 “ᤂᤧᤵᤛᤧᤶᤔᤧ᤹ᤀᤥ᥄ ᤔᤧᤸᤗᤢᤰᤜᤠ᤹ ᤐᤖᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤐᤠᤱᤏᤡᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤀᤛᤣ᤺ᤰᤐᤠ ᤜᤧᤰᤁᤣ ᤆᤠᤆᤠ᤺ᤵᤐᤠ ᤏᤢ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤁᤢᤍᤥ᤺ᤵᤔᤠ ᤐᤥ᤺ᤰᤂᤧᤶᤔᤧ᤹ᤀᤥ॥
MAT 10:17 ᤔᤏᤠᤜᤠ᤹ᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤠᤛᤧᤴ ᤗᤥ᤺ᤶᤔᤠ ᤜᤡᤶᤔᤥ ᤂᤡᤏᤡ᤹ ᤁᤧᤶᤍᤣ᤹ᤖᤡ᤹. ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤋᤧ᤺ᤶᤓᤢᤰ ᤁᤧᤶᤒᤡᤖᤡ᤹ᤖᤥ॥
MAT 10:18 ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤶᤍᤣ᤹ᤖᤡ᤹॥ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤏᤢ ᤁᤧᤖᤧᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤔᤧᤵᤔᤠᤛᤡ ᤛᤢᤕᤧᤶ ᤁᤧᤄᤥ᤺ᤛᤢᤶᤗᤥ॥
MAT 10:19 ᤁᤖ ᤂᤡᤏᤡ᤹ ᤁᤧᤶᤍᤧᤶᤛᤡᤸᤗᤧ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤀᤠᤸᤗ ᤌᤧᤔᤠ ᤐᤠ᤺ᤵᤔᤠ. ᤀᤠᤰᤂᤣᤗ᤹ᤖᤡᤰ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤂᤧᤴ ᤕᤧᤶᤔᤥᤃ ᤂᤡᤏᤡ᤹ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤴ ᤒᤠ ᤂᤧᤴ ᤕᤧᤶᤔᤥᤀᤣ ᤁᤧᤄᤥ᤺ᤛᤢᤶᤗᤥ॥
MAT 10:20 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤁᤧᤶᤒᤠᤖᤡᤴ ᤁᤖ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤗᤠᤶᤒᤠ ᤐᤠ᤺ᤳᤗᤥ॥
MAT 10:21 ᤑᤢ᤹ᤏᤢᤛᤠ᤹ᤜᤠ᤹ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰᤁᤠᤱ ᤀᤡᤱᤔᤧᤗᤧᤰᤋᤢᤛᤡ ᤜᤧᤰᤁᤩᤠᤱ ᤛᤧᤵᤔᤠ ᤔᤧᤒᤠᤱᤄᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤐᤠ-ᤔᤠᤜᤠ᤹ ᤛᤠ᤺ᤜᤠ᤹ᤖᤧ. ᤜᤧᤰᤁᤩᤠᤱ ᤛᤠ᤺ᤜᤠ᤹ ᤐᤠ-ᤔᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰᤁᤠᤱ ᤛᤧᤵᤔᤠ ᤔᤧᤒᤠᤱᤄᤢᤛᤡᤖᤥ॥
MAT 10:22 ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤌᤖᤢ᤹. ᤂᤧᤸᤗᤧᤀᤣ ᤛᤧᤴᤗᤵ ᤂᤥ᤺ᤛᤢ᤹ᤖᤥ॥
MAT 10:23 ᤂᤡᤏᤡ᤹ ᤌᤡᤰᤋᤧᤴᤏᤥ ᤋᤢᤰᤂᤣ ᤁᤧᤶᤈᤠ᤺ᤳᤋᤡᤸᤗᤧ ᤘᤣ᤹ᤛ᤻ᤔᤠ ᤋᤧᤴᤏᤥ ᤂᤧᤳᤇᤡᤱᤅᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤏᤢ᤺ᤱᤅᤠ ᤕᤢ᤺ᤀᤠᤸᤗᤧ ᤂᤡᤏᤡ᤹ ᤁᤴ ᤀᤡᤛᤪᤠᤀᤡᤗᤛ᤻ᤔᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤛᤢᤏᤠᤀᤡᤱ ᤛᤧ᤺ᤔᤠ ᤕᤠ᤺ᤶᤒᤰ ᤔᤧᤴᤇᤢ᤺ᤳᤋᤣ ᤁᤧᤘᤕᤡ᤹ᤖᤥ॥
MAT 10:24 ᤜᤢ᤹ᤛᤠᤶᤒᤧᤴ ᤁᤢᤛᤡᤰᤛᤠᤶᤒᤠᤴᤏᤢ᤺ᤸᤗᤧ ᤕᤶᤒᤠ. ᤜᤧᤰᤁᤩᤠᤱ ᤛᤣᤘᤠᤖᤥᤒᤧᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥
MAT 10:25 ᤜᤢ᤹ᤛᤠᤶᤒᤧᤴ ᤁᤢᤛᤡᤰᤛᤠᤶᤒᤧᤴ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤛᤣᤘᤠᤖᤥᤒᤧᤴ ᤁᤢᤴᤍᤠᤱᤒᤧᤴ ᤁᤢᤀᤡᤛᤡ᤺ᤰ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤜᤡᤶᤍᤠᤱᤒᤠᤴᤏᤣ ᤂᤧᤱᤜᤠ᤹ᤖᤧ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤒᤠᤗᤈᤡᤒᤢᤗ ᤔᤧᤔᤧᤳᤋᤠᤱᤅᤡᤸᤗᤧ ᤀᤠᤜᤡᤶᤛᤕᤱᤒᤠᤜᤠ᤹ᤃ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤑᤧᤴ ᤔᤡᤱᤜᤠ᤹ ᤔᤧᤘᤠ᤺ᤳᤋᤢᤛᤡ᤹ᤖᤥ॥
MAT 10:26 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤎᤠ᤺ᤵᤏᤧᤴᤗ ᤑᤠ᤹ᤀᤠᤱ ᤋᤧᤵᤋᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴ ᤀᤡᤃᤪ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤏᤧᤴᤗ ᤑᤠ᤹ᤀᤠᤱ ᤔᤠ᤹ᤖᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴ ᤌᤣᤀᤠᤱ ᤜᤥ᤺ᤵᤗᤥ॥
MAT 10:27 ᤀᤡᤱᤃᤠ᤹ ᤀᤠᤸᤗᤥ ᤂᤠᤃᤧᤔᤠᤰᤐᤠᤀᤥ ᤔᤧᤳᤏᤡᤱᤒᤠ ᤐᤠ᤺ᤴᤏᤡᤴ ᤂᤠᤃᤧᤀᤥ᤺ᤵᤐᤠᤀᤥ ᤔᤧᤳᤋᤧᤶᤛᤡᤶᤔᤧ᤹. ᤂᤡᤏᤡ᤹ ᤛᤫᤠ᤺ᤳᤋᤠᤱ ᤔᤧᤳᤏᤡᤱᤒᤠ ᤐᤠ᤺ᤴᤏᤡᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤑᤠ᤹ᤀᤠᤱ ᤜᤡᤶ ᤛᤶᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀᤡᤱᤓᤴ ᤆᤥᤃᤧᤶᤔᤧ᤹ᤀᤥ॥
MAT 10:28 ᤏᤠᤛᤡᤱᤃᤧᤴ ᤌᤰᤁᤡᤴ ᤁᤧᤛᤧᤵᤐᤠᤜᤠ᤹ᤏᤢ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤛᤧᤵᤔᤠ ᤔᤧᤴᤇᤢᤰᤋᤢᤴᤗᤥ॥ ᤁᤖ ᤏᤠᤛᤡᤱᤃᤧᤴ ᤌᤰᤁᤡᤴ ᤏᤢ ᤕᤠᤶᤛᤠᤶᤔᤡᤴ ᤏᤧᤵᤔᤠᤱ ᤂᤧᤔᤠᤕᤱᤛᤱᤅᤥ ᤔᤧᤱᤔᤠ ᤁᤧᤛᤢᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡ᤺ᤛᤧᤶᤔᤧ᤹ᤀᤥ॥
MAT 10:29 ᤏᤧᤳᤇᤡ ᤆᤢᤈᤢᤰᤛᤠ ᤐᤢᤜᤠ᤹ᤖᤧ ᤕᤠᤱᤎᤡᤰ ᤔᤧᤗᤧᤰᤏᤧᤴᤒᤡ᥅ ᤜᤧᤰᤁᤣᤛᤠᤱ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧ᤺ᤴᤏᤣ ᤗᤳᤌᤡᤰᤁᤠᤱ ᤂᤠᤶᤔᤥ ᤔᤰ ᤔᤧᤎᤠᤏᤧᤴᤗᤥ॥
MAT 10:30 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤌᤧᤃᤣ᤺ᤰᤁᤥᤒᤠ ᤁᤧᤖᤧᤰ ᤌᤧᤃᤣ᤺ᤰᤀᤡᤜᤠ᤹ ᤂᤢᤏᤧ᤹ ᤏᤡ᤺ᤖᤢᤀᤠᤱ ᤘᤠ᤹ᤖᤥ॥
MAT 10:31 ᤂᤧᤸᤗᤧ ᤆᤥᤃᤢᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹॥ ᤂᤡᤏᤡ᤹ᤃ ᤕᤖᤡᤰ ᤆᤢᤈᤢᤰᤛᤠ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤈᤥᤃᤡᤖᤥ॥
MAT 10:32 ᤜᤠ᤺ᤳᤗᤧ ᤔᤏᤠ ᤋᤃᤡ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤢᤱ ᤗ᤹ᤖᤡᤰ ᤐᤠ᤺ᤳᤋᤢ᤹. ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤶᤒᤠᤖᤧ ᤁᤢᤍᤃᤡ ᤀᤡᤱᤃᤠ᤹ᤀᤠᤱ ᤂᤧᤴ ᤋᤠ᤺ᤰᤋᤢᤱᤗᤥ॥
MAT 10:33 ᤜᤠ᤺ᤳᤗᤧ ᤀᤡᤱᤃᤠ᤹ ᤔᤏᤠ ᤋᤃᤡ ᤏᤠ᤹ᤀᤠ. ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤀᤠᤶᤒᤠᤖᤧ ᤁᤢᤍᤃᤡ ᤀᤡᤱᤃᤠ᤹ᤀᤠᤱ ᤂᤧᤴ ᤏᤠ᤹ᤖᤢᤱᤗᤥ॥”
MAT 10:34 “ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤋᤩᤠᤱᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹॥ ᤀᤡᤱᤃᤠ᤹ ᤛᤏᤠᤖᤢᤱ ᤋᤠ᤺ᤳᤇᤧᤃ ᤔᤧ᤺ᤴ. ᤁᤖ ᤋᤢᤰᤂᤣ ᤋᤠ᤺ᤳᤇᤧ ᤋᤩᤠᤱᤒᤠᤖᤥ॥
MAT 10:35 ᤌᤣᤀᤠᤱᤓᤧᤸᤗᤧ ᤐᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤕᤧᤶᤒᤡᤳᤇᤠ᤹ᤛᤠ᤺ᤴ. ᤔᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤴᤇᤢᤔᤠ᤹ᤛᤠ᤺ᤴ. ᤜᤧᤰᤁᤩᤠᤱ ᤏᤥ᤺ᤵᤔᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠᤱᤗᤡᤔᤠᤴ ᤑᤥ᤺ᤱᤛᤧ ᤋᤩᤠᤱᤒᤠᤖᤥ॥
MAT 10:36 ᤔᤏᤠ᤺ᤸᤗᤧ ᤁᤢᤏᤡᤱᤔᤡᤜᤠ᤹ᤃ ᤀᤠᤒᤠᤅᤣ ᤁᤢᤜᤡᤶᤛᤕᤱᤜᤠ᤹ᤀᤣ ᤔᤧᤒᤥ᤺ᤱᤗᤥ॥
MAT 10:37 ᤁᤢᤶᤒᤠ ᤁᤢᤶᤔᤠᤛᤡ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤗᤢᤱᤔᤠ᤹ ᤁᤧᤍᤢᤰᤐᤧᤴ ᤀᤠᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤔᤧᤗᤠ᤹ᤖᤢᤴᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠ᤺ ᤁᤢᤀᤣᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤗᤢᤱᤔᤠ᤹ ᤁᤧᤍᤢᤰᤐᤧᤴ ᤀᤠᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤔᤧᤗᤠ᤹ᤖᤢᤴᤗᤥ॥
MAT 10:38 ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤀᤠᤒᤠᤅᤣ ᤐᤰᤂᤢᤀᤠᤱ ᤀᤡᤱᤃᤠ᤹ᤏᤢ ᤗᤠᤱᤔᤧᤄᤣ᤺ᤰᤏᤧᤴ ᤂᤧᤴ ᤀᤠᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤔᤧᤗᤠ᤹ᤖᤢᤴᤗᤥ॥
MAT 10:39 ᤀᤠᤳᤋᤡᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤀᤠᤒᤠᤅᤣ ᤜᤡᤱᤔᤠ ᤁᤥ᤺ᤳᤋᤢ᤹ ᤂᤧᤸᤗᤧ ᤂᤧᤴ ᤔᤠᤛᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥”
MAT 10:40 “ᤀᤠᤳᤋᤡᤸᤗᤧ ᤂᤡᤏᤡ᤹ ᤗᤠᤱᤃᤧᤍᤠ᤺ᤰᤋᤡ᤹. ᤂᤧᤸᤗᤧ ᤀᤡᤱᤃᤠ᤹ᤀᤠᤱ ᤗᤠᤱᤍᤠ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠ. ᤂᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤧᤴᤏᤠᤱ ᤗᤠᤱᤍᤠ᤺ᤰᤋᤢ᤹ᤖᤥ॥
MAT 10:41 ᤀᤠᤳᤋᤡᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤸᤗᤧᤴ ᤌᤢᤶᤄᤥ᤺ᤴ ᤂᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤛᤠᤶᤕᤥᤏᤡᤒᤠ ᤕᤠᤵᤔᤡ᤺ᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤛᤠᤶᤕᤥᤏᤡᤒᤠᤸᤗᤧᤴ ᤌᤢᤶᤄᤥ᤺ᤴ ᤂᤥ᤺ᤛᤢ᤹ᤖᤥ॥
MAT 10:42 ᤀᤠᤳᤋᤡᤸᤗᤧ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠᤎᤡᤰᤁᤡᤴ ᤀᤠᤜᤢ᤹ᤛᤠᤶᤒᤠ ᤑᤠ᤹ᤀᤠᤱ ᤑᤱᤏᤠᤎᤡᤰ ᤆᤫᤠ᤺ᤳ ᤐᤡᤖᤢ᤹. ᤂᤧᤸᤗᤧ ᤛᤧᤰᤂᤠᤀᤣ ᤌᤢᤶᤄᤥ᤺ᤴ ᤂᤥ᤺ᤛᤢ᤹ᤖᤥ॥”
MAT 11:1 ᤕᤧᤛᤢᤖᤧ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤜᤧᤰᤁᤣᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢ ᤛᤢᤖᤢᤛᤡᤀᤠᤱ ᤂᤧᤵᤔᤥᤗᤠᤶ ᤂᤢᤏᤧ᤹ ᤃᤠᤗᤡᤗ ᤂᤡᤖᤡᤒᤠ ᤐᤠᤱᤈᤢᤶ ᤜᤧᤱᤄᤠ᤺ᤳᤋᤡ ᤏᤡᤛᤠᤶ ᤜᤢ᤹ᤛᤧ ᤏᤢ ᤛᤢᤏᤠᤀᤡᤱ ᤛᤧ᤺ᤛᤧ ᤌᤠᤛᤡᤱᤗᤥ॥
MAT 11:2 ᤂᤧᤴ ᤕᤧᤶᤔᤥ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤀᤠᤱ ᤕᤠᤃᤧᤒᤠ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤂᤧᤵᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤧᤛᤢᤖᤥ ᤐᤠᤱᤄᤢᤛᤡ॥
MAT 11:3 ᤂᤧᤱᤜᤠ᤹ ᤔᤧᤒᤣᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤏᤧᤒᤡ. ᤀᤡ ᤘᤣ᤹ᤛ᤻ᤔᤠᤴ ᤜᤠᤱᤄᤢᤶᤒᤧᤒᤠᤒᤡ᥅”
MAT 11:4 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹ᤀᤠᤱ ᤁᤧᤏᤡ᤺ᤛᤢᤶᤒᤠ ᤏᤢ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤕᤢᤜᤢᤴᤏᤠ᤺ᤴ ᤔᤧᤳᤋᤧᤶᤔᤧ᤹ᤀᤥ–
MAT 11:5 ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡ᤺ᤔᤠ ᤔᤧᤛᤢᤰᤋᤢ᤹. ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣ᤺ᤰ. ᤗᤥᤃᤣ᤹ ᤋᤢᤰᤔᤠᤸᤗᤧ ᤋᤖᤢᤛᤡᤒᤠᤜᤠ᤹ ᤔᤧᤏᤢ᤹. ᤏᤠᤎᤠᤰᤐᤠᤜᤠ᤹ᤖᤧ ᤂᤧᤶᤔᤠ ᤔᤧᤛᤢᤰᤋᤢ᤹. ᤁᤧᤛᤡ᤺ᤒᤠᤜᤠ᤹ ᤁᤢᤜᤡᤱᤘᤧᤳ ᤔᤧᤒᤥ᤺ᤱ. ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤛᤢᤏᤠᤀᤡᤱ ᤔᤧᤄᤧᤵᤛᤢ᤹ᤖᤥ॥
MAT 11:6 ᤀᤡᤱᤃᤠ᤹ ᤕᤠᤵᤔᤡ ᤆᤵᤆᤡ ᤔᤧᤴᤈᤥ᤺ᤰᤔᤏᤠ ᤔᤏᤠ᤺ᤴ ᤔᤢ᤹ᤀᤡᤛᤠᤒᤠᤖᤥ॥”
MAT 11:7 ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤔᤧᤳᤋᤢᤛᤡ. “ᤕᤧ᤺ᤱᤄᤠᤍᤧᤴᤏᤥ ᤌᤣ᤺ᤴ ᤀᤥᤔᤳᤇᤧ ᤁᤧᤒᤣᤃᤡᤒᤠᤒᤣ᥅ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤘᤠ᤺ᤴᤈᤥ-ᤘᤠ᤺ᤴᤈᤥ ᤗ᤹ᤖᤡᤰ ᤘᤠ᤺ᤴᤍᤢᤒᤠ ᤌᤡᤱᤏᤧᤳ ᤜᤧᤰᤋᤱᤒᤠ ᤔᤏᤠ᤺ᤴᤒᤡ᥅
MAT 11:8 ᤔᤧ᤺ᤴᤏᤧ ᤑᤠ᤹ᤃᤪ ᤌᤣ᤺ᤴ ᤀᤥᤔᤳᤇᤧ ᤁᤧᤒᤣᤃᤡᤒᤠᤒᤣ᥅ ᤏᤢ᤺ᤒ᤻ ᤏᤢ᤺ᤒᤠ ᤆᤠᤱᤍᤣ᤺ᤳ ᤁᤧᤈᤠᤱᤒᤠ ᤔᤏᤠ᤺ᤴᤒᤡ᥅ ᤔᤧ᤺ᤴ. ᤜᤧᤰᤋᤱᤒᤠ ᤔᤏᤠ᤺ᤱᤃ ᤜᤠᤱᤜᤡᤶᤔᤥᤖᤰ ᤘᤠ᤹ᤖᤥ॥
MAT 11:9 ᤜᤧᤰᤁᤣ᤺ᤸᤗᤧ ᤌᤣ᤺ᤴ ᤀᤥᤔᤳᤇᤧ ᤂᤡᤏᤡ᤹ ᤁᤧᤒᤣᤃᤡ᥅ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤴᤒᤡ᥅ ᤀᤥᤖᤥ. ᤛᤧᤰᤂᤠᤀᤣ ᤀᤡᤱᤃᤠ᤹ ᤔᤧᤳᤏᤡᤱ. ᤂᤢᤏᤧ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤏᤢ᤺ᤸᤗᤧᤀᤠᤱ ᤕᤶᤒᤠᤖᤥ॥
MAT 11:10 ᤛᤠᤶᤕᤥᤛᤠᤵᤗᤠᤀᤥ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤀᤡᤱᤛᤠᤒᤠᤴ ᤁᤧᤗᤠᤶᤔᤡᤴ ᤕᤠᤖᤡᤵ ᤆᤥ᤺ᤰᤛᤧ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤐᤠᤱᤄᤢᤱᤗᤥ॥’
MAT 11:11 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤘᤣ᤹ ᤕᤶᤒᤠ ᤜᤠ᤺ᤳᤋᤠᤱ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤘᤠ᤹ᤖᤥ॥ ᤜᤧᤰᤁᤣᤛᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤆᤢᤒᤧᤳᤇᤡᤰᤗᤰ ᤁᤧᤕᤧᤰᤐᤠ ᤔᤏᤠ᤺ᤴ ᤂᤢᤏᤧ᤹ᤏᤢ᤺ᤸᤗᤧ ᤕᤶᤒᤠᤖᤥ॥
MAT 11:12 ᤕᤢᤜᤢᤴᤏᤠᤖᤧ ᤀᤡᤱᤓᤴ ᤆᤥ᤺ᤰᤔᤠ ᤜᤣ᤺ᤰᤋᤢᤀᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤗᤢᤒᤢᤒᤢᤏᤠ ᤋᤃᤡ ᤐᤥ᤺ᤖ ᤐᤳ. ᤜᤧᤰᤁᤩᤠᤱ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤛᤠᤁᤧᤸᤗᤧᤰᤁᤠᤱ ᤀᤵᤔᤠ ᤋᤶᤛᤡᤴ ᤔᤧᤈᤥᤃᤢᤖ ᤔᤧᤒᤳ॥
MAT 11:13 ᤕᤢᤜᤢᤴᤏᤠᤖᤧ ᤁᤢᤕᤧᤶᤔᤥ ᤌᤠᤖᤡᤰ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤸᤗᤧ ᤜᤧᤰᤁᤩᤠᤱ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥᤀᤣ ᤔᤧᤒᤠ᤺ᤳᤋᤢᤀᤠᤱ ᤘᤕᤧᤖᤥ॥
MAT 11:14 ᤜᤧᤰᤁᤩᤠᤱ ᤂᤡᤏᤡ᤹ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤍᤧᤴᤍᤡ᤹ᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤋᤠ᤺ ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤠ ᤀᤣᤗᤡᤕᤠ᤺ᤱᤃ ᤕᤢᤜᤢᤴᤏᤠ᤺ᤴᤏᤣᤖᤥ॥
MAT 11:15 ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄
MAT 11:16 ᤁᤥᤕᤧᤶᤒᤠ ᤁᤴ ᤔᤏᤠᤜᤠ᤹ ᤌᤣ᤺ᤴᤏᤢ ᤋᤱᤄᤢᤱᤛᤡᤱᤒᤠᤒᤣ᥅ ᤁᤴ ᤔᤏᤠᤜᤠ᤹ᤃ ᤐᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤜᤡᤴᤈᤠ᤹ᤜᤠ᤹ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤜᤡᤴᤈᤠ᤹ᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ᤹.
MAT 11:17 ‘ᤂᤡᤏᤡ᤹ ᤗᤠᤃᤡ ᤀᤠᤏᤡᤃᤧ ᤁᤣ ᤜᤡᤵᤔᤏᤠ. ᤁᤖ ᤂᤡᤏᤡ᤹ ᤁᤧᤴᤗᤠ᤺ᤰᤂᤡᤴ. ᤜᤧᤰᤁᤩᤠᤱ ᤀᤠᤏᤡᤃᤧ ᤔᤣᤖᤡᤱ ᤌᤰᤔᤏᤠ. ᤁᤖ ᤂᤡᤏᤡ᤹ ᤁᤧᤴᤜᤠᤒᤡᤴ॥’
MAT 11:18 ᤜᤧᤰᤁᤣᤗ᤹ᤖᤡᤰ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤱᤃ ᤔᤧᤴᤈᤠ ᤔᤧᤴᤎᤢᤱᤅᤣ ᤋᤩᤧᤛᤠᤱ ᤂᤡᤏᤡ᤹ ᤂᤧᤱᤃ ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤀᤠᤱ ᤘᤠ᤹ ᤗ᤹ᤖᤡᤰ ᤁᤧᤔᤧᤳᤋᤢᤶ॥
MAT 11:19 ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤆᤠᤱᤗ ᤌᤢᤅᤢᤱᤗ ᤋᤩᤠᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤂᤧᤱᤃ ᤋ᤺ᤰ ᤌᤧ᤺ᤰᤁᤣ ᤏᤢ ᤌᤡ᤺ᤔᤛᤠᤱᤗᤥ. ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤗᤥ॥’ ᤁᤖ ᤏᤡᤱᤘᤠ᤹ᤑᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤱᤃ ᤁᤢᤕᤠ᤺ᤶᤒᤰᤁᤥᤗᤠᤶ ᤂᤧᤴ ᤏᤡᤛ᤻ᤛᤣ ᤆᤥ᤺ᤰ ᤑᤠ᤹ᤀᤠᤱ ᤏᤡ᤺ᤍᤧᤳᤗᤥ॥”
MAT 11:20 ᤜᤧᤰᤁᤩᤠᤱ ᤕᤧᤛᤢᤖᤧ ᤋᤃᤡ ᤕᤖᤡᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠ ᤕᤧᤰᤕᤰᤜᤠ᤹ ᤑᤧ᤺ᤰᤔᤠ ᤜᤣ᤺ᤰᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤴᤜᤡᤴᤍᤧᤴᤗᤥ॥
MAT 11:21 “ᤂᤥᤖᤠᤈᤡᤏ ᤏᤢ ᤒᤧᤌᤛᤣᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤂᤡᤏᤡ᤹ ᤐᤠᤱᤈᤢᤶᤔᤥ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤋᤠᤕᤖ ᤏᤢ ᤛᤡᤍᤥᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧᤃ ᤀᤢᤴᤇᤥ᤺ᤴᤇᤠ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤒᤠᤖᤥ ᤑᤠ᤹ᤀᤠᤱ ᤛᤃᤡᤋᤣ᤺ᤳ ᤔᤧᤈᤠᤰᤛᤡᤱᤅᤠᤱ ᤂᤠᤵᤐᤢ ᤔᤧᤈᤢ᤺ᤳᤇᤡᤱᤒᤠᤔᤧᤴ॥
MAT 11:22 ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤠᤛᤧᤴ ᤕᤧᤴᤏᤥᤃ ᤂᤡᤏᤡ᤹ ᤋᤢᤰᤂᤣᤴᤏᤢ᤺ᤸᤗᤧ ᤋᤠᤕᤖ ᤏᤢ ᤛᤡᤍᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥
MAT 11:23 ᤜᤧᤰᤁᤩᤠᤱ ᤂᤡᤏᤡ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤐᤣᤃᤡᤃᤧ᤹ ᤁᤧᤗ᤹ᤖᤡᤒᤡ᥅ ᤔᤧ᤺ᤴᤗᤥ᥄ ᤂᤡᤏᤡ᤹ᤃ ᤂᤧᤔᤠᤕᤱᤛᤱ ᤌᤠᤖᤡᤰ ᤁᤧᤎᤩᤧ᤹ᤀᤡᤖᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤐᤠᤱᤈᤢᤶᤔᤥ ᤆᤥᤃᤧᤒᤠ ᤜᤧᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤛᤍᤥᤔ ᤕᤧᤰᤕᤰᤁᤥ ᤆᤥᤃᤧᤀᤠᤱ ᤘᤕᤧᤸᤗᤧᤃ ᤂᤧᤴ ᤕᤧᤰᤕᤰᤁᤡᤱᤃ ᤀᤠᤀᤡᤴ ᤌᤠᤖᤡᤰ ᤏᤧᤛ᤻ᤛᤧᤒᤠᤔᤧᤴ᥄
MAT 11:24 ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤂᤠᤛᤧᤴᤏᤡᤸᤗᤧ ᤕᤧᤴᤏᤥᤃ ᤂᤧᤏᤧ᤹ᤏᤢ᤺ᤸᤗᤧ ᤛᤠᤍᤥᤔᤖᤧ ᤁᤢᤍᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥”
MAT 11:25 ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤋᤢᤘᤠ ᤆᤥᤃᤢ. “ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤍᤠᤱᤒᤠᤀᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤡᤰᤁᤢᤶᤛᤠᤒᤠᤜᤠ᤹ ᤜᤧᤰᤁᤩᤠᤱ ᤆᤠ᤺ᤵᤐᤠᤜᤠ᤹ᤏᤢ ᤁᤧᤔᤠ᤹ᤖᤢᤒᤠ ᤐᤠ᤺ᤴᤏᤡᤴ ᤜᤡᤴᤈᤠ᤹ ᤜᤧᤰᤋᤱᤒᤠᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤛᤡᤖᤥ॥
MAT 11:26 ᤀᤠᤶᤒᤣ. ᤒᤠ ᤀᤰᤂᤣ ᤆᤥ᤺ᤰᤔᤠᤀᤣ ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤅᤧᤖᤥ॥”
MAT 11:27 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤶᤒᤠᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤁᤢᤛ᤻ᤛᤠ᤺ᤴ ᤁᤢᤶᤒᤠᤖᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹. ᤘᤣ᤹ᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤁᤢᤛ᤻ᤛᤠ᤺ᤸᤗᤧ ᤀᤥᤛᤣ᤺ᤴᤎᤠᤰᤋᤢᤛᤡᤒᤠ ᤔᤏᤠᤜᤠ᤹ᤖᤧᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥
MAT 11:28 ᤁᤧᤖᤧᤰ ᤁᤧᤗᤡ᤺ᤵᤐᤠ ᤁᤰᤁᤡᤸᤗᤧ ᤁᤧᤃᤧ᤺ᤵᤋᤡᤒᤠ ᤏᤢ ᤁᤧᤏᤠ᤺ᤒᤠᤛᤣ. ᤀᤡᤱᤃᤠ᤹ᤀᤥ ᤋᤩᤧᤶᤔᤧ᤹ᤀᤥ. ᤀᤡᤱᤃᤠ᤹ ᤏᤠ᤺ᤶᤛᤡᤱᤔᤠ ᤐᤡᤏᤡᤱᤗᤥ॥
MAT 11:29 ᤀᤡᤱᤃᤠ᤹ ᤀᤠᤈᤡᤄᤧ᤺ᤵᤐᤡᤴ ᤁᤢᤕᤧᤶᤔᤧ᤹ᤀᤠᤱ ᤀᤡᤱᤃᤠ᤹ᤏᤢ ᤜᤢ᤹ᤀᤠᤛᤡᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤗᤢᤶᤗᤢᤶᤒᤠ ᤏᤢ ᤆᤢᤱᤈᤡᤃᤧᤶᤒᤠ ᤆᤥ᤺ᤰᤁᤠᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤛᤠᤶᤔᤡᤸᤗᤧ ᤏᤠ᤺ᤶᤛᤡᤱᤔᤠ ᤂᤥ᤺ᤛᤢ᤹ᤖᤥ॥
MAT 11:30 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤈᤡᤄᤧ᤺ᤵᤐᤡᤴ ᤀᤢᤛᤢᤖᤢᤒᤠ ᤏᤢ ᤁᤢ᤺ᤔᤠ ᤐᤠᤱᤏᤡᤱᤒᤠ ᤀᤠᤃᤰᤁᤡᤴ ᤕᤠᤱᤕᤠᤱᤒᤠ ᤆᤥ᤺ᤰᤗᤥ॥”
MAT 12:1 ᤌᤡᤰᤗᤧᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤗᤢᤶᤔᤥᤏᤢ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤀᤠᤱ ᤛᤡ᤺ᤍᤠᤵᤔᤠᤜᤠ᤹ ᤔᤧᤍᤢᤒᤢᤀᤠᤱ ᤔᤧᤏᤢᤃᤢᤖ ᤆᤠᤔᤠ ᤔᤧᤜᤣ᤺ᤰᤋᤢᤖᤥ॥
MAT 12:2 ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤁᤖ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤃ ᤔᤧᤈᤥᤃᤢᤱᤃ᥄”
MAT 12:3 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤧ᤺ᤶᤒᤧ᥄ ᤍᤠᤀᤢᤍ ᤜᤠᤱᤅᤡᤴ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ ᤔᤧᤈᤥᤃᤢᤒᤠ ᤐᤠ᤺ᤴᤏᤡᤴ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅
MAT 12:4 ᤍᤠᤀᤢᤍ ᤜᤠᤱᤅᤡᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤛᤧᤀᤠᤱ ᤂᤢᤏᤧ᤹ ᤏᤢ ᤁᤢᤴᤈᤢᤶᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤅᤡᤴ ᤔᤧᤈᤖᤥ॥ ᤂᤧᤱᤃ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤖᤰ ᤆᤠᤔᤠ ᤁᤧᤏᤢ᤹ᤒᤠ ᤘᤕᤧ. ᤁᤖ ᤘᤣ᤹ᤜᤠ᤹ᤖᤧ ᤆᤠᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ॥
MAT 12:5 ᤕᤠᤶᤔᤥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤛᤠᤶᤕᤥᤌᤡᤶᤔᤡᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤐᤠ᤺ᤳᤋᤢᤛᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤔᤧᤈᤥᤃᤢ. ᤁᤖᤛᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤔᤧᤒᤥ᤺ᤰᤂᤧᤖᤥ॥
MAT 12:6 ᤀᤡᤱᤃᤠ᤹ ᤛᤧᤰᤂᤠ ᤔᤧᤳᤏᤡᤱ. ᤔᤠᤱᤜᤡᤶᤔᤡᤴᤏᤢ᤺ᤸᤗᤧᤀᤠᤱ ᤕᤶᤒᤠᤴ ᤁᤵᤔᤥ ᤘᤠ᤹ᤖᤥ॥
MAT 12:7 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤡᤍᤢᤱᤈᤓᤠ᤺ᤴ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴ ᤁᤖ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡᤸᤗᤧᤃ ᤑᤥᤋᤩᤠ ᤔᤧ᤺ᤴᤏᤣᤒᤠ ᤔᤏᤠᤜᤠ᤹ ᤀᤠᤵᤋᤡᤰ ᤁᤧᤴᤃᤢ᤺ᤳᤋᤢᤶᤛᤡᤶᤔᤧᤴᤒᤠ ᤘᤕᤧ ᤔᤧᤴ॥
MAT 12:8 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠᤖᤥ॥”
MAT 12:9 ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤗᤠ᤺ᤛᤧ॥
MAT 12:10 ᤂᤧᤵᤔᤥ ᤁᤢᤜᤢᤰ ᤁᤧᤛᤶᤒᤠ ᤔᤏᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤖ ᤔᤧᤘᤕᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤏᤠ᤺ᤶᤛᤡᤱ ᤕᤧᤴᤏᤥ ᤔᤏᤠᤜᤠ᤹ ᤘᤣ᤺ᤶᤔᤠᤛᤡ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤔᤧ᤺ᤶᤒᤡ᥅”
MAT 12:11 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤔᤧᤸᤗᤢᤰᤁᤡᤴ ᤏᤠ᤺ᤶᤛᤡᤱ ᤕᤧᤴᤏᤥ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ ᤔᤰᤌᤠ᤺ᤸᤗᤧ ᤁᤧᤴᤀᤢ᤺ᤰᤂᤢᤶ ᤁᤧᤴᤗ᤺ᤳᤋᤢᤶᤔᤡᤴᤒᤡ᥅
MAT 12:12 ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤔᤧᤸᤗᤢᤰᤁᤡᤴᤏᤢ᤺ᤸᤗᤧ ᤀᤡᤔᤧᤸᤗᤢᤱᤒᤠ ᤔᤧᤈᤥ᤺ᤰᤏᤧᤴᤒᤡ᥅ ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤖᤥ॥”
MAT 12:13 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤀᤠᤱ ᤘᤣ᤹ᤛ᤻ᤔᤠ ᤁᤢᤜᤢᤰᤁᤡᤴ ᤜᤧᤰᤁᤣᤀᤣ ᤏᤢ᤺ᤒᤠ ᤐᤥ᤺ᤰᤂᤧᤖᤥ॥
MAT 12:14 ᤁᤖ ᤑᤖᤡᤛᤡᤜᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤕᤧᤛᤢ᤺ᤴ ᤀᤠᤰᤂᤣᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴ ᤔᤧᤍᤱᤄᤢᤖᤥ॥
MAT 12:15 ᤕᤧᤛᤢᤖᤧ ᤂᤧᤴ ᤆᤧᤶᤓᤴ ᤔᤧᤈᤥᤃᤢᤒᤠᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤐᤣᤖᤥ॥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ ᤜᤧᤰᤁᤩᤠᤱ ᤂᤧᤴ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤁᤧᤖᤧᤰ ᤘᤣ᤺ᤴᤍᤢᤛᤡ.
MAT 12:16 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠ᤺ᤱ ᤐᤡᤖᤢᤛᤡ॥
MAT 12:17 ᤁᤱᤃ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤒᤠᤴ ᤁᤧᤖᤧᤒᤠᤖᤥ–
MAT 12:18 “ᤀᤡᤱᤃᤠ᤹ ᤛᤣᤃᤢᤱᤒᤠ ᤏᤢ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛᤣᤘᤠᤖᤥᤒᤠᤴ ᤁᤵᤔᤥ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤀᤡᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤢᤛᤶᤍᤠᤱ ᤀᤠᤛᤣᤛᤣᤔᤠᤱᤅᤡᤴ ᤏᤧᤛ᤻ᤛᤢᤱᤐᤡᤖᤢᤱ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤂᤠᤛᤧᤴᤖᤧᤴ ᤀᤡᤱᤓᤴ ᤆᤥᤃᤢᤛᤡ᤹ᤖᤥ॥
MAT 12:19 ᤂᤢᤏᤧ᤹ᤃ ᤔᤧᤄᤣ᤺ᤏᤧᤴ ᤔᤧᤀ᤺ᤰᤏᤧᤴ ᤜᤧᤰᤁᤩᤠᤱ ᤗᤠᤶᤗᤠᤶᤔᤥ ᤂᤢᤏᤧ᤹ ᤐᤠ᤺ᤵᤐᤠᤀᤠᤱ ᤂᤧᤶᤔᤧᤍᤧᤳᤏᤧᤴᤗᤥ॥
MAT 12:20 ᤂᤠᤛᤧᤴᤏᤡᤴ ᤁᤢᤗᤡᤱᤎᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤢᤏᤧ᤹ᤃ ᤘᤠ᤺ᤴᤈᤥᤈᤥᤒᤠ ᤌᤡᤱᤏᤧ᤺ᤳᤋᤡᤴᤏᤠᤱ ᤔᤧᤛᤧᤰᤂᤢᤴ. ᤜᤧᤰᤁᤩᤠᤱ ᤛᤡᤍᤥ᤹ᤍᤥ᤹ᤒᤠ ᤛᤣᤔᤡᤴᤏᤠᤱ ᤔᤧᤛᤧᤖᤢᤴᤗᤥ॥
MAT 12:21 ᤂᤢᤏᤧ᤹ ᤁᤢᤔᤡᤱᤅᤥ ᤁᤧᤖᤧᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤡᤱᤛᤠᤱ ᤔᤧᤈᤥᤃᤢ᤹ᤖᤥ॥”
MAT 12:22 ᤂᤧᤱᤜᤠ᤹ᤖᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠᤸᤗᤧ ᤆᤥᤃᤢᤸᤗᤧ ᤔᤡᤰᤑ᤺ᤶᤒᤠ ᤏᤢ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠ ᤔᤏᤠᤎᤡᤰ ᤕᤧᤛᤢᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤺ᤴᤍᤢᤀᤠᤱ ᤂᤧᤴ ᤐᤠ᤺ᤵᤔᤠ ᤏᤢ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤖᤥ॥
MAT 12:23 ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤒᤠ᤺ᤳᤋᤢ. “ᤁᤱᤃ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤛᤧᤴᤗᤵ ᤁᤧᤒᤡᤒᤠ ᤜᤠᤱᤅᤡᤴ ᤔᤧ᤺ᤶᤒᤡ᥅”
MAT 12:24 ᤁᤖ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤸᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤗᤠᤶᤖᤰ ᤁᤴ ᤔᤏᤠ᤺ᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤒᤠᤖᤥ॥”
MAT 12:25 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤔᤧᤔᤧᤰᤗᤥ॥ ᤜᤧᤰᤁᤩᤠᤱ ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤕᤧᤰᤕᤰ ᤏᤢ ᤜᤡᤶᤛᤕᤱᤜᤠ᤹ᤖᤧ ᤔᤧᤴᤎ᤺ᤳᤋᤢᤴᤗᤥ॥
MAT 12:26 ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤵᤑᤣ᤺ᤰ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤛᤡᤀᤠᤱ ᤀᤠᤒᤠᤅᤣ ᤁᤢᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤁᤢᤜᤠᤱᤈᤢᤶᤔᤡᤸᤗᤧ ᤌᤖᤢᤒᤣ᥅
MAT 12:27 ᤜᤧᤰᤁᤩᤠᤱ ᤒᤠᤗᤈᤡᤒᤢᤗ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤀᤡᤱᤃᤠ᤹ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤏᤧ ᤑᤠ᤹ᤃᤪ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤀᤠᤳᤋᤡᤴ ᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤔᤧᤏᤠ᤺ᤳᤋᤢ ᤔᤧᤗ᤺ᤳᤋᤢᤛᤡᤒᤣ᥅ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤶᤎᤠᤰᤗᤥ॥
MAT 12:28 ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤗᤢᤶᤔᤥ ᤋᤩᤧ ᤆᤢᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
MAT 12:29 “ᤕᤠᤶᤔᤥ ᤂᤧᤵᤛᤧᤶᤔᤧ᤹ᤀᤥ. ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤂᤧᤸᤗᤧ ᤁᤢᤈᤡᤃ᤺ᤰᤘᤠᤜᤠ᤹ ᤏᤠᤵᤔᤠᤍᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤎᤢᤶᤒᤠ ᤔᤏᤠ᤺ᤴ ᤀᤡᤄᤣ᤺ᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱᤗᤰ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤆᤡᤃ᤺ᤰᤘᤠᤜᤠ᤹ ᤗ᤺ᤵᤔᤠᤍᤣ᤹ᤔᤠ ᤛᤢᤰᤋᤧᤳᤗᤥ॥”
MAT 12:30 “ᤀᤠᤳᤋᤡᤴ ᤀᤡᤱᤃᤠ᤹ᤏᤢ ᤌᤡᤰᤜᤢᤵᤐᤥ ᤜᤥ᤺ᤵ ᤂᤧᤴ ᤀᤠᤍᤰᤗᤧᤱᤘᤠᤀᤥ ᤘᤠ᤹. ᤜᤠ᤺ᤳᤗᤧ ᤀᤡᤱᤃᤠ᤹ᤏᤢ ᤔᤧᤛᤢᤵᤛᤢᤴ ᤂᤧᤸᤗᤧ ᤛᤧ᤺ᤛᤢᤖᤥ॥”
MAT 12:31 “ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤔᤧᤴᤇᤠᤶ ᤕᤠᤵᤔᤡᤖᤧ ᤆᤥ᤺ᤰᤔᤏᤠᤒᤠ ᤁᤧᤖᤧᤰ ᤗᤠᤕᤥ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤏᤠᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤂᤥ᤺ᤔᤠ ᤛᤢᤰᤋᤧᤳ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤏᤠᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤀᤠᤵᤑᤠᤸᤗᤧᤀᤠᤱ ᤂᤥᤔᤧᤍᤧᤳᤏᤧᤴᤗᤥ॥
MAT 12:32 ᤀᤠᤳᤋᤡᤴ ᤔᤏᤠ᤺ᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢ᤹. ᤂᤧᤸᤗᤧ ᤗᤧᤵᤔᤡ ᤂᤥ᤺ᤛᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤸᤗᤧ ᤁᤴ ᤕᤧᤶᤔᤥ ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤕᤧᤶᤔᤥᤀᤠᤱ ᤗᤧᤵᤔᤡ ᤔᤧᤄᤥ᤺ᤛᤢᤴᤗᤥ॥”
MAT 12:33 ᤏᤢ᤺ᤒᤠ ᤛᤡᤱᤒᤢᤱᤅᤥ ᤏᤢ᤺ᤒᤠᤀᤣ ᤛᤡᤱᤛᤣ᤹ ᤌᤥ᤺ᤰᤗᤥ. ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥ ᤋᤠᤵᤑᤧ᤺ᤶᤒᤠᤀᤣ ᤛᤡᤱᤛᤣ᤹ ᤌᤥ᤺ᤰᤗᤥ॥ ᤛᤡᤱᤒᤢᤱᤔᤠᤱᤃ ᤛᤡᤱᤛᤣ᤹ᤗᤠᤶᤔᤣ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥
MAT 12:34 ᤀᤛᤣ᤺ᤰᤐᤠᤛᤣ. ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤁᤧᤈᤥᤃᤡ᤹. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤢ᤺ᤒᤠ ᤐᤠ᤺ᤴ ᤐᤠ᤺ᤵᤔᤠ ᤁᤧᤛᤢᤰᤋᤡᤒᤣ᥅ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤒᤥ ᤁᤧᤕᤠᤰᤐᤠ ᤐᤠ᤺ᤴᤜᤠ᤹ᤀᤣ ᤔᤢᤖᤠ᤺ᤸᤗᤧ ᤐᤠ᤺ᤳᤋᤢ᤹ᤖᤥ॥
MAT 12:35 ᤏᤢ᤺ᤒᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ᤒᤥ ᤁᤧᤕᤠᤰᤐᤠ ᤏᤢ᤺ᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤐᤠ᤺ᤳᤋᤢ᤹ᤖᤥ. ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ᤒᤥ ᤁᤧᤕᤠᤰᤐᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤐᤠ᤺ᤳᤋᤢ᤹ᤖᤥ॥
MAT 12:36 ᤀᤡᤱᤃᤠ᤹ ᤔᤧᤳᤏᤡᤱ. ᤂᤠᤛᤧᤴ ᤕᤧᤴᤏᤥ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤜᤏᤧᤒᤠ ᤐᤠ᤺ᤴ ᤛᤢᤳᤗᤠᤜᤠ᤹ᤖᤧᤴ ᤆᤡᤍᤱ ᤐᤡᤔᤠ ᤐᤥ᤺ᤱᤗᤥ॥
MAT 12:37 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤐᤠ᤺ᤴ ᤛᤢᤳᤗᤠᤜᤠ᤹ᤖᤧᤀᤣ ᤂᤡᤏᤡ᤹ ᤛᤠᤶᤕᤥᤏᤡᤒᤠ ᤀᤡᤃᤪ ᤗᤠᤕᤥᤒᤠ ᤁᤧᤒᤥ᤺ᤰᤂᤡ᤹ᤖᤥ॥
MAT 12:38 ᤜᤧᤰᤁᤩᤠᤱ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤔᤧᤍᤱᤛᤡᤱ ᤜᤧᤰᤁᤩᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤀᤠᤏᤡᤃᤧ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥”
MAT 12:39 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤁᤴ ᤕᤧᤶᤔᤥᤒᤠ ᤁᤢ᤹ᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣ᤺ᤴ ᤌᤣᤀᤠᤱ ᤀᤥᤔᤧᤵᤔᤠ ᤔᤧᤱᤄᤥ᤺ᤛᤢᤴᤗᤥ॥
MAT 12:40 ᤌᤣᤀᤠᤱᤓᤧᤸᤗᤧ ᤕᤥᤏᤠ᤺ᤱᤃ ᤕᤶᤒᤠ ᤅᤠ᤺ᤸᤗᤧ ᤗᤖᤢᤀᤠᤱ ᤁᤢᤛᤠᤵᤐᤥ᤺ᤰᤐᤥ ᤛᤧᤴᤍᤡᤰ ᤗᤧᤴᤍᤡᤰ ᤛᤢᤶᤕᤧᤴ ᤌᤠᤖᤡᤰ ᤕᤠᤃᤧ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ ᤛᤡᤃᤠᤱ ᤛᤢᤶᤛᤧᤴ ᤏᤢ ᤛᤢᤶᤕᤧᤴ ᤌᤠᤖᤡᤰ ᤕᤠ᤺ᤰᤁᤠᤖᤥ॥
MAT 12:41 ᤏᤡᤏᤒᤣ ᤕᤧᤰᤕᤰᤛ᤻ᤔᤠ ᤔᤏᤠᤜᤠ᤹ ᤁᤥᤕᤧᤶᤒᤠ ᤔᤏᤠᤜᤠ᤹ᤏᤢ ᤂᤠᤛᤧᤴ ᤕᤧᤴᤏᤥ ᤔᤧᤕᤧᤵᤐᤠᤱ ᤁᤱᤜᤠ᤹ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤛᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤕᤥᤏᤠᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤖᤥ. ᤁᤖ ᤁᤵᤔᤥᤃ ᤕᤥᤏᤠ᤺ᤴᤏᤢ᤺ᤸᤗᤧᤀᤠᤱ ᤕᤶᤒᤠᤎᤡᤰ ᤘᤠ᤹ᤛᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤗᤥ॥
MAT 12:42 ᤗᤠᤱᤃᤧᤳ ᤐᤡᤛᤠᤱᤒᤠ ᤛᤡᤘᤠ ᤗᤠᤈᤣ᤹ᤛ᤻ᤔᤠ ᤜᤠᤱᤔᤠᤴ ᤂᤠᤛᤧᤴ ᤕᤧᤴᤏᤥ ᤕᤧᤶᤛᤡᤱᤅᤠᤱ ᤁᤴ ᤕᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤁᤠᤱ ᤐᤠ᤺ᤴᤎᤡᤰᤋᤢᤛᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴ ᤂᤧᤶᤛᤧ ᤛᤠ᤹ᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤩᤧᤀᤠᤱ ᤘᤕᤧᤖᤥ॥ ᤁᤵᤔᤥ ᤛᤥᤗᤥᤔᤏ ᤜᤠᤱᤅᤡᤴᤏᤢ᤺ᤸᤗᤧ ᤕᤶᤒᤠᤴ ᤘᤠ᤹ᤛᤠᤱ ᤁᤧᤴᤄᤧᤵᤛᤢᤶᤔᤡᤴᤗᤥ॥”
MAT 12:43 “ᤑᤧᤴᤛᤠᤶᤔᤡᤴ ᤔᤏᤠᤀᤥᤗᤠᤶ ᤗ᤺ᤴ ᤐᤣ᤺ᤰᤁᤡᤸᤗᤧ ᤏᤠ᤺ᤶᤛᤡᤱ ᤋᤧᤴ ᤁᤥ᤺ᤳᤇᤧ ᤛᤧᤱᤛᤧᤱᤒᤠ ᤋᤧᤴ ᤜᤧᤱᤄᤠ᤺ᤳᤋᤡ ᤐᤣ᤺ᤰᤗᤥ. ᤁᤖ ᤂᤧᤸᤗᤧ ᤀᤠᤳᤋᤠᤴᤏᤠᤱ ᤔᤧᤄᤥ᤺ᤛᤢᤴᤏᤠᤱ
MAT 12:44 ᤀᤰᤂᤣ ᤔᤧᤳᤇᤡᤱᤗᤥ. ‘ᤀᤡᤱᤃᤠ᤹ ᤗᤧᤖᤢᤱᤒᤠ ᤔᤏᤠ᤺ᤸᤗᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥’ ᤜᤧᤰᤁᤩᤠᤱ ᤂᤧᤴ ᤂᤧᤵᤔᤥ ᤏᤢ᤺ᤱ ᤋᤠ᤺ᤸᤗᤧ ᤋᤃᤡ ᤕᤠᤃᤧᤒᤠ ᤋᤧᤴᤏᤡᤴ ᤁᤢᤄᤠᤗᤧᤶ. ᤔᤧᤍᤢᤃᤢᤒᤠ ᤏᤢ ᤏᤢ᤺ᤒᤠ ᤔᤧᤈᤥᤃᤢᤒᤠ ᤏᤡ᤺ᤛᤢ᤹॥
MAT 12:45 ᤜᤧᤰᤁᤩᤠᤱ ᤂᤧᤴ ᤐᤣ᤺ᤰᤁᤠᤱ ᤀᤠᤵᤑᤣ᤺ᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤢ᤹ᤀᤡ ᤁᤧᤓᤧ᤹ᤒᤠ ᤘᤣ᤹ ᤏᤢᤛᤡ ᤑᤧᤴᤛᤠᤶᤜᤠ᤹ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤋᤠᤱ ᤔᤧᤕᤢᤱᤛᤡᤱᤗᤥ॥ ᤂᤧᤴ ᤔᤏᤠ᤺ᤸᤗᤧ ᤁᤢᤕᤠᤰᤏᤠᤶᤔᤡᤴ ᤋᤃᤡᤒᤠᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤐᤥ᤺ᤱᤗᤥ॥ ᤁᤴ ᤕᤧᤶᤔᤥᤒᤠ ᤁᤢ᤹ᤀᤡ ᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠᤰᤏᤠᤶᤔᤡᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤐᤥ᤺ᤱᤗᤥ॥”
MAT 12:46 ᤕᤧᤛᤢ᤺ᤴ ᤔᤏᤠᤜᤠ᤹ᤏᤢ ᤐᤠᤖᤧᤖ ᤕᤠᤃᤧᤸᤗᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤂᤢᤏᤧ᤹ᤏᤢ ᤋᤠ᤹ᤈᤧᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤗᤠ᤺ᤰᤁᤠᤳ ᤔᤧᤕᤧᤒᤧᤖᤥ॥
MAT 12:47 ᤔᤏᤠᤎᤡᤰ ᤐᤣᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤂᤧᤏᤧ᤹ᤏᤢ ᤋᤠ᤹ᤈᤧᤱᤔᤠ ᤑᤠ᤹ᤀᤠᤱ ᤗᤠ᤺ᤰᤁᤠᤳ ᤁᤧᤶᤜᤠᤱᤗ ᤔᤧᤕᤧᤵᤗᤥ॥”
MAT 12:48 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤜᤠ᤺ᤳᤇᤡᤒᤣ᥅”
MAT 12:49 ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤥ᤺ᤰᤋᤢᤛᤡᤖ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤀᤥᤔᤧᤳᤋᤧᤛᤧ᤹. ᤁᤵᤔᤥ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤔᤧᤕᤢᤱᤗᤥ॥
MAT 12:50 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢ᤹. ᤂᤧᤱᤜᤠ᤹ᤀᤣ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”
MAT 13:1 ᤒᤠ ᤂᤧᤴ ᤕᤧᤴᤏᤥ ᤕᤧᤛᤢ᤺ᤴ ᤜᤡᤶᤔᤥᤗᤠᤶ ᤐᤣᤀᤠᤱ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤢᤱᤛᤡᤱᤗᤥ॥
MAT 13:2 ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤕᤢᤱᤛᤡᤱ. ᤁᤖ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤔᤧᤕᤧᤒᤧ॥
MAT 13:3 ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤗᤳᤇᤠ ᤕᤠ᤺ᤴᤁᤧᤔ᤺ᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥
MAT 13:4 ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤈ ᤔᤧᤍᤣ᤺ᤛᤢᤖᤥ॥
MAT 13:5 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤧᤖᤧᤰᤁᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ ᤗᤡᤱᤔᤠᤃ ᤗᤡᤅᤧ. ᤁᤖ ᤕᤖᤡᤰ ᤂᤠᤶ ᤔᤧᤏᤧᤛ᤻ᤛᤧᤴᤏᤠᤱ ᤁᤢᤛ᤻ᤛᤠ᤺ᤵᤐᤡᤴ ᤂᤠᤶ ᤛᤡᤃᤠᤱᤎᤠᤖᤡᤰ ᤔᤧᤗᤠ᤺ᤛᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤠᤶ ᤛᤧ᤺ᤖᤧᤸᤗᤧ ᤏᤠᤶᤔᤡᤸᤗᤧ ᤛᤧ᤺ᤰᤋᤢᤀᤠᤱ ᤁᤧᤖᤧᤰ ᤜᤣᤖᤧᤒᤣᤖᤥ॥
MAT 13:7 ᤁᤢᤓᤠ ᤕᤠ᤹ᤖᤡ᤺ᤶᤒᤠᤱᤃ ᤋᤡᤱᤃᤪᤣ᤺ᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠ ᤋᤧᤴᤏᤥ ᤆᤢᤰᤋᤧᤀᤠᤱ ᤛᤥᤛᤥᤖᤡᤰ ᤗᤡᤅᤧᤸᤗᤧ ᤋᤡᤱᤃᤪᤣ᤺ᤰᤐᤠᤸᤗᤧ ᤂᤧᤴ ᤛᤢ᤺ᤵᤋᤢ ᤛᤧᤖᤢᤖᤥ॥
MAT 13:8 ᤁᤢᤓᤠ ᤕᤠ᤹ᤖᤡ᤺ᤶᤒᤧᤱᤃ ᤏᤢ᤺ᤒᤠ ᤂᤠᤶᤔᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ᤀᤥ ᤁᤡᤵᤌᤡᤰ ᤗᤧᤱ (᥇᥆᥆). ᤋᤢᤰᤐᤥ᤺ᤱ ᤗᤧᤱ (᥌᥆) ᤏᤢ ᤛᤢᤶᤒᤥ᤺ᤱ ᤗᤧᤱ (᥉᥆) ᤌᤠᤖᤡᤰ ᤁᤢᤈᤠ᤹ ᤐᤳᤇᤧᤖᤥ॥
MAT 13:9 ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”
MAT 13:10 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ. ᤌᤣᤀᤠᤱ ᤁᤴᤜᤠ᤹ᤏᤢ ᤂᤧᤍᤠ᤹ᤀᤥᤖᤰ ᤁᤧᤒᤠ᤺ᤵᤐᤠᤒᤣ᥅”
MAT 13:11 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤖᤰ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ. ᤁᤖ ᤂᤧᤱᤜᤠ᤹ᤖᤧᤃ ᤔᤧᤱᤄᤥᤀᤣ ᤔᤧᤘᤠ᤹ᤖᤥ॥
MAT 13:12 ᤕᤖᤡᤰ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧᤴ ᤕᤖᤡᤰ ᤐᤥ᤺ᤱᤗᤥ॥ ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢ᤹ᤖᤥ॥
MAT 13:13 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤱᤜᤠ᤹ᤏᤢ ᤂᤧᤍᤠ᤹ᤀᤥ ᤐᤠ᤺ᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡ᤺ᤛᤢᤴᤗᤥ. ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
MAT 13:14 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤴ ᤔᤏᤠᤜᤠ᤹ᤀᤥ ᤁᤧᤖᤧᤒᤠᤖᤥ– ‘ᤂᤡᤏᤡ᤹ ᤁᤧᤄᤧᤵᤛᤢᤶᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ. ᤀᤥᤃᤧᤔᤧᤳᤋᤢᤶᤛᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
MAT 13:15 ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤁᤧᤎᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤌᤠᤰᤋᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤰᤁᤡᤴ ᤀᤡᤶ ᤔᤧᤔᤧᤳᤋᤢᤀᤠᤱ ᤘᤠ᤹॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤸᤗᤧ ᤔᤧᤄᤧᤵᤛᤢᤒᤠ ᤏᤢ ᤔᤡᤰᤁᤡᤸᤗᤧ ᤔᤧᤏᤡ᤺ᤛᤢᤒᤠᤔᤧᤴ. ᤜᤧᤰᤁᤩᤠᤱ ᤂᤢᤏᤡ᤹ ᤛᤡᤰᤗᤢᤱᤔᤠᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤱᤃᤠ᤹ ᤗᤧᤵᤔᤠᤱ ᤔᤧᤏᤢ᤺ᤰᤂᤧᤒᤠᤔᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤱᤜᤠ᤹ ᤘᤣ᤺ᤴᤍᤢᤱᤛᤡᤱᤔᤧᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥’
MAT 13:16 ᤁᤖ ᤂᤡᤏᤡ᤹ᤃ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤡᤰᤁᤡᤸᤗᤧ ᤏᤡ᤺ᤛᤢ᤹. ᤜᤧᤰᤁᤩᤠᤱ ᤏᤧᤰᤂᤥ᤹ᤒᤠᤸᤗᤧ ᤂᤧᤵᤛᤢ᤹ᤖᤥ॥
MAT 13:17 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡ᤺ᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤏᤡ᤺ᤔᤠ ᤏᤢ ᤂᤧᤶᤔᤠ ᤔᤧᤱᤄᤥ᤺ᤛᤢᤴᤗᤥ॥”
MAT 13:18 “ᤀᤠᤸᤗ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤂᤧᤵᤛᤧᤶᤔᤧ᤹ᤀᤥ
MAT 13:19 ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴ. ᤂᤧᤴ ᤔᤏᤠ᤺ᤱᤃ ᤗᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡ᤺ᤰ ᤆᤥ᤺ᤰ॥ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤁᤧᤕᤠᤰᤐᤠ ᤐᤠ᤺ᤴᤈᤠᤰᤁᤡᤴ ᤗ᤺ᤳᤋᤢ ᤋᤣ᤹ᤖᤢᤖᤥ॥
MAT 13:20 ᤗᤢᤱᤄᤧᤖᤧᤰᤁᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤛ᤺ᤵᤐᤠᤖ ᤁᤧᤍᤠ᤺ᤰᤐᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰ.
MAT 13:21 ᤁᤖ ᤋᤠᤱᤒᤠ ᤁᤢᤛ᤻ᤛᤠ᤺ᤵ ᤁᤧᤒᤵᤐᤠ ᤁᤢᤒᤢᤱᤔᤠᤴ ᤜᤧᤰᤁᤣ ᤂᤧᤸᤗᤧ ᤛᤵᤑᤠᤖᤰ ᤌᤖᤢᤖᤥ॥ ᤜᤧᤰᤁᤩᤠᤱ ᤐᤠ᤺ᤴᤈᤠᤰᤁᤡᤴ ᤏᤛᤠ᤺ᤴ ᤆᤥᤃᤢᤒᤠᤸᤗᤧ ᤁᤧᤛᤠᤰᤐᤠ ᤐᤠ᤺ᤴ ᤏᤢ ᤋᤢᤰᤂᤣ᤺ᤴ ᤋᤠᤏᤢᤔᤧ᤺ᤴᤏᤣ ᤜᤠᤖᤠᤀᤣ ᤏᤛᤠ᤺ᤴᤏᤡᤴ ᤗᤧᤖᤢᤍᤣ᤺ᤛᤢ᤹ᤖᤥ॥
MAT 13:22 ᤋᤡᤱᤃᤪᤣ᤺ᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠᤍᤧᤴᤏᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰ. ᤁᤖ ᤂᤧᤸᤗᤧ ᤁᤴ ᤜᤡᤱᤔᤴᤏᤥᤒᤠ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤏᤢ ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤠᤰᤂᤣᤀᤠᤱ ᤐᤥ᤺ᤱᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ᤀᤡᤸᤗᤧ ᤐᤠ᤺ᤴᤈᤠᤰᤁᤡᤴ ᤛᤢ᤺ᤵᤋᤢᤍᤣ᤺ᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ ᤔᤧᤓᤳᤇᤢᤴᤗᤥ॥
MAT 13:23 ᤜᤧᤰᤁᤩᤠᤱ ᤏᤢ᤺ᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤵᤐᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤡᤵᤌᤡᤰ. ᤋᤢᤰᤐᤥ᤺ᤱ ᤏᤢ ᤛᤢᤶᤒᤥ᤺ᤱ ᤗᤧᤱ ᤌᤠᤖᤡᤰ ᤁᤢᤈᤠ᤹ ᤑᤳᤇᤢᤖᤥ॥”
MAT 13:24 ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰᤗᤥ–ᤗᤳᤇᤠ ᤔᤏᤠᤎᤡᤰᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢ.
MAT 13:25 ᤁᤖ ᤛᤧᤴᤍᤡᤰ ᤁᤧᤖᤧᤰ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤸᤗᤧ ᤁᤢᤏᤡᤱᤔᤡ᤺ᤴ ᤋᤩᤧᤀᤠᤱ ᤂᤧᤴ ᤔᤠᤛᤡ ᤗᤧᤵᤔᤏᤠᤒᤠᤀᤥ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢᤎᤀᤠᤱ ᤐᤣᤖᤥ॥
MAT 13:26 ᤜᤧᤰᤁᤩᤠᤱ ᤔᤠᤛᤡ᤺ᤴ ᤁᤢᤈᤠ᤹ ᤌᤥ᤺ᤰᤔᤠ ᤜᤣ᤺ᤰᤋᤧᤸᤗᤧ ᤔᤠᤗᤧ᤺ᤴᤍᤥᤜᤠ᤹ᤀᤠᤱ ᤏᤡ᤺ᤎᤠᤒᤧᤖᤥ॥
MAT 13:27 ᤜᤧᤰᤁᤩᤠᤱ ᤛᤣᤘᤠᤖᤥᤒᤠᤜᤠ᤹ ᤗᤠᤈᤣ᤹ ᤍᤠᤱᤒᤠᤸᤗᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤔᤠᤛᤡ ᤕᤠ᤹ᤖᤡ᤺ᤶᤒᤠᤖᤰ ᤁᤧᤗᤧᤵᤋᤢᤀᤠᤱ ᤏᤧᤛ᤻ᤛᤧ ᤔᤧ᤺ᤶᤒᤡ. ᤁᤖ ᤀᤠᤰᤂᤣᤀᤠᤱ ᤔᤠᤗᤧ᤺ᤴᤍᤥ᤺ᤴᤏᤠᤱ ᤗᤡᤅᤧᤒᤣ᥅’
MAT 13:28 ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. ‘ᤂᤧᤱᤃ ᤏᤡᤱᤔᤡ᤺ᤸᤗᤧ ᤜᤧᤰᤁᤣ ᤆᤥᤃᤢᤒᤠᤖᤥ॥’ ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. ‘ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤢᤶᤍᤣ᤺ᤛᤢᤶᤒᤧ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤡ᥅’
MAT 13:29 ᤗᤠᤈᤣ᤹ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ‘ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤔᤠᤗᤧ᤺ᤴᤍᤥ᤺ᤴ ᤁᤧᤀᤠ᤺ᤰᤂᤢᤶᤔᤡᤸᤗᤧ ᤔᤠᤛᤡ᤺ᤴᤏᤠᤱ ᤁᤧᤀᤠ᤺ᤰᤂᤢᤶ ᤁᤧᤛᤧᤖᤢᤶᤗᤥ॥
MAT 13:30 ᤆᤠᤛᤢᤶᤔᤠ ᤕᤧᤶ ᤌᤠᤖᤡᤰ ᤏᤧᤵᤔᤠᤱ ᤛᤥᤛᤥᤖᤡᤰ ᤐᤥᤛᤡᤖ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤆᤠᤃᤧᤛᤢᤶᤒᤠᤜᤠ᤹ ᤁᤧᤖᤧᤰᤏᤢ ᤋᤃᤡ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤧᤶᤔᤧ᤹ᤀᤠᤱ ᤀᤡᤓᤢᤳᤋᤧᤶᤔᤧ᤹ ᤜᤧᤰᤁᤩᤠᤱ ᤔᤡᤀᤥ ᤗᤠᤵᤑᤢ᤺ᤛᤧᤶᤔᤧ᤹ ᤜᤧᤰᤁᤩᤠᤱ ᤔᤠᤛᤡ᤺ᤴ ᤛᤢᤵᤛᤧᤶᤔᤧ᤹ᤀᤠᤱ ᤆᤠᤕᤠᤱᤔᤠᤀᤥ ᤕᤠ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥’”
MAT 13:31 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤋᤣ᤹ᤖᤢᤀᤠᤱ ᤀᤡᤰᤋᤠᤵᤐᤥ ᤗᤧᤵᤋᤢ॥
MAT 13:32 ᤁᤧᤖᤧᤰ ᤕᤠ᤹ᤖᤡ᤺ᤶᤒᤠᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥ᤺ᤰᤛᤠᤱ ᤂᤧᤴ ᤐᤥ᤺ᤀᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤘᤣ᤹ ᤏᤢᤎᤡ-ᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤁᤢᤒᤢᤱ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤐᤢᤛᤠᤜᤠ᤹ ᤔᤧᤍᤠᤀᤠᤱ ᤁᤢᤒᤥᤖᤠ᤺ᤰᤁᤥ ᤜᤠᤵ ᤔᤧᤈᤥᤃᤢᤖᤥ॥”
MAT 13:33 ᤕᤧᤛᤢᤖᤧ ᤀᤠᤸᤗᤛᤠᤱ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤑᤧ᤹ᤖᤢᤶᤔᤥ ᤕᤠᤰᤔᤏᤠᤒᤠ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴ ᤜᤧᤰᤋᤱᤒᤠ ᤆᤥ᤺ᤰᤗᤥ॥ ᤌᤡᤰ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤵᤐᤩᤠᤀᤥ ᤕᤖᤡᤰ ᤑᤧ᤹ᤖᤢᤶᤔᤥ ᤔᤡᤛᤠᤰ ᤛᤡᤍᤠ᤹ᤀᤡᤴ ᤕᤠᤰᤋᤢ. ᤜᤧᤰᤁᤩᤠᤱ ᤛ᤹ᤖᤢ ᤕᤢᤰᤂᤢᤀᤠᤱ ᤔᤧᤴᤕᤢᤵᤐᤣ ᤌᤠᤖᤡᤰ ᤛᤢ᤺ᤵᤋᤢ ᤕᤢᤰᤂᤢᤖᤥ॥”
MAT 13:34 ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤔᤏᤠᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡᤖᤥ. ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤐᤠᤖᤧᤸᤗᤧ ᤂᤧᤍᤠ᤹ᤀᤥᤖᤰ ᤐᤠᤖᤧ॥
MAT 13:35 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ– “ᤀᤡᤱᤃᤠ᤹ ᤂᤧᤍᤠ᤹ᤀᤥᤖᤰ ᤐᤠ᤺ᤳᤋᤠᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ॥”
MAT 13:36 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤗᤧᤖᤢᤎᤛᤡᤀᤠᤱ ᤕᤧᤛᤢ᤺ᤴ ᤜᤡᤶᤔᤥ ᤐᤣ॥ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ “ᤐᤩᤠᤱᤛᤡᤀᤥᤒᤠ ᤔᤠᤗᤧ᤺ᤴᤍᤥᤖᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤐᤥᤀᤠᤎᤰᤋᤧ᤹” ᤑᤠ᤹ᤀᤠᤱ ᤔᤧᤔᤧᤳᤋᤢ॥
MAT 13:37 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤱᤃ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤀᤠᤖᤥ॥
MAT 13:38 ᤐᤩᤠᤱᤛᤡᤃᤧᤴ ᤀᤡ᤺ᤰᤋᤠᤵᤐᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤗᤥ. ᤜᤧᤰᤁᤩᤠᤱ ᤂᤧᤴ ᤏᤢ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤒᤠ ᤔᤏᤠᤛᤡᤖᤥ॥ ᤔᤠᤗᤧ᤺ᤴᤍᤥᤜᤠ᤹ᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤏᤠᤛᤡᤖᤥ.
MAT 13:39 ᤜᤧᤰᤁᤩᤠᤱ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠ ᤏᤡᤱᤔᤡ᤺ᤱᤃ ᤔᤠᤑᤧᤴᤛᤠᤶᤔᤡᤴᤗᤥ॥ ᤆᤠᤛᤢᤶᤔᤠ ᤕᤧᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴᤗᤥ. ᤜᤧᤰᤁᤩᤠᤱ ᤆᤠᤃᤧᤛᤢᤶᤒᤠᤜᤠ᤹ᤃ ᤔᤠᤱᤗᤠᤀᤡᤱᤒᤠᤛᤡᤖᤥ॥”
MAT 13:40 “ᤜᤧᤰᤁᤩᤠᤱ ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤔᤧᤛᤢᤵᤛᤢᤀᤠᤱ ᤔᤡᤀᤥ ᤗᤠᤵᤔᤧᤓᤢᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤐᤥ᤺ᤱᤗᤥ॥
MAT 13:41 ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤠᤔᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢᤱᤛᤡᤱ ᤜᤧᤰᤁᤩᤠᤱ ᤁᤧᤖᤧᤰ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤜᤠ᤹ ᤏᤢ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤜᤠᤱᤈᤢᤶᤔᤥᤗᤠᤶ ᤔᤧᤛᤢᤵᤛᤢᤛᤡ᤹ᤀᤠᤱ
MAT 13:42 ᤕᤶᤒᤠ ᤔᤡᤜᤠᤵᤐᤥ ᤗᤠᤵᤔᤧᤓᤢᤛᤢᤛᤡ᤹ᤖᤥ॥ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤋᤢᤰᤂᤣ᤺ᤸᤗᤧ ᤜᤠ᤺ᤵᤔᤠᤴ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥
MAT 13:43 ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤥ ᤏᤠᤶ ᤁᤢᤀᤡᤛᤡ᤺ᤰ ᤔᤧᤗᤧᤰᤗᤥ॥ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
MAT 13:44 ᤕᤠᤶᤔᤥ “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤆᤡᤱᤔᤏᤠᤒᤠ ᤕᤖᤡᤰ ᤕᤠᤱᤓᤢ᤺ᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕᤠᤱᤓᤢ᤺ᤴ ᤂᤥ᤺ᤛᤢᤀᤠᤱ ᤕᤠᤶᤔᤥ ᤆᤡᤰᤂᤢᤖᤥ. ᤜᤧᤰᤁᤩᤠᤱ ᤂᤧᤴ ᤛ᤺ᤳᤗ ᤐᤣ᤺ᤰᤁᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤆᤡᤃ᤺ᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤀᤡᤅᤢᤖᤥ॥”
MAT 13:45 “ᤕᤠᤶᤔᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤗᤳᤇᤠ ᤏᤢ᤺ᤒ᤻ ᤏᤢ᤺ᤒᤠ ᤋᤧᤰᤛᤣ᤺ᤰ ᤁᤧᤃᤥ᤺ᤵᤐᤠ ᤗᤧᤱᤜᤱᤒᤠᤸᤗᤧ
MAT 13:46 ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤋᤧᤰᤛᤣ᤺ᤰᤁᤡᤴ ᤂᤥ᤺ᤛᤢ. ᤜᤧᤰᤁᤩᤠᤱ ᤐᤣᤀᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤁᤢᤈᤡᤃ᤺ᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤋᤧᤰᤛᤣ᤺ᤰᤁᤡᤴ ᤀᤡᤅᤢᤖᤥ॥”
MAT 13:47 “ᤕᤠᤶᤔᤥ. ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤕᤶᤒᤠ ᤕᤥ᤺ᤱ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤴ ᤕᤥ᤺ᤱᤅᤡᤴ ᤘᤖᤰᤁᤥ ᤔᤧᤗᤧᤵᤋᤢᤸᤗᤧ ᤂᤧᤵᤔᤥ ᤁᤧᤖᤧᤰ ᤐᤖᤡᤰᤗᤧᤴ ᤅᤠᤜᤠ᤹ ᤔᤧᤎᤠ᤺ᤖᤥ॥
MAT 13:48 ᤜᤧᤰᤁᤩᤠᤱ ᤂᤧᤴ ᤕᤥ᤺ᤱᤅᤥ ᤁᤢᤗᤧᤶ ᤅᤠᤜᤠ᤹ ᤔᤧᤎᤠᤀᤠᤱ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ᤖᤧ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ. ᤜᤧᤰᤁᤩᤠᤱ ᤔᤧᤕᤢᤱᤛᤡᤱᤅᤠᤱ ᤏᤢ᤺ᤒᤠ ᤅᤠᤜᤠ᤹ ᤅᤠ ᤕᤠᤱᤔᤠᤀᤥ ᤔᤧᤕᤠᤰᤋᤢᤛᤡ. ᤁᤖ ᤋᤠᤵᤑᤧ᤺ᤶᤒᤠ ᤅᤠᤜᤠ᤹ ᤕᤠᤶᤔᤥ ᤆᤫᤠ᤺ᤳᤋᤥ ᤗᤠᤵᤔᤧᤓᤢᤛᤢᤛᤡᤖᤥ॥
MAT 13:49 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥᤀᤠᤱ ᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤍᤠᤀᤠᤱ ᤛᤠᤶᤕᤥᤏᤡᤒᤠᤜᤠ᤹ᤀᤥᤗᤠᤶ ᤑᤥᤋᤩᤠᤒᤠ ᤔᤏᤠᤜᤠ᤹ ᤘᤣ᤹ ᤔᤧᤛᤧᤴᤍᤢᤛᤡ᤹ᤀᤠᤱ
MAT 13:50 ᤂᤧᤱᤜᤠ᤹ ᤕᤶᤒᤠ ᤔᤡᤜᤠᤵᤐᤥ ᤗᤠᤵᤔᤧᤓᤢᤛᤢᤛᤡ᤹ᤖᤥ॥ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤋᤢᤰᤂᤣ᤺ᤸᤗᤧ ᤜᤠ᤺ᤵᤔᤠᤴ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥”
MAT 13:51 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ᥄”
MAT 13:52 ᤂᤢᤏᤧ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤜᤢ᤹ᤛᤠᤶᤒᤠ ᤁᤧᤒᤥ᤺ᤱᤒᤠ ᤁᤧᤖᤧᤰ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤃ ᤜᤡᤶᤍᤠᤱᤒᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤴᤍᤥ᤺ᤰᤗᤠᤶ ᤁᤢᤛᤱ ᤏᤢ ᤁᤧᤕ᤺ᤵᤐᤠ ᤁᤧᤕᤧᤰᤐᤠ ᤀᤡᤔᤧᤸᤗᤢᤱᤒᤠ ᤆᤡᤃ᤺ᤰᤘᤠᤜᤠ᤹ ᤔᤧᤗ᤺ᤳᤋᤢᤛᤡ᤹ᤖᤥ॥”
MAT 13:53 ᤕᤧᤛᤢᤖᤧ ᤁᤴ ᤂᤧᤍᤠ᤹ᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤧᤵᤔᤥᤗᤠᤶ ᤐᤣᤀᤠᤱ
MAT 13:54 ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤋᤩᤧᤖᤥ॥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡᤸᤗᤧ ᤔᤏᤠᤜᤠ᤹ᤖᤧ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤰᤋᤱᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤢᤰᤛᤠᤶ ᤀᤠᤳᤋᤥᤗᤠᤶ ᤂᤥ᤺ᤛᤢᤒᤣ᥅
MAT 13:55 ᤔᤧ᤺ᤶᤒᤧ. ᤁᤱᤃ ᤛᤡᤱ ᤁᤧᤃᤠᤶᤒᤠᤸᤗᤧ ᤁᤢᤛ᤻ᤛᤠ᤺ᤴ ᤔᤧ᤺ᤶᤒᤡ᥅ ᤁᤸᤗᤧ ᤁᤢᤶᤔᤠᤖᤧ ᤁᤢᤔᤡᤱ ᤔᤖᤡᤕᤔ ᤜᤧᤰᤁᤩᤠᤱ ᤁᤢᤴᤛᤠ᤹ᤛᤡᤃ ᤕᤠᤁᤢᤒ. ᤕᤢᤛᤢᤑ. ᤛᤡᤔᤥᤏ ᤏᤢ ᤕᤜᤢᤍᤠᤛᤡ ᤔᤧ᤺ᤴᤇᤡᤒᤡ᥅
MAT 13:56 ᤂᤧᤸᤗᤧ ᤁᤢᤴᤛᤠ᤹ ᤔᤧᤴᤇᤢᤔᤠᤜᤠ᤹ ᤀᤠᤏᤡ᤹ᤏᤢᤀᤣᤛᤧ ᤔᤧᤘᤠ᤹ᤒᤠ॥ ᤜᤧᤰᤁᤣ᤺ᤸᤗᤧ ᤁᤴ ᤔᤏᤠ᤺ᤸᤗᤧ ᤀᤠᤳᤋᤥᤗᤠᤶ ᤁᤴ ᤐᤠ᤺ᤴᤜᤠ᤹ ᤂᤥ᤺ᤛᤢᤒᤣ᥅”
MAT 13:57 ᤜᤧᤰᤁᤣ ᤔᤧᤒᤠ᤺ᤳᤋᤢᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤱᤃ ᤁᤧᤖᤧᤰ ᤋᤧᤴᤏᤥ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢ. ᤁᤖ ᤀᤠᤵᤑᤣ᤺ᤰ ᤁᤢᤜᤡᤶᤔᤥ ᤏᤢ ᤁᤢᤒᤠᤱᤓᤣ᤹ᤀᤥᤖᤰ ᤀᤡᤱᤎᤠ᤺ᤱ ᤔᤧᤶᤒᤡᤖᤢᤴᤗᤥ॥”
MAT 13:58 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ॥
MAT 14:1 ᤂᤧᤴ ᤕᤧᤶᤔᤥ ᤃᤠᤗᤡᤗ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤜᤧᤖᤥᤍ ᤀᤣᤴᤋᤡᤐᤠᤛᤖᤧ ᤕᤧᤛᤢᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢ.
MAT 14:2 ᤜᤧᤰᤁᤩᤠᤱ ᤁᤢᤛᤣᤘᤠᤖᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤁᤱᤃ ᤛᤧᤰᤂᤠᤛᤠᤱ ᤛᤧᤵᤐᤠᤱᤄᤢᤱᤛᤡᤱᤒᤠ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴᤏᤣᤖᤥ. ᤂᤢᤏᤧ᤹ ᤕᤠᤶᤔᤥ ᤜᤡᤅᤧᤒᤠᤸᤗᤧ ᤆᤥᤃᤢᤸᤗᤧ ᤔᤢᤰᤛᤠᤶᤗᤠᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥”
MAT 14:3 ᤀᤠᤸᤗ ᤀᤢᤴᤇᤥ᤺ᤴᤇᤠ ᤜᤧᤖᤥᤍᤖᤧ ᤀᤠᤒᤠᤅᤣ ᤁᤢᤴᤛᤠ᤹ ᤑᤡᤗᤡᤐᤖᤧ ᤁᤢᤔᤣ᤺ᤳ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤳ ᤁᤳᤋᤢᤀᤠᤱ ᤘᤕᤧ॥ ᤜᤧᤰᤁᤣ᤺ᤸᤗᤧ ᤕᤢᤜᤢᤴᤏᤠᤖᤧ ᤂᤢᤏᤧ᤹ ᤀᤧᤳᤗᤧᤱ “ᤂᤧᤴ ᤀᤠᤒᤠᤅᤣ ᤁᤧᤴᤛᤠ᤹ᤖᤧ ᤁᤢᤔᤣ᤺ᤳᤋᤡᤴ ᤂᤧᤏᤧ᤹ ᤔᤣ᤺ᤳ ᤁᤵᤔᤠ ᤔᤧᤏᤢ᤹ᤏᤧᤴ” ᤔᤧᤳᤋᤢᤀᤠᤱ ᤘᤕᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤜᤧᤖᤥᤍᤖᤧ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤀᤠᤱ ᤘᤕᤧ॥
MAT 14:5 ᤜᤧᤖᤥᤍᤖᤧ ᤕᤢᤜᤢᤴᤏᤠ᤺ᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢ ᤁᤖ ᤔᤏᤠᤜᤠ᤹ᤏᤢ ᤁᤡ᤺ᤛᤧᤀᤠᤱ ᤘᤕᤧ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤕᤢᤜᤢᤴᤏᤠ᤺ᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤘᤕᤧᤖᤥ॥
MAT 14:6 ᤁᤖ ᤜᤧᤖᤥᤍᤖᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤛᤛ᤺ᤳᤛᤖᤠᤱᤅᤥ ᤜᤧᤖᤥᤍᤡᤕᤠᤛᤖᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤴ ᤜᤧᤖᤥᤍᤧᤏ ᤏᤢ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤏᤢ᤺ᤖᤡᤰ ᤗᤠ᤺ᤰᤂᤧᤀᤠᤱ ᤜᤧᤖᤥᤍᤖᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧᤒᤠᤸᤗᤧ ᤆᤥᤃᤢᤸᤗᤧ
MAT 14:7 ᤂᤧᤏᤧ᤹ ᤌᤣ ᤁᤧᤏᤠ᤺ᤰᤋᤢᤛᤠᤱ ᤐᤡᤏᤧᤖᤥ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤗᤥ॥
MAT 14:8 ᤁᤢᤶᤔᤠᤖᤧ ᤜᤢ᤺ᤛ᤻ᤛᤢᤀᤠᤱ ᤂᤧᤴ ᤆᤢᤰᤔᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤐᤧᤴ ᤆᤧᤳᤌᤩᤠᤀᤥ ᤐᤡᤖᤠᤱᤅᤧ᤹ᤀᤥ॥”
MAT 14:9 ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤜᤧᤖᤥᤍᤧᤏ ᤁᤢᤏᤡᤱᤘᤠ᤹ ᤋᤢᤃᤧ. ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤆᤢᤰᤔᤧᤸᤗᤧ ᤏᤠ᤺ᤰᤋᤢᤒᤠᤴ ᤁᤧᤳᤋᤧᤶ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
MAT 14:10 ᤂᤧᤸᤗᤧ ᤆᤥᤃᤢᤸᤗᤧ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤐᤧᤴ ᤂᤰᤐᤠᤱᤄᤢᤛᤡᤀᤠᤱ
MAT 14:11 ᤁᤢᤎᤧᤃᤣ᤺ᤰᤐᤧᤴ ᤔᤧᤍᤠᤖᤢᤀᤠᤱ ᤂᤧᤴ ᤆᤢᤰᤔᤧᤴ ᤆᤧᤳᤌᤩᤠᤀᤥ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤁᤢᤶᤔᤠᤖᤥ ᤋᤣ᤹ᤖᤢ॥
MAT 14:12 ᤂᤧᤴ ᤀᤣᤃᤠᤱ ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤁᤢᤎᤰᤁᤡᤴ ᤔᤧᤍᤣ᤹ᤖᤢᤀᤠᤱ ᤔᤧᤗᤢᤵᤋᤢ॥ ᤜᤧᤰᤁᤩᤠᤱ ᤔᤧᤒᤣᤀᤠᤱ ᤁᤴ ᤐᤠ᤺ᤴᤏᤡᤴ ᤕᤧᤛᤢ᤺ᤴ ᤔᤧᤔᤧᤳᤋᤢ॥
MAT 14:13 ᤕᤧᤛᤢᤖᤧ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤀᤠᤱ ᤂ᤺ᤱᤒᤣᤀᤥᤗᤠᤶ ᤂᤢᤏᤧ᤹ᤖᤰ ᤀᤣ᤺ᤰᤛᤠᤍᤧᤴᤏᤥ ᤐᤣ॥ ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤐᤣᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤐᤠᤱᤈᤢᤶᤗᤠᤶ ᤂᤢᤏᤧ᤹ ᤐᤣᤒᤠ ᤗᤧᤵᤔᤠᤱ ᤗᤠᤱᤔᤧᤄᤣᤃᤧᤖ ᤁᤢᤀᤣᤃᤠᤱ ᤔᤧᤎᤠᤛᤡᤱᤗᤥ॥
MAT 14:14 ᤕᤧᤛᤢ᤺ᤴ ᤂ᤺ᤱᤒᤣᤀᤥᤗᤠᤶ ᤗ᤺ᤴᤍᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡ᤺ᤛᤢᤛᤡᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤂᤧᤴ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤢᤛᤡᤖᤥ॥
MAT 14:15 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤱᤜᤠ᤹ ᤐᤠᤱᤄᤧᤍᤣ᤺ᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤀᤣ᤺ᤰᤛᤠᤍᤧᤴᤏᤥ ᤌᤣᤀᤠᤱ ᤀᤡᤱᤔᤠ ᤆᤠᤔᤠ ᤂᤥᤔᤧᤍᤧᤳᤏᤧᤴᤗᤥ. ᤕᤠᤶᤔᤥ ᤏᤠᤶᤎᤩᤧᤒᤣᤖᤥ॥ ᤜᤠᤖᤠ᤹ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤔᤧᤀᤡᤅᤢ ᤔᤧᤈᤖᤖᤥ॥”
MAT 14:16 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴᤜᤠ᤹ ᤐᤠᤱᤔᤠᤛᤡ ᤔᤧ᤺ᤴᤗᤥ॥ ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ॥”
MAT 14:17 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤅᤠᤛᤡ ᤂᤖᤧ᤺ᤱᤜᤠ᤹ ᤏᤢ ᤏᤧᤳᤇᤡ ᤅᤠᤜᤠ᤹ᤖᤰ ᤁᤳᤋᤢᤶᤒᤧᤱᤃ᥄”
MAT 14:18 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤂᤖᤧ᤺ᤱᤅᤡᤴ ᤏᤢ ᤏᤧᤳᤇᤡ ᤅᤠᤜᤠ᤹ ᤁᤳᤏᤠ ᤀᤡᤱᤃᤠ᤹ᤀᤥ ᤑᤧᤳᤋᤧᤶᤔᤧ᤹॥”
MAT 14:19 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤕᤠ᤺ᤴ ᤛᤶᤍᤠᤱ ᤕᤢᤱᤔᤠ ᤐᤠᤱᤄᤢᤛᤡᤀᤠᤱ ᤅᤠᤛᤡ ᤂᤖᤧ᤺ᤱᤅᤡᤴ ᤏᤢ ᤏᤧᤳᤇᤡ ᤅᤠᤜᤠ᤹ ᤐᤰᤂᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤌᤥ ᤀᤥᤔᤕᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤖᤧ᤺ᤱᤜᤠ᤹ ᤂᤧ᤺ᤰᤂᤢ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖᤥ॥
MAT 14:20 ᤂᤧᤴ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤠᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ (᥇᥈) ᤏᤀᤡᤔᤠ ᤕᤥᤖᤧᤖᤥ॥
MAT 14:21 ᤂᤧᤴ ᤁᤧᤈᤠᤒᤠᤜᤠ᤹ᤀᤥᤃ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥
MAT 14:22 ᤂᤧᤴ ᤀᤣᤃᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤐᤠᤱᤄᤢᤛᤡᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤗᤠ᤺ᤛ᤻ᤛᤧᤶᤔᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤏᤠᤜᤠᤱᤍᤠᤱ ᤐᤣᤃᤧᤶᤔᤧ᤹ ᤔᤧᤳᤋᤢᤛᤡ॥
MAT 14:23 ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤔᤏᤠᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡᤀᤠᤱ ᤋᤢᤘᤠ ᤆᤥ᤺ᤰᤛᤧ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥ ᤂᤠᤍᤠᤔᤧᤸᤗᤧ ᤂᤧᤵᤔᤥ ᤂᤢᤏᤧ᤹ᤖᤰ ᤘᤕᤧᤖᤥ॥
MAT 14:24 ᤂᤧᤴ ᤕᤧᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤗᤠᤶ ᤘᤖᤰᤁᤡᤸᤗᤧ ᤁᤢᤕᤠᤀᤥᤏᤢ ᤔᤠ᤺ᤱᤄᤠ ᤔᤧᤃᤧᤖᤧᤀᤠᤱ ᤔᤧᤘᤕᤧᤸᤗᤧ ᤂᤢᤏᤡ᤹ ᤋᤰᤗᤧᤵᤔᤠᤱᤏᤢ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤖᤧᤀᤠᤱ ᤘᤠᤓᤧᤸᤗᤧᤱᤅᤡᤸᤗᤧ ᤂ᤺ᤱᤒᤣᤴ ᤛᤠ᤹ᤖᤡᤰ ᤘᤠ᤺ᤴᤍᤢᤖᤥ॥
MAT 14:25 ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢ᤺ᤴ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤃᤧᤖ ᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤂ᤺ᤱᤒᤣᤀᤥ ᤐᤣᤖᤥ॥
MAT 14:26 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤃᤧᤖ ᤐᤳᤇᤧᤒᤠ ᤔᤧᤏᤡ᤺ᤛᤢᤀᤠᤱ “ᤁᤱᤃ ᤛᤡᤛᤠᤶᤗᤥ᥄” ᤗ᤹ᤖᤡᤰ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤓᤡ᤺ᤰᤋᤧᤖᤥ॥
MAT 14:27 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤡᤔᤥ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹᥄ ᤀᤡᤱᤃᤠ᤹ ᤕᤧᤛᤢᤀᤠ॥ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄”
MAT 14:28 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤔᤧᤳᤋᤢ. “ᤍᤠᤱᤒᤣ. ᤛᤧᤰᤂᤠ ᤂᤧᤏᤧ᤹ᤀᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ᤀᤠᤱ ᤆᤫᤠ᤺ᤳ ᤛᤶᤍᤠᤱ ᤗᤠᤱᤄᤣᤃᤧᤖ ᤑᤧᤖᤧ᤹ ᤔᤧᤳᤋᤠᤱᤅᤧ᤹ᤀᤥ॥”
MAT 14:29 ᤕᤧᤛᤢᤖᤧ ᤔᤧᤳᤋᤢ. “ᤑᤧᤖᤧ᤹”॥ ᤜᤧᤰᤁᤣ᤺ᤸᤗᤧ ᤐᤋᤪᤢᤛᤧᤴᤏᤠᤱ ᤆᤫᤠ᤺ᤳᤋᤥ ᤗᤠᤱᤄᤣᤃᤧᤖ ᤕᤧᤛᤢ᤺ᤴ ᤘᤕᤧᤒᤠ ᤗᤧᤵᤔᤠᤱ ᤌᤠᤛᤡᤱ॥
MAT 14:30 ᤁᤖ ᤐᤣᤖ ᤐᤳᤇᤧᤸᤗᤧ ᤂᤧᤸᤗᤧ ᤕᤶᤒᤠ ᤛᤢᤖᤡᤳ ᤁᤣᤈᤱ ᤏᤢ ᤘᤠᤓᤧᤸᤗᤧᤱᤅᤡᤴ ᤏᤡ᤺ᤛᤢᤀᤠᤱ ᤁᤡ᤺ᤛᤧ॥ ᤜᤧᤰᤁᤩᤠᤱ ᤂᤧᤴ ᤆᤫᤠ᤺ᤳᤋᤥ ᤜᤢᤶᤔᤠ ᤜᤣ᤺ᤰᤋᤧᤸᤗᤧ “ᤀᤠᤍᤠᤱᤒᤣ. ᤋᤠᤱᤛᤧ᤺ᤵᤋᤠᤱᤅᤧ᤹ᤀᤥ” ᤗ᤹ᤖᤡᤰ ᤀ᤺ᤰᤋᤧ॥
MAT 14:31 ᤂᤡᤔᤥ ᤕᤧᤛᤢᤖᤧ ᤁᤢᤜᤢᤰᤁᤥ ᤋᤧᤶᤛᤢᤖ ᤔᤧᤳᤋᤢ. “ᤏᤛᤠ᤺ᤴ ᤁᤧᤛᤢ᤺ᤶᤒᤠᤀᤣ. ᤌᤣᤀᤠᤱ ᤆᤵᤆᤡ ᤁᤧᤈᤥᤃᤢᤒᤠᤒᤣ᥅”
MAT 14:32 ᤜᤧᤰᤁᤩᤠᤱ ᤂᤢᤴᤇᤡ᤹ ᤂ᤺ᤱᤒᤣᤀᤥ ᤗᤠ᤺ᤛᤧᤳᤇᤡᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤔᤠ ᤆᤰ ᤗ᤹ᤖᤧᤖᤥ॥
MAT 14:33 ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤣᤘᤠ ᤔᤧᤈᤥᤃᤢ. “ᤍᤠᤱᤒᤣ. ᤂᤧᤏᤧ᤹ᤃ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠ᤺ᤏᤧᤖᤥ᥄”
MAT 14:34 ᤂᤧᤱᤜᤠ᤹ ᤏᤠᤎᤠ᤺ᤶᤒᤡᤒᤠ ᤃᤏᤧᤛᤖᤧᤋ ᤋᤧᤴᤏᤥ ᤔᤧᤃᤧᤖᤧᤀᤠᤱ
MAT 14:35 ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤂᤢᤏᤧ᤹ ᤋᤩᤧᤒᤠ ᤀᤡᤱᤄᤱᤅᤡᤴ ᤂᤧᤴ ᤂᤡᤖᤡᤒᤠ ᤋᤧᤴᤏᤥ ᤛᤧ᤺ᤖᤧ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤕᤧᤛᤢᤖᤥ ᤔᤧᤍᤠᤖᤢᤛᤡ॥
MAT 14:36 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤧᤍᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤴᤗᤰᤛᤠᤱ ᤛᤢ᤺ᤔᤠ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤛᤢᤒᤠᤜᤠ᤹ ᤁᤧᤖᤧᤰ ᤔᤧᤘᤣ᤺ᤳᤋᤧᤖᤥ॥
MAT 15:1 ᤜᤧᤰᤁᤩᤠᤱ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ.
MAT 15:2 “ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤒᤣ᥅ ᤂᤧᤱᤜᤠ᤹ᤖᤧ ᤆᤠᤔᤠᤏᤢ᤺ᤸᤗᤧ ᤋᤃᤡ ᤆᤥ᤺ᤰᤌᤡᤶ ᤁᤢᤀᤡᤛᤡ᤺ᤰ ᤜᤢᤰ ᤘᤠᤔᤧᤴᤜᤵᤋᤢᤴᤗᤥ॥”
MAT 15:3 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤀᤠᤱ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤌᤣᤀᤠᤱ ᤁᤧᤓᤣ᤺ᤴᤍᤢᤶᤒᤠᤒᤣ᥅
MAT 15:4 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤁᤧᤶᤒᤠ ᤁᤧᤶᤔᤠᤛᤡ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤛᤧ᤹’ ᤜᤧᤰᤁᤩᤠᤱ ‘ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤛᤠᤱᤃᤪᤠ ᤔᤧᤳᤋᤢᤛᤡ᤹. ᤂᤧᤱᤃ ᤛᤧᤵᤔᤠᤀᤣ ᤐᤥ᤺ᤱᤗᤥ॥’
MAT 15:5 ᤁᤖ ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤀᤡᤱᤃᤠ᤹ᤗᤠᤶ ᤂᤡᤴᤇᤡ᤹ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤁᤢᤓᤠ᤹ᤀᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤡᤖᤢᤱ ᤛᤢᤖᤢᤱᤅᤠᤱ ᤘᤠ᤹ ᤗ᤹ᤖᤡᤰ ᤐᤠ᤺ᤳᤋᤢ᤹.
MAT 15:6 ᤂᤧᤸᤗᤧ ᤀᤠᤒᤠᤅᤣ ᤁᤢᤶᤒᤠ ᤁᤢᤶᤔᤠᤛᤡ ᤁᤢᤓᤠ᤹ ᤐᤡᤔᤠᤛᤡᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠᤛᤡ ᤔᤧᤒᤥ᤺ᤱᤏᤧᤴ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤔᤠᤱ ᤀᤠᤵᤑᤣ᤺ᤰ ᤂᤡᤏᤡ᤹ ᤆᤥ᤺ᤰᤌᤡᤶᤔᤡᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤌᤣᤏᤠ-ᤎᤣᤒᤠ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥
MAT 15:7 ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠᤱᤃ ᤛᤧᤰᤂᤠᤀᤣ ᤗᤠ᤹ᤖᤢᤖᤥ.
MAT 15:8 ‘ᤁᤴ ᤔᤏᤠᤜᤠ᤹ᤖᤧᤃ ᤂᤢᤏᤡ᤹ ᤔᤢᤖᤠ᤺ᤸᤗᤧᤖᤰ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤀᤠᤖᤥ. ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤗᤧᤵᤔᤠᤱ ᤜᤥ᤺ᤵᤗᤥ.
MAT 15:9 ᤁᤱᤜᤠ᤹ᤖᤧ ᤜᤏᤧᤀᤣ ᤛᤣᤘᤠ ᤔᤧᤈᤥ᤺ᤰᤁᤠ. ᤁᤖ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤵᤑᤣ᤺ᤰ ᤔᤧᤈᤥᤃᤢᤒᤠ ᤌᤡᤶᤖᤰᤗᤥ॥’”
MAT 15:10 ᤕᤧᤛᤢᤖᤧ ᤔᤏᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
MAT 15:11 ᤔᤏᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤁᤧᤗᤠ᤺ᤵᤐᤠ ᤆᤠ᤺ᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤔᤧᤈᤥᤃᤢᤴ. ᤁᤖ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢᤖᤥ॥”
MAT 15:12 ᤜᤧᤰᤁᤩᤠᤱ ᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤑᤖᤡᤛᤡᤜᤠ᤹ ᤗᤰᤋᤢᤛᤡᤒᤠ ᤏᤡᤱᤘᤠ᤹ ᤁᤧᤄᤥ᤺ᤛᤢᤒᤡ᥅”
MAT 15:13 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤧᤗᤣ᤺ᤳᤋᤢᤴᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤂᤢᤏᤡ᤹ ᤛᤠ᤺ᤵᤐᤥᤏᤢᤀᤣ ᤔᤧᤀᤠ᤺ᤰᤂᤢ᤹ᤖᤥ.
MAT 15:14 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤃ ᤔᤡᤰᤑ᤺ᤶᤒᤠ ᤗᤠᤶᤗᤥ᤺ᤒᤠᤛᤡᤖᤥ॥ ᤔᤡᤰᤑ᤺ᤶᤒᤠᤸᤗᤧ ᤔᤡᤰᤑ᤺ᤶᤒᤧᤴ ᤗᤠᤶᤗᤥᤛᤢᤏᤧ ᤑᤠ᤹ᤃᤪ ᤏᤧᤵᤔᤠᤱ ᤗᤢᤶᤒᤠ᤺ᤳᤋᤥ ᤁᤧᤱᤛᤡ ᤗᤠ᤺ᤳᤇᤡ᤹ᤖᤥ॥”
MAT 15:15 ᤐᤋᤪᤢᤛᤖᤧ ᤔᤧᤳᤋᤢ. “ᤁᤴ ᤂᤧᤍᤠ᤹ᤀᤥ ᤁᤧᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤕᤠᤵᤔᤡ ᤀᤠᤈᤧᤰᤋᤧ᤹ᤀᤥ॥”
MAT 15:16 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤐᤡ᥅
MAT 15:17 ᤔᤢᤖᤠᤀᤥᤗᤠᤶ ᤁᤧᤗᤠ᤺ᤵᤐᤧᤱᤃ ᤛᤠᤵᤐᤥ᤺ᤰᤁᤥ ᤐᤣ᤺ᤰᤁᤠᤱ ᤗᤠ᤺ᤰᤁᤠᤳ ᤗ᤺ᤴᤒᤣ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅
MAT 15:18 ᤁᤖ ᤔᤏᤠ ᤔᤢᤖᤠᤀᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤠ ᤐᤠ᤺ᤴᤏᤡᤱᤃ ᤛᤡᤰᤗᤢᤱᤔᤠᤗᤠᤶ ᤗ᤺ᤴᤗᤥ॥ ᤂᤧᤸᤗᤧᤀᤣ ᤔᤏᤠ᤺ᤱᤃ ᤀᤠᤛᤢᤳᤌᤥ ᤆᤥᤃᤢᤖᤥ.
MAT 15:19 ᤌᤣᤀᤠᤱᤓᤧᤸᤗᤧ ᤑᤧᤴ ᤏᤡᤱᤘᤠ᤹ ᤀᤡ᤺ᤵᤔᤠ. ᤔᤏᤠ ᤛᤧᤵᤔᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ. ᤕᤠᤶᤒᤥ᤺ᤵᤔᤠ. ᤂᤢ᤺ᤶᤔᤠ. ᤑᤥᤋᤩᤠᤒᤠ ᤋᤥ᤺ᤴᤍᤡ ᤐᤡᤔᤠ. ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤒᤥᤗᤠᤶ ᤗ᤺ᤴᤗᤥ॥
MAT 15:20 ᤁᤴ ᤐᤠ᤺ᤴᤜᤠ᤹ᤖᤧᤃ ᤔᤏᤠ᤺ᤴ ᤀᤠᤛᤢᤳᤌᤥ ᤆᤥᤃᤢᤖᤥ॥ ᤁᤖ ᤜᤢᤰ ᤘᤠᤔᤧᤴᤜᤵᤐᤣ ᤆ᤺ᤸᤗᤧ ᤂᤧᤴ ᤀᤠᤛᤢᤳᤌᤥ ᤔᤧᤒᤥ᤺ᤱᤅᤡᤴᤗᤥ॥”
MAT 15:21 ᤜᤧᤰᤁᤩᤠᤱ ᤕᤧᤛᤢ᤺ᤴ ᤃᤠᤗᤡᤗᤗᤠᤶ ᤀᤡᤛᤪᤠᤀᤡᤗ ᤗᤠ᤺ᤰᤁᤠᤳᤐᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣ॥
MAT 15:22 ᤂᤧᤵᤔᤥᤒᤠ ᤁᤏᤠᤏᤡ ᤛᤢᤘᤠᤱᤛ᤻ᤔᤠ ᤔᤧᤴᤇᤢᤔᤠ᤹ᤎᤡᤰ ᤂᤢᤏᤧ᤹ᤀᤥ ᤋᤩᤧᤀᤠᤱ ᤀᤰᤂᤣ ᤔᤧᤳᤋᤢᤖ ᤐᤣᤗᤡ ᤑᤠᤰᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤀᤠᤍᤠᤱᤒᤣ. ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄ ᤀᤠᤛ᤻ᤛᤠ᤺ ᤆᤢᤰᤔᤧᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢ᤹ᤖᤥ॥”
MAT 15:23 ᤁᤖ ᤕᤧᤛᤢᤖᤧ ᤂᤧᤴ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤖ ᤂᤢᤏᤧ᤹ᤏᤢ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤂᤧᤴ ᤐᤠᤱᤄᤧᤍᤣ᤺ᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤧᤳᤗᤧᤱ ᤐᤣᤗᤡ ᤑᤠᤰᤋᤢᤀᤠᤱ ᤀᤠᤏᤡᤃᤧ ᤏᤡᤱᤎᤧᤴᤍᤢᤖᤥ॥”
MAT 15:24 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ᤃ ᤀᤡᤛᤪᤠᤀᤡᤗᤛ᤻ᤔᤠ ᤁᤧᤔᤠᤒᤠ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠᤖᤥ॥”
MAT 15:25 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤢᤓᤠ᤹ ᤐᤡᤖᤠᤱᤅᤧ᤹ᤀᤥ॥”
MAT 15:26 ᤕᤧᤛᤢᤖᤧ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢ᤺ᤒᤠ ᤔᤧ᤺ᤴᤗᤥ॥”
MAT 15:27 ᤂᤧᤸᤗᤧ ᤔᤧᤳᤋᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤂᤢᤏᤡ᤹ ᤍᤠᤱᤒᤠᤸᤗᤧ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥”
MAT 15:28 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤛᤧᤰᤂᤠᤀᤣ ᤕᤶᤒᤠ ᤏᤛᤠ᤺ᤴ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤏᤧᤴᤏᤧᤖᤥ᥄ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤧᤴ ᤁᤧᤄᤥ᤺ᤛᤢ᤹ᤖᤥ॥” ᤜᤧᤰᤁᤩᤠᤱ ᤒᤠ ᤂᤧᤴ ᤕᤧᤶᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ ᤆᤢᤰᤔᤧᤴ ᤏᤢ᤺ᤖᤧᤖᤥ॥
MAT 15:29 ᤕᤧᤛᤢ᤺ᤴ ᤂᤧᤴ ᤋᤧᤴᤏᤥᤗᤠᤶ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤥ᤺ᤰᤂᤧᤖ ᤏᤢ᤺ᤰᤂᤧ ᤐᤣ. ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥ ᤌᤥ ᤐᤣᤀᤠᤱ ᤂᤧᤵᤔᤥ ᤕᤢᤱᤛᤡᤱᤗᤥ॥
MAT 15:30 ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤗᤠᤱᤛᤰᤐᤠᤜᤠ᤹. ᤔᤡᤰᤑ᤺ᤶᤒᤠᤜᤠ᤹. ᤗᤠᤱ ᤜᤢᤰ ᤑᤧᤳᤁᤧᤗᤠ᤹ᤒᤠᤜᤠ᤹. ᤂᤢᤏᤡ᤹ ᤐᤠ᤺ᤴ ᤔᤧᤴᤗ᤺ᤶᤔᤏᤠᤒᤠᤜᤠ᤹ ᤏᤢ ᤘᤣ᤹ ᤕᤖᤡᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤍᤠᤖᤢᤛᤡᤀᤠᤱ ᤁᤢᤗᤠᤱᤒᤢᤱᤔᤥ ᤔᤧᤕᤢᤰᤂᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤧᤛᤢᤖᤧ ᤏᤢᤛᤢᤛᤡᤖᤥ॥
MAT 15:31 ᤂᤧᤴ ᤔᤏᤠᤜᤠ᤹ᤖᤧ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ ᤔᤧᤒᤠᤖᤧᤒᤠ. ᤗᤠᤱ ᤜᤢᤰ ᤑᤧᤳᤁᤧᤗᤠ᤹ᤒᤠᤜᤠ᤹ ᤔᤧᤏᤢᤖᤧᤒᤠ. ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣᤃᤧᤒᤠ ᤏᤢ ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡ᤺ᤔᤠ ᤔᤧᤛᤢᤰᤋᤢᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤡᤛᤪᤠᤀᤡᤗᤛ᤻ᤔᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥
MAT 15:32 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤴ ᤔᤏᤠᤜᤠ᤹ ᤀᤠᤗᤢᤱᤔᤠ᤹ ᤔᤧᤍᤢᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤛᤢᤶᤕᤧᤴᤏᤠᤱᤎᤥ ᤀᤡᤱᤃᤠ᤹ᤏᤢᤀᤣ ᤔᤧᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤱᤃᤳᤋᤢᤴᤗᤥ॥ ᤂᤧᤱᤜᤠ᤹ ᤒᤠ ᤜᤧᤰᤁᤣ ᤛᤠᤰᤔᤧᤴᤈᤠ ᤐᤠᤱᤔᤠᤛᤡ ᤀᤠᤏᤡᤱᤘᤠ᤹ ᤜᤥ᤺ᤵᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤔᤧᤒᤣ᤺ᤰᤗ ᤔᤧᤒᤳᤋᤡᤸᤗᤧᤛᤠ ᤛᤠᤰᤗᤠᤶᤒᤳᤋᤢᤛᤡᤖᤥ॥”
MAT 15:33 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤰᤋᤱᤒᤠ ᤀᤣ᤺ᤰᤛᤠᤍᤧᤴᤏᤥ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤆᤠ᤺ᤵᤔᤠᤛᤡᤖᤧ ᤗᤠᤃᤡ ᤂᤖᤧ᤺ᤱᤅᤡᤴ ᤀᤠᤳᤋᤠᤴᤏᤢ ᤂᤥ᤺ᤔᤠ ᤛᤢᤰᤋᤧᤵᤐᤠᤒᤣ᥅”
MAT 15:34 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤰᤂᤧᤶᤔᤩᤠᤰ ᤂᤖᤧ᤺ᤱ ᤁᤧᤃᤳᤋᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤢᤛᤡ ᤂᤖᤧ᤺ᤱ ᤏᤢ ᤆᤢᤈᤢᤰᤛᤠ ᤁᤢᤓᤠ ᤅᤠᤖᤰ ᤁᤳᤋᤢᤶᤒᤧᤖᤥ॥”
MAT 15:35 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤂᤠᤶᤒᤠᤱᤅᤥ ᤕᤢᤱ ᤐᤠᤱᤄᤢᤛᤡ॥
MAT 15:36 ᤂᤧᤴ ᤏᤢᤛᤡ ᤂᤖᤧ᤺ᤱᤅᤡᤴ ᤏᤢ ᤅᤠ᤺ᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤂᤧ᤺ᤰᤂᤢ. ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖᤥ॥
MAT 15:37 ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤧᤴ ᤔᤧᤛᤢᤵᤛᤢᤸᤗᤧ ᤏᤢᤛᤡ ᤏᤀᤡᤔᤠ ᤕᤥᤖᤧᤖᤥ॥
MAT 15:38 ᤂᤧᤴ ᤁᤧᤈᤠᤒᤠᤜᤠ᤹ᤀᤥᤃ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥
MAT 15:39 ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡ. ᤜᤧᤰᤁᤩᤠᤱ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤔᤃᤠᤍᤠᤴ ᤐᤠᤱᤈᤢᤶ ᤂᤡᤖᤡᤒᤠ ᤋᤧᤴᤏᤥ ᤐᤣᤖᤥ॥
MAT 16:1 ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ ᤔᤧᤍᤩᤧᤀᤠᤱ “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤧᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹” ᤔᤧᤔᤧᤳᤋᤢᤖ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢ॥
MAT 16:2 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤕᤢ᤺ᤴᤇᤡᤰ ᤋᤠᤱᤛᤠᤰᤐᤧᤴ ᤜᤧ᤺ᤳ ᤗ᤹ᤀᤡᤸᤗᤧ ᤋᤠ᤺ᤴᤍᤡᤰ ᤏᤠᤶᤛᤧ᤺ᤰ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ॥
MAT 16:3 ᤜᤧᤰᤁᤩᤠᤱ ᤋᤠᤏᤠᤶ ᤋᤠᤱᤛᤠᤰᤐᤧᤴ ᤔᤢᤍ᤺ᤵᤐᤡᤸᤗᤧ ᤀᤠᤀᤡᤴ ᤘᤠᤜᤡᤳ ᤌᤠ᤺ᤛᤢ᤹. ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤹᤺ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ॥ ᤀᤰᤂᤣᤗ᤹ᤖᤡᤰ ᤋᤠᤱᤛᤠᤰᤐᤧᤴ ᤀᤥᤃᤧᤔᤧᤳᤋᤢᤶᤔᤠᤱ ᤘᤠᤕᤧᤶᤔᤡᤴ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤁᤧᤛᤧᤴᤍᤢᤶᤔᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤴ ᤕᤧᤶᤔᤥ ᤁᤧᤍᤠ᤺ᤒᤠ ᤔᤡᤰᤛᤣ᤺ᤴᤜᤠ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠᤒᤣ᥅
MAT 16:4 ᤁᤴ ᤕᤧᤶᤔᤥᤒᤠ ᤁᤢᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣ᤺ᤴ ᤌᤣᤀᤠᤱ ᤔᤧᤱᤄᤥ᤺ᤛᤢᤴᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤐᤰᤌᤛᤡᤀᤠᤱ ᤂᤧᤵᤔᤥᤗᤠᤶ ᤌᤠᤛᤡᤱᤗᤥ॥
MAT 16:5 ᤕᤠᤱᤛᤡ ᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤧᤖᤧᤸᤗᤧ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤕᤠᤱᤛᤡᤱᤔᤠ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤒᤠᤴ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥
MAT 16:6 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥”
MAT 16:7 ᤂᤧᤱᤜᤠ᤹ᤖᤧ ᤂᤖᤧ᤺ᤱᤅᤡᤴ ᤀᤠᤶᤓᤧᤳᤋᤢᤶᤔᤡᤴᤏᤠᤱ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧᤒᤠᤖᤥ ᤑᤠ᤹ᤀᤠᤱ ᤂᤢᤏᤡ᤹ ᤗᤢᤶᤔᤥ ᤐᤠ᤺ᤴ ᤔᤧᤎᤰᤋᤧᤖᤥ॥
MAT 16:8 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ. ᤂᤡᤏᤡ᤹ ᤗᤢᤶᤔᤥ ᤂᤖᤧ᤺ᤱ ᤜᤥ᤺ᤵ ᤑᤠ᤹ᤀᤠᤱ ᤌᤣᤀᤠᤱ ᤐᤠ᤺ᤴ ᤁᤧᤎᤰᤋᤡᤒᤠᤒᤣ᥅
MAT 16:9 ᤂᤡᤏᤡ᤹ ᤀᤠᤸᤗᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤔᤏᤠᤜᤠ᤹ᤖᤧ ᤅᤠᤛᤡ ᤂᤖᤧ᤺ᤱ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠᤴ ᤁᤧᤛᤢᤵᤛᤢᤶᤔᤡᤸᤗᤧ ᤀᤠᤰᤂᤧᤴ ᤏᤀᤡᤔᤠ ᤕᤥᤖᤧ. ᤂᤧᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅
MAT 16:10 ᤕᤠᤶᤔᤥ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤔᤏᤠᤜᤠ᤹ᤖᤧ ᤏᤢᤛᤡ ᤂᤖᤧ᤺ᤱ ᤔᤧᤈ ᤜᤧᤰᤁᤩᤠᤱ ᤀᤠᤰᤂᤧᤶᤔᤩᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤂᤡᤏᤡ᤹ ᤁᤧᤛᤢᤵᤛᤢᤶ. ᤂᤧᤴᤏᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅
MAT 16:11 ᤂᤖᤧ᤺ᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤔᤧ᤺ᤴ ᤑᤠ᤹ᤀᤠᤱ ᤀᤠᤸᤗᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤁᤖ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱᤏᤧ ᤜᤧᤰᤁᤣ ᤔᤧᤳᤏᤡᤱᤒᤠᤖᤥ॥”
MAT 16:12 ᤜᤧᤰᤁᤩᤠᤱᤗᤰ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤔᤧᤳᤋᤢᤛᤡᤒᤠ ᤔᤧ᤺ᤴ. ᤁᤖ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥
MAT 16:13 ᤕᤧᤛᤢ᤺ᤴ ᤛᤡᤈᤖᤡᤕᤠ ᤑᤡᤗᤡᤵᤐᤡ ᤌᤢᤶᤔᤥ ᤋᤩᤧ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤔᤏᤠᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤴ ᤜᤠ᤺ᤳ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤒᤣ᥅”
MAT 16:14 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ. ᤘᤣ᤹ᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ᤜᤠ᤹ᤖᤧᤃ ᤕᤷᤔᤡᤕᤠ ᤔᤧ᤺ᤴᤇᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤗᤳᤇᤠᤏᤧᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤖᤥ॥”
MAT 16:15 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅”
MAT 16:16 ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ. ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤏᤧᤖᤥ॥”
MAT 16:17 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤥᤏᤠᤖᤧ ᤁᤢᤛ᤻ᤛᤠ᤺ ᤛᤡᤔᤥᤏᤣ. ᤂᤧᤏᤧ᤹ᤃ ᤔᤢ᤹ᤀᤡᤛᤠᤒᤠᤏᤧᤖᤥ ᤌᤣᤀᤠᤱᤓᤧᤸᤗᤧ ᤁᤱᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤥᤛᤣ᤺ᤴᤍᤠᤱ ᤁᤧᤶᤈᤥᤃᤧᤒᤠ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤏᤧ᤹ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤧᤒᤠᤖᤥ॥
MAT 16:18 ᤛᤧᤰᤂᤠ ᤐᤠ᤺ᤴ ᤂᤧᤏᤧ᤹ ᤔᤧᤳᤏᤧ᤹. ᤂᤧᤏᤧ᤹ ᤐᤋᤪᤢᤛᤏᤧᤖᤥ (ᤐᤋᤪᤢᤛ ᤑᤠ᤹ᤀᤡᤴ ᤗᤢᤱᤗᤥ). ᤜᤧᤰᤁᤩᤠᤱ ᤁᤴ ᤐᤕᤶ ᤕᤶᤒᤠ ᤗᤢᤱᤛᤶᤍᤠᤱ ᤀᤡᤱᤃᤠ᤹ ᤀᤠᤛᤣᤛᤣᤜᤢᤵᤗᤰᤁᤡᤴ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤁᤴ ᤀᤠᤛᤣᤛᤣᤜᤢᤵᤗᤰᤁᤡᤴ ᤛᤡ᤺ᤔᤧᤸᤗᤧᤴ ᤔᤢᤰᤛᤠᤶᤔᤡᤸᤗᤧ ᤏᤠ᤺ᤶᤔᤠ ᤔᤧᤛᤢᤰᤋᤢᤴᤗᤥ॥
MAT 16:19 ᤂᤧᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤋᤡᤔᤡᤰᤜᤠ᤹ ᤐᤡᤏᤧᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤛᤠᤰᤋᤢᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥᤀᤠᤱ ᤛᤠᤰᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤜᤴᤍᤢᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤴᤗᤥ॥”
MAT 16:20 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤠᤱᤒᤠ ᤂᤪᤡᤛ᤻ᤋᤀᤠ ᤑᤠ᤹ᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤈᤧᤰᤋᤧᤶᤛᤡᤶᤔᤧᤴᤏᤧ᤹ᤀᤥ ᤗ᤹ᤖᤡᤰ ᤁᤧᤛᤠᤰᤐᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
MAT 16:21 ᤂᤧᤴ ᤕᤧᤶᤔᤠᤱᤎᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤐᤣ᤺ᤰᤔᤠᤀᤣ ᤐᤥ᤺ᤱ. ᤜᤧᤰᤁᤩᤠᤱ ᤂᤧᤵᤔᤥ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤥᤗᤠᤶ ᤕᤖᤡᤰ ᤐᤠ᤺ᤴᤏᤥ ᤋᤢᤰᤂᤣ ᤆᤠᤔᤠᤀᤣ ᤐᤥ᤺ᤱ ᤜᤧᤰᤁᤩᤠᤱ ᤂᤢᤏᤧ᤹ ᤛᤡ᤺ᤔᤠᤀᤣ ᤐᤥ᤺ᤱᤅᤠᤱ ᤕᤠᤶᤔᤥ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤰᤔᤠ ᤜᤣ᤺ᤰᤋᤢᤛᤡᤖᤥ॥
MAT 16:22 ᤁᤖ ᤐᤋᤪᤢᤛᤖᤧ ᤂᤢᤏᤧ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤑᤧ᤺ᤰᤋᤢ. “ᤀᤠᤍᤠᤱᤒᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤥ᤺ᤱᤔᤠ ᤔᤧᤒᤠᤱᤄᤢᤴᤗᤥ. ᤀᤰᤋᤱᤒᤠ ᤐᤠ᤺ᤱᤃ ᤂᤧᤏᤧ᤹ᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤒᤥ᤺ᤱᤏᤧᤸᤗᤥ॥”
MAT 16:23 ᤕᤧᤛᤢ᤺ᤴ ᤐᤋᤪᤢᤛ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢ. “ᤔᤠᤑᤧᤴᤛᤠᤶᤔᤣ. ᤂᤧᤏᤧ᤹ ᤀᤡᤱᤃᤠ᤹ᤗᤠᤶ ᤔᤠ᤺ᤱᤄᤠ ᤐᤣᤃᤧ᤹᥄ ᤂᤧᤏᤧ᤹ ᤁᤧᤄ᤺ᤀᤠᤖᤥ॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰᤗᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹ᤖᤥ॥”
MAT 16:24 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥
MAT 16:25 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥
MAT 16:26 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤀᤠᤱ ᤔᤧᤴᤏᤢᤵᤔᤏᤠᤒᤠ ᤁᤢᤜᤡᤱᤔᤴᤏᤡᤴ ᤔᤠᤛᤢᤸᤗᤧ ᤏᤢ᤺ᤒᤠ ᤐᤥ᤺ᤱᤒᤡ᥅ ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤔᤧᤴᤏᤢᤵᤔᤏᤠᤒᤠ ᤁᤢᤜᤡᤱᤔᤴᤏᤡᤴ ᤕᤠᤱᤏᤠ ᤂᤥ᤺ᤔᤠᤖᤧ ᤗᤠᤃᤡ ᤌᤣ᤺ᤸᤗᤧᤀᤠᤱ ᤗᤧᤰᤔᤠ ᤔᤧᤛᤢᤰᤋᤢᤴᤗᤥ॥
MAT 16:27 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤅᤥ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤀᤠᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤴ ᤗᤠ᤹ᤖᤢᤒᤠ ᤌᤢᤶᤄᤥ᤺ᤴ ᤐᤡᤖᤢᤱᤛᤡᤱᤗᤥ॥
MAT 16:28 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤀᤠᤜᤠᤱᤈᤢᤶᤔᤥ ᤜᤠᤱ ᤆᤥ᤺ᤰᤛᤧ ᤕᤢ᤺ᤀᤠᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤁᤵᤔᤥ ᤁᤧᤕᤧᤵᤐᤠᤜᤠ᤹ᤀᤥ ᤁᤢᤓᤠᤃ ᤔᤧᤴᤇᤡ᤺ᤏᤧᤴᤗᤥ॥”
MAT 17:1 ᤜᤧᤰᤁᤣ ᤔᤧᤳᤋᤢᤛᤡᤒᤠ ᤋᤢᤰᤛᤡ (᥌) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴ ᤂᤢᤏᤧ᤹ᤏᤢ ᤌᤥ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤛᤡ॥
MAT 17:2 ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤕᤧᤛᤢᤖᤧ ᤁᤢᤏᤠᤀᤡᤒᤣ᤺ᤰ ᤗᤧᤱᤛᤡᤱᤗ ᤐᤣ. ᤜᤧᤰᤁᤩᤠᤱ ᤁᤢᤏᤠᤖᤠ᤺ᤴ ᤏᤠᤶᤔᤡᤴ ᤁᤢᤀᤡᤛᤡ᤺ᤰ ᤗᤧᤰᤋᤧ ᤜᤧᤰᤁᤩᤠᤱ ᤁᤢᤍᤣ᤺ᤳᤋᤡᤴᤏᤠᤱ ᤔᤡᤰᤁᤡᤴ ᤆᤧᤔᤢᤖ ᤀᤥ᤺ᤳᤋᤧᤖᤥ॥
MAT 17:3 ᤜᤰᤆᤄᤳ ᤂᤧᤵᤔᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠ᤺ᤴᤏᤠᤱ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢ᤺ᤴᤏᤢ ᤋᤠ᤹ᤈᤧᤰᤂᤧᤳᤇᤡ॥
MAT 17:4 ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤍᤠᤱᤒᤣ. ᤀᤠᤏᤡ᤹ ᤁᤵᤔᤥᤀᤣ ᤘᤠ᤹ᤔᤠ ᤏᤢ᤺ᤒᤠ ᤐᤥ᤺ᤱᤗᤥ॥ ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤱ. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰ ᤌᤡᤰ ᤆᤥᤃᤢᤱᤗᤥ॥”
MAT 17:5 ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤀᤣ ᤑ᤺ ᤗ᤹ᤖᤡᤰ ᤁᤧᤀᤥ᤺ᤵᤐᤠ ᤂᤠᤵᤔᤡ᤺ᤳᤋᤡᤸᤗᤧ ᤆᤡᤍᤧᤵ ᤋᤧᤵᤋᤢᤛᤡᤀᤠᤱ ᤂᤠᤵᤔᤡ᤺ᤳᤋᤥᤗᤠᤶ ᤀᤰᤋᤱᤒᤠ ᤀᤡᤰᤗᤠ ᤔᤧᤄᤧᤵᤛᤢ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤖᤥ. ᤂᤢᤏᤧ᤹ᤏᤢ ᤀᤡᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”
MAT 17:6 ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤸᤗᤧ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤂᤠᤶᤔᤥ ᤛᤠᤶᤒᤥ᤺ᤴ ᤜᤒᤳ ᤔᤧᤓᤴᤇᤡᤱᤗᤥ॥
MAT 17:7 ᤁᤖ ᤕᤧᤛᤢ᤺ᤴ ᤂᤧᤵᤔᤥ ᤋᤩᤧᤀᤠᤱ ᤂᤧᤱᤜᤠ᤹ ᤛᤢᤛ᤻ᤛᤢᤛᤡᤖ ᤔᤧᤳᤋᤢᤛᤡ. “ᤐᤥᤃᤧᤶᤔᤧ᤹. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥”
MAT 17:8 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤸᤗᤧ ᤂᤧᤵᤔᤥ ᤕᤧᤛᤢ᤺ᤴᤏᤢ᤺ᤴᤗᤰ ᤘᤕᤧ ᤁᤖ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥
MAT 17:9 ᤂᤧᤱᤜᤠ᤹ ᤁᤥ᤺ᤰᤔᤠᤗᤠᤶ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤴᤜᤡᤱᤅᤣ ᤌᤠᤖᤡᤰ ᤁᤴ ᤁᤧᤏᤡ᤺ᤛᤢᤶᤒᤠ ᤐᤠ᤺ᤴᤜᤠ᤹ ᤀᤠᤳᤋᤡᤴᤏᤠᤱ ᤔᤧᤈᤧᤰᤋᤧᤶᤔᤡᤴᤏᤧ᤹ᤀᤥ॥”
MAT 17:10 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤔᤠᤏᤢ᤺ᤸᤗᤧ ᤋᤃᤡ ᤀᤣᤗᤡᤕᤠ᤺ᤱᤃ ᤕᤢ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅”
MAT 17:11 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣᤖᤥ. ᤀᤣᤗᤡᤕᤠ᤺ᤱᤃ ᤕᤢ᤹᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤍᤠ᤺ᤔᤠᤴ ᤁᤧᤖᤧᤰ ᤕᤠᤖᤡᤵ ᤆᤥᤃᤢ᤹ᤖᤥ॥
MAT 17:12 ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤣᤗᤡᤕᤠ᤺ᤴ ᤋᤩᤧ ᤆᤢᤖᤧᤀᤠᤱ ᤘᤠ᤹. ᤁᤖ ᤔᤏᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤔᤧᤴᤇᤠᤶᤛᤠ᤺ᤴᤏᤠᤱ ᤂᤢᤏᤡ᤹ ᤜᤢᤰᤁᤥ ᤌᤠᤀᤠᤱ ᤋᤢᤰᤂᤣ ᤆᤠᤖᤥ॥”
MAT 17:13 ᤜᤧᤰᤁᤩᤠᤱᤗᤰ ᤕᤧᤛᤢᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤒᤠ ᤑᤠ᤹ᤀᤠᤱ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ॥
MAT 17:14 ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤠᤶᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤔᤧᤃᤧᤖᤧᤸᤗᤧ ᤂᤧᤵᤔᤥ ᤔᤏᤠᤎᤡᤰ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ
MAT 17:15 ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤛ᤻ᤛᤠ᤺ᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤧᤴᤏᤡᤴ ᤌᤵᤔᤠᤔ᤺ᤔᤧᤸᤗᤧ ᤕᤠᤱᤄᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠᤖᤥ॥ ᤀᤧᤳᤗᤧᤱ ᤂᤧᤴ ᤆᤫᤠ᤺ᤳᤋᤥ ᤏᤢ ᤔᤡᤀᤥ ᤌᤠ᤺ᤖᤥ॥
MAT 17:16 ᤂᤧᤴ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤥ ᤔᤧᤘᤣ᤺ᤴᤍᤢᤖ ᤑᤠ᤹ᤀᤠᤱ ᤋᤠᤖᤢᤱ. ᤁᤖ ᤂᤧᤱᤜᤠ᤹ᤖᤧ ᤘᤣ᤺ᤶᤔᤠ ᤔᤧᤴᤇᤢᤰᤋᤢᤴᤗᤥ॥”
MAT 17:17 ᤕᤧᤛᤢᤖᤧ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤜᤥ᤺ᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤒᤠᤒᤣ᥅ ᤀᤠᤵᤑᤠᤸᤗᤧ ᤌᤠᤖᤡᤰ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”
MAT 17:18 ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢᤀᤠᤱ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤖᤥ॥ ᤒᤠ ᤂᤧᤴ ᤕᤧᤶᤔᤥᤀᤣ ᤂᤧᤴ ᤆᤢᤰᤐᤧᤴ ᤘᤣ᤺ᤳᤋᤧᤖᤥ॥
MAT 17:19 ᤕᤠᤱᤛᤡ ᤜᤢ᤹ᤛᤠᤶᤒᤠᤜᤠ᤹ ᤛᤫᤠ᤺ᤳᤋᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤀᤠᤏᤡᤃᤧ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤵᤔᤠ ᤗ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤒᤠᤒᤣ᥅”
MAT 17:20 ᤕᤧᤛᤢᤖᤧ ᤔᤧᤳᤋᤢᤛᤡ. “ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤛᤢ᤺ᤴᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤛᤠ᤺ᤴᤏᤡᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤎᤡᤰ ᤕᤠ᤺ᤳᤇᤠᤱ ᤁᤴ ᤁᤥ᤺ᤰᤔᤠᤴ ‘ᤂᤧᤵᤔᤥᤗᤠᤶ ᤂᤧᤳᤇᤡᤱᤅᤧ᤹’ ᤁᤧᤔᤧᤳᤋᤢᤶᤔᤡᤸᤗᤧ. ᤂᤧᤴ ᤂᤧᤳᤇᤡᤱ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶᤒᤠ ᤐᤥ᤺ᤱᤔᤠ ᤔᤧᤴᤇᤢᤰᤔᤏᤠ ᤌᤣᤀᤠᤱ ᤜᤥ᤺ᤵᤗᤥ॥”
MAT 17:21 ((ᤁᤖ ᤀᤰᤋᤱᤒᤠ ᤑᤧᤴᤛᤠᤶᤔᤡᤱᤃ ᤋᤢᤘᤠ ᤏᤢ ᤆᤠ᤺ᤏᤧᤳ ᤔᤧ᤺ᤴᤏᤣ ᤗ᤺ᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥))
MAT 17:22 ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤃᤠᤗᤡᤗ ᤌᤢᤶᤔᤥ ᤔᤧᤍᤩᤧᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤋᤢ᤹ᤀᤠᤱ ᤔᤏᤠᤜᤠ᤹ᤖᤥ ᤜᤢᤰ ᤔᤧᤛᤢᤵᤋᤢ᤹.
MAT 17:23 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢ᤹. ᤁᤖ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤱᤗᤥ॥” ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤥ᤺ᤶ ᤐᤢ᤹ᤖᤧᤖᤥ॥
MAT 17:24 ᤕᤠᤱᤛᤡ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤐᤷᤏᤜᤢᤶᤔᤥ ᤔᤧᤍᤩᤧ. ᤜᤧᤰᤁᤩᤠᤱ ᤔᤠᤱᤜᤡᤶ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤀᤠᤱ ᤐᤋᤪᤢᤛᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤁᤧᤛᤡᤰᤛᤠᤶᤒᤠᤸᤗᤧ ᤔᤠᤱᤜᤡᤶ ᤀᤣ᤺ᤱᤕᤠᤱ ᤔᤧᤜᤢᤅᤢᤴᤒᤡ᥅”
MAT 17:25 ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤌᤣᤀᤠᤱ ᤔᤧᤜᤢᤅᤢᤴᤒᤣ᥅ ᤜᤢᤅᤢ᤹ᤖᤥ॥” ᤜᤧᤰᤁᤩᤠᤱ ᤐᤋᤪᤢᤛᤧᤴ ᤜᤡᤶᤔᤥ ᤗᤠ᤺ᤛᤧᤏᤠᤔᤧ᤺ᤴᤏᤧ ᤕᤧᤛᤢᤖᤧ ᤛᤣ᤺ᤴᤍᤥᤛᤢ. “ᤛᤡᤔᤥᤏᤣ. ᤌᤣ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ᤖᤧ ᤀᤣ᤺ᤱᤕᤠᤱ ᤀᤠᤳᤋᤡᤸᤗᤥᤗᤠᤶ ᤔᤧᤓᤥ᤺ᤰᤂᤢᤒᤣ᥅ ᤂᤢᤏᤡ᤹ ᤀᤠᤒᤠᤅᤣ ᤔᤏᤠᤗᤠᤶᤒᤠ ᤔᤧᤓᤥ᤺ᤰᤂᤢᤒᤡ. ᤀᤡ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶ ᤔᤧᤓᤥ᤺ᤰᤂᤢᤒᤡ᥅”
MAT 17:26 ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶ ᤔᤧᤓᤥ᤺ᤰᤂᤢᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤢᤏᤡ᤹ ᤀᤠᤒᤠᤅᤣ ᤔᤏᤠᤜᤠ᤹ᤖᤧ ᤜᤢᤱᤔᤠ ᤔᤧᤒᤥ᤺ᤱᤏᤧᤸᤗᤥ॥
MAT 17:27 ᤜᤧᤰᤁᤣᤛᤠᤱ ᤀᤠᤏᤡ᤹ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤔᤧᤒᤥ᤺ᤰᤏᤧᤴᤗ ᤑᤠ᤹ᤀᤠᤱ ᤃᤠᤗᤡᤗ ᤘᤖᤰᤁᤥ ᤐᤣᤃᤧ᤹ᤀᤠᤱ ᤂᤣ᤺ᤱ ᤋᤣᤛᤧ᤹ᤀᤥ॥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤧᤶᤛᤢᤒᤠ ᤅᤠ᤺ᤸᤗᤧ ᤁᤢᤔᤢᤖᤠᤀᤥ ᤕᤠᤱᤀᤡᤳᤇᤡᤎᤡᤰ ᤁᤧᤄᤥ᤺ᤛᤢ᤹ᤖᤥ॥ ᤂᤧᤴ ᤋᤣ᤹ᤖᤧ᤹ᤀᤠᤱ ᤀᤠᤴᤇᤡ᤹ ᤔᤠᤱᤜᤡᤶ ᤀᤣ᤺ᤱᤕᤠᤱᤅᤡᤴ ᤜᤢᤅᤧ᤹ᤀᤥ॥”
MAT 18:1 ᤂᤧᤴ ᤕᤧᤶᤔᤥ ᤜᤢ᤹ᤛᤠᤶᤒᤠᤜᤠ᤹ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤴ ᤜᤠ᤺ᤵᤐᤣ᥅”
MAT 18:2 ᤕᤧᤛᤢᤖᤧ ᤂᤧᤵᤔᤥ ᤜᤡᤴᤈᤠ᤹ᤎᤡᤰ ᤀᤢ᤺ᤳᤋᤢᤀᤠᤱ ᤂᤢᤏᤡ᤹ ᤗᤢᤶᤔᤥ ᤕᤧᤵᤛᤢᤖ
MAT 18:3 ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤗᤧᤰᤂᤢᤶᤔᤠᤱ ᤁᤴ ᤜᤡᤴᤈᤠ᤹ᤀᤡᤴ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤁᤧᤶᤒᤥ᤺ᤰᤂᤡᤴᤏᤧ ᤑᤠ᤹ᤃᤪ ᤀᤠᤵᤑᤠᤸᤗᤧᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤁᤧᤴᤇᤢᤰᤋᤡᤴᤗᤥ.
MAT 18:4 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴ ᤀᤠᤵᤑᤣ᤺ᤰ ᤆᤢᤱᤈᤡᤃᤧᤴ ᤏ᤺ᤶᤛᤡᤱᤅᤠᤱ ᤁᤴ ᤜᤡᤴᤈᤠ᤹ᤀᤡᤴ ᤜᤧᤰᤁᤣ ᤐᤥ᤺ᤱ ᤂᤧᤴᤏᤣ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤕᤶᤒᤠ ᤐᤥ᤺ᤱᤗᤥ॥
MAT 18:5 ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ॥
MAT 18:6 ᤁᤖ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤆᤢᤰᤛᤠ ᤜᤡᤴᤈᤠ᤹ᤌᤡᤰ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢ᤹. ᤂᤧᤸᤗᤧ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤀᤡᤄᤣ᤺ᤱᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
MAT 18:7 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠ ᤐᤠ᤺ᤴᤜᤠ᤹ ᤁᤵᤔᤥ ᤕᤖᤡᤰ ᤘᤠ᤹ᤖᤥ॥ ᤀᤰᤋᤱᤒᤠ ᤐᤠ᤺ᤴᤜᤠ᤹ᤃ ᤋᤠ᤺ᤀᤣᤖᤥ. ᤁᤖ ᤘᤣ᤹ᤜᤠ᤹ ᤗᤠᤕᤥᤀᤥ ᤁᤧᤎᤠ᤺ᤒᤠ ᤔᤏᤠ᤺ᤱᤃ ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄
MAT 18:8 ᤂᤧᤏᤧ᤹ ᤁᤧᤗᤠᤱ ᤁᤧᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧ᤹ᤀᤠᤱ ᤗᤠᤵᤑᤢᤛᤧ᤹॥ ᤗᤠᤱ-ᤜᤢᤰ ᤏᤧᤵᤔᤠᤱᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧ ᤗᤠᤱᤎᤡᤰ ᤏᤢ ᤜᤢᤰᤌᤡᤰ ᤔᤧ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠᤀᤣ ᤏᤢ᤺ᤒᤠᤖᤥ॥
MAT 18:9 ᤂᤧᤏᤧ᤹ ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤕᤃᤧᤗ᤺ᤳᤋᤧ᤹ᤀᤠᤱ ᤗᤠᤵᤑᤢᤛᤧ᤹ᤀᤥ॥ ᤏᤧᤳᤇᤡ ᤔᤡᤰᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠ ᤂᤧᤔᤠᤕᤱᤛᤱᤒᤠ ᤔᤡᤀᤥ ᤐᤣ᤺ᤰᤔᤠᤏᤢ᤺ᤸᤗᤧ ᤔᤡᤰᤌᤡᤰᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠᤀᤣ ᤏᤢ᤺ᤒᤠᤖᤥ॥”
MAT 18:10 “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤁᤴ ᤆᤢᤰᤐᤠ ᤆᤢᤰᤐᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥ ᤀᤡᤱᤃᤠ᤹ ᤛᤧᤰᤂᤠ ᤐᤠ᤺ᤴ ᤔᤧᤳᤏᤡᤱ. ᤁᤱᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤂᤢᤏᤡ᤹ ᤔᤠᤱᤗᤠᤀᤡᤱᤒᤠᤜᤠ᤹ ᤛᤍᤠᤍᤡᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤍᤃᤡ ᤔᤧᤘᤠ᤹ᤖᤥ॥
MAT 18:11 ((ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤁᤧᤔᤠᤒᤠᤜᤠ᤹ ᤋᤠᤱᤛᤧ᤺ᤵᤛᤧ ᤋᤩᤠᤱᤒᤠᤖᤥ॥))”
MAT 18:12 “ᤀᤠᤸᤗ. ᤁᤡᤵᤌᤡᤰ (᥇᥆᥆) ᤔᤧᤸᤗᤢᤰ ᤁᤧᤃᤵᤐᤠᤸᤗᤧ ᤁᤢᤔᤧᤸᤗᤢᤰᤌᤡᤰ ᤔᤠ᤺ᤸᤗᤧ ᤌᤣ ᤆᤥᤃᤢ᤹᥅ ᤂᤧᤸᤗᤧ ᤂᤧᤴ ᤑᤠᤱ-ᤑᤠᤱ (᥏᥏) ᤔᤧᤸᤗᤢᤰᤜᤠ᤹ ᤆᤠᤖᤠᤶᤔᤠᤍᤧᤴᤏᤥ ᤗᤧᤖᤢᤎᤛᤡᤀᤠᤱ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤸᤗᤧ ᤁᤢᤃᤥ᤺ᤳᤇᤧ ᤔᤧᤒᤣ᤺ᤰᤁᤡᤴᤒᤡ᥅
MAT 18:13 ᤂᤧᤸᤗᤧ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤴ ᤂᤥ᤺ᤛᤢᤸᤗᤧ ᤛᤧᤰᤂᤠᤀᤣ ᤂᤧᤴ ᤔᤧᤶᤔᤠᤀᤣ ᤑᤠᤱ-ᤑᤠᤱ (᥏᥏) ᤔᤧᤸᤗᤢᤰᤜᤠ᤹ ᤁᤳᤋᤢᤛᤡᤒᤠᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤛ᤺ᤳᤗᤥ॥
MAT 18:14 ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤁᤴ ᤆᤢᤰᤐᤠᤜᤠ᤹ᤀᤥ ᤌᤡᤰᤁᤠᤱ ᤔᤧᤔᤠ᤺ᤏᤧᤴᤗ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤠ᤹ᤖᤥ॥
MAT 18:15 ᤏᤛᤠᤏᤡᤒᤠᤎᤡᤰᤗᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤏᤧ᤹ᤖᤰ ᤂᤧᤸᤗᤥ ᤐᤣᤃᤧ᤹ᤀᤠᤱ ᤁᤢᤗᤠᤕᤥ᤺ᤴ ᤀᤥᤛᤣ᤺ᤴᤎᤠᤰᤋᤧ᤹ᤀᤥ॥ ᤂᤧᤸᤗᤧ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤏᤧ ᤑᤠ᤹ᤃᤪ ᤂᤧᤴ ᤏᤛᤠᤏᤡᤒᤠᤸᤗᤧ ᤁᤢᤏᤡᤱᤘᤠ᤹ ᤁᤧᤍᤥ᤺ᤴᤍᤢᤖᤥ॥
MAT 18:16 ᤁᤖ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢᤴᤏᤧ ᤑᤠ᤹ᤃᤪ ᤂᤧᤏᤧ᤹ᤏᤢ ᤘᤣ᤹ ᤌᤡᤰᤐᤠ ᤀᤡᤃᤪ ᤏᤧᤵᤑᤢ ᤋᤣ᤹ᤖᤧᤛᤧ᤹ᤀᤠᤱ ᤕᤠᤶᤔᤥ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ. ‘ᤏᤧᤵᤑᤢ ᤀᤡᤃᤪ ᤛᤢᤶᤛᤡ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧᤴ ᤏᤡ᤺ᤴᤎᤥ ᤆᤥ᤺ᤰᤔᤠ ᤐᤥ᤺ᤱᤗᤥ॥’
MAT 18:17 ᤂᤧᤸᤗᤧ ᤀᤠᤸᤗᤛᤠᤱ ᤂᤧᤱᤜᤠ᤹ ᤂᤧᤶᤔᤠ ᤏᤠ᤹ᤖᤢᤛᤡᤏᤧ ᤑᤠ᤹ᤃᤪ ᤛᤣᤛᤣᤜᤢᤵᤗᤰᤁᤥ ᤁᤴ ᤐᤠ᤺ᤴᤏᤡᤴ ᤋᤠᤖᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤁᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤠᤱ ᤏᤠ᤹ᤖᤢᤏᤧ ᤑᤠ᤹ᤃᤪ ᤂᤧᤱᤃ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤋᤠᤵᤑᤧ᤺ᤶᤒᤠ ᤔᤏᤠ ᤁᤢᤀᤡᤛᤡ᤺ᤰ ᤀᤡ᤺ᤳᤋᤧᤶᤔᤧ᤹ᤀᤥ॥
MAT 18:18 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤛᤠᤰᤋᤢᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥᤀᤠᤱ ᤛᤠᤰᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤜᤴᤍᤢᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤜᤴᤗᤥ॥
MAT 18:19 ᤕᤠᤶᤔᤥ ᤀᤡᤱᤃᤠ᤹ ᤀᤰᤂᤣᤀᤠᤱ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤏᤧᤵᤑᤢ ᤔᤏᤠᤜᤠ᤹ ᤏᤡᤱᤘᤠ᤹ᤒᤥ ᤌᤡᤰᤜᤢᤵ ᤁᤧᤒᤥ᤺ᤱᤛᤡᤏᤧ ᤑᤠ᤹ᤃᤪ ᤌᤣ ᤁᤧᤏᤠ᤺ᤰᤛᤢᤛᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤴ ᤁᤧᤈᤥ᤺ᤰᤛᤡ ᤁᤧᤒᤡᤛᤡ᤹ᤖᤥ॥
MAT 18:20 ᤌᤣᤀᤠᤱᤓᤧᤸᤗᤧ ᤏᤧᤵᤑᤢ ᤀᤡᤃᤪ ᤛᤢᤶᤓᤢ ᤔᤏᤠᤜᤠ᤹ ᤀᤡᤱᤃᤠ᤹ ᤀᤠᤔᤡᤱᤅᤥ ᤔᤧᤈᤢᤶᤔᤡᤸᤗᤧ. ᤀᤡᤱᤃᤠ᤹ ᤂᤢᤏᤡ᤹ ᤗᤢᤶᤔᤥ ᤘᤠ᤹ᤀᤠᤖᤥ॥”
MAT 18:21 ᤜᤧᤰᤁᤩᤠᤱ ᤐᤋᤪᤢᤛᤧᤴ ᤕᤧᤛᤢᤖᤥ ᤑᤧᤖᤧᤀᤠᤱ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤍᤰᤗᤧᤱᤅᤥ ᤗᤠᤕᤥ ᤁᤧᤈᤥ᤺ᤰᤐᤠᤖ ᤁᤧᤏᤧᤒᤠᤴ ᤀᤠᤰᤂᤧᤴᤗᤧᤱ ᤗᤧᤵᤔᤡ ᤐᤡᤖᤢᤱᤒᤠᤒᤣ᥅ ᤏᤢᤛᤡ ᤗᤧᤱ ᤌᤠᤖᤡᤰᤐᤡ᥅”
MAT 18:22 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤢᤛᤡ (᥍) ᤗᤧᤱᤖᤰ ᤔᤧ᤺ᤴ. ᤁᤖ ᤏᤢᤛᤡᤀᤠᤱ ᤏᤢᤒᤥ᤺ᤱ ᤗᤧᤱ (᥍᥆) ᤌᤠᤖᤡᤰ ᤗᤧᤵᤔᤡ ᤁᤧᤒᤡᤖᤢᤖ ᤐᤥ᤺ᤱᤗᤥ॥
MAT 18:23 ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤗᤳᤇᤠ ᤜᤠᤱᤎᤡᤰᤗᤧ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤔᤧᤍᤣ᤹ᤖᤢᤒᤠ ᤛᤠᤶᤔᤩᤠᤱ-ᤕᤠᤱᤀᤡᤳᤇᤡ᤺ᤴ ᤑᤥ᤺ᤱᤔᤠ ᤕᤠ᤺ᤶᤒᤰ ᤆᤥᤃᤢᤒᤠᤴᤏᤢ ᤋᤱᤔᤠ ᤛᤢᤰᤋᤧᤳᤗᤥ॥
MAT 18:24 ᤂᤧᤴ ᤜᤠᤱᤅᤡᤸᤗᤧ ᤛᤡᤱᤏᤠ᤺ᤳᤋᤡᤴ ᤑᤥ᤺ᤱᤔᤠ ᤜᤣ᤺ᤰᤋᤢᤸᤗᤧ ᤌᤡᤒᤥ᤺ᤱ ᤜᤧᤴᤇᤡᤱ (᥇᥆.᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤛᤡᤱᤏᤠ᤺ᤳ ᤑᤥ᤺ᤱᤔᤠ ᤁᤧᤒᤥ᤺ᤱᤒᤠ ᤔᤏᤠ᤺ᤴ ᤂᤢᤏᤧ᤹ᤀᤥ ᤔᤧᤍᤠᤖᤢ॥
MAT 18:25 ᤂᤧᤸᤗᤧ ᤂᤧᤴ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ᤺ᤴ ᤜᤢᤱᤔᤠ ᤔᤧᤛᤢᤰᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤔᤣᤗᤡᤱᤃᤧᤴ ᤁᤢᤔᤣ᤺ᤳ. ᤁᤢᤛ᤻ᤛᤠ᤺ᤜᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤆᤡᤃ᤺ᤰᤘᤠᤜᤠ᤹ ᤛᤱᤄᤧᤶᤔᤧ᤹ᤀᤠᤱ ᤑᤥ᤺ᤱᤔᤠ ᤁᤧᤒᤥ᤺ᤱᤒᤠ ᤕᤠᤱᤅᤡᤴ ᤑᤥ᤺ᤰᤂᤧᤶᤔᤧ᤹ ᤗ᤹ᤖᤡᤰ ᤜᤠᤱᤅᤡᤸᤗᤧ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
MAT 18:26 ᤁᤖ ᤂᤧᤴ ᤛᤣᤘᤠᤖᤥᤒᤠᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤐᤣᤗᤡ ᤑᤠᤰᤋᤢ. ‘ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤠᤛᤡ ᤌ᤺ᤳᤋᤠᤱᤅᤧ᤹ᤀᤠᤱ ᤁᤢᤓᤠ ᤕᤧᤶ ᤌᤠᤖᤡᤰ ᤜᤠᤱᤄᤠᤱᤅᤧ᤹ᤀᤥ᥄ ᤀᤡᤱᤃᤠ᤹ ᤁᤧᤕᤠᤱᤅᤡᤴ ᤁᤧᤖᤧᤰ ᤜᤢᤅᤢᤱ ᤐᤡᤏᤧᤖᤥ॥’
MAT 18:27 ᤜᤠᤱᤅᤡᤸᤗᤧ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤁᤧᤖᤧᤰ ᤜᤢᤱᤔᤠ ᤁᤧᤒᤥ᤺ᤱᤒᤠ ᤕᤠᤱᤅᤡᤴ ᤗᤧᤵᤔᤡ ᤐᤡᤖᤢᤀᤠᤱ ᤐᤠᤱᤄᤢᤍᤣ᤺ᤛᤢᤖᤥ॥
MAT 18:28 ᤜᤧᤰᤁᤩᤠᤱ ᤂᤧᤴ ᤛᤣᤘᤠᤖᤥᤒᤠᤴ ᤗᤠ᤺ᤰᤁᤠᤳ ᤗ᤺ᤴᤍᤧᤸᤗᤧ ᤁᤡᤵᤌᤡᤰ ᤕᤢᤵᤐᤠ ᤕᤠᤱᤀᤡᤳᤇᤡ ᤁᤢᤛᤡᤱᤏᤠ᤺ᤳ ᤁᤧᤒᤵᤐᤠ ᤁᤢᤴᤈᤢᤶ ᤛᤣᤘᤠᤖᤥᤒᤠᤴ ᤋᤢᤔᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤁᤢᤴᤈᤢᤶ ᤛᤣᤘᤠᤖᤥᤒᤠᤴ ᤑᤳᤋᤢᤖ ᤁᤢᤛᤡᤳᤗᤠ᤺ᤴ ᤕ᤹ᤖᤢᤀᤠᤱ ᤀᤰᤂᤣ ᤔᤧᤳᤋᤢ. ‘ᤀᤡᤱᤃᤠ᤹ᤀᤥᤏᤢ ᤁᤧᤍᤣ᤹ᤖᤢᤒᤠ ᤛᤡᤱᤏᤠ᤺ᤳᤋᤡᤴ ᤀᤠᤸᤗᤥᤛᤠ ᤜᤢᤅᤧ᤹॥’
MAT 18:29 ᤂᤧᤸᤗᤧ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤐᤣᤗᤡ ᤑᤠᤰᤋᤢᤖ ᤔᤧᤳᤋᤢ. ‘ᤆᤢᤶᤔᤣ. ᤀᤡᤱᤃᤠ᤹ ᤏᤠᤛᤡ ᤌ᤺ᤳᤋᤠᤱᤅᤧ᤹ᤀᤠᤱ ᤁᤢᤓᤠ ᤕᤧᤶ ᤌᤠᤖᤡᤰ ᤜᤠᤱᤄᤠᤱᤅᤧ᤹ᤀᤥ᥄ ᤀᤡᤱᤃᤠ᤹ ᤁᤧᤕᤠᤱᤅᤡᤴ ᤁᤧᤖᤧᤰ ᤜᤢᤅᤢᤱᤗᤥ॥’
MAT 18:30 ᤁᤖ ᤂᤧᤸᤗᤧ ᤔᤧᤍᤧᤴᤍᤧᤴᤏᤠᤱ ᤂᤧᤴ ᤜᤢᤱᤔᤠ ᤁᤧᤒᤥ᤺ᤱᤒᤠ ᤕᤠᤱᤅᤡᤴ ᤔᤧᤴᤜᤢᤱᤅᤣ ᤌᤠᤖᤡᤰ ᤐᤢᤱᤗᤠᤜᤡᤶᤔᤥ ᤕᤠᤰᤗ ᤑᤠ᤹ᤀᤠᤱ ᤛᤠᤰᤔᤠ ᤐᤠᤱᤄᤢᤛᤡᤖᤥ॥
MAT 18:31 ᤘᤣ᤹ ᤛᤣᤘᤠᤖᤥᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤋᤢᤃᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤅᤡᤴ ᤔᤧᤈᤧᤰᤋᤢ॥
MAT 18:32 ᤜᤠᤱᤅᤡᤸᤗᤧᤀᤠᤱ ᤂᤧᤴ ᤋᤃᤡᤛ᤻ᤔᤠ ᤛᤣᤘᤠᤖᤥᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤂᤧᤏᤧ᤹ᤃ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤠᤏᤧᤖᤥ᥄ ᤂᤧᤏᤧ᤹ ᤐᤣᤗᤡ ᤁᤧᤓᤠᤰᤋᤠᤱᤒᤠᤸᤗᤧ ᤁᤧᤖᤧᤰ ᤁᤧᤛᤡᤱᤏᤠ᤺ᤳᤋᤡᤴ ᤗᤧᤵᤔᤡ ᤐᤡᤏᤧᤀᤠᤱ ᤘᤕᤠᤱᤗᤥ॥
MAT 18:33 ᤁᤖ ᤂᤧᤏᤧ᤹ ᤗᤢᤱᤔᤠ᤹ ᤋᤢᤰᤏᤧᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤏᤧ᤹ᤀᤠᤱ ᤁᤧᤴᤈᤢᤶ ᤛᤣᤘᤠᤖᤥᤒᤠᤴ ᤗᤢᤱᤔᤠ᤹ ᤋᤢᤰᤔᤠ ᤔᤧᤒᤥ᤺ᤱᤏᤧᤶᤒᤡ᥅’
MAT 18:34 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤢᤛᤡᤰᤁᤡᤴ ᤐᤥᤃᤧᤀᤠᤱ ᤂᤧᤴ ᤛᤣᤘᤠᤖᤥᤒᤧᤴ ᤛᤡᤱᤏᤠ᤺ᤳᤋᤡᤴ ᤔᤧᤴᤜᤢᤱᤅᤣ ᤌᤠᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤖ ᤑᤠ᤹ᤀᤠᤱ ᤐᤢᤱᤗᤠᤎᤠᤒᤠᤸᤗᤥ ᤜᤢᤰ ᤛᤢᤵᤋᤢᤖᤥ॥”
MAT 18:35 ᤕᤧᤛᤢᤖᤧ ᤁᤢᤏᤢᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤛᤡᤰᤗᤢᤱᤔᤥᤏᤢᤀᤣ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤀᤠᤶᤒᤠᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤁᤧᤔᤧᤳᤋᤡ᤹ᤖᤥ॥”
MAT 19:1 ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤕᤜᤢᤍᤡᤕᤠ ᤌᤢᤶᤔᤥ ᤐᤣᤖᤥ॥
MAT 19:2 ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤺ᤴᤍᤢᤛᤡᤖᤥ॥
MAT 19:3 ᤁᤢᤓᤠ ᤑᤖᤡᤛᤡᤜᤠ᤹ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤐᤠ᤺ᤴ ᤔᤧᤃᤧᤛᤢ. “ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤔᤏᤠ᤺ᤸᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤐᤡᤖᤢᤒᤡ ᤔᤧ᤺ᤶᤒᤡ᥅”
MAT 19:4 ᤕᤧᤛᤢᤖᤧ ᤔᤧᤳᤋᤢᤛᤡ. “ᤔᤧ᤺ᤶᤒᤧ᥄ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤆᤀᤡ᤺ᤳᤍᤠᤱᤒᤠᤸᤗᤧ ᤁᤢᤜᤣ᤺ᤰᤛᤡᤱᤔᤥᤀᤣ ‘ᤂᤧᤱᤜᤠ᤹ ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ ᤆᤥᤃᤢᤛᤡᤖᤥ॥’
MAT 19:5 ᤜᤧᤰᤁᤩᤠᤱ ‘ᤂᤧᤸᤗᤧ ᤆᤥᤃᤢᤸᤗᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤶᤒᤠ ᤏᤢ ᤁᤢᤶᤔᤠᤛᤡ ᤗᤧᤖᤢᤛᤡᤀᤠᤱ ᤁᤢᤔᤣ᤺ᤳᤋᤡᤴᤏᤢ ᤋᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥ᤺ᤱᤛᤡᤖᤥ॥’
MAT 19:6 ᤀᤠᤸᤗ ᤂᤧᤱᤜᤠ᤹ᤃ ᤏᤧᤵᤑᤢᤛᤡ ᤔᤧ᤺ᤴ. ᤁᤖ ᤗᤳᤇᤠ ᤌᤰᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤌᤰ ᤆᤥᤃᤢᤛᤡᤒᤠᤜᤠ᤹ ᤔᤧᤴᤇᤠᤶ ᤕᤠᤵᤔᤡᤖᤧ ᤛᤧᤶᤔᤠᤛᤡ ᤔᤧᤏᤢ᤹ᤏᤧᤴᤗᤥ॥”
MAT 19:7 ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤣᤀᤠᤱ ᤔᤥᤛᤠ᤺ᤸᤗᤧ ‘ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤀᤡᤱᤃᤠ᤹ ᤏᤠ᤹ᤏᤧᤒᤠᤖᤥ ᤑᤠ᤹ᤀᤠᤱ ᤛᤠᤵᤗᤠ ᤛᤠᤵᤋᤢᤀᤠᤱ ᤐᤠᤱᤔᤠᤍᤣ᤺ᤔᤠ ᤛᤢᤰᤋᤢ᤹’ ᤗ᤹ᤖᤡᤰ ᤛᤠᤵᤋᤢᤒᤠᤒᤣ᥅”
MAT 19:8 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤐᤠ᤺ᤴ ᤔᤧᤱᤄᤧᤶᤔᤏᤠᤒᤠ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤔᤥᤛᤠᤖᤧ ᤂᤡᤏᤡ᤹ ᤔᤣ᤺ᤳᤜᤠ᤹ ᤏᤠ᤹ᤔᤠ ᤁᤧᤛᤢᤰᤋᤢᤶᤛᤡᤶ ᤑᤠ᤹ᤀᤠᤱ ᤛᤠᤵᤋᤢᤒᤠᤖᤥ॥ ᤁᤖ ᤁᤢᤜᤣ᤺ᤰᤛᤡᤱᤔᤥᤃ ᤀᤰᤋᤱᤒᤠ ᤜᤥ᤺ᤵᤋᤧᤖᤥ॥
MAT 19:9 ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤳᤋᤡᤴ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤘᤣ᤹ᤜᤠ᤹ᤏᤢ ᤔᤧᤴᤗᤠᤶᤔᤣ ᤏᤠ᤹ᤖᤢᤀᤠᤱ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ. ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰᤁᤣ ᤆᤥᤃᤢ᤹ᤖᤥ॥” ((ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤂᤧᤴ ᤏᤠ᤹ᤖᤢᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹ ᤂᤧᤸᤗᤧᤀᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤣ ᤆᤥᤃᤢ᤹ᤖᤥ॥))
MAT 19:10 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤔᤣ᤺ᤳ ᤕᤧᤶᤒᤠ᤹ ᤗᤢᤶᤔᤥ ᤒᤠ ᤜᤧᤰᤁᤣᤖᤰ ᤐᤥ᤺ᤱᤏᤧ ᤑᤠ᤹ᤃᤪ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤠᤀᤣ ᤏᤢ᤺ᤒᤠᤖᤥ॥”
MAT 19:11 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤁᤧᤖᤧᤰᤗᤧᤃ ᤁᤴ ᤐᤠ᤺ᤴᤜᤠ᤹ ᤋᤠ᤺ᤰᤔᤠ ᤔᤧᤴᤇᤢᤰᤋᤢᤴ. ᤁᤖ ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤥ᤺ᤛᤢ᤹. ᤂᤧᤸᤗᤧᤖᤰ ᤋᤠ᤺ᤰᤔᤠ ᤛᤢᤰᤋᤢ᤹॥
MAT 19:12 ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤏᤠ ᤕᤖᤡᤰ ᤐᤴᤕᤧᤶᤜᤠ᤹ ᤘᤠ᤹ᤖᤥ॥ ᤁᤢᤓᤠᤃ ᤛᤠᤘᤠ᤺ᤴᤇᤡᤱᤔᤠᤏᤢᤎᤥᤀᤣ ᤛᤡᤱᤃᤠᤖᤢ ᤔᤧᤘᤠ᤹ᤖᤥ. ᤘᤣ᤹ᤜᤠ᤹ ᤔᤏᤠᤜᤠ᤹ᤖᤧ ᤛᤡᤱᤃᤠᤖᤢ ᤔᤧᤈᤥᤃᤢᤛᤡ. ᤜᤧᤰᤁᤩᤠᤱ ᤁᤢᤓᤠᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ॥ ᤀᤠᤳᤋᤡᤸᤗᤧ ᤋᤠ᤺ᤰᤔᤠ ᤛᤢᤰᤋᤢ᤹ ᤜᤠᤖᤠ᤹ ᤂᤧᤸᤗᤧᤀᤣ ᤋᤠ᤺ᤰᤋᤢᤖ॥”
MAT 19:13 ᤌᤡᤰ ᤕᤧᤴ ᤕᤧᤛᤢᤖᤧ ᤜᤢᤰ ᤏᤧᤛ᤻ᤛᤢᤀᤠᤱ ᤋᤢᤘᤠ ᤆᤥᤃᤢ ᤐᤡᤖᤢᤛᤡᤖ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤍᤠᤖᤢᤛᤡ॥ ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤜᤡᤴᤈᤠ᤹ᤒᤡᤳᤇᤠ ᤁᤧᤍᤠ᤺ᤵᤐᤠᤜᤠ᤹ ᤔᤧᤓᤧ᤺ᤰᤋᤢᤛᤡ॥
MAT 19:14 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤑᤠ᤺ᤰᤋᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤁᤴ ᤜᤡᤴᤈᤠ᤹ᤒᤡᤳᤇᤠ ᤜᤧᤰᤋᤱᤒᤠᤜᤠ᤹ᤖᤧᤴᤏᤣᤖᤥ॥”
MAT 19:15 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤖ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤀᤠᤱ ᤂᤧᤵᤔᤥᤗᤠᤶ ᤌᤠᤛᤡᤱᤗᤥ॥
MAT 19:16 ᤀᤠᤸᤗ ᤔᤏᤠᤎᤡᤰ ᤕᤧᤛᤢᤖᤥ ᤑᤧᤖᤧᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤠᤰᤋᤱᤒᤠ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤱᤒᤣ᥅”
MAT 19:17 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤛᤣ᤺ᤴᤃᤧᤍᤥᤀᤠᤒᤠᤒᤣ᥅ ᤁᤧᤏᤢ᤹ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤘᤠ᤹ᤖᤥ॥ ᤁᤖ ᤂᤧᤏᤧ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤜᤠ᤹ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ॥”
MAT 19:18 ᤂᤧᤴ ᤔᤏᤠ᤺ᤸᤗᤧ ᤛᤣ᤺ᤴᤍᤥᤛᤢ. “ᤀᤠᤳᤋᤡᤴ ᤛᤠᤶᤕᤥᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤒᤠᤒᤣ᥅” ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤔᤏᤠ ᤛᤧᤵᤔᤠ ᤔᤧᤏᤢ᤹ᤏᤧᤴ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤂᤢ᤺ᤶᤔᤠ ᤔᤧᤏᤢ᤹ᤏᤧᤴ. ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ.
MAT 19:19 ᤁᤧᤶᤒᤠ ᤁᤧᤶᤔᤠᤛᤡ ᤀᤡᤱᤎᤠ᤺ᤱ ᤐᤡᤖᤧᤛᤧ᤹॥ ᤜᤧᤰᤁᤩᤠᤱ ᤀᤠᤵᤑᤣ᤺ᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥”
MAT 19:20 ᤂᤧᤴ ᤌᤠᤱᤒᤧᤴᤏᤡᤸᤗᤧ ᤔᤧᤳᤋᤢ. “ᤁᤴᤜᤠ᤹ ᤁᤧᤖᤧᤰ ᤀᤡ᤺ᤳᤋᤢᤱ-ᤏᤠ᤺ᤳᤋᤢᤱᤅᤠᤱᤅᤣ ᤘᤠ᤹ᤀᤠᤖᤥ॥ ᤀᤠᤸᤗᤛᤠᤱ ᤕᤠᤶᤔᤥ ᤌᤣ ᤆᤥ᤺ᤰᤔᤠᤀᤥ ᤛᤢ᤺ᤴᤍᤠᤱᤒᤣ᥅”
MAT 19:21 ᤕᤧᤛᤢᤖᤧ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤁᤢᤗᤡᤱᤎᤥ ᤁᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤐᤣᤃᤧ᤹ᤀᤠᤱ ᤁᤧᤃᤳᤋᤢᤒᤠᤴ ᤁᤧᤖᤧᤰ ᤛᤱᤄᤧᤍᤣ᤺ᤛᤧ᤹ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤁᤧᤄᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤑᤧᤖᤧ᤹ᤀᤠᤱ ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”
MAT 19:22 ᤂᤧᤴ ᤌᤠᤱᤒᤧᤴᤏᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤏᤡᤱᤘᤠ᤹ ᤋᤢᤃᤧᤖ ᤂᤧᤵᤔᤥᤗᤠᤶ ᤐᤣᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤢᤖᤥ॥
MAT 19:23 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤠ᤹ᤖᤡᤰ ᤛᤠᤰᤗᤥ॥
MAT 19:24 ᤕᤠᤶᤔᤥᤀᤠᤱ ᤂᤡᤏᤡ᤹ ᤔᤧᤳᤏᤡᤱ. ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤏᤢ᤺ᤸᤗᤧ ᤀᤢᤔᤣ᤺ᤴ ᤛᤶᤔᤣ᤺ᤳᤋᤡᤸᤗᤧ ᤁᤢᤜᤱᤅᤥ ᤗᤠ᤺ᤵᤔᤠ ᤀᤢᤛᤢᤖᤢ ᤐᤥ᤺ᤱᤗᤥ॥”
MAT 19:25 ᤜᤧᤰᤁᤩᤠᤱ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤜᤠ᤺ᤳ ᤋᤠᤱᤛᤧ᤺ᤵᤔᤠ ᤛᤢᤰᤐᤠᤒᤣ᥅”
MAT 19:26 ᤕᤧᤛᤢᤖᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡ ᤁᤴ ᤐᤥ᤺ᤱᤔᤠ ᤔᤧᤴᤇᤢᤰᤔᤏᤠᤒᤠ ᤆᤥ᤺ᤰᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ॥”
MAT 19:27 ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤍᤠᤱᤒᤣ. ᤀᤠᤏᤡᤃᤧᤃ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤶᤒᤧ. ᤜᤧᤰᤁᤩᤠᤱ ᤂᤧᤏᤧ᤹ ᤋᤡᤶᤔᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥ ᤀᤠᤏᤡᤃᤧᤃ ᤌᤣ ᤂᤥ᤺ᤛᤢᤶᤒᤧᤒᤠᤒᤣ᥅”
MAT 19:28 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤁᤧᤍᤠ᤺ᤒᤠ ᤁᤢᤛᤱ ᤜᤠᤱᤈᤢᤶᤔᤥ ᤔᤡᤔᤡᤍᤡᤱᤃᤧᤴ ᤜᤠᤱᤕᤢᤰᤏᤠᤀᤥ ᤕᤢᤱᤅᤠᤖᤥ॥ ᤂᤧᤴ ᤕᤧᤶᤔᤥ ᤂᤡᤏᤡ᤹ ᤀᤡᤱᤃᤠ᤹ ᤕᤠᤵᤔᤡ ᤁᤧᤍᤡᤶᤒᤠᤜᤠ᤹ᤀᤠᤱ ᤌᤡᤰ-ᤏᤧᤳ (᥇᥈) ᤜᤠᤱᤕᤢᤰᤏᤠᤀᤥ ᤁᤧᤕᤢᤅᤡᤀᤠᤱ ᤀᤡᤛᤪᤠᤀᤡᤗᤒᤠ ᤌᤡᤰ-ᤏᤧᤳ ᤛᤢᤘᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥᤃᤡ᤹ᤖᤥ॥
MAT 19:29 ᤀᤠᤳᤋᤡᤸᤗᤧ ᤀᤠᤗᤠᤃᤡ ᤜᤡᤶᤎᤠ᤺ᤱᤜᤠ᤹. ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤏᤧ᤹ᤏᤢᤛᤠ᤹ᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤐᤠ᤺ ᤔᤠᤜᤠ᤹. ᤀᤡᤃᤪ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤗᤧᤖᤢᤛᤡᤀᤠᤱ ᤘᤠ᤹. ᤂᤧᤸᤗᤧᤃ ᤁᤡᤵᤌᤡᤰ (᥇᥆᥆) ᤗᤧᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥
MAT 19:30 ᤁᤖ ᤀᤠᤸᤗᤥ ᤋᤃᤡ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤀᤣᤃᤠᤱ ᤔᤧᤒᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤣᤃᤠᤱ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤋᤃᤠᤱ ᤔᤧᤒᤥ᤺ᤱᤗᤥ॥”
MAT 20:1 “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤗᤳᤇᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤍᤠᤱᤒᤠᤴ ᤌᤡᤰ ᤋᤠᤏᤠᤶᤛᤠ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤕᤠ᤺ᤗᤡᤰ ᤛᤠᤱᤛᤧ᤹ ᤐᤣᤖᤥ॥
MAT 20:2 ᤂᤧᤸᤗᤧ ᤔᤏᤠᤜᤠ᤹ ᤌᤡᤰᤕᤧᤴᤒᤠ ᤏᤠᤶᤕᤠᤰᤁᤡᤱᤃ ᤕᤢᤵᤐᤠᤕᤠᤱᤎᤡᤰ ᤐᤡᤔᤠ ᤐᤠ᤺ᤴ ᤋᤱᤄᤢᤀᤠᤱ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰ ᤐᤠᤱᤄᤢᤛᤡᤖᤥ॥
MAT 20:3 ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡ (᥏) ᤔᤢᤰᤋᤧᤖ ᤐᤳᤇᤧᤸᤗᤧ ᤂᤢᤏᤧ᤹ ᤐᤠᤱᤈᤢᤶᤔᤥ ᤐᤣ᤺ᤸᤗᤧ ᤁᤢᤓᤠ ᤔᤏᤠᤜᤠ᤹ ᤐᤠᤱᤈᤢᤶᤜᤠ᤺ᤳᤋᤡ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤔᤧᤘᤕᤧᤒᤠ ᤏᤡ᤺ᤛᤢᤛᤡᤀᤠᤱ
MAT 20:4 ᤔᤧᤳᤋᤢᤛᤡ. ‘ᤂᤡᤏᤡ᤹ᤀᤠᤱ ᤐᤣᤃᤧᤶᤔᤧ᤹ᤀᤠᤱ ᤀᤠᤈᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤂᤥ᤺ᤔᤠ ᤁᤧᤕᤠ᤹ᤖᤡᤒᤠ ᤕᤠᤱᤅᤡᤴ ᤐᤡᤏᤡᤱᤗᤥ॥’
MAT 20:5 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤕᤠ᤺ᤶᤒᤰ ᤆᤥ᤺ᤰᤛᤧ ᤔᤧᤒᤣ॥ ᤂᤢᤏᤧ᤹ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤜᤧᤰᤁᤩᤠᤱ ᤕᤠᤶᤔᤥ ᤁᤢᤔᤢᤰ ᤛᤢᤶᤛᤡ (᥉) ᤔᤢᤰᤋᤧᤖ ᤐᤳᤇᤧᤸᤗᤧ ᤗᤠ᤺ᤰᤁᤠᤳ ᤐᤣ᤺ᤸᤗᤧ ᤔᤏᤠᤜᤠ᤹ ᤋᤢᤔᤢᤛᤡᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤳᤋᤢᤛᤡ॥
MAT 20:6 ᤕᤠᤱᤛᤡ ᤁᤢᤔᤢᤰ ᤅᤠᤛᤡ (᥋) ᤔᤢᤰᤋᤧᤖ ᤐᤳᤇᤧᤸᤗᤧ ᤂᤢᤏᤧ᤹ ᤐᤠᤱᤈᤢᤶᤔᤥ ᤐᤣ᤺ᤸᤗᤧ ᤔᤏᤠᤜᤠ᤹ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤔᤧᤘᤕᤧ ᤔᤧᤃᤳᤋᤧᤒᤠ ᤕᤠᤶᤔᤥ ᤏᤡ᤺ᤛᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. ‘ᤀᤠᤀᤡᤴ ᤌᤣᤀᤠᤱ ᤂᤡᤏᤡ᤹ ᤏᤠᤶᤎᤠᤎᤠ ᤕᤠ᤺ᤶᤒᤰ ᤁᤧᤴᤈᤥᤃᤡᤴᤒᤠᤒᤣ᥅’
MAT 20:7 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. ‘ᤌᤣ᤺ᤴ ᤆᤥ᤺ᤰᤔᤠᤒᤣ. ᤀᤠᤏᤡᤃᤧ ᤀᤠᤳᤋᤡᤸᤗᤧᤀᤠᤱ ᤕᤠ᤺ᤗᤡᤰ ᤕᤠᤵᤔᤡ ᤔᤧᤛᤠᤅᤡᤃᤧᤴᤗᤥ॥’ ᤂᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. ‘ᤜᤧᤰᤁᤣᤏᤧ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤐᤣᤃᤧᤶᤔᤧ᤹ᤀᤠᤱ ᤀᤠᤈᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥’
MAT 20:8 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤸᤗᤧ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤍᤠᤱᤒᤠᤸᤗᤧ ᤂᤧᤴ ᤕᤠ᤺ᤗᤡᤰ ᤁᤧᤓᤶᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤁᤧᤖᤧᤰ ᤕᤠ᤺ᤗᤡᤰᤜᤠ᤹ ᤀᤢ᤺ᤳᤋᤧᤛᤧ᤹ᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠᤜᤠ᤹ᤀᤥᤗᤠᤶ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤏᤠᤶᤕᤠᤰᤁᤡᤴ ᤜᤠ᤺ᤳᤋᤧᤛᤧ᤹ᤀᤥ॥’
MAT 20:9 ᤜᤧᤰᤁᤩᤠᤱ ᤂᤧᤴ ᤕᤠ᤺ᤗᤡᤰ ᤁᤧᤓᤶᤒᤠᤸᤗᤧ ᤁᤢᤔᤢᤰ ᤅᤠᤛᤡ ᤔᤢᤰᤋᤧᤸᤗᤧ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠ ᤕᤠ᤺ᤗᤡᤰᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤕᤢᤵᤐᤠᤕᤠᤱ ᤌᤡᤰ ᤌᤡᤰ ᤁᤧᤖᤧᤰ ᤏᤠᤶᤕᤠᤰ ᤐᤡᤖᤢᤛᤡᤖᤥ॥
MAT 20:10 ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤕᤠ᤺ᤶᤒᤰᤁᤥ ᤁᤧᤓᤴᤇᤡᤱᤒᤠᤜᤠ᤹ᤖᤧᤃ ᤂᤧᤴ ᤔᤧᤏᤡ᤺ᤛᤢᤀᤠᤱ ᤀᤠᤏᤡᤃᤧ ᤕᤖᤡᤰ ᤂᤥ᤺ᤛᤢᤶᤒᤠᤒᤡᤗᤠ ᤗ᤹ᤖᤡᤰ ᤔᤧᤀᤡ᤺ᤳᤋᤢ. ᤁᤖ ᤂᤧᤱᤜᤠ᤹ᤖᤧᤀᤠᤱ ᤕᤢᤵᤐᤠᤕᤠᤱ ᤌᤡᤰᤗᤰ ᤔᤧᤄᤥ᤺ᤛᤢᤖᤥ॥
MAT 20:11 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤶᤕᤠᤰ ᤔᤧᤍᤠ᤺ᤰᤋᤢᤀᤠᤱ ᤆᤧᤸᤗᤧᤰᤛᤣ᤹ ᤍᤠᤱᤒᤠᤴᤏᤢ ᤗᤢᤱᤜᤠ᤺ᤵᤔᤠ ᤔᤧᤜᤣ᤺ᤰᤋᤧᤖᤥ॥
MAT 20:12 ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. ‘ᤁᤴ ᤀᤣᤃᤠᤱ ᤁᤧᤛᤠᤅᤢᤛᤡᤒᤠᤜᤠ᤹ᤖᤧᤃ ᤁᤢᤔᤢᤰ ᤌᤡᤰᤗᤰ ᤕᤠ᤺ᤶᤒᤰ ᤔᤧᤈᤥᤃᤢ॥ ᤀᤠᤏᤡᤃᤧ ᤗᤧᤴᤍᤡᤰ ᤂᤠᤖᤠᤰ ᤏᤠᤶᤛᤧ᤺ᤰᤔᤠᤀᤥ ᤕᤠ᤺ᤶᤒᤰ ᤆᤥᤃᤢᤶᤒᤧᤛᤠᤱ ᤂᤧᤱᤜᤠ᤹ᤏᤢ ᤁᤢᤍᤱᤒᤠ ᤕᤠᤵᤔᤡ ᤁᤧᤈᤥᤃᤧᤖᤥ॥’
MAT 20:13 ᤁᤖ ᤂᤧᤴ ᤔᤏᤠ᤺ᤸᤗᤧ ᤂᤧᤱᤜᤠ᤹ᤀᤥ ᤌᤡᤰᤁᤡᤴ ᤏᤥᤃᤵ ᤐᤡᤖᤢ. ‘ᤗᤠᤈᤣ. ᤀᤡᤱᤃᤠ᤹ ᤂᤧᤏᤧ᤹ ᤏᤡᤱᤄᤢᤶ ᤔᤧᤶᤔᤧᤳᤋᤣ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤕᤢᤵᤐᤠᤕᤠᤱᤎᤡᤰᤁᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤍᤧᤴᤍᤧᤒᤠᤒᤡ ᤔᤧ᤺ᤶᤒᤡ᥅
MAT 20:14 ᤁᤧᤏᤠᤶᤕᤠᤰᤁᤡᤴ ᤋᤠ᤺ᤰᤋᤧ᤹ᤀᤠᤱ ᤐᤣᤃᤧ᤹ᤀᤥ॥ ᤀᤡᤱᤃᤠ᤹ᤃ ᤀᤣᤃᤠᤱ ᤛᤠᤱᤔᤏᤠᤒᤠᤴᤏᤠᤱ ᤂᤧᤏᤧ᤹ ᤐᤡᤏᤧᤒᤠ ᤕᤠᤖᤡᤰᤁᤣ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
MAT 20:15 ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤜᤧᤰᤁᤣ ᤔᤏᤠᤜᤠ᤹ ᤀᤠᤕᤠᤱᤅᤡᤴ ᤐᤡᤔᤠᤛᤡ ᤕᤢᤰ ᤔᤧᤃᤳᤋᤠᤴᤒᤡ᥅ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤕᤶᤒᤠ ᤆᤥᤃᤢᤱᤅᤡᤸᤗᤧ ᤌᤣᤀᤠᤱ ᤁᤧᤛᤡᤰ ᤐᤥ᤺ᤰᤐᤠᤒᤣ᥅’
MAT 20:16 ᤀᤰᤂᤣᤗ᤹ᤖᤡᤰ ᤀᤠᤸᤗᤥ ᤋᤃᤡ ᤁᤧᤘᤠ᤹ᤒᤠᤜᤠ᤹ ᤀᤣᤃᤠᤱ ᤔᤧᤒᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤣᤃᤠᤱ ᤁᤧᤘᤠ᤹ᤒᤠᤜᤠ᤹ ᤋᤃᤠᤱ ᤔᤧᤒᤥ᤺ᤱᤗᤥ॥”
MAT 20:17 ᤀᤠᤸᤗ ᤕᤧᤛᤢ᤺ᤴ ᤕᤖᤢᤛᤗᤧᤔ ᤌᤥ ᤐᤣᤖ ᤐᤳᤇᤧᤸᤗᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ.
MAT 20:18 “ᤀᤥᤔᤧᤳᤋᤧᤶᤔᤧ᤹. ᤀᤠᤏᤡ᤹ ᤕᤖᤢᤛᤗᤧᤔ ᤌᤥ ᤀᤠᤒᤣ᤺ᤰᤗ ᤀᤠᤒᤳᤗᤥ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤋᤢᤀᤠᤱ ᤜᤢᤰᤔᤧᤛᤢᤵᤋᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤀᤠᤱ
MAT 20:19 ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ. ᤋᤧ᤺ᤶᤓᤢᤰ ᤔᤧᤕᤠᤰᤋᤢᤖ. ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢᤖ ᤑᤠ᤹ᤀᤠᤱ ᤜᤢᤰᤔᤧᤛᤢᤵᤋᤢ᤹ᤖᤥ॥ ᤜᤧᤰᤁᤩᤠᤱ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤗᤥ॥”
MAT 20:20 ᤜᤧᤰᤁᤩᤠᤱ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤂᤢᤴᤇᤡ᤹ ᤔᤠ᤺ᤴ ᤁᤢᤛ᤻ᤛᤠ᤺ᤜᤠ᤹ᤏᤢ ᤋᤩᤧᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤕᤧᤛᤢ᤺ᤴ ᤐᤣᤗᤡ ᤑᤠᤰᤋᤢᤖᤥ॥
MAT 20:21 ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤌᤧᤔᤠ ᤆᤥᤃᤢᤱ ᤐᤡᤏᤧᤖ ᤑᤠ᤹ᤀᤠᤱ ᤐᤣᤗᤡ ᤁᤧᤓᤠᤰᤁᤠᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤁᤧᤜᤠᤱᤈᤢᤶᤔᤥ ᤁᤴ ᤏᤧᤵᤑᤢ ᤀᤠᤛ᤻ᤛᤠ᤺ᤜᤠ᤹ ᤁᤧᤈᤢᤵᤛᤠᤱ ᤏᤢ ᤁᤧᤓᤧᤴᤇᤠᤱ ᤗᤧᤵᤔᤠᤱ ᤕᤢᤱᤔᤠ ᤐᤠᤱᤄᤧᤛᤧ᤹ᤀᤥ॥”
MAT 20:22 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤌᤣ᤺ᤴ ᤁᤧᤏᤠ᤺ᤰᤛᤢᤖ ᤁᤧᤒᤳᤇᤡ᤹ ᤂᤧᤴ ᤁᤢᤛᤡᤱ ᤁᤧᤴᤏᤡ᤺ᤳᤇᤢᤴ॥ ᤀᤡᤱᤃᤠ᤹ ᤌᤢᤅᤢᤱᤒᤠ ᤋᤢᤰᤂᤣᤘᤠ ᤂᤥᤷᤕᤠᤀᤥ ᤌᤢᤱᤔᤠ ᤁᤧᤛᤢᤰᤛᤢᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤛᤢᤰᤛᤢᤃᤧ᤹॥”
MAT 20:23 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤛᤧᤰᤂᤠᤀᤣ ᤀᤡᤱᤃᤠ᤹ ᤌᤢᤅᤢᤱᤒᤠ ᤂᤥᤷᤕᤠᤀᤥ ᤁᤧᤎᤢᤱᤛᤢ᤹. ᤁᤖᤛᤠᤱ ᤀᤠᤓᤧᤴᤇᤠᤱ ᤏᤢ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤔᤠ ᤁᤧᤛᤢᤰᤛᤡ᤹ ᤐᤠ᤺ᤵᤔᤠ ᤕᤢᤰ ᤔᤧᤃᤳᤋᤠᤴᤗᤥ॥ ᤂᤧᤴ ᤋᤧᤴᤜᤠ᤹ᤃ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤠᤳᤋᤡᤴᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹. ᤒᤠ ᤂᤧᤱᤜᤠ᤹ᤖᤰ ᤕᤢᤱᤔᤠ ᤔᤧᤄᤥ᤺ᤖᤥ॥”
MAT 20:24 ᤜᤧᤰᤁᤩᤠᤱ ᤘᤣ᤹ ᤌᤡᤒᤥ᤺ᤱ (᥇᥆) ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤕᤠᤁᤢᤒ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴᤏᤢ ᤂᤢᤴᤇᤡ᤹ ᤛᤡᤰ ᤐᤥᤃᤧᤖᤥ॥
MAT 20:25 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧᤃ ᤔᤏᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤑᤥ᤺ᤛᤠᤱᤒᤠᤜᤠ᤹ ᤛᤠᤰᤁᤧᤗᤧᤰᤁᤠᤱ ᤕᤢᤰ ᤔᤧᤈᤥᤃᤢᤛᤡᤒᤠᤃ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
MAT 20:26 ᤁᤖ ᤂᤡᤏᤡ᤹ ᤗᤢᤶᤔᤥᤃ ᤜᤧᤰᤁᤣ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤡᤏᤡ᤹ ᤗᤢᤶᤔᤥᤃ ᤀᤠᤳᤋᤡᤸᤗᤧ ᤗᤠᤶᤗᤥ᤺ᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤜᤠᤖᤠ᤹ ᤂᤡᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤱᤗᤖᤥ॥
MAT 20:27 ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤠᤱ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤴ ᤂᤡᤏᤡ᤹ ᤕᤥ᤺ᤰ ᤐᤥ᤺ᤱᤗᤖᤥ॥
MAT 20:28 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤛᤣᤘᤠ ᤔᤧᤈᤥ᤺ᤰᤁᤠᤖ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤣᤘᤠ ᤆᤥ᤺ᤰᤛᤧ ᤋᤩᤠᤱᤒᤠᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤗᤠᤶ ᤌᤧ᤹ᤔᤠᤛᤡᤀᤠᤱ ᤋᤠᤱᤛᤧ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤐᤡᤛᤧ ᤋᤩᤠᤱᤒᤠᤖᤥ॥”
MAT 20:29 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤧᤖᤡᤜᤥ ᤕᤧᤰᤕᤰᤁᤥᤗᤠᤶ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤔᤧᤎᤠᤛᤡᤱᤗᤥ॥
MAT 20:30 ᤂᤧᤵᤔᤥ ᤔᤧᤒᤣᤖ ᤔᤧᤒᤳᤇᤧᤒᤠ ᤗᤠᤶᤔᤥ ᤏᤧᤵᤑᤢ ᤔᤡᤰᤑ᤺ᤶᤒᤠᤜᤠ᤹ ᤕᤢᤅᤧᤳᤇᤡ॥ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣ᤺ᤰᤗ ᤐᤳ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤧᤳᤇᤢᤀᤠᤱ ᤀ᤺ᤰᤋᤧᤳᤇᤡ. “ᤍᤠᤱᤒᤣ. ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤠᤴᤇᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ᥄”
MAT 20:31 ᤂᤧᤴ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤧ᤺ᤰᤋᤢᤛᤡᤖ ᤛᤫᤠ᤺ᤳ ᤕᤢᤱᤔᤠ ᤔᤧᤒᤠᤱᤄᤢᤛᤡ. ᤁᤖ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤀ᤺ᤰᤋᤧᤳᤇᤡᤖᤥ. “ᤍᤠᤱᤒᤣ. ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤠᤴᤇᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ᥄”
MAT 20:32 ᤕᤧᤛᤢᤖᤧ ᤕᤧᤶᤛᤡᤱᤅᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤌᤧᤔᤠ ᤆᤥᤃᤢᤱ ᤐᤡᤏᤧᤳᤇᤡᤱᤒᤠ ᤂᤡᤴᤇᤡ᤹ ᤏᤡᤱᤘᤠ᤹ ᤁᤧᤈᤥ᤺ᤰᤛᤢᤒᤣ᥅”
MAT 20:33 ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤍᤠᤱᤒᤣ. ᤀᤠᤴᤇᤡᤃᤧ ᤏᤡ᤺ᤔᤠ ᤁᤧᤛᤢᤰᤐᤠ ᤀᤠᤈᤥᤃᤧᤳᤇᤧ᤹ᤀᤥ॥”
MAT 20:34 ᤕᤧᤛᤢᤖᤧ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤂᤢᤴᤇᤡ᤹ ᤔᤡᤰᤜᤠ᤹ ᤛᤢ᤺ᤛᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤡᤔᤥ ᤂᤧᤱᤜᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤳᤇᤡᤀᤠᤱ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤂᤧᤱᤜᤠ᤹ ᤌᤠᤏᤧᤳᤇᤡᤖᤥ॥
MAT 21:1 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤖᤢᤛᤗᤧᤔ ᤏᤡ᤺ᤳᤋᤠᤱᤒᤠ ᤈᤤᤋᤢᤏ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱᤒᤠ ᤒᤧᤌᤑᤠᤃᤣ ᤐᤠᤱᤓᤣ᤹ ᤏᤡ᤺ᤳᤋᤠᤱ ᤔᤧᤃᤧᤖᤧ. ᤜᤧᤰᤁᤩᤠᤱ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ.
MAT 21:2 “ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹. ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧᤛᤠ ᤀᤡᤔᤧᤄᤣ᤺ᤰᤂᤢᤔᤠ ᤀᤍᤱᤔᤠ᤺ᤸᤗᤧ ᤁᤢᤒᤣᤛᤠᤱ ᤁᤢᤛ᤻ᤛᤠ᤺ᤴ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤀᤡᤱᤃᤠ᤹ᤀᤥ ᤋᤠᤖᤧᤳᤇᤧ᤹ᤀᤥ॥
MAT 21:3 ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠ᤺ᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤱᤜᤠ᤹ ᤀᤠᤏᤡᤃᤧ ᤍᤠᤱᤒᤧᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹. ᤜᤠᤖᤠᤀᤣ ᤂᤢᤏᤧ᤹ ᤕᤠᤱᤏᤠ ᤏᤢ᤺ᤰᤋᤢᤛᤡ᤹ ᤑᤠ᤹ᤀᤠᤱ ᤔᤧᤳᤋᤧᤇᤧ᤹ᤀᤥ॥”
MAT 21:4 ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ–
MAT 21:5 “ᤕᤖᤢᤛᤗᤧᤔᤛ᤻ᤔᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ᤂᤡᤏᤡ᤹ ᤐᤕᤶ ᤜᤠᤱᤅᤡᤴ ᤂᤡᤏᤡ᤹ᤀᤥ ᤋᤠᤖ ᤐᤳ. ᤂᤢᤏᤧ᤹ᤃ ᤆᤢᤱᤈᤡᤃᤧᤴ ᤏ᤺ᤶᤛᤡᤱᤅᤠᤱ ᤀᤍᤱᤛᤠ᤺ᤴ ᤕᤢᤰᤋᤢᤀᤠᤱ ᤋᤠ᤺. ᤂᤢᤏᤧ᤹ᤃ ᤀᤍᤱᤛᤠ᤺ᤴᤏᤣ ᤕᤢᤰᤋᤢᤀᤠᤱ ᤋᤠᤖ ᤐᤳᤗᤥ॥”
MAT 21:6 ᤂᤧᤴ ᤏᤧᤵᤑᤢ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤆᤥᤃᤧᤳᤇᤢ॥
MAT 21:7 ᤂᤧᤱᤜᤠ᤹ᤖᤧ ᤀᤍᤱᤛᤠ᤺ᤴ ᤏᤢ ᤀᤍᤱᤔᤠ᤺ᤴ ᤋᤠᤖᤧᤳᤇᤢᤀᤠᤱ ᤂᤧᤱᤜᤠ᤹ ᤛᤶᤍᤠᤱ ᤂᤢᤏᤡ᤹ ᤋᤣ᤺ᤳᤜᤠ᤹ ᤔᤧᤏᤧᤛ᤻ᤛᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤀᤍᤱᤛᤠ᤺ᤴ ᤕᤢᤰᤋᤢᤖᤥ॥
MAT 21:8 ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤍᤃᤡ ᤁᤢᤍᤃᤡ ᤗᤠᤶᤔᤥ ᤂᤢᤏᤡ᤹ ᤋᤣ᤺ᤳᤜᤠ᤹ ᤔᤧᤓᤧᤛᤢ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤆᤢᤈᤢᤰᤛᤠ ᤛᤡᤱ ᤐᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤖᤥ॥
MAT 21:9 ᤂᤢᤏᤧ᤹ ᤁᤢᤍᤃᤡ ᤏᤢ ᤁᤢᤀᤣᤃᤠᤱ ᤁᤧᤒᤵᤐᤠ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤀ᤺ᤰᤋᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄”
MAT 21:10 ᤕᤧᤛᤢ᤺ᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤗᤠ᤺ᤛᤧᤸᤗᤧ ᤕᤶᤒᤠ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤀᤠᤱ ᤔᤏᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤛᤣ᤺ᤴᤗᤠᤵᤔᤠ ᤔᤧᤜᤣ᤺ᤰᤋᤢ. “ᤁᤱᤃ ᤜᤠ᤺ᤳᤏᤡᤒᤣ᥅”
MAT 21:11 ᤔᤏᤠᤗᤢᤶᤔᤥᤗᤠᤶ ᤁᤢᤓᤠᤖᤧ ᤏᤥᤃᤵ ᤔᤧᤒᤡᤖᤢᤛᤡ. “ᤁᤱᤃ ᤃᤠᤗᤡᤗᤛ᤻ᤔᤠ ᤏᤠᤛᤖᤋᤗᤠᤶ ᤁᤧᤍᤠ᤺ᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤧᤛᤢᤖᤥ॥”
MAT 21:12 ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤐᤣᤀᤠᤱ ᤂᤧᤵᤔᤥ ᤆᤡᤃ᤺ᤰᤘᤠ ᤁᤧᤛᤱᤒᤠ ᤁᤧᤀᤡᤱᤒᤠᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ॥ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤗᤧᤰᤔᤠ ᤛᤠᤵᤏᤧᤳᤋᤡᤴ ᤏᤢ ᤐᤢᤳᤋᤢ᤺ᤰᤁᤣ ᤁᤧᤛᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤏᤠ᤺ᤴ ᤗᤧᤰᤂᤢᤒᤡᤖᤢᤛᤡᤖᤥ॥
MAT 21:13 ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥ᤺ᤱ.’ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ᥄”
MAT 21:14 ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤘᤕᤧᤸᤗᤧ ᤔᤡᤰᤑ᤺ᤶᤒᤠᤜᤠ᤹ ᤏᤢ ᤗᤠᤱᤛᤰᤐᤠᤜᤠ᤹ ᤔᤧᤍᤩᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤏᤢᤛᤢᤛᤡᤖᤥ॥
MAT 21:15 ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡ᤺ᤛᤢ ᤜᤧᤰᤁᤩᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧᤀᤠᤱ ᤔᤠᤱᤜᤡᤶᤔᤥ ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤸᤗᤧ ᤁᤢᤏᤠᤖᤠ ᤐᤥ᤺ᤖ ᤗ᤹ᤖᤡᤰ ᤔᤧᤀ᤺ᤰᤋᤧᤒᤠ ᤔᤧᤄᤧᤵᤛᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧᤖᤥ॥
MAT 21:16 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤴᤜᤠ᤹ᤖᤧ ᤌᤣ ᤔᤧᤒᤠ᤺ᤳᤋᤢᤖ ᤔᤧᤒᤳ ᤁᤧᤱᤄᤧᤵᤛᤢᤴᤒᤡ᥅” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤵᤛᤢᤱᤒᤧ. ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤂᤡᤏᤡ᤹ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ‘ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤏᤢ ᤏᤢᤃᤧᤎᤢᤱᤒᤠᤜᤠ᤹ᤗᤠᤶ ᤂᤢᤏᤧ᤹ ᤁᤧᤏᤠᤖᤠ ᤑᤥ᤺ᤔᤠ ᤐᤠᤱᤄᤢᤛᤡ’”
MAT 21:17 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤗᤧᤖᤢᤎᤛᤡᤀᤠᤱ ᤕᤧᤰᤕᤰᤗᤠᤶ ᤒᤧᤌᤠᤏᤡ ᤐᤠᤱᤈᤢᤶᤔᤥ ᤐᤣᤀᤠᤱ ᤕᤠᤱᤎᤥ᤺ᤰᤋᤧᤖᤥ॥
MAT 21:18 ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤧᤰᤕᤰᤁᤥ ᤏᤢ᤺ᤰᤂᤧᤀᤠᤱ ᤐᤣᤖ ᤐᤳᤇᤧᤸᤗᤧ ᤁᤢᤛᤧᤳᤗᤠ᤺ᤰᤋᤧ॥
MAT 21:19 ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤐ᤺ᤳᤇᤣ᤹ᤒᤢᤱᤔᤠᤴ ᤏᤡ᤺ᤛᤢᤀᤠᤱ ᤁᤢᤒᤣᤛᤠᤱ ᤐᤣ. ᤜᤧᤰᤁᤩᤠᤱ ᤀᤥᤔᤧᤳᤋᤢᤸᤗᤧ ᤁᤢᤓᤧᤰᤘᤠᤖᤰ ᤐᤳᤇᤧ ᤁᤖ ᤁᤢᤈᤠ᤹ ᤔᤧᤒᤳᤇᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤐ᤺ᤳᤇᤣ᤹ᤒᤢᤱᤔᤠᤴ ᤔᤧᤳᤋᤢ. “ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤁᤧᤈᤠ᤹ ᤔᤧᤎᤥ᤺ᤰᤏᤧᤴᤗᤖᤥ॥” ᤜᤧᤰᤁᤩᤠᤱ ᤂᤧᤴ ᤐ᤺ᤳᤇᤣ᤹ᤒᤢᤱᤔᤠᤴ ᤂᤡᤔᤥ ᤀᤡᤗᤧᤔᤧ ᤛᤩᤧᤖᤥ॥
MAT 21:20 ᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤒᤠᤖᤧ. “ᤀᤠᤰᤂᤧᤴ ᤜᤠᤖᤠᤏᤧ ᤁᤴ ᤐ᤺ᤳᤇᤣ᤹ᤒᤢᤱᤔᤠᤴ ᤀᤡᤗᤧᤔᤧ ᤛᤩᤧᤒᤠᤒᤣ᥄”
MAT 21:21 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤆᤵᤆᤡ ᤔᤧᤴᤈᤥ᤺ᤰᤁᤣ ᤏᤛᤠ᤺ᤴ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤁᤴ ᤐ᤺ᤳᤇᤣ᤹ᤒᤢᤱᤔᤠᤴ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤆᤥ᤺ᤰᤔᤠ ᤁᤧᤛᤢᤰᤋᤢᤶ. ᤜᤧᤰᤁᤩᤠᤱ ᤂᤧᤶᤔᤩᤠᤰᤗᤰ ᤔᤧ᤺ᤴ. ᤁᤖ ‘ᤁᤴ ᤁᤥ᤺ᤰᤔᤠᤴ ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹’ ᤁᤧᤔᤧᤳᤋᤢᤶᤔᤡᤸᤗᤧ ᤂᤧᤴ ᤁᤧᤳᤗᤥ॥
MAT 21:22 ᤂᤡᤏᤡ᤹ ᤋᤢᤘᤠᤀᤥ ᤁᤧᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤂᤥ᤺ᤛᤢᤶᤒᤧ᤹ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤄᤥ᤺ᤛᤢᤶᤗᤥ॥”
MAT 21:23 ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤁᤧᤖᤧᤀᤠᤱ ᤔᤏᤠᤜᤠ᤹ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤘᤣ᤹ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹᥅ ᤁᤴ ᤕᤢᤰᤁᤡᤴ ᤜᤠ᤺ᤳᤗᤧ ᤁᤧᤒᤡᤖᤧ᥅”
MAT 21:24 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤗᤳᤇᤠ ᤛᤣ᤺ᤴᤗᤠᤵᤌᤡᤰ ᤛᤣ᤺ᤴᤍᤥ᤺ᤏᤡᤱᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤏᤥᤃᤵ ᤁᤧᤒᤡᤖᤡ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ᤀᤠᤱ ᤌᤧᤔᤠ ᤕᤢᤰᤁᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤱ ᤂᤧᤴ ᤔᤧᤳᤏᤡᤱᤗᤥ॥
MAT 21:25 ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤔᤠ ᤁᤢᤕᤢᤰᤁᤡᤴ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤒᤡ. ᤀᤡ ᤔᤏᤠᤗᤠᤶᤒᤡ᥅” ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠ᤺ᤴ ᤔᤧᤎᤰᤋᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ‘ᤏᤡᤱᤘᤠ᤹ᤑᤢᤔᤠᤱᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤌᤣᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤛᤣ᤺ᤴᤀᤠᤗᤠᤵ॥
MAT 21:26 ᤁᤖ ‘ᤔᤏᤠᤜᤠ᤹ᤗᤠᤶ’ ᤀᤠᤒᤠ᤺ᤳᤋᤢᤶᤏᤧ ᤑᤠ᤹ᤃᤪ ᤔᤏᤠᤜᤠ᤹ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰᤐᤡ ᤑᤠ᤹ᤀᤠᤱ ᤀᤠᤃᤡᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤕᤢᤜᤢᤴᤏᤠ᤺ᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥”
MAT 21:27 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤂᤧᤴ ᤀᤡᤱᤃᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥”
MAT 21:28 ᤕᤠᤶᤔᤥ ᤕᤧᤛᤢᤖᤧ ᤂᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤂᤧᤍᤠ᤹ᤎᤡᤰ ᤔᤧᤳᤏᤡᤱ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣ ᤁᤧᤀᤡ᤺ᤳᤋᤢᤶ ᤀᤠᤔᤧᤳᤋᤧᤶᤔᤧ᤹ᤀᤥ॥ ᤗᤳᤇᤠ ᤔᤏᤠᤎᤡᤰ ᤘᤕᤧ. ᤂᤧᤸᤗᤧ ᤏᤧᤵᤑᤢ ᤁᤢᤛ᤻ᤛᤠ᤺ ᤕᤧᤶᤒᤡᤳᤇᤠ᤹ᤜᤠ᤹ ᤘᤕᤧᤳᤇᤡ॥ ᤂᤧᤴ ᤔᤏᤠ᤺ᤴ ᤁᤢᤛ᤻ᤛᤠ᤺ ᤋᤢᤶᤒᤠᤸᤗᤥ ᤐᤣᤀᤠᤱ ᤔᤧᤳᤋᤢ. ‘ᤀᤠᤛ᤻ᤛᤠ᤺ᤀᤣ. ᤐᤣᤃᤧ᤹ᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥’
MAT 21:29 ᤂᤧᤴ ᤁᤢᤛ᤻ᤛᤠ᤺ᤸᤗᤧ ᤋᤃᤡᤃ ‘ᤔᤧᤈᤥ᤺ᤰᤁᤠᤴᤗᤥ’ ᤔᤧᤳᤋᤢ. ᤁᤖ ᤕᤠᤱᤛᤡ ᤁᤢᤏᤡᤱᤘᤠ᤹ ᤏᤢ᤺ᤰᤂᤧ. ᤜᤧᤰᤁᤩᤠᤱ ᤐᤣᤀᤠᤱ ᤕᤠ᤺ᤶᤒᤰ ᤆᤥᤃᤢᤖᤥ॥
MAT 21:30 ᤜᤧᤰᤁᤩᤠᤱ ᤁᤢᤶᤒᤠ᤺ᤴ ᤁᤢᤛ᤻ᤛᤠ᤺ ᤑᤥ᤹ᤒᤠᤸᤗᤥ ᤐᤣᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤳᤋᤢ॥ ᤂᤧᤴ ᤁᤢᤛ᤻ᤛᤠ᤺ ᤑᤥ᤹ᤒᤠᤸᤗᤧᤀᤠᤱ. ‘ᤐᤥ᤺ᤱ ᤀᤠᤍᤠᤱᤒᤣ. ᤐᤣ᤺ᤰᤁᤠᤖᤥ’ ᤔᤧᤳᤋᤢ. ᤁᤖ ᤂᤧᤴ ᤕᤠ᤺ᤶᤒᤰᤁᤥ ᤔᤧᤒᤣᤏᤧᤴᤗᤥ॥
MAT 21:31 ᤀᤠᤸᤗ ᤂᤧᤴ ᤏᤧᤵᤑᤢᤀᤥ ᤀᤠᤳᤋᤡᤸᤗᤧ ᤂᤢᤴᤇᤡ᤹ ᤐᤠ᤺ᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥᤃᤧᤳᤇᤢᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤋᤢᤶᤒᤠᤸᤗᤧᤖᤥ॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤁᤧᤳᤏᤡᤔᤠᤜᤠ᤹ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤋᤃᤡ ᤔᤧᤗᤠ᤺ᤳᤗᤥ॥
MAT 21:32 ᤌᤣᤀᤠᤱᤓᤧᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤂᤡᤏᤡ᤹ ᤛᤠᤶᤕᤥᤏᤡᤒᤠ ᤗᤠᤶ ᤀᤥᤛᤣ᤺ᤴᤎᤠᤰᤛᤧ ᤋᤩᤧᤒᤠᤖᤥ. ᤜᤧᤰᤁᤣᤛᤠᤱ ᤂᤢᤏᤧ᤹ ᤛᤶᤍᤠᤱ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤖ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤁᤧᤳᤏᤡᤔᤠᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤴ ᤁᤧᤏᤡ᤺ᤛᤢᤶᤛᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤏᤠᤱ ᤂᤢᤏᤧ᤹ ᤏᤛᤠ᤺ᤴᤏᤠᤱ ᤁᤧᤴᤈᤥᤃᤢᤶᤔᤡᤴᤗᤥ॥”
MAT 21:33 ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤘᤣ᤹ᤛ᤻ᤔᤠ ᤂᤧᤍᤠ᤹ᤎᤡᤰ ᤂᤧᤵᤛᤧᤶᤔᤧ᤹ᤀᤥ॥ ᤌᤡᤰᤗᤧᤱ ᤕᤶᤒᤠ ᤗᤠᤈᤣ᤹ᤍᤠᤱᤒᤠᤎᤡᤰ ᤘᤕᤧ. ᤂᤧᤸᤗᤧ ᤗᤳᤇᤠ ᤀᤡᤰᤁᤥ ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤢᤀᤠᤱ ᤁᤢᤄᤡᤖᤡ ᤗᤢᤱᤎᤠᤰ ᤛᤧᤳᤋᤢᤖ ᤑᤠᤅᤢ. ᤜᤧᤰᤁᤩᤠᤱ ᤁᤢᤗᤢᤶᤔᤥ ᤗᤢᤶᤒᤠ᤺ᤳ ᤋᤕᤢᤀᤠᤱ ᤂᤧᤵᤔᤥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠ ᤋᤧᤴᤎᤡᤰ ᤆᤥᤃᤢ॥ ᤀᤡᤰ ᤁᤥᤔᤠ ᤕᤠᤰᤛᤠᤎᤡᤰᤁᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤁᤢᤓᤪᤧ᤺ᤱ ᤗᤰ ᤂᤥ᤺ᤔᤠᤖᤧ ᤗᤠᤃᤡ ᤀᤡᤰᤔᤛᤠᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤗᤠᤶᤍᤡ᤺ᤰ ᤆᤥ᤺ᤰᤛᤧ ᤐᤣᤖᤥ॥
MAT 21:34 ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤋᤩᤧ᤺ᤸᤗᤧ ᤁᤢᤗᤰ ᤗᤠ᤺ᤛᤧ ᤁᤢᤛᤣᤘᤠᤖᤥᤒᤠᤜᤠ᤹ ᤀᤡᤰᤔ᤺ᤒᤠᤜᤠ᤹ᤖᤥ ᤐᤠᤱᤄᤢᤛᤡᤖᤥ॥
MAT 21:35 ᤂᤧᤴ ᤀᤡᤰᤔ᤺ᤒᤠᤜᤠ᤹ᤖᤧ ᤁᤢᤛᤣᤘᤠᤖᤥᤒᤠᤜᤠ᤹ ᤔᤧᤍᤧᤶᤛᤢᤛᤡ ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤠᤴ ᤔᤧᤜᤡᤵᤋᤢ. ᤏᤡᤛᤡᤃᤣ᤺ᤰᤐᤠᤴ ᤔᤧᤛᤧᤖᤢᤀᤠᤱ ᤛᤢᤶᤛᤡᤃᤣ᤺ᤰᤐᤠᤴ ᤗᤢᤱᤅᤡᤸᤗᤧ ᤔᤧᤒ᤺ᤳᤋᤢ ᤔᤧᤛᤧᤖᤢᤖᤥ॥
MAT 21:36 ᤜᤧᤰᤁᤩᤠᤱ ᤂᤧᤸᤗᤧ ᤋᤃᤡᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤢᤛᤣᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡ. ᤁᤖ ᤂᤧᤴ ᤀᤡᤰᤔ᤺ᤒᤠᤜᤠ᤹ᤖᤧ ᤂᤧᤱᤜᤠ᤹ᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡ॥
MAT 21:37 ᤜᤧᤰᤁᤩᤠᤱ ᤁᤢᤏᤢᤵᤔᤥ ᤂᤧᤴ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤀᤠᤸᤗ ᤁᤴ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛ᤻ᤛᤠ᤺ᤴ ᤐᤠᤱᤄᤢᤱᤅᤡᤸᤗᤧᤃ ᤛᤧᤰᤂᤠᤛᤠᤱ ᤁᤢᤏᤠ ᤔᤧᤛᤠ᤹ᤖᤢᤒᤡᤗᤠ ᤑᤠ᤹ᤀᤠᤱ ᤀᤡ᤺ᤳᤋᤢᤀᤠᤱ ᤁᤢᤛ᤻ᤛᤠ᤺ᤴ ᤐᤠᤱᤄᤢ॥
MAT 21:38 ᤁᤖ ᤂᤧᤱᤜᤠ᤹ᤖᤧ ᤁᤢᤛ᤻ᤛᤠ᤺ᤴ ᤔᤧᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. ‘ᤁᤱᤃ ᤁᤢᤶᤒᤠᤖᤧ ᤁᤢᤗᤰ ᤁᤧᤄᤥ᤺ᤒᤠᤖᤥ. ᤁᤴ ᤛᤧᤖᤢᤶᤔᤠᤱ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤜᤢᤰᤁᤠᤵᤐᤠᤛᤡᤖᤥ॥’
MAT 21:39 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤔᤧᤛᤧᤖᤢᤖᤥ॥”
MAT 21:40 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤸᤗ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤴ ᤋᤠᤀᤠᤱ ᤂᤧᤴ ᤀᤡᤰᤔ᤺ᤒᤠᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ᤹ᤒᤣ᥅”
MAT 21:41 ᤂᤧᤴ ᤋᤢᤶᤕᤰᤕᤠᤒᤠᤜᤠ᤹ ᤏᤢ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤂᤢᤏᤧ᤹ ᤋᤠᤀᤠᤱ ᤂᤧᤴ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤛᤧᤰᤂᤠᤛᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤖ ᤛᤧᤖᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤁᤢᤓᤪᤧ᤺ᤱ ᤗᤰ ᤂᤥ᤺ᤔᤠᤖᤧ ᤗᤠᤃᤡ ᤘᤣ᤹ ᤀᤡᤰᤔ᤺ᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤋᤢᤶᤔᤡᤸᤗᤧ ᤁᤢᤗᤰᤁᤡᤴ ᤔᤧᤒᤡᤖᤢ᤹ᤖᤥ॥”
MAT 21:42 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡᤒᤡ᥅ ‘ᤗᤢᤱᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤁᤢᤶᤔᤠ ᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤁᤱᤃ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤆᤥᤃᤢᤒᤠᤖᤥ. ᤜᤧᤰᤁᤩᤠᤱ ᤁᤴ ᤀᤠᤏᤡ᤹ ᤏᤡ᤺ᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤆᤥ᤺ᤰᤗᤥ॥’
MAT 21:43 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤔᤧᤳᤏᤡᤱ. ᤂᤡᤏᤡ᤹ᤀᤥᤗᤠᤶ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤠᤵᤐᤠᤱ ᤂᤧᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤐᤡᤖᤢᤛᤡᤖᤥ॥
MAT 21:44 ‘ᤀᤠᤳᤋᤡᤴᤜᤠ᤹ ᤂᤧᤴ ᤗᤢᤱ ᤛᤶᤍᤠᤱ ᤔᤰᤔᤧᤎᤠ᤹᤺. ᤂᤧᤱᤜᤠ᤹ ᤔᤧᤓᤰ ᤔᤧᤛᤡ᤺ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤛᤶᤍᤠᤱ ᤂᤧᤴ ᤗᤢᤱᤅᤡᤴ ᤔᤰᤌᤠ᤹᤺. ᤂᤧᤱᤜᤠ᤹ ᤔᤧᤓᤧᤰ ᤔᤧᤛᤡ᤺ᤖᤥ॥’”
MAT 21:45 ᤜᤧᤰᤁᤩᤠᤱ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤁᤴ ᤂᤧᤍᤠ᤹ᤀᤡᤴ ᤔᤧᤄᤧᤵᤛᤢᤀᤠᤱ ᤁᤱᤃ ᤀᤠᤏᤡᤃᤧ ᤕᤠ᤺ᤶᤒᤣᤀᤥᤀᤣ ᤕᤧᤛᤢᤖᤧ ᤐᤠ᤺ᤳᤋᤢᤖ ᤐᤳ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥
MAT 21:46 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤋᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤁᤖ ᤔᤏᤠᤜᤠ᤹ ᤔᤧᤃᤡᤖᤢᤛᤡ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤧᤛᤢ᤺ᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥
MAT 22:1 ᤕᤧᤛᤢᤖᤧ ᤂᤧᤴ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤕᤠᤶᤔᤥ ᤂᤧᤍᤠ᤹ᤜᤠ᤹ᤀᤥ ᤀᤰᤂᤣ ᤔᤧᤳᤋᤢᤛᤡ –
MAT 22:2 “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤗᤳᤇᤠ ᤜᤠᤱᤎᤡᤰᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤔᤣ᤺ᤰᤂᤡᤶᤔᤡᤸᤗᤧᤴ ᤛᤠᤓᤠᤱᤈᤠ ᤛᤧ᤺ᤛᤢᤒᤠ ᤂᤧᤍᤠ᤹ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
MAT 22:3 ᤔᤣ᤺ᤰᤂᤡᤶ ᤛᤠᤓᤠᤱᤈᤠᤖᤧᤴ ᤆᤠᤔᤢᤰ ᤌᤡᤔᤢᤰᤁᤡᤴ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤴ ᤜᤠᤱᤅᤡᤸᤗᤧ ᤀᤢ᤺ᤳᤇᤡᤱ ᤁᤧᤄᤥ᤺ᤒᤠᤜᤠ᤹ ᤛᤠᤓᤠᤱᤈᤠᤀᤥ ᤋᤠ᤺ᤵᤔᤠᤛᤡ ᤁᤢᤛᤣᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡ. ᤁᤖ ᤂᤧᤱᤜᤠ᤹ ᤋᤠ᤺ᤔᤠ ᤔᤧᤴᤍᤧᤴᤍᤧᤴᤗᤥ॥
MAT 22:4 ᤜᤧᤰᤁᤣ᤺ᤸᤗᤧ ᤂᤧᤴ ᤜᤠᤱᤅᤡᤸᤗᤧ ᤁᤢᤓᤠ ᤁᤢᤛᤣᤘᤠᤖᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. ‘ᤂᤧᤴ ᤀᤢ᤺ᤳᤇᤡᤱ ᤁᤧᤄᤥ᤺ᤒᤠᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ᤀᤡᤱᤃᤠ᤹ ᤔᤣ᤺ᤰᤂᤡᤶ ᤛᤠᤓᤠᤱᤈᤠ᤺ᤴ ᤕᤠᤖᤡᤵ ᤆᤥᤃᤢᤱᤅᤠᤱ ᤘᤠ᤹ᤀᤠ॥ ᤗᤢᤵᤔᤏᤠᤒᤠ ᤌᤰᤛᤠᤜᤠ᤹ ᤛᤧᤖᤢᤱᤛᤡᤱᤅᤠᤱ ᤁᤧᤖᤧᤰ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹. ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤋᤩᤧᤶᤔᤧ᤹ᤀᤥ॥’
MAT 22:5 ᤁᤖ ᤂᤧᤱᤜᤠ᤹ᤖᤧ ᤂᤧᤶᤄᤧᤶ ᤔᤧᤴᤗᤠᤵᤋᤢᤴᤏᤠᤱ ᤁᤢᤓᤠᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤔᤧᤒᤣ. ᤁᤢᤓᤠ ᤗᤧᤱᤜᤱ ᤆᤥ᤺ᤰᤛᤧ ᤔᤧᤒᤣ.
MAT 22:6 ᤁᤢᤓᤠᤖᤧᤃ ᤁᤢᤛᤣᤘᤠᤖᤥᤒᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤀᤠᤱ ᤔᤧᤛᤧᤖᤢᤛᤡᤖᤥ॥
MAT 22:7 ᤂᤧᤴ ᤜᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ ᤂᤢᤏᤧ᤹ ᤌᤰᤛᤢᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤂᤧᤴ ᤔᤏᤠ ᤁᤧᤛᤧᤵᤐᤠᤜᤠ᤹ ᤁᤧᤖᤧᤰ ᤛᤧᤵᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤡ᤹ ᤕᤧᤰᤕᤰᤁᤡᤴ ᤑᤢᤳᤗᤢᤶ ᤜᤠ᤺ᤴᤍᤢᤍᤣ᤺ᤛᤢ ᤐᤡᤖᤢᤛᤡᤖᤥ॥
MAT 22:8 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤔᤣ᤺ᤰᤂᤡᤶ ᤛᤠᤓᤠᤱᤈᤠ᤺ᤴ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹. ᤁᤖ ᤂᤧᤵᤔᤥ ᤀᤢ᤺ᤳᤇᤡᤱ ᤁᤧᤄᤥ᤺ᤒᤠᤜᤠ᤹ ᤋᤠ᤺ᤔᤠ ᤛᤢᤶᤒᤥᤎᤠᤒᤠ ᤔᤧᤴᤈᤥ᤺ᤰᤏᤧᤴᤗᤥ॥
MAT 22:9 ᤜᤧᤰᤁᤣ᤺ᤸᤗᤧ ᤕᤧᤰᤕᤰᤁᤥᤒᤠ ᤗᤠᤶ ᤗᤠᤶᤔᤥ ᤐᤣᤃᤧᤶᤔᤧ᤹ᤀᤠᤱ ᤁᤧᤍᤢᤔᤢᤶᤛᤡᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤀᤢ᤺ᤳᤋᤧᤶ ᤋᤠᤖᤧᤶᤛᤡᤶᤔᤧ᤹ᤀᤥ॥’
MAT 22:10 ᤂᤧᤸᤗᤧ ᤆᤥᤃᤢᤸᤗᤧ ᤛᤣᤘᤠᤖᤥᤒᤠᤜᤠ᤹ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤗᤠᤶ ᤗᤠᤶᤔᤥ ᤔᤧᤍᤢᤔᤢᤛᤡᤒᤠ ᤁᤧᤖᤧᤰ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤀᤢ᤺ᤳᤋᤢ ᤔᤧᤍᤠᤖᤢᤛᤡᤀᤠᤱ ᤂᤧᤵᤔᤥᤒᤠ ᤕᤢᤰᤏᤠᤜᤠ᤹ ᤔᤧᤎᤡᤶᤛᤢᤖᤥ॥
MAT 22:11 ᤁᤖ ᤜᤠᤱᤅᤡᤴ ᤋᤖᤣ ᤋᤢᤶᤛᤧ ᤛᤡᤃᤠᤱ ᤗᤠ᤺ᤛᤧᤸᤗᤧ ᤂᤧᤵᤔᤥ ᤏᤢ᤺ᤒᤠ ᤋᤣ᤺ᤳ ᤔᤧᤴᤈᤠᤱᤔᤏᤠᤒᤠ ᤔᤏᤠᤎᤡᤰ ᤏᤡ᤺ᤛᤢᤀᤠᤱ
MAT 22:12 ᤛᤣ᤺ᤴᤍᤥᤛᤢ. ‘ᤆᤢᤶᤔᤣ. ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ. ᤔᤣ᤺ᤰᤂᤡᤶᤔᤥ ᤆᤠᤱᤔᤏᤠᤒᤠ ᤏᤢ᤺ᤒᤠ ᤋᤣ᤺ᤳ ᤔᤧ᤺ᤴᤏᤣ ᤁᤧᤗᤠ᤺ᤛᤧᤒᤣ᥅’ ᤂᤧᤴ ᤔᤏᤠ᤺ᤸᤗᤧ ᤌᤣᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ॥
MAT 22:13 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤛᤣᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤁᤴ ᤔᤏᤠ᤺ᤴ ᤋᤧᤶᤛᤧᤶᤔᤧ᤹ᤀᤠᤱ ᤁᤢᤗᤠᤱ ᤁᤢᤜᤢᤰᤜᤠ᤹ ᤀᤡᤄᤣ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤂᤠᤍᤠᤶᤔᤥ ᤗᤠᤵᤑᤢ᤺ᤛᤧᤶᤔᤧ᤹ᤀᤥ॥ ᤂᤧᤵᤔᤥ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥’
MAT 22:14 ᤌᤣᤀᤠᤱᤓᤧᤸᤗᤧ ᤀᤢ᤺ᤳᤇᤡᤱᤔᤠ ᤁᤧᤄᤥ᤺ᤒᤠᤜᤠ᤹ ᤕᤖᤡᤰ ᤔᤧᤘᤠ᤹. ᤁᤖ ᤛᤣ᤺ᤰᤛᤡᤱᤔᤠ ᤁᤧᤄᤥ᤺ᤒᤠᤜᤠ᤹ ᤁᤢᤓᤠᤖᤰ ᤔᤧᤘᤠ᤹ᤖᤥ॥”
MAT 22:15 ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤕᤧᤛᤢ᤺ᤴ ᤀᤠᤰᤂᤣᤗ᤹ᤖᤡᤰ ᤐᤠ᤺ᤴᤏᤥ ᤌᤠ᤺ᤔᤠᤒᤣ ᤑᤠ᤹ᤀᤠᤱ ᤛᤢᤰᤔᤠ ᤔᤧᤜᤣ᤺ᤰᤋᤢᤖᤥ॥
MAT 22:16 ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤕᤧᤛᤢᤖᤥ ᤔᤧᤒᤠᤱᤄᤢᤛᤡ॥ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤛᤧᤰᤂᤠ ᤐᤠ᤺ᤴᤗᤰ ᤁᤧᤒᤠ᤺ᤵᤐᤧᤴ ᤀᤠᤏᤡᤃᤧ ᤏᤡ᤺ᤛᤢᤶᤒᤧᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤛᤧᤰᤂᤠᤀᤣ ᤁᤧᤜᤢ᤹ᤖᤢᤛᤡᤖᤥ॥ ᤂᤧᤏᤧ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤁᤧᤶᤒᤳᤏᤧᤴ. ᤜᤧᤰᤁᤩᤠᤱ ᤔᤏᤠᤀᤠᤱ ᤁᤧᤴᤇᤧᤴᤍᤢᤴᤇᤡᤴ॥
MAT 22:17 ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤔᤧᤳᤋᤧ᤹ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤜᤢᤱᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤀᤠᤶᤒᤡᤏᤧᤴᤒᤡ᥅”
MAT 22:18 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤑᤧᤴ ᤏᤡᤱᤘᤠ᤹ᤀᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤐᤠ᤺ᤴᤏᤥ ᤋᤧᤶᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅
MAT 22:19 ᤀᤣ᤺ᤱᤕᤠᤱ ᤜᤢᤱᤔᤠ ᤁᤧᤒᤥ᤺ᤱᤒᤠ ᤖᤥᤔᤡ ᤕᤠᤱᤀᤡᤳᤇᤡ᤺ᤴ ᤁᤳᤏᤠ ᤑᤧᤳᤋᤧᤶᤔᤧ᤹॥” ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤥ ᤕᤠᤱᤀᤡᤳᤇᤡ᤺ᤴ ᤔᤧᤍᤠᤖᤢᤀᤠᤱ
MAT 22:20 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤵᤔᤥ ᤜᤠ᤺ᤳᤗᤧ ᤁᤢᤀᤡᤳᤇᤠᤵ ᤏᤢ ᤁᤢᤒᤠ᤺ᤴᤛᤠᤵ ᤐᤵᤐᤣ᥅”
MAT 22:21 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤈᤖᤧᤸᤗᤧᤴ ᤐᤳᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤡᤈᤖᤗᤧ ᤁᤢᤒᤠ᤺ᤴᤜᤠ᤹ ᤛᤡᤈᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤡᤖᤧᤶᤔᤧ᤹ᤀᤥ॥”
MAT 22:22 ᤂᤧᤱᤜᤠ᤹ᤖᤧ ᤁᤴ ᤏᤥᤃᤵᤐᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥᤀᤣ ᤔᤧᤗᤧᤖᤢᤔᤧᤎ᤺ᤀᤠᤱ ᤔᤧᤒᤣᤖᤥ॥
MAT 22:23 ᤒᤠ ᤂᤧᤴ ᤕᤧᤴᤏᤥ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤜᤥ᤺ᤵ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤛᤍᤢᤁᤡᤜᤠ᤹ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ.
MAT 22:24 “ᤛᤡᤰᤛᤠᤶᤒᤣ. ᤔᤥᤛᤠᤖᤧ ᤛᤠᤶᤕᤥᤌᤡᤶᤔᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤀᤠᤳᤋᤡᤸᤗᤧ ᤁᤢᤶᤓᤢ᤹ᤀᤡᤴ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤡ᤹᤺. ᤂᤧᤸᤗᤧ ᤁᤢᤴᤛᤠ᤹ᤖᤧ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥ᤺ᤱ॥ ᤜᤧᤰᤁᤩᤠᤱ ᤁᤢᤶᤓᤢ᤹ᤖᤧ ᤁᤢᤗᤠᤃᤡ ᤛᤠᤃᤵᤔᤠ ᤐᤥ᤺ᤱᤗᤥ॥’
MAT 22:25 ᤀᤠᤸᤗ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤕᤧ॥ ᤋᤢᤶᤒᤠᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤩᤧ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤡᤴᤏᤢ ᤁᤢᤴᤛᤠ᤹ᤖᤧ ᤔᤣ᤺ᤰᤂᤡᤶ ᤆᤥᤃᤢ॥
MAT 22:26 ᤜᤧᤰᤁᤣᤗ᤹ᤖᤡᤰ ᤛᤖᤢᤶᤒᤠ. ᤕᤠᤱᤛᤖᤢᤶᤒᤠ ᤏᤢ ᤑᤥ᤹ᤒᤠ ᤌᤠᤖᤡᤰᤗᤧ ᤂᤧᤴ ᤔᤣᤔᤣᤍᤢᤔᤠᤴᤏᤢ ᤔᤣ᤺ᤰᤂᤡᤶ ᤔᤧᤈᤥᤃᤢ. ᤁᤖ ᤋᤢᤶᤒᤠᤴ ᤜᤧᤰᤁᤣᤀᤣ ᤂᤢᤏᤡ᤹ ᤛᤠ-ᤀᤣ ᤔᤧᤴᤘᤠ᤹ᤀᤣ ᤔᤧᤛᤩᤧᤖᤥ॥
MAT 22:27 ᤀᤠᤸᤗ ᤁᤢᤏᤢᤵᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤠᤱ ᤛᤩᤧᤖᤥ॥
MAT 22:28 ᤀᤠᤸᤗ ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤂᤧᤴ ᤀᤠᤳᤋᤡᤸᤗᤧ ᤁᤢᤔᤣ᤺ᤳ ᤐᤥ᤺ᤱᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤏᤢᤛᤡ ᤑᤢ᤹ᤏᤢᤛᤠ᤹ ᤁᤧᤖᤧᤰᤗᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥”
MAT 22:29 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴᤏᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤖᤥ॥
MAT 22:30 ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧᤃ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ. ᤁᤖ ᤂᤧᤱᤜᤠ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡ᤺ᤰᤏᤧ ᤔᤧᤒᤥ᤺ᤱᤗᤥ॥
MAT 22:31 ᤁᤖ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅
MAT 22:32 ‘ᤀᤡᤱᤃᤠ᤹ᤃ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’ ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤜᤠ᤹ᤖᤧᤴ ᤔᤧ᤺ᤴ. ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ॥”
MAT 22:33 ᤂᤧᤴ ᤁᤧᤈᤢᤶᤒᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤸᤗᤧ ᤁᤢᤏᤡᤛᤠᤶᤔᤥ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
MAT 22:34 ᤕᤧᤛᤢᤖᤧ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤔᤢᤖᤠ᤺ᤴ ᤛᤢᤒᤢ ᤐᤡᤖᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤀᤡᤱᤔᤧᤍᤱᤛᤡᤱᤅᤠᤱ ᤕᤧᤛᤢᤖᤥ ᤔᤧᤍᤩᤧᤖᤥ॥
MAT 22:35 ᤂᤧᤱᤜᤠ᤹ᤀᤥ ᤛᤠᤶᤕᤥᤛᤠᤵᤗᤠ ᤛᤠ᤹ᤖᤡᤰ ᤁᤧᤗᤧᤒᤠᤎᤡᤰᤗᤧ ᤕᤧᤛᤢ᤺ᤴ ᤀᤰᤂᤣᤗ᤹ᤖᤡᤰ ᤁᤢᤏᤡᤱᤘᤠ᤹ ᤛᤠ᤹ᤖᤢᤖ ᤛᤣ᤺ᤴᤗᤠᤵᤋᤢ.
MAT 22:36 “ᤛᤡᤰᤛᤠᤶᤒᤣ. ᤛᤠᤶᤕᤥᤌᤡᤶᤔᤥ ᤀᤡ᤺ᤵᤔᤠ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤀᤡᤱᤈᤠ᤺ᤱᤅᤡᤴ ᤀᤠᤳᤋᤡᤱᤃ᥅”
MAT 22:37 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “‘ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤁᤧᤛᤰᤔᤠᤛᤠᤶᤔᤡᤸᤗᤧ. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤧ᤹ᤀᤥ॥’
MAT 22:38 ᤁᤱᤃ ᤌᤡᤰᤛᤡᤃᤣ᤺ᤰᤐᤠ ᤏᤢ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤀᤡᤱᤈᤠ᤺ᤱᤗᤥ॥
MAT 22:39 ᤜᤧᤰᤁᤣᤗ᤹ᤖᤡᤰ ᤏᤡᤛᤡᤃᤣ᤺ᤰᤐᤠ ᤁᤧᤕᤧᤰᤐᤠ ᤀᤡᤱᤈᤠ᤺ᤱᤅᤡᤱᤃ ᤒᤠ ᤁᤴᤗᤥ. ‘ᤀᤠᤵᤑᤣ᤺ᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’
MAT 22:40 ᤁᤧᤖᤧᤰ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤴ ᤁᤴ ᤏᤧᤳᤇᤡ ᤀᤡᤱᤈᤠ᤺ᤱᤗᤠᤶ ᤋᤩᤧᤒᤠᤖᤥ॥”
MAT 22:41 ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤌᤡᤰᤍᤧᤴᤏᤥ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ.
MAT 22:42 “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤌᤣ ᤁᤧᤀᤡ᤺ᤳᤋᤢᤶᤒᤣ᥅ ᤂᤢᤏᤧ᤹ ᤜᤠ᤺ᤳᤗᤧ ᤁᤢᤛ᤻ᤛᤠ᤺ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤢᤏᤧ᤹ᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ॥”
MAT 22:43 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤛᤣᤛᤣᤔᤠᤱᤗᤠᤶ ᤍᤠᤀᤢᤍᤖᤧ ᤀᤠᤰᤂᤣᤗ᤹ᤖᤡᤰ ᤀᤠᤍᤠᤱᤒᤣ ᤑᤠ᤹ᤀᤠᤱ ᤔᤧᤳᤋᤢᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤍᤠᤀᤢᤍ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶᤔᤥ ᤐᤠ᤺ᤳᤋᤢ.
MAT 22:44 ‘ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤀᤡᤱᤃᤠ᤹ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤂᤧᤏᤧ᤹ ᤕᤢᤅᤧ᤹ᤀᤥ॥’
MAT 22:45 ᤍᤠᤀᤢᤍ ᤜᤠᤱᤅᤡᤸᤗᤧᤀᤣ ᤂᤢᤏᤧ᤹ ᤀᤠᤍᤠᤱᤒᤣ ᤗ᤹ᤖᤡᤰ ᤔᤧᤳᤋᤢᤏᤧ ᤑᤠ᤹ᤃᤪ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤐᤥ᤺ᤱᤒᤠᤒᤣ᥅”
MAT 22:46 ᤀᤠᤳᤋᤡᤴᤜᤠ᤹ᤖᤧᤀᤠᤱ ᤐᤠ᤺ᤴᤛᤢᤳᤗᤠᤎᤡᤰ ᤏᤥᤃᤵ ᤐᤡᤔᤠ ᤔᤧᤴᤇᤢᤰᤋᤢᤴ. ᤜᤧᤰᤁᤩᤠᤱ ᤂᤧᤴ ᤕᤧᤴᤏᤠᤱᤎᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠ᤺ᤴ ᤛᤣ᤺ᤴᤍᤥ᤺ᤔᤠ ᤀᤠ᤺ᤴᤇᤡᤱᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥
MAT 23:1 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤵᤔᤥ ᤁᤧᤈᤢᤶᤒᤠ ᤔᤏᤠᤜᤠ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ.
MAT 23:2 “ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤐᤥᤎᤰᤔᤠ ᤕᤢᤰ ᤔᤧᤃᤳᤋᤢ᤹॥
MAT 23:3 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤧᤶᤔᤧᤳᤋᤡ ᤁᤧᤶᤜᤢ᤹ᤖᤡᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ. ᤁᤖ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤀᤡᤛᤡ᤺ᤰᤃ ᤀᤠᤒᤠᤅᤣᤀᤠᤱ ᤔᤧᤴᤈᤥᤃᤢᤴᤗᤥ॥
MAT 23:4 ᤂᤧᤱᤜᤠ᤹ᤖᤧᤃ ᤁᤧᤗᤡ᤺ᤵᤐᤠ ᤁᤰ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤌᤡᤶᤜᤠ᤹ ᤔᤧᤈᤥᤃᤢᤀᤠᤱ ᤔᤏᤠᤜᤠ᤹ ᤔᤧᤃᤢ᤺ᤳᤋᤢᤛᤡ᤹. ᤁᤖ ᤁᤰ ᤕᤠᤱᤕᤠᤱ ᤗ᤹ᤖ ᤑᤠ᤹ᤀᤠᤱ ᤀᤠᤒᤠᤅᤣ ᤜᤢᤰᤆᤥᤎᤡᤰᤁᤡᤸᤗᤧᤀᤠᤱ ᤔᤧᤴᤇᤢᤛ᤻ᤛᤢᤴᤗᤥ॥
MAT 23:5 ᤂᤧᤱᤜᤠ᤹ᤖᤧᤃ ᤏᤢ᤺ᤒᤠ ᤐᤠ᤺ᤴᤜᤠ᤹ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱᤗᤰ ᤔᤧᤈᤥᤃᤢᤖᤥ–ᤂᤧᤱᤜᤠ᤹ᤖᤧ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱ ᤛᤠᤵᤔᤠ ᤕᤠᤰᤔᤏᤠᤒᤠ ᤔᤠᤰᤐᤧᤴᤇᤠᤵᤜᤠ᤹ ᤕᤶᤒ᤻ ᤕᤶᤒᤠ ᤔᤧᤈᤥᤃᤢᤀᤠᤱ ᤜᤢᤰᤁᤥ ᤏᤢ ᤋᤥᤘᤠᤒᤥ ᤔᤧᤓᤳᤇᤢ᤹. ᤜᤧᤰᤁᤩᤠᤱ ᤆᤠᤱ ᤋᤣ᤺ᤳᤋᤥ ᤁᤣ᤺ᤶᤒ᤻ ᤁᤣ᤺ᤶᤒᤠ ᤐᤥᤖᤥ᤺ᤰᤘᤠᤜᤠ᤹ ᤔᤧᤓᤳᤇᤢ᤹॥
MAT 23:6 ᤂᤧᤱᤜᤠ᤹ ᤛᤠᤓᤠᤱᤈᤠ ᤏᤢ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥
MAT 23:7 ᤜᤧᤰᤁᤩᤠᤱ ᤐᤠᤱᤈᤢᤶᤔᤥ ᤔᤏᤠᤜᤠ᤹ᤖᤧ ᤛᤣᤘᤠ ᤔᤧᤔᤧᤳᤋᤢᤛᤡᤒᤠ ᤏᤢ ᤛᤡᤰᤛᤠᤶᤒᤣ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤒᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥
MAT 23:8 ᤁᤖ ᤂᤡᤏᤡ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤛᤡᤰᤛᤠᤶᤒᤣ ᤗ᤹ᤖᤡᤰ ᤁᤧᤔᤧᤶᤔᤧᤳᤋᤡᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤛᤡᤰᤛᤠᤶᤒᤠᤴ ᤁᤧᤃᤳᤋᤢᤶᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤁ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ ᤜᤧᤰᤁᤣᤏᤡᤱᤗᤥ॥
MAT 23:9 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ‘ᤐᤠ᤺ᤀᤣ’ ᤗ᤹ᤖᤡᤰ ᤘᤣ᤹ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤏᤡᤱᤘᤠ᤹ᤑᤢᤐᤠ᤺ ᤁᤧᤃᤳᤋᤢᤶᤗᤥ. ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤖᤥ॥
MAT 23:10 ᤀᤠᤳᤋᤡᤴᤜᤠ᤹ᤖᤧᤀᤠᤱ ‘ᤛᤡᤰᤛᤠᤶᤒᤣ’ ᤗ᤹ᤖᤡᤰ ᤁᤧᤔᤧᤶᤔᤧᤳᤋᤡᤴᤗᤖᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤌᤡᤰᤗᤰ ᤛᤡᤰᤛᤠᤶᤒᤠᤴ ᤁᤧᤃᤳᤋᤢᤶᤗᤥ. ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ॥
MAT 23:11 ᤂᤡᤏᤡ᤹ ᤗᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤔᤏᤠ᤺ᤴ ᤜᤠᤖᤠ᤹ ᤂᤧᤴ ᤂᤡᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
MAT 23:12 ᤀᤠᤳᤋᤡᤸᤗᤧ ᤕᤶᤒᤠ ᤗᤧᤱᤛᤡᤱᤔᤠ ᤁᤥ᤺ᤳᤋᤢ᤹. ᤂᤧᤱᤃ ᤆᤢᤰᤛᤠ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤳᤋᤡᤴ ᤆᤢᤰᤛᤠ ᤗᤧᤱᤛᤡᤱ ᤂᤧᤱᤃ ᤕᤶᤒᤠ ᤐᤥ᤺ᤱᤗᤥ॥
MAT 23:13 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧ ᤁᤢᤗᤠᤶᤔᤡᤴ ᤘᤣ᤹ ᤔᤏᤠᤜᤠ᤹ᤖᤧ ᤗᤠᤃᤡ ᤁᤧᤛᤠᤰᤋᤢᤶᤔᤠᤱ ᤁᤧᤘᤕᤡ᤹ᤖᤥ. ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤂᤧᤵᤔᤥ ᤂᤡᤏᤡ᤹ ᤁᤧᤴᤗᤠᤛᤡᤴ ᤜᤧᤰᤁᤩᤠᤱ ᤗᤠ᤺ᤵᤔᤠ ᤁᤧᤃᤥ᤺ᤵᤐᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤗᤠ᤺ᤵᤔᤠ ᤁᤧᤶᤒᤠᤱᤄᤢᤶᤛᤡᤶᤔᤡᤴᤗᤥ॥
MAT 23:14 ((ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤔᤣᤔᤣᤍᤢᤔᤠᤜᤠ᤹ ᤀᤡᤱᤃᤧᤗᤧᤰᤋᤢᤶᤛᤡᤶᤔᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤁᤧᤏᤠᤵᤋᤢᤶᤛᤡᤶ. ᤁᤖ ᤏᤢ᤺ᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒ᤻ ᤁᤣ᤺ᤶᤒᤠ ᤋᤢᤘᤠ ᤁᤧᤈᤥᤃᤢᤶ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤂᤢᤶᤍᤡᤱᤅᤡᤱᤃ ᤛᤧᤰᤂᤠᤛᤠᤱ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤗᤥ॥))
MAT 23:15 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤌᤡᤰ ᤔᤏᤠ᤺ᤴ ᤕᤜᤢᤍᤡ ᤛᤠᤶᤕᤥᤀᤥ ᤋᤠ᤺ᤵᤔᤠ ᤑᤠ᤹ᤀᤠᤱ ᤗᤠᤈᤣ᤹ ᤏᤢ ᤘᤠᤜᤱ ᤂᤠᤖᤠᤰ ᤗᤠᤶᤍᤡ᤺ᤰ ᤁᤧᤈᤥᤃᤡᤖᤥ. ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤕᤜᤢᤍᤡ ᤛᤠᤶᤕᤥᤀᤥ ᤁᤧᤍᤠ᤺ᤖᤢᤶᤔᤠᤱᤃ ᤂᤧᤴ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤂᤧᤔᤠᤕᤱᤛᤱᤅᤥ ᤂᤢᤶᤍᤡᤱ ᤁᤧᤄᤥ᤺ᤒᤠ ᤁᤧᤈᤥᤃᤢᤶᤗᤥ॥
MAT 23:16 ᤂᤡᤏᤡ᤹ ᤔᤡᤰᤑ᤺ᤶᤒᤠ ᤗᤠᤶᤗᤥ᤺ᤒᤠᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤀᤠᤳᤋᤡᤴ ᤔᤠᤱᤜᤡᤶᤔᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱ ᤂᤧᤱᤃ ᤌᤣᤀᤠᤱ ᤔᤧ᤺ᤴᤗᤥ. ᤁᤖ ᤀᤠᤳᤋᤡᤴ ᤔᤠᤱᤜᤡᤶᤔᤥᤒᤠ ᤛᤠᤶᤔᤩᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱ ᤂᤧᤴ ᤁᤢᤒᤠ᤺ᤴᤏᤡᤸᤗᤧ ᤂᤣ᤺ᤱᤛᤡᤱᤗᤥ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶ॥
MAT 23:17 ᤂᤡᤏᤡ᤹ ᤔᤡᤰᤑ᤺ᤶᤒᤠ ᤀᤍᤱᤛᤣ᥄ ᤛᤠᤶᤔᤩᤠᤱᤅᤡᤴ ᤕᤶᤒᤠᤒᤡ ᤛᤠᤶᤔᤩᤠᤱᤅᤡᤴ ᤛᤣᤛᤣ ᤁᤧᤈᤥ᤺ᤰᤐᤠ ᤔᤠᤱᤜᤡᤶᤔᤡᤴ ᤕᤶᤒᤠᤒᤡ᥅
MAT 23:18 ᤂᤡᤏᤡ᤹ ᤀᤰᤂᤣᤗ᤹ᤖᤡᤰᤁᤠᤱ ᤁᤧᤒᤠ᤺ᤳᤋᤢᤶ. ‘ᤀᤠᤳᤋᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤌᤣᤀᤠᤱ ᤔᤧ᤺ᤴᤗᤥ. ᤁᤖ ᤀᤠᤳᤋᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥᤒᤠ ᤆᤥᤑᤠ᤹ᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤁᤢᤒᤠ᤺ᤴᤏᤡᤸᤗᤧ ᤂᤣ᤺ᤱᤛᤡᤱᤗᤥ॥’
MAT 23:19 ᤂᤡᤏᤡ᤹ ᤔᤡᤰᤑ᤺ᤶᤒᤠ ᤔᤏᤠᤛᤣ. ᤆᤥᤑᤠ᤹ᤀᤡᤴ ᤕᤶᤒᤠ ᤒᤡ ᤆᤥᤑᤠ᤹ᤀᤡᤴ ᤛᤣᤛᤣ ᤁᤧᤈᤥ᤺ᤰᤐᤠ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤴ ᤕᤶᤒᤠᤒᤡ᥅
MAT 23:20 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤴ ᤂᤧᤵᤔᤥ ᤁᤧᤖᤧᤰ ᤁᤧᤏᤧᤒᤠᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥
MAT 23:21 ᤜᤧᤰᤁᤩᤠᤱ ᤀᤠᤳᤋᤡᤴ ᤔᤠᤱᤜᤡᤶᤔᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤱᤃ ᤂᤧᤵᤔᤥ ᤁᤧᤘᤠ᤹ᤒᤠᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥
MAT 23:22 ᤀᤠᤳᤋᤡᤴ ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧᤴ ᤔᤠᤱᤜᤧᤰᤛᤡᤱ ᤂᤧᤱᤃ ᤏᤡᤱᤘᤠ᤹ᤑᤢ ᤕᤢᤰᤏᤠ ᤏᤢ ᤂᤧᤵᤔᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤠᤱ ᤔᤠᤱᤜᤧᤰᤛᤡᤱᤗᤥ॥
MAT 23:23 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ ᤀᤡᤰᤋᤠᤵᤐᤥᤗᤠᤶ ᤏᤠᤶᤛᤢᤏᤠ. ᤛ᤺ᤵᤑᤠ ᤏᤢ ᤜᤡᤶᤆᤧᤶᤓᤧᤴ ᤜᤧᤰᤋᤱᤒᤠ ᤔᤠᤖᤢᤰᤜᤠ᤹ᤖᤧᤴᤏᤠᤱ ᤌᤡᤒᤥ᤺ᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶ. ᤁᤖ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤁᤧᤴᤈᤥᤃᤢᤶᤛᤡᤶᤔᤡᤴ. ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤴᤍᤢᤰᤋᤢᤶᤛᤡᤶᤔᤡᤴ. ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤴ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤛᤠᤶᤕᤥᤌᤡᤶᤒᤠ ᤐᤠ᤺ᤴᤜᤠ᤹ ᤁᤧᤴᤏᤠ᤺ᤳᤋᤢᤶᤔᤡᤴᤗᤥ॥ ᤂᤡᤏᤡ᤹ᤃ ᤌᤡᤒᤥ᤺ᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶᤔᤡᤸᤗᤧ ᤁᤴ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥ᤺ᤰᤔᤠ. ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤢ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤗ᤹ᤒᤠ ᤛᤠᤶᤕᤥᤌᤡᤶᤔᤥᤒᤠ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ᤀᤠᤱ ᤆᤥᤃᤧᤶᤔᤧ᤹ᤀᤥ॥
MAT 23:24 ᤂᤡᤏᤡ᤹ ᤔᤡᤰᤑ᤺ᤶᤒᤠ ᤗᤠᤶᤗᤥ᤺ᤒᤠᤛᤣ. ᤂᤡᤏᤡ᤹ ᤛᤡᤰᤆᤠᤜᤠ᤹ ᤁᤧᤛᤠ᤺ᤰᤋᤢᤶ ᤁᤧᤗ᤺ᤳᤋᤢᤶᤛᤡᤶ. ᤁᤖ ᤀᤢᤔᤣ᤺ᤴ ᤁᤧᤗᤖᤢᤶᤗᤥ॥
MAT 23:25 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤂᤥᤷᤕᤠ᤺ᤴ ᤏᤢ ᤆᤧᤳᤌᤩᤠ᤺ᤴ ᤗᤠ᤺ᤰᤁᤠᤳᤗᤰ ᤘᤠᤃᤧᤜᤵᤋᤢᤶ. ᤁᤖ ᤛᤡᤃᤠᤱᤃ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥ᤺ᤰᤔᤠᤴ ᤏᤢ ᤔᤏᤠᤜᤠ᤹ ᤁᤧᤏᤠᤵᤋᤢᤶ ᤁᤧᤍᤠ᤺ᤖᤢᤶᤛᤡᤒᤠ ᤐᤠ᤺ᤴᤜᤠ᤹ᤖᤧ ᤁᤧᤍᤡᤶᤛᤡᤀᤠᤱ ᤁᤧᤘᤕᤡ᤹ᤖᤥ॥
MAT 23:26 ᤔᤡᤰᤑ᤺ᤶᤒᤠ ᤑᤖᤡᤛᤡᤛᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤥᤷᤕᤠ᤺ᤴ ᤁᤢᤛᤡᤃᤠᤱ ᤘᤠᤜᤵᤋᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤗᤠ᤺ᤰᤁᤠᤳᤋᤠᤱ ᤛᤣᤛᤣ ᤐᤥ᤺ᤱᤗᤥ॥
MAT 23:27 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤆᤢᤏᤡ ᤂᤠᤶᤔᤡᤸᤗᤧ ᤗᤧᤱᤔᤏᤠᤒᤠ ᤀᤡ᤺ᤵᤐᤢᤱ ᤁᤢᤀᤡᤛᤡ᤺ᤰ ᤁᤧᤈᤥᤃᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤥᤔᤧᤵᤔᤠᤸᤗᤧ ᤗᤠ᤺ᤰᤁᤠᤳᤗᤠᤶ ᤏᤢ᤺ᤒᤠ ᤌᤠ᤺ᤵᤛᤠᤱ ᤛᤡᤃᤠᤱᤃ ᤁᤧᤛᤡ᤺ᤒᤠ ᤔᤏᤠ᤺ᤸᤗᤧ ᤁᤢᤕᤧᤵ ᤏᤢ ᤁᤧᤈᤡ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤎᤡᤶ ᤆᤥ᤺ᤰᤗᤥ॥
MAT 23:28 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤔᤏᤠᤜᤠ᤹ᤏᤢ ᤗᤠ᤺ᤰᤁᤠᤳᤗᤠᤶ ᤛᤠᤶᤕᤥᤏᤡᤒᤠ ᤁᤧᤎᤠᤒᤡᤛᤠᤱ ᤛᤡᤃᤠᤱᤃ ᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤏᤢ ᤋᤠᤵᤑᤧ᤺ᤶᤒᤠ ᤁᤧᤈᤥᤃᤡ᤹ᤖᤥ॥
MAT 23:29 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤔᤧᤛᤧᤖᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤀᤡᤵᤐᤢᤱᤅᤡᤴ ᤁᤧᤈᤥᤃᤢᤶ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤗᤢ᤺ᤴᤍᤢᤛᤡᤒᤠ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤵᤐᤢᤱᤅᤡᤴ ᤁᤧᤛᤠ᤺ᤰᤋᤢᤶ ᤁᤧᤈᤥᤃᤢᤶᤗᤥ॥
MAT 23:30 ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤶ. ‘ᤀᤠᤏᤡᤃᤧ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤶᤔᤥ ᤀᤠᤏᤡᤃᤧ ᤘᤕᤡᤃᤧᤸᤗᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤛᤧᤵᤔᤠᤛᤡ ᤆᤢᤶ ᤔᤧᤔᤧᤳᤋᤢᤶᤛᤡᤶᤒᤧᤶᤒᤠ ᤘᤕᤧᤖᤥ॥’
MAT 23:31 ᤜᤧᤰᤁᤣᤗ᤹ᤖᤡᤰ ᤁᤧᤒᤠ᤺ᤳᤋᤢᤶᤔᤡᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤀᤠᤏᤡᤃᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤔᤧᤴᤇᤠ᤹ᤛᤡᤃᤧ ᤑᤠ᤹ᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤢᤶᤗᤥ॥
MAT 23:32 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤔᤧᤜᤣ᤺ᤰᤋᤢᤒᤠ ᤗᤠᤕᤥ᤺ᤴ ᤂᤡᤏᤡ᤹ ᤁᤧᤳᤋᤧᤶ ᤛᤢᤖᤧᤶᤔᤧ᤹ᤀᤥ᥄
MAT 23:33 ᤀᤛᤣ᤺ᤰᤐᤠᤛᤣ. ᤂᤡᤏᤡ᤹ ᤋᤠᤱᤒᤢ ᤀᤛᤣ᤺ᤰᤁᤡᤸᤗᤧ ᤁᤢᤛ᤻ᤛᤠ᤺ᤛᤣ. ᤀᤠᤰᤂᤣᤗ᤹ᤖᤡᤰ ᤂᤧᤔᤠᤕᤱᤛᤱᤅᤥᤒᤠ ᤂᤢᤶᤍᤡᤱᤗᤠᤶ ᤁᤧᤒᤡᤴᤍᤡᤒᤠᤒᤣ᥅
MAT 23:34 ᤜᤧᤰᤁᤣ᤺ᤸᤗᤧ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤋᤠ᤺ᤴᤍᤡ ᤂᤡᤏᤡ᤹ᤀᤥ ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹. ᤛᤡᤰᤁᤢᤶᤛᤠᤒᤠ ᤔᤏᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤐᤠᤱᤄᤢᤱᤛᤡᤱᤗᤥ॥ ᤂᤧᤱᤜᤠ᤹ᤀᤥ ᤁᤢᤓᤠ ᤂᤡᤏᤡ᤹ ᤁᤧᤛᤧᤖᤢᤶᤛᤡᤶ. ᤁᤢᤓᤠ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤛᤡᤶ. ᤜᤧᤰᤁᤩᤠᤱ ᤁᤢᤓᤠᤃ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤋᤧ᤺ᤶᤓᤢᤰ ᤁᤧᤕᤠᤰᤋᤢᤶᤛᤡᤶᤔᤠᤱ ᤕᤧᤰᤕᤰ ᤌᤵᤔᤠ ᤏᤡᤱᤄᤢᤶ ᤁᤧᤔᤧᤳᤋᤢᤶᤛᤡᤶᤗᤥ॥
MAT 23:35 ᤜᤧᤰᤁᤣᤗ᤹ᤖᤡᤰ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤛᤧᤖᤢᤛᤡᤒᤠ ᤁᤧᤖᤧᤰ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤜᤠᤒᤡᤗᤧᤴᤏᤠᤱᤎᤥ ᤔᤠᤱᤜᤡᤶ ᤏᤢ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴ ᤗᤢᤶᤔᤥ ᤁᤧᤛᤧᤖᤢᤶᤒᤠ ᤒᤣᤖᤣᤁᤩᤠᤜᤗᤧ ᤁᤢᤛ᤻ᤛᤠ᤺ ᤈᤁᤖᤡᤕᤠ ᤌᤠᤖᤡᤰᤐᤠ ᤂᤢᤏᤡ᤹ ᤔᤠᤰᤂᤡ᤹ᤀᤡᤸᤗᤧ ᤂᤡᤏᤡ᤹ ᤁᤧᤍᤧᤳᤋᤡᤖᤥ॥
MAT 23:36 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤏᤡᤸᤗᤧᤴ ᤀᤠᤵᤋᤡᤰᤁᤡᤴ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤛᤶᤍᤠᤱ ᤌᤠ᤺ᤖᤥ॥”
MAT 23:37 “ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤂᤡᤏᤡ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤖᤢᤶᤛᤡᤶ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤥ ᤐᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹ ᤗᤢᤱᤅᤡᤸᤗᤧ ᤁᤧᤒ᤺ᤳᤋᤢᤶᤛᤡᤶᤗᤥ॥ ᤀᤠᤰᤂᤧᤴ ᤗᤧᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤘᤠᤔᤠ᤺ᤵᤔᤠᤸᤗᤧ ᤘᤠᤈᤩᤠ᤺ᤰᤜᤠ᤹ ᤁᤢᤵᤋᤢᤛᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤛᤠ᤺ᤜᤠ᤹ ᤛᤢᤶᤔᤠᤛᤡ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤂᤡᤏᤡ᤹ ᤁᤧᤴᤍᤧᤴᤍᤡᤴᤗᤥ॥
MAT 23:38 ᤀᤥᤔᤧᤳᤋᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤔᤡᤴ ᤔᤏᤠ ᤔᤧ᤺ᤴᤏᤣ ᤗᤠᤶᤎᤣ᤺ᤵ ᤆᤡᤀᤧᤳ ᤀᤧᤳᤋᤢ᤹ᤖᤥ॥
MAT 23:39 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ‘ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠᤖᤥ’ ᤗ᤹ᤖᤡᤰ ᤁᤧᤶᤒᤠ᤺ᤳᤋᤢᤶᤔᤡᤴᤗ ᤌᤠᤖᤡᤰ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ॥”
MAT 24:1 ᤕᤧᤛᤢ᤺ᤴ ᤔᤠᤱᤜᤡᤶᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧᤴ ᤏᤢ᤺ᤒ᤻ ᤏᤢ᤺ᤒᤠ ᤜᤡᤶᤜᤠ᤹ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤔᤠ ᤑᤠ᤹ᤀᤠᤱ ᤁᤢᤒᤣᤛᤠᤱ ᤔᤧᤍᤩᤧ॥
MAT 24:2 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤁᤧᤏᤡ᤺ᤛᤢᤶᤒᤠ ᤜᤡᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤛᤧᤰᤂᤠ ᤐᤠ᤺ᤴ ᤔᤧᤳᤏᤡᤱ. ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤌᤠᤖᤡᤰ ᤁᤱᤜᤠ᤹ ᤁᤧᤖᤧᤰ ᤔᤧᤕ᤺ ᤔᤧᤒᤣ᤺ᤰᤗᤥ॥”
MAT 24:3 ᤕᤠᤱᤛᤡ ᤕᤧᤛᤢ᤺ᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤁᤴ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱᤒᤠᤒᤣ᥅ ᤂᤧᤏᤧ᤹ ᤁᤧᤕᤢ᤺ᤔᤠ ᤕᤧᤶᤔᤡᤴ ᤏᤢ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤧᤶᤔᤡᤸᤗᤧ ᤁᤢᤏᤢᤵᤔᤠ ᤔᤡᤰᤛᤣ᤺ᤴᤏᤡᤴ ᤀᤠᤔᤧᤳᤋᤧ᤹ᤀᤥ॥”
MAT 24:4 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤴᤗᤖᤥ.
MAT 24:5 ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤀᤡᤱᤃᤠ᤹ ᤀᤠᤔᤡᤱᤅᤥ ᤔᤧᤍᤠᤖᤥ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
MAT 24:6 ᤂᤡᤏᤡ᤹ᤃ ᤌᤱ ᤏᤢ ᤌᤱᤜᤠ᤹ᤖᤧᤴ ᤜᤕᤱᤁᤡᤸᤗᤡᤱᤜᤠ᤹ ᤁᤧᤄᤧᤵᤛᤢᤶ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥ᤺ᤱᤔᤠᤀᤣ ᤐᤥ᤺ᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥
MAT 24:7 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥ᤺ᤰ. ᤕᤖᤡᤰ ᤋᤧᤴᤏᤥ ᤕᤶᤒᤠ ᤛᤠᤰ ᤐᤥ᤺ᤰ ᤜᤧᤰᤁᤩᤠᤱ ᤗᤢᤵᤗᤡ ᤌᤠᤱᤗᤥ॥
MAT 24:8 ᤁᤱᤃ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣᤜᤠ᤹ᤖᤧ ᤁᤢᤜᤣ᤺ᤰᤛᤡᤱᤔᤠᤖᤰᤗᤥ॥
MAT 24:9 ᤜᤧᤰᤁᤩᤠᤱ ᤂᤡᤏᤡ᤹ᤃ ᤔᤏᤠᤜᤠ᤹ᤖᤧ ᤁᤧᤶᤍᤧᤶᤛᤡᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹. ᤜᤧᤰᤁᤩᤠᤱ ᤁᤧᤶᤛᤧᤖᤡ᤹ᤖᤥ॥ ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤖᤥ॥
MAT 24:10 ᤂᤧᤴ ᤕᤧᤶᤔᤥ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤗᤠᤶ ᤔᤧᤏᤢ᤺ᤱᤅᤠᤱ ᤀᤡᤱᤔᤧᤗᤧᤰᤛᤡᤱᤅᤠᤱ ᤔᤧᤈᤡ᤺ᤳᤇᤡᤱᤗᤥ॥
MAT 24:11 ᤜᤧᤰᤁᤣᤗ᤹ᤖᤡᤰ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
MAT 24:12 ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤐᤥ᤺ᤖ ᤐᤣ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤱᤘᤠ᤹ᤀᤥᤏᤢ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤔᤧᤗᤧᤖᤢᤖᤥ॥
MAT 24:13 ᤁᤖ ᤀᤠᤳᤋᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤌᤖᤢ᤹. ᤂᤧᤸᤗᤧᤀᤣ ᤛᤧᤴᤗᤵ ᤂᤥ᤺ᤛᤢ᤹ᤖᤥ॥
MAT 24:14 ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤧᤴ ᤛᤢᤏᤠᤀᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤠᤖᤠᤰ ᤀᤡᤱᤓᤥ᤹᤺. ᤜᤧᤰᤁᤩᤠᤱ ᤁᤢᤏᤢᤵᤔᤠᤴ ᤋᤠ᤺ᤖᤥ॥
MAT 24:15 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤍᤠᤏᤡᤀᤣᤗᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤧᤗᤧ᤺ᤱᤒᤠᤴ ᤔᤠᤱᤜᤡᤶᤔᤥᤒᤠ ᤛᤣᤛᤣ ᤍᤧᤴᤏᤥ ᤕᤧᤵᤐᤠ ᤁᤧᤏᤡ᤺ᤛᤢᤶᤗᤥ॥” (ᤜᤠᤖᤠ᤹ ᤁᤧᤏᤡ᤺ᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ᥄)
MAT 24:16 “ᤂᤧᤴ ᤕᤧᤶᤔᤥ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤖᤥ॥
MAT 24:17 ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶ ᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ॥
MAT 24:18 ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠᤴ ᤜᤠᤖᤠ᤹ ᤁᤢᤛᤢᤱᤄᤣ᤺ᤰᤘᤠ ᤗᤠ᤺ᤛᤧ ᤁᤢᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥
MAT 24:19 ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤅᤡ᥄
MAT 24:20 ᤆᤢᤱᤘᤠ᤺ᤶᤔᤠ ᤕᤧᤶᤔᤥ ᤏᤢ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤂᤧᤳᤇᤡᤱᤔᤠ ᤔᤧᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥
MAT 24:21 ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣ᤺ᤴ ᤋᤠ᤺ᤖᤥ॥ ᤀᤰᤋᤱᤒᤠ ᤋᤢᤰᤂᤣ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤔᤧᤶᤒᤥ᤺ᤱᤅᤣ ᤘᤠ᤹. ᤜᤧᤰᤁᤩᤠᤱ ᤋᤠ᤺ᤴᤍᤡ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤒᤥ᤺ᤱᤏᤧᤸᤗᤥ॥
MAT 24:22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤔᤧᤈᤥᤃᤢᤴᤏᤡᤸᤗᤧᤃ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤜᤡᤱᤔᤠ ᤔᤧᤴᤇᤢᤰᤋᤧᤴᤒᤠᤖᤥ॥ ᤁᤖ ᤂᤢᤏᤧ᤹ ᤛᤣᤃᤢᤛᤡᤒᤠᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤐᤥ᤺ᤰᤂᤧᤒᤠᤖᤥ॥
MAT 24:23 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤵᤔᤥ ᤘᤠ᤹’ ᤀᤡᤃᤪ ‘ᤂᤢᤏᤧ᤹ ᤂᤧᤵᤔᤥ ᤘᤠ᤹’ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤍᤠ᤺ᤸᤗᤧ ᤏᤛᤠ᤺ᤴ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥
MAT 24:24 ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤐᤠ ᤂᤪᤡᤛ᤻ᤋᤜᤠ᤹ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤐᤕᤶ ᤕᤶᤒᤠ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤂᤢᤏᤡ᤹ ᤛᤢᤰᤛᤢᤰ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
MAT 24:25 ᤀᤥᤔᤧᤳᤋᤧᤶᤔᤧ᤹. ᤁᤴ ᤐᤠ᤺ᤴᤜᤠ᤹ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥
MAT 24:26 ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤂᤪᤡᤛ᤻ᤋᤧᤱᤃ ᤕᤧ᤺ᤱᤄᤠᤍᤧᤴᤏᤥ ᤘᤠ᤹’ ᤁᤧᤶᤔᤧᤳᤋᤡᤃᤪ. ᤀᤥᤔᤧᤳᤇᤧ ᤂᤧᤵᤔᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤀᤡᤃᤪ ‘ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤁᤵᤔᤥ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤘᤠ᤹’ ᤁᤧᤶᤔᤧᤳᤋᤡᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
MAT 24:27 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤁᤧᤖᤧᤰ ᤋᤠᤱᤛᤠᤰᤐᤧᤴ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤥ॥
MAT 24:28 ᤀᤠᤳᤋᤥ ᤛᤡᤏᤢ᤺ᤴ ᤏᤧ᤹. ᤂᤧᤵᤔᤥᤀᤣ ᤁᤡᤍᤠᤒᤠᤜᤠ᤹ᤀᤠᤱ ᤔᤧᤈᤢᤶᤗᤥ॥”
MAT 24:29 “ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣ᤺ᤴ ᤀᤣᤃᤠᤱ ᤂᤡᤔᤥ ‘ᤏᤠᤶᤔᤡᤴ ᤂᤠᤔᤠᤰᤗᤥ. ᤗᤠᤒᤠᤸᤗᤧ ᤀᤥ᤺ᤳᤋᤡ ᤔᤧᤒᤡᤖᤢᤴᤗᤥ. ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤔᤰᤔᤧᤎᤠ᤺ᤖᤥ. ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤔᤧᤕᤱᤗᤥ॥’
MAT 24:30 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤥ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤸᤗᤧᤴ ᤔᤡᤰᤛᤣ᤺ᤴᤏᤡᤴ ᤌᤠ᤺ᤵᤐᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤣᤖᤡᤱ ᤔᤧᤎᤰᤗᤥ॥ ᤂᤧᤱᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤴ ᤋᤠᤱᤛᤠᤰᤐᤥ ᤔᤢᤰᤛᤠᤶ ᤜᤧᤰᤁᤩᤠᤱ ᤐᤕᤶ ᤔᤡᤔᤡᤍᤡᤱᤅᤡᤴᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤖ ᤐᤵᤐᤠ ᤔᤧᤏᤡ᤺ᤛᤢ᤹ᤖᤥ॥
MAT 24:31 ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤃᤢᤛᤡᤒᤠ ᤔᤏᤠᤜᤠ᤹ ᤛᤢᤶᤛᤧ ᤁᤧᤖᤧᤰ ᤐᤡᤛᤠᤱᤗᤠᤶ ᤋᤠᤱᤛᤠᤰᤐᤠᤸᤗᤧ ᤂᤥ᤺ᤵᤋᤢᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤠ᤺ᤰᤋᤢᤒᤠᤀᤥ ᤌᤢᤳᤋᤢᤖᤡ᤺ᤵᤐᤠᤸᤗᤧᤴ ᤐᤕᤶ ᤀᤡᤰᤗᤠᤏᤢ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢ᤺ᤛᤢᤛᤡ᤹ᤖᤥ॥”
MAT 24:32 “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ. ᤂᤧᤸᤗᤧ ᤁᤢᤒᤥᤖᤠ᤺ᤰᤜᤠ᤹ᤗᤠᤶᤒᤠ ᤁᤢᤛᤱ ᤁᤢᤏ᤺ᤰᤜᤠ᤹ ᤗ᤺ᤶᤔᤠ ᤜᤣ᤺ᤰᤁᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖᤥ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ॥
MAT 24:33 ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
MAT 24:34 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡ᤺ᤏᤧᤴ॥
MAT 24:35 ᤋᤠᤱᤛᤠᤰᤐᤧᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣ᤺ᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥”
MAT 24:36 “ᤀᤠᤸᤗ ᤂᤧᤴ ᤕᤧᤶ ᤏᤢ ᤕᤧᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱ ᤑᤠ᤹ᤀᤠᤱ ᤀᤠᤳᤋᤡᤸᤗᤧᤀᤠᤱ ᤔᤧᤏᤡ᤺ᤛᤢᤴ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠ ᤏᤢ ᤏᤡᤱᤘᤠ᤹ᤑᤢᤛᤠ᤺ᤸᤗᤧᤀᤠᤱ ᤔᤧᤏᤡ᤺ᤛᤢᤴᤗᤥ. ᤁᤖ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡ᤺ᤛᤢ᤹ᤖᤥ॥
MAT 24:37 ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥ᤺ᤱᤗᤥ॥
MAT 24:38 ᤏᤢᤜᤠ᤺ᤴ ᤘᤠᤗᤠᤎᤠᤀᤥ ᤗᤠ᤺ᤛᤧᤒᤠ ᤕᤧᤶᤔᤥ ᤌᤠᤖᤡᤰᤁᤣ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥
MAT 24:39 ᤜᤧᤰᤁᤩᤠᤱ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤏᤡ᤺ᤶᤔᤠ ᤛᤡ᤺ᤔᤠᤏᤢ᤺ᤸᤗᤧ ᤋᤃᤡ ᤌᤣ ᤐᤥ᤺ᤱ ᤁᤧᤗ᤹ᤒᤠᤴ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴᤏᤠᤱ ᤐᤥ᤺ᤱᤗᤥ॥
MAT 24:40 ᤂᤧᤴ ᤕᤧᤶᤔᤥ ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤢᤖ ᤕᤠᤰᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤘᤠ᤹ ᤗᤠ᤺ᤳᤗᤥ॥
MAT 24:41 ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤕᤢᤱ ᤗᤠ᤺ᤳᤗᤥ॥
MAT 24:42 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤍᤠᤱᤒᤠᤴ ᤀᤠᤵᤑᤠᤸᤗᤧ ᤕᤢ᤺ᤒᤣ ᤁᤧᤗ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤴᤗᤥ॥
MAT 24:43 ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤀᤠᤳᤋᤡᤴ ᤕᤧᤶᤔᤥ ᤋᤠ᤺ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥ᤺ᤛᤢᤏᤧ ᤑᤠ᤹ᤃᤪ ᤂᤧᤸᤗᤧ ᤔᤧᤴᤀᤡᤶᤔᤣ ᤜᤡᤶᤔᤡᤴ ᤁᤥᤛᤢᤀᤠᤱ ᤂᤧᤴ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
MAT 24:44 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤴ ᤕᤢ᤺ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢ᤺ᤖᤥ॥”
MAT 24:45 “ᤀᤠᤳᤋᤡᤴ ᤛᤣᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥ᤺ᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢᤀᤠᤱ ᤂᤧᤸᤗᤧ ᤘᤣ᤹ ᤛᤣᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ-ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥
MAT 24:46 ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤣᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥
MAT 24:47 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤣᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥
MAT 24:48 ᤁᤖ ᤂᤧᤴ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤠᤸᤗᤧ ᤁᤢᤏᤡᤱᤘᤠ᤹ᤒᤥ ᤀᤠᤴᤍᤠᤱᤒᤠᤴ ᤔᤠ᤺ᤱᤄᤠ ᤐᤣᤀᤠᤱ ᤘᤠ᤹.
MAT 24:49 ᤜᤠᤖᤠ ᤔᤧᤍᤠᤏᤧᤴ ᤗ᤹ᤀᤠᤱ ᤁᤢᤴᤈᤢᤶ ᤛᤣᤘᤠᤖᤥᤒᤠᤜᤠ᤹ ᤜᤡᤵᤋᤢᤛᤡᤀᤠᤱ ᤌᤡ᤺ᤔᤛᤠᤱᤜᤠ᤹ᤏᤢ ᤆᤠᤔᤠ-ᤌᤢᤱᤔᤠ ᤜᤣ᤺ᤰᤋᤢ᤹ᤏᤧ ᤑᤠ᤹ᤃᤪ
MAT 24:50 ᤂᤧᤸᤗᤧ ᤁᤢᤴᤍᤠᤱᤒᤠᤴ ᤋᤠ᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴᤒᤠ ᤕᤧᤶᤔᤥ ᤁᤢᤴᤍᤠᤱᤒᤠᤴ ᤋᤠ᤺ᤖᤥ॥
MAT 24:51 ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤋᤢᤀᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤏᤢ ᤛᤥᤖᤡᤰ ᤂᤢᤶᤍᤡᤱ ᤐᤡᤖᤢ᤹ᤖᤥ॥ ᤂᤧᤵᤔᤥᤃ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥”
MAT 25:1 ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤗᤧᤴ ᤏᤠᤗᤡᤛᤠᤱᤅᤡᤴ ᤗᤠᤶᤗᤰᤛᤧ ᤛᤣᤔᤡ ᤁᤧᤒᤱᤔᤠᤀᤠᤱ ᤁᤧᤒᤣ᤺ᤰᤔᤠ ᤌᤡᤒᤥ᤺ᤱ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤔᤧᤘᤕᤧ॥
MAT 25:2 ᤂᤧᤱᤜᤠ᤹ᤀᤥ ᤅᤠᤛᤡ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠ ᤏᤢ ᤅᤠᤛᤡ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ ᤔᤧᤘᤕᤧᤖᤥ॥
MAT 25:3 ᤂᤧᤴ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠ ᤔᤧᤴᤇᤡᤕᤠ᤹ᤜᤠ᤹ᤖᤧ ᤛᤣᤔᤡ᤺ᤱᤃ ᤔᤧᤍᤣ᤹ᤖᤢ ᤁᤖ ᤏᤡ᤺ᤱᤃᤣ᤺ᤴ ᤔᤧᤴᤕᤠᤱᤛᤡᤱᤅᤡᤴᤗᤥ॥
MAT 25:4 ᤁᤖ ᤂᤧᤴ ᤅᤠᤛᤡ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ᤖᤧᤃ ᤛᤣᤔᤡ᤺ᤴ ᤏᤢ ᤏᤡ᤺ᤱᤃᤣ᤺ᤴ ᤁᤠᤷᤕᤥᤔᤠᤜᤠ᤹ᤀᤥ ᤔᤧᤕᤠᤱᤛᤡᤱᤗᤥ॥
MAT 25:5 ᤜᤧᤰᤁᤩᤠᤱ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤗᤧᤴ ᤏᤠᤗᤡᤛᤠᤱᤅᤡᤴ ᤛᤢ᤺ᤛᤧᤀᤠᤱ ᤜᤠᤖᤠ ᤔᤧᤍᤩᤧᤏᤧᤴᤏᤡᤸᤗᤧᤃ ᤂᤧᤱᤜᤠ᤹ ᤀᤡᤳᤌᤥ᤹ᤘᤠ ᤗᤥ᤺ᤔᤠ ᤔᤧᤜᤣ᤺ᤰᤋᤧᤀᤠᤱ ᤔᤧᤀᤡᤵᤛᤧᤖᤥ॥
MAT 25:6 ᤛᤧᤳᤗᤢᤶᤓᤰᤋᤧᤸᤗᤧ ᤋᤧᤴᤎᤠᤶᤃᤧᤴ ᤏᤠᤗᤡᤛᤠᤱᤅᤡᤴ ᤂᤠ ᤋᤩᤧᤖᤥ. ᤁᤢᤍᤢᤶᤛᤧ ᤗ᤺ᤴᤍᤧᤶᤔᤧ᤹ᤀᤥ ᤗ᤹ᤖᤡᤰ ᤐᤠ᤺ᤵᤔᤏᤠᤒᤠ ᤀᤡᤰᤗᤠ᤺ᤴ ᤔᤧᤄᤧᤵᤛᤢ.
MAT 25:7 ᤜᤧᤰᤁᤩᤠᤱ ᤂᤧᤴ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤔᤧᤒᤥᤃᤧᤀᤠᤱ ᤂᤢᤏᤡ᤹ ᤛᤣᤔᤡ᤺ᤴ ᤔᤧᤜᤠ᤺ᤴᤍᤢᤖᤥ॥
MAT 25:8 ᤂᤧᤴ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠᤜᤠ᤹ᤖᤧ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ ᤔᤧᤔᤧᤳᤋᤢᤛᤡ. ‘ᤀᤠᤏᤡᤃᤧᤀᤠᤱ ᤁᤢᤓᤠ ᤏᤡ᤺ᤱᤃᤣ᤹ ᤀᤠᤒᤡᤖᤧ᤹ᤏᤠ. ᤀᤠᤏᤡᤃᤧ ᤛᤣᤔᤡ᤺ᤱᤃ ᤛᤡ᤺ᤔᤠ ᤀᤡ᤺ᤳᤋᤧᤖᤥ॥’
MAT 25:9 ᤂᤧᤴ ᤛᤡᤰᤁᤢᤶᤛᤠᤔᤠ ᤔᤧᤴᤇᤡᤕᤠ᤹ᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢᤛᤡ. ‘ᤔᤧ᤺ᤴᤗᤥ. ᤀᤠᤏᤡ᤹ ᤁᤧᤖᤧᤰ ᤁᤧᤍᤧᤰᤐᤠ ᤏᤡ᤺ᤱᤃᤣ᤹ᤃ ᤔᤧᤃᤳᤋᤢᤶᤒᤧᤴᤗᤥ॥ ᤏᤡ᤺ᤱᤃᤣ᤹ ᤁᤧᤛᤱᤒᤠᤜᤠ᤹ᤖᤥ ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤀᤡᤅᤧᤶᤔᤧ᤹ᤀᤥ॥’
MAT 25:10 ᤁᤖ ᤂᤧᤱᤜᤠ᤹ ᤏᤡ᤺ᤱᤃᤣ᤹ ᤀᤡᤱᤛᤧ ᤔᤧᤒᤣᤖ ᤔᤧᤒᤳᤇᤧᤸᤗᤧᤀᤣ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤖᤧ ᤏᤠᤗᤡᤛᤠᤱᤅᤡᤴ ᤁᤧᤖᤧ ᤋᤩᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤕᤠᤖᤡᤵ ᤁᤧᤒᤥ᤺ᤱᤔᤠ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤂᤢᤏᤧ᤹ᤏᤢ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤗᤠ᤺ᤛᤧᤀᤠᤱ ᤗᤠᤶᤎᤣ᤺ᤵᤐᤧᤴ ᤛᤢᤒᤧᤖᤥ॥
MAT 25:11 ᤕᤠᤱᤛᤡ ᤂᤧᤴ ᤁᤢᤏᤡᤛᤡ᤺ᤰ ᤁᤧᤜᤥ᤺ᤵᤔᤠ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤜᤠ᤹ ᤔᤧᤃᤧᤖᤧ ᤔᤧᤍᤩᤧᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧ. ‘ᤍᤠᤱᤒᤣ. ᤍᤠᤱᤒᤣ. ᤀᤠᤏᤡᤃᤧ ᤗᤠᤃᤡᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤍᤧ ᤀᤠᤒᤡᤖᤧ᤹ᤏᤠ᥄’
MAT 25:12 ᤁᤖ ᤂᤧᤴ ᤏᤠᤗᤡᤛᤠᤱᤅᤡᤸᤗᤧ ᤏᤥᤃᤵ ᤐᤡᤖᤢᤛᤡ. ‘ᤀᤡᤱᤃᤠ᤹ ᤛᤧᤰᤂᤠᤛᤠᤱ ᤁᤢᤛᤡᤱ ᤔᤧᤏᤡ᤺ᤳᤏᤡᤱᤅᤡᤴᤗᤥ॥’
MAT 25:13 ᤂᤧᤸᤗᤧ ᤆᤥᤃᤢᤸᤗᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤢ᤺ᤔᤠ ᤕᤧᤶᤔᤡᤴ ᤁᤧᤴᤏᤡ᤺ᤛᤢᤶᤔᤡᤴᤗᤥ॥”
MAT 25:14 ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥ᤺ᤰ–ᤔᤠ᤺ᤱᤄᤠ ᤗᤠᤶᤍᤡ᤺ᤰᤁᤥ ᤁᤧᤒᤣ᤺ᤰᤐᤠᤖ ᤁᤧᤒᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤁᤢᤕᤠᤱᤅᤡᤴ ᤑᤥ᤺ᤔᤠ ᤑᤠ᤹ᤀᤠᤱ ᤐᤡᤖᤢᤛᤡᤖᤥ॥
MAT 25:15 ᤂᤧᤸᤗᤧ ᤌᤡᤰᤁᤡᤴ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ. ᤘᤣ᤹ᤛ᤻ᤔᤠᤴ ᤜᤧᤴᤇᤡᤱ ᤏᤧᤳᤇᤡ (᥈᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ. ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤧᤴ ᤜᤧᤴᤇᤡᤱ ᤌᤡᤰ (᥇᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ᤺ᤴ ᤕᤠᤱ ᤁᤧ᤺ᤔᤠ ᤔᤧᤗᤧᤛ᤻ᤛᤢᤒᤠ ᤁᤢᤀᤡᤛᤡ᤺ᤰ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤠ᤺ᤱᤄᤠ ᤗᤠᤶᤍᤡ᤺ᤰᤁᤥ ᤐᤣᤖᤥ॥
MAT 25:16 ᤂᤧᤴ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥ᤺ᤒᤠ ᤛᤣᤘᤠᤖᤥᤒᤠᤴ ᤂᤡᤔᤥ ᤐᤣᤀᤠᤱ ᤂᤧᤴ ᤕᤠᤱᤅᤡᤴ ᤁᤧ᤺ᤛᤢᤀᤠᤱ ᤘᤣ᤹ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤌᤃᤢᤖᤥ॥
MAT 25:17 ᤜᤧᤰᤁᤣᤗ᤹ᤖᤡᤰᤁᤣ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥᤒᤧᤸᤗᤧᤀᤠᤱ ᤘᤣ᤹ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤌᤃᤢ॥
MAT 25:18 ᤁᤖ ᤜᤧᤴᤇᤡᤱ ᤌᤡᤰᤗᤰ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥ᤺ᤒᤠ ᤛᤣᤘᤠᤖᤥᤒᤠᤱᤃ ᤐᤣᤀᤠᤱ ᤂᤠᤶᤔᤡᤴ ᤋᤕᤢᤀᤠᤱ ᤁᤢᤴᤍᤠᤱᤒᤠᤸᤗᤧ ᤁᤢᤕᤠᤱᤅᤡᤴ ᤂᤧᤵᤔᤥ ᤗᤢᤵᤋᤢ ᤏᤧᤛ᤻ᤛᤢᤖᤥ॥
MAT 25:19 ᤕᤖᤡᤰ ᤕᤧᤶ ᤀᤣᤃᤠᤱ ᤂᤢᤏᤡ᤹ ᤍᤠᤱᤒᤠᤴ ᤏᤢ᤺ᤰᤂᤧ ᤋᤩᤧᤀᤠᤱ ᤁᤢᤛᤣᤘᤠᤖᤥᤒᤠᤜᤠ᤹ ᤁᤢᤕᤠᤱᤅᤡᤸᤗᤧᤴ ᤂᤠᤖᤠ᤺ᤳ ᤏᤠ᤺ᤰᤋᤢᤛᤡ॥
MAT 25:20 ᤂᤧᤴ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥ᤺ᤒᤠ ᤛᤣᤘᤠᤖᤥᤒᤧᤸᤗᤧ ᤘᤣ᤹ ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤋᤠᤖᤢᤀᤠᤱ ᤀᤰᤂᤣ ᤔᤧᤳᤋᤢ. ‘ᤀᤠᤍᤠᤱᤒᤣ. ᤜᤧᤴᤇᤡᤱ ᤅᤠᤛᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤒᤡᤖᤠᤱᤅᤠᤱ ᤘᤕᤧ. ᤁᤖ ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤘᤣ᤹ ᤜᤧᤴᤇᤡᤱ ᤅᤠᤛᤡ ᤌᤃᤢᤱ ᤐᤡᤏᤧᤀᤠᤱ ᤘᤠ᤹ᤖᤥ॥’
MAT 25:21 ᤁᤢᤴᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤏᤢ᤺ᤒᤠ ᤏᤢ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤛᤣᤘᤠᤖᤥᤒᤠᤀᤣ. ᤏᤢ᤺ᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ᤃ ᤔᤡᤛᤠᤰ ᤕᤠᤱᤅᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧ. ᤀᤠᤸᤗ ᤕᤖᤡᤰ ᤐᤠ᤺ᤴᤏᤥ ᤕᤢᤰ ᤐᤡᤏᤧᤖᤥ॥ ᤀᤠᤸᤗ ᤀᤠᤏᤡ᤹ ᤛᤥᤖᤡᤰ ᤛ᤺ᤳᤋᤡᤖᤥ᥄’
MAT 25:22 ᤜᤧᤰᤁᤩᤠᤱ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥ᤺ᤒᤠ ᤁᤢᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤀᤡᤱᤃᤠ᤹ ᤜᤧᤴᤇᤡᤱ ᤏᤧᤳᤇᤡ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤒᤡᤖᤠᤱᤅᤠᤱ ᤘᤕᤧ. ᤁᤖ ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤘᤣ᤹ ᤜᤧᤴᤇᤡᤱ ᤏᤧᤳᤇᤡ ᤌᤃᤢᤱ ᤐᤡᤏᤧᤀᤠᤱ ᤘᤠ᤹ᤖᤥ॥’
MAT 25:23 ᤁᤢᤴᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤏᤢ᤺ᤒᤠ ᤏᤢ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤛᤣᤘᤠᤖᤥᤒᤠᤀᤣ. ᤏᤢ᤺ᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ᤃ ᤔᤡᤛᤠᤰ ᤕᤠᤱᤅᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧ. ᤀᤠᤸᤗ ᤕᤖᤡᤰ ᤐᤠ᤺ᤴᤏᤥ ᤕᤢᤰ ᤐᤡᤏᤧᤖᤥ॥ ᤀᤠᤸᤗ ᤀᤠᤏᤡ᤹ ᤛᤥᤖᤡᤰ ᤛ᤺ᤳᤋᤡᤖᤥ᥄’
MAT 25:24 ᤀᤠᤸᤗ ᤜᤧᤴᤇᤡᤱ ᤌᤡᤰ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤄᤥ᤺ᤒᤠ ᤛᤣᤘᤠᤖᤥᤒᤠᤸᤗᤧᤀᤠᤱ ᤔᤧᤳᤋᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤁᤧᤈᤡ᤺ᤵᤐᤠ ᤁᤧᤈᤥ᤺ᤰ ᤑᤠ᤹ᤀᤠᤱ ᤏᤡ᤺ᤛᤢᤱᤅᤠᤱ ᤘᤕᤠᤱᤗᤥ॥ ᤂᤧᤏᤧ᤹ ᤀᤠᤳᤋᤥ ᤆᤠ ᤁᤧᤴᤍᤣ᤺ᤛᤢᤴ ᤂᤧᤵᤔᤥ ᤂᤧᤏᤧ᤹ ᤆᤠ ᤁᤧᤛᤢᤵᤛᤢ᤹ᤖᤥ. ᤀᤠᤳᤋᤥ ᤆᤠ ᤁᤧᤴᤇᤧᤛᤢᤴ ᤂᤧᤵᤔᤥᤀᤣ ᤆᤠ ᤁᤧᤓᤢᤱᤗᤥ॥
MAT 25:25 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤁᤡ᤺ᤛᤠᤱᤅᤠᤱ ᤁᤧᤕᤠᤱᤅᤡᤴ ᤋᤣ᤹ᤖᤢᤱᤅᤠᤱ ᤂᤠᤶᤔᤥ ᤆᤡᤰᤂᤢᤱ॥ ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤕᤠᤱᤅᤡᤴ ᤂᤠ ᤁᤵᤔᤥ ᤘᤠ᤹ᤖᤥ॥’
MAT 25:26 ᤂᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤏᤥᤃᤵ ᤐᤡᤖᤢ. ‘ᤂᤧᤏᤧ᤹ ᤋᤠᤰᤁᤧᤓᤧ᤹ᤒᤠ ᤏᤢ ᤁᤢᤗᤧᤶᤃᤧᤕᤢᤒᤠ ᤛᤣᤘᤠᤖᤥᤒᤠᤀᤣ᥄ ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤳᤋᤥ ᤆᤠ ᤔᤧᤍᤣ᤺ᤀᤠᤴ ᤂᤧᤵᤔᤥ ᤆᤠ ᤛᤢᤵᤛᤢᤱ. ᤀᤠᤳᤋᤥ ᤆᤠ ᤔᤧᤛᤧ᤺ᤛᤢᤱᤅᤡᤴ ᤂᤧᤵᤔᤥ ᤆᤠ ᤑᤢᤰᤂᤢᤱ ᤑᤠ᤹ᤀᤠᤱ ᤁᤧᤏᤡ᤺ᤛᤢᤀᤠᤱᤅᤣ ᤁᤧᤘᤕᤧᤖᤥ॥
MAT 25:27 ᤜᤧᤰᤁᤣ᤺ᤸᤗᤧ ᤀᤠᤕᤠᤱᤅᤡᤴ ᤁᤧᤍᤣ᤹ᤖᤢᤀᤠᤱ ᤛᤡᤱᤏᤠ᤺ᤳ ᤁᤧᤃᤧᤒᤠᤜᤠ᤹ᤖᤥ ᤁᤧᤕᤢᤰᤂᤢᤸᤗᤧ ᤐᤥ᤺ᤰᤂᤧᤒᤠᤖᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤀᤡᤱᤃᤠ᤹ ᤏᤢ᤺ᤰᤂᤠᤱ ᤋᤩᤠᤱᤅᤡᤸᤗᤧ ᤀᤠᤕᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤃ ᤂᤥ᤺ᤛᤢᤱᤒᤠ ᤘᤕᤧᤖᤥ॥
MAT 25:28 ᤁᤴ ᤛᤣᤘᤠᤖᤥᤒᤠᤸᤗᤧ ᤁᤳᤋᤢᤒᤠ ᤕᤠᤱᤅᤡᤴ ᤏᤠᤵᤋᤧᤶᤔᤧ᤹ᤀᤠᤱ ᤌᤡᤒᤥ᤺ᤱ ᤜᤧᤴᤇᤡᤱ ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤁᤧᤃᤵᤐᤧᤴ ᤐᤡᤖᤧᤶᤔᤧ᤹ᤀᤥ॥
MAT 25:29 ᤌᤣᤀᤠᤱᤓᤧᤸᤗᤧ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥ᤺ᤛᤢᤀᤠᤱ ᤂᤧᤸᤗᤧᤴ ᤕᤖᤡᤰ ᤐᤥ᤺ᤱᤗᤥ॥ ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤏᤠᤵᤗᤥ॥
MAT 25:30 ᤀᤠᤸᤗ ᤂᤧᤴ ᤀᤡᤏᤠ᤺ᤶᤒᤠ ᤛᤣᤘᤠᤖᤥᤒᤠᤴ ᤗᤠ᤺ᤰᤁᤠᤳ ᤂᤠᤍᤠᤶᤔᤥ ᤗᤠᤵᤑᤢ᤺ᤛᤧᤶᤔᤧ᤹॥ ᤂᤧᤵᤔᤥ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥ᤺ᤱᤗᤥ॥’”
MAT 25:31 “ᤔᤧᤴᤇᤠᤶᤛᤠ᤺ᤴ ᤁᤢᤔᤡᤔᤡᤍᤡᤱᤅᤥ ᤁᤧᤖᤧᤰ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤸᤗᤧ ᤂᤢᤏᤧ᤹ ᤔᤡᤔᤡᤍᤡᤱᤃᤧᤴ ᤁᤢᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥
MAT 25:32 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤁᤢᤍᤃᤡ ᤔᤧᤈᤢᤶᤗᤥ॥ ᤜᤧᤰᤁᤩᤠᤱ ᤔᤧᤸᤗᤢᤰᤁᤶᤒᤠᤸᤗᤧ ᤔᤧᤸᤗᤢᤰᤜᤠ᤹ ᤔᤧᤴᤍᤠᤰᤜᤠ᤹ᤗᤠᤶ ᤛᤧᤴᤍᤢᤛᤡᤒᤠ ᤁᤢᤀᤡᤛᤡ᤺ᤰ ᤔᤏᤠᤜᤠ᤹ ᤛᤧᤴᤍᤢᤛᤡᤖᤥ॥
MAT 25:33 ᤁᤢᤈᤢᤵᤛᤠᤱ ᤗᤧᤵᤔᤠᤱ ᤔᤧᤸᤗᤢᤰᤜᤠ᤹ ᤏᤢ ᤁᤢᤓᤧᤴᤇᤠᤱ ᤗᤧᤵᤔᤠᤱ ᤔᤧᤴᤍᤠᤰᤜᤠ᤹ ᤛᤧᤴᤍᤢᤛᤡᤖᤥ॥
MAT 25:34 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠᤜᤠ᤹ ᤔᤧᤳᤋᤢᤛᤡ. ‘ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤒᤠᤛᤣ. ᤋᤩᤧᤶᤔᤧ᤹ᤀᤥ. ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤂᤡᤏᤡ᤹ ᤗᤠᤃᤡ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤜᤠᤱᤈᤢᤶᤔᤡᤴ ᤕᤢᤰᤋᤧᤶᤔᤧ᤹ᤀᤥ॥
MAT 25:35 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤧᤳᤗᤠ᤺ᤰᤋᤧᤀᤠᤱ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤁᤢᤈᤠ ᤕᤠᤵᤔᤡ ᤀᤠᤃᤧᤒᤡᤖᤡ. ᤀᤠᤘᤠᤔᤡ᤺ᤛᤧᤀᤠᤱ ᤘᤕᤠᤱᤅᤡᤸᤗᤧ ᤆᤫᤠ᤺ᤳ ᤕᤠᤵᤔᤡ ᤀᤠᤃᤧᤒᤡᤖᤡ. ᤀᤡᤱᤃᤠ᤹ ᤘᤠ᤹ᤔᤠ ᤋᤧᤴ ᤔᤧ᤺ᤴᤏᤣ ᤗᤠᤶᤍᤡ᤺ᤰᤐᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤔᤥ ᤕᤠᤵᤔᤡ ᤀᤠᤃᤧᤍᤣ᤹ᤖᤡᤖᤥ॥
MAT 25:36 ᤜᤧᤰᤁᤩᤠᤱ ᤀᤡᤱᤃᤠ᤹ ᤋᤣ᤺ᤵᤑᤢᤱ ᤔᤧ᤺ᤴᤏᤣ ᤘᤕᤠᤱᤅᤡᤸᤗᤧ ᤋᤣ᤺ᤳ ᤕᤠᤵᤔᤡ ᤀᤠᤃᤧᤒᤡᤖᤡ. ᤀᤡᤱᤃᤠ᤹ ᤋᤢᤃᤠᤱᤅᤠᤱ ᤘᤕᤠᤱᤅᤡᤸᤗᤧ ᤕᤠᤵᤔᤡ ᤁᤶᤒᤪᤠᤱ ᤀᤠᤃᤧᤔᤧᤳᤋᤡ. ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤠᤱᤅᤠᤱ ᤕᤠᤃᤠᤱᤅᤡᤸᤗᤧ ᤕᤠᤵᤔᤡ ᤀᤠᤃᤧᤛᤠ᤹ᤖᤡᤖᤥ॥’
MAT 25:37 ᤜᤧᤰᤁᤩᤠᤱ ᤂᤧᤴ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. ‘ᤍᤠᤱᤒᤣ. ᤀᤠᤵᤑᤠᤸᤗᤧ ᤂᤧᤏᤧ᤹ ᤛᤠᤰᤔᤧᤴᤈᤠ ᤏᤡ᤺ᤀᤠᤛᤡᤃᤧᤀᤠᤱ ᤁᤢᤈᤠ ᤐᤡᤀᤠᤛᤡᤃᤧᤒᤣ᥅ ᤁᤧᤘᤠᤔᤡ᤺ᤛᤧᤒᤠ ᤏᤡ᤺ᤀᤠᤛᤡᤃᤧᤀᤠᤱ ᤆᤫᤠ᤺ᤳ ᤌᤢᤱᤔᤠ ᤐᤡ᤹ᤀᤠᤛᤡᤃᤧᤒᤣ᥅
MAT 25:38 ᤜᤡᤶᤎᤠ᤺ᤱ ᤔᤧ᤺ᤴᤏᤣ ᤗᤠᤶᤍᤡ᤺ᤰᤐᤠ ᤁᤧᤒᤥ᤺ᤰᤂᤧᤒᤠ ᤏᤡ᤺ᤀᤠᤛᤡᤃᤧᤀᤠᤱ ᤜᤡᤶᤔᤥ ᤋᤣ᤹ᤀᤠᤛᤡᤃᤧᤒᤣ᥅ ᤀᤠᤵᤑᤠᤸᤗᤧ ᤋᤣ᤺ᤳ ᤔᤧ᤺ᤴᤏᤣ ᤏᤡ᤺ᤀᤠᤛᤡᤃᤧᤀᤠᤱ ᤋᤣ᤺ᤳ ᤐᤡ᤹ᤀᤠᤛᤡᤃᤧᤒᤣ᥅
MAT 25:39 ᤀᤠᤵᤑᤠᤸᤗᤧ ᤂᤧᤏᤧ᤹ ᤁᤧᤍᤢᤃᤧᤒᤠ ᤏᤢ ᤐᤢᤱᤗᤠᤜᤡᤶᤔᤥ ᤁᤧᤕᤠᤃᤧᤒᤠ ᤏᤡ᤺ᤀᤠᤛᤡᤃᤧᤀᤠᤱ ᤛᤠ᤹ᤀᤠᤛᤡᤃᤧᤒᤣ᥅’
MAT 25:40 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ ‘ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤱᤜᤠ᤹ᤀᤥ ᤁᤧᤘᤠ᤹ᤒᤠ ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤀᤥ ᤗᤳᤇᤠ ᤆᤢᤰᤐᤠᤎᤡᤰ ᤆᤩᤠ ᤁᤧᤔᤧᤳᤋᤢᤶ. ᤂᤧᤴ ᤀᤡᤱᤃᤠ᤹ᤀᤣ ᤕᤠᤵᤔᤡ ᤀᤠᤃᤧᤔᤧᤳᤋᤡᤒᤠᤖᤥ॥’
MAT 25:41 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤓᤧᤴᤇᤠᤱ ᤗᤧᤵᤔᤠᤱᤒᤠᤜᤠ᤹ ᤔᤧᤳᤋᤢᤛᤡ. ‘ᤂᤡᤏᤡ᤹ ᤏᤡᤱᤘᤠ᤹ᤑᤢ ᤛᤠᤰᤔᤢᤖᤠ᤺ᤸᤗᤧ ᤁᤧᤍᤧᤳᤋᤡᤒᤠᤛᤣ. ᤂᤡᤏᤡ᤹ ᤀᤡᤱᤃᤠ᤹ᤀᤥᤗᤠᤶ ᤐᤣᤃᤧᤶᤔᤧ᤹ᤀᤥ॥ ᤂᤡᤏᤡ᤹ᤃ ᤔᤠᤑᤧᤴᤛᤠᤶᤔᤡᤴ ᤏᤢ ᤂᤢᤏᤧ᤹ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤁᤣ᤺ᤵᤔᤠᤛᤡ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤒᤠ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣᤃᤧᤶᤔᤧ᤹ᤀᤥ॥
MAT 25:42 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤧᤳᤗᤠ᤺ᤰᤋᤧᤀᤠᤱ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤁᤢᤈᤠ ᤕᤠᤵᤔᤡ ᤀᤠᤃᤧᤶᤒᤡᤖᤡᤴ. ᤀᤠᤘᤠᤔᤡ᤺ᤛᤧᤀᤠᤱ ᤘᤕᤠᤱᤅᤡᤸᤗᤧ ᤆᤫᤠ᤺ᤳ ᤌᤢᤱᤔᤠ ᤕᤠᤵᤔᤡ ᤀᤠᤃᤧᤶᤒᤡᤖᤡᤴ.
MAT 25:43 ᤀᤡᤱᤃᤠ᤹ ᤘᤠ᤹ᤔᤠ ᤋᤧᤴ ᤔᤧ᤺ᤴᤏᤣ ᤗᤠᤶᤍᤡ᤺ᤰᤐᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤔᤥ ᤕᤠᤵᤔᤡ ᤀᤠᤃᤧᤴᤍᤣ᤹ᤖᤡᤴ. ᤀᤡᤱᤃᤠ᤹ ᤋᤣ᤺ᤵᤑᤢᤱ ᤔᤧ᤺ᤴᤏᤣ ᤘᤕᤠᤱᤅᤡᤸᤗᤧ ᤋᤣ᤺ᤳ ᤕᤠᤵᤔᤡ ᤀᤠᤃᤧᤶᤒᤡᤖᤡᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤋᤢᤃᤠᤱ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤠᤱᤅᤠᤱ ᤕᤠᤃᤠᤱᤅᤡᤸᤗᤧ ᤕᤠᤵᤔᤡ ᤀᤠᤃᤧᤴᤇᤠ᤹ᤖᤡᤴᤗᤥ॥’
MAT 25:44 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤏᤥᤃᤵ ᤔᤧᤒᤡᤖᤢ. ‘ᤍᤠᤱᤒᤣ. ᤀᤠᤵᤑᤠᤸᤗᤧ ᤀᤠᤏᤡᤃᤧ ᤂᤧᤏᤧ᤹ ᤁᤧᤛᤧᤳᤗᤠ᤺ᤰᤋᤧᤒᤠ ᤏᤢ ᤁᤧᤘᤠᤔᤡ᤺ᤛᤧᤒᤠ ᤜᤧᤰᤁᤩᤠᤱ ᤘᤠ᤹ᤔᤠ ᤋᤧᤴ ᤔᤧ᤺ᤴᤏᤣ ᤏᤢ ᤋᤣ᤺ᤵᤑᤢᤱ ᤆᤠᤜᤠᤒᤠ ᤁᤧᤈᤥᤃᤧᤒᤠ. ᤁᤧᤍᤢᤃᤧᤒᤠ ᤏᤢ ᤐᤢᤱᤗᤠᤜᤡᤶᤔᤥ ᤁᤧᤕᤠᤃᤧᤒᤠ ᤏᤡ᤺ᤛᤢᤶᤒᤧᤀᤠᤱ ᤁᤢᤓᤠ᤹ ᤔᤧᤒᤡᤀᤠᤛᤡᤃᤧᤴᤒᤣ᥅’
MAT 25:45 ᤂᤧᤴ ᤕᤧᤶᤔᤥ ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. ‘ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤀᤥ ᤀᤠᤳᤋᤡᤴ ᤗᤳᤇᤠ ᤆᤢᤰᤛᤠᤎᤡᤰ ᤜᤧᤰᤁᤣ ᤁᤧᤶᤔᤧᤳᤋᤢᤶᤔᤡᤴ. ᤂᤧᤴ ᤀᤡᤱᤃᤠ᤹ᤀᤣ ᤕᤠᤵᤔᤡ ᤀᤠᤃᤧᤶᤔᤧᤳᤋᤡᤶᤒᤠᤖᤥ॥’
MAT 25:46 ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤔᤧᤴᤏᤢᤵᤔᤏᤠᤒᤠ ᤂᤢᤶᤍᤡᤱᤅᤥ ᤔᤧᤒᤣ᤺ᤰᤗᤥ. ᤁᤖ ᤛᤠᤶᤕᤥᤏᤡᤒᤠᤜᤠ᤹ᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤔᤧᤒᤣ᤺ᤰᤗᤥ॥”
MAT 26:1 ᤕᤧᤛᤢᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ.
MAT 26:2 “ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤠ᤺ᤔᤠ ᤏᤡᤕᤧᤴᤗᤰ ᤘᤠ᤹ᤒᤠᤃ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤣᤖᤥ. ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤜᤢᤰᤔᤧᤛᤢᤵᤋᤢ᤹ᤖᤥ॥”
MAT 26:3 ᤂᤧᤴ ᤕᤧᤶᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤈᤢᤵᤛᤧ॥ ᤂᤧᤸᤗᤧ ᤁᤢᤔᤡᤱᤃ ᤁᤤᤕᤠᤑᤠᤛ ᤘᤕᤧ॥
MAT 26:4 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤠᤰᤂᤣᤗ᤹ᤖᤡᤰ ᤛᤫᤠ᤺ᤳᤋᤠᤱ ᤋᤧᤶᤔᤠᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥
MAT 26:5 ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤋᤱᤏᤠᤶᤔᤥᤃ ᤀᤠᤏᤡ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤁᤴ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ᤖᤥ॥”
MAT 26:6 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤒᤧᤌᤠᤏᤡ ᤐᤠᤱᤓᤣ᤹ᤀᤥ ᤗᤥᤃᤣ᤹ ᤋᤢᤰᤔᤠᤗᤠᤶ ᤁᤧᤘᤣ᤺ᤵᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤕᤧᤖᤥ॥
MAT 26:7 ᤜᤧᤰᤁᤩᤠᤱ ᤆᤠᤈᤠᤏᤢ ᤕᤢᤅᤧᤸᤗᤧ ᤔᤧᤴᤇᤢᤔᤠ᤹ᤎᤡᤰ ᤀᤡᤔᤧᤸᤗᤢᤱᤒᤠ ᤑᤢᤱᤏᤠᤶ ᤁᤧᤕᤠᤰᤐᤠ ᤗᤧᤶᤓᤠᤗᤢᤱ ᤐᤷᤕᤠᤔᤠᤏᤢ ᤋᤩᤧᤀᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰᤐᤥ ᤜᤢᤰᤂᤢᤖᤥ॥
MAT 26:8 ᤂᤧᤴ ᤔᤧᤏᤡ᤺ᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤌᤣᤀᤠᤱ ᤁᤴ ᤑᤢᤱᤏᤠᤶᤔᤡᤴ ᤆᤠᤛᤥ᤺ᤰᤂᤢᤒᤠᤒᤣ᥅
MAT 26:9 ᤁᤱᤃ ᤕᤖᤡᤰ ᤕᤠᤱᤅᤥ ᤛᤱᤔᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡ᤺ᤔᤏᤠᤛᤡᤸᤗᤧ ᤐᤥ᤺ᤰᤂᤧᤒᤠᤖᤥ॥”
MAT 26:10 ᤕᤧᤛᤢᤖᤧ ᤁᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱ ᤁᤴ ᤔᤧᤴᤇᤢᤔᤠ᤹ᤀᤡᤴ ᤋᤢᤰᤂᤣ ᤁᤧᤈᤠ᤺ᤳᤋᤢᤶᤒᤠᤒᤣ᥅ ᤂᤧᤸᤗᤧᤃ ᤀᤠᤗᤠᤃᤡ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥
MAT 26:11 ᤕᤠᤱᤃᤧᤛᤠ᤹ᤒᤠᤜᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤖᤥ॥ ᤁᤖ ᤀᤡᤱᤃᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴᤗᤥ॥
MAT 26:12 ᤂᤧᤸᤗᤧ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤑᤢᤱᤏᤠᤶᤔᤡᤴ ᤜᤢᤰᤂᤢᤀᤠᤱ ᤀᤠᤗᤢᤵᤔᤠᤸᤗᤧᤴ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ॥
MAT 26:13 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤸᤗᤧ. ᤂᤧᤵᤔᤥ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤈᤧᤰᤂᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥”
MAT 26:14 ᤜᤧᤰᤁᤩᤠᤱ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤐᤣᤀᤠᤱ
MAT 26:15 ᤔᤧᤳᤋᤛᤡ. “ᤕᤧᤛᤢ᤺ᤴ ᤁᤧᤍᤧᤶᤛᤢᤶᤗ ᤑᤠ᤹ᤀᤠᤱ ᤂᤡᤏᤡ᤹ ᤜᤢᤰᤁᤥ ᤌᤠ᤺ᤛᤢᤱ ᤐᤡᤏᤡᤱᤅᤡᤸᤗᤧ ᤀᤡᤱᤃᤠ᤹ ᤌᤣ ᤕᤠᤵᤔᤡ ᤀᤠᤃᤧᤒᤡᤖᤡᤒᤣ᥅” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤢᤶᤒᤥ᤺ᤱ (᥉᥆) ᤕᤢᤵᤐᤠᤕᤠᤱ ᤂᤧᤴ ᤔᤧᤒᤡᤖᤢᤖᤥ॥
MAT 26:16 ᤂᤧᤴ ᤕᤧᤶᤔᤠᤱᤎᤥ ᤕᤜᤢᤍᤠ᤺ᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥
MAT 26:17 ᤀᤠᤸᤗ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣ᤺ᤰᤐᤠ ᤕᤧᤴᤏᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠ ᤀᤠᤳᤋᤥ ᤕᤠᤖᤡᤵ ᤆᤥ᤺ᤰᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤀᤠᤱ ᤘᤠ᤹ᤒᤣ᥅”
MAT 26:18 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤕᤧᤰᤕᤰᤁᤥ ᤐᤣᤃᤧᤶᤔᤧ᤹. ᤂᤧᤵᤔᤥ ᤗᤳᤇᤠ ᤔᤏᤠᤎᤡᤰ ᤁᤧᤍᤢᤔᤢᤶ॥ ᤂᤧᤴ ᤀᤰᤂᤣ ᤔᤧᤳᤋᤧᤶᤔᤧ᤹. ‘ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤛᤛᤠᤱᤛᤪᤥ᤺ᤳ ᤆᤥᤃᤢᤶᤒᤧ᤹ᤖᤥ॥’”
MAT 26:19 ᤜᤧᤰᤁᤣ᤺ᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤢ॥
MAT 26:20 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤕᤧᤛᤢ᤺ᤴ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤛᤥᤖᤡᤰ ᤆᤠᤔᤠ ᤋᤧᤴᤏᤥ ᤕᤢᤱᤛᤡᤱ॥
MAT 26:21 ᤜᤧᤰᤁᤩᤠᤱ ᤔᤧᤈᤖ ᤔᤧᤕᤢᤅᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”
MAT 26:22 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧᤀᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤛᤣ᤺ᤴᤍᤥ᤺ᤔᤠ ᤔᤧᤜᤣ᤺ᤰᤋᤢ. “ᤍᤠᤱᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠ᤺ᤴ ᤀᤡᤱᤃᤠ᤹ᤒᤡ᥅”
MAT 26:23 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤈᤠᤒᤠᤖ ᤁᤧᤕᤢᤱᤒᤠᤎᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥
MAT 26:24 ᤔᤧᤴᤇᤠᤶᤛᤠ᤺ᤱᤃ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤛᤡ᤺ᤔᤠᤀᤣ ᤐᤥ᤺ᤱᤗᤥ॥ ᤁᤖ ᤔᤧᤴᤇᤠᤶᤛᤠ᤺ᤴ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧ ᤛᤩᤧᤖᤥ᥄ ᤂᤧᤱᤃ ᤛᤠᤔᤧᤘᤠ᤺ᤴᤇᤡᤱᤅᤡᤴᤏᤡᤸᤗᤧ ᤏᤢᤖᤧᤒᤠᤖᤥ॥”
MAT 26:25 ᤜᤧᤰᤁᤩᤠᤱ ᤛᤧᤰᤂᤠᤀᤥ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤸᤗᤧᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠ᤺ᤴ ᤀᤡᤱᤃᤠ᤹ᤀᤣᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤀᤠᤒᤠᤅᤣ ᤁᤧᤒᤠ᤺ᤳᤋᤢᤖᤥ॥”
MAT 26:26 ᤂᤧᤱᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤡᤖᤢᤛᤡ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤠᤱ ᤆᤧᤶᤔᤧ᤹ᤀᤥ. ᤁᤱᤃ ᤏᤠᤛᤡᤱᤃᤧᤴ ᤀᤠᤎᤰᤗᤥ॥”
MAT 26:27 ᤜᤧᤰᤁᤩᤠᤱ ᤆᤸᤗᤱᤏᤠ ᤂᤥᤷᤕᤠ᤺ᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤡᤖᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤁᤴ ᤌᤢᤅᤧᤶᤔᤧ᤹ᤀᤥ॥
MAT 26:28 ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤆᤥ᤺ᤰᤔᤏᤠᤒᤠ ᤁᤢᤛᤱ ᤔᤠᤱᤜᤢᤵᤗᤧᤴ ᤀᤠᤔᤠᤰᤂᤡ᤹ᤖᤥ॥ ᤁᤴ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤥ᤺ᤱᤗ ᤑᤠ᤹ᤀᤠᤱ ᤘᤠᤍᤣ᤺ᤴᤗᤥ॥
MAT 26:29 ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤀᤡᤴᤏᤠᤱᤎᤥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤠᤱᤈᤢᤶᤔᤥ ᤂᤡᤏᤡ᤹ᤏᤢ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤕᤠᤶᤔᤥ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤅᤠᤴᤗᤥ॥”
MAT 26:30 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠ ᤛᤠᤶᤗᤥ ᤛᤠᤶᤔᤧᤗᤥᤖᤧᤀᤠᤱ ᤈᤤᤋᤢᤏ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥
MAT 26:31 ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤀᤡᤴ ᤛᤧᤴᤍᤡᤰᤛᤠ ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤗᤧᤖᤡ᤹ᤀᤠᤱ ᤁᤧᤒᤡᤃᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. ‘ᤀᤡᤱᤃᤠ᤹ ᤔᤧᤸᤗᤢᤰᤁᤶᤒᤠᤴ ᤜᤡᤵᤋᤢᤱ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤸᤗᤢᤰᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤛᤧᤖᤥ॥’
MAT 26:32 ᤁᤖ ᤀᤡᤱᤃᤠ᤹ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤱᤅᤠᤀᤠᤱ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗ ᤌᤢᤶᤔᤥ ᤐᤣ᤺ᤰᤁᤠᤖᤥ॥”
MAT 26:33 ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤁᤧᤖᤧᤰᤗᤧ ᤂᤧᤏᤧ᤹ ᤁᤧᤶᤗᤧᤳ ᤁᤧᤶᤎᤠ᤺ᤛᤠᤱ ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤧᤴᤗᤥ॥”
MAT 26:34 ᤕᤧᤛᤢᤖᤧ ᤔᤧᤳᤋᤢ. “ᤐᤋᤪᤢᤛᤣ. ᤛᤧᤰᤂᤠᤀᤣ ᤔᤧᤳᤏᤧ᤹. ᤀᤠᤰᤂᤥ ᤛᤧᤴᤍᤡᤰ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”
MAT 26:35 ᤁᤖ ᤐᤋᤪᤢᤛᤖᤧ ᤜᤠᤍᤡᤱ ᤌᤰᤋᤧᤖ ᤔᤧᤳᤋᤢ. “ᤔᤧ᤺ᤴᤗᤥ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤛᤡ᤺ᤔᤠ ᤐᤥ᤺ᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤧᤴᤗᤥ॥” ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤒᤠ᤺ᤳᤋᤢᤖᤥ॥
MAT 26:36 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤃᤧᤋᤛᤔᤏᤡ ᤔᤧᤵᤔᤏᤠᤒᤠ ᤈᤤᤋᤢᤏ ᤛᤡᤱᤗᤠᤀᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤧᤵᤔᤥ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤂᤡᤏᤡ᤹ ᤁᤵᤔᤥ ᤕᤢᤅᤧᤶᤔᤧ᤹ᤀᤥ॥”
MAT 26:37 ᤕᤧᤛᤢᤖᤧ ᤐᤋᤪᤢᤛᤧᤴ ᤏᤢ ᤈᤒ᤻ᤍᤡᤕᤠᤖᤧ ᤏᤧᤵᤑᤢ ᤁᤢᤛ᤻ᤛᤠ᤺ᤜᤠ᤹ ᤂᤢᤏᤧ᤹ᤏᤢ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤔᤡᤱᤘᤠᤖᤧ ᤁᤢᤎᤡᤶᤏᤢ ᤏᤡᤱᤛᤠᤶᤔᤥ ᤌᤩᤧᤖᤥ॥
MAT 26:38 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤔᤡᤱᤘᤠᤖᤧ ᤕᤥ᤺ᤴᤍᤠᤱᤅᤠᤱ ᤛᤡ᤺ᤔᤠᤗᤡᤱᤎᤥ ᤌᤠᤖᤡᤰ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤵᤔᤥ ᤆᤠᤱᤈᤠᤱᤅᤠᤱ ᤕᤢᤅᤧᤶᤔᤧ᤹ᤖ ᤕᤠᤵᤔᤡ ᤆᤢᤶ ᤀᤠᤔᤧᤳᤋᤧᤶᤔᤧ᤹ᤀᤥ॥”
MAT 26:39 ᤂᤢᤏᤧ᤹ ᤕᤠᤶᤔᤥ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤂᤠᤶᤔᤥ ᤛᤠᤶᤒᤥ᤺ᤴ ᤑᤴᤇᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤖᤥ. “ᤐᤠᤏᤢᤍᤡᤱ ᤀᤠᤶᤒᤣ. ᤐᤥ᤺ᤱᤔᤠ ᤛᤢᤰᤏᤧ ᤑᤠ᤹ᤃᤪ. ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣ᤺ᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤧ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤗᤖᤥ॥”
MAT 26:40 ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ॥ ᤕᤧᤛᤢᤖᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤡᤏᤡ᤹ ᤁᤢᤔᤢᤰᤌᤡᤰᤁᤠᤱ ᤀᤡᤱᤃᤠ᤹ᤏᤢ ᤆᤠᤱᤈᤠᤱᤅᤠᤱ ᤕᤢᤱᤔᤠ ᤁᤧᤴᤇᤢᤰᤋᤡᤴᤒᤡ᥅
MAT 26:41 ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤠᤱᤈᤠᤱᤅᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤡᤸᤗᤧ ᤏᤢ᤺ᤖᤡᤰᤁᤠᤱ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤶ. ᤁᤖ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤔᤧᤎᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤁᤧᤴᤇᤢᤰᤋᤢᤶᤔᤡᤸᤗᤥ॥”
MAT 26:42 ᤂᤢᤏᤧ᤹ ᤕᤠᤶᤔᤥ ᤐᤣᤀᤠᤱ ᤋᤢᤘᤠ ᤆᤥᤃᤢ. “ᤐᤠᤏᤢᤍᤡᤱ ᤀᤠᤶᤒᤦ. ᤀᤡᤱᤃᤠ᤹ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤔᤧᤴᤎᤢᤱᤅᤣ ᤔᤧᤒᤥ᤺ᤱᤅᤡᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤖᤥ॥”
MAT 26:43 ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤡᤰᤕᤢ᤺ᤔᤠᤸᤗᤧ ᤛᤠ᤹ᤖᤡᤰ ᤋᤖᤢᤛᤡᤀᤠᤱ ᤔᤧᤘᤕᤧ॥
MAT 26:44 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤗᤧᤖᤢᤎᤛᤡᤀᤠᤱ ᤕᤠᤶᤔᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤋᤃᤡ ᤜᤧᤰᤁᤣ ᤋᤢᤘᤠ ᤆᤥᤃᤢ॥
MAT 26:45 ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤸᤗᤛᤠᤱ ᤁᤧᤏᤠᤛᤡᤱᤅᤡᤀᤠᤱ ᤁᤧᤀᤡᤵᤛᤡᤀᤠᤱ ᤁᤧᤏᤧᤛ᤻ᤛᤡᤒᤡ᥅ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠ᤺ᤔᤠ ᤕᤧᤶᤔᤡᤴ ᤋᤩᤧᤖᤥ॥
MAT 26:46 ᤐᤥᤃᤧᤶᤔᤧ᤹. ᤁᤵᤔᤥᤗᤠᤶ ᤐᤡᤃᤡ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤧᤴ ᤂᤠ ᤑᤧᤴᤗ ᤐᤳᤗᤥ᥄”
MAT 26:47 ᤕᤧᤛᤢ᤺ᤴ ᤜᤧᤰᤁᤣᤗ᤹ᤖᤡᤰ ᤐᤠᤖᤧᤖ ᤐᤳᤇᤧᤸᤗᤧ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤂᤧᤵᤔᤥ ᤁᤧᤖᤧ ᤋᤩᤧ॥ ᤂᤢᤏᤧ᤹ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤋᤠᤓᤣ ᤏᤢ ᤋᤰᤁᤠ᤺ᤳ ᤁᤧᤃᤵᤐᤠ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤘᤕᤧ॥
MAT 26:48 ᤀᤠᤸᤗ ᤕᤧᤛᤢ᤺ᤴ ᤀᤡᤱᤃᤧᤗᤧᤰᤐᤧᤸᤗᤧ ᤀᤠᤳᤋᤡᤴ ᤔᤏᤠ᤺ᤴ ᤀᤡᤱᤃᤠ᤹ ᤆᤢᤵ ᤔᤧᤳᤋᤢᤱ. ᤂᤧᤴ ᤋᤧᤶᤛᤧᤶᤔᤧ᤹ ᤗ᤹ᤖᤡᤰ ᤔᤡᤰᤛᤣ᤺ᤴ ᤐᤡᤖᤢᤛᤡᤀᤠᤱ ᤘᤕᤧ॥
MAT 26:49 ᤂᤡᤔᤥ ᤕᤜᤢᤍᤠ᤺ᤴ ᤕᤧᤛᤢᤖᤥ ᤐᤣᤀᤠᤱ “ᤀᤠᤛᤣᤘᤠᤖᤥ. ᤛᤡᤰᤛᤠᤶᤒᤣ” ᤔᤧᤳᤋᤢᤖ ᤆᤢᤵ ᤔᤧᤳᤋᤢ॥
MAT 26:50 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤆᤢᤶᤔᤣ. ᤂᤧᤏᤧ᤹ ᤌᤣ ᤆᤥ᤺ᤰᤛᤧ ᤁᤧᤍᤩᤧᤒᤠ ᤂᤧᤴ ᤜᤠᤖᤠ ᤆᤥᤃᤧ᤹ᤀᤥ॥” ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤜᤢᤰ ᤔᤧᤕᤠᤰᤋᤢᤀᤠᤱ ᤔᤧᤍᤧᤶᤛᤢᤖᤥ॥
MAT 26:51 ᤕᤧᤛᤢ᤺ᤴᤏᤢ ᤁᤧᤘᤠ᤹ᤒᤠᤜᤠ᤹ᤀᤥ ᤌᤡᤰᤗᤧ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠᤴ ᤆᤧᤵᤋᤢᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥
MAT 26:52 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤑᤧᤛᤡ᤺ᤵᤐᤥ ᤕᤠᤰᤋᤧ᤹. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤋᤠᤓᤣ᤺ᤴ ᤀᤥᤃᤵ ᤆᤥᤃᤢ᤹. ᤂᤧᤴ ᤋᤠᤓᤣᤗᤠᤶᤔᤣ ᤛᤡ᤹᤺॥
MAT 26:53 ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ᤺ᤴ ᤏᤠ᤺ᤰᤋᤢᤱᤅᤡᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧᤴ ᤌᤡᤰ-ᤏᤧᤳ ᤋᤢᤖᤠᤏᤢ᤺ᤸᤗᤧ ᤕᤖᤡᤰ ᤀᤡᤱᤃᤠ᤹ ᤕᤠᤵᤔᤡ ᤋᤠᤱᤛᤧ᤺ᤵᤛᤧ ᤂᤡᤔᤥ ᤔᤧᤒᤠᤱᤄᤢᤴᤛᤡᤴᤒᤡ᥅
MAT 26:54 ᤁᤖ ᤜᤧᤰᤁᤣᤗ᤹ᤖᤡᤰ ᤏᤠ᤺ᤰᤋᤢᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤥ᤺ᤱᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤛᤠᤵᤋᤧᤒᤠᤴ ᤀᤠᤰᤂᤣᤀᤠᤱ ᤁᤧᤵᤐᤠᤒᤣ᥅”
MAT 26:55 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤧᤶᤛᤧ ᤁᤧᤍᤠ᤺ᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅ ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ॥
MAT 26:56 ᤁᤖ ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ॥” ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤐᤰᤔᤧᤎ᤺ᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤖᤥ॥
MAT 26:57 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤧᤍᤧᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤖᤥ॥
MAT 26:58 ᤁᤖ ᤐᤋᤪᤢᤛᤖᤧᤃ ᤕᤧᤛᤢ᤺ᤴ ᤏᤢ ᤂᤧᤴ ᤔᤏᤠᤜᤠ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤔᤠ᤺ᤱᤄᤠᤗᤠᤶ ᤋᤡᤶᤍᤢᤛᤡᤖᤥ॥ ᤜᤧᤰᤁᤩᤠᤱ ᤀᤠᤸᤗ ᤕᤧᤛᤢ᤺ᤴ ᤌᤣ ᤔᤧᤔᤧᤳᤋᤢᤀᤡᤗᤠ ᤗ᤹ᤖᤡᤰ ᤀᤥᤔᤧᤳᤇᤧ ᤛᤡᤃᤠᤱ ᤗᤠ᤺ᤛᤧᤀᤠᤱ ᤛᤣᤘᤠᤖᤥᤒᤠᤜᤠ᤹ᤏᤢ ᤕᤢᤱᤛᤡᤱᤗᤥ॥
MAT 26:59 ᤀᤠᤸᤗ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤁᤧᤖᤧᤰ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤕᤧᤛᤢ᤺ᤴ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥᤒᤠ ᤀᤠᤵᤋᤡᤰᤜᤠ᤹ ᤔᤧᤃᤥ᤺ᤳᤋᤢ॥
MAT 26:60 ᤂᤧᤵᤔᤥ ᤕᤖᤡᤰ ᤑᤥᤋᤩᤠᤒᤠ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤗ᤺ᤴᤍᤧ. ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤋᤛᤡ ᤔᤧᤱᤄᤥ᤺ᤛᤢᤴ॥ ᤁᤢᤏᤢᤵᤔᤥ ᤏᤧᤵᤑᤢ ᤔᤏᤠ ᤗ᤺ᤴᤍᤧᤳᤇᤡᤀᤠᤱ
MAT 26:61 ᤐᤠ᤺ᤳᤋᤧᤳᤇᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤕ᤺ᤔᤠ ᤛᤢᤰᤋᤢᤱ. ᤜᤧᤰᤁᤩᤠᤱ ᤛᤢᤶᤕᤧᤴᤏᤥ ᤕᤠᤶᤔᤥ ᤆᤥ᤺ᤰᤔᤠ ᤛᤢᤰᤋᤢᤱᤗᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥”
MAT 26:62 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤐᤥᤃᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤁᤴ ᤔᤏᤠᤜᤠ᤹ᤖᤧ ᤁᤧᤍᤰᤗᤧᤱᤘᤠᤀᤥ ᤐᤡᤖᤧᤳᤇᤢᤒᤠ ᤋᤥ᤺ᤴᤍᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤂᤧᤏᤧ᤹ ᤏᤥᤃᤵ ᤁᤧᤶᤒᤡᤖᤢᤴᤇᤡᤴᤒᤠᤒᤣ᥅”
MAT 26:63 ᤁᤖ ᤕᤧᤛᤢ᤺ᤴ ᤔᤧᤶᤒᤠ᤺ᤳᤋᤣ ᤕᤧᤒᤧ॥ ᤜᤧᤰᤁᤣ᤺ᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤳᤋᤢ. “ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤂᤧᤏᤧ᤹ ᤀᤡᤱᤈᤠ᤺ᤱ ᤐᤡᤏᤧ. ᤛᤧᤰᤂᤠᤀᤣ ᤀᤠᤔᤧᤳᤋᤧ᤹. ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤏᤡᤱᤘᤠ᤹ᤑᤢᤛᤠ᤺ᤏᤧᤒᤡ᥅”
MAT 26:64 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤂᤧᤏᤧ᤹ ᤀᤠᤒᤠᤅᤣ ᤜᤧᤰᤁᤣ ᤁᤧᤒᤠ᤺ᤳᤋᤢ᤹ᤖᤥ॥ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤋᤠ᤺ᤴᤍᤡ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠ᤹ᤒᤠ ᤏᤢ ᤛᤠᤱᤃᤪᤠᤶᤐᤣᤍᤠᤱᤅᤥᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤀᤠᤒᤠ ᤁᤧᤏᤡ᤺ᤛᤢᤶᤗᤥ॥”
MAT 26:65 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤠᤰᤁᤧᤴ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤀᤠᤒᤠᤅᤣ ᤁᤢᤍᤣ᤺ᤳᤋᤡᤴ ᤌᤧ᤺ᤰᤂᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤖᤥ᥄ ᤀᤠᤸᤗ ᤀᤠᤏᤡ᤹ ᤘᤣ᤹ ᤋᤥ᤺ᤴᤍᤡᤜᤠ᤹ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗᤥ॥
MAT 26:66 ᤁᤴ ᤐᤠ᤺ᤴᤏᤥ ᤂᤡᤏᤡ᤹ ᤌᤣ ᤁᤧᤒᤠ᤺ᤳᤋᤢᤶ᥅” ᤂᤢᤏᤧ᤹ ᤛᤡ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ॥
MAT 26:67 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤏᤠᤖᤠᤀᤥ ᤌᤧᤳ ᤔᤧᤎᤥ᤺ᤰᤋᤢᤖ ᤜᤢᤰᤐᤢᤳᤋᤡᤸᤗᤧ ᤔᤧᤗᤰᤋᤢ॥ ᤜᤧᤰᤁᤩᤠᤱ ᤁᤢᤓᤠᤖᤧᤃ ᤁᤢᤏᤧᤍᤧᤱᤒᤠᤴ ᤔᤧᤗᤧᤰᤂᤢᤀᤠᤱ
MAT 26:68 ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤣ. ᤗ ᤀᤠᤸᤗ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧ᤹᥄ ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧ᥅”
MAT 26:69 ᤀᤠᤸᤗ ᤐᤋᤪᤢᤛᤧᤴ ᤗᤠ᤺ᤰᤁᤠᤳ ᤗᤰᤂᤢᤶᤔᤥ ᤕᤢᤅᤧᤸᤗᤧ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰ ᤑᤧᤖᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤃᤠᤗᤡᤗᤛ᤻ᤔᤠ ᤕᤧᤛᤢ᤺ᤴᤏᤢᤀᤣ ᤁᤧᤘᤕᤧᤖᤥ॥”
MAT 26:70 ᤁᤖ ᤐᤋᤪᤢᤛᤖᤧ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤂᤧᤴ ᤐᤠ᤺ᤴᤏᤡᤴ ᤏᤠ᤹ᤖᤢᤖ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤵᤐᤧᤴᤗᤥ᥄”
MAT 26:71 ᤜᤧᤰᤁᤩᤠᤱ ᤂᤢᤏᤧ᤹ ᤗᤰᤂᤢᤶᤔᤥᤗᤠᤶ ᤋᤠ᤺ᤰᤜᤴ ᤗᤧᤵᤔᤠᤱ ᤐᤣ॥ ᤂᤧᤵᤔᤥ ᤘᤣ᤹ᤛ᤻ᤔᤠ ᤛᤣᤘᤠᤖᤥᤔᤠ ᤆᤢᤰᤔᤧᤸᤗᤧ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤘᤣ᤹ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤴᤏᤠᤱ ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ॥”
MAT 26:72 ᤐᤋᤪᤢᤛᤖᤧ ᤔᤠᤱᤜᤧᤰᤛᤡᤱᤗ ᤕᤠᤶᤔᤥ ᤂᤧᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤏᤠ᤹ᤖᤢ. “ᤛᤧᤰᤂᤠᤛᤠᤱ ᤀᤡᤱᤃᤠ᤹ᤃ ᤁᤴ ᤔᤏᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ᥄”
MAT 26:73 ᤛᤵᤑᤠᤀᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤔᤏᤠᤜᤠ᤹ ᤐᤋᤪᤢᤛᤖᤥ ᤔᤧᤒᤣᤀᤠᤱ ᤔᤧᤔᤧᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤂᤧᤏᤧ᤹ᤀᤠᤱ ᤗᤳᤌᤡᤰᤏᤧᤖᤥ. ᤌᤣᤀᤠᤱᤓᤧᤸᤗᤧ ᤁᤧᤒᤠ᤺ᤴ ᤀᤡᤰᤗᤠ᤺ᤴ ᤃᤠᤗᤡᤗᤛ᤻ᤔᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥”
MAT 26:74 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤕᤠᤶᤔᤥ ᤔᤠᤱᤜᤧᤰᤛᤡᤱᤗ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤡ᤺ᤀᤠᤖ॥” ᤜᤧᤰᤁᤣ ᤐᤠ᤺ᤳᤋᤢᤏᤠᤔᤧ᤺ᤴᤏᤣ ᤀᤡᤱᤘᤠ᤺ᤴ ᤁᤠ᤺ᤛᤧᤖᤥ॥
MAT 26:75 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤡᤔᤥ ᤕᤧᤛᤢᤖᤧ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤏᤡᤱᤘᤠ᤹ ᤛᤢᤶ ᤗ᤹ᤖᤧ॥ ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧ ᤐᤣᤀᤠᤱ ᤀᤢ᤺ᤰᤁᤠᤱ-ᤀᤢ᤺ᤰ ᤜᤠᤒᤧᤖᤥ॥
MAT 27:1 ᤁᤢᤏᤠᤶᤍᤠ᤺ᤵᤔᤠ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧᤛᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤂᤥ᤺ᤛᤢᤖ ᤕᤠ᤺ᤶᤔᤠᤒᤣ ᤑᤠ᤹ᤀᤠᤱ ᤏᤡᤱᤛᤣ᤺ᤰ ᤔᤧᤈᤥᤃᤢᤖᤥ॥
MAT 27:2 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤡᤔᤧᤄᤣ᤺ᤰᤂᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤥ ᤔᤧᤍᤣ᤹ᤖᤢᤖᤥ॥
MAT 27:3 ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤱᤃᤧᤗᤧᤰᤐᤠ ᤕᤜᤢᤍᤠ᤺ᤸᤗᤧ ᤕᤧᤛᤢ᤺ᤴ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤗᤥ᤺ᤖᤧ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤛᤢᤶᤒᤥ᤺ᤱ ᤕᤢᤵᤐᤠᤕᤠᤱᤅᤡᤴ ᤋᤣ᤹ᤖᤢᤀᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤏᤢ᤺ᤰᤋᤢ ᤐᤡᤖᤢᤛᤡ.
MAT 27:4 “ᤀᤡᤱᤃᤠ᤹ᤃ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤔᤏᤠ᤺ᤴ ᤀᤡᤱᤗᤧᤰᤋᤢᤱᤗᤥ॥” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤌᤣᤀᤠᤱ ᤆᤥᤃᤢᤶᤒᤧᤒᤠ ᤜᤥ᤺ᤵᤗᤥ॥ ᤂᤧᤱᤃ ᤂᤧᤏᤧ᤹ ᤀᤠᤒᤠᤅᤣ ᤁᤧᤈᤥᤃᤢᤒᤠᤖᤥ॥”
MAT 27:5 ᤂᤧᤴ ᤂᤧᤵᤛᤢᤀᤠᤱ ᤕᤜᤢᤍᤠ᤺ᤸᤗᤧ ᤂᤧᤴ ᤕᤢᤵᤐᤠᤕᤠᤱᤅᤡᤴ ᤔᤠᤱᤜᤡᤶᤔᤥ ᤗᤠᤵᤑᤢᤛᤢᤎ. ᤜᤧᤰᤁᤩᤠᤱ ᤗ᤺ᤴᤍᤧ ᤐᤣᤀᤠᤱ ᤀᤠᤒᤠᤅᤣ ᤑᤥ᤺ᤴᤇᤡᤱ ᤛᤩᤧᤖᤥ॥
MAT 27:6 ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤴ ᤕᤢᤵᤐᤠᤕᤠᤱᤅᤡᤴ ᤔᤧᤄᤵᤛᤢᤀᤠᤱ ᤔᤧᤒᤠ᤺ᤳᤋᤢ. “ᤁᤱᤃ ᤔᤏᤠ ᤛᤧᤳᤇᤧ ᤐᤡᤔᤏᤠᤒᤠ ᤕᤠᤱᤗᤥ. ᤜᤧᤰᤁᤣ᤺ᤸᤗᤧ ᤔᤠᤱᤜᤡᤶ ᤕᤠᤱᤓᤢᤱᤔᤠᤀᤥ ᤁᤣ᤺ᤵᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤶᤒᤡᤏᤧᤴᤗᤥ॥”
MAT 27:7 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤁᤥ᤺ᤶᤓᤗᤣᤖᤧ ᤁᤢᤀᤡᤰᤋᤠᤵᤐᤡᤴ ᤋᤠᤰᤁᤴᤏᤡᤒᤠᤜᤠ᤹ ᤔᤧᤛᤡ᤺ᤸᤗᤧ ᤗᤢᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤔᤠ ᤏᤡ᤺ᤴᤎᤥ ᤔᤧᤈᤥᤃᤢ॥
MAT 27:8 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤀᤡᤴ ᤌᤠᤖᤡᤰᤛᤠᤱ ᤂᤧᤴ ᤀᤡᤰᤋᤠᤵᤐᤡᤴ ᤔᤠᤰᤂᤡ᤹ᤖᤧ ᤀᤡᤱᤔᤏᤠᤒᤠ ᤀᤡᤰᤋᤠᤵ ᤗ᤹ᤖᤡᤰ ᤔᤧᤔᤧᤳᤋᤢᤖᤥ॥
MAT 27:9 ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ– “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤜᤧᤴᤍᤢᤒᤠ ᤁᤢᤔᤧᤸᤗᤢᤱ ᤛᤢᤶᤒᤥ᤺ᤱ ᤕᤢᤵᤐᤠᤕᤠᤱ ᤔᤧᤍᤠ᤺ᤰᤋᤢᤖᤥ.
MAT 27:10 ᤜᤧᤰᤁᤩᤠᤱ ᤍᤠᤱᤒᤧᤸᤗᤧ ᤀᤥ᤺ᤴᤎᤠᤰᤋᤠᤱᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤖᤧ ᤁᤥ᤺ᤶᤓᤗᤣᤖᤧ ᤁᤢᤀᤡᤰᤋᤠᤵᤐᤡᤴ ᤔᤧᤀᤡᤅᤢᤖᤥ॥”
MAT 27:11 ᤀᤠᤸᤗ ᤕᤧᤛᤢ᤺ᤴ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤁᤢᤍᤃᤡ ᤕᤧᤒᤧᤸᤗᤧ ᤛᤢᤜᤠᤱᤃᤧᤶᤒᤧᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢᤖ ᤁᤧᤒᤳᤗᤥ॥”
MAT 27:12 ᤁᤖ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤸᤗᤧ ᤂᤢᤏᤧ᤹ ᤔᤧᤶᤒᤠ᤺ᤳᤋᤣ ᤕᤧᤒᤧᤖᤥ॥
MAT 27:13 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤁᤧᤶᤃᤢ᤺ᤳᤋᤧᤒᤠ ᤀᤠᤵᤋᤡᤰᤁᤡᤴ ᤁᤧᤱᤄᤧᤵᤛᤢᤴᤒᤡ᥅”
MAT 27:14 ᤁᤖ ᤕᤧᤛᤢ᤺ᤴ ᤐᤠ᤺ᤴᤎᤡᤰᤁᤠᤱ ᤔᤧᤶᤒᤠ᤺ᤳᤋᤣ ᤕᤧᤒᤧ. ᤜᤧᤰᤁᤣ᤺ᤸᤗᤧ ᤛᤢᤜᤠᤱᤃᤧᤶᤒᤠᤸᤗᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤖᤥ॥
MAT 27:15 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤗᤳᤇᤠ ᤛᤠᤰᤐᤠ ᤁᤧᤎᤠ᤺ᤒᤠ ᤔᤏᤠ᤺ᤴ ᤔᤏᤠᤜᤠ᤹ᤖᤧ ᤗᤧᤖᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤛᤢᤜᤠᤱᤃᤧᤶᤒᤠᤸᤗᤧ ᤗᤧᤵᤔᤠ ᤌᤡᤶ ᤁᤳᤋᤢᤖᤥ॥
MAT 27:16 ᤂᤧᤴ ᤕᤧᤶᤔᤥ ᤒᤖᤒ᤻ᤒᤠᤛ ᤔᤧᤵᤔᤏᤠᤒᤠ ᤁᤧᤀᤡᤱᤒᤠ ᤁᤢ᤹ᤀᤡᤃᤧᤓᤧ᤹ᤒᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤀᤠᤱ ᤘᤕᤧ॥
MAT 27:17 ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤳᤋᤡᤴ ᤗᤧᤖᤢᤱ ᤐᤡᤏᤡᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤣ᥅ ᤒᤖᤒ᤻ᤒᤠᤛᤧᤏ ᤒᤡ ᤀᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠ ᤕᤧᤛᤢ᤺ᤴ ᤗᤧᤖᤢᤱ ᤐᤡᤏᤡᤱᤒᤠᤒᤡ᥅”
MAT 27:18 ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤕᤧᤛᤢ᤺ᤴ ᤏᤠᤔᤧᤜᤧᤳᤋᤢᤀᤠᤱ ᤂᤢᤏᤧ᤹ᤀᤥ ᤜᤢᤰᤔᤧᤛᤢᤵᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥
MAT 27:19 ᤐᤡᤗᤠᤋᤛᤧᤴ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤅᤧᤸᤗᤧᤀᤣ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤄᤱ ᤜᤠᤰᤋᤢ. “ᤂᤧᤴ ᤛᤠᤶᤕᤥᤏᤡᤒᤠ ᤔᤏᤠ᤺ᤴ ᤌᤣᤀᤠᤱ ᤔᤧᤔᤧᤳᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤴᤍᤧ ᤛᤧᤴᤍᤡᤰ ᤂᤧᤴ ᤔᤏᤠ᤺ᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤛᤧᤵᤔᤠᤱ ᤔᤠᤰᤋᤢᤱᤗᤥ॥”
MAT 27:20 ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤒᤖᤒ᤻ᤒᤠᤛᤧᤏ ᤗᤧᤵᤔᤠ ᤐᤠᤱᤔᤠ ᤜᤧᤰᤁᤩᤠᤱ ᤕᤧᤛᤢ᤺ᤴ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤐᤠᤱᤔᤠ ᤐᤥ᤺ᤱ ᤗ᤹ᤖᤡᤰ ᤔᤏᤠᤜᤠ᤹ ᤔᤧᤜᤢᤛᤢᤛᤡᤖᤥ॥
MAT 27:21 ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤧᤴ ᤏᤧᤵᤑᤢᤀᤥ ᤀᤠᤳᤋᤡᤴ ᤗᤧᤖᤢᤱ ᤐᤡᤏᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤒᤣ᥅” ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢ. “ᤒᤖᤒ᤻ᤒᤠᤛᤧᤏ ᤗᤧᤖᤧ᤹ᤀᤥ॥”
MAT 27:22 ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠ ᤕᤧᤛᤢ᤺ᤴ ᤌᤣ ᤔᤧᤳᤋᤢᤱᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹ᤀᤥ᥄”
MAT 27:23 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤌᤣᤀᤠᤱᤒᤣ᥅ ᤂᤧᤸᤗᤧ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤠ᤹ᤒᤣ᥅” ᤁᤖ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹ᤀᤥ᥄”
MAT 27:24 ᤀᤠᤸᤗ ᤐᤡᤗᤠᤋᤛᤖᤧ ᤌᤣᤀᤠᤱ ᤆᤥ᤺ᤰᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤏᤢ ᤕᤠᤶᤔᤥ ᤜᤕᤱᤁᤡᤸᤗᤡᤱ ᤁᤧᤒᤥ᤺ᤱᤒᤠ ᤏᤡ᤺ᤛᤢᤀᤠᤱ ᤁᤴ ᤐᤠ᤺ᤴᤏᤥ ᤂᤢᤏᤧ᤹ ᤁᤢᤜᤢᤰ ᤜᤥ᤺ᤵ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤛᤧ ᤁᤢᤜᤢᤰᤜᤠ᤹ ᤘᤠᤜᤵᤋᤢᤖ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤕᤠ᤺ᤶᤒᤰ ᤔᤧᤴᤓᤣ᤺ᤴᤏᤣ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤛᤡ᤺ᤔᤧᤴᤏᤥ ᤀᤡᤱᤃᤠ᤹ ᤀᤠᤗᤰ ᤜᤥ᤺ᤵᤗᤥ॥ ᤀᤰᤂᤣ ᤁᤧᤈᤥ᤺ᤰᤐᤠᤜᤠ᤹ᤃ ᤒᤠ ᤂᤡᤏᤡ᤹ᤏᤡᤱᤗᤥ᥄”
MAT 27:25 ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢ. “ᤁᤴ ᤐᤠ᤺ᤴᤏᤡᤸᤗᤧᤴ ᤋᤴᤇᤪᤢᤱᤅᤡᤴ ᤀᤠᤏᤡᤃᤧ ᤏᤢ ᤀᤠᤏᤡᤃᤧ ᤔᤢ᤹ᤀᤡᤍᤠᤱᤛᤠ ᤛᤶᤍᤠᤱ ᤌᤠ᤺ᤖᤖᤥ᥄”
MAT 27:26 ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤒᤖᤒ᤻ᤒᤠᤛᤧᤏ ᤗᤧᤖᤢ ᤐᤡᤖᤢᤛᤡ. ᤁᤖ ᤕᤧᤛᤢ᤺ᤴ ᤋᤧ᤺ᤶᤓᤢᤰ ᤕᤠᤰᤔᤠ ᤐᤠᤱᤄᤢᤛᤡᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤑᤠ᤹ᤀᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤢᤰᤛᤢᤵᤋᤢᤛᤡᤖᤥ॥
MAT 27:27 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤂᤢᤏᤡ᤹ ᤋᤢᤖᤠ ᤕᤰᤁᤥ ᤔᤧᤍᤣ᤹ᤖᤢᤀᤠᤱ ᤂᤧᤵᤔᤥ ᤋᤢᤖᤠᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤁᤢᤄᤡᤖᤡ ᤔᤧᤈᤢᤵᤛᤧ॥
MAT 27:28 ᤂᤧᤱᤜᤠ᤹ᤖᤧ ᤁᤢᤍᤣ᤺ᤳᤋᤡᤴ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤐᤖᤠᤴᤗᤠ ᤜᤠᤱᤍᤣ᤺ᤳᤋᤡᤴ ᤔᤧᤈᤠᤰᤋᤢ॥
MAT 27:29 ᤜᤧᤰᤁᤩᤠᤱ ᤋᤡᤱᤃᤪᤣ᤺ᤰᤁᤡᤸᤗᤧᤴ ᤋᤡᤆ᤺ ᤔᤧᤓᤕᤢᤀᤠᤱ ᤁᤢᤎᤧᤃᤣ᤺ᤰᤐᤥ ᤔᤧᤄᤢ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤰᤁᤠ᤺ᤳᤋᤡᤴ ᤁᤢᤈᤢᤵᤛᤠᤱ ᤜᤢᤰᤁᤥ ᤔᤧᤓᤳᤇᤢᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤗ ᤀᤰᤂᤣᤗ᤹ᤖᤡᤰ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. “ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄”
MAT 27:30 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤌᤩᤧᤳ ᤔᤧᤎᤥ᤺ᤰᤋᤢᤀᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤎᤧᤃᤣ᤺ᤰᤐᤥ ᤀᤧᤳᤗᤧᤱ ᤔᤧᤄᤠᤰᤂᤢ॥
MAT 27:31 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤔᤧᤛᤢᤖᤢᤀᤠᤱ ᤂᤧᤴ ᤜᤠᤱᤍᤣ᤺ᤳᤋᤡᤴ ᤔᤧᤓᤧᤴᤍᤢᤀᤠᤱ ᤁᤢᤍᤣ᤺ᤳᤋᤡᤴ ᤔᤧᤈᤠᤰᤋᤢ॥ ᤜᤧᤰᤁᤩᤠᤱ ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤔᤧᤍᤣ᤹ᤖᤢᤖᤥ॥
MAT 27:32 ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤛᤠᤀᤡᤖᤣᤏᤡ ᤕᤧᤰᤕᤰᤗᤠᤶ ᤁᤧᤍᤠ᤺ᤒᤠ ᤛᤡᤔᤥᤏ ᤔᤧᤵᤔᤏᤠᤒᤠ ᤔᤏᤠ᤺ᤴ ᤔᤧᤍᤢᤔᤢᤀᤠᤱ ᤕᤧᤛᤢᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤛᤠᤰᤁᤧᤸᤗᤧᤰ ᤐᤱᤔᤠ ᤔᤧᤒᤠᤱᤄᤢ॥
MAT 27:33 ᤂᤧᤱᤜᤠ᤹ ᤃᤗᤃᤌᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤃᤧᤖᤧ (ᤃᤗᤃᤌᤠ ᤑᤠ᤹ᤀᤡᤱᤃ ᤔᤡᤰᤂᤥ᤺ᤰᤐᤠ ᤐᤥ᤺ᤱᤗᤥ)॥
MAT 27:34 ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤧᤄᤡ᤺ᤰᤐᤠ ᤛᤡᤍᤠ᤹ ᤑᤢᤵᤔᤏᤠᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤄᤢ. ᤁᤖ ᤕᤧᤛᤢᤖᤧ ᤂᤧᤴ ᤛᤠ᤹ᤖᤢᤀᤠᤱ ᤌᤢᤱᤔᤠ ᤔᤧᤍᤧᤴᤍᤧᤴ॥
MAT 27:35 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤀᤠᤱ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤋ᤹ᤕᤠ᤺ᤴᤛᤥ᤺ᤴ ᤔᤧᤃᤧᤛᤢᤖᤥ॥
MAT 27:36 ᤂᤧᤱᤜᤠ᤹ᤖᤧ ᤂᤧᤵᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤅᤡᤸᤗᤧ ᤁᤢᤒᤢᤱᤔᤥ ᤔᤧᤕᤢᤅᤧᤖ ᤂᤢᤏᤧ᤹ ᤔᤧᤃᤥ᤺ᤛᤢᤖᤥ॥
MAT 27:37 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰ ᤛᤶᤍᤠᤱ ᤁᤢᤀᤠᤵᤋᤡᤰ ᤛᤰᤁᤡᤴ ᤔᤧᤄᤡᤵᤛᤢᤀᤠᤱ ᤐᤳᤇᤧ. ᤂᤧᤵᤔᤥ “ᤁᤱᤃ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤕᤧᤛᤢᤖᤥ” ᤗ᤹ᤖᤡᤰ ᤔᤧᤛᤠᤵᤋᤢᤀᤠᤱ ᤐᤳᤇᤧ॥
MAT 27:38 ᤂᤢᤏᤧ᤹ᤏᤢᤀᤣ ᤁᤢᤓᤧᤴᤇᤠᤱ ᤏᤢ ᤁᤢᤈᤢᤵᤛᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤑᤠ᤺ᤴᤍᤠᤜᤠ᤹ ᤌᤰᤛᤢᤒᤠᤜᤠ᤹ᤖᤧ ᤔᤧᤓᤥ᤺ᤴᤍᤢᤛᤡᤖᤥ॥
MAT 27:39 ᤂᤧᤵᤔᤥᤗᤠᤶ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤌᤧᤃᤣ᤺ᤰᤐᤧᤴ ᤔᤧᤜᤡᤰᤂᤢᤖ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ.
MAT 27:40 “ᤂᤧᤏᤧ᤹ ᤔᤠᤱᤜᤡᤶᤔᤡᤴ ᤁᤧᤕ᤺ᤒᤠᤀᤠᤱ ᤛᤢᤶᤕᤧᤴᤏᤥ ᤁᤧᤈᤥ᤺ᤰᤐᤣ. ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤗᤠᤶ ᤕᤥ ᤌᤩᤧ᤹ᤀᤠᤱ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤅᤧ᤹ᤀᤥ॥”
MAT 27:41 ᤜᤧᤰᤁᤣᤗ᤹ᤖᤡᤰᤁᤣ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ॥
MAT 27:42 ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤂᤧᤸᤗᤧᤃ ᤘᤣ᤹ᤜᤠ᤹ ᤋᤠᤱᤛᤧ᤺ᤵᤋᤢᤛᤡ. ᤁᤖ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤛᤢᤰᤋᤧᤴᤗᤥ॥ ᤂᤢᤏᤧ᤹ᤃ ᤀᤡᤛᤪᤠᤀᤡᤗᤛ᤻ᤔᤠ ᤜᤠᤱᤔᤢ᥄ ᤜᤠᤖᤠ᤹ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤗᤠᤶ ᤕᤥ ᤌᤠ᤺ᤖ. ᤜᤧᤰᤁᤩᤠᤱ ᤀᤠᤏᤡᤃᤧ ᤂᤢᤏᤧ᤹ ᤏᤛᤠ᤺ᤴ ᤆᤥᤃᤢᤶᤒᤧ᤹ᤖᤥ॥
MAT 27:43 ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢ᤹॥ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤴ ᤂᤧᤵᤔᤥᤗᤠᤶ ᤀᤠᤸᤗᤥ ᤛᤧ᤺ᤵᤋᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤛᤠ᤺ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤕᤧᤖᤥ॥”
MAT 27:44 ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤛᤡᤒᤠ ᤑᤠ᤺ᤴᤍᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤖᤧᤳᤇᤢᤖᤥ॥
MAT 27:45 ᤜᤧᤰᤁᤩᤠᤱ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳᤋᤠᤱᤎᤥ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤠᤍᤠᤶᤔᤠᤸᤗᤧ ᤂᤧᤴ ᤗᤠᤈᤣ᤹ᤀᤡᤴ ᤛᤡᤍᤧᤵ ᤋᤧᤵᤋᤢᤖᤥ॥
MAT 27:46 ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤖ ᤐᤳᤇᤧᤸᤗᤧ ᤕᤧᤛᤢ᤺ᤴ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. “ᤀᤣᤗᤡ. ᤀᤣᤗᤡ ᤗᤠᤔᤠ ᤛᤒᤂᤌᤠᤏᤡ᥅” (ᤂᤧᤴ ᤑᤠ᤹ᤀᤡᤱᤃ “ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣᤀᤠᤱ ᤁᤧᤗᤧᤖᤠᤱ ᤁᤧᤍᤣ᤺ᤛᤠᤱᤒᤣ᥅” ᤐᤥ᤺ᤱᤗᤥ॥)
MAT 27:47 ᤂᤧᤵᤔᤥ ᤁᤧᤕᤧᤵᤐᤠ ᤁᤢᤓᤠᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤀᤢ᤺ᤳᤋᤢᤖ ᤐᤳᤗᤥ॥”
MAT 27:48 ᤂᤧᤱᤜᤠ᤹ᤀᤥ ᤗᤳᤇᤠ ᤔᤏᤠᤎᤡᤰ ᤂᤡᤔᤥ ᤗᤥ᤺ᤰᤋᤧᤖ ᤐᤣᤀᤠᤱ ᤂᤡᤃᤠᤰᤔᤠ᤺ᤴ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡᤀᤥ ᤏᤡ᤺ᤵᤛᤢ ᤜᤧᤰᤁᤩᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤛᤶᤔᤥ ᤑᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤡ᤺ᤳᤋᤢ ᤌᤢᤅᤢᤖ ᤑᤠ᤹ᤀᤠᤱ ᤁᤢᤔᤢᤖᤠᤀᤥ ᤌᤢᤵᤋᤢ ᤐᤡᤖᤢᤖᤥ॥
MAT 27:49 ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤛᤵᤑᤠᤖᤥ. ᤀᤣᤗᤡᤕᤠ᤺ᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤢ᤺ᤀᤠᤱ ᤂᤧᤴ ᤋᤠᤱᤛᤧ᤺ᤵᤋᤢ᤹ᤒᤡ ᤔᤧ᤺ᤶᤒᤡ ᤀᤥᤔᤧᤳᤋᤢᤶᤗᤥ॥”
MAT 27:50 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤠᤶᤔᤥ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. ᤜᤧᤰᤁᤩᤠᤱ ᤁᤢᤛᤰᤔᤠ ᤐᤣᤀᤠᤱ ᤛᤩᤧᤖᤥ॥
MAT 27:51 ᤒᤠ ᤂᤧᤴ ᤕᤧᤶᤔᤥ ᤔᤠᤱᤜᤡᤶᤔᤥᤒᤠ ᤑᤥ᤺ᤴᤍᤠ᤺ᤴ ᤌᤥᤗᤠᤶ ᤕᤥ ᤁᤢᤒᤢᤱᤔᤥ ᤌᤠᤖᤡᤰ ᤂᤧᤸᤗᤧᤰ ᤋᤧ᤺ᤰᤂᤧ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤠ᤹ᤖᤡᤰ ᤌᤢᤖᤢᤵᤗᤢᤵ ᤕᤰᤂᤧ. ᤐᤕᤶ ᤗᤢᤱᤜᤠ᤹ ᤐ᤺ᤰᤂᤧ.
MAT 27:52 ᤀᤡᤵᤐᤢᤱᤜᤠ᤹ ᤔᤧᤜᤖᤧᤀᤠᤱ ᤀᤢᤴᤇᤣ᤺ᤴ ᤁᤧᤛᤡ᤺ᤒᤠᤀᤠᤱ ᤁᤧᤘᤠ᤹ᤒᤠ ᤕᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴᤏᤥ ᤁᤢᤜᤡᤱᤘᤧᤳ ᤔᤧᤒᤥ᤺ᤰᤂᤧᤀᤠᤱ ᤔᤧᤒᤥᤃᤧᤖᤥ॥
MAT 27:53 ᤂᤧᤱᤜᤠ᤹ ᤀᤡᤵᤐᤢᤱᤜᤠ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ ᤜᤧᤰᤁᤩᤠᤱ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤕᤠᤱᤛᤡ ᤂᤧᤱᤜᤠ᤹ ᤛᤣᤛᤣ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤕᤖᤡᤰ ᤔᤏᤠᤜᤠ᤹ᤖᤥ ᤏᤡ᤺ᤔᤧᤎᤠᤒᤧᤖᤥ॥
MAT 27:54 ᤂᤧᤵᤔᤥ ᤖᤥᤔᤡ ᤌᤰᤋᤢᤶᤒᤠᤴ ᤏᤢ ᤘᤣ᤹ᤜᤠ᤹ᤖᤧ ᤕᤧᤛᤢ᤺ᤴ ᤔᤧᤃᤥ᤺ᤛᤢᤖ ᤔᤧᤕᤢᤅᤧ॥ ᤂᤧᤱᤜᤠ᤹ᤖᤧ ᤗᤢᤵᤗᤡ ᤌᤠᤅᤧᤒᤠ ᤏᤢ ᤂᤧᤵᤔᤥ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤔᤧᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤖ ᤔᤧᤀ᤺ᤰᤋᤧ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤴ ᤏᤡᤱᤘᤠ᤹ᤑᤢᤛᤠ᤺ᤀᤣ ᤘᤕᤧᤖᤧᤳᤇ॥”
MAT 27:55 ᤂᤧᤵᤔᤥ ᤕᤖᤡᤰ ᤔᤧᤴᤇᤢᤔᤠᤜᤠ᤹ ᤔᤠ᤺ᤱᤄᤠᤗᤠᤶ ᤀᤥᤔᤀᤡ ᤔᤧᤕᤧᤒᤧ॥ ᤂᤧᤱᤜᤠ᤹ᤖᤧᤃ ᤕᤧᤛᤢ᤺ᤴ ᤃᤠᤗᤡᤗᤗᤠᤶᤔᤣ ᤁᤢᤛᤣᤘᤠ ᤆᤥ᤺ᤰᤛᤧ ᤔᤧᤍᤡᤶᤍᤢᤖ ᤔᤧᤍᤩᤧᤀᤠᤱ ᤔᤧᤘᤕᤧᤖᤥ॥
MAT 27:56 ᤂᤧᤵᤔᤥ ᤁᤧᤘᤠ᤹ᤔᤠᤜᤠ᤹ᤀᤥ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤕᤠᤁᤢᤒ ᤏᤢ ᤕᤢᤛᤢᤑᤖᤧ ᤁᤢᤶᤔᤠ ᤔᤖᤡᤕᤔ. ᤜᤧᤰᤁᤩᤠᤱ ᤈᤒ᤻ᤍᤡᤕᤠᤖᤧ ᤁᤢᤔᤣ᤺ᤳ (ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤁᤢᤶᤔᤠ) ᤔᤧᤘᤕᤧᤖᤥ॥
MAT 27:57 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑ ᤔᤧᤵᤔᤏᤠᤒᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤴ ᤋᤩᤧ॥ ᤂᤢᤏᤧ᤹ᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
MAT 27:58 ᤂᤧᤴ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ. ᤜᤧᤰᤁᤩᤠᤱ ᤐᤡᤗᤠᤋᤛᤖᤧᤀᤠᤱ ᤂᤧᤴ ᤔᤧᤒᤡᤖᤢᤖ ᤑᤠ᤹ᤀᤠᤱ ᤌᤰᤛᤢᤒᤠᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
MAT 27:59 ᤕᤧᤛᤢᤖᤧ ᤁᤢᤎᤰᤁᤡᤴ ᤕᤢᤛᤢᤑᤖᤧ ᤋᤣ᤹ᤖᤢᤀᤠᤱ ᤏᤢ᤺ᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤢ.
MAT 27:60 ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤗᤠᤃᤡ ᤗᤢᤱᤅᤥ ᤂᤥ᤺ᤶᤔᤏᤠᤒᤠ ᤁᤢᤛᤱ ᤀᤡᤵᤐᤢᤱᤅᤥ ᤏᤧᤛ᤻ᤛᤢᤖᤥ॥ ᤜᤧᤰᤁᤩᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤗᤠ᤺ᤰᤁᤠᤳᤗᤠᤶ ᤕᤶᤒᤠ ᤗᤢᤱᤅᤡᤸᤗᤧ ᤌᤣ᤺ᤰᤋᤢᤎ᤺ᤀᤠᤱ ᤏᤢ᤺ᤰᤂᤧ ᤐᤣᤖᤥ॥
MAT 27:61 ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤏᤢ ᤘᤣ᤹ᤛ᤻ᤔᤠ ᤔᤖᤡᤕᤶᤔᤡᤸᤗᤧ ᤂᤧᤴ ᤏᤡ᤺ᤳᤋᤠᤱᤏᤢᤀᤣ ᤀᤥᤔᤧᤳᤋᤧᤳᤇᤢᤖ ᤕᤢᤅᤧᤳᤇᤡ॥
MAT 27:62 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤌᤡᤰᤛᤡᤃᤣ᤺ᤰᤐᤠ ᤕᤧᤴᤏᤥ. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤐᤡᤗᤠᤋᤛᤖᤥ ᤔᤧᤒᤣᤀᤠᤱ
MAT 27:63 ᤀᤰᤂᤣ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤴ ᤀᤡᤱᤗᤧᤰᤐᤧᤴ ᤁᤢᤜᤡᤱᤘᤧᤳ ᤘᤕᤧᤸᤗᤧ ‘ᤀᤡᤱᤃᤠ᤹ ᤛᤡ᤺ᤀᤠᤒᤠ ᤛᤢᤶᤕᤧᤴᤏᤥ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤱᤅᤠᤖᤥ’ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤵᤔᤏᤠᤖᤥ॥
MAT 27:64 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤛᤢᤶᤕᤧᤴ ᤌᤠᤖᤡᤰ ᤛᤡᤱᤛᤡᤱᤅᤠᤱ ᤁᤢᤀᤡᤵᤐᤢᤱᤅᤡᤴ ᤁᤥᤔᤠ ᤐᤠᤱᤄᤧᤛᤧ᤹ᤀᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤧᤴᤍᤡᤰ ᤔᤧᤍᤠᤀᤠᤱ ᤁᤢᤎᤰᤁᤡᤴ ᤔᤧᤄᤢ᤺ᤳᤋᤢ ᤔᤧᤍᤣ᤹ᤖᤢ᤹. ᤜᤧᤰᤁᤩᤠᤱ ‘ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹’ ᤗ᤹ᤖᤡᤰ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ᤹ᤖᤥ॥ ᤁᤴ ᤐᤠ᤺ᤴᤏᤡᤱᤃ ᤋᤃᤡᤛ᤻ᤔᤠ ᤀᤡᤱᤗᤧᤰᤁᤡᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤥ᤺ᤱᤗᤥ॥”
MAT 27:65 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡ᤺ᤵᤐᤢᤱ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤂᤡᤏᤡ᤹ ᤛᤢᤰᤛᤢᤰ ᤂᤧᤴ ᤀᤡᤵᤐᤢᤱᤅᤡᤴ ᤁᤥᤛᤧᤶᤔᤧ᤹॥”
MAT 27:66 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤔᤧᤒᤣᤀᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥᤒᤠ ᤗᤢᤱᤅᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤀᤠᤱ ᤔᤏᤠᤜᤠ᤹ᤖᤧ ᤔᤧᤴᤜᤴᤍᤢᤴᤗ ᤑᤠ᤹ᤀᤠᤱ ᤌᤰᤛᤢᤒᤠᤜᤠ᤹ ᤂᤧᤵᤔᤥ ᤁᤥᤔᤠ ᤔᤧᤒᤠᤱᤄᤢᤛᤡᤖᤥ॥
MAT 28:1 ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤁᤢᤍᤠ᤺ᤴᤍᤡᤰᤔᤥ. ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤏᤢ ᤘᤣ᤹ᤛ᤻ᤔᤠ ᤔᤖᤡᤕᤶᤔᤡᤴ ᤕᤧᤛᤢ᤺ᤴ ᤔᤧᤏᤧᤛ᤻ᤛᤢᤒᤠ ᤀᤡᤵᤐᤢᤱᤅᤡᤴ ᤀᤥᤔᤧᤳᤇᤧ ᤐᤣᤛᤡᤖᤥ॥
MAT 28:2 ᤜᤰᤆᤄᤳ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤥ ᤌᤩᤧᤀᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤁᤧᤕᤧᤵᤐᤠ ᤂᤧᤴ ᤕᤶᤒᤠ ᤗᤢᤱᤅᤡᤴ ᤌᤡᤰ ᤗᤧᤵᤔᤠᤱ ᤀᤡᤛᤢᤀᤠᤱ ᤂᤧᤴ ᤛᤶᤍᤠᤱ ᤕᤢᤱᤛᤡᤱᤗᤥ॥
MAT 28:3 ᤂᤧᤸᤗᤧ ᤁᤢᤏᤠᤖᤠ᤺ᤴ ᤛᤠ᤺ᤶᤓᤣ ᤁᤢᤀᤡᤛᤡ᤺ᤰ ᤗᤧᤰᤋᤧ. ᤜᤧᤰᤁᤩᤠᤱ ᤁᤢᤍᤣ᤺ᤳᤜᤠ᤹ ᤏᤠ᤺ᤱ ᤁᤢᤀᤡᤛᤡ᤺ᤰ ᤑ᤺ ᤗ᤹ᤖᤧᤖᤥ॥
MAT 28:4 ᤂᤧᤴ ᤀᤡ᤺ᤵᤐᤢᤱ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ ᤁᤡ᤺ᤔᤠᤸᤗᤧ ᤔᤧᤕᤰᤂᤧᤖ ᤜᤷᤃᤢᤵ ᤔᤧᤈᤥ᤺ᤴᤍᤧᤀᤠᤱ ᤁᤢᤛᤡᤘᤧᤳ ᤔᤏᤠ ᤁᤢᤀᤡᤛᤡ᤺ᤰ ᤔᤧᤒᤥ᤺ᤰᤂᤧᤖᤥ॥
MAT 28:5 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤳᤇᤧᤴᤏᤧ᤹ᤀᤥ. ᤂᤡᤴᤇᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤕᤧᤛᤢ᤺ᤴ ᤁᤧᤃᤥ᤺ᤳᤇᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥
MAT 28:6 ᤂᤢᤏᤧ᤹ᤃ ᤁᤵᤔᤥ ᤜᤥ᤺ᤵᤗᤥ. ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤑᤧᤖᤧᤳᤇᤧ᤹ᤀᤠᤱ ᤁᤢᤎᤰᤁᤡᤴ ᤏᤧᤛ᤻ᤛᤧᤒᤠ ᤋᤧᤴᤏᤡᤴ ᤀᤥᤔᤧᤳᤋᤧᤳᤇᤧᤏᤠ॥
MAT 28:7 ᤜᤧᤰᤁᤩᤠᤱ ᤜᤠᤖᤠ ᤐᤣᤃᤧᤳᤇᤧ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤧᤇᤧ᤹ᤀᤥ. ‘ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗᤀᤥ ᤐᤣ᤺ᤰᤗ ᤐᤳᤗᤥ॥ ᤂᤢᤏᤧ᤹ ᤂᤧᤵᤔᤥᤀᤣ ᤂᤡᤏᤡ᤹ ᤁᤧᤍᤢᤔᤢᤶᤗᤥ॥’ ᤀᤥᤔᤧᤳᤋᤧᤳᤇᤧ᤹ᤀᤥ. ᤁᤴ ᤐᤠ᤺ᤴᤏᤡᤴ ᤂᤡᤴᤇᤡ᤹ ᤔᤧᤳᤏᤧᤳᤇᤡᤱᤅᤠᤱ ᤘᤠ᤹ᤀᤠᤖᤥ॥”
MAT 28:8 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤁᤡ᤺ᤛᤧᤳᤇᤡᤛᤠᤱ ᤀᤥᤔᤢᤗ᤹ᤖᤧᤳᤇᤡᤖ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤂᤧᤴ ᤐᤠ᤺ᤴᤏᤡᤴ ᤔᤧᤳᤇᤧ ᤀᤡᤵᤐᤢᤱᤗᤠᤶ ᤆᤠᤳᤋᤧᤳᤇᤡᤖ ᤐᤣᤛᤡᤖᤥ॥
MAT 28:9 ᤜᤰᤆᤄᤳ ᤕᤧᤛᤢᤖᤧ ᤂᤧᤱᤜᤠ᤹ ᤋᤢᤔᤢᤛᤡᤀᤠᤱ “ᤛᤣᤘᤠᤖᤥ” ᤔᤧᤳᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤕᤧᤛᤢᤖᤥ ᤋᤩᤧᤳᤇᤡᤀᤠᤱ ᤁᤢᤗᤠᤱᤜᤠ᤹ ᤋᤧᤶᤛᤧᤳᤇᤢᤖ ᤛᤣᤘᤠ ᤆᤥᤃᤧᤳᤇᤢ॥
MAT 28:10 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤔᤧᤃᤡᤛᤧᤳᤇᤧᤴᤏᤧ᤹ᤀᤥ. ᤐᤣᤃᤧᤳᤇᤧ᤹ᤀᤠᤱ ᤀᤠᤴᤛᤠ᤹ᤛᤡ ᤃᤠᤗᤡᤗᤀᤥ ᤁᤧᤒᤣᤃᤡᤔᤢ ᤔᤧᤳᤋᤧᤇᤧᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤂᤧᤳᤌᤥᤀᤣ ᤔᤧᤍᤢᤶᤔᤠ᤹ᤖᤥ॥”
MAT 28:11 ᤂᤧᤴ ᤔᤧᤴᤇᤢᤔᤠᤜᤠ᤹ ᤕᤧᤰᤕᤰᤁᤥ ᤏᤢ᤺ᤰᤂᤧᤳᤇᤡ ᤐᤣᤛᤧᤳᤇᤡᤸᤗᤧ ᤁᤢᤓᤠ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤐᤥ᤺ᤰᤂᤧᤒᤠ ᤁᤧᤖᤧᤰ ᤜᤡᤴᤍᤥ᤺ᤰᤁᤡᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤈᤧᤰᤋᤢᤛᤡᤖᤥ॥
MAT 28:12 ᤜᤧᤰᤁᤣ᤺ᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤀᤡᤱᤔᤧᤍᤱᤄᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤰᤛᤢᤒᤠᤜᤠ᤹ ᤕᤖᤡᤰ ᤕᤠᤱ ᤔᤧᤒᤡᤖᤢᤛᤡᤖ
MAT 28:13 ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤧ ᤛᤧᤴᤍᤡᤰ ᤀᤡᤵᤛᤡᤃᤧᤀᤠᤱ ᤏᤧᤛ᤻ᤛᤡᤃᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤁᤢᤎᤰᤁᤡᤴ ᤔᤧᤄᤢ᤺ᤳᤋᤢᤀᤠᤱ ᤔᤧᤍᤣ᤹ᤖᤢᤖᤥ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤗ ᤐᤥ᤺ᤱᤗᤥ॥
MAT 28:14 ᤁᤴ ᤐᤠ᤺ᤴᤏᤡᤴ ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤵᤛᤢᤏᤧ ᤑᤠ᤹ᤃᤪ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤛᤢᤶᤒᤧᤀᤠᤱ ᤂᤡᤏᤡ᤹ ᤏᤠᤱᤅᤠᤛᤡᤃᤧ᤹ᤖᤥ॥”
MAT 28:15 ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤖᤡᤰ ᤕᤠᤱ ᤔᤧᤍᤠ᤺ᤰᤋᤢᤀᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤡᤱᤃ ᤛᤧ᤺ᤖᤧᤀᤠᤱ ᤀᤠᤀᤡᤴ ᤌᤠᤖᤡᤰᤛᤠᤱ ᤕᤜᤢᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ॥
MAT 28:16 ᤜᤧᤰᤁᤩᤠᤱ ᤌᤡᤰ-ᤌᤡᤰ (᥇᥇) ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤧᤛᤢᤖᤧ ᤐᤣᤃᤧᤶᤔᤧ᤹ᤀᤥ ᤗ᤹ᤖᤡᤰ ᤔᤧᤳᤋᤢᤛᤡᤒᤠ ᤃᤠᤗᤡᤗᤀᤥᤒᤠ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥
MAT 28:17 ᤂᤧᤱᤜᤠ᤹ᤖᤧ ᤂᤧᤵᤔᤥ ᤕᤧᤛᤢ᤺ᤴ ᤔᤧᤏᤡ᤺ᤛᤢᤀᤠᤱ ᤛᤣᤘᤠ ᤔᤧᤈᤥᤃᤢ. ᤁᤖ ᤁᤢᤓᤠᤖᤧᤃ ᤆᤵᤆᤡ ᤔᤧᤈᤥᤃᤢᤖᤥ॥
MAT 28:18 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤱᤜᤠ᤹ᤀᤥ ᤋᤩᤧᤀᤠᤱ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤕᤢᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥
MAT 28:19 ᤂᤧᤸᤗᤧ ᤆᤥᤃᤢᤸᤗᤧ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤢ᤹ᤛᤠᤶᤒᤠ ᤆᤥᤃᤧᤶᤛᤡᤶᤔᤧ᤹ᤀᤥ॥ ᤐᤠᤏᤢᤍᤡᤱ ᤐᤠ᤺. ᤀᤠᤒᤢᤍᤡᤱ ᤛᤠ᤺. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤡᤖᤧᤶᤛᤡᤶᤔᤧ᤹ᤀᤥ॥
MAT 28:20 ᤀᤡᤱᤃᤠ᤹ ᤀᤡᤱᤈᤠ᤺ᤱ ᤐᤡᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤜᤢ᤹ᤖᤧᤶᤛᤡᤶᤔᤧ᤹ᤀᤥ॥ ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥ ᤌᤠᤖᤡᤰᤁᤣ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤀᤠᤖᤥ॥”
MAR 1:1 ᤁᤱᤃ ᤏᤡᤱᤘᤠ᤹ᤑᤢᤛᤠ᤺ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤸᤗᤧ ᤁᤢᤜᤣ᤺ᤰᤛᤡᤱᤔᤠᤖᤥ॥
MAR 1:2 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. ‘ᤂᤧᤏᤧ᤹ ᤁᤧᤗᤠᤶᤔᤡᤴ ᤕᤠᤖᤡᤵ ᤆᤥᤃᤢᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤀᤡᤱᤛᤠᤒᤧᤴ ᤁᤧᤍᤃᤡ ᤐᤠᤱᤄᤢᤱ ᤕᤢ᤺ᤛᤢᤱᤗᤥ॥’
MAR 1:3 ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥ᤺ᤴ ᤆᤥᤃᤧᤶᤔᤧ᤹᥄’”
MAR 1:4 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤁᤢᤀᤡᤛᤡ᤺ᤰ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤀᤣ᤺ᤰᤛᤠᤍᤧᤴᤏᤥ ᤋᤩᤧᤀᤠᤱ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤒᤡᤖᤡ᤹ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤖᤥ॥
MAR 1:5 ᤕᤜᤢᤍᤡᤕᤠ ᤌᤢᤶ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤀᤡᤱᤃᤠ᤹ ᤗᤠᤕᤥᤒᤠᤀᤠᤖᤥ ᤔᤧᤒᤠ᤺ᤳᤋᤢᤖ ᤕᤷᤍᤏ ᤕᤱᤄᤱᤅᤥ ᤂᤢᤏᤧ᤹ᤗᤠᤶ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥
MAR 1:6 ᤀᤠᤸᤗ ᤕᤢᤜᤢᤴᤏᤠ᤺ᤱᤃ ᤀᤢᤔᤧ᤺ᤸᤗᤧ ᤁᤢᤔᤢᤖᤡᤰᤗᤠᤶ ᤌᤠᤰᤔᤏᤠᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤢ ᤛᤧᤜᤥᤒᤠ ᤑ᤹ᤀᤡ ᤁᤧᤕᤢᤶᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤂᤢᤏᤧ᤹ᤃ ᤏᤡ᤺ᤱᤄᤢ᤺ᤰᤘᤠ ᤏᤢ ᤋᤠᤶᤓᤢᤱ ᤛᤰᤘᤠᤄᤢ ᤁᤧᤈᤠᤒᤠ ᤘᤕᤧᤖᤥ॥
MAR 1:7 ᤕᤢᤜᤢᤴᤏᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤓᤥ᤺ᤛᤢ. “ᤀᤡᤱᤃᤠ᤹ ᤀᤠᤀᤣᤃᤠᤱ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤔᤢᤰᤛᤠᤶᤛᤠᤒᤠᤴ ᤋᤠ᤺ᤖᤥ॥ ᤀᤡᤱᤃᤠ᤹ᤃ ᤕᤥ᤺ᤰ ᤁᤢᤀᤡᤛᤡ᤺ᤰ ᤁᤢᤗᤠᤱᤛᤢ᤺ᤵ ᤏᤠᤶᤜᤠ᤹ ᤑᤠ᤺ᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥
MAR 1:8 ᤀᤡᤱᤃᤠ᤹ᤃ ᤂᤡᤏᤡ᤹ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤏᤡᤱᤗ ᤐᤳᤋᤠ. ᤁᤖ ᤂᤢᤏᤧ᤹ᤃ ᤛᤣᤛᤣᤔᤠᤱᤅᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ᤹ᤖᤥ॥”
MAR 1:9 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤃᤠᤗᤡᤗ ᤌᤢᤶᤔᤥᤒᤠ ᤏᤠᤛᤖᤋᤗᤠᤶ ᤋᤩᤧᤀᤠᤱ ᤕᤢᤜᤢᤴᤏᤠᤗᤠᤶ ᤕᤷᤍᤏ ᤕᤱᤄᤱᤅᤥ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ॥
MAR 1:10 ᤂᤢᤏᤧ᤹ ᤆᤫᤠ᤺ᤳᤋᤥᤗᤠᤶ ᤗ᤺ᤴᤍᤧᤏᤢᤔᤧ᤺ᤴᤏᤣ ᤋᤠᤱᤛᤠᤰᤐᤧᤴ ᤜᤖᤧᤀᤠᤱ ᤛᤣᤛᤣᤔᤠᤱᤅᤡᤴ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤂᤢᤏᤧ᤹ ᤁᤢᤛᤶᤍᤠᤱ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤖᤥ॥
MAR 1:11 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤂᤧᤏᤧ᤹ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤏᤧᤖᤥ. ᤂᤧᤏᤧ᤹ᤏᤢ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥”
MAR 1:12 ᤂᤡᤔᤥ ᤛᤣᤛᤣᤔᤠᤱᤅᤡᤸᤗᤧ ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤐᤣ᤺ᤰᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤋᤣ᤹ᤖᤢ॥
MAR 1:13 ᤂᤢᤏᤧ᤹ ᤂᤧᤵᤔᤥ ᤗᤡᤒᤥ᤺ᤱ (᥊᥆) ᤕᤧᤴ ᤌᤠᤖᤡᤰ ᤘᤕᤧᤸᤗᤧ ᤔᤠᤑᤧᤴᤛᤠᤶ ᤛᤤᤋᤠᤏᤡᤸᤗᤧ ᤂᤢᤏᤧ᤹ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤐᤠᤱᤔᤠ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤛᤠ᤹ᤖᤢ॥ ᤂᤧᤵᤔᤥ ᤂᤢᤏᤧ᤹ ᤋᤠᤶᤓᤢᤱᤌᤰᤛᤠᤜᤠ᤹ᤏᤢ ᤘᤕᤧ. ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤁᤶᤒᤪᤠᤱ ᤔᤧᤔᤧᤳᤋᤢᤖᤥ॥
MAR 1:14 ᤀᤠᤸᤗ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤀᤠᤱ ᤕᤠᤃᤧᤸᤗᤧ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤛᤧ᤺ᤛᤢᤖ ᤃᤠᤗᤡᤗ ᤌᤢᤶᤔᤥ ᤋᤩᤧᤖᤥ॥
MAR 1:15 ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤓᤴ ᤛᤧ᤺ᤛᤢ. “ᤁᤴ ᤛᤢᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ॥”
MAR 1:16 ᤜᤧᤰᤁᤩᤠᤱ ᤕᤧᤛᤢ᤺ᤴ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤣᤖ ᤐᤳᤇᤧᤸᤗᤧ ᤛᤡᤔᤥᤏ ᤏᤢ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤴ ᤕᤥ᤺ᤱ ᤗᤧᤵᤋᤧᤳᤇᤢᤖ ᤕᤠᤃᤧᤳᤇᤡᤒᤠ ᤋᤢᤔᤢᤛᤡ॥ ᤂᤧᤱᤜᤠ᤹ ᤏᤧᤵᤔᤠᤱ ᤕᤥ᤺ᤱ ᤁᤧᤗᤧᤵᤐᤠ ᤘᤕᤧᤳᤇᤡᤖᤥ॥
MAR 1:17 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤀᤡᤱᤃᤠ᤹ ᤀᤠᤀᤣᤃᤠᤱ ᤌᤠᤏᤧᤳᤇᤧ᤹ᤀᤥ. ᤂᤡᤴᤇᤡ᤹ ᤅᤠ ᤁᤧᤍᤧᤶᤛᤢ ᤁᤧᤍᤠ᤺ᤳᤇᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤥ ᤔᤏᤠ ᤁᤧᤍᤠ᤺ᤵᤐᤠ ᤆᤥ᤺ᤰᤏᤧᤳᤇᤡᤱᤗᤥ॥”
MAR 1:18 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤔᤥ ᤕᤥ᤺ᤱᤅᤡᤴ ᤏᤧᤛ᤻ᤛᤧᤳᤇᤢᤌᤧ᤺ᤛᤢᤀᤠᤱ ᤕᤧᤛᤢ᤺ᤴ ᤁᤧᤏᤠ᤺ᤵᤐᤠ ᤐᤥ᤺ᤱᤛᤧ ᤁᤢᤀᤣ᤺ᤰ ᤁᤢᤀᤣ᤺ᤰ ᤌᤠᤏᤧᤳᤇᤡᤖᤥ॥
MAR 1:19 ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤖ ᤐᤳᤇᤧᤸᤗᤧ ᤈᤒ᤻ᤍᤡᤖᤧ ᤁᤢᤛ᤻ᤛᤠ᤺ ᤕᤠᤁᤢᤒᤧᤴ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴᤏᤠᤱ ᤂᤢᤴᤇᤡ᤹ ᤂ᤺ᤱᤒᤣᤀᤥ ᤕᤥ᤺ᤱᤅᤡᤴ ᤗᤧᤶᤍᤧᤳᤇᤢᤖ ᤕᤠᤃᤧᤳᤇᤡᤒᤠ ᤏᤡ᤺ᤛᤢᤛᤡᤖᤥ॥
MAR 1:20 ᤂᤢᤏᤧ᤹ ᤂᤧᤱᤜᤠ᤹ᤀᤠᤱ ᤀᤢ᤺ᤳᤋᤢᤛᤡᤀᤠᤱ ᤂᤡᤔᤥ ᤂᤢᤴᤇᤡ᤹ ᤐᤠ᤺ ᤈᤒ᤻ᤍᤡ ᤜᤧᤰᤁᤩᤠᤱ ᤔᤧᤛᤠᤅᤢᤛᤡᤒᤠ ᤕᤠ᤺ᤗᤡᤰᤜᤠ᤹ ᤂ᤺ᤱᤒᤣᤀᤥ ᤐᤰᤌᤧᤳᤇᤢᤀᤠᤱ ᤕᤧᤛᤢᤖᤧ ᤁᤢᤀᤣᤃᤠᤱ ᤌᤠ᤺ᤏᤧᤳᤇᤡ॥
MAR 1:21 ᤕᤧᤛᤢ᤺ᤴ ᤏᤢ ᤂᤧᤱᤜᤠ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤔᤧᤒᤣ॥ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤜᤢ᤹ᤔᤠ ᤜᤣ᤺ᤰᤋᤢᤛᤡᤖᤥ॥
MAR 1:22 ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤜᤢ᤹ᤖᤢᤛᤡᤖᤥ॥
MAR 1:23 ᤕᤧᤛᤢᤖᤧ ᤂᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤢ᤹ᤔᤠ ᤜᤣ᤺ᤰᤋᤢᤛᤡᤸᤗᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤀ᤺ᤰᤋᤧᤖ ᤐᤠᤖᤧ.
MAR 1:24 “ᤏᤠᤛᤖᤋᤒᤠ ᤕᤧᤛᤢᤀᤣ. ᤂᤧᤏᤧ᤹ ᤀᤠᤏᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤧᤏᤧ᤹ ᤀᤠᤏᤡᤃᤧ ᤔᤧᤱᤛᤧ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤜᤠ᤺ᤳᤏᤧᤒᤣ ᤑᤠ᤹ᤀᤠᤱ ᤏᤡ᤺ᤛᤢᤶᤒᤧᤖᤥ–ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠᤏᤧᤖᤥ॥”
MAR 1:25 ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤛᤫᤠ᤺ᤳ᥄ ᤂᤧᤴ ᤔᤏᤠ᤺ᤴ ᤗᤧᤖᤧ᤹ᤀᤠᤱ ᤐᤣᤃᤧ᤹᥄”
MAR 1:26 ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤂᤧᤴ ᤔᤏᤠ᤺ᤴ ᤐᤡᤷᤎᤠᤵ ᤌᤠᤵᤛᤢᤎᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤑᤡ᤺ᤰᤋᤧᤖ ᤗᤧᤖᤢᤎ᤺ᤖᤥ॥
MAR 1:27 ᤂᤧ᤹ᤕᤥ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤗ᤹ᤖᤧ. “ᤁᤱᤃ ᤀᤠᤰᤋᤱᤒᤠ ᤏᤡᤛᤠᤶᤒᤣ᥅ ᤂᤢᤏᤧ᤹ᤃ ᤑᤧᤴᤛᤠᤶᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧᤀᤠᤱ ᤔᤧᤄᤧᤵᤛᤢᤖᤥ॥ ᤀᤠᤰᤋᤱᤒᤠ ᤕᤢᤰᤁᤡᤴᤏᤣ ᤁᤳᤋᤢᤒᤣ᥄”
MAR 1:28 ᤂᤢᤏᤧ᤹ ᤁᤢᤔᤡᤱᤛᤥ ᤀᤡᤱᤎᤠ᤺ᤱᤅᤡᤴ ᤁᤧᤖᤧᤰ ᤃᤠᤗᤡᤗ ᤌᤢᤶᤔᤥ ᤛᤧ᤺ᤖᤧᤖᤥ॥
MAR 1:29 ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤂᤢᤏᤧ᤹ ᤁᤧᤏᤠ᤺ᤵᤐᤠᤜᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤗᤠᤶ ᤔᤧᤗ᤺ᤴᤍᤧᤀᤠᤱ ᤛᤡᤔᤥᤏ ᤏᤢ ᤀᤠᤴᤍᤪᤡᤕᤠᤛᤖᤧ ᤂᤢᤴᤇᤡ᤹ ᤜᤡᤶᤔᤥ ᤔᤧᤒᤣᤖᤥ॥ ᤕᤢᤜᤢᤴᤏᤠ᤺ᤴ ᤏᤢ ᤕᤠᤁᤢᤒᤧᤴᤏᤠᤱ ᤂᤧᤱᤜᤠ᤹ᤏᤢᤀᤣ ᤐᤣᤛᤡᤖᤥ॥
MAR 1:30 ᤂᤧᤵᤔᤥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤁᤢᤍᤢᤱ ᤋᤩᤧᤀᤠᤱ ᤌᤠ᤺ᤛᤢᤀᤠᤱ ᤏᤧᤛ᤻ᤛᤧ॥ ᤂᤧᤱᤜᤠ᤹ᤖᤧ ᤂᤡᤔᤥ ᤂᤧᤴ ᤐᤠ᤺ᤴᤏᤡᤴ ᤕᤧᤛᤢ᤺ᤴ ᤔᤧᤔᤧᤳᤋᤢ॥
MAR 1:31 ᤕᤧᤛᤢ᤺ᤴ ᤁᤢᤒᤣᤛᤠᤱ ᤐᤣᤀᤠᤱ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ ᤑᤥ᤺ᤰᤂᤢ॥ ᤂᤡᤔᤥ ᤂᤧᤴ ᤘᤣ᤺ᤳᤋᤧᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤛᤣᤘᤠ ᤆᤥ᤺ᤰᤔᤠ ᤜᤣ᤺ᤰᤋᤢᤛᤡᤖᤥ॥
MAR 1:32 ᤏᤠᤶᤎᤧᤀᤠᤱ ᤂᤧᤴ ᤕᤢ᤺ᤴᤇᤡᤰ ᤕᤖᤡᤰ ᤁᤧᤍᤢᤰᤐᤠᤜᤠ᤹ ᤏᤢ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤛᤡᤒᤠ ᤔᤏᤠᤜᤠ᤹ ᤕᤧᤛᤢᤖᤥ ᤔᤧᤍᤠᤖᤢᤛᤡ॥
MAR 1:33 ᤂᤧᤴ ᤐᤠᤱᤈᤢᤶᤔᤥᤒᤠ ᤕᤖᤡᤰ ᤔᤏᤠᤜᤠ᤹ ᤂᤧᤴ ᤜᤡᤶᤔᤥ ᤔᤧᤈᤢᤵᤛᤧ॥
MAR 1:34 ᤕᤧᤛᤢᤖᤧ ᤘᤣ᤹ ᤘᤣ᤹ ᤐᤖᤡᤰᤐᤠ ᤋᤢᤰᤔᤠᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤘᤣ᤺ᤴᤍᤢᤛᤡᤖ ᤕᤖᤡᤰ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤗ᤺ᤳᤋᤢᤛᤡᤖᤥ॥ ᤂᤢᤏᤧ᤹ ᤑᤧᤴᤛᤠᤶᤜᤠ᤹ ᤐᤠ᤺ᤵᤔᤠ ᤔᤧᤒᤠᤱᤄᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤠ᤺ᤳ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥
MAR 1:35 ᤁᤢᤍᤠ᤺ᤴᤍᤡᤰ ᤂᤠᤀᤥ᤺ᤵᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢ᤺ᤴ ᤀᤣ᤺ᤰᤛᤠᤍᤧᤴᤏᤥ ᤐᤣᤀᤠᤱ ᤋᤢᤘᤠ ᤆᤥᤃᤧ॥
MAR 1:36 ᤕᤠᤱᤛᤡ ᤛᤡᤔᤥᤏ ᤏᤢ ᤁᤢᤴᤍᤣ᤺ᤱᤒᤠᤜᤠ᤹ ᤂᤢᤏᤧ᤹ ᤁᤢᤃᤥ᤺ᤳᤇᤧ ᤔᤧᤒᤣ॥
MAR 1:37 ᤂᤢᤏᤧ᤹ ᤔᤧᤍᤢᤔᤢᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤃᤥ᤺ᤳᤗ ᤔᤧᤘᤠ᤹ᤖᤥ॥”
MAR 1:38 ᤜᤧᤰᤁᤩᤠᤱ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤠᤏᤡ᤹ ᤁᤴ ᤂᤡᤖᤡᤒᤠ ᤘᤣ᤹ᤛ᤻ᤔᤠ ᤐᤠᤱᤓᤣ᤹ᤜᤠ᤹ᤀᤥ ᤐᤣᤃᤡ॥ ᤀᤡᤱᤃᤠ᤹ ᤂᤧᤵᤔᤥᤀᤠᤱ ᤛᤢᤏᤠᤀᤡᤱ ᤛᤧ᤺ᤔᤠ ᤐᤥ᤺ᤱ॥ ᤜᤠᤒᤠ ᤂᤧᤸᤗᤧ ᤗᤠᤃᤡ ᤀᤡᤱᤃᤠ᤹ ᤋᤩᤠᤱᤒᤠᤖᤥ॥”
MAR 1:39 ᤜᤧᤰᤁᤩᤠᤱ ᤕᤧᤛᤢᤖᤧ ᤃᤠᤗᤡᤗ ᤌᤢᤶᤔᤥ ᤂᤠᤖᤠᤰ ᤗᤠᤱᤄᤣᤃᤧᤖ ᤂᤧᤱᤄᤠ᤺ᤳᤋᤡᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤛᤢᤏᤠᤀᤡᤱ ᤛᤧ᤺ᤛᤢᤀᤠᤱ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤖᤥ॥
MAR 1:40 ᤌᤡᤰ ᤗᤥᤃᤣ᤹ ᤋᤢᤰᤔᤠᤸᤗᤧ ᤋᤖᤢᤒᤠ ᤔᤏᤠ᤺ᤴ ᤕᤧᤛᤢᤖᤥ ᤋᤩᤧᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”
MAR 1:41 ᤕᤧᤛᤢᤖᤧ ᤗᤢᤱᤔᤠ᤹ ᤋᤢᤰᤋᤢᤖ ᤁᤢᤜᤢᤰᤁᤡᤸᤗᤧ ᤛᤢ᤺ᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱ. ᤂᤧᤏᤧ᤹ ᤏᤢᤖᤧ᤹ᤀᤥ॥”
MAR 1:42 ᤂᤡᤔᤥ ᤂᤧᤴ ᤔᤏᤠ᤺ᤴ ᤗᤥᤃᤣ᤹ ᤋᤢᤰᤔᤥᤗᤠᤶ ᤏᤢ᤺ᤖᤧᤖᤥ॥
MAR 1:43 ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ. “ᤂᤧᤏᤧ᤹ ᤁᤧᤏᤢᤖᤧᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤴᤏᤧ᤹ᤀᤥ.
MAR 1:44 ᤁᤖ ᤐᤣᤃᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤏᤢ᤺ᤖᤠᤱ ᤑᤠ᤹ᤀᤠᤱ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡᤖᤧ ᤗᤠᤃᤡ ᤔᤥᤛᤠᤖᤧ ᤀᤡᤱᤈᤠ᤺ᤱ ᤆᤥᤃᤢᤒᤠ ᤜᤧᤰᤁᤣ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ” ᤔᤧᤳᤋᤢᤖ ᤐᤠᤱᤄᤢᤍᤣ᤺ᤛᤢᤖᤥ॥
MAR 1:45 ᤁᤖ ᤂᤢᤏᤧ᤹ ᤐᤣᤀᤠᤱ ᤏᤢ᤺ᤖᤧᤒᤠ ᤐᤠ᤺ᤴᤏᤡᤴ ᤁᤧᤖᤧᤰ ᤔᤏᤠᤜᤠ᤹ ᤆᤧᤰᤋᤢᤛᤡ॥ ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴ ᤐᤠᤱᤈᤢᤶᤔᤥ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤖ ᤋᤠ᤺ᤔᤠ ᤔᤧᤛᤢᤰᤋᤧᤴᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤗᤠ᤺ᤰᤁᤠᤳ ᤀᤣ᤺ᤰᤛᤠᤍᤧᤴᤏᤥ ᤘᤕᤧᤀᤠᤱ ᤂᤧᤵᤔᤥᤀᤣ ᤁᤠᤰ ᤐᤡᤛᤠᤱᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤍᤩᤧᤖᤥ॥
MAR 2:1 ᤌᤡᤰᤕᤧᤴ ᤏᤡᤕᤧᤴ ᤀᤣᤃᤠᤱ ᤕᤧᤛᤢ᤺ᤴ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤏᤢ᤺ᤰᤂᤧ ᤋᤩᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶᤔᤥ ᤘᤠ᤹ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤛᤧ᤺ᤖᤧᤖᤥ॥
MAR 2:2 ᤕᤖᤡᤰ ᤔᤏᤠᤜᤠ᤹ ᤂᤧᤴ ᤜᤡᤶᤔᤥ ᤜᤳᤔᤧᤴᤜᤳ ᤗᤠᤶᤎᤣ᤺ᤵᤐᤢᤱᤏᤢ ᤗᤰᤂᤢᤶᤔᤥ ᤌᤠᤖᤡᤰ ᤔᤧᤈᤢᤵᤛᤧᤀᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥᤃᤢᤛᤡᤖᤥ॥
MAR 2:3 ᤜᤧᤰᤁᤩᤠᤱ ᤂᤧᤵᤔᤥ ᤗᤡᤛᤡ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠᤎᤡᤰ ᤔᤧᤃᤢᤕᤢᤀᤠᤱ ᤔᤧᤍᤠᤖᤢ.
MAR 2:4 ᤁᤖ ᤂᤧᤴ ᤜᤡᤶᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤔᤧᤕᤢᤅᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤕᤧᤛᤢᤖᤧ ᤁᤢᤍᤃᤡ ᤋᤣ᤹ᤔᤠ ᤔᤧᤴᤇᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤌᤥ ᤂᤠᤶᤒᤢᤀᤥ ᤔᤧᤗᤠ᤺ᤛᤧᤀᤠᤱ ᤂᤠᤶᤒᤢ᤺ᤴ ᤔᤧᤜᤴᤍᤢ॥ ᤜᤧᤰᤁᤩᤠᤱ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤁᤢᤏᤧᤳᤏᤠ᤺ᤴᤏᤢᤀᤣ ᤕᤧᤛᤢᤖᤧ ᤁᤢᤍᤃᤡ ᤕᤥ ᤔᤧᤎᤠ᤺ᤛᤢ॥
MAR 2:5 ᤂᤧᤱᤜᤠ᤹ᤖᤧ ᤂᤧᤴ ᤁᤧᤍᤢᤰᤐᤧᤴ ᤘᤣ᤺ᤵᤔᤠ ᤛᤢᤰ ᤁᤧᤗ᤹ᤒᤠ ᤏᤛᤠ᤺ᤴ ᤔᤧᤃᤳᤋᤢᤒᤠ ᤕᤧᤛᤢᤖᤧ ᤏᤡ᤺ᤛᤢᤀᤠᤱ ᤗᤱᤗᤧ᤺ᤱᤘᤠ᤺ᤴ ᤔᤧᤳᤋᤢ. “ᤀᤠᤛ᤻ᤛᤠ᤺ᤀᤣ. ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥”
MAR 2:6 ᤀᤠᤸᤗ ᤂᤧᤵᤔᤥ ᤁᤧᤕᤢᤱᤒᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤇᤡᤱ.
MAR 2:7 “ᤔᤧ᤺ᤴ. ᤁᤴ ᤔᤏᤠ᤺ᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴᤏᤣ ᤐᤠ᤺ᤳᤋᤢ᤹ᤖᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧᤀᤠᤱ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧᤴ ᤗᤠᤕᤥ᤺ᤴ ᤗᤧᤵᤔᤡ ᤐᤡᤔᤠ ᤔᤧᤛᤢᤰᤋᤢᤴᤗᤥ॥”
MAR 2:8 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤌᤣ ᤔᤧᤀᤡ᤺ᤳᤋᤢᤖ ᤔᤧᤕᤢᤱ ᤁᤧᤗ᤹ᤒᤠᤴ ᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣᤀᤠᤱ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅
MAR 2:9 ᤁᤴ ᤗᤱᤗᤧ᤺ᤱᤘᤠ᤺ᤴ ‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅ ᤀᤡ ‘ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤂᤵᤛᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅
MAR 2:10 ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤜᤠ᤹ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢᤱ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤏᤡᤱᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ᤺ᤴ ᤔᤧᤳᤋᤢ.
MAR 2:11 “ᤀᤠᤸᤗ ᤐᤥᤃᤧ᤹᥄ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”
MAR 2:12 ᤂᤡᤔᤥ ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤏᤧᤳᤏᤠ᤺ᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤗ᤺ᤴᤍᤧ ᤐᤣᤖᤥ॥ ᤂᤧᤴ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤔᤧᤳᤋᤢᤖ ᤁᤢᤏᤠᤖᤠ ᤔᤧᤓᤥ᤺ᤛᤢ. “ᤀᤰᤋᤱᤒᤠᤃ ᤀᤠᤏᤡᤃᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”
MAR 2:13 ᤕᤠᤶᤔᤥ ᤕᤧᤛᤢ᤺ᤴ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤣ॥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤀᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤂᤠᤜᤢᤴ ᤜᤢ᤹ᤖᤢᤛᤡ॥
MAR 2:14 ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤣᤖ ᤐᤳᤇᤧᤸᤗᤧ ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤗᤧᤒᤡ᤺ᤴ ᤀᤣ᤺ᤱᤕᤠᤱ ᤑᤥ᤺ᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥” ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤂᤢᤏᤧ᤹ᤏᤢ ᤌᤠᤛᤡᤱᤗᤥ॥
MAR 2:15 ᤕᤠᤱᤛᤡ ᤗᤧᤒᤡ᤺ᤸᤗᤧ ᤁᤢᤜᤡᤶᤔᤥ ᤕᤧᤛᤢ᤺ᤴᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤠᤈᤠᤛᤧ ᤀᤢ᤺ᤳᤋᤢᤛᤡ. ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤘᤣ᤹ᤛ᤻ᤔᤠ ᤗᤠᤕᤥᤒᤠᤜᤠ᤹ ᤕᤧᤛᤢ᤺ᤴᤏᤢ ᤛᤥᤖᤡᤰ ᤆᤠᤔᤧᤈᤖ ᤔᤧᤕᤢᤅᤧ (ᤌᤣᤀᤠᤱᤓᤧᤸᤗᤧ ᤂᤧᤴ ᤜᤧᤰᤋᤱᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤍᤡᤶᤍᤢᤖ ᤔᤧᤘᤕᤧ)॥
MAR 2:16 ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤑᤖᤡᤛᤡ ᤗᤢᤵᤐᤥᤒᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰ ᤆᤠᤈᤠᤏᤢ ᤕᤢᤅᤧᤒᤠ ᤔᤧᤏᤡ᤺ᤛᤢᤀᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤔᤧᤳᤋᤢᤛᤡ. “ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤏᤢ ᤂᤢᤏᤧ᤹ ᤌᤣᤀᤠᤱ ᤆᤠᤈᤠᤒᤠᤒᤣ᥅”
MAR 2:17 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤏᤥᤃᤵ ᤐᤡᤖᤢᤛᤡ. “ᤛᤡᤍᤠ᤹ᤛᤠᤶᤒᤧᤱᤃ ᤔᤧᤴᤍᤢᤰᤔᤏᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤁᤧᤍᤢᤰᤐᤠᤜᤠ᤹ᤖᤧ ᤗᤠᤃᤡᤖᤥ॥ ᤂᤧᤴ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤗᤠᤕᤥᤒᤠᤜᤠ᤹ ᤗᤠᤕᤥᤗᤠᤶ ᤔᤧᤏᤢ᤺ᤱᤅᤠᤱ ᤋᤠᤱᤔᤧᤛᤧ᤺ᤵᤗ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥”
MAR 2:18 ᤀᤠᤸᤗ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤅᤧᤀᤠᤱ ᤔᤧᤘᤕᤧ॥ ᤌᤡᤰᤕᤧᤴ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤔᤧᤗᤠᤵᤋᤢ. “ᤑᤖᤡᤛᤡᤜᤠ᤹ ᤏᤢ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ᤃ ᤆᤠ᤺ᤏᤧᤳᤋᤥ ᤔᤧᤕᤢᤱ. ᤁᤖ ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤌᤣᤀᤠᤱ ᤆᤠ᤺ᤏᤧᤳᤋᤥ ᤔᤧᤴᤕᤢᤱᤏᤧᤴᤒᤠᤒᤣ᥅”
MAR 2:19 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤣ᤺ᤰᤂᤡᤶᤛᤠᤒᤧᤴ ᤁᤢᤴᤈᤢᤶᤜᤠ᤹ᤏᤢ ᤘᤠ᤹ᤖ ᤌᤠᤖᤡᤰ ᤂᤧᤱᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅ ᤔᤧ᤺ᤴᤗᤥ. ᤔᤣ᤺ᤰᤂᤡᤶᤛᤠᤒᤧᤴ ᤘᤠ᤹ᤖ ᤌᤠᤖᤡᤰ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤆᤠ᤺ᤏᤧᤳᤋᤥ ᤔᤧᤴᤕᤢᤱᤏᤧᤴ.
MAR 2:20 ᤁᤖ ᤂᤧᤱᤜᤠ᤹ᤗᤠᤶ ᤔᤣ᤺ᤰᤂᤡᤶᤛᤠᤒᤧᤴ ᤛᤠᤰᤁᤧᤸᤗᤧᤰ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤸᤗᤧ ᤂᤧᤱᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤗᤥ॥
MAR 2:21 ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤡᤖᤡᤰᤁᤡᤸᤗᤧ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤗᤧᤶᤍᤢᤴᤗᤥ. ᤗᤧᤶᤍᤢᤏᤧ ᤑᤠ᤹ᤃᤪ ᤂᤧᤴ ᤁᤡᤱᤅᤠᤱ ᤀᤠᤸᤗᤛᤠᤱ ᤕᤶᤒᤠ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ॥
MAR 2:22 ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤔᤧᤕᤢᤰᤂᤢᤴ॥ ᤕᤢᤰᤂᤢᤏᤧ ᤑᤠ᤹ᤃᤪ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠ᤺ᤴ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤌᤡ᤺ᤴ ᤘᤧᤳ ᤐᤣ᤺ᤰᤁᤠᤱ ᤏᤧᤵᤔᤠᤱ ᤆᤠᤛᤥ᤺ᤰᤗᤥ॥ ᤁᤖ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤛᤱ ᤛᤧᤜᤥᤒᤠ ᤛᤢ᤺ᤰᤘᤠᤀᤥᤀᤣ ᤕᤠᤰᤔᤠ ᤐᤥ᤺ᤱᤗᤥ॥”
MAR 2:23 ᤌᤡᤰᤗᤧᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤗᤢᤶᤔᤥᤏᤢ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤢᤰᤔᤠ ᤆᤠᤔᤠ ᤑᤠ᤹ᤀᤠᤱ ᤛᤡ᤺ᤍᤠᤵᤔᤠᤜᤠ᤹ ᤋᤢᤵᤔᤠ ᤔᤧᤜᤣ᤺ᤰᤋᤢ॥
MAR 2:24 ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤌᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤒᤠᤒᤣ᥅”
MAR 2:25 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤠᤶᤕᤥᤛᤠᤵᤗᤠ᤺ᤴ ᤂᤡᤏᤡ᤹ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤍᤠᤀᤢᤍ ᤜᤠᤱᤅᤡᤴ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ
MAR 2:26 ᤍᤠᤀᤢᤍᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤅᤡᤴ ᤆᤀᤠᤱ ᤕᤠᤶᤔᤥ ᤁᤢᤔᤏᤠᤜᤠ᤹ᤀᤠᤱ ᤐᤡᤖᤢᤛᤡ (ᤂᤧᤴ ᤕᤧᤶᤔᤥ ᤀᤒᤡᤕᤠᤌᤠᤖᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ)॥ ᤂᤧᤱᤃ ᤀᤠᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤖᤰ ᤆᤠᤔᤠ ᤁᤧᤏᤢ᤹ᤒᤠ ᤘᤕᤧᤖᤥ॥”
MAR 2:27 ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤐᤠ᤺ᤴ ᤏᤢᤵᤛᤢ. “ᤏᤠ᤺ᤶᤛᤡᤱ ᤕᤧᤴᤏᤡᤴ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤆᤥᤃᤧᤒᤠᤖᤥ. ᤁᤖ ᤁᤴ ᤔᤧᤴᤇᤠᤶᤃᤧᤴ ᤕᤠᤵᤔᤡ᤺ᤴ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤗᤠᤃᤡ ᤆᤥᤃᤧᤒᤠ ᤔᤧ᤺ᤴᤗᤥ॥
MAR 2:28 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠ᤹ᤖᤥ”
MAR 3:1 ᤕᤧᤛᤢ᤺ᤴ ᤕᤠᤶᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣ॥ ᤂᤧᤵᤔᤥ ᤗᤳᤇᤠ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤎᤡᤰ ᤘᤕᤧ॥
MAR 3:2 ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤴ ᤔᤏᤠ᤺ᤴ ᤕᤧᤛᤢᤖᤧ ᤘᤣ᤺ᤴᤍᤢ᤹ᤏᤧ ᤑᤠ᤹ᤃᤪ ᤂᤢᤏᤧ᤹ ᤑᤥᤋᤩᤠ ᤁᤢ᤺ᤵᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤛᤢᤃᤢᤖ ᤔᤧᤘᤕᤧ॥
MAR 3:3 ᤕᤧᤛᤢᤖᤧ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠ᤺ᤴ ᤔᤧᤳᤋᤢ. “ᤑᤧᤖᤧ᤹ᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤒᤧ᤹॥”
MAR 3:4 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤥ. ᤀᤠᤳᤋᤡᤴ ᤆᤥ᤺ᤰᤔᤠ ᤏᤢ᤺ᤒᤠᤒᤣ᥅ ᤜᤡᤱᤔᤴ ᤋᤠᤱᤛᤧ᤺ᤵᤔᤠᤒᤡ ᤔᤧᤱᤔᤠᤒᤡ᥅” ᤁᤖ ᤂᤧᤴ ᤔᤏᤠᤜᤠ᤹ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ ᤔᤧᤕᤢᤅᤧᤖᤥ॥
MAR 3:5 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡ᤺ᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤖᤥ॥
MAR 3:6 ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤕᤧᤛᤢ᤺ᤴ ᤀᤠᤰᤂᤣᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴ ᤔᤧᤍᤱᤄᤢᤖᤥ॥
MAR 3:7 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤣ᤺ᤸᤗᤧ ᤂᤧᤵᤔᤥ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥
MAR 3:8 ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤔᤧᤄᤧᤵᤛᤢᤀᤠᤱ ᤕᤖᤡᤰ ᤔᤏᤠᤜᤠ᤹ ᤕᤜᤢᤍᤡᤕᤠ. ᤕᤖᤢᤛᤗᤧᤔ. ᤀᤡᤍᤢᤔᤡᤕᤠ. ᤕᤷᤍᤏ ᤏᤠᤎᤠ᤺ᤶᤒᤡᤒᤠ ᤗᤠᤈᤣ᤹ᤀᤥᤏᤢ. ᤜᤧᤰᤁᤩᤠᤱ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤗᤠᤶ ᤁᤢᤀᤥᤔᤧᤳᤇᤧ ᤔᤧᤍᤩᤧᤖᤥ॥
MAR 3:9 ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤴᤗᤠ᤺ᤰᤋᤢᤴᤗ ᤔᤧᤴᤍᤥ᤹ᤖᤢᤴᤗ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤎᤡᤰ ᤁᤢᤗᤠᤃᤡ ᤕᤠᤖᤡᤵ ᤆᤥ᤺ᤰᤔᤠ ᤐᤠᤱᤄᤢᤛᤡ॥
MAR 3:10 ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ ᤏᤢᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤢ᤺ᤛᤧ ᤔᤏᤠᤜᤠ᤹ ᤔᤧᤈᤴᤇᤡᤱᤗ ᤔᤧᤒᤥ᤺ᤖᤧ ᤔᤧᤎᤠᤅᤧ॥
MAR 3:11 ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤖᤧ ᤕᤠᤱᤄᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡ᤺ᤛᤢᤸᤗᤧ ᤂᤧᤱᤜᤠ᤹ ᤔᤧᤎᤠᤶᤛᤡᤱᤗ ᤔᤧᤓᤡ᤺ᤰᤋᤧᤖ ᤀᤰᤂᤣᤗ᤹ᤖᤡᤰ ᤔᤧᤒᤠᤖᤧ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ᤏᤧᤖᤥ᥄”
MAR 3:12 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠ᤺ᤱ ᤐᤡᤖᤢᤛᤡ॥
MAR 3:13 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤥ᤺ᤰᤔᤠᤀᤥ ᤐᤣᤖ ᤐᤳᤇᤧᤸᤗᤧ ᤁᤢᤏᤡᤱᤘᤠ᤹ᤒᤠᤸᤗᤧ ᤆᤛᤡᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣᤖᤥ॥
MAR 3:14 ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤔᤧᤘᤠ᤹ᤖ ᤜᤧᤰᤁᤩᤠᤱ ᤛᤢᤏᤠᤀᤡᤱ ᤔᤧᤛᤧ᤺ᤛᤢᤖ ᤑᤠ᤹ᤀᤠᤱ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ ᤛᤣᤃᤢᤛᤡᤀᤠᤱ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥
MAR 3:15 ᤜᤧᤰᤁᤩᤠᤱ ᤂᤧᤱᤜᤠ᤹ ᤑᤧᤴᤛᤠᤶ ᤏᤠ᤺ᤵᤔᤠ ᤗ᤺ᤵᤔᤠ ᤕᤢᤰ ᤐᤡᤖᤢᤛᤡ॥
MAR 3:16 ᤕᤧᤛᤢᤖᤧ ᤛᤣᤃᤢᤛᤡᤒᤠ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤁᤴᤗᤥ–ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢ).
MAR 3:17 ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠ (ᤕᤧᤛᤢᤖᤧ ᤂᤧᤱᤜᤠ᤹ ᤒᤥᤀᤏᤖᤃᤧᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢᤛᤡ. ᤂᤧᤸᤗᤧ ᤁᤢᤒᤣᤀᤡᤱᤃ “ᤋᤠᤱᤛᤠᤰ ᤁᤧᤗᤥ᤺ᤱᤒᤠᤸᤗᤧ ᤁᤢᤛ᤻ᤛᤠ᤺ᤜᤠ᤹” ᤐᤥ᤺ᤱᤗᤥ).
MAR 3:18 ᤜᤧᤰᤁᤩᤠᤱ ᤀᤠᤴᤍᤪᤡᤕᤠᤛ. ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ. ᤔᤳᤋᤡ. ᤌᤥᤔᤠ. ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ. ᤌᤧᤍᤡᤕᤛ. ᤛᤡᤔᤥᤏ (ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ).
MAR 3:19 ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡᤴ (ᤋᤠ᤺ᤴᤍᤡ ᤂᤧᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤋᤢ)॥
MAR 3:20 ᤜᤧᤰᤁᤩᤠᤱ ᤕᤧᤛᤢ᤺ᤴ ᤜᤡᤶᤔᤥ ᤗᤠ᤺ᤛᤧᤀᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤆᤠᤈᤠᤔᤠ ᤕᤧᤶᤔᤡᤴᤏᤣ ᤔᤧᤱᤄᤥ᤺ᤛᤢᤴᤗᤥ॥
MAR 3:21 ᤁᤢᤓᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤶᤒᤧ. ᤀᤠᤀᤡᤴ ᤂᤢᤏᤧ᤹ᤃ ᤏᤠᤰᤂᤧᤒᤣ ᤒᤡ ᤌᤣᤏᤡᤒᤣ᥅” ᤜᤧᤰᤁᤣ᤺ᤸᤗᤧ ᤁᤢᤜᤡᤶᤛᤕᤱᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤢ᤺ᤵᤔᤠ ᤋᤣ᤹ᤔᤠ ᤑᤠ᤹ᤀᤠᤱ ᤔᤧᤍᤩᤧᤖᤥ॥
MAR 3:22 ᤕᤖᤢᤛᤗᤧᤔᤗᤠᤶ ᤁᤧᤍᤠ᤺ᤒᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤒᤠᤗᤈᤡᤒᤢᤗ ᤔᤠᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤘᤠ᤹॥ ᤂᤢᤏᤧ᤹ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ᤹ ᤗ᤺ᤳᤋᤢᤛᤡ᤹ᤖᤥ॥”
MAR 3:23 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤀᤠᤰᤂᤣᤗ᤹ᤖᤡᤰ ᤔᤠᤑᤧᤴᤛᤠᤶᤔᤡᤴ ᤀᤠᤒᤠᤅᤣ ᤏᤠ᤺ᤳᤇᤡᤱᤒᤣ᥅
MAR 3:24 ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤠᤱᤈᤢᤶᤔᤡᤸᤗᤧ ᤔᤧᤎᤖᤢᤴᤗᤥ॥
MAR 3:25 ᤜᤧᤰᤁᤩᤠᤱ ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤡᤶᤛᤕᤱᤅᤡᤸᤗᤧ ᤔᤧᤎᤖᤢᤴᤗᤥ॥
MAR 3:26 ᤔᤠᤑᤧᤴᤛᤠᤶᤔᤡᤴᤏᤠᤱ ᤀᤠᤒᤠᤅᤣ ᤋᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤂᤧᤸᤗᤧᤀᤠᤱ ᤔᤧᤎᤖᤢᤴᤏᤠᤱ ᤏᤢᤵᤗᤥ॥
MAR 3:27 ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤂᤧᤸᤗᤧ ᤁᤢᤈᤡᤃ᤺ᤰᤘᤠᤜᤠ᤹ ᤏᤠᤵᤔᤠᤍᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤎᤢᤶᤒᤠ ᤔᤏᤠ᤺ᤴ ᤀᤡᤄᤣ᤺ᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱᤗᤰ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤆᤡᤃ᤺ᤰᤘᤠᤜᤠ᤹ ᤗ᤺ᤵᤔᤠᤍᤣ᤹ᤔᤠ ᤛᤢᤰᤋᤧᤳᤗᤥ॥
MAR 3:28 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤔᤠᤱᤆᤧ᤹ᤕᤠ ᤐᤠ᤺ᤴ ᤏᤢ ᤔᤧᤈᤥᤃᤢᤒᤠ ᤁᤧᤖᤧᤰ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤂᤥ᤺ᤔᤠ ᤔᤧᤛᤢᤰᤋᤢᤖᤥ.
MAR 3:29 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤗᤧᤵᤔᤡ ᤔᤧᤱᤄᤥ᤺ᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤗᤧᤵᤔᤡ ᤔᤧᤶᤒᤥ᤺ᤱᤔᤏᤠᤒᤠ ᤗᤠᤕᤥᤖᤥ॥”
MAR 3:30 (ᤕᤧᤛᤢᤖᤧ ᤑᤧᤴᤛᤠᤶᤔᤡᤴ ᤁᤳᤋᤢ ᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤒᤠᤖᤥ॥)
MAR 3:31 ᤕᤠᤱᤛᤡ ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤂᤢᤏᤧ᤹ ᤘᤕᤧᤒᤠ ᤜᤡᤶᤔᤥ ᤔᤧᤍᤩᤧᤀᤠᤱ ᤗᤠ᤺ᤰᤁᤠᤳ ᤁᤢᤀᤢ᤺ᤳᤇᤧ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡᤖᤥ॥
MAR 3:32 ᤜᤧᤰᤁᤩᤠᤱ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤗᤠ᤺ᤰᤁᤠᤳ ᤔᤧᤍᤩᤧᤀᤠᤱ ᤂᤧᤏᤧ᤹ ᤁᤧᤶᤜᤠᤱᤗ ᤔᤧᤕᤧᤵᤗᤥ॥”
MAR 3:33 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤜᤠ᤺ᤳᤇᤡᤒᤣ᥅”
MAR 3:34 ᤂᤢᤏᤧ᤹ ᤂᤧᤵᤔᤥ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖ ᤕᤠᤶᤔᤥ ᤐᤠ᤺ᤳᤋᤢ. “ᤁᤵᤔᤥ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤔᤧᤕᤢᤱᤗᤥ॥
MAR 3:35 ᤀᤠᤳᤋᤡᤴᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢ᤹ ᤂᤧᤱᤜᤠ᤹ᤀᤣ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”
MAR 4:1 ᤕᤠᤱᤛᤡ ᤕᤠᤶᤔᤥ ᤕᤧᤛᤢᤖᤧ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤖᤥ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤕᤢᤱᤛᤡᤱ. ᤁᤖ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤔᤧᤕᤧᤒᤧ॥
MAR 4:2 ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤜᤢ᤹ᤖᤢᤛᤡ–
MAR 4:3 “ᤂᤧᤵᤛᤧᤶᤔᤧ᤹ᤀᤥ᥄ ᤗᤳᤇᤠ ᤕᤠ᤺ᤴᤁᤧᤔ᤺ᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥
MAR 4:4 ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤈᤔᤧᤍᤣ᤺ᤛᤢᤖᤥ॥
MAR 4:5 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤧᤖᤧᤰᤁᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ ᤗᤡᤱᤔᤠᤃ ᤗᤡᤅᤧ. ᤁᤖ ᤕᤖᤡᤰ ᤂᤠᤶ ᤔᤧᤏᤧᤛ᤻ᤛᤧᤴᤏᤠᤱ ᤁᤢᤛᤠ᤺ᤵᤐᤡᤴ ᤂᤠᤶ ᤛᤡᤃᤠᤱᤎᤠᤖᤡᤰ ᤔᤧᤗᤠ᤺ᤛᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤠᤶ ᤛᤧ᤺ᤖᤧᤸᤗᤧ ᤏᤠᤶᤔᤡᤸᤗᤧ ᤕᤧᤶᤍᤢᤀᤠᤱ ᤁᤠᤰ ᤜᤣᤖᤧᤒᤣᤖᤥ॥
MAR 4:7 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤠᤱᤃ ᤋᤡᤱᤃᤪᤣ᤺ᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠ ᤋᤧᤴᤏᤥ ᤆᤢᤰᤋᤧᤀᤠᤱ ᤛᤥᤛᤥᤖᤡᤰ ᤗᤡᤅᤧᤸᤗᤧ ᤋᤡᤱᤃᤪᤣ᤺ᤰᤐᤠᤸᤗᤧ ᤂᤧᤴ ᤛᤢ᤺ᤵᤋᤢᤍᤣ᤺ᤛᤢᤀᤠᤱ ᤁᤢᤈᤠ᤹ ᤌᤥ᤺ᤰᤔᤠ ᤔᤧᤛᤢᤰᤋᤧᤴᤗᤥ॥
MAR 4:8 ᤘᤣ᤹ ᤕᤠ᤹ᤖᤡ᤺ᤶᤒᤧᤴ ᤏᤢ᤺ᤒᤠ ᤂᤠᤶᤔᤥ ᤆᤢᤰᤋᤧ॥ ᤜᤧᤰᤁᤩᤠᤱ ᤗᤡᤅᤧᤀᤠᤱ ᤂᤧᤱᤜᤠ᤹ᤖᤧ ᤛᤢᤶᤒᤥ᤺ᤱ ᤗᤧᤱ (᥉᥆). ᤋᤢᤰᤐᤥ᤺ᤱ ᤗᤧᤱ (᥌᥆) ᤜᤧᤰᤁᤩᤠᤱ ᤁᤡᤵᤌᤡᤰ ᤗᤧᤱ (᥇᥆᥆) ᤌᤠᤖᤡᤰ ᤁᤢᤈᤠ᤹ ᤐᤳᤇᤧᤖᤥ॥”
MAR 4:9 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”
MAR 4:10 ᤜᤧᤰᤁᤩᤠᤱ ᤕᤧᤛᤢ᤺ᤴ ᤀᤣ᤺ᤰᤗᤣ᤺ᤰ ᤘᤕᤧᤸᤗᤧ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ ᤏᤢ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧ “ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤌᤧᤔᤠᤒᤣ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢ॥
MAR 4:11 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹. ᤁᤖ ᤘᤣ᤹ ᤔᤏᤠᤜᤠ᤹ᤖᤧᤃ ᤂᤧᤍᤠ᤹ᤀᤥᤖᤰ ᤂᤧᤶᤔᤠ ᤔᤧᤄᤥ᤺ᤛᤢ᤹ᤖᤥ॥
MAR 4:12 ᤂᤧᤸᤗᤧ ᤆᤥᤃᤢᤸᤗᤧ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. ‘ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢ. ᤀᤧᤳᤗᤧᤱ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡ᤺ᤛᤢᤴ॥ ᤂᤧᤱᤜᤠ᤹ᤖᤧ ᤀᤧᤳᤗᤧᤱ ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤃ ᤗᤠᤕᤥᤗᤠᤶ ᤔᤧᤏᤢ᤺ᤱ ᤔᤧᤍᤠᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥ᤺ᤛᤢ᤹ᤒᤠᤖᤥ॥’”
MAR 4:13 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤂᤧᤍᤠ᤹ᤀᤡᤴᤏᤣ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤏᤧ ᤑᤠ᤹ᤃᤪ. ᤘᤣ᤹ ᤂᤧᤍᤠ᤹ᤜᤠ᤹ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤒᤣ᥅
MAR 4:14 ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤛᤧ᤺ᤛᤢᤖᤥ॥
MAR 4:15 ᤁᤢᤓᤠ ᤔᤏᤠᤜᤠ᤹ ᤗᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤐᤠ᤺ᤴᤈᤠᤰᤁᤡᤴ ᤂᤢᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤗ᤺ᤳᤋᤢ ᤋᤣ᤹ᤖᤢᤖᤥ॥
MAR 4:16 ᤘᤣ᤹ ᤔᤏᤠᤜᤠ᤹ ᤗᤢᤱᤄᤧᤖᤧᤰᤁᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤐᤠ᤺ᤴᤈᤠᤰ ᤔᤧᤄᤧᤵᤛᤢᤸᤗᤧ ᤔᤧᤛ᤺ᤳᤗ ᤔᤧᤄᤧᤵᤛᤢ᤹.
MAR 4:17 ᤁᤖ ᤋᤠᤱᤒᤠ ᤁᤢᤛᤠ᤺ᤵ ᤁᤧᤒᤵᤐᤠ ᤁᤢᤒᤢᤱᤔᤠᤴ ᤜᤧᤰᤁᤣ ᤂᤧᤱᤜᤠ᤹ ᤛᤵᤑᤠᤖᤰ ᤔᤧᤒᤳᤗᤥ. ᤁᤖ ᤐᤠ᤺ᤴᤈᤠᤰᤁᤡᤴ ᤏᤛᤠ᤺ᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤧᤛᤠᤰᤐᤠ ᤐᤠ᤺ᤴ ᤏᤢ ᤋᤢᤰᤂᤣ᤺ᤴ ᤋᤠᤏᤢᤔᤧ᤺ᤴᤏᤣ ᤜᤠᤖᤠᤀᤣ ᤏᤛᤠ᤺ᤴᤏᤡᤴ ᤔᤧᤗᤧᤖᤢ ᤔᤧᤍᤣ᤺ᤛᤢ᤹ᤖᤥ॥
MAR 4:18 ᤘᤣ᤹ᤜᤠ᤹ ᤋᤡᤱᤃᤪᤣ᤺ᤰᤐᤠᤗᤠᤀᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥
MAR 4:19 ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰ ᤂᤧᤶᤔᤠᤃ ᤔᤧᤄᤧᤵᤛᤢ᤹. ᤁᤖ ᤁᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠ. ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤠᤰᤂᤣᤀᤠᤱ ᤐᤥ᤺ᤱᤔᤠ ᤜᤧᤰᤋᤱᤒᤠ ᤘᤣ᤹ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤐᤠ᤺ᤴᤈᤠᤰᤁᤡᤴ ᤛᤢ᤺ᤵᤋᤢᤍᤣ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤁᤢᤈᤠ᤹ ᤔᤧᤶᤓᤳᤇᤢᤴᤗᤥ॥
MAR 4:20 ᤁᤖ ᤘᤣ᤹ ᤔᤏᤠᤜᤠ᤹ ᤏᤢ᤺ᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤀᤥ ᤔᤧᤍᤠ᤺ᤰᤋᤢ. ᤜᤧᤰᤁᤩᤠᤱ ᤛᤢᤶᤒᤥ᤺ᤱ (᥉᥆) ᤗᤧᤱ. ᤋᤢᤰᤐᤥ᤺ᤱ (᥌᥆) ᤗᤧᤱ ᤜᤧᤰᤁᤩᤠᤱ ᤁᤡᤵᤌᤡᤰ (᥇᥆᥆) ᤗᤧᤱ ᤌᤠᤖᤡᤰ ᤁᤢᤈᤠ᤹ ᤔᤧᤓᤳᤇᤢᤖᤥ॥”
MAR 4:21 ᤀᤠᤸᤗ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤣᤔᤡ᤺ᤴ ᤏᤧᤳᤏᤠ ᤛᤡᤃᤠᤱ ᤁᤧᤕᤢᤰᤂᤢᤶᤒᤡ᥅ ᤀᤡ ᤏᤀᤡᤔᤠᤸᤗᤧ ᤁᤧᤛᤢ᤺ᤵᤋᤢᤶ ᤁᤧᤕᤢᤰᤂᤢᤶᤒᤡ᥅ ᤜᤠ᤺ᤳᤗᤧᤀᤠᤱ ᤜᤧᤰᤁᤣᤃ ᤔᤧᤈᤥᤃᤢᤴᤗᤥ. ᤁᤖ ᤛᤣᤔᤡ᤺ᤴ ᤆᤶᤈᤶᤒᤠ ᤋᤧᤴᤏᤥ ᤌᤥ ᤕᤢᤰᤂᤢ᤹ᤖᤥ॥
MAR 4:22 ᤜᤧᤰᤁᤣ᤺ᤸᤗᤧ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤁᤧᤖᤧᤰᤗᤧ ᤔᤧᤏᤡ᤺ᤛᤢ. ᤜᤧᤰᤁᤩᤠᤱ ᤆᤡᤱᤏᤠᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥”
MAR 4:23 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥”
MAR 4:24 ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱᤅᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤀᤠᤰᤋᤱᤒᤠ ᤁᤢᤛᤡ᤺ᤰᤔᤠᤸᤗᤧ ᤁᤧᤛᤡ᤺ᤰᤋᤢᤶᤛᤡᤶ. ᤀᤠᤶᤓᤠ ᤂᤧᤴ ᤁᤢᤛᤡ᤺ᤰᤔᤠᤸᤗᤧ ᤂᤡᤏᤡ᤹ᤀᤠᤱ ᤁᤧᤶᤛᤡ᤺ᤰᤋᤡ᤹. ᤂᤧᤴᤏᤢ᤺ᤸᤗᤧ ᤕᤖᤡᤰᤁᤠᤱ ᤂᤡᤏᤡ᤹ ᤁᤧᤶᤛᤡ᤺ᤰᤋᤡ ᤁᤧᤶᤒᤡᤖᤡ᤹ᤖᤥ॥
MAR 4:25 ᤕᤖᤡᤰ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥ᤺ᤛᤢ᤹. ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢ᤹ᤖᤥ॥”
MAR 4:26 ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤰᤋᤱᤒᤠ ᤆᤥ᤺ᤰ–ᤔᤏᤠᤎᤡᤰᤗᤧ ᤕᤠ᤹ᤖᤡ᤺ᤶᤒᤠᤴ ᤀᤡᤰᤋᤠᤵᤐᤥ ᤗᤧᤵᤋᤢ᤹.
MAR 4:27 ᤜᤧᤰᤁᤩᤠᤱ ᤕᤧᤶ ᤗᤧᤰᤗ ᤐᤣ᤺ᤰᤁᤡᤸᤗᤧ. ᤂᤢᤏᤧ᤹ ᤂᤧᤴ ᤕᤠ᤹ᤖᤡ᤺ᤶᤒᤠᤴ ᤀᤠᤰᤂᤣᤗ᤹ᤖᤡᤰ ᤗᤡᤱ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤇᤠᤱ ᤂᤧᤴ ᤕᤠ᤹ᤖᤡ᤺ᤶᤒᤠᤴ ᤗᤡᤱᤗᤥ॥
MAR 4:28 ᤀᤠᤒᤠᤅᤣ ᤂᤠᤶᤒᤣ᤺ᤰᤔᤥ ᤐᤥᤃᤢᤃᤧᤴ ᤁᤢᤈᤠ᤺ᤴ ᤗᤡᤱ. ᤂᤠᤶᤒᤣ᤺ᤰᤔᤠᤸᤗᤧᤀᤣ ᤁᤢᤈᤠ᤹ ᤌᤥ᤺ᤰᤗ ᤕᤠ᤺ᤴᤍᤢ᤹. ᤋᤃᤡ ᤁᤢᤏ᤺ᤰ ᤌᤠᤱ ᤜᤧᤰᤁᤩᤠᤱ ᤐᤥᤀᤠᤱ ᤁᤢᤈᤠ᤹ ᤌᤥ᤺ᤰ॥
MAR 4:29 ᤐᤥᤃᤢᤃᤧᤴ ᤁᤢᤈᤠ᤺ᤴ ᤋᤢᤶᤔᤠᤱ ᤂᤧᤴ ᤔᤏᤠ᤺ᤴ ᤁᤠᤳᤆᤩᤠ᤺ᤴ ᤕᤠᤱᤛᤡᤱᤅᤠᤱ ᤆᤠ ᤛᤢᤶᤛᤧ ᤀᤡᤰᤋᤠᤵᤐᤥ ᤗᤠ᤺ᤳ. ᤌᤣᤀᤠᤱᤓᤧᤸᤗᤧ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤩᤧᤖᤥ॥”
MAR 4:30 ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤌᤣ᤺ᤴᤏᤢ ᤋᤱᤔᤠᤒᤣ᥅ ᤀᤠᤰᤂᤣᤗ᤹ᤖᤡᤰ ᤁᤢᤒᤡ ᤐᤡᤔᤠᤀᤠᤱ ᤐᤥᤎᤰ ᤆᤥ᤺ᤰᤔᤠᤒᤣ᥅
MAR 4:31 ᤁᤱᤃ ᤂᤠᤶᤔᤥ ᤗᤧᤵᤔᤏᤠᤒᤠ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤀᤥ ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠᤱ
MAR 4:32 ᤀᤡᤰᤋᤠᤵᤐᤥ ᤘᤣ᤹ ᤏᤢᤎᤡ-ᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤐᤥ᤺ᤱᤅᤠᤱ ᤁᤢᤒᤥᤖᤠ᤺ᤰᤜᤠ᤹ᤀᤥ ᤐᤢᤜᤠ᤹ᤖᤧᤀᤠᤱ ᤜᤠᤵ ᤔᤧᤈᤥᤃᤢᤖᤥ॥”
MAR 4:33 ᤕᤧᤛᤢᤖᤧ ᤀᤰᤋᤱᤒᤠ ᤂᤧᤍᤠ᤹ᤀᤥ ᤔᤏᤠᤜᤠ᤹ᤖᤧ ᤐᤠ᤺ᤴᤈᤠᤰ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤖ ᤌᤠᤖᤡᤰ ᤜᤢ᤹ᤖᤢᤛᤡ॥
MAR 4:34 ᤂᤢᤏᤧ᤹ ᤐᤠᤖᤧᤸᤗᤧ ᤂᤧᤍᤠ᤹ᤀᤥᤖᤰ ᤐᤠᤖᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤀᤣ᤺ᤰ ᤔᤧᤘᤕᤧᤸᤗᤧ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤜᤴᤍᤢ ᤐᤡᤖᤢᤛᤡᤖᤥ॥
MAR 4:35 ᤂᤧᤴ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤐᤣᤃᤡ॥”
MAR 4:36 ᤜᤧᤰᤁᤣᤗ᤹ᤖᤡᤰ ᤕᤖᤡᤰ ᤔᤏᤠᤜᤠ᤹ᤏᤢ ᤔᤧᤛᤧᤴᤍᤧᤀᤠᤱ ᤂᤢᤏᤧ᤹ ᤒᤠ ᤂᤧᤴ ᤂ᤺ᤱᤒᤣᤀᤥᤏᤢ ᤏᤠᤜᤠᤱᤍᤠᤱ ᤔᤧᤍᤣ᤹ᤖᤢᤖᤥ॥ ᤂᤧᤵᤔᤥ ᤘᤣ᤹ ᤂ᤺ᤱᤒᤣᤜᤠ᤹ᤀᤠᤱ ᤔᤧᤏᤧᤛ᤻ᤛᤧᤖᤥ॥
MAR 4:37 ᤜᤰᤆᤄᤳ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤂᤠ ᤂ᤺ᤱᤒᤣᤀᤡᤴᤏᤣ ᤋᤡᤶᤛᤧᤖᤥ॥
MAR 4:38 ᤕᤧᤛᤢ᤺ᤴ ᤂ᤺ᤱᤒᤣᤸᤗᤧ ᤁᤢᤀᤣ᤺ᤰ ᤗᤧᤵᤔᤠᤱ ᤋᤠᤰᤂᤥ᤺ᤱᤎᤡᤰ ᤁᤥ᤺ᤰᤛᤡᤱᤅᤠᤱ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤓᤥ᤺ᤰᤂᤢᤖ ᤀᤰᤂᤣ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡᤃᤧ ᤜᤢᤶᤔᤠ ᤛᤡ᤺ᤔᤠ ᤀᤡ᤺ᤳᤋᤡᤃᤧᤖᤥ᥄ ᤌᤣᤀᤠᤱ ᤛᤫᤠ᤺ᤳ ᤁᤧᤏᤧᤒᤠᤒᤣ᥅”
MAR 4:39 ᤕᤧᤛᤢ᤺ᤴ ᤐᤥᤃᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ “ᤔᤧᤴᤜᤢ᤺ᤀᤧ᤹” ᤔᤧᤳᤋᤢᤀᤠᤱ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤴ “ᤆᤡᤈᤡ ᤕᤧᤶᤕᤧᤶ ᤗ᤹ᤖᤧ᤹” ᤔᤧᤳᤋᤢ. ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤗ᤹ᤖᤧᤀᤠᤱ. ᤘᤠᤓᤧᤸᤗᤧᤱᤅᤡᤴᤏᤠᤱ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤖᤥ॥
MAR 4:40 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤗᤠᤵᤋᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤁᤧᤃᤡ᤺ᤛᤡ ᤁᤧᤛᤩᤧ᤹ᤀᤡᤒᤠ᥅ ᤀᤠᤸᤗᤛᤠᤱ ᤕᤠᤵᤔᤡ ᤏᤛᤠ᤺ᤴ ᤁᤧᤴᤈᤥᤃᤡᤴᤒᤡ᥅”
MAR 4:41 ᤁᤖ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤸᤗᤧᤀᤠᤱ ᤂᤧᤵᤛᤢᤒᤠᤒᤣ᥅ ᤁᤴ ᤔᤏᤠ᤺ᤱᤃ ᤜᤠ᤺ᤵᤐᤣ᥅”
MAR 5:1 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥ ᤔᤧᤃᤧᤖᤧ॥
MAR 5:2 ᤕᤧᤛᤢ᤺ᤴ ᤂ᤺ᤱᤒᤣᤀᤥᤏᤢ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤀᤡᤵᤐᤢᤱᤍᤧᤴᤏᤥᤗᤠᤶ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧ॥
MAR 5:3 ᤂᤧᤴ ᤔᤏᤠ᤺ᤴ ᤀᤡᤵᤐᤢᤱᤍᤧᤴᤜᤠ᤹ᤀᤥ ᤘᤕᤧᤃᤳᤋᤧ॥ ᤜᤠ᤺ᤳᤗᤧᤀᤠᤱ ᤂᤧᤴ ᤑᤧᤴᤌᤰᤁᤪᤱᤅᤡᤸᤗᤧᤀᤠᤱ ᤀᤡᤄᤣ᤺ᤱᤔᤠ ᤔᤧᤛᤢᤰᤋᤢᤴ.
MAR 5:4 ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤖᤡᤰᤗᤧᤱ ᤁᤢᤜᤢᤰ ᤁᤢᤗᤠᤱᤅᤥ ᤀᤡᤔᤧᤄᤣ᤺ᤰᤂᤢ ᤔᤧᤓᤳᤇᤢ ᤔᤧᤒᤡᤖᤢᤒᤠ ᤑᤧᤴᤌᤰᤁᤪᤱᤜᤠ᤹ ᤏᤢ ᤑᤧᤴᤜᤢᤰᤐᤠ᤺ᤱᤃᤡᤜᤠ᤹ ᤑᤢ᤹ᤖᤢᤀᤠᤱ ᤘᤕᤧᤖᤥ॥ ᤀᤠᤳᤋᤡᤸᤗᤧᤀᤠᤱ ᤂᤧᤴ ᤔᤏᤠ᤺ᤴ ᤕᤢᤰᤁᤥ ᤁᤵᤔᤠ ᤔᤧᤛᤢᤰᤋᤢᤴᤗᤥ॥
MAR 5:5 ᤂᤧᤴ ᤀᤡᤵᤐᤢᤱᤍᤧᤴᤏᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱᤄᤠ᤺ᤳᤋᤡᤖᤰ ᤛᤧᤴᤍᤡᤰ ᤗᤧᤴᤍᤡᤰ ᤀ᤺ᤰᤋᤧᤖ ᤑᤡ᤺ᤰᤋᤧᤖ ᤗᤢᤱᤅᤡᤸᤗᤧ ᤂᤧ᤺ᤴᤇᤡᤱᤗ ᤘᤕᤧᤃᤳᤋᤧᤖᤥ॥
MAR 5:6 ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢ᤺ᤴ ᤔᤠ᤺ᤱᤄᤠᤗᤠᤶᤔᤣ ᤏᤡ᤺ᤛᤢᤀᤠᤱ ᤗᤥ᤺ᤰᤋᤧᤖ ᤑᤧᤖᤧᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖ ᤁᤢᤗᤠᤱᤈᤰᤁᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥
MAR 5:7 ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤕᤧᤛᤢ᤺ᤴ ᤔᤧᤳᤋᤢ. “ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤕᤧᤛᤢᤀᤣ. ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤏᤧ᤹ᤖᤥ॥”
MAR 5:8 (ᤌᤣᤀᤠᤱᤓᤧᤸᤗᤧ ᤋᤃᤡ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤏᤧ᤹ ᤂᤧᤴ ᤔᤏᤠᤀᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤔᤧᤳᤋᤢᤀᤠᤱ ᤘᤕᤧᤖᤥ॥)
MAR 5:9 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤁᤧᤔᤡᤱ ᤌᤧᤔᤠᤒᤣ᥅” ᤜᤧᤰᤁᤩᤠᤱ ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤔᤡᤱ ᤋᤢᤖᤠᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤀᤥ ᤀᤠᤏᤡᤃᤧ ᤕᤖᤡᤰ ᤕᤠᤃᤡᤃᤧ॥”
MAR 5:10 ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢ᤺ᤴ ᤐᤣᤗᤡ ᤑᤠᤰᤋᤢ. “ᤁᤴ ᤌᤢᤶᤔᤥᤗᤠᤶ ᤀᤠᤏᤡᤃᤧ ᤀᤠᤶᤒᤠᤱᤄᤧᤴᤏᤧ᤹ᤀᤥ॥”
MAR 5:11 ᤀᤠᤸᤗ ᤂᤧᤴ ᤁᤥ᤺ᤰᤔᤠᤀᤥ ᤕᤖᤡᤰ ᤑᤠᤰᤜᤠ᤹ ᤆᤠᤔᤧᤖᤠᤔᤧᤖ ᤔᤧᤕᤧᤒᤧ॥
MAR 5:12 ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤕᤧᤛᤢ᤺ᤴ ᤐᤣᤗᤡ ᤔᤧᤓᤠᤰᤋᤢ. “ᤀᤠᤏᤡᤃᤧ ᤂᤧᤴ ᤑᤠᤰᤜᤠ᤹ᤀᤥ ᤗᤠ᤺ᤵᤔᤠ ᤀᤠᤒᤠᤱᤄᤧ᤹ᤀᤥ॥ ᤀᤠᤏᤡᤃᤧ ᤂᤧᤱᤜᤠ᤹ᤀᤥ ᤗᤠ᤺ᤛᤡᤃᤧ᤹॥”
MAR 5:13 ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤗᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤑᤧᤴᤛᤠᤶᤜᤠ᤹ ᤂᤧᤴ ᤔᤏᤠᤀᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤑᤠᤰᤜᤠ᤹ᤀᤥ ᤔᤧᤗᤠ᤺ᤛᤧ॥ ᤂᤧᤴ ᤜᤧᤴᤇᤡᤱ ᤏᤧᤳᤇᤡ ᤕᤠᤖᤡᤰ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥
MAR 5:14 ᤂᤧᤵᤔᤥ ᤑᤠᤰ ᤁᤧᤃᤶᤒᤠᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤐᤠᤱᤈᤢᤶᤔᤥ ᤏᤢ ᤂᤧᤴ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤴ ᤐᤠ᤺ᤴᤏᤡᤴ ᤔᤧᤛᤧ᤺ᤛᤢ॥ ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤣ᤺ᤴᤏᤧ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤀᤥᤔᤧᤳᤇᤧ
MAR 5:15 ᤕᤧᤛᤢ᤺ᤴ ᤘᤕᤧᤒᤠ ᤋᤧᤴᤏᤥ ᤔᤧᤍᤩᤧᤖᤥ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠ᤺ᤴ ᤘᤣ᤺ᤳᤋᤧᤀᤠᤱ ᤏᤢ᤺ᤖᤡᤰᤁᤠᤱ ᤋᤣ᤺ᤳ ᤆᤠᤰᤂᤢᤀᤠᤱ ᤕᤢᤅᤧᤒᤠ ᤔᤧᤏᤡ᤺ᤛᤢ॥ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤏᤢ ᤑᤠᤰᤜᤠ᤹ ᤌᤣ ᤔᤧᤒᤥ᤺ᤰᤂᤧ ᤑᤠ᤹ᤀᤠᤱ ᤁᤧᤏᤡ᤺ᤒᤠ ᤔᤏᤠᤜᤠ᤹ᤖᤧ ᤔᤧᤈᤧᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ॥
MAR 5:17 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤠᤏᤡᤃᤧ ᤌᤢᤶᤔᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
MAR 5:18 ᤕᤧᤛᤢ᤺ᤴ ᤂ᤺ᤱᤒᤣᤀᤥ ᤗᤠ᤺ᤛᤧᤖ ᤐᤳᤇᤧᤸᤗᤧ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠ᤺ᤴ ᤕᤧᤛᤢᤖᤧ ᤁᤢᤒᤣᤛᤠᤱ ᤋᤩᤧᤀᤠᤱ. ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤋᤣ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ॥
MAR 5:19 ᤁᤖ ᤕᤧᤛᤢᤖᤧ ᤔᤧᤍᤧᤴᤍᤧᤴᤗ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤰᤂᤧ ᤐᤣᤃᤧ᤹ᤀᤠᤱ ᤁᤧᤜᤡᤶᤛᤕᤱ ᤏᤢ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤗᤠᤃᤡ ᤆᤥᤃᤢᤒᤠ ᤕᤶᤒᤠ ᤕᤠ᤺ᤶᤒᤰᤁᤡᤴ ᤏᤢ ᤗᤢᤱᤔᤠ᤹ ᤁᤧᤍᤢᤰᤋᤧᤒᤠ ᤐᤠ᤺ᤴᤏᤡᤴ ᤆᤧᤰᤋᤧᤛᤧ᤹ᤀᤥ॥”
MAR 5:20 ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴᤏᤠᤱ ᤂᤧᤵᤔᤥᤗᤠᤶ ᤏᤢ᤺ᤰᤂᤧ ᤐᤣᤀᤠᤱ ᤌᤡᤒᤥ᤺ᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤂᤠᤖᤠᤰ ᤕᤧᤛᤢᤖᤧ ᤆᤥᤃᤢᤒᤠ ᤕᤶᤒᤠ ᤐᤠ᤺ᤴᤏᤡᤴ ᤀᤡᤱᤓᤴ ᤛᤧ᤺ᤛᤢᤖᤥ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
MAR 5:21 ᤕᤧᤛᤢ᤺ᤴ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤏᤢ᤺ᤰᤂᤧ ᤐᤣᤀᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤖᤡᤰ ᤔᤏᤠᤜᤠ᤹ ᤁᤢᤃᤒᤪᤡᤱ ᤔᤧᤈᤢᤵᤛᤧᤖᤥ॥
MAR 5:22 ᤐᤠᤱᤋᤡᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤠ ᤕᤠᤀᤡᤖᤛ ᤔᤧᤵᤔᤏᤠᤒᤠ ᤔᤏᤠ᤺ᤴ ᤋᤩᤧ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ
MAR 5:23 ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ ᤆᤢᤰᤔᤧᤴ ᤛᤡ᤺ᤔᤠ ᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤖᤥ॥ ᤂᤧᤴ ᤘᤣ᤺ᤳᤋᤠᤱ ᤜᤡᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤁᤧᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤧ ᤐᤡᤖᤧ᤹ᤀᤥ॥”
MAR 5:24 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴᤏᤢ ᤌᤠᤛᤡᤱ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤡᤓᤡ᤺ᤳ ᤔᤧᤓᤡ᤺ᤳᤋᤢᤖ ᤔᤧᤍᤡᤶᤍᤢᤖᤥ॥
MAR 5:25 ᤂᤧᤵᤔᤥ ᤋᤱᤒᤣ ᤌᤡᤰ-ᤏᤧᤳᤋᤠᤱᤎᤥ (᥇᥈) ᤔᤠᤰᤂᤡ᤹ ᤘᤕᤢ᤺ᤔᤠᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥
MAR 5:26 ᤂᤢᤏᤧ᤹ ᤕᤖᤡᤰ ᤛᤡᤍᤠ᤹ᤛᤠᤶᤒᤠᤜᤠ᤹ᤖᤥ ᤛᤡᤍᤠ᤹ ᤔᤧᤳᤇᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤔᤠ᤺ᤴᤍᤢᤛᤠᤱ. ᤂᤧᤴ ᤘᤣ᤺ᤵᤔᤠᤸᤗᤧ ᤁᤢᤗᤧᤰᤘᤠ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤢᤃᤧᤒᤣᤀᤠᤱ ᤘᤕᤧᤖᤥ॥
MAR 5:27 ᤂᤧᤸᤗᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱᤗᤠᤶ ᤋᤩᤧᤀᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤴ ᤛᤢ᤺ᤛᤢᤖᤥ॥
MAR 5:28 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤣ᤺ᤳᤋᤡᤴᤗᤰ ᤛᤢ᤺ᤛᤢᤱᤛᤠᤱ ᤀᤡᤱᤃᤠ᤹ ᤘᤣ᤺ᤳᤋᤠ ᤗ᤹ᤖᤡᤰ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤇᤡᤱ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤴ ᤛᤢ᤺ᤛᤢᤏᤢᤔᤧ᤺ᤴᤏᤣ ᤁᤢᤎᤰᤁᤥ ᤔᤠᤰᤂᤡ᤹ ᤘᤕᤢ᤺ᤔᤠᤴ ᤆᤡᤒᤧᤀᤠᤱ ᤆᤠᤱᤈᤠᤱ ᤗ᤹ᤖᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤖᤥ॥
MAR 5:30 ᤂᤡᤔᤥ ᤕᤧᤛᤢᤖᤧ ᤁᤢᤎᤰᤁᤥᤏᤢ ᤔᤢᤰᤛᤠᤶ ᤗ᤺ᤴᤍᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤡᤖᤡ ᤜᤡᤛᤡᤱᤅᤠᤱ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤍᤣ᤺ᤳᤋᤡᤴ ᤛᤢ᤺ᤛᤢᤒᤣ᥅”
MAR 5:31 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤰᤂᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤁᤧᤶᤈᤴᤗ ᤁᤧᤶᤓᤡ᤺ᤳᤗ ᤔᤧᤒᤳ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤜᤠ᤺ᤳᤗᤧ ᤛᤢ᤺ᤛᤠᤱᤒᤣ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅”
MAR 5:32 ᤁᤖ ᤕᤧᤛᤢᤖᤧ ᤂᤢᤏᤧ᤹ ᤁᤧᤛᤢᤔᤧᤴ ᤀᤥᤔᤧᤳᤇᤧ ᤂᤡᤖᤡ ᤀᤥᤔᤕᤧ॥
MAR 5:33 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤁᤢᤃᤡ᤺ᤔᤠᤸᤗᤧ ᤕᤰᤂᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ ᤕᤧᤛᤢ᤺ᤴ ᤁᤧᤖᤧᤰ ᤐᤠ᤺ᤴᤏᤡᤴ ᤆᤧᤰᤋᤢ॥
MAR 5:34 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤔᤠᤔᤢᤀᤣ. ᤏᤛᤠ᤺ᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤘᤣ᤺ᤳᤋᤧᤖᤥ॥ ᤂᤧᤏᤧ᤹ ᤁᤧᤘᤣ᤺ᤳᤋᤧᤀᤠᤱ ᤁᤧᤘᤠ᤹ᤖᤥ. ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ᥄”
MAR 5:35 ᤕᤧᤛᤢ᤺ᤴ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤗᤠᤶᤗᤥ᤺ᤒᤠ ᤕᤠᤀᤡᤖᤛᤖᤧ ᤁᤢᤜᤡᤶᤔᤥᤗᤠᤶ ᤀᤡᤱᤛᤠᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤛ᤻ᤛᤠ᤺ᤱᤃ ᤛᤩᤧᤖᤥ॥ ᤀᤠᤸᤗ ᤛᤡᤰᤛᤠᤶᤒᤧᤴ ᤌᤣᤀᤠᤱ ᤋᤢᤰᤂᤣ ᤆᤠ᤺ᤵᤔᤠᤒᤣ᥅”
MAR 5:36 ᤁᤖ ᤕᤧᤛᤢᤖᤧ ᤂᤧᤴ ᤂᤧᤶᤂᤧᤶᤔᤠᤱ ᤔᤧᤴᤗᤠᤵᤐᤣ ᤕᤠᤀᤡᤖᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤏᤛᤠ᤺ᤴᤗᤰ ᤆᤥᤃᤧ᤹ᤀᤥ॥”
MAR 5:37 ᤜᤧᤰᤁᤩᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴᤗᤰ ᤂᤢᤏᤧ᤹ᤏᤢ ᤐᤣ᤺ᤰᤔᤠ ᤐᤠᤱᤄᤢᤛᤡ॥
MAR 5:38 ᤂᤧᤱᤜᤠ᤹ ᤕᤠᤀᤡᤖᤛᤖᤧ ᤁᤢᤜᤡᤶᤔᤥ ᤔᤧᤃᤧᤖᤧᤸᤗᤧ ᤔᤏᤠᤜᤠ᤹ ᤜᤕᤱᤁᤡᤸᤗᤡᤱ ᤏᤢ ᤔᤣᤖᤡᤱ ᤌᤰᤏᤢ ᤔᤧᤜᤠᤒᤧᤖ ᤔᤧᤕᤠᤃᤧᤒᤠ ᤕᤧᤛᤢᤖᤧ ᤏᤡ᤺ᤛᤢᤛᤡ॥
MAR 5:39 ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶ ᤛᤡᤃᤠᤱ ᤗᤠ᤺ᤛᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤜᤕᤱᤁᤡᤸᤗᤡᤱ ᤏᤢ ᤔᤣᤖᤡᤱ ᤌᤰᤏᤢ ᤁᤧᤜᤠᤒᤡᤒᤠᤒᤣ᥅ ᤆᤢᤰᤔᤧᤱᤃ ᤔᤧᤴᤇᤡ᤺ᤀᤣ ᤘᤠ᤹. ᤀᤡᤵᤛᤧᤀᤠᤱᤗᤰ ᤏᤧ᤹॥”
MAR 5:40 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤀᤣ᤺ᤳᤋᤢ. ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤁᤧᤖᤧᤰ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤆᤢᤰᤔᤧᤸᤗᤧ ᤁᤢᤶᤒᤠ ᤁᤢᤶᤔᤠ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤢᤰᤔᤧᤴ ᤏᤧᤛ᤻ᤛᤧᤒᤠ ᤋᤧᤴᤏᤥ ᤋᤣ᤹ᤖᤢᤛᤡ॥
MAR 5:41 ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤸᤗᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ “ᤋᤗᤡᤋᤠ ᤁᤢᤔᤡ” ᤔᤧᤳᤋᤢ. ᤂᤧᤸᤗᤧ ᤁᤢᤒᤣ᤺ᤱᤃ “ᤆᤢᤰᤔᤣ. ᤐᤥᤃᤧ᤹ᤀᤥ᥄” ᤐᤥ᤺ᤱᤗᤥ॥
MAR 5:42 ᤂᤡᤔᤥ ᤂᤧᤴ ᤆᤢᤰᤔᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤗᤠᤱᤄᤣᤃᤧ॥ (ᤂᤧᤴ ᤋᤱᤒᤣ ᤌᤡᤰ-ᤏᤧᤳ (᥇᥈) ᤁᤧᤖᤧᤀᤠᤱ ᤘᤕᤧ॥) ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
MAR 5:43 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠ᤺ᤱ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤴ ᤌᤧᤔᤠᤀᤡ ᤆᤠᤔᤠ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥
MAR 6:1 ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤐᤣᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤋᤩᤧ॥
MAR 6:2 ᤜᤧᤰᤁᤩᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤰᤋᤱᤒᤠ ᤐᤠ᤺ᤴᤏᤡᤴ ᤀᤠᤳᤋᤥ ᤂᤥ᤺ᤛᤢᤒᤣ᥅ ᤀᤠᤰᤂᤣᤗ᤹ᤖᤡᤰ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤣ᥄
MAR 6:3 ᤁᤱᤃ ᤔᤖᤡᤕᤔᤖᤧ ᤁᤢᤛ᤻ᤛᤠ᤺ ᤛᤡᤱ ᤁᤧᤃᤠᤶᤒᤧᤴ ᤔᤧ᤺ᤶᤒᤡ᥅ ᤁᤱᤃ ᤕᤠᤁᤢᤒ. ᤕᤢᤛᤢᤑ. ᤕᤜᤢᤍᤠ ᤏᤢ ᤛᤡᤔᤥᤏᤛᤡᤖᤧ ᤂᤢᤏᤡ᤹ ᤑᤢ᤹ᤏᤣ ᤔᤧ᤺ᤶᤒᤡ᥅ ᤁᤸᤗᤧ ᤁᤢᤴᤛᤠ᤹ ᤔᤧᤴᤇᤢᤔᤠᤜᤠ᤹ᤃ ᤀᤠᤏᤡ᤹ᤏᤢᤀᤣᤛᤧ ᤔᤧᤘᤠ᤹ᤒᤠ॥” ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥
MAR 6:4 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤱᤃ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹. ᤁᤢᤃᤠ᤹ᤀᤡᤛᤥᤎᤥ᤺ᤰᤜᤠ᤹ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧ ᤀᤡᤱᤎᤠ᤺ᤱ ᤔᤧᤶᤒᤡᤖᤢᤴᤗᤥ॥ ᤁᤖ ᤘᤣ᤹ ᤋᤧᤴᤏᤥᤖᤰ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥”
MAR 6:5 ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤁᤖ ᤌᤡᤰ-ᤏᤧᤳᤇᤡ ᤁᤧᤍᤢᤰᤐᤠᤜᤠ᤹ ᤛᤶᤍᤠᤱᤗᤰ ᤁᤢᤜᤢᤰ ᤏᤧᤛ᤻ᤛᤢ ᤐᤡᤖᤢᤛᤡᤀᤠᤱ ᤘᤣ᤺ᤴᤍᤢᤛᤡᤖᤥ॥
MAR 6:6 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤜᤥ᤺ᤵᤋᤧᤒᤠ ᤏᤡ᤺ᤛᤢᤀᤠᤱ ᤁᤢᤏᤡᤱᤘᤠ᤹ ᤔᤕᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠᤱᤓᤣ᤹ᤜᤠ᤹ᤀᤥ ᤜᤢ᤹ᤖᤢᤛᤡᤖ ᤐᤣᤖᤥ॥
MAR 6:7 ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤑᤧᤴᤛᤠᤶᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤕᤢᤰ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤛᤢᤏᤠᤀᤡᤱ ᤀᤡᤱᤓᤴ ᤛᤧ᤺ᤛᤧ ᤏᤧᤳᤏᤧᤳᤇᤡ ᤐᤠᤱᤄᤢᤛᤡ॥
MAR 6:8 ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢᤛᤡ. “ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤁᤧᤒᤣᤃᤡᤸᤗᤧ ᤋᤰᤁᤠ᤺ᤳᤗᤰ ᤕᤠᤱᤅᤠᤛᤡᤶᤔᤧ᤹. ᤂᤧᤴᤏᤠᤱᤎᤥ ᤘᤣ᤹ ᤆᤠᤔᤠ ᤆᤠ. ᤛᤢ᤺ᤰᤘᤠ ᤏᤢ ᤕᤠᤱ ᤌᤣᤀᤠᤱ ᤔᤧᤍᤣ᤹ᤖᤧᤶᤔᤡᤴᤏᤧ᤹ᤀᤥ॥
MAR 6:9 ᤗᤠᤱᤛᤢ᤺ᤵᤐᤡᤴ ᤆᤠᤰᤂᤧᤶᤔᤧ᤹. ᤁᤖ ᤘᤣ᤹ ᤗᤧᤰᤛᤡᤱᤔᤠ ᤆᤠᤱ ᤔᤧᤒᤰᤂᤧᤶᤔᤡᤴᤏᤧ᤹ᤀᤥ॥
MAR 6:10 ᤂᤡᤏᤡ᤹ ᤁᤧᤒᤣᤃᤡᤸᤗᤧ ᤀᤠᤳᤋᤡᤴ ᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤁᤧᤶᤒᤡᤖᤡ᤹. ᤂᤧᤴ ᤐᤠᤱᤓᤣ᤹ᤀᤥᤗᤠᤶ ᤔᤧᤶᤒᤣ᤺ᤰᤁᤣ ᤌᤠᤖᤡᤰ ᤒᤠ ᤂᤧᤴ ᤜᤡᤶᤔᤥᤀᤣ ᤘᤕᤧᤶᤔᤧ᤹ᤀᤥ॥
MAR 6:11 ᤜᤧᤰᤁᤩᤠᤱ ᤀᤠᤳᤋᤡᤴ ᤗᤠᤈᤣ᤹ᤀᤥ ᤂᤡᤏᤡ᤹ ᤗᤠᤶ ᤁᤧᤔᤧᤴᤍᤠ᤺ᤰᤋᤡᤴ ᤜᤧᤰᤁᤩᤠᤱ ᤂᤡᤏᤡ᤹ ᤐᤠ᤺ᤴᤏᤠᤱ ᤔᤧᤱᤄᤧᤵᤛᤢᤴ. ᤂᤧᤴ ᤗᤠᤈᤣ᤹ᤀᤡᤴ ᤁᤧᤗᤧᤖᤢᤶᤔᤠᤱ ᤁᤧᤒᤡᤃᤡᤸᤗᤧ ᤂᤡᤏᤡ᤹ ᤗᤠᤱᤅᤥ ᤁᤧᤄᤡᤵᤐᤠ ᤂᤠᤶ ᤜᤡ᤺ᤰᤁᤡᤴ ᤌᤠᤵᤛᤧᤶ ᤌᤠ᤹ᤖᤧᤶᤛᤡᤶᤔᤧ᤹ ᤁᤱᤃ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤱᤒᤠ ᤔᤡᤰᤛᤣ᤺ᤴᤗᤥ॥”
MAR 6:12 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤔᤏᤠᤜᤠ᤹ᤀᤥ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤓᤴ ᤛᤧ᤺ᤔᤠ ᤔᤧᤜᤣ᤺ᤰᤋᤢ॥
MAR 6:13 ᤂᤧᤱᤜᤠ᤹ᤖᤧ ᤔᤏᤠᤜᤠ᤹ᤗᤠᤶ ᤑᤧᤴᤛᤠᤶᤜᤠ᤹ ᤔᤧᤗ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤕᤖᤡᤰ ᤁᤧᤍᤢᤰᤐᤠᤜᤠ᤹ ᤏᤡ᤺ᤱᤃᤣ᤹ ᤔᤧᤜᤢ᤺ᤳᤋᤢ ᤔᤧᤒᤡᤖᤢᤛᤡ. ᤜᤧᤰᤁᤩᤠᤱ ᤔᤧᤘᤣ᤺ᤴᤍᤢᤛᤡᤖᤥ॥
MAR 6:14 ᤀᤠᤸᤗ ᤕᤧᤛᤢᤖᤧ ᤁᤢᤔᤡᤱᤛᤥ-ᤁᤢᤎᤠ᤺ᤱᤛᤥ ᤁᤧᤖᤧᤰ ᤐᤡᤛᤠᤱ ᤛᤧ᤺ᤖᤧ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤜᤧᤖᤥᤍ ᤜᤠᤱᤅᤡᤸᤗᤧᤀᤠᤱ ᤂᤧᤵᤛᤢᤖᤥ॥ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤕᤠᤶᤔᤥ ᤜᤡᤅᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤔᤢᤰᤛᤠᤶᤗᤠᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥”
MAR 6:15 ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴᤗᤥ॥” ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤂᤢᤏᤧ᤹ᤀᤠᤱ ᤌᤡᤰᤗᤥ॥”
MAR 6:16 ᤁᤖ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤴ ᤂᤧᤵᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤱᤃ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤥ॥ ᤀᤡᤱᤃᤠ᤹ ᤂᤢᤏᤧ᤹ ᤁᤢᤏᤡ᤺ᤱᤔᤠᤴ ᤂᤰ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ. ᤁᤖ ᤕᤠᤶᤔᤥ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤖᤥ᥄”
MAR 6:17 ᤜᤧᤖᤥᤍ ᤜᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ ᤑᤡᤗᤡᤐᤖᤧ ᤁᤢᤔᤣ᤺ᤳ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤳ ᤁᤳᤋᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤜᤧᤖᤥᤍᤡᤕᤠᤛᤖᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤑᤠ᤹ᤀᤠᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤋᤧᤶᤔᤠᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤢᤜᤢᤴᤏᤠᤖᤧ ᤂᤢᤏᤧ᤹ ᤀᤧᤳᤗᤧᤱ “ᤂᤧᤴ ᤀᤠᤒᤠᤅᤣ ᤁᤧᤴᤛᤠ᤹ᤖᤧ ᤁᤢᤔᤣ᤺ᤳᤋᤡᤴ ᤔᤣ᤺ᤳ ᤁᤵᤔᤠ ᤔᤧᤏᤢ᤹ᤏᤧᤴ” ᤔᤧᤳᤋᤢᤀᤠᤱ ᤘᤕᤧᤖᤥ॥
MAR 6:19 ᤜᤧᤖᤥᤍᤡᤕᤠᤛᤖᤧ ᤕᤢᤜᤢᤴᤏᤠ᤺ᤴᤏᤢ ᤁᤢᤛᤡᤰ ᤐᤥᤃᤧᤀᤠᤱ ᤂᤧᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤛᤠᤱ ᤂᤢᤏᤧ᤹ ᤛᤧᤵᤔᤠ ᤔᤧᤴᤇᤢᤰᤁᤣ ᤘᤕᤧ.
MAR 6:20 ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤕᤢᤜᤢᤴᤏᤠ᤺ᤴ ᤛᤠᤶᤕᤥᤏᤡᤒᤠ ᤏᤢ ᤛᤣᤛᤣᤒᤠ ᤔᤏᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ. ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤋᤠᤱᤛᤧ᤺ᤵᤋᤢᤀᤠᤱ ᤘᤕᤧᤖᤥ॥ ᤕᤢᤜᤢᤴᤏᤠᤖᤧ ᤁᤢᤒᤠ᤺ᤴᤏᤡᤴ ᤂᤢᤏᤧ᤹ ᤂᤧᤵᤛᤢᤸᤗᤧ ᤛᤠ᤹ᤖᤡᤰ ᤁᤡ᤺ᤛᤧᤀᤠᤱ ᤘᤕᤧᤛᤠᤱ ᤛ᤺ᤳᤋᤧᤖ ᤂᤧᤵᤛᤢᤖᤀᤣ ᤘᤕᤧᤖᤥ॥
MAR 6:21 ᤀᤠᤸᤗ ᤕᤶᤒᤠ ᤛᤢᤕᤧᤶ ᤋᤩᤧ॥ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤛᤠᤘᤠ᤺ᤴᤇᤡᤱᤔᤠ ᤛᤛ᤺ᤳᤛᤖᤠᤱᤅᤥ ᤃᤠᤗᤡᤗ ᤌᤢᤶᤔᤥᤒᤠ ᤐᤕᤶ ᤕᤶᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤋᤡᤗᤡᤱᤃᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤔᤡᤱᤛᤥᤍᤠᤱᤒᤠ ᤋᤢᤶᤔᤩᤠᤜᤠᤱᤜᤠ᤹ ᤋᤖᤣ ᤀᤢ᤺ᤳᤋᤢᤛᤡᤀᤠᤱ ᤘᤕᤧ॥
MAR 6:22 ᤜᤧᤖᤥᤍᤡᤕᤠᤛᤖᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤴ ᤂᤧᤵᤔᤥ ᤋᤩᤧᤀᤠᤱ ᤗᤠ᤺ᤰᤂᤧ. ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤴ ᤏᤢ ᤂᤧᤵᤔᤥ ᤁᤧᤍᤠ᤺ᤒᤠ ᤁᤧᤖᤧᤰ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤛᤢ ᤐᤡᤖᤢᤛᤡᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤏᤠ᤺ᤰᤁᤠᤛᤠᤱ ᤀᤡᤱᤃᤠ᤹ ᤐᤡᤏᤧᤖᤥ॥”
MAR 6:23 ᤂᤧᤸᤗᤧ ᤔᤠᤱᤜᤧᤰᤛᤡᤱᤗ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤏᤠ᤺ᤰᤁᤠ ᤀᤡᤱᤃᤠ᤹ ᤐᤡᤏᤧ॥ ᤀᤠᤜᤠᤱᤈᤢᤶᤔᤡᤴ ᤁᤢᤓᤪᤧ᤺ᤱ ᤁᤧᤏᤠ᤺ᤰᤋᤢᤛᤠᤱ ᤐᤡᤏᤧᤖᤥ॥”
MAR 6:24 ᤂᤧᤴ ᤆᤢᤰᤔᤧᤴ ᤁᤢᤶᤔᤠᤖᤥ ᤐᤣᤀᤠᤱ ᤛᤣ᤺ᤴᤍᤥᤛᤢ. “ᤀᤠᤸᤗ ᤌᤣ ᤏᤠ᤺ᤰᤋᤢᤱᤒᤠᤒᤣ᥅” ᤜᤧᤰᤁᤣ᤺ᤸᤗᤧ ᤁᤢᤶᤔᤠᤖᤧ ᤔᤧᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤏᤠ᤺ᤰᤋᤧ᤹॥”
MAR 6:25 ᤂᤡᤔᤥ ᤂᤧᤴ ᤆᤢᤰᤔᤧᤴᤏᤠᤱ ᤐᤣᤀᤠᤱ ᤔᤧᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤀᤠᤸᤗᤥᤛᤠ ᤆᤧᤳᤌᤩᤠᤀᤥ ᤐᤡᤖᤠᤱᤅᤧ᤹ᤀᤥ॥”
MAR 6:26 ᤜᤧᤰᤁᤣ᤺ᤸᤗᤧ ᤜᤧᤖᤥᤍ ᤜᤠᤱᤅᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤛᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠᤀᤣ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ
MAR 6:27 ᤂᤧᤵᤔᤥ ᤁᤧᤕᤧᤵᤐᤠ ᤜᤠᤱᤋᤡᤗᤡᤱᤃᤠ᤺ᤴ ᤐᤣᤃᤧ᤹ᤀᤠᤱ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤁᤡᤴ ᤑᤧᤳᤋᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢ॥ ᤂᤧᤴ ᤂᤡᤔᤥ ᤐᤢᤱᤗᤠᤜᤡᤶᤔᤥ ᤐᤣᤀᤠᤱ ᤕᤢᤜᤢᤴᤏᤠᤖᤧ ᤁᤢᤎᤧᤃᤣ᤺ᤰᤁᤡᤴ ᤂᤰᤋᤢ.
MAR 6:28 ᤜᤧᤰᤁᤩᤠᤱ ᤆᤧᤳᤌᤩᤠᤀᤥ ᤑᤧᤳᤋᤢᤀᤠᤱ ᤂᤧᤴ ᤆᤢᤰᤔᤧᤴ ᤐᤡᤖᤢ॥ ᤆᤢᤰᤔᤧᤸᤗᤧ ᤂᤧᤴ ᤋᤣ᤹ᤖᤢᤀᤠᤱ ᤁᤢᤶᤔᤠ ᤐᤡᤖᤢᤖᤥ॥
MAR 6:29 ᤕᤢᤜᤢᤴᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤔᤧᤍᤩᤧ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤔᤧᤍᤣ᤹ᤖᤢᤀᤠᤱ ᤀᤡᤵᤐᤢᤱᤅᤥ ᤔᤧᤗᤢᤵᤋᤢ॥
MAR 6:30 ᤋᤃᤡ ᤕᤧᤛᤢᤖᤧ ᤀᤡᤱᤓᤴ ᤆᤥ᤺ᤰᤛᤧ ᤐᤠᤱᤄᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤏᤢ ᤔᤧᤜᤢ᤹ᤖᤢᤛᤡᤒᤠ ᤐᤠ᤺ᤴᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤈᤧᤰᤋᤢ॥
MAR 6:31 ᤜᤧᤰᤁᤩᤠᤱ ᤕᤧᤛᤢᤖᤧ ᤀᤠᤸᤗ ᤀᤣ᤺ᤰᤛᤠᤍᤧᤴᤏᤥ ᤐᤡᤃᤡᤀᤠᤱ ᤛᤵᤑᤠᤛᤡᤰ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤁᤧᤍᤠ᤺ᤒᤠ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤂᤢᤏᤡ᤹ ᤆᤠᤔᤠ ᤕᤧᤶᤔᤠᤱ ᤔᤧᤱᤄᤥᤀᤣ ᤔᤧᤘᤕᤧᤖᤥ॥
MAR 6:32 ᤜᤧᤰᤁᤣ᤺ᤸᤗᤧ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤛᤫᤠ᤺ᤳᤋᤠᤱ ᤔᤧᤗᤠ᤺ᤛᤧᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤔᤧᤒᤣ॥
MAR 6:33 ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤒᤠ ᤔᤧᤏᤡ᤺ᤛᤢᤛᤡᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤐᤠᤱᤈᤢᤶᤔᤥᤗᤠᤶ ᤔᤧᤗᤥ᤺ᤰᤋᤧᤖ ᤔᤧᤒᤣ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤒᤠ ᤋᤧᤴᤏᤥ ᤂᤧᤱᤜᤠ᤹ᤏᤢ᤺ᤸᤗᤧ ᤋᤃᤡ ᤂᤧᤵᤔᤥ ᤔᤧᤃᤧᤖᤧ॥
MAR 6:34 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂ᤺ᤱᤒᤣᤀᤥᤗᤠᤶ ᤗ᤺ᤴᤍᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡ᤺ᤛᤢᤛᤡᤀᤠᤱ ᤁᤢᤗᤢᤱᤔᤠ᤹ ᤔᤧᤍᤢᤃᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤸᤗᤢᤰᤁᤶᤒᤠ ᤔᤧ᤺ᤴᤏᤣᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤔᤧᤗ᤹ᤖᤧ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤕᤖᤡᤰ ᤏᤡᤛᤠᤶ ᤜᤢ᤹ᤖᤢᤛᤡ॥
MAR 6:35 ᤏᤠᤶᤎᤩᤧᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤱᤜᤠ᤹ ᤐᤠᤱᤄᤧᤍᤣ᤺ᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤀᤣ᤺ᤰᤛᤠᤍᤧᤴᤏᤥ ᤌᤣᤀᤠᤱ ᤀᤡᤱᤔᤠ ᤆᤠᤔᤠ ᤂᤥ᤺ᤔᤧᤍᤧᤳᤏᤧᤴᤗᤥ. ᤕᤠᤶᤔᤥ ᤏᤠᤶᤔᤠᤱ ᤌᤩᤧᤒᤣᤖᤥ॥ ᤜᤠᤖᤠ᤹ ᤂᤡᤖᤡᤒᤠ ᤜᤡᤶᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤔᤧᤀᤡᤅᤢ ᤔᤧᤈᤖᤖᤥ॥”
MAR 6:37 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ” ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤕᤠᤶᤔᤥ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤡᤵ ᤏᤧᤳᤇᤡ (᥈᥆᥆) ᤕᤠᤱᤅᤡᤸᤗᤧ ᤀᤡᤱᤔᤏᤠᤒᤠ ᤂᤖᤧ᤺ᤱᤅᤡᤸᤗᤧᤀᤠᤱ ᤁᤱᤜᤠ᤹ ᤔᤧᤕᤥᤖᤢᤴᤇᤡᤴᤗᤥ॥ ᤀᤠᤰᤂᤣᤗ᤹ᤖᤡᤰ ᤐᤡᤔᤠ ᤛᤢᤰᤔᤧᤍᤧᤵᤐᤣ᥅”
MAR 6:38 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤰᤂᤧᤶᤔᤩᤠᤰ ᤂᤖᤧ᤺ᤱ ᤁᤧᤃᤳᤋᤢᤶ. ᤐᤣᤃᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹᥄” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢ. ᤜᤧᤰᤁᤩᤠᤱ ᤔᤧᤓᤧᤖᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤅᤠᤛᤡ (᥋) ᤂᤖᤧ᤺ᤱ ᤏᤢ ᤏᤧᤳᤇᤡ (᥈) ᤅᤠᤖᤰ ᤁᤳᤋᤢᤶᤒᤧ॥”
MAR 6:39 ᤂᤧᤴ ᤔᤏᤠᤜᤠ᤹ ᤕᤠ᤺ᤴ ᤁᤧᤕᤢᤱᤒᤠ ᤂᤠᤶᤔᤥ ᤌᤧ᤺ᤰᤐᤧᤳᤋᤠᤱ ᤕᤢᤱᤔᤠ ᤐᤠᤱᤄᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤕᤧᤛᤢᤖᤧ ᤀᤡᤱᤈᤠ᤺ᤱ ᤐᤡᤖᤢᤛᤡ.
MAR 6:40 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤡᤵ ᤌᤡᤰ (᥇᥆᥆) ᤏᤢ ᤅᤠᤒᤥ᤺ᤱ (᥋᥆) ᤗ᤹ᤖᤡᤰ ᤔᤧᤜᤠᤛᤡᤱᤅᤠᤱ ᤌᤧ᤺ᤰᤐᤧᤳ ᤔᤧᤒᤧᤴᤇᤡᤱᤅᤠᤱ ᤔᤧᤕᤢᤱᤛᤡᤱ॥
MAR 6:41 ᤕᤧᤛᤢᤖᤧ ᤂᤧᤴ ᤅᤠᤛᤡ (᥋) ᤂᤖᤧ᤺ᤱ ᤏᤢ ᤏᤧᤳᤇᤡ (᥈) ᤅᤠᤜᤠ᤹ ᤕᤠᤱᤛᤡᤱᤅᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤧᤳᤋᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤂᤖᤧ᤺ᤱᤜᤠ᤹ ᤂᤧ᤺ᤰᤂᤢ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡ॥ ᤂᤧᤴ ᤏᤧᤳᤇᤡ ᤅᤠᤜᤠ᤹ᤀᤠᤱ ᤂᤧ᤺ᤰᤂᤢᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖᤥ॥
MAR 6:42 ᤂᤧᤱᤜᤠ᤹ᤖᤧ ᤂᤠᤄᤠ ᤔᤧᤈᤖᤥ॥
MAR 6:43 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤂᤖᤧ᤺ᤱ ᤏᤢ ᤅᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤠᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ (᥇᥈) ᤏᤀᤡᤔᤠ ᤕᤥᤖᤧᤖᤥ॥
MAR 6:44 ᤂᤧᤴ ᤂᤖᤧ᤺ᤱ ᤁᤧᤈᤠᤒᤠᤜᤠ᤹ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤔᤧᤘᤕᤧ॥
MAR 6:45 ᤕᤧᤛᤢᤖᤧ ᤔᤏᤠᤜᤠ᤹ ᤐᤠᤱᤄᤢᤛᤡᤏᤠᤔᤧ᤺ᤴᤏᤣ ᤂ᤺ᤱᤒᤣᤀᤥ ᤗᤠ᤺ᤛᤧᤶᤔᤧ᤹ᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤒᤧᤌᤛᤣᤍᤠᤀᤥ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤐᤣᤃᤧᤶᤔᤧ᤹ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ॥
MAR 6:46 ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤋᤢᤘᤠ ᤆᤥ᤺ᤰᤛᤧ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥
MAR 6:47 ᤀᤠᤸᤗ ᤂᤠᤍᤠᤔᤧᤸᤗᤧ ᤂ᤺ᤱᤒᤣᤴ ᤘᤖᤰᤁᤡᤸᤗᤧ ᤁᤢᤗᤢᤶᤔᤥ ᤘᤕᤧ. ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤧᤛᤢ᤺ᤱᤃ ᤀᤣ᤺ᤰ ᤘᤕᤧᤖᤥ॥
MAR 6:48 ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤢᤖᤡᤳ ᤁᤣᤈᤱᤅᤡᤴ ᤂᤢᤏᤡ᤹ ᤋᤰᤗᤧᤵᤔᤠᤱᤏᤢ ᤜᤢ᤺ᤖᤧᤒᤠᤸᤗᤧ ᤂ᤺ᤱᤒᤣᤴ ᤘᤖᤰᤁᤥ ᤋᤃᤡ ᤋᤣ᤹ᤔᤠ ᤁᤧᤛᤠᤰᤐᤠ ᤔᤧᤍᤢᤔᤢᤀᤠᤱ ᤔᤧᤕᤠᤃᤧᤒᤠ ᤕᤧᤛᤢᤖᤧ ᤏᤡ᤺ᤛᤢᤛᤡ॥ ᤜᤧᤰᤁᤣ᤺ᤸᤗᤧ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢ᤺ᤴ ᤘᤖᤰᤁᤥ ᤗᤠᤱᤄᤣᤃᤧᤖ ᤐᤣᤖᤥ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤕᤠᤃᤧᤒᤠ ᤂ᤺ᤱᤒᤣᤴ ᤗᤠᤶᤒᤠᤰᤔᤠ ᤀᤡ᤺ᤳᤋᤢᤸᤗᤧ
MAR 6:49 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤠᤱᤄᤣᤃᤧᤒᤠ ᤔᤧᤏᤡ᤺ᤛᤢᤀᤠᤱ ᤁᤱᤃ ᤛᤡᤛᤠᤶᤏᤣ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤖ ᤔᤧᤀ᤺ᤰᤋᤧ॥ ᤂᤡᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤶᤔᤡᤴᤏᤧ᤹᥄ ᤀᤡᤱᤃᤠ᤹ ᤕᤧᤛᤢᤀᤠ॥ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄”
MAR 6:51 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤔᤠ ᤆᤰ ᤗ᤹ᤖᤧ॥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥
MAR 6:52 ᤂᤧᤱᤜᤠ᤹ᤖᤧ ᤂᤖᤧ᤺ᤱᤅᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤋᤧᤰᤋᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤆᤥᤃᤧᤖᤥ॥
MAR 6:53 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤠ᤺ᤰᤋᤢᤀᤠᤱ ᤃᤏᤧᤛᤖᤧᤳᤋᤥ ᤔᤧᤃᤧᤖᤧᤀᤠᤱ ᤂ᤺ᤱᤒᤣᤴ ᤀᤡᤔᤧᤄᤣ᤺ᤰᤂᤢ॥ ᤕᤧᤛᤢ᤺ᤴ ᤂ᤺ᤱᤒᤣᤗᤠᤶ ᤗ᤺ᤴᤍᤧᤏᤢᤔᤧ᤺ᤴᤏᤣ ᤂᤧᤵᤔᤥᤒᤠ ᤔᤏᤠᤜᤠ᤹ ᤁᤧᤖᤧᤰᤗᤧ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢ॥
MAR 6:55 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤡᤖᤡᤒᤠ ᤋᤧᤴᤏᤥ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤕᤧᤛᤢ᤺ᤴ ᤘᤕᤧᤒᤠ ᤋᤧᤴᤏᤥᤀᤣ ᤂᤢᤏᤡ᤹ ᤏᤧᤳᤏᤠ᤺ᤴᤏᤢᤀᤣ ᤔᤧᤍᤠᤖᤢᤛᤡᤖᤥ॥
MAR 6:56 ᤐᤠᤱᤓᤣ᤹ ᤐᤠᤱᤈᤢᤶ ᤕᤧᤰᤕᤰᤁᤥ ᤂᤢᤏᤧ᤹ ᤀᤠᤳᤋᤠᤴ ᤐᤣᤛᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤁᤢᤗᤠᤶᤔᤥ ᤔᤧᤏᤧᤛ᤻ᤛᤢᤛᤡᤖᤥ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤴᤗᤰᤛᤠᤱ ᤛᤢ᤺ᤔᤠ ᤑᤠ᤹ᤀᤠᤱ ᤁᤧᤍᤢᤰᤐᤠᤜᤠ᤹ᤖᤧ ᤐᤣᤗᤡ ᤔᤧᤓᤠᤰᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤛᤢᤒᤠᤜᤠ᤹ ᤁᤧᤖᤧᤰ ᤔᤧᤘᤣ᤺ᤳᤋᤧᤖᤥ॥
MAR 7:1 ᤌᤡᤰᤕᤧᤴ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤧᤛᤢᤖᤥ ᤔᤧᤍᤩᤧ॥
MAR 7:2 ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤓᤠ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤘᤠᤜᤵᤛᤡᤱᤔᤠ ᤆᤥ᤺ᤰᤌᤡᤶ ᤁᤢᤀᤡᤛᤡ᤺ᤰ ᤜᤢᤰ ᤘᤠᤔᤧᤴᤜᤵᤐᤣ ᤆᤠ ᤔᤧᤈᤒᤠ ᤔᤧᤏᤡ᤺ᤛᤢᤛᤡ॥
MAR 7:3 (ᤑᤖᤡᤛᤡᤜᤠ᤹ ᤏᤢ ᤁᤠᤰ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤘᤠᤔᤧᤴᤜᤵᤛᤡᤱᤅᤣ ᤆᤠ ᤔᤧᤴᤈᤏᤧᤴᤗᤥ॥
MAR 7:4 ᤂᤧᤱᤜᤠ᤹ᤖᤧ ᤐᤠᤱᤈᤢᤶᤗᤠᤶ ᤜᤡᤶᤔᤥ ᤔᤧᤍᤠ᤺ᤸᤗᤧ ᤘᤠᤜᤵᤛᤡᤱᤔᤠ ᤏᤢ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤔᤠ ᤌᤡᤶ ᤔᤧᤴᤈᤥ᤺ᤰᤁᤣ ᤔᤧᤴᤈᤏᤧᤴ॥ ᤂᤧᤱᤜᤠ᤹ᤖᤧ ᤑᤱᤏᤠᤜᤠ᤹. ᤆᤧᤳᤌᤩᤠᤜᤠ᤹. ᤂᤵᤐᤩᤠᤜᤠ᤹ ᤘᤠᤜᤵᤔᤠ ᤛᤢᤳᤌᤥ ᤆᤥ᤺ᤰᤔᤠ ᤘᤣ᤹ ᤌᤡᤶᤜᤠ᤹ᤀᤠᤱ ᤔᤧᤃᤳᤋᤢᤖᤥ॥)
MAR 7:5 ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤗᤠᤵᤋᤢ. “ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤃ ᤛᤢᤳᤌᤥ ᤆᤥ᤺ᤰᤔᤠ ᤌᤡᤶ ᤔᤧᤴᤈᤥ᤺ᤰᤁᤣ ᤆᤠ ᤔᤧᤈᤒᤠ ᤀᤠᤏᤡᤃᤧ ᤏᤡ᤺ᤔᤏᤠ॥ ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤒᤣ᥅”
MAR 7:6 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠᤱᤃ ᤛᤧᤰᤂᤠᤀᤣ ᤗᤠ᤹ᤖᤢᤖᤥ. ‘ᤁᤴ ᤔᤏᤠᤜᤠ᤹ᤖᤧᤃ ᤂᤢᤏᤡ᤹ ᤔᤢᤖᤠ᤺ᤸᤗᤧᤖᤰ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤀᤠᤖᤥ. ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤗᤧᤵᤔᤠᤱ ᤜᤥ᤺ᤵᤗᤥ॥
MAR 7:7 ᤁᤱᤜᤠ᤹ᤖᤧ ᤜᤏᤧ ᤛᤣᤘᤠ ᤔᤧᤈᤥ᤺ᤰᤁᤠ. ᤁᤖ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤵᤑᤣ᤺ᤰ ᤔᤧᤈᤥᤃᤢᤒᤠ ᤌᤡᤶᤖᤰᤗᤥ॥’
MAR 7:8 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤧᤏᤠ᤹ᤖᤢᤶᤔᤠᤱ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤌᤡᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥
MAR 7:9 ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤠ᤹ᤖᤡᤰ ᤆᤠ᤺ᤵᤐᤠ ᤁᤧᤈᤥᤃᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤧᤏᤠ᤹ᤖᤢᤶᤗᤥ॥
MAR 7:10 ᤁᤢᤒᤡᤀᤥ ᤔᤥᤛᤠ᤺ᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤁᤧᤶᤒᤠ ᤁᤧᤶᤔᤠᤛᤡ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤛᤧ᤹’ ᤜᤧᤰᤁᤩᤠᤱ ‘ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤛᤠᤱᤃᤪᤠ ᤔᤧᤳᤋᤢᤛᤡ. ᤂᤧᤱᤃ ᤛᤧᤵᤔᤠᤀᤣ ᤐᤥ᤺ᤱᤗᤥ॥’
MAR 7:11 ᤁᤖ ᤂᤡᤏᤡ᤹ ᤑᤖᤡᤛᤡᤜᤠ᤹ᤖᤧ ᤕᤠᤵᤔᤡᤜᤠ᤹. ‘ᤆᤩᤠ ᤀᤡᤱᤃᤠ᤹ᤗᤠᤶ ᤁᤢᤓᤠ᤹ ᤁᤧᤄᤥ᤺ᤛᤢᤶ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤷᤒᤠᤴ ᤐᤡᤔᤏᤠᤒᤠᤖᤥ’ ᤗ᤹ᤖᤡᤰ ᤂᤢᤏᤡ᤹ ᤐᤠ-ᤔᤠᤜᤠ᤹ ᤜᤧᤰᤁᤣ ᤔᤧᤵᤔᤠᤛᤡ ᤏᤢ᤺ᤒᤠᤖᤥ ᤑᤠ᤹ᤀᤠᤱ ᤁᤧᤔᤧᤳᤋᤢᤶᤛᤡᤶᤗᤥ (ᤁᤢᤷᤒᤠᤴ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤏᤠᤒᤠ ᤜᤢᤰᤛᤥᤕᤠᤱᤗᤥ)॥
MAR 7:12 ᤜᤧᤰᤁᤣᤗ᤹ᤖᤡᤰ ᤂᤧᤴ ᤁᤢᤶᤒᤠ ᤁᤢᤶᤔᤠᤛᤡ ᤁᤢᤓᤠ᤹ ᤐᤡᤔᤠ ᤂᤡᤏᤡ᤹ ᤁᤧᤶᤒᤠᤱᤄᤢᤶᤔᤡᤴᤗᤥ॥
MAR 7:13 ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤒᤥ᤺ᤱᤒᤠ ᤁᤧᤕᤢ᤺ᤒᤠ ᤆᤥ᤺ᤰᤌᤡᤶᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤗᤧᤖᤢᤶ ᤁᤧᤍᤣ᤺ᤛᤢᤶᤗᤥ॥ ᤒᤠ ᤜᤧᤰᤋᤱᤒᤠ ᤕᤠ᤺ᤶᤒᤰᤜᤠ᤹ᤖᤰ ᤂᤡᤏᤡ᤹ ᤁᤧᤈᤥᤃᤢᤶ॥”
MAR 7:14 ᤕᤧᤛᤢᤖᤧ ᤔᤏᤠᤜᤠ᤹ ᤕᤠᤶᤔᤥ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
MAR 7:15 ᤗᤠ᤺ᤰᤁᤠᤳᤗᤠᤶ ᤔᤏᤠ ᤛᤡᤃᤠᤱ ᤁᤧᤗᤠ᤺ᤵᤐᤠ ᤐᤠ᤺ᤴᤏᤡᤸᤗᤧ ᤔᤏᤠ᤺ᤴ ᤀᤠᤛᤢᤳᤌᤥ ᤔᤧᤈᤥᤃᤢᤴᤗᤥ. ᤁᤖ ᤏᤡᤱᤘᤠ᤹ᤀᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧᤀᤣ ᤔᤏᤠ᤺ᤴ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥
MAR 7:16 ((ᤏᤧᤰᤂᤥ᤹ ᤁᤧᤒᤵᤐᤠᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥”))
MAR 7:17 ᤂᤧᤴ ᤔᤏᤠᤜᤠ᤹ ᤐᤰᤌᤛᤡᤀᤠᤱ ᤕᤧᤛᤢ᤺ᤴ ᤜᤡᤶ ᤛᤡᤃᤠᤱ ᤗᤠ᤺ᤛᤧ ᤜᤧᤰᤁᤩᤠᤱ ᤂᤧᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤌᤧᤔᤠᤒᤣ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤖᤥ॥
MAR 7:18 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤗᤥ᥄ ᤔᤏᤠ ᤛᤡᤃᤠᤱ ᤁᤧᤗᤠ᤺ᤵᤐᤠ ᤆᤠ᤺ᤔᤏᤠᤒᤠ ᤁᤢᤈᤠ᤺ᤸᤗᤧ ᤂᤧᤴ ᤀᤠᤛᤢᤳᤌᤥ ᤔᤧᤈᤥᤃᤢᤴ ᤁᤧᤗ᤹ᤒᤠ ᤁᤧᤴᤏᤡ᤺ᤛᤢᤶᤔᤡᤴᤒᤡ᥅
MAR 7:19 ᤁᤱᤃ ᤛᤡᤰᤗᤢᤱᤔᤠᤀᤥ ᤔᤧᤒᤣ᤺ᤰᤏᤧᤴ. ᤁᤖ ᤁᤴ ᤛᤠᤵᤐᤥ᤺ᤰᤁᤥ ᤗᤠ᤺ᤳᤋᤠᤱ ᤗᤠ᤺ᤰᤁᤠᤳ ᤗ᤺ᤶᤒᤣ᤺ᤰᤗᤥ॥” (ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤠᤰ ᤆᤠ᤺ᤔᤏᤠᤒᤠ ᤆᤠᤜᤠ᤹ ᤛᤢᤳᤌᤥ ᤆᤥ᤺ᤰ ᤑᤠ᤹ᤀᤠᤱ ᤐᤠ᤺ᤳᤋᤢᤖᤥ॥)
MAR 7:20 ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤐᤠ᤺ᤳᤋᤢ. “ᤛᤡᤰᤗᤢᤱᤔᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥
MAR 7:21 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤏᤡᤱᤘᤠ᤹ ᤛᤡᤃᤠᤱᤗᤠᤶ ᤑᤧᤴ ᤏᤡᤱᤘᤠ᤹. ᤕᤠᤶᤒᤥ᤺ᤵᤔᤠ. ᤂᤢ᤺ᤶᤔᤠ. ᤔᤏᤠ ᤛᤧᤵᤔᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ. ᤂᤡ᤺ᤶᤔᤠ. ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤆᤥ᤺ᤰᤔᤠ. ᤀᤡᤱᤗᤧᤰ ᤆᤥ᤺ᤰᤔᤠ. ᤆᤧᤸᤗᤧᤰᤗᤧᤰ ᤗ᤹ᤔᤠ. ᤏᤠᤜᤧᤶᤔᤠ. ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ. ᤀᤠᤱᤍᤡᤱ ᤗ᤹ᤔᤠ. ᤀᤍᤱ ᤐᤠ᤺ᤴ ᤆᤥ᤺ᤰᤔᤠ. ᤜᤧᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤗ᤺ᤴᤗᤥ॥
MAR 7:23 ᤀᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤛᤡᤃᤠᤱᤗᤠᤶ ᤗᤠ᤺ᤰᤁᤠᤳ ᤗ᤺ᤴᤏᤠᤱ ᤔᤏᤠ᤺ᤴ ᤀᤠᤛᤢᤳᤌᤥ ᤆᤥᤃᤢ᤹ᤖᤥ॥”
MAR 7:24 ᤕᤧᤛᤢ᤺ᤴ ᤂᤧᤴ ᤋᤧᤴᤏᤥᤗᤠᤶ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤜᤡᤶᤔᤥ ᤗᤠ᤺ᤛᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥ᤺ᤛᤢᤴᤗ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ॥ ᤁᤖ ᤂᤢᤏᤧ᤹ ᤆᤡᤱᤛᤡᤱᤔᤠ ᤔᤧᤛᤢᤰᤋᤧᤴᤗᤥ॥
MAR 7:25 ᤁᤖ ᤁᤢᤛ᤻ᤛᤠ᤺ᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤢᤏᤧ᤹ ᤋᤩᤧᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤏᤠᤔᤧ᤺ᤴᤏᤣ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱ॥
MAR 7:26 ᤂᤧᤴ ᤔᤧᤴᤇᤢᤔᤠ᤺ᤴ ᤛᤡᤖᤡᤕᤠ ᤗᤠᤈᤣ᤹ᤛ᤻ᤔᤠ ᤛᤢᤖᤥᤑᤥᤏᤡᤛᤡᤕᤠ ᤌᤢᤶᤔᤥ ᤛᤠᤃᤧᤘᤠ᤺ᤴᤇᤡᤱᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤘᤕᤧ॥ ᤂᤧᤸᤗᤧ ᤀᤠᤛ᤻ᤛᤠ᤺ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤜᤠ᤹ ᤗ᤺ᤳᤋᤠᤱ ᤐᤡᤖᤠᤱᤅᤧ᤹ᤏᤠ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤑᤠᤰᤋᤢ॥
MAR 7:27 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤖᤧ᤺ᤱᤅᤡᤴ ᤂᤠᤄᤠ ᤔᤧᤈᤖ ᤐᤥ᤺ᤱ॥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢ᤺ᤒᤠ ᤔᤧ᤺ᤴᤗᤥ॥”
MAR 7:28 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥”
MAR 7:29 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤒᤠ ᤏᤛᤠ᤺ᤴ ᤁᤢᤎᤡᤶᤒᤠ ᤏᤥᤃᤵ ᤁᤧᤒᤡᤖᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤜᤡᤶᤔᤥ ᤐᤣᤃᤧ᤹. ᤁᤧᤛ᤻ᤛᤠ᤺ ᤆᤢᤰᤔᤧᤸᤗᤥᤗᤠᤶ ᤑᤧᤴᤛᤠᤶᤔᤡᤴ ᤗ᤺ᤴᤍᤧ ᤐᤣᤀᤠᤱ ᤘᤠ᤹ᤖᤥ॥”
MAR 7:30 ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤁᤢᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤁᤢᤛ᤻ᤛᤠ᤺ᤴ ᤏᤢ᤺ᤖᤡᤰᤁᤠᤱ ᤁᤢᤏᤧᤳᤏᤠᤀᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤋᤢᤔᤢ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤜᤠ᤹ᤖᤧ ᤂᤧᤴ ᤔᤧᤗᤧᤖᤢ ᤔᤧᤎ᤺ᤀᤠᤱ ᤘᤕᤧ॥
MAR 7:31 ᤕᤧᤛᤢ᤺ᤴ ᤋᤠᤕᤖᤗᤠᤶ ᤛᤡᤍᤥᤏ ᤐᤥ᤺ᤰᤂᤧᤖ ᤐᤣᤀᤠᤱ ᤂᤢᤏᤧ᤹ ᤃᤠᤗᤡᤗ ᤘᤖᤰ ᤏᤢ ᤌᤡᤒᤥ᤺ᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤐᤣᤖᤥ॥
MAR 7:32 ᤂᤧᤵᤔᤥ ᤔᤏᤠᤜᤠ᤹ᤖᤧ ᤏᤠᤎᤠᤰᤐᤠ ᤏᤢ ᤁᤢᤒᤠ᤺ᤴ ᤔᤧᤴᤗ᤺ᤶᤔᤏᤠᤒᤠ ᤔᤏᤠᤎᤡᤰ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
MAR 7:33 ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ᤗᤠᤶ ᤔᤠ᤺ᤱᤄᤠ ᤋᤣ᤹ᤖᤢᤀᤠᤱ ᤁᤢᤏᤧᤰᤂᤥ᤹ᤒᤥ ᤜᤢᤰᤆᤥ᤺ᤴ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤜᤢᤰᤁᤥ ᤌᤩᤠ᤺ᤳ ᤌᤥ᤺ᤰᤋᤢᤀᤠᤱ ᤁᤢᤗᤧᤛᤥ᤺ᤵᤐᤡᤴ ᤛᤢ᤺ᤛᤢ ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤗᤧᤵᤔᤠᤱ ᤀᤥᤔᤕᤧᤀᤠᤱ ᤛᤰᤔᤠ ᤛᤥ᤺ᤴᤇᤡᤱᤗ “ᤀᤡᤑ᤻ᤑᤠᤌᤠ” ᤔᤧᤳᤋᤢᤖᤥ॥ ᤂᤧᤴ ᤑᤠ᤹ᤀᤡᤴ “ᤜᤴᤇᤡᤱᤅᤧ᤹” ᤐᤥ᤺ᤱᤗᤥ॥
MAR 7:35 ᤂᤡᤔᤥ ᤂᤧᤴ ᤔᤏᤠ᤺ᤴ ᤏᤧᤰᤂᤥ᤹ ᤂᤧᤶᤔᤠ ᤁᤧᤛᤢᤰᤐᤠ ᤏᤢ ᤐᤠ᤺ᤵᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤏᤢ᤺ᤖᤡᤰ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥
MAR 7:36 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤵᤔᤠᤛᤡ ᤔᤧ᤺ᤴ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥ ᤁᤖ ᤀᤠᤰᤂᤧᤴ ᤔᤧᤵᤔᤠᤛᤡ ᤔᤧ᤺ᤴᤗᤥ ᤔᤧᤳᤋᤢᤛᤡᤛᤠᤱ ᤁᤴ ᤀᤡᤱᤓᤴᤏᤡᤴ ᤔᤧᤛᤧ᤺ᤛᤢᤖ ᤔᤧᤍᤣ᤹ᤖᤢᤖᤥ॥
MAR 7:37 ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤂᤢᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤛᤠ᤹ᤖᤡᤰ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ᤹ᤖᤥ᥄ ᤀᤰᤂᤣᤗ᤹ᤖᤡᤰ ᤏᤠᤎᤠᤰᤐᤠᤜᤠ᤹ ᤏᤢ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ᤀᤠᤱ ᤏᤢᤛᤢᤛᤡᤖᤥ॥”
MAR 8:1 ᤂᤧᤴ ᤕᤧᤶᤔᤥ ᤕᤖᤡᤰ ᤔᤏᤠᤜᤠ᤹ ᤕᤠᤶᤔᤥ ᤕᤧᤛᤢ᤺ᤴ ᤘᤕᤧᤒᤠ ᤋᤧᤴᤏᤥ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤜᤥ᤺ᤵᤋᤧ॥ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ.
MAR 8:2 “ᤁᤴ ᤔᤏᤠᤜᤠ᤹ ᤀᤡᤱᤃᤠ᤹ ᤀᤠᤗᤢᤱᤔᤠ᤹ ᤔᤧᤍᤢᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤛᤢᤶᤕᤧᤴᤏᤠᤱᤎᤥ ᤀᤡᤱᤃᤠ᤹ᤏᤢᤀᤣ ᤔᤧᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤱᤃᤳᤋᤢᤴᤗᤥ॥
MAR 8:3 ᤀᤡᤱᤃᤠ᤹ ᤂᤧᤱᤜᤠ᤹ ᤜᤡᤶᤔᤥ ᤒᤠ ᤀᤰᤂᤣᤀᤣ ᤐᤠᤱᤄᤢᤱᤍᤣ᤺ᤛᤢᤱᤛᤡᤱᤏᤧ ᤑᤠ᤹ᤃᤪ ᤔᤧᤒᤣ᤺ᤰᤗ ᤔᤧᤒᤳᤋᤡᤸᤗᤧᤛᤠ ᤛᤠᤰᤁᤡᤸᤗᤧ ᤛᤠᤰᤗᤠᤶᤒᤳᤋᤢᤛᤡ᤹. ᤌᤣᤀᤠᤱᤓᤧᤸᤗᤧ ᤁᤢᤓᤠᤃ ᤛᤠ᤹ᤖᤡᤰ ᤔᤠ᤺ᤱᤄᤠ ᤔᤠ᤺ᤱᤄᤠᤗᤠᤶ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥”
MAR 8:4 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤴ ᤀᤣ᤺ᤰᤛᤠᤍᤧᤴᤏᤥ ᤀᤠᤰᤂᤣᤗ᤹ᤖᤡᤰ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤂᤖᤧ᤺ᤱᤅᤡᤸᤗᤧ ᤂᤠ᤺ᤵᤔᤠᤛᤡᤒᤣ᥅”
MAR 8:5 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤀᤠᤰᤂᤧᤶᤔᤩᤠᤰ ᤂᤖᤧ᤺ᤱ ᤁᤧᤃᤳᤋᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤏᤢᤛᤡ ᤂᤖᤧ᤺ᤱᤗᤰ ᤁᤳᤋᤢᤶᤒᤧᤖᤥ॥”
MAR 8:6 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤂᤠᤶᤒᤠᤱᤅᤥ ᤕᤢᤅᤧᤶᤔᤧ᤹ ᤔᤧᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤏᤢᤛᤡ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤂᤧ᤺ᤰᤂᤢ. ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖᤥ॥
MAR 8:7 ᤂᤧᤱᤜᤠ᤹ᤖᤧ ᤌᤡᤰ-ᤏᤧᤳᤇᤡ ᤆᤢᤈᤢᤰᤛᤠ ᤅᤠᤀᤠᤱ ᤔᤧᤃᤳᤋᤢ॥ ᤂᤧᤴᤏᤠᤱ ᤕᤧᤛᤢᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤜᤠ᤺ᤳᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖᤥ॥
MAR 8:8 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤁᤢᤈᤡ ᤁᤧᤏᤶᤒᤠᤜᤠ᤹ ᤔᤧᤛᤢᤵᤛᤢᤸᤗᤧ ᤏᤢᤛᤡ ᤏᤀᤡᤔᤠ ᤕᤥᤖᤧᤖᤥ॥
MAR 8:9 ᤂᤧᤴ ᤁᤧᤈᤠᤒᤠᤜᤠ᤹ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤕᤠᤖᤡᤰ ᤔᤧᤘᤕᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡᤀᤠᤱ
MAR 8:10 ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤏᤠᤜᤠᤱᤍᤠᤱ ᤍᤗᤔᤏᤢᤌᤠ ᤐᤠᤱᤈᤢᤶ ᤂᤡᤖᤡᤒᤠ ᤋᤧᤴᤏᤥ ᤐᤣᤖᤥ॥
MAR 8:11 ᤁᤢᤓᤠ ᤑᤖᤡᤛᤡᤜᤠ᤹ ᤂᤧᤵᤔᤥ ᤔᤧᤈᤢᤵᤛᤧᤀᤠᤱ ᤕᤧᤛᤢ᤺ᤴᤏᤢ ᤐᤠ᤺ᤴᤎᤰᤔᤠ ᤔᤧᤜᤣ᤺ᤰᤋᤧ॥ ᤂᤧᤱᤜᤠ᤹ᤖᤧ “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤧᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹ᤀᤥ” ᤔᤧᤔᤧᤳᤋᤢᤖ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢ॥
MAR 8:12 ᤜᤧᤰᤁᤣ᤺ᤸᤗᤧ ᤕᤧᤛᤢ᤺ᤴ ᤁᤣ᤺ᤶᤒᤠ ᤛᤰᤔᤠ ᤛᤥ᤺ᤴᤇᤡᤱᤗ ᤐᤠᤖᤧ. “ᤌᤣᤀᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢᤒᤠᤒᤣ᥅ ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤔᤏᤠᤜᤠ᤹ᤖᤧ ᤂᤧᤴ ᤜᤧᤰᤋᤱᤒᤠ ᤔᤡᤰᤛᤣ᤺ᤴ ᤀᤥᤔᤧᤵᤔᤠ ᤔᤧᤱᤄᤥ᤺ᤛᤢᤴᤗᤥ॥”
MAR 8:13 ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤧᤖᤢᤛᤡᤀᤠᤱ ᤍᤗᤔᤏᤢᤌᤠᤗᤠᤶ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤠᤶᤔᤥ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤏᤠᤎᤠ᤺ᤶᤒᤡ ᤌᤠᤛᤡᤱ॥
MAR 8:14 ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤆᤠᤔᤠ ᤌᤢᤱᤔᤠ ᤁᤢᤈᤠᤜᤠ᤹ ᤕᤠᤱᤛᤡᤱᤔᤠ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤥ॥ ᤂᤧᤱᤜᤠ᤹ᤖᤧ ᤂᤖᤧ᤺ᤱᤎᤡᤰᤗᤰ ᤂ᤺ᤱᤒᤣᤀᤥ ᤔᤧᤃᤳᤋᤢ॥
MAR 8:15 ᤕᤧᤛᤢᤖᤧ ᤂᤧᤱᤜᤠ᤹ ᤛᤠᤶᤍᤡᤱ ᤐᤡᤖᤢᤛᤡ. “ᤜᤧᤖᤥᤍ ᤜᤠᤱᤅᤡᤴ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄”
MAR 8:16 ᤂᤧᤱᤜᤠ᤹ᤖᤧ ᤀᤠᤏᤡ᤹ ᤂᤖᤧ᤺ᤱᤅᤡᤴ ᤀᤠᤱᤃᤳᤋᤢᤶᤔᤡᤴᤏᤠᤱ ᤜᤧᤰᤁᤣ ᤀᤠᤔᤧᤳᤋᤧᤒᤠᤖᤥ ᤑᤠ᤹ᤀᤠᤱ ᤐᤠ᤺ᤴᤎᤰᤔᤠ ᤔᤧᤜᤣ᤺ᤰᤋᤧ॥
MAR 8:17 ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤗᤢᤶᤔᤥ ᤂᤖᤧ᤺ᤱ ᤜᤥ᤺ᤵ ᤑᤠ᤹ᤀᤠᤱ ᤌᤣᤀᤠᤱ ᤐᤠ᤺ᤴ ᤁᤧᤎᤰᤋᤡᤒᤠ᥅ ᤂᤡᤏᤡ᤹ ᤀᤠᤸᤗᤛᤠᤱ ᤐᤠ᤺ᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤡᤴᤏᤠᤱ ᤂᤠᤛᤡᤱ ᤁᤧᤴᤏᤡ᤺ᤳᤋᤡᤴᤒᤡ᥅ ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤌᤢᤱᤒᤡ᥅
MAR 8:18 ᤀᤥᤔᤧᤵᤔᤠ ᤔᤡᤰ ᤁᤧᤃᤳᤋᤢᤶᤛᤠᤱ ᤁᤧᤴᤏᤡ᤺ᤛᤢᤶᤔᤡᤴᤒᤡ᥅ ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤳᤋᤢᤶᤛᤠᤱ ᤁᤧᤱᤄᤧᤵᤛᤢᤶᤔᤡᤴᤒᤡ᥅ ᤂᤡᤏᤡ᤹ ᤏᤡᤱᤘᤠ᤹ ᤔᤧᤕᤠᤰᤏᤧᤴᤒᤡ᥅
MAR 8:19 ᤀᤡᤱᤃᤠ᤹ ᤅᤠᤛᤡ ᤂᤖᤧ᤺ᤱᤅᤡᤸᤗᤧ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤔᤏᤠᤜᤠ᤹ ᤆᤠ᤺ᤳᤋᤢᤱᤛᤡᤱᤅᤡᤸᤗᤧ ᤁᤢᤈᤡ ᤁᤧᤏᤶᤒᤠᤜᤠ᤹ ᤀᤠᤰᤂᤧᤴ ᤏᤀᤡᤔᤠ ᤁᤧᤓᤢᤰᤂᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤌᤡᤰ-ᤏᤧᤳ” (᥇᥈)॥
MAR 8:20 “ᤜᤧᤰᤁᤩᤠᤱ ᤏᤢᤛᤡ ᤂᤖᤧ᤺ᤱᤅᤡᤸᤗᤧ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤔᤏᤠᤜᤠ᤹ ᤆᤠ᤺ᤳᤋᤢᤱᤛᤡᤱᤅᤡᤸᤗᤧ ᤀᤠᤰᤂᤧᤴ ᤏᤀᤡᤔᤠ ᤁᤢᤈᤡ ᤁᤧᤏᤶᤒᤠᤜᤠ᤹ ᤁᤧᤓᤢᤰᤂᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤢᤛᤡ” (᥍)॥
MAR 8:21 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤁᤢᤛᤡᤱ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤶᤔᤡᤴᤒᤡ᥅”
MAR 8:22 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤒᤧᤌᤛᤣᤍᤠᤀᤥ ᤔᤧᤃᤧᤖᤧ॥ ᤂᤧᤵᤔᤥ ᤔᤏᤠᤜᤠ᤹ᤖᤧ ᤔᤡᤰᤑ᤺ᤶᤒᤠᤎᤡᤰ ᤕᤧᤛᤢᤖᤥ ᤔᤧᤍᤠᤖᤢᤀᤠᤱ “ᤂᤧᤸᤗᤧ ᤁᤢᤛᤶᤍᤠᤱ ᤁᤧᤜᤢᤰᤁᤡᤴ ᤏᤧᤛ᤻ᤛᤧ᤹ᤀᤠᤱ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤧ᤹ᤀᤥ” ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
MAR 8:23 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤡᤰᤑ᤺ᤶᤒᤧᤴ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ ᤐᤠᤱᤓᤣ᤹ᤀᤥᤗᤠᤶ ᤗᤠ᤺ᤰᤁᤠᤳ ᤋᤣ᤹ᤖᤢ. ᤜᤧᤰᤁᤩᤠᤱ ᤁᤢᤎᤩᤠ᤺ᤳᤋᤡᤴ ᤁᤢᤔᤡᤰᤁᤥ ᤑᤳᤇᤢᤖ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤒᤡᤖᤢᤀᤠᤱ ᤛᤣ᤺ᤴᤍᤥᤛᤢ. “ᤀᤠᤸᤗᤥ ᤂᤠᤏᤡ᤺ᤔᤠ ᤁᤧᤛᤢᤰᤋᤢᤒᤡ᥅”
MAR 8:24 ᤜᤧᤰᤁᤩᤠᤱ ᤂᤧᤸᤗᤧ ᤂᤡᤖᤡ ᤀᤥᤔᤕᤧᤖ ᤐᤠ᤺ᤳᤋᤢ. “ᤀᤠᤸᤗᤥ ᤂᤠᤏᤡ᤺ᤔᤠ ᤛᤢᤰᤋᤢᤱ. ᤁᤖ ᤔᤏᤠᤜᤠ᤹ᤃ ᤛᤡᤱᤒᤢᤱ ᤜᤧᤰᤁᤣᤏᤧ ᤏᤡ᤺ᤔᤧᤎᤠ᤺ᤵᤐᤠᤱ ᤗᤠᤱᤔᤧᤄᤣ᤺ᤰᤐᤠ ᤏᤡ᤺ᤛᤢᤱᤛᤡᤱᤗᤥ॥”
MAR 8:25 ᤕᤧᤛᤢᤖᤧ ᤕᤠᤶᤔᤥ ᤁᤢᤔᤡᤰ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤒᤡᤖᤢᤀᤠᤱ ᤂᤧᤴ ᤀᤍᤰᤋᤰᤁᤠᤱ ᤀᤥᤔᤕᤧ. ᤜᤧᤰᤁᤩᤠᤱ ᤏᤢ᤺ᤖᤡᤰᤁᤠᤱ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤖᤥ॥
MAR 8:26 ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤀᤰᤂᤣ ᤔᤧᤳᤋᤢᤖ ᤁᤢᤜᤡᤶᤛᤕᤱᤅᤥ ᤐᤠᤱᤄᤢᤍᤣ᤺ᤛᤢ. “ᤂᤧᤏᤧ᤹ ᤐᤠᤱᤓᤣ᤹ᤀᤥ ᤔᤧᤴᤗᤠ᤺ᤳᤋᤣ ᤁᤧᤜᤡᤶᤔᤥ ᤏᤢ᤺ᤰᤂᤧ ᤐᤣᤃᤧ᤹ᤀᤥ॥”
MAR 8:27 ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤡᤈᤖᤡᤕᤠ ᤑᤡᤗᤡᤵᤐᤡ ᤌᤢᤶᤔᤥᤒᤠ ᤐᤠᤱᤓᤣ᤹ᤜᤠ᤹ᤀᤥ ᤔᤧᤒᤣ॥ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹ᤒᤣ᥅”
MAR 8:28 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤂᤧᤏᤧ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤏᤢ ᤘᤣ᤹ᤜᤠ᤹ᤖᤧᤃ ᤀᤣᤗᤡᤕᤠ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹॥ ᤁᤢᤓᤠᤖᤧᤃ ᤘᤣ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤗᤳᤇᤠᤏᤧᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤖᤥ॥”
MAR 8:29 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅” ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ᤹ᤖᤥ॥”
MAR 8:30 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤀᤠᤕᤠ᤺ᤶᤒᤣᤀᤥ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
MAR 8:31 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤂᤣ ᤐᤠ᤺ᤳᤋᤢᤖ ᤜᤢ᤹ᤔᤠ ᤜᤣ᤺ᤰᤋᤢᤛᤡ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤕᤖᤡᤰ ᤋᤢᤰᤂᤣᤜᤠ᤹ ᤋᤢᤶᤔᤠ ᤐᤥ᤺ᤱ. ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ. ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤀᤠ. ᤜᤧᤰᤁᤩᤠᤱ ᤔᤧᤛᤧᤳᤋᤠᤀᤠᤱ ᤕᤠᤶᤔᤥ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤅᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤆᤧᤰᤋᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤢᤏᤧ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤑᤧ᤺ᤰᤋᤢᤖᤥ॥
MAR 8:33 ᤜᤧᤰᤁᤩᤠᤱ ᤂᤢᤏᤧ᤹ ᤂᤡᤖᤡ ᤜᤡᤛᤡᤱᤅᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤥᤔᤧᤳᤋᤢᤛᤡᤖ ᤐᤋᤪᤢᤛᤧᤴ ᤑᤧ᤺ᤰᤋᤢ. “ᤔᤠᤑᤧᤴᤛᤠᤶᤔᤣ. ᤂᤧᤏᤧ᤹ ᤀᤡᤱᤃᤠ᤹ᤗᤠᤶ ᤔᤠ᤺ᤱᤄᤠ ᤐᤣᤃᤧ᤹॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰᤗᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹ᤖᤥ॥”
MAR 8:34 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱᤌᤢᤱᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤛᤡᤗᤠᤶᤛᤠᤰᤔᤠ ᤁᤢᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥
MAR 8:35 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤏᤢ ᤛᤢᤏᤠᤀᤡᤱᤅᤡᤸᤗᤧ ᤁᤢᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥”
MAR 8:36 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤛᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤔᤠᤛᤢᤸᤗᤧ ᤏᤢ᤺ᤒᤠ ᤐᤥ᤺ᤱᤒᤡ᥅
MAR 8:37 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤕᤠᤱᤏᤠ ᤂᤥ᤺ᤔᤠᤖᤧ ᤗᤠᤃᤡ ᤌᤣ᤺ᤸᤗᤧᤀᤠᤱ ᤏᤢ᤺ᤰᤔᤠ ᤔᤧᤛᤢᤰᤋᤢᤴᤗᤥ॥
MAR 8:38 ᤁᤴ ᤁᤢ᤹ᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤕᤧᤶᤔᤥ ᤀᤠᤳᤋᤡᤴ ᤔᤏᤠ᤺ᤴ ᤀᤡᤱᤃᤠ᤹ᤏᤢ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠᤰᤁᤡᤴᤏᤢ ᤛᤡᤖᤡᤱ ᤔ᤹᤺. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤠᤱ ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤅᤥ ᤛᤣᤛᤣ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤀᤠᤸᤗᤧ ᤂᤧᤴᤏᤢ ᤛᤡᤖᤡᤱ ᤔ᤺ᤀᤠᤖᤥ॥
MAR 9:1 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤔᤢᤰᤛᤠᤶᤏᤢ ᤕᤢ᤺ᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤔᤧᤴᤇᤡ᤺ᤏᤧᤴᤗᤥ॥”
MAR 9:2 ᤋᤢᤰᤛᤡ (᥌) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤕᤢᤜᤢᤴᤏᤠ᤺ᤴ ᤌᤥ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤛᤡ॥ ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤕᤧᤛᤢᤖᤧ ᤁᤢᤏᤠᤀᤡᤒᤣ᤺ᤰ ᤗᤧᤱᤛᤡᤱᤗ ᤐᤣᤀᤠᤱ
MAR 9:3 ᤁᤢᤍᤣ᤺ᤳᤜᤠ᤹ ᤔᤡᤰᤁᤡᤴ ᤆᤧᤔᤢᤖ ᤌᤠᤖᤡᤰ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤐᤥ᤺ᤰᤂᤧ. ᤂᤧᤶᤔᤩᤠᤰ ᤛᤠ᤹ᤖᤡᤰ ᤑ᤺ ᤗ᤹ᤖ ᤌᤠᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠ᤺ᤳᤗᤧᤀᤠᤱ ᤆᤠᤱᤅᤡᤴ ᤘᤠᤜᤵᤔᤠ ᤔᤧᤛᤢᤰᤋᤢᤴᤗᤥ॥
MAR 9:4 ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤏᤢ ᤔᤥᤛᤠ᤺ᤴ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢ᤺ᤴᤏᤢ ᤋᤠ᤹ᤈᤧᤰᤂᤧᤳᤇᤡᤖᤥ॥
MAR 9:5 ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥ ᤀᤠᤏᤡᤃᤧ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧᤒᤡ᥅ ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰ ᤌᤡᤰ ᤆᤥᤃᤢᤶᤒᤧᤖᤥ᥄”
MAR 9:6 ᤐᤋᤪᤢᤛᤖᤧ ᤌᤣ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ᤀᤡᤸᤗᤧ ᤌᤣᤀᤠᤱ ᤔᤧᤎᤠᤵᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧᤖᤥ॥
MAR 9:7 ᤜᤧᤰᤁᤩᤠᤱ ᤂᤠᤵᤔᤡ᤺ᤳᤋᤡᤸᤗᤧ ᤆᤡᤍᤧᤵ ᤋᤧᤵᤋᤢᤛᤡᤀᤠᤱ ᤂᤠᤵᤔᤡ᤺ᤳᤋᤥᤗᤠᤶ ᤀᤰᤋᤱᤒᤠ ᤀᤡᤰᤗᤠ ᤔᤧᤄᤧᤵᤛᤢ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤖᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”
MAR 9:8 ᤂᤧᤱᤜᤠ᤹ ᤂᤡᤖᤡ ᤀᤥᤔᤧᤔ᤺ᤕᤧᤸᤗᤧ ᤕᤧᤛᤢ᤺ᤴᤗᤰ ᤘᤕᤧ. ᤘᤣ᤹ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧᤖᤥ॥
MAR 9:9 ᤂᤧᤱᤜᤠ᤹ ᤁᤥ᤺ᤰᤔᤠᤗᤠᤶ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤁᤧᤏᤡ᤺ᤛᤢᤶᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤴᤜᤡᤱᤅᤣ ᤌᤠᤖᤡᤰ ᤜᤠ᤺ᤳᤋᤠᤱ ᤔᤧᤈᤧᤰᤋᤧᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
MAR 9:10 ᤂᤧᤱᤜᤠ᤹ᤖᤧᤀᤠᤱ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤗᤢᤶᤔᤥᤀᤣ ᤔᤧᤕᤢᤰᤂᤢ॥ ᤂᤧᤱᤜᤠ᤹ ᤁᤴ ᤛᤡ᤺ᤔᤧᤴᤗᤠᤶ ᤜᤡᤱᤔᤠ ᤑᤠ᤹ᤀᤡᤴ ᤌᤧᤔᤠᤏᤧᤒᤣ ᤑᤠ᤹ᤀᤠᤱ ᤐᤠ᤺ᤴ ᤔᤧᤎᤰᤋᤧᤖᤥ॥
MAR 9:11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤔᤠᤏᤢ᤺ᤸᤗᤧ ᤋᤃᤡ ᤀᤣᤗᤡᤕᤠ᤺ᤱᤃ ᤕᤢ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅”
MAR 9:12 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤛᤡ. “ᤛᤧᤰᤂᤠᤀᤣᤖᤥ. ᤀᤣᤗᤡᤕᤠ᤺ᤱᤃ ᤕᤢ᤹᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤍᤠ᤺ᤔᤠᤴ ᤁᤧᤖᤧᤰ ᤕᤠᤖᤡᤵ ᤆᤥᤃᤢ᤹ᤖᤥ॥ ᤀᤠᤰᤂᤣᤗ᤹ᤖᤡᤰ ᤔᤧᤴᤇᤠᤶᤛᤠ᤺ᤴ ᤋᤢᤰᤂᤣ ᤆᤠᤔᤠᤀᤣ ᤐᤥ᤺ᤱ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢ ᤁᤧᤗ᤹ᤒᤠ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤒᤡ᥅
MAR 9:13 ᤁᤖ ᤀᤣᤗᤡᤕᤠ᤺ᤴ ᤋᤩᤧ ᤆᤢᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤵᤐᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥”
MAR 9:14 ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤔᤧᤃᤧᤖᤧᤸᤗᤧ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤐᤠ᤺ᤴᤎᤰᤏᤢ ᤔᤧᤕᤠᤃᤧ॥
MAR 9:15 ᤕᤧᤛᤢ᤺ᤴ ᤕᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤜᤠ᤺ᤵᤔᤧᤗᤧᤰᤋᤧᤀᤠᤱ ᤔᤧᤗᤥ᤺ᤰᤋᤧᤖ ᤕᤧᤛᤢ᤺ᤴ ᤛᤣᤘᤠ ᤔᤧᤈᤥᤃᤢᤖᤥ॥
MAR 9:16 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤧᤱᤜᤠ᤹ᤏᤢ ᤌᤧᤔᤠ ᤐᤠ᤺ᤴ ᤁᤧᤎᤰᤋᤡᤒᤠᤒᤣ᥅”
MAR 9:17 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤐᤠ᤺ᤳᤋᤢ. “ᤛᤡᤰᤛᤠᤶᤒᤣ. ᤀᤠᤛ᤻ᤛᤠ᤺ᤴ ᤁᤵᤔᤥ ᤋᤠᤖᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤋᤖᤢᤀᤠᤱ ᤁᤢᤒᤠ᤺ᤴᤏᤠᤱ ᤔᤕᤧᤒᤣᤀᤠᤱ ᤘᤠ᤹ᤖᤥ॥
MAR 9:18 ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤸᤗᤧ ᤂᤧᤴ ᤂᤠᤶᤔᤥ ᤌᤠᤶᤛᤡᤱᤅᤠᤱ ᤁᤢᤎᤩᤠ᤺ᤳᤋᤡᤴ ᤑᤢᤈᤢ᤺ᤰ-ᤑᤢᤈᤢ᤺ᤰ ᤗ᤺ᤴᤏᤠᤱ ᤁᤢᤜᤠᤒᤥ᤹ᤒᤠᤴ ᤀᤡᤛᤡᤰᤂᤢ᤹. ᤜᤧᤰᤁᤩᤠᤱ ᤂᤠᤰᤋᤢ᤹ᤖᤥ॥ ᤁᤧᤜᤢ᤹ᤛᤠᤶᤒᤠᤜᤠ᤹ ‘ᤂᤧᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹’ ᤔᤧᤳᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”
MAR 9:19 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤛᤠ᤺ᤴ ᤁᤧᤜᤥ᤺ᤵᤐᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤖ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”
MAR 9:20 ᤂᤧᤴ ᤆᤢᤰᤐᤧᤴ ᤕᤧᤛᤢᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤑᤧᤴᤛᤠᤶᤔᤡᤸᤗᤧ ᤕᤧᤛᤢ᤺ᤴ ᤏᤡ᤺ᤛᤢᤀᤠᤱ ᤂᤧᤴ ᤆᤢᤰᤐᤧᤴ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤁᤢᤎᤩᤠ᤺ᤳᤋᤡᤴ ᤑᤢᤈᤢ᤺ᤰ-ᤑᤢᤈᤢ᤺ᤰ ᤗ᤺ᤴᤍᤧᤖ ᤜᤥ᤺ᤳᤇᤡᤱᤔᤠ ᤜᤣ᤺ᤰᤋᤧᤖᤥ॥
MAR 9:21 ᤕᤧᤛᤢᤖᤧ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤠ᤺ᤴ ᤛᤣ᤺ᤴᤍᤥᤛᤢ. “ᤁᤴ ᤆᤢᤰᤐᤧᤴ ᤀᤠᤵᤑᤠᤸᤗᤧᤀᤠᤱᤎᤥ ᤀᤰᤂᤣ ᤐᤥ᤺ᤰᤂᤧᤒᤠᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤁᤴ ᤀᤅᤧ᤺ᤰᤘᤠ ᤘᤕᤧᤀᤠᤱᤎᤥᤀᤣ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
MAR 9:22 ᤁᤴ ᤑᤧᤴᤛᤠᤶᤔᤡᤸᤗᤧ ᤕᤖᤡᤰ ᤗᤧᤱ ᤛᤧᤵᤔᤠ ᤁᤥ᤺ᤳᤋᤢᤸᤗᤧ ᤆᤢᤰᤐᤧᤴ ᤔᤡᤀᤥ ᤏᤢ ᤆᤫᤠ᤺ᤳᤋᤥ ᤛᤧᤵᤔᤠ ᤑᤠ᤹ᤀᤠᤱ ᤗᤠᤵᤑᤢᤛᤢ ᤕᤠᤰᤋᤢᤖᤥ॥ ᤀᤠᤍᤠᤱᤒᤣ. ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ. ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤀᤠᤓᤠ᤹ᤖᤧ᤹ᤀᤥ॥”
MAR 9:23 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “‘ᤁᤧᤛᤢᤰᤋᤢᤏᤧ ᤑᤠ᤹ᤃᤪ’ ᤑᤠ᤹ᤀᤠᤱ ᤌᤣᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅ ᤏᤛᤠ᤺ᤴ ᤁᤧᤈᤥ᤺ᤰᤐᤠᤸᤗᤧ ᤁᤢᤗᤠᤃᤡᤃ ᤌᤣᤛᤠᤱ ᤐᤥ᤺ᤱᤔᤠ ᤛᤢᤰᤗᤥ॥”
MAR 9:24 ᤜᤧᤰᤁᤣ᤺ᤸᤗᤧ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤠᤖᤧ ᤂᤡᤔᤥ ᤕᤶᤒᤠ ᤀᤡᤰᤗᤠᤀᤥ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤛᤠ᤺ᤴ ᤆᤥᤃᤢᤱ. ᤁᤖ ᤀᤠᤸᤗᤛᤠᤱ ᤕᤖᤡᤰ ᤏᤛᤠ᤺ᤴ ᤆᤥ᤺ᤰᤔᤠ ᤑᤠ᤹ᤖᤠᤱᤅᤧ᤹ᤀᤥ᥄”
MAR 9:25 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤂᤧᤵᤔᤥ ᤔᤧᤗᤥ᤺ᤰᤋᤧᤖ ᤔᤧᤓᤧᤖᤧᤒᤠ ᤏᤡ᤺ᤛᤢᤛᤡᤀᤠᤱ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤏᤠᤎᤠᤰᤐᤠ ᤏᤢ ᤁᤢᤒᤠ᤺ᤴ ᤔᤧᤴᤗ᤺ᤶᤏᤠᤒᤠ ᤑᤧᤴᤛᤠᤶᤔᤣ. ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤕᤠᤶᤔᤥ ᤔᤧᤗᤠ᤺ᤛᤧᤴᤏᤧ᤹᥄”
MAR 9:26 ᤂᤧᤴ ᤑᤧᤴᤛᤠᤶᤔᤡᤴ ᤑᤡ᤺ᤰᤋᤧᤖ ᤂᤧᤴ ᤛᤠ᤹ᤖᤡᤰ ᤌᤠᤵᤛᤢᤎᤀᤠᤱ ᤗ᤺ᤴᤍᤧ ᤐᤣᤖᤥ॥ ᤂᤧᤴ ᤆᤢᤰᤐᤧᤴ ᤂᤠᤰᤋᤢᤀᤠᤱ ᤁᤧᤛᤡ᤺ᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤣ᤺ᤸᤗᤧ ᤁᤢᤓᤠᤖᤧᤃ ᤂᤧᤱᤃ ᤛᤩᤧ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ॥
MAR 9:27 ᤁᤖ ᤕᤧᤛᤢᤖᤧ ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤋᤧᤶᤛᤢᤖ ᤑᤥ᤺ᤰᤂᤢᤀᤠᤱ ᤕᤧᤵᤛᤢ. ᤜᤧᤰᤁᤩᤠᤱ ᤂᤧᤴ ᤕᤧᤶᤛᤡᤱᤗᤥ॥
MAR 9:28 ᤕᤧᤛᤢ᤺ᤴ ᤜᤡᤶᤔᤥ ᤗᤠ᤺ᤛᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤀᤠᤏᤡᤃᤧ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤵᤔᤠ ᤗ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤒᤠᤒᤣ᥅”
MAR 9:29 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤰᤋᤱᤒᤠᤱᤃ ᤋᤢᤘᤠ᤺ᤸᤗᤧᤖᤰ ᤏᤠ᤺ᤵᤔᤠ ᤗ᤺ᤵᤔᤠ ᤛᤢᤰᤋᤧᤳᤗᤥ॥”
MAR 9:30 ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤋᤧᤴᤏᤡᤴ ᤐᤰᤔᤧᤎ᤺ᤀᤠᤱ ᤃᤠᤗᤡᤗ ᤔᤧᤗᤛ᤻ᤛᤢᤖ ᤔᤧᤒᤣ॥ ᤂᤢᤏᤡ᤹ ᤀᤠᤳᤋᤥ ᤔᤧᤘᤠ᤹ ᤑᤠ᤹ᤀᤠᤱ ᤘᤣ᤹ᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥ᤺ᤛᤢᤴᤗ ᤁᤧᤗ᤹ᤒᤠ ᤕᤧᤛᤢᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤕᤧᤖᤥ.
MAR 9:31 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤜᤢ᤹ᤖᤢᤛᤡᤖ ᤘᤕᤧ॥ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤳᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢ᤹. ᤁᤖ ᤛᤢᤶᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤱᤗᤥ॥”
MAR 9:32 ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥ᤺ᤔᤠᤀᤠᤱ ᤔᤧᤃᤡᤛᤧᤖᤥ॥
MAR 9:33 ᤂᤧᤱᤜᤠ᤹ ᤁᤐᤷᤏᤜᤢᤶᤔᤥ ᤔᤧᤍᤩᤧᤀᤠᤱ ᤂᤧᤵᤔᤥᤒᤠ ᤜᤡᤶᤔᤥ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤴᤍᤧ᤺ᤴ ᤗᤠᤶᤔᤥ ᤂᤡᤏᤡ᤹ ᤌᤧᤔᤠ᤺ᤴ ᤐᤠ᤺ᤴ ᤁᤧᤎᤰᤋᤡᤖ ᤁᤧᤘᤕᤡᤒᤠᤒᤣ᥅”
MAR 9:34 ᤁᤖ ᤂᤧᤱᤜᤠ᤹ ᤔᤧᤶᤒᤠᤖᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤐᤠ᤺ᤴᤔᤧᤎᤰᤋᤧᤀᤠᤱ ᤔᤧᤘᤕᤧᤖᤥ॥
MAR 9:35 ᤕᤧᤛᤢ᤺ᤴ ᤕᤢᤱᤛᤡᤱᤅᤠᤱ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤜᤠ᤺ᤳᤗᤧ ᤋᤃᤡ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤐᤥ᤺ᤱᤔᤠᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥”
MAR 9:36 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤵᤔᤥ ᤜᤡᤴᤈᤠ᤹ᤎᤡᤰ ᤂᤢᤏᤡ᤹ ᤗᤢᤶᤔᤥ ᤕᤧᤵᤛᤢ. ᤜᤧᤰᤁᤩᤠᤱ ᤁᤢᤓᤰᤋᤢᤱᤅᤥ ᤕᤢᤰᤂᤢᤖ ᤔᤧᤳᤋᤢᤛᤡ.
MAR 9:37 “ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤗᤠᤱᤃᤧᤍᤠ᤺ᤰᤐᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤗᤠᤱᤍᤠ᤺ᤰᤋᤢ᤹॥”
MAR 9:38 ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰᤐᤠ ᤕᤢᤜᤢᤴᤏᤠ ᤔᤧᤵᤔᤏᤠᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡᤃᤧ ᤗᤳᤇᤠ ᤔᤏᤠᤎᤡᤰᤗᤧ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤛᤡᤖ ᤐᤳᤇᤧᤒᤠ ᤏᤡ᤺ᤛᤢᤶᤒᤧ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤂᤧᤴ “ᤜᤧᤰᤁᤣ ᤔᤧᤈᤥᤃᤧᤴᤏᤧ᤹” ᤔᤧᤳᤋᤢᤶᤒᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤏᤡ᤹ᤏᤢ ᤛᤥᤖᤡᤰ ᤗᤠᤱᤔᤧᤄᤣ᤺ᤰᤏᤧᤴᤗᤥ॥”
MAR 9:39 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤔᤡᤱᤅᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤴ ᤀᤠᤍᤰᤗᤧᤱᤘᤠᤀᤥ ᤜᤠᤖᤠ ᤔᤧᤒᤥ᤺ᤰᤏᤧᤴᤗᤥ॥
MAR 9:40 ᤀᤠᤳᤋᤡᤴ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤜᤥ᤺ᤵ. ᤂᤧᤴ ᤀᤠᤏᤡ᤹ ᤗᤧᤵᤔᤠᤱ ᤘᤠ᤹ᤖᤥ॥
MAR 9:41 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤔᤏᤠ ᤑᤠ᤹ᤀᤠᤱ ᤑᤱᤏᤠᤎᤡᤰ ᤆᤫᤠ᤺ᤳ ᤁᤧᤒᤡᤖᤡ᤹. ᤂᤧᤸᤗᤧ ᤛᤧᤰᤂᤠᤛᤠᤱ ᤌᤢᤶᤄᤥ᤺ᤴ ᤂᤥ᤺ᤛᤢ᤹ᤀᤣᤖᤥ॥”
MAR 9:42 “ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢ᤹. ᤂᤧᤸᤗᤧ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤑᤥ᤺ᤶᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
MAR 9:43 ᤂᤧᤏᤧ᤹ ᤁᤧᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧᤍᤣ᤺ᤛᤧ᤹ᤀᤥ॥ ᤏᤧᤳᤇᤡ ᤜᤢᤰᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤜᤢᤰᤌᤡᤰ ᤔᤧ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠᤀᤣ ᤏᤢ᤺ᤒᤠᤖᤥ॥
MAR 9:44 ((ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠ᤺ᤳ ᤏᤢ ᤔᤡ᤺ᤴ ᤔᤧᤛᤡ᤺ᤏᤧᤴᤗᤥ॥))
MAR 9:45 ᤁᤧᤗᤠᤱᤅᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧᤍᤣ᤺ᤛᤧ᤹॥ ᤏᤧᤳᤇᤡ ᤗᤠᤱᤏᤢ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤗᤠᤱᤎᤡᤰ ᤔᤧ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠᤀᤣ ᤏᤢ᤺ᤒᤠᤖᤥ॥
MAR 9:46 ((ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠ᤺ᤳ ᤏᤢ ᤔᤡ᤺ᤴ ᤔᤧᤛᤡ᤺ᤏᤧᤴᤗᤥ॥))
MAR 9:47 ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤕᤃᤧᤗ᤺ᤳᤋᤧ᤹॥ ᤏᤧᤳᤇᤡ ᤔᤡᤰᤁᤡᤴᤏᤢ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤔᤡᤰᤌᤡᤰᤏᤢ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤏᤢ᤺ᤒᤠᤖᤥ॥
MAR 9:48 ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠ᤺ᤳ ᤏᤢ ᤔᤡ᤺ᤴ ᤔᤧᤛᤡ᤺ᤏᤧᤴᤗᤥ॥
MAR 9:49 ᤕᤢᤶᤔᤡᤸᤗᤧ ᤛᤡᤍᤢᤱᤈᤓᤠ᤺ᤴ ᤛᤢᤳᤌᤥ ᤆᤥᤃᤢᤒᤠ ᤜᤧᤰᤁᤣᤀᤣ ᤔᤡ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤛᤢᤳᤌᤥ ᤆᤥᤃᤢᤛᤡ᤹ᤖᤥ॥
MAR 9:50 ᤕᤢᤶᤔᤡᤴ ᤏᤢ᤺ᤒᤠ ᤆᤥ᤺ᤰ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠ᤺ᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤂᤧᤴ ᤁᤧᤗᤡᤶᤒᤠ ᤁᤧᤈᤥᤃᤢᤶᤒᤣ᥅ ᤂᤡᤏᤡ᤹ ᤜᤡᤱᤔᤴᤏᤥ ᤕᤢᤶᤔᤡᤴ ᤁᤳᤋᤧᤶᤔᤧ᤹ᤀᤠᤱ ᤁᤧᤖᤧᤰᤏᤢ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥”
MAR 10:1 ᤕᤧᤛᤢᤖᤧ ᤂᤧᤴ ᤋᤧᤴᤏᤡᤴ ᤗᤧᤖᤢᤀᤠᤱ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤕᤜᤢᤍᤡᤕᤠ ᤌᤢᤶᤔᤥ ᤐᤣ॥ ᤂᤧᤵᤔᤥᤀᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤧᤵᤗᤧᤰ ᤁᤢᤀᤡᤛᤡ᤺ᤰ ᤂᤧᤴ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥
MAR 10:2 ᤂᤧᤵᤔᤥ ᤁᤢᤓᤠ ᤑᤖᤡᤛᤡᤜᤠ᤹ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤐᤠ᤺ᤴ ᤔᤧᤃᤧᤛᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤐᤡᤖᤢᤒᤡ ᤔᤧ᤺ᤶᤒᤡ᥅”
MAR 10:3 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤱᤏᤠ ᤛᤣ᤺ᤴᤍᤥᤛᤢᤛᤡ. “ᤔᤥᤛᤠᤖᤧ ᤂᤡᤏᤡ᤹ ᤀᤠᤰᤋᤱᤒᤠ ᤀᤡᤱᤈᤠ᤺ᤱ ᤁᤧᤒᤡᤖᤡᤀᤠᤱ ᤁᤧᤘᤕᤡ᤹ᤒᤣ᥅”
MAR 10:4 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤔᤥᤛᤠ᤺ᤸᤗᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤀᤡᤱᤃᤠ᤹ ᤏᤠ᤹ᤏᤧᤒᤠᤖᤥ ᤑᤠ᤹ᤀᤠᤱ ᤛᤠᤵᤗᤠ ᤛᤠᤵᤋᤢᤀᤠᤱ ᤐᤠᤱᤔᤠᤍᤣ᤺ᤔᤠ ᤛᤢᤰᤋᤢ᤹ ᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳᤗᤥ॥”
MAR 10:5 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤱᤃ ᤂᤡᤏᤡ᤹ ᤐᤠ᤺ᤴ ᤔᤧᤱᤄᤧᤶᤔᤏᤠᤒᤠ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤣᤗ᤹ᤖᤡᤰ ᤔᤥᤛᤠᤖᤧ ᤂᤧᤴ ᤛᤠᤶᤕᤥᤌᤡᤶᤔᤡᤴ ᤁᤧᤛᤠᤵᤋᤡ ᤁᤧᤒᤡᤖᤡᤒᤠᤖᤥ॥
MAR 10:6 ᤁᤖ ᤁᤢᤜᤣ᤺ᤰᤛᤡᤱᤔᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤸᤗᤧ ‘ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ ᤆᤥᤃᤢᤛᤡᤖᤥ॥’
MAR 10:7 ‘ᤂᤧᤸᤗᤧ ᤆᤥᤃᤢᤸᤗᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤶᤒᤠ ᤏᤢ ᤁᤢᤶᤔᤠᤛᤡ ᤗᤧᤖᤢᤛᤡᤀᤠᤱ ᤁᤢᤔᤣ᤺ᤳᤋᤡᤴᤏᤢ ᤋᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥ᤺ᤱᤛᤡᤖᤥ॥ ᤀᤠᤸᤗ ᤂᤧᤱᤜᤠ᤹ᤃ ᤏᤧᤵᤑᤢᤛᤡ ᤔᤧ᤺ᤴ. ᤁᤖ ᤗᤳᤇᤠ ᤌᤰᤛᤡᤖᤥ॥’
MAR 10:9 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤌᤰ ᤆᤥᤃᤢᤛᤡᤒᤠᤜᤠ᤹ ᤔᤧᤴᤇᤠᤶ ᤕᤠᤵᤔᤡᤖᤧ ᤛᤧᤶᤔᤠᤛᤡ ᤔᤧᤏᤢ᤹ᤏᤧᤴᤗᤥ॥”
MAR 10:10 ᤜᤧᤰᤁᤩᤠᤱ ᤕᤠᤱᤛᤡ ᤂᤧᤱᤜᤠ᤹ ᤜᤡᤶᤔᤥ ᤔᤧᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤌᤧᤔᤠᤒᤣ ᤑᤠ᤹ᤀᤠᤱ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢᤖᤥ॥
MAR 10:11 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤴ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢᤀᤠᤱ ᤘᤣ᤹ᤛ᤻ᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤋᤃᤡᤛ᤻ᤔᤠ ᤁᤢᤔᤣ᤺ᤳᤋᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥
MAR 10:12 ᤜᤧᤰᤁᤩᤠᤱ ᤀᤠᤳᤋᤡᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤕᤧᤶᤒᤠ᤹ᤀᤡᤴ ᤏᤠ᤹ᤖᤢᤀᤠᤱ ᤘᤣ᤹ ᤕᤧᤶᤒᤡᤳᤇᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧᤀᤠᤱ ᤋᤃᤡᤛ᤻ᤔᤠ ᤁᤢᤕᤧᤶᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤣ᤹ ᤕᤧᤶᤒᤡᤳᤇᤠ᤹ᤀᤡᤴᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥”
MAR 10:13 ᤜᤧᤰᤁᤩᤠᤱ ᤕᤧᤛᤢᤖᤧ ᤜᤢᤰ ᤏᤧᤛ᤻ᤛᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤍᤠᤖᤢᤛᤡ॥ ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤁᤧᤍᤠ᤺ᤵᤐᤠᤜᤠ᤹ ᤔᤧᤓᤧ᤺ᤰᤋᤢᤛᤡ॥
MAR 10:14 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤏᤡ᤺ᤛᤢᤀᤠᤱ ᤁᤢᤕᤠ᤺ᤰ ᤗᤧ᤹ᤖᤧᤖ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤠᤖᤠ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤑᤠ᤺ᤰᤋᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤁᤴ ᤜᤡᤴᤈᤠ᤹ᤒᤡᤳᤇᤠ ᤜᤧᤰᤋᤱᤒᤠᤜᤠ᤹ᤖᤧᤴᤏᤣᤖᤥ॥
MAR 10:15 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤜᤡᤴᤈᤠ᤹ ᤜᤧᤰᤁᤣ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤔᤧᤍᤠ᤺ᤰᤋᤢᤴ. ᤂᤧᤴ ᤂᤧᤵᤔᤥ ᤗᤠ᤺ᤵᤔᤠ ᤔᤧᤄᤥ᤺ᤏᤧᤴᤗᤥ॥”
MAR 10:16 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤁᤢᤓᤰᤋᤢᤱᤅᤥ ᤕᤢᤰᤂᤢᤛᤡᤀᤠᤱ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤖ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ॥
MAR 10:17 ᤜᤧᤰᤁᤩᤠᤱ ᤕᤧᤛᤢ᤺ᤴ ᤗᤠᤶᤍᤡ᤺ᤰᤁᤥ ᤐᤣᤖ ᤐᤳᤇᤧᤸᤗᤧ ᤔᤏᤠᤎᤡᤰ ᤗᤥ᤺ᤰᤋᤧ ᤑᤧᤖᤧᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤁᤧᤏᤢ᤹ᤒᤠ ᤛᤡᤰᤛᤠᤶᤒᤠᤀᤣ. ᤀᤠᤰᤋᤱᤒᤠ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤱᤒᤣ᥅”
MAR 10:18 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤌᤣᤀᤠᤱ ᤀᤡᤱᤃᤠ᤹ ᤁᤧᤏᤢ᤹ᤒᤠ ᤁᤧᤔᤧᤳᤋᤠᤒᤣ᥅ ᤁᤧᤏᤢ᤹ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤘᤠ᤹ᤖᤥ॥
MAR 10:19 ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤜᤠ᤹ ᤁᤧᤗᤧᤛ᤻ᤛᤢ᤹–ᤔᤏᤠ ᤛᤧᤵᤔᤠ ᤔᤧᤏᤢ᤹ᤏᤧᤴ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤂᤢ᤺ᤶᤔᤠ ᤔᤧᤏᤢ᤹ᤏᤧᤴ. ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ. ᤔᤏᤠᤜᤠ᤹ ᤂᤢᤶᤔᤠᤛᤡ ᤔᤧᤏᤢ᤹ᤏᤧᤴ. ᤜᤧᤰᤁᤩᤠᤱ ᤐᤠ-ᤔᤠ ᤀᤡᤱᤎᤠ᤺ᤱ ᤐᤡᤔᤠᤛᤡᤀᤣ ᤐᤥ᤺ᤱ॥”
MAR 10:20 ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤁᤴ ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤜᤠ᤹ᤃ ᤀᤡᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥᤀᤣ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗ ᤘᤠ᤹ᤀᤠᤖᤥ॥”
MAR 10:21 ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤀᤥᤔᤧᤳᤋᤢᤀᤠᤱ ᤗᤢᤱᤔᤠ᤹ ᤋᤢᤰᤋᤢᤖ ᤔᤧᤳᤋᤢ. “ᤀᤠᤸᤗᤛᤠᤱ ᤂᤧᤏᤧ᤹ ᤕᤠ᤺ᤶᤒᤰᤌᤡᤰ ᤆᤥ᤺ᤰᤔᤠ ᤁᤧᤃᤳᤋᤢ᤹ᤖᤥ॥ ᤐᤣᤃᤧ᤹ᤀᤠᤱ ᤁᤧᤃᤳᤋᤢᤒᤠᤴ ᤁᤧᤖᤧᤰ ᤛᤱᤄᤧᤍᤣ᤺ᤛᤧ᤹ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤁᤧᤄᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤑᤧᤖᤧ᤹ᤀᤠᤱ ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”
MAR 10:22 ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤏᤠ᤺ᤴ ᤁᤡ᤺ᤴᤍᤢᤀᤠᤱ ᤁᤢᤏᤡᤱᤘᤠ᤹ ᤋᤢᤃᤧᤖ ᤂᤧᤵᤔᤥᤗᤠᤶ ᤐᤣ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤢᤖᤥ॥
MAR 10:23 ᤕᤧᤛᤢᤖᤧ ᤂᤡᤖᤡ ᤀᤥᤔᤕᤧᤖ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤃ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤠ᤹ᤖᤡᤰ ᤛᤠᤰᤗᤥ᥄”
MAR 10:24 ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤁᤖ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤢᤰᤐᤠᤛᤣ. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤧᤰᤂᤠᤀᤣ ᤛᤠᤰᤗᤥ॥
MAR 10:25 ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤏᤢ᤺ᤸᤗᤧ ᤀᤢᤔᤣ᤺ᤴ ᤛᤶᤔᤣ᤺ᤳᤋᤡᤸᤗᤧ ᤁᤢᤜᤱᤅᤥ ᤗᤠ᤺ᤵᤔᤠ ᤀᤢᤛᤢᤖᤢ ᤐᤥ᤺ᤱᤗᤥ॥”
MAR 10:26 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤜᤧᤰᤁᤣ᤺ᤸᤗᤧ ᤜᤠ᤺ᤳ ᤋᤠᤱᤛᤧ᤺ᤵᤔᤠ ᤛᤢᤰᤐᤠᤒᤣ᥅”
MAR 10:27 ᤕᤧᤛᤢᤖᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤂᤧᤵᤛᤧᤶᤔᤧ᤹. ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡᤃ ᤁᤴ ᤛᤢᤰᤔᤧᤴᤍᤧᤵᤔᤏᤠ ᤆᤥ᤺ᤰᤛᤠᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡᤃ ᤔᤧᤛᤠᤰᤏᤧᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ॥”
MAR 10:28 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤶᤒᤧ. ᤜᤧᤰᤁᤩᤠᤱ ᤂᤧᤏᤧ᤹ ᤋᤡᤶᤔᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥”
MAR 10:29 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤠᤗᤠᤃᤡ ᤏᤢ ᤛᤢᤏᤠᤀᤡᤱᤗᤧ ᤗᤠᤃᤡ ᤜᤡᤶᤎᤠ᤺ᤱᤜᤠ᤹. ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤏᤧ᤹ᤏᤢᤛᤠ᤹ᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤐᤠ᤺ ᤔᤠᤜᤠ᤹. ᤀᤡᤃᤪ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤗᤧᤖᤢᤛᤡᤀᤠᤱ ᤘᤠ᤹.
MAR 10:30 ᤂᤧᤸᤗᤧ ᤛᤧᤰᤂᤠᤀᤣ ᤁᤴ ᤕᤧᤶᤔᤥ ᤔᤏᤠᤗᤠᤶᤒᤠ ᤋᤢᤰᤂᤣ ᤆᤠᤔᤠᤏᤢ ᤛᤥᤛᤥᤖᤡᤰ ᤜᤡᤶᤎᤠ᤺ᤱᤜᤠ᤹. ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤑᤢ᤹ᤏᤢᤛᤠ᤹. ᤏᤧ᤹ᤏᤢᤛᤠ᤹. ᤔᤠᤜᤠ᤹ ᤜᤧᤰᤁᤩᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤁᤡᤵᤌᤡᤰ (᥇᥆᥆) ᤗᤧᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤕᤧᤶᤔᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥
MAR 10:31 ᤁᤖ ᤀᤠᤸᤗᤥ ᤋᤃᤡ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤀᤣᤃᤠᤱ ᤔᤧᤒᤥ᤺ᤱᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤣᤃᤠᤱ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤋᤃᤠᤱ ᤔᤧᤒᤥ᤺ᤱᤗᤥ॥”
MAR 10:32 ᤂᤧᤱᤜᤠ᤹ ᤕᤖᤢᤛᤗᤧᤔ ᤌᤥ ᤔᤧᤒᤣ᤺ᤸᤗᤧ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ᤺ᤸᤗᤧ ᤋᤃᤠᤱ ᤐᤳᤇᤧ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤜᤧᤰᤁᤩᤠᤱ ᤀᤣᤃᤠᤱ ᤁᤧᤍᤡᤶᤒᤠᤜᤠ᤹ᤀᤠᤱ ᤔᤧᤃᤡᤛᤧᤖᤥ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤛᤡᤀᤠᤱ ᤀᤠᤸᤗ ᤐᤥ᤺ᤱᤔᤠ ᤀᤡ᤺ᤳᤋᤧᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ.
MAR 10:33 “ᤀᤠᤸᤗ ᤀᤠᤏᤡ᤹ ᤕᤖᤢᤛᤗᤧᤔ ᤀᤠᤃᤧᤳᤋᤠᤱ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤋᤢᤀᤠᤱ ᤜᤢᤰᤔᤧᤛᤢᤵᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤒᤡᤖᤢ᤹ᤖᤥ॥
MAR 10:34 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. ᤌᤩᤠ᤺ᤳ ᤔᤧᤎᤥ᤺ᤰᤋᤢ᤹. ᤔᤧᤜᤡᤵᤋᤢ᤹. ᤋᤧ᤺ᤶᤓᤢᤰ ᤔᤧᤒᤡᤖᤢ᤹. ᤜᤧᤰᤁᤩᤠᤱ ᤔᤧᤛᤧᤖᤢ᤹ᤖᤥ॥ ᤁᤖ ᤂᤢᤏᤧ᤹ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤗᤥ॥”
MAR 10:35 ᤜᤧᤰᤁᤩᤠᤱ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ ᤏᤢ ᤕᤢᤜᤢᤴᤏᤠ᤺ᤸᤗᤧ ᤕᤧᤛᤢ᤺ᤴ ᤔᤧᤳᤋᤧᤇᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤀᤠᤴᤇᤡᤃᤧ ᤐᤠ᤺ᤳᤇᤢᤃᤧᤒᤠ ᤐᤠ᤺ᤴᤏᤡᤴ ᤀᤠᤴᤇᤡᤃᤧ ᤗᤠᤃᤡ ᤆᤥᤃᤧ᤹ᤀᤥ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤇᤢᤃᤧ᤹ᤖᤥ॥”
MAR 10:36 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤴᤇᤡ᤹ ᤀᤡᤱᤃᤠ᤹ ᤌᤧᤔᤠ ᤆᤥᤃᤢᤱ ᤐᤡᤏᤧᤳᤇᤡᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤈᤥ᤺ᤰᤛᤢᤒᤣ᥅”
MAR 10:37 ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤂᤧᤏᤧ᤹ ᤔᤡᤔᤡᤍᤡᤱᤃᤧᤴ ᤁᤧᤜᤠᤱᤈᤢᤶᤔᤥ ᤁᤧᤕᤢᤱᤅᤡᤸᤗᤧ. ᤁᤧᤈᤢᤵᤛᤠᤱ ᤏᤢ ᤁᤧᤓᤧᤴᤇᤠᤱ ᤗᤧᤵᤔᤠᤱ ᤀᤠᤴᤇᤡᤃᤧ ᤕᤢᤱᤔᤠ ᤕᤠᤵᤔᤡ ᤐᤠᤱᤄᤧ᤹ᤀᤥ॥”
MAR 10:38 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤌᤣ᤺ᤴ ᤁᤧᤏᤠ᤺ᤰᤛᤢᤖ ᤁᤧᤒᤳᤇᤡ᤹ ᤂᤧᤴ ᤁᤢᤛᤡᤱ ᤁᤧᤴᤏᤡ᤺ᤳᤇᤢᤴ॥ ᤀᤡᤱᤃᤠ᤹ ᤌᤢᤅᤢᤱᤒᤠ ᤋᤢᤰᤂᤣᤘᤠ ᤂᤥᤷᤕᤠᤀᤥ ᤌᤢᤱᤔᤠ ᤁᤧᤛᤢᤰᤛᤢᤒᤡ᥅ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤥ᤺ᤱᤅᤠᤒᤠ ᤒᤵᤋᤡᤛ᤻ᤔᤠᤴ ᤂᤡᤴᤇᤡ᤹ ᤐᤥ᤺ᤱᤔᤠ ᤁᤧᤛᤢᤰᤛᤢᤒᤡ᥅”
MAR 10:39 ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤛᤢᤰᤛᤢᤃᤧ᤹॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤛᤧᤰᤂᤠᤀᤣ ᤀᤡᤱᤃᤠ᤹ ᤌᤢᤅᤢᤱᤒᤠ ᤂᤥᤷᤕᤠᤀᤥ ᤁᤧᤎᤢᤱᤛᤢ᤹ᤀᤠᤱ ᤀᤡᤱᤃᤠ᤹ ᤐᤥ᤺ᤱᤅᤠᤒᤠ ᤒᤵᤋᤡᤛ᤻ᤔᤠᤴᤏᤠᤱ ᤂᤡᤴᤇᤡ᤹ ᤁᤧᤒᤥ᤺ᤱᤛᤡ᤹.
MAR 10:40 ᤁᤖᤛᤠᤱ ᤀᤠᤓᤧᤴᤇᤠᤱ ᤏᤢ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤔᤠ ᤁᤧᤛᤢᤰᤛᤡ᤹ ᤐᤠ᤺ᤵᤔᤠ ᤕᤢᤰ ᤔᤧᤃᤳᤋᤠᤴᤗᤥ॥ ᤂᤧᤴ ᤋᤧᤴᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹. ᤒᤠ ᤂᤧᤱᤜᤠ᤹ᤖᤰ ᤕᤢᤱᤔᤠ ᤔᤧᤄᤥ᤺ᤖᤥ॥”
MAR 10:41 ᤜᤧᤰᤁᤩᤠᤱ ᤘᤣ᤹ ᤌᤡᤒᤥ᤺ᤱ (᥇᥆) ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤕᤠᤁᤢᤒ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴᤏᤢ ᤂᤢᤴᤇᤡ᤹ ᤛᤡᤰ ᤐᤥᤃᤧᤖᤥ॥
MAR 10:42 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤁᤠᤰ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧᤃ ᤔᤏᤠᤜᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡᤒᤠ ᤜᤧᤰᤁᤩᤠᤱ ᤂᤢᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤑᤥ᤺ᤛᤠᤱᤒᤠᤜᤠ᤹ ᤔᤧᤕᤢᤰᤋᤢᤛᤡᤒᤠᤃ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
MAR 10:43 ᤁᤖ ᤂᤡᤏᤡ᤹ ᤗᤢᤶᤔᤥᤃ ᤜᤧᤰᤁᤣ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤡᤏᤡ᤹ ᤗᤢᤶᤔᤥᤃ ᤀᤠᤳᤋᤡᤸᤗᤧ ᤗᤠᤶᤗᤥ᤺ᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤜᤠᤖᤠ᤹ ᤂᤡᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤱᤗᤖᤥ॥
MAR 10:44 ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤠᤱ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤁᤧᤖᤧᤰᤗᤧ ᤂᤢᤏᤡ᤹ ᤕᤥ᤺ᤰ ᤐᤥ᤺ᤱᤗᤖᤥ॥
MAR 10:45 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤛᤣᤘᤠ ᤔᤧᤒᤡᤀᤠᤖ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤣᤘᤠ ᤐᤡᤛᤧ ᤋᤩᤠᤱᤒᤠᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤗᤠᤶ ᤌᤧ᤹ᤔᤠᤛᤡᤀᤠᤱ ᤋᤠᤱᤛᤧ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤐᤡᤛᤧ ᤋᤩᤠᤱᤒᤠᤖᤥ॥”
MAR 10:46 ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤧᤖᤡᤜᤥ ᤕᤧᤰᤕᤰᤁᤥ ᤔᤧᤍᤩᤧ॥ ᤕᤠᤱᤛᤡ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤡᤰ ᤔᤏᤠᤜᤠ᤹ᤏᤢ ᤕᤧᤰᤕᤰᤗᤠᤶ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤋᤡᤔᤤᤖᤧ ᤁᤢᤛ᤻ᤛᤠ᤺ ᤒᤷᤋᤡᤔᤠᤀᤡ ᤔᤧᤵᤔᤏᤠᤒᤠ ᤆᤠᤃᤧᤏᤠ᤺ᤰᤐᤠ ᤔᤡᤰᤑ᤺ᤶᤒᤧᤴ ᤗᤠᤶᤔᤡᤸᤗᤧ ᤁᤢᤕᤠᤀᤥ ᤕᤢᤅᤧᤖᤥ॥
MAR 10:47 ᤏᤠᤛᤖᤋᤒᤠ ᤕᤧᤛᤢ᤺ᤴ ᤐᤣ᤺ᤰᤗ ᤐᤳ ᤁᤧᤗ᤹ᤒᤠ ᤂᤧᤸᤗᤧ ᤂᤧᤵᤛᤢᤀᤠᤱ ᤀ᤺ᤰᤔᤠ ᤜᤣ᤺ᤰᤋᤧ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤕᤧᤛᤢᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄”
MAR 10:48 ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤛᤫᤠ᤺ᤳ ᤕᤢᤅᤧ᤹ ᤑᤠ᤹ᤀᤠᤱ ᤔᤧᤓᤧ᤺ᤰᤋᤢ॥ ᤁᤖ ᤂᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤀ᤺ᤰᤋᤧ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄”
MAR 10:49 ᤕᤧᤛᤢᤖᤧ ᤂᤧᤴ ᤀ᤺ᤰᤋᤧᤒᤠ ᤂᤧᤵᤛᤢᤸᤗᤧ ᤕᤧᤶᤛᤡᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤂᤧᤴ ᤔᤡᤰᤑ᤺ᤶᤒᤧᤴ ᤔᤧᤔᤧᤳᤋᤢ. “ᤜᤦ. ᤛ᤺ᤳᤋᤧ᤹ᤀᤥ᥄ ᤛᤡᤰᤛᤠᤶᤒᤧᤸᤗᤧ ᤁᤧᤀᤢ᤺ᤳᤋᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤐᤥᤃᤧ᤹᥄”
MAR 10:50 ᤂᤧᤸᤗᤧ ᤁᤢᤛᤢᤱᤄᤣ᤺ᤰᤘᤠ᤺ᤴ ᤌᤡᤰᤗᤧᤵᤔᤠᤱ ᤗᤠᤵᤑᤢᤛᤢᤀᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤧᤛᤢᤖᤥ ᤐᤣ॥
MAR 10:51 ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ ᤌᤧᤔᤠ ᤆᤥᤃᤢᤱ ᤐᤡᤏᤧᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤣ᥅” ᤂᤧᤸᤗᤧ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤱᤅᤠᤖ॥”
MAR 10:52 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹᥄ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹ᤖᤥ॥” ᤂᤡᤔᤥ ᤂᤧᤴ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤛ᤺ᤳᤋᤧᤖ ᤕᤧᤛᤢᤖᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤌᤠᤛᤡᤱᤗᤥ॥
MAR 11:1 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤖᤢᤛᤗᤧᤔ ᤏᤡ᤺ᤳᤋᤠᤱᤒᤠ ᤈᤤᤋᤢᤏ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱᤒᤠ ᤒᤧᤌᤑᤠᤃᤣ ᤏᤢ ᤒᤧᤌᤠᤏᤡ ᤔᤧᤵᤔᤏᤠᤒᤠ ᤐᤠᤱᤈᤢᤶ ᤏᤡ᤺ᤳᤋᤠᤱ ᤔᤧᤃᤧᤖᤧ. ᤜᤧᤰᤁᤩᤠᤱ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ.
MAR 11:2 “ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹॥ ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧᤛᤠ ᤀᤠᤵᤑᤠᤸᤗᤧᤀᤠᤱ ᤔᤧᤴᤕᤢᤰᤁᤣ ᤁᤧᤘᤠ᤹ᤒᤠ ᤀᤍᤱᤛᤠᤎᤡᤰ ᤀᤡᤔᤧᤄᤣ᤺ᤰᤂᤢᤀᤠᤱ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤁᤳᤏᤠ ᤑᤧᤳᤋᤧᤳᤇᤧ᤹॥
MAR 11:3 ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠ᤺ᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤴ ᤀᤠᤏᤡᤃᤧ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤜᤠᤖᤠᤀᤣ ᤂᤢᤏᤧ᤹ ᤕᤠᤱᤏᤠ ᤏᤢ᤺ᤰᤋᤢ᤹ᤖᤥ ᤔᤧᤳᤋᤧᤇᤧ᤹ᤀᤥ॥”
MAR 11:4 ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤡᤸᤗᤧ ᤛᤧᤰᤂᤠᤀᤣ ᤗᤳᤇᤠ ᤜᤡᤶᤒᤣᤛᤠᤱ ᤀᤍᤱᤛᤠ᤺ᤴ ᤀᤡᤔᤧᤄᤣ᤺ᤰᤂᤢᤀᤠᤱ ᤗᤠᤶᤔᤥ ᤕᤧᤒᤧᤒᤠ ᤏᤡ᤺ᤛᤧᤳᤇᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤧᤖᤧᤳᤇᤢᤖ ᤐᤳᤇᤧᤳᤇᤡᤸᤗᤧ
MAR 11:5 ᤂᤧᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢᤛᤡ. “ᤁᤴ ᤀᤍᤱᤛᤠ᤺ᤴ ᤌᤣᤀᤠᤱ ᤁᤧᤗᤧᤳᤇᤢᤒᤠᤒᤣ᥅”
MAR 11:6 ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤔᤧᤳᤋᤢᤛᤡᤒᤠ ᤜᤧᤰᤁᤣᤀᤣ ᤏᤥᤃᤵ ᤐᤡᤖᤧᤳᤇᤢᤀᤠᤱ ᤂᤧᤴ ᤔᤏᤠᤜᤠ᤹ᤖᤧ ᤐᤣ᤺ᤰᤔᤠ ᤔᤧᤒᤠᤱᤄᤢᤛᤡᤖᤥ॥
MAR 11:7 ᤂᤧᤱᤜᤠ᤹ᤖᤧ ᤂᤧᤴ ᤀᤍᤱᤛᤠ᤺ᤴ ᤕᤧᤛᤢᤖᤥ ᤋᤠᤖᤧᤳᤇᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤳᤜᤠ᤹ ᤂᤧᤴ ᤀᤍᤱᤛᤠ᤺ᤸᤗᤧ ᤁᤢᤀᤣ᤺ᤰᤁᤥ ᤔᤧᤏᤧᤛ᤻ᤛᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤕᤢᤰᤋᤢ॥
MAR 11:8 ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤳᤜᤠ᤹ ᤗᤠᤶᤔᤥ ᤔᤧᤓᤧᤛᤢ॥ ᤁᤢᤓᤠᤖᤧᤃ ᤂᤧᤴ ᤂᤡᤖᤡᤗᤠᤶ ᤁᤢᤓᤧᤰᤘᤠᤏᤢᤒᤠ ᤛᤡᤱ ᤐᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤖᤥ॥
MAR 11:9 ᤂᤢᤏᤧ᤹ ᤁᤢᤍᤃᤡ ᤏᤢ ᤁᤢᤀᤣᤃᤠᤱ ᤁᤧᤒᤵᤐᤠ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤀ᤺ᤰᤋᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤖᤥ॥
MAR 11:10 ᤀᤠᤏᤡ᤹ ᤌᤠ᤺ᤰᤌᤧᤒᤠ ᤍᤠᤀᤢᤍ ᤜᤠᤱᤅᤡᤸᤗᤧᤴ ᤁᤧᤍᤠ᤺ᤒᤠ ᤜᤠᤱᤈᤢᤶᤔᤡᤴ ᤔᤢ᤹ᤀᤡᤛᤠᤶᤔᤡᤸᤗᤧ ᤁᤢᤎᤡᤶ ᤐᤥ᤺ᤱᤗᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄”
MAR 11:11 ᤜᤧᤰᤁᤣᤗ᤹ᤖᤡᤰ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥ ᤐᤣᤀᤠᤱ ᤔᤠᤱᤜᤡᤶᤔᤥ ᤗᤠ᤺ᤛᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤂᤡᤖᤡ ᤋᤠᤰᤁᤴᤍᤧᤖ ᤁᤧᤖᤧᤰ ᤀᤥᤔᤧᤳᤋᤢᤛᤡ. ᤁᤖ ᤏᤠᤶᤎᤧ ᤐᤣᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤒᤧᤌᤠᤏᤡ ᤐᤠᤱᤈᤢᤶᤔᤥ ᤏᤢ᤺ᤰᤂᤧ ᤐᤣᤖᤥ॥
MAR 11:12 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤒᤧᤌᤠᤏᤡᤗᤠᤶ ᤕᤖᤢᤛᤗᤧᤔ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤁᤢᤛᤧᤳᤗᤠ᤺ᤰᤋᤧ॥
MAR 11:13 ᤔᤠ᤺ᤱᤄᤠᤗᤠᤶ ᤐ᤺ᤳᤇᤣ᤹ᤒᤢᤱᤔᤠᤴ ᤛᤖᤡᤳ ᤕᤠᤖᤡᤰ ᤏᤡ᤺ᤛᤢᤀᤠᤱ ᤁᤢᤈᤠ᤹ ᤌᤥ᤺ᤰᤋᤧᤀᤠᤱ ᤐᤳᤐᤡ ᤑᤠ᤹ᤀᤠᤱ ᤂᤧᤵᤔᤥ ᤐᤣᤀᤠᤱ ᤀᤥᤔᤧᤳᤋᤢᤸᤗᤧ ᤁᤢᤓᤧᤰᤘᤠᤖᤰ ᤐᤳᤇᤧ ᤁᤖ ᤁᤢᤈᤠ᤹ ᤔᤧᤒᤳᤇᤧᤴ. ᤌᤣᤀᤠᤱᤓᤧᤸᤗᤧ ᤐ᤺ᤳᤇᤣ᤹ ᤌᤥ᤺ᤰᤔᤠ ᤕᤧᤶ ᤔᤧᤴᤍᤠᤀᤣ ᤘᤕᤧ॥
MAR 11:14 ᤕᤧᤛᤢᤖᤧ ᤂᤧᤴ ᤐ᤺ᤳᤇᤣ᤹ᤒᤢᤱᤔᤠᤴ ᤔᤧᤳᤋᤢ. “ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤁᤧᤈᤠ᤹ ᤔᤧᤎᤥ᤺ᤰᤏᤧᤴᤗᤖᤥ॥” ᤁᤴ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤔᤧᤄᤧᤵᤛᤢ॥
MAR 11:15 ᤜᤧᤰᤁᤩᤠᤱ ᤕᤖᤢᤛᤗᤧᤔ ᤔᤧᤃᤧᤖᤧᤀᤠᤱ ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤐᤣ. ᤜᤧᤰᤁᤩᤠᤱ ᤂᤧᤵᤔᤥ ᤆᤡᤃ᤺ᤰᤘᤠ ᤁᤧᤛᤱᤒᤠ ᤁᤧᤀᤡᤱᤒᤠᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ॥ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤗᤧᤰᤔᤠ ᤛᤠᤵᤏᤧᤳᤋᤡᤴ ᤏᤢ ᤐᤢᤳᤋᤢ᤺ᤰᤁᤣ ᤁᤧᤛᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤏᤠ᤺ᤴ ᤗᤧᤰᤂᤢᤒᤡᤖᤢᤛᤡᤖᤥ॥
MAR 11:16 ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶ ᤗᤰᤂᤢᤶᤔᤥ ᤗᤠᤱᤄᤣ᤺ᤰᤔᤠᤖ ᤆᤡᤃ᤺ᤰᤘᤠ ᤋᤣ᤹ᤔᤠ ᤋᤠ᤺ᤵᤔᤠ ᤛᤠᤰᤋᤢᤛᤡᤖᤥ॥
MAR 11:17 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥ᤺ᤱ.’ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥”
MAR 11:18 ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤕᤧᤛᤢ᤺ᤴ ᤀᤠᤰᤂᤣᤗ᤹ᤖᤡᤰ ᤛᤧᤵᤔᤠᤒᤣ ᤑᤠ᤹ᤀᤠᤱ ᤗᤠᤶ ᤁᤥ᤺ᤵᤔᤠ ᤔᤧᤜᤣ᤺ᤰᤋᤢ॥ ᤁᤖ ᤂᤧᤱᤜᤠ᤹ ᤔᤧᤃᤡᤛᤧ. ᤌᤣᤀᤠᤱᤓᤧᤸᤗᤧ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤘᤕᤧᤖᤥ॥
MAR 11:19 ᤜᤧᤰᤁᤩᤠᤱ ᤏᤠᤶᤎᤧᤀᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤶᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤖᤥ॥
MAR 11:20 ᤁᤢᤏᤠᤶᤍᤠ᤺ᤵᤔᤠ ᤂᤧᤴ ᤗᤠᤶᤔᤥ ᤔᤧᤒᤣ᤺ᤸᤗᤧ ᤔᤡ᤺ᤵᤔᤠᤒᤠ ᤐ᤺ᤳᤇᤣ᤹ᤒᤢᤱᤔᤠᤴ ᤁᤢᤒᤢᤱᤔᤥᤏᤢᤀᤣ ᤜᤣᤖᤧᤀᤠᤱ ᤛᤩᤧᤒᤠ ᤔᤧᤏᤡ᤺ᤛᤢᤖᤥ॥
MAR 11:21 ᤕᤧᤛᤢᤖᤧ ᤐᤠ᤺ᤳᤋᤢᤒᤠᤴ ᤐᤋᤪᤢᤛᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤥᤔᤧᤳᤋᤧ᤹᥄ ᤂᤧᤴ ᤛᤠᤱᤃᤪᤠ ᤁᤧᤔᤧᤳᤋᤢᤒᤠ ᤐ᤺ᤳᤇᤣ᤹ᤒᤢᤱᤔᤠᤱᤃ ᤀᤡᤗᤧᤔᤧᤀᤠᤱ ᤛᤩᤧᤖᤥ॥”
MAR 11:22 ᤕᤧᤛᤢᤖᤧ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤧᤶᤔᤧ᤹᥄ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤏᤡᤱᤘᤠ᤹ᤀᤥ ᤆᤵᤆᤡ ᤔᤧᤴᤈᤥ᤺ᤰᤁᤣ. ᤁᤴ ᤁᤥ᤺ᤰᤔᤠᤴ ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤀᤥ ᤏᤛᤠ᤺ᤴ ᤆᤥᤃᤢᤀᤠᤱ ᤐᤠ᤺ᤳᤋᤢ᤹. ᤂᤧᤱᤃ ᤁᤢᤗᤠᤃᤡ ᤐᤥ᤺ᤱᤅᤣᤖᤥ॥
MAR 11:24 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤁᤧᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤂᤥ᤺ᤛᤢᤶᤒᤧ᤹ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤄᤥ᤺ᤛᤢᤶᤗᤥ॥
MAR 11:25 ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹. ᤂᤧᤴᤏᤡᤴ ᤗᤧᤵᤔᤡ ᤐᤡᤖᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥ ((ᤁᤖ ᤂᤡᤏᤡ᤹ ᤗᤧᤵᤔᤡ ᤁᤧᤶᤒᤡᤖᤢᤶᤔᤡᤴᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤶᤒᤡᤖᤡᤴᤗᤥ॥))”
MAR 11:27 ᤂᤧᤱᤜᤠ᤹ ᤕᤠᤶᤔᤥ ᤕᤖᤢᤛᤗᤧᤶᤔᤥ ᤔᤧᤍᤩᤧ॥ ᤕᤧᤛᤢ᤺ᤴ ᤔᤠᤱᤜᤡᤶ ᤗᤰᤂᤢᤶᤔᤥ ᤋᤠᤰᤁᤴᤏᤢ ᤘᤕᤧᤸᤗᤧ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤍᤩᤧᤀᤠᤱ
MAR 11:28 ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹᥅ ᤁᤴ ᤕᤢᤰᤁᤡᤴ ᤜᤠ᤺ᤳᤗᤧ ᤁᤧᤒᤡᤖᤧ᥅”
MAR 11:29 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤗᤳᤇᤠ ᤛᤣ᤺ᤴᤗᤠᤵᤌᤡᤰ ᤛᤣ᤺ᤴᤍᤥ᤺ᤏᤡᤱᤗᤥ॥ ᤕᤠᤵᤔᤡ ᤏᤥᤃᤵ ᤀᤠᤒᤡᤖᤧᤶᤔᤧ᤹ᤀᤥ. ᤜᤧᤰᤁᤩᤠᤱᤗᤰ ᤌᤧᤔᤠ ᤕᤢᤰᤁᤡᤸᤗᤧ ᤀᤡᤱᤃᤠ᤹ ᤕᤠ᤺ᤶᤒᤰ ᤆᤥᤃᤢᤱ. ᤂᤡᤏᤡ᤹ ᤔᤧᤳᤏᤡᤱᤗᤥ॥
MAR 11:30 ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤔᤠ ᤁᤢᤕᤢᤰᤁᤡᤴ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤒᤡ. ᤀᤡ ᤔᤏᤠᤗᤠᤶᤒᤡ᥅ ᤕᤠᤵᤔᤡ ᤀᤠᤔᤧᤳᤋᤧᤶᤔᤧ᤹᥄”
MAR 11:31 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠ᤺ᤴ ᤔᤧᤎᤰᤋᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ‘ᤏᤡᤱᤘᤠ᤹ᤑᤢᤔᤠᤱᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤌᤣᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤛᤣ᤺ᤴᤀᤠᤗᤠᤵ॥
MAR 11:32 ᤁᤖ ‘ᤔᤏᤠᤜᤠ᤹ᤗᤠᤶᤗᤥ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤔᤏᤠᤜᤠ᤹ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤢᤜᤢᤴᤏᤠ᤺ᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹॥”
MAR 11:33 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤂᤧᤴ ᤀᤡᤱᤃᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥”
MAR 12:1 ᤕᤧᤛᤢ᤺ᤴ ᤂᤧᤱᤜᤠ᤹ᤏᤢ ᤂᤧᤍᤠ᤹ᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤢᤴᤇᤣ᤺ᤴ ᤔᤏᤠᤎᤡᤰᤗᤧ ᤗᤳᤇᤠ ᤀᤡᤰᤁᤥ ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤢᤀᤠᤱ ᤁᤢᤄᤡᤖᤡ ᤗᤢᤱᤎᤠᤰ ᤛᤧᤳᤋᤢᤀᤠᤱ ᤑᤠᤅᤢ. ᤜᤧᤰᤁᤩᤠᤱ ᤁᤢᤗᤢᤶᤔᤥ ᤗᤢᤶᤒᤠ᤺ᤳ ᤋᤕᤢᤀᤠᤱ ᤂᤧᤵᤔᤥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠ ᤋᤧᤴᤎᤡᤰ ᤆᤥᤃᤢ॥ ᤀᤡᤰ ᤁᤥᤔᤠ ᤕᤠᤰᤛᤠᤎᤡᤰᤁᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤁᤢᤓᤪᤧ᤺ᤱ ᤗᤰ ᤂᤥ᤺ᤔᤠᤖᤧ ᤗᤠᤃᤡ ᤀᤡᤰᤔᤛᤠᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤗᤠᤶᤍᤡ᤺ᤰ ᤆᤥ᤺ᤰᤛᤧ ᤐᤣᤖᤥ॥
MAR 12:2 ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤋᤩᤧ᤺ᤸᤗᤧ ᤁᤢᤗᤰ ᤗᤠ᤺ᤛᤧ ᤁᤢᤛᤣᤘᤠᤖᤥᤒᤠᤎᤡᤰ ᤀᤡᤰᤔ᤺ᤒᤠᤜᤠ᤹ᤖᤥ ᤐᤠᤱᤄᤢᤖᤥ॥
MAR 12:3 ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤂᤢᤏᤧ᤹ᤃ ᤔᤧᤜᤡᤵᤋᤢᤀᤠᤱ ᤌᤣᤀᤠᤱ ᤔᤧᤶᤒᤡᤀᤣ ᤜᤠᤒᤠ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥
MAR 12:4 ᤕᤠᤶᤔᤥ ᤂᤧᤴ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤘᤣ᤹ᤛ᤻ᤔᤠ ᤛᤣᤘᤠᤖᤥᤒᤠᤴ ᤐᤠᤱᤄᤢ॥ ᤂᤧᤴᤏᤠᤱ ᤁᤢᤎᤧᤃᤣ᤺ᤰᤐᤥ ᤔᤧᤄᤠᤰᤂᤢᤖ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢ॥
MAR 12:5 ᤕᤠᤶᤔᤥ ᤘᤣ᤹ᤛ᤻ᤔᤠ ᤛᤣᤘᤠᤖᤥᤒᤠᤴ ᤐᤠᤱᤄᤢ. ᤜᤧᤰᤁᤩᤠᤱ ᤂᤧᤱᤃ ᤔᤧᤜᤡᤵᤋᤢᤀᤠᤱ ᤔᤧᤛᤧᤖᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤘᤣ᤹ ᤘᤣ᤹ ᤕᤖᤡᤰ ᤛᤣᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡᤸᤗᤧ ᤁᤢᤓᤠ ᤔᤧᤜᤡᤵᤋᤢᤛᤡ. ᤁᤢᤓᤠ ᤔᤧᤛᤧᤖᤢᤛᤡᤖᤥ॥
MAR 12:6 ᤂᤧᤴ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤗᤳᤌᤡᤰᤗᤰ ᤁᤢᤛ᤻ᤛᤠ᤺ ᤘᤕᤧ॥ ᤀᤠᤸᤗ ᤁᤴ ᤀᤠᤛ᤻ᤛᤠ᤺ᤴ ᤐᤠᤱᤄᤢᤱᤅᤡᤸᤗᤧᤃ ᤛᤧᤰᤂᤠᤛᤠᤱ ᤁᤢᤏᤠ ᤔᤧᤛᤠ᤹ᤖᤢᤒᤡᤗᤠ ᤑᤠ᤹ᤀᤠᤱ ᤀᤡ᤺ᤳᤋᤢᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤐᤠᤱᤄᤢᤖᤥ॥
MAR 12:7 ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. ‘ᤁᤱᤃ ᤁᤢᤶᤒᤠᤖᤧ ᤁᤢᤗᤰ ᤁᤧᤄᤥ᤺ᤒᤠᤖᤥ. ᤁᤴ ᤛᤧᤖᤢᤶᤔᤠᤱ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤜᤢᤰᤁᤠᤵᤐᤠᤛᤡᤖᤥ॥’
MAR 12:8 ᤜᤧᤰᤁᤩᤠᤱ ᤁᤢᤛ᤻ᤛᤠ᤺ᤴᤏᤠᤱ ᤔᤧᤜᤡᤵᤋᤢ ᤔᤧᤛᤧᤖᤢᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤥᤗᤠᤶ ᤗᤠ᤺ᤰᤁᤠᤳ ᤗᤠᤵᤔᤧᤓᤢᤛᤢᤖᤥ॥”
MAR 12:9 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤛᤣ᤺ᤴᤗᤠᤵᤋᤢᤛᤡ. “ᤀᤠᤸᤗ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤴ ᤋᤠᤀᤠᤱ ᤂᤧᤱᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ᤹ᤒᤣ᥅ ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤧᤖᤧᤰ ᤛᤧᤖᤢᤛᤡᤀᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤘᤣ᤹ ᤔᤏᤠᤜᤠ᤹ ᤐᤡᤖᤢᤛᤡ᤹ᤖᤥ॥
MAR 12:10 ᤁᤴ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤏᤡᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ‘ᤗᤢᤱᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ ᤁᤠᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤁᤢᤶᤔᤠ ᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
MAR 12:11 ᤁᤱᤃ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤆᤥᤃᤢᤒᤠᤖᤥ. ᤜᤧᤰᤁᤩᤠᤱ ᤁᤴ ᤀᤠᤏᤡ᤹ ᤏᤡ᤺ᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤆᤥ᤺ᤰᤗᤥ॥’”
MAR 12:12 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤋᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤂᤧᤍᤠ᤹ᤀᤥ ᤂᤧᤱᤜᤠ᤹ ᤁᤢ᤹ᤀᤡᤁᤧᤓᤧᤶᤒᤠ ᤀᤡᤰᤔᤛᤠᤒᤠᤜᤠ᤹ᤏᤢ ᤋᤱᤄᤢᤛᤡᤒᤠᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢ॥ ᤁᤖ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤃᤡᤖᤢᤛᤡᤀᤠᤱ ᤂᤢᤏᤧ᤹ ᤔᤧᤗᤧᤖᤢᤀᤠᤱ ᤔᤧᤒᤣᤖᤥ॥
MAR 12:13 ᤂᤧᤸᤗᤧ ᤁᤢᤀᤣᤃᤠᤱ ᤁᤢᤓᤠ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤐᤠ᤺ᤴᤏᤥ ᤋᤧᤶᤔᤠᤀᤠᤱ ᤕᤧᤛᤢ᤺ᤴ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤧᤒᤠᤱᤄᤢᤛᤡ॥
MAR 12:14 ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤛᤧᤰᤂᤠ ᤐᤠ᤺ᤴᤗᤰ ᤁᤧᤒᤠ᤺ᤳᤗᤥ॥ ᤂᤧᤏᤧ᤹ᤃ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥᤀᤠᤱ ᤁᤧᤶᤒᤳᤏᤧᤴ. ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤁᤧᤴᤇᤧᤴᤍᤢᤴᤇᤡᤴ॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤛᤧᤰᤂᤠᤀᤣ ᤁᤧᤜᤢ᤹ᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤔᤧᤳᤋᤧ᤹–ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤜᤢᤱᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤀᤠᤶᤒᤡᤏᤧᤴᤒᤡ᥅”
MAR 12:15 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡ᤺ᤛᤢᤀᤠᤱ ᤛᤣ᤺ᤴᤍᤥᤛᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤐᤠ᤺ᤴᤏᤥ ᤋᤧᤶᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤕᤠᤱᤀᤡᤳᤇᤡ᤺ᤴ ᤑᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤀᤥᤔᤧᤳᤋᤢᤱ ᤛᤠ᤹ᤖᤢᤱ॥”
MAR 12:16 ᤂᤧᤱᤜᤠ᤹ᤖᤧ ᤔᤧᤓᤧᤳᤋᤢᤀᤠᤱ ᤕᤧᤛᤢᤖᤧ ᤂᤧᤴ ᤀᤥᤔᤧᤳᤋᤢᤀᤠᤱ ᤛᤣ᤺ᤴᤍᤥᤛᤢᤛᤡ. “ᤁᤴ ᤕᤠᤱᤀᤡᤳᤇᤡᤀᤥ ᤜᤠ᤺ᤳᤗᤧ ᤁᤢᤀᤡᤳᤇᤠᤵ ᤏᤢ ᤁᤢᤒᤠ᤺ᤴᤛᤠᤵ ᤐᤵᤐᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤈᤖᤧᤸᤗᤧᤴ ᤐᤳᤗᤥ॥”
MAR 12:17 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤛᤡᤈᤖᤗᤧ ᤁᤢᤒᤠ᤺ᤴᤜᤠ᤹ ᤛᤡᤈᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤡᤖᤧᤶᤔᤧ᤹ᤀᤥ॥” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥
MAR 12:18 ᤂᤧᤵᤔᤥ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤜᤥ᤺ᤵ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤛᤍᤢᤁᤡᤜᤠ᤹ ᤔᤧᤍᤩᤧᤀᤠᤱ
MAR 12:19 ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤔᤥᤛᤠᤖᤧᤃ ᤀᤰᤂᤣᤗ᤹ᤖᤡᤰ ᤛᤠᤵᤋᤢ ᤀᤠᤒᤡᤖᤧᤀᤠᤱ ᤐᤳ–‘ᤀᤠᤳᤋᤡᤸᤗᤧ ᤁᤢᤶᤓᤢ᤹ᤀᤡᤴ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤡ᤹᤺. ᤂᤧᤸᤗᤧ ᤁᤢᤴᤛᤠ᤹ᤖᤧ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥ᤺ᤱ॥ ᤜᤧᤰᤁᤩᤠᤱ ᤁᤢᤶᤓᤢ᤹ᤖᤧ ᤁᤢᤗᤠᤃᤡ ᤛᤠᤃᤵᤔᤠ ᤐᤥ᤺ᤱᤗᤥ॥’
MAR 12:20 ᤀᤠᤸᤗ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤕᤧ॥ ᤋᤢᤶᤒᤠᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤩᤧᤖᤥ॥
MAR 12:21 ᤜᤧᤰᤁᤩᤠᤱ ᤛᤖᤢᤶᤒᤧᤸᤗᤧᤀᤠᤱ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢ. ᤁᤖ ᤂᤧᤴᤏᤠᤱ ᤁᤢᤛ᤻ᤛᤠ᤺ ᤔᤧᤴᤘᤠ᤹ᤀᤣ ᤛᤩᤧ॥ ᤜᤧᤰᤁᤩᤠᤱ ᤕᤠᤱᤛᤖᤢᤶᤒᤧᤸᤗᤧᤀᤠᤱ ᤂᤧᤴ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢ. ᤂᤧᤴᤏᤠᤱ ᤁᤢᤛ᤻ᤛᤠ᤺ ᤔᤧᤴᤘᤠ᤹ᤀᤣ ᤛᤩᤧᤖᤥ॥
MAR 12:22 ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤛᤠᤱ ᤂᤢᤏᤡ᤹ ᤛᤠᤔᤧᤴᤘᤠ᤹ᤀᤣ ᤁᤧᤖᤧᤰ ᤔᤧᤛᤩᤧ॥ ᤁᤢᤏᤢᤵᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤠᤱ ᤛᤩᤧᤖᤥ॥
MAR 12:23 ᤀᤠᤸᤗ ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤀᤠᤳᤋᤡᤸᤗᤧ ᤁᤢᤔᤣ᤺ᤳ ᤐᤥ᤺ᤱᤒᤠᤒᤣ᥅ ᤂᤧᤴᤏᤢᤃ ᤏᤢᤛᤡᤀᤣ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤔᤧᤘᤕᤧ॥”
MAR 12:24 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤐᤡᤷᤒᤣ᤺ᤶᤒᤠ ᤁᤧᤈᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴᤏᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤖᤥ॥
MAR 12:25 ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧᤃ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ. ᤁᤖ ᤂᤧᤱᤜᤠ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡ᤺ᤰᤏᤧ ᤔᤧᤒᤥ᤺ᤱᤗᤥ॥
MAR 12:26 ᤀᤠᤸᤗ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤧᤴᤏᤥ ᤂᤡᤏᤡ᤹ ᤔᤥᤛᤠᤖᤧ ᤁᤢᤛᤠᤵᤐᤴᤏᤡᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤂᤧᤵᤔᤥ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. ‘ᤀᤡᤱᤃᤠ᤹ᤃ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ॥’
MAR 12:27 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤜᤠ᤹ᤖᤧᤴ ᤔᤧ᤺ᤴ. ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤂᤡᤏᤡ᤹ᤃ ᤛᤠ᤹ᤖᤡᤰᤁᤣ ᤐᤡᤷᤒᤣ᤺ᤶᤒᤠ ᤁᤧᤈᤩᤧᤀᤡᤀᤠᤱ ᤁᤧᤘᤕᤡ᤹ᤖᤥ॥”
MAR 12:28 ᤂᤧᤵᤔᤥᤒᤠ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰᤗᤧ ᤐᤠ᤺ᤴ ᤔᤧᤎᤰᤋᤧᤒᤠ ᤂᤧᤵᤛᤢᤛᤡ॥ ᤂᤧᤸᤗᤧ ᤕᤧᤛᤢᤖᤧ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤍᤠ᤺ᤒᤠ ᤏᤥᤃᤵ ᤐᤡᤖᤢᤛᤡᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤡ᤺ᤵᤔᤠ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤀᤠᤳᤋᤡᤱᤃ᥅”
MAR 12:29 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤠ᤺ᤵᤔᤠᤀᤣ ᤁᤧᤒᤥ᤺ᤱᤒᤠ ᤀᤡᤱᤈᤠ᤺ᤱᤅᤡᤴ ᤁᤴᤗᤥ–‘ᤀᤡᤛᤪᤠᤀᤡᤗᤡᤛᤣ. ᤂᤧᤵᤛᤧᤶᤔᤧ᤹ᤀᤥ᥄ ᤀᤠᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ. ᤌᤡᤰᤗᤰ ᤘᤠ᤹ᤖᤥ॥
MAR 12:30 ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ ᤁᤧᤖᤧᤰ ᤁᤧᤛᤰᤔᤠᤛᤠᤶᤔᤡᤸᤗᤧ. ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ. ᤁᤧᤖᤧᤰ ᤁᤧᤎᤢᤶᤔᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤧ᤹ᤀᤥ॥’
MAR 12:31 ᤏᤡᤛᤡᤃᤣ᤺ᤰᤐᤠ ᤀᤡᤱᤈᤠ᤺ᤱᤅᤡᤴ ᤁᤴᤗᤥ–‘ᤀᤠᤵᤑᤣ᤺ᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’ ᤁᤴᤜᤠ᤹ᤏᤢ᤺ᤸᤗᤧ ᤕᤶᤒᤠ ᤘᤣ᤹ ᤀᤡᤱᤈᤠ᤺ᤱᤅᤡᤱᤃ ᤌᤣᤀᤠᤱ ᤜᤥ᤺ᤵᤗᤥ॥”
MAR 12:32 ᤂᤧᤴ ᤔᤏᤠ᤺ᤸᤗᤧ ᤕᤧᤛᤢ᤺ᤴ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤖᤥ॥ ᤀᤠᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤍᤠᤱᤒᤠᤖᤥ॥ ᤘᤣ᤹ ᤔᤠᤱ ᤔᤧᤜᤥ᤺ᤵᤗᤥ ᤑᤠ᤹ᤀᤠᤱ ᤛᤠ᤹ᤖᤡᤰ ᤁᤧᤍᤱᤒᤠ ᤁᤧᤒᤠ᤺ᤳᤋᤢᤖᤥ॥
MAR 12:33 ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤏᤡᤱᤘᤠ᤹ᤀᤡᤸᤗᤧ. ᤁᤧᤖᤧᤰ ᤌᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤏᤢ ᤐᤠᤱᤓᤣ᤹ᤛᤠᤒᤠᤜᤠ᤹ ᤀᤠᤒᤠᤅᤣ ᤜᤧᤰᤁᤣ ᤗᤢᤱᤔᤠ᤹ ᤋᤢᤰᤔᤠᤛᤡᤃ. ᤁᤧᤖᤧᤰ ᤔᤡᤎᤡᤱᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤘᤣ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤏᤢ᤺ᤸᤗᤧᤀᤠᤱ ᤕᤶᤒᤠ ᤀᤡᤱᤈᤠ᤺ᤱᤗᤥ॥”
MAR 12:34 ᤂᤧᤸᤗᤧ ᤛᤡᤱᤛᤡᤱᤅᤠᤱ ᤏᤥᤃᤵ ᤐᤡᤖᤢᤒᤠ ᤏᤡ᤺ᤛᤢᤀᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤠᤶᤒᤠ ᤔᤠ᤺ᤱᤄᤠ ᤁᤧᤜᤥ᤺ᤵᤗᤥ॥ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤠᤱᤎᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠ᤺ᤴ ᤛᤣ᤺ᤴᤍᤥ᤺ᤔᤠ ᤀᤠ᤺ᤴᤇᤡᤱᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥”
MAR 12:35 ᤕᤧᤛᤢᤖᤧ ᤔᤠᤱᤜᤡᤶ ᤗᤰᤂᤢᤶᤔᤥ ᤜᤢ᤹ᤖᤢᤛᤡᤖ ᤘᤕᤧᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤰᤂᤣᤗ᤹ᤖᤡᤰ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅
MAR 12:36 ᤍᤠᤀᤢᤍ ᤜᤠᤱᤅᤡᤸᤗᤧ ᤛᤣᤛᤣᤔᤠᤱᤗᤠᤶ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤀᤡᤱᤃᤠ᤹ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤂᤧᤏᤧ᤹ ᤕᤢᤅᤧ᤹ᤀᤥ॥’
MAR 12:37 ᤍᤠᤀᤢᤍ ᤜᤠᤱᤅᤡᤸᤗᤧᤀᤣ ᤂᤢᤏᤧ᤹ ᤀᤠᤍᤠᤱᤒᤣ ᤔᤧᤳᤋᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤐᤥ᤺ᤱᤒᤠᤒᤣ᥅” ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤖ ᤔᤧᤄᤧᤵᤛᤢᤖᤥ॥
MAR 12:38 ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤔᤧᤳᤋᤢᤛᤡ. “ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤱᤜᤠ᤹ ᤁᤣ᤺ᤶᤒᤠ ᤁᤣ᤺ᤶᤒᤠ ᤗᤃᤣᤵ ᤔᤧᤈᤠᤰᤂᤢᤀᤠᤱ ᤏᤠᤏᤢᤃᤳᤏᤠ ᤗᤠᤱᤔᤧᤄᤣ᤺ᤰᤗᤥ. ᤜᤧᤰᤁᤩᤠᤱ ᤐᤠᤱᤈᤢᤶ ᤗᤢᤶᤔᤥ ᤛᤣᤘᤠ ᤔᤧᤔᤧᤳᤋᤡᤃᤧᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ
MAR 12:39 ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤛᤠᤓᤠᤱᤈᤠᤀᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥
MAR 12:40 ᤂᤧᤱᤜᤠ᤹ᤖᤧ ᤔᤣᤔᤣᤍᤢᤔᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤔᤧᤏᤠᤵᤋᤢᤛᤡ᤹. ᤁᤖ ᤏᤢ᤺ᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒᤠ ᤁᤣ᤺ᤶᤒᤠ ᤋᤢᤘᤠ ᤔᤧᤈᤥᤃᤢ᤹॥ ᤂᤧᤱᤜᤠ᤹ᤖᤧᤃ ᤛᤧᤰᤂᤠᤀᤣ ᤁᤧᤛᤠᤰᤐᤠ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥”
MAR 12:41 ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤜᤢᤰᤛᤥᤕᤠᤱ ᤁᤧᤕᤠᤰᤐᤠᤜᤠ᤹ ᤀᤥᤔᤧᤳᤋᤢᤛᤡᤖ ᤕᤢᤅᤧᤖᤥ॥ ᤂᤧᤵᤔᤥ ᤕᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤔᤧᤍᤩᤧᤀᤠᤱ ᤕᤖᤡᤰ ᤕᤠᤱᤜᤠ᤹ ᤔᤧᤕᤠᤰᤋᤢ.
MAR 12:42 ᤁᤖ ᤂᤧᤵᤔᤥ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤎᤡᤰ ᤋᤩᤧᤀᤠᤱ ᤕᤠᤱ ᤏᤧᤳᤇᤡ ᤕᤠᤰᤋᤢ॥
MAR 12:43 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤀᤡᤴ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧ ᤘᤣ᤹ᤜᤠ᤹ᤏᤢ᤺ᤸᤗᤧ ᤕᤖᤡᤰ ᤜᤢᤰᤛᤥᤕᤠᤱ ᤕᤠᤰᤋᤢᤀᤠᤱ ᤘᤠ᤹ᤖᤥ॥
MAR 12:44 ᤌᤣᤀᤠᤱᤓᤧᤸᤗᤧ ᤁᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧᤃ ᤂᤢᤏᤡ᤹ ᤁᤧᤕᤥᤒᤠᤀᤠᤱ ᤁᤧᤏᤶᤒᤠ ᤕᤠᤱᤜᤠ᤹ᤀᤣ ᤔᤧᤕᤠᤰᤋᤢ. ᤁᤖ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧᤃ ᤂᤢᤏᤧ᤹ ᤁᤢᤕᤠᤱᤛᤠ᤹ᤔᤥ ᤁᤳᤋᤢᤒᤠ ᤁᤠᤰ ᤆᤠᤔᤠ ᤌᤢᤱᤔᤥᤗᤠᤶ ᤕᤠᤰᤋᤢᤀᤠᤱ ᤘᤠ᤹ᤖᤥ॥”
MAR 13:1 ᤕᤧᤛᤢ᤺ᤴ ᤔᤠᤱᤜᤡᤶᤔᤥᤗᤠᤶ ᤗ᤺ᤴᤍᤧᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤎᤡᤰᤗᤧ ᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤀᤠᤰᤂᤧᤴ ᤕᤔᤩᤶᤒᤠ ᤗᤢᤱᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤜᤡᤶᤜᤠ᤹ᤏᤧᤒᤣ. ᤀᤥᤔᤧᤳᤋᤧ᤹ᤏᤠ᥄”
MAR 13:2 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤴ ᤁᤧᤏᤡ᤺ᤛᤢᤶᤒᤠ ᤜᤡᤶᤜᤠ᤹ ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤁᤠᤰ ᤔᤧᤕ᤺ ᤔᤧᤒᤣ᤺ᤰᤗᤥ॥”
MAR 13:3 ᤜᤧᤰᤁᤩᤠᤱ ᤕᤧᤛᤢ᤺ᤴ ᤔᤠᤱᤜᤡᤶᤔᤡᤸᤗᤧ ᤏᤠᤎᤠ᤺ᤶᤒᤡ ᤈᤤᤋᤢᤏ ᤁᤥ᤺ᤰᤔᤠᤀᤥ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤋᤪᤢᤛ. ᤕᤠᤁᤢᤒ. ᤕᤢᤜᤢᤴᤏᤠ ᤏᤢ ᤀᤠᤴᤍᤪᤡᤕᤠᤛᤖᤧ ᤛᤫᤠ᤺ᤳᤋᤠᤱ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢ.
MAR 13:4 “ᤛᤡᤰᤛᤠᤶᤒᤣ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱᤒᤠᤒᤣ᥅ ᤁᤴ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡ ᤌᤣ ᤔᤡᤰᤛᤣ᤺ᤴ ᤐᤥ᤺ᤱᤒᤣ᥅ ᤕᤠᤵᤔᤡ ᤀᤠᤔᤧᤳᤋᤧ᤹ᤀᤥ॥”
MAR 13:5 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤴᤗᤖᤥ॥
MAR 13:6 ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤀᤠᤔᤡᤱᤅᤥ ᤔᤧᤍᤠᤖᤥ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
MAR 13:7 ᤜᤧᤰᤁᤩᤠᤱ ᤂᤡᤏᤡ᤹ ᤌᤱ ᤏᤢ ᤌᤱᤜᤠ᤹ᤖᤧᤴ ᤜᤕᤱᤁᤡᤸᤗᤡᤱᤜᤠ᤹ ᤁᤧᤄᤧᤵᤛᤢᤶ. ᤁᤖ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥ᤺ᤱᤔᤠᤀᤣ ᤐᤥ᤺ᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥
MAR 13:8 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥ᤺ᤰ. ᤕᤖᤡᤰ ᤗᤠᤈᤣ᤹ᤀᤥ ᤗᤢᤵᤗᤡ ᤌᤠᤱ. ᤜᤧᤰᤁᤩᤠᤱ ᤛᤠᤰ ᤐᤥ᤺ᤰᤗᤥ॥ ᤁᤱᤃ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣᤜᤠ᤹ᤖᤧᤴ ᤁᤢᤜᤣ᤺ᤰᤛᤡᤱᤔᤠᤖᤰᤗᤥ॥
MAR 13:9 ᤂᤡᤏᤡ᤹ᤃ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤧᤶᤍᤧᤶᤛᤡ᤹ᤀᤠᤱ ᤕᤧᤈᤢᤶᤓᤥᤜᤠ᤹ᤀᤥ ᤁᤧᤶᤍᤣ᤹ᤖᤡ᤹. ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤋᤧ᤺ᤶᤓᤢᤰ ᤁᤧᤶᤒᤡᤖᤡ᤹ᤖᤥ॥ ᤁᤱᤃ ᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤠᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤂᤡᤏᤡ᤹ ᤁᤧᤄᤥ᤺ᤛᤢᤶᤒᤠ ᤛᤢᤕᤧᤶᤗᤥ॥
MAR 13:10 ᤁᤖ ᤁᤢᤏᤢᤵᤔᤠ ᤕᤧᤶᤔᤡᤴᤏᤢ᤺ᤸᤗᤧ ᤋᤃᤡ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤛᤢᤏᤠᤀᤡᤱ ᤛᤧ᤺ᤖᤀᤣ ᤐᤥ᤺ᤱᤗᤥ॥
MAR 13:11 ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤍᤧᤶᤛᤡ᤹ᤀᤠᤱ ᤂᤠᤛᤧᤴᤍᤧᤴᤏᤥ ᤂᤠᤛᤧᤴ ᤗᤥ᤺ᤴᤇᤧ ᤁᤧᤶᤍᤣ᤹ᤖᤡᤸᤗᤧ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤋᤃᤡᤛᤠ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤂᤧᤴ ᤕᤧᤶᤔᤥ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤧᤒᤡᤖᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤧᤒᤠ᤺ᤵᤐᤧᤱᤃ ᤂᤡᤏᤡ᤹ ᤔᤧ᤺ᤴᤗᤥ. ᤁᤖ ᤛᤣᤛᤣᤔᤠᤱᤅᤡᤴᤏᤣᤖᤥ॥
MAR 13:12 ᤑᤢ᤹ᤏᤢᤛᤠ᤹ᤜᤠ᤹ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰ. ᤜᤧᤰᤁᤩᤠᤱ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤛᤧᤵᤔᤠ ᤔᤧᤒᤠᤱᤄᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤐᤠ-ᤔᤠᤜᤠ᤹ ᤛᤠ᤺ᤜᤠ᤹ᤖᤧ. ᤜᤧᤰᤁᤩᤠᤱ ᤛᤠ᤺ᤜᤠ᤹ ᤐᤠ-ᤔᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰᤁᤠᤱ ᤛᤧᤵᤔᤠ ᤔᤧᤒᤠᤱᤄᤢᤛᤡ᤹ᤖᤥ॥
MAR 13:13 ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹. ᤁᤖ ᤀᤠᤳᤋᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤌᤖᤢ᤹. ᤂᤧᤸᤗᤧᤀᤣ ᤛᤧᤴᤗᤵ ᤂᤥ᤺ᤛᤢ᤹ᤖᤥ॥
MAR 13:14 ᤜᤧᤰᤁᤩᤠᤱ ᤛᤡᤰᤁᤧᤗᤧ᤺ᤱᤒᤠᤴ ᤘᤠ᤹ᤔᤠ ᤔᤧᤴᤏᤢ᤹ᤔᤏᤠᤒᤠ ᤋᤧᤴᤏᤥ ᤕᤧᤵᤐᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤖᤥ॥ ᤁᤴ ᤐᤠ᤺ᤴᤏᤡᤴ ᤛᤠᤵᤗᤠ ᤁᤧᤏᤡ᤺ᤵᤐᤠᤜᤠ᤹ᤖᤧ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄
MAR 13:15 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶ ᤛᤡᤃᤠᤱ ᤔᤧᤗᤠ᤺ᤳᤏᤧᤴᤗᤖᤥ॥
MAR 13:16 ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠᤴ ᤜᤠᤖᤠ᤹ ᤁᤢᤛᤢᤱᤄᤣ᤺ᤰᤘᤠ ᤗᤠ᤺ᤛᤧ ᤁᤢᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥
MAR 13:17 ᤂᤧᤴ ᤕᤧᤴᤜᤠ᤹ᤃ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤗᤥ᥄ ᤆᤢᤱᤘᤠ᤺ᤶᤔᤠ ᤕᤧᤶᤔᤥ ᤂᤡᤏᤡ᤹ ᤂᤧᤳᤇᤡᤱᤔᤠ ᤔᤧᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥
MAR 13:19 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤀᤠᤱᤎᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣ᤺ᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥ᤺ᤱᤅᤣ ᤘᤠ᤹. ᤜᤧᤰᤁᤩᤠᤱ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤒᤥ᤺ᤱᤏᤧᤸᤗᤥ॥
MAR 13:20 ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤴ ᤕᤧᤴᤜᤠ᤹ ᤋᤠᤱᤛᤠ ᤔᤧᤈᤥᤃᤢᤴᤏᤡᤸᤗᤧᤃ ᤀᤠᤳᤋᤡᤴᤏᤠᤱ ᤜᤡᤱᤔᤠ ᤔᤧᤛᤢᤰᤏᤧᤴ. ᤁᤖ ᤂᤢᤏᤧ᤹ ᤛᤣᤃᤢᤛᤡᤒᤠᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤁᤴ ᤕᤧᤴᤜᤠ᤹ ᤋᤠᤱᤛᤠ ᤆᤥᤃᤢᤀᤠᤱ ᤘᤠ᤹ᤖᤥ॥
MAR 13:21 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ. ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤵᤔᤥ ᤘᤠ᤹ ᤀᤡᤃᤪ ᤂᤢᤏᤧ᤹ ᤂᤧᤵᤔᤥ ᤘᤠ᤹ᤖᤥ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤍᤠ᤺ᤸᤗᤧ ᤏᤛᤠ᤺ᤴ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥
MAR 13:22 ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤐᤠ ᤂᤪᤡᤛ᤻ᤋᤜᤠ᤹ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤂᤢᤏᤡ᤹ ᤛᤢᤰᤛᤢᤰ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
MAR 13:23 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤁᤴ ᤐᤠ᤺ᤴᤜᤠ᤹ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥”
MAR 13:24 “ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤋᤢᤰᤂᤣ᤺ᤴ ᤀᤣᤃᤠᤱ ‘ᤏᤠᤶᤔᤡᤸᤗᤧ ᤀᤥ᤺ᤳᤋᤡ ᤔᤧᤒᤡᤖᤢᤴᤏᤠᤱ ᤂᤠᤔᤠᤰᤗᤥ. ᤗᤠᤒᤠᤸᤗᤧ ᤀᤥ᤺ᤳᤋᤡ ᤔᤧᤒᤡᤖᤢᤴᤗᤥ.
MAR 13:25 ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤔᤰᤔᤧᤎᤠ᤺ᤖᤥ. ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤔᤧᤕᤱᤗᤥ॥’
MAR 13:26 ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤂᤠᤵᤔᤡ᤺ᤳᤋᤥ ᤕᤶᤒᤠ ᤔᤢᤰᤛᤠᤶ ᤜᤧᤰᤁᤩᤠᤱ ᤔᤡᤔᤡᤍᤡᤱᤅᤡᤴᤏᤢ ᤕᤢ᤺ᤖ ᤐᤵᤐᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤏᤡ᤺ᤛᤢ᤹ᤖᤥ॥
MAR 13:27 ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤃᤢᤛᤡᤒᤠ ᤔᤏᤠᤜᤠ᤹ ᤛᤢᤶᤛᤧ ᤁᤠᤰ ᤐᤡᤛᤠᤱᤗᤠᤶ ᤋᤠᤱᤛᤠᤰᤐᤠᤸᤗᤧ ᤂᤥ᤺ᤵᤋᤢᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤠ᤺ᤰᤋᤢᤒᤠᤀᤥ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢ᤺ᤛᤢᤛᤡ᤹ᤖᤥ॥”
MAR 13:28 “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ–ᤂᤧᤸᤗᤧ ᤁᤢᤒᤥᤖᤠ᤺ᤰᤜᤠ᤹ᤗᤠᤶᤒᤠ ᤁᤢᤏ᤺ᤰ ᤗ᤺ᤶᤔᤠ ᤜᤣ᤺ᤰᤁᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖᤥ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ॥
MAR 13:29 ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
MAR 13:30 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡ᤺ᤏᤧᤴᤗᤥ॥
MAR 13:31 ᤋᤠᤱᤛᤠᤰᤐᤠᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣ᤺ᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥”
MAR 13:32 “ᤀᤠᤸᤗ ᤂᤧᤴ ᤕᤧᤶ ᤏᤢ ᤕᤧᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱ ᤑᤠ᤹ᤀᤠᤱ ᤀᤠᤳᤋᤡᤸᤗᤧᤀᤠᤱ ᤔᤧᤏᤡ᤺ᤛᤢᤴ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠ ᤏᤢ ᤏᤡᤱᤘᤠ᤹ᤑᤢᤛᤠ᤺ᤸᤗᤧᤀᤠᤱ ᤔᤧᤏᤡ᤺ᤛᤢᤴᤗᤥ. ᤁᤖ ᤐᤠᤏᤢᤍᤡᤱ ᤐᤠ᤺ᤸᤗᤧᤖᤰ ᤏᤡ᤺ᤛᤢ᤹ᤖᤥ॥
MAR 13:33 ᤜᤧᤰᤁᤣ᤺ᤸᤗᤧ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤧᤴᤏᤡᤴ ᤀᤠᤵᤑᤠᤸᤗᤧ ᤋᤠ᤺ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
MAR 13:34 ᤁᤴ ᤐᤠ᤺ᤴᤏᤡᤱᤃ ᤌᤡᤰ ᤔᤠ᤺ᤱᤄᤠ ᤗᤠᤶᤍᤡ᤺ᤰ ᤆᤥ᤺ᤰᤛᤧ ᤁᤧᤒᤣ᤺ᤰᤐᤠ ᤔᤏᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤸᤗᤧ ᤁᤠᤰ ᤁᤢᤛᤣᤘᤠᤖᤥᤒᤠᤜᤠ᤹ ᤂᤢᤏᤡ᤹ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤕᤠ᤺ᤶᤒᤰᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤀᤠᤱ ᤁᤢᤜᤡᤶᤎᤠ᤺ᤱᤜᤠ᤹ ᤂᤢᤏᤡ᤹ ᤜᤢᤰᤁᤥ ᤐᤡᤖᤢᤛᤡ᤹. ᤜᤧᤰᤁᤩᤠᤱ ᤌᤡᤰ ᤜᤡᤶ ᤁᤧᤃᤥ᤺ᤒᤠ ᤛᤣᤘᤠᤖᤥᤒᤠᤴ ᤜᤡᤶ ᤁᤥᤔᤠ ᤐᤠᤱᤄᤢᤀᤠᤱ ᤂᤢᤏᤧ᤹ ᤗᤠᤶᤍᤡ᤺ᤰᤁᤥ ᤐᤣ᤺ᤰᤗᤥ॥
MAR 13:35 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤡᤶᤍᤠᤱᤒᤠᤴ ᤕᤢ᤺ᤴᤇᤡᤰ ᤋᤠᤒᤡ. ᤛᤧᤳᤗᤢᤶᤓᤰᤁᤡᤸᤗᤧ ᤋᤠ᤺ᤒᤡ. ᤀᤡᤱᤘᤠ ᤁᤠ᤺ᤸᤗᤧ ᤋᤠᤒᤡ ᤀᤡ ᤂᤠᤀᤥ᤺ᤳᤋᤡᤸᤗᤧ ᤋᤠ᤺ᤒᤡ᥅ ᤀᤠᤵᤑᤠᤸᤗᤧ ᤏᤢ᤺ᤱ ᤋᤠ᤺ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
MAR 13:36 ᤂᤢᤏᤧ᤹ ᤜᤰᤆᤄᤳ ᤋᤠ᤺ᤸᤗᤧ ᤂᤡᤏᤡ᤹ ᤁᤧᤀᤡᤵᤛᤡᤀᤠᤱ ᤁᤧᤏᤧᤛ᤻ᤛᤡᤒᤠ ᤁᤧᤴᤍᤢᤔᤡᤴᤏᤡᤖᤥ॥
MAR 13:37 ᤂᤧᤸᤗᤧ ᤆᤥᤃᤢᤸᤗᤧ. ᤂᤡᤏᤡ᤹ ᤔᤧᤳᤏᤡᤱᤒᤠ ᤜᤧᤰᤁᤣᤀᤣ ᤁᤧᤖᤧᤰ ᤔᤏᤠᤜᤠ᤹ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤢᤱᤛᤡᤱᤗᤥ॥”
MAR 14:1 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤏᤢ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤕᤧᤴ ᤋᤠ᤺ᤔᤠ ᤏᤡᤕᤧᤴᤗᤰ ᤘᤕᤧ॥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤀᤠᤰᤂᤣᤗ᤹ᤖᤡᤰ ᤛᤫᤠ᤺ᤳᤋᤠᤱ ᤋᤧᤶᤔᤠᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤗᤠᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧᤖᤥ॥
MAR 14:2 ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤋᤱᤏᤠᤶᤔᤥᤃ ᤀᤠᤏᤡ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤁᤴ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ᤖᤥ॥”
MAR 14:3 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤒᤧᤌᤠᤏᤡ ᤐᤠᤱᤓᤣ᤹ᤀᤥ ᤗᤥᤃᤣ᤹ ᤋᤢᤰᤔᤠᤗᤠᤶ ᤁᤧᤘᤣ᤺ᤵᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤕᤧᤖᤥ॥ ᤜᤧᤰᤁᤩᤠᤱ ᤆᤠᤈᤠᤏᤢ ᤕᤢᤅᤧᤸᤗᤧ ᤔᤧᤴᤇᤢᤔᤠ᤹ᤎᤡᤰ ᤀᤡᤔᤧᤸᤗᤢᤱᤒᤠ ᤐᤠᤱᤒᤥ᤺ᤰ ᤑᤢᤱᤏᤠᤶ ᤏᤡ᤺ᤱᤃᤣ᤹ ᤁᤧᤕᤠᤰᤐᤠ ᤗᤧᤶᤓᤠᤗᤢᤱ ᤐᤷᤕᤠᤔᤠᤏᤢ ᤋᤩᤧᤀᤠᤱ ᤐᤷᤕᤠᤔᤠᤸᤗᤧ ᤁᤢᤛᤢ᤺ᤵᤔᤧᤴ ᤑᤢᤴᤍᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤕᤧᤛᤢᤖᤧ ᤁᤢᤎᤧᤃᤣ᤺ᤰᤐᤥ ᤜᤢᤰᤂᤢᤖᤥ॥
MAR 14:4 ᤁᤖ ᤂᤧ᤹ᤕᤥ ᤁᤧᤘᤠ᤹ᤒᤠ ᤁᤢᤓᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤌᤣᤀᤠᤱ ᤆᤠᤛᤥ᤺ᤰ ᤐᤠᤱᤔᤏᤠᤒᤠᤒᤣ᥅
MAR 14:5 ᤁᤱᤃ ᤁᤡᤵ ᤛᤢᤶᤛᤡ (᥉᥆᥆) ᤕᤢᤵᤐᤠᤕᤠᤱᤅᤥ ᤛᤱᤔᤠᤀᤠᤱ ᤂᤧᤴ ᤕᤠᤱᤅᤡᤴ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤔᤏᤠᤛᤡᤸᤗᤧ ᤐᤥ᤺ᤰᤂᤧᤒᤠ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤓᤧ᤺ᤰᤋᤢᤖᤥ॥
MAR 14:6 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣᤀᤠᤱ ᤂᤧᤴ ᤁᤧᤓᤧ᤺ᤰᤋᤢᤶᤒᤠᤒᤣ᥅ ᤂᤧᤴ ᤋᤢᤰᤂᤣ ᤔᤧᤈᤠ᤺ᤳᤋᤧᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧᤃ ᤀᤠᤗᤠᤃᤡ ᤏᤢ᤺ᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥
MAR 14:7 ᤕᤠᤱᤃᤧᤛᤠ᤹ᤒᤠᤜᤠ᤹ᤃ ᤂᤡᤏᤡ᤹ᤏᤢᤀᤣ ᤛᤍᤠᤍᤡᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤛᤠᤱ ᤁᤶᤒᤪᤠᤱ ᤔᤧᤵᤔᤠ ᤁᤧᤛᤢᤰᤋᤢᤶᤛᤡᤶᤗᤥ. ᤁᤖ ᤀᤡᤱᤃᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴᤗᤥ॥
MAR 14:8 ᤂᤧᤸᤗᤧ ᤀᤡᤱᤃᤠ᤹ ᤏᤠᤛᤡᤱᤃᤧᤴ ᤀᤠᤎᤰᤁᤡᤴ ᤗᤢᤵᤔᤠᤖᤧ ᤗᤠᤃᤡ ᤋᤃᤡᤀᤣ ᤀᤠᤎᤧᤃᤣ᤺ᤰᤐᤥ ᤑᤢᤱᤏᤠᤶ ᤜᤢ᤺ᤳᤋᤢᤀᤠᤱ ᤘᤠ᤹ᤖᤥ॥
MAR 14:9 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤸᤗᤧ. ᤂᤧᤵᤔᤥ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤈᤧᤰᤂᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ᤹ᤖᤥ॥”
MAR 14:10 ᤜᤧᤰᤁᤩᤠᤱ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤕᤧᤛᤢ᤺ᤴ ᤀᤡᤱᤗᤧᤰᤋᤢᤱ ᤑᤠ᤹ᤀᤠᤱ ᤐᤣᤖᤥ॥
MAR 14:11 ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤕᤜᤢᤍᤠ᤺ᤴ ᤕᤠᤱ ᤐᤡᤀᤠᤛᤡᤃᤧ ᤑᤠ᤹ᤀᤠᤱ ᤔᤠᤱᤔᤧᤜᤧᤰᤋᤢ॥ ᤂᤧᤴ ᤕᤧᤶᤔᤠᤱᤎᤥ ᤕᤜᤢᤍᤠ᤺ᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥
MAR 14:12 ᤜᤧᤰᤁᤩᤠᤱ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣ᤺ᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤔᤧᤸᤗᤢᤰᤛᤠ᤺ᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤌᤡᤶ ᤘᤕᤧ॥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ. ᤀᤠᤏᤡ᤹ ᤀᤠᤳᤋᤥ ᤐᤣ᤺ᤰᤔᤠᤀᤠᤱ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤛᤠᤓᤠᤱᤈᤠ᤺ᤴ ᤕᤠᤖᤡᤵ ᤆᤥ᤺ᤰᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤃᤳᤋᤢᤒᤣ᥅”
MAR 14:13 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤕᤖᤢᤛᤗᤧᤶᤔᤥ ᤐᤠᤱᤄᤢᤛᤡ. “ᤂᤡᤴᤇᤡ᤹ ᤕᤧᤰᤕᤰᤁᤥ ᤁᤧᤗᤠ᤺ᤳᤇᤡᤖ ᤁᤧᤒᤳᤇᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ ᤁᤧᤒᤱᤒᤠ ᤔᤏᤠᤎᤡᤰᤗᤧ ᤁᤧᤍᤢᤶᤛᤡ᤹॥ ᤂᤧᤴ ᤗᤠ᤺ᤵᤐᤠ ᤜᤡᤶᤔᤥ ᤌᤠᤖᤡᤰ ᤋᤡᤶᤍᤧᤳᤇᤧ᤹॥ ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤴ ᤔᤧᤳᤋᤧᤳᤇᤧ᤹. ‘ᤀᤠᤏᤡᤃᤧ ᤛᤡᤰᤛᤠᤶᤒᤠᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧᤀᤠᤱ ᤁᤧᤘᤠ᤹ᤖᤥ. ᤋᤖᤣ ᤕᤢᤱᤔᤠ ᤕᤠᤰᤑᤠᤱᤅᤡᤴ ᤀᤠᤳᤋᤥ ᤏᤧᤒᤣ᥅ ᤂᤧᤵᤔᤥ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤛᤠᤓᤠᤱᤈᤠ᤺ᤴ ᤆᤠᤱᤗᤥ॥’
MAR 14:15 ᤜᤧᤰᤁᤩᤠᤱ ᤂᤧᤸᤗᤧ ᤂᤡᤴᤇᤡ᤹ ᤌᤥ᤺ᤛ᤻ᤔᤠ ᤂᤠᤶᤗᤥᤀᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤗᤳᤇᤠ ᤕᤶᤒᤠ ᤕᤠᤰᤑᤠᤱᤅᤡᤴ ᤀᤥᤛᤣ᤺ᤴᤃᤧᤎᤠᤰᤛᤡ᤹॥ ᤂᤧᤵᤔᤥᤀᤣ ᤀᤠᤏᤡ᤹ ᤛᤠᤓᤠᤱᤈᤠ᤺ᤴ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥”
MAR 14:16 ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤣᤃᤧᤳᤇᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤋᤢᤔᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤛᤠᤓᤠᤱᤈᤠ᤺ᤴ ᤕᤠᤖᤡᤵ ᤆᤥᤃᤧᤳᤇᤢ॥
MAR 14:17 ᤂᤧᤴ ᤕᤢ᤺ᤴᤇᤡᤰ ᤕᤧᤛᤢ᤺ᤴ ᤏᤢ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧᤖᤥ॥
MAR 14:18 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤋᤧᤴᤏᤥ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ᤏᤢ ᤁᤧᤈᤠᤒᤠᤖ ᤁᤧᤕᤢᤱᤒᤠ ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”
MAR 14:19 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧᤀᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤛᤣ᤺ᤴᤍᤥ᤺ᤔᤠ ᤔᤧᤜᤣ᤺ᤰᤋᤢ. “ᤍᤠᤱᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠ᤺ᤴ ᤀᤡᤱᤃᤠ᤹ᤀᤠᤒᤡ᥅”
MAR 14:20 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤌᤡᤰ-ᤏᤧᤳᤋᤥ ᤀᤠᤸᤗᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤈᤠᤒᤠᤖ ᤁᤧᤕᤢᤱᤒᤠᤎᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥
MAR 14:21 ᤔᤧᤴᤇᤠᤶᤛᤠ᤺ᤱᤃ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤛᤡ᤺ᤔᤠᤀᤣ ᤐᤥ᤺ᤱᤗᤥ॥ ᤁᤖ ᤔᤧᤴᤇᤠᤶᤛᤠ᤺ᤴ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧ ᤛᤩᤧᤖᤥ᥄ ᤂᤧᤱᤃ ᤛᤠᤔᤧᤘᤠ᤺ᤴᤇᤡᤱᤅᤡᤴᤏᤡᤸᤗᤧᤀᤣ ᤏᤢᤖᤧᤒᤠᤖᤥ॥”
MAR 14:22 ᤂᤧᤱᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤥ. ᤁᤴ ᤀᤡᤱᤃᤠ᤹ ᤏᤠᤛᤡᤱᤃᤧᤴ ᤀᤠᤎᤰᤗᤥ॥”
MAR 14:23 ᤜᤧᤰᤁᤩᤠᤱ ᤆᤸᤗᤱᤏᤠ ᤂᤥᤷᤕᤠ᤺ᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤡᤖᤢᤛᤡᤀᤠᤱ ᤁᤧᤖᤧᤰᤗᤧ ᤔᤧᤎᤢᤅᤢᤖᤥ॥
MAR 14:24 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤆᤥ᤺ᤰᤔᤏᤠᤒᤠ ᤁᤢᤛᤱ ᤔᤠᤱᤜᤢᤵᤗᤧᤴ ᤀᤠᤔᤠᤰᤂᤡ᤹ᤖᤥ॥ ᤁᤴ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤘᤠᤜᤵᤔᤠ ᤑᤠ᤹ᤀᤠᤱ ᤘᤠᤍᤣ᤺ᤴᤗᤥ॥
MAR 14:25 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤀᤡᤴᤏᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤕᤠᤶᤔᤥ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤅᤠᤴᤗᤥ॥”
MAR 14:26 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠ ᤛᤠᤶᤗᤥᤎᤡᤰ ᤛᤠᤶᤔᤧᤗᤥ᤺ᤖᤧᤀᤠᤱ ᤈᤤᤋᤢᤏ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥
MAR 14:27 ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤗᤧᤖᤡ᤹ᤀᤠᤱ ᤁᤧᤒᤡᤃᤡ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. ‘ᤀᤡᤱᤃᤠ᤹ ᤔᤧᤸᤗᤢᤰᤁᤶᤒᤠᤴ ᤜᤡᤵᤋᤢᤱ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤸᤗᤢᤰᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤛᤧᤖᤥ॥’
MAR 14:28 ᤁᤖ ᤀᤡᤱᤃᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤅᤠᤀᤠᤱ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗ ᤌᤢᤶᤔᤥ ᤐᤣ᤺ᤰᤁᤠᤖᤥ॥”
MAR 14:29 ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤁᤧᤖᤧᤰᤗᤧ ᤂᤧᤏᤧ᤹ ᤁᤧᤶᤗᤧᤳ ᤁᤧᤶᤎᤠ᤺ᤛᤠᤱ ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤧᤴᤗᤥ॥”
MAR 14:30 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤀᤠᤰᤂᤥ ᤛᤧᤴᤍᤡᤰ ᤏᤡᤗᤧᤱ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”
MAR 14:31 ᤁᤖ ᤐᤋᤪᤢᤛᤖᤧ ᤜᤠᤍᤡᤱ ᤌᤰᤋᤧᤖ ᤔᤧᤳᤋᤢ. “ᤔᤧ᤺ᤴᤗᤥ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤛᤡ᤺ᤔᤠ ᤐᤥ᤺ᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤧᤴᤗᤥ॥” ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤒᤠ᤺ᤳᤋᤢᤖᤥ॥
MAR 14:32 ᤜᤧᤰᤁᤩᤠᤱ ᤂᤧᤱᤜᤠ᤹ ᤃᤧᤋᤛᤔᤏᤡ ᤔᤧᤵᤔᤏᤠᤒᤠ ᤈᤤᤋᤢᤏ ᤛᤡᤱᤗᤠᤀᤥ ᤔᤧᤒᤣ॥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤋᤢᤘᤠ ᤆᤥᤃᤢᤱᤅᤡᤸᤗᤧ ᤂᤡᤏᤡ᤹ ᤁᤵᤔᤥ ᤕᤢᤅᤧᤶᤔᤧ᤹ᤀᤥ॥”
MAR 14:33 ᤜᤧᤰᤁᤩᤠᤱ ᤂᤢᤏᤧ᤹ ᤐᤋᤪᤢᤛ. ᤕᤠᤁᤢᤒ. ᤏᤢ ᤕᤢᤜᤢᤴᤏᤠᤛᤡ ᤋᤣ᤹ᤖᤢᤛᤡ॥ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤏᤡᤱᤛᤠᤶᤔᤥ ᤌᤩᤧ॥
MAR 14:34 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤔᤡᤱᤘᤠᤖᤧ ᤕᤥ᤺ᤴᤍᤠᤱᤅᤠᤱ ᤛᤡ᤺ᤔᤠᤗᤡᤱᤎᤥ ᤌᤠᤖᤡᤰ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤡᤏᤡ᤹ ᤁᤵᤔᤥ ᤆᤠᤱᤈᤠᤱᤅᤠᤱ ᤕᤢᤅᤧᤶᤔᤧ᤹ᤀᤥ॥”
MAR 14:35 ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤛᤠᤶᤒᤥ᤺ᤴ ᤑᤴᤇᤡᤱᤗ ᤋᤢᤘᤠ ᤆᤥᤃᤢ. “ᤐᤥ᤺ᤱᤏᤧ ᤑᤠ᤹ᤃᤪ ᤁᤴ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤀᤠᤛᤶᤍᤠᤱ ᤔᤧᤍᤠᤏᤧᤴᤗ॥
MAR 14:36 ᤐᤠᤏᤢᤍᤡᤱ ᤀᤠᤶᤒᤦ. ᤂᤧᤏᤧ᤹ ᤁᤧᤗᤠᤃᤡᤃ ᤁᤠᤰ ᤐᤥ᤺ᤱᤔᤠ ᤛᤢᤰ॥ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣ᤺ᤛᤧ᤹ᤀᤥ. ᤁᤖ ᤜᤧᤰᤁᤣᤛᤠᤱ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤧ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤗᤖᤥ॥”
MAR 14:37 ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧᤸᤗᤧ ᤂᤧᤴ ᤛᤢᤶᤒᤪᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤃ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ॥ ᤜᤧᤰᤁᤩᤠᤱ ᤐᤋᤪᤢᤛᤧᤴ ᤔᤧᤳᤋᤢ. “ᤛᤡᤔᤥᤏᤣ. ᤌᤣᤀᤠᤱ ᤁᤧᤀᤡᤵᤛᤧᤒᤠ᥅ ᤁᤢᤔᤢᤰᤌᤡᤰᤁᤠᤱ ᤆᤠᤱᤈᤠᤱᤅᤠᤱ ᤕᤢᤱᤔᤠ ᤁᤧᤴᤇᤢᤰᤋᤢᤴᤒᤡ᥅
MAR 14:38 ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤠᤱᤈᤠᤱᤅᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤡᤸᤗᤧ ᤏᤢ᤺ᤖᤡᤰᤁᤠᤱ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤶ. ᤁᤖ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤔᤧᤎᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤁᤧᤴᤇᤢᤰᤋᤢᤶᤔᤡᤸᤗᤥ॥”
MAR 14:39 ᤕᤠᤶᤔᤥ ᤂᤢᤏᤧ᤹ ᤐᤣᤀᤠᤱ ᤀᤠᤴᤍᤧ᤺ᤴ ᤜᤧᤰᤁᤣ ᤐᤠ᤺ᤳᤋᤢᤖ ᤋᤢᤘᤠ ᤆᤥᤃᤢ॥
MAR 14:40 ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤡᤰᤕᤢ᤺ᤔᤠᤸᤗᤧ ᤛᤠ᤹ᤖᤡᤰ ᤋᤖᤢᤛᤡᤀᤠᤱ ᤔᤧᤘᤕᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤰᤂᤣ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥
MAR 14:41 ᤜᤧᤰᤁᤩᤠᤱ ᤂᤢᤏᤧ᤹ ᤛᤢᤶᤗᤧᤱᤅᤥ ᤏᤢ᤺ᤰᤂᤧ ᤑᤧᤖᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤸᤗᤛᤠᤱ ᤁᤧᤏᤠᤛᤡᤀᤠᤱ ᤁᤧᤀᤡᤵᤛᤡᤀᤠᤱ ᤁᤧᤏᤧᤛ᤻ᤛᤡᤒᤡ᥅ ᤀᤠᤸᤗ ᤐᤥ᤺ᤰᤂᤧᤖᤥ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠ᤺ᤔᤠ ᤕᤧᤶᤔᤡᤴ ᤋᤩᤧᤖᤥ॥
MAR 14:42 ᤐᤥᤃᤧᤶᤔᤧ᤹. ᤁᤵᤔᤥᤗᤠᤶ ᤐᤡᤃᤡ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤧᤴ ᤂᤠ ᤑᤧᤴᤗ ᤐᤳᤗᤥ᥄”
MAR 14:43 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤂᤧᤵᤔᤥ ᤁᤧᤖᤧ ᤋᤩᤧ॥ ᤂᤢᤏᤧ᤹ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤋᤠᤓᤣ ᤏᤢ ᤋᤰᤁᤠ᤺ᤳ ᤁᤧᤃᤵᤐᤠ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤘᤕᤧᤖᤥ॥
MAR 14:44 ᤀᤠᤸᤗ ᤕᤧᤛᤢ᤺ᤴ ᤀᤡᤱᤃᤧᤗᤧᤰᤐᤧᤸᤗᤧ ᤀᤠᤳᤋᤡᤴ ᤔᤏᤠ᤺ᤴ ᤀᤡᤱᤃᤠ᤹ ᤆᤢᤵ ᤔᤧᤳᤋᤢᤱ. ᤂᤧᤴ ᤋᤧᤶᤛᤧᤶᤔᤧ᤹ᤀᤠᤱ ᤋᤣ᤹ᤖᤧᤶᤔᤧ᤹ ᤗ᤹ᤖᤡᤰ ᤔᤡᤰᤛᤣ᤺ᤴ ᤐᤡᤖᤢᤛᤡᤀᤠᤱ ᤘᤕᤧᤖᤥ॥
MAR 14:45 ᤕᤜᤢᤍᤠ᤺ᤴ ᤁᤧᤖᤧᤏᤢᤔᤧ᤺ᤴᤏᤣ ᤕᤧᤛᤢᤖᤥ ᤐᤣᤀᤠᤱ “ᤛᤡᤰᤛᤠᤶᤒᤣ” ᤔᤧᤳᤋᤢᤖ ᤆᤢᤵ ᤔᤧᤳᤋᤢᤖᤥ॥
MAR 14:46 ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤜᤢᤰ ᤔᤧᤕᤠᤰᤋᤢᤀᤠᤱ ᤔᤧᤍᤧᤶᤛᤢᤖᤥ॥
MAR 14:47 ᤂᤧᤵᤔᤥ ᤁᤧᤕᤧᤵᤐᤠᤜᤠ᤹ᤀᤥ ᤌᤡᤰᤁᤡᤸᤗᤧ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠᤴ ᤆᤧᤵᤋᤢᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥
MAR 14:48 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣ ᤜᤧᤰᤁᤩᤠᤱ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅
MAR 14:49 ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ. ᤁᤖ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤧᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥”
MAR 14:50 ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤰᤔᤧᤎ᤺ᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤖᤥ॥
MAR 14:51 ᤂᤧᤵᤔᤥ ᤌᤡᤰ ᤏᤠᤗᤡᤱᤃᤧᤴ ᤌᤠᤱᤒᤧᤴᤏᤡᤸᤗᤧ ᤛᤢᤱᤄᤣ᤺ᤰᤘᤠ᤺ᤴ ᤜᤧᤶᤛᤡᤱᤅᤧᤀᤠᤱ ᤕᤧᤛᤢᤖᤧ ᤁᤢᤀᤣ᤺ᤰ ᤁᤢᤀᤣ᤺ᤰ ᤋᤡ᤺ᤰᤋᤢᤖ ᤘᤕᤧ॥ ᤂᤧᤴ ᤔᤏᤠᤛᤢᤶᤜᤠ᤹ᤖᤧ ᤂᤧᤴ ᤋᤧᤶᤔᤠ ᤔᤧᤃᤥ᤺ᤳᤋᤢᤸᤗᤧ
MAR 14:52 ᤛᤢᤱᤄᤣ᤺ᤰᤘᤠ᤺ᤴ ᤐᤰᤌ᤺ᤀᤠᤱ ᤗᤧᤰᤆᤠᤒᤧᤎᤡ᤺ᤰ ᤗᤥ᤺ᤰᤋᤧ ᤐᤣᤖᤥ॥
MAR 14:53 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤖᤥ॥
MAR 14:54 ᤐᤋᤪᤢᤛᤧᤸᤗᤧᤀᤠᤱ ᤔᤠ᤺ᤱᤄᤠᤗᤠᤶ ᤕᤧᤛᤢ᤺ᤴ ᤋᤡᤶᤍᤢᤖ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤁᤧᤖᤧ॥ ᤂᤧᤵᤔᤥ ᤛᤣᤘᤠᤖᤥᤒᤠᤜᤠ᤹ᤏᤢ ᤔᤡᤈᤠ᤹ᤏᤢ ᤕᤢᤅᤧ॥
MAR 14:55 ᤀᤠᤸᤗ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤁᤠᤰ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤕᤧᤛᤢ᤺ᤴ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤑᤥᤋᤩᤠᤒᤠ ᤀᤠᤵᤋᤡᤰᤜᤠ᤹ ᤔᤧᤃᤥ᤺ᤳᤋᤢ. ᤁᤖ ᤌᤣᤀᤠᤱ ᤔᤧᤱᤄᤥ᤺ᤛᤢᤴᤗᤥ॥
MAR 14:56 ᤕᤖᤡᤰ ᤑᤥᤋᤩᤠᤒᤠ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠᤖᤧ. ᤁᤖ ᤂᤢᤏᤡ᤹ ᤐᤠ᤺ᤴ ᤔᤧᤍᤅᤧᤴᤗᤥ॥
MAR 14:57 ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤔᤧᤒᤥᤃᤧᤀᤠᤱ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤀᤰᤂᤣᤗ᤹ᤖᤡᤰ ᤀᤡᤱᤗᤧᤰ ᤐᤠ᤺ᤴ ᤔᤧᤒᤠ᤺ᤳᤋᤢ.
MAR 14:58 “ᤀᤠᤏᤡᤃᤧ ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤒᤠ ᤂᤧᤵᤛᤢᤶᤒᤧᤖᤥ. ‘ᤁᤴ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤠᤱᤜᤡᤶᤔᤡᤴ ᤕᤛ᤻ᤛᤢᤱᤅᤠᤱ ᤛᤢᤶᤕᤧᤴ ᤀᤣᤃᤠᤱ. ᤔᤏᤠᤜᤠ᤹ᤖᤧ ᤔᤧᤶᤓᤠ᤹ᤀᤣ. ᤘᤣ᤹ ᤔᤠᤱᤜᤡᤶᤔᤡᤴ ᤆᤥᤃᤢᤱᤗᤥ॥’”
MAR 14:59 ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤔᤧᤴᤏᤥ ᤀᤡᤱᤗᤧᤰ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤍᤅᤧᤴᤗᤥ॥
MAR 14:60 ᤜᤧᤰᤁᤣ᤺ᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤐᤥᤃᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤁᤴ ᤔᤏᤠᤜᤠ᤹ᤖᤧ ᤁᤧᤍᤰᤗᤧᤱᤘᤠᤀᤥ ᤐᤡᤖᤧᤳᤇᤢᤒᤠ ᤋᤥ᤺ᤴᤍᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤂᤧᤏᤧ᤹ ᤏᤥᤃᤵ ᤁᤧᤶᤒᤡᤖᤢᤴᤇᤡᤴᤒᤠᤒᤣ᥅”
MAR 14:61 ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤶᤒᤡᤛᤡᤱᤅᤣ ᤛᤫᤠ᤺ᤳ ᤕᤧᤒᤧ॥ ᤕᤠᤶᤔᤥ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤔᤢ᤹ᤀᤡᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤛᤠ᤺ ᤂᤪᤡᤛ᤻ᤋᤏᤧᤒᤡ᥅”
MAR 14:62 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤥᤖᤥ. ᤀᤡᤱᤃᤠ᤹ᤀᤠᤖᤥ᥄ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠᤒᤠ ᤏᤢ ᤛᤠᤱᤃᤪᤠᤶᤐᤣᤍᤠᤱᤅᤥᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤀᤠᤒᤠ ᤁᤧᤏᤡ᤺ᤛᤢᤶᤗᤥ॥”
MAR 14:63 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤠᤰᤁᤧᤴ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤀᤠᤒᤠᤅᤣ ᤁᤢᤍᤣ᤺ᤳᤋᤡᤴ ᤌᤧ᤺ᤰᤂᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤀᤠᤸᤗ ᤀᤠᤏᤡ᤹ ᤘᤣ᤹ ᤋᤥ᤺ᤴᤍᤡᤜᤠ᤹ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅
MAR 14:64 ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗᤥ॥ ᤀᤠᤸᤗ ᤌᤧᤔᤠ ᤁᤧᤀᤡ᤺ᤳᤋᤢᤶᤒᤣ᥅” ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤔᤧᤔᤧᤳᤋᤢ॥
MAR 14:65 ᤜᤧᤰᤁᤩᤠᤱ ᤁᤢᤓᤠᤖᤧ ᤂᤢᤏᤧ᤹ ᤌᤩᤠ᤺ᤳ ᤔᤧᤎᤥ᤺ᤰᤂᤢᤀᤠᤱ ᤁᤢᤓᤠᤖᤧ ᤁᤢᤔᤡᤰᤁᤧᤴ ᤔᤧᤍᤧᤵᤋᤢᤀᤠᤱ ᤂᤢᤏᤡ᤹ ᤜᤢᤰᤐᤢᤳᤋᤡᤸᤗᤧ ᤔᤧᤗᤰᤋᤢᤖ “ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧ᤹. ᤜᤠ᤺ᤳᤗᤧ ᤁᤧᤜᤡᤵᤋᤧᤒᤣ᥅” ᤔᤧᤔᤧᤳᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤔᤧᤜᤡᤵᤋᤢᤖᤥ॥
MAR 14:66 ᤐᤋᤪᤢᤛᤧᤴ ᤕᤥ ᤗᤰᤂᤢᤶᤔᤥ ᤘᤕᤧᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰ ᤂᤧᤵᤔᤥ ᤋᤩᤧᤀᤠᤱ
MAR 14:67 ᤐᤋᤪᤢᤛᤧᤴ ᤔᤡᤈᤠ᤹ᤏᤢ ᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤁᤢᤒᤣᤛᤠᤱ ᤐᤣᤀᤠᤱ ᤏᤢ᤺ᤖᤡᤰ ᤀᤥᤔᤧᤳᤋᤢᤖ ᤔᤧᤳᤋᤢ. “ᤂᤧᤏᤧ᤹ᤃ ᤏᤠᤛᤖᤡ ᤕᤧᤛᤢ᤺ᤴᤏᤢ ᤁᤧᤘᤕᤧ ᤔᤧ᤺ᤶᤒᤡ᥅”
MAR 14:68 ᤁᤖ ᤐᤋᤪᤢᤛᤖᤧ ᤂᤧᤴ ᤏᤠ᤹ᤖᤢᤖ ᤔᤧᤳᤋᤢ. “ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ᥄ ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢᤒᤠ ᤀᤡ᥅” ᤜᤧᤰᤁᤩᤠᤱ ᤂᤢᤏᤧ᤹ ᤗᤠ᤺ᤰᤁᤠᤳ ᤐᤣ᤺ᤰᤔᤠ ᤗᤠᤶᤎᤣ᤺ᤵ ᤗᤧᤵᤔᤠᤱ ᤆᤳᤇᤡᤱ॥ ᤜᤧᤰᤁᤩᤠᤱ ᤒᤠ ᤂᤧᤴ ᤕᤧᤶᤔᤥ ᤀᤡᤱᤘᤠ ᤁᤠ᤺ᤛᤧ॥
MAR 14:69 ᤜᤧᤰᤁᤩᤠᤱ ᤂᤧᤴ ᤛᤣᤘᤠᤖᤥᤔᤠ ᤆᤢᤰᤔᤧᤴ ᤕᤠᤶᤔᤥ ᤋᤩᤧᤀᤠᤱ ᤂᤧᤵᤔᤥ ᤐᤋᤪᤢᤛᤧᤴ ᤏᤡ᤺ᤛᤢᤀᤠᤱ ᤁᤢᤄᤡᤖᤡ ᤁᤧᤕᤧᤵᤐᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤱᤃ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰᤗᤥ॥”
MAR 14:70 ᤁᤖ ᤐᤋᤪᤢᤛᤖᤧ ᤕᤠᤶᤔᤥ ᤏᤠ᤹ᤖᤢ॥ ᤕᤠᤱᤛᤡ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡ᤺ᤛᤢᤀᤠᤱ ᤔᤧᤔᤧᤳᤋᤢ. “ᤛᤧᤰᤂᤠᤛᤠᤱ ᤂᤧᤱᤜᤠ᤹ᤀᤥ ᤂᤧᤏᤧ᤹ ᤌᤡᤰᤏᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤠᤱ ᤃᤠᤗᤡᤗᤗᤠᤶ ᤁᤧᤍᤩᤧᤒᤠᤖᤥ॥”
MAR 14:71 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤔᤠᤱᤜᤧᤰᤛᤡᤱᤗ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤴ ᤜᤠ᤺ᤳ ᤀᤡ ᤑᤠ᤹ᤀᤠᤱ ᤔᤧᤏᤡ᤺ᤛᤢᤱᤅᤡᤴᤗᤥ᥄ ᤂᤡᤏᤡ᤹ ᤌᤧᤔᤠ ᤁᤧᤒᤠ᤺ᤳᤋᤢᤶᤒᤠ ᤀᤡ᥅”
MAR 14:72 ᤂᤡᤔᤥ ᤀᤡᤱᤘᤠ᤺ᤴ ᤏᤡᤛᤡᤃᤣ᤺ᤰ ᤗᤧᤱ ᤁᤠ᤺ᤛᤧᤖᤥ॥ ᤜᤧᤰᤁᤩᤠᤱ ᤐᤋᤪᤢᤛᤖᤧ “ᤏᤡᤗᤧᤱ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ” ᤑᤠ᤹ᤀᤠᤱ ᤕᤧᤛᤢᤖᤧ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤜᤠᤒᤧᤖᤥ॥
MAR 15:1 ᤁᤢᤏᤠᤶᤍᤠ᤺ᤵᤔᤠ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧᤛᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤁᤠᤰ ᤕᤰᤆᤢᤶᤓᤥᤒᤠ ᤔᤏᤠᤜᤠ᤹ ᤆᤢᤶᤗᤢᤱ ᤔᤧᤈᤥᤃᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤡᤔᤧᤄᤣ᤺ᤰᤂᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤥ ᤔᤧᤍᤣ᤹ᤖᤢᤖᤥ॥
MAR 15:2 ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤀᤰᤂᤣ ᤔᤧᤳᤋᤢᤖ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢᤖ ᤁᤧᤒᤳᤗᤥ॥”
MAR 15:3 ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤕᤖᤡᤰ ᤐᤠ᤺ᤴᤏᤥ ᤀᤠᤵᤋᤡᤰ ᤔᤧᤃᤢ᤺ᤳᤋᤢ॥
MAR 15:4 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤀᤥᤔᤧᤳᤋᤧ᤹. ᤁᤶᤔᤩᤠᤰ ᤕᤖᤡᤰ ᤀᤠᤵᤋᤡᤰ ᤁᤧᤶᤃᤢ᤺ᤳᤋᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤌᤣᤀᤠᤱ ᤁᤧᤶᤒᤠ᤺ᤳᤏᤧᤴᤒᤠᤒᤣ᥅”
MAR 15:5 ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤏᤡᤸᤗᤧ ᤐᤡᤗᤠᤋᤛᤖᤧ ᤁᤢᤏᤡᤱᤘᤠ᤹ ᤔᤕᤧᤖᤥ॥
MAR 15:6 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤗᤳᤇᤠ ᤛᤠᤰᤐᤠ ᤁᤧᤎᤠ᤺ᤒᤠ ᤔᤏᤠ᤺ᤴ ᤔᤏᤠᤜᤠ᤹ᤖᤧ ᤗᤧᤖᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤛᤢᤜᤠᤱᤃᤧᤶᤒᤠᤸᤗᤧ ᤗᤧᤵᤔᤠ ᤌᤡᤶ ᤁᤳᤋᤢᤖᤥ॥
MAR 15:7 ᤂᤧᤴ ᤕᤧᤶᤔᤥ ᤒᤖᤒ᤻ᤒᤠᤛ ᤔᤧᤵᤔᤏᤠᤒᤠ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤜᤠᤱᤒᤡᤑᤩᤢᤱ ᤐᤥ᤺ᤰᤂᤧᤸᤗᤧ ᤜᤕᤱ ᤋᤧᤱᤎᤱᤅᤥ ᤘᤣ᤹ ᤔᤏᤠᤜᤠ᤹ᤏᤢ ᤋᤱᤛᤡᤱᤅᤠᤱ ᤕᤖᤡᤰ ᤔᤏᤠᤜᤠ᤹ ᤛᤧᤖᤢᤛᤡᤀᤠᤱ ᤘᤕᤧ॥
MAR 15:8 ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤐᤡᤗᤠᤋᤛᤖᤥ ᤔᤧᤍᤩᤧᤀᤠᤱ ᤛᤍᤠᤍᤡᤱ ᤁᤧᤈᤥᤃᤢᤒᤠ ᤜᤧᤰᤁᤣ ᤆᤥᤃᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ॥
MAR 15:9 ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤕᤜᤢᤍᤡ ᤜᤠᤱᤅᤡᤴ ᤗᤧᤖᤢᤱ ᤐᤡᤏᤡᤱᤒᤡ᥅”
MAR 15:10 ᤌᤣᤀᤠᤱᤓᤧᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤏᤠᤔᤧᤜᤧᤳᤋᤢᤀᤠᤱ ᤂᤢᤏᤧ᤹ᤀᤥ ᤜᤢᤰᤔᤧᤛᤢᤵᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥
MAR 15:11 ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤏᤠᤜᤠ᤹ ᤕᤧᤛᤢᤖᤧ ᤁᤢᤗᤧᤰᤘᤠᤀᤥ ᤒᤖᤒ᤻ᤒᤠᤛᤧᤴᤏᤣ ᤗᤧᤖᤧ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤔᤧᤜᤢᤛᤢᤛᤡᤀᤠᤱ ᤔᤧᤘᤕᤧᤖᤥ॥
MAR 15:12 ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤕᤜᤢᤍᤡ ᤜᤠᤱ ᤁᤧᤔᤧᤳᤋᤢᤶᤒᤠ ᤔᤏᤠ᤺ᤴ ᤀᤡᤱᤃᤠ᤹ ᤌᤣ ᤔᤧᤳᤋᤢᤱᤒᤠᤒᤣ᥅”
MAR 15:13 ᤁᤖ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠᤀᤣ ᤐᤥ᤺ᤱ॥”
MAR 15:14 ᤐᤡᤗᤠᤋᤛᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤌᤣᤀᤠᤱᤒᤣ᥅ ᤂᤧᤸᤗᤧ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤠ᤹ᤒᤣ᥅” ᤁᤖ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄”
MAR 15:15 ᤐᤡᤗᤠᤋᤛᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤒᤖᤒ᤻ᤒᤠᤛᤧᤏ ᤗᤧᤖᤢ ᤐᤡᤖᤢᤛᤡ. ᤁᤖ ᤕᤧᤛᤢ᤺ᤴ ᤋᤧ᤺ᤶᤓᤢᤰ ᤕᤠᤰ ᤐᤠᤱᤄᤢᤛᤡᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤑᤠ᤹ᤀᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤢᤰᤛᤢᤵᤋᤢᤛᤡᤖᤥ॥
MAR 15:16 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤂᤢᤏᤡ᤹ ᤋᤢᤖᤠ ᤕᤰᤁᤥ ᤔᤧᤍᤣ᤹ᤖᤢᤀᤠᤱ ᤂᤧᤵᤔᤥ ᤋᤢᤖᤠᤒᤠ ᤁᤠᤰ ᤌᤰᤛᤢᤒᤠᤜᤠ᤹ ᤁᤢᤄᤡᤖᤡ ᤔᤧᤈᤢᤵᤛᤧ॥
MAR 15:17 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤡᤴ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤐᤖᤠᤴᤗᤠ ᤜᤠᤱᤍᤣ᤺ᤳᤋᤡᤴ ᤔᤧᤈᤠᤰᤋᤢ. ᤋᤡᤱᤃᤪᤣ᤺ᤰ ᤋᤡᤆ᤺ ᤔᤧᤓᤕᤢᤀᤠᤱ ᤔᤧᤄᤢ᤺ᤰᤋᤢ.
MAR 15:18 ᤜᤧᤰᤁᤩᤠᤱ ᤂᤢᤏᤧ᤹ “ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄” ᤔᤧᤔᤧᤳᤋᤢᤖ ᤛᤣᤘᤠ ᤔᤧᤔᤧᤳᤋᤢ॥
MAR 15:19 ᤜᤧᤰᤁᤩᤠᤱ ᤀᤧᤳᤗᤧᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤎᤧᤃᤣ᤺ᤰᤐᤧᤴ ᤔᤧᤄᤠᤰᤂᤢᤖ. ᤌᤩᤠ᤺ᤳ ᤔᤧᤎᤥ᤺ᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤔᤧᤒᤣᤀᤠᤱ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤗ ᤛᤣᤘᤠ ᤔᤧᤔᤧᤳᤋᤢᤖᤥ॥
MAR 15:20 ᤀᤰᤂᤣᤗ᤹ᤖᤡᤰ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤔᤧᤛᤢᤖᤢᤀᤠᤱ ᤂᤧᤴ ᤐᤖᤠᤴᤗᤠ ᤋᤣ᤺ᤳᤋᤡᤴ ᤔᤧᤓᤧᤴᤍᤢᤀᤠᤱ ᤁᤢᤍᤣ᤺ᤳᤋᤡᤴ ᤔᤧᤈᤠᤰᤋᤢ॥ ᤜᤧᤰᤁᤩᤠᤱ ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤔᤧᤍᤣ᤹ᤖᤢᤖᤥ॥
MAR 15:21 ᤂᤧᤴ ᤕᤧᤶᤔᤥ ᤀᤗᤧᤰᤈᤧᤴᤍᤖ ᤏᤢ ᤖᤢᤑᤛᤖᤧ ᤂᤢᤴᤇᤡ᤹ ᤐᤠ᤺ ᤛᤡᤔᤥᤏ ᤔᤧᤵᤔᤏᤠᤒᤠ ᤛᤠᤀᤡᤖᤣᤏᤡ ᤕᤧᤰᤕᤰᤁᤥ ᤁᤧᤕᤢᤱᤒᤧᤴ ᤐᤠᤱᤓᤣ᤹ᤗᤠᤶ ᤑᤧᤖᤧᤖ ᤐᤳᤇᤧᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤍᤢᤔᤢᤀᤠᤱ ᤕᤧᤛᤢᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤛᤠᤰᤁᤧᤸᤗᤧᤰ ᤐᤱᤔᤠ ᤔᤧᤒᤠᤱᤄᤢ॥
MAR 15:22 ᤂᤧᤱᤜᤠ᤹ᤖᤧ ᤃᤗᤃᤌᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢ (ᤃᤗᤃᤌᤠ ᤑᤠ᤹ᤀᤡᤱᤃ ᤔᤡᤰᤂᤥ᤺ᤰᤐᤠ ᤐᤥ᤺ᤱᤗᤥ)॥
MAR 15:23 ᤜᤧᤰᤁᤩᤠᤱ ᤔᤢᤷᤖ ᤔᤧᤵᤔᤏᤠᤒᤠ ᤛᤡᤍᤠ᤹ ᤑᤢᤵᤔᤏᤠᤒᤠ ᤆᤧᤰᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤄᤢ. ᤁᤖ ᤕᤧᤛᤢᤖᤧ ᤔᤧᤎᤢᤅᤢᤴ॥
MAR 15:24 ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ. ᤜᤧᤰᤁᤩᤠᤱ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤋ᤹ᤕᤠ᤺ᤴᤛᤥ᤺ᤴ ᤔᤧᤃᤧᤛᤢᤖᤥ॥
MAR 15:25 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤸᤗᤧ ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡ (᥏) ᤔᤢᤰᤋᤧᤀᤠᤱ ᤘᤕᤧᤖᤥ॥
MAR 15:26 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰ ᤛᤶᤍᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤀᤠᤵᤋᤡᤰ ᤛᤰᤁᤡᤴ ᤔᤧᤛᤠᤵᤋᤢᤀᤠᤱ ᤔᤧᤓᤳᤇᤢ॥
MAR 15:27 ᤂᤢᤏᤧ᤹ᤏᤢᤀᤣ ᤁᤢᤓᤧᤴᤇᤠᤱ ᤏᤢ ᤁᤢᤈᤢᤵᤛᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤑᤠ᤺ᤴᤍᤠᤜᤠ᤹ ᤌᤰᤛᤢᤒᤠᤜᤠ᤹ᤖᤧ ᤔᤧᤓᤥ᤺ᤴᤍᤢᤛᤡᤖᤥ॥ ((ᤀᤰᤂᤣᤗ᤹ᤖᤡᤰ “ᤂᤢᤏᤧ᤹ ᤐᤠ᤺ᤴ ᤁᤧᤓᤣ᤺ᤶᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤈᤥᤃᤢ” ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤏᤡᤴ ᤁᤧᤖᤧᤖᤥ॥))
MAR 15:29 ᤂᤧᤵᤔᤥᤗᤠᤶ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤌᤧᤃᤣ᤺ᤰᤐᤧᤴ ᤔᤧᤜᤡᤰᤂᤢᤖ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. “ᤂᤧᤏᤧ᤹ᤃ ᤔᤠᤱᤜᤡᤶᤔᤡᤴ ᤁᤧᤕ᤺ᤒᤠᤀᤠᤱ ᤛᤢᤶᤕᤧᤴᤏᤥ ᤁᤧᤈᤥ᤺ᤰᤐᤣ.
MAR 15:30 ᤂᤧᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤗᤠᤶ ᤕᤥ ᤌᤩᤧ᤹ᤀᤠᤱ ᤀᤠᤒᤠᤅᤣ ᤛᤧ᤺ᤵᤛᤡᤱᤅᤧ᤹॥”
MAR 15:31 ᤜᤧᤰᤁᤣᤗ᤹ᤖᤡᤰᤁᤣ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤘᤣ᤹ ᤔᤏᤠᤜᤠ᤹ᤃ ᤋᤠᤱᤛᤧ᤺ᤵᤋᤢᤛᤡ. ᤁᤖ ᤂᤢᤏᤧ᤹ ᤀᤠᤒᤠᤅᤣᤃ ᤛᤧ᤺ᤵᤛᤡᤱᤔᤠ ᤔᤧᤛᤢᤰᤛᤡᤱᤅᤡᤴᤗᤥ॥
MAR 15:32 ᤂᤢᤏᤧ᤹ ᤛᤧᤰᤂᤠᤀᤣ ᤀᤡᤛᤪᤠᤀᤡᤗᤛ᤻ᤔᤠ ᤜᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ. ᤜᤠᤖᤠ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤏᤢ ᤕᤥ ᤌᤠ᤺ᤖ. ᤜᤧᤰᤁᤩᤠᤱ ᤂᤧᤴ ᤏᤡ᤺ᤛᤢᤶᤒᤧᤀᤠᤱ ᤏᤛᤠ᤺ᤴ ᤆᤥᤃᤢᤶᤒᤧ᤹ᤖᤥ॥” ᤂᤢᤏᤧ᤹ᤏᤢᤀᤣ ᤔᤧᤓᤥ᤺ᤴᤍᤢᤛᤡᤒᤠ ᤂᤧᤴ ᤑᤠ᤺ᤴᤍᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤖᤧᤳᤇᤢᤖᤥ॥
MAR 15:33 ᤜᤧᤰᤁᤩᤠᤱ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳᤋᤠᤱᤎᤥ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤠᤍᤠᤶᤔᤠᤸᤗᤧ ᤂᤧᤴ ᤗᤠᤈᤣ᤹ᤀᤡᤴ ᤛᤡᤍᤧᤵ ᤋᤧᤵᤋᤢᤖᤥ॥
MAR 15:34 ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤖ ᤐᤳᤇᤧᤸᤗᤧ ᤕᤧᤛᤢ᤺ᤴ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. “ᤀᤣᤗᤥᤀᤡ. ᤀᤣᤗᤥᤀᤡ. ᤗᤠᤔᤠ ᤛᤒᤂᤌᤠᤏᤡ᥅” ᤂᤧᤴ ᤑᤠ᤹ᤀᤡᤱᤃ “ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣᤀᤠᤱ ᤁᤧᤗᤧᤖᤠᤱ ᤁᤧᤍᤣ᤺ᤛᤠᤱᤒᤣ᥅” ᤐᤥ᤺ᤱᤗᤥ॥
MAR 15:35 ᤂᤧᤵᤔᤥ ᤁᤧᤕᤧᤵᤐᤠ ᤁᤢᤓᤠᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤀᤢ᤺ᤳᤋᤢᤖ ᤐᤳᤗᤥ॥”
MAR 15:36 ᤂᤧᤱᤜᤠ᤹ᤀᤥ ᤗᤳᤇᤠ ᤔᤏᤠᤎᤡᤰ ᤂᤡᤔᤥ ᤗᤥ᤺ᤰᤋᤧᤖ ᤐᤣᤀᤠᤱ ᤂᤡᤃᤠᤰᤔᤠ᤺ᤴ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ᤺ᤀᤥ ᤏᤡ᤺ᤵᤛᤢ ᤜᤧᤰᤁᤩᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤛᤶᤔᤥ ᤑᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤡ᤺ᤳᤋᤢ ᤌᤢᤅᤢᤖ ᤑᤠ᤹ᤀᤠᤱ ᤁᤢᤔᤢᤖᤠᤀᤥ ᤌᤢᤵᤋᤢ ᤐᤡᤖᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤗᤢ ᤀᤥᤔᤧᤳᤋᤢᤶ ᤛᤠ᤹ᤖᤢᤶ᥄ ᤀᤣᤗᤡᤕᤠ᤺ᤴ ᤕᤢ᤺ᤀᤠᤱ ᤂᤢᤏᤧ᤹ ᤌᤠ᤺ᤛᤢ᤹ᤒᤡ ᤔᤧ᤺ᤶᤒᤡ᥅”
MAR 15:37 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤠᤶᤔᤥ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤀᤠᤱ ᤁᤢᤛᤰᤔᤠ ᤐᤣᤖᤥ॥
MAR 15:38 ᤂᤡᤔᤥ ᤔᤠᤱᤜᤡᤶᤔᤥᤒᤠ ᤑᤥ᤺ᤴᤍᤠ᤺ᤴ ᤌᤥᤏᤢ ᤕᤥ ᤌᤠᤖᤡᤰ ᤂᤧᤸᤗᤧᤰ ᤋᤧ᤺ᤰᤂᤧ॥
MAR 15:39 ᤕᤧᤛᤢ᤺ᤴ ᤔᤧᤓᤥ᤺ᤴᤍᤢᤒᤠ ᤛᤡᤗᤠᤶᤛᤠᤰᤔᤠ ᤛᤡᤱ ᤋᤃᤡ ᤁᤧᤕᤧᤵᤐᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤛᤩᤧᤒᤠᤴ ᤀᤥᤔᤧᤳᤋᤢᤖ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤴ ᤏᤡᤱᤘᤠ᤹ᤑᤢᤛᤠ᤺ᤀᤣ ᤘᤕᤧᤖᤧᤳᤇ॥”
MAR 15:40 ᤂᤧᤵᤔᤥ ᤔᤠ᤺ᤱᤄᤠᤗᤠᤶ ᤁᤢᤓᤠ ᤔᤧᤴᤇᤢᤔᤠᤜᤠ᤹ ᤀᤥᤔᤀᤡ ᤔᤧᤕᤧᤒᤧ॥ ᤂᤧᤱᤜᤠ᤹ᤀᤥ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤆᤢᤰᤐᤠ ᤕᤠᤁᤢᤒ ᤏᤢ ᤕᤢᤛᤢᤑᤖᤧ ᤂᤢᤴᤇᤡ᤹ ᤔᤠ ᤔᤖᤡᤕᤔ ᤏᤢ ᤛᤠᤗᤥᤔᤡᤛᤡ ᤔᤧᤘᤕᤧᤖᤥ॥
MAR 15:41 ᤕᤧᤛᤢ᤺ᤴ ᤃᤠᤗᤡᤗᤀᤥ ᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤧᤍᤡ᤺ᤰᤋᤢᤖ ᤁᤢᤓᤠ᤹ ᤔᤧᤒᤡᤖᤢᤖ ᤔᤧᤘᤕᤧ॥ ᤂᤧᤵᤔᤥ ᤕᤖᤢᤛᤗᤧᤔ ᤌᤠᤖᤡᤰ ᤕᤧᤛᤢ᤺ᤴᤏᤢ ᤁᤧᤍᤠ᤺ᤒᤠ ᤘᤣ᤹ ᤔᤧᤴᤇᤢᤔᤠᤜᤠ᤹ᤀᤠᤱ ᤕᤖᤡᤰ ᤔᤧᤘᤕᤧᤖᤥ॥
MAR 15:42 ᤀᤠᤸᤗ ᤕᤢ᤺ᤴᤇᤡᤰ ᤐᤥ᤺ᤰᤂᤧᤸᤗᤧ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑᤧᤴ ᤂᤧᤵᤔᤥ ᤋᤩᤧ॥ ᤂᤢᤏᤧ᤹ ᤕᤜᤢᤍᤡ ᤕᤧᤈᤢᤶᤓᤥᤖᤧ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤐᤠᤛᤡᤱᤐᤠᤍᤠᤱᤗᤠ ᤏᤢ ᤏᤡᤱᤘᤠ᤹ᤑᤢᤜᤠᤱᤈᤢᤶ ᤁᤧᤜᤠᤱᤒᤠᤀᤠᤱ ᤁᤧᤘᤠ᤹ᤒᤠ ᤘᤕᤧᤖᤥ॥ ᤂᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤶ ᤘᤕᤧ (ᤏᤠ᤺ᤶᤛᤡᤱ ᤕᤧᤴᤏᤡᤴ ᤁᤢᤍᤠ᤺ᤴᤍᤡᤰᤔᤠ ᤘᤕᤧ)॥ ᤜᤧᤰᤁᤣ᤺ᤸᤗᤧ ᤂᤧᤴ ᤀᤠ᤺ᤴᤇᤡᤱᤅᤠᤱ ᤐᤡᤗᤠᤋᤛᤖᤥ ᤐᤣ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢᤖᤥ॥
MAR 15:44 ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤀᤠᤴᤍᤧ᤺ᤴᤇᤠ ᤛᤩᤧᤒᤠ ᤂᤧᤵᤛᤢᤀᤠᤱ ᤁᤢᤏᤡᤱᤘᤠ᤹ ᤔᤕᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤌᤰᤋᤢᤶᤒᤠᤴ ᤀᤢ᤺ᤳᤋᤢᤀᤠᤱ ᤕᤧᤛᤢ᤺ᤴ ᤀᤠᤴᤍᤧ᤺ᤴᤇᤠ ᤛᤩᤧᤒᤠᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢ॥
MAR 15:45 ᤂᤧᤸᤗᤧ ᤌᤰᤋᤢᤶᤒᤧᤸᤗᤥᤗᤠᤶ ᤕᤧᤛᤢ᤺ᤴ ᤀᤠᤴᤍᤧ᤺ᤴᤇᤠ ᤛᤩᤧᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤕᤢᤛᤢᤑᤧᤴ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤔᤠ ᤐᤠᤱᤄᤢᤖᤥ॥
MAR 15:46 ᤜᤧᤰᤁᤣ᤺ᤸᤗᤧ ᤕᤢᤛᤢᤑᤖᤧ ᤏᤢ᤺ᤒᤠ ᤆᤣ ᤋᤣ᤺ᤳᤋᤡᤴ ᤀᤡᤅᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤏᤢ ᤌᤠ᤺ᤛᤢᤀᤠᤱ ᤂᤧᤴ ᤋᤣ᤺ᤳᤋᤡᤸᤗᤧ ᤁᤡᤳᤋᤢᤀᤠᤱ ᤗᤢᤱᤅᤥ ᤂᤥ᤺ᤶᤔᤏᤠᤒᤠ ᤀᤡᤵᤐᤢᤱᤅᤥ ᤏᤧᤛ᤻ᤛᤢᤖᤥ॥ ᤜᤧᤰᤁᤩᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤗᤠ᤺ᤰᤁᤠᤳᤗᤠᤶ ᤕᤶᤒᤠ ᤗᤢᤱᤅᤡᤴ ᤀᤡᤛᤢᤎ᤺ᤖᤥ॥
MAR 15:47 ᤔᤖᤡᤕᤔ ᤔᤃ᤻ᤍᤗᤡᤏᤡ ᤏᤢ ᤕᤢᤛᤢᤑᤖᤧ ᤁᤢᤶᤔᤠ ᤔᤖᤡᤕᤔᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤔᤧᤏᤧᤛ᤻ᤛᤢᤒᤠ ᤋᤧᤴᤏᤡᤴ ᤔᤡᤰᤛᤣ᤺ᤴ ᤔᤧᤳᤋᤧᤳᤇᤢᤖᤥ॥
MAR 16:1 ᤀᤠᤸᤗ ᤏᤠ᤺ᤶᤛᤡᤱᤔᤠ ᤕᤧᤴ ᤁᤠ᤺ᤰᤋᤢᤀᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤕᤠᤁᤢᤒᤖᤧ ᤁᤢᤶᤔᤠ ᤔᤖᤡᤕᤔ ᤏᤢ ᤛᤠᤗᤥᤔᤡᤛᤡᤖᤧ ᤔᤢᤷᤖ᤺ᤴ ᤕᤧᤛᤢᤖᤧ ᤁᤢᤎᤰᤁᤥ ᤜᤢ᤺ᤵᤔᤠ ᤑᤠ᤹ᤀᤠᤱ ᤔᤧᤀᤡᤅᤢ॥
MAR 16:2 ᤜᤧᤰᤁᤩᤠᤱ ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ ᤕᤧᤛᤢ᤺ᤴ ᤔᤧᤏᤧᤛ᤻ᤛᤢᤒᤠ ᤀᤡᤵᤐᤢᤱᤅᤥ ᤔᤧᤎᤠ᤺ᤛᤡᤱ॥
MAR 16:3 ᤜᤧᤰᤁᤩᤠᤱ ᤗᤠᤶᤔᤥ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤗᤠᤃᤡ ᤂᤧᤴ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤔᤧᤕᤧᤵᤛᤢᤒᤠ ᤕᤶᤒᤠ ᤗᤢᤱᤅᤡᤴ ᤜᤠ᤺ᤳᤗᤧ ᤀᤠᤀᤡᤴᤀᤠᤒᤡᤒᤠᤒᤣ᥅”
MAR 16:4 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤀᤥᤔᤧᤔᤧᤳᤋᤢᤸᤗᤧ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤁᤧᤕᤧᤵᤐᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢᤀᤠᤱ ᤏᤧᤛ᤻ᤛᤧᤒᤠ ᤔᤧᤏᤡ᤺ᤛᤢ॥ ᤂᤧᤴ ᤗᤢᤱᤅᤡᤴ ᤛᤠ᤹ᤖᤡᤰ ᤕᤶᤒᤠ ᤆᤥᤃᤧ॥
MAR 16:5 ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤛ᤻ᤛᤧᤸᤗᤧ ᤂᤧᤵᤔᤥ ᤑ᤺ᤍᤠᤱᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤠᤗᤡᤱᤃᤧᤴ ᤌᤠᤱᤒᤧᤴᤎᤡᤰ ᤆᤢᤵᤛᤠᤱ ᤗᤧᤵᤔᤠᤱ ᤕᤧᤒᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
MAR 16:6 ᤂᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ᥄ ᤂᤡᤏᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤏᤠᤛᤖᤋᤒᤠ ᤕᤧᤛᤢ᤺ᤴ ᤁᤧᤃᤥ᤺ᤳᤋᤢᤶᤒᤠ ᤔᤧ᤺ᤶᤒᤡ᥅ ᤂᤢᤏᤧ᤹ᤃ ᤁᤵᤔᤥ ᤜᤥ᤺ᤵᤗᤥ᥄ ᤂᤢᤏᤧ᤹ᤃ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧ. ᤔᤧ᤺ᤴᤏᤧ ᤑᤠ᤹ᤃᤪ ᤂᤢᤏᤧ᤹ ᤔᤧᤏᤧᤛ᤻ᤛᤢᤒᤠᤍᤧᤴᤏᤡᤴ ᤀᤥᤔᤧᤳᤋᤧᤶᤔᤧ᤹ᤀᤥ॥
MAR 16:7 ᤂᤡᤏᤡ᤹ ᤐᤣᤃᤧᤶᤔᤧ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤐᤋᤪᤢᤛᤧᤴ ᤁᤴ ᤀᤡᤱᤄᤱᤅᤡᤴ ᤐᤡᤖᤧᤶᤛᤡᤶᤔᤧ᤹. ‘ᤂᤢᤏᤧ᤹ ᤋᤃᤡ ᤁᤧᤔᤧᤳᤋᤡᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗᤀᤥ ᤐᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤳᤌᤥᤀᤣ ᤂᤢᤏᤧ᤹ ᤁᤧᤍᤢᤔᤢᤶᤗᤥ॥’”
MAR 16:8 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤵᤐᤢᤱᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤀᤠᤱ ᤔᤧᤗᤥ᤺ᤰᤋᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤜᤠ᤺ᤳᤋᤠᤱ ᤌᤣᤀᤠᤱ ᤔᤧᤶᤔᤧᤳᤋᤢᤴ॥
MAR 16:9 ((ᤀᤠᤸᤗ ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡᤖᤥ ᤀᤥᤛᤣ᤺ᤴᤎᤠᤰᤛᤡᤱᤗᤥ॥ ᤂᤧᤸᤗᤥᤗᤠᤶ ᤏᤢᤛᤡ ᤑᤧᤴᤛᤠᤶᤜᤠ᤹ ᤕᤧᤛᤢᤖᤧ ᤏᤠ᤺ᤳᤋᤢ ᤗ᤺ᤳᤋᤢᤛᤡᤀᤠᤱ ᤘᤕᤧ॥
MAR 16:10 ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤐᤣᤀᤠᤱ ᤕᤧᤛᤢ᤺ᤴ ᤋᤢᤔᤢᤒᤠ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ॥ ᤂᤧᤱᤜᤠ᤹ ᤔᤣᤖᤡᤱ ᤌᤰᤏᤢ ᤔᤧᤜᤠᤒᤧᤖ ᤔᤧᤘᤕᤧᤖᤥ॥
MAR 16:11 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤏᤢ ᤂᤧᤸᤗᤧ ᤏᤡ᤺ᤛᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤛᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
MAR 16:12 ᤂᤧᤱᤜᤠ᤹ᤀᤥ ᤏᤧᤵᤑᤢ ᤜᤢ᤹ᤛᤠᤶᤒᤠᤜᤠ᤹ ᤐᤠᤱᤓᤣ᤹ᤀᤥ ᤐᤣᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤕᤧᤛᤢ᤺ᤴ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱᤗᤥ॥
MAR 16:13 ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤧᤵᤔᤠᤱ ᤏᤢ᤺ᤰᤂᤧᤳᤇᤡᤀᤠᤱ ᤂᤢᤴᤇᤡ᤹ ᤏᤡ᤺ᤛᤧᤳᤇᤢᤒᤠ ᤐᤠ᤺ᤴᤏᤡᤴ ᤘᤣ᤹ᤜᤠ᤹ ᤆᤧᤰᤋᤧᤳᤇᤢ. ᤁᤖ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
MAR 16:14 ᤕᤠᤱᤛᤡ ᤌᤡᤰ-ᤌᤡᤰ (᥇᥇) ᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢ᤺ᤴ ᤂᤧᤵᤔᤥ ᤀᤥᤛᤣ᤺ᤴᤎᤠᤰᤛᤡᤱ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤏᤛᤠ᤺ᤴ ᤛᤢ᤺ᤶᤔᤠᤴ ᤏᤢ ᤏᤡᤱᤘᤠ᤹ ᤌᤢᤱᤔᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤁᤧᤏᤡ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
MAR 16:15 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤂᤡᤏᤡ᤹ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤁᤴ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤧᤶᤛᤡᤶᤔᤧ᤹ᤀᤥ᥄
MAR 16:16 ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤢ ᤒᤵᤋᤡᤛ᤻ᤔᤠ ᤁᤧᤒᤥ᤺ᤱᤒᤠᤸᤗᤧ ᤛᤧᤴᤗᤵ ᤂᤥ᤺ᤛᤢ᤹. ᤁᤖ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤸᤗᤧ ᤂᤠᤛᤧᤴᤏᤥ ᤌᤠᤀᤠᤱ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ॥
MAR 16:17 ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤴ ᤔᤡᤰᤛᤣ᤺ᤴᤏᤡᤸᤗᤧ ᤁᤠᤵᤋᤢᤛᤡᤖᤥ–ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤔᤡᤱᤅᤥ ᤑᤧᤴᤛᤠᤶᤜᤠ᤹ ᤔᤧᤏᤠ᤺ᤳᤋᤢᤛᤡ᤹. ᤜᤧᤰᤁᤩᤠᤱ ᤁᤢᤛᤱ ᤐᤠ᤺ᤴᤍᤠᤱᤜᤠ᤹ ᤔᤧᤒᤠ᤺ᤳᤋᤢ᤹ᤖᤥ॥
MAR 16:18 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤛᤣ᤺ᤰᤐᤠᤜᤠ᤹ ᤔᤧᤍᤧᤶᤛᤢᤛᤡ᤹. ᤏᤡᤱ ᤁᤧᤕᤠᤰᤐᤠ ᤆᤩᤠ ᤔᤧᤎᤢᤅᤢᤛᤠᤱ ᤌᤣᤀᤠᤱ ᤜᤶ ᤔᤧᤶᤒᤥ᤺ᤱᤅᤡᤴᤗᤥ॥ ᤜᤧᤰᤁᤩᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤛᤶᤍᤠᤱ ᤜᤢᤰ ᤔᤧᤏᤧᤛ᤻ᤛᤢ ᤔᤧᤒᤡᤖᤢᤛᤡᤸᤗᤧ ᤂᤧᤱᤜᤠ᤹ ᤔᤧᤘᤣ᤺ᤳᤗᤥ॥”
MAR 16:19 ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤌᤠ᤺ᤱᤎᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤌᤥ ᤐᤰᤂᤧᤖ ᤐᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤛᤡᤱᤗᤥ॥
MAR 16:20 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤠᤰ ᤐᤡᤛᤠᤱ ᤔᤧᤒᤣᤀᤠᤱ ᤛᤢᤏᤠᤀᤡᤱ ᤔᤧᤛᤧ᤺ᤛᤢᤖᤥ॥ ᤍᤠᤱᤒᤠᤸᤗᤧᤀᤠᤱ ᤂᤢᤏᤡ᤹ᤗᤠᤶ ᤕᤠ᤺ᤶᤒᤰ ᤆᤥᤃᤢᤖ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤸᤗᤧ ᤛᤢᤏᤠᤀᤡᤱᤅᤡᤴ ᤛᤧᤰᤂᤠᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢᤖᤥ॥))
LUK 1:1 ᤀᤠᤍᤠᤱᤒᤠ ᤋᤢᤶᤔᤩᤠᤱᤜᤠᤱ ᤌᤡᤕᤥᤑᤡᤗᤛᤣ. ᤕᤖᤡᤰ ᤔᤏᤠᤜᤠ᤹ᤖᤧ ᤀᤠᤏᤡᤃᤧ ᤗᤢᤶᤔᤥ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤁᤡᤸᤗᤧ ᤐᤥᤎᤰᤁᤡᤴ ᤔᤧᤛᤠᤵᤋᤢᤀᤠᤱ ᤘᤠ᤹ᤖᤥ॥
LUK 1:2 ᤂᤧᤴ ᤜᤡᤴᤍᤥ᤺ᤰᤜᤠ᤹ᤃ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤁᤧᤏᤡ᤺ᤒᤠᤜᤠ᤹ ᤏᤢ ᤒᤠ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤁᤧᤛᤧᤒᤠᤜᤠ᤹ᤖᤧ ᤀᤠᤏᤡᤃᤧ ᤔᤧᤈᤧᤰᤋᤡᤃᤧᤀᤠᤱ ᤘᤠ᤹॥
LUK 1:3 ᤜᤧᤰᤁᤣ᤺ᤸᤗᤧ ᤀᤠᤏᤡᤃᤧ ᤗᤢᤶᤔᤥ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤥ᤺ᤶᤓᤥ ᤆᤥᤃᤢᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤃᤡ ᤛᤠᤵᤔᤠ ᤏᤢ᤺ᤒᤠ ᤐᤥ᤺ᤱ ᤁᤧᤗ᤹ᤒᤠᤴ ᤀᤡᤱᤃᤠ᤹ᤀᤠᤱ ᤀᤡ᤺ᤳᤋᤢᤱᤗᤥ. ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤜᤢ᤹ᤛᤡᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤌᤧᤵᤐᤧᤳ ᤛᤠᤵᤋᤢᤱ ᤐᤡᤏᤧᤀᤠᤱ ᤘᤠ᤹ᤀᤠᤖᤥ॥
LUK 1:5 ᤕᤜᤢᤍᤡᤕᤠᤛ᤻ᤔᤠ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤕᤧᤶᤔᤥ ᤀᤒᤡᤕᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤎᤠ᤺ᤰᤁᤥ ᤗᤳᤇᤠ ᤈᤁᤖᤡᤕᤠ ᤔᤧᤵᤔᤏᤠᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤔᤣᤗᤡᤱᤃᤧᤴ ᤁᤢᤔᤣ᤺ᤳ ᤀᤡᤗᤡᤛᤡᤒᤠ᤺ᤴᤏᤠᤱ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤘᤕᤧᤖᤥ॥
LUK 1:6 ᤂᤧᤱᤜᤠ᤹ ᤏᤧᤵᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤘᤕᤧᤳᤇᤡᤀᤠᤱ ᤏᤢ᤺ᤖᤡᤰᤁᤠᤱ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤏᤢ ᤕᤜᤘᤣ ᤍᤠᤱᤒᤠᤸᤗᤧ ᤁᤧᤖᤧᤰ ᤁᤢᤀᤡᤱᤈᤠ᤺ᤱ ᤁᤧᤄᤧᤶᤒᤠ ᤘᤕᤧᤳᤇᤡᤖᤥ॥
LUK 1:7 ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ-ᤀᤣ ᤔᤧᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤀᤡᤗᤡᤛᤡᤒᤠᤖᤧ ᤁᤢᤛᤠᤔᤢ᤹ᤀᤡ ᤂᤰᤛᤡᤱᤅᤠᤱ ᤘᤕᤧ. ᤜᤧᤰᤁᤩᤠᤱ ᤏᤧᤵᤔᤠᤱ ᤁᤠᤵᤐᤥᤒᤠ ᤁᤠᤵᤔᤥᤔᤠ ᤋᤢᤶᤛᤧᤳᤇᤡᤀᤠᤱ ᤘᤕᤧᤳᤇᤡᤖᤥ॥
LUK 1:8 ᤌᤡᤰᤗᤧᤱ ᤈᤁᤖᤡᤕᤠᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤔᤠᤀᤠᤱ ᤛᤣᤘᤠ ᤆᤥ᤺ᤰᤔᤠ ᤗᤰ ᤂᤥ᤺ᤛᤢ. ᤌᤣᤀᤠᤱᤓᤧᤸᤗᤧ ᤁᤴ ᤂᤢᤏᤧ᤹ ᤘᤕᤧᤒᤠ ᤗᤰᤁᤡᤸᤗᤧᤴ ᤛᤣᤘᤠ ᤆᤥ᤺ᤰᤔᤠ ᤕᤧᤶ ᤘᤕᤧᤖᤥ॥
LUK 1:9 ᤏᤡᤱᤘᤠ᤹ᤑᤢᤛᤠᤶᤒᤠ ᤌᤡᤶ ᤁᤢᤀᤡᤛᤡ᤺ᤰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤡᤶᤔᤥ ᤐᤣ᤺ᤰᤔᤠᤀᤠᤱ ᤛᤠᤱᤛᤡᤱ ᤜᤠ᤺ᤶᤔᤠ ᤗᤰᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤋ᤹ᤕᤠ᤺ᤴᤛᤥ᤺ᤴ ᤔᤧᤃᤧ᤺ᤛᤢᤸᤗᤧ ᤂᤢᤏᤧ᤹ ᤂᤥ᤺ᤛᤢᤀᤠᤱ ᤘᤕᤧᤖᤥ॥
LUK 1:10 ᤜᤧᤰᤁᤩᤠᤱ ᤛᤠᤱᤛᤡᤱ ᤜᤠ᤺ᤴᤍᤢᤸᤗᤧ ᤗᤠ᤺ᤰᤁᤠᤳ ᤕᤖᤡᤰ ᤔᤏᤠᤜᤠ᤹ ᤛᤣᤘᤠ ᤆᤥ᤺ᤰᤛᤧ ᤔᤧᤈᤢᤵᤛᤧᤀᤠᤱ ᤋᤢᤘᤠ ᤆᤥ᤺ᤰᤏᤢ ᤔᤧᤕᤧᤒᤧ॥
LUK 1:11 ᤜᤧᤰᤁᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤏᤡᤸᤗᤧ ᤆᤢᤵᤛᤠᤱ ᤗᤧᤵᤔᤠᤱ ᤔᤠᤱᤗᤠᤀᤡᤱᤒᤠᤎᤡᤰ ᤀᤥ᤺ᤴᤎᤠᤰᤛᤡᤱᤗᤥ॥
LUK 1:12 ᤜᤧᤰᤁᤣ᤺ᤸᤗᤧ ᤈᤁᤖᤡᤕᤠᤖᤧ ᤁᤢᤕᤱᤔᤠ ᤁᤧᤖᤧᤀᤠᤱ ᤁᤢᤃᤡ᤺ᤔᤠᤸᤗᤧ ᤕᤢᤶᤛᤢᤱᤔᤠ ᤐᤥ᤺ᤰᤂᤧ.
LUK 1:13 ᤁᤖ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤧᤃᤡᤛᤧᤴᤏᤧ᤹ᤀᤥ ᤈᤁᤖᤡᤕᤠᤀᤣ᥄ ᤀᤠᤸᤗᤥ ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤠ᤹ᤖᤥ॥ ᤀᤠᤸᤗ ᤔᤣᤗᤡᤱᤃᤧᤴ ᤁᤧᤔᤣ᤺ᤳ ᤀᤡᤗᤡᤛᤡᤒᤠᤖᤧ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤧᤃᤳ ᤁᤧᤒᤡ᤹ᤖᤥ॥ ᤂᤧᤴ ᤀᤅᤧ᤺ᤰᤘᤠ᤺ᤴ ᤕᤢᤜᤢᤴᤏᤠ ᤔᤡᤱ ᤘᤠ᤺ᤳᤋᤧ᤹ᤀᤥ॥
LUK 1:14 ᤂᤧᤏᤧ᤹ ᤁᤧᤛ᤺ᤳᤋᤠᤱ ᤕᤧᤕᤧ ᤁᤧᤗ᤹ᤖᤥ॥ ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤛᤠ᤺ᤃᤧᤘᤠ᤺ᤴᤇᤡᤱᤒᤠ ᤐᤥ᤺ᤱᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤛ᤺ᤳᤗᤥ॥
LUK 1:15 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤏᤡ᤺ᤔᤠᤀᤥ ᤕᤶᤒᤠ ᤐᤥ᤺ᤱᤗᤥ॥ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤌᤡ᤺ ᤏᤢ ᤘᤣ᤹ ᤀᤠᤔᤔᤒᤠ ᤌᤢᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤩᤠᤱ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤱᤗᤥ॥
LUK 1:16 ᤂᤢᤏᤧ᤹ᤃ ᤕᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤍᤠᤱᤒᤠᤀᤥ ᤏᤢ᤺ᤰᤋᤢ ᤋᤠᤖᤢᤛᤡ᤹ᤖᤥ॥
LUK 1:17 ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤁᤢᤀᤡᤛᤡ᤺ᤰ ᤌᤢᤶ ᤏᤢ ᤔᤢᤰᤛᤠᤶᤔᤡᤸᤗᤧ ᤁᤢᤎᤡᤶ ᤐᤥ᤺ᤱᤅᤠᤱ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤏᤠᤜᤠ᤹ ᤕᤠᤖᤡᤵ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤍᤠᤱᤒᤠᤖᤧ ᤁᤢᤍᤃᤡ ᤐᤣ᤺ᤰᤗᤥ॥ ᤂᤢᤏᤧ᤹ ᤐᤠ᤺ᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤛᤠ᤺ᤜᤠ᤹ ᤗᤧᤵᤔᤠᤱ. ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤏᤢ᤺ᤰᤋᤢᤛᤡᤖᤥ॥”
LUK 1:18 ᤜᤧᤰᤁᤩᤠᤱ ᤈᤁᤖᤡᤕᤠᤖᤧ ᤔᤠᤱᤗᤠᤀᤡᤱᤒᤠᤴ ᤛᤣ᤺ᤴᤍᤥᤛᤢ. “ᤀᤠᤰᤂᤣᤀᤠᤱ ᤁᤴ ᤁᤢᤛᤡᤱ ᤏᤡ᤺ᤳᤋᤢᤱᤒᤠᤒᤣ᥅ ᤀᤡᤱᤃᤠ᤹ᤀᤠᤱ ᤁᤠᤵᤐᤥᤒᤠ ᤋᤢᤶᤛᤠᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤩᤠᤱ ᤀᤠᤔᤣ᤺ᤳᤋᤡᤴᤏᤠᤱ ᤁᤠᤵᤔᤥ ᤋᤢᤶᤛᤧᤀᤠᤱ ᤘᤠ᤹ᤖᤥ॥”
LUK 1:19 ᤂᤢᤏᤧ᤹ ᤔᤧᤳᤋᤢ. “ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤃᤠᤒᤪᤡᤀᤣᤗ ᤔᤠᤱᤗᤠᤀᤡᤱᤒᤠ᤹ᤀᤠᤖᤥ॥ ᤂᤧᤏᤧ᤹ᤀᤥ ᤁᤴ ᤛᤢᤏᤠᤀᤡᤱᤅᤡᤴ ᤋᤠ᤺ᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥
LUK 1:20 ᤁᤴ ᤐᤠ᤺ᤳᤋᤢᤱᤒᤠ ᤔᤠᤱᤜᤧᤰᤁᤡᤴ ᤁᤢᤕᤧᤶᤔᤥ ᤁᤧᤳᤗᤥ. ᤁᤖ ᤂᤧᤏᤧ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤧᤛ᤻ᤛᤠ᤺ᤴ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤌᤠᤖᤡᤰ ᤁᤧᤒᤠ᤺ᤴ ᤔᤧᤗ᤺ᤴᤏᤧᤴᤗᤥ॥”
LUK 1:21 ᤜᤧᤰᤁᤣᤗ᤹ᤖᤡᤰ ᤔᤠᤱᤜᤡᤶ ᤗᤠ᤺ᤰᤁᤠᤳ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤌᤣᤀᤠᤱ ᤈᤁᤖᤡᤕᤠ᤺ᤴ ᤛᤢ᤺ᤛᤧᤒᤣ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤜᤠᤱᤄᤢᤖ ᤔᤧᤕᤧᤒᤧᤖᤥ॥
LUK 1:22 ᤜᤧᤰᤁᤩᤠᤱ ᤈᤁᤖᤡᤕᤠ᤺ᤴ ᤗᤠ᤺ᤰᤁᤠᤳ ᤗ᤺ᤴᤍᤧ. ᤁᤖ ᤂᤢᤏᤧ᤹ ᤐᤠ᤺ᤵᤔᤠᤀᤣ ᤔᤧᤛᤢᤰᤋᤧᤴᤗᤥ. ᤜᤧᤰᤁᤣ᤺ᤸᤗᤧ ᤜᤢᤰᤆᤠ᤺ᤸᤁᤡᤸᤗᤧ ᤔᤡᤰᤛᤣ᤺ᤴ ᤆᤥᤃᤢᤖ ᤐᤠᤖᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤸᤗᤧ ᤔᤠᤱᤜᤡᤶ ᤛᤡᤃᤠᤱ ᤛᤢᤑᤥ᤺ᤴ ᤏᤡ᤺ᤛᤢᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥
LUK 1:23 ᤜᤧᤰᤁᤩᤠᤱ ᤈᤁᤖᤡᤕᤠ᤺ᤸᤗᤧ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤕᤧᤶ ᤆᤢᤖᤧᤀᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤏᤢ᤺ᤰᤂᤧ ᤐᤣ॥
LUK 1:24 ᤕᤠᤱᤛᤡ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤗᤠ ᤅᤠᤛᤡ ᤌᤠᤖᤡᤰ ᤜᤡᤶᤔᤥᤀᤣ ᤕᤠ᤺ᤰᤋᤧ॥
LUK 1:25 ᤂᤧᤸᤗᤧ ᤐᤠ᤺ᤳᤋᤢ. “ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤛᤠ᤺ᤔᤧᤱᤃᤵᤔᤏᤠᤔᤠ ᤗ᤹ᤖᤡᤰ ᤋᤠᤵᤑᤧ᤺ᤶᤒᤠ ᤀᤠᤔᤡᤱᤅᤡᤴ ᤂᤧᤳᤋᤢᤍᤣ᤺ᤛᤢ ᤐᤡᤖᤠᤱᤗᤥ॥”
LUK 1:26 ᤜᤧᤰᤁᤩᤠᤱ ᤀᤡᤗᤡᤛᤡᤒᤠ᤺ᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤒᤠ ᤗᤠ ᤋᤢᤰᤛᤡ ᤁᤧᤖᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤃᤠᤒᤪᤡᤀᤣᤗᤧᤴ ᤃᤠᤗᤡᤗ ᤌᤢᤶᤔᤥᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤐᤠᤱᤄᤢᤖᤥ॥ ᤂᤧᤴ ᤔᤖᤡᤕᤔ ᤔᤧᤵᤔᤏᤠᤔᤠ ᤛᤡᤛᤠᤍᤡᤱ ᤔᤧᤴᤇᤢᤔᤠᤀᤥ ᤐᤣ॥ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤔᤣ᤺ᤰᤂᤡᤶ ᤐᤠ᤺ᤴᤏᤡᤴ ᤍᤠᤀᤢᤍᤖᤧ ᤁᤢᤎᤠ᤺ᤰ ᤕᤢᤛᤢᤑ ᤔᤧᤵᤔᤏᤠᤒᤠ ᤔᤏᤠ᤺ᤴᤏᤢ ᤐᤢ᤹ᤖᤧᤀᤠᤱ ᤘᤕᤧᤖᤥ॥
LUK 1:28 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤢ. “ᤀᤠᤛᤣᤘᤠᤖᤥ. ᤂᤧᤏᤧ᤹ᤃ ᤍᤠᤱᤒᤠᤸᤗᤧ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥ ᤂᤢᤏᤧ᤹ ᤂᤧᤏᤧ᤹ᤏᤢ ᤘᤠ᤹ᤖᤥ॥”
LUK 1:29 ᤔᤖᤡᤕᤶᤔᤡᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤀᤠᤰᤋᤱᤒᤠ ᤐᤖᤡᤰᤗᤧᤴ ᤛᤣᤘᤠ ᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ॥
LUK 1:30 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤔᤖᤡᤕᤶᤔᤣ. ᤔᤧᤃᤡᤛᤧᤴᤏᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤃ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤁᤧᤎᤠᤅᤧᤀᤠᤱ ᤁᤧᤘᤠ᤹ᤖᤥ॥
LUK 1:31 ᤀᤠᤸᤗ ᤂᤧᤏᤧ᤹ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤁᤧᤃᤳᤋᤢ᤹॥ ᤂᤧᤸᤗᤧ ᤁᤢᤔᤡᤱ ᤕᤧᤛᤢ ᤘᤠ᤺ᤳᤋᤧ᤹ᤀᤥ॥
LUK 1:32 ᤂᤢᤏᤧ᤹ ᤐᤕᤶ ᤕᤶᤒᤠ ᤐᤥ᤺ᤱᤅᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤑᤠ᤹ᤀᤠᤱ ᤔᤧᤔᤧᤳᤋᤢ᤹ᤖᤥ॥ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤎᤠ᤺ᤰᤌᤧᤒᤠ ᤍᤠᤀᤢᤍᤖᤧ ᤜᤠᤱ ᤆᤥᤃᤢᤒᤠ ᤜᤧᤰᤁᤣ ᤜᤠᤱ ᤆᤥᤃᤢ᤹ᤖᤥ॥
LUK 1:33 ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗ ᤛᤶᤍᤠᤱ ᤛᤍᤠᤍᤡᤱ ᤜᤠᤱ ᤆᤥᤃᤢ᤹ᤖᤥ॥ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ॥”
LUK 1:34 ᤔᤖᤡᤕᤶᤔᤡᤸᤗᤧ ᤔᤠᤱᤗᤠᤀᤡᤱᤒᤠᤴ ᤛᤣ᤺ᤴᤍᤥᤛᤢ. “ᤁᤴ ᤀᤠᤰᤂᤣᤗ᤹ᤖᤡᤰ ᤐᤥ᤺ᤱᤒᤠᤒᤣ᥅ ᤀᤡᤱᤃᤠ᤹ᤃ ᤛᤡᤛᤠᤃᤧᤴ ᤔᤧᤴᤇᤡᤕᤠ᤹ᤀᤠᤖᤥ॥”
LUK 1:35 ᤔᤠᤱᤗᤠᤀᤡᤱᤒᤠᤸᤗᤧ ᤏᤥᤃᤵ ᤐᤡᤖᤢ. “ᤛᤣᤛᤣᤔᤠᤱᤅᤡᤴ ᤁᤧᤛᤶᤍᤠᤱ ᤋᤠᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤄᤢ᤺ᤰᤗᤥ. ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤥᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤱᤃ ᤏᤡᤱᤘᤠ᤹ᤑᤢᤛᤠ᤺ ᤔᤧᤔᤧᤳᤋᤢ᤹ᤖᤥ॥
LUK 1:36 ᤂᤧᤵᤛᤧ᤹ᤀᤥ. ᤂᤧᤏᤧ᤹ ᤁᤧᤃᤠ᤹ᤀᤡ ᤀᤡᤗᤡᤛᤡᤒᤠ᤺ᤴ ᤂᤢᤏᤧ᤹ ᤁᤢᤃᤠᤵᤔᤥ ᤋᤢᤶᤔᤥ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤸᤗᤥ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤠ᤺ᤔᤧᤱᤃᤵᤔᤏᤠᤔᤠ ᤔᤧᤔᤧᤳᤋᤢᤛᤠᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤒᤠ ᤗᤠ ᤋᤢᤰᤛᤡ ᤁᤧᤖᤧᤀᤠᤱ ᤘᤠ᤹ᤖᤥ॥
LUK 1:37 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤜᤥ᤺ᤵᤗᤥ॥”
LUK 1:38 ᤔᤖᤡᤕᤔᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤍᤠᤱᤒᤠᤸᤗᤧ ᤁᤢᤛᤣᤘᤠᤖᤥᤔᤠᤀᤠᤖᤥ॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤁᤧᤳᤗᤖᤥ॥” ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤧᤴ ᤐᤣ॥
LUK 1:39 ᤕᤠᤱᤛᤡ ᤔᤖᤡᤕᤶᤔᤡᤴᤏᤠᤱ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤁᤥ᤺ᤰᤔᤠᤀᤥ ᤁᤧᤏᤧᤒᤠ ᤐᤠᤱᤈᤢᤶᤔᤥ ᤌᤠᤛᤡᤱ॥
LUK 1:40 ᤂᤧᤵᤔᤥ ᤈᤁᤖᤡᤕᤠᤖᤧ ᤁᤢᤜᤡᤶᤔᤥ ᤁᤧᤖᤧᤀᤠᤱ ᤀᤡᤗᤡᤛᤡᤒᤠ᤺ᤴ ᤛᤣᤘᤠ ᤔᤧᤳᤋᤢᤖᤥ॥
LUK 1:41 ᤀᤡᤗᤡᤛᤡᤒᤠᤖᤧ ᤔᤖᤡᤕᤶᤔᤡᤴ ᤛᤣᤘᤠ ᤔᤕᤧᤒᤠ ᤂᤧᤵᤛᤢᤏᤠᤔᤧ᤺ᤴᤏᤣ ᤁᤢᤛᤠᤵᤐᤥ᤺ᤰᤁᤥ ᤁᤧᤕᤠᤰᤐᤠ ᤀᤅᤧ᤺ᤰᤘᤠ᤺ᤴ ᤔᤢᤴᤈᤡᤱ ᤗ᤹ᤖᤧᤖᤥ॥ ᤀᤡᤗᤡᤛᤡᤒᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧ.
LUK 1:42 ᤜᤧᤰᤁᤩᤠᤱ ᤕᤶᤒᤠ ᤀᤡᤰᤗᤠᤀᤥ ᤐᤠᤖᤧ. “ᤂᤧᤏᤧ᤹ᤃ ᤔᤧᤴᤇᤢᤔᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤃᤧᤘᤠ᤺ᤴᤍᤢᤒᤠ ᤀᤅᤧ᤺ᤰᤘᤠ᤺ᤱᤃ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤥ॥
LUK 1:43 ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤍᤠᤱᤒᤠᤸᤗᤧ ᤁᤢᤶᤔᤠᤀᤣ ᤀᤠᤍᤢᤶᤛᤧ ᤋᤠ᤺ᤔᤠ ᤁᤴ ᤀᤠᤰᤋᤱᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤏᤧ ᤀᤡᤱᤃᤠ᤹ ᤂᤥ᤺ᤛᤢᤱᤒᤣ᥅
LUK 1:44 ᤂᤧᤏᤧ᤹ ᤛᤣᤘᤠ ᤁᤧᤔᤧᤳᤋᤠᤱᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤱᤏᤢᤔᤧ᤺ᤴᤏᤣ ᤀᤡᤱᤃᤠ᤹ ᤀᤠᤛᤠᤵᤐᤥ᤺ᤰᤐᤥ ᤁᤧᤕᤠᤰᤐᤠ ᤀᤅᤧ᤺ᤰᤘᤠ᤺ᤴ ᤛ᤺ᤳᤋᤧᤖ ᤔᤢᤴᤈᤡᤱ ᤗ᤹ᤖᤧᤖᤥ॥
LUK 1:45 ᤂᤧᤏᤧ᤹ᤃ ᤁᤧᤖᤧᤰᤏᤢ᤺ᤸᤗᤧ ᤔᤢ᤹ᤀᤡᤛᤠᤔᤠᤏᤧᤖᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤜᤡᤱᤔᤴᤏᤥ ᤐᤥ᤺ᤱ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤢᤏᤠ ᤁᤧᤛᤠ᤹ᤖᤢᤖᤥ॥”
LUK 1:46 ᤜᤧᤰᤁᤩᤠᤱ ᤔᤖᤡᤕᤔᤖᤧ ᤐᤠ᤺ᤳᤋᤢ. “ᤀᤡᤱᤃᤠ᤹ ᤀᤠᤛᤡᤰᤗᤢᤱᤔᤥᤗᤠᤶᤔᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤱᤗᤥ.
LUK 1:47 ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥
LUK 1:48 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤜᤧᤰᤋᤱᤔᤠ ᤆᤢᤱᤈᤡᤃᤧᤴ ᤁᤢᤛᤣᤘᤠᤖᤥᤔᤠᤴ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗᤀᤠᤱᤎᤥ ᤌᤠ᤺ᤰᤌᤠ᤺ᤰᤁᤥ ᤀᤡᤱᤃᤠ᤹ ᤔᤢ᤹ᤀᤡᤛᤠᤔᤠ ᤑᤠ᤹ᤀᤠᤱ ᤔᤧᤔᤧᤳᤋᤠᤖᤥ.
LUK 1:49 ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤗᤠᤒᤠ ᤕᤠ᤺ᤶᤒᤰᤜᤠ᤹ ᤀᤡᤱᤃᤠ᤹ ᤆᤥᤃᤠᤱ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤁᤢᤔᤡᤱᤅᤡᤱᤃ ᤛᤣᤛᤣ ᤆᤥ᤺ᤰᤗᤥ॥
LUK 1:50 ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤒᤠᤜᤠ᤹ ᤁᤧᤖᤧᤰ ᤌᤠ᤺ᤰᤌᤠ᤺ᤰᤁᤥ ᤂᤢᤏᤧ᤹ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥
LUK 1:51 ᤂᤢᤏᤧ᤹ ᤔᤢᤰᤛᤠᤶᤒᤠ ᤁᤢᤜᤢᤰᤜᤠ᤹ᤖᤧ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤁᤧᤖᤧᤰ ᤀᤡᤍᤡᤘᤍᤡ᤹ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥
LUK 1:52 ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱ ᤁᤧᤈᤥ᤺ᤰᤐᤠᤜᤠ᤹ ᤂᤢᤏᤡ᤹ ᤜᤠᤱ ᤕᤢᤰᤏᤠᤀᤥᤗᤠᤶ ᤕᤥ ᤌᤠ᤺ᤛᤢᤛᤡᤀᤠᤱ ᤘᤠ᤹. ᤁᤖ ᤆᤢᤱᤈᤡᤃᤧᤶᤒᤠᤜᤠ᤹ ᤌᤠ᤺ᤱᤎᤠ᤺ᤱ ᤑᤥ᤺ᤰᤂᤢᤛᤡᤀᤠᤱ ᤘᤠ᤹ᤖᤥ॥
LUK 1:53 ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤜᤠ᤹ ᤏᤢ᤺ᤒᤠ ᤆᤡᤃ᤺ᤰᤘᤠᤜᤠ᤹ ᤐᤡᤖᤢᤛᤡᤀᤠᤱ ᤘᤠ᤹. ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤁᤢᤄᤠᤗᤧᤶ ᤐᤠᤱᤄᤢᤛᤡᤀᤠᤱ ᤘᤠ᤹ᤖᤥ॥
LUK 1:54 ᤂᤢᤏᤧ᤹ ᤀᤒᤪᤠᤜᤠᤔ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤛᤍᤠᤍᤡᤱ ᤗᤢᤱᤔᤠ᤹ ᤋᤢᤰᤔᤠᤛᤡ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤏᤡᤃᤧ ᤌᤠ᤺ᤰᤜᤠ᤹ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤁᤢᤛᤣᤘᤠᤖᤥᤒᤠ ᤀᤡᤛᤪᤠᤀᤡᤗᤧᤴ ᤁᤢᤓᤠ᤹ ᤐᤡᤖᤢᤀᤠᤱ ᤘᤠ᤹ᤖᤥ॥”
LUK 1:56 ᤔᤖᤡᤕᤶᤔᤡᤴ ᤗᤠ ᤛᤢᤶᤛᤡ ᤌᤠᤖᤡᤰ ᤀᤡᤗᤡᤛᤡᤒᤠ᤺ᤴᤏᤢ ᤘᤕᤧ. ᤜᤧᤰᤁᤩᤠᤱ ᤁᤢᤜᤡᤶᤔᤥ ᤏᤢ᤺ᤰᤂᤧᤖᤥ॥
LUK 1:57 ᤜᤧᤰᤁᤩᤠᤱ ᤀᤡᤗᤡᤛᤡᤒᤠᤖᤧ ᤁᤢᤛᤠᤘᤠ᤺ᤶᤔᤠ ᤕᤧᤶ ᤋᤩᤧᤀᤠᤱ ᤕᤧᤶᤒᤡᤳᤇᤠ᤹ᤛᤠ᤺ᤎᤡᤰ ᤛᤠᤘᤠ᤺ᤴᤍᤢᤖᤥ॥
LUK 1:58 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤠᤜᤠ᤹ ᤏᤢ ᤁᤢᤃᤠ᤹ᤀᤡᤒᤠᤜᤠ᤹ᤖᤧ ᤁᤴ ᤍᤠᤱᤒᤠᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤂᤢᤏᤧ᤹ᤏᤢ ᤔᤧᤛ᤺ᤳᤋᤧᤖᤥ॥
LUK 1:59 ᤜᤧᤰᤁᤩᤠᤱ ᤀᤅᤧ᤺ᤰᤘᤠᤛᤠ᤺ᤴ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤔᤧᤜᤧᤃᤢ ᤔᤧᤒᤡᤖᤢᤒᤠ ᤌᤡᤶᤔᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴᤏᤠᤱ ᤁᤢᤶᤒᤠᤖᤧ ᤁᤢᤔᤡᤱ ᤁᤢᤀᤡᤛᤡ᤺ᤰ ᤈᤁᤖᤡᤕᤠ ᤔᤡᤱ ᤘᤠ᤺ᤵᤔᤠ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧ.
LUK 1:60 ᤁᤖ ᤁᤢᤶᤔᤠᤖᤧ ᤔᤧᤳᤋᤢᤛᤡ “ᤔᤧ᤺ᤴᤗᤥ᥄ ᤁᤸᤗᤧ ᤁᤢᤔᤡᤱᤃ ᤕᤢᤜᤢᤴᤏᤠ ᤘᤠ᤺ᤵᤔᤠ ᤐᤥ᤺ᤱᤗᤥ॥”
LUK 1:61 ᤂᤧᤱᤜᤠ᤹ᤖᤧ ᤁᤢᤶᤔᤠ᤺ᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤃᤠ᤹ᤀᤡᤜᤠ᤹ᤀᤥ ᤀᤰᤋᤱᤒᤠ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤜᤠ᤹ ᤔᤧᤜᤥ᤺ᤵᤗᤥ॥”
LUK 1:62 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤈᤁᤖᤡᤕᤠ᤺ᤴ ᤜᤢᤰᤆᤠ᤺ᤸᤁᤡ᤺ᤸᤗᤧ ᤛᤣ᤺ᤴᤔᤧᤍᤥᤛᤢ. “ᤁᤸᤗᤧ ᤁᤢᤔᤡᤱ ᤌᤣ ᤘᤠ᤺ᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤒᤣ᥅”
LUK 1:63 ᤂᤧᤸᤗᤧ ᤛᤠᤵᤔᤠ ᤛᤠᤔᤠ᤺ᤴ ᤏᤠ᤺ᤰᤋᤢᤛᤡᤀᤠᤱ ᤁᤸᤗᤧ ᤁᤢᤔᤡᤱ ᤕᤢᤜᤢᤴᤏᤠ ᤗ᤹ᤖᤡᤰ ᤛᤠᤵᤋᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
LUK 1:64 ᤂᤡᤔᤥ ᤂᤧᤴ ᤐᤠ᤺ᤵᤔᤠ ᤜᤣ᤺ᤰᤋᤧᤀᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤜᤣ᤺ᤰᤋᤢᤖᤥ॥
LUK 1:65 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤃᤡᤛᤧᤖᤥ॥ ᤕᤜᤢᤍᤡᤕᤠᤛ᤻ᤔᤠ ᤁᤠᤰ ᤁᤥ᤺ᤰᤔᤠ ᤑᤠᤱᤈᤱᤒᤠ ᤐᤠᤱᤓᤣ᤹ ᤂᤠᤖᤠᤰ ᤁᤴ ᤐᤠ᤺ᤴᤏᤡᤴ ᤛᤧ᤺ᤖᤧᤖᤥ॥
LUK 1:66 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤸᤗ ᤁᤴ ᤀᤅᤧ᤺ᤰᤘᤠ᤺ᤴ ᤋᤠ᤺ᤴᤍᤡ ᤌᤣ ᤐᤥ᤺ᤱᤒᤠᤀᤡᤖᤥ᥅” ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤜᤢᤰᤁᤡᤴ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤛᤶᤍᤠᤱ ᤘᤕᤧᤖᤥ॥
LUK 1:67 ᤕᤢᤜᤢᤴᤏᤠᤖᤧ ᤁᤢᤶᤒᤠ ᤈᤁᤖᤡᤕᤠ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧ.
LUK 1:68 “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤶᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤀᤠᤱ ᤆᤥ᤺ᤰᤕᤢᤶᤓᤥ ᤐᤡᤖᤢᤛᤡᤖᤥ॥
LUK 1:69 ᤂᤢᤏᤧ᤹ ᤁᤢᤛᤣᤘᤠᤖᤥᤒᤠ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤗᤠᤶ ᤕᤠᤵᤔᤡ ᤛᤧᤴᤗᤵ ᤁᤧᤒᤡᤒᤠ ᤔᤢᤰᤁᤧᤃᤢᤒᤠ ᤛᤧᤴᤗᤵᤍᤠᤱᤒᤠᤎᤡᤰ ᤑᤥ᤺ᤰᤂᤢᤖᤥ॥
LUK 1:70 ᤀᤠᤏᤡ᤹ ᤏᤡᤱᤔᤡᤜᤠ᤹ ᤏᤢ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤋᤠᤱᤀᤠᤛᤧ᤺ᤵᤗᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤕᤖᤡᤰ ᤋᤱᤒᤣ ᤋᤃᤡ ᤛᤣᤛᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤘᤕᤧ॥
LUK 1:72 ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤗᤢᤱᤃᤢᤶ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢ॥
LUK 1:73 ᤂᤧᤴ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤀᤠᤏᤡ᤹ ᤌᤠ᤺ᤰᤌᤧᤒᤠ ᤀᤒᤪᤠᤜᤠᤶᤔᤡᤴᤏᤢ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧᤖᤥ॥
LUK 1:74 ᤁᤴ ᤔᤠᤱᤜᤧᤰᤁᤡᤴ ᤀᤠᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤋᤠᤱᤛᤧ᤺ᤵᤔᤠ ᤀᤠᤄᤥ᤺ᤛᤢᤶᤗ. ᤜᤧᤰᤁᤩᤠᤱ ᤔᤧᤱᤃᤡᤀᤣ ᤔᤧᤴᤕᤱᤅᤣ ᤀᤠᤏᤡ᤹ ᤜᤡᤱᤔᤴ ᤂᤠᤖᤠᤰ ᤛᤣᤛᤣ ᤏᤢ ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠᤀᤠᤱ ᤂᤢᤏᤧ᤹ ᤁᤢᤛᤣᤘᤠ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ॥”
LUK 1:76 “ᤀᤠᤛ᤻ᤛᤠ᤺ᤀᤣ. ᤂᤧᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤧᤶᤔᤧᤳᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤍᤠᤱᤒᤠᤸᤗᤧ ᤁᤢᤍᤃᤡ ᤗᤠᤶ ᤕᤠᤖᤡᤵ ᤆᤥ᤺ᤰᤛᤧ ᤁᤧᤒᤣ᤺ᤰᤗᤥ॥
LUK 1:77 ᤜᤧᤰᤁᤩᤠᤱ ᤁᤢᤔᤏᤠᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤏᤢ ᤛᤧᤴᤗᤵᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤀᤥᤛᤧ᤺ᤴᤃᤧᤎᤠᤰᤋᤢᤛᤡ᤹ᤖᤥ॥
LUK 1:78 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤢᤱᤈᤡᤃᤧᤴ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤏᤠᤶᤛᤠᤱᤅᤡᤴ ᤀᤠᤏᤡ᤹ᤀᤥ ᤆᤢᤰᤔᤠ ᤀᤡ᤺ᤳᤋᤧᤖᤥ॥
LUK 1:79 ᤜᤧᤰᤁᤩᤠᤱ ᤂᤠᤍᤠᤶᤔᤠ ᤏᤢ ᤛᤡ᤺ᤔᤧᤸᤗᤧᤴ ᤛᤠᤶᤔᤪᤡ᤺ᤵᤐᤥ ᤁᤧᤘᤠ᤹ᤒᤠᤜᤠ᤹ᤀᤥ ᤂᤧᤴ ᤏᤠᤶᤛᤠᤱᤅᤡᤴ ᤀᤥ᤺ᤳᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤱᤓᤥ᤺ᤴ ᤛᤏᤠᤖᤢᤱ ᤗᤠᤶᤔᤥ ᤋᤥ᤺ᤴᤇᤡᤱᤗᤥ॥”
LUK 1:80 ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤕᤢᤜᤢᤴᤏᤠ᤺ᤴ ᤐᤥ᤺ᤖᤧᤖ ᤕᤠᤶᤛᤠᤶᤔᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤖ ᤐᤣᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤀᤥᤛᤣ᤺ᤴᤔᤧᤴᤎᤠᤰᤛᤡᤱᤅᤣ ᤌᤠᤖᤡᤰ ᤀᤣ᤺ᤰᤛᤠᤍᤧᤴᤏᤥᤀᤣ ᤘᤕᤧ॥
LUK 2:1 ᤂᤧᤴ ᤕᤧᤶᤔᤥ ᤖᤥᤔᤡ ᤐᤕᤶ ᤜᤠᤱ ᤀᤃᤛ᤻ᤋᤛᤧᤸᤗᤧ ᤁᤧᤖᤧᤰ ᤖᤥᤔᤡ ᤜᤠᤱᤈᤢᤶᤔᤥ ᤕᤠᤶᤏᤠ᤺ᤳᤏᤡ᤺ᤳ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤍᤳ ᤐᤡᤖᤢᤛᤡ॥
LUK 2:2 ᤁᤴ ᤌᤡᤰᤛᤡᤃᤣ᤺ᤰᤐᤠ ᤕᤠᤶᤏᤠ᤺ᤳᤏᤡ᤺ᤳ ᤔᤧᤈᤥᤃᤢᤸᤗᤧ ᤛᤡᤖᤡᤕᤠ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤁᤢᤖᤣᤏᤡᤕᤛ ᤘᤕᤧ॥
LUK 2:3 ᤁᤧᤖᤧᤰ ᤔᤏᤠᤜᤠ᤹ ᤕᤠᤶᤏᤠ᤺ᤳᤏᤡ᤺ᤳᤋᤥ ᤔᤡᤱ ᤛᤠᤵᤛᤧ ᤀᤠᤒᤠᤅᤣ ᤐᤠᤱᤈᤢᤶᤔᤥ ᤔᤧᤒᤣ॥
LUK 2:4 ᤜᤧᤰᤁᤣ᤺ᤸᤗᤧ ᤕᤢᤛᤢᤑᤧᤴᤏᤠᤱ ᤃᤠᤗᤡᤗ ᤌᤢᤶᤔᤥᤒᤠ ᤏᤠᤛᤖᤋ ᤐᤠᤱᤓᤣ᤹ᤀᤥᤗᤠᤶ ᤕᤜᤢᤍᤡᤕᤠᤛ᤻ᤔᤠ ᤍᤠᤀᤢᤍᤖᤧ ᤁᤢᤒᤠᤱᤈᤢᤶ ᤒᤧᤌᤗᤣᤜᤧᤶᤔᤥ ᤔᤡᤱ ᤛᤠᤵᤛᤧ ᤌᤠᤛᤡᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤘᤕᤧ॥ ᤂᤢᤏᤧ᤹ ᤁᤢᤔᤣ᤺ᤰᤂᤡᤶ ᤐᤠ᤺ᤴ ᤁᤧᤒᤢ᤹ᤔᤠᤀᤠᤱ ᤁᤧᤘᤠ᤹ᤔᤠ ᤔᤖᤡᤕᤶᤔᤡᤴᤏᤢ ᤐᤣ॥ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤔᤧᤴᤇᤢᤰᤔᤠ ᤘᤕᤧᤖᤥ॥
LUK 2:6 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤘᤕᤧᤳᤇᤡᤸᤗᤧ ᤔᤖᤡᤕᤔᤖᤧ ᤁᤢᤛᤠᤃᤵᤔᤠ ᤕᤧᤶ ᤋᤩᤧᤀᤠᤱ
LUK 2:7 ᤛᤠᤍᤢᤱᤅᤡᤸᤗᤧ ᤋᤖᤢ. ᤜᤧᤰᤁᤩᤠᤱ ᤋᤢᤶᤒᤠ ᤕᤧᤶᤒᤡᤳᤇᤠ᤹ᤛᤠ᤺ᤴ ᤛᤠᤘᤠ᤺ᤴᤍᤢᤀᤠᤱ ᤂᤧᤴ ᤀᤅᤧ᤺ᤰᤘᤠ᤺ᤴ ᤋᤣ᤺ᤳᤋᤡᤸᤗᤧ ᤛᤢᤅᤢᤀᤠᤱ ᤘᤠᤄᤥ᤺ᤱᤅᤥ ᤏᤧᤛ᤻ᤛᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤆᤧᤕᤠᤱᤎᤥ᤺ᤰᤁᤥ ᤕᤠᤱᤎᤥ᤺ᤰᤔᤠ ᤔᤧᤄᤥ᤺ᤛᤧᤳᤇᤢᤴᤗᤥ॥
LUK 2:8 ᤂᤧᤴ ᤕᤧᤶᤔᤥ ᤗᤠ᤺ᤰᤁᤠᤳ ᤆᤦᤖᤡᤀᤥ ᤁᤢᤓᤠ ᤔᤧᤸᤗᤢᤰᤁᤶᤒᤠᤜᤠ᤹ ᤂᤢᤏᤡ᤹ ᤔᤧᤸᤗᤢᤰᤜᤠ᤹ ᤔᤧᤃᤥ᤺ᤛ᤻ᤛᤢᤛᤡᤖ ᤛᤧᤴᤍᤡᤰ ᤔᤧᤕᤢᤅᤧ॥
LUK 2:9 ᤂᤧᤵᤔᤥ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤁᤢᤀᤡᤛᤡ᤺ᤰ ᤂᤢᤏᤡ᤹ ᤂᤡᤖᤡ ᤗᤧᤰᤋᤧᤖᤥ॥ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ.
LUK 2:10 ᤁᤖ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ᥄ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤛᤢᤏᤠᤀᤡᤱ ᤋᤠᤖᤢᤱᤅᤠᤱ ᤘᤠ᤹ᤀᤠᤖᤥ॥
LUK 2:11 ᤌᤣᤀᤠᤱᤓᤧᤸᤗᤧ ᤀᤠᤀᤡᤴ ᤍᤠᤀᤢᤍᤖᤧ ᤁᤢᤒᤠᤱᤈᤢᤶᤔᤥ ᤛᤧᤴᤗᤵᤍᤠᤱᤒᤠᤴ ᤛᤠᤘᤠ᤺ᤴᤇᤡᤱᤅᤠᤱ ᤘᤠ᤹॥ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤍᤠᤱᤒᤠᤖᤥ॥
LUK 2:12 ᤀᤅᤧ᤺ᤰᤘᤠ᤺ᤴ ᤋᤣ᤺ᤳᤋᤡᤸᤗᤧ ᤔᤧᤛᤢᤅᤢᤀᤠᤱ ᤘᤠᤄᤥ᤺ᤱᤅᤥ ᤔᤧᤀᤡᤵᤋᤢᤀᤠᤱ ᤏᤧᤒᤠ ᤁᤧᤏᤡ᤺ᤛᤢᤶᤗᤥ॥ ᤂᤡᤏᤡ᤹ ᤗᤠᤃᤡ ᤒᤠ ᤂᤧᤴᤏᤡᤴᤏᤧ ᤔᤡᤰᤛᤣ᤺ᤴ ᤐᤥ᤺ᤱᤗᤥ॥”
LUK 2:13 ᤂᤧᤵᤔᤥ ᤜᤰᤆᤄᤳ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤎᤠ᤺ᤶᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ.
LUK 2:14 “ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤔᤏᤠᤜᤠ᤹ᤖᤧ ᤛᤏᤠᤖᤢᤱ ᤔᤧᤄᤥ᤺ᤛᤢᤖᤖᤥ॥”
LUK 2:15 ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤜᤠ᤹ ᤕᤠᤱᤎᤥ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤏᤢ᤺ᤰᤂᤧ ᤔᤧᤒᤣ. ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰᤁᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤀᤠᤶᤔᤧᤳᤋᤧᤒᤠ ᤜᤧᤰᤁᤣ ᤒᤧᤌᤗᤣᤜᤧᤶᤔᤥ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤴ ᤐᤣᤃᤡᤀᤠᤱ ᤀᤥᤔᤧᤳᤋᤢᤶᤗᤥ॥”
LUK 2:16 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤠ ᤔᤧᤈᤠᤳᤋᤧᤖ ᤒᤧᤌᤗᤣᤜᤧᤶᤔᤥ ᤔᤧᤒᤣ॥ ᤂᤧᤵᤔᤥ ᤕᤢᤛᤢᤑ ᤏᤢ ᤔᤖᤡᤕᤔ ᤜᤧᤰᤁᤩᤠᤱ ᤘᤠᤄᤥ᤺ᤱᤅᤥ ᤔᤧᤀᤡᤵᤋᤢᤀᤠᤱ ᤏᤧᤛ᤻ᤛᤧᤒᤠ ᤀᤅᤧ᤺ᤰᤘᤠ᤺ᤴ ᤔᤧᤍᤢᤔᤢᤖᤥ॥
LUK 2:17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤀᤅᤧ᤺ᤰᤘᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤔᤧᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤔᤧᤈᤧᤰᤋᤢᤛᤡᤖᤥ॥
LUK 2:18 ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
LUK 2:19 ᤁᤖ ᤔᤖᤡᤕᤶᤔᤡᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤕᤢᤰᤂᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤗ ᤘᤕᤧᤖᤥ॥
LUK 2:20 ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰ ᤁᤶᤒᤠᤜᤠ᤹ᤖᤧ ᤔᤠᤱᤗᤠᤀᤡᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤒᤠ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤔᤧᤈᤥᤃᤢᤖ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
LUK 2:21 ᤕᤧᤳᤇᤡ ᤕᤧᤴ ᤁᤧᤖᤧᤸᤗᤧ ᤀᤅᤧ᤺ᤰᤘᤠ᤺ᤴ ᤜᤷᤍᤥ ᤔᤧᤜᤧᤃᤢ ᤔᤧᤒᤡᤖᤢᤀᤠᤱ ᤕᤧᤛᤢ ᤔᤡᤱ ᤔᤧᤘᤠ᤺ᤳᤋᤢᤖᤥ॥ ᤂᤧᤴ ᤔᤡᤱᤅᤡᤴ ᤂᤢᤏᤧ᤹ ᤜᤠᤱᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤔᤠᤱᤗᤠᤀᤡᤱᤒᤠᤸᤗᤧ ᤐᤡᤖᤢᤛᤡᤀᤠᤱ ᤘᤕᤧᤖᤥ॥
LUK 2:22 ᤀᤠᤸᤗ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤕᤠᤱᤍᤠᤱ ᤑᤥ᤺ᤱᤔᤠ ᤕᤧᤴ ᤋᤩᤧᤀᤠᤱ ᤕᤢᤛᤢᤑ ᤏᤢ ᤔᤖᤡᤕᤔᤖᤧ ᤕᤖᤢᤛᤗᤧᤶᤔᤥ ᤀᤅᤧ᤺ᤰᤘᤠ᤺ᤴ ᤍᤠᤱᤒᤠᤸᤗᤥ ᤋᤥ᤺ᤶᤔᤠ ᤑᤠ᤹ᤀᤠᤱ ᤋᤠᤖᤧᤳᤇᤢ
LUK 2:23 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤋᤢᤶᤒᤠᤛᤠᤜᤠ᤹ ᤁᤧᤖᤧᤰ ᤍᤠᤱᤒᤠᤀᤥ ᤛᤣᤛᤣ ᤗ᤹ᤖᤡᤰ ᤋᤥ᤺ᤶᤔᤠᤛᤡᤀᤣ ᤐᤥ᤺ᤱ॥
LUK 2:24 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤁᤢᤃᤠᤵᤌᤡᤰ ᤐᤢᤳᤋᤢ᤺ᤰᤁᤣ ᤀᤡᤃᤪ ᤏᤧᤳᤇᤡ ᤐᤣᤖᤘᤠᤛᤠᤜᤠ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤔᤠᤱᤜᤡᤶᤔᤥ ᤋᤠᤖᤧᤳᤇᤢ॥
LUK 2:25 ᤀᤠᤸᤗ ᤕᤖᤢᤛᤗᤧᤶᤔᤥ ᤛᤡᤔᤡᤕᤥᤏ ᤔᤧᤵᤔᤏᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤛᤠᤶᤕᤥᤏᤡᤒᤠ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ॥ ᤂᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤔᤡᤰᤘᤠ ᤁᤧᤍᤢ᤺ᤰᤐᤧᤴ ᤜᤠᤱᤄᤢᤖ ᤘᤕᤧᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤌᤡᤶᤛᤢᤀᤠᤱ
LUK 2:26 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤧᤏᤡ᤺ᤛᤢᤀᤠᤱᤗᤰ ᤁᤧᤔᤠᤛᤡᤱᤗᤥ ᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤕᤧᤖᤥ॥
LUK 2:27 ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤀᤠᤱ ᤂᤢᤏᤧ᤹ ᤔᤠᤱᤜᤡᤶᤔᤥ ᤋᤣ᤹ᤖᤢ॥ ᤂᤧᤵᤔᤥ ᤕᤢᤛᤢᤑ ᤏᤢ ᤔᤖᤡᤕᤔᤖᤧ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤀᤅᤧ᤺ᤰᤘᤠ ᤕᤧᤛᤢ᤺ᤴ ᤋᤥ᤺ᤶᤔᤠ ᤑᤠ᤹ᤀᤠᤱ ᤋᤠᤖᤧᤳᤇᤢᤸᤗᤧ
LUK 2:28 ᤛᤡᤔᤡᤕᤥᤏᤖᤧ ᤁᤢᤜᤢᤰᤁᤥ ᤀᤅᤧ᤺ᤰᤘᤠ᤺ᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤀᤰᤂᤣ ᤐᤠ᤺ᤳᤋᤢ.
LUK 2:29 “ᤔᤢᤰᤛᤠᤶᤍᤠᤱᤒᤠ ᤀᤠᤍᤠᤱᤒᤠᤀᤣ. ᤀᤠᤸᤗ ᤂᤧᤏᤧ᤹ ᤁᤧᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤁᤧᤛᤣᤘᤠᤖᤥᤒᤠᤴ ᤛᤏᤠᤖᤢᤱᤅᤥ ᤛᤡ᤺ᤀᤠᤏᤡᤖᤥ.
LUK 2:30 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤕᤠᤖᤡᤵ ᤁᤧᤈᤥᤃᤢᤒᤠ ᤁᤧᤛᤧᤴᤗᤵᤐᤡᤴ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤡᤰᤁᤡᤸᤗᤧ ᤏᤡ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥
LUK 2:32 ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤀᤥ᤺ᤳᤋᤡ ᤀᤥᤛᤣ᤺ᤴᤃᤧᤎᤠᤰᤐᤠ ᤜᤧᤰᤁᤩᤠᤱ ᤂᤢᤏᤧ᤹ᤃ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱ ᤐᤥ᤺ᤱᤗᤥ॥”
LUK 2:33 ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤳᤇᤢᤀᤠᤱ ᤛᤠ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧᤖᤥ॥
LUK 2:34 ᤜᤧᤰᤁᤩᤠᤱ ᤛᤡᤔᤡᤕᤥᤏᤖᤧ ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖ ᤔᤖᤡᤕᤶᤔᤡᤴ ᤔᤧᤳᤋᤢ. “ᤁᤴ ᤀᤅᤧ᤺ᤰᤘᤠ᤺ᤴ ᤀᤡᤛᤪᤠᤀᤡᤸᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤐᤥᤃᤧᤱᤔᤠ ᤏᤢ ᤛᤒᤵᤔᤠᤖᤧᤴ ᤔᤡᤰᤛᤣ᤺ᤴ ᤐᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤗᤥ॥
LUK 2:35 ᤜᤧᤰᤁᤣ᤺ᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤌᤠ᤺ᤵᤗᤥ॥ ᤜᤧᤰᤁᤩᤠᤱ ᤋᤢᤰᤂᤣᤖᤧ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤸᤗᤧ ᤁᤢᤀᤡᤛᤡ᤺ᤰ ᤁᤧᤗᤢᤱᤔᤠ᤹ᤀᤡᤴ ᤗᤛ᤻ᤛᤢ᤹ᤖᤥ॥”
LUK 2:36 ᤜᤧᤰᤁᤩᤠᤱ ᤂᤧᤵᤔᤥ ᤀᤠᤛᤣᤖ ᤛᤢᤘᤠᤱᤒᤠ ᤑᤏᤢᤀᤧᤗᤖᤧ ᤁᤢᤛ᤻ᤛᤠ᤺ ᤜᤴᤏᤠ ᤔᤧᤵᤔᤏᤠᤔᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤔᤠ ᤛᤠᤶᤕᤥᤏᤡᤔᤠ ᤏᤢ ᤛᤣᤘᤠᤖᤥᤔᤠᤎᤡᤰ ᤘᤕᤧ॥ ᤂᤧᤴ ᤁᤢᤔᤣ᤺ᤰᤂᤡᤶ ᤐᤥ᤺ᤰᤂᤧᤀᤠᤱ ᤏᤢᤛᤡ (᥍) ᤋᤱᤒᤣ ᤌᤠᤖᤡᤰ ᤁᤢᤕᤧᤶᤒᤠ᤺ᤴᤏᤢ ᤛᤥᤖᤡᤰ ᤘᤕᤧᤳᤇᤡ ᤜᤧᤰᤁᤩᤠᤱ ᤁᤢᤕᤧᤶᤒᤠ᤹ᤀᤡᤴ ᤔᤠᤛᤡᤱᤅᤠᤱ ᤔᤣᤔᤣᤍᤢᤔᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
LUK 2:37 ᤂᤢᤏᤧ᤹ ᤋᤱᤒᤣ ᤕᤧᤳ-ᤗᤡ (᥎᥊) ᤁᤧᤃᤧᤵᤔᤠ ᤁᤠᤵᤔᤥᤔᤠ ᤘᤕᤧᤖᤥ॥ ᤂᤧᤸᤗᤧ ᤔᤠᤱᤜᤡᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤸᤗᤧᤳᤋᤣ ᤛᤧᤴᤍᤡᤰ ᤗᤧᤴᤍᤡᤰ ᤆᤠ᤺ᤏᤧᤳ ᤕᤢᤅᤧᤖ ᤋᤢᤘᤠ ᤆᤥᤃᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠ ᤆᤥᤃᤢᤖ ᤘᤕᤧᤖᤥ॥
LUK 2:38 ᤂᤧᤴ ᤕᤧᤶᤔᤥ ᤂᤧᤵᤔᤥ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤜᤠᤱᤒᤠ ᤔᤏᤠᤜᤠ᤹ ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤧᤴᤏᤥ ᤔᤧᤳᤋᤢᤛᤡᤖᤥ॥
LUK 2:39 ᤍᤠᤱᤒᤠᤸᤗᤧ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤔᤖᤡᤕᤔ ᤏᤢ ᤕᤢᤛᤢᤑᤖᤧ ᤆᤥᤃᤧᤳᤇᤢᤀᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤐᤠᤱᤓᤣ᤹ ᤃᤠᤗᤡᤗ ᤌᤢᤶᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤏᤢ᤺ᤰᤂᤧᤳᤇᤡ ᤐᤣᤛᤡᤖᤥ॥
LUK 2:40 ᤂᤧᤵᤔᤥ ᤀᤅᤧ᤺ᤰᤘᤠ᤺ᤴ ᤐᤥ᤺ᤖᤧᤖ ᤐᤣᤀᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧᤖᤥ॥ ᤂᤢᤏᤧ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤁᤢᤎᤡᤶ ᤘᤕᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤂᤢᤏᤧ᤹ ᤛᤶᤍᤠᤱ ᤘᤕᤧᤖᤥ॥
LUK 2:41 ᤋᤱᤒᤣ ᤌᤵᤔᤠ ᤕᤧᤛᤢᤖᤧ ᤁᤢᤶᤒᤠ ᤁᤢᤶᤔᤠᤛᤡ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤐᤣ᤺ᤰᤔᤠ ᤌᤡᤶ ᤁᤳᤋᤧᤳᤇᤢᤖᤥ॥
LUK 2:42 ᤜᤧᤰᤁᤩᤠᤱ ᤕᤧᤛᤢ᤺ᤴ ᤌᤡᤰ-ᤏᤧᤳ (᥇᥈) ᤋᤱᤒᤣ ᤁᤧᤖᤧᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤋᤱᤏᤠᤶᤔᤥ ᤔᤧᤒᤣ॥
LUK 2:43 ᤂᤧᤴ ᤋᤱᤏᤠᤶᤔᤡᤴ ᤐᤣᤀᤠᤱ ᤂᤧᤱᤜᤠ᤹ ᤜᤡᤶᤔᤥ ᤏᤢ᤺ᤱᤔᤠ ᤔᤧᤜᤣ᤺ᤰᤋᤧ. ᤁᤖ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥᤀᤣ ᤘᤕᤧᤗᤠᤖᤧ॥ ᤁᤴ ᤐᤠ᤺ᤴᤏᤡᤴ ᤕᤧᤛᤢᤖᤧ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤧᤳᤇᤢᤴᤗᤥ॥
LUK 2:44 ᤂᤧᤱᤜᤠ᤹ᤖᤧ ᤋᤃᤡ ᤁᤧᤒᤣ᤺ᤰᤐᤠ ᤗᤠᤶᤍᤡ᤺ᤰᤛᤠᤒᤠᤜᤠ᤹ᤏᤢ ᤐᤣᤒᤡᤗᤠ ᤑᤠ᤹ᤀᤠᤱ ᤀᤡ᤺ᤳᤋᤧᤳᤇᤢ॥ ᤌᤡᤰ ᤕᤧᤴᤒᤠ ᤗᤠᤶᤍᤡ᤺ᤰ ᤔᤧᤈᤥᤃᤧᤀᤠᤱ ᤂᤢᤴᤇᤡ᤹ ᤁᤠ᤹ᤀᤡ ᤛᤥ᤹ᤎᤥ᤺ᤰ ᤏᤢ ᤋᤣ᤺ᤱᤈᤢᤶᤜᤠ᤹ᤀᤥ ᤕᤧᤛᤢ᤺ᤴ ᤁᤥ᤺ᤵᤔᤠ ᤜᤣ᤺ᤰᤋᤧᤳᤇᤢ.
LUK 2:45 ᤁᤖ ᤔᤧᤍᤢᤔᤧᤳᤇᤢᤴᤏᤠᤱ ᤏᤧᤵᤔᤠᤱ ᤁᤢᤃᤥ᤺ᤳᤇᤧ ᤕᤖᤢᤛᤗᤧᤶᤔᤥ ᤏᤢ᤺ᤰᤂᤧᤳᤇᤡ॥
LUK 2:46 ᤛᤢᤶ ᤕᤧᤴᤏᤥ ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤕᤜᤢᤍᤡ ᤛᤡᤰᤛᤠᤶᤒᤠᤜᤠ᤹ ᤂᤧᤵᤛᤢᤛᤡᤖ ᤐᤠ᤺ᤴ ᤛᤣ᤺ᤴᤍᤥᤛᤢᤛᤡᤖ ᤕᤢᤅᤧᤒᤠ ᤋᤢᤔᤧᤳᤇᤢᤖᤥ॥
LUK 2:47 ᤂᤢᤏᤧ᤹ ᤁᤢᤀᤡ᤺ᤳᤇᤡᤱᤛᤠᤶ ᤏᤢ ᤐᤡᤖᤢᤛᤡᤒᤠ ᤏᤥᤃᤵ ᤁᤧᤄᤧᤶᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥
LUK 2:48 ᤜᤧᤰᤁᤩᤠᤱ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤏᤧ᤹ ᤏᤡ᤺ᤛᤧᤳᤇᤢᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤁᤢᤶᤔᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤛ᤻ᤛᤠ᤺ᤀᤣ. ᤂᤧᤏᤧ᤹ ᤌᤣᤀᤠᤱ ᤀᤰᤂᤣ ᤕᤠᤵᤔᤡ ᤁᤧᤈᤥᤃᤧᤒᤠᤒᤣ᥅ ᤀᤠᤴᤇᤡᤃᤧ ᤏᤡᤱᤛᤠᤶᤔᤥ ᤌᤩᤧᤛᤡᤃᤧᤀᤠᤱ ᤁᤥ᤺ᤳᤏᤧᤳᤇᤡᤃᤧ ᤔᤧ᤺ᤶᤒᤡ᥅”
LUK 2:49 ᤕᤧᤛᤢᤖᤧ ᤛᤣ᤺ᤴᤍᤥᤛᤢᤛᤡ. “ᤐᤠᤏᤢᤍᤡᤱ ᤀᤠᤶᤒᤦ ᤀᤠᤶᤔᤦ. ᤌᤣᤀᤠᤱ ᤕᤠᤵᤔᤡ ᤁᤧᤃᤥ᤺ᤳᤇᤡᤒᤠᤒᤣ᥅ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤘᤠ᤹ᤔᤠ ᤐᤥ᤺ᤱ ᤑᤠ᤹ᤀᤠᤱ ᤂᤡᤴᤇᤡ᤹ ᤁᤧᤴᤏᤡ᤺ᤛᤧᤳᤇᤢᤴᤒᤡ᥅”
LUK 2:50 ᤁᤖ ᤁᤴ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤧᤳᤇᤢᤴᤗᤥ॥
LUK 2:51 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠ ᤁᤢᤶᤔᤠᤛᤡᤏᤢ ᤏᤠᤛᤖᤋᤀᤥ ᤐᤣ॥ ᤂᤢᤏᤧ᤹ᤃ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤐᤠ᤺ᤴ ᤁᤧᤄᤧᤶᤒᤠ ᤘᤕᤧ॥ ᤁᤢᤶᤔᤠᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤛᤡᤃᤠᤱ ᤕᤢᤰᤂᤢᤖᤥ॥
LUK 2:52 ᤀᤰᤂᤣᤗ᤹ᤖᤡᤰ ᤕᤧᤛᤢ᤺ᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤖᤧ ᤂᤢᤏᤡ᤹ ᤗᤢᤱᤃᤢᤶᤔᤥ ᤐᤥ᤺ᤖᤧᤖ ᤐᤣᤖᤥ॥
LUK 3:1 ᤀᤠᤸᤗ ᤖᤥᤔᤡ ᤐᤕᤶ ᤜᤠᤱ ᤋᤡᤒᤣᤖᤡᤕᤛᤧᤸᤗᤧ ᤜᤠᤱ ᤆᤥᤃᤢᤒᤠ ᤋᤱᤒᤣ ᤌᤡᤰ-ᤅᤠ (᥇᥋) ᤁᤧᤖᤧᤀᤠᤱ ᤘᤕᤧᤸᤗᤧ ᤐᤴᤋᤡᤕᤛ ᤐᤡᤗᤠᤋᤛᤧᤴ ᤕᤜᤢᤍᤡᤕᤠᤒᤠ ᤛᤢᤜᤠᤱᤃᤧᤶᤒᤠ ᤘᤕᤧ॥ ᤂᤧᤴ ᤕᤧᤶᤔᤥ ᤜᤧᤖᤥᤍᤧᤏ ᤃᤠᤗᤡᤗᤛ᤻ᤔᤠ ᤛᤢᤜᤠᤱᤃᤧᤶᤒᤠ. ᤁᤢᤴᤛᤠ᤹ ᤑᤡᤗᤡᤵᤐᤧᤴ ᤀᤡᤋᤢᤖᤡᤕᤠ ᤏᤢ ᤋᤪᤠᤁᤥᤏᤡᤋᤡᤛ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ. ᤜᤧᤰᤁᤩᤠᤱ ᤗᤡᤛᤠᤏᤡᤕᤠᤛᤧᤴ ᤀᤣᤒᤡᤗᤣᤏᤡ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤔᤧᤘᤕᤧ.
LUK 3:2 ᤜᤧᤰᤁᤩᤠᤱ ᤜᤴᤏᤠᤛᤧᤴ ᤏᤢ ᤁᤤᤕᤠᤑᤠᤛᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤳᤇᤡ॥ ᤂᤧᤴ ᤕᤧᤶᤔᤥ ᤀᤣ᤺ᤰᤛᤠᤍᤧᤴᤏᤥ ᤈᤁᤖᤡᤕᤠᤖᤧ ᤁᤢᤛ᤻ᤛᤠ᤺ ᤕᤢᤜᤢᤴᤏᤠ᤺ᤸᤗᤥ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤋᤩᤧᤀᤠᤱ
LUK 3:3 ᤂᤢᤏᤧ᤹ ᤕᤷᤍᤏ ᤕᤱᤄᤱ ᤂᤡᤖᤡᤒᤠ ᤗᤠᤈᤣ᤹ᤀᤥ ᤂᤠᤖᤠᤰ ᤗᤠᤶᤍᤡ᤺ᤰ ᤆᤥᤃᤧᤖ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤒᤡᤖᤡ᤹ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤖᤥ॥
LUK 3:4 ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤛᤠᤵᤐᤴᤏᤥ ᤕᤢᤜᤢᤴᤏᤠᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥ᤺ᤴ ᤆᤥᤃᤧᤶᤔᤧ᤹᥄
LUK 3:5 ᤁᤧᤖᤧᤰ ᤏᤧᤘᤠᤗᤠᤜᤠ᤹ ᤗᤢᤵᤛᤡᤱᤗ. ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤋᤱᤅᤠᤱ ᤋᤧ᤺ᤶᤒᤣ ᤐᤥ᤺ᤱᤗ ᤜᤧᤰᤁᤩᤠᤱ ᤀᤡ᤺ᤗᤠᤶᤜᤠ᤹ ᤋᤥ᤺ᤴᤇᤡᤱᤗ ᤋᤠᤵᤑᤧ᤺ᤶᤒᤠ ᤗᤠᤶᤜᤠ᤹ ᤏᤢ᤺ᤒᤠ ᤐᤥ᤺ᤱᤗ॥
LUK 3:6 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤁᤢᤛᤧᤴᤗᤵᤐᤡᤴ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤔᤧᤏᤡ᤺ᤛᤢ᤹ᤖᤥ॥’”
LUK 3:7 ᤔᤏᤠᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤧ᤹ᤕᤥ ᤔᤧᤍᤩᤧ॥ ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤑᤧ᤺ᤰᤋᤢᤛᤡ. “ᤀᤛᤣ᤺ᤰᤛᤠᤛᤣ. ᤂᤡᤏᤡ᤹ ᤁᤴ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤂᤧᤳᤇᤡᤱᤅᤧᤶᤔᤧ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤡᤒᤣ᥅
LUK 3:8 ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ᤛᤡᤃᤧ. ᤂᤧᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱᤗᤠᤶ ᤂᤧᤳᤇᤡᤱᤔᤠ ᤛᤢᤰᤋᤡᤃᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ᤖᤥ॥
LUK 3:9 ᤀᤠᤸᤗᤥᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤡᤸᤗᤧ ᤋ᤺ᤴᤍᤡᤱᤃ ᤛᤡᤱᤒᤢᤱᤔᤥ ᤂᤠ ᤆᤢᤰᤔᤠ ᤀᤡ᤺ᤳᤋᤧᤀᤠᤱ ᤘᤠ᤹॥ ᤏᤢ᤺ᤒᤠ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠᤒᤠ ᤛᤡᤱᤒᤢᤱᤜᤠ᤹ ᤁᤧᤖᤧᤰ ᤋᤠᤱᤔᤠᤀᤠᤱ ᤔᤡᤀᤥ ᤗᤠᤵᤑᤢᤔᤠ ᤐᤥ᤺ᤱᤗᤥ॥”
LUK 3:10 ᤔᤏᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤃᤪ ᤀᤠᤸᤗᤥ ᤀᤠᤏᤡᤃᤧ ᤌᤣ ᤆᤥᤃᤢᤶᤒᤧᤒᤠᤒᤣ᥅”
LUK 3:11 ᤕᤢᤜᤢᤴᤏᤠᤖᤧ ᤏᤥᤃᤵ ᤐᤡᤖᤢᤛᤡ. “ᤜᤠ᤺ᤳᤗᤧ ᤏᤧᤳᤇᤡ ᤆᤠᤱ ᤁᤳᤋᤢ᤹. ᤂᤧᤸᤗᤧ ᤔᤧᤱᤃᤵᤔᤏᤠᤒᤠᤴ ᤗᤳᤇᤠ ᤐᤡᤖᤢᤖ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤆᤠᤔᤠ ᤁᤳᤋᤢ᤹. ᤂᤧᤸᤗᤧ ᤆᤠᤔᤠ ᤔᤧᤱᤃᤵᤔᤏᤠᤒᤠᤴᤏᤢ ᤜᤠ᤺ᤛᤢ ᤆᤖ॥”
LUK 3:12 ᤜᤧᤰᤁᤩᤠᤱ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤀᤠᤱ ᤂᤧ᤹ᤕᤥ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤔᤧᤍᤩᤧᤀᤠᤱ ᤕᤢᤜᤢᤴᤏᤠ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤀᤠᤸᤗ ᤀᤠᤏᤡᤃᤧᤃ ᤌᤣ ᤆᤥᤃᤢᤶᤒᤧᤒᤠᤒᤣ᥅”
LUK 3:13 ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤖᤥᤔᤡ ᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠᤀᤠᤱᤎᤥ ᤔᤏᤠᤜᤠ᤹ᤗᤠᤶ ᤕᤖᤡᤰ ᤀᤣ᤺ᤅᤕᤠᤱ ᤔᤧᤓᤥ᤺ᤰᤂᤧᤶᤔᤡᤴᤏᤧ᤹॥”
LUK 3:14 ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤀᤠᤱ ᤂᤧ᤹ᤕᤥ ᤔᤧᤍᤩᤧᤀᤠᤱ “ᤀᤠᤏᤡᤃᤧᤃ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤖᤥ॥ ᤂᤧᤱᤜᤠ᤹ ᤕᤢᤜᤢᤴᤏᤠᤖᤧ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ᤀᤠᤱ ᤘᤣ᤹ ᤔᤏᤠᤜᤠ᤹ᤗᤠᤶ ᤛᤠᤰᤁᤧᤸᤗᤧᤰ ᤏᤢ ᤀᤡᤱᤗᤧᤰᤗᤠᤶ ᤕᤠᤱ ᤔᤧᤓᤥ᤺ᤰᤂᤧᤶᤔᤡᤴᤏᤧ᤹. ᤁᤖ ᤁᤧᤄᤥ᤺ᤛᤢᤶᤒᤠ ᤑᤠ᤹ᤕᤠᤱᤅᤥ ᤂᤡᤏᤡ᤹ ᤏᤡᤱᤘᤠ᤹ ᤋᤠᤛᤧᤶᤔᤧ᤹॥”
LUK 3:15 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤋᤠ᤺ ᤗ᤹ᤖᤡᤰ ᤔᤧᤜᤠᤱᤄᤢᤖ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤱᤃ ᤒᤠ ᤁᤴ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤔᤧᤔᤧᤳᤇᤡᤱᤗᤥ॥
LUK 3:16 ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤁᤧᤖᤧᤰ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤂᤡᤏᤡ᤹ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤏᤡᤱ. ᤁᤖ ᤀᤡᤱᤃᤠ᤹ᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠᤎᤡᤰ ᤋᤠᤖ ᤐᤳ॥ ᤀᤡᤱᤃᤠ᤹ᤃ ᤕᤥ᤺ᤰ ᤁᤢᤀᤡᤛᤡ᤺ᤰ ᤁᤢᤗᤠᤱᤛᤢ᤺ᤵ ᤏᤠᤶᤜᤠ᤹ ᤑᤠ᤺ᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤢᤏᤧ᤹ᤃ ᤛᤣᤛᤣᤔᤠᤱ ᤏᤢ ᤔᤡ᤺ᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ᤹ᤖᤥ॥
LUK 3:17 ᤁᤢᤓ᤹ᤀᤣ᤺ᤳᤋᤡᤸᤗᤧ ᤛᤡ᤺ᤴ ᤀᤠ᤺ᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤕᤠᤖᤡᤵ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤃᤢᤖ ᤛᤢᤵᤛᤢᤀᤠᤱ ᤛᤡ᤺ᤴ ᤆᤠᤎᤥ᤺ᤰᤗᤠᤀᤥ ᤆᤡᤰᤂᤢ᤹ ᤜᤧᤰᤁᤩᤠᤱ ᤁᤢᤜᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤔᤏᤠᤒᤠ ᤔᤡᤀᤥ ᤜᤠ᤺ᤴᤍᤢᤍᤣ᤺ᤛᤢ᤹ᤖᤥ॥”
LUK 3:18 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤖᤡᤰ ᤐᤖᤡᤰᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴᤜᤠ᤹ ᤐᤡᤖᤢᤛᤡᤖ ᤛᤢᤏᤠᤀᤡᤱ ᤀᤡᤱᤓᤴ ᤛᤧ᤺ᤛᤢᤖᤥ॥
LUK 3:19 ᤁᤖ ᤕᤢᤜᤢᤴᤏᤠᤖᤧ ᤛᤢᤜᤠᤱᤃᤧᤶᤒᤠ ᤜᤧᤖᤥᤍᤧᤏ ᤑᤧ᤺ᤰᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤀᤅᤧ᤺ᤰᤔᤠ ᤜᤧᤖᤥᤍᤡᤕᤠᤛᤧᤴ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤘᤣ᤹ ᤕᤖᤡᤰ ᤑᤧᤴ ᤕᤠ᤺ᤶᤒᤰᤜᤠ᤹ᤀᤠᤱ ᤆᤥᤃᤢᤀᤠᤱ ᤘᤕᤧᤖᤥ॥
LUK 3:20 ᤜᤧᤖᤥᤍᤖᤧ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤑᤧᤴ ᤕᤠ᤺ᤶᤒᤰᤁᤡᤴ ᤕᤥ᤹ᤖᤢᤖᤥ॥
LUK 3:21 ᤌᤡᤰᤕᤧᤴ ᤁᤠᤰ ᤔᤏᤠᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤸᤗᤧ ᤕᤧᤛᤢ᤺ᤴᤏᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤘᤠ ᤆᤥᤃᤢᤖ ᤐᤳᤇᤧᤸᤗᤧ ᤋᤠᤱᤛᤠᤰᤐᤧᤴ ᤜᤖᤧᤀᤠᤱ
LUK 3:22 ᤛᤣᤛᤣᤔᤠᤱᤅᤡᤴ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤕᤧᤀᤠᤱ ᤂᤢᤏᤧ᤹ ᤁᤢᤛᤶᤍᤠᤱ ᤆᤢᤰᤋᤧ. ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤗᤠᤶ ᤀᤡᤰᤗᤠᤎᤡᤰ ᤕᤧ. “ᤂᤧᤏᤧ᤹ ᤀᤡᤱᤃᤠ᤹ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤏᤧᤖᤥ॥ ᤂᤧᤏᤧ᤹ᤏᤢ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥”
LUK 3:23 ᤀᤠᤸᤗ ᤕᤧᤛᤢᤖᤧ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢᤸᤗᤧ ᤂᤢᤏᤧ᤹ ᤋᤱᤒᤣ ᤛᤢᤶᤒᤥ᤺ᤱ (᥉᥆) ᤁᤧᤖᤧᤀᤠᤱ ᤘᤕᤧ॥ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:24 ᤕᤢᤛᤢᤑᤧᤴ ᤜᤧᤗᤡᤖᤧ ᤁᤢᤛ᤻ᤛᤠ᤺. ᤜᤧᤗᤡ᤺ᤴ ᤔᤋᤠᤋᤖᤧ ᤁᤢᤛ᤻ᤛᤠ᤺. ᤔᤠᤋᤠᤋᤧᤴ ᤗᤧᤒᤡᤖᤧ ᤁᤢᤛ᤻ᤛᤠ᤺. ᤗᤧᤒᤡ᤺ᤴ ᤔᤧᤸᤆᤡᤖᤧ ᤁᤢᤛ᤻ᤛᤠ᤺. ᤔᤧᤸᤆᤡ᤺ᤴ ᤈᤴᤏᤤᤖᤧ ᤁᤢᤛ᤻ᤛᤠ᤺. ᤈᤴᤏᤤ᤺ᤴ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:25 ᤕᤢᤛᤢᤑᤧᤴ ᤔᤳᤋᤠᤌᤡᤕᤠᤛᤖᤧ ᤁᤢᤛ᤻ᤛᤠ᤺. ᤔᤳᤋᤠᤌᤡᤕᤠᤛᤧᤴ ᤀᤠᤔᤥᤛᤖᤧ ᤁᤢᤛ᤻ᤛᤠ᤺. ᤀᤠᤔᤥᤛᤧᤴ ᤏᤠᤜᤢᤔᤖᤧ ᤁᤢᤛ᤻ᤛᤠ᤺. ᤏᤠᤜᤢᤶᤔᤡᤴ ᤀᤡᤛ᤻ᤗᤡᤖᤧ ᤁᤢᤛ᤻ᤛᤠ᤺. ᤀᤡᤛ᤻ᤗᤡ᤺ᤴ ᤏᤃ᤻ᤃᤠᤀᤡᤖᤧ ᤁᤢᤛ᤻ᤛᤠ᤺.
LUK 3:26 ᤏᤃ᤻ᤃᤠᤀᤡᤴ ᤔᤠᤌᤖᤧ ᤁᤢᤛ᤻ᤛᤠ᤺. ᤔᤠᤌᤧᤴ ᤔᤳᤋᤠᤌᤡᤕᤠᤛᤖᤧ ᤁᤢᤛ᤻ᤛᤠ᤺. ᤔᤳᤋᤠᤌᤡᤕᤠᤛᤧᤴ ᤛᤣᤔᤤᤏᤖᤧ ᤁᤢᤛ᤻ᤛᤠ᤺. ᤛᤣᤔᤤᤏᤧᤴ ᤕᤥᤛᤧᤂᤖᤧ ᤁᤢᤛ᤻ᤛᤠ᤺. ᤕᤥᤛᤧᤂᤧᤴ ᤕᤥᤍᤠᤖᤧ ᤁᤢᤛ᤻ᤛᤠ᤺ ᤘᤕᤧ॥
LUK 3:27 ᤕᤥᤍᤠ᤺ᤴ ᤕᤥᤀᤠᤏᤖᤧ ᤁᤢᤛ᤻ᤛᤠ᤺. ᤕᤥᤀᤠᤏᤧᤴ ᤖᤣᤛᤠᤖᤧ ᤁᤢᤛ᤻ᤛᤠ᤺. ᤖᤣᤛᤠ᤺ᤴ ᤕᤖᤢᤒᤠᤒᤧᤗᤖᤧ ᤁᤢᤛ᤻ᤛᤠ᤺. ᤕᤖᤢᤒᤠᤒᤧᤸᤗᤧᤴ ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ᤺. ᤛᤠᤸᤋᤡᤀᤣᤸᤗᤧᤴ ᤏᤣᤖᤡᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:28 ᤜᤧᤰᤁᤩᤠᤱ ᤏᤣᤖᤡ᤺ᤴ ᤔᤧᤸᤁᤡᤖᤧ ᤁᤢᤛ᤻ᤛᤠ᤺. ᤔᤸᤁᤡ᤺ᤴ ᤀᤍ᤻ᤍᤡᤖᤧ ᤁᤢᤛ᤻ᤛᤠ᤺. ᤀᤍ᤻ᤍᤡ᤺ᤴ ᤁᤥᤛᤠᤔᤖᤧ ᤁᤢᤛ᤻ᤛᤠ᤺. ᤁᤥᤛᤠᤶᤔᤡᤴ ᤀᤣᤗᤔᤠᤋᤔᤖᤧ ᤁᤢᤛ᤻ᤛᤠ᤺. ᤀᤣᤗᤔᤠᤋᤶᤔᤡᤴ ᤀᤣᤖᤧᤸᤗᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:29 ᤜᤧᤰᤁᤩᤠᤱ ᤀᤣᤖᤧᤴ ᤕᤜᤥᤛᤢᤖᤧ ᤁᤢᤛ᤻ᤛᤠ᤺. ᤕᤜᤥᤛᤢ᤺ᤴ ᤀᤣᤗᤡᤀᤣᤈᤖᤗᤧ ᤁᤢᤛ᤻ᤛᤠ᤺. ᤀᤣᤗᤡᤀᤣᤈᤖᤧᤴ ᤕᤥᤖᤡᤶᤖᤧ ᤁᤢᤛ᤻ᤛᤠ᤺. ᤕᤥᤖᤡᤶᤔᤡᤴ ᤔᤠᤋᤠᤋᤖᤧ ᤁᤢᤛ᤻ᤛᤠ᤺. ᤔᤠᤋᤠᤋᤧᤴ ᤗᤧᤒᤡᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:30 ᤜᤧᤰᤁᤩᤠᤱ ᤗᤧᤒᤡ᤺ᤴ ᤛᤡᤔᤡᤕᤥᤏᤖᤧ ᤁᤢᤛ᤻ᤛᤠ᤺. ᤛᤡᤔᤡᤕᤥᤏᤧᤴ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ᤺. ᤕᤜᤢᤍᤠ᤺ᤴ ᤕᤢᤛᤢᤑᤖᤧ ᤁᤢᤛ᤻ᤛᤠ᤺. ᤕᤢᤛᤢᤑᤧᤴ ᤕᤥᤏᤠᤔᤖᤧ ᤁᤢᤛ᤻ᤛᤠ᤺. ᤕᤥᤏᤠᤶᤔᤡᤴ ᤀᤣᤗᤡᤕᤠᤁᤡᤔᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:31 ᤀᤣᤗᤡᤕᤠᤁᤡᤶᤔᤡᤴ ᤔᤗᤣᤀᤠᤖᤧ ᤁᤢᤛ᤻ᤛᤠ᤺. ᤔᤗᤣᤀᤠ᤺ᤴ ᤔᤡᤴᤏᤠᤖᤧ ᤁᤢᤛ᤻ᤛᤠ᤺. ᤔᤡᤴᤏᤠ᤺ᤴ ᤔᤳᤋᤠᤌᤠᤖᤧ ᤁᤢᤛ᤻ᤛᤠ᤺. ᤔᤳᤋᤠᤌᤠ᤺ᤴ ᤏᤠᤋᤠᤏᤖᤧ ᤁᤢᤛ᤻ᤛᤠ᤺. ᤏᤠᤋᤠᤏᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:32 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤕᤡᤛᤤᤖᤧ ᤁᤢᤛ᤻ᤛᤠ᤺. ᤕᤡᤛᤤ᤺ᤴ ᤀᤥᤒᤣᤍᤖᤧ ᤁᤢᤛ᤻ᤛᤠ᤺. ᤀᤥᤒᤣᤍᤧᤴ ᤒᤥᤀᤈᤖᤧ ᤁᤢᤛ᤻ᤛᤠ᤺. ᤒᤥᤀᤈᤧᤴ ᤛᤸᤔᤥᤏᤖᤧ ᤁᤢᤛ᤻ᤛᤠ᤺. ᤛᤠᤸᤔᤥᤏᤧᤴ ᤏᤜᤛᤥᤏᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:33 ᤏᤜᤛᤥᤏᤧᤴ ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ᤺. ᤀᤶᤔᤡᤏᤠᤍᤠᤒᤧᤴ ᤀᤠᤖᤠᤔᤖᤧ ᤁᤢᤛ᤻ᤛᤠ᤺. ᤀᤠᤖᤠᤶᤔᤡᤴ ᤜᤧᤛᤪᤥᤏᤖᤧ ᤁᤢᤛ᤻ᤛᤠ᤺. ᤜᤧᤛᤪᤥᤏᤧᤴ ᤐᤣᤖᤣᤈᤖᤧ ᤁᤢᤛ᤻ᤛᤠ᤺. ᤐᤧᤖᤧᤈᤧᤴ ᤕᤜᤢᤍᤠ᤺ᤸᤗᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:34 ᤕᤜᤢᤍᤠ᤺ᤴ ᤕᤠᤁᤢᤒᤖᤧ ᤁᤢᤛ᤻ᤛᤠ᤺. ᤕᤠᤁᤢᤒᤧᤴ ᤀᤡᤛᤜᤠᤁᤖᤧ ᤁᤢᤛ᤻ᤛᤠ᤺. ᤀᤡᤛᤜᤠᤰᤁᤡᤴ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺. ᤀᤒᤪᤠᤜᤠᤶᤔᤡᤴ ᤋᤣᤖᤜᤖᤧ ᤁᤢᤛ᤻ᤛᤠ᤺. ᤋᤣᤖᤜ᤺ᤴ ᤏᤠᤜᤥᤖᤗᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:35 ᤜᤧᤰᤁᤩᤠᤱ ᤏᤠᤜᤥᤖᤧᤴ ᤛᤖᤢᤃᤖᤧ ᤁᤢᤛ᤻ᤛᤠ᤺. ᤛᤖᤢᤃ᤻ᤃᤧᤴ ᤖᤀᤢᤖᤧ ᤁᤢᤛ᤻ᤛᤠ᤺. ᤖᤀᤢ᤺ᤴ ᤐᤣᤗᤣᤃᤖᤧ ᤁᤢᤛ᤻ᤛᤠ᤺. ᤐᤣᤗᤧᤃᤧᤴ ᤀᤣᤒᤧᤖᤖᤧ ᤁᤢᤛ᤻ᤛᤠ᤺. ᤀᤣᤒᤧᤖᤧᤴ ᤛᤧᤗᤜᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:36 ᤜᤧᤰᤁᤩᤠᤱ ᤛᤧᤗᤜ᤺ᤴ ᤁᤤᤏᤠᤏᤖᤧ ᤁᤢᤛ᤻ᤛᤠ᤺. ᤁᤤᤏᤠᤏᤧᤴ ᤀᤠᤷᤐᤰᤇᤍᤖᤧ ᤁᤢᤛ᤻ᤛᤠ᤺. ᤀᤠᤷᤐᤰᤇᤍᤧᤴ ᤛᤧᤔᤖᤧ ᤁᤢᤛ᤻ᤛᤠ᤺. ᤛᤧᤶᤔᤡᤴ ᤏᤢᤜᤠᤖᤧ ᤁᤢᤛ᤻ᤛᤠ᤺. ᤏᤢᤜᤠ᤺ᤴ ᤗᤧᤔᤧᤂᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:37 ᤜᤧᤰᤁᤩᤠᤱ ᤗᤧᤔᤧᤰᤂᤧᤴ ᤔᤋᤢᤛᤣᤗᤜᤖᤧ ᤁᤢᤛ᤻ᤛᤠ᤺. ᤔᤋᤢᤛᤣᤗᤜ᤺ᤴ ᤜᤏᤥᤁᤖᤧ ᤁᤢᤛ᤻ᤛᤠ᤺. ᤜᤏᤥᤰᤁᤧᤴ ᤕᤧᤖᤧᤍᤖᤧ ᤁᤢᤛ᤻ᤛᤠ᤺. ᤕᤧᤖᤧᤍᤧᤴ ᤔᤜᤗᤠᤗᤧᤗᤖᤧ ᤁᤢᤛ᤻ᤛᤠ᤺. ᤔᤜᤗᤠᤗᤧᤴ ᤁᤤᤏᤠᤏᤖᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 3:38 ᤁᤣᤏᤠᤏᤧᤴ ᤀᤣᤏᤥᤛᤖᤧ ᤁᤢᤛ᤻ᤛᤠ᤺. ᤀᤣᤏᤥᤛᤧᤴ ᤛᤣᤋᤖᤧ ᤁᤢᤛ᤻ᤛᤠ᤺. ᤛᤣᤋᤧᤴ ᤀᤠᤍᤔᤖᤧ ᤁᤢᤛ᤻ᤛᤠ᤺. ᤀᤠᤍᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤘᤕᤧᤖᤥ॥
LUK 4:1 ᤕᤧᤛᤢ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤕᤷᤍᤏ ᤕᤱᤄᤱᤗᤠᤶ ᤐᤣ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤗᤠᤶᤗᤥᤛᤢᤀᤠᤱ ᤋᤣ᤹ᤖᤢᤖᤥ॥
LUK 4:2 ᤂᤧᤵᤔᤥ ᤗᤡᤒᤥ᤺ᤱ ᤕᤧᤴ (᥊᥆) ᤌᤠᤖᤡᤰ ᤘᤕᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤗᤠᤕᤥ ᤆᤥ᤺ᤰᤐᤠᤱᤔᤠ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤛᤠ᤹ᤖᤢ॥ ᤂᤧᤴ ᤕᤧᤶ ᤂᤠᤖᤠᤰ ᤂᤢᤏᤧ᤹ ᤌᤣᤀᤠᤱ ᤔᤧᤈᤏᤧᤴ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤁᤢᤛᤧᤳᤗᤠ᤺ᤰᤋᤧ॥
LUK 4:3 ᤂᤧᤵᤔᤥ ᤔᤠᤑᤧᤴᤛᤠᤶᤔᤡᤴ ᤋᤩᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ ᤁᤴ ᤗᤢᤱᤅᤡᤴ ᤂᤖᤧ᤺ᤱ ᤐᤥ᤺ᤰᤂᤧ᤹ ᤑᤠ᤹ᤀᤠᤱ ᤔᤧᤳᤋᤧ᤹॥”
LUK 4:4 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤜᤧᤰᤁᤣ ᤔᤧᤈᤥ᤺ᤰᤁᤠᤴ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤔᤥᤛᤠᤖᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤁᤢᤈᤠ᤺ᤸᤗᤧᤖᤰ ᤔᤧᤜᤡᤱᤏᤧᤴ॥’”
LUK 4:5 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤌᤠ᤺ᤱ ᤁᤥ᤺ᤰᤔᤠᤸᤗᤧ ᤁᤢᤛᤶᤔᤥ ᤋᤣ᤹ᤖᤢᤀᤠᤱ ᤔᤡᤰᤆᤡᤖᤠᤵᤐᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤀᤥᤛᤣ᤺ᤴᤎᤠᤰᤋᤢᤀᤠᤱ
LUK 4:6 ᤔᤧᤳᤋᤢ. “ᤁᤴ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ ᤁᤧᤖᤧᤰ ᤕᤢᤰᤜᤠ᤹ ᤀᤡᤱᤃᤠ᤹ ᤐᤡᤔᤠ ᤛᤢᤰᤏᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤛᤶᤍᤠᤱ ᤕᤢᤰ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤛᤡᤖᤠ᤹ ᤁᤧᤎᤠᤱᤒᤧᤴ ᤀᤠᤳᤋᤡᤴᤇᤠᤱ ᤐᤡᤔᤠ ᤛᤢᤰᤋᤢᤱᤗᤥ॥
LUK 4:7 ᤂᤧᤏᤧ᤹ ᤛᤠᤶᤒᤥ᤺ᤴ ᤁᤧᤓᤴᤇᤡᤱᤅᤠᤱ ᤛᤣᤘᤠ ᤁᤧᤔᤧᤳᤋᤠᤏᤧ ᤑᤠ᤹ᤃᤪ ᤁᤧᤖᤧᤰ ᤂᤧᤏᤧ᤹ᤀᤡᤴ ᤐᤥ᤺ᤱᤗᤥ॥”
LUK 4:8 ᤕᤧᤛᤢᤖᤧ ᤂᤢᤏᤧ᤹ ᤔᤧᤳᤋᤢ. “ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤂᤧᤏᤧ᤹ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤣᤘᤠ ᤆᤥᤃᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤀᤡᤴᤗᤰ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥’”
LUK 4:9 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤋᤣ᤹ᤖᤢᤀᤠᤱ ᤔᤠᤱᤜᤡᤶᤔᤥᤒᤠ ᤁᤠᤰᤏᤢ᤺ᤸᤗᤧ ᤁᤣ᤺ᤶᤒᤠ ᤆᤶᤈᤶᤒᤠ ᤋᤧᤴᤏᤥ ᤕᤧᤵᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤛᤠ᤺ᤏᤧ ᤑᤠ᤹ᤃᤪ. ᤁᤵᤔᤥᤗᤠᤶ ᤕᤥ ᤐᤡᤴᤍᤧ ᤌᤩᤧ᤹.
LUK 4:10 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤶᤒᤪᤠᤱ ᤁᤧᤶᤔᤧᤳᤗᤥ॥’
LUK 4:11 ᤜᤧᤰᤁᤩᤠᤱ ‘ᤂᤧᤱᤜᤠ᤹ᤖᤧ ᤂᤧᤏᤧ᤹ ᤌᤠ᤺ᤱ ᤌᤠ᤺ᤱᤅᤣ ᤂᤢᤏᤡ᤹ ᤜᤢᤰᤁᤥ ᤁᤧᤶᤍᤠ᤺ᤰᤁᤠᤱ ᤂᤧᤏᤧ᤹ ᤁᤧᤗᤠᤱᤅᤡᤴ ᤗᤢᤱᤅᤥ ᤔᤧᤎᤠᤶᤛᤡᤱᤅᤡᤴᤗᤥ॥’”
LUK 4:12 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤧᤴᤏᤧ᤹ᤀᤥ॥’”
LUK 4:13 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤖᤢ ᤛᤢᤖᤢᤀᤠᤱ ᤛᤵᤑᤠᤖᤧ ᤗᤠᤃᤡ ᤕᤠᤶᤔᤥ ᤛᤢᤕᤧᤶ ᤔᤧᤱᤄᤥᤀᤣ ᤌᤠᤖᤡᤰ ᤂᤢᤏᤧ᤹ ᤗᤧᤖᤢᤎᤀᤠᤱ ᤐᤣᤖᤥ॥
LUK 4:14 ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤕᤧᤛᤢ᤺ᤴ ᤃᤠᤗᤡᤗ ᤌᤢᤶᤔᤥ ᤏᤢ᤺ᤰᤂᤧ॥ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤀᤡᤱᤄᤱᤅᤡᤴ ᤂᤡᤖᤡᤒᤠ ᤁᤠᤰ ᤗᤠᤈᤣ᤹ᤀᤥ ᤛᤧ᤺ᤖᤧᤖᤥ॥
LUK 4:15 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤌᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤖ ᤜᤢ᤹ᤖᤢᤛᤡᤸᤗᤧ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥
LUK 4:16 ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤥ᤺ᤖᤧᤀᤠᤱ ᤌᤠᤱᤒᤧᤴ ᤁᤧᤖᤧᤒᤠ ᤏᤠᤛᤖᤋ ᤐᤠᤱᤈᤢᤶᤔᤥ ᤋᤩᤧ॥ ᤂᤢᤏᤧ᤹ ᤁᤢᤕᤧᤵᤗᤧᤰ ᤁᤢᤀᤡᤛᤡ᤺ᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤛᤠᤶᤕᤥᤛᤠᤵᤗᤠ᤺ᤴ ᤏᤡ᤺ᤵᤔᤠ ᤑᤠ᤹ᤀᤠᤱ ᤕᤧᤶᤛᤡᤱ॥
LUK 4:17 ᤂᤧᤵᤔᤥ ᤁᤧᤘᤠ᤹ᤒᤠ ᤛᤠᤶᤕᤥᤛᤠᤵᤗᤠ ᤁᤧᤃᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤁᤢᤃᤡᤳᤏᤠ᤺ᤴ ᤔᤧᤒᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤑᤠ᤺ᤰᤂᤢᤀᤠᤱ ᤀᤰᤂᤣᤗ᤹ᤖᤡᤰ ᤁᤧᤒᤵᤐᤧᤴ ᤂᤥ᤺ᤛᤢᤀᤠᤱ ᤏᤡ᤺ᤖᤢ–
LUK 4:18 “ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤡᤱᤃᤠ᤹ ᤀᤠᤛᤶᤍᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤔᤠᤱᤎᤥ᤺ᤰᤏᤠ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤛᤠᤰᤐᤠ ᤁᤧᤎᤠ᤺ᤒᤠᤜᤠ᤹ ᤆᤥ᤺ᤰᤕᤢᤶᤓᤥᤖᤧᤴ ᤀᤡᤱᤓᤴ ᤆᤥ᤺ᤰᤛᤧ. ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤰᤛᤠ᤺ᤴ ᤘᤣ᤺ᤶᤔᤠ ᤀᤡᤱᤓᤴ ᤆᤥ᤺ᤰᤛᤧ. ᤜᤧᤰᤁᤩᤠᤱ ᤀᤣᤵᤗᤧᤰᤂᤧᤀᤥ ᤁᤧᤘᤠ᤹ᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤛᤧ ᤏᤢ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤋᤱᤒᤣᤸᤗᤧᤴ ᤀᤡᤱᤓᤴ ᤆᤥ᤺ᤰᤛᤧ ᤀᤡᤱᤃᤠ᤹ ᤐᤠᤱᤄᤠᤱᤅᤠᤱ ᤘᤠ᤹ᤀᤠᤖᤥ॥”
LUK 4:20 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤛᤠᤶᤕᤥᤛᤠᤵᤗᤠ᤺ᤴ ᤛᤢᤒᤢᤀᤠᤱ ᤂᤧᤵᤔᤥ ᤁᤧᤕᤧᤵᤐᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤕᤢᤱᤛᤡᤱ॥ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤀᤥᤔᤧᤔᤧᤳᤋᤢᤸᤗᤧ
LUK 4:21 ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤀᤡᤴ ᤁᤴ ᤁᤧᤄᤧᤵᤛᤢᤶᤔᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤀᤥ ᤁᤧᤖᤧᤀᤠᤱ ᤘᤠ᤹ᤖᤥ॥”
LUK 4:22 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤄᤧᤶ ᤁᤧᤏᤢ᤹ᤒᤠ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤔᤧ᤺ᤶᤒᤡ᥅”
LUK 4:23 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤛ᤻ᤛᤣᤛᤠᤱ ᤂᤡᤏᤡ᤹ ᤁᤴ ᤂᤧᤍᤠ᤹ᤀᤡᤴ ᤀᤡᤱᤃᤠ᤹ ᤀᤠᤔᤧᤴᤏᤥ ᤁᤧᤒᤠ᤺ᤳᤋᤢᤶᤒᤡᤗᤠ. ‘ᤛᤡᤍᤠ᤹ᤛᤠᤶᤒᤣ. ᤋᤃᤡ ᤂᤧᤏᤧ᤹ ᤏᤢᤛᤡᤱᤅᤧ᤹ᤀᤥ॥’ ᤜᤧᤰᤁᤣᤗ᤹ᤖᤡᤰ ᤁᤐᤷᤏᤜᤢᤶᤔᤥ ᤁᤧᤈᤥᤃᤢᤒᤠ ᤀᤠᤏᤡᤃᤧ ᤂᤧᤵᤛᤢᤶᤒᤧᤒᤠ ᤜᤧᤰᤁᤣᤀᤣ ᤁᤴ ᤁᤧᤒᤠᤱᤈᤢᤶᤔᤥᤀᤠᤱ ᤆᤥᤃᤧ᤹ᤀᤥ॥
LUK 4:24 ᤁᤖ ᤂᤢᤏᤧ᤹ ᤔᤧᤳᤋᤢᤛᤡ. ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤳᤋᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤠᤱ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤔᤧᤴᤍᤠ᤺ᤰᤋᤢᤴᤗᤥ॥
LUK 4:25 ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤸᤗᤧ ᤁᤢᤕᤧᤶᤔᤥ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧ॥ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤧᤴ ᤋᤱᤒᤣ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤛᤢᤵᤛᤡᤱᤅᤠᤱ ᤐᤠᤱᤃᤧᤴᤍᤡᤱ ᤘᤠᤜᤡ᤺ᤳ ᤔᤧᤎᤩᤧᤏᤧᤴᤏᤠᤱ ᤂᤧᤴ ᤗᤠᤈᤣ᤹ᤀᤥ ᤁᤡᤵᤔᤠ ᤁᤧᤄᤢ᤺ᤒᤠ ᤕᤶᤒᤠ ᤛᤠᤰ ᤐᤥᤃᤧᤖᤥ॥
LUK 4:26 ᤂᤧᤵᤔᤥ ᤕᤖᤡᤰ ᤔᤣᤔᤣᤍᤢᤔᤠᤜᤠ᤹ ᤔᤧᤘᤕᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤣᤗᤡᤕᤠ᤺ᤴ ᤀᤡᤛᤪᤠᤀᤡᤗᤀᤥ ᤔᤧ᤺ᤴ. ᤁᤖ ᤛᤡᤍᤥᤏ ᤌᤢᤶᤔᤥᤒᤠ ᤛᤠᤖᤑᤋ ᤐᤠᤱᤈᤢᤶᤔᤥᤒᤠ ᤔᤣᤔᤣᤍᤢᤔᤠᤸᤗᤥᤖᤰ ᤐᤠᤱᤄᤢᤖᤥ॥
LUK 4:27 ᤜᤧᤰᤁᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤛᤠ᤺ᤸᤗᤧᤀᤠᤱ ᤀᤡᤛᤪᤠᤀᤡᤗᤀᤥ ᤕᤖᤡᤰ ᤗᤥᤃᤣ᤹ᤖᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤔᤧᤘᤕᤧᤛᤠᤱ ᤀᤠᤳᤋᤡᤴᤏᤠᤱ ᤔᤧᤏᤢᤛᤢᤴ. ᤁᤖ ᤛᤡᤖᤡᤕᤠᤛ᤻ᤔᤠ ᤏᤠᤔᤠᤏᤧᤴᤗᤰ ᤏᤢᤛᤢᤖᤥ॥”
LUK 4:28 ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧ॥
LUK 4:29 ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤕᤧᤛᤢ᤺ᤴ ᤔᤧᤍᤧᤶᤛᤢᤀᤠᤱ ᤐᤠᤱᤈᤢᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ॥ ᤜᤧᤰᤁᤩᤠᤱ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤕᤠᤰᤁᤣ᤺ᤰᤁᤥᤗᤠᤶ ᤗᤠᤵᤑᤢᤔᤠ ᤌᤠ᤺ᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤍᤣ᤹ᤖᤢ.
LUK 4:30 ᤁᤖ ᤔᤏᤠᤗᤢᤶᤔᤥᤗᤠᤶ ᤂᤢᤏᤧ᤹ ᤑᤡ᤺ᤴᤇᤡᤱᤅᤠᤱ ᤗ᤺ᤴᤍᤧ ᤐᤣᤖᤥ॥
LUK 4:31 ᤜᤧᤰᤁᤩᤠᤱ ᤂᤢᤏᤧ᤹ ᤃᤠᤗᤡᤗ ᤌᤢᤶᤔᤥᤒᤠ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤐᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥
LUK 4:32 ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤐᤠᤖᤧᤖᤥ॥
LUK 4:33 ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ.
LUK 4:34 “ᤏᤠᤛᤖᤋᤒᤠ ᤕᤧᤛᤢᤀᤣ. ᤂᤧᤏᤧ᤹ ᤀᤠᤏᤡᤃᤧᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤂᤧᤏᤧ᤹ ᤀᤠᤏᤡᤃᤧ ᤔᤧᤱᤛᤧ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤜᤠ᤺ᤳᤏᤧᤒᤣ ᤑᤠ᤹ᤀᤠᤱ ᤏᤡ᤺ᤛᤢᤶᤒᤧᤖᤥ–ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠᤏᤧᤖᤥ॥”
LUK 4:35 ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤛᤫᤠ᤺ᤳ᥄ ᤂᤧᤴ ᤔᤏᤠ᤺ᤴ ᤗᤧᤖᤧ᤹ᤀᤠᤱ ᤐᤣᤃᤧ᤹᥄” ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤂᤧᤴ ᤔᤏᤠ᤺ᤴ ᤂᤢᤏᤡ᤹ ᤋᤃᤡᤀᤣ ᤐᤡᤷᤎᤠᤵ ᤌᤠᤵᤛᤢᤀᤠᤱ ᤔᤧᤱᤄᤠ᤺ᤴᤏᤣ ᤗᤧᤖᤢᤎ᤺ᤖᤥ॥
LUK 4:36 ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤰᤋᤱᤒᤠ ᤏᤡᤛᤠᤶᤒᤣ᥅ ᤁᤴ ᤔᤏᤠ᤺ᤸᤗᤧᤃ ᤕᤢᤰ ᤏᤢ ᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤸᤗᤧ ᤔᤧᤗ᤺ᤴ ᤔᤧᤒᤣ᤺ᤰᤗᤥ᥄”
LUK 4:37 ᤁᤴ ᤀᤡᤱᤄᤱᤅᤡᤴ ᤂᤧᤴ ᤌᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤛᤧ᤺ᤖᤧᤖᤥ॥
LUK 4:38 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤐᤣ॥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤋᤢᤱᤅᤡᤸᤗᤧ ᤋᤖᤢᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤧᤴᤏᤥ ᤕᤧᤛᤢ᤺ᤴ ᤔᤧᤔᤧᤳᤋᤢ॥
LUK 4:39 ᤕᤧᤛᤢ᤺ᤴ ᤁᤧᤍᤢᤰᤔᤠᤸᤗᤧ ᤁᤢᤏᤧᤳᤏᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤂᤧᤴ ᤋᤢᤱ ᤋᤢᤰᤔᤠᤴ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤂᤡᤔᤥ ᤛᤡᤔᤥᤏᤖᤧ ᤁᤢᤴᤏᤥ᤺ᤵᤔᤧᤴ ᤏᤢᤖᤧᤀᤠᤱ ᤂᤧᤱᤜᤠ᤹ ᤋᤖᤣ ᤋᤥ᤺ᤛᤢᤛᤡᤖᤥ॥
LUK 4:40 ᤜᤧᤰᤁᤩᤠᤱ ᤏᤠᤶᤎᤩᤧᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤐᤖᤡᤰᤐᤠ ᤋᤢᤰᤔᤠᤸᤗᤧ ᤋᤖᤢᤛᤡᤒᤠ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤠᤖᤢᤛᤡ॥ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤒᤡᤖᤢᤛᤡᤀᤠᤱ ᤏᤢᤛᤢᤛᤡᤖᤥ॥
LUK 4:41 ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤃ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤗ᤺ᤴᤍᤧ ᤔᤧᤒᤣᤖᤥ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ᤏᤧᤖᤥ॥” ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖ ᤐᤠ᤺ᤵᤔᤠ ᤔᤧᤒᤠᤱᤄᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧᤖᤥ॥
LUK 4:42 ᤜᤧᤰᤁᤩᤠᤱ ᤋᤠᤏᤠᤶᤛᤠ ᤕᤧᤛᤢ᤺ᤴ ᤀᤣ᤺ᤰᤛᤠᤍᤧᤴᤏᤥ ᤐᤣ. ᤁᤖ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤀᤠᤳᤋᤥ ᤘᤠ᤹ᤒᤣ ᤑᤠ᤹ᤀᤠᤱ ᤔᤧᤃᤥ᤺ᤳᤋᤢ॥ ᤂᤢᤏᤧ᤹ ᤔᤧᤍᤢᤔᤢᤀᤠᤱ ᤂᤢᤏᤡ᤹ᤏᤢᤀᤣ ᤘᤠ᤹ᤖ ᤑᤠ᤹ᤀᤠᤱ ᤛᤠᤰᤔᤠ ᤔᤧᤃᤥ᤺ᤳᤋᤢᤖᤥ.
LUK 4:43 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤁᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤘᤣ᤹ᤛ᤻ᤔᤠ ᤐᤠᤱᤈᤢᤶᤜᤠ᤹ᤀᤥᤀᤠᤱ ᤀᤡᤱᤓᤥ᤺ᤔᤠᤀᤣ ᤐᤥ᤺ᤱᤗᤥ॥ ᤀᤡᤱᤃᤠ᤹ᤃ ᤒᤠ ᤂᤧᤸᤗᤧ ᤗᤠᤃᤡᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠᤖᤥ॥”
LUK 4:44 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤀᤠᤱ ᤛᤢᤏᤠᤀᤡᤱ ᤛᤧ᤺ᤛᤢᤖᤥ॥
LUK 5:1 ᤌᤡᤰ ᤕᤧᤴ ᤕᤧᤛᤢ᤺ᤴ ᤃᤏᤧᤛᤖᤧᤋ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤛᤢᤏᤠᤀᤡᤱ ᤛᤧ᤺ᤛᤢᤖ ᤕᤧᤒᤧᤸᤗᤧ ᤂᤧᤵᤔᤥ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤧᤶᤛᤧ ᤔᤧᤍᤩᤧᤀᤠᤱ ᤂᤢᤏᤧ᤹ ᤆᤡᤒᤢ᤺ᤳ ᤔᤧᤒᤴᤇᤢᤖᤥ॥
LUK 5:2 ᤂᤧᤵᤔᤥ ᤁᤢᤕᤠᤀᤥ ᤏᤧᤳᤇᤡ ᤂ᤺ᤱᤒᤣᤜᤠ᤹ ᤕᤧᤛᤢᤖᤧ ᤏᤡ᤺ᤛᤢᤛᤡ. ᤁᤖ ᤁᤢᤒᤣᤛᤠᤱ ᤕᤥ᤺ᤱᤃᤧᤗᤧᤵᤐᤠᤜᤠ᤹ ᤂᤢᤏᤡ᤹ ᤕᤥ᤺ᤱ ᤘᤠᤜᤵᤏᤢ ᤔᤧᤕᤠᤃᤧ॥
LUK 5:3 ᤕᤧᤛᤢ᤺ᤴ ᤛᤡᤔᤥᤏᤖᤧ ᤁᤢᤄ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤔᤡᤛᤠᤰ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤒᤠᤱᤄᤢ. ᤜᤧᤰᤁᤩᤠᤱ ᤂᤧᤵᤔᤥ ᤕᤢᤱᤛᤡᤱᤅᤠᤱ ᤔᤏᤠᤜᤠ᤹ ᤜᤢ᤹ᤖᤢᤛᤡ॥
LUK 5:4 ᤂᤢᤏᤧ᤹ ᤐᤠ᤺ᤵᤔᤠ ᤛᤢᤖᤢᤀᤠᤱ ᤛᤡᤔᤥᤏᤧᤴ ᤔᤧᤳᤋᤢ. “ᤂ᤺ᤱᤒᤣᤴ ᤏᤠ ᤁᤢᤍᤡ᤺ᤶᤒᤣ ᤁᤣ᤺ᤶᤒᤠᤀᤥ ᤋᤣ᤹ᤖᤧᤀᤠᤱ ᤕᤥ᤺ᤱᤅᤡᤴ ᤗᤧᤵᤋᤧ᤹॥”
LUK 5:5 ᤜᤧᤰᤁᤣ᤺ᤸᤗᤧ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤏᤠᤶᤍᤠ᤺ᤳᤋᤠ᤺ᤳ ᤕᤥ᤺ᤱ ᤗᤧᤵᤔᤏᤠᤛᤠᤱ ᤅᤠᤎᤡᤰᤁᤠᤱ ᤔᤧᤕᤠᤱᤄᤢᤶᤒᤧᤴᤗᤥ. ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤗᤧᤵᤋᤢᤱᤛᤠ᤹ᤖᤢᤱᤗᤥ॥”
LUK 5:6 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤥ᤺ᤱᤅᤡᤴ ᤗᤧᤵᤋᤢᤸᤗᤧ ᤕᤖᤡᤰ ᤅᤠᤜᤠ᤹ ᤔᤧᤎᤩᤧᤀᤠᤱ ᤕᤥ᤺ᤱᤅᤡᤴᤏᤣ ᤋᤧ᤺ᤱᤔᤠ ᤀᤡ᤺ᤳᤋᤧᤖᤥ॥
LUK 5:7 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ ᤂᤢᤏᤡ᤹ ᤋᤣ᤺ᤱᤈᤢᤶᤜᤠ᤹ ᤘᤣ᤹ ᤂ᤺ᤱᤒᤣᤴ ᤑᤧᤳᤋᤧᤶᤔᤧ᤹ᤀᤠᤱ ᤀᤠᤓᤠ᤹ᤖᤧᤶᤔᤧ᤹ᤀᤥ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤏᤧᤵᤔᤠᤱ ᤂ᤺ᤱᤒᤣᤜᤠ᤹ ᤅᤠ᤺ᤸᤗᤧ ᤋᤡᤶᤛᤧᤀᤠᤱ ᤏᤡ᤺ᤶᤔᤠ ᤀᤡ᤺ᤳᤋᤧ॥
LUK 5:8 ᤛᤡᤔᤥᤏ ᤐᤋᤪᤢᤛᤖᤧ ᤁᤴ ᤏᤡ᤺ᤛᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤗᤠᤕᤥᤒᤠ ᤔᤏᤠᤀᤠᤖᤥ. ᤂᤧᤏᤧ᤹ᤏᤢ ᤘᤠ᤹ᤔᤠ ᤔᤧᤗᤠ᤹ᤀᤠᤴᤗᤥ. ᤗᤧᤖᤠᤱ ᤌᤩᤠᤱᤅᤧ᤹ᤀᤥ॥”
LUK 5:9 ᤌᤣᤀᤠᤱᤓᤧᤸᤗᤧ ᤛᤡᤔᤥᤏ ᤏᤢ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤛᤡᤒᤠ ᤅᤠᤜᤠ᤹ ᤔᤧᤀᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
LUK 5:10 ᤛᤡᤔᤥᤏᤖᤧ ᤁᤢᤴᤈᤢᤶ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ᤺ᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤛᤡᤖᤧᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤛᤡᤔᤥᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹. ᤅᤠ ᤁᤧᤍᤧᤶᤛᤢᤒᤠ ᤜᤧᤰᤁᤣᤀᤣ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤏᤠ ᤁᤧᤍᤧᤶᤒᤠ ᤁᤧᤍᤠ᤺ᤵᤐᤠ ᤁᤧᤒᤥ᤺ᤱᤗᤥ॥”
LUK 5:11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂ᤺ᤱᤒᤣᤜᤠ᤹ ᤁᤢᤕᤠᤀᤥ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤗᤧᤖᤢ ᤔᤧᤎ᤺ᤀᤠᤱ ᤕᤧᤛᤢ᤺ᤴ ᤔᤧᤏᤠ᤺ᤳᤋᤢᤖᤥ॥
LUK 5:12 ᤌᤡᤰ ᤕᤧᤴ ᤕᤧᤛᤢ᤺ᤴ ᤗᤳᤇᤠ ᤐᤠᤱᤈᤢᤶᤔᤥ ᤘᤕᤧᤸᤗᤧ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤧᤸᤗᤧ ᤕᤧᤛᤢ᤺ᤴ ᤏᤡ᤺ᤛᤢᤀᤠᤱ ᤁᤢᤍᤃᤡ ᤛᤠᤶᤒᤥ᤺ᤴ ᤑᤴᤇᤡᤱᤗ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤗᤥᤃᤣ᤹ᤗᤠᤶ ᤘᤣ᤺ᤶᤔᤠ ᤁᤧᤛᤢᤰᤁᤠᤖᤥ॥”
LUK 5:13 ᤕᤧᤛᤢᤖᤧᤀᤠᤱ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤛᤢ᤺ᤛᤢᤖ ᤂᤧᤴ ᤔᤏᤠ᤺ᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤧᤏᤢ᤹ᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤜᤧᤰᤁᤩᤠᤱ ᤂᤡᤔᤥ ᤂᤧᤴ ᤗᤥᤃᤣ᤹ᤖᤧ ᤋᤖᤢᤒᤠ ᤔᤏᤠ᤺ᤴ ᤏᤢ᤺ᤖᤧᤖᤥ॥
LUK 5:14 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤴᤏᤧ᤹. ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤛᤠ᤹ᤖ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤏᤠᤜᤠ᤹ ᤏᤢ᤺ᤖᤠᤱ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠᤛᤡᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤆᤥᤃᤧ᤹ᤀᤥ॥”
LUK 5:15 ᤁᤖᤛᤠᤱ ᤁᤴ ᤐᤠ᤺ᤴᤏᤡᤴ ᤁᤠᤰ ᤐᤡᤛᤠᤱ ᤛᤧ᤺ᤖᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴ ᤂᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤏᤢᤛᤡᤱᤛᤧ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤩᤧ॥
LUK 5:16 ᤁᤖ ᤕᤧᤛᤢ᤺ᤴ ᤀᤧᤳᤗᤧᤱ ᤔᤏᤠᤗᤢᤶᤔᤥᤗᤠᤶ ᤛᤧᤴᤇᤡᤱᤅᤠᤱ ᤋᤢᤘᤠ ᤆᤥ᤺ᤰᤛᤧ ᤀᤣ᤺ᤰᤛᤠᤍᤧᤴᤏᤥ ᤐᤣᤖᤥ॥
LUK 5:17 ᤌᤡᤰ ᤕᤧᤴ ᤕᤧᤛᤢ᤺ᤴ ᤔᤏᤠᤜᤠ᤹ ᤂᤠᤜᤢᤴ ᤜᤢ᤹ᤖᤢᤛᤡᤖ ᤕᤢᤅᤧᤸᤗᤧ ᤂᤧᤵᤔᤥ ᤃᤠᤗᤡᤗ ᤏᤢ ᤕᤜᤢᤍᤡᤕᤠᤛ᤻ᤔᤠ ᤕᤖᤡᤰ ᤐᤠᤱᤈᤢᤶᤔᤥᤗᤠᤶ ᤜᤧᤰᤁᤩᤠᤱ ᤕᤖᤢᤛᤗᤧᤔᤗᤠᤶ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤔᤧᤍᤩᤧᤀᤠᤱ ᤂᤠᤜᤢᤴ ᤔᤧᤄᤧᤵᤛᤢᤖ ᤔᤧᤕᤢᤅᤧ॥ ᤕᤧᤛᤢᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤣ᤺ᤶᤔᤠ ᤁᤢᤔᤢᤰᤛᤠᤶᤔᤡᤴ ᤁᤳᤋᤢᤀᤠᤱ ᤘᤕᤧ.
LUK 5:18 ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤗᤱᤗᤧ᤺ᤱᤘᤠ ᤔᤏᤠ᤺ᤴ ᤁᤢᤏᤧᤳᤏᤠ᤺ᤴᤏᤢᤀᤣ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤧᤛᤢᤖᤧ ᤁᤢᤍᤃᤡ ᤋᤣ᤹ᤔᤠᤀᤠᤱ ᤏᤧᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢ.
LUK 5:19 ᤁᤖ ᤂᤧᤵᤔᤥ ᤕᤧᤛᤢ᤺ᤴ ᤘᤕᤧᤒᤠ ᤜᤡᤶᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤔᤧᤕᤢᤅᤧᤒᤠᤸᤗᤧ ᤆᤥᤃᤢᤸᤗᤧ ᤛᤡᤃᤠᤱ ᤋᤣ᤹ᤔᤠ ᤔᤧᤴᤇᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤌᤥ ᤂᤠᤶᤒᤢᤀᤥ ᤔᤧᤗᤠ᤺ᤛᤧᤀᤠᤱ ᤂᤠᤶᤒᤢ᤺ᤴ ᤔᤧᤜᤴᤍᤢ॥ ᤜᤧᤰᤁᤩᤠᤱ ᤗᤱᤗᤧ᤺ᤱᤘᤠ᤺ᤴ ᤁᤢᤏᤧᤳᤏᤠᤏᤢᤀᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤕᤧᤛᤢᤖᤧ ᤁᤢᤍᤃᤡ ᤕᤥ ᤔᤧᤜᤥᤛᤢ ᤔᤧᤎᤠᤛᤢᤖᤥ॥
LUK 5:20 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤏᤡ᤺ᤛᤢᤀᤠᤱ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤖᤥ॥”
LUK 5:21 ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤀᤰᤂᤣᤗ᤹ᤖᤡᤰ ᤔᤧᤀᤡ᤺ᤳᤋᤢ. “ᤁᤴ ᤔᤏᤠ᤺ᤴ ᤜᤠ᤺ᤵᤐᤣ᥅ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤴ ᤔᤏᤠ᤺ᤴ ᤜᤠ᤺ᤵᤐᤣ᥅ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤔᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴᤗᤥ॥”
LUK 5:22 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤌᤧᤔᤠ ᤔᤧᤀᤡ᤺ᤳᤋᤢᤖ ᤔᤧᤕᤢᤱ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡ᤺ᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤰᤋᤱᤒᤠ ᤌᤣᤀᤠᤱ ᤁᤧᤀᤡ᤺ᤳᤋᤢᤶᤒᤠᤒᤣ᥅
LUK 5:23 ᤁᤴ ᤗᤱᤗᤧ᤺ᤱᤘᤠ᤺ᤴ ‘ᤁᤧᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧ’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰᤐᤡ᥅ ᤀᤡ ‘ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤂᤵᤛᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤵᤔᤠ ᤀᤢᤛᤢᤖᤢ ᤆᤥ᤺ᤰ᥅
LUK 5:24 ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤴᤇᤠᤶᤛᤠ᤺ᤸᤗᤧ ᤗᤠᤕᤥ ᤗᤧᤵᤔᤡ ᤐᤡᤔᤠ ᤕᤢᤰ ᤁᤳᤋᤢ᤹ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ.” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤗᤱᤗᤧ᤺ᤱᤘᤠ ᤔᤏᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤁᤧᤜᤡᤶᤔᤥ ᤌᤠᤛᤡᤱᤅᤧ᤹॥”
LUK 5:25 ᤂᤡᤔᤥ ᤂᤧᤴ ᤂᤢᤏᤡ᤹ ᤋᤃᤡᤀᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤏᤧᤳᤏᤠ᤺ᤴ ᤕᤠᤱᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤁᤢᤜᤡᤶᤔᤥ ᤌᤠᤛᤡᤱᤗᤥ॥
LUK 5:26 ᤁᤧᤖᤧᤰᤗᤧ ᤂᤢᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤕᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤔᤧᤒᤡᤖᤢᤖ ᤔᤧᤒᤠ᤺ᤳᤋᤢ. “ᤀᤰᤋᤱᤒᤠᤃ ᤀᤠᤏᤡᤃᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤕᤡᤃᤧᤖᤥ॥”
LUK 5:27 ᤕᤠᤱᤛᤡ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤗ᤺ᤴᤍᤧ ᤐᤣᤀᤠᤱ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤗᤧᤒᤡ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠ᤺ᤴ ᤀᤣ᤺ᤱᤕᤠᤱ ᤑᤥ᤺ᤱᤔᤠ ᤋᤧᤴᤏᤥ ᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”
LUK 5:28 ᤜᤧᤰᤁᤩᤠᤱ ᤂᤧᤴᤏᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤎᤀᤠᤱ ᤂᤢᤏᤧ᤹ᤏᤢ ᤌᤠᤛᤡᤱᤗᤥ॥
LUK 5:29 ᤕᤠᤱᤛᤡ ᤕᤧᤛᤢᤖᤧ ᤁᤢᤗᤠᤃᤡ ᤗᤧᤒᤡ᤺ᤸᤗᤧ ᤁᤢᤜᤡᤶᤔᤥ ᤕᤶᤒᤠ ᤆᤠᤔᤢᤰ ᤌᤡᤔᤢᤰ ᤛᤧ᤺ᤛᤢ॥ ᤂᤧᤵᤔᤥ ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤘᤣ᤹ ᤋᤖᤣᤒᤠᤜᤠ᤹ ᤔᤧᤘᤕᤧᤖᤥ॥
LUK 5:30 ᤂᤧᤵᤔᤥ ᤑᤖᤡᤛᤡᤜᤠ᤹ ᤏᤢ ᤂᤢᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤏᤧ ᤔᤧᤎᤡᤰᤋᤧᤖ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤜᤧᤰᤁᤩᤠᤱ ᤗᤠᤕᤥᤒᤠᤜᤠ᤹ᤏᤢ ᤌᤣᤀᤠᤱ ᤂᤡᤏᤡ᤹ ᤁᤧᤍᤱᤅᤠᤛᤡᤀᤠᤱ ᤆᤠ ᤁᤧᤈᤠᤶᤒᤠᤒᤣ᥅”
LUK 5:31 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤍᤠ᤹ᤛᤠᤶᤒᤧᤱᤃ ᤔᤧᤴᤍᤢᤰᤔᤏᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤁᤧᤍᤢᤰᤐᤠᤜᤠ᤹ᤖᤧ ᤗᤠᤃᤡᤖᤥ॥
LUK 5:32 ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ᤀᤠᤱ ᤛᤠᤶᤕᤥᤏᤡᤒᤠᤜᤠ᤹ ᤔᤧ᤺ᤴ. ᤁᤖ ᤗᤠᤕᤥᤒᤠᤜᤠ᤹ ᤗᤠᤕᤥᤗᤠᤶ ᤔᤧᤜᤡᤴᤗ ᤑᤠ᤹ᤀᤠᤱ ᤀᤢ᤺ᤳᤇᤧ ᤋᤩᤠᤱᤒᤠᤖᤥ॥”
LUK 5:33 ᤁᤢᤓᤠᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤃ ᤀᤧᤳᤗᤧᤱ ᤆᤠ᤺ᤏᤧᤳᤋᤥ ᤏᤢ ᤋᤢᤘᤠ ᤆᤥ᤺ᤰᤁᤡ ᤔᤧᤕᤢᤱ. ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤜᤧᤰᤁᤣ ᤔᤧᤈᤥ᤺ᤰ. ᤁᤖ ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ᤃ ᤆᤠ᤺ᤏᤧᤳᤋᤥᤀᤠᤱ ᤔᤧᤴᤕᤢᤱᤏᤧᤴ. ᤔᤧᤈᤖ ᤔᤧᤎᤢᤅᤢᤖ ᤔᤧᤘᤠ᤹ᤀᤡᤱᤃ᥄”
LUK 5:34 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤣ᤺ᤰᤂᤡᤶᤛᤠᤒᤧᤴ ᤁᤢᤴᤈᤢᤶᤜᤠ᤹ᤏᤢ ᤘᤠ᤹ᤖ ᤌᤠᤖᤡᤰ ᤂᤧᤱᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤒᤡ᥅
LUK 5:35 ᤁᤖ ᤂᤧᤱᤜᤠ᤹ᤗᤠᤶ ᤔᤣ᤺ᤰᤂᤡᤶᤛᤠᤒᤧᤴ ᤛᤠᤰᤁᤧᤸᤗᤧᤰ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤸᤗᤧ ᤂᤧᤱᤜᤠ᤹ ᤆᤠ᤺ᤏᤧᤳᤋᤥ ᤔᤧᤕᤢᤱᤗᤥ॥”
LUK 5:36 ᤜᤧᤰᤁᤩᤠᤱ ᤕᤠᤶᤔᤥ ᤂᤢᤏᤧ᤹ ᤁᤴ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤠ᤺ᤳᤗᤧᤀᤠᤱ ᤁᤢᤛᤱ ᤆᤠᤱᤅᤡᤴ ᤌᤧ᤺ᤰᤂᤢᤀᤠᤱ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤗᤧᤶᤍᤢᤴ. ᤗᤧᤶᤍᤢᤏᤧ ᤑᤠ᤹ᤃᤪ ᤁᤢᤛᤱ ᤆᤠᤱᤅᤡᤴ ᤋᤧ᤺ᤱᤒᤣ᤺ᤰᤗᤥ. ᤜᤧᤰᤁᤩᤠᤱ ᤁᤢᤛᤱ ᤆᤠᤱᤅᤡᤸᤗᤧ ᤁᤢᤍᤪᤧᤰ ᤆᤠᤱᤅᤡᤴ ᤔᤧᤄᤧᤶᤍᤢᤴᤏᤠᤱᤗᤥ॥
LUK 5:37 ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤸᤗᤧᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠᤀᤥ ᤔᤧᤕᤢᤰᤂᤢᤴ॥ ᤕᤢᤰᤂᤢᤏᤧ ᤑᤠ᤹ᤃᤪ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤁᤢᤍᤪᤧᤰ ᤛᤧᤜᤥᤒᤠ ᤛᤢ᤺ᤰᤘᤠ᤺ᤴ ᤌᤧ᤺ᤰᤂᤢᤍᤣ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤌᤡ᤺ᤴ ᤘᤧᤳ ᤐᤣ᤺ᤰᤁᤠᤱ ᤆᤠᤛᤥ᤺ᤰᤗᤥ॥
LUK 5:38 ᤁᤖ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤁᤢᤛᤱ ᤛᤧᤜᤥᤒᤠ ᤛᤢ᤺ᤰᤘᤠᤀᤥᤀᤣ ᤕᤠᤰᤔᤠ ᤐᤥ᤺ᤱᤗᤥ॥
LUK 5:39 ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤌᤢᤅᤢᤀᤠᤱ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤌᤢᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ. ᤌᤣᤀᤠᤱᤓᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤣ ᤁᤢᤈᤠ ᤏᤢ᤹ᤖᤥ॥’”
LUK 6:1 ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤗᤢᤶᤔᤥᤏᤢ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤆᤠᤛᤶᤔᤡᤴ ᤔᤧᤍᤢᤒᤢᤀᤠᤱ ᤜᤢᤰᤁᤥ ᤔᤧᤏᤢᤃᤢᤖ ᤆᤠᤔᤠ ᤔᤧᤜᤣ᤺ᤰᤋᤢᤖᤥ॥
LUK 6:2 ᤜᤧᤰᤁᤣ᤺ᤸᤗᤧ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤱᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ. “ᤌᤣᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢᤶᤒᤠᤒᤣ᥅”
LUK 6:3 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤛᤠᤶᤕᤥᤛᤠᤵᤗᤠ᤺ᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡᤒᤡ᥅ ᤌᤡᤰᤗᤧᤱ ᤍᤠᤀᤢᤍ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ
LUK 6:4 ᤂᤢᤏᤧ᤹ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤅᤡᤴ ᤆᤀᤠᤱ ᤁᤢᤔᤏᤠᤜᤠ᤹ᤀᤠᤱ ᤐᤡᤖᤢᤛᤡ॥ ᤂᤧᤱᤃ ᤀᤠᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤖᤰ ᤆᤠᤔᤠ ᤁᤧᤏᤢ᤹ᤒᤠ ᤘᤕᤧᤖᤥ॥”
LUK 6:5 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠᤖᤥ॥”
LUK 6:6 ᤘᤣ᤹ᤛ᤻ᤔᤠ ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤜᤢ᤹ᤖᤢᤛᤡᤖ ᤕᤠᤃᤧ॥ ᤂᤧᤵᤔᤥ ᤆᤢᤵᤛᤠᤱ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤎᤡᤰ ᤘᤕᤧ॥
LUK 6:7 ᤀᤠᤸᤗ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤏᤠ᤺ᤶᤛᤡᤱ ᤕᤧᤴᤏᤥ ᤘᤣ᤺ᤴᤍᤢᤸᤗᤧ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤂᤧᤵᤔᤥ ᤔᤧᤛᤢᤃᤢᤀᤠᤱ ᤔᤧᤘᤕᤧᤖᤥ॥
LUK 6:8 ᤁᤖ ᤕᤧᤛᤢᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠ᤺ᤴ ᤔᤧᤳᤋᤢ. “ᤑᤧᤖᤧ᤹ᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤒᤧ᤹॥” ᤂᤧᤴᤏᤠᤱ ᤑᤧᤖᤧᤀᤠᤱ ᤂᤧᤵᤔᤥ ᤕᤧᤒᤧ॥
LUK 6:9 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤐᤠ᤺ᤴᤎᤡᤰ ᤛᤣ᤺ᤴᤍᤥ᤺ᤏᤡᤱᤗᤥ–ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤥ. ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤳᤋᤡᤴ ᤆᤥ᤺ᤰᤔᤠ ᤀᤠᤒᤡ᤹ᤒᤣ᥅ ᤜᤡᤱᤔᤴ ᤛᤧ᤺ᤵᤔᤠᤒᤡ ᤔᤧᤱᤔᤠᤒᤡ᥅”
LUK 6:10 ᤂᤢᤏᤧ᤹ ᤂᤡᤖᤡ ᤀᤥᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠ᤺ᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤖᤥ॥
LUK 6:11 ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤁᤴ ᤕᤧᤛᤢ᤺ᤴ ᤌᤣ ᤔᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴ ᤌᤰᤔᤠ ᤔᤧᤜᤣ᤺ᤰᤋᤧᤖᤥ॥
LUK 6:12 ᤌᤡᤰ ᤕᤧᤴ ᤕᤧᤛᤢ᤺ᤴ ᤁᤥ᤺ᤰᤔᤠᤀᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤏᤠᤶᤍᤠ᤺ᤳᤋᤠ᤺ᤳ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥᤃᤧᤖᤥ॥
LUK 6:13 ᤜᤧᤰᤁᤩᤠᤱ ᤂᤠᤀᤥ᤺ᤳᤋᤧᤀᤠᤱ ᤕᤧᤛᤢᤖᤧ ᤁᤠᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤀᤥᤗᤠᤶ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣᤃᤢᤛᤡ॥ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠᤛᤡ ᤔᤧᤳᤋᤢᤛᤡᤖᤥ॥
LUK 6:14 ᤂᤧᤱᤜᤠ᤹ᤀᤥ ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢ). ᤜᤧᤰᤁᤩᤠᤱ ᤂᤧᤸᤗᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛ. ᤕᤠᤁᤢᤒ. ᤕᤢᤜᤢᤴᤏᤠ. ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ.
LUK 6:15 ᤔᤳᤋᤡ. ᤌᤥᤔᤠ ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ. ᤛᤡᤔᤥᤏ (ᤂᤢᤏᤧ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤈᤡᤗᤋᤡ ᤔᤧᤵᤔᤏᤠᤒᤠ ᤘᤕᤧ).
LUK 6:16 ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤘᤕᤧ. ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ ᤘᤕᤧ. ᤂᤧᤴ ᤋᤠ᤺ᤴᤍᤡ ᤏᤛᤠ᤺ᤴ ᤁᤧᤗᤧᤱᤒᤠ ᤐᤥ᤺ᤰᤂᤧᤖᤥ॥
LUK 6:17 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤕᤥ ᤌᤩᤧᤀᤠᤱ ᤏᤧᤏᤧᤒᤠ ᤋᤧᤴᤏᤥ ᤕᤧᤶᤛᤡᤱᤗᤥ॥ ᤂᤧᤵᤔᤥ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤠᤰ ᤕᤜᤢᤍᤡᤕᤠ ᤌᤢᤶ. ᤕᤖᤢᤛᤗᤧᤔ. ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰᤁᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤍᤩᤧᤀᤠᤱ ᤔᤧᤘᤕᤧ॥
LUK 6:18 ᤂᤧᤱᤜᤠ᤹ ᤂᤢᤏᤧ᤹ ᤁᤢᤄᤧᤶᤛᤧ ᤏᤢ ᤂᤢᤏᤡ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤘᤣ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤣ᤺ᤳᤋᤧᤖᤥ॥
LUK 6:19 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤢ᤺ᤔᤠ ᤔᤧᤃᤥ᤺ᤳᤋᤢ ᤌᤣᤀᤠᤱᤓᤧᤸᤗᤧ ᤁᤧᤘᤣ᤺ᤶᤒᤠ ᤔᤢᤰᤛᤠᤶ ᤂᤢᤏᤧ᤹ᤀᤥᤗᤠᤶ ᤗ᤺ᤴᤍᤧᤖ ᤐᤳᤇᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤘᤣ᤺ᤴᤍᤢᤛᤡᤖᤥ॥
LUK 6:20 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤕᤠᤱᤁᤧᤛᤠ᤹ᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ᤀᤡᤴᤏᤧᤖᤥ॥
LUK 6:21 ᤀᤠᤸᤗ ᤛᤠᤰᤁᤡᤸᤗᤧ ᤋᤖᤢᤛᤡᤒᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡ ᤂᤡᤏᤡ᤹ ᤁᤧᤄᤠᤛᤡᤀᤠᤱ ᤂᤡᤏᤡ᤹ ᤏᤡᤱᤛᤶᤗᤥ॥ ᤀᤠᤸᤗᤥ ᤔᤣᤖᤡᤱ ᤌᤰᤏᤢ ᤁᤧᤜᤠ᤺ᤵᤐᤠᤛᤣ. ᤂᤡᤏᤡ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤀᤣᤖᤡ᤹ᤖᤥ॥
LUK 6:22 ᤔᤧᤴᤇᤠᤶᤛᤠ᤺ᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤒᤠ. ᤁᤧᤶᤏᤠ᤹ᤖᤡᤒᤠ ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤔᤧᤎᤠᤛᤢᤀᤠᤱ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳᤋᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤏᤡᤱᤗᤥ॥
LUK 6:23 ᤂᤧᤴ ᤕᤧᤶᤔᤥ ᤛ᤺ᤳᤋᤧᤶᤔᤧ᤹ᤀᤥ. ᤀᤥᤔᤢ ᤗ᤹ᤖᤧᤶᤔᤧ᤹ᤀᤠᤱ ᤗᤠ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤢᤶᤄᤥ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤆᤥ᤺ᤰᤗᤥ॥ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤕᤧᤖᤥ॥
LUK 6:24 ᤁᤖ ᤀᤠᤸᤗᤥ ᤕᤠᤱᤛᤠᤁᤢᤴᤎᤣᤛᤠᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛ᤺ᤵᤔᤠᤴ ᤏᤢ ᤏᤡᤱᤘᤠ᤹ ᤋᤠ᤺ᤔᤠᤴ ᤂᤡᤏᤡ᤹ ᤜᤡᤱᤔᤴᤏᤥᤀᤣ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
LUK 6:25 ᤀᤠᤸᤗᤥ ᤁᤧᤄᤠᤒᤠᤀᤠᤱ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤰᤔᤧᤴᤈᤠ ᤁᤧᤒᤥ᤺ᤰᤂᤡ᤹ᤖᤥ॥ ᤀᤠᤸᤗᤥ ᤁᤧᤀᤣ᤺ᤵᤐᤠᤖ ᤁᤧᤘᤠ᤹ᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤣᤖᤡᤱ ᤌᤰᤏᤢ ᤁᤧᤜᤠᤒᤡ᤹ᤖᤥ॥
LUK 6:26 ᤀᤠᤸᤗᤥ ᤔᤏᤠᤜᤠ᤹ᤖᤧ ᤏᤢ᤺ᤖᤡᤰ ᤔᤧᤔᤧᤳᤋᤢᤛᤡᤒᤠᤛᤣ. ᤆᤡ᤺ᤳᤋᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧᤀᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡᤖᤥ॥”
LUK 6:27 “ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴ ᤁᤧᤄᤧᤶᤒᤠᤛᤣ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ ᤕᤠᤵᤔᤡ ᤁᤧᤈᤡ᤺ᤵᤐᤠᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
LUK 6:28 ᤂᤡᤏᤡ᤹ ᤛᤠᤱᤃᤪᤠ ᤁᤧᤔᤧᤵᤐᤠᤜᤠ᤹ ᤔᤢ᤹ᤀᤡᤛᤠᤶ ᤌᤠᤛᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤋᤢᤘᤠ ᤆᤥᤃᤧᤶ ᤐᤡᤖᤧᤶᤛᤡᤶᤔᤧ᤹ᤀᤥ॥
LUK 6:29 ᤜᤠ᤺ᤳᤗᤧ ᤁᤧᤏᤧᤍᤧᤱᤒᤠᤴ ᤁᤧᤗᤧᤱ ᤁᤧᤒᤡ᤹. ᤂᤧᤏᤧ᤹ ᤘᤣ᤹ ᤗᤧᤵᤔᤠᤱᤒᤠ ᤁᤧᤏᤧᤍᤧᤱᤒᤠᤴᤏᤠᤱ ᤂᤧᤴ ᤋᤥ᤺ᤴᤍᤧ ᤐᤡᤖᤧ᤹॥ ᤜᤠ᤺ᤳᤗᤧ ᤛᤠᤰᤁᤧᤸᤗᤧᤰ ᤁᤧᤛᤢᤱᤄᤣ᤺ᤰᤘᤠ᤺ᤴ ᤁᤧᤏᤠᤵᤐᤠᤱ ᤋᤣ᤹ᤖᤢ᤹. ᤂᤧᤴᤏᤡᤴ ᤁᤧᤈᤠᤱᤔᤠ ᤋᤣ᤺ᤳᤋᤡᤴᤏᤠᤱ ᤐᤡᤖᤧᤍᤣ᤺ᤛᤧ᤹ᤀᤥ॥
LUK 6:30 ᤜᤧᤰᤁᤩᤠᤱ ᤁᤧᤏᤠ᤺ᤰᤐᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤁᤧᤈᤡᤃ᤺ᤰᤘᤠᤜᤠ᤹ ᤁᤧᤍᤣ᤹ᤒᤠᤜᤠ᤹ ᤕᤠᤶᤔᤥ ᤕᤠᤱᤏᤠ ᤔᤧᤏᤠ᤺ᤰᤋᤧᤛᤧᤴᤏᤧ᤹ᤀᤥ॥
LUK 6:31 ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤀᤠᤰᤂᤣ ᤁᤧᤶᤔᤧᤳᤋᤡᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤂᤡᤏᤡ᤹ᤀᤠᤱ ᤒᤠ ᤜᤧᤰᤁᤣ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
LUK 6:32 ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤜᤠ᤹ᤖᤰ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥅ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤈᤥᤃᤢ᤹ᤖᤥ॥
LUK 6:33 ᤜᤧᤰᤁᤩᤠᤱ ᤂᤡᤏᤡ᤹ ᤏᤢ᤺ᤖᤡᤰ ᤁᤧᤔᤧᤵᤐᤠᤜᤠ᤹ᤖᤰ ᤏᤢ᤺ᤖᤡᤰ ᤁᤧᤔᤧᤳᤋᤢᤶᤛᤡᤶᤏᤧ ᤑᤠ᤹ᤃᤪ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥄ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤔᤧᤳᤋᤢᤛᤡ᤹ᤖᤥ॥
LUK 6:34 ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤔᤥ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤔᤏᤠᤜᤠ᤹ ᤌᤧ᤹ᤗᤠ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤌᤣ ᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱᤒᤣ᥄ ᤂᤧᤱᤃ ᤗᤠᤕᤥᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤈᤥᤃᤢ᤹ᤖᤥ॥
LUK 6:35 ᤁᤖ ᤂᤡᤏᤡ᤹ ᤏᤡᤱᤔᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. ᤂᤧᤱᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤔᤧᤏᤢ᤺ᤰᤋᤢᤖ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤌᤧ᤹ᤗᤠ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤢᤶᤄᤥ᤺ᤴ ᤕᤖᤡᤰ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ ᤏᤢ ᤑᤥᤋᤩᤠᤒᤠ ᤔᤏᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥
LUK 6:36 ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤆᤥ᤺ᤰ. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥”
LUK 6:37 “ᤔᤏᤠᤜᤠ᤹ ᤐᤠ᤺ᤴ ᤔᤧᤎᤡᤰᤋᤧᤶᤛᤡᤶᤔᤧᤴᤏᤧ᤹. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠ᤺ᤴ ᤁᤧᤴᤎᤡᤰᤋᤡᤴᤗᤥ॥ ᤔᤏᤠᤜᤠ᤹ ᤆᤧ᤹ᤕᤠ ᤀᤡᤱᤍᤥ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤆᤧ᤹ᤕᤠ ᤀᤡᤱᤍᤥ ᤁᤧᤔᤧᤶᤔᤧᤳᤋᤡᤴᤗᤖᤥ॥ ᤔᤏᤠᤜᤠ᤹ ᤗᤧᤵᤔᤡ ᤐᤡᤖᤧᤶᤛᤡᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤧᤵᤔᤡ ᤁᤧᤒᤡᤖᤡ᤹ᤖᤥ॥
LUK 6:38 ᤔᤏᤠᤜᤠ᤹ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤁᤧᤶᤒᤡᤖᤡ᤹ᤖᤥ॥ ᤏᤢ᤺ᤖᤡᤰ ᤛᤡ᤺ᤰᤋᤧᤶᤔᤧ᤹ ᤏᤢ᤺ᤖᤡᤰ ᤌᤧᤰᤋᤧᤶᤔᤧ᤹ᤖ ᤏᤢ᤺ᤖᤡᤰ ᤔᤢᤴᤍᤧᤶᤔᤧ᤹ᤖ ᤁᤢᤎᤡᤶ ᤐᤥ᤺ᤱᤅᤠᤱ ᤁᤢᤘᤧᤳᤘᤧᤳ ᤔᤏᤠᤜᤠ᤹ ᤛᤡ᤺ᤰᤋᤧᤶ ᤐᤡᤖᤧᤶᤛᤡᤶᤔᤧ᤹. ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤁᤧᤶᤒᤡᤖᤡ᤹ᤖᤥ॥ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤁᤧᤛᤡ᤺ᤰᤋᤢᤶ ᤁᤧᤒᤡᤖᤢᤶᤛᤡᤶ. ᤒᤠ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤁᤧᤶᤛᤡ᤺ᤰᤋᤡ ᤁᤧᤶᤒᤡᤖᤡ᤹ᤖᤥ॥”
LUK 6:39 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤴ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤡᤰᤑ᤺ᤶᤒᤠᤸᤗᤧ ᤘᤣ᤹ ᤔᤡᤰᤑ᤺ᤶᤒᤧᤴ ᤗᤠᤶᤗᤥᤔᤠ ᤔᤧᤛᤢᤰᤋᤢᤴᤗᤥ. ᤗᤠᤶᤗᤥᤛᤢᤏᤧ ᤑᤠ᤹ᤃᤪ ᤏᤧᤵᤔᤠᤱ ᤗᤢᤶᤒᤠ᤺ᤳᤋᤥ ᤁᤧᤱᤛᤡ ᤗᤠ᤺ᤳᤇᤡ᤹ᤖᤥ॥
LUK 6:40 ᤜᤢ᤹ᤛᤠᤶᤒᤧᤴ ᤁᤢᤛᤡᤰᤛᤠᤶᤒᤧᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥ ᤁᤖ ᤂᤢᤏᤧ᤹ ᤏᤢ᤺ᤖᤡᤰ ᤜᤢ᤹ᤛᤡᤱ ᤛᤢ᤺ᤳᤇᤡᤱᤅᤠᤱ ᤂᤢᤏᤧ᤹ ᤁᤢᤛᤡᤰᤛᤠᤶᤒᤧᤴ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥
LUK 6:41 ᤀᤠᤒᤠᤅᤣ ᤌᤰᤁᤥ ᤛᤠ᤺ᤱᤘᤧᤳ ᤆᤠᤖᤠᤶᤒᤠ ᤔᤧᤴᤏᤡ᤺ᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤖᤧ ᤁᤢᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤁᤧᤏᤡ᤺ᤛᤢᤒᤣ᥅
LUK 6:42 ᤂᤧᤏᤧ᤹ ᤀᤠᤒᤠᤅᤣ ᤁᤧᤎᤰᤁᤥ ᤛᤠ᤺ᤱᤘᤧᤳ ᤆᤠᤖᤠᤶᤒᤠ ᤁᤧᤴᤏᤡ᤺ᤛᤢᤴᤏᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤀᤡᤴ ᤁᤧᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤂᤧᤰᤂᤢᤱ ᤐᤡᤏᤧ ᤗ᤹ᤖᤡᤰ ᤔᤧᤵᤔᤠ ᤁᤧᤛᤢᤰᤋᤢᤒᤣ᥅ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤁᤧᤎᤰᤁᤥᤒᤠ ᤛᤠ᤺ᤱᤘᤧᤳᤋᤡᤴ ᤏᤠ᤺ᤳᤋᤧᤍᤣ᤺ᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤁᤧᤴᤛᤠ᤹ᤖᤧ ᤁᤢᤎᤰᤁᤥᤒᤠ ᤘᤠᤶᤛᤡᤰᤁᤡᤴ ᤀᤢᤛᤢᤖᤢ ᤁᤧᤏᤡ᤺ᤛᤢᤀᤠᤱ ᤂᤧᤱᤔᤠ ᤁᤧᤛᤢᤰᤋᤢ᤹ᤖᤥ॥”
LUK 6:43 ᤀᤠᤳᤋᤡᤴ ᤏᤢ᤺ᤒᤠ ᤛᤡᤱᤒᤢᤱᤅᤥᤀᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤛᤣ᤹ ᤔᤧᤎᤥ᤺ᤰᤏᤧᤴᤗᤥ. ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥᤀᤠᤱ ᤏᤢ᤺ᤒᤠ ᤛᤡᤱᤛᤣ᤹ ᤔᤧᤎᤥ᤺ᤰᤏᤧᤴᤗᤥ॥
LUK 6:44 ᤂᤧᤴ ᤛᤡᤱᤒᤢᤱᤜᤠ᤹ᤃ ᤛᤡᤱᤛᤣᤜᤠ᤹ ᤀᤥᤔᤧᤵᤔᤠᤀᤠᤱᤛᤠᤱ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤗᤥ॥ ᤀᤠᤵᤑᤠᤸᤗᤧᤀᤠᤱ ᤋᤡᤱᤃᤪᤣ᤺ᤰ ᤐᤥ᤺ᤰᤗᤠᤀᤥᤗᤠᤶ ᤔᤏᤠᤜᤠ᤹ᤖᤧ ᤐ᤺ᤳᤇᤣ᤹ᤀᤡᤴ ᤔᤧᤴᤍᤢᤒᤢᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤋᤡᤱᤘᤠᤛᤣᤰ ᤐᤥ᤺ᤰᤗᤠᤀᤥᤗᤠᤶ ᤆᤧᤸᤗᤧᤰᤛᤣ᤹ᤀᤡᤴ ᤔᤧᤴᤇᤢᤵᤛᤢᤴᤗᤥ॥
LUK 6:45 ᤏᤢ᤺ᤒᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ ᤛᤡᤃᤠᤱ ᤁᤧᤕᤠᤰᤐᤠ ᤏᤢ᤺ᤒᤠ ᤐᤠ᤺ᤴᤏᤥᤗᤠᤶ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤋᤠᤵᤑᤧ᤺ᤶᤒᤠ ᤔᤏᤠ᤺ᤸᤗᤧᤀᤠᤱ ᤁᤢᤏᤡᤱᤘᤠ᤹ ᤛᤡᤃᤠᤱ ᤁᤧᤕᤠᤰᤐᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤥᤗᤠᤶ ᤑᤧᤴ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ ᤛᤡᤃᤠᤱ ᤁᤧᤕᤠᤰᤐᤠ ᤐᤠ᤺ᤴᤜᤠ᤹ᤀᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤗᤠᤶ ᤔᤧᤒᤠ᤺ᤳᤋᤢ ᤔᤧᤗ᤺ᤳᤋᤢ᤹ᤖᤥ॥
LUK 6:46 “ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴ ᤁᤢᤀᤡᤛᤡ᤺ᤰ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧ. ᤌᤣᤀᤠᤱ ᤀᤡᤱᤃᤠ᤹ ‘ᤀᤠᤍᤠᤱᤒᤣ. ᤀᤠᤍᤠᤱᤒᤣ.’ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅
LUK 6:47 ᤀᤡᤱᤃᤠ᤹ ᤀᤠᤒᤠ᤺ᤴ ᤁᤧᤄᤧᤶᤒᤠᤀᤠᤱ ᤁᤢᤀᤡᤛᤡ᤺ᤰ ᤁᤧᤈᤥ᤺ᤰᤐᤠ ᤔᤏᤠ᤺ᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ–
LUK 6:48 ᤂᤧᤴ ᤏᤢ᤺ᤒᤠ ᤐᤠᤱᤕᤰᤁᤥ ᤜᤡᤶ ᤁᤧᤈᤥ᤺ᤰᤐᤠ ᤔᤏᤠ ᤁᤢᤀᤡᤛᤡ᤺ᤰᤗᤥ॥ ᤂᤧᤸᤗᤧ ᤜᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤥ ᤂᤠᤶ ᤛᤡᤃᤠᤱᤒᤠ ᤕᤶᤒᤠ ᤗᤢᤱᤅᤡᤴ ᤔᤧᤴᤕᤠᤱᤅᤣ ᤌᤠᤖᤡᤰ ᤋᤕᤢ॥ ᤜᤧᤰᤁᤩᤠᤱ ᤕᤶᤒᤠ ᤗᤢᤱᤛᤶᤍᤠᤱ ᤐᤠᤱᤕᤰ ᤏᤣᤶᤓᤥ ᤏᤧᤛ᤻ᤛᤢᤀᤠᤱ ᤗᤢᤱᤎᤠᤰ ᤛᤧᤳᤋᤢᤖ ᤜᤡᤶ ᤆᤥᤃᤢ᤹॥ ᤜᤧᤰᤁᤩᤠᤱ ᤕᤶᤒᤠ ᤘᤠᤜᤡᤵᤔᤠᤴ ᤌᤩᤧᤀᤠᤱ ᤘᤠᤁᤢᤰᤛᤧ ᤕᤧᤀᤠᤱ ᤆᤫᤠ᤺ᤳᤋᤡᤸᤗᤧ ᤂᤧᤴ ᤜᤡᤶᤔᤡᤴ ᤗᤰᤋᤢ. ᤁᤖ ᤌᤣᤀᤠᤱ ᤔᤧᤒᤥ᤺ᤰᤂᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤜᤡᤶᤔᤡᤸᤗᤧᤴ ᤏᤢ᤺ᤖᤡᤰᤁᤠᤱ ᤐᤠᤱᤕᤰ ᤕᤢᤰᤂᤢᤀᤠᤱ ᤘᤕᤧᤖᤥ॥
LUK 6:49 ᤜᤧᤰᤁᤩᤠᤱ ᤀᤠᤒᤠ᤺ᤴ ᤁᤧᤄᤧᤶᤒᤠᤀᤠᤱ ᤐᤠ᤺ᤳᤋᤢᤱᤒᤠ ᤐᤠ᤺ᤴ ᤁᤢᤀᤡᤛᤡ᤺ᤰ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ᤺ᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ–ᤂᤧᤸᤗᤧᤀᤠᤱ ᤜᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤠᤱᤕᤰ ᤋᤕᤢ. ᤁᤖ ᤏᤢ᤺ᤒᤠ ᤐᤠᤱᤕᤰ ᤏᤣᤶᤓᤥ ᤔᤧᤴᤏᤧᤀᤣ ᤗᤢᤱᤎᤠᤰ ᤛᤧᤳᤋᤢᤀᤠᤱ ᤜᤡᤶ ᤆᤥᤃᤢ॥ ᤜᤧᤰᤁᤩᤠᤱ ᤕᤶᤒᤠ ᤘᤠᤜᤡᤵᤔᤠᤴ ᤌᤩᤧ. ᤘᤠᤁᤢᤰᤂᤢ ᤕᤧᤀᤠᤱ ᤆᤫᤠ᤺ᤳᤋᤡᤸᤗᤧ ᤂᤧᤴ ᤜᤡᤶᤔᤡᤴ ᤗᤰᤋᤢ. ᤜᤧᤰᤁᤩᤠᤱ ᤗᤢ᤺ᤴᤍᤢᤍᤣ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤜᤡᤶᤔᤡᤴ ᤆᤥ᤺ᤴᤍᤧᤒᤣᤀᤠᤱ ᤕᤶᤒᤠ ᤔᤧᤶᤓᤤ ᤐᤥ᤺ᤰᤂᤧᤖᤥ॥”
LUK 7:1 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤁᤧᤖᤧᤰ ᤛᤡᤘᤠᤍᤡᤱ ᤂᤠᤜᤢᤴᤜᤠ᤹ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤂᤢᤏᤧ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤗᤠ᤺ᤛᤧ॥
LUK 7:2 ᤂᤧᤵᤔᤥᤒᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤁᤢᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤁᤢᤕᤥ᤺ᤰᤐᤧᤴ ᤋᤢᤃᤧᤀᤠᤱ ᤛᤡ᤺ᤔᤠᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤛ᤻ᤛᤧᤖᤥ॥
LUK 7:3 ᤂᤧᤴ ᤌᤰᤋᤢᤶᤒᤠᤸᤗᤧ ᤕᤧᤛᤢ᤺ᤴ ᤐᤠᤱᤈᤢᤶᤔᤥ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤜᤠᤖᤠ᤹ ᤑᤧᤴᤏᤠᤱ ᤁᤢᤕᤥ᤺ᤰᤐᤧᤴ ᤘᤣ᤺ᤴᤍᤢᤖ ᤑᤠ᤹ᤀᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤕᤧᤛᤢᤖᤧ ᤁᤢᤗᤠ᤺ᤛᤧ ᤐᤠᤱᤄᤢᤛᤡᤖᤥ॥
LUK 7:4 ᤂᤧᤱᤜᤠ᤹ᤀᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤀᤰᤂᤣ ᤔᤧᤔᤧᤳᤋᤢᤖ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤂᤧᤴ ᤌᤰᤋᤢᤶᤒᤧᤴ ᤂᤧᤏᤧ᤹ᤗᤠᤶ ᤁᤢᤓᤠ᤹ ᤂᤥ᤺ᤔᤠ ᤗᤠ᤹ᤖᤢᤖᤥ.
LUK 7:5 ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤏᤡ᤹ ᤕᤜᤢᤍᤡ ᤛᤢᤘᤠᤱᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰ॥ ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤃᤡ ᤕᤜᤢᤍᤡ ᤆᤢᤶᤗᤢᤱᤜᤡᤶᤎᤡᤰ ᤀᤠᤈᤥᤃᤧ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥”
LUK 7:6 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤱᤜᤠ᤹ᤏᤢ ᤌᤠᤛᤡᤱ॥ ᤂᤧᤱᤜᤠ᤹ ᤂᤧᤴ ᤌᤰᤋᤢᤶᤒᤠᤸᤗᤧ ᤁᤢᤜᤡᤶᤔᤥ ᤁᤧᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤌᤰᤋᤢᤶᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤁᤢᤴᤈᤢᤶᤜᤠ᤹ ᤐᤠᤱᤄᤢᤛᤡ. “ᤀᤠᤍᤠᤱᤒᤣ. ᤋᤢᤰᤂᤣ ᤔᤧᤈᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤧᤏᤧ᤹ ᤀᤠᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤔᤧᤗᤠ᤹ᤀᤠᤴᤗᤥ॥
LUK 7:7 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤧᤏᤧ᤹ᤀᤥ ᤋᤠ᤺ᤔᤠ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤐᤠ᤺ᤴ ᤛᤢᤳᤗᤠᤎᤡᤰᤗᤰ ᤁᤧᤒᤠ᤺ᤳᤋᤢᤛᤠᤱ ᤀᤠᤕᤥ᤺ᤰᤐᤧᤴ ᤘᤣ᤺ᤳᤗᤥ॥
LUK 7:8 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤎᤢᤱᤎᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤘᤠ᤹ᤒᤠ ᤔᤏᤠᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤢᤰᤁᤥ ᤌᤰᤛᤢᤒᤠᤜᤠ᤹ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤌᤰᤛᤢᤒᤠᤎᤡᤰᤁᤡᤴ ‘ᤐᤣᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤐᤣ᤺ᤰ. ᤜᤧᤰᤁᤩᤠᤱ ᤘᤣ᤹ ᤌᤰᤛᤢᤒᤠᤴ ‘ᤑᤧᤖᤧ᤹’ ᤔᤧᤳᤋᤢᤱᤅᤡᤸᤗᤧ ᤑᤧᤴ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤕᤥ᤺ᤰᤐᤧᤴ ‘ᤁᤴ ᤆᤥᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤆᤥᤃᤢ᤹ᤖᤥ॥”
LUK 7:9 ᤕᤧᤛᤢᤖᤧ ᤁᤴ ᤂᤧᤵᤛᤢᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤂᤡᤖᤡ ᤜᤡᤛᤡᤱᤅᤠᤱ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤰᤋᤱᤒᤠ ᤕᤶᤒᤠ ᤏᤛᤠ᤺ᤴ ᤁᤧᤃᤵᤐᤠ ᤔᤏᤠ᤺ᤱᤃ ᤀᤡᤛᤪᤠᤀᤡᤗᤀᤥᤀᤠᤱ ᤀᤡᤱᤃᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ᥄
LUK 7:10 ᤜᤧᤰᤁᤩᤠᤱ ᤌᤰᤋᤢᤶᤒᤠᤸᤗᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤜᤡᤶᤔᤥ ᤔᤧᤃᤧᤖᤧᤸᤗᤧ ᤂᤧᤴ ᤕᤥ᤺ᤰᤐᤧᤴ ᤘᤣ᤺ᤳᤋᤧᤀᤠᤱ ᤕᤢᤅᤧᤒᤠ ᤔᤧᤍᤢᤔᤢᤖᤥ॥”
LUK 7:11 ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤣᤃᤠᤱ ᤕᤧᤛᤢ᤺ᤴ ᤏᤠᤀᤡᤴ ᤐᤠᤱᤈᤢᤶᤔᤥ ᤐᤣ॥ ᤂᤢᤏᤧ᤹ᤏᤢᤀᤣ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤒᤣᤖᤥ॥
LUK 7:12 ᤂᤢᤏᤧ᤹ ᤐᤠᤱᤈᤢᤶᤔᤥᤒᤠ ᤕᤶᤒᤠ ᤋᤠ᤺ᤰᤜᤴᤏᤥ ᤁᤧᤖᤧᤸᤗᤧ ᤔᤣᤔᤣᤍᤢᤔᤠᤎᤡᤰᤗᤧ ᤗᤳᤇᤠᤖᤰ ᤁᤧᤘᤠ᤹ᤒᤠ ᤁᤢᤛ᤻ᤛᤠ᤺ ᤕᤧᤶᤒᤡᤳᤇᤠ᤹ᤀᤡᤴ ᤛᤩᤧᤀᤠᤱ ᤁᤢᤈᤣᤎᤠ᤺ᤵᤐᤡᤴ ᤐᤠᤱᤈᤢᤶᤔᤥᤒᤠ ᤔᤏᤠᤜᤠ᤹ᤖᤧ ᤔᤧᤓᤧᤳᤋᤢᤖ ᤔᤧᤒᤳᤇᤧᤒᤠ ᤋᤢᤔᤢ॥ ᤂᤧᤴ ᤔᤣᤔᤣᤍᤢᤔᤠᤴᤏᤢ ᤕᤖᤡᤰ ᤔᤏᤠᤜᤠ᤹ ᤔᤧᤘᤕᤧᤖᤥ॥
LUK 7:13 ᤕᤧᤛᤢᤖᤧ ᤂᤧᤴ ᤔᤣᤔᤣᤍᤢᤔᤠᤴ ᤀᤥᤔᤧᤳᤋᤢᤸᤗᤧ ᤁᤢᤗᤢᤱᤔᤠ᤹ ᤛᤡᤕᤥ᤺ᤴ ᤕᤥ᤺ᤴᤍᤧᤀᤠᤱ ᤂᤧᤏᤧ᤹ ᤔᤧᤜᤠᤒᤧᤴᤏᤧ᤹ᤀᤥ ᤔᤧᤳᤋᤢᤖ ᤀᤠ᤺ᤴᤇᤡᤱᤔᤠ ᤐᤡᤖᤢᤖᤥ॥
LUK 7:14 ᤜᤧᤰᤁᤩᤠᤱ ᤐᤣᤀᤠᤱ ᤆᤣᤎᤠ᤺ᤵᤐᤡᤴ ᤛᤢ᤺ᤛᤢᤸᤗᤧ ᤂᤧᤴ ᤆᤣᤎᤠ᤺ᤵ ᤁᤧᤒᤱᤒᤠᤜᤠ᤹ ᤔᤧᤕᤧᤶᤛᤡᤱ॥ ᤕᤧᤛᤢᤖᤧ ᤔᤧᤳᤋᤢ. “ᤗᤠᤈᤣ. ᤐᤥᤃᤧ᤹ᤀᤥ॥”
LUK 7:15 ᤜᤧᤰᤁᤩᤠᤱ ᤂᤧᤴ ᤁᤧᤛᤡ᤺ᤒᤠ ᤌᤠᤱᤒᤧᤴᤏᤡᤴᤏᤠᤱ ᤐᤥᤃᤧᤀᤠᤱ ᤐᤠ᤺ᤵᤔᤠ ᤜᤣ᤺ᤰᤋᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤁᤢᤶᤔᤠ ᤜᤢᤰᤛᤢᤵᤋᤢᤖᤥ॥
LUK 7:16 ᤜᤧᤰᤁᤩᤠᤱ ᤔᤏᤠᤜᤠ᤹ ᤁᤧᤖᤧᤰ ᤔᤧᤃᤡᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤗᤢᤶᤔᤥᤀᤠᤱ ᤕᤶᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤘᤠ᤹ᤖᤥ॥” ᤜᤧᤰᤁᤩᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤔᤏᤠᤜᤠ᤹ ᤁᤢᤓᤠ᤹ ᤐᤡᤛᤧ ᤏᤢ ᤁᤶᤒᤪᤠᤱ ᤔᤧᤳᤇᤧ ᤕᤧᤖᤥ॥
LUK 7:17 ᤜᤧᤰᤁᤩᤠᤱ ᤁᤴ ᤜᤡᤴᤍᤥ᤺ᤰᤁᤡᤴ ᤁᤧᤖᤧᤰ ᤐᤡᤛᤠᤱ ᤕᤜᤢᤍᤡᤕᤠ ᤏᤢ ᤂᤧᤴ ᤂᤡᤖᤡᤒᤠ ᤌᤢᤶᤔᤥ ᤛᤧ᤺ᤖᤧᤖᤥ॥”
LUK 7:18 ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤥᤗᤠᤶ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ॥
LUK 7:19 ᤜᤧᤰᤁᤩᤠᤱ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤍᤠᤱᤒᤠᤸᤗᤥ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤍᤣ᤺ᤛᤢ–“ᤀᤠᤸᤗ ᤁᤧᤍᤠ᤺ᤒᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤒᤡ᥅ ᤀᤡ ᤀᤠᤏᤡᤃᤧ ᤘᤣ᤹ᤛ᤻ᤔᤠᤴ ᤜᤠᤱᤄᤢᤶᤒᤧᤒᤠᤒᤡ᥅”
LUK 7:20 ᤜᤧᤰᤁᤩᤠᤱ ᤂᤧᤴ ᤀᤡᤱᤛᤠᤒᤠᤜᤠ᤹ᤀᤠᤱ ᤕᤧᤛᤢᤖᤥ ᤐᤣᤛᤧᤳᤇᤡᤀᤠᤱ ᤔᤧᤳᤋᤧᤇᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤠᤵᤔᤡ ᤐᤠᤱᤄᤧᤳᤇᤡᤃᤧᤀᤠᤱ ᤘᤠ᤹ᤛᤡᤃᤧᤖᤥ. ‘ᤀᤠᤸᤗ ᤁᤧᤍᤠ᤺ᤒᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤒᤡ. ᤀᤡ ᤀᤠᤏᤡᤃᤧ ᤘᤣ᤹ᤛ᤻ᤔᤠᤴ ᤜᤠᤱᤄᤢᤶᤒᤧᤒᤠᤒᤡ᥅’”
LUK 7:21 ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤏᤢ ᤑᤧᤴᤛᤠᤶᤔᤡᤸᤗᤧ ᤋᤖᤢᤛᤡᤒᤠᤜᤠ᤹ ᤏᤢᤛᤢᤛᤡ ᤜᤧᤰᤁᤩᤠᤱ ᤕᤖᤡᤰ ᤔᤡᤰᤑ᤺ᤶᤒᤠᤜᤠ᤹ᤀᤠᤱ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤛᤡᤖᤥ॥
LUK 7:22 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤢᤜᤢᤴᤏᤠᤗᤠᤶ ᤁᤧᤍᤠ᤺ᤒᤠᤜᤠ᤹ ᤔᤧᤳᤋᤢᤛᤡ. “ᤐᤣᤛᤧᤳᤇᤧ᤹ᤀᤠᤱ ᤁᤴ ᤁᤧᤏᤡ᤺ᤛᤧᤳᤇᤢ. ᤁᤧᤄᤧᤵᤛᤧᤳᤇᤢᤒᤠ ᤐᤠ᤺ᤴᤏᤡᤴ ᤕᤢᤜᤢᤴᤏᤠ᤺ᤴ ᤔᤧᤳᤋᤧᤇᤧ᤹–ᤀᤰᤂᤣᤗ᤹ᤖᤡᤰ ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡ᤺ᤔᤠ ᤔᤧᤛᤢᤰᤋᤢ᤹. ᤜᤧᤰᤁᤩᤠᤱ ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣ᤺ᤰ. ᤗᤥᤃᤣ᤹ᤖᤧ ᤋᤖᤢᤛᤡᤒᤠᤜᤠ᤹ ᤔᤧᤘᤣ᤺ᤳ. ᤜᤧᤰᤁᤩᤠᤱ ᤏᤠᤎᤧᤰᤁᤪᤧᤱᤜᤠ᤹ᤖᤧ ᤔᤧᤄᤧᤵᤛᤢ. ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤔᤧᤜᤡᤱ. ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤔᤧᤄᤧᤵᤛᤢ᤹ᤖᤥ॥
LUK 7:23 ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ ᤁᤢᤏᤡᤱᤘᤠ᤹ ᤔᤧᤴᤍᤢᤰᤔᤏᤠᤒᤠᤀᤠᤱ ᤕᤠᤵᤔᤡ ᤆᤵᤆᤡ ᤔᤧᤴᤈᤥ᤺ᤰᤔᤏᤠᤒᤠᤴ ᤔᤢ᤹ᤀᤡᤛᤠᤒᤠᤖᤥ॥”
LUK 7:24 ᤜᤧᤰᤁᤩᤠᤱ ᤕᤢᤜᤢᤴᤏᤠᤖᤧ ᤁᤢᤀᤡᤱᤛᤠᤒᤠᤜᤠ᤹ ᤐᤣᤛᤧᤳᤇᤡᤀᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤕᤢᤜᤢᤴᤏᤠᤖᤧ ᤁᤢᤔᤧᤴᤏᤥ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤣ᤺ᤰᤛᤠᤍᤧᤴᤏᤥ ᤌᤧᤔᤠ ᤀᤥᤔᤧᤳᤇᤧ ᤁᤧᤒᤣᤃᤡᤒᤠ᥅ ᤛᤢᤖᤡᤳᤔᤠᤸᤗᤧ ᤘᤠ᤺ᤴᤍᤢᤒᤠ ᤌᤡᤱᤏᤧ᤺ᤳᤋᤧᤴᤒᤡ᥅”
LUK 7:25 ᤏᤢ᤺ᤒᤠ ᤆᤠᤱ ᤋᤣ᤺ᤳ ᤁᤧᤈᤠᤱᤒᤠ ᤔᤏᤠ᤺ᤴ ᤀᤥᤔᤧᤳᤇᤧ ᤗᤠ᤺ᤰᤁᤠᤳ ᤁᤧᤒᤣᤃᤡᤒᤡ᥅ ᤜᤧᤰᤋᤱᤒᤠᤜᤠ᤹ ᤏᤢ ᤜᤠᤱᤜᤠᤱ ᤗ᤹ᤖᤡᤰ ᤁᤧᤕᤢᤱᤒᤠᤜᤠ᤹ᤃ ᤜᤠᤱᤜᤡᤶᤔᤥᤖᤰ ᤔᤧᤘᤠ᤹ᤖᤥ॥
LUK 7:26 ᤌᤧᤔᤠ ᤀᤥᤔᤧᤳᤇᤧ ᤁᤧᤒᤡᤃᤡᤒᤠ᥅ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤒᤡ᥅ ᤛᤧᤰᤂᤠ᤺ᤸᤗᤧ ᤀᤡᤱᤃᤠ᤹ ᤔᤧᤳᤏᤡᤱ. ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤢ᤺ᤸᤗᤧ ᤕᤶᤒᤠ ᤔᤏᤠ᤺ᤴ ᤁᤧᤏᤡ᤺ᤛᤢᤶᤗᤥ॥
LUK 7:27 ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤔᤧᤴᤏᤥ. ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤀᤠᤀᤡᤱᤛᤠᤒᤧᤴ ᤁᤧᤗᤠᤃᤡ ᤗᤠᤶ ᤕᤠᤖᤡᤵ ᤆᤥ᤺ᤰᤛᤧ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤐᤠᤱᤄᤢᤱᤗᤥ॥
LUK 7:28 ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤕᤶᤒᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤠᤰᤏᤢ ᤆᤢᤰᤐᤧᤴ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤕᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥”
LUK 7:29 ᤀᤰᤂᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ᤖᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤏᤢ᤺ᤒᤠ ᤑᤠ᤹ᤀᤠᤱ ᤋᤧᤴᤍᤡᤱ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧᤖᤥ॥
LUK 7:30 ᤁᤖ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤛᤣ᤺ᤰᤁᤡᤴ ᤔᤧᤏᤠ᤹ᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤔᤧᤴᤈᤥ᤺ᤰᤛᤡᤱᤅᤡᤴᤗᤥ॥
LUK 7:31 ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤀᤠᤸᤗ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥ᤺ᤰ ᤑᤠ᤹ᤀᤠᤱ ᤌᤧᤔᤠ᤺ᤴᤏᤢ ᤋᤱᤄᤢᤱᤛᤡᤱᤒᤠᤒᤣ᥅
LUK 7:32 ᤂᤧᤱᤜᤠ᤹ᤃ ᤐᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤜᤡᤴᤈᤠ᤹ᤒᤡᤳᤇᤠ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤇᤡᤱ. ‘ᤀᤠᤏᤡᤃᤧ ᤔᤢ᤹ᤑᤪᤠᤔᤠ ᤜᤡᤵᤔᤏᤠ. ᤁᤖ ᤂᤡᤏᤡ᤹ ᤁᤧᤴᤗᤠ᤺ᤰᤂᤡᤴ॥ ᤀᤠᤏᤡᤃᤧ ᤔᤣᤖᤡᤱ ᤌᤰᤔᤏᤠ. ᤁᤖ ᤂᤡᤏᤡ᤹ ᤁᤧᤴᤜᤠᤒᤡᤴ॥’
LUK 7:33 ᤌᤣᤀᤠᤱᤓᤧᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤋ᤺ᤰᤏᤧᤳᤋᤥ ᤕᤢᤅᤧᤖ ᤀᤠᤔᤔᤒᤠᤴ ᤔᤧᤴᤎᤢᤱᤅᤣ ᤋᤩᤧ. ᤁᤖ ‘ᤂᤧᤸᤗᤧ ᤑᤧᤴᤛᤠᤶ ᤁᤳᤋᤢ᤹’ ᤁᤧᤔᤧᤳᤋᤢᤶᤗᤥ॥
LUK 7:34 ᤔᤧᤴᤇᤠᤶᤛᤠ᤺ᤴ ᤆᤖ ᤌᤢᤅᤢᤖ ᤋᤩᤧ. ᤜᤧᤰᤁᤩᤠᤱ ‘ᤂᤧᤴ ᤋ᤺ᤰᤌᤧ᤺ᤰᤁᤧᤜᤠ᤹. ᤌᤡ᤺ᤔᤛᤠᤱᤜᤠ᤹. ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤒᤠᤖᤥ’ ᤁᤧᤔᤧᤳᤋᤢᤶᤗᤥ॥
LUK 7:35 ᤏᤡᤱᤘᤠ᤹ᤑᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤀᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤧᤴ ᤏᤡᤛ᤻ᤛᤣ ᤆᤥ᤺ᤰ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤶᤎᤠᤰᤗᤥ॥”
LUK 7:36 ᤑᤖᤡᤛᤡᤎᤡᤰᤗᤧ ᤕᤧᤛᤢ᤺ᤴ ᤕᤢ᤺ᤴᤇᤡᤰ ᤆᤠᤈᤠᤛᤧ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤐᤣᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤗᤥ॥
LUK 7:37 ᤂᤧᤴ ᤐᤠᤱᤈᤢᤶᤔᤥ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤑᤖᤡᤛᤡ᤺ᤸᤗᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤸᤗᤧ ᤀᤡᤔᤧᤸᤗᤢᤱᤒᤠ ᤐᤷᤕᤠᤔᤠᤎᤡᤰ ᤁᤢᤗᤧᤶ ᤑᤢᤱᤏᤠᤶ ᤕᤠᤱᤛᤡᤅᤧᤀᤠᤱ
LUK 7:38 ᤕᤧᤛᤢᤖᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤋᤩᤧᤀᤠᤱ ᤜᤠᤒᤧᤖ ᤕᤧᤛᤢᤖᤧ ᤁᤢᤗᤠᤱᤅᤥ ᤁᤢᤔᤡᤰᤘᤠ᤺ᤸᤗᤧ ᤘᤠᤖᤰᤂᤢᤖᤥ॥ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤜᤣ᤺ᤛᤢᤖ ᤁᤢᤗᤠᤱᤅᤡᤴ ᤆᤢᤵ ᤔᤧᤳᤋᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤢᤖᤥ॥
LUK 7:39 ᤜᤧᤰᤁᤣ᤺ᤸᤗᤧ ᤂᤧᤴ ᤑᤖᤡᤛᤡ᤺ᤸᤗᤧ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ. “ᤁᤴ ᤔᤏᤠ᤺ᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤘᤕᤧᤸᤗᤧᤃ ᤂᤢᤏᤧ᤹ ᤁᤧᤛᤢᤔᤠ ᤔᤧᤴᤇᤢᤔᤠ᤹ᤀᤡᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤒᤠᤔᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤰᤂᤠᤀᤣ ᤗᤠᤕᤥ ᤁᤧᤈᤥ᤺ᤰᤔᤠᤀᤣᤖᤥ॥”
LUK 7:40 ᤕᤧᤛᤢᤖᤧ ᤂᤧᤴ ᤑᤖᤡᤛᤡ᤺ᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤗᤳᤇᤠ ᤐᤠ᤺ᤴᤎᤡᤰ ᤐᤠ᤺ᤵᤔᤠ ᤁᤳᤋᤢᤱᤗᤥ॥” ᤛᤡᤔᤥᤏᤖᤧᤀᤠᤱ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤔᤧᤳᤋᤠᤱᤅᤧ᤹ᤀᤥ॥”
LUK 7:41 ᤕᤧᤛᤢᤖᤧ ᤔᤧᤳᤋᤢ. “ᤌᤡᤰ ᤋᤧᤴᤏᤥ ᤏᤧᤵᤑᤢ ᤔᤏᤠᤜᤠ᤹ ᤘᤕᤧᤳᤇᤡ॥ ᤂᤧᤱᤜᤠ᤹ᤖᤧ ᤛᤡᤱᤏᤠ᤺ᤳ ᤕᤠᤱ ᤁᤧᤃᤧᤒᤠᤸᤗᤥᤗᤠᤶ ᤗᤳᤇᤠᤖᤧ ᤅᤠᤃᤡᤵ (᥋᥆) ᤕᤢᤵᤐᤠᤕᤠᤱ ᤏᤢ ᤘᤣ᤹ᤛ᤻ᤔᤠᤸᤗᤧ ᤁᤢᤃᤡᤵ ᤅᤠᤛᤡ (᥋᥆᥆) ᤕᤢᤵᤐᤠᤕᤠᤱ ᤋᤣ᤹ᤖᤧᤳᤇᤢᤀᤠᤱ ᤘᤕᤧᤳᤇᤡ॥
LUK 7:42 ᤁᤖ ᤂᤧᤴ ᤏᤧᤵᤔᤠᤱᤗᤧ ᤜᤢᤱᤔᤠ ᤔᤧᤴᤇᤢᤰᤁᤣ ᤘᤕᤧᤳᤇᤡ॥ ᤂᤧᤴ ᤛᤡᤱᤏᤠ᤺ᤳ ᤕᤠᤱ ᤁᤧᤃᤧᤒᤠᤸᤗᤧ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤛᤡᤱᤏᤠ᤺ᤳᤋᤡᤴ ᤗᤧᤖᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤂᤧᤴ ᤛᤡᤱᤏᤠ᤺ᤳ ᤕᤠᤱ ᤗᤧᤵᤔᤡ ᤁᤧᤒᤡᤒᤠᤴ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠ᥅”
LUK 7:43 ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤂᤧᤴ ᤕᤖᤡᤰ ᤛᤡᤱᤏᤠ᤺ᤳ ᤗᤧᤵᤔᤡ ᤁᤧᤄᤥ᤺ᤒᤠᤴᤏᤣ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤖᤥ॥”
LUK 7:44 ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤡᤔᤥᤴᤏᤡᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤋᤩᤠᤱᤅᤡᤸᤗᤧ ᤗᤠᤱ ᤘᤠᤜᤵᤔᤠ ᤆᤫᤠ᤺ᤳ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤡᤴ ᤁᤢᤔᤡᤰᤘᤠ᤺ᤸᤗᤧ ᤘᤠᤜᤵᤋᤢᤀᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤘᤠ᤹ᤖᤥ॥
LUK 7:45 ᤂᤧᤏᤧ᤹ ᤀᤡᤱᤃᤠ᤹ ᤆᤢᤵ ᤁᤧᤔᤧᤳᤋᤠᤱᤗ ᤛᤣᤘᤠ ᤁᤧᤶᤔᤧᤳᤋᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤋᤩᤠᤱᤅᤠᤱᤎᤥᤀᤣ ᤀᤠᤗᤠᤱᤅᤥ ᤆᤢᤵ ᤔᤧᤳᤋᤢᤖ ᤘᤠ᤹ᤖᤥ॥
LUK 7:46 ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤎᤧᤃᤣ᤺ᤰᤐᤥ ᤏᤡ᤺ᤱᤃᤧ᤹ ᤁᤧᤴᤜᤢ᤺ᤳᤋᤠᤱᤅᤡᤴ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤥ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥
LUK 7:47 ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤒᤠᤸᤗᤧ ᤕᤖᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤛᤢ᤹ ᤁᤧᤗ᤹ᤒᤠ ᤀᤥᤛᤣ᤺ᤴᤀᤠᤎᤠᤰᤗᤥ॥ ᤂᤧᤴ ᤆᤢ᤺ᤳᤇᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤒᤠᤸᤗᤧ ᤛᤢ᤺ᤸᤗᤡᤰᤗᤰ ᤗᤢᤱᤔᤠ᤹ ᤋᤢᤰᤋᤢᤛᤡ᤹ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ”
LUK 7:48 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤛᤢᤀᤠᤱ ᤁᤧᤘᤠ᤹ᤖᤥ॥”
LUK 7:49 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤆᤠ ᤁᤧᤈᤠᤒᤠᤖ ᤁᤧᤕᤢᤱᤒᤠ ᤘᤣ᤹ ᤔᤏᤠᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤒᤡᤒᤠ ᤁᤴ ᤕᤠᤵᤔᤡ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥
LUK 7:50 ᤁᤖ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤋᤠᤱᤃᤧᤛᤧ᤺ᤵᤋᤧᤀᤠᤱ ᤁᤧᤘᤠ᤹ᤖᤥ॥ ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ॥”
LUK 8:1 ᤂᤧᤴ ᤀᤣᤃᤠᤱ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧ᤺ᤛᤢᤖ ᤕᤧᤰᤕᤰ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤗᤠᤶᤍᤡ᤺ᤰ ᤆᤥᤃᤧ॥ ᤂᤢᤏᤧ᤹ᤏᤢ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧ.
LUK 8:2 ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ ᤏᤢ ᤋᤢᤰᤔᤠ ᤕ᤹ᤔᤠᤗᤠᤶ ᤘᤣ᤺ᤴᤍᤢᤛᤡᤔᤠ ᤁᤢᤓᤠ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤔᤃ᤻ᤍᤗᤡᤏᤡ ᤔᤧᤵᤔᤏᤠᤔᤠ ᤔᤖᤡᤕᤔᤀᤥᤗᤠᤶ ᤏᤢᤛᤡ ᤑᤧᤴᤛᤠᤶᤜᤠ᤹ ᤗ᤺ᤳᤋᤢᤛᤡᤀᤠᤱ ᤘᤕᤧ॥
LUK 8:3 ᤜᤧᤰᤁᤩᤠᤱ ᤜᤧᤖᤥᤍᤖᤧ ᤁᤢᤄᤠᤖᤠᤳ ᤁᤧᤕᤢᤱᤒᤠ ᤆᤢᤈᤠᤛᤖᤧ ᤁᤢᤔᤣ᤺ᤳ ᤕᤥᤀᤠᤴᤏᤠ. ᤛᤢᤈᤏᤠ. ᤏᤢ ᤕᤖᤡᤰ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤢᤓᤠ᤹ ᤔᤧᤒᤡᤖᤢᤛᤡᤖᤥ॥
LUK 8:4 ᤌᤡᤰ ᤕᤧᤴ ᤕᤖᤡᤰ ᤕᤧᤰᤕᤰᤁᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤩᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ–
LUK 8:5 “ᤗᤳᤇᤠ ᤕᤠ᤺ᤴᤁᤧᤔ᤺ᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥ ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧᤀᤠᤱ ᤔᤏᤠᤜᤠ᤹ᤖᤧ ᤔᤧᤍᤥ᤹ᤖᤢ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤄᤵᤛᤢ ᤔᤧᤈᤖᤥ॥
LUK 8:6 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤠᤖᤠᤰᤁᤥ ᤆᤢᤰᤋᤧ. ᤜᤧᤰᤁᤩᤠᤱ ᤂᤧᤴ ᤗᤡᤱᤔᤠᤃ ᤗᤡᤅᤧ. ᤁᤖ ᤏᤠᤶᤔᤡᤸᤗᤧ ᤜᤣᤖᤧᤒᤣ. ᤌᤣᤀᤠᤱᤓᤧᤸᤗᤧ ᤁᤧᤛᤧ᤺ᤶᤒᤠ ᤂᤠᤶ ᤔᤧᤏᤧᤛ᤻ᤛᤧᤴᤗᤥ॥
LUK 8:7 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤋᤡᤱᤃᤪᤣ᤺ᤰ ᤁᤧᤗᤡᤱᤒᤠ ᤂᤠᤶᤔᤥ ᤆᤢᤰᤋᤧ. ᤋᤡᤱᤃᤪᤣ᤺ᤰᤁᤡᤴ ᤏᤢ ᤕᤠ᤹ᤖᤡ᤺ᤶᤒᤠᤴ ᤛᤥᤛᤥᤖᤡᤰ ᤗᤡᤅᤧ. ᤁᤖ ᤋᤡᤱᤃᤪᤣ᤺ᤰᤜᤠ᤹ᤖᤧ ᤂᤧᤴ ᤛᤢ᤺ᤵᤋᤢ ᤛᤧᤖᤢᤖᤥ॥
LUK 8:8 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤏᤢ᤺ᤒᤠ ᤂᤠᤶᤔᤥ ᤆᤢᤰᤋᤧᤀᤠᤱ ᤗᤡᤅᤧ. ᤜᤧᤰᤁᤩᤠᤱ ᤁᤢᤈᤠ᤹ᤀᤡ ᤁᤢᤈᤠ᤹ ᤌᤥ᤺ᤰᤋᤧ॥ ᤂᤧᤴ ᤕᤠ᤹ᤖᤡ᤺ᤶᤒᤠᤸᤗᤧ ᤁᤡᤵᤌᤡᤰ ᤗᤧᤱᤅᤠᤱᤎᤥ ᤁᤢᤈᤠ᤹ ᤌᤥ᤺ᤰᤋᤧᤖᤥ॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”
LUK 8:9 ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤌᤧᤔᤠᤒᤣ᥅”
LUK 8:10 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤖᤰ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ. ᤁᤖ ᤘᤣ᤹ ᤔᤏᤠᤜᤠ᤹ᤏᤢ ᤀᤡᤱᤃᤠ᤹ ᤂᤧᤍᤠ᤹ᤀᤥᤖᤰ ᤐᤠ᤺ᤳᤋᤠᤖᤥ॥ ᤜᤧᤰᤁᤣ᤺ᤸᤗᤧ ‘ᤁᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡ᤺ᤛᤢᤴ. ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥’
LUK 8:11 ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣ᤺ᤴ ᤀᤰᤋᤱᤒᤠ ᤆᤥ᤺ᤰ–ᤕᤠ᤹ᤖᤡ᤺ᤶᤒᤠ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴᤗᤥ॥
LUK 8:12 ᤜᤧᤰᤁᤩᤠᤱ ᤗᤠᤶᤔᤥ ᤔᤰᤁᤧᤎᤠ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠᤛᤡᤖᤥ॥ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥᤗᤠᤶ ᤐᤠ᤺ᤴᤈᤠᤰᤁᤡᤴ ᤗ᤺ᤳᤋᤢ ᤋᤣ᤹ᤖᤢ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤱᤄᤥ᤺ᤛᤢᤴᤏᤠᤱ ᤛᤧᤴᤗᤵ ᤂᤥ᤺ᤔᤠ ᤔᤧᤴᤇᤢᤰᤋᤢᤴᤗᤥ॥
LUK 8:13 ᤜᤧᤰᤁᤩᤠᤱ ᤗᤢᤱᤄᤠᤖᤠᤰᤁᤥ ᤔᤰᤁᤧᤎᤠ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤧᤛ᤺ᤵᤐᤠᤖ ᤁᤧᤍᤠ᤺ᤰᤐᤠᤛᤡᤖᤥ. ᤁᤖ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢ ᤔᤧᤃᤳᤋᤢᤒᤠᤴ ᤋᤢᤰᤂᤣ ᤗᤠᤰᤂᤣ ᤋᤠ᤺ᤸᤗᤧ ᤔᤧᤗᤧᤖᤢ ᤔᤧᤍᤣ᤺ᤛᤢ. ᤌᤣᤀᤠᤱᤓᤧᤸᤗᤧ ᤐᤠ᤺ᤴᤈᤠᤰᤁᤡᤴ ᤂᤢᤏᤡ᤹ ᤗᤢᤱᤔᤠ᤹ ᤛᤡᤃᤠᤱ ᤔᤧᤱᤃᤧᤳᤋᤣ ᤘᤕᤧᤖᤥ॥
LUK 8:14 ᤜᤧᤰᤁᤩᤠᤱ ᤋᤡᤱᤃᤪᤣ᤺ᤰ ᤁᤧᤗᤡᤱᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰ. ᤁᤖ ᤏᤡᤱᤛᤠᤶ. ᤕᤠᤱᤛᤠᤁᤢᤴᤎᤣ ᤏᤢ ᤁᤴ ᤜᤡᤱᤔᤴᤒᤠ ᤕᤠᤶᤍᤠᤍᤠᤒᤠ ᤐᤠ᤺ᤴᤏᤡᤸᤗᤧ ᤂᤧᤱᤜᤠ᤹ ᤛᤢ᤺ᤵᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤁᤢᤈᤠ᤹ ᤑᤶᤔᤠ ᤔᤧᤴᤇᤢᤰᤋᤢᤴᤗᤥ॥
LUK 8:15 ᤁᤖ ᤏᤢ᤺ᤒᤠ ᤂᤠᤶᤔᤥ ᤔᤰᤁᤧᤎᤠ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤏᤢ᤺ᤒᤠ ᤏᤢ ᤛᤣᤛᤣ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤖ ᤏᤡᤱᤘᤠ᤹ᤀᤥ ᤔᤧᤕᤢᤰᤂᤢ ᤜᤧᤰᤁᤩᤠᤱ ᤏᤠᤛᤡ ᤔᤧᤎ᤺ᤳᤋᤢᤀᤠᤱ ᤁᤢᤈᤠ᤹ ᤔᤧᤓᤳᤇᤢᤖᤥ॥”
LUK 8:16 “ᤜᤠ᤺ᤳᤗᤧᤀᤠᤱ ᤛᤣᤔᤡ᤺ᤴ ᤜᤠ᤺ᤴᤍᤢᤀᤠᤱ ᤂᤵᤐᤩᤠ ᤛᤡᤃᤠᤱ ᤔᤧᤕᤢᤰᤂᤢᤴ ᤜᤧᤰᤁᤩᤠᤱ ᤏᤧᤳᤏᤠ ᤛᤡᤃᤠᤱᤅᤠᤱ ᤔᤧᤕᤢᤰᤂᤢᤴ. ᤁᤖ ᤁᤧᤍᤠ᤺ᤒᤠᤜᤠ᤹ᤖᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤌᤥ ᤆᤴᤈᤶᤒᤠ ᤋᤧᤴᤏᤥ ᤕᤢᤰᤂᤢ᤹॥
LUK 8:17 ᤀᤠᤸᤗ ᤔᤧᤴᤎᤠ᤺ᤵᤔᤏᤠᤒᤠ ᤁᤠᤰ ᤆᤡᤃ᤺ᤰᤘᤠᤜᤠ᤹ ᤀᤥ᤺ᤳᤋᤡᤀᤥ ᤏᤡᤔᤧᤎᤠ᤺ᤵ ᤜᤧᤰᤁᤩᤠᤱ ᤛᤡᤒᤡ᤹ᤒᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥
LUK 8:18 ᤜᤧᤰᤁᤣ᤺ᤸᤗᤧ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤀᤥ ᤏᤢ᤺ᤖᤡᤰᤁᤠᤱ ᤕᤢᤰᤂᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤀᤠᤸᤗᤛᤠᤱ ᤕᤖᤡᤰ ᤁᤢᤛᤡᤱ ᤏᤡ᤺ᤵᤔᤠᤴ ᤔᤧᤄᤥ᤺ᤛᤢᤖᤥ. ᤁᤖ ᤀᤠᤏᤡᤛᤠᤶᤔᤡᤴ ᤔᤧᤱᤄᤧᤶᤔᤏᤠᤒᤠᤜᤠ᤹ᤖᤧ ᤁᤳᤋᤢᤶᤒᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢᤛᤡᤖᤥ॥”
LUK 8:19 ᤀᤠᤸᤗ ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤁᤢᤍᤢᤶᤛᤧ ᤔᤧᤍᤩᤧᤀᤠᤱ ᤔᤧᤘᤕᤧ. ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤁᤢᤒᤣᤛᤠᤱ ᤐᤣ᤺ᤰᤔᤠ ᤔᤧᤴᤇᤢᤰᤋᤧᤴᤗᤥ॥
LUK 8:20 ᤜᤧᤰᤁᤣ᤺ᤸᤗᤧ ᤗᤳᤇᤠ ᤔᤏᤠᤎᤡᤰᤗᤧ ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤁᤧᤍᤢᤶᤛᤧ ᤔᤧᤍᤩᤧᤀᤠᤱ ᤗᤠ᤺ᤰᤁᤠᤳ ᤁᤧᤶᤜᤠᤱᤗ ᤔᤧᤕᤧᤵᤗᤥ ᤗ᤹ᤖᤡᤰ ᤕᤧᤛᤢ᤺ᤴ ᤔᤧᤳᤋᤢ॥
LUK 8:21 ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤁᤧᤄᤧᤶᤒᤠᤜᤠ᤹ ᤜᤧᤰᤁᤩᤠᤱ ᤂᤧᤴ ᤁᤢᤀᤡᤛᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”
LUK 8:22 ᤌᤡᤰᤕᤧᤴ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤐᤡᤃᤡ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤎᤠᤛᤡᤱᤗᤥ॥
LUK 8:23 ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤧᤛᤢ᤺ᤴ ᤀᤡᤵᤛᤧ॥ ᤜᤰᤆᤄᤳ ᤘᤖᤰᤁᤥ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤂᤠ ᤂ᤺ᤱᤒᤣᤴᤏᤧ ᤋᤡᤶᤛᤧᤀᤠᤱ ᤁᤧᤛᤠᤰᤐᤥ ᤔᤧᤎᤩᤧᤖᤥ॥
LUK 8:24 ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢ᤺ᤴ ᤔᤧᤓᤥ᤺ᤰᤂᤢᤖ ᤀᤰᤂᤣ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤜᤢᤶᤔᤠ ᤛᤡ᤺ᤔᤠ ᤀᤡ᤺ᤳᤋᤡᤃᤧᤖᤥ॥” ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤥᤃᤧᤀᤠᤱ ᤂᤧᤴ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤴ ᤑᤧ᤺ᤰᤋᤢ॥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤔᤠ ᤆᤰᤌᤠᤛᤢ ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤴᤏᤠᤱ ᤆᤡᤈᤡ ᤕᤧᤶᤕᤧᤶ ᤗ᤹ᤖᤧᤖᤥ॥
LUK 8:25 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠ᤺ᤴᤏᤡᤴ ᤀᤠᤳᤋᤥ ᤘᤠ᤹ᤒᤣ᥅” ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤃᤡᤛᤧᤖ ᤂᤢᤏᤡ᤹ ᤕᤱᤔᤠ ᤁᤧᤖᤧᤀᤠᤱ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤴ ᤁᤱᤃ ᤀᤠᤰᤋᤱᤒᤠ ᤔᤏᤠᤏᤧᤒᤣ᥅ ᤂᤢᤏᤧ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤸᤗᤧ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤸᤗᤧᤀᤠᤱ ᤂᤧᤵᤛᤢᤱᤃ᥄”
LUK 8:26 ᤜᤧᤰᤁᤩᤠᤱ ᤂᤧᤱᤜᤠ᤹ ᤃᤠᤗᤡᤗ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱᤒᤠ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥ ᤔᤧᤃᤧᤖᤧ॥
LUK 8:27 ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤕᤧᤛᤢ᤺ᤴ ᤂ᤺ᤱᤒᤣᤀᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤐᤠᤱᤈᤢᤶᤗᤠᤶ ᤁᤧᤓᤧᤶᤒᤠ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤢᤔᤢ॥ ᤂᤧᤴ ᤔᤏᤠ᤺ᤴ ᤕᤖᤡᤰ ᤕᤧᤶᤔᤠᤱᤎᤥ ᤜᤡᤶᤔᤥ ᤔᤧᤴᤘᤠ᤹ᤀᤣ ᤋᤣ᤺ᤳᤑᤢᤱᤅᤠᤱ ᤔᤧᤴᤈᤠᤱᤅᤣ ᤀᤡᤵᤐᤢᤱᤍᤧᤴᤜᤠ᤹ᤀᤥᤖᤰ ᤘᤕᤧᤃᤳᤋᤧᤖᤥ॥
LUK 8:28 ᤂᤧᤸᤗᤧ ᤕᤧᤛᤢ᤺ᤴ ᤏᤡ᤺ᤛᤢᤀᤠᤱ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤐᤡᤷᤎᤠᤵ ᤌᤠᤶᤛᤡᤱᤗ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢ. “ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤕᤧᤛᤢᤀᤣ. ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥”
LUK 8:29 ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤴ ᤔᤏᤠᤀᤥᤗᤠᤶ ᤀᤠᤴᤍᤧ᤺ᤴᤇᤠ ᤗᤠ᤺ᤰᤁᤠᤳ ᤗ᤺ᤴᤍᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤀᤠᤱ ᤘᤕᤧ॥ ᤂᤧᤴ ᤔᤏᤠ᤺ᤴ ᤕᤖᤡᤰᤗᤧᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤘᤕᤧ॥ ᤔᤏᤠᤜᤠ᤹ᤖᤧ ᤕᤖᤡᤰᤗᤧᤱ ᤁᤢᤜᤢᤰ ᤁᤢᤗᤠᤱᤅᤥ ᤀᤡᤔᤧᤄᤣ᤺ᤰᤂᤢᤀᤠᤱ ᤁᤧᤒᤵᤐᤠ ᤑᤧᤴᤈᤣ᤹ ᤌᤰᤁᤪᤱᤜᤠ᤹ ᤑᤢ᤹ᤖᤢᤀᤠᤱ ᤑᤧᤴᤛᤠᤶᤜᤠ᤹ᤖᤧ ᤀᤣ᤺ᤰᤛᤠᤍᤧᤴᤏᤥ ᤛᤠᤰᤁᤧᤸᤗᤧᤰ ᤔᤧᤍᤣ᤹ᤖᤢᤀᤠᤱ ᤘᤕᤧᤖᤥ॥
LUK 8:30 ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤁᤧᤔᤡᤱ ᤌᤧᤔᤠᤒᤣ᥅” ᤂᤧᤸᤗᤧ ᤀᤠᤔᤡᤱ ᤋᤢᤖᤠᤖᤥ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥ ᤌᤣᤀᤠᤱᤓᤧᤸᤗᤧ ᤕᤖᤡᤰ ᤑᤧᤴᤛᤠᤶᤜᤠ᤹ ᤂᤧᤴ ᤔᤏᤠᤀᤥ ᤔᤧᤗᤠ᤺ᤛᤧᤀᤠᤱ ᤔᤧᤘᤕᤧᤖᤥ॥
LUK 8:31 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤀᤠᤏᤡᤃᤧ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥ ᤕᤠᤵᤔᤡ ᤀᤠᤶᤒᤠᤱᤄᤧᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ॥
LUK 8:32 ᤀᤠᤸᤗ ᤂᤧᤴ ᤁᤥ᤺ᤰᤔᤠᤀᤥ ᤕᤖᤡᤰ ᤑᤠᤰᤜᤠ᤹ ᤆᤠᤔᤧᤖᤠᤔᤧᤖ ᤔᤧᤕᤧᤒᤧ॥ ᤜᤧᤰᤁᤣ᤺ᤸᤗᤧ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤀᤠᤏᤡᤃᤧ ᤂᤧᤴ ᤑᤠᤰᤜᤠ᤹ᤀᤥ ᤗᤠ᤺ᤵᤔᤠ ᤀᤠᤒᤠᤱᤄᤧ᤹ ᤗ᤹ᤖᤡᤰ ᤕᤧᤛᤢ᤺ᤴ ᤐᤣᤗᤡ ᤔᤧᤓᤠᤰᤋᤢ॥ ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤗᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ
LUK 8:33 ᤂᤧᤴ ᤔᤏᤠᤀᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤂᤧᤱᤜᤠ᤹ ᤑᤠᤰᤜᤠ᤹ᤀᤥ ᤔᤧᤗᤠ᤺ᤛᤧ॥ ᤜᤧᤰᤁᤩᤠᤱ ᤂᤧᤴ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥
LUK 8:34 ᤜᤧᤰᤁᤩᤠᤱ ᤑᤠᤰ ᤁᤧᤃᤶᤒᤠᤜᤠ᤹ᤖᤧ ᤁᤴ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤂᤡᤔᤥ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤐᤠᤱᤈᤢᤶᤔᤥ ᤏᤢ ᤂᤧᤴ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤴ ᤀᤡᤱᤄᤱᤅᤡᤴ ᤔᤧᤛᤧ᤺ᤛᤢᤖᤥ॥
LUK 8:35 ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤧᤔᤠᤏᤡ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤀᤥᤔᤧᤳᤇᤧ ᤂᤧᤵᤔᤥ ᤔᤧᤍᤩᤧ॥ ᤂᤧᤱᤜᤠ᤹ᤖᤧ ᤔᤠᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤔᤏᤠ᤺ᤴ ᤏᤢᤖᤧᤀᤠᤱ ᤋᤣ᤺ᤳ ᤆᤠᤰᤛᤡᤱᤅᤠᤱ ᤁᤢᤏᤡᤱᤘᤠ᤹ ᤛᤣ᤺ᤖᤧᤀᤠᤱ ᤕᤧᤛᤢᤖᤧ ᤁᤢᤗᤠᤱᤈᤰᤐᤥ ᤕᤢᤅᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤔᤧᤃᤡᤛᤧ॥
LUK 8:36 ᤜᤧᤰᤁᤩᤠᤱ ᤂᤧᤴ ᤜᤡᤴᤍᤥ᤺ᤰ ᤁᤧᤏᤡ᤺ᤒᤠᤜᤠ᤹ᤖᤧ ᤂᤧᤵᤔᤥ ᤁᤧᤍᤠ᤺ᤒᤠ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤁᤴ ᤔᤏᤠ᤺ᤴ ᤘᤣ᤺ᤳᤋᤧᤒᤣ ᤑᤠ᤹ᤀᤠᤱ ᤔᤧᤈᤧᤰᤋᤢᤛᤡ॥
LUK 8:37 ᤜᤧᤰᤁᤣ᤺ᤸᤗᤧ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤁᤵᤔᤥᤗᤠᤶ ᤐᤣᤃᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧ॥ ᤜᤧᤰᤁᤣ᤺ᤸᤗᤧ ᤕᤧᤛᤢ᤺ᤴ ᤐᤣ᤺ᤰᤔᤠ ᤑᤠ᤹ᤀᤠᤱ ᤂ᤺ᤱᤒᤣᤀᤥ ᤗᤠ᤺ᤛᤧᤖᤥ॥
LUK 8:38 ᤑᤧᤴᤛᤠᤶᤜᤠ᤹ᤖᤧ ᤔᤧᤗᤧᤖᤢᤒᤠ ᤂᤧᤴ ᤔᤏᤠ᤺ᤴ ᤂᤧ᤹ᤕᤥ ᤋᤩᤧᤀᤠᤱ ᤕᤧᤛᤢ᤺ᤴ ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤋᤣ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ. ᤁᤖ ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤖ ᤏᤢ᤺ᤰᤋᤢᤍᤣ᤺ᤛᤢ.
LUK 8:39 “ᤂᤧᤏᤧ᤹ ᤁᤧᤜᤡᤶᤔᤥ ᤐᤣᤃᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤗᤠᤃᤡ ᤆᤥᤃᤢ ᤁᤧᤒᤡᤖᤧᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱ ᤛᤧ᤺ᤛᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤐᤣᤀᤠᤱ ᤕᤧᤛᤢᤖᤧ ᤂᤢᤏᤧ᤹ ᤁᤢᤗᤠᤃᤡ ᤆᤥᤃᤢᤒᤠ ᤁᤠᤰ ᤐᤠ᤺ᤴᤏᤡᤴ ᤁᤠᤰ ᤐᤠᤱᤈᤢᤶᤔᤥ ᤛᤧ᤺ᤛᤢᤖᤥ॥
LUK 8:40 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤠᤶᤔᤥ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤜᤠᤱᤄᤢᤖ ᤔᤧᤕᤢᤅᤧᤖᤥ॥
LUK 8:41 ᤜᤧᤰᤁᤩᤠᤱ ᤕᤠᤀᤡᤖᤛ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤢᤏᤧ᤹ ᤐᤠᤱᤋᤡᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠ ᤘᤕᤧ॥ ᤂᤧᤸᤗᤧ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ ᤀᤠᤜᤡᤶᤔᤥ ᤑᤧᤖᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ.
LUK 8:42 ᤌᤣᤀᤠᤱᤓᤧᤸᤗᤧ ᤋᤱᤒᤣ ᤌᤡᤰ-ᤏᤧᤳ (᥇᥈) ᤁᤧᤃᤧᤵᤔᤠ ᤌᤡᤰᤗᤰ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤴ ᤛᤡ᤺ᤔᤠ ᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴᤏᤢᤀᤣ ᤌᤠᤛᤡᤱ॥ ᤜᤧᤰᤁᤩᤠᤱ ᤐᤣᤖ ᤐᤳᤇᤧᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤡᤒᤢ᤺ᤳ ᤔᤧᤒᤢ᤺ᤳᤋᤢᤖᤥ॥
LUK 8:43 ᤂᤧᤵᤔᤥ ᤋᤱᤒᤣ ᤌᤡᤰ-ᤏᤧᤳᤋᤠᤱᤎᤥ (᥇᥈) ᤀᤠᤳᤋᤡᤸᤗᤧᤀᤠᤱ ᤘᤣ᤺ᤶᤔᤠ ᤔᤧᤴᤇᤢᤰᤋᤢᤶᤔᤠ ᤔᤠᤰᤂᤡ᤹ ᤘᤕᤢ᤺ᤔᤠᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧᤖᤥ॥
LUK 8:44 ᤂᤧᤴ ᤕᤧᤛᤢᤖᤧ ᤁᤢᤀᤣᤃᤠᤱ ᤋᤩᤧᤀᤠᤱ ᤁᤢᤍᤣ᤺ᤳᤋᤡᤸᤗᤧ ᤁᤢᤕᤠ᤺ᤴ ᤛᤢ᤺ᤛᤢᤏᤢᤔᤧ᤺ᤴᤏᤣ ᤔᤠᤰᤂᤡ᤹ ᤘᤕᤢ᤺ᤔᤠᤴ ᤆᤡᤒᤧᤖᤥ॥
LUK 8:45 ᤕᤧᤛᤢᤖᤧ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤗᤧ ᤛᤢ᤺ᤛᤠᤱᤒᤣ᥅” ᤜᤧᤰᤁᤩᤠᤱ ᤁᤧᤖᤧᤰᤗᤧ ᤀᤡᤱᤃᤠ᤹ ᤔᤧ᤺ᤴ ᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤐᤋᤪᤢᤛᤖᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤰᤂᤣᤗ᤹ᤖᤡᤰ ᤁᤧᤖᤧᤰ ᤐᤡᤛᤠᤱᤗᤠᤶ ᤔᤏᤠᤜᤠ᤹ᤖᤧ ᤆᤡᤓᤡ᤺ᤳ ᤁᤧᤶᤓᤡ᤺ᤳᤋᤧᤀᤠᤱ ᤁᤧᤶᤀᤣ᤺ᤵᤗ ᤔᤧᤒᤳᤗᤥ॥”
LUK 8:46 ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤜᤠ᤺ᤳᤗᤧᤀᤡᤃ ᤛᤢ᤺ᤛᤠᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤎᤰᤁᤥᤏᤢ ᤔᤢᤰᤛᤠᤶ ᤗ᤺ᤴᤍᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥”
LUK 8:47 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧᤀᤠᤱ ᤀᤡᤱᤃᤠ᤹ ᤆᤡᤱᤛᤡᤱᤔᤠ ᤔᤧᤛᤢᤰᤁᤠᤴ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤁᤢᤃᤡ᤺ᤔᤠᤸᤗᤧ ᤕᤰᤂᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗᤥ॥ ᤂᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤂᤢᤏᤧ᤹ ᤛᤢ᤺ᤛᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤡᤔᤥ ᤘᤣ᤺ᤳᤋᤧᤒᤠ ᤐᤠ᤺ᤴᤏᤡᤴ ᤕᤧᤛᤢ᤺ᤴ ᤆᤧᤰᤋᤢᤖᤥ॥
LUK 8:48 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤔᤠᤔᤢᤀᤣ. ᤂᤧᤏᤧ᤹ ᤏᤛᤠ᤺ᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤧᤘᤣ᤺ᤳᤋᤧᤀᤠᤱ ᤁᤧᤘᤠ᤹ᤖᤥ॥ ᤀᤠᤸᤗ ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ॥”
LUK 8:49 ᤀᤰᤂᤣᤗ᤹ᤖᤡᤰ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤗᤠᤶᤗᤥ᤺ᤒᤠ ᤕᤠᤀᤡᤖᤛᤖᤧ ᤁᤢᤜᤡᤶᤔᤥᤗᤠᤶ ᤔᤏᤠᤎᤡᤰ ᤋᤩᤧᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤛ᤻ᤛᤠ᤺ᤱᤃ ᤛᤩᤧᤖᤥ. ᤀᤠᤸᤗ ᤛᤡᤰᤛᤠᤶᤒᤧᤴ ᤋᤢᤰᤂᤣ ᤆᤠ᤺ᤳᤋᤢᤶ ᤔᤧ᤺ᤴᤗᤥ॥”
LUK 8:50 ᤁᤖ ᤕᤧᤛᤢᤖᤧ ᤂᤧᤴ ᤂᤧᤵᤛᤢᤀᤠᤱ ᤕᤠᤀᤡᤖᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤏᤛᤠ᤺ᤴᤗᤰ ᤆᤥᤃᤧ᤹॥ ᤂᤢᤏᤧ᤹ ᤘᤣ᤺ᤳᤗᤥ॥”
LUK 8:51 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤠᤀᤡᤖᤛᤖᤧ ᤁᤢᤜᤡᤶᤔᤥ ᤁᤧᤖᤧᤀᤠᤱ ᤐᤋᤪᤢᤛ. ᤕᤠᤁᤢᤒ ᤏᤢ ᤕᤢᤜᤢᤴᤏᤠ᤺ᤴ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤠᤸᤗᤧ ᤁᤢᤶᤒᤠ ᤁᤢᤶᤔᤠᤛᤡᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤏᤠᤱ ᤂᤧᤴ ᤆᤢᤰᤔᤧᤴ ᤏᤧᤛ᤻ᤛᤧᤒᤠ ᤋᤧᤴᤏᤥ ᤐᤣ᤺ᤰᤔᤠ ᤔᤧᤒᤠᤱᤄᤢᤴᤛᤡᤴ॥
LUK 8:52 ᤂᤧᤵᤔᤥ ᤔᤏᤠᤜᤠ᤹ ᤔᤧᤜᤠᤒᤧᤖ. ᤔᤣᤖᤡᤱ ᤌᤰᤏᤢ ᤔᤧᤕᤢᤅᤧ॥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤜᤠᤒᤧᤶᤔᤡᤴᤏᤧ᤹. ᤂᤢᤏᤧ᤹ ᤔᤧᤴᤇᤡ᤹ᤀᤣ ᤘᤠ᤹. ᤀᤡᤵᤛᤧᤀᤠᤱᤗᤰ ᤏᤧᤖᤥ॥”
LUK 8:53 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤧᤀᤣ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤆᤢᤰᤔᤧᤴ ᤛᤩᤧᤒᤠ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧ॥
LUK 8:54 ᤕᤧᤛᤢᤖᤧ ᤂᤧᤴ ᤆᤢᤰᤔᤧᤴ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ “ᤔᤠᤔᤢᤀᤣ. ᤐᤥᤃᤧ᤹ᤀᤥ” ᤔᤧᤳᤋᤢ॥
LUK 8:55 ᤂᤡᤔᤥ ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠ ᤏᤢ᤺ᤰᤂᤧ ᤋᤩᤧᤀᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤢᤱᤛᤡᤱ॥ ᤕᤧᤛᤢᤖᤧ ᤂᤧᤱᤜᤠ᤹ “ᤂᤧᤴ ᤌᤧᤔᤠᤀᤡ ᤆᤠᤔᤠ ᤐᤡᤖᤧᤶᤔᤧ᤹” ᤔᤧᤳᤋᤢᤛᤡ॥
LUK 8:56 ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ. ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
LUK 9:1 ᤀᤠᤸᤗ ᤕᤧᤛᤢᤖᤧ ᤌᤡᤰ ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤢᤒᤣᤛᤠᤱ ᤀᤢ᤺ᤳᤋᤢᤛᤡᤀᤠᤱ ᤁᤧᤖᤧᤰ ᤑᤧᤴᤛᤠᤶᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤏᤢ ᤁᤧᤍᤢᤰᤐᤠᤜᤠ᤹ ᤘᤣ᤺ᤶᤔᤠ ᤔᤢᤰᤛᤠᤶ ᤏᤢ ᤕᤢᤰ ᤐᤡᤖᤢᤛᤡᤀᤠᤱ
LUK 9:2 ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱ ᤛᤧ᤺ᤛᤧ ᤏᤢ ᤁᤧᤍᤢᤰᤐᤠᤜᤠ᤹ ᤘᤣ᤺ᤴᤇᤧ ᤐᤠᤱᤄᤢᤍᤣ᤺ᤛᤢᤛᤡᤖᤥ॥
LUK 9:3 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤁᤧᤒᤣᤃᤡᤸᤗᤧ ᤋᤰᤁᤠ᤺ᤳ. ᤛᤢ᤺ᤰᤘᤠ. ᤆᤠᤔᤠ ᤆᤠ. ᤕᤠᤱ. ᤜᤧᤰᤁᤩᤠᤱ ᤘᤣ᤹ ᤗᤧᤰᤛᤡᤱᤔᤠ ᤆᤠᤱ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ॥
LUK 9:4 ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤁᤧᤶᤒᤡᤖᤡ᤹. ᤂᤧᤴ ᤐᤠᤱᤈᤢᤶᤔᤡᤴ ᤔᤧᤸᤗᤧᤳᤋᤣ ᤌᤠᤖᤡᤰ ᤂᤧᤴ ᤜᤡᤶᤔᤥᤀᤣ ᤕᤠ᤺ᤰᤋᤧᤶᤔᤧ᤹.
LUK 9:5 ᤁᤖ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤗᤠᤱᤍᤠ᤺ᤰᤔᤠ ᤁᤧᤔᤧᤶᤒᤡᤖᤡᤴᤏᤧ ᤑᤠ᤹ᤃᤪ ᤂᤧᤴ ᤐᤠᤱᤈᤢᤶᤔᤡᤴ ᤁᤧᤗᤧᤖᤢᤶᤔᤡᤸᤗᤧ ᤂᤡᤏᤡ᤹ ᤗᤠᤱᤅᤥ ᤁᤧᤄᤡᤵᤐᤠ ᤂᤠᤶ ᤜᤡ᤺ᤰᤁᤡᤴ ᤌᤠᤵᤛᤧᤶ ᤌᤩᤧᤶᤔᤧ᤹॥ ᤁᤱᤃ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤱᤒᤠ ᤔᤡᤰᤛᤣ᤺ᤴᤗᤥ॥”
LUK 9:6 ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤠᤱᤓᤣ᤹ ᤐᤠᤱᤓᤣ᤹ᤀᤥ ᤔᤧᤒᤣᤀᤠᤱ ᤛᤢᤏᤠᤀᤡᤱ ᤔᤧᤛᤧ᤺ᤛᤢᤀᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤘᤣ᤺ᤴᤍᤢᤛᤡᤖᤥ॥
LUK 9:7 ᤀᤠᤸᤗ ᤃᤠᤗᤡᤗ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤜᤧᤖᤥᤍ ᤀᤣᤴᤋᤡᤐᤠᤛᤖᤧ ᤁᤴ ᤁᤧᤖᤧᤰ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ᤖᤥ” ᤔᤧᤒᤠ᤺ᤳᤋᤢ॥
LUK 9:8 ᤘᤣ᤹ᤜᤠ᤹ᤖᤧ “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤕᤠᤶᤔᤥ ᤗ᤺ᤴᤍᤧᤀᤠᤱ ᤘᤠ᤹” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ ᤔᤏᤠᤜᤠ᤹ᤖᤧ “ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤎᤡᤰ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹” ᤔᤧᤒᤠ᤺ᤳᤋᤢᤖᤥ॥
LUK 9:9 ᤜᤧᤰᤁᤣ᤺ᤸᤗᤧ ᤜᤧᤖᤥᤍᤖᤧ ᤐᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤱᤃ ᤁᤢᤏᤡ᤺ᤱᤔᤠᤴ ᤂᤰ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ. ᤁᤖ ᤀᤠᤰᤂᤣᤗ᤹ᤖᤡᤰ ᤕᤠᤶᤔᤥ ᤜᤡᤅᤧᤒᤣ᥅ ᤀᤡᤱᤃᤠ᤹ ᤁᤴ ᤌᤣ᤺ᤴᤏᤧ ᤂᤧᤵᤛᤢᤱᤒᤣ᥅” ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ॥
LUK 9:10 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤕᤧᤛᤢ᤺ᤴ ᤔᤧᤈᤧᤰᤋᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤒᤧᤌᤛᤣᤍᤠ ᤐᤠᤱᤈᤢᤶ ᤗᤧᤵᤔᤠᤱ ᤛᤫᤠ᤺ᤳᤋᤠᤱ ᤋᤣ᤹ᤖᤢᤛᤡᤀᤠᤱ ᤐᤣ.
LUK 9:11 ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤀᤣᤃᤠᤱ ᤔᤧᤎᤠᤛᤡᤱ॥ ᤕᤧᤛᤢᤖᤧ ᤂᤧᤱᤜᤠ᤹ ᤁᤧᤖᤧᤰ ᤗᤠᤱᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤒᤠ ᤐᤠ᤺ᤴᤜᤠ᤹ ᤆᤧᤰᤋᤢᤛᤡ. ᤜᤧᤰᤁᤩᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤢᤛᤡ॥
LUK 9:12 ᤜᤧᤰᤁᤩᤠᤱ ᤏᤠᤶᤎᤩᤧᤖ ᤐᤳᤇᤧᤸᤗᤧ ᤌᤡᤰ ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤁᤴ ᤔᤏᤠᤜᤠ᤹ ᤐᤠᤱᤄᤧᤍᤣ᤺ᤛᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤴ ᤂᤡᤖᤡᤒᤠ ᤐᤠᤱᤈᤢᤶᤔᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤏᤢ ᤕᤠᤱᤎᤥ᤺ᤰᤔᤠᤖᤧᤴ ᤋᤱᤃᤠᤶ ᤔᤧᤈᤥᤃᤢᤖᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤀᤣ᤺ᤰᤛᤠᤍᤧᤴᤏᤥ ᤀᤠᤘᤠ᤹ᤖᤥ॥”
LUK 9:13 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ” ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤧᤃ ᤅᤠᤛᤡ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤖᤰ ᤁᤳᤋᤢᤶᤒᤧᤖᤥ॥ ᤘᤣ᤹ ᤌᤣᤀᤠᤱ ᤜᤥ᤺ᤵ॥ ᤘᤣ᤹ ᤂᤖᤧ᤺ᤱ ᤔᤧᤴᤀᤡᤱᤅᤣ ᤁᤴ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”
LUK 9:14 (ᤂᤧᤵᤔᤥ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤕᤧᤶᤒᤡᤳᤇᤠ᤹ᤜᤠ᤹ ᤔᤧᤘᤕᤧᤖᤥ॥) ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤱᤜᤠ᤹ ᤅᤠᤃᤡᤵᤖᤧᤴ (᥋᥆) ᤗᤢᤵᤐᤥ ᤌᤧ᤺ᤰᤐᤧᤳᤋᤠᤱ ᤕᤢᤱᤔᤠ ᤐᤠᤱᤄᤧᤶᤛᤡᤶᤔᤧ᤹॥”
LUK 9:15 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤒᤠ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ ᤔᤧᤕᤢᤰᤂᤢᤛᤡ॥
LUK 9:16 ᤕᤧᤛᤢᤖᤧ ᤅᤠᤛᤡ ᤂᤖᤧ᤺ᤱᤜᤠ᤹ ᤏᤢ ᤏᤧᤳᤇᤡ ᤅᤠᤜᤠ᤹ ᤐᤰᤂᤢᤀᤠᤱ ᤌᤥ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤖ ᤏᤡᤱᤘ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤧᤴ ᤂᤖᤧ᤺ᤱᤜᤠ᤹ ᤏᤢ ᤅᤠᤜᤠ᤹ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤐᤡᤖᤢᤛᤡ॥
LUK 9:17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤔᤧᤏᤴᤇᤢᤒᤠ ᤁᤢᤈᤡᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ (᥇᥈) ᤏᤀᤡᤔᤠ ᤕᤥᤖᤧᤖᤥ॥
LUK 9:18 ᤌᤡᤰ ᤕᤧᤴ ᤕᤧᤛᤢ᤺ᤴ ᤀᤣ᤺ᤰᤛᤠᤍᤧᤴᤏᤥ ᤋᤢᤘᤠ ᤆᤥ᤺ᤰᤏᤢ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧ॥ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠᤒᤣ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹ᤒᤣ᥅”
LUK 9:19 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤂᤧᤏᤧ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤏᤢ ᤘᤣ᤹ᤜᤠ᤹ᤖᤧᤃ ᤀᤣᤗᤡᤕᤠ ᤑᤠ᤹ᤀᤠᤱ ᤁᤧᤶᤔᤧᤳᤗᤥ॥ ᤁᤢᤓᤠᤖᤧᤃ ᤀᤢᤴᤇᤥ᤺ᤴᤒᤠ ᤘᤣ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤎᤡᤰ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤶᤔᤧᤳᤗᤥ॥”
LUK 9:20 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠᤒᤣ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅” ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ᤹ᤖᤥ॥”
LUK 9:21 ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡ॥
LUK 9:22 ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤕᤖᤡᤰ ᤋᤢᤰᤂᤣᤜᤠ᤹ ᤋᤢᤶᤔᤠ ᤐᤥ᤺ᤱ॥ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤀᤠ. ᤜᤧᤰᤁᤩᤠᤱ ᤔᤧᤛᤧᤳᤋᤠᤀᤠᤱ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤅᤠᤖᤥ॥”
LUK 9:23 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤌᤡᤰᤕᤠ᤺ᤴᤎᤰ ᤛᤡᤗᤠᤶᤛᤠᤰᤔᤠ ᤁᤢᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥
LUK 9:24 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥
LUK 9:25 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤛᤠᤱ ᤁᤢᤜᤡᤱᤔᤴᤏᤡᤴ ᤔᤠ᤺ᤛᤢᤏᤧ ᤑᤠ᤹ᤃᤪ ᤏᤢ᤺ᤒᤠ ᤐᤥ᤺ᤱᤒᤡ᥅
LUK 9:26 ᤀᤠᤳᤋᤡᤴ ᤔᤏᤠ᤺ᤴ ᤀᤡᤱᤃᤠ᤹ᤏᤢ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠᤰᤁᤡᤴᤏᤢ ᤛᤡᤖᤡᤱ ᤔ᤹᤺. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤠᤱ ᤀᤠᤔᤡᤔᤡᤍᤡᤱᤏᤢ. ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤏᤢ ᤜᤧᤰᤁᤩᤠᤱ ᤛᤣᤛᤣ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤏᤢ ᤕᤢ᤺ᤀᤠᤸᤗᤧ ᤂᤧᤴᤏᤡᤴ ᤀᤠᤔᤏᤠ ᤐᤠ᤺ᤵᤔᤠ ᤛᤡᤖᤡᤱ ᤔ᤺ᤀᤠᤖᤥ॥
LUK 9:27 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤕᤢ᤺ᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤔᤧᤴᤇᤡ᤺ᤏᤧᤴᤗᤥ॥”
LUK 9:28 ᤂᤧᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤒᤠ ᤕᤧᤳᤇᤡ (᥎) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤢᤜᤢᤴᤏᤠ ᤏᤢ ᤕᤠᤁᤢᤒᤧᤴ ᤋᤣ᤹ᤖᤢᤛᤡᤀᤠᤱ ᤁᤥ᤺ᤰᤔᤠᤀᤥ ᤌᤥ ᤋᤢᤘᤠ ᤆᤥ᤺ᤰᤛᤧ ᤐᤣ॥
LUK 9:29 ᤂᤢᤏᤧ᤹ ᤋᤢᤘᤠ ᤆᤥ᤺ᤰᤏᤢ ᤐᤳᤇᤧᤸᤗᤧ ᤁᤢᤏᤠᤖᤠ᤺ᤴ ᤗᤧᤰᤛᤡᤱᤗ ᤐᤣᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤜᤠ᤹ ᤔᤡᤰ ᤁᤧᤈᤧᤶᤒᤠ ᤑ᤺ᤃᤧᤗ᤹ᤒᤠ ᤐᤥ᤺ᤰᤂᤧᤖ ᤗᤧᤰᤋᤧᤖᤥ॥
LUK 9:30 ᤜᤧᤰᤁᤩᤠᤱ ᤂᤧᤵᤔᤥ ᤏᤧᤵᤑᤢ ᤔᤏᤠᤜᤠ᤹ ᤛᤠᤱᤃᤪᤠᤶᤃᤧᤴ ᤀᤥ᤺ᤳᤋᤡᤒᤠ ᤔᤡᤔᤡᤍᤡᤱᤅᤥ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢ᤺ᤴᤏᤢ ᤋᤠ᤹ᤈᤧᤰᤂᤧᤳᤇᤡ॥ ᤂᤧᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤏᤢ ᤔᤥᤛᤠ᤺ᤴ ᤘᤕᤧᤳᤇᤡᤖᤥ॥ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤛᤡ᤺ᤔᤧᤴ ᤏᤢ ᤕᤖᤢᤛᤗᤧᤶᤔᤥ ᤆᤥ᤺ᤰᤔᤠ ᤛᤢ᤺ᤵᤔᤠ ᤀᤡ᤺ᤳᤋᤧᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤔᤧᤈᤧᤰᤂᤧ॥
LUK 9:32 ᤐᤋᤪᤢᤛ ᤏᤢ ᤁᤢᤴᤈᤢᤶᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ. ᤁᤖ ᤂᤧᤱᤜᤠ᤹ ᤋᤠᤍᤠᤵ ᤗ᤹ᤖᤡᤰ ᤔᤧᤛᤥᤖᤧᤸᤗᤧ ᤕᤧᤛᤢᤖᤧ ᤁᤢᤔᤡᤔᤡᤍᤡᤱᤅᤡᤴ ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤕᤧᤒᤧᤳᤇᤡᤒᤠ ᤔᤧᤏᤡ᤺ᤛᤢ॥
LUK 9:33 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤐᤰᤌᤩᤧᤛᤢᤀᤠᤱ ᤐᤣᤛᤡᤖ ᤐᤳᤇᤧᤳᤇᤡᤸᤗᤧ ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥ ᤀᤠᤏᤡᤃᤧ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧ᤹. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰ ᤌᤡᤰ ᤆᤥᤃᤢᤶᤒᤧ᤹ᤖᤥ᥄” (ᤁᤖ ᤂᤢᤏᤧ᤹ ᤌᤣ᤺ᤴ ᤐᤠ᤺ᤳᤋᤢᤱᤒᤣ ᤑᤠ᤹ᤀᤠᤱ ᤌᤣᤀᤠᤱ ᤁᤢᤏᤡᤱᤘᤠ᤹ ᤔᤧᤕᤠᤃᤧᤴ॥)
LUK 9:34 ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤂᤧᤵᤔᤥ ᤂᤠᤵᤔᤡ᤺ᤳᤋᤡᤸᤗᤧ ᤂᤧᤱᤜᤠ᤹ ᤋᤧᤵᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥
LUK 9:35 ᤂᤠᤵᤔᤡ᤺ᤳᤋᤥᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤛ᤻ᤛᤠ᤺ᤖᤥ. ᤂᤢᤏᤧ᤹ᤀᤣ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ᥄ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”
LUK 9:36 ᤂᤧᤴ ᤀᤡᤰᤗᤠ᤺ᤴ ᤐᤠᤖᤧ ᤆᤢᤖᤧᤀᤠᤱ ᤂᤧᤵᤔᤥ ᤕᤧᤛᤢ᤺ᤴᤗᤰ ᤔᤧᤏᤡ᤺ᤛᤢᤖᤥ॥ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱ ᤔᤧᤕᤢᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤔᤧᤳᤋᤢᤴᤇᤡᤴᤗᤥ॥
LUK 9:37 ᤁᤢᤍᤠ᤺ᤴᤍᤡᤰᤔᤠ ᤂᤧᤱᤜᤠ᤹ ᤁᤥ᤺ᤰᤔᤠᤀᤥᤏᤢ ᤕᤥ ᤔᤧᤎᤩᤧ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤍᤢᤔᤢᤛᤡᤖᤥ॥
LUK 9:38 ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤁᤢᤛ᤻ᤛᤠ᤺ ᤆᤢᤰᤐᤧᤴ ᤑᤧᤳᤋᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ᤴ ᤀᤥᤔᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥ ᤁᤴ ᤗᤳᤌᤡᤰᤗᤰ ᤀᤠᤛ᤻ᤛᤠ᤺ᤖᤥ॥
LUK 9:39 ᤀᤧᤳᤗᤧᤱ ᤑᤧᤴᤛᤠᤶᤔᤡᤸᤗᤧ ᤑᤳᤋᤢ. ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤛᤸᤗᤡᤰ ᤛᤴᤇᤡᤱᤗᤥ॥ ᤜᤧᤰᤁᤩᤠᤱ ᤁᤢᤔᤢᤖᤠᤀᤥᤗᤠᤶ ᤁᤢᤎᤩᤠ᤺ᤳ ᤗ᤺ᤳᤋᤢᤖᤥ॥ ᤑᤧᤴᤛᤠᤶᤔᤡᤸᤗᤧ ᤛᤵᤑᤠ ᤛᤵᤑᤠᤖᤰ ᤗᤧᤖᤢᤀᤠᤱ ᤂᤢᤏᤧ᤹ᤃ ᤔᤧᤱᤔᤠ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥
LUK 9:40 ᤀᤡᤱᤃᤠ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤁᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”
LUK 9:41 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤛᤠ᤺ᤴ ᤁᤧᤜᤥ᤺ᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤀᤠᤱ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”
LUK 9:42 ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤕᤧᤛᤢ᤺ᤴ ᤗᤧᤵᤔᤠᤱ ᤐᤣᤖ ᤐᤳᤇᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤀᤠᤱ ᤐᤡᤷᤎᤠᤵ ᤌᤠᤵᤛᤢ. ᤁᤖ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤘᤣ᤺ᤴᤍᤢᤀᤠᤱ ᤁᤢᤶᤒᤠ ᤐᤡᤖᤢᤖᤥ॥
LUK 9:43 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤔᤧᤏᤡ᤺ᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ.
LUK 9:44 “ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ-ᤀᤠᤸᤗ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤳᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤖᤥ॥”
LUK 9:45 ᤁᤖ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤢᤏᤡ᤹ᤀᤥᤗᤠᤶ ᤔᤠ᤹ᤖᤧᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤍᤥ᤺ᤔᤠᤀᤠᤱ ᤔᤧᤃᤡᤛᤧᤖᤥ॥
LUK 9:46 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤠᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤵᤐᤣ ᤑᤠ᤹ᤀᤠᤱ ᤐᤠ᤺ᤴ ᤔᤧᤎᤰᤋᤧ॥
LUK 9:47 ᤁᤖ ᤕᤧᤛᤢᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤆᤢᤰᤐᤠ ᤜᤡᤴᤈᤠ᤹ᤎᤡᤰ ᤑᤧᤳᤋᤢᤀᤠᤱ ᤂᤢᤏᤡ᤹ ᤋᤃᤡ ᤕᤧᤵᤛᤢᤖᤥ॥
LUK 9:48 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤗᤠᤱᤃᤧᤍᤠ᤺ᤰᤐᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤗᤠᤱᤍᤠ᤺ᤰᤋᤢ᤹॥ ᤀᤠᤳᤋᤡᤴ ᤂᤡᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥ᤺ᤰ. ᤂᤧᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤖᤥ॥”
LUK 9:49 ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤀᤠᤏᤡᤃᤧ ᤗᤳᤇᤠ ᤔᤏᤠᤎᤡᤰᤗᤧ ᤂᤧᤏᤧ᤹ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤖ ᤐᤳᤇᤧᤒᤠ ᤏᤡ᤺ᤛᤢᤶᤒᤧᤀᤠᤱ ᤀᤠᤏᤡᤃᤧ ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤒᤠᤱᤄᤢᤶᤒᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤏᤡᤃᤧᤏᤢ ᤌᤡᤰ ᤜᤢᤵᤐᤥ ᤔᤧᤘᤠ᤹ᤏᤧᤴᤗᤥ॥”
LUK 9:50 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤠ᤺ᤳ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤜᤥ᤺ᤵ. ᤂᤧᤴ ᤂᤡᤏᤡ᤹ ᤗᤧᤵᤔᤠᤱ ᤘᤠ᤹ᤖᤥ॥”
LUK 9:51 ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤢᤒᤣ᤺ᤰᤔᤠ ᤕᤧᤶ ᤋᤩᤧᤖ ᤐᤳᤇᤧᤒᤠᤸᤗᤧ ᤂᤢᤏᤧ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥
LUK 9:52 ᤂᤢᤏᤧ᤹ ᤀᤡᤱᤛᤠᤒᤠᤜᤠ᤹ ᤋᤃᤡ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤠᤱ ᤛᤠᤔᤖᤡᤜᤠ᤹ᤖᤧ ᤂᤢᤏᤡ᤹ ᤐᤠᤱᤓᤣ᤹ᤀᤥ ᤆᤠᤔᤠ ᤌᤢᤱᤔᤠ ᤏᤢ ᤛᤧᤴᤍᤡᤰ ᤕᤠᤱᤎᤥ᤺ᤰᤛᤧ ᤔᤧᤒᤣ.
LUK 9:53 ᤁᤖ ᤛᤠᤔᤖᤡᤜᤠ᤹ᤖᤧ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤶᤒᤡᤖᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣᤖ ᤐᤳᤇᤧ॥
LUK 9:54 ᤜᤧᤰᤁᤣ᤺ᤸᤗᤧ ᤂᤧᤴ ᤏᤡ᤺ᤛᤧᤳᤇᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤕᤧᤛᤢ᤺ᤴ ᤛᤣ᤺ᤴᤍᤥ᤺ᤛᤧᤳᤇᤢ. “ᤀᤠᤍᤠᤱᤒᤣ. ᤀᤠᤏᤡᤃᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡᤖᤠ᤺ᤰ ᤌᤠ᤺ᤛᤢᤶᤒᤧᤀᤠᤱ ᤁᤴ ᤐᤠᤱᤓᤣ᤹ᤀᤡᤴ ᤂᤠᤵᤐᤢ ᤌᤩ᤺ᤱ ᤆᤥᤃᤢᤶᤒᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”
LUK 9:55 ᤁᤖ ᤕᤧᤛᤢᤖᤧ ᤜᤡᤛᤡᤱᤅᤠᤱ ᤑᤧ᤺ᤰᤋᤢᤛᤡᤖ ((ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤰᤋᤱᤒᤠ ᤕᤠᤶᤛᤠᤶ ᤁᤧᤃᤳᤋᤢᤶ ᤑᤠ᤹ᤀᤠᤱ ᤁᤧᤴᤏᤡ᤺ᤛᤢᤶᤔᤡᤴ॥
LUK 9:56 ᤜᤧᤰᤁᤣᤗ᤹ᤖᤡᤰ ᤔᤧᤴᤇᤠᤶᤛᤠ᤺ᤴ ᤜᤡᤱᤔᤴ ᤔᤧᤱᤛᤧ ᤔᤧ᤺ᤴ. ᤁᤖ ᤋᤠᤱᤛᤧ᤺ᤵᤛᤧ ᤋᤩᤧᤒᤠᤖᤥ॥”)) ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤹ᤛ᤻ᤔᤠ ᤐᤠᤱᤓᤣ᤹ᤀᤥ ᤔᤧᤒᤣᤖᤥ॥
LUK 9:57 ᤜᤧᤰᤁᤩᤠᤱ ᤗᤠᤶᤔᤥ ᤗᤠᤱᤔᤧᤄᤣᤃᤧᤖ ᤔᤧᤒᤳᤇᤧᤸᤗᤧ ᤔᤏᤠᤎᤡᤰ ᤋᤩᤧᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤂᤧᤏᤧ᤹ᤏᤢ ᤐᤣ᤺ᤰᤁᤠᤖᤥ॥”
LUK 9:58 ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤡᤍᤡ᤺ᤵᤐᤠᤜᤠ᤹ᤖᤧ ᤗᤢᤱᤄᤢᤖᤡ ᤔᤧᤃᤳᤋᤢ᤹. ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤃ ᤌᤧᤃᤣ᤺ᤰ ᤏᤧᤔᤠ ᤋᤧᤴᤏᤠᤱ ᤔᤧᤃᤳᤋᤠᤴᤗᤥ॥
LUK 9:59 ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤔᤧᤳᤋᤢ. ‘ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥’” ᤁᤖ ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤋᤃᤡ ᤀᤡᤱᤃᤠ᤹ ᤁᤧᤛᤡ᤺ᤒᤠ ᤀᤠᤶᤒᤠ᤺ᤴ ᤀᤡᤵᤐᤢᤱᤅᤥ ᤆᤡᤱᤛᤧ ᤐᤣ᤺ᤰᤔᤠ ᤐᤠᤱᤄᤠᤱᤅᤧ᤹ᤀᤥ”
LUK 9:60 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤜᤠᤖᤠ᤹ ᤕᤠᤶᤛᤠᤶᤔᤥ ᤁᤧᤛᤡ᤺ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤆᤣᤜᤠ᤹ ᤀᤡᤵᤐᤢᤱᤅᤥ ᤔᤧᤈᤡᤰᤂᤢᤛᤡᤖ. ᤁᤖ ᤂᤧᤏᤧ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤛᤧ᤺ᤛᤧ᤹ᤀᤥ॥”
LUK 9:61 ᤜᤧᤰᤁᤩᤠᤱ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤋᤩᤧᤀᤠᤱ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤂᤧᤏᤧ᤹ ᤏᤠ᤺ᤳᤏᤧ᤹ᤖᤥ. ᤁᤖ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤡᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ᤏᤢ ᤛᤧᤶᤔᤢ᤹ᤀᤡ ᤆᤥ᤺ᤰᤛᤧ ᤐᤠᤱᤄᤠᤱᤅᤧ᤹ᤀᤥ॥”
LUK 9:62 ᤁᤖ ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤜᤠ᤺ᤳᤗᤧ ᤁᤢᤜᤢᤰᤁᤡᤴ ᤁᤧᤰᤆᤢᤀᤥ ᤑᤳᤇᤢᤀᤠᤱ ᤀᤣᤃᤠᤱ ᤀᤥᤔᤧᤳᤋᤢ. ᤂᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤗᤠ᤹ᤖᤢᤴᤗᤥ॥”
LUK 10:1 ᤂᤧᤴ ᤀᤣᤃᤠᤱ ᤍᤠᤱᤒᤠᤖᤧ ᤘᤣ᤹ ᤏᤢ-ᤏᤧᤳ (᥍᥈) ᤔᤏᤠᤜᤠ᤹ ᤛᤣᤃᤢᤛᤡᤀᤠᤱ ᤐᤣᤖ ᤐᤳᤇᤧᤒᤠ ᤐᤠᤱᤈᤢᤶᤜᤠ᤹ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤏᤧᤵᤑᤢ ᤏᤧᤵᤑᤢ ᤗ᤹ᤖᤡᤰ ᤀᤡᤱᤓᤴ ᤛᤧ᤺ᤛᤧ ᤐᤠᤱᤄᤢᤛᤡᤖᤥ॥
LUK 10:2 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤴ ᤕᤖᤡᤰ ᤏᤧ᤹᤺. ᤁᤖ ᤆᤠ ᤁᤧᤛᤢᤶᤒᤠ ᤕᤠ᤺ᤗᤡᤰᤜᤠ᤹ ᤔᤧᤛᤢ᤺ᤴᤗᤥ॥ ᤜᤧᤰᤁᤣ᤺ᤸᤗᤧ ᤛᤢᤶᤔᤠ ᤁᤧᤒᤥ᤺ᤱᤒᤠ ᤆᤠ᤺ᤸᤗᤧ ᤁᤢᤴᤍᤠᤱᤒᤠᤴ ᤕᤖᤡᤰ ᤕᤠ᤺ᤗᤡᤰᤜᤠ᤹ ᤆᤠ ᤛᤢᤶᤛᤧ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥
LUK 10:3 ᤔᤧᤸᤗᤢᤰᤛᤠ᤺ᤜᤠ᤹ ᤐᤖᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤐᤠᤱᤏᤡᤱᤗᤥ॥ ᤀᤠᤸᤗ ᤐᤣᤃᤧᤶᤔᤧ᤹ᤀᤥ॥
LUK 10:4 ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤛᤠᤒᤪᤡᤜᤠ᤹. ᤛᤢ᤺ᤰᤘᤠᤜᤠ᤹ ᤜᤧᤰᤁᤩᤠᤱ ᤗᤠᤱᤛᤢ᤺ᤵᤜᤠ᤹ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤗᤠᤶᤔᤥ ᤔᤏᤠᤜᤠ᤹ᤏᤢ ᤛᤣᤘᤠ ᤔᤕᤧᤶᤔᤧ᤹ᤖ ᤔᤧᤜᤶᤛᤡᤱᤅᤧᤶᤔᤡᤴᤏᤧ᤹ᤀᤥ॥
LUK 10:5 ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥ ᤁᤧᤗᤠ᤺ᤛ᤻ᤛᤡ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤜᤡᤶᤔᤥ ᤜᤠᤖᤠ᤹ ᤛᤏᤠᤖᤢᤱ ᤋᤠᤏᤡᤖᤥ ᤗ᤹ᤖᤡᤰ ᤐᤠ᤺ᤳᤋᤧᤶᤔᤧ᤹॥
LUK 10:6 ᤂᤧᤴ ᤜᤡᤶᤔᤥ ᤛᤏᤠᤖᤢᤱ ᤂᤥ᤺ᤔᤠ ᤗᤠ᤹ᤖᤢᤒᤠ ᤔᤏᤠ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤧᤵᤔᤥ ᤘᤠ᤹ ᤗᤠ᤺ᤳᤗᤥ. ᤁᤖ ᤜᤧᤰᤋᤱᤒᤠ ᤔᤏᤠ᤺ᤴ ᤜᤥ᤺ᤵᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤀᤥᤀᤣ ᤕᤠᤱᤏᤠ ᤏᤢ᤺ᤱ ᤋᤠ᤺ᤖᤥ॥
LUK 10:7 ᤀᤠᤳᤋᤡᤴ ᤜᤡᤶᤔᤥ ᤂᤡᤏᤡ᤹ ᤁᤧᤘᤕᤡ᤹. ᤒᤠ ᤂᤧᤵᤔᤥᤀᤣ ᤘᤕᤧᤶᤔᤧ᤹ᤀᤠᤱ ᤂᤡᤏᤡ᤹ ᤁᤧᤶᤒᤡᤖᤡᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤆᤧᤶᤔᤧ᤹ ᤌᤢᤅᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤠ᤺ᤗᤡᤰᤁᤡᤴ ᤏᤠᤶᤕᤠᤰ ᤂᤥ᤺ᤔᤠ ᤗᤠ᤹ᤖᤢᤖᤥ॥ ᤂᤡᤏᤡ᤹ ᤜᤡᤶ ᤌᤵᤔᤣ ᤋᤠᤰᤔᤧᤃᤴᤍᤧᤶᤔᤡᤴᤏᤧ᤹ᤀᤥ॥
LUK 10:8 ᤂᤡᤏᤡ᤹ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤁᤧᤗᤠ᤺ᤛ᤻ᤛᤡᤸᤗᤧ ᤗᤠᤱᤍᤠ᤺ᤰᤔᤠ ᤁᤧᤶᤒᤡᤖᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤍᤥ᤺ᤴᤍᤡ᤹ ᤁᤧᤶᤒᤡᤖᤡᤒᤠ ᤆᤠᤜᤠ᤹ ᤆᤧᤶᤔᤧ᤹.
LUK 10:9 ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤧᤶᤛᤡᤶᤔᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ‘ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ॥’
LUK 10:10 ᤁᤖ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤂᤡᤏᤡ᤹ ᤗᤠᤱᤍᤠ᤺ᤰᤔᤠ ᤁᤧᤔᤧᤶᤒᤡᤖᤡᤴ. ᤂᤧᤴ ᤐᤠᤱᤈᤢᤶᤜᤠ᤹ᤀᤥᤒᤠ ᤗᤠᤶ ᤜᤧᤱᤄᤠ᤺ᤳᤋᤡ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹.
LUK 10:11 ‘ᤀᤠᤏᤡᤃᤧ ᤗᤠᤱᤅᤥ ᤂᤡᤵᤋᤢᤀᤠᤱ ᤁᤧᤒᤵᤐᤠ ᤂᤡᤏᤡ᤹ ᤐᤠᤱᤈᤢᤶᤔᤥᤒᤠ ᤂᤠᤶᤜᤡ᤺ᤰᤜᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤠᤏᤡᤃᤧ ᤌᤠᤵᤛᤢᤶᤒᤧᤖᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
LUK 10:12 ᤂᤠᤛᤧᤴ ᤕᤧᤴᤏᤥ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤢᤰᤂᤣ᤺ᤱᤃ ᤛᤠᤍᤥᤔᤖᤧ ᤁᤢᤍᤢᤰᤂᤣ᤺ᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤐᤥ᤺ᤱ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥’”
LUK 10:13 “ᤂᤥᤖᤠᤈᤡᤏ ᤏᤢ ᤒᤧᤌᤛᤣᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤂᤡᤏᤡ᤹ ᤐᤠᤱᤈᤢᤶᤔᤥ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤋᤠᤕᤖ ᤏᤢ ᤛᤡᤍᤥᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧᤃ ᤀᤢᤴᤇᤥ᤺ᤴᤇᤠ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤜᤡᤴᤍᤡᤃᤧ ᤑᤠ᤹ᤀᤠᤱ ᤛᤃᤡ ᤋᤣ᤺ᤳ ᤔᤧᤈᤠᤰᤛᤡᤱᤅᤠᤱ ᤂᤠᤵᤐᤢ ᤔᤧᤈᤢ᤺ᤳᤇᤡᤱᤒᤠᤔᤧᤴ॥
LUK 10:14 ᤁᤖ ᤂᤠᤛᤧᤴ ᤕᤧᤴᤏᤥᤃ ᤂᤡᤏᤡ᤹ ᤋᤢᤰᤂᤣᤏᤢ᤺ᤸᤗᤧ ᤋᤠᤕᤖ ᤏᤢ ᤛᤡᤍᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥
LUK 10:15 ᤜᤧᤰᤁᤩᤠᤱ ᤂᤡᤏᤡ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤐᤣᤃᤡᤃᤧ᤹ ᤁᤧᤗ᤹ᤖᤡᤒᤡ᥅ ᤔᤧ᤺ᤴᤗᤥ᥄ ᤂᤡᤏᤡ᤹ᤃ ᤂᤧᤔᤠᤕᤱᤛᤱ ᤌᤠᤖᤡᤰ ᤁᤧᤎᤩᤧ᤹ᤀᤡᤖᤥ॥
LUK 10:16 ᤀᤠᤳᤋᤡᤸᤗᤧ ᤂᤡᤏᤡ᤹ ᤐᤠ᤺ᤴ ᤂᤧᤵᤛᤢ᤹. ᤂᤧᤸᤗᤧ ᤀᤠᤒᤠ᤺ᤴᤏᤡᤴᤏᤠᤱ ᤂᤧᤵᤛᤢ᤹॥ ᤀᤠᤳᤋᤡᤸᤗᤧ ᤁᤧᤏᤠ᤹ᤖᤡ᤹. ᤂᤧᤸᤗᤧ ᤀᤡᤱᤃᤠ᤹ᤀᤠᤱ ᤏᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤠ᤹ᤀᤠ. ᤂᤧᤸᤗᤧ ᤕᤠᤵᤔᤡ ᤁᤧᤒᤠᤱᤒᤧᤴᤏᤠᤱ ᤏᤠ᤹ᤖᤢ᤹ᤖᤥ॥”
LUK 10:17 ᤏᤢ-ᤏᤧᤳ (᥍᥈) ᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥᤃ ᤑᤧᤴᤛᤠᤶᤜᤠ᤹ ᤀᤠᤏᤡᤃᤧ ᤕᤢᤰᤁᤥ ᤔᤧᤍᤩᤧᤖᤥ॥”
LUK 10:18 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤠᤑᤧᤴᤛᤠᤶᤔᤡᤴ ᤛᤠ᤺ᤶᤓᤣ ᤗᤧᤰᤋᤧᤒᤠ ᤁᤢᤀᤡᤛᤡ᤺ᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤰᤌᤩᤧᤖ ᤐᤳᤇᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ॥
LUK 10:19 ᤏᤡᤱᤔᤡ᤺ᤸᤗᤧ ᤁᤢᤔᤢᤰᤛᤠᤶ ᤛᤶᤍᤠᤱ ᤀᤡᤱᤃᤠ᤹ ᤕᤢᤰ ᤐᤡᤏᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤛᤣ᤺ᤰᤐᤠᤜᤠ᤹ ᤛᤶᤍᤠᤱ ᤂᤡᤏᤡ᤹ ᤗᤠᤱᤁᤧᤄᤣᤃᤡ᤹. ᤋᤠᤱᤛᤠᤱ ᤂᤧᤒᤰᤜᤠ᤹ ᤁᤧᤍᤥ᤹ᤖᤢᤶᤛᤡᤶ. ᤁᤖ ᤌᤣᤀᤠᤱ ᤁᤧᤔᤧᤶᤔᤧᤳᤋᤡᤴᤗᤥ॥
LUK 10:20 ᤜᤧᤰᤁᤣᤛᤠᤱ ᤑᤧᤴᤛᤠᤶᤜᤠ᤹ ᤂᤡᤏᤡ᤹ ᤕᤢᤰᤁᤥ ᤔᤧᤘᤠ᤹ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ ᤔᤡᤱ ᤛᤠᤵᤋᤧᤀᤠᤱ ᤐᤵᤐᤠᤸᤗᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤥ॥”
LUK 10:21 ᤂᤧᤴ ᤕᤧᤶᤔᤥ ᤕᤧᤛᤢ᤺ᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤛ᤺ᤳᤋᤧᤖ ᤐᤠᤖᤧ. “ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤀᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤛᤡᤰᤁᤢᤶᤛᤠᤒᤠᤜᤠ᤹ ᤜᤧᤰᤁᤩᤠᤱ ᤆᤠ᤺ᤵᤐᤠᤜᤠ᤹ᤏᤢ ᤁᤧᤔᤠ᤹ᤖᤢᤒᤠ ᤐᤠ᤺ᤴᤏᤡᤴ ᤜᤡᤴᤈᤠ᤹ ᤜᤧᤰᤋᤱᤒᤠᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤛᤡᤖᤥ॥ ᤀᤠᤶᤒᤣ. ᤒᤠ ᤀᤰᤂᤣ ᤆᤥ᤺ᤰᤔᤠᤀᤣ ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤅᤧᤖᤥ॥”
LUK 10:22 “ᤀᤠᤶᤒᤠᤖᤧ ᤁᤠᤰ ᤐᤠ᤺ᤴᤜᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥ ᤁᤢᤛ᤻ᤛᤠ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤶᤒᤠᤖᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹. ᤘᤣ᤹ᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤁᤢᤛ᤻ᤛᤠ᤺ᤸᤗᤧ ᤀᤥᤛᤣ᤺ᤴᤎᤠᤰᤋᤢᤛᤡᤒᤠ ᤔᤏᤠᤜᤠ᤹ᤖᤧᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥”
LUK 10:23 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤫᤠ᤺ᤳᤋᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤡᤰᤁᤡᤸᤗᤧ ᤁᤴ ᤐᤠ᤺ᤴᤜᤠ᤹ ᤏᤡ᤺ᤛᤢ᤹ᤖᤥ॥
LUK 10:24 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡ᤺ᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤔᤧᤱᤄᤥ᤺ᤛᤢᤴᤗᤥ॥”
LUK 10:25 ᤌᤡᤰ ᤕᤧᤴ ᤛᤠᤶᤕᤥᤌᤡᤶᤛᤠᤶᤒᤠᤎᤡᤰ ᤕᤧᤶᤛᤡᤱᤅᤠᤱ ᤕᤧᤛᤢ᤺ᤴ ᤐᤠ᤺ᤴᤏᤥ ᤌᤠ᤺ᤔᤠ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤌᤣ ᤆᤥ᤺ᤰᤔᤠ ᤐᤥ᤺ᤱᤒᤣ᥅”
LUK 10:26 ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤂᤧᤴ ᤛᤣ᤺ᤴᤍᤥᤛᤢ. “ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤌᤣ ᤛᤠᤵᤋᤧᤀᤠᤱ ᤐᤳ᥅ ᤂᤧᤴ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤒᤣ᥅”
LUK 10:27 ᤂᤧᤸᤗᤧ ᤏᤥᤃᤵ ᤐᤡᤖᤢ. “‘ᤂᤧᤏᤧ᤹ ᤁᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤖᤧᤰ ᤁᤧᤛᤡᤰᤗᤢᤱᤔᤠᤸᤗᤧ. ᤁᤧᤖᤧᤰ ᤁᤧᤛᤰᤔᤠᤛᤠᤶᤔᤡᤸᤗᤧ. ᤁᤧᤖᤧᤰ ᤁᤧᤎᤢᤶᤔᤡᤸᤗᤧ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤏᤡᤱᤘᤠ᤹ᤀᤡᤸᤗᤧ. ᤔᤡ᤺ᤶᤈᤡ ᤔᤧᤳᤋᤧ᤹.’ ᤜᤧᤰᤁᤩᤠᤱ ‘ᤀᤠᤵᤑᤣ᤺ᤰ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤜᤡᤶᤒᤣᤛᤠᤱᤒᤠᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ॥’”
LUK 10:28 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤍᤱᤒᤠ ᤏᤥᤃᤵ ᤁᤧᤒᤡᤖᤢᤖᤥ॥ ᤜᤧᤰᤁᤩᤠᤱ ᤒᤠ ᤜᤧᤰᤁᤣ ᤆᤥᤃᤧ᤹ᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤄᤥ᤺ᤛᤢ᤹ᤖᤥ॥”
LUK 10:29 ᤁᤖ ᤂᤧᤸᤗᤧ ᤛᤠᤶᤕᤥᤏᤡᤒᤠ ᤌᤠ᤺ᤶᤛᤡᤱᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤏᤢ᤺ᤒᤠ ᤗᤧᤱᤛᤡᤱᤗ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ ᤀᤠᤜᤡᤶᤒᤣᤛᤠᤱᤒᤠᤜᤠ᤹ ᤜᤠ᤺ᤳᤇᤡᤒᤣ᥅”
LUK 10:30 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢᤀᤠᤱ ᤔᤧᤳᤋᤢ. “ᤌᤡᤰᤕᤧᤴ ᤗᤳᤇᤠ ᤔᤏᤠ᤺ᤴ ᤕᤖᤢᤛᤗᤧᤔᤗᤠᤶ ᤕᤥ ᤕᤧᤖᤡᤜᤥᤀᤥ ᤐᤣᤖ ᤐᤳᤇᤧᤸᤗᤧ ᤑᤠ᤺ᤴᤍᤠᤜᤠ᤹ᤖᤧ ᤔᤧᤕᤠᤱᤄᤢᤀᤠᤱ ᤁᤢᤍᤣ᤺ᤳᤜᤠ᤹ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤛᤡ᤺ᤔᤠᤗᤡᤱᤎᤥ ᤁᤧᤖᤧᤖ ᤜᤠᤶᤒᤪᤧᤰ ᤔᤧᤜᤡᤵᤋᤢᤀᤠᤱ ᤗᤠᤶᤔᤥ ᤗᤠᤵᤔᤧᤓᤢᤛᤢ ᤔᤧᤎ॥
LUK 10:31 ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤏᤡᤱᤘᤠ᤹ᤑᤢᤛᤠᤶᤒᤠᤎᤡᤰ ᤕᤧ᤺ᤖ ᤐᤳᤇᤧ॥ ᤂᤧᤸᤗᤧ ᤂᤧᤴ ᤔᤏᤠ᤺ᤴ ᤏᤡ᤺ᤛᤢᤛᤠᤱ ᤔᤧᤴᤏᤡ᤺ᤔᤏᤠ ᤗᤧᤱᤛᤡᤱᤅᤠᤱ ᤗᤠᤶ ᤁᤒᤢᤎᤀᤠᤱ ᤐᤣᤖᤥ॥
LUK 10:32 ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤗᤠᤶᤔᤥ ᤔᤠᤱᤜᤡᤶᤔᤥ ᤁᤧᤓᤠ᤹ᤒᤠ ᤗᤧᤒᤡᤎᤡᤰᤁᤠᤱ ᤕᤧ᤺ᤖ ᤐᤳᤇᤧ ᤂᤧᤸᤗᤧᤀᤠᤱ ᤂᤧᤴ ᤔᤏᤠ᤺ᤴ ᤏᤡ᤺ᤛᤢᤛᤠᤱ ᤔᤧᤴᤏᤡ᤺ᤔᤏᤠ ᤗᤧᤱᤛᤡᤱᤅᤠᤱ ᤗᤠᤶ ᤁᤒᤢᤎᤀᤠᤱ ᤐᤣᤖᤥ॥
LUK 10:33 ᤁᤖ ᤛᤠᤔᤖᤡᤕᤠᤛ᤻ᤔᤠ ᤔᤏᤠᤎᤡᤰ ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤐᤣᤖᤒᤳᤇᤧᤸᤗᤧ ᤂᤧᤴ ᤔᤏᤠ᤺ᤴ ᤏᤡ᤺ᤛᤢᤀᤠᤱ ᤗᤢᤱᤔᤠ᤹ ᤋᤢᤰᤋᤢᤖᤥ॥
LUK 10:34 ᤂᤧᤴ ᤛᤠᤔᤖᤡ᤺ᤴ ᤐᤣᤀᤠᤱ ᤁᤠ᤺ᤴᤍᤧᤒᤠ ᤁᤢᤕᤠᤱᤄᤣ᤺ᤰᤁᤥ ᤛᤡᤍᤠ᤹ᤀᤡᤴ ᤜᤢ᤺ᤳᤋᤢ ᤐᤡᤖᤢᤀᤠᤱ ᤋᤣ᤺ᤳ ᤆᤡᤖᤡᤰᤜᤠ᤹ᤖᤧ ᤀᤡᤓᤢᤳᤋᤢ ᤐᤡᤖᤢ. ᤜᤧᤰᤁᤩᤠᤱ ᤁᤢᤀᤍᤱ ᤛᤶᤍᤠᤱ ᤕᤢᤰᤂᤢᤀᤠᤱ ᤆᤧᤕᤠᤱᤎᤥ᤺ᤰᤁᤥ ᤋᤣ᤹ᤖᤢᤀᤠᤱ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤢᤖᤥ॥
LUK 10:35 ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤛᤠᤔᤠᤖᤡ᤺ᤸᤗᤧ ᤆᤧᤕᤠᤱᤎᤥ᤺ᤰ ᤍᤠᤱᤒᤠᤴ ᤏᤧᤳᤇᤡ ᤕᤢᤵᤐᤠᤕᤠᤱ ᤐᤡᤖᤢᤀᤠᤱ ᤔᤧᤳᤋᤢ. ‘ᤁᤴ ᤔᤏᤠ᤺ᤴ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤏᤢ᤺ᤱᤅᤠ ᤋᤠᤀᤠᤸᤗᤧ ᤁᤴᤏᤠᤱᤎᤥ ᤁᤧᤗᤠ᤺ᤵᤐᤠ ᤕᤠᤱᤅᤡᤴ ᤜᤢᤅᤢᤱ ᤐᤡᤏᤧᤖᤥ॥’”
LUK 10:36 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤁᤴ ᤛᤢᤶᤛᤡ ᤔᤏᤠᤜᤠ᤹ᤀᤥ ᤀᤠᤳᤋᤡᤴ ᤔᤏᤠ᤺ᤴ ᤑᤠ᤺ᤴᤍᤠᤜᤠ᤹ᤖᤧ ᤔᤧᤕᤠᤱᤄᤢᤒᤠᤸᤗᤧᤴ ᤁᤧᤏᤢ᤹ᤒᤠ ᤁᤢᤜᤡᤶᤒᤣᤛᤠᤱᤒᤠ ᤐᤥ᤺ᤰᤂᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤣ᥅”
LUK 10:37 ᤂᤧᤴ ᤛᤠᤶᤕᤥᤌᤡᤶᤛᤠᤶᤒᤠᤸᤗᤧ ᤏᤥᤃᤵ ᤐᤡᤖᤢ. “ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤵᤐᤧᤴᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤂᤧᤏᤧ᤹ᤀᤠᤱ ᤒᤠ ᤜᤧᤰᤁᤣᤀᤣ ᤆᤥᤃᤧ᤹ᤀᤥ॥”
LUK 10:38 ᤀᤠᤸᤗ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤌᤡᤰ ᤐᤠᤱᤓᤣ᤹ᤀᤥ ᤔᤧᤃᤧᤖᤧᤀᤠᤱ ᤂᤧᤵᤔᤥ ᤔᤠᤷᤌᤠ ᤔᤧᤵᤔᤏᤠᤔᤠᤸᤗᤧ ᤁᤢᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤁᤢᤜᤡᤶᤔᤥ ᤔᤧᤒᤣ॥
LUK 10:39 ᤜᤧᤰᤁᤩᤠᤱ ᤔᤠᤷᤌᤠᤖᤧ ᤁᤢᤴᤛᤠ᤹ ᤔᤖᤡᤕᤔ ᤔᤧᤵᤔᤏᤠᤔᤠᤴ ᤘᤕᤧ॥ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤗᤠᤱᤈᤰᤐᤥ ᤕᤢᤱᤛᤡᤱᤅᤠᤱ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤢᤶᤍᤡᤱ ᤂᤠᤜᤢᤴᤜᤠ᤹ ᤂᤧᤵᤛᤢᤖᤥ॥
LUK 10:40 ᤁᤖ ᤔᤠᤷᤌᤠᤖᤧ ᤋᤖᤣ ᤋᤥᤔᤠ ᤕᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤐᤥ᤺ᤰᤂᤧᤒᤠᤸᤗᤧ ᤁᤢᤛᤰᤔᤠ ᤜᤢ᤹ᤖᤢ ᤜᤧᤰᤁᤩᤠᤱ ᤐᤣᤀᤠᤱ ᤍᤠᤱᤒᤠᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤕᤠᤵᤔᤡ ᤁᤶᤒᤪᤠᤱ ᤁᤧᤶᤔᤧᤳᤋᤠᤴᤒᤡ᥅ ᤀᤡᤱᤃᤠ᤹ ᤀᤠᤴᤛᤠ᤹ᤖᤧᤃ ᤁ᤹ᤕᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤓᤠ᤹ᤀᤠᤴᤒᤧ॥ ᤀᤡᤱᤃᤠ᤹ ᤕᤠ᤺ᤶᤒᤰᤁᤥ ᤜᤠᤖᤠ᤹ ᤑᤠ᤹ᤀᤠᤏᤡ ᤑᤠ᤹ᤀᤠᤱ ᤔᤧᤳᤋᤠᤱ ᤐᤡᤖᤠᤱᤅᤧ᤹ᤏᤠ॥”
LUK 10:41 ᤁᤖ ᤕᤧᤛᤢᤖᤧ ᤔᤧᤳᤋᤢ. “ᤔᤠᤷᤌᤠᤀᤣ. ᤂᤧᤏᤧ᤹ᤃ ᤕᤖᤡᤰ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤁᤧᤒᤡᤖᤢᤀᤠᤱ ᤀᤠᤒᤠᤅᤣ ᤋᤢᤰᤂᤣ ᤁᤧᤈᤠ᤺ᤳᤇᤡᤱᤅᤠᤱ ᤁᤧᤘᤠ᤹ᤖᤥ.
LUK 10:42 ᤁᤖ ᤁᤧᤕᤧᤰᤐᤠ ᤗᤰ ᤌᤡᤰᤗᤰ ᤘᤠ᤹ᤖᤥ. ᤜᤧᤰᤁᤩᤠᤱ ᤔᤖᤡᤕᤔᤖᤧᤃ ᤂᤧᤴ ᤏᤢ᤺ᤒᤠ ᤗᤰᤁᤡᤴ ᤛᤣᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤂᤧᤴ ᤗᤰᤁᤡᤴ ᤏᤠᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥”
LUK 11:1 ᤌᤡᤰ ᤕᤧᤴ ᤕᤧᤛᤢ᤺ᤴ ᤌᤡᤰ ᤋᤧᤴᤏᤥ ᤋᤢᤘᤠ ᤆᤥᤃᤧᤖ ᤕᤢᤅᤧ॥ ᤂᤢᤏᤧ᤹ ᤋᤢᤘᤠ ᤆᤥᤃᤢ ᤛᤢᤖᤢᤸᤗᤧ ᤁᤢᤜᤢ᤹ᤛᤠᤶᤒᤠᤎᤡᤰ ᤂᤧ᤹ᤕᤥ ᤋᤩᤧᤀᤠᤱ ᤔᤧᤳᤋᤢ. “ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤋᤢᤘᤠ ᤆᤥ᤺ᤰᤔᤠ ᤜᤢ᤹ᤖᤢᤛᤡᤒᤠ ᤜᤧᤰᤁᤣᤀᤣ ᤀᤠᤍᤠᤱᤒᤠᤖᤧ ᤀᤠᤏᤡᤃᤧᤀᤠᤱ ᤋᤢᤘᤠ ᤆᤥ᤺ᤰᤔᤠ ᤀᤠᤜᤢ᤹ᤖᤧ᤹ᤀᤥ॥”
LUK 11:2 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤢᤘᤠ ᤁᤧᤈᤥᤃᤢᤶᤔᤡᤸᤗᤧ ᤀᤰᤂᤣ ᤐᤠ᤺ᤳᤋᤧᤶᤔᤧ᤹. ᤀᤠᤏᤡᤃᤧ ᤐᤠ᤺ᤀᤣ. ᤔᤏᤠᤜᤠ᤹ᤖᤧ ᤁᤧᤔᤡᤱᤅᤡᤴ ᤛᤣᤛᤣ ᤔᤧᤀᤡ᤺ᤳᤋᤢᤖ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤶᤒᤡᤖᤖᤥ॥ ᤁᤧᤜᤠᤱᤈᤢᤶᤔᤡᤴ ᤋᤠᤖᤖᤥ॥
LUK 11:3 ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤁᤢᤈᤠ᤺ᤴ ᤀᤠᤒᤡᤖᤧ᤹ᤀᤥ॥
LUK 11:4 ᤀᤠᤏᤡᤃᤧ ᤗᤠᤕᤥᤗᤠᤶ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡᤃᤧᤀᤠᤱ ᤀᤠᤏᤡᤃᤧ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤗᤧᤵᤔᤡ ᤐᤡᤖᤢᤶᤛᤡᤶᤒᤧ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤛᤠ᤹ᤔᤠᤀᤥ ᤀᤠᤴᤎᤠ᤺ᤛᤧᤴᤏᤧ᤹ᤀᤥ॥”
LUK 11:5 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤠᤸᤗ ᤂᤧᤏᤧ᤹ ᤌᤡᤰ ᤛᤧᤴᤍᤡᤰ ᤛᤧᤳᤗᤢᤶᤓᤰᤁᤡᤸᤗᤧ ᤋᤣ᤺ᤱᤒᤠᤸᤗᤥ ᤁᤧᤒᤣ᤺ᤰᤁᤠᤱ ᤀᤰᤂᤣ ᤁᤧᤔᤧᤳᤋᤢ. ‘ᤋᤣ᤺ᤱᤒᤣ ᤀᤡᤱᤃᤠ᤹ ᤛᤢᤶᤛᤡ ᤂᤖᤧ᤺ᤱᤎᤡᤰ ᤌᤧ᤹ᤗᤠ ᤐᤡᤖᤠᤱᤅᤧ᤹ᤀᤥ॥
LUK 11:6 ᤌᤣᤀᤠᤱᤓᤧᤸᤗᤧ ᤔᤠ᤺ᤱᤄᤠᤏᤢ ᤀᤠᤴᤈᤢᤶᤎᤡᤰ ᤋᤩᤧᤀᤠᤱ ᤘᤠ᤹॥ ᤂᤢᤏᤧ᤹ ᤐᤡᤔᤠᤖᤧ ᤗᤠᤃᤡ ᤆᤠᤔᤠ ᤌᤢᤱᤔᤠ ᤀᤡᤱᤃᤠ᤹ ᤌᤣᤀᤠᤱ ᤔᤧᤃᤳᤋᤠᤴᤗᤥ॥’
LUK 11:7 ᤜᤧᤰᤁᤣ᤺ᤸᤗᤧ ᤜᤡᤶ ᤛᤡᤃᤠᤱᤗᤠᤶ ᤂᤧᤸᤗᤧ ᤏᤥᤃᤵ ᤁᤧᤒᤡ᤹. ‘ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ᤀᤥ᥄ ᤀᤠᤴᤍᤧ᤺ᤴᤇᤠ ᤗᤠᤶᤎᤣ᤺ᤵᤐᤧᤴ ᤀᤧᤳᤋᤧᤀᤠᤱ ᤐᤳ. ᤜᤧᤰᤁᤩᤠᤱ ᤕᤠᤶᤔᤥ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤀᤠᤱ ᤀᤡᤱᤃᤠ᤹ᤏᤢᤀᤣ ᤏᤧᤳᤏᤠᤀᤥ ᤔᤧᤏᤧ॥ ᤀᤡᤱᤃᤠ᤹ ᤐᤥ᤺ᤰᤔᤠᤀᤠᤱ ᤂᤧᤏᤧ᤹ ᤌᤧᤔᤠᤀᤠᤱ ᤐᤡᤔᤠ ᤔᤧᤛᤢᤰᤏᤧᤴᤗᤥ॥’
LUK 11:8 ᤁᤖ ᤂᤧᤵᤛᤧᤶᤔᤧ᤹. ᤂᤧᤴ ᤀᤠᤒᤠᤅᤣ ᤁᤢᤴᤍᤣ᤺ᤱᤒᤠᤛᤠᤱ ᤂᤢᤏᤧ᤹ ᤐᤥ᤺ᤰᤁᤠᤱ ᤌᤣᤀᤠᤱ ᤔᤧᤒᤡᤖᤢᤴᤗᤥ. ᤁᤖ ᤂᤢᤏᤧ᤹ ᤁᤢᤏᤠ ᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤐᤥ᤺ᤰᤁᤠᤱ ᤆᤠᤜᤠᤒᤠ ᤆᤥ᤺ᤰᤐᤠ ᤕᤠᤖᤡᤰᤁᤣ ᤂᤧᤴ ᤐᤡᤖᤢ᤹ᤖᤥ॥
LUK 11:9 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤔᤧᤳᤏᤡᤱᤗᤥ–ᤏᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤒᤡᤖᤡ᤹ᤖᤥ. ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤄᤥ᤺ᤛᤢᤶᤗᤥ. ᤗᤠᤶᤎᤣ᤺ᤵᤐᤧᤴ ᤂᤰ ᤂᤰ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤗᤠᤶᤎᤣ᤺ᤵᤐᤧᤴ ᤜᤴᤗᤥ॥
LUK 11:10 ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤏᤠ᤺ᤰᤋᤢ᤹. ᤂᤧᤸᤗᤧ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤥ᤺ᤳᤋᤢ᤹. ᤂᤧᤸᤗᤧ ᤕᤠᤱᤄᤢ᤹. ᤜᤧᤰᤁᤩᤠᤱ ᤜᤠ᤺ᤳᤗᤧ ᤗᤠᤶᤎᤣ᤺ᤵᤐᤧᤴ ᤂᤰ ᤂᤰ ᤔᤧᤳᤋᤢ᤹. ᤂᤧᤸᤗᤧ ᤁᤢᤗᤠᤃᤡ ᤗᤠᤶᤎᤣ᤺ᤵᤐᤧᤴ ᤜᤴᤗᤥ॥
LUK 11:11 ᤂᤡᤏᤡ᤹ᤀᤥ ᤀᤠᤳᤋᤡᤴ ᤐᤠ᤺ᤸᤗᤧ ᤁᤢᤛ᤻ᤛᤠ᤺ᤴ ᤅᤠ ᤏᤠ᤺ᤰᤁᤡᤸᤗᤧ ᤀᤛᤣ᤺ᤰᤐᤧᤴ ᤐᤡᤖᤢᤒᤣ᥅
LUK 11:12 ᤜᤧᤰᤁᤩᤠᤱ ᤘᤠᤎᤡ᤺ᤴ ᤏᤠ᤺ᤰᤁᤡᤸᤗᤧ ᤋᤠᤱᤛᤠᤰᤂᤧᤒᤰᤐᤧᤴ ᤐᤡᤖᤢᤒᤣ᥅
LUK 11:13 ᤂᤡᤏᤡ᤹ ᤑᤧᤴ ᤏᤡᤱᤘᤠ᤹ ᤁᤧᤃᤳᤋᤢᤶᤛᤠᤱ ᤀᤠᤒᤠᤅᤣ ᤛᤠ᤺ᤜᤠ᤹ ᤏᤢ᤺ᤒᤠ ᤆᤡᤃ᤺ᤰᤘᤠᤜᤠ᤹ ᤐᤡᤔᤠᤛᤡ ᤁᤧᤗᤧᤛ᤻ᤛᤢᤶᤔᤡᤸᤗᤧ. ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤸᤗᤧᤀᤠᤱ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ ᤁᤧᤏᤠ᤺ᤰᤋᤢᤶᤔᤡᤸᤗᤧ ᤛᤧᤰᤂᤠᤛᤠᤱ ᤁᤧᤒᤡᤖᤡ᤹ᤀᤣᤖᤥ॥”
LUK 11:14 ᤌᤡᤰᤕᤧᤴ ᤕᤧᤛᤢᤖᤧ ᤌᤡᤰ ᤁᤢᤒᤠ᤺ᤴ ᤔᤧᤴᤗ᤺ᤶᤔᤏᤠᤒᤠ ᤁᤧᤒᤠ ᤔᤏᤠᤗᤠᤶ ᤑᤧᤴᤛᤠᤶᤔᤡᤴ ᤏᤠ᤺ᤳᤋᤢ ᤗ᤺ᤳᤋᤢᤖ ᤐᤳᤇᤧ॥ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤳᤋᤢᤍᤣ᤺ᤛᤢᤀᤠᤱ ᤂᤧᤴ ᤔᤏᤠ᤺ᤴ ᤐᤠ᤺ᤵᤔᤠ ᤜᤣ᤺ᤰᤋᤧ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ.
LUK 11:15 ᤁᤖ ᤁᤢᤓᤠᤖᤧ ᤔᤧᤔᤧᤳᤋᤢ. “ᤁᤸᤗᤧᤃ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡ᤹ᤖᤥ॥”
LUK 11:16 ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤢᤏᤧ᤹ “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤧᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹ᤀᤥ” ᤔᤧᤔᤧᤳᤋᤢᤖ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢ॥
LUK 11:17 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤔᤧᤔᤧᤰᤗᤥ॥ ᤜᤧᤰᤁᤩᤠᤱ ᤀᤠᤵᤑᤣ᤺ᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤡᤶᤛᤕᤱᤜᤠ᤹ᤀᤠᤱ ᤔᤧᤔᤧᤰᤗᤥ॥
LUK 11:18 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤀᤠᤒᤠᤅᤣ ᤁᤢᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤁᤢᤜᤠᤱᤈᤢᤶᤔᤡᤸᤗᤧ ᤌᤖᤢᤒᤣ᥅ ᤁᤖ ᤀᤡᤱᤃᤠ᤹ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤗᤥ॥
LUK 11:19 ᤀᤡᤱᤃᤠ᤹ ᤒᤠᤗᤈᤡᤒᤢᤗᤗᤠᤶ ᤑᤧᤴᤛᤠᤶᤜᤠ᤹ ᤗ᤺ᤳᤋᤢᤱᤛᤡᤱᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠ᤺ᤜᤠ᤹ᤖᤧ ᤌᤧᤔᤠ᤺ᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤧᤗ᤺ᤳᤋᤢᤛᤡᤒᤣ᥅ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤎᤠᤰᤗᤥ॥
LUK 11:20 ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤗᤢᤶᤔᤥ ᤋᤩᤧ ᤆᤢᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
LUK 11:21 “ᤗᤳᤇᤠ ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤑᤧᤈᤠ-ᤑᤧᤕᤢᤶᤜᤠ᤹ ᤁᤠᤵᤛᤡᤱᤅᤠᤱ ᤁᤢᤜᤡᤶᤔᤡᤴ ᤁᤥᤛᤢᤸᤗᤧ ᤁᤢᤈᤡᤃ᤺ᤰᤘᤠᤜᤠ᤹ ᤛᤧ᤺ᤵᤋᤢᤛᤡ᤹ᤖᤥ॥
LUK 11:22 ᤁᤖ ᤂᤢᤏᤧ᤹ᤏᤢ᤺ᤸᤗᤧ ᤁᤧᤎᤢᤶᤒᤠ ᤔᤏᤠ᤺ᤴ ᤋᤠ᤺ᤀᤠᤱ ᤂᤢᤏᤧ᤹ ᤏᤠ᤺ᤴᤍᤢ᤹. ᤜᤧᤰᤁᤩᤠᤱ ᤛᤧ᤺ᤵᤔᤠ ᤛᤢᤰᤁᤠ ᤗ᤹ᤖᤡᤰ ᤀᤡ᤺ᤳᤋᤢᤒᤠ ᤑᤧᤈᤠ-ᤑᤧᤕᤢᤶᤜᤠ᤹ ᤏᤢ ᤁᤢᤈᤡᤃ᤺ᤰᤘᤠᤜᤠ᤹ ᤏᤠᤵᤋᤢᤍᤣ᤹ᤖᤢᤀᤠᤱ ᤁᤢᤔᤏᤠᤜᤠ᤹ᤏᤢ ᤜᤠᤛ᤻ᤛᤢᤖᤥ॥
LUK 11:23 ᤜᤠ᤺ᤳ ᤀᤡᤱᤃᤠ᤹ ᤗᤧᤵᤔᤠᤱ ᤜᤥ᤺ᤵ. ᤂᤧᤴ ᤀᤠᤍᤰᤗᤧᤱᤘᤠᤀᤥ ᤘᤠ᤹॥ ᤜᤠ᤺ᤳᤗᤧ ᤀᤡᤱᤃᤠ᤹ᤏᤢ ᤔᤧᤛᤢᤵᤛᤢᤴ. ᤂᤧᤸᤗᤧ ᤛᤧ᤺ᤛᤢᤖᤥ॥”
LUK 11:24 “ᤑᤧᤴᤛᤠᤶᤔᤡᤴ ᤔᤏᤠᤀᤥᤗᤠᤶ ᤗ᤺ᤴ ᤐᤣ᤺ᤰᤁᤡᤸᤗᤧ ᤏᤠ᤺ᤶᤛᤡᤱ ᤋᤧᤴ ᤁᤥ᤺ᤳᤇᤧ ᤛᤧᤱᤛᤧᤱᤒᤠ ᤋᤧᤴ ᤜᤧᤱᤄᤠ᤺ᤳᤋᤡ ᤐᤣ᤺ᤰᤗᤥ. ᤁᤖ ᤂᤧᤸᤗᤧ ᤀᤠᤳᤋᤠᤴᤏᤠᤱ ᤔᤧᤄᤥ᤺ᤛᤢᤴᤏᤠᤱ ᤀᤰᤂᤣ ᤔᤧᤳᤇᤡᤱ. ‘ᤀᤡᤱᤃᤠ᤹ ᤗᤧᤖᤢᤱᤒᤠ ᤔᤏᤠ᤺ᤸᤗᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥’
LUK 11:25 ᤜᤧᤰᤁᤩᤠᤱ ᤂᤧᤴ ᤂᤧᤵᤔᤥ ᤏᤢ᤺ᤱ ᤋᤠ᤺ᤸᤗᤧ ᤋᤃᤡ ᤕᤠᤃᤧᤒᤠ ᤋᤧᤴᤏᤡᤴ ᤔᤧᤍᤢᤃᤢᤀᤠᤱ ᤏᤢ᤺ᤒᤠ ᤔᤧᤈᤥᤃᤢᤒᤠ ᤏᤡ᤺ᤛᤢᤖᤥ॥
LUK 11:26 ᤜᤧᤰᤁᤩᤠᤱ ᤂᤧᤴ ᤐᤣ᤺ᤰᤁᤠᤱ ᤀᤠᤵᤑᤣ᤺ᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤢ᤹ᤀᤡ ᤁᤧᤓᤧ᤹ᤒᤠ ᤘᤣ᤹ ᤏᤢᤛᤡ ᤑᤧᤴᤛᤠᤶᤜᤠ᤹ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤋᤠᤱ ᤔᤧᤕᤢᤱᤛᤡᤱᤗᤥ॥ ᤂᤧᤴ ᤔᤏᤠ᤺ᤸᤗᤧ ᤁᤢᤕᤠᤰᤏᤠᤶᤔᤡᤴ ᤋᤃᤡᤒᤠᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤐᤥ᤺ᤱᤗᤥ॥”
LUK 11:27 ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤵᤔᤥ ᤔᤏᤠᤗᤢᤶᤔᤥᤗᤠᤶ ᤌᤡᤰ ᤔᤧᤴᤇᤢᤔᤠ᤹ᤀᤡᤴ ᤕᤶᤒᤠ ᤀᤡᤰᤗᤠᤀᤥ ᤐᤠᤖᤧ. “ᤂᤢᤏᤧ᤹ ᤛᤠᤃᤧᤘᤠ᤺ᤶᤔᤠᤴ ᤜᤧᤰᤁᤩᤠᤱ ᤏᤢᤃᤧᤎᤢᤰᤔᤠᤱᤃ ᤔᤢ᤹ᤀᤡᤛᤠᤔᤠᤖᤥ॥”
LUK 11:28 ᤁᤖ ᤕᤧᤛᤢᤖᤧ ᤐᤠ᤺ᤳᤋᤢ. “ᤜᤧᤰᤁᤣᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠ ᤏᤢ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤀᤣ ᤔᤢ᤹ᤀᤡᤛᤠᤒᤠᤛᤡᤖᤥ॥”
LUK 11:29 ᤔᤏᤠᤜᤠ᤹ ᤂᤧᤵᤔᤥ ᤕᤖᤡᤰ ᤔᤧᤒᤥ᤺ᤖᤧᤖ ᤔᤧᤒᤣ᤺ᤸᤗᤧ ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤁᤢ᤹ᤀᤡᤃᤧᤓᤧ᤹ᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤔᤧᤃᤥ᤺ᤳᤋᤢ᤹. ᤁᤖ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣ᤺ᤴ ᤔᤧᤱᤄᤥ᤺ᤛᤢᤴᤗᤥ॥
LUK 11:30 ᤀᤠᤰᤂᤣᤗ᤹ᤖᤡᤰ ᤕᤥᤏᤠ᤺ᤴ ᤏᤡᤏᤒᤣ ᤕᤧᤰᤕᤰᤐᤠ ᤔᤏᤠᤜᤠ᤹ᤖᤧ ᤗᤠᤃᤡ ᤔᤡᤰᤛᤣ᤺ᤴ ᤐᤥ᤺ᤰᤂᤧᤀᤠᤱ ᤘᤕᤧ. ᤂᤧᤴ ᤜᤧᤰᤁᤣᤀᤣ ᤔᤧᤴᤇᤠᤶᤛᤠ᤺ᤴᤏᤠᤱ ᤁᤴ ᤌᤠ᤺ᤰᤁᤡᤸᤗᤧ ᤗᤠᤃᤡ ᤔᤡᤰᤛᤣ᤺ᤴ ᤐᤥ᤺ᤱᤗᤥ॥
LUK 11:31 ᤗᤠᤱᤃᤧᤳ ᤐᤡᤛᤠᤱᤒᤠ ᤛᤡᤘᤠ ᤗᤠᤈᤣ᤹ᤛ᤻ᤔᤠ ᤜᤠᤱᤔᤠᤴ ᤂᤠᤛᤧᤴ ᤕᤧᤴᤏᤥ ᤕᤧᤶᤛᤡᤱᤅᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤁᤠᤱ ᤐᤠ᤺ᤴᤎᤡᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤂᤠᤜᤢᤴ ᤂᤧᤶᤛᤧ ᤛᤠ᤹ᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤩᤧᤀᤠᤱ ᤘᤕᤧᤖᤥ॥ ᤁᤵᤔᤥ ᤛᤥᤗᤥᤔᤏ ᤜᤠᤱᤅᤡᤴᤏᤢ᤺ᤸᤗᤧ ᤐᤕᤶ ᤕᤶᤒᤠᤴ ᤘᤠ᤹ᤛᤠᤱ ᤁᤧᤱᤄᤧᤵᤛᤢᤶᤔᤡᤴᤗᤥ॥
LUK 11:32 ᤏᤡᤏᤒᤣᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧᤀᤠᤱ ᤁᤴ ᤌᤠ᤺ᤰᤜᤠ᤹ ᤂᤠᤛᤧᤴ ᤕᤧᤴᤏᤥ ᤐᤠ᤺ᤴᤔᤧᤎᤡᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤕᤥᤏᤠᤖᤧ ᤀᤡᤱᤓᤴ ᤛᤧ᤺ᤛᤢᤸᤗᤧ ᤂᤧᤱᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤀᤠᤱ ᤔᤧᤘᤕᤧ. ᤁᤖ ᤁᤵᤔᤥ ᤕᤥᤏᤠ᤺ᤴᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠᤴ ᤘᤠ᤹ᤛᤠᤱ ᤂᤡᤏᤡ᤹ ᤁᤧᤴᤜᤡᤴᤍᤡᤴᤗᤥ॥”
LUK 11:33 “ᤀᤠᤳᤋᤡᤸᤗᤧᤀᤠᤱ ᤛᤣᤔᤡ᤺ᤴ ᤜᤠ᤺ᤴᤍᤢᤀᤠᤱ ᤏᤀᤡᤔᤠᤸᤗᤧ ᤔᤧᤛᤢ᤺ᤵᤋᤢᤴ ᤜᤧᤰᤁᤩᤠᤱ ᤔᤧᤈᤡᤰᤂᤢᤴᤏᤠᤱ. ᤁᤖ ᤜᤡᤶ ᤛᤡᤃᤠᤱ ᤁᤧᤗᤠ᤺ᤵᤐᤠᤜᤠ᤹ᤖᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤆᤶᤈᤶᤒᤠ ᤋᤧᤴᤏᤥ ᤕᤢᤰᤂᤢ᤹ᤖᤥ॥
LUK 11:34 ᤂᤧᤏᤧ᤹ ᤁᤧᤔᤡᤰᤁᤡᤴ ᤏᤠᤛᤡᤱᤃᤧᤴ ᤁᤧᤎᤰᤁᤥᤒᤠ ᤛᤣᤔᤡᤖᤥ॥ ᤂᤧᤏᤧ᤹ ᤁᤧᤔᤡᤰᤁᤴ ᤏᤢ᤹ᤏᤧ ᤑᤠ᤹ᤃᤪ. ᤁᤠᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤀᤥ᤺ᤳᤗᤥ॥ ᤁᤖ ᤁᤧᤔᤡᤰᤁᤴ ᤑᤧᤴᤏᤧ ᤑᤠ᤹ᤃᤪ. ᤁᤠᤰ ᤏᤠᤛᤡᤱᤃᤧᤴ ᤁᤧᤎᤰᤁᤡᤴ ᤂᤠᤍᤠᤶᤗᤥ॥
LUK 11:35 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤥᤒᤠ ᤀᤥ᤺ᤳᤋᤡ᤺ᤴ ᤂᤠᤍᤠᤶᤔᤠᤸᤗᤧ ᤔᤧᤛᤢ᤺ᤵᤋᤢᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥
LUK 11:36 ᤂᤧᤏᤧ᤹ ᤁᤧᤏᤡᤱᤘᤠ᤹ᤛᤠᤶᤔᤡᤴ ᤀᤥ᤺ᤳᤋᤡᤸᤗᤧ ᤁᤢᤎᤡᤶ ᤘᤠ᤹ᤀᤠᤱ ᤂᤠᤍᤠᤶᤔᤠᤴ ᤜᤥ᤺ᤵᤏᤧ ᤑᤠ᤹ᤃᤪ. ᤛᤣᤔᤡ᤺ᤸᤗᤧ ᤌᤥ᤹ᤖᤢᤒᤠ ᤜᤧᤰᤁᤣᤀᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤛᤠᤶᤔᤡᤴᤏᤠᤱ ᤀᤥ᤺ᤳᤗᤥ॥”
LUK 11:37 ᤕᤧᤛᤢᤖᤧ ᤐᤠ᤺ᤵᤔᤠ ᤛᤢᤖᤢᤸᤗᤧ ᤂᤧᤵᤔᤥ ᤑᤖᤡᤛᤡᤎᤡᤰ ᤋᤩᤧᤀᤠᤱ ᤂᤢᤏᤧ᤹ ᤆᤠᤈᤠᤛᤧ ᤀᤢ᤺ᤳᤋᤢᤖᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢ᤺ᤴ ᤁᤢᤜᤡᤶᤔᤥ ᤐᤣᤀᤠᤱ ᤆᤠᤈᤠᤛᤧ ᤕᤢᤱᤛᤡᤱ॥
LUK 11:38 ᤆᤠᤔᤠᤏᤢ᤺ᤸᤗᤧ ᤋᤃᤡ ᤕᤧᤛᤢᤖᤧ ᤁᤢᤜᤢᤰᤁᤡᤴ ᤆᤥ᤺ᤰᤌᤡᤶ ᤁᤢᤀᤡᤛᤡ᤺ᤰ ᤘᤠᤔᤧᤜᤵᤋᤢᤶᤒᤠ ᤏᤡ᤺ᤛᤢᤸᤗᤧ. ᤂᤧᤴ ᤑᤖᤡᤛᤡ᤺ᤸᤗᤧ ᤁᤢᤏᤡᤱᤘᤠ᤹ ᤔᤕᤧᤖᤥ॥
LUK 11:39 ᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. “ᤂᤡᤏᤡ᤹ ᤑᤖᤡᤛᤡᤜᤠ᤹ᤖᤧ ᤂᤥᤷᤕᤠ᤺ᤴ ᤏᤢ ᤆᤧᤳᤌᤩᤠ᤺ᤴ ᤗᤠ᤺ᤰᤁᤠᤳᤗᤰ ᤘᤠᤃᤧᤜᤵᤋᤢᤶ. ᤁᤖ ᤂᤡᤏᤡ᤹ ᤛᤡᤃᤠᤱᤃ ᤔᤏᤠᤜᤠ᤹ ᤁᤧᤏᤠᤵᤋᤢᤶ ᤁᤧᤍᤠ᤺ᤖᤢᤶᤛᤡᤒᤠ ᤐᤠ᤺ᤴᤜᤠ᤹ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤍᤡᤶᤛᤡᤀᤠᤱ ᤁᤧᤘᤕᤡ᤹ᤖᤥ॥
LUK 11:40 ᤀᤍᤱᤛᤣ. ᤗᤠ᤺ᤰᤁᤠᤳ ᤁᤧᤈᤥ᤺ᤰᤐᤠᤸᤗᤧ ᤛᤡᤃᤠᤱᤒᤠᤴᤏᤠᤱ ᤆᤥᤃᤢᤒᤠ ᤔᤧ᤺ᤶᤒᤡ᥅
LUK 11:41 ᤁᤖ ᤁᤧᤄᤡ᤺ᤵᤛᤡᤖ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤶᤍᤣ᤺ᤛᤧᤶᤛᤡᤶᤔᤧ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤢᤳᤌᤥᤀᤣ ᤁᤧᤒᤥ᤺ᤰᤂᤡ᤹ᤖᤥ॥
LUK 11:42 ᤁᤖ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ ᤑᤖᤡᤛᤡᤛᤣ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤆᤢᤈᤢᤰᤛᤠ ᤔᤠᤖᤢᤰᤁᤡᤸᤗᤧᤴ ᤌᤡᤒᤥ᤺ᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤒᤡᤖᤢᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤶᤔᤧᤳᤋᤢᤶᤔᤡᤴ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤁᤧᤴᤗᤥ᤺ᤴᤍᤢᤶᤛᤡᤶᤔᤡᤴᤗᤥ॥ ᤂᤡᤏᤡ᤹ ᤋᤃᤡᤛ᤻ᤔᤠᤴ ᤁᤧᤈᤥᤃᤢᤶᤔᤡᤸᤗᤧ ᤀᤣᤃᤠᤱᤛ᤻ᤔᤠᤴᤏᤠᤱ ᤁᤧᤈᤥᤃᤢᤶᤔᤡᤸᤗᤧ ᤐᤥ᤺ᤰᤂᤧᤒᤠᤖᤥ॥
LUK 11:43 ᤑᤖᤡᤛᤡᤛᤣ. ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤡᤏᤡ᤹ ᤛᤡᤖᤠ᤹ ᤌᤠᤱᤗᤥ. ᤜᤧᤰᤁᤩᤠᤱ ᤐᤠᤱᤈᤢᤶᤜᤠ᤺ᤳᤋᤡ ᤔᤏᤠᤜᤠ᤹ᤖᤧ ᤛᤣᤘᤠ ᤔᤧᤔᤧᤳᤋᤡᤃᤧᤖ ᤁᤧᤗ᤹ᤖᤡ᤹ᤖᤥ॥
LUK 11:44 ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ᥄ ᤂᤡᤏᤡ᤹ᤃ ᤛᤢᤳᤗᤢᤱ ᤔᤧ᤺ᤴᤏᤣᤒᤠ ᤀᤡ᤺ᤵᤐᤢᤱ ᤜᤧᤰᤁᤣ ᤁᤧᤗᤖᤡ᤹ᤖᤥ॥ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤀᤣ ᤔᤧᤱᤄᤥᤀᤣ ᤂᤧᤴ ᤀᤡ᤺ᤵᤐᤢᤱ ᤛᤶᤍᤠᤱ ᤗᤠᤱᤔᤧᤄᤣ᤺ᤰᤁᤠᤱ ᤀᤠᤛᤢᤳᤌᤥ ᤔᤧᤒᤥ᤺ᤱᤗᤥ॥”
LUK 11:45 ᤂᤧᤵᤔᤥ ᤌᤡᤰ ᤛᤠᤶᤕᤥᤌᤡᤶᤛᤠᤶᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤳᤋᤡᤸᤗᤧᤃ ᤀᤠᤏᤡᤃᤧᤀᤠᤱ ᤆᤠ᤺ᤳᤌᤡᤖᤰ ᤁᤧᤍᤣ᤺ᤛᤢᤖᤥ॥
LUK 11:46 ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. ᤂᤡᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤁᤧᤈᤡ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤁᤧᤗᤡ᤺ᤵᤐᤠ ᤁᤰ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤌᤡᤶᤜᤠ᤹ ᤁᤧᤈᤥᤃᤢᤶᤔᤠᤱ ᤔᤏᤠᤜᤠ᤹ ᤁᤧᤃᤢ᤺ᤳᤋᤢᤶᤛᤡᤶ. ᤁᤖ ᤂᤡᤏᤡ᤹ᤃ ᤁᤰ ᤕᤠᤱᤕᤠᤱ ᤗ᤹ᤖ ᤑᤠ᤹ᤀᤠᤱ ᤀᤠᤒᤠᤅᤣ ᤜᤢᤰᤆᤥᤎᤡᤰᤁᤡᤸᤗᤧᤀᤠᤱ ᤂᤧᤴ ᤁᤧᤴᤇᤢᤛᤢᤶᤔᤡᤴᤗᤥ॥
LUK 11:47 ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤛᤧᤖᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤴ ᤀᤡᤵᤐᤢᤱᤅᤡᤴ ᤁᤧᤈᤥᤃᤢᤶᤗᤥ॥
LUK 11:48 ᤂᤡᤏᤡ᤹ᤃ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴᤏᤢ ᤋᤧᤴᤍᤡᤱ ᤁᤧᤈᤥᤃᤢᤶᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡᤵᤐᤢᤱᤅᤡᤴ ᤂᤡᤏᤡ᤹ ᤁᤧᤈᤥᤃᤢᤶᤗᤥ॥
LUK 11:49 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤁᤢᤏᤡᤱᤘᤠ᤹ᤀᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. ‘ᤂᤡᤏᤡ᤹ᤀᤥ ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤐᤠᤱᤄᤢᤱᤛᤡᤱ. ᤁᤖ ᤂᤡᤏᤡ᤹ ᤁᤢᤓᤠ ᤁᤧᤛᤧᤖᤢᤶᤛᤡᤶ. ᤁᤢᤓᤠ ᤏᤡᤱᤄᤢᤶ ᤁᤧᤔᤧᤳᤋᤢᤶᤛᤡᤶ॥’
LUK 11:50 ᤜᤧᤰᤁᤣ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤵᤐᤠᤜᤠ᤹ᤖᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤂᤢᤶᤍᤡᤱᤅᤡᤴ ᤁᤴ ᤌᤠ᤺ᤰᤜᤠ᤹ᤖᤧ ᤔᤧᤄᤥ᤺ᤛᤢ᤹ᤖᤥ–
LUK 11:51 ᤔᤧᤛᤧᤖᤢᤒᤠ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤀᤠᤱᤎᤥ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴ ᤏᤢ ᤔᤠᤱᤜᤡᤶᤔᤡᤸᤗᤧ ᤁᤢᤗᤢᤶᤔᤥ ᤔᤧᤛᤧᤖᤢᤒᤠ ᤈᤁᤖᤡᤕᤠᤖᤧ ᤁᤢᤔᤠᤰᤂᤡ᤹ ᤌᤠᤖᤡᤰᤐᤠ ᤂᤢᤶᤍᤡᤱᤅᤡᤴ ᤁᤴ ᤌᤠ᤺ᤰᤜᤠ᤹ᤖᤧ ᤔᤧᤄᤥ᤺ᤛᤢ᤹ᤖᤥ॥
LUK 11:52 ᤂᤡᤏᤡ᤹ ᤛᤠᤶᤕᤥᤌᤡᤶᤛᤠᤶᤒᤠᤛᤣ. ᤂᤡᤏᤡ᤹ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤵᤔᤠ ᤏᤧᤜᤡᤏᤡᤱᤘᤠ᤹ ᤜᤶᤔᤠ ᤋᤡᤔᤡᤰᤁᤡᤴ ᤁᤧᤍᤣ᤹ᤖᤢᤶᤛᤠᤱ ᤂᤡᤏᤡ᤹ ᤀᤠᤒᤠᤅᤣᤃ ᤁᤧᤴᤗᤠᤛᤡᤴᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤁᤧᤃᤥ᤺ᤵᤐᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤗᤠ᤺ᤵᤔᤠ ᤁᤧᤶᤒᤠᤱᤄᤢᤶᤛᤡᤶᤔᤡᤴᤗᤥ॥”
LUK 11:53 ᤜᤧᤰᤁᤩᤠᤱ ᤂᤢᤏᤧ᤹ ᤂᤧ᤹ᤕᤥᤗᤠᤶ ᤐᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤠ ᤔᤧᤜᤣ᤺ᤰᤋᤢᤖᤥ॥ ᤂᤧᤴ ᤕᤧᤶᤔᤠᤱᤎᤥ ᤂᤢᤏᤧ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤖ ᤕᤖᤡᤰ ᤛᤣ᤺ᤴᤍᤥᤜᤠ᤹ ᤛᤣ᤺ᤴᤔᤧᤍᤥᤛᤢ॥
LUK 11:54 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤋᤧᤶᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤡᤱ ᤋᤱᤔᤠ ᤔᤧᤜᤣ᤺ᤰᤋᤢᤖᤥ॥
LUK 12:1 ᤂᤧᤵᤔᤥ ᤏᤡ᤺ᤳᤔᤧᤴᤍᤧᤳᤋᤣ ᤜᤧᤴᤇᤡᤱᤅᤠᤱᤎᤥ ᤔᤏᤠᤜᤠ᤹ ᤆᤡᤀᤧᤳ ᤆᤡᤀᤧᤳ ᤔᤧᤀᤧᤳᤇᤡᤱᤗ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤑᤖᤡᤛᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤴ ᤛᤡᤍᤠ᤹ ᤑᤠ᤹ᤀᤡᤴ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴᤗᤥ॥
LUK 12:2 ᤔᤧᤎᤠ᤺ᤵᤏᤧᤴᤗ ᤑᤠ᤹ᤀᤠᤱ ᤋᤧᤵᤋᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴ ᤀᤡᤃᤪ ᤁᤢᤛᤡᤱ ᤏᤡ᤺ᤳᤔᤧᤍᤧᤳᤏᤧᤴᤗ ᤑᤠ᤹ᤀᤠᤱ ᤔᤠ᤹ᤖᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴ ᤌᤣᤀᤠᤱ ᤜᤥ᤺ᤵᤗᤥ॥
LUK 12:3 ᤂᤧᤏᤧ᤹ ᤂᤠᤃᤧᤔᤠᤰᤐᤠᤀᤥ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤠᤃᤧᤀᤥ᤺ᤵᤐᤠᤀᤥ ᤀᤡᤱᤓᤴ ᤆᤥ᤺ᤰᤗᤥ॥ ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤜᤡᤶ ᤛᤡᤃᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤡᤶ ᤛᤶᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀᤡᤱᤓᤴ ᤆᤥ᤺ᤰᤗᤥ॥”
LUK 12:4 “ᤀᤠᤴᤈᤢᤶᤛᤣ. ᤜᤠ᤺ᤳᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴᤗᤰ ᤛᤧᤵᤔᤠᤀᤠᤱᤎᤥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤂᤧᤴᤏᤢ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥
LUK 12:5 ᤁᤖ ᤜᤠ᤺ᤳᤏᤢ ᤁᤡ᤺ᤔᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤳᤏᤡᤱᤗᤥ–ᤜᤠ᤺ᤳᤗᤧ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤧᤖᤢᤀᤠᤱ ᤂᤧᤔᤠᤕᤱᤛᤱᤅᤥ ᤗᤠᤵᤑᤢᤔᤠ ᤛᤢᤰᤋᤢ᤹. ᤂᤢᤏᤧ᤹ᤏᤢᤀᤣ ᤁᤡ᤺ᤛᤧᤶᤔᤧ᤹ᤀᤥ᥄
LUK 12:6 ᤅᤠᤛᤡ ᤆᤢᤈᤢᤰᤛᤠ ᤐᤢᤜᤠ᤹ᤖᤧ ᤕᤠᤱᤏᤧᤳᤇᤡ ᤔᤧᤗᤧᤰᤏᤧᤴᤒᤡ᥅ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤴᤗᤥ॥
LUK 12:7 ᤂᤡᤏᤡ᤹ ᤌᤧᤃᤣ᤺ᤰᤁᤥᤒᤠ ᤁᤠᤰ ᤌᤧᤃᤣ᤺ᤰᤀᤡᤜᤠ᤹ ᤂᤢᤏᤧ᤹ ᤏᤡ᤺ᤖᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ᥄ ᤂᤡᤏᤡ᤹ᤃ ᤕᤖᤡᤰ ᤆᤢᤈᤢᤰᤛᤠ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤁᤧᤈᤥᤃᤡᤖᤥ॥”
LUK 12:8 “ᤀᤠᤸᤗ ᤂᤧᤵᤛᤧᤶᤔᤧ᤹ᤀᤥ. ᤜᤠ᤺ᤳᤗᤧ ᤔᤏᤠ ᤋᤃᤡ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤢᤱ ᤗ᤹ᤖᤡᤰ ᤐᤠ᤺ᤳᤋᤢ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤴ ᤋᤠ᤺ᤰᤋᤢᤱᤗᤥ॥
LUK 12:9 ᤁᤖ ᤜᤠ᤺ᤳᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤀᤡᤱᤃᤠ᤹ ᤏᤠ᤹ᤀᤠ. ᤀᤡᤱᤃᤠ᤹ᤀᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤏᤠ᤹ᤖᤢᤱᤗᤥ॥
LUK 12:10 ᤜᤧᤰᤁᤩᤠᤱ ᤜᤠ᤺ᤳᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ᤹. ᤂᤧᤸᤗᤧ ᤗᤧᤵᤔᤡ ᤂᤥ᤺ᤔᤠ ᤛᤢᤰᤋᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤔᤧᤄᤥ᤺ᤛᤢᤴᤗᤥ॥
LUK 12:11 ᤔᤏᤠᤜᤠ᤹ᤖᤧ ᤂᤡᤏᤡ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤧᤰᤁᤩᤠᤱ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤠᤛᤧᤴ ᤗᤥ᤺ᤶᤔᤠᤖᤧ ᤗᤠᤃᤡ ᤁᤧᤶᤍᤣ᤹ᤖᤡᤸᤗᤧ. ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥
LUK 12:12 ᤜᤠᤒᤠ ᤂᤧᤴ ᤕᤧᤶᤔᤥ ᤌᤣ ᤐᤠ᤺ᤵᤔᤠ ᤐᤥ᤺ᤱ ᤑᤠ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤜᤢ᤹ᤖᤡ᤹ᤖᤥ॥”
LUK 12:13 ᤜᤧᤰᤁᤩᤠᤱ ᤂᤧᤴ ᤔᤏᤠᤗᤢᤶᤔᤥᤗᤠᤶ ᤌᤡᤰ ᤔᤏᤠ᤺ᤸᤗᤧ ᤕᤧᤛᤢ᤺ᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤶᤓᤢ᤹ᤖᤧ ᤕᤠᤱᤛᤠᤁᤢᤴᤎᤣᤀᤥᤒᤠ ᤀᤡᤱᤃᤠ᤹ ᤀᤠᤗᤰᤁᤡᤴ ᤐᤡᤀᤠᤖ ᤑᤠ᤹ᤀᤠᤱ ᤔᤧᤳᤋᤠᤱ ᤐᤡᤖᤠᤱᤅᤧ᤹ᤀᤥ॥”
LUK 12:14 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤗᤢᤱᤅᤠᤀᤣ. ᤜᤠ᤺ᤳᤗᤧ ᤀᤡᤱᤃᤠ᤹ ᤂᤡᤴᤇᤡ᤹ ᤗᤢᤶᤔᤥ ᤕᤠᤱᤛᤠᤁᤢᤴᤎᤣ ᤁᤧᤜᤠᤒᤠ ᤁᤧᤒᤡᤒᤠ ᤆᤥᤃᤠᤱ ᤀᤡᤃᤪ ᤂᤠᤛᤧᤴᤗᤥ᤺ᤶᤒᤠ ᤆᤥᤃᤠᤱᤒᤣ᥅”
LUK 12:15 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤂᤡ᤺ᤶᤕᤰ ᤆᤥ᤺ᤰᤔᤥᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤔᤏᤠ᤺ᤸᤗᤧ ᤁᤳᤋᤢᤒᤠ ᤔᤢᤸᤗᤢᤰ ᤕᤠᤱᤛᤠᤁᤢᤴᤎᤣᤀᤥ ᤂᤢᤏᤧ᤹ ᤛᤧᤰᤂᤠᤒᤠ ᤁᤢᤜᤡᤱᤔᤴᤏᤡᤴ ᤔᤧᤘᤠ᤹ᤏᤧᤴᤗᤥ॥”
LUK 12:16 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤌᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠ᤺ᤸᤗᤧ ᤕᤖᤡᤰ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤛᤢᤵᤛᤢ᤹ᤖᤥ॥
LUK 12:17 ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ. ‘ᤀᤠᤸᤗ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤣ᥅ ᤁᤴ ᤆᤠᤜᤠ᤹ ᤕᤢᤱᤔᤠᤍᤧᤴᤏᤣ ᤜᤥ᤺ᤵᤗᤥ॥’
LUK 12:18 ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤀᤡ᤺ᤳᤋᤢ. ‘ᤀᤠᤸᤗ ᤀᤡᤱᤃᤠ᤹ ᤀᤰᤂᤣ ᤆᤥᤃᤢᤱ–ᤀᤢᤴᤇᤥ᤺ᤴᤒᤠ ᤆᤠ ᤕᤢᤱᤍᤧᤴᤜᤠ᤹ ᤕ᤺ᤛᤢᤱᤅᤠᤱ ᤁᤢᤛᤱ ᤕᤶᤒᤠ ᤆᤠ ᤕᤢᤱᤍᤧᤴᤜᤠ᤹ ᤆᤥᤃᤢᤱᤛᤡᤱ॥ ᤜᤧᤰᤁᤩᤠᤱ ᤁᤠᤰ ᤆᤠᤜᤠ᤹ ᤏᤢ ᤀᤠᤈᤡᤃ᤺ᤰᤘᤠᤜᤠ᤹ ᤂᤧᤵᤔᤥ ᤕᤢᤰᤂᤢᤱᤛᤡᤱᤗᤥ॥
LUK 12:19 ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤀᤰᤂᤣ ᤔᤧᤳᤇᤡᤱᤅᤠ. ᤋᤣ᤺ᤱᤒᤣ. ᤕᤖᤡᤰ ᤋᤱᤒᤣ ᤌᤠᤖᤡᤰ ᤁᤧᤕᤥᤒᤠ ᤆᤠ ᤏᤢ ᤆᤡᤃ᤺ᤰᤘᤠᤜᤠ᤹ ᤛᤢᤵᤛᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗ ᤁᤢᤛᤠᤏᤢ᤺ᤖᤡᤰ ᤕᤢᤅᤧ᤹. ᤆᤧ᤹. ᤌᤢᤅᤧ᤹ᤀᤠᤱ ᤛ᤺ᤳᤋᤧ᤹ᤀᤥ᥄’
LUK 12:20 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. ‘ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤣ. ᤀᤠᤀᤡᤴ ᤛᤧᤴᤍᤡᤰᤛᤠ ᤂᤧᤏᤧ᤹ ᤁᤧᤜᤡᤱᤔᤴᤏᤡᤴ ᤏᤢᤵᤐᤠᤱ ᤂᤧᤏᤧ᤹ ᤁᤧᤛᤡ᤺ᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤗᤢᤵᤛᤢᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤜᤠ᤺ᤳᤗᤧᤴ ᤐᤥ᤺ᤱᤒᤠᤒᤣ᥅’”
LUK 12:21 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤀᤠᤒᤠᤅᤣ ᤗᤠᤃᤡᤖᤰ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤗᤢᤶᤒᤠᤀᤠᤱ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤶᤒᤥ᤺ᤱᤔᤏᤠᤒᤧᤴᤏᤠᤱ ᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥”
LUK 12:22 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤂᤧᤵᤛᤧᤶᤔᤧ᤹ᤀᤥ. ᤂᤡᤏᤡ᤹ ᤜᤡᤱᤔᤴᤏᤥ ᤌᤣ ᤆᤠᤔᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤌᤣ ᤆᤠᤱᤔᤠ ᤘᤠ᤺ᤵᤔᤠ ᤑᤠ᤹ᤀᤠᤱ ᤏᤡᤱᤛᤠᤶ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
LUK 12:23 ᤌᤣᤀᤠᤱᤓᤧᤸᤗᤧ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤆᤠᤔᤠ ᤌᤢᤱᤔᤠᤏᤢ᤺ᤸᤗᤧ ᤕᤶᤒᤠᤖᤥ॥ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ ᤆᤠᤱᤔᤠ ᤘᤠ᤺ᤵᤔᤠᤏᤢ᤺ᤸᤗᤧᤀᤠᤱ ᤕᤶᤒᤠᤖᤥ॥
LUK 12:24 ᤀᤠ᤺ᤰᤘᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ–ᤂᤧᤱᤜᤠ᤹ᤖᤧ ᤆᤠ ᤔᤧᤴᤍᤣ᤺ᤛᤢᤴ ᤔᤧᤴᤇᤢᤵᤛᤢᤴ. ᤆᤠᤕᤢᤱᤍᤧᤴᤏᤥᤀᤠᤱ ᤕᤠᤱᤔᤧᤱᤄᤥ᤺ᤳᤋᤢᤴ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠ᤺ᤳᤋᤢᤛᤡ᤹ ᤜᤡᤱᤄᤢᤛᤡ᤹ᤖᤥ॥ ᤂᤡᤏᤡ᤹ᤃ ᤐᤢᤜᤠ᤹ᤏᤢ᤺ᤸᤗᤧᤀᤠᤱ ᤀᤠᤰᤂᤧᤴ ᤀᤡᤔᤧᤸᤗᤢᤱᤛᤠᤒᤠ ᤁᤧᤈᤥᤃᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
LUK 12:25 ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤁᤢᤔᤢᤰᤌᤡᤰᤁᤠᤱ ᤑᤥ᤺ᤔᤠ ᤁᤧᤴᤇᤢᤰᤋᤢᤶᤔᤡᤴ॥
LUK 12:26 ᤀᤰᤋᤱᤒᤠ ᤆᤢᤰᤛᤠ ᤕᤠ᤺ᤶᤒᤰᤁᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴᤏᤡᤸᤗᤧ ᤌᤣᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤒᤠᤸᤗᤧ ᤁᤧᤕᤧ᤺ᤰᤂᤡᤒᤠᤒᤣ᥅
LUK 12:27 ᤀᤠᤸᤗ ᤗᤡ-ᤗᤡ ᤑᤢᤱᤅᤡᤴ ᤐᤥ᤺ᤒᤠᤴ ᤀᤥᤔᤧᤳᤋᤧᤶᤔᤧ᤹ᤀᤥ. ᤂᤧᤱᤜᤠ᤹ᤖᤧ ᤂᤡ᤺ ᤔᤧᤴᤍᤣ᤺ᤛᤢᤴ ᤂᤡ᤺ᤀᤠᤱ ᤔᤧᤴᤗ᤺ᤴᤏᤧᤴ. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤏᤢ᤹ᤔᤠ ᤁᤢᤍᤠ᤺ᤔᤠᤀᤥ ᤁᤴ ᤗᤡ-ᤗᤡ ᤑᤢᤱᤅᤡᤴ ᤕᤠᤖᤡᤰᤁᤠᤱ ᤏᤢ᤺ᤒᤠ ᤋᤣ᤺ᤳ ᤔᤧᤈᤠᤰᤛᤡᤱᤅᤡᤴᤗᤥ᥄
LUK 12:28 ᤀᤠᤀᤡᤴ ᤋᤠ᤺ᤴᤍᤡᤰ ᤔᤡᤀᤥ ᤗᤠᤵᤁᤧᤓᤢᤛᤡᤱᤒᤠ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤛᤢᤱᤑᤢᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤣᤗ᤹ᤖᤡᤰ ᤋᤣ᤺ᤳ ᤆᤠᤰᤋᤢᤛᤡᤸᤗᤧ ᤂᤡᤏᤡ᤹ ᤋᤣ᤺ᤳ ᤁᤧᤴᤈᤠᤰᤋᤡᤴᤒᤡ᥅ ᤏᤛᤠ᤺ᤴ ᤁᤧᤛᤢ᤺ᤶᤒᤠᤛᤣ᥄
LUK 12:29 ᤆᤠᤔᤠ ᤌᤢᤱᤔᤠᤀᤥᤖᤰ ᤂᤡᤏᤡ᤹ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧ ᤗᤠᤃᤡᤃ ᤏᤡᤱᤛᤠᤶᤔᤥᤀᤠᤱ ᤔᤧᤎᤩᤧᤶᤔᤡᤴᤏᤧ᤹ᤀᤥ.
LUK 12:30 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤢᤘᤠᤱᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤔᤧᤀᤡ᤺ᤳᤋᤢ᤹ᤖᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠᤴ ᤏᤡ᤺ᤛᤢᤖᤥ॥
LUK 12:31 ᤁᤖ ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴᤗᤰ ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤠᤰ ᤁᤴ ᤆᤡᤃ᤺ᤰᤘᤠᤜᤠ᤹ ᤂᤡᤏᤡ᤹ ᤁᤧᤶᤒᤡᤖᤡ᤹ᤖᤥ॥”
LUK 12:32 “ᤆᤢᤰᤛᤠ ᤔᤧᤸᤗᤢᤰ ᤛᤢᤶᤛᤣ. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤂᤡᤏᤡ᤹ ᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤡᤴ ᤐᤡᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥
LUK 12:33 ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤆᤡᤃ᤺ᤰᤘᤠᤜᤠ᤹ ᤛᤱᤄᤧᤶᤔᤧ᤹ᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤶᤍᤣ᤺ᤛᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤵᤑᤠᤸᤗᤧᤀᤠᤱ ᤔᤧᤴᤍᤧ᤺ᤱᤔᤏᤠ. ᤔᤧᤴᤜᤱᤔᤏᤠᤒᤠ ᤛᤢ᤺ᤰᤘᤠᤀᤥ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤌᤡᤶᤛᤧᤶᤛᤡᤶᤔᤧ᤹ᤀᤥ॥ ᤂᤧᤵᤔᤥ ᤁᤧᤄᤢ᤺ᤶᤒᤠᤜᤠ᤹ᤖᤧᤀᤠᤱ ᤔᤧᤴᤄᤢ᤺ᤳᤋᤢᤴ. ᤜᤧᤰᤁᤩᤠᤱ ᤁᤢᤒᤢ᤺ᤸᤗᤧᤀᤠᤱ ᤔᤧᤈᤏᤧᤴᤗᤥ॥
LUK 12:34 ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤕᤢᤰᤂᤢ᤹. ᤂᤧᤵᤔᤥᤀᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤒᤧᤴ ᤐᤣ᤺ᤰᤗᤥ॥”
LUK 12:35 “ᤂᤡᤏᤡ᤹ ᤑ᤹ᤀᤡ᤺ᤴ ᤏᤢ᤺ᤖᤡᤰᤁᤠᤱ ᤕᤢᤵᤛᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤣᤔᤡ᤺ᤴ ᤜᤠ᤺ᤴᤍᤧᤶᤔᤧ᤹ᤀᤠᤱ ᤕᤢᤰᤂᤧᤶᤔᤧ᤹ᤀᤥ॥
LUK 12:36 ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤖᤧ ᤆᤛᤡᤒᤠ ᤛᤣᤘᤠᤖᤥᤒᤠᤜᤠ᤹ ᤜᤧᤰᤁᤣ ᤂᤡᤏᤡ᤹ ᤐᤥ᤺ᤰᤂᤧᤶᤔᤧ᤹ᤀᤥ॥ ᤂᤢᤏᤡ᤹ ᤍᤠᤱᤒᤠᤴ ᤔᤣ᤺ᤰᤂᤡᤶ ᤛᤠᤓᤠᤱᤈᤠ ᤆᤠᤛᤧ ᤐᤣ᤺ᤰᤁᤠᤱ ᤏᤢ᤺ᤱ ᤋᤠ᤺ᤸᤗᤧ ᤂᤡᤔᤥ ᤗᤠᤶᤎᤣ᤺ᤵᤐᤧᤴ ᤜᤶᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤴᤀᤡᤶᤔᤣ ᤒᤠ ᤔᤧᤕᤢᤱᤗᤥ॥
LUK 12:37 ᤜᤧᤰᤁᤩᤠᤱ ᤍᤠᤱᤒᤠᤴ ᤏᤢ᤺ᤱ ᤋᤠ᤺ᤀᤡᤸᤗᤧ. ᤔᤧᤴᤀᤡᤶᤔᤣ ᤂᤢᤏᤧ᤹ ᤁᤧᤜᤠᤱᤒᤠᤖ ᤁᤧᤕᤢᤱᤒᤠ ᤛᤣᤘᤠᤖᤥᤒᤠᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥ᤺ᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤕᤠᤖᤡᤵ ᤆᤥ᤺ᤰᤛᤡᤱᤅᤠᤱ ᤛᤣᤘᤠᤖᤥᤒᤠᤜᤠ᤹ ᤆᤠᤔᤠᤍᤧᤴᤏᤥ ᤕᤢᤰᤂᤢᤛᤡ᤹ ᤜᤧᤰᤁᤩᤠᤱ ᤆᤠᤔᤠ ᤌᤢᤱᤔᤠᤜᤠ᤹ ᤌᤠᤒᤢ ᤐᤡᤖᤢᤛᤡ᤹ᤖᤥ॥
LUK 12:38 ᤜᤧᤰᤁᤩᤠᤱ ᤂᤧᤴ ᤜᤡᤶᤍᤠᤱᤒᤧᤴ ᤛᤧᤳᤗᤢᤶᤓᤰ ᤂᤡᤖᤡ ᤋᤠᤛᤠᤱ ᤂᤧᤱᤜᤠ᤹ ᤔᤧᤴᤀᤡᤶᤔᤣ ᤔᤧᤕᤢᤱᤒᤠ ᤋᤢᤔᤢᤛᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤁᤢᤛᤣᤘᤠᤖᤥᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥
LUK 12:39 ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤴᤇᤧ ᤋᤠ᤺ ᤁᤧᤗ᤹ᤒᤠ ᤕᤧᤶᤔᤡᤴ ᤏᤡᤱᤘᤠ᤹ ᤂᤥ᤺ᤛᤢᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
LUK 12:40 ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤴ ᤕᤢ᤺ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢ᤺ᤖᤥ॥”
LUK 12:41 ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤁᤴ ᤂᤧᤍᤠ᤹ᤀᤡᤴ ᤀᤠᤏᤡᤃᤧ ᤗᤠᤃᤡ ᤁᤧᤒᤠ᤺ᤳᤋᤢᤒᤠᤒᤡ. ᤀᤡ ᤘᤣ᤹ ᤁᤧᤖᤧᤰᤗᤧ ᤗᤠᤃᤡᤀᤠᤱ ᤁᤧᤒᤠ᤺ᤳᤋᤢᤒᤠᤒᤡ᥅”
LUK 12:42 ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ᤀᤠᤳᤋᤡᤴ ᤛᤣᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥ᤺ᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤘᤣ᤹ ᤛᤣᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥
LUK 12:43 ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤣᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥
LUK 12:44 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤣᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥
LUK 12:45 ᤁᤖ ᤀᤠᤳᤋᤡᤴ ᤛᤣᤘᤠᤖᤥᤒᤠᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤒᤥ ᤀᤡᤱᤃᤠ᤹ ᤀᤠᤴᤍᤠᤱᤒᤠᤴ ᤜᤠᤖᤠ ᤔᤧᤍᤠᤏᤧᤴ ᤗ᤹ᤖᤡᤰ ᤀᤡ᤺ᤳᤋᤢᤖ ᤆ᤺ ᤌᤢᤅᤢ᤹. ᤜᤧᤰᤁᤩᤠᤱ ᤔ᤺ᤛᤡᤱᤅᤠᤱ ᤘᤣ᤹ ᤛᤣᤘᤠᤖᤥᤒᤠ ᤏᤢ ᤛᤣᤘᤠᤖᤥᤔᤠᤜᤠ᤹ ᤜᤡᤵᤋᤢᤛᤡ᤹ ᤗ᤺ᤵᤛᤢᤛᤡ᤹ᤖ ᤘᤠ᤹ᤀᤡᤸᤗᤧ
LUK 12:46 ᤔᤧᤴᤀᤡ᤺ᤳᤋᤣᤒᤠ ᤏᤢ ᤏᤡᤱᤘᤠ᤹ ᤔᤧᤱᤄᤥᤀᤣᤒᤠ ᤕᤧᤴᤏᤥ ᤜᤡᤶᤍᤠᤱᤒᤧᤴ ᤜᤡᤶᤔᤥ ᤏᤢ᤺ᤱ ᤋᤠᤀᤠᤱ ᤂᤧᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤋᤢ᤹॥ ᤜᤧᤰᤁᤩᤠᤱ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤥᤖᤡᤰ ᤂᤢᤶᤍᤡᤱ ᤐᤡᤖᤢ᤹ᤖᤥ॥
LUK 12:47 “ᤜᤧᤰᤁᤩᤠᤱ ᤀᤠᤳᤋᤡᤴ ᤛᤣᤘᤠᤖᤥᤒᤠᤸᤗᤧ ᤂᤢᤏᤧ᤹ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤏᤡ᤺ᤛᤢᤛᤠᤱ ᤂᤧᤴ ᤁᤢᤀᤡᤛᤡ᤺ᤰ ᤕᤠᤖᤡᤵ ᤔᤧᤶᤒᤥ᤺ᤱᤅᤣ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢᤴᤏᤡᤸᤗᤧ ᤂᤧᤸᤗᤧ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤂᤥ᤺ᤛᤢ᤹ᤖᤥ॥
LUK 12:48 ᤁᤖ ᤜᤠ᤺ᤳᤗᤧ ᤁᤢᤴᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤔᤧᤏᤡ᤺ᤛᤢᤴᤏᤠᤱ ᤋᤧ᤺ᤶᤓᤢᤰ ᤆᤠᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤸᤗᤧ ᤔᤡᤛᤠᤰᤗᤰ ᤋᤧ᤺ᤶᤓᤢᤰ ᤆᤖᤥ॥ ᤜᤠ᤺ᤳᤗᤧ ᤕᤖᤡᤰ ᤂᤥ᤺ᤛᤢ᤹. ᤂᤧᤸᤗᤥᤗᤠᤶ ᤕᤖᤡᤰᤁᤣ ᤏᤠ᤺ᤰᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤕᤖᤡᤰ ᤗᤰᤐᤧᤴ ᤂᤥ᤺ᤛᤢ᤹ ᤂᤧᤸᤗᤥᤗᤠᤶᤔᤠᤱ ᤕᤖᤡᤰᤁᤣ ᤏᤠ᤺ᤰᤗᤥ॥”
LUK 12:49 “ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤡ ᤁᤣ᤺ᤳᤇᤧ ᤋᤩᤠᤱᤒᤠᤖᤥ. ᤁᤖ ᤋᤃᤡᤛᤠ ᤔᤡ ᤗᤠ᤺ᤛᤧᤸᤗᤧ ᤏᤢ᤺ᤒᤠ ᤐᤥ᤺ᤰᤂᤧᤒᤠᤖᤥ॥
LUK 12:50 ᤀᤡᤱᤃᤠ᤹ᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧᤴ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤁᤳᤋᤢᤱᤗᤥ॥ ᤂᤧᤴ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤀᤠᤛᤰᤔᤠ ᤜᤢ᤹ᤛᤡᤱᤅᤠᤱ ᤘᤠ᤹ᤖᤥ॥
LUK 12:51 ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤋᤩᤠᤱᤒᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤡ᥅ ᤔᤧ᤺ᤴᤗᤥ᥄ ᤀᤡᤱᤃᤠ᤹ᤃ ᤔᤏᤠᤜᤠ᤹ ᤛᤧᤶᤔᤠᤛᤡ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥
LUK 12:52 ᤀᤠᤸᤗᤀᤠᤱᤎᤥ ᤅᤠᤛᤡ ᤔᤏᤠ ᤁᤧᤘᤠ᤹ᤒᤠ ᤜᤡᤶᤛᤕᤱᤅᤥ ᤛᤢᤶᤓᤢᤖᤧ ᤋᤰᤗᤧᤱᤘᤠᤀᤥ ᤏᤧᤵᤑᤢ. ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤛᤢᤶᤓᤢ ᤔᤧᤒᤥ᤺ᤰᤁᤠᤱ ᤂᤧᤱᤜᤠ᤹ ᤔᤧᤛᤧᤖᤥ॥
LUK 12:53 ᤁᤢᤶᤒᤠ᤺ᤴ ᤁᤢᤛ᤻ᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰ. ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠ᤺ᤴ ᤁᤢᤶᤒᤠᤖᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤁᤢᤶᤔᤠ᤺ᤴ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤴ ᤁᤢᤶᤔᤠᤖᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ ᤜᤧᤰᤁᤩᤠᤱ ᤏᤥ᤺ᤵᤔᤧᤴ ᤁᤢᤶᤒᤠᤱᤗᤡ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ. ᤜᤧᤰᤁᤩᤠᤱ ᤐᤠᤱᤗᤡᤔᤧᤴ ᤁᤢᤴᤏᤥ᤺ᤵᤔᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥”
LUK 12:54 ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤶᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤏᤠᤶᤎᤠ ᤐᤡᤛᤠᤱ ᤂᤠᤵᤔᤡ᤺ᤵᤐᤠᤴ ᤁᤧᤏᤡ᤺ᤛᤢᤶᤔᤡᤸᤗᤧ ᤀᤠᤸᤗᤥᤛᤠ ᤘᤠᤜᤡᤳ ᤌᤠ᤹᤺ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶ. ᤜᤧᤰᤁᤩᤠᤱ ᤜᤧᤰᤁᤣᤗ᤹ᤖᤡᤰ ᤘᤠᤜᤡᤳ ᤌᤠ᤹᤺॥
LUK 12:55 ᤗᤠᤱᤃᤧᤴᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤸᤗᤧ ᤀᤠᤸᤗ ᤛᤠ᤹ᤖᤡᤰ ᤜᤠᤱᤘᤠ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ. ᤜᤧᤰᤁᤩᤠᤱ ᤜᤧᤰᤁᤣᤀᤣ ᤐᤥ᤺ᤱ॥
LUK 12:56 ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤀᤰᤂᤣᤗ᤹ᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤋᤖ᤺ᤱᤍᤡᤱ ᤋᤠᤱᤛᤠᤱᤅᤥᤒᤠ ᤐᤠ᤺ᤴᤏᤡᤴ ᤀᤥᤃᤧᤔᤧᤳᤋᤢᤶᤔᤠᤱ ᤋᤠ᤺ᤴᤍᤡᤰ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤴ ᤁᤧᤒᤠ᤺ᤳᤋᤢᤶ. ᤁᤖ ᤁᤴ ᤕᤧᤶᤔᤥ ᤁᤧᤍᤠ᤺ᤒᤠ ᤔᤡᤰᤛᤣ᤺ᤴᤜᤠ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠᤒᤣ᥅”
LUK 12:57 “ᤂᤡᤏᤡ᤹ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤴ ᤏᤢ᤺ᤒᤠ ᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤇᤧᤴᤍᤢᤶᤔᤡᤴᤒᤠᤒᤣ᥅
LUK 12:58 ᤂᤧᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤧᤴᤏᤢ ᤂᤠᤛᤧᤴᤜᤡᤶᤔᤥ ᤁᤧᤒᤣ᤺ᤰᤁᤡᤸᤗᤧ. ᤗᤠᤶᤔᤥᤛᤠ ᤑᤥᤋᤩᤠ ᤁᤧᤃᤢ᤺ᤵᤐᤧᤴᤏᤢ ᤏᤠᤍᤱ ᤆᤥᤃᤧ᤹ᤀᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤏᤧ᤹ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤁᤧᤍᤣ᤹ᤀᤠᤱ ᤂᤧᤴ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤋᤡᤗᤡᤱᤃᤠᤜᤠ᤹ᤖᤥ ᤜᤢᤰᤁᤧᤛᤢᤵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤢᤱᤗᤠᤜᤡᤶᤔᤥ ᤁᤧᤶᤎᤧᤰᤗᤥ॥
LUK 12:59 ᤜᤧᤰᤁᤩᤠᤱ ᤜᤢᤱᤔᤠ ᤁᤧᤒᤥ᤺ᤱᤒᤠ ᤁᤠᤰ ᤛᤠᤶᤒᤠ᤺ᤴ ᤕᤠᤱ ᤔᤧᤴᤜᤢᤱᤅᤣ ᤌᤠᤖᤡᤰ ᤂᤧᤵᤔᤥᤀᤣ ᤁᤧᤕᤠᤰᤗᤥ॥”
LUK 13:1 ᤂᤧᤴ ᤕᤧᤴᤏᤥ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤓᤠ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤰᤂᤣᤗ᤹ᤖᤡᤰ ᤃᤠᤗᤡᤗᤡᤜᤠ᤹ ᤛᤡᤍᤢᤱᤈᤓᤠ ᤆᤥ᤺ᤰᤁᤡ ᤔᤧᤕᤠᤃᤧᤸᤗᤧ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤂᤧᤴ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤠᤜᤠ᤹ ᤛᤧᤵᤔᤠ ᤐᤠᤱᤄᤢᤛᤡᤖᤥ॥”
LUK 13:2 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ ᤐᤥ᤺ᤰᤂᤧ ᤑᤠ᤹ᤗᤧ ᤂᤧᤴ ᤃᤠᤗᤡᤗᤡᤜᤠ᤹ ᤛᤠ᤹ᤖᤡᤰ ᤗᤠᤕᤥᤒᤠ ᤔᤧᤈᤥᤃᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅
LUK 13:3 ᤔᤧ᤺ᤴᤗᤥ᥄ ᤂᤡᤏᤡ᤹ᤀᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤏᤧ ᤑᤠ᤹ᤃᤪ ᤒᤠ ᤜᤧᤰᤁᤣᤀᤣ ᤁᤧᤒᤥ᤺ᤰᤂᤡ᤹ᤀᤠᤱ ᤁᤧᤔᤧᤃᤡ᤹ᤖᤥ॥
LUK 13:4 ᤜᤧᤰᤁᤩᤠᤱ ᤛᤡᤗᤥᤀᤠᤔ ᤈᤱᤜᤡᤶᤔᤡᤸᤗᤧ ᤁᤧ᤺ᤵᤋᤢ ᤛᤧᤖᤢᤛᤡᤒᤠ ᤌᤡᤰ-ᤕᤧᤳ (᥇᥎) ᤔᤏᤠᤜᤠ᤹ ᤕᤖᤢᤛᤗᤧᤶᤔᤥ ᤁᤠᤰᤏᤢ᤺ᤸᤗᤧ ᤛᤠ᤹ᤖᤡᤰ ᤗᤠᤕᤥᤒᤠ ᤔᤧᤈᤥᤃᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅
LUK 13:5 ᤔᤧ᤺ᤴᤗᤥ᥄ ᤂᤡᤏᤡ᤹ᤀᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤏᤧ ᤑᤠ᤹ᤃᤪ ᤒᤠ ᤜᤧᤰᤁᤣᤀᤣ ᤁᤧᤒᤥ᤺ᤰᤂᤡ᤹ᤀᤠᤱ ᤁᤧᤔᤧᤃᤡ᤹ᤖᤥ॥”
LUK 13:6 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤌᤡᤰ ᤔᤏᤠ᤺ᤸᤗᤧ ᤐ᤺ᤳᤇᤣ᤹ᤒᤢᤱᤔᤠᤎᤡᤰ ᤗᤣ᤺ᤳᤋᤢ॥ ᤂᤢᤏᤧ᤹ ᤐ᤺ᤳᤇᤣ᤹ᤒᤢᤱᤔᤥ ᤁᤢᤈᤠ᤹ ᤁᤥ᤺ᤳᤇᤧ ᤋᤩᤧ. ᤁᤖ ᤔᤧᤄᤥ᤺ᤛᤢᤴ॥
LUK 13:7 ᤂᤧᤸᤗᤧ ᤀᤡᤰᤁᤧᤃᤥ᤺ᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤀᤡᤱᤃᤠ᤹ ᤋᤱᤒᤣ ᤛᤢᤶᤛᤡᤀᤠᤱᤎᤥ ᤁᤴ ᤐ᤺ᤳᤇᤣ᤹ᤒᤢᤱᤔᤥ ᤁᤢᤈᤠ᤹ᤀᤡᤴ ᤀᤥᤔᤧᤳᤋᤢᤱᤗ ᤘᤠ᤹ᤀᤠ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤔᤧᤱᤄᤥ᤺ᤒᤠᤴᤗᤥ॥ ᤀᤠᤸᤗ ᤁᤴ ᤋᤠᤅᤧ᤹ᤀᤠᤱ ᤛᤧᤖᤧ᤹॥ ᤌᤣᤀᤠᤱ ᤂᤠᤶᤔᤡᤴ ᤀᤠᤶᤓᤠ ᤆᤠᤛᤥ᤺ᤰᤂᤢᤒᤠᤒᤣ॥’
LUK 13:8 ᤂᤧᤴ ᤀᤡᤰᤁᤧᤃᤥ᤺ᤒᤠᤸᤗᤧ ᤔᤧᤳᤋᤢ. ‘ᤀᤠᤍᤠᤱᤒᤣ. ᤀᤠᤀᤡᤗᤠᤶᤒᤠ ᤐ᤺ᤳᤇᤣ᤹ᤒᤢᤱᤔᤠᤴ ᤗᤧᤖᤠᤱ ᤐᤡᤖᤠᤱᤅᤧ᤹ᤀᤠᤱ ᤀᤡᤱᤃᤠ᤹ ᤁᤢᤄᤡᤖᤡ ᤋ᤺ᤕᤢᤱᤅᤠᤱ ᤔᤗ ᤕᤠᤰᤋᤢᤱ॥
LUK 13:9 ᤜᤧᤰᤁᤩᤠᤱ ᤀᤠᤴᤏᤧᤶᤔᤠ᤹ ᤁᤢᤈᤠ᤹ ᤌᤥ᤺ᤰᤋᤧᤏᤧ ᤑᤠ᤹ᤃᤪ ᤏᤢ᤺ᤒᤠ ᤐᤥ᤺ᤰᤂᤧ. ᤔᤧᤎᤥ᤺ᤰᤋᤧᤴᤏᤧ ᤑᤠ᤹ᤃᤪ ᤋᤠᤅᤧᤍᤣ᤺ᤛᤧ᤹ᤀᤥ॥’”
LUK 13:10 ᤜᤧᤰᤁᤩᤠᤱ ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖ ᤕᤠᤃᤧᤸᤗᤧ
LUK 13:11 ᤂᤧᤵᤔᤥ ᤋᤱᤒᤣ ᤌᤡᤰ-ᤕᤧᤳᤋᤠᤱᤎᤥ (᥇᥎) ᤀᤢᤎᤢᤰᤁᤣ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤁᤢᤀᤣ᤺ᤰ ᤀᤢ᤺ᤰᤂᤢ᤹ ᤁᤧᤗ᤹ᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤀᤣ᤺ᤰ ᤛᤸᤗᤡᤰ ᤛᤶᤔᤠ ᤔᤧᤛᤢᤰᤋᤢᤴᤏᤠᤱ ᤘᤕᤧᤖᤥ॥
LUK 13:12 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤡ᤺ᤛᤢᤀᤠᤱ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤸᤗᤥ ᤀᤢᤎᤢᤰᤁᤣ ᤑᤧᤴᤛᤠᤶᤔᤡᤸᤗᤧ ᤂᤧᤏᤧ᤹ ᤁᤧᤗᤧᤖᤧ ᤁᤧᤎᤩᤧᤖᤥ॥”
LUK 13:13 ᤜᤧᤰᤁᤩᤠᤱ ᤂᤧᤴ ᤀᤢ᤺ᤰᤂᤢ᤹ᤒᤠ ᤁᤢᤀᤣ᤺ᤰᤁᤥ ᤜᤢᤰᤁᤡᤴ ᤏᤧᤛ᤻ᤛᤢ ᤐᤡᤖᤢ॥ ᤂᤡᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤢᤖᤧᤀᤠᤱ ᤁᤢᤀᤣ᤺ᤰᤁᤡᤴ ᤛᤸᤗᤡᤰ ᤛᤴᤇᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖᤥ॥
LUK 13:14 ᤁᤖ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤢᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤠᤴ ᤁᤢᤛᤠᤰᤁᤧᤴ ᤐᤥᤃᤧᤀᤠᤱ ᤂᤧᤵᤔᤥ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤕᤧᤳᤏᤠᤶᤎᤡᤰᤁᤥ ᤋᤢᤰᤛᤡ (᥌) ᤕᤧᤴ ᤌᤠᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤧᤳ॥ ᤜᤧᤰᤁᤣ᤺ᤸᤗᤧ ᤏᤠ᤺ᤶᤛᤡᤱ ᤕᤧᤴᤏᤥ ᤔᤧ᤺ᤴ. ᤁᤖ ᤘᤣ᤹ ᤕᤧᤴᤜᤠ᤹ᤀᤥ ᤏᤢᤛᤡᤱᤛᤧ ᤋᤩᤧᤶᤔᤧ᤹॥”
LUK 13:15 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤌᤠ᤺ᤱᤅᤥᤗᤠᤶ ᤐᤡᤳᤜᤠ᤹ ᤀᤡᤃᤪ ᤀᤍᤱᤜᤠ᤹ ᤁᤧᤗᤧᤖᤢᤶᤛᤡᤶᤔᤠᤱ ᤆᤫᤠ᤺ᤳ ᤌᤢᤱᤛᤧ ᤁᤧᤍᤣ᤹ᤖᤢᤶᤛᤡᤶᤒᤡ ᤔᤧ᤺ᤶᤒᤡ᥅
LUK 13:16 ᤁᤴ ᤀᤒᤪᤠᤜᤠᤔᤖᤧ ᤁᤢᤜᤡᤶᤛᤕᤱᤒᤠ ᤔᤧᤴᤇᤢᤔᤠ᤹ᤀᤡᤴ ᤋᤱᤒᤣ ᤌᤡᤰ-ᤕᤧᤳᤋᤠᤱᤎᤥ (᥇᥎) ᤔᤠᤑᤧᤴᤛᤠᤶᤔᤡᤸᤗᤧ ᤌᤢ᤺ᤴᤍᤢᤀᤠᤱ ᤘᤕᤧ॥ ᤁᤴ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤴ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤄᤣ᤺ᤱᤅᤥᤗᤠᤶ ᤗᤧᤵᤔᤠ ᤏᤢ᤺ᤒᤠᤒᤡ ᤔᤧ᤺ᤶᤒᤡ᥅”
LUK 13:17 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤏᤢ᤺ᤴᤍᤧᤖᤥ॥ ᤁᤖ ᤔᤏᤠᤜᤠ᤹ ᤕᤧᤛᤢᤖᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤔᤧᤛ᤺ᤳᤋᤧᤖᤥ॥
LUK 13:18 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤌᤧᤔᤠ᤺ᤴᤏᤢ ᤋᤱᤄᤢᤱᤒᤠᤒᤣ᥅
LUK 13:19 ᤁᤱᤃ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠ ᤜᤧᤰᤁᤣ ᤆᤥ᤺ᤰᤗᤥ॥ ᤂᤧᤴ ᤀᤡᤰᤋᤠᤵᤐᤥ ᤗᤧᤵᤔᤠᤀᤠᤱ ᤗᤡᤱ ᤜᤧᤰᤁᤩᤠᤱ ᤛᤡᤱᤒᤢᤱ ᤜᤧᤰᤁᤣ ᤕᤶᤒᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤁᤢᤒᤥᤖᤠ᤺ᤰᤁᤥ ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤈᤥᤃᤢ᤹ᤖᤥ॥”
LUK 13:20 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤡᤱᤃᤠ᤹ ᤌᤧᤔᤠ᤺ᤴᤏᤢ ᤋᤱᤄᤢᤱᤒᤠᤒᤣ᥅
LUK 13:21 ᤁᤱᤃ ᤑᤧ᤹ᤖᤢᤶᤔᤥ ᤕᤠᤰᤔᤏᤠᤒᤠ ᤛᤡᤍᤠ᤹ ᤜᤧᤰᤍᤱᤒᤠ ᤆᤥ᤺ᤰᤗᤥ॥ ᤌᤡᤰ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤖᤡᤰ ᤑᤧ᤹ᤖᤢᤶᤔᤥ ᤔᤡᤛᤠᤰ ᤛᤡᤍᤠ᤹ᤀᤡᤴ ᤕᤠᤰᤋᤢ ᤜᤧᤰᤁᤩᤠᤱ ᤛᤡᤍᤠ᤹ᤀᤡᤸᤗᤧ ᤔᤧᤴᤕᤢᤰᤁᤣ ᤌᤠᤖᤡᤰ ᤛ᤹ᤖᤢ ᤕᤢᤰᤂᤢᤖᤥ॥”
LUK 13:22 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤖᤢᤛᤗᤧᤔ ᤐᤣᤖ ᤐᤳᤇᤧᤸᤗᤧ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ᤀᤥ ᤏᤡᤛᤠᤶᤜᤠ᤹ ᤜᤢ᤹ᤖᤢᤛᤡᤖ ᤐᤣᤖᤥ॥
LUK 13:23 ᤁᤢᤓᤠᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤛᤢ᤺ᤸᤗᤡᤰ ᤔᤏᤠᤜᤠ᤹ᤖᤧᤖᤰ ᤛᤧᤴᤗᤵ ᤔᤧᤄᤥ᤺ᤛᤢ᤹ᤒᤡ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ.
LUK 13:24 “ᤆᤡᤓᤡ᤺ᤳᤑᤡ᤺ᤵᤐᤠ ᤗᤠᤶᤎᤣ᤺ᤵᤐᤥᤗᤠᤶ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤋᤶᤛᤡᤴ ᤆᤥᤃᤧᤶᤔᤧ᤹ᤀᤥ॥ ᤕᤖᤡᤰ ᤔᤏᤠᤜᤠ᤹ᤖᤧ ᤋᤶᤛᤡᤴ ᤔᤧᤈᤥᤃᤢ᤹. ᤁᤖ ᤗᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
LUK 13:25 ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤸᤗᤧ ᤗᤠᤶᤎᤣ᤺ᤵᤐᤧᤴ ᤛᤢᤒᤢ᤹॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤠ᤺ᤰᤁᤠᤳᤗᤠᤶ ᤗᤠᤶᤎᤣ᤺ᤵᤐᤧᤴ ᤁᤧᤜᤡᤵᤋᤢᤶᤗ ᤁᤧᤔᤧᤳᤋᤢᤶ. ‘ᤀᤠᤏᤡᤃᤧ ᤗᤠᤃᤡᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤍᤧ ᤀᤠᤒᤡᤖᤧᤏᤠ᥄’ ᤁᤖ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤏᤥᤃᤵ ᤁᤧᤒᤡᤖᤡ᤹. ‘ᤂᤡᤏᤡ᤹ ᤀᤠᤳᤋᤥᤗᤠᤶ ᤁᤧᤍᤩᤧ᤹ᤀᤡᤒᤣ᥅ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤏᤡᤱᤅᤡᤴᤗᤥ॥’”
LUK 13:26 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤕᤠᤶᤔᤥ ᤁᤧᤒᤠ᤺ᤳᤋᤢᤶ. “ᤀᤠᤏᤡᤃᤧᤃ ᤂᤧᤏᤧ᤹ᤏᤢᤀᤣ ᤛᤥᤖᤡᤰ ᤕᤢᤱᤔᤏᤠᤀᤠᤱ ᤆᤠ᤺ᤔᤏᤠ ᤌᤢᤱᤔᤏᤠᤖᤥ. ᤂᤧᤏᤧ᤹ᤃ ᤀᤠᤏᤡᤃᤧ ᤗᤠᤶᤔᤥ ᤏᤡᤛᤠᤶ ᤁᤧᤜᤢ᤹ᤖᤢᤛᤡᤖᤥ॥
LUK 13:27 ᤁᤖ ᤂᤢᤏᤧ᤹ ᤏᤥᤃᤵ ᤁᤧᤒᤡᤖᤡ᤹. ‘ᤛᤧᤰᤂᤠᤀᤣ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤏᤡᤱᤅᤡᤴᤗᤥ. ᤀᤠᤳᤋᤥᤗᤠᤶ ᤁᤧᤍᤩᤧ᤹ᤀᤡᤒᤠᤒᤣ᥅ ᤋᤠᤰᤁᤧᤓᤧ᤹ᤒᤠᤛᤣ. ᤁᤵᤔᤥᤗᤠᤶ ᤐᤣᤃᤧᤶᤔᤧ᤹ᤀᤥ᥄’
LUK 13:28 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤀᤒᤪᤠᤜᤠᤔ. ᤀᤡᤛᤜᤠᤁ. ᤕᤠᤁᤢᤒ. ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤧᤕᤢᤱᤒᤠ ᤁᤧᤏᤡ᤺ᤛᤢᤶᤛᤡᤶ. ᤁᤖ ᤀᤠᤒᤠᤅᤣᤃ ᤗᤠ᤺ᤰᤁᤠᤳ ᤗᤠᤵᤁᤧᤶᤓᤢᤛᤡᤀᤠᤱ ᤁᤧᤜᤠᤒᤡᤖ ᤁᤧᤓᤡ᤺ᤰᤋᤡᤖ ᤕᤧᤳᤋᤢᤰᤂᤣ᤺ᤸᤗᤧ ᤜᤠᤒᤥ᤹ᤒᤠᤴ ᤁᤧᤕᤧ᤺ᤰᤂᤢᤶᤗᤥ॥
LUK 13:29 ᤁᤠᤰ ᤐᤡᤛᤠᤱᤗᤠᤶ ᤏᤢ ᤁᤠᤰ ᤗᤠᤈᤣ᤹ᤗᤠᤶ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤧᤍᤠᤀᤠᤱ ᤛᤠᤓᤠᤱᤈᤠ ᤆᤠᤛᤧ ᤔᤧᤕᤢᤱᤛᤡᤱᤗᤥ॥
LUK 13:30 ᤂᤧᤵᤔᤥ ᤀᤠᤸᤗᤥ ᤕᤶᤗᤠᤒᤠ ᤔᤏᤠᤜᤠ᤹ ᤋᤠ᤺ᤴᤍᤡ ᤆᤢᤰᤛᤠ ᤔᤧᤒᤥ᤺ᤱ. ᤜᤧᤰᤁᤩᤠᤱ ᤆᤢᤰᤛᤠ ᤔᤏᤠᤜᤠ᤹ ᤕᤶᤗᤠᤒᤠ ᤔᤧᤒᤥ᤺ᤱᤗᤥ॥”
LUK 13:31 ᤒᤠ ᤂᤧᤴ ᤕᤧᤶᤔᤥ ᤂᤧ᤹ᤕᤥ ᤁᤢᤓᤠ ᤑᤖᤡᤛᤡᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤵᤔᤥᤗᤠᤶ ᤜᤠᤖᤠ ᤗ᤺ᤴᤍᤧ ᤐᤣᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤸᤗᤧ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ॥”
LUK 13:32 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤂᤧᤴ ᤁᤡᤍᤡ᤺ᤵᤐᤠᤴ ᤀᤰᤂᤣ ᤔᤧᤳᤋᤧᤶᤔᤧ᤹ᤀᤥ–‘ᤀᤠᤀᤡᤴ ᤏᤢ ᤋᤠ᤺ᤴᤍᤡᤰ ᤀᤡᤱᤃᤠ᤹ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤅᤠᤱ ᤔᤏᤠᤜᤠ᤹ ᤏᤢᤛᤢᤱᤛᤡᤱ ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤕᤧᤴᤏᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤰᤁᤡᤴ ᤛᤢᤖᤢᤱᤗᤥ॥
LUK 13:33 ᤁᤖ ᤀᤡᤱᤃᤠ᤹ ᤀᤠᤀᤡᤴ. ᤋᤠ᤺ᤴᤍᤡᤰ ᤏᤢ ᤀᤠᤳᤇᤧᤴᤍᤠ᤺ᤴ ᤂᤧᤳᤌᤥᤀᤣ ᤐᤣ᤺ᤰᤁᤠᤖ ᤐᤳᤋᤠ. ᤌᤣᤀᤠᤱᤓᤧᤸᤗᤧ ᤕᤖᤢᤛᤗᤧᤔ ᤗᤠ᤺ᤰᤁᤠᤳ ᤘᤣ᤹ ᤍᤧᤴᤏᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤛᤧᤵᤔᤠᤛᤡ ᤔᤧᤏᤢ᤹ᤏᤧᤴᤗᤥ॥’
LUK 13:34 ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤕᤖᤢᤛᤗᤧᤶᤔᤥᤒᤠ ᤔᤏᤠᤛᤣ. ᤂᤡᤏᤡ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤛᤧᤖᤢᤶᤛᤡᤶ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤥ ᤐᤠᤱᤄᤢᤛᤡᤒᤠ ᤀᤡᤱᤛᤠᤒᤠᤜᤠ᤹ ᤗᤢᤱᤅᤡᤸᤗᤧ ᤁᤧᤒ᤺ᤳᤋᤢᤶᤛᤡᤶᤗᤥ॥ ᤀᤠᤰᤂᤧᤴ ᤗᤧᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤘᤠᤔᤠ᤺ᤵᤔᤠᤸᤗᤧ ᤘᤠᤈᤩᤠ᤺ᤰᤜᤠ᤹ ᤁᤢᤵᤋᤢᤛᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤛᤠ᤺ᤜᤠ᤹ ᤛᤢᤶᤔᤠᤛᤡ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤂᤡᤏᤡ᤹ ᤁᤧᤴᤍᤧᤴᤍᤡᤴᤗᤥ॥
LUK 13:35 ᤀᤥᤔᤧᤳᤋᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤜᤡᤶᤔᤡᤴ ᤗᤠᤶᤎᤣ᤺ᤵ ᤆᤡᤀᤧᤳ ᤀᤧᤳᤋᤢ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ‘ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠᤖᤥ’ ᤗ᤹ᤖᤡᤰ ᤁᤧᤶᤒᤠ᤺ᤳᤋᤢᤶᤔᤡᤴᤗ ᤌᤠᤖᤡᤰ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ॥”
LUK 14:1 ᤌᤡᤰ ᤏᤠ᤺ᤶᤛᤡᤱ ᤕᤧᤴᤏᤥ ᤕᤧᤛᤢ᤺ᤴ ᤗᤳᤇᤠ ᤑᤖᤡᤛᤡ ᤗᤠᤶᤗᤥ᤺ᤒᤠᤸᤗᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤐᤣ॥ ᤂᤧᤵᤔᤥ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤎᤥ᤺ᤵᤛᤢᤀᤠᤱ ᤔᤧᤘᤕᤧ.
LUK 14:2 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤃᤡ ᤁᤢᤗᤠᤱ ᤁᤢᤜᤢᤰ ᤜ᤺ᤵᤛᤢᤒᤠ ᤔᤏᤠᤎᤡᤰ ᤋᤩᤧ॥
LUK 14:3 ᤜᤧᤰᤁᤩᤠᤱ ᤕᤧᤛᤢᤖᤧ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤏᤠ᤺ᤶᤛᤡᤱ ᤕᤧᤴᤏᤥ ᤁᤧᤍᤢᤰᤐᤠ ᤔᤏᤠᤜᤠ᤹ ᤘᤣ᤺ᤶᤔᤠᤛᤡ ᤏᤢ᤹ᤒᤡ᥅”
LUK 14:4 ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤥᤃᤵ ᤔᤧᤶᤒᤡᤖᤢᤴ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤛᤶᤍᤠᤱ ᤁᤢᤜᤢᤰ ᤏᤧᤛ᤻ᤛᤢᤖ ᤏᤢᤛᤢᤀᤠᤱ ᤐᤠᤱᤄᤢᤍᤣ᤺ᤛᤢᤖᤥ॥
LUK 14:5 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤛᤠ᤺ ᤀᤡᤃᤪ ᤐᤡᤳᤌᤡᤰ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ ᤔᤰᤌᤠ ᤗᤠ᤺ᤳᤋᤡᤸᤗᤧ ᤂᤡᤏᤡ᤹ ᤂᤡᤔᤥ ᤗᤠ᤺ᤰᤁᤠᤳ ᤁᤧᤀᤢ᤺ᤰᤂᤢᤶ ᤁᤧᤗ᤺ᤳᤋᤢᤶᤒᤡ ᤔᤧ᤺ᤶᤒᤡ᥅”
LUK 14:6 ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤥᤃᤵ ᤐᤡᤔᤠ ᤔᤧᤴᤇᤢᤰᤋᤢᤴᤗᤥ॥
LUK 14:7 ᤕᤧᤛᤢᤖᤧ ᤂᤧᤴ ᤛᤠᤓᤠᤱᤈᤠᤀᤥ ᤀᤢ᤺ᤵᤔᤏᤠᤒᤠ ᤔᤏᤠᤜᤠ᤹ᤖᤧ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ ᤔᤧᤛᤣᤃᤢᤖ ᤔᤧᤕᤢᤅᤧᤒᤠ ᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ–
LUK 14:8 “ᤂᤡᤏᤡ᤹ ᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤋᤖᤣ ᤁᤧᤶᤀᤢ᤺ᤳᤋᤡᤏᤧ ᤑᤠ᤹ᤃᤪ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤀᤥ ᤔᤧᤕᤢᤅᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤔᤡᤱᤛᤥᤍᤠᤱᤒᤠ ᤔᤏᤠ᤺ᤴ ᤋᤖᤣ ᤀᤢ᤺ᤳᤋᤧᤀᤠᤱ ᤘᤠ᤹ᤏᤧ ᤑᤠ᤹ᤃᤪ
LUK 14:9 ᤂᤧᤴ ᤜᤡᤶᤍᤠᤱᤒᤠᤴ ᤋᤠᤀᤠᤱ ‘ᤂᤧᤏᤧ᤹ ᤁᤴ ᤕᤢᤰᤏᤠ᤺ᤴ ᤂᤢᤏᤧ᤹ ᤗᤧᤖᤧᤒᤡᤖᤧ᤹ᤀᤠᤱ ᤕᤥ ᤂᤠᤶᤗᤥᤀᤥ ᤕᤢᤅᤧ᤹ᤀᤥ’ ᤁᤧᤔᤧᤳᤏᤧ ᤑᤠ᤹ᤃᤪ ᤁᤧᤏᤠᤎᤠᤖᤥ॥
LUK 14:10 ᤂᤧᤸᤗᤧ ᤁᤢᤗᤧᤰᤘᤠ ᤋᤖᤣ ᤁᤧᤶᤀᤢ᤺ᤳᤏᤧ ᤑᤠ᤹ᤃᤪ ᤂᤧᤏᤧ᤹ ᤕᤥ ᤂᤠᤶᤗᤥᤀᤥ ᤕᤢᤱᤛᤡᤱᤅᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤜᤡᤶᤍᤠᤱᤒᤧᤴ ᤋᤠᤀᤠᤱ ‘ᤔᤧ᤺ᤴ ᤀᤠᤍᤠᤱᤒᤣ. ᤂᤧᤏᤧ᤹ ᤌᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤀᤥ ᤕᤢᤅᤧ᤹ᤀᤥ’ ᤁᤧᤔᤧᤳᤏᤧ ᤑᤠ᤹ᤃᤪ ᤂᤧ᤹ᤕᤥ ᤂᤡᤖᤡ ᤁᤧᤘᤠ᤹ᤒᤠ ᤋᤖᤣᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤏᤧ᤹ ᤁᤧᤔᤡᤱᤛᤥ ᤐᤥ᤺ᤖᤥ॥
LUK 14:11 ᤌᤣᤀᤠᤱᤓᤧᤸᤗᤧ ᤜᤠ᤺ᤳ ᤕᤶᤒᤠ ᤗᤧᤱᤛᤡᤱ ᤂᤧᤴ ᤆᤢᤱᤈᤡᤃᤧᤴᤛᤠ᤺ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤜᤠ᤺ᤳ ᤆᤢᤱᤈᤡᤃᤧᤴᤛᤠ᤺ ᤗᤧᤱᤛᤡᤱ ᤂᤧᤴ ᤕᤶᤗᤠᤒᤠ ᤐᤥ᤺ᤱᤗᤥ॥”
LUK 14:12 ᤜᤧᤰᤁᤩᤠᤱ ᤕᤧᤛᤢᤖᤧ ᤜᤡᤶᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤆᤠᤔᤢᤰ ᤌᤡᤔᤢᤰ ᤁᤧᤛᤧ᤺ᤛᤢᤸᤗᤧ ᤁᤧᤴᤈᤢᤶᤜᤠ᤹. ᤁᤧᤶᤓᤢ᤹ ᤁᤧᤴᤛᤠ᤹ᤜᤠ᤹. ᤁᤧᤃᤠ᤹ᤀᤡ ᤛᤥᤎᤥ᤺ᤰᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣ ᤁᤧᤃᤵᤐᤠ ᤐᤠᤱᤓᤣ᤹ᤛᤠᤒᤠᤜᤠ᤹ ᤔᤧᤀᤢ᤺ᤳᤋᤧᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤀᤠᤱ ᤂᤧᤏᤧ᤹ ᤁᤧᤶᤀᤢ᤺ᤳᤋᤠᤱ ᤆᤠᤔᤢᤰ ᤌᤡᤔᤢᤰ ᤁᤧᤶᤒᤡᤖ ᤕᤠᤱᤏᤠ ᤁᤧᤶᤏᤢ᤺ᤰ ᤁᤧᤶᤒᤡ᤹ᤖᤥ॥
LUK 14:13 ᤁᤖ ᤂᤧᤏᤧ᤹ ᤆᤠᤔᤢᤰ ᤌᤡᤔᤢᤰ ᤁᤧᤛᤧ᤺ᤛᤢᤸᤗᤧ ᤕᤠᤱᤃᤧᤛᤠ᤹ᤒᤠᤜᤠ᤹. ᤁᤧᤍᤢᤰᤐᤠᤜᤠ᤹. ᤗᤠᤱᤛᤰᤐᤠᤜᤠ᤹ ᤏᤢ ᤔᤡᤰᤑ᤺ᤶᤒᤠᤜᤠ᤹ ᤀᤢ᤺ᤳᤋᤧᤛᤧ᤹ᤀᤥ॥
LUK 14:14 ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤁᤧᤄᤥ᤺ᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤴᤃᤳᤋᤢᤴᤏᤠᤱ ᤂᤧᤴ ᤕᤠᤱᤏᤠ ᤜᤢᤱᤔᤠ ᤔᤧᤴᤇᤢᤰᤋᤢᤴᤗᤥ॥ ᤁᤖ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤠᤰ ᤏᤢ᤺ᤰᤋᤢ ᤁᤧᤒᤡ᤹ᤖᤥ॥”
LUK 14:15 ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤁᤧᤕᤢᤱᤒᤠ ᤌᤡᤰᤁᤡᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤒᤠ ᤆᤠᤔᤢᤰ ᤌᤡᤔᤢᤰᤁᤥ ᤆᤠ ᤁᤧᤈᤠᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥”
LUK 14:16 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤌᤡᤰ ᤔᤏᤠ᤺ᤸᤗᤧ ᤕᤶᤒᤠ ᤛᤠᤓᤠᤱᤈᤠ ᤛᤧ᤺ᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤕᤖᤡᤰ ᤋᤖᤣᤜᤠ᤹ ᤀᤢ᤺ᤳᤋᤢᤛᤡ॥
LUK 14:17 ᤜᤧᤰᤁᤩᤠᤱ ᤁᤠᤰ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤁᤢᤛᤣᤘᤠᤖᤥᤒᤠᤎᤡᤰᤁᤡᤴ ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤐᤥ᤺ᤰᤂᤧ. ᤀᤠᤸᤗ ᤋᤩᤧᤶᤔᤧ᤹ᤀᤥ ᤑᤠ᤹ᤀᤠᤱ ᤋᤖᤣ ᤀᤢ᤺ᤳᤇᤧ ᤐᤠᤱᤄᤢᤍᤣ᤺ᤛᤢᤖᤥ॥”
LUK 14:18 ᤁᤖ ᤂᤧᤴ ᤔᤏᤠᤜᤠ᤹ ᤛᤠᤓᤠᤱᤈᤠᤀᤥ ᤔᤧᤶᤒᤣ᤺ᤰᤔᤏᤠ ᤔᤣᤗᤠᤶᤛᤡᤱᤗᤥ॥ ᤌᤡᤰᤛᤡᤃᤣ᤺ᤰᤐᤠᤸᤗᤧ ᤔᤧᤳᤋᤢ. “ᤀᤡᤱᤃᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤀᤡᤅᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤴ ᤀᤥᤔᤧᤳᤇᤧ ᤐᤣ᤺ᤰᤔᤠ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤛᤠᤓᤠᤱᤈᤠᤀᤥ ᤋᤠ᤺ᤔᤠ ᤔᤧᤛᤢᤰᤁᤠᤴᤗᤥ॥ ᤗᤧᤵᤔᤡ ᤐᤡᤖᤠᤱᤅᤧ᤹ᤀᤥ॥”
LUK 14:19 ᤘᤣ᤹ ᤔᤏᤠ᤺ᤸᤗᤧ ᤔᤧᤳᤋᤢ. “ᤀᤡᤱᤃᤠ᤹ ᤁᤢᤃᤠᤵ ᤅᤠᤛᤡ ᤐᤡᤳᤐᤠᤜᤠ᤹ ᤀᤡᤅᤢᤱᤛᤡᤱᤅᤠᤱ ᤘᤠ᤹ᤀᤠ॥ ᤂᤧᤱᤜᤠ᤹ ᤌᤥ᤺ᤱᤔᤠ ᤛᤠ᤹ᤔᤠᤛᤡ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤠᤓᤠᤱᤈᤠᤀᤥ ᤋᤠ᤺ᤔᤠ ᤔᤧᤛᤢᤰᤁᤠᤴᤗᤥ॥ ᤗᤧᤵᤔᤡ ᤀᤠᤒᤡᤖᤧ᤹ᤀᤥ॥”
LUK 14:20 ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ ᤔᤏᤠ᤺ᤸᤗᤧ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ᤃ ᤂᤠᤖᤰ ᤔᤣ᤺ᤰᤂᤡᤶ ᤆᤥᤃᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤣ᤺ᤸᤗᤧ ᤛᤠᤓᤠᤱᤈᤠᤀᤥ ᤋᤠ᤺ᤔᤠ ᤔᤧᤛᤢᤰᤁᤠᤴᤗᤥ॥
LUK 14:21 ᤜᤧᤰᤁᤩᤠᤱ ᤛᤣᤘᤠᤖᤥᤒᤠᤸᤗᤧ ᤐᤣᤀᤠᤱ ᤁᤢᤴᤍᤠᤱᤒᤠᤴ ᤒᤠ ᤜᤧᤰᤁᤣ ᤂᤧᤴ ᤐᤠ᤺ᤴᤏᤡᤴ ᤔᤧᤳᤋᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤂᤧᤴ ᤁᤢᤛᤣᤘᤠᤖᤥᤒᤠᤴ ᤔᤧᤳᤋᤢ. ‘ᤜᤠᤖᤠ ᤐᤣᤃᤧ᤹ᤀᤠᤱ ᤐᤠᤱᤈᤢᤶᤔᤥᤒᤠ ᤗᤠᤶ ᤗᤠᤶ ᤁᤧᤘᤠ᤹ᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹. ᤁᤧᤍᤢᤰᤐᤠᤜᤠ᤹. ᤗᤠᤱᤛᤰᤐᤠᤜᤠ᤹ ᤏᤢ ᤔᤡᤰᤑ᤺ᤶᤒᤠᤜᤠ᤹ ᤀᤢ᤺ᤳᤋᤧ ᤋᤠᤖᤧᤛᤧ᤹॥’
LUK 14:22 ᤜᤧᤰᤁᤩᤠᤱ ᤂᤧᤴ ᤛᤣᤘᤠᤖᤥᤒᤠᤴᤏᤠᤱ ᤐᤣᤀᤠᤱ ᤒᤠ ᤜᤧᤰᤁᤣ ᤆᤥᤃᤢᤀᤠᤱ ᤏᤢ᤺ᤰᤂᤧ ᤋᤩᤧᤀᤠᤱ ᤔᤧᤳᤋᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤀᤡᤱᤃᤠ᤹ ᤆᤥᤃᤢᤱ. ᤀᤠᤸᤗᤛᤠᤱ ᤕᤖᤡᤰ ᤕᤢᤱᤔᤠ ᤋᤧᤴᤜᤠ᤹ ᤏᤧᤖᤥ॥’
LUK 14:23 ᤜᤧᤰᤁᤣ᤺ᤸᤗᤧ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤐᤠᤱᤓᤣ᤹ᤀᤥ ᤐᤣᤃᤧ᤹ᤀᤠᤱ ᤗᤠᤶ ᤗᤠᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤜᤠᤖᤠ ᤛᤠᤓᤠᤱᤈᤠᤀᤥ ᤔᤧᤍᤠᤖᤀᤣ ᤐᤥ᤺ᤱ ᤑᤠ᤹ᤀᤠᤱ ᤀᤢ᤺ᤳᤋᤧ ᤋᤠᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤴ ᤀᤠᤜᤡᤶᤔᤡᤴ ᤛᤎᤧᤰ ᤋᤡᤶᤗᤖᤥ॥’
LUK 14:24 ᤀᤢ᤺ᤵᤔᤏᤠᤒᤠ ᤋᤖᤣᤒᤠ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤛᤧ᤺ᤛᤢᤱᤒᤠ ᤛᤠᤓᤠᤱᤈᤠᤀᤥ ᤆᤠᤔᤠ ᤔᤧᤄᤥ᤺ᤛᤢᤴᤗᤥ॥”
LUK 14:25 ᤌᤡᤰᤗᤧᤱ ᤕᤖᤡᤰ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤀᤣ᤺ᤰ ᤁᤢᤀᤣ᤺ᤰ ᤔᤧᤏᤠ᤺ᤳᤋᤢᤖ ᤔᤧᤘᤕᤧᤸᤗᤧ ᤂᤢᤏᤧ᤹ ᤂᤡᤖᤡ ᤜᤡᤛᤡᤱᤅᤠᤱ ᤔᤧᤳᤋᤢᤛᤡ.
LUK 14:26 “ᤀᤡᤱᤃᤠ᤹ ᤕᤠᤵᤔᤡ ᤁᤧᤍᤡᤶᤒᤠᤸᤗᤧ ᤁᤢᤶᤔᤠ-ᤁᤢᤶᤒᤠᤛᤡ. ᤁᤢᤔᤣ᤺ᤳ-ᤁᤢᤛ᤻ᤛᤠ᤺ᤜᤠ᤹. ᤁᤢᤶᤓᤢ᤹ ᤁᤢᤴᤛᤠ᤹ᤛᤡ. ᤁᤢᤴᤏᤧ᤹ ᤁᤢᤴᤛᤠ᤹ᤛᤡ. ᤜᤧᤰᤁᤩᤠᤱ ᤁᤢᤜᤡᤱᤔᤴᤏᤡᤴ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤔᤡ᤺ᤶᤈᤡ ᤔᤧᤳᤋᤢᤏᤧ ᤑᤠ᤹ᤃᤪ ᤂᤧᤱᤃ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤔᤧᤛᤢᤰᤏᤧᤴᤗᤥ॥
LUK 14:27 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤀᤠᤒᤠᤅᤣ ᤁᤧᤒᤱᤛᤡᤱᤅᤠᤱ ᤀᤡᤱᤃᤠ᤹ ᤁᤧᤴᤍᤡᤶᤔᤠᤴᤏᤧ ᤑᤠ᤹ᤃᤪ ᤀᤠᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤁᤧᤴᤇᤢᤰᤏᤧᤴᤗᤥ॥
LUK 14:28 ᤀᤠᤸᤗ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤕᤶᤒᤠ ᤆᤱᤜᤡᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤸᤗᤧ. ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤛᤢ᤺ᤵᤔᤠᤸᤗᤧ ᤀᤠᤰᤂᤧᤴ ᤕᤠᤱᤛᤠᤁᤢᤴᤎᤣ ᤆᤠᤜᤠᤒᤠ ᤆᤥ᤺ᤰ ᤗ᤹ᤖᤡᤰ ᤏᤡᤱᤛᤣ᤺ᤰ ᤆᤥᤃᤢᤒᤡ ᤔᤧ᤺ᤶᤒᤡ᥅
LUK 14:29 ᤔᤧ᤺ᤴᤏᤧ ᤑᤠ᤹ᤃᤪ ᤜᤡᤶ ᤐᤠᤱᤕᤰ ᤏᤧᤔᤠᤃ ᤛᤢᤰᤋᤢ. ᤁᤖ ᤂᤧᤴ ᤆᤥ᤺ᤰᤔᤠ ᤛᤢ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤜᤧᤰᤁᤩᤠᤱ ᤁᤴ ᤁᤧᤏᤡ᤺ᤒᤠ ᤁᤧᤄᤧᤶᤒᤠ ᤔᤏᤠᤜᤠ᤹ᤖᤧ ᤂᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖᤥ. ‘ᤂᤧᤏᤧ᤹ ᤜᤣ᤺ᤰᤔᤠᤃ ᤁᤧᤜᤣ᤺ᤰᤋᤢ. ᤁᤖ ᤛᤢ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ᥄’
LUK 14:31 ᤀᤠᤸᤗ ᤗᤳᤇᤠ ᤌᤡᤒᤥ᤺ᤱ ᤜᤧᤴᤇᤡᤱ (᥇᥆.᥆᥆᥆) ᤌᤰᤛᤢᤒᤠ ᤁᤧᤃᤵᤐᤠ ᤜᤠᤱᤅᤡᤸᤗᤧ ᤘᤣ᤹ᤛ᤻ᤔᤠ ᤏᤡᤒᤥ᤺ᤱ ᤜᤧᤴᤇᤡᤱ (᥈᥆.᥆᥆᥆) ᤌᤰᤛᤢᤒᤠ ᤁᤧᤃᤵᤐᤠ ᤜᤠᤱᤅᤡᤴᤏᤢ ᤌᤱ ᤆᤥ᤺ᤰᤛᤧ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤂᤧᤸᤗᤧ ᤕᤢᤱᤛᤡᤱᤅᤠᤱ ᤂᤧᤴ ᤘᤣ᤹ᤛ᤻ᤔᤠ ᤜᤠᤱᤅᤡᤴ ᤏᤠ᤺ᤶᤔᤠ ᤛᤢᤰᤋᤢ ᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ᤹ᤖᤥ॥
LUK 14:32 ᤂᤧᤸᤗᤧ ᤂᤧᤴ ᤜᤠᤱᤅᤡᤴ ᤏᤠ᤺ᤶᤔᤠ ᤔᤧᤛᤢᤰᤋᤢᤴᤒᤠ ᤏᤡ᤺ᤴᤎᤥ ᤆᤥᤃᤢᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤴ ᤜᤠᤱᤅᤡᤴ ᤗᤠᤶᤔᤥ ᤌᤱ ᤆᤥ᤺ᤰᤛᤧ ᤑᤧᤴᤗ ᤐᤳᤋᤡᤸᤗᤧᤛᤠ ᤜᤠᤱᤗᤠᤀᤡᤱᤒᤠᤴ ᤐᤠᤱᤄᤢᤀᤠᤱ ᤏᤠᤍᤱ ᤆᤥᤃᤢ᤹ᤖᤥ॥
LUK 14:33 ᤜᤧᤰᤁᤣᤗ᤹ᤖᤡᤰᤁᤣ ᤂᤧᤏᤧ᤹ ᤁᤧᤃᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤴᤗᤧᤖᤢᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤁᤧᤴᤇᤢᤰᤏᤧᤴᤗᤥ॥
LUK 14:34 ᤕᤢᤶᤔᤡᤱᤃ ᤏᤢ᤺ᤒᤠᤀᤣ ᤆᤥ᤺ᤰ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠ᤺ᤒᤣ᤺ᤰᤏᤧ ᤑᤠ᤹ᤃᤪ ᤕᤠᤶᤔᤥ ᤁᤧᤗᤡᤶᤒᤠ ᤆᤥ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥
LUK 14:35 ᤜᤧᤰᤁᤩᤠᤱ ᤂᤧᤱᤃ ᤀᤡᤰᤋᤠᤵᤐᤥ ᤔ᤺ᤸᤗᤠᤱ ᤔᤧᤒᤥ᤺ᤱᤏᤧᤴ ᤔᤏᤠᤜᤠ᤹ᤖᤧ ᤒᤠ ᤜᤧᤰᤁᤣᤀᤣ ᤗᤠᤵᤔᤧᤓᤢᤛᤢ ᤔᤧᤍᤣ᤺ᤛᤢᤖᤥ॥ ᤜᤧᤰᤁᤩᤠᤱ ᤀᤠᤒᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”
LUK 15:1 ᤌᤡᤰᤕᤧᤴ ᤕᤖᤡᤰ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤜᤠ᤹ ᤏᤢ ᤘᤣ᤹ ᤗᤠᤕᤥᤒᤠᤜᤠ᤹ ᤕᤧᤛᤢᤖᤧ ᤁᤢᤒᤠ᤺ᤴ ᤂᤧᤶᤛᤧ ᤂᤢᤏᤧ᤹ ᤁᤢᤄᤡᤖᤡ ᤔᤧᤈᤢᤵᤛᤧᤸᤗᤧ
LUK 15:2 ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤁᤠᤏᤠᤰᤏᤠᤰ ᤔᤧᤗ᤹ᤖᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧᤃ ᤗᤠᤕᤥᤒᤠᤜᤠ᤹ᤀᤠᤱ ᤋᤠ᤺ᤰᤋᤢᤛᤡᤀᤠᤱ ᤛᤥᤖᤡᤰ ᤕᤢᤱᤅᤠᤱ ᤆᤠᤈᤠᤖᤥ॥”
LUK 15:3 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ–
LUK 15:4 “ᤂᤡᤏᤡ᤹ᤀᤥ ᤁᤡᤵᤌᤡᤰ (᥇᥆᥆) ᤔᤧᤸᤗᤢᤰᤜᤠ᤹ ᤁᤧᤃᤵᤐᤠ ᤔᤏᤠ᤺ᤸᤗᤧ ᤗᤳᤇᤠ᤺ᤴ ᤔᤠᤛᤢᤸᤗᤧ ᤑᤠᤱ-ᤑᤠᤱ (᥏᥏) ᤔᤧᤸᤗᤢᤰᤜᤠ᤹ ᤆᤠᤖᤠᤶᤔᤠᤍᤧᤴᤏᤥ ᤗᤧᤖᤢᤎᤛᤡᤀᤠᤱ ᤂᤧᤴ ᤁᤧᤔᤠᤒᤧᤴ ᤔᤧᤱᤄᤥᤀᤣ ᤌᤠᤖᤡᤰ ᤔᤧᤃᤥ᤺ᤳᤋᤢᤴᤒᤡ᥅
LUK 15:5 ᤂᤢᤏᤧ᤹ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤴ ᤂᤥ᤺ᤛᤢᤀᤠᤱ ᤁᤢᤓᤰᤋᤠᤱᤅᤥ ᤐᤰᤂᤢᤖ ᤛ᤺ᤳᤗ ᤏᤢ᤺ᤱ ᤋᤠ᤺ᤖᤥ॥ ᤜᤧᤰᤁᤩᤠᤱ ᤁᤢᤴᤍᤣ᤺ᤱ ᤁᤢᤴᤈᤢᤶᤜᤠ᤹ ᤏᤢ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. ‘ᤜᤦ᥄ ᤀᤠᤸᤗ ᤀᤠᤏᤡ᤹ ᤛ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤁᤧᤔᤠᤒᤠ ᤀᤠᤔᤧᤸᤗᤢᤰᤁᤡᤴ ᤕᤠᤶᤔᤥ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥’
LUK 15:7 ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤕᤥᤗᤠᤶ ᤜᤡᤶᤔᤠ ᤔᤧᤶᤒᤥ᤺ᤱᤔᤏᤠᤒᤠ ᤑᤠᤱ-ᤑᤠᤱ (᥏᥏) ᤛᤠᤶᤕᤥᤏᤡᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤗᤠᤕᤥᤗᤠᤶ ᤁᤧᤜᤡᤶᤒᤠ ᤗᤠᤕᤥᤒᤠᤎᤡᤰᤁᤡᤸᤗᤧ ᤗᤠᤃᤡ ᤕᤶᤒᤠ ᤛ᤺ᤵᤔᤠᤴ ᤐᤥ᤺ᤱᤗᤥ॥”
LUK 15:8 ᤕᤧᤛᤢᤖᤧ ᤂᤧᤱᤜᤠ᤹ ᤘᤣ᤹ᤛ᤻ᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤀᤠᤸᤗ ᤌᤡᤒᤥ᤺ᤱ ᤕᤢᤵᤐᤠ ᤕᤠᤱᤀᤡᤳᤇᤡ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤎᤡᤰᤗᤧ ᤕᤠᤱᤎᤡᤰ ᤔᤠᤛᤢᤸᤗᤧ ᤂᤧᤸᤗᤧ ᤛᤣᤔᤡ ᤜᤠ᤺ᤴᤍᤢᤀᤠᤱ ᤂᤧᤴ ᤕᤠᤱᤀᤡᤳᤇᤡ᤺ᤴ ᤔᤧᤱᤄᤥᤀᤣ ᤌᤠᤖᤡᤰ ᤜᤡᤶᤔᤡᤴ ᤋᤢᤃᤢᤖ ᤔᤧᤃᤥ᤺ᤳᤋᤢᤶᤒᤡ᥅
LUK 15:9 ᤜᤧᤰᤁᤩᤠᤱ ᤂᤧᤸᤗᤧ ᤂᤥ᤺ᤛᤢᤀᤠᤱ ᤁᤢᤴᤍᤣ᤺ᤱ ᤁᤢᤴᤈᤢᤶᤜᤠ᤹. ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ. ‘ᤀᤠᤸᤗ ᤀᤠᤏᤡ᤹ ᤛ᤺ᤳᤋᤡᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤠᤛᤢᤱᤒᤠ ᤀᤠᤕᤠᤱᤀᤡᤳᤇᤡ᤺ᤴ ᤀᤡᤱᤃᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥’
LUK 15:10 ᤂᤧᤵᤛᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰᤁᤣ ᤌᤡᤰ ᤗᤠᤕᤥᤗᤠᤶ ᤁᤧᤜᤡᤶᤒᤠᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤔᤧᤛ᤺ᤳᤗᤥ॥”
LUK 15:11 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ᤛ᤻ᤔᤠ ᤂᤧᤍᤠ᤹ᤀᤠᤱ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤏᤧᤵᤑᤢ ᤕᤧᤶᤒᤡᤳᤇᤠ᤹ᤛᤠ ᤁᤧᤃᤵᤐᤠ ᤗᤳᤇᤠ ᤔᤏᤠᤎᤡᤰ ᤘᤕᤧ॥
LUK 15:12 ᤜᤧᤰᤁᤩᤠᤱ ᤌᤡᤰᤕᤧᤴ ᤑᤥ᤹ᤒᤠᤸᤗᤧ ᤁᤢᤶᤒᤠ᤺ᤴ ᤀᤰᤂᤣ ᤔᤧᤳᤋᤢ. ‘ᤀᤠᤶᤒᤣ. ᤀᤡᤱᤃᤠ᤹ ᤁᤧᤕᤠᤱᤛᤠᤁᤢᤴᤎᤣ᤺ᤴ ᤑ᤺ᤰᤂᤧᤀᤠᤱ ᤀᤠᤗᤰᤁᤥ ᤁᤧᤎᤠ᤺ᤒᤠᤴ ᤐᤡᤖᤠᤱᤅᤧ᤹ᤀᤥ॥’ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧᤀᤠᤱ ᤁᤢᤕᤠᤱᤛᤠᤁᤢᤴᤎᤣ᤺ᤴ ᤂᤧᤱᤜᤠ᤹ ᤜᤠ᤺ᤳᤋᤢᤛᤡᤖᤥ॥
LUK 15:13 ᤌᤡᤰᤕᤧᤴ ᤏᤡᤕᤧᤴ ᤀᤣᤃᤠᤱ ᤁᤢᤛ᤻ᤛᤠ᤺ ᤑᤥ᤹ᤒᤠᤸᤗᤧ ᤁᤢᤗᤰᤁᤥ ᤁᤧᤎᤠ᤺ᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤖᤧᤰ ᤁᤰ ᤔᤧᤳᤇᤡᤱᤅᤠᤱ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤐᤣᤖᤥ॥ ᤂᤧᤵᤔᤥ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤜᤏᤧ ᤀᤧ᤺ᤳᤗᤧᤗᤧ ᤗ᤹ᤔᤠ ᤏᤢ ᤆᤠᤔᤠ ᤌᤢᤱᤔᤠᤀᤥ ᤆ᤺ ᤔᤠ᤺ᤴᤍᤢᤖᤥ॥
LUK 15:14 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤔᤠ᤺ᤴᤍᤢᤀᤠᤱ ᤘᤕᤧᤸᤗᤧ ᤂᤧᤵᤔᤥ ᤕᤶᤒᤠ ᤛᤠᤰ ᤌᤩᤧᤀᤠᤱ ᤂᤧᤸᤗᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤄᤥ᤺ᤛᤢᤴᤗᤥ॥
LUK 15:15 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤜᤠᤒᤠ ᤂᤧᤴ ᤗᤠᤈᤣ᤹ᤀᤥᤒᤠ ᤌᤡᤰ ᤔᤏᤠ᤺ᤸᤗᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤐᤣᤀᤠᤱ ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤑᤠᤰᤆᤠ ᤐᤡᤔᤠ ᤕᤠ᤺ᤶᤒᤰᤁᤥ ᤑᤳᤇᤢ॥
LUK 15:16 ᤜᤧᤰᤁᤩᤠᤱ ᤂᤧᤴ ᤀᤠᤳᤋᤡᤸᤗᤧᤀᤠᤱ ᤆᤠᤔᤠ ᤌᤢᤱᤔᤠ ᤔᤧᤶᤒᤡᤖᤢᤴᤏᤡᤸᤗᤧ ᤂᤧᤸᤗᤧ ᤑᤠᤰᤆᤠ᤺ᤴ ᤆᤠᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥
LUK 15:17 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤣ᤺ᤖᤧᤀᤠᤱ ᤀᤰᤂᤣᤗ᤹ᤖᤡᤰ ᤀᤡ᤺ᤳᤇᤡᤱ. ‘ᤀᤠᤶᤒᤠᤖᤧ ᤁᤢᤜᤡᤶᤔᤥᤃ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤂᤠᤄᤠ ᤔᤧᤈ ᤔᤧᤎᤢᤅᤢᤖ ᤔᤧᤏᤴᤇᤢ᤹. ᤁᤖ ᤀᤡᤱᤃᤠ᤹ᤃ ᤁᤵᤔᤥ ᤛᤠᤰᤁᤡᤸᤗᤧ ᤛᤡ᤺ᤔᤠ ᤀᤡ᤺ᤳᤋᤠᤱᤗᤥ॥
LUK 15:18 ᤀᤡᤱᤃᤠ᤹ ᤀᤠᤸᤗᤥ ᤀᤠᤶᤒᤠᤖᤧ ᤁᤢᤜᤡᤶᤔᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤀᤠᤱ ᤔᤧᤳᤋᤢᤱ. ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
LUK 15:19 ᤀᤠᤸᤗ ᤀᤡᤱᤃᤠ᤹ ᤁᤧᤛ᤻ᤛᤠ᤺ᤀᤠ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤁᤧᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤁᤧᤜᤡᤶᤔᤥ ᤁᤳᤋᤠᤱᤅᤧ᤹ᤀᤥ॥’
LUK 15:20 ᤜᤧᤰᤁᤩᤠᤱ ᤂᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤁᤢᤶᤒᤠᤖᤥ ᤏᤢ᤺ᤰᤂᤧ ᤐᤣ॥ ᤂᤧᤴ ᤑᤧᤖᤧᤖ ᤐᤳᤇᤧᤒᤠ ᤔᤠ᤺ᤱᤄᤠᤗᤠᤶᤏᤢᤀᤣ ᤁᤢᤶᤒᤠᤖᤧ ᤏᤡ᤺ᤛᤢᤀᤠᤱ ᤔᤡ᤺ᤶᤈᤡᤖᤧ ᤁᤢᤗᤢᤱᤔᤠ᤹ ᤁᤢᤎᤡᤶ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤗᤥ᤺ᤰᤋᤧᤖ ᤐᤣᤀᤠᤱ ᤂᤧᤴ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤆᤢᤵ ᤔᤧᤳᤋᤢᤖᤥ॥
LUK 15:21 ᤁᤢᤛ᤻ᤛᤠ᤺ ᤑᤥ᤹ᤒᤧᤸᤗᤧ ᤁᤢᤶᤒᤠ ᤔᤧᤳᤋᤢ. ‘ᤀᤠᤶᤒᤣ. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤸᤗ ᤀᤡᤱᤃᤠ᤹ ᤁᤧᤛ᤻ᤛᤠ᤺ᤀᤠ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤁᤧᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤁᤧᤜᤡᤶᤔᤥ ᤁᤳᤋᤠᤱᤅᤧ᤹ᤀᤥ॥’
LUK 15:22 ᤁᤖ ᤁᤢᤶᤒᤠᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤛᤣᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. ‘ᤜᤠᤖᤠ ᤐᤣᤃᤧᤶᤔᤧ᤹ᤀᤠᤱ ᤁᤴ ᤀᤠᤛ᤻ᤛᤠ᤺ ᤑᤥ᤹ᤒᤠᤴ ᤁᤠᤰᤏᤢ᤺ᤸᤗᤧ ᤏᤢ᤺ᤒᤠ ᤋᤣ᤺ᤳᤋᤡᤴ ᤑᤧᤳᤋᤧᤶᤔᤧ᤹ᤀᤠᤱ ᤆᤠᤰᤋᤧᤶᤔᤧ᤹. ᤁᤢᤜᤢᤰᤆᤥᤀᤥ ᤛᤫᤠᤃᤧᤵ ᤘᤠ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤁᤢᤗᤠᤱᤅᤥ ᤗᤠᤱᤛᤢ᤺ᤵ ᤆᤠᤰᤋᤧᤶᤔᤧ᤹ᤀᤥ॥
LUK 15:23 ᤜᤧᤰᤁᤩᤠᤱ ᤌᤠ᤺ᤱᤅᤥ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤑᤧᤳᤋᤧᤶᤔᤧ᤹ᤀᤠᤱ ᤛᤧᤖᤧᤶᤔᤧ᤹. ᤜᤧᤰᤁᤩᤠᤱ ᤆᤠᤔᤢᤰ ᤌᤡᤔᤢᤰ ᤕᤠᤖᤡᤵ ᤆᤥᤃᤢᤶᤔᤠᤱ ᤛ᤺ᤳᤋᤡᤖᤥ॥
LUK 15:24 ᤌᤣᤀᤠᤱᤓᤧᤸᤗᤧ ᤁᤴ ᤀᤠᤛ᤻ᤛᤠ᤺ᤴ ᤛᤩᤧᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤜᤡᤅᤧ॥ ᤂᤢᤏᤧ᤹ ᤔᤕᤧᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤀᤡᤱᤃᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥’ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤶᤒᤠ ᤛᤠᤓᤠᤱᤈᤠ ᤛᤧ᤺ᤔᤠ ᤔᤧᤜᤣ᤺ᤰᤋᤢᤖᤥ॥
LUK 15:25 ᤀᤠᤸᤗ ᤂᤧᤴ ᤕᤧᤶᤔᤥ ᤁᤢᤛ᤻ᤛᤠ᤺ ᤋᤢᤶᤒᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤃᤧ॥ ᤂᤧᤴ ᤀᤠᤰᤂᤥ ᤏᤢ᤺ᤰᤂᤧᤀᤠᤱ ᤜᤡᤶᤒᤣᤛᤠᤱ ᤁᤧᤖᤧᤸᤗᤧ ᤜᤡᤶᤔᤥ ᤔᤢᤰᤗᤠᤜᤠ᤹ ᤔᤢᤰᤋᤧᤒᤠ ᤏᤢ ᤔᤏᤠᤜᤠ᤹ ᤔᤧᤗᤠ᤺ᤰᤂᤧᤒᤠ ᤂᤧᤵᤛᤢᤛᤡ॥
LUK 15:26 ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤌᤣ ᤐᤥ᤺ᤱᤗ ᤐᤳᤐᤣ᥅ ᤑᤠ᤹ᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤛᤣᤘᤠᤖᤥᤒᤠᤴ ᤛᤣ᤺ᤴᤍᤥᤛᤢ॥
LUK 15:27 ᤜᤧᤰᤁᤩᤠᤱ ᤂᤧᤴ ᤛᤣᤘᤠᤖᤥᤒᤠᤸᤗᤧᤀᤠᤱ ᤏᤥᤃᤵ ᤐᤡᤖᤢ. ‘ᤂᤧᤏᤧ᤹ ᤁᤧᤴᤛᤠ᤹ ᤑᤥ᤹ᤒᤧᤴ ᤌᤣᤀᤠᤱ ᤔᤧᤶᤒᤥ᤺ᤱᤅᤣ ᤏᤢ᤺ᤖᤡᤰᤁᤠᤱ ᤏᤢ᤺ᤰᤂᤧ ᤋᤩᤧᤀᤠᤱ ᤘᤠ᤹. ᤂᤧᤸᤗᤧ ᤆᤥᤃᤢᤸᤗᤧ ᤁᤧᤶᤒᤠᤖᤧ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤛᤧᤵᤔᤠ ᤐᤠᤱᤄᤢᤛᤡᤀᤠᤱ ᤁᤵᤔᤥ ᤆᤠᤔᤢᤰ ᤌᤡᤔᤢᤰ ᤛᤧ᤺ᤛᤢᤒᤠᤖᤥ॥’
LUK 15:28 ᤁᤖ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤜᤡᤶ ᤛᤡᤃᤠᤱ ᤗᤠ᤺ᤵᤔᤠᤀᤣ ᤔᤧᤍᤧᤴᤍᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤁᤢᤶᤒᤠ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤂᤧᤴ ᤜᤡᤶ ᤛᤡᤃᤠᤱ ᤐᤡᤳᤇᤡ ᤑᤠ᤹ᤀᤠᤱ ᤗᤧᤔᤢ॥
LUK 15:29 ᤜᤧᤰᤁᤣ᤺ᤸᤗᤧ ᤂᤧᤴ ᤁᤢᤛ᤻ᤛᤠ᤺ ᤋᤢᤶᤒᤠᤸᤗᤧ ᤁᤢᤶᤒᤠ ᤀᤰᤂᤣ ᤔᤧᤳᤋᤢ. ‘ᤀᤥᤔᤧᤳᤋᤧ᤹. ᤀᤡᤱᤃᤠ᤹ ᤁᤶᤓᤧᤖᤡᤰ ᤋᤱᤒᤣ ᤌᤠᤖᤡᤰ ᤂᤧᤏᤧ᤹ ᤁᤧᤛᤣᤘᤠ ᤆᤥᤃᤢᤱ. ᤁᤧᤒᤠ᤺ᤳᤋᤢᤒᤠ ᤐᤠ᤺ᤴ ᤀᤠᤵᤑᤠᤸᤗᤧᤀᤠᤱ ᤀᤡᤱᤃᤠ᤹ ᤔᤧᤴᤀᤵᤐᤧᤴ. ᤜᤧᤰᤁᤣᤛᤠᤱ ᤂᤧᤏᤧ᤹ ᤀᤠᤴᤍᤣ᤺ᤱ ᤀᤠᤴᤈᤢᤶᤜᤠ᤹ᤏᤢ ᤆᤠᤔᤢᤰ ᤌᤡᤔᤢᤰ ᤆᤥᤃᤢᤱᤏᤡ ᤑᤠ᤹ᤀᤠᤱ ᤔᤧᤴᤍᤠᤰᤛᤠᤎᤡᤰᤁᤠᤱ ᤁᤧᤶᤒᤡᤖᤠᤱᤅᤡᤴᤗᤥ॥
LUK 15:30 ᤁᤖ ᤁᤴ ᤁᤧᤛ᤻ᤛᤠ᤺ᤸᤗᤧ ᤂᤧᤏᤧ᤹ ᤁᤧᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤳᤏᤡᤔᤠᤜᤠ᤹ᤏᤢ ᤀᤧ᤺ᤳᤗᤧᤗᤧ ᤗ᤹ᤔᤠᤀᤥ ᤁᤧᤖᤧᤰ ᤔᤠ᤺ᤴᤍᤢ॥ ᤁᤖ ᤂᤢᤏᤧ᤹ ᤏᤢ᤺ᤰᤂᤧ ᤋᤩᤧ᤺ᤸᤗᤧ ᤂᤧᤏᤧ᤹ ᤆᤠᤗᤢᤵᤔᤏᤠᤒᤠ ᤌᤰᤛᤠᤎᤡᤰ ᤁᤧᤛᤧᤖᤢᤀᤠᤱ ᤆᤠᤔᤢᤰ ᤌᤡᤔᤢᤰ ᤁᤧᤛᤧ᤺ᤛᤢᤖᤥ॥’
LUK 15:31 ᤜᤧᤰᤁᤣ᤺ᤸᤗᤧ ᤁᤢᤶᤒᤠᤖᤧ ᤁᤢᤛ᤻ᤛᤠ᤺ᤴ ᤔᤧᤳᤋᤢ. ‘ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤀᤣ. ᤂᤧᤏᤧ᤹ᤃ ᤛᤍᤠᤍᤡᤱ ᤀᤡᤱᤃᤠ᤹ᤏᤢᤀᤣ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤳᤋᤢᤱᤒᤠ ᤁᤠᤰ ᤀᤠᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤏᤧ᤹ᤀᤡᤴᤏᤣᤖᤥ॥
LUK 15:32 ᤁᤖ ᤁᤧᤴᤛᤠ᤹ ᤏᤢ᤺ᤰᤂᤧ ᤋᤩᤧᤒᤠᤀᤥ ᤀᤠᤏᤡ᤹ ᤛ᤺ᤵᤔᤠ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤩᤧᤀᤠᤱ ᤘᤕᤧ. ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹॥ ᤂᤢᤏᤧ᤹ ᤔᤕᤧᤒᤣᤀᤠᤱ ᤘᤕᤧ. ᤁᤖ ᤕᤠᤶᤔᤥ ᤀᤠᤏᤡ᤹ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥’”
LUK 16:1 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤴ ᤂᤧᤍᤠ᤹ᤀᤡᤴᤏᤠᤱ ᤔᤧᤳᤋᤢᤛᤡ. “ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤜᤡᤶ ᤁᤢᤎᤠ᤺ᤱ ᤀᤥᤔᤧᤵᤔᤠ ᤂᤠᤖᤠ᤺ᤳ ᤁᤧᤕᤢᤱᤒᤠᤎᤡᤰ ᤁᤳᤋᤢ॥ ᤁᤖ ᤜᤠᤖᤠᤀᤣ ᤔᤏᤠᤜᤠ᤹ᤖᤧ ᤂᤧᤸᤗᤧ ᤁᤢᤴᤍᤠᤱᤒᤠᤴ ᤁᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤁᤧᤕᤠᤱᤛᤠᤁᤢᤴᤎᤣᤜᤠ᤹ ᤐᤡᤷᤒᤣ᤺ᤴ ᤆᤥᤃᤢᤖ ᤐᤳ ᤗ᤹ᤖᤡᤰ ᤆᤧ᤹ᤕᤠ ᤐᤠ᤺ᤴ ᤔᤧᤈᤧᤰᤋᤢ॥
LUK 16:2 ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤑᤧᤴ ᤐᤠ᤺ᤴᤜᤠ᤹ ᤂᤧᤵᤛᤢᤱᤗ ᤐᤳᤋᤠᤖᤥ॥ ᤂᤧᤏᤧ᤹ ᤁᤧᤕᤢᤰᤂᤢᤒᤠ ᤂᤠᤖᤠ᤺ᤳᤋᤡᤴ ᤁᤠᤰ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤂᤠᤖᤠ᤺ᤳ ᤕᤢᤱᤔᤠ ᤕᤠ᤺ᤶᤒᤰᤁᤡᤴ ᤁᤧᤱᤄᤥ᤺ᤛᤢᤴᤗᤥ॥’
LUK 16:3 ᤜᤧᤰᤁᤩᤠᤱ ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤁᤢᤏᤡᤱᤘᤠ᤹ᤒᤥ ᤀᤠᤒᤠᤅᤣ ᤀᤰᤂᤣ ᤔᤧᤳᤇᤡᤱ. ‘ᤀᤠᤸᤗ ᤀᤡᤱᤃᤠ᤹ ᤁᤴ ᤂᤠᤖᤠ᤺ᤳ ᤕᤢᤱᤔᤠ ᤕᤠ᤺ᤶᤒᤰᤁᤥᤗᤠᤶ ᤗ᤺ᤳᤋᤠᤍᤣ᤺ᤀᤠᤸᤗᤧ ᤌᤣ ᤆᤥᤃᤢᤱᤒᤠᤒᤣ᥅ ᤀᤡᤱᤃᤠ᤹ ᤕᤠ᤺ᤴᤔ᤺ᤔᤠᤀᤠᤱ ᤔᤧᤛᤢᤰᤁᤠᤴ. ᤆᤠᤏᤠ᤺ᤰᤔᤠ ᤆᤠᤔᤠᤀᤠᤱ ᤏᤢ᤺ᤴᤏᤠ᤹ᤖᤥ॥
LUK 16:4 ᤁᤖ ᤁᤴ ᤂᤠᤖᤠ᤺ᤳ ᤕᤢᤱᤔᤠ ᤕᤠ᤺ᤶᤒᤰᤁᤥᤗᤠᤶ ᤗ᤺ᤳᤋᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤡᤶᤔᤥ ᤔᤧᤀᤢ᤺ᤳᤋᤠ ᤔᤧᤍᤠ᤺ᤰᤁᤠᤖ ᤑᤠ᤹ᤀᤠᤱ ᤆᤥ᤺ᤰᤔᤠᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠ॥’
LUK 16:5 ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤁᤢᤴᤍᤠᤱᤒᤧᤸᤗᤧ ᤁᤢᤛᤡᤱᤏᤠ᤺ᤳ ᤁᤧᤒᤵᤐᤠ ᤔᤏᤠᤜᤠ᤹ ᤌᤡᤰ ᤌᤡᤰ ᤗ᤹ᤖᤡᤰ ᤀᤢ᤺ᤳᤋᤢᤛᤡ. ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤧᤴ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤀᤠᤰᤂᤧᤶᤔᤩᤠᤰ ᤀᤠᤴᤍᤠᤱᤒᤠᤸᤗᤧ ᤁᤢᤛᤡᤱᤏᤠ᤺ᤳ ᤁᤧᤒᤵᤐᤣ᥅’
LUK 16:6 ᤂᤧᤴ ᤔᤏᤠ᤺ᤸᤗᤧ ‘ᤀᤡᤱᤃᤠ᤹ ᤁᤢᤃᤡᤵ ᤕᤧᤳᤇᤡ (᥎᥆᥆) ᤑᤥᤗᤰ ᤏᤡ᤺ᤱᤃᤣ᤹ ᤐᤳᤋᤠᤖᤥ’ ᤔᤧᤳᤋᤢ॥ ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤂᤧᤴ ᤔᤧᤳᤋᤢ. ‘ᤁᤧᤍᤧᤶᤛᤰᤁᤡᤴ ᤁᤳᤏᤠ ᤑᤧᤳᤋᤧ᤹᥄ ᤜᤠᤖᤠ. ᤁᤢᤃᤡᤵ ᤕᤧᤳᤇᤡᤖᤧ ᤁᤢᤗᤧᤰᤘᤠ ᤁᤢᤃᤡᤵ ᤗᤡᤛᤡ (᥊᥆᥆) ᤑᤥᤗᤰ ᤗ᤹ᤖᤡᤰ ᤛᤠᤵᤋᤧ᤹॥’
LUK 16:7 ᤂᤧᤴ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤀᤠᤰᤂᤧᤶᤔᤩᤠᤰ ᤛᤡᤱᤏᤠ᤺ᤳ ᤁᤧᤒᤳ᥅’ ᤂᤧᤸᤗᤧ ᤏᤥᤃᤵ ᤐᤡᤖᤢ. ‘ᤀᤡᤱᤃᤠ᤹ᤃ ᤑᤥᤗᤰ ᤜᤧᤴᤇᤡᤱ (᥇᥆᥆᥆) ᤛᤡ᤺ ᤛᤡᤱᤏᤠ᤺ᤳ ᤜᤢᤱᤔᤠ ᤁᤳᤋᤢᤱᤗᤥ॥’ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤔᤧᤳᤋᤢ. ‘ᤂᤧᤏᤧ᤹ ᤁᤧᤍᤧᤶᤛᤰᤁᤥ ᤜᤠᤖᤠ ᤜᤧᤴᤇᤡᤱᤎᤡᤰᤗᤧ ᤁᤢᤗᤧᤰᤘᤠ ᤁᤢᤃᤡᤵ ᤕᤧᤳᤇᤡ (᥎᥆᥆) ᤛᤠᤵᤋᤧ᤹॥’
LUK 16:8 ᤜᤧᤰᤁᤣᤗ᤹ᤖᤡᤰ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤋᤠᤵᤑᤧ᤺ᤶᤒᤠ ᤂᤠᤖᤠ᤺ᤳ ᤁᤧᤕᤢᤱᤒᤠᤸᤗᤧ ᤀᤡᤛᤫᤠᤒᤠ ᤁᤢᤕᤠ᤺ᤶᤒᤰᤁᤡᤴ ᤏᤡ᤺ᤛᤢᤀᤠᤱ ᤁᤢᤏᤠᤖᤠ ᤑᤥ᤺ᤛᤢᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤸᤗᤧ ᤁᤢᤛ᤻ᤛᤠ᤺ᤜᤠ᤹ᤏᤢ᤺ᤸᤗᤧ ᤆᤠ᤺ᤵᤐᤠ ᤔᤧᤈᤥ᤺ᤰᤗᤥ॥
LUK 16:9 ᤜᤧᤰᤁᤩᤠᤱ ᤂᤡᤏᤡ᤹ ᤔᤧᤳᤏᤡᤱᤗᤥ. ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤖᤧ ᤋᤣ᤺ᤱᤈᤢᤶ ᤆᤥᤃᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤴ ᤕᤠᤱᤛᤠᤁᤢᤴᤎᤣ᤺ᤴ ᤔᤠ᤺ᤳᤋᤡᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤁᤧᤶᤒᤡᤖᤡ᤹ᤖᤥ॥
LUK 16:10 ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤴ ᤆᤢᤰᤛᤠ ᤐᤠ᤺ᤴᤏᤥ ᤗᤰᤐᤧᤴᤛᤠᤒᤠ ᤆᤥ᤺ᤰ. ᤂᤧᤸᤗᤧ ᤕᤶᤒᤠ ᤐᤠ᤺ᤴᤏᤥ ᤗᤰᤐᤧᤴ ᤂᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤴ ᤆᤢᤰᤛᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤔᤧᤈᤥ᤺ᤰᤏᤧᤴ. ᤂᤧᤴ ᤕᤶᤒᤠ ᤐᤠ᤺ᤴᤏᤥᤀᤠᤱ ᤏᤛᤠ᤺ᤴᤛᤠᤒᤠ ᤔᤧᤒᤥ᤺ᤱᤏᤧᤸᤗᤥ॥
LUK 16:11 ᤀᤠᤳᤋᤡᤴ ᤔᤏᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤀᤥᤀᤣ ᤏᤛᤠ᤺ᤴᤛᤠᤒᤠ ᤔᤧᤒᤥ᤺ᤱᤏᤧᤴ. ᤂᤧᤴ ᤜᤠ᤺ᤳᤗᤧ ᤛᤧᤰᤂᤠᤛ᤻ᤔᤠ ᤕᤠᤱᤛᤠᤁᤢᤴᤎᤣᤀᤥ ᤗᤰᤐᤧᤴ ᤐᤡᤖᤢᤒᤣ᥅
LUK 16:12 ᤂᤡᤏᤡ᤹ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤡᤃ᤺ᤰᤘᤠᤀᤥᤀᤣ ᤏᤛᤠ᤺ᤴᤛᤠᤒᤠ ᤁᤧᤶᤒᤥ᤺ᤰᤂᤡᤴᤏᤧ ᤑᤠ᤹ᤃᤪ. ᤂᤡᤏᤡ᤹ ᤀᤠᤒᤠᤅᤣᤀᤡᤴᤏᤠᤱ ᤜᤠ᤺ᤳᤗᤧ ᤁᤧᤒᤡᤖᤡ᤹ᤒᤣ᥅
LUK 16:13 ᤀᤠᤳᤋᤡᤴ ᤛᤣᤘᤠᤖᤥᤒᤠᤸᤗᤧᤀᤠᤱ ᤏᤧᤵᤑᤢ ᤍᤠᤱᤒᤠᤜᤠ᤹ᤖᤧᤴ ᤌᤡᤰᤗᤧᤱᤔᤥ ᤛᤣᤘᤠ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤸᤗᤧ ᤌᤡᤰᤁᤡᤴ ᤆᤡ᤺ᤳᤋᤢᤀᤠᤱ ᤘᤣ᤹ᤛ᤻ᤔᤠᤴ ᤔᤡ᤺ᤶᤈᤡ ᤔᤧᤳᤋᤢ᤹ ᤀᤡᤃᤪ ᤌᤡᤰᤁᤡᤴ ᤀᤡᤱᤎᤠ᤺ᤱ ᤐᤡᤖᤢᤀᤠᤱ ᤘᤣ᤹ᤛ᤻ᤔᤠᤴ ᤜᤡᤏᤠ᤺ᤶ ᤔᤧᤳᤋᤢᤖᤥ॥ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤕᤠᤱᤛᤠᤁᤢᤴᤎᤣ᤺ᤴ ᤌᤡᤰᤗᤧᤱᤔᤥ ᤛᤣᤘᤠ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥”
LUK 16:14 ᤂᤧᤵᤔᤥ ᤑᤖᤡᤛᤡᤜᤠ᤹ᤖᤧ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤡ᤺ᤶᤕᤰᤐᤠ ᤔᤧᤘᤕᤧ॥
LUK 16:15 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤛᤍᤠᤍᤡᤱ ᤗᤠ᤺ᤰᤁᤠᤳᤗᤰ ᤏᤢ᤺ᤒᤠ ᤌᤠ᤺ᤶᤛᤡᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢ᤹ᤖᤥ॥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤏᤡ᤺ᤔᤠᤀᤥ ᤕᤶᤗᤠᤒᤠ ᤆᤥ᤺ᤰ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤡᤰᤁᤧᤗᤧ᤺ᤱᤒᤠ ᤆᤥ᤺ᤰᤗᤥ॥
LUK 16:16 ᤜᤧᤰᤁᤩᤠᤱ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤕᤧᤶ ᤌᤠᤖᤡᤰ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤈᤠ᤺ᤱᤜᤠ᤹ ᤀᤡᤱᤓᤴ ᤐᤥ᤺ᤰᤂᤧ. ᤁᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤛᤧ᤺ᤖᤧᤀᤠᤱᤎᤥ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤛᤠᤰᤁᤧᤸᤗᤧᤰ ᤗᤠ᤺ᤵᤔᤠ ᤔᤧᤃᤥ᤺ᤳᤗᤥ॥
LUK 16:17 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤠᤱᤛᤠᤰᤐᤧᤴ ᤗᤧᤰᤔᤠ ᤐᤣ᤺ᤰᤔᤠ ᤀᤢᤛᤢᤖᤢ ᤆᤥ᤺ᤰᤐᤡᤗᤠ. ᤁᤖ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤁᤧᤒᤵᤐᤠ ᤆᤢᤰᤛᤠ ᤁᤢᤛᤠᤵᤌᤡᤰᤁᤠᤱ ᤔᤧᤔᤠ᤺ᤏᤧᤴᤗᤥ॥
LUK 16:18 ᤜᤠ᤺ᤳᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢᤀᤠᤱ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥”
LUK 16:19 ᤕᤧᤛᤢᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤌᤡᤰᤗᤧᤱ ᤕᤠᤱᤛᤠᤁᤢᤴᤎᤣᤛᤠᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤐᤖᤠᤴᤗᤠ ᤋᤣ᤺ᤳ ᤆᤠᤰᤂᤢᤖ ᤌᤡᤰᤕᤠ᤺ᤴᤎᤰ ᤆᤠᤔᤢᤰ ᤌᤡᤔᤢᤰ ᤆᤖ ᤘᤕᤧ॥
LUK 16:20 ᤔᤏᤠᤜᤠ᤹ᤖᤧ ᤗᤠᤈᤖᤛ ᤔᤧᤵᤔᤏᤠᤒᤠ ᤕᤠᤱᤄᤣ᤺ᤰ ᤀᤡᤛᤣ᤺ᤱᤒᤠ ᤕᤠᤱᤃᤧᤛᤠ᤹ᤒᤠ ᤔᤏᤠ᤺ᤴ ᤔᤧᤍᤠᤖᤢᤀᤠᤱ ᤁᤢᤗᤠᤶᤎᤣ᤺ᤵᤐᤥ ᤔᤧᤕᤢᤰᤂᤢᤖᤥ॥
LUK 16:21 ᤂᤧᤸᤗᤧ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤆᤠᤔᤠᤀᤠᤱ ᤂᤠ᤺ᤳᤇᤡᤱᤔᤠ ᤏᤡᤱᤛᤠᤱ ᤆᤥᤃᤢᤀᤠᤱ ᤘᤕᤧᤖᤥ॥ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤁᤢᤕᤠᤱᤄᤣ᤺ᤰᤁᤡᤴ ᤔᤧᤗᤠᤃᤢ ᤔᤧᤒᤡᤖᤢᤖᤥ॥
LUK 16:22 ᤂᤧᤴ ᤕᤠᤱᤁᤧᤛᤠ᤹ᤒᤠ ᤗᤠᤈᤖᤛᤧᤴ ᤛᤩᤧᤀᤠᤱ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤒᤰᤂᤢ ᤔᤧᤍᤣ᤹ᤖᤢᤀᤠᤱ ᤀᤒᤪᤠᤜᤠᤔᤖᤧ ᤁᤢᤒᤣᤛᤠᤱ ᤔᤧᤕᤢᤰᤂᤢ॥ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤧᤴᤏᤠᤱ ᤛᤩᤧᤀᤠᤱ ᤔᤧᤗᤢᤵᤋᤢ.
LUK 16:23 ᤜᤧᤰᤁᤩᤠᤱ ᤂᤧᤴ ᤂᤧᤔᤠᤕᤱᤛᤱᤅᤥ ᤐᤣᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤩᤧ॥ ᤂᤧᤴ ᤔᤠ᤺ᤱᤄᤠ ᤀᤥᤔᤕᤧᤸᤗᤧ ᤗᤠᤈᤖᤛᤧᤴ ᤀᤒᤪᤠᤜᤠᤔᤖᤧ ᤁᤢᤓᤰᤋᤢᤱᤅᤥ ᤕᤢᤅᤧᤒᤠ ᤏᤡ᤺ᤛᤢᤖᤥ॥
LUK 16:24 ᤜᤧᤰᤁᤩᤠᤱ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠᤸᤗᤧ ᤀ᤺ᤰᤋᤧᤖ ᤔᤧᤳᤋᤢ. ‘ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤠᤱ ᤗᤠᤈᤖᤛᤧᤴ ᤁ᤹ᤕᤥ ᤐᤠᤱᤄᤧ ᤕᤢ᤺ᤛᤧ᤹ᤀᤥ॥ ᤁᤢᤜᤢᤰᤆᤥ᤺ᤴ ᤆᤫᤠ᤺ᤳᤋᤥ ᤏᤡ᤺ᤵᤛᤢᤀᤠᤱ ᤀᤠᤸᤛᤥ᤺ᤵᤐᤠᤸᤗᤧ ᤁᤢᤛᤶᤔᤥ ᤌᤠ᤺ᤛᤢ ᤐᤡᤀᤠᤏᤡᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤡᤖᤠ᤺ᤰᤁᤥ ᤀᤡᤱᤃᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠᤀᤠᤖ ᤕᤠ᤺ᤰᤁᤠᤖᤥ॥’
LUK 16:25 ᤁᤖ ᤀᤒᤪᤠᤜᤠᤶᤔᤡᤸᤗᤧ ᤂᤢᤏᤧ᤹ ᤔᤧᤳᤋᤢ. ‘ᤀᤠᤛ᤻ᤛᤠ᤺ᤀᤣ. ᤏᤡᤱᤘᤠ᤹ ᤀᤡ᤺ᤳᤋᤧ ᤛᤠ᤹ᤖᤧ. ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤕᤧᤸᤗᤧ ᤛᤢᤰᤂᤣᤘᤠᤀᤥ ᤁᤧᤘᤕᤧ. ᤜᤧᤰᤁᤩᤠᤱ ᤁᤴ ᤗᤠᤈᤖᤛᤧᤴ ᤋᤢᤰᤂᤣᤘᤠᤀᤥᤀᤣ ᤘᤕᤧ. ᤁᤖ ᤀᤠᤸᤗᤥ ᤂᤢᤏᤧ᤹ ᤛᤢᤰᤂᤣᤘᤠᤀᤥ ᤘᤠ᤹. ᤂᤧᤏᤧ᤹ ᤋᤢᤰᤂᤣ ᤁᤧᤈᤖ ᤁᤧᤕᤠᤰᤗᤥ॥
LUK 16:26 ᤂᤧᤴᤏᤢ᤺ᤸᤗᤧᤀᤠᤱ ᤂᤡᤏᤡ᤹ ᤁᤧᤘᤕᤡᤒᤠᤍᤧᤴᤏᤥ ᤀᤠᤏᤡᤃᤧ ᤕᤢ᤺ᤔᤠ ᤔᤧᤛᤢᤰᤋᤢᤶᤒᤠᤴ. ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤀᤠᤏᤡᤃᤧ ᤘᤕᤡᤃᤧᤒᤠᤍᤧᤴᤏᤥ ᤌᤠᤱᤔᤠ ᤁᤧᤴᤇᤢᤰᤋᤢᤶᤔᤡᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤢᤶᤔᤥ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳ ᤏᤧᤖᤥ॥’
LUK 16:27 ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤐᤠ᤺ᤳᤋᤢ. ‘ᤀᤠᤶᤒᤣ. ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤴ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤐᤠᤱᤄᤧ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥
LUK 16:28 ᤂᤧᤵᤔᤥ ᤅᤠᤛᤡ ᤀᤠᤶᤓᤢ᤹ ᤀᤠᤴᤛᤠ᤹ᤛᤡ ᤔᤧᤘᤠ᤹. ᤜᤠᤖᤠ᤹ ᤂᤧᤱᤜᤠ᤹ ᤁᤴ ᤋᤢᤰᤂᤣᤘᤠᤍᤧᤴᤏᤥ ᤔᤧᤴᤍᤠ᤺ᤏᤧᤴᤗ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤢᤛᤡᤏᤡᤖᤥ॥’
LUK 16:29 ᤁᤖ ᤀᤒᤪᤠᤜᤠᤔᤖᤧ ᤂᤧᤴ ᤏᤥᤃᤵ ᤐᤡᤖᤢ. ‘ᤂᤧᤱᤜᤠ᤹ᤖᤧ ᤔᤥᤛᤠ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤴ ᤛᤠᤵᤐᤴᤜᤠ᤹ ᤔᤧᤃᤳᤋᤢ᤹. ᤜᤠᤖᤠ᤹ ᤂᤧᤴ ᤔᤧᤄᤧᤵᤛᤢᤏᤡᤖᤥ॥’
LUK 16:30 ᤁᤖ ᤂᤧᤸᤗᤧ ᤏᤥᤃᤵ ᤐᤡᤖᤢ. ‘ᤜᤧᤰᤁᤣ ᤔᤧ᤺ᤴ ᤀᤠᤶᤒᤣ. ᤁᤢᤓᤠ ᤔᤏᤠᤜᤠ᤹ ᤁᤧᤛᤡ᤺ᤒᤥᤗᤠᤶ ᤁᤢᤜᤡᤱᤘᤧᤳ ᤔᤧᤒᤥ᤺ᤱᤅᤠᤱ ᤔᤧᤒᤣ᤺ᤰᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤏᤠᤱ ᤔᤧᤜᤡᤱᤗᤥ॥’
LUK 16:31 ᤁᤖ ᤀᤒᤪᤠᤜᤠᤔᤖᤧ ᤂᤧᤴ ᤏᤥᤃᤵ ᤐᤡᤖᤢ. ‘ᤔᤥᤛᤠ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤵᤐᤴᤜᤠ᤹ ᤔᤧᤄᤧᤵᤛᤢᤀᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤏᤧ ᤑᤠ᤹ᤃᤪ. ᤁᤢᤓᤠ ᤔᤏᤠᤜᤠ᤹ ᤁᤧᤛᤡ᤺ᤒᤥᤗᤠᤶ ᤁᤢᤜᤡᤱᤘᤧᤳ ᤔᤧᤒᤥ᤺ᤱᤅᤠᤱ ᤔᤧᤒᤣ᤺ᤰᤛᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥’”
LUK 17:1 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤗᤠᤕᤥᤀᤥ ᤁᤧᤎᤠ᤺ᤒᤠ ᤐᤠ᤺ᤴᤜᤠ᤹ ᤋᤠ᤺ᤀᤣᤖᤥ. ᤁᤖ ᤂᤧᤴ ᤐᤠ᤺ᤴᤜᤠ᤹ ᤁᤧᤍᤠ᤺ᤵᤐᤠ ᤔᤏᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ॥
LUK 17:2 ᤁᤴ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤱᤃ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤑᤥ᤺ᤶᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
LUK 17:3 ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤁᤧᤴᤛᤠ᤹ᤖᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤏᤧ ᤑᤠ᤹ᤃᤪ ᤂᤧᤴ ᤑᤧ᤺ᤰᤋᤧ᤹. ᤜᤧᤰᤁᤩᤠᤱ ᤁᤢᤗᤠᤕᤥᤗᤠᤶ ᤜᤡᤴᤇᤡᤱᤏᤧ ᤑᤠ᤹ᤃᤪ ᤗᤧᤵᤔᤡ ᤐᤡᤖᤧ᤹ᤀᤥ॥
LUK 17:4 ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ ᤕᤧᤴᤏᤥ ᤏᤢᤛᤡ ᤗᤧᤱ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤀᤠᤱ ᤏᤢᤛᤡᤗᤧᤱᤅᤣ ᤀᤡᤱᤃᤠ᤹ ᤜᤡᤴᤍᤠᤱ ᤑᤠ᤹ᤀᤠᤱ ᤐᤠ᤺ᤳᤋᤢ᤹ᤏᤧ ᤑᤠ᤹ᤃᤪ ᤗᤧᤵᤔᤡ ᤐᤡᤖᤧ᤹ᤀᤥ॥”
LUK 17:5 ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤍᤠᤱᤒᤠ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧ ᤏᤛᤠ᤺ᤴᤏᤡᤴ ᤑᤥ᤺ᤛᤧ ᤀᤠᤒᤡᤖᤧ᤹ᤀᤥ॥”
LUK 17:6 ᤜᤧᤰᤁᤣ᤺ᤸᤗᤧ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠ᤺ᤴᤏᤡᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤎᤡᤰ ᤕᤠ᤺ᤳᤇᤠᤱ ᤁᤴ ᤂ᤺ᤰᤛᤣ᤹ᤒᤢᤱᤔᤠᤴ ‘ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹’ ᤁᤧᤔᤧᤳᤋᤢᤶᤏᤧ ᤑᤠ᤹ᤃᤪ ᤂᤧᤸᤗᤧ ᤁᤧᤔᤧᤳᤋᤢᤶᤒᤠ ᤁᤢᤀᤡᤛᤡ᤺ᤰ ᤆᤥᤃᤢ᤹ᤖᤥ॥”
LUK 17:7 “ᤂᤡᤏᤡ᤹ᤀᤥ ᤜᤠ᤺ᤳᤗᤧ ᤁᤧᤰᤆᤢ ᤁᤧᤎᤥ᤺ᤱᤒᤠ ᤛᤣᤘᤠᤖᤥᤒᤠᤴ ᤀᤡᤃᤪ ᤔᤧᤸᤗᤢᤰ ᤆᤠᤃᤧᤖᤠᤶᤒᤧᤴ ᤕᤠ᤺ᤶᤒᤰᤁᤥᤗᤠᤶ ᤏᤢ᤺ᤱ ᤋᤠ᤺ᤸᤗᤧ ‘ᤜᤠᤖᤠ᤹ ᤑᤧᤖᤧ᤹ᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤅᤧ᤹’” ᤁᤧᤔᤧᤳᤋᤢᤶᤒᤣ᥅
LUK 17:8 ᤂᤧᤸᤗᤧ ᤁᤢᤗᤧᤰᤘᤠ “ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤆᤥᤃᤧ᤹ ᤜᤧᤰᤁᤩᤠᤱ ᤑ᤹ᤀᤡ ᤕᤢᤵᤛᤡᤱᤅᤧ᤹ᤀᤠᤱ ᤀᤡᤱᤃᤠ᤹ ᤆᤠᤔᤠ ᤌᤢᤱᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤜᤠᤱᤄᤠᤱᤅᤧ᤹ ᤜᤧᤰᤁᤩᤠᤱᤗᤰ ᤂᤧᤏᤧ᤹ ᤆᤧ᤹ ᤁᤧᤶᤔᤧᤳᤋᤢᤶᤔᤡᤶᤒᤡ᥅
LUK 17:9 ᤁᤢᤛᤣᤘᤠᤖᤥᤒᤠᤸᤗᤧ ᤏᤢ᤺ᤖᤡᤰ ᤕᤠ᤺ᤶᤒᤰ ᤆᤥᤃᤢ ᤑᤠ᤹ᤀᤠᤱ ᤁᤢᤴᤍᤠᤱᤒᤠᤸᤗᤧ ᤁᤢᤛᤣᤘᤠᤖᤥᤒᤠᤴ ᤀᤥᤒᤧ ᤏᤢ᤺ᤖᤡᤰ ᤛᤣᤘᤠ ᤁᤧᤔᤧᤳᤋᤠᤱᤗᤥ ᤑᤠ᤹ᤀᤠᤱ ᤔᤧᤳᤋᤢᤒᤡ᥅”
LUK 17:10 “ᤂᤡᤏᤡ᤹ᤀᤠᤱ ᤔᤧᤵᤔᤏᤠᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶ ᤁᤧᤛᤢᤖᤢᤶᤏᤧ ᤑᤠ᤹ᤃᤪ ᤀᤰᤂᤣ ᤐᤠ᤺ᤳᤋᤧᤶᤔᤧ᤹. ‘ᤀᤠᤏᤡᤃᤧᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤁᤧᤛᤣᤘᤠᤖᤥᤒᤠᤛᤡᤃᤧᤖᤥ॥ ᤀᤠᤏᤡᤃᤧᤃ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤖᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥’”
LUK 17:11 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥ ᤐᤣᤖ ᤐᤳᤇᤧᤸᤗᤧ ᤃᤠᤗᤡᤗ ᤏᤢ ᤛᤠᤔᤖᤡᤕᤠᤖᤧ ᤁᤢᤗᤢᤶᤔᤥ ᤐᤥ᤺ᤰᤂᤧᤖ ᤐᤣ॥
LUK 17:12 ᤜᤧᤰᤁᤩᤠᤱ ᤌᤡᤰ ᤐᤠᤱᤓᤣ᤹ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤌᤡᤒᤥ᤺ᤱ ᤗᤥᤃᤣ᤹ ᤋᤢᤰᤔᤠᤸᤗᤧ ᤕᤠᤱᤄᤢᤛᤡᤒᤠᤜᤠ᤹ ᤋᤢᤔᤢᤛᤡ॥ ᤂᤧᤱᤜᤠ᤹ ᤔᤠ᤺ᤱᤄᤠ ᤔᤧᤕᤧᤶᤛᤡᤱᤅᤠᤱ
LUK 17:13 ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤍᤠᤱᤒᤠ ᤕᤧᤛᤢᤀᤣ. ᤀᤠᤏᤡᤃᤧ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤠᤱ ᤀᤠᤏᤢ᤺ᤛᤧ᤹ᤀᤥ॥”
LUK 17:14 ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧᤛᤠ ᤗᤥᤃᤣ᤹ ᤋᤢᤰᤔᤥᤗᤠᤶ ᤔᤧᤏᤢ᤺ᤖᤧᤖᤥ॥
LUK 17:15 ᤜᤧᤰᤁᤩᤠᤱ ᤌᤡᤰ ᤁᤧᤍᤢᤰᤐᤠᤸᤗᤧ ᤂᤢᤏᤧ᤹ ᤏᤢ᤺ᤖᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤏᤢ᤺ᤰᤂᤧ ᤋᤩᤧᤖᤥ॥
LUK 17:16 ᤂᤧᤴ ᤕᤧᤛᤢᤖᤧ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤑᤴᤇᤡᤱᤗ ᤏᤥᤃᤧᤴ ᤐᤡᤖᤢᤖᤥ॥ ᤂᤧᤱᤃ ᤛᤠᤔᤖᤡ ᤛᤢᤘᤠᤱᤛ᤻ᤔᤠ ᤘᤕᤧᤖᤥ॥
LUK 17:17 ᤕᤧᤛᤢᤖᤧ ᤐᤠ᤺ᤳᤋᤢ. “ᤁᤴ ᤋᤢᤰᤔᤥᤗᤠᤶ ᤁᤧᤘᤣ᤺ᤵᤐᤠᤜᤠ᤹ᤃ ᤌᤡᤒᤥ᤺ᤱᤏᤧ (᥇᥆) ᤔᤧᤘᤕᤧ. ᤁᤖ ᤘᤣ᤹ ᤑᤠᤱᤛᤡᤜᤠ᤹ (᥏) ᤀᤠᤳᤋᤠᤴ ᤔᤧᤒᤣᤒᤣ᥅
LUK 17:18 ᤀᤠᤰᤂᤣᤀᤠᤱ ᤁᤴ ᤗᤳᤇᤠ ᤌᤡᤶᤔᤧᤴᤍᤱ ᤔᤏᤠ᤺ᤴᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤐᤡᤛᤧ ᤏᤢ᤺ᤰᤂᤧ ᤋᤩᤧᤒᤣ᥅”
LUK 17:19 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹ᤀᤠᤱ ᤐᤣᤃᤧ᤹ᤀᤥ॥ ᤁᤧᤏᤛᤠ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤏᤢ᤺ᤛᤧᤖᤥ॥”
LUK 17:20 ᤌᤡᤰ ᤕᤧᤴ ᤑᤖᤡᤛᤡᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤠᤵᤑᤠᤸᤗᤧ ᤋᤠ᤺ᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤔᤏᤠᤒᤠ ᤔᤡᤰᤛᤣ᤺ᤴᤏᤢ ᤔᤧᤍᤠᤏᤧᤴ॥
LUK 17:21 ᤜᤠ᤺ᤳᤗᤧᤀᤠᤱ ‘ᤂᤧᤴ ᤂᤧᤳᤏᤠ ᤘᤠ᤹. ᤁᤳᤏᤠ ᤘᤠ᤹’ ᤑᤠ᤹ᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴ॥ ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤂᤡᤏᤡ᤹ ᤗᤢᤶᤔᤥᤀᤣ ᤘᤠ᤹ᤖᤥ॥”
LUK 17:22 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤰᤋᤱᤒᤠ ᤕᤧᤶᤔᤡᤴ ᤋᤠ᤺ᤖ ᤐᤳᤗᤥ. ᤂᤧᤴ ᤕᤧᤶᤔᤥᤃ ᤔᤧᤴᤇᤠᤶᤛᤠ᤺ᤴ ᤁᤢᤕᤧᤴᤏᤥ ᤜᤧᤰᤁᤣᤀᤣ ᤂᤡᤏᤡ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤁᤧᤱᤄᤥ᤺ᤛᤢᤶᤔᤡᤴᤗᤥ॥
LUK 17:23 ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤧᤳᤏᤠ ᤘᤠ᤹. ᤂᤢᤏᤧ᤹ ᤁᤳᤏᤠ ᤘᤠ᤹ ᤗ᤹ᤖᤡᤰ ᤁᤧᤶᤔᤧᤳᤋᤡᤸᤗᤧ ᤂᤢᤏᤧ᤹ ᤁᤢᤀᤥᤔᤧᤳᤇᤧ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ॥
LUK 17:24 ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤧᤶᤔᤡᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤋᤠᤱᤛᤠᤰᤐᤠᤸᤗᤧ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ᤛ᤻ᤔᤠ ᤁᤢᤕᤠᤀᤥ ᤌᤠᤖᤡᤰ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰ ᤁᤧᤖᤧᤰᤗᤧ ᤔᤧᤏᤡ᤺ᤛᤢ᤹ᤖᤥ॥
LUK 17:25 ᤁᤖ ᤁᤠᤰᤏᤢ ᤋᤃᤡ ᤔᤧᤴᤇᤠᤶᤛᤠ᤺ᤴ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤹᤺. ᤜᤧᤰᤁᤩᤠᤱ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤠ᤹ᤖᤢᤖᤥ॥
LUK 17:26 ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥ᤺ᤱᤗᤥ॥
LUK 17:27 ᤏᤢᤜᤠ᤺ᤴ ᤘᤠᤗᤠᤎᤠᤀᤥ ᤗᤠ᤺ᤛᤧᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤶᤒᤠ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤔᤧᤏᤡ᤺ᤒᤧ ᤔᤧᤛᤩᤧ. ᤁᤖ ᤂᤢᤏᤧ᤹ ᤘᤠᤗᤠᤎᤠᤀᤥ ᤗᤠ᤺ᤛᤧᤒᤠ ᤕᤧᤴ ᤌᤠᤖᤡᤰ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥
LUK 17:28 ᤜᤧᤰᤁᤩᤠᤱ ᤗᤢᤋᤧᤸᤗᤧ ᤁᤢᤕᤧᤶᤔᤥᤀᤠᤱ ᤜᤧᤰᤁᤣᤀᤣ ᤐᤥ᤺ᤰᤂᤧ॥ ᤔᤏᤠᤜᤠ᤹ᤖᤧ ᤔᤧᤈᤖ ᤔᤧᤎᤢᤅᤢᤖ ᤔᤧᤘᤕᤧ. ᤂᤧᤱᤜᤠ᤹ ᤆᤡᤃ᤺ᤰᤘᤠ ᤛᤱ­-ᤀᤡᤱᤏᤢ. ᤀᤡᤰ ᤔ᤺ᤏᤢ. ᤜᤡᤶᤎᤠ᤺ᤱ ᤆᤥ᤺ᤰᤏᤢ ᤔᤧᤘᤕᤧᤖᤥ॥
LUK 17:29 ᤁᤖ ᤗᤢᤋᤖᤧ ᤛᤍᤥᤔ ᤕᤧᤰᤕᤰᤁᤡᤴ ᤗᤧᤖᤢᤀᤠᤱ ᤐᤣ᤺ᤸᤗᤧ ᤋᤠᤱᤛᤠᤰᤐᤥᤗᤠᤶ ᤔᤡᤖᤠ᤺ᤰ ᤏᤢ ᤌᤠᤒᤢ᤺ᤴ ᤌᤩᤧᤀᤠᤱ ᤁᤠᤰ ᤔᤏᤠᤜᤠ᤹ ᤔᤧᤰᤂᤢᤛᤡᤖᤥ॥
LUK 17:30 ᤜᤧᤰᤁᤣᤗ᤹ᤖᤡᤰᤁᤣ ᤔᤏᤠᤜᤠ᤹ ᤕᤠᤖᤡᤵ ᤔᤧᤒᤥ᤺ᤱᤅᤣ ᤔᤧᤘᤠ᤹ᤀᤡᤸᤗᤧ ᤔᤧᤴᤇᤠᤶᤛᤠ᤺ᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥
LUK 17:31 ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶ ᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ. ᤜᤧᤰᤁᤩᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠ ᤔᤏᤠ᤺ᤴ ᤆᤡᤃ᤺ᤰᤘᤠ ᤗᤠ᤺ᤛᤧ ᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥
LUK 17:32 ᤗᤢᤋᤖᤧ ᤁᤢᤔᤣ᤺ᤳᤋᤡᤴ ᤕᤢᤶ ᤛᤡᤳᤗᤠᤱ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ᥄
LUK 17:33 ᤜᤠ᤺ᤳᤗᤧ ᤁᤢᤜᤡᤱᤔᤴᤏᤡᤴ ᤛᤧ᤺ᤵᤋᤢᤱ ᤗ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹ᤖᤥ. ᤁᤖ ᤜᤠ᤺ᤳᤗᤧ ᤁᤢᤜᤡᤱᤔᤴᤏᤡᤴ ᤔᤠᤛᤢ᤹. ᤂᤧᤸᤗᤧ ᤛᤧ᤺ᤵᤋᤢ᤹ᤖᤥ॥
LUK 17:34 ᤂᤧᤴ ᤛᤧᤴᤍᤡᤰ ᤏᤧᤵᤑᤢ ᤔᤏᤠᤜᤠ᤹ ᤛᤥᤖᤡᤰ ᤏᤧᤛᤡ᤹. ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤏᤧ ᤗᤠ᤺ᤳᤗᤥ॥
LUK 17:35 ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤕᤢᤱ ᤗᤠ᤺ᤳᤗᤥ॥
LUK 17:36 ((ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤡᤖ ᤕᤠᤰᤛᤡ᤹. ᤌᤡᤰᤁᤡᤴ ᤋᤣ᤹. ᤘᤣ᤹ᤛ᤻ᤔᤠᤴ ᤘᤠ᤹ ᤗᤠ᤺ᤳᤗᤥ॥))”
LUK 17:37 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤴ ᤀᤠᤳᤋᤥ ᤐᤥ᤺ᤱᤒᤠᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤡᤍᤠᤒᤠᤜᤠ᤹ ᤔᤧᤈᤢᤶᤔᤡᤸᤗᤧ ᤂᤧᤵᤔᤥ ᤛᤡᤏᤢ᤺ᤴ ᤏᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤏᤠᤒᤠ ᤜᤧᤰᤁᤣ. ᤁᤴ ᤔᤡᤰᤛᤣ᤺ᤴᤜᤠ᤹ ᤐᤥ᤺ᤱᤅᤡᤸᤗᤧ ᤁᤢᤏᤢᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤗᤥ॥”
LUK 18:1 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥ᤺ᤰᤔᤠ ᤐᤥ᤺ᤱ. ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤛᤥ᤺ᤶᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤜᤢ᤹ᤔᤠᤛᤡ ᤑᤠ᤹ᤀᤠᤱ ᤗᤳᤇᤠ ᤂᤧᤍᤠ᤹ ᤔᤧᤳᤋᤢᤛᤡ॥
LUK 18:2 “ᤌᤡᤰ ᤕᤧᤰᤕᤰᤁᤥ ᤗᤳᤌᤡᤰ ᤏᤡᤱᤘᤠ᤹ᤑᤢᤔᤠᤱᤏᤢ ᤔᤧᤱᤃᤡ᤺ᤔᤏᤠᤒᤠ. ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤀᤡᤱᤎᤠ᤺ᤱ ᤔᤧᤶᤒᤡᤔᤏᤠᤒᤠ ᤂᤠᤛᤧᤴᤗᤥ᤺ᤶᤒᤠᤎᤡᤰ ᤘᤕᤧᤖᤥ॥
LUK 18:3 ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤰᤕᤰᤁᤥ ᤔᤣᤔᤣᤍᤢᤔᤠᤎᤡᤰᤁᤠᤱ ᤘᤕᤧ॥ ᤂᤧᤴ ᤀᤧᤳᤗᤧᤱ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤋᤩᤧᤖ ᤀᤠᤵᤋᤡᤰ ᤕᤠᤵᤔᤡ ᤁᤧᤃᤢ᤺ᤵᤐᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤴᤍᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤔᤧᤳᤋᤢᤖ ᤘᤕᤧᤖᤥ॥
LUK 18:4 ᤜᤧᤰᤁᤣ᤺ᤸᤗᤧ ᤋᤃᤡᤃ ᤂᤧᤴ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤁᤥᤈᤠᤰ ᤔᤧᤔᤧᤳᤋᤢᤴ. ᤁᤖ ᤕᤠᤱᤛᤡ ᤀᤰᤂᤣᤗ᤹ᤖᤡᤰ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤇᤡᤱ. ‘ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢᤀᤠᤱ ᤔᤧᤃᤡᤀᤠᤴ. ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤀᤡᤱᤎᤠ᤺ᤱ ᤔᤧᤒᤡᤖᤢᤱᤛᤡᤱᤅᤡᤴ.
LUK 18:5 ᤁᤖ ᤁᤴ ᤔᤣᤔᤣᤍᤢᤔᤠᤴ ᤂᤠᤛᤧᤴ ᤔᤧᤗᤥ᤺ᤴᤍᤢᤱᤅᤡᤴ ᤔᤧᤒᤡᤖᤢᤱᤅᤡᤴᤏᤧ ᤑᤠ᤹ᤃᤪ ᤀᤧᤳᤗᤧᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤠᤀᤠᤱ ᤛᤧᤳᤋᤠᤒᤠ ᤐᤥ᤺ᤰᤂᤧ॥ ᤀᤠᤸᤗ ᤂᤧᤴ ᤂᤠᤛᤧᤴ ᤗᤥ᤺ᤶᤔᤠ ᤐᤡᤔᤠ ᤐᤥ᤺ᤰᤂᤧᤖᤥ॥’”
LUK 18:6 ᤍᤠᤱᤒᤠᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤋᤠᤵᤑᤧ᤺ᤶᤒᤠ ᤂᤠᤛᤧᤴᤗᤥ᤺ᤶᤒᤠᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥
LUK 18:7 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤔᤧᤜᤠ᤺ᤵᤗ ᤋᤢᤘᤠ ᤆᤥ᤺ᤰᤁᤡ ᤐᤣᤗᤡ ᤔᤧᤓᤠᤰᤁᤡᤸᤗᤧ. ᤂᤢᤏᤧ᤹ ᤛᤧᤰᤂᤠᤛᤠᤱ ᤁᤢᤔᤏᤠᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤍᤢᤴ ᤔᤧᤒᤡᤖᤢᤴᤛᤡᤴᤏᤠᤱ ᤂᤢᤏᤧ᤹ ᤂᤧᤱᤜᤠ᤹ ᤂᤧᤶᤄᤧᤶᤗᤰ ᤗᤠᤵᤋᤢᤛᤡ᤹ᤒᤡ᥅
LUK 18:8 ᤜᤧᤰᤁᤣ ᤔᤧ᤺ᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤜᤠᤖᤠᤀᤣ ᤂᤠᤛᤧᤴ ᤗᤥ᤺ᤴᤍᤢᤒᤡᤖᤢᤛᤡ᤹ᤖᤥ॥ ᤁᤖ ᤔᤧᤴᤇᤠᤶᤛᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ᤸᤗᤧ ᤁᤵᤔᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤋᤢᤔᤢᤛᤡ᤹ᤒᤡ᥅”
LUK 18:9 ᤜᤧᤰᤁᤩᤠᤱ ᤕᤧᤛᤢᤖᤧ ᤀᤡᤱᤃᤠ᤹ᤖᤰ ᤛᤠᤶᤕᤥᤏᤡᤒᤠ ᤁᤧᤗ᤹ᤒᤠᤀᤠᤱ ᤘᤣ᤹ ᤔᤏᤠᤜᤠ᤹ ᤜᤡᤏᤠ᤺ᤶ ᤁᤧᤔᤧᤵᤐᤠ ᤔᤏᤠᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ–
LUK 18:10 “ᤏᤧᤵᤑᤢ ᤔᤏᤠᤜᤠ᤹ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤛᤧ ᤐᤣᤛᤡ॥ ᤂᤧᤱᤜᤠ᤹ᤀᤥ ᤗᤳᤌᤡᤰᤁᤡᤴ ᤑᤖᤡᤛᤡ ᤏᤢ ᤘᤣ᤹ᤛ᤻ᤔᤠᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤘᤕᤧ॥
LUK 18:11 ᤂᤧᤴ ᤑᤖᤡᤛᤡ᤺ᤴ ᤀᤣ᤺ᤰ ᤕᤧᤶᤛᤡᤱᤅᤠᤱ ᤋᤢᤘᤠ ᤆᤥᤃᤢ. ‘ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤱᤃᤠ᤹ ᤏᤥᤃᤧᤴ ᤐᤡᤏᤧᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤘᤣ᤹ᤛ᤻ᤔᤠ ᤔᤏᤠᤜᤠ᤹ ᤜᤧᤰᤁᤣ. ᤛᤠᤰᤁᤧᤸᤗᤧᤰᤁᤠᤱ ᤕᤠᤱ ᤁᤧᤓᤥ᤺ᤱᤒᤠ. ᤔᤏᤠ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤜᤧᤰᤁᤩᤠᤱ ᤁᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠ ᤜᤧᤰᤁᤣ ᤀᤡᤱᤃᤠ᤹ ᤔᤧᤈᤥ᤺ᤰᤁᤠᤴᤗᤥ॥
LUK 18:12 ᤀᤡᤱᤃᤠ᤹ ᤕᤧᤳᤏᤠᤶᤗᤧ ᤏᤡᤗᤧᤱ ᤆᤠ᤺ᤏᤧᤳᤋᤥ ᤕᤢᤱᤅᤠ᤹. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤥ᤺ᤛᤢᤱᤒᤠ ᤌᤃᤢᤱᤒᤠ ᤁᤧᤖᤧᤰᤗᤧᤴ ᤌᤡᤒᤥ᤺ᤱᤗᤰ ᤐᤡᤏᤧᤖᤥ॥’
LUK 18:13 ᤁᤖ ᤂᤧᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤧᤱᤃ ᤔᤠ᤺ᤱᤄᤠ ᤕᤧᤶᤛᤡᤱᤅᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱᤅᤠᤱ ᤀᤥᤔᤧᤶᤔᤀᤣ ᤁᤢᤛᤱᤒᤧᤴ ᤜᤡᤵᤋᤢᤖ ᤜᤠᤒᤧᤖ ᤀᤰᤂᤣ ᤐᤠ᤺ᤳᤋᤢ. ‘ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ. ᤀᤡᤱᤃᤠ᤹ᤃ ᤗᤠᤕᤥᤒᤠᤀᤠᤖᤥ॥’
LUK 18:14 ᤀᤥᤔᤧᤳᤋᤧᤶᤔᤧ᤹ᤀᤥ. ᤁᤴ ᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤧᤱᤃ ᤑᤖᤡᤛᤡ᤺ᤴᤏᤢ᤺ᤸᤗᤧ ᤛᤠᤶᤕᤥᤏᤡᤒᤠ ᤐᤥ᤺ᤰᤂᤧᤀᤠᤱ ᤁᤢᤜᤡᤶᤔᤥ ᤐᤣᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤔᤏᤠ᤺ᤴ ᤌᤠ᤺ᤱᤎᤠ᤺ᤱ ᤕᤶᤒᤠ ᤗᤧᤱᤛᤡᤱ. ᤂᤧᤴ ᤆᤢᤱᤈᤡᤃᤧᤴ ᤐᤥ᤺ᤱᤗᤥ॥ ᤀᤠᤳᤋᤡᤴ ᤆᤢᤱᤈᤡᤃᤧᤴ ᤗᤧᤱᤛᤡᤱ ᤂᤧᤴᤏᤡᤴ ᤕᤶᤒᤗᤠᤒᤠ ᤐᤥ᤺ᤱᤗᤥ॥”
LUK 18:15 ᤀᤠᤸᤗ ᤂᤧᤵᤔᤥ ᤔᤏᤠᤜᤠ᤹ᤖᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤀᤠᤱ ᤜᤠᤖᤠ᤹ ᤂᤢᤏᤡ᤹ ᤛᤶᤍᤠᤱ ᤕᤧᤛᤢᤖᤧ ᤜᤢᤰ ᤏᤧᤛ᤻ᤛᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖ ᤑᤠ᤹ᤀᤠᤱ ᤔᤧᤍᤠᤖᤢᤛᤡ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤂᤧᤴ ᤁᤧᤍᤠ᤺ᤵᤐᤠᤜᤠ᤹ ᤔᤧᤓᤧ᤺ᤰᤋᤢᤛᤡ॥
LUK 18:16 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤁᤴ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤑᤠ᤺ᤰᤋᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤁᤴ ᤜᤡᤴᤈᤠ᤹ᤒᤡᤳᤇᤠ ᤜᤧᤰᤋᤱᤒᤠᤜᤠ᤹ᤖᤧᤴᤏᤣᤖᤥ॥
LUK 18:17 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤜᤧᤰᤁᤣ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤔᤧᤍᤠ᤺ᤰᤋᤢᤴ. ᤂᤧᤴ ᤂᤧᤵᤔᤥ ᤗᤠ᤺ᤵᤔᤠ ᤔᤧᤄᤥ᤺ᤏᤧᤴᤗᤥ॥”
LUK 18:18 ᤂᤧᤵᤔᤥ ᤛᤢᤜᤠᤱᤕᤢᤰᤐᤠᤎᤡᤰ ᤋᤩᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤁᤧᤏᤢ᤹ᤒᤠ ᤛᤡᤰᤛᤠᤶᤒᤣ. ᤀᤠᤰᤋᤱᤒᤠ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤱᤒᤣ᥅”
LUK 18:19 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤌᤣᤀᤠᤱ ᤀᤡᤱᤃᤠ᤹ ᤁᤧᤏᤢ᤹ᤒᤠ ᤁᤧᤔᤧᤳᤋᤠᤒᤣ᥅ ᤁᤧᤏᤢ᤹ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤘᤠ᤹ᤖᤥ॥
LUK 18:20 ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤜᤠ᤹ ᤁᤧᤗᤧᤛ᤻ᤛᤢᤀᤠᤱ ᤁᤧᤘᤠ᤹–‘ᤕᤠᤵᤔᤡ ᤛᤧᤵᤔᤠ ᤔᤧᤏᤢ᤹ᤏᤧᤴ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤂᤢ᤺ᤶᤔᤠ ᤔᤧᤏᤢ᤹ᤏᤧᤴ. ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ. ᤜᤧᤰᤁᤩᤠᤱ ᤐᤠ-ᤔᤠ ᤀᤡᤱᤎᤠ᤺ᤱ ᤐᤡᤔᤠᤛᤡᤀᤣ ᤐᤥ᤺ᤱ॥’”
LUK 18:21 ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤁᤴ ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤜᤠ᤹ᤃ ᤀᤡᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥᤀᤣ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗ ᤘᤠ᤹ᤀᤠᤖᤥ॥”
LUK 18:22 ᤕᤧᤛᤢᤖᤧ ᤂᤧᤴ ᤂᤧᤵᤛᤢᤀᤠᤱ ᤔᤧᤳᤋᤢ. “ᤀᤠᤸᤗᤛᤠᤱ ᤂᤧᤏᤧ᤹ ᤕᤠ᤺ᤶᤒᤰᤌᤡᤰ ᤆᤥ᤺ᤰᤔᤠ ᤁᤧᤃᤳᤋᤢ᤹ᤖᤥ॥ ᤂᤧᤏᤧ᤹ ᤁᤧᤃᤳᤋᤢᤒᤠᤴ ᤁᤧᤖᤧᤰ ᤛᤱᤄᤧᤍᤣ᤺ᤛᤧ᤹ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤁᤧᤄᤥ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤑᤧᤖᤧ᤹ᤀᤠᤱ ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”
LUK 18:23 ᤁᤖ ᤂᤢᤏᤧ᤹ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤸᤗᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤠᤳᤋᤠᤳᤋᤠᤴᤏᤣ ᤕᤠᤱᤛᤠᤁᤢᤴᤎᤣᤛᤠᤒᤠ ᤘᤕᤧᤖᤥ॥
LUK 18:24 ᤕᤧᤛᤢᤖᤧ ᤂᤧᤴ ᤀᤥᤔᤧᤳᤋᤢᤀᤠᤱ ᤐᤠ᤺ᤳᤋᤢ. “ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤃ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤠ᤹ᤖᤡᤰ ᤛᤠᤰᤗᤥ᥄
LUK 18:25 ᤛᤧᤰᤂᤠᤀᤣ ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤏᤢ᤺ᤸᤗᤧ ᤀᤢᤔᤣ᤺ᤴ ᤛᤶᤔᤣ᤺ᤳᤋᤡᤸᤗᤧ ᤁᤢᤜᤱᤅᤥ ᤗᤠ᤺ᤵᤔᤠ ᤀᤢᤛᤢᤖᤢ ᤆᤥ᤺ᤰᤗᤥ॥”
LUK 18:26 ᤁᤴ ᤐᤠ᤺ᤴ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤜᤠ᤺ᤳ ᤋᤠᤱᤛᤧ᤺ᤵᤔᤠ ᤛᤢᤰᤐᤠᤒᤣ᥅”
LUK 18:27 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤃ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤢᤰᤋᤢ᤹ᤖᤥ॥”
LUK 18:28 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤀᤠᤏᤡᤃᤧ ᤜᤡᤶᤎᤠ᤺ᤱ ᤗᤧᤖᤢᤶᤒᤧᤀᤠᤱ ᤂᤧᤏᤧ᤹ ᤋᤡᤶᤔᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥”
LUK 18:29 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢᤜᤠᤱᤈᤢᤶᤖᤧ ᤗᤠᤃᤡ ᤜᤡᤶᤎᤠ᤺ᤱ. ᤔᤣ᤺ᤳ. ᤑᤢ᤹ᤏᤢᤛᤠ᤹ᤜᤠ᤹. ᤔᤠ-ᤒᤠᤜᤠ᤹. ᤀᤡᤃᤪ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤁᤧᤗᤧᤵᤐᤠᤜᤠ᤹ᤖᤧ
LUK 18:30 ᤁᤴ ᤜᤡᤱᤔᤴᤏᤥ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤧᤄᤥ᤺ᤛᤢ᤹. ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤕᤧᤶᤔᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥”
LUK 18:31 ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤸᤗ ᤂᤧᤵᤛᤧᤶᤔᤧ᤹ᤀᤥ. ᤀᤠᤏᤡ᤹ᤃ ᤕᤖᤢᤛᤗᤧᤔ ᤌᤥ ᤀᤠᤒᤣ᤺ᤰᤗ ᤀᤠᤒᤳᤗᤥ॥ ᤂᤧᤵᤔᤥ ᤀᤢᤴᤇᤣ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤛᤠᤵᤋᤢᤒᤠ ᤁᤧᤖᤧᤰ ᤐᤠ᤺ᤴᤏᤡᤴ ᤁᤧᤳᤗᤥ॥
LUK 18:32 ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤒᤡᤖᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ᤹. ᤁᤢᤏᤠᤔᤧᤎᤠᤛᤢ᤹. ᤌᤩᤠ᤺ᤳ ᤔᤧᤎᤥ᤺ᤰᤋᤢ᤹. ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤀᤠᤱ ᤔᤧᤛᤧᤖᤢ᤹.
LUK 18:33 ᤜᤧᤰᤁᤣᤛᤠᤱ ᤛᤢᤶ ᤕᤧᤴ ᤀᤣᤃᤠᤱ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤗᤥ॥”
LUK 18:34 ᤁᤖ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤂᤧᤱᤜᤠ᤹ᤖᤥᤗᤠᤶ ᤔᤠ᤹ᤖᤧᤀᤠᤱ ᤘᤕᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱ ᤔᤧᤒᤣᤏᤧᤴᤗᤥ॥
LUK 18:35 ᤕᤧᤛᤢ᤺ᤴ ᤕᤧᤖᤡᤜᤥ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤔᤡᤰᤑ᤺ᤶᤒᤠᤎᤡᤰ ᤆᤠᤏᤠ᤺ᤰᤁᤡ ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤕᤢᤅᤧ॥
LUK 18:36 ᤂᤧᤸᤗᤧ ᤁᤢᤒᤣᤛᤠᤱᤏᤢ ᤔᤏᤠᤜᤠ᤹ ᤔᤧᤒᤣ᤺ᤰᤗ ᤔᤧᤒᤳ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤌᤣ᤺ᤴᤏᤧ ᤐᤥ᤺ᤱᤗ ᤐᤵᤐᤣ ᤑᤠ᤹ᤀᤠᤱ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ॥
LUK 18:37 ᤂᤧᤱᤜᤠ᤹ᤖᤧ ᤂᤧᤴ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤴ ᤐᤣ᤺ᤰᤗ ᤐᤳᤗᤥ॥”
LUK 18:38 ᤂᤧᤸᤗᤧ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤕᤧᤛᤢᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ॥”
LUK 18:39 ᤜᤧᤰᤁᤣ᤺ᤸᤗᤧ ᤂᤧᤴ ᤗᤠᤶᤗᤥ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤖᤧ “ᤛᤫᤠ᤺ᤳ ᤕᤢᤅᤧ᤹” ᤔᤧᤔᤧᤳᤋᤢᤖ ᤂᤧᤴ ᤔᤧᤓᤧ᤺ᤰᤋᤢ. ᤁᤖ ᤂᤧᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ” ᤐᤠ᤺ᤳᤋᤢᤖ ᤀ᤺ᤰᤋᤧ॥
LUK 18:40 ᤕᤧᤛᤢ᤺ᤴ ᤂᤧᤵᤔᤥ ᤕᤧᤶᤛᤡᤱᤅᤠᤱ ᤂᤧᤴ ᤆᤠᤃᤧᤏᤠ᤺ᤰᤐᤧᤴ ᤁᤢᤒᤣᤛᤠᤱ ᤔᤧᤍᤠᤖᤢᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴᤏᤠᤱ ᤕᤧᤛᤢᤖᤧ ᤁᤢᤒᤣᤛᤠᤱ ᤋᤩᤧᤀᤠᤱ
LUK 18:41 ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ ᤂᤧᤏᤧ᤹ ᤌᤧᤔᤠ ᤆᤥᤃᤢᤱ ᤐᤡᤏᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤱᤅᤠᤖ॥”
LUK 18:42 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤁᤧᤏᤢᤛᤧᤀᤠᤱ ᤁᤧᤘᤠ᤹ᤖᤥ॥”
LUK 18:43 ᤂᤡᤔᤥ ᤂᤧᤴ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤕᤧᤛᤢᤖᤧ ᤁᤢᤀᤣᤃᤠᤱ ᤌᤠᤛᤡᤱᤗᤥ॥ ᤔᤏᤠᤜᤠ᤹ᤖᤧᤀᤠᤱ ᤂᤧᤴ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥
LUK 19:1 ᤕᤧᤛᤢ᤺ᤴ ᤕᤧᤖᤡᤜᤥ ᤕᤧᤰᤕᤰᤗᤠᤶ ᤐᤥ᤺ᤰᤂᤧᤖ ᤐᤣᤖ ᤐᤳᤇᤧ॥
LUK 19:2 ᤂᤧᤴ ᤕᤧᤰᤕᤰᤁᤥ ᤈᤰᤁᤤ ᤔᤡᤱ ᤁᤧᤘᤠ᤺ᤵᤐᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤋᤢᤶᤀᤣ᤺ᤱᤕᤠᤱ ᤁᤧᤓᤥ᤺ᤱᤒᤠᤎᤡᤰ ᤘᤕᤧ॥
LUK 19:3 ᤕᤧᤛᤢ᤺ᤴ ᤐᤣᤖ ᤐᤳᤇᤧᤸᤗᤧ ᤂᤢᤏᤧ᤹ᤀᤠᤱ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤕᤧᤛᤢᤖᤧ ᤁᤢᤀᤥᤔᤧᤳᤇᤧ ᤐᤣ. ᤁᤖ ᤋᤠᤱᤛᤠ ᤆᤥᤃᤧᤒᤠᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤎᤣ᤺ᤰᤋᤢᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴ॥
LUK 19:4 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤋᤃᤡ ᤐᤣᤀᤠᤱ ᤕᤧᤛᤢᤖᤧ ᤁᤢᤀᤥᤔᤧᤳᤇᤧ ᤗᤠᤶᤔᤡᤸᤗᤧ ᤁᤢᤒᤣᤛᤠᤱᤒᤠ ᤐ᤺ᤳᤇᤣ᤹ᤒᤢᤱᤔᤥ ᤗᤠ᤺ᤛᤧᤀᤠᤱ ᤕᤢᤱᤛᤡᤱ॥
LUK 19:5 ᤕᤧᤛᤢ᤺ᤴ ᤂᤧᤵᤔᤥ ᤁᤧᤖᤧᤸᤗᤧ ᤌᤥ ᤀᤥᤔᤕᤧᤀᤠᤱ ᤔᤧᤳᤋᤢ. “ᤈᤰᤁᤤᤀᤣ. ᤂᤧᤏᤧ᤹ ᤜᤠᤖᤠ ᤌᤩᤧ᤹ᤀᤥ॥ ᤀᤠᤀᤡᤴ ᤀᤡᤱᤃᤠ᤹ ᤁᤧᤜᤡᤶᤔᤥ ᤏᤧᤀᤠᤒᤠᤖᤥ॥”
LUK 19:6 ᤜᤧᤰᤁᤣ᤺ᤸᤗᤧ ᤈᤰᤁᤤᤴ ᤕᤥ ᤌᤩᤧᤀᤠᤱ ᤁᤢᤛᤡᤖᤠ᤹ ᤐᤎᤠᤱᤌᤠᤅᤧᤖ ᤕᤧᤛᤢ᤺ᤴ ᤁᤢᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤐᤡᤖᤢ॥
LUK 19:7 ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤗᤠᤕᤥᤒᤠᤸᤗᤧ ᤁᤢᤜᤡᤶᤔᤥ ᤕᤠᤱᤎᤥ᤺ᤰᤛᤧ ᤐᤣᤖᤥ ᤑᤠ᤹ᤀᤠᤱ ᤁᤠᤏᤠᤰᤏᤠᤰ ᤔᤧᤗ᤹ᤖᤧᤖᤥ॥
LUK 19:8 ᤕᤠᤱᤛᤡ ᤈᤰᤁᤤ᤺ᤴ ᤕᤧᤶᤛᤡᤱᤅᤠᤱ ᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤁᤳᤋᤢᤱᤒᤠ ᤕᤠᤱᤛᤠᤁᤢᤴᤎᤣ᤺ᤴ ᤁᤢᤓᤪᤧ᤺ᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤜᤠ᤺ᤳᤋᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤀᤡᤱᤗᤧᤰ ᤔᤧᤳᤋᤢᤱᤛᤡᤱᤅᤠᤱ ᤕᤖᤡᤰ ᤕᤠᤱ ᤑᤥ᤺ᤰᤂᤢᤱᤛᤡᤱᤅᤠᤱ ᤘᤠ᤹ᤀᤠ. ᤂᤧᤱᤜᤠ᤹ ᤀᤡᤱᤃᤠ᤹ ᤗᤡᤛᤡ ᤗᤧᤱ ᤌᤠᤖᤡᤰ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ॥”
LUK 19:9 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢ. “ᤀᤠᤀᤡᤴ ᤁᤴ ᤜᤡᤶᤛᤕᤱᤅᤡᤸᤗᤧ ᤛᤧᤴᤗᤵ ᤂᤥ᤺ᤛᤢᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤈᤰᤁᤤ᤺ᤴᤏᤠᤱ ᤀᤒᤪᤠᤜᤠᤔᤖᤧᤴᤏᤣ ᤁᤢᤔᤢ᤹ᤀᤡᤍᤠᤱᤛᤠᤖᤥ॥
LUK 19:10 ᤔᤧᤴᤇᤠᤶᤛᤠ᤺ᤴ ᤗᤠᤕᤥᤀᤥ ᤁᤧᤔᤠᤒᤠᤜᤠ᤹ ᤁᤥ᤺ᤵᤔᤠ ᤏᤢ ᤜᤡᤱᤔᤠᤛᤡ ᤑᤠ᤹ᤀᤠᤱ ᤋᤩᤧᤒᤠᤖᤥ॥”
LUK 19:11 ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤖᤢᤛᤗᤧᤔ ᤏᤡ᤺ᤳᤋᤠᤱ ᤔᤧᤃᤧᤖᤧᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤁᤢᤓᤠᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤔᤥ ᤋᤠ᤺ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥
LUK 19:12 “ᤜᤠᤱᤃᤧᤶᤒᤠᤛᤠ᤺ᤎᤡᤰ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤜᤠᤱ ᤆᤥ᤺ᤰᤔᤠ ᤕᤢᤰ ᤂᤥ᤺ᤔᤠ ᤑᤠ᤹ᤀᤠᤱ ᤗᤠᤶᤍᤡ᤺ᤰ ᤆᤥᤃᤧᤖᤥ॥
LUK 19:13 ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤌᤡᤒᤥ᤺ᤱ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤳᤇᤠ ᤗᤳᤇᤠ ᤛᤠᤶᤔᤩᤠᤱ ᤕᤠᤱ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤁᤸᤗᤧ ᤗᤧᤱᤜᤱ ᤆᤥᤃᤧᤶᤔᤧ᤹ᤀᤥ॥’”
LUK 19:14 ᤁᤖ ᤁᤢᤕᤰᤕᤢᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤈᤡ᤺ᤳᤋᤢᤀᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ “ᤁᤴ ᤔᤏᤠ᤺ᤸᤗᤧ ᤀᤠᤏᤡᤃᤧ ᤛᤶᤍᤠᤱ ᤜᤠᤱ ᤆᤥᤃᤢᤒᤠ ᤛᤡᤖᤠ᤹ ᤔᤧᤎᤠᤱᤅᤡᤴᤗᤥ” ᤔᤧᤒᤠ᤺ᤳᤋᤢᤖ ᤀᤡᤱᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ॥
LUK 19:15 ᤜᤧᤰᤁᤩᤠᤱ ᤂᤧᤸᤗᤧ ᤜᤠᤱᤕᤢᤰ ᤂᤥ᤺ᤛᤢᤀᤠᤱ ᤏᤢ᤺ᤰᤂᤧ ᤋᤩᤧᤖᤥ॥ ᤀᤠᤸᤗ ᤂᤢᤏᤧ᤹ ᤕᤠᤱ ᤐᤡᤖᤢᤛᤡᤒᤠ ᤁᤢᤛᤣᤘᤠᤖᤥᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤗᤧᤱᤜᤱ ᤁᤧᤈᤥᤃᤢᤶᤔᤠᤱ ᤀᤠᤰᤂᤧᤶᤔᤩᤠᤰ ᤕᤠᤱ ᤁᤧᤎᤃᤢᤶ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥
LUK 19:16 ᤌᤡᤰᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤌᤡᤒᤥ᤺ᤱ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥”
LUK 19:17 ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢ. “ᤏᤢ᤺ᤖᤧᤖᤥ ᤀᤠᤛᤣᤘᤠᤖᤥᤒᤣ. ᤛᤠ᤹ᤖᤡᤰ ᤏᤢ᤺ᤒᤠ ᤁᤧᤈᤥᤃᤢᤖᤥ᥄ ᤂᤧᤏᤧ᤹ ᤌᤡᤒᤥ᤺ᤱ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤆᤢᤰᤛᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧᤖᤥ॥”
LUK 19:18 ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤧᤕᤠᤱᤎᤡᤰᤁᤡᤸᤗᤧ ᤘᤣ᤹ ᤅᤠᤛᤡ ᤕᤠᤱ ᤌᤃᤢᤱᤅᤠᤱ ᤘᤠ᤹ᤖᤥ॥”
LUK 19:19 ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤅᤠᤛᤡ ᤕᤧᤰᤕᤰ ᤛᤶᤍᤠᤱ ᤛᤢᤜᤠᤱᤃᤧᤶᤒᤠ ᤁᤧᤒᤥ᤺ᤱᤗᤥ॥”
LUK 19:20 ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤕᤠᤱᤎᤡᤰᤁᤡᤴ ᤒᤠ ᤁᤵᤔᤥ ᤘᤠ᤹ᤖᤥ. ᤁᤧᤕᤠᤱᤅᤡᤴ ᤀᤡᤱᤃᤠ᤹ ᤋᤣ᤺ᤳᤋᤥ ᤛᤢᤅᤢᤱ ᤆᤡᤰᤂᤢᤱᤅᤠᤱ ᤁᤳᤋᤢᤱᤗᤥ॥
LUK 19:21 ᤂᤧᤏᤧ᤹ᤏᤢ ᤀᤡᤱᤃᤠ᤹ ᤁᤡᤛᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤈᤡ᤺ᤵᤐᤠ ᤁᤧᤈᤥ᤺ᤰ॥ ᤂᤧᤏᤧ᤹ ᤁᤧᤶᤒᤡᤖᤢᤴᤛᤡᤴᤒᤠᤴ ᤁᤧᤏᤠ᤺ᤰᤋᤢᤛᤡ᤹. ᤁᤧᤴᤍᤣ᤺ᤛᤢᤶᤒᤠᤴ ᤁᤧᤛᤢᤵᤛᤢ᤹ᤖᤥ॥”
LUK 19:22 ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤂᤧᤴ ᤛᤣᤘᤠᤖᤥᤒᤠᤴ ᤔᤧᤳᤋᤢ. “ᤂᤧᤏᤧ᤹ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤣ᥄ ᤀᤠᤸᤗ ᤒᤠ ᤂᤧᤏᤧ᤹ ᤁᤧᤒᤠ᤺ᤴᤏᤥᤗᤠᤶ ᤀᤠᤵᤋᤡᤰ ᤁᤢ᤺ᤳᤏᤧ᤹ᤖᤥ॥ ᤀᤡᤱᤃᤠ᤹ ᤌᤣ ᤔᤧᤒᤡᤖᤢᤱᤅᤡᤴ ᤒᤠ ᤂᤧᤴ ᤏᤠ᤺ᤰᤋᤢᤱ. ᤌᤧᤔᤠ ᤔᤧᤍᤣ᤺ᤛᤢᤱᤅᤡᤴ ᤂᤧᤴ ᤛᤢᤵᤛᤢᤱ ᤑᤠ᤹ᤀᤠᤱ ᤂᤧᤏᤧ᤹ᤀᤣ ᤏᤡᤱᤘᤠ᤹ ᤁᤧᤃᤳᤋᤢᤖᤥ॥
LUK 19:23 ᤜᤧᤰᤁᤣ᤺ᤸᤗᤧ ᤂᤧᤴ ᤀᤠᤕᤠᤱᤅᤡᤴ ᤌᤣᤀᤠᤱ ᤛᤡᤱᤏᤠ᤺ᤳ ᤁᤧᤃᤧᤒᤠᤜᤠ᤹ᤖᤥ ᤁᤧᤴᤕᤢᤰᤂᤢᤴ᥅ ᤀᤡᤱᤃᤠ᤹ ᤋᤩᤠᤱᤅᤡᤸᤗᤧ ᤀᤠᤕᤠᤱᤅᤡᤸᤗᤧ ᤁᤢᤛ᤻ᤛᤠᤃ ᤂᤥ᤺ᤛᤢᤱᤒᤠ ᤘᤕᤧ॥”
LUK 19:24 ᤂᤧᤴ ᤜᤠᤱᤅᤡᤸᤗᤧ ᤂᤧᤵᤔᤥ ᤁᤧᤕᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤂᤧᤸᤗᤧ ᤁᤳᤋᤢᤒᤠ ᤕᤠᤱᤀᤡᤳᤇᤡ᤺ᤴ ᤏᤠᤵᤋᤧᤶᤔᤧ᤹ᤀᤠᤱ ᤌᤡᤒᤥ᤺ᤱ ᤕᤠᤱᤀᤡᤳᤇᤡ ᤁᤧᤃᤵᤐᤧᤴ ᤐᤡᤖᤧᤶᤔᤧ᤹ᤀᤥ॥”
LUK 19:25 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤸᤗᤧᤃ ᤀᤠᤴᤍᤧ᤺ᤴᤇᤠ ᤌᤡᤒᤥ᤺ᤱ ᤕᤠᤱ ᤁᤳᤋᤢᤱᤃ᥄”
LUK 19:26 ᤜᤧᤰᤁᤣ᤺ᤸᤗᤧ ᤜᤠᤱᤅᤡᤸᤗᤧ ᤏᤥᤃᤵ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹ᤀᤥ. ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥ᤺ᤛᤢ᤹ᤖᤥ. ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤏᤠᤵᤗᤥ॥
LUK 19:27 ᤀᤠᤸᤗ ᤀᤡᤱᤃᤠ᤹ ᤂᤢᤏᤡ᤹ ᤛᤶᤍᤠᤱ ᤜᤠᤱ ᤆᤥᤃᤢᤱᤏᤡ ᤑᤠ᤹ᤀᤠᤱ ᤂᤢᤏᤡ᤹ ᤛᤡᤖᤠ᤹ ᤔᤧᤴᤎᤠᤱᤔᤏᤠᤒᤠ ᤀᤠᤏᤡᤱᤔᤡᤜᤠ᤹ ᤁᤵᤔᤥ ᤋᤠᤖᤧᤶᤛᤡᤶᤔᤧ᤹ᤀᤠᤱ ᤀᤡᤱᤃᤠ᤹ ᤀᤠᤍᤃᤡᤀᤣ ᤛᤧᤖᤧᤶᤛᤡᤶᤔᤧ᤹ᤀᤥ॥”
LUK 19:28 ᤜᤧᤰᤁᤩᤠᤱ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤖᤢᤛᤗᤧᤔ ᤗᤧᤵᤔᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤃᤡ ᤌᤠᤛᤡᤱᤗᤥ॥
LUK 19:29 ᤜᤧᤰᤁᤩᤠᤱ ᤂᤢᤏᤧ᤹ ᤒᤧᤌᤑᤠᤃᤣ ᤏᤢ ᤒᤧᤌᤠᤏᤡ ᤐᤠᤱᤈᤢᤶᤜᤠ᤹ᤖᤧ ᤏᤡ᤺ᤳᤋᤠᤱ ᤁᤧᤖᤧᤸᤗᤧ ᤈᤤᤋᤢᤏ ᤁᤥ᤺ᤰᤔᤠᤀᤥ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ.
LUK 19:30 “ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹॥ ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤕᤢᤰᤁᤣ ᤁᤧᤘᤠ᤹ᤒᤠ ᤀᤍᤱᤛᤠᤎᤡᤰ ᤀᤡᤔᤧᤄᤣ᤺ᤰᤂᤢᤀᤠᤱ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤁᤳᤏᤠ ᤑᤧᤳᤋᤧᤳᤇᤧ᤹॥
LUK 19:31 ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠ᤺ᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤱᤃ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤳᤋᤧᤛᤧ᤹ᤀᤥ॥”
LUK 19:32 ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤛᤧᤰᤂᤠᤀᤣ ᤀᤍᤱᤛᤠ᤺ᤴ ᤏᤡ᤺ᤛᤧᤳᤇᤢ॥
LUK 19:33 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤧᤖᤧᤳᤇᤢᤖ ᤐᤳᤇᤧᤳᤇᤡᤸᤗᤧ ᤂᤧᤵᤔᤥ ᤁᤢᤴᤍᤠᤱᤒᤠᤜᤠ᤹ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤌᤣᤀᤠᤱ ᤁᤴ ᤀᤍᤱᤛᤠ᤺ᤴ ᤁᤧᤗᤧᤳᤇᤢᤒᤠᤒᤣ᥅”
LUK 19:34 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤁᤱᤃ ᤍᤠᤱᤒᤠᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹ᤖᤥ॥”
LUK 19:35 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤀᤍᤱᤛᤠ᤺ᤴ ᤕᤧᤛᤢᤖᤥ ᤋᤠᤖᤧᤳᤇᤢᤀᤠᤱ ᤀᤍᤱᤛᤠ᤺ᤸᤗᤧ ᤁᤢᤀᤣ᤺ᤰᤁᤥ ᤂᤢᤏᤡ᤹ ᤋᤣ᤺ᤳᤜᤠ᤹ ᤔᤧᤓᤧᤛᤢ. ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤴ ᤛᤶᤍᤠᤱ ᤔᤧᤕᤢᤰᤂᤢᤖᤥ॥
LUK 19:36 ᤂᤧᤴ ᤕᤢᤰᤋᤢᤀᤠᤱ ᤐᤣ᤺ᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤳᤜᤠ᤹ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤖᤥ॥
LUK 19:37 ᤜᤧᤰᤁᤩᤠᤱ ᤕᤧᤛᤢ᤺ᤴ ᤈᤤᤋᤢᤏ ᤁᤥ᤺ᤰᤔᤠᤀᤥᤗᤠᤶ ᤛᤱᤔᤠᤱ ᤌᤠ᤺ᤔᤠ ᤁᤧᤒᤥ᤺ᤱᤒᤠ ᤋᤧᤴᤏᤥ ᤁᤧᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡ᤺ᤛᤢᤒᤠᤴ ᤔᤧᤀᤡ᤺ᤳᤋᤢᤀᤠᤱ ᤔᤧᤛ᤺ᤳᤋᤧᤖ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤔᤧᤜᤣ᤺ᤰᤋᤢ–
LUK 19:38 “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠ ᤜᤠᤱᤅᤡᤴ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤖᤥ॥ ᤛᤠᤱᤃᤪᤠᤶᤐᤣᤍᤠᤱᤅᤥ ᤛᤏᤠᤖᤢᤱ ᤐᤥ᤺ᤱᤗᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ॥”
LUK 19:39 ᤁᤖ ᤂᤧᤵᤔᤥ ᤔᤏᤠᤗᤢᤶᤔᤥ ᤁᤧᤘᤠ᤹ᤒᤠ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤜᤧᤰᤁᤣ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤑᤧ᤺ᤰᤋᤧᤛᤧ᤹ᤀᤥ॥”
LUK 19:40 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤧᤵᤛᤧᤶᤔᤧ᤹ᤀᤥ. ᤂᤧᤱᤜᤠ᤹ ᤛᤫᤠ᤺ᤳ ᤔᤧᤕᤢᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤔᤧᤛ᤺ᤳᤋᤠᤱ ᤔᤧᤒᤠ᤺ᤳ ᤔᤧᤗ᤺ᤴᤗᤥ॥”
LUK 19:41 ᤁᤖ ᤕᤧᤛᤢ᤺ᤴ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤀᤥᤔᤧᤳᤋᤢᤀᤠᤱ ᤜᤠᤒᤧ. ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢ.
LUK 19:42 “ᤀᤠᤸᤗ ᤂᤡᤏᤡ᤹ᤃ ᤛᤏᤠᤖᤢᤱ ᤂᤥ᤺ᤔᤠ ᤔᤠᤖᤠᤶᤔᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤡᤸᤗᤧ ᤐᤥ᤺ᤰᤂᤧᤒᤠᤖᤥ. ᤁᤖ ᤁᤴ ᤁᤧᤖᤧᤰᤃ ᤁᤧᤔᤡᤰᤛᤠᤀᤥᤗᤠᤶ ᤌᤣ᤺ᤰᤛᤡᤱᤒᤣᤀᤠᤱ ᤘᤠ᤹ᤖᤥ॥
LUK 19:43 ᤀᤠᤸᤗ ᤁᤧᤏᤡᤱᤔᤡᤜᤠ᤹ᤖᤧ ᤂᤧᤏᤧ᤹ ᤁᤠᤰ ᤐᤡᤛᤠᤱᤗᤠᤶ ᤁᤧᤶᤃᤵᤐᤠᤱ ᤂᤡᤖᤡ ᤁᤧᤶᤎᤣ᤺ᤰᤁᤠᤱ ᤆᤡᤜᤢ᤹ ᤁᤧᤶᤜᤢ᤹ᤒᤠ ᤕᤧᤶ ᤋᤠᤖ ᤐᤳᤗᤥ॥
LUK 19:44 ᤂᤧᤏᤧ᤹ ᤁᤧᤶᤕ ᤁᤧᤶᤗᤢ᤺ᤴᤏᤠᤱ ᤁᤧᤛ᤻ᤛᤠ᤺ᤜᤠ᤹ᤏᤢ ᤂᤠᤶᤔᤥ ᤁᤧᤶᤍᤱᤗᤥ॥ ᤌᤡᤰ ᤗᤢᤱ ᤛᤶᤍᤠᤱ ᤘᤣ᤹ ᤗᤢᤱᤅᤡᤴᤏᤣ ᤐᤰᤔᤧᤴᤎᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ ᤁᤧᤛᤧ᤺ᤵᤛᤧ ᤕᤧᤒᤠ ᤛᤢᤕᤧᤶᤔᤡᤴ ᤁᤧᤏᤠ᤹ᤖᤢᤖᤥ॥”
LUK 19:45 ᤜᤧᤰᤁᤩᤠᤱ ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤗᤠ᤺ᤛᤧᤀᤠᤱ ᤂᤧᤵᤔᤥ ᤗᤧᤱᤜᤱᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥ᤺ᤱ.’ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ᥄”
LUK 19:47 ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖᤥ॥ ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ.
LUK 19:48 ᤁᤖ ᤀᤠᤵᤋᤡᤰ ᤁᤢ᤺ᤵᤔᤠ ᤐᤠ᤺ᤴ ᤌᤣᤀᤠᤱ ᤂᤧᤱᤜᤠ᤹ᤖᤧ ᤔᤧᤱᤄᤥ᤺ᤛᤢᤴ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤂᤢᤏᤧ᤹ ᤜᤢ᤹ᤖᤢᤛᤡᤒᤠ ᤏᤡᤛᤠᤶᤜᤠ᤹ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤖ ᤔᤧᤄᤧᤵᤛᤢᤖᤥ॥
LUK 20:1 ᤌᤡᤰ ᤕᤧᤴ ᤕᤧᤛᤢᤖᤧ ᤔᤠᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖ ᤛᤢᤏᤠᤀᤡᤱ ᤀᤡᤱᤓᤴ ᤆᤥᤃᤢᤖ ᤕᤠᤃᤧ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤍᤩᤧᤀᤠᤱ
LUK 20:2 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢᤖ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹᥅ ᤁᤴ ᤕᤢᤰᤁᤡᤴ ᤜᤠ᤺ᤳᤗᤧ ᤁᤧᤒᤡᤖᤧ᥅ ᤀᤠᤔᤧᤳᤋᤧ᤹॥”
LUK 20:3 ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤗᤳᤇᤠ ᤛᤣ᤺ᤴᤗᤠᤵᤌᤡᤰ ᤛᤣ᤺ᤴᤍᤥ᤺ᤏᤡᤱᤗᤥ॥
LUK 20:4 ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤔᤠ ᤁᤢᤕᤢᤰᤁᤡᤴ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤒᤡ. ᤀᤡ ᤔᤏᤠᤗᤠᤶᤒᤡ᥅ ᤀᤠᤔᤧᤳᤋᤧᤶᤔᤧ᤹᥄”
LUK 20:5 ᤂᤧᤱᤜᤠ᤹ ᤂᤢᤏᤡ᤹ ᤗᤢᤶᤔᤥ ᤐᤠ᤺ᤴ ᤔᤧᤎᤰᤋᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ‘ᤏᤡᤱᤘᤠ᤹ᤑᤢᤔᤠᤱᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤌᤣᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤛᤣ᤺ᤴᤀᤠᤗᤠᤵ॥
LUK 20:6 ᤁᤖ ‘ᤔᤏᤠᤜᤠ᤹ᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤔᤏᤠᤜᤠ᤹ᤖᤧ ᤀᤠᤏᤡ᤹ ᤗᤢᤱᤅᤡᤸᤗᤧ ᤀᤠᤶᤒ᤺ᤳ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤢᤜᤢᤴᤏᤠ᤺ᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤏᤡᤛ᤻ᤛᤣᤀᤣ ᤔᤧᤀᤡ᤺ᤳᤋᤢ᤹ᤖᤥ॥”
LUK 20:7 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴᤗᤥ॥”
LUK 20:8 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤂᤧᤴ ᤀᤡᤱᤃᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥”
LUK 20:9 ᤕᤧᤛᤢᤖᤧ ᤔᤏᤠᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤔᤏᤠᤎᤡᤰᤗᤧ ᤗᤳᤇᤠ ᤀᤡᤰᤁᤥ ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤢᤀᤠᤱ ᤁᤢᤓᤪᤧ᤺ᤱ ᤗᤰᤁᤥ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤀᤡᤰᤔᤛᤠᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤕᤖᤡᤰ ᤕᤧᤶ ᤌᤠᤖᤡᤰ ᤘᤣ᤹ ᤗᤠᤈᤣ᤹ᤀᤥ ᤐᤣ॥
LUK 20:10 ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤋᤩᤧ᤺ᤸᤗᤧ ᤁᤢᤗᤰ ᤗᤠ᤺ᤛᤧ ᤁᤢᤛᤣᤘᤠᤖᤥᤒᤠᤎᤡᤰ ᤀᤡᤰᤔ᤺ᤒᤠᤜᤠ᤹ᤖᤥ ᤐᤠᤱᤄᤢᤖᤥ॥ ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤂᤢᤏᤧ᤹ᤃ ᤔᤧᤜᤡᤵᤋᤢᤀᤠᤱ ᤌᤣᤀᤠᤱ ᤔᤧᤶᤒᤡᤀᤣ ᤜᤠᤒᤠ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥
LUK 20:11 ᤜᤧᤰᤁᤩᤠᤱ ᤕᤠᤶᤔᤥ ᤏᤡᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤴ ᤗᤰ ᤋᤠ᤺ᤰᤛᤧ ᤐᤠᤱᤄᤢ. ᤁᤖ ᤂᤧᤴᤏᤠᤱ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤔᤧᤜᤡᤵᤋᤢᤖ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢᤀᤠᤱ ᤁᤢᤄᤠᤗᤧᤶ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥
LUK 20:12 ᤕᤠᤶᤔᤥ ᤀᤠᤸᤗᤛᤠᤱ ᤛᤢᤶᤛᤡᤃᤣ᤺ᤰᤐᤠ ᤁᤢᤛᤣᤘᤠᤖᤥᤒᤠᤴ ᤗᤰ ᤋᤠ᤺ᤰᤛᤧ ᤐᤠᤱᤄᤢ. ᤁᤖ ᤂᤧᤴᤏᤠᤱ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤔᤧᤄᤠ᤺ᤴᤍᤢᤀᤠᤱ ᤔᤧᤏᤠ᤺ᤳᤋᤢ ᤔᤧᤍᤣ᤺ᤛᤢᤖᤥ॥
LUK 20:13 ᤀᤠᤸᤗ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤴ ᤏᤡᤱᤘᤠ᤹ ᤀᤡ᤺ᤳᤇᤡᤱ. ‘ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠᤒᤣ᥅ ᤀᤠᤸᤗ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛ᤻ᤛᤠ᤺ᤴ ᤐᤠᤱᤄᤢᤱ॥ ᤂᤢᤏᤧ᤹ ᤔᤧᤏᤡ᤺ᤛᤢᤀᤠᤱᤃ ᤁᤢᤏᤠ ᤔᤧᤛᤠ᤹ᤖᤢᤒᤡᤗᤠ॥’
LUK 20:14 ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤂᤧᤴ ᤁᤢᤛ᤻ᤛᤠ᤺ᤴ ᤔᤧᤏᤡ᤺ᤛᤢᤀᤠᤱ ᤀᤡᤱᤔᤧᤍᤱᤄᤢ. ‘ᤁᤴ ᤁᤢᤶᤒᤠᤖᤧ ᤁᤢᤗᤰ ᤁᤧᤄᤥ᤺ᤒᤠᤖᤥ. ᤁᤴ ᤛᤧᤖᤢᤶᤔᤠᤱ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤜᤢᤰᤁᤠᤵᤐᤠᤛᤡᤖᤥ॥’
LUK 20:15 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤁᤢᤛ᤻ᤛᤠ᤺ᤴ ᤆᤧᤸᤗᤧᤰᤛᤣ᤹ ᤀᤡᤰᤁᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤔᤧᤛᤧᤖᤢᤖᤥ॥” ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤸᤗ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤀᤡᤰᤔᤛᤠᤒᤠᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ᤹ᤒᤣ᥅
LUK 20:16 ᤂᤢᤏᤧ᤹ ᤋᤠᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤛᤧᤖᤢᤛᤡᤀᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤘᤣ᤹ ᤔᤏᤠᤜᤠ᤹ ᤐᤡᤖᤢᤛᤡ᤹ᤖᤥ॥” ᤔᤏᤠᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤔᤧᤒᤠ᤺ᤳᤋᤢ. “ᤀᤠᤵᤑᤠᤸᤗᤧᤀᤠᤱ ᤀᤰᤂᤣ ᤔᤧᤒᤥ᤺ᤱᤅᤡᤸᤗᤖᤥ॥”
LUK 20:17 ᤕᤧᤛᤢᤖᤧ ᤂᤧᤱᤜᤠ᤹ ᤀᤍᤰᤋᤰᤁᤠᤱ ᤀᤥᤔᤧᤳᤋᤢᤛᤡᤖ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤁᤴ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠᤴ ᤌᤧᤔᤠᤒᤣ᥅ ‘ᤗᤢᤱ ᤁᤧᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ ᤁᤢᤶᤔᤠᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥’
LUK 20:18 ᤀᤠᤳᤋᤡᤴᤜᤠ᤹ ᤂᤧᤴ ᤗᤢᤱ ᤛᤶᤍᤠᤱ ᤔᤰᤔᤧᤎᤠ᤺. ᤂᤧᤱᤜᤠ᤹ ᤔᤧᤓᤰ ᤔᤧᤛᤡ᤺ᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤛᤶᤍᤠᤱ ᤂᤧᤴ ᤗᤢᤱᤅᤡᤴ ᤔᤰᤌᤠ. ᤂᤧᤴ ᤑᤧᤰ ᤛᤡ᤺ᤖᤥ॥”
LUK 20:19 ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤒᤠ ᤂᤧᤵᤔᤥᤀᤣ ᤋᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤂᤧᤍᤠ᤹ᤀᤥ ᤑᤧᤴ ᤀᤡᤰᤔᤛᤠᤒᤠᤜᤠ᤹ᤏᤢ ᤋᤱᤄᤢᤛᤡᤒᤠᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢ. ᤁᤖ ᤔᤏᤠᤜᤠ᤹ ᤔᤧᤃᤡᤖᤢᤛᤡ॥
LUK 20:20 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤋᤧᤶᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤔᤧᤜᤣ᤺ᤰᤋᤢ॥ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤕᤠᤱ ᤔᤧᤒᤡᤖᤢᤛᤡᤀᤠᤱ ᤛᤠᤶᤕᤥᤏᤡᤒᤠ ᤔᤧᤗᤧᤱᤛᤡᤱᤅᤠᤱ ᤕᤧᤛᤢᤖᤧ ᤁᤢᤎᤥ᤺ᤶᤛᤧ ᤔᤧᤒᤠᤱᤄᤢᤛᤡ॥ ᤂᤧᤱᤜᤠ᤹ᤖᤧ ᤁᤢᤒᤠ᤺ᤴᤏᤥ ᤋᤧᤶᤔᤠᤀᤠᤱ ᤖᤥᤔᤡ ᤕᤢᤰᤛᤠᤒᤠᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ ᤐᤡᤔᤠᤛᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥
LUK 20:21 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤒᤠ᤺ᤴᤏᤥ ᤌᤠ᤺ᤔᤠ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤛᤧᤰᤂᤠᤛᤠᤱ ᤂᤧᤏᤧ᤹ᤃ ᤁᤢᤍᤥ᤺ᤵᤔᤠ ᤐᤠ᤺ᤴᤗᤰ ᤁᤧᤒᤠ᤺ᤳᤋᤢ᤹. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠᤖᤰ ᤁᤧᤜᤢ᤹ᤖᤢᤛᤡ᤹॥ ᤂᤧᤏᤧ᤹ᤃ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤁᤧᤴᤇᤧᤴᤍᤢᤴᤇᤡᤴ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤛᤧᤰᤂᤠᤀᤣ ᤁᤧᤜᤢ᤹ᤖᤢᤛᤡᤖᤥ॥
LUK 20:22 ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤔᤧᤳᤋᤧ᤹–ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤜᤢᤱᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤀᤠᤶᤒᤡᤏᤧᤴᤒᤡ᥅”
LUK 20:23 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ.
LUK 20:24 “ᤀᤡᤱᤃᤠ᤹ ᤕᤠᤱᤀᤡᤳᤇᤡ᤺ᤴ ᤀᤥᤛᤣ᤺ᤴᤀᤠᤎᤠᤰᤋᤧᤶᤔᤧ᤹॥ ᤁᤵᤔᤥ ᤜᤠ᤺ᤳᤗᤧ ᤁᤢᤀᤡᤳᤇᤠᤵ ᤏᤢ ᤁᤢᤒᤠ᤺ᤴᤛᤠᤵ ᤐᤵᤐᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤈᤖᤧᤸᤗᤧᤴ ᤐᤳᤗᤥ॥”
LUK 20:25 ᤕᤧᤛᤢᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤛᤡᤈᤖᤗᤧ ᤁᤢᤒᤠ᤺ᤴᤜᤠ᤹ ᤛᤡᤈᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤡᤖᤧᤶᤔᤧ᤹ᤀᤥ॥”
LUK 20:26 ᤔᤏᤠ ᤋᤃᤡ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤋᤧᤶᤔᤠ ᤔᤧᤴᤇᤢᤰᤋᤢᤴ॥ ᤕᤧᤛᤢᤖᤧ ᤐᤡᤖᤢᤛᤡᤒᤠ ᤏᤥᤃᤵᤐᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤛᤫᤠ᤺ᤳ ᤔᤧᤕᤢᤅᤧ॥
LUK 20:27 ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤜᤥ᤺ᤵ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤢᤓᤠ ᤛᤍᤢᤁᤡᤜᤠ᤹ ᤕᤧᤛᤢᤖᤥ ᤔᤧᤍᤩᤧᤀᤠᤱ
LUK 20:28 ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤔᤥᤛᤠᤖᤧᤃ ᤀᤰᤂᤣᤗ᤹ᤖᤡᤰ ᤛᤠᤵᤋᤢ ᤀᤠᤒᤡᤖᤧᤀᤠᤱ ᤐᤳ–‘ᤀᤠᤳᤋᤡᤸᤗᤧ ᤁᤢᤶᤓᤢ᤹ᤀᤡᤴ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤡ᤹᤺. ᤂᤧᤸᤗᤧ ᤁᤢᤴᤛᤠ᤹ᤖᤧ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣᤔᤠᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥ᤺ᤱ॥ ᤜᤧᤰᤁᤩᤠᤱ ᤁᤢᤶᤓᤢ᤹ᤖᤧ ᤁᤢᤗᤠᤃᤡ ᤛᤠᤃᤵᤔᤠ ᤐᤥ᤺ᤱᤗᤥ॥’
LUK 20:29 ᤀᤠᤸᤗ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤕᤧ॥ ᤋᤢᤶᤒᤠᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤩᤧᤖᤥ॥
LUK 20:30 ᤜᤧᤰᤁᤣᤗ᤹ᤖᤡᤰ ᤛᤖᤢᤶᤒᤠᤴ ᤏᤢ ᤕᤠᤱᤛᤖᤢᤶᤒᤠᤸᤗᤧᤀᤠᤱ ᤂᤢᤴᤇᤡ᤹ ᤏᤧ᤹ᤍᤪᤣᤔᤠᤴᤏᤢ ᤔᤣ᤺ᤰᤂᤡᤶ ᤆᤥᤃᤧᤳᤇᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤧᤰᤁᤣᤀᤣ ᤁᤧᤖᤧᤰ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤏᤧ᤹ᤍᤪᤣᤔᤠᤴᤏᤢ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤛᤠᤔᤧᤴᤘᤠ᤹ᤀᤣ ᤔᤧᤛᤩᤧᤖᤥ॥
LUK 20:32 ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧ᤹ᤍᤪᤣᤔᤠᤴᤏᤠᤱ ᤛᤩᤧᤖᤥ॥
LUK 20:33 ᤀᤠᤸᤗ ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤀᤠᤳᤋᤡᤸᤗᤧ ᤁᤢᤔᤣ᤺ᤳ ᤐᤥ᤺ᤱᤒᤠᤒᤣ᥅ ᤂᤧᤴᤏᤢᤃ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤣ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤔᤧᤘᤕᤧ॥”
LUK 20:34 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤁᤵᤔᤥᤖᤰ ᤔᤣ᤺ᤰᤂᤡᤶ ᤔᤧᤈᤥ᤺ᤰᤗᤥ॥
LUK 20:35 ᤁᤖ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤕᤧᤶᤔᤥᤃ ᤜᤧᤰᤁᤣ ᤔᤧᤒᤥ᤺ᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤗᤠ᤹ᤖᤢᤛᤡᤒᤠ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ॥
LUK 20:36 ᤂᤧᤱᤜᤠ᤹ᤃ ᤕᤠᤶᤔᤥ ᤔᤧᤴᤇᤡ᤺ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤗᤥ॥ ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ॥
LUK 20:37 ᤜᤧᤰᤁᤣᤗ᤹ᤖᤡᤰ ᤁᤧᤛᤡ᤺ᤒᤠᤜᤠ᤹ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠᤀᤥᤒᤠ ᤜᤡᤴᤍᤥ᤺ᤰᤁᤥ ᤔᤥᤛᤠᤖᤧ ᤀᤥᤛᤣ᤺ᤴᤀᤠᤎᤠᤰᤗᤥ॥ ᤔᤥᤛᤠᤖᤧ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤜᤘᤣ ᤍᤠᤱᤒᤠᤀᤣ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥
LUK 20:38 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤜᤠ᤹ᤖᤧᤴ ᤔᤧ᤺ᤴ. ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡᤃ ᤁᤧᤖᤧᤰ ᤁᤢᤜᤡᤱᤘᤧᤳᤋᤣ ᤔᤧᤘᤠ᤹ᤖᤥ॥”
LUK 20:39 ᤜᤧᤰᤁᤩᤠᤱ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤛᤠ᤹ᤖᤡᤰ ᤏᤢ᤺ᤖᤡᤰᤁᤠᤱ ᤕᤠᤵᤔᤡ ᤁᤧᤔᤧᤳᤋᤧᤖᤥ॥”
LUK 20:40 ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠ᤺ᤴ ᤛᤣ᤺ᤴᤍᤥ᤺ᤔᤠ ᤀᤠ᤺ᤴᤇᤡᤱᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥
LUK 20:41 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ ᤑᤠ᤹ᤀᤠᤱ ᤔᤧᤔᤧᤳᤋᤢᤒᤠᤒᤣ᥅”
LUK 20:42 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶᤔᤥ ᤍᤠᤀᤢᤍᤖᤧ ᤀᤠᤒᤠᤅᤣ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “ᤕᤜᤘᤣ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤠᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. ‘ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤀᤡᤱᤃᤠ᤹ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤂᤧᤏᤧ᤹ ᤕᤢᤅᤧ᤹ᤀᤥ॥’
LUK 20:44 ᤍᤠᤀᤢᤍ ᤜᤠᤱᤅᤡᤸᤗᤧᤀᤣ ᤂᤢᤏᤧ᤹ ᤀᤠᤍᤠᤱᤒᤣ ᤗ᤹ᤖᤡᤰ ᤔᤧᤳᤋᤢᤏᤧ ᤑᤠ᤹ᤃᤪ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤍᤠᤀᤢᤍᤖᤧ ᤁᤢᤛ᤻ᤛᤠ᤺ ᤐᤥ᤺ᤱᤒᤠᤒᤣ᥅”
LUK 20:45 ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ.
LUK 20:46 “ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤱᤜᤠ᤹ ᤁᤣ᤺ᤶᤒ᤻ ᤁᤣ᤺ᤶᤒᤠ ᤗᤃᤣᤵ ᤔᤧᤈᤠᤰᤂᤢᤀᤠᤱ ᤏᤠᤏᤢᤃᤳᤏᤠ ᤗᤠᤱᤔᤧᤄᤣ᤺ᤰᤗᤥ. ᤜᤧᤰᤁᤩᤠᤱ ᤐᤠᤱᤈᤢᤶ ᤗᤢᤶᤔᤥ ᤛᤣᤘᤠ ᤔᤧᤔᤧᤳᤋᤡᤃᤧᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤛᤠᤓᤠᤱᤈᤠᤀᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥
LUK 20:47 ᤂᤧᤱᤜᤠ᤹ᤖᤧ ᤔᤣᤔᤣᤍᤢᤔᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤔᤧᤗᤖᤢᤖᤥ. ᤁᤖ ᤏᤢ᤺ᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒ᤻ ᤁᤣ᤺ᤶᤒᤠ ᤋᤢᤘᤠ ᤔᤧᤈᤥᤃᤢ᤹॥ ᤂᤧᤱᤜᤠ᤹ᤖᤧᤃ ᤛᤧᤰᤂᤠᤀᤣ ᤛᤠᤰᤗ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥”
LUK 21:1 ᤕᤧᤛᤢᤖᤧ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤋᤥ᤺ᤶᤔᤠᤍᤧᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤛᤥᤕᤠᤱᤅᤡᤴ ᤔᤧᤃᤣ᤺ᤳᤋᤢᤖ ᤔᤧᤒᤳᤇᤧᤒᤠᤴ ᤀᤥᤔᤧᤳᤋᤢᤛᤡᤖ ᤕᤢᤅᤧ॥
LUK 21:2 ᤂᤧᤵᤔᤥ ᤗᤳᤇᤠ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤎᤡᤰᤗᤧ ᤕᤠᤱ ᤏᤧᤳᤇᤡ ᤁᤣ᤺ᤳᤋᤢᤒᤠ ᤏᤡ᤺ᤛᤢᤀᤠᤱ
LUK 21:3 ᤐᤠ᤺ᤳᤋᤢ. “ᤛᤧᤰᤂᤠᤀᤣ ᤁᤴ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧ ᤘᤣ᤹ᤜᤠ᤹ᤏᤢ᤺ᤸᤗᤧ ᤕᤖᤡᤰ ᤜᤢᤰᤛᤥᤕᤠᤱ ᤁᤣ᤺ᤳᤋᤢᤀᤠᤱ ᤘᤠ᤹ᤖᤥ.
LUK 21:4 ᤌᤣᤀᤠᤱᤓᤧᤸᤗᤧ ᤁᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤖᤧᤃ ᤂᤢᤏᤡ᤹ ᤁᤧᤕᤥᤒᤠᤀᤠᤱ ᤁᤧᤏᤶᤒᤠ ᤕᤠᤱᤜᤠ᤹ᤀᤣ ᤔᤧᤕᤠᤰᤋᤢ. ᤁᤖ ᤕᤠᤱᤃᤧᤛᤠ᤹ᤔᤠ ᤔᤣᤔᤣᤍᤢᤔᤠᤸᤗᤧᤃ ᤂᤢᤏᤧ᤹ ᤁᤢᤕᤠᤱᤛᤠ᤹ᤔᤥ ᤁᤳᤋᤢᤒᤠ ᤆᤠᤔᤠ ᤌᤢᤱᤔᤠᤗᤠᤶ ᤕᤠᤰᤋᤢᤀᤠᤱ ᤘᤠ᤹ᤖᤥ॥”
LUK 21:5 ᤜᤧᤰᤁᤩᤠᤱ ᤁᤢᤓᤠ ᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤴ ᤏᤢ᤺ᤒ᤻ ᤏᤢ᤺ᤒᤠ ᤗᤢᤱᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥ᤺ᤴᤍᤢᤒᤠ ᤁᤧᤄᤧᤶᤒᤠ ᤁᤧᤗᤠ᤹ᤒᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤖᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ.
LUK 21:6 “ᤂᤡᤏᤡ᤹ ᤀᤠᤸᤗᤥ ᤁᤧᤏᤡ᤺ᤛᤢᤶᤒᤠᤴ ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤕ᤺ᤔᤠ ᤕᤧᤶ ᤋᤠᤖ ᤐᤳᤗᤥ॥”
LUK 21:7 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤁᤴ ᤀᤠᤵᤑᤠᤸᤗᤧ ᤐᤥ᤺ᤱᤒᤠᤒᤣ᥅ ᤁᤴ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡ ᤌᤣ ᤔᤡᤰᤛᤣ᤺ᤴ ᤐᤥ᤺ᤱᤒᤣ᥅”
LUK 21:8 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤸᤗᤖᤥ. ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤀᤡᤱᤃᤠ᤹ ᤀᤠᤔᤡᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ. ᤜᤧᤰᤁᤩᤠᤱ ᤀᤠᤸᤗᤥ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥
LUK 21:9 ᤜᤧᤰᤁᤩᤠᤱ ᤂᤡᤏᤡ᤹ ᤌᤱᤜᤠ᤹ ᤏᤢ ᤁᤧᤈᤡᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤵᤛᤢᤶ. ᤁᤖ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥ᤺ᤱᤔᤠᤀᤣ ᤐᤥ᤺ᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥”
LUK 21:10 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥ᤺ᤰ॥
LUK 21:11 ᤜᤧᤰᤁᤩᤠᤱ ᤕᤖᤡᤰ ᤋᤧᤴᤏᤥ ᤐᤕᤶ ᤕᤶᤒᤠ ᤗᤢᤵᤗᤡ ᤌᤠᤱ. ᤕᤶᤒᤠ ᤛᤠᤰ ᤐᤥ᤺ᤰ ᤜᤧᤰᤁᤩᤠᤱ ᤕᤶᤒᤠ ᤔᤡᤴᤍᤣ᤹ᤜᤠ᤹ ᤐᤥ᤺ᤰᤁᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤋᤠᤱᤛᤠᤰᤐᤥ ᤔᤧᤎᤠ᤺ᤵᤗᤥ॥
LUK 21:12 ᤁᤴ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤃ ᤂᤡᤏᤡ᤹ ᤜᤢᤰ ᤁᤧᤶᤕᤠᤰᤋᤡᤀᤠᤱ ᤏᤡᤱᤄᤢᤶ ᤁᤧᤶᤔᤧᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤂᤠᤛᤧᤴ ᤁᤧᤶᤗᤥ᤺ᤴᤍᤡᤀᤠᤱ ᤐᤢᤱᤗᤠᤜᤡᤶᤔᤥ ᤁᤧᤶᤎᤧᤰᤋᤡ᤹ᤖᤥ॥ ᤀᤠᤔᤡᤱᤅᤡᤸᤗᤧ ᤆᤥᤃᤢᤸᤗᤧ ᤜᤠᤱᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤶᤕᤧᤵᤛᤡ᤹ᤖᤥ॥
LUK 21:13 ᤁᤱᤃ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤁᤧᤄᤥ᤺ᤛᤢᤶᤒᤠ ᤛᤢᤕᤧᤶᤗᤥ॥
LUK 21:14 ᤜᤧᤰᤁᤩᤠᤱ ᤂᤡᤏᤡ᤹ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤌᤧᤔᤠ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤋᤃᤡᤛᤠ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥
LUK 21:15 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤛᤢᤳᤗᤠᤜᤠ᤹ ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤡᤏᤡᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤴᤏᤠᤱ ᤂᤡᤏᤡ᤹ ᤒᤡᤑᤩᤢᤱᤜᤠ᤹ᤖᤧ ᤀᤵᤔᤠ ᤏᤢ ᤐᤠ᤺ᤴᤎᤰᤔᤠ ᤔᤧᤴᤇᤢᤰᤋᤢᤴᤗᤥ॥
LUK 21:16 ᤂᤡᤏᤡ᤹ ᤐᤠ-ᤔᤠᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤁᤠ᤹ᤀᤡ ᤛᤥ᤹ᤎᤥ᤺ᤰᤜᤠ᤹ ᤏᤢ ᤋᤣ᤺ᤱᤈᤢᤶᤜᤠ᤹ᤖᤧ ᤀᤡᤱᤃᤧᤶᤗᤧᤰᤋᤡᤀᤠᤱ ᤋᤧᤶᤔᤠ ᤁᤧᤶᤒᤠᤱᤄᤡ᤹ᤖᤥ॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤢᤓᤠᤃ ᤁᤧᤶᤛᤧᤖᤡ᤹॥
LUK 21:17 ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤡ᤺ᤳᤋᤡ᤹.
LUK 21:18 ᤜᤧᤰᤁᤣᤛᤠᤱ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤔᤰᤔᤧᤎᤠᤏᤧᤴᤗᤥ॥
LUK 21:19 ᤂᤡᤏᤡ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤎᤖᤢᤶᤔᤡᤸᤗᤧᤀᤣ ᤂᤡᤏᤡ᤹ ᤜᤡᤱᤔᤴᤏᤡᤴ ᤋᤠᤱᤗᤥ॥”
LUK 21:20 ᤀᤠᤸᤗ ᤕᤖᤢᤛᤗᤧᤶᤔᤡᤴ ᤏᤡᤱᤔᤡ ᤌᤰᤛᤢᤒᤠᤜᤠ᤹ᤖᤧ ᤔᤧᤃᤒᤢᤒᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤀᤠᤸᤗ ᤁᤢᤔᤧᤰᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
LUK 21:21 ᤜᤧᤰᤁᤩᤠᤱ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗ. ᤕᤧᤰᤕᤰᤁᤥ ᤁᤧᤘᤠ᤹ᤒᤠᤜᤠ᤹ ᤗᤠ᤺ᤰᤁᤠᤳ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗ. ᤜᤧᤰᤁᤩᤠᤱ ᤐᤠᤱᤓᤣ᤹ᤀᤥ ᤁᤧᤕᤢᤱᤒᤠᤜᤠ᤹ ᤕᤠᤶᤔᤥ ᤕᤧᤰᤕᤰᤁᤥ ᤔᤧᤴᤍᤠᤏᤧᤴᤗᤖᤥ॥
LUK 21:22 ᤌᤣᤀᤠᤱᤓᤧᤸᤗᤧ ᤛᤠᤶᤕᤥ ᤛᤠᤵᤗᤠᤀᤥ ᤁᤴ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤱᤃ ᤂᤢᤶᤍᤡᤱᤗᤧᤴ ᤕᤧᤴᤜᤠ᤹ ᤐᤥ᤺ᤱᤗᤥ॥
LUK 21:23 ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤱᤅᤡ᥄ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤶᤒᤠ ᤋᤢᤰᤂᤣ ᤌᤠ᤺ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤅᤡᤴ ᤁᤴ ᤔᤏᤠᤜᤠ᤹ᤀᤥ ᤆᤢᤰᤗᤥ॥
LUK 21:24 ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡ᤹ ᤜᤧᤰᤁᤩᤠᤱ ᤕᤖᤡᤰ ᤗᤠᤈᤣ᤹ᤀᤥ ᤐᤢᤱᤗᤠᤎᤠᤒᤠ ᤔᤧᤒᤥ᤺ᤱᤅᤠᤱ ᤔᤧᤒᤣ᤺ᤰᤗᤥ॥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤕᤧᤶ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤕᤖᤢᤛᤗᤧᤶᤔᤡᤴ ᤔᤧᤍᤥ᤹ᤖᤢ ᤔᤧᤛ᤹ᤖᤢ᤹ᤖᤥ॥
LUK 21:25 “ᤜᤧᤰᤁᤩᤠᤱ ᤏᤠᤶ. ᤗᤠᤒᤠ ᤏᤢ ᤂᤣ᤺ᤶᤛᤡᤰᤜᤠ᤹ᤀᤥ ᤕᤶᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤎᤠ᤺ᤵᤗᤥ॥ ᤜᤧᤰᤁᤩᤠᤱ ᤘᤠᤜᤱᤅᤡᤸᤗᤧ ᤁᤢᤛ᤺ᤰᤔᤠᤴ ᤏᤢ ᤕᤶᤒ᤻ ᤕᤶᤒᤠ ᤘᤠᤓᤧᤸᤗᤧᤱᤅᤡᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤛᤠ᤹ᤖᤡᤰ ᤁᤡ᤺ᤔᤠᤀᤥ ᤏᤢ ᤏᤡᤱᤛᤠᤶᤔᤥ ᤔᤧᤎᤠ᤺ᤖᤥ॥
LUK 21:26 ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤔᤧᤀᤡ᤺ᤳᤋᤢᤀᤠᤱ ᤔᤏᤠᤜᤠ᤹ ᤂᤢᤏᤡ᤹ ᤛᤠᤶ ᤔᤡᤰᤁᤡᤸᤗᤧ ᤐᤰᤌᤛᤡ. ᤌᤣᤀᤠᤱᤓᤧᤸᤗᤧ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤏᤢ ᤂᤣ᤺ᤶᤛᤡᤰᤜᤠ᤹ ᤔᤧᤕᤱᤗᤥ॥
LUK 21:27 ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤂᤠᤵᤔᤡ᤺ᤳᤋᤥ ᤕᤶᤒᤠ ᤔᤢᤰᤛᤠᤶ ᤜᤧᤰᤁᤩᤠᤱ ᤔᤡᤔᤡᤍᤡᤱᤏᤢ ᤕᤢ᤺ᤖ ᤐᤵᤐᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤏᤡ᤺ᤛᤢ᤹ᤖᤥ॥
LUK 21:28 ᤀᤠᤸᤗ ᤁᤴ ᤁᤧᤖᤧᤰ ᤐᤥ᤺ᤱᤅᤡᤸᤗᤧ ᤂᤡᤏᤡ᤹ ᤌᤧᤃᤣ᤺ᤰᤐᤧᤴ ᤑᤥ᤺ᤰᤂᤧᤶᤔᤧ᤹ᤀᤠᤱ ᤌᤠ᤺ᤱ ᤀᤥᤔᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤧᤴᤗᤵᤐᤡᤴ ᤏᤡ᤺ᤳᤋᤠᤱ ᤋᤠᤖ ᤐᤳᤗᤥ॥”
LUK 21:29 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ. “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤠᤴ ᤏᤢ ᤘᤣ᤹ ᤛᤡᤱᤒᤢᤱᤜᤠ᤹ ᤀᤥᤔᤧᤳᤋᤧᤶᤔᤧ᤹॥
LUK 21:30 ᤀᤠᤸᤗ ᤁᤢᤛᤱ ᤁᤢᤓᤧᤰᤘᤠ ᤗ᤺ᤴᤏᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤠᤖ ᤐᤳ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
LUK 21:31 ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
LUK 21:32 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡ᤺ᤏᤧᤴᤗᤥ॥
LUK 21:33 ᤋᤠᤱᤛᤠᤰᤐᤠᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣ᤺ᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥
LUK 21:34 ᤂᤡᤏᤡ᤹ ᤕᤠᤶᤍᤠᤍᤠ ᤛᤢᤰᤂᤣᤘᤠ ᤏᤢ ᤆᤠᤔᤠ ᤌᤢᤱᤔᤠ ᤜᤧᤰᤁᤩᤠᤱ ᤁᤴ ᤜᤡᤱᤔᤴᤗᤧᤴ ᤏᤡᤱᤛᤠᤶ ᤆᤥ᤺ᤰᤔᤥ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤜᤰᤆᤄᤳ ᤌᤰᤛᤠ ᤐᤢᤛᤠ ᤀᤡᤈᤥᤀᤥ ᤔᤧᤎᤠ᤺ᤒᤠ ᤜᤧᤰᤁᤣ ᤁᤴ ᤕᤧᤴᤜᤠ᤹ᤀᤥ ᤂᤡᤏᤡ᤹ᤀᤠᤱ ᤁᤧᤎᤩᤧ᤹ᤀᤡᤖᤥ॥
LUK 21:35 ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤏᤢᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤐᤥ᤺ᤱᤗᤥ॥
LUK 21:36 ᤁᤧᤖᤧᤰ ᤕᤧᤶᤔᤥ ᤀᤠᤵᤑᤠᤸᤗᤧᤛᤠᤱ ᤁᤴ ᤁᤧᤍᤠ᤺ᤒᤠ ᤐᤠ᤺ᤴᤏᤥᤗᤠᤶ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤔᤢᤰᤛᤠᤶ ᤁᤧᤄᤥ᤺ᤛᤢᤶᤗ ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤃᤡ ᤕᤧᤵᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤖ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”
LUK 21:37 ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤜᤢ᤹ᤖᤢᤛᤡᤖ ᤘᤕᤧ. ᤁᤖ ᤛᤧᤴᤍᤡᤰ ᤕᤠᤱᤎᤥ᤺ᤰᤛᤧ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣᤖ ᤘᤕᤧᤖᤥ॥
LUK 21:38 ᤜᤧᤰᤁᤩᤠᤱ ᤋᤠᤏᤠᤶᤛᤠ ᤔᤠᤱᤜᤡᤶᤔᤥ ᤂᤢᤏᤧ᤹ ᤁᤢᤒᤠ᤺ᤴᤈᤠᤰ ᤂᤧᤶᤛᤧ ᤔᤏᤠᤜᤠ᤹ ᤔᤧᤍᤩᤧᤖᤥ॥
LUK 22:1 ᤀᤠᤸᤗ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱᤅᤡᤸᤗᤧ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖ ᤐᤳᤇᤧ॥ ᤂᤧᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤠᤱ ᤔᤧᤔᤧᤳᤋᤢ᤹॥
LUK 22:2 ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤛᤧᤵᤔᤠ ᤛᤢᤕᤧᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧ. ᤁᤖ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ ᤑᤠ᤹ᤀᤠᤱ ᤔᤧᤃᤡᤛᤧᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ॥
LUK 22:3 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤠᤸᤗᤧ ᤁᤢᤏᤡᤱᤘᤠ᤹ᤀᤥ ᤗᤠ᤺ᤛᤧ॥
LUK 22:4 ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ᤖᤥ ᤐᤣᤀᤠᤱ ᤕᤧᤛᤢ᤺ᤴ ᤂᤡᤏᤡ᤹ ᤜᤢᤰᤁᤥ ᤌᤠ᤺ᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤆᤧᤰᤋᤢᤛᤡ॥
LUK 22:5 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤕᤠᤱ ᤐᤡᤀᤠᤛᤡᤃᤧ᤹ᤖᤥ ᤗ᤹ᤖᤡᤰ ᤔᤧᤔᤧᤳᤋᤢᤖᤥ॥
LUK 22:6 ᤂᤢᤏᤧ᤹ᤀᤠᤱ ᤂᤧᤴ ᤐᤠ᤺ᤴᤏᤥ ᤋᤧᤴᤍᤧᤀᤠᤱ ᤔᤏᤠᤜᤠ᤹ ᤔᤧᤜᤥ᤺ᤵᤐᤡᤸᤗᤧ ᤀᤡᤱᤗᤧᤰᤔᤠᤀᤠᤱ ᤋᤧᤶᤔᤠ ᤐᤠᤱᤔᤠᤛᤡ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥
LUK 22:7 ᤜᤧᤰᤁᤩᤠᤱ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣ᤺ᤰᤐᤠ ᤕᤧᤴᤏᤥ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤔᤧᤸᤗᤢᤰᤛᤠ᤺ᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤌᤡᤶ ᤘᤕᤧ॥
LUK 22:8 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ. “ᤂᤡᤴᤇᤡ᤹ ᤐᤣᤃᤧᤳᤇᤧ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤛᤥᤖᤡᤰ ᤆᤠᤶᤗᤥ॥”
LUK 22:9 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤴᤍᤥ᤺ᤛᤧᤳᤇᤢ. “ᤜᤧᤰᤁᤣ᤺ᤸᤗᤧ ᤀᤠᤳᤋᤠᤴ ᤐᤣ᤺ᤰᤔᤠᤀᤠᤱ ᤕᤠᤖᤡᤵ ᤆᤥ᤺ᤰᤔᤠᤒᤣ᥅”
LUK 22:10 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗ ᤀᤥᤔᤧᤳᤋᤧᤳᤇᤧ᤹ᤀᤥ. ᤂᤡᤴᤇᤡ᤹ ᤕᤧᤰᤕᤰᤁᤥ ᤁᤧᤗᤠ᤺ᤳᤇᤡᤖ ᤁᤧᤒᤳᤇᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ ᤁᤧᤒᤱᤒᤠ ᤔᤏᤠᤎᤡᤰᤗᤧ ᤁᤧᤍᤢᤶᤛᤡ᤹॥ ᤂᤧᤴ ᤗᤠ᤺ᤵᤐᤠ ᤜᤡᤶᤔᤥ ᤌᤠᤖᤡᤰ ᤋᤡᤶᤍᤧᤳᤇᤧ᤹॥”
LUK 22:11 ᤜᤧᤰᤁᤩᤠᤱ ᤜᤡᤶᤍᤠᤱᤒᤠᤴ ᤔᤧᤳᤋᤧᤇᤧ᤹. “ᤀᤠᤏᤡᤃᤧ ᤛᤡᤰᤛᤠᤶᤒᤠᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧᤀᤠᤱ ᤁᤧᤘᤠ᤹ᤖᤥ. ‘ᤋᤖᤣ ᤕᤢᤱᤔᤠ ᤕᤠᤰᤑᤠᤱᤅᤡᤴ ᤀᤠᤳᤋᤥ ᤏᤧᤒᤣ᥅ ᤂᤧᤵᤔᤥ ᤀᤡᤱᤃᤠ᤹ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤆᤠᤱᤗᤥ॥’
LUK 22:12 ᤜᤧᤰᤁᤩᤠᤱ ᤂᤧᤸᤗᤧ ᤂᤡᤴᤇᤡ᤹ ᤌᤥ᤺ᤛ᤻ᤔᤠ ᤂᤠᤶᤗᤥᤀᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤗᤳᤇᤠ ᤕᤶᤒᤠ ᤕᤠᤰᤑᤠᤱᤅᤡᤴ ᤀᤥᤛᤣ᤺ᤴᤃᤧᤎᤠᤰᤛᤡ᤹॥ ᤂᤧᤵᤔᤥᤀᤣ ᤀᤠᤏᤡ᤹ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤧ᤹ᤀᤥ॥”
LUK 22:13 ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤧᤳᤇᤡᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤋᤢᤔᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤢ॥
LUK 22:14 ᤀᤠᤸᤗ ᤆᤠᤈᤠᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤕᤧᤛᤢ᤺ᤴ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤆᤠᤔᤠ ᤋᤧᤴᤏᤥ ᤕᤢᤱᤛᤡᤱ॥
LUK 22:15 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤋᤢᤰᤂᤣ ᤆᤠᤔᤠᤏᤢ᤺ᤸᤗᤧ ᤋᤃᤡ ᤁᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤠᤓᤠᤱᤈᤠ᤺ᤴ ᤂᤡᤏᤡ᤹ᤏᤢ ᤛᤥᤖᤡᤰ ᤆᤠᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤠᤱ.
LUK 22:16 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤴ ᤀᤠᤈᤠᤶᤗ ᤀᤠᤒᤵᤐᤠ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤛᤠᤓᤠᤱᤈᤠ᤺ᤸᤗᤧ ᤁᤢᤒᤣ᤺ᤴ ᤔᤧᤱᤃᤧᤳᤋᤣ ᤌᤠᤖᤡᤰ ᤀᤡᤱᤃᤠ᤹ ᤕᤠᤶᤔᤥ ᤔᤧᤈᤠᤀᤠᤴᤗᤥ॥”
LUK 22:17 ᤜᤧᤰᤁᤩᤠᤱ ᤕᤧᤛᤢᤖᤧ ᤆᤸᤗᤱᤏᤠ ᤂᤥᤷᤕᤠ᤺ᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤢᤶᤔᤥ ᤜᤠ᤺ᤳᤋᤠᤛᤡᤶᤔᤧᤖ ᤆᤧᤶᤔᤧ ᤌᤢᤅᤧᤶᤔᤧ᤹ᤀᤥ॥
LUK 22:18 ᤂᤡᤏᤡ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤕᤠᤶᤔᤥ ᤔᤧᤴᤍᤠᤀᤣ ᤌᤠᤖᤡᤰ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤀᤡᤱᤃᤠ᤹ ᤕᤠᤶᤔᤥ ᤔᤧᤎᤢᤱᤅᤠᤴᤗᤥ॥”
LUK 22:19 ᤜᤧᤰᤁᤩᤠᤱ ᤂᤢᤏᤧ᤹ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤐᤡᤖᤧᤒᤠ ᤀᤠᤎᤰᤗᤥ॥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”
LUK 22:20 ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤈ ᤔᤧᤛᤢᤖᤢᤀᤠᤱ ᤆᤸᤗᤱᤏᤠ ᤂᤥᤷᤕᤠ᤺ᤴ ᤕᤧᤛᤢᤖᤧ ᤐᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤀᤠᤔᤠᤰᤂᤡ᤹ᤀᤡᤴ ᤘᤍᤣ᤺ᤴᤍᤧᤀᤠᤱ ᤏᤡ᤺ᤴᤎᤥ ᤐᤥ᤺ᤰᤂᤧᤒᤠ ᤁᤢᤛᤱ ᤔᤠᤱᤜᤢᤵᤐᤡᤴᤗᤥ॥
LUK 22:21 ᤁᤖ ᤀᤥᤔᤧᤳᤋᤧᤶᤔᤧ᤹᥄ ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤠᤴ ᤒᤠ ᤁᤴ ᤆᤠᤔᤠ ᤋᤧᤴᤏᤥ ᤀᤡᤱᤃᤠ᤹ᤏᤢᤀᤣ ᤆᤖ ᤕᤢᤱᤗᤥ॥”
LUK 22:22 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤴᤇᤠᤶᤛᤠ᤺ᤱᤃ ᤛᤡ᤺ᤔᤠᤀᤣ ᤐᤥ᤺ᤱᤗᤥ. ᤁᤖ ᤂᤢᤏᤧ᤹ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧ ᤛᤩᤧᤖᤥ॥
LUK 22:23 ᤂᤧᤱᤜᤠ᤹ᤖᤧ ᤀᤠᤏᤡ᤹ ᤗᤢᤶᤔᤥ ᤀᤰᤋᤱᤒᤠ ᤕᤠ᤺ᤶᤒᤰ ᤜᤠ᤺ᤳᤗᤧ ᤆᤥᤃᤢ᤹ᤒᤡᤗᤠ ᤗ᤹ᤖᤡᤰ ᤛᤣ᤺ᤴᤍᤥ᤺ᤛᤡᤱᤔᤠ ᤔᤧᤜᤣ᤺ᤰᤛᤡᤱᤗᤥ॥
LUK 22:24 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤳᤏᤡᤒᤣ ᤑᤠ᤹ᤀᤠᤱ ᤐᤠ᤺ᤴᤎᤰᤔᤠ ᤔᤧᤜᤣ᤺ᤰᤋᤢᤖᤥ॥
LUK 22:25 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧ ᤔᤏᤠᤜᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤢᤏᤡ᤹ ᤕᤢᤰᤛᤠᤒᤠᤜᤠ᤹ᤖᤧ ᤀᤠᤏᤡᤃᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤛᤡᤃᤧ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥
LUK 22:26 ᤁᤖ ᤂᤡᤏᤡ᤹ᤀᤥᤃ ᤀᤰᤂᤣ ᤔᤧᤒᤥ᤺ᤱᤏᤧᤸᤗᤥ॥ ᤂᤡᤏᤡ᤹ᤀᤥᤃ ᤀᤠᤳᤋᤡᤴ ᤕᤶᤒᤠ ᤆᤥ᤺ᤰ. ᤂᤧᤴ ᤆᤢᤰᤛᤠ ᤐᤥ᤺ᤱᤔᤠ ᤐᤥ᤺ᤱ ᤜᤧᤰᤁᤩᤠᤱ ᤗᤠᤶᤗᤥ᤺ᤒᤠᤴ ᤛᤣᤘᤠᤖᤥᤒᤧᤴ ᤜᤧᤰᤁᤣ ᤐᤥ᤺ᤱᤔᤠ ᤐᤥ᤺ᤱᤗᤥ॥
LUK 22:27 ᤀᤠᤸᤗ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤧᤴ ᤏᤢ ᤛᤣᤘᤠ ᤁᤧᤈᤥ᤺ᤰᤐᤧᤴ ᤀᤠᤳᤋᤡᤴ ᤕᤶᤒᤠᤒᤣ᥅ ᤂᤧᤴ ᤆᤠᤈᤠᤔᤠᤍᤧᤴᤏᤥ ᤁᤧᤕᤢᤱᤒᤧᤴ ᤕᤶᤒᤠ ᤔᤧ᤺ᤶᤒᤡ᥅ ᤁᤖ ᤂᤡᤏᤡ᤹ᤀᤥᤃ ᤀᤡᤱᤃᤠ᤹ ᤛᤣᤘᤠ ᤁᤧᤈᤥ᤺ᤰᤐᤠ ᤜᤧᤰᤁᤣ ᤘᤠ᤹ᤀᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥
LUK 22:28 ᤂᤡᤏᤡ᤹ᤃ ᤆᤰᤔᤧᤸᤗ᤹ᤀᤣ ᤀᤡᤱᤃᤠ᤹ ᤀᤠᤍᤢᤰᤂᤣᤀᤥ ᤋᤣ᤺ᤱ ᤕᤠᤵᤔᤡ ᤁᤧᤔᤧᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
LUK 22:29 ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤡᤱᤃᤠ᤹ ᤜᤠᤱ ᤆᤥ᤺ᤰᤔᤠ ᤕᤢᤰ ᤐᤡᤖᤠᤱᤒᤠ ᤜᤧᤰᤁᤣᤀᤣ ᤂᤡᤏᤡ᤹ᤀᤠᤱ ᤐᤡᤏᤡᤱᤗᤥ॥
LUK 22:30 ᤂᤡᤏᤡ᤹ ᤀᤠᤜᤠᤱᤈᤢᤶᤔᤥ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤁᤧᤕᤢᤅᤡ᤹ᤀᤠᤱ ᤁᤧᤈᤠᤶ ᤁᤧᤎᤢᤅᤢᤶᤗᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤅᤡᤀᤠᤱ ᤀᤡᤛᤪᤠᤀᤡᤗᤒᤠ ᤌᤡᤰ-ᤏᤧᤳ ᤛᤢᤘᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥᤃᤡ᤹ᤖᤥ॥”
LUK 22:31 ᤕᤧᤛᤢᤖᤧ ᤔᤧᤳᤋᤢ. “ᤛᤡᤔᤥᤏᤣ. ᤛᤡᤔᤥᤏᤣ. ᤂᤧᤵᤛᤧ᤹ᤀᤥ᥄ ᤀᤡᤰᤔᤛᤠᤒᤠᤸᤗᤧ ᤆᤠ᤺ᤴᤏᤢ ᤁᤢᤜ᤺ᤰᤁᤡᤴ ᤛᤧᤶᤔᤠᤖᤧ ᤗᤠᤃᤡ ᤀᤧᤵᤋᤢᤀᤠᤱ ᤛᤧᤴᤍᤢᤒᤠ ᤁᤢᤀᤡᤛᤡ᤺ᤰ ᤔᤠᤑᤧᤴᤛᤠᤶᤔᤡᤸᤗᤧᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤗᤧᤱᤔᤠ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤏᤠ᤺ᤰᤋᤢᤀᤠᤱ ᤘᤠ᤹ᤖᤥ॥
LUK 22:32 ᤁᤖ ᤀᤡᤱᤃᤠ᤹ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤴ ᤔᤧᤗᤧᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤱ ᤐᤡᤏᤧᤀᤠᤱ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤕᤠᤶᤔᤥ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤀᤠᤱ ᤁᤧᤶᤓᤢ᤹ ᤁᤧᤴᤛᤠ᤹ᤛᤡᤀᤠᤱ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥᤃᤧᤛᤧ᤹ᤀᤥ॥”
LUK 22:33 ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤐᤢᤱᤗᤠᤜᤡᤶᤔᤥ ᤌᤠᤖᤡᤰᤗᤰ ᤔᤧ᤺ᤴ. ᤁᤖ ᤛᤡ᤺ᤔᤠ ᤐᤥ᤺ᤱᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥”
LUK 22:34 ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤋᤪᤢᤛᤣ. ᤀᤡᤱᤃᤠ᤹ ᤐᤠ᤺ᤴᤎᤡᤰ ᤔᤧᤳᤏᤧ᤹ᤖᤥ. ᤀᤠᤀᤡᤴ ᤛᤧᤴᤍᤡᤰ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”
LUK 22:35 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤡᤏᤡ᤹ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤛᤢ᤺ᤰᤘᤠ. ᤛᤠᤒᤪᤡ ᤏᤢ ᤗᤠᤱᤛᤢ᤺ᤵ ᤌᤣᤀᤠᤱ ᤔᤧ᤺ᤴᤏᤣ ᤐᤠᤱᤏᤡᤱᤅᤡᤸᤗᤧ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤎᤩᤧ᤹ᤀᤡᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤔᤧᤎᤩᤧ᤹ᤀᤡᤃᤧᤴᤗᤥ॥”
LUK 22:36 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤖ ᤀᤠᤸᤗᤥ ᤂᤡᤏᤡ᤹ ᤛᤢ᤺ᤰᤘᤠ ᤛᤠᤒᤪᤡᤜᤠ᤹ ᤕᤠᤱᤛᤡᤱᤅᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤋᤠᤓᤣ᤺ᤴ ᤔᤧᤱᤃᤵᤔᤏᤠᤒᤠᤸᤗᤧ ᤜᤠᤖᤠ᤹ ᤁᤢᤛᤢᤱᤄᤧ᤹ᤘᤠ᤺ᤴ ᤛᤱᤄᤢᤀᤠᤱ ᤗᤳᤌᤡᤰ ᤋᤠᤓᤣᤎᤡᤰᤁᤠᤱ ᤀᤡᤅᤢᤖᤖᤥ॥
LUK 22:37 ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤂᤢᤏᤧ᤹ᤃ ᤜᤠᤱᤒᤡᤑᤩᤢᤱᤒᤠᤜᤠ᤹ᤏᤢ ᤔᤧᤍᤱᤄᤢᤖᤥ॥’ ᤁᤴ ᤐᤠ᤺ᤴᤏᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤥ ᤀᤡᤱᤃᤠ᤹ ᤀᤠᤔᤧᤴᤏᤥ ᤛᤠᤵᤋᤧᤀᤠᤱ ᤐᤵᤐᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤁᤧᤳᤗᤥ॥”
LUK 22:38 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤣ. ᤀᤠᤏᤡᤃᤧ ᤏᤧᤳᤇᤡ ᤋᤠᤓᤣ ᤁᤳᤋᤢᤶᤒᤧᤖᤥ॥” ᤕᤧᤛᤢᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤶᤔᤩᤠᤰᤁᤠᤱ ᤐᤥ᤺ᤱᤗᤥ॥”
LUK 22:39 ᤜᤧᤰᤁᤩᤠᤱ ᤕᤧᤛᤢ᤺ᤴ ᤌᤥ᤺ᤛ᤻ᤔᤠ ᤕᤠᤰᤑᤠᤱᤅᤥᤏᤢ ᤗ᤺ᤴᤍᤧᤀᤠᤱ ᤛᤍᤠᤍᤡᤱ ᤜᤧᤰᤁᤣ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤔᤧᤒᤣᤖᤥ॥
LUK 22:40 ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥”
LUK 22:41 ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ.
LUK 22:42 “ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠ᤺ᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣ᤺ᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤧ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤗᤖᤥ॥”
LUK 22:43 ((ᤜᤧᤰᤁᤩᤠᤱ ᤂᤧᤵᤔᤥ ᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤌᤠ᤺ᤶᤛᤡᤱᤅᤠᤱ ᤂᤢᤏᤧ᤹ ᤁᤢᤓᤠ᤹ ᤐᤡᤖᤢᤖᤥ॥
LUK 22:44 ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤛᤠᤶᤃᤧᤴ ᤏᤡᤱᤘᤠ᤹ᤖᤧ ᤏᤠᤕᤥ ᤐᤥ᤺ᤰᤂᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ ᤐᤡᤖᤢᤀᤠᤱ ᤋᤢᤘᤠ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠ᤺ᤶᤒᤪᤡᤰᤘᤠ᤺ᤴ ᤕᤶᤒ᤻ ᤕᤶᤒᤠ ᤔᤠᤰᤂᤡ᤹ ᤋᤧᤵᤐᤰᤘᤠ ᤁᤢᤀᤡᤛᤡ᤺ᤰ ᤂᤠᤶᤔᤥ ᤔᤰᤌᤩᤧᤖᤥ॥))
LUK 22:45 ᤕᤧᤛᤢ᤺ᤴ ᤋᤢᤘᤠᤀᤥᤗᤠᤶ ᤐᤥᤃᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤕᤢᤅᤧᤒᤠ ᤋᤧᤴᤏᤥ ᤐᤣ॥ ᤂᤧᤱᤜᤠ᤹ ᤁᤧᤖᤧᤰ ᤔᤡᤱᤘᤠ᤺ᤸᤗᤧ ᤔᤧᤏᤠ᤺ᤛᤧᤀᤠᤱ ᤔᤧᤀᤡᤵᤛᤧᤒᤠ ᤋᤢᤔᤢᤛᤡ॥
LUK 22:46 ᤂᤧᤱᤜᤠ᤹ ᤑᤥ᤺ᤰᤂᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤌᤣᤀᤠᤱ ᤁᤧᤀᤡᤵᤛᤡᤖ ᤁᤧᤏᤧᤛ᤻ᤛᤡᤒᤠᤒᤣ᥅ ᤐᤥᤃᤧᤶᤔᤧ᤹ᤀᤠᤱ ᤜᤱᤛᤠ᤹ᤔᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹॥”
LUK 22:47 ᤁᤖ ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤖ ᤐᤳᤇᤧᤸᤗᤧᤛᤠ. ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤗᤳᤇᤠ ᤕᤜᤢᤍᤠ ᤔᤧᤵᤔᤏᤠᤒᤧᤸᤗᤧ ᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖ ᤂᤧᤵᤔᤥ ᤋᤠᤖᤢᤛᤡ॥ ᤜᤧᤰᤁᤩᤠᤱ ᤕᤧᤛᤢ᤺ᤴ ᤆᤢᤵ ᤔᤧᤵᤔᤠᤀᤠᤱ ᤛᤣᤘᤠ ᤔᤧᤳᤇᤧ ᤁᤢᤒᤣᤛᤠᤱ ᤐᤣ॥
LUK 22:48 ᤁᤖ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤜᤢᤍᤠᤀᤣ. ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤆᤢᤵ ᤁᤧᤔᤧᤳᤋᤠᤀᤠᤱ ᤂᤧᤏᤧ᤹ ᤀᤡᤱᤃᤧᤗᤧᤰᤁᤠᤒᤠᤒᤡ᥅”
LUK 22:49 ᤜᤧᤰᤁᤩᤠᤱ ᤀᤠᤸᤗ ᤂᤧᤵᤔᤥ ᤌᤣ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤸᤗᤥ ᤀᤠᤏᤡᤃᤧ ᤋᤠᤓᤣ᤺ᤸᤗᤧ ᤁᤱᤜᤠ᤹ ᤆᤧᤵᤳᤋᤢᤶᤛᤡᤶᤒᤧ᤹ᤒᤡ᥅”
LUK 22:50 ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤌᤡᤰᤁᤡᤸᤗᤧᤃ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥
LUK 22:51 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤏᤠ᤹ᤖᤧᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤛᤢ᤺ᤛᤢᤀᤠᤱ ᤏᤢᤛᤢᤖᤥ॥
LUK 22:52 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤢᤏᤧ᤹ ᤁᤢᤍᤧᤶᤛᤧ ᤁᤧᤍᤠ᤺ᤒᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤔᤠᤱᤜᤡᤶ ᤁᤧᤃᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅
LUK 22:53 ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ. ᤁᤖ ᤂᤠᤍᤠᤶᤔᤠ ᤔᤢᤰᤛᤠᤶᤔᤡᤸᤗᤧ ᤕᤢᤰᤋᤢᤸᤗᤧᤀᤣ ᤂᤡᤏᤡ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤶ ᤐᤥ᤺ᤱᤗᤥ॥”
LUK 22:54 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤍᤠᤖᤢ॥ ᤐᤋᤪᤢᤛᤧᤴᤏᤠᤱ ᤔᤠ᤺ᤱᤄᤠᤗᤠᤶ ᤂᤧᤱᤜᤠ᤹ ᤋᤡᤶᤍᤢᤛᤡᤖ ᤂᤧᤵᤔᤥ ᤋᤩᤧᤖᤥ॥
LUK 22:55 ᤂᤧᤱᤜᤠ᤹ᤖᤧ ᤗᤰᤂᤢᤶᤗᤢᤶᤔᤥ ᤔᤡ ᤔᤧᤍᤢᤵᤋᤢᤀᤠᤱ ᤔᤡᤈᤠ᤹ᤏᤢ ᤔᤧᤕᤢᤅᤧᤸᤗᤧ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤗᤢᤶᤔᤥ ᤐᤣᤀᤠᤱ ᤕᤢᤱᤛᤡᤱ॥
LUK 22:56 ᤜᤧᤰᤁᤩᤠᤱ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰᤗᤧ ᤂᤢᤏᤧ᤹ ᤂᤠᤃᤧᤀᤥ᤺ᤵᤐᤠᤀᤥ ᤕᤢᤅᤧᤸᤗᤧ ᤏᤢ᤺ᤖᤡᤰ ᤀᤥᤔᤧᤳᤋᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤴ ᤔᤏᤠ᤺ᤴᤏᤠᤱ ᤕᤧᤛᤢ᤺ᤴᤏᤢᤀᤣ ᤘᤕᤧᤒᤠ ᤜᤧᤰᤁᤣ ᤗ᤹ᤖᤥ॥”
LUK 22:57 ᤁᤖ ᤐᤋᤪᤢᤛᤖᤧ ᤂᤧᤴ ᤏᤠ᤹ᤖᤢᤖ ᤔᤧᤳᤋᤢ. “ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤣ᤺ᤴᤏᤧ ᤐᤠ᤺ᤳᤋᤢᤒᤣ᥅ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ॥”
LUK 22:58 ᤛᤵᤑᤠ ᤀᤣᤃᤠᤱ ᤘᤣ᤹ᤛ᤻ᤔᤠ ᤌᤡᤰᤗᤧ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ᤃ ᤂᤧᤱᤜᤠ᤹ᤏᤢᤀᤣ ᤁᤧᤘᤕᤧᤖᤥ॥” ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤧ᤺ᤴᤗᤥ. ᤀᤡᤱᤃᤠ᤹ᤃ ᤔᤧᤘᤕᤠᤱᤅᤡᤴᤗᤥ᥄”
LUK 22:59 ᤕᤠᤱᤛᤡ ᤁᤢᤔᤢᤰ ᤌᤡᤰ ᤀᤣᤃᤠᤱ ᤁᤢᤓᤠᤎᤡᤰᤗᤧ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ᤃ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤃᤠᤗᤡᤗᤗᤠᤶ ᤁᤧᤍᤠ᤺ᤒᤠᤖᤥ॥”
LUK 22:60 ᤁᤖ ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤔᤧ᤺ᤶᤒᤧ ᤜᤦ᥄ ᤌᤧᤔᤠᤏᤡ ᤁᤧᤒᤠ᤺ᤳᤋᤢᤒᤣ᥅ ᤀᤡᤱᤃᤠ᤹ᤃ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤴᤗᤥ॥” ᤂᤡᤔᤥ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤀᤡᤱᤘᤠ᤺ᤴ ᤁᤠ᤺ᤛᤧ॥
LUK 22:61 ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤐᤋᤪᤢᤛᤧᤴ ᤀᤥᤔᤧᤳᤋᤢ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ. “ᤀᤠᤀᤡᤴ ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ” ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤋᤪᤢᤛᤖᤧ ᤁᤢᤏᤡᤱᤘᤠ᤹ ᤛᤢᤶ ᤗ᤹ᤖᤧ॥
LUK 22:62 ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧᤐᤣᤀᤠᤱ ᤀᤢ᤺ᤰᤁᤠᤱ-ᤀᤢ᤺ᤰ ᤜᤠᤒᤧᤖᤥ॥
LUK 22:63 ᤀᤠᤸᤗ ᤕᤧᤛᤢ᤺ᤴ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤔᤠ ᤔᤧᤜᤣ᤺ᤰᤋᤢᤖ ᤔᤧᤜᤡᤵᤋᤢ॥
LUK 22:64 ᤁᤢᤔᤡᤰᤁᤡᤴ ᤋᤣ᤺ᤳᤋᤡᤸᤗᤧ ᤔᤧᤍᤧᤵᤋᤢᤖ ᤔᤧᤜᤡᤵᤋᤢᤀᤠᤱ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧᤒᤣ᥅ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤧ᤹ᤀᤥ᥄”
LUK 22:65 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤘᤣ᤹ᤛ᤻ᤔᤠ ᤕᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤖᤥ॥
LUK 22:66 ᤜᤧᤰᤁᤩᤠᤱ ᤂᤠᤀᤥ᤺ᤳᤋᤧᤀᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤈᤢᤵᤛᤧ॥ ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤧᤈᤢᤶᤓᤥᤀᤥ ᤔᤧᤍᤣ᤹ᤖᤢᤀᤠᤱ
LUK 22:67 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧᤴᤒᤡ᥅ ᤕᤠᤵᤔᤡ ᤀᤠᤔᤧᤳᤋᤧ᤹॥ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤐᤠ᤺ᤳᤋᤢᤱᤛᤠᤱ ᤕᤠᤵᤔᤡ ᤏᤛᤠ᤺ᤴ ᤁᤧᤴᤈᤥᤃᤡᤴᤗᤥ॥
LUK 22:68 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣ᤺ᤴᤍᤥ᤺ᤏᤡᤱᤛᤠᤱ ᤏᤥᤃᤵ ᤕᤠᤵᤔᤡ ᤁᤧᤶᤒᤡᤖᤡᤴ॥
LUK 22:69 ᤁᤖ ᤀᤠᤸᤗᤥᤀᤠᤱᤎᤥ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤗᤥ॥’”
LUK 22:70 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ᤀᤣ ᤏᤡᤱᤘᤠ᤹ᤑᤢᤛᤠ᤺ᤏᤧᤒᤡ᥅” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤴ ᤛᤧᤰᤂᤠᤖᤥ॥”
LUK 22:71 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤸᤗ ᤀᤠᤏᤡ᤹ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤥ᤺ᤴᤍᤡ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ ᤂᤢᤏᤧ᤹ ᤁᤢᤔᤢᤖᤠᤗᤠᤶᤒᤠᤀᤣ ᤀᤠᤏᤡ᤹ ᤂᤠ ᤀᤠᤄᤧᤵᤛᤢᤶᤗᤥ᥄”
LUK 23:1 ᤕᤧᤈᤢᤶᤓᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ ᤕᤧᤛᤢ᤺ᤴ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤥ ᤔᤧᤍᤠᤖᤢᤀᤠᤱ
LUK 23:2 ᤑᤥᤋᤩᤠ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. “ᤀᤠᤏᤡᤃᤧ ᤁᤴ ᤔᤏᤠ᤺ᤸᤗᤧ ᤁᤴ ᤛᤢᤘᤠᤱᤜᤠ᤹ ᤀᤡᤱᤃᤠ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤜᤠᤱᤀᤠ ᤔᤧᤳᤋᤢᤛᤡᤖ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤐᤡᤔᤠ ᤔᤧ᤺ᤴ ᤑᤠ᤹ᤀᤠᤱ ᤜᤢᤛᤢᤛᤡᤒᤠ ᤋᤢᤔᤢᤶᤒᤧᤖᤥ॥”
LUK 23:3 ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅” ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢᤖ ᤁᤧᤒᤳᤗᤥ॥”
LUK 23:4 ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤁᤴ ᤔᤏᤠ᤺ᤸᤗᤧ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤆᤥᤃᤢᤒᤠ ᤔᤧᤱᤄᤥ᤺ᤒᤠᤴᤗᤥ॥”
LUK 23:5 ᤁᤖ ᤂᤧᤱᤜᤠ᤹ᤖᤧ ᤕᤠᤶᤔᤥ ᤕᤧᤛᤢ᤺ᤴ ᤀᤰᤂᤣ ᤔᤧᤔᤧᤳᤋᤢᤖ ᤀᤠᤵᤋᤡᤰ ᤔᤧᤃᤢ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤁᤢᤏᤡᤛᤠᤶᤔᤡᤸᤗᤧ ᤁᤴ ᤁᤧᤖᤧᤰ ᤔᤏᤠᤜᤠ᤹ ᤁᤧᤖᤧᤰ ᤕᤜᤢᤍᤡᤕᤠ ᤏᤢ ᤃᤠᤗᤡᤗᤗᤠᤶ ᤁᤵᤔᤥ ᤌᤠᤖᤡᤰ ᤜᤠᤱᤒᤡᤑᤩᤢᤱ ᤆᤥ᤺ᤰᤔᤠ ᤜᤢᤛᤢᤛᤡᤖ ᤘᤠ᤹ᤖᤥ॥”
LUK 23:6 ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤂᤧᤴ ᤂᤧᤵᤛᤢᤀᤠᤱ ᤁᤴ ᤔᤏᤠ᤺ᤴ ᤃᤠᤗᤡᤗᤛ᤻ᤔᤠᤒᤡ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤛᤡ॥
LUK 23:7 ᤐᤡᤗᤠᤋᤛᤖᤧ ᤁᤴ ᤐᤠ᤺ᤴᤏᤡᤴ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ᤀᤥᤒᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤕᤧᤛᤢ᤺ᤴ ᤜᤧᤖᤥᤍ ᤜᤠᤱᤅᤡᤸᤗᤥᤀᤣ ᤐᤠᤱᤄᤢᤍᤣ᤺ᤛᤢᤖᤥ॥ ᤂᤧᤴ ᤕᤧᤶᤔᤥ ᤜᤧᤖᤥᤍᤧᤏ ᤕᤖᤢᤛᤗᤧᤶᤔᤥ ᤘᤕᤧᤖᤥ॥
LUK 23:8 ᤜᤧᤖᤥᤍᤖᤧ ᤕᤧᤛᤢ᤺ᤴ ᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤛ᤺ᤳᤋᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤋᤃᤡᤀᤠᤱᤎᤥ ᤋᤢᤶᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ॥ ᤀᤠᤸᤗ ᤂᤢᤏᤧ᤹ ᤁᤢᤍᤃᤡ ᤕᤧᤛᤢᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠ ᤀᤥᤔᤧᤵᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧᤖᤥ॥
LUK 23:9 ᤜᤧᤖᤥᤍᤖᤧ ᤂᤢᤏᤧ᤹ ᤕᤖᤡᤰ ᤐᤠ᤺ᤴᤜᤠ᤹ ᤛᤣ᤺ᤴᤍᤥᤛᤢ. ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤗᤥ॥
LUK 23:10 ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤔᤧᤒᤥᤃᤧᤀᤠᤱ ᤂᤢᤏᤧ᤹ ᤕᤧᤰᤁᤵ ᤑᤥᤋᤩᤠ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ॥
LUK 23:11 ᤜᤧᤖᤥᤍᤧᤏ ᤏᤢ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢ. ᤜᤧᤰᤁᤩᤠᤱ ᤐᤖᤠᤴᤗᤠ ᤜᤠᤱᤋᤣ᤺ᤳᤋᤡᤴ ᤔᤧᤈᤠᤰᤋᤢ ᤔᤧᤒᤡᤖᤢᤀᤠᤱ ᤕᤠᤱᤏᤠ ᤐᤡᤗᤠᤋᤛᤖᤥ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥
LUK 23:12 ᤒᤠ ᤂᤧᤴ ᤕᤧᤴᤏᤠᤱᤎᤥ ᤜᤧᤖᤥᤍ ᤜᤠᤱᤅᤡᤴ ᤏᤢ ᤐᤡᤗᤠᤋᤛᤧᤴ ᤕᤠᤶᤔᤥ ᤋᤅᤧᤳᤇᤡᤖᤥ॥ ᤂᤧᤴᤏᤢ᤺ᤸᤗᤧ ᤋᤃᤡ ᤂᤢᤴᤇᤡ᤹ ᤏᤧᤵᤔᤠᤱ ᤏᤡᤱᤔᤡ ᤘᤕᤧᤳᤇᤡᤖᤥ॥
LUK 23:13 ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤏᤢ ᤔᤏᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ
LUK 23:14 ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤴ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤑᤠ᤹ᤀᤠᤱ ᤑᤥᤋᤩᤠ ᤁᤧᤃᤢ᤺ᤳᤋᤢᤶᤔᤠᤱ ᤁᤧᤍᤠᤖᤢᤶᤒᤠ ᤔᤏᤠ᤺ᤴ ᤂᤡᤏᤡ᤹ ᤋᤃᤡᤀᤣ ᤀᤡᤱᤃᤠ᤹ ᤕᤖᤡᤰ ᤐᤠ᤺ᤴ ᤛᤣ᤺ᤴᤍᤥᤛᤢᤱ. ᤁᤖ ᤀᤡᤱᤃᤠ᤹ ᤌᤣᤀᤠᤱ ᤕᤠ᤺ᤶᤒᤰ ᤑᤣ᤺ᤴᤍᤢᤒᤠ ᤔᤧᤱᤄᤥ᤺ᤒᤠᤴᤗᤥ॥
LUK 23:15 ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧᤀᤠᤱ ᤌᤣᤀᤠᤱ ᤔᤧᤄᤥ᤺ᤛᤢᤴᤏᤠᤱ ᤕᤠᤱᤏᤠ ᤀᤡᤱᤃᤠ᤹ᤀᤥ ᤏᤢ᤺ᤰᤋᤢ ᤑᤧᤴᤇᤢᤀᤠᤱ ᤘᤠ᤹ᤖᤥ॥ ᤀᤥᤔᤧᤳᤋᤧᤶᤔᤧ᤹. ᤁᤸᤗᤧ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤕᤠ᤺ᤶᤒᤰ ᤌᤧᤔᤠᤀᤠᤱ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥
LUK 23:16 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤢᤏᤧ᤹ ᤋᤧ᤺ᤶᤓᤢᤰ ᤕᤠᤰ ᤐᤠᤱᤄᤢᤱᤛᤡᤱᤅᤠᤱ ᤗᤧᤖᤢᤱᤍᤣ᤺ᤛᤢᤱᤗᤥ॥”
LUK 23:17 ((ᤀᤠᤸᤗ ᤋᤱᤏᤠᤶᤔᤥ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤗᤧᤵᤔᤠ ᤌᤡᤶ ᤘᤕᤧᤖᤥ॥))
LUK 23:18 ᤁᤖ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤀ᤺ᤰᤋᤧ. “ᤁᤴ ᤔᤏᤠ᤺ᤴ ᤂᤢᤶᤍᤡᤱ ᤐᤡᤖᤧ᤹ᤀᤠᤱ ᤀᤠᤏᤡᤃᤧ ᤗᤠᤃᤡ ᤒᤖᤒ᤻ᤒᤠᤛᤧᤏ ᤗᤧᤖᤧ ᤀᤠᤒᤡᤖᤧ᤹᥄”
LUK 23:19 (ᤂᤧᤴ ᤔᤏᤠ᤺ᤴ ᤕᤧᤰᤕᤰᤁᤥ ᤜᤠᤱᤒᤡᤑᤩᤢᤱ ᤆᤥᤃᤢᤒᤠ ᤏᤢ ᤔᤏᤠ ᤛᤧᤖᤢᤛᤡᤒᤠ ᤀᤠᤵᤋᤡᤰᤁᤥ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤧᤀᤠᤱ ᤕᤠᤃᤧᤖᤥ॥)
LUK 23:20 ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤗᤧᤵᤔᤠ ᤏᤡᤱᤘᤠ᤹ ᤆᤥᤃᤢᤖ ᤂᤧᤱᤜᤠ᤹ ᤕᤠᤶᤔᤥ ᤋᤠ᤹ᤈᤧᤰᤋᤢᤛᤡ.
LUK 23:21 ᤁᤖ ᤂᤧᤱᤜᤠ᤹ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄”
LUK 23:22 ᤜᤧᤰᤁᤩᤠᤱ ᤛᤢᤶᤗᤧᤱᤅᤥ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤌᤣᤀᤠᤱᤒᤣ᥅ ᤂᤧᤸᤗᤧ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤠ᤹ᤒᤣ᥅ ᤂᤢᤏᤧ᤹ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤕᤠ᤺ᤶᤒᤰ ᤆᤥᤃᤢᤒᤠ ᤀᤡᤱᤃᤠ᤹ ᤔᤧᤱᤄᤥ᤺ᤒᤠᤴᤗᤥ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤱᤛᤡᤱᤅᤠᤱ ᤗᤧᤖᤢᤱᤍᤣ᤺ᤛᤢᤱᤗᤥ॥”
LUK 23:23 ᤁᤖ ᤂᤧᤱᤜᤠ᤹ ᤀᤕᤠᤰ ᤔᤧᤸᤗ᤹ᤀᤣ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹॥” ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧᤒᤠᤸᤗᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤁᤧᤖᤧᤖᤥ॥
LUK 23:24 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤀᤡᤛᤡ᤺ᤰ ᤐᤡᤗᤠᤋᤛᤖᤧ ᤂᤢᤶᤍᤡᤱ ᤐᤡᤖᤢᤖᤥ॥
LUK 23:25 ᤂᤢᤏᤧ᤹ ᤂᤧᤴ ᤕᤧᤰᤕᤰᤁᤥ ᤜᤠᤱᤒᤡᤑᤩᤢᤱ ᤆᤥ᤺ᤰᤔᤠ ᤏᤢ ᤔᤏᤠ ᤛᤧᤵᤔᤠ ᤀᤠᤵᤋᤡᤰᤁᤥ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠᤒᤧᤴ ᤗᤧᤵᤔᤠ ᤐᤠᤱᤄᤢᤛᤡ. ᤁᤖ ᤕᤧᤛᤢ᤺ᤴ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤜᤧᤰᤁᤣ ᤔᤧᤈᤥᤃᤢᤖ ᤑᤠ᤹ᤀᤠᤱ ᤗᤧᤖᤢ ᤐᤡᤖᤢᤛᤡᤖᤥ॥
LUK 23:26 ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ᤖᤧ ᤐᤠᤱᤓᤣ᤹ᤀᤥᤏᤢ ᤁᤧᤓᤧᤶᤒᤠᤖ ᤁᤧᤒᤵᤐᤠ ᤛᤡᤔᤥᤏ ᤔᤧᤵᤔᤏᤠᤒᤠ ᤛᤠᤀᤡᤖᤣᤏᤡ ᤕᤧᤰᤕᤰᤁᤥ ᤁᤧᤕᤢᤱᤒᤧᤴ ᤔᤧᤍᤧᤶᤛᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤐᤱᤔᤠᤀᤠᤱ ᤕᤧᤛᤢ᤺ᤴ ᤋᤡᤶᤔᤠ ᤔᤧᤒᤠᤱᤄᤢᤖᤥ॥
LUK 23:27 ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ ᤂᤧᤵᤔᤥ ᤁᤧᤜᤠ᤺ᤵᤔᤠᤖ ᤔᤣᤖᤡᤱ ᤁᤧᤎᤰᤔᤠ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤘᤕᤧᤖᤥ॥
LUK 23:28 ᤁᤖ ᤕᤧᤛᤢᤖᤧ ᤂᤡᤖᤡ ᤜᤡᤛᤡᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤕᤖᤢᤛᤗᤧᤶᤔᤡᤸᤗᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤛᤣ. ᤂᤡᤏᤡ᤹ ᤀᤠᤗᤠᤃᤡ ᤔᤧᤜᤠᤒᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤀᤠᤒᤠᤅᤣ ᤗᤠᤃᤡ ᤏᤢ ᤂᤡᤏᤡ᤹ ᤛᤠ᤺ᤜᤠ᤹ᤖᤧ ᤗᤠᤃᤡ ᤜᤠᤒᤧᤶᤔᤧ᤹ᤀᤥ.
LUK 23:29 ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤛᤠ᤺ᤔᤧᤱᤃᤵᤔᤏᤠᤔᤠᤜᤠ᤹ ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤏᤢᤔᤧᤴᤎᤢᤰᤏᤠᤔᤠᤜᤠ᤹ ᤔᤢᤀᤡ᤹ᤛᤠᤔᤠᤛᤡᤖᤥ ᤗ᤹ᤖᤡᤰ ᤐᤠ᤺ᤵᤔᤠ ᤕᤧᤶ ᤋᤠᤖ ᤐᤳᤗᤥ॥
LUK 23:30 ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ᤏᤠᤱᤈᤱᤜᤠ᤹ ᤀᤠᤏᤡᤃᤧ ᤛᤶᤍᤠᤱ ᤔᤰᤌᤩᤧ᤹ᤀᤥ᥄ ᤜᤧᤰᤁᤩᤠᤱ ᤁᤥ᤺ᤰᤔᤠᤜᤠ᤹ ᤕᤠᤵᤔᤡ ᤀᤠᤗᤢᤵᤋᤧᤀᤥ᥄ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥
LUK 23:31 ᤌᤣᤀᤠᤱᤓᤧᤸᤗᤧ ᤛᤖᤡ᤺ᤳᤁᤩᤠ᤺ᤵᤐᤠ ᤁᤢᤜᤡᤱᤘᤧᤳ ᤛᤡᤱᤅᤡᤴᤏᤣ ᤀᤰᤂᤣ ᤔᤧᤔᤧᤳᤋᤢᤸᤗᤧ. ᤁᤧᤜᤣᤒᤠ ᤛᤡᤱᤅᤡᤱᤃ ᤀᤠᤰᤂᤣ ᤔᤧᤔᤧᤳᤋᤢᤀᤡᤖᤥ᥅”
LUK 23:32 ᤂᤢᤏᤧ᤹ᤏᤢᤀᤣ ᤏᤧᤵᤑᤢ ᤁᤢᤓᤠᤱ ᤁᤧᤓᤣ᤺ᤶᤒᤠᤜᤠ᤹ᤀᤠᤱ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤔᤧᤍᤣ᤹ᤖᤢᤛᤡ॥
LUK 23:33 ᤂᤧᤱᤜᤠ᤹ ᤔᤡᤰᤂᤥ᤺ᤰᤐᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤃᤧᤖᤧᤀᤠᤱ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖᤥ॥ ᤂᤧᤴ ᤏᤧᤵᤑᤢ ᤁᤢᤓᤠᤱ ᤁᤧᤓᤣ᤺ᤶᤒᤠᤜᤠ᤹ ᤕᤧᤛᤢᤖᤧ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤔᤧᤓᤥ᤺ᤴᤍᤢᤛᤡᤖᤥ॥
LUK 23:34 ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤦ. ᤁᤱᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧ ᤌᤧᤔᤠ ᤔᤧᤈᤥᤃᤢᤖ ᤔᤧᤒᤳ ᤌᤣᤀᤠᤱ ᤔᤧᤴᤏᤡ᤺ᤛᤢᤴᤗᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤋ᤹ᤕᤠ᤺ᤴᤛᤥ᤺ᤴ ᤔᤧᤃᤧᤛᤢᤖᤥ॥
LUK 23:35 ᤔᤠ᤺ᤱᤄᤠᤗᤠᤶ ᤔᤏᤠᤜᤠ᤹ ᤀᤥᤔᤧᤔᤕᤧᤖ ᤔᤧᤕᤧᤒᤧ. ᤁᤖ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤀᤰᤂᤣ ᤔᤧᤔᤧᤳᤋᤢ. “ᤂᤧᤸᤗᤧ ᤘᤣ᤹ ᤔᤏᤠᤜᤠ᤹ᤃ ᤛᤧ᤺ᤵᤋᤢᤛᤡ. ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ ᤀᤠᤒᤠᤅᤣ ᤛᤧ᤺ᤵᤛᤡᤱᤗ᥄”
LUK 23:36 ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤔᤧᤎᤠᤅᤧᤀᤠᤱ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤜᤧᤰᤁᤩᤠᤱ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤎᤢᤱᤄᤢᤖ
LUK 23:37 ᤔᤧᤔᤧᤳᤋᤢ. “ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧ ᤑᤠ᤹ᤃᤪ ᤀᤠᤒᤠᤅᤣ ᤛᤧ᤺ᤵᤛᤡᤱᤅᤧ᤹ᤀᤥ॥”
LUK 23:38 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰ ᤛᤶᤍᤠᤱ ᤁᤱᤃ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤗᤥ ᤗ᤹ᤖᤡᤰ ᤀᤠᤵᤋᤡᤰ ᤛᤰᤁᤡᤴ ᤔᤧᤛᤠᤵᤋᤢᤀᤠᤱ ᤔᤧᤓᤳᤇᤢ॥
LUK 23:39 ᤂᤧᤵᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤁᤢᤓᤠᤱ ᤁᤧᤓᤣ᤺ᤶᤒᤠᤎᤡᤰᤗᤧ ᤂᤢᤏᤧ᤹ ᤐᤠ᤺ᤴᤏᤡᤸᤗᤧ ᤗᤰᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤔᤧ᤺ᤶᤒᤡ᥅ ᤂᤧᤏᤧ᤹ ᤛᤧ᤺ᤵᤛᤡᤱᤅᤧ᤹ᤀᤠᤱ ᤀᤠᤴᤇᤡᤃᤧᤀᤠᤱ ᤕᤠᤵᤔᤡ ᤀᤠᤛᤧ᤺ᤵᤋᤧ᤹॥”
LUK 23:40 ᤁᤖ ᤘᤣ᤹ᤛ᤻ᤔᤠ ᤁᤢᤓᤠᤱ ᤁᤧᤓᤣ᤺ᤶᤒᤠᤸᤗᤧ ᤂᤧᤴ ᤑᤧ᤺ᤰᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤱᤃᤡᤖᤢᤴᤒᤡ᥅ ᤀᤠᤏᤡ᤹ ᤛᤢᤶᤒᤪᤠᤱᤅᤧ ᤗᤳᤇᤠ ᤐᤖᤡᤰᤐᤠ ᤂᤢᤶᤍᤡᤱᤅᤥ ᤀᤠᤎᤩᤧᤀᤠᤱ ᤀᤠᤘᤠ᤹.
LUK 23:41 ᤆᤩᤠᤛᤠᤱ ᤀᤠᤴᤇᤡ᤹ᤃ ᤀᤠᤈᤥᤃᤧᤳᤇᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤀᤠᤄᤥ᤺ᤛᤧᤳᤇᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥”
LUK 23:42 ᤜᤧᤰᤁᤩᤠᤱ ᤂᤢᤏᤧ᤹ ᤕᤧᤛᤢ᤺ᤴ ᤔᤧᤳᤋᤢ. “ᤕᤧᤛᤢᤀᤣ. ᤂᤧᤏᤧ᤹ ᤁᤧᤜᤠᤱᤈᤢᤶᤔᤥ ᤁᤧᤕᤢ᤺ᤸᤗᤧ ᤀᤡᤱᤃᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ॥”
LUK 23:43 ᤕᤧᤛᤢᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤡᤱᤃᤠ᤹ ᤂᤧᤏᤧ᤹ ᤔᤧᤳᤏᤧ᤹. ᤛᤧᤰᤂᤠᤀᤣ ᤂᤧᤏᤧ᤹ ᤀᤠᤀᤡᤴᤇᤠ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤘᤠ᤹ᤖᤥ॥”
LUK 23:44 ᤀᤠᤸᤗ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤂᤡᤖᤡ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤏᤠᤶᤔᤡᤴ ᤔᤧᤀᤥ᤺ᤳᤋᤧᤴᤏᤠᤱ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤠᤍᤠᤶᤔᤠᤸᤗᤧ ᤂᤧᤴ ᤗᤠᤈᤣ᤹ᤀᤡᤴ ᤛᤡᤍᤧᤵ ᤋᤧᤵᤋᤢᤖᤥ॥ ᤜᤧᤰᤁᤩᤠᤱ ᤔᤠᤱᤜᤡᤶᤔᤥ ᤑᤥ᤺ᤶᤔᤏᤠᤒᤠ ᤑᤥ᤺ᤴᤍᤠ᤺ᤴ ᤌᤥᤏᤢ ᤕᤥ ᤌᤠᤖᤡᤰ ᤁᤢᤗᤢᤶᤔᤥ ᤋᤧᤖᤧ᤹ ᤋᤧ᤺ᤰᤂᤧᤖᤥ॥
LUK 23:46 ᤕᤧᤛᤢ᤺ᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤜᤢᤰᤛᤢᤵᤏᤧ᤹ᤖᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤰᤔᤠ ᤐᤣᤖᤥ॥
LUK 23:47 ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤁᤴ ᤜᤡᤴᤍᤥ᤺ᤰᤜᤠ᤹ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤀᤰᤂᤣ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤴ ᤛᤠᤶᤕᤥᤏᤡᤒᤠ ᤘᤕᤧᤖᤥ॥”
LUK 23:48 ᤜᤧᤰᤁᤩᤠᤱ ᤂᤧᤵᤔᤥ ᤁᤴ ᤜᤡᤴᤍᤥ᤺ᤰ ᤀᤥᤔᤧᤳᤇᤧ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ᤖᤧ ᤁᤴ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤛᤱᤒᤣᤴ ᤔᤧᤜᤡᤵᤋᤢᤖ ᤔᤣᤖᤡᤱ ᤌᤰᤏᤢ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
LUK 23:49 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤠᤰ ᤁᤢᤴᤍᤣ᤺ᤱ-ᤁᤢᤴᤈᤢᤶᤜᤠ᤹ ᤏᤢ ᤂᤢᤏᤧ᤹ ᤃᤠᤗᤡᤗᤗᤠᤶ ᤁᤧᤍᤡᤶᤔᤠᤖ ᤁᤧᤍᤠ᤺ᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤔᤠ᤺ᤱᤄᤠᤗᤠᤶ ᤁᤴ ᤜᤡᤴᤍᤥ᤺ᤰᤁᤡᤴ ᤀᤥᤔᤧᤔᤧᤳᤋᤢᤖ ᤔᤧᤕᤧᤒᤧᤖᤥ॥
LUK 23:50 ᤀᤠᤸᤗ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑ ᤔᤧᤵᤔᤏᤠᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤕᤜᤢᤍᤡ ᤕᤧᤈᤢᤶᤓᤥᤒᤠ ᤐᤠᤛᤡᤱᤐᤠᤍᤠᤱᤗᤠᤀᤠᤱ ᤘᤕᤧᤖᤥ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤁᤧᤜᤠᤱᤒᤠ ᤏᤢ᤺ᤒᤠ ᤏᤢ ᤛᤠᤶᤕᤥᤏᤡᤒᤠ ᤔᤏᤠ ᤆᤥᤃᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤴ ᤕᤠ᤺ᤶᤒᤰᤁᤥ ᤌᤣᤀᤠᤱ ᤋᤧᤴᤍᤡᤱ ᤔᤧᤶᤒᤡᤀᤣ ᤘᤕᤧᤖᤥ॥
LUK 23:52 ᤂᤢᤏᤧ᤹ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ॥
LUK 23:53 ᤜᤧᤰᤁᤩᤠᤱ ᤂᤢᤏᤧ᤹ ᤕᤧᤛᤢᤖᤧ ᤁᤢᤎᤰᤁᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤗᤠᤶ ᤌᤠ᤺ᤛᤢᤀᤠᤱ ᤏᤢ᤺ᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤢᤀᤠᤱ ᤂᤥ᤺ᤶᤔᤏᤠᤒᤠ ᤗᤢᤱ ᤀᤡᤵᤐᤢᤱᤅᤥ ᤏᤧᤛ᤻ᤛᤢᤖᤥ॥ ᤂᤧᤴ ᤀᤡᤵᤐᤢᤱᤅᤥ ᤋᤃᤡ ᤀᤠᤳᤋᤡᤴᤏᤠᤱ ᤔᤧᤴᤏᤧᤀᤣ ᤘᤕᤧᤖᤥ॥
LUK 23:54 ᤀᤠᤸᤗ ᤁᤴ ᤏᤠ᤺ᤶᤛᤡᤱ ᤕᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤴ ᤘᤕᤧ ᤜᤧᤰᤁᤩᤠᤱ ᤏᤠ᤺ᤶᤛᤡᤱ ᤕᤧᤴ ᤋᤠ᤺ᤔᤠ ᤀᤡ᤺ᤳᤋᤧᤀᤠᤱ ᤘᤕᤧ॥
LUK 23:55 ᤜᤧᤰᤁᤩᤠᤱ ᤃᤠᤗᤡᤗᤗᤠᤶ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤍᤠ᤺ᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤕᤢᤛᤢᤑᤧᤴ ᤔᤧᤍᤡᤶᤍᤢᤖ ᤕᤧᤛᤢᤖᤧ ᤁᤢᤎᤰᤁᤡᤴ ᤔᤧᤏᤧᤛ᤻ᤛᤢᤒᤠ ᤀᤡᤵᤐᤢᤱᤅᤡᤴ ᤔᤧᤏᤡ᤺ᤛᤢᤀᤠᤱ
LUK 23:56 ᤂᤧᤱᤜᤠ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤥ ᤜᤢ᤺ᤵᤔᤠ ᤑᤠ᤹ᤀᤠᤱ ᤔᤠᤖᤢᤰ ᤏᤢ ᤛᤡᤍᤠ᤹ᤜᤠ᤹ ᤕᤠᤖᤡᤵ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤁᤴ ᤛᤠᤶᤕᤥ ᤀᤡᤱᤈᤠ᤺ᤱᤅᤡᤴ ᤁᤢᤀᤡᤛᤡ᤺ᤰ ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤱᤜᤠ᤹ ᤔᤧᤏᤠ᤺ᤶᤛᤡᤱᤗᤥ॥
LUK 24:1 ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤎᤰᤁᤥ ᤜᤢ᤺ᤵᤔᤠ ᤑᤠ᤹ᤀᤠᤱ ᤕᤠᤖᤡᤵ ᤔᤧᤈᤥᤃᤢᤒᤠ ᤔᤠᤖᤢᤰ ᤏᤢ ᤛᤡᤍᤠ᤹ᤜᤠ᤹ ᤔᤧᤕᤠᤱᤛᤡᤱᤅᤠᤱ ᤀᤡᤵᤐᤢᤱᤍᤧᤴᤏᤥ ᤔᤧᤒᤣ॥
LUK 24:2 ᤂᤧᤱᤜᤠ᤹ᤖᤧ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤔᤧᤕᤧᤵᤛᤢᤒᤠ ᤕᤶᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢᤀᤠᤱ ᤏᤧᤛ᤻ᤛᤧᤒᤠ ᤔᤧᤏᤡ᤺ᤛᤢ.
LUK 24:3 ᤁᤖ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤛ᤻ᤛᤧᤸᤗᤧ ᤍᤠᤱᤒᤠ ᤕᤧᤛᤢᤖᤧ ᤁᤢᤎᤰᤁᤡᤴ ᤔᤧᤱᤄᤥ᤺ᤛᤢᤴᤗᤥ॥
LUK 24:4 ᤂᤧᤱᤜᤠ᤹ ᤂᤧᤵᤔᤥ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤕᤧᤒᤧᤸᤗᤧ ᤂᤢᤴᤇᤡ᤹ ᤐᤣᤛᤠᤱ ᤔᤡᤰᤁᤡᤴᤏᤣ ᤁᤧᤈᤧᤶᤒᤠ ᤑᤛᤢ᤺ᤳᤁᤩᤠ᤺ᤵᤐᤠ ᤋᤣ᤺ᤳ ᤁᤧᤈᤠᤱᤒᤠ ᤏᤧᤵᤑᤢ ᤔᤏᤠᤜᤠ᤹ ᤕᤧᤒᤧᤳᤇᤡᤒᤠ ᤔᤧᤏᤡ᤺ᤛᤢᤛᤡ॥
LUK 24:5 ᤂᤧᤱᤜᤠ᤹ ᤂᤢᤏᤡ᤹ ᤕᤱᤔᤠ ᤁᤧᤖᤧᤀᤠᤱ ᤂᤠᤶᤔᤥ ᤛᤠᤶᤒᤥ᤺ᤴ ᤜᤒᤳ ᤔᤧᤒᤥ᤺ᤰᤂᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤌᤣᤀᤠᤱ ᤂᤡᤏᤡ᤹ ᤁᤢᤜᤡᤱᤘᤧᤳ ᤔᤏᤠ᤺ᤴ ᤁᤢᤛᤡᤘᤧᤳ ᤔᤏᤠᤗᤢᤶᤔᤥ ᤁᤧᤃᤥ᤺ᤳᤋᤢᤶᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ॥
LUK 24:6 “ᤂᤢᤏᤧ᤹ᤃ ᤁᤵᤔᤥ ᤜᤥ᤺ᤵᤗᤥ᥄ ᤂᤢᤏᤧ᤹ᤃ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ᤖᤥ॥ ᤃᤠᤗᤡᤗᤀᤥ ᤂᤡᤏᤡ᤹ᤏᤢ ᤘᤕᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ–
LUK 24:7 ‘ᤔᤧᤴᤇᤠᤶᤛᤠ᤺ᤴ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤀᤡᤱᤔᤧᤗᤧᤰᤋᤢ᤹ᤀᤠᤱ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢ᤹. ᤁᤖ ᤛᤢᤶᤛᤡᤃᤣ᤺ᤰᤐᤠ ᤕᤧᤴᤏᤥ ᤕᤠᤶᤔᤥ ᤜᤡᤱᤗᤥ॥’”
LUK 24:8 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖ
LUK 24:9 ᤀᤡᤵᤐᤢᤱᤗᤠᤶ ᤔᤧᤏᤢ᤺ᤰᤂᤧᤀᤠᤱ ᤌᤡᤰ-ᤌᤡᤰ (᥇᥇) ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ ᤁᤧᤖᤧᤰ ᤔᤧᤈᤧᤰᤋᤢᤛᤡᤖᤥ॥
LUK 24:10 ᤀᤠᤸᤗ ᤂᤧᤴ ᤔᤧᤴᤇᤢᤔᤠᤜᤠ᤹ᤃ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤕᤥᤀᤠᤴᤏᤠ. ᤕᤠᤁᤢᤒᤖᤧ ᤁᤢᤶᤔᤠ ᤔᤖᤡᤕᤔ ᤜᤧᤰᤁᤩᤠᤱ ᤘᤣ᤹ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤘᤕᤧᤖᤥ॥
LUK 24:11 ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤠᤔᤧᤴᤇᤠ᤹ᤖᤢᤴ॥ ᤁᤱᤃ ᤔᤧᤴᤘᤠ᤹ᤔᤏᤠ ᤐᤠ᤺ᤴᤗᤰ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤥ॥
LUK 24:12 ᤁᤖ ᤐᤋᤪᤢᤛᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤀᤡᤵᤐᤢᤱᤅᤥ ᤗᤥ᤺ᤰᤋᤧᤖ ᤐᤣ॥ ᤂᤧᤵᤔᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤀᤥᤔᤧᤳᤋᤢᤸᤗᤧᤃ ᤂᤧᤵᤔᤥ ᤑ᤺ᤃᤧᤗ᤹ᤒᤠ ᤆᤣᤍᤣ᤺ᤳᤋᤡᤴ ᤛᤧ᤺ᤖᤧᤀᤠᤱ ᤏᤧᤛ᤻ᤛᤧᤒᤠ ᤏᤡ᤺ᤛᤢ॥ ᤂᤢᤏᤧ᤹ᤃ ᤌᤣ᤺ᤴᤏᤧ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤖ ᤏᤢ᤺ᤰᤂᤧ ᤐᤣᤖᤥ॥
LUK 24:13 ᤀᤠᤸᤗ ᤒᤠ ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤶᤗᤠᤶ ᤌᤡᤰ-ᤌᤡᤰ (᥇᥇) ᤁᤡᤗᤥᤔᤡᤋᤖ ᤔᤠ᤺ᤱᤄᤠ ᤀᤡᤶᤔᤠᤀᤢᤛ ᤐᤠᤱᤓᤣ᤹ᤒᤠ ᤗᤠᤶᤔᤥ
LUK 24:14 ᤂᤧᤱᤜᤠ᤹ᤖᤧ ᤀᤠᤀᤡᤴ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤈᤧᤰᤂᤧᤳᤇᤡᤖ ᤐᤣᤛᤡᤖᤥ॥
LUK 24:15 ᤂᤧᤱᤜᤠ᤹ ᤜᤧᤰᤁᤣᤗ᤹ᤖᤡᤰ ᤋᤠ᤹ᤈᤧᤰᤂᤧᤛᤡᤸᤗᤧ ᤂᤧᤵᤔᤥ ᤕᤧᤛᤢ᤺ᤴ ᤋᤩᤧᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧ.
LUK 24:16 ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤇᤢᤴᤗ ᤑᤠ᤹ᤀᤠᤱ ᤂᤢᤴᤇᤡ᤹ ᤔᤡᤰᤁᤡᤴ ᤌᤣ᤺ᤰᤋᤢ ᤐᤡᤖᤢᤛᤡᤀᤠᤱ ᤘᤕᤧᤖᤥ॥
LUK 24:17 ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤔᤧ᤺ᤶᤒᤧ. ᤂᤡᤴᤇᤡ᤹ ᤌᤧᤔᤠ ᤐᤠ᤺ᤴᤏᤡᤴᤏᤧ ᤁᤧᤈᤧᤱᤛᤢᤖ ᤗᤠᤱᤃᤧᤄᤣ᤺ᤰᤛᤡᤒᤣ᥅” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤔᤡᤱᤘᤠ ᤁᤢᤎᤡᤶ ᤌᤵᤐᤧᤳ ᤕᤧᤒᤧᤳᤇᤡᤖᤥ॥
LUK 24:18 ᤂᤧᤱᤜᤠ᤹ᤀᤥ ᤰᤗᤡᤀᤥᤐᤠᤛ ᤔᤧᤵᤔᤏᤠᤒᤠ ᤌᤡᤰᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤔᤧ᤺ᤶᤒᤧ. ᤂᤧᤏᤧ᤹ ᤕᤖᤢᤛᤗᤧᤶᤔᤥ ᤁᤧᤴᤕᤢᤱᤏᤧᤴᤒᤡ᥅ ᤀᤠᤀᤡᤴ ᤋᤠ᤺ᤴᤍᤡᤰ ᤂᤧᤵᤔᤥ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤏᤡᤱᤘᤠ᤹ ᤁᤧᤱᤄᤥ᤺ᤛᤢᤴᤒᤡ᥅”
LUK 24:19 ᤕᤧᤛᤢᤖᤧ ᤔᤧᤳᤋᤢᤛᤡ. “ᤔᤧ᤺ᤶᤒᤧ. ᤌᤧᤔᤠ ᤐᤠ᤺ᤴᤏᤡᤴᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤏᤠᤛᤖᤋᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤀᤠ. ᤂᤢᤏᤧ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤘᤕᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤗᤢᤶᤔᤥ ᤂᤢᤏᤧ᤹ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤥ ᤏᤢ ᤕᤠ᤺ᤶᤒᤰᤁᤥ ᤔᤢᤰᤛᤠᤶᤛᤠᤒᤠ ᤆᤥᤃᤧᤖᤥ॥
LUK 24:20 ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤀᤠᤏᤡᤃᤧ ᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤧ᤹ᤃ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤖ ᤑᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤢᤰᤔᤧᤛᤢᤵᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖᤥ.
LUK 24:21 ᤁᤖ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤔᤏᤠ ᤑᤠ᤹ᤀᤠᤱ ᤀᤠᤏᤡᤃᤧᤃ ᤁᤢᤗᤠᤶ ᤀᤥᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤂᤧᤴᤏᤠᤱᤎᤥ ᤀᤠᤸᤗᤥ ᤁᤴ ᤜᤡᤴᤍᤥ᤺ᤰ ᤐᤥ᤺ᤰᤂᤧᤒᤠ ᤛᤢᤶ ᤕᤧᤴ ᤁᤧᤖᤧᤖᤥ॥
LUK 24:22 ᤀᤠᤏᤡᤃᤧ ᤗᤢᤶᤔᤥ ᤁᤢᤓᤠ ᤔᤧᤴᤇᤢᤔᤠᤜᤠ᤹ᤖᤧ ᤀᤠᤏᤡᤃᤧ ᤏᤡᤱᤘᤠ᤹ ᤔᤧᤔᤠᤛᤢᤖᤥ॥ ᤀᤠᤀᤡᤴ ᤋᤠᤏᤠᤶᤛᤠ ᤂᤧᤱᤜᤠ᤹ ᤀᤡᤵᤐᤢᤱᤅᤥ ᤔᤧᤒᤣ. ᤁᤖ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤂᤧᤵᤔᤥ ᤔᤧᤱᤄᤥ᤺ᤛᤢᤴ॥ ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤏᤡ᤺ᤛᤢᤛᤡᤒᤠ ᤐᤠ᤺ᤴᤏᤡᤴ ᤏᤢ ᤂᤧᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ᤃ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤜᤡᤅᤧᤖᤥ ᤑᤠ᤹ᤀᤠᤱ ᤐᤠ᤺ᤳᤋᤧᤳᤇᤢᤒᤠ ᤐᤠ᤺ᤴᤏᤡᤴ ᤔᤧᤈᤧᤰᤋᤡᤃᤧᤖᤥ॥
LUK 24:24 ᤜᤧᤰᤁᤩᤠᤱ ᤀᤠᤏᤡᤃᤧ ᤁᤢᤓᤠ ᤋᤣ᤺ᤱᤈᤢᤶᤜᤠ᤹ ᤀᤡᤵᤐᤢᤱᤍᤧᤴᤏᤥ ᤔᤧᤒᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤂᤧᤵᤔᤥ ᤔᤧᤏᤡ᤺ᤛᤢ. ᤁᤖ ᤂᤧᤱᤜᤠ᤹ᤖᤧᤀᤠᤱ ᤕᤧᤛᤢ᤺ᤴ ᤔᤧᤴᤏᤡ᤺ᤛᤢᤴᤗᤥ॥”
LUK 24:25 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤏᤡᤱᤘᤠ᤹ᤀᤡᤴ ᤀᤠᤰᤂᤧᤴ ᤛᤠ᤹ᤖᤡᤰ ᤌᤢᤱᤒᤠᤒᤣ᥄ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥ᤺ᤰᤔᤠ ᤀᤠᤰᤂᤧᤴ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤐᤠᤒᤣ᥅
LUK 24:26 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤢᤰᤂᤣ ᤆᤠᤔᤠᤀᤠᤱ ᤁᤢᤔᤡᤔᤡᤍᤡᤱᤅᤥ ᤐᤣ᤺ᤰᤔᤠ ᤁᤧᤒᤥ᤺ᤱᤒᤠ ᤘᤕᤧ ᤒᤡ ᤔᤧ᤺ᤶᤒᤡ᥅”
LUK 24:27 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤀᤠᤒᤠᤅᤣ ᤁᤢᤕᤠ᤺ᤶᤒᤣᤀᤥ ᤔᤥᤛᤠᤖᤧ ᤁᤢᤛᤠᤵᤐᤴᤜᤠ᤹ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤵᤐᤴᤏᤥ ᤌᤠᤖᤡᤰ ᤁᤢᤒᤣ᤺ᤴ ᤐᤥᤎᤰ ᤆᤥᤃᤢ ᤐᤡᤖᤢᤛᤡᤖᤥ॥
LUK 24:28 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤒᤠ ᤐᤠᤱᤓᤣ᤹ᤀᤡᤸᤗᤧ ᤁᤢᤒᤣᤛᤠᤱ ᤔᤧᤃᤧᤖᤧᤀᤠᤱ ᤕᤧᤛᤢ᤺ᤴ ᤔᤡᤛᤠᤰ ᤔᤠ᤺ᤱᤄᤠ ᤁᤧᤒᤣ᤺ᤰᤐᤠ ᤗᤠᤶᤛᤡᤱᤗᤥ.
LUK 24:29 ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤧᤇᤢᤖ ᤐᤣᤗᤡ ᤑᤠᤰᤋᤧᤳᤇᤢ. “ᤂᤧᤏᤧ᤹ ᤀᤠᤴᤇᤡᤃᤧᤏᤢᤀᤣ ᤀᤠᤀᤡᤴ ᤛᤧᤴᤍᤡᤰ ᤕᤠᤱᤎᤥ᤺ᤰᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗᤥ ᤏᤠᤶᤎᤩᤧᤀᤠᤱ ᤂᤠᤍᤠᤶᤗ ᤐᤳᤗᤥ॥” ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤕᤠᤱᤎᤥ᤺ᤰᤛᤧ ᤐᤣᤖᤥ॥
LUK 24:30 ᤜᤧᤰᤁᤩᤠᤱ ᤂᤢᤏᤧ᤹ ᤆᤠᤔᤠᤍᤧᤴᤏᤥ ᤕᤢᤱᤛᤡᤱᤅᤡᤸᤗᤧ ᤂᤖᤧ᤺ᤱᤅᤡᤴ ᤂᤵᤛᤢ ᤜᤧᤰᤁᤩᤠᤱ ᤏᤥᤃᤧᤴ ᤐᤡᤖᤢᤀᤠᤱ ᤑᤢ᤹ᤖᤢᤖ ᤂᤧᤱᤜᤠ᤹ ᤐᤡᤖᤢᤛᤡ॥
LUK 24:31 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤜᤖᤧᤀᤠᤱ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤧᤳᤇᤢ. ᤁᤖ ᤂᤧᤵᤔᤥᤀᤣ ᤂᤢᤴᤇᤡ᤹ ᤋᤃᤡᤗᤠᤶ ᤂᤢᤏᤧ᤹ ᤀᤠᤗᤠᤵ ᤐᤥ᤺ᤰᤂᤧ ᤐᤣᤖᤥ॥
LUK 24:32 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤏᤧᤳᤇᤡ. “ᤔᤧ᤺ᤶᤒᤧ. ᤗᤠᤶᤔᤥ ᤀᤠᤏᤡ᤹ ᤋᤠ᤹ᤀᤠᤈᤧᤰᤂᤧᤖ ᤀᤠᤓᤧᤖᤧᤖ ᤀᤠᤒᤳᤇᤧᤸᤗᤧ ᤂᤢᤏᤧ᤹ ᤛᤠᤶᤕᤥᤛᤠᤵᤗᤠ᤺ᤴ ᤐᤥᤎᤰ ᤀᤠᤈᤥᤃᤧᤳᤇᤡ ᤀᤠᤒᤡᤖᤧᤳᤇᤡᤸᤗᤧ ᤀᤠᤴᤇᤡ᤹ ᤛᤡᤰ ᤐᤛᤶᤛᤔᤧᤀᤠᤱ ᤘᤕᤧᤒᤡ ᤔᤧ᤺ᤶᤒᤡ᥅”
LUK 24:33 ᤜᤧᤰᤁᤩᤠᤱ ᤂᤡᤔᤥ ᤏᤧᤵᤔᤠᤱ ᤒᤠ ᤂᤧᤴ ᤕᤧᤶᤔᤥ ᤐᤥᤃᤧᤳᤇᤡᤀᤠᤱ ᤕᤖᤢᤛᤗᤧᤔ ᤗᤧᤵᤔᤠᤱ ᤌᤠᤏᤧᤳᤇᤡᤖᤥ॥ ᤂᤧᤵᤔᤥ ᤌᤡᤰ-ᤌᤡᤰ (᥇᥇) ᤜᤢ᤹ᤛᤠᤶᤒᤠᤜᤠ᤹ ᤏᤢ ᤘᤣ᤹ᤜᤠ᤹ ᤛᤥᤖᤡᤰ ᤔᤧᤕᤢᤅᤧᤒᤠ ᤋᤢᤔᤧᤳᤇᤢᤛᤡ॥
LUK 24:34 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤔᤧᤳᤋᤢᤛᤡ. “ᤍᤠᤱᤒᤠᤴ ᤛᤧᤰᤂᤠᤀᤣ ᤛᤩᤧᤀᤠᤱ ᤕᤠᤶᤔᤥ ᤜᤡᤅᤧᤖᤥ. ᤜᤧᤰᤁᤩᤠᤱ ᤛᤡᤔᤥᤏᤧᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤒᤠᤀᤣᤖᤥ᥄”
LUK 24:35 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤗᤠᤶᤔᤥ ᤕᤧᤛᤢ᤺ᤴ ᤋᤢᤔᤧᤳᤇᤢᤀᤠᤱ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤢ ᤆᤠᤈᤠᤔᤠ ᤕᤧᤶᤔᤥ ᤂᤢᤏᤧ᤹ ᤂᤖᤧ᤺ᤱᤅᤡᤴ ᤑᤢ᤹ᤖᤢᤸᤗᤧ ᤁᤢᤛᤡᤱ ᤏᤡ᤺ᤳᤋᤧᤳᤇᤢᤒᤠᤴ ᤁᤧᤖᤧᤰ ᤆᤧᤰᤂᤧᤳᤇᤢᤖᤥ॥
LUK 24:36 ᤜᤧᤰᤁᤩᤠᤱ ᤀᤠᤸᤗᤛᤠᤱ ᤔᤧᤒᤠᤖᤧᤖ ᤔᤧᤒᤳᤇᤧᤸᤗᤧ ᤕᤧᤛᤢ᤺ᤴ ᤀᤠᤒᤠᤅᤣ ᤂᤢᤏᤡ᤹ ᤗᤢᤶᤔᤥ ᤌᤠ᤺ᤶᤛᤡᤱᤅᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ॥”
LUK 24:37 ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧ॥ ᤂᤧᤱᤜᤠ᤹ᤖᤧᤃ ᤀᤠᤸᤗ ᤛᤡ᤺ᤛᤠᤶᤔᤡᤴᤏᤧ ᤀᤠᤏᤡ᤺ᤛᤢᤶ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ॥
LUK 24:38 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤕᤱᤔᤠ ᤁᤧᤖᤧᤒᤠ᥅ ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ᤒᤥ ᤌᤣᤀᤠᤱ ᤆᤵᤆᤡ ᤁᤧᤈᤥᤃᤢᤶᤒᤠᤒᤣ᥅
LUK 24:39 ᤀᤠᤜᤢᤰ ᤀᤠᤗᤠᤱᤜᤠ᤹ ᤀᤥᤔᤧᤳᤋᤧᤶᤔᤧ᤹᥄ ᤛᤧᤰᤂᤠᤀᤣ ᤁᤱᤃ ᤀᤡᤱᤃᤠ᤹ᤀᤣᤖᤥ॥ ᤀᤡᤱᤃᤠ᤹ ᤀᤠᤛᤢ᤺ᤛᤧᤶᤔᤧ᤹ᤀᤠᤱ ᤀᤥᤀᤠᤔᤧᤳᤋᤧᤶᤔᤧ᤹᥄ ᤛᤡ᤺ᤛᤠᤶᤔᤡᤸᤗᤧᤴ ᤀᤡᤱᤃᤠ᤹ ᤁᤳᤋᤢᤱᤒᤠ ᤜᤧᤰᤁᤣ ᤏᤧᤰᤛᤠ ᤏᤢ ᤕᤧᤵ ᤜᤥ᤺ᤵᤗᤥ॥”
LUK 24:40 ᤜᤧᤰᤁᤣ ᤔᤧᤳᤋᤢᤛᤡᤖ ᤂᤢᤏᤧ᤹ ᤁᤢᤗᤠᤱ ᤁᤢᤜᤢᤰᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥
LUK 24:41 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤛᤶᤛᤔᤧᤀᤠᤱ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤜ᤺ᤴᤍᤠ ᤔᤧᤗᤧᤰᤋᤧᤀᤠᤱ ᤔᤧᤕᤧᤒᤧᤖᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤆᤠᤔᤠ ᤁᤢᤈᤠᤎᤡᤰ ᤁᤧᤃᤳᤋᤢᤶᤒᤡ᥅”
LUK 24:42 ᤂᤧᤱᤜᤠ᤹ᤖᤧ ᤀᤥ᤹ᤔᤏᤠᤒᤠ ᤁᤢᤗᤧᤵᤌᤡᤰ ᤅᤠ ᤔᤧᤒᤡᤖᤢᤀᤠᤱ
LUK 24:43 ᤕᤧᤛᤢᤖᤧ ᤂᤢᤏᤡ᤹ ᤋᤃᤠᤱᤅᤧ ᤂᤧᤴ ᤋᤠ᤺ᤰᤋᤢᤀᤠᤱ ᤆᤍᤣ᤺ᤛᤢᤖᤥ॥
LUK 24:44 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. “ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧᤛᤠᤀᤣ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ. ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤵᤐᤴᤜᤠ᤹ᤀᤥ ᤏᤢ ᤛᤠᤶᤗᤥ ᤛᤢᤶ ᤛᤠᤵᤐᤴᤏᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤛᤠᤵᤋᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗᤥ ᤑᤠ᤹ᤀᤠᤱ ᤔᤧᤳᤏᤡᤱᤅᤠᤱ ᤘᤕᤠᤱᤗᤥ॥”
LUK 24:45 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤛᤠᤶᤕᤥᤛᤠᤵᤗᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤜᤴᤍᤢᤒᤡᤖᤢᤛᤡᤀᤠᤱ
LUK 24:46 ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤱᤃ ᤋᤢᤰᤂᤣ ᤆᤠᤔᤠᤀᤣ ᤐᤥ᤺ᤱ. ᤜᤧᤰᤁᤩᤠᤱ ᤛᤡ᤺ᤔᤠᤀᤠᤱ ᤛᤢᤶ ᤕᤧᤴᤏᤥ ᤕᤠᤶᤔᤥ ᤜᤡᤱᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤛᤠᤵᤋᤧᤀᤠᤱ ᤐᤳᤗᤥ॥
LUK 24:47 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤥ ᤗᤠᤕᤥᤗᤠᤶ ᤜᤡᤴᤇᤡᤱᤔᤠ ᤏᤢ ᤗᤧᤵᤔᤡᤖᤧᤴ ᤛᤢᤏᤠᤀᤡᤱᤅᤡᤴ ᤕᤖᤢᤛᤗᤧᤶᤔᤥ ᤜᤣ᤺ᤰᤔᤠᤀᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤀᤡᤱᤓᤥ᤺ᤔᤠᤀᤣ ᤐᤥ᤺ᤱᤗᤥ॥
LUK 24:48 ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤁᤴ ᤐᤠ᤺ᤴᤏᤡᤸᤗᤧᤴ ᤜᤡᤴᤎᤥ᤺ᤰᤔᤡᤒᤠ ᤁᤧᤘᤕᤡ᤹ᤖᤥ॥
LUK 24:49 ᤀᤠᤸᤗ ᤂᤧᤵᤛᤧᤶᤔᤧ᤹ᤀᤥ. ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤂᤡᤏᤡ᤹ᤀᤥ ᤐᤠᤱᤄᤢᤱ ᤕᤢ᤺ᤛᤢᤱᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤢᤰᤛᤠᤶᤔᤡᤸᤗᤧ ᤁᤢᤎᤡᤶ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤒᤠ ᤁᤴ ᤕᤧᤰᤕᤰᤁᤥᤀᤣ ᤘᤕᤧᤶᤔᤧ᤹ᤀᤥ॥”
LUK 24:50 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤒᤧᤌᤠᤏᤡ ᤌᤠᤖᤡᤰ ᤋᤣ᤹ᤖᤢᤛᤡᤀᤠᤱ ᤁᤢᤜᤢᤰᤜᤠ᤹ ᤌᤠ᤺ᤱ ᤑᤥ᤺ᤰᤂᤢᤖ ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖᤥ॥
LUK 24:51 ᤂᤧᤱᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖ ᤐᤳᤇᤧᤸᤗᤧ ᤂᤢᤏᤧ᤹ ᤌᤠ᤺ᤱᤎᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤐᤰᤂᤧᤖ ᤐᤣᤖᤥ॥
LUK 24:52 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤛᤔᤧᤖ ᤂᤢᤏᤧ᤹ ᤛᤣᤘᤠ ᤔᤧᤈᤥᤃᤢᤀᤠᤱ ᤕᤖᤢᤛᤗᤧᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣ.
LUK 24:53 ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤔᤠᤱᤜᤡᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤔᤧᤘᤕᤧᤖᤥ॥
JOH 1:1 ᤋᤥᤗᤡᤱᤛᤥᤔᤢᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ. ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤘᤕᤧᤖᤥ॥ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤕᤧ ᤜᤧᤰᤁᤩᤠᤱ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱ ᤘᤕᤧᤖᤥ॥
JOH 1:2 ᤂᤢᤏᤧ᤹ᤃ ᤋᤥᤗᤡᤱᤛᤥᤔᤢᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤕᤧᤖᤥ॥
JOH 1:3 ᤂᤢᤏᤧ᤹ᤗᤠᤶᤔᤣ ᤏᤠᤘᤠᤃᤧᤴ ᤆᤀᤡ᤺ᤳᤋᤥᤒᤠ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤒᤠᤖᤥ॥ ᤜᤧᤰᤁᤩᤠᤱ ᤁᤴ ᤁᤧᤒᤥ᤺ᤱᤒᤠᤜᤠ᤹ᤀᤥ ᤂᤢᤏᤧ᤹ ᤔᤧ᤺ᤴᤏᤣ ᤌᤣᤎᤡᤰᤁᤠᤱ ᤔᤧᤒᤥ᤺ᤰᤂᤧᤴ॥
JOH 1:4 ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤂᤢᤏᤧ᤹ᤏᤢ ᤘᤕᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤸᤗᤧ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤐᤡᤖᤢᤛᤡᤖᤥ॥
JOH 1:5 ᤂᤧᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤱᤃ ᤔᤠᤰᤆᤡᤃᤧᤴ ᤂᤠᤍᤠᤶᤔᤥ ᤀᤥ᤺ᤳᤗᤥ. ᤁᤖ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤀᤠᤵᤑᤠᤸᤗᤧᤀᤠᤱ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤔᤧᤴᤏᤠ᤺ᤴᤏᤣ ᤘᤠ᤹ᤖᤥ॥
JOH 1:6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤔᤏᤠᤎᤡᤰ ᤘᤕᤧ॥ ᤂᤧᤸᤗᤧ ᤁᤢᤔᤡᤱᤅᤡᤱᤃ ᤕᤢᤜᤢᤴᤏᤠ ᤘᤕᤧᤖᤥ॥
JOH 1:7 ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤧᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤴ ᤀᤥ᤺ᤳᤋᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤛᤧ ᤂᤢᤏᤧ᤹ ᤋᤩᤧᤒᤠᤖᤥ॥
JOH 1:8 ᤕᤢᤜᤢᤴᤏᤠ᤺ᤴ ᤀᤠᤒᤠᤅᤣᤃ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤔᤧᤘᤕᤧᤴ. ᤂᤢᤏᤧ᤹ᤃ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤔᤧᤳᤇᤧᤖᤰ ᤋᤩᤧᤒᤠᤖᤥ॥
JOH 1:9 ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤥ᤺ᤳᤋᤡ ᤁᤧᤒᤡᤒᤠ ᤂᤧᤴ ᤛᤧᤰᤂᤠᤍᤡᤱ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤍᤠ᤺ᤒᤠ ᤘᤕᤧᤖᤥ॥
JOH 1:10 ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤕᤧ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤛᤠᤱ ᤂᤧᤵᤔᤥ ᤋᤩᤧ᤺ᤸᤗᤧ ᤂᤧᤸᤗᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥
JOH 1:11 ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤏᤠᤜᤠ᤹ᤀᤥ ᤋᤩᤧᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤴᤍᤠ᤺ᤰᤋᤢᤴᤗᤥ॥
JOH 1:12 ᤁᤖ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤏᤡᤱᤘᤠ᤹ᤀᤥ ᤁᤧᤍᤠ᤺ᤰᤐᤠᤜᤠ᤹ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ᤺ ᤐᤥ᤺ᤱᤔᤠ ᤕᤢᤰ ᤐᤡᤖᤢᤛᤡᤖᤥ॥
JOH 1:13 ᤂᤧᤱᤜᤠ᤹ᤃ ᤔᤠ-ᤒᤠᤗᤠᤶ ᤛᤠᤔᤧᤘᤠ᤺ᤴᤇᤡᤱᤒᤠ ᤏᤢ ᤔᤧᤴᤇᤠᤶ ᤏᤡᤱᤘᤠ᤹ᤗᤠᤶᤒᤠ ᤛᤠ-ᤀᤣ ᤔᤧᤒᤥ᤺ᤰᤂᤧᤒᤠ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤆᤥᤃᤢᤛᤡᤒᤠᤖᤥ॥
JOH 1:14 ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤠᤛᤡᤱᤃᤧᤴ ᤌᤰᤗᤠᤍᤡᤱ ᤐᤥ᤺ᤰᤂᤧᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤏᤡ᤹ ᤗᤢᤶᤔᤥ ᤘᤕᤧᤖᤥ॥ ᤂᤢᤏᤧ᤹ᤃ ᤗᤢᤱᤃᤢᤶ ᤏᤢ ᤛᤧᤰᤂᤠ᤺ᤸᤗᤧ ᤁᤢᤎᤡᤶ ᤆᤥᤃᤧᤀᤠᤱ ᤁᤢᤔᤡᤔᤡᤍᤡᤱᤅᤡᤴ ᤀᤠᤏᤡ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥ ᤂᤧᤴ ᤔᤡᤔᤡᤍᤡᤱᤅᤡᤴ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠ ᤌᤡᤰᤗᤰ ᤁᤢᤛ᤻ᤛᤠ᤺ᤸᤗᤧᤴ ᤜᤧᤰᤋᤱᤒᤠ ᤆᤥᤃᤧᤖᤥ॥
JOH 1:15 ᤕᤢᤜᤢᤴᤏᤠ᤺ᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠ᤺ᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤱᤅᤠᤱ ᤘᤕᤧ. ‘ᤀᤠᤀᤣᤃᤠᤱ ᤁᤧᤍᤠ᤺ᤒᤠᤱᤃ ᤀᤡᤱᤃᤠ᤹ᤏᤢ᤺ᤸᤗᤧ ᤐᤕᤶ ᤕᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤋᤃᤡᤛᤠ ᤘᤕᤧᤖᤥ॥’”
JOH 1:16 ᤂᤢᤏᤧ᤹ ᤁᤢᤗᤢᤱᤃᤢᤶ ᤁᤢᤎᤡᤶᤗᤠᤶ ᤜᤠᤱᤘᤠᤛᤠᤶᤔᤣ ᤜᤠᤱᤘᤠᤛᤠᤶ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥
JOH 1:17 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶᤔᤡᤴ ᤔᤥᤛᤠᤗᤠᤶᤒᤠ ᤀᤠᤒᤡᤖᤧ. ᤁᤖ ᤗᤢᤱᤃᤢᤶᤔᤡᤴ ᤏᤢ ᤛᤧᤰᤂᤠ᤺ᤱᤃ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠᤀᤣ ᤋᤩᤧᤒᤠᤖᤥ॥
JOH 1:18 ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤀᤠᤳᤋᤡᤸᤗᤧᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤠ᤹ᤖᤥ. ᤁᤖ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤥᤖᤡᤰ ᤁᤧᤘᤠ᤹ᤒᤠ ᤌᤡᤰᤗᤰ ᤁᤢᤛ᤻ᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤀᤠᤱ ᤘᤠ᤹ᤖᤥ॥
JOH 1:19 ᤕᤖᤢᤛᤗᤧᤶᤒᤠ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶᤔᤥ ᤛᤣᤘᤠ ᤁᤧᤈᤥ᤺ᤰᤐᤠ ᤗᤧᤒᤡᤜᤠ᤹ ᤕᤢᤜᤢᤴᤏᤠᤀᤥ ᤂᤧᤏᤧ᤹ ᤜᤠ᤺ᤳᤏᤧᤴᤒᤣ᥅ ᤗ᤹ᤖᤡᤰ ᤛᤣ᤺ᤴᤍᤥ᤺ᤛᤧ ᤔᤧᤒᤠᤱᤛᤢᤛᤡᤸᤗᤧ ᤕᤢᤜᤢᤴᤏᤠ᤺ᤸᤗᤧ ᤁᤢᤍᤥ᤺ᤴᤍᤡᤴ ᤀᤰᤋᤱᤒᤠ ᤆᤥᤃᤧᤖᤥ॥
JOH 1:20 ᤕᤢᤜᤢᤴᤏᤠ᤺ᤸᤗᤧ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧ᤺ᤴᤏᤠᤖᤥ ᤗ᤹ᤖᤡᤰ ᤁᤢᤍᤥ᤺ᤵᤔᤠ ᤏᤥᤃᤵ ᤐᤡᤖᤢᤛᤡ॥
JOH 1:21 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅ ᤂᤧᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴᤏᤧᤴᤒᤡ᥅” ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥” ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤏᤧᤒᤡ᥅” ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ ᤗ᤹ᤖᤡᤰ ᤕᤠᤶᤔᤥ ᤔᤧᤳᤋᤢᤛᤡ॥
JOH 1:22 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅ ᤀᤠᤏᤡᤃᤧ ᤕᤠᤵᤔᤡ ᤁᤧᤒᤠᤱᤒᤠᤜᤠ᤹ ᤌᤣ ᤏᤥᤃᤵ ᤐᤡᤖᤢᤶᤛᤡᤶᤒᤧᤒᤠᤒᤣ᥅ ᤂᤧᤏᤧ᤹ ᤜᤠ᤺ᤳᤏᤧᤒᤣ ᤑᤠ᤹ᤀᤠᤱ ᤛᤧᤰᤂᤠ ᤕᤠᤵᤔᤡ ᤀᤠᤔᤧᤳᤋᤧ᤹ᤀᤥ᥅”
JOH 1:23 ᤕᤢᤜᤢᤴᤏᤠᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤒᤠ᤺ᤴ ᤛᤢᤳᤗᤠᤀᤥ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤍᤠᤱᤒᤠᤸᤗᤧ ᤁᤢᤗᤠᤶᤔᤡᤴ ᤋᤥ᤺ᤴᤍᤥ᤺ᤴ ᤆᤥᤃᤧᤶᤔᤧ᤹ ᤗ᤹ᤖᤡᤰ ᤀᤣ᤺ᤰᤛᤠᤍᤧᤴᤏᤥ ᤁᤧᤀ᤺ᤰᤐᤠ ᤀᤡᤰᤗᤠᤀᤠᤖᤥ॥”
JOH 1:24 ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤂᤧᤴ ᤑᤖᤡᤛᤡᤜᤠ᤹ᤖᤧ
JOH 1:25 ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋ. ᤀᤣᤗᤡᤕᤠ ᤜᤧᤰᤁᤩᤠᤱ ᤀᤠᤏᤡᤃᤧ ᤜᤠᤱᤄᤢᤶᤒᤧᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤠᤱ ᤔᤧ᤺ᤴᤏᤧ ᤑᤠ᤹ᤃᤪ ᤌᤣᤀᤠᤱ ᤒᤵᤋᤡᤛ᤻ᤔᤠ ᤁᤧᤒᤡᤖᤢᤛᤡᤒᤠᤒᤣ ᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢ॥
JOH 1:26 ᤜᤧᤰᤁᤣ᤺ᤸᤗᤧ ᤕᤢᤜᤢᤴᤏᤠᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤱᤛᤡᤱᤗᤥ. ᤁᤖ ᤂᤡᤏᤡ᤹ ᤗᤢᤶᤔᤥ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠ ᤔᤏᤠᤎᤡᤰ ᤘᤠ᤹ᤖᤥ॥
JOH 1:27 ᤀᤡᤱᤃᤠ᤹ ᤀᤠᤀᤣᤃᤠᤱ ᤁᤧᤍᤠ᤺ᤒᤠᤱᤃ ᤂᤢᤏᤧ᤹ᤀᤣᤖᤥ॥ ᤀᤡᤱᤃᤠ᤹ᤃ ᤕᤥ᤺ᤰ ᤁᤢᤀᤡᤛᤡ᤺ᤰ ᤁᤢᤗᤠᤱᤛᤢ᤺ᤵ ᤏᤠᤶᤜᤠ᤹ ᤑᤠ᤺ᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥”
JOH 1:28 ᤁᤴ ᤐᤠ᤺ᤴᤏᤡᤱᤃ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤒᤧᤌᤠᤏᤡ ᤐᤠᤱᤓᤣ᤹ᤀᤥ ᤐᤥ᤺ᤰᤂᤧᤀᤠᤱ ᤘᤕᤧ. ᤂᤧᤵᤔᤥᤀᤣ ᤕᤢᤜᤢᤴᤏᤠ᤺ᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤃᤧᤖᤥ॥
JOH 1:29 ᤁᤢᤍᤠ᤺ᤴᤍᤡᤰᤔᤠ ᤕᤢᤜᤢᤴᤏᤠ᤺ᤸᤗᤧ ᤕᤧᤛᤢ᤺ᤴ ᤂᤢᤏᤧ᤹ ᤗᤧᤵᤔᤠᤱ ᤑᤧᤖᤧᤖ ᤐᤳᤇᤧᤒᤠ ᤏᤡ᤺ᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤁᤧᤃᤢᤒᤠᤀᤠᤱ ᤁᤧᤍᤣ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤧᤸᤗᤢᤰᤛᤠ᤺ᤴ ᤂᤠ ᤑᤧᤴᤗ ᤐᤳᤗᤥ᥄
JOH 1:30 ᤀᤠᤀᤣᤃᤠᤱ ᤁᤧᤍᤠ᤺ᤒᤠᤱᤃ ᤀᤡᤱᤃᤠ᤹ᤏᤢ᤺ᤸᤗᤧ ᤐᤕᤶ ᤕᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤋᤃᤡᤛᤠ ᤘᤕᤧᤖᤥ ᤗ᤹ᤖᤡᤰ ᤀᤡᤱᤃᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥᤀᤣ ᤐᤠ᤺ᤳᤋᤢᤱᤅᤠᤱ ᤘᤕᤧᤒᤠᤖᤥ॥
JOH 1:31 ᤋᤃᤡᤃ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤢᤏᤧ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱ ᤁᤖ ᤂᤢᤏᤧ᤹ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱᤗ ᤑᤠ᤹ᤀᤠᤱ ᤆᤫᤠ᤺ᤳᤋᤥ ᤒᤵᤋᤡᤛ᤻ᤔᤠ ᤐᤡᤖᤢᤱᤛᤡᤱᤗ ᤋᤩᤠᤱᤒᤠᤖᤥ॥”
JOH 1:32 ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤸᤗᤧ ᤕᤠᤶᤔᤥ ᤐᤠ᤺ᤳᤋᤢ. “ᤀᤡᤱᤃᤠ᤹ ᤛᤣᤛᤣᤔᤠᤱᤅᤡᤴ ᤛᤠᤱᤃᤪᤠᤶᤐᤣᤍᤠᤱᤅᤥᤗᤠᤶ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤂᤢᤏᤧ᤹ᤀᤥ ᤆᤢᤰᤋᤧᤀᤠᤱ ᤕᤢᤅᤧᤒᤠ ᤏᤡ᤺ᤛᤢᤱᤗᤥ
JOH 1:33 ᤂᤢᤏᤧ᤹ᤀᤣ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤐᤧᤴᤗᤥ. ᤁᤖ ᤆᤫᤠ᤺ᤳᤋᤥ ᤒᤵᤋᤡᤛ᤻ᤔᤠ ᤐᤡᤛᤧ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤛᤶᤍᤠᤱ ᤛᤣᤛᤣᤔᤠᤱᤅᤡᤴ ᤕᤢ᤺ᤀᤠᤱ ᤆᤢᤰᤐᤠ ᤁᤧᤏᤡ᤺ᤛᤢ᤹. ᤂᤧᤏᤧ᤹ ᤁᤧᤜᤠᤱᤄᤢᤒᤠᤱᤃ ᤂᤢᤏᤧ᤹ᤀᤣᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤛᤣᤛᤣᤔᤠᤱᤅᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡ᤹ ᤑᤠ᤹ᤀᤠᤱ ᤔᤧᤳᤋᤠᤱᤗᤥ॥
JOH 1:34 ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤕᤧᤛᤢᤀᤥ ᤐᤥ᤺ᤰᤂᤧᤒᤠ ᤏᤡ᤺ᤛᤢᤱᤅᤠᤱ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤣ ᤁᤢᤛ᤻ᤛᤠᤠ᤺ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤔᤏᤠᤜᤠ᤹ ᤋᤥ᤺ᤴᤍᤡ ᤐᤡᤖᤢᤱᤛᤡᤱᤗᤥ॥”
JOH 1:35 ᤁᤢᤍᤠ᤺ᤴᤍᤡᤰᤔᤠ ᤕᤠᤶᤔᤥ ᤕᤢᤜᤢᤴᤏᤠ᤺ᤴ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂᤧᤵᤔᤥ ᤘᤕᤧᤸᤗᤧ.
JOH 1:36 ᤕᤧᤛᤢ᤺ᤴ ᤂᤢᤏᤡ᤹ ᤐᤣᤛᤠᤱᤗᤠᤶ ᤐᤣᤖ ᤐᤳᤇᤧᤒᤠ ᤏᤡ᤺ᤛᤢᤀᤠᤱ ᤕᤢᤜᤢᤴᤏᤠ᤺ᤸᤗᤧ ᤂᤢᤏᤧ᤹ ᤀᤥᤔᤧᤳᤋᤢᤖ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤧᤸᤗᤢᤰᤛᤠ᤺ᤴ ᤀᤥᤔᤧᤳᤋᤧᤶᤔᤧ᤹᥄”
JOH 1:37 ᤕᤢᤜᤢᤴᤏᤠ᤺ᤸᤗᤧ ᤜᤧᤰᤁᤣ ᤐᤠ᤺ᤳᤋᤢᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤵᤛᤧᤳᤇᤢᤀᤠᤱ ᤕᤧᤛᤢ᤺ᤴ ᤋᤡᤶᤍᤧᤛᤢᤖᤥ॥
JOH 1:38 ᤕᤧᤛᤢ᤺ᤴ ᤀᤣᤃᤠᤱ ᤜᤡᤛᤡᤱᤅᤡᤸᤗᤧ ᤂᤧᤱᤜᤠ᤹ ᤁᤢᤀᤣᤃᤠᤱ ᤑᤧᤖᤧᤳᤇᤡᤒᤠ ᤏᤡ᤺ᤛᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤂᤡᤴᤇᤡ᤹ ᤌᤧᤔᤠ᤺ᤴ ᤁᤧᤃᤥ᤺ᤳᤇᤢᤖ ᤁᤧᤘᤠ᤹ᤛᤡᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤖᤒ᤻ᤒᤡ (ᤂᤧᤴ ᤑᤠ᤹ᤀᤡᤱᤃ ‘ᤛᤡᤰᤛᤠᤶᤒᤣ’ ᤐᤥ᤺ᤱᤗᤥ) ᤂᤧᤏᤧ᤹ ᤀᤠᤳᤋᤥ ᤁᤧᤕᤠ᤺ᤰᤐᤣ᥅”
JOH 1:39 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤧᤖᤧᤳᤇᤧ᤹ᤀᤠᤱ ᤀᤥᤔᤧᤳᤋᤧᤳᤇᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤔᤢᤰ ᤗᤡᤛᤡ (᥊) ᤔᤢᤰᤋᤧᤀᤠᤱ ᤘᤕᤧᤸᤗᤧ ᤐᤣᤛᤡᤀᤠᤱ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤕᤢᤅᤧᤒᤠ ᤋᤧᤴᤏᤡᤴ ᤀᤥᤔᤧᤳᤋᤧᤳᤇᤢ॥ ᤂᤧᤱᤜᤠ᤹ ᤂᤧᤴ ᤕᤧᤴ ᤕᤧᤛᤢ᤺ᤴᤏᤢᤀᤣ ᤕᤠ᤺ᤰᤋᤧᤳᤇᤡᤖᤥ॥
JOH 1:40 ᤂᤧᤴ ᤏᤧᤵᤑᤢᤜᤠ᤹ᤀᤥ ᤌᤡᤰᤁᤡᤱᤃ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤴ ᤘᤕᤧᤖᤥ॥ ᤂᤢᤏᤧ᤹ᤃ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤧᤄᤧᤶᤒᤠ ᤏᤢ ᤕᤧᤛᤢ᤺ᤴᤏᤢ ᤗᤠᤱᤃᤧᤄᤣ᤺ᤰᤐᤠ ᤘᤕᤧᤖᤥ॥
JOH 1:41 ᤀᤴᤍᤪᤡᤕᤠᤛᤖᤧ ᤁᤠᤰᤏᤢ ᤋᤃᤡ ᤁᤢᤶᤓᤢ᤹ ᤛᤡᤔᤥᤏᤧᤴ ᤋᤢᤔᤢᤀᤠᤱ ᤔᤧᤳᤋᤢ. “ᤀᤠᤴᤇᤡᤃᤧ ᤔᤛᤡᤜ ᤔᤧᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤢᤔᤧᤳᤇᤢᤃᤧᤖᤥ” (ᤃᤪᤡᤁ ᤐᤠ᤺ᤴᤍᤠᤱᤅᤥ “‘ᤂᤪᤡᤛ᤻ᤋ’ ᤐᤥ᤺ᤱ. ᤜᤡᤒᤪᤢ ᤐᤠ᤺ᤴᤍᤠᤱᤅᤥ ‘ᤔᤛᤡᤜ’” ᤐᤥ᤺ᤱᤗᤥ)॥
JOH 1:42 ᤜᤧᤰᤁᤩᤠᤱ ᤀᤴᤍᤪᤡᤕᤠᤛᤖᤧ ᤛᤡᤔᤥᤏᤧᤴ ᤕᤧᤛᤢᤖᤥ ᤋᤠᤖᤢᤸᤗᤧ ᤕᤧᤛᤢᤖᤧ ᤏᤢ᤺ᤖᤡᤰ ᤀᤥᤔᤧᤳᤋᤢᤖ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ᤃ ᤕᤢᤜᤢᤴᤏᤠ᤺ᤸᤗᤧ ᤁᤢᤛ᤻ᤛᤠ᤺ ᤛᤡᤔᤥᤴᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ᤃ ᤁᤧᤑᤠᤛ ᤗ᤹ᤖᤡᤰ ᤁᤧᤶᤔᤧᤳᤗᤥ” (ᤂᤧᤴ ᤑᤠ᤹ᤀᤡᤱᤃ “ᤐᤋᤪᤢᤛ” ᤐᤥ᤺ᤱ)॥
JOH 1:43 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤕᤧᤛᤢᤖᤧ ᤃᤠᤗᤡᤗ ᤌᤢᤶᤔᤥ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥ ᤂᤢᤏᤧ᤹ ᤑᤡᤗᤡᤵᤐᤧᤴ ᤋᤢᤔᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”
JOH 1:44 ᤀᤠᤸᤗ ᤑᤡᤗᤡᤵᤐᤧᤱᤃ. ᤀᤠᤴᤍᤪᤡᤕᤠᤛ ᤏᤢ ᤐᤋᤪᤢᤛᤖᤧ ᤂᤢᤴᤇᤡ᤹ ᤒᤧᤌᤛᤣᤍᤠ ᤐᤠᤱᤈᤢᤶ ᤁᤧᤕᤢᤱᤒᤠ ᤘᤕᤧᤖᤥ॥
JOH 1:45 ᤑᤡᤗᤡᤐᤖᤧ ᤏᤠᤌᤠᤏᤧᤸᤗᤧᤴ ᤋᤢᤔᤢᤀᤠᤱ ᤔᤧᤳᤋᤢ. “ᤀᤠᤏᤡᤃᤧᤃ ᤔᤥᤛᤠ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤔᤧᤛᤠᤵᤋᤢᤀᤠᤱ ᤁᤧᤒᤵᤐᤠ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤏᤠᤛᤖᤋᤒᤠ ᤕᤧᤛᤢ᤺ᤴ ᤋᤢᤔᤢᤶᤒᤧᤖᤥ॥”
JOH 1:46 ᤜᤧᤰᤁᤣ᤺ᤸᤗᤧ ᤏᤠᤌᤠᤏᤧᤗᤖᤧ ᤁᤢᤏᤡᤱᤘᤠ᤹ ᤔᤕᤧᤖ ᤐᤠ᤺ᤳᤋᤢ. “ᤔᤧ᤺ᤶᤒᤧ᥄ ᤏᤠᤛᤖᤋᤗᤠᤶ ᤏᤢ᤺ᤒᤠ ᤐᤠ᤺ᤴᤜᤠ᤹ ᤋᤠᤒᤡ ᤜᤦ᥅” ᤜᤧᤰᤁᤣ᤺ᤸᤗᤧ ᤑᤡᤗᤡᤐᤖᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤒᤠᤅᤣ ᤑᤧᤖᤧ᤹ᤀᤠᤱ ᤀᤥᤔᤧᤳᤋᤧ᤹ᤀᤥ॥”
JOH 1:47 ᤕᤧᤛᤢᤖᤧ ᤏᤠᤌᤠᤏᤧᤸᤗᤧᤴ ᤏᤡ᤺ᤳᤋᤠᤱ ᤑᤧᤖᤧᤖ ᤐᤳᤇᤧᤒᤠ ᤏᤡ᤺ᤛᤢᤀᤠᤱ ᤔᤧᤳᤋᤢ. “ᤀᤥᤔᤧᤳᤋᤧᤶᤔᤧ᤹ᤀᤥ. ᤛᤧᤰᤂᤠᤒᤠ ᤀᤡᤛᤪᤠᤀᤡᤗᤡ᤺ᤴ ᤑᤧᤴᤗ ᤐᤳᤗᤥ॥ ᤂᤢᤏᤧ᤹ ᤁᤢᤏᤡᤱᤘᤠ᤹ᤒᤥ ᤌᤣᤀᤠᤱ ᤋᤠᤵᤑᤧ᤺ᤶᤒᤠ ᤜᤥ᤺ᤵᤗᤥ॥”
JOH 1:48 ᤜᤧᤰᤁᤣ᤺ᤸᤗᤧ ᤏᤠᤌᤠᤏᤧᤗᤖᤧ ᤛᤣ᤺ᤴᤍᤥᤛᤢ. “ᤔᤧ᤺ᤶᤒᤧ. ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤠᤱᤒᤣ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤑᤡᤗᤡᤐᤖᤧ ᤔᤧᤴᤀᤢ᤺ᤳᤋᤣ ᤁᤧᤘᤕᤧᤸᤗᤧᤛᤠ ᤂᤧᤏᤧ᤹ᤃ ᤐ᤺ᤳᤇᤣ᤹ ᤒᤢᤱᤔᤥ ᤁᤧᤘᤕᤧᤒᤠ ᤏᤡ᤺ᤏᤧᤖᤥ॥”
JOH 1:49 ᤏᤠᤌᤠᤏᤧᤗᤖᤧ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ᤏᤧᤖᤥ. ᤂᤧᤏᤧ᤹ᤃ ᤀᤡᤛᤪᤠᤀᤡᤗᤒᤠ ᤜᤠᤱᤏᤧᤖᤥ॥”
JOH 1:50 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤔᤧ᤺ᤶᤒᤧ᥄ ᤂᤧᤏᤧ᤹ ᤐ᤺ᤳᤇᤣ᤹ ᤒᤢᤱᤔᤥ ᤁᤧᤘᤕᤧᤒᤠ ᤏᤡ᤺ᤏᤧ ᤗ᤹ᤖᤡᤰ ᤔᤧᤳᤏᤧᤒᤠᤸᤗᤧ ᤆᤥᤃᤢᤸᤗᤧᤛᤠ ᤏᤛᤠ᤺ᤴ ᤁᤧᤈᤥᤃᤢᤒᤠᤒᤡ᥅ ᤁᤖ ᤁᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤐᤠ᤺ᤴᤜᤠ᤹ ᤁᤧᤏᤡ᤺ᤛᤢ᤹ᤖᤥ॥”
JOH 1:51 ᤂᤢᤏᤧ᤹ ᤀᤠᤸᤗᤛᤠᤱ ᤕᤥ᤹ᤖᤢᤖ ᤐᤠ᤺ᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤴᤇᤠᤶᤛᤠ᤺ᤀᤥ ᤔᤧᤕᤢᤒᤠ ᤏᤢ ᤌᤠ᤺ᤱ ᤔᤧᤒᤣ᤺ᤰᤐᤠ ᤁᤧᤏᤡ᤺ᤛᤢᤛᤡ᤹ᤖᤥ॥”
JOH 2:1 ᤜᤧᤰᤁᤩᤠᤱ ᤏᤡᤕᤧᤴ ᤀᤣᤃᤠᤱ ᤃᤠᤗᤡᤗ ᤌᤢᤶᤔᤥᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤥ ᤕᤧᤛᤢᤖᤧ ᤁᤢᤶᤔᤠ ᤔᤖᤡᤕᤶᤔᤡᤴ ᤋᤖᤣ ᤘᤕᤧᤖᤥ॥
JOH 2:2 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤔᤧᤀᤢ᤺ᤳᤋᤢᤛᤡᤀᤠᤱ ᤂᤧᤵᤔᤥ ᤔᤧᤒᤣᤀᤠᤱ ᤔᤧᤘᤕᤧ॥
JOH 2:3 ᤂᤧᤴ ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤥ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤠ᤺ᤖᤧᤸᤗᤧ ᤕᤧᤛᤢᤖᤧ ᤁᤢᤶᤔᤠ ᤐᤣᤀᤠᤱ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤸᤗ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤡ᤺ᤛᤠᤰᤁᤠᤱ ᤔᤧᤱᤃᤳᤋᤢᤴᤗᤥ॥”
JOH 2:4 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤶᤔᤦ. ᤌᤣᤀᤠᤱ ᤁᤴ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤁᤧᤔᤧᤳᤋᤠᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤰ ᤆᤥ᤺ᤰᤔᤠ ᤕᤧᤶᤔᤡᤴ ᤀᤠᤸᤗ ᤌᤠᤖᤡᤰ ᤔᤧᤴᤍᤠᤀᤣ ᤘᤠ᤹ᤖᤥ॥”
JOH 2:5 ᤁᤖ ᤁᤢᤶᤔᤠ ᤐᤣᤀᤠᤱ ᤂᤧᤵᤔᤥᤒᤠ ᤛᤣᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤂᤢᤏᤧ᤹ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹ᤀᤥ॥”
JOH 2:6 ᤂᤧᤵᤔᤥ ᤕᤜᤢᤍᤡ ᤛᤣᤛᤣ ᤆᤥ᤺ᤰᤛᤡᤱᤔᤠ ᤌᤡᤶᤔᤥ ᤀᤥᤃᤵ ᤆᤥ᤺ᤰᤔᤏᤠᤒᤠ ᤆᤫᤠ᤺ᤳ ᤕᤠᤱᤔᤠ ᤋᤢᤰᤛᤡ (᥌) ᤕᤶᤒᤠ ᤂᤥ᤺ᤶᤔᤏᤠᤒᤠ ᤗᤢᤱ ᤁᤢ᤺ᤴᤍᤠᤜᤠ᤹ ᤔᤧᤕᤢᤅᤧ॥ ᤂᤧᤴ ᤌᤡᤰᤁᤥ ᤛᤢᤶᤒᤥ᤺ᤱ (᥉᥆) ᤐᤠᤌᤡ ᤌᤠᤖᤡᤰ ᤆᤫᤠ᤺ᤳ ᤁᤧᤜᤵᤐᤠ ᤆᤥᤃᤧᤖᤥ॥
JOH 2:7 ᤕᤧᤛᤢᤖᤧ ᤂᤧᤴ ᤛᤣᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤁᤢ᤺ᤴᤍᤠᤜᤠ᤹ ᤆᤫᤠ᤺ᤳᤋᤡᤸᤗᤧ ᤁᤢᤗᤧᤶ ᤌᤡᤶᤛᤧᤶᤛᤡᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤁᤢ᤺ᤴᤍᤠᤜᤠ᤹ ᤁᤢᤗᤧ᤺ᤶ ᤁᤢᤗᤧ᤺ᤶ ᤔᤧᤎᤡᤶᤛᤢᤛᤡᤖᤥ॥
JOH 2:8 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤡᤛᤠᤰ ᤐᤠᤃᤧᤶᤔᤧ᤹ᤀᤠᤱ ᤔᤣ᤺ᤰᤂᤡᤶᤔᤥ ᤆᤠᤔᤢᤰ ᤌᤡᤔᤢᤰ ᤀᤥᤃᤧᤔᤧᤵᤐᤧᤴ ᤐᤡᤖᤧᤶᤔᤧ᤹ᤀᤥ.” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤔᤧᤈᤥᤃᤢ॥
JOH 2:9 ᤜᤧᤰᤁᤩᤠᤱ ᤂᤧᤴ ᤔᤣ᤺ᤰᤂᤡᤶᤔᤥᤒᤠ ᤆᤠᤔᤢᤰ ᤌᤡᤔᤢᤰ ᤀᤥᤃᤧᤔᤧᤵᤐᤠᤸᤗᤧ ᤆᤫᤠ᤺ᤳᤗᤠᤶ ᤁᤧᤒᤥ᤺ᤱᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤛᤠ᤹ᤖᤢ॥ ᤂᤧᤴ ᤀᤠᤳᤋᤥᤗᤠᤶ ᤋᤩᤧᤒᤠ ᤂᤧᤸᤗᤧ ᤌᤣᤀᤠᤱ ᤔᤧᤏᤡ᤺ᤛᤢᤴᤗᤥ. ᤁᤖ ᤂᤧᤴ ᤆᤫᤠ᤺ᤳ ᤁᤧᤓᤠ᤺ᤵᤐᤠ ᤛᤣᤘᤠᤖᤥᤒᤠᤜᤠ᤹ᤖᤧᤖᤰ ᤔᤧᤏᤡ᤺ᤛᤢᤖᤥ॥ ᤂᤧᤸᤗᤧ ᤔᤣ᤺ᤰᤂᤡᤶᤛᤠᤒᤠᤴ ᤌᤡᤰᤗᤧᤵᤔᤠᤱ ᤀᤢ᤺ᤳᤋᤢ ᤋᤣ᤹ᤖᤢᤀᤠᤱ ᤔᤧᤳᤋᤢ.
JOH 2:10 “ᤘᤣ᤹ ᤔᤏᤠᤜᤠ᤹ᤖᤧᤃ ᤁᤠᤰᤏᤢ᤺ᤸᤗᤧ ᤋᤃᤡ ᤁᤢᤈᤠ ᤁᤧᤏᤢ᤹ᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤜᤠᤛᤢ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤔᤧᤎᤢᤅᤢᤀᤠᤱ ᤔᤕᤢᤛᤡ᤹ ᤜᤧᤰᤁᤩᤠᤱᤗᤰ ᤘᤠᤈᤣᤖᤣᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤔᤧᤜᤠᤛᤢᤖᤥ ᤁᤖ ᤂᤧᤏᤧ᤹ᤃ ᤀᤠᤸᤗᤥ ᤌᤠᤖᤡᤰ ᤁᤢᤈᤠ ᤁᤧᤏᤢ᤹ᤒᤠ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤣ ᤁᤧᤍᤠᤱᤄᤢᤀᤠᤱ ᤁᤧᤘᤠ᤹ᤖᤥ॥”
JOH 2:11 ᤕᤧᤛᤢᤖᤧ ᤁᤠᤰᤏᤢ᤺ᤸᤗᤧ ᤋᤃᤡᤒᤠ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤃᤠᤗᤡᤗ ᤌᤢᤶᤔᤥᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤆᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 2:12 ᤂᤧᤴ ᤁᤠᤏᤠᤒᤠ ᤔᤣ᤺ᤰᤂᤡᤶ ᤀᤣᤃᤠᤱ ᤂᤢᤏᤧ᤹ ᤁᤢᤶᤔᤠ ᤁᤢᤴᤛᤠ᤹ᤛᤡ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤐᤣ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤁᤢᤓᤠ ᤕᤧᤴ ᤔᤧᤕᤠ᤺ᤰᤋᤧᤖᤥ॥
JOH 2:13 ᤁᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖ ᤐᤳᤇᤧᤸᤗᤧ ᤕᤧᤛᤢ᤺ᤴ ᤌᤥ ᤕᤖᤢᤛᤗᤧᤶᤔᤥ ᤐᤣ॥
JOH 2:14 ᤜᤧᤰᤁᤩᤠᤱ ᤔᤠᤱᤜᤡᤶᤔᤥ ᤗᤧᤱᤜᤱᤒᤠᤜᤠ᤹ᤖᤧ ᤐᤡᤳᤜᤠ᤹. ᤔᤧᤸᤗᤢᤰᤜᤠ᤹. ᤐᤢᤳᤋᤢ᤺ᤰᤁᤣᤜᤠ᤹ ᤛᤡᤍᤢᤱᤈᤓᤠ ᤁᤧᤈᤥ᤺ᤰᤐᤠᤜᤠ᤹ᤖᤥ ᤔᤧᤛᤱᤄᤢᤒᤠ ᤏᤢ ᤂᤧᤵᤔᤥ ᤕᤠᤱ ᤁᤧᤗᤧᤰᤐᤠᤜᤠ᤹ᤀᤠᤱ ᤕᤠᤱ ᤗᤧᤰᤏᤢ ᤔᤧᤕᤢᤅᤧᤒᤠ ᤂᤢᤏᤧ᤹ ᤏᤡ᤺ᤛᤢᤛᤡ॥
JOH 2:15 ᤕᤧᤛᤢᤖᤧ ᤀᤡᤍᤠ᤺ᤰᤁᤡᤸᤗᤧᤴ ᤋᤧ᤺ᤶᤓᤢᤰ ᤆᤥᤃᤢᤀᤠᤱ ᤂᤧᤴ ᤁᤧᤖᤧᤰ ᤔᤧᤸᤗᤢᤰᤜᤠ᤹ ᤏᤢ ᤐᤡᤳᤜᤠ᤹ ᤔᤠᤱᤜᤡᤶᤗᤠᤶ ᤗᤠ᤺ᤰᤁᤠᤳ ᤏᤠ᤺ᤳᤋᤢᤍᤣ᤺ᤛᤢᤛᤡᤀᤠᤱ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤀᤡᤳᤇᤡᤜᤠ᤹ᤀᤠᤱ ᤛᤧ᤺ᤛᤢ ᤐᤡᤖᤢᤛᤡᤖ ᤂᤢᤏᤡ᤹ ᤛᤠᤵᤏᤧᤳᤜᤠ᤹ᤀᤠᤱ ᤗᤧᤰᤂᤢ ᤐᤡᤖᤢᤛᤡᤖᤥ॥
JOH 2:16 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤐᤢᤳᤋᤢ᤺ᤰᤁᤣ ᤁᤧᤛᤱᤒᤠᤜᤠ᤹ ᤔᤧᤳᤋᤢᤛᤡ. “ᤁᤱᤜᤠ᤹ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤶ ᤐᤣᤃᤧᤶᤔᤧ᤹᥄ ᤂᤡᤏᤡ᤹ ᤌᤣᤀᤠᤱ ᤀᤠᤶᤒᤠᤖᤧ ᤁᤢᤜᤡᤶᤔᤡᤴ ᤛᤱᤀᤡᤱᤍᤧᤴ ᤁᤧᤈᤥᤃᤢᤶᤒᤠᤒᤣ᥅”
JOH 2:17 ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤧᤜᤡᤶᤔᤡᤸᤗᤧ ᤗᤠᤃᤡ ᤔᤡ᤺ᤶᤈᤡ᤺ᤸᤗᤧ ᤀᤡᤱᤃᤠ᤹ ᤌᤢᤰᤁᤠᤖᤥ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤧᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥
JOH 2:18 ᤜᤧᤰᤁᤣ᤺ᤸᤗᤧ ᤁᤢᤓᤠ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ “ᤌᤧᤔᤠ ᤕᤢᤰᤁᤡᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤈᤥᤃᤢᤒᤠᤒᤣ᥅ ᤁᤴ ᤕᤢᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹॥”
JOH 2:19 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤐᤥ᤺ᤱ. ᤁᤴ ᤔᤠᤱᤜᤡᤶᤔᤡᤴ ᤕ᤺ᤛᤧᤶᤔᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤢᤶᤕᤧᤴᤏᤥ ᤕᤠᤶᤔᤥ ᤆᤥᤃᤢᤱ॥”
JOH 2:20 ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤰᤂᤣᤔᤢ᥅ ᤁᤴ ᤔᤠᤱᤜᤡᤶᤔᤡᤴ ᤋᤱᤒᤣ ᤗᤡ-ᤋᤢᤰᤁᤥᤖᤰ (᥊᥌) ᤆᤥ᤺ᤰᤔᤠ ᤆᤢᤖᤧᤸᤗᤧ ᤂᤧᤏᤧ᤹ ᤛᤢᤶᤕᤧᤴᤏᤥᤀᤣ ᤁᤧᤈᤥᤃᤢ᤹ᤔᤢ᥄”
JOH 2:21 ᤁᤖ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤔᤠᤱᤜᤡᤶᤔᤡᤱᤃ ᤀᤠᤒᤠᤅᤣ ᤁᤢᤎᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤀᤠᤱ ᤘᤕᤧᤒᤠᤖᤥ॥
JOH 2:22 ᤋᤠ᤺ᤴᤍᤡ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱᤗᤰ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤂᤧᤴ ᤐᤠ᤺ᤴᤏᤡᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤐᤠ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤈᤠᤰᤜᤠ᤹ ᤏᤢ ᤛᤠᤶᤕᤥᤛᤠᤵᤗᤠ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 2:23 ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤘᤕᤧᤸᤗᤧ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 2:24 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤋᤠ᤺ᤰᤐᤥ ᤔᤧᤈᤥᤃᤢᤴᤛᤡᤴ. ᤌᤣᤀᤠᤱᤓᤧᤸᤗᤧ ᤁᤠᤰ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤛᤡᤀᤠᤱ ᤘᤕᤧᤖᤥ॥
JOH 2:25 ᤀᤠᤳᤋᤡᤸᤗᤧᤀᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤂᤢᤏᤧ᤹ ᤔᤧᤵᤔᤠ ᤔᤧᤒᤥ᤺ᤰᤂᤧᤴᤗᤥ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥ᤺ᤰ ᤑᤠ᤹ᤀᤠᤱ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤘᤕᤧᤖᤥ॥
JOH 3:1 ᤀᤠᤸᤗ ᤏᤡᤁᤥᤍᤣᤔᤛ ᤔᤧᤵᤔᤏᤠᤒᤠ ᤗᤳᤇᤠ ᤑᤖᤡᤛᤡᤎᤡᤰ ᤘᤕᤧ. ᤂᤧᤱᤃ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤐᤠᤛᤡᤱᤐᤠᤍᤠᤱᤗᤠᤀᤠᤱ ᤘᤕᤧᤖᤥ॥
JOH 3:2 ᤌᤡᤰ ᤛᤧᤴᤍᤡᤰ ᤂᤧᤴ ᤕᤧᤛᤢᤖᤧ ᤁᤢᤍᤢᤶᤛᤧ ᤐᤣᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶᤔᤣ ᤁᤧᤍᤩᤧᤒᤠᤖᤥ ᤑᤠ᤹ᤀᤠᤱ ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤂᤢᤏᤧ᤹ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤘᤠ᤹ᤏᤧᤴᤏᤡᤸᤗᤧᤃ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥”
JOH 3:3 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤕᤠᤶᤔᤥ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤌᤠᤖᤡᤰ ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤏᤡ᤺ᤔᤠ ᤔᤧᤛᤢᤰᤋᤢᤴᤗᤥ॥”
JOH 3:4 ᤜᤧᤰᤁᤣ᤺ᤸᤗᤧ ᤏᤡᤁᤥᤍᤣᤔᤛᤖᤧ ᤁᤢᤏᤡᤱᤘᤠ᤹ ᤔᤕᤧᤖ ᤛᤣ᤺ᤴᤍᤥᤛᤢ. “ᤔᤧ᤺ᤶᤒᤧ. ᤀᤠᤰᤂᤣᤗ᤹ᤖᤡᤰ ᤂᤍᤠᤰᤔᤡ ᤕᤠᤵᤔᤡ᤺ᤴ ᤕᤠᤶᤔᤥ ᤛᤠᤘᤠ᤺ᤴᤇᤡᤱᤒᤣ᥅ ᤂᤧᤴ ᤛᤧᤰᤂᤠᤀᤣ ᤁᤢᤶᤔᤠᤖᤧ ᤁᤢᤛᤠᤵᤐᤥ᤺ᤰ ᤛᤡᤃᤠᤱ ᤕᤠᤶᤔᤥ ᤗᤠ᤺ᤳᤋᤠᤱ ᤛᤠᤘᤠ᤺ᤴᤇᤡᤱᤔᤠ ᤛᤢᤰᤐᤡ᥅”
JOH 3:5 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤆᤫᤠ᤺ᤳ ᤏᤢ ᤛᤣᤛᤣᤔᤠᤱᤗᤠᤶᤒᤠ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤌᤠᤖᤡᤰ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤀᤠᤳᤋᤡᤴᤏᤠᤱ ᤗᤠ᤺ᤵᤔᤠ ᤔᤧᤛᤢᤰᤏᤧᤴᤗᤥ॥
JOH 3:6 ᤏᤠᤛᤡᤱᤃᤧᤴ ᤌᤰᤗᤠᤶᤒᤠᤃ ᤏᤠᤛᤡᤱᤃᤧᤴ ᤌᤰᤁᤡᤴᤏᤣ ᤛᤠᤘᤠ᤺ᤴᤇᤡᤱ ᤜᤧᤰᤁᤩᤠᤱ ᤛᤣᤛᤣᤔᤠᤱᤗᤠᤶ ᤕᤠᤶᤛᤠᤶᤔᤡᤴ ᤁᤢᤛᤱᤅᤠᤱ ᤛᤠᤘᤠ᤺ᤴᤇᤡᤱᤗᤥ॥
JOH 3:7 ᤜᤧᤰᤁᤣ᤺ᤸᤗᤧ ‘ᤂᤧᤏᤧ᤹ ᤕᤠᤶᤔᤥ ᤛᤠᤃᤧᤘᤠ᤺ᤴᤇᤡᤱᤗᤀᤣ ᤐᤥ᤺ᤱ’ ᤔᤧᤳᤏᤧᤸᤗᤧ ᤁᤧᤏᤡᤱᤘᤠ᤹ ᤔᤧᤔᤕᤧᤴᤏᤧ᤹ᤀᤥ॥
JOH 3:8 ᤛᤢᤖᤡᤳ ᤁᤣᤈᤱᤅᤡᤴ ᤀᤠᤳᤋᤠᤴᤛᤠᤱ ᤜᤢ᤺ᤔᤠ ᤛᤢᤰᤗᤥ॥ ᤂᤧᤏᤧ᤹ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤒᤠ ᤁᤧᤄᤧᤵᤛᤢ᤹. ᤁᤖ ᤀᤠᤳᤋᤥᤗᤠᤶ ᤋᤠ᤺ ᤜᤧᤰᤁᤩᤠᤱ ᤀᤠᤳᤋᤥ ᤐᤣ᤺ᤰ ᤂᤧᤴ ᤂᤧᤏᤧ᤹ ᤐᤠ᤺ᤵᤔᤠ ᤁᤧᤴᤇᤢᤰᤋᤢᤴᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤛᤣᤛᤣᤔᤠᤱᤗᤠᤶᤒᤠ ᤛᤠᤘᤠ᤺ᤴᤇᤡᤱᤔᤠ ᤐᤠ᤺ᤴᤏᤡᤴᤏᤠᤱ ᤐᤥᤎᤰᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥”
JOH 3:9 ᤜᤧᤰᤁᤣ᤺ᤸᤗᤧ ᤏᤡᤁᤥᤍᤣᤔᤛᤖᤧ ᤛᤣ᤺ᤴᤍᤥᤛᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤴ ᤀᤠᤰᤂᤣᤗ᤹ᤖᤡᤰ ᤐᤥ᤺ᤱᤔᤠ ᤛᤢᤰᤐᤣ᥅”
JOH 3:10 ᤜᤧᤰᤁᤩᤠᤱ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤀᤡᤛᤪᤠᤀᤡᤗᤒᤠ ᤛᤡᤰᤛᤠᤶᤒᤠᤏᤧ ᤜᤧᤰᤁᤣᤛᤠᤱ ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤒᤡ᥅
JOH 3:11 ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤔᤧᤳᤏᤧ᤹ᤖᤥ॥ ᤀᤠᤏᤡᤃᤧ ᤏᤡ᤺ᤛᤢᤶᤒᤧ ᤗᤧᤛ᤻ᤛᤢᤶᤒᤧᤒᤠ ᤐᤠ᤺ᤴᤜᤠ᤹ᤀᤣ ᤂᤡᤏᤡ᤹ ᤔᤧᤳᤋᤠᤛᤡᤃᤧ᤹. ᤁᤖᤛᤠᤱ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥
JOH 3:12 ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤏᤡᤱ ᤜᤧᤰᤁᤣᤛᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤴ॥ ᤜᤧᤰᤁᤣ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ ᤔᤧᤳᤏᤡᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤒᤣ᥅
JOH 3:13 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤏᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠ᤺ᤱ ᤔᤧᤶᤒᤣ᤺ᤰᤁᤣ ᤘᤠ᤹ᤖᤥ॥
JOH 3:14 ᤀᤡᤛᤪᤠᤀᤡᤗᤡᤜᤠ᤹ ᤕᤧ᤺ᤱᤄᤠᤍᤧᤴᤏᤥ ᤗᤠᤶᤍᤡ᤺ᤰ ᤔᤧᤈᤥᤃᤧᤸᤗᤧ ᤔᤥᤛᤠᤖᤧ ᤐᤡᤳᤋᤥᤗᤡ ᤀᤛᤣ᤺ᤰᤐᤧᤴ ᤐᤰᤂᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤴᤇᤠᤶᤛᤠ᤺ᤴᤏᤠᤱ ᤐᤱᤗᤀᤣ ᤐᤥ᤺ᤱᤗᤥ॥
JOH 3:15 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥
JOH 3:16 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤌᤡᤰᤗᤰ ᤁᤢᤛ᤻ᤛᤠ᤺ᤴ ᤐᤠᤱᤄᤢ ᤕᤢ᤺ᤛᤢᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤃ ᤔᤧᤶᤔᤧᤰᤏᤧᤴ. ᤁᤖ ᤂᤧᤱᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥
JOH 3:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤛ᤻ᤛᤠ᤺ᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤑᤠ᤹ᤀᤠᤱ ᤐᤠᤱᤄᤢᤒᤠ ᤔᤧ᤺ᤴᤗᤥ ᤁᤖ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖ ᤑᤠ᤹ᤀᤠᤱ ᤐᤠᤱᤄᤢᤒᤠᤖᤥ॥
JOH 3:18 ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤂᤢᤶᤍᤡᤱ ᤔᤧᤱᤄᤥ᤺ᤛᤢᤴᤗᤥ ᤁᤖ ᤂᤢᤏᤧ᤹ᤀᤥ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧᤱᤃ ᤋᤃᤡᤀᤣ ᤂᤠᤛᤧᤴ ᤐᤥ᤺ᤰᤂᤧ ᤆᤢᤖᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤰᤗᤰ ᤁᤢᤛ᤻ᤛᤠ᤺ᤀᤥ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
JOH 3:19 ᤂᤢᤏᤡ᤹ ᤂᤠᤛᤧᤴᤏᤡᤴ ᤒᤠ ᤁᤴᤗᤥ. ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤕᤧ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧᤒᤠᤸᤗᤧ ᤂᤧᤱᤜᤠ᤹ᤖᤧ ᤀᤥ᤺ᤳᤋᤡᤴᤏᤢ᤺ᤸᤗᤧ ᤂᤠᤍᤠᤶᤔᤠᤴᤏᤣ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧ॥
JOH 3:20 ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤀᤥ᤺ᤳᤋᤡ᤺ᤴ ᤔᤧᤈᤡ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤡᤴ ᤏᤡᤎᤠ᤺ᤵ ᤑᤠ᤹ᤀᤠᤱ ᤔᤧᤃᤡᤀᤠᤱ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤔᤧᤴᤍᤠ᤺ᤏᤧᤴᤗᤥ॥
JOH 3:21 ᤁᤖ ᤀᤠᤳᤋᤡᤴᤜᤠ᤹ ᤛᤧᤰᤂᤠᤀᤥ ᤗᤠᤱᤔᤧᤄᤣ᤺ᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤈᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤥ᤺ᤳᤋᤡᤀᤥ ᤔᤧᤍᤠᤖᤥ॥”
JOH 3:22 ᤂᤧᤴ ᤀᤣᤃᤠᤱ ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔᤗᤠᤶᤒᤠ ᤕᤜᤢᤍᤡᤕᤠ ᤌᤢᤶ ᤁᤒᤪᤡᤱᤒᤠ ᤗᤠᤈᤣ᤹ᤀᤥ ᤔᤧᤒᤣᤀᤠᤱ ᤂᤧᤵᤔᤥ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤘᤕᤧᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖᤥ॥
JOH 3:23 ᤂᤧᤴ ᤕᤧᤶᤔᤥ ᤕᤢᤜᤢᤴᤏᤠ᤺ᤴ ᤛᤠᤗᤡᤶ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱ ᤀᤣᤏᤥᤏ ᤔᤧᤵᤔᤏᤠᤒᤠ ᤋᤧᤴᤏᤥ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤃᤧ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤖᤡᤰ ᤆᤫᤠ᤺ᤳ ᤏᤧᤛ᤻ᤛᤧᤀᤠᤱ ᤔᤏᤠᤜᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤛᤧ ᤂᤧᤵᤔᤥ ᤔᤧᤍᤩᤧᤖ ᤔᤧᤘᤕᤧᤖᤥ॥
JOH 3:24 (ᤁᤴ ᤒᤵᤋᤡᤛ᤻ᤔᤠ ᤐᤡᤔᤠ ᤕᤠ᤺ᤶᤒᤰᤁᤡᤱᤃ ᤕᤢᤜᤢᤴᤏᤠ᤺ᤴ ᤐᤢᤱᤗᤠᤜᤡᤶᤔᤥ ᤛᤠᤰᤔᤠᤏᤢ᤺ᤸᤗᤧ ᤋᤃᤡᤒᤠ ᤐᤠ᤺ᤴ ᤘᤕᤧᤖᤥ॥)
JOH 3:25 ᤕᤢᤜᤢᤴᤏᤠ᤺ᤸᤗᤧ ᤁᤢᤓᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤜᤢᤍᤡᤎᤡᤰᤏᤢ ᤛᤣᤛᤣ ᤆᤥ᤺ᤰᤛᤡᤱᤔᤠ ᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱ ᤐᤥ᤺ᤰᤂᤧᤖᤥ॥
JOH 3:26 ᤕᤢᤜᤢᤴᤏᤠᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤋᤥ᤺ᤴᤍᤡ ᤁᤧᤒᤡᤖᤢᤒᤠ ᤔᤏᤠ᤺ᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤰᤗᤥ॥ ᤀᤠᤏᤡ᤹ᤀᤥ ᤁᤧᤖᤧᤰ ᤔᤏᤠᤜᤠ᤹ ᤋᤠᤔᤠᤖᤧ ᤁᤢᤗᤧᤰᤘᤠ ᤂᤢᤏᤧ᤹ᤀᤥ ᤔᤧᤒᤣ᤺ᤰᤗ ᤔᤧᤒᤳᤗᤥ॥”
JOH 3:27 ᤕᤢᤜᤢᤴᤏᤠᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤶᤒᤡᤀᤣᤃ ᤔᤏᤠ᤺ᤸᤗᤧ ᤌᤧᤔᤠᤀᤠᤱ ᤂᤥ᤺ᤔᤠ ᤔᤧᤛᤢᤰᤋᤢᤴᤗᤥ॥
JOH 3:28 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧ᤺ᤴᤏᤠ᤹ᤖᤥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤏᤢ᤺ᤸᤗᤣ ᤋᤃᤡ ᤐᤠᤱᤄᤠᤱᤒᤠᤖᤰ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ᤀᤣ ᤋᤥ᤺ᤴᤍᤡ ᤐᤡᤔᤠ ᤁᤧᤛᤢᤰᤋᤢᤶᤗᤥ॥
JOH 3:29 ᤛᤡᤛᤠᤔᤣ᤺ᤳᤋᤡᤱᤃ ᤏᤠᤗᤡᤛᤠᤱᤅᤡᤸᤗᤧᤴᤏᤣᤖᤥ॥ ᤏᤠᤗᤡᤛᤠᤱᤅᤡᤴ ᤀᤠᤳᤋᤥ ᤘᤠ᤹. ᤂᤧᤵᤔᤥᤀᤣ ᤛᤡᤛᤠᤔᤣ᤺ᤳᤋᤡᤴ ᤐᤣ᤺ᤰᤗᤥ॥ ᤏᤠᤗᤡᤛᤠᤱᤅᤡᤴ ᤁᤢᤴᤍᤣ᤺ᤱᤒᤠᤸᤗᤧ ᤜᤠᤱᤄᤢᤀᤠᤱ ᤂᤢᤏᤧ᤹ ᤁᤢᤒᤠ᤺ᤴ ᤂᤧᤵᤛᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤋᤠ᤺ᤸᤗᤧ ᤛ᤺ᤳᤗᤥ॥ ᤀᤡᤱᤃᤠ᤹ᤀᤠᤱ ᤜᤧᤰᤁᤣᤗ᤹ᤖᤡᤰ ᤛ᤺ᤳᤋᤠᤖᤥ ᤜᤧᤰᤁᤩᤠᤱ ᤀᤠᤸᤗ ᤀᤠᤛ᤺ᤵᤔᤧᤴ ᤁᤢᤗᤡᤱᤎᤥ ᤁᤧᤖᤧᤖᤥ॥
JOH 3:30 ᤂᤪᤡᤛ᤻ᤋᤖᤧ ᤁᤢᤔᤡᤱᤛᤥ ᤀᤡᤱᤎᤠ᤺ᤱ ᤜᤠᤖᤠ᤹ ᤐᤥ᤺ᤖ ᤐᤣ᤺ᤰᤗᤖᤥ. ᤀᤡᤱᤃᤠ᤹ᤃ ᤆᤢᤰᤐᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥”
JOH 3:31 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠᤴᤏᤢ᤺ᤸᤗᤧ ᤕᤶᤒᤠᤃ ᤀᤠᤳᤋᤡᤴᤏᤠᤱ ᤜᤥ᤺ᤵᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶᤒᤠ ᤁᤧᤒᤥ᤺ᤱᤒᤠᤱᤃ ᤂᤠᤶᤒᤣ᤺ᤰᤔᤥᤒᤠᤀᤣᤖᤥ ᤜᤧᤰᤁᤩᤠᤱ ᤂᤧᤸᤗᤧᤃ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤏᤡᤴᤗᤰ ᤐᤠ᤺ᤳᤋᤢ᤹. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤖᤥ॥
JOH 3:32 ᤂᤢᤏᤧ᤹ᤃ ᤏᤡ᤺ᤛᤢᤒᤠ ᤏᤢ ᤂᤧᤵᤛᤢᤒᤠ ᤐᤠ᤺ᤴᤜᤠ᤹ᤀᤣ ᤐᤠ᤺ᤳᤋᤢ᤹. ᤁᤖ ᤀᤠᤳᤋᤡᤸᤗᤧᤀᤠᤱ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤴᤗᤥ॥
JOH 3:33 ᤀᤠᤳᤋᤡᤸᤗᤧ ᤂᤢᤏᤧ᤹ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠ ᤆᤥ᤺ᤰ ᤑᤠ᤹ᤀᤠᤱ ᤐᤷᤔᤠᤱᤃᤡ ᤐᤡᤖᤢ᤹ᤖᤥ॥
JOH 3:34 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠᤖᤥ॥ ᤂᤧᤸᤗᤧ ᤏᤡᤱᤘᤠ᤹ᤑᤢᤐᤠ᤺ᤴᤗᤰ ᤐᤠ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤌᤡᤶᤛᤢ᤹ᤖᤥ॥
JOH 3:35 ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ᤴ ᤗᤢᤱᤔᤠ᤹ ᤋᤢᤰᤋᤢ᤹. ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ ᤁᤢᤜᤢᤰᤁᤥ ᤐᤡᤖᤢᤀᤠᤱ ᤘᤠ᤹ᤖᤥ॥
JOH 3:36 ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤵᤑᤠᤸᤗᤧᤀᤠᤱ ᤔᤧᤱᤄᤥ᤺ᤛᤢᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤧᤱᤜᤠ᤹ ᤛᤶᤍᤠᤱ ᤆᤢᤰᤗᤥ॥
JOH 4:1 ᤕᤧᤛᤢᤖᤧ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ ᤆᤥᤃᤢᤛᤡᤀᤠᤱ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤕᤠᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢ॥
JOH 4:2 (ᤜᤧᤰᤁᤣᤛᤠᤱ ᤕᤧᤛᤢᤖᤧᤃ ᤔᤧ᤺ᤴ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧᤖᤰ ᤒᤵᤋᤡᤛ᤻ᤔᤠ ᤔᤧᤒᤡᤖᤢᤛᤡᤖ ᤔᤧᤕᤠᤃᤧᤖᤥ॥)
JOH 4:3 ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤢᤏᤧ᤹ ᤕᤜᤢᤍᤡᤕᤠ ᤌᤢᤔᤗᤠᤶ ᤃᤠᤗᤡᤗ ᤌᤢᤶ ᤗᤧᤵᤔᤠᤱ ᤕᤠᤶᤔᤥ ᤏᤢ᤺ᤰᤂᤧ ᤐᤣᤖᤥ॥
JOH 4:4 ᤀᤠᤸᤗ ᤂᤢᤏᤧ᤹ ᤛᤠᤔᤖᤡᤕᤠ ᤌᤢᤶᤗᤠᤶ ᤐᤥ᤺ᤱᤔᤠᤀᤠᤱ ᤐᤣ᤺ᤰᤔᤠ ᤁᤧᤒᤥ᤺ᤱᤒᤠ ᤘᤕᤧᤖᤥ॥
JOH 4:5 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤢᤛᤢᤑᤧᤴ ᤐᤡᤖᤢᤒᤠ ᤗᤠᤈᤣ᤹ᤀᤡᤸᤗᤧ ᤁᤢᤒᤣᤛᤠᤱ ᤛᤢᤂᤠᤖ ᤔᤧᤵᤔᤏᤠᤒᤠ ᤛᤠᤔᤖᤡᤕᤠ ᤐᤠᤱᤓᤣ᤹ᤀᤥ ᤁᤧᤖᤧ॥
JOH 4:6 ᤂᤧᤵᤔᤥ ᤕᤠᤁᤢᤒᤖᤧ ᤋᤕᤢᤒᤠ ᤘᤠᤒᤠᤰᤁᤡᤴ ᤏᤧᤛ᤻ᤛᤧ॥ ᤂᤢᤏᤧ᤹ ᤗᤠᤶᤍᤡ᤺ᤰᤁᤥᤗᤠᤶ ᤏᤠᤛ᤻ᤛᤧᤀᤠᤱ ᤗᤧᤴᤍᤡᤰ ᤂᤧᤴ ᤘᤠᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤕᤢᤱᤛᤡᤱ॥
JOH 4:7 ᤛᤵᤑᤠᤀᤠᤱ ᤛᤠᤔᤖᤡᤕᤠᤒᤠ ᤔᤧᤴᤇᤢᤔᤠ᤹ᤎᤡᤰ ᤆᤫᤠ᤺ᤳ ᤑᤠ᤺ᤳᤇᤧ ᤂᤧᤵᤔᤥ ᤋᤩᤧ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤆᤫᤠ᤺ᤳᤇᤡᤰ ᤌᤢᤱᤔᤠ ᤐᤡᤖᤠᤱᤅᤧᤏᤠ॥”
JOH 4:8 ᤂᤧᤵᤔᤥᤃ ᤕᤧᤛᤢ᤺ᤴᤗᤰ ᤘᤕᤧ. ᤌᤣᤀᤠᤱᤓᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤠᤔᤠ ᤌᤢᤱᤔᤠ ᤀᤡᤱᤛᤧ ᤐᤠᤱᤈᤢᤶᤔᤥ ᤔᤧᤒᤣᤀᤠᤱ ᤔᤧᤘᤕᤧᤖᤥ॥
JOH 4:9 ᤂᤧᤴ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤕᤜᤢᤍᤡᤏᤧ. ᤀᤡᤱᤃᤠ᤹ᤃ ᤛᤠᤔᤖᤡ ᤔᤧᤴᤇᤢᤔᤠ᤹ᤀᤠ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤫᤠ᤺ᤳ ᤌᤢᤱᤔᤠ ᤀᤡᤱᤃᤠ᤹ ᤁᤧᤏᤠ᤺ᤰᤁᤠᤒᤠᤒᤣ᥅” (ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤕᤜᤢᤍᤡᤜᤠ᤹ ᤏᤢ ᤛᤠᤔᤖᤡᤗᤢᤶᤔᤥ ᤋᤱᤈᤢᤶ ᤜᤥ᤺ᤵᤋᤧᤖᤥ)॥
JOH 4:10 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶᤔᤡᤴ ᤏᤢ ᤂᤧᤏᤧ᤹ ᤆᤫᤠ᤺ᤳ ᤁᤧᤏᤠ᤺ᤰᤐᤧᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤕᤧᤸᤗᤧᤃ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤕᤠᤱᤏᤠ ᤁᤧᤏᤠ᤺ᤰᤋᤢᤀᤠᤱ ᤂᤧᤴ ᤜᤡᤱᤔᤴᤗᤧᤴ ᤆᤫᤠ᤺ᤳᤋᤡᤴ ᤁᤧᤒᤡᤖᤧᤒᤠᤔᤧᤴ॥”
JOH 4:11 ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤆᤫᤠ᤺ᤳ ᤐᤠ᤺ᤰᤔᤧᤴ ᤏᤢ ᤀᤡᤍᤠ᤺ᤰᤁᤡᤴᤏᤠᤱ ᤁᤧᤱᤃᤳᤋᤢᤴ. ᤘᤠᤒᤠᤰᤁᤡᤴᤏᤠᤱ ᤁᤣ᤺ᤶ. ᤜᤧᤰᤁᤣ᤺ᤸᤗᤧ ᤀᤠᤳᤋᤡᤏᤢ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤋᤠ᤺ᤵᤔᤠ ᤁᤧᤛᤢᤰᤋᤢᤒᤣ᥅
JOH 4:12 ᤜᤧᤰᤁᤣ᤺ᤸᤗᤧ ᤂᤧᤏᤧ᤹ᤃ ᤀᤠᤏᤡᤃᤧ ᤋᤠᤰᤌᤧᤒᤠ ᤕᤠᤁᤢᤒᤧᤴᤏᤢ᤺ᤸᤗᤧᤀᤠᤱ ᤕᤶᤒᤠᤏᤧᤒᤡ᥅ ᤂᤢᤏᤧ᤹ᤀᤣ ᤁᤴ ᤘᤠᤒᤠᤰᤁᤡᤴ ᤀᤠᤏᤡᤃᤧ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤒᤠ ᤁᤵᤔᤥᤗᤠᤶᤒᤠᤀᤣ ᤂᤢᤏᤧ᤹ ᤏᤢ ᤁᤢᤛ᤻ᤛᤠ᤺ᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤠᤗᤢᤵᤜᤠ᤹ᤖᤧᤀᤠᤱ ᤆᤫᤠ᤺ᤳ ᤔᤧᤎᤢᤅᤢᤖᤥ॥”
JOH 4:13 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤴ ᤘᤠᤒᤠᤰᤁᤥᤗᤠᤶ ᤆᤫᤠ᤺ᤳ ᤁᤧᤎᤢᤱᤒᤠᤜᤠ᤹ᤃ ᤕᤠᤶᤔᤥ ᤂᤢᤏᤡ᤹ ᤘᤠᤔᤡ᤺ᤰᤗᤥ.
JOH 4:14 ᤁᤖ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳ ᤁᤧᤎᤢᤱᤒᤠᤴ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴ॥ ᤀᤡᤱᤃᤠ᤹ ᤐᤡᤖᤢᤱᤒᤠ ᤆᤫᤠ᤺ᤳᤋᤡᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤍᤠᤍᤡᤱ ᤁᤧᤒᤢᤶᤒᤠ ᤘᤠᤒᤢᤴ ᤜᤧᤰᤁᤣ ᤂᤢᤏᤧ᤹ᤀᤥ ᤐᤥ᤺ᤱᤗᤥ॥”
JOH 4:15 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤴ ᤆᤫᤠ᤺ᤳᤋᤡᤴ ᤐᤡᤖᤠᤱᤅᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤘᤠᤔᤧᤔᤡ᤺ᤰᤏᤧᤴᤗ ᤜᤧᤰᤁᤩᤠᤱ ᤀᤧᤳᤗᤧᤱ ᤀᤡᤱᤃᤠ᤹ ᤆᤫᤠ᤺ᤳ ᤑᤠ᤺ᤳᤇᤧ ᤁᤵᤔᤥ ᤋᤠ᤺ᤔᤠ ᤔᤧᤒᤥ᤺ᤱᤏᤧᤴᤗᤖᤥ॥”
JOH 4:16 ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤁᤧᤕᤧᤶᤒᤠ᤹ᤀᤡᤴ ᤁᤵᤔᤥ ᤀᤢ᤺ᤳᤋᤧ ᤋᤠᤖᤧ᤹॥”
JOH 4:17 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥ᤺ᤵᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥ᤺ᤵᤗᤥ ᤗ᤹ᤖᤡᤰ ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢ᤹ᤖᤥ॥
JOH 4:18 ᤛᤧᤰᤂᤠᤀᤣ ᤀᤢᤴᤇᤣ᤺ᤴᤇᤠ ᤅᤠᤛᤡ ᤁᤧᤕᤧᤶᤒᤠ᤹ ᤔᤧᤒᤥ᤺ᤰᤂᤧ ᤔᤧᤈᤢᤖᤧᤀᤠᤱ ᤘᤠ᤹॥ ᤀᤠᤸᤗᤥ ᤀᤠᤳᤋᤡᤴ ᤔᤏᤠ᤺ᤴᤏᤢ ᤂᤧᤏᤧ᤹ ᤁᤧᤘᤠ᤹ ᤂᤧᤴᤏᤠᤱ ᤛᤧᤰᤂᤠ᤺ᤸᤗᤧ ᤁᤧᤕᤧᤶᤒᤠ᤹ ᤔᤧ᤺ᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤕᤧᤶᤒᤠ᤹ ᤜᤥ᤺ᤵᤗᤥ ᤁᤧᤒᤠ᤺ᤳᤋᤢᤒᤠᤴ ᤛᤧᤰᤂᤠᤀᤣᤖᤥ॥”
JOH 4:19 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢ᤺ᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤏᤧ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤏᤧ᤹ᤖᤥ॥
JOH 4:20 ᤀᤠᤏᤡᤃᤧ ᤛᤠᤔᤖᤡ ᤋᤠᤰᤌᤧᤒᤠᤜᤠ᤹ᤖᤣ ᤁᤵᤔᤥ ᤃᤣᤖᤡᤈᤡᤔ ᤁᤥ᤺ᤰᤔᤠᤀᤥᤀᤣ ᤛᤣᤘᤠ ᤔᤧᤈᤥᤃᤢ. ᤁᤖ ᤂᤡᤏᤡ᤹ ᤕᤜᤢᤍᤡᤜᤠ᤹ᤖᤧ ᤛᤣᤘᤠ ᤆᤥ᤺ᤰᤔᤠ ᤋᤧᤴᤏᤡᤱᤃ ᤕᤖᤢᤛᤗᤧᤶᤗᤰ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤶᤗᤥ॥”
JOH 4:21 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗ ᤛᤢᤕᤧᤶᤔᤡᤴ ᤋᤠᤖ ᤐᤳᤗᤥ ᤗ᤹ᤖᤡᤰ ᤀᤡᤱᤃᤠ᤹ ᤔᤧᤳᤏᤧᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤧ᤹ᤀᤥ॥ ᤂᤧᤴ ᤕᤧᤶᤔᤥ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤛᤧ ᤂᤡᤏᤡ᤹ ᤁᤴ ᤁᤥ᤺ᤰᤔᤠᤀᤥ ᤀᤡᤃᤪ ᤕᤖᤢᤛᤗᤧᤶᤔᤥ. ᤀᤠᤳᤋᤥᤀᤠᤱ ᤁᤧᤶᤒᤣᤃᤡᤴᤗᤥ॥
JOH 4:22 ᤂᤡᤏᤡ᤹ ᤛᤠᤔᤖᤡᤜᤠ᤹ᤖᤧ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ ᤜᤠᤒᤠ ᤂᤧᤴ ᤛᤣᤘᤠ ᤁᤧᤈᤥᤃᤢᤶ. ᤁᤖ ᤀᤠᤏᤡᤃᤧ ᤕᤜᤢᤍᤡᤜᤠ᤹ᤖᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤴ ᤛᤣᤘᤠ ᤆᤥᤃᤢᤶᤒᤧ᤹. ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ᤗᤠᤶᤔᤣ ᤛᤧᤴᤗᤵᤐᤡᤴ ᤋᤠ᤺ᤖᤥ॥
JOH 4:23 ᤁᤖ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠ ᤏᤢ ᤛᤣᤛᤣᤔᤠᤱᤗᤠᤶ ᤛᤣᤘᤠ ᤆᤥ᤺ᤰᤔᤠ ᤕᤧᤶᤔᤡᤴ ᤋᤠᤖ ᤐᤳ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤡᤴ ᤀᤠᤸᤗᤥᤛᤠ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥ ᤜᤧᤰᤋᤱᤒᤠ ᤁᤢᤈᤧᤰ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤥ᤺ᤳᤋᤢᤛᤡ᤹ᤖᤥ॥
JOH 4:24 ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤕᤠᤶᤛᤠᤶᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤛᤧᤰᤂᤠ᤺ᤸᤗᤧ ᤛᤣᤛᤣᤔᤠᤱᤗᤠᤶ ᤛᤣᤘᤠ ᤆᤥ᤺ᤰᤔᤠ ᤐᤥ᤺ᤱᤗᤥ॥”
JOH 4:25 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤔᤧᤳᤋᤢ. “ᤔᤛᤡᤜ᤺ᤴ ᤋᤠ᤺ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ. (ᤂᤢᤏᤧ᤹ᤀᤣ ᤂᤪᤡᤛ᤻ᤋ ᤔᤧᤔᤧᤳᤋᤢ᤹ᤖᤥ) ᤂᤢᤏᤧ᤹ ᤋᤠ᤺ᤸᤗᤧ ᤁᤴ ᤁᤠᤰ ᤐᤠ᤺ᤴᤜᤠ᤹ ᤕᤠᤵᤔᤡ ᤐᤥᤎᤰ ᤆᤥᤃᤢ ᤐᤡᤖᤡᤃᤧᤖᤥ॥”
JOH 4:26 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤏᤢ ᤋᤠ᤹ᤁᤧᤈᤧᤱᤒᤠᤴᤏᤣ ᤂᤢᤏᤧ᤹ᤖᤥ॥”
JOH 4:27 ᤒᤠ ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤃᤧᤖᤧ ᤔᤧᤍᤩᤧ॥ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤏᤢ ᤋᤠ᤹ᤈᤧᤱᤏᤢ ᤕᤢᤅᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤌᤣ᤺ᤴ ᤆᤠᤜᤠᤒᤠ ᤁᤧᤈᤥᤃᤧᤒᤣ᥅ ᤀᤡᤃᤪ ᤌᤣᤀᤠᤱ ᤂᤧᤴᤏᤢ ᤋᤠ᤹ᤁᤧᤈᤧᤱᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤔᤧᤴᤍᤥ᤺ᤛᤢᤴᤗᤥ॥
JOH 4:28 ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤫᤠ᤺ᤳ ᤁᤢ᤺ᤴᤍᤠ᤺ᤴ ᤂᤧᤵᤔᤥᤀᤣ ᤕᤢᤰᤂᤢᤎᤀᤠᤱ ᤐᤠᤱᤈᤢᤶᤔᤥ ᤏᤢ᤺ᤰᤂᤧ ᤐᤣ ᤜᤧᤰᤁᤩᤠᤱ ᤁᤠᤰ ᤐᤠᤱᤈᤢᤶᤛᤠᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ.
JOH 4:29 “ᤀᤥᤔᤧᤳᤋᤧᤶᤔᤧ᤹. ᤔᤏᤠᤎᤡᤰᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤠᤰ ᤀᤠᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤠᤱᤗᤥ॥ ᤑᤧᤖᤧᤶᤔᤧ᤹ᤀᤠᤱ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠᤴ ᤂᤢᤏᤧ᤹ᤀᤣᤃ ᤔᤧ᤺ᤶᤒᤡ᥅”
JOH 4:30 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤐᤠᤱᤈᤢᤶᤔᤥᤗᤠᤶ ᤔᤧᤗ᤺ᤴᤍᤧᤀᤠᤱ ᤕᤧᤛᤢ᤺ᤴ ᤘᤕᤧᤒᤠ ᤋᤧᤴᤏᤥ ᤔᤧᤒᤣᤖᤥ॥
JOH 4:31 ᤀᤠᤸᤗ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ “‘ᤛᤡᤰᤛᤠᤶᤒᤣ. ᤆᤠ ᤆᤧ᤹ᤀᤥ’” ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ॥
JOH 4:32 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤳᤋᤢᤱᤒᤠ ᤀᤠᤈᤠᤔᤠ ᤆᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥”
JOH 4:33 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤒᤠᤅᤣ ᤛᤣ᤺ᤴᤔᤧᤍᤥ᤺ᤛᤡᤱ. “ᤔᤧ᤺ᤶᤒᤧ. ᤂᤢᤏᤧ᤹ ᤜᤠ᤺ᤳᤗᤧ ᤁᤢᤈᤠ ᤜᤢ᤹ᤖᤢᤒᤣ᥅”
JOH 4:34 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤏᤢ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢ᤺ᤵᤔᤠᤴᤏᤣ ᤀᤡᤱᤃᤠ᤹ ᤀᤠᤈᤠᤔᤠ ᤆᤠᤖᤥ॥
JOH 4:35 ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤳᤋᤢᤶ. ‘ᤀᤠᤸᤗ ᤗᤠ ᤗᤡᤛᤡ ᤀᤣᤃᤠᤱ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤠ᤺ᤖᤥ॥’ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ‘ᤂᤡᤏᤡ᤹ ᤔᤡᤰ ᤜᤴᤍᤧᤶᤔᤧ᤹ᤀᤠᤱ ᤀᤥᤔ᤺ᤕᤧᤶᤔᤧ᤹. ᤁᤠᤰ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤆᤠ ᤋᤢᤶᤛᤧᤀᤠᤱ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥’
JOH 4:36 ᤜᤧᤰᤁᤩᤠᤱ ᤁᤧᤛᤢᤶᤒᤠᤸᤗᤧ ᤂᤢᤏᤧ᤹ ᤁᤢᤏᤠᤶᤕᤠᤰ ᤂᤥ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧ ᤗᤠᤃᤡ ᤐᤥᤃᤢᤃᤧᤴ ᤁᤢᤈᤠ᤺ᤴ ᤔᤧᤛᤢᤵᤛᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤒᤠ ᤏᤢ ᤆᤠ ᤁᤧᤛᤢᤶᤒᤠ ᤏᤧᤵᤔᤠᤱ ᤛ᤺ᤳᤇᤡᤖᤥ॥
JOH 4:37 ᤜᤧᤰᤁᤣᤗ᤹ᤖᤡᤰ ‘ᤌᤡᤰᤁᤡᤸᤗᤧ ᤕᤠ᤹ᤖᤡ᤺ᤶᤒᤠᤴ ᤜᤣ᤹ᤖᤢ ᤘᤣ᤹ᤛ᤻ᤔᤠᤸᤗᤧ ᤆᤠ ᤛᤢᤵᤛᤢ᤹’ ᤐᤠ᤺ᤵᤔᤏᤠᤒᤠᤴ ᤛᤧᤰᤂᤠᤀᤣᤖᤥ॥
JOH 4:38 ᤀᤡᤱᤃᤠ᤹ᤀᤠᤱ ᤂᤡᤏᤡ᤹ ᤆᤠ ᤁᤧᤴᤜᤣ᤹ᤖᤢᤶᤔᤡᤴᤒᤥ ᤐᤥᤃᤢᤃᤧᤴ ᤁᤢᤈᤠ ᤛᤢᤶᤛᤧ ᤐᤠᤱᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤘᤣ᤹ᤜᤠ᤹ᤖᤧ ᤕᤠᤶᤒᤢᤎᤡᤰ ᤔᤧᤈᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤢᤏᤡ᤹ ᤕᤠᤶᤒᤢᤎᤡᤰᤗᤧᤴ ᤀᤡᤴᤎᤠ᤺ᤱᤅᤡᤴ ᤂᤡᤏᤡ᤹ ᤁᤧᤄᤥ᤺ᤛᤢᤶᤔᤠᤱ ᤘᤠ᤹ᤖᤥ॥”
JOH 4:39 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤠᤰ ᤀᤠᤕᤠ᤺ᤶᤒᤰᤜᤠ᤹ ᤂᤢᤏᤧ᤹ ᤆᤧᤰᤋᤠᤱᤗᤥ ᤗ᤹ᤖᤡᤰ ᤐᤠ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤐᤠᤱᤈᤢᤶᤗᤠᤶ ᤁᤧᤍᤠ᤺ᤒᤠ ᤕᤖᤡᤰ ᤛᤠᤔᤖᤡᤜᤠ᤹ᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 4:40 ᤛᤠᤔᤖᤡᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤍᤩᤧᤀᤠᤱ ᤀᤠᤏᤡᤃᤧᤏᤢ ᤌᤡᤰᤕᤧᤴ ᤏᤡᤕᤧᤴ ᤌᤠᤖᤡᤰ ᤕᤠ᤺ᤰᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ ᤜᤧᤰᤁᤩᤠᤱ ᤕᤧᤛᤢ᤺ᤴ ᤂᤧᤵᤔᤥ ᤏᤡᤕᤧᤴ ᤌᤠᤖᤡᤰ ᤕᤠ᤺ᤰᤋᤧᤖᤥ॥
JOH 4:41 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤏᤛᤠᤏᤡᤒᤠ ᤔᤧᤒᤥ᤺ᤰᤂᤧᤖᤥ॥
JOH 4:42 ᤂᤧᤱᤜᤠ᤹ᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤶᤔᤏᤠᤒᤠᤸᤗᤧᤖᤰ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠ ᤔᤧ᤺ᤴ. ᤁᤖ ᤀᤠᤸᤗᤥᤃ ᤀᤠᤏᤡᤃᤧ ᤀᤠᤒᤠᤅᤣ ᤂᤢᤏᤧ᤹ ᤁᤢᤒᤠ᤺ᤴᤜᤠ᤹ ᤂᤧᤵᤛᤢᤶᤒᤠ ᤜᤧᤰᤁᤩᤠᤱ ᤁᤴ ᤔᤏᤠ᤺ᤱᤃ ᤛᤧᤰᤂᤠᤛᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤛᤧᤴᤗᤵᤍᤠᤱᤒᤠ ᤑᤠ᤹ᤀᤠᤱ ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠᤖᤥ॥”
JOH 4:43 ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤡᤕᤧᤴ ᤀᤣᤃᤠᤱ ᤀᤠᤒᤠᤅᤣ ᤁᤢᤗᤠᤈᤣ᤹ ᤃᤠᤗᤡᤗ ᤌᤢᤶ ᤗᤧᤵᤔᤠᤱ ᤌᤠᤛᤡᤱᤗᤥ॥
JOH 4:44 (ᤀᤠᤸᤗ ᤕᤧᤛᤢᤖᤧ ᤀᤠᤒᤠᤅᤣ ᤀᤰᤂᤣᤗ᤹ᤖᤡᤰ ᤋᤃᤡ ᤐᤠ᤺ᤳᤋᤢᤀᤠᤱ ᤘᤕᤧ “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤂᤢᤏᤧ᤹ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤶᤒᤡᤖᤢᤴᤗᤥ॥”)
JOH 4:45 ᤕᤧᤛᤢ᤺ᤴ ᤃᤠᤗᤡᤗ ᤁᤧᤖᤧᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤖᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤘᤕᤧᤖᤥ॥
JOH 4:46 ᤂᤢᤏᤧ᤹ ᤕᤠᤶᤔᤥ ᤃᤠᤗᤡᤗᤒᤠ ᤁᤠᤏᤠ ᤐᤠᤱᤈᤢᤶᤔᤥ ᤐᤣ॥ ᤂᤧᤵᤔᤥ ᤂᤢᤏᤧ᤹ ᤆᤫᤠ᤺ᤳᤋᤡᤴ ᤆᤧᤸᤗᤧᤰᤛᤣ᤹ ᤌᤡ᤺ ᤆᤥᤃᤢᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤗᤳᤇᤠ ᤛᤢᤜᤠᤱᤕᤢᤰᤐᤠᤸᤗᤧ ᤁᤢᤛ᤻ᤛᤠ᤺ᤴ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤛᤠ᤹ᤖᤡᤰ ᤋᤢᤃᤧᤀᤠᤱ ᤏᤧᤛ᤻ᤛᤧᤖᤥ॥
JOH 4:47 ᤂᤧᤸᤗᤧ ᤕᤧᤛᤢ᤺ᤴ ᤕᤜᤢᤍᤡᤕᤠᤗᤠᤶ ᤃᤠᤗᤡᤗᤀᤥ ᤁᤧᤖᤧ ᤋᤩᤧ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤵᤔᤥ ᤁᤢᤍᤢᤶᤛᤧ ᤐᤣ॥ ᤂᤧᤸᤗᤧ ᤕᤧᤛᤢ᤺ᤴ ᤋᤢᤔᤢ ᤜᤧᤰᤁᤩᤠᤱ ᤁᤐᤷᤏᤜᤢᤶᤔᤥ ᤕᤧ᤹ᤀᤠᤱ ᤛᤡ᤺ᤔᤠᤗᤡᤱᤎᤥ ᤁᤧᤃᤧᤵᤐᤠᤀᤠᤱ ᤁᤧᤏᤧᤒᤠ ᤀᤠᤛ᤻ᤛᤠ᤺ᤴ ᤘᤣ᤺ᤴᤍᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤖᤥ॥
JOH 4:48 ᤕᤧᤛᤢᤖᤧ ᤂᤧᤴ ᤛᤢᤜᤠᤱᤕᤢᤰᤐᤧᤴ ᤔᤧᤳᤋᤢ. “ᤂᤡᤏᤡ᤹ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤴᤏᤡᤀᤣ ᤌᤠᤖᤡᤰ ᤀᤠᤵᤑᤠᤸᤗᤧᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥”
JOH 4:49 ᤂᤧᤴ ᤛᤢᤜᤠᤱᤕᤢᤰᤐᤠᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ᤴ ᤔᤧᤴᤇᤡ᤺ᤀᤣᤛᤠ ᤕᤧ᤹ᤀᤥ॥”
JOH 4:50 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹ᤀᤥ. ᤁᤧᤛ᤻ᤛᤠ᤺ᤴ ᤜᤡᤱᤗᤥ॥” ᤜᤧᤰᤁᤩᤠᤱ ᤂᤧᤸᤗᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤢᤀᤠᤱ ᤌᤠᤛᤡᤱᤗᤥ॥
JOH 4:51 ᤗᤠᤶᤔᤥ ᤂᤧᤴ ᤐᤣᤖ ᤐᤳᤇᤧᤸᤗᤧ ᤁᤢᤓᤠ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤔᤧᤍᤢᤔᤢᤀᤠᤱ “‘ᤁᤧᤛ᤻ᤛᤠ᤺ᤴ ᤘᤣ᤺ᤳᤋᤧᤖᤥ’” ᤔᤧᤔᤧᤳᤋᤢ॥
JOH 4:52 ᤜᤧᤰᤁᤩᤠᤱ ᤀᤠᤳᤋᤡᤴ ᤕᤧᤶᤔᤥ ᤘᤣ᤺ᤳᤋᤧᤒᤣ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤏᤥᤃᤵ ᤔᤧᤒᤡᤖᤢ. “ᤔᤡ᤺ᤵᤔᤠ ᤁᤢᤔᤢᤰ ᤌᤡᤰ ᤔᤢᤰᤋᤧᤀᤠᤱ ᤘᤕᤧᤸᤗᤧ ᤋᤢᤰᤔᤠᤸᤗᤧ ᤗᤧᤖᤢᤖᤥ॥”
JOH 4:53 ᤜᤧᤰᤁᤣ᤺ᤸᤗᤧ ᤁᤧᤍᤢᤰᤐᤠᤸᤗᤧ ᤁᤢᤶᤒᤠᤖᤧ ᤔᤡ᤺ᤵᤔᤠ ᤁᤧᤛ᤻ᤛᤠ᤺ᤴ ᤜᤡᤱᤗᤥ ᤗ᤹ᤖᤡᤰ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤕᤧᤶᤔᤥᤀᤣ ᤁᤧᤍᤢᤰᤐᤧᤴ ᤘᤣ᤺ᤳᤋᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰᤗᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 4:54 ᤁᤱᤃ ᤕᤧᤛᤢ᤺ᤴ ᤕᤜᤢᤍᤡᤕᤠᤗᤠᤶ ᤃᤠᤗᤡᤗᤀᤥ ᤋᤩᤧᤀᤠᤱ ᤆᤥᤃᤢᤒᤠ ᤏᤡᤛᤡᤃᤣ᤺ᤰᤐᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤘᤕᤧᤖᤥ॥
JOH 5:1 ᤂᤧᤴ ᤀᤣᤃᤠᤱ ᤕᤧᤛᤢ᤺ᤴ ᤕᤜᤢᤍᤡ ᤋᤱᤏᤠᤶᤖᤧ ᤗᤠᤃᤡ ᤌᤥ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤐᤣ॥
JOH 5:2 ᤀᤠᤸᤗ ᤕᤖᤢᤛᤗᤧᤶᤔᤥ ᤔᤧᤸᤗᤢᤰ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱ ᤅᤠᤛᤡ ᤛᤡᤳᤗᤠᤱᤜᤠ᤹ᤖᤧ ᤁᤒᤪᤡᤱ ᤁᤒᤢᤒᤠ ᤜᤡᤒᤪᤢ ᤐᤠ᤺ᤴᤏᤥ ᤒᤧᤌᤛ᤻ᤍᤠ ᤔᤧᤵᤔᤏᤠᤒᤠ ᤘᤠᤒᤠᤰᤌᤡᤰ ᤏᤧ᤹᤺॥
JOH 5:3 ᤂᤧᤵᤔᤥ ᤕᤖᤡᤰ ᤁᤧᤍᤢᤰᤐᤠ ᤔᤏᤠᤜᤠ᤹–ᤔᤡᤰᤑ᤺ᤶᤒᤠ. ᤗᤠᤱᤛᤰᤐᤠ ᤏᤢ ᤗᤱᤗᤧ᤺ᤱᤘᤠ ᤔᤏᤠᤜᤠ᤹ ᤔᤧᤏᤧᤛ᤻ᤛᤧᤖᤥ॥ ((ᤂᤧᤱᤜᤠ᤹ᤖᤧ ᤇᤡᤶᤗᤡᤱ ᤇᤡᤶᤗᤡᤱ ᤗ᤹ᤖᤡᤰ ᤁᤧᤔᤢᤶᤒᤠ ᤆᤫᤠ᤺ᤳᤋᤡᤴ ᤔᤧᤜᤠᤱᤄᤢᤀᤠᤱ ᤔᤧᤏᤧᤛ᤻ᤛᤧᤖᤥ॥
JOH 5:4 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤁᤢᤓᤠ ᤕᤧᤴᤏᤥ ᤋᤠᤀᤠᤱ ᤆᤫᤠ᤺ᤳᤋᤡᤴ ᤔᤢᤴᤍᤢᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤆᤫᤠ᤺ᤳᤋᤥ ᤁᤧᤗᤠ᤺ᤵᤐᤧᤴ ᤀᤠᤰᤋᤱᤒᤠ ᤋᤢᤰᤔᤠ ᤕ᤹ᤔᤠ ᤁᤳᤋᤢᤛᤠᤱ ᤘᤣ᤺ᤳᤋᤧᤖᤥ॥))
JOH 5:5 ᤂᤧᤵᤔᤥ ᤁᤧᤏᤧᤒᤠ ᤌᤡᤰ ᤁᤧᤍᤢᤰᤐᤠ ᤔᤏᤠ᤺ᤱᤃ ᤛᤢᤶᤕᤧᤳ (᥉᥎) ᤋᤱᤒᤣᤀᤠᤱᤎᤥ ᤏᤧᤛ᤻ᤛᤧᤖᤥ॥
JOH 5:6 ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤂᤧᤵᤔᤥ ᤏᤧᤛ᤻ᤛᤧᤒᤠ ᤏᤡ᤺ᤛᤢ ᤜᤧᤰᤁᤩᤠᤱ ᤕᤖᤡᤰ ᤋᤱᤒᤣᤀᤠᤱᤎᤥ ᤋᤢᤰᤁᤠᤱ ᤏᤧᤖᤥ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤘᤣ᤺ᤵᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅”
JOH 5:7 ᤂᤧᤴ ᤁᤧᤍᤢᤰᤐᤠᤸᤗᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤀᤠᤍᤠᤱᤒᤣ. ᤁᤖ ᤂᤧᤴ ᤘᤠᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤇᤡᤶᤗᤡᤱ ᤇᤡᤶᤗᤡᤱ ᤗ᤹ᤖᤡᤰ ᤔᤢᤴᤏᤡᤸᤗᤧ ᤂᤧᤵᤔᤥ ᤕᤠᤵᤔᤡ ᤁᤧᤃᤣ᤺ᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥ ᤀᤡᤱᤃᤠ᤹ ᤂᤧᤵᤔᤥ ᤗᤠ᤺ᤵᤔᤠ ᤋᤶᤛᤡᤴ ᤆᤥᤃᤢᤱᤗ ᤐᤳᤋᤠᤸᤗᤧᤛᤠ ᤘᤣ᤹ᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤔᤧᤗᤠ᤺ᤳ ᤔᤧᤒᤣ᤺ᤰᤗᤥ॥”
JOH 5:8 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹᥄ ᤜᤧᤰᤁᤩᤠᤱ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹ᤀᤥ॥”
JOH 5:9 ᤂᤡᤔᤥ ᤂᤧᤴ ᤔᤏᤠ᤺ᤴ ᤘᤣ᤺ᤳᤋᤧᤀᤠᤱ ᤁᤢᤏᤧᤳᤏᤠ᤺ᤴ ᤕᤠᤱᤛᤡᤱᤅᤠᤱ ᤌᤠᤛᤡᤱᤗᤥ॥ ᤀᤠᤸᤗ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤱᤃ ᤏᤠ᤺ᤶᤛᤡᤱ ᤕᤧᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
JOH 5:10 ᤂᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤧᤴ ᤁᤧᤘᤣ᤺ᤵᤐᤠ ᤔᤏᤠ᤺ᤴ “ᤂᤧᤏᤧ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤁᤧᤏᤧᤳᤏᤠ᤺ᤴ ᤐᤱᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤁᤧᤶᤒᤡᤏᤧᤴᤗᤥ” ᤔᤧᤔᤧᤳᤋᤢᤖ ᤔᤧᤀᤳᤋᤢ॥
JOH 5:11 ᤁᤖ ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤕᤠᤵᤔᤡ ᤁᤧᤘᤣ᤺ᤶᤒᤠ ᤔᤏᤠ᤺ᤸᤗᤧᤀᤣ ‘ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤳᤋᤠᤱᤒᤠᤖᤥ॥”
JOH 5:12 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤳᤋᤡᤴ ᤔᤏᤠ᤺ᤸᤗᤧ “ᤂᤧᤏᤧ᤹ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹” ᤁᤧᤔᤧᤳᤋᤧ ᤗ᤹ᤖᤡᤰ ᤂᤧᤴ ᤛᤣ᤺ᤴᤔᤧᤍᤥᤛᤢ॥
JOH 5:13 ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤧᤘᤣ᤺ᤶᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤒᤠ ᤔᤏᤠᤗᤢᤶᤔᤥ ᤕᤧᤛᤢ᤺ᤴ ᤀᤡ᤺ᤶᤛᤡᤱ ᤐᤣᤀᤠᤱ ᤜᤥ᤺ᤵᤋᤧᤖᤥ॥
JOH 5:14 ᤕᤠᤱᤛᤡ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤔᤠᤱᤜᤡᤶᤔᤥ ᤋᤢᤔᤢᤀᤠᤱ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤏᤢᤖᤧᤀᤠᤱ ᤁᤧᤘᤠ᤹ᤖᤥ॥ ᤀᤠᤸᤗᤀᤠᤱᤎᤥ ᤗᤠᤕᤥ ᤔᤧᤈᤥᤃᤧᤴᤏᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤍᤢᤔᤢ᤹ᤖᤥ॥”
JOH 5:15 ᤂᤧᤴ ᤔᤏᤠ᤺ᤴ ᤐᤣᤀᤠᤱ ᤀᤡᤱᤃᤠ᤹ ᤁᤧᤘᤣ᤺ᤶᤒᤠᤱᤃ ᤕᤧᤛᤢ᤺ᤴᤏᤣᤖᤧᤳᤇ ᤑᤠ᤹ᤀᤠᤱ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤳᤋᤢᤛᤡᤖᤥ॥
JOH 5:16 ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴ ᤛᤠᤶᤕᤥᤌᤡᤶᤔᤡᤴ ᤑᤣ᤺ᤴᤍᤢ ᤑᤠ᤹ᤀᤠᤱ ᤕᤧᤛᤢ᤺ᤴ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤵᤔᤠ ᤔᤧᤜᤣ᤺ᤰᤋᤢᤖᤥ॥
JOH 5:17 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤶᤒᤠᤖᤧᤀᤣ ᤀᤠᤸᤗᤥ ᤌᤠᤖᤡᤰ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ᤀᤠᤱ ᤆᤥᤃᤢᤱᤗᤥ॥”
JOH 5:18 ᤂᤢᤏᤧ᤹ᤃ ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠ ᤛᤠᤶᤕᤥᤌᤡᤶᤔᤡᤴᤗᤰ ᤔᤧᤏᤠ᤹ᤖᤢᤴ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ “ᤀᤠᤶᤒᤠᤖᤥ” ᤐᤠ᤺ᤳᤋᤢᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤢᤍᤱᤒᤠ ᤆᤥ᤺ᤰᤛᤡᤱ ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰᤛᤠᤱ ᤂᤢᤏᤧ᤹ ᤛᤧᤵᤔᤠ ᤐᤥ᤺ᤱ ᤗ᤹ᤖᤡᤰ ᤋᤶᤛᤡᤴ ᤔᤧᤈᤥᤃᤢ॥
JOH 5:19 ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤋᤱᤒᤠ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤁᤢᤛ᤻ᤛᤠ᤺ᤸᤗᤧ ᤀᤠᤒᤠᤅᤣᤃ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴ. ᤁᤖ ᤂᤢᤏᤧ᤹ᤃ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤏᤡ᤺ᤛᤢᤒᤠ ᤁᤢᤀᤡᤛᤡ᤺ᤰᤗᤰ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤌᤣ ᤆᤥᤃᤢ᤹ ᤒᤠ ᤂᤧᤴᤏᤣ ᤁᤢᤛ᤻ᤛᤠ᤺ᤸᤗᤧᤀᤠᤱ ᤆᤥᤃᤢ᤹ᤖᤥ॥
JOH 5:20 ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤛ᤻ᤛᤠ᤺ᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤂᤢᤏᤧ᤹ ᤆᤥᤃᤢᤒᤠ ᤁᤠᤰ ᤕᤠ᤺ᤶᤒᤰᤁᤡᤴ ᤀᤥᤛᤣ᤺ᤴᤎᤠᤰᤋᤢ᤹ᤖᤥ॥ ᤜᤧᤰᤁᤩᤠᤱ ᤁᤴ ᤔᤏᤠ᤺ᤴ ᤘᤣ᤺ᤳᤋᤧᤒᤠᤴᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤀᤥᤛᤣ᤺ᤴᤎᤠᤰᤋᤢᤒᤠ ᤁᤧᤏᤡ᤺ᤛᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤠᤖᤥ॥
JOH 5:21 ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤜᤡᤱᤄᤢᤛᤡᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛ᤻ᤛᤠ᤺ᤸᤗᤧᤀᤠᤱ ᤏᤡᤱᤘᤠ᤹ ᤆᤥᤃᤢᤛᤡᤒᤠ ᤔᤏᤠᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤐᤡᤖᤢᤛᤡ᤹ᤖᤥ॥
JOH 5:22 ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠᤏᤢᤍᤡᤱ ᤐᤠ᤺ᤸᤗᤧ ᤜᤠ᤺ᤳᤋᤠᤱ ᤀᤠᤒᤠᤅᤣ ᤂᤠᤛᤧᤴ ᤔᤧᤈᤥᤃᤢᤴ. ᤁᤖ ᤁᤠᤰ ᤂᤠᤛᤧᤴ ᤆᤥ᤺ᤰᤔᤠ ᤕᤢᤰᤁᤡᤴ ᤁᤢᤛ᤻ᤛᤠ᤺ᤴ ᤐᤡᤖᤢᤀᤠᤱ ᤘᤠ᤹ᤖᤥ॥
JOH 5:23 ᤂᤧᤸᤗᤧ ᤆᤥᤃᤢᤸᤗᤧ ᤁᤠᤰ ᤔᤏᤠᤜᤠ᤹ᤖᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛ᤻ᤛᤠ᤺ᤴᤏᤠᤱ ᤔᤧᤒᤡᤖᤢᤖᤖᤥ॥ ᤁᤖ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤀᤡᤱᤎᤠ᤺ᤱ ᤔᤧᤶᤒᤡᤔᤏᤠᤒᤠᤸᤗᤧᤃ ᤁᤢᤛ᤻ᤛᤠ᤺ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤀᤡᤱᤎᤠ᤺ᤱ ᤔᤧᤒᤡᤖᤢᤴᤗᤥ॥”
JOH 5:24 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰᤁᤡᤴ ᤂᤧᤵᤛᤢᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤂᤢᤶᤍᤡᤱ ᤔᤧᤄᤥ᤺ᤛᤢᤴ. ᤁᤖ ᤂᤧᤱᤃ ᤋᤃᤡᤛᤠ ᤛᤡ᤺ᤔᤧᤴᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤆᤳᤇᤡᤱ ᤐᤣᤀᤠᤱ ᤘᤠ᤹ᤖᤥ॥
JOH 5:25 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤸᤗ ᤕᤧᤶᤔᤡᤴ ᤋᤠᤖ ᤐᤳᤗᤥ. ᤁᤧᤛᤡ᤺ᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤀᤡᤰᤗᤠ᤺ᤴ ᤔᤧᤄᤧᤵᤛᤢ᤹ ᤜᤧᤰᤁᤩᤠᤱ ᤁᤢᤀᤡᤰᤗᤠ᤺ᤴ ᤁᤧᤄᤧᤶᤒᤠᤜᤠ᤹ ᤔᤧᤜᤡᤱᤗᤥ ᤜᤧᤰᤁᤩᤠᤱ ᤛᤧᤰᤂᤠᤀᤣ ᤂᤧᤴ ᤕᤧᤶᤔᤡᤱᤃ ᤀᤠᤸᤗᤥᤀᤣᤖᤥ॥
JOH 5:26 ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤠᤰ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤸᤗᤧ ᤁᤢᤒᤢᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛ᤻ᤛᤠ᤺ᤴᤏᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥
JOH 5:27 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤂᤠᤛᤧᤴ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤢᤰ ᤐᤡᤖᤢᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤧᤴᤇᤠᤶᤛᤠ᤺ᤖᤥ॥
JOH 5:28 “ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹. ᤛᤧᤰᤂᤠᤀᤣ ᤀᤰᤋᤱᤒᤠ ᤕᤧᤶ ᤋᤠᤖ ᤐᤳ. ᤂᤧᤴ ᤕᤧᤶᤔᤥᤃ ᤀᤡᤵᤐᤢᤱᤅᤥᤒᤠ ᤁᤠᤰ ᤁᤢᤛᤡᤘᤧᤳᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤀᤡᤰᤗᤠ᤺ᤴ ᤔᤧᤄᤧᤵᤛᤢᤀᤠᤱ
JOH 5:29 ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ–ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹. ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥”
JOH 5:30 ᤀᤡᤱᤃᤠ᤹ ᤀᤠᤒᤠᤅᤣᤃ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤁᤠᤴᤗᤥ. ᤁᤖ ᤀᤡᤱᤃᤠ᤹ ᤂᤧᤵᤛᤢᤱᤒᤠ ᤁᤢᤀᤡᤛᤡ᤺ᤰᤗᤰ ᤂᤠᤛᤧᤴ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠ ᤂᤠᤛᤧᤴᤏᤡᤴ ᤛᤠᤶᤕᤥᤏᤡᤒᤠ ᤆᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤀᤡᤸᤗᤧ ᤌᤠᤵᤋᤢᤒᤠ ᤌᤣᤀᤠᤱ ᤔᤧᤈᤥ᤺ᤰᤁᤠᤴ. ᤁᤖ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤗᤰ ᤆᤥᤃᤢᤱᤗᤥ॥
JOH 5:31 “ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤀᤠᤒᤠᤅᤣ ᤋᤥ᤺ᤴᤍᤡ ᤐᤡᤖᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤍᤥ᤺ᤴᤍᤡᤴ ᤛᤧᤰᤂᤠ ᤔᤧᤒᤥ᤺ᤱᤏᤧᤸᤗᤥ॥
JOH 5:32 ᤁᤖ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤒᤠᤱᤃ ᤘᤣ᤹ᤎᤡᤰ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤥ᤺ᤴᤍᤡᤱᤃ ᤛᤧᤰᤂᤠ ᤆᤥ᤺ᤰᤗᤥ॥”
JOH 5:33 ᤛᤧᤰᤂᤠᤀᤣ ᤂᤡᤏᤡ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤖᤥ ᤁᤢᤒᤠ᤺ᤴ ᤂᤧᤶᤛᤧ ᤁᤧᤒᤠᤱᤄᤢᤶᤛᤡᤶ ᤜᤧᤰᤁᤩᤠᤱ ᤛᤧᤰᤂᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤋᤥ᤺ᤴᤍᤡ ᤐᤡᤖᤢᤀᤠᤱ ᤘᤠ᤹ᤖᤥ॥
JOH 5:34 ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤴ ᤋᤥ᤺ᤴᤍᤡ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ. ᤁᤖ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤂᤡᤏᤡ᤹ ᤛᤧᤴᤗᤵ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥
JOH 5:35 ᤕᤢᤜᤢᤴᤏᤠ᤺ᤱᤃ ᤛᤣᤔᤡ ᤁᤢᤀᤡᤛᤡ᤺ᤰ ᤁᤧᤍᤡ᤺ᤵᤐᤠ ᤏᤢ ᤀᤥ᤺ᤳᤋᤡ ᤁᤧᤒᤡᤒᤠ ᤘᤕᤧ ᤜᤧᤰᤁᤩᤠᤱ ᤛᤵᤑᤠᤎᤡᤰᤛᤠᤱ ᤂᤢᤏᤧ᤹ ᤁᤢᤀᤥ᤺ᤳᤋᤡ᤺ᤴ ᤂᤡᤏᤡ᤹ ᤛᤡᤖᤠ᤹ ᤌᤠᤅᤧᤖᤥ.
JOH 5:36 ᤁᤖ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤕᤢᤜᤢᤴᤏᤠ᤺ᤸᤗᤧ ᤁᤢᤍᤥ᤺ᤴᤍᤡᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤋᤥ᤺ᤴᤍᤡ ᤘᤠ᤹. ᤂᤧᤱᤃ ᤆᤥᤃᤢᤱᤗ ᤘᤠ᤹ᤀᤠᤒᤠ ᤀᤠᤶᤒᤠᤖᤧ ᤆᤥ᤺ᤰᤔᤠ ᤛᤢ᤺ᤵᤔᤠ ᤑᤠ᤹ᤀᤠᤱ ᤐᤡᤖᤠᤱᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤐᤠᤏᤢᤍᤡᤱ ᤀᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤡᤖᤥ॥
JOH 5:37 ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤀᤠᤱ ᤘᤠ᤹ᤖᤥ॥ ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤁᤢᤒᤠ᤺ᤴ ᤔᤧᤱᤄᤧᤶᤔᤣ ᤏᤢ ᤂᤢᤏᤧ᤹ ᤔᤧᤴᤏᤡᤀᤣ ᤁᤧᤘᤕᤡ᤹ᤖᤥ॥
JOH 5:38 ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤔᤧᤘᤠ᤹ᤏᤧᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠ᤺ᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ॥
JOH 5:39 ᤂᤡᤏᤡ᤹ᤃ ᤛᤠᤶᤕᤥᤛᤠᤵᤗᤠ᤺ᤴ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤖᤢᤶᤗᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢᤶᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ. ᤁᤖ ᤂᤧᤴ ᤛᤠᤶᤕᤥᤛᤠᤵᤗᤠ᤺ᤸᤗᤧᤀᤣ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤡ᤹ᤖᤥ॥
JOH 5:40 ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤶᤔᤡᤴᤗᤥ॥
JOH 5:41 “ᤀᤡᤱᤃᤠ᤹ᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤏᤠᤖᤠ ᤔᤧᤓᤥ᤺ᤛᤢᤖ ᤔᤧᤗ᤹ᤀᤠᤴᤗᤥ॥
JOH 5:42 ᤁᤖ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤗᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤶᤔᤧᤳᤋᤢᤶᤔᤡᤴᤒᤠᤴ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥
JOH 5:43 ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤢᤰ ᤐᤡᤖᤠᤱᤅᤠᤱ ᤐᤠᤱᤄᤠᤱᤛᤠᤱ ᤕᤠᤵᤔᤡ ᤗᤠᤱᤃᤧᤴᤍᤠ᤺ᤰᤋᤡᤴᤗᤥ ᤁᤖ ᤘᤣ᤹ᤜᤠ᤹ ᤜᤠ᤺ᤳᤗᤧᤀᤠᤱ ᤕᤢᤰ ᤔᤧᤶᤒᤡᤀᤣ ᤀᤠᤒᤠᤅᤣ ᤂᤢᤏᤡ᤹ ᤕᤢᤰᤁᤥ ᤁᤧᤍᤠ᤺ᤒᤠᤜᤠ᤹ ᤂᤡᤏᤡ᤹ ᤗᤠᤱᤃᤧᤍᤠ᤺ᤰᤋᤢᤶᤛᤡᤶᤗᤥ॥
JOH 5:44 ᤂᤡᤏᤡ᤹ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤀᤠᤛᤡ. ᤁᤖ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤅᤡᤱᤃ ᤁᤧᤱᤃᤥ᤺ᤳᤋᤢᤶᤔᤡᤴ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤕᤠᤵᤔᤡ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤛᤢᤰᤋᤡᤒᤣ᥅”
JOH 5:45 “ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤍᤃᤡ ᤀᤠᤵᤋᤡᤰ ᤔᤧᤃᤢ᤺ᤳᤏᤡᤱᤅᤡᤴᤗᤥ. ᤁᤖ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧᤀᤣ ᤂᤡᤏᤡ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤡ᤹ᤖᤥ॥
JOH 5:46 ᤛᤧᤰᤂᤠᤀᤣ ᤔᤥᤛᤠ᤺ᤴ ᤏᤛᤠ᤺ᤴ ᤁᤧᤈᤥᤃᤢᤶᤔᤡᤸᤗᤧᤃ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤕᤠ᤺ᤶᤒᤣᤀᤥ ᤛᤠᤵᤋᤢᤀᤠᤱ ᤐᤳᤗᤥ॥
JOH 5:47 ᤁᤖ ᤂᤡᤏᤡ᤹ ᤔᤥᤛᤠᤖᤧ ᤛᤠᤵᤋᤢᤒᤠ ᤐᤠ᤺ᤴᤏᤥᤀᤣ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥᤃᤡ᤹ᤒᤣ᥅”
JOH 6:1 ᤕᤠᤱᤛᤡ ᤕᤧᤛᤢ᤺ᤴ ᤃᤠᤗᤡᤗ ᤘᤠᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤐᤣ॥ (ᤂᤧᤱᤃ ᤋᤡᤒᤣᤖᤡᤕᤛ ᤘᤠᤖᤰᤁᤠᤱ ᤔᤧᤔᤧᤳᤋᤢᤖᤥ॥)
JOH 6:2 ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤍᤢᤰᤐᤠᤜᤠ᤹ ᤘᤣ᤺ᤴᤍᤢᤛᤡᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧᤖᤥ॥
JOH 6:3 ᤕᤧᤛᤢ᤺ᤴ ᤌᤥ ᤁᤥ᤺ᤰᤔᤠᤀᤥ ᤐᤣ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤢᤱᤛᤡᤱᤗᤥ॥
JOH 6:4 ᤂᤧᤴ ᤕᤧᤶᤔᤥ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧ ᤆᤢᤖᤧᤀᤠᤱ ᤘᤕᤧᤖᤥ॥
JOH 6:5 ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤎᤠᤅᤧᤖ ᤔᤧᤒᤳᤇᤧᤒᤠ ᤕᤧᤛᤢᤖᤧ ᤏᤡ᤺ᤛᤢᤛᤡᤀᤠᤱ ᤑᤡᤗᤡᤵᤐᤧᤴ ᤛᤣ᤺ᤴᤍᤥᤛᤢ. “ᤀᤠᤸᤗ ᤀᤠᤳᤋᤡᤏᤢ ᤂᤖᤧ᤺ᤱᤅᤡᤴ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ ᤀᤠᤈᤠ᤺ᤳᤋᤢᤶᤛᤡᤶᤒᤠᤒᤣ᥅”
JOH 6:6 ᤂᤢᤏᤧ᤹ ᤑᤡᤗᤡᤵᤐᤧᤴ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤒᤠᤖᤥ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤌᤣ ᤆᤥᤃᤢᤱ ᤁᤧᤗ᤹ᤒᤠᤴ ᤋᤃᤡᤛᤠ ᤁᤢᤏᤡᤱᤘᤠ᤹ᤀᤥ ᤘᤕᤧᤖᤥ॥
JOH 6:7 ᤑᤡᤗᤡᤐᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤀᤠᤏᤡ᤹ᤃ ᤁᤡᤵ ᤏᤧᤳᤇᤡ (᥈᥆᥆) ᤕᤠᤱᤗᤧ ᤂᤖᤧ᤺ᤱ ᤀᤠᤀᤡᤅᤢᤶᤔᤠᤱ ᤁᤴ ᤔᤏᤠᤜᤠ᤹ᤃ ᤆᤩ᤹ ᤆᤩ᤹ᤖᤰ ᤀᤠᤒᤡᤖᤢᤶᤛᤡᤶᤛᤠᤱ ᤀᤠᤴᤕᤥᤛᤢᤶᤛᤡᤶᤔᤡᤴᤗᤥ॥”
JOH 6:8 ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛ᤻ᤔᤠ ᤁᤢᤜᤢ᤹ᤛᤠᤶᤒᤠ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤴᤛᤠ᤹ ᤀᤠᤴᤍᤪᤡᤕᤠᤛᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ.
JOH 6:9 “ᤁᤵᤔᤥ ᤆᤢᤰᤐᤠᤎᤡᤰᤗᤧ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤛᤠ ᤁᤳᤋᤢ᤹. ᤁᤖ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”
JOH 6:10 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤢᤖᤠ ᤔᤧᤳᤋᤢᤛᤡ. “ᤁᤧᤖᤧᤰ ᤔᤏᤠᤜᤠ᤹ ᤕᤢᤱ ᤐᤠᤱᤄᤧᤶᤛᤡᤶᤔᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤡᤰ ᤕᤠ᤺ᤴ ᤁᤧᤕᤢᤱᤒᤠ ᤏᤧᤏᤧᤒᤠ ᤋᤧᤴᤏᤥ ᤕᤢᤱᤔᤧᤒᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤵᤔᤥ ᤔᤧᤴᤇᤢᤔᤠ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤔᤧᤘᤕᤧᤖᤥ॥
JOH 6:11 ᤕᤧᤛᤢᤖᤧ ᤂᤧᤴ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤜᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤅᤠᤛᤠ᤺ᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤡ᤹ ᤕᤥᤕᤥ ᤜᤠ᤺ᤳᤋᤢᤛᤡᤖᤥ॥
JOH 6:12 ᤂᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤁᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤛᤢᤵᤛᤧᤶᤔᤧ᤹ᤀᤥ. ᤁᤢᤈᤡᤌᤡᤰᤁᤠᤱ ᤆᤠᤔᤧᤛᤥ᤺ᤰᤏᤧᤴᤗᤖᤥ॥”
JOH 6:13 ᤜᤧᤰᤁᤩᤠᤱ ᤂᤧᤴ ᤅᤠᤛᤡ ᤜ᤺ᤰᤛᤡ᤺ ᤂᤖᤧ᤺ᤱᤜᤠ᤹ ᤔᤏᤠᤜᤠ᤹ᤖᤧ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠ ᤂᤖᤧ᤺ᤱᤜᤠ᤹ ᤔᤧᤛᤢᤵᤛᤢᤸᤗᤧᤃ ᤌᤡᤰ-ᤏᤧᤳ ᤏᤀᤡᤔᤠᤏᤧ ᤋᤡᤶᤛᤧ᥄
JOH 6:14 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ ᤗ᤹ᤖᤡᤰ ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤱᤃ ᤛᤧᤰᤂᤠᤛᤠᤱ ᤂᤢᤏᤧ᤹ᤀᤣᤖᤥ॥”
JOH 6:15 ᤔᤏᤠᤜᤠ᤹ᤖᤧ ᤛᤠᤰᤁᤧᤸᤗᤧᤰᤁᤠᤱ ᤂᤢᤏᤡ᤹ ᤜᤠᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤢᤏᤧ᤹ ᤀᤧᤰᤗᤣ᤺ᤰ ᤌᤥ ᤁᤥ᤺ᤰᤔᤠᤀᤥ ᤐᤣᤖᤥ॥
JOH 6:16 ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤴ ᤁᤥ᤺ᤰᤔᤠᤀᤥᤗᤠᤶ ᤕᤥ ᤔᤧᤎᤩᤧᤀᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤧᤛᤢ᤺ᤴ ᤔᤧᤜᤠᤱᤄᤢᤖᤥ॥
JOH 6:17 ᤁᤖ ᤂᤠᤍᤠᤔᤧᤛᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤕᤧᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤀᤥ ᤔᤧᤗᤠ᤺ᤛᤧᤀᤠᤱ ᤏᤠᤜᤠᤱᤍᤠᤱ ᤁᤐᤷᤏᤜᤢᤔ ᤐᤠᤱᤈᤢᤶ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥
JOH 6:18 ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤘᤖᤰᤁᤥ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤺ᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤐᤥᤃᤧᤖᤥ॥
JOH 6:19 ᤂᤧᤱᤜᤠ᤹ ᤅᤠᤛᤡ-ᤋᤢᤰᤛᤡ (᥋-᥌) ᤁᤡᤗᤥᤔᤡᤋᤖ ᤔᤧᤒᤣᤀᤠᤱ ᤔᤧᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤜᤰᤆᤄᤳ ᤕᤧᤛᤢ᤺ᤴ ᤆᤫᤠ᤺ᤳᤋᤥ ᤗᤠᤱᤄᤣᤃᤧᤖ ᤂᤢᤏᤡ᤹ ᤐᤣᤛᤠᤱ ᤑᤧᤖᤧᤖ ᤐᤳᤇᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥
JOH 6:20 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤕᤧᤛᤢᤀᤠ. ᤔᤧᤃᤡᤛᤧᤶᤔᤡᤴᤏᤧ᤹॥”
JOH 6:21 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤂᤢᤏᤧ᤹ ᤂ᤺ᤱᤒᤣᤀᤥ ᤔᤧᤕᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤒᤠ ᤋᤧᤴᤏᤥ ᤂᤡᤔᤥ ᤂᤢᤏᤡ᤹ ᤂ᤺ᤱᤒᤣᤴ ᤁᤧᤖᤧᤖᤥ॥
JOH 6:22 ᤜᤧᤰᤁᤩᤠᤱ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤌᤡᤰᤗᤰ ᤂ᤺ᤱᤒᤣᤴ ᤏᤧᤛ᤻ᤛᤧᤒᤠ ᤔᤧᤏᤡ᤺ᤛᤢ ᤜᤧᤰᤁᤩᤠᤱ ᤕᤧᤛᤢ᤺ᤴ ᤂ᤺ᤱᤒᤣᤀᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤔᤧᤗᤠ᤺ᤛᤧᤶᤒᤠ ᤁᤖ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤰ ᤔᤧᤒᤣᤒᤠ ᤐᤠ᤺ᤴᤏᤡᤴ ᤁᤢᤍᤠ᤺ᤴᤍᤡᤰᤔᤠᤖᤰ ᤁᤢᤛᤡᤱ ᤔᤧᤏᤡ᤺ᤳᤋᤢ॥
JOH 6:23 ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤏᤥᤃᤧᤴ ᤐᤡᤖᤢᤀᤠᤱ ᤔᤏᤠᤜᤠ᤹ᤖᤧ ᤕᤖᤡᤰ ᤂᤖᤧ᤺ᤱᤜᤠ᤹ ᤔᤧᤈᤒᤠ ᤋᤧᤴᤏᤡᤸᤗᤧ ᤁᤢᤒᤣᤛᤠᤱ ᤋᤡᤒᤣᤖᤡᤕᤛ ᤕᤧᤰᤕᤰᤁᤥᤏᤢ ᤁᤢᤓᤠ ᤂ᤺ᤱᤒᤣᤜᤠ᤹ ᤂᤧᤵᤔᤥ ᤔᤧᤃᤧᤖᤧ॥
JOH 6:24 ᤕᤧᤛᤢ᤺ᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤜᤥ᤺ᤵ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤕᤠᤶᤔᤥ ᤂᤧᤴ ᤔᤏᤠᤜᤠ᤹ ᤂᤧᤴ ᤂ᤺ᤱᤒᤣᤜᤠ᤹ᤀᤥ ᤔᤧᤗᤠ᤺ᤛᤧᤀᤠᤱ ᤏᤠᤜᤠᤱᤍᤠᤱ ᤁᤐᤷᤏᤜᤢᤶᤔᤥ ᤕᤧᤛᤢᤖᤧ ᤁᤢᤃᤥ᤺ᤳᤇᤧ ᤔᤧᤒᤣᤖᤥ॥
JOH 6:25 ᤂᤧᤱᤜᤠ᤹ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤧᤖᤧᤸᤗᤧ ᤕᤧᤛᤢ᤺ᤴ ᤔᤧᤍᤢᤔᤢᤀᤠᤱ ᤛᤣ᤺ᤴᤔᤧᤍᤥᤛᤢ “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤵᤑᤠᤸᤗᤧ ᤁᤵᤔᤥ ᤁᤧᤓᤧᤖᤧᤒᤣ᥅”
JOH 6:26 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤏᤡᤴ ᤁᤧᤏᤡ᤺ᤛᤢᤶᤔᤠᤱ ᤔᤧ᤺ᤴ. ᤁᤖ ᤂᤠᤄᤠ ᤂᤖᤧ᤺ᤱᤅᤡᤴ ᤁᤧᤈᤠᤶᤔᤠᤱᤏᤧ ᤕᤠᤵᤔᤡ ᤁᤧᤃᤥ᤺ᤳᤋᤡᤒᤠᤖᤥ॥
JOH 6:27 ᤂᤡᤏᤡ᤹ ᤆᤠᤃᤧᤛᤥ᤺ᤰᤐᤠᤀᤠᤱ ᤁᤧᤒᤣ᤺ᤰᤐᤠ ᤁᤢᤈᤠᤖᤧ ᤗᤠᤃᤡ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤐᤡᤏᤡᤱᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤌᤠᤖᤡᤰ ᤁᤧᤎ᤺ᤵᤐᤠ ᤁᤢᤈᤠᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤒᤠ ᤜᤧᤰᤁᤣ ᤆᤥ᤺ᤰᤛᤧᤀᤣ ᤀᤡᤱᤃᤠ᤹ ᤕᤢᤰ ᤐᤡᤖᤠᤱᤅᤠᤱ ᤘᤠ᤹ᤖᤥ॥
JOH 6:28 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤌᤣ ᤆᤥᤃᤢᤶᤒᤧᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤒᤣ᥅”
JOH 6:29 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤱᤃ ᤂᤢᤏᤧ᤹ ᤐᤠᤱᤄᤢᤒᤠ ᤔᤏᤠ᤺ᤴ ᤏᤛᤠ᤺ᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢ᤹ᤖᤥ॥”
JOH 6:30 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤀᤠᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤁᤧᤈᤥᤃᤢᤀᤠᤱ ᤀᤠᤏᤡᤃᤧ ᤏᤛᤠ᤺ᤴ ᤆᤥ᤺ᤰᤁᤠᤛᤡᤃᤧᤒᤠᤒᤣ᥅ ᤀᤠᤏᤡᤃᤧ ᤗᤠᤃᤡ ᤂᤧᤏᤧ᤹ ᤌᤣ ᤁᤧᤈᤥᤃᤢᤒᤣ᥅
JOH 6:31 ᤀᤠᤏᤡᤃᤧ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧᤃ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ᤺ᤴ ᤔᤧᤈ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤖᤧ᤺ᤱᤅᤡᤴ ᤆᤠᤔᤠ ᤐᤡᤖᤢᤛᤡᤖᤥ॥’”
JOH 6:32 ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤥᤛᤠᤖᤧ ᤂᤡᤏᤡ᤹ ᤁᤧᤒᤡᤖᤡᤒᤠ ᤂᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤴ ᤛᤧᤰᤂᤠᤒᤠ ᤂᤖᤧ᤺ᤱᤅᤡᤴ ᤐᤠᤏᤢᤍᤡᤱ ᤀᤠᤶᤒᤠᤖᤧᤏᤧ ᤁᤧᤒᤡᤖᤡᤒᤠᤖᤥ॥
JOH 6:33 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤄᤖᤧ᤺ᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠᤀᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠᤴᤏᤣᤖᤥ”
JOH 6:34 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤴ ᤂᤖᤧ᤺ᤱᤅᤡᤴ ᤛᤍᤠᤍᤡᤱ ᤕᤠᤵᤔᤡ ᤀᤠᤒᤡᤖᤧ᤹ᤀᤥ॥”
JOH 6:35 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ. ᤀᤡᤱᤃᤠ᤹ᤀᤥ ᤁᤧᤍᤠ᤺ᤒᤠᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤛᤧᤳᤔᤧᤗᤠ᤺ᤰᤏᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥ᤺ᤰᤐᤧᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤢᤘᤠᤔᤧᤔᤡ᤺ᤰᤏᤧᤴᤗᤥ॥
JOH 6:36 ᤁᤖ ᤀᤡᤱᤃᤠ᤹ ᤕᤠᤵᤔᤡ ᤀᤠᤃᤧᤏᤡ᤺ᤛᤡᤛᤠᤱ ᤏᤛᤠ᤺ᤴ ᤀᤠᤃᤧᤴᤈᤥᤃᤡᤴ ᤑᤠ᤹ᤀᤠᤱ ᤛᤧᤰᤂᤠᤀᤣ ᤔᤧᤳᤏᤡᤱᤅᤠᤱ ᤘᤠ᤹ᤖᤥ॥
JOH 6:37 ᤐᤠᤏᤢᤍᤡᤱ ᤐᤠ᤺ᤸᤗᤧ ᤐᤡᤀᤠᤒᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤔᤧᤍᤠ᤹᤺. ᤜᤧᤰᤁᤩᤠᤱ ᤀᤠᤳᤋᤡᤴ ᤀᤡᤱᤃᤠ᤹ᤀᤥ ᤋᤠ᤺ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤢᤱᤅᤡᤴᤗᤥ॥
JOH 6:38 ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤠᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤔᤧᤴᤍᤠᤒᤧᤴᤗᤥ ᤁᤖ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤆᤥ᤺ᤰᤛᤧ ᤐᤠᤱᤄᤠᤱᤅᤠᤱ ᤋᤩᤠᤱᤒᤠᤖᤥ॥
JOH 6:39 ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤡᤖᤠᤱᤒᤠ ᤗᤳᤌᤡᤰᤁᤠᤱ ᤔᤧᤶᤔᤠᤀᤣ ᤁᤳᤋᤢᤱᤛᤡᤱᤗ ᤜᤧᤰᤁᤩᤠᤱ ᤁᤢᤏᤢᤵᤔᤠ ᤕᤧᤴᤏᤥ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗ ᤁᤧᤗ᤹ᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ ᤘᤠ᤹ᤖᤥ॥
JOH 6:40 ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠ᤺ᤴ ᤁᤧᤏᤡ᤺ᤒᤠᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢᤖ ᤁᤧᤗ᤹ᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤢᤏᤢᤵᤔᤠ ᤕᤧᤴᤏᤥ ᤂᤧᤱᤜᤠ᤹ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥”
JOH 6:41 ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ “‘ᤕᤧᤛᤢᤖᤧ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤀᤠ’” ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤩᤧᤏᤧᤴᤏᤠᤱ ᤔᤢᤏᤢᤰᤏᤢᤰ ᤗ᤹ᤔᤠ ᤔᤧᤜᤣ᤺ᤰᤋᤧᤖᤥ॥
JOH 6:42 ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤕᤢᤛᤢᤑᤖᤧ ᤁᤢᤛ᤻ᤛᤠ᤺ ᤕᤧᤛᤢ᤺ᤴ ᤔᤧ᤺ᤶᤒᤡ᥅ ᤁᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤀᤠᤏᤡ᤹ ᤁᤢᤛᤡᤱ ᤀᤠᤴᤏᤡ᤺ᤳᤋᤢᤶᤛᤡᤶᤔᤡᤶᤒᤡ᥅ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤀᤠᤱ ᤂᤧᤸᤗᤧ ‘ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤋᤩᤠᤱᤒᤠ’ ᤐᤠ᤺ᤵᤔᤠ ᤛᤢᤰᤋᤢᤒᤠᤒᤣ᥅”
JOH 6:43 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤔᤢᤏᤢᤰᤏᤢᤰ ᤔᤧᤗ᤹ᤖᤧᤶᤔᤡᤴᤏᤧ᤹.
JOH 6:44 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤔᤏᤠᤜᤠ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤏᤡᤱᤘᤠ᤹ ᤔᤧᤒᤡᤖᤢᤴᤛᤡᤴᤗ ᤌᤠᤖᤡᤰ ᤀᤠᤳᤋᤡᤴᤏᤠᤱ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤔᤧᤴᤇᤢᤰᤏᤧᤴᤗᤥ॥ ᤂᤧᤱᤜᤠ᤹ ᤔᤧᤍᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤁᤢᤏᤢᤵᤔᤠ ᤕᤧᤴᤏᤥ ᤁᤢᤜᤡᤱᤘᤧᤳ ᤆᤥᤃᤢᤱᤛᤡᤱᤗᤥ॥
JOH 6:45 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤛᤠᤵᤐᤴᤏᤥ ᤀᤰᤂᤣᤗ᤹ᤖᤡᤰ ᤔᤧᤛᤠᤵᤋᤢᤀᤠᤱ ᤐᤳ. ‘ᤂᤧᤱᤜᤠ᤹ᤃ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤢ᤹ᤖᤢᤛᤡᤒᤠ ᤔᤧᤒᤥ᤺ᤱᤗᤥ॥’ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤒᤠ᤺ᤴ ᤁᤧᤄᤧᤶᤒᤠᤜᤠ᤹ ᤏᤢ ᤂᤢᤏᤧ᤹ᤗᤠᤶᤒᤠ ᤁᤧᤜᤢ᤹ᤛᤡᤱᤒᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ᤀᤥ ᤔᤧᤍᤠᤖᤥ॥
JOH 6:46 ᤀᤠᤳᤋᤡᤸᤗᤧᤀᤠᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤏᤡᤀᤣ ᤘᤠ᤹ᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠᤸᤗᤧᤖᤰ ᤏᤡ᤺ᤛᤢᤀᤠᤱ ᤘᤠ᤹ᤖᤥ॥
JOH 6:47 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤧᤴᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤘᤠ᤹ᤖᤥ॥
JOH 6:48 ᤀᤡᤱᤃᤠ᤹ᤀᤣ ᤛᤧᤰᤂᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥
JOH 6:49 ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤕᤧ᤺ᤱᤄᤠᤍᤧᤴᤏᤥ ᤔᤴᤏᤠ ᤔᤧᤈᤛᤠᤱ ᤔᤧᤛᤩᤧᤖᤥ॥
JOH 6:50 ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤅᤡᤴ ᤁᤵᤔᤥ ᤘᤠ᤹ᤖᤥ. ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤴ ᤆ᤺ ᤂᤧᤴ ᤔᤧᤛᤡ᤺ᤏᤧᤴᤗᤥ॥
JOH 6:51 ᤀᤡᤱᤃᤠ᤹ᤀᤣ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤂᤖᤧ᤺ᤱᤀᤠᤖᤥ॥ ᤜᤠ᤺ᤳᤗᤧ ᤁᤴ ᤂᤖᤧ᤺ᤱᤅᤡᤴ ᤆ᤹᤺ ᤂᤧᤱᤃ ᤛᤍᤠᤍᤡᤱ ᤜᤡᤱᤗᤥ॥ ᤁᤴ ᤂᤖᤧ᤺ᤱᤅᤡᤱᤃ ᤏᤠᤛᤡᤱᤃᤧᤴ ᤀᤠᤎᤰᤁᤡᤴᤏᤣᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤁᤴᤏᤡᤴ ᤐᤡᤖᤢᤱᤛᤡᤱᤗᤥ॥”
JOH 6:52 ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤗᤢᤶᤔᤥ “ᤁᤴ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰᤁᤠᤱ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤆᤠᤔᤠ ᤑᤠ᤹ᤀᤠᤱ ᤐᤡᤔᤠ ᤀᤠᤛᤢᤰᤐᤠᤒᤣ᥅” ᤔᤧᤒᤠ᤺ᤳᤋᤢᤖ ᤐᤠ᤺ᤴᤎᤱ ᤆᤥ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥
JOH 6:53 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤧᤴᤇᤠᤶᤛᤠ᤺ᤸᤗᤧ ᤁᤢᤎᤰᤁᤡᤴ ᤔᤧᤴᤈᤠᤀᤣ ᤏᤢ ᤁᤢᤔᤠᤰᤂᤡ᤹ᤀᤡᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤂᤡᤏᤡ᤹ᤀᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤘᤠ᤹ᤏᤧᤴᤗᤥ॥
JOH 6:54 ᤁᤖ ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠ ᤏᤢ ᤀᤠᤔᤠᤰᤂᤡ᤹ ᤁᤧᤎᤢᤱᤒᤠᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤁᤢᤏᤢᤵᤔᤠ ᤕᤧᤴᤏᤥ ᤀᤡᤱᤃᤠ᤹ ᤁᤢᤜᤡᤱᤘᤧᤳ ᤆᤥᤃᤢᤱᤗᤥ॥
JOH 6:55 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤎᤰᤁᤡᤴ ᤜᤧᤰᤁᤩᤠᤱ ᤀᤠᤔᤠᤰᤂᤡ᤹ᤀᤡᤴ ᤛᤧᤰᤂᤠᤒᤠ ᤆᤠᤔᤠ ᤌᤢᤱᤔᤠ ᤆᤠᤖᤥ॥
JOH 6:56 ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠᤴ ᤏᤢ ᤀᤠᤔᤠᤰᤂᤡ᤹ ᤁᤧᤎᤢᤱᤒᤠᤴ ᤀᤡᤱᤃᤠ᤹ᤀᤥ ᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤧ᤹ᤀᤥ ᤘᤠ᤹ᤀᤠᤖᤥ॥
JOH 6:57 ᤜᤡᤱᤔᤴᤍᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤸᤗᤧ ᤜᤡᤱᤅᤠᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤀᤠᤎᤰᤁᤡᤴ ᤁᤧᤈᤠᤒᤠᤴᤏᤠᤱ ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤜᤡᤱᤗᤥ॥
JOH 6:58 ᤁᤴ ᤀᤠᤎᤰᤁᤡᤴᤏᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤂᤖᤧ᤺ᤱᤗᤥ॥ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤔᤴᤏᤠ᤺ᤴ ᤔᤧᤈᤀᤠᤱ ᤔᤧᤛᤩᤧ ᤁᤖ ᤁᤴ ᤂᤖᤧ᤺ᤱᤅᤡᤴ ᤁᤧᤈᤠ᤺ᤒᤠᤱᤃ ᤛᤍᤠᤍᤡᤱ ᤜᤡᤱᤗᤥ॥”
JOH 6:59 ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤁᤐᤷᤏᤜᤢᤶᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤜᤢ᤹ᤖᤢᤛᤡᤸᤗᤧ ᤐᤠ᤺ᤳᤋᤢᤒᤠᤖᤥ॥
JOH 6:60 ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤖᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤐᤠ᤺ᤴᤏᤡᤱᤃ ᤁᤧᤛᤠᤰᤐᤠ ᤏᤡᤛᤠᤶᤗᤥ॥ ᤁᤴ ᤜᤠ᤺ᤳᤗᤧ ᤏᤠ᤺ᤵᤔᤠ ᤛᤢᤰᤋᤢᤒᤣ᥅”
JOH 6:61 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤢᤏᤢᤰᤏᤢᤰ ᤔᤧᤗ᤹ᤖᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤂ᤺ᤛᤢᤒᤡ᥅
JOH 6:62 ᤔᤧᤴᤇᤠᤶᤛᤠ᤺ᤴ ᤋᤃᤡ ᤀᤠᤳᤋᤡ ᤘᤕᤧ ᤂᤧᤵᤔᤥᤀᤣ ᤕᤠᤶᤔᤥ ᤏᤢ᤺ᤱ ᤐᤣ᤺ᤰᤐᤠ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤡᤸᤗᤧ ᤀᤠᤰᤂᤣ ᤁᤧᤒᤠ᤺ᤳᤋᤢᤶᤒᤣ᥅
JOH 6:63 ᤛᤣᤛᤣᤔᤠᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤀᤠᤒᤡ᤹ᤖᤥ. ᤁᤖ ᤔᤧᤴᤇᤠᤶ ᤌᤢᤶᤔᤡᤸᤗᤧ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤴᤗᤥ॥ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤈᤠᤰᤜᤠ᤹ ᤕᤠᤶᤛᤠᤶ ᤏᤢ ᤜᤡᤱᤔᤴᤗᤥ॥
JOH 6:64 ᤁᤖ ᤂᤡᤏᤡ᤹ᤀᤥ ᤁᤢᤓᤠᤖᤧ ᤀᤡᤱᤃᤠ᤹ ᤏᤛᤠ᤺ᤴ ᤀᤠᤃᤧᤴᤈᤥᤃᤡᤴ॥” (ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤁᤢᤜᤣ᤺ᤰᤛᤡᤱᤔᤥᤏᤢᤀᤣ ᤀᤠᤳᤋᤡᤴᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤴᤈᤥᤃᤢᤴ ᤜᤧᤰᤁᤩᤠᤱ ᤜᤠ᤺ᤳᤗᤧ ᤂᤢᤏᤧ᤹ ᤀᤡᤱᤗᤧᤰᤋᤢ᤹ ᤁᤧᤗ᤹ᤒᤠᤴ ᤏᤡ᤺ᤛᤢᤀᤠᤱ ᤘᤕᤧᤖᤥ॥)
JOH 6:65 ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤧᤸᤗᤧ ᤆᤥᤃᤢᤸᤗᤧᤀᤣ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤔᤧᤶᤒᤡᤀᤣ ᤌᤠᤖᤡᤰ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤔᤧᤴᤇᤢᤰᤏᤧᤴᤗᤥ ᤗ᤹ᤖᤡᤰ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤒᤠ ᤂᤧᤴᤗᤥ॥”
JOH 6:66 ᤁᤴ ᤕᤧᤶᤔᤠᤱᤎᤥ ᤕᤖᤡᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤰᤔᤧᤎ᤺ᤀᤠᤱ ᤔᤧᤒᤣᤖᤥ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤕᤠᤶᤔᤥ ᤗᤠᤱᤔᤧᤱᤄᤣ᤺ᤃᤧᤴᤗᤥ॥
JOH 6:67 ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ᤀᤠᤱ ᤕᤠᤵᤔᤡ ᤀᤠᤃᤧᤗᤧᤖᤡ᤹ᤀᤠᤱ ᤁᤧᤒᤣᤃᤡᤒᤠᤒᤡ᥅”
JOH 6:68 ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤜᤠ᤺ᤳᤗᤥ ᤐᤣᤃᤡᤃᤧᤒᤠᤒᤣ᥅ ᤂᤧᤏᤧ᤹ᤖᤰ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤈᤠᤰᤁᤡᤴ ᤁᤧᤃᤳᤋᤢ᤹ᤖᤥ॥
JOH 6:69 ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤠᤱᤄᤧᤒᤠ ᤛᤣᤛᤣ ᤁᤢᤔᤏᤠ᤺ᤴᤏᤧ᤹ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡ᤺ᤛᤢᤶᤒᤧ ᤜᤧᤰᤁᤩᤠᤱ ᤏᤛᤠ᤺ᤴ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥”
JOH 6:70 ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤡᤏᤡ᤹ ᤌᤡᤰ-ᤏᤧᤳᤜᤠ᤹ ᤛᤣ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ. ᤁᤖ ᤂᤡᤏᤡ᤹ᤀᤥ ᤌᤡᤰᤁᤡᤴ ᤔᤠᤑᤧᤴᤛᤠᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
JOH 6:71 (ᤕᤧᤛᤢᤖᤧ ᤌᤡᤰ-ᤏᤧᤳ ᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤛᤡᤔᤥᤏ ᤀᤡᤛ᤻ᤁᤖᤡᤕᤥᤋᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤀᤠᤱ ᤘᤕᤧ॥ ᤂᤧᤸᤗᤧ ᤋᤠ᤺ᤴᤍᤡ ᤂᤢᤏᤧ᤹ ᤀᤡᤱᤗᤧᤰᤋᤢ᤹ᤖᤥ॥)
JOH 7:1 ᤂᤧᤴ ᤀᤣᤃᤠᤱ ᤕᤧᤛᤢ᤺ᤴ ᤃᤠᤗᤡᤗ ᤌᤢᤶ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤋᤠᤰᤁᤴᤍᤧᤖ ᤘᤕᤧᤖᤥ॥ ᤂᤢᤏᤧ᤹ᤃ ᤕᤜᤢᤍᤡᤕᤠ ᤌᤢᤶᤗᤠᤶ ᤔᤠ᤺ᤱᤄᤠᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤖ ᤔᤧᤘᤕᤧᤖᤥ॥
JOH 7:2 ᤁᤖ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤛᤠ᤺ᤱᤃᤠᤜᤡᤶ ᤋᤱᤏᤠᤶᤔᤡᤴ ᤋᤠ᤺ᤔᤠ ᤀᤡ᤺ᤳᤋᤧᤸᤗᤧ
JOH 7:3 ᤁᤢᤴᤛᤠ᤹ᤛᤡᤖᤧ ᤕᤧᤛᤢ᤺ᤴ ᤀᤰᤂᤣ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤴ ᤋᤧᤴᤏᤡᤴ ᤗᤧᤖᤧ᤹ᤀᤠᤱ ᤕᤜᤢᤍᤡᤕᤠᤀᤥ ᤐᤣᤃᤧ᤹ᤀᤥ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤘᤣ᤹ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤔᤧᤏᤡ᤺ᤛᤢᤖᤖᤥ॥
JOH 7:4 ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤑᤥ᤺ᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤆᤡᤱᤛᤡᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹ᤏᤧ ᤑᤠ᤹ᤃᤪ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤛᤣ᤺ᤴᤎᤠᤰᤛᤡᤱᤅᤧ᤹ᤀᤥ॥”
JOH 7:5 ᤌᤣᤀᤠᤱᤓᤧᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ᤛᤡᤖᤧᤀᤠᤱ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥
JOH 7:6 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤔᤧᤴᤍᤠᤀᤣ ᤘᤠ᤹ᤖᤥ॥ ᤂᤡᤏᤡ᤹ᤃ ᤀᤠᤵᤑᤠᤸᤗᤧᤛᤠᤱ ᤐᤣ᤺ᤰᤔᤠ ᤁᤧᤛᤢᤰᤋᤡ᤹ᤖᤥ.
JOH 7:7 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤂᤡᤏᤡ᤹ ᤆᤡ᤺ᤵᤔᤠ ᤁᤧᤔᤧᤴᤇᤢᤰᤋᤡᤴᤗᤥ. ᤁᤖ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤋᤠᤵᤑᤧ᤺ᤶᤒᤠ ᤆᤥ᤺ᤰ ᤔᤧᤳᤋᤢᤱᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤔᤧᤈᤡ᤺ᤳᤋᤠᤖᤥ॥
JOH 7:8 ᤋᤱᤏᤠᤶᤔᤥ ᤂᤡᤏᤡ᤹ ᤌᤥ ᤕᤖᤢᤛᤗᤧᤶᤔᤥ ᤐᤣᤃᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤀᤠᤸᤗᤥ ᤔᤧᤒᤣ᤺ᤰᤁᤠᤴ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤔᤧᤴᤍᤠᤀᤣ ᤘᤠ᤹ᤖᤥ॥”
JOH 7:9 ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤃᤠᤗᤡᤗᤀᤥᤀᤣ ᤘᤕᤧ ᤗᤠᤖᤧᤖᤥ॥
JOH 7:10 ᤁᤖ ᤕᤧᤛᤢᤖᤧ ᤁᤢᤴᤛᤠ᤹ᤛᤡ ᤋᤱᤏᤠᤶᤔᤥ ᤔᤧᤒᤣ ᤜᤧᤰᤁᤩᤠᤱ ᤕᤧᤛᤢ᤺ᤴᤏᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤔᤧᤴᤏᤡᤀᤣ ᤛᤫᤠ᤺ᤳᤋᤠᤱ ᤕᤖᤢᤛᤗᤧᤶᤔᤥ ᤐᤣᤖᤥ॥
JOH 7:11 ᤀᤠᤸᤗ ᤋᤱᤏᤠᤶᤔᤥ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤃᤥ᤺ᤳᤋᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤴ ᤀᤠᤳᤋᤠᤴ ᤐᤣᤒᤣ᥅”
JOH 7:12 ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤫᤠ᤺ᤳᤋᤠᤱ ᤔᤧᤈᤧᤰᤂᤢ॥ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤏᤢ᤺ᤒᤠ ᤔᤏᤠᤖᤥ” ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤴ. ᤂᤧᤸᤗᤧᤃ ᤔᤏᤠᤜᤠ᤹ ᤀᤡᤱᤗᤧᤰᤋᤢᤛᤡᤖ ᤘᤠ᤹ᤖᤥ॥”
JOH 7:13 ᤁᤖ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤃᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤶᤒᤠᤖᤧᤴᤗᤥ॥
JOH 7:14 ᤜᤧᤰᤁᤩᤠᤱ ᤋᤱᤏᤠᤶᤔᤡᤸᤗᤧ ᤁᤢᤗᤢᤶᤔᤥ ᤕᤧᤛᤢ᤺ᤴ ᤔᤠᤱᤜᤡᤶᤔᤥ ᤌᤥ ᤐᤣᤀᤠᤱ ᤔᤏᤠᤜᤠ᤹ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤖᤥ॥
JOH 7:15 ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤔᤧᤴᤜᤢ᤹ᤛᤡᤱᤅᤣ ᤀᤠᤰᤂᤣᤗ᤹ᤖᤡᤰ ᤀᤠᤏᤡ᤹ ᤜᤧᤰᤁᤣ ᤁᤴ ᤏᤡᤛᤠᤶᤔᤡᤴ ᤗᤧᤛ᤻ᤛᤢᤒᤣ᥅”
JOH 7:16 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤱᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤡᤴ ᤔᤧ᤺ᤴᤗᤥ. ᤁᤖ ᤁᤱᤃ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤖᤥ॥
JOH 7:17 ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤋᤩᤧᤒᤠᤒᤡ ᤀᤡᤱᤃᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤒᤠᤒᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥
JOH 7:18 ᤀᤠᤒᤠᤅᤣ ᤕᤢᤰᤁᤥᤗᤠᤶ ᤁᤧᤒᤠ᤺ᤵᤐᤠᤜᤠ᤹ᤖᤧᤃ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤃᤥ᤺ᤳᤋᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤂᤢᤏᤧ᤹ ᤁᤧᤒᤠᤱᤒᤠᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤛᤧᤰᤂᤠ ᤐᤠ᤺ᤴ ᤐᤠ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤌᤣᤀᤠᤱ ᤀᤡᤱᤗᤧᤰᤐᤠ ᤐᤠ᤺ᤴ ᤜᤥ᤺ᤵᤗᤥ॥
JOH 7:19 ᤔᤥᤛᤠᤖᤧ ᤂᤡᤏᤡ᤹ ᤛᤠᤶᤕᤥᤌᤡᤶ ᤁᤧᤒᤡᤖᤡ. ᤁᤖ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴ॥ ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤂᤡᤏᤡ᤹ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡᤒᤠᤒᤣ᥅”
JOH 7:20 ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ᤃ ᤑᤧᤴᤛᤠᤶᤔᤡᤸᤗᤧ ᤁᤧᤕᤠᤱᤄᤧᤀᤠᤱ ᤁᤧᤘᤠ᤹ᤖᤥ᥄ ᤜᤠ᤺ᤳᤗᤧ ᤂᤧᤏᤧ᤹ ᤛᤧᤵᤔᤠ ᤁᤧᤃᤥ᤺ᤳᤋᤧᤒᤣ᥅”
JOH 7:21 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤗᤳᤇᤠ ᤔᤏᤠᤎᤡᤰ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤏᤢᤛᤢᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
JOH 7:22 ᤁᤖ ᤂᤡᤏᤡ᤹ᤀᤠᤱ ᤔᤥᤛᤠᤖᤧ ᤁᤧᤒᤡᤖᤡᤒᤠ ᤜᤷᤍᤥ ᤜᤧᤰᤔᤠ ᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤔᤠᤱ ᤏᤠ᤺ᤶᤛᤡᤱ ᤕᤧᤴᤏᤥᤀᤣ ᤂᤡᤏᤡ᤹ ᤛᤠ᤺ᤜᤠ᤹ᤖᤧᤴ ᤜᤷᤍᤥ ᤁᤧᤜᤧᤃᤢᤶ ᤁᤧᤒᤡᤖᤢᤶᤛᤡᤶᤔᤡᤸᤗᤧ ᤂᤡᤏᤡ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤴᤍᤢᤶᤗᤥ॥ (ᤛᤧᤰᤂᤠ᤺ᤸᤗᤧ ᤁᤴ ᤜᤷᤍᤥ ᤜᤧᤰᤔᤠ ᤛᤠᤶᤕᤥᤌᤡᤶᤔᤡᤱᤃ ᤔᤥᤛᤠᤗᤠᤶ ᤔᤧ᤺ᤴ. ᤁᤖ ᤁᤱᤃ ᤀᤒᤪᤠᤜᤠᤶᤗᤠᤶ ᤐᤥ᤺ᤰᤂᤧ ᤕᤧᤒᤠᤖᤥ॥)
JOH 7:23 ᤀᤠᤸᤗ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤔᤧᤒᤣ᤺ᤴᤏᤧᤴᤗ ᤑᤠ᤹ᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤛᤠ᤺ᤜᤠ᤹ᤖᤧᤴ ᤜᤷᤍᤥ ᤜᤧᤰᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧ ᤑᤠ᤹ᤃᤪ. ᤀᤡᤱᤃᤠ᤹ ᤁᤴ ᤔᤏᤠ᤺ᤴ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤏᤢᤛᤢᤱᤅᤡᤸᤗᤧ ᤌᤣᤀᤠᤱ ᤀᤡᤱᤃᤠ᤹ᤏᤢ ᤂᤡᤏᤡ᤹ ᤕᤠ᤺ᤰᤗᤧ᤹ᤒᤠᤒᤣ᥅
JOH 7:24 ᤔᤏᤠ ᤀᤥᤔᤧᤵᤔᤠᤛᤡᤀᤠᤱ ᤔᤧ᤺ᤴ ᤁᤖ ᤛᤧᤰᤂᤠᤀᤥ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹ᤀᤥ॥”
JOH 7:25 ᤂᤧᤴ ᤕᤧᤶᤔᤥ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤁᤢᤓᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤶᤒᤧ. ᤛᤧᤵᤔᤠ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤒᤠ ᤔᤏᤠ᤺ᤴ ᤒᤠ ᤁᤴ ᤔᤧ᤺ᤶᤒᤡ᥅
JOH 7:26 ᤁᤖ ᤁᤱᤃ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤳᤗ ᤘᤠ᤹ᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤶᤔᤧᤳᤋᤢᤴᤗᤥ॥ ᤔᤧ᤺ᤶᤒᤧ. ᤀᤠᤏᤡ᤹ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤡ᥅
JOH 7:27 ᤁᤴ ᤔᤏᤠ᤺ᤴ ᤀᤠᤳᤋᤥᤗᤠᤶ ᤋᤩᤧ ᤁᤧᤗ᤹ᤒᤠ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤸᤗᤧᤃ ᤂᤢᤏᤧ᤹ ᤌᤠ᤺ᤶᤛᤡᤱᤗᤰᤗᤥ. ᤂᤢᤏᤧ᤹ ᤀᤠᤳᤋᤥᤗᤠᤶ ᤋᤠ᤺ ᤁᤧᤗ᤹ᤒᤠ ᤀᤠᤳᤋᤡᤸᤗᤧᤀᤠᤱ ᤔᤧᤏᤡ᤺ᤛᤢᤴᤗᤥ॥”
JOH 7:28 ᤕᤧᤛᤢᤖᤧ ᤔᤠᤱᤜᤡᤶᤔᤥ ᤜᤢ᤹ᤖᤢᤛᤡᤖ ᤐᤳᤇᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤥᤖᤥ. ᤂᤡᤏᤡ᤹ ᤀᤡᤱᤃᤠ᤹ ᤁᤢᤛᤡᤱ ᤕᤠᤵᤔᤡ ᤁᤧᤏᤡ᤺ᤳᤋᤡ᤹ ᤜᤧᤰᤁᤩᤠᤱ ᤀᤠᤳᤋᤥᤗᤠᤶ ᤋᤩᤠᤱᤒᤠ ᤂᤧᤴᤏᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶ. ᤁᤖ ᤀᤡᤱᤃᤠ᤹ ᤀᤠᤒᤠᤅᤣ ᤋᤩᤠᤱᤒᤠ ᤔᤧ᤺ᤴᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤱᤃ ᤛᤧᤰᤂᤠᤀᤣ ᤆᤥ᤺ᤰ ᤜᤧᤰᤁᤩᤠᤱ ᤂᤢᤏᤧ᤹ᤃ ᤂᤡᤏᤡ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ.
JOH 7:29 ᤁᤖ ᤀᤡᤱᤃᤠ᤹ᤃ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤗᤠᤶᤒᤠ ᤋᤩᤠᤱᤒᤠ ᤜᤧᤰᤁᤩᤠᤱ ᤂᤢᤏᤧ᤹ ᤐᤠᤱᤄᤠᤱᤒᤠᤖᤥ॥”
JOH 7:30 ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤋᤧᤶᤔᤠ ᤔᤧᤃᤥ᤺ᤳᤋᤢ. ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤔᤧᤴᤇᤢᤛ᤻ᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶᤔᤡᤴ ᤔᤧᤱᤃᤧᤳᤋᤣ ᤘᤕᤧᤖᤥ॥
JOH 7:31 ᤜᤧᤰᤁᤣᤛᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠ᤺ᤸᤗᤧ ᤁᤴ ᤔᤏᤠ᤺ᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤡ᥅”
JOH 7:32 ᤔᤏᤠᤜᤠ᤹ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤫᤠ᤺ᤳᤋᤠᤱ ᤂᤢᤛ᤻ᤂᤢᤛ᤻ ᤗ᤹ᤖᤡᤰ ᤔᤧᤒᤠᤖᤧᤒᤠ ᤑᤖᤡᤛᤡᤜᤠ᤹ᤖᤧ ᤔᤧᤄᤧᤵᤛᤢᤖᤥ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ ᤂᤢᤏᤧ᤹ ᤁᤢᤍᤧᤶᤛᤧ ᤔᤧᤒᤠᤱᤄᤢᤛᤡ॥
JOH 7:33 ᤁᤖ ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤂᤡᤏᤡ᤹ᤏᤢ ᤛᤵᤑᤠᤖᤰ ᤁᤵᤔᤥ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠᤸᤗᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥
JOH 7:34 ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ ᤁᤖ ᤕᤠᤵᤔᤡ ᤁᤧᤱᤄᤥ᤺ᤛᤡᤴᤗᤥ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤧᤴᤏᤥᤀᤠᤱ ᤁᤧᤵᤔᤠ ᤁᤧᤴᤇᤢᤰᤋᤡᤸᤗᤥ॥”
JOH 7:35 ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤛᤣ᤺ᤴᤔᤧᤗᤠᤵᤛᤡᤱ. “ᤔᤧ᤺ᤶᤒᤧ. ᤂᤢᤏᤧ᤹ ᤀᤠᤳᤋᤥ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖ ᤘᤠ᤹ᤀᤠᤱ ᤀᤠᤏᤡ᤹ ᤋᤢᤶᤔᤠ ᤀᤠᤴᤇᤢᤰᤋᤢᤶᤔᤡᤴᤒᤠᤒᤣ᥅ ᤂᤢᤏᤧ᤹ ᤘᤣ᤹ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤠᤏᤡ᤹ ᤔᤏᤠᤜᤠ᤹ᤖᤥ ᤐᤣ᤺ᤰᤁᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤢ᤹ᤖᤢᤛᤡᤒᤠᤒᤡ᥅
JOH 7:36 ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ ᤁᤖ ᤕᤠᤵᤔᤡ ᤁᤧᤴᤍᤢᤔᤡᤴ ᤜᤧᤰᤁᤩᤠᤱ ᤀᤠᤳᤋᤠᤴ ᤐᤣ᤺ᤰᤁᤠ ᤂᤧᤴ ᤋᤧᤴᤏᤥᤀᤠᤱ ᤁᤧᤵᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ ᤗ᤹ᤖᤡᤰ ᤌᤣ ᤐᤠ᤺ᤳᤋᤢᤒᤠᤒᤣ᥅”
JOH 7:37 ᤜᤧᤰᤁᤩᤠᤱ ᤋᤱᤏᤠᤶᤖᤧ ᤁᤢᤏᤢᤵᤔᤠ ᤏᤢ ᤁᤧᤕᤧᤰᤐᤠ ᤕᤧᤴᤏᤥ ᤕᤧᤛᤢ᤺ᤴ ᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤔᤏᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡᤖᤥ. “ᤂᤡᤏᤡ᤹ ᤗᤢᤶᤔᤥ ᤁᤢᤘᤠᤃᤧᤔᤡ᤺ᤒᤠᤸᤗᤧ ᤀᤡᤱᤃᤠ᤹ᤀᤥ ᤋᤠᤀᤠᤱ ᤌᤢᤅᤢᤖᤖᤥ॥
JOH 7:38 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤕᤠᤵᤔᤡ ᤏᤛᤠ᤺ᤴ ᤁᤧᤈᤥ᤺ᤰᤐᤠᤸᤗᤧ ᤁᤢᤛᤡᤃᤠᤱᤗᤠᤶ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤕᤱᤄᤱ ᤁᤢᤀᤡᤛᤡ᤺ᤰ ᤐᤢᤴᤗ᤺ᤴᤗᤥ॥”
JOH 7:39 ᤁᤱᤃ ᤕᤧᤛᤢᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤴ ᤔᤧᤄᤥ᤺ᤛᤢᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤛᤣᤛᤣᤔᤠᤱᤅᤡᤴ ᤂᤧᤴ ᤕᤧᤶ ᤌᤠᤖᤡᤰ ᤔᤧᤶᤒᤠᤱᤅᤣ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤴᤏᤢ᤺ᤱ ᤔᤧᤶᤒᤣ᤺ᤰᤁᤣ ᤘᤕᤧᤖᤥ॥
JOH 7:40 ᤜᤧᤰᤁᤩᤠᤱ ᤁᤴ ᤔᤧᤄᤧᤵᤛᤢᤀᤠᤱ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠ᤺ᤱᤃ ᤋᤠ᤺ ᤗ᤹ᤖᤡᤰ ᤀᤡ᤺ᤵᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤣᤖᤥ॥”
JOH 7:41 ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ “ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ॥” ᤁᤖ ᤀᤠᤸᤗᤛᤠᤱ ᤘᤣ᤹ᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢ. “ᤁᤱᤃ ᤐᤥ᤺ᤱᤔᤠᤀᤣ ᤔᤧᤛᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤃᤠᤗᤡᤗ ᤌᤢᤶᤔᤥᤗᤠᤶ ᤔᤧᤍᤠᤏᤧᤴᤗᤥ॥
JOH 7:42 ᤛᤠᤶᤕᤥᤛᤠᤵᤗᤠᤀᤥ ᤋᤥ᤺ᤴᤍᤥ᤺ᤴᤏᤠᤱ ᤛᤠᤵᤋᤧᤀᤠᤱ ᤐᤳᤗᤥ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤱᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤡᤶᤛᤕᤱᤗᤠᤶ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱ ᤘᤕᤧᤒᤠ ᤒᤧᤌᤗᤣᤜᤧᤔ ᤐᤠᤱᤈᤢᤶᤔᤥ ᤛᤠᤘᤠ᤺ᤴᤇᤡᤱᤗᤥ॥’”
JOH 7:43 ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥
JOH 7:44 ᤁᤢᤓᤠᤖᤧ ᤂᤢᤏᤧ᤹ ᤋᤧᤶᤔᤠ ᤔᤧᤃᤥ᤺ᤳᤋᤢ. ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤜᤢᤰ ᤔᤧᤴᤕᤠᤰᤋᤢᤴᤗᤥ॥
JOH 7:45 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤧᤶᤛᤧ ᤁᤧᤍᤠ᤺ᤒᤠ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤥ ᤀᤠᤶᤓᤠ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥ ᤂᤧᤱᤜᤠ᤹ᤖᤧ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ “ᤌᤣᤀᤠᤱ ᤂᤢᤏᤧ᤹ ᤁᤧᤴᤍᤧᤶᤛᤢᤶᤔᤡᤴ ᤁᤧᤴᤍᤠᤖᤢᤔᤡᤶᤒᤠᤒᤣ᥅”
JOH 7:46 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢᤛᤡ. “ᤀᤠᤳᤋᤡᤴᤏᤠᤱ ᤂᤧᤴ ᤔᤏᤠ᤺ᤴ ᤜᤧᤰᤁᤣ ᤐᤠᤖᤧᤒᤠᤃ ᤔᤧᤱᤄᤧᤶᤔᤣ ᤘᤠ᤹ᤖᤥ॥”
JOH 7:47 ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤔᤧ᤺ᤶᤒᤧ. ᤂᤡᤏᤡ᤹ᤀᤠᤱ ᤂᤧᤸᤗᤧ ᤁᤢᤀᤡᤱᤗᤧᤰᤁᤥ ᤁᤧᤎᤩᤧ᤹ᤀᤡᤒᤡ ᤌᤧᤔᤠᤒᤣ᥅
JOH 7:48 ᤀᤠᤏᤡ᤹ ᤗᤠᤶᤗᤥ᤺ᤒᤠ ᤏᤢ ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ᤀᤥ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤘᤠ᤹ᤒᤡ᥅
JOH 7:49 ᤀᤠᤳᤋᤡᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤘᤠ᤹॥ ᤁᤴ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧᤔᤏᤠᤒᤠ ᤔᤏᤠᤜᤠ᤹ᤖᤧᤖᤰ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥ ᤁᤴ ᤔᤏᤠᤜᤠ᤹ᤃ ᤏᤡᤱᤘᤠ᤹ᤑᤢ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤀᤠᤱ ᤘᤠ᤹ᤖᤥ॥”
JOH 7:50 ᤋᤃᤡ ᤌᤡᤰ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤍᤢᤶᤛᤧ ᤁᤧᤒᤣ᤺ᤰᤐᤠ ᤏᤡᤁᤥᤍᤣᤔᤛ ᤔᤧᤵᤔᤏᤠᤒᤠ ᤂᤢᤏᤡ᤹ ᤗᤢᤶᤔᤥᤒᤠ ᤌᤡᤰ ᤑᤖᤡᤛᤡ ᤗᤠᤶᤗᤥ᤺ᤒᤠᤴ ᤐᤠᤖᤧᤖᤥ.
JOH 7:51 “ᤔᤧ᤺ᤶᤒᤧ. ᤂᤧᤴ ᤔᤏᤠ᤺ᤸᤗᤧ ᤌᤣ ᤆᤥᤃᤢᤖ ᤘᤠ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤀᤠᤵᤋᤡᤰ ᤁᤢ᤺ᤵᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ᥅”
JOH 7:52 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ᤀᤠᤱ ᤃᤠᤗᤡᤗᤗᤠᤶᤔᤣ ᤁᤧᤍᤩᤧᤒᤠᤒᤡ᥅ ᤂᤧᤏᤧ᤹ ᤀᤠᤒᤠᤅᤣ ᤛᤠᤶᤕᤥᤛᤠᤵᤗᤠ᤺ᤴ ᤏᤡ᤺ᤖᤧ ᤛᤠ᤹ᤖᤧ. ᤃᤠᤗᤡᤗᤗᤠᤶᤒᤠᤃ ᤀᤠᤵᤑᤠᤸᤗᤧᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤔᤧᤍᤠᤏᤧᤴᤗᤥ॥”
JOH 7:53 ((ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤠᤒᤠᤅᤣ ᤜᤡᤶᤜᤡᤶ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
JOH 8:1 ᤁᤖ ᤕᤧᤛᤢ᤺ᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤐᤣᤖᤥ॥
JOH 8:2 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤂᤠᤀᤥ᤺ᤳᤋᤧᤏᤢᤔᤧ᤺ᤴᤏᤣ ᤂᤢᤏᤧ᤹ ᤔᤠᤱᤜᤡᤶᤔᤥ ᤋᤩᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤔᤏᤠᤜᤠ᤹ ᤆᤢᤶᤔᤠ ᤔᤧᤜᤣ᤺ᤰᤋᤧᤀᤠᤱ ᤂᤢᤏᤧ᤹ ᤕᤢᤱᤛᤡᤱᤅᤠᤱ ᤂᤧᤱᤜᤠ᤹ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥
JOH 8:3 ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢᤖ ᤐᤳᤇᤧᤸᤗᤧ ᤔᤧᤍᤧᤶᤛᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤔᤏᤠᤗᤢᤵᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢ॥
JOH 8:4 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤁᤴ ᤔᤧᤴᤇᤢᤔᤠ᤹ᤀᤡᤴ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤧᤖ ᤐᤳᤇᤧᤸᤗᤧᤀᤣ ᤔᤧᤍᤧᤶᤛᤢᤀᤠᤱ ᤋᤠᤖᤢᤶᤒᤧᤒᤠᤖᤥ॥
JOH 8:5 ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤔᤥᤛᤠ᤺ᤸᤗᤧᤃ ᤀᤰᤋᤱᤔᤠ ᤔᤧᤴᤇᤢᤔᤠ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ᤁᤖ ᤂᤧᤏᤧ᤹ᤃ ᤌᤣ ᤕᤠᤵᤔᤡ ᤁᤧᤔᤧᤵᤐᤣ᥅”
JOH 8:6 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤴᤏᤥ ᤌᤠ᤺ᤔᤠᤀᤠᤱ ᤁᤢᤍᤰᤗᤧᤱᤘᤠᤀᤥᤒᤠ ᤐᤠ᤺ᤴᤏᤡᤴ ᤂᤥ᤺ᤔᤠ ᤑᤠ᤹ᤀᤠᤱ ᤁᤴ ᤛᤣ᤺ᤴᤔᤧᤍᤥᤛᤢᤀᤠᤱ ᤘᤕᤧ. ᤁᤖ ᤕᤧᤛᤢ᤺ᤴ ᤌᤢ᤺ᤱᤛᤡᤱᤅᤠᤱ ᤂᤠᤶᤒᤠᤱᤅᤥ ᤌᤣᤎᤣᤀᤡ ᤁᤢᤜᤢᤰᤆᤥ᤺ᤸᤗᤧ ᤛᤠᤵᤋᤢᤖ ᤕᤢᤅᤧ॥
JOH 8:7 ᤂᤧᤱᤜᤠ᤹ᤖᤧ ᤀᤧᤳᤗᤧᤱ ᤛᤣ᤺ᤴᤔᤧᤍᤥᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤥ ᤀᤠᤸᤗᤥ ᤌᤠᤖᤡᤰ ᤗᤠᤕᤥ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤜᤠ᤺ᤳ ᤘᤠ᤹᥅ ᤜᤠᤖᤠ᤹ ᤒᤠ ᤂᤧᤸᤗᤧᤀᤣ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤔᤧᤴᤇᤢᤔᤠ᤹ᤀᤡᤴ ᤗᤢᤱᤅᤡᤸᤗᤧ ᤗᤧᤵᤋᤢᤖᤖᤥ॥”
JOH 8:8 ᤂᤢᤏᤧ᤹ ᤕᤠᤶᤔᤥ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤂᤠᤶᤒᤠᤱᤅᤥ ᤛᤠᤵᤔᤠ ᤜᤣ᤺ᤰᤋᤢᤖᤥ॥
JOH 8:9 ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤋᤢᤶᤓᤠᤰᤛᤠ ᤜᤧᤰᤁᤩᤠᤱ ᤂᤧᤴᤏᤠᤱ ᤕᤥᤒᤠᤜᤠ᤹ ᤌᤡᤰ ᤌᤡᤰ ᤗ᤹ᤖᤡᤰ ᤐᤣ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤕᤧᤛᤢ᤺ᤴ ᤏᤢ ᤂᤧᤴ ᤔᤧᤴᤇᤢᤔᤠ᤹ᤀᤡᤴᤗᤰ ᤕᤠ᤺ᤰᤋᤧᤳᤇᤡᤖᤥ॥
JOH 8:10 ᤜᤧᤰᤁᤩᤠᤱ ᤕᤧᤛᤢ᤺ᤴ ᤐᤥᤃᤧᤀᤠᤱ ᤂᤧᤴ ᤛᤣ᤺ᤴᤍᤥᤛᤢ “ᤔᤠᤔᤢᤀᤣ. ᤂᤧᤏᤧ᤹ ᤐᤠ᤺ᤴ ᤁᤧᤎᤡᤰᤐᤠᤜᤠ᤹ ᤀᤠᤳᤋᤡ ᤔᤧᤒᤣᤒᤣ᥅ ᤜᤠ᤺ᤳᤗᤧᤀᤠᤱ ᤂᤧᤏᤧ᤹ ᤐᤠ᤺ᤴ ᤁᤧᤴᤎᤡᤰᤋᤧᤴᤒᤡ᥅”
JOH 8:11 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤥᤃᤵ ᤐᤡᤖᤢ. “ᤜᤥ᤺ᤵᤗᤥ. ᤀᤠᤍᤠᤱᤒᤣ᥄” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧᤀᤠᤱ ᤔᤧᤳᤋᤢ. “ᤀᤡᤱᤃᤠ᤹ᤀᤠᤱ ᤔᤧᤎᤡᤰᤏᤧᤴᤗᤥ॥ ᤐᤣᤃᤧ᤹ᤀᤥ. ᤁᤖ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤗᤠᤕᤥ ᤔᤧᤈᤥᤃᤧᤴᤏᤧ᤹ᤀᤥ॥”))
JOH 8:12 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤀᤠᤖᤥ॥ ᤜᤠ᤺ᤳᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ ᤂᤧᤴᤏᤢ ᤜᤡᤱᤔᤴ ᤁᤧᤒᤡᤒᤠ ᤀᤥ᤺ᤳᤋᤡ᤺ᤴ ᤘᤠ᤹ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤂᤧᤴ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥”
JOH 8:13 ᤑᤖᤡᤛᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤀᤠᤒᤠᤅᤣ ᤁᤧᤕᤠ᤺ᤶᤒᤣᤀᤥ ᤁᤧᤒᤠ᤺ᤳᤋᤢ᤹ᤖᤥ ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠ ᤔᤧ᤺ᤴᤗᤥ॥”
JOH 8:14 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤒᤠ᤺ᤴᤜᤠ᤹ ᤀᤠᤒᤠᤅᤣ ᤐᤠ᤺ᤳᤋᤢᤱᤛᤠᤱ ᤂᤧᤴ ᤛᤧᤰᤂᤠᤀᤣᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤅᤠᤱ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤏᤢ᤺ᤖᤡᤰᤁᤠᤱ ᤏᤡ᤺ᤛᤢᤱᤗᤥ ᤁᤖ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤠᤳᤋᤥᤗᤠᤶ ᤋᤩᤠᤱᤒᤠ ᤜᤧᤰᤁᤩᤠᤱ ᤀᤠᤳᤋᤥ ᤐᤣ᤺ᤰᤁᤠᤖ ᤐᤳᤋᤠ ᤂᤧᤴ ᤌᤣᤀᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
JOH 8:15 ᤂᤡᤏᤡ᤹ᤃ ᤔᤧᤴᤇᤠᤶ ᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤠᤛᤧᤴ ᤁᤧᤗᤥ᤺ᤴᤍᤡ᤹ᤖᤥ. ᤁᤖ ᤀᤡᤱᤃᤠ᤹ᤃ ᤀᤠᤳᤋᤡᤸᤗᤧᤴᤏᤠᤱ ᤂᤠᤛᤧᤴ ᤔᤧᤈᤥᤃᤢᤱᤅᤡᤴᤗᤥ॥
JOH 8:16 ᤁᤖ ᤀᤡᤱᤃᤠ᤹ ᤂᤠᤛᤧᤴ ᤆᤥᤃᤢᤱᤏᤧ ᤑᤠ᤹ᤃᤪ ᤀᤠᤄᤠᤛᤧᤴᤏᤡᤴ ᤛᤧᤰᤂᤠᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤖᤰ ᤜᤥ᤺ᤵᤐᤠᤖᤥ॥ ᤀᤡᤱᤃᤠ᤹ᤏᤢᤃ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤘᤠ᤹ᤖᤥ॥
JOH 8:17 ᤂᤡᤏᤡ᤹ ᤛᤠᤶᤕᤥᤌᤡᤶᤔᤥ ᤏᤧᤵᤑᤢ ᤔᤏᤠᤜᤠ᤹ᤖᤧ ᤌᤡᤰ ᤐᤠ᤺ᤴᤏᤥ ᤋᤱᤛᤡᤀᤠᤱ ᤋᤥ᤺ᤴᤍᤡ ᤐᤡᤛᤢᤏᤧ ᤑᤠ᤹ᤃᤪ ᤂᤧᤴ ᤋᤥ᤺ᤴᤍᤡᤴ ᤛᤧᤰᤂᤠᤀᤣ ᤐᤥ᤺ᤱᤗᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤗᤥ॥
JOH 8:18 ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧᤀᤠᤱ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤖᤥ॥”
JOH 8:19 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤖ ᤁᤧᤏᤧᤒᤠ ᤐᤠᤏᤢᤍᤡᤱ ᤁᤧᤶᤒᤠᤃ ᤀᤠᤳᤋᤥ ᤘᤠ᤹ᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤃ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤴᤏᤡ᤺ᤳᤋᤡᤴ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤏᤡ᤺ᤳᤋᤡᤸᤗᤧᤃ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤔᤧᤴᤗᤥ॥”
JOH 8:20 ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤔᤠᤱᤜᤡᤶᤔᤥ ᤜᤢᤰᤛᤥᤕᤠᤱ ᤕᤠᤰᤔᤏᤠᤒᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤏᤡᤛᤠᤶ ᤜᤢ᤹ᤖᤢᤛᤡᤖ ᤐᤳᤇᤧᤸᤗᤧ ᤐᤠ᤺ᤳᤋᤢᤒᤠᤖᤥ. ᤁᤖ ᤂᤢᤏᤧ᤹ᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤍᤧᤶᤛᤢᤴᤗᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤕᤧᤶ ᤔᤧᤴᤍᤠᤀᤣ ᤘᤕᤧᤖᤥ॥
JOH 8:21 ᤕᤠᤱᤛᤡ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤐᤣ᤺ᤰᤁᤠᤀᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤀᤥ ᤁᤧᤛᤩᤧ᤹ᤀᤡᤖᤥ॥ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤣᤴᤏᤥ ᤂᤡᤏᤡ᤹ ᤋᤠ᤺ᤔᤠ ᤁᤧᤴᤇᤢᤰᤋᤡᤴᤗᤥ॥”
JOH 8:22 ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤛᤣ᤺ᤴᤔᤧᤍᤥ᤺ᤛᤡᤱ. “ᤕᤧᤛᤢ᤺ᤴ ᤀᤠᤒᤠᤅᤣ ᤛᤧᤳᤇᤡᤱᤒᤠᤒᤡ᥅ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤣ᤺ᤰᤁᤠᤒᤠ ᤋᤣᤴᤏᤥ ᤋᤠ᤺ᤔᤠ ᤁᤧᤴᤇᤢᤰᤋᤡᤴᤗᤥ ᤑᤠ᤹ᤀᤠᤱ ᤐᤠ᤺ᤳᤋᤢᤒᤠᤒᤡ᥅”
JOH 8:23 ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤒᤠ ᤁ᤹ᤕᤥᤒᤠᤏᤡᤱᤗᤥ. ᤁᤖ ᤀᤡᤱᤃᤠ᤹ ᤌᤥᤗᤠᤶᤒᤠᤀᤠᤖᤥ॥ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤏᤡᤱᤗᤥ ᤁᤖ ᤀᤡᤱᤃᤠ᤹ᤃ ᤔᤧ᤺ᤴᤏᤠ᤹ᤖᤥ॥
JOH 8:24 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤗᤠᤕᤥᤜᤠ᤹ᤀᤥ ᤁᤧᤛᤩᤧ᤹ᤀᤡᤖᤥ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤏᤡᤸᤗᤧᤃ ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤒᤠᤅᤣ ᤗᤠᤕᤥᤜᤠ᤹ᤀᤥ ᤁᤧᤛᤩᤧ᤹ᤀᤡ॥”
JOH 8:25 ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅” ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤋᤃᤡᤏᤢᤀᤣ ᤔᤧᤳᤏᤡᤱᤗ ᤘᤠ᤹ᤀᤠᤒᤠᤴᤏᤣ ᤂᤢᤏᤧ᤹ᤀᤠᤖᤥ॥
JOH 8:26 ᤀᤡᤱᤃᤠ᤹ᤃ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤕᤖᤡᤰ ᤐᤠ᤺ᤵᤔᤠ ᤏᤢ ᤂᤡᤏᤡ᤹ ᤑᤧ᤺ᤰᤔᤠ ᤐᤠ᤺ᤴ ᤁᤳᤋᤢᤱᤗᤥ॥ ᤁᤖ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤛᤧᤰᤂᤠᤀᤣ ᤆᤥ᤺ᤰᤗᤥ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤂᤧᤵᤛᤢᤱᤒᤠ ᤐᤠ᤺ᤴᤏᤡᤴᤗᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤔᤧᤳᤋᤢᤱᤛᤡᤱᤗᤥ॥”
JOH 8:27 ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
JOH 8:28 ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤴᤇᤠᤶᤛᤠ᤺ᤴ ᤌᤠ᤺ᤱ ᤁᤧᤒᤰᤂᤢᤶᤔᤡᤸᤗᤧ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢᤶᤗᤥ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤔᤧᤒᤠ᤺ᤳᤋᤠᤴ ᤁᤖ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤜᤢ᤹ᤖᤠᤱᤒᤠ ᤐᤠ᤺ᤴᤗᤰ ᤐᤠ᤺ᤳᤋᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢᤶᤗᤥ॥
JOH 8:29 ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤱᤃ ᤛᤍᤠᤍᤡᤱ ᤀᤡᤱᤃᤠ᤹ᤏᤢ ᤘᤠ᤹ᤖᤥ॥ ᤂᤢᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤀᤡᤱᤃᤠ᤹ ᤀᤣ᤺ᤰ ᤔᤧᤸᤗᤧᤳᤋᤣ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤍᤠᤍᤡᤱ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤆᤥᤃᤢᤱᤗᤥ॥
JOH 8:30 ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ᤀᤥ ᤏᤛᤠ᤺ᤴ ᤔᤧᤈᤥᤃᤢᤖᤥ॥”
JOH 8:31 ᤕᤧᤛᤢᤖᤧ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤁᤧᤒᤳᤇᤡ᤹ᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤀᤠᤜᤢ᤹ᤛᤠᤶᤒᤠ ᤁᤧᤒᤥ᤺ᤰᤂᤡ᤹ᤖᤥ॥
JOH 8:32 ᤜᤧᤰᤁᤩᤠᤱ ᤛᤧᤰᤂᤠ᤺ᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤛᤧᤰᤂᤠ᤺ᤸᤗᤧ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡ᤹ᤖᤥ॥”
JOH 8:33 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤡᤃᤧᤖᤥ॥ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤳᤋᤡᤸᤗᤧᤴᤏᤠᤱ ᤁᤢᤕᤥ᤺ᤰᤐᤠ ᤔᤧᤶᤒᤥ᤺ᤱᤅᤣ ᤘᤕᤡᤃᤧᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤆᤥ᤺ᤰᤕᤢᤶᤓᤥ ᤁᤧᤄᤥ᤺ᤛᤢᤶ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤒᤣ᥅”
JOH 8:34 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤜᤠ᤺ᤳᤗᤧ ᤗᤠᤕᤥ ᤆᤥᤃᤢ᤹. ᤂᤧᤱᤃ ᤗᤠᤕᤥᤖᤧ ᤁᤢᤕᤥ᤺ᤰᤐᤠ ᤐᤥ᤺ᤱᤗᤥ॥
JOH 8:35 ᤀᤠᤸᤗ ᤕᤥ᤺ᤰᤐᤠᤱᤃ ᤛᤍᤠᤍᤡᤱ ᤜᤡᤶᤛᤕᤱᤅᤥᤒᤠ ᤔᤧ᤺ᤴᤗᤥ. ᤁᤖ ᤛᤠ᤺ᤱᤃ ᤛᤍᤠᤍᤡᤱ ᤜᤡᤶᤛᤕᤱᤅᤥᤒᤠᤖᤥ॥
JOH 8:36 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤆᤥ᤺ᤰᤕᤢᤶᤓᤥ ᤁᤧᤈᤥᤃᤡᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤁᤧᤒᤥ᤺ᤰᤂᤡ᤹ᤖᤥ॥
JOH 8:37 ᤂᤡᤏᤡ᤹ᤃ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤏᤡᤱ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ. ᤜᤧᤰᤁᤣᤛᤠᤱ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡ᤹ᤖᤥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤜᤢ᤹ᤏᤡᤱᤒᤠ ᤏᤡᤛᤠᤶᤔᤡᤴ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤕᤢᤱᤔᤠ ᤁᤧᤴᤍᤧᤴᤍᤡᤴᤗᤥ॥
JOH 8:38 ᤀᤡᤱᤃᤠ᤹ᤃ ᤐᤠᤏᤢᤍᤡᤱ ᤀᤠᤶᤒᤠᤏᤢ ᤘᤕᤠᤱᤅᤡᤸᤗᤧ ᤏᤡ᤺ᤛᤢᤱᤒᤠ ᤐᤠ᤺ᤴᤜᤠ᤹ᤀᤣ ᤐᤠ᤺ᤳᤋᤢᤱᤗᤥ. ᤁᤖ ᤂᤡᤏᤡ᤹ᤃ ᤂᤡᤏᤡ᤹ ᤐᤠ᤺ᤗᤠᤶ ᤁᤧᤄᤧᤵᤛᤢᤶᤒᤠᤴᤗᤰ ᤁᤧᤈᤥᤃᤢᤶᤗᤥ॥”
JOH 8:39 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤐᤠᤏᤢᤍᤡᤱ ᤐᤠ᤺ᤱᤃ ᤀᤒᤪᤠᤜᤠᤶᤔᤡᤴᤏᤣᤖᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤁᤧᤘᤕᤡᤸᤗᤧᤃ ᤀᤒᤪᤠᤜᤠᤔᤖᤧ ᤆᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤧᤈᤥᤃᤢᤶᤗᤥ॥
JOH 8:40 ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤧᤵᤛᤢᤱᤒᤠ ᤛᤧᤰᤂᤠ᤺ᤴᤏᤣ ᤂᤡᤏᤡ᤹ ᤔᤧᤳᤏᤡᤱᤗᤥ. ᤁᤖ ᤂᤡᤏᤡ᤹ᤃ ᤕᤠᤵᤔᤡ ᤛᤧᤵᤔᤠ ᤁᤧᤃᤥ᤺ᤳᤋᤡ᤹ᤖᤥ॥ ᤀᤒᤪᤠᤜᤠᤔᤖᤧᤃ ᤜᤧᤰᤁᤣ ᤔᤧᤈᤥᤃᤢᤴᤗᤥ॥
JOH 8:41 ᤂᤡᤏᤡ᤹ ᤀᤠᤒᤠᤅᤣ ᤐᤠ᤺ᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤀᤣ ᤂᤡᤏᤡ᤹ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧ ᤂᤥ᤹ᤛᤠᤛᤡᤃᤧᤃ ᤔᤧ᤺ᤴᤗᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤀᤠᤏᤡᤃᤧ ᤐᤠᤏᤢᤍᤡᤱ ᤐᤠ᤺ᤖᤥ॥”
JOH 8:42 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤐᤠ ᤘᤕᤧᤸᤗᤧᤃ ᤀᤡᤱᤃᤠ᤹ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡᤔᤧᤴ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤠᤱᤒᤠᤖᤥ. ᤀᤡᤱᤃᤠ᤹ ᤀᤠᤒᤠᤅᤣ ᤋᤩᤠᤱᤒᤠ ᤔᤧ᤺ᤴᤗᤥ ᤁᤖ ᤂᤢᤏᤧ᤹ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥
JOH 8:43 ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤶᤒᤠᤒᤣ᥅ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤁᤡᤴ ᤂᤧᤶᤔᤠ ᤁᤧᤴᤇᤢᤰᤋᤢᤶᤔᤡᤴᤗᤥ॥
JOH 8:44 ᤂᤡᤏᤡ᤹ ᤐᤠ᤺ᤱᤃ ᤔᤠᤑᤧᤴᤛᤠᤶᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤜᤧᤰᤁᤣᤀᤣ ᤆᤥ᤺ᤰᤔᤠ ᤂᤡᤏᤡ᤹ ᤛᤡᤖᤠ᤹ ᤌᤠᤱᤗᤥ॥ ᤂᤧᤱᤃ ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤔᤧᤴᤇᤠᤶ ᤕᤠᤵᤔᤡ ᤁᤧᤛᤧᤵᤐᤠ ᤘᤕᤧ॥ ᤂᤧᤸᤗᤧ ᤛᤧᤰᤂᤠ᤺ᤴ ᤆᤡ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤧᤰᤂᤠ᤺ᤴ ᤂᤢᤏᤧ᤹ᤀᤥ ᤜᤥ᤺ᤵᤗᤥ॥ ᤂᤢᤏᤧ᤹ ᤋᤠᤵᤑᤧ᤺ᤶᤒᤠ ᤁᤢᤛᤢᤳᤏᤠ᤺ᤴ ᤁᤢᤀᤡᤛᤡ᤺ᤰᤁᤣ ᤀᤡᤱᤗᤧᤰ ᤐᤠ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤜᤧᤰᤁᤩᤠᤱ ᤀᤡᤱᤗᤧᤰᤁᤣ ᤐᤠ᤺ᤴᤜᤠ᤹ᤖᤧ ᤁᤢᤶᤒᤠᤖᤥ॥
JOH 8:45 ᤀᤡᤱᤃᤠ᤹ ᤛᤧᤰᤂᤠ᤺ᤴ ᤔᤧᤳᤏᤡᤱᤛᤠᤱ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ᥄
JOH 8:46 ᤂᤡᤏᤡ᤹ᤀᤥ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤕᤥᤒᤠ ᤔᤧᤵᤔᤠ ᤛᤢᤰᤁᤠᤒᤣ᥅ ᤀᤡᤱᤃᤠ᤹ ᤛᤧᤰᤂᤠ ᤐᤠ᤺ᤴ ᤔᤧᤳᤏᤡᤱᤛᤠᤱ ᤌᤣᤀᤠᤱ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤶᤒᤠᤒᤣ᥅
JOH 8:47 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤔᤧ᤺ᤴᤏᤡᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧᤀᤣ ᤂᤡᤏᤡ᤹ ᤁᤢᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤗᤥ॥”
JOH 8:48 ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ ᤛᤠᤔᤖᤡ ᤛᤢᤘᤠᤱᤒᤠᤏᤧ ᤜᤧᤰᤁᤩᤠᤱ ᤂᤧᤏᤧ᤹ ᤑᤧᤴᤛᤠᤶᤔᤡᤸᤗᤧ ᤁᤧᤍᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ॥”
JOH 8:49 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤑᤧᤴᤛᤠᤶᤔᤡᤸᤗᤧ ᤔᤧᤴᤕᤠᤱᤅᤣ ᤘᤠ᤹ᤀᤠᤖᤥ॥ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ᤺ᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤱ. ᤁᤖ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤡᤱᤎᤠ᤺ᤱ ᤕᤠᤵᤔᤡ ᤁᤧᤶᤒᤡᤖᤡᤴᤗᤥ॥
JOH 8:50 ᤀᤡᤱᤃᤠ᤹ᤃ ᤀᤠᤵᤑᤣ᤺ᤰ ᤀᤠᤔᤡᤔᤡᤍᤡᤱᤅᤡᤴ ᤔᤧᤃᤥ᤺ᤳᤋᤢᤱᤅᤡᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤔᤡᤔᤡᤍᤡᤱᤅᤡᤴ ᤁᤥ᤺ᤳᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤠᤛᤧᤴᤗᤥ᤺ᤶᤒᤠᤖᤥ॥
JOH 8:51 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤠᤏᤡᤛᤠᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤗᤥ॥”
JOH 8:52 ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤛᤧᤰᤂᤠᤀᤣ ᤑᤧᤴᤛᤠᤶᤔᤡᤸᤗᤧ ᤁᤧᤕᤠᤱᤄᤧᤀᤠᤱ ᤁᤧᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥ ᤌᤣᤀᤠᤱᤓᤧᤸᤗᤧ ᤀᤒᤪᤠᤜᤠᤶᤔᤡᤴ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤠᤰ ᤔᤧᤛᤩᤧ ᤔᤧᤄᤧᤖᤧ. ᤁᤖ ᤂᤧᤏᤧ᤹. ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤗᤥ ᤗ᤹ᤖᤡᤰ ᤁᤧᤒᤠ᤺ᤳᤋᤢ᤹ᤖᤥ॥
JOH 8:53 ᤂᤧᤏᤧ᤹ ᤀᤠᤏᤡᤃᤧ ᤛᤢᤎᤧᤒᤠ ᤋᤠᤰᤌᤧᤒᤠ ᤀᤒᤪᤠᤜᤠᤶᤔᤡᤴᤏᤢ᤺ᤸᤗᤧᤀᤠᤱ ᤕᤶᤒᤠᤏᤧᤒᤡ᥅ ᤂᤢᤏᤧ᤹ᤃ ᤛᤩᤧ ᤜᤧᤰᤁᤩᤠᤱ ᤁᤠᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤔᤧᤛᤩᤧᤖᤥ॥ ᤂᤧᤏᤧ᤹ᤃ ᤀᤠᤒᤠᤅᤣ ᤜᤠ᤺ᤳᤀᤠ ᤁᤧᤗ᤹ᤒᤣ᥅”
JOH 8:54 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤒᤠᤅᤣ ᤆᤶᤛᤡᤱᤅᤠᤏᤧ ᤑᤠ᤹ᤃᤪ ᤂᤧᤱᤃ ᤌᤣᤀᤠᤱ ᤔᤧ᤺ᤴᤗᤥ. ᤁᤖ ᤂᤡᤏᤡ᤹ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱ ᤁᤧᤔᤧᤳᤋᤢᤶᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧᤀᤣ ᤀᤡᤱᤃᤠ᤹ ᤀᤠᤔᤡᤔᤡᤍᤡᤱ ᤆᤥᤃᤢ᤹ᤖᤥ॥
JOH 8:55 ᤂᤡᤏᤡ᤹ᤃ ᤂᤢᤏᤧ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤇᤠᤱ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤗ᤹ᤖᤡᤰ ᤐᤠ᤺ᤳᤋᤢᤱᤏᤧ ᤑᤠ᤹ᤃᤪ ᤂᤡᤏᤡ᤹ ᤜᤧᤰᤁᤣᤀᤣ ᤀᤡᤱᤃᤠ᤹ ᤀᤡᤱᤗᤧᤰᤁᤣ ᤐᤥ᤺ᤱᤅᤠᤖᤥ. ᤁᤖ ᤀᤡᤱᤃᤠ᤹ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤁᤢᤒᤠ᤺ᤴᤈᤠᤰᤁᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥
JOH 8:56 ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠ ᤀᤒᤪᤠᤜᤠᤔᤖᤧᤀᤠᤱ ᤁᤴ ᤀᤠᤍᤠ᤺ᤔᤠ ᤕᤧᤶᤔᤡᤴ ᤀᤥᤔᤧᤵᤔᤠ ᤑᤠ᤹ᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤛᤔᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤡᤴ ᤏᤡ᤺ᤛᤢᤀᤠᤱ ᤛ᤺ᤳᤋᤧᤖᤥ॥”
JOH 8:57 ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤋᤱᤒᤣ ᤅᤠᤃᤡᤵᤐᤠᤱ (᥋᥆) ᤔᤧᤱᤃᤧᤳᤋᤣ ᤁᤧᤘᤠ᤹ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤒᤪᤠᤜᤠᤶᤔᤡᤴ ᤁᤧᤏᤡ᤺ᤛᤢᤀᤠᤱ ᤁᤧᤘᤠ᤹ᤒᤣ᥅”
JOH 8:58 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤀᤒᤪᤠᤜᤠᤶᤔᤡᤴ ᤛᤠᤘᤠ᤺ᤴᤇᤡᤱᤔᤠᤏᤢ᤺ᤸᤗᤧ ᤋᤃᤡᤀᤠᤱᤎᤥᤀᤣ ᤀᤡᤱᤃᤠ᤹ ᤘᤠ᤹ᤀᤠᤖᤥ॥”
JOH 8:59 ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤗᤢᤱ ᤔᤧᤄᤵᤛᤢ. ᤁᤖ ᤕᤧᤛᤢ᤺ᤴ ᤆᤡᤱᤛᤡᤱᤅᤠᤱ ᤔᤠᤱᤜᤡᤶ ᤗᤰᤂᤢᤶᤔᤥᤗᤠᤶ ᤛᤫᤠ᤺ᤳᤋᤠᤱ ᤗ᤺ᤴᤍᤧ ᤐᤣᤖᤥ॥
JOH 9:1 ᤕᤧᤛᤢ᤺ᤴ ᤗᤠᤱᤄᤣᤃᤧᤖ ᤘᤕᤧᤸᤗᤧ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣᤒᤠ ᤔᤡᤰᤑ᤺ᤶᤒᤠ ᤔᤏᤠᤎᤡᤰ ᤏᤡ᤺ᤛᤢ॥
JOH 9:2 ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤌᤣᤀᤠᤱ ᤁᤴ ᤛᤠᤘᤠ᤺ᤴᤇᤡᤱᤅᤡᤸᤗᤧᤛᤠ ᤔᤡᤰᤑ᤺ᤶᤒᤠ ᤐᤥ᤺ᤰᤂᤧᤒᤠᤒᤣ᥅ ᤁᤴ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤗᤠᤕᤥ᤺ᤸᤗᤧ ᤆᤥᤃᤢᤸᤗᤧᤒᤡ. ᤀᤡ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧᤒᤡ᥅”
JOH 9:3 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ “ᤁᤱᤃ ᤀᤠᤒᤠᤅᤣ ᤁᤢᤗᤠᤕᤥ᤺ᤴ ᤏᤢ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧᤀᤠᤱ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴ ᤂᤢᤏᤧ᤹ᤀᤥ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
JOH 9:4 ᤗᤧᤴᤍᤡᤰᤛᤠ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤀᤠᤏᤡ᤹ ᤆᤥ᤺ᤰᤔᤠ ᤐᤥ᤺ᤱᤗᤥ॥ ᤛᤧᤴᤍᤡᤰ ᤐᤥ᤺ᤱᤅᤠᤱᤃ ᤜᤠ᤺ᤳᤋᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ॥
JOH 9:5 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤠ᤹ᤀᤠᤖ ᤌᤠᤖᤡᤰ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤥ᤺ᤳᤋᤡᤀᤠᤖᤥ॥”
JOH 9:6 ᤀᤰᤂᤣ ᤐᤠ᤺ᤳᤋᤢᤖ ᤂᤢᤏᤧ᤹ ᤂᤠᤶᤔᤥ ᤌᤩᤠ᤺ᤳ ᤌᤥ᤺ᤰᤋᤢ ᤜᤧᤰᤁᤩᤠᤱ ᤂᤠᤶᤔᤡᤴ ᤁᤢᤎᤩᤠ᤺ᤳᤋᤥ ᤛ᤹ᤖᤢᤀᤠᤱ ᤂᤧᤴ ᤔᤡᤰᤑ᤺ᤶᤒᤠᤸᤗᤧ ᤁᤢᤔᤡᤰᤁᤥ ᤑᤳᤇᤢᤖᤥ॥
JOH 9:7 ᤜᤧᤰᤁᤩᤠᤱ ᤂᤧᤴ ᤔᤡᤰᤑ᤺ᤶᤒᤠᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤛᤡᤗᤥᤀᤠᤔ ᤘᤠᤒᤠᤰᤁᤥ ᤁᤧᤔᤡᤰᤁᤡᤴ ᤘᤠᤜᤵᤋᤧ᤹ᤀᤥ” (ᤜᤡᤒᤪᤢ ᤐᤠ᤺ᤴᤏᤥ ᤛᤡᤗᤥᤀᤠᤔ ᤑᤠ᤹ᤀᤡᤱᤃ “ᤐᤠᤱᤔᤏᤠᤒᤠ” ᤐᤥ᤺ᤱᤗᤥ)॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴ ᤐᤣᤀᤠᤱ ᤁᤢᤔᤡᤰᤁᤡᤴ ᤘᤠᤜᤵᤋᤢ ᤜᤧᤰᤁᤩᤠᤱ ᤂᤠᤃᤧᤏᤡ᤺ᤒᤠ ᤐᤥ᤺ᤰᤂᤧᤀᤠᤱ ᤁᤢᤜᤡᤶᤔᤥ ᤐᤣᤖᤥ॥
JOH 9:8 ᤂᤧᤸᤗᤧ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ ᤏᤢ ᤂᤧᤸᤗᤧ ᤆᤠᤏᤠ᤺ᤰᤋᤢᤒᤠ ᤁᤧᤏᤡ᤺ᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤶᤒᤧ᥄ ᤁᤴ ᤒᤠ ᤂᤧᤴ ᤆᤠ ᤁᤧᤏᤠ᤺ᤰᤐᤠᤖ ᤁᤧᤕᤢᤱᤒᤠᤴ ᤔᤧ᤺ᤶᤒᤡ᥅”
JOH 9:9 ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤀᤥᤒᤧ॥” ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤴ. ᤁᤱᤃ ᤂᤧᤴ ᤜᤧᤰᤁᤣᤖᤰ ᤏᤡᤎᤠ᤺ᤵᤐᤧ॥” ᤁᤖ ᤂᤧᤴ ᤔᤏᤠ᤺ᤸᤗᤧ “ᤂᤧᤴ ᤔᤏᤠ᤺ᤴ ᤒᤠ ᤀᤡᤱᤃᤠ᤹ᤀᤣᤖᤥ” ᤔᤧᤳᤋᤢᤛᤡ॥
JOH 9:10 ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤧᤒᤣ᥅”
JOH 9:11 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤕᤧᤛᤢ ᤔᤧᤔᤧᤳᤋᤢᤒᤠ ᤔᤏᤠ᤺ᤸᤗᤧ ᤀᤠᤔᤡᤰᤁᤥ ᤂᤠᤶᤗᤧᤰᤘᤠ᤺ᤴ ᤑᤳᤇᤠᤱ ᤐᤡᤖᤠᤱ ᤜᤧᤰᤁᤩᤠᤱ ‘ᤛᤡᤗᤥᤀᤠᤔ ᤘᤠᤒᤠᤰᤁᤥ ᤐᤣᤃᤧ᤹ᤀᤠᤱ ᤁᤧᤔᤡᤰᤁᤡᤴ ᤘᤠᤜᤵᤋᤧ᤹’ ᤔᤧᤳᤋᤠᤱ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤀᤠᤱ ᤐᤣᤃᤠᤱᤅᤠᤱ ᤂᤧᤴ ᤀᤠᤔᤡᤰᤁᤥ ᤑᤳᤇᤠᤱ ᤐᤡᤖᤠᤱᤒᤠ ᤂᤠᤶᤗᤧᤰᤘᤠ᤺ᤴ ᤘᤠᤜᤵᤋᤢᤱᤅᤡᤸᤗᤧ ᤏᤡ᤺ᤔᤠ ᤛᤢᤰᤋᤢᤱᤗᤥ॥”
JOH 9:12 ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤂᤧᤴ ᤔᤏᤠ᤺ᤴ ᤀᤠᤳᤋᤥ ᤘᤠ᤹᥅” ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ”॥
JOH 9:13 ᤜᤧᤰᤁᤣ᤺ᤸᤗᤧ ᤔᤏᤠᤜᤠ᤹ᤖᤧ ᤂᤧᤴ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤱᤒᤠ ᤔᤡᤰᤑ᤺ᤶᤒᤠᤴ ᤑᤖᤡᤛᤡᤜᤠ᤹ᤖᤥ ᤔᤧᤍᤣ᤹ᤖᤢᤖᤥ॥
JOH 9:14 ᤀᤠᤸᤗ ᤕᤧᤛᤢᤖᤧ ᤛ᤹ᤖᤢᤒᤠ ᤂᤠᤶᤔᤡᤸᤗᤧ ᤂᤧᤴ ᤔᤡᤰᤑ᤺ᤶᤒᤠᤴ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤒᤠ ᤕᤧᤴᤏᤡᤱᤃ ᤏᤠ᤺ᤶᤛᤡᤱ ᤕᤧᤴ ᤘᤕᤧᤖᤥ॥
JOH 9:15 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴ ᤀᤠᤰᤂᤣᤗ᤹ᤖᤡᤰ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤧᤒᤣ ᤑᤠ᤹ᤀᤠᤱ ᤑᤖᤡᤛᤡᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ॥ ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤂᤠᤶᤗᤧᤰᤘᤠ᤺ᤴ ᤀᤠᤔᤡᤰᤁᤥ ᤑᤳᤇᤢ ᤐᤡᤖᤠᤱ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤂᤠᤶᤗᤧᤰᤘᤠ᤺ᤴ ᤘᤠᤜᤵᤋᤢᤱᤅᤡᤸᤗᤧ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤠᤱᤗᤥ॥”
JOH 9:16 ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤕᤧᤛᤢ ᤔᤧᤵᤔᤏᤠᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰ॥” ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤜᤧᤰᤁᤣ᤺ᤸᤗᤧ ᤗᤠᤕᤥᤒᤠ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤒᤣ᥅” ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥
JOH 9:17 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤀᤠᤸᤗᤛᤠᤱ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤕᤧᤛᤢᤖᤧ ᤂᤧᤏᤧ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤂᤢᤏᤧ᤹ᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤖᤥ॥”
JOH 9:18 ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤀᤠᤸᤗᤛᤠᤱ ᤂᤧᤴ ᤔᤡᤰᤑ᤺ᤶᤒᤠᤴ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤔᤡᤰᤑ᤺ᤶᤒᤠ ᤘᤕᤧ ᤑᤠ᤹ᤀᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤁᤢᤶᤔᤠ ᤁᤢᤶᤒᤠᤛᤡ ᤔᤧᤀᤢ᤺ᤳᤋᤢᤛᤡᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ.
JOH 9:19 “ᤁᤴ ᤔᤡᤰᤑ᤺ᤶᤒᤠᤴ ᤂᤡᤴᤇᤡ᤹ ᤛᤠ᤺ᤒᤡ᥅ ᤜᤧᤰᤁᤩᤠᤱ ᤁᤴ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤔᤡᤰᤑ᤺ᤶᤒᤠ ᤘᤕᤧᤒᤡ᥅ ᤁᤴ ᤀᤠᤰᤂᤣᤗ᤹ᤖᤡᤰ ᤀᤠᤸᤗᤥ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤒᤣ᥅”
JOH 9:20 ᤂᤧᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤏᤥᤃᤵ ᤐᤡᤖᤧᤳᤇᤢᤛᤡ. “ᤁᤴ ᤛᤧᤰᤂᤠᤀᤣ ᤀᤠᤴᤇᤡᤃᤧ ᤛᤠ᤺ᤖᤥ ᤜᤧᤰᤁᤩᤠᤱ ᤁᤴ ᤛᤠᤘᤠ᤺ᤴᤇᤡᤱᤅᤡᤸᤗᤧᤛᤠᤀᤣ ᤔᤡᤰᤑ᤺ᤶᤒᤠ ᤘᤕᤧᤖᤥ॥
JOH 9:21 ᤁᤖ ᤂᤢᤏᤧ᤹ ᤀᤠᤰᤂᤣᤗ᤹ᤖᤡᤰ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ. ᤜᤠ᤺ᤳᤗᤧ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤐᤡᤖᤢ. ᤀᤠᤴᤇᤡᤃᤧ ᤌᤣᤀᤠᤱ ᤔᤧᤏᤡ᤺ᤛᤢᤃᤧᤴᤗᤥ॥ ᤂᤧᤴ ᤌᤠᤱᤒᤧᤴ ᤁᤧᤖᤧᤀᤠᤱ ᤘᤠ᤹. ᤀᤠᤒᤠᤅᤣ ᤐᤠ᤺ᤵᤔᤠ ᤛᤢᤰᤋᤢ᤹ᤖᤥ॥ ᤂᤢᤏᤧ᤹ᤀᤣ ᤛᤣ᤺ᤴᤗᤠᤵᤋᤧᤶᤔᤧ᤹ᤀᤥ॥”
JOH 9:22 ᤂᤧᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤌᤣᤀᤠᤱ ᤜᤧᤰᤁᤣ ᤐᤠ᤺ᤳᤋᤧᤳᤇᤢᤓᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤏᤢ ᤂᤢᤴᤇᤡ᤹ ᤁᤡ᤺ᤛᤧᤳᤇᤡᤀᤠᤱ ᤘᤕᤧᤳᤇᤡᤖᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤀᤠᤳᤋᤡᤸᤗᤧ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤢ᤹ ᤂᤧᤴ ᤔᤏᤠ᤺ᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗ᤺ᤵᤔᤠᤍᤣ᤺ᤔᤠ ᤐᤥ᤺ᤱ ᤑᤠ᤹ᤀᤠᤱ ᤔᤢᤖᤠ ᤔᤧᤍᤱᤄᤢᤀᤠᤱ ᤔᤧᤘᤕᤧᤖᤥ॥
JOH 9:23 ᤂᤧᤸᤗᤧ ᤆᤥᤃᤢᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤂᤧᤴ ᤌᤠᤱᤒᤧᤴ ᤁᤧᤖᤧᤀᤠᤱ ᤘᤠ᤹. ᤂᤢᤏᤧ᤹ᤀᤣ ᤛᤣ᤺ᤴᤗᤠᤵᤋᤧᤶᤔᤧ᤹ᤀᤥ ᤑᤠ᤹ᤀᤠᤱ ᤐᤠ᤺ᤳᤋᤧᤳᤇᤢᤒᤠᤖᤥ॥
JOH 9:24 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤱᤒᤠ ᤔᤡᤰᤑ᤺ᤶᤒᤠᤴ ᤕᤠᤶᤔᤥ ᤔᤧᤀᤢ᤺ᤳᤋᤢᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠ ᤐᤠ᤺ᤴ ᤐᤠ᤺ᤳᤋᤠ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤜᤧᤰᤛᤡᤱᤅᤧ᤹ᤀᤥ॥ ᤂᤧᤴ ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤱᤃ ᤛᤧᤰᤂᤠᤛᤠᤱ ᤗᤠᤕᤥᤒᤠᤀᤣᤖᤥ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡ᤺ᤛᤢᤶᤒᤧᤖᤥ॥”
JOH 9:25 ᤂᤧᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤢᤏᤧ᤹ᤃ ᤗᤠᤕᤥᤒᤠᤒᤡ ᤔᤧ᤺ᤶᤒᤡ ᤀᤡᤱᤃᤠ᤹ ᤌᤣᤀᤠᤱ ᤔᤧᤏᤡᤀᤠᤴᤗᤥ. ᤁᤖ ᤀᤡᤱᤃᤠ᤹ ᤗᤳᤌᤡᤰ ᤐᤠ᤺ᤴ ᤏᤡ᤺ᤛᤢᤱ॥ ᤀᤡᤱᤃᤠ᤹ ᤔᤡᤰᤑ᤺ᤶᤒᤠ ᤘᤕᤠᤱ. ᤁᤖ ᤀᤠᤸᤗᤥ ᤂᤠᤏᤡ᤺ᤔᤠ ᤛᤢᤰᤋᤢᤱᤗᤥ᥄”
JOH 9:26 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. “ᤂᤧᤸᤗᤧ ᤂᤧᤏᤧ᤹ ᤌᤣ ᤁᤧᤈᤥᤃᤧᤀᤠᤱ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤧᤒᤣ᥅”
JOH 9:27 ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤀᤠᤴᤍᤧ᤺ᤴᤇᤠ ᤔᤧᤳᤏᤡᤱᤒᤠ ᤁᤖ ᤂᤡᤏᤡ᤹ ᤁᤧᤱᤄᤧᤵᤛᤢᤶᤔᤡᤴ॥ ᤌᤣᤀᤠᤱ ᤕᤠᤶᤔᤥ ᤂᤧᤶᤔᤠ ᤁᤧᤃᤥ᤺ᤳᤋᤢᤶᤒᤠᤒᤣ᥅ ᤂᤡᤏᤡ᤹ᤀᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤒᤡ᥅”
JOH 9:28 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤏᤠ ᤔᤧᤎᤠ᤺ᤛᤢᤖ ᤔᤧᤔᤧᤳᤋᤢ. “ᤂᤧᤏᤧ᤹ᤀᤣ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤏᤧᤖᤥ. ᤁᤖ ᤀᤠᤏᤡᤃᤧᤃ ᤔᤥᤛᤠᤖᤧ ᤁᤢᤜᤢ᤹ᤛᤠᤶᤒᤠᤛᤡᤃᤧᤖᤥ॥
JOH 9:29 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤥᤛᤠ᤺ᤴᤏᤢ ᤐᤠᤖᤧᤒᤠ ᤐᤠ᤺ᤴᤏᤥ ᤀᤠᤏᤡᤃᤧ ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤘᤕᤡᤃᤧᤖᤥ. ᤁᤖ ᤁᤴ ᤔᤏᤠ᤺ᤱᤃ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ ᤑᤠ᤹ᤀᤠᤱ ᤀᤠᤏᤡᤃᤧ ᤌᤣᤀᤠᤱ ᤔᤧᤏᤡ᤺ᤛᤢᤶᤒᤧᤴᤗᤥ॥”
JOH 9:30 ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢᤛᤡ. “ᤁᤱᤃ ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤐᤥ᤺ᤰᤂᤧᤖᤥ᥄ ᤂᤢᤏᤧ᤹ ᤀᤠᤳᤋᤥᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤴᤏᤡ᤺ᤛᤢᤶᤔᤡᤴᤗᤥ. ᤁᤖ ᤁᤴ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤂᤠᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤠᤱᤗᤥ॥
JOH 9:31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴ ᤁᤧᤗ᤹ᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶ॥ ᤂᤢᤏᤧ᤹ ᤛᤣᤛᤣ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤗᤰ ᤂᤧᤵᤛᤢ᤹ᤖᤥ॥
JOH 9:32 ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤔᤡᤰᤑ᤺ᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤏᤡ᤺ᤔᤠ ᤁᤧᤛᤢᤰᤐᤠ ᤆᤥᤃᤢᤒᤠᤱᤃ ᤀᤠᤳᤋᤡᤸᤗᤧᤀᤠᤱ ᤔᤧᤱᤄᤧᤶᤔᤣ ᤘᤠ᤹ᤖᤥ॥
JOH 9:33 ᤁᤴ ᤔᤏᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤧ᤺ᤴᤏᤡᤸᤗᤧᤃ ᤀᤰᤋᤱᤒᤠ ᤕᤠ᤺ᤶᤒᤰ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠᤖᤥ॥”
JOH 9:34 ᤂᤧᤱᤜᤠ᤹ᤖᤧ ᤂᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤛᤠᤃᤧᤘᤠ᤺ᤴᤇᤡᤱᤅᤠᤱᤎᤥ ᤗᤠᤕᤥᤀᤥᤀᤣ ᤁᤧᤘᤠ᤹ᤖᤥ᥄ ᤂᤧᤏᤧ᤹ ᤀᤠᤏᤡᤃᤧ ᤜᤢ᤹ᤔᤠ ᤕᤠᤵᤔᤡ ᤁᤧᤃᤥ᤺ᤵᤐᤡ᥅” ᤜᤧᤰᤁᤣ ᤔᤧᤔᤧᤳᤋᤢᤖ ᤂᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤏᤢ ᤗᤠ᤺ᤰᤁᤠᤳ ᤔᤧᤈᤴᤍᤢ ᤔᤧᤗ᤺ᤳᤋᤢᤖᤥ॥
JOH 9:35 ᤕᤧᤛᤢᤖᤧ ᤂᤧᤴ ᤔᤡᤰᤑ᤺ᤶᤒᤠᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤈᤴᤍᤢ ᤔᤧᤗ᤺ᤳᤋᤢ ᤁᤧᤗ᤹ᤒᤠ ᤂᤧᤵᤛᤢ॥ ᤜᤧᤰᤁᤩᤠᤱ ᤂᤧᤴᤏᤡᤴ ᤋᤢᤔᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤔᤧᤴᤇᤠᤶᤛᤠ᤺ᤴ ᤏᤛᤠ᤺ᤴ ᤁᤧᤈᤥᤃᤢ᤹ᤒᤡ᥅”
JOH 9:36 ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤂᤢᤏᤧ᤹ ᤜᤠ᤺ᤳᤏᤡᤒᤣ᥅ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹ᤏᤠ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤀᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤋᤢᤱᤗ॥”
JOH 9:37 ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤏᤡ᤺ᤛᤢᤀᤠᤱᤅᤣ ᤁᤧᤘᤠ᤹ᤖᤥ॥ ᤂᤧᤏᤧ᤹ᤏᤢ ᤁᤧᤒᤠ᤺ᤵᤐᤠᤖ ᤁᤧᤒᤵᤐᤧᤴᤏᤣ ᤂᤢᤏᤧ᤹ᤖᤥ॥”
JOH 9:38 ᤂᤧᤴ ᤔᤏᤠ᤺ᤸᤗᤧ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤏᤛᤠ᤺ᤴ ᤆᤥ᤺ᤰᤏᤧ᤹ᤖᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢ᤺ᤴ ᤌᤢᤱᤒᤥᤜᤈ᤹ᤀᤠᤱ ᤛᤣᤘᤠ ᤔᤧᤳᤋᤢᤖᤥ॥
JOH 9:39 ᤕᤧᤛᤢᤖᤧ ᤐᤠ᤺ᤳᤋᤢ. “ᤔᤡᤰᤑ᤺ᤶᤒᤠᤜᤠ᤹ ᤏᤡ᤺ᤔᤠ ᤁᤧᤛᤢᤰᤐᤠ ᤔᤧᤒᤥ᤺ᤱᤗ ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡ᤺ᤛᤢᤶᤒᤧ ᤁᤧᤗ᤹ᤒᤠ ᤔᤏᤠᤜᤠ᤹ ᤔᤡᤰᤑ᤺ᤶᤒᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤡᤰᤛᤠ ᤂᤠᤶᤒᤣ᤺ᤰᤔᤥ ᤂᤠᤛᤧᤴ ᤆᤥ᤺ᤰᤛᤧ ᤀᤡᤱᤃᤠ᤹ ᤋᤩᤠᤱᤒᤠᤖᤥ॥”
JOH 9:40 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤏᤡᤃᤧᤀᤠᤱ ᤔᤡᤰᤑ᤺ᤶᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤵᤐᤠᤒᤡ᥅”
JOH 9:41 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤔᤡᤰᤑ᤺ᤶᤒᤠ ᤁᤧᤈᤥᤃᤡᤸᤗᤧᤃ ᤂᤡᤏᤡ᤹ᤏᤢ ᤗᤠᤕᤥ᤺ᤴ ᤜᤥ᤺ᤵᤋᤧᤒᤠᤖᤥ. ᤁᤖ ᤀᤠᤏᤡᤃᤧ ᤏᤡ᤺ᤛᤢᤶᤒᤧ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤗᤠᤕᤥᤀᤥᤀᤣ ᤁᤧᤘᤕᤡ᤹ᤖᤥ॥”
JOH 10:1 ᤕᤧᤛᤢᤖᤧ ᤐᤠ᤺ᤳᤋᤢ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤴ ᤔᤏᤠ᤺ᤴ ᤗᤠᤶᤎᤣ᤺ᤵᤐᤥᤗᤠᤶ ᤔᤧᤸᤗᤢᤰᤂᤖᤀᤥ ᤔᤧᤗᤠ᤺ᤳᤏᤧᤴ ᤁᤖ ᤘᤣ᤹ ᤗᤧᤵᤔᤠᤱᤏᤢ ᤗᤠ᤺ᤳ ᤂᤧᤱᤃ ᤂᤢ᤺ᤴᤍᤪᤡᤰᤐᤠ ᤏᤢ ᤑᤠ᤺ᤴᤍᤠᤖᤥ॥
JOH 10:2 ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤁᤶᤒᤠᤱᤃ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤳᤗᤥ॥
JOH 10:3 ᤗᤠᤶᤎᤣ᤺ᤵ ᤁᤧᤃᤥ᤺ᤒᤠᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤗᤠᤶᤎᤣ᤺ᤵᤐᤧᤴ ᤜᤴᤍᤢ ᤐᤡᤖᤢ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤧᤸᤗᤢᤰᤜᤠ᤹ ᤂᤢᤏᤡ᤹ ᤔᤡᤱᤅᤥᤏᤢ ᤀᤢ᤺ᤳᤋᤢᤛᤡᤀᤠᤱ ᤗᤠ᤺ᤰᤁᤠᤳ ᤗᤠᤶᤗᤥᤛᤢᤛᤡ᤹ᤀᤠᤱ ᤋᤣ᤹ᤖᤢᤛᤡᤖᤥ॥
JOH 10:4 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤢᤔᤧᤸᤗᤢᤰᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡ᤹ᤀᤠᤱ ᤋᤃᤡ ᤋᤃᤡ ᤗᤠᤱᤄᤣ᤺ᤰᤗ ᤗᤠᤶᤗᤥᤛᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤸᤗᤢᤰᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥
JOH 10:5 ᤁᤖ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠᤱᤃ ᤂᤧᤱᤜᤠ᤹ᤖᤧ ᤔᤧᤴᤍᤡᤶᤍᤢᤴ. ᤁᤖ ᤔᤧᤗᤥ᤺ᤰ ᤔᤧᤒᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤀᤡᤰᤗᤠ᤺ᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥”
JOH 10:6 ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤴ ᤐᤠ᤺ᤴᤏᤡᤴ ᤂᤧᤍᤠ᤹ᤀᤥ ᤔᤧᤳᤋᤢᤛᤡᤀᤠᤱ ᤘᤕᤧ. ᤁᤖ ᤕᤧᤛᤢᤖᤧ ᤌᤣ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
JOH 10:7 ᤂᤧᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤗᤥ. ᤀᤡᤱᤃᤠ᤹ᤀᤣ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤗᤠᤶᤎᤣ᤺ᤵᤐᤠᤀᤠᤖᤥ॥
JOH 10:8 ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤁᤧᤍᤠ᤺ᤒᤠᤜᤠ᤹ ᤁᤧᤖᤧᤰ ᤂᤢ᤺ᤴᤍᤪᤡᤰᤐᤠ ᤏᤢ ᤑᤠ᤺ᤴᤍᤠᤛᤡᤖᤥ. ᤁᤖ ᤔᤧᤸᤗᤢᤰᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴ ᤔᤧᤱᤄᤧᤵᤛᤢᤴᤗᤥ॥
JOH 10:9 ᤀᤡᤱᤃᤠ᤹ᤀᤣ ᤗᤠᤶᤎᤣ᤺ᤵᤐᤠᤀᤠᤖᤥ. ᤀᤡᤱᤃᤠ᤹ᤗᤠᤶ ᤛᤡᤃᤠᤱ ᤁᤧᤗᤠ᤺ᤵᤐᤠᤜᤠ᤹ ᤋᤠᤱᤔᤧᤛᤧ᤺ᤵᤗᤥ॥ ᤂᤧᤴ ᤛᤡᤃᤠᤱ ᤗᤠ᤺ᤵᤔᤠ ᤏᤢ ᤗᤠ᤺ᤰᤁᤠᤳ ᤐᤣ᤺ᤰᤔᤠ ᤛᤢᤰᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤆᤠᤖᤠᤶᤍᤧᤴ ᤂᤥ᤺ᤛᤢ᤹ᤖᤥ॥
JOH 10:10 ᤂᤢ᤺ᤴᤍᤪᤡᤰᤐᤠᤱᤃ ᤂᤢ᤺ᤳᤇᤧ. ᤛᤧᤳᤇᤧ ᤏᤢ ᤔᤧᤱᤛᤧᤖᤰ ᤋᤠ᤺ᤖᤥ. ᤁᤖ ᤀᤡᤱᤃᤠ᤹ᤃ ᤔᤏᤠᤜᤠ᤹ᤖᤧ ᤛᤧᤰᤂᤠᤒᤠ ᤜᤡᤱᤔᤴᤏᤡᤴ ᤔᤧᤄᤥ᤺ᤛᤢᤖ. ᤜᤧᤰᤁᤩᤠᤱ ᤂᤧᤴᤏᤠᤱ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤋᤩᤠᤱᤒᤠᤖᤥ॥
JOH 10:11 ᤀᤡᤱᤃᤠ᤹ ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠᤀᤠᤖᤥ॥ ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠᤱᤃ ᤁᤢᤔᤧᤸᤗᤢᤰᤜᤠ᤹ᤖᤧᤗᤠᤃᤡ ᤛᤡ᤺ᤔᤠᤀᤣ ᤐᤥ᤺ᤱᤛᤠᤱ ᤔᤧᤃᤡᤏᤧᤴᤗᤥ॥
JOH 10:12 ᤁᤖ ᤕᤠᤱᤅᤥ ᤕᤠ᤺ᤗᤡᤰ ᤛᤠᤱᤔᤏᤠᤒᤠ ᤔᤏᤠ᤺ᤱᤃ ᤛᤧᤰᤂᤠᤒᤠ ᤔᤧᤸᤗᤢᤰᤁᤶᤒᤠ ᤏᤢ ᤔᤧᤸᤗᤢᤰᤍᤠᤱᤒᤠ ᤔᤧ᤺ᤴᤗᤥ॥ ᤂᤧᤸᤗᤧ ᤐᤖᤠᤒᤠᤴ ᤑᤧᤴᤗ ᤐᤵᤐᤠ ᤏᤡ᤺ᤛᤢᤸᤗᤧ ᤔᤧᤸᤗᤢᤰᤜᤠ᤹ ᤗᤧᤖᤢᤎᤛᤡᤀᤠᤱ ᤂᤧᤳᤇᤡᤱ ᤐᤣ᤺ᤰᤗᤥ ᤜᤧᤰᤁᤩᤠᤱ ᤐᤖᤠᤒᤠᤴ ᤋᤠᤀᤠᤱ ᤔᤧᤸᤗᤢᤰᤜᤠ᤹ ᤑᤳᤋᤢᤛᤡ᤹ᤀᤠᤱ ᤛᤧ᤺ᤛᤢᤍᤣ᤺ᤛᤢᤛᤡ᤹ᤖᤥ॥
JOH 10:13 ᤂᤧᤴ ᤔᤏᤠ᤺ᤴ ᤕᤠᤱᤅᤥ ᤕᤠ᤺ᤗᤡᤰ ᤛᤠᤱᤔᤏᤠᤒᤠᤀᤠᤱᤗᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤔᤧᤸᤗᤢᤰᤜᤠ᤹ ᤏᤢ᤺ᤖᤡᤰᤁᤠᤱ ᤀᤥᤔᤧᤔᤧᤳᤋᤢᤴᤇᤡᤴ ᤁᤖ ᤗᤧᤖᤢᤎᤛᤡᤀᤠᤱ ᤂᤧᤳᤇᤡᤱ ᤐᤣ᤺ᤰᤗᤥ॥
JOH 10:14 ᤀᤡᤱᤃᤠ᤹ ᤁᤧᤏᤢ᤹ᤒᤠ ᤔᤧᤸᤗᤢᤰᤁᤶᤒᤠᤀᤠᤖᤥ॥ ᤀᤡᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤛᤡᤱ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤛᤡᤱ ᤏᤡ᤺ᤳᤋᤠᤒᤠ ᤜᤧᤰᤁᤣᤀᤣ ᤀᤠᤔᤧᤸᤗᤢᤰᤜᤠ᤹ᤖᤧ ᤀᤡᤱᤃᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ–ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤱ. ᤜᤧᤰᤁᤩᤠᤱ ᤀᤠᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤛᤡ᤺ᤔᤠᤀᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥
JOH 10:16 ᤀᤡᤱᤃᤠ᤹ ᤘᤣ᤹ ᤔᤧᤸᤗᤢᤰᤜᤠ᤹ᤀᤠᤱ ᤁᤳᤋᤢᤱᤛᤡᤱ॥ ᤂᤧᤱᤜᤠ᤹ᤃ ᤁᤴ ᤗᤢᤵᤐᤥᤒᤠ ᤔᤧ᤺ᤴᤇᤡᤖᤥ ᤁᤖ ᤂᤧᤱᤜᤠ᤹ᤀᤠᤱ ᤀᤡᤱᤃᤠ᤹ ᤗᤳᤇᤠ ᤗᤢᤵᤐᤥ ᤋᤠ᤺ᤵᤔᤠᤛᤡ ᤐᤥ᤺ᤱᤗᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤀᤡᤰᤗᤠ᤺ᤴ ᤔᤧᤄᤧᤵᤛᤢ᤹ᤀᤠᤱ ᤂᤧᤱᤜᤠ᤹ ᤌᤡᤰ ᤗᤢᤵ ᤔᤧᤒᤥ᤺ᤱ ᤜᤧᤰᤁᤩᤠᤱ ᤔᤧᤸᤗᤢᤰᤁᤶᤒᤠᤴᤏᤠᤱ ᤗᤳᤇᤠᤖᤰ ᤐᤥ᤺ᤱᤗᤥ॥
JOH 10:17 ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤕᤠᤶᤔᤥ ᤕᤠᤱᤏᤠ ᤂᤥ᤺ᤔᤠ ᤑᤠ᤹ᤀᤠᤱ ᤁᤴ ᤀᤠᤜᤡᤱᤔᤴᤏᤡᤴ ᤂᤢᤏᤧ᤹ ᤐᤡᤖᤢᤱᤍᤣ᤺ᤛᤢᤱᤗᤥ॥
JOH 10:18 ᤀᤠᤳᤋᤡᤸᤗᤧᤀᤠᤱ ᤏᤧᤳᤋᤡᤃᤧᤴ ᤀᤠᤜᤡᤱᤔᤴᤏᤡᤴ ᤀᤡᤱᤃᤠ᤹ᤀᤥᤗᤠᤶ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ. ᤁᤖ ᤁᤱᤃ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤛᤡᤖᤠ᤹ ᤌᤠᤱᤎᤠᤱ ᤐᤡᤔᤠ ᤛᤢᤰᤋᤢᤱᤗᤥ॥ ᤏᤧᤳᤋᤡᤃᤧᤴ ᤀᤠᤜᤡᤱᤔᤴᤏᤡᤴ ᤀᤠᤒᤠᤅᤣ ᤐᤡᤔᤠ ᤏᤢ ᤕᤠᤶᤔᤥ ᤕᤠᤱᤏᤠ ᤂᤥ᤺ᤔᤠ ᤕᤢᤰ ᤁᤳᤋᤢᤱᤗᤥ॥ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤰᤂᤣ ᤆᤥ᤺ᤰᤔᤠ ᤀᤡᤱᤈᤠ᤺ᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥”
JOH 10:19 ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤕᤜᤢᤍᤡᤜᤠ᤹ ᤕᤠᤶᤔᤥᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤅᤧᤴᤏᤠᤱ ᤔᤧᤛᤧᤖᤧᤖᤥ॥
JOH 10:20 ᤕᤖᤡᤰᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤱᤃ ᤛᤧᤰᤂᤠᤛᤠᤱ ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤀᤠᤱ ᤏᤠᤰᤂᤧ ᤐᤣᤀᤠᤱ ᤘᤠ᤹ᤖᤥ᥄ ᤀᤰᤋᤱᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤴ ᤌᤣᤀᤠᤱ ᤂᤧᤶᤔᤠᤒᤣ᥅”
JOH 10:21 ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤒᤠ ᤔᤏᤠ᤺ᤴ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤏᤧᤴᤗᤥ॥ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠᤸᤗᤧ ᤔᤡᤰᤑ᤺ᤶᤒᤠᤸᤗᤧ ᤁᤢᤔᤡᤰᤁᤡᤴ ᤜᤶᤔᤠ ᤛᤢᤰᤋᤢᤒᤡ᥅”
JOH 10:22 ᤜᤧᤰᤁᤩᤠᤱ ᤕᤖᤢᤛᤗᤧᤶᤔᤥ ᤔᤠᤱᤜᤡᤶ ᤋᤥ᤺ᤶᤔᤠ ᤋᤱᤏᤠᤶᤖᤧᤴ ᤕᤧᤶ ᤘᤕᤧ. ᤁᤱᤃ ᤆᤢᤱᤘᤠ᤺ᤶᤔᤠ ᤗᤠᤀᤥ ᤘᤕᤧᤖᤥ॥
JOH 10:23 ᤜᤧᤰᤁᤩᤠᤱ ᤂᤧᤵᤔᤥ ᤕᤧᤛᤢ᤺ᤴ ᤔᤠᤱᤜᤡᤶ ᤗᤰᤂᤢᤶ ᤂᤡᤖᤡ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥ ᤔᤧᤵᤔᤏᤠᤒᤠ ᤋᤧᤴᤏᤥ ᤗᤠᤱᤄᤣ᤺ᤰᤁᤡ ᤘᤕᤧᤖᤥ॥
JOH 10:24 ᤂᤢᤏᤧ᤹ ᤁᤢᤄᤡᤖᤡ ᤕᤜᤢᤍᤡᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤀᤠᤵᤑᤠᤸᤗᤧ ᤌᤠᤖᤡᤰ ᤐᤡᤷᤒᤣ᤺ᤶᤒᤥ ᤕᤠᤵᤔᤡ ᤁᤧᤃᤵᤐᤠᤒᤣ᥅ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ ᤁᤢᤍᤥ᤺ᤵᤔᤠᤱ ᤐᤠ᤺ᤳᤋᤧ᤹ᤀᤥ᥄”
JOH 10:25 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤃ ᤋᤃᤡᤛᤠ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤁᤖ ᤂᤡᤏᤡ᤹ᤃ ᤏᤛᤠ᤺ᤴ ᤀᤠᤃᤧᤴᤈᤥᤃᤡᤴᤗᤥ॥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤕᤢᤰᤁᤥᤗᤠᤶ ᤆᤥᤃᤢᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤖᤧᤀᤣ ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤃᤧᤎᤠᤰᤋᤡ᤹.
JOH 10:26 ᤁᤖ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤗᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤔᤧᤸᤗᤢᤰ ᤔᤧ᤺ᤴᤏᤡᤱᤗᤥ॥
JOH 10:27 ᤀᤡᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ᤖᤧᤃ ᤀᤠᤀᤡᤰᤗᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧᤃ ᤀᤡᤱᤃᤠ᤹ ᤔᤧᤍᤡᤶᤔᤠᤖᤥ॥
JOH 10:28 ᤂᤧᤱᤜᤠ᤹ ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤏᤧᤴ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ ᤀᤠᤜᤢᤰᤁᤥᤗᤠᤶ ᤏᤠᤵᤔᤠ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ.
JOH 10:29 ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤱᤜᤠ᤹ ᤀᤡᤱᤃᤠ᤹ ᤐᤡᤖᤠᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤆᤥ᤺ᤰᤗᤥ॥ ᤂᤧᤱᤜᤠ᤹ ᤀᤠᤶᤒᤠᤖᤧ ᤁᤢᤜᤢᤰᤁᤥᤗᤠᤶ ᤀᤠᤳᤋᤡᤸᤗᤧᤀᤠᤱ ᤏᤠᤵᤔᤠ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ॥
JOH 10:30 ᤐᤠᤏᤢᤍᤡᤱ ᤀᤠᤶᤒᤠ ᤏᤢ ᤀᤡᤱᤃᤠ᤹ ᤗᤳᤇᤠᤛᤡᤃᤧᤖᤥ॥”
JOH 10:31 ᤜᤧᤰᤁᤣ᤺ᤸᤗᤧ ᤕᤠᤶᤔᤥ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤗᤧᤵᤔᤠ ᤛᤧᤵᤔᤠ ᤑᤠ᤹ᤀᤠᤱ ᤗᤢᤱᤅᤡᤴ ᤔᤧᤄᤵᤛᤢ.
JOH 10:32 ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤐᤠᤏᤢᤍᤡᤱ ᤀᤠᤶᤒᤠᤗᤠᤶ ᤕᤖᤡᤰ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤐᤡᤏᤡᤱ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤀᤥ ᤀᤠᤳᤋᤡᤴ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤗᤢᤱᤅᤡᤸᤗᤧ ᤗᤧᤵᤔᤠ ᤀᤠᤃᤧᤃᤥ᤺ᤳᤋᤡᤒᤠᤒᤣ᥅”
JOH 10:33 ᤕᤜᤢᤍᤡᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧᤃ ᤔᤧ᤺ᤴᤗᤥ. ᤁᤖ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤁᤧᤒᤠᤖᤧᤒᤠᤸᤗᤧ ᤆᤥᤃᤢᤸᤗᤧ ᤗᤢᤱᤅᤡᤸᤗᤧ ᤗᤧᤵᤔᤠ ᤁᤥ᤺ᤳᤋᤠᤛᤡᤃᤧᤒᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤔᤧᤴᤇᤠᤶ ᤕᤠᤵᤔᤡᤏᤧᤖᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤀᤠ ᤗ᤹ᤖᤡᤰ ᤁᤧᤒᤠ᤺ᤳᤋᤢ᤹ᤖᤥ॥”
JOH 10:34 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤀᤠᤒᤠᤅᤣ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤡᤏᤡ᤹ ᤔᤠᤱᤏᤡᤱᤗᤥ ᤗ᤹ᤖᤡᤰ ᤔᤧᤳᤋᤢᤛᤡᤒᤠ ᤛᤠᤵᤋᤧᤀᤠᤱ ᤐᤳᤗᤥ॥
JOH 10:35 ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠ᤺ᤴ ᤗᤧᤱᤔᤠ ᤛᤢᤰᤔᤧᤍᤧᤳᤏᤧᤴᤒᤠᤴ ᤁᤧᤏᤡ᤺ᤛᤢᤶᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ ᤐᤠ᤺ᤴᤈᤠᤰ ᤐᤡᤖᤢᤛᤡ ᤂᤧᤱᤜᤠ᤹ ᤂᤡᤏᤡ᤹ ᤔᤠᤱᤏᤡᤱᤗᤥ ᤗ᤹ᤖᤡᤰ ᤔᤧᤳᤋᤢᤛᤡᤖᤥ॥
JOH 10:36 ᤜᤧᤰᤁᤣ᤺ᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤛᤣᤛᤣ ᤆᤥᤃᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢᤒᤠ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤛᤠ᤺ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤁᤧᤒᤠ᤺ᤳᤋᤢ ᤑᤠ᤹ᤀᤠᤱ ᤕᤠᤵᤔᤡ ᤁᤧᤎᤡᤰᤋᤡᤒᤠᤒᤣ᥅
JOH 10:37 ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤆᤥ᤺ᤰ ᤐᤠᤱᤅᤠᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥ᤺ᤰᤁᤠᤴᤏᤧ ᤑᤠ᤹ᤃᤪ ᤕᤠᤵᤔᤡ ᤏᤛᤠ᤺ᤴ ᤀᤠᤴᤈᤥᤃᤧᤶᤔᤡᤴᤏᤧ᤹ᤀᤥ॥
JOH 10:38 ᤁᤖ ᤀᤡᤱᤃᤠ᤹ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴᤇᤠᤱ ᤁᤴ ᤆᤥᤃᤢᤱᤒᤠ ᤕᤠ᤺ᤶᤒᤰᤜᤠ᤹ᤀᤥᤃ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤐᤠᤏᤢᤍᤡᤱ ᤐᤠ᤺ᤴ ᤀᤡᤱᤃᤠ᤹ᤀᤥ ᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤧ᤹ᤀᤥ ᤘᤠ᤹ᤀᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥”
JOH 10:39 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤋᤧᤶᤔᤠ ᤔᤧᤃᤥ᤺ᤳᤋᤢ ᤁᤖ ᤂᤢᤏᤧ᤹ ᤑᤡ᤺ᤴᤇᤡᤱ ᤐᤣᤖᤥ॥
JOH 10:40 ᤜᤧᤰᤁᤩᤠᤱ ᤕᤧᤛᤢ᤺ᤴ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡ ᤋᤃᤡ ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤒᤠ ᤋᤧᤴᤏᤥ ᤐᤣ॥ ᤂᤢᤏᤧ᤹ ᤂᤧᤵᤔᤥᤀᤣ ᤕᤠ᤺ᤰᤋᤧᤸᤗᤧ
JOH 10:41 ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤖᤥ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤢᤜᤢᤴᤏᤠᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤇᤠᤱ ᤁᤴ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤧᤰᤂᤠᤀᤣᤖᤥ॥”
JOH 10:42 ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 11:1 ᤀᤠᤸᤗ ᤒᤧᤌᤠᤏᤡ ᤐᤠᤱᤓᤣ᤹ᤀᤥ ᤗᤠᤈᤖᤛ ᤔᤧᤵᤔᤏᤠᤒᤠ ᤗᤳᤇᤠ ᤔᤏᤠ᤺ᤴ ᤛᤠ᤹ᤖᤡᤰ ᤋᤢᤃᤧᤀᤠᤱ ᤏᤧᤛ᤻ᤛᤧ॥ ᤂᤧᤸᤗᤧ ᤁᤢᤴᤈᤣᤗᤡᤔᤠᤜᤠ᤹ ᤔᤖᤡᤕᤔ ᤏᤢ ᤔᤠᤷᤌᤠ ᤔᤧᤵᤔᤏᤠᤔᤠ ᤘᤕᤧᤳᤇᤡᤖᤥ॥
JOH 11:2 ᤒᤠ ᤁᤴ ᤔᤖᤡᤕᤶᤔᤡᤸᤗᤧ ᤋᤠ᤺ᤴᤍᤡ ᤍᤠᤱᤒᤠᤸᤗᤧ ᤁᤢᤗᤠᤱᤅᤥ ᤑᤢᤱᤏᤠᤶ ᤏᤡ᤺ᤱᤃᤣ᤺ᤴ ᤜᤢᤰᤂᤢᤀᤠᤱ ᤁᤢᤎᤧᤃᤣ᤺ᤰᤁᤡᤸᤗᤧ ᤋᤢᤃᤢᤀᤠᤱ ᤘᤕᤧᤖᤥ॥ ᤂᤧᤸᤗᤧ ᤁᤢᤴᤛᤠ᤹ ᤗᤠᤈᤖᤛᤧᤴ ᤋᤢᤃᤧᤀᤠᤱ ᤏᤧᤛ᤻ᤛᤧᤖᤥ॥
JOH 11:3 ᤂᤧᤴ ᤁᤢᤴᤈᤣᤗᤡᤔᤠᤜᤠ᤹ᤖᤧ ᤕᤧᤛᤢ᤺ᤴ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤧᤳᤇᤢ. “ᤍᤠᤱᤒᤣ. ᤗᤢᤱᤔᤠ᤹ ᤁᤧᤍᤢᤰᤋᤢᤒᤠ ᤁᤧᤴᤈᤢᤶᤔᤡᤴ ᤛᤠ᤹ᤖᤡᤰ ᤋᤢᤰᤁᤠᤱ ᤏᤧᤖᤥ॥”
JOH 11:4 ᤕᤧᤛᤢᤖᤧ ᤁᤴ ᤀᤡᤱᤄᤱᤅᤡᤴ ᤂᤧᤵᤛᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤂᤢᤏᤧ᤹ᤃ ᤁᤴ ᤋᤢᤰᤔᤠᤸᤗᤧ ᤔᤧᤛᤡ᤺ᤏᤧᤴᤗᤥ॥ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤗᤧ ᤗᤠᤃᤡ ᤐᤥ᤺ᤰᤂᤧᤒᤠᤖᤥ॥ ᤁᤴᤗᤠᤶᤒᤠ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤐᤥ᤺ᤱᤗᤥ॥”
JOH 11:5 ᤕᤧᤛᤢᤖᤧ ᤔᤠᤷᤌᤠ. ᤂᤧᤸᤗᤧ ᤁᤢᤴᤛᤠ᤹ ᤔᤖᤡᤕᤔ ᤏᤢ ᤗᤠᤈᤖᤛ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤘᤕᤧᤛᤠᤱ
JOH 11:6 ᤗᤠᤈᤖᤛᤧᤴ ᤋᤢᤰᤁᤠᤱ ᤏᤧ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤂᤧᤵᤛᤢᤀᤠᤱᤛᤠᤱ ᤂᤢᤏᤧ᤹ ᤏᤡᤕᤧᤴ ᤌᤠᤖᤡᤰ ᤘᤕᤧᤒᤠ ᤋᤧᤴᤏᤥᤀᤣ ᤕᤠ᤺ᤰᤋᤧᤖᤥ॥
JOH 11:7 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤠᤏᤡ᤹ ᤕᤠᤶᤔᤥ ᤕᤜᤢᤍᤡᤕᤠ ᤌᤢᤶᤔᤥ ᤏᤢ᤺ᤰᤂᤡ ᤐᤡᤃᤡᤖᤥ॥”
JOH 11:8 ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤳᤌᤥᤃ ᤕᤜᤢᤍᤡᤜᤠ᤹ᤖᤧ ᤁᤢᤓᤠ ᤕᤧᤴ ᤋᤃᤡ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠ ᤁᤧᤶᤃᤥ᤺ᤳᤋᤧᤀᤠᤱ ᤘᤕᤧ. ᤜᤧᤰᤁᤣᤛᤠᤱ ᤂᤧᤏᤧ᤹ ᤕᤠᤶᤔᤥ ᤂᤧᤳᤌᤥᤀᤣ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”
JOH 11:9 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤌᤡᤰ ᤗᤧᤴᤍᤡᤰᤁᤥ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤔᤧᤒᤥ᤺ᤱᤏᤧᤴᤒᤡ᥅ ᤀᤠᤳᤋᤡᤴ ᤔᤏᤠ᤺ᤴ ᤗᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱᤅᤡᤴ ᤔᤧᤍᤥ᤺ᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤂᤠᤀᤥ᤺ᤵᤔᤠᤀᤥ ᤔᤡᤰ ᤏᤡ᤺ᤖᤥ॥
JOH 11:10 ᤁᤖ ᤀᤠᤳᤋᤡᤴ ᤔᤏᤠ᤺ᤴ ᤛᤧᤴᤍᤡᤰ ᤗᤠᤱᤄᤣ᤺ᤰ ᤂᤧᤸᤗᤧ ᤁᤢᤗᤠᤱ ᤋᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤥ ᤂᤧᤸᤗᤧ ᤌᤥ᤹ᤛᤡᤱᤔᤠ ᤀᤥ᤺ᤳᤋᤡ᤺ᤴ ᤔᤧᤃᤳᤋᤢᤴᤗᤥ॥”
JOH 11:11 ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤆᤢᤶ ᤗᤠᤈᤖᤛᤧᤴ ᤔᤢᤖᤢᤰ ᤂᤢᤖᤢᤰ ᤀᤡᤵᤛᤧᤀᤠᤱ ᤏᤧᤖᤥ. ᤁᤖ ᤂᤢᤏᤧ᤹ ᤁᤢᤓᤥ᤺ᤱᤛᤧ ᤐᤣ᤺ᤰᤁᤠᤖᤥ॥”
JOH 11:12 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤢᤏᤧ᤹ ᤀᤡᤵᤛᤧᤀᤠᤱᤗᤰ ᤏᤧᤏᤧ ᤑᤠ᤹ᤃᤪ ᤐᤥ᤺ᤰᤗᤥ॥”
JOH 11:13 ᤕᤧᤛᤢᤖᤧ ᤂᤧᤱᤜᤠ᤹ ᤗᤠᤈᤖᤛᤖᤧ ᤁᤢᤛᤡ᤺ᤔᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤀᤠᤱ ᤘᤕᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤗᤠᤈᤖᤛᤧᤴ ᤀᤡᤵᤛᤧᤀᤠᤱᤗᤰ ᤏᤧ᤹᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥
JOH 11:14 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤢᤍᤥ᤺ᤵᤔᤠᤀᤣ ᤔᤧᤳᤋᤢᤛᤡ. “ᤗᤠᤈᤖᤛᤧᤱᤃ ᤛᤩᤧᤖᤥ.
JOH 11:15 ᤁᤖ ᤀᤠᤸᤗᤛᤠᤱ ᤂᤡᤏᤡ᤹ ᤕᤖᤡᤰ ᤕᤠᤵᤔᤡ ᤏᤛᤠ᤺ᤴ ᤀᤠᤃᤧᤈᤥᤃᤡᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤳᤏᤠ ᤜᤥ᤺ᤵᤋᤠᤱᤒᤠᤴᤏᤣ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤐᤥ᤺ᤰᤂᤧᤖᤥ॥ ᤀᤠᤸᤗ ᤂᤢᤏᤧ᤹ ᤁᤢᤛᤠ᤹ᤛᤧ ᤐᤣᤃᤡᤖᤥ॥”
JOH 11:16 ᤜᤧᤰᤁᤩᤠᤱ ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ᤺ᤸᤗᤧ ᤘᤣ᤹ ᤁᤢᤴᤈᤢᤶ ᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ᤀᤠᤱ ᤍᤠᤱᤒᤠᤴᤏᤢᤀᤣ ᤐᤣᤃᤡᤀᤠᤱ ᤂᤢᤏᤧ᤹ᤏᤢᤀᤣ ᤛᤩᤧ᤹ᤀᤡᤖᤥ॥”
JOH 11:17 ᤂᤧᤱᤜᤠ᤹ ᤒᤧᤌᤠᤏᤡᤀᤥ ᤔᤧᤃᤧᤖᤧᤸᤗᤧ ᤗᤠᤈᤖᤛᤧᤴ ᤂᤠᤶᤔᤥ ᤔᤧᤈᤡᤰᤂᤢᤒᤠᤱᤃ ᤗᤡᤛᤡ ᤕᤧᤴ ᤁᤧᤖᤧ ᤁᤧᤗ᤹ᤒᤠᤴ ᤕᤧᤛᤢᤖᤧ ᤏᤡᤱᤘᤠ᤹ ᤂᤥ᤺ᤛᤢᤖᤥ॥
JOH 11:18 ᤒᤧᤌᤠᤏᤡᤃ ᤕᤖᤢᤛᤗᤧᤶᤗᤠᤶ ᤁᤡᤗᤥᤔᤡᤋᤖ ᤛᤢᤶᤛᤡ ᤕᤠᤖᤡᤰ ᤔᤠ᤺ᤰᤂᤧ.
JOH 11:19 ᤜᤧᤰᤁᤩᤠᤱ ᤕᤖᤡᤰ ᤕᤜᤢᤍᤡᤜᤠ᤹ ᤔᤠᤷᤌᤠ ᤏᤢ ᤔᤖᤡᤕᤔᤖᤧ ᤂᤢᤴᤇᤡ᤹ ᤛᤱᤘᤠᤒᤠᤴ ᤛᤩᤧᤒᤠᤀᤥ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠ ᤐᤡᤛᤧ ᤂᤧᤵᤔᤥ ᤔᤧᤍᤩᤧᤀᤠᤱ ᤔᤧᤘᤕᤧ॥
JOH 11:20 ᤔᤠᤷᤌᤠᤖᤧ ᤕᤧᤛᤢ᤺ᤴ ᤑᤧᤴᤗ ᤐᤳ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤗᤠᤶᤍᤣ᤺ᤱ ᤌᤠᤖᤡᤰ ᤁᤢᤍᤢᤶᤛᤧ ᤐᤣᤖᤥ. ᤁᤖ ᤔᤖᤡᤕᤶᤔᤡᤴ ᤜᤡᤶᤔᤥᤀᤣ ᤕᤠ᤺ᤰᤋᤧᤖᤥ॥
JOH 11:21 ᤔᤠᤷᤌᤠᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ᥄
JOH 11:22 ᤁᤖ ᤀᤠᤸᤗᤥ ᤌᤣ ᤁᤧᤏᤠ᤺ᤰᤋᤢᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡ᤹ ᤁᤧᤗ᤹ᤒᤠᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”
JOH 11:23 ᤕᤧᤛᤢᤖᤧ ᤔᤠᤷᤌᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤴᤛᤠ᤹ᤃ ᤕᤠᤶᤔᤥ ᤛᤡ᤺ᤔᤧᤴᤗᤠᤶ ᤜᤡᤱᤗᤥ॥”
JOH 11:24 ᤜᤧᤰᤁᤣ᤺ᤸᤗᤧ ᤔᤠᤷᤌᤠᤖᤧ ᤏᤥᤃᤵ ᤐᤡᤖᤢ. “ᤀᤥᤖᤥ ᤀᤠᤍᤠᤱᤒᤣ. ᤁᤢᤏᤢᤵᤔᤠ ᤕᤧᤴᤏᤥ ᤛᤡ᤺ᤔᤧᤴᤗᤠᤶ ᤜᤡᤱᤔᤴᤏᤥ ᤂᤢᤏᤧ᤹ ᤕᤠᤶᤔᤥ ᤜᤡᤱ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥”
JOH 11:25 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ᤃ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤜᤡᤱᤔᤴ ᤁᤧᤒᤡᤒᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠᤀᤠᤖᤥ॥ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ ᤂᤧᤱᤃ ᤛᤡ᤺ᤛᤠᤱ ᤕᤠᤶᤔᤥ ᤜᤡᤱᤗᤥ॥
JOH 11:26 ᤜᤧᤰᤁᤩᤠᤱ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤜᤡᤱᤒᤠᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤗᤥ॥ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤀᤠᤒᤠ᤺ᤴᤏᤡᤴ ᤏᤛᤠ᤺ᤴ ᤁᤧᤈᤥᤃᤢᤒᤡ᥅”
JOH 11:27 ᤔᤠᤷᤌᤠᤖᤧ ᤏᤥᤃᤵ ᤐᤡᤖᤢ “ᤀᤥᤖᤥ ᤀᤠᤍᤠᤱᤒᤣ. ᤂᤧᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤢ᤺ᤔᤠ ᤁᤧᤒᤥ᤺ᤱᤒᤠ ᤏᤡᤱᤘᤠ᤹ᤑᤢᤛᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣ᤺ᤴᤍᤧᤒᤠ ᤂᤪᤡᤛ᤻ᤋᤏᤧ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤛᤠ᤺ᤴ ᤆᤥᤃᤢᤱᤗᤥ॥”
JOH 11:28 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤠᤶᤔᤥ ᤜᤡᤶᤔᤥ ᤏᤢ᤺ᤰᤂᤧ ᤐᤣᤀᤠᤱ ᤔᤖᤡᤕᤶᤔᤡᤴ ᤔᤣᤖᤡᤱ ᤁᤧᤎᤰᤐᤠᤜᤠ᤹ᤗᤠᤶ ᤌᤡᤰᤗᤧᤵᤔᤠᤱ ᤛᤫᤠ᤺ᤳ ᤀᤢ᤺ᤳᤋᤢ ᤋᤣ᤹ᤖᤢᤀᤠᤱ ᤔᤧᤳᤋᤢ. “ᤛᤡᤰᤛᤠᤶᤒᤠᤱᤃ ᤁᤵᤔᤥ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤏᤧ᤹ ᤁᤧᤀᤢ᤺ᤳᤋᤧᤀᤠᤱ ᤘᤠ᤹ᤖᤥ॥”
JOH 11:29 ᤔᤖᤡᤕᤔᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤏᤢᤔᤧ᤺ᤴᤏᤣ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤧᤛᤢᤖᤧ ᤁᤢᤍᤢᤶᤛᤧ ᤐᤣᤖᤥ॥
JOH 11:30 ᤂᤧᤴ ᤕᤧᤶ ᤌᤠᤖᤡᤰ ᤕᤧᤛᤢ᤺ᤱᤃ ᤐᤠᤱᤓᤣ᤹ᤀᤥ ᤔᤧᤱᤃᤧᤳᤋᤣ ᤘᤕᤧ. ᤁᤖ ᤂᤢᤏᤧ᤹ᤃ ᤔᤠᤷᤌᤠᤖᤧ ᤋᤢᤔᤢᤒᤠ ᤋᤧᤴᤏᤥᤀᤣ ᤘᤕᤧ॥
JOH 11:31 ᤀᤠ᤺ᤴᤇᤡᤱᤔᤠ ᤐᤡᤛᤧ ᤜᤡᤶᤔᤥ ᤁᤧᤍᤠ᤺ᤒᤠ ᤕᤜᤢᤍᤡᤜᤠ᤹ᤖᤧ ᤔᤖᤡᤕᤶᤔᤡᤴ ᤜᤧᤰᤁᤣᤗ᤹ᤖᤡᤰ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤐᤣᤒᤠ ᤔᤧᤏᤡ᤺ᤛᤢᤀᤠᤱ ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤢᤴᤛᤠ᤹ᤖᤧ ᤁᤢᤀᤡᤵᤐᤢᤱᤅᤥ ᤔᤣᤖᤡᤱ ᤌᤰᤛᤧ ᤐᤣᤒᤠᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥
JOH 11:32 ᤔᤖᤡᤕᤶᤔᤡᤴ ᤕᤧᤛᤢ᤺ᤴ ᤘᤕᤧᤒᤠᤍᤧᤴᤏᤥ ᤁᤧᤖᤧᤀᤠᤱ ᤌᤢᤱᤒᤥᤜᤈ᤹ᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤵᤔᤥ ᤁᤧᤘᤕᤧᤸᤗᤧᤃ ᤀᤠᤴᤛᤠ᤹ ᤔᤧᤛᤩᤧᤏᤧᤶᤒᤠᤔᤧᤴ॥”
JOH 11:33 ᤕᤧᤛᤢᤖᤧ ᤔᤖᤡᤕᤶᤔᤡᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤀᤠᤱ ᤔᤣᤖᤡᤱ ᤔᤧᤎᤰᤋᤧᤒᤠ ᤏᤡ᤺ᤛᤢᤛᤡᤸᤗᤧ ᤁᤢᤛᤠ᤹ᤀᤡ ᤕᤃᤧᤀᤠᤱ ᤁᤢᤕᤥ᤺ᤶ ᤐᤢ᤹ᤖᤧᤖᤥ॥
JOH 11:34 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤢᤏᤧ᤹ ᤀᤠᤳᤋᤥ ᤁᤧᤏᤧᤛ᤻ᤛᤢᤶᤔᤠᤱ ᤏᤧᤒᤣ᥅” ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤍᤠᤱᤒᤣ. ᤑᤧᤖᤧ᤹ᤀᤠᤱ ᤀᤥᤔᤧᤳᤋᤧ᤹ᤀᤥ॥”
JOH 11:35 ᤕᤧᤛᤢ᤺ᤴ ᤜᤠᤒᤧ॥
JOH 11:36 ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹ ᤂᤢᤏᤧ᤹ᤃ ᤗᤠᤈᤖᤛᤧᤴ ᤀᤠᤰᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠᤒᤣ᥅”
JOH 11:37 ᤁᤖ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤔᤧ᤺ᤶᤒᤧ. ᤔᤡᤰᤑ᤺ᤶᤒᤠᤴ ᤏᤡ᤺ᤔᤠ ᤁᤧᤛᤢᤰᤐᤠ ᤁᤧᤈᤥ᤺ᤰᤐᤠᤱᤃ ᤒᤠ ᤂᤢᤏᤧ᤹ ᤔᤧ᤺ᤶᤒᤡ᥅ ᤌᤣᤀᤠᤱ ᤁᤴ ᤗᤠᤈᤖᤛᤧᤴ ᤛᤡ᤺ᤔᤠᤗᤠᤶ ᤜᤡᤱᤔᤠ ᤔᤧᤛᤢᤰᤋᤢᤶᤒᤠᤒᤣ᥅”
JOH 11:38 ᤕᤠᤶᤔᤥᤀᤠᤱ ᤕᤧᤛᤢ᤺ᤴ ᤛᤠ᤹ᤖᤡᤰ ᤁᤢᤕᤥ᤺ᤶ ᤐᤢ᤹ᤖᤧᤀᤠᤱ ᤀᤡᤵᤐᤢᤱᤅᤡᤸᤗᤧ ᤁᤢᤒᤣᤛᤠᤱ ᤐᤣ॥ ᤂᤧᤴ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤕᤶᤒᤠ ᤗᤢᤱᤅᤡᤴ ᤔᤧᤕᤧᤵᤛᤢᤒᤠ ᤑᤢᤰᤁᤢ ᤘᤕᤧᤖᤥ॥
JOH 11:39 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤀᤡ᤺ᤛᤧᤶᤔᤧ᤹॥” ᤁᤖ ᤗᤠᤈᤖᤛᤖᤧ ᤁᤢᤴᤏᤧ᤹ ᤔᤠᤷᤌᤠᤖᤧ ᤔᤧᤳᤋᤢ. “ᤍᤠᤱᤒᤣ. ᤂᤢᤏᤧ᤹ᤃ ᤂᤠᤶᤔᤥ ᤆᤡᤱᤔᤏᤠᤒᤠ ᤗᤡᤛᤡ ᤕᤧᤴ ᤁᤧᤖᤧᤔᤠᤖᤧᤖᤥ. ᤀᤠᤸᤗᤃ ᤏᤠᤶᤛᤢᤒᤡᤗᤠᤖᤥ॥”
JOH 11:40 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤔᤧᤳᤋᤢ. “ᤏᤛᤠ᤺ᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤁᤧᤏᤡ᤺ᤛᤢ᤹ ᤑᤠ᤹ᤀᤠᤱ ᤋᤃᤡᤛᤠ ᤔᤧᤳᤏᤧᤀᤠᤱ ᤘᤕᤧᤖᤥ॥”
JOH 11:41 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤌᤠ᤺ᤱ ᤀᤥᤔᤧᤳᤋᤢᤖ ᤐᤠ᤺ᤳᤋᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤏᤧ᤹ ᤀᤠᤒᤣᤗᤡ᤺ᤴ ᤁᤧᤄᤧᤵᤛᤢᤒᤠᤀᤥ ᤏᤥᤃᤧᤴᤗᤥ॥
JOH 11:42 ᤂᤧᤏᤧ᤹ᤃ ᤛᤍᤠᤍᤡᤱ ᤀᤠᤒᤣᤗᤡ᤺ᤴ ᤁᤧᤄᤧᤵᤛᤢ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ. ᤁᤖ ᤀᤡᤱᤃᤠ᤹ ᤁᤵᤔᤥ ᤀᤠᤄᤡᤖᤡ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤕᤠᤵᤔᤡ ᤁᤧᤒᤠᤱᤄᤧᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤒᤠᤖᤥ॥”
JOH 11:43 ᤕᤧᤛᤢᤖᤧ ᤀᤰᤂᤣ ᤐᤠ᤺ᤳᤋᤢᤖ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤳᤋᤢ. “ᤗᤠᤈᤖᤛ᤻ᤛᤣ. ᤗᤠ᤺ᤰᤁᤠᤳ ᤗ᤺ᤴᤍᤧ᤹ᤀᤥ᥄”
JOH 11:44 ᤁᤧᤛᤡ᤺ᤒᤠ ᤗᤠᤈᤖᤛᤧᤴ ᤗᤠ᤺ᤰᤁᤠᤳ ᤗ᤺ᤴᤍᤧ. ᤂᤢᤏᤧ᤹ ᤁᤢᤗᤠᤱ ᤏᤢ ᤁᤢᤜᤢᤰᤜᤠ᤹ ᤆᤣᤍᤣ᤺ᤳᤋᤡᤸᤗᤧ ᤁᤢᤓᤠᤰ ᤁᤢᤓᤠᤰ ᤔᤧᤃᤡᤳᤋᤢᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤁᤢᤏᤠᤖᤠ᤺ᤴᤏᤠᤱ ᤆᤡᤖᤡᤰᤁᤡᤸᤗᤧ ᤔᤧᤍᤧᤵᤋᤢᤀᤠᤱ ᤐᤳᤇᤧᤖᤥ॥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤣᤍᤣ᤺ᤳᤋᤡᤴ ᤑᤠ᤺ᤰᤂᤧᤶ ᤐᤡᤖᤧᤶᤔᤧ᤹ᤀᤠᤱ ᤐᤣ᤺ᤰᤗ ᤕᤠ᤺ᤴᤍᤧᤶᤔᤧ᤹॥”
JOH 11:45 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤔᤖᤡᤕᤔᤖᤧ ᤁᤢᤍᤢᤶᤛᤧ ᤁᤧᤍᤠ᤺ᤒᤠᤀᤠᤱ ᤁᤧᤘᤠ᤹ᤒᤠ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡ᤺ᤛᤢᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
JOH 11:46 ᤁᤖ ᤁᤢᤓᤠ ᤔᤏᤠᤜᤠ᤹ᤃ ᤑᤖᤡᤛᤡᤜᤠ᤹ᤀᤥ ᤔᤧᤒᤣᤀᤠᤱ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤔᤧᤈᤧᤰᤋᤢᤛᤡ॥
JOH 11:47 ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤐᤠ᤺ᤴᤎᤰᤛᤧ ᤕᤜᤢᤍᤡ ᤕᤧᤈᤢᤶᤓᤥ ᤕᤢᤱᤔᤠ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤸᤗ ᤀᤠᤏᤡ᤹ ᤌᤣ ᤀᤠᤈᤥᤃᤢᤶᤒᤠᤒᤣ᥅ ᤗ᤹ᤖᤡᤰ ᤛᤣ᤺ᤴᤔᤧᤍᤥᤛᤢᤛᤡ॥ ᤁᤴ ᤔᤏᤠ᤺ᤸᤗᤧᤃ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤆᤥᤃᤢᤖ ᤘᤠ᤹ᤖᤥ॥
JOH 11:48 ᤒᤠ ᤀᤰᤂᤣ ᤗᤧᤵᤔᤠᤏᤧ ᤑᤠ᤹ᤃᤪ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢ᤹ᤀᤠᤱ ᤔᤧᤍᤡᤶᤍᤢ᤹॥ ᤜᤧᤰᤁᤩᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤔᤧᤍᤠᤀᤠᤱ ᤔᤠᤱᤜᤡᤶᤔᤡᤴ ᤏᤢ ᤀᤠᤏᤡ᤹ ᤛᤢᤘᤠᤱᤜᤠ᤹ ᤔᤧᤔᤧᤰᤂᤢᤛᤡ᤹ᤖᤥ॥
JOH 11:49 ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ᥄
JOH 11:50 ᤁᤠᤰ ᤀᤠᤏᤡ᤹ ᤗᤠᤈᤣ᤹ᤀᤡᤴ ᤔᤧᤰᤔᤠᤏᤢ᤺ᤸᤗᤧ ᤁᤴ ᤗᤳᤇᤠ ᤔᤏᤠ᤺ᤴ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤛᤡ᤺ᤸᤗᤧ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹॥”
JOH 11:51 ᤂᤢᤏᤧ᤹ ᤁᤴ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤔᤧ᤺ᤴᤗᤥ. ᤁᤖ ᤂᤢᤏᤧ᤹ᤃ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴ ᤗᤠᤈᤣ᤹ᤖᤧ ᤗᤠᤃᤡ ᤛᤡ᤺ᤔᤠ ᤐᤥ᤺ᤱ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤒᤠᤖᤥ.
JOH 11:52 ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤔᤧ᤺ᤴ. ᤁᤖ ᤘᤣ᤹ ᤗᤠᤈᤣ᤹ᤜᤠ᤹ᤀᤥ ᤁᤠᤰ ᤁᤧᤛᤧᤒᤠᤀᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤛᤥᤖᤡᤰ ᤋᤠ᤺ᤵᤔᤠᤛᤡᤀᤠᤱ ᤌᤡᤰᤜᤢᤵ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤂᤧᤸᤗᤧ ᤐᤠ᤺ᤳᤋᤢᤒᤠᤖᤥ॥
JOH 11:53 ᤜᤧᤰᤁᤣ᤺ᤸᤗᤧ ᤂᤧᤴ ᤕᤧᤴᤏᤠᤱᤎᤥ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤛᤧᤵᤔᤠ ᤑᤠ᤹ᤀᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥
JOH 11:54 ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤕᤜᤢᤍᤡ ᤗᤢᤶᤔᤥ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤖ ᤘᤠ᤹ᤔᤠ ᤐᤣ᤺ᤰᤔᤠ ᤗᤧᤖᤢᤖᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ᤃ ᤕᤧ᤺ᤱᤄᤠᤍᤧᤴ ᤐᤣᤛᤠᤱᤒᤠ ᤀᤣᤑᤪᤠᤀᤡᤔ ᤔᤧᤵᤔᤏᤠᤒᤠ ᤐᤠᤱᤓᤣ᤹ᤀᤥ ᤐᤣᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂᤧᤵᤔᤥᤀᤣ ᤕᤠ᤺ᤰᤋᤧᤖᤥ॥
JOH 11:55 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤠ᤺ᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤐᤠᤱᤓᤣ᤹ᤜᤠ᤹ᤀᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤂᤧᤴ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤋᤃᤡ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤛᤢᤳᤌᤥ ᤆᤥ᤺ᤰᤛᤡᤱᤛᤧ ᤕᤖᤢᤛᤗᤧᤶᤔᤥ ᤔᤧᤒᤣ॥
JOH 11:56 ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤃᤥ᤺ᤳᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤱᤜᤡᤶ ᤗᤰᤂᤢᤶᤔᤥ ᤔᤧᤕᤧᤒᤧᤸᤗᤧ ᤀᤰᤂᤣ ᤔᤧᤔᤧᤳᤇᤡᤱ. “ᤂᤢᤏᤧ᤹ ᤁᤴ ᤋᤱᤏᤠᤶᤔᤥ ᤋᤠ᤺ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅”
JOH 11:57 ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤕᤧᤛᤢ᤺ᤴ ᤋᤧᤶᤔᤠ ᤛᤢᤰᤋᤧᤳᤗ ᤑᤠ᤹ᤀᤠᤱ ᤂᤢᤏᤧ᤹ ᤁᤧᤏᤡ᤺ᤛᤢᤶᤏᤧ ᤑᤠ᤹ᤃᤪ ᤕᤠᤵᤔᤡ ᤀᤠᤔᤧᤳᤋᤧᤶᤔᤧ᤹ᤀᤥ ᤗ᤹ᤖᤡᤰ ᤔᤏᤠᤜᤠ᤹ ᤀᤡᤱᤈᤠ᤺ᤱ ᤔᤧᤒᤡᤖᤢᤛᤡᤀᤠᤱ ᤔᤧᤘᤕᤧᤖᤥ॥
JOH 12:1 ᤕᤧᤛᤢ᤺ᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤋᤠ᤺ᤔᤠᤏᤢ᤺ᤸᤗᤧ ᤋᤢᤰᤛᤡ ᤕᤧᤴ ᤋᤃᤡ ᤗᤠᤈᤖᤛᤖᤧ ᤁᤢᤒᤠᤱᤓᤣ᤹ ᤒᤧᤌᤠᤏᤡ ᤋᤩᤧᤖᤥ॥ ᤒᤠ ᤂᤧᤴ ᤗᤠᤈᤖᤛᤧᤴ ᤛᤡ᤺ᤔᤧᤴᤗᤠᤶ ᤕᤧᤛᤢᤖᤧ ᤁᤢᤜᤡᤱᤘᤧᤳ ᤆᤥᤃᤢᤀᤠᤱ ᤘᤕᤧᤖᤥ॥
JOH 12:2 ᤂᤧᤱᤜᤠ᤹ᤖᤧ ᤂᤧᤴ ᤕᤢ᤺ᤴᤇᤡᤰ ᤕᤧᤛᤢ᤺ᤴ ᤁᤢᤔᤡᤱᤛᤥ ᤀᤡᤱᤎᤠ᤺ᤱᤗᤧ ᤗᤠᤃᤡ ᤆᤠ ᤔᤧᤔᤧᤳᤋᤢᤖᤥ॥ ᤔᤠᤷᤌᤠᤖᤧ ᤂᤧᤱᤜᤠ᤹ ᤆᤠ ᤔᤧᤳᤋᤢᤛᤡᤸᤗᤧ ᤆᤠ ᤁᤧᤈᤠᤒᤠᤜᤠ᤹ᤀᤥ ᤂᤢᤏᤧ᤹ᤏᤢ ᤛᤥᤖᤡᤰ ᤗᤠᤈᤖᤛᤧᤴᤏᤠᤱ ᤆᤠᤔᤠ ᤋᤧᤴᤏᤥ ᤕᤢᤅᤧ॥
JOH 12:3 ᤂᤧᤴ ᤕᤧᤶᤔᤥ ᤔᤖᤡᤕᤶᤔᤡᤸᤗᤧ ᤀᤡᤔᤧᤸᤗᤢᤱᤒᤠ ᤐᤠᤱᤒᤥ᤺ᤰ ᤑᤢᤱᤏᤠᤶᤔᤡᤸᤗᤧᤴ ᤆᤢᤰᤛᤠ ᤐᤷᤕᤠᤔᤠᤎᤡᤰ ᤋᤠᤖᤢᤀᤠᤱ ᤕᤧᤛᤢᤖᤧ ᤁᤢᤗᤠᤱᤅᤥ ᤜᤢ᤺ᤳᤋᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤗᤠᤱᤅᤡᤴ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤖᤥ॥ ᤂᤧᤴ ᤁᤢᤏᤠᤶ ᤁᤧᤏᤢ᤹ᤒᤠ ᤑᤢᤱᤏᤠᤶᤔᤡᤸᤗᤧ ᤜᤡᤶᤔᤡᤴ ᤕᤠᤰᤋᤢᤖᤥ॥
JOH 12:4 ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤋᤠ᤺ᤴᤍᤡ ᤕᤧᤛᤢ᤺ᤴ ᤀᤡᤱᤃᤧᤗᤧᤰᤐᤠ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ᤺ᤸᤗᤧ ᤀᤳᤋᤢᤖ ᤐᤠ᤺ᤳᤋᤢ.
JOH 12:5 “ᤌᤡᤰᤐᤠᤖᤧ ᤋᤱᤒᤣᤎᤡᤰ ᤌᤠᤖᤡᤰᤐᤠ ᤏᤠᤶᤕᤠᤰ ᤕᤠ᤹ᤖᤢᤒᤠ ᤁᤴ ᤀᤡᤔᤧᤸᤗᤢᤱᤒᤠ ᤑᤢᤱᤏᤠᤶᤔᤡᤱᤃ ᤛᤱᤔᤠᤀᤠᤱ ᤂᤧᤴ ᤕᤠᤱᤅᤡᤴ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤔᤠᤛᤡᤸᤗᤧ ᤏᤢ᤺ᤒᤠ ᤔᤧᤒᤥ᤺ᤰᤂᤧᤶᤒᤠᤒᤡ᥅”
JOH 12:6 ᤂᤧᤸᤗᤧ ᤛᤧᤰᤂᤠᤀᤣ ᤕᤠᤱᤃᤧᤛᤠ᤹ᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤜᤧᤰᤁᤣ ᤐᤠ᤺ᤳᤋᤢᤒᤠ ᤔᤧ᤺ᤴᤗᤥ. ᤁᤖ ᤂᤧᤱᤃ ᤁᤧᤄᤢ᤺ᤶᤒᤠ ᤘᤕᤧ. ᤜᤧᤰᤁᤩᤠᤱ ᤕᤠᤱ ᤕᤠᤱᤔᤠ ᤛᤢ᤺ᤰᤘᤠ ᤁᤧᤕᤢᤱᤒᤠ ᤘᤕᤧᤀᤠᤱ ᤀᤧᤳᤗᤧᤱ ᤂᤧᤵᤔᤥᤗᤠᤶ ᤕᤠᤱᤅᤡᤴ ᤂᤢ᤺ᤳᤋᤢᤖ ᤘᤕᤧᤖᤥ॥
JOH 12:7 ᤕᤧᤛᤢᤖᤧ ᤔᤧᤳᤋᤢᤛᤡ. “ᤁᤴ ᤔᤧᤴᤇᤢᤔᤠ᤹ᤀᤡᤴ ᤋᤢᤰᤂᤣ ᤔᤧᤈᤠ᤺ᤳᤋᤧᤶᤔᤡᤴᤏᤧ᤹ᤀᤥ᥄ ᤂᤧᤸᤗᤧᤃ ᤀᤡᤱᤃᤠ᤹ ᤀᤠᤗᤢᤵᤔᤠ ᤕᤧᤴᤖᤧ ᤗᤠᤃᤡ ᤁᤴ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤢ ᤐᤡᤖᤠᤱᤒᤠᤖᤥ॥
JOH 12:8 ᤕᤠᤱᤃᤧᤛᤠ᤹ᤒᤠᤜᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹. ᤁᤖ ᤀᤡᤱᤃᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴᤗᤥ॥”
JOH 12:9 ᤂᤧᤴ ᤕᤧᤶᤔᤥ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤒᤧᤌᤠᤏᤡᤀᤥ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤂᤧᤵᤔᤥ ᤂᤢᤏᤧ᤹ ᤁᤢᤀᤥᤔᤧᤳᤇᤧᤖᤰ ᤔᤧ᤺ᤴ. ᤁᤖ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤗᤠᤈᤖᤛᤧᤴᤏᤠᤱ ᤀᤥᤔᤧᤳᤇᤧ ᤂᤧᤵᤔᤥ ᤔᤧᤍᤩᤧ॥
JOH 12:10 ᤂᤧᤸᤗᤧ ᤆᤥᤃᤢᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤈᤖᤛᤧᤴᤏᤠᤱ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢ.
JOH 12:11 ᤌᤣᤀᤠᤱᤓᤧᤸᤗᤧ ᤗᤠᤈᤖᤛᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤗᤠᤶ ᤕᤖᤡᤰ ᤔᤏᤠᤜᤠ᤹ ᤔᤧᤛᤧᤴᤍᤧ ᤔᤧᤒᤣᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥
JOH 12:12 ᤁᤢᤍᤠ᤺ᤴᤍᤡᤰ ᤋᤱᤏᤠᤶᤔᤥ ᤁᤧᤈᤢᤶᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤕᤖᤢᤛᤗᤧᤶᤔᤥ ᤌᤠᤱᤗ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤖᤥ॥
JOH 12:13 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤂᤧᤒᤰᤛᤡᤱ ᤐᤥᤖᤠ᤺ᤰᤜᤠ᤹ ᤔᤧᤕᤠᤱᤛᤡᤱᤅᤠᤱ ᤂᤢᤏᤧ᤹ ᤁᤢᤍᤢᤶᤛᤧ ᤗᤠᤶᤍᤣ᤺ᤱ ᤌᤠᤖᤡᤰ ᤔᤧᤒᤣᤖᤥ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤔᤧᤀ᤺ᤰᤋᤧ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠ᤺ᤒᤠᤴ ᤔᤢ᤹ᤀᤡᤛᤠᤒᤠ ᤐᤥ᤺ᤱᤗᤖᤥ॥ ᤀᤡᤛᤪᤠᤀᤡᤗᤛ᤻ᤔᤠ ᤜᤠᤱᤅᤡᤴ ᤔᤢ᤹ᤀᤡᤛᤠᤒᤠᤖᤥ᥄”
JOH 12:14 ᤀᤠᤸᤗ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡ᤺ᤰ ᤕᤧᤛᤢᤖᤧ ᤀᤍᤱᤛᤠᤎᤡᤰ ᤂᤥ᤺ᤛᤢᤀᤠᤱ ᤕᤢᤰᤋᤢ.
JOH 12:15 “ᤛᤡᤕᤥᤏᤖᤧ ᤁᤢᤛ᤻ᤛᤠ᤺ᤀᤣ. ᤔᤧᤃᤡᤛᤧᤴᤏᤧ᤹ᤀᤥ᥄ ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤜᤠᤱᤅᤡᤱᤃ ᤀᤍᤱᤛᤠ᤺ᤴ ᤕᤢᤰᤋᤢᤀᤠᤱ ᤂᤧᤏᤧ᤹ᤀᤥ ᤑᤧᤴᤗ ᤐᤳᤗᤥ॥”
JOH 12:16 ᤋᤃᤡᤃ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤁᤧᤖᤧᤒᤠ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤁᤖ ᤕᤠᤱᤛᤡ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤢ᤺ᤰᤂᤧ ᤐᤣᤀᤠᤱᤗᤰ ᤛᤠᤶᤕᤥᤛᤠᤵᤗᤠᤀᤥ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤒᤠ ᤏᤢ ᤂᤢᤏᤧ᤹ ᤁᤢᤍᤢᤶᤛᤧ ᤗᤠᤶᤍᤣ᤺ᤱ ᤌᤠᤖᤡᤰ ᤔᤧᤒᤣᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥
JOH 12:17 ᤀᤠᤸᤗ ᤕᤧᤛᤢᤖᤧ ᤗᤠᤈᤖᤛᤧᤴ ᤀᤡᤵᤐᤢᤱᤗᤠᤶ ᤗᤠ᤺ᤰᤁᤠᤳ ᤀᤢ᤺ᤳᤋᤢᤀᤠᤱ ᤁᤧᤛᤡ᤺ᤒᤠᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤁᤧᤏᤡ᤺ᤒᤠ ᤔᤏᤠᤜᤠ᤹ᤖᤧ ᤂᤧᤴ ᤁᤠᤰ ᤐᤠ᤺ᤴᤏᤡᤴ ᤆᤰᤔᤧᤸᤗ᤹ᤀᤣ ᤀᤡᤱᤔᤧᤓᤥ᤺ᤛᤢᤖᤥ॥
JOH 12:18 ᤂᤢᤏᤧ᤹ ᤀᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ ᤗ᤹ᤖᤡᤰ ᤔᤧᤄᤧᤵᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤒᤣᤀᤠᤱ ᤔᤧᤘᤕᤧᤖᤥ॥
JOH 12:19 ᤜᤧᤰᤁᤣ᤺ᤸᤗᤧ ᤑᤖᤡᤛᤡᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ᤃ ᤌᤧᤔᤠᤀᤠᤱ ᤆᤥ᤺ᤰᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧᤀᤣ ᤂᤢᤏᤧ᤹ ᤔᤧᤍᤡᤶᤍᤢᤀᤠᤱ ᤔᤧᤘᤠ᤹ᤖᤥ᥄”
JOH 12:20 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤛᤣᤘᤠ ᤆᤥ᤺ᤰᤛᤧ ᤁᤧᤍᤠ᤺ᤒᤠᤜᤠ᤹ᤀᤥ ᤁᤢᤓᤠ ᤃᤪᤡᤁ ᤛᤢᤘᤠᤱᤜᤠ᤹ᤀᤠᤱ ᤕᤖᤢᤛᤗᤧᤶᤔᤥ ᤔᤧᤎᤠᤅᤧᤀᤠᤱ ᤔᤧᤘᤕᤧ॥
JOH 12:21 ᤂᤧᤱᤜᤠ᤹ ᤃᤠᤗᤡᤗᤒᤠ ᤒᤧᤌᤛᤣᤍᤠ ᤐᤠᤱᤈᤢᤶᤒᤠ ᤑᤡᤗᤡᤐᤖᤥ ᤔᤧᤒᤣᤀᤠᤱ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤕᤧᤛᤢ᤺ᤴ ᤋᤢᤶᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥”
JOH 12:22 ᤜᤧᤰᤁᤩᤠᤱ ᤑᤡᤗᤡᤵᤐᤧᤴ ᤐᤣᤀᤠᤱ ᤀᤠᤴᤍᤪᤡᤕᤠᤛᤧᤴ ᤔᤧᤳᤋᤢ. ᤜᤧᤰᤁᤩᤠᤱ ᤑᤡᤗᤡᤵᤐᤧᤴ ᤏᤢ ᤀᤴᤍᤪᤡᤕᤠᤛᤧᤴ ᤐᤣᤛᤡᤀᤠᤱ ᤕᤧᤛᤢ᤺ᤴ ᤆᤧᤰᤋᤧᤳᤇᤢ॥
JOH 12:23 ᤕᤧᤛᤢᤖᤧ ᤐᤠ᤺ᤳᤋᤢ. “ᤔᤧᤴᤇᤠᤶᤛᤠ᤺ᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥
JOH 12:24 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤠ᤹ᤖᤡ᤺ᤶᤒᤠᤴ ᤂᤠᤶᤔᤥ ᤔᤰᤌᤠᤀᤠᤱ ᤔᤧᤴᤇᤡ᤺ᤀᤣ ᤌᤠᤖᤡᤰ ᤂᤧᤱᤃ ᤌᤡᤰᤗᤰ ᤏᤧᤖᤥ॥ ᤁᤖ ᤂᤧᤴ ᤛᤡ᤺ᤏᤧ ᤑᤠ᤹ᤃᤪ ᤂᤧᤴᤗᤠᤶ ᤕᤖᤡᤰ ᤐᤥᤃᤢᤃᤧᤴ ᤁᤢᤈᤠ᤹ ᤌᤥ᤺ᤰᤗᤥ॥
JOH 12:25 ᤀᤠᤳᤋᤡᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤗᤢᤱᤔᤠ᤹ ᤋᤢᤰᤋᤢ᤹. ᤂᤧᤸᤗᤧ ᤔᤠᤛᤢ᤹ᤖᤥ. ᤁᤖ ᤀᤠᤳᤋᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤴ ᤌᤣᤀᤠᤱ ᤔᤧᤀᤡ᤺ᤳᤋᤢᤴ. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤛᤧ᤺ᤵᤋᤢ ᤕᤢᤰᤂᤢ᤹ᤖᤥ॥
JOH 12:26 ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤛᤣᤘᤠ ᤆᤥ᤺ᤰᤁᤠ ᤂᤧᤸᤗᤧ ᤀᤡᤱᤃᤠ᤹ ᤋᤡᤶᤔᤠᤀᤣ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤳᤋᤥ ᤘᤠ᤹ᤀᤠ. ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤴᤏᤠᤱ ᤂᤧᤵᤔᤥᤀᤣ ᤘᤠ᤹ᤖᤥ॥ ᤀᤠᤳᤋᤡᤸᤗᤧ ᤛᤣᤘᤠ ᤆᤥ᤺ᤰᤁᤠ ᤂᤧᤱᤃ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖᤥ॥”
JOH 12:27 “ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤡᤴ ᤛᤠ᤹ᤖᤡᤰ ᤋᤢᤰᤂᤣ ᤆᤩᤧᤀᤠᤱ ᤘᤠ᤹. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤌᤣ ᤐᤠ᤺ᤳᤋᤢᤱᤒᤠᤒᤣ᥅ ᤐᤠᤏᤢᤍᤡᤱ ᤀᤠᤶᤒᤦ. ᤁᤴ ᤀᤡᤏᤥᤃᤧᤴ ᤋᤢᤰᤂᤣᤗᤠᤶ ᤋᤠᤱᤛᤧ᤺ᤵᤋᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤒᤡ ᤗ᤹ᤀᤠ. ᤁᤖᤛᤠᤱ ᤐᤣᤗᤡ ᤔᤧᤓᤠᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤢᤰᤂᤣ ᤆᤠᤛᤧᤀᤣ ᤋᤩᤠᤱᤒᤠᤖᤥ॥
JOH 12:28 ᤂᤧᤸᤗᤧ ᤆᤥᤃᤢᤸᤗᤧ ᤐᤠᤏᤢᤍᤡᤱ ᤀᤠᤶᤒᤦ. ᤂᤧᤏᤧ᤹ ᤀᤠᤒᤠᤅᤣ ᤔᤡᤔᤡᤍᤡᤱ ᤔᤧᤳᤇᤡᤱᤅᤧ᤹ᤀᤥ॥” ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤀᤡᤱᤃᤠ᤹ ᤋᤃᤡᤛᤠ ᤀᤠᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤗᤥ॥”
JOH 12:29 ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤧᤴ ᤀᤡᤰᤗᤠ᤺ᤴ ᤔᤧᤄᤧᤵᤛᤢᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. ᤁᤱᤃ ᤋᤠᤱᤛᤠᤰᤐᤧᤴ ᤀᤢ᤺ᤰᤋᤧᤒᤠᤖᤥ. ᤁᤖ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤠᤱᤗᤠᤀᤡᤱᤒᤧᤴ ᤕᤧᤛᤢ᤺ᤴᤏᤢ ᤐᤠᤖᤧᤒᤠᤖᤥ॥”
JOH 12:30 ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤀᤡᤰᤗᤠ᤺ᤱᤃ ᤀᤡᤱᤃᤠ᤹ ᤀᤠᤗᤠᤃᤡ ᤔᤧ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤋᤩᤧᤒᤠᤖᤥ॥
JOH 12:31 ᤀᤠᤸᤗ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤄᤠᤛᤧᤴ ᤐᤥ᤺ᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ. ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤱᤃ ᤗᤠ᤺ᤰᤁᤠᤳ ᤗᤠᤵᤑᤢᤖᤥ॥
JOH 12:32 ᤁᤖ ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤌᤠ᤺ᤱ ᤐᤱᤛᤡᤱᤅᤠᤸᤗᤧ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤀᤡᤱᤃᤠ᤹ ᤗᤧᤵᤔᤠᤱ ᤀᤢ᤺ᤰᤂᤢᤱᤛᤡᤱᤗᤥ॥”
JOH 12:33 ᤂᤢᤏᤧ᤹ ᤀᤠᤰᤋᤱᤒᤠ ᤛᤡ᤺ᤔᤧᤴᤏᤥ ᤐᤣ᤺ᤰᤗ ᤐᤳ ᤁᤧᤗ᤹ᤒᤠᤴ ᤀᤥᤛᤣ᤺ᤴᤎᤠᤰᤛᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠᤖᤥ॥
JOH 12:34 ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤛᤍᤠᤍᤡᤱ ᤘᤠ᤹ ᤗ᤹ᤖᤡᤰ ᤂᤧᤶᤔᤏᤠᤖᤥ. ᤁᤖ ᤂᤧᤏᤧ᤹ᤃ ᤀᤠᤰᤂᤣᤀᤠᤱ ᤔᤧᤴᤇᤠᤶᤛᤠ᤺ᤴ ᤌᤠ᤺ᤱ ᤐᤱᤛᤡᤱ ᤗ᤹ᤖᤡᤰ ᤁᤧᤒᤠ᤺ᤳᤋᤢᤒᤠᤒᤣ᥅ ᤁᤴ ᤔᤧᤴᤇᤠᤶᤛᤠ᤺ᤱᤃ ᤜᤠ᤺ᤵᤐᤣ᥅”
JOH 12:35 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤵᤑᤠᤖᤧ ᤗᤠᤃᤡᤖᤰ ᤀᤥ᤺ᤳᤋᤡ᤺ᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥ ᤂᤠᤍᤠᤶᤔᤠᤴ ᤋᤠᤖ ᤐᤳ. ᤜᤧᤰᤁᤣ᤺ᤸᤗᤧ ᤀᤥ᤺ᤳᤋᤡ᤺ᤴ ᤂᤡᤏᤡ᤹ᤏᤢ ᤘᤠ᤹ᤖᤀᤣ ᤗᤠᤱᤄᤣᤃᤧᤶᤔᤧ᤹ᤀᤥ॥ ᤂᤠᤍᤠᤶᤔᤥ ᤗᤠᤱᤃᤧᤄᤣ᤺ᤰᤐᤠ ᤔᤏᤠ᤺ᤸᤗᤧ ᤀᤠᤳᤋᤥ ᤐᤣ᤺ᤰᤗ ᤐᤳ ᤁᤧᤗ᤹ᤒᤠᤴ ᤌᤣᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤴᤗᤥ॥
JOH 12:36 ᤀᤥ᤺ᤳᤋᤡ᤺ᤴ ᤂᤡᤏᤡ᤹ᤏᤢ ᤘᤠ᤹ᤖᤀᤣ ᤂᤧᤴ ᤏᤛᤠ᤺ᤴ ᤆᤥᤃᤧᤶᤔᤧ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤀᤥ᤺ᤳᤋᤡ᤺ᤸᤗᤧ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡ᤹ᤖᤥ॥” ᤂᤢᤏᤧ᤹ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤧᤵᤔᤥᤗᤠᤶ ᤌᤠᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤴᤏᤡᤀᤣ ᤀᤡ᤺ᤶᤛᤡᤱᤗᤥ॥
JOH 12:37 ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤶᤔᤩᤠᤰ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤆᤥᤃᤢᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
JOH 12:38 ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ– “ᤕᤜᤘᤣ ᤍᤠᤱᤒᤣ. ᤜᤠ᤺ᤳᤗᤧ ᤀᤠᤏᤡᤃᤧ ᤀᤡᤱᤄᤱᤅᤡᤴ ᤏᤛᤠ᤺ᤴ ᤆᤥᤃᤢᤒᤣ᥅ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤢᤰᤛᤠᤶᤔᤡᤴ ᤀᤠᤳᤋᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤒᤣ᥅”
JOH 12:39 ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴ ᤑᤠ᤹ᤀᤠᤱ ᤕᤛᤤᤕᤠ᤺ᤸᤗᤧ ᤀᤰᤂᤣᤀᤠᤱ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ–
JOH 12:40 “ᤕᤜᤘᤣ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤔᤡᤰᤑ᤺ᤶᤒᤠ ᤆᤥᤃᤢᤛᤡ ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎᤢᤱᤒᤠ ᤆᤥᤃᤢ ᤐᤡᤖᤢᤛᤡ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤠᤏᤡ᤺ᤔᤠ ᤔᤧᤴᤇᤢᤰᤋᤢᤴ. ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤸᤗᤥ ᤔᤧᤏᤢ᤺ᤰᤂᤧᤀᤠᤱ ᤂᤢᤏᤧ᤹ ᤘᤣ᤺ᤴᤍᤢᤛᤡᤒᤠᤔᤧᤴ॥”
JOH 12:41 ᤕᤛᤤᤕᤠ᤺ᤸᤗᤧ ᤋᤃᤡᤛᤠ ᤕᤧᤛᤢᤖᤧ ᤁᤢᤔᤡᤔᤡᤍᤡᤱᤅᤡᤴ ᤏᤡ᤺ᤛᤢᤀᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤖᤥ॥
JOH 12:42 ᤜᤧᤰᤁᤣᤛᤠᤱ ᤂᤧᤴ ᤕᤧᤶᤔᤥ ᤕᤖᤡᤰ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢ॥ ᤁᤖᤛᤠᤱ ᤂᤧᤱᤜᤠ᤹ᤖᤧ ᤔᤏᤠ ᤋᤃᤡ ᤁᤴ ᤐᤠ᤺ᤴᤏᤡᤴ ᤐᤠ᤺ᤵᤔᤠ ᤔᤧᤴᤍᤧᤴᤍᤧᤴᤗᤥ. ᤌᤣᤀᤠᤱᤓᤧᤸᤗᤧ ᤑᤖᤡᤛᤡᤜᤠ᤹ᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤗᤠᤶ ᤗᤠ᤺ᤰᤁᤠᤳ ᤀᤠᤶᤗ᤺ᤳ ᤀᤠᤶᤍᤣ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤃᤡᤛᤧᤖᤥ॥
JOH 12:43 ᤌᤣᤀᤠᤱᤓᤧᤸᤗᤧ ᤂᤧᤴ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤆᤶᤛᤡᤱᤔᤠᤴᤏᤢ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤆᤶᤛᤡᤱᤔᤠᤴᤏᤣ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤖᤥ॥
JOH 12:44 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤶᤒᤠ ᤀᤡᤰᤗᤠᤀᤥ ᤐᤠ᤺ᤳᤋᤢ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ ᤂᤧᤸᤗᤧ ᤀᤡᤱᤃᤠ᤹ᤖᤰ ᤔᤧ᤺ᤴ. ᤁᤖ ᤕᤠᤵᤔᤡ ᤁᤧᤒᤠᤱᤒᤠᤴᤏᤠᤱ ᤏᤛᤠ᤺ᤴ ᤆᤥᤃᤢ᤹ᤖᤥ॥
JOH 12:45 ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤧᤏᤡ᤺ᤒᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤏᤡ᤺ᤛᤢ᤹ᤖᤥ॥
JOH 12:46 ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥ᤺ᤳᤋᤡ ᤜᤧᤰᤁᤣ ᤋᤩᤠᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤀᤠᤳᤋᤡᤴᤏᤠᤱ ᤂᤠᤍᤠᤶᤔᤥ ᤘᤠ᤹ᤔᤠ ᤔᤧᤒᤥ᤺ᤱᤏᤧᤸᤗᤥ॥
JOH 12:47 ᤀᤠᤳᤋᤡᤴ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤀᤠᤒᤠ᤺ᤴᤈᤠᤰᤜᤠ᤹ ᤂᤧᤵᤛᤢ᤹ ᤁᤖ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ. ᤂᤧᤴ ᤂᤠᤛᤧᤴ ᤔᤧᤈᤥᤃᤢᤱᤅᤡᤴ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤠᤛᤧᤴ ᤆᤥ᤺ᤰᤛᤧ ᤔᤧ᤺ᤴ. ᤁᤖ ᤋᤠᤱᤛᤧ᤺ᤵᤛᤧ ᤋᤩᤠᤱᤒᤠᤖᤥ॥
JOH 12:48 ᤀᤡᤱᤃᤠ᤹ ᤁᤧᤏᤠ᤹ᤒᤠᤜᤠ᤹ ᤏᤢ ᤀᤠᤒᤠ᤺ᤴ ᤔᤧᤱᤄᤧᤶᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴᤗᤥ᤺ᤶᤒᤠᤱᤃ ᤘᤣ᤹ ᤘᤠ᤹ᤖᤥ॥ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ᤖᤧᤀᤣ ᤁᤢᤏᤢᤵᤔᤠ ᤕᤧᤴᤏᤥ ᤂᤧᤱᤜᤠ᤹ ᤂᤠᤛᤧᤴ ᤗᤥ᤺ᤴᤍᤢᤛᤡᤖᤥ॥
JOH 12:49 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤀᤠᤒᤠᤅᤣ ᤌᤣᤀᤠᤱ ᤔᤧᤶᤒᤠ᤺ᤵᤐᤧᤴᤗᤥ. ᤁᤖ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤐᤠ᤺ᤵᤔᤠ ᤐᤠᤱᤄᤠᤱᤒᤠ ᤐᤠ᤺ᤴᤜᤠ᤹ᤀᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥
JOH 12:50 ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤅᤡᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤐᤡᤖᤢᤛᤡᤖᤥ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤐᤠ᤺ᤳᤋᤧ᤹ ᤑᤠ᤹ᤀᤠᤱ ᤔᤧᤳᤋᤠᤱᤒᤠ ᤐᤠ᤺ᤴᤜᤠ᤹ᤖᤰ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥”
JOH 13:1 ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤌᤡᤰᤕᤧᤴ ᤋᤃᤡ ᤕᤧᤛᤢᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤵᤔᤠᤀᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤔᤠ ᤕᤧᤶ ᤋᤩᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢᤖᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤘᤕᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤏᤢᤵᤔᤥ ᤌᤠᤖᤡᤰᤁᤣ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥
JOH 13:2 ᤀᤠᤸᤗ ᤕᤢ᤺ᤴᤇᤡᤰ ᤆᤠᤈᤠᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤛᤡᤔᤥᤏᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡ᤺ᤸᤗᤧ ᤕᤧᤛᤢ᤺ᤴ ᤀᤡᤱᤗᤧᤰᤋᤢᤖ ᤑᤠ᤹ᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤋᤃᤡᤛᤠ ᤁᤢᤏᤡᤱᤘᤠ᤹ᤀᤡᤴ ᤑᤧᤳᤗᤠ᤺ᤴᤍᤢ ᤐᤡᤖᤢᤀᤠᤱ ᤘᤕᤧ॥
JOH 13:3 ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤢᤏᤧ᤹ ᤁᤠᤰ ᤛᤶᤍᤠᤱ ᤕᤢᤰ ᤐᤡᤖᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶᤔᤣ ᤋᤩᤧᤒᤠ ᤏᤢ ᤂᤢᤏᤧ᤹ᤀᤥᤀᤣ ᤏᤢ᤺ᤱᤗ ᤐᤳ ᤁᤧᤗ᤹ᤒᤠᤴ ᤕᤧᤛᤢᤖᤧ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥
JOH 13:4 ᤜᤧᤰᤁᤩᤠᤱ ᤂᤢᤏᤧ᤹ ᤆᤠᤈᤠᤔᤠᤍᤧᤴᤏᤥᤗᤠᤶ ᤐᤥᤃᤧᤀᤠᤱ ᤁᤢᤛᤢᤱᤄᤣ᤺ᤰᤘᤠ᤺ᤴ ᤑᤧᤴᤍᤢᤀᤠᤱ ᤕᤠᤶᤍᤢ᤺ᤰᤔᤠᤸᤗᤧ ᤁᤡᤳᤗᤡᤰ ᤁᤡᤳᤇᤡᤱ.
JOH 13:5 ᤜᤧᤰᤁᤣᤗ᤹ᤖᤡᤰᤁᤣ ᤆᤫᤠ᤺ᤳᤋᤡᤴ ᤂᤵᤐᤩᤠᤀᤥ ᤜᤢᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤔᤠ ᤜᤣ᤺ᤰᤋᤢ ᤜᤧᤰᤁᤩᤠᤱ ᤁᤡᤳᤇᤡᤱᤒᤠ ᤕᤠᤶᤍᤢ᤺ᤰᤔᤠᤸᤗᤧ ᤋᤢᤃᤢ ᤐᤡᤖᤢᤛᤡ॥
JOH 13:6 ᤂᤢᤏᤧ᤹ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤗᤠᤱ ᤘᤠᤜᤵᤛᤧ ᤑᤧᤖᤧᤸᤗᤧ ᤂᤧᤸᤗᤧ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤗᤠᤱᤅᤡᤴ ᤘᤠᤃᤧᤜᤵᤋᤢᤒᤠᤒᤡ᥅”
JOH 13:7 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥ ᤀᤡᤱᤃᤠ᤹ ᤌᤣ ᤆᤥᤃᤢᤱᤗ ᤐᤳᤋᤠ ᤁᤧᤗ᤹ᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤗᤥ ᤁᤖ ᤋᤠ᤺ᤴᤍᤡᤃ ᤁᤢᤛᤡᤱ ᤁᤧᤏᤡ᤺ᤳᤋᤢ᤹ᤖᤥ॥”
JOH 13:8 ᤐᤋᤪᤢᤛᤖᤧ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤀᤠᤗᤠᤱᤜᤠ᤹ ᤘᤠᤜᤵᤔᤠ ᤔᤧᤏᤢ᤹ᤏᤧᤴᤗᤥ᥄” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤁᤧᤗᤠᤱᤜᤠ᤹ ᤘᤠᤔᤧᤜᤵᤋᤢᤱᤅᤡᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤀᤡᤱᤃᤠ᤹ᤏᤢ ᤗᤰ ᤁᤧᤱᤄᤥ᤺ᤛᤢᤴᤗᤥ॥”
JOH 13:9 ᤜᤧᤰᤁᤣ᤺ᤸᤗᤧ ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤗᤠᤱᤜᤠ᤹ᤖᤰ ᤔᤧ᤺ᤴ. ᤁᤖ ᤀᤠᤜᤢᤰᤜᤠ᤹ ᤏᤢ ᤀᤠᤎᤧᤃᤣ᤺ᤰᤁᤡᤴᤏᤠᤱ ᤘᤠᤜᤵᤋᤠᤱ ᤐᤡᤖᤠᤱᤅᤧ᤹ᤀᤥ᥄”
JOH 13:10 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤘᤠᤃᤧᤖᤢᤶᤛᤡᤱᤒᤠ ᤔᤏᤠ᤺ᤱᤃ ᤛᤣᤛᤣ ᤐᤥ᤺ᤱᤔᤠᤖᤧ ᤗᤠᤃᤡ ᤁᤢᤗᤠᤱᤜᤠ᤹ᤖᤰ ᤘᤠᤜᤵᤔᤠ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤏᤠᤛᤡᤱᤃᤧᤴ ᤁᤢᤎᤰᤁᤡᤱᤃ ᤛᤣᤛᤣᤀᤣ ᤆᤥ᤺ᤰᤗᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤃ ᤛᤣᤛᤣᤀᤣ ᤁᤧᤈᤥᤃᤡᤛᤠᤱ ᤂᤡᤏᤡ᤹ ᤁᤧᤖᤧᤰ ᤛᤣᤛᤣ ᤁᤧᤜᤥ᤺ᤵᤋᤡ᤹ᤖᤥ॥”
JOH 13:11 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤠ᤺ᤳᤗᤧ ᤀᤡᤱᤗᤧᤰᤋᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤡᤏᤡ᤹ ᤁᤧᤖᤧᤰ ᤛᤣᤛᤣ ᤁᤧᤜᤥ᤺ᤵᤋᤡ᤹ ᤗ᤹ᤖᤡᤰ ᤔᤧᤳᤋᤢᤛᤡᤒᤠᤖᤥ॥
JOH 13:12 ᤕᤧᤛᤢᤖᤧ ᤂᤢᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡᤀᤠᤱ ᤁᤢᤈᤠᤱᤅᤡᤴ ᤆᤠᤰᤛᤡᤱ ᤜᤧᤰᤁᤩᤠᤱ ᤕᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅
JOH 13:13 ᤂᤡᤏᤡ᤹ ᤍᤠᤱᤒᤠ ᤏᤢ ᤛᤡᤰᤛᤠᤶᤒᤠ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤳᤋᤡ᤹॥ ᤂᤧᤴ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤶ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤒᤠ ᤂᤧᤴᤏᤠᤖᤥ॥
JOH 13:14 ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ ᤍᤠᤱᤒᤠ ᤏᤢ ᤛᤡᤰᤛᤠᤶᤒᤠᤀᤠᤛᤠᤱ ᤂᤡᤏᤡ᤹ ᤗᤠᤱᤜᤠ᤹ ᤘᤠᤜᤵᤋᤢᤱ ᤐᤡᤏᤡᤱ. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤗᤠᤱ ᤘᤠᤜᤵᤔᤠ ᤐᤡᤛᤡᤱᤔᤠ ᤐᤥ᤺ᤱᤗᤥ॥
JOH 13:15 ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤁᤴ ᤁᤢᤒᤡ᤺ᤴ ᤕᤢᤰᤂᤢᤱ ᤐᤡᤏᤡᤱᤅᤠᤱ ᤘᤠ᤹ᤖᤥ॥
JOH 13:16 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤛᤣᤘᤠᤖᤥᤒᤠᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ. ᤜᤧᤰᤁᤩᤠᤱ ᤀᤡᤱᤛᤠᤒᤠᤴᤏᤠᤱ ᤂᤢᤏᤧ᤹ ᤁᤧᤒᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥
JOH 13:17 ᤀᤠᤸᤗ ᤁᤴ ᤐᤠ᤺ᤴᤜᤠ᤹ᤃ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤁᤱᤜᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤔᤢ᤹ᤀᤡᤛᤠᤒᤠ ᤁᤧᤒᤥ᤺ᤰᤂᤡ᤹ᤖᤥ॥”
JOH 13:18 “ᤀᤡᤱᤃᤠ᤹ ᤂᤡᤏᤡ᤹ ᤁᤧᤖᤧᤰᤗᤧ ᤗᤠᤃᤡᤃ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤥ॥ ᤀᤡᤱᤃᤠ᤹ ᤛᤣ᤺ᤰᤏᤡᤱᤒᤠᤜᤠ᤹ᤃ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤗᤥ॥ ᤁᤖ ᤀᤡᤱᤃᤠ᤹ᤏᤢ ᤛᤥᤖᤡᤰ ᤆᤠᤃᤧᤈᤠᤒᤠᤴᤏᤣ ᤀᤡᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤥᤃᤧᤖᤥ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠᤴ ᤁᤧᤳᤗᤀᤣ ᤐᤥ᤺ᤱᤗᤥ॥
JOH 13:19 ᤁᤴ ᤐᤠ᤺ᤴᤜᤠ᤹ᤃ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤧᤳᤋᤡᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤀᤠ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤗᤥ॥
JOH 13:20 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤐᤠᤱᤄᤢᤱᤛᤡᤱᤒᤠᤜᤠ᤹ ᤗᤠᤱᤍᤠ᤺ᤰᤋᤢᤛᤡ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤗᤠᤱᤍᤠ᤺ᤰᤁᤠ. ᤂᤧᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤧᤴ ᤗᤠᤱᤍᤠ᤺ᤰᤋᤢ᤹ᤖᤥ॥”
JOH 13:21 ᤕᤧᤛᤢᤖᤧ ᤂᤧᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤁᤢᤕᤥ᤺ᤶ ᤐᤢ᤹ᤖᤧᤖ ᤀᤰᤂᤣᤗ᤹ᤖᤡᤰ ᤀᤡᤱᤓᤥ᤺ᤛᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”
JOH 13:22 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤜᤠ᤺ᤳᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤀᤡ ᤗ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤥᤔᤧᤔᤧᤳᤇᤡᤱ॥
JOH 13:23 ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤎᤡᤰ ᤁᤢᤒᤣᤛᤠᤱ ᤂᤧ᤺ᤶᤛᤡᤱᤅᤠᤱ ᤕᤢᤅᤧᤖᤥ॥
JOH 13:24 ᤛᤡᤔᤥᤏ ᤐᤋᤪᤢᤛᤖᤧ ᤂᤧᤴ ᤜᤢ᤹ᤛᤠᤶᤒᤠᤴ ᤂᤢᤏᤧ᤹ ᤜᤠ᤺ᤵᤐᤣ ᤑᤠ᤹ᤀᤠᤱ ᤛᤣ᤺ᤴᤍᤥ᤺ᤛᤧ᤹ ᤗ᤹ᤖᤡᤰ ᤜᤢᤰᤆᤠ᤺ᤸᤁᤡ᤺ᤸᤗᤧ ᤔᤡᤰᤛᤣ᤺ᤴ ᤐᤡᤖᤢᤖᤥ॥
JOH 13:25 ᤜᤧᤰᤁᤣ᤺ᤸᤗᤧ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤕᤧᤛᤢᤀᤥ ᤂᤧ᤺ᤶᤛᤡᤱᤗ ᤛᤣ᤺ᤴᤍᤥᤛᤢ. “ᤍᤠᤱᤒᤣ ᤂᤧᤱᤃ ᤜᤠ᤺ᤳᤏᤧᤒᤣ᥅”
JOH 13:26 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤁᤴ ᤂᤖᤧ᤺ᤱᤅᤡᤸᤗᤧ ᤁᤢᤄᤧ᤺ᤱᤅᤡᤴ ᤂᤥᤷᤕᤠᤀᤥ ᤏᤡ᤺ᤵᤛᤢᤱᤅᤠᤱ ᤐᤡᤖᤢᤱᤒᤠ ᤔᤏᤠ᤺ᤴᤏᤧᤖᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤖᤧ᤺ᤱᤅᤡᤸᤗᤧ ᤁᤢᤄᤧ᤺ᤱᤅᤡᤴ ᤏᤡ᤺ᤵᤛᤢᤀᤠᤱ ᤛᤡᤔᤥᤏᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤧᤴ ᤐᤡᤖᤢ॥
JOH 13:27 ᤕᤜᤢᤍᤠ᤺ᤸᤗᤧ ᤂᤧᤴ ᤋᤠ᤺ᤰᤋᤢᤏᤠᤔᤧ᤺ᤴᤏᤣ ᤔᤠᤑᤧᤴᤛᤠᤶᤔᤡᤸᤗᤧ ᤂᤧᤴ ᤕᤢᤰᤋᤢᤖᤥ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤧᤔᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤘᤠ᤹. ᤂᤧᤴ ᤜᤠᤖᤠᤀᤣ ᤆᤥᤃᤧ᤹ᤀᤥ॥”
JOH 13:28 ᤁᤖ ᤂᤧᤵᤔᤥ ᤆᤠᤈᤠᤀᤡ ᤁᤧᤕᤢᤱᤒᤠᤜᤠ᤹ᤖᤧ ᤕᤧᤛᤢᤖᤧ ᤜᤧᤰᤁᤣ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
JOH 13:29 ᤕᤜᤢᤍᤠ᤺ᤱᤃ ᤕᤠᤱ ᤕᤠᤱᤔᤠ ᤛᤢ᤺ᤰᤘᤠ ᤁᤧᤃᤢᤒᤠ ᤘᤕᤧᤒᤠᤸᤗᤧ ᤛᤠᤓᤠᤱᤈᤠᤀᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤀᤡᤱᤔᤠ ᤀᤡᤃᤪ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤢᤈᤠ ᤜᤠ᤺ᤵᤔᤠᤛᤡ ᤑᤠ᤹ᤀᤠᤱ ᤕᤧᤛᤢᤖᤧ ᤔᤧᤳᤋᤢᤒᤠᤒᤡᤗᤠ ᤗ᤹ᤖᤡᤰ ᤁᤢᤓᤠᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥
JOH 13:30 ᤂᤖᤧ᤺ᤱᤅᤡᤴ ᤆᤏᤢᤔᤧ᤺ᤴᤏᤣ ᤕᤜᤢᤍᤠ᤺ᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤂᤠᤔᤠᤰᤗᤢᤶᤔᤥ ᤗ᤺ᤴᤍᤧ ᤐᤣᤖᤥ॥
JOH 13:31 ᤕᤜᤢᤍᤠ᤺ᤴ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤀᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤠᤔᤡᤔᤡᤍᤡᤱ ᤐᤥ᤺ᤱᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤀᤥ ᤔᤡᤔᤡᤍᤡᤱ ᤐᤥ᤺ᤱᤗᤥ॥
JOH 13:32 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛ᤻ᤛᤠ᤺ᤀᤥ ᤔᤡᤔᤡᤍᤡᤱ ᤐᤥ᤺ᤱᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤔᤡᤔᤡᤍᤡᤱ ᤆᤥᤃᤢ᤹. ᤂᤧᤴᤏᤠᤱ ᤜᤠᤖᤠᤀᤣ ᤔᤡᤔᤡᤍᤡᤱ ᤆᤥᤃᤢ᤹ᤖᤥ॥
JOH 13:33 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤀᤡᤱᤃᤠ᤹ᤃ ᤂᤡᤏᤡ᤹ᤏᤢ ᤛᤵᤑᤠᤖᤰ ᤘᤠ᤹ᤀᤠᤖᤥ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤵᤔᤡ ᤁᤧᤃᤥ᤺ᤳᤋᤡ᤹ ᤁᤖ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤔᤧᤳᤏᤡᤱ. ‘ᤀᤡᤱᤃᤠ᤹ ᤀᤠᤳᤋᤠᤴ ᤐᤣ᤺ᤰᤁᤠ ᤂᤧᤵᤔᤥ ᤋᤠ᤺ᤔᤠ ᤁᤧᤴᤇᤢᤰᤋᤡᤴ॥’
JOH 13:34 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤢᤛᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥ ᤂᤡᤏᤡ᤹ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥
JOH 13:35 ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤏᤧ ᤑᤠ᤹ᤃᤪ ᤂᤧᤴᤗᤠᤶᤔᤣ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤡᤏᤡ᤹ ᤀᤠᤜᤢ᤹ᤛᤠᤶᤒᤠᤏᤡᤱ ᤑᤠ᤹ᤀᤠᤱ ᤁᤢᤛᤡᤱ ᤁᤧᤶᤏᤡ᤺ᤳᤋᤡ᤹ᤖᤥ॥”
JOH 13:36 ᤛᤡᤔᤥᤏ ᤐᤋᤪᤢᤛᤖᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣ᤺ᤰᤐᤠᤒᤣ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤀᤠᤸᤗᤥ ᤋᤡᤶᤔᤠ ᤁᤧᤴᤇᤢᤰᤁᤠᤴᤗᤥ. ᤁᤖ ᤕᤠᤱᤛᤡᤃ ᤀᤡᤱᤃᤠ᤹ ᤁᤧᤍᤡᤶᤔᤠ᤹ᤖᤥ॥”
JOH 13:37 ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤌᤣᤀᤠᤱ ᤀᤠᤸᤗᤥ ᤋᤡᤶᤔᤠ ᤔᤧᤛᤢᤰᤏᤧᤴᤒᤣ᥅ ᤂᤧᤏᤧ᤹ ᤁᤧᤗᤠᤃᤡ ᤀᤡᤱᤃᤠ᤹ ᤀᤠᤸᤗᤥ ᤛᤡ᤺ᤔᤠᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥”
JOH 13:38 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤀᤡᤱᤃᤠ᤹ ᤀᤠᤗᤠᤃᤡ ᤛᤡ᤺ᤔᤠ ᤕᤠᤖᤡᤵ ᤁᤧᤘᤠ᤹ᤒᤡ᥅ ᤀᤡᤱᤃᤠ᤹ ᤛᤧᤰᤂᤠ ᤔᤧᤳᤏᤧ᤹. ᤀᤡᤱᤘᤠ ᤁᤠ᤺ᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”
JOH 14:1 ᤕᤧᤛᤢᤖᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤀᤠᤱ ᤕᤠᤵᤔᤡ ᤏᤛᤠ᤺ᤴ ᤀᤠᤈᤥᤃᤧᤶᤔᤧ᤹ᤀᤥ॥
JOH 14:2 ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤡᤶᤔᤥᤃ ᤕᤖᤡᤰ ᤕᤠᤰᤑᤠᤱᤜᤠ᤹ ᤔᤧᤏᤧ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤕᤢᤱᤍᤧᤴ ᤕᤠᤖᤡᤵ ᤆᤥ᤺ᤰᤛᤧ ᤐᤣ᤺ᤰᤁᤠᤖ ᤐᤳᤋᤠᤖᤥ॥ ᤂᤧᤴ ᤜᤥ᤺ᤵᤋᤧᤸᤗᤧᤃ ᤀᤡᤱᤃᤠ᤹ ᤜᤧᤰᤁᤣ ᤔᤧᤔᤧᤳᤏᤡᤱᤅᤡᤶᤒᤠ ᤘᤕᤧᤖᤥ॥
JOH 14:3 ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤣ᤺ᤰᤁᤠᤀᤠᤱ ᤂᤡᤏᤡ᤹ ᤗᤠᤃᤡ ᤕᤢᤱᤍᤧᤴ ᤕᤠᤖᤡᤵ ᤆᤥᤃᤢᤱᤅᤠᤱ ᤕᤠᤶᤔᤥ ᤕᤢ᤺ᤀᤠ ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤋᤣ᤹ᤏᤡᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤳᤋᤡ ᤘᤠ᤹ᤀᤠ ᤂᤧᤵᤔᤥ ᤂᤡᤏᤡ᤹ᤀᤠᤱ ᤁᤧᤘᤕᤡ᤹ᤖᤥ॥
JOH 14:4 ᤀᤡᤱᤃᤠ᤹ ᤐᤣ᤺ᤰᤁᤠᤖ ᤐᤳᤋᤠᤒᤠ ᤗᤠᤶᤔᤡᤱᤃ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤖᤥ॥”
JOH 14:5 ᤌᤥᤔᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤍᤠᤱᤒᤣ. ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣ᤺ᤰᤗ ᤁᤧᤒᤳ ᤂᤧᤴ ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴ. ᤜᤧᤰᤁᤣ᤺ᤸᤗᤧ ᤀᤠᤏᤡᤃᤧ ᤂᤧᤴ ᤗᤠᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤒᤣ᥅”
JOH 14:6 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤗᤠᤶ. ᤛᤧᤰᤂᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤡᤱᤃᤠ᤹ᤀᤣᤖᤥ॥ ᤀᤠᤳᤋᤡᤴᤏᤠᤱ ᤀᤡᤱᤃᤠ᤹ ᤔᤧ᤺ᤴᤏᤣᤃ ᤐᤠᤏᤢᤍᤡᤱ ᤐᤠ᤺ᤸᤗᤥ ᤁᤧᤵᤔᤠ ᤔᤧᤛᤢᤰᤏᤧᤴᤗᤥ॥
JOH 14:7 ᤂᤡᤏᤡ᤹ ᤛᤧᤰᤂᤠᤀᤣ ᤕᤠᤵᤔᤡ ᤁᤢᤛᤡᤱ ᤁᤧᤏᤡ᤺ᤳᤋᤡᤀᤠᤱ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤀᤠᤸᤗᤠᤱᤎᤥ ᤂᤢᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥”
JOH 14:8 ᤑᤡᤗᤡᤐᤖᤧ ᤐᤠ᤺ᤳᤋᤢ. “ᤍᤠᤱᤒᤣ. ᤐᤠᤏᤢᤍᤡᤱ ᤐᤠ᤺ᤴ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹ᤀᤥ ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡᤱᤘᤠ᤹ ᤋᤠ᤺ᤖᤥ॥”
JOH 14:9 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤔᤧ᤺ᤶᤒᤧ ᤑᤡᤗᤡᤵᤐᤣ. ᤀᤡᤱᤃᤠ᤹ᤃ ᤀᤠᤸᤗᤥ ᤌᤠᤖᤡᤰ ᤂᤡᤏᤡ᤹ᤏᤢ ᤛᤥᤖᤡᤰ ᤘᤕᤠᤱᤛᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤁᤧᤴᤏᤡ᤺ᤳᤋᤠᤴᤒᤡ᥅ ᤜᤠ᤺ᤳᤗᤧ ᤀᤡᤱᤃᤠ᤹ ᤏᤡᤛᤠᤱᤅᤠᤱ ᤘᤠ᤹. ᤂᤧᤸᤗᤧᤃ ᤐᤠᤏᤢᤍᤡᤱ ᤐᤠ᤺ᤴᤏᤠᤱ ᤏᤡ᤺ᤛᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤐᤠᤏᤢᤍᤡᤱ ᤐᤠ᤺ᤴ ᤀᤥᤛᤣ᤺ᤴᤀᤠᤎᤠᤰᤋᤧ᤹ ᤗ᤹ᤖᤡᤰ ᤁᤧᤒᤠ᤺ᤳᤋᤢᤒᤠᤒᤣ᥅
JOH 14:10 ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤀᤥ ᤘᤠ᤹ᤀᤠ. ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤀᤡᤱᤃᤠ᤹ᤀᤥ ᤘᤠ᤹ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤴᤒᤡ᥅ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤈᤠᤰᤜᤠ᤹ᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤡᤴ ᤔᤧ᤺ᤴᤗᤥ. ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧᤀᤣ ᤀᤡᤱᤃᤠ᤹ᤀᤥᤗᤠᤶ ᤁᤢᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠᤖᤥ॥”
JOH 14:11 ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤀᤥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤀᤡᤱᤃᤠ᤹ᤀᤥ ᤘᤠ᤹ ᤗ᤹ᤖᤡᤰ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤆᤥᤃᤢᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ॥
JOH 14:12 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤁᤠ. ᤂᤧᤸᤗᤧᤃ ᤀᤡᤱᤃᤠ᤹ ᤆᤥᤃᤢᤱᤒᤠᤴᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤁᤠᤖ ᤐᤳᤋᤠᤖᤥ॥
JOH 14:13 ᤂᤡᤏᤡ᤹ ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥ ᤁᤢᤛ᤻ᤛᤠ᤺ᤀᤥᤗᤠᤶ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤴ ᤆᤥᤃᤢᤱᤗᤥ॥
JOH 14:14 ᤀᤡᤱᤃᤠ᤹ ᤀᤠᤔᤡᤱᤅᤥ ᤌᤣ᤺ᤴ ᤁᤧᤏᤠ᤺ᤰᤋᤢᤶᤛᤠᤱ ᤂᤧᤴ ᤀᤡᤱᤃᤠ᤹ ᤆᤥᤃᤢᤱᤗᤥ॥
JOH 14:15 “ᤀᤡᤱᤃᤠ᤹ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡ᤹ᤏᤧ ᤑᤠ᤹ᤃᤪ ᤀᤠᤀᤡᤱᤈᤠ᤺ᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥
JOH 14:16 ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤴᤏᤢ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤃ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤖ ᤑᤠ᤹ᤀᤠᤱ ᤘᤣ᤹ ᤁᤢᤓᤠ᤹ ᤁᤧᤒᤡᤒᤠᤎᤡᤰ ᤁᤧᤒᤡᤖᤡ᤹ᤖᤥ॥
JOH 14:17 ᤂᤢᤏᤧ᤹ᤃ ᤁᤠᤰ ᤛᤧᤰᤂᤠᤀᤥ ᤗᤠᤶᤃᤧᤗᤥ᤺ᤒᤠ ᤛᤣᤛᤣᤔᤠᤱᤗᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤂᤥ᤺ᤔᤠ ᤔᤧᤴᤇᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤴᤏᤡ᤺ᤛᤢᤴᤏᤠᤱ ᤁᤢᤛᤡᤱᤅᤠᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤁᤖ ᤂᤡᤏᤡ᤹ᤃ ᤂᤢᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗᤥ ᤂᤢᤏᤧ᤹ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹ ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤕᤧᤶᤔᤥᤀᤠᤱ ᤂᤡᤏᤡ᤹ ᤜᤡᤱᤔᤴᤏᤥ ᤘᤠ᤹ᤖᤥ॥
JOH 14:18 ᤀᤡᤱᤃᤠ᤹ᤃ ᤂᤡᤏᤡ᤹ ᤕᤧᤳᤇᤠᤒᤠ ᤁᤢᤀᤡᤛᤡ᤺ᤰ ᤐᤰᤔᤧᤎᤠᤏᤡᤱᤅᤡᤴᤗᤥ॥ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤢ᤺ᤀᤠᤖᤥ॥
JOH 14:19 ᤛᤵᤑᤠ ᤀᤣᤃᤠᤱᤅᤠᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ. ᤁᤖ ᤂᤡᤏᤡ᤹ᤃ ᤕᤠᤵᤔᤡ ᤁᤧᤏᤡ᤺ᤛᤡ᤹ᤖᤥ॥ ᤀᤡᤱᤃᤠ᤹ ᤜᤡᤱᤅᤠ. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤁᤧᤜᤡᤅᤡ᤹ᤖᤥ॥
JOH 14:20 ᤂᤧᤴ ᤕᤧᤴᤏᤥ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤀᤥ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤱᤃᤠ᤹ᤀᤥ ᤁᤧᤘᤕᤡ᤹ᤀᤠᤱ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤠ᤹ᤀᤠᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
JOH 14:21 ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤀᤡᤱᤈᤠ᤺ᤱᤜᤠ᤹ ᤂᤧᤵᤛᤢᤀᤠᤱ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤀᤡᤱᤃᤠ᤹ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤧᤱᤃ ᤒᤠ ᤂᤧᤴᤏᤣᤖᤥ॥ ᤜᤠ᤺ᤳᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠ ᤂᤧᤱᤃ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤗᤢᤱᤔᤠ᤹ ᤋᤢᤰᤋᤢ᤹. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤢᤱᤅᤠᤱ ᤂᤧᤸᤗᤥ ᤀᤥᤛᤣ᤺ᤴᤎᤠᤰᤛᤡᤱᤅᤠᤖᤥ॥”
JOH 14:22 ᤜᤧᤰᤁᤩᤠᤱ ᤕᤜᤢᤍᤠ᤺ᤸᤗᤧ (ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡᤱᤃ ᤔᤧ᤺ᤴᤗᤥ) ᤔᤧᤳᤋᤢ. “ᤁᤖ ᤍᤠᤱᤒᤣ. ᤘᤣ᤹ ᤕᤖᤡᤰ ᤔᤏᤠᤜᤠ᤹ᤏᤢᤃ ᤀᤥᤛᤣ᤺ᤴᤃᤧᤴᤎᤠᤰᤛᤡᤱᤅᤡᤴ ᤁᤖ ᤀᤠᤏᤡᤃᤧᤏᤢᤖᤰ ᤌᤣᤀᤠᤱ ᤀᤥᤛᤣ᤺ᤴᤎᤠᤰᤛᤡᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤠᤒᤣ᥅”
JOH 14:23 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤜᤠ᤺ᤳᤗᤧ ᤀᤡᤱᤃᤠ᤹ ᤔᤡ᤺ᤶᤈᤡ ᤔᤧᤳᤋᤠ. ᤂᤧᤸᤗᤧᤃ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹ᤖᤥ॥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤴ ᤔᤡ᤺ᤶᤈᤡ ᤔᤧᤳᤋᤢ᤹ ᤜᤧᤰᤁᤩᤠᤱ ᤀᤠᤴᤇᤡᤃᤧ ᤋᤠ᤺ᤛᤡᤃᤧᤀᤠᤱ ᤂᤧᤴᤏᤢ ᤘᤠ᤹ᤛᤡᤃᤧᤖᤥ॥
JOH 14:24 ᤜᤠ᤺ᤳᤗᤧ ᤀᤡᤱᤃᤠ᤹ ᤔᤡ᤺ᤶᤈᤡ ᤔᤧᤔᤧᤳᤋᤠᤴ. ᤂᤧᤸᤗᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴᤗᤥ॥ ᤁᤴ ᤁᤧᤄᤧᤵᤛᤢᤶᤒᤠ ᤀᤠᤒᤠ᤺ᤴᤈᤠᤰᤁᤡᤱᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤡᤴ ᤔᤧ᤺ᤴᤗᤥ. ᤁᤖ ᤕᤠᤵᤔᤡ ᤁᤧᤒᤠᤱᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧᤴᤏᤧᤖᤥ॥
JOH 14:25 ᤁᤴ ᤁᤠᤰ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧᤛᤠ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ
JOH 14:26 ᤁᤖ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤔᤡᤱᤅᤥ ᤐᤠᤱᤔᤠ ᤀᤡ᤺ᤳᤋᤢᤒᤠ ᤁᤢᤓᤠ᤹ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤧᤜᤢ᤹ᤖᤡᤀᤠᤱ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤛᤥᤀᤥ ᤋᤠᤖᤢ ᤁᤧᤒᤡᤖᤡ᤹ᤖᤥ॥
JOH 14:27 ᤀᤡᤱᤃᤠ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤏᤢ ᤐᤰᤌᤠᤱᤗᤥ. ᤀᤠᤛᤏᤠᤖᤢᤱᤅᤡᤴ ᤂᤡᤏᤡ᤹ ᤐᤡᤏᤡᤱᤗᤥ॥ ᤁᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤧᤒᤡᤖᤡᤒᤠ ᤜᤧᤰᤁᤣᤃ ᤔᤧᤒᤡᤏᤡᤱᤅᤡᤴᤗᤥ॥ ᤂᤡᤏᤡ᤹ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥
JOH 14:28 ᤀᤡᤱᤃᤠ᤹ ᤐᤣ᤺ᤰᤁᤠᤖ ᤐᤳᤋᤠ ᤜᤧᤰᤁᤩᤠᤱ ᤕᤠᤶᤔᤥ ᤂᤡᤏᤡ᤹ᤀᤥ ᤏᤢ᤺ᤱᤅᤠ ᤋᤠᤀᤠᤒᤠᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤱᤅᤠ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ᤃ ᤁᤧᤛ᤺ᤳᤋᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤆᤥ᤺ᤰᤗᤥ॥
JOH 14:29 ᤁᤴ ᤐᤠ᤺ᤴᤜᤠ᤹ ᤁᤧᤳᤋᤡᤸᤗᤧ ᤏᤛᤠ᤺ᤴ ᤕᤠᤵᤔᤡ ᤀᤠᤃᤧᤈᤥᤃᤡᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ ᤀᤠᤸᤗᤥᤛᤠ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥
JOH 14:30 ᤀᤠᤸᤗ ᤂᤡᤏᤡ᤹ᤏᤢ ᤕᤖᤡᤰ ᤔᤧᤒᤠ᤺ᤳᤋᤠᤴ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤴ ᤑᤧᤴᤗ ᤐᤳᤗᤥ॥ ᤀᤠᤛᤶᤍᤠᤱ ᤂᤧᤸᤗᤧ ᤌᤣᤀᤠᤱ ᤔᤢᤰᤛᤠᤶ ᤔᤧᤃᤳᤋᤢᤴᤗᤥ.
JOH 14:31 ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤗᤧ ᤐᤠᤏᤢᤍᤡᤱ ᤐᤠ᤺ᤴ ᤗᤢᤱᤔᤠ᤹ ᤋᤢᤰᤋᤢᤱᤒᤠᤴ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤐᤡᤖᤠᤱᤒᤠ ᤀᤡᤱᤈᤠ᤺ᤱᤜᤠ᤹ ᤁᤢᤀᤡᤛᤡ᤺ᤰ ᤆᤥᤃᤢᤱᤗᤥ॥ ᤀᤠᤸᤗ ᤁᤵᤔᤥᤗᤠᤶ ᤐᤣᤃᤡᤖᤥ॥”
JOH 15:1 ᤕᤧᤛᤢᤖᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤛᤧᤰᤂᤠᤛ᤻ᤔᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤀᤠᤖᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤃ ᤀᤡᤰᤔ᤺ᤒᤠᤖᤥ॥
JOH 15:2 ᤀᤡᤱᤃᤠ᤹ᤀᤥ ᤁᤢᤈᤠ᤹ ᤔᤧᤴᤎᤥ᤺ᤰᤔᤏᤠᤒᤠ ᤁᤠᤰ ᤐᤥᤖᤠ᤺ᤰᤜᤠ᤹ᤃ ᤆᤧᤵᤋᤢᤍᤣ᤺ᤛᤢ᤹ ᤜᤧᤰᤁᤩᤠᤱ ᤁᤢᤈᤠ᤹ ᤁᤧᤎᤥ᤺ᤰᤐᤠᤜᤠ᤹ᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤁᤢᤈᤠ᤹ ᤌᤥ᤺ᤰᤗ ᤑᤠ᤹ᤀᤠᤱ ᤁᤢᤒᤥᤖᤠ᤺ᤰᤜᤠ᤹ ᤆᤧᤵᤋᤢᤀᤠᤱ ᤛᤠ᤺ᤰᤋᤢᤖᤥ॥
JOH 15:3 ᤐᤥᤖᤠ᤺ᤰᤜᤠ᤹ ᤆᤧᤵᤔᤠᤀᤠᤱ ᤛᤠ᤺ᤰᤔᤏᤠᤒᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤸᤗᤧ ᤋᤃᤡᤛᤠ ᤂᤡᤏᤡ᤹ ᤛᤣᤛᤣ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
JOH 15:4 ᤀᤡᤱᤃᤠ᤹ᤀᤥ ᤘᤕᤧᤶᤔᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤠ᤹ᤀᤠᤖᤥ॥ ᤛᤡᤱ ᤐᤥᤖᤠ᤺ᤰᤁᤡᤴ ᤆᤧᤵᤔᤠᤀᤠᤱ ᤁᤢᤒᤢᤱᤔᤥᤗᤠᤶ ᤛᤧᤶᤔᤠᤏᤧ ᤑᤠ᤹ᤃᤪ ᤂᤧ᤹ᤕᤥ ᤁᤢᤈᤠ᤹ ᤌᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ᤀᤥ ᤔᤧᤴᤘᤠ᤹ᤀᤣ ᤁᤢᤈᤠ᤹ ᤑᤶᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥
JOH 15:5 ᤀᤡᤱᤃᤠ᤹ᤃ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤀᤠᤖᤥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤀᤠᤒᤥᤖᤠ᤺ᤰᤏᤡᤱᤗᤥ॥ ᤂᤡᤏᤡ᤹ ᤀᤡᤱᤃᤠ᤹ᤀᤥ ᤁᤧᤘᤕᤡ᤹ᤀᤠᤱ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤠᤸᤗᤛᤠᤱ ᤕᤖᤡᤰ ᤁᤢᤈᤠ᤹ ᤑᤶᤔᤠ ᤁᤧᤛᤢᤰᤋᤢᤶᤗᤥ. ᤁᤖ ᤀᤡᤱᤃᤠ᤹ᤀᤥ ᤔᤧᤴᤘᤠ᤹ᤀᤣ ᤌᤣᤀᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥
JOH 15:6 ᤀᤡᤱᤃᤠ᤹ᤀᤥ ᤔᤧᤴᤘᤠ᤹ᤔᤏᤠᤒᤠᤱᤃ ᤆᤧᤵᤔᤠᤀᤠᤱ ᤗᤠᤵᤑᤢᤔᤏᤠᤒᤠ ᤁᤧᤜᤣᤒᤠᤀᤠᤱ ᤁᤧᤛᤡ᤺ᤒᤠ ᤛᤡᤱ ᤐᤥᤖᤠ᤺ᤰ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥ ᤂᤧᤱᤃ ᤔᤏᤠᤜᤠ᤹ᤖᤧ ᤔᤧᤄᤵᤛᤢᤀᤠᤱ ᤔᤡᤀᤥ ᤔᤧᤜᤠ᤺ᤴᤍᤢᤖᤥ॥
JOH 15:7 ᤂᤡᤏᤡ᤹ ᤀᤡᤱᤃᤠ᤹ᤀᤥ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤡᤖᤠ᤹ ᤁᤧᤎᤠᤱᤒᤠ ᤐᤠ᤺ᤴᤜᤠ᤹ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤂᤡᤏᤡ᤹ ᤁᤧᤄᤥ᤺ᤛᤢᤶᤗᤥ॥
JOH 15:8 ᤕᤖᤡᤰ ᤁᤢᤈᤠ᤹ ᤁᤧᤓᤳᤇᤢᤶᤏᤧ ᤑᤠ᤹ᤃᤪ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱ ᤁᤧᤈᤥᤃᤢᤶᤔᤠᤱ ᤂᤡᤏᤡ᤹ ᤛᤧᤰᤂᤠᤛ᤻ᤔᤠ ᤀᤠᤜᤢ᤹ᤛᤠᤶᤒᤠ ᤁᤧᤒᤥ᤺ᤰᤂᤡ᤹ᤖᤥ॥
JOH 15:9 ᤐᤠᤏᤢᤍᤡᤱ ᤐᤠ᤺ᤸᤗᤧ ᤗᤢᤱᤔᤠ᤹ ᤋᤢᤰᤋᤠᤱᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤀᤠᤔᤡ᤺ᤶᤈᤡᤀᤥ ᤘᤕᤧᤶᤔᤧ᤹ᤀᤥ॥
JOH 15:10 ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤀᤡᤱᤃᤠ᤹ ᤁᤢᤔᤡ᤺ᤶᤈᤡᤀᤥ ᤘᤠ᤹ᤀᤠᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤀᤠᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤔᤡ᤺ᤶᤈᤡᤀᤥ ᤁᤧᤘᤕᤡᤒᤠ ᤐᤥ᤺ᤱᤗᤥ॥
JOH 15:11 ᤀᤠᤛᤡᤰ ᤛᤶᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤛᤡᤰ ᤐᤛᤶᤛᤶᤗ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤒᤠᤖᤥ॥
JOH 15:12 ᤀᤠᤸᤗ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥
JOH 15:13 ᤆᤢᤶᤔᤡᤸᤗᤧ ᤁᤢᤗᤠᤃᤡ ᤜᤡᤱᤔᤴ ᤐᤡᤔᤠᤴᤏᤣ ᤕᤶᤒᤠ ᤔᤡ᤺ᤶᤈᤡᤖᤥ. ᤁᤴᤏᤢ᤺ᤸᤗᤧ ᤕᤶᤒᤠ ᤔᤡ᤺ᤶᤈᤡ ᤘᤣ᤹ ᤜᤥ᤺ᤵᤗᤥ॥
JOH 15:14 ᤂᤡᤏᤡ᤹ ᤐᤡᤏᤡᤱᤒᤠ ᤀᤠᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤴᤈᤢᤶ ᤁᤧᤒᤥ᤺ᤰᤂᤡᤖᤥ॥
JOH 15:15 ᤀᤠᤸᤗᤠᤱᤎᤥ ᤀᤡᤱᤃᤠ᤹ ᤛᤣᤘᤠᤖᤥᤒᤠ ᤔᤧᤔᤧᤳᤏᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤛᤣᤘᤠᤖᤥᤒᤠᤸᤗᤧ ᤔᤧᤏᤡ᤺ᤛᤢᤴᤗᤥ॥ ᤁᤖ ᤂᤡᤏᤡ᤹ᤃ ᤀᤠᤴᤈᤢᤶᤏᤡᤱ ᤑᤠ᤹ᤀᤠᤱ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤧᤳᤋᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤖᤥ॥
JOH 15:16 ᤂᤡᤏᤡ᤹ ᤕᤠᤵᤔᤡ ᤁᤧᤴᤇᤣᤃᤡᤴ ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤛᤣ᤺ᤰᤏᤡᤱ. ᤜᤧᤰᤁᤩᤠᤱ ᤐᤣᤃᤧᤶᤔᤧ᤹ᤀᤠᤱ ᤛᤍᤠᤍᤡᤱ ᤁᤧᤒᤵᤐᤠ ᤁᤢᤈᤠ᤹ ᤑᤳᤇᤧᤶᤔᤧ᤹ ᤑᤠ᤹ᤀᤠᤱ ᤛᤣ᤺ᤰᤕᤢᤰ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤧᤒᤡᤖᤡ᤹ᤖᤥ॥
JOH 15:17 ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥”
JOH 15:18 “ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡᤸᤗᤧ ᤂᤧᤴᤏᤢ ᤋᤃᤡ ᤀᤡᤱᤃᤠ᤹ ᤔᤧᤈᤡ᤺ᤳᤋᤠᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
JOH 15:19 ᤂᤡᤏᤡ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤘᤕᤡᤸᤗᤧᤃ ᤀᤠᤒᤠᤅᤣ ᤂᤢᤏᤡ᤹ ᤔᤏᤠ ᤜᤧᤰᤁᤣᤀᤣ ᤗᤢᤱᤔᤠ᤹ ᤁᤧᤶᤍᤢᤰᤋᤡ᤹ᤔᤧᤴ. ᤁᤖ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤏᤡᤱᤗᤥ॥ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤡᤱᤃᤠ᤹ ᤛᤣ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤡ᤺ᤳᤋᤡ᤹ᤖᤥ॥
JOH 15:20 ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤀᤠᤒᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ ‘ᤛᤣᤘᤠᤖᤥᤒᤠᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤧ᤺ᤴᤗᤥ॥’ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ᤀᤣ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹ᤖᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤘᤕᤧᤸᤗᤧᤃ ᤂᤡᤏᤡ᤹ ᤏᤡᤛᤠᤶᤔᤡᤴᤏᤠᤱ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ᤖᤥ॥
JOH 15:21 ᤂᤡᤏᤡ᤹ᤃ ᤀᤡᤱᤃᤠ᤹ᤀᤡᤴ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤔᤧᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤁᤧᤶᤔᤧᤳᤋᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
JOH 15:22 ᤀᤡᤱᤃᤠ᤹ ᤋᤩᤠᤱᤅᤠᤱ ᤂᤧᤱᤜᤠ᤹ ᤗᤠᤕᤥᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤶᤔᤧᤳᤇᤡᤱᤒᤠᤴᤏᤡᤸᤗᤧᤃ ᤗᤠᤕᤥᤖᤧᤴ ᤀᤠᤵᤋᤡᤰ ᤔᤧᤱᤄᤥ᤺ᤛᤢᤶᤒᤠᤖᤥ॥ ᤁᤖ ᤀᤠᤸᤗᤃ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤗᤠᤶᤛᤡᤱᤔᤠ ᤔᤧᤱᤄᤥ᤺ᤛᤢᤴᤗᤥ॥
JOH 15:23 ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤆᤡ᤺ᤳᤋᤠ. ᤂᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤆᤡ᤺ᤳᤋᤢ᤹ᤖᤥ॥
JOH 15:24 ᤀᤡᤱᤃᤠ᤹ ᤘᤣ᤹ᤜᤠ᤹ᤖᤧ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤒᤠ ᤕᤠ᤺ᤶᤒᤰ ᤆᤥᤃᤢᤱ॥ ᤂᤧᤱᤜᤠ᤹ᤖᤧ ᤂᤧᤴ ᤐᤠ᤺ᤴᤜᤠ᤹ ᤔᤧᤴᤏᤡ᤺ᤛᤢᤴᤏᤡᤸᤗᤧᤃ ᤂᤧᤱᤜᤠ᤹ ᤗᤠᤕᤥᤖᤧ ᤀᤠᤵᤋᤡᤰ ᤁᤧᤄᤥ᤺ᤒᤠ ᤔᤧᤶᤒᤥ᤺ᤰᤂᤧᤶᤒᤠ ᤘᤕᤧᤖᤥ॥ ᤁᤖ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤛᤠᤱ ᤐᤠᤏᤢᤍᤡᤱ ᤀᤠᤶᤒᤠ ᤏᤢ ᤀᤡᤱᤃᤠ᤹ ᤏᤧᤵᤔᤠᤱ ᤔᤧᤈᤡ᤺ᤳᤋᤧᤳᤇᤡᤃᤧᤀᤠᤱ ᤘᤠ᤹ᤖᤥ॥
JOH 15:25 ᤁᤖ ᤁᤱᤃ ᤂᤧᤱᤜᤠ᤹ᤖᤧ ᤌᤣᤏᤠᤎᤣ ᤔᤧᤈᤡ᤺ᤳᤋᤠᤱᤒᤠᤖᤥ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤁᤧᤖᤧᤒᤠᤖᤥ॥
JOH 15:26 ᤀᤠᤸᤗ ᤐᤠᤏᤢᤍᤡᤱ ᤐᤠ᤺ᤗᤠᤶ ᤁᤢᤓᤠ᤹ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤐᤠᤱᤄᤢᤱᤗᤥ॥ ᤂᤢᤏᤧ᤹ᤃ ᤐᤠᤏᤢᤍᤡᤱ ᤐᤠ᤺ᤗᤠᤶᤒᤠ ᤁᤧᤕᤢ᤺ᤒᤠ ᤛᤧᤰᤂᤠᤀᤥ ᤗᤠᤶᤃᤧᤗᤥ᤺ᤒᤠ ᤛᤣᤛᤣᤔᤠᤱᤗᤥ. ᤂᤢᤏᤧ᤹ᤀᤣ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤡ᤹ᤖᤥ॥
JOH 15:27 ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤢᤶᤗᤀᤣ ᤐᤥ᤺ᤱᤗᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤡᤱᤃᤠ᤹ᤏᤢ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤀᤣ ᤁᤧᤘᤕᤡᤖᤥ॥”
JOH 16:1 ᤕᤧᤛᤢᤖᤧ ᤀᤠᤸᤗᤛᤠᤱ ᤔᤧᤳᤋᤢᤛᤡ. “ᤕᤠᤵᤔᤡ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤴᤗᤧᤖᤢᤶᤔᤡᤴᤗ ᤑᤠ᤹ᤀᤠᤱ ᤋᤃᤡᤛᤠ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤗ ᤐᤳᤋᤠᤖᤥ॥
JOH 16:2 ᤂᤡᤏᤡ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤁᤧᤶᤗ᤺ᤳᤋᤡ ᤁᤧᤶᤍᤣ᤺ᤛᤡ᤹॥ ᤜᤧᤰᤁᤩᤠᤱ ᤀᤰᤋᤱᤒᤠ ᤕᤧᤶᤔᤠᤱ ᤋᤠᤖ ᤐᤳ. ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤛᤧᤖᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤶᤒᤠᤖ ᤐᤳᤇᤡᤃᤧ ᤗ᤹ᤖᤡᤰ ᤔᤧᤀᤡ᤺ᤳᤋᤢᤖᤥ॥
JOH 16:3 ᤂᤧᤱᤜᤠ᤹ᤖᤧ ᤐᤠᤏᤢᤍᤡᤱ ᤐᤠ᤺ᤴ ᤀᤡᤃᤪ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤔᤧᤴᤏᤡ᤺ᤳᤋᤠᤴᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤜᤧᤰᤁᤣ ᤁᤧᤶᤔᤧᤳᤋᤡ᤹ᤖᤥ॥
JOH 16:4 ᤁᤴ ᤐᤠ᤺ᤴᤜᤠ᤹ ᤋᤠ᤺ᤴᤍᤡ ᤂᤡᤏᤡ᤹ᤀᤥ ᤁᤧᤳᤋᤡᤸᤗᤧ ᤀᤡᤱᤃᤠ᤹ ᤛᤠᤶᤍᤡᤱ ᤐᤡᤏᤡᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤰᤂᤣ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤋᤃᤡᤃ ᤁᤴ ᤐᤠ᤺ᤴᤜᤠ᤹ ᤔᤧᤔᤧᤳᤏᤡᤱᤅᤡᤴᤗᤥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ᤏᤢᤀᤣ ᤘᤕᤠᤱᤗᤥ॥”
JOH 16:5 “ᤁᤖ ᤀᤠᤸᤗ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤸᤗᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖ ᤐᤳᤋᤠ ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤀᤠᤳᤋᤠᤴ ᤁᤧᤒᤣ᤺ᤰᤗ ᤁᤧᤒᤵᤐᤣ ᤑᤠ᤹ᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤛᤣ᤺ᤴᤃᤧᤴᤍᤥ᤺ᤛᤡᤴᤗᤥ॥
JOH 16:6 ᤀᤡᤱᤃᤠ᤹ ᤜᤧᤰᤁᤣ ᤐᤠ᤺ᤳᤋᤢᤱᤒᤠᤸᤗᤧ ᤂᤡᤏᤡ᤹ ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥
JOH 16:7 ᤁᤖ ᤀᤡᤱᤃᤠ᤹ ᤛᤧᤰᤂᤠ᤺ᤴ ᤔᤧᤳᤏᤡᤱ. ᤀᤡᤱᤃᤠ᤹ᤃ ᤐᤣ᤺ᤰᤁᤠᤒᤠᤴᤏᤣ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤒᤣ᤺ᤰᤁᤠᤴᤏᤧ ᤑᤠ᤹ᤃᤪ ᤁᤢᤓᤠ᤹ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤔᤧᤕᤢᤏᤧᤴᤗᤥ. ᤁᤖ ᤀᤡᤱᤃᤠ᤹ ᤐᤣ᤺ᤰᤁᤠᤀᤠᤱ ᤂᤢᤏᤧ᤹ ᤂᤡᤏᤡ᤹ᤀᤥ ᤐᤠᤱᤄᤢᤱ ᤕᤢ᤺ᤛᤢᤱᤗᤥ॥
JOH 16:8 ᤂᤢᤏᤧ᤹ ᤕᤢ᤺ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤖᤧ ᤁᤢᤕᤠ᤺ᤶᤒᤣᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤏᤡᤔᤠᤴ ᤜᤧᤰᤁᤩᤠᤱ ᤁᤢᤄᤠᤛᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤡᤷᤒᤣ᤺ᤴ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥
JOH 16:9 ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤁᤠᤴᤒᤠᤴᤏᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤗᤠᤕᤥᤖᤥ॥
JOH 16:10 ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤁᤠᤒᤠᤸᤗᤧ ᤛᤠᤶᤕᤥᤏᤡᤒᤠ ᤁᤧᤒᤥ᤺ᤰᤂᤡᤖᤥ. ᤜᤧᤰᤁᤩᤠᤱᤎᤥ ᤂᤡᤏᤡ᤹ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ॥
JOH 16:11 ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤸᤗᤧ ᤁᤢᤄᤠᤛᤧᤴ ᤐᤥ᤺ᤰᤂᤧᤀᤠᤱ ᤘᤠ᤹॥
JOH 16:12 ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤀᤠᤸᤗᤥ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤁᤳᤋᤢᤱᤗᤥ॥
JOH 16:13 ᤁᤖ ᤛᤧᤰᤂᤠᤀᤥ ᤗᤠᤶᤃᤧᤗᤥ᤺ᤒᤠ ᤛᤣᤛᤣᤔᤠᤱᤅᤡᤴ ᤕᤢ᤺ᤀᤠᤱ ᤁᤠᤰ ᤛᤧᤰᤂᤠᤀᤥ ᤗᤠᤶᤃᤧᤗᤥ᤺ᤛᤡ᤹ ᤜᤧᤰᤁᤩᤠᤱ ᤂᤢᤏᤧ᤹ᤃ ᤀᤠᤒᤠᤅᤣ ᤁᤢᤒᤠ᤺ᤴᤜᤠ᤹ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ. ᤁᤖ ᤂᤧᤵᤛᤢᤒᤠ ᤐᤠ᤺ᤴᤜᤠ᤹ᤖᤰ ᤂᤡᤏᤡ᤹ ᤁᤧᤔᤧᤳᤋᤡ᤹ ᤜᤧᤰᤁᤩᤠᤱ ᤋᤠ᤺ᤴᤍᤡ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤁᤧᤔᤧᤳᤋᤡ᤹ᤖᤥ॥
JOH 16:14 ᤂᤢᤏᤧ᤹ᤃ ᤀᤠᤒᤠ᤺ᤴᤜᤠ᤹ ᤀᤡᤱᤃᤠ᤹ᤗᤠᤶ ᤂᤥ᤺ᤛᤢᤀᤠᤱ ᤂᤡᤏᤡ᤹ ᤁᤧᤔᤧᤳᤋᤡᤸᤗᤧ ᤀᤠᤔᤡᤔᤡᤍᤡᤱ ᤆᤥᤃᤢ᤹ᤖᤥ॥
JOH 16:15 ᤁᤠᤰ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤒᤠ᤺ᤴᤜᤠ᤹ ᤀᤡᤱᤃᤠ᤹ᤀᤡᤴᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ᤗᤠᤶᤔᤣ ᤐᤠ᤺ᤴᤜᤠ᤹ ᤋᤣ᤹ᤖᤢᤀᤠᤱ ᤂᤡᤏᤡ᤹ ᤁᤧᤔᤧᤳᤋᤡ᤹ᤖᤥ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠᤖᤥ॥”
JOH 16:16 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ. ᤁᤖ ᤕᤠᤱᤛᤡ ᤛᤵᤑᤠᤀᤠᤱᤃ ᤕᤠᤶᤔᤥ ᤕᤠᤵᤔᤡ ᤁᤧᤏᤡ᤺ᤛᤡ᤹ᤖᤥ॥”
JOH 16:17 ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤍᤠᤱᤒᤠᤸᤗᤧ ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤀᤠᤃᤧᤴᤏᤡ᤺ᤛᤡᤴ ᤁᤖ ᤕᤠᤱᤛᤡ ᤛᤵᤑᤠᤀᤠᤱ ᤕᤠᤶᤔᤥ ᤕᤠᤵᤔᤡ ᤁᤧᤏᤡ᤺ᤛᤡ᤹ᤖᤥ ᤗ᤹ᤖᤡᤰ ᤌᤧᤔᤠ ᤐᤠ᤺ᤳᤋᤢᤒᤠᤒᤣ᥅ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤁᤠᤖ ᤐᤳᤋᤠ ᤗ᤹ᤖᤡᤰ ᤌᤣ ᤐᤠ᤺ᤳᤋᤢᤒᤠᤒᤣ᥅
JOH 16:18 ᤕᤠᤱᤛᤡ ᤛᤵᤑᤠᤀᤠᤱ ᤗ᤹ᤖᤡᤰ ᤂᤢᤏᤧ᤹ ᤌᤣ ᤐᤠ᤺ᤳᤋᤢᤒᤠᤀᤡ᥅ ᤀᤠᤏᤡ᤹ ᤌᤣᤀᤠᤱ ᤁᤢᤛᤡᤱ ᤀᤠᤴᤏᤡ᤺ᤳᤋᤢᤶᤔᤡᤴᤗᤥ॥”
JOH 16:19 ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤓᤠ ᤐᤠ᤺ᤴ ᤛᤣ᤺ᤴᤍᤥ᤺ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤗ᤹ᤖᤡᤰ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤴᤏᤡ᤺ᤛᤡᤴᤗᤥ. ᤁᤖ ᤕᤠᤱᤛᤡ ᤛᤵᤑᤠᤀᤠᤱ ᤕᤠᤶᤔᤥ ᤕᤠᤵᤔᤡ ᤁᤧᤏᤡ᤺ᤛᤡ᤹ᤖᤥ ᤗ᤹ᤖᤡᤰ ᤐᤠ᤺ᤳᤋᤢᤱᤒᤠᤀᤥ ᤂᤡᤏᤡ᤹ ᤛᤣ᤺ᤴᤃᤧᤍᤥ᤺ᤀᤠᤛᤡᤖ ᤁᤧᤒᤳᤇᤡᤒᤡ᥅
JOH 16:20 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤁᤧᤜᤠᤒᤡ᤹. ᤔᤣᤖᤡᤱ ᤁᤧᤎᤰᤋᤡ᤹. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤃ ᤔᤧᤛ᤺ᤳᤗᤥ॥ ᤂᤡᤏᤡ᤹ ᤔᤣᤖᤡᤱ ᤁᤧᤎᤰᤋᤡ᤹. ᤁᤖ ᤂᤡᤏᤡ᤹ ᤔᤣᤖᤡᤱ ᤌᤰᤔᤠᤱᤃ ᤛ᤺ᤵᤔᤠᤀᤥ ᤗᤧᤱᤗᤥ॥
JOH 16:21 ᤂᤧᤴ ᤕᤧᤶᤔᤡᤱᤃ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤕᤠᤱᤄᤢᤒᤠ ᤔᤧᤴᤇᤢᤔᤠ᤹ᤀᤡᤴ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥ ᤁᤢᤛ᤻ᤛᤠ᤺ᤴ ᤛᤠᤘᤠ᤺ᤴᤍᤢ ᤛᤢᤖᤢᤀᤠᤱ ᤁᤠᤰ ᤛᤠᤘᤠ᤺ᤴᤍᤢᤱᤅᤡᤴ ᤏᤡᤱᤘᤠ᤹ ᤑᤣ᤺ᤳᤇᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤅᤧ᤺ᤰᤘᤠᤎᤡᤰ ᤛᤠᤘᤠ᤺ᤴᤍᤢᤒᤠᤀᤥ ᤛ᤺ᤳᤗᤥ॥
JOH 16:22 ᤂᤡᤏᤡ᤹ ᤗᤠᤃᤡᤀᤠᤱ ᤒᤠ ᤜᤧᤰᤁᤣ ᤐᤥ᤺ᤱ–ᤀᤠᤸᤗᤥᤃ ᤔᤣᤖᤡᤱ ᤁᤧᤎᤰᤋᤡ᤹. ᤁᤖ ᤀᤡᤱᤃᤠ᤹ ᤕᤠᤶᤔᤥ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤂᤡᤏᤡ᤹ ᤁᤧᤛ᤺ᤳᤋᤡ᤹ᤖᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤛ᤺ᤵᤔᤠᤴ ᤏᤠᤵᤔᤠᤀᤠᤱ ᤋᤣ᤹ᤔᤠ ᤁᤧᤴᤇᤢᤰᤋᤡᤴᤗᤥ॥
JOH 16:23 ᤂᤧᤴ ᤕᤧᤴᤏᤥ ᤂᤡᤏᤡ᤹ ᤌᤣᤀᤠᤱ ᤕᤠᤵᤔᤡ ᤛᤣ᤺ᤴᤃᤧᤴᤍᤥ᤺ᤛᤡᤴᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤧᤒᤡᤖᤡ᤹ᤖᤥ॥
JOH 16:24 ᤀᤠᤸᤗᤥ ᤌᤠᤖᤡᤰ ᤀᤰᤂᤣᤗ᤹ᤖᤡᤰ ᤀᤠᤔᤡᤱᤅᤥ ᤌᤣᤀᤠᤱ ᤔᤧᤴᤏᤠ᤺ᤰᤁᤣ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤠ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤁᤧᤄᤥ᤺ᤛᤢᤶᤔᤠᤱ ᤁᤧᤛ᤺ᤳᤋᤡ᤹ᤖᤥ॥
JOH 16:25 ᤀᤠᤸᤗᤥᤃ ᤀᤡᤱᤃᤠ᤹ ᤐᤠ᤺ᤶᤑᤪᤧᤶᤔᤥ ᤐᤠ᤺ᤳᤋᤠᤖ ᤘᤠ᤹ᤀᤠᤛᤠᤱ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤕᤧᤶᤔᤥᤃ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤠᤴᤗᤥ. ᤁᤖ ᤀᤠᤶᤒᤠᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤍᤥ᤺ᤵᤔᤠᤀᤣ ᤔᤧᤳᤏᤡᤱᤗᤥ॥
JOH 16:26 ᤂᤧᤴ ᤕᤧᤶᤔᤥ ᤂᤡᤏᤡ᤹ᤀᤣ ᤀᤡᤱᤃᤠ᤹ ᤀᤠᤔᤡᤱᤅᤥ ᤁᤧᤏᤠ᤺ᤰᤋᤢᤶᤗᤥ॥ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤐᤠᤏᤢᤍᤡᤱ ᤐᤠ᤺ᤴ ᤏᤠ᤺ᤰᤋᤢᤱ ᤐᤡᤏᤡᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤠᤴᤗᤥ॥
JOH 16:27 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤠᤱᤒᤠᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡ᤹ᤖᤥ॥
JOH 16:28 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤩᤠᤱᤒᤠᤖᤥ॥ ᤀᤠᤸᤗᤥᤃ ᤀᤡᤱᤃᤠ᤹ ᤕᤠᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤖᤢᤱᤅᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖ ᤐᤳᤋᤠᤖᤥ॥”
JOH 16:29 ᤜᤧᤰᤁᤩᤠᤱ ᤕᤧᤛᤢ᤺ᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤸᤗᤥᤃ ᤂᤧᤏᤧ᤹ ᤐᤠ᤺ᤴᤑᤪᤧᤶᤔᤡᤴ ᤀᤥᤃᤵ ᤔᤧᤴᤈᤥ᤺ᤰᤁᤣ ᤁᤢᤍᤥ᤺ᤵᤔᤥ ᤁᤧᤒᤠ᤺ᤳᤗ ᤁᤧᤒᤳᤗᤥ॥
JOH 16:30 ᤀᤠᤸᤗᤥ ᤂᤧᤏᤧ᤹ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡ᤺ᤛᤢ ᤑᤠ᤹ᤀᤠᤱ ᤀᤠᤏᤡᤃᤧ ᤁᤢᤛᤡᤱ ᤏᤡ᤺ᤳᤋᤢᤶᤒᤠᤖᤥ॥ ᤀᤠᤳᤋᤡᤸᤗᤧᤀᤠᤱ ᤌᤣᤀᤠᤱ ᤛᤣ᤺ᤴᤍᤥ᤺ᤔᤠ ᤔᤧᤒᤥ᤺ᤱᤏᤧᤴ. ᤌᤣᤀᤠᤱᤓᤧᤸᤗᤧ ᤛᤣ᤺ᤴᤍᤥ᤺ᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤁᤧᤏᤡ᤺ᤛᤢ᤹ᤖᤥ॥ ᤒᤠ ᤁᤴ ᤐᤠ᤺ᤴᤏᤥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤩᤧᤒᤠ ᤑᤠ᤹ᤀᤠᤱ ᤀᤠᤏᤡᤃᤧ ᤏᤛᤠ᤺ᤴ ᤆᤥᤃᤢᤶᤒᤠᤖᤥ॥”
JOH 16:31 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤧ. ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤸᤗᤥ ᤏᤛᤠ᤺ᤴ ᤁᤧᤈᤥᤃᤢᤶᤒᤡ᥅
JOH 16:32 ᤁᤖ ᤀᤠᤸᤗ ᤂᤡᤏᤡ᤹ ᤁᤠᤰ ᤛᤧ᤺ᤔᤠᤀᤠᤱ ᤀᤠᤒᤠᤅᤣ ᤜᤡᤶᤜᤡᤶ ᤐᤣ᤺ᤰᤔᤠ ᤕᤧᤶ ᤋᤠᤖ ᤐᤳᤗᤥ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤡᤱᤃ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥ ᤀᤠᤸᤗ ᤂᤡᤏᤡ᤹ ᤁᤧᤖᤧᤰᤗᤧ ᤕᤠᤵᤔᤡ ᤁᤧᤗᤧᤖᤡᤀᤠᤱ ᤁᤧᤒᤡᤃᤡ᤹ᤖᤥ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤣ᤺ᤰ ᤜᤥ᤺ᤵᤐᤠᤖᤥ. ᤁᤖ ᤀᤡᤱᤃᤠ᤹ᤏᤢ ᤀᤠᤶᤒᤠᤀᤠᤱ ᤘᤠ᤹ᤖᤥ॥
JOH 16:33 ᤀᤡᤱᤃᤠ᤹ᤀᤥ ᤂᤡᤏᤡ᤹ ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ ᤑᤠ᤹ᤀᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤖᤡᤰ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤁᤧᤍᤢᤔᤢᤶᤗᤥ॥ ᤁᤖ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤴᤍᤢᤱᤅᤠᤱ ᤘᤠ᤹ᤀᤠᤖᤥ॥”
JOH 17:1 ᤕᤧᤛᤢᤖᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤖ ᤋᤢᤘᤠ ᤆᤥᤃᤢ. “ᤐᤠᤏᤢᤍᤡᤱ ᤀᤠᤶᤒᤣ. ᤀᤠᤸᤗ ᤕᤧᤶ ᤐᤥ᤺ᤰᤂᤧᤖᤥ. ᤁᤧᤛ᤻ᤛᤠ᤺ᤸᤗᤧ ᤂᤧᤏᤧ᤹ ᤁᤧᤔᤡᤔᤡᤍᤡᤱ ᤆᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤆᤥᤃᤧ᤹ᤀᤥ॥
JOH 17:2 ᤂᤧᤏᤧ᤹ ᤁᤧᤛ᤻ᤛᤠ᤺ᤴ ᤁᤧᤒᤡᤖᤢᤒᤠ ᤔᤏᤠᤜᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡᤖ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤂᤢᤏᤧ᤹ ᤕᤢᤰ ᤁᤧᤒᤡᤖᤢᤀᤠᤱ ᤁᤧᤘᤠ᤹ᤖᤥ॥
JOH 17:3 ᤂᤧᤱᤜᤠ᤹ᤖᤧ ᤛᤧᤰᤂᤠᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤖᤰ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤠᤱᤄᤢᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤒᤠ ᤂᤧᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥
JOH 17:4 ᤂᤧᤏᤧ᤹ ᤆᤥ᤺ᤰᤔᤠ ᤁᤧᤒᤠᤱᤄᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤆᤥᤃᤢᤱᤛᤢᤖᤢᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤔᤡᤔᤡᤍᤡᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
JOH 17:5 ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤥᤗᤡᤱᤛᤥᤔᤢ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤀᤠᤱᤎᤥ ᤂᤧᤏᤧ᤹ᤏᤢ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤁᤳᤋᤢᤱᤒᤠ ᤔᤡᤔᤡᤍᤡᤱᤅᤡᤸᤗᤧ ᤂᤧᤏᤧ᤹ ᤁᤧᤍᤃᤡ ᤀᤠᤔᤡᤱᤛᤥ ᤀᤡᤱᤎᤠ᤺ᤱ ᤆᤥᤃᤧ᤹ᤀᤥ॥
JOH 17:6 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤔᤏᤠᤜᤠ᤹ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤜᤠ᤹ᤃ ᤛᤍᤠᤍᤡᤱ ᤂᤧᤏᤧ᤹ᤀᤡᤴᤏᤣ ᤔᤧᤘᤕᤧ॥ ᤂᤧᤴ ᤁᤧᤒᤡᤖᤠᤱᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤴᤈᤠᤰᤁᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥
JOH 17:7 ᤀᤠᤸᤗ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤧᤏᤧ᤹ᤗᤠᤶᤒᤠᤀᤣ ᤋᤩᤧᤒᤠ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤖᤥ॥
JOH 17:8 ᤂᤧᤏᤧ᤹ ᤁᤧᤒᤡᤖᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤔᤧᤍᤠ᤺ᤰᤋᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤂᤧᤏᤧ᤹ᤗᤠᤶ ᤋᤩᤠᤱᤒᤠ ᤑᤠ᤹ᤀᤠᤱ ᤛᤧᤰᤂᤠᤀᤣ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥
JOH 17:9 ᤂᤧᤱᤜᤠ᤹ᤖᤧ ᤗᤠᤃᤡ ᤀᤡᤱᤃᤠ᤹ ᤋᤢᤘᤠ ᤆᤥ᤺ᤰᤁᤠ. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡᤃ ᤔᤧᤈᤥ᤺ᤰᤁᤠᤴᤗᤥ॥ ᤂᤧᤏᤧ᤹ ᤁᤧᤒᤡᤖᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤋᤢᤘᤠ ᤆᤥ᤺ᤰᤁᤠ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤁᤧᤔᤏᤠᤛᤡᤖᤥ॥
JOH 17:10 ᤀᤡᤱᤃᤠ᤹ ᤁᤳᤋᤢᤱᤛᤡᤱᤒᤠ ᤁᤠᤰ ᤔᤏᤠᤜᤠ᤹ᤃ ᤂᤧᤏᤧ᤹ᤀᤡᤴᤇᤡᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤃᤳᤋᤢᤛᤡᤒᤠ ᤔᤏᤠᤜᤠ᤹ᤃ ᤀᤡᤱᤃᤠ᤹ᤀᤡᤴᤇᤡᤖᤥ॥ ᤂᤧᤱᤜᤠ᤹ᤀᤥ ᤀᤠᤔᤡᤔᤡᤍᤡᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
JOH 17:11 ᤀᤠᤸᤗ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤂᤧᤏᤧ᤹ᤀᤥ ᤌᤥ ᤌᤠᤱᤅᤠᤖ ᤐᤳᤋᤠᤖᤥ॥ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤘᤠ᤹ᤀᤠᤴ. ᤁᤖ ᤂᤧᤱᤜᤠ᤹ᤃ ᤁᤵᤔᤥᤀᤣ ᤔᤧᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤛᤣᤛᤣ ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤱᤜᤠ᤹ᤃ ᤁᤧᤒᤡᤖᤠᤱᤒᤠ ᤔᤢᤰᤛᤠᤶᤃᤧᤴ ᤁᤧᤔᤡᤱᤅᤥ ᤁᤶᤒᤪᤠᤱ ᤔᤧᤳᤋᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤴᤇᤡ᤹ ᤌᤡᤰ ᤀᤠᤘᤠ᤹ᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤀᤠᤱ ᤌᤡᤰᤜᤢᤵ ᤔᤧᤒᤥ᤺ᤱᤗᤖᤥ॥
JOH 17:12 ᤀᤡᤱᤃᤠ᤹ ᤁᤵᤔᤥ ᤘᤕᤠᤱᤗ ᤌᤠᤖᤡᤰ ᤂᤧᤴ ᤔᤡᤱᤅᤡᤸᤗᤧᤴ ᤔᤢᤰᤛᤠᤶᤔᤥ ᤁᤠᤰ ᤁᤶᤒᤪᤠᤱ ᤔᤧᤳᤋᤢᤱᤛᤡᤱᤗᤥ॥ ᤂᤧᤴ ᤔᤧᤰᤔᤠ ᤁᤧᤒᤥ᤺ᤱᤒᤠᤴᤏᤠᤱ ᤌᤥ ᤘᤣ᤹ ᤀᤠᤳᤋᤡᤴᤏᤠᤱ ᤔᤧᤔᤠ᤺ᤛᤢᤱᤅᤡᤴ. ᤁᤖ ᤁᤠᤰ ᤋᤠᤱᤛᤧ᤺ᤵᤋᤢᤱᤛᤡᤱᤗᤥ॥ ᤂᤧᤱᤃ ᤛᤠᤶᤕᤥᤛᤠᤵᤗᤠ᤺ᤴ ᤁᤧᤳᤗ ᤑᤠ᤹ᤀᤠᤱ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥
JOH 17:13 ᤀᤠᤸᤗ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤌᤠᤱᤅᤠᤖ ᤐᤳᤋᤠᤖᤥ॥ ᤀᤡᤱᤃᤠ᤹ ᤁᤳᤋᤢᤱᤒᤠ ᤀᤠᤕᤠᤶᤏᤠ᤺ᤶᤔᤡᤴ ᤂᤧᤱᤜᤠ᤹ᤖᤧᤀᤠᤱ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤠ᤹ᤀᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥
JOH 17:14 ᤂᤧᤱᤜᤠ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤜᤠ᤹ ᤐᤡᤖᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤇᤡᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤈᤡ᤺ᤳᤋᤢᤛᤡᤖᤥ॥
JOH 17:15 ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤣ᤹ᤖᤧᤛᤧ᤹ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤠᤴ. ᤁᤖ ᤁᤢ᤹ᤀᤡᤃᤧᤓᤧ᤹ᤒᤠ ᤔᤠᤑᤧᤴᤛᤠᤶᤔᤥᤗᤠᤶ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤧᤛᤧ᤹ᤀᤥ॥
JOH 17:16 ᤀᤡᤱᤃᤠ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤇᤡᤖᤥ॥
JOH 17:17 ᤂᤧᤱᤜᤠ᤹ ᤛᤧᤰᤂᤠ᤺ᤸᤗᤧ ᤛᤣᤛᤣ ᤛᤠᤱᤛᤠᤱ ᤆᤥᤃᤧᤛᤧ᤹ᤀᤥ॥ ᤂᤧᤏᤧ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤁᤡᤱᤃ ᤛᤧᤰᤂᤠᤖᤥ॥
JOH 17:18 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢᤱᤛᤡᤱᤗᤥ॥
JOH 17:19 ᤂᤧᤱᤜᤠ᤹ ᤛᤧᤰᤂᤠᤀᤣ ᤛᤣᤛᤣ ᤛᤠᤱᤛᤠᤱ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤣᤛᤣ ᤛᤠᤱᤛᤠᤱ ᤆᤥ᤺ᤰᤛᤡᤱᤅᤠᤖᤥ॥
JOH 17:20 ᤀᤡᤱᤃᤠ᤹ᤃ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤖᤰ ᤔᤧ᤺ᤴ. ᤁᤖ ᤂᤧᤱᤜᤠ᤹ᤖᤧ ᤀᤡᤱᤓᤴ ᤔᤧᤈᤥᤃᤢᤒᤠᤗᤠᤶ ᤀᤡᤱᤃᤠ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥
JOH 17:21 ᤐᤠᤏᤢᤍᤡᤱ ᤀᤠᤶᤒᤣ. ᤂᤧᤱᤜᤠ᤹ ᤁᤠᤰ ᤌᤡᤰᤜᤢᤵ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤀᤠᤱ ᤀᤠᤴᤇᤡ᤹ᤀᤥ ᤔᤧᤘᤠ᤹ᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤑᤠ᤹ᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖᤖᤥ॥
JOH 17:22 ᤀᤠᤴᤇᤡ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤒᤡᤖᤠᤱᤒᤠ ᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥
JOH 17:23 ᤀᤡᤱᤃᤠ᤹ ᤂᤧᤱᤜᤠ᤹ᤏᤢ ᤌᤡᤰᤜᤢᤵ ᤘᤠ᤹ᤀᤠᤒᤠ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤡᤰᤜᤢᤵ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤁᤢᤈᤧᤰ ᤌᤡᤰᤜᤢᤵᤐᤥ ᤔᤧᤍᤠᤖᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤏᤢ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ॥
JOH 17:24 ᤐᤠᤏᤢᤍᤡᤱ ᤀᤠᤶᤒᤣ. ᤀᤡᤱᤃᤠ᤹ ᤁᤧᤒᤡᤖᤠᤱᤒᤠᤜᤠ᤹ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤔᤧᤘᤠ᤹ᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤁᤧᤒᤡᤖᤠᤱᤒᤠ ᤔᤡᤔᤡᤍᤡᤱᤅᤡᤴ ᤔᤧᤏᤡ᤺ᤛᤢ᤹ᤖᤥ॥ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤡᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤔᤡᤔᤡᤍᤡᤱᤅᤡᤴ ᤁᤧᤒᤡᤖᤠᤱᤗᤥ॥
JOH 17:25 ᤛᤠᤶᤕᤥᤏᤡᤒᤠ ᤀᤠᤶᤒᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤢᤛᤡᤱ ᤁᤧᤔᤧᤴᤏᤡ᤺ᤳᤏᤧᤴᤇᤠᤱ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤏᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤧᤒᤠᤱᤄᤠᤱᤒᤠ ᤐᤠ᤺ᤴᤏᤡᤴ ᤁᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥
JOH 17:26 ᤀᤡᤱᤃᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠ ᤗᤢᤱᤔᤠ᤹ ᤋᤢᤰᤔᤧᤴ ᤂᤢᤏᤡ᤹ᤏᤢᤀᤠᤱ ᤘᤠ᤹ᤖ ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤱᤜᤠ᤹ᤀᤥ ᤘᤠ᤹ᤀᤠᤖ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤁᤱᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤕᤠᤶᤔᤥ ᤔᤧᤳᤋᤢᤱᤛᤡᤱᤗᤥ॥”
JOH 18:1 ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ ᤛᤢᤖᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤁᤡᤍᤪᤥᤏ ᤔᤧᤵᤔᤏᤠᤒᤠ ᤜᤱᤜᤱᤘᤠ᤺ᤸᤗᤧ ᤏᤠᤎᤠ᤺ᤶᤒᤡ ᤐᤣᤖᤥ॥ ᤂᤧᤵᤔᤥ ᤈᤤᤋᤢᤏ ᤛᤡᤱᤗᤠ ᤌᤡᤰ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤗᤠ᤺ᤛᤧ॥
JOH 18:2 ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤸᤗᤧᤀᤠᤱ ᤂᤧᤴ ᤋᤧᤴᤏᤡᤴ ᤏᤡ᤺ᤛᤢᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤡᤰᤗᤧᤱ ᤂᤧᤵᤔᤥ ᤋᤢᤔᤢᤛᤡᤀᤠᤱ ᤘᤕᤧᤖᤥ॥
JOH 18:3 ᤂᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤠ᤺ᤸᤗᤧ ᤁᤢᤓᤠ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤔᤠᤱᤜᤡᤶ ᤁᤧᤃᤥ᤺ᤒᤠ ᤋᤡᤗᤡᤱᤃᤠᤜᤠ᤹ ᤂᤧᤴ ᤈᤤᤋᤢᤏ ᤛᤡᤱᤗᤠᤀᤥ ᤗᤠᤶᤗᤥᤛᤢᤛᤡᤀᤠᤱ ᤋᤠᤖᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤋᤡᤕᤠᤗᤥ. ᤛᤣᤔᤡ ᤏᤢ ᤑᤧᤈᤢᤶ ᤑᤧᤕᤠᤜᤠ᤹ ᤔᤧᤃᤳᤋᤢᤖᤥ॥
JOH 18:4 ᤕᤧᤛᤢᤖᤧ ᤀᤠᤸᤗ ᤂᤢᤏᤧ᤹ᤏᤢ ᤌᤣ ᤐᤥ᤺ᤱ ᤁᤧᤗ᤹ᤒᤠᤴ ᤁᤠᤰ ᤏᤡ᤺ᤛᤢᤀᤠᤱ ᤂᤢᤏᤧ᤹ ᤋᤃᤡ ᤐᤣᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠ᤺ᤳ ᤁᤧᤃᤥ᤺ᤳᤋᤢᤶᤒᤠᤒᤣ᥅”
JOH 18:5 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤒᤠ ᤕᤧᤛᤢ᤺ᤴ॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤱᤃ ᤀᤡᤱᤃᤠ᤹ᤀᤣᤖᤥ॥” ᤂᤧᤴ ᤕᤧᤶᤔᤥ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤴᤏᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤧᤒᤧᤖᤥ॥
JOH 18:6 ᤕᤧᤛᤢᤖᤧ ᤂᤧᤱᤜᤠ᤹ “ᤂᤧᤱᤃ ᤀᤡᤱᤃᤠ᤹ᤀᤣᤖᤥ” ᤔᤧᤳᤋᤢᤛᤡᤸᤗᤧ ᤂᤧᤱᤜᤠ᤹ ᤀᤣᤃᤠᤱ ᤔᤧᤈᤳᤇᤡᤱᤗ ᤗᤧᤖᤠᤱ ᤁᤠᤰᤐᤧᤳ ᤂᤠᤶᤔᤥ ᤔᤧᤗᤧᤰᤂᤧᤖᤥ॥
JOH 18:7 ᤕᤠᤶᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠ᤺ᤳ ᤁᤧᤃᤥ᤺ᤳᤋᤢᤶᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤴᤗᤥ॥”
JOH 18:8 ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ᤀᤠᤖᤥ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠ᤺ᤱᤃ ᤀᤡᤱᤃᤠ᤹ᤏᤧ ᤑᤠ᤹ᤃᤪ ᤁᤱᤜᤠ᤹ᤃ ᤐᤣ᤺ᤰᤔᤠ ᤐᤠᤱᤄᤧᤶᤛᤡᤶᤔᤧ᤹ᤀᤥ॥”
JOH 18:9 ᤁᤧᤒᤡᤖᤠᤱᤒᤠᤜᤠ᤹ᤀᤥ ᤌᤡᤰᤁᤠᤱ ᤔᤧᤔᤠ᤺ᤛᤢᤱᤅᤡᤴᤗᤥ ᤗ᤹ᤖᤡᤰ ᤕᤧᤛᤢᤖᤧ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤁᤴ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
JOH 18:10 ᤜᤧᤰᤁᤩᤠᤱ ᤛᤡᤔᤥᤏ ᤐᤋᤪᤢᤛᤖᤧ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤣᤘᤠᤖᤥᤒᤠ ᤔᤠᤸᤂᤛ ᤔᤧᤵᤔᤏᤠᤒᤠᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱᤒᤠ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤖᤥ॥
JOH 18:11 ᤕᤧᤛᤢᤖᤧ ᤐᤋᤪᤢᤛᤧᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤑᤧᤛᤡ᤺ᤵᤐᤥ ᤕᤠᤰᤋᤧ᤹᥄ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤀᤡᤱᤃᤠ᤹ ᤐᤡᤀᤠᤒᤠ ᤀᤡᤏᤥᤃᤧᤴ ᤋᤢᤰᤂᤣᤘᤠ ᤂᤥᤷᤕᤠᤀᤥᤗᤠᤶ ᤌᤢᤅᤢᤱᤗᤀᤣ ᤐᤥ᤺ᤱ॥”
JOH 18:12 ᤜᤧᤰᤁᤣᤗ᤹ᤖᤡᤰ ᤌᤰᤋᤢᤶᤒᤠ ᤏᤢ ᤌᤰᤛᤢᤒᤠᤜᤠ᤹ᤖᤧ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤍᤧᤶᤛᤢᤀᤠᤱ ᤀᤡᤔᤧᤄᤣ᤺ᤰᤂᤢ.
JOH 18:13 ᤜᤧᤰᤁᤩᤠᤱ ᤂᤧᤴ ᤋᤱᤒᤣᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤁᤢᤴᤏᤥ᤺ᤵᤐᤠ ᤜᤴᤏᤠᤛᤖᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤖᤥ॥
JOH 18:14 ᤒᤠ ᤁᤴ ᤁᤤᤕᤠᤑᤠᤛᤖᤧᤀᤣ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤌᤡᤰ ᤔᤏᤠ᤺ᤴ ᤛᤡ᤺ᤔᤠᤀᤣ ᤏᤢ᤺ᤒᤠ ᤐᤥ᤺ᤱ ᤗ᤹ᤖᤡᤰ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡᤀᤠᤱ ᤘᤕᤧᤖᤥ॥
JOH 18:15 ᤛᤡᤔᤥᤏ ᤐᤋᤪᤢᤛ ᤏᤢ ᤘᤣ᤹ ᤁᤢᤜᤢ᤹ᤛᤠᤶᤒᤠᤎᤡᤰᤗᤧ ᤕᤧᤛᤢ᤺ᤴ ᤋᤡᤶᤍᤧᤳᤇᤢᤖᤥ॥ ᤂᤧᤴ ᤘᤣ᤹ ᤜᤢ᤹ᤛᤠᤶᤒᤠᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴ ᤋᤡᤶᤍᤢᤖ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤁᤧᤖᤧ॥
JOH 18:16 ᤁᤖ ᤐᤋᤪᤢᤛᤖᤧ ᤗᤠ᤺ᤰᤁᤠᤳ ᤂᤢᤏᤧ᤹ ᤜᤠᤱᤄᤢᤖ ᤕᤧᤒᤧ॥ ᤂᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤢᤛᤡᤱ ᤁᤧᤏᤡ᤺ᤵᤐᤠ ᤜᤢ᤹ᤛᤠᤶᤒᤠᤴ ᤛᤡᤃᤠᤱᤗᤠᤶ ᤏᤢ᤺ᤰᤂᤧ ᤑᤧᤖᤧᤀᤠᤱ ᤗᤠᤶᤎᤣ᤺ᤵ ᤁᤧᤃᤥ᤺ᤔᤠ ᤛᤣᤘᤠᤖᤥᤔᤠᤴ ᤔᤧᤳᤋᤢᤀᤠᤱ ᤐᤋᤪᤢᤛᤧᤴ ᤛᤡᤃᤠᤱ ᤋᤣ᤹ᤖᤢᤖᤥ॥
JOH 18:17 ᤂᤧᤴ ᤛᤣᤘᤠᤖᤥᤔᤠᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤔᤧ᤺ᤴᤏᤧᤒᤡ᥅” ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥”
JOH 18:18 ᤛᤠ᤹ᤖᤡᤰ ᤆᤢᤱᤈᤡ᤺ᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤛᤣᤘᤠᤖᤥᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥ᤺ᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤔᤡ ᤔᤧᤍᤢᤵᤋᤢᤀᤠᤱ ᤂᤡᤖᤡ ᤔᤡᤈᤠ᤹ᤏᤢ ᤔᤧᤕᤧᤒᤧᤖᤥ॥ ᤐᤋᤪᤢᤛᤧᤴᤏᤠᤱ ᤂᤢᤏᤡ᤹ ᤐᤣᤛᤠᤱ ᤔᤡᤈᤠ᤹ᤏᤢ ᤕᤧᤒᤧᤖᤥ॥
JOH 18:19 ᤀᤠᤸᤗ ᤜᤡᤶᤛᤡᤃᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤧᤛᤢ᤺ᤴ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤁᤢᤏᤡᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤛᤢᤖ ᤕᤠᤃᤧ॥
JOH 18:20 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤁᤠᤰᤗᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤖᤠᤱᤗᤥ. ᤀᤡᤱᤃᤠ᤹ᤃ ᤁᤠᤰ ᤕᤜᤢᤍᤡᤜᤠ᤹ ᤔᤧᤈᤢᤶᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤔᤠᤱᤜᤡᤶᤔᤥ ᤔᤏᤠᤜᤠ᤹ ᤛᤍᤠᤍᤡᤱ ᤜᤢ᤹ᤖᤢᤱᤛᤡᤱᤗ ᤘᤠ᤹ᤖᤥ॥ ᤀᤡᤱᤃᤠ᤹ ᤛᤫᤠ᤺ᤳᤋᤠᤱ ᤌᤣᤀᤠᤱ ᤔᤧᤶᤒᤠ᤺ᤵᤐᤧᤴᤗᤥ॥
JOH 18:21 ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤀᤰᤂᤣᤗ᤹ᤖᤡᤰ ᤕᤠᤵᤔᤡ ᤛᤣ᤺ᤴᤃᤧᤍᤥ᤺ᤛᤡᤒᤣ᥅ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤄᤧᤶᤒᤠᤜᤠ᤹ᤀᤣ ᤛᤣ᤺ᤴᤍᤥ᤺ᤛᤧᤶᤛᤡᤶᤔᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤖᤥ॥”
JOH 18:22 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢᤸᤗᤧ ᤂᤧᤵᤔᤥ ᤏᤡ᤺ᤳᤋᤠᤱ ᤁᤧᤕᤧᤵᤐᤠ ᤛᤢᤜᤠᤱᤕᤢᤰᤐᤠᤎᤡᤰᤗᤧ ᤕᤧᤛᤢᤖᤧ ᤁᤢᤏᤧᤍᤧᤱᤒᤠᤴ ᤗᤧᤰᤂᤢᤀᤠᤱ ᤔᤧᤳᤋᤢ. “ᤀᤰᤂᤣᤗ᤹ᤖᤡᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴᤏᤢ ᤔᤢᤖᤠ ᤁᤧᤍᤥ᤺ᤒᤡ᥅”
JOH 18:23 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤐᤠ᤺ᤴ ᤑᤣ᤺ᤴᤍᤢᤱᤏᤧ ᤑᤠ᤹ᤃᤪ ᤐᤠ᤺ᤳᤋᤧ᤹॥ ᤁᤖ ᤀᤡᤱᤃᤠ᤹ ᤛᤧᤰᤂᤠ ᤐᤠ᤺ᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤌᤣᤀᤠᤱ ᤁᤧᤜᤡᤵᤐᤠᤒᤠᤒᤣ᥅”
JOH 18:24 ᤜᤧᤰᤁᤩᤠᤱ ᤜᤴᤏᤠᤛᤖᤧ ᤕᤧᤛᤢ᤺ᤴ ᤀᤡᤔᤧᤄᤣ᤺ᤰᤂᤢᤒᤠᤴ ᤔᤧᤶᤓᤠ᤺ᤱᤅᤣ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤥ ᤐᤠᤱᤄᤢᤍᤣ᤺ᤛᤢᤖᤥ॥
JOH 18:25 ᤛᤡᤔᤥᤏ ᤐᤋᤪᤢᤛᤧᤴ ᤔᤡᤈᤠ᤹ᤏᤢ ᤕᤧᤒᤧᤸᤗᤧ ᤁᤢᤓᤠᤖᤧ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ᤀᤠᤱ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤔᤧ᤺ᤴᤏᤧᤒᤡ᥅” ᤐᤋᤪᤢᤛᤖᤧ ᤂᤧᤴ ᤐᤠ᤺ᤴᤏᤡᤴ ᤏᤠ᤹ᤖᤢᤖ ᤔᤧᤳᤋᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ॥”
JOH 18:26 ᤐᤋᤪᤢᤛᤖᤧ ᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠ᤺ᤛᤢᤒᤠ ᤔᤏᤠ᤺ᤸᤗᤧ ᤁᤢᤃᤠ᤹ᤀᤡ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤘᤣ᤹ᤛ᤻ᤔᤠ ᤁᤢᤛᤣᤘᤠᤖᤥᤒᤠᤎᤡᤰᤁᤠᤱ ᤂᤧᤵᤔᤥ ᤕᤧᤒᤧ॥ ᤂᤧᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤈᤤᤋᤢᤏ ᤛᤡᤱᤗᤠᤀᤥ ᤕᤧᤛᤢ᤺ᤴᤏᤢ ᤁᤧᤘᤕᤧᤒᤠ ᤏᤡ᤺ᤏᤧᤒᤠ ᤔᤧ᤺ᤶᤒᤡ᥅”
JOH 18:27 ᤐᤋᤪᤢᤛᤖᤧ ᤕᤠᤶᤔᤥ ᤔᤧ᤺ᤴᤗᤥ ᤗ᤹ᤖᤡᤰ ᤐᤠ᤺ᤳᤋᤢᤸᤗᤧ ᤒᤠ ᤂᤧᤴ ᤕᤧᤶᤔᤥᤀᤣ ᤀᤡᤱᤘᤠ ᤁᤠ᤺ᤛᤧᤖᤥ॥
JOH 18:28 ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤕᤧᤛᤢ᤺ᤴ ᤋᤠᤏᤠᤶᤛᤠ ᤁᤤᤕᤠᤑᤠᤛᤖᤧ ᤁᤢᤜᤡᤶᤔᤥᤗᤠᤶ ᤖᤥᤔᤡ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤜᤠᤱᤜᤡᤶᤔᤥ ᤔᤧᤍᤣ᤹ᤖᤢ॥ ᤁᤖ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤀᤠᤛᤢᤳᤌᤥ ᤀᤠᤒᤥ᤺ᤱᤅᤠᤱ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤒᤠ ᤆᤠ ᤆᤠᤔᤠ ᤂᤥ᤺ᤔᤧᤍᤧᤳᤏᤧᤴ ᤑᤠ᤹ᤀᤠᤱ ᤂᤧᤱᤜᤠ᤹ ᤜᤡᤶ ᤛᤡᤃᤠᤱ ᤔᤧᤴᤗᤠ᤺ᤛᤧᤴᤗᤥ॥
JOH 18:29 ᤜᤧᤰᤁᤣ᤺ᤸᤗᤧ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣ ᤀᤠᤵᤋᤡᤰ ᤁᤧᤍᤠ᤺ᤖᤢᤶᤔᤠᤱ ᤁᤧᤘᤕᤡ᤹ᤒᤣ᥅”
JOH 18:30 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤴ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤕᤧᤸᤗᤧᤃ ᤂᤧᤏᤧ᤹ᤀᤥ ᤔᤧᤍᤠᤖᤢᤶᤒᤧᤴ ᤔᤧᤴ॥”
JOH 18:31 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤴ ᤋᤣ᤹ᤖᤧᤶᤔᤧ᤹ᤀᤠᤱ ᤂᤡᤏᤡ᤹ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹॥” ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤕᤢᤰ ᤔᤧᤃᤳᤋᤢᤶᤒᤧᤴᤗᤥ॥”
JOH 18:32 ᤁᤱᤃ ᤕᤧᤛᤢᤖᤧ ᤂᤢᤏᤧ᤹ ᤀᤠᤰᤋᤱᤒᤠ ᤛᤡ᤺ᤔᤧᤸᤗᤧ ᤛᤡ᤺ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
JOH 18:33 ᤐᤡᤗᤠᤋᤛᤧᤴ ᤕᤠᤶᤔᤥ ᤜᤠᤱᤜᤡᤶ ᤛᤡᤃᤠᤱ ᤗᤠ᤺ᤛᤧᤀᤠᤱ ᤕᤧᤛᤢ᤺ᤴ ᤀᤢ᤺ᤳᤋᤢᤀᤠᤱ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅”
JOH 18:34 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤴ ᤐᤠ᤺ᤴᤏᤡᤴ ᤀᤠᤒᤠᤅᤣ ᤁᤧᤏᤡᤱᤘᤠ᤹ᤀᤡᤸᤗᤧ ᤁᤧᤒᤠ᤺ᤳᤋᤢᤒᤠᤒᤡ. ᤀᤡ ᤘᤣ᤹ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤁᤧᤶᤔᤧᤳᤋᤧᤒᤠᤒᤡ᥅”
JOH 18:35 ᤐᤡᤗᤠᤋᤛᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤕᤜᤢᤍᤡᤀᤠᤒᤡ᥅ ᤀᤠᤒᤠᤅᤣ ᤁᤧᤕᤠᤵᤔᤡᤜᤠ᤹ ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤏᤧ᤹ ᤜᤢᤰᤔᤧᤛᤢᤵᤋᤠᤱᤅᤠᤱ ᤘᤠ᤹॥ ᤂᤧᤏᤧ᤹ ᤌᤣ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢ᥅”
JOH 18:36 ᤕᤧᤛᤢᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤀᤠᤜᤠᤱᤈᤢᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤗᤥ॥ ᤁᤵᤔᤥᤒᤠ ᤘᤕᤧᤸᤗᤧᤃ ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤜᤠ᤹ᤖᤧ ᤀᤡᤱᤃᤠ᤹ ᤕᤠᤵᤔᤡ ᤋᤧᤶᤔᤠ ᤔᤧᤱᤄᤥ᤺ᤀᤠᤴᤗ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤏᤢ ᤌᤱ ᤔᤧᤈᤥᤃᤢᤒᤠᤔᤧᤴ. ᤁᤖ ᤀᤠᤜᤠᤱᤈᤢᤶᤔᤡᤴ ᤁᤵᤔᤥᤒᤠ ᤔᤧ᤺ᤴᤗᤥ॥”
JOH 18:37 ᤐᤡᤗᤠᤋᤛᤖᤧ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤜᤠᤱᤏᤧᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤜᤠᤱᤀᤠ ᤑᤠ᤹ᤀᤠᤱ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢ᤹ᤖᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤰᤂᤠ᤺ᤸᤗᤧᤴ ᤋᤥ᤺ᤴᤍᤡ ᤐᤡᤛᤧ ᤀᤡᤱᤃᤠ᤹ ᤛᤠᤘᤠ᤺ᤴᤇᤡᤅᤠᤱᤒᤠᤖᤥ॥ ᤛᤧᤰᤂᤠᤀᤥ ᤁᤧᤒᤵᤐᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤄᤧᤵᤛᤢ᤹ᤖᤥ॥”
JOH 18:38 ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢ. “ᤛᤧᤰᤂᤠ᤺ᤱᤃ ᤌᤧᤔᤠ᤺ᤴᤒᤣ᥅” ᤂᤧᤸᤗᤧ ᤜᤧᤰᤁᤣ ᤐᤠ᤺ᤳᤋᤢᤖ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤜᤢᤍᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤗᤥ॥
JOH 18:39 ᤁᤖ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤂᤡᤏᤡ᤹ ᤗᤠᤃᤡ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤗᤧᤖᤢᤱ ᤐᤡᤏᤡᤱᤒᤠ ᤌᤡᤶ ᤁᤧᤃᤳᤋᤢᤶ. ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤜᤠᤱᤅᤡᤴ ᤗᤧᤖᤢᤱ ᤐᤡᤏᤡᤱᤒᤡ᥅”
JOH 18:40 ᤂᤧᤱᤜᤠ᤹ᤖᤧ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤔᤧ᤺ᤴ᥄ ᤂᤧᤴ ᤔᤧ᤺ᤴ᥄ ᤒᤖᤒ᤻ᤒᤠᤛᤧᤏ ᤗᤧᤖᤧ ᤀᤠᤒᤡᤖᤧ᤹᥄” (ᤀᤠᤸᤗ ᤒᤖᤒ᤻ᤒᤠᤛᤧᤱᤃ ᤜᤠᤱᤒᤡᤑᤩᤢᤱᤒᤠ ᤘᤕᤧᤖᤥ॥)
JOH 19:1 ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤛᤡᤖᤥ॥
JOH 19:2 ᤌᤰᤛᤢᤒᤠᤜᤠ᤹ᤖᤧ ᤋᤡᤱᤃᤪᤣ᤺ᤰᤗᤧᤴ ᤋᤡᤆ᤺ ᤔᤧᤓᤕᤢᤀᤠᤱ ᤕᤧᤛᤢ᤺ᤴ ᤔᤧᤄᤢ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤖᤠᤴᤗᤠ ᤜᤠᤱᤋᤣ᤺ᤳᤋᤡᤴ ᤔᤧᤈᤠᤰᤋᤢᤖ
JOH 19:3 ᤁᤢᤍᤃᤡ ᤔᤧᤒᤣᤀᤠᤱ ᤀᤧᤳᤗᤧᤱ ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄ ᤗ᤹ᤖᤡᤰ ᤔᤧᤔᤧᤳᤋᤢᤖ ᤁᤢᤏᤧᤍᤧᤱᤒᤠᤴ ᤔᤧᤗᤧᤰᤂᤢ ᤔᤧᤒᤡᤖᤢᤖᤥ॥
JOH 19:4 ᤐᤡᤗᤠᤋᤛᤧᤴ ᤕᤠᤶᤔᤥ ᤗᤠ᤺ᤰᤁᤠᤳ ᤗ᤺ᤴᤍᤧᤀᤠᤱ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠᤀᤥ ᤀᤡᤱᤃᤠ᤹ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤱᤗ ᤐᤳᤋᤠᤖᤥ॥”
JOH 19:5 ᤜᤧᤰᤁᤩᤠᤱ ᤋᤡᤱᤃᤪᤣ᤺ᤰ ᤋᤡᤆ᤺ᤴ ᤔᤧᤄᤢ᤺ᤰᤋᤢᤒᤠ ᤏᤢ ᤐᤖᤠᤴᤗᤠ ᤜᤠᤱᤋᤣ᤺ᤳᤋᤡᤴ ᤔᤧᤈᤠᤰᤋᤢᤒᤠ ᤕᤧᤛᤢ᤺ᤴ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤔᤧᤳᤋᤢᤛᤡ. “ᤂᤠ. ᤁᤴ ᤔᤏᤠ᤺ᤴ ᤀᤥᤔᤧᤳᤋᤧᤶᤔᤧ᤹᥄”
JOH 19:6 ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤜᤡᤶ ᤁᤧᤃᤥ᤺ᤒᤠ ᤋᤡᤗᤡᤱᤃᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡ᤺ᤛᤢᤏᤠᤔᤧ᤺ᤴᤏᤣ “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤧᤴ ᤑᤥ᤺ᤴᤍᤧ᤹ᤀᤥ. ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤧᤴ ᤑᤥ᤺ᤴᤍᤧ᤹ᤀᤥ” ᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥ ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤴ ᤔᤏᤠ᤺ᤴ ᤋᤣ᤹ᤖᤧᤶᤔᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧᤶᤔᤧ᤹ᤀᤥ. ᤁᤖ ᤀᤡᤱᤃᤠ᤹ᤃ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤀᤠᤵᤋᤡᤰ ᤔᤧᤱᤄᤥ᤺ᤒᤠᤴᤗᤥ॥”
JOH 19:7 ᤁᤖ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤁᤳᤋᤢᤶᤒᤧᤒᤠ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤃ ᤂᤧᤴ ᤛᤡ᤺ᤔᤠᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤛᤠ᤺ᤀᤠ ᤑᤠ᤹ᤀᤠᤱ ᤔᤧᤳᤇᤡᤱᤅᤠᤱ ᤘᤠ᤹ᤖᤥ॥”
JOH 19:8 ᤐᤡᤗᤠᤋᤛᤖᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤡ᤺ᤛᤧᤖᤥ॥
JOH 19:9 ᤂᤢᤏᤧ᤹ ᤕᤠᤶᤔᤥ ᤜᤠᤱᤜᤡᤶ ᤛᤡᤃᤠᤱ ᤗᤠ᤺ᤛᤧᤀᤠᤱ ᤕᤧᤛᤢ᤺ᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤀᤠᤳᤋᤥᤗᤠᤶ ᤁᤧᤍᤩᤧᤒᤠᤒᤣ᥅” ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤗᤥ॥
JOH 19:10 ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤀᤡᤱᤃᤠ᤹ᤏᤢ ᤌᤣᤀᤠᤱ ᤁᤧᤶᤒᤠ᤺ᤳᤏᤧᤶᤒᤠ᥅ ᤂᤧᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤏᤢ ᤗᤧᤵᤔᤠᤍᤣ᤺ᤔᤠ ᤕᤢᤰ ᤁᤳᤋᤢᤱᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤒᤡ᥅”
JOH 19:11 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤶᤒᤡᤖᤧᤴᤏᤡᤸᤗᤧᤃ ᤀᤡᤱᤃᤠ᤹ ᤛᤶᤍᤠᤱ ᤕᤢᤰ ᤁᤧᤱᤃᤳᤋᤢᤴᤒᤠᤖᤥ॥ ᤁᤖ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤕᤠᤵᤔᤡ ᤜᤢᤰ ᤁᤧᤛᤢᤵᤐᤠᤸᤗᤧ ᤁᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤗᤠᤕᤥᤖᤧᤴ ᤀᤠᤵᤋᤡᤰ ᤂᤥ᤺ᤛᤢ᤹ᤖᤥ॥”
JOH 19:12 ᤜᤧᤰᤁᤣ᤺ᤸᤗᤧᤃ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤗᤧᤵᤔᤠᤍᤣ᤺ᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤕᤜᤢᤍᤡᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧᤖᤥ. “ᤁᤴ ᤔᤏᤠ᤺ᤴ ᤁᤧᤗᤧᤖᤢ ᤁᤧᤍᤣ᤺ᤛᤢᤏᤧ ᤑᤠ᤹ᤃᤪ ᤂᤧᤏᤧ᤹ᤃ ᤛᤡᤈᤖᤗᤧ ᤁᤢᤴᤍᤣ᤺ᤱᤒᤠ ᤁᤧᤶᤒᤥ᤺ᤱᤏᤧᤴᤗᤥ॥ ᤀᤠᤳᤋᤡᤸᤗᤧ ᤀᤠᤒᤠᤅᤣ ᤜᤠᤱ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤛᤡᤈᤖᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥”
JOH 19:13 ᤐᤡᤗᤠᤋᤛᤖᤧ ᤂᤧᤴ ᤂᤧᤵᤛᤢᤀᤠᤱ ᤕᤧᤛᤢ᤺ᤴ ᤗᤠ᤺ᤰᤁᤠᤳ ᤗ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤗᤢᤱ ᤑᤧ᤺ᤔᤏᤠᤒᤠ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤱᤛᤡᤱᤗᤥ॥ (ᤂᤧᤴ ᤋᤧᤴᤏᤡᤴ ᤜᤡᤒᤪᤢ ᤐᤠ᤺ᤴᤏᤥ ᤃᤒ᤻ᤒᤌᤠ ᤔᤧᤔᤧᤳᤋᤢᤖᤥ॥)
JOH 19:14 ᤜᤧᤰᤁᤩᤠᤱ ᤁᤱᤃ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧ ᤌᤡᤰ ᤕᤧᤴ ᤋᤃᤡ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ॥ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤁᤵᤔᤥ ᤘᤠ᤹ᤖᤥ॥”
JOH 19:15 ᤜᤧᤰᤁᤣ᤺ᤸᤗᤧ ᤕᤜᤢᤍᤡᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤔᤧᤳᤋᤢ. “ᤂᤧᤴ ᤋᤣ᤹ᤖᤧ᤹ᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄” ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤂᤡᤏᤡ᤹ ᤜᤠᤱᤅᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤢᤱᤒᤠᤒᤡ᥅” ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤜᤠᤱᤅᤡᤱᤃ ᤛᤡᤈᤖᤧᤴᤗᤰᤗᤥ॥”
JOH 19:16 ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤖ ᤑᤠ᤹ᤀᤠᤱ ᤜᤢᤰᤛᤢᤵᤋᤢᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤂᤧᤵᤔᤥᤗᤠᤶ ᤔᤧᤍᤣ᤹ᤖᤢᤖᤥ॥
JOH 19:17 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤔᤧᤃᤢ᤺ᤳᤋᤢᤀᤠᤱ ᤔᤡᤰᤂᤥ᤺ᤰᤐᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢᤖᤥ॥ (ᤂᤧᤴ ᤁᤥ᤺ᤰᤔᤠᤴ ᤜᤡᤒᤪᤢ ᤐᤠ᤺ᤴᤏᤥ ᤃᤗᤃᤌᤠ ᤔᤧᤔᤧᤳᤋᤢᤖᤥ॥)
JOH 19:18 ᤂᤧᤵᤔᤥ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤏᤢ ᤁᤢᤓᤧᤴᤇᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤔᤏᤠᤜᤠ᤹ᤀᤠᤱ ᤔᤧᤓᤥ᤺ᤴᤍᤢᤛᤡᤖᤥ॥
JOH 19:19 ᤐᤡᤗᤠᤋᤛᤖᤧ ᤏᤠᤛᤖᤋᤒᤠ ᤕᤧᤛᤢ ᤕᤜᤢᤍᤡ ᤜᤠᤱ ᤗ᤹ᤖᤡᤰ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤁᤡᤴ ᤛᤠᤵᤋᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤶᤔᤠ ᤐᤠᤱᤄᤢᤛᤡᤖᤥ॥
JOH 19:20 ᤂᤧᤴ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤖᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤧᤴᤏᤡᤴ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱᤅᤣ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤱᤃ ᤜᤡᤒᤪᤢ. ᤗᤩᤠᤋᤡᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤛᤠᤵᤋᤧᤀᤠᤱ ᤐᤳᤇᤧ॥
JOH 19:21 ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤐᤡᤗᤠᤋᤛᤧᤴ ᤀᤰᤂᤣ ᤔᤧᤔᤧᤳᤋᤢᤖ ᤔᤧᤀᤳᤋᤢᤖᤥ. “ᤂᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤔᤧᤛᤠᤵᤋᤧᤴᤏᤧ᤹ᤀᤥ. ᤁᤖ ᤁᤴ ᤔᤏᤠ᤺ᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱᤀᤠ ᤗ᤹ᤖᤡᤰ ᤐᤠ᤺ᤳᤋᤢᤖᤥ ᤗ᤹ᤖᤡᤰ ᤛᤠᤵᤋᤧ᤹ᤀᤥ॥”
JOH 19:22 ᤁᤖ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤆᤩᤠ ᤛᤠᤵᤋᤢᤱ. ᤂᤧᤴ ᤛᤠᤵᤋᤢᤱ ᤛᤠᤵᤋᤢᤱ॥”
JOH 19:23 ᤌᤰᤛᤢᤒᤠᤜᤠ᤹ᤖᤧ ᤕᤧᤛᤢ᤺ᤴ ᤔᤧᤓᤥ᤺ᤴᤍᤢ ᤔᤧᤛᤢᤖᤢᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤜᤠ᤹ ᤗᤡᤛᤡ ᤗᤰᤁᤥ ᤔᤧᤜᤠ᤺ᤳᤇᤡᤱᤗᤥ॥ ᤁᤖ ᤁᤢᤗᤃᤣ᤺ᤳᤋᤡᤴ ᤁᤢᤍᤢᤶᤒᤣ ᤔᤧ᤺ᤴᤏᤣᤒᤠ ᤛᤷᤎᤰ ᤑ᤺ᤔᤏᤠᤒᤠ ᤆᤥᤃᤧ.
JOH 19:24 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤀᤠᤏᤡ᤹ ᤌᤧ᤺ᤰᤂᤢᤶ ᤔᤧ᤺ᤴᤗᤥ. ᤁᤖ ᤋ᤹ᤕᤠ᤺ᤴᤛᤥ᤺ᤴ ᤁᤧ᤺ᤛᤢᤶᤗᤥ॥ ᤀᤠᤳᤋᤡᤸᤗᤧ ᤁᤢᤗᤰᤁᤥ ᤌᤠ᤺. ᤜᤠᤖᤠ᤹ ᤂᤧᤸᤗᤧᤀᤣ ᤂᤧᤴ ᤋᤣ᤹ᤖᤢᤏᤡᤖᤥ॥” ᤁᤴ ᤐᤠ᤺ᤴᤏᤡᤱᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤈᤠᤱᤜᤠ᤹ ᤔᤧᤜᤠ᤺ᤳᤇᤡᤱᤗᤥ. ᤜᤧᤰᤁᤩᤠᤱ ᤀᤠᤍᤣ᤺ᤳᤋᤡᤴ ᤋ᤹ᤕᤠᤏ᤺ᤴᤛᤥ᤺ᤴ ᤔᤧᤃᤧᤛᤢ᤹ᤖᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤁᤧᤖᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤌᤰᤛᤢᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤈᤥᤃᤢᤖᤥ॥
JOH 19:25 ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠᤸᤗᤧ ᤁᤢᤒᤣᤛᤠᤱ ᤁᤢᤶᤔᤠ. ᤁᤢᤴᤇᤢᤔᤠ᤹. ᤰᤗᤥᤐᤠᤛᤖᤧ ᤁᤢᤔᤣ᤺ᤳ ᤔᤖᤡᤕᤔ. ᤜᤧᤰᤁᤩᤠᤱ ᤔᤖᤡᤕᤔ ᤔᤃ᤻ᤍᤗᤡᤏᤡᤛᤡ ᤔᤧᤕᤧᤒᤧᤖᤥ॥
JOH 19:26 ᤕᤧᤛᤢᤖᤧ ᤁᤢᤶᤔᤠ ᤜᤧᤰᤁᤩᤠᤱ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤴᤏᤠᤱ ᤂᤧᤵᤔᤥ ᤏᤡ᤺ᤳᤋᤠᤱ ᤕᤧᤒᤧᤳᤇᤡᤒᤠ ᤏᤡ᤺ᤛᤢᤛᤡᤸᤗᤧ ᤁᤢᤶᤔᤠ ᤔᤧᤳᤋᤢ. “ᤂᤢᤏᤧ᤹ᤃ ᤁᤧᤛ᤻ᤛᤠ᤺ᤖᤥ॥”
JOH 19:27 ᤜᤧᤰᤁᤩᤠᤱ ᤂᤧᤴ ᤜᤢ᤹ᤛᤠᤶᤒᤠᤴ ᤔᤧᤳᤋᤢ. “ᤂᤢᤏᤧ᤹ᤃ ᤌᤠᤔᤧᤴᤍᤡᤱ ᤁᤧᤶᤔᤠᤖᤥ॥” ᤂᤧᤴ ᤕᤧᤶᤔᤠᤱᤎᤥᤃ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤔᤖᤡᤕᤶᤔᤡᤴ ᤁᤢᤜᤡᤶᤔᤥ ᤋᤣ᤹ᤖᤢᤖᤥ॥
JOH 19:28 ᤕᤠᤱᤛᤡ ᤕᤧᤛᤢᤖᤧ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧ ᤆᤢᤖᤧᤒᤠ ᤏᤡ᤺ᤛᤢᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤠ᤺ᤳᤋᤢ. “ᤀᤡᤱᤃᤠ᤹ ᤀᤠᤘᤠᤔᤡ᤺ᤛᤧᤖᤥ॥”
JOH 19:29 ᤂᤧᤵᤔᤥ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡ᤺ ᤁᤧᤕᤠᤰᤐᤠ ᤐᤷᤕᤠᤔᤠᤎᤡᤰ ᤕᤢᤅᤧ॥ ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂᤡᤃᤠᤰᤔᤠ᤺ᤴ ᤆᤧᤸᤗᤧᤰᤛᤣ᤹ ᤌᤡᤀᤥ ᤔᤧᤏᤡ᤺ᤵᤛᤢᤀᤠᤱ ᤜᤡᤛᤵ ᤛᤡᤱᤅᤡᤸᤗᤧ ᤁᤢᤒᤥᤖᤠ᤺ᤰᤁᤥ ᤔᤧᤓᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤔᤢᤖᤠᤀᤥ ᤂᤧᤴ ᤔᤧᤎᤢᤵᤋᤢ ᤔᤧᤒᤡᤖᤢᤖᤥ॥
JOH 19:30 ᤕᤧᤛᤢᤖᤧ ᤂᤧᤴ ᤐᤡ᤺ᤳᤋᤢᤀᤠᤱ ᤐᤠ᤺ᤳᤋᤢ. “ᤀᤠᤸᤗ ᤆᤢᤖᤧᤖᤥ॥” ᤜᤧᤰᤁᤣ ᤐᤠ᤺ᤳᤋᤢᤖ ᤁᤢᤎᤧᤃᤣ᤺ᤰᤐᤧᤴ ᤋᤷᤄᤢ᤹ ᤌᤠ᤺ᤛᤢ ᤜᤧᤰᤁᤩᤠᤱ ᤁᤢᤛᤰᤔᤠᤴ ᤗᤧᤖᤢᤍᤣ᤺ᤛᤢᤀᤠᤱ ᤛᤩᤧᤖᤥ॥
JOH 19:31 ᤁᤱᤃ ᤋᤱᤒᤣᤒᤠ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤠ ᤜᤧᤰᤁᤩᤠᤱ ᤕᤶᤒᤠ ᤏᤠ᤺ᤶᤛᤡᤱ ᤕᤧᤴᤏᤡᤴᤏᤢ᤺ᤸᤗᤧ ᤌᤡᤰ ᤕᤧᤴ ᤋᤃᤡ ᤘᤕᤧᤖᤥ॥ ᤕᤜᤢᤍᤡᤜᤠ᤹ᤖᤧ ᤏᤠ᤺ᤶᤛᤡᤱ ᤕᤧᤴᤏᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤆᤣᤜᤠ᤹ ᤔᤧᤒᤵᤐᤠ ᤂᤢᤏᤡ᤹ ᤛᤡᤖᤠ᤹ ᤔᤧᤎᤠᤱᤅᤡᤴᤒᤠᤸᤗᤧ ᤆᤥᤃᤢᤸᤗᤧ ᤜᤠᤖᤠ ᤔᤧᤛᤡ᤺ᤖ ᤑᤠ᤹ᤀᤠᤱ ᤂᤢᤏᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤀᤠᤱ ᤔᤧᤎᤠ᤺ᤛᤢᤛᤡᤖ ᤑᤠ᤹ᤀᤠᤱ ᤐᤡᤗᤠᤋᤛᤧᤴ ᤐᤣᤗᤡ ᤔᤧᤓᤠᤰᤋᤢᤖᤥ॥
JOH 19:32 ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢ᤺ᤴᤏᤢ ᤔᤧᤓᤥ᤺ᤴᤍᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤔᤧᤀᤧᤰᤂᤢᤖᤥ॥
JOH 19:33 ᤁᤖ ᤂᤧᤱᤜᤠ᤹ ᤕᤧᤛᤢᤖᤥ ᤔᤧᤓᤧᤖᤧᤸᤗᤧ ᤕᤧᤛᤢ᤺ᤱᤃ ᤋᤃᤡᤀᤣ ᤛᤩᤧᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤧ᤹ ᤁᤢᤗᤠᤱᤜᤠ᤹ ᤔᤧᤴᤀᤧᤰᤂᤢᤴᤗᤥ॥
JOH 19:34 ᤜᤧᤰᤁᤣᤛᤠᤱ ᤌᤡᤰ ᤌᤰᤛᤢᤒᤠᤸᤗᤧ ᤕᤧᤛᤢᤖᤧ ᤁᤢᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤌᤢᤒᤢᤸᤗᤧ ᤂᤡᤔᤥ ᤂᤧᤵᤔᤥᤗᤠᤶ ᤔᤠᤰᤂᤡ᤹ ᤏᤢ ᤆᤫᤠ᤺ᤳ ᤗ᤺ᤴᤍᤧᤖᤥ॥
JOH 19:35 ᤂᤡᤏᤡ᤹ᤀᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤂᤧᤴ ᤐᤥ᤺ᤰᤂᤧᤒᤠ ᤐᤠ᤺ᤴ ᤁᤧᤏᤡ᤺ᤒᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤒᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥
JOH 19:36 “ᤂᤢᤏᤧ᤹ ᤁᤢᤕᤧ᤺ᤵᤐᤠᤜᤠ᤹ ᤗᤳᤌᤡᤰᤁᤠᤱ ᤔᤧᤀᤧᤰᤏᤧᤴᤗᤥ” ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤛᤠᤶᤕᤥᤛᤠᤵᤗᤠ᤺ᤴ ᤁᤧᤳᤗ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ.
JOH 19:37 ᤜᤧᤰᤁᤩᤠᤱ ᤘᤣ᤹ ᤋᤧᤴᤏᤥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳᤗᤥ. “ᤁᤧᤎᤢᤵᤐᤠᤜᤠ᤹ᤖᤧ ᤀᤠᤒᤠᤅᤣ ᤔᤧᤎᤢᤒᤢᤒᤠᤴ ᤀᤥᤔᤧᤔᤧᤳᤋᤢᤖᤥ॥”
JOH 19:38 ᤂᤧᤴ ᤀᤣᤃᤠᤱ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑᤧᤴ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ॥ ᤂᤢᤏᤧ᤹ ᤕᤜᤢᤍᤡᤜᤠ᤹ ᤁᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤛᤫᤠ᤺ᤳᤋᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤐᤡᤗᤠᤋᤛᤖᤧ ᤀᤡᤱᤍᤳ ᤐᤡᤖᤢᤀᤠᤱ ᤂᤧᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤌᤠ᤺ᤛᤢᤀᤠᤱ ᤋᤣ᤹ᤖᤢ॥
JOH 19:39 ᤋᤃᤡ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤍᤢᤶᤛᤧ ᤁᤧᤍᤠ᤺ᤒᤠ ᤏᤡᤁᤥᤍᤣᤔᤛᤖᤧ ᤕᤢᤛᤢᤑᤧᤴ ᤋᤣ᤺ᤱ ᤔᤧᤳᤋᤢᤀᤠᤱ ᤘᤕᤧ॥ ᤏᤡᤁᤥᤍᤣᤔᤛᤖᤧ ᤔᤢᤷᤖ ᤏᤢ ᤂᤠᤶᤍᤥᤗᤡ ᤑ᤺ᤶᤔᤏᤠᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤛᤢᤶᤛᤢᤶ (᥉᥉) ᤁᤡᤗᤥ ᤔᤠᤖᤢᤰᤁᤡᤴ ᤋᤠᤖᤢᤀᤠᤱ ᤘᤕᤧᤖᤥ॥
JOH 19:40 ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤕᤜᤢᤍᤡ ᤆᤣ ᤗᤢᤵᤔᤠ ᤌᤡᤶ ᤁᤢᤀᤡᤛᤡ᤺ᤰ ᤔᤠᤖᤢᤰᤁᤡᤴ ᤜᤢ᤺ᤳᤋᤧᤳᤇᤢᤀᤠᤱ ᤏᤢ᤺ᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤧᤳᤇᤢᤖᤥ॥
JOH 19:41 ᤀᤠᤸᤗ ᤕᤧᤛᤢ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤒᤠ ᤋᤧᤴᤏᤥ ᤑᤢᤱᤀᤡᤰ ᤌᤡᤰ ᤏᤧᤛ᤻ᤛᤧ॥ ᤂᤧᤴ ᤑᤢᤱᤀᤡᤰᤁᤥ ᤀᤠᤸᤗᤥ ᤌᤠᤖᤡᤰ ᤔᤏᤠ ᤔᤧᤴᤏᤧᤀᤣ ᤁᤧᤘᤠ᤹ᤒᤠ ᤀᤡᤵᤐᤢᤱᤎᤡᤰ ᤏᤧᤛ᤻ᤛᤧᤖᤥ॥
JOH 19:42 ᤁᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤴ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤡᤵᤐᤢᤱᤅᤡᤴ ᤏᤡ᤺ᤳᤋᤠᤱ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤖᤧᤳᤇᤢᤀᤠᤱ ᤏᤧᤛ᤻ᤛᤧᤳᤇᤢᤖᤥ॥
JOH 20:1 ᤀᤠᤸᤗ ᤋᤧᤏᤧᤒᤠ ᤕᤧᤴᤏᤥ ᤂᤠᤔᤧᤴᤀᤥ᤺ᤳᤋᤣ ᤘᤕᤧᤸᤗᤧᤛᤠ ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤀᤡᤵᤐᤢᤱᤅᤥ ᤐᤣᤖᤥ॥ ᤂᤧᤴ ᤀᤡᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤔᤧᤕᤧᤵᤛᤢᤒᤠ ᤕᤶᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤔᤧᤀᤡᤛᤢᤀᤠᤱ ᤏᤧᤛ᤻ᤛᤧᤒᤠ ᤏᤡ᤺ᤛᤢ॥
JOH 20:2 ᤜᤧᤰᤁᤩᤠᤱ ᤂᤧᤴ ᤗᤥ᤺ᤰᤋᤧᤖ ᤛᤡᤔᤥᤏ ᤐᤋᤪᤢᤛ ᤏᤢ ᤕᤧᤛᤢᤖᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤘᤣ᤹ᤛ᤻ᤔᤠ ᤜᤢ᤹ᤛᤠᤶᤒᤠᤸᤗᤥ ᤐᤣᤀᤠᤱ ᤔᤧᤳᤋᤢᤛᤡ. “ᤂᤧᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤀᤡᤵᤐᤢᤱᤅᤥᤗᤠᤶ ᤔᤧᤍᤣ᤹ᤖᤢᤀᤠᤱ ᤜᤥ᤺ᤵᤗᤥ᥄ ᤀᤠᤳᤋᤠᤴ ᤔᤧᤏᤧᤛ᤻ᤛᤢᤀᤠᤱ ᤏᤧ᤹᤺ ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤠᤴᤗᤥ᥄”
JOH 20:3 ᤐᤋᤪᤢᤛ ᤏᤢ ᤂᤧᤴ ᤘᤣ᤹ ᤜᤢ᤹ᤛᤠᤶᤒᤠᤴ ᤀᤡ᤺ᤵᤐᤢᤱ ᤗᤧᤵᤔᤠᤱ ᤌᤠ᤺ᤏᤧᤳᤇᤡ॥
JOH 20:4 ᤂᤧᤴ ᤏᤧᤵᤔᤠᤱ ᤗᤥ᤺ᤰᤋᤧᤳᤇᤡ. ᤁᤖ ᤂᤧᤴ ᤘᤣ᤹ ᤜᤢ᤹ᤛᤠᤶᤒᤠᤸᤗᤧ ᤐᤋᤪᤢᤛᤧᤴ ᤗᤠᤶᤒᤠᤰᤋᤢᤀᤠᤱ ᤀᤡᤵᤐᤢᤱᤅᤥ ᤋᤃᤡ ᤁᤧᤖᤧᤖᤥ॥
JOH 20:5 ᤂᤧᤴ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤛᤡᤃᤠᤱ ᤀᤥᤔᤧᤳᤋᤢᤸᤗᤧ ᤆᤣᤍᤣ᤺ᤳᤋᤡᤴ ᤂᤧᤵᤔᤥ ᤏᤧᤛ᤻ᤛᤧᤒᤠ ᤏᤡ᤺ᤛᤢ. ᤁᤖ ᤛᤡᤃᤠᤱᤃ ᤔᤧᤗᤠ᤺ᤛᤧᤴᤗᤥ॥
JOH 20:6 ᤁᤢᤀᤣ᤺ᤰ ᤁᤢᤀᤣ᤺ᤰ ᤛᤡᤔᤥᤏ ᤐᤋᤪᤢᤛᤧᤴ ᤂᤧᤵᤔᤥ ᤁᤧᤖᤧᤀᤠᤱ ᤛᤡᤃᤠᤱ ᤗᤠ᤺ᤛᤧ॥ ᤂᤧᤸᤗᤧ ᤆᤣᤍᤣ᤺ᤳᤋᤡᤴ ᤏᤢ
JOH 20:7 ᤕᤧᤛᤢᤖᤧ ᤁᤢᤏᤠᤖᤠ ᤔᤧᤍᤧᤵᤋᤢᤒᤠ ᤋᤣ᤺ᤳᤋᤡᤴ ᤂᤧᤵᤔᤥ ᤏᤧᤛ᤻ᤛᤧᤒᤠ ᤏᤡ᤺ᤛᤢ॥ ᤂᤧᤴ ᤏᤠᤍᤧᤵᤔᤠ ᤋᤣ᤺ᤳᤋᤡᤴ ᤆᤣᤍᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤔᤧᤓᤠᤰᤋᤢᤀᤠᤱ ᤏᤧᤛ᤻ᤛᤧᤒᤠ ᤏᤡ᤺ᤛᤢᤖᤥ॥
JOH 20:8 ᤜᤧᤰᤁᤩᤠᤱ ᤋᤃᤡ ᤀᤡᤵᤐᤢᤱᤅᤥ ᤁᤧᤃᤧᤵᤐᤠ ᤜᤢ᤹ᤛᤠᤶᤒᤧᤴᤏᤠᤱ ᤛᤡᤃᤠᤱ ᤗᤠ᤺ᤛᤧ॥ ᤂᤧᤸᤗᤧ ᤂᤧᤴ ᤏᤡ᤺ᤛᤢᤀᤠᤱ ᤏᤛᤠ᤺ᤴ ᤆᤥᤃᤢᤖᤥ॥
JOH 20:9 (ᤂᤧᤱᤜᤠ᤹ᤖᤧ ᤀᤠᤸᤗᤛᤠᤱ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤜᤡᤱ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤧᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤔᤧᤘᤕᤧᤖᤥ॥)
JOH 20:10 ᤜᤧᤰᤁᤩᤠᤱ ᤂᤧᤴ ᤜᤢ᤹ᤛᤠᤶᤒᤠᤜᤠ᤹ ᤏᤧᤵᤔᤠᤱ ᤜᤡᤶᤔᤥ ᤏᤢ᤺ᤰᤂᤧᤳᤇᤡᤖᤥ॥
JOH 20:11 ᤁᤖ ᤔᤖᤡᤕᤶᤔᤡᤴ ᤀᤡ᤺ᤵᤐᤢᤱ ᤗᤠ᤺ᤰᤁᤠᤳ ᤜᤠᤒᤧᤖ ᤕᤧᤒᤧᤖᤥ॥ ᤂᤧᤴ ᤜᤠᤒᤧᤖ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤀᤡ᤺ᤵᤐᤢᤱ ᤛᤡᤃᤠᤱ ᤀᤥᤔᤧᤳᤋᤢᤸᤗᤧ.
JOH 20:12 ᤑ᤺ᤃᤧᤗ᤹ᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤧᤵᤑᤢ ᤔᤠᤱᤗᤠᤀᤡᤱᤒᤠᤜᤠ᤹ ᤕᤧᤛᤢᤖᤧ ᤁᤢᤎᤰ ᤔᤧᤏᤧᤛ᤻ᤛᤢᤀᤠᤱ ᤏᤧᤛ᤻ᤛᤧᤒᤠ ᤋᤧᤴᤏᤥ ᤌᤡᤰᤁᤡᤴ ᤁᤢᤎᤧᤃᤣ᤺ᤰ ᤗᤧᤵᤔᤠᤱ ᤏᤢ ᤘᤧᤛ᤻ᤔᤠᤴ ᤁᤢᤗᤠᤱ ᤗᤧᤵᤔᤠᤱ ᤕᤢᤅᤧᤳᤇᤡᤒᤠ ᤏᤡ᤺ᤛᤢᤛᤡᤖᤥ॥
JOH 20:13 ᤂᤧᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤍᤥ᤺ᤛᤧᤳᤇᤢ. “ᤂᤧᤏᤧ᤹ ᤌᤣᤀᤠᤱ ᤁᤧᤜᤠ᤺ᤵᤐᤠᤒᤣ᥅” ᤂᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤁᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤔᤧᤍᤣ᤹ᤖᤢᤖᤥ ᤜᤧᤰᤁᤩᤠᤱ ᤀᤠᤳᤋᤠᤴ ᤔᤧᤏᤧᤛ᤻ᤛᤢᤀᤠᤱ ᤏᤧᤀᤡ ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ॥”
JOH 20:14 ᤜᤧᤰᤁᤣ ᤐᤠ᤺ᤳᤋᤢᤖ ᤔᤖᤡᤕᤶᤔᤡᤴ ᤂᤡᤖᤡ ᤜᤡᤛᤡᤱᤅᤡᤸᤗᤧ ᤕᤧᤛᤢ᤺ᤴ ᤂᤧᤵᤔᤥ ᤕᤧᤒᤧᤒᤠ ᤏᤡ᤺ᤛᤢ. ᤁᤖ ᤂᤢᤏᤧ᤹ ᤕᤧᤛᤢ᤺ᤴᤏᤣᤖᤥ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ॥
JOH 20:15 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤔᤠᤔᤢᤀᤣ. ᤂᤧᤏᤧ᤹ ᤌᤣᤀᤠᤱ ᤁᤧᤜᤠ᤺ᤵᤐᤠᤒᤣ᥅ ᤜᤠ᤺ᤳ ᤁᤧᤃᤥ᤺ᤳᤋᤢᤒᤠᤒᤣ᥅” ᤔᤖᤡᤕᤔᤖᤧ ᤂᤢᤏᤧ᤹ᤃ ᤑᤢᤱᤀᤡᤰ ᤁᤧᤃᤥ᤺ᤒᤠᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤁᤵᤔᤥᤗᤠᤶ ᤁᤧᤍᤣ᤹ᤖᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤀᤠᤳᤋᤠᤴ ᤁᤧᤏᤧᤛ᤻ᤛᤢᤀᤠᤱ ᤏᤧ᤹᤺ ᤀᤡᤱᤃᤠ᤹ ᤔᤧᤳᤋᤠᤱᤅᤧ᤹ᤏᤠ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤀᤡᤱᤃᤠ᤹ ᤋᤣ᤹ᤖᤢᤱᤗᤥ॥”
JOH 20:16 ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤔᤖᤡᤕᤶᤔᤣ᥄” ᤂᤢᤏᤧ᤹ ᤕᤧᤛᤢ᤺ᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ “ᤖᤒ᤻ᤒᤥᤏᤡ᥄” ᤔᤧᤳᤋᤢᤖᤥ॥ (ᤂᤧᤴ ᤑᤠ᤹ᤀᤡᤱᤃ ᤜᤡᤒᤪᤢ ᤐᤠ᤺ᤴᤏᤥ “ᤛᤡᤰᤛᤠᤶᤒᤣ” ᤐᤥ᤺ᤱᤗᤥ॥)
JOH 20:17 ᤕᤧᤛᤢᤖᤧ ᤂᤧᤴ ᤔᤧᤳᤋᤢ “ᤀᤡᤱᤃᤠ᤹ ᤔᤧᤍᤧᤶᤛᤠᤱᤅᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗᤥ ᤌᤠᤖᤡᤰ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤥ ᤔᤧᤶᤒᤣ᤺ᤰᤁᤣ ᤘᤠ᤹ᤀᤠᤖᤥ॥ ᤁᤖ ᤐᤣᤃᤧ᤹ᤀᤠᤱ ᤀᤠᤴᤛᤠ᤹ᤛᤡ ᤀᤰᤂᤣ ᤔᤧᤳᤋᤧᤛᤧ᤹ᤀᤥ. ‘ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤏᤢ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖ ᤐᤳᤋᤠᤖᤥ॥’”
JOH 20:18 ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤐᤣᤀᤠᤱ ᤜᤢ᤹ᤛᤠᤶᤒᤠᤜᤠ᤹. “ᤀᤡᤱᤃᤠ᤹ ᤍᤠᤱᤒᤠᤴ ᤏᤡ᤺ᤛᤢᤱᤅᤠᤱ ᤘᤠ᤹ᤖᤥ” ᤔᤧᤳᤋᤢᤛᤡᤀᤠᤱ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤆᤧᤰᤋᤢᤛᤡᤖᤥ॥
JOH 20:19 ᤒᤠ ᤂᤧᤴ ᤋᤧᤏᤧᤒᤠᤸᤗᤧ ᤕᤢ᤺ᤴᤇᤡᤰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤜᤢᤍᤡᤜᤠ᤹ ᤔᤧᤃᤡᤖᤢᤛᤡᤀᤠᤱ ᤜᤡᤶᤛᤡᤃᤠᤱ ᤔᤧᤛᤢᤶᤛᤡᤱ. ᤜᤧᤰᤁᤩᤠᤱ ᤗᤠᤶᤎᤣ᤺ᤵᤐᤧᤴ ᤔᤧᤀᤧᤳᤋᤢᤀᤠᤱ ᤔᤧᤕᤢᤅᤧᤸᤗᤧ ᤕᤧᤛᤢ᤺ᤴ ᤂᤢᤏᤡ᤹ ᤗᤢᤶᤔᤥ ᤌᤠ᤺ᤶᤛᤡᤱᤗ ᤀᤰᤂᤣ ᤔᤧᤳᤋᤢᤛᤡ. “ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ᥄”
JOH 20:20 ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤁᤢᤜᤢᤰᤜᤠ᤹ ᤏᤢ ᤁᤢᤗᤧᤶᤓᤣ᤺ᤵᤔᤠᤴ ᤀᤥᤛᤣ᤺ᤴᤎᤠᤰᤋᤢᤛᤡ॥ ᤍᤠᤱᤒᤠᤴ ᤔᤧᤏᤡ᤺ᤛᤢᤒᤠᤸᤗᤧ ᤜᤢ᤹ᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥
JOH 20:21 ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ᥄ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ ᤐᤠᤱᤏᤡᤱᤗ ᤐᤳᤋᤠᤖᤥ॥”
JOH 20:22 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤀᤥ ᤛᤠᤱᤃᤢᤃᤧᤴ ᤛᤰᤔᤠ᤺ᤸᤗᤧ ᤔᤢ᤺ᤳᤋᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤛᤣᤛᤣᤔᤠᤱᤅᤡᤴ ᤋᤠ᤺ᤰᤋᤧᤶᤔᤧ᤹ᤀᤥ॥
JOH 20:23 ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤥ᤺ᤱᤗᤥ. ᤁᤖ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤔᤧᤒᤥ᤺ᤱᤏᤧᤸᤗᤥ॥”
JOH 20:24 ᤀᤠᤸᤗ ᤕᤧᤛᤢ᤺ᤴ ᤂᤢᤏᤡ᤹ ᤗᤢᤶᤔᤥ ᤋᤩᤧ᤺ᤸᤗᤧ ᤌᤡᤰ-ᤏᤧᤳ ᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ᤺ᤴ ᤂᤧᤵᤔᤥ ᤜᤥ᤺ᤵᤋᤧᤖᤥ॥
JOH 20:25 ᤜᤧᤰᤁᤣ᤺ᤸᤗᤧ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧ ᤌᤥᤔᤠ᤺ᤴ ᤀᤰᤂᤣ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤍᤠᤱᤒᤠᤴ ᤏᤡ᤺ᤛᤢᤶᤒᤧᤖᤥ᥄” ᤁᤖ ᤌᤥᤔᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤢᤜᤢᤰᤁᤥ ᤔᤧᤎᤧᤵᤋᤢᤒᤠ ᤑᤧᤴᤋᤡᤱᤅᤡᤸᤗᤧ ᤁᤢᤕᤥ᤺ᤰᤁᤡᤴ ᤔᤧᤴᤏᤡᤀᤣ ᤏᤢ ᤂᤧᤵᤔᤥ ᤀᤠᤜᤢᤰᤆᤥ᤺ᤴ ᤔᤧᤱᤃᤣ᤺ᤳᤋᤣ ᤜᤧᤰᤁᤩᤠᤱ ᤁᤢᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤔᤧᤎᤢᤒᤢᤒᤠᤀᤥ ᤀᤠᤜᤢᤰᤁᤡᤴ ᤔᤧᤱᤃᤣ᤺ᤳᤋᤣᤃ ᤏᤛᤠ᤺ᤴ ᤔᤧᤈᤥ᤺ᤰᤁᤠᤴᤗᤥ॥”
JOH 20:26 ᤕᤧᤳᤇᤡ ᤕᤧᤴ ᤀᤣᤃᤠᤱ ᤜᤢ᤹ᤛᤠᤶᤒᤠᤜᤠ᤹ ᤕᤠᤶᤔᤥ ᤜᤡᤶ ᤛᤡᤃᤠᤱ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧ॥ ᤁᤴ ᤕᤧᤶᤔᤥ ᤌᤥᤔᤠ᤺ᤴᤏᤠᤱ ᤘᤕᤧ. ᤗᤠᤶᤎᤣ᤺ᤵᤐᤧᤴ ᤛᤡᤃᤠᤱᤗᤠᤶ ᤔᤧᤛᤢᤒᤢᤀᤠᤱ ᤐᤳᤇᤧᤛᤠᤱ ᤂᤢᤏᤡ᤹ ᤗᤢᤶᤔᤥᤀᤣ ᤕᤧᤛᤢ᤺ᤴ ᤌᤠ᤺ᤶᤛᤡᤱᤗ. “ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ” ᤔᤧᤳᤋᤢᤛᤡ॥
JOH 20:27 ᤜᤧᤰᤁᤩᤠᤱ ᤌᤥᤔᤠ᤺ᤴ ᤔᤧᤳᤋᤢ. “ᤌᤥᤔᤠᤀᤣ. ᤁᤧᤜᤢᤰᤆᤥ᤺ᤴ ᤁ᤹ᤕᤥ ᤕᤠᤰᤋᤧ᤹. ᤀᤠᤜᤢᤰᤜᤠ᤹ ᤀᤥᤔᤧᤳᤋᤧ᤹॥ ᤂᤧᤏᤧ᤹ ᤁᤧᤜᤢᤰᤁᤡᤴ ᤀᤠᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤔᤧᤎᤢᤒᤢᤒᤠ ᤁᤢᤕᤥ᤺ᤰᤁᤥ ᤁᤣ᤺ᤳᤋᤧ᤹ᤀᤥ॥ ᤂᤧᤏᤧ᤹ ᤆᤵᤆᤡ ᤔᤧᤈᤥᤃᤧᤴᤏᤧ᤹. ᤁᤖ ᤏᤛᤠ᤺ᤴ ᤆᤥᤃᤧ᤹ᤀᤥ॥”
JOH 20:28 ᤌᤥᤔᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤍᤠᤱᤒᤠ ᤏᤢ ᤀᤠᤏᤡᤱᤘᤠ᤹ᤑᤢᤔᤠᤱᤏᤧᤖᤥ”
JOH 20:29 ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ᤃ ᤀᤡᤱᤃᤠ᤹ ᤁᤧᤏᤡ᤺ᤛᤠᤱᤅᤠᤱᤗᤰ ᤏᤛᤠ᤺ᤴ ᤁᤧᤈᤥᤃᤠᤱᤗᤥ. ᤁᤖ ᤀᤡᤱᤃᤠ᤹ ᤕᤠᤵᤔᤡ ᤔᤧᤴᤏᤡᤀᤣ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥”
JOH 20:30 ᤕᤧᤛᤢᤖᤧ ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤆᤥᤃᤢᤀᤠᤱ ᤘᤕᤧ॥
JOH 20:31 ᤁᤖ ᤁᤵᤔᤥᤃ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤛᤠ᤺. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤛᤠᤵᤋᤧᤀᤠᤱ ᤐᤵᤐᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥
JOH 21:1 ᤕᤠᤱᤛᤡ ᤕᤧᤛᤢ᤺ᤴ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤋᤡᤒᤣᤖᤡᤕᤛ ᤘᤖᤰᤁᤡᤸᤗᤧ ᤁᤢᤒᤣᤛᤠᤱ ᤀᤰᤂᤣᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤛᤡᤱᤗᤥ–
JOH 21:2 ᤂᤧᤵᤔᤥ ᤛᤡᤔᤥᤏ ᤐᤋᤪᤢᤛ. ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ. ᤈᤒ᤻ᤍᤡᤕᤠᤖᤧ ᤏᤧᤵᤑᤢ ᤁᤢᤛ᤻ᤛᤠ᤺ᤜᤠ᤹. ᤃᤠᤗᤡᤗᤒᤠ ᤁᤠᤏᤠ ᤐᤠᤱᤈᤢᤶᤒᤠ ᤏᤠᤌᤠᤏᤧᤗ ᤜᤧᤰᤁᤩᤠᤱ ᤘᤣ᤹ ᤏᤧᤵᤑᤢ ᤜᤢ᤹ᤛᤠᤶᤒᤠᤜᤠ᤹ ᤛᤥᤖᤡᤰ ᤔᤧᤘᤕᤧᤖᤥ॥
JOH 21:3 ᤛᤡᤔᤥᤏ ᤐᤋᤪᤢᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤅᤠ ᤋᤧᤶᤛᤧ ᤐᤣ᤺ᤰᤁᤠᤖᤥ॥” ᤂᤧᤱᤜᤠ᤹ᤖᤧ. “ᤀᤠᤏᤡᤃᤧᤀᤠᤱ ᤂᤧᤏᤧ᤹ᤏᤢᤀᤣ ᤐᤣᤃᤡᤃᤧ᤹ᤖᤥ” ᤔᤧᤔᤧᤳᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂ᤺ᤱᤒᤣᤀᤥ ᤔᤧᤗᤠ᤺ᤛᤧᤀᤠᤱ ᤕᤥ᤺ᤱ ᤗᤧᤵᤛᤧ ᤔᤧᤒᤣ. ᤁᤖ ᤂᤧᤴ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠ᤺ᤳ ᤌᤣᤀᤠᤱ ᤋᤧᤶᤔᤠ ᤔᤧᤴᤇᤢᤰᤋᤢᤴᤗᤥ॥
JOH 21:4 ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤕᤧᤛᤢ᤺ᤴ ᤘᤖᤰᤁᤡᤸᤗᤧ ᤁᤢᤒᤣᤛᤠᤱ ᤕᤧᤒᤧ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤕᤧᤛᤢ᤺ᤴᤏᤣᤖᤥ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
JOH 21:5 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤢᤶᤛᤣ. ᤂᤡᤏᤡ᤹ ᤅᤠ ᤁᤧᤍᤧᤶᤛᤢᤶᤔᤠᤱ ᤘᤠ᤹ᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤜᤥ᤺ᤵᤗᤥ॥”
JOH 21:6 ᤕᤠᤶᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤂ᤺ᤱᤒᤣᤸᤗᤧ ᤆᤢᤵᤛᤠᤱ ᤗᤧᤵᤔᤠᤱ ᤕᤥ᤺ᤱᤅᤡᤴ ᤗᤧᤵᤋᤧᤶᤔᤧ᤹ᤀᤠᤱ ᤂᤧᤵᤔᤥ ᤂᤡᤏᤡ᤹ ᤅᤠ ᤁᤧᤎᤠ᤺ᤛᤢᤶᤗᤥ॥” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤥ᤺ᤱᤅᤡᤴ ᤔᤧᤗᤧᤵᤋᤢᤸᤗᤧ ᤛᤠ᤹ᤖᤡᤰ ᤕᤖᤡᤰ ᤅᤠ ᤔᤧᤎᤩᤧᤀᤠᤱ ᤂᤧᤱᤜᤠ᤹ᤖᤧ ᤕᤥ᤺ᤱᤅᤡᤴ ᤀᤢ᤺ᤱᤔᤠᤀᤣ ᤔᤧᤴᤇᤢᤰᤋᤢᤴ॥
JOH 21:7 ᤕᤧᤛᤢᤖᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤠᤸᤗᤧ ᤛᤡᤔᤥᤏ ᤐᤋᤪᤢᤛᤧᤴ ᤔᤧᤳᤋᤢ. “ᤂᤢᤏᤧ᤹ᤃ ᤍᤠᤱᤒᤠᤴᤏᤣᤖᤥ᥄” ᤛᤡᤔᤥᤏ ᤐᤋᤪᤢᤛᤖᤧ ᤂᤧᤴ ᤂᤧᤵᤛᤢᤏᤠᤔᤧ᤺ᤴᤏᤣ ᤋᤣ᤺ᤳᤋᤡᤸᤗᤧ ᤁᤡᤳᤗᤡᤰ ᤁᤡᤳᤇᤡᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤴ ᤑᤧᤴᤍᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤆᤫᤠ᤺ᤳᤋᤥ ᤐᤡᤴᤍᤧ ᤗᤠ᤺ᤛᤧᤀᤠᤱ ᤘᤠᤈᤠᤃᤧᤖ ᤁᤢᤕᤠᤀᤥ ᤐᤣᤖᤥ॥
JOH 21:8 ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ ᤅᤠ᤺ᤸᤗᤧ ᤁᤧᤍᤡᤶᤒᤠ ᤕᤥ᤺ᤱᤅᤡᤴ ᤂ᤺ᤱᤒᤣᤀᤥᤗᤠᤶ ᤔᤧᤀᤢ᤺ᤰᤂᤢᤖ ᤁᤢᤕᤠᤀᤥ ᤔᤧᤓᤧᤖᤧ॥ ᤂᤧᤱᤃ ᤁᤢᤕᤠᤗᤠᤶ ᤂᤧᤶᤔᤩᤠᤰ ᤔᤧᤔᤠ᤺ᤰᤂᤧᤴ. ᤁᤖ ᤁᤢᤃᤡᤵ ᤏᤧᤳᤇᤡ (᥈᥆᥆) ᤜᤢᤰᤛᤡᤰ ᤌᤠᤖᤡᤰᤗᤰ ᤏᤧᤛ᤻ᤛᤧᤖᤥ॥
JOH 21:9 ᤂᤧᤱᤜᤠ᤹ ᤁᤢᤕᤠᤀᤥ ᤔᤧᤃᤧᤖᤧᤸᤗᤧ ᤔᤡᤄᤠ᤺ᤱᤅᤥ ᤀᤥ᤹ᤔᤏᤠᤒᤠ ᤅᤠᤜᤠ᤹ ᤏᤢ ᤂᤖᤧ᤺ᤱᤜᤠ᤹ ᤔᤧᤏᤡ᤺ᤛᤢᤖᤥ॥
JOH 21:10 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤥ ᤂᤠᤖᤰ ᤁᤧᤍᤧᤶᤛᤢᤶᤒᤠᤀᤥᤗᤠᤶ ᤁᤢᤓᤠ ᤅᤠᤜᤠ᤹ ᤑᤧᤳᤋᤧᤶᤔᤧ᤹ᤀᤥ॥”
JOH 21:11 ᤛᤡᤔᤥᤏ ᤐᤋᤪᤢᤛᤧᤴ ᤂ᤺ᤱᤒᤣᤀᤥ ᤗᤠ᤺ᤛᤧᤀᤠᤱ ᤅᤠ᤺ᤸᤗᤧ ᤁᤧᤍᤡᤶᤒᤠ ᤕᤥ᤺ᤱᤅᤡᤴ ᤁᤢᤕᤠᤀᤥ ᤀᤢ᤺ᤰᤂᤢ ᤗ᤺ᤳᤋᤢ॥ ᤂᤧᤵᤔᤥ ᤕᤶᤕᤶᤒᤠ ᤁᤡᤵᤌᤡᤰᤁᤠᤱ ᤅᤠ-ᤛᤢᤶ (᥇᥋᥉) ᤅᤠᤜᤠ᤹ ᤔᤧᤕᤠᤃᤧ॥ ᤜᤧᤰᤁᤣᤛᤠᤱ ᤕᤥ᤺ᤱᤅᤡᤴ ᤔᤧᤍᤧ᤺ᤰᤂᤧᤴᤗᤥ॥
JOH 21:12 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤧᤖᤧᤶᤔᤧ᤹ᤀᤠᤱ ᤆᤧᤶᤔᤧ᤹ᤀᤥ॥” ᤁᤖ ᤂᤧᤵᤔᤥ ᤀᤠᤳᤋᤡᤴ ᤁᤢᤜᤢ᤹ᤛᤠᤶᤒᤠᤴᤏᤠᤱ ᤂᤧᤏᤧ᤹ ᤜᤠ᤺ᤳᤏᤧᤴᤒᤣ ᤗ᤹ᤖᤡᤰ ᤛᤣ᤺ᤴᤍᤥ᤺ᤔᤠ ᤔᤧᤴᤀᤠ᤺ᤴᤇᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤍᤠᤱᤒᤠᤴᤏᤣᤖᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤃᤳᤋᤢᤖᤥ॥
JOH 21:13 ᤕᤧᤛᤢᤖᤧ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤂᤧᤱᤜᤠ᤹ ᤐᤡᤖᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤅᤠᤜᤠ᤹ᤀᤠᤱ ᤐᤡᤖᤢᤛᤡᤖᤥ॥
JOH 21:14 ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤜᤡᤅᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤛᤡᤱᤒᤠ ᤁᤴ ᤛᤢᤶᤗᤧᤱ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
JOH 21:15 ᤂᤧᤱᤜᤠ᤹ᤖᤧ ᤔᤧᤈ ᤔᤧᤛᤢᤖᤢᤀᤠᤱ ᤛᤡᤔᤥᤏ ᤐᤋᤪᤢᤛᤧᤴ ᤕᤧᤛᤢᤖᤧ ᤔᤧᤳᤋᤢ “ᤕᤢᤜᤢᤴᤏᤠᤖᤧ ᤁᤢᤛ᤻ᤛᤠ᤺ ᤛᤡᤔᤥᤏᤣ. ᤁᤱᤜᤠ᤹ᤖᤧ ᤔᤡ᤺ᤶᤈᤡ ᤔᤧᤔᤧᤳᤋᤠᤒᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤧᤏᤧ᤹ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤡ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤀᤠᤍᤠᤱᤒᤣ. ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤡ᤺ᤶᤈᤡ ᤔᤧᤳᤏᤧ᤹ᤒᤠᤴ ᤂᤧᤏᤧ᤹ ᤁᤧᤏᤡ᤺ᤛᤢ᤹ᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤀᤠᤔᤧᤸᤗᤢᤰᤛᤠ᤺ᤜᤠ᤹ ᤆᤠᤗᤠᤶᤛᤧᤛᤧ᤹ᤀᤥ॥”
JOH 21:16 ᤕᤧᤛᤢᤖᤧ ᤐᤋᤪᤢᤛᤧᤴ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤕᤢᤜᤢᤴᤏᤠᤖᤧ ᤁᤢᤛ᤻ᤛᤠ᤺ ᤛᤡᤔᤥᤏᤣ. ᤀᤡᤱᤃᤠ᤹ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤡ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤀᤠᤍᤠᤱᤒᤣ. ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤡ᤺ᤶᤈᤡ ᤔᤧᤳᤏᤧ᤹ᤒᤠᤴ ᤂᤧᤏᤧ᤹ ᤁᤧᤏᤡ᤺ᤛᤢ᤹ᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤀᤠᤔᤧᤸᤗᤢᤰᤜᤠ᤹ ᤁᤔᤧᤛᤧ᤹ᤀᤥ॥”
JOH 21:17 ᤜᤧᤰᤁᤩᤠᤱ ᤕᤠᤶᤔᤥ ᤕᤧᤛᤢᤖᤧ ᤛᤢᤶᤗᤧᤱᤅᤥ ᤐᤋᤪᤢᤛᤧᤴ ᤛᤣ᤺ᤴᤍᤥᤛᤢ. “ᤕᤢᤜᤢᤴᤏᤠᤖᤧ ᤁᤢᤛ᤻ᤛᤠ᤺ ᤛᤡᤔᤥᤏᤣ. ᤀᤡᤱᤃᤠ᤹ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤡ᥅” ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤛᤢᤶᤗᤧᤱ ᤌᤠᤖᤡᤰ “ᤀᤡᤱᤃᤠ᤹ ᤔᤡ᤺ᤶᤈᤡ ᤁᤧᤔᤧᤳᤋᤠᤒᤡ” ᤗ᤹ᤖᤡᤰ ᤛᤣ᤺ᤴᤍᤥᤛᤢᤒᤠᤀᤥ ᤐᤋᤪᤢᤛᤖᤧ ᤁᤢᤏᤡᤱᤘᤠ᤹ ᤋᤢᤃᤧᤖ ᤔᤧᤳᤋᤢ. “ᤀᤥᤖᤥ. ᤀᤠᤍᤠᤱᤒᤣ. ᤂᤧᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡ᤺ᤛᤢ᤹ᤖᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤔᤡ᤺ᤶᤈᤡ ᤔᤧᤳᤏᤧᤒᤠᤴ ᤂᤧᤏᤧ᤹ ᤁᤧᤏᤡ᤺ᤛᤢ᤹ᤖᤥ॥” ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤀᤠᤔᤧᤸᤗᤢᤰᤜᤠ᤹ ᤆᤠᤗᤠᤶᤛᤧᤛᤧ᤹ᤀᤥ॥
JOH 21:18 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤧ᤹. ᤌᤠᤱᤒᤧᤴ ᤁᤧᤘᤕᤧᤸᤗᤧ ᤀᤠᤒᤠᤅᤣ ᤑ᤹ᤀᤡ ᤁᤧᤕᤢᤵᤛᤡᤱᤅᤠᤱ ᤀᤠᤳᤋᤠᤴ ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢ ᤂᤧᤵᤔᤥᤀᤣ ᤁᤧᤒᤣᤖᤥ. ᤁᤖ ᤁᤠᤵᤐᤥᤒᤠ ᤁᤧᤍᤢᤶᤔᤠᤱᤃ ᤁᤧᤜᤢᤰᤜᤠ᤹ ᤁᤧᤛᤴᤇᤢ᤹. ᤜᤧᤰᤁᤩᤠᤱ ᤑ᤹ᤀᤡ ᤁᤧᤶᤕᤢᤵᤐᤠᤱ ᤀᤠᤳᤋᤠᤴ ᤐᤣ᤺ᤰᤔᤠ ᤁᤧᤛᤡᤖᤠ᤹ ᤔᤧᤎᤠᤱᤏᤧᤴ ᤂᤧᤵᤔᤥ ᤁᤧᤶᤍᤣ᤹ᤖᤥ॥”
JOH 21:19 ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤖ ᤐᤋᤪᤢᤛᤧᤴ ᤁᤧᤍᤠ᤺ᤒᤠ ᤕᤧᤶᤔᤥ ᤀᤠᤳᤋᤡᤴ ᤐᤖᤡᤰᤗᤧᤴ ᤛᤡ᤺ᤔᤧᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ ᤆᤥᤃᤢ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤐᤋᤪᤢᤛᤧᤴ ᤔᤧᤳᤋᤢ. “ᤀᤡᤱᤃᤠ᤹ ᤋᤡ᤺ᤰᤋᤠᤱᤅᤧ᤹ᤀᤥ᥄”
JOH 21:20 ᤐᤋᤪᤢᤛᤧᤴ ᤜᤡᤸᤗᤡᤰ ᤜᤡᤛᤡᤱᤅᤡᤸᤗᤧ ᤕᤧᤛᤢᤖᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤜᤢ᤹ᤛᤠᤶᤒᤧᤸᤗᤧ ᤋᤡᤶᤍᤢᤒᤠ ᤏᤡ᤺ᤛᤢᤖᤥ॥ (ᤛᤠᤓᤠᤱᤈᤠ ᤔᤧᤈ᤺ᤸᤗᤧ ᤒᤠ ᤂᤧᤴ ᤜᤢ᤹ᤛᤠᤶᤒᤠᤸᤗᤧ ᤕᤧᤛᤢᤖᤧ ᤁᤢᤒᤣᤛᤠᤱ ᤏᤠ᤺ᤶᤛᤡᤱᤗ ᤕᤢᤅᤧᤸᤗᤧ ᤍᤠᤱᤒᤣ. ᤜᤠ᤺ᤳᤗᤧ ᤀᤡᤱᤃᤧᤗᤧᤰᤐᤣ ᤗ᤹ᤖᤡᤰ ᤛᤣ᤺ᤴᤍᤥᤛᤢᤀᤠᤱ ᤘᤕᤧᤖᤥ)
JOH 21:21 ᤐᤋᤪᤢᤛᤖᤧ ᤂᤧᤴ ᤏᤡ᤺ᤛᤢᤀᤠᤱ ᤍᤠᤱᤒᤠᤴ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤌᤣ ᤐᤥ᤺ᤱᤒᤠᤒᤣ᥅”
JOH 21:22 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤏᤢ᤺ᤱᤅᤠᤖ ᤌᤠᤖᤡᤰ ᤂᤢᤏᤧ᤹ ᤜᤡᤱᤅᤠᤱ ᤘᤠ᤹ᤖ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤅᤡᤸᤗᤧ ᤂᤧᤏᤧ᤹ ᤌᤧᤔᤠ ᤐᤥ᤺ᤱᤒᤣ᥅ ᤀᤡᤱᤃᤠ᤹ ᤋᤡ᤺ᤰᤋᤠᤱᤅᤧ᤹ᤀᤥ॥”
JOH 21:23 ᤂᤧᤸᤗᤧ ᤆᤥᤃᤢᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤴ ᤜᤢ᤹ᤛᤠᤶᤒᤠᤱᤃ ᤔᤧᤛᤡ᤺ᤏᤧᤴᤗᤥ ᤗ᤹ᤖᤡᤰ ᤀᤡᤱ ᤛᤧ᤺ᤖᤧᤖᤥ॥ ᤁᤖ ᤍᤠᤱᤒᤠᤸᤗᤧᤃ ᤜᤧᤰᤁᤣ ᤐᤠ᤺ᤳᤋᤢᤒᤠ ᤜᤥ᤺ᤵᤋᤧᤖᤥ॥ ᤂᤢᤏᤧ᤹ᤃ ᤀᤰᤂᤣᤖᤰ ᤐᤠ᤺ᤳᤋᤢᤀᤠᤱ ᤘᤕᤧᤖᤥ. “ᤀᤡᤱᤃᤠ᤹ ᤏᤢ᤺ᤱᤅᤠᤖ ᤌᤠᤖᤡᤰ ᤂᤢᤏᤧ᤹ ᤜᤡᤱᤅᤠᤱ ᤘᤠ᤹ᤖ ᤐᤠ᤺ᤳᤋᤢᤱᤅᤡᤸᤗᤧ ᤂᤧᤏᤧ᤹ ᤌᤧᤔᤠ ᤐᤥ᤺ᤰᤂᤧᤒᤣ᥅”
JOH 21:24 ᤒᤠ ᤂᤧᤴ ᤁᤢᤜᤢ᤹ᤛᤠᤶᤒᤠᤸᤗᤧ ᤁᤴ ᤐᤠ᤺ᤴᤜᤠ᤹ᤖᤧᤴ ᤋᤥ᤺ᤴᤍᤡ ᤐᤡᤖᤢᤀᤠᤱ ᤛᤠᤵᤋᤢᤒᤠᤖᤥ॥ ᤂᤢᤏᤧ᤹ ᤁᤢᤒᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡ᤺ᤛᤢᤶᤒᤧᤖᤥ॥
JOH 21:25 ᤕᤧᤛᤢᤖᤧ ᤘᤣ᤹ ᤕᤖᤡᤰ ᤕᤠ᤺ᤶᤒᤰᤜᤠ᤹ᤀᤠᤱ ᤆᤥᤃᤢ॥ ᤂᤧᤱᤜᤠ᤹ ᤌᤧᤵᤐᤧᤳᤋᤠᤱ ᤛᤠᤵᤔᤠᤸᤗᤧᤃ ᤂᤧᤴ ᤛᤠᤵᤐᤴᤜᤠ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤀᤠᤱ ᤔᤧᤜᤳᤋᤢᤴ ᤗ᤹ᤖᤡᤰ ᤀᤡ᤺ᤳᤋᤢᤱᤗᤥ॥
ACT 1:1 ᤀᤠᤔᤡ᤺ᤶ ᤌᤡᤕᤥᤑᤡᤗᤛᤣ. ᤀᤡᤱᤃᤠ᤹ ᤋᤃᤡᤒᤠ ᤀᤠᤛᤠᤵᤐᤴᤏᤥ ᤕᤧᤛᤢᤖᤣ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤧᤴᤍᤣ᤹ᤀᤣ ᤌᤠᤖᤡᤰ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤜᤢ᤹ᤖᤢᤛᤡᤒᤠ ᤁᤠᤰ ᤐᤠ᤺ᤴᤜᤠ᤹ ᤛᤠᤵᤋᤢᤱ ᤐᤡᤏᤧᤀᤠᤱ ᤐᤳᤗᤥ॥
ACT 1:3 ᤕᤧᤛᤢ᤺ᤴ ᤋᤢᤰᤂᤣ ᤆᤩᤧᤀᤠᤱ ᤛᤩᤧ. ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤗᤡᤒᤥ᤺ᤱ (᥊᥆) ᤕᤧᤴ ᤌᤠᤖᤡᤰ ᤂᤢᤏᤧ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤛᤡᤱᤔᤠ ᤑᤠ᤹ᤀᤠᤱ ᤀᤧᤳᤗᤧᤱ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤆᤧᤰᤋᤢᤛᤡᤖᤥ॥
ACT 1:4 ᤌᤡᤰᤗᤧᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤆᤖ ᤕᤢᤅᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤕᤖᤢᤛᤗᤧᤔ ᤗᤧᤖᤧᤶᤔᤧ᤹ᤀᤠᤱ ᤀᤠᤸᤗᤥᤛᤠ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤛᤣᤛᤣᤔᤠᤱ ᤐᤡᤏᤡᤱ ᤗ᤹ᤖᤡᤰ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤜᤠᤱᤄᤧᤶᤔᤧ᤹॥ ᤁᤱᤃ ᤋᤃᤡ ᤔᤧᤳᤏᤡᤱᤒᤠ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ACT 1:5 ᤕᤢᤜᤢᤴᤏᤠᤖᤧᤃ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ. ᤁᤖ ᤁᤢᤓᤠ ᤕᤧᤴ ᤀᤣᤃᤠᤱ ᤛᤣᤛᤣᤔᤠᤱᤗᤠᤶ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡ᤹ᤖᤥ॥”
ACT 1:6 ᤌᤡᤰᤕᤧᤴ ᤂᤧᤱᤜᤠ᤹ᤖᤧ ᤂᤢᤏᤧ᤹ᤏᤢ ᤛᤥᤖᤡᤰ ᤔᤧᤘᤕᤧᤸᤗᤧ ᤔᤧᤔᤧᤳᤋᤢ “ᤀᤠᤍᤠᤱᤒᤣ. ᤒᤠ ᤁᤴ ᤕᤧᤶᤔᤥᤀᤣ ᤀᤡᤛᤪᤠᤀᤡᤗᤡᤜᤠ᤹ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤢᤛᤡᤀᤠᤱ ᤀᤠᤏᤡ᤹ ᤜᤠᤱᤈᤢᤶᤔᤡᤴ ᤕᤠᤶᤔᤥ ᤁᤧᤈᤥᤃᤢ᤹ᤒᤡ᥅”
ACT 1:7 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤵᤑᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤧᤳ ᤁᤧᤗ᤹ᤒᤠᤴ ᤏᤡ᤺ᤔᤠ ᤌᤠ᤺ᤔᤠ ᤂᤡᤏᤡ᤹ ᤕᤠ᤺ᤶᤒᤰ ᤔᤧ᤺ᤴᤗᤥ॥ ᤂᤧᤱᤃ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤀᤥ ᤏᤡ᤺ᤴᤎᤥ ᤆᤥᤃᤢ᤹ᤖᤥ॥
ACT 1:8 ᤁᤖ ᤂᤡᤏᤡ᤹ ᤌᤧᤔᤠ ᤏᤡᤱᤘᤠ᤹ ᤂᤥ᤺ᤔᤠ ᤐᤥ᤺ᤱ ᤑᤠ᤹ᤗᤧ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤋᤠ᤺ᤸᤗᤧ ᤔᤢᤰᤛᤠᤶ ᤁᤧᤄᤥ᤺ᤛᤢᤶᤔᤠᤱ ᤂᤡᤏᤡ᤹ ᤕᤖᤢᤛᤗᤧᤶᤔᤥ. ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠ ᤌᤢᤶᤔᤥ ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠᤖᤠᤰ ᤀᤡᤱᤃᤠ᤹ ᤀᤠᤍᤥ᤺ᤴᤍᤡ ᤁᤧᤒᤥ᤺ᤰᤂᤡ᤹ᤖᤥ॥”
ACT 1:9 ᤕᤧᤛᤢᤖᤧ ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤌᤠ᤺ᤱᤎᤠ᤺ᤱ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤐᤰᤂᤧᤖ ᤂᤠᤵᤔᤡ᤺ᤳᤋᤡᤸᤗᤧ ᤀᤡ᤺ᤵᤋᤢ ᤋᤣ᤹ᤖᤢᤖᤥ॥
ACT 1:10 ᤂᤧᤱᤜᤠ᤹ᤖᤧ ᤋᤠᤱᤛᤠᤰᤐᤥ ᤂᤢᤏᤧ᤹ ᤐᤱᤛᤡᤱᤒᤠ ᤀᤥᤔᤧᤔᤧᤳᤋᤢᤖ ᤔᤧᤕᤧᤒᤧᤸᤗᤧ ᤑ᤺ᤃᤧᤗ᤹ᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤧᤵᤑᤢ ᤔᤠᤱᤗᤠᤀᤡᤱᤒᤠᤜᤠ᤹ ᤜᤰᤆᤄᤳ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤣᤛᤠᤱ ᤕᤧᤶᤏᤧᤳᤇᤡᤀᤠᤱ
ACT 1:11 ᤐᤠᤖᤧᤳᤇᤡ. “ᤃᤠᤗᤡᤗᤒᤠ ᤔᤏᤠᤛᤣ. ᤌᤣᤀᤠᤱ ᤋᤠᤱᤛᤠᤰᤐᤥ ᤀᤥᤃᤧᤔᤧᤳᤋᤢᤶᤒᤠᤒᤣ᥅ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥᤎᤥ ᤐᤱᤛᤡᤱ ᤐᤣᤒᤠ ᤜᤧᤰᤁᤣᤀᤣ ᤂᤢᤏᤧ᤹ ᤌᤡᤰᤕᤧᤴ ᤕᤠᤶᤔᤥ ᤕᤢ᤺ᤖᤥ॥”
ACT 1:12 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤈᤤᤋᤢᤏ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤗᤠᤶ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧ॥ ᤂᤧᤴ ᤕᤖᤢᤛᤗᤧᤔᤗᤠᤶ ᤁᤡᤗᤥᤔᤡᤋᤖᤎᤡᤰ ᤔᤠ᤺ᤱᤗᤥ॥
ACT 1:13 ᤕᤧᤰᤕᤰᤁᤥ ᤔᤧᤗᤠ᤺ᤛᤧᤀᤠᤱ ᤂᤧᤱᤜᤠ᤹ ᤔᤧᤕᤠᤃᤧᤒᤠ ᤌᤠ᤺ᤱᤛ᤻ᤔᤠ ᤕᤠᤰᤑᤠᤀᤥ ᤔᤧᤗᤠ᤺ᤛᤧ॥ ᤂᤧᤵᤔᤥ ᤐᤋᤪᤢᤛ. ᤕᤢᤜᤢᤴᤏᤠ. ᤕᤠᤁᤢᤒ. ᤀᤠᤴᤍᤪᤡᤕᤠᤛ. ᤑᤡᤗᤡᤐ. ᤌᤥᤔᤠ. ᤒᤠᤖᤌᤥᤗᤥᤔᤠᤀᤡ. ᤔᤳᤋᤡ. ᤀᤸᤑᤠᤕᤛᤖᤧ ᤁᤢᤛ᤻ᤛᤠ᤺ ᤕᤠᤁᤢᤒ. ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ ᤛᤡᤔᤥᤏ ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤛ᤻ᤛᤠ᤺ ᤕᤜᤢᤍᤠ ᤔᤧᤘᤕᤧᤖᤥ॥
ACT 1:14 ᤂᤧᤱᤜᤠ᤹ ᤁᤠᤰ ᤛᤥᤖᤡᤰ ᤔᤧᤒᤥ᤺ᤰᤂᤧᤖ ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥ᤺ᤰᤁᤡ ᤔᤧᤕᤠᤃᤧ॥ ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤁᤢᤶᤔᤠ ᤔᤖᤡᤕᤔ ᤏᤢ ᤘᤣ᤹ ᤔᤧᤴᤇᤢᤔᤠᤜᤠ᤹ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤴᤛᤠ᤹ᤛᤡᤀᤠᤱ ᤔᤧᤘᤕᤧᤖᤥ॥
ACT 1:15 ᤂᤧᤴ ᤕᤧᤶᤔᤥ ᤐᤋᤪᤢᤛᤧᤴ ᤁᤡᤵᤌᤡᤰᤁᤠᤱ ᤏᤡᤒᤥ᤺ᤱ ᤕᤠᤖᤡᤰ (᥇᥈᥆) ᤏᤛᤠᤏᤡᤒᤠ ᤗᤢᤶᤔᤥ ᤕᤧᤶᤛᤡᤱᤅᤠᤱ
ACT 1:16 ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡᤴ ᤀᤠᤏᤡ᤹ᤏᤢᤀᤣ ᤘᤕᤧ. ᤜᤧᤰᤁᤩᤠᤱ ᤁᤴ ᤔᤠᤱᤛᤣᤘᤠ ᤆᤥ᤺ᤰᤔᤠ ᤗᤰᤁᤡᤴ ᤍᤠᤱᤒᤠᤗᤠᤶ ᤂᤥ᤺ᤛᤢᤀᤠᤱ ᤘᤕᤧᤖᤥ॥ ᤁᤖ ᤂᤧᤸᤗᤧ ᤀᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤁᤢᤍᤧᤶᤛᤧ ᤁᤧᤍᤠ᤺ᤒᤠᤜᤠ᤹ ᤗᤠᤶᤗᤥᤛᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤣᤛᤣᤔᤠᤱᤅᤡᤸᤗᤧ ᤋᤃᤡᤛᤠ ᤍᤠᤀᤢᤍ ᤜᤠᤱᤗᤠᤶ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤐᤠ᤺ᤴᤏᤡᤴ ᤁᤧᤵᤔᤠ ᤐᤥ᤺ᤰᤂᤧᤖᤥ॥”
ACT 1:18 (ᤁᤴ ᤔᤏᤠ᤺ᤸᤗᤧ ᤑᤧᤴ ᤕᤠ᤺ᤶᤒᤰᤗᤠᤶ ᤌᤃᤢᤒᤠ ᤕᤠᤱᤅᤡᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤀᤡᤅᤢᤀᤠᤱ ᤘᤕᤧ॥ ᤂᤢᤏᤧ᤹ ᤂᤧᤵᤔᤥ ᤑᤥ᤺ᤴᤇᤡᤱᤅᤡᤸᤗᤧ ᤔᤰᤌᤩᤧᤀᤠᤱ ᤁᤢᤛᤠᤵᤐᤥ᤺ᤰᤁᤡᤴ ᤋᤧᤛ᤻ᤛᤧᤀᤠᤱ ᤁᤢᤜᤡᤍᤢᤳ ᤗ᤺ᤴᤍᤧᤀᤠᤱ ᤛᤩᤧ॥
ACT 1:19 ᤜᤧᤰᤁᤩᤠᤱ ᤕᤖᤢᤛᤗᤧᤔᤒᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ “ᤀᤰᤁᤣᤸᤍᤠᤔᤠ” ᤔᤡᤱ ᤔᤧᤘᤠ᤺ᤳᤋᤢᤖᤥ॥ ᤂᤧᤴ ᤑᤠ᤹ᤀᤡᤴ ᤔᤠᤰᤂᤡ᤹ ᤀᤡᤰᤋᤠᤵ ᤐᤥ᤺ᤱᤗᤥ॥)
ACT 1:20 ᤐᤋᤪᤢᤛᤖᤧ ᤐᤠ᤺ᤳᤋᤢ. “ᤀᤰᤂᤣᤗ᤹ᤖᤡᤰ ᤁᤴ ᤐᤠ᤺ᤴᤏᤡᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ. ‘ᤂᤧᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤁᤢᤄᤠᤗᤧᤶ ᤐᤥ᤺ᤱᤗᤖᤥ॥’ ᤜᤧᤰᤁᤩᤠᤱ ‘ᤂᤧᤵᤔᤥ ᤁᤧᤕᤢᤱᤒᤠ ᤜᤠ᤺ᤳᤋᤠᤱ ᤔᤧᤜᤥ᤺ᤵᤗᤖᤥ॥’ ᤜᤧᤰᤁᤩᤠᤱ ‘ᤔᤠᤱᤛᤣᤘᤠ ᤆᤥ᤺ᤰᤔᤠ ᤁᤢᤗᤰᤁᤡᤴ ᤘᤣ᤹ ᤔᤏᤠ᤺ᤸᤗᤧ ᤂᤥ᤺ᤛᤢᤖᤖᤥ॥’
ACT 1:21 ᤜᤧᤰᤁᤣ᤺ᤸᤗᤧ ᤍᤠᤱᤒᤠ ᤕᤧᤛᤢ᤺ᤴᤏᤢ ᤛᤥᤖᤡᤰ ᤀᤠᤘᤕᤧᤸᤗᤧ ᤀᤠᤏᤡ᤹ᤏᤢᤀᤣ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤗᤧᤰᤘᤠ ᤗᤳᤌᤡᤰ ᤛᤣ᤺ᤰᤔᤠᤀᤣ ᤐᤥ᤺ᤱ॥
ACT 1:22 ᤂᤢᤏᤧ᤹ ᤕᤢᤜᤢᤴᤏᤠᤖᤧ ᤆᤥᤃᤢᤒᤠ ᤒᤵᤋᤡᤛ᤻ᤔᤠᤀᤠᤱᤎᤥ ᤍᤠᤱᤒᤠ ᤕᤧᤛᤢ᤺ᤴ ᤀᤠᤏᤡ᤹ ᤗᤢᤶᤔᤥᤏᤢ ᤛᤠᤱᤃᤪᤠᤶᤐᤣᤍᤠᤱ ᤐᤣᤒᤠ ᤌᤠᤖᤡᤰ ᤁᤧᤏᤡ᤺ᤒᤠ ᤐᤥ᤺ᤱᤔᤠ ᤐᤥ᤺ᤱ॥ ᤂᤢᤏᤧ᤹ ᤀᤠᤏᤡ᤹ᤏᤢᤀᤣ ᤍᤠᤱᤒᤠ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ ᤐᤥ᤺ᤱᤔᤠ ᤐᤥ᤺ᤱᤗᤥ॥”
ACT 1:23 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤧᤵᤑᤢ ᤔᤏᤠᤜᤠ᤹ ᤔᤧᤍᤥ᤺ᤴᤍᤢᤛᤡ—ᤒᤖᤛᤠᤒᤠᤛ ᤔᤧᤵᤔᤏᤠᤒᤠ ᤕᤢᤛᤢᤑ (ᤂᤧᤸᤗᤧ ᤁᤢᤔᤡᤱᤅᤡᤴ ᤕᤢᤛ᤻ᤋᤛᤀᤠᤱ ᤘᤕᤧ) ᤜᤧᤰᤁᤩᤠᤱ ᤔᤳᤋᤡᤕᤠᤛ॥
ACT 1:24 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤋᤢᤘᤠ ᤔᤧᤈᤥᤃᤢ. “ᤀᤠᤍᤠᤱᤒᤣ. ᤂᤧᤏᤧ᤹ᤃ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤏᤡᤴ ᤁᤧᤏᤡ᤺ᤛᤢ᤹ᤖᤥ॥ ᤁᤴ ᤛᤣ᤺ᤰᤕᤢᤰᤔᤡᤒᤠ ᤔᤠᤱᤛᤣᤘᤠ ᤗᤰᤁᤡᤴ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤜᤢᤍᤠ᤺ᤸᤗᤧ ᤁᤢᤗᤧᤰᤘᤠ ᤁᤴ ᤏᤧᤵᤑᤢᤀᤥ ᤁᤧᤛᤣᤃᤢᤒᤠ ᤔᤏᤠ᤺ᤴ ᤀᤥᤛᤣ᤺ᤴᤍᤠᤱ ᤆᤥᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤢᤍᤠ᤺ᤸᤗᤧ ᤂᤧᤴ ᤗᤧᤖᤢᤀᤠᤱ ᤗᤠ᤹ᤖᤢᤒᤠ ᤁᤢᤗᤠᤶᤔᤥ ᤐᤣᤖᤥ॥”
ACT 1:26 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤡᤱᤈᤣ᤺ᤰ ᤔᤧᤀᤧᤰᤂᤢᤸᤗᤧ ᤂᤧᤴ ᤔᤳᤋᤡᤕᤠᤛᤖᤧ ᤁᤢᤔᤡᤱᤅᤥ ᤌᤩᤧᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤡᤰ-ᤌᤡᤰ (᥇᥇) ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤕᤥ᤹ᤛᤡᤱᤗᤥ॥
ACT 2:1 ᤐᤧᤴᤋᤡᤁᤥᤛ ᤋᤱᤏᤠᤶᤔᤥ ᤕᤖᤢᤛᤗᤧᤶᤔᤥ ᤏᤛᤠᤏᤡᤒᤠᤜᤠ᤹ ᤌᤡᤰ ᤋᤧᤴᤏᤥ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥
ACT 2:2 ᤜᤰᤆᤄᤳ ᤂᤧᤵᤔᤥ ᤕᤶᤒᤠ ᤛᤢᤖᤡᤳ ᤁᤣᤈᤱ ᤁᤧᤜᤢᤒᤠ ᤁᤢᤀᤡᤛᤡ᤺ᤰ ᤀᤡᤰᤗᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤧᤀᤠᤱ ᤂᤧᤱᤜᤠ᤹ ᤔᤧᤕᤠᤃᤧᤒᤠ ᤜᤡᤶᤔᤡᤴ ᤛᤡᤍᤠᤰ ᤌᤡᤶᤛᤢᤖᤥ॥
ACT 2:3 ᤜᤧᤰᤁᤩᤠᤱ ᤔᤡᤖᤠ᤺ᤰᤗᤠᤶ ᤁᤧᤛᤧᤒᤠ ᤔᤡᤛᤠᤱ ᤜᤧᤰᤋᤱᤒᤠ ᤔᤡ᤺ᤴ ᤁᤧᤖᤧᤰᤗᤧ ᤂᤢᤏᤡ᤹ ᤌᤧᤃᤣ᤺ᤰᤁᤥ ᤆᤢᤰᤋᤧᤒᤠ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤖᤥ॥
ACT 2:4 ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤛᤡᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤁᤢᤀᤡᤛᤡ᤺ᤰ ᤘᤣ᤹ ᤘᤣ᤹ ᤔᤧᤸᤗᤧᤛ᤻ᤛᤢᤶᤒᤠ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠ ᤔᤧᤜᤣ᤺ᤰᤋᤧᤖᤥ॥
ACT 2:5 ᤀᤠᤸᤗ ᤕᤖᤢᤛᤗᤧᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤗᤠᤈᤣ᤹ᤀᤥᤏᤢ ᤁᤧᤍᤠ᤺ᤒᤠᤀᤠᤱ ᤁᤧᤘᤠ᤹ᤒᤠ ᤕᤜᤢᤍᤡ ᤛᤠᤶᤕᤥᤒᤠ ᤔᤏᤠᤜᤠ᤹ᤀᤠᤱ ᤔᤧᤘᤕᤧᤖᤥ॥
ACT 2:6 ᤕᤖᤡᤰ ᤔᤏᤠᤜᤠ᤹ᤖᤧ ᤁᤴ ᤀᤡᤰᤗᤠ᤺ᤴ ᤔᤧᤄᤧᤵᤛᤢᤀᤠᤱ ᤂᤧᤴ ᤋᤧᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤈᤢᤵᤛᤧ. ᤌᤣᤀᤠᤱᤓᤧᤸᤗᤧ ᤁᤧᤍᤠ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤐᤣᤗᤡᤃᤧᤴ ᤐᤠ᤺ᤴᤍᤠᤱᤅᤥ ᤂᤧᤴ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤔᤧᤄᤧᤵᤛᤢ॥
ACT 2:7 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤔᤧ᤺ᤶᤒᤧ᥄ ᤁᤴ ᤁᤠᤰ ᤁᤧᤒᤠ᤺ᤵᤐᤠᤜᤠ᤹ᤃ ᤃᤠᤗᤡᤗᤡᤛᤡ ᤔᤧ᤺ᤴᤇᤡᤒᤡ᥅
ACT 2:8 ᤜᤧᤰᤁᤣ᤺ᤸᤗᤧ ᤁᤱᤜᤠ᤹ᤖᤧ ᤀᤠᤒᤠᤅᤣ ᤀᤠᤏᤡ᤹ ᤐᤠ᤺ᤴᤍᤠᤱᤜᤠ᤹ᤀᤥ ᤀᤠᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤔᤧᤛᤢᤰᤋᤢᤒᤠᤒᤣ᥅
ACT 2:9 ᤀᤠᤏᤡ᤹ᤃ ᤐᤷᤌᤡᤕᤠ. ᤔᤣᤍᤡᤕᤠ. ᤀᤣᤗᤠᤔᤡ. ᤔᤧᤛᤥᤐᤥᤋᤠᤔᤡᤕᤠ. ᤕᤜᤢᤍᤡᤕᤠ. ᤁᤠᤵᤐᤠᤍᤥᤁᤡᤕᤠ. ᤐᤥᤴᤋᤛ. ᤀᤣᤛᤡᤕᤠ.
ACT 2:10 ᤑᤪᤡᤃᤡᤕᤠ. ᤐᤠᤶᤑᤡᤗᤡᤕᤠ. ᤔᤡᤛᤪ ᤏᤢ ᤗᤡᤒᤡᤕᤠ ᤁᤢᤒᤣᤛᤠᤱᤒᤠ ᤛᤠᤀᤡᤖᤣᤏᤡ ᤕᤧᤰᤕᤰ. ᤜᤧᤰᤁᤩᤠᤱ ᤖᤥᤔᤗᤠᤶ ᤁᤧᤍᤠ᤺ᤒᤠ (ᤕᤜᤢᤍᤡᤜᤠ᤹ ᤏᤢ ᤕᤜᤢᤍᤡ ᤛᤠᤶᤕᤥ ᤁᤧᤏᤠ᤺ᤵᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹).
ACT 2:11 ᤁᤪᤣᤋᤡᤜᤠ᤹ ᤜᤧᤰᤁᤩᤠᤱ ᤀᤖᤒᤡᤜᤠ᤹ᤀᤠᤱ ᤀᤠᤘᤠ᤹॥ ᤁᤖᤛᤠᤱ ᤂᤧᤱᤜᤠ᤹ᤖᤧᤃ ᤀᤠᤏᤡ᤹ ᤀᤠᤒᤠᤅᤣ ᤐᤠ᤺ᤴᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤧᤰᤂᤢᤖ ᤔᤧᤒᤵᤐᤠ ᤀᤠᤄᤧᤵᤛᤢᤶᤗᤥ॥”
ACT 2:12 ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ ᤜᤧᤰᤁᤩᤠᤱ ᤜ᤺ᤴᤍᤠ ᤔᤧᤗᤧᤰᤋᤧᤀᤠᤱ ᤀᤰᤂᤣᤗ᤹ᤖᤡᤰ ᤛᤣ᤺ᤴᤔᤧᤍᤥ᤺ᤛᤡᤱ. “ᤁᤴ ᤑᤠ᤹ᤀᤡᤱᤃ ᤌᤧᤔᤠ᤺ᤴᤒᤣ᥅”
ACT 2:13 ᤁᤖ ᤁᤢᤓᤠᤖᤧ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤡᤖ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤘᤠ᤹ ᤗ᤹ᤖᤡᤰ ᤔᤧᤔᤧᤳᤋᤢᤛᤡᤖᤥ॥
ACT 2:14 ᤁᤖ ᤐᤋᤪᤢᤛᤧᤴ ᤘᤣ᤹ ᤌᤡᤰ-ᤌᤡᤰ (᥇᥇) ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤁᤠᤰᤗᤧ ᤔᤧᤄᤧᤵᤛᤢᤖ ᤔᤧᤳᤋᤢᤛᤡ. “ᤕᤜᤢᤍᤡᤕᤠᤗᤠᤶ ᤁᤧᤍᤠ᤺ᤒᤠ ᤕᤜᤢᤍᤡ ᤋᤣ᤺ᤱᤈᤢᤶᤜᤠ᤹ ᤏᤢ ᤕᤖᤢᤛᤗᤧᤶᤔᤥ ᤁᤧᤕᤢᤱᤒᤠᤛᤣ. ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤔᤧᤳᤏᤡᤱᤗᤥ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄
ACT 2:15 ᤁᤴ ᤔᤏᤠᤜᤠ᤹ ᤏᤢ ᤀᤡᤱᤃᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠ ᤁᤢᤀᤡᤛᤡ᤺ᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤡᤃᤧᤒᤠ ᤔᤧ᤺ᤴᤗᤥ॥ ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡᤀᤥᤛᤠᤃ (᥏) ᤀᤠᤳᤋᤡᤴᤜᤠ᤹ᤖᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ᤺ ᤔᤧᤴᤎᤢᤅᤢᤴᤗᤥ॥
ACT 2:16 ᤁᤖ ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤥᤀᤣᤗᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ–
ACT 2:17 ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤀᤡᤱᤃᤠ᤹ ᤀᤠᤛᤣᤛᤣᤔᤠᤱᤅᤡᤴ ᤁᤠᤰ ᤔᤧᤴᤇᤠᤶᤃᤧᤴ ᤛᤢᤘᤠᤱ ᤛᤶᤍᤠᤱ ᤐᤠᤱᤄᤢᤱᤅᤠᤱ ᤂᤡᤏᤡ᤹ ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ᤛᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠ᤺ᤳᤋᤢ᤹. ᤂᤡᤏᤡ᤹ ᤏᤠᤗᤡᤱᤃᤧᤴ ᤌᤠᤱᤒᤧᤴᤛᤠᤜᤠ᤹ᤖᤧ ᤛᤢᤑᤥ ᤔᤧᤏᤡ᤺ᤛᤢ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤍᤠᤰᤔᤡᤜᤠ᤹ᤖᤧ ᤋᤠᤍᤡᤃᤧᤴ ᤛᤧᤵᤔᤠᤱ ᤔᤧᤔᤠᤰᤋᤢ᤹ᤖᤥ॥
ACT 2:18 ᤂᤧᤴ ᤕᤧᤴᤜᤠ᤹ᤀᤥ ᤀᤡᤱᤃᤠ᤹ ᤀᤠᤛᤣᤘᤠ ᤁᤧᤈᤥ᤺ᤰᤐᤠ ᤁᤧᤈᤥ᤺ᤰᤔᤠᤜᤠ᤹ᤀᤥ ᤀᤠᤛᤣᤛᤣᤔᤠᤱᤅᤡᤴ ᤐᤠᤱᤄᤢᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠ᤺ᤳᤋᤢ᤹ᤖᤥ॥
ACT 2:19 ᤜᤧᤰᤁᤩᤠᤱ ᤀᤡᤱᤃᤠ᤹ ᤌᤥ ᤋᤠᤱᤛᤠᤰᤐᤥ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤆᤥᤃᤢᤱ ᤜᤧᤰᤁᤩᤠᤱ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤔᤡᤰᤛᤣ᤺ᤴ ᤆᤥᤃᤢᤱ– ᤔᤠᤰᤂᤡ᤹. ᤔᤡ ᤜᤧᤰᤁᤩᤠᤱ ᤜᤠ᤺ᤱᤃᤢᤜᤠ᤺ᤱᤃᤢ ᤁᤧᤗ᤹ᤒᤠ ᤔᤡ᤺ᤰᤂᤢ᤹ᤀᤡᤴ ᤀᤥᤛᤣ᤺ᤴᤎᤠᤰᤏᤡᤱᤗᤥ॥
ACT 2:20 ᤜᤧᤰᤁᤩᤠᤱ ᤌᤥ ᤋᤠᤱᤛᤠᤰᤐᤥ ᤏᤠᤶᤔᤡᤸᤗᤧ ᤏᤠᤶᤛᤠᤱ ᤐᤡᤔᤠ ᤗᤧᤖᤢᤀᤠᤱ ᤂᤠᤍᤠᤶᤗᤥ ᤜᤧᤰᤁᤩᤠᤱ ᤗᤠᤒᤠᤴ ᤔᤠᤰᤂᤡ᤹ ᤜᤧᤰᤁᤣ ᤜᤧ᤺ᤳᤗ᤹ᤖᤡᤰ ᤗᤧᤱᤛᤡᤱᤗᤥ॥ ᤁᤴ ᤁᤠᤰ ᤐᤠ᤺ᤴᤜᤠ᤹ ᤍᤠᤱᤒᤠᤴ ᤏᤢ᤺ᤱ ᤕᤢ᤺ᤒᤠ ᤐᤕᤶ ᤕᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤧᤴᤏᤡᤴ ᤋᤠ᤺ᤔᤠᤏᤢ᤺ᤸᤗᤧ ᤋᤃᤡ ᤐᤥ᤺ᤱᤗᤥ॥
ACT 2:21 ᤜᤧᤰᤁᤩᤠᤱ ᤜᤠ᤺ᤳᤗᤧ ᤍᤠᤱᤒᤧᤸᤗᤧ ᤁᤢᤔᤡᤱᤅᤡᤴ ᤗᤥ᤺ᤰᤂᤢ᤹ ᤂᤧᤴ ᤋᤠᤱᤛᤧ᤺ᤵᤗᤥ॥’
ACT 2:22 ᤀᤡᤛᤪᤠᤀᤡᤗᤡᤛᤣ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ–ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤔᤡᤰᤛᤣ᤺ᤴᤜᤠ᤹ᤏᤢ ᤂᤡᤏᤡ᤹ ᤗᤢᤶᤔᤥ ᤐᤠᤱᤄᤢᤖᤥ॥ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰᤜᤠ᤹ ᤆᤥᤃᤢᤒᤠᤱᤃ. ᤂᤡᤏᤡ᤹ᤀᤠᤱ ᤁᤧᤏᤡ᤺ᤛᤢᤶᤔᤣᤖᤥ॥
ACT 2:23 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤏᤡᤱᤛᤣ᤺ᤰ ᤏᤢ ᤋᤃᤡ ᤏᤡᤱᤘᤠ᤹ᤀᤥ ᤜᤧᤰᤁᤣ ᤕᤧᤛᤢ᤺ᤴ ᤂᤡᤏᤡ᤹ ᤜᤢᤰᤁᤥ ᤐᤡᤖᤧᤀᤠᤱ ᤑᤧᤴ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤗᤠᤶ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤔᤠᤱ ᤁᤧᤛᤧᤖᤢᤶᤗᤥ॥
ACT 2:24 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡ᤺ᤔᤧᤸᤗᤧ ᤋᤢᤰᤂᤣᤘᤠᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤢᤀᤠᤱ ᤁᤢᤜᤡᤱᤘᤧᤳ ᤆᤥᤃᤢᤖᤥ. ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤸᤗᤧ ᤂᤢᤏᤧ᤹ ᤌᤣ᤺ᤰᤔᤠ ᤔᤧᤛᤢᤰᤋᤢᤴᤗᤥ॥
ACT 2:25 ᤍᤠᤀᤢᤍ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳ. ‘ᤛᤍᤠᤍᤡᤱ ᤀᤡᤱᤃᤠ᤹ ᤀᤠᤴᤍᤠᤱᤒᤧᤱᤃ ᤀᤠᤍᤃᤠᤱ ᤏᤡ᤺ᤛᤢᤱᤗᤥ॥ ᤂᤢᤏᤧ᤹ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤔᤧᤃᤡᤀᤠᤴᤗᤥ॥
ACT 2:26 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤛ᤺ᤳᤋᤠᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤱᤗᤥ॥ ᤏᤠᤛᤡᤱᤃᤧᤴ ᤀᤠᤎᤰᤗᤠᤀᤥ ᤀᤡᤱᤃᤠ᤹ ᤛᤡ᤺ᤀᤠᤛᤠᤱ ᤕᤠᤶᤔᤥ ᤜᤡᤱᤅᤠ ᤁᤧᤗ᤹ᤒᤠ ᤏᤡᤱᤛᤠᤱᤅᤥ ᤜᤠᤱᤜᤠᤱ ᤘᤠ᤹ᤀᤠᤖᤥ॥
ACT 2:27 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤡᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤧᤔᤠᤕᤱᤛᤱᤅᤥ ᤐᤰᤁᤧᤴᤎᤏᤧᤴᤗᤥ॥ ᤜᤧᤰᤁᤩᤠᤱ ᤛᤣᤛᤣ ᤁᤧᤛᤣᤘᤠᤖᤥᤒᤠᤸᤗᤧ ᤁᤢᤎᤰᤁᤡᤴ ᤀᤡᤵᤐᤢᤱᤅᤥ ᤁᤡ᤺ᤔᤠ ᤕ᤺ᤵᤔᤠ ᤁᤧᤶᤒᤠᤱᤄᤢᤴᤗᤥ॥
ACT 2:28 ᤕᤠᤶᤔᤥ ᤜᤡᤱᤅᤠ ᤑᤠ᤹ᤀᤠᤱ ᤂᤧᤏᤧ᤹ ᤀᤥᤛᤣ᤺ᤴᤃᤧᤎᤠᤰᤋᤠᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤍᤃᤠᤱ ᤘᤠ᤹ᤀᤠᤸᤗᤧ ᤛ᤺ᤵᤔᤠᤸᤗᤧ ᤁᤧᤎᤡᤶᤔᤠ᤹ᤖᤥ॥’
ACT 2:29 ᤑᤢ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤡᤱᤃᤠ᤹ ᤏᤡᤛ᤻ᤛᤣᤀᤠᤱ ᤀᤰᤂᤣ ᤐᤠ᤺ᤵᤔᤠ ᤛᤢᤰᤋᤢᤱᤗᤥ–ᤀᤠᤏᤡ᤹ ᤋᤠᤰᤌᤧᤒᤠ ᤍᤠᤀᤢᤍᤧᤱᤃ ᤛᤩᤧ ᤜᤧᤰᤁᤩᤠᤱ ᤔᤧᤗᤢᤵᤋᤢᤀᤠᤱ ᤁᤢᤀᤡᤵᤐᤢᤱᤅᤡᤴ ᤀᤠᤸᤗᤥ ᤌᤠᤖᤡᤰᤁᤠᤱ ᤏᤧᤖᤥ॥
ACT 2:30 ᤜᤧᤰᤁᤣᤛᤠᤱ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤆᤥᤃᤧᤒᤠᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤀᤥ ᤒᤠ ᤂᤢᤏᤧ᤹ ᤜᤧᤰᤋᤱᤒᤠ ᤜᤠᤱ ᤐᤥ᤺ᤱ ᤁᤧᤗ᤹ᤒᤠ ᤔᤠᤱᤜᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠᤴ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢ॥
ACT 2:31 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤋᤃᤡᤏᤢᤛᤠ ᤋᤠ᤺ᤴᤍᤡ ᤌᤣ ᤐᤥ᤺ᤱ ᤁᤧᤗ᤹ᤒᤠᤴ ᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤂᤢᤏᤧ᤹ᤃ ᤂᤧᤔᤠᤕᤱᤛᤱᤅᤥ ᤐᤰᤔᤧᤎᤠᤏᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤡᤴᤏᤠᤱ ᤔᤧᤃᤡᤏᤧᤴᤗᤥ॥’
ACT 2:32 ᤒᤠ ᤁᤴ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤐᤠ᤺ᤴᤏᤥ ᤀᤠᤏᤡᤃᤧ ᤁᤧᤖᤧᤰ ᤁᤧᤏᤡ᤺ᤒᤠ ᤋᤥ᤺ᤴᤍᤡ ᤘᤕᤡᤃᤧᤖᤥ॥
ACT 2:33 ᤜᤧᤰᤁᤩᤠᤱ ᤂᤢᤏᤧ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤰᤂᤢ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤐᤠ᤺ᤗᤠᤶ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤜᤧᤰᤁᤡᤴ ᤂᤥ᤺ᤛᤢᤀᤠᤱ ᤀᤠᤏᤡᤃᤧᤀᤥ ᤌᤠ᤺ᤛᤢᤒᤠᤴ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡ᤺ᤛᤢᤶ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ACT 2:34 ᤍᤠᤀᤢᤍ ᤜᤠᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱ ᤌᤠ᤺ᤱ ᤔᤧᤒᤣᤏᤧᤴᤇᤠᤱ ᤂᤢᤏᤧ᤹ᤃ ᤀᤠᤒᤠᤅᤣ ᤀᤰᤂᤣ ᤐᤠ᤺ᤳᤋᤢ. ᤕᤜᤘᤣ ᤍᤠᤱᤒᤠᤸᤗᤧ ᤀᤠᤴᤍᤠᤱᤒᤠᤴ ᤀᤰᤂᤣ ᤔᤧᤳᤋᤢ. ‘ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤱᤛᤡᤱᤅᤡᤸᤗ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤅᤧ᤹ᤀᤥ॥’
ACT 2:36 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤏᤢ ᤁᤠᤰ ᤀᤡᤛᤪᤠᤀᤡᤗᤛ᤻ᤔᤠ ᤜᤡᤶᤛᤕᤱᤜᤠ᤹ᤖᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤁᤧᤓᤥ᤺ᤴᤍᤢᤶᤒᤠ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤍᤠᤱᤒᤠ ᤏᤢ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤆᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤐᤥ᤺ᤱ॥”
ACT 2:37 ᤀᤠᤸᤗ ᤁᤴ ᤐᤠ᤺ᤴ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤥ᤺ᤶ ᤐᤢ᤹ᤖᤧᤀᤠᤱ ᤐᤋᤪᤢᤛ ᤏᤢ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤠᤏᤡᤃᤧ ᤌᤣ ᤆᤥᤃᤢᤶᤒᤧᤒᤠᤒᤣ᥅”
ACT 2:38 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤖᤧᤰ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤍᤠᤱᤒᤠᤀᤥ ᤏᤢ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤔᤠ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤶᤔᤧ᤹ᤀᤥ᥄ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶ ᤁᤧᤄᤥ᤺ᤛᤢᤶᤗᤥ॥
ACT 2:39 ᤌᤣᤀᤠᤱᤓᤧᤸᤗᤧ ᤁᤴ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤜᤧᤰᤁᤡᤱᤃ ᤂᤡᤏᤡ᤹ ᤗᤠᤃᤡ ᤏᤢ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ. ᤜᤧᤰᤁᤩᤠᤱ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢ᤺ᤳᤋᤢᤛᤡᤒᤠ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡᤖᤥ॥”
ACT 2:40 ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤐᤠ᤺ᤴ ᤐᤠ᤺ᤳᤋᤢᤖ ᤛᤠᤶᤍᤡᤱ ᤐᤡᤖᤢᤛᤡᤀᤠᤱ “ᤁᤴ ᤑᤧᤴ ᤕᤠᤵᤔᤡᤜᤠ᤹ᤖᤧ ᤔᤧᤄᤥ᤺ᤛᤢᤒᤠ ᤂᤢᤶᤍᤡᤱᤗᤠᤶ ᤛᤧ᤺ᤵᤐᤠᤛᤡᤶᤔᤧ᤹ᤀᤥ” ᤔᤧᤳᤋᤢᤛᤡᤖ ᤂᤠᤜᤢᤴ ᤐᤡᤖᤢᤛᤡᤖᤥ॥
ACT 2:41 ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤈᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤀᤠᤱ ᤒᤠ ᤂᤧᤴ ᤕᤧᤴᤏᤥ ᤜᤧᤴᤇᤡᤱ ᤛᤢᤶᤛᤡ (᥉᥆᥆᥆) ᤕᤠᤖᤡᤰ ᤔᤏᤠᤜᤠ᤹ ᤂᤧᤱᤜᤠ᤹ᤀᤥ ᤔᤧᤕᤥ᤹ᤛᤡᤱᤗᤥ॥
ACT 2:42 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤴ ᤏᤢ ᤛᤣᤛᤣ ᤋᤱᤈᤢᤶᤔᤥ. ᤜᤧᤰᤁᤩᤠᤱ ᤋᤢᤘᤠ ᤆᤥ᤺ᤰᤔᤠ ᤏᤢ ᤔᤡ᤺ᤶ ᤛᤠᤓᤠᤱᤈᤠ ᤆᤠᤔᤠᤀᤥ ᤆᤰᤔᤧᤸᤗ᤹ᤀᤣ ᤔᤧᤒᤳᤇᤧᤖᤥ॥
ACT 2:43 ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤕᤖᤡᤰ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤒᤠᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ACT 2:44 ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤛᤥᤛᤥᤖᤡᤰ ᤔᤧᤕᤢᤅᤧ ᤔᤧᤘᤕᤧ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤡ᤹ ᤆᤡᤃᤥ᤺ᤰᤘᤠᤜᤠ᤹ᤀᤠᤱ ᤛᤥᤖᤡᤰ ᤀᤥᤃᤵ ᤔᤧᤈᤥᤃᤢᤖᤥ॥
ACT 2:45 ᤜᤧᤰᤁᤩᤠᤱ ᤁᤢᤓᤠᤖᤧ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤆᤡᤃ᤺ᤰᤘᤠᤜᤠ᤹ ᤔᤧᤛᤱᤄᤢᤖ ᤆᤠᤕᤥ᤺ᤶᤒᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤕᤠᤱᤅᤡᤴ ᤔᤧᤜᤠ᤺ᤳᤋᤢᤛᤡᤖᤥ॥
ACT 2:46 ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤌᤡᤰᤕᤠ᤺ᤴᤎᤰ ᤔᤠᤱᤜᤡᤶᤔᤥ ᤔᤧᤒᤣᤖ ᤂᤢᤏᤡ᤹ ᤜᤡᤶ ᤜᤡᤶᤔᤥ ᤔᤡ᤺ᤶ ᤛᤠᤓᤠᤱᤈᤠ ᤔᤧᤈᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛ᤺ᤳᤋᤧᤖ ᤂᤢᤏᤡ᤹ ᤏᤡᤱᤘᤠ᤹ ᤋᤩᤧᤀᤠᤱ
ACT 2:47 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤏᤢ᤺ᤖᤡᤰ ᤔᤧᤔᤧᤳᤋᤢᤛᤡᤖᤥ॥ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤌᤡᤰᤕᤠ᤺ᤴᤎᤰ ᤛᤧᤴᤗᤵ ᤁᤧᤄᤥ᤺ᤒᤠ ᤔᤏᤠᤜᤠ᤹ ᤂᤢᤏᤧ᤹ᤀᤥ ᤑᤥ᤺ᤛᤢᤛᤡᤖ ᤋᤣ᤹ᤖᤢᤛᤡᤖᤥ॥
ACT 3:1 ᤌᤡᤰᤕᤧᤴ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡᤒᤠ ᤋᤢᤘᤠ ᤆᤥ᤺ᤰᤔᤠ ᤕᤧᤶᤔᤥ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤔᤠᤱᤜᤡᤶᤔᤥ ᤐᤣᤛᤡ॥
ACT 3:2 ᤂᤧᤵᤔᤥ. ᤁᤢᤄᤧᤶᤛᤡᤱ ᤏᤢ᤺ᤒᤠ ᤔᤧᤵᤔᤏᤠᤒᤠ ᤗᤠᤶᤎᤣ᤺ᤵᤐᤥ. ᤔᤏᤠᤜᤠ᤹ᤖᤧ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤁᤢᤗᤠᤱ ᤁᤧᤛᤰᤐᤠ ᤔᤏᤠ᤺ᤴ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤛᤧ ᤁᤧᤒᤣ᤺ᤰᤐᤠᤜᤠ᤹ ᤕᤠᤱ ᤏᤠ᤺ᤰᤋᤢᤛᤡᤖ ᤑᤠ᤹ᤀᤠᤱ ᤌᤡᤰᤕᤠ᤺ᤴᤎᤰ ᤔᤧᤒᤰᤂᤢ ᤔᤧᤍᤠᤖᤢᤀᤠᤱ ᤔᤧᤕᤢᤰᤂᤢᤖ ᤔᤧᤘᤕᤧᤖᤥ॥
ACT 3:3 ᤂᤧᤸᤗᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤔᤠᤱᤜᤡᤶᤔᤥ ᤐᤣᤛᤡᤖ ᤐᤳᤇᤧᤳᤇᤡᤒᤠ ᤏᤡ᤺ᤛᤢᤛᤡᤀᤠᤱ ᤕᤠᤱ ᤏᤠ᤺ᤰᤋᤢᤛᤡᤖᤥ॥
ACT 3:4 ᤜᤧᤰᤁᤣ᤺ᤸᤗᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤂᤢᤏᤧ᤹ᤗᤧᤵᤔᤠᤱ ᤏᤢ᤺ᤖᤡᤰᤁᤠᤱ ᤀᤥᤔᤕᤧᤳᤇᤡ ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢ “ᤀᤠᤴᤇᤡᤃᤧ ᤕᤠᤵᤔᤡ ᤀᤥᤀᤠᤔᤧᤳᤋᤧ᤹॥”
ACT 3:5 ᤂᤧᤸᤗᤧᤀᤠᤱ ᤌᤣ᤺ᤴᤏᤡ ᤂᤥ᤺ᤛᤢᤱᤅᤡᤕᤠ ᤑᤠ᤹ᤀᤠᤱ ᤀᤥᤔᤧᤳᤋᤢᤛᤡ॥
ACT 3:6 ᤐᤋᤪᤢᤛᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤌᤣᤀᤠᤱ ᤔᤧᤃᤳᤋᤠᤴᤗᤥ. ᤁᤖ ᤀᤡᤱᤃᤠ᤹ ᤌᤣ᤺ᤴ ᤁᤳᤋᤢᤱ ᤒᤠᤂᤧᤴᤏᤣ ᤐᤡᤏᤧ–ᤏᤠᤛᤖᤋᤛ᤻ᤔᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤂᤧᤏᤧ᤹ ᤐᤥᤃᤧ᤹ᤀᤠᤱ ᤗᤠᤱᤄᤣᤃᤧ᤹॥”
ACT 3:7 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤴ ᤗᤠᤱᤛᤰᤐᤧᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤡᤴ ᤋᤧᤶᤛᤢᤀᤠᤱ ᤑᤥ᤺ᤰᤂᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤁᤢᤗᤠᤱ ᤏᤢ ᤁᤢᤗᤠᤱᤔᤡᤰᤁᤥ ᤌᤢᤶ ᤗᤠ᤺ᤛᤧᤀᤠᤱ
ACT 3:8 ᤐᤡᤆ᤻ᤆᤠᤰ ᤐᤡᤴᤍᤧᤖ ᤋᤰᤐᤧᤳ ᤕᤧᤶᤛᤡᤱ ᤜᤧᤰᤁᤩᤠᤱ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱᤃ ᤂᤧᤱᤃ ᤗᤠᤱᤄᤣᤃᤧᤖ. ᤐᤡᤆ᤻ᤆᤠᤰ ᤐᤡᤴᤍᤧᤖ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖ ᤐᤋᤪᤢᤛ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴᤏᤢ ᤔᤠᤱᤜᤡᤶᤛᤡᤃᤠᤱ ᤐᤣᤖᤥ॥
ACT 3:9 ᤂᤧᤵᤔᤥᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤧᤴ ᤗᤠᤱᤄᤣᤃᤧᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤒᤠ ᤔᤧᤏᤡ᤺ᤛᤢᤸᤗᤧ
ACT 3:10 ᤂᤧᤱᤃ ᤔᤠᤱᤜᤡᤶᤔᤡᤸᤗᤧ ᤁᤢᤄᤧᤶᤛᤡᤱ ᤏᤢ᤺ᤒᤠ ᤔᤧᤵᤔᤏᤠᤒᤠ ᤗᤠᤶᤎᤣ᤺ᤵᤐᤥ ᤛᤍᤠᤍᤡᤱ ᤆᤠᤏᤠ᤺ᤰᤏᤢ ᤁᤧᤕᤢᤱᤒᤠ ᤏᤢ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤔᤏᤠ᤺ᤴᤏᤣ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ACT 3:11 ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠ᤺ᤸᤗᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤋᤧᤶᤛᤢᤛᤡᤖ ᤔᤠᤱᤜᤡᤶᤔᤥᤒᤠ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥ ᤔᤧᤵᤔᤏᤠᤒᤠ ᤋᤧᤴᤏᤥ ᤘᤕᤧ॥ ᤂᤧᤵᤔᤥ ᤔᤏᤠᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤍᤩᤧᤀᤠᤱ ᤂᤢᤏᤡ᤹ ᤂᤡᤖᤡ ᤔᤧᤈᤢᤵᤛᤧᤖᤥ॥
ACT 3:12 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤡᤛᤣ. ᤁᤴ ᤐᤠ᤺ᤴᤏᤥ ᤌᤣᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤒᤠᤒᤣ᥅ ᤌᤣᤀᤠᤱ ᤁᤴ ᤔᤏᤠ᤺ᤴ ᤀᤠᤴᤇᤡᤃᤧ ᤔᤢᤰᤛᤠᤶ ᤏᤢ ᤛᤠᤶᤕᤥᤒᤠᤸᤗᤧ ᤗᤠᤱᤃᤧᤄᤣ᤺ᤰᤐᤠ ᤆᤥᤃᤢᤒᤠ ᤑᤠ᤹ᤀᤠᤱ ᤕᤠᤵᤔᤡ ᤀᤥᤃᤧᤔᤧᤳᤋᤡᤒᤠᤒᤣ᥅
ACT 3:13 ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒ ᤜᤧᤰᤁᤩᤠᤱ ᤀᤠᤏᤡ᤹ ᤘᤣ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠ ᤕᤧᤛᤢ᤺ᤴ ᤔᤡᤔᤡᤍᤡᤱ ᤆᤥᤃᤢᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤁᤧᤍᤧᤶᤛᤢᤶᤔᤠᤱ ᤜᤠᤱᤕᤢᤰᤐᤠᤜᤠ᤹ᤖᤥ ᤛᤧᤳᤇᤧ ᤜᤢᤰᤁᤧᤛᤢᤵᤋᤢᤶ॥ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤂᤢᤏᤧ᤹ ᤗᤧᤵᤔᤠ ᤏᤡᤱᤘᤠ᤹ ᤆᤥᤃᤢᤛᤠᤱ ᤂᤡᤏᤡ᤹ ᤁᤧᤏᤠ᤹ᤖᤢᤶᤗᤥ॥
ACT 3:14 ᤂᤡᤏᤡ᤹ ᤛᤣᤛᤣ ᤏᤢ ᤛᤠᤶᤕᤥᤏᤡᤒᤠ ᤔᤏᤠ᤺ᤸᤗᤧ ᤁᤢᤗᤧᤰᤘᤠ ᤔᤏᤠ ᤁᤧᤛᤧᤵᤐᤧᤴ ᤗᤧᤖᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤁᤧᤏᤠ᤺ᤰᤋᤢᤶᤗᤥ॥
ACT 3:15 ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤏᤧᤳᤋᤡᤃᤧᤴ ᤜᤡᤱᤔᤴᤗᤧ ᤁᤢᤒᤢᤴᤏᤡᤴ ᤛᤧᤵᤔᤠ ᤁᤧᤒᤠᤱᤄᤢᤶᤛᤡᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤖᤥ॥ ᤂᤧᤴ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ ᤀᤠᤏᤡᤃᤧ ᤘᤕᤡᤃᤧᤖᤥ॥
ACT 3:16 ᤜᤧᤰᤁᤩᤠᤱ ᤕᤧᤛᤢᤀᤥᤒᤠ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤁᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠ ᤔᤏᤠ᤺ᤴ ᤁᤧᤎᤢᤶᤒᤠ ᤐᤥ᤺ᤰᤂᤧᤒᤠ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤧᤴ ᤕᤧᤛᤢᤀᤥᤒᤠ ᤏᤛᤠ᤺ᤴᤏᤡᤸᤗᤧ ᤁᤴ ᤔᤏᤠ᤺ᤴ ᤒᤠ ᤂᤡᤏᤡ᤹ ᤋᤃᤡᤀᤣ ᤘᤣ᤺ᤳᤋᤧᤀᤠᤱ ᤘᤠ᤹ᤖᤥ॥
ACT 3:17 ᤀᤠᤸᤗ ᤑᤢ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤕᤧᤛᤢ᤺ᤴ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤒᤠ ᤜᤧᤰᤁᤣ ᤂᤡᤏᤡ᤹ᤃ ᤌᤣᤀᤠᤱ ᤔᤧᤴᤏᤡᤀᤣ ᤔᤧᤸᤗᤧᤀᤣ ᤁᤴ ᤁᤧᤈᤥᤃᤢᤶᤒᤠᤖᤥ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥
ACT 3:18 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧᤃ ᤋᤢᤰᤂᤣ ᤆᤠᤔᤠᤀᤠᤱ ᤛᤡ᤺ᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ॥
ACT 3:19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗᤥ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤍᤠᤱᤒᤠᤀᤥ ᤏᤢ᤺ᤰᤂᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤔᤠᤒᤣ᤺ᤰᤏᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤍᤠᤱᤒᤠᤗᤠᤶ ᤕᤠᤶᤛᤠᤶᤔᤥ ᤁᤧᤎᤢᤶᤒᤠ ᤐᤥ᤺ᤱᤔᤠ ᤕᤧᤶ ᤋᤠᤏᤡᤖᤥ॥
ACT 3:20 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤋᤃᤡᤛᤠ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤕᤠᤶᤔᤥ ᤁᤧᤒᤠᤱᤄᤡ ᤁᤧᤒᤡᤖᤡ᤹ᤖᤥ॥
ACT 3:21 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤏᤢᤛᤠᤀᤣ ᤁᤢᤛᤣᤛᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤠᤶᤔᤥ ᤁᤢᤛᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤕᤧᤛᤢ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤔᤠ ᤐᤥ᤺ᤱ ᤑᤠ᤹ᤀᤠᤱ ᤐᤠ᤺ᤳᤋᤢᤀᤠᤱ ᤘᤠ᤹॥
ACT 3:22 ᤔᤥᤛᤠᤖᤧᤀᤠᤱ ᤔᤠᤱᤎᤢᤰᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤜᤧᤰᤋᤱᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤗᤠᤶ ᤑᤥ᤺ᤰᤂᤢ᤹ᤖᤥ॥ ᤁᤢᤒᤠ᤺ᤴᤏᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗ ᤐᤥ᤺ᤱᤗᤥ॥
ACT 3:23 ᤂᤧᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤱᤄᤧᤶᤔᤏᤠᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤗᤠᤶ ᤔᤧᤛᤧᤴᤏᤠᤱ ᤔᤧᤔᤧᤰᤗᤥ॥’
ACT 3:24 ᤜᤧᤰᤁᤩᤠᤱ ᤛᤠᤔᤢᤀᤧᤸᤗᤠᤱᤎᤥ ᤕᤠᤱᤛᤡᤒᤠ ᤁᤠᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤜᤠᤒᤠ ᤁᤴ ᤕᤧᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥
ACT 3:25 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤡᤏᤡ᤹ᤀᤠᤱ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ ᤀᤒᤪᤠᤜᤠᤶᤔᤡᤴ ᤀᤰᤂᤣ ᤔᤧᤳᤋᤢ. ‘ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤗᤠᤶᤔᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤢᤘᤠᤱᤃᤧᤴ ᤛᤕᤱᤜᤠ᤹ᤖᤧ ᤔᤢ᤹ᤀᤡᤛᤠᤶ ᤔᤧᤄᤥ᤺ᤛᤢ᤹ᤖᤥ॥’
ACT 3:26 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤑᤧᤴ ᤕᤠ᤺ᤶᤒᤰᤁᤥᤗᤠᤶ ᤏᤢ᤺ᤰᤔᤠᤛᤡᤀᤠᤱ ᤔᤢ᤹ᤀᤡᤛᤠᤶ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤛᤣᤘᤠᤖᤥᤒᤠᤴ ᤁᤠᤰᤏᤢ ᤋᤃᤡ ᤂᤡᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤐᤠᤱᤄᤢᤀᤠᤱ ᤘᤠ᤹ᤖᤥ॥”
ACT 4:1 ᤐᤋᤪᤢᤛ ᤏᤢ ᤕᤢᤜᤢᤴᤏᤠᤖᤧ ᤔᤏᤠᤜᤠ᤹ ᤀᤡᤱᤓᤥ᤺ᤛᤧᤳᤇᤢᤖ ᤕᤠᤃᤧᤳᤇᤡᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤔᤠᤱᤜᤡᤶ ᤁᤧᤃᤥ᤺ᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤋᤢᤶᤒᤠ ᤏᤢ ᤁᤢᤓᤠ ᤛᤍᤢᤁᤡᤜᤠ᤹ ᤂᤧᤵᤔᤥ ᤔᤧᤍᤩᤧᤖᤥ॥
ACT 4:2 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤜᤧᤰᤁᤣᤀᤣ ᤘᤣ᤹ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤘᤠ᤹ ᤑᤠ᤹ᤀᤠᤱ ᤐᤠ᤺ᤴ ᤀᤡᤱᤓᤥ᤺ᤛᤧᤳᤇᤢᤒᤠ ᤔᤧᤄᤧᤵᤛᤢᤒᤠᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠ᤹ᤖᤡᤰ ᤛᤡᤰᤆᤡᤃᤧ ᤗ᤹ᤖᤧ.
ACT 4:3 ᤂᤧᤱᤜᤠ᤹ᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤔᤧᤍᤧᤶᤛᤢᤛᤡ ᤜᤧᤰᤁᤩᤠᤱ ᤂᤠᤍᤠᤔᤧ ᤐᤣᤒᤠᤸᤗᤧ ᤆᤥᤃᤢᤸᤗᤧ ᤏᤠᤶᤍᤠ᤺ᤳᤋᤠ᤺ᤳ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡ॥
ACT 4:4 ᤁᤖ ᤂᤧᤴ ᤐᤠ᤺ᤴᤈᤠᤰ ᤁᤧᤄᤧᤶᤒᤠᤜᤠ᤹ᤀᤥ ᤕᤖᤡᤰ ᤔᤏᤠᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢ॥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤔᤧᤒᤥ᤺ᤖᤧᤀᤠᤱ ᤕᤧᤶᤒᤡᤳᤇᤠᤜᤠ᤹ᤖᤰ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤔᤧᤃᤧᤖᤧᤖᤥ॥
ACT 4:5 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤛᤢᤜᤠᤱᤕᤢᤰᤐᤠᤜᤠ᤹. ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤖᤢᤛᤗᤧᤶᤔᤥ ᤆᤢᤶᤗᤢᤱ ᤔᤧᤈᤥᤃᤧ॥
ACT 4:6 ᤂᤧᤵᤔᤥᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤜᤴᤏᤠᤛ. ᤜᤧᤰᤁᤩᤠᤱ ᤁᤤᤕᤠᤑᤠᤛ. ᤕᤢᤜᤢᤴᤏᤠ. ᤀᤗᤧᤰᤈᤧᤴᤍᤖ ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤛᤕᤱᤅᤥ ᤁᤧᤘᤠ᤹ᤒᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤖᤥ॥
ACT 4:7 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤢᤜᤢᤴᤏᤠ ᤏᤢ ᤐᤋᤪᤢᤛᤧᤴ ᤂᤢᤏᤡ᤹ ᤋᤃᤡ ᤔᤧᤍᤠᤖᤢᤛᤡᤀᤠᤱ ᤀᤰᤂᤣ ᤔᤧᤔᤧᤳᤋᤢᤛᤡᤖ ᤛᤣ᤺ᤴᤔᤧᤍᤥᤛᤢᤛᤡ. “ᤀᤠᤳᤋᤡᤴ ᤔᤢᤰᤛᤠᤶᤗᤠᤶ ᤀᤡᤃᤪ ᤜᤠ᤺ᤳᤗᤧ ᤁᤢᤕᤢᤰᤁᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥᤃᤧᤳᤇᤢᤒᤠᤒᤣ᥅”
ACT 4:8 ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤀᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤛᤣ.
ACT 4:9 ᤀᤠᤀᤡᤴ ᤀᤠᤴᤇᤡᤃᤧ ᤁᤴ ᤗᤠᤱᤛᤰᤐᤠ ᤔᤏᤠ᤺ᤴ ᤗᤢᤱᤔᤠ᤹ ᤋᤢᤰᤋᤧᤇᤢᤃᤧᤀᤠᤱ ᤘᤣ᤺ᤳᤋᤧᤒᤠ ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤂᤡᤏᤡ᤹ ᤋᤃᤠᤱ ᤛᤣ᤺ᤴᤍᤥ᤺ᤛᤧ ᤕᤠᤵᤔᤡ ᤁᤧᤍᤠᤖᤡᤒᤠᤏᤧ ᤑᤠ᤹ᤃᤪ.
ACT 4:10 ᤀᤠᤸᤗ ᤂᤡᤏᤡ᤹ ᤏᤢ ᤘᤣ᤹ ᤀᤡᤛᤪᤠᤀᤡᤗᤒᤠ ᤁᤠᤰ ᤔᤏᤠᤜᤠ᤹ᤖᤧ ᤁᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ. ᤏᤠᤛᤖᤋᤛ᤻ᤔᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤗᤠᤶ ᤁᤴ ᤔᤏᤠ᤺ᤴ ᤂᤡᤏᤡ᤹ ᤋᤃᤡ ᤘᤣ᤺ᤳᤋᤧᤀᤠᤱ ᤕᤧᤵᤗᤥ॥ ᤕᤧᤛᤢ᤺ᤱᤃ ᤂᤡᤏᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤛᤧᤵᤔᤠ ᤁᤧᤒᤠᤱᤄᤢᤶᤛᤡᤶ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤀᤠᤱ ᤑᤥ᤺ᤰᤂᤢᤖᤥ॥
ACT 4:11 ᤂᤢᤏᤧ᤹ ᤁᤢᤔᤧᤴᤏᤥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤂᤡᤏᤡ᤹ ᤗᤢᤱ ᤁᤧᤃᤠᤶᤒᤠᤜᤠ᤹ᤖᤧ ᤁᤧᤏᤠ᤹ᤖᤢᤶᤒᤠ ᤗᤢᤱᤅᤡᤴ ᤂᤢᤏᤧ᤹ᤀᤣᤖᤥ. ᤁᤖ ᤀᤠᤸᤗᤥ ᤔᤠᤗᤢᤱ ᤐᤥ᤺ᤰᤂᤧᤖᤥ॥’
ACT 4:12 ᤕᤧᤛᤢᤗᤠᤶᤗᤰ ᤛᤧᤴᤗᤵ ᤘᤠ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤛᤧᤴᤗᤵ ᤕᤠᤵᤔᤡ ᤁᤧᤒᤡᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥”
ACT 4:13 ᤀᤠᤸᤗ ᤕᤜᤢᤍᤡ ᤕᤧᤈᤢᤶᤓᤥᤒᤠ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤛᤠᤵᤗᤠ ᤔᤧᤴᤏᤡ᤺ᤵᤔᤏᤠ ᤔᤧᤴᤈᤥᤒᤠ ᤘᤕᤧᤳᤇᤡᤛᤠᤱ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠᤴ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤏᤠᤜᤠ᤹ ᤕᤧᤛᤢ᤺ᤴᤏᤢ ᤘᤕᤧᤳᤇᤡᤒᤠ ᤏᤡᤱᤘᤠ᤹ ᤔᤧᤄᤥ᤺ᤛᤢ॥
ACT 4:14 ᤁᤖ ᤂᤧᤴ ᤁᤧᤘᤣ᤺ᤵᤐᤠ ᤔᤏᤠ᤺ᤴᤏᤠᤱ ᤂᤧᤱᤜᤠ᤹ᤏᤢᤀᤣ ᤕᤧᤒᤧᤒᤠ ᤔᤧᤏᤡ᤺ᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤣᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
ACT 4:15 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤕᤧᤈᤢᤶᤓᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤴ ᤔᤧᤎᤰᤋᤧᤖᤥ.
ACT 4:16 “ᤀᤠᤸᤗ ᤁᤴ ᤔᤏᤠᤜᤠ᤹ ᤌᤣ ᤔᤧᤵᤔᤠᤛᤡᤒᤣ᥅ ᤁᤱᤜᤠ᤹ᤖᤧᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤒᤠᤴ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤁᤠᤰ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤀᤠᤱ ᤁᤴ ᤔᤧ᤺ᤴ ᤑᤠ᤹ᤀᤠᤱ ᤐᤠ᤺ᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥
ACT 4:17 ᤁᤖ ᤁᤴ ᤐᤠ᤺ᤴᤏᤡᤴ ᤔᤏᤠᤜᤠ᤹ᤀᤥ ᤔᤧᤛᤧᤏᤧᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤠᤸᤗᤀᤠᤱᤎᤥ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤔᤠ ᤗᤧᤖᤧᤇᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤔᤠᤛᤡ ᤐᤥ᤺ᤱᤗᤥ॥”
ACT 4:18 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤠᤶᤔᤥ ᤔᤧᤀᤢ᤺ᤳᤋᤢᤛᤡᤀᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤀᤡᤃᤪ ᤜᤢ᤹ᤔᤠ ᤗᤧᤖᤧᤛᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤒᤡᤖᤢᤛᤡᤖᤥ॥
ACT 4:19 ᤁᤖ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤖᤧ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤴ ᤂᤧᤶᤔᤠ ᤏᤢ᤺ᤒᤠᤒᤡ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠᤴ ᤂᤧᤶᤔᤠ ᤏᤢ᤺ᤒᤠᤒᤡ᥅ ᤂᤡᤏᤡ᤹ᤀᤣ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ᥄
ACT 4:20 ᤁᤖ ᤀᤠᤴᤇᤡᤃᤧ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴ ᤏᤡ᤺ᤛᤢᤛᤡᤃᤧ ᤜᤧᤰᤁᤩᤠᤱ ᤂᤧᤵᤛᤢᤛᤡᤃᤧᤒᤠ ᤐᤠ᤺ᤴᤜᤠ᤹ ᤔᤧᤶᤒᤠ᤺ᤳᤋᤣ ᤘᤠ᤹ᤔᤠ ᤔᤧᤛᤢᤰᤛᤢᤃᤧᤴᤗᤥ॥”
ACT 4:21 ᤀᤠᤸᤗ ᤁᤠᤰ ᤔᤏᤠᤜᤠ᤹ᤖᤧ ᤂᤧᤵᤔᤥ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤁᤡᤴ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢᤖ ᤁᤢᤏᤠᤖᤠ ᤔᤧᤓᤥ᤺ᤛᤢᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤀᤠᤵᤋᤡᤰ ᤁᤢ᤺ᤵᤔᤠ ᤗᤠᤶ ᤂᤥ᤺ᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤔᤡᤒᤠᤜᤠ᤹ ᤕᤠᤶᤔᤥ ᤕᤱᤔᤠ ᤔᤧᤛᤧᤖᤢᤛᤡᤀᤠᤱ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤛᤡ॥
ACT 4:22 ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤗᤠᤶ ᤁᤧᤘᤣ᤺ᤵᤐᤠ ᤔᤏᤠ᤺ᤴ ᤋᤱᤒᤣ ᤗᤡᤒᤥ᤺ᤱ (᥊᥆) ᤁᤧᤃᤧᤵᤐᤠ ᤘᤕᤧ॥ ᤂᤧᤱᤃ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤗᤠᤱᤔᤧᤱᤄᤣ᤺ᤰᤔᤏᤠᤒᤠ ᤘᤕᤧᤖᤥ॥
ACT 4:23 ᤜᤧᤰᤁᤣᤗ᤹ᤖᤡᤰ ᤔᤧᤗᤧᤖᤢᤛᤡᤀᤠᤱ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤘᤣ᤹ᤛ᤻ᤔᤠ ᤏᤛᤠᤏᤡᤒᤠᤜᤠ᤹ ᤋᤢᤶᤛᤧ ᤐᤣᤛᤡ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤔᤧᤳᤋᤢᤛᤡᤒᤠ ᤐᤠ᤺ᤴᤜᤠ᤹ ᤆᤧᤰᤂᤧᤳᤇᤢᤖᤥ॥
ACT 4:24 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤌᤡᤰᤜᤢᤵ ᤏᤢ ᤌᤡᤰᤔᤢᤖᤠ ᤔᤧᤒᤥ᤺ᤰᤂᤧᤀᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤔᤧᤈᤥᤃᤧ. “ᤀᤠᤏᤡᤃᤧ ᤔᤢᤰᤛᤠᤶᤍᤠᤱᤒᤠᤀᤣ. ᤂᤧᤏᤧ᤹ᤃ ᤋᤠᤱᤛᤠᤰᤐᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤠᤜᤱᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤥᤃᤢᤛᤡᤒᤠᤖᤥ॥
ACT 4:25 ᤀᤢᤴᤇᤣ᤺ᤴ ᤂᤧᤏᤧ᤹ᤃ ᤀᤠᤏᤡᤃᤧ ᤋᤠᤰᤌᤧᤒᤠ ᤍᤠᤀᤢᤍᤖᤧ ᤁᤢᤔᤢᤖᤠᤀᤥᤗᤠᤶ ᤂᤧᤏᤧ᤹ ᤁᤧᤛᤣᤘᤠᤖᤥᤒᤠᤸᤗᤧ ᤁᤢᤔᤧᤴᤏᤥ ᤛᤣᤛᤣᤔᤠᤱᤗᤠᤶ ᤀᤰᤂᤣ ᤁᤧᤒᤠ᤺ᤳᤋᤢᤖᤥ– ‘ᤌᤣᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤡᤴ ᤀᤠᤍᤰᤗᤧᤱᤘᤠᤀᤥ ᤐᤥ᤺ᤰᤐᤣ᥅ ᤜᤧᤰᤁᤩᤠᤱ ᤌᤣᤀᤠᤱ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤜᤏᤧᤒᤠ ᤏᤡᤱᤛᤣ᤺ᤰ ᤔᤧᤈᤥᤃᤢᤒᤣ᥅
ACT 4:26 ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤱᤅᤠᤱ ᤍᤠᤱᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤢᤶᤗᤥ॥’
ACT 4:27 ᤛᤧᤰᤂᤠᤀᤣ ᤒᤠ ᤂᤧᤴ ᤐᤠ᤺ᤴᤏᤡᤴ ᤁᤴ ᤕᤧᤰᤕᤰᤁᤥ ᤁᤧᤖᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤜᤧᤖᤥᤍ ᤜᤠᤱᤅᤡᤴ. ᤛᤢᤜᤠᤱᤃᤧᤶᤒᤠ ᤐᤴᤋᤡᤕᤛ ᤐᤡᤗᤠᤋᤛ. ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤱᤛᤣ᤺ᤰᤁᤥ ᤁᤧᤛᤣᤃᤢᤒᤠ ᤛᤣᤛᤣ ᤁᤧᤛᤣᤘᤠᤖᤥᤒᤠ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤁᤴ ᤕᤧᤰᤕᤰᤁᤥ ᤔᤧᤈᤢᤵᤛᤧᤀᤠᤱ ᤔᤧᤘᤠ᤹ᤖᤥ॥
ACT 4:28 ᤂᤧᤏᤧ᤹ ᤁᤧᤏᤡᤱᤛᤣ᤺ᤰ ᤐᤥ᤺ᤱᤏᤡ ᤑᤠ᤹ᤀᤠᤱ ᤋᤃᤡᤛᤠ ᤁᤧᤔᤢᤰᤛᤠᤶ ᤏᤢ ᤁᤧᤏᤡᤱᤘᤠ᤹ᤖᤧ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤈᤥᤃᤢᤖᤥ॥
ACT 4:29 ᤍᤠᤱᤒᤣ. ᤀᤠᤸᤗ ᤂᤧᤱᤜᤠ᤹ᤖᤧ ᤕᤱᤔᤠ ᤔᤧᤛᤧᤖᤡᤃᤧᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤁᤧᤛᤣᤘᤠᤖᤥᤒᤠᤜᤠ᤹ ᤐᤣᤗᤡᤃᤧᤴ ᤁᤧᤒᤠ᤺ᤴᤈᤠᤰᤁᤡᤴ ᤜᤠᤱᤜᤠᤱᤅᤠᤱ ᤐᤠ᤺ᤵᤔᤠ ᤕᤠᤵᤔᤡ ᤁᤧᤎᤢᤶᤒᤠ ᤀᤠᤈᤥᤃᤧ᤹ᤀᤥ॥
ACT 4:30 ᤜᤧᤰᤁᤩᤠᤱ ᤛᤣᤛᤣ ᤁᤧᤛᤣᤘᤠᤖᤥᤒᤠ ᤕᤧᤛᤢᤖᤧ ᤁᤢᤔᤢᤰᤛᤠᤶᤗᤠᤶ ᤔᤏᤠᤜᤠ᤹ ᤔᤧᤘᤣ᤺ᤳᤏᤡ. ᤜᤧᤰᤁᤩᤠᤱ ᤕᤖᤡᤰ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤐᤥ᤺ᤱᤏᤡ ᤑᤠ᤹ᤀᤠᤱ ᤁᤧᤜᤢᤰᤁᤡᤴ ᤛᤴᤇᤧ᤹ᤀᤥ॥”
ACT 4:31 ᤂᤧᤱᤜᤠ᤹ᤖᤧ ᤋᤢᤘᤠ ᤔᤧᤈᤥᤃᤢ ᤔᤧᤛᤢᤖᤢᤸᤗᤧ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤒᤠ ᤋᤧᤴᤏᤡᤴ ᤗᤢᤵᤗᤡ ᤌᤠᤅᤧᤒᤠ ᤜᤧᤰᤁᤣ ᤛᤠ᤹ᤖᤡᤰ ᤕᤰᤂᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤠᤰ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤀᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤔᤧᤱᤃᤡᤀᤣ ᤔᤧᤒᤠᤖᤧᤖᤥ॥
ACT 4:32 ᤀᤠᤸᤗ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤌᤡᤰ ᤏᤡᤱᤘᤠ᤹ ᤌᤡᤰ ᤔᤢᤖᤠ ᤔᤧᤒᤥ᤺ᤰᤂᤧᤀᤠᤱ ᤂᤢᤏᤡ᤹ ᤔᤧᤃᤳᤋᤢᤒᤠ᤺ᤴ ᤀᤡᤱᤃᤠ᤹ᤀᤡᤴ ᤔᤧᤸᤗ᤹ᤀᤣ ᤁᤧᤖᤧᤰᤗᤧ ᤌᤡᤰ ᤏᤡᤱᤘᤠ᤹ ᤌᤡᤰ ᤜᤢᤵᤐᤥ ᤔᤧᤕᤠᤅᤢᤖᤥ॥
ACT 4:33 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤐᤕᤶ ᤔᤢᤰᤛᤠᤶᤏᤢ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤐᤠ᤺ᤴᤜᤠ᤹ᤖᤧᤴ ᤋᤥ᤺ᤴᤍᤡ ᤔᤧᤒᤡᤖᤢᤀᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤛᤡᤖᤥ॥
ACT 4:34 ᤂᤢᤏᤡ᤹ ᤗᤢᤶᤔᤥ ᤆᤠᤕᤥ᤺ᤶᤒᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤔᤧᤜᤥ᤺ᤵᤋᤧ. ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ ᤔᤧᤃᤳᤋᤢᤒᤠ ᤕᤠᤱᤛᤠᤁᤢᤴᤎᤣ. ᤜᤡᤶᤎᤠ᤺ᤱ. ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤔᤧᤛᤱᤄᤢᤀᤠᤱ ᤂᤧᤴ ᤕᤠᤱᤅᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤆᤠᤕᤥ᤺ᤶᤒᤥ ᤁᤢᤀᤡᤛᤡ᤺ᤰ ᤔᤧᤜᤠ᤺ᤳᤋᤢᤛᤡᤖᤥ॥
ACT 4:36 ᤜᤧᤰᤁᤣ ᤁᤧᤈᤥ᤺ᤰᤐᤠᤀᤥ ᤕᤢᤛᤢᤑ ᤔᤡᤱ ᤁᤧᤘᤠ᤺ᤵᤐᤠ ᤗᤧᤒᤡ ᤌᤠ᤺ᤰᤁᤥᤒᤠ ᤛᤤᤐᤪᤛ ᤘᤠᤃᤵᤂᤠᤶᤔᤥ ᤛᤠᤃᤧᤘᤠ᤺ᤴᤇᤡᤱᤒᤠᤎᤡᤰ ᤘᤕᤧ॥ ᤂᤢᤏᤧ᤹ ᤁᤳᤋᤢᤒᤠ ᤐᤩᤠᤱᤛᤡ᤺ᤴ ᤛᤱᤄᤢᤀᤠᤱ ᤕᤠᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤋᤠᤖᤢᤖᤥ॥ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤧ᤹ ᤒᤖᤏᤠᤒᤠᤛ ᤔᤡᤱᤔᤧᤗᤥ᤺ᤰᤂᤢ (ᤂᤧᤴ ᤑᤠ᤹ᤀᤡᤴ ᤜᤠᤱᤜᤠᤱ ᤁᤧᤈᤥ᤺ᤰᤐᤠ ᤛᤠ᤺ ᤐᤥ᤺ᤱᤗᤥ)॥
ACT 5:1 ᤁᤖ ᤂᤧᤵᤔᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳ ᤛᤑᤡᤖᤠ᤺ᤴᤏᤢ ᤂᤢᤴᤇᤡ᤹ ᤗᤰᤁᤥᤒᤠ ᤁᤢᤓᤠ ᤗᤠᤈᤣ᤹ᤎᤡᤰ ᤛᤱᤄᤧᤳᤇᤢᤀᤠᤱ
ACT 5:2 ᤁᤢᤓᤠ ᤕᤠᤱᤅᤡᤴ ᤁᤢᤔᤣ᤺ᤳᤋᤡᤸᤗᤧ ᤏᤡ᤺ᤛᤢᤖ ᤆᤡᤰᤂᤢᤗᤠᤖᤢ ᤜᤧᤰᤁᤩᤠᤱ ᤁᤢᤓᤠ ᤕᤠᤱᤅᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤋᤠᤖᤢᤖᤥ॥
ACT 5:3 ᤁᤖ ᤐᤋᤪᤢᤛᤖᤧ ᤛᤣ᤺ᤴᤍᤥᤛᤢ. “ᤜᤏᤏᤡᤕᤠᤀᤣ. ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤀᤡᤴ ᤌᤣᤀᤠᤱᤏᤧ ᤔᤠᤑᤧᤴᤛᤠᤶᤔᤡᤴ ᤌᤡᤶᤔᤠ ᤁᤧᤒᤠᤱᤄᤢᤒᤠᤒᤣ᥅ ᤌᤣᤀᤠᤱ ᤂᤧᤏᤧ᤹ ᤁᤢᤓᤠ ᤕᤠᤱᤅᤡᤴ ᤁᤧᤗᤠᤖᤢᤀᤠᤱ ᤁᤠᤰ ᤕᤠᤱ ᤁᤧᤒᤡᤒᤠ ᤁᤧᤗᤠᤶᤛᤡᤱᤒᤠᤒᤣ᥅
ACT 5:4 ᤁᤱᤃ ᤔᤧᤴᤇᤱᤅᤣ ᤘᤕᤧᤛᤠᤱ ᤂᤧᤏᤧ᤹ᤀᤡᤴᤏᤣᤛᤧ ᤘᤕᤧᤒᤠ᥄ ᤀᤠᤸᤗᤥ ᤁᤧᤛᤱᤄᤢᤀᤠᤱᤛᤠᤱ ᤒᤠ ᤁᤧᤜᤢᤰᤁᤥᤀᤣᤛᤠ ᤕᤠᤱᤅᤡᤴ ᤘᤠ᤹ᤒᤠ᥄ ᤀᤰᤂᤣᤗ᤹ᤖᤡᤰ ᤌᤣᤀᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤋᤠᤵᤑᤧ᤺ᤶᤒᤠ ᤁᤧᤀᤡ᤺ᤳᤋᤢᤒᤠᤒᤣ᥅ ᤂᤧᤏᤧ᤹ᤃ ᤔᤧᤴᤇᤠᤶᤃᤧᤴ ᤕᤠᤵᤔᤡ᤺ᤴᤗᤰ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤀᤡᤱᤃᤧᤗᤧᤰᤋᤢᤀᤠᤱ ᤘᤠ᤹ᤖᤥ॥”
ACT 5:5 ᤜᤧᤰᤁᤩᤠᤱ ᤜᤏᤏᤡᤕᤠᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤏᤢᤔᤧ᤺ᤴᤏᤣ ᤜᤷᤃᤢᤵᤛᤠ ᤆᤥ᤺ᤴᤍᤧᤀᤠᤱ ᤁᤢᤛᤰᤔᤠ ᤐᤣᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤴ ᤁᤧᤄᤧᤶᤒᤠ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥
ACT 5:6 ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤌᤠᤱᤒᤧᤴᤜᤠ᤹ᤖᤧ ᤆᤣ ᤋᤣ᤺ᤳᤋᤡᤸᤗᤧ ᤔᤧᤃᤡᤳᤋᤢ ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤔᤧᤍᤣ᤹ᤖᤢᤀᤠᤱ ᤔᤧᤗᤢᤵᤋᤢᤖᤥ॥
ACT 5:7 ᤜᤧᤰᤁᤩᤠᤱ ᤁᤢᤔᤢᤰ ᤛᤢᤶᤛᤡ ᤀᤣᤃᤠᤱ ᤜᤏᤏᤡᤕᤠᤖᤧ ᤁᤢᤔᤣ᤺ᤳᤋᤡᤴ ᤁᤢᤕᤧᤶᤒᤠ᤹ᤀᤡᤴ ᤌᤧᤔᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥᤀᤣ ᤂᤧᤵᤔᤥ ᤋᤩᤧᤖᤥ॥
ACT 5:8 ᤐᤋᤪᤢᤛᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤜᤏᤏᤡᤕᤠᤖᤧ ᤁᤢᤗᤠᤈᤣᤴ ᤛᤱᤄᤢᤀᤠᤱ ᤂᤥ᤺ᤛᤢᤒᤠ ᤁᤢᤔᤧᤸᤗᤢᤱ ᤕᤠᤱ ᤒᤠ ᤁᤶᤔᤩᤠᤰᤗᤰᤐᤡ᥅” ᤜᤧᤰᤁᤣ᤺ᤸᤗᤧ ᤂᤧᤸᤗᤧᤀᤠᤱ ᤏᤥᤃᤵ ᤐᤡᤖᤢ. “ᤀᤥᤖᤥ᥄ ᤁᤢᤔᤧᤸᤗᤢᤱ ᤕᤠᤱᤃ ᤒᤠ ᤂᤧᤶᤔᤩᤠᤰᤗᤰᤗᤥ॥”
ACT 5:9 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤴ ᤔᤧᤳᤋᤢ. “ᤀᤠᤰᤂᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤛᤠ᤹ᤔᤠ ᤑᤠ᤹ᤀᤠᤱ ᤂᤡᤴᤇᤡ᤹ ᤏᤡᤱᤘᤠ᤹ᤀᤡᤴ ᤁᤧᤍᤱᤄᤧᤳᤇᤢᤒᤣ᥅ ᤂᤧᤵᤛᤧ᤹ᤀᤥ. ᤂᤧᤏᤧ᤹ ᤁᤧᤃᤠᤵᤐᤥᤒᤧᤴ ᤁᤧᤗᤢᤵᤐᤠᤜᤠ᤹ ᤂᤠ ᤗᤠᤶᤎᤣ᤺ᤵᤐᤥ ᤔᤧᤃᤧᤳᤗᤖᤰ ᤔᤧᤒᤳᤗᤥ॥ ᤂᤧᤱᤜᤠ᤹ᤖᤧ ᤁᤧᤎᤰᤁᤡᤴᤏᤠᤱ ᤔᤧᤒᤰᤂᤢᤀᤠᤱ ᤔᤧᤍᤣ᤹ᤖᤢᤖᤥ॥”
ACT 5:10 ᤂᤡᤔᤥ ᤐᤋᤪᤢᤛᤖᤧ ᤁᤢᤗᤠᤱᤈᤰᤐᤥ ᤂᤧᤴ ᤜᤷᤃᤢᤵᤛᤠ ᤆᤥ᤺ᤴᤍᤧᤀᤠᤱ ᤁᤢᤛᤰᤔᤠ ᤐᤣᤖᤥ॥ ᤜᤧᤰᤁᤩᤠᤱ ᤂᤧᤴ ᤌᤠᤱᤒᤧᤴᤜᤠ᤹ ᤛᤡᤃᤠᤱ ᤔᤧᤗᤠ᤺ᤛᤧᤸᤗᤧ ᤂᤧᤴ ᤛᤩᤧᤒᤠ ᤔᤧᤏᤡ᤺ᤛᤢ. ᤜᤧᤰᤁᤩᤠᤱ ᤔᤧᤒᤰᤂᤢ ᤔᤧᤍᤣ᤹ᤖᤢᤀᤠᤱ ᤁᤢᤕᤧᤶᤒᤠ᤹ᤀᤡᤸᤗᤧ ᤁᤢᤒᤣᤛᤠᤱ ᤔᤧᤗᤢᤵᤋᤢᤖᤥ॥
ACT 5:11 ᤜᤧᤰᤁᤩᤠᤱ ᤂᤧᤴ ᤐᤠ᤺ᤴ ᤁᤧᤄᤧᤶᤒᤠ ᤔᤏᤠᤜᤠ᤹ ᤏᤢ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥
ACT 5:12 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤕᤖᤡᤰ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤏᤠᤗᤢᤶᤔᤥ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤁᤧᤖᤧᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤀᤧᤳᤗᤧᤱ ᤛᤥᤗᤥᤔᤏᤖᤧ ᤁᤢᤀᤠ᤺ᤶᤓᤥᤀᤥ ᤛᤥᤛᤥᤖᤡᤰ ᤔᤧᤘᤕᤧᤖᤥ॥
ACT 5:13 ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ᤏᤢ ᤋᤱᤛᤡᤱᤔᤠ ᤑᤠ᤹ᤀᤠᤱ ᤀᤠ᤺ᤴᤇᤡᤱᤔᤠ ᤔᤧᤴᤇᤢᤰᤋᤢᤴ. ᤁᤖ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤛᤡᤖᤥ॥
ACT 5:14 ᤜᤧᤰᤁᤣᤛᤠᤱ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤧᤴᤇᤢᤔᤠ᤹ ᤏᤢ ᤕᤧᤶᤒᤡᤳᤇᤠ᤹ᤜᤠ᤹ ᤀᤠᤸᤗᤛᤠᤱ ᤕᤖᤡᤰ ᤔᤧᤕᤥ᤹ᤛᤡᤱᤗ ᤔᤧᤒᤣᤖᤥ॥
ACT 5:15 ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤐᤋᤪᤢᤛᤧᤴ ᤂᤧᤵᤔᤥᤗᤠᤶ ᤐᤣ᤺ᤰᤁᤡᤸᤗᤧ ᤁᤢᤛᤠᤶᤔᤪᤡ᤺ᤵᤐᤧᤴ ᤁᤧᤍᤢᤰᤐᤠ ᤛᤶᤍᤠᤱ ᤆᤢᤰᤁᤠᤱ ᤔᤧᤘᤣ᤺ᤳᤗ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤗᤠᤶᤗᤠᤶᤔᤥ ᤂᤢᤏᤡ᤹ ᤏᤧᤳᤏᤠᤀᤥ ᤔᤧᤏᤧᤛ᤻ᤛᤢᤛᤡᤖᤥ॥
ACT 5:16 ᤕᤖᤢᤛᤗᤧᤔ ᤂᤡᤖᤡᤒᤠ ᤐᤠᤱᤈᤢᤶᤗᤠᤶᤔᤠᤱ ᤂᤧᤵᤔᤥ ᤔᤏᤠᤜᤠ᤹ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤏᤢ ᤑᤧᤴᤛᤠᤶᤜᤠ᤹ᤖᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤜᤠ᤹ ᤂᤧᤵᤔᤥ ᤔᤧᤍᤠᤖᤢᤛᤡ. ᤜᤧᤰᤁᤩᤠᤱ ᤁᤠᤰ ᤔᤧᤘᤣ᤺ᤳᤋᤧᤖᤥ॥
ACT 5:17 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤛᤍᤢᤁᤡ ᤗᤰᤁᤥᤒᤠ ᤂᤢᤏᤧ᤹ ᤁᤢᤴᤈᤢᤶᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤠ᤹ᤖᤡᤰ ᤏᤠᤔᤧᤜᤧᤳᤋᤢᤛᤡ॥
ACT 5:18 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡ॥
ACT 5:19 ᤁᤖ ᤛᤧᤴᤍᤡᤰ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤧᤴ ᤋᤩᤧᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤍᤢᤒᤡᤖᤢᤛᤡ. ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ.
ACT 5:20 “ᤔᤠᤱᤜᤡᤶᤔᤥ ᤐᤣᤃᤧᤶᤔᤧ᤹ᤀᤠᤱ ᤁᤴ ᤁᤢᤛᤱ ᤜᤡᤱᤔᤴᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤁᤠᤰ ᤐᤠ᤺ᤴᤏᤡᤴ ᤔᤏᤠᤜᤠ᤹ ᤀᤡᤱᤓᤴ ᤆᤥᤃᤧᤶᤛᤡᤶᤔᤧ᤹ᤀᤥ॥”
ACT 5:21 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤔᤠᤱᤜᤡᤶᤔᤥ ᤔᤧᤗᤠ᤺ᤛᤧᤀᤠᤱ ᤔᤏᤠᤜᤠ᤹ ᤜᤢ᤹ᤔᤠ ᤔᤧᤜᤣ᤺ᤰᤋᤢᤛᤡᤖᤥ॥ ᤒᤠ ᤂᤧᤴ ᤕᤧᤶᤔᤥ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤁᤢᤴᤈᤢᤶᤜᤠ᤹ᤖᤧ ᤕᤜᤢᤍᤡ ᤕᤧᤈᤢᤶᤓᤥ ᤏᤢ ᤁᤠᤰ ᤀᤡᤛᤪᤠᤀᤡᤗᤛ᤻ᤔᤠ ᤋᤢᤶᤓᤠᤰᤛᤠᤜᤠ᤹ᤖᤧᤴ ᤆᤢᤶᤗᤢᤱ ᤔᤧᤈᤥᤃᤢᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤋᤠᤖᤧᤛᤧ᤹ ᤑᤠ᤹ᤀᤠᤱ ᤐᤢᤱᤗᤠᤀᤡᤱᤒᤠᤴ ᤀᤡᤱᤄᤱ ᤔᤧᤜᤠᤰᤋᤢᤖᤥ॥
ACT 5:22 ᤁᤖ ᤌᤰᤛᤢᤒᤠᤜᤠ᤹ ᤐᤢᤱᤗᤠᤜᤡᤶᤔᤥ ᤔᤧᤃᤧᤖᤧᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤂᤧᤵᤔᤥ ᤔᤧᤜᤥ᤺ᤵᤋᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ.
ACT 5:23 “ᤀᤠᤏᤡᤃᤧ ᤐᤢᤱᤗᤠᤜᤡᤶᤔᤥ ᤁᤧᤖᤡᤃᤧᤸᤗᤧ ᤗᤠᤶᤎᤣ᤺ᤵᤐᤧᤴ ᤏᤢ᤺ᤖᤡᤰᤁᤠᤱ ᤀᤧᤳᤇᤡᤱᤅᤠᤱ ᤐᤳᤇᤧ. ᤜᤧᤰᤁᤩᤠᤱ ᤌᤰᤛᤢᤒᤠᤜᤠ᤹ᤀᤠᤱ ᤗᤠᤶᤎᤣ᤺ᤵᤐᤧᤴ ᤔᤧᤃᤥ᤺ᤛᤢᤖ ᤔᤧᤕᤧᤒᤧᤖᤥ. ᤁᤖ ᤀᤠᤏᤡᤃᤧ ᤗᤠᤶᤎᤣ᤺ᤵᤐᤧᤴ ᤜᤶᤏᤠ᤺ᤸᤗᤧ ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤕᤠᤃᤧᤴᤗᤥ॥”
ACT 5:24 ᤔᤠᤱᤜᤡᤶ ᤁᤧᤃᤥ᤺ᤒᤠ ᤌᤰᤋᤢᤶᤒᤠᤴ ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤠᤸᤗ ᤌᤣ ᤐᤥ᤺ᤱᤒᤠᤒᤣ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜ᤺ᤴᤍᤠ ᤗᤧᤰᤋᤧᤖᤥ॥
ACT 5:25 ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤔᤏᤠᤎᤡᤰ ᤑᤧᤖᤧᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤐᤢᤱᤗᤠᤜᤡᤶᤔᤥ ᤁᤧᤛᤠᤰᤋᤢᤶᤛᤡᤶᤒᤠ ᤔᤏᤠᤜᤠ᤹ᤖᤧᤃ ᤏᤠ ᤔᤠᤱᤜᤡᤶᤔᤥᤏᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖ ᤔᤧᤕᤠᤰᤗᤥ॥”
ACT 5:26 ᤂᤧᤴ ᤌᤰᤋᤢᤶᤒᤠᤸᤗᤧ ᤌᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤌᤣᤀᤠᤱ ᤔᤧᤶᤔᤧᤳᤇᤡᤱᤅᤣ ᤕᤧᤈᤢᤶᤓᤥᤀᤥ ᤋᤠᤖᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤏᤠᤜᤠ᤹ᤖᤧ ᤗᤢᤱᤅᤡᤸᤗᤧ ᤀᤠᤶᤗᤧᤵ ᤀᤠᤶᤛᤧᤳ ᤑᤠ᤹ᤀᤠᤱ ᤔᤧᤃᤡᤛᤧᤖᤥ॥
ACT 5:27 ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤕᤧᤈᤢᤶᤓᤥ ᤋᤃᤡ ᤔᤧᤕᤧᤵᤛᤢᤛᤡᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ.
ACT 5:28 “ᤀᤠᤏᤡᤃᤧᤃ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤏᤠᤜᤠ᤹ ᤌᤣᤀᤠᤱ ᤔᤧᤜᤢ᤹ᤖᤧᤶᤛᤡᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤀᤠᤛᤡᤃᤧᤀᤠᤱ ᤘᤕᤧ. ᤁᤖ ᤂᤡᤏᤡ᤹ᤃ ᤕᤖᤢᤛᤗᤧᤶᤔᤥ ᤂᤡᤏᤡ᤹ ᤏᤡᤛᤠᤶᤔᤡᤸᤗᤧ ᤁᤧᤎᤡᤶᤛᤢᤶᤔᤠᤱ ᤁᤴ ᤔᤏᤠ᤺ᤸᤗᤧ ᤁᤢᤛᤡ᤺ᤔᤧᤸᤗᤧ ᤀᤠᤵᤋᤡᤰᤁᤡᤴ ᤕᤠᤵᤔᤡ ᤁᤢ᤺ᤵᤔᤠ ᤁᤧᤃᤥ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ᥄”
ACT 5:29 ᤁᤖ ᤐᤋᤪᤢᤛ ᤏᤢ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤐᤠ᤺ᤴᤏᤡᤴ ᤂᤧᤶᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴᤏᤧ ᤂᤧᤶᤔᤠ ᤐᤥ᤺ᤱᤗᤥ॥
ACT 5:30 ᤂᤡᤏᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤛᤧᤵᤔᤠ ᤁᤧᤒᤠᤱᤄᤢᤶᤛᤡᤶᤒᤠ ᤕᤧᤛᤢ᤺ᤴ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤖᤥ॥
ACT 5:31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤗᤠᤶᤗᤥ᤺ᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤐᤥ᤺ᤱᤛᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤰᤂᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤛ᤻ᤔᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤗᤠᤶ ᤜᤡᤶᤔᤠ ᤏᤢ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤔᤠ ᤛᤢᤕᤧᤶ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥
ACT 5:32 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡ᤺ᤱᤃ ᤀᤠᤏᤡᤃᤧ ᤘᤕᤡᤃᤧᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤜᤠ᤹ ᤐᤡᤖᤢᤛᤡᤒᤠ ᤛᤣᤛᤣᤔᤠᤱᤅᤡᤴᤏᤠᤱ ᤋᤥ᤺ᤴᤍᤡ ᤘᤠ᤹ᤖᤥ॥”
ACT 5:33 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤕᤧᤈᤢᤶᤓᤥᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤛᤠᤰᤁᤧᤴ ᤐᤥᤃᤧᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥
ACT 5:34 ᤁᤖ ᤂᤧᤵᤔᤥ ᤛᤠᤶᤕᤥᤌᤡᤶᤛᤠᤶᤒᤠ ᤏᤢ ᤁᤠᤰ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤃᤔᤠᤗᤡᤕᤗ ᤔᤧᤵᤔᤏᤠᤒᤠ ᤑᤖᤡᤛᤡ᤺ᤴ ᤕᤧᤶᤛᤡᤱᤅᤠᤱ ᤂᤧᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤵᤑᤠᤎᤡᤰ ᤗᤠ᤺ᤰᤁᤠᤳ ᤐᤠᤱᤄᤢᤛᤡ॥
ACT 5:35 ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤕᤜᤢᤍᤡ ᤕᤧᤈᤢᤶᤓᤥᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤛ᤻ᤔᤠ ᤔᤏᤠᤛᤣ. ᤁᤴ ᤔᤏᤠᤜᤠ᤹ ᤌᤧᤔᤠ ᤔᤧᤵᤔᤠᤛᤡ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤣ᥅ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄
ACT 5:36 ᤁᤢᤓᤠ ᤋᤱᤒᤣ ᤋᤃᤡ ᤌᤡᤕᤠᤍᤛ ᤔᤧᤵᤔᤏᤠᤒᤧᤴ ᤋᤩᤧᤀᤠᤱ ᤘᤕᤧ॥ ᤂᤢᤏᤧ᤹ᤃ ᤖᤥᤔᤡ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤠᤱᤒᤡᤑᤩᤢᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ᤀᤣ᤺ᤰ ᤗ᤹ᤖᤧᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤁᤢᤓᤠ ᤁᤢᤃᤡᤵ ᤗᤡᤛᤡ (᥊᥆᥆) ᤔᤏᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤔᤧᤍᤡᤶᤍᤢ. ᤁᤖ ᤁᤢᤓᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢᤀᤠᤱ ᤂᤢᤏᤧ᤹ ᤁᤧᤍᤡᤶᤒᤠ ᤔᤏᤠᤜᤠ᤹ ᤁᤠᤰ ᤔᤧᤛᤧ᤺ᤖᤧᤀᤠᤱ ᤔᤧᤏᤢᤒᤧ ᤔᤧᤒᤣᤖᤥ॥
ACT 5:37 ᤕᤠᤱᤛᤡ ᤐᤕᤶ ᤕᤠᤶᤏᤠ᤺ᤳᤏᤡ᤺ᤳᤋᤥ ᤃᤠᤗᤡᤗᤛ᤻ᤔᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤋᤩᤧᤀᤠᤱ ᤁᤢᤓᤠ ᤔᤏᤠᤜᤠ᤹ᤏᤢ ᤋᤱᤛᤡᤱᤅᤠᤱ ᤜᤠᤱᤒᤡᤑᤩᤢᤱ ᤆᤥᤃᤢᤖᤥ. ᤁᤖ ᤂᤢᤏᤧ᤹ᤀᤠᤱ ᤔᤧᤛᤧᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ᤀᤠᤱ ᤔᤧᤛᤧ᤺ᤖᤧ ᤔᤧᤒᤣᤖᤥ॥
ACT 5:38 ᤁᤴ ᤔᤏᤠᤜᤠ᤹ ᤔᤧᤛᤢᤛᤧᤶᤛᤡᤶᤔᤡᤴᤏᤧ᤹ ᤗᤧᤖᤧᤶᤍᤧ᤺ᤛᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤢᤈᤠ ᤐᤡᤏᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤔᤧᤈᤥᤃᤢᤛᤡᤒᤠ ᤐᤠ᤺ᤴᤏᤡᤴ ᤔᤏᤠᤗᤠᤶᤏᤧ ᤑᤠ᤹ᤃᤪ ᤁᤴ ᤔᤏᤠᤜᤠ᤹ ᤔᤧᤏᤢᤵ ᤔᤧᤒᤣ᤺ᤰᤗᤥ॥
ACT 5:39 ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤴ ᤔᤏᤠᤜᤠ᤹ ᤀᤵᤔᤠ ᤁᤧᤴᤇᤢᤰᤋᤢᤶᤛᤡᤶᤔᤡᤴᤗᤥ. ᤁᤖ ᤕᤠᤱᤏᤠ ᤂᤡᤏᤡ᤹ᤏᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤃᤡᤒᤠ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥”
ACT 5:40 ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤕᤧᤈᤢᤶᤓᤥᤒᤠ ᤔᤏᤠᤜᤠ᤹ ᤂᤧᤶᤔᤠ ᤔᤧᤍᤧᤴᤍᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡᤀᤠᤱ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡᤖ ᤀᤠᤸᤗ ᤁᤴ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤜᤢ᤹ᤔᤠ ᤁᤧᤱᤄᤥ᤺ᤛᤢᤶᤔᤡᤴᤗᤥ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤒᤡᤖᤢᤛᤡᤀᤠᤱ ᤔᤧᤗᤧᤖᤢᤛᤡᤖᤥ॥
ACT 5:41 ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤕᤧᤈᤢᤶᤓᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤀᤠᤏᤡᤃᤧᤃ ᤕᤧᤛᤢᤖᤧ ᤁᤢᤔᤏᤠ ᤐᤥ᤺ᤰᤂᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤋᤢᤰᤂᤣ ᤆᤠᤔᤠ ᤗᤠ᤹ᤖᤡᤃᤧ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥
ACT 5:42 ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰ ᤂᤧᤱᤜᤠ᤹ ᤔᤠᤱᤜᤡᤶᤔᤥ ᤏᤢ ᤜᤡᤶᤜᤡᤶ ᤔᤧᤒᤣᤀᤠᤱ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤁᤴ ᤛᤢᤏᤠᤀᤡᤱᤅᤡᤴ ᤆᤰᤔᤧᤸᤗ᤹ᤀᤣ ᤔᤧᤜᤢ᤹ᤖᤢᤛᤡᤖ ᤀᤡᤱᤓᤴ ᤔᤧᤈᤥᤃᤢᤖᤥ॥
ACT 6:1 ᤀᤠᤸᤗ ᤂᤧᤴ ᤕᤧᤶᤔᤥ ᤜᤢ᤹ᤛᤠᤶᤒᤠᤜᤠ᤹ ᤆᤰᤔᤧᤸᤗ᤹ᤀᤣ ᤔᤧᤒᤥ᤺ᤖᤧᤖ ᤔᤧᤒᤣ᤺ᤸᤗᤧ ᤃᤪᤡᤁ ᤁᤧᤒᤠ᤺ᤵᤐᤠ ᤕᤜᤢᤍᤡᤜᤠ᤹ ᤏᤢ ᤜᤡᤒᤪᤢ ᤁᤧᤒᤠ᤺ᤵᤐᤠ ᤕᤜᤢᤍᤡᤜᤠ᤹ᤀᤥ ᤂᤧᤔᤠ᤹ ᤐᤥᤃᤧᤖᤥ॥ ᤃᤪᤡᤁ ᤁᤧᤒᤠ᤺ᤵᤐᤠ ᤕᤜᤢᤍᤡᤜᤠ᤹ᤖᤧ ᤀᤠᤏᤡᤃᤧ ᤔᤣᤔᤣᤍᤢᤔᤠᤜᤠ᤹ ᤌᤡᤰᤕᤠ᤺ᤴᤎᤰᤐᤠ ᤆᤠᤔᤠ ᤌᤢᤱᤔᤠ ᤔᤧᤜᤠᤛᤢᤒᤠᤀᤥ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤴᤈᤥᤃᤢᤛᤡᤴ ᤑᤠ᤹ᤀᤠᤱ ᤗᤢᤱᤔᤧᤜᤠ᤺ᤳᤋᤢᤛᤡᤖᤥ॥
ACT 6:2 ᤜᤧᤰᤁᤣ᤺ᤸᤗᤧ ᤌᤡᤰ-ᤏᤧᤳ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤕᤖᤢᤛᤗᤧᤔᤛ᤻ᤔᤠ ᤏᤛᤠᤏᤡᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤆᤥ᤺ᤰᤔᤠ ᤏᤢ ᤜᤢ᤹ᤔᤠᤛᤡ ᤗᤧᤵᤔᤠᤀᤠᤱ ᤆᤠᤔᤠ ᤌᤢᤱᤔᤠᤖᤧ ᤋᤱᤃᤠᤶ ᤆᤥ᤺ᤰᤔᤠ ᤔᤧᤗᤠ᤹ᤖᤡᤃᤧᤴᤗᤥ॥
ACT 6:3 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤢᤶᤔᤥᤗᤠᤶ ᤏᤢᤛᤡ ᤔᤡᤱᤛᤥᤍᤠᤱᤒᤠ ᤑᤠ᤹ᤀᤠᤱ ᤁᤧᤀᤡᤱᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤒᤠ ᤏᤢ ᤛᤡᤰᤁᤢᤶᤍᤡᤱᤏᤡᤱᤘᤠ᤹ᤖᤧ ᤁᤢᤎᤡᤶ ᤁᤧᤒᤥ᤺ᤱᤒᤠ ᤔᤏᤠᤜᤠ᤹ ᤛᤣᤃᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ ᤀᤠᤏᤡᤃᤧ ᤁᤴ ᤗᤰᤐᤧᤴᤜᤠ᤹ ᤜᤢᤰᤛᤢᤵᤋᤢᤶᤛᤡᤶᤒᤧᤀᤠᤱ
ACT 6:4 ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥ᤺ᤰᤔᤠ ᤏᤢ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤆᤥ᤺ᤰᤔᤠᤀᤥ ᤏᤢ ᤜᤢ᤹ᤔᤠᤀᤥ ᤕᤧᤶ ᤐᤡᤖᤢᤶᤒᤧ᤹ᤖᤥ॥”
ACT 6:5 ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤸᤗᤧ ᤁᤠᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤛᤢᤖᤥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤒᤠ ᤏᤢ ᤏᤛᤠ᤺ᤴᤏᤡᤸᤗᤧ ᤁᤢᤎᤡᤶ ᤁᤧᤒᤥ᤺ᤱᤒᤠ ᤛ᤻ᤋᤡᤑᤏᤛ. ᤜᤧᤰᤁᤩᤠᤱ ᤑᤡᤗᤡᤐ. ᤐᤪᤂᤢᤖᤛ. ᤏᤡᤁᤠᤏᤥᤖ. ᤋᤡᤔᤥᤏ. ᤐᤷᤔᤡᤏᤠᤛ. ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤗᤠᤶ ᤕᤜᤢᤍᤡ ᤛᤠᤶᤕᤥᤀᤥ ᤁᤧᤍᤠ᤺ᤒᤠ ᤀᤣᤴᤋᤡᤀᤥᤁᤛ᤻ᤔᤠ ᤏᤛᤠᤏᤡᤒᤠ ᤏᤡᤁᤥᤗᤛᤧᤴ ᤔᤧᤛᤣᤃᤢᤛᤡᤀᤠᤱ
ACT 6:6 ᤂᤧᤱᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤔᤧᤍᤠᤖᤢᤛᤡᤖᤥ॥ ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤔᤧᤏᤧᤛ᤻ᤛᤢ ᤔᤧᤒᤡᤖᤢᤛᤡᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤋᤢᤘᤠ ᤔᤧᤈᤥᤃᤢᤖᤥ
ACT 6:7 ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤆᤰᤔᤧᤸᤗ᤹ᤀᤣ ᤔᤧᤛᤧ᤺ᤛᤢᤖ ᤔᤧᤍᤣ᤹ᤖᤢ॥ ᤜᤧᤰᤁᤩᤠᤱ ᤕᤖᤢᤛᤗᤧᤶᤔᤥ ᤜᤢ᤹ᤛᤠᤶᤒᤠᤜᤠ᤹ ᤕᤖᤡᤰ ᤔᤧᤒᤥ᤺ᤰᤂᤧᤖ ᤔᤧᤒᤣᤀᤠᤱ ᤕᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤁᤴ ᤏᤛᤠ᤺ᤴᤏᤡᤴ ᤋᤧᤴᤍᤡᤱ ᤔᤧᤈᤥᤃᤢᤖᤥ॥
ACT 6:8 ᤀᤠᤸᤗ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤏᤢ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤍᤡᤶᤒᤠ ᤛ᤻ᤋᤡᤑᤏᤛᤧᤸᤗᤧ ᤔᤏᤠᤗᤢᤶᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤔᤡᤰᤛᤣ᤺ᤴᤜᤠ᤹ ᤆᤥᤃᤢᤖᤥ॥
ACT 6:9 ᤁᤖ “ᤆᤥ᤺ᤰᤕᤢᤶᤓᤥᤛᤠᤒᤠᤜᤠ᤹ᤖᤧᤴ ᤆᤢᤶᤗᤢᤱᤜᤡᤶ” ᤔᤧᤵᤔᤏᤠᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤁᤧᤕᤠᤰᤐᤠ ᤁᤢᤓᤠ ᤔᤏᤠᤜᤠ᤹ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥᤃᤧ॥ ᤂᤧᤱᤜᤠ᤹ ᤛᤠᤀᤡᤖᤣᤏᤡ ᤏᤢ ᤀᤗᤧᤰᤈᤧᤴᤍᤪᤡᤕᤠ ᤕᤧᤰᤕᤰ. ᤜᤧᤰᤁᤩᤠᤱ ᤛᤡᤗᤡᤛᤡᤕᤠ ᤏᤢ ᤀᤣᤛᤡᤕᤠ ᤋᤧᤱᤃᤵᤛ᤻ᤔᤠ ᤕᤜᤢᤍᤡ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤛ᤻ᤋᤡᤑᤏᤛᤏᤢ ᤐᤠ᤺ᤴ ᤌᤰᤔᤠ ᤔᤧᤜᤣ᤺ᤰᤋᤢ.
ACT 6:10 ᤁᤖ ᤛᤣᤛᤣᤔᤠᤱᤗᤠᤶ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤛ᤻ᤋᤡᤑᤏᤛᤧᤴ ᤐᤠᤖᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤴᤎᤱᤅᤥ ᤏᤠ᤺ᤶᤔᤠ ᤔᤧᤴᤇᤢᤰᤋᤢᤴᤗᤥ॥
ACT 6:11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤫᤠ᤺ᤳᤋᤠᤱ ᤔᤏᤠᤜᤠ᤹ ᤀᤰᤂᤣᤗ᤹ᤖᤡᤰ ᤐᤠ᤺ᤵᤔᤠ ᤔᤧᤜᤢᤛᤢᤛᤡᤖᤥ. “ᤀᤠᤏᤡᤃᤧᤃ ᤁᤸᤗᤧ ᤔᤥᤛᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠᤖᤧᤒᤠ ᤂᤧᤵᤛᤢᤶᤒᤧᤖᤥ॥”
ACT 6:12 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ ᤔᤧᤓᤥ᤺ᤰᤂᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤍᤩᤧᤀᤠᤱ ᤛ᤻ᤋᤡᤑᤏᤛᤧᤴ ᤔᤧᤍᤧᤶᤛᤢᤀᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤕᤧᤈᤢᤶᤓᤥᤀᤥ ᤔᤧᤍᤣ᤹ᤖᤢᤖᤥ॥
ACT 6:13 ᤜᤧᤰᤁᤩᤠᤱ ᤑᤥᤋᤩᤠᤒᤠ ᤋᤥ᤺ᤴᤍᤡ ᤐᤡᤛᤧ ᤔᤧᤍᤠᤖᤢᤛᤡᤒᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧᤃ ᤀᤠᤵᤑᤠᤸᤗᤧᤛᤠᤱ ᤁᤴ ᤛᤣᤛᤣᤔᤠᤱᤜᤡᤶ ᤏᤢ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠᤖᤧᤒᤠᤖᤰ ᤂᤧᤵᤛᤢᤶᤒᤧᤖᤥ॥
ACT 6:14 ᤜᤧᤰᤁᤩᤠᤱ ᤁᤸᤗᤧᤃ. ᤏᤠᤛᤖᤋᤛ᤻ᤔᤠ ᤕᤧᤛᤢᤖᤧ ᤁᤴ ᤔᤠᤱᤜᤡᤶᤔᤡᤴ ᤕᤛ᤻ᤛᤢᤀᤠᤱ ᤔᤥᤛᤠᤖᤧ ᤀᤠᤒᤡᤖᤧ ᤀᤠᤕᤢᤛᤧᤒᤠ ᤛᤠᤰᤌᤡᤶᤜᤠ᤹. ᤆᤥ᤺ᤰᤌᤡᤶᤜᤠ᤹ ᤁᤧᤖᤧᤰ ᤗᤧᤰᤂᤢ ᤀᤠᤒᤡᤖᤧᤖᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥”
ACT 6:15 ᤜᤧᤰᤁᤩᤠᤱ ᤂᤧᤴ ᤆᤢᤶᤗᤢᤱᤅᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤏᤧ᤹ ᤀᤍᤰᤋᤰᤁᤠᤱ ᤀᤥᤔᤧᤔᤧᤳᤋᤢᤸᤗᤧ ᤁᤢᤏᤠᤖᤠ᤺ᤱᤃ ᤔᤠᤱᤗᤠᤀᤡᤱᤒᤠᤸᤗᤧᤴ ᤜᤧᤰᤁᤣ ᤀᤥ᤺ᤳᤋᤧᤒᤠ ᤔᤧᤏᤡ᤺ᤛᤢᤖᤥ॥
ACT 7:1 ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤛ᤻ᤋᤡᤑᤏᤛᤧᤴ ᤛᤣ᤺ᤴᤍᤥᤛᤢ. “ᤁᤴ ᤀᤠᤵᤋᤡᤰᤜᤠ᤹ ᤛᤧᤰᤂᤠᤀᤣᤒᤡ᥅”
ACT 7:2 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. “ᤐᤠ᤺ᤛᤣ. ᤑᤢ᤹ᤏᤢᤛᤠ᤹ᤛᤣ. ᤀᤠᤄᤧᤵᤛᤧᤶᤔᤧ᤹ᤀᤥ᥄ ᤀᤠᤏᤡ᤹ ᤛᤢᤎᤧᤒᤠ ᤀᤒᤪᤠᤜᤠᤶᤔᤡᤴ ᤜᤠᤖᤠᤏ ᤕᤧᤰᤕᤰᤁᤥ ᤐᤣ᤺ᤰᤔᤠᤀᤠᤱ ᤕᤢᤱᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤔᤧᤛᤥᤐᤥᤋᤠᤔᤡᤕᤠ ᤋᤧᤱᤃᤵᤐᤥ ᤘᤕᤧᤸᤗᤧᤀᤣ ᤔᤡᤔᤡᤍᤡᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤢᤏᤧ᤹ᤀᤥ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ
ACT 7:3 ᤀᤰᤂᤣ ᤔᤧᤳᤋᤢᤖᤥ. ‘ᤁᤴ ᤗᤠᤈᤣ᤹ ᤏᤢ ᤁᤧᤃᤠ᤹ᤀᤡ ᤛᤥ᤹ᤎᤥ᤺ᤰᤜᤠ᤹ ᤗᤧᤖᤧᤎᤩᤧᤛᤧ᤹ᤀᤠᤱ ᤂᤧᤏᤧ᤹ ᤀᤥᤛᤣ᤺ᤴᤎᤠᤰᤏᤧᤒᤠ ᤗᤠᤈᤣ᤹ᤀᤥ ᤐᤣᤃᤧ᤹ᤀᤥ॥’
ACT 7:4 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤀᤠᤱ ᤁᤠᤸᤍᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤗᤠᤶ ᤗ᤺ᤴᤍᤧᤀᤠᤱ ᤜᤠᤖᤠ᤺ᤴᤏᤥ ᤐᤣᤀᤠᤱ ᤕᤢᤱᤛᤡᤱ॥ ᤂᤧᤵᤔᤥ ᤁᤢᤶᤒᤠ ᤛᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤂᤧᤴ ᤗᤠᤈᤣ᤹ᤗᤠᤶ ᤋᤣ᤹ᤖᤢᤀᤠᤱ ᤀᤠᤸᤗᤥ ᤁᤵᤔᤥ ᤀᤠᤕᤢᤱᤒᤠ ᤗᤠᤈᤣ᤹ᤀᤥ ᤋᤠᤖᤢᤖᤥ॥
ACT 7:5 ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤴ ᤗᤠᤈᤣ᤹ᤀᤥ ᤗᤠᤱᤓᤥ ᤋᤥ᤹ᤔᤠ ᤗᤠᤈᤣ᤹ᤀᤠᤱ ᤔᤧᤒᤡᤖᤢᤴᤗᤥ. ᤁᤖ ᤁᤴ ᤂᤢᤏᤧ᤹ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤋᤠ᤺ᤴᤍᤡ ᤐᤡᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤖᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤕᤧᤶᤔᤥ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ᤎᤡᤰᤁᤠᤱ ᤜᤥ᤺ᤵᤋᤧᤖᤥ॥
ACT 7:6 ᤕᤠᤱᤛᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. ‘ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤠ᤺ᤱᤄᤠᤒᤠ ᤘᤣ᤹ ᤗᤠᤈᤣ᤹ᤀᤥ ᤔᤧᤕᤢᤱᤗᤥ॥ ᤂᤧᤵᤔᤥᤒᤠ ᤗᤠᤈᤣ᤹ᤛᤠᤒᤠᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤀᤠᤱ ᤁᤢᤃᤡᤵ ᤗᤡᤛᤡ ᤋᤱᤒᤣ (᥊᥆᥆) ᤌᤠᤖᤡᤰ ᤂᤢᤏᤡ᤹ ᤛᤠᤰᤁᤧᤸᤗᤧᤰᤁᤠᤱ ᤕᤥ᤺ᤰ ᤔᤧᤈᤥᤃᤢᤛᤡ᤹ᤖᤥ॥
ACT 7:7 ᤁᤖ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤕᤥ᤺ᤰᤐᤠ ᤁᤧᤈᤥ᤺ᤰᤐᤠ ᤂᤧᤵᤔᤥᤒᤠ ᤗᤠᤈᤣ᤹ᤛᤠᤒᤠᤜᤠ᤹ ᤀᤡᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤧᤴ ᤗᤠᤈᤣ᤹ᤀᤥᤗᤠᤶ ᤁᤴ ᤗᤠᤈᤣ᤹ᤀᤥ ᤔᤧᤎᤠᤱᤅᤠᤱ ᤀᤡᤱᤃᤠ᤹ ᤛᤣᤘᤠ ᤔᤧᤈᤥ᤺ᤰᤁᤠᤖᤥ॥’
ACT 7:8 ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤠᤱᤜᤢᤵᤗᤧᤴ ᤔᤡᤰᤛᤣ᤺ᤴ ᤐᤥ᤺ᤱᤗ ᤑᤠ᤹ᤀᤠᤱ ᤜᤷᤍᤥ ᤜᤧᤰᤔᤠ ᤌᤡᤶ ᤐᤡᤖᤢᤖᤥ॥ ᤜᤧᤰᤁᤣ᤺ᤸᤗᤧ ᤀᤒᤪᤠᤜᤠᤔᤖᤧ ᤀᤡᤛᤜᤠᤰᤁᤡᤴ ᤛᤠᤘᤠ᤺ᤴᤍᤢᤀᤠᤱ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤜᤧᤃᤢ ᤐᤡᤖᤢ॥ ᤜᤧᤰᤁᤩᤠᤱ ᤀᤡᤛᤜᤠᤁᤧᤴ ᤕᤠᤁᤢᤒᤖᤧ ᤁᤢᤶᤒᤠᤖᤥ॥ ᤀᤠᤏᤡ᤹ᤃ ᤕᤠᤁᤢᤒᤖᤧ ᤌᤡᤰ-ᤏᤧᤳ (᥇᥈) ᤁᤢᤛ᤻ᤛᤠ᤺ᤜᤠ᤹ᤖᤧ ᤂᤢᤏᤡ᤹ ᤔᤢ᤹ᤀᤡᤍᤠᤱᤛᤠᤛᤡᤖᤥ॥
ACT 7:9 ᤁᤢᤶᤓᤢ᤹ᤛᤡᤖᤧ ᤕᤢᤛᤢᤑᤧᤴ ᤛᤠ᤹ᤖᤡᤰ ᤏᤠᤔᤧᤜᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤡᤛᤪᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤛᤱᤄᤢᤀᤠᤱ ᤂᤢᤏᤧ᤹ ᤕᤥ᤺ᤰᤐᤠ ᤐᤥ᤺ᤰᤂᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧ.
ACT 7:10 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤢᤰᤂᤣᤘᤠᤗᤠᤶ ᤛᤧ᤺ᤵᤋᤢᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤑᤠᤖᤥ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖ ᤔᤡᤛᤪ ᤗᤠᤈᤣ᤹ ᤏᤢ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤛᤢᤜᤠᤱᤕᤢᤰᤐᤠ ᤆᤥᤃᤢᤖᤥ॥
ACT 7:11 ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ ᤏᤢ ᤁᤏᤠᤏ ᤗᤠᤈᤣ᤹ᤀᤥ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤌᤩᤧᤀᤠᤱ ᤕᤶᤒᤠ ᤋᤢᤰᤂᤣᤘᤠ ᤏᤢ ᤔᤡᤴᤍᤣ᤹ ᤐᤥᤃᤧ. ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤆᤠᤔᤠ ᤌᤧᤔᤠᤀᤠᤱ ᤔᤧᤱᤃᤳᤋᤢᤴᤗᤥ॥
ACT 7:12 ᤁᤖ ᤕᤠᤁᤢᤒᤖᤧ ᤔᤡᤛᤪᤀᤥ ᤕᤖᤡᤰ ᤆᤠ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤁᤢᤛ᤻ᤛᤠ᤺ᤜᤠ᤹ ᤆᤠ ᤗᤠ᤺ᤛᤧ ᤐᤠᤱᤄᤢᤛᤡ॥ ᤂᤧᤱᤜᤠ᤹ᤖᤧ ᤕᤢᤛᤢᤑᤗᤠᤶ ᤆᤠ᤺ᤴ ᤔᤧᤀᤡᤅᤢ ᤁᤖ ᤂᤢᤏᤧ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤜᤡᤶᤔᤥ ᤔᤧᤏᤢ᤺ᤰᤂᤧᤖᤥ॥
ACT 7:13 ᤜᤧᤰᤁᤣᤗ᤹ᤖᤡᤰ ᤔᤡᤛᤪᤀᤥ ᤏᤡᤗᤧᤱ ᤆᤠ ᤗᤠ᤺ᤛᤧ ᤔᤧᤒᤣ᤺ᤸᤗᤧ ᤕᤢᤛᤢᤑᤖᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤀᤡᤱᤃᤠ᤹ ᤕᤢᤛᤢᤑᤀᤠ ᤑᤠ᤹ᤀᤠᤱ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤑᤠᤖᤥᤜᤠᤱᤅᤡᤸᤗᤧᤀᤠᤱ ᤕᤢᤛᤢᤑᤖᤧ ᤁᤢᤜᤡᤶᤛᤕᤱᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤛᤡᤖᤥ॥
ACT 7:14 ᤜᤧᤰᤁᤩᤠᤱ ᤕᤢᤛᤢᤑᤖᤧ ᤁᤢᤶᤒᤠ ᤕᤠᤁᤢᤒ ᤏᤢ ᤁᤠᤰ ᤁᤢᤜᤡᤶᤛᤕᤱᤜᤠ᤹ ᤔᤡᤛᤪᤀᤥ ᤀᤢ᤺ᤳᤋᤢᤛᤡ॥ ᤂᤧᤱᤜᤠ᤹ ᤁᤧᤖᤧᤰ ᤏᤢ-ᤅᤠ (᥍᥋) ᤔᤧᤘᤕᤧᤖᤥ॥
ACT 7:15 ᤜᤧᤰᤁᤩᤠᤱ ᤕᤠᤁᤢᤒ ᤏᤢ ᤁᤢᤜᤡᤶᤛᤕᤱᤜᤠ᤹ ᤔᤡᤛᤪᤀᤥ ᤔᤧᤒᤣ॥ ᤕᤠᤱᤛᤡ ᤂᤢᤏᤧ᤹ ᤏᤢ ᤁᤢᤛ᤻ᤛᤠ᤺ᤜᤠ᤹ ᤂᤧᤵᤔᤥᤀᤣ ᤔᤧᤛᤩᤧ॥
ACT 7:16 ᤂᤢᤏᤡ᤹ ᤌᤰᤜᤠ᤹ ᤛᤣᤰᤁᤣᤔ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤀᤠᤱ ᤀᤒᤪᤠᤜᤠᤔᤖᤧ ᤜᤠᤔᤥᤖᤖᤧ ᤁᤢᤛ᤻ᤛᤠ᤺ᤜᤠ᤹ᤗᤠᤶ ᤀᤡᤅᤢᤀᤠᤱ ᤘᤕᤧᤒᤠ ᤀᤡᤵᤐᤢᤱᤍᤧᤴᤏᤥ ᤔᤧᤗᤢᤵᤋᤢᤛᤡᤖᤥ॥
ACT 7:17 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤔᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤀᤡ᤺ᤳᤋᤧᤸᤗᤧ ᤔᤡᤛᤪᤀᤥ ᤀᤠᤏᤡ᤹ ᤔᤏᤠᤜᤠ᤹ ᤕᤖᤡᤰ ᤔᤧᤒᤥ᤺ᤴᤍᤧᤖ ᤔᤧᤒᤣᤖᤥ॥
ACT 7:18 ᤕᤖᤡᤰ ᤋᤱᤒᤣ ᤀᤣᤃᤠᤱ ᤂᤧᤵᤔᤥ ᤘᤣ᤹ᤛ᤻ᤔᤠ ᤔᤏᤠ᤺ᤴ ᤜᤠᤱ ᤐᤥ᤺ᤰᤂᤧᤀᤠᤱ ᤔᤡᤛᤪᤀᤥ ᤜᤠᤱ ᤆᤥ᤺ᤰᤔᤠ ᤜᤣ᤺ᤰᤋᤢ॥ ᤂᤧᤸᤗᤧ ᤕᤢᤛᤢᤑᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥
ACT 7:19 ᤂᤧᤸᤗᤧ ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤀᤡᤱᤗᤧᤰ ᤔᤧᤳᤋᤢᤛᤡᤖ ᤛᤠ᤹ᤖᤡᤰ ᤏᤡᤱᤄᤢᤶ ᤆᤥᤃᤢᤛᤡᤀᤠᤱ ᤕᤧᤶᤒᤡᤳᤇᤠ᤹ ᤀᤅᤧ᤺ᤰᤘᤠᤛᤠᤜᤠ᤹ ᤔᤧᤛᤡᤖ ᤑᤠ᤹ᤀᤠᤱ ᤗᤠᤵᤑᤢ ᤐᤠᤱᤄᤢᤛᤡ॥
ACT 7:20 ᤒᤠ ᤂᤧᤴ ᤕᤧᤶᤔᤥ ᤔᤥᤛᤠ᤺ᤴ ᤛᤠᤘᤠ᤺ᤴᤇᤡᤱ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠ᤹ᤖᤡᤰ ᤏᤢ᤺ᤒᤠ ᤀᤅᤧ᤺ᤰᤘᤠ ᤆᤥᤃᤧ॥ ᤂᤢᤏᤧ᤹ ᤜᤡᤶᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤆᤡᤰᤂᤧᤇᤢᤀᤠᤱ ᤁᤳᤋᤧᤇᤢᤖᤥ॥
ACT 7:21 ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤘᤜᤱᤅᤡᤸᤗᤧ ᤁᤢᤕᤠᤀᤥ ᤔᤧᤏᤧᤛ᤻ᤛᤢᤸᤗᤧ ᤂᤧᤵᤔᤥ ᤑᤠᤖᤥᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤜᤠᤱᤛᤠᤔᤠᤸᤗᤧ ᤂᤥ᤺ᤛᤢᤀᤠᤱ ᤁᤢᤛ᤻ᤛᤠ᤺ ᤆᤥᤃᤢᤀᤠᤱ ᤁᤳᤋᤢᤖᤥ॥
ACT 7:22 ᤜᤧᤰᤁᤣᤗ᤹ᤖᤡᤰ ᤔᤡᤛᤪᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤡᤛᤠᤶᤜᤠ᤹ ᤂᤢᤏᤧ᤹ ᤔᤧᤜᤢ᤹ᤖᤢᤖᤥ॥ ᤜᤧᤰᤁᤩᤠᤱ ᤌᤠᤱᤒᤧᤴ ᤁᤧᤖᤧᤀᤠᤱ ᤂᤢᤏᤧ᤹ ᤐᤠ᤺ᤴᤏᤥ ᤏᤢ ᤕᤠ᤺ᤶᤒᤰᤁᤥ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤖᤥ॥
ACT 7:23 ᤜᤧᤰᤁᤩᤠᤱ ᤔᤥᤛᤠ᤺ᤴ ᤋᤱᤒᤣ ᤗᤡᤒᤥ᤺ᤱ (᥊᥆) ᤁᤧᤖᤧᤸᤗᤧ ᤁᤢᤃᤠ᤹ᤀᤡ ᤀᤡᤛᤪᤠᤀᤡᤗᤡᤜᤠ᤹ ᤋᤢᤶᤛᤧ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥
ACT 7:24 ᤜᤧᤰᤁᤩᤠᤱ ᤔᤡᤛᤪᤡᤎᤡᤰᤗᤧ ᤌᤡᤰ ᤀᤡᤛᤪᤠᤀᤡᤗᤡ᤺ᤴ ᤏᤡᤱᤄᤢᤶ ᤔᤧᤳᤋᤢᤒᤠ ᤏᤡ᤺ᤛᤢ॥ ᤜᤧᤰᤁᤣ᤺ᤸᤗᤧ ᤂᤧᤴ ᤏᤠᤱᤔᤠ ᤑᤠ᤹ᤀᤠᤱ ᤐᤣᤀᤠᤱ ᤂᤧᤴ ᤔᤡᤛᤪᤡ᤺ᤴ ᤜᤡᤵᤋᤢ ᤛᤧᤖᤢᤖᤥ॥
ACT 7:25 ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤕᤥ᤺ᤰᤐᤠ ᤜᤡᤱᤔᤴᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤐᤠᤱᤄᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤘᤕᤧ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
ACT 7:26 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤏᤧᤵᤑᤢ ᤀᤡᤛᤪᤠᤀᤡᤗᤡᤜᤠ᤹ ᤆᤢᤅᤧᤳᤇᤡᤖ ᤕᤠᤃᤧᤳᤇᤡᤒᤠ ᤏᤡ᤺ᤛᤢᤛᤡᤀᤠᤱ ᤏᤠᤍᤱ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤐᤣᤀᤠᤱ ᤔᤧᤳᤋᤢᤛᤡ. ‘ᤋᤣ᤺ᤱᤒᤠᤛᤣ. ᤂᤡᤴᤇᤡ᤹ᤃ ᤑᤢ᤹ᤏᤢᤛᤠ᤹ ᤁᤧᤎᤠᤵᤛᤡ᥄ ᤌᤣᤀᤠᤱ ᤁᤧᤈᤢᤱᤛᤡᤒᤠᤒᤣ᥅’
ACT 7:27 ᤁᤖ ᤂᤧᤴ ᤏᤡᤱᤄᤢᤶ ᤁᤧᤔᤧᤵᤐᤧᤸᤗᤧ ᤔᤥᤛᤠ᤺ᤴ ᤌᤡᤰᤗᤧᤵᤔᤠᤱ ᤆᤴᤍᤢᤖ ᤛᤣ᤺ᤴᤍᤥᤛᤢ. ‘ᤂᤧᤏᤧ᤹ ᤜᤠ᤺ᤳᤗᤧ ᤀᤠᤏᤡᤃᤧ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤂᤠᤛᤧᤴᤗᤥ᤺ᤶᤒᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹ᤒᤣ᥅
ACT 7:28 ᤂᤧᤏᤧ᤹ ᤔᤡ᤺ᤵᤔᤠ ᤔᤡᤛᤪᤡ᤺ᤴ ᤁᤧᤛᤧᤖᤢᤒᤠ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤁᤧᤛᤧᤳᤋᤠᤒᤠᤒᤡ᥅’
ACT 7:29 ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤔᤥᤛᤠᤖᤧ ᤀᤡᤱᤃᤠ᤹ ᤔᤡᤛᤪᤡ᤺ᤴ ᤛᤧᤖᤢᤱᤒᤠ ᤐᤠ᤺ᤴᤏᤡᤴᤏᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤁᤡ᤺ᤛᤧᤀᤠᤱ ᤔᤡᤛᤪᤗᤠᤶ ᤔᤡᤍᤩᤠᤏ ᤗᤠᤈᤣ᤹ᤀᤥ ᤂᤧᤳᤇᤡᤱ ᤐᤣᤀᤠᤱ ᤂᤧᤵᤔᤥᤀᤣ ᤘᤠ᤹ᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤂᤧᤵᤔᤥᤀᤣ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤏᤧᤵᤑᤢ ᤁᤢᤛ᤻ᤛᤠ᤺ᤀᤠᤱ ᤐᤥ᤺ᤰᤂᤧᤳᤇᤡᤖᤥ॥
ACT 7:30 ᤋᤱᤒᤣ ᤗᤡᤒᤥ᤺ᤱ (᥊᥆) ᤀᤣᤃᤠᤱ ᤛᤡᤏᤠᤀᤡ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱ ᤀᤣᤰᤛᤠᤍᤧᤴᤏᤥᤒᤠ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠᤀᤥ ᤔᤠᤱᤗᤠᤀᤡᤱᤒᤠᤴ ᤔᤥᤛᤠᤖᤥ ᤌᤠ᤺ᤴᤇᤡᤱᤗᤥ॥
ACT 7:31 ᤔᤥᤛᤠᤖᤧ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤌᤣ᤺ᤴᤏᤧᤒᤣ᥅ ᤑᤠ᤹ᤀᤠᤱ ᤁᤢᤒᤣᤛᤠᤱ ᤐᤣᤖᤥ॥ ᤁᤖ ᤂᤧᤸᤗᤧ ᤍᤠᤱᤒᤠᤸᤗᤧ ᤁᤢᤀᤡᤰᤗᤠ᤺ᤴ ᤂᤧᤵᤛᤢ–
ACT 7:32 ‘ᤀᤡᤱᤃᤠ᤹ ᤁᤧᤛᤢᤎᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤛᤣᤘᤠ ᤔᤧᤈᤥᤃᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤀᤠ॥’ ᤔᤥᤛᤠ᤺ᤴ ᤁᤢᤃᤡ᤺ᤔᤠᤸᤗᤧ ᤕᤰᤂᤧᤀᤠᤱ ᤂᤧᤴ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠ᤺ᤴ ᤀᤥᤔᤧᤵᤔᤠ ᤀᤠ᤺ᤴᤇᤡᤱ ᤔᤧᤈᤥᤃᤢᤴᤗᤥ॥
ACT 7:33 ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤔᤧᤳᤋᤢ. ‘ᤂᤧᤏᤧ᤹ ᤁᤧᤗᤠᤱᤛᤢ᤺ᤵᤜᤠ᤹ ᤑᤧᤴᤍᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤕᤧᤵᤐᤠ ᤍᤧᤴᤏᤡᤴ ᤛᤣᤛᤣ ᤆᤥ᤺ᤰ॥’
ACT 7:34 ᤀᤡᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤪᤀᤥ ᤏᤡᤱᤄᤢᤶᤔᤥ ᤔᤧᤘᤠ᤹ᤒᤠ ᤏᤡ᤺ᤛᤢᤱᤛᤡᤱᤅᤠᤱ ᤂᤢᤏᤡ᤹ ᤔᤣᤖᤡᤱᤅᤡᤴ ᤂᤧᤵᤛᤢᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤣ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤂᤢᤏᤡ᤹ ᤕᤥ᤺ᤰᤐᤠ ᤜᤡᤱᤔᤴᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤛᤧ ᤀᤡᤱᤃᤠ᤹ ᤕᤠᤱᤅᤠᤱ ᤘᤠ᤹ᤀᤠ॥ ᤀᤠᤸᤗ ᤕᤠᤱᤏᤠ ᤔᤡᤛᤪ ᤗᤠᤈᤣ᤹ᤀᤥ ᤂᤢᤏᤡ᤹ ᤁᤢᤓᤠ᤹ ᤐᤡᤛᤧ ᤏᤢ᤺ᤰᤏᤧ᤹ᤖᤥ॥
ACT 7:35 ᤒᤠ ᤁᤴ ᤔᤥᤛᤠ᤺ᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ‘ᤂᤧᤏᤧ᤹ ᤀᤠᤏᤡᤃᤧ ᤛᤶᤍᤠᤱ ᤜᤠ᤺ᤳᤗᤧ ᤜᤠᤱ ᤏᤢ ᤂᤠᤛᤧᤴᤗᤥ᤺ᤶᤒᤠ ᤁᤧᤛᤣᤃᤧᤀᤠᤱ ᤁᤧᤘᤠ᤹ᤒᤣ᥅’ ᤔᤧᤔᤧᤳᤋᤢᤖ ᤔᤧᤏᤠ᤹ᤖᤢᤀᤠᤱ ᤔᤧᤘᤕᤧ. ᤁᤖ ᤐᤥ᤺ᤰᤗᤠᤀᤥ ᤀᤥᤛᤣ᤺ᤴᤃᤧᤎᤠᤰᤛᤡᤱᤒᤠ ᤔᤠᤱᤗᤠᤀᤡᤱᤒᤠᤸᤗᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤣ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤋᤠᤱᤃᤧᤛᤧ᤺ᤵᤐᤠ ᤆᤥᤃᤢᤀᤠᤱ ᤐᤠᤱᤄᤢᤖᤥ॥
ACT 7:36 ᤔᤥᤛᤠᤖᤧᤀᤣ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡ. ᤜᤧᤰᤁᤩᤠᤱ ᤔᤡᤛᤪᤀᤥ. ᤜᤧ᤺ᤳᤋᤠᤱᤒᤠ ᤘᤠᤜᤱᤅᤥ ᤏᤢ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤀᤣ᤺ᤰᤛᤠᤍᤧᤴᤏᤥ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ॥
ACT 7:37 ᤁᤴ ᤔᤥᤛᤠᤖᤧ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤜᤧᤰᤋᤱᤒᤠᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤂᤡᤏᤡ᤹ ᤀᤠᤒᤠᤅᤣ ᤔᤏᤠᤗᤠᤶ ᤂᤡᤏᤡ᤹ᤀᤥ ᤐᤠᤱᤄᤢ᤹ᤖᤥ॥’
ACT 7:38 ᤀᤡᤛᤪᤠᤀᤡᤗᤡᤜᤠ᤹ ᤀᤣ᤺ᤰᤛᤠᤍᤧᤴᤏᤥ ᤔᤧᤈᤢᤵᤛᤧᤸᤗᤧ ᤔᤥᤛᤠ᤺ᤴ ᤂᤧᤱᤜᤠ᤹ᤏᤢ ᤘᤕᤧ. ᤛᤡᤏᤠᤀᤡ ᤁᤥ᤺ᤰᤔᤠᤀᤥ ᤔᤠᤱᤗᤠᤀᤡᤱᤒᤠᤴ ᤂᤢᤏᤧ᤹ᤏᤢ ᤐᤠᤖᤧ ᤜᤧᤰᤁᤩᤠᤱ ᤂᤧᤴ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤢᤏᤧ᤹ ᤂᤥ᤺ᤛᤢ. ᤜᤧᤰᤁᤩᤠᤱ ᤀᤠᤏᤡ᤹ ᤛᤢᤎᤧᤒᤠᤜᤠ᤹ ᤐᤡᤖᤢᤛᤡᤀᤠᤱ ᤀᤠᤏᤡ᤹ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥
ACT 7:39 ᤁᤖ ᤀᤠᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤒᤠ᤺ᤴᤏᤡᤴ ᤋᤧᤴᤍᤡᤱ ᤆᤥ᤺ᤰᤔᤠ ᤔᤧᤏᤠ᤹ᤖᤢᤀᤠᤱ ᤔᤥᤛᤠ᤺ᤴᤏᤠᤱ ᤔᤧᤏᤠ᤹ᤖᤢ. ᤜᤧᤰᤁᤩᤠᤱ ᤔᤡᤛᤪᤀᤥ ᤏᤢ᤺ᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥
ACT 7:40 ᤜᤧᤰᤁᤣ᤺ᤸᤗᤧ ᤔᤥᤛᤠᤖᤧ ᤁᤢᤶᤓᤢ᤹ ᤜᤠᤖᤢᤴᤏᤡᤴ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. ‘ᤀᤠᤏᤡᤃᤧ ᤗᤠᤃᤡ ᤕᤠᤵᤔᤡ ᤗᤠᤶ ᤁᤧᤗᤥ᤺ᤒᤠ ᤔᤠᤱᤜᤠ᤹ ᤆᤥᤃᤧ ᤀᤠᤒᤡᤖᤧ᤹॥ ᤔᤡᤛᤪᤗᤠᤶ ᤕᤠᤵᤔᤡ ᤁᤧᤗ᤺ᤵᤐᤠ ᤁᤴ ᤔᤥᤛᤠ᤺ᤴ ᤌᤣ ᤐᤥ᤺ᤰᤂᤧ ᤑᤠ᤹ᤀᤠᤱ ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴᤗᤥ॥’
ACT 7:41 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤡᤳᤛᤠ᤺ᤳ ᤏᤠᤘᤠᤀᤡᤳᤗᤠ ᤔᤧᤈᤥᤃᤢᤀᤠᤱ ᤛᤡᤍᤢᤱᤈᤓᤠ ᤔᤧᤈᤥᤃᤢᤖᤥ॥ ᤂᤢᤏᤡ᤹ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤔᤧᤛ᤺ᤳᤋᤧᤖ ᤏᤠᤘᤠᤀᤡᤳᤗᤠ᤺ᤴ ᤀᤡᤱᤎᤠ᤺ᤱ ᤐᤡᤛᤧ ᤛᤛᤠᤱᤛᤪᤥ᤺ᤳ ᤔᤧᤈᤥᤃᤢᤖᤥ॥
ACT 7:42 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤧᤴ ᤛᤣᤘᤠ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤗᤧᤖᤢᤛᤡᤖᤥ॥ ᤁᤴ ᤐᤠ᤺ᤴᤏᤡᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤛᤠᤵᤐᤴᤏᤥ ᤛᤠᤵᤋᤢᤀᤠᤱ ᤁᤧᤒᤵᤐᤠ ᤁᤢᤀᤡᤛᤡ᤺ᤰ ᤁᤧᤖᤧᤖᤥ. ‘ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤀᤣ᤺ᤰᤛᤠᤍᤧᤴᤏᤥ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤁᤧᤘᤕᤡᤸᤗᤧᤀᤠᤱ ᤀᤡᤱᤃᤠ᤹ ᤀᤠᤛᤣᤘᤠ ᤁᤧᤈᤥᤃᤢᤶᤔᤡᤸᤗᤧ ᤛᤡᤍᤢᤱᤈᤓᤠ ᤕᤠᤵᤔᤡ ᤁᤧᤶᤒᤡᤖᤡᤴᤗᤥ॥
ACT 7:43 ᤁᤖ ᤂᤡᤏᤡ᤹ᤃ ᤔᤥᤗᤥᤁ ᤛᤠᤶᤔᤠᤱᤅᤡᤸᤗᤧ ᤁᤢᤔᤠᤱᤎᤠ᤺ᤴ ᤏᤢ ᤂᤣ᤺ᤶᤛᤡᤰᤐᤧᤴ ᤖᤧᤑᤠᤏ ᤛᤠᤶᤔᤠᤱᤅᤡᤸᤗᤧᤴ ᤏᤠᤘᤠᤀᤡᤳᤗᤠ᤺ᤴ ᤁᤧᤒᤰᤂᤢᤶᤗᤥ॥ ᤂᤡᤏᤡ᤹ ᤀᤠᤒᤠᤅᤣ ᤁᤧᤈᤥᤃᤢᤶᤒᤠ ᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤁᤧᤔᤧᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤒᤧᤒᤡᤗᤥᤴᤏᤢ᤺ᤸᤗᤧᤀᤠᤱ ᤔᤠ᤺ᤱᤄᤠ ᤐᤠᤱᤏᤡᤱᤗᤥ॥’
ACT 7:44 ᤂᤧᤱᤜᤠ᤹ ᤕᤧ᤺ᤱᤄᤠᤍᤧᤴᤏᤥ ᤔᤧᤘᤕᤧᤸᤗᤧ ᤀᤠᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶ ᤔᤧᤃᤳᤋᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴ ᤀᤥᤛᤣ᤺ᤴᤎᤠᤰᤋᤢᤒᤠ ᤜᤧᤰᤁᤣᤀᤣ ᤂᤧᤴ ᤆᤥᤃᤧᤀᤠᤱ ᤘᤕᤧᤖᤥ॥
ACT 7:45 ᤕᤠᤱᤛᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤋᤃᤡᤗᤠᤶ ᤏᤠ᤺ᤳᤋᤢ ᤗ᤺ᤳᤋᤢᤛᤡᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤕᤜᤥᤛᤢ᤺ᤴᤏᤢ ᤔᤧᤒᤣ᤺ᤸᤗᤧ. ᤂᤧᤱᤜᤠ᤹ᤖᤧ ᤛᤠ᤺ᤱᤃᤠᤜᤡᤶᤔᤡᤴ ᤂᤢᤏᤡ᤹ᤏᤢᤀᤣ ᤔᤧᤃᤢᤕᤢᤀᤠᤱ ᤔᤧᤍᤣ᤹ᤖᤢᤖᤥ॥ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤕᤧᤶ ᤌᤠᤖᤡᤰ ᤂᤧᤴ ᤛᤠ᤺ᤱᤃᤠᤜᤡᤶᤔᤡᤴ ᤏᤧᤛ᤻ᤛᤧᤖᤥ॥
ACT 7:46 ᤍᤠᤀᤢᤍ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤛᤢᤀᤠᤱ ᤕᤠᤁᤢᤒᤖᤧ ᤛᤣᤘᤠ ᤆᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤜᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ.
ACT 7:47 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤱᤃ ᤛᤥᤗᤥᤔᤏ ᤜᤠᤱᤅᤡᤸᤗᤧᤖᤰ ᤆᤥᤃᤢᤖᤥ॥
ACT 7:48 ᤜᤧᤰᤁᤣᤛᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤏᤠᤜᤠ᤹ᤖᤧ ᤆᤥ᤺ᤰᤔᤏᤠᤒᤠ ᤜᤡᤶᤔᤥ ᤔᤧᤘᤠ᤹ᤏᤧᤴ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤛᤠᤵᤐᤴᤏᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ–
ACT 7:49 ‘ᤍᤠᤱᤒᤠᤸᤗᤧ ᤐᤠ᤺ᤳᤋᤢ. ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤀᤡᤱᤃᤠ᤹ ᤀᤠᤜᤠᤱᤕᤢᤰᤏᤠᤖᤥ॥ ᤂᤧᤵᤔᤥᤗᤠᤶᤔᤣ ᤁᤠᤰ ᤛᤶᤍᤠᤱ ᤜᤠᤱ ᤆᤥ᤺ᤰᤁᤠᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤡᤱᤃᤠ᤹ ᤀᤠᤗᤠᤱ ᤋᤥ᤹ᤓᤣ᤺ᤳᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤰᤋᤱᤒᤠ ᤁᤧᤄᤧᤶᤒᤠ ᤀᤠᤘᤠ᤹ᤔᤠ ᤜᤡᤶ ᤁᤧᤈᤥᤃᤢᤶᤒᤠᤒᤣ᥅
ACT 7:50 ᤁᤠᤰ ᤁᤱᤜᤠ᤹ᤃ ᤀᤡᤱᤃᤠ᤹ᤀᤣ ᤆᤥᤃᤢᤱᤛᤡᤱᤒᤠ ᤔᤧ᤺ᤶᤒᤡ᥅’
ACT 7:51 ᤂᤡᤏᤡ᤹ᤃ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤁᤧᤎᤢᤱᤒᤠ ᤌᤡᤱᤃᤠᤏᤡ ᤁᤧᤈᤥᤃᤡᤖᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤶᤔᤠ ᤂᤡᤏᤡ᤹ ᤏᤧᤰᤂᤥ᤹ ᤌᤢᤱᤗᤥ॥ ᤂᤡᤏᤡ᤹ ᤛᤢᤎᤧᤒᤠᤜᤠ᤹ ᤜᤧᤰᤁᤣᤀᤣ ᤁᤧᤗ᤹ᤖᤡᤀᤠᤱ ᤛᤍᤠᤍᤡᤱ ᤛᤣᤛᤣᤔᤠᤱᤅᤡᤴ ᤁᤧᤀᤳᤋᤢᤶᤗᤥ॥
ACT 7:52 ᤂᤡᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤁᤠᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤛᤠᤶᤕᤥᤏᤡᤒᤠ ᤜᤠᤱᤅᤡᤸᤗᤧ ᤁᤢᤍᤠᤔᤠᤸᤗᤧᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤔᤧᤛᤧᤖᤢᤛᤡᤖᤥ॥ ᤀᤠᤸᤗ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤳᤋᤢᤶᤔᤠᤱ ᤁᤧᤛᤧᤖᤢᤶᤗᤥ॥
ACT 7:53 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤅᤡᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤒᤡᤖᤡ᤹. ᤁᤖᤛᤠᤱ ᤂᤡᤏᤡ᤹ ᤁᤧᤱᤄᤧᤵᤛᤢᤶᤔᤡᤴᤗᤥ॥”
ACT 7:54 ᤁᤴ ᤐᤠ᤺ᤴᤏᤡᤴ ᤆᤢᤶᤗᤢᤱᤒᤠ ᤐᤠᤛᤡᤱ ᤐᤠᤍᤠᤱᤗᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛ᤻ᤋᤡᤑᤏᤛᤧᤴᤏᤢ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤂᤢᤏᤡ᤹ ᤜᤠᤒᤥ᤹ ᤔᤧᤕᤧ᤺ᤰᤂᤢᤖᤥ॥
ACT 7:55 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤒᤠ ᤛ᤻ᤋᤡᤑᤏᤛᤧᤴ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤏᤢ ᤁᤢᤈᤢᤵᤛᤠᤱ ᤗᤧᤵᤛᤠᤱ ᤕᤧᤛᤢ᤺ᤴ ᤕᤧᤒᤧᤒᤠ ᤏᤡ᤺ᤛᤢᤖᤥ॥
ACT 7:56 ᤜᤧᤰᤁᤩᤠᤱ ᤛ᤻ᤋᤡᤑᤏᤛᤧᤴ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤖᤧᤒᤠ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤔᤧᤴᤇᤠᤶᤛᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤧᤵᤐᤠ ᤏᤡ᤺ᤛᤢᤱᤗᤥ᥄”
ACT 7:57 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤓᤡ᤺ᤰᤋᤧᤖ ᤂᤢᤏᤡ᤹ ᤏᤧᤰᤂᤥ᤹ᤜᤠ᤹ ᤜᤢᤰᤁᤡᤸᤗᤧ ᤔᤧᤜᤢ᤹. ᤜᤧᤰᤁᤩᤠᤱ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤌᤡᤰᤗᤧᤱᤔᤠᤸᤗᤧ ᤂᤢᤏᤧ᤹ ᤑᤢᤳᤗᤢᤶ ᤔᤧᤓᤳᤋᤢ.
ACT 7:58 ᤜᤧᤰᤁᤩᤠᤱ ᤕᤧᤰᤕᤰ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ॥ ᤂᤧᤴ ᤐᤠ᤺ᤴᤏᤡᤸᤗᤧᤴ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤛᤢᤱᤄᤣ᤺ᤰᤘᤠᤜᤠ᤹ ᤛᤠᤘᤗ ᤔᤧᤵᤔᤏᤠᤒᤠ ᤌᤠᤱᤒᤧᤴᤏᤡᤴ ᤁᤥᤔᤧᤒᤠᤱᤄᤢᤀᤠᤱ ᤛ᤻ᤋᤡᤑᤏᤛᤧᤴ ᤗᤢᤱᤅᤡᤸᤗᤧ ᤐ᤺ᤵᤔᤠ ᤔᤧᤜᤣ᤺ᤰᤋᤢᤖᤥ॥
ACT 7:59 ᤗᤢᤱᤅᤡᤸᤗᤧ ᤔᤧᤒ᤺ᤳᤋᤢᤖ ᤔᤧᤒᤳᤇᤧᤸᤗᤧ ᤛ᤻ᤋᤡᤑᤏᤛᤖᤧ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢ. “ᤍᤠᤱᤒᤠ ᤕᤧᤛᤢᤀᤣ. ᤀᤡᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤋᤠ᤺ᤰᤋᤧ᤹ᤀᤥ॥”
ACT 7:60 ᤜᤧᤰᤁᤩᤠᤱ ᤂᤢᤏᤧ᤹ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤍᤠᤱᤒᤠᤀᤣ. ᤁᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤖᤧᤴ ᤂᤢᤶᤍᤡᤱ ᤔᤧᤒᤡᤖᤧᤛᤧᤴᤏᤧ᤹ᤀᤥ॥” ᤀᤰᤂᤣ ᤐᤠ᤺ᤳᤋᤢᤖ ᤂᤧᤴ ᤛᤩᤧᤖᤥ॥
ACT 8:1 ᤂᤧᤵᤔᤥ ᤛᤠᤘᤗᤖᤧᤀᤠᤱ ᤛ᤻ᤋᤡᤑᤏᤛᤖᤧ ᤁᤢᤛᤡ᤺ᤔᤧᤴᤏᤥ ᤋᤧᤴᤍᤡᤱ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤜᤧᤰᤁᤩᤠᤱ ᤔᤡᤱᤛᤥᤍᤠᤱᤒᤠ ᤛᤠᤶᤕᤥᤛᤠᤒᤠ ᤔᤏᤠᤜᤠ᤹ᤖᤧ ᤛ᤻ᤋᤡᤑᤏᤛᤧᤴ ᤔᤧᤜᤢᤶᤛᤢ ᤔᤧᤛᤢᤖᤢᤀᤠᤱ ᤛᤠ᤹ᤖᤡᤰ ᤔᤣᤖᤡᤱ ᤔᤧᤎᤰᤋᤧᤖᤥ॥ ᤂᤧᤴ ᤕᤧᤴᤏᤠᤱᤎᤥ ᤕᤖᤢᤛᤗᤧᤶᤔᤥᤒᤠ ᤛᤣᤛᤣᤜᤢᤵᤗᤰᤁᤥ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤵᤔᤠ ᤔᤧᤜᤣ᤺ᤰᤋᤢᤛᤡᤖᤥ॥ ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ ᤘᤣ᤹ ᤁᤠᤰ ᤏᤛᤠᤏᤡᤒᤠᤜᤠ᤹ ᤕᤜᤢᤍᤡᤕᤠ ᤏᤢ ᤛᤠᤔᤖᤡᤕᤠ ᤋᤧᤱᤃᤵ ᤗᤧᤵᤛᤠᤱ ᤔᤧᤛᤧ᤺ᤖᤧ ᤔᤧᤒᤣᤖᤥ॥
ACT 8:3 ᤁᤖ ᤛᤠᤘᤗᤖᤧ ᤛᤣᤛᤣᤜᤢᤵᤗᤰᤁᤡᤴ ᤔᤧᤶᤓᤤ ᤆᤥ᤺ᤰᤔᤠ ᤜᤣ᤺ᤰᤋᤢ॥ ᤂᤢᤏᤧ᤹ ᤜᤡᤶ ᤜᤡᤶ ᤐᤣᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ ᤋᤧᤶᤛᤢᤛᤡᤀᤠᤱ ᤀᤢ᤺ᤰᤂᤢᤛᤡᤖ ᤐᤢᤱᤗᤠᤜᤡᤶᤔᤥ ᤌᤧᤰᤋᤢᤛᤡᤖᤥ॥
ACT 8:4 ᤕᤖᤢᤛᤗᤧᤶᤗᤠᤶ ᤁᤧᤛᤧᤒᤠᤖ ᤁᤧᤒᤣ᤺ᤰᤐᤠᤜᤠ᤹ᤖᤧ ᤀᤠᤳᤋᤡ ᤔᤧᤒᤣᤛᤠᤱ ᤛᤢᤏᤠᤀᤡᤱ ᤔᤧᤛᤧ᤺ᤛᤢᤖᤥ॥
ACT 8:5 ᤑᤡᤗᤡᤵᤐᤧᤴᤏᤠᤱ ᤛᤠᤔᤖᤡᤕᤠᤛ᤻ᤔᤠ ᤕᤧᤰᤕᤰᤁᤥ ᤐᤣᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤀᤡᤱᤓᤥ᤺ᤛᤢᤖᤥ॥
ACT 8:6 ᤑᤡᤗᤡᤐᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡ᤺ᤛᤢᤸᤗᤧ ᤔᤏᤠᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤁᤢᤒᤠ᤺ᤴᤏᤥ ᤏᤡᤱᤘᤠ᤹ ᤔᤧᤒᤡᤖᤢᤖᤥ॥
ACT 8:7 ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤀᤥᤏᤢ ᤑᤧᤴᤛᤠᤶᤜᤠ᤹ ᤔᤧᤓᤡ᤺ᤰᤋᤧᤖ ᤔᤧᤗ᤺ᤴᤍᤧ ᤔᤧᤒᤣ. ᤜᤧᤰᤁᤩᤠᤱ ᤕᤖᤡᤰ ᤗᤱᤗᤧ᤺ᤱᤘᤠᤜᤠ᤹ ᤏᤢ ᤗᤠᤱᤛᤰᤐᤠᤜᤠ᤹ᤀᤠᤱ ᤔᤧᤏᤢ᤺ᤖᤧᤖᤥ॥
ACT 8:8 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤕᤧᤰᤕᤰᤁᤥ ᤐᤕᤶ ᤛ᤺ᤵᤔᤠ ᤏᤢ ᤀᤥᤔᤢᤗ᤹ᤔᤠᤴ ᤋᤩᤧᤖᤥ॥
ACT 8:9 ᤀᤠᤸᤗ ᤋᤃᤡᤀᤠᤱᤎᤥ ᤂᤧᤴ ᤕᤧᤰᤕᤰᤁᤥ ᤛᤡᤔᤥᤏ ᤔᤧᤵᤔᤏᤠᤒᤠ ᤁᤡᤳᤆᤠᤰᤌᤡᤰ ᤘᤕᤧ॥ ᤂᤧᤸᤗᤧ ᤁᤡᤳᤆᤠᤰ ᤕᤠ᤺ᤶᤒᤰ ᤆᤥᤃᤢᤀᤠᤱ ᤛᤠᤔᤖᤡᤕᤠᤛ᤻ᤔᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤠ᤺ᤛᤢ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤂᤧᤸᤗᤧᤃ ᤀᤠᤒᤠᤅᤣ ᤀᤡᤱᤃᤠ᤹ᤀᤣ ᤐᤕᤶ ᤕᤶᤒᤠᤀᤠ ᤑᤠ᤹ᤀᤠᤱ ᤀᤠᤱᤍᤡᤱ ᤗ᤹ᤖᤧᤀᤠᤱ ᤘᤕᤧᤖᤥ॥
ACT 8:10 ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤁᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤁᤢᤔᤢᤰᤛᤠᤶ ᤁᤳᤋᤢᤖᤥ ᤗ᤹ᤖᤡᤰ ᤂᤧᤴ ᤔᤧᤔᤧᤳᤋᤢᤀᤠᤱ ᤔᤧᤘᤕᤧᤖᤥ॥
ACT 8:11 ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤕᤖᤡᤰ ᤋᤱᤒᤣᤀᤠᤱᤎᤥ ᤂᤢᤏᤧ᤹ ᤁᤢᤃᤡᤳᤆᤠᤰ ᤔᤢᤴᤎᤢᤶᤔᤡᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤠ᤺ᤛᤢ ᤐᤡᤖᤢᤛᤡᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤔᤧᤒᤳᤇᤧᤖᤥ॥
ACT 8:12 ᤁᤖ ᤂᤧᤴ ᤔᤏᤠᤜᤠ᤹ᤖᤧ ᤑᤡᤗᤡᤐᤖᤧ ᤀᤡᤱᤓᤥ᤺ᤛᤢᤒᤠ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤏᤢ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤕᤧᤶᤒᤡᤳᤇᤠ᤹ ᤔᤧᤴᤇᤢᤔᤠ᤹ ᤁᤠᤰ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥
ACT 8:13 ᤛᤡᤔᤥᤏᤖᤧᤀᤠᤱ ᤀᤠᤒᤠᤅᤣ ᤏᤛᤠ᤺ᤴ ᤆᤥᤃᤢᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤑᤡᤗᤡᤐᤏᤢ ᤘᤕᤧᤃᤳᤋᤧᤸᤗᤧ ᤑᤡᤗᤡᤐᤖᤧ ᤆᤥᤃᤢᤒᤠ ᤕᤖᤡᤰ ᤐᤖᤡᤰᤗᤧᤴ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤴ ᤏᤡ᤺ᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤕᤧᤖᤥ॥
ACT 8:14 ᤜᤧᤰᤁᤩᤠᤱ ᤕᤖᤢᤛᤗᤧᤶᤔᤥᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤛᤠᤔᤖᤡᤕᤠᤛ᤻ᤔᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤋᤧᤴᤍᤡᤱ ᤔᤧᤈᤥᤃᤢ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤐᤋᤪᤢᤛ ᤏᤢ ᤕᤢᤜᤢᤴᤏᤠ᤺ᤴ ᤂᤧᤵᤔᤥ ᤔᤧᤒᤠᤱᤄᤢᤛᤡᤖᤥ॥
ACT 8:15 ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤠᤔᤖᤡᤕᤠᤀᤥ ᤁᤧᤖᤧᤳᤇᤡᤀᤠᤱ ᤏᤛᤠᤏᤡᤒᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤏᤡ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢ ᤐᤡᤖᤧᤳᤇᤢᤖᤥ.
ACT 8:16 ᤌᤣᤀᤠᤱᤓᤧᤸᤗᤧ ᤀᤠᤸᤗᤥ ᤌᤠᤖᤡᤰ ᤏᤛᤠᤏᤡᤒᤠᤜᤠ᤹ᤖᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴ ᤔᤧᤱᤄᤥᤀᤣ ᤔᤧᤘᤕᤧ. ᤁᤖ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥᤖᤰ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥
ACT 8:17 ᤜᤧᤰᤁᤩᤠᤱ ᤐᤋᤪᤢᤛ ᤏᤢ ᤕᤢᤜᤢᤴᤏᤠᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤛᤠᤔᤖᤡᤕᤠᤛ᤻ᤔᤠ ᤏᤛᤠᤏᤡᤒᤠᤜᤠ᤹ ᤛᤶᤍᤠᤱ ᤏᤧᤛ᤻ᤛᤢ ᤐᤡᤖᤧᤳᤇᤢᤀᤠᤱ ᤂᤧᤱᤜᤠ᤹ᤖᤧ ᤛᤣᤛᤣᤔᤠᤱ ᤔᤧᤄᤥ᤺ᤛᤢᤖᤥ॥
ACT 8:18 ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤡᤴ ᤏᤧᤛ᤻ᤛᤧᤳᤇᤢᤸᤗᤧ ᤔᤏᤠᤜᤠ᤹ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤌᤢᤰᤋᤢᤛᤡᤒᤠ ᤛᤡᤔᤥᤏᤖᤧᤀᤠᤱ ᤏᤡ᤺ᤛᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤱ ᤐᤡᤖᤢᤛᤡᤖ
ACT 8:19 ᤀᤰᤂᤣ ᤔᤧᤳᤋᤢᤛᤡ. “ᤔᤏᤠ ᤛᤶᤍᤠᤱ ᤀᤡᤱᤃᤠ᤹ᤀᤠᤱ ᤀᤠᤜᤢᤰ ᤏᤧᤛ᤻ᤛᤢᤱ ᤐᤡᤖᤢᤱᤛᤡᤱᤅᤡᤸᤗᤧ ᤜᤠᤖᤠ᤹ ᤛᤣᤛᤣᤔᤠᤱᤅᤡᤴ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤁᤴ ᤔᤢᤰᤛᤠᤶᤔᤡᤴ ᤕᤠᤵᤔᤡ ᤀᤠᤒᤡᤖᤧᤳᤇᤧ᤹ᤀᤥ॥”
ACT 8:20 ᤁᤖ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤁᤧᤕᤠᤱᤅᤡᤴ ᤂᤧᤏᤧ᤹ᤏᤢᤀᤣ ᤔᤧᤰᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤷᤎᤠ᤺ᤶᤔᤡᤴ ᤕᤠᤱᤅᤡᤸᤗᤧ ᤀᤡᤱᤔᤠ ᤁᤧᤀᤡ᤺ᤳᤋᤢ᤹ᤖᤥ॥
ACT 8:21 ᤂᤧᤏᤧ᤹ᤃ ᤁᤴ ᤛᤣᤘᤠᤀᤥ ᤗᤰ ᤂᤥ᤺ᤔᤠ ᤏᤢ ᤁᤵᤔᤠ ᤌᤣᤀᤠᤱ ᤁᤧᤴᤇᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤡᤰᤗᤢᤱᤔᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤏᤢ᤺ᤒᤠ ᤜᤥ᤺ᤵᤗᤥ॥
ACT 8:22 ᤜᤧᤰᤁᤣ᤺ᤸᤗᤧ ᤁᤧᤓᤧᤴ ᤏᤡᤱᤘᤠ᤹ᤀᤥᤗᤠᤶ ᤜᤡᤴᤍᤧ᤹ᤀᤠᤱ ᤍᤠᤱᤒᤠᤴᤏᤢ ᤋᤢᤘᤠ ᤆᤥᤃᤧ᤹ᤀᤥ॥ ᤜᤧᤰᤋᤱᤒᤠ ᤑᤧᤴ ᤏᤡᤱᤘᤠ᤹ᤀᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤛᤢᤒᤡ᥄
ACT 8:23 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤏᤠᤜᤧᤶᤔᤠᤸᤗᤧ ᤁᤢᤎᤡᤶ ᤏᤢ ᤗᤠᤕᤥ ᤀᤡᤛᤣ᤺ᤱᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤧᤕᤢᤰᤋᤧᤒᤠᤴ ᤀᤡᤱᤃᤠ᤹ ᤏᤡ᤺ᤏᤧᤖᤥ”
ACT 8:24 ᤜᤧᤰᤁᤩᤠᤱ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢᤛᤡ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤀᤠᤳᤋᤡᤴ ᤐᤠ᤺ᤴᤜᤠ᤹ᤀᤠᤱ ᤀᤡᤱᤃᤠ᤹ ᤀᤠᤛᤶᤍᤠᤱ ᤔᤧᤈᤢᤰᤏᤧᤴᤗ ᤑᤠ᤹ᤀᤠᤱ ᤍᤠᤱᤒᤠᤴᤏᤢ ᤀᤡᤱᤃᤠ᤹ ᤀᤠᤗᤠᤃᤡ ᤋᤢᤘᤠ ᤆᤥᤃᤧ ᤀᤠᤒᤡᤖᤧᤳᤇᤧ᤹ᤀᤥ॥”
ACT 8:25 ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤆᤧᤰᤂᤧᤳᤇᤢᤖ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰ ᤀᤡᤱᤓᤴ ᤆᤥᤃᤧᤳᤇᤢᤀᤠᤱ ᤕᤢᤜᤢᤴᤏᤠ᤺ᤴ ᤏᤢ ᤐᤋᤪᤢᤛᤧᤴ ᤕᤖᤢᤛᤗᤧᤔ ᤗᤧᤵᤔᤠᤱ ᤏᤢ᤺ᤰᤂᤧᤳᤇᤡᤸᤗᤧ ᤗᤠᤶᤔᤥᤒᤠ ᤕᤖᤡᤰ ᤛᤠᤔᤖᤡᤕᤠᤛ᤻ᤔᤠ ᤐᤠᤱᤓᤣ᤹ᤜᤠ᤹ᤀᤥ ᤛᤢᤏᤠᤀᤡᤱ ᤛᤧ᤺ᤛᤧᤳᤇᤢᤖᤥ॥
ACT 8:26 ᤌᤡᤰ ᤕᤧᤴ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤸᤗᤧ ᤑᤡᤗᤡᤵᤐᤧᤴ ᤀᤰᤂᤣ ᤔᤧᤳᤋᤢ. “ᤕᤖᤢᤛᤗᤧᤔᤗᤠᤶ ᤕᤥ ᤗᤠᤱᤃᤧᤴ ᤗᤧᤵᤔᤠᤱᤒᤠ ᤃᤠᤈᤠ ᤁᤧᤒᤣ᤺ᤰᤐᤠ ᤕᤧ᤺ᤱᤄᤠᤍᤧᤴᤒᤠ ᤔᤠᤖᤠᤶᤔᤥ ᤐᤣᤃᤧ᤹॥”
ACT 8:27 ᤜᤧᤰᤁᤣ᤺ᤸᤗᤧ ᤑᤡᤗᤡᤵᤐᤧᤴᤏᤠᤱ ᤂᤧᤵᤔᤥ ᤌᤠᤛᤡᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤌᤡᤕᤥᤐᤡᤕᤠᤛ᤻ᤔᤠ ᤛᤧᤓᤰᤐᤠ ᤕᤶᤒᤠ ᤛᤢᤜᤠᤱᤕᤢᤰᤐᤧᤴ ᤋᤢᤔᤢ॥ ᤂᤧᤴ ᤀᤡᤌᤡᤕᤥᤐᤡᤕᤠᤛ᤻ᤔᤠ ᤜᤠᤱᤔᤠ ᤁᤴᤍᤠᤁᤡᤖᤧ ᤁᤢᤕᤠᤱᤛᤠᤁᤢᤴᤎᤣ ᤀᤥᤃᤧᤔᤧᤵᤐᤠ ᤛᤢᤜᤠᤱᤕᤢᤰᤐᤠ ᤘᤕᤧᤖᤥ॥ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤛᤣᤘᤠ ᤆᤥ᤺ᤰᤛᤧ ᤐᤣᤀᤠᤱ ᤘᤕᤧᤖᤥ॥
ACT 8:28 ᤜᤧᤰᤁᤩᤠᤱ ᤀᤴᤗᤠᤀᤥ ᤕᤢᤱᤛᤡᤱᤅᤠᤱ ᤁᤢᤜᤡᤶᤔᤥ ᤏᤢ᤺ᤰᤂᤧᤖ ᤐᤳᤇᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤵᤐᤴᤏᤡᤴ ᤏᤡ᤺ᤖᤢᤖ ᤕᤢᤅᤧ॥
ACT 8:29 ᤛᤣᤛᤣᤔᤠᤱᤅᤡᤸᤗᤧ ᤑᤡᤗᤡᤵᤐᤧᤴ ᤔᤧᤳᤋᤢ. “ᤀᤴᤗᤠ᤺ᤸᤗᤧ ᤁᤢᤒᤣᤛᤠᤱ ᤐᤣᤃᤧ᤹॥”
ACT 8:30 ᤜᤧᤰᤁᤩᤠᤱ ᤑᤡᤗᤡᤵᤐᤧᤴᤏᤠᤱ ᤗᤥ᤺ᤰᤋᤧᤖ ᤀᤴᤗᤠ᤺ᤸᤗᤧ ᤁᤢᤒᤣᤛᤠᤱ ᤐᤣ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠ ᤛᤠᤵᤐᤴᤏᤡᤴ ᤏᤡ᤺ᤖᤢᤖ ᤕᤢᤅᤧᤒᤠ ᤂᤧᤵᤛᤢ॥ ᤜᤧᤰᤁᤩᤠᤱ ᤑᤡᤗᤡᤐᤖᤧ ᤛᤣ᤺ᤴᤍᤥᤛᤢ. “ᤁᤴ ᤁᤧᤏᤡ᤺ᤖᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤒᤡ᥅”
ACT 8:31 ᤂᤧᤴ ᤛᤧᤓᤰᤐᤧᤸᤗᤧ ᤏᤥᤃᤵ ᤐᤡᤖᤢ. “ᤐᤥᤎᤰ ᤕᤠᤵᤔᤡ ᤁᤧᤈᤥ᤺ᤰ ᤁᤧᤒᤡᤒᤠ ᤔᤏᤠ ᤔᤧ᤺ᤴᤏᤣᤃ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤱᤒᤣ᥅” ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤑᤡᤗᤡᤵᤐᤧᤴ ᤀᤢ᤺ᤳᤋᤢᤀᤠᤱ ᤛᤥᤖᤡᤰ ᤂᤢᤏᤧ᤹ᤏᤢᤀᤣ ᤕᤢᤰᤂᤢ॥
ACT 8:32 ᤂᤧᤸᤗᤧ ᤏᤡ᤺ᤖᤢᤒᤠ ᤛᤠᤶᤕᤥᤛᤠᤵᤗᤠ ᤗᤰᤁᤡᤴ ᤁᤴ ᤘᤕᤧᤖᤥ– “ᤂᤢᤏᤧ᤹ᤃ ᤛᤧᤳᤇᤧ ᤋᤣ᤹ᤔᤏᤠᤒᤠ ᤔᤧᤸᤗᤢᤰ ᤜᤧᤰᤁᤣ ᤆᤥᤃᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤢᤖᤡᤰ ᤁᤧᤏ᤺ᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤠᤱ ᤛᤫᤠ᤺ᤳ ᤁᤧᤕᤧᤵᤐᤠ ᤔᤧᤸᤗᤢᤰᤛᤠ᤺ ᤜᤧᤰᤁᤣᤀᤣ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ॥
ACT 8:33 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤠ ᤔᤧᤎᤠ᤺ᤛᤢ ᤔᤧᤒᤡᤖᤢᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤖᤥ॥ ᤁᤢᤔᤢ᤹ᤀᤡᤍᤠᤱᤛᤠᤖᤧ ᤁᤢᤕᤠ᤺ᤶᤒᤣᤀᤥ ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤏᤧᤳᤋᤡᤃᤧᤴ ᤁᤢᤜᤡᤱᤔᤴᤏᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤣ᤹ᤖᤧᤖᤥ॥”
ACT 8:34 ᤜᤧᤰᤁᤩᤠᤱ ᤂᤧᤴ ᤛᤧᤓᤰᤐᤧᤸᤗᤧ ᤑᤡᤗᤡᤵᤐᤧᤴ ᤛᤣ᤺ᤴᤍᤥᤛᤢ. “ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤜᤠ᤺ᤳᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤣ᥅ ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤡ. ᤘᤣ᤹ᤛ᤻ᤔᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤒᤡ᥅ ᤀᤡᤱᤃᤠ᤹ ᤐᤥᤎᤰ ᤆᤥᤃᤠᤱ ᤐᤡᤖᤠᤱᤅᤧ᤹ᤀᤥ॥”
ACT 8:35 ᤜᤧᤰᤁᤣ᤺ᤸᤗᤧ ᤑᤡᤗᤡᤐᤖᤧ ᤛᤠᤶᤕᤥᤛᤠᤵᤗᤠᤒᤠ ᤒᤠ ᤁᤴ ᤗᤰᤁᤥᤗᤠᤶ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱᤅᤡᤴ ᤐᤥᤎᤰ ᤆᤥᤃᤢᤸᤗᤧ ᤂᤧᤴ ᤛᤧᤓᤰᤐᤧᤸᤗᤧ ᤏᤛᤠ᤺ᤴ ᤆᤥᤃᤢᤖᤥ॥
ACT 8:36 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤴ ᤗᤠᤶᤔᤥ ᤗᤠᤶᤍᤡ᤺ᤰ ᤆᤥᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤆᤫᤠ᤺ᤳ ᤁᤧᤏᤧᤒᤠ ᤋᤧᤴᤏᤥ ᤁᤧᤖᤧᤳᤇᤡ॥ ᤜᤧᤰᤁᤩᤠᤱ ᤂᤧᤴ ᤛᤧᤓᤰᤐᤧᤸᤗᤧ ᤛᤣ᤺ᤴᤍᤥᤛᤢ. “ᤀᤥᤔᤧᤳᤋᤧ᤹. ᤁᤵᤔᤥ ᤆᤫᤠ᤺ᤳ ᤏᤧᤖᤥ॥ ᤀᤡᤱᤃᤠ᤹ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤔᤧᤛᤢᤰᤁᤠᤴᤒᤡ᥅” ((ᤑᤡᤗᤡᤐᤖᤧ ᤔᤧᤳᤋᤢ. “ᤂᤧᤏᤧ᤹ ᤁᤠᤰ ᤁᤧᤏᤡᤱᤘᤠ᤹ᤖᤧ ᤏᤛᤠ᤺ᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤧᤛᤢᤰᤋᤢᤖᤥ” ᤂᤧᤴ ᤛᤧᤓᤰᤐᤧᤸᤗᤧ ᤏᤥᤃᤵ ᤐᤡᤖᤢ. “ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ᤑᤢᤛᤠ᤺ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤢᤱᤗᤥ॥”))
ACT 8:38 ᤜᤧᤰᤁᤩᤠᤱ ᤂᤧᤴ ᤀᤴᤗᤠ᤺ᤴ ᤕᤧᤵᤔᤠ ᤐᤠᤱᤄᤢᤀᤠᤱ ᤂᤢᤴᤇᤡ᤹ ᤕᤥ ᤆᤫᤠ᤺ᤳᤋᤥ ᤐᤣᤛᤡᤀᤠᤱ ᤑᤡᤗᤡᤐᤖᤧ ᤂᤧᤴ ᤒᤵᤋᤡᤛ᤻ᤔᤠ ᤐᤡᤖᤢ॥
ACT 8:39 ᤂᤧᤱᤜᤠ᤹ ᤕᤥ ᤆᤫᤠ᤺ᤳᤋᤥᤗᤠᤶ ᤗ᤺ᤴᤍᤧ ᤌᤠᤅᤧᤳᤇᤡᤖ ᤐᤳᤇᤧᤳᤇᤡᤸᤗᤧ ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤂᤡᤔᤥ ᤑᤡᤗᤡᤵᤐᤧᤴ ᤐᤰᤂᤢ ᤋᤣ᤹ᤖᤢᤀᤠᤱ ᤀᤠᤈᤥᤳᤋᤥᤛ ᤔᤧᤵᤔᤏᤠᤒᤠ ᤋᤧᤴᤏᤥ ᤁᤧᤳᤋᤢᤖᤥ॥ ᤂᤧᤵᤔᤥ ᤂᤢᤏᤧ᤹ ᤛᤡᤈᤖᤡᤕᤠ ᤔᤧᤱᤃᤧᤳᤋᤣ ᤌᤠᤖᤡᤰ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤖ ᤐᤣᤖᤥ॥ ᤛᤧᤓᤰᤐᤧᤸᤗᤧ ᤂᤢᤏᤧ᤹ ᤕᤠᤶᤔᤥ ᤔᤧᤏᤡ᤺ᤛᤢᤴ. ᤁᤖ ᤂᤧᤴ ᤛ᤺ᤳᤋᤧᤖ ᤁᤢᤗᤠᤶᤍᤡ᤺ᤰᤁᤥ ᤐᤣᤖᤥ॥
ACT 9:1 ᤁᤖ ᤍᤠᤱᤒᤠᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤧᤖᤧᤰ ᤛᤧᤵᤔᤠᤛᤡ ᤑᤠ᤹ᤀᤠᤱ ᤛᤠᤘᤗᤖᤧ ᤛᤠ᤹ᤖᤡᤰ ᤕᤱᤔᤠ ᤛᤧᤖᤢᤛᤡᤖᤥ॥ ᤂᤢᤏᤧ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤥ ᤐᤣᤀᤠᤱ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤍᤠᤱᤒᤠᤸᤗᤧ ᤁᤢᤗᤠᤶ ᤁᤧᤍᤡᤶᤒᤠ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ᤜᤠ᤹ ᤐᤢᤱᤗᤠᤎᤠᤒᤠ ᤆᤥ᤺ᤰᤔᤠᤛᤡᤀᤠᤱ ᤕᤖᤢᤛᤗᤧᤶᤔᤥ ᤋᤠ᤺ᤵᤔᤠᤛᤡ ᤜᤧᤰᤁᤩᤠᤱ ᤂᤢᤶᤍᤡᤱ ᤐᤡᤔᤠᤛᤡ ᤛᤢᤰᤋᤢᤱᤗ ᤑᤠ᤹ᤀᤠᤱ ᤍᤔᤛ᤻ᤁᤛᤀᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤗᤠᤃᤡ ᤛᤰᤀᤡᤱᤄᤱ ᤛᤠᤵᤐᤠᤱᤄᤢᤛᤡᤖᤥ॥
ACT 9:3 ᤜᤧᤰᤁᤩᤠᤱ ᤂᤢᤏᤧ᤹ ᤍᤔᤛ᤻ᤁᤛᤖᤧ ᤁᤢᤒᤣᤛᤠᤱ ᤁᤧᤖᤧᤖ ᤐᤳᤇᤧᤸᤗᤧ ᤜᤰᤆᤄᤳ ᤋᤠᤱᤛᤠᤰᤐᤥᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤂᤢᤏᤧ᤹ ᤁᤢᤄᤡᤖᤡ ᤗᤧᤰᤋᤧᤖᤥ॥
ACT 9:4 ᤜᤧᤰᤁᤩᤠᤱ ᤂᤢᤏᤧ᤹ ᤂᤠᤶᤔᤥ ᤜᤷᤃᤢᤵ ᤆᤥ᤺ᤴᤍᤧᤀᤠᤱ ᤀᤡᤰᤗᤠᤎᤡᤰ ᤂᤧᤵᤛᤢ. “ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅”
ACT 9:5 ᤛᤠᤘᤗᤖᤧ ᤛᤣ᤺ᤴᤍᤥᤛᤢ. “ᤍᤠᤱᤒᤣ. ᤂᤧᤏᤧ᤹ᤃ ᤜᤠ᤺ᤳᤏᤧᤴᤒᤣ᥅” ᤜᤧᤰᤁᤣ᤺ᤸᤗᤧ ᤀᤰᤂᤣᤗ᤹ᤖᤡᤰ ᤏᤥᤃᤵ ᤋᤩᤧ. “ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤕᤧᤛᤢᤀᤠᤖᤥ॥
ACT 9:6 ᤀᤠᤸᤗ ᤂᤧᤏᤧ᤹ ᤐᤥᤃᤧ᤹ᤀᤠᤱ ᤕᤧᤰᤕᤰᤁᤥ ᤐᤣᤃᤧ᤹॥ ᤂᤧᤵᤔᤥᤀᤣ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤐᤥ᤺ᤱ ᤀᤡᤱᤃᤠ᤹ ᤔᤧᤳᤏᤧ᤹ᤖᤥ॥”
ACT 9:7 ᤀᤠᤸᤗ ᤛᤠᤘᤗᤏᤢ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤌᤣᤀᤠᤱ ᤔᤧᤶᤒᤠ᤺ᤳᤋᤣ ᤔᤧᤕᤧᤒᤧ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤀᤡᤰᤗᤠ᤺ᤴ ᤂᤧᤶᤔᤠᤃ ᤔᤧᤄᤧᤵᤛᤢ. ᤁᤖ ᤜᤠ᤺ᤳᤋᤠᤱ ᤔᤧᤴᤏᤡ᤺ᤛᤢᤴᤗᤥ॥
ACT 9:8 ᤛᤠᤘᤗᤧᤴ ᤂᤠᤶᤔᤥᤗᤠᤶ ᤔᤢᤳᤌᤪᤡᤰ ᤐᤥᤃᤧ. ᤁᤖ ᤁᤢᤔᤡᤰᤁᤡᤴ ᤜᤴᤍᤢᤸᤗᤧ ᤌᤣᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤢᤜᤢᤰᤁᤥ ᤔᤧᤍᤧᤶᤛᤢᤀᤠᤱ ᤔᤧᤀᤢ᤺ᤰᤂᤢᤖ ᤍᤔᤛ᤻ᤁᤛᤀᤥ ᤔᤧᤍᤣ᤹ᤖᤢᤖᤥ॥
ACT 9:9 ᤜᤧᤰᤁᤣᤗ᤹ᤖᤡᤰ ᤛᤢᤶᤕᤧᤴ ᤌᤠᤖᤡᤰ ᤌᤧᤔᤠᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴ ᤜᤧᤰᤁᤩᤠᤱ ᤌᤧᤔᤠᤀᤠᤱ ᤔᤧᤈᤏᤧᤴ. ᤔᤧᤎᤢᤅᤢᤴᤗᤥ॥
ACT 9:10 ᤀᤠᤸᤗ ᤍᤔᤛ᤻ᤁᤛᤀᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤜᤢ᤹ᤛᤠᤶᤒᤠᤎᤡᤰ ᤘᤕᤧ॥ ᤂᤧᤴ ᤛᤢᤑᤥᤀᤥ ᤍᤠᤱᤒᤠᤸᤗᤧ ᤀᤰᤂᤣ ᤔᤧᤳᤋᤢ. “ᤜᤏᤏᤡᤕᤠᤀᤣ᥄” ᤜᤏᤏᤡᤕᤠᤖᤧ ᤏᤥᤃᤵ ᤐᤡᤖᤢ. “ᤌᤧᤔᤠᤒᤣ. ᤀᤠᤍᤠᤱᤒᤣ᥅”
ACT 9:11 ᤍᤠᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤋᤥ᤺ᤴᤍᤥ᤺ᤴ ᤔᤧᤵᤔᤏᤠᤒᤠ ᤗᤠᤶᤔᤥ ᤕᤜᤢᤍᤠ᤺ᤸᤗᤧ ᤁᤢᤜᤡᤶᤔᤥ ᤐᤣᤃᤧ᤹॥ ᤂᤧᤵᤔᤥ ᤋᤠᤷᤛᤛᤒᤠ ᤛᤠᤘᤗ ᤔᤧᤵᤔᤏᤠᤒᤠ ᤔᤏᤠ᤺ᤴ ᤘᤠ᤹ᤒᤡ ᤑᤠ᤹ᤀᤠᤱ ᤛᤣ᤺ᤴᤍᤥ᤺ᤛᤧ᤹॥ ᤁᤴ ᤕᤧᤶᤔᤥ ᤂᤢᤏᤧ᤹ ᤂᤧᤵᤔᤥ ᤋᤢᤘᤠ ᤆᤥ᤺ᤰᤏᤢ ᤕᤢᤱᤗᤥ॥
ACT 9:12 ᤂᤢᤏᤧ᤹ ᤛᤢᤑᤥᤀᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤔᤏᤠ᤺ᤴ ᤋᤠᤀᤠᤱ ᤂᤢᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤛᤢᤰᤋᤢᤏᤡ ᤑᤠ᤹ᤀᤠᤱ ᤁᤢᤜᤢᤰᤜᤠ᤹ ᤁᤢᤎᤧᤃᤣ᤺ᤰᤐᤥ ᤏᤧᤛ᤻ᤛᤢᤒᤡᤖᤢᤒᤠ ᤏᤡ᤺ᤛᤢᤀᤠᤱ ᤘᤠ᤹ᤖᤥ॥”
ACT 9:13 ᤜᤏᤏᤡᤕᤠ᤺ᤸᤗᤧ ᤀᤳᤋᤢᤖ ᤏᤥᤃᤵ ᤐᤡᤖᤢ. “ᤁᤖ ᤀᤠᤍᤠᤱᤒᤣ. ᤂᤧᤸᤗᤧᤃ ᤕᤖᤢᤛᤗᤧᤶᤔᤥᤒᤠ ᤂᤧᤏᤧ᤹ ᤛᤣᤛᤣ ᤁᤧᤔᤏᤠᤜᤠ᤹ ᤕᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤒᤠ ᤀᤡᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤀᤠᤖᤥ॥
ACT 9:14 ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤗᤠᤶ ᤕᤢᤰ ᤂᤥ᤺ᤛᤢᤀᤠᤱ ᤂᤧᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤋᤧᤶᤔᤠᤛᤡ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤩᤧᤀᤠᤱ ᤘᤠ᤹ᤖᤥ॥”
ACT 9:15 ᤁᤖ ᤍᤠᤱᤒᤠᤸᤗᤧ ᤜᤏᤏᤡᤕᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤐᤣᤃᤧ᤹᥄ ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠ᤺ᤴ ᤀᤡᤱᤃᤠ᤹ ᤀᤠᤛᤣᤘᤠ ᤆᤥᤃᤢᤏᤡ ᤑᤠ᤹ᤀᤠᤱ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤸᤗᤧᤃ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹. ᤜᤠᤱᤜᤠ᤹. ᤏᤢ ᤀᤡᤛᤪᤠᤀᤡᤗᤡᤜᤠ᤹ ᤀᤠᤔᤡᤱ ᤀᤡᤱᤓᤴ ᤆᤥᤃᤢᤛᤡ᤹ᤖᤥ॥
ACT 9:16 ᤀᤡᤱᤃᤠ᤹ ᤀᤠᤗᤠᤃᤡ ᤂᤧᤸᤗᤧ ᤀᤠᤰᤂᤧᤴ ᤋᤢᤰᤂᤣ ᤆᤠᤔᤠ ᤐᤥ᤺ᤱ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤥᤛᤣ᤺ᤴᤎᤠᤰᤋᤢᤱᤗᤥ॥”
ACT 9:17 ᤜᤧᤰᤁᤩᤠᤱ ᤜᤏᤏᤡᤕᤠ᤺ᤴ ᤂᤧᤴ ᤜᤡᤶᤔᤥ ᤐᤣᤀᤠᤱ ᤛᤠᤘᤗᤖᤧ ᤁᤢᤎᤧᤃᤣ᤺ᤰ ᤛᤶᤍᤠᤱ ᤁᤢᤜᤢᤰᤜᤠ᤹ ᤏᤧᤛ᤻ᤛᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤠᤴᤛᤠ᤹ ᤛᤠᤘᤗᤀᤣ. ᤍᤠᤱᤒᤠ ᤕᤧᤛᤢᤖᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠᤖᤥ॥ ᤂᤢᤏᤧ᤹ᤃ ᤁᤵᤔᤥ ᤍᤔᤛ᤻ᤁᤛᤀᤥ ᤁᤧᤍᤩᤧᤖ ᤁᤧᤒᤳᤇᤧᤸᤗᤧ ᤗᤠᤶᤔᤥ ᤂᤧᤏᤧ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤁᤧᤛᤢᤰᤋᤢᤖ. ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤎᤢᤰᤗ ᤑᤠ᤹ᤀᤠᤱ ᤐᤠᤱᤄᤠᤱᤒᤠᤖᤥ॥”
ACT 9:18 ᤂᤡᤔᤥ ᤛᤠᤘᤗᤖᤧ ᤁᤢᤔᤡᤰᤁᤥᤗᤠᤶ ᤅᤠᤛᤣ᤺ᤰ ᤜᤧᤰᤋᤱᤒᤠ ᤔᤰᤌᤩᤧᤀᤠᤱ ᤂᤢᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤐᤥᤃᤧᤀᤠᤱ ᤜᤏᤏᤡᤕᤠ᤺ᤸᤗᤧ ᤒᤵᤋᤡᤛ᤻ᤔᤠ ᤐᤡᤖᤢᤖᤥ॥
ACT 9:19 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤈᤠ ᤆᤀᤠᤱ ᤁᤢᤛᤰᤔᤠ ᤋᤩᤧᤖᤥ॥ ᤛᤠᤘᤗᤧᤴ ᤁᤢᤓᤠ ᤕᤧᤴ ᤌᤠᤖᤡᤰ ᤍᤔᤛ᤻ᤁᤛᤀᤥᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤘᤕᤧ॥
ACT 9:20 ᤂᤢᤏᤧ᤹ ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶ ᤜᤧᤱᤄᤠ᤺ᤳᤋᤡ ᤐᤣᤀᤠᤱ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤛᤠ᤺ᤖᤥ ᤑᤠ᤹ᤀᤠᤱ ᤂᤡᤔᤥ ᤀᤡᤱᤓᤴ ᤆᤥ᤺ᤰᤔᤠ ᤜᤣ᤺ᤰᤋᤢᤖᤥ॥
ACT 9:21 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴ ᤁᤧᤄᤧᤶᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤇᤡᤱ. “ᤕᤖᤢᤛᤗᤧᤶᤔᤥ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤜᤶ ᤁᤧᤈᤥ᤺ᤰᤐᤧᤴ ᤒᤠᤁᤴ ᤔᤏᤠ᤺ᤴ ᤔᤧ᤺ᤶᤒᤡ᥅ ᤜᤧᤰᤁᤩᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤋᤧᤶᤔᤠ ᤋᤣ᤹ᤔᤠᤛᤡ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤩᤧᤒᤠᤃ ᤔᤧ᤺ᤶᤒᤡ᥅”
ACT 9:22 ᤁᤖ ᤛᤠᤘᤗᤖᤧ ᤀᤠᤸᤗᤛᤠᤱ ᤔᤢᤰᤛᤠᤶ ᤁᤢᤎᤡᤶᤒᤠ ᤀᤡᤱᤓᤴ ᤛᤧ᤺ᤛᤢᤖ ᤐᤣᤀᤠᤱ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹. ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤕᤠ᤺ᤴᤍᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵᤐᤣ ᤐᤡᤔᤠ ᤔᤧᤴᤇᤢᤰᤋᤢᤴᤗᤥ॥
ACT 9:23 ᤜᤧᤰᤁᤩᤠᤱ ᤕᤖᤡᤰ ᤕᤧᤶ ᤀᤣᤃᤠᤱ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤖᤧ ᤛᤠᤘᤗᤧᤴ ᤛᤧᤵᤔᤠ ᤑᤠ᤹ᤀᤠᤱ ᤀᤡᤱᤔᤧᤍᤱᤄᤢ.
ACT 9:24 ᤁᤖ ᤁᤴ ᤐᤠ᤺ᤴᤏᤡᤴ ᤛᤠᤘᤗᤖᤧ ᤏᤡᤱᤘᤠ᤹ ᤂᤥ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤛᤧᤴᤍᤡᤰ ᤗᤧᤴᤍᤡᤰ ᤂᤢᤏᤧ᤹ ᤋᤧᤶᤔᤠᤀᤠᤱ ᤛᤧᤵᤔᤠ ᤑᤠ᤹ᤀᤠᤱ ᤕᤧᤰᤕᤰᤁᤥᤒᤠ ᤐᤕᤶ ᤗᤠᤶᤎᤣ᤺ᤵᤜᤠ᤹ᤀᤥ ᤔᤧᤛᤢᤃᤢᤖᤥ॥
ACT 9:25 ᤁᤖ ᤌᤡᤰ ᤛᤧᤴᤍᤡᤰ ᤛᤠᤘᤗᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤛᤠᤵᤐᤥᤀᤥ ᤔᤧᤕᤠᤰᤋᤢᤀᤠᤱ ᤕᤧᤰᤕᤰᤁᤡᤸᤗᤧ ᤗᤢᤱᤎᤠᤰ ᤗᤠ᤺ᤰᤁᤠᤳ ᤀᤡᤍᤠ᤺ᤰᤁᤡᤸᤗᤧ ᤔᤧᤓᤥ᤺ᤴᤍᤢ ᤔᤧᤎᤠᤛᤢᤀᤠᤱ ᤔᤧᤄᤧᤳᤋᤢ ᤔᤧᤍᤣ᤺ᤛᤢᤖᤥ॥
ACT 9:26 ᤛᤠᤘᤗᤧᤴ ᤕᤖᤢᤛᤗᤧᤔ ᤐᤣᤀᤠᤱ ᤂᤧᤵᤔᤥᤒᤠ ᤜᤢ᤹ᤛᤠᤶᤒᤠᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤠ᤹ᤖᤡᤰ ᤔᤧᤃᤡᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤜᤢ᤹ᤛᤠᤶᤒᤠ ᤑᤠ᤹ᤀᤠᤱ ᤁᤢᤏᤠᤛᤠ᤹ᤔᤠᤀᤣ ᤔᤧᤴᤇᤢᤰᤋᤢᤴᤗᤥ॥
ACT 9:27 ᤁᤖ ᤒᤖᤏᤠᤒᤠᤛᤧᤴ ᤋᤩᤧᤀᤠᤱ ᤛᤠᤘᤗᤧᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤋᤠᤖᤢᤀᤠᤱ ᤀᤠᤰᤂᤣᤗ᤹ᤖᤡᤰ ᤛᤠᤘᤗᤖᤧ ᤍᤔᤛ᤻ᤁᤛ ᤐᤣ᤺ᤰᤔᤠ ᤗᤠᤶᤔᤥ ᤍᤠᤱᤒᤠᤴ ᤋᤢᤔᤢ ᤜᤧᤰᤁᤩᤠᤱ ᤍᤠᤱᤒᤠᤴ ᤂᤢᤏᤧ᤹ᤏᤢ ᤐᤠᤖᤧ. ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰ ᤍᤔᤛ᤻ᤁᤛᤀᤥ ᤔᤧᤱᤃᤡᤀᤣ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤘᤗᤖᤧ ᤀᤡᤱᤓᤴ ᤛᤧ᤺ᤛᤢ ᤁᤧᤗ᤹ᤒᤠᤴ ᤁᤠᤰ ᤆᤧᤰᤋᤢᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤠ᤺ᤰᤋᤢᤖᤥ॥
ACT 9:28 ᤜᤧᤰᤁᤩᤠᤱ ᤛᤠᤘᤗᤧᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ ᤜᤣ᤺ᤰᤋᤧᤀᤠᤱ ᤕᤖᤢᤛᤗᤧᤔ ᤂᤠᤖᤠᤰ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤔᤧᤱᤃᤡᤀᤣ ᤀᤡᤱᤓᤴ ᤆᤥᤃᤢᤖᤥ॥
ACT 9:29 ᤜᤧᤰᤁᤩᤠᤱ ᤃᤪᤡᤁ ᤁᤧᤒᤠ᤺ᤵᤐᤠ ᤕᤜᤢᤍᤡᤜᤠ᤹ᤏᤢᤀᤠᤱ ᤐᤠ᤺ᤴᤎᤰᤋᤧ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤑᤠ᤹ᤀᤠᤱ ᤗᤠᤶ ᤔᤧᤃᤥ᤺ᤳᤋᤢᤖ ᤔᤧᤘᤕᤧ॥
ACT 9:30 ᤁᤴ ᤐᤠ᤺ᤴᤏᤡᤴ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤔᤧᤍᤣ᤹ᤖᤢ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤛᤠᤘᤗᤧᤴ ᤋᤠᤷᤛᤛ ᤕᤧᤰᤕᤰ ᤗᤧᤵᤔᤠᤱ ᤘᤠᤗᤠᤎᤠᤗᤠᤶ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥
ACT 9:31 ᤜᤧᤰᤁᤩᤠᤱ ᤕᤜᤢᤍᤡᤕᤠ. ᤃᤠᤗᤡᤗ. ᤏᤢ ᤛᤠᤔᤖᤡᤕᤠᤀᤥᤛ᤻ᤔᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤏᤡᤱᤄᤢᤶ ᤐᤥ᤺ᤱᤔᤠ ᤆᤰ ᤌᤩᤧᤀᤠᤱ ᤕᤧᤶᤕᤧᤶᤘᤠ ᤋᤩᤧ॥ ᤂᤧᤱᤜᤠ᤹ᤖᤧ ᤍᤠᤱᤒᤠᤴ ᤛᤠ᤹ᤖᤡᤰ ᤀᤡᤱᤎᤠ᤺ᤱ ᤔᤧᤒᤡ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡᤀᤠᤱ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤖ ᤂᤧᤱᤜᤠ᤹ ᤔᤧᤒᤥ᤺ᤖᤧᤖ ᤔᤧᤒᤣᤖᤥ॥
ACT 9:32 ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤠᤶᤍᤡ᤺ᤰ ᤆᤥᤃᤧᤖ ᤗᤡᤍ᤻ᤍᤠᤒᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤛᤠ᤹ᤖᤢᤛᤡᤖᤥ॥
ACT 9:33 ᤂᤧᤵᤔᤥ ᤀᤣᤏᤡᤕᤠᤛ ᤔᤧᤵᤔᤏᤠᤒᤠ ᤋᤱᤒᤣ ᤕᤧᤳᤇᤡᤀᤠᤱᤎᤥ (᥎) ᤗᤱᤗᤧ᤺ᤱ ᤋᤢᤰᤔᤠᤸᤗᤧ ᤋᤖᤢᤀᤠᤱ ᤏᤧᤳᤏᤠᤀᤥᤖᤰ ᤁᤧᤏᤧᤒᤠ ᤔᤏᤠ᤺ᤴ ᤋᤢᤔᤢ॥
ACT 9:34 ᤐᤋᤪᤢᤛᤖᤧ ᤂᤧᤴ ᤔᤧᤳᤋᤢ. “ᤀᤣᤏᤡᤕᤠᤛᤣ. ᤕᤧᤛᤢ ᤂᤪᤡᤛ᤻ᤋᤖᤧ ᤁᤧᤘᤣ᤺ᤴᤗᤥ॥ ᤐᤥᤃᤧ᤹ᤀᤠᤱ ᤁᤧᤏᤧᤳᤏᤠ᤺ᤴ ᤑᤥ᤺ᤰᤂᤧ᤹ᤀᤥ᥄” ᤂᤡᤔᤥ ᤂᤧᤴ ᤔᤢᤳᤌᤪᤡᤰ ᤐᤥᤃᤧ॥
ACT 9:35 ᤜᤧᤰᤁᤩᤠᤱ ᤗᤡᤍ᤻ᤍᤠ ᤕᤧᤰᤕᤰᤁᤥ ᤏᤢ ᤛᤠᤖᤥᤏ ᤋᤧᤶᤒᤣ᤹ᤀᤥ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤔᤏᤠ᤺ᤴ ᤘᤣ᤺ᤳᤋᤧᤒᤠ ᤔᤧᤏᤡ᤺ᤛᤢᤀᤠᤱ ᤍᤠᤱᤒᤠ ᤗᤧᤵᤔᤠᤱ ᤔᤧᤜᤡᤛᤡᤱᤗᤥ॥
ACT 9:36 ᤜᤧᤰᤁᤩᤠᤱ ᤈᤥᤵᤐᤠ ᤕᤧᤰᤕᤰᤁᤥ ᤋᤒᤡᤋᤠ ᤔᤡᤱ ᤁᤧᤘᤠ᤺ᤵᤔᤠ ᤜᤢ᤹ᤛᤠᤶᤔᤠ ᤌᤡᤰ ᤘᤕᤧ॥ (ᤂᤧᤸᤗᤧ ᤁᤢᤔᤡᤱ ᤃᤪᤡᤰᤁᤥ ᤍᤥᤖᤁᤠᤛ ᤘᤕᤧ–ᤂᤧᤴ ᤑᤠ᤹ᤀᤡᤴ ᤐᤧ᤺ᤱᤘᤠ ᤐᤥ᤺ᤱᤗᤥ॥) ᤂᤧᤴ ᤛᤍᤠᤍᤡᤱ ᤘᤣ᤹ᤜᤠ᤹ᤖᤧ ᤗᤠᤃᤡ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤓᤠ᤹ᤔᤠ ᤘᤕᤧᤖᤥ॥
ACT 9:37 ᤂᤢᤏᤧ᤹ ᤂᤧᤴ ᤕᤧᤶᤔᤥ ᤋᤢᤃᤧᤀᤠᤱ ᤛᤩᤧ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤘᤠᤔᤧᤜᤵᤋᤢᤀᤠᤱ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤔᤧᤍᤣ᤹ᤖᤢᤀᤠᤱ ᤔᤧᤏᤧᤛ᤻ᤛᤢᤖᤥ॥
ACT 9:38 ᤈᤥᤵᤐᤠ ᤕᤧᤰᤕᤰᤁᤡᤴ ᤗᤡᤍ᤻ᤍᤠ ᤕᤧᤰᤕᤰᤗᤠᤶ ᤔᤧᤔᤠ᤺ᤰᤂᤧᤴ. ᤜᤧᤰᤁᤣ᤺ᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤐᤋᤪᤢᤛᤧᤴ ᤗᤡᤍ᤻ᤍᤠᤀᤥ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢᤀᤠᤱ ᤏᤧᤵᤑᤢ ᤔᤏᤠᤜᤠ᤹ ᤁᤢᤗᤠ᤺ᤛᤧ ᤔᤧᤒᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣᤛᤧᤳᤇᤡᤀᤠᤱ ᤐᤋᤪᤢᤛᤧᤴ. “ᤀᤠᤍᤠᤱᤒᤣ. ᤜᤠᤖᤠ᤹ ᤈᤥᤵᤐᤠᤀᤥ ᤑᤧᤖᤧ᤹ᤀᤥ.” ᤔᤧᤳᤋᤧᤇᤢᤖ ᤐᤣᤗᤡ ᤑᤠᤰᤋᤧᤳᤇᤢᤖᤥ॥
ACT 9:39 ᤂᤧᤸᤗᤧ ᤆᤥᤃᤢᤸᤗᤧ ᤐᤋᤪᤢᤛᤧᤴᤏᤠᤱ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤏᤢ ᤈᤥᤵᤐᤠᤀᤥ ᤐᤣ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤖᤧᤏᤢᤔᤧ᤺ᤴᤏᤣ ᤂᤢᤏᤧ᤹ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤔᤣᤔᤣᤍᤢᤔᤠᤜᤠ᤹ ᤐᤋᤪᤢᤛᤖᤧ ᤁᤢᤄᤡᤖᤡ ᤔᤧᤕᤧᤒᤧᤀᤠᤱ ᤍᤥᤖᤁᤠᤛᤖᤧ ᤁᤢᤜᤡᤱᤘᤧᤳ ᤘᤕᤧᤸᤗᤧ ᤋᤕᤢᤒᤠ ᤋᤣ᤺ᤵᤑᤢᤱᤜᤠ᤹ ᤀᤥᤛᤣ᤺ᤴᤔᤧᤎᤠᤰᤋᤢᤖ ᤔᤧᤜᤠᤒᤧ॥
ACT 9:40 ᤐᤋᤪᤢᤛᤧᤴ ᤐᤣᤀᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤠᤰᤑᤠᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤂᤢᤏᤧ᤹ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤋᤢᤘᤠ ᤆᤥᤃᤢᤀᤠᤱ ᤂᤧᤴ ᤁᤧᤛᤡ᤺ᤔᤠ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢ. “ᤋᤒᤡᤋᤠᤀᤣ. ᤐᤥᤃᤧ᤹ᤀᤥ॥” ᤂᤧᤸᤗᤧ ᤁᤢᤔᤡᤰᤜᤠ᤹ ᤜᤴᤍᤢ. ᤜᤧᤰᤁᤩᤠᤱ ᤐᤋᤪᤢᤛᤧᤴ ᤏᤡ᤺ᤛᤢ ᤜᤧᤰᤁᤩᤠᤱ ᤐᤥᤃᤧᤀᤠᤱ ᤕᤢᤱᤛᤡᤱᤗᤥ॥
ACT 9:41 ᤐᤋᤪᤢᤛᤖᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ ᤕᤧᤵᤛᤢ ᤜᤧᤰᤁᤩᤠᤱ ᤔᤣᤔᤣᤍᤢᤔᤠᤜᤠ᤹ ᤏᤢ ᤘᤣ᤹ ᤏᤛᤠᤏᤡᤒᤠᤜᤠ᤹ ᤐᤋᤪᤢᤛᤖᤧ ᤀᤢ᤺ᤳᤋᤢᤛᤡᤀᤠᤱ ᤂᤧᤴ ᤜᤢᤰᤛᤢᤵᤋᤢᤛᤡᤖᤥ॥
ACT 9:42 ᤜᤧᤰᤁᤩᤠᤱ ᤈᤥᤵᤐᤠ ᤂᤠᤖᤠᤰ ᤁᤴ ᤐᤠ᤺ᤴᤏᤡᤴ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤕᤖᤡᤰᤗᤧ ᤍᤠᤱᤒᤠᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
ACT 9:43 ᤐᤋᤪᤢᤛᤧᤴ ᤈᤥᤵᤐᤠᤀᤥ ᤁᤢᤓᤠ ᤕᤧᤶ ᤛᤧᤜᤥᤒᤠᤸᤗᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤕᤠ᤺ᤰᤋᤧᤖᤥ॥
ACT 10:1 ᤛᤡᤈᤖᤡᤕᤠ ᤕᤧᤰᤕᤰᤁᤥ ᤁᤷᤏᤠᤗᤡᤕᤛ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤧᤴ ᤀᤡᤋᤠᤗᤡᤕᤠ ᤔᤧᤵᤔᤏᤠᤒᤠ ᤖᤥᤔᤡ ᤋᤢᤖᤠᤖᤧᤴ ᤌᤰᤋᤢᤶᤒᤠ ᤘᤕᤧᤖᤥ॥
ACT 10:2 ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤔᤡᤱᤛᤥᤍᤠᤱᤒᤠ ᤏᤢ ᤛᤠᤶᤕᤥᤛᤠᤒᤠ ᤔᤧᤘᤕᤧᤖᤥ॥ ᤂᤢᤏᤧ᤹ᤃ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤖᤡᤰ ᤁᤢᤓᤠ᤹ ᤕᤠᤱ ᤁᤧᤒᤡᤒᤠ ᤏᤢ ᤌᤡᤰᤕᤠ᤺ᤴᤎᤰ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤘᤠ ᤁᤧᤈᤥ᤺ᤰᤐᤠ ᤘᤕᤧᤖᤥ॥
ACT 10:3 ᤌᤡᤰᤕᤧᤴ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤀᤠᤱ ᤘᤕᤧᤸᤗᤧ ᤂᤢᤏᤧ᤹ ᤛᤢᤑᤥᤎᤡᤰ ᤏᤡ᤺ᤛᤢ॥ ᤂᤧᤴ ᤛᤢᤑᤥᤀᤥ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤴ ᤂᤢᤏᤧ᤹ ᤗᤧᤵᤔᤠᤱ ᤑᤧᤖᤧᤖ “ᤁᤷᤏᤠᤗᤡᤕᤛᤣ.” ᤔᤧᤳᤋᤢᤖᤥ॥
ACT 10:4 ᤁᤷᤏᤠᤗᤡᤕᤛᤖᤧ ᤁᤡ᤺ᤛᤧᤖ ᤀᤥᤔᤧᤳᤋᤢᤖ ᤀᤥᤒᤧ ᤀᤠᤍᤠᤱᤒᤣ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠᤜᤠ᤹ ᤏᤢ ᤕᤠᤱᤃᤧᤛᤠ᤹ᤒᤠᤜᤠ᤹ ᤕᤖᤡᤰ ᤁᤢᤓᤠ᤹ ᤕᤠᤱ ᤁᤧᤒᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥”
ACT 10:5 ᤀᤠᤸᤗ ᤈᤥᤵᤐᤠ ᤕᤧᤰᤕᤰᤁᤥ ᤛᤡᤔᤥᤏ ᤐᤋᤪᤢᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤀᤢ᤺ᤳᤇᤧ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤥ॥
ACT 10:6 ᤂᤧᤴ ᤘᤠᤜᤱ ᤐᤣᤛᤠᤱᤒᤠ ᤛᤧᤜᤥᤒᤠᤖᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤠ᤹॥
ACT 10:7 ᤂᤧᤴ ᤔᤠᤱᤗᤠᤀᤡᤱᤒᤠᤴ ᤜᤧᤰᤁᤣ ᤐᤠ᤺ᤳᤋᤢᤀᤠᤱ ᤐᤣ. ᤜᤧᤰᤁᤩᤠᤱ ᤁᤷᤏᤠᤗᤡᤕᤛᤖᤧ ᤏᤧᤵᤑᤢ ᤁᤢᤛᤣᤘᤠᤖᤥᤒᤠᤜᤠ᤹ ᤏᤢ ᤛᤠᤶᤕᤥᤒᤠ ᤁᤢᤍᤠᤱᤛᤧ᤺ᤵ ᤌᤰᤛᤢᤒᤠᤴ ᤀᤢ᤺ᤳᤋᤢᤀᤠᤱ
ACT 10:8 ᤁᤴ ᤐᤠ᤺ᤴᤏᤡᤴ ᤆᤧᤰᤋᤢᤛᤡᤖ ᤈᤥᤵᤐᤠᤀᤥ ᤐᤋᤪᤢᤛᤖᤧ ᤁᤢᤗᤠ᤺ᤛᤧ ᤂᤧᤱᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡᤖᤥ॥
ACT 10:9 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤂᤧᤱᤜᤠ᤹ ᤈᤥᤵᤐᤠ ᤐᤣᤛᤠᤱ ᤔᤧᤃᤧᤖᤧ॥ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳ (᥇᥈) ᤔᤢᤰᤋᤧᤸᤗᤧ ᤐᤋᤪᤢᤛᤧᤴ ᤋᤢᤘᤠ ᤆᤥ᤺ᤰᤛᤧ ᤌᤠ᤺ᤱᤛ᤻ᤔᤠ ᤀᤠ᤺ᤶᤓᤥᤀᤥ ᤐᤣ॥
ACT 10:10 ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤧᤳ ᤗᤠ᤺ᤰᤋᤧᤀᤠᤱ ᤌᤣᤀᤡ ᤆᤠᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤆᤠ ᤔᤧᤈᤥᤃᤢᤖ ᤔᤧᤒᤳᤇᤧᤸᤗᤧ ᤁᤢᤎᤏᤠ ᤗᤧᤰᤂᤧᤖᤥ॥
ACT 10:11 ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤜᤖᤧᤒᤠ ᤁᤢᤀᤡᤛᤡ᤺ᤰ ᤂᤧᤳᤌᤥᤗᤠᤶ ᤕᤶᤒᤠ ᤋᤣ᤺ᤳ ᤜᤧᤰᤋᤱᤒᤠᤴ ᤗᤡᤛᤡ ᤁᤢᤛᤢᤰᤐᤥ ᤂᤣ᤺ᤱᤔᤏᤠᤒᤠ ᤌᤩᤧᤖ ᤐᤳᤇᤧᤒᤠ ᤏᤡ᤺ᤛᤢ॥
ACT 10:12 ᤂᤧᤵᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤐᤖᤡᤰᤗᤧᤴ ᤌᤰᤛᤠᤜᤠ᤹. ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤏᤢ ᤐᤢᤛᤠᤜᤠ᤹ ᤔᤧᤕᤠᤃᤧ॥ ᤂᤧᤱᤜᤠ᤹ᤀᤥ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤆᤠᤔᤠ ᤀᤠᤶᤒᤡᤏᤧᤴᤒᤠᤜᤠ᤹ᤀᤠᤱ ᤔᤧᤕᤠᤃᤧ॥
ACT 10:13 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢ. “ᤐᤋᤪᤢᤛᤣ. ᤐᤥᤃᤧ᤹᥄ ᤛᤧᤖᤧᤛᤧ᤹ᤀᤠᤱ ᤆᤧ᤹ᤀᤥ॥”
ACT 10:14 ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤛᤧᤰᤂᤠᤛᤠᤱ ᤀᤰᤋᤱᤒᤠᤃ ᤀᤡᤱᤃᤠ᤹ ᤔᤧᤈᤠᤀᤠᤴᤗᤥ॥ ᤀᤠᤸᤗᤥ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤶᤒᤠ ᤆᤠ ᤌᤣᤀᤠᤱ ᤔᤧᤴᤈᤠᤀᤣ ᤘᤠ᤹ᤀᤠᤖᤥ॥”
ACT 10:15 ᤜᤧᤰᤁᤩᤠᤱ ᤕᤠᤶᤔᤥ ᤀᤡᤰᤗᤠ᤺ᤴ ᤋᤩᤧ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤁᤢᤈᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤕᤠᤵᤔᤡ ᤁᤧᤈᤡ᤺ᤶᤒᤠ ᤔᤧᤗᤣ᤺ᤳᤋᤧᤴᤏᤧ᤹ᤀᤥ॥”
ACT 10:16 ᤀᤰᤂᤣᤗ᤹ᤖᤡᤰ ᤁᤴ ᤛᤢᤶᤗᤧᤱ ᤌᤠᤖᤡᤰ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤴ ᤁᤢᤛᤢᤱᤔᤧᤴ ᤕᤠᤱᤎᤥ ᤋᤠᤱᤛᤠᤰᤐᤥ ᤀᤢ᤺ᤰᤂᤧ ᤋᤣ᤹ᤖᤧᤖᤥ॥
ACT 10:17 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤴ ᤛᤢᤑᤥ᤺ᤸᤗᤧ ᤁᤢᤒᤣ᤺ᤴ ᤌᤣᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤗ ᤐᤳᤇᤧᤸᤗᤧ ᤁᤷᤏᤠᤗᤡᤕᤛᤖᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ ᤛᤡᤔᤥᤏᤖᤧ ᤁᤢᤜᤡᤶᤔᤡᤴ ᤔᤧᤃᤥ᤺ᤳᤋᤢᤖ ᤗᤠᤶᤎᤣ᤺ᤵᤐᤥ ᤔᤧᤍᤩᤧᤖᤥ॥
ACT 10:18 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ. ᤛᤡᤔᤥᤏ ᤔᤧᤵᤔᤏᤠᤒᤠ ᤐᤋᤪᤢᤛᤧᤴ ᤁᤵᤔᤥ ᤘᤠ᤹ᤒᤡ ᤜᤥ᤺ᤵᤐᤡ ᤑᤠ᤹ᤀᤠᤱ ᤛᤣ᤺ᤴᤍᤥᤀᤡ ᤔᤧᤕᤧᤒᤧᤖᤥ॥
ACT 10:19 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤀᤠᤸᤗᤛᤠᤱ ᤁᤴ ᤛᤢᤑᤥᤀᤡᤴ ᤌᤣᤀᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤐᤳᤇᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤔᤧᤳᤋᤢ. “ᤛᤡᤔᤥᤏᤣ. ᤛᤢᤶᤛᤡ ᤔᤏᤠᤜᤠ᤹ ᤁᤧᤃᤥ᤺ᤳᤇᤧ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥
ACT 10:20 ᤂᤧᤸᤗᤧ ᤆᤥᤃᤢᤸᤗᤧ ᤐᤥᤃᤧ᤹ᤀᤠᤱ ᤕᤥ ᤌᤩᤧ᤹. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤛᤡ ᤑᤠ᤹ᤀᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤂᤧᤱᤜᤠ᤹ᤏᤢ ᤐᤣᤃᤧ᤹ᤀᤥ॥ ᤂᤧᤱᤜᤠ᤹ᤃ ᤀᤡᤱᤃᤠ᤹ᤀᤣ ᤐᤠᤱᤄᤢᤱᤛᤡᤱᤒᤠᤖᤥ॥”
ACT 10:21 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤧᤴ ᤕᤥ ᤌᤩᤧᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤔᤏᤠ᤺ᤱᤃ ᤀᤡᤱᤃᤠ᤹ᤀᤣᤖᤥ॥ ᤌᤣᤀᤠᤱ ᤁᤵᤔᤥ ᤁᤧᤍᤩᤧ᤹ᤀᤡᤒᤠᤒᤣ᥅”
ACT 10:22 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤁᤷᤏᤠᤗᤡᤕᤛ ᤔᤧᤵᤔᤏᤠᤒᤠ ᤌᤰᤋᤢᤶᤒᤧᤸᤗᤧ ᤕᤠᤵᤔᤡ ᤐᤠᤱᤄᤧᤒᤠᤖᤥ॥ ᤂᤢᤏᤧ᤹ᤃ ᤛᤠᤶᤕᤥᤏᤡᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ ᤔᤏᤠ ᤏᤢ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ᤃ ᤛᤠ᤹ᤖᤡᤰᤁᤣ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤛᤣᤛᤣ ᤔᤠᤱᤗᤠᤀᤡᤱᤒᤠᤎᤡᤰᤗᤧ ᤂᤧᤏᤧ᤹ ᤁᤢᤜᤡᤶᤔᤥ ᤀᤢ᤺ᤵᤔᤠᤀᤠᤱ ᤂᤧᤏᤧ᤹ᤗᤠᤶ ᤐᤠ᤺ᤵᤔᤠ ᤁᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤂᤧᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤳᤋᤢᤖᤥ॥”
ACT 10:23 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤱᤜᤠ᤹ ᤜᤡᤶᤛᤡᤃᤠᤱ ᤀᤢ᤺ᤳᤋᤢᤛᤡᤀᤠᤱ ᤋᤖᤣ ᤋᤠ᤺ᤰᤋᤢᤛᤡᤖᤥ॥ ᤁᤢᤏᤠᤶᤍᤠ᤺ᤵᤔᤠ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤏᤢᤀᤣ ᤐᤣ॥ ᤜᤧᤰᤁᤩᤠᤱ ᤈᤥᤵᤐᤠᤒᤠ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣᤖᤥ॥
ACT 10:24 ᤁᤢᤀᤠᤳᤇᤡᤴᤍᤠ᤺ᤴ ᤂᤧᤱᤜᤠ᤹ ᤛᤡᤈᤖᤡᤕᤠᤀᤥ ᤔᤧᤃᤧᤖᤧᤀᤠᤱ ᤁᤷᤏᤠᤗᤡᤕᤛᤖᤧ ᤁᤢᤃᤠᤀᤡᤜᤠ᤹ ᤏᤢ ᤏᤡ᤺ᤳᤋᤠᤱᤒᤠ ᤁᤢᤴᤍᤣ᤺ᤱ ᤁᤢᤴᤈᤢᤶᤜᤠ᤹ ᤛᤥᤖᤡᤰ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤔᤧᤜᤠᤱᤄᤢᤛᤡᤖ ᤔᤧᤕᤢᤅᤧᤖᤥ॥
ACT 10:25 ᤐᤋᤪᤢᤛᤧᤴ ᤜᤡᤶᤛᤡᤃᤠᤱ ᤗᤠ᤺ᤵᤔᤠ ᤀᤡ᤺ᤳᤋᤧᤸᤗᤧ ᤁᤷᤏᤠᤗᤡᤕᤛᤖᤧ ᤂᤢᤏᤧ᤹ ᤋᤢᤔᤢᤀᤠᤱ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤑᤴᤇᤡᤱᤅᤠᤱ ᤛᤣᤘᤠ ᤆᤥᤃᤢᤖᤥ॥
ACT 10:26 ᤁᤖ ᤐᤋᤪᤢᤛᤖᤧ ᤂᤧᤴ ᤑᤥ᤺ᤰᤂᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤐᤥᤃᤧ᤹ᤀᤥ. ᤀᤡᤱᤃᤠ᤹ᤃ ᤔᤏᤠᤀᤠᤖᤰᤗᤥ॥”
ACT 10:27 ᤐᤋᤪᤢᤛᤧᤴ ᤁᤷᤏᤠᤗᤡᤕᤛᤧᤴᤏᤢ ᤋᤠ᤹ᤈᤧᤰᤂᤧᤖ ᤜᤡᤶᤛᤡᤃᤠᤱ ᤗᤠ᤺ᤛᤧ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧᤒᤠ ᤏᤡ᤺ᤛᤢᤛᤡᤖᤥ॥
ACT 10:28 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤔᤠ. ᤂᤢᤏᤡ᤹ ᤜᤡᤶᤔᤥ ᤐᤣ᤺ᤰᤔᤠ ᤀᤠᤏᤡᤃᤧ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤔᤧᤒᤡᤖᤡᤃᤧᤴ ᤁᤧᤗ᤹ᤒᤠ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤵᤔᤠᤛᤡ ᤔᤧᤏᤢ᤹ᤏᤧᤴᤗᤥ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤋᤠᤱᤗᤥ॥
ACT 10:29 ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤒᤠᤱᤄᤢᤛᤡᤒᤠ ᤔᤏᤠᤜᤠ᤹ᤏᤢ ᤌᤣᤀᤠᤱ ᤔᤧᤶᤒᤠ᤺ᤳᤋᤣ ᤀᤡᤱᤃᤠ᤹ ᤁᤵᤔᤥ ᤋᤩᤠᤱᤗᤥ॥ ᤀᤠᤸᤗ ᤌᤣᤀᤠᤱ ᤁᤧᤀᤢ᤺ᤳᤋᤠᤱᤒᤠ ᤐᤠ᤺ᤳᤋᤧ᤹ᤀᤥ॥”
ACT 10:30 ᤁᤖᤏᤠᤗᤡᤛᤕᤖᤧ ᤂᤢᤏᤧ᤹ ᤔᤧᤳᤋᤢ. “ᤗᤡᤛᤡᤕᤧᤴ ᤋᤃᤡ ᤀᤡᤱᤃᤠ᤹ ᤗᤧᤴᤍᤡᤰ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤸᤗᤧ ᤋᤢᤘᤠ ᤆᤥ᤺ᤰᤁᤡ ᤀᤠᤜᤡᤶᤔᤥ ᤕᤠᤃᤠᤱ॥ ᤂᤡᤔᤥ ᤔᤡᤰᤁᤡᤴᤏᤣ ᤁᤧᤈᤧᤶᤒᤠ ᤋᤣ᤺ᤳ ᤁᤧᤈᤠᤱᤒᤠ ᤔᤏᤠᤎᤡᤰ ᤀᤡᤱᤃᤠ᤹ ᤀᤠᤍᤃᤡ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ
ACT 10:31 ᤔᤧᤳᤋᤠᤱ. ‘ᤁᤷᤏᤠᤗᤡᤕᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠ᤺ᤴ ᤂᤧᤵᤛᤢᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤁᤢᤓᤠ᤹ ᤕᤠᤱᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥
ACT 10:32 ᤜᤧᤰᤁᤣ᤺ᤸᤗᤧ ᤈᤥᤵᤐᤠᤀᤥ ᤛᤡᤔᤥᤏ ᤐᤋᤪᤢᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤗᤠ᤺ᤛᤧ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤥ॥ ᤂᤢᤏᤧ᤹ᤃ ᤛᤧᤜᤥᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤕᤠ᤺ᤰᤋᤧᤀᤠᤱ ᤘᤠ᤹॥ ᤂᤧᤴ ᤜᤡᤶᤔᤡᤴ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤏᤧᤖᤥ॥’
ACT 10:33 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤔᤥ ᤁᤧᤗᤠ᤺ᤛᤧ ᤐᤠᤱᤄᤢᤱᤛᤡᤱ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ᤀᤠᤱ ᤁᤵᤔᤥ ᤁᤧᤍᤩᤧᤀᤠᤱ ᤏᤢ᤺ᤒᤠᤀᤣ ᤐᤥ᤺ᤰᤂᤧᤖᤥ॥ ᤀᤠᤸᤗᤥᤃ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤘᤕᤡᤃᤧᤀᤠᤱ ᤍᤠᤱᤒᤠᤸᤗᤧ ᤂᤧᤏᤧ᤹ ᤌᤣ ᤐᤠ᤺ᤵᤔᤠ ᤀᤡᤱᤈᤠ᤺ᤱ ᤁᤧᤒᤡᤖᤧᤀᤠᤱ ᤘᤠ᤹. ᤂᤧᤴ ᤐᤠ᤺ᤴ ᤂᤧᤶᤛᤧ ᤁᤵᤔᤥ ᤕᤠᤖᤡᤵ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥”
ACT 10:34 ᤁᤴ ᤂᤧᤵᤛᤢᤀᤠᤱ ᤐᤋᤪᤢᤛᤖᤧ ᤐᤠ᤺ᤵᤔᤠ ᤜᤣ᤺ᤰᤋᤢ. “ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤔᤧᤛᤧᤴᤍᤢᤴᤇᤡᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤸᤗ ᤀᤡᤱᤃᤠ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥
ACT 10:35 ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤀᤡᤱᤎᤠ᤺ᤱ ᤁᤧᤒᤡᤒᤠ ᤏᤢ ᤁᤢᤏᤡᤱᤘᤠ᤹ ᤜᤧᤰᤁᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤠ᤺ᤰᤋᤢᤛᤡᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥
ACT 10:36 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤏᤠᤖᤢᤱᤗᤧᤴ ᤛᤢᤏᤠᤀᤡᤱᤅᤡᤴ ᤁᤠᤰ ᤀᤡᤛᤪᤠᤀᤡᤗᤡᤜᤠ᤹ᤖᤥ ᤐᤠᤱᤄᤢᤖᤥ॥ ᤂᤧᤴ ᤛᤢᤏᤠᤀᤡᤱᤅᤡᤱᤃ ᤕᤜᤢᤍᤡᤜᤠ᤹ᤖᤧᤴᤗᤰ ᤔᤧ᤺ᤴ. ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤋᤩᤧᤀᤠᤱ ᤘᤠ᤹ᤖᤥ॥
ACT 10:37 ᤃᤠᤗᤡᤗᤗᤠᤶ ᤕᤢᤜᤢᤴᤏᤠᤖᤧ ᤀᤡᤱᤓᤥ᤺ᤛᤢᤒᤠ ᤒᤵᤋᤡᤛ᤻ᤔᤠᤀᤠᤱᤎᤥ ᤕᤜᤢᤍᤡᤕᤠᤀᤥ ᤐᤥ᤺ᤰᤂᤧᤒᤠ ᤁᤠᤰ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤖᤋᤛ᤻ᤔᤠ ᤕᤧᤛᤢ᤺ᤴ ᤛᤣᤛᤣᤔᤠᤱᤅᤡᤴ ᤏᤢ ᤔᤢᤰᤛᤠᤶᤔᤡᤸᤗᤧ ᤔᤠᤱᤎᤥ᤺ᤰᤏᤠ ᤐᤡᤖᤢᤀᤠᤱ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤆᤥ᤺ᤰᤁᤡ ᤔᤠᤑᤧᤴᤛᤠᤶᤔᤡᤸᤗᤧ ᤀᤣ᤺ᤵᤋᤢᤛᤡᤒᤠᤜᤠ᤹ ᤘᤣ᤺ᤴᤍᤢᤛᤡᤖ ᤗᤠᤶᤍᤡ᤺ᤰ ᤆᤥᤃᤢᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧᤒᤠᤴᤏᤠᤱ ᤁᤧᤏᤡ᤺ᤛᤢᤶᤗᤥ॥
ACT 10:39 ᤜᤧᤰᤁᤩᤠᤱ ᤕᤧᤛᤢᤖᤧ ᤕᤖᤢᤛᤗᤧᤔ ᤏᤢ ᤁᤠᤰ ᤕᤜᤢᤍᤡᤕᤠᤛ᤻ᤔᤠ ᤗᤠᤈᤣ᤹ᤀᤥ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤖᤧᤴ ᤀᤠᤏᤡᤃᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤋᤥ᤺ᤴᤍᤡ ᤘᤕᤡᤃᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ᤃ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢ.
ACT 10:40 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤣ ᤛᤢᤶᤕᤧᤴ ᤀᤣᤃᤠᤱ ᤑᤥ᤺ᤰᤂᤢᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤡᤃᤧᤖᤥ॥
ACT 10:41 ᤂᤢᤏᤧ᤹ᤃ ᤁᤠᤰ ᤕᤜᤢᤍᤡᤜᤠ᤹ᤏᤢᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤥ᤺ᤴᤍᤡ ᤐᤡᤛᤧ ᤛᤣᤃᤡᤃᤧᤒᤠᤜᤠ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱᤗᤥ॥ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤜᤡᤅᤧᤀᤠᤱ ᤀᤠᤏᤡᤃᤧ ᤂᤢᤏᤧ᤹ᤏᤢᤀᤣ ᤛᤥᤖᤡᤰ ᤆᤠ᤺ᤔᤏᤠ ᤌᤢᤱᤔᤏᤠᤖᤥ॥
ACT 10:42 ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ ᤀᤡᤱᤓᤴ ᤆᤥ᤺ᤰᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡ᤺ᤒᤠ ᤏᤢ ᤁᤧᤜᤡᤱᤒᤠᤜᤠ᤹ᤖᤧᤴ ᤂᤠᤛᤧᤴ ᤆᤥ᤺ᤰᤛᤧ ᤂᤢᤏᤧ᤹ᤀᤣ ᤛᤣᤃᤢᤒᤠ ᤐᤠ᤺ᤴᤏᤡᤴ ᤐᤠ᤺ᤳᤋᤧᤶᤔᤧ᤹ᤀᤥ ᤗ᤹ᤖᤡᤰ ᤂᤢᤏᤧ᤹ ᤕᤠᤵᤔᤡ ᤀᤡᤱᤈᤠ᤺ᤱ ᤐᤡᤖᤧᤖᤥ
ACT 10:43 ᤁᤠᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤘᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤜᤠᤱᤅᤡᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤀᤠᤳᤋᤡᤸᤗᤧᤛᤠᤱ ᤂᤢᤏᤧ᤹ᤗᤠᤶ ᤁᤢᤗᤠᤕᤥᤖᤧᤴ ᤗᤧᤵᤔᤡ ᤂᤥ᤺ᤛᤢᤖᤥ॥”
ACT 10:44 ᤐᤋᤪᤢᤛᤖᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖ ᤐᤳᤇᤧᤸᤗᤧᤛᤠ ᤂᤧᤴ ᤛᤢᤏᤠᤀᤡᤱ ᤁᤧᤄᤧᤶᤒᤠᤜᤠ᤹ ᤛᤶᤍᤠᤱ ᤛᤣᤛᤣᤔᤠᤱᤅᤡᤴ ᤆᤢᤰᤋᤧᤖᤥ॥
ACT 10:45 ᤂᤧᤴ ᤐᤋᤪᤢᤛ ᤏᤢ ᤈᤥᤵᤐᤠᤗᤠᤶ ᤁᤧᤓᤧᤶᤒᤠ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶ ᤐᤡᤖᤢᤛᤡᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ACT 10:46 ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤔᤧᤒᤠ᤺ᤳᤋᤢᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤒᤠ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤖᤥ॥ ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢᤛᤡ.
ACT 10:47 “ᤁᤴ ᤔᤏᤠᤜᤠ᤹ᤖᤧᤀᤠᤱ ᤛᤣᤛᤣᤔᤠᤱᤅᤡᤴ ᤀᤠᤏᤡ᤹ ᤜᤧᤰᤁᤣᤀᤣ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤁᤴ ᤔᤏᤠᤜᤠ᤹ ᤜᤠ᤺ᤳᤗᤧ ᤒᤵᤋᤡᤛ᤻ᤔᤠ ᤐᤥ᤺ᤱᤔᤠ ᤛᤠᤰᤋᤢᤛᤡᤒᤣ᥅”
ACT 10:48 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤧᤱᤜᤠ᤹ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤡᤔᤠ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤁᤢᤓᤠ ᤕᤧᤴ ᤂᤢᤏᤡ᤹ᤏᤢᤀᤣ ᤘᤠ᤹ᤏᤡ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤔᤧᤓᤠᤰᤋᤢᤖᤥ॥
ACT 11:1 ᤀᤠᤸᤗ ᤕᤜᤢᤍᤡᤕᤠᤀᤥ ᤁᤧᤘᤠ᤹ᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤁᤢᤓᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤔᤧᤍᤠ᤺ᤰᤋᤢ ᤁᤧᤗ᤹ᤒᤠᤴ ᤔᤧᤄᤧᤵᤛᤢᤖᤥ॥
ACT 11:2 ᤜᤧᤰᤁᤩᤠᤱ ᤐᤋᤪᤢᤛᤧᤴ ᤕᤖᤢᤛᤗᤧᤔ ᤏᤢ᤺ᤰᤂᤧᤀᤠᤱ ᤘᤕᤧᤸᤗᤧ ᤁᤢᤓᤠ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤀᤡᤱᤍᤥ ᤔᤧᤔᤧᤳᤋᤢᤖ
ACT 11:3 ᤀᤰᤂᤣᤗ᤹ᤖᤡᤰ ᤔᤧᤔᤧᤳᤋᤢ. “ᤂᤧᤏᤧ᤹ᤃ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤛᤢᤘᤠᤱᤅᤥ ᤋᤖᤣ ᤁᤧᤒᤥ᤺ᤰᤂᤧᤀᤠᤱ ᤁᤧᤈᤖᤥ॥ ᤁᤱᤃ ᤀᤠᤏᤡᤃᤧ ᤛᤠᤰᤌᤡᤶᤖᤧ ᤁᤢᤍᤰᤗᤧᤱᤘᤠᤀᤥ ᤘᤕᤧᤖᤥ॥”
ACT 11:4 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤁᤴ ᤁᤠᤰ ᤐᤥ᤺ᤰᤂᤧᤒᤠ ᤜᤡᤴᤍᤥ᤺ᤰᤜᤠ᤹ ᤌᤧᤵᤌᤧᤵᤐᤠᤱ ᤐᤥᤎᤰ ᤆᤥᤃᤢᤛᤡ–
ACT 11:5 “ᤀᤡᤱᤃᤠ᤹ ᤈᤥᤵᤐᤠ ᤕᤧᤰᤕᤰᤁᤥ ᤋᤢᤘᤠ ᤆᤥ᤺ᤰᤁᤡ ᤘᤕᤠᤱᤅᤡᤸᤗᤧ ᤛᤢᤑᤥᤎᤡᤰ ᤏᤡ᤺ᤛᤢᤱ॥ ᤋᤠᤱᤛᤠᤰᤐᤥᤗᤠᤶ ᤕᤶᤒᤠ ᤋᤣ᤺ᤳ ᤜᤧᤰᤋᤱᤒᤠᤴ ᤗᤡᤛᤡ ᤁᤢᤛᤢᤰᤐᤥ ᤂᤣ᤺ᤱᤔᤏᤠᤒᤠ ᤀᤠᤒᤣᤛᤠᤱ ᤔᤰᤌᤩᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ॥
ACT 11:6 ᤂᤧᤵᤔᤥ ᤀᤡᤰᤛᤠᤀᤥᤒᤠ ᤁᤠᤰ ᤐᤖᤡᤰᤐᤠ ᤆᤠᤔᤠ ᤔᤧᤴᤏᤢ᤹ᤔᤏᤠᤒᤠ ᤁᤧᤛ᤺ᤴᤇᤡᤱᤒᤠ. ᤋᤠᤶᤓᤢᤱ ᤏᤢ ᤜᤡᤶᤌᤰᤛᤠᤜᤠ᤹ ᤜᤧᤰᤁᤩᤠᤱ ᤐᤢᤛᤠᤜᤠ᤹ ᤔᤧᤕᤠᤃᤧᤒᤠ ᤏᤡ᤺ᤛᤢᤱᤛᤡᤱ॥
ACT 11:7 ᤋᤠᤱᤛᤠᤰᤐᤥᤗᤠᤶ ᤀᤡᤰᤗᤠᤎᤡᤰ ᤂᤧᤵᤛᤢᤱ. ‘ᤐᤋᤪᤢᤛᤣ. ᤐᤥᤃᤧ᤹᥄ ᤛᤧᤖᤧᤛᤧ᤹ᤀᤠᤱ ᤆᤧ᤹ᤀᤥ॥’
ACT 11:8 ᤁᤖ ᤀᤡᤱᤃᤠ᤹ ᤏᤥᤃᤵ ᤐᤡᤖᤢᤱ. ‘ᤛᤧᤰᤂᤠᤛᤠᤱ ᤀᤰᤋᤱᤒᤠᤃ ᤀᤡᤱᤃᤠ᤹ ᤔᤧᤈᤠᤀᤠᤴᤗᤥ॥ ᤀᤠᤸᤗᤥ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤶᤒᤠ ᤆᤠ ᤌᤣᤀᤠᤱ ᤔᤧᤴᤈᤠᤀᤣ ᤘᤠ᤹ᤀᤠᤖᤥ॥’
ACT 11:9 ᤕᤠᤶᤔᤥ ᤋᤠᤱᤛᤠᤰᤐᤥᤗᤠᤶ ᤂᤧᤴ ᤀᤡᤰᤗᤠ᤺ᤴ ᤂᤧᤵᤛᤢᤱ. ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤁᤢᤈᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤕᤠᤵᤔᤡ ᤁᤧᤈᤡ᤺ᤶᤒᤠ ᤔᤧᤗᤣ᤺ᤳᤋᤧᤴᤏᤧ᤹ᤀᤥ॥’
ACT 11:10 ᤜᤧᤰᤁᤣᤗ᤹ᤖᤡᤰ ᤛᤢᤶᤗᤧᤱ ᤀᤰᤂᤣ ᤐᤥ᤺ᤰᤂᤧᤀᤠᤱ ᤋᤠᤱᤛᤠᤱ ᤌᤥ ᤂᤧᤴ ᤐᤰᤂᤧ ᤋᤣ᤹ᤖᤧᤒᤠ ᤏᤡ᤺ᤛᤢᤱᤗᤥ॥
ACT 11:11 ᤒᤠ ᤂᤧᤴ ᤕᤧᤶᤔᤥ ᤛᤡᤈᤖᤡᤕᤠᤗᤠᤶ ᤀᤠᤗᤠ᤺ᤛᤧ ᤔᤧᤒᤠᤱᤄᤢᤛᤡᤒᤠ ᤛᤢᤶᤛᤡ ᤔᤏᤠᤜᤠ᤹ ᤀᤡᤱᤃᤠ᤹ ᤕᤠ᤺ᤰᤋᤠᤱᤒᤠ ᤜᤡᤶᤔᤥ ᤔᤧᤃᤧᤖᤧ॥
ACT 11:12 ᤛᤣᤛᤣᤔᤠᤱᤅᤡᤸᤗᤧᤀᤠᤱ ᤔᤧᤳᤋᤠᤱ. ‘ᤌᤡᤶᤔᤧᤴᤍᤱ ᤛᤢᤘᤠᤱᤛᤡᤛᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤂᤧᤱᤜᤠ᤹ᤏᤢ ᤐᤣᤃᤧ᤹ᤀᤥ॥’ ᤂᤧᤵᤔᤥ ᤋᤢᤰᤛᤡ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤀᤡᤱᤃᤠ᤹ᤏᤢ ᤛᤡᤈᤖᤡᤕᤠᤀᤥ ᤔᤧᤒᤣ. ᤜᤧᤰᤁᤩᤠᤱ ᤛᤥᤖᤡᤰ ᤁᤷᤏᤠᤗᤡᤕᤛᤖᤧ ᤁᤢᤜᤡᤶᤔᤥ ᤐᤣ᤺ᤰᤔᤏᤠᤖᤥ॥
ACT 11:13 ᤂᤢᤏᤧ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤔᤠᤱᤗᤠᤀᤡᤱᤒᤠᤴ ᤁᤢᤜᤡᤶᤔᤥ ᤋᤩᤧᤀᤠᤱ ᤂᤢᤏᤧ᤹ ᤔᤧᤳᤋᤢᤒᤠᤴ ᤕᤠᤵᤔᤡ ᤆᤧᤰᤋᤧ. ‘ᤁᤢᤓᤠ ᤔᤏᤠᤜᤠ᤹ ᤈᤥᤵᤐᤠᤀᤥ ᤛᤡᤔᤥᤏ ᤐᤋᤪᤢᤛᤖᤧ ᤁᤢᤗᤠ᤺ᤛᤧ ᤐᤠᤱᤛᤧᤛᤧ᤹ᤀᤥ॥
ACT 11:14 ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠᤰᤁᤡᤸᤗᤧ ᤂᤧᤏᤧ᤹ ᤏᤢ ᤁᤠᤰ ᤁᤧᤜᤡᤶᤛᤕᤱᤜᤠ᤹ᤖᤧ ᤛᤧᤴᤗᤵ ᤁᤧᤄᤥ᤺ᤛᤢᤶᤗᤥ॥’
ACT 11:15 ᤀᤡᤱᤃᤠ᤹ ᤐᤠ᤺ᤵᤔᤠ ᤜᤣ᤺ᤰᤋᤢᤱᤗ ᤐᤳᤇᤠᤱᤅᤡᤸᤗᤧ ᤛᤣᤛᤣᤔᤠᤱᤅᤡᤴ ᤋᤃᤡ ᤀᤠᤏᤡ᤹ ᤛᤶᤍᤠᤱ ᤆᤢᤰᤋᤧᤒᤠ ᤜᤧᤰᤁᤣ ᤂᤧᤱᤜᤠ᤹ ᤛᤶᤍᤠᤱᤅᤠᤱ ᤆᤢᤰᤋᤧᤖᤥ॥
ACT 11:16 ᤜᤧᤰᤁᤩᤠᤱ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱ–‘ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ. ᤁᤖ ᤂᤡᤏᤡ᤹ᤃ ᤛᤣᤛᤣᤔᤠᤱᤅᤡᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡ᤹ᤖᤥ॥’
ACT 11:17 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤀᤠᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤷᤎᤠ᤺ᤶ ᤀᤠᤒᤡᤖᤧᤒᤠ ᤁᤢᤀᤡᤛᤡ᤺ᤰᤁᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶᤔᤠᤱ ᤔᤧᤄᤥ᤺ᤛᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤒᤠᤴ ᤀᤵᤔᤠ ᤁᤧᤛᤢᤰᤐᤠ ᤀᤡᤱᤃᤠ᤹ ᤜᤠ᤺ᤳᤀᤠᤒᤣ᥅”
ACT 11:18 ᤜᤧᤰᤁᤩᤠᤱ ᤂᤧᤴ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤸᤗᤧ ᤂᤢᤏᤧ᤹ᤏᤢ ᤐᤠ᤺ᤴ ᤌᤰᤔᤠ ᤔᤧᤗᤧᤖᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤔᤧᤜᤣ᤺ᤰᤋᤢᤖᤥ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤗᤠᤕᤥᤗᤠᤶ ᤜᤡᤶᤔᤠᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤛᤢᤕᤧᤶ ᤐᤡᤖᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥”
ACT 11:19 ᤀᤠᤸᤗ ᤛ᤻ᤋᤡᤑᤏᤛᤧᤴ ᤔᤧᤛᤧᤖᤢᤀᤠᤱ ᤀᤣᤃᤠᤱ ᤕᤖᤢᤛᤗᤧᤶᤔᤥ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤏᤛᤠᤏᤡᤒᤠᤜᤠ᤹ ᤁᤠᤰ ᤐᤡᤛᤠᤱ ᤔᤧᤛᤧ᤺ᤖᤧᤖ ᤔᤧᤒᤣᤖᤥ॥ ᤁᤢᤓᤠᤃ ᤑᤥᤏᤡᤛᤡᤕᤠ ᤋᤧᤱᤃᤵ. ᤛᤤᤐᤪᤛ ᤘᤠᤃᤵᤂᤠᤶ. ᤏᤢ ᤀᤣᤴᤋᤡᤀᤥᤁ ᤕᤧᤰᤕᤰᤁᤠᤱ ᤔᤧᤃᤧᤖᤧᤖᤥ॥ ᤂᤧᤱᤜᤠ᤹ᤖᤧᤃ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤖᤰ ᤛᤢᤏᤠᤀᤡᤱ ᤀᤡᤱᤔᤧᤓᤥ᤺ᤛᤢᤛᤡᤖᤥ॥
ACT 11:20 ᤁᤖ ᤛᤤᤐᤪᤛ ᤏᤢ ᤛᤠᤀᤡᤖᤣᤏᤡᤒᤠ ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤣᤴᤋᤡᤀᤥᤰᤁᤥ ᤔᤧᤒᤣᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤍᤠᤱᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤔᤧᤈᤥᤃᤢᤛᤡᤖᤥ॥
ACT 11:21 ᤍᤠᤱᤒᤠᤸᤗᤧ ᤁᤢᤔᤢᤰᤛᤠᤶᤔᤡᤴ ᤂᤧᤱᤜᤠ᤹ᤏᤢ ᤘᤕᤧ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤍᤠᤱᤒᤠ ᤗᤧᤵᤔᤠᤱ ᤔᤧᤜᤡᤛᤡᤱᤗᤥ॥
ACT 11:22 ᤁᤴ ᤀᤡᤱᤄᤱᤅᤡᤴ ᤕᤖᤢᤛᤗᤧᤶᤔᤥᤒᤠ ᤛᤣᤛᤣᤜᤢᤵᤗᤰᤁᤥᤀᤠᤱ ᤁᤧᤖᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤒᤖᤏᤠᤒᤠᤛᤧᤴ ᤀᤣᤴᤋᤡᤀᤥᤰᤁᤥ ᤔᤧᤒᤠᤱᤄᤢᤖᤥ॥
ACT 11:23 ᤂᤢᤏᤧ᤹ ᤂᤧᤵᤔᤥ ᤁᤧᤖᤧᤀᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤌᤠ᤺ᤛᤢᤒᤠ ᤏᤡ᤺ᤛᤢ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤛᤠ᤹ᤖᤡᤰᤁᤣ ᤛ᤺ᤳᤋᤧᤀᤠᤱ ᤂᤧᤱᤜᤠ᤹ ᤛᤡᤰᤗᤢᤱᤔᤥᤏᤢ ᤛᤧᤰᤂᤠᤀᤣ ᤍᤠᤱᤒᤠᤀᤥ ᤘᤕᤧᤶᤔᤧ᤹ᤀᤥ ᤑᤠ᤹ᤀᤠᤱ ᤜᤠᤱᤜᤠᤱ ᤔᤧᤳᤋᤢᤛᤡᤖᤥ॥
ACT 11:24 ᤒᤖᤏᤠᤒᤠᤛᤧᤴ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤒᤠ ᤏᤢ ᤏᤛᤠ᤺ᤴᤏᤡᤸᤗᤧ ᤁᤢᤎᤡᤶ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤥᤗᤠᤶ ᤍᤠᤱᤒᤠᤀᤥ ᤔᤧᤍᤩᤧᤖᤥ॥
ACT 11:25 ᤜᤧᤰᤁᤩᤠᤱ ᤒᤖᤏᤠᤒᤠᤛᤧᤴ ᤛᤠᤘᤗᤖᤧ ᤁᤢᤃᤥ᤺ᤳᤇᤧ ᤋᤠᤷᤛᤛ ᤐᤣᤖᤥ॥
ACT 11:26 ᤂᤧᤵᤔᤥ ᤂᤢᤏᤧ᤹ ᤋᤢᤔᤢᤀᤠᤱ ᤀᤣᤴᤋᤡᤀᤥᤰᤁᤥ ᤋᤠᤖᤢ॥ ᤜᤧᤰᤁᤩᤠᤱ ᤋᤱᤒᤣ ᤂᤠᤖᤠᤰ ᤂᤧᤱᤜᤠ᤹ᤖᤧ ᤛᤣᤛᤣᤜᤢᤵᤗᤰᤁᤥ ᤔᤏᤠᤜᤠ᤹ ᤋᤢᤔᤧᤳᤇᤢᤖ ᤕᤖᤡᤰ ᤔᤏᤠᤜᤠ᤹ ᤜᤢ᤹ᤖᤧᤳᤇᤢᤖᤥ॥ (ᤜᤢ᤹ᤛᤠᤶᤒᤠᤜᤠ᤹ ᤀᤣᤴᤋᤡᤀᤥᤰᤁᤥᤀᤣ ᤁᤠᤰᤏᤢ ᤋᤃᤡ ᤂᤪᤡᤛ᤻ᤋᤠᤏᤡᤛᤡ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥)
ACT 11:27 ᤁᤴ ᤕᤧᤶᤔᤥ ᤁᤢᤓᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤕᤖᤢᤛᤗᤧᤶᤗᤠᤶ ᤀᤣᤴᤋᤡᤀᤥᤰᤁᤥ ᤔᤧᤍᤩᤧ॥
ACT 11:28 ᤂᤧᤱᤜᤠ᤹ᤀᤥ ᤌᤡᤰ ᤀᤃᤠᤒᤛ ᤔᤧᤵᤔᤏᤠᤒᤧᤴ ᤐᤥᤃᤧᤀᤠᤱ ᤀᤠᤸᤗ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤐᤕᤶ ᤛᤠᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣᤛᤣᤔᤠᤱᤗᤠᤶ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧᤖᤥ॥ (ᤁᤱᤃ ᤰᤗᤠᤀᤢᤍᤡᤕᤛ ᤜᤠᤱᤅᤡᤸᤗᤧ ᤜᤠᤱ ᤆᤥᤃᤢᤒᤠ ᤕᤧᤶᤔᤥ ᤐᤥ᤺ᤰᤂᤧᤖᤥ॥)
ACT 11:29 ᤀᤣᤴᤋᤡᤀᤥᤰᤁᤥᤒᤠ ᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤕᤜᤢᤍᤡᤕᤠᤀᤥ ᤁᤧᤘᤠ᤹ᤒᤠ ᤁᤠᤰ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤗᤠᤃᤡ ᤂᤢᤏᤡ᤹ ᤛᤢᤰᤛᤢᤰ ᤁᤢᤓᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤍᤱᤄᤢᤖᤥ॥
ACT 11:30 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤁᤢᤓᤠ᤹ ᤕᤠᤱᤅᤡᤴ ᤔᤧᤓᤥ᤺ᤰᤂᤢᤀᤠᤱ ᤒᤖᤏᤠᤒᤠᤛ ᤏᤢ ᤛᤠᤘᤗᤖᤧ ᤂᤢᤴᤇᤡ᤹ ᤜᤢᤰᤗᤠᤶ ᤂᤧᤴ ᤑᤠ᤹ᤕᤠᤱᤅᤡᤴ ᤕᤜᤢᤍᤡᤕᤠᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤜᤠᤰᤋᤢᤛᤡᤖᤥ॥
ACT 12:1 ᤂᤧᤴ ᤕᤧᤶᤔᤥ ᤜᤧᤖᤥᤍ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤁᤥᤒᤠ ᤁᤢᤓᤠ ᤏᤛᤠᤏᤡᤒᤠᤜᤠ᤹ ᤋᤢᤰᤂᤣ ᤆᤠ᤺ᤵᤔᤠ ᤜᤣ᤺ᤰᤋᤢᤛᤡᤀᤠᤱ
ACT 12:2 ᤂᤧᤸᤗᤧ ᤕᤢᤜᤢᤴᤏᤠᤖᤧ ᤁᤢᤶᤓᤢ᤹ ᤕᤠᤁᤢᤒᤧᤴᤏᤠᤱ ᤋᤠᤓᤣ᤺ᤸᤗᤧ ᤛᤧᤵᤔᤠ ᤐᤠᤱᤄᤢᤛᤡᤖᤥ॥
ACT 12:3 ᤜᤧᤰᤁᤩᤠᤱ ᤂᤧᤸᤗᤧ ᤜᤧᤰᤁᤣ ᤆᤥᤃᤢᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤔᤧᤛ᤺ᤳᤋᤧᤒᤠ ᤏᤡ᤺ᤛᤢᤛᤡ. ᤂᤧᤸᤗᤧ ᤆᤥᤃᤢᤸᤗᤧ ᤐᤋᤪᤢᤛᤧᤴᤏᤠᤱ ᤋᤧᤶᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥ ᤁᤴ ᤜᤡᤴᤍᤥ᤺ᤰᤁᤡᤴ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤥ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
ACT 12:4 ᤜᤧᤖᤥᤍᤖᤧ ᤐᤋᤪᤢᤛᤧᤴ ᤋᤧᤶᤔᤠ ᤐᤠᤱᤄᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤢ॥ ᤜᤧᤰᤁᤩᤠᤱ ᤂᤧᤵᤔᤥ ᤌᤡᤰ ᤌᤡᤰ ᤗᤰᤁᤥ ᤗᤡᤛᤡ ᤗᤡᤛᤡ ᤌᤰᤛᤢᤒᤠᤜᤠ᤹ᤖᤧ ᤐᤋᤪᤢᤛᤧᤴ ᤛᤧᤴᤍᤡᤰ ᤗᤧᤴᤍᤡᤰ ᤁᤥᤔᤠ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤂᤧᤴ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤆᤢ᤺ᤳᤋᤠᤱ ᤐᤋᤪᤢᤛᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤠᤛᤧᤴ ᤗᤥ᤺ᤶᤔᤠᤀᤠᤱ ᤂᤢᤶᤍᤡᤱ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤖᤥ॥
ACT 12:5 ᤜᤧᤰᤁᤣᤗ᤹ᤖᤡᤰ ᤐᤋᤪᤢᤛᤧᤴ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤀᤠᤱ ᤘᤕᤧᤸᤗᤧ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤃᤡ ᤆᤰᤔᤧᤸᤗ᤹ᤀᤣ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤁᤡ ᤔᤧᤕᤠᤃᤧᤖᤥ॥
ACT 12:6 ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤐᤋᤪᤢᤛᤧᤴ ᤋᤠ᤺ᤵᤔᤠᤏᤢ᤺ᤸᤗᤧ ᤋᤃᤡᤛ᤻ᤔᤠ ᤛᤧᤴᤍᤡᤰᤁᤥ ᤏᤧᤳᤇᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤧᤳᤇᤡ ᤑᤧᤴᤈᤣ᤹ ᤜᤢᤰᤐᤠ᤺ᤱᤃᤡᤸᤗᤧ ᤀᤡᤔᤧᤄᤣ᤺ᤰᤂᤢᤀᤠᤱ ᤂᤧᤴ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤖᤥ॥ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥᤒᤠ ᤗᤠᤶᤔᤥᤀᤠᤱ ᤌᤰᤛᤢᤒᤠᤜᤠ᤹ ᤗᤠᤶᤃᤥᤀᤡ ᤔᤧᤕᤧᤒᤧᤖᤥ॥
ACT 12:7 ᤂᤡᤔᤥ ᤂᤧᤴ ᤐᤢᤱᤗᤠᤜᤡᤶᤔᤥᤒᤠ ᤕᤠᤰᤑᤠᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤸᤗᤧ ᤌᤥ᤹ᤖᤢᤖ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤴᤏᤠᤱ ᤂᤧᤵᤔᤥ ᤌᤠ᤺ᤴᤇᤡᤱ॥ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤐᤋᤪᤢᤛᤖᤧ ᤁᤢᤓᤰᤋᤠᤱᤅᤥ ᤑᤧᤰᤑᤧᤰ ᤜᤡᤵᤋᤢᤖ ᤑᤥ᤺ᤰᤂᤢᤀᤠᤱ ᤀᤰᤂᤣ ᤔᤧᤳᤋᤢ. “ᤜᤠᤖᤠ ᤐᤥᤃᤧ᤹॥” ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤢᤜᤢᤰᤁᤥ ᤁᤧᤒᤵᤐᤠ ᤑᤧᤴᤈᤣ᤹ ᤜᤢᤰᤐᤠ᤺ᤱᤃᤡᤜᤠ᤹ ᤐᤠ᤺ᤰᤂᤧᤀᤠᤱ ᤔᤰᤌᤩᤧᤖᤥ॥
ACT 12:8 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤑ᤹ᤀᤡ ᤕᤢᤵᤛᤧᤀᤠᤱ ᤗᤠᤱᤛᤢ᤺ᤵᤐᤡᤴ ᤆᤠᤰᤂᤧ᤹॥” ᤐᤋᤪᤢᤛᤖᤧ ᤜᤧᤰᤁᤣ ᤆᤥᤃᤢ. ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤢ. “ᤛᤢᤱᤄᤣ᤺ᤰᤘᤠ᤺ᤴ ᤜᤧᤵᤛᤡᤱᤅᤧ᤹ᤀᤠᤱ ᤋᤡᤶᤍᤠᤱᤅᤧ᤹ᤀᤥ॥”
ACT 12:9 ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧᤀᤠᤱ ᤐᤢᤱᤗᤠᤜᤡᤶᤗᤠᤶ ᤗᤠ᤺ᤰᤁᤠᤳ ᤋᤡᤶᤍᤢᤖᤥ॥ ᤁᤴ ᤔᤠᤱᤗᤠᤀᤡᤱᤒᤠᤸᤗᤧ ᤋᤠᤍᤡᤃᤧᤴ ᤛᤧᤵᤔᤠᤱᤅᤥ ᤆᤥᤃᤢᤒᤠᤒᤡ ᤀᤡ ᤕᤠᤰᤌᤢᤱᤎᤥᤀᤥ ᤆᤥᤃᤢᤒᤠᤒᤡ ᤑᤠ᤹ᤀᤠᤱ ᤂᤢᤏᤧ᤹ ᤌᤣᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤴᤗᤥ॥ ᤂᤢᤏᤧ᤹ᤃ ᤛᤢᤑᤥᤏᤧ ᤏᤡ᤺ᤛᤢᤱᤒᤠᤒᤡ ᤗ᤹ᤖᤧᤖᤥ॥
ACT 12:10 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣ᤺ᤰᤛ᤻ᤔᤠ ᤏᤢ ᤏᤡᤛᤡᤃᤣ᤺ᤰᤛ᤻ᤔᤠ ᤗᤠᤶ ᤁᤧᤃᤥ᤺ᤒᤠ ᤌᤰᤛᤢᤒᤠ ᤕᤧᤵᤏᤠ᤺ᤴ ᤁᤠ᤺ᤰᤋᤧᤳᤇᤢᤀᤠᤱ ᤕᤧᤰᤕᤰᤁᤥ ᤗᤠ᤺ᤵᤔᤠ ᤑᤧᤴᤈᤣ᤹ ᤗᤠᤶᤎᤣ᤺ᤵᤐᤥ ᤁᤧᤖᤧᤳᤇᤡ॥ ᤂᤧᤴ ᤗᤠᤶᤎᤣ᤺ᤵᤐᤡᤴᤏᤠᤱ ᤂᤢᤴᤇᤡ᤹ ᤗᤠᤃᤡ ᤀᤠᤒᤠᤅᤣ ᤜᤴᤇᤡᤱ. ᤜᤧᤰᤁᤩᤠᤱ ᤏᤧᤵᤔᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤳᤇᤡᤖᤥ॥ ᤂᤧᤱᤜᤠ᤹ ᤕᤧᤰᤕᤰᤁᤥᤒᤠ ᤔᤠᤖᤠᤶᤔᤥ ᤗ᤺ᤴᤍᤧᤳᤇᤡᤀᤠᤱ ᤗᤠᤱᤄᤣ᤺ᤃᤧᤳᤇᤡᤖ ᤐᤳᤇᤧᤳᤇᤡᤸᤗᤧᤀᤣ ᤔᤠᤱᤗᤠᤀᤡᤱᤒᤠᤸᤗᤧ ᤂᤡᤔᤥ ᤐᤋᤪᤢᤛᤧᤴ ᤗᤧᤖᤢᤎ॥
ACT 12:11 ᤜᤧᤰᤁᤩᤠᤱ ᤐᤋᤪᤢᤛᤖᤧ ᤁᤴ ᤛᤧᤰᤂᤠᤀᤣ ᤐᤥ᤺ᤰᤂᤧᤒᤠᤖᤥ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤀᤰᤂᤣ ᤔᤧᤳᤇᤡᤱ. “ᤁᤴ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥ ᤍᤠᤱᤒᤠᤸᤗᤧ ᤂᤢᤏᤧ᤹ ᤁᤢᤔᤠᤱᤗᤠᤀᤡᤱᤒᤠᤴ ᤐᤠᤱᤄᤢᤀᤠᤱ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤏᤢ ᤜᤧᤖᤥᤍᤗᤠᤶ ᤀᤡᤱᤃᤠ᤹ ᤛᤧ᤺ᤵᤋᤠᤱᤗᤥ॥”
ACT 12:12 ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤕᤢᤜᤢᤴᤏᤠ ᤔᤷᤁᤢᤛᤖᤧ ᤁᤢᤶᤔᤠ ᤔᤖᤡᤕᤔᤖᤧ ᤁᤢᤜᤡᤶᤔᤥ ᤐᤣ॥ ᤂᤧᤵᤔᤥ ᤕᤖᤡᤰ ᤏᤛᤠᤏᤡᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤋᤢᤘᤠ ᤆᤥ᤺ᤰᤁᤡ ᤔᤧᤕᤠᤃᤧᤖᤥ॥
ACT 12:13 ᤐᤋᤪᤢᤛᤖᤧ ᤗᤠᤶᤎᤣ᤺ᤵᤐᤡᤴ ᤗᤠ᤺ᤰᤁᤠᤳᤗᤠᤶ ᤂᤠᤰᤂᤢ ᤜᤧᤰᤁᤩᤠᤱ ᤖᤥᤍᤠ ᤔᤧᤵᤔᤏᤠᤔᤠ ᤛᤣᤘᤠᤖᤥᤔᤠᤴ ᤀᤥᤔᤧᤳᤇᤧ ᤑᤧᤖᤧ॥
ACT 12:14 ᤂᤧᤸᤗᤧ ᤐᤋᤪᤢᤛᤖᤧ ᤁᤢᤀᤡᤰᤗᤠ᤺ᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤗᤠᤶᤎᤣ᤺ᤵᤐᤡᤴ ᤔᤧᤴᤜᤴᤏᤣ ᤛ᤺ᤳᤋᤧᤖ ᤗᤥ᤺ᤰᤋᤧ ᤐᤣᤀᤠᤱ “ᤐᤋᤪᤢᤛᤧᤴ ᤗᤠ᤺ᤰᤁᤠᤳ ᤋᤩᤧᤀᤠᤱ ᤕᤧᤵᤗᤥ” ᤔᤧᤳᤋᤢᤛᤡᤖᤥ॥
ACT 12:15 ᤂᤧᤱᤜᤠ᤹ᤖᤧ “ᤂᤧᤏᤧ᤹ᤃ ᤁᤧᤏᤠᤰᤂᤧᤒᤡ ᤌᤣ᤺ᤴᤒᤣ” ᤔᤧᤔᤧᤳᤋᤢᤖᤥ॥ ᤂᤧᤸᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ ᤗ᤹ᤖᤡᤰ ᤜᤠᤍᤡᤱ ᤌᤰᤋᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤂᤧᤱᤃ ᤐᤋᤪᤢᤛᤧᤴ ᤁᤶᤒᤪᤠᤱ ᤁᤧᤔᤧᤵᤐᤠ ᤔᤠᤱᤗᤠᤀᤡᤱᤒᤠᤴ ᤗᤠ᤹ᤒᤣ᥄”
ACT 12:16 ᤁᤖ ᤐᤋᤪᤢᤛᤖᤧ ᤆᤰᤔᤧᤸᤗ᤹ᤀᤣ ᤗᤠᤶᤎᤣ᤺ᤵᤐᤧᤴ ᤂᤠᤰᤂᤢᤖᤥ॥ ᤕᤠᤱᤛᤡ ᤂᤧᤱᤜᤠ᤹ ᤔᤧᤒᤣᤀᤠᤱ ᤗᤠᤶᤎᤣ᤺ᤵᤐᤧᤴ ᤔᤧᤜᤴᤍᤢᤸᤗᤧ ᤂᤢᤏᤧ᤹ ᤛᤧᤰᤂᤠᤀᤣ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥
ACT 12:17 ᤐᤋᤪᤢᤛᤖᤧ ᤂᤧᤱᤜᤠ᤹ ᤜᤢᤰᤆᤠ᤺ᤸᤁᤡ᤺ᤸᤗᤧ ᤛᤫᤠ᤺ᤳ ᤆᤥᤃᤢᤛᤡᤀᤠᤱ ᤀᤠᤰᤂᤣᤗ᤹ᤖᤡᤰ ᤍᤠᤱᤒᤧᤸᤗᤧ ᤂᤢᤏᤧ᤹ ᤐᤢᤱᤗᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤐᤥᤎᤰᤋᤢᤛᤡᤖᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤠᤏᤡ᤹ ᤗᤠᤶᤗᤥ᤺ᤒᤠ ᤕᤠᤁᤢᤒ ᤏᤢ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤔᤧᤳᤋᤧᤶᤛᤡᤶᤔᤧ᤹ ᤗ᤹ᤖᤡᤰ ᤔᤧᤳᤋᤢᤛᤡᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤘᤣ᤹ᤛ᤻ᤔᤠ ᤋᤧᤴᤏᤥ ᤐᤣᤖᤥ॥
ACT 12:18 ᤜᤧᤰᤁᤩᤠᤱ ᤁᤢᤏᤠᤶᤍᤠ᤺ᤵᤔᤠ ᤂᤠᤀᤥ᤺ᤳᤋᤧᤀᤠᤱ ᤐᤋᤪᤢᤛᤧᤴ ᤌᤧᤔᤠ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤂᤧᤴ ᤐᤢᤱᤗᤠᤜᤡᤶ ᤁᤧᤃᤥ᤺ᤒᤠ ᤌᤰᤛᤢᤒᤠ ᤗᤢᤶᤔᤥ ᤕᤶᤒᤠ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤖᤥ॥
ACT 12:19 ᤂᤧᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤜᤧᤖᤥᤍᤖᤧ ᤌᤰᤛᤢᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤥᤃᤵ ᤐᤡᤔᤠ ᤔᤧᤴᤇᤢᤰᤋᤢᤴ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤧᤵᤔᤠ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤜᤧᤖᤥᤍᤧᤏ ᤕᤜᤢᤍᤡᤕᤠᤗᤠᤶ ᤛᤡᤈᤖᤡᤕᤠ ᤕᤧᤰᤕᤰᤁᤥ ᤁᤢᤓᤠ ᤕᤧᤴ ᤘᤠ᤹ᤛᤧ ᤐᤣᤖᤥ॥
ACT 12:20 ᤂᤧᤴ ᤕᤧᤶᤔᤥ ᤜᤧᤖᤥᤍ ᤜᤠᤱᤅᤡᤸᤗᤧ ᤋᤠᤕᤖ ᤏᤢ ᤛᤡᤍᤥᤏᤛ᤻ᤔᤠ ᤔᤏᤠᤜᤠ᤹ᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤘᤕᤧ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤜᤧᤖᤥᤍ ᤜᤠᤱᤅᤡᤴᤏᤢ ᤏᤠᤍᤱ ᤆᤥ᤺ᤰᤛᤧ ᤁᤢᤍᤢᤶᤛᤧ ᤔᤧᤒᤣ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤆᤠᤔᤠ ᤌᤢᤱᤔᤠᤜᤠ᤹ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ᤀᤥᤗᤠᤶ ᤔᤧᤍᤠᤖᤢᤖ ᤔᤧᤘᤕᤧ ᤁᤖ ᤜᤠᤱᤅᤡᤸᤗᤧ ᤂᤧᤴ ᤆᤠᤔᤠ ᤌᤢᤱᤔᤠ ᤁᤧᤍᤠ᤺ᤒᤠ ᤗᤠᤶᤔᤡᤴ ᤛᤠᤰᤔᤠ ᤐᤠᤱᤄᤢᤛᤡᤀᤠᤱ ᤘᤕᤧᤖᤥ॥ ᤁᤠᤰᤏᤢ ᤋᤃᤡ ᤜᤠᤱ ᤜᤡᤶᤔᤥᤒᤠ ᤒᤠᤗᤠᤛ᤻ᤋᤛ ᤔᤧᤵᤔᤏᤠᤒᤠ ᤏᤛᤠ᤺ᤴᤛᤠᤒᤠ ᤔᤏᤠ᤺ᤴ ᤜᤢᤰᤁᤥ ᤔᤧᤍᤠᤖᤢᤀᤠᤱ ᤜᤠᤱᤅᤡᤴᤏᤢ ᤋᤠ᤹ᤈᤧᤱᤔᤠ ᤕᤧᤶ ᤔᤧᤄᤥ᤺ᤛᤢᤖᤥ॥
ACT 12:21 ᤜᤧᤰᤁᤩᤠᤱ ᤂᤧᤴ ᤋᤢᤶᤔᤠ ᤕᤧᤴᤏᤥ ᤜᤧᤖᤥᤍ ᤜᤠᤱᤅᤡᤸᤗᤧ ᤜᤠᤱᤍᤣ᤺ᤳᤋᤡᤴ ᤆᤠᤰᤂᤢᤀᤠᤱ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱᤅᤠᤱ ᤔᤏᤠᤜᤠ᤹ ᤀᤢᤘᤠ ᤆᤥᤃᤢᤛᤡᤖᤥ॥
ACT 12:22 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤁᤴ ᤁᤧᤒᤠ᤺ᤵᤐᤧᤴ ᤔᤠᤱᤗᤥ. ᤔᤧᤴᤇᤠᤶᤃᤧᤴ ᤕᤠᤵᤔᤡᤃ ᤔᤧ᤺ᤴᤗᤥ ᤗ᤹ᤖᤡᤰ ᤔᤧᤀ᤺ᤰᤋᤧᤖᤥ॥
ACT 12:23 ᤂᤡᤔᤥ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤠᤱᤗᤠᤀᤡᤱᤒᤠᤸᤗᤧ ᤜᤧᤖᤥᤍ ᤜᤠᤱᤅᤡᤴ ᤕ᤹ᤎᤧᤳᤋᤢᤖ ᤕᤠ᤺ᤴᤍᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤴᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤛᤩᤥ᤺ᤱ ᤛᤩᤥ᤺ᤱ ᤗ᤹ᤖᤡᤰ ᤑᤣ᤹ᤒᤠ᤺ᤳ ᤌᤩᤧᤀᤠᤱ ᤛᤩᤧᤖᤥ॥
ACT 12:24 ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤆᤰᤔᤧᤸᤗ᤹ᤀᤣ ᤛᤧ᤺ᤖᤧᤀᤠᤱ ᤐᤥᤖᤧᤖ ᤐᤣᤖᤥ॥
ACT 12:25 ᤒᤖᤏᤠᤒᤠᤛ ᤏᤢ ᤛᤠᤘᤗᤖᤧᤀᤠᤱ ᤕᤖᤢᤛᤗᤧᤶᤔᤥ ᤑᤠ᤹ᤕᤠᤱ ᤛᤧᤎᤩᤧᤳᤇᤢᤀᤠᤱ ᤀᤣᤴᤋᤡᤀᤥᤰᤁᤥ ᤏᤢ᤺ᤰᤂᤧᤳᤇᤡ ᤋᤩᤧᤳᤇᤡᤖᤥ॥ ᤂᤢᤴᤇᤡ᤹ᤏᤢᤀᤣ ᤕᤢᤜᤢᤴᤏᤠ ᤔᤷᤁᤢᤛᤧᤴᤏᤠᤱ ᤋᤠᤖᤧᤳᤇᤢᤖᤥ॥
ACT 13:1 ᤀᤣᤴᤋᤡᤀᤥᤁᤛ᤻ᤔᤠ ᤛᤣᤛᤣᤜᤢᤵᤗᤰᤁᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤡᤰᤛᤠᤶᤒᤠᤜᤠ᤹ ᤔᤧᤘᤕᤧ–ᤒᤖᤏᤠᤒᤠᤛ. ᤔᤠᤰᤗᤠ ᤔᤧᤵᤔᤏᤠᤒᤠ ᤛᤡᤔᤡᤕᤥᤏ. ᤛᤠᤀᤡᤖᤣᤏᤡᤗᤠᤶ ᤁᤧᤍᤠ᤺ᤒᤠ ᤗᤢᤛᤡᤕᤛ. ᤛᤢᤜᤠᤱᤃᤧᤶᤒᤠ ᤜᤧᤖᤥᤍᤧᤴᤏᤢ ᤁᤧᤒᤥ᤺ᤒᤠ ᤔᤠᤏᤧᤏ ᤜᤧᤰᤁᤩᤠᤱ ᤛᤠᤘᤗ ᤘᤕᤧᤖᤥ॥
ACT 13:2 ᤌᤡᤰᤕᤧᤴ ᤂᤧᤱᤜᤠ᤹ᤖᤧ ᤆᤠ᤺ᤏᤧᤳᤋᤥ ᤔᤧᤕᤢᤅᤧᤖ ᤍᤠᤱᤒᤠᤸᤗᤧᤴ ᤛᤣᤘᤠ ᤔᤧᤈᤥᤃᤢᤖ ᤔᤧᤘᤕᤧᤸᤗᤧ ᤛᤣᤛᤣᤔᤠᤱᤅᤡᤴ ᤂᤧᤱᤜᤠ᤹ᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤒᤖᤏᤠᤒᤠᤛ ᤏᤢ ᤛᤠᤘᤗᤧᤴ ᤀᤡᤱᤃᤠ᤹ ᤀᤠᤗᤠᤃᤡ ᤛᤧᤴᤍᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ᤃ ᤀᤡᤱᤃᤠ᤹ ᤀᤠᤕᤠ᤺ᤶᤒᤰ ᤆᤥ᤺ᤰᤛᤧ ᤀᤢ᤺ᤳᤋᤢᤱᤛᤡᤱᤅᤠᤱ ᤘᤠ᤹ᤛᤡᤖᤥ॥”
ACT 13:3 ᤜᤧᤰᤁᤣ᤺ᤸᤗᤧ ᤕᤠᤶᤔᤥ ᤂᤧᤱᤜᤠ᤹ᤖᤧ ᤆᤠ᤺ᤏᤧᤳᤋᤥ ᤔᤧᤕᤢᤅᤧᤀᤠᤱ ᤋᤢᤘᤠ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤢᤏᤡ᤹ ᤜᤢᤰᤜᤠ᤹ ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤢᤴᤇᤡ᤹ ᤛᤶᤍᤠᤱ ᤔᤧᤏᤧᤛ᤻ᤛᤢᤀᤠᤱ ᤋᤢᤘᤠ ᤔᤧᤈᤥᤃᤢ ᤜᤧᤰᤁᤩᤠᤱ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤛᤡᤖᤥ॥
ACT 13:4 ᤒᤖᤏᤠᤒᤠᤛ ᤏᤢ ᤛᤠᤘᤗᤧᤴ ᤛᤣᤛᤣᤔᤠᤱᤅᤡᤸᤗᤧ ᤐᤠᤱᤄᤢᤛᤡᤀᤠᤱ ᤛᤡᤗᤢᤁᤡᤕᤠ ᤕᤧᤰᤕᤰᤁᤥ ᤐᤣᤛᤡ॥ ᤂᤧᤵᤔᤥᤏᤢ ᤘᤠᤗᤠᤎᤠᤗᤠᤶ ᤛᤤᤐᤪᤛ ᤘᤠᤃᤵᤗᤠᤈᤣ᤹ᤀᤥ ᤐᤣᤛᤡᤖᤥ॥
ACT 13:5 ᤜᤧᤰᤁᤩᤠᤱ ᤛᤠᤗᤠᤔᤡᤛ ᤐᤠᤱᤈᤢᤶᤔᤥ ᤁᤧᤖᤧᤳᤇᤡᤀᤠᤱ ᤂᤧᤵᤔᤥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤀᤡᤱᤓᤴ ᤆᤥᤃᤧᤛᤢᤖᤥ॥ ᤂᤧᤱᤜᤠ᤹ᤏᤢ ᤁᤢᤓᤠ᤹ ᤁᤧᤒᤡᤒᤠ ᤕᤢᤜᤢᤴᤏᤠ ᤔᤷᤁᤢᤛᤧᤴᤏᤠᤱ ᤘᤕᤧᤖᤥ॥
ACT 13:6 ᤂᤧᤱᤜᤠ᤹ ᤐᤠᤑᤥᤛ ᤕᤧᤰᤕᤰᤁᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤘᤠᤃᤵᤗᤠᤈᤣ᤹ ᤂᤠᤖᤠᤰ ᤗᤠᤶᤍᤡ᤺ᤰ ᤔᤧᤈᤥᤃᤧ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤌᤡᤰ ᤕᤜᤢᤍᤡ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤒᤠᤖ-ᤕᤧᤛᤢ ᤔᤧᤵᤔᤏᤠᤒᤠ ᤁᤡᤆ᤻ᤆᤠᤰᤁᤡᤴ ᤔᤧᤍᤢᤔᤢ॥
ACT 13:7 ᤂᤧᤸᤗᤧ ᤁᤢᤴᤍᤣ᤺ᤱᤒᤠᤴ ᤂᤧᤴ ᤘᤠᤃᤵᤗᤠᤈᤣ᤹ᤀᤥᤒᤠ ᤛᤢᤜᤠᤱᤃᤧᤶᤒᤠ ᤛᤷᤃᤡᤕᤛ ᤐᤦᤗᤢᤛᤧᤴ ᤘᤕᤧᤀᤠᤱ ᤛᤥᤖᤡᤰ ᤂᤧᤴ ᤂᤢᤏᤧ᤹ᤏᤢ ᤋᤠᤰᤁᤴᤍᤧᤖᤥ॥ ᤛᤷᤃᤡᤕᤛ ᤐᤦᤗᤢᤛᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤛᤠᤒᤠ ᤘᤕᤧ॥ ᤂᤧᤸᤗᤧ ᤒᤖᤏᤠᤒᤠᤛ ᤏᤢ ᤛᤠᤘᤗᤧᤴ ᤀᤢ᤺ᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤧᤶᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥
ACT 13:8 ᤁᤖ ᤂᤧᤴ ᤁᤡᤳᤆᤠᤰ ᤀᤡᤗᤢᤔᤠᤛᤧᤴ (ᤃᤪᤡᤁ ᤐᤠ᤺ᤴᤍᤠᤱᤅᤥ ᤂᤧᤸᤗᤧ ᤁᤢᤔᤡᤱᤅᤡᤸᤗᤧ ᤁᤢᤒᤣ᤺ᤴ ᤁᤡᤳᤆᤠᤰ ᤐᤥ᤺ᤱᤗᤥ) ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤛᤢᤜᤠᤱᤃᤧᤶᤒᤠ ᤛᤷᤃᤡᤕᤛ ᤐᤦᤗᤢᤛᤧᤴ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰ ᤔᤧᤶᤒᤠᤱᤔᤠ ᤋᤶᤛᤡᤴ ᤆᤥᤃᤢᤀᤠᤱ ᤂᤧᤱᤜᤠ᤹ ᤀᤳᤋᤢᤛᤡᤖᤥ॥
ACT 13:9 ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤛᤠᤘᤗᤖᤧ (ᤂᤧᤸᤗᤧ ᤁᤢᤔᤡᤱ ᤐᤠᤘᤗᤀᤠᤱ ᤘᤕᤧᤖᤥ) ᤂᤧᤴ ᤀᤡᤗᤢᤔᤠᤛᤧᤴ ᤀᤍᤰᤋᤰᤁᤠᤱ ᤀᤥᤔᤧᤳᤋᤢᤖ ᤔᤧᤳᤋᤢ.
ACT 13:10 “ᤂᤧᤏᤧ᤹ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤛ᤻ᤛᤠ᤺ᤀᤣ. ᤁᤠᤰ ᤛᤠᤶᤕᤥᤏᤡᤔᤠᤸᤗᤧ ᤁᤢᤏᤡᤱᤔᤡᤀᤣ. ᤂᤧᤏᤧ᤹ᤃ ᤁᤠᤰ ᤀᤡᤱᤗᤧᤰ ᤏᤢ ᤑᤧᤴ ᤕᤠ᤺ᤶᤒᤰᤗᤧ ᤁᤢᤎᤡᤶ ᤁᤧᤘᤠ᤹ᤖᤥ॥ ᤂᤧᤏᤧ᤹ ᤍᤠᤱᤒᤠᤸᤗᤧ ᤋᤥ᤺ᤴᤍᤥ᤺ᤶᤒᤠ ᤁᤢᤗᤠᤶᤔᤡᤴ ᤐᤧᤃᤧᤰ-ᤘᤃᤧᤰ ᤆᤥ᤺ᤰᤔᤠ ᤗᤧᤖᤧ᤹᥄
ACT 13:11 ᤍᤠᤱᤒᤠᤸᤗᤧ ᤂᤢᤶᤍᤡᤱ ᤁᤧᤒᤡ᤹ᤀᤠᤱ ᤀᤠᤸᤗ ᤂᤠᤏᤡ᤺ᤔᤠ ᤔᤧᤴᤇᤢᤰᤔᤏᤠᤒᤠ ᤁᤧᤒᤥ᤺ᤱᤅᤠᤱ ᤁᤢᤓᤠ ᤕᤧᤶ ᤌᤠᤖᤡᤰ ᤂᤧᤏᤧ᤹ᤃ ᤏᤠᤶᤔᤡᤴᤏᤠᤱ ᤏᤡ᤺ᤔᤠ ᤁᤧᤴᤇᤢᤰᤋᤢᤴᤗᤥ॥” ᤂᤡᤔᤥ ᤀᤡᤗᤢᤔᤠᤛᤖᤧ ᤁᤢᤔᤡᤰᤁᤥ ᤂᤠᤶᤍ᤺ᤶᤒᤠᤸᤗᤧ ᤋᤧᤵᤋᤢᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤌᤣᤀᤠᤱ ᤏᤡ᤺ᤔᤠ ᤔᤧᤛᤢᤰᤋᤢᤴᤗᤥ॥ ᤂᤢᤏᤧ᤹ᤃ ᤁᤢᤓᤠᤖᤧ ᤔᤧᤍᤧᤶᤔᤠᤀᤠᤱ ᤔᤧᤀᤢ᤺ᤱᤅᤠᤏᤡ ᤑᤠ᤹ᤀᤠᤱ ᤛᤵᤛᤢᤖ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧᤖᤥ॥
ACT 13:12 ᤛᤢᤜᤠᤱᤃᤧᤶᤒᤠᤸᤗᤧ ᤁᤴ ᤜᤡᤴᤍᤥ᤺ᤰᤁᤡᤴ ᤏᤡ᤺ᤛᤢᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤍᤠᤱᤒᤧᤸᤗᤧ ᤁᤢᤏᤡᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤏᤡᤱᤘᤠ᤹ ᤔᤕᤧᤖᤥ॥
ACT 13:13 ᤂᤧᤴ ᤕᤠᤱᤛᤡ ᤐᤠᤘᤗ ᤏᤢ ᤁᤢᤴᤈᤢᤶᤜᤠ᤹ ᤐᤠᤑᤥᤛᤗᤠᤶ ᤐᤠᤶᤑᤡᤗᤡᤕᤠ ᤌᤢᤶᤔᤥᤒᤠ ᤐᤷᤃᤠᤀᤥ ᤘᤠᤗᤠᤶᤍᤡ᤺ᤰ ᤔᤧᤈᤥᤃᤢ. ᤁᤖ ᤕᤢᤜᤢᤴᤏᤠ ᤔᤷᤁᤢᤛᤖᤧ ᤂᤧᤱᤜᤠ᤹ ᤂᤧᤵᤔᤥ ᤐᤰᤌᤛᤡᤀᤠᤱ ᤕᤖᤢᤛᤗᤧᤶᤔᤥ ᤏᤢ᤺ᤰᤂᤧ ᤐᤣᤖᤥ॥
ACT 13:14 ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤐᤷᤃᤠᤗᤠᤶ ᤐᤡᤛᤡᤍᤡᤕᤠ ᤌᤢᤶᤔᤥᤒᤠ ᤀᤣᤴᤋᤡᤀᤥᤁ ᤕᤧᤰᤕᤰᤁᤥ ᤐᤣᤛᤡ॥ ᤜᤧᤰᤁᤩᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤂᤧᤱᤜᤠ᤹ ᤐᤣᤛᤡᤀᤠᤱ ᤕᤢᤱᤏᤧᤇᤡᤖᤥ॥
ACT 13:15 ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤐᤴᤗᤠᤶ ᤔᤧᤏᤡ᤺ᤖᤢ ᤔᤧᤛᤢᤖᤢᤀᤠᤱ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤀᤠᤏᤡᤃᤧ ᤔᤏᤠᤜᤠ᤹ ᤜᤠᤱᤜᤠᤱ ᤔᤧᤵᤔᤠᤛᤡ ᤀᤡᤱᤄᤱ ᤁᤧᤃᤳᤇᤢᤏᤧ ᤑᤠ᤹ᤃᤪ ᤐᤠ᤺ᤳᤋᤧᤛᤧ᤹ᤀᤥ॥”
ACT 13:16 ᤐᤠᤘᤗᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤜᤢᤰᤆᤠ᤺ᤸᤁᤡ ᤆᤥᤃᤢᤖ ᤐᤠ᤺ᤵᤔᤠ ᤜᤣ᤺ᤰᤋᤧ. “ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤠᤛᤣ. ᤀᤠᤄᤧᤵᤛᤧᤶᤔᤧ᤹ᤀᤥ᥄
ACT 13:17 ᤁᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤐᤠᤎᤧᤒᤠ ᤛᤢᤎᤧᤒᤠᤜᤠ᤹ ᤛᤣᤃᤢᤛᤡᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤔᤠ᤺ᤱᤄᤠᤒᤠ ᤗᤠᤈᤣ᤹ᤛᤠᤒᤠ ᤜᤧᤰᤁᤣ ᤔᤧᤘᤕᤧᤸᤗᤧ ᤕᤶᤒᤠ ᤛᤢᤘᤠᤱ ᤆᤥᤃᤢᤛᤡᤖᤥ॥ ᤜᤧᤰᤁᤩᤠᤱ ᤐᤕᤶ ᤔᤢᤰᤛᤠᤶᤏᤢ ᤂᤧᤴ ᤗᤠᤈᤣ᤹ᤀᤥᤏᤢ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ
ACT 13:18 ᤀᤣ᤺ᤰᤛᤠᤍᤧᤴᤏᤥ ᤋᤱᤒᤣ ᤗᤡᤒᤥ᤺ᤱ ᤌᤠᤖᤡᤰ ᤂᤧᤱᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥
ACT 13:19 ᤜᤧᤰᤁᤩᤠᤱ ᤂᤢᤏᤧ᤹ᤃ ᤁᤏᤠᤏ ᤗᤠᤈᤣ᤹ᤛ᤻ᤔᤠ ᤏᤢᤛᤡ ᤛᤢᤘᤠᤱᤜᤠ᤹ ᤔᤧᤰᤂᤢᤛᤡᤀᤠᤱ ᤂᤧᤴ ᤗᤠᤈᤣ᤹ᤀᤥ ᤁᤢᤔᤏᤠᤜᤠ᤹ ᤕᤢᤰᤍᤠᤱᤒᤠ ᤆᤥᤃᤢᤛᤡᤀᤠᤱ
ACT 13:20 ᤋᤱᤒᤣ ᤁᤢᤃᤡᤵ ᤗᤡᤛᤡᤀᤠᤱ ᤁᤢᤓᤪᤧ᤺ᤱ (᥊᥋᥆) ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤡᤴ ᤔᤧᤕᤢᤰᤋᤢᤖᤥ॥ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤛᤠᤔᤢᤀᤧᤗ ᤌᤠᤖᤡᤰ ᤂᤠᤛᤧᤴᤕᤢᤰᤐᤠᤜᤠ᤹ ᤐᤡᤖᤢᤛᤡᤖᤥ॥
ACT 13:21 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤠᤱ ᤔᤧᤏᤠ᤺ᤰᤋᤢᤸᤗᤧ ᤂᤢᤏᤧ᤹ ᤒᤧᤴᤈᤠᤔᤡᤏ ᤛᤢᤘᤠᤱᤛ᤻ᤔᤠ ᤁᤡᤛᤖᤧ ᤁᤢᤛ᤻ᤛᤠ᤺ ᤛᤠᤘᤗᤧᤴ ᤐᤡᤖᤢᤛᤡᤀᤠᤱ ᤂᤧᤸᤗᤧ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤜᤠᤱ ᤆᤥᤃᤢᤖᤥ॥
ACT 13:22 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤜᤠᤱᤕᤢᤰᤗᤠᤶ ᤂᤧᤳᤋᤢᤀᤠᤱ ᤍᤠᤀᤢᤍᤧᤴ ᤜᤠᤱ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. ‘ᤕᤡᤛᤤᤖᤧ ᤁᤢᤛ᤻ᤛᤠ᤺ ᤍᤠᤀᤢᤍᤧᤱᤃ ᤀᤠᤏᤡᤱᤘᤠ᤹ ᤜᤧᤰᤁᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠᤖᤥ॥’
ACT 13:23 ᤒᤠ ᤁᤴ ᤔᤧᤴᤇᤠᤶ ᤌᤠ᤺ᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤛᤡᤒᤠ ᤁᤢᤀᤡᤛᤡ᤺ᤰ ᤛᤧᤴᤗᤵᤍᤠᤱᤒᤠ ᤕᤧᤛᤢ᤺ᤴ ᤀᤠᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤐᤠᤱᤄᤢᤖᤥ॥
ACT 13:24 ᤕᤧᤛᤢᤖᤧ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴ ᤜᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤕᤢᤜᤢᤴᤏᤠᤖᤧ ᤀᤡᤛᤪᤠᤀᤡᤗᤛ᤻ᤔᤠ ᤁᤠᤰ ᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤏᤠᤱ ᤒᤵᤋᤡᤛ᤻ᤔᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤡᤱᤓᤥ᤺ᤛᤢᤛᤡᤖᤥ॥
ACT 13:25 ᤜᤧᤰᤁᤩᤠᤱ ᤕᤢᤜᤢᤴᤏᤠᤖᤧ ᤂᤢᤏᤧ᤹ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴ ᤛᤢ᤺ᤵᤔᤠ ᤀᤡ᤺ᤳᤋᤢᤸᤗᤧ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤀᤡ᤺ᤳᤋᤡᤒᤣ᥅ ᤀᤡᤱᤃᤠ᤹ᤃ ᤂᤡᤏᤡ᤹ ᤁᤧᤜᤠᤱᤄᤢᤶᤒᤠ ᤔᤏᤠ᤺ᤱᤃ ᤔᤧ᤺ᤴᤏᤠᤖᤥ. ᤂᤢᤏᤧ᤹ᤃ ᤀᤡᤱᤃᤠ᤹ᤏᤢ᤺ᤸᤗᤧ ᤕᤠᤱᤛᤡ ᤋᤠ᤺ᤖᤥ॥ ᤂᤢᤏᤧ᤹ ᤁᤢᤗᤠᤱᤛᤢ᤺ᤵᤐᤡᤸᤗᤧ ᤁᤢᤏᤠᤶᤜᤠ᤹ᤀᤠᤱ ᤑᤠ᤺ᤱᤔᤠ ᤔᤧᤗᤠ᤹ᤀᤠᤴᤗᤥ॥’
ACT 13:26 ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤠᤛᤣ. ᤀᤠᤏᤡ᤹ᤀᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱᤄᤱᤅᤡᤴ ᤐᤠᤱᤄᤢᤀᤠᤱ ᤘᤠ᤹ᤖᤥ॥
ACT 13:27 ᤁᤴ ᤕᤖᤢᤛᤗᤧᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤏᤢ ᤂᤢᤏᤡ᤹ ᤗᤠᤶᤗᤥ᤺ᤒᤠᤜᤠ᤹ᤖᤧ ᤕᤧᤛᤢ᤺ᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤁᤖ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤸᤗᤧ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤔᤧᤏᤡ᤺ᤖᤢᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤁᤧᤖᤧᤒᤠᤖᤥ॥
ACT 13:28 ᤜᤧᤰᤁᤩᤠᤱ ᤂᤢᤏᤧ᤹ᤃ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤌᤧᤔᤠ ᤀᤠᤵᤋᤡᤰᤁᤠᤱ ᤔᤧᤱᤄᤥ᤺ᤛᤢᤴᤇᤠᤱ ᤐᤡᤗᤠᤋᤛᤧᤴ ᤂᤧᤴ ᤛᤧᤵᤔᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤋᤧᤴᤍᤧᤖᤥ॥
ACT 13:29 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤔᤧᤈᤥᤃᤢ ᤔᤧᤛᤢᤖᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤗᤠᤶ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤀᤠᤱ ᤀᤡᤵᤐᤢᤱᤅᤥ ᤔᤧᤏᤧᤛ᤻ᤛᤢᤖᤥ॥
ACT 13:30 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤖᤥ॥
ACT 13:31 ᤜᤧᤰᤁᤩᤠᤱ ᤕᤖᤡᤰ ᤕᤧᤴ ᤌᤠᤖᤡᤰ ᤂᤢᤏᤧ᤹ᤏᤢ ᤃᤠᤗᤡᤗᤗᤠᤶ ᤕᤖᤢᤛᤗᤧᤔ ᤌᤠᤖᤡᤰ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤛᤡᤱᤗ ᤘᤕᤧᤖᤥ॥ ᤀᤠᤸᤗ ᤂᤧᤱᤜᤠ᤹ ᤀᤡᤛᤪᤠᤀᤡᤗᤛ᤻ᤔᤠ ᤔᤏᤠᤜᤠ᤹ᤖᤧ ᤗᤠᤃᤡ ᤋᤥ᤺ᤴᤍᤡ ᤔᤧᤘᤠ᤹ᤖᤥ॥
ACT 13:32 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤐᤠᤎᤧᤒᤠᤜᤠ᤹ ᤐᤡᤖᤢᤛᤡᤒᤠ ᤔᤠᤱᤜᤧᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤴ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤀᤠᤏᤡᤃᤧ ᤂᤡᤏᤡ᤹ᤀᤥ ᤋᤩᤧ᤹ᤀᤡᤃᤧᤀᤠᤱ ᤘᤕᤡᤃᤧᤖᤥ–
ACT 13:33 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤄᤢᤀᤠᤱ ᤔᤠᤱᤜᤧᤰᤁᤡᤴ ᤀᤠᤏᤡ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤥ ᤁᤧᤳᤋᤢᤖᤥ॥ ᤁᤴ ᤏᤡᤛᤡᤃᤣ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢ᤺ᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤠ᤹ᤖᤥ. ‘ᤂᤧᤏᤧ᤹ᤃ ᤀᤠᤛ᤻ᤛᤠ᤺ᤏᤧᤖᤥ. ᤀᤡᤱᤃᤠ᤹ ᤛᤧᤰᤂᤠᤀᤣ ᤁᤧᤶᤒᤠᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤅᤠᤱ ᤘᤠ᤹ᤖᤥ॥’
ACT 13:34 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤑᤥ᤺ᤰᤂᤢᤸᤗᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤡ᤺ᤔᤠ ᤔᤧᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹– ‘ᤀᤠᤀᤡᤴ ᤂᤡᤏᤡ᤹ᤃ ᤀᤡᤱᤃᤠ᤹ ᤛᤣᤛᤣ ᤏᤢ ᤏᤡᤛ᤻ᤛᤣᤀᤣ ᤍᤠᤀᤢᤍᤧᤴᤏᤢ ᤔᤠᤱᤜᤢᤵ ᤆᤥᤃᤢᤱᤒᤠ ᤔᤢ᤹ᤀᤡᤛᤠᤶᤔᤡᤴ ᤐᤡᤏᤡᤱᤅᤠᤱ ᤘᤠ᤹ᤀᤠᤖᤥ॥’
ACT 13:35 ᤜᤧᤰᤁᤩᤠᤱ ᤘᤣ᤹ᤛ᤻ᤔᤠ ᤋᤧᤴᤏᤥᤀᤠᤱ ᤂᤢᤏᤧ᤹ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤂᤧᤏᤧ᤹ᤃ ᤛᤣᤛᤣ ᤁᤧᤛᤣᤘᤠᤖᤥᤒᤠᤸᤗᤧ ᤁᤢᤎᤰᤁᤡᤴ ᤁᤡ᤺ᤔᤠ ᤕ᤺ᤵᤔᤠ ᤁᤧᤶᤒᤠᤱᤄᤢᤴᤗᤥ॥’
ACT 13:36 ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤜᤡᤱᤔᤴ ᤂᤠᤖᤠᤰ ᤛᤣᤘᤠ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤛᤩᤧᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤐᤠᤎᤧᤒᤠᤜᤠ᤹ᤏᤢᤀᤣ ᤔᤧᤜᤢᤶᤛᤢᤀᤠᤱ ᤁᤡ᤺ᤖᤧ ᤐᤣᤖᤥ॥
ACT 13:37 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡ᤺ᤔᤧᤴᤗᤠᤶ ᤜᤡᤱᤄᤢᤒᤠᤸᤗᤧ ᤁᤢᤎᤰᤁᤡᤴ ᤔᤧᤃᤡᤖᤧᤴᤗᤥ॥
ACT 13:38 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ᤛᤣ. ᤒᤠ ᤁᤴ ᤕᤧᤛᤢᤖᤧ ᤆᤥᤃᤢᤒᤠᤗᤠᤶᤔᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤀᤠᤒᤡ᤹ ᤑᤠ᤹ᤀᤠᤱ ᤁᤴ ᤀᤡᤱᤄᤱᤅᤡᤴ ᤂᤡᤏᤡ᤹ᤀᤥ ᤀᤡᤱᤓᤥ᤺ᤛᤧᤀᤠᤱ ᤘᤠ᤹ᤒᤠᤴ ᤀᤠᤸᤗ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
ACT 13:39 ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤢ᤺ᤴᤍᤢᤐᤡᤖᤢᤛᤡ᤹ᤖᤥ॥ ᤁᤧᤖᤧᤰᤗᤧ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤗᤠᤶ ᤂᤥ᤺ᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ᤺ᤴ ᤂᤡᤏᤡ᤹ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ACT 13:40 ᤜᤧᤰᤁᤩᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤡᤏᤡ᤹ ᤛᤶᤍᤠᤱ ᤁᤧᤳᤗᤥ॥
ACT 13:41 ‘ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤁᤡᤏᤠ᤺ᤴᤍᤡ ᤁᤧᤔᤧᤵᤐᤠᤛᤣ. ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤶᤔᤧ᤹ᤀᤠᤱ ᤛᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤧᤶᤜᤠ᤹ᤀᤥ ᤔᤏᤠᤜᤠ᤹ᤖᤧ ᤐᤥᤎᤰ ᤁᤧᤶᤈᤥᤃᤡᤛᤠᤱ ᤀᤠᤵᤑᤠᤸᤗᤧᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤶᤒᤠ ᤕᤠ᤺ᤶᤒᤰ ᤀᤡᤱᤃᤠ᤹ ᤆᤥᤃᤢᤱᤗᤥ॥’”
ACT 13:42 ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗ᤺ᤴᤍᤧᤛᤡᤀᤠᤱ ᤐᤣᤛᤡᤸᤗᤧ ᤔᤏᤠᤜᤠ᤹ᤖᤧ ᤂᤧᤱᤜᤠ᤹. ᤕᤠᤶᤔᤥ ᤁᤧᤍᤠ᤺ᤒᤠ ᤏᤠ᤺ᤶᤛᤡᤱ ᤕᤧᤴᤏᤥ ᤋᤩᤧᤛᤧ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤆᤧᤰᤂᤧᤛᤧ᤹ᤀᤥ ᤑᤠ᤹ᤀᤠᤱ ᤔᤧᤀᤢ᤺ᤳᤋᤢᤛᤡᤖᤥ॥
ACT 13:43 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤡᤴ ᤔᤧᤗᤧᤖᤢᤀᤠᤱ ᤕᤖᤡᤰ ᤕᤜᤢᤍᤡᤜᤠ᤹ ᤏᤢ ᤕᤜᤢᤍᤡ ᤛᤠᤶᤕᤥᤀᤥ ᤁᤧᤍᤠ᤺ᤒᤠᤜᤠ᤹ᤖᤧ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤔᤧᤍᤡᤶᤍᤢᤛᤡᤖᤥ॥ ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤧᤱᤜᤠ᤹ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤥ ᤆᤰᤔᤧᤸᤗ᤹ᤀᤣ ᤏᤛᤠ᤺ᤴ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤧᤇᤢᤖᤥ॥
ACT 13:44 ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤏᤠ᤺ᤶᤛᤡᤱ ᤕᤧᤴᤏᤥ ᤂᤵᤔᤧᤴ ᤂᤧᤴ ᤕᤧᤰᤕᤰᤁᤥᤒᤠ ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤂᤧᤶᤛᤧ ᤔᤧᤍᤩᤧᤖᤥ॥
ACT 13:45 ᤁᤖ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤔᤧᤏᤡ᤺ᤛᤢᤛᤡᤀᤠᤱ ᤛᤠ᤹ᤖᤡᤰ ᤏᤠᤔᤧᤜᤧᤳᤋᤢᤛᤡ. ᤜᤧᤰᤁᤩᤠᤱ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠᤖᤧᤖ ᤔᤧᤍᤖᤢᤖᤥ॥
ACT 13:46 ᤁᤖ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤔᤧᤱᤃᤡᤀᤣ ᤀᤰᤂᤣᤗ᤹ᤖᤡᤰ ᤐᤠᤖᤧᤳᤇᤡ. “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤱᤃ ᤁᤠᤰᤏᤢ ᤋᤃᤡ ᤂᤡᤏᤡ᤹ ᤕᤜᤢᤍᤡᤜᤠ᤹ᤏᤢ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤘᤕᤧ. ᤁᤖ ᤂᤡᤏᤡ᤹ᤀᤣ ᤁᤴ ᤁᤧᤏᤠ᤹ᤖᤢᤶᤗᤥ॥ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤔᤠ ᤛᤢᤶᤒᤥᤎᤠᤛᤠᤒᤠ ᤔᤧᤶᤒᤥ᤺ᤱᤔᤠ ᤑᤠ᤹ᤀᤠᤱ ᤂᤡᤏᤡ᤹ ᤀᤥᤛᤣ᤺ᤴᤃᤧᤎᤠᤰᤋᤢᤶᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤀᤠᤏᤡᤃᤧ ᤂᤡᤏᤡ᤹ᤗᤠᤶ ᤗ᤺ᤴᤍᤡᤃᤧᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤐᤣᤃᤡᤃᤧ᤹ᤖᤥ॥
ACT 13:47 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤀᤡᤱᤈᤠ᤺ᤱ ᤕᤠᤵᤔᤡ ᤐᤡᤖᤡᤃᤧᤀᤠᤱ ᤘᤠ᤹ᤖᤥ. ‘ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤋᤣ᤹ᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤀᤥ᤺ᤳᤋᤡ ᤁᤢᤀᤡᤛᤡ᤺ᤰ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ॥’”
ACT 13:48 ᤁᤴ ᤐᤠ᤺ᤴᤏᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤎᤠ᤺ᤱ ᤔᤧᤒᤡᤖᤢ॥ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧ ᤗᤠᤃᤡ ᤛᤣ᤺ᤰᤕᤢᤰ ᤁᤧᤒᤥ᤺ᤱᤒᤠᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤖᤥ॥
ACT 13:49 ᤜᤧᤰᤁᤩᤠᤱ ᤏᤛᤠᤏᤡᤒᤠᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤴ ᤌᤢᤶᤔᤥ ᤁᤠᤰ ᤐᤡᤛᤠᤱ ᤔᤧᤛᤧ᤺ᤛᤢᤖᤥ॥
ACT 13:50 ᤁᤖ ᤕᤜᤢᤍᤡᤜᤠ᤹ᤖᤧ ᤕᤧᤰᤕᤠᤔᤠ ᤛᤠᤶᤕᤥᤔᤠ ᤔᤧᤴᤇᤢᤔᤠᤜᤠ᤹ ᤏᤢ ᤂᤧᤴ ᤕᤧᤰᤕᤰᤁᤥᤒᤠ ᤔᤡᤱᤛᤥᤍᤠᤱᤒᤠ ᤔᤏᤠᤜᤠ᤹ ᤔᤧᤜᤢᤛᤢᤛᤡ ᤔᤧᤒᤰᤛᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤋᤢᤰᤂᤣ ᤆᤠ᤺ᤵᤔᤠ ᤔᤧᤜᤣ᤺ᤰᤋᤢᤛᤡᤀᤠᤱ ᤂᤧᤴ ᤌᤢᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤏᤠ᤺ᤳᤋᤢ ᤔᤧᤍᤣ᤺ᤛᤢᤛᤡᤖᤥ॥
ACT 13:51 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠ᤹ᤖᤢᤛᤡᤒᤠᤴ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤗᤠᤱᤓᤥᤀᤥᤒᤠ ᤂᤠᤶ ᤜᤡ᤺ᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤎᤠᤵᤛᤢ ᤔᤧᤎ᤺ᤀᤠᤱ ᤀᤠᤀᤡᤁᤥᤏᤡᤕᤔ ᤕᤧᤰᤕᤰ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥
ACT 13:52 ᤒᤠ ᤂᤧᤴ ᤕᤧᤶᤔᤥ ᤀᤣᤴᤋᤡᤀᤥᤰᤛᤔᤠ ᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤛᤣᤛᤣᤔᤠᤱᤅᤡᤴ ᤏᤢ ᤀᤥᤔᤢᤗ᤹ᤔᤠᤸᤗᤧ ᤁᤢᤎᤡᤶ ᤔᤧᤒᤥ᤺ᤰᤂᤧᤖᤥ॥
ACT 14:1 ᤀᤠᤸᤗ ᤀᤣᤴᤋᤡᤀᤥᤰᤁᤥ ᤁᤢᤀᤡᤛᤡ᤺ᤰ ᤀᤠᤀᤡᤁᤥᤏᤡᤕᤶᤔᤥᤀᤠᤱ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤛᤡᤀᤠᤱ ᤛᤠ᤹ᤖᤡᤰ ᤛᤡᤰᤁᤢᤶ ᤏᤡᤱᤘᤠ᤹ ᤗᤛ᤻ᤛᤢᤖ ᤐᤠᤖᤧᤳᤇᤡᤸᤗᤧ ᤂᤧᤵᤔᤥ ᤕᤖᤡᤰ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥
ACT 14:2 ᤁᤖ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤜᤢᤍᤡᤜᤠ᤹ᤖᤧ ᤂᤧᤵᤔᤥᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤔᤧᤜᤢᤛᤢᤛᤡᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ ᤔᤧᤗᤧᤰᤂᤢ ᤔᤧᤒᤡᤖᤢᤛᤡᤖᤥ॥
ACT 14:3 ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤂᤧᤵᤔᤥ ᤕᤖᤡᤰ ᤕᤧᤶ ᤌᤠᤖᤡᤰ ᤘᤕᤧᤳᤇᤡᤸᤗᤧ ᤂᤧᤱᤜᤠ᤹ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤱᤃᤡᤀᤣ ᤐᤠᤖᤧᤳᤇᤡᤖᤥ॥ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤢᤰᤛᤠᤶ ᤐᤡᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤱᤓᤴ ᤆᤥᤃᤧᤳᤇᤢᤒᤠ ᤁᤢᤗᤢᤱᤃᤢᤶᤔᤡᤴ ᤛᤧᤰᤂᤠᤀᤣ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥
ACT 14:4 ᤂᤧᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤁᤢᤓᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤗᤧᤵᤔᤠᤱ ᤏᤢ ᤁᤢᤓᤠ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤜᤢᤍᤡᤜᤠ᤹ ᤗᤧᤵᤔᤠᤱ ᤔᤧᤛᤧᤴᤇᤡᤱᤗᤥ॥
ACT 14:5 ᤂᤧᤵᤔᤥ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤂᤢᤏᤡ᤹ ᤗᤠᤶᤗᤥ᤺ᤒᤠᤜᤠ᤹ ᤔᤧᤍᤱᤛᤡᤱᤅᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤔᤠᤀᤠᤱ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤔᤧᤍᤱᤄᤢᤖᤥ.
ACT 14:6 ᤁᤖ ᤁᤴ ᤆᤧᤶᤑᤴᤏᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤵᤔᤥᤏᤢ ᤗᤢᤁᤥᤏᤡᤕᤠ ᤌᤢᤶᤔᤥᤒᤠ ᤗᤢᤛ᤻ᤋᤪᤠ ᤏᤢ ᤍᤷᤒᤡ ᤔᤧᤵᤔᤏᤠᤒᤠ ᤕᤧᤰᤕᤰᤜᤠ᤹ ᤏᤢ ᤂᤧᤴ ᤂᤡᤖᤡᤒᤠ ᤋᤧᤴᤏᤥ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ
ACT 14:7 ᤂᤧᤵᤔᤥᤀᤠᤱ ᤂᤧᤱᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤔᤧᤈᤥᤃᤢᤖᤥ॥
ACT 14:8 ᤗᤢᤛ᤻ᤋᤪᤠᤀᤥ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤗᤠᤱᤛᤰᤐᤠᤎᤡᤰ ᤘᤕᤧᤖᤥ॥ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤗᤠᤱᤔᤧᤱᤄᤣ᤺ᤰᤁᤣ ᤘᤕᤧ॥
ACT 14:9 ᤂᤧᤵᤔᤥ ᤂᤧᤸᤗᤧ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤂᤧᤵᤛᤢᤖ ᤕᤢᤅᤧ॥ ᤐᤠᤘᤗᤖᤧ ᤂᤧᤸᤗᤧ ᤘᤣ᤺ᤵᤔᤠ ᤁᤧᤛᤢᤰᤐᤠ ᤁᤢᤏᤛᤠ᤺ᤴᤏᤡᤴ ᤏᤡ᤺ᤛᤢᤀᤠᤱ ᤀᤍᤰᤋᤰᤁᤠᤱ ᤀᤥᤔᤧᤳᤋᤢᤖ
ACT 14:10 ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤕᤧᤒᤧ᤹᥄” ᤂᤧᤴ ᤔᤏᤠ᤺ᤴᤏᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧᤖᤥ॥
ACT 14:11 ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤐᤠᤘᤗᤖᤧ ᤆᤥᤃᤢᤒᤠ ᤂᤧᤴ ᤕᤠ᤺ᤶᤒᤰᤁᤡᤴ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ᤖᤧ ᤗᤢᤁᤥᤏᤡᤕᤠᤛ᤻ᤔᤠ ᤐᤠ᤺ᤴᤏᤥ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧ. “ᤔᤠᤱᤜᤠ᤹ ᤔᤏᤠ ᤗᤧᤱᤏᤧᤳᤇᤡᤀᤠᤱ ᤀᤠᤏᤡ᤹ᤀᤥ ᤋᤩᤧᤇᤡᤀᤠᤱ ᤘᤠ᤹ᤛᤡᤖᤥ॥”
ACT 14:12 ᤂᤧᤱᤜᤠ᤹ᤖᤧ ᤒᤖᤏᤠᤒᤠᤛᤧᤴ ᤈᤡᤀᤢᤛ ᤏᤢ ᤐᤠᤘᤗᤧᤴ ᤜᤷᤔᤣᤛ ᤔᤧᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤐᤠᤘᤗᤧᤴ ᤁᤧᤒᤠ᤺ᤵᤐᤠ ᤆᤥᤃᤧᤖᤥ॥ (ᤃᤪᤡᤁᤣᤗᤡᤜᤠ᤹ᤖᤧᤴ ᤈᤡᤀᤢᤛ ᤔᤧᤵᤔᤏᤠᤒᤠᤴ ᤋᤢᤶ ᤔᤠᤱ ᤏᤢ ᤜᤷᤔᤣᤛ ᤔᤧᤵᤔᤏᤠᤒᤠᤴ ᤀᤡᤱᤃᤧᤛᤠᤒᤠ ᤔᤠᤱ ᤘᤕᤧᤖᤥ॥)
ACT 14:13 ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤈᤡᤀᤢᤛ ᤔᤠᤱᤅᤡᤸᤗᤧᤴ ᤔᤠᤱᤜᤡᤶ ᤏᤧᤛ᤻ᤛᤧ॥ ᤈᤡᤀᤢᤛ ᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤐᤡᤳᤜᤠ᤹ ᤏᤢ ᤑᤢᤱᤜᤠ᤹ ᤋᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤕᤧᤰᤕᤰᤁᤡᤸᤗᤧᤴ ᤐᤕᤶ ᤗᤠᤶᤎᤣ᤺ᤵᤐᤥ ᤋᤩᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤢ ᤔᤏᤠᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥
ACT 14:14 ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤧᤴ ᤂᤧᤵᤛᤧᤳᤇᤢᤀᤠᤱ ᤔᤠᤱ ᤆᤧ᤹ᤕᤠ ᤐᤠ᤺ᤴ ᤐᤥ᤺ᤱᤔᤠ ᤀᤡ᤺ᤳᤋᤧ ᤑᤠ᤹ᤀᤠᤱ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤋᤣ᤺ᤳᤋᤡᤴ ᤌᤧ᤺ᤰᤂᤧᤳᤇᤢ ᤜᤧᤰᤁᤩᤠᤱ ᤔᤏᤠᤗᤢᤶᤔᤥ ᤗᤥ᤺ᤰᤋᤧᤳᤇᤡᤖ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤳᤇᤡ.
ACT 14:15 “ᤀᤠᤍᤠᤱᤒᤠᤛᤣ. ᤁᤴ ᤌᤣ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤀᤠᤴᤇᤡᤃᤧᤃ ᤒᤠ ᤂᤡᤏᤡ᤹ ᤜᤧᤰᤁᤣ ᤔᤧᤴᤇᤠᤶᤃᤧᤴ ᤕᤠᤵᤔᤡᤛᤡᤃᤧᤖᤥ᥄ ᤂᤡᤏᤡ᤹ ᤁᤴ ᤜᤏᤧᤒᤠ ᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤆᤥ᤺ᤰᤔᤠ ᤗᤧᤖᤧᤶᤔᤧ᤹ᤀᤠᤱ ᤋᤠᤱᤛᤠᤰᤐᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤠᤜᤱᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤏᤢ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤀᤠᤴᤇᤡᤃᤧ ᤁᤵᤔᤥ ᤋᤩᤧᤳᤇᤡᤃᤧᤒᤠᤖᤥ॥
ACT 14:16 ᤁᤴ ᤐᤣᤒᤠ ᤕᤧᤶᤔᤥᤃ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤂᤢᤏᤡ᤹ ᤔᤠᤱᤜᤠ᤹ ᤛᤣᤘᤠ ᤆᤥ᤺ᤰᤛᤧ ᤗᤧᤖᤢᤍᤣ᤺ᤛᤢᤛᤡ.
ACT 14:17 ᤁᤖ ᤀᤠᤸᤗᤥᤃ ᤂᤢᤏᤧ᤹ᤃ ᤀᤠᤒᤠᤅᤣ ᤋᤥ᤺ᤴᤍᤡ ᤔᤧ᤺ᤴᤏᤣᤃ ᤜᤥ᤺ᤵᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤠ᤺ᤛᤢ ᤁᤧᤒᤡᤖᤡᤀᤠᤱ ᤆᤠᤔᤠ ᤌᤢᤱᤔᤠᤖᤧ ᤂᤡᤏᤡ᤹ ᤏᤡᤱᤘᤠ᤹ ᤁᤧᤍᤠᤛᤡ ᤁᤧᤒᤡᤖᤡᤀᤠᤱ ᤛᤡᤰ ᤛᤶᤔᤠᤸᤗᤧ ᤁᤢᤎᤡᤶ ᤁᤧᤈᤥᤃᤡᤀᤠᤱ ᤁᤧᤘᤕᤡᤖᤥ॥”
ACT 14:18 ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤧᤳᤇᤢᤖ ᤐᤠᤘᤗ ᤏᤢ ᤒᤖᤏᤠᤒᤠᤛᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤔᤧᤀᤡ᤺ᤳᤋᤢᤒᤠᤴ ᤐᤸᤗᤡᤔᤠᤸᤗᤧ ᤛᤠᤰᤔᤠ ᤛᤢᤰᤋᤧᤳᤇᤢᤖᤥ॥
ACT 14:19 ᤜᤧᤰᤁᤩᤠᤱ ᤁᤢᤓᤠ ᤕᤜᤢᤍᤡᤜᤠ᤹ ᤀᤣᤴᤋᤡᤀᤥᤁ ᤏᤢ ᤀᤠᤀᤡᤁᤥᤏᤡᤕᤶᤗᤠᤶ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤜᤢᤛᤢᤛᤡᤀᤠᤱ ᤂᤢᤏᤡ᤹ ᤗᤧᤵᤔᤠᤱ ᤔᤧᤈᤥᤃᤢᤛᤡᤀᤠᤱ ᤐᤠᤘᤗᤧᤴ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ. ᤜᤧᤰᤁᤩᤠᤱ ᤐᤠᤱᤈᤢᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤍᤣ᤹ᤖᤢᤀᤠᤱ ᤂᤢᤏᤧ᤹ ᤛᤩᤧ ᤑᤠ᤹ᤀᤠᤱ ᤗᤠᤵᤔᤧᤓᤢᤛᤢ॥
ACT 14:20 ᤁᤖ ᤏᤛᤠᤏᤡᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤁᤢᤄᤡᤖᤡ ᤔᤧᤕᤧᤶᤛᤡᤱᤅᤠᤱ ᤔᤧᤕᤧᤒᤧᤸᤗᤧ ᤂᤧᤴ ᤕᤧᤶᤔᤥ ᤏᤡᤱᤘᤠ᤹ ᤔᤕᤧᤖ ᤐᤠᤘᤗᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤠᤱᤏᤠ ᤕᤧᤰᤕᤰᤁᤥ ᤐᤣᤖᤥ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤒᤖᤏᤠᤒᤠᤛᤧᤴᤏᤢ ᤍᤷᤒᤡᤀᤥ ᤐᤣᤛᤧᤳᤇᤡᤖᤥ॥
ACT 14:21 ᤐᤠᤘᤗ ᤏᤢ ᤒᤖᤏᤠᤒᤠᤛᤖᤧ ᤍᤷᤒᤡᤀᤥ ᤛᤢᤏᤠᤀᤡᤱ ᤀᤡᤱᤓᤴ ᤆᤥᤃᤧᤳᤇᤢᤀᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤜᤢ᤹ᤛᤠᤶᤒᤠ ᤔᤧᤒᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤢᤛ᤻ᤋᤪᤠ. ᤀᤠᤀᤡᤁᤥᤏᤡᤕᤔ ᤏᤢ ᤀᤣᤴᤋᤡᤀᤥᤰᤁᤥ ᤏᤢ᤺ᤰᤂᤧᤳᤇᤡᤀᤠᤱ
ACT 14:22 ᤂᤧᤵᤔᤥ ᤂᤧᤱᤜᤠ᤹ᤖᤧ ᤜᤢ᤹ᤛᤠᤶᤒᤠᤜᤠ᤹ ᤏᤛᤠ᤺ᤴᤏᤥ ᤆᤰᤔᤧᤸᤗ᤹ᤀᤣ ᤘᤕᤧᤶᤔᤧ᤹ ᤔᤧᤳᤋᤧᤇᤢᤛᤡᤖ ᤜᤠᤱᤜᤠᤱ ᤆᤥᤃᤧᤳᤇᤢᤛᤡ. ᤜᤧᤰᤁᤩᤠᤱ ᤕᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤀᤣ ᤐᤥ᤺ᤱᤗᤥ ᤑᤠ᤹ᤀᤠᤱ ᤀᤠ᤺ᤴᤇᤡᤱᤔᤠ ᤐᤡᤖᤧᤳᤇᤢᤛᤡᤖᤥ॥
ACT 14:23 ᤜᤧᤰᤁᤩᤠᤱ ᤐᤠᤘᤗ ᤏᤢ ᤒᤖᤏᤠᤒᤠᤛᤖᤧ ᤂᤧᤴ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤛᤣ᤺ᤰᤕᤢᤰ ᤆᤥᤃᤧᤳᤇᤢᤀᤠᤱ ᤋᤢᤘᤠ ᤏᤢ ᤆᤠ᤺ᤏᤧᤳᤋᤥ ᤔᤧᤕᤢᤅᤧᤀᤠᤱ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤒᤠ ᤍᤠᤱᤒᤠᤸᤗᤧ ᤁᤢᤃᤶᤒᤪᤠᤱᤅᤥ ᤂᤧᤱᤜᤠ᤹ ᤕᤢᤰᤂᤧᤳᤇᤢᤛᤡᤖᤥ॥
ACT 14:24 ᤕᤠᤱᤛᤡ ᤂᤧᤱᤜᤠ᤹ ᤐᤡᤛᤡᤍᤡᤕᤠ ᤌᤢᤶᤔᤥ ᤐᤥ᤺ᤰᤂᤧᤳᤇᤡᤖ ᤐᤠᤶᤑᤡᤗᤡᤕᤠ ᤌᤢᤶᤔᤥ ᤌᤩᤧᤛᤡ॥
ACT 14:25 ᤂᤧᤱᤜᤠ᤹ᤖᤧ ᤕᤠᤶᤔᤥ ᤐᤷᤃᤠᤀᤥ ᤀᤡᤱᤓᤴ ᤆᤥᤃᤧᤳᤇᤢ. ᤜᤧᤰᤁᤩᤠᤱ ᤀᤋᤠᤗᤡᤕᤠ ᤕᤧᤰᤕᤰᤁᤥ ᤐᤣᤛᤡᤖᤥ॥
ACT 14:26 ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤛᤡᤖᤡᤕᤠᤛ᤻ᤔᤠ ᤀᤣᤴᤋᤡᤀᤥᤰᤁᤥ ᤕᤠᤱᤏᤠ ᤘᤠᤗᤠᤶᤍᤡ᤺ᤰ ᤆᤥᤃᤧᤳᤇᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤥ ᤂᤢᤴᤇᤡ᤹ ᤜᤣ᤺ᤰᤋᤧᤳᤇᤢᤒᤠ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴ ᤀᤠᤸᤗᤥ ᤂᤧᤵᤔᤥᤀᤣ ᤆᤥ᤺ᤰᤔᤠ ᤛᤢᤖᤧᤳᤇᤢᤖᤥ॥
ACT 14:27 ᤂᤧᤱᤜᤠ᤹ ᤀᤣᤴᤋᤡᤀᤥᤰᤁᤥ ᤁᤧᤖᤧᤳᤇᤡᤀᤠᤱ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ᤗᤠᤶ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤛᤧᤴᤗᤵ ᤂᤥ᤺ᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤶᤎᤣ᤺ᤵᤐᤧᤴ ᤜᤴᤍᤢᤒᤠ ᤐᤠ᤺ᤴᤏᤡᤴ ᤆᤧᤰᤂᤧᤳᤇᤢᤖᤥ॥
ACT 14:28 ᤜᤧᤰᤁᤩᤠᤱ ᤂᤧᤵᤔᤥ ᤏᤛᤠᤏᤡᤒᤠᤜᤠ᤹ᤏᤢ ᤕᤖᤡᤰ ᤕᤧᤶ ᤌᤠᤖᤡᤰ ᤘᤕᤧᤳᤇᤡᤖᤥ॥
ACT 15:1 ᤁᤢᤓᤠ ᤕᤧᤶ ᤀᤣᤃᤠᤱ ᤕᤜᤢᤍᤡᤕᤠᤗᤠᤶ ᤀᤣᤴᤋᤡᤀᤥᤰᤁᤥ ᤁᤢᤓᤠ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ ᤔᤧᤍᤩᤧᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤖ ᤏᤡᤛᤠᤶ ᤔᤧᤜᤢ᤹ᤖᤢᤛᤡ. “ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥᤒᤠ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤜᤷᤍᤥ ᤁᤧᤴᤜᤧᤃᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤴᤗᤵ ᤂᤥ᤺ᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥”
ACT 15:2 ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤂᤧᤱᤜᤠ᤹ᤏᤢ ᤛᤠ᤹ᤖᤡᤰ ᤐᤠ᤺ᤴ ᤌᤰᤋᤧᤳᤇᤡ॥ ᤜᤧᤰᤁᤣ᤺ᤸᤗᤧ ᤐᤠᤘᤗ. ᤒᤖᤏᤠᤒᤠᤛ ᤏᤢ ᤀᤣᤴᤋᤡᤀᤥᤁᤛ᤻ᤔᤠ ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤕᤖᤢᤛᤗᤧᤶᤔᤥ ᤐᤣ᤺ᤰᤔᤠᤀᤠᤱ ᤂᤧᤵᤔᤥᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤏᤢ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤈᤧᤱᤔᤠ ᤑᤠ᤹ᤀᤠᤱ ᤔᤧᤛᤣᤃᤢᤛᤡᤖᤥ॥
ACT 15:3 ᤀᤣᤴᤋᤡᤀᤥᤰ ᤛᤣᤛᤣᤜᤢᤵᤗᤰᤐᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤧᤱᤜᤠ᤹ ᤂᤧᤵᤔᤥᤗᤠᤶ ᤛᤧᤶᤔᤢ᤹ᤀᤡ ᤔᤧᤈᤥᤃᤢᤛᤡ॥ ᤂᤧᤱᤜᤠ᤹ ᤑᤥᤏᤡᤛᤡᤕᤠ ᤏᤢ ᤛᤠᤔᤖᤡᤕᤠ ᤌᤢᤶᤔᤥ ᤐᤥ᤺ᤰᤂᤧᤳᤇᤡᤖ ᤗᤠᤶᤍᤡ᤺ᤰ ᤆᤥᤃᤧᤳᤇᤡᤸᤗᤧ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤰᤂᤧᤇᤢᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤵᤔᤥᤒᤠ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥
ACT 15:4 ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤢᤛᤗᤧᤶᤔᤥ ᤁᤧᤖᤧᤳᤇᤡᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹. ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤛᤣᤛᤣᤜᤢᤵᤗᤰᤐᤠ ᤘᤣ᤹ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤵᤔᤥ ᤁᤧᤘᤠ᤹ᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ᤗᤠᤶ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤆᤧᤰᤂᤧᤇᤢᤖᤥ॥
ACT 15:5 ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤑᤖᤡᤛᤡ ᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤒᤥᤃᤧᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤏᤛᤠᤏᤡᤒᤠᤜᤠ᤹ᤖᤧ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥᤒᤠ ᤛᤠᤰᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤖ ᤜᤷᤍᤥᤀᤠᤱ ᤜᤧᤰᤔᤠᤀᤣ ᤐᤥ᤺ᤱᤗᤥ॥”
ACT 15:6 ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤛᤥᤖᤡᤰ ᤔᤧᤈᤢᤵᤛᤧᤀᤠᤱ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤴᤎᤱ ᤔᤧᤈᤥᤃᤢᤖᤥ॥
ACT 15:7 ᤂᤧᤵᤔᤥ ᤐᤕᤶ ᤐᤠ᤺ᤴᤎᤱ ᤐᤥ᤺ᤰᤂᤧᤀᤠᤱ ᤁᤢᤏᤢᤵᤔᤥ ᤐᤋᤪᤢᤛᤧᤴ ᤐᤥᤃᤧᤀᤠᤱ ᤔᤧᤳᤋᤢᤛᤡ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤕᤖᤡᤰ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤢᤏᤠᤀᤡᤱ ᤂᤧᤶᤔᤠ ᤏᤢ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤀᤡᤱᤓᤴ ᤆᤥ᤺ᤰᤛᤧ ᤂᤡᤏᤡ᤹ᤀᤥᤗᤠᤶ ᤀᤡᤱᤃᤠ᤹ ᤛᤣᤃᤠᤱᤒᤠᤴ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ACT 15:8 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤛᤡᤰᤗᤢᤱᤔᤠᤴ ᤏᤡ᤺ᤛᤢᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤜᤧᤰᤁᤣᤀᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤛᤣᤛᤣᤔᤠᤱ ᤐᤡᤖᤢᤛᤡᤖ ᤋᤠ᤺ᤰᤋᤢᤛᤡᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤹ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥
ACT 15:9 ᤀᤠᤸᤗ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤀᤠᤏᤡ᤹ ᤀᤠᤴᤇᤧᤴᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤜᤧᤰᤁᤣ ᤍᤠᤱᤒᤠᤀᤥᤒᤠ ᤏᤛᤠ᤺ᤴᤗᤠᤶ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤛᤣᤛᤣ ᤆᤥᤃᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥
ACT 15:10 ᤜᤧᤰᤁᤣ᤺ᤸᤗᤧ ᤌᤣᤀᤠᤱᤏᤧ ᤁᤧᤛᤠᤰᤐᤠ ᤕᤜᤢᤍᤡ ᤛᤠᤰᤌᤡᤶᤔᤡᤴ ᤌᤡᤶᤔᤧᤴᤍᤱ ᤏᤛᤠᤏᤡᤒᤠᤜᤠ᤹ ᤁᤧᤃᤢ᤺ᤳᤋᤢᤶᤛᤡᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤑᤥ᤺ᤱᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤂᤧᤱᤃ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧᤀᤠᤱ ᤁᤢ᤺ᤔᤠ ᤔᤧᤴᤇᤢᤰᤋᤢᤴ. ᤜᤧᤰᤁᤩᤠᤱ ᤀᤠᤏᤡ᤹ᤀᤠᤱ ᤁᤢ᤺ᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥
ACT 15:11 ᤛᤧᤰᤂᤠ᤺ᤸᤗᤧᤃ. ᤂᤧᤱᤜᤠ᤹ ᤜᤧᤰᤁᤣᤀᤣ ᤀᤠᤏᤡ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧᤖᤰ ᤋᤠᤱᤀᤠᤛᤣ᤺ᤵᤋᤧ ᤁᤧᤗ᤹ᤒᤠᤴ ᤏᤛᤠ᤺ᤴ ᤀᤠᤈᤥᤃᤢᤶᤗᤥ॥”
ACT 15:12 ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤢᤴᤇᤡ᤹ᤗᤠᤶ ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤧᤰᤂᤧᤇᤢᤸᤗᤧ ᤕᤧᤈᤢᤶᤓᤥᤒᤠ ᤁᤠᤰ ᤔᤏᤠᤜᤠ᤹ ᤛᤫᤠ᤺ᤳᤋᤠᤱ ᤔᤧᤄᤧᤵᤛᤢᤖ ᤔᤧᤕᤢᤅᤧᤖᤥ॥
ACT 15:13 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤠ᤺ᤵᤔᤠ ᤛᤢᤖᤧᤳᤇᤢᤀᤠᤱ ᤕᤠᤁᤢᤒᤧᤴ ᤕᤧᤶᤛᤡᤱᤅᤠᤱ ᤐᤠ᤺ᤳᤋᤢ. “ᤑᤢ᤹ᤏᤢᤛᤠ᤹ᤛᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥
ACT 15:14 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰᤏᤢ ᤋᤃᤡ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤰᤂᤣᤗ᤹ᤖᤡᤰ ᤀᤠᤒᤠᤅᤣ ᤁᤢᤔᤏᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤀᤢ᤺ᤳᤋᤢᤛᤡ ᤁᤧᤗ᤹ᤒᤠᤴ ᤛᤡᤔᤥᤏ ᤐᤋᤪᤢᤛᤖᤧ ᤆᤧᤰᤂᤢᤖᤥ॥
ACT 15:15 ᤁᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤂᤢᤏᤡ᤹ ᤐᤠ᤺ᤴᤏᤡᤴ ᤛᤠ᤹ᤖᤡᤰᤁᤣ ᤋᤱᤗᤥ॥ ᤛᤠᤶᤕᤥᤛᤠᤵᤗᤠᤖᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.
ACT 15:16 ‘ᤁᤴ ᤀᤣᤃᤠᤱ ᤀᤡᤱᤃᤠ᤹ ᤏᤢ᤺ᤱᤅᤠᤖᤥ. ᤜᤧᤰᤁᤩᤠᤱ ᤏᤢᤒᤧᤒᤠ ᤍᤠᤀᤢᤍᤖᤧ ᤁᤢᤜᤠᤱᤈᤢᤶᤔᤡᤴ ᤀᤡᤱᤃᤠ᤹ ᤕᤠᤶᤔᤥ ᤆᤥᤃᤢᤱᤗᤥ॥ ᤀᤡᤱᤃᤠ᤹ ᤁᤧᤕ᤺ᤒᤠ ᤗᤢᤱᤎᤠᤰᤜᤠ᤹ ᤛᤧᤳᤋᤢᤱᤗᤥ॥ ᤕᤠᤶᤔᤥ ᤆᤥᤃᤢᤱᤅᤠᤱ ᤕᤧᤵᤛᤢᤱᤗᤥ॥
ACT 15:17 ᤜᤧᤰᤁᤣᤗ᤹ᤖᤡᤰ ᤘᤣ᤹ ᤔᤏᤠᤜᤠ᤹ᤖᤧᤀᤠᤱ ᤀᤡᤱᤃᤠ᤹ ᤍᤠᤱᤒᤠᤴ ᤁᤥ᤺ᤵᤔᤠ ᤔᤧᤛᤢᤰᤁᤠᤖ॥ ᤀᤠᤔᤡᤱ ᤁᤧᤍᤠ᤺ᤰᤐᤠ ᤁᤠᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤛᤢᤘᤠᤱ ᤑᤠ᤹ᤀᤠᤱ ᤀᤢ᤺ᤳᤋᤢᤱᤛᤡᤱᤗᤥ॥ ᤁᤴ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤕᤖᤡᤰ ᤋᤱᤒᤣ ᤋᤃᤡᤀᤣ ᤐᤠ᤺ᤳᤋᤧ ᤆᤢᤖᤧᤀᤠᤱ ᤘᤠ᤹ᤖᤥ॥’”
ACT 15:19 ᤕᤠᤁᤢᤒᤖᤧ ᤕᤠᤶᤔᤥ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤏᤢ᤺ᤱᤒᤠᤀᤠᤱ ᤁᤧᤍᤠ᤺ᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤔᤧ᤺ᤴᤗᤥ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
ACT 15:20 ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤰᤋᤱᤒᤠ ᤛᤰᤀᤡᤱᤄᤱ ᤜᤠᤰᤋᤢᤶᤛᤡᤶᤗᤥ. ‘ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤏᤠᤒᤠ ᤆᤠᤜᤠ᤹ ᤆᤠᤔᤠ ᤔᤧᤏᤢ᤹ᤏᤧᤴ॥ ᤜᤧᤰᤁᤩᤠᤱ ᤆᤠᤖᤠᤶᤔᤠ ᤔᤧᤏᤢ᤹ᤏᤧᤴ॥ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ᤺ ᤏᤢ ᤛᤠᤔᤠᤰᤂᤡ᤹ᤀᤠᤱ ᤆᤠᤔᤠ ᤔᤧᤏᤢ᤹ᤏᤧᤴᤗᤥ॥’
ACT 15:21 ᤌᤣᤀᤠᤱᤓᤧᤸᤗᤧ ᤒᤠ ᤁᤴ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤁᤠᤰ ᤐᤠᤱᤈᤢᤶᤔᤥ ᤀᤢᤴᤇᤥ᤺ᤴ ᤀᤢᤴᤇᤥ᤺ᤴᤏᤠᤱᤎᤥᤀᤣ ᤀᤡᤱᤓᤥ᤺ᤛᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤌᤡᤰᤕᤠ᤺ᤴᤎᤰ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤏᤡ᤺ᤳᤗ ᤘᤠ᤹ᤖᤥ॥”
ACT 15:22 ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰ ᤛᤣᤛᤣᤜᤢᤵᤗᤰᤁᤥᤒᤠᤜᤠ᤹ ᤔᤧᤍᤅᤧᤀᤠᤱ ᤏᤧᤵᤑᤢ ᤔᤏᤠᤜᤠ᤹ ᤕᤜᤢᤍᤠ ᤔᤧᤵᤔᤏᤠᤒᤠ ᤒᤖᤛᤠᤒᤠᤛ ᤏᤢ ᤛᤡᤗᤠᤛᤧᤴ ᤛᤣ᤺ᤰᤔᤠᤛᤡᤀᤠᤱ ᤐᤠᤘᤗ ᤜᤧᤰᤁᤩᤠᤱ ᤒᤖᤏᤠᤒᤠᤛᤧᤴᤏᤢ ᤀᤣᤴᤋᤡᤀᤥᤰᤁᤥ ᤐᤠᤱᤔᤠᤛᤡ ᤏᤡ᤺ᤴᤎᤥ ᤐᤥ᤺ᤰᤂᤧᤖᤥ॥ ᤂᤧᤱᤜᤠ᤹ᤃ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤗᤢᤶᤔᤥ ᤛᤠ᤹ᤖᤡᤰᤁᤣ ᤔᤡᤱᤛᤥᤍᤠᤱᤒᤠ ᤆᤥᤃᤧᤳᤇᤡᤖᤥ॥
ACT 15:23 ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤛᤰᤀᤡᤱᤄᤱᤅᤡᤴ ᤂᤧᤴ ᤗᤡᤛᤡ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥᤏᤢ ᤔᤧᤜᤠᤰᤋᤢᤛᤡ. “ᤀᤠᤏᤡᤃᤧ ᤕᤖᤢᤛᤗᤧᤶᤒᤠ ᤂᤡᤏᤡ᤹ ᤑᤢ᤹ᤏᤢᤛᤠ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤗᤠᤶ. ᤀᤣᤴᤋᤡᤀᤥᤁ. ᤛᤡᤖᤡᤕᤠ. ᤏᤢ ᤛᤡᤗᤡᤛᤡᤕᤠᤀᤥ ᤁᤧᤘᤠ᤹ᤒᤠ ᤌᤡᤶᤔᤧᤴᤍᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ. ᤁᤴ ᤛᤰᤀᤡᤱᤄᤱᤗᤠᤶ ᤛᤣᤘᤠ ᤜᤠᤅᤢᤶᤒᤧ᤹ᤖᤥ॥
ACT 15:24 ᤀᤠᤏᤡᤃᤧ ᤔᤧᤶᤒᤠᤱᤅᤣ ᤁᤢᤓᤠ ᤔᤏᤠᤜᤠ᤹ ᤂᤡᤏᤡ᤹ᤀᤥ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤁᤠᤰ ᤕᤜᤢᤍᤡ ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤁᤧᤶᤔᤧᤳᤋᤡᤀᤠᤱ ᤗᤠᤶ ᤁᤧᤶᤓᤥ᤺ᤳᤋᤡᤖ ᤂᤡᤏᤡ᤹ ᤗᤢᤱᤔᤠ᤹ ᤁᤧᤶᤛᤥ᤺ᤴᤍᤡ ᤁᤧᤶᤒᤡᤖᤡᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤧ ᤂᤧᤵᤛᤢᤶᤒᤧᤖᤥ॥
ACT 15:25 ᤜᤧᤰᤁᤩᤠᤱ ᤀᤠᤏᤡᤃᤧ ᤔᤡ᤺ᤶ ᤆᤢᤶ ᤒᤖᤏᤠᤒᤠᤛ ᤜᤧᤰᤁᤩᤠᤱ ᤐᤠᤘᤗᤧᤴᤏᤢ ᤂᤡᤏᤡ᤹ᤀᤥ ᤐᤠᤱᤔᤠᤛᤡ ᤑᤠ᤹ᤀᤠᤱ ᤁᤢᤓᤠ ᤔᤏᤠᤜᤠ᤹ ᤛᤣ᤺ᤰᤔᤠᤛᤡ ᤁᤧᤗ᤹ᤒᤠ ᤀᤡᤱᤋᤱᤔᤏᤠᤖᤥ॥
ACT 15:26 ᤂᤧᤱᤜᤠ᤹ᤖᤧᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤘᤠ ᤆᤥ᤺ᤰᤔᤥ ᤂᤢᤏᤡ᤹ ᤜᤡᤱᤔᤴᤏᤡᤴ ᤔᤧᤴᤍᤠᤱᤄᤢᤴᤗᤥ॥
ACT 15:27 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧ ᤛᤠᤵᤋᤢᤶᤒᤧᤒᤠ ᤛᤰᤀᤡᤱᤄᤱᤅᤥ ᤁᤴ ᤐᤠ᤺ᤴᤜᤠ᤹ᤀᤣ ᤆᤧᤱᤔᤠ ᤑᤠ᤹ᤀᤠᤱ ᤕᤜᤢᤍᤠ ᤏᤢ ᤛᤡᤗᤠᤛᤛᤡ ᤂᤡᤏᤡ᤹ᤀᤥ ᤐᤠᤱᤄᤢᤶᤛᤡᤶᤒᤧᤖ ᤐᤳᤇᤡᤃᤧᤖᤥ॥
ACT 15:28 ᤛᤣᤛᤣᤔᤠᤱ ᤏᤢ ᤀᤠᤏᤡᤃᤧᤃ ᤂᤡᤏᤡ᤹ ᤛᤶᤍᤠᤱ ᤁᤵᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ᤏᤢ᤺ᤸᤗᤧ ᤘᤣ᤹ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ ᤌᤧᤔᤠᤀᤠᤱ ᤔᤧᤱᤃᤢ᤺ᤵᤔᤠᤏᤡᤱ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥
ACT 15:29 ᤜᤧᤰᤁᤣ᤺ᤸᤗᤧ ᤏᤠᤘᤠᤀᤡᤳᤗᤠᤀᤥ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤆᤠᤜᤠ᤹ ᤔᤧᤈᤧᤶᤔᤡᤴᤏᤧ᤹. ᤛᤠᤔᤠᤰᤂᤡ᤹ᤀᤠᤱ ᤔᤧᤈᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ ᤔᤧᤈᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤩᤠᤱ ᤆᤠᤗᤠᤶᤔᤠᤏᤢᤀᤠᤱ ᤀᤣ᤺ᤰ ᤘᤕᤧᤶᤔᤧ᤹ᤀᤥ॥ ᤀᤰᤂᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤢ᤺ᤒᤠᤀᤣ ᤁᤧᤈᤥᤃᤢᤶᤗᤥ॥ ᤛᤧᤶᤔᤢ᤹ᤀᤡᤖᤥ॥”
ACT 15:30 ᤜᤧᤰᤁᤣᤗ᤹ᤖᤡᤰ ᤂᤧᤴ ᤗᤡᤛᤡ ᤀᤡᤱᤛᤠᤒᤠᤜᤠ᤹ ᤔᤧᤎᤠᤛᤡᤱᤅᤠᤱ ᤀᤣᤴᤋᤡᤀᤥᤰᤁᤥ ᤔᤧᤃᤧᤖᤧ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤁᤠᤰ ᤏᤛᤠᤏᤡᤒᤠᤜᤠ᤹ ᤌᤡᤰᤋᤧᤴᤏᤥ ᤔᤧᤛᤢᤵᤛᤢᤛᤡᤀᤠᤱ ᤂᤧᤴ ᤛᤰᤀᤡᤱᤄᤱᤅᤡᤴ ᤜᤢᤰᤔᤧᤛᤢᤵᤋᤢᤛᤡᤖᤥ॥
ACT 15:31 ᤜᤧᤰᤁᤩᤠᤱ ᤂᤧᤴ ᤛᤰᤀᤡᤱᤄᤱᤗᤠᤶ ᤀᤠ᤺ᤴᤇᤡᤱᤔᤠ ᤔᤧᤄᤥ᤺ᤛᤢᤀᤠᤱ ᤏᤛᤠᤏᤡᤒᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥
ACT 15:32 ᤕᤜᤢᤍᤠ ᤏᤢ ᤛᤡᤗᤠᤛᤡᤀᤠᤱ ᤀᤠᤒᤠᤅᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤘᤕᤧᤳᤇᤡ॥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤜᤠᤱᤜᤠᤱ ᤏᤢ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤕᤖᤡᤰ ᤐᤠ᤺ᤴᤜᤠ᤹ ᤔᤧᤳᤋᤧᤳᤇᤢᤖᤥ॥
ACT 15:33 ᤂᤧᤵᤔᤥ ᤁᤢᤓᤠ ᤕᤧᤴ ᤘᤕᤧᤳᤇᤡᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤡᤴᤇᤡ᤹ ᤏᤢ᤺ᤖᤡᤰᤁᤠᤱ ᤐᤣᤃᤧᤳᤇᤧ᤹ᤀᤥ ᤗ᤹ᤖᤡᤰ ᤕᤠᤱᤏᤠ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤛᤡᤖᤥ॥
ACT 15:34 ((ᤁᤖ ᤛᤡᤗᤠᤛᤖᤧ ᤂᤧᤵᤔᤥᤀᤣ ᤘᤠ᤹ᤔᤠ ᤗᤠ᤺ᤵᤔᤠ ᤏᤡ᤺ᤴᤎᤥ ᤆᤥᤃᤢᤖᤥ॥))
ACT 15:35 ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴᤏᤠᤱ ᤀᤣᤴᤋᤡᤀᤥᤰᤁᤥᤀᤣ ᤘᤕᤧ ᤗᤠᤖᤧᤳᤇᤡᤖᤥ॥ ᤂᤧᤱᤜᤠ᤹ ᤏᤢ ᤘᤣ᤹ ᤕᤖᤡᤰᤗᤧ ᤛᤥᤛᤥᤖᤡᤰ ᤍᤠᤱᤒᤠᤸᤗᤧᤴ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤔᤧᤈᤥᤃᤢᤖ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖᤥ॥
ACT 15:36 ᤁᤢᤓᤠ ᤕᤧᤴ ᤀᤣᤃᤠᤱ ᤐᤠᤘᤗᤖᤧ ᤒᤖᤏᤠᤒᤠᤛᤧᤴ ᤔᤧᤳᤋᤢ. “ᤀᤠᤸᤗ ᤀᤠᤴᤇᤡ᤹ᤀᤠᤱ ᤏᤢ᤺ᤱᤛᤡ ᤐᤡᤳᤇᤡ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤀᤠᤈᤥᤃᤧᤳᤇᤢᤒᤠ ᤐᤠᤱᤈᤢᤶᤜᤠ᤹ᤀᤥ ᤗ᤺ᤴᤇᤡᤖ ᤑᤢ᤹ᤏᤢᤛᤠ᤹ᤜᤠ᤹ ᤀᤠᤰᤂᤣ ᤔᤧᤈᤥᤃᤢᤖ ᤔᤧᤕᤠᤰᤐᤣ ᤑᤠ᤹ᤀᤠᤱ ᤛᤠ᤹ᤛᤢᤛᤡᤖᤥ॥”
ACT 15:37 ᤒᤖᤏᤠᤒᤠᤛᤖᤧ ᤕᤢᤜᤢᤴᤏᤠ ᤔᤧᤵᤔᤏᤠᤒᤠ ᤔᤷᤁᤢᤛᤧᤴ ᤛᤥᤖᤡᤰ ᤋᤣ᤹ᤔᤠ ᤏᤡᤱᤘᤠ᤹ ᤆᤥᤃᤢ.
ACT 15:38 ᤁᤖ ᤐᤠᤘᤗᤖᤧ ᤀᤳᤋᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤂᤧᤱᤜᤠ᤹ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤓᤠ᤹ᤖᤢᤴᤛᤡᤴᤏᤠᤱ ᤐᤠᤶᤑᤡᤗᤡᤕᤠᤀᤥᤗᤠᤶᤔᤣ ᤐᤰᤌᤛᤡᤀᤠᤱ ᤏᤢ᤺ᤰᤂᤧ ᤐᤣᤀᤠᤱ ᤘᤕᤧᤖᤥ॥
ACT 15:39 ᤂᤢᤴᤇᤡ᤹ ᤛᤠ᤹ᤖᤡᤰ ᤐᤠ᤺ᤴ ᤌᤰᤋᤧᤇᤡᤀᤠᤱ ᤘᤣ᤹ ᤘᤣ᤹ ᤛᤧᤴᤍᤧᤇᤡᤀᤠᤱ ᤐᤣᤛᤡᤖᤥ॥ ᤒᤖᤏᤠᤒᤠᤛᤖᤧ ᤕᤢᤜᤢᤴᤏᤠ ᤔᤧᤵᤔᤏᤠᤒᤠ ᤔᤷᤁᤢᤛᤧᤴ ᤋᤣ᤹ᤖᤢᤀᤠᤱ ᤛᤤᤐᤪᤛ ᤘᤠᤃᤵᤂᤠᤶ ᤗᤧᤵᤔᤠᤱ ᤘᤠᤗᤠᤎᤠᤗᤠᤶ ᤌᤠᤛᤡᤱ.
ACT 15:40 ᤁᤖ ᤐᤠᤘᤗᤖᤧ ᤛᤡᤗᤠᤛᤧᤴ ᤛᤣᤃᤢ. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤧᤱᤜᤠ᤹ ᤍᤠᤱᤒᤠᤸᤗᤧ ᤁᤢᤗᤢᤱᤃᤢᤶᤔᤥ ᤔᤧᤍᤥ᤺ᤴᤍᤢᤛᤡᤀᤠᤱ ᤔᤧᤒᤠᤱᤄᤢᤛᤡᤖᤥ॥
ACT 15:41 ᤂᤢᤴᤇᤡ᤹ ᤛᤡᤖᤡᤕᤠ ᤏᤢ ᤛᤡᤗᤡᤛᤡᤕᤠ ᤌᤢᤶᤔᤥ ᤐᤥ᤺ᤰᤂᤧᤇᤡᤖ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ ᤁᤧᤎᤢᤶᤒᤠ ᤆᤥᤃᤧᤳᤇᤢᤖᤥ॥
ACT 16:1 ᤐᤠᤘᤗᤧᤴ ᤍᤷᤒᤡ ᤏᤢ ᤗᤢᤛ᤻ᤋᤪᤠ ᤕᤧᤰᤕᤰᤜᤠ᤹ᤀᤥ ᤋᤩᤧᤖᤥ॥ ᤂᤧᤵᤔᤥ ᤋᤡᤔᤥᤌᤡ ᤔᤧᤵᤔᤏᤠᤒᤠ ᤏᤛᤠᤏᤡᤒᤠᤎᤡᤰ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤔᤠ ᤏᤛᤠ᤺ᤴ ᤁᤧᤈᤥ᤺ᤰᤔᤠ ᤕᤜᤢᤍᤡ ᤘᤕᤧ. ᤁᤖ ᤁᤢᤶᤒᤠ ᤃᤪᤡᤁ ᤘᤕᤧ॥
ACT 16:2 ᤗᤢᤛ᤻ᤋᤪᤠ ᤏᤢ ᤀᤠᤀᤡᤁᤥᤏᤡᤕᤶᤒᤠ ᤁᤠᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤋᤡᤔᤥᤌᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ᤺ᤒᤠ ᤁᤢᤀᤡᤱ ᤛᤧ᤺ᤖᤧᤀᤠᤱ ᤘᤕᤧᤖᤥ॥
ACT 16:3 ᤐᤠᤘᤗᤖᤧ ᤋᤡᤔᤥᤌᤡ᤺ᤴᤏᤠᤱ ᤛᤥᤖᤡᤰ ᤋᤣ᤹ᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤂᤧᤵᤔᤥᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤂᤧᤴ ᤜᤷᤍᤥ ᤜᤧᤃᤢ ᤐᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤠᤈᤣ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤋᤡᤔᤥᤌᤡᤖᤧ ᤁᤢᤶᤒᤠ ᤃᤪᤡᤁ ᤘᤕᤧᤒᤠᤴ ᤔᤧᤏᤡ᤺ᤛᤢᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤂᤧᤴ ᤜᤷᤍᤥ ᤔᤧᤴᤜᤧᤰᤁᤣ ᤘᤕᤧᤖᤥ॥
ACT 16:4 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤶᤔᤥ ᤁᤧᤏᤧᤒᤠ ᤐᤠᤱᤈᤢᤶᤜᤠ᤹ ᤌᤵᤔᤣ ᤕᤖᤢᤛᤗᤧᤔᤛ᤻ᤔᤠ ᤛᤣ᤺ᤰᤕᤢᤰᤔᤡᤒᤠ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤏᤡ᤺ᤴᤎᤥ ᤔᤧᤈᤥᤃᤢᤒᤠ ᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤥ ᤑᤠ᤹ᤀᤠᤱ ᤏᤛᤠᤏᤡᤒᤠᤜᤠ᤹ ᤔᤧᤔᤧᤳᤋᤢᤛᤡᤖᤥ॥
ACT 16:5 ᤜᤧᤰᤁᤣᤗ᤹ᤖᤡᤰ ᤛᤣᤛᤣᤜᤢᤵᤗᤰᤜᤠ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤖ ᤌᤡᤰᤕᤠ᤺ᤴᤎᤰ ᤔᤧᤒᤥ᤺ᤖᤧᤖ ᤔᤧᤒᤣᤖᤥ॥
ACT 16:6 ᤐᤠᤘᤗ ᤏᤢ ᤁᤢᤴᤍᤣ᤺ᤱᤜᤠ᤹ ᤑᤪᤡᤃᤡᤕᤠ ᤏᤢ ᤃᤗᤠᤋᤡᤕᤠᤛ᤻ᤔᤠ ᤌᤢᤶᤔᤥ ᤗᤠᤶᤍᤡ᤺ᤰ ᤔᤧᤈᤥᤃᤧ. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤛᤢᤏᤠᤀᤡᤱ ᤛᤧ᤺ᤔᤠ ᤛᤠᤰᤋᤢᤛᤡᤀᤠᤱ ᤘᤕᤧᤖᤥ॥
ACT 16:7 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤠᤀᤡᤛᤡᤕᤠᤛ᤻ᤔᤠ ᤀᤡ᤺ᤴᤎᤥᤀᤥ ᤔᤧᤃᤧᤖᤧᤀᤠᤱ ᤒᤡᤌᤠᤏᤡᤕᤠᤛ᤻ᤔᤠ ᤌᤢᤶᤔᤥ ᤐᤣ᤺ᤰᤔᤠ ᤋᤶᤛᤡᤴ ᤔᤧᤈᤥᤃᤧ. ᤁᤖ ᤕᤧᤛᤢᤖᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤜᤧᤰᤁᤣ ᤆᤥ᤺ᤰᤔᤠ ᤂᤧᤱᤜᤠ᤹ ᤔᤧᤒᤠᤱᤄᤢᤴᤛᤡᤴᤗᤥ॥
ACT 16:8 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤏᤠᤶᤎᤠ ᤐᤡᤛᤠᤱᤒᤠ ᤔᤠᤀᤡᤛᤡᤕᤠ ᤔᤧᤒᤥ᤺ᤰᤂᤧᤖ ᤋᤪᤥᤀᤠᤛ ᤕᤧᤰᤕᤰᤁᤥ ᤔᤧᤒᤣ॥
ACT 16:9 ᤂᤧᤵᤔᤥ ᤂᤧᤴ ᤛᤧᤴᤍᤡᤰ ᤐᤠᤘᤗᤖᤧ ᤋᤠᤍᤡᤃᤧᤴ ᤛᤢᤑᤥᤎᤡᤰ ᤏᤡ᤺ᤛᤢ॥ ᤂᤧᤵᤔᤥ ᤔᤧᤛᤣᤍᤥᤏᤡᤕᤠᤛ᤻ᤔᤠ ᤔᤏᤠᤎᤡᤰ ᤔᤧᤛᤣᤍᤥᤏᤡᤕᤠᤀᤥ ᤌᤠᤅᤧᤀᤠᤱ ᤀᤠᤏᤡᤃᤧ ᤕᤠᤵᤔᤡ ᤁᤢᤓᤠ᤹ ᤀᤠᤒᤡᤖᤧ᤹ ᤗ᤹ᤖᤡᤰ ᤐᤣᤗᤡ ᤑᤠᤰᤋᤢᤖ ᤕᤧᤒᤧᤒᤠ ᤏᤡ᤺ᤛᤢᤖᤥ॥
ACT 16:10 ᤐᤠᤘᤗᤖᤧ ᤁᤴ ᤋᤠᤍᤡᤃᤧᤴ ᤛᤢᤑᤥ᤺ᤴ ᤏᤡ᤺ᤛᤢᤀᤠᤱ ᤀᤠᤏᤡᤃᤧ ᤂᤡᤔᤥ ᤔᤧᤛᤣᤍᤥᤏᤡᤕᤠᤀᤥ ᤐᤣ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤡᤃᤧ. ᤌᤣᤀᤠᤱᤓᤧᤸᤗᤧ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ᤀᤥ ᤛᤢᤏᤠᤀᤡᤱ ᤛᤧ᤺ᤔᤠ ᤕᤠᤵᤔᤡ ᤀᤢ᤺ᤳᤋᤧᤒᤠ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥ᤺ᤰᤔᤏᤠᤖᤥ॥
ACT 16:11 ᤀᤠᤏᤡᤃᤧ ᤋᤪᤥᤀᤠᤛ ᤗᤧᤵᤔᤏᤠᤀᤠᤱ ᤘᤠᤗᤠᤎᤠᤗᤠᤶ ᤛᤠᤔᤥᤌᤪᤧᤛ ᤘᤠᤃᤵᤂᤠᤶ ᤐᤣ᤺ᤰᤔᤏᤠ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤏᤡᤕᤠᤐᤥᤗᤡᤛ ᤁᤧᤖᤡᤃᤧᤖᤥ॥
ACT 16:12 ᤂᤧᤵᤔᤥᤗᤠᤶ ᤀᤠᤏᤡᤃᤧ ᤗᤠᤱᤄᤣ᤺ᤰᤔᤏᤠᤀᤠᤱ ᤑᤡᤗᤡᤵᤐᤡᤀᤥ ᤁᤧᤵᤔᤏᤠᤖᤥ॥ ᤂᤧᤱᤃ ᤔᤧᤛᤣᤍᤥᤏᤡᤕᤠᤛ᤻ᤔᤠ ᤌᤢᤶᤔᤥᤒᤠ ᤁᤧᤕᤧᤰᤐᤠ ᤕᤧᤰᤕᤰ ᤏᤢ ᤖᤥᤔᤡ ᤕᤰᤗᤠᤈᤣ᤹ᤀᤠᤱ ᤘᤕᤧᤖᤥ॥ ᤂᤧᤵᤔᤥ ᤀᤠᤏᤡᤃᤧ ᤁᤢᤓᤠ ᤕᤧᤴ ᤘᤕᤡᤃᤧᤖᤥ॥
ACT 16:13 ᤜᤧᤰᤁᤩᤠᤱ ᤘᤣ᤹ᤛ᤻ᤔᤠ ᤏᤠ᤺ᤶᤛᤡᤱ ᤕᤧᤴᤏᤥ ᤀᤠᤏᤡᤃᤧ ᤕᤧᤰᤕᤰᤁᤥᤛ᤻ᤔᤠ ᤘᤠᤜᤱ ᤗᤧᤵᤔᤠᤱᤒᤠ ᤁᤢᤕᤠᤀᤥ ᤐᤣ᤺ᤰᤔᤏᤠ॥ ᤁᤴ ᤋᤧᤴᤏᤡᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠ ᤆᤥ᤺ᤰᤔᤠᤍᤧᤴ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡᤱᤘᤠ᤹ ᤀᤡ᤺ᤵᤔᤏᤠᤖᤥ॥ ᤀᤠᤏᤡᤃᤧ ᤂᤧᤵᤔᤥ ᤛᤣᤘᤠ ᤆᤥ᤺ᤰᤛᤧ ᤁᤧᤈᤢᤶᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤋᤠ᤹ᤈᤧᤱᤔᤏᤠᤖ ᤕᤢᤱᤔᤏᤠᤖᤥ॥
ACT 16:14 ᤂᤧᤵᤔᤥ ᤛᤢᤏᤠᤀᤡᤱ ᤁᤧᤄᤧᤶᤔᤠᤜᤠ᤹ᤀᤥ ᤗᤡᤍᤡᤕᤠ ᤔᤧᤵᤔᤏᤠᤔᤠ ᤌᤡᤕᤠᤋᤡᤖᤠ ᤕᤧᤰᤕᤰᤁᤥᤛ᤻ᤔᤠ ᤐᤖᤠᤴᤗᤠ ᤋᤣ᤺ᤳ ᤗᤧᤱᤜᤱ ᤁᤧᤈᤥ᤺ᤰᤔᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤔᤠ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤘᤕᤧ॥ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤏᤛᤠ᤺ᤴ ᤆᤥᤃᤢᤖ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤴᤍᤢ ᤐᤡᤖᤢ॥
ACT 16:15 ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤠᤰ ᤁᤢᤜᤡᤶᤛᤕᤱᤜᤠ᤹ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤱᤃᤠ᤹ ᤛᤧᤰᤂᤠᤀᤣ ᤍᤠᤱᤒᤠᤸᤗᤧ ᤁᤢᤏᤛᤠᤏᤡᤔᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤀᤡ᤺ᤳᤋᤡᤏᤧ ᤑᤠ᤹ᤃᤪ ᤀᤠᤜᤡᤶᤔᤥ ᤋᤩᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ ᤗ᤹ᤖᤡᤰ ᤕᤠᤵᤔᤡ ᤀᤢ᤺ᤳᤋᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤜᤡᤶᤔᤥ ᤕᤠᤵᤔᤡ ᤋᤣ᤹ᤔᤠ ᤑᤠ᤹ᤀᤠᤱ ᤛᤠᤰᤁᤧᤸᤗᤧᤰ ᤆᤥᤃᤧᤖᤥ॥
ACT 16:16 ᤌᤡᤰᤕᤧᤴ ᤀᤠᤏᤡᤃᤧ ᤋᤢᤘᤠ ᤆᤥ᤺ᤰᤔᤠᤍᤧᤴᤏᤥ ᤐᤣ᤺ᤰᤔᤏᤠᤖ ᤐᤵᤔᤏᤠ᤺ᤸᤗᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤔᤠ ᤕᤥ᤺ᤰᤔᤠᤎᤡᤰ ᤋᤢᤶᤏᤠ॥ ᤂᤧᤸᤗᤧ ᤂᤠᤀᤡᤃᤢᤀᤠᤱ ᤁᤢᤴᤍᤠᤱᤒᤠᤜᤠ᤹ ᤕᤖᤡᤰ ᤕᤠᤱ ᤌᤃᤢ ᤐᤡᤖᤢᤛᤡᤖ ᤘᤕᤧᤖᤥ॥
ACT 16:17 ᤂᤧᤸᤗᤧ ᤐᤠᤘᤗ ᤏᤢ ᤀᤠᤏᤡᤃᤧ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤖ ᤕᤠᤵᤔᤡ ᤋᤡᤶᤍᤧᤖᤥ. “ᤁᤴ ᤔᤏᤠᤜᤠ᤹ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤛᤧᤴᤗᤵ ᤁᤧᤄᤥ᤺ᤛᤢᤶ ᤂᤧᤴ ᤂᤡᤏᤡ᤹ ᤁᤧᤶᤔᤧᤳᤋᤡᤖᤥ॥”
ACT 16:18 ᤂᤧᤸᤗᤧ ᤕᤖᤡᤰ ᤕᤧᤴ ᤌᤠᤖᤡᤰ ᤜᤧᤰᤁᤣ ᤆᤥᤃᤢᤖ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤐᤠᤘᤗᤧᤴ ᤁᤢᤏᤡᤱᤄᤧᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤜᤡᤛᤡᤱᤅᤠᤱ ᤂᤧᤴ ᤕᤥ᤺ᤰᤔᤠᤀᤥ ᤁᤧᤕᤠᤰᤐᤠ ᤑᤧᤴᤛᤠᤶᤔᤡᤴ ᤀᤰᤂᤣ ᤔᤧᤳᤋᤢᤖ ᤑᤧ᤺ᤰᤋᤢᤖᤥ. “ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤧ॥” ᤂᤡᤔᤥ ᤂᤧᤴ ᤑᤧᤴᤛᤠᤶᤔᤡᤴᤏᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤐᤰᤌ᤺ᤀᤠᤱ ᤐᤣᤖᤥ॥
ACT 16:19 ᤜᤧᤰᤁᤩᤠᤱ ᤂᤧᤴ ᤕᤥ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤜᤠ᤹ᤖᤧ ᤀᤠᤸᤗ ᤕᤠᤱᤌᤰᤔᤠ ᤗᤠᤶᤔᤡᤴ ᤏᤢᤒᤧᤒᤠ ᤔᤧᤏᤡ᤺ᤛᤢᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤔᤧᤍᤧᤶᤛᤢᤛᤡᤀᤠᤱ ᤔᤧᤀᤢ᤺ᤰᤂᤢᤛᤡᤖ ᤕᤧᤰᤕᤰᤛ᤻ᤔᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤔᤧᤍᤠᤖᤢᤛᤡᤖᤥ॥
ACT 16:20 ᤂᤧᤱᤜᤠ᤹ᤖᤧ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤁᤴ ᤔᤏᤠᤜᤠ᤹ ᤕᤜᤢᤍᤡᤛᤡᤖᤥ. ᤜᤧᤰᤁᤩᤠᤱ ᤁᤱᤜᤠ᤹ᤖᤧ ᤀᤠᤏᤡ᤹ ᤕᤧᤰᤕᤰᤁᤥ ᤜᤕᤱᤁᤡᤸᤗᤡᤱ ᤆᤥ᤺ᤰᤛᤢᤖ ᤕᤠᤰᤛᤡᤖᤥ॥
ACT 16:21 ᤂᤧᤱᤜᤠ᤹ᤖᤧ ᤀᤠᤏᤡ᤹ ᤖᤥᤔᤡ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥᤒᤠ ᤛᤠᤰᤌᤡᤶᤜᤠ᤹ ᤜᤢ᤹ᤛᤢᤛᤡᤖ ᤕᤠᤰᤛᤡᤖᤥ॥ ᤀᤠᤏᤡ᤹ ᤖᤥᤔᤡᤜᤠ᤹ᤖᤧᤃ ᤂᤧᤴ ᤋᤧᤴᤍᤡᤱ ᤆᤥ᤺ᤰᤔᤠ ᤏᤢ ᤀᤡ᤺ᤵᤔᤠ ᤏᤠ᤺ᤵᤔᤠ ᤛᤢᤰᤔᤧᤍᤧᤳᤋᤡᤴᤗᤥ॥”
ACT 16:22 ᤜᤧᤰᤁᤣ᤺ᤸᤗᤧ ᤂᤧᤵᤔᤥ ᤁᤧᤈᤢᤶᤒᤠᤀᤠᤱ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤵᤛᤧ ᤔᤧᤓᤢᤱᤛᤡᤱ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤆᤠᤱᤍᤣ᤺ᤳᤜᤠ᤹ ᤑᤧᤶᤔᤠᤀᤠᤱ ᤜᤡᤵᤔᤠ ᤔᤧᤒᤠᤱᤄᤢᤛᤡ॥
ACT 16:23 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤐᤢᤱᤗᤠᤀᤡᤱᤒᤠᤴ ᤏᤢ᤺ᤖᤡᤰᤁᤠᤱ ᤂᤧᤱᤜᤠ᤹ ᤁᤥᤔᤠ ᤐᤠᤱᤄᤧᤛᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤒᤡᤖᤢᤖᤥ॥
ACT 16:24 ᤀᤰᤋᤱᤒᤠ ᤀᤡᤱᤈᤠ᤺ᤱ ᤂᤥ᤺ᤛᤢᤀᤠᤱ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤒᤠ ᤛᤡᤃᤠᤱᤛ᤻ᤔᤠ ᤕᤠᤰᤑᤠᤀᤥ ᤂᤢᤴᤇᤡ᤹ ᤗᤠᤱᤜᤠ᤹ ᤑᤧᤴᤌᤰᤁᤪᤱᤅᤥ ᤕᤠᤰᤐᤠᤱᤄᤢᤛᤡᤀᤠᤱ ᤛᤠᤰᤋᤢᤛᤡᤖᤥ॥
ACT 16:25 ᤛᤧᤳᤗᤢᤶ ᤑᤰᤋᤧᤖ ᤐᤳᤇᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤋᤢᤘᤠ ᤆᤥᤃᤢᤛᤡᤖ ᤛᤠᤶᤗᤥᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤳᤇᤢᤖ ᤕᤠᤃᤧᤳᤇᤡᤖᤥ॥ ᤘᤣ᤹ ᤐᤢᤱᤗᤠᤎᤠᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤔᤧᤄᤧᤵᤛᤢᤛᤡᤖ ᤔᤧᤕᤢᤅᤧᤖᤥ॥
ACT 16:26 ᤜᤰᤆᤄᤳ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤀᤠᤱ ᤐᤢᤱᤗᤠᤜᤡᤶ ᤕᤰᤜᤠ᤹ᤀᤣ ᤕᤰᤂᤢᤖ ᤗᤠᤶᤎᤣ᤺ᤵᤜᤠ᤹ ᤜᤸᤗᤧᤰ ᤘᤖᤧᤰ ᤜᤖᤧᤀᤠᤱ ᤁᤧᤖᤧᤰ ᤐᤢᤱᤗᤠᤎᤠᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤄᤣ᤺ᤱᤜᤠ᤹ ᤐᤠ᤺ᤰᤂᤧᤖᤥ॥
ACT 16:27 ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤴ ᤁᤢᤔᤡᤰ ᤛᤥᤖᤧᤀᤠᤱ ᤐᤢᤱᤗᤠᤜᤡᤶᤔᤥᤒᤠ ᤗᤠᤶᤎᤣ᤺ᤵᤜᤠ᤹ ᤜᤖᤧᤀᤠᤱ ᤐᤳᤇᤧᤒᤠ ᤏᤡ᤺ᤛᤢ ᤜᤧᤰᤁᤩᤠᤱ ᤐᤢᤱᤗᤠᤎᤠᤒᤠᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤒᤡᤗᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤜᤣ᤺ᤛᤢᤒᤠ ᤋᤠᤓᤣ᤺ᤴ ᤋᤖᤵ ᤑᤡ᤺ᤰᤂᤢᤀᤠᤱ ᤛᤧᤳᤇᤡᤱᤔᤠ ᤁᤥ᤺ᤳᤋᤢᤖᤥ॥
ACT 16:28 ᤁᤖ ᤐᤠᤘᤗᤖᤧ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤠᤀᤣ. ᤌᤣᤀᤠᤱ ᤔᤧᤔᤧᤳᤇᤡᤅᤧᤴᤏᤧ᤹ᤀᤥ᥄ ᤀᤠᤏᤡᤃᤧᤃ ᤂᤠ ᤁᤵᤔᤥᤀᤣ ᤕᤠᤃᤡᤃᤧ᤹ᤖᤥ॥”
ACT 16:29 ᤂᤧᤴ ᤐᤢᤱᤗᤠᤀᤡᤱᤒᤠᤸᤗᤧ ᤛᤣᤔᤡ᤺ᤴ ᤜᤠ᤺ᤶᤔᤠ ᤐᤠᤱᤄᤢᤛᤡᤀᤠᤱ ᤛᤡᤃᤠᤱ ᤗᤥ᤺ᤰᤋᤧᤖ ᤋᤩᤧ॥ ᤂᤧᤴ ᤕᤰᤂᤧᤖ ᤐᤠᤘᤗ ᤏᤢ ᤛᤡᤗᤠᤛᤖᤧ ᤂᤢᤴᤇᤡ᤹ ᤗᤠᤱᤈᤰᤐᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥
ACT 16:30 ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤛᤣ᤺ᤴᤍᤥᤛᤢᤛᤡ. “ᤀᤠᤍᤠᤱᤒᤠᤛᤣ. ᤀᤡᤱᤃᤠ᤹ ᤌᤣ ᤆᤥᤃᤢᤱᤅᤡᤸᤗᤧ ᤛᤧᤴᤗᤵ ᤂᤥᤀᤠᤒᤣ᥅”
ACT 16:31 ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤍᤠᤱᤒᤠ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤛᤧᤴᤗᤵ ᤁᤧᤄᤥ᤺ᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤏᤧ ᤑᤠ᤹ᤃᤪ ᤛᤧᤴᤗᤵ ᤔᤧᤄᤥ᤺ᤛᤢ᤹ᤖᤥ॥”
ACT 16:32 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ ᤆᤧᤰᤋᤧᤳᤇᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤖᤥ॥
ACT 16:33 ᤛᤧᤴᤍᤡᤰ ᤒᤠᤂᤧᤴ ᤕᤧᤶᤔᤥ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤱᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤢᤴᤇᤡ᤹ ᤕᤠᤱᤄᤣ᤺ᤰᤜᤠ᤹ ᤘᤠᤜᤵᤋᤢ ᤐᤡᤖᤢᤛᤡ. ᤜᤧᤰᤁᤩᤠᤱ ᤐᤢᤱᤗᤠᤀᤡᤱᤒᤠᤴ ᤏᤢ ᤁᤢᤜᤡᤶᤛᤕᤱᤜᤠ᤹ ᤂᤡᤔᤥ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥
ACT 16:34 ᤂᤧᤸᤗᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤁᤢᤜᤡᤶᤔᤥ ᤋᤣ᤹ᤖᤢᤛᤡᤀᤠᤱ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ॥ ᤂᤢᤏᤧ᤹ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤀᤥᤔᤢ ᤔᤧᤗ᤹ᤖᤧᤖᤥ॥
ACT 16:35 ᤁᤢᤍᤠ᤺ᤴᤍᤡᤰᤔᤠ ᤒᤠ ᤂᤧᤴ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤜᤠᤖᤠ᤹ ᤐᤢᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤏᤠᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤐᤣ᤺ᤰᤔᤠ ᤐᤠᤱᤄᤢᤛᤡᤏᤡ ᤑᤠ᤹ᤀᤠᤱ ᤋᤡᤗᤡᤱᤃᤠᤜᤠ᤹ᤗᤠᤶ ᤀᤡᤱᤈᤠ᤺ᤱ ᤔᤧᤜᤠᤰᤋᤢᤖᤥ॥
ACT 16:36 ᤜᤧᤰᤁᤣ᤺ᤸᤗᤧ ᤐᤢᤱᤗᤠᤀᤡᤱᤒᤠᤸᤗᤧ ᤐᤠᤘᤗᤧᤴ ᤀᤰᤂᤣ ᤔᤧᤳᤋᤢ. “ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤧᤏᤧ᤹ ᤏᤢ ᤛᤡᤗᤠᤛᤧᤴ ᤗᤧᤵᤔᤠᤍᤣ᤺ᤔᤠᤏᤧᤛᤡᤱ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤔᤧᤜᤠᤅᤢᤀᤠᤱ ᤔᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤡᤴᤇᤡ᤹ ᤐᤣ᤺ᤰᤔᤠ ᤁᤧᤛᤢᤰᤛᤢᤖᤥ॥ ᤏᤢ᤺ᤖᤡᤰᤁᤠᤱ ᤐᤣᤛᤧᤳᤇᤧ᤹ᤀᤥ॥”
ACT 16:37 ᤁᤖ ᤐᤠᤘᤗᤖᤧ ᤂᤧᤴ ᤋᤡᤗᤡᤱᤃᤠᤜᤠ᤹ ᤔᤧᤳᤋᤢᤛᤡ. “ᤀᤠᤴᤇᤡᤃᤧᤃ ᤖᤥᤔᤡ ᤕᤰᤕᤢᤱᤒᤠᤛᤡᤃᤧᤛᤠᤱ ᤌᤧᤔᤠᤀᤠᤱ ᤋᤢ᤺ᤴᤍᤣ᤹ ᤔᤧ᤺ᤴᤏᤣ ᤔᤏᤠᤗᤢᤶᤔᤥ ᤀᤠᤴᤇᤡᤃᤧ ᤕᤠᤵᤔᤡ ᤋᤧ᤺ᤶᤓᤢᤰ ᤔᤧᤕᤠᤰᤋᤧᤳᤇᤡᤃᤧᤀᤠᤱ ᤐᤢᤱᤗᤠᤜᤡᤶᤔᤥ ᤕᤠᤵᤔᤡ ᤔᤧᤛᤠᤰᤋᤧ॥ ᤀᤠᤸᤗ ᤂᤧᤱᤜᤠ᤹ᤖᤧ ᤛᤫᤠ᤺ᤳᤋᤠᤱ ᤗᤧᤵᤔᤠᤍᤣ᤺ᤔᤠ ᤔᤧᤃᤥ᤺ᤳᤋᤧᤳᤇᤡᤃᤧᤒᤠᤒᤡ᥅ ᤁᤱᤃ ᤐᤥ᤺ᤱᤔᤠ ᤔᤧᤛᤢᤰᤏᤧᤴᤗᤥ᥄ ᤜᤠᤖᤠ᤹ ᤛᤢᤜᤠᤱᤕᤢᤰᤐᤠᤜᤠ᤹ᤀᤣ ᤁᤵᤔᤥ ᤔᤧᤍᤠᤀᤠᤱ ᤔᤧᤗᤧᤳᤇᤡᤃᤧᤖ ᤐᤥ᤺ᤱᤗᤥ॥”
ACT 16:38 ᤜᤧᤰᤁᤩᤠᤱ ᤋᤡᤗᤡᤱᤃᤠᤜᤠ᤹ᤖᤧ ᤛᤢᤜᤠᤱᤕᤢᤰᤐᤠᤜᤠ᤹ ᤒᤠᤁᤴ ᤐᤠ᤺ᤴᤜᤠ᤹ ᤔᤧᤔᤧᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤖᤥᤔᤡ ᤕᤰᤕᤢᤱᤒᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤱᤜᤠ᤹ ᤔᤧᤃᤡᤛᤧᤖᤥ॥
ACT 16:39 ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤔᤧᤏ᤺ᤶᤛᤡᤱᤗ ᤂᤧᤱᤜᤠ᤹ᤏᤢ ᤗᤧᤵᤔᤡ ᤔᤧᤏᤠ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡᤀᤠᤱ ᤀᤠᤸᤗ ᤁᤴ ᤕᤧᤰᤕᤰᤁᤥᤗᤠᤶ ᤐᤣᤛᤧᤇᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤛᤡᤖᤥ॥
ACT 16:40 ᤜᤧᤰᤁᤩᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤂᤧᤵᤔᤥᤗᤠᤶ ᤗᤡᤍᤡᤕᤠᤖᤧ ᤁᤢᤜᤡᤶᤔᤥ ᤐᤣᤛᤡ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤗᤡᤍᤡᤕᤠ ᤏᤢ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤋᤢᤔᤧᤳᤇᤢᤖ ᤀᤠ᤺ᤴᤇᤡᤱᤔᤠ ᤐᤡᤖᤧᤳᤇᤢᤀᤠᤱ ᤂᤧᤵᤔᤥᤗᤠᤶ ᤐᤣᤛᤡᤖᤥ॥
ACT 17:1 ᤐᤠᤘᤗ ᤏᤢ ᤛᤡᤗᤠᤛᤧᤴ ᤀᤶᤑᤡᤐᤥᤗᤡᤛ ᤏᤢ ᤀᤵᤐᤥᤗᤥᤏᤡᤕᤠ ᤐᤥ᤺ᤰᤂᤧᤛᤡᤖ ᤌᤡᤛ᤻ᤛᤗᤥᤏᤡᤁᤠ ᤕᤧᤰᤕᤰᤁᤥ ᤁᤧᤖᤧᤳᤇᤡ॥ ᤂᤧᤵᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤎᤡᤰ ᤏᤧᤛ᤻ᤛᤧ॥
ACT 17:2 ᤐᤠᤘᤗᤖᤧ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣ᤺ᤸᤗᤧ ᤛᤢᤶᤗᤧᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤂᤧᤵᤔᤥᤒᤠ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤢᤰᤂᤣ ᤆᤠᤀᤠᤱ ᤛᤡ᤹᤺ ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤜᤡᤱ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤗᤠᤶ ᤀᤥᤛᤣ᤺ᤴᤎᤠᤰᤋᤢᤛᤡ॥ “ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠ ᤁᤴ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ” ᤔᤧᤳᤋᤢᤛᤡ॥
ACT 17:4 ᤂᤧᤵᤔᤥ ᤁᤧᤘᤠ᤹ᤒᤠ ᤁᤢᤓᤠ ᤕᤜᤢᤍᤡᤜᤠ᤹ ᤁᤴ ᤐᤠ᤺ᤴᤏᤡᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤜᤢ᤹ᤛᤠᤶᤒᤠ ᤔᤧᤒᤥ᤺ᤰᤂᤧᤖᤥ॥ ᤂᤧᤵᤔᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤐᤠ ᤕᤖᤡᤰ ᤃᤪᤡᤰᤜᤠ᤹ ᤏᤢ ᤔᤡᤱᤛᤥᤍᤠᤱᤔᤠ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖᤥ॥
ACT 17:5 ᤁᤖ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤜᤢᤍᤡᤜᤠ᤹ᤖᤧ ᤂᤧᤱᤜᤠ᤹ ᤏᤠᤔᤧᤜᤧᤳᤋᤢᤛᤡᤀᤠᤱ ᤂᤧᤴ ᤕᤧᤰᤕᤰᤁᤥᤒᤠ ᤀᤠᤗᤧᤵᤐᤠ ᤗᤧᤃᤧᤒᤠᤜᤠ᤹ ᤔᤧᤛᤢᤵᤛᤢᤛᤡᤀᤠᤱ ᤔᤧᤜᤢᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤥ ᤐᤕᤶ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤀᤠᤱ ᤕᤧᤛᤥᤏᤖᤧ ᤁᤢᤜᤡᤶᤔᤥ ᤔᤧᤒᤣᤀᤠᤱ ᤐᤠᤘᤗ ᤏᤢ ᤛᤡᤗᤠᤛᤧᤴ ᤔᤏᤠᤜᤠ᤹ᤖᤥ ᤋᤣ᤹ᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥
ACT 17:6 ᤁᤖ ᤂᤧᤱᤜᤠ᤹ᤖᤧ ᤂᤧᤵᤔᤥ ᤐᤠᤘᤗ ᤏᤢ ᤛᤡᤗᤠᤛᤧᤴ ᤔᤧᤴᤍᤢᤔᤢᤴᤛᤡᤴ. ᤜᤧᤰᤁᤣ᤺ᤸᤗᤧ ᤕᤧᤛᤥᤏ ᤏᤢ ᤘᤣ᤹ ᤑᤢ᤹ᤏᤢᤛᤠ᤹ ᤏᤛᤠᤏᤡᤒᤠᤜᤠ᤹ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤀᤢ᤺ᤰᤂᤢ ᤔᤧᤍᤠᤖᤢᤛᤡ. “ᤁᤴ ᤔᤏᤠᤜᤠ᤹ᤖᤧ ᤀᤠᤳᤋᤡᤛᤠᤱ ᤋᤢᤰᤂᤣ ᤔᤧᤍᤠᤖᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤃ ᤀᤠᤸᤗᤥ ᤀᤠᤏᤡ᤹ ᤕᤧᤰᤕᤰᤁᤥᤀᤠᤱ ᤔᤧᤍᤩᤧᤀᤠᤱ ᤔᤧᤘᤠ᤹ᤖᤥ॥
ACT 17:7 ᤕᤧᤛᤥᤏᤖᤧ ᤂᤧᤱᤜᤠ᤹ ᤁᤢᤜᤡᤶᤔᤥ ᤗᤠᤱᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧᤃ ‘ᤕᤧᤛᤢ ᤔᤧᤵᤔᤏᤠᤒᤠ ᤀᤠᤏᤡ᤹ ᤘᤣ᤹ ᤜᤠᤱ ᤘᤠ᤹’ ᤔᤧᤒᤠ᤺ᤳᤋᤢᤖ ᤖᤥᤔᤡ ᤐᤕᤶ ᤜᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤕᤠ᤺ᤶᤒᤰ ᤔᤧᤈᤥ᤺ᤰᤗᤥ॥”
ACT 17:8 ᤁᤴ ᤐᤠ᤺ᤴᤏᤡᤴ ᤕᤧᤰᤕᤰᤁᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤛᤡᤰ ᤐᤥᤃᤧᤖᤥ॥
ACT 17:9 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤥᤏ ᤏᤢ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ ᤛᤠᤶᤒᤠ᤺ᤴ ᤔᤧᤃᤢ᤺ᤳᤋᤢᤛᤡᤀᤠᤱ ᤔᤧᤗᤧᤖᤢ ᤔᤧᤍᤣ᤺ᤛᤢᤛᤡᤖᤥ॥
ACT 17:10 ᤜᤧᤰᤁᤩᤠᤱ ᤛᤧᤴᤍᤡᤰ ᤐᤥ᤺ᤰᤂᤧᤀᤠᤱ ᤂᤡᤔᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤐᤠᤘᤗ ᤏᤢ ᤛᤡᤗᤠᤛᤧᤴ ᤒᤣᤖᤡᤕᤠ ᤐᤠᤱᤈᤢᤶ ᤗᤧᤵᤔᤠᤱ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤛᤡ॥ ᤂᤧᤵᤔᤥ ᤁᤧᤖᤧᤳᤇᤡᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤛᤡᤖᤥ॥
ACT 17:11 ᤒᤣᤖᤡᤕᤠᤛ᤻ᤔᤠ ᤔᤏᤠᤜᤠ᤹ᤃ ᤌᤡᤛ᤻ᤛᤗᤥᤏᤡᤁᤠᤒᤠ ᤔᤏᤠᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤁᤧᤜᤶᤒᤠ ᤔᤧᤈᤥᤃᤧ॥ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤏᤢ᤺ᤖᤡᤰᤁᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤔᤧᤄᤧᤵᤛᤢᤀᤠᤱ ᤌᤡᤰᤕᤠ᤺ᤴᤎᤰ ᤐᤠᤘᤗᤖᤧ ᤐᤠ᤺ᤳᤋᤢᤒᤠᤴ ᤛᤧᤰᤂᤠᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤔᤧᤃᤥ᤺ᤳᤋᤢ ᤔᤧᤏᤡ᤺ᤖᤢᤖᤥ॥
ACT 17:12 ᤂᤧᤱᤜᤠ᤹ᤀᤥ ᤕᤖᤡᤰ ᤕᤜᤢᤍᤡᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢ. ᤜᤧᤰᤁᤩᤠᤱ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤃᤪᤡᤁ ᤕᤧᤶᤒᤡᤳᤇᤠ᤹ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖᤥ॥
ACT 17:13 ᤁᤖ ᤌᤡᤛ᤻ᤛᤗᤥᤏᤡᤁᤠᤒᤠ ᤕᤜᤢᤍᤡᤜᤠ᤹ᤖᤧ ᤒᤣᤖᤡᤕᤠᤀᤥ ᤐᤠᤘᤗᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤥ᤺ᤛᤢᤖ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢ. ᤜᤧᤰᤁᤣ᤺ᤸᤗᤧ ᤂᤧᤵᤔᤥᤀᤠᤱ ᤔᤧᤍᤩᤧᤀᤠᤱ ᤔᤏᤠᤜᤠ᤹ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤜᤢᤛᤢᤛᤡᤖ ᤔᤧᤓᤥ᤺ᤰᤂᤢᤛᤡᤖᤥ॥
ACT 17:14 ᤂᤡᤔᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤘᤠᤗᤠᤶᤍᤡ᤺ᤰ ᤆᤥ᤺ᤰᤛᤧ ᤐᤠᤘᤗᤧᤴ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥ ᤁᤖ ᤛᤡᤗᤠᤛ ᤏᤢ ᤋᤡᤔᤥᤌᤡ᤺ᤴ ᤏᤧᤵᤔᤠᤱ ᤒᤣᤖᤡᤕᤠᤀᤥ ᤘᤕᤧ ᤗᤠᤖᤧᤳᤇᤡᤖᤥ॥
ACT 17:15 ᤐᤠᤘᤗᤧᤴ ᤁᤧᤛᤠᤒᤠ ᤔᤏᤠᤜᤠ᤹ ᤂᤢᤏᤧ᤹ᤏᤢᤀᤣ ᤀᤧᤌᤧᤴᤛ ᤕᤧᤰᤕᤰ ᤌᤠᤖᤡᤰ ᤔᤧᤒᤣ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤕᤠᤱᤏᤠ ᤒᤣᤖᤡᤕᤠᤀᤥ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤛᤡᤗᤠᤛ ᤏᤢ ᤋᤡᤔᤥᤌᤡ᤺ᤴ ᤜᤠᤖᤠᤀᤣ ᤁᤧᤒᤡᤳᤇᤡᤀᤠᤱ ᤂᤢᤏᤧ᤹ ᤁᤧᤍᤢᤶᤛᤢᤔᤢᤖᤥ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡᤖᤥ॥
ACT 17:16 ᤐᤠᤘᤗᤖᤧ ᤀᤧᤌᤧᤴᤛᤀᤥ ᤛᤡᤗᤠᤛ ᤏᤢ ᤋᤡᤔᤥᤌᤡ᤺ᤴ ᤜᤠᤱᤄᤢᤛᤡᤖ ᤘᤕᤧᤸᤗᤧ ᤕᤧᤰᤕᤰᤁᤥ ᤕᤖᤡᤰ ᤏᤠᤘᤠᤀᤡᤳᤗᤠᤜᤠ᤹ ᤏᤡ᤺ᤛᤢᤀᤠᤱ ᤛᤠ᤹ᤖᤡᤰᤁᤣ ᤁᤢᤗᤢᤱᤔᤠ᤹ ᤕᤥ᤺ᤴᤍᤧᤖᤥ॥
ACT 17:17 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤕᤜᤢᤍᤡᤜᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤐᤠᤱᤈᤢᤶᤔᤥ ᤌᤡᤰᤕᤠ᤺ᤴᤎᤰ ᤁᤧᤍᤠ᤺ᤒᤠ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤏᤢ ᤐᤠ᤺ᤴᤌᤰᤋᤧᤖᤥ॥
ACT 17:18 ᤂᤧᤵᤔᤥ ᤀᤣᤐᤡᤁᤩᤢᤖᤡ ᤏᤢ ᤛ᤻ᤋᤥᤁᤡ ᤛᤡᤰᤛᤠᤶᤒᤠᤜᤠ᤹ᤀᤠᤱ ᤂᤢᤏᤧ᤹ᤏᤢ ᤐᤠ᤺ᤴ ᤔᤧᤎᤰᤋᤧᤖᤥ॥ ᤁᤢᤓᤠ ᤀᤰᤂᤣ ᤔᤧᤔᤧᤳᤇᤡᤱ. “ᤁᤴ ᤀ᤹ᤀᤒᤠᤸᤗᤧ ᤌᤧᤔᤠ᤺ᤴ ᤐᤠ᤺ᤳᤋᤢᤒᤣ᥅” ᤘᤣ᤹ᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. “ᤁᤸᤗᤧᤃ ᤁᤢᤛᤱ ᤘᤣ᤹ ᤛᤠᤶᤔᤠᤱᤈᤩᤠᤱ ᤏᤢ ᤔᤠᤱ ᤐᤠ᤺ᤴ ᤆᤧᤰᤂᤢ ᤐᤠ᤺ᤳᤋᤢᤒᤠ ᤜᤧᤰᤁᤣ ᤗ᤹ᤖᤥ॥” ᤐᤠᤘᤗᤖᤧ ᤕᤧᤛᤢ᤺ᤴ ᤏᤢ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤆᤥᤃᤢᤒᤠᤸᤗᤧ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤒᤠᤖᤥ॥
ACT 17:19 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤀᤖᤡᤕᤥᤐᤠᤃᤛ ᤔᤧᤵᤔᤏᤠᤒᤠ ᤆᤢᤶᤗᤢᤱᤅᤥ ᤔᤧᤍᤠᤖᤢᤀᤠᤱ ᤀᤰᤂᤣ ᤔᤧᤔᤧᤳᤋᤢ. “ᤁᤴ ᤁᤧᤒᤠ᤺ᤳᤋᤢᤖ ᤁᤧᤘᤠ᤹ᤒᤠ ᤁᤢᤛᤱ ᤏᤡᤛᤠᤶᤔᤡᤴ ᤀᤠᤏᤡᤃᤧᤀᤠᤱ ᤂᤧᤶᤔᤠ ᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥
ACT 17:20 ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤁᤢᤓᤠ ᤐᤠ᤺ᤴᤜᤠ᤹ᤃ ᤀᤠᤏᤡᤃᤧᤀᤥᤃ ᤁᤢᤛᤱ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤆᤥ᤺ᤰᤐᤠ ᤏᤡ᤺ᤛᤢᤶᤒᤧ॥ ᤂᤧᤸᤗᤧ ᤁᤢᤒᤣ᤺ᤴᤏᤡᤱᤃ ᤌᤧᤔᤠᤒᤣ᥅ ᤕᤠᤵᤔᤡ ᤀᤠᤔᤧᤳᤋᤧ᤹ᤀᤥ॥”
ACT 17:21 (ᤀᤧᤌᤧᤴᤛᤒᤠ ᤁᤠᤰ ᤕᤰᤕᤢᤱᤒᤠᤜᤠ᤹ ᤏᤢ ᤔᤠ᤺ᤱᤄᤠ ᤗᤠᤈᤣ᤹ᤗᤠᤶ ᤁᤧᤍᤠ᤺ᤒᤠ ᤔᤏᤠᤜᤠ᤹ᤖᤧ ᤁᤢᤛᤱ ᤐᤠ᤺ᤴ ᤆᤧᤱᤔᤠ ᤏᤢ ᤂᤧᤶᤔᤠᤀᤥᤖᤰ ᤏᤠᤶ ᤔᤧᤎᤠᤛᤢᤖᤥ॥)
ACT 17:22 ᤜᤧᤰᤁᤣ᤺ᤸᤗᤧ ᤀᤖᤡᤕᤥᤐᤠᤃᤛᤒᤠ ᤆᤢᤶᤗᤢᤱᤅᤡᤸᤗᤧ ᤁᤢᤗᤢᤶᤔᤥ ᤐᤠᤘᤗᤧᤴ ᤕᤧᤶᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤧᤌᤧᤴᤛᤀᤥ ᤁᤧᤕᤢᤱᤒᤠ ᤀᤠᤍᤠᤱᤒᤠᤛᤣ. ᤂᤡᤏᤡ᤹ᤃ ᤛᤠ᤹ᤖᤡᤰ ᤛᤠᤶᤕᤥᤛᤠᤒᤠ ᤁᤧᤈᤥᤃᤡ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥
ACT 17:23 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤧᤰᤕᤰᤁᤥ ᤗᤠᤱᤄᤣᤃᤠᤱᤗ ᤐᤳᤇᤠᤱᤅᤡᤸᤗᤧ ᤂᤡᤏᤡ᤹ ᤛᤣᤘᤠ ᤁᤧᤈᤥᤃᤡᤒᤠ ᤋᤧᤴᤜᤠ᤹ ᤀᤥᤔᤧᤳᤋᤢᤱᤅᤡᤸᤗᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤔᤠᤱᤅᤡᤸᤗᤧᤴ ᤗ᤹ᤖᤡᤰ ᤛᤠᤵᤋᤧᤒᤠ ᤛᤠᤱᤒᤣᤎᤡᤰ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ. ᤀᤠᤸᤗᤥ ᤂᤡᤏᤡ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤛᤣᤘᤠ ᤁᤧᤈᤥᤃᤢᤶᤒᤠ ᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤀᤡᤴ ᤀᤡᤱᤃᤠ᤹ ᤀᤡᤱᤓᤴ ᤆᤥᤃᤢᤱᤗᤥ॥
ACT 17:24 ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤴᤍᤠᤱᤒᤠᤖᤥ॥ ᤂᤢᤏᤧ᤹ᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤆᤥᤃᤢᤛᤡᤒᤠᤸᤗᤧ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤔᤠᤱᤜᤡᤶᤔᤥ ᤔᤧᤕᤢᤱᤅᤡᤴᤗᤥ॥
ACT 17:25 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤁᤢᤓᤠ᤹ ᤂᤢᤏᤧ᤹ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤏᤢ ᤛᤠ᤺ᤱᤃᤢᤃᤧᤴ ᤛᤰᤔᤠ ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ ᤁᤧᤒᤡᤒᤠ ᤂᤢᤏᤧ᤹ᤀᤣᤖᤥ॥
ACT 17:26 ᤂᤢᤏᤧ᤹ᤀᤣ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤆᤥᤃᤢᤛᤡᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤡᤍᤠᤰ ᤕᤢᤱᤔᤠ ᤐᤠᤱᤄᤢᤛᤡᤒᤠᤖᤥ॥ ᤂᤢᤏᤧ᤹ᤀᤣ ᤂᤧᤱᤜᤠ᤹ ᤀᤠᤳᤋᤥ ᤕᤢᤱᤔᤠ ᤐᤥ᤺ᤱ ᤀᤠᤵᤑᤠᤸᤗᤧ ᤕᤢᤱᤔᤠ ᤐᤥ᤺ᤱ ᤑᤠ᤹ᤀᤠᤱ ᤋᤃᤡᤛᤠ ᤏᤡᤱᤛᤣ᤺ᤰ ᤆᤥᤃᤢᤀᤠᤱ ᤘᤕᤧ॥
ACT 17:27 ᤂᤢᤏᤧ᤹ ᤔᤧᤃᤥ᤺ᤳᤋᤢᤸᤗᤧ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢ ᤐᤡᤖᤢᤛᤡᤒᤠᤖᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤀᤠᤏᤡ᤹ᤏᤢ ᤔᤠ᤺ᤱᤄᤠ ᤜᤥ᤺ᤵᤗᤥ॥
ACT 17:28 ᤔᤏᤠᤎᤡᤰᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ‘ᤂᤢᤏᤧ᤹ ᤆᤥᤃᤢᤸᤗᤧᤀᤣ ᤀᤠᤏᤡ᤹ ᤀᤠᤜᤡᤱ. ᤗᤠᤱᤀᤠᤄᤣ᤺ᤰᤁᤠᤱ ᤜᤡᤱᤔᤴᤏᤥ ᤀᤠᤘᤠ᤹ᤖᤥ॥’ ᤂᤡᤏᤡ᤹ ᤁᤢᤓᤠ ᤛᤠᤶᤔᤡᤗᤠ ᤛᤠᤶᤒᤠᤜᤠ᤹ᤖᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤏᤡ᤹ᤀᤠᤱ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤛᤡᤖᤥ॥’
ACT 17:29 ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤇᤠᤶ ᤕᤠᤵᤔᤡᤖᤧ ᤜᤢᤰᤛᤠᤵᤃᤧᤴ ᤛᤢᤶᤒᤥᤎᤠᤖᤧ ᤆᤥ᤺ᤰᤔᤏᤠᤒᤠ ᤛᤠᤶᤔᤩᤠᤱ. ᤕᤢᤵᤐᤠ. ᤏᤢ ᤗᤢᤱ ᤏᤠᤘᤠᤀᤡᤳᤗᤠ ᤁᤢᤀᤡᤛᤡ᤺ᤰ ᤆᤥ᤺ᤰ ᤑᤠ᤹ᤀᤠᤱ ᤀᤠᤏᤡ᤹ ᤀᤡ᤺ᤵᤔᤠ ᤔᤧᤏᤢ᤹ᤏᤧᤴᤗᤥ॥
ACT 17:30 ᤐᤣᤒᤠ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤴᤏᤡ ᤔᤧᤴᤎᤠᤀᤣ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢᤒᤠᤀᤥ ᤂᤢᤶᤍᤡᤱ ᤔᤧᤒᤡᤖᤢᤴᤛᤡᤴ. ᤁᤖ ᤀᤠᤸᤗ ᤂᤧᤱᤜᤠ᤹ ᤀᤠᤳᤋᤠᤴ ᤐᤡᤛᤠᤱᤛᤠᤱ ᤔᤏᤠᤜᤠ᤹ ᤑᤧᤴ ᤕᤠ᤺ᤶᤒᤰ ᤁᤢᤎᤡᤶ ᤜᤡᤱᤔᤴᤗᤠᤶ ᤔᤧᤜᤡᤴᤗ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥
ACT 17:31 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤁᤴ ᤔᤏᤠᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤵᤔᤡᤜᤠ᤹ ᤛᤠᤶᤕᤥᤏᤡᤒᤠ ᤂᤠᤛᤧᤴ ᤆᤥ᤺ᤰᤔᤠ ᤛᤢᤕᤧᤶ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤃ ᤂᤧᤴ ᤛᤣᤃᤢᤒᤠ ᤔᤏᤠ᤺ᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤀᤠᤱ ᤁᤴ ᤐᤠ᤺ᤴᤏᤡᤴ ᤀᤥᤛᤣ᤺ᤴᤀᤠᤎᤠᤰᤋᤧᤀᤠᤱ ᤘᤠ᤹ᤖᤥ॥”
ACT 17:32 ᤐᤠᤘᤗᤖᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤸᤗᤧᤴ ᤐᤠ᤺ᤴ ᤐᤠ᤺ᤳᤋᤢᤒᤠ ᤔᤧᤄᤧᤵᤛᤢᤀᤠᤱ ᤁᤢᤓᤠᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤛᤠᤱ ᤘᤣ᤹ᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. “ᤀᤠᤏᤡᤃᤧ ᤁᤧᤒᤠ᤺ᤳᤋᤢᤒᤠ ᤁᤴ ᤐᤠ᤺ᤴᤏᤡᤴ ᤕᤠᤶᤔᤥᤀᤠᤱ ᤂᤧᤶᤔᤠ ᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥”
ACT 17:33 ᤜᤧᤰᤁᤩᤠᤱ ᤐᤠᤘᤗᤧᤴ ᤆᤢᤶᤗᤢᤱᤗᤠᤶ ᤗ᤺ᤴᤍᤧ ᤐᤣ॥
ACT 17:34 ᤁᤖ ᤁᤢᤓᤠ ᤔᤏᤠᤜᤠ᤹ ᤐᤠᤘᤗᤖᤥ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢ॥ ᤂᤧᤱᤜᤠ᤹ᤀᤥ ᤍᤣᤀᤢᤏᤡᤛᤡᤕᤛ ᤔᤧᤵᤔᤏᤠᤒᤠ ᤀᤖᤡᤕᤥᤐᤠᤃᤛᤖᤧᤴ ᤐᤠᤛᤡᤱᤐᤠᤍᤠᤱ ᤏᤢ ᤍᤠᤔᤠᤖᤡᤕᤛ ᤔᤧᤵᤔᤏᤠᤔᤠ ᤔᤧᤴᤇᤢᤔᤠ᤹ ᤏᤢ ᤘᤣ᤹ ᤔᤏᤠᤜᤠ᤹ᤀᤠᤱ ᤔᤧᤘᤕᤧᤖᤥ॥
ACT 18:1 ᤂᤧᤴ ᤀᤣᤃᤠᤱ ᤐᤠᤘᤗᤧᤴ ᤀᤧᤌᤧᤴᤛᤗᤠᤶ ᤁᤥᤖᤴᤌᤡ ᤕᤧᤰᤕᤰᤁᤥ ᤐᤣ॥
ACT 18:2 ᤂᤧᤵᤔᤥ ᤂᤢᤏᤧ᤹ ᤀᤁᤫᤡᤗᤠ ᤔᤧᤵᤔᤏᤠᤒᤠ ᤕᤜᤢᤍᤡᤎᤡᤰ ᤋᤢᤔᤢ॥ ᤂᤧᤴ ᤐᤥᤴᤋᤛ ᤗᤠᤈᤣ᤹ᤒᤠ ᤘᤕᤧ॥ ᤂᤧᤴ ᤂᤠᤖᤰ ᤀᤡᤋᤠᤗᤡᤗᤠᤶ ᤔᤣᤗᤡᤱᤃᤧᤴ ᤁᤢᤔᤣ᤺ᤳ ᤐᤪᤡᤛ᤻ᤁᤡᤗᤠ᤺ᤴᤏᤢ ᤋᤩᤧᤛᤡᤀᤠᤱ ᤘᤕᤧᤳᤇᤡ. ᤌᤣᤀᤠᤱᤓᤧᤸᤗᤧ ᤐᤕᤶ ᤜᤠᤱ ᤰᤗᤠᤀᤢᤍᤡᤕᤛᤖᤧ ᤁᤠᤰ ᤕᤜᤢᤍᤡᤜᤠ᤹ ᤖᤥᤔ ᤕᤧᤰᤕᤰᤁᤡᤴ ᤐᤰᤌᤩᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤶᤛᤧ ᤐᤠᤘᤗᤧᤴ ᤐᤣ.
ACT 18:3 ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤧᤰᤁᤣᤀᤣ ᤂᤢᤏᤧ᤹ᤀᤠᤱ ᤛᤠ᤺ᤱᤃᤠᤜᤡᤶ ᤂᤠᤵᤔᤠ ᤋᤣ᤺ᤳ ᤁᤧᤎᤠᤰᤐᤠ ᤘᤕᤧᤒᤠᤸᤗᤧ ᤂᤧᤱᤜᤠ᤹ᤏᤢᤀᤣ ᤛᤥᤖᤡᤰ ᤘᤕᤧᤖ ᤕᤠ᤺ᤶᤒᤰ ᤆᤥᤃᤧᤖᤥ॥
ACT 18:4 ᤜᤧᤰᤁᤩᤠᤱ ᤁᤠᤰ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤕᤜᤢᤍᤡᤜᤠ᤹ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤐᤠ᤺ᤴᤌᤰᤋᤧᤖ ᤂᤧᤱᤜᤠ᤹ᤖᤧᤀᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤐᤥᤎᤰ ᤆᤥᤃᤢᤛᤡᤖᤥ॥
ACT 18:5 ᤛᤡᤗᤠᤛ ᤏᤢ ᤋᤡᤔᤥᤌᤡ᤺ᤴ ᤔᤧᤛᤣᤍᤥᤏᤡᤕᤠᤗᤠᤶ ᤂᤧᤵᤔᤥ ᤁᤧᤖᤧᤳᤇᤡᤀᤠᤱ ᤐᤠᤘᤗᤧᤴ ᤁᤠᤰ ᤕᤧᤶᤔᤥ ᤛᤢᤏᤠᤀᤡᤱ ᤛᤧ᤺ᤔᤠ ᤏᤢ ᤕᤜᤢᤍᤡᤜᤠ᤹ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤕᤧᤛᤢ᤺ᤴᤏᤣᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠ ᤕᤠ᤺ᤶᤒᤰᤁᤥ ᤀᤠᤸᤗᤛᤠᤱ ᤛᤠ᤹ᤖᤡᤰ ᤑᤴᤇᤡᤱᤗᤥ॥
ACT 18:6 ᤁᤖ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤔᤧᤀᤳᤋᤢᤖ ᤁᤢᤏᤠ ᤔᤧᤎᤠᤛᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤱᤜᤠ᤹ᤏᤢ ᤛᤡᤳᤇᤡᤱᤅᤠᤱ ᤘᤠ᤹ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤐᤠᤘᤗᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤢᤍᤣ᤺ᤳᤋᤡᤴ ᤛᤠᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤠᤶᤍᤡᤱ ᤐᤡᤔᤠ ᤀᤠᤕᤠ᤺ᤶᤒᤰᤁᤡᤴ ᤆᤢᤖᤧᤖᤥ॥ ᤂᤡᤏᤡ᤹ ᤁᤧᤛᤩᤧ᤹ᤀᤡ ᤁᤧᤔᤧᤃᤡᤛᤠᤱ ᤀᤡᤱᤃᤠ᤹ ᤌᤣᤀᤠᤱ ᤀᤠᤵᤋᤡᤰ ᤔᤧᤄᤥᤀᤠᤴᤗᤥ॥ ᤀᤠᤸᤗᤀᤠᤱᤎᤥᤃ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤐᤣᤃᤠᤱᤗᤥ॥”
ACT 18:7 ᤜᤧᤰᤁᤣᤗ᤹ᤖᤡᤰ ᤐᤠᤘᤗᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤗᤠᤶ ᤗ᤺ᤴᤍᤧᤀᤠᤱ ᤂᤧᤸᤗᤧ ᤁᤢᤒᤣᤛᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤐᤠ ᤋᤡᤋᤛ ᤔᤧᤵᤔᤏᤠᤒᤠ ᤕᤢᤛ᤻ᤋᤛᤖᤧ ᤁᤢᤜᤡᤶᤔᤥ ᤘᤠ᤹ᤛᤧ ᤐᤣ (ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱ ᤘᤕᤧ)॥
ACT 18:8 ᤁᤪᤡᤛ᤻ᤐᤛ ᤔᤧᤵᤔᤏᤠᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤧᤴ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤈᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤁᤥᤖᤴᤌᤡᤒᤠ ᤕᤖᤡᤰ ᤘᤣ᤹ ᤔᤏᤠᤜᤠ᤹ᤖᤧ ᤛᤢᤏᤠᤀᤡᤱ ᤔᤧᤄᤧᤵᤛᤢᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤖ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥
ACT 18:9 ᤌᤡᤰ ᤛᤧᤴᤍᤡᤰ ᤋᤠᤍᤡᤃᤧᤴ ᤛᤧᤵᤔᤠᤱᤔᤥ ᤍᤠᤱᤒᤠᤸᤗᤧ ᤐᤠᤘᤗᤧᤴ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤁᤖ ᤛᤫᤠ᤺ᤳ ᤔᤧᤘᤕᤧᤴᤏᤧ᤹. ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤛᤧ᤺ᤛ᤻ᤛᤧ᤹ᤖ ᤘᤕᤧ᤹ᤀᤥ᥄
ACT 18:10 ᤀᤡᤱᤃᤠ᤹ᤃ ᤂᤧᤏᤧ᤹ᤏᤢᤀᤣ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤜᤠ᤺ᤳᤗᤧᤀᤠᤱ ᤌᤣᤀᤠᤱ ᤁᤧᤶᤔᤧᤳᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤧᤰᤕᤰᤁᤥ ᤆᤰᤔᤧᤸᤗ᤹ᤀᤣ ᤛᤢᤏᤠᤀᤡᤱ ᤀᤡᤱᤃᤧᤓᤥ᤺ᤛᤢᤏᤧ ᤑᤠ᤹ᤃᤪ ᤏᤛᤠ᤺ᤴᤏᤥ ᤋᤠ᤺ᤔᤠ ᤕᤖᤡᤰ ᤀᤠᤔᤏᤠᤜᤠ᤹ ᤔᤧᤘᤠ᤹ᤖᤥ॥”
ACT 18:11 ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤐᤠᤘᤗᤖᤧ ᤋᤱᤒᤣ ᤌᤡᤰᤁᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤜᤢ᤹ᤖᤢᤛᤡᤖ ᤘᤕᤧᤖᤥ॥
ACT 18:12 ᤜᤧᤰᤁᤩᤠᤱ ᤃᤠᤗᤡᤕᤥ ᤔᤧᤵᤔᤏᤠᤒᤠ ᤔᤏᤠ᤺ᤴ ᤀᤰᤂᤤᤕᤠ ᤗᤠᤈᤣ᤹ᤒᤠ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤘᤕᤧᤸᤗᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤐᤠᤘᤗᤧᤴ ᤔᤧᤍᤧᤶᤛᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤍᤃᤡ ᤂᤠᤛᤧᤴ ᤗᤥ᤺ᤴᤇᤧ ᤔᤧᤍᤠᤖᤢ॥
ACT 18:13 ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧ ᤛᤠᤶᤕᤥᤌᤡᤶᤏᤢ ᤔᤧᤴᤍᤱᤔᤏᤠ ᤛᤣᤘᤠ ᤆᤥ᤺ᤰᤔᤠ ᤔᤏᤠᤜᤠ᤹ ᤜᤢᤛᤢᤛᤡᤀᤠᤱ ᤘᤠ᤹ᤖᤥ॥”
ACT 18:14 ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤐᤠ᤺ᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤃᤠᤗᤡᤕᤥᤖᤧ ᤂᤧᤴ ᤕᤜᤢᤍᤡᤜᤠ᤹ ᤔᤧᤳᤋᤢᤛᤡ. “ᤕᤜᤢᤍᤡᤛᤣ. ᤁᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤏᤢ ᤁᤴ ᤔᤏᤠ᤺ᤸᤗᤧ ᤖᤥᤔᤡ ᤌᤡᤶ ᤑᤣ᤺ᤴᤍᤢᤒᤠ ᤐᤠ᤺ᤴ ᤘᤠ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ ᤐᤠ᤺ᤴ ᤂᤧᤶᤔᤠᤀᤠᤱ ᤂᤠᤛᤧᤴ ᤗᤥ᤺ᤶᤔᤠ ᤏᤢ᤺ᤒᤠᤀᤣ ᤐᤥ᤺ᤱ॥
ACT 18:15 ᤁᤖ ᤁᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤛᤠᤶᤕᤥᤌᤡᤶᤔᤥᤒᤠ ᤔᤡᤱᤜᤠ᤹. ᤛᤢᤳᤗᤠᤜᤠ᤹ ᤏᤢ ᤌᤡᤶᤔᤡᤸᤗᤧᤴᤗᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤱᤃ ᤂᤡᤏᤡ᤹ ᤀᤠᤒᤠᤅᤣ ᤋᤱᤄᤧᤶᤔᤧ᤹ᤀᤥ॥ ᤀᤡᤱᤃᤠ᤹ᤃ ᤁᤴ ᤐᤠ᤺ᤴᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤏᤠᤴᤗᤥ॥”
ACT 18:16 ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤂᤠᤛᤧᤴᤜᤡᤶᤗᤠᤶ ᤗᤠ᤺ᤰᤁᤠᤳ ᤐᤠᤱᤄᤢᤍᤣ᤺ᤛᤢᤛᤡᤖᤥ॥
ACT 18:17 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤁᤧᤖᤧᤰᤗᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥ᤺ᤒᤠ ᤛᤥᤛ᤻ᤌᤣᤏᤛᤧᤴ ᤔᤧᤍᤧᤶᤛᤢᤀᤠᤱ ᤂᤠᤛᤧᤴᤜᤡᤶ ᤋᤃᤡᤀᤣ ᤔᤧᤗ᤺ᤵᤛᤢᤖᤥ॥ ᤁᤖ ᤃᤠᤗᤡᤕᤥᤖᤧ ᤂᤧᤱᤜᤠ᤹ ᤂᤧᤶᤂᤧᤶᤔᤠᤱ ᤔᤧᤗᤠᤵᤋᤢᤛᤡᤴ॥
ACT 18:18 ᤐᤠᤘᤗᤧᤴ ᤁᤥᤖᤴᤌᤡᤀᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤕᤖᤡᤰ ᤕᤧᤴ ᤘᤕᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤐᤪᤡᤛ᤻ᤁᤡᤗᤠ ᤜᤧᤰᤁᤩᤠᤱ ᤁᤢᤕᤧᤶᤒᤠ᤹ ᤀᤁᤫᤡᤗᤠ᤺ᤴᤏᤢ ᤛᤡᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰ ᤆᤥᤃᤧ॥ ᤁᤖ ᤂᤢᤏᤧ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ. ᤔᤠᤱᤜᤧᤰ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤐᤠᤘᤗᤖᤧ ᤁᤡᤱᤁᤪᤡᤕᤠ ᤕᤧᤰᤕᤰᤁᤥ ᤁᤢᤎᤧᤃᤣ᤺ᤰ ᤏ᤺ᤰᤂᤢᤖᤥ॥
ACT 18:19 ᤂᤧᤱᤜᤠ᤹ ᤀᤣᤑᤡᤛᤛᤀᤥ ᤔᤧᤃᤧᤖᤧᤀᤠᤱ ᤐᤠᤘᤗᤖᤧ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠ᤺ᤴ ᤂᤧᤵᤔᤥ ᤐᤰᤌᤛᤡ॥ ᤁᤖ ᤂᤧᤵᤔᤥ ᤘᤕᤧᤸᤗᤧ ᤂᤢᤏᤧ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤀᤠᤱ ᤕᤜᤢᤍᤡᤜᤠ᤹ᤏᤢ ᤐᤠ᤺ᤴᤌᤰᤋᤧᤖᤥ॥
ACT 18:20 ᤂᤧᤱᤜᤠ᤹ᤖᤧ ᤁᤢᤓᤠ ᤕᤧᤴ ᤀᤠᤏᤡᤃᤧᤏᤢᤀᤣ ᤘᤕᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤛᤠᤱ ᤂᤢᤏᤧ᤹ ᤘᤠ᤹ᤔᤠ ᤔᤧᤍᤧᤴᤍᤧᤴᤗᤥ॥
ACT 18:21 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤐᤥ᤺ᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤠᤶᤔᤥ ᤋᤠᤀᤠᤖᤥ॥” ᤜᤧᤰᤁᤣ ᤔᤧᤳᤋᤢᤎᤛᤡᤀᤠᤱ ᤂᤢᤏᤧ᤹ ᤀᤣᤑᤡᤛᤛᤗᤠᤶ ᤛᤡᤈᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰᤁᤥ ᤌᤠᤛᤡᤱᤗᤥ॥
ACT 18:22 ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤁᤧᤖᤧᤀᤠᤱ ᤂᤧᤵᤔᤥᤏᤢ ᤌᤠ᤺ᤱ ᤕᤖᤢᤛᤗᤧᤶᤔᤥ ᤐᤣᤀᤠᤱ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤀᤥ ᤆᤢᤱᤈᤡᤃᤧᤴ ᤛᤣᤘᤠ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤣᤴᤋᤡᤀᤥᤰᤁᤥ ᤌᤩᤧᤖᤥ॥
ACT 18:23 ᤂᤧᤵᤔᤥ ᤁᤢᤓᤠ ᤕᤧᤶ ᤕᤠ᤺ᤰᤋᤧᤀᤠᤱ ᤂᤧᤵᤔᤥᤗᤠᤶ ᤐᤠᤘᤗᤧᤴ ᤃᤗᤠᤋᤡᤕᤠ ᤏᤢ ᤑᤪᤡᤃᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤕᤠᤶᤔᤥ ᤗᤠᤶᤍᤡ᤺ᤰ ᤆᤥᤃᤧᤖ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥᤃᤢᤛᤡᤖᤥ॥
ACT 18:24 ᤂᤧᤴ ᤕᤧᤶᤔᤥ ᤀᤗᤧᤰᤈᤧᤴᤍᤪᤡᤕᤠ ᤕᤧᤰᤕᤰᤁᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤵᤐᤥᤸᤗᤥᤛ ᤔᤧᤵᤔᤏᤠᤒᤠ ᤕᤜᤢᤍᤡᤎᤡᤰ ᤀᤣᤑᤡᤛᤛᤀᤥ ᤋᤩᤧ॥ ᤂᤢᤏᤧ᤹ᤃ ᤛᤠ᤹ᤖᤡᤰ ᤏᤢ᤺ᤖᤡᤰ ᤐᤠ᤺ᤵᤔᤠ ᤁᤧᤛᤢᤰᤐᤠ ᤆᤥᤃᤧ. ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤀᤠᤱ ᤏᤢ᤺ᤖᤡᤰ ᤗᤧᤛ᤻ᤛᤢᤀᤠᤱ ᤘᤕᤧᤖᤥ॥
ACT 18:25 ᤂᤢᤏᤧ᤹ᤃ ᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤜᤡᤱᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤜᤢ᤹ᤖᤢᤛᤡᤀᤠᤱ ᤘᤕᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤏᤢ᤺ᤖᤡᤰᤁᤠᤱ ᤁᤢᤛᤡᤰ ᤛᤔᤧᤖ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤒᤠ ᤛᤧᤰᤂᤠ ᤐᤠ᤺ᤴᤜᤠ᤹ ᤜᤢ᤹ᤖᤢᤛᤡᤖᤥ॥ ᤜᤧᤰᤁᤣᤛᤠᤱ ᤂᤢᤏᤧ᤹ᤃ ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤸᤗᤧ ᤜᤢ᤹ᤖᤢᤛᤡᤒᤠᤴᤗᤰ ᤗᤧᤛ᤻ᤛᤢᤀᤠᤱ ᤘᤕᤧᤖᤥ॥
ACT 18:26 ᤂᤢᤏᤧ᤹ ᤐᤕᤶ ᤀᤠ᤺ᤴᤇᤡᤱᤔᤠᤏᤢ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤠᤖᤧᤸᤗᤧ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠᤖᤧ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤧᤳᤇᤢᤀᤠᤱ ᤂᤢᤴᤇᤡ᤹ ᤜᤡᤶᤔᤥ ᤀᤢ᤺ᤳᤋᤧᤳᤇᤢ. ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤜᤡᤱᤔᤠ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤢᤖ ᤑᤠ᤹ᤀᤠᤱ ᤐᤥᤎᤰ ᤆᤥᤃᤢ ᤐᤡᤖᤧᤳᤇᤢᤖᤥ॥
ACT 18:27 ᤀᤵᤐᤥᤗᤥᤛ ᤀᤰᤂᤤᤕᤠ ᤌᤢᤶᤔᤥ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤸᤗᤧ ᤀᤣᤑᤡᤛᤛ᤻ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤀᤠ᤺ᤴᤇᤡᤱᤔᤠ ᤔᤧᤒᤡᤖᤢᤖ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ ᤂᤡᤏᤡ᤹ᤀᤥ ᤀᤵᤐᤥᤗᤥᤛᤧᤴ ᤋᤠᤖ ᤐᤳ. ᤏᤢ᤺ᤖᤡᤰᤁᤠᤱ ᤗᤠᤱᤍᤠ᤺ᤰᤔᤠ ᤐᤡᤖᤧᤶᤔᤧ᤹ᤀᤥ ᤗ᤹ᤖᤡᤰ ᤛᤰᤀᤡᤱᤄᤱ ᤔᤧᤜᤠᤰᤋᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥ ᤁᤧᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤛᤠᤏᤡᤒᤠᤜᤠ᤹ ᤕᤖᤡᤰ ᤁᤢᤓᤠ᤹ ᤐᤡᤖᤢᤛᤡᤖᤥ॥
ACT 18:28 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤏᤠᤗᤢᤶᤔᤥᤀᤣ ᤂᤧᤵᤔᤥᤒᤠ ᤕᤜᤢᤍᤡᤜᤠ᤹ᤏᤢ ᤛᤠ᤹ᤖᤡᤰ ᤐᤠ᤺ᤴᤌᤰᤋᤧᤀᤠᤱ ᤂᤢᤏᤡ᤹ ᤐᤠ᤺ᤴᤏᤡᤴ ᤀᤳᤋᤢᤖ ᤛᤠᤶᤕᤥᤛᤠᤵᤗᤠᤗᤠᤶ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤕᤠ᤺ᤴᤍᤢᤛᤡᤖᤥ॥
ACT 19:1 ᤀᤵᤐᤥᤗᤥᤛᤧᤴ ᤁᤥᤖᤴᤌᤡ ᤕᤧᤰᤕᤰᤁᤥ ᤘᤕᤧᤸᤗᤧ ᤐᤠᤘᤗᤧᤴ ᤀᤣᤛᤡᤕᤠ ᤋᤧᤱᤃᤵ ᤛᤡᤃᤠᤱ ᤗᤠᤶᤍᤡ᤺ᤰ ᤆᤥᤃᤧᤖ ᤀᤣᤑᤡᤛᤛ ᤕᤧᤰᤕᤰᤁᤥ ᤁᤧᤖᤧ ᤋᤩᤧᤖᤥ॥ ᤂᤧᤵᤔᤥ ᤁᤢᤓᤠ ᤏᤛᤠᤏᤡᤒᤠᤜᤠ᤹ ᤋᤢᤔᤢᤛᤡᤀᤠᤱ
ACT 19:2 ᤛᤣ᤺ᤴᤍᤥᤛᤢᤛᤡ. “ᤏᤛᤠ᤺ᤴ ᤁᤧᤈᤥᤃᤢᤶᤔᤡᤸᤗᤧ ᤛᤣᤛᤣᤔᤠᤱᤅᤡᤴ ᤁᤧᤄᤥ᤺ᤛᤢᤶᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤛᤣᤛᤣᤔᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤱᤃ ᤔᤧᤱᤄᤧᤶᤔᤣ ᤘᤕᤡᤃᤧᤖᤥ॥”
ACT 19:3 ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤰᤋᤱᤒᤠ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧ ᤏᤛᤠ᤺ᤴ ᤆᤥ᤺ᤰᤔᤏᤠ᤺ᤸᤗᤧ ᤕᤢᤜᤢᤴᤏᤠᤖᤧ ᤜᤢ᤹ᤖᤡᤃᤧᤒᤠ ᤒᤵᤋᤡᤛ᤻ᤔᤠᤴ ᤐᤥ᤺ᤰᤂᤡᤃᤧᤖᤥ॥”
ACT 19:4 ᤐᤠᤘᤗᤖᤧ ᤔᤧᤳᤋᤢᤛᤡ. “ᤕᤢᤜᤢᤴᤏᤠᤖᤧᤃ ᤗᤠᤕᤥᤗᤠᤶ ᤁᤧᤜᤡᤶᤒᤠᤜᤠ᤹ ᤒᤵᤋᤡᤛ᤻ᤔᤠ ᤐᤡᤖᤢᤛᤡᤖ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡ. ᤋᤠ᤺ᤴᤍᤡ ᤀᤠᤀᤣᤃᤠᤱ ᤁᤧᤍᤠ᤺ᤒᤠᤖ ᤁᤧᤒᤵᤐᤧᤴ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ. ᤂᤢᤏᤧ᤹ᤀᤣ ᤕᤧᤛᤢᤖᤥ॥”
ACT 19:5 ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧ॥
ACT 19:6 ᤐᤠᤘᤗᤖᤧ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢ ᤐᤡᤖᤢᤛᤡᤸᤗᤧ ᤛᤣᤛᤣᤔᤠᤱᤅᤡᤴ ᤂᤢᤏᤡ᤹ ᤛᤶᤍᤠᤱ ᤌᤩᤧᤀᤠᤱ ᤂᤧᤱᤜᤠ᤹ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠᤖᤧᤖᤥ॥
ACT 19:7 ᤂᤧᤵᤔᤥ ᤁᤧᤖᤧᤰᤁᤥ ᤌᤡᤰ-ᤏᤧᤳ (᥇᥈) ᤕᤠᤖᤡᤰ ᤕᤧᤶᤒᤡᤳᤇᤠ᤹ᤜᤠ᤹ ᤔᤧᤘᤕᤧᤖᤥ॥
ACT 19:8 ᤐᤠᤘᤗᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤖ ᤗᤠ ᤛᤢᤶᤛᤡ ᤌᤠᤖᤡᤰ ᤜᤠᤱᤜᤠᤱ ᤗ᤹ᤖᤡᤰ ᤔᤏᤠᤜᤠ᤹ᤏᤢ ᤐᤠ᤺ᤴᤎᤱ ᤆᤥᤃᤢᤖ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤋᤶᤛᤡᤴ ᤆᤥᤃᤢ॥
ACT 19:9 ᤁᤢᤓᤠᤖᤧ ᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢ. ᤁᤖ ᤁᤢᤓᤠᤃ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤔᤧᤘᤕᤧᤀᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤴᤍᤧᤴᤍᤧᤴᤏᤠᤱ ᤍᤠᤱᤒᤠᤖᤧ ᤁᤢᤗᤠᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤋᤠᤵᤑᤧ᤺ᤶᤒᤠ ᤔᤧᤒᤠ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤐᤰᤌᤛᤡᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤣ᤹ᤛ᤻ᤔᤠ ᤋᤧᤴᤏᤥ ᤋᤣ᤹ᤖᤢᤛᤡ॥ ᤜᤧᤰᤁᤩᤠᤱ ᤋᤡᤖᤠᤏᤛ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤏᤡᤛᤠᤶᤜᤡᤶᤔᤥ ᤌᤡᤰᤕᤠ᤺ᤴᤎᤰ ᤋᤱᤒᤣ ᤏᤧᤳᤇᤡ ᤌᤠᤖᤡᤰ ᤔᤏᤠᤜᤠ᤹ᤏᤢ ᤐᤠ᤺ᤴᤎᤱ ᤆᤥᤃᤢ॥ ᤀᤰᤂᤣᤗ᤹ᤖᤡᤰ ᤀᤣᤛᤡᤕᤠ ᤋᤧᤱᤃᤵᤐᤥᤒᤠ ᤁᤠᤰ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤖᤥ॥
ACT 19:11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤘᤗᤗᤠᤶ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤖᤥ॥
ACT 19:12 ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤛᤢᤛ᤻ᤛᤢᤒᤠ ᤐᤱᤃᤧᤴᤜᤠ᤹ ᤏᤢ ᤐᤌᤠᤱᤜᤠ᤹ ᤔᤧᤍᤣ᤹ᤖᤢᤀᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠ ᤛᤶᤍᤠᤱ ᤔᤧᤏᤧᤛ᤻ᤛᤢ ᤔᤧᤒᤡᤖᤢᤛᤡᤸᤗᤧ ᤂᤧᤱᤜᤠ᤹ ᤋᤢᤰᤔᤠ ᤕ᤹ᤔᤠᤗᤠᤶ ᤔᤧᤘᤣ᤺ᤳᤋᤧᤀᤠᤱ ᤑᤧᤴᤛᤠᤶᤜᤠ᤹ ᤔᤧᤗ᤺ᤴᤍᤧ ᤔᤧᤒᤣᤖᤥ॥
ACT 19:13 ᤂᤧᤵᤔᤥ ᤋᤠᤰᤁᤴᤏᤢ ᤑᤧᤴᤛᤠᤶ ᤁᤧᤗ᤺ᤵᤐᤠ ᤁᤢᤓᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤡᤴ ᤀᤥᤃᤵ ᤆᤥ᤺ᤰᤔᤠ ᤋᤶᤛᤡᤴ ᤔᤧᤈᤥᤃᤢᤖ ᤂᤧᤱᤜᤠ᤹ᤖᤧ ᤑᤧᤴᤛᤠᤶᤔᤡᤴ ᤀᤰᤂᤣ ᤔᤧᤔᤧᤳᤋᤢ. “ᤐᤠᤘᤗᤖᤧ ᤀᤡᤱᤓᤥ᤺ᤛᤢᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤡᤱᤈᤠ᤺ᤱ ᤐᤡᤏᤧᤖᤥ॥”
ACT 19:14 ᤂᤧᤵᤔᤥ ᤛ᤻ᤁᤣᤘᤠᤛ ᤔᤧᤵᤔᤏᤠᤒᤠ ᤕᤜᤢᤍᤡ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤏᤢᤛᤡ ᤁᤢᤛ᤻ᤛᤠ᤺ ᤕᤧᤶᤒᤡᤳᤇᤠ᤹ᤜᤠ᤹ᤖᤧᤀᤠᤱ ᤜᤧᤰᤋᤱᤒᤠ ᤕᤠ᤺ᤶᤒᤰ ᤔᤧᤈᤥᤃᤢ॥
ACT 19:15 ᤜᤧᤰᤁᤣ ᤔᤧᤈᤥᤃᤢᤸᤗᤧ ᤑᤧᤴᤛᤠᤶᤔᤡᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤐᤠᤘᤗᤧᤴ ᤁᤢᤛᤡᤱ ᤏᤡ᤺ᤳᤋᤢᤱ. ᤕᤧᤛᤢ᤺ᤴ ᤁᤢᤛᤡᤱ ᤏᤡ᤺ᤳᤋᤢᤱ. ᤁᤖ ᤂᤡᤏᤡ᤹ᤃ ᤜᤠ᤺ᤳᤏᤡᤱᤒᤣ᥅”
ACT 19:16 ᤂᤧᤴ ᤑᤧᤴᤛᤠᤶᤔᤡᤸᤗᤧ ᤕᤢᤰᤋᤢᤒᤠ ᤔᤏᤠ᤺ᤴ ᤐᤡᤳᤆᤠᤰ ᤐᤡᤴᤍᤧᤖ ᤂᤧᤱᤜᤠ᤹ ᤑᤳᤋᤢᤛᤡᤖ ᤕᤢᤰᤋᤢᤛᤡᤀᤠᤱ ᤂᤧᤸᤗᤧ ᤂᤢᤏᤡ᤹ ᤋᤣ᤺ᤳᤜᤠ᤹ ᤌᤧ᤺ᤰᤂᤢᤒᤡᤖᤢᤛᤡᤖ ᤂᤠ᤺ᤴᤍᤢᤛᤡᤀᤠᤱ ᤂᤧᤴ ᤜᤡᤶᤔᤥᤗᤠᤶ ᤂᤧᤱᤜᤠ᤹ ᤗᤧᤰᤆᤠᤒᤧᤎᤡ᤺ᤰ ᤔᤧᤗ᤺ᤴᤍᤧᤀᤠᤱ ᤔᤧᤗᤥ᤺ᤰᤋᤧ ᤔᤧᤒᤣᤖᤥ॥
ACT 19:17 ᤜᤧᤰᤁᤩᤠᤱ ᤀᤣᤑᤡᤛᤛᤀᤥ ᤁᤧᤘᤠ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤔᤧᤃᤡᤛᤧᤖᤥ॥ ᤂᤧᤱᤜᤠ᤹ᤖᤧ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤡᤴ ᤐᤕᤶ ᤀᤡᤱᤎᤠ᤺ᤱ ᤔᤧᤒᤡᤖᤢᤖ ᤌᤠ᤺ᤱᤎᤠ᤺ᤱ ᤔᤧᤈᤥᤃᤢᤖᤥ॥
ACT 19:18 ᤕᤖᤡᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤘᤣ᤹ ᤏᤛᤠᤏᤡᤒᤠ ᤋᤃᤡ ᤂᤢᤏᤡ᤹ ᤔᤧᤈᤥᤃᤢᤒᤠ ᤑᤧᤴ ᤕᤠ᤺ᤶᤒᤰᤜᤠ᤹ ᤕᤠᤶᤔᤥ ᤔᤧᤈᤥᤃᤢᤶᤒᤧᤴ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ॥
ACT 19:19 ᤀᤰᤂᤣᤗ᤹ᤖᤡᤰ ᤕᤖᤡᤰ ᤁᤡᤳᤆᤠᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤴ ᤔᤏᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤁᤡᤳᤆᤠᤰ ᤛᤠᤵᤗᤠᤜᤠ᤹ ᤔᤧᤛᤢᤵᤛᤢᤀᤠᤱ ᤔᤏᤠ ᤋᤃᤡᤀᤣ ᤔᤧᤜᤠ᤺ᤴᤍᤢ ᤔᤧᤍᤣ᤺ᤛᤢᤖᤥ॥ ᤂᤧᤴ ᤁᤡᤳᤆᤠᤰ ᤛᤠᤵᤗᤠᤜᤠ᤹ᤖᤧ ᤁᤢᤔᤧᤸᤗᤢᤱᤃ ᤜᤧᤴᤇᤡᤱ ᤅᤠᤒᤥ᤺ᤱᤏᤢ᤺ᤸᤗᤧᤀᤠᤱ ᤕᤖᤡᤰ (᥋᥆.᥆᥆᥆) ᤕᤢᤵᤐᤠᤕᤠᤱ ᤘᤕᤧᤖᤥ॥
ACT 19:20 ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤍᤠᤱᤒᤠᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤒᤠ᤺ᤴᤈᤠᤰᤁᤡᤴ ᤔᤢᤰᤛᤠᤶᤏᤢ ᤁᤢᤎᤡᤶ ᤛᤧ᤺ᤖᤧᤖ ᤐᤣᤖᤥ॥
ACT 19:21 ᤁᤴ ᤐᤠ᤺ᤴᤜᤠ᤹ ᤐᤥ᤺ᤰᤂᤧ ᤆᤢᤖᤧᤀᤠᤱ ᤐᤠᤘᤗᤖᤧ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠ ᤌᤢᤶ ᤐᤥ᤺ᤱᤔᤠᤖ ᤕᤖᤢᤛᤗᤧᤔ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤂᤧᤵᤔᤥ ᤐᤣ᤺ᤰᤔᤠᤀᤠᤱ ᤖᤥᤔ ᤕᤧᤰᤕᤰᤁᤥᤀᤠᤱ ᤐᤣ᤺ᤰᤔᤠᤀᤣ ᤐᤥ᤺ᤱᤗᤥ॥”
ACT 19:22 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤠ᤹ ᤁᤧᤒᤡᤒᤠ ᤏᤧᤵᤑᤢ ᤁᤢᤴᤈᤢᤶᤜᤠ᤹ ᤋᤡᤔᤥᤌᤡ ᤏᤢ ᤀᤡᤖᤠᤛ᤻ᤋᤛᤧᤴ ᤋᤃᤡ ᤔᤧᤛᤣᤍᤥᤏᤡᤕᤠᤀᤥ ᤐᤠᤱᤄᤢᤛᤡᤀᤠᤱ ᤂᤢᤏᤧ᤹ᤃ ᤀᤣᤛᤡᤕᤠ ᤋᤧᤱᤃᤵᤐᤥᤀᤣ ᤁᤢᤓᤠ ᤕᤧᤴ ᤕᤠ᤺ᤰᤋᤧᤖᤥ॥
ACT 19:23 ᤒᤠ ᤂᤧᤴ ᤕᤧᤶᤔᤥ ᤀᤣᤑᤡᤛᤛᤀᤥ ᤍᤠᤱᤒᤠᤸᤗᤧ ᤁᤢᤗᤠᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤕᤶᤒᤠ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧᤖᤥ॥
ACT 19:24 ᤍᤧᤔᤧᤋᤪᤡᤕᤛ ᤔᤧᤵᤔᤏᤠᤒᤠ ᤕᤢᤵᤐᤠ ᤆᤥᤒᤧᤃᤢᤎᤡᤰ ᤘᤕᤧ॥ ᤂᤧᤴ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤸᤗᤧᤴ ᤆᤢᤈᤢᤰᤛᤠ ᤕᤢᤵᤐᤠ ᤔᤠᤱᤜᤡᤶ ᤁᤧᤈᤥ᤺ᤰᤐᤠ ᤘᤕᤧ ᤜᤧᤰᤁᤩᤠᤱ ᤂᤧᤴ ᤕᤠ᤺ᤶᤒᤰᤁᤥᤗᤠᤶ ᤕᤖᤡᤰ ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤜᤡᤶᤒᤪᤠᤶ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥
ACT 19:25 ᤜᤧᤰᤁᤩᤠᤱ ᤁᤴ ᤏᤠᤘᤠᤀᤡᤳᤗᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤘᤣ᤹ ᤜᤧᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤛᤢᤵᤛᤢᤛᤡᤀᤠᤱ ᤆᤢᤶᤗᤢᤱ ᤆᤥᤃᤢᤖ ᤀᤰᤂᤣ ᤔᤧᤳᤋᤢᤛᤡ. “ᤋᤣ᤺ᤱᤈᤢᤶᤛᤣ. ᤁᤴ ᤕᤠ᤺ᤶᤒᤰᤁᤥᤗᤠᤶ ᤀᤠᤏᤡ᤹ᤃ ᤛᤠ᤹ᤖᤡᤰᤁᤣ ᤕᤖᤡᤰ ᤕᤠᤱ ᤀᤠᤎᤃᤢᤶᤒᤠᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤠᤱ ᤘᤠ᤹ᤖᤥ॥
ACT 19:26 ᤀᤠᤸᤗ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡ᤺ᤛᤢᤶᤔᤠᤱ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤁᤴ ᤐᤠᤘᤗ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤀᤣᤑᤡᤛᤛᤀᤥᤖᤰ ᤔᤧ᤺ᤴ. ᤁᤖ ᤀᤣᤛᤡᤕᤠ ᤂᤠᤖᤠᤰᤐᤠ ᤋᤧᤱᤃᤵᤐᤥ ᤕᤖᤡᤰ ᤔᤏᤠᤜᤠ᤹. ᤀᤠᤏᤡ᤹ ᤔᤏᤠᤜᤠ᤹ᤖᤧ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤛᤡ ᤔᤧ᤺ᤴᤗᤥ ᤑᤠ᤹ᤀᤠᤱ ᤗᤧᤔᤢᤛᤡᤖ ᤘᤠ᤹ᤖᤥ॥
ACT 19:27 ᤜᤧᤰᤁᤣ᤺ᤸᤗᤧ ᤁᤸᤗᤧᤃ ᤀᤠᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤏᤠᤜᤠ᤹ᤖᤧ ᤑᤧᤴ ᤐᤠ᤺ᤴ ᤔᤧᤒᤠ᤺ᤳᤋᤢᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴ ᤏᤢ ᤁᤢᤔᤠᤱᤜᤡᤶᤔᤡᤸᤗᤧ ᤁᤢᤈᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
ACT 19:28 ᤀᤠᤸᤗ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧ. “ᤀᤣᤑᤡᤛᤛ᤻ᤔᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴᤏᤣ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤗᤥ᥄”
ACT 19:29 ᤜᤧᤰᤁᤣ᤺ᤸᤗᤧ ᤛᤵᤑᤠᤖᤧᤛᤠ ᤁᤠᤰ ᤕᤧᤰᤕᤰᤁᤥ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤐᤠᤘᤗᤧᤴᤏᤢ ᤔᤧᤛᤣᤍᤥᤏᤡᤕᤠᤗᤠᤶ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤁᤢᤴᤈᤢᤶᤜᤠ᤹ ᤃᤠᤕᤛ ᤏᤢ ᤀᤖᤡᤛ᤻ᤋᤠᤷᤂᤛᤛᤡ ᤔᤧᤍᤧᤶᤛᤢᤛᤡᤀᤠᤱ ᤐᤱᤘᤠᤀᤡᤳᤗᤠᤍᤧᤴᤏᤥ ᤔᤧᤍᤠᤖᤢᤛᤡᤖᤥ॥
ACT 19:30 ᤐᤠᤘᤗᤖᤧᤀᤠᤱ ᤂᤧᤵᤔᤥ ᤐᤣ᤺ᤰᤔᤠᤀᤠᤱ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢ. ᤁᤖ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤧ᤹ ᤂᤧᤵᤔᤥ ᤐᤣ᤺ᤰᤔᤠ ᤔᤧᤶᤒᤠᤱᤄᤢᤴᤗᤥ॥
ACT 19:31 ᤐᤠᤘᤗᤖᤧ ᤁᤢᤓᤠ ᤁᤢᤴᤈᤢᤶ ᤋᤧᤱᤃᤐᤩᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤱᤘᤠᤀᤡᤳᤗᤠᤍᤧᤴᤏᤥ ᤀᤥᤛᤣ᤺ᤴᤔᤧᤎᤠᤰᤛᤡᤱᤅᤡᤴᤏᤡ ᤑᤠ᤹ᤀᤠᤱ ᤀᤡᤱᤄᤱ ᤔᤧᤜᤠᤅᤢᤖᤥ॥
ACT 19:32 ᤜᤧᤰᤁᤩᤠᤱ ᤆᤢᤶᤗᤢᤱᤒᤠ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤖ ᤁᤢᤓᤠ ᤌᤡᤰ ᤐᤠ᤺ᤴᤏᤥ ᤔᤧᤀ᤺ᤰᤋᤧ. ᤘᤣ᤹ᤜᤠ᤹ ᤘᤣ᤹ ᤐᤠ᤺ᤴᤏᤥ ᤔᤧᤀ᤺ᤰᤋᤧ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤡ᤹ ᤐᤠ᤺ᤴ ᤔᤧᤍᤅᤧᤴᤏᤠᤱ ᤌᤣᤀᤠᤱ ᤔᤏᤠᤜᤠ᤹ ᤂᤧᤵᤔᤥ ᤔᤧᤈᤢᤵᤛᤧᤒᤠ ᤕᤖᤡᤰᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
ACT 19:33 ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤗᤧᤰᤈᤧᤴᤍᤖ ᤔᤧᤵᤔᤏᤠᤒᤠ ᤔᤏᤠ᤺ᤴ ᤁᤴ ᤜᤕᤱᤁᤡᤸᤗᤡᤱᤅᤡᤴ ᤌᤣᤀᤠᤱ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤆᤧᤱᤛᤧ ᤂᤢᤏᤧ᤹ ᤋᤃᤡ ᤔᤧᤈᤴᤍᤢ॥ ᤜᤧᤰᤁᤩᤠᤱ ᤀᤗᤣᤰᤈᤣᤴᤍᤖᤗᤧ ᤌᤡᤰ ᤏᤧᤳᤇᤡ ᤏᤠᤱᤛᤡᤱᤔᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤑᤠ᤹ᤀᤠᤱ ᤜᤢᤰᤑᤥ᤺ᤰᤂᤢᤖ ᤔᤏᤠᤜᤠ᤹ ᤛᤫᤠ᤺ᤳ ᤆᤥ᤺ᤰᤔᤠᤛᤡ ᤏᤡᤱᤘᤠ᤹ ᤆᤥᤃᤢᤖᤥ॥
ACT 19:34 ᤁᤖ ᤂᤢᤏᤧ᤹ ᤕᤜᤢᤍᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤔᤏᤠᤜᤠ᤹ ᤛᤠ᤹ᤖᤡᤰ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤂᤵᤔᤧ ᤁᤢᤔᤢᤰ ᤏᤧᤳᤇᤡ ᤌᤠᤖᤡᤰ ᤀᤰᤂᤣ ᤗ᤹ᤖᤡᤰ ᤔᤧᤀ᤺ᤰᤋᤧ. “ᤀᤣᤑᤡᤛᤛ᤻ᤔᤠ ᤀᤠᤷᤋᤣᤔᤡᤛ ᤛᤠᤶᤔᤠᤱᤅᤡᤴᤏᤣ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤗᤥ᥄”
ACT 19:35 ᤜᤧᤰᤁᤩᤠᤱ ᤁᤢᤏᤢᤵᤔᤥ ᤕᤧᤰᤕᤰ ᤛᤢᤜᤠᤱᤃᤧᤶᤒᤠᤸᤗᤧ ᤁᤠᤰ ᤔᤏᤠᤜᤠ᤹ ᤛᤫᤠ᤺ᤳ ᤆᤥᤃᤢᤛᤡᤀᤠᤱ ᤔᤧᤳᤋᤢᤛᤡ. “ᤋᤣ᤺ᤱᤈᤢᤶᤛᤣ. ᤁᤴ ᤀᤣᤑᤡᤛᤛ᤻ᤔᤠ ᤋᤧᤱᤃᤵᤐᤡᤱᤃ ᤐᤕᤶ ᤀᤠᤷᤋᤣᤔᤡᤛ ᤔᤠᤱᤅᤡᤸᤗᤧ ᤁᤢᤔᤠᤱᤜᤡᤶ ᤏᤢ ᤋᤠᤱᤛᤠᤰᤐᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤏᤠᤘᤠᤀᤡᤳᤗᤠ ᤁᤧᤃᤵᤐᤠ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥
ACT 19:36 ᤀᤠᤳᤋᤡᤸᤗᤧᤀᤠᤱ ᤁᤴ ᤐᤠ᤺ᤴᤏᤡᤴ ᤀᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤠᤰᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤥ ᤂᤡᤏᤡ᤹ᤃ ᤔᤧᤴᤀᤡ᤺ᤳᤋᤣ ᤌᤣᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
ACT 19:37 ᤂᤡᤏᤡ᤹ ᤁᤴ ᤏᤧᤵᤑᤢ ᤔᤏᤠᤜᤠ᤹ ᤁᤧᤍᤠᤖᤢᤶᤛᤡᤶᤔᤠᤱ ᤘᤠ᤹ᤛᤡ. ᤁᤖ ᤁᤱᤜᤠ᤹ᤖᤧ ᤔᤠᤱᤜᤡᤶᤔᤥᤗᤠᤶ ᤌᤣᤀᤠᤱ ᤔᤧᤱᤄᤢ᤺ᤳᤋᤣ ᤘᤠ᤹ᤛᤡ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤷᤋᤣᤔᤡᤛ ᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴᤏᤠᤱ ᤔᤧᤶᤒᤠ᤺ᤳᤋᤣ ᤘᤠ᤹ᤛᤡᤖᤥ॥
ACT 19:38 ᤍᤧᤔᤧᤋᤪᤡᤕᤛ ᤏᤢ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤀᤠᤵᤋᤡᤰ ᤘᤠ᤹ᤏᤧ ᤑᤠ᤹ᤃᤪ ᤂᤠᤛᤧᤴᤜᤡᤶ ᤏᤢ ᤛᤢᤜᤠᤱᤜᤡᤶ ᤘᤠ᤹. ᤜᤠᤖᤠ᤹ ᤂᤧᤵᤔᤥ ᤔᤧᤍᤠᤖᤢᤏᤡ॥
ACT 19:39 ᤁᤖ ᤂᤧᤴᤏᤠᤱᤎᤥ ᤘᤣ᤹ ᤐᤠ᤺ᤴ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤆᤥ᤺ᤰᤌᤡᤶ ᤆᤢᤶᤗᤢᤱᤅᤥᤗᤠᤶ ᤐᤠ᤺ᤴ ᤁᤧᤔᤠ ᤐᤥ᤺ᤱᤗᤥ॥
ACT 19:40 ᤜᤧᤰᤁᤣ᤺ᤸᤗᤧ ᤀᤠᤀᤡᤴ ᤁᤧᤒᤥ᤺ᤱᤒᤠ ᤁᤴ ᤜᤕᤱᤁᤡᤸᤗᤡᤱᤖᤧᤴ ᤀᤠᤵᤋᤡᤰᤁᤡᤴ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤏᤡ᤹ ᤀᤠᤶᤃᤢ᤺ᤵᤐᤠ ᤐᤥ᤺ᤰᤂᤧᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤌᤣᤀᤠᤱ ᤐᤠ᤺ᤵᤔᤠ ᤀᤠᤴᤇᤢᤰᤋᤢᤶᤔᤡᤴᤗᤥ॥”
ACT 19:41 ᤕᤧᤰᤕᤰ ᤛᤢᤜᤠᤱᤔᤡᤒᤠᤸᤗᤧ ᤜᤧᤰᤁᤣ ᤔᤧᤳᤋᤢᤛᤡᤀᤠᤱ ᤁᤧᤍᤠ᤺ᤒᤠ ᤔᤏᤠᤜᤠ᤹ ᤐᤠᤱᤄᤢᤍᤣ᤺ᤛᤢᤛᤡᤖᤥ॥
ACT 20:1 ᤜᤧᤰᤁᤩᤠᤱ ᤂᤧᤴ ᤜᤕᤱᤁᤡᤸᤗᤡᤱ ᤗ᤹ᤔᤧᤴ ᤆᤡᤈᤡᤂᤰᤂᤰ ᤐᤥ᤺ᤰᤂᤧᤀᤠᤱ ᤐᤠᤘᤗᤖᤧ ᤀᤣᤑᤡᤛᤛ᤻ᤔᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤧᤶᤔᤢ᤹ᤀᤡ ᤆᤥᤃᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤔᤧᤛᤣᤍᤥᤏᤡᤕᤠᤀᤥ ᤐᤣᤖᤥ॥
ACT 20:2 ᤜᤧᤰᤁᤩᤠᤱ ᤂᤧᤴ ᤌᤢᤶᤔᤥ ᤐᤥ᤺ᤰᤂᤧᤖ ᤗᤠᤶᤍᤡ᤺ᤰ ᤆᤥᤃᤧᤸᤗᤧ ᤏᤛᤠᤏᤡᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤖᤢᤛᤡ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤃᤪᤡᤛ ᤗᤠᤈᤣ᤹ᤀᤥ ᤁᤧᤖᤧᤀᤠᤱ
ACT 20:3 ᤂᤢᤏᤧ᤹ ᤂᤧᤵᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤕᤠ᤺ᤰᤋᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤛᤡᤖᤡᤕᤠ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤠᤀᤠᤱ ᤐᤣ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤀᤡᤱᤔᤧᤍᤱᤄᤢᤀᤠᤱ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤵᤔᤥᤗᤠᤶ ᤂᤢᤏᤧ᤹ ᤔᤧᤛᤣᤍᤥᤏᤡᤕᤠᤗᤠᤶ ᤗᤠᤱᤄᤣ᤺ᤰᤔᤠᤀᤠᤱ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥
ACT 20:4 ᤜᤧᤰᤁᤩᤠᤱ ᤒᤣᤖᤡᤕᤠ ᤁᤧᤕᤢᤱᤒᤠ ᤐᤢᤖᤛᤖᤧ ᤁᤢᤛ᤻ᤛᤠ᤺ ᤛᤥᤐᤠᤋᤪᤥᤛ. ᤌᤡᤛ᤻ᤛᤗᤥᤏᤡᤁᤠᤗᤠᤶ ᤀᤖᤡᤛ᤻ᤋᤠᤷᤂᤛ ᤏᤢ ᤛᤡᤁᤴᤍᤛ. ᤍᤷᤒᤡᤗᤠᤶ ᤃᤠᤕᤛ. ᤃᤗᤠᤋᤡᤕᤠᤗᤠᤶ ᤋᤡᤔᤥᤌᤡ. ᤜᤧᤰᤁᤩᤠᤱ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥᤗᤠᤶ ᤋᤢᤂᤡᤁᤛ ᤏᤢ ᤋᤪᤥᤑᤡᤔᤛᤛᤡ ᤂᤢᤏᤧ᤹ᤏᤢᤀᤣ ᤔᤧᤘᤕᤧᤖᤥ॥
ACT 20:5 ᤂᤧᤱᤜᤠ᤹ ᤀᤠᤴᤇᤡᤃᤧᤏᤢ ᤋᤃᤡ ᤔᤧᤒᤣᤀᤠᤱ ᤋᤪᤥᤀᤠᤛᤀᤥᤀᤣ ᤕᤠᤵᤔᤡ ᤔᤧᤜᤠᤱᤄᤡᤃᤧᤖᤥ॥
ACT 20:6 ᤀᤠᤏᤡᤃᤧ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ ᤁᤢᤀᤣᤃᤠᤱ ᤘᤠᤗᤠᤶᤍᤡ᤺ᤰᤁᤥ ᤑᤡᤗᤡᤵᤐᤡᤗᤠᤶ ᤌᤠᤛᤡᤱᤔᤏᤠᤀᤠᤱ ᤅᤠᤛᤡ ᤕᤧᤴ ᤀᤣᤃᤠᤱ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ ᤋᤪᤥᤀᤠᤛᤀᤥ ᤋᤢᤶᤏᤠᤛᤡ ᤜᤧᤰᤁᤩᤠᤱ ᤂᤧᤵᤔᤥ ᤏᤢᤛᤡ (᥍) ᤕᤧᤴ ᤛᤥᤖᤡᤰ ᤘᤠ᤹ᤔᤏᤠᤖᤥ॥
ACT 20:7 ᤜᤧᤰᤁᤩᤠᤱ ᤋᤧᤏᤧᤒᤠ ᤕᤧᤴᤏᤡᤸᤗᤧᤴ ᤕᤢ᤺ᤴᤇᤡᤰ ᤀᤠᤏᤡᤃᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤆᤠᤔᤠ ᤑᤠ᤹ᤀᤠᤱ ᤛᤥᤖᤡᤰ ᤆᤢᤶᤔᤏᤠᤖᤥ॥ ᤁᤴ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤐᤠᤘᤗᤧᤴ ᤛᤧᤳᤗᤢᤶᤓᤰᤋᤧᤖ ᤌᤠᤖᤡᤰ ᤐᤠᤖᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤁᤢᤏᤠᤶᤍᤠ᤺ᤵᤔᤠ ᤂᤧᤵᤔᤥᤗᤠᤶ ᤁᤧᤒᤣ᤺ᤰᤐᤠ ᤘᤕᤧᤖᤥ॥
ACT 20:8 ᤀᤠᤏᤡᤃᤧ ᤆᤢᤶᤗᤢᤱ ᤆᤥ᤺ᤰᤔᤏᤠᤒᤠ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤕᤖᤡᤰ ᤛᤣᤔᤡᤜᤠ᤹ ᤔᤧᤜᤠ᤺ᤴᤍᤢᤀᤠᤱ ᤕᤢᤅᤧᤖᤥ॥
ACT 20:9 ᤂᤧᤵᤔᤥ ᤕᤢᤋᤠᤀᤡᤁᤛ ᤔᤧᤵᤔᤏᤠᤒᤠ ᤏᤠᤗᤡᤱᤃᤧᤴ ᤌᤠᤱᤒᤧᤴᤎᤡᤰ ᤐᤣᤎᤠ᤺ᤵᤐᤥ ᤐᤣᤀᤠᤱ ᤕᤢᤱᤛᤡᤱ॥ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤌᤠᤱᤒᤧᤴᤏᤡᤴ ᤁᤢᤔᤡᤁᤩᤢ᤺ᤛᤧᤀᤠᤱ ᤀᤡᤶᤎᤰᤘᤠ ᤗᤥᤖᤧᤖ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤛᤠ᤹ᤖᤡᤰ ᤀᤡᤵᤛᤧᤸᤗᤧ ᤛᤢᤶᤛᤡᤃᤣ᤺ᤰᤛᤔᤠ ᤂᤠᤶᤗᤥᤀᤥᤏᤢ ᤕᤥ ᤔᤰᤌᤩᤧᤀᤠᤱ ᤛᤩᤧᤖᤥ॥ ᤔᤏᤠᤜᤠ᤹ᤖᤧ ᤔᤧᤒᤣᤀᤠᤱ ᤀᤥᤔᤧᤔᤧᤳᤋᤢᤸᤗᤧᤃ ᤀᤠᤴᤍᤣ᤺ᤴᤇᤠ ᤛᤩᤧᤀᤠᤱ ᤏᤧᤛ᤻ᤛᤧᤖᤥ॥
ACT 20:10 ᤁᤖ ᤐᤠᤘᤗᤧᤴ ᤕᤥ ᤐᤣᤀᤠᤱ ᤂᤢᤏᤧ᤹ ᤛᤶᤍᤠᤱ ᤛᤸᤗᤡᤰ ᤛᤴᤇᤡᤱᤗ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ᤀᤥ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ. ᤂᤢᤏᤧ᤹ᤃ ᤁᤢᤜᤡᤱᤘᤧᤳ ᤘᤠ᤹ᤖᤥ᥄”
ACT 20:11 ᤜᤧᤰᤁᤩᤠᤱ ᤌᤥ᤺ᤛ᤻ᤔᤠ ᤕᤠᤰᤑᤠᤀᤥ ᤔᤧᤒᤣᤀᤠᤱ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤛᤥᤖᤡᤰ ᤔᤧᤈᤖᤥ॥ ᤂᤢᤏᤧ᤹ ᤂᤠᤀᤥ᤺ᤳᤋᤧᤖ ᤌᤠᤖᤡᤰ ᤂᤢᤏᤡ᤹ᤏᤢ ᤋᤠ᤹ᤈᤧᤰᤂᤧ. ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤛᤧᤶᤔᤢ᤹ᤀᤡ ᤐᤥ᤺ᤰᤂᤧᤀᤠᤱ ᤌᤠᤛᤡᤱᤗᤥ॥
ACT 20:12 ᤂᤧᤱᤜᤠ᤹ᤖᤧ ᤂᤧᤴ ᤌᤠᤱᤒᤧᤴᤏᤡᤴ ᤁᤢᤜᤡᤱᤘᤧᤳᤋᤣ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰᤁᤣ ᤜᤠᤱᤜᤠᤱ ᤔᤧᤗ᤹ᤖᤧᤖᤥ॥
ACT 20:13 ᤀᤠᤏᤡᤃᤧ ᤘᤠᤗᤠᤎᤠᤗᤠᤶ ᤋᤃᤡ ᤀᤛ᤻ᤛᤥᤛ ᤕᤧᤰᤕᤰᤁᤥ ᤐᤣ᤺ᤰᤔᤏᤠ॥ ᤂᤧᤵᤔᤥᤀᤣ ᤐᤠᤘᤗᤧᤴ ᤘᤠᤗᤠᤎᤠᤗᤠᤀᤥ ᤁᤣ᤺ᤵᤔᤠ ᤐᤠ᤺ᤴ ᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤌᤠᤖᤡᤰ ᤗᤠᤱᤄᤣ᤺ᤰᤔᤠᤖ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤖᤥ॥
ACT 20:14 ᤜᤧᤰᤁᤩᤠᤱ ᤐᤠᤘᤗᤖᤧ ᤀᤛ᤻ᤛᤥᤛᤀᤥ ᤕᤠᤵᤔᤡ ᤋᤢᤔᤡᤃᤧ ᤜᤧᤰᤁᤩᤠᤱ ᤘᤠᤗᤠᤎᤠᤀᤥ ᤁᤣ᤺ᤵᤔᤏᤠᤀᤠᤱ ᤂᤧᤵᤔᤥᤗᤠᤶ ᤔᤡᤳᤋᤡᤗᤣᤏᤡ ᤘᤠᤃᤵᤂᤠᤶ ᤗᤧᤵᤔᤠᤱ ᤌᤠᤛᤡᤱᤔᤏᤠᤖᤥ॥
ACT 20:15 ᤂᤧᤵᤔᤥᤗᤠᤶ ᤀᤠᤏᤡᤃᤧ ᤁᤢᤍᤠ᤺ᤴᤍᤡᤰᤔᤠ ᤂᤡᤕᤛ ᤘᤠᤃᤵᤂᤠᤶᤔᤥ ᤁᤧᤵᤔᤏᤠ॥ ᤜᤧᤰᤁᤩᤠᤱ ᤁᤢᤀᤠᤳᤇᤡᤴᤍᤠ᤺ᤴ ᤛᤠᤔᤥᤛ ᤘᤠᤃᤵᤂᤠᤶᤔᤥ ᤁᤧᤵᤔᤏᤠᤀᤠᤱ ᤁᤢᤀᤠᤰᤂᤧᤴᤍᤠ᤺ᤴ ᤔᤡᤗᤣᤋᤛ ᤕᤧᤰᤕᤰᤁᤥ ᤋᤠ᤺ᤶᤏᤠᤖᤥ॥
ACT 20:16 ᤐᤠᤘᤗᤖᤧ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤔᤧᤴᤏᤠ᤺ᤶᤛᤡᤱᤅᤣ. ᤜᤧᤰᤁᤩᤠᤱ ᤀᤣᤑᤡᤛᤛᤀᤥ ᤔᤧᤴᤗ᤺ᤴᤏᤣ ᤁᤢᤒᤣᤛᤠᤱ ᤐᤥ᤺ᤱᤔᤠᤖ ᤐᤣ᤺ᤰᤔᤠᤀᤠᤱ ᤜᤠᤖᤠᤀᤣ ᤕᤖᤢᤛᤗᤧᤔ ᤁᤧᤵᤔᤠ ᤏᤡᤱᤘᤠ᤹ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤐᤧᤴᤋᤡᤁᤥᤛ᤻ᤋ ᤋᤱᤏᤠᤶᤔᤥ ᤂᤧᤵᤔᤥ ᤘᤠ᤹ᤔᤠ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤕᤧ॥
ACT 20:17 ᤐᤠᤘᤗᤖᤧ ᤔᤡᤗᤣᤋᤛ᤻ᤗᤠᤶ ᤀᤣᤑᤡᤛᤛ᤻ᤔᤠ ᤛᤣᤛᤣᤜᤢᤵᤗᤰᤐᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤁᤢᤍᤢᤶᤛᤧ ᤀᤢ᤺ᤳᤋᤢᤛᤡ॥
ACT 20:18 ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤐᤠᤘᤗᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥ ᤁᤧᤖᤠᤱᤒᤠ ᤌᤡᤰᤛᤡᤃᤣ᤺ᤰᤛᤔᤠ ᤕᤧᤴᤏᤠᤱᤎᤥᤀᤣ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ᤏᤢ ᤘᤕᤠᤱ ᤁᤧᤗ᤹ᤒᤠ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡᤖᤥ॥
ACT 20:19 ᤀᤡᤱᤃᤠ᤹ᤃ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤏᤢ ᤔᤡᤰᤘᤠ ᤛᤥᤖᤡᤰ ᤕᤜᤢᤍᤡ ᤏᤡᤱᤄᤢᤶᤔᤥᤀᤠᤱ ᤍᤠᤱᤒᤠᤸᤗᤧ ᤁᤢᤛᤣᤘᤠ ᤆᤥᤃᤢᤱᤗᤥ॥
ACT 20:20 ᤜᤧᤰᤁᤩᤠᤱ ᤂᤡᤏᤡ᤹ ᤏᤡ᤺ᤔᤠ ᤌᤠ᤺ᤔᤠ ᤁᤧᤒᤥ᤺ᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤔᤧᤳᤏᤡᤱᤅᤠᤱ ᤘᤕᤠᤱ ᤜᤧᤰᤁᤩᤠᤱ ᤔᤏᤠᤗᤢᤶᤔᤥ ᤀᤡᤱᤓᤴ ᤆᤥ᤺ᤰᤔᤠ ᤏᤢ ᤂᤡᤏᤡ᤹ ᤜᤡᤶᤜᤡᤶ ᤋᤠᤰᤁᤶᤔᤠᤖ ᤏᤡᤛᤠᤶ ᤜᤢ᤹ᤔᤠ ᤀᤡᤱᤃᤠ᤹ ᤆᤰᤔᤧᤸᤗ᤹ᤀᤣ ᤆᤥᤃᤢᤱᤅᤠᤱ ᤘᤕᤠᤱᤒᤠᤱᤃ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤠᤱᤅᤣ ᤁᤧᤘᤕᤡ᤹ᤖᤥ॥
ACT 20:21 ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤏᤢ᤺ᤰᤂᤧᤶᤔᤧ᤹ ᤔᤧᤵᤔᤠᤛᤡ ᤏᤢ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋ ᤛᤶᤍᤠᤱ ᤏᤛᤠ᤺ᤴ ᤆᤥ᤺ᤰ ᤐᤠᤱᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥
ACT 20:22 ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤠᤱᤒᤠ ᤁᤢᤀᤡᤛᤡ᤺ᤰ ᤕᤖᤢᤛᤗᤧᤔ ᤐᤣ᤺ᤰᤁᤠᤖ ᤐᤳᤋᤠᤖᤥ॥ ᤂᤧᤵᤔᤥ ᤌᤣ ᤐᤥ᤺ᤱ ᤁᤧᤗ᤹ᤒᤠ ᤀᤡᤱᤃᤠ᤹ ᤌᤣᤀᤠᤱ ᤏᤡᤱᤘᤠ᤹ ᤔᤧᤃᤳᤋᤠᤴᤗᤥ॥
ACT 20:23 ᤁᤖ ᤁᤧᤖᤧᤰ ᤀᤡᤱᤃᤠ᤹ ᤐᤣᤃᤠᤱᤒᤠ ᤕᤧᤰᤕᤰᤁᤥ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰ. ᤐᤢᤱᤗᤠᤜᤡᤶ ᤏᤢ ᤋᤢᤰᤂᤣᤖᤧ ᤂᤧᤵᤔᤥ ᤜᤠᤱᤅᤠᤖ ᤘᤠ᤹ᤀᤠᤖᤥ॥
ACT 20:24 ᤁᤖ ᤀᤠᤜᤡᤱᤔᤴᤏᤥ ᤍᤠᤱᤒᤠ ᤕᤧᤛᤢᤖᤧ ᤐᤡᤖᤠᤱᤒᤠ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤛᤢ᤺ᤵᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱᤄᤱ ᤀᤡᤱᤓᤥ᤺ᤔᤠᤀᤠᤱᤎᤥ ᤘᤣ᤹ ᤌᤣᤀᤠᤱ ᤔᤧᤀᤡ᤺ᤳᤋᤢᤱᤅᤡᤴᤗᤥ॥
ACT 20:25 ᤀᤠᤸᤗ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤀᤡᤱᤓᤴ ᤆᤥ᤺ᤰᤏᤡᤱᤒᤠ ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤕᤠᤶᤔᤥ ᤕᤠᤵᤔᤡ ᤁᤧᤴᤏᤡ᤺ᤛᤡᤴ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ॥
ACT 20:26 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤳᤋᤡᤸᤗᤧᤴᤏᤠᤱ ᤔᤧᤰᤔᤠᤸᤗᤧᤴ ᤀᤡᤱᤃᤠ᤹ ᤀᤠᤵᤋᤡᤰ ᤔᤧᤄᤥᤀᤠᤴᤗᤥ ᤑᤠ᤹ᤀᤠᤱ ᤀᤠᤀᤡᤴ ᤀᤡᤱᤃᤠ᤹ ᤔᤧᤳᤏᤡᤱᤗᤥ॥
ACT 20:27 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤏᤡᤱᤛᤣ᤺ᤰ ᤀᤡᤱᤓᤴ ᤆᤥ᤺ᤰᤔᤠ ᤀᤣᤃᤠᤱ ᤔᤧᤶᤒᤵᤐᤧᤴᤗᤥ॥
ACT 20:28 ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤡᤏᤡ᤹ ᤗᤰᤐᤧᤴᤏᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤏᤢ᤺ᤖᤡᤰᤁᤠᤱ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤈᤥᤃᤡᤀᤠᤱ ᤘᤠ᤹॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢᤒᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤡᤅᤢᤒᤠ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤳᤋᤧᤶᤔᤧ᤹॥
ACT 20:29 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤰᤌᤠᤏᤡᤱᤅᤠᤱᤃ ᤁᤡᤵᤔᤠ ᤁᤧᤄᤢ᤺ᤒᤠ ᤐᤖᤠᤒᤠᤜᤠ᤹ ᤔᤧᤍᤠᤀᤠᤱ ᤔᤧᤸᤗᤢᤰ ᤗᤢᤵᤜᤠ᤹ ᤔᤧᤴᤏᤴᤇᤢᤴᤛᤡᤴᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤢᤶᤔᤥᤀᤣ ᤀᤡᤱᤗᤧᤰᤐᤠ ᤛᤡᤰᤛᤠᤶᤒᤠᤜᤠ᤹ ᤔᤧᤗ᤺ᤴᤏᤠᤱ ᤂᤡᤏᤡ᤹ ᤁᤧᤔᤧᤴᤍᤠᤱᤄᤡᤴ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥
ACT 20:30 ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥᤏᤢᤀᤣ ᤀᤡᤱᤗᤧᤰᤐᤠᤜᤠ᤹ ᤔᤧᤗ᤺ᤴ ᤔᤧᤍᤠᤀᤠᤱ ᤏᤛᤠᤏᤡᤒᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤗᤠᤶ ᤔᤧᤓᤥ᤺ᤳᤋᤢ ᤔᤧᤍᤣ᤹ᤖᤢᤛᤡᤖᤥ॥
ACT 20:31 ᤜᤧᤰᤁᤣ᤺ᤸᤗᤧ ᤜᤧᤰᤋᤱᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤋᤱᤒᤣ ᤛᤢᤶᤛᤡ ᤌᤠᤖᤡᤰ ᤗᤧᤴᤍᤡᤰ ᤛᤧᤴᤍᤡᤰ ᤀᤡᤱᤃᤠ᤹ ᤔᤡᤰᤘᤠᤖᤧ ᤁᤢᤎᤡᤶ ᤐᤥ᤺ᤰᤂᤠᤱᤗ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤏᤡᤱᤗ ᤘᤕᤠᤱᤗᤥ॥
ACT 20:32 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱ ᤏᤢ ᤗᤢᤱᤃᤢᤶᤃᤧᤴ ᤁᤢᤒᤠ᤺ᤴᤈᤠᤰᤗᤧᤴ ᤁᤶᤒᤪᤠᤱᤅᤥ ᤀᤡᤱᤃᤠ᤹ ᤜᤢᤰᤛᤢᤵᤏᤡᤱᤗᤥ॥ ᤆᤰᤔᤧᤸᤗ᤹ᤀᤣ ᤂᤢᤏᤧ᤹ ᤏᤛᤠ᤺ᤴ ᤆᤥᤃᤧᤶᤔᤧ᤹. ᤂᤢᤏᤧ᤹ ᤁᤢᤗᤢᤱᤃᤢᤶᤔᤥ ᤋᤠᤱᤃᤧᤛᤧ᤺ᤵᤋᤡ᤹ ᤗ᤹ᤖᤡᤰ ᤔᤧᤳᤏᤡᤱᤗᤥ॥ ᤂᤧᤸᤗᤧ ᤂᤡᤏᤡ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ ᤏᤢ ᤛᤣᤛᤣ ᤁᤧᤒᤥ᤺ᤱᤒᤠ ᤁᤢᤔᤏᤠᤜᤠ᤹ᤏᤢ ᤕᤢᤰ ᤂᤥ᤺ᤔᤠᤴ ᤐᤡᤔᤠ ᤁᤧᤛᤢᤰᤋᤡ᤹ᤖᤥ॥
ACT 20:33 ᤀᤡᤱᤃᤠ᤹ᤃ ᤀᤠᤳᤋᤡᤴᤜᤠ᤹ᤖᤧᤴᤏᤠᤱ ᤂᤢᤏᤡ᤹ ᤛᤠᤶᤔᤩᤠᤱ ᤕᤢᤵᤐᤠ ᤏᤢ ᤏᤢ᤺ᤒᤠ ᤋᤧ᤺ᤳᤑᤢᤱᤜᤠ᤹ᤀᤥ ᤔᤡᤰᤔᤧᤱᤃᤣ᤺ᤐᤠᤴᤗᤥ॥
ACT 20:34 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤒᤠᤅᤣ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤕᤠᤱ ᤌᤃᤢᤱᤅᤠᤱ ᤀᤠᤴᤈᤢᤶᤜᤠ᤹ ᤏᤢ ᤀᤡᤱᤃᤠ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤋᤱᤃᤠᤶ ᤆᤥᤃᤢᤱᤅᤠᤱ ᤘᤕᤠᤱᤒᤠᤴ ᤂᤡᤏᤡ᤹ ᤀᤠᤒᤠᤅᤣ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ACT 20:35 ᤆᤠᤔᤠ ᤌᤢᤱᤔᤠ ᤀᤠᤒᤠᤅᤣ ᤋᤱᤃᤠᤶ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤕᤠᤶᤒᤢᤎᤡᤰᤐᤠ ᤐᤥ᤺ᤱᤔᤠ ᤐᤥ᤺ᤱ ᤁᤧᤗ᤹ᤒᤠ ᤀᤡᤱᤃᤠ᤹ ᤀᤥᤛᤣ᤺ᤴᤎᤠᤰᤏᤡᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤩᤠᤱ ‘ᤋᤠ᤺ᤰᤔᤠᤏᤢ᤺ᤸᤗᤧ ᤐᤡᤔᤠᤀᤥᤀᤣ ᤕᤖᤡᤰ ᤔᤢ᤹ᤀᤡᤛᤠᤶ ᤘᤠ᤹’ ᤗ᤹ᤖᤡᤰ ᤍᤠᤱᤒᤠ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥”
ACT 20:36 ᤜᤧᤰᤁᤩᤠᤱ ᤐᤠᤘᤗᤖᤧ ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤧᤱᤜᤠ᤹ ᤁᤠᤰ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤅᤠᤱ ᤋᤢᤘᤠ ᤔᤧᤈᤥᤃᤧᤖᤥ॥
ACT 20:37 ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤜᤧᤵᤋᤢᤀᤠᤱ ᤔᤧᤜᤠᤒᤧᤖ ᤆᤢᤵ ᤔᤧᤔᤧᤳᤋᤢᤖᤥ॥
ACT 20:38 ᤐᤠᤘᤗᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡᤒᤠ ᤘᤣ᤹ ᤐᤠ᤺ᤴᤜᤠ᤹ᤏᤢ᤺ᤸᤗᤧᤀᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤏᤠᤖᤠ᤺ᤴ ᤁᤧᤴᤏᤡ᤺ᤛᤢᤶᤔᤡᤴᤗᤥ ᤔᤧᤳᤋᤢᤛᤡᤒᤠᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤘᤠᤗᤠᤎᤠᤀᤥ ᤌᤠᤖᤡᤰ ᤔᤧᤛᤔᤧᤎ᤺ᤖᤥ॥
ACT 21:1 ᤀᤠᤸᤗ ᤀᤣᤑᤡᤛᤛᤛ᤻ᤔᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤛᤧᤶᤔᤢ᤹ᤀᤡ ᤐᤡᤖᤢᤛᤡᤀᤠᤱ ᤂᤧᤵᤔᤥᤏᤢ ᤘᤠᤗᤠᤎᤠᤗᤠᤶ ᤁᤥᤛ ᤘᤠᤃᤵᤂᤠᤶ ᤗᤧᤵᤔᤠᤱ ᤐᤣ᤺ᤰᤔᤏᤠ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤖᤥᤍᤥᤛ ᤔᤧᤵᤔᤏᤠᤒᤠ ᤘᤠᤃᤵᤂᤠᤶ ᤁᤧᤵᤔᤏᤠᤀᤠᤱ ᤂᤧᤵᤔᤥᤗᤠᤶ ᤐᤋᤠᤖᤠ ᤕᤧᤰᤕᤰᤁᤥ ᤋᤠ᤺ᤔᤏᤠᤖᤥ॥
ACT 21:2 ᤂᤧᤵᤔᤥ ᤛᤡᤖᤡᤕᤠᤛ᤻ᤔᤠ ᤑᤥᤏᤡᤛᤡᤕᤠ ᤋᤧᤱᤃᤵ ᤗᤧᤵᤔᤠᤱ ᤁᤧᤒᤣ᤺ᤰᤐᤠᤖ ᤁᤧᤒᤵᤐᤠ ᤘᤣ᤹ ᤘᤠᤗᤠᤎᤠᤎᤡᤰ ᤂᤥ᤺ᤔᤏᤠ. ᤜᤧᤰᤁᤩᤠᤱ ᤂᤧᤵᤔᤥ ᤗᤠ᤺ᤵᤔᤏᤠᤀᤠᤱ ᤌᤠᤛᤡᤱᤔᤏᤠᤖᤥ॥
ACT 21:3 ᤜᤧᤰᤁᤩᤠᤱ ᤛᤤᤐᤪᤛ ᤗᤠᤈᤣ᤹ᤀᤡᤴ ᤏᤡᤎᤠ᤺ᤒᤧᤀᤠᤱ ᤀᤠᤏᤡᤃᤧ ᤆᤢᤵᤛᤠᤱ ᤗᤧᤵᤔᤠᤱ ᤐᤥ᤺ᤱᤔᤏᤠᤖ ᤛᤡᤖᤡᤕᤠ ᤗᤧᤵᤔᤠᤱ ᤌᤠᤛᤡᤱᤔᤏᤠ॥ ᤘᤠᤗᤠᤎᤠ᤺ᤸᤗᤧ ᤘᤠᤃᤰᤜᤠ᤹ ᤋᤠᤕᤖ ᤕᤧᤰᤕᤰᤁᤥ ᤗ᤺ᤵᤔᤠ ᤑᤠ᤹ᤀᤠᤱ ᤂᤧᤵᤔᤥ ᤏᤠ᤺ᤶᤛᤡᤱᤗᤥ॥
ACT 21:4 ᤂᤧᤵᤔᤥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤁᤥ᤺ᤵᤔᤏᤠᤛᤡᤀᤠᤱ ᤂᤧᤱᤜᤠ᤹ ᤋᤢᤶᤔᤏᤠᤛᤡ ᤜᤧᤰᤁᤩᤠᤱ ᤕᤧᤳᤏᤠᤶ ᤌᤠᤖᤡᤰ ᤂᤧᤱᤜᤠ᤹ᤏᤢ ᤘᤠ᤹ᤔᤏᤠ॥ ᤂᤧᤱᤜᤠ᤹ᤖᤧ ᤛᤣᤛᤣᤔᤠᤱᤗᤠᤶ ᤐᤠᤘᤗᤧᤴ ᤕᤖᤢᤛᤗᤧᤶᤔᤥ ᤔᤧᤒᤣᤃᤧᤏᤧ᤹ ᤑᤠ᤹ᤀᤠᤱ ᤔᤧᤔᤧᤳᤋᤢᤖᤥ॥
ACT 21:5 ᤁᤖ ᤂᤧᤴ ᤕᤧᤳᤏᤠᤶ ᤀᤣᤃᤠᤱ ᤂᤧᤱᤜᤠ᤹ᤏᤢ ᤛᤧ᤺ᤶᤏᤠᤀᤠᤱ ᤌᤠᤛᤡᤱᤶᤏᤠ॥ ᤁᤧᤖᤧᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤂᤢᤏᤡ᤹ ᤔᤣ᤺ᤳ ᤛᤠ᤺ᤜᤠ᤹ ᤀᤠᤏᤡᤃᤧ ᤛᤠ᤺ᤛᤧ ᤕᤧᤰᤕᤰ ᤗᤠ᤺ᤰᤁᤠᤳ ᤌᤠᤖᤡᤰ ᤔᤧᤓᤧᤖᤧᤀᤠᤱ ᤀᤠᤏᤡᤃᤧ ᤛᤥᤖᤡᤰ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤌᤢᤱᤒᤥᤜᤈ᤹ ᤕᤢᤱᤔᤏᤠᤖ ᤋᤢᤘᤠ ᤆᤥ᤺ᤰᤔᤏᤠᤖᤥ॥
ACT 21:6 ᤛᤧᤶᤔᤢ᤹ᤀᤡ ᤆᤥ᤺ᤰᤔᤏᤠᤀᤠᤱ ᤀᤠᤏᤡᤃᤧ ᤘᤠᤗᤠᤎᤠᤀᤥ ᤗᤠᤛᤡᤃᤧᤀᤠᤱ ᤂᤧᤱᤜᤠ᤹ ᤂᤢᤏᤡ᤹ ᤜᤡᤶᤔᤥ ᤔᤧᤏᤢ᤺ᤰᤂᤧ ᤔᤧᤒᤣᤖᤥ॥
ACT 21:7 ᤀᤠᤏᤡᤃᤧ ᤋᤠᤕᤖᤏᤢ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤏᤠᤖ ᤋᤥᤗᤣᤔᤠᤀᤡᤛ ᤁᤧᤵᤔᤏᤠ॥ ᤂᤧᤵᤔᤥ ᤏᤛᤠᤏᤡᤒᤠᤜᤠ᤹ᤏᤢ ᤛᤣᤘᤠ ᤔ᤺ᤔᤏᤠᤀᤠᤱ ᤌᤡᤰᤕᤧᤴ ᤕᤠ᤺ᤰᤔᤏᤠ॥
ACT 21:8 ᤁᤢᤍᤠ᤺ᤴᤍᤡᤰᤔᤠ ᤛᤡᤈᤖᤡ ᤁᤧᤵᤔᤏᤠᤀᤠᤱ ᤛᤢᤏᤠᤀᤡᤱᤄᤱ ᤀᤡᤱᤓᤴ ᤁᤧᤈᤥ᤺ᤰᤐᤠ ᤑᤡᤗᤡᤐᤖᤧ ᤁᤢᤜᤡᤶᤔᤥ ᤐᤣ᤺ᤰᤔᤏᤠᤖᤥ॥ ᤂᤢᤏᤧ᤹ᤀᤣ ᤕᤖᤢᤛᤗᤧᤶᤔᤥ ᤔᤣᤔᤣᤍᤢᤔᤠᤜᤠ᤹ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤁᤢᤓᤠ᤹ ᤐᤡᤛᤧ ᤔᤧᤛᤣᤃᤢᤛᤡᤒᤠ ᤏᤢᤛᤡ ᤔᤏᤠᤜᤠ᤹ᤀᤥ ᤌᤡᤰ ᤘᤕᤧᤖᤥ॥
ACT 21:9 ᤂᤧᤸᤗᤧᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤔᤠ ᤗᤡᤛᤡ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤁᤢᤛ᤻ᤛᤠ᤺ᤜᤠ᤹ ᤔᤧᤘᤕᤧ॥
ACT 21:10 ᤀᤠᤸᤗ ᤂᤧᤵᤔᤥ ᤘᤕᤡᤃᤧᤒᤠ ᤁᤢᤓᤠ ᤕᤧᤴ ᤀᤣᤃᤠᤱ ᤕᤜᤢᤍᤡᤕᤠᤗᤠᤶ ᤀᤃᤠᤒᤛ ᤔᤧᤵᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤎᤡᤰ ᤋᤩᤧ॥
ACT 21:11 ᤂᤧᤴ ᤀᤠᤏᤡᤃᤧ ᤘᤕᤡᤃᤧᤒᤠᤀᤥ ᤋᤩᤧᤀᤠᤱ ᤐᤠᤘᤗᤖᤧ ᤁᤢᤓ᤹ᤀᤡ᤺ᤴ ᤑᤠ᤺ᤰᤂᤢᤀᤠᤱ ᤀᤠᤒᤠᤅᤣ ᤁᤢᤗᤠᤱ ᤁᤢᤜᤢᤰᤁᤥ ᤀᤡᤄᤣ᤺ᤱᤛᤡᤱᤗ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤛᤣᤛᤣᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤁᤴ ᤑ᤹ᤀᤡ ᤍᤠᤱᤒᤠᤴ ᤕᤖᤢᤛᤗᤧᤶᤔᤥ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤔᤧᤍᤧᤶᤛᤢᤀᤠᤱ ᤀᤰᤂᤣᤗ᤹ᤖᤡᤰ ᤀᤡᤔᤧᤄᤣ᤺ᤰᤂᤢ. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤜᤢᤰᤔᤧᤛᤢᤵᤋᤢ᤹॥’”
ACT 21:12 ᤜᤧᤰᤁᤩᤠᤱ ᤀᤠᤏᤡᤃᤧ ᤁᤴ ᤐᤠ᤺ᤴᤏᤡᤴ ᤂᤧᤶᤔᤏᤠᤀᤠᤱ ᤀᤠᤏᤡᤃᤧ ᤏᤢ ᤘᤣ᤹ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤕᤖᤢᤛᤗᤧᤔ ᤔᤧᤒᤣᤃᤧᤴᤏᤧ᤹ ᤑᤠ᤹ᤀᤠᤱ ᤂᤢᤏᤧ᤹ᤏᤢ ᤆᤰᤔᤧᤸᤗ᤹ᤀᤣ ᤐᤣᤗᤡ ᤑᤠᤰᤔᤏᤠ॥
ACT 21:13 ᤁᤖ ᤐᤠᤘᤗᤖᤧ ᤀᤠᤏᤡᤃᤧ ᤀᤰᤂᤣ ᤔᤧᤳᤋᤡᤃᤧ. “ᤂᤡᤏᤡ᤹ ᤌᤣᤀᤠᤱ ᤁᤧᤜᤠᤒᤡᤀᤠᤱ ᤀᤠᤛᤠ᤹ᤀᤡ ᤕᤰᤗ ᤁᤧᤕᤠ᤺ᤴᤍᤢᤶᤒᤠᤒᤣ᥅ ᤀᤡᤱᤃᤠ᤹ᤃ ᤕᤖᤢᤛᤗᤧᤶᤔᤥ ᤍᤠᤱᤒᤠ ᤕᤧᤛᤢᤖᤧ ᤁᤢᤗᤠᤃᤡ ᤛᤠᤰᤛᤡᤱᤔᤠᤖᤰ ᤔᤧ᤺ᤴ. ᤁᤖ ᤛᤡ᤺ᤔᤠ ᤐᤥ᤺ᤱᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥”
ACT 21:14 ᤜᤧᤰᤁᤩᤠᤱ ᤀᤠᤸᤗ ᤂᤢᤏᤧ᤹ ᤁᤢᤏᤡᤱᤘᤠ᤹ ᤏᤢ᤺ᤰᤔᤠ ᤛᤢᤰᤔᤧᤍᤧᤳᤏᤧᤴᤒᤠ ᤏᤡ᤺ᤔᤏᤠᤀᤠᤱ ᤀᤰᤂᤣ ᤐᤠ᤺ᤵᤔᤏᤠ. “ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥ᤺ᤱᤏᤡᤖᤥ॥”
ACT 21:15 ᤂᤧᤴ ᤀᤣᤃᤠᤱ ᤕᤠᤖᤡᤵ ᤐᤥ᤺ᤱᤔᤏᤠᤀᤠᤱ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣ᤺ᤰᤔᤏᤠᤖᤥ॥
ACT 21:16 ᤛᤡᤈᤖᤡᤕᤠᤗᤠᤶ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤀᤠᤏᤡᤃᤧᤏᤢᤀᤣ ᤔᤧᤎᤠᤛᤡᤱᤅᤠᤱ ᤛᤤᤐᤪᤛ ᤘᤠᤃᤵᤂᤠᤶᤒᤠ ᤋᤃᤡ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤛᤥᤏᤖᤧ ᤁᤢᤜᤡᤶᤔᤥ ᤘᤠ᤹ᤔᤠ ᤑᤠ᤹ᤀᤠᤱ ᤕᤠᤵᤔᤡ ᤋᤣ᤹ᤖᤧᤖᤥ॥
ACT 21:17 ᤜᤧᤰᤁᤩᤠᤱ ᤕᤖᤢᤛᤗᤧᤔ ᤁᤧᤵᤔᤏᤠ᤺ᤸᤗᤧ ᤂᤧᤵᤔᤥᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤢᤱᤔᤧᤴᤍᤡᤱ ᤕᤠᤵᤔᤡ ᤗᤠᤶᤔᤧᤍᤠ᤺ᤰᤋᤡᤃᤧᤖᤥ॥
ACT 21:18 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤐᤠᤘᤗᤧᤴ ᤀᤠᤏᤡᤃᤧ ᤗᤠᤶᤗᤥ᤺ᤒᤠ ᤕᤠᤁᤢᤒᤖᤧ ᤁᤢᤜᤡᤶᤔᤥ ᤀᤠᤏᤡᤃᤧᤏᤢ ᤐᤣ॥ ᤂᤧᤵᤔᤥ ᤁᤧᤖᤧᤰ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧᤖᤥ॥
ACT 21:19 ᤐᤠᤘᤗᤖᤧ ᤂᤧᤱᤜᤠ᤹ ᤁᤧᤖᤧᤰ ᤛᤣᤘᤠ ᤔᤧᤳᤋᤢᤛᤡᤀᤠᤱ ᤂᤢᤏᤧ᤹ ᤁᤢᤜᤢᤰᤁᤥᤗᤠᤶ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤶᤒᤰ ᤆᤥᤃᤢ ᤁᤧᤗ᤹ᤒᤠ ᤁᤠᤰ ᤐᤠ᤺ᤴᤜᤠ᤹ ᤆᤧᤰᤋᤢᤛᤡᤖᤥ॥
ACT 21:20 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢ. “ᤏᤢᤛᤠ᤹ᤀᤣ. ᤀᤥᤔᤧᤳᤋᤧ᤹ᤏᤠ. ᤁᤵᤔᤥᤀᤠᤱ ᤕᤖᤡᤰ ᤜᤧᤴᤇᤡᤱ ᤕᤜᤢᤍᤡᤜᤠ᤹ᤖᤧ ᤕᤧᤛᤢ᤺ᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤂᤢᤏᤡ᤹ ᤛᤡᤰ ᤁᤧᤛᤶᤒᤠ ᤔᤧᤈᤥ᤺ᤰ॥
ACT 21:21 ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤁᤧᤕᤢᤱᤒᤠ ᤕᤜᤢᤍᤡᤜᤠ᤹ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤗᤧᤵᤔᤠᤍᤣ᤺ᤔᤠ ᤜᤧᤰᤁᤩᤠᤱ ᤂᤢᤏᤡ᤹ ᤕᤧᤶᤒᤡᤳᤇᤠ᤹ᤛᤠ᤺ᤜᤠ᤹ᤀᤠᤱ ᤜᤷᤍᤥ ᤜᤧᤰᤔᤠ ᤐᤡᤔᤠᤛᤡ ᤔᤧ᤺ᤴ. ᤜᤧᤰᤁᤩᤠᤱ ᤀᤠᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶᤔᤠᤱ ᤏᤠ᤺ᤵᤔᤠ ᤔᤧ᤺ᤴ ᤗ᤹ᤖᤡᤰ ᤁᤧᤜᤢ᤹ᤖᤢᤛᤡᤖᤥ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹ᤖᤥ॥
ACT 21:22 ᤂᤧᤏᤧ᤹ ᤁᤵᤔᤥ ᤁᤧᤍᤩᤧᤀᤠᤱ ᤁᤧᤘᤠ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤛᤧᤰᤂᤠᤛᤠᤱ ᤔᤧᤄᤧᤵᤛᤢ᤹॥ ᤀᤠᤸᤗ ᤌᤣ ᤆᤥ᤺ᤰᤔᤠᤒᤣ᥅
ACT 21:23 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧ ᤛᤢᤈᤠ ᤐᤡᤀᤠᤛᤡᤃᤧᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤏᤧ᤹ ᤆᤥᤃᤧ᤹ᤀᤥ॥ ᤁᤵᤔᤥ ᤀᤠᤏᤡᤃᤧᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤠᤱᤃᤧᤜᤧᤰᤛᤡᤱᤒᤠ ᤗᤡᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤠ᤹ᤖᤥ॥
ACT 21:24 ᤂᤧᤏᤧ᤹ᤀᤠᤱ ᤁᤱᤜᤠ᤹ ᤔᤠᤱᤜᤡᤶᤔᤥ ᤋᤣ᤹ᤖᤧᤛᤧ᤹ᤀᤠᤱ ᤂᤧᤱᤜᤠ᤹ᤏᤢᤀᤣ ᤛᤥᤖᤡᤰ ᤛᤣᤛᤣ ᤐᤥ᤺ᤰᤂᤧ᤹ᤀᤥ॥ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤴ ᤌᤡᤶᤔᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤂᤧᤏᤧ᤹ ᤁᤣ᤺ᤳᤋᤧ ᤐᤡᤖᤧᤛᤧ᤹ᤀᤥ॥ ᤂᤧᤱᤜᤠ᤹ᤖᤧ ᤔᤠᤱᤜᤧᤰᤛᤡᤱᤔᤠᤴ ᤁᤧᤖᤧᤖᤥ ᤁᤧᤗ᤹ᤒᤠ ᤀᤥᤛᤣ᤺ᤴᤎᤠᤰᤛᤧ ᤂᤢᤏᤡ᤹ ᤌᤧᤃᤣ᤺ᤰᤁᤡᤴ ᤜᤠᤖᤠ᤹ ᤔᤧᤏ᤺ᤰᤂᤢᤏᤡᤖᤥ॥ ᤀᤰᤂᤣᤗ᤹ᤖᤡᤰ ᤂᤧᤏᤧ᤹ ᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤺ᤳᤋᤢᤒᤠ ᤁᤧᤀᤡ᤺ᤳᤋᤢᤒᤠ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤁᤧᤕᤠ᤺ᤶᤒᤣᤀᤥ ᤔᤧᤄᤧᤵᤛᤢᤒᤠ ᤐᤠ᤺ᤴᤏᤡᤴ ᤛᤧᤰᤂᤠ ᤔᤧ᤺ᤴᤗᤧᤇ ᤑᤠ᤹ᤀᤠᤱ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥
ACT 21:25 ᤁᤖ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤃ. ᤜᤠᤖᤠ᤹ ᤏᤠᤘᤠᤀᤡᤳᤗᤠᤀᤥ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤆᤠ᤺ᤴ ᤔᤧᤴᤈ᤺ᤏᤧᤴᤗ. ᤛᤠᤔᤠᤰᤂᤡ᤹ ᤏᤢ ᤁᤢᤛᤡᤳᤗᤠ ᤕ᤹ᤔᤏᤠ ᤛᤧᤵᤔᤏᤠᤒᤠ ᤛᤠ ᤆᤠᤔᤠ ᤔᤧᤏᤢ᤹ᤏᤧᤴᤗᤥ. ᤜᤧᤰᤁᤩᤠᤱ ᤆᤠᤖᤠᤶᤔᤥᤗᤠᤶ ᤀᤣ᤺ᤰ ᤔᤧᤘᤠ᤹ᤏᤡᤖᤥ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡ᤺ᤴᤎᤥ ᤐᤠ᤺ᤴᤜᤠ᤹ ᤛᤰᤀᤡᤱᤄᤱᤅᤥ ᤛᤠᤵᤋᤢᤶᤒᤧᤀᤠᤱ ᤐᤳᤗᤥ॥”
ACT 21:26 ᤜᤧᤰᤁᤣᤗ᤹ᤖᤡᤰ ᤐᤠᤘᤗᤧᤴ ᤋᤧᤴᤍᤧᤀᤠᤱ ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤗᤡᤛᤡ ᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤜᤢᤍᤡ ᤌᤡᤶ ᤁᤢᤀᤡᤛᤡ᤺ᤰ ᤛᤢᤳᤌᤥ ᤆᤥ᤺ᤰᤛᤡᤱ॥ ᤜᤧᤰᤁᤩᤠᤱ ᤛᤣᤛᤣ ᤐᤥ᤺ᤱᤔᤠ ᤕᤧᤴᤏᤡᤴ ᤀᤠᤵᤑᤠᤸᤗᤧ ᤆᤢ᤺ᤳᤋᤠᤱ ᤁᤠᤰᤗᤧ ᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤡᤱᤄᤱ ᤐᤡᤛᤧ ᤂᤢᤏᤧ᤹ ᤔᤠᤱᤜᤡᤶ ᤛᤡᤃᤠᤱ ᤗᤠ᤺ᤛᤧᤖᤥ॥
ACT 21:27 ᤛᤣᤛᤣ ᤆᤥ᤺ᤰᤛᤡᤱᤔᤠ ᤏᤢᤛᤡᤃᤣ᤺ᤰᤛᤔᤠ ᤕᤧᤴ ᤁᤧᤵᤔᤠ ᤀᤡ᤺ᤳᤋᤧᤀᤠᤱ ᤘᤕᤧᤸᤗᤧ ᤁᤢᤓᤠ ᤀᤣᤛᤡᤕᤠᤛ᤻ᤔᤠ ᤕᤜᤢᤍᤡᤜᤠ᤹ᤖᤧ ᤐᤠᤘᤗᤧᤴ ᤔᤠᤱᤜᤡᤶ ᤛᤡᤃᤠᤱ ᤔᤧᤏᤡ᤺ᤛᤢᤀᤠᤱ ᤔᤏᤠᤜᤠ᤹ ᤔᤧᤜᤢᤛᤢᤛᤡᤖ ᤂᤢᤏᤧ᤹ ᤔᤧᤍᤧᤶᤛᤢᤖᤥ॥
ACT 21:28 ᤂᤧᤱᤜᤠ᤹ᤖᤧ ᤀᤣᤑᤡᤛᤛᤀᤥ ᤒᤠ ᤋᤪᤥᤑᤡᤔᤛ ᤔᤧᤵᤔᤏᤠᤒᤠ ᤔᤏᤠ᤺ᤴ ᤕᤧᤰᤕᤰᤁᤥ ᤂᤢᤏᤧ᤹ᤏᤢ ᤋᤠᤰᤁᤴᤏᤡ ᤘᤕᤧᤒᤠ ᤔᤧᤏᤡ᤺ᤛᤢᤀᤠᤱ ᤒᤠ ᤂᤧᤴᤏᤣ ᤐᤠᤘᤗᤖᤧ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤅᤥ ᤔᤠᤱᤜᤡᤶ ᤛᤡᤃᤠᤱ ᤁᤣ᤺ᤳᤋᤢᤒᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤀᤠᤱ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤛᤣ. ᤕᤠᤵᤔᤡ ᤁᤢᤓᤠ᤹ ᤀᤠᤒᤡᤖᤧᤶᤔᤧ᤹ᤀᤥ᥄ ᤁᤴ ᤔᤏᤠ᤺ᤸᤗᤧ ᤀᤠᤳᤋᤠᤴᤇᤠᤱ ᤀᤠᤏᤡ᤹ ᤛᤢᤘᤠᤱᤜᤠ᤹ ᤏᤢ ᤀᤠᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶ ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶ ᤋᤰᤗᤧᤱᤘᤠᤀᤥ ᤔᤏᤠᤜᤠ᤹ ᤏᤡᤛᤠᤶ ᤜᤢ᤹ᤖᤢᤛᤡᤖ ᤘᤠ᤹ᤖᤥ॥ ᤁᤶᤔᤩᤠᤰᤗᤰ ᤔᤧ᤺ᤴᤗᤥ. ᤁᤸᤗᤧᤃ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤔᤠᤱᤜᤡᤶ ᤛᤡᤃᤠᤱ ᤋᤠᤖᤢᤛᤡᤀᤠᤱ ᤁᤴ ᤛᤣᤛᤣ ᤋᤧᤴᤏᤡᤴᤏᤣ ᤆᤡ᤺ᤴᤍᤢᤖᤥ ᤗ᤹ᤖᤡᤰ ᤀ᤺ᤰᤔᤠ ᤔᤧᤜᤣ᤺ᤰᤋᤧᤖᤥ॥
ACT 21:30 ᤜᤧᤰᤁᤩᤠᤱ ᤕᤧᤰᤕᤰᤁᤥ ᤛᤡᤍᤠᤰ ᤜᤕᤱᤁᤡᤸᤗᤡᤱ ᤐᤥ᤺ᤰᤂᤧᤀᤠᤱ ᤁᤠᤰ ᤐᤡᤛᤠᤱᤗᤠᤶ ᤔᤏᤠᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤍᤩᤧᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤍᤧᤶᤛᤢᤀᤠᤱ ᤔᤠᤱᤜᤡᤶᤗᤠᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢᤖ ᤔᤧᤗ᤺ᤳᤋᤢᤀᤠᤱ ᤂᤡᤔᤥ ᤔᤠᤱᤜᤡᤶᤗᤧᤴ ᤗᤠᤶᤎᤣ᤺ᤵᤜᤠ᤹ ᤔᤧᤛᤢᤒᤢᤖᤥ॥
ACT 21:31 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤵᤔᤠ ᤔᤧᤃᤥ᤺ᤳᤋᤢᤸᤗᤧ ᤕᤖᤢᤛᤗᤧᤶᤔᤥ ᤜᤕᤱᤁᤡᤸᤗᤡᤱ ᤁᤧᤒᤥ᤺ᤱᤒᤠᤖ ᤁᤧᤒᤵᤐᤠ ᤀᤡᤱᤄᤱᤅᤡᤴ ᤖᤥᤔᤡ ᤋᤢᤖᤠᤛ᤻ᤔᤠ ᤌᤰᤋᤢᤶᤒᤠᤸᤗᤧ ᤁᤢᤏᤧᤰᤂᤥ᤹ᤀᤥ ᤋᤥ᤺ᤰᤋᤧ॥
ACT 21:32 ᤂᤡᤔᤥ ᤂᤧᤴ ᤌᤰᤋᤢᤶᤒᤠᤸᤗᤧ ᤁᤢᤓᤠ ᤋᤢᤶᤌᤰᤛᤢᤒᤠᤜᤠ᤹ ᤏᤢ ᤌᤰᤛᤢᤒᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤗᤥ᤺ᤰᤋᤧᤖ ᤁᤧᤖᤧ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤡ᤺ᤛᤢᤛᤡᤀᤠᤱ ᤐᤠᤘᤗᤧᤴ ᤜᤡᤵᤔᤠ ᤔᤧᤗᤧᤖᤢᤖᤥ॥
ACT 21:33 ᤂᤧᤴ ᤌᤰᤋᤢᤶᤒᤧᤴ ᤐᤣᤀᤠᤱ ᤐᤠᤘᤗᤧᤴ ᤋᤧᤶᤛᤢᤀᤠᤱ ᤏᤧᤳᤇᤡ ᤑᤧᤴᤛᤡᤰᤂᤡᤜᤠ᤹ᤖᤧ ᤀᤡᤄᤣ᤺ᤱᤔᤠ ᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤵᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤔᤏᤠ᤺ᤴ ᤜᤠ᤺ᤳᤏᤡᤒᤣ᥅ ᤜᤧᤰᤁᤩᤠᤱ ᤁᤸᤗᤧ ᤌᤣ ᤆᤥᤃᤢᤀᤠᤱ ᤘᤠ᤹᥅”
ACT 21:34 ᤂᤧᤴ ᤔᤏᤠᤜᤠ᤹ᤀᤥ ᤁᤢᤓᤠᤖᤧ ᤌᤡᤰ ᤐᤠ᤺ᤴ ᤔᤧᤒᤠ᤺ᤳᤋᤢ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤘᤣ᤹ ᤐᤠ᤺ᤴ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧ॥ ᤁᤴ ᤌᤣ ᤐᤥ᤺ᤰᤂᤧᤒᤠ ᤑᤠ᤹ᤀᤠᤱ ᤂᤧᤴ ᤌᤰᤋᤢᤶᤒᤧᤸᤗᤧ ᤛᤧᤰᤂᤠ ᤐᤠ᤺ᤴ ᤌᤣᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤢᤔᤏᤠᤜᤠ᤹ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤌᤠ᤺ᤱ ᤋᤣ᤹ᤔᤠ ᤐᤠᤱᤄᤢᤛᤡᤖᤥ॥
ACT 21:35 ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤖᤣ᤹ᤀᤡᤴ ᤔᤧᤗᤡᤅᤢᤖ ᤔᤧᤒᤳᤇᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤳᤋᤡᤋᤡ ᤜᤕᤱᤁᤡᤸᤗᤡᤱ ᤔᤧᤈᤥᤃᤢᤀᤠᤱ ᤐᤠᤘᤗᤧᤴ ᤛᤧᤵᤔᤠ ᤔᤧᤃᤥ᤺ᤳᤋᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤐᤠᤘᤗᤧᤴ ᤔᤧᤒᤰᤂᤢᤀᤠᤱ ᤔᤧᤍᤣ᤹ᤖᤢᤖᤥ॥
ACT 21:36 ᤂᤧᤱᤜᤠ᤹ ᤂᤢᤏᤡ᤹ ᤀᤣ᤺ᤰᤀᤣ᤺ᤰ ᤂᤧᤴ ᤔᤏᤠ᤺ᤴ ᤛᤧᤖᤧᤶᤔᤧ᤹. ᤛᤧᤖᤧᤶᤔᤧ᤹ ᤗ᤹ᤖᤡᤰ ᤔᤧᤀ᤺ᤰᤋᤧᤖ ᤔᤧᤍᤡᤶᤍᤢᤛᤡᤖᤥ॥
ACT 21:37 ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤋᤣ᤹ᤔᤠ ᤔᤧᤀᤡ᤺ᤳᤋᤢᤸᤗᤧ ᤐᤠᤘᤗᤖᤧ ᤌᤰᤋᤢᤶᤒᤧᤴ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤁᤢᤓᤠ ᤐᤠ᤺ᤴ ᤐᤠ᤺ᤵᤔᤠ ᤛᤢᤰᤁᤠᤒᤡ᥅” ᤜᤧᤰᤁᤩᤠᤱ ᤂᤧᤴ ᤌᤰᤋᤢᤶᤒᤠᤸᤗᤧᤀᤠᤱ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤃᤪᤡᤁ ᤐᤠ᤺ᤴᤏᤠᤱ ᤐᤠ᤺ᤵᤔᤠ ᤁᤧᤗᤧᤛ᤻ᤛᤢᤒᤡ᥅
ACT 21:38 ᤜᤧᤰᤁᤣᤏᤧ ᤑᤠ᤹ᤃᤪ ᤁᤢᤓᤠ ᤋᤱᤒᤣ ᤋᤃᤡ ᤜᤠᤱᤒᤡᤑᤩᤢᤱ ᤁᤧᤜᤣ᤺ᤰᤐᤠ ᤂᤧᤴ ᤔᤡᤛᤪᤡ ᤔᤏᤠ᤺ᤱᤃ ᤂᤧᤏᤧ᤹ᤀᤣᤒᤡᤗᤠᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤂᤧᤸᤗᤧ ᤕᤧ᤺ᤱᤄᤠᤍᤧᤴᤏᤥ ᤜᤧᤴᤇᤡᤱ ᤗᤡᤛᤡ (᥊᥆᥆᥆) ᤜᤠᤱᤒᤡᤑᤩᤢᤱᤒᤠᤜᤠ᤹ ᤗᤠᤶᤗᤥᤛᤢᤛᤡᤀᤠᤱ ᤘᤕᤧᤖᤥ॥”
ACT 21:39 ᤐᤠᤘᤗᤖᤧ ᤔᤧᤳᤋᤢ. “ᤀᤡᤱᤃᤠ᤹ ᤔᤧ᤺ᤴᤏᤠ᤹ᤖᤥ. ᤀᤡᤱᤃᤠ᤹ᤃ ᤕᤜᤢᤍᤡᤀᤠ. ᤜᤧᤰᤁᤩᤠᤱ ᤛᤡᤗᤡᤛᤡᤕᤠ ᤌᤢᤶᤔᤥᤒᤠ ᤋᤠᤷᤛᤛ᤻ᤛᤥ ᤛᤠᤘᤠ᤺ᤴᤇᤡᤱᤅᤠᤱᤒᤠ॥ ᤀᤡᤱᤃᤠ᤹ ᤁᤧᤕᤧᤰᤐᤠ ᤕᤧᤰᤕᤰᤁᤥᤒᤠ ᤕᤰᤕᤢᤱᤒᤠᤀᤠ॥ ᤀᤠᤍᤠᤱᤒᤣ. ᤁᤴ ᤔᤏᤠᤜᤠ᤹ᤏᤢ ᤀᤡᤱᤃᤠ᤹ ᤐᤠ᤺ᤵᤔᤠ ᤐᤠᤱᤄᤠᤱᤅᤧ᤹ᤀᤥ॥”
ACT 21:40 ᤌᤰᤋᤢᤶᤒᤧᤸᤗᤧᤀᤠᤱ ᤐᤠ᤺ᤵᤔᤠ ᤋᤧᤴᤍᤡᤱ ᤐᤡᤖᤢ॥ ᤜᤧᤰᤁᤩᤠᤱ ᤐᤠᤘᤗᤧᤴ ᤌᤖᤣ᤹ᤗᤧ ᤏᤠᤱᤛᤣ᤺ᤰᤁᤥ ᤕᤧᤶᤛᤡᤱᤅᤠᤱ ᤔᤏᤠᤜᤠ᤹ ᤜᤢᤰᤆᤠ᤺ᤸᤁᤡ ᤐᤡᤖᤢᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤔᤏᤠᤜᤠ᤹ ᤛᤫᤠ᤺ᤳ ᤔᤧᤒᤥ᤺ᤰᤂᤧᤀᤠᤱ ᤂᤧᤴ ᤔᤏᤠᤜᤠ᤹ᤏᤢ ᤐᤠᤘᤗᤧᤴ ᤜᤡᤒᤪᤢ ᤐᤠ᤺ᤴᤏᤥ ᤐᤠ᤺ᤵᤔᤠ ᤜᤣ᤺ᤰᤋᤧᤖᤥ॥
ACT 22:1 “ᤀᤠᤍᤠᤱᤒᤠᤛᤣ. ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤂᤡᤏᤡ᤹ ᤋᤃᤡ ᤐᤠ᤺ᤳᤋᤢᤱᤒᤠ ᤀᤠᤏᤠᤱᤛᤡᤱᤔᤠ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”
ACT 22:2 ᤀᤰᤂᤣᤗ᤹ᤖᤡᤰ ᤜᤡᤒᤪᤢ ᤐᤠ᤺ᤴᤏᤥ ᤂᤢᤏᤧ᤹ ᤐᤠᤖᤧᤒᤠ ᤔᤧᤄᤧᤵᤛᤢᤀᤠᤱ ᤁᤠᤰ ᤛᤫᤠ᤺ᤳ ᤔᤧᤒᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤐᤠᤘᤗᤖᤧ ᤀᤰᤂᤣ ᤔᤧᤳᤋᤢᤛᤡ.
ACT 22:3 “ᤀᤡᤱᤃᤠ᤹ ᤛᤡᤗᤡᤛᤡᤕᤠᤛ᤻ᤔᤠ ᤋᤠᤷᤛᤛ᤻ᤛᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤜᤢᤍᤡᤀᤠᤖᤥ. ᤁᤖ ᤒᤠ ᤁᤵᤔᤥ ᤕᤖᤢᤛᤗᤧᤶᤔᤥᤀᤣ ᤌᤠᤱᤒᤧᤴ ᤁᤧᤖᤠᤱᤅᤠᤱ ᤋᤢᤳᤋᤢᤃᤧᤴ ᤋᤢᤶᤔᤩᤠᤱᤜᤠᤱ ᤛᤡᤰᤛᤠᤶᤒᤠ ᤃᤔᤠᤗᤡᤕᤗᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤠᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤶᤕᤥᤌᤡᤶ ᤏᤢ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤏᤠ᤺ᤳᤋᤢ ᤔᤧᤕᤢᤖᤢᤒᤠ ᤛᤠᤰᤌᤡᤶᤜᤠ᤹ ᤁᤵᤔᤥ ᤜᤢ᤹ᤛᤡᤱᤅᤠᤱᤗᤥ॥ ᤀᤠᤀᤡᤴ ᤂᤡᤏᤡ᤹ ᤜᤧᤰᤁᤣᤀᤣ ᤀᤡᤱᤃᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤐᤡᤔᤠ ᤁᤢᤛᤡᤰ ᤁᤧᤛᤶᤒᤠ ᤘᤕᤠᤱᤗᤥ॥
ACT 22:4 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤍᤠᤱᤒᤠᤸᤗᤧ ᤁᤢᤗᤠᤶ ᤁᤧᤍᤡᤶᤒᤠᤜᤠ᤹ ᤛᤡ᤺ᤔᤧᤴ ᤌᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱ. ᤜᤧᤰᤁᤩᤠᤱ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ᤜᤠ᤹ ᤋᤧᤶᤛᤢᤱᤛᤡᤱᤅᤠᤱ ᤐᤢᤱᤗᤠ ᤜᤡᤶᤔᤥ ᤛᤠᤰᤋᤢᤱᤛᤡᤱᤗᤥ॥
ACT 22:5 ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤁᤠᤰ ᤕᤧᤈᤢᤶᤓᤥᤒᤠ ᤔᤏᤠᤜᤠ᤹ᤖᤣ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤗᤠᤶ ᤀᤡᤱᤃᤠ᤹ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤕᤜᤢᤍᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤧᤶᤔᤠ ᤕᤢᤰ ᤁᤧᤒᤡᤒᤠ ᤛᤰᤀᤡᤱᤄᤱᤜᤠ᤹ᤀᤠᤱ ᤂᤥ᤺ᤛᤢᤱᤅᤠᤱ ᤀᤡᤱᤃᤠ᤹ ᤂᤧᤵᤔᤥ ᤁᤴ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤕᤖᤢᤛᤗᤧᤶᤔᤥ ᤋᤧᤶᤔᤠ ᤋᤠ᤺ᤵᤔᤠᤛᤡᤀᤠᤱ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤍᤔᤛ᤻ᤁᤛᤀᤥ ᤐᤣᤃᤠᤱᤗᤥ॥
ACT 22:6 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤗᤠᤶᤍᤡ᤺ᤰᤁᤥ ᤐᤣᤃᤠᤱᤗ ᤐᤳᤇᤠᤱᤅᤡᤸᤗᤧ ᤍᤔᤛ᤻ᤁᤛ ᤁᤢᤒᤣᤛᤠᤱ ᤁᤧᤖᤠᤱᤅᤡᤸᤗᤧ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ. ᤂᤧᤵᤔᤥ ᤜᤰᤆᤄᤳ ᤋᤠᤱᤛᤠᤰᤐᤥᤗᤠᤶ ᤀᤡᤱᤃᤠ᤹ ᤀᤠᤄᤡᤖᤡ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤗᤧᤰᤋᤧᤖᤥ॥
ACT 22:7 ᤀᤡᤱᤃᤠ᤹ ᤂᤧᤵᤔᤥ ᤜᤷᤃᤢᤵ ᤆᤥ᤺ᤴᤍᤠᤱᤅᤡᤸᤗᤧ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. ‘ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅’
ACT 22:8 ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤛᤣ᤺ᤴᤍᤥᤛᤢᤱ ‘ᤂᤧᤏᤧ᤹ᤃ ᤜᤠ᤺ᤳᤏᤧᤒᤣ. ᤀᤠᤍᤠᤱᤒᤣ᥅’ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤏᤥᤃᤵ ᤐᤡᤖᤠᤱ. ‘ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤏᤠᤛᤖᤋᤒᤠ ᤕᤧᤛᤢᤀᤠᤖᤥ॥’
ACT 22:9 ᤂᤧᤵᤔᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤱᤃ ᤔᤧᤏᤡ᤺ᤛᤢ. ᤁᤖ ᤀᤡᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤀᤡᤰᤗᤠ᤺ᤴ ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥
ACT 22:10 ᤀᤡᤱᤃᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤱ. ‘ᤀᤠᤍᤠᤱᤒᤣ. ᤀᤠᤸᤗ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠᤒᤣ᥅’ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤔᤧᤳᤋᤠᤱ. ‘ᤐᤥᤃᤧ᤹ᤀᤠᤱ ᤍᤔᤛ᤻ᤁᤛᤀᤥ ᤐᤣᤃᤧ᤹॥ ᤂᤧᤵᤔᤥ ᤂᤧᤏᤧ᤹ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤁᤢᤓᤠᤖᤧ ᤁᤧᤶᤔᤧᤳᤗᤥ॥’
ACT 22:11 ᤂᤧᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤗᤧᤰᤋᤧᤒᤠᤸᤗᤧ ᤀᤠᤔᤡᤰᤁᤡᤴ ᤆᤧᤔᤢᤀᤠᤱ ᤂᤠᤏᤡ᤺ᤔᤠ ᤔᤧᤴᤇᤢᤰᤁᤣ ᤔᤡᤰᤑ᤺ᤶᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ᤏᤢ ᤛᤥᤖᤡᤰ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤀᤠᤴᤍᤣ᤺ᤱ ᤀᤠᤴᤈᤢᤶᤜᤠ᤹ᤖᤧ ᤀᤠᤜᤢᤰᤁᤥ ᤔᤧᤍᤧᤶᤛᤠᤱᤗ ᤍᤔᤛ᤻ᤁᤛᤀᤥ ᤔᤧᤃᤧᤳᤋᤠᤱᤗᤥ॥
ACT 22:12 ᤜᤧᤰᤁᤩᤠᤱ ᤂᤧᤵᤔᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤀᤠᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶ ᤁᤧᤏᤠ᤺ᤵᤐᤠ ᤁᤧᤀᤡ᤺ᤵᤐᤠ ᤛᤠᤶᤕᤥᤏᤡᤒᤠ ᤔᤏᤠᤎᤡᤰ ᤀᤠᤍᤢᤶᤛᤧ ᤋᤩᤧ॥ ᤂᤧᤱᤃ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤔᤏᤠ ᤘᤕᤧᤖᤥ॥
ACT 22:13 ᤂᤢᤏᤧ᤹ ᤀᤡᤱᤃᤠ᤹ ᤘᤕᤠᤱᤒᤠ ᤋᤧᤴᤏᤥ ᤋᤩᤧᤀᤠᤱ ᤀᤰᤂᤣ ᤔᤧᤳᤋᤠᤱ. ‘ᤏᤢᤛᤠ᤹ ᤛᤠᤘᤗᤀᤣ. ᤀᤠᤸᤗᤥ ᤂᤧᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ᤹ᤀᤥ.’ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤔᤥ ᤂᤢᤏᤧ᤹ ᤏᤡ᤺ᤔᤠ ᤛᤢᤰᤋᤢᤱᤗᤥ॥
ACT 22:14 ᤂᤧᤸᤗᤧ ᤔᤧᤳᤋᤠᤱ. ‘ᤂᤧᤏᤧ᤹ᤃ ᤀᤠᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤛᤡᤱ ᤏᤡ᤺ᤵᤔᤠ. ᤛᤠᤶᤕᤥᤏᤡᤒᤠ ᤁᤢᤔᤏᤠ ᤕᤧᤛᤢ᤺ᤴ ᤏᤡ᤺ᤔᤠ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴ ᤂᤧᤶᤔᤠ ᤑᤠ᤹ᤀᤠᤱ ᤁᤧᤛᤣᤃᤧᤀᤠᤱ ᤁᤧᤘᤠ᤹ᤖᤥ॥
ACT 22:15 ᤂᤧᤏᤧ᤹ ᤁᤧᤏᤡ᤺ᤛᤢᤒᤠ ᤏᤢ ᤁᤧᤄᤧᤵᤛᤢᤒᤠ ᤐᤠ᤺ᤴᤜᤠ᤹ᤖᤧᤴ ᤁᤠᤰ ᤔᤏᤠᤜᤠ᤹ᤀᤥ ᤁᤢᤍᤥ᤺ᤴᤍᤡ ᤁᤧᤒᤥ᤺ᤱᤗᤥ॥
ACT 22:16 ᤀᤠᤸᤗ ᤌᤣ᤺ᤴ ᤁᤧᤜᤠᤱᤄᤢᤒᤠᤒᤣ᥅ ᤐᤥᤃᤧ᤹ᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ᤹. ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤧ᤹ᤀᤠᤱ ᤁᤧᤗᤠᤕᤥᤗᤠᤶ ᤛᤣᤛᤣ ᤐᤥ᤺ᤰᤂᤧ᤹ᤀᤥ॥’
ACT 22:17 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤢᤛᤗᤧᤶᤔᤥ ᤕᤠᤶᤔᤥ ᤏᤢ᤺ᤰᤂᤠᤱ ᤐᤣᤃᤠᤱᤅᤠᤱ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤁᤡ ᤕᤢᤅᤠᤱᤅᤡᤸᤗᤧ ᤀᤡᤱᤃᤠ᤹ ᤛᤢᤑᤥ ᤏᤡ᤺ᤛᤢᤱᤗᤥ॥
ACT 22:18 ᤂᤧᤵᤔᤥ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. ‘ᤕᤖᤢᤛᤗᤧᤔᤗᤠᤶ ᤜᤠᤖᤠ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤁᤵᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤒᤡᤖᤢᤒᤠ ᤋᤥ᤺ᤴᤍᤡᤴ ᤔᤧᤴᤍᤠ᤺ᤰᤋᤢᤴᤗᤥ॥’
ACT 22:19 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤢᤏᤧ᤹ ᤔᤧᤳᤋᤢᤱ. ‘ᤀᤠᤍᤠᤱᤒᤣ. ᤀᤡᤱᤃᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤃᤠᤱᤅᤠᤱ ᤂᤧᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤋᤧᤶᤛᤢᤱᤛᤡᤱᤅᤠᤱ ᤗ᤺ᤵᤛᤢᤱᤛᤡᤱ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤱᤛᤡᤱᤒᤠ ᤐᤠ᤺ᤴᤜᤠ᤹ᤃ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤖᤥ॥
ACT 22:20 ᤜᤧᤰᤁᤩᤠᤱ ᤛ᤻ᤋᤡᤑᤏᤛᤧᤴ ᤔᤧᤛᤧᤖᤢᤸᤗᤧ ᤀᤡᤱᤃᤠ᤹ᤃ ᤋᤥ᤺ᤴᤍᤡ ᤐᤥ᤺ᤰᤂᤠᤱᤅᤠᤱ ᤂᤧᤴ ᤐᤠ᤺ᤴᤏᤡᤴ ᤋᤧᤴᤍᤡᤱ ᤆᤥᤃᤢᤱᤅᤠᤱ ᤂᤧᤴ ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤆᤠᤱᤍᤣ᤺ᤳᤜᤠ᤹ ᤁᤥᤛᤢᤱᤗ ᤕᤧᤒᤠᤱᤗᤥ॥’
ACT 22:21 ᤁᤖ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤔᤧᤳᤋᤠᤱ. ᤐᤣᤃᤧ᤹. ‘ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤔᤠ᤺ᤱᤄᤠ ᤔᤠ᤺ᤱᤄᤠ ᤌᤠᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤀᤠᤕᤠ᤺ᤶᤒᤣᤀᤥ ᤀᤡᤱᤓᤴ ᤆᤥ᤺ᤰᤛᤧ ᤐᤠᤱᤏᤧ᤹ᤖᤥ॥’”
ACT 22:22 ᤁᤴ ᤐᤠ᤺ᤳᤋᤢᤖ ᤌᤠᤖᤡᤰ ᤔᤏᤠᤜᤠ᤹ᤖᤧ ᤐᤠᤘᤗᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤖᤥ. ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱ ᤗ᤹ᤖᤡᤰ ᤐᤠ᤺ᤴᤛᤢᤳᤗᤠ᤺ᤴ ᤐᤠ᤺ᤳᤋᤢᤏᤠᤔᤧ᤺ᤴᤏᤣ ᤂᤧᤱᤜᤠ᤹ ᤔᤧᤀ᤺ᤰᤋᤧᤖ ᤀᤰᤂᤣ ᤗ᤹ᤔᤠ ᤔᤧᤜᤣ᤺ᤰᤋᤧ. “ᤁᤴ ᤛᤧᤵᤔᤠᤀᤣ ᤐᤥ᤺ᤱ᥄ ᤀᤠᤸᤗ ᤁᤴ ᤔᤏᤠ᤺ᤴ ᤁᤢᤜᤡᤱᤘᤧᤳ ᤗᤧᤵᤔᤠ ᤔᤧᤏᤢ᤹ᤏᤧᤴᤗᤥ᥄”
ACT 22:23 ᤀᤰᤂᤣᤗ᤹ᤖᤡᤰ ᤛᤡᤰᤁᤡᤸᤗᤧ ᤀᤠᤒᤠᤅᤣ ᤂᤢᤏᤡ᤹ ᤛᤢᤱᤄᤣ᤺ᤰᤘᤠᤜᤠ᤹ ᤔᤧᤎᤧ᤺ᤰᤂᤢᤖ ᤂᤠᤶᤜᤡ᤺ᤰᤜᤠ᤹ ᤌᤥ ᤔᤧᤛᤧ᤺ᤛᤢᤖ ᤔᤧᤀ᤺ᤰᤋᤧ॥
ACT 22:24 ᤀᤠᤸᤗ ᤖᤥᤔᤡ ᤌᤰᤐᤧᤒᤠᤸᤗᤧ ᤁᤴ ᤏᤡ᤺ᤛᤢᤀᤠᤱ ᤐᤠᤘᤗᤧᤴ ᤋᤢᤖᤠ ᤜᤡᤶᤛᤡᤃᤠᤱ ᤋᤠ᤺ᤵᤔᤠᤀᤠᤱ ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤕᤜᤢᤍᤡᤜᤠ᤹ ᤔᤧᤀ᤺ᤰᤋᤧᤒᤠᤒᤣ᥅ ᤗ᤹ᤖᤡᤰ ᤏᤡᤱᤘᤠ᤹ ᤂᤥ᤺ᤔᤠ ᤑᤠ᤹ᤀᤠᤱ ᤋᤧ᤺ᤶᤓᤢᤰ ᤕᤠᤰᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
ACT 22:25 ᤋᤡᤗᤡᤱᤃᤠᤜᤠ᤹ᤖᤧ ᤋᤧ᤺ᤶᤓᤢᤰ ᤕᤠᤰᤔᤠ ᤑᤠ᤹ᤀᤠᤱ ᤐᤠᤘᤗᤧᤴ ᤀᤡᤄᤣ᤺ᤱᤔᤠ ᤔᤧᤜᤣ᤺ᤰᤋᤢᤸᤗᤧ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤌᤰᤋᤢᤶᤒᤧᤴ ᤐᤠᤘᤗᤖᤧ ᤀᤰᤂᤣ ᤔᤧᤳᤋᤢ. “ᤖᤥᤔᤡ ᤕᤰᤕᤢᤱᤒᤠᤴᤏᤠᤱ ᤀᤠᤵᤋᤡᤰ ᤔᤧ᤺ᤴᤏᤣ ᤋᤧ᤺ᤶᤓᤢᤰ ᤕᤠᤰᤔᤠ ᤖᤥᤔᤡ ᤌᤡᤶᤔᤡᤸᤗᤧ ᤁᤧᤒᤡᤖᤡᤒᤡ᥅”
ACT 22:26 ᤌᤰᤋᤢᤶᤒᤧᤸᤗᤧ ᤂᤧᤴ ᤌᤰᤐᤧᤒᤠᤴ ᤐᤣᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤴ ᤌᤣ᤺ᤴ ᤁᤧᤈᤥᤃᤢᤖ ᤁᤧᤒᤵᤐᤣ᥅ ᤁᤴ ᤔᤏᤠ᤺ᤱᤃ ᤖᤥᤔᤡ ᤕᤰᤕᤢᤱᤒᤠᤔᤢᤖᤥ᥄”
ACT 22:27 ᤂᤧᤴ ᤌᤰᤐᤧᤒᤠᤴ ᤋᤩᤧᤀᤠᤱ ᤐᤠᤘᤗᤧᤴ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤖᤥᤔᤡ ᤕᤰᤕᤢᤱᤒᤠᤏᤧᤴᤒᤡ᥅” ᤜᤧᤰᤁᤩᤠᤱ ᤐᤠᤘᤗᤖᤧ ᤀᤥᤖᤥ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥
ACT 22:28 ᤂᤧᤴ ᤌᤰᤐᤧᤒᤠᤸᤗᤧ ᤔᤧᤳᤋᤢ. “ᤁᤖ ᤀᤡᤱᤃᤠ᤹ᤃ ᤕᤖᤡᤰ ᤕᤠᤱᤛᤠᤁᤢᤴᤎᤣᤖᤧ ᤁᤴ ᤖᤥᤔᤡ ᤕᤰᤕᤢᤱᤒᤠ ᤕᤢᤰᤁᤡᤴ ᤀᤡᤅᤢᤱᤒᤠᤖᤥ॥” ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤛᤠᤘᤠ᤺ᤴᤇᤡᤅᤠᤱᤅᤡᤸᤗᤧᤛᤠ ᤖᤥᤔᤡᤀᤠᤖᤥ॥”
ACT 22:29 ᤁᤖ ᤂᤢᤏᤧ᤹ ᤛᤣ᤺ᤴᤗᤠᤵᤔᤠ ᤕᤠᤖᤡᤵ ᤁᤧᤒᤥ᤺ᤱᤒᤠᤜᤠ᤹ᤖᤧ ᤜᤰᤆᤄᤳ ᤂᤢᤏᤧ᤹ ᤔᤧᤗᤧᤖᤢ ᤔᤧᤎ᤺ᤀᤠᤱ ᤔᤧᤒᤣ. ᤜᤧᤰᤁᤩᤠᤱ ᤐᤠᤘᤗᤧᤴ ᤖᤥᤔᤡ ᤕᤰᤕᤢᤱᤒᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤴ ᤌᤰᤐᤧᤒᤠᤴᤏᤠᤱ ᤁᤡ᤺ᤛᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤠᤛᤧᤴ ᤔᤧᤴᤗᤥ᤺ᤴᤏᤣ ᤂᤧᤴ ᤀᤡᤄᤣ᤺ᤰᤂᤢᤀᤠᤱ ᤘᤕᤧᤖᤥ॥
ACT 22:30 ᤁᤖ ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤖᤥᤔᤡ ᤌᤰᤐᤧᤒᤠᤸᤗᤧ ᤌᤣᤀᤠᤱ ᤕᤜᤢᤍᤡᤜᤠ᤹ᤖᤧ ᤐᤠᤘᤗᤧᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤂᤧᤴ ᤗᤧᤖᤢ॥ ᤜᤧᤰᤁᤩᤠᤱ ᤁᤠᤰ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤧᤈᤢᤶᤓᤥ ᤆᤢᤶᤗᤢᤱ ᤆᤥ᤺ᤰᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤖ ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢᤖᤥ॥
ACT 23:1 ᤐᤠᤘᤗᤖᤧ ᤕᤧᤈᤢᤶᤓᤥ᤺ᤴ ᤏᤢ᤺ᤖᤡᤰᤁᤠᤱ ᤀᤥᤔᤧᤳᤋᤢᤀᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤀᤡᤴ ᤌᤠᤖᤡᤰ ᤀᤠᤜᤡᤱᤔᤴᤏᤥ ᤛᤣᤛᤣ ᤂᤠᤛᤡᤱᤅᤥ ᤔᤠᤱᤛᤣᤘᤠ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥”
ACT 23:2 ᤁᤴ ᤂᤧᤵᤛᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤜᤏᤏᤡᤕᤠᤖᤧ ᤐᤠᤘᤗᤖᤧ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤌᤰᤋᤢᤶᤒᤠᤴ ᤐᤠᤘᤗᤖᤧ ᤁᤢᤔᤢᤖᤠᤀᤥ ᤜᤡᤵᤋᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤖᤥ॥
ACT 23:3 ᤐᤠᤘᤗᤖᤧᤀᤠᤱ ᤜᤏᤏᤡᤕᤠ᤺ᤴ ᤔᤧᤳᤋᤢ. “ᤂᤧᤏᤧ᤹ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤀᤠᤱ ᤁᤧᤜᤡᤵᤗᤥ॥ ᤂᤧᤏᤧ᤹ᤃ ᤂᤧᤵᤔᤥ ᤔᤥᤛᤠᤖᤧ ᤐᤡᤖᤢᤒᤠ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤀᤠᤄᤠᤛᤧᤴ ᤗᤥ᤺ᤶᤔᤠ ᤑᤠ᤹ᤀᤠᤱ ᤁᤧᤕᤢᤱ. ᤁᤖ ᤂᤧᤏᤧ᤹ᤃ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤶᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤡᤱᤃᤠ᤹ ᤕᤠᤵᤔᤡ ᤜᤡᤵᤔᤠ ᤁᤧᤒᤠᤱᤄᤢᤛᤡᤒᤡ᥅”
ACT 23:4 ᤜᤧᤰᤁᤩᤠᤱ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤔᤏᤠᤜᤠ᤹ᤖᤧ ᤐᤠᤘᤗᤧᤴ ᤔᤧᤔᤧᤳᤋᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤏᤠᤎᤠ᤺ᤔᤠ ᤀᤠᤰᤂᤣᤀᤠᤱ ᤁᤧᤀᤠ᤺ᤴᤇᤡᤱᤒᤣ᥅”
ACT 23:5 ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤂᤢᤏᤧ᤹ᤃ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤔᤧᤴᤏᤡ᤺ᤒᤧᤴᤗᤥ॥ ᤛᤠᤶᤕᤥᤛᤠᤵᤗᤠᤀᤥᤃ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. ‘ᤂᤡᤏᤡ᤹ ᤗᤠᤶᤗᤥ᤺ᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥’”
ACT 23:6 ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤵᤔᤥ ᤑᤖᤡᤛᤡ ᤏᤢ ᤛᤍᤢᤁᤡᤜᤠ᤹ ᤔᤧᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤡ᤺ᤔᤧᤴ ᤀᤣᤃᤠᤱ ᤌᤣ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤥ ᤂᤢᤏᤡ᤹ ᤏᤛᤠ᤺ᤴ ᤔᤧᤍᤅᤧᤴᤒᤠ ᤏᤡ᤺ᤛᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤕᤧᤈᤢᤶᤓᤥᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤀᤡᤱᤃᤠ᤹ᤃ ᤑᤖᤡᤛᤡ᤺ᤸᤗᤧ ᤁᤢᤛ᤻ᤛᤠ᤺ ᤑᤖᤡᤛᤡᤀᤠᤖᤥ॥ ᤀᤡᤱᤃᤠ᤹ᤃ ᤁᤧᤛᤡ᤺ᤒᤠᤜᤠ᤹ ᤔᤧᤜᤡᤱ ᤗ᤹ᤖᤡᤰ ᤏᤡᤱᤛᤠᤱ ᤆᤥᤃᤢᤱᤒᤠᤸᤗᤧ ᤀᤠᤀᤡᤴ ᤁᤴ ᤋᤢ᤺ᤴᤍᤣ᤹ᤀᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥”
ACT 23:7 ᤂᤢᤏᤧ᤹ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤏᤢᤔᤧ᤺ᤴᤏᤣ ᤑᤖᤡᤛᤡ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤧᤔᤠ᤹ ᤐᤥᤃᤧᤀᤠᤱ ᤂᤧᤱᤜᤠ᤹ ᤔᤧᤛᤧ᤺ᤖᤧ ᤔᤧᤒᤣᤖᤥ॥
ACT 23:8 (ᤌᤣᤀᤠᤱᤓᤧᤸᤗᤧ ᤛᤍᤢᤁᤡᤜᤠ᤹ᤖᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤀᤥ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤛᤠᤶᤜᤠ᤹ ᤔᤧᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥ ᤁᤖ ᤑᤖᤡᤛᤡᤜᤠ᤹ᤖᤧ ᤁᤴ ᤛᤢᤶᤛᤡ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤖᤥ॥)
ACT 23:9 ᤜᤧᤰᤁᤩᤠᤱ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤀ᤺ᤰᤋᤧ॥ ᤂᤧᤵᤔᤥ ᤑᤖᤡᤛᤡ ᤗᤰᤁᤥᤒᤠ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤠᤱ ᤔᤧᤒᤥᤃᤧᤀᤠᤱ ᤘᤣ᤹ᤜᤠ᤹ ᤛᤠ᤹ᤖᤡᤰ ᤔᤧᤀᤳᤋᤢᤛᤡᤖ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤕᤠ᤺ᤶᤒᤰ ᤑᤣ᤺ᤴᤍᤢᤒᤠ ᤌᤣᤀᤠᤱ ᤔᤧᤏᤡ᤺ᤛᤢᤶᤒᤧᤴᤗᤥ॥ ᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤃᤪ ᤛᤠᤶᤜᤠ᤹ᤀᤠᤱᤛᤠ ᤛᤧᤰᤂᤠᤀᤣ ᤁᤴᤏᤢ ᤐᤠ᤺ᤵᤔᤠ ᤔᤧᤛᤢᤰᤛᤧᤒᤠ᥄”
ACT 23:10 ᤜᤧᤰᤁᤩᤠᤱ ᤐᤠ᤺ᤴᤎᤱᤅᤡᤴ ᤐᤥ᤺ᤖᤧᤖ ᤐᤣᤒᤠᤸᤗᤧ ᤌᤰᤋᤢᤶᤒᤠᤸᤗᤧ ᤐᤠᤘᤗᤧᤴᤏᤠᤱ ᤔᤧᤎᤧ᤺ᤰᤂᤢ ᤔᤧᤛᤧᤖᤢ ᤑᤠ᤹ᤀᤠᤱ ᤁᤡ᤺ᤛᤧᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ ᤕᤥ ᤐᤠᤱᤄᤢᤛᤡᤀᤠᤱ ᤐᤠᤘᤗᤧᤴ ᤌᤰᤛᤢᤒᤠ ᤕᤰᤁᤥ ᤌᤠᤰᤋᤧᤶᤔᤧ᤹ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤐᤠᤘᤗᤧᤴ ᤛᤠᤰᤁᤧᤸᤗᤧᤰᤁᤠᤱ ᤌᤰᤛᤢᤒᤠ ᤕᤰᤁᤥ ᤔᤧᤎᤠᤰᤋᤢᤖᤥ॥
ACT 23:11 ᤒᤠ ᤂᤧᤴ ᤛᤧᤴᤍᤡᤰ ᤐᤠᤘᤗᤖᤧ ᤁᤢᤒᤣᤛᤠᤱ ᤍᤠᤱᤒᤧᤴ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ ᤀᤰᤂᤣ ᤔᤧᤳᤋᤢ. “ᤐᤠᤘᤗᤀᤣ. ᤂᤧᤏᤧ᤹ ᤜᤠᤱᤜᤠᤱ ᤔᤧᤳᤇᤡᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤰᤂᤣᤗ᤹ᤖᤡᤰ ᤁᤴ ᤕᤖᤢᤛᤗᤧᤶᤔᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤢᤒᤠ ᤁᤢᤀᤡᤛᤡ᤺ᤰ ᤖᤥᤔ ᤗᤠᤈᤣ᤹ᤀᤥᤀᤠᤱ ᤋᤥ᤺ᤴᤍᤡ ᤁᤧᤒᤡᤖᤢᤖ ᤐᤥ᤺ᤱᤗᤥ॥”
ACT 23:12 ᤁᤢᤍᤠ᤺ᤴᤍᤡᤰᤔᤠ ᤕᤜᤢᤍᤡᤜᤠ᤹ ᤔᤧᤓᤢᤱᤛᤡᤱᤅᤠᤱ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤖ ᤀᤡᤱᤔᤧᤍᤱᤄᤢᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤴᤇᤧᤳᤋᤣ ᤌᤠᤖᤡᤰ ᤌᤧᤔᤠᤀᤠᤱ ᤔᤧᤈᤠᤶᤒᤧᤴ ᤔᤧᤎᤢᤱᤃᤢᤶᤒᤧᤴ ᤗ᤹ᤖᤡᤰ ᤔᤠᤱᤔᤧᤜᤧᤰᤛᤡᤱᤗᤥ॥
ACT 23:13 ᤁᤴ ᤆᤧᤶᤑᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤗᤡᤒᤥ᤺ᤱᤅᤠᤱ (᥊᥆) ᤌᤥ ᤔᤧᤘᤕᤧᤖᤥ॥
ACT 23:14 ᤂᤧᤴ ᤆᤧᤶᤑᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤥ ᤔᤧᤒᤣᤀᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤧᤃ ᤐᤠᤘᤗᤧᤴ ᤔᤧᤴᤇᤧᤳᤋᤣ ᤌᤠᤖᤡᤰ ᤌᤣᤀᤠᤱ ᤔᤧᤈᤠᤶᤒᤧᤴ ᤔᤧᤎᤢᤅᤢᤶᤒᤧᤴ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤔᤏᤠᤀᤠᤱ ᤘᤕᤡᤃᤧᤖᤥ॥
ACT 23:15 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤏᤢ ᤕᤧᤈᤢᤶᤓᤥ᤺ᤴ ᤋᤱᤅᤠᤛᤡᤶᤔᤧ᤹ᤀᤠᤱ ᤖᤥᤔᤡ ᤌᤰᤋᤢᤶᤒᤧᤸᤗᤥ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ‘ᤂᤧᤴ ᤐᤠᤘᤗᤧᤴ ᤆᤢᤶᤗᤢᤱᤅᤥ ᤕᤢᤖᤧ᤹’ ᤔᤧᤳᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤆᤢᤶᤗᤢᤱᤅᤡᤸᤗᤧ ᤕᤖᤡᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤘᤠ᤹ᤖᤥ ᤗ᤹ᤖᤡᤰ ᤐᤠ᤺ᤴ ᤆᤥᤃᤧᤶᤔᤧ᤹ᤀᤥ॥ ᤁᤖ ᤂᤢᤏᤧ᤹ ᤁᤵᤔᤥ ᤔᤧᤕᤢᤖᤢᤖ ᤔᤧᤒᤳᤋᤡᤸᤗᤧ ᤗᤠᤶᤔᤥᤛᤠ ᤀᤠᤏᤡᤃᤧ ᤛᤧᤖᤢᤶᤒᤧ᤹ᤖᤥ॥”
ACT 23:16 ᤁᤖ ᤐᤠᤘᤗᤖᤧ ᤁᤢᤸᤗᤠᤶᤛᤠ᤹ᤀᤡᤸᤗᤧ ᤁᤴ ᤆᤧᤶᤑᤴ ᤔᤧᤈᤥᤃᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤌᤰᤛᤢᤒᤠ ᤕᤰᤁᤥ ᤐᤣᤀᤠᤱ ᤁᤴ ᤐᤠ᤺ᤴᤜᤠ᤹ ᤁᤠᤰ ᤐᤠᤘᤗᤧᤴ ᤆᤧᤰᤋᤢᤖᤥ॥
ACT 23:17 ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤌᤡᤰ ᤌᤰᤋᤢᤶᤒᤧᤴ ᤀᤢ᤺ᤳᤋᤢᤀᤠᤱ ᤀᤰᤂᤣ ᤔᤧᤳᤋᤢᤖᤥ. “ᤀᤠᤍᤠᤱᤒᤣ. ᤁᤴ ᤌᤠᤱᤒᤧᤴᤏᤡᤸᤗᤧ ᤁᤢᤓᤠ ᤋᤠ᤹ᤈᤧᤱ ᤐᤠ᤺ᤴᤜᤠ᤹ ᤌᤰᤋᤢᤶᤒᤧᤴ ᤔᤧᤵᤔᤠ ᤁᤳᤋᤢᤖᤥ॥”
ACT 23:18 ᤜᤧᤰᤁᤣ᤺ᤸᤗᤧ ᤂᤧᤴ ᤛᤢᤜᤠᤱᤕᤢᤰᤐᤧᤸᤗᤧ ᤐᤠᤘᤗᤖᤧ ᤁᤢᤸᤗᤠᤶᤛᤠ᤹ᤀᤡᤴ ᤌᤰᤋᤢᤶᤒᤠᤸᤗᤥ ᤋᤣ᤹ᤖᤢᤀᤠᤱ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤐᤢᤱᤗᤠᤎᤠᤒᤠ ᤐᤠᤘᤗᤖᤧ ᤀᤡᤱᤃᤠ᤹ ᤀᤢ᤺ᤳᤋᤠᤱᤅᤠᤱ ᤁᤴ ᤔᤏᤠ᤺ᤸᤗᤧ ᤀᤠᤍᤠᤱᤒᤠᤏᤢ ᤋᤠ᤹ᤈᤧᤱᤔᤠ ᤁᤢᤓᤠ ᤐᤠ᤺ᤴᤜᤠ᤹ ᤁᤳᤋᤢᤖᤥ ᤗ᤹ᤖᤡᤰ ᤔᤧᤳᤋᤠᤱᤅᤠᤱ ᤁᤴ ᤁᤵᤔᤥ ᤋᤠᤖᤢᤱᤒᤠᤖᤥ॥”
ACT 23:19 ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤁᤢᤸᤗᤠᤶᤛᤠ᤹ᤀᤡᤸᤗᤧ ᤁᤢᤜᤢᤰᤁᤡᤴ ᤋᤧᤶᤛᤢᤀᤠᤱ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤌᤰᤋᤢᤶᤒᤠᤸᤗᤧ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ᤏᤢ ᤋᤠ᤹ᤈᤧᤱ ᤐᤠ᤺ᤴᤜᤠ᤹ ᤌᤧᤔᤠ ᤁᤧᤃᤳᤋᤢ᤹. ᤗᤢ ᤐᤠ᤺ᤳᤋᤧ᤹᥄”
ACT 23:20 ᤂᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤢᤓᤠ ᤕᤜᤢᤍᤡ ᤕᤢᤰᤛᤠᤒᤠᤜᤠ᤹ᤖᤧ ᤋᤠ᤺ᤴᤍᤡᤰ ᤐᤠᤘᤗᤧᤴ ᤕᤥ ᤕᤧᤈᤢᤶᤓᤥᤀᤥ ᤕᤢᤖᤧ᤹ ᤑᤠ᤹ᤀᤠᤱ ᤂᤧᤏᤧ᤹ᤏᤢ ᤐᤣᤗᤡ ᤑᤠᤰᤔᤠ ᤀᤡᤱᤔᤧᤍᤱᤄᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤴ ᤆᤢᤶᤗᤢᤱᤅᤡᤸᤗᤧᤃ ᤐᤠᤘᤗᤖᤧ ᤁᤢᤕᤠ᤺ᤶᤒᤣᤀᤥ ᤕᤖᤡᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤘᤠ᤹ ᤑᤠ᤹ᤀᤠᤱ ᤐᤠ᤺ᤴ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥
ACT 23:21 ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤗᤡᤒᤥ᤺ᤱᤅᤠᤱᤎᤥ ᤔᤏᤠᤜᤠ᤹ᤖᤧ ᤐᤠᤘᤗᤧᤴ ᤛᤧᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤀᤠᤱ ᤔᤧᤕᤢᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤢᤏᤧ᤹ ᤔᤧᤴᤇᤧᤳᤋᤣ ᤌᤠᤖᤡᤰ ᤌᤣᤀᤠᤱ ᤔᤧᤈᤠᤶᤒᤧᤴ ᤔᤧᤎᤢᤅᤢᤶᤒᤧᤴ ᤗ᤹ᤖᤡᤰ ᤔᤠᤱᤔᤧᤜᤧᤰᤛᤡᤱᤅᤠᤱ ᤕᤠᤖᤡᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤱᤘᤠ᤹ ᤐᤠ᤺ᤴᤏᤡᤸᤗᤧ ᤀᤡᤱᤈᤠ᤺ᤱ ᤂᤥ᤺ᤔᤠᤖᤰ ᤔᤧᤜᤠᤱᤄᤢᤀᤠᤱ ᤔᤧᤕᤢᤱᤗᤥ॥”
ACT 23:22 ᤜᤧᤰᤁᤣ᤺ᤸᤗᤧ ᤌᤰᤋᤢᤶᤒᤧᤸᤗᤧ ᤂᤧᤴ ᤔᤏᤠ᤺ᤴ ᤀᤰᤂᤣ ᤔᤧᤳᤋᤢᤀᤠᤱ ᤛᤠᤶᤍᤡᤱ ᤐᤡᤖᤢᤖ ᤐᤠᤱᤄᤢᤍᤣ᤺ᤛᤢ. “ᤁᤴ ᤀᤡᤱᤃᤠ᤹ ᤁᤧᤈᤧᤰᤋᤠᤱᤒᤠ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤴᤏᤧ᤹ᤀᤥ॥”
ACT 23:23 ᤜᤧᤰᤁᤩᤠᤱ ᤂᤧᤴ ᤌᤰᤋᤢᤶᤒᤠᤸᤗᤧ ᤏᤧᤵᤑᤢ ᤛᤢᤜᤠᤱᤕᤢᤰᤐᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤰᤂᤥ ᤛᤧᤴᤍᤡᤰ ᤁᤢᤔᤢᤰ ᤑᤠᤱᤛᤡ (᥏) ᤔᤢᤰᤁᤡᤸᤗᤧ ᤁᤡᤵ ᤏᤧᤳᤇᤡ (᥈᥆᥆) ᤌᤰᤛᤢᤒᤠᤜᤠ᤹. ᤏᤢᤒᤥ᤺ᤱ (᥍᥆) ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤁᤡᤵ ᤏᤧᤳᤇᤡ ᤗᤠ᤺ᤰ ᤁᤧᤕᤠᤱᤒᤠ ᤌᤰᤛᤢᤒᤠᤜᤠ᤹ ᤛᤡᤈᤖᤡᤕᤠᤀᤥ ᤐᤣ᤺ᤰᤔᤠ ᤕᤠᤖᤡᤵ ᤆᤥᤃᤧᤳᤇᤧ᤹.
ACT 23:24 ᤜᤧᤰᤁᤩᤠᤱ ᤐᤠᤘᤗ ᤏᤢ ᤁᤢᤴᤍᤣ᤺ᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤔᤠ ᤀᤴᤜᤠ᤹ᤖᤧᤴᤏᤠᤱ ᤋᤱᤃᤠᤶ ᤆᤥᤃᤧᤳᤇᤧ᤹ᤀᤥ॥ ᤂᤢᤏᤧ᤹ ᤏᤢ᤺ᤖᤡᤰᤁᤠᤱ ᤌᤣᤀᤠᤱ ᤔᤧᤶᤒᤥ᤺ᤱᤅᤣ ᤛᤢᤜᤠᤱᤃᤧᤶᤒᤠ ᤑᤧᤗᤡᤰᤛᤖᤥ ᤁᤧᤳᤋᤧᤇᤧ᤹ᤀᤥ॥”
ACT 23:25 ᤌᤰᤋᤢᤶᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤛᤢᤜᤠᤱᤃᤧᤶᤒᤠ ᤑᤧᤗᤡᤰᤛᤧᤴ ᤛᤰᤀᤡᤱᤄᤱ ᤜᤠᤰᤋᤢᤖᤥ–
ACT 23:26 “ᤋᤢᤳᤋᤢ ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠ ᤑᤧᤗᤡᤰᤛᤣ. ᤰᤗᤠᤀᤢᤍᤡᤕᤛ ᤗᤢᤛᤡᤕᤛᤗᤠᤶ. ᤀᤠᤛᤣᤘᤠᤖᤥ॥
ACT 23:27 ᤁᤴ ᤔᤏᤠ᤺ᤴ ᤕᤜᤢᤍᤡᤜᤠ᤹ᤖᤧ ᤔᤧᤍᤧᤶᤛᤢᤀᤠᤱ ᤛᤧᤵᤔᤠ ᤔᤧᤃᤥ᤺ᤳᤋᤢᤀᤠᤱ ᤔᤧᤘᤕᤧ. ᤁᤖ ᤀᤡᤱᤃᤠ᤹ ᤁᤴ ᤔᤏᤠ᤺ᤱᤃ ᤖᤥᤔᤡ ᤕᤰᤕᤢᤱᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢᤱᤅᤠᤱ ᤌᤰᤛᤢᤒᤠᤜᤠ᤹ᤏᤢ ᤐᤣᤃᤠᤱᤅᤠᤱ ᤕᤜᤢᤍᤡᤜᤠ᤹ᤗᤠᤶ ᤛᤧ᤺ᤵᤋᤢᤱᤗᤥ॥
ACT 23:28 ᤁᤴ ᤔᤏᤠ᤺ᤴ ᤌᤣ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤂᤢᤏᤡ᤹ ᤕᤧᤈᤢᤶᤓᤥᤀᤥ ᤋᤣ᤹ᤖᤢᤱ.
ACT 23:29 ᤁᤖ ᤂᤢᤏᤡ᤹ ᤀᤠᤒᤠᤅᤣ ᤕᤜᤢᤍᤡ ᤛᤠᤶᤕᤥᤌᤡᤶᤔᤥᤒᤠ ᤏᤡᤱᤘᤠ᤹ ᤔᤧᤴᤍᤠ᤺ᤔᤏᤠ ᤐᤠ᤺ᤴᤏᤥᤖᤰ ᤁᤴ ᤔᤏᤠ᤺ᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤁᤴ ᤔᤏᤠ᤺ᤸᤗᤧ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤏᤢ ᤐᤢᤱᤗᤠᤎᤠᤒᤠ ᤐᤥ᤺ᤱᤔᤠ ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤠ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥
ACT 23:30 ᤜᤧᤰᤁᤩᤠᤱ ᤁᤴ ᤔᤏᤠ᤺ᤴ ᤛᤧᤵᤔᤠ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤖᤧ ᤆᤧᤶᤑᤴ ᤔᤧᤈᤥᤃᤢᤖ ᤔᤧᤕᤠᤰ ᤁᤧᤗ᤹ᤒᤠ ᤀᤡᤱᤃᤠ᤹ ᤀᤡᤱᤄᤱ ᤂᤥ᤺ᤛᤢᤱ॥ ᤜᤧᤰᤁᤣ᤺ᤸᤗᤧ ᤁᤴ ᤔᤏᤠ᤺ᤴ ᤂᤧᤏᤧ᤹ᤀᤥᤀᤣ ᤐᤠᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ᤀᤠᤱ ᤜᤠᤖᤠ᤹ ᤂᤧᤏᤧ᤹ᤀᤥᤀᤣ ᤔᤧᤕᤢᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤅᤥ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤜᤠ᤹ᤀᤠᤱ ᤂᤧᤏᤧ᤹ᤀᤣ ᤁᤧᤶᤔᤧᤳᤗ. ᤑᤠ᤹ᤀᤠᤱ ᤔᤧᤳᤋᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ॥”
ACT 23:31 ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂᤧᤴ ᤀᤡᤱᤈᤠ᤺ᤱᤅᤡᤴ ᤋᤧᤴᤍᤡᤱ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤐᤠᤘᤗᤧᤴ ᤔᤧᤍᤣ᤹ᤖᤢᤀᤠᤱ ᤛᤧᤴᤍᤡᤰᤛᤠ ᤀᤣᤴᤋᤡᤐᤋᤪᤡᤛ ᤕᤧᤰᤕᤰᤁᤥ ᤔᤧᤃᤧᤳᤋᤢᤖᤥ॥
ACT 23:32 ᤜᤧᤰᤁᤩᤠᤱ ᤁᤢᤏᤠᤶᤍᤠ᤺ᤵᤔᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ᤏᤢ ᤐᤣ᤺ᤰᤏᤡ ᤑᤠ᤹ᤀᤠᤱ ᤐᤰᤔᤧᤎᤛᤡᤀᤠᤱ ᤕᤰᤁᤥ ᤔᤧᤏᤢ᤺ᤰᤂᤧ ᤔᤧᤍᤩᤧᤖᤥ॥
ACT 23:33 ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ᤖᤧᤀᤠᤱ ᤛᤡᤈᤖᤡᤕᤠ ᤔᤧᤃᤧᤖᤧᤀᤠᤱ ᤛᤰᤀᤡᤱᤄᤱᤅᤡᤴ ᤏᤢ ᤐᤠᤘᤗᤧᤴᤏᤠᤱ ᤛᤢᤜᤠᤱᤃᤧᤶᤒᤠᤸᤗᤥ ᤔᤧᤍᤥ᤺ᤴᤍᤢ ᤔᤧᤒᤡᤖᤢᤖᤥ॥
ACT 23:34 ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤴ ᤛᤰᤀᤡᤱᤄᤱᤅᤡᤴ ᤏᤡ᤺ᤖᤢᤀᤠᤱ ᤐᤠᤘᤗᤧᤴ ᤀᤠᤳᤋᤡᤴ ᤋᤧᤱᤃᤐᤛ᤻ᤔᤠ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤸᤗᤧ ᤂᤢᤏᤧ᤹ ᤛᤡᤗᤡᤛᤡᤕᤠᤛ᤻ᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢ॥
ACT 23:35 ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤍᤠ᤺ᤀᤠᤱᤗᤰ ᤁᤧᤍᤢ᤺ᤴᤍᤣᤴ ᤀᤥᤔᤧᤳᤋᤢᤱᤗᤥ॥” ᤜᤧᤰᤁᤩᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤜᤠᤱᤜᤡᤶᤔᤥ ᤂᤡᤏᤡ᤹ ᤗᤰᤐᤧᤴᤏᤥ ᤁᤳᤋᤧᤶᤔᤧ᤹ ᤑᤠ᤹ᤀᤠᤱ ᤌᤰᤛᤢᤒᤠᤜᤠ᤹ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
ACT 24:1 ᤅᤠᤛᤡ ᤕᤧᤴ ᤀᤣᤃᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤜᤏᤏᤡᤕᤠᤖᤧ ᤁᤢᤓᤠ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤋᤖᤋᤢᤗᤛ ᤔᤧᤵᤔᤏᤠᤒᤠ ᤁᤢᤓᤠᤱᤛᤧᤶᤒᤠᤴ ᤋᤣ᤹ᤖᤢᤀᤠᤱ ᤕᤥ ᤛᤡᤈᤖᤡᤕᤠ ᤕᤧᤰᤕᤰᤁᤥ ᤐᤣ. ᤂᤧᤵᤔᤥ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤍᤃᤡ ᤐᤠᤘᤗᤖᤧ ᤁᤢᤍᤰᤗᤧᤱᤘᤠᤀᤥ ᤂᤢᤏᤡ᤹ ᤀᤠᤵᤋᤡᤰ ᤐᤠ᤺ᤴᤏᤡᤴ ᤔᤧᤍᤥ᤺ᤴᤍᤢᤖᤥ॥
ACT 24:2 ᤐᤠᤘᤗᤧᤴ ᤂᤧᤵᤔᤥ ᤔᤧᤀᤢ᤺ᤳᤋᤢᤀᤠᤱ ᤋᤖᤋᤢᤗᤛᤖᤧ ᤂᤢᤏᤧ᤹ ᤀᤠᤵᤋᤡᤰ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤑᤧᤗᤡᤰᤛᤖᤧ ᤁᤢᤍᤃᤡ ᤕᤢᤰᤂᤢᤖᤥ– “ᤀᤠᤍᤠᤱᤒᤠ ᤋᤢᤳᤋᤢ ᤛᤢᤜᤠᤱᤃᤧᤶᤒᤠᤀᤣ. ᤂᤧᤏᤧ᤹ ᤛᤡᤁᤢᤶᤏᤡᤒᤠ ᤁᤧᤗᤠᤶᤗᤥ᤺ᤸᤗᤧ ᤕᤖᤡᤰ ᤋᤱᤒᤣᤀᤠᤱᤎᤥ ᤀᤠᤏᤡᤃᤧ ᤛᤏᤠᤖᤢᤱᤅᤥ ᤘᤠ᤹ᤔᤠ ᤂᤥ᤺ᤛᤢᤶᤒᤧᤀᤠᤱ ᤘᤕᤡᤃᤧ. ᤜᤧᤰᤁᤩᤠᤱ ᤀᤠᤏᤡᤃᤧ ᤗᤠᤈᤣ᤹ᤀᤥ ᤌᤥᤒᤥᤀᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
ACT 24:3 ᤀᤠᤏᤡᤃᤧ ᤀᤠᤳᤋᤡᤛᤠᤱ ᤀᤠᤵᤑᤠᤸᤗᤧᤛᤠᤱ ᤂᤧᤏᤧ᤹ ᤏᤢ ᤏᤢ᤺ᤒ᤻ ᤏᤢ᤺ᤒᤠ ᤁᤧᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤸᤗᤧ ᤏᤡᤱᤘᤠ᤹ ᤛᤡᤃᤠᤱᤗᤠᤶ ᤂᤧᤏᤧ᤹ ᤏᤥᤃᤧᤴ ᤐᤡᤀᤠᤛᤡᤃᤧ᤹ᤖᤥ॥
ACT 24:4 ᤜᤧᤰᤁᤣ᤺ᤸᤗᤧ ᤕᤖᤡᤰ ᤜᤶᤔᤠᤛᤡᤃᤧᤛᤠᤱ ᤏᤠᤛᤡ ᤌ᤺ᤳᤋᤧ᤹ᤀᤠᤱ ᤀᤠᤏᤡᤃᤧ ᤐᤣᤗᤡᤃᤧᤴ ᤐᤠ᤺ᤴᤏᤡᤴ ᤆᤢᤰᤔᤢᤰᤁᤥ ᤂᤧᤵᤛᤧ᤹ ᤀᤠᤒᤡᤖᤧ᤹ᤀᤥ॥
ACT 24:5 ᤁᤴ ᤔᤏᤠ᤺ᤴ ᤀᤠᤏᤡᤃᤧ ᤁᤢ᤹ᤀᤡ ᤁᤧᤓᤧ᤹ᤒᤠ ᤏᤡ᤺ᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤁᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤕᤜᤢᤍᤡ ᤗᤢᤶᤔᤥ ᤒᤡᤑᤩᤢᤱ ᤆᤥᤃᤢᤖᤥ॥ ᤁᤴ ᤔᤏᤠ᤺ᤴ ᤏᤠᤛᤖᤡ ᤛᤠᤶᤕᤥ ᤏᤛᤠ᤺ᤴᤒᤠ ᤗᤠᤶᤗᤥ᤺ᤒᤠᤀᤠᤱᤗᤥ॥
ACT 24:6 ᤁᤴ ᤔᤏᤠ᤺ᤸᤗᤧ ᤔᤠᤱᤜᤡᤶᤔᤡᤴ ᤆᤡ᤺ᤶᤔᤠ ᤁᤥ᤺ᤳᤋᤢᤸᤗᤧ ᤀᤠᤏᤡᤃᤧ ᤋᤧᤶᤛᤢᤶᤒᤧᤒᤠᤖᤥ॥ ((ᤜᤧᤰᤁᤩᤠᤱ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤠᤛᤧᤴ ᤗᤥ᤺ᤴᤍᤢᤶᤒᤧᤔᤧᤴ
ACT 24:7 ᤁᤖ ᤌᤰᤋᤢᤶᤒᤠ ᤗᤢᤛᤡᤕᤛᤖᤧ ᤛᤠᤰᤁᤧᤸᤗᤧᤰ ᤀᤠᤏᤡᤃᤧ ᤜᤢᤰᤁᤥᤗᤠᤶ ᤁᤴ ᤔᤏᤠ᤺ᤴ ᤏᤠᤵᤋᤡᤃᤧᤀᤠᤱ ᤋᤣ᤹ᤖᤢᤖᤥ॥
ACT 24:8 ᤜᤧᤰᤁᤩᤠᤱ ᤌᤰᤋᤢᤶᤒᤠ ᤗᤢᤛᤡᤕᤛᤖᤧ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤔᤏᤠᤜᤠ᤹ ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤸᤗᤥ ᤔᤧᤍᤠᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥)) ᤀᤠᤍᤠᤱᤒᤠᤖᤧ ᤀᤠᤒᤠᤅᤣ ᤁᤴ ᤔᤏᤠ᤺ᤴ ᤛᤣ᤺ᤴᤃᤧᤍᤥ᤺ᤛᤢᤏᤧ ᤑᤠ᤹ᤃᤪ ᤀᤠᤏᤡᤃᤧ ᤁᤢᤍᤰᤗᤧᤱᤘᤠᤀᤥ ᤁᤢ᤺ᤳᤋᤢᤶᤒᤧᤒᤠ ᤀᤠᤵᤋᤡᤰᤁᤡᤴ ᤛᤧᤰᤂᤠᤖᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢ᤹ᤖᤥ॥”
ACT 24:9 ᤂᤧᤵᤔᤥ ᤘᤣ᤹ ᤕᤜᤢᤍᤡᤜᤠ᤹ᤖᤧᤀᤠᤱ ᤂᤧᤴ ᤀᤠᤵᤋᤡᤰᤁᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤔᤢᤖᤠ ᤔᤧᤍᤱᤄᤢᤖᤥ॥
ACT 24:10 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤐᤠᤘᤗᤧᤴ ᤐᤠᤖᤧ᤹ ᤑᤠ᤹ᤀᤠᤱ ᤜᤢᤰᤆᤠ᤺ᤸᤁᤡ ᤐᤡᤖᤢᤀᤠᤱ ᤐᤠᤘᤗᤧᤴ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤀᤣ. ᤁᤴ ᤗᤠᤈᤣ᤹ᤀᤥ ᤂᤠᤛᤧᤴᤗᤥ᤺ᤶᤒᤠ ᤁᤧᤒᤥ᤺ᤰᤂᤧᤒᤠ ᤕᤖᤡᤰ ᤋᤱᤒᤣ ᤁᤧᤖᤧ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤏᤠᤱᤛᤡᤱᤔᤠ ᤀᤠᤒᤠ᤺ᤴᤏᤡᤴ ᤕᤢᤱᤔᤠ ᤀᤠᤛᤡᤖᤠ᤹ ᤌᤠᤱᤗᤥ॥
ACT 24:11 ᤕᤖᤢᤛᤗᤧᤶᤔᤥ ᤔᤠᤱᤛᤣᤘᤠ ᤆᤥ᤺ᤰᤛᤧ ᤀᤡᤱᤃᤠ᤹ ᤐᤣᤃᤠᤱᤒᤠ ᤌᤡᤰ-ᤏᤧᤳ ᤕᤧᤴᤏᤠᤱ ᤔᤧᤱᤃᤧᤳᤋᤣ ᤘᤠ᤹ ᤁᤧᤗ᤹ᤒᤠᤱᤃ ᤀᤠᤍᤠᤱᤒᤠᤖᤧ ᤀᤢᤛᤢᤖᤢ ᤏᤡᤱᤘᤠ᤹ ᤁᤧᤄᤥ᤺ᤛᤢ᤹ᤖᤥ॥
ACT 24:12 ᤕᤠᤵᤔᤡ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ᤖᤧ ᤔᤧᤍᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤔᤠᤱᤜᤡᤶᤔᤥ ᤐᤠ᤺ᤴ ᤌᤰᤁᤡ ᤕᤠᤃᤠᤱᤒᤠ. ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤕᤧᤰᤕᤰᤁᤥ ᤀᤠᤳᤋᤡᤛᤠᤱ ᤔᤏᤠᤜᤠ᤹ ᤜᤢᤛᤢᤱᤛᤡᤱᤗ ᤘᤕᤠᤱᤒᤠ ᤜᤥ᤺ᤵᤋᤧᤖᤥ॥
ACT 24:13 ᤂᤧᤱᤜᤠ᤹ᤖᤧ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰᤗᤧ ᤋᤥ᤺ᤴᤍᤡᤀᤠᤱ ᤋᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
ACT 24:14 ᤁᤖᤛᤠᤱ. ᤀᤡᤱᤃᤠ᤹ᤃ ᤀᤠᤏᤡᤃᤧ ᤌᤠ᤺ᤰᤌᤧᤒᤠᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤋᤧᤴᤍᤡᤱ ᤆᤥᤃᤢᤱᤗᤥ॥ ᤂᤧᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤒᤠ ᤕᤧᤛᤢᤖᤧ ᤁᤢᤗᤠᤶᤔᤡᤴ. ᤂᤧᤱᤜᤠ᤹ᤖᤧ ᤑᤥᤋᤩᤠᤒᤠ ᤔᤧᤔᤧᤳᤋᤢᤖᤥ॥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤏᤛᤠ᤺ᤴ ᤆᤥᤃᤢᤱᤗᤥ॥
ACT 24:15 ᤀᤡᤱᤃᤠ᤹ ᤂᤢᤏᤡ᤹ ᤜᤧᤰᤁᤣᤀᤣ ᤛᤠᤶᤕᤥᤏᤡᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤡᤱᤛᤠᤱ ᤆᤥᤃᤢᤱᤗᤥ॥
ACT 24:16 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ᤃ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤋᤃᤡ ᤛᤣᤛᤣ ᤂᤠᤛᤡᤱ ᤁᤵᤔᤠ ᤋᤶᤛᤡᤴ ᤆᤥ᤺ᤰᤁᤠᤖᤥ॥
ACT 24:17 ᤕᤖᤢᤛᤗᤧᤶᤔᤥᤏᤢ ᤗᤠ᤺ᤰᤁᤠᤳ ᤘᤕᤠᤱᤒᤠ ᤕᤖᤡᤰ ᤋᤱᤒᤣ ᤐᤥ᤺ᤰᤂᤧᤀᤠᤱ ᤂᤠᤖᤰ ᤀᤡᤱᤃᤠ᤹ ᤕᤠᤱᤃᤧᤛᤠ᤹ᤒᤠ ᤕᤜᤢᤍᤡᤕᤠᤛ᤻ᤔᤠ ᤀᤠᤔᤏᤠᤜᤠ᤹ ᤀᤣᤴᤋᤡᤀᤥᤰᤗᤠᤶ ᤛᤢᤶᤔᤏᤠᤒᤠ ᤜᤢᤰᤛᤥ ᤕᤠᤱ ᤜᤢ᤹ᤔᤠᤛᤡ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤵᤔᤥ ᤋᤩᤠᤱᤗᤥ॥
ACT 24:18 ᤀᤡᤱᤃᤠ᤹ ᤂᤠᤖᤰ ᤔᤠᤱᤜᤡᤶᤔᤥ ᤛᤣᤛᤣ ᤐᤥ᤺ᤱᤔᤠ ᤌᤡᤶ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤕᤠᤱᤅᤡᤸᤗᤧ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤀᤡᤱᤃᤠ᤹ ᤔᤧᤏᤡ᤺ᤛᤠᤱ॥ ᤀᤡᤱᤃᤠ᤹ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤜᤥ᤺ᤵᤋᤧ. ᤜᤕᤱᤁᤡᤸᤗᤡᤱᤅᤠᤱ ᤜᤥ᤺ᤵᤋᤧ॥
ACT 24:19 ᤁᤖ ᤂᤧᤵᤔᤥ ᤀᤣᤛᤡᤕᤠ ᤋᤧᤱᤃᤵᤗᤠᤶ ᤁᤧᤍᤠ᤺ᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤏᤧ ᤑᤠ᤹ᤃᤪ ᤜᤠᤖᤠ᤹ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤀᤠᤵᤋᤡᤰ ᤋᤥ᤺ᤴᤇᤧ ᤔᤧᤍᤠᤖᤖᤥ॥
ACT 24:20 ᤔᤧ᤺ᤴᤏᤧ ᤑᤠ᤹ᤃᤪ ᤜᤠᤖᤠ᤹ ᤁᤵᤔᤥ ᤁᤧᤘᤠ᤹ᤒᤠᤜᤠ᤹ᤖᤧᤀᤠᤱ ᤕᤧᤈᤢᤶᤓᤥᤀᤥ ᤏᤠᤱᤛᤡᤱᤛᤧ ᤕᤧᤒᤠᤱᤅᤡᤸᤗᤧ ᤀᤠᤍᤰᤗᤧᤱᤘᤠᤀᤥ ᤀᤠᤵᤋᤡᤰ ᤔᤧᤄᤥ᤺ᤛᤢᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤔᤧᤍᤠᤖᤢᤸᤗᤧ ᤐᤥ᤺ᤱᤗᤥ.
ACT 24:21 ᤁᤖ ᤀᤡᤱᤃᤠ᤹ᤃ ᤂᤢᤏᤡ᤹ ᤋᤃᤠᤱ ᤀᤰᤂᤣᤗ᤹ᤖᤡᤰᤗᤰ ᤀ᤺ᤰᤋᤠᤱᤗ ᤕᤧᤒᤠᤱᤗᤥ. ‘ᤀᤡᤱᤃᤠ᤹ᤃ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠᤜᤠ᤹ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤀᤡᤴ ᤀᤠᤄᤠᤛᤧᤴ ᤁᤧᤗᤥ᤺ᤴᤍᤡᤖ ᤁᤧᤒᤳᤇᤡᤖᤥ॥’”
ACT 24:22 ᤑᤧᤗᤡᤰᤛᤖᤧ ᤁᤴ ᤕᤧᤛᤢᤖᤧ ᤁᤢᤛᤱ ᤁᤢᤗᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ᤺ᤖᤡᤰᤁᤠᤱ ᤗᤧᤛ᤻ᤛᤢᤀᤠᤱ ᤘᤕᤧᤀᤠᤱ ᤒᤠ ᤂᤧᤴ ᤕᤧᤶᤔᤥᤀᤣ ᤂᤠᤛᤧᤴ ᤗᤥ᤺ᤶᤔᤠᤀᤠᤱ ᤁᤧᤛᤢᤰᤐᤠ ᤆᤥᤃᤧ. ᤁᤖ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤆᤢᤶᤗᤢᤱᤅᤡᤴ ᤏᤢᤵᤛᤢ. “ᤀᤠᤸᤗ ᤌᤰᤋᤢᤶᤒᤠ ᤗᤢᤛᤡᤕᤛᤧᤴ ᤕᤢ᤺ᤀᤠᤱ ᤂᤠᤛᤧᤴ ᤗᤥ᤺ᤴᤍᤢᤱ ᤐᤡᤏᤡᤱᤗᤥ॥”
ACT 24:23 ᤜᤧᤰᤁᤩᤠᤱ ᤑᤧᤗᤡᤰᤛᤖᤧ ᤐᤠᤘᤗᤧᤴ ᤁᤥᤔᤠ ᤌᤰᤛᤢᤒᤠᤜᤠ᤹ ᤕᤢᤱᤔᤠᤛᤡ ᤜᤧᤰᤁᤩᤠᤱ ᤘᤠ᤹ᤔᤠ ᤐᤣ᤺ᤰᤔᤠ ᤛᤠ᤹ᤖᤡᤰ ᤛᤠᤰᤔᤠ ᤔᤧ᤺ᤴᤏᤠᤱ ᤁᤢᤴᤈᤢᤶ ᤁᤢᤴᤍᤣ᤺ᤱᤜᤠ᤹ᤖᤧ ᤂᤢᤏᤧ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠᤜᤠ᤹ ᤔᤧᤍᤠᤖᤢ ᤔᤧᤒᤡᤖᤢᤏᤡ ᤑᤠ᤹ᤀᤠᤱ ᤌᤰᤋᤢᤶᤒᤠᤴ ᤀᤡᤱᤈᤠ᤺ᤱ ᤐᤡᤖᤢᤖᤥ॥
ACT 24:24 ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤣᤃᤠᤱ ᤑᤧᤗᤡᤰᤛᤧᤴ ᤁᤢᤔᤣ᤺ᤳ ᤍᤪᤢᤛᤡᤸᤗᤠ᤺ᤴᤏᤢ ᤋᤩᤧᤳᤇᤡ॥ ᤍᤪᤢᤛᤡᤸᤗᤠ᤺ᤴ ᤕᤜᤢᤍᤡ ᤘᤕᤧᤖᤥ॥ ᤑᤧᤗᤡᤰᤛᤖᤧ ᤐᤠᤘᤗᤧᤴ ᤀᤢ᤺ᤳᤋᤢᤀᤠᤱ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤏᤠᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ᤗᤠᤶ ᤂᤧᤵᤛᤢ॥
ACT 24:25 ᤐᤠᤘᤗᤖᤧ ᤋᤠ᤹ᤎᤰᤋᤢᤖ ᤋᤣ᤹ᤖᤢᤸᤗᤧ ᤛᤠᤶᤕᤥᤏᤡᤒᤠ. ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ ᤏᤢ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤐᤕᤶ ᤂᤢᤶᤍᤡᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥᤀᤠᤱ ᤐᤥᤎᤰ ᤆᤥᤃᤢᤖᤥ॥ ᤁᤖ ᤑᤧᤗᤡᤰᤛᤧᤴ ᤁᤡ᤺ᤛᤧᤀᤠᤱ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤐᤣᤃᤧ᤹. ᤀᤡᤱᤃᤠ᤹ ᤕᤠ᤺ᤴᤍᤡᤰ ᤋᤠᤀᤠᤸᤗᤧ ᤕᤠᤶᤔᤥ ᤀᤢ᤺ᤳᤏᤧᤀᤠᤱ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤱᤗᤥ॥”
ACT 24:26 ᤂᤢᤏᤧ᤹ᤃ ᤐᤠᤘᤗᤗᤠᤶ ᤛᤢᤖᤢᤳ-ᤕᤠᤱ ᤂᤥ᤺ᤛᤢᤱᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤧᤳᤗᤧᤱ ᤀᤢ᤺ᤳᤋᤢᤖ ᤋᤠ᤹ᤈᤧᤰᤂᤧᤛᤠᤱ ᤐᤠᤘᤗᤖᤧ ᤌᤣᤀᤠᤱ ᤔᤧᤒᤡᤖᤢᤴᤗᤥ॥
ACT 24:27 ᤀᤠᤸᤗ ᤋᤱᤒᤣ ᤏᤧᤳᤇᤡ ᤀᤣᤃᤠᤱ ᤑᤧᤗᤡᤰᤛᤖᤧ ᤁᤢᤗᤧᤰᤘᤠ ᤐᤥᤷᤁᤡᤕᤛ ᤑᤧᤛ᤻ᤋᤛᤧᤴ ᤛᤢᤜᤠᤱᤃᤧᤶᤒᤠ ᤐᤥ᤺ᤰᤂᤧᤀᤠᤱ ᤋᤩᤧᤖᤥ. ᤁᤖ ᤑᤧᤗᤡᤰᤛᤖᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤐᤠᤘᤗᤧᤴ ᤐᤢᤱᤗᤠᤜᤡᤶᤔᤥᤀᤣ ᤗᤧᤖᤢᤎᤀᤠᤱ ᤐᤣᤖᤥ॥
ACT 25:1 ᤑᤧᤛ᤻ᤋᤛᤧᤴ ᤛᤢᤜᤠᤱᤃᤧᤶᤒᤠ ᤐᤥ᤺ᤰᤂᤧᤀᤠᤱ ᤖᤥᤔᤗᤠᤶ ᤕᤜᤢᤍᤡᤕᤠ ᤌᤢᤶᤔᤥ ᤋᤩᤧᤒᤠ ᤛᤢᤶ ᤕᤧᤴ ᤀᤣᤃᤠᤱ ᤛᤡᤈᤖᤡᤕᤠᤗᤠᤶ ᤌᤥ ᤕᤖᤢᤛᤗᤧᤔ ᤐᤣ॥
ACT 25:2 ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤃᤡ ᤐᤠᤘᤗᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤵᤋᤡᤰᤜᤠ᤹ ᤔᤧᤕᤢᤰᤂᤢᤖᤥ॥
ACT 25:3 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤑᤧᤛ᤻ᤋᤛᤧᤴ ᤐᤠᤘᤗᤖᤧ ᤁᤢᤍᤢ᤺ᤴᤍᤣ᤹ᤗᤧᤴ ᤂᤠᤛᤧᤴ ᤗᤥ᤺ᤴᤇᤧ ᤕᤖᤢᤛᤗᤧᤶᤔᤥ ᤌᤠᤰᤔᤠ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ. ᤌᤣᤀᤠᤱᤓᤧᤸᤗᤧ ᤐᤠᤘᤗᤧᤴ ᤂᤧᤱᤜᤠ᤹ᤖᤧ ᤗᤠᤶᤔᤥᤛᤠ ᤛᤧᤵᤔᤠ ᤁᤧᤗ᤹ᤒᤠ ᤆᤧᤶᤑᤴ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥
ACT 25:4 ᤁᤖ ᤑᤧᤛ᤻ᤋᤛᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤐᤠᤘᤗᤧᤱᤃ ᤛᤡᤈᤖᤡᤕᤠᤛ᤻ᤔᤠ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤀᤠᤱ ᤘᤠ᤹॥ ᤀᤡᤱᤃᤠ᤹ᤀᤣ ᤛᤡᤈᤖᤡᤕᤠᤀᤥ ᤜᤠᤖᤠ ᤐᤣ᤺ᤰᤁᤠᤖ ᤐᤳᤋᤠ॥
ACT 25:5 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤁᤢᤓᤠ ᤗᤠᤶᤗᤥ᤺ᤒᤠᤜᤠ᤹ ᤀᤡᤱᤃᤠ᤹ᤏᤢᤀᤣ ᤌᤩᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤛᤧᤰᤂᤠᤀᤣ ᤐᤠ᤺ᤴ ᤑᤣ᤺ᤴᤍᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤁᤢᤍᤰᤗᤧᤱᤘᤠᤀᤥ ᤜᤠᤖᤠ᤹ ᤂᤧᤵᤔᤥᤀᤣ ᤀᤠᤵᤋᤡᤰ ᤁᤢ᤺ᤳᤋᤧᤶᤔᤧ᤹ᤀᤥ॥”
ACT 25:6 ᤜᤧᤰᤁᤩᤠᤱ ᤑᤧᤛ᤻ᤋᤛᤧᤴ ᤕᤖᤢᤛᤗᤧᤶᤔᤥ ᤕᤧᤳᤇᤡ ᤕᤧᤴᤏᤠᤱᤎᤥ ᤌᤡᤒᤥ᤺ᤱ ᤕᤧᤴ ᤌᤠᤖᤡᤰ ᤕᤠ᤺ᤰᤋᤧᤀᤠᤱ ᤂᤢᤏᤧ᤹ ᤛᤡᤈᤖᤡᤕᤠᤀᤥ ᤌᤩᤧᤒᤣᤖᤥ॥ ᤕᤖᤡᤰ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤀᤠᤱ ᤂᤧᤵᤔᤥ ᤔᤧᤒᤣ॥ ᤛᤡᤈᤖᤡᤕᤠ ᤁᤧᤖᤧᤒᤠ ᤁᤢᤍᤠ᤺ᤴᤍᤡᤰᤔᤠ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤱᤛᤡᤱᤅᤠᤱ ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
ACT 25:7 ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤕᤖᤢᤛᤗᤧᤶᤗᤠᤶ ᤁᤧᤕᤢ᤺ᤒᤠ ᤕᤜᤢᤍᤡᤜᤠ᤹ ᤂᤢᤏᤧ᤹ ᤁᤢᤄᤡᤖᤡ ᤔᤧᤕᤧᤶᤛᤡᤱᤅᤠᤱ ᤐᤕᤶ ᤕᤶᤒᤠ ᤀᤠᤵᤋᤡᤰᤜᤠ᤹ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤂᤢᤏᤧ᤹ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤜᤠ᤹ ᤛᤧᤰᤂᤠᤀᤣ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠ ᤔᤧᤴᤇᤢᤰᤋᤢᤴᤗᤥ॥
ACT 25:8 ᤜᤧᤰᤁᤩᤠᤱ ᤐᤠᤘᤗᤖᤧ ᤏᤠᤱᤛᤡᤱᤗ ᤀᤰᤂᤣ ᤔᤧᤳᤋᤢᤛᤡ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤕᤜᤢᤍᤡ ᤛᤠᤶᤕᤥᤌᤡᤶ. ᤔᤠᤱᤜᤡᤶ ᤏᤢ ᤖᤥᤔᤡ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠᤖᤥ॥”
ACT 25:9 ᤁᤖ ᤑᤧᤛ᤻ᤋᤛᤖᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤐᤠᤘᤗᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤶᤃᤢ᤺ᤳᤋᤧᤒᤠ ᤀᤠᤵᤋᤡᤰᤁᤡᤸᤗᤧᤴ ᤋᤢ᤺ᤴᤍᤣ᤹ᤖᤧ ᤂᤠᤛᤧᤴᤏᤡᤴ ᤌᤥ ᤕᤖᤢᤛᤗᤧᤶᤔᤥ ᤀᤠᤍᤃᤡ ᤐᤥ᤺ᤱᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”
ACT 25:10 ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤔᤧ᤺ᤴᤗᤥ. ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤛᤡᤈᤖᤧᤸᤗᤣ ᤁᤢᤄᤠᤛᤧᤴ ᤕᤢᤰᤏᤠ᤺ᤸᤗᤣ ᤁᤢᤍᤃᤡ ᤕᤧᤵᤐᤠ᤹ᤖᤥ॥ ᤁᤵᤔᤥᤀᤣ ᤀᤡᤱᤃᤠ᤹ ᤀᤠᤍᤢ᤺ᤴᤍᤣᤸᤗᤧᤴ ᤂᤠᤛᤧᤴ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀᤡᤱᤃᤠ᤹ ᤌᤣᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹ᤀᤠ ᤁᤧᤗ᤹ᤒᤠ ᤀᤠᤍᤠᤱᤒᤠᤖᤧ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥
ACT 25:11 ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤂᤥ᤺ᤔᤠ ᤌᤡᤶ ᤑᤣ᤺ᤴᤍᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤡ᤺ᤔᤠ ᤐᤥ᤺ᤱᤛᤠᤱ ᤔᤧᤀᤳᤋᤢᤱᤅᤡᤴᤗᤥ॥ ᤁᤖ ᤀᤡᤱᤃᤠ᤹ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰ ᤐᤠ᤺ᤴᤏᤥ ᤛᤧᤰᤂᤠ ᤐᤠ᤺ᤴ ᤜᤥ᤺ᤵᤐᤠᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤂᤢᤏᤡ᤹ᤀᤥ ᤜᤢᤰᤛᤢᤵᤔᤠ ᤔᤧᤴᤇᤢᤰᤁᤠᤴᤗᤥ॥ ᤀᤡᤱᤃᤠ᤹ ᤖᤥᤔᤀᤥ ᤜᤠᤱᤕᤢᤰᤐᤠ ᤛᤡᤈᤖᤖᤧᤸᤗᤥ ᤀᤠᤍᤢ᤺ᤴᤍᤣᤸᤗᤧᤴ ᤂᤠᤛᤧᤴ ᤐᤥ᤺ᤱᤗ ᤑᤠ᤹ᤀᤠᤱ ᤕᤧᤰᤐᤣᤗᤡ ᤆᤥ᤺ᤰᤁᤠᤖᤥ᥄”
ACT 25:12 ᤑᤧᤛ᤻ᤋᤛᤧᤴ ᤁᤢᤛᤢᤈᤠᤛᤠᤒᤠᤜᤠ᤹ᤏᤢ ᤋᤠ᤹ᤈᤧᤰᤂᤧᤀᤠᤱ ᤐᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤛᤡᤈᤖᤗᤥ ᤕᤧᤰᤐᤣᤗᤡ ᤁᤧᤈᤥᤃᤢᤀᤠᤱ ᤁᤧᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤛᤡᤈᤖᤗᤥᤀᤣ ᤐᤠᤱᤏᤧ᤹ᤖᤥ॥”
ACT 25:13 ᤁᤢᤓᤠ ᤕᤧᤴ ᤀᤣᤃᤠᤱ ᤀᤃᤪᤡᤐᤠ ᤜᤠᤱ ᤏᤢ ᤁᤢᤴᤈᤣᤗᤡ ᤒᤷᤏᤡᤛᤧᤴ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤧᤴ ᤋᤢᤶᤍᤢᤶ ᤗᤠᤱᤍᤠ᤺ᤰᤛᤧ ᤛᤡᤈᤖᤡᤕᤠᤀᤥ ᤋᤩᤧᤳᤇᤡᤖᤥ॥
ACT 25:14 ᤂᤢᤴᤇᤡ᤹ ᤕᤖᤡᤰ ᤕᤧᤴ ᤘᤕᤧᤳᤇᤡᤸᤗᤧ ᤑᤧᤛ᤻ᤋᤛᤖᤧ ᤀᤃᤪᤡᤐᤠ ᤜᤠᤱᤅᤡᤴ ᤐᤠᤘᤗᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢ. “ᤑᤧᤗᤡᤰᤛᤧᤴ ᤁᤵᤔᤥᤗᤠᤶ ᤐᤣ᤺ᤸᤗᤧ ᤐᤠᤘᤗ ᤔᤧᤵᤔᤏᤠᤒᤠ ᤐᤢᤱᤗᤠᤎᤠᤒᤠᤴ ᤐᤰᤌ᤺ᤀᤠᤱ ᤘᤕᤧ॥
ACT 25:15 ᤀᤡᤱᤃᤠ᤹ ᤌᤥ ᤕᤖᤢᤛᤗᤧᤶᤔᤥ ᤐᤣᤃᤠᤱᤅᤡᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤵᤋᤡᤰ ᤔᤧᤍᤥ᤺ᤴᤍᤢᤀᤠᤱ ᤜᤠᤖᤠ᤹ ᤂᤢᤶᤍᤡᤱ ᤂᤥ᤺ᤛᤢᤏᤡ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
ACT 25:16 ᤀᤡᤱᤃᤠ᤹ ᤂᤧᤱᤜᤠ᤹ ‘ᤀᤠᤵᤋᤡᤰᤛᤠᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤃᤢ᤺ᤳᤋᤢᤒᤠ ᤀᤠᤵᤋᤡᤰᤗᤧ ᤁᤢᤍᤰᤗᤧᤱᤘᤠᤀᤥ ᤏᤠᤱᤛᤡᤱᤔᤠ ᤛᤢᤕᤧᤶ ᤔᤧᤶᤒᤡᤀᤣ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤂᤧᤴ ᤜᤢᤰᤛᤢᤵᤔᤠ ᤖᤥᤔᤡᤌᤡᤶ ᤜᤥ᤺ᤵᤗᤥ’ ᤗ᤹ᤖᤡᤰ ᤔᤧᤳᤋᤢᤱᤛᤡᤱᤗᤥ॥
ACT 25:17 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤛᤡᤈᤖᤡᤕᤠᤀᤥ ᤔᤧᤍᤩᤧᤀᤠᤱ ᤀᤡᤱᤃᤠ᤹ ᤔᤧᤴᤏᤠ᤺ᤶᤛᤡᤱᤅᤣ ᤁᤢᤍᤠ᤺ᤴᤍᤡᤰᤔᤠᤀᤣ ᤂᤠᤛᤧᤴᤜᤡᤶᤔᤥ ᤀᤢ᤺ᤳᤋᤢᤱᤛᤡᤱᤅᤠᤱ ᤂᤧᤴ ᤐᤠᤘᤗᤧᤴᤏᤠᤱ ᤂᤧᤵᤔᤥ ᤋᤠ᤺ᤵᤔᤠ ᤐᤠᤱᤄᤢᤱᤛᤡᤱᤗᤥ॥
ACT 25:18 ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤕᤧᤶᤛᤡᤱᤅᤠᤱ ᤀᤠᤵᤋᤡᤰ ᤁᤢ᤺ᤵᤔᤠ ᤔᤧᤜᤣ᤺ᤰᤋᤢ. ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤜᤧᤰᤁᤣ ᤐᤕᤶ ᤀᤠᤵᤋᤡᤰ ᤌᤣᤀᤠᤱ ᤁᤢ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
ACT 25:19 ᤁᤖ ᤁᤢᤀᤠᤵᤋᤡᤰᤁᤡᤱᤃ ᤀᤠᤒᤠᤅᤣ ᤂᤢᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤏᤡᤱᤘᤠ᤹ ᤔᤧᤴᤍᤱ ᤐᤠ᤺ᤴᤎᤱᤜᤠ᤹ ᤏᤢ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠ ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤘᤕᤧᤖᤥ॥ ᤂᤧᤴ ᤀᤠᤸᤗᤥᤀᤠᤱ ᤁᤢᤜᤡᤱᤘᤧᤳ ᤘᤠ᤹ ᤗ᤹ᤖᤡᤰ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤜᤠᤍᤡᤱ ᤌᤰᤋᤧᤖᤥ॥
ACT 25:20 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤁᤥ᤺ᤶᤓᤥ ᤆᤥ᤺ᤰᤔᤠ ᤀᤡᤱᤃᤠ᤹ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤌᤥ ᤕᤖᤢᤛᤗᤧᤶᤔᤥ ᤁᤧᤍᤢ᤺ᤴᤍᤣ᤹ᤖᤧ ᤂᤠᤛᤧᤴ ᤗᤥ᤺ᤶᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱᤗᤥ॥
ACT 25:21 ᤁᤖ ᤐᤠᤘᤗᤖᤧ ᤂᤢᤏᤧ᤹ ᤁᤢᤍᤢ᤺ᤴᤍᤣ᤹ᤗᤧᤴ ᤂᤠᤛᤧᤴᤏᤡᤴ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤆᤥᤃᤢᤏᤡ ᤗ᤹ᤖᤡᤰ ᤕᤧᤰᤐᤣᤗᤡ ᤆᤥᤃᤢᤒᤠᤸᤗᤧ ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤐᤕᤶ ᤜᤠᤱ ᤛᤡᤈᤖᤧᤸᤗᤥᤀᤣ ᤐᤠᤱᤔᤠᤍᤣ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤂᤢᤏᤧ᤹ ᤔᤧᤶᤒᤠᤱᤅᤣ ᤌᤠᤖᤡᤰ ᤋᤡᤗᤡᤱᤃᤠᤜᤠ᤹ ᤁᤥᤔᤠᤀᤠᤱ ᤁᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥”
ACT 25:22 ᤜᤧᤰᤁᤣ᤺ᤸᤗᤧ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤑᤧᤛ᤻ᤋᤛᤧᤴ ᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤧᤶᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤑᤧᤛ᤻ᤋᤛᤖᤧ ᤏᤥᤃᤵ ᤐᤡᤖᤢ. “ᤐᤥ᤺ᤱ ᤀᤠᤍᤠᤱᤒᤣ. ᤂᤧᤏᤧ᤹ ᤋᤠ᤺ᤴᤍᤡᤰ ᤂᤧᤵᤛᤧ᤹ᤀᤥ॥”
ACT 25:23 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤀᤃᤪᤡᤐᤠ ᤜᤠᤱ ᤏᤢ ᤒᤷᤏᤡᤛᤧᤴ ᤀᤠᤳᤋᤠᤳᤋᤠᤴᤏᤣ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤋᤩᤧᤳᤇᤡᤀᤠᤱ ᤆᤢᤶᤗᤢᤱᤜᤡᤶᤔᤥ ᤌᤰᤋᤢᤶᤒᤠᤜᤠ᤹ ᤏᤢ ᤕᤧᤰᤕᤰᤁᤥᤒᤠ ᤔᤡᤱᤛᤥᤍᤠᤱᤒᤠᤜᤠ᤹ᤏᤢ ᤗᤠ᤺ᤛᤧᤳᤇᤡ॥ ᤜᤧᤰᤁᤩᤠᤱ ᤑᤧᤛ᤻ᤋᤛᤖᤧ ᤐᤠᤘᤗᤧᤴ ᤋᤠ᤺ᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤍᤠᤖᤢ॥
ACT 25:24 ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤖᤧ ᤐᤠ᤺ᤳᤋᤢ. “ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱ ᤏᤢ ᤁᤵᤔᤥ ᤁᤧᤍᤠ᤺ᤒᤠ ᤋᤢᤳᤋᤢᤃᤧᤴ ᤋᤢᤶᤔᤩᤠᤱᤜᤠᤱᤛᤣ. ᤂᤡᤏᤡ᤹ ᤁᤧᤖᤧᤰᤗᤧ ᤁᤴ ᤔᤏᤠ᤺ᤴ ᤁᤧᤏᤡ᤺ᤛᤢᤶ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤖᤢᤛᤗᤧᤔ ᤏᤢ ᤁᤵᤔᤥᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤁᤸᤗᤧ ᤀᤠᤸᤗ ᤜᤡᤱᤔᤠ ᤔᤧᤄᤥ᤺ᤛᤢᤴᤏᤡ. ᤂᤧᤴ ᤛᤡ᤺ᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤔᤧᤀ᤺ᤰᤋᤧᤖ ᤀᤡᤱᤃᤠ᤹ᤀᤥ ᤐᤣᤗᤡ ᤔᤧᤍᤥ᤺ᤴᤍᤢᤀᤠᤱ ᤔᤧᤘᤠ᤹ᤖᤥ॥
ACT 25:25 ᤁᤖ ᤁᤴ ᤔᤏᤠ᤺ᤸᤗᤧ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤌᤧᤔᤠᤀᤠᤱ ᤐᤠ᤺ᤴ ᤔᤧᤶᤓᤣ᤺ᤴᤏᤣ ᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤱ॥ ᤕᤠᤶᤔᤥ ᤁᤴ ᤔᤏᤠ᤺ᤸᤗᤧ ᤐᤕᤶ ᤜᤠᤱ ᤛᤡᤈᤖᤗᤥ ᤕᤧᤰᤐᤣᤗᤡ ᤆᤥᤃᤢᤒᤠᤸᤗᤧ ᤀᤡᤱᤃᤠ᤹ᤀᤠᤱ ᤛᤡᤈᤖᤧᤸᤗᤥᤀᤣ ᤖᤥᤶᤔᤥ ᤂᤧᤴ ᤐᤠᤱᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
ACT 25:26 ᤁᤖ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤕᤶ ᤜᤠᤱ ᤛᤡᤈᤖᤧᤴ ᤛᤰᤀᤡᤱᤄᤱᤅᤥ ᤌᤣ ᤛᤠᤵᤔᤠ ᤐᤥ᤺ᤱ ᤁᤧᤗ᤹ᤒᤠ ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤔᤏᤠ᤺ᤴ ᤁᤢᤳᤆᤡᤀᤥ ᤂᤧᤏᤧ᤹ ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤁᤧᤍᤃᤡ ᤋᤠᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤥᤖᤡᤰ ᤀᤠᤏᤡ᤹ ᤁᤥ᤺ᤶᤓᤥ ᤀᤠᤈᤥᤃᤢᤶᤔᤡᤸᤗᤧ ᤛᤠᤵᤔᤠ ᤐᤠ᤺ᤴ ᤁᤢᤓᤠ ᤀᤡᤱᤃᤠ᤹ ᤂᤥ᤺ᤛᤢᤱᤅᤣᤖᤥ॥
ACT 25:27 ᤌᤣᤀᤠᤱᤓᤧᤸᤗᤧ ᤐᤢᤱᤗᤠᤎᤠᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤛᤧᤰᤂᤠ ᤀᤠᤵᤋᤡᤰ ᤐᤠ᤺ᤴᤜᤠ᤹ ᤔᤧᤴᤇᤠᤵᤐᤣ ᤛᤡᤈᤖᤗᤥ ᤐᤠᤱᤔᤠ ᤀᤡᤱᤃᤠ᤹ ᤏᤢ᤺ᤒᤠ ᤔᤧᤴᤏᤡ᤺ᤒᤧᤴᤗᤥ॥”
ACT 26:1 ᤀᤃᤪᤡᤐᤠ ᤜᤠᤱᤅᤡᤸᤗᤧ ᤐᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤠᤱᤛᤡᤱᤔᤠ ᤐᤠ᤺ᤴᤏᤡᤴ ᤕᤢᤱᤔᤠ ᤁᤧᤄᤥ᤺ᤛᤢ᤹ᤖᤥ॥” ᤐᤠᤘᤗᤖᤧᤀᤠᤱ ᤁᤢᤜᤢᤰᤜᤠ᤹ ᤛᤴᤇᤢᤖ ᤁᤢᤏᤠᤱᤛᤡᤱᤔᤠ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤕᤢᤰᤂᤢ–
ACT 26:2 “ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤣ. ᤀᤡᤱᤃᤠ᤹ᤃ ᤀᤠᤀᤡᤴ ᤕᤜᤢᤍᤡᤜᤠ᤹ᤖᤧ ᤔᤧᤃᤢ᤺ᤳᤋᤠᤱᤒᤠ ᤀᤠᤵᤋᤡᤰᤗᤧ ᤁᤢᤍᤰᤗᤧᤱᤘᤠᤀᤥ ᤏᤠᤱᤛᤡᤱᤔᤠ ᤐᤠ᤺ᤴ ᤁᤧᤍᤃᤠᤱ ᤕᤢᤱᤔᤠ ᤛᤢᤕᤧᤶ ᤂᤥ᤺ᤛᤢᤱᤒᤠᤀᤥ ᤀᤡᤱᤃᤠ᤹ ᤀᤠᤒᤠᤅᤣ ᤁᤢᤍ᤹ᤕᤠ᤺ᤴ ᤁᤧᤏᤢ᤹ᤒᤠ ᤆᤥ᤺ᤰᤁᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤖᤥ॥
ACT 26:3 ᤌᤣᤀᤠᤱᤓᤧᤸᤗᤧ ᤁᤢᤳᤆᤡᤀᤥᤃ ᤂᤧᤏᤧ᤹ ᤏᤢ᤺ᤖᤡᤰᤁᤠᤱ ᤀᤠᤏᤡᤃᤧ ᤕᤜᤢᤍᤡ ᤆᤥ᤺ᤰᤌᤡᤶ ᤏᤢ ᤕᤧᤔᤧᤴᤍᤱ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤏᤡ᤺ᤛᤢ ᤁᤧᤗᤧᤛ᤻ᤛᤢᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤒᤠ᤺ᤴᤏᤡᤴ ᤏᤠᤛᤡ ᤌ᤺ᤳᤋᤧ᤹ᤀᤠᤱ ᤂᤧᤵᤛᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥
ACT 26:4 ᤀᤡᤱᤃᤠ᤹ ᤆᤢᤰᤋᤠᤱᤅᤠᤱᤎᤥᤀᤣ ᤀᤠᤒᤠᤅᤣ ᤀᤠᤗᤠᤈᤣ᤹ᤛᤠᤒᤠᤗᤢᤶᤔᤥ ᤏᤢ ᤕᤖᤢᤛᤗᤧᤶᤔᤥ ᤘᤕᤠᤱᤅᤡᤸᤗᤧ ᤀᤠᤜᤡᤱᤔᤴ ᤀᤠᤰᤋᤱᤒᤠ ᤘᤕᤧ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ᤖᤧ ᤔᤧᤏᤡ᤺ᤛᤢᤖᤥ॥
ACT 26:5 ᤀᤢᤴᤇᤣ᤺ᤴᤏᤠᤱᤎᤥᤀᤣ ᤂᤧᤱᤜᤠ᤹ᤖᤧ ᤀᤠᤕᤠ᤺ᤶᤒᤣᤀᤥ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ ᤔᤧᤈᤥᤃᤢᤏᤧ ᤑᤠ᤹ᤃᤪ ᤀᤡᤱᤃᤠ᤹ᤃ ᤀᤠᤏᤡᤃᤧ ᤛᤠᤶᤕᤥᤌᤡᤶᤔᤥ ᤁᤠᤰᤏᤢ ᤁᤧᤛᤠᤰᤐᤠ ᤜᤧᤴᤌᤡᤶᤒᤠ ᤑᤖᤡᤛᤡ ᤛᤠᤶᤕᤥᤗᤰᤁᤥᤒᤠ ᤘᤕᤠᤱ ᤑᤠ᤹ᤀᤠᤱ ᤁᤵᤔᤥᤀᤠᤱ ᤋᤥ᤺ᤴᤍᤡ ᤐᤡᤔᤠ ᤔᤧᤛᤢᤰᤋᤢ᤹ᤖᤥ॥
ACT 26:6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤳ ᤗ᤹ᤖᤡᤰ ᤏᤡᤱᤛᤠᤱ ᤆᤥᤃᤢᤱᤒᤠᤸᤗᤧ ᤀᤡᤱᤃᤠ᤹ᤃ ᤀᤠᤀᤡᤴ ᤁᤵᤔᤥ ᤂᤠᤛᤧᤴ ᤗᤥ᤺ᤶᤔᤠ ᤋᤧᤴᤏᤥ ᤕᤧᤵᤐᤠᤖᤥ॥
ACT 26:7 ᤒᤠ ᤂᤧᤴ ᤔᤠᤱᤜᤧᤰᤁᤡᤴ ᤂᤥ᤺ᤔᤠ ᤏᤡᤱᤛᤠᤱ ᤔᤧᤈᤥᤃᤢᤖ ᤀᤠᤏᤡᤃᤧ ᤌᤡᤰ-ᤏᤧᤳ ᤌᤠ᤺ᤰᤛᤢᤘᤠᤱᤜᤠ᤹ᤖᤧ ᤛᤧᤴᤍᤡᤰ ᤗᤧᤴᤍᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤔᤧᤈᤥᤃᤢᤖᤥ॥ ᤀᤠᤍᤠᤱᤒᤠ ᤜᤠᤱᤅᤣ. ᤒᤠ ᤂᤧᤴ ᤏᤡᤱᤛᤠᤱᤅᤡᤸᤗᤧ ᤆᤥᤃᤢᤸᤗᤧ ᤀᤠᤀᤡᤴ ᤁᤴ ᤕᤜᤢᤍᤡᤜᤠ᤹ᤖᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥
ACT 26:8 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡ᤺ᤒᤠ ᤔᤏᤠᤜᤠ᤹ ᤁᤢᤜᤡᤱᤘᤧᤳ ᤆᤥᤃᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤌᤣᤀᤠᤱ ᤂᤡᤏᤡ᤹ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠᤒᤣ᥅
ACT 26:9 ᤀᤡᤱᤃᤠ᤹ ᤀᤠᤒᤠᤅᤣ ᤏᤠᤛᤖᤋᤒᤠ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤕᤖᤡᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤐᤥ᤺ᤱ ᤁᤧᤗ᤹ᤒᤠ ᤀᤡ᤺ᤳᤇᤡᤱᤅᤠᤱ ᤘᤕᤠᤱᤅᤠᤱ
ACT 26:10 ᤕᤖᤢᤛᤗᤧᤶᤔᤥ ᤒᤠ ᤜᤧᤰᤁᤣᤀᤣ ᤆᤥᤃᤢᤱᤗᤥ॥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥᤗᤠᤶ ᤕᤢᤰ ᤂᤥ᤺ᤛᤢᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤐᤢᤱᤗᤠᤜᤡᤶᤔᤥ ᤌᤧᤰᤋᤢᤱᤛᤡᤱ. ᤜᤧᤰᤁᤩᤠᤱ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤔᤧᤒᤡᤖᤢᤛᤡᤸᤗᤧ ᤀᤡᤱᤃᤠ᤹ᤀᤠᤱ ᤋᤧᤴᤍᤡᤱ ᤐᤡᤖᤢᤱᤛᤡᤱᤗᤥ॥
ACT 26:11 ᤀᤡᤱᤃᤠ᤹ ᤕᤖᤡᤰᤗᤧᤱ ᤕᤜᤢᤍᤡ ᤆᤢᤶᤗᤢᤱᤜᤡᤶ ᤌᤵᤔᤣ ᤐᤣᤃᤠᤱᤅᤠᤱ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤛᤠᤰᤁᤧᤸᤗᤧᤰᤁᤠᤱ ᤔᤠᤱᤆᤧ᤹ᤕᤠ ᤐᤠ᤺ᤵᤔᤠ ᤐᤠᤱᤄᤢᤱᤛᤡᤱᤗᤥ॥ ᤛᤠ᤹ᤖᤡᤰ ᤀᤠᤛᤡᤰᤁᤡᤴ ᤐᤥᤃᤧᤒᤠᤸᤗᤧ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤠ᤺ᤱᤄᤠ ᤗᤠᤈᤣ᤹ᤀᤥᤒᤠ ᤕᤧᤰᤕᤰᤁᤥᤀᤠᤱ ᤂᤧᤱᤜᤠ᤹ ᤋᤢᤰᤂᤣ ᤆᤠ᤺ᤳᤇᤧ ᤐᤣᤃᤠᤱᤗᤥ॥
ACT 26:12 ᤌᤡᤰᤕᤧᤴ ᤁᤴ ᤕᤠ᤺ᤶᤒᤰᤁᤥ ᤕᤖᤢᤛᤗᤧᤶᤔᤥᤒᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥᤗᤠᤶ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤋᤧᤶᤔᤠᤛᤡᤀᤠᤱ ᤛᤠᤰᤔᤠᤛᤡ ᤁᤧᤗ᤹ᤒᤠ ᤕᤢᤰ ᤏᤢ ᤀᤡᤱᤍᤳ ᤂᤥ᤺ᤛᤢᤱᤅᤠᤱ ᤍᤔᤛ᤻ᤁᤛᤀᤥ ᤐᤣᤃᤠᤱᤗ ᤐᤳᤇᤠᤱ॥
ACT 26:13 ᤀᤠᤍᤠᤱᤒᤠ ᤜᤠᤱᤅᤣ. ᤗᤧᤴᤍᤡᤰ ᤗᤠᤶᤔᤥ ᤐᤣᤃᤠᤱᤗ ᤐᤳᤇᤠᤱᤅᤡᤸᤗᤧ ᤋᤠᤱᤛᤠᤰᤐᤥᤗᤠᤶ ᤏᤠᤶᤔᤡᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤧᤗᤧᤰᤐᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤀᤠᤏᤡᤃᤧ ᤂᤡᤖᤡ ᤔᤡᤰᤁᤡᤴ ᤆᤧᤔᤢᤖ ᤗᤧᤰᤋᤧᤖᤥ॥
ACT 26:14 ᤀᤠᤏᤡᤃᤧ ᤁᤠᤰ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ ᤗᤠᤶᤔᤥ ᤜᤷᤃᤢᤵᤛᤠ ᤆᤥ᤺ᤴᤍᤡᤃᤧᤖᤥ॥ ᤜᤧᤰᤁᤩᤠᤱ ᤜᤡᤒᤪᤢ ᤐᤠ᤺ᤴᤏᤥ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤶᤔᤏᤠ. ‘ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅ ᤀᤡᤱᤃᤠ᤹ᤏᤢ ᤌᤱ ᤁᤧᤈᤥ᤺ᤰᤏᤧ ᤑᤠ᤹ᤃᤪ ᤀᤠᤒᤠᤅᤣᤖᤰ ᤁᤧᤄᤢᤶᤗᤥ॥’
ACT 26:15 ᤀᤡᤱᤃᤠ᤹ᤀᤠᤱ ᤍᤠᤱᤒᤣ. ᤂᤧᤏᤧ᤹ᤃ ᤜᤠ᤺ᤳᤏᤧᤴᤒᤣ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱ॥ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤏᤥᤃᤵ ᤐᤡᤖᤠᤱ. ‘ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤕᤧᤛᤢᤀᤠᤖᤥ॥
ACT 26:16 ᤀᤠᤸᤗ ᤐᤥᤃᤧ᤹. ᤀᤠᤀᤡᤴ ᤂᤧᤏᤧ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤅᤠᤱᤅᤠᤱ ᤀᤠᤛᤣᤘᤠᤖᤥᤒᤠ ᤏᤢ ᤀᤠᤍᤥ᤺ᤴᤍᤡ ᤁᤧᤒᤡᤒᤠ ᤆᤥ᤺ᤰᤏᤧᤀᤠᤱ ᤘᤠ᤹ᤀᤠᤖᤥ॥ ᤂᤧᤏᤧ᤹ ᤀᤠᤀᤡᤴ ᤁᤧᤏᤡ᤺ᤛᤢᤒᤠ ᤐᤠ᤺ᤴᤏᤡᤴ ᤏᤢ ᤋᤠ᤺ᤴᤍᤡ ᤋᤠᤕᤧᤶᤔᤥ ᤀᤥᤛᤣ᤺ᤴᤎᤠᤰᤏᤧᤒᤠ ᤐᤠ᤺ᤴᤜᤠ᤹ ᤘᤣ᤹ ᤔᤏᤠᤜᤠ᤹ ᤀᤡᤱᤃᤧᤓᤥ᤺ᤛᤢᤛᤡᤖ ᤐᤥ᤺ᤱᤗᤥ॥
ACT 26:17 ᤀᤡᤱᤃᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤧᤵᤈᤠᤱᤗᤠᤶ ᤋᤠᤱᤛᤧ᤺ᤵᤏᤧ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤰᤜᤠ᤹ ᤜᤴᤇᤧ. ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤗᤠᤶ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤋᤠ᤺ᤳᤇᤧ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤕᤢᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤢᤰᤁᤥ ᤋᤠ᤺ᤳᤇᤧ ᤂᤧᤱᤜᤠ᤹ᤖᤥ ᤐᤠᤱᤏᤧ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤏᤛᤠ᤺ᤴ ᤔᤧᤈᤥᤃᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥ᤺ᤛᤢ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤛᤣᤛᤣ ᤆᤥᤃᤢᤛᤡᤒᤠ ᤁᤢᤔᤏᤠᤜᤠ᤹ᤏᤢ ᤂᤢᤏᤡ᤹ ᤕᤢᤱᤍᤧᤴ ᤔᤧᤄᤥ᤺ᤛᤢ᤹ᤖᤥ॥’
ACT 26:19 ᤜᤧᤰᤁᤣ᤺ᤸᤗᤧ ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤣ. ᤀᤡᤱᤃᤠ᤹ᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤥ᤺ᤛᤢᤱᤒᤠ ᤛᤢᤑᤥᤖᤧ ᤀᤡᤱᤈᤠ᤺ᤱᤃᤧᤶᤒᤠᤀᤣ ᤐᤥ᤺ᤰᤂᤠᤱᤗᤥ॥
ACT 26:20 ᤁᤠᤰᤏᤢ ᤋᤃᤡ ᤍᤔᤛ᤻ᤁᤛᤀᤥ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤏᤢ ᤁᤠᤰ ᤕᤜᤢᤍᤡᤕᤠ ᤗᤠᤈᤣ᤹ᤒᤠ. ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤏᤢ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ ᤑᤠ᤹ᤀᤠᤱ ᤀᤡᤱᤓᤴ ᤆᤥᤃᤢᤱᤛᤡᤱᤗᤥ॥
ACT 26:21 ᤜᤧᤰᤁᤣᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧᤀᤣ ᤕᤜᤢᤍᤡᤜᤠ᤹ᤖᤧ ᤔᤠᤱᤜᤡᤶᤔᤥ ᤀᤡᤱᤃᤠ᤹ ᤔᤧᤍᤧᤶᤛᤠᤱᤅᤠᤱ ᤛᤧᤵᤔᤠ ᤔᤧᤃᤥ᤺ᤳᤋᤠᤱᤒᤠᤖᤥ॥
ACT 26:22 ᤁᤖ ᤀᤠᤀᤡᤴ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤠ᤹ ᤐᤡᤖᤠᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤣ᤺ᤸᤗᤧᤀᤣ ᤀᤡᤱᤃᤠ᤹ ᤆᤢᤰᤐᤠ ᤕᤶᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤵᤔᤠᤀᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤔᤠ ᤛᤢᤕᤧᤶ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤔᤥᤛᤠ ᤜᤧᤰᤁᤩᤠᤱ ᤘᤣ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤋᤠ᤺ᤴᤍᤡ ᤐᤥ᤺ᤱ ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤠᤴᤏᤠᤱᤎᤥ. ᤘᤣ᤹ ᤌᤣᤀᤠᤱ ᤀᤡᤱᤃᤠ᤹ ᤔᤧᤶᤒᤠ᤺ᤳᤋᤣ ᤘᤠ᤹ᤀᤠᤖᤥ॥
ACT 26:23 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤋᤢᤰᤂᤣ ᤆᤠᤔᤠᤀᤠᤱ ᤛᤡ᤺ᤔᤠᤀᤣ ᤐᤥ᤺ᤱ. ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤱᤔᤠ ᤜᤧᤰᤁᤩᤠᤱ ᤁᤠᤰᤏᤢ ᤋᤢᤶᤒᤠ ᤐᤥ᤺ᤱᤅᤠᤱ ᤛᤧᤴᤗᤵᤖᤧᤴ ᤀᤥ᤺ᤳᤋᤡ᤺ᤴ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤓᤥ᤺ᤛᤢᤛᤡᤖᤥ ᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤖᤥ॥”
ACT 26:24 ᤀᤰᤂᤣᤗ᤹ᤖᤡᤰ ᤐᤠᤘᤗᤖᤧ ᤏᤠᤱᤛᤡᤱᤔᤠ ᤐᤠ᤺ᤴᤏᤡᤴ ᤐᤠ᤺ᤳᤋᤢᤖ ᤐᤳᤇᤧᤸᤗᤧ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤖᤧ ᤑᤧ᤺ᤰᤋᤢ. “ᤐᤠᤘᤗᤀᤣ. ᤂᤧᤏᤧ᤹ᤃ ᤁᤧᤏᤠᤰᤂᤧ ᤁᤧᤒᤣᤖᤥ᥄ ᤂᤧᤏᤧ᤹ᤃ ᤕᤖᤡᤰ ᤏᤡᤛᤠᤶᤔᤡᤸᤗᤧ ᤁᤧᤏᤠᤰᤂᤧ ᤁᤧᤒᤣᤖᤥ॥”
ACT 26:25 ᤁᤖ ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤠ ᤛᤢᤜᤠᤱᤃᤧᤶᤒᤠᤀᤣ. ᤀᤡᤱᤃᤠ᤹ᤃ ᤔᤧᤴᤏᤠᤱᤅᤣ ᤘᤠ᤹ᤀᤠ॥ ᤀᤡᤱᤃᤠ᤹ᤃ ᤛᤧᤰᤂᤠ ᤛᤣᤏᤡᤱᤘᤠ᤹ᤀᤥ ᤐᤠ᤺ᤳᤋᤠᤖᤥ॥
ACT 26:26 ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱᤅᤡᤸᤗᤧᤀᤠᤱ ᤁᤴ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤏᤡ᤺ᤛᤢᤒᤠᤸᤗᤧ ᤂᤢᤏᤧ᤹ ᤁᤢᤍᤃᤡ ᤜᤠᤱ ᤜᤠᤱᤅᤠᤱ ᤐᤠ᤺ᤵᤔᤠ ᤛᤢᤰᤁᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤐᤠ᤺ᤴᤜᤠ᤹ᤃ ᤏᤢ᤺ᤖᤡᤰᤁᤠᤱ ᤁᤢᤏᤡᤱᤘᤠ᤹ᤀᤥ ᤕᤢᤰᤂᤢᤀᤠᤱ ᤘᤠ᤹ ᤗ᤹ᤖᤡᤰ ᤀᤡᤱᤃᤠ᤹ ᤏᤡᤛ᤻ᤛᤣ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤒᤠ ᤐᤠ᤺ᤴᤜᤠ᤹ᤃ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤖᤥ॥”
ACT 26:27 ᤜᤧᤰᤁᤩᤠᤱ ᤐᤠᤘᤗᤖᤧ ᤔᤧᤳᤋᤢ. “ᤀᤃᤪᤡᤐᤠ ᤜᤠᤱᤅᤣ. ᤂᤧᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤐᤠ᤺ᤴᤜᤠ᤹ ᤏᤛᤠ᤺ᤴ ᤁᤧᤈᤥᤃᤢᤒᤡ᥅ ᤛᤧᤰᤂᤠᤛᤠᤱ ᤂᤧᤏᤧ᤹ ᤁᤧᤈᤥᤃᤢ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥”
ACT 26:28 ᤀᤃᤪᤡᤐᤠ ᤜᤠᤱᤅᤡᤸᤗᤧ ᤐᤠᤘᤗᤧᤴ ᤔᤧᤳᤋᤢ. “ᤛᤵᤑᤠᤖᤧᤛᤠ ᤂᤧᤏᤧ᤹ ᤀᤡᤱᤃᤠ᤹ᤀᤠᤱ ᤂᤪᤡᤛ᤻ᤋᤠᤏᤡ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”
ACT 26:29 ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥᤛᤠᤱ ᤋᤠ᤺ᤴᤍᤡᤛᤠᤱ. ᤀᤠᤍᤠᤱᤒᤠᤖᤰ ᤔᤧ᤺ᤴ. ᤁᤖ ᤀᤠᤀᤡᤴ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴ ᤁᤧᤄᤧᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤁᤴ ᤐᤢᤱᤗᤠ ᤌᤠ᤺ᤔᤠᤀᤥᤖᤰ ᤔᤧ᤺ᤴᤏᤠᤱᤃ ᤘᤣ᤹ ᤀᤡᤱᤃᤠ᤹ ᤜᤧᤰᤁᤣᤀᤣ ᤏᤛᤠᤏᤡᤒᤠ ᤔᤧᤒᤥ᤺ᤱᤏᤡ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤆᤥ᤺ᤰᤁᤠᤖᤥ॥”
ACT 26:30 ᤜᤧᤰᤁᤩᤠᤱ ᤀᤃᤪᤡᤐᤠ ᤜᤠᤱ. ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛ ᤏᤢ ᤒᤷᤏᤡᤛ ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥᤒᤠ ᤘᤣ᤹ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ
ACT 26:31 ᤂᤧᤵᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤖ ᤔᤧᤒᤳᤇᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱᤗᤥ. “ᤁᤴ ᤔᤏᤠ᤺ᤸᤗᤧᤃ ᤐᤢᤱᤗᤠᤎᤠᤒᤠ ᤐᤥ᤺ᤱᤔᤠ ᤏᤢ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤂᤥ᤺ᤔᤠᤃ ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤏᤣ ᤘᤠ᤹ᤖᤥ॥”
ACT 26:32 ᤜᤧᤰᤁᤩᤠᤱ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤧᤴ ᤔᤧᤳᤋᤢ. “ᤁᤸᤗᤧ ᤛᤡᤈᤖᤧᤴ ᤕᤧᤰᤐᤣᤗᤡ ᤔᤧᤴᤈᤥ᤺ᤰᤁᤣ ᤘᤕᤧᤸᤗᤧᤃ ᤗᤧᤵᤔᤠᤍᤣ᤺ᤔᤠᤀᤠᤱ ᤛᤢᤰᤋᤧᤳᤋᤧᤒᤠᤖᤥ॥”
ACT 27:1 ᤀᤠᤸᤗ ᤀᤠᤏᤡᤃᤧ ᤀᤡᤋᤠᤗᤡ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤠ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤐᤥ᤺ᤰᤂᤧ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤘᤣ᤹ ᤐᤢᤱᤗᤠᤎᤠᤒᤠᤜᤠ᤹ ᤐᤕᤶ ᤜᤠᤱᤅᤡᤸᤗᤧᤴ ᤋᤢᤖᤠ ᤔᤧᤵᤔᤏᤠᤒᤠ ᤋᤢᤖᤠᤖᤧᤴ ᤌᤰᤋᤢᤶᤒᤠ ᤈᤢᤗᤡᤕᤛᤖᤧ ᤁᤢᤜᤢᤰᤁᤥ ᤗᤰᤐᤧᤴ ᤔᤧᤒᤡᤖᤢᤛᤡᤖᤥ॥
ACT 27:2 ᤜᤧᤰᤁᤩᤠᤱ ᤀᤠᤏᤡᤃᤧ ᤀᤣᤛᤡᤕᤠᤛ᤻ᤔᤠ ᤋᤧᤱᤃᤵᤐᤥᤒᤠ ᤘᤠᤃᤵᤂᤣ᤺ᤱᤜᤠ᤹ ᤗᤧᤵᤔᤠᤱ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤠ ᤕᤠᤖᤡᤵ ᤁᤧᤒᤥ᤺ᤱᤒᤠ ᤀᤠᤍᤪᤠᤔᤡᤋᤣᤏᤛᤗᤠᤶ ᤁᤧᤓᤧᤶᤒᤠ ᤘᤠᤗᤠᤎᤠᤀᤥ ᤗᤠ᤺ᤵᤔᤏᤠᤀᤠᤱ ᤗᤠᤶᤍᤡ᤺ᤰ ᤆᤥ᤺ᤰᤔᤏᤠᤖᤥ॥ ᤀᤠᤏᤡᤃᤧ ᤏᤢ ᤌᤡᤛ᤻ᤛᤗᤥᤏᤡᤁᤠᤗᤠᤶ ᤁᤧᤍᤠ᤺ᤒᤠ ᤀᤖᤡᤛ᤻ᤋᤠᤷᤂᤛ ᤔᤧᤵᤔᤏᤠᤒᤠ ᤔᤧᤛᤣᤍᤥᤏᤡᤕᤠᤗᤡ ᤏᤛᤠᤏᤡᤒᤠ ᤆᤢᤶᤎᤡᤰᤁᤠᤱ ᤘᤕᤧᤖᤥ॥
ACT 27:3 ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤀᤠᤏᤡᤃᤧ ᤛᤡᤍᤥᤴᤏᤥ ᤁᤧᤵᤔᤏᤠᤀᤠᤱ ᤌᤰᤋᤢᤶᤒᤠ ᤈᤢᤗᤡᤕᤛᤧᤸᤗᤧ ᤐᤠᤘᤗᤧᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤁᤢᤴᤍᤣ᤺ᤱ ᤁᤢᤴᤈᤢᤶᤜᤠ᤹ᤏᤢ ᤋᤢᤶᤔᤠ ᤜᤧᤰᤁᤩᤠᤱ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤡᤃ᤺ᤰᤘᤠ ᤋᤱᤃᤠᤶ ᤆᤥ᤺ᤰᤔᤠ ᤋᤧᤴᤍᤡᤱ ᤐᤡᤖᤢᤖᤥ॥
ACT 27:4 ᤂᤧᤵᤔᤥᤗᤠᤶ ᤀᤠᤏᤡᤃᤧ ᤋᤃᤡ ᤐᤥ᤺ᤱᤔᤏᤠᤖ ᤐᤣ᤺ᤰᤔᤏᤠ ᤁᤖ ᤛᤢᤖᤡᤳ ᤁᤣᤈᤱᤅᤡᤴ ᤀᤠᤏᤡᤃᤧ ᤋᤰᤗᤧᤱᤘᤠ ᤗᤧᤵᤔᤠᤱᤗᤠᤶ ᤜᤢ᤺ᤖᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤛᤢᤖᤡᤳᤔᤠᤴᤏᤢ ᤛᤧ᤺ᤵᤛᤡᤱᤔᤠ ᤑᤠ᤹ᤀᤠᤱ ᤀᤠᤏᤡᤃᤧ ᤛᤤᤐᤪᤛ ᤘᤠᤃᤵᤂᤠᤶᤔᤡᤸᤗᤧ ᤌᤥᤜᤠᤱᤗᤧᤵᤔᤠᤱᤏᤢ ᤁᤢᤕᤠ ᤁᤢᤕᤠ ᤐᤥ᤺ᤱᤔᤏᤠᤖ ᤐᤣ᤺ᤰᤔᤏᤠᤖᤥ॥
ACT 27:5 ᤜᤧᤰᤁᤩᤠᤱ ᤛᤡᤗᤡᤛᤡᤕᤠ ᤏᤢ ᤐᤠᤶᤑᤡᤗᤡᤕᤠ ᤋᤧᤱᤃᤵᤖᤧ ᤁᤢᤕᤠᤀᤥ ᤐᤥ᤺ᤱᤶᤏᤠᤖ ᤐᤣ᤺ᤰᤔᤏᤠᤀᤠᤱ ᤗᤡᤛᤡᤕᤠ ᤌᤢᤶᤔᤥᤒᤠ ᤔᤀᤡᤖᤠ ᤐᤠᤱᤈᤢᤶᤔᤥ ᤁᤧᤵᤔᤏᤠᤖᤥ॥
ACT 27:6 ᤂᤧᤵᤔᤥ ᤌᤰᤋᤢᤶᤒᤧᤸᤗᤧ ᤔᤡᤛᤪᤛ᤻ᤔᤠ ᤀᤗᤧᤰᤈᤧᤴᤍᤪᤡᤕᤠᤗᤠᤶ ᤁᤧᤓᤧᤶᤒᤠᤀᤠᤱ ᤀᤡᤋᤠᤗᤡ ᤗᤧᤵᤔᤠᤱ ᤗᤠᤶᤍᤡ᤺ᤰ ᤆᤥ᤺ᤰᤔᤠ ᤕᤠᤖᤡᤵ ᤁᤧᤒᤥ᤺ᤱᤒᤠ ᤘᤣ᤹ ᤘᤠᤗᤠᤎᤠ᤺ᤴ ᤂᤥ᤺ᤛᤢ. ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧ ᤂᤧᤵᤔᤥ ᤆᤳᤇᤡᤱᤔᤏᤠᤖᤥ॥
ACT 27:7 ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤕᤖᤡᤰ ᤕᤧᤴ ᤏᤅᤣ᤺ᤰᤁᤠᤱ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤏᤠᤖ ᤐᤕᤶ ᤋᤢᤰᤂᤣᤏᤢ ᤏᤡᤍᤛ ᤔᤧᤵᤔᤏᤠᤒᤠ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤁᤧᤵᤔᤏᤠᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤀᤡᤋᤠᤗᤡ ᤗᤧᤵᤔᤠᤱ ᤐᤣ᤺ᤰᤔᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤔᤧᤒᤡᤖᤡᤃᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤪᤣᤋ ᤔᤧᤵᤔᤏᤠᤒᤠ ᤘᤠᤃᤵᤂᤠᤶᤛᤔᤠ ᤛᤠᤗᤔᤥᤏᤣᤏᤢ ᤗᤠᤱᤃᤧᤳ ᤗᤧᤵᤔᤠᤱ ᤐᤥ᤺ᤱᤔᤏᤠᤀᤠᤱ
ACT 27:8 ᤁᤪᤣᤋᤖᤧ ᤗᤠᤱᤃᤧᤳ ᤐᤡᤛᤠᤱ ᤁᤢᤕᤠ ᤁᤢᤕᤠ ᤐᤥ᤺ᤰᤂᤡᤃᤧᤖ ᤐᤕᤶ ᤋᤢᤰᤂᤣᤘᤠᤏᤢ ᤀᤠᤏᤡᤃᤧ ᤗᤛᤡᤕᤠ ᤐᤠᤱᤈᤢᤶᤔᤡᤸᤗᤧ ᤁᤢᤒᤣᤛᤠᤱᤒᤠ “ᤛᤧ᤺ᤵᤛᤡᤱᤍᤧᤴ” ᤔᤧᤵᤔᤏᤠᤒᤠ ᤋᤧᤴᤏᤥ ᤁᤧᤵᤔᤏᤠᤖᤥ॥
ACT 27:9 ᤂᤧᤱᤜᤠ᤹ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤠ ᤔᤧᤛᤢᤛᤧᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤜᤢ᤺ᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤖ ᤐᤳᤇᤧᤒᤠᤸᤗᤧ. ᤂᤧᤵᤔᤥᤏᤢ ᤋᤃᤡ ᤗᤠᤶᤍᤡ᤺ᤰ ᤆᤥ᤺ᤰᤔᤠ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤖᤧ ᤘᤠᤍᤥᤆᤠ᤺ᤰᤐᤠᤜᤠ᤹ ᤛᤢᤈᤠ ᤐᤡᤖᤢᤛᤡ.
ACT 27:10 “ᤀᤠᤍᤠᤱᤒᤠᤛᤣ. ᤀᤠᤸᤗ ᤋᤃᤡᤒᤠ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤠ ᤁᤡᤵᤔᤠ ᤁᤧᤄᤢ᤺ᤒᤠ ᤐᤥ᤺ᤰᤂᤧᤒᤠ ᤏᤡ᤺ᤛᤢᤱᤗᤥ॥ ᤆᤰᤔᤧᤸᤗ᤹ᤀᤣ ᤘᤠᤗᤠᤶᤍᤡ᤺ᤰ ᤀᤠᤈᤥᤃᤢᤶᤏᤧ ᤑᤠ᤹ᤃᤪ. ᤘᤠᤗᤠᤎᤠ ᤏᤢ ᤘᤠᤃᤰᤖᤧ ᤐᤕᤶ ᤀᤡᤶᤔᤥ᤺ᤰᤗᤰ ᤔᤧ᤺ᤴ. ᤁᤖ ᤀᤠᤏᤡ᤹ᤀᤠᤱ ᤛᤡ᤺ᤔᤠ ᤀᤠᤛᤢᤰᤗᤥ॥”
ACT 27:11 ᤁᤖ ᤌᤰᤋᤢᤶᤒᤧᤸᤗᤧ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤢ᤺ᤸᤗᤧᤀᤠᤱ ᤘᤠᤍᤥᤕᤢᤰᤐᤧᤴ ᤏᤢ ᤘᤠᤍᤥᤍᤠᤱᤒᤠᤸᤗᤧ ᤗᤠᤶᤍᤡ᤺ᤰ ᤆᤥᤃᤡ ᤗ᤹ᤖᤡᤰ ᤐᤠ᤺ᤳᤋᤧᤳᤇᤢᤒᤠ ᤐᤠ᤺ᤴᤏᤥᤀᤣ ᤏᤡᤱᤘᤠ᤹ ᤐᤡᤖᤢᤖᤥ॥
ACT 27:12 ᤁᤴ ᤋᤧᤴᤏᤡᤴ ᤆᤢᤱᤘᤠ᤺ᤶᤔᤠᤀᤥ ᤘᤠ᤹ᤔᤠ ᤏᤢ᤺ᤒᤠ ᤔᤧᤈᤥᤃᤧᤶᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰᤍᤱᤒᤠ ᤔᤏᤠᤜᤠ᤹ ᤗᤠᤶᤍᤡ᤺ᤰ ᤆᤥ᤺ᤰᤔᤠᤀᤠᤱ ᤑᤥᤏᤡᤰᤛ ᤕᤧᤰᤕᤰᤁᤥ ᤁᤧᤵᤔᤠᤀᤠᤱ ᤆᤢᤱᤘᤠ᤺ᤶᤔᤠᤀᤥ ᤘᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ ᤂᤧᤴ ᤘᤠᤃᤵᤂᤧ᤺ᤱᤅᤡᤱᤃ ᤁᤪᤣᤋᤛ᤻ᤔᤠ ᤌᤠᤱᤃᤧᤳ ᤏᤠᤶᤎᤠ ᤏᤢ ᤗᤠᤱᤃᤧᤳ ᤏᤠᤶᤎᤠ ᤗᤧᤵᤔᤠᤱ ᤋᤰᤁᤧᤔᤧᤵᤐᤠ ᤏᤢ᤺ᤒᤠ ᤘᤠᤃᤵᤂᤣ᤺ᤱ ᤆᤥᤃᤧᤖᤥ॥
ACT 27:13 ᤗᤠᤱᤃᤧᤳ ᤐᤡᤛᤠᤱᤗᤠᤶ ᤕᤧᤶᤕᤧᤶᤃᤧᤴ ᤛᤢᤖᤡᤳ ᤁᤣᤈᤱ ᤜᤢ᤺ᤔᤠ ᤜᤣ᤺ᤰᤋᤧᤀᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤁᤱᤃ ᤘᤠᤗᤠᤶᤍᤡ᤺ᤰ ᤆᤥ᤺ᤰᤔᤠ ᤏᤢ᤺ᤒᤠ ᤔᤡᤰᤛᤣ᤺ᤴᤗᤥ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ॥ ᤜᤧᤰᤁᤩᤠᤱ ᤘᤠᤍᤥᤂᤧ᤺ᤰᤆᤢᤖᤡᤴ ᤔᤧᤀᤢ᤺ᤰᤂᤢᤀᤠᤱ ᤁᤪᤣᤋᤖᤧ ᤗᤠᤱᤃᤧᤳ ᤐᤡᤛᤠᤱᤗᤠᤶ ᤁᤢᤕᤠ ᤁᤢᤕᤠ ᤔᤧᤒᤥ᤺ᤰᤂᤧᤖ ᤏᤠᤶᤎᤠ ᤐᤡᤛᤠᤱ ᤗᤧᤵᤔᤠᤱ ᤗᤠᤶᤍᤡ᤺ᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥
ACT 27:14 ᤁᤖ ᤜᤠᤖᤠᤀᤣ ᤂᤧᤵᤔᤥ “ᤌᤠᤱᤃᤧᤳ-ᤏᤠᤶᤃᤧᤴ” ᤔᤧᤵᤔᤏᤠᤒᤠ ᤀᤡᤎᤢᤃᤧᤒᤠ ᤛᤢᤖᤡᤳ ᤁᤣᤈᤱᤅᤡᤴ ᤘᤠᤃᤵᤂᤠᤶᤗᤠᤶ ᤁᤡᤵᤔᤠ ᤂᤢ᤺ᤛᤧᤖ ᤜᤢ᤺ᤔᤠ ᤜᤣ᤺ᤰᤋᤧᤖᤥ॥
ACT 27:15 ᤂᤧᤸᤗᤧ ᤘᤠᤗᤠᤎᤠ᤺ᤴ ᤜᤡᤵᤋᤢᤀᤠᤱ ᤛᤢᤖᤡᤳ ᤁᤣᤈᤱ ᤁᤧᤜᤢᤒᤠ ᤗᤧᤵᤔᤠᤱ ᤋᤃᤡ ᤐᤥ᤺ᤔᤠ ᤁᤧᤛᤠᤰᤐᤠ ᤐᤥ᤺ᤰᤂᤧᤀᤠᤱ ᤘᤠᤗᤠᤎᤠ᤺ᤴ ᤀᤠᤏᤡᤃᤧ ᤛᤢᤖᤡᤳ ᤁᤣᤈᤱᤅᤥᤀᤣ ᤗᤧᤵᤔᤏᤠᤍᤣᤔᤏᤠᤖᤥ॥
ACT 27:16 ᤜᤧᤰᤁᤩᤠᤱ ᤀᤠᤏᤡᤃᤧ ᤁᤠᤀᤢᤍᤠ ᤔᤧᤵᤔᤏᤠᤒᤠ ᤆᤢᤰᤛᤠ ᤘᤠᤃᤵᤂᤠᤶᤔᤡᤸᤗᤧ ᤁᤢᤕᤠᤀᤥ ᤀᤡ᤺ᤶᤛᤡᤱᤔᤏᤠᤖ ᤐᤣ᤺ᤰᤔᤏᤠ॥ ᤂᤧᤵᤔᤥ ᤘᤠᤗᤠᤎᤠ᤺ᤴ ᤑᤧᤳᤗᤠᤀᤠᤱ ᤏᤡ᤺ᤶᤔᤡᤸᤗᤧ ᤛᤧ᤺ᤵᤛᤡᤱᤛᤧ ᤀᤥᤃᤵ ᤆᤥ᤺ᤰᤔᤏᤠᤒᤠ ᤂ᤺ᤱᤒᤣᤜᤠ᤹ ᤀᤠᤏᤡᤃᤧ ᤛᤢᤰᤔᤧᤴᤇᤢᤰ ᤆᤫᤠ᤺ᤳᤋᤥᤗᤠᤶ ᤌᤥ ᤀᤢ᤺ᤰᤂᤢᤶᤒᤧᤀᤠᤱ ᤀᤡᤄᤣ᤺ᤱᤔᤏᤠᤀᤠᤱ ᤋᤠᤱᤔᤏᤠᤖᤥ॥
ACT 27:17 ᤂᤧᤱᤜᤠ᤹ᤖᤧ ᤂᤧᤴ ᤌᤥ ᤔᤧᤀᤢ᤺ᤰᤂᤢᤀᤠᤱ ᤘᤠᤗᤠᤎᤠ᤺ᤴ ᤔᤧᤕ᤺ᤏᤧᤴᤗ ᤑᤠ᤹ᤀᤠᤱ ᤁᤢᤛᤡᤃᤠᤱᤗᤠᤶ ᤀᤡᤍᤠ᤺ᤰᤁᤡᤸᤗᤧ ᤆᤡᤃᤧᤰ ᤆᤡᤃᤧᤰ ᤀᤡᤔᤧᤄᤣ᤺ᤰᤂᤢᤖᤥ॥ ᤛᤡᤖᤋᤡᤛ ᤔᤧᤵᤔᤏᤠᤒᤠ ᤕᤧ᤺ᤱᤄᤠ ᤘᤠᤈᤡᤶᤒᤣᤀᤥ ᤀᤠᤎᤠ᤺ ᤑᤠ᤹ᤀᤠᤱ ᤔᤧᤃᤡᤛᤧᤀᤠᤱ ᤕᤶᤒᤠ ᤘᤠᤍᤥᤛᤠᤖᤡ᤺ᤴ ᤕᤥ ᤔᤧᤎᤠ᤺ᤛᤢ॥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱ ᤜᤢᤖᤧᤒᤠ ᤗᤧᤵᤔᤠᤱ ᤘᤠᤗᤠᤎᤠ᤺ᤴ ᤔᤧᤗᤧᤖᤢ ᤔᤧᤍᤣ᤺ᤛᤢᤖᤥ॥
ACT 27:18 ᤆᤰᤔᤧᤸᤗ᤹ᤀᤣ ᤛᤢᤖᤡᤳ ᤁᤣᤈᤱ ᤁᤡᤵᤔᤠ ᤂᤢ᤺ᤛᤧᤖ ᤜᤢᤖᤧᤖ ᤏᤧᤛ᤻ᤛᤧ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤥ ᤂᤧᤱᤜᤠ᤹ᤖᤧ ᤘᤠᤃᤰᤜᤠ᤹ ᤆᤫᤠ᤺ᤳᤋᤥ ᤗᤠᤵᤑᤢᤔᤠ ᤔᤧᤜᤣ᤺ᤰᤋᤢᤖᤥ॥
ACT 27:19 ᤁᤢᤀᤠᤳᤇᤧᤴᤍᤠ᤺ᤴ ᤘᤠᤗᤠᤎᤠ᤺ᤴ ᤕᤠᤱᤕᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤘᤠᤍᤥᤛᤠᤔᤠᤜᤠ᤹ ᤆᤫᤠ᤺ᤳᤋᤥ ᤀᤠᤒᤠᤅᤣ ᤗᤠᤵᤔᤧᤓᤢᤛᤢᤖᤥ॥
ACT 27:20 ᤕᤖᤡᤰ ᤕᤧᤴ ᤌᤠᤖᤡᤰ ᤁᤡᤵᤔᤠ ᤂᤢ᤺ᤛᤧᤖ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤖᤧᤖ ᤏᤧᤛ᤻ᤛᤧᤒᤠᤸᤗᤧ ᤆᤥᤃᤢᤸᤗᤧ ᤗᤠᤶ ᤁᤧᤗᤥ᤺ᤒᤠ ᤂᤣᤛᤣ᤹. ᤏᤠᤶ ᤌᤣᤀᤠᤱ ᤀᤠᤏᤡᤃᤧ ᤏᤡ᤺ᤔᤠ ᤔᤧᤛᤢᤰᤋᤢᤶᤒᤧᤴᤏᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤜᤡᤱ ᤁᤧᤗ᤹ᤒᤠ ᤏᤡᤱᤛᤠᤱᤅᤠᤱ ᤔᤠ᤺ᤔᤏᤠᤍᤣ᤺ᤔᤏᤠᤖᤥ॥
ACT 27:21 ᤘᤠᤗᤠᤎᤠᤀᤥᤒᤠ ᤔᤏᤠᤜᤠ᤹ ᤆᤠ ᤔᤧᤴᤈᤠᤀᤣᤒᤠ ᤕᤖᤡᤰ ᤕᤧᤴ ᤐᤥ᤺ᤰᤂᤧᤀᤠᤱ ᤘᤕᤧᤒᤠᤸᤗᤧ ᤐᤠᤘᤗᤧᤴ ᤂᤢᤴᤇᤡ᤹ ᤗᤢᤶᤔᤥ ᤕᤧᤶᤛᤡᤱᤅᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤍᤠᤱᤒᤠᤛᤣ. ᤀᤠᤒᤠ᤺ᤴ ᤁᤧᤄᤧᤵᤛᤢᤶᤔᤠᤱ ᤁᤪᤣᤋᤗᤠᤶ ᤀᤠᤴᤎᤠᤛᤡᤱᤅᤡᤴᤏᤡᤸᤗᤧᤃ ᤀᤰᤂᤣᤗ᤹ᤖᤡᤰ ᤀᤡᤶᤔᤥ᤺ᤰ ᤔᤧᤒᤥ᤺ᤰᤂᤧᤶᤒᤠᤖᤥ॥
ACT 27:22 ᤁᤖ ᤀᤠᤸᤗ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤗᤳᤌᤡᤰᤁᤠᤱ ᤀᤠᤴᤇᤡ᤺ᤏᤧᤴᤗᤥ. ᤁᤖ ᤁᤴ ᤘᤠᤗᤠᤎᤠ᤺ᤴᤗᤰ ᤀᤡᤶᤔᤥ᤺ᤰ ᤐᤥ᤺ᤱᤗᤥ॥
ACT 27:23 ᤀᤡᤱᤃᤠ᤹ ᤛᤣᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤀᤠᤴᤍᤧ᤺ᤴ ᤛᤧᤴᤍᤡᤰ ᤀᤡᤱᤃᤠ᤹ᤏᤢ ᤀᤥᤛᤣ᤺ᤴᤎᤠᤰᤛᤡᤱᤅᤠᤱ
ACT 27:24 ᤀᤰᤂᤣ ᤔᤧᤳᤋᤠᤱ. ‘ᤐᤠᤘᤗᤀᤣ. ᤔᤧᤃᤡᤛᤧᤴᤏᤧ᤹ᤀᤥ. ᤂᤧᤏᤧ᤹ᤃ ᤛᤡᤈᤖᤗᤧ ᤁᤢᤍᤃᤡ ᤂᤠᤛᤧᤴ ᤗᤥ᤺ᤴᤇᤡᤱᤛᤧ ᤕᤧᤵᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ᤏᤢ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤜᤡᤱᤄᤢᤛᤡ᤹ᤖᤥ॥’
ACT 27:25 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤛᤣ. ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ᥄ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰ ᤁᤧᤳᤗᤥ॥
ACT 27:26 ᤜᤧᤰᤁᤣᤛᤠᤱ ᤀᤠᤏᤡ᤹ᤃ ᤁᤢᤓᤠ ᤘᤠᤃᤵᤂᤠᤶᤔᤥ ᤀᤠᤜᤠᤰᤛᤡᤱᤗᤥ॥”
ACT 27:27 ᤂᤠᤶᤍᤥᤗᤢᤶ ᤘᤖᤰᤁᤥ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤕᤠᤵᤔᤡ ᤔᤢ᤺ᤳᤋᤧᤒᤠ ᤌᤡᤰ-ᤗᤡ (᥇᥊) ᤕᤧᤴ ᤐᤥ᤺ᤰᤂᤧ ᤆᤢᤖᤧᤀᤠᤱ ᤘᤕᤧᤖᤥ॥ ᤛᤧᤳᤗᤢᤶᤓᤰᤋᤧᤸᤗᤧ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤗᤠᤈᤣ᤹ᤖᤧ ᤁᤢᤒᤣᤛᤠᤱ ᤔᤧᤃᤧᤖᤧᤒᤠ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥
ACT 27:28 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤆᤫᤠ᤺ᤳᤋᤡᤸᤗᤧ ᤁᤢᤓᤡ᤺ᤶᤔᤧᤴ ᤀᤠᤰᤂᤧᤶᤔᤩᤠᤰ ᤏᤧᤒᤣ ᤑᤠ᤹ᤀᤠᤱ ᤗᤢᤱᤅᤡᤴ ᤀᤡᤍᤠ᤺ᤰᤁᤡᤸᤗᤧ ᤀᤡᤔᤧᤄᤣ᤺ᤰᤂᤢᤀᤠᤱ ᤆᤫᤠ᤺ᤳᤋᤥ ᤔᤧᤎᤠᤛᤢᤀᤠᤱ ᤔᤧᤛᤡ᤺ᤰᤋᤢᤸᤗᤧ ᤜᤢᤰᤛᤡᤰ ᤕᤧᤳᤁᤡᤵ (᥎᥆) ᤔᤧᤄᤥ᤺ᤛᤢ॥ ᤜᤧᤰᤁᤩᤠᤱ ᤛᤵᤑᤠᤱ ᤔᤧᤛᤡ᤺ᤰᤋᤢᤸᤗᤧ ᤜᤢᤰᤛᤡᤰ ᤋᤢᤰᤁᤡᤵ (᥌᥆) ᤔᤧᤄᤥ᤺ᤛᤢᤖᤥ॥
ACT 27:29 ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤢᤕᤠᤀᤥᤒᤠ ᤐᤕᤶ ᤗᤢᤱᤅᤥ ᤀᤠᤍᤥ᤺ᤰᤐᤡᤗᤠ ᤑᤠ᤹ᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤘᤠᤗᤠᤎᤠ᤺ᤸᤗᤧ ᤁᤢᤀᤣ᤺ᤰᤗᤧᤵᤔᤠᤱᤏᤢ ᤗᤡᤛᤡ ᤘᤠᤍᤥᤂᤧ᤺ᤰᤆᤢᤖᤡᤜᤠ᤹ ᤔᤧᤎᤠᤛᤢᤀᤠᤱ ᤀᤠᤸᤗ ᤜᤠᤖᤠ ᤂᤠᤀᤥ᤺ᤳᤏᤡᤖᤥ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥
ACT 27:30 ᤜᤧᤰᤁᤩᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤘᤠᤗᤠᤎᤠᤸᤗᤧᤴ ᤋᤰᤗᤧᤵᤔᤠᤱᤏᤢ ᤘᤠᤍᤥᤂᤧᤰᤆᤢᤖᤡᤜᤠ᤹ ᤁᤧᤎᤠ᤺ᤒᤠ ᤔᤧᤗᤠᤶᤛᤡᤱᤗ ᤂᤧᤳᤇᤡᤱᤔᤠ ᤑᤠ᤹ᤀᤠᤱ ᤂ᤺ᤱᤒᤣᤴ ᤕᤥ ᤆᤫᤠ᤺ᤳᤋᤥ ᤌᤠ᤺ᤔᤠ ᤔᤧᤜᤣ᤺ᤰᤋᤢᤖᤥ॥
ACT 27:31 ᤁᤖ ᤐᤠᤘᤗᤖᤧ ᤌᤰᤋᤢᤶᤒᤠ ᤏᤢ ᤌᤰᤛᤢᤒᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤘᤠᤍᤥᤆᤠ᤺ᤰᤐᤠᤜᤠ᤹ ᤁᤴ ᤘᤠᤗᤠᤎᤠᤀᤥ ᤔᤧᤴᤕᤠ᤺ᤰᤏᤧᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤴᤜᤡᤱᤅᤡᤴᤗᤥ॥”
ACT 27:32 ᤂᤧᤸᤗᤧ ᤆᤥᤃᤢᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤂ᤺ᤱᤒᤣᤴ ᤁᤧᤓᤥ᤺ᤶᤒᤠᤀᤠᤱ ᤁᤧᤒᤵᤐᤠ ᤀᤡᤍᤠ᤺ᤰᤜᤠ᤹ ᤔᤧᤄᤰᤋᤢ ᤔᤧᤍᤣ᤺ᤛᤢᤀᤠᤱ ᤂ᤺ᤱᤒᤣᤴ ᤆᤫᤠ᤺ᤳᤋᤥ ᤔᤧᤗᤧᤖᤢ ᤔᤧᤍᤣ᤺ᤛᤢᤖᤥ॥
ACT 27:33 ᤀᤠᤸᤗ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤐᤠᤘᤗᤖᤧ ᤂᤧᤱᤜᤠ᤹ ᤁᤢᤈᤠᤛᤡᤰ ᤆᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤛᤡ. “ᤂᤡᤏᤡ᤹ᤃ ᤁᤧᤃᤡᤛᤡᤒᤠᤸᤗᤧ ᤆᤥᤃᤢᤸᤗᤧ ᤌᤣᤀᤠᤱ ᤔᤧᤴᤈᤠᤀᤣ ᤁᤧᤘᤕᤡᤒᤠ ᤌᤡᤰ-ᤗᤡ (᥇᥊) ᤕᤧᤴ ᤐᤥ᤺ᤰᤂᤧ॥
ACT 27:34 ᤜᤡᤱᤔᤠᤖᤧ ᤗᤠᤃᤡ ᤌᤣᤀᤡᤃ ᤆᤠᤔᤠᤀᤣ ᤐᤥ᤺ᤱ. ᤜᤧᤰᤁᤣ᤺ᤸᤗᤧ ᤆᤠᤈᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤡᤏᤡ᤹ ᤌᤧᤃᤣ᤺ᤰᤀᤡᤎᤡᤰᤁᤠᤱ ᤌᤣᤀᤠᤱ ᤔᤧᤒᤥ᤺ᤱᤏᤧᤸᤗᤥ॥”
ACT 27:35 ᤐᤠᤘᤗᤖᤧ ᤜᤧᤰᤁᤣ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤁᤢᤓᤠ ᤂᤖᤧ᤺ᤱ ᤂᤵᤛᤢᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤆᤠᤔᤠ ᤜᤣ᤺ᤰᤋᤢᤖᤥ॥
ACT 27:36 ᤂᤧᤱᤜᤠ᤹ ᤁᤠᤰ ᤜᤠᤱᤜᤠᤱ ᤔᤧᤗ᤹ᤖᤧᤀᤠᤱ ᤆᤠᤈᤠᤔᤠ ᤔᤧᤜᤣ᤺ᤰᤋᤢ॥
ACT 27:37 ᤀᤠᤏᤡᤃᤧ ᤘᤠᤗᤠᤎᤠᤀᤥ ᤁᤡᤵ ᤌᤡᤰ ᤏᤧᤳᤇᤡᤀᤠᤱ ᤏᤢ-ᤋᤢᤰ (᥈᥍᥌) ᤔᤏᤠᤜᤠ᤹ ᤕᤠᤰᤔᤏᤠᤖᤥ॥
ACT 27:38 ᤁᤧᤖᤧᤰᤗᤧ ᤂᤢᤏᤡ᤹ ᤂᤠᤄᤠ ᤆᤠ ᤔᤧᤈᤀᤠᤱ ᤘᤠᤗᤠᤎᤠ᤺ᤴ ᤕᤠᤱ ᤕᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤛᤡ-ᤈᤠᤜᤠ᤹ ᤆᤫᤠ᤺ᤳᤋᤥ ᤗᤠᤵᤔᤧᤓᤢᤛᤢᤖᤥ॥
ACT 27:39 ᤜᤧᤰᤁᤩᤠᤱ ᤏᤠᤶᤒᤡᤴᤍᤧᤀᤠᤱ ᤘᤠᤍᤥᤆᤠ᤺ᤰᤐᤠᤜᤠ᤹ᤖᤧ ᤘᤠᤖᤰ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤋᤧᤴ ᤔᤧᤏᤡ᤺ᤛᤢ. ᤁᤖ ᤗᤠᤈᤣ᤹ᤀᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥ ᤜᤧᤰᤁᤩᤠᤱ ᤁᤢᤕᤠᤀᤥ ᤋᤣ᤹ᤔᤠᤀᤠᤱ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤕᤧ᤺ᤱᤄᤠᤀᤥ ᤘᤠᤗᤠᤎᤠ᤺ᤴ ᤜᤠᤰᤔᤠ ᤏᤡᤱᤘᤠ᤹ ᤏᤡ᤺ᤴᤎᤥ ᤔᤧᤈᤥᤃᤢᤖᤥ॥
ACT 27:40 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤘᤠᤍᤥᤂᤧ᤺ᤰᤆᤢᤖᤡ ᤀᤡᤍᤠ᤺ᤰᤜᤠ᤹ ᤔᤧᤄᤰᤋᤢᤀᤠᤱ ᤘᤖᤰᤁᤥ ᤔᤧᤏᤡ᤺ᤒᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤢᤍᤥ᤺ᤶᤔᤠ ᤁᤢᤜᤡᤔᤠ ᤛᤡᤱᤅᤡᤴ ᤁᤧᤎᤶᤒᤠᤀᤠᤱ ᤁᤧᤒᤵᤐᤠ ᤀᤡᤍᤠ᤺ᤰᤜᤠ᤹ᤀᤠᤱ ᤔᤧᤓᤠ᤺ᤰᤂᤢ ᤔᤧᤍᤣ᤺ᤛᤢᤖᤥ॥ ᤂᤧᤱᤜᤠ᤹ᤖᤧ ᤘᤠᤍᤥᤛᤠᤖᤡ᤺ᤴ ᤔᤧᤓᤠ᤺ᤰᤂᤢᤀᤠᤱ ᤔᤧᤓᤥ᤺ᤴᤍᤢ॥ ᤜᤧᤰᤁᤣᤗ᤹ᤖᤡᤰ ᤛᤢᤖᤡᤳᤔᤠᤸᤗᤧ ᤘᤠᤗᤠᤎᤠ᤺ᤴ ᤔᤢ᤺ᤳᤋᤢᤖ ᤁᤢᤕᤠᤀᤥ ᤋᤣ᤹ᤖᤢᤖᤥ॥
ACT 27:41 ᤁᤖ ᤘᤠᤗᤠᤎᤠ᤺ᤸᤗᤧᤴ ᤋᤰᤗᤧᤵᤔᤠᤱᤒᤧᤴ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤕᤧ᤺ᤱᤄᤠᤀᤥ ᤛᤠ᤹ᤖᤡᤰ ᤜᤠᤰᤛᤡᤱᤅᤠᤱ ᤔᤢᤶᤔᤠᤀᤠᤱ ᤔᤧᤴᤇᤢᤰᤔᤏᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤣ᤺ᤰᤗᤧᤵᤔᤠᤱᤒᤠᤴ ᤘᤠᤓᤧᤸᤗᤧᤱᤅᤡᤸᤗᤧ ᤜᤡᤵᤋᤢᤀᤠᤱ ᤕᤶᤔᤠ ᤜᤣ᤺ᤰᤋᤧᤖᤥ॥
ACT 27:42 ᤌᤰᤛᤢᤒᤠᤜᤠ᤹ᤖᤧ ᤐᤢᤱᤗᤠᤎᤠᤒᤠᤜᤠ᤹ ᤘᤠᤔᤧᤈᤠ᤺ᤰᤁᤠᤱ ᤔᤧᤄᤧᤳᤇᤡᤱ ᤔᤧᤒᤣ᤺ᤰ ᤑᤠ᤹ᤀᤠᤱ ᤛᤧᤵᤔᤠᤛᤡ ᤏᤡᤱᤛᤣ᤺ᤰ ᤔᤧᤈᤥᤃᤢ॥
ACT 27:43 ᤁᤖ ᤌᤰᤋᤢᤶᤒᤠᤸᤗᤧ ᤐᤠᤘᤗᤧᤴ ᤋᤠᤱᤛᤧ᤺ᤵᤔᤠ ᤑᤠ᤹ᤀᤠᤱ ᤔᤠ᤹ᤖᤢᤀᤠᤱ ᤘᤠᤈᤠ᤺ᤰᤔᤠ ᤁᤧᤗᤧᤒᤠᤜᤠ᤹ ᤋᤃᤡ ᤔᤧᤒᤡᤴ ᤔᤧᤎᤠᤏᤡᤀᤠᤱ ᤘᤠᤔᤧᤈᤠ᤺ᤰᤁᤠᤱ ᤁᤢᤕᤠᤀᤥ ᤔᤧᤒᤣ᤺ᤰᤏᤡ ᤜᤧᤰᤁᤩᤠᤱ
ACT 27:44 ᤘᤠᤈᤠ᤺ᤰᤔᤠ ᤔᤧᤸᤗᤧ᤺ᤔᤏᤠᤒᤠᤜᤠ᤹ ᤛᤡᤱᤓᤧᤸᤗᤧᤰ ᤏᤢ ᤁᤧᤕᤶᤒᤠ ᤘᤠᤗᤠᤎᤠ ᤛᤡᤱ ᤜᤧᤵᤔᤥ ᤔᤧᤄᤡᤶᤛᤡᤱᤅᤠᤱ ᤘᤠᤔᤧᤈᤠ᤺ᤰᤗ ᤁᤢᤕᤠᤀᤥ ᤔᤧᤒᤣ᤺ᤰᤏᤡ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤌᤣᤀᤠᤱ ᤔᤧᤶᤒᤥ᤺ᤱᤅᤣ ᤀᤠᤏᤡᤃᤧ ᤁᤢᤕᤠᤀᤥ ᤁᤧᤵᤔᤏᤠᤖᤥ॥
ACT 28:1 ᤜᤧᤰᤁᤩᤠᤱ ᤀᤠᤏᤡᤃᤧ ᤁᤧᤖᤧᤰ ᤌᤣᤀᤠᤱ ᤔᤧᤶᤒᤥ᤺ᤱᤅᤣ ᤁᤢᤕᤠᤀᤥ ᤗ᤺ᤴᤍᤡᤃᤧᤀᤠᤱ ᤁᤴ ᤘᤠᤃᤵᤂᤠᤶᤔᤡᤸᤗᤧ ᤁᤢᤔᤡᤱ ᤔᤠᤸᤋᤠ ᤘᤕᤧᤒᤠᤴ ᤏᤡᤱᤘᤠ᤹ ᤂᤥ᤺ᤶᤏᤠᤖᤥ॥
ACT 28:2 ᤂᤧᤵᤔᤥ ᤁᤧᤕᤢᤱᤒᤠ ᤐᤠᤱᤋᤡᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤀᤠᤏᤡᤃᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤔᤧᤍᤢᤰᤋᤡᤃᤧᤀᤠᤱ ᤔᤡᤔᤧᤍᤢᤵᤋᤢᤀᤠᤱ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤡᤃᤧᤖᤥ. ᤌᤣᤀᤠᤱᤓᤧᤸᤗᤧ ᤘᤠᤜᤡᤳᤔᤠᤴ ᤌᤩᤧᤖ ᤐᤳᤇᤧᤀᤠᤱ ᤆᤢᤱᤈᤡ᤺ᤰᤋᤧᤖᤥ॥
ACT 28:3 ᤐᤠᤘᤗᤖᤧ ᤛᤡᤱᤔᤢᤈᤡ᤹ ᤛᤢᤵᤛᤢᤖ ᤔᤡᤀᤥ ᤁᤣ᤺ᤳᤋᤢᤸᤗᤧ ᤔᤡ᤺ᤸᤗᤧ ᤕᤧᤶᤍᤢᤀᤠᤱ ᤀᤛᤣ᤺ᤰᤐᤧᤴ ᤂᤧᤴ ᤛᤡᤱᤔᤢᤈᤡ᤹ᤀᤥᤏᤢ ᤗ᤺ᤴᤍᤧᤀᤠᤱ ᤐᤠᤘᤗᤖᤧ ᤁᤢᤜᤢᤰᤁᤥ ᤁᤡᤳᤇᤡᤱᤗᤥ॥
ACT 28:4 ᤐᤠᤱᤋᤡᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤐᤠᤘᤗᤖᤧ ᤁᤢᤜᤢᤰᤁᤥ ᤀᤛᤣ᤺ᤰᤐᤧᤴ ᤁᤡᤳᤇᤡᤱᤒᤠ ᤔᤧᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤁᤱᤃ ᤛᤧᤰᤂᤠᤛᤠᤱ ᤔᤏᤠ ᤁᤧᤛᤧᤵᤐᤠᤀᤣᤖᤥ॥ ᤁᤴ ᤘᤠᤜᤱᤅᤥᤗᤠᤶ ᤜᤡᤅᤧᤛᤠᤱ ᤁᤴ ᤂᤠᤛᤧᤴ ᤁᤧᤗᤥ᤺ᤶᤒᤠ ᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤐᤡᤶᤔᤠ ᤔᤧᤛᤢᤰᤋᤧᤴᤗᤥ॥”
ACT 28:5 ᤁᤖ ᤐᤠᤘᤗᤖᤧ ᤂᤧᤴ ᤀᤛᤣ᤺ᤰᤐᤧᤸᤗᤧ ᤀ᤺ᤰᤔᤠ ᤔᤧᤱᤄᤥᤀᤣ ᤔᤡᤀᤥ ᤛᤠᤰᤂᤢ ᤁᤣ᤺ᤳᤋᤢᤀᤠᤱ ᤌᤣᤀᤠᤱ ᤔᤧᤒᤥ᤺ᤰᤂᤧᤴᤗᤥ॥
ACT 28:6 ᤀᤠᤸᤗ ᤐᤠᤘᤗᤧᤴ ᤌᤱᤍᤢᤀᤠᤱ ᤜᤷᤃᤢᤵ ᤆᤥ᤺ᤴᤏᤠᤱ ᤛᤡ᤹᤺ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤏᤠᤜᤠ᤹ᤖᤧ ᤔᤧᤜᤠᤱᤄᤢᤖᤥ॥ ᤕᤖᤡᤰ ᤕᤧᤶ ᤔᤧᤜᤠᤱᤄᤢᤛᤠᤱ ᤂᤢᤏᤧ᤹ ᤌᤧᤔᤠᤀᤠᤱ ᤔᤧᤒᤥ᤺ᤰᤂᤧᤶᤒᤠ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤔᤧᤗᤧᤰᤂᤢᤖ ᤀᤰᤂᤣ ᤔᤧᤔᤧᤳᤇᤡᤱᤗᤥ. “ᤁᤱᤃ ᤛᤧᤰᤂᤠᤛᤠᤱ ᤔᤠᤱᤗᤥ॥”
ACT 28:7 ᤂᤧᤵᤔᤥ ᤏᤡ᤺ᤳᤋᤠᤱᤅᤣ ᤂᤧᤴ ᤘᤠᤃᤵᤂᤠᤶ ᤕᤢᤰᤐᤠ ᤐᤒ᤻ᤗᤡᤕᤛᤖᤧ ᤁᤢᤗᤠᤈᤣ᤹ ᤏᤧᤛ᤻ᤛᤧ॥ ᤂᤧᤸᤗᤧ ᤀᤠᤏᤡᤃᤧ ᤁᤢᤜᤡᤶᤔᤥ ᤋᤣ᤹ᤖᤡᤃᤧᤀᤠᤱ ᤛᤠ᤹ᤖᤡᤰ ᤏᤢ᤺ᤖᤡᤰ ᤔᤧᤳᤋᤡᤃᤧᤖ ᤛᤢᤶᤕᤧᤴ ᤌᤠᤖᤡᤰ ᤋᤖᤣ ᤕᤠᤵᤔᤡ ᤋᤥ᤺ᤛᤧᤖᤥ॥
ACT 28:8 ᤐᤒ᤻ᤗᤡᤕᤛᤖᤧ ᤁᤢᤶᤒᤠ ᤋᤢᤱ ᤏᤢ ᤔᤠᤰᤂᤡ᤹ ᤜᤡᤒᤡ᤺ᤵᤔᤠᤸᤗᤧ ᤋᤖᤢᤀᤠᤱ ᤏᤧᤳᤏᤠᤀᤥ ᤏᤧᤛ᤻ᤛᤧ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤁᤢᤜᤡᤶᤔᤥ ᤐᤣᤀᤠᤱ ᤋᤢᤘᤠ ᤆᤥᤃᤢ ᤐᤡᤖᤢᤀᤠᤱ ᤜᤢᤰ ᤏᤧᤛ᤻ᤛᤢᤀᤠᤱ ᤘᤣ᤺ᤴᤍᤢᤖᤥ॥
ACT 28:9 ᤀᤰᤂᤣ ᤐᤥ᤺ᤰᤂᤧᤸᤗᤧ ᤘᤠᤃᤵᤗᤠᤈᤣ᤹ᤀᤥᤒᤠ ᤁᤠᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤘᤣ᤺ᤳᤋᤧᤖᤥ॥
ACT 28:10 ᤂᤧᤱᤜᤠ᤹ᤖᤧ ᤕᤖᤡᤰ ᤀᤡᤱᤎᤠ᤺ᤱ ᤔᤧᤒᤡᤖᤡᤃᤧᤖ ᤔᤡᤰᤋᤥ᤺ᤰ ᤏᤢ ᤆᤧᤛ᤻ᤛᤢᤱᤜᤠ᤹ ᤔᤧᤍᤥ᤺ᤴᤍᤡ ᤔᤧᤒᤡᤖᤡᤃᤧ॥ ᤕᤠᤱᤛᤡ ᤐᤣ᤺ᤰᤔᤠ ᤕᤧᤶ ᤐᤥ᤺ᤰᤂᤧᤸᤗᤧ ᤘᤠᤗᤠᤶᤍᤡ᤺ᤰᤁᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤁᤧᤖᤧᤰ ᤆᤡᤃ᤺ᤰᤘᤠᤜᤠ᤹ ᤘᤠᤗᤠᤎᤠᤀᤥ ᤔᤧᤕᤠᤰᤋᤢ ᤔᤧᤒᤡᤖᤡᤃᤧᤖᤥ॥
ACT 28:11 ᤜᤧᤰᤁᤩᤠᤱ ᤂᤧᤵᤔᤥ ᤗᤠ ᤛᤢᤶᤛᤡ ᤌᤠᤖᤡᤰ ᤘᤕᤡᤃᤧᤀᤠᤱ ᤂᤧᤵᤔᤥ ᤀᤗᤧᤰᤈᤧᤴᤍᤪᤡᤕᤠᤗᤠᤶ ᤁᤧᤍᤠ᤺ᤒᤠ ᤁᤠᤵᤛᤠᤒᤠ ᤃᤪᤡᤁ ᤔᤠᤱᤜᤠ᤹ᤖᤧᤴ ᤂᤥ᤺ᤶᤔᤏᤠᤒᤠ ᤀᤡᤳᤇᤠᤵ ᤁᤧᤒᤵᤐᤠ ᤘᤠᤗᤠᤎᤠᤀᤥ ᤗᤠ᤺ᤵᤔᤏᤠᤀᤠᤱ ᤀᤠᤏᤡᤃᤧ ᤘᤠᤗᤠᤶᤍᤡ᤺ᤰᤁᤥ ᤌᤠᤛᤡᤱᤔᤏᤠᤖᤥ॥ ᤂᤧᤴ ᤘᤠᤗᤠᤎᤠ᤺ᤴ ᤆᤢᤱᤘᤠ᤺ᤶᤔᤠᤀᤥ ᤂᤧᤴ ᤘᤠᤃᤵᤂᤣ᤺ᤱᤅᤥ ᤋᤩᤧᤀᤠᤱ ᤘᤕᤧᤖᤥ॥
ACT 28:12 ᤜᤧᤰᤁᤩᤠᤱ ᤀᤠᤏᤡᤃᤧ ᤛᤡᤖᤠᤁᤛ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤁᤧᤵᤔᤏᤠᤀᤠᤱ ᤛᤢᤶᤕᤧᤴ ᤌᤠᤖᤡᤰ ᤂᤧᤵᤔᤥ ᤏᤧᤔᤏᤠ॥
ACT 28:13 ᤂᤧᤵᤔᤥᤗᤠᤶ ᤌᤠᤛᤡᤱᤔᤏᤠᤀᤠᤱ ᤀᤡᤋᤠᤗᤡ ᤗᤠᤈᤣ᤹ᤒᤠ ᤖᤣᤃᤡᤕᤔ ᤔᤧᤵᤔᤏᤠᤒᤠ ᤕᤧᤰᤕᤰᤁᤥ ᤁᤧᤵᤔᤏᤠᤖᤥ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤗᤠᤱᤃᤧᤳ ᤐᤡᤛᤠᤱᤗᤠᤶ ᤛᤢᤖᤡᤳ ᤁᤣᤈᤱ ᤜᤢ᤺ᤖᤧ. ᤜᤧᤰᤁᤩᤠᤱ ᤌᤠᤛᤡᤱᤔᤏᤠᤀᤠᤱ ᤁᤢᤀᤠᤳᤇᤧᤴᤍᤠ᤺ᤴ ᤐᤋᤡᤀᤥᤗᤡ ᤔᤧᤵᤔᤏᤠᤒᤠ ᤐᤠᤱᤈᤢᤶᤔᤥ ᤁᤧᤵᤔᤏᤠᤖᤥ॥
ACT 28:14 ᤂᤧᤵᤔᤥ ᤀᤠᤏᤡᤃᤧ ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤋᤢᤶᤔᤏᤠᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤳᤏᤠᤶᤎᤡᤰ ᤕᤠ᤺ᤰᤋᤧᤶᤔᤧ᤹ ᤗ᤹ᤖᤡᤰ ᤐᤣᤗᤡ ᤕᤠᤵᤔᤡ ᤔᤧᤓᤠᤰᤋᤧᤖᤥ॥ ᤀᤠᤏᤡᤃᤧ ᤂᤢᤴᤇᤡ᤹ᤏᤢ ᤕᤧᤴᤏᤠᤶᤎᤡᤰ ᤕᤠ᤺ᤰᤔᤏᤠᤀᤠᤱ ᤖᤥᤔ ᤗᤧᤵᤔᤠᤱ ᤌᤠᤛᤡᤱᤔᤏᤠᤖᤥ॥
ACT 28:15 ᤖᤥᤶᤔᤥ ᤁᤧᤘᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤀᤠᤏᤡᤃᤧ ᤋᤩᤧ᤹ᤀᤡᤃᤧᤖ ᤐᤳᤇᤡᤃᤧᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤵᤐᤡᤕᤠᤛ᤻ᤔᤠ ᤐᤠᤱᤈᤢᤶ ᤏᤢ ᤛᤢᤶᤛᤡ ᤀᤡ᤺ᤰᤂᤡᤶ ᤔᤧᤵᤔᤏᤠᤒᤠ ᤍᤧᤴᤏᤥ ᤀᤠᤏᤡᤃᤧ ᤋᤢᤶᤛᤧ ᤗᤠᤶᤍᤣ᤺ᤱ ᤌᤠᤖᤡᤰ ᤗᤠᤶᤗᤰᤛᤧ ᤔᤧᤍᤩᤧᤖᤥ॥ ᤜᤧᤰᤁᤩᤠᤱ ᤐᤠᤘᤗᤖᤧ ᤂᤧᤱᤜᤠ᤹ ᤏᤡ᤺ᤛᤢᤛᤡᤀᤠᤱ ᤜᤠᤱᤜᤠᤱ ᤐᤥ᤺ᤰᤂᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖᤥ॥
ACT 28:16 ᤀᤠᤏᤡᤃᤧ ᤖᤥᤶᤔᤥ ᤁᤧᤵᤔᤏᤠᤀᤠᤱ ᤂᤧᤵᤔᤥ ᤌᤰᤛᤢᤒᤠ ᤁᤥᤔᤠᤀᤥ ᤐᤠᤘᤗᤖᤧ ᤀᤠᤒᤠᤅᤣ ᤋᤱᤃᤠᤶ ᤆᤥᤃᤢᤒᤠ ᤕᤧᤱᤘᤠᤜᤡᤶᤔᤥ ᤘᤠ᤹ᤔᤠ ᤔᤧᤒᤠᤱᤄᤢᤖᤥ॥
ACT 28:17 ᤛᤢᤶᤕᤧᤴ ᤀᤣᤃᤠᤱ ᤐᤠᤘᤗᤖᤧ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ ᤆᤢᤶᤗᤢᤱᤅᤥ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ ᤔᤧᤈᤢᤵᤛᤧᤸᤗᤧ ᤀᤰᤂᤣ ᤔᤧᤳᤋᤢᤛᤡᤖᤥ. “ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤀᤡᤱᤃᤠ᤹ᤃ ᤀᤠᤏᤡ᤹ ᤔᤏᤠᤜᤠ᤹ ᤏᤢ ᤀᤠᤏᤡ᤹ ᤛᤢᤎᤧᤒᤠᤜᤠ᤹ᤖᤧ ᤀᤠᤶᤒᤡᤖᤧ ᤀᤠᤶᤕᤢᤛᤧᤒᤠ ᤛᤠᤰᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤔᤧᤶᤒᤠ᤺ᤵᤐᤧᤴᤗᤥ. ᤜᤧᤰᤁᤣᤛᤠᤱ ᤀᤡᤱᤃᤠ᤹ᤃ ᤕᤖᤢᤛᤗᤧᤶᤔᤥ ᤔᤧᤍᤧᤶᤛᤠᤱᤅᤠᤱ ᤖᤥᤔᤡ ᤛᤢᤜᤠᤱᤕᤢᤰᤐᤠᤜᤠ᤹ᤖᤥ ᤜᤢᤰᤔᤧᤛᤢᤵᤋᤠᤱᤗᤥ॥
ACT 28:18 ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤔᤧᤛᤠ᤹ᤖᤠᤱᤅᤠᤱ ᤕᤠᤵᤔᤡ ᤗᤧᤵᤔᤠᤍᤣ᤺ᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤂᤥ᤺ᤔᤠ ᤌᤣᤀᤠᤱ ᤑᤧᤴ ᤐᤠ᤺ᤴ ᤔᤧᤴᤈᤥ᤺ᤰᤁᤣ ᤘᤕᤠᤱᤗᤥ॥
ACT 28:19 ᤀᤠᤏᤡ᤹ ᤀᤠᤒᤠᤅᤣ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀᤠᤵᤋᤡᤰ ᤌᤣᤀᤠᤱ ᤔᤧᤃᤳᤋᤠᤴᤇᤠᤱ ᤕᤜᤢᤍᤡ ᤗᤠᤶᤗᤥ᤺ᤒᤠᤜᤠ᤹ᤖᤧ ᤛᤠ᤹ᤖᤡᤰ ᤔᤧᤀᤳᤋᤠᤱᤅᤡᤸᤗᤧ ᤀᤡᤱᤃᤠ᤹ ᤜᤠᤱ ᤕᤢᤰᤐᤠ ᤛᤡᤈᤖᤗᤥ ᤕᤧᤰᤐᤣᤗᤡ ᤆᤥ᤺ᤰᤔᤠᤀᤣ ᤁᤧᤒᤥ᤺ᤱᤒᤠ ᤐᤥ᤺ᤰᤂᤠᤱᤗᤥ॥
ACT 28:20 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤋᤢᤶᤔᤠᤀᤠᤱ ᤌᤣᤀᤠᤱ ᤀᤠᤵᤋᤡᤰ ᤔᤧᤃᤢ᤺ᤳᤋᤠᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤱᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤁᤵᤔᤥ ᤋᤩᤧᤶᤔᤧ᤹ ᤑᤠ᤹ᤀᤠᤱ ᤀᤢ᤺ᤳᤏᤡᤱᤒᤠᤖᤥ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤠ᤺ ᤁᤧᤗ᤹ᤒᤠ ᤏᤡᤱᤛᤠᤱ ᤔᤧᤈᤥᤃᤢᤒᤠ ᤔᤠᤱᤌᤢᤰᤐᤧᤴ ᤏᤛᤠ᤺ᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤀᤠᤀᤡᤴ ᤁᤴ ᤀᤡᤄᤣ᤺ᤱᤅᤥ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥”
ACT 28:21 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤧᤃ ᤕᤜᤢᤍᤡᤕᤠᤗᤠᤶ ᤁᤧᤕᤠ᤺ᤶᤒᤣᤀᤥ ᤌᤣᤀᤠᤱ ᤛᤰᤀᤡᤱᤄᤱ ᤔᤧᤱᤄᤥᤀᤣ ᤘᤕᤡᤃᤧᤖᤥ॥ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴᤜᤠ᤹ ᤁᤧᤍᤠ᤺ᤵᤐᤠ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤔᤧᤜᤥ᤺ᤵᤗᤥ॥
ACT 28:22 ᤁᤖ ᤁᤴ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤀᤠᤱ ᤁᤧᤘᤠ᤹ᤒᤠ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤀᤠᤳᤋᤡᤛᤠᤱ ᤂᤧᤵᤛᤢᤶᤒᤧᤖ ᤘᤕᤡᤃᤧ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤏᤡᤱᤘᤠ᤹ ᤌᤧᤔᤠ ᤘᤠ᤹ᤒᤣ ᤑᤠ᤹ᤀᤠᤱ ᤂᤧᤶᤔᤠ ᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥”
ACT 28:23 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤠᤘᤗᤏᤢ ᤕᤠᤶᤔᤥ ᤋᤢᤶᤔᤠ ᤕᤧᤶ ᤏᤡ᤺ᤴᤎᤥ ᤔᤧᤈᤥᤃᤢ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤐᤠᤘᤗᤖᤧ ᤁᤢᤕᤧᤱᤘᤠᤜᤡᤶᤔᤥ ᤕᤖᤡᤰ ᤔᤧᤍᤩᤧᤖᤥ॥ ᤜᤧᤰᤁᤩᤠᤱ ᤐᤠᤘᤗᤖᤧ ᤋᤠᤏᤠᤶᤏᤢ ᤏᤠᤶᤎᤩᤧᤖ ᤌᤠᤖᤡᤰ ᤏᤡᤱᤘᤠ᤹ᤑᤢᤜᤠᤱᤈᤢᤶ ᤏᤢ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤱᤜᤠ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤗᤠᤗᤠᤶ ᤁᤢᤒᤣ ᤜᤴᤍᤢᤀᤠᤱ ᤆᤧᤰᤋᤢᤛᤡᤖᤥ॥
ACT 28:24 ᤂᤧᤱᤜᤠ᤹ ᤁᤢᤓᤠᤖᤧᤃ ᤐᤠᤘᤗᤖᤧ ᤐᤠ᤺ᤳᤋᤢᤒᤠᤴ ᤏᤠᤔᤧᤛᤠ᤹ᤖᤢ ᤁᤖ ᤘᤣ᤹ᤜᤠ᤹ᤖᤧᤃ ᤏᤠᤔᤧᤴᤇᤠ᤹ᤖᤢᤴᤗᤥ॥
ACT 28:25 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤗᤢᤶᤔᤥᤀᤣ ᤏᤡᤱᤘᤠ᤹ ᤔᤧᤴᤍᤱ ᤐᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤐᤠᤘᤗᤖᤧ ᤀᤰᤂᤣ ᤔᤧᤳᤋᤢᤛᤡ. “ᤛᤧᤰᤂᤠᤀᤣ ᤏᤢ᤺ᤖᤡᤰᤁᤠᤱ ᤛᤣᤛᤣᤔᤠᤱᤅᤡᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤘᤠ᤹ᤖᤥ–
ACT 28:26 ‘ᤁᤴ ᤔᤏᤠᤜᤠ᤹ᤖᤥ ᤐᤣᤃᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤛᤧ᤹. ᤀᤠᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶ ᤀᤠᤸᤗᤛᤠᤱ ᤏᤢ᤺ᤖᤡᤰᤁᤠᤱ ᤁᤧᤄᤧᤵᤛᤢᤶ. ᤁᤖ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤗᤥ॥ ᤀᤠᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤀᤥᤃᤧᤔᤧᤳᤋᤢᤶ ᤀᤠᤸᤗᤛᤠᤱ ᤏᤢ᤺ᤖᤡᤰᤁᤠᤱ ᤀᤥᤃᤧᤔᤧᤳᤋᤢᤶ ᤜᤧᤰᤁᤣᤛᤠᤱ ᤁᤧᤴᤏᤡ᤺ᤛᤢᤶᤔᤡᤴᤗᤥ॥
ACT 28:27 ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤢᤏᤡ᤹ ᤏᤧᤰᤂᤥ᤹ᤜᤠ᤹ ᤛᤢᤒᤧᤀᤠᤱ ᤐᤳᤗᤥ॥ ᤂᤢᤏᤡ᤹ ᤔᤡᤰᤜᤠ᤹ ᤛᤢᤒᤧᤀᤠᤱ ᤐᤳᤗᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤔᤧᤏᤡ᤺ᤛᤢ. ᤔᤧᤄᤧᤵᤛᤢ. ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤱᤃᤠ᤹ᤀᤥ ᤔᤧᤏᤢ᤺ᤰᤂᤧᤒᤠᤖᤥ ᤜᤧᤰᤁᤩᤠᤱ ᤘᤣ᤺ᤴᤏᤡᤱᤒᤠ ᤘᤕᤧᤖᤥ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥’”
ACT 28:28 ᤜᤧᤰᤁᤩᤠᤱ ᤐᤠᤘᤗᤖᤧ ᤁᤢᤏᤢᤵᤔᤥ ᤀᤰᤂᤣ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤛᤧᤴᤗᤵᤖᤧ ᤛᤢᤏᤠᤀᤡᤱᤅᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤐᤠᤱᤄᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤔᤧᤄᤧᤵᤛᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”
ACT 28:29 ((ᤜᤧᤰᤁᤩᤠᤱ ᤐᤠᤘᤗᤖᤧ ᤁᤴ ᤐᤠ᤺ᤳᤋᤢ ᤛᤢᤖᤢᤀᤠᤱ ᤕᤜᤢᤍᤡᤜᤠ᤹ ᤂᤢᤏᤡ᤹ ᤗᤢᤶᤔᤥ ᤛᤠ᤹ᤖᤡᤰ ᤐᤠ᤺ᤴᤎᤱ ᤔᤧᤎᤰᤋᤧᤖ ᤂᤧᤵᤔᤥᤗᤠᤶ ᤔᤧᤒᤣᤖᤥ॥))
ACT 28:30 ᤋᤱᤒᤣ ᤏᤧᤳᤇᤡ ᤌᤠᤖᤡᤰ ᤐᤠᤘᤗᤖᤧ ᤀᤠᤒᤠᤅᤣ ᤋᤱᤃᤠᤶ ᤆᤥᤃᤢᤒᤠ ᤕᤧᤱᤘᤠᤜᤡᤶᤔᤥ ᤕᤠ᤺ᤰᤋᤧᤀᤠᤱ ᤁᤢᤍᤢᤶᤛᤧ ᤁᤧᤍᤠ᤺ᤒᤠ ᤁᤧᤖᤧᤰ ᤔᤏᤠᤜᤠ᤹ ᤗᤠᤱᤍᤠ᤺ᤰᤔᤠ ᤐᤡᤖᤢᤛᤡᤖ ᤘᤕᤧᤖᤥ॥
ACT 28:31 ᤜᤧᤰᤁᤩᤠᤱ ᤔᤧᤱᤃᤡᤀᤣ ᤜᤠᤱᤜᤠᤱ ᤗ᤹ᤖᤡᤰ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤆᤥᤃᤢᤖ ᤁᤧᤍᤠ᤺ᤒᤠ ᤁᤧᤒᤣ᤺ᤰᤐᤠᤜᤠ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤜᤢ᤹ᤖᤢᤛᤡᤖᤥ॥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤧᤰᤁᤣ ᤆᤥ᤺ᤰᤔᤥᤗᤠᤶ ᤂᤢᤏᤧ᤹ ᤛᤠᤰᤔᤠ ᤔᤧᤱᤃᤥ᤺ᤳᤋᤢᤴᤗᤥ॥
ROM 1:1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤛᤣᤃᤠᤱᤅᤠᤱ ᤁᤢᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤀᤢ᤺ᤳᤋᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤀᤡᤱᤃᤠ᤹ ᤐᤠᤘᤗᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥
ROM 1:2 ᤁᤴ ᤛᤢᤏᤠᤀᤡᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤛᤠ ᤁᤢᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶᤒᤠ ᤛᤣᤛᤣ ᤛᤠᤶᤕᤥᤛᤠᤵᤗᤠᤀᤥ ᤔᤠᤱᤜᤧᤰ ᤆᤥᤃᤢᤀᤠᤱ ᤐᤳᤗᤥ॥
ROM 1:3 ᤁᤴ ᤛᤢᤏᤠᤀᤡᤱᤅᤡᤱᤃ ᤏᤡᤱᤘᤠ᤹ᤑᤢᤛᤠ᤺ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤖᤥ॥ ᤂᤢᤏᤧ᤹ᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤗᤠᤶᤒᤠ ᤔᤧᤴᤇᤠᤶ ᤕᤠᤵᤔᤡ ᤐᤥ᤺ᤰᤂᤧ.
ROM 1:4 ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶᤒᤠ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤖᤥ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ॥ ᤂᤢᤏᤧ᤹ᤀᤣ ᤕᤧᤛᤢ ᤂᤪᤡᤛ᤻ᤋ ᤀᤠᤏᤡ᤹ ᤍᤠᤱᤒᤠᤖᤥ॥
ROM 1:5 ᤂᤢᤏᤧ᤹ᤗᤠᤶ ᤏᤢ ᤁᤢᤔᤡᤱᤛᤥ ᤀᤡᤱᤎᤠ᤺ᤱᤗᤧ ᤗᤠᤃᤡ ᤁᤧᤖᤧᤰ ᤗᤠᤈᤣ᤹ᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤖ ᤜᤧᤰᤁᤩᤠᤱ ᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤔᤠ ᤛᤢᤕᤧᤶ ᤐᤡᤖᤡᤃᤧᤀᤠᤱ ᤘᤠ᤹ᤖᤥ॥
ROM 1:6 ᤂᤡᤏᤡ᤹ᤀᤠᤱ ᤂᤧᤱᤜᤠ᤹ᤏᤢᤀᤣ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤢᤔᤏᤠ ᤐᤥ᤺ᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
ROM 1:7 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤔᤡ᤺ᤶᤈᤡ ᤁᤧᤔᤧᤳᤋᤡ᤹ᤀᤠᤱ ᤀᤠᤒᤠᤅᤣ ᤁᤢᤛᤣᤛᤣ ᤔᤏᤠ ᤐᤥ᤺ᤱᤛᤧ ᤁᤧᤀᤢ᤺ᤳᤋᤡᤒᤠ ᤖᤥᤔ ᤕᤧᤰᤕᤰᤁᤥᤒᤠ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤜᤠᤖᤠ᤹ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤁᤧᤒᤡᤖᤡᤖᤖᤥ॥
ROM 1:8 ᤁᤠᤰᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤛᤣᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤏᤥᤃᤧᤴ ᤐᤡᤖᤢᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤀᤡᤱᤄᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤛᤧ᤺ᤖᤧᤀᤠᤱ ᤘᤠ᤹ᤖᤥ॥
ROM 1:9 ᤂᤢᤏᤧ᤹ ᤁᤢᤛ᤻ᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤗ ᤁᤧᤖᤧᤰ ᤀᤠᤏᤡᤱᤘᤠ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤡᤏᤡ᤹ ᤗᤠᤃᤡ ᤀᤧᤳᤗᤧᤱ ᤋᤢᤘᤠ ᤆᤥᤃᤢᤱᤒᤠᤴ ᤏᤡ᤺ᤛᤢᤀᤠᤱ ᤘᤠ᤹ᤖᤥ॥
ROM 1:10 ᤛᤍᤠᤍᤡᤱ ᤀᤡᤱᤃᤠ᤹ ᤆᤥᤃᤢᤱᤒᤠ ᤋᤢᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤠᤰᤂᤣᤗ᤹ᤖᤡᤰᤛᤠᤱ ᤗᤠᤶ ᤂᤥ᤺ᤛᤢᤱᤅᤠᤱ ᤂᤡᤏᤡ᤹ᤀᤥ ᤋᤠ᤺ᤔᤠ ᤛᤢᤰᤁᤠᤖ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤁᤠᤖᤥ॥
ROM 1:11 ᤀᤡᤱᤃᤠ᤹ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥ᤺ᤰᤛᤧ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤔᤡᤴ ᤂᤡᤏᤡ᤹ᤏᤢ ᤜᤠ᤺ᤔᤠ ᤑᤠ᤹ᤀᤠᤱ ᤛᤠ᤹ᤖᤡᤰᤁᤣ ᤂᤡᤏᤡ᤹ᤏᤢ ᤋᤢᤶᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
ROM 1:12 ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤁᤧᤖᤧᤰᤗᤧ ᤏᤛᤠ᤺ᤴᤗᤠᤶᤒᤠ ᤜᤠᤱᤜᤠᤱ ᤀᤠᤔᤧᤳᤇᤡᤱᤗᤥ॥
ROM 1:13 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤀᤥ ᤋᤠ᤺ᤔᤠ ᤕᤖᤡᤰᤗᤧᤱ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤀᤠᤸᤗᤥ ᤌᤠᤖᤡᤰ ᤋᤠ᤺ᤔᤠ ᤔᤧᤴᤇᤢᤰᤐᤧᤴ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥ᤺ᤛᤧᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤀᤡᤱᤃᤠ᤹ ᤘᤣ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤂᤪᤡᤛ᤻ᤋᤀᤥ ᤋᤠᤖᤢᤱᤛᤡᤱᤒᤠ ᤜᤧᤰᤁᤣ ᤂᤡᤏᤡ᤹ᤀᤥᤗᤠᤶᤔᤠᤱ ᤕᤖᤡᤰ ᤔᤏᤠᤜᤠ᤹ ᤋᤠ᤺ᤵᤔᤠᤛᤡ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
ROM 1:14 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤠᤛᤠᤶᤒᤠᤜᤠ᤹ ᤏᤢ ᤂᤠᤛᤠᤶ ᤔᤧ᤺ᤶᤒᤠᤜᤠ᤹. ᤜᤧᤰᤁᤩᤠᤱ ᤛᤡᤰᤁᤢᤶᤛᤠᤒᤠᤜᤠ᤹ ᤏᤢ ᤛᤎ᤺ᤰᤐᤠᤜᤠ᤹. ᤁᤧᤖᤧᤰᤗᤧ ᤗᤠᤃᤡ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠᤀᤣ ᤐᤥ᤺ᤱᤗᤥ॥
ROM 1:15 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤖᤥᤶᤔᤥ ᤁᤧᤘᤠ᤹ᤒᤠᤜᤠ᤹ᤀᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠᤏᤡᤱ ᤛᤠ᤹ᤖᤡᤰ ᤀᤠᤛᤡᤰ ᤛᤔᤧᤀᤠᤱ ᤘᤠ᤹ᤖᤥ॥
ROM 1:16 ᤁᤴ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤔᤠ ᤔᤧᤏᤢ᤺ᤴᤏᤠᤴᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤠᤰ ᤔᤏᤠᤜᤠ᤹. ᤋᤃᤡ ᤕᤜᤢᤍᤡᤜᤠ᤹ ᤜᤧᤰᤁᤩᤠᤱ ᤕᤠᤱᤛᤡ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤠᤱᤛᤧ᤺ᤵᤔᤠᤛᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤥ॥
ROM 1:17 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤰᤂᤣᤗ᤹ᤖᤡᤰ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤈᤥ᤺ᤰ ᤑᤠ᤹ᤀᤠᤱ ᤁᤴ ᤛᤢᤏᤠᤀᤡᤱᤅᤡᤸᤗᤧ ᤀᤥᤛᤣ᤺ᤴᤀᤠᤎᤠᤰᤗᤥ. ᤜᤧᤰᤁᤩᤠᤱ ᤁᤱᤃ ᤏᤛᤠ᤺ᤴᤗᤠᤶ ᤜᤣ᤺ᤰᤛᤡᤱᤅᤠᤱ ᤏᤛᤠ᤺ᤴᤗᤠᤶᤒᤠᤀᤣ ᤁᤢᤗᤡᤱᤎᤥ ᤁᤧᤳᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤏᤡᤒᤠᤱᤃ ᤏᤛᤠ᤺ᤶᤗᤠᤶᤒᤠᤀᤣ ᤜᤡᤱᤗᤥ॥”
ROM 1:18 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤗᤠᤕᤥᤒᤠ ᤏᤢ ᤑᤧᤴ ᤕᤠ᤺ᤶᤒᤰᤁᤡᤸᤗᤧ ᤁᤢᤎᤡᤶᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡ ᤛᤶᤍᤠᤱ ᤆᤢᤰᤋᤧᤀᤠᤱ ᤘᤠ᤹ᤖᤥ॥ ᤜᤠᤒᤠ ᤁᤴ ᤔᤏᤠᤜᤠ᤹ᤖᤧᤀᤣ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤛᤧᤰᤂᤠ᤺ᤴ ᤌᤣ᤺ᤰᤋᤢᤀᤠᤱ ᤘᤠ᤹ᤖᤥ॥
ROM 1:19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤛᤡᤱ ᤏᤡ᤺ᤵᤔᤠ ᤁᤧᤒᤥ᤺ᤱᤒᤠ ᤁᤠᤰ ᤐᤠ᤺ᤴᤜᤠ᤹ᤃ ᤀᤠᤒᤠᤅᤣ ᤂᤧᤱᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥
ROM 1:20 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤀᤠᤱᤎᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤁᤢᤛᤢᤶᤒᤥ᤺ᤴ–ᤔᤧᤴᤏᤢᤵᤔᤏᤠᤒᤠ ᤁᤢᤔᤢᤰᤛᤠᤶ ᤏᤢ ᤏᤡᤱᤘᤠ᤹ᤑᤢᤃᤧᤴ ᤏᤥᤛᤪᤱᤅᤡᤴ–ᤏᤢ᤺ᤖᤡᤰᤁᤠᤱ ᤏᤡ᤺ᤍᤧᤳᤗᤥ॥ ᤂᤧᤱᤜᤠ᤹ᤃ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤧᤳᤋᤧᤀᤠᤅ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤴᤏᤡ᤺ᤔᤏᤠ ᤗᤠᤶᤛᤡᤱᤔᤠ ᤐᤠ᤺ᤴ ᤌᤣᤀᤠᤱ ᤜᤥ᤺ᤵᤗᤥ॥
ROM 1:21 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤛᤠᤱ ᤂᤢᤏᤧ᤹ ᤐᤡᤔᤠ ᤁᤧᤒᤥ᤺ᤱᤒᤠ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤶᤒᤡᤖᤢᤴ ᤜᤧᤰᤁᤩᤠᤱ ᤏᤥᤃᤧᤴᤏᤠᤱ ᤔᤧᤶᤒᤡᤖᤢᤴᤗᤥ॥ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤳᤇᤡᤱᤛᤠᤶᤔᤡᤴ ᤑᤧ᤺ᤳᤗᤠ᤹ᤖᤧ ᤐᤣᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤀᤍᤱ ᤏᤡᤱᤘᤠ᤹ᤀᤡᤴ ᤂᤠᤍᤠᤵᤋᤢᤀᤠᤱ ᤘᤠ᤹ᤖᤥ॥
ROM 1:22 ᤂᤧᤱᤜᤠ᤹ᤖᤧ ᤀᤠᤏᤡᤃᤧ ᤛᤡᤰᤁᤢᤶᤛᤠᤒᤠ ᤘᤕᤡᤃᤧ ᤔᤧᤗ᤹ᤛᤠᤱ ᤂᤧᤱᤜᤠ᤹ᤃ ᤀᤍᤱ ᤔᤧᤒᤥ᤺ᤰᤂᤧᤖᤥ॥
ROM 1:23 ᤂᤧᤱᤜᤠ᤹ᤖᤧ ᤀᤠᤈᤢᤏᤡᤒᤠ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤔᤠᤸᤗᤧ ᤁᤢᤗᤧᤰᤘᤠ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤔᤧᤴᤇᤠᤶ ᤕᤠᤵᤔᤡ. ᤌᤰᤛᤠ. ᤐᤢᤛᤠ ᤏᤢ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ ᤜᤧᤰᤋᤱᤒᤠ ᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤔᤧᤈᤥᤃᤢᤖᤥ॥
ROM 1:24 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤂᤢᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤒᤠᤸᤗᤧ ᤁᤥ᤺ᤳᤋᤢᤒᤠ ᤛᤡᤰᤁᤧᤗᤧ᤺ᤱᤒᤠ ᤕᤠᤰᤏᤠᤶᤔᤥᤀᤣ ᤘᤠ᤹ᤔᤠ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤡ᤹ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤥ ᤛᤡᤖᤡᤱ ᤔ᤺ᤔᤠ ᤕᤠ᤺ᤶᤒᤰ ᤔᤧᤈᤥ᤺ᤰᤛᤡᤱᤗᤥ॥
ROM 1:25 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤰᤂᤠ᤺ᤴ ᤏᤛᤠ᤺ᤴ ᤆᤥ᤺ᤰᤔᤠᤸᤗᤧ ᤁᤢᤗᤧᤰᤘᤠ ᤏᤡ᤺ᤏᤡ᤺ᤒᤠᤀᤣ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤏᤛᤠ᤺ᤴ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤧᤰᤘᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤛᤣᤘᤠ ᤔᤧᤈᤥᤃᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤛᤍᤠᤍᤡᤱ ᤏᤧᤶᤓᤥᤃᤧᤴ ᤏᤠᤖᤠ ᤑᤥ᤺ᤔᤠ ᤗᤠ᤹ᤖᤢᤖᤥ॥ ᤀᤠᤔᤧᤴ॥
ROM 1:26 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤡᤖᤡᤱ ᤀᤠᤔ᤺ᤒᤠ ᤕᤠᤶᤒᤥ᤺ᤵᤔᤠ ᤏᤡᤱᤘᤠ᤹ᤀᤥ ᤗᤧᤖᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤁᤧᤒᤥ᤺ᤱᤒᤠ ᤁᤧᤕᤢ᤺ᤒᤠ ᤁᤢᤀᤡᤛᤡ᤺ᤰ ᤕᤧᤶᤒᤡᤳᤇᤠ᤹ᤜᤠ᤹ᤏᤢ ᤀᤡᤶᤔᤠᤸᤗᤧ ᤁᤢᤗᤧᤰᤘᤠ ᤔᤧᤴᤇᤢᤔᤠᤜᤠ᤹ᤏᤢᤀᤣ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢ॥
ROM 1:27 ᤜᤧᤰᤁᤣᤗ᤹ᤖᤡᤰ ᤕᤧᤶᤒᤡᤳᤇᤠ᤹ᤜᤠ᤹ᤖᤧᤀᤠᤱ ᤁᤧᤒᤥ᤺ᤱᤒᤠ ᤁᤧᤕᤢ᤺ᤒᤠ ᤁᤢᤀᤡᤛᤡ᤺ᤰ ᤔᤧᤴᤇᤢᤔᤠᤜᤠ᤹ᤏᤢ ᤀᤡᤶᤔᤠᤸᤗᤧ ᤁᤢᤗᤧᤰᤘᤠ ᤘᤣ᤹ ᤕᤧᤶᤒᤡᤳᤇᤠ᤹ᤜᤠ᤹ᤏᤢ ᤕᤠᤶᤒᤥ᤺ᤵᤔᤠ ᤏᤡᤱᤘᤠ᤹ᤀᤡᤸᤗᤧ ᤕᤠ᤺ᤴᤍᤢᤛᤡᤀᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤃ ᤔᤧᤈᤥᤃᤢᤒᤠ ᤂᤧᤴ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧᤴ ᤂᤢᤶᤍᤡᤱ ᤀᤠᤒᤠᤅᤣ ᤌᤰᤁᤥ ᤔᤧᤄᤥ᤺ᤛᤢᤖᤥ॥
ROM 1:28 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤏᤡ᤺ᤛᤢ ᤔᤧᤎᤠ᤺ᤛᤢᤒᤠ ᤐᤠ᤺ᤴᤜᤠ᤹ ᤔᤧᤏᤠ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤑᤧᤴ ᤏᤡᤱᤘᤠ᤹ᤀᤥ ᤗᤧᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤖᤥ॥
ROM 1:29 ᤂᤧᤱᤜᤠ᤹ ᤁᤠᤰ ᤐᤖᤡᤰᤐᤠ ᤁᤢᤀᤡᤓᤧᤶᤔᤠ. ᤑᤧᤴ ᤏᤡᤱᤘᤠ᤹. ᤂᤡ᤺ᤶᤔᤠ ᤜᤧᤰᤁᤩᤠᤱ ᤆᤡ᤺ᤳᤇᤡᤱᤔᤠ. ᤏᤠᤜᤧᤶᤔᤠ. ᤔᤏᤠ ᤛᤧᤵᤔᤠ. ᤂᤣᤔᤠ ᤌᤰᤔᤠ. ᤀᤡᤱᤗᤧᤰᤔᤠ. ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤢᤰᤗ ᤆᤥ᤺ᤰᤔᤠ ᤐᤠ᤺ᤴᤜᤠ᤹ᤖᤰ ᤔᤧᤀᤡ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤏᤠ ᤁᤧᤈᤧᤱᤒᤠ.
ROM 1:30 ᤔᤏᤠ ᤆᤠ᤺ᤳᤌᤡ ᤁᤧᤍᤣ᤺ᤒᤠ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤈᤡ᤺ᤵᤐᤠ. ᤔᤏᤠ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠ. ᤀᤠᤱᤍᤡᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤁᤧᤜᤧᤴᤇᤡᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤑᤧᤴ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤁᤢᤛᤱ ᤗᤠᤶ ᤔᤧᤃᤥ᤺ᤳᤋᤢ᤹. ᤜᤧᤰᤁᤩᤠᤱ ᤔᤠᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴ ᤔᤧᤱᤄᤧᤵᤛᤢᤴ॥
ROM 1:31 ᤂᤧᤱᤜᤠ᤹ ᤀᤍᤱ ᤔᤧᤈᤥ᤺ᤰ. ᤔᤧᤈᤥᤃᤢᤒᤠ ᤔᤠᤱᤜᤧᤰᤜᤠ᤹ ᤔᤧᤱᤃᤧᤳᤋᤢᤴ. ᤔᤏᤠᤜᤠ᤹ ᤗᤢᤱᤔᤠ᤹ ᤔᤧᤴᤍᤢᤰᤋᤢᤴᤇᤡᤴ. ᤜᤧᤰᤁᤩᤠᤱ ᤂᤢᤏᤡ᤹ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤗ᤹ᤏᤧᤴᤗᤥ॥
ROM 1:32 ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤃ ᤛᤡ᤺ᤔᤧᤸᤗᤧᤴ ᤂᤢᤶᤍᤡᤱ ᤂᤥ᤺ᤔᤠ ᤗᤠ᤹ᤖᤢᤛᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤱᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤔᤧᤏᤡ᤺ᤛᤢᤛᤠᤱ ᤀᤠᤒᤠᤅᤣᤖᤰ ᤀᤰᤋᤱᤒᤠ ᤕᤠ᤺ᤶᤒᤰ ᤔᤧᤴᤈᤥᤃᤢᤴ. ᤁᤖ ᤜᤧᤰᤋᤱᤒᤠ ᤁᤧᤈᤥ᤺ᤰᤐᤠ ᤘᤣ᤹ ᤔᤏᤠᤜᤠ᤹ᤀᤠᤱ ᤏᤢ᤺ᤒᤠ ᤁᤧᤈᤥᤃᤢᤶᤗᤥ ᤔᤧᤔᤧᤳᤋᤢᤛᤡ᤹ᤖᤥ॥
ROM 2:1 ᤘᤣ᤹ᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤗᤠ᤹ᤖᤡᤃᤧ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶ. ᤁᤖ ᤂᤡᤏᤡ᤹ ᤑᤥᤋᤩᤠ ᤔᤧ᤺ᤴᤏᤣᤒᤠ ᤗᤠᤶᤛᤡᤱᤔᤠ ᤐᤠ᤺ᤴ ᤌᤣᤀᤠᤱ ᤁᤧᤱᤃᤳᤋᤢᤶᤔᤡᤴᤗᤥ. ᤌᤣᤀᤠᤱᤓᤧᤸᤗᤧ ᤌᤣ ᤐᤠ᤺ᤴᤏᤥ ᤘᤣ᤹ᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤶᤛᤡᤶ ᤜᤠᤒᤠ ᤂᤧᤴ ᤐᤠ᤺ᤴᤏᤡᤴᤏᤣ ᤂᤡᤏᤡ᤹ᤀᤠᤱ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤠᤱ ᤀᤠᤒᤠᤅᤣ ᤀᤠᤵᤋᤡᤰ ᤁᤧᤃᤢ᤺ᤳᤋᤠᤛᤡ᤹ᤖᤥ॥
ROM 2:2 ᤀᤠᤸᤗ ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡᤸᤗᤧ ᤂᤢᤏᤧ᤹ ᤛᤧᤰᤂᤠᤗᤠᤶ ᤂᤠᤛᤧᤴ ᤗᤥ᤺ᤴᤍᤢᤛᤡ᤹ ᤑᤠ᤹ᤀᤠᤱ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
ROM 2:3 ᤂᤧᤸᤗᤧ ᤆᤥᤃᤢᤸᤗᤧ ᤜᤧᤰᤋᤱᤒᤠ ᤐᤠ᤺ᤴᤏᤥ ᤂᤡᤏᤡ᤹ ᤘᤣ᤹ ᤔᤏᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤶᤛᤡᤶ. ᤁᤖ ᤀᤠᤒᤠᤅᤣᤃ ᤒᤠ ᤜᤧᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤔᤧᤒᤡᤖᤡᤃᤧᤴ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤡ᥅
ROM 2:4 ᤔᤧ᤺ᤱᤃᤪ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤴ. ᤏᤠᤛᤡ ᤁᤧᤎ᤺ᤳᤋᤡᤒᤠᤴ ᤜᤧᤰᤁᤩᤠᤱ ᤁᤢᤛᤡᤰ ᤏ᤺ᤶᤏ᤺ᤶ ᤗ᤹ᤒᤠᤴ ᤜᤏᤧ ᤁᤧᤗᤣ᤺ᤳᤋᤢᤶᤒᤡ᥅ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅
ROM 2:5 ᤁᤖ ᤂᤡᤏᤡ᤹ ᤜᤠᤍᤡᤱ ᤁᤧᤎᤰᤐᤠ ᤏᤢ ᤗᤠᤕᤥᤗᤠᤶ ᤔᤧᤴᤏᤢ᤺ᤱᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. ᤁᤢᤍᤥ᤺ᤵᤔᤠ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤔᤠ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤧᤴᤏᤡᤴ ᤁᤧᤓᤥ᤺ᤰᤂᤢᤶᤗ ᤁᤧᤘᤕᤡ᤹ᤖᤥ॥
ROM 2:6 ᤌᤣᤀᤠᤱᤓᤧᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰᤁᤣ ᤏᤢ᤺ᤰᤋᤢ ᤐᤡᤖᤢᤛᤡ᤹ᤖᤥ॥”
ROM 2:7 ᤁᤢᤓᤠ ᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤀᤠᤈᤢᤏᤡ ᤜᤡᤱᤔᤴ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢᤛᤡ᤹ᤖᤥ॥
ROM 2:8 ᤁᤖ ᤛᤧᤰᤂᤠ᤺ᤴ ᤁᤧᤏᤠ᤹ᤒᤠ. ᤀᤡᤱᤃᤠ᤹ᤖᤰ ᤆᤥᤃᤢᤱ ᤆᤠᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤑᤧᤴ ᤐᤠ᤺ᤴᤏᤥ ᤁᤧᤒᤵᤐᤠ ᤔᤏᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤂᤢᤶᤍᤡᤱ ᤐᤡᤖᤢᤛᤡ᤹॥
ROM 2:9 ᤜᤧᤰᤁᤩᤠᤱ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ. ᤋᤃᤡ ᤕᤜᤢᤍᤡᤜᤠ᤹ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤠ᤺ᤛᤢᤛᤡ᤹ᤖᤥ॥
ROM 2:10 ᤁᤖ ᤏᤢ᤺ᤒᤠ ᤐᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤛᤏᤠᤖᤢᤱᤅᤡᤴ ᤔᤧᤄᤥ᤺ᤛᤢ᤹–ᤋᤃᤡ ᤕᤜᤢᤍᤡᤜᤠ᤹ᤖᤧ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤔᤧᤄᤥ᤺ᤛᤢ᤹ᤖᤥ॥
ROM 2:11 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤣ᤺ᤰᤐᤀᤣ᤺ᤰ ᤔᤧᤈᤥᤃᤢᤴᤇᤡᤴᤗᤥ॥
ROM 2:12 ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶ ᤔᤧᤱᤃᤳᤋᤢᤴᤇᤠᤱ ᤗᤠᤕᤥ ᤔᤧᤈᤥᤃᤢᤸᤗᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤡᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤃᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤸᤗᤧ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤁᤣ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥
ROM 2:13 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤂᤧᤶᤔᤠᤀᤠᤱᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤀᤠᤶᤒᤥ᤺ᤱᤏᤧᤴ. ᤁᤖ ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤏᤡᤒᤠ ᤀᤠᤗᤣ᤺ᤳᤗᤥ॥
ROM 2:14 (ᤜᤧᤰᤁᤣᤗ᤹ᤖᤡᤰᤁᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤱᤃᤳᤋᤢᤴ ᤁᤖ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤔᤧᤈᤥᤃᤢᤸᤗᤧ ᤀᤠᤶᤓᤠᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥
ROM 2:15 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤛᤠᤶᤕᤥᤌᤡᤶᤔᤡᤴ ᤛᤠᤵᤋᤧᤀᤠᤱ ᤐᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤔᤧᤈᤥᤃᤢ᤹ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤂᤠᤛᤡᤱᤅᤡᤸᤗᤧ ᤂᤧᤱᤜᤠ᤹ ᤁᤢᤓᤠ ᤕᤧᤶᤔᤥ ᤀᤠᤵᤋᤡᤰ ᤁᤢ᤺ᤳᤋᤢᤛᤡ᤹ ᤜᤧᤰᤁᤩᤠᤱ ᤁᤢᤓᤠ ᤕᤧᤶᤔᤥ ᤏᤠᤅᤢᤛᤡ᤹ᤖᤥ॥)
ROM 2:16 ᤁᤴ ᤐᤠ᤺ᤴᤜᤠ᤹ᤃ ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤂᤠᤛᤧᤴ ᤆᤥᤃᤢᤒᤠ ᤕᤧᤴᤏᤥ ᤐᤥ᤺ᤱᤗᤥ॥
ROM 2:17 ᤁᤖ ᤀᤡᤱᤃᤠ᤹ ᤕᤜᤢᤍᤡᤀᤠᤖᤥ ᤁᤧᤒᤠ᤺ᤳᤋᤢᤀᤠᤱ ᤛᤠᤶᤕᤥᤌᤡᤶᤔᤡᤴ ᤏᤡᤱᤘᤠ᤹ ᤀᤡᤖᤧ ᤂᤥ᤺ᤵᤋᤢᤖ ᤁᤧᤈᤥᤃᤢ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤱ ᤑᤠ᤹ᤀᤠᤱ ᤀᤠᤱᤍᤡᤱ ᤁᤧᤗ᤹.
ROM 2:18 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤡᤴ ᤁᤧᤏᤡ᤺ᤛᤢ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤜᤢ᤹ᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤛᤣ᤺ᤰᤔᤠ ᤁᤧᤛᤢᤰᤋᤢ᤹.
ROM 2:19 ᤜᤧᤰᤁᤩᤠᤱ ᤔᤡᤰᤑ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥ᤺ᤒᤠ ᤏᤢ ᤂᤠᤍᤠᤶᤔᤠᤗᤢᤶᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤀᤥ᤺ᤳᤋᤡᤀᤠ ᤑᤠ᤹ᤀᤠᤱ ᤏᤡᤛ᤻ᤛᤣ ᤁᤧᤈᤥᤃᤢᤀᤠᤱ ᤁᤧᤘᤠ᤹.
ROM 2:20 ᤀᤍᤱᤜᤠ᤹ᤖᤧ ᤂᤢᤏᤡ᤹ ᤛᤢᤈᤠᤍᤠᤱᤒᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤸᤗᤧ᤺ᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤛᤠᤶᤒᤠᤀᤠ ᤗ᤹ᤖᤡᤰ ᤁᤧᤀᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠᤶᤕᤥᤌᤡᤶᤔᤥ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤜᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢ᤹ᤖᤥ॥
ROM 2:21 ᤜᤧᤰᤁᤣᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤁᤧᤜᤢ᤹ᤖᤢᤛᤡᤀᤠᤱ ᤌᤣᤀᤠᤱ ᤀᤠᤒᤠᤅᤣ ᤁᤧᤴᤜᤢ᤹ᤛᤡᤱᤅᤡᤴᤒᤣ᥅ ᤂᤢ᤺ᤶᤔᤠ ᤔᤧ᤺ᤴ ᤗ᤹ᤖᤡᤰ ᤀᤡᤱᤃᤧᤓᤥ᤺ᤛᤢᤀᤠᤱ ᤁᤧᤄᤢ᤺ᤴᤒᤡ᥅
ROM 2:22 ᤂᤧᤏᤧ᤹ ᤘᤣ᤹ᤜᤠ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤀᤠᤱ ᤀᤠᤒᤠᤅᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤡ᥅ ᤏᤠᤘᤠᤀᤡᤳᤗᤠᤜᤠ᤹ ᤀᤠᤛᤡᤰᤔᤧᤗᤧ᤺ᤱ ᤁᤧᤒᤠ᤺ᤳᤋᤢᤀᤠᤱ ᤏᤠᤘᤠᤀᤡᤳᤗᤠ ᤁᤧᤕᤢᤱᤒᤠ ᤔᤠᤱᤜᤡᤶᤔᤥ ᤔᤧᤍᤥ᤺ᤴᤍᤢᤒᤠ ᤕᤠᤱᤅᤡᤴ ᤁᤧᤄᤢ᤺ᤳᤋᤢ᤹ᤒᤡ᥅
ROM 2:23 ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤗᤧᤛ᤻ᤛᤢᤱ ᤗ᤹ᤖᤡᤰ ᤀᤠᤱᤍᤡᤱ ᤁᤧᤗ᤹. ᤁᤖ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤴᤍᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤁᤧᤍᤣ᤺ᤛᤢᤖᤥ॥
ROM 2:24 ᤛᤠᤶᤕᤥᤛᤠᤵᤗᤠᤀᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤠ᤺ᤳᤌᤡ ᤐᤣᤀᤠᤱ ᤘᤠ᤹ᤖᤥ॥”
ROM 2:25 ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢ᤹ᤏᤧ ᤑᤠ᤹ᤃᤪ ᤜᤷᤍᤥ ᤁᤧᤜᤧᤃᤢᤒᤠᤴ ᤏᤢ᤺ᤒᤠᤀᤣ ᤐᤥ᤺ᤱᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤁᤧᤓᤣ᤺ᤴᤍᤢᤏᤧ ᤑᤠ᤹ᤃᤪ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤁᤧᤒᤥ᤺ᤱᤗᤥ॥
ROM 2:26 ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤔᤧᤀᤡ᤺ᤳᤋᤢ᤹ ᤔᤧᤏᤠ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤜᤷᤍᤥ ᤁᤧᤜᤧᤰᤐᤠ ᤜᤧᤰᤁᤣᤀᤣ ᤀᤡ᤺ᤳᤋᤢᤛᤡ᤹ᤖᤥ॥
ROM 2:27 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤛᤠᤶᤕᤥᤌᤡᤶ ᤏᤢ ᤜᤷᤍᤥ ᤜᤧᤰᤔᤠ ᤌᤡᤶ ᤁᤧᤃᤵᤐᤠᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤶᤒᤠ ᤕᤜᤢᤍᤡᤛᤣ. ᤏᤠᤛᤡᤱᤃᤧᤴ ᤌᤰᤁᤥ ᤜᤷᤍᤥ ᤜᤧᤰᤔᤠ ᤌᤡᤶ ᤔᤧᤱᤃᤵᤔᤏᤠ ᤁᤖ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤗᤠ᤹ᤖᤡᤒᤠ ᤀᤠᤵᤋᤡᤰᤁᤡᤴ ᤁᤧᤶᤃᤢ᤺ᤳᤋᤡ᤹ᤖᤥ॥
ROM 2:28 ᤕᤜᤢᤍᤡ ᤌᤡᤶᤔᤡᤸᤗᤰ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤧᤴ ᤛᤧᤰᤂᤠᤒᤠ ᤕᤜᤢᤍᤡ ᤔᤧ᤺ᤴ. ᤜᤧᤰᤁᤩᤠᤱ ᤜᤷᤍᤥ ᤜᤧᤰᤔᤠᤱᤃ ᤗᤠ᤺ᤰᤁᤠᤳᤐᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤐᤠ᤺ᤴᤗᤰᤗᤥ॥
ROM 2:29 ᤁᤖ ᤛᤧᤰᤂᤠᤒᤠ ᤕᤜᤢᤍᤡᤃ ᤏᤡᤱᤘᤠ᤹ᤀᤥᤏᤢ ᤐᤥ᤺ᤱᤔᤠ ᤐᤥ᤺ᤱ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤜᤷᤍᤥ ᤜᤧᤰᤔᤠᤱᤃ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤐᤠ᤺ᤴ ᤔᤧ᤺ᤴ. ᤁᤖ ᤛᤡᤰᤗᤢᤱᤔᤥ ᤛᤣᤛᤣᤔᤠᤱᤅᤡᤸᤗᤧ ᤆᤥᤃᤢᤒᤠ ᤐᤠ᤺ᤴᤗᤥ॥ ᤜᤧᤰᤋᤱᤒᤠ ᤔᤏᤠ᤺ᤴ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖᤥ॥
ROM 3:1 ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤐᤥ᤺ᤱᤔᤠᤸᤗᤧ ᤌᤣ ᤀᤡᤴᤎᤠ᤺ᤰ ᤘᤠ᤹ᤒᤣ᥅ ᤜᤷᤍᤥ ᤜᤧᤰᤔᤠ ᤕᤜᤢᤍᤡ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤸᤗᤧ ᤌᤣ ᤐᤥ᤺ᤱᤒᤣ᥅
ROM 3:2 ᤛᤧᤰᤂᤠ᤺ᤸᤗᤧ ᤕᤜᤢᤍᤡ ᤐᤥ᤺ᤱᤔᤠᤸᤗᤧ ᤁᤧᤖᤧᤰ ᤐᤖᤡᤰᤗᤧᤴ ᤏᤢ᤺ᤒᤠ ᤐᤠ᤺ᤴᤜᤠ᤹ ᤘᤠ᤹ᤖᤥ᥄ ᤁᤠᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤐᤠ᤺ᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡᤜᤠ᤹ ᤏᤠᤛᤠ᤹ᤖᤢᤛᤡᤀᤠᤱ ᤁᤢᤒᤠ᤺ᤴᤈᤠᤰᤁᤡᤸᤗᤧᤴ ᤗᤰᤐᤧᤴ ᤐᤡᤖᤢᤛᤡᤀᤠᤱ ᤘᤠ᤹॥
ROM 3:3 ᤂᤧᤱᤜᤠ᤹ ᤁᤢᤓᤠ ᤏᤛᤠ᤺ᤴᤛᤠᤒᤠ ᤔᤧᤴᤈᤥ᤺ᤰᤏᤧᤴᤇᤠᤱ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤂᤧᤱᤜᤠ᤹ ᤏᤛᤠ᤺ᤴᤛᤠᤒᤠ ᤔᤧᤴᤈᤥ᤺ᤰᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤔᤧᤃᤧᤳᤋᤢᤶᤒᤡ᥅
ROM 3:4 ᤔᤧ᤺ᤴᤗᤥ᥄ ᤁᤧᤖᤧᤰ ᤔᤏᤠᤜᤠ᤹ ᤀᤡᤱᤗᤧᤰᤐᤠ ᤔᤧᤈᤥ᤺ᤰᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤒᤠ ᤆᤥ᤺ᤰᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤏᤡ᤺ᤍᤧᤳᤗᤥ. ᤜᤧᤰᤁᤩᤠᤱ ᤂᤠᤛᤧᤴ ᤐᤥ᤺ᤱᤅᤡᤸᤗᤧ ᤂᤧᤏᤧ᤹ᤀᤣ ᤁᤧᤏᤠ᤺ᤴᤍᤢ᤹ᤖᤥ॥”
ROM 3:5 ᤁᤖ ᤁᤢᤓᤠᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ᤀᤠᤏᤡ᤹ ᤗᤠᤕᤥ ᤀᤠᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤏᤡᤔᤠᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤧᤳᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤂᤢᤶᤍᤡᤱ ᤀᤠᤒᤡ᤺ᤸᤗᤧ ᤂᤢᤏᤧ᤹ ᤑᤧᤴ ᤕᤠ᤺ᤶᤒᤰ ᤆᤥᤃᤢᤒᤠ ᤐᤥ᤺ᤱᤒᤡ᥅ (ᤀᤡᤱᤃᤠ᤹ ᤁᤢᤓᤠ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰ ᤐᤠ᤺ᤳᤋᤠᤒᤠᤖᤥ॥)
ROM 3:6 ᤛᤧᤰᤂᤠᤛᤠᤱ ᤔᤧ᤺ᤴᤗᤥ᥄ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤏᤡᤒᤠ ᤔᤧᤈᤥ᤺ᤰᤏᤧᤴᤏᤡᤸᤗᤧᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤠᤛᤧᤴ ᤆᤥ᤺ᤰᤔᤠ ᤔᤧᤕᤠᤖᤢᤴᤗᤥ᥄
ROM 3:7 ᤁᤢᤓᤠᤖᤧ ᤔᤧᤒᤠ᤺ᤳᤋᤢᤒᤡᤗᤠ. “ᤀᤡᤱᤃᤠ᤹ ᤀᤠᤀᤡᤱᤗᤧᤰᤁᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤰᤂᤠ᤺ᤴ ᤏᤢ ᤁᤢᤔᤡᤔᤡᤍᤡᤱᤅᤡᤴ ᤑᤥ᤺ᤛᤢ᤹ᤏᤧ ᤑᤠ᤹ᤃᤪ ᤌᤣᤀᤠᤱ ᤀᤠᤸᤗᤛᤠᤱ ᤗᤠᤕᤥᤒᤠ ᤁᤢᤀᤡᤛᤡ᤺ᤰ ᤀᤠᤵᤋᤡᤰ ᤁᤢ᤺ᤳᤋᤠᤒᤠᤒᤣ᥅”
ROM 3:8 ᤏᤢ᤺ᤒᤠ ᤐᤠ᤺ᤴ ᤗ᤺ᤴᤗ ᤑᤠ᤹ᤀᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤶ ᤗ᤹ᤖᤡᤰ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧ᤹ᤔᤢ ᤑᤠ᤹ᤀᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤐᤠ᤺ᤴ ᤔᤧᤎᤡᤰᤋᤡᤃᤧ᤹ᤖᤥ॥ ᤜᤧᤰᤁᤣ ᤁᤧᤒᤠ᤺ᤵᤐᤠᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠ ᤗᤠ᤹ᤖᤢᤛᤡᤖᤥ॥
ROM 3:9 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤕᤜᤢᤍᤡᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤏᤢ᤺ᤒᤠ ᤀᤠᤈᤥ᤺ᤰᤐᤡ᥅ ᤛᤧᤰᤂᤠᤛᤠᤱ ᤀᤠᤴᤈᤥ᤺ᤰᤏᤧᤴᤗᤥ᥄ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤗᤠᤕᤥ᤺ᤸᤗᤧ ᤋᤧᤳᤋᤢᤛᤡᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤳᤋᤢᤱ ᤛᤢᤖᤢᤱᤛᤡᤱᤅᤠᤱ ᤘᤠ᤹ᤖᤥ॥
ROM 3:10 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤏᤡᤒᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ. ᤗᤳᤌᤡᤰᤁᤠᤱ ᤜᤥ᤺ᤵᤗᤥ॥
ROM 3:11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤃᤥ᤺ᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥
ROM 3:12 ᤁᤧᤖᤧᤰᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤗᤧᤖᤢ ᤔᤧᤍᤣ᤺ᤛᤢᤀᤠᤱ ᤌᤣᤏᤠᤎᤣᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ. ᤗᤳᤌᤡᤰᤁᤠᤱ ᤜᤥ᤺ᤵᤗᤥ॥”
ROM 3:13 “ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤛᤢᤳᤗᤠ᤺ᤱᤃ ᤜᤱᤒᤧᤳ ᤁᤧᤒᤵᤐᤠ ᤀᤡᤵᤐᤢᤱᤅᤥᤗᤠᤶ ᤁᤧᤗ᤺ᤶᤒᤠ ᤏᤠᤶᤃᤧᤛᤢᤒᤠ ᤁᤢᤏᤠᤶ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤱᤜᤠ᤹ ᤀᤡᤱᤗᤧᤰᤗᤰ ᤔᤧᤒᤠ᤺ᤳᤗᤥ॥” “ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤠᤰ ᤐᤠ᤺ᤴᤏᤡᤱᤃ ᤀᤛᤣ᤺ᤰᤐᤠᤸᤗᤧ ᤁᤢᤏᤡᤱᤅᤡᤴ ᤜᤧᤰᤋᤱᤒᤠ ᤆᤥ᤺ᤰᤗᤥ॥”
ROM 3:14 “ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤀᤥᤗᤠᤶ ᤛᤠᤱᤃᤪᤠ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤗᤰ ᤗ᤺ᤴᤗᤥ॥”
ROM 3:15 “ᤂᤧᤱᤜᤠ᤹ᤃ ᤔᤏᤠ ᤛᤧᤵᤔᤠ ᤕᤠ᤺ᤶᤒᤰᤁᤥ ᤜᤠᤖᤠ ᤕᤠᤖᤡᤵ ᤔᤧᤒᤥ᤺ᤱᤗᤥ.
ROM 3:16 ᤂᤧᤱᤜᤠ᤹ ᤀᤠᤳᤋᤡ ᤔᤧᤒᤣ᤺ᤰᤛᤠᤱ ᤔᤧᤶᤓᤤ ᤏᤢ ᤋᤢᤰᤂᤣ ᤗᤠᤰᤂᤣ ᤔᤧᤍᤠᤖᤢ᤹.
ROM 3:17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤏᤠᤖᤢᤱᤅᤥ ᤀᤠᤰᤂᤣᤗ᤹ᤖᤡᤰ ᤘᤠ᤹ᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤔᤧᤴᤏᤡ᤺ᤛᤢᤴᤗᤥ॥”
ROM 3:18 “ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤡ᤺ᤖᤢᤴᤗᤥ॥”
ROM 3:19 ᤀᤠᤸᤗ ᤛᤠᤶᤕᤥᤌᤡᤶᤔᤡᤱᤃ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤁᤧᤘᤠ᤹ᤒᤠᤜᤠ᤹ᤀᤣ ᤐᤡᤖᤢᤛᤡᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤗᤧᤱᤛᤡᤱᤔᤠ ᤔᤧᤱᤄᤥ᤺ᤏᤧᤴᤏᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤠᤛᤧᤴᤏᤥ ᤕᤧᤵᤔᤠ ᤐᤥ᤺ᤱᤗᤥ॥
ROM 3:20 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤳᤋᤡᤴᤏᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤶᤒᤥ᤺ᤱᤏᤧᤴᤗᤥ॥ ᤛᤠᤶᤕᤥᤌᤡᤶᤔᤡᤸᤗᤧᤃ ᤀᤠᤏᤡ᤹ ᤗᤠᤕᤥ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴ ᤀᤠᤎᤠᤰᤗᤥ॥
ROM 3:21 ᤁᤖ ᤀᤠᤸᤗ ᤛᤠᤶᤕᤥᤌᤡᤶ ᤔᤧ᤺ᤴᤏᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡᤀᤠᤱ ᤘᤠ᤹ ᤁᤧᤗ᤹ᤒᤠ ᤗᤠᤶᤔᤡᤴ ᤂᤥᤍᤧᤳᤋᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ॥
ROM 3:22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡᤒᤠ ᤁᤴ ᤗᤠᤶᤔᤡᤱᤃ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤏᤛᤠ᤺ᤴᤗᤠᤶᤔᤣ ᤂᤥ᤺ᤍᤧᤳᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱ ᤗ᤹ᤖᤡᤰ ᤔᤧᤛᤧᤴᤍᤢᤴᤇᤡᤴᤗᤥ.
ROM 3:23 ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤁᤢᤗᤡᤱᤎᤥ ᤔᤧᤱᤃᤧᤳᤏᤧᤴᤗᤥ॥
ROM 3:24 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶ ᤀᤠᤏᤡ᤹ ᤗᤠᤕᤥᤀᤥᤏᤢ ᤀᤠᤎᤧ᤹ᤖᤧᤀᤠᤱ ᤀᤠᤶᤓᤠ ᤀᤠᤏᤡ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤈᤥᤃᤧᤀᤠᤱ ᤘᤠ᤹ᤖᤥ॥
ROM 3:25 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤂᤢᤶᤍᤡᤱᤗᤠᤶ ᤋᤠᤱᤃᤧᤛᤧ᤺ᤵᤐᤠ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤂᤪᤡᤛ᤻ᤋᤧᤴ ᤐᤠᤱᤄᤢᤕᤢ᤺ᤛᤢ॥ ᤂᤢᤏᤧ᤹ ᤁᤢᤔᤠᤰᤂᤡ᤹ᤀᤡᤴ ᤀᤠᤏᤡ᤹ ᤗᤠᤃᤡ ᤘᤠᤍᤣ᤺ᤴᤍᤢᤒᤠ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥ᤺ᤛᤢ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤀᤠᤱ ᤀᤠᤒᤠᤅᤣ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤆᤥ᤺ᤰ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤡᤱ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴ ᤕᤢ᤺ᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤁᤢᤛᤡᤰᤁᤡᤴ ᤌᤖᤢᤀᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥ᤺ᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤴᤇᤡᤴᤗᤥ॥
ROM 3:26 ᤜᤧᤰᤁᤣ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤛᤠᤶᤕᤥᤏᤡᤒᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤆᤥ᤺ᤰ ᤁᤧᤗ᤹ᤒᤠ ᤁᤴ ᤕᤧᤶᤔᤥ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤆᤥᤃᤢ᤹॥
ROM 3:27 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤌᤧᤔᤠᤀᤥ ᤀᤠᤱᤍᤡᤱ ᤗ᤹ᤔᤏᤠᤒᤠᤒᤣ᥅ ᤌᤧᤔᤠ ᤐᤠ᤺ᤴᤏᤥᤀᤠᤱ ᤔᤧ᤺ᤴᤗᤥ᥄ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤠᤶᤕᤥᤌᤡᤶ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱ ᤔᤧ᤺ᤴ. ᤁᤖ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤀᤠᤈᤥᤃᤢᤶᤔᤠᤱᤗᤰ ᤀᤠᤏᤡ᤹ ᤛᤠᤶᤕᤥᤏᤡᤒᤠ ᤀᤠᤒᤥ᤺ᤱ॥
ROM 3:28 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱᤃ ᤔᤧ᤺ᤴ. ᤁᤖ ᤏᤛᤠ᤺ᤴᤗᤠᤶᤔᤣ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤱᤗᤥ॥
ROM 3:29 ᤛᤧᤰᤂᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤜᤢᤍᤡᤜᤠ᤹ᤖᤧᤴᤗᤰ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤒᤡ᥅ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤔᤧ᤺ᤶᤒᤡ᥅ ᤛᤧᤰᤂᤠᤛᤠᤱ ᤂᤧᤱᤜᤠ᤹ᤖᤧᤴᤏᤠᤱᤗᤥ.
ROM 3:30 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤗᤳᤇᤠᤖᤰ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤧᤵᤔᤠᤱ ᤂᤢᤏᤡ᤹ ᤏᤛᤠ᤺ᤴᤗᤠᤶᤔᤣ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡ᤹ᤖᤥ॥
ROM 3:31 ᤀᤠᤏᤡ᤹ ᤏᤛᤠ᤺ᤴᤗᤠᤶ ᤛᤠᤶᤕᤥᤌᤡᤶᤔᤡᤴ ᤂᤠᤖᤥ᤺ᤳᤋᤡ ᤀᤠᤈᤥᤃᤢᤶᤒᤡ᥅ ᤛᤧᤰᤂᤠᤛᤠᤱ ᤔᤧ᤺ᤴᤗᤥ᥄ ᤂᤧᤸᤗᤧ ᤁᤢᤗᤧᤰᤘᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤥ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤁᤢᤈᤧᤰᤐᤠ ᤐᤠ᤺ᤴᤜᤠ᤹ ᤀᤠᤃᤧᤳᤋᤢᤶᤗᤥ॥
ROM 4:1 ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤏᤡ᤹ ᤕᤜᤢᤍᤡᤜᤠ᤹ᤖᤧ ᤐᤠᤎᤧᤒᤠ ᤀᤒᤪᤠᤜᤠᤔᤖᤧ ᤏᤡ᤺ᤛᤢ ᤌᤠ᤺ᤛᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣ ᤐᤠ᤺ᤵᤔᤠᤒᤣ᥅
ROM 4:2 ᤛᤧᤰᤂᤠᤀᤣ ᤀᤒᤪᤠᤜᤠᤶᤔᤡᤱᤃ ᤂᤢᤏᤧ᤹ ᤆᤥᤃᤢᤒᤠ ᤏᤢ᤺ᤒᤠ ᤕᤠ᤺ᤶᤒᤰᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤧᤀᤠᤱ ᤘᤕᤧᤸᤗᤧᤃ ᤀᤠᤱᤍᤡᤱ ᤗ᤹ᤔᤠ ᤛᤢᤰᤋᤢᤒᤠᤔᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤃ ᤔᤧ᤺ᤴᤗᤥ.
ROM 4:3 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤸᤗᤧᤃ ᤀᤰᤂᤣᤏᤧ ᤐᤠ᤺ᤳᤋᤢ᤹ᤖᤥ. “ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤖᤥ॥”
ROM 4:4 ᤀᤠᤸᤗ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤁᤢᤏᤠᤶᤕᤠᤰᤁᤡᤴ ᤗᤢᤱᤔᤠ᤹ ᤋᤢᤰᤔᤠᤗᤠᤶ ᤂᤥ᤺ᤛᤢᤒᤠ ᤔᤧ᤺ᤴ. ᤁᤖ ᤂᤧᤱᤃ ᤂᤢᤏᤧ᤹ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤁᤢᤗᤰᤗᤥ॥
ROM 4:5 ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤀᤠᤒᤠᤅᤣ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤔᤧ᤺ᤴ. ᤁᤖ ᤗᤠᤕᤥᤒᤠ ᤔᤏᤠ᤺ᤴ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤸᤗᤧ ᤏᤛᤠ᤺ᤴ ᤆᤥᤃᤢᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤖᤥ॥
ROM 4:6 ᤍᤠᤀᤢᤍ ᤜᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤒᤠ ᤔᤏᤠ᤺ᤴ ᤀᤠᤰᤂᤧᤴ ᤔᤢ᤹ᤀᤡᤛᤠᤒᤠᤒᤣ ᤑᤠ᤹ᤀᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.
ROM 4:7 “ᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥ᤺ᤒᤠᤜᤠ᤹. ᤂᤢᤏᤡ᤹ ᤗᤠᤕᤥ᤺ᤴ ᤋᤧᤵᤋᤧᤀᤠᤱ ᤁᤧᤘᤠ᤹ᤒᤠᤜᤠ᤹ᤃ. ᤔᤢ᤹ᤀᤡᤛᤠᤒᤠᤛᤡᤖᤥ॥
ROM 4:8 ᤀᤠᤳᤋᤡᤸᤗᤧ ᤁᤢᤗᤠᤕᤥ᤺ᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤄᤠᤖᤥ᤺ᤳᤋᤥᤗᤠᤶ ᤋᤢᤃᤢᤍᤣ᤺ᤛᤢᤀᤠᤱ ᤘᤠ᤹. ᤂᤧᤴ ᤔᤏᤠ᤺ᤴ ᤔᤢ᤹ᤀᤡᤛᤠᤒᤠᤖᤥ॥”
ROM 4:9 ᤁᤴ ᤔᤢ᤹ᤀᤡᤛᤠᤶᤔᤡᤱᤃ ᤜᤷᤍᤥ ᤁᤧᤜᤧᤰᤐᤠ ᤕᤜᤢᤍᤡᤜᤠ᤹ᤖᤧ ᤗᤠᤃᤡᤖᤰ ᤔᤧ᤺ᤴ. ᤁᤖ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤌᤡᤶᤔᤧᤴᤍᤱ ᤛᤢᤘᤠᤜᤠ᤹ᤖᤧ ᤗᤠᤃᤡᤀᤠᤱᤗᤥ॥ ᤀᤒᤪᤠᤜᤠᤔᤖᤧ ᤆᤥᤃᤢᤒᤠ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤀᤠᤱ ᤘᤕᤧ ᤗ᤹ᤖᤡᤰ ᤀᤠᤏᤡᤃᤧᤃ ᤐᤠ᤺ᤳᤋᤢᤶᤒᤧᤖ ᤘᤕᤡᤃᤧᤖᤥ॥
ROM 4:10 ᤁᤖ ᤀᤠᤵᤑᤠᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗ᤹ᤖᤡᤰ ᤗᤣ᤺ᤳᤋᤧᤒᤣ᥅ ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤜᤷᤍᤥ ᤜᤧᤰᤔᤠᤏᤢ᤺ᤸᤗᤧ ᤋᤃᤡᤒᤡ ᤀᤡ ᤕᤠᤱᤛᤡ ᤐᤥ᤺ᤰᤂᤧᤒᤠᤒᤡ᥅ ᤛᤧᤰᤂᤠᤀᤣ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤧᤒᤠᤃ ᤋᤃᤡᤀᤣᤖᤥ॥
ROM 4:11 ᤀᤒᤪᤠᤜᤠᤔᤖᤧ ᤂᤥ᤺ᤛᤢᤒᤠ ᤁᤴ ᤜᤷᤍᤥ ᤜᤧᤰᤔᤠ ᤌᤡᤶᤔᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢᤀᤠᤱ ᤘᤕᤧᤸᤗᤧ ᤜᤷᤍᤥ ᤔᤧᤴᤜᤧᤰᤁᤣᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤔᤡᤰᤛᤣ᤺ᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤒᤪᤠᤜᤠᤶᤔᤡᤴ ᤜᤷᤍᤥ ᤔᤧᤴᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤖᤥ॥ ᤂᤧᤱᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤛᤡ᤹ᤖᤥ॥
ROM 4:12 ᤀᤒᤪᤠᤜᤠᤶᤔᤡᤱᤃ ᤜᤷᤍᤥ ᤁᤧᤜᤧᤰᤐᤠᤜᤠ᤹ᤖᤧᤴᤏᤠᤱ ᤂᤢᤏᤡ᤹ ᤐᤠ᤺ᤖᤥ. ᤁᤖ ᤜᤷᤍᤥ ᤁᤧᤜᤧᤰᤐᤠᤀᤠᤱ ᤀᤒᤪᤠᤜᤠᤔᤖᤧ ᤜᤷᤍᤥ ᤜᤧᤰᤔᤠᤏᤢ᤺ᤸᤗᤧ ᤋᤃᤡ ᤁᤳᤋᤢᤒᤠ ᤁᤢᤀᤡᤛᤡ᤺ᤰ ᤏᤛᤠ᤺ᤴ ᤁᤧᤃᤵᤐᤠᤜᤠ᤹ᤖᤧᤴᤗᤰ ᤂᤢᤏᤡ᤹ ᤐᤠ᤺ᤖᤥ॥
ROM 4:13 ᤀᤒᤪᤠᤜᤠᤶᤔᤡᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢᤒᤠᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤰᤂᤧᤒᤠᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤗᤰ ᤁᤧᤄᤥ᤺ᤛᤢᤶ ᤁᤧᤗ᤹ᤒᤠ ᤔᤠᤱᤜᤧᤰᤁᤡᤴ ᤀᤒᤪᤠᤜᤠᤶᤔᤡᤴᤏᤢ ᤆᤥᤃᤢᤒᤠᤖᤥ॥
ROM 4:14 ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤑᤠ᤹ᤀᤠᤱ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤗᤰ ᤔᤧᤄᤥ᤺ᤛᤢ᤹ᤏᤧ ᤑᤠ᤹ᤃᤪ ᤏᤛᤠ᤺ᤴᤏᤡᤴ ᤜᤏᤧᤒᤠ ᤐᤥ᤺ᤱ ᤜᤧᤰᤁᤩᤠᤱ ᤂᤧᤴ ᤔᤠᤱᤜᤧᤰᤁᤡᤴᤏᤠᤱ ᤜᤏᤧᤒᤠ ᤐᤥ᤺ᤱᤗᤥ॥
ROM 4:15 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤁᤧᤓᤣ᤺ᤶᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡ᤹ᤖᤥ. (ᤛᤠᤶᤕᤥᤌᤡᤶ ᤜᤥ᤺ᤵᤐᤡᤸᤗᤧᤖᤰ ᤗᤠᤕᤥ᤺ᤴ ᤜᤥ᤺ᤵᤗᤥ)॥
ROM 4:16 ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤔᤠᤱᤜᤧᤰᤁᤡᤱᤃ ᤏᤛᤠ᤺ᤴᤗᤠᤶ ᤋᤠ᤺ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤀᤠᤶᤓᤠ ᤀᤠᤒᤡ᤹ᤖᤥ॥ ᤜᤧᤰᤁᤩᤠᤱ ᤛᤠᤶᤕᤥᤌᤡᤶ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱ ᤔᤧ᤺ᤴ. ᤁᤖ ᤀᤒᤪᤠᤜᤠᤶᤔᤡᤸᤗᤧ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤏᤛᤠ᤺ᤴ ᤀᤠᤈᤥᤃᤢᤶᤏᤧ ᤑᤠ᤹ᤃᤪ ᤁᤴ ᤔᤠᤱᤜᤧᤰᤁᤡᤴ ᤀᤠᤄᤥ᤺ᤛᤢᤶ ᤁᤧᤗ᤹ᤒᤠ ᤏᤡ᤺ᤴᤎᤥ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤀᤒᤪᤠᤜᤠᤶᤔᤡᤱᤃ ᤀᤠᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧᤴ ᤐᤠ᤺ᤖᤥ॥
ROM 4:17 ᤛᤠᤶᤕᤥᤛᤠᤵᤗᤠᤀᤥ ᤀᤒᤪᤠᤜᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤧᤏᤧ᤹ᤃ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ ᤆᤥ᤺ᤰᤏᤧᤀᤠᤱ ᤘᤠ᤹॥” ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤏᤡ᤹ ᤁᤧᤖᤧᤰᤗᤧᤴ ᤐᤠ᤺ ᤐᤥ᤺ᤰᤂᤧ. ᤁᤧᤛᤡ᤺ᤒᤠᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤏᤢ ᤁᤧᤜᤥ᤺ᤵᤐᤠ ᤐᤠ᤺ᤴᤜᤠ᤹ᤀᤥᤗᤠᤶ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤒᤪᤠᤜᤠᤔᤖᤧ ᤏᤛᤠ᤺ᤴ ᤆᤥᤃᤢᤖᤥ॥
ROM 4:18 ᤏᤡᤱᤛᤠᤱ ᤆᤥ᤺ᤰᤔᤠ ᤛᤢᤰᤔᤧᤴᤍᤧᤵᤔᤏᤠ ᤘᤕᤧᤛᤠᤱ ᤀᤒᤪᤠᤜᤠᤔᤖᤧ “ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤣ᤺ᤶᤛᤡᤰᤐᤠ ᤁᤢᤀᤡᤛᤡ᤺ᤰ ᤕᤖᤡᤰ ᤔᤧᤒᤥ᤺ᤱᤗᤥ” ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤳᤋᤢᤒᤠ ᤐᤠ᤺ᤴᤏᤡᤸᤗᤧᤴ ᤏᤡᤱᤛᤠᤱ ᤆᤥᤃᤢᤀᤠᤱ ᤏᤛᤠ᤺ᤴ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤐᤠ᤺ ᤐᤥ᤺ᤰᤂᤧᤖᤥ॥
ROM 4:19 ᤂᤢᤏᤧ᤹ ᤋᤱᤒᤣ ᤁᤡᤵᤌᤡᤰ (᥇᥆᥆) ᤕᤠᤖᤡᤰ ᤁᤧᤖᤧᤀᤠᤱ ᤕ᤺ᤖᤧᤒᤣᤀᤠᤱ ᤘᤕᤧ. ᤜᤧᤰᤁᤩᤠᤱ ᤁᤢᤔᤣ᤺ᤳ ᤛᤠᤖᤠ᤺ᤴᤏᤠᤱ ᤛᤠᤔᤢ᤹ᤀᤡ ᤂᤰᤋᤧᤀᤠᤱ ᤆᤵᤋᤧᤒᤣᤀᤠᤱ ᤘᤕᤧᤛᤠᤱ ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤴ ᤀᤕᤠᤰ ᤔᤧᤗ᤹ᤖᤧᤴᤏᤠᤱ
ROM 4:20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤆᤵᤆᤡ ᤔᤧᤈᤥᤃᤢᤴ. ᤁᤖ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤖᤥ॥
ROM 4:21 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤛᤢᤰᤋᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤀᤒᤪᤠᤜᤠᤶᤔᤡᤴ ᤏᤡ᤺ᤴᤎᤥ ᤘᤕᤧ॥
ROM 4:22 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤀᤒᤪᤠᤜᤠᤔᤖᤧ ᤁᤢᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤖᤥ॥”
ROM 4:23 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤒᤪᤠᤜᤠᤔᤖᤧ ᤁᤢᤗᤠᤃᤡᤖᤰ ᤔᤧ᤺ᤴ.
ROM 4:24 ᤁᤖ ᤀᤠᤏᤡ᤹ ᤗᤠᤃᤡᤀᤠᤱ ᤛᤠᤵᤋᤧᤒᤠᤖᤥ॥ ᤕᤧᤛᤢ ᤀᤠᤏᤡ᤹ ᤍᤠᤱᤒᤠᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤀᤠᤈᤥᤃᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤛᤠᤶᤕᤥᤏᤡᤒᤠ ᤀᤠᤗᤣ᤺ᤳᤗᤥ॥
ROM 4:25 ᤂᤢᤏᤧ᤹ᤃ ᤀᤠᤏᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤛᤧᤵᤔᤠ ᤑᤠ᤹ᤀᤠᤱ ᤜᤢᤰᤛᤢᤵᤋᤧ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥ᤺ᤰᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤂᤢᤏᤧ᤹ ᤁᤢᤜᤡᤱᤘᤧᤳ ᤆᤥᤃᤢᤖᤥ॥
ROM 5:1 ᤂᤧᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴ ᤀᤠᤈᤥᤃᤢᤶᤒᤠᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤏᤡ᤹ ᤏᤠᤍᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
ROM 5:2 ᤀᤠᤏᤡ᤹ ᤏᤛᤠ᤺ᤴ ᤀᤠᤈᤥᤃᤢᤶᤒᤠᤸᤗᤧ ᤕᤧᤛᤢ ᤂᤪᤡᤛ᤻ᤋᤖᤧ ᤁᤴ ᤗᤢᤱᤃᤢᤶᤔᤥ ᤀᤠᤍᤠ᤺ᤖᤧᤀᤠᤱ ᤘᤠ᤹॥ ᤀᤠᤸᤗᤥ ᤜᤠᤒᤠ ᤂᤧᤴ ᤗᤢᤱᤃᤢᤶᤔᤥᤀᤣ ᤀᤠᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤥ᤺ᤔᤠ ᤗᤰ ᤀᤠᤄᤥ᤺ᤛᤢᤶᤔᤣᤖᤥ ᤑᤠ᤹ᤀᤠᤱ ᤀᤠᤛ᤺ᤳᤗᤥ॥
ROM 5:3 ᤜᤧᤰᤁᤣᤖᤰ ᤔᤧ᤺ᤴ. ᤁᤖ ᤀᤠᤏᤡ᤹ ᤏᤛᤠ᤺ᤴ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤗᤠᤰᤂᤣ ᤀᤠᤍᤢᤔᤢᤶᤔᤡᤸᤗᤧᤀᤣ ᤀᤠᤛ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤗᤠᤰᤂᤣ ᤀᤠᤍᤢᤔᤢᤶᤔᤡᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤏᤠᤛᤡ ᤌ᤺ᤵᤔᤠ ᤀᤠᤛᤢᤰᤋᤢᤶ ᤁᤧᤗ᤹ᤒᤠᤴ ᤀᤠᤏᤡ᤺ᤛᤢᤶᤔᤠᤱ ᤀᤠᤘᤠ᤹ᤖᤥ.
ROM 5:4 ᤜᤧᤰᤁᤩᤠᤱ ᤏᤠᤛᤡ ᤀᤠᤎ᤺ᤳᤋᤢᤶᤔᤡᤸᤗᤧ ᤏᤢ᤺ᤒᤠ ᤕᤧᤵᤗᤧᤰ ᤀᤠᤄᤥ᤺ᤛᤢᤶ. ᤜᤧᤰᤁᤩᤠᤱ ᤏᤢ᤺ᤒᤠ ᤕᤧᤵᤗᤧᤰ ᤀᤠᤃᤳᤋᤢᤶᤔᤡᤸᤗᤧ ᤛᤧᤴᤗᤵ ᤀᤠᤄᤥ᤺ᤛᤢᤶᤔᤣ ᤑᤠ᤹ᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤏᤡᤱᤛᤠᤱ ᤀᤠᤈᤥᤃᤢᤶᤗᤥ॥
ROM 5:5 ᤜᤧᤰᤁᤣᤗ᤹ᤖᤡᤰ ᤏᤡᤱᤛᤠᤱ ᤀᤠᤈᤥᤃᤢᤶᤔᤡᤸᤗᤧ ᤀᤠᤏᤡ᤹ ᤏᤡᤱᤛᤠᤱ ᤔᤧᤒᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤂᤢᤏᤧ᤹ ᤀᤠᤒᤡᤖᤧᤒᤠ ᤛᤣᤛᤣᤔᤠᤱᤗᤠᤶ ᤀᤠᤏᤡ᤹ ᤛᤡᤰᤗᤢᤱᤔᤥ ᤏᤡᤱᤘᤠ᤹ ᤀᤠᤄᤥ᤺ᤛᤢᤶᤗᤥ॥
ROM 5:6 ᤀᤠᤏᤡ᤹ ᤗᤠᤕᤥᤗᤠᤶ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤴᤇᤢᤰᤔᤏᤠᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤕᤧᤸᤗᤧ ᤛᤢᤕᤧᤶᤔᤥ ᤗᤠᤕᤥᤒᤠᤜᤠ᤹ᤖᤧ ᤗᤠᤃᤡ ᤂᤪᤡᤛ᤻ᤋᤧᤴ ᤛᤩᤧᤖᤥ॥
ROM 5:7 ᤀᤠᤸᤗ ᤛᤠᤶᤕᤥᤏᤡᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤛᤡ᤺ᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤔᤏᤠᤃ ᤂᤥ᤺ᤔᤠ ᤛᤠᤰᤐᤡᤗᤠ. ᤜᤧᤰᤁᤣᤛᤠᤱ ᤛᤧᤰᤂᤠᤀᤣ ᤏᤢ᤺ᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡᤃ ᤁᤢᤓᤠ ᤛᤡ᤺ᤔᤠᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ ᤔᤧᤛᤢᤰᤗᤥ॥
ROM 5:8 ᤁᤖ ᤀᤠᤏᤡ᤹ ᤗᤠᤕᤥᤀᤥ ᤀᤠᤘᤕᤧᤸᤗᤧᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤗᤠᤃᤡ ᤛᤡ᤺ᤔᤠ ᤐᤠᤱᤄᤢᤀᤠᤱ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥
ROM 5:9 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤃ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤛᤧᤰᤂᤠᤀᤣ ᤋᤠᤱᤀᤠᤛᤧ᤺ᤵᤗᤥ॥
ROM 5:10 ᤂᤧᤴ ᤑᤠ᤹ᤀᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤀᤠᤘᤕᤧᤸᤗᤧᤛᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤛᤡ᤺ᤔᤧᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤜᤡᤱᤔᤴᤏᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤛᤧᤰᤂᤠᤀᤣ ᤋᤠᤱᤀᤠᤛᤧ᤺ᤵᤗᤥ॥
ROM 5:11 ᤂᤧᤴ ᤐᤠ᤺ᤴᤏᤥᤖᤰ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥᤀᤠᤱ ᤀᤠᤛ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤏᤡ᤹ ᤏᤠᤍᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
ROM 5:12 ᤁᤠᤰᤏᤢ᤺ᤸᤗᤧ ᤋᤃᤡᤒᤠ ᤔᤧᤴᤇᤠᤶ ᤕᤠᤵᤔᤡ ᤀᤠᤍᤔᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥ᤺ᤴ ᤐᤥᤃᤧ. ᤜᤧᤰᤁᤩᤠᤱ ᤂᤧᤴ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤛᤡ᤺ᤔᤧᤴ ᤐᤥᤃᤧᤖᤥ॥ ᤀᤰᤂᤣᤗ᤹ᤖᤡᤰ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤥ ᤛᤡ᤺ᤔᤧᤴ ᤋᤩᤧᤖᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤗᤠᤕᤥ ᤔᤧᤈᤥᤃᤢᤖᤥ॥
ROM 5:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶ ᤔᤧᤶᤒᤡᤀᤣ ᤋᤃᤡᤛᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥ᤺ᤴ ᤘᤕᤧᤖᤥ. ᤁᤖ ᤛᤠᤶᤕᤥᤌᤡᤶ ᤜᤥ᤺ᤵᤋᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥᤜᤠ᤹ᤖᤧᤴ ᤂᤠᤖᤠ᤺ᤳ ᤔᤧᤕᤢᤰᤂᤢᤴᤗᤥ॥
ROM 5:14 ᤀᤠᤍᤶᤔᤡᤸᤗᤧ ᤁᤢᤕᤧᤶᤔᤠᤱᤎᤥ ᤛᤠᤶᤕᤥᤌᤡᤶ ᤁᤧᤛᤠᤵᤐᤠ ᤔᤥᤛᤠ᤺ᤸᤗᤧ ᤁᤢᤕᤧᤶ ᤌᤠᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤠᤍᤶᤔᤡᤴ ᤜᤧᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤶᤓᤣ᤺ᤴᤏᤣ ᤔᤧᤘᤕᤧᤛᤠᤱ ᤔᤧᤛᤩᤧᤖᤥ॥ ᤀᤠᤸᤗ ᤁᤢᤓᤠ ᤐᤠ᤺ᤴᤏᤥ ᤀᤠᤍᤔᤧᤱᤃ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤂᤪᤡᤛ᤻ᤋᤧᤴ ᤜᤧᤰᤋᤱᤒᤠ ᤘᤕᤧᤖᤥ॥
ROM 5:15 ᤁᤖ ᤗᤠᤕᤥ ᤏᤢ ᤐᤷᤎᤠ᤺ᤶᤔᤡᤱᤃ ᤗᤳᤌᤡᤰ ᤔᤧᤈᤥ᤺ᤰᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤗᤳᤇᤠ ᤔᤏᤠ ᤀᤠᤍᤶᤔᤡᤸᤗᤧ ᤆᤥᤃᤢᤒᤠ ᤗᤠᤕᤥ᤺ᤸᤗᤧ ᤕᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤩᤧ. ᤁᤖ ᤗᤳᤇᤠ ᤔᤏᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤀᤠᤶᤓᤠ ᤀᤠᤳᤋᤠᤳᤋᤠᤴᤏᤣ ᤛᤧᤴᤗᤵ ᤐᤡᤖᤢᤛᤡᤖᤥ॥
ROM 5:16 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤁᤧᤍᤠ᤺ᤒᤠ ᤐᤷᤎᤠ᤺ᤶᤔᤡᤱᤃ ᤀᤠᤍᤔᤖᤧ ᤁᤢᤗᤠᤕᤥ᤺ᤴᤏᤢ ᤔᤧᤍᤱᤏᤧᤴᤗᤥ॥ ᤗᤳᤇᤠ ᤗᤠᤕᤥᤎᤡᤰᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧᤖᤥ. ᤁᤖ ᤕᤖᤡᤰ ᤗᤠᤕᤥ ᤀᤠᤈᤥᤃᤢᤶᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤶᤓᤠ ᤀᤠᤒᤡᤒᤠ ᤐᤷᤎᤠ᤺ᤶᤔᤡᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤈᤥ᤺ᤰᤗᤥ॥
ROM 5:17 ᤌᤡᤰ ᤔᤏᤠ ᤀᤠᤍᤶᤔᤡᤸᤗᤧ ᤆᤥᤃᤢᤒᤠ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤁᤠᤰ ᤔᤏᤠᤜᤠ᤹ᤀᤥ ᤛᤡ᤺ᤔᤧᤸᤗᤧ ᤜᤠᤱ ᤆᤥᤃᤢᤏᤧ ᤑᤠ᤹ᤃᤪ ᤀᤠᤸᤗᤛᤠᤱ ᤕᤖᤡᤰ ᤗᤢᤱᤃᤢᤶ ᤏᤢ ᤛᤠᤶᤕᤥᤏᤡᤔᤠᤖᤧᤴ ᤐᤷᤎᤠ᤺ᤶᤔᤡᤴ ᤀᤠᤶᤓᤠᤀᤣ ᤁᤧᤄᤥ᤺ᤒᤠᤜᤠ᤹ᤖᤧ ᤌᤡᤰ ᤔᤏᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤁᤧᤍᤠ᤺ᤒᤠ ᤜᤡᤱᤔᤴᤏᤥ ᤜᤠᤱ ᤔᤧᤈᤥᤃᤢ᤹ᤖᤥ॥
ROM 5:18 ᤜᤧᤰᤁᤣᤗ᤹ᤖᤡᤰ ᤗᤳᤌᤡᤰ ᤔᤏᤠ᤺ᤸᤗᤧ ᤆᤥᤃᤢᤒᤠ ᤗᤠᤕᤥ᤺ᤸᤗᤧ ᤁᤠᤰ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧᤒᤠ ᤜᤧᤰᤁᤣᤀᤣ ᤗᤳᤇᤠ ᤔᤏᤠ᤺ᤸᤗᤧ ᤆᤥᤃᤢᤒᤠ ᤌᤡᤰ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤔᤧᤒᤥ᤺ᤱᤅᤠᤱ ᤁᤢᤛᤱ ᤜᤡᤱᤔᤴ ᤔᤧᤄᤥ᤺ᤛᤢ᤹ᤖᤥ॥
ROM 5:19 ᤌᤣᤀᤠᤱᤓᤧᤸᤗᤧ ᤌᤡᤰ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤀᤡᤱᤈᤠ᤺ᤱ ᤑᤧ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤒᤠ ᤔᤧᤒᤥ᤺ᤰᤂᤧᤒᤠ ᤜᤧᤰᤁᤣᤀᤣ ᤗᤳᤇᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤀᤡᤱᤈᤠ᤺ᤱᤅᤡᤴ ᤋᤧᤴᤍᤡᤱ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤔᤧᤒᤥ᤺ᤱᤗᤥ॥
ROM 5:20 ᤁᤧᤖᤧᤰ ᤔᤏᤠᤜᤠ᤹ ᤀᤠᤰᤂᤧᤴ ᤗᤠᤕᤥᤒᤠ ᤔᤧᤈᤥᤃᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤋᤩᤧᤖᤥ. ᤁᤖ ᤗᤠᤕᤥ᤺ᤴ ᤐᤥ᤺ᤖᤧᤸᤗᤧ ᤗᤢᤱᤃᤢᤶᤔᤡᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤥ᤺ᤖᤧᤖᤥ॥
ROM 5:21 ᤜᤧᤰᤁᤣᤗ᤹ᤖᤡᤰ ᤗᤠᤕᤥ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤀᤥ ᤜᤠᤱ ᤆᤥᤃᤢᤀᤠᤱ ᤛᤡ᤺ᤔᤧᤴ ᤋᤠᤖᤢᤒᤠ ᤁᤢᤀᤡᤛᤡ᤺ᤰ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤜᤠᤱ ᤆᤥᤃᤢ᤹ᤀᤠᤱ ᤂᤧᤸᤗᤧ ᤀᤠᤏᤡ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤈᤥ᤺ᤰ. ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤄᤥ᤺ᤛᤢᤶᤗᤥ॥
ROM 6:1 ᤀᤠᤸᤗ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤗᤢᤱᤃᤢᤶᤔᤡᤴ ᤀᤠᤳᤋᤠᤳᤋᤠᤴᤏᤣ ᤀᤠᤄᤥ᤺ᤛᤢᤶᤗ ᤑᤠ᤹ᤀᤠᤱ ᤗᤠᤕᤥ ᤆᤥ᤺ᤰᤔᤠᤖ ᤘᤠ᤹ᤔᤠᤒᤡ᥅
ROM 6:2 ᤔᤧ᤺ᤴᤗᤥ᥄ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ᥄ ᤀᤠᤏᤡ᤹ᤃ ᤁᤢᤛᤡᤘᤧᤳ ᤔᤏᤠ ᤜᤧᤰᤋᤱᤒᤠ ᤀᤠᤈᤥ᤺ᤰᤗᤥ. ᤜᤧᤰᤁᤩᤠᤱ ᤀᤠᤸᤗ ᤗᤠᤕᤥ᤺ᤸᤗᤧ ᤁᤢᤕᤢᤰᤁᤥ ᤀᤠᤴᤘᤠ᤹ᤏᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤀᤠᤱᤎᤥ ᤗᤠᤕᤥ ᤆᤥ᤺ᤰᤔᤠᤖ ᤘᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥
ROM 6:3 ᤀᤠᤏᤡ᤹ ᤂᤪᤡᤛ᤻ᤋ ᤕᤧᤛᤢᤀᤥ ᤒᤵᤋᤡᤛ᤻ᤔᤠ ᤀᤠᤒᤥ᤺ᤰᤂᤧᤸᤗᤧ ᤂᤢᤏᤧ᤹ᤏᤢᤀᤣ ᤀᤠᤛᤩᤧ ᤁᤧᤗ᤹ᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅
ROM 6:4 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤃ ᤒᤵᤋᤡᤛ᤻ᤔᤠᤗᤠᤶ ᤛᤡ᤺ᤔᤧᤴᤏᤥ ᤂᤢᤏᤧ᤹ᤏᤢ ᤀᤠᤜᤢᤶᤛᤡᤱ. ᤜᤧᤰᤁᤣ᤺ᤸᤗᤧ ᤂᤪᤡᤛ᤻ᤋᤧᤴ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤔᤡᤍᤡᤱᤃᤧᤴ ᤁᤢᤔᤢᤰᤛᤠᤶᤔᤡᤸᤗᤧ ᤛᤡ᤺ᤔᤧᤴᤗᤠᤶᤒᤠ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ᤀᤠᤱ ᤁᤢᤛᤱ ᤜᤡᤱᤔᤴᤏᤥ ᤀᤠᤜᤡᤱᤗᤥ॥
ROM 6:5 ᤀᤠᤏᤡ᤹ ᤁᤢᤛᤡ᤺ᤔᤧᤴᤏᤥ ᤂᤢᤏᤧ᤹ᤏᤢ ᤌᤡᤰᤜᤢᤵ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤜᤧᤰᤁᤣ ᤀᤠᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤀᤠᤜᤡᤱᤗᤥ॥
ROM 6:6 ᤗᤠᤕᤥ᤺ᤸᤗᤧ ᤁᤢᤕᤢᤰᤁᤡᤴ ᤀᤠᤏᤡ᤹ ᤜᤡᤱᤔᤴᤏᤥᤗᤠᤶ ᤔᤧᤰᤗ ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤗᤠᤕᤥᤖᤧ ᤁᤢᤕᤥ᤺ᤰᤐᤠ ᤀᤠᤶᤒᤥ᤺ᤱᤅᤡᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤋᤃᤡᤛ᤻ᤔᤠ ᤜᤡᤱᤔᤴᤏᤡᤴ ᤂᤪᤡᤛ᤻ᤋᤧᤴᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤍᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶ.
ROM 6:7 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤛᤩᤧᤀᤠᤱ ᤘᤠ᤹ ᤂᤧᤴ ᤗᤠᤕᤥ᤺ᤸᤗᤧ ᤁᤢᤕᤢᤰᤁᤥᤏᤢ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
ROM 6:8 ᤀᤠᤸᤗ ᤀᤠᤏᤡ᤹ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤀᤠᤛᤩᤧᤀᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤢᤏᤧ᤹ᤏᤢᤀᤣ ᤀᤠᤏᤡ᤹ᤀᤠᤱ ᤕᤠᤶᤔᤥ ᤀᤠᤜᤡᤱᤗᤥ ᤑᤠ᤹ᤀᤠᤱ ᤏᤛᤠ᤺ᤴ ᤀᤠᤈᤥᤃᤢᤶᤗᤥ॥
ROM 6:9 ᤂᤪᤡᤛ᤻ᤋᤧᤱᤃ ᤛᤩᤧᤀᤠᤱ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤒᤠᤸᤗᤧ ᤀᤠᤸᤗ ᤕᤠᤶᤔᤥ ᤔᤧᤛᤡ᤺ᤏᤧᤴᤗᤥ ᤁᤧᤗ᤹ᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤀᤠᤱᤎᤥ ᤂᤢᤏᤧ᤹ ᤛᤶᤍᤠᤱ ᤛᤡ᤺ᤔᤧᤸᤗᤧ ᤕᤢᤰ ᤔᤧᤃᤳᤋᤢᤴᤗᤥ॥
ROM 6:10 ᤂᤪᤡᤛ᤻ᤋᤧᤴ ᤛᤩᤧᤸᤗᤧ ᤗᤠᤕᤥ᤺ᤸᤗᤧ ᤁᤢᤔᤢᤰᤛᤠᤶᤔᤡᤴ ᤏᤠ᤺ᤶᤔᤠ ᤑᤠ᤹ᤀᤠᤱ ᤛᤍᤠᤍᤡᤱᤖᤧ ᤗᤠᤃᤡ ᤂᤢᤏᤧ᤹ ᤌᤡᤰᤗᤧᤱᤅᤥ ᤛᤩᤧ. ᤁᤖ ᤀᤠᤸᤗ ᤂᤢᤏᤧ᤹ ᤁᤢᤜᤡᤱᤘᤧᤳ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤜᤡᤱᤔᤴᤏᤡᤴ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤑᤠ᤹ᤀᤠᤱ ᤜᤡᤱᤗᤥ॥
ROM 6:11 ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛᤡᤘᤧᤳ ᤔᤏᤠ᤺ᤸᤗᤧ ᤗᤠᤕᤥ ᤔᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤠᤕᤥ ᤆᤥ᤺ᤰᤔᤠᤀᤥ ᤁᤧᤛᤩᤧ᤹ᤀᤡ ᤁᤖ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠᤖᤧ ᤗᤠᤃᤡ ᤁᤧᤜᤡᤅᤡᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
ROM 6:12 ᤂᤧᤸᤗᤧ ᤆᤥᤃᤢᤸᤗᤧ ᤗᤠᤕᤥ᤺ᤸᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤕᤢᤰᤔᤠ ᤔᤧᤒᤠᤱᤄᤧᤶᤔᤡᤴᤏᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤁᤢᤒᤠ᤺ᤴᤏᤡᤴ ᤋᤧᤴᤍᤡᤱ ᤁᤧᤈᤥᤃᤢᤶᤗᤥ॥
ROM 6:13 ᤂᤡᤏᤡ᤹ ᤌᤰᤁᤥᤒᤠ ᤕᤠᤶᤗᤰᤜᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤕᤥ᤺ᤴ ᤔᤧᤍᤥ᤺ᤴᤍᤧᤶ ᤔᤧᤒᤡᤖᤧᤶᤔᤡᤴᤏᤧ᤹॥ ᤂᤧᤸᤗᤧ ᤁᤢᤗᤧᤰᤘᤠ ᤛᤡ᤺ᤔᤧᤴᤗᤠᤶ ᤜᤡᤱᤔᤴᤏᤥ ᤁᤧᤍᤠ᤺ᤒᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤏᤠ᤹ᤛᤡᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤗᤰᤜᤠ᤹ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤧᤶᤔᤧ᤹ᤀᤥ॥
ROM 6:14 ᤂᤡᤏᤡ᤹ ᤛᤶᤍᤠᤱ ᤗᤠᤕᤥ᤺ᤴ ᤕᤢᤰ ᤆᤥ᤺ᤰ ᤔᤧᤒᤠᤱᤄᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤁᤧᤜᤥ᤺ᤵᤋᤡ᤹. ᤁᤖ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤡᤸᤗᤧ ᤁᤢᤕᤢᤰᤁᤥ ᤁᤧᤘᤕᤡ᤹ᤖᤥ॥
ROM 6:15 ᤁᤴ ᤁᤠᤰ ᤑᤠ᤹ᤀᤡᤱᤃ ᤌᤧᤔᤠᤒᤣ᥅ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤜᤥ᤺ᤵ ᤁᤖ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤘᤠ᤹ᤒᤠᤸᤗᤧ ᤗᤠᤕᤥ ᤆᤥᤃᤢᤶᤒᤡ᥅ ᤀᤠᤵᤑᤠᤸᤗᤧᤀᤠᤱ ᤆᤥᤃᤢᤶ ᤔᤧ᤺ᤴ᥄
ROM 6:16 ᤀᤠᤳᤋᤡᤴᤜᤠ᤹ ᤀᤡᤱᤈᤠ᤺ᤱ ᤂᤧᤶᤔᤠ ᤁᤧᤍᤧᤴᤍᤡ᤹. ᤒᤠ ᤂᤧᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡ᤹ ᤁᤧᤗ᤹ᤒᤠᤴ ᤁᤧᤴᤏᤡ᤺ᤛᤢᤶᤔᤡᤴᤒᤡ᥅ ᤗᤠᤕᤥ᤺ᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤛᤩᤧ᤹ᤀᤡ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤧᤄᤧᤵᤛᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠᤶᤕᤥᤏᤡᤒᤠ ᤁᤧᤒᤥ᤺ᤰᤂᤡ᤹ᤖᤥ॥
ROM 6:17 ᤁᤖ ᤂᤡᤏᤡ᤹ ᤗᤠᤕᤥ᤺ᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤛᤠᤱ. ᤀᤠᤸᤗ ᤂᤡᤏᤡ᤹ ᤁᤧᤜᤢ᤹ᤀᤠᤛᤡᤒᤠ ᤏᤡᤛᤠᤶᤔᤡᤴ ᤛᤡᤰᤗᤢᤱᤔᤥᤏᤢᤀᤣ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ॥
ROM 6:18 ᤂᤡᤏᤡ᤹ᤃ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤄᤥ᤺ᤛᤢᤶᤔᤠᤱ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
ROM 6:19 ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤜᤡᤶᤍᤠᤱᤒᤠᤴ ᤏᤢ ᤕᤥ᤺ᤰᤁᤡᤸᤗᤧ ᤁᤢᤒᤡ᤺ᤴ ᤀᤥᤃᤵ ᤆᤥᤃᤢᤱᤗ ᤐᤳᤋᤠᤖᤥ॥ ᤂᤡᤏᤡ᤹ ᤀᤠᤒᤠᤅᤣ ᤕᤠᤶᤗᤰᤁᤡᤴ ᤋᤃᤡ ᤕᤠᤵᤔᤡ ᤁᤧᤈᤡ᤺ᤶᤒᤠ ᤏᤢ ᤑᤧᤴ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤥ᤺ᤰᤐᤠ ᤐᤥ᤺ᤱᤛᤧ ᤁᤧᤍᤥ᤺ᤴᤍᤢᤶᤔᤠᤱ ᤁᤧᤘᤕᤡᤒᤠ ᤁᤢᤀᤡᤛᤡ᤺ᤰ. ᤀᤠᤸᤗ ᤛᤣᤛᤣᤃᤧᤴ ᤛᤢᤳᤌᤥ ᤐᤥ᤺ᤱᤔᤠᤖᤧ ᤗᤠᤃᤡ ᤛᤠᤶᤕᤥᤏᤡᤒᤠᤸᤗᤧ ᤁᤢᤕᤥ᤺ᤰᤐᤠ ᤐᤥ᤺ᤱᤛᤧ ᤂᤡᤏᤡ᤹ ᤕᤠᤶᤗᤰᤁᤡᤴ ᤋᤥ᤺ᤴᤍᤧᤶᤔᤧ᤹ᤀᤥ॥
ROM 6:20 ᤂᤡᤏᤡ᤹ ᤗᤠᤕᤥ᤺ᤸᤗᤧ ᤁᤢᤕᤥ᤺ᤰᤐᤠ ᤁᤧᤘᤕᤡᤸᤗᤧ ᤛᤠᤶᤕᤥᤏᤡᤒᤠᤸᤗᤧ ᤁᤢᤕᤢᤰᤁᤥ ᤁᤧᤜᤥ᤺ᤵᤋᤡᤖᤥ॥
ROM 6:21 ᤂᤧᤴ ᤕᤧᤶᤔᤥ ᤁᤧᤈᤥᤃᤢᤶᤒᤠ ᤐᤠ᤺ᤴᤜᤠ᤹ᤗᤠᤶ ᤀᤠᤸᤗᤥ ᤛᤡᤖᤡᤱ ᤁᤧᤔᤕᤡᤸᤗᤧ ᤌᤣ ᤀᤡᤴᤎᤠ᤺ᤰ ᤁᤧᤄᤥ᤺ᤛᤢᤶᤒᤣ᥅ ᤁᤢᤏᤢᤵᤔᤥᤃ ᤂᤧᤴ ᤐᤠ᤺ᤴᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤛᤡ᤺ᤔᤧᤴᤏᤥ ᤁᤧᤃᤧᤳᤋᤡ᤹ᤖᤥ॥
ROM 6:22 ᤁᤖ ᤀᤠᤸᤗᤥᤃ ᤂᤡᤏᤡ᤹ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤧᤸᤗᤧᤃ ᤛᤣᤛᤣᤃᤧᤴ ᤛᤢᤳᤌᤥ ᤁᤧᤈᤥᤃᤡ᤹. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤁᤧᤃᤧᤳᤋᤡ᤹ᤖᤥ॥
ROM 6:23 ᤌᤣᤀᤠᤱᤓᤧᤸᤗᤧ ᤗᤠᤕᤥᤖᤧ ᤀᤠᤒᤡᤒᤠ ᤏᤠᤶᤕᤠᤰᤁᤡᤱᤃ ᤛᤡ᤺ᤔᤧᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤶᤓᤠ ᤀᤠᤒᤡᤒᤠ ᤐᤷᤎᤠ᤺ᤶᤔᤡᤱᤃ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤀᤥᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥
ROM 7:1 ᤀᤠᤸᤗ ᤛᤠᤶᤕᤥᤌᤡᤶ ᤁᤧᤗᤧᤒᤠ ᤁᤧᤏᤡ᤺ᤒᤠ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤛᤠᤶᤕᤥᤌᤡᤶᤔᤡᤸᤗᤧᤃ ᤔᤏᤠ᤺ᤴ ᤁᤢᤜᤡᤱᤘᤧᤳ ᤘᤠ᤹ᤖ ᤌᤠᤖᤡᤰᤗᤰ ᤕᤢᤰᤋᤢ᤹॥
ROM 7:2 ᤔᤣ᤺ᤰᤂᤡᤶᤔᤡᤸᤗᤧ ᤁᤢᤒᤡᤎᤡᤰ ᤐᤡᤏᤡᤱᤗᤥ. ᤔᤣ᤺ᤰᤂᤡᤶ ᤁᤧᤒᤥ᤺ᤱᤔᤠ ᤔᤧᤴᤇᤢᤔᤠ᤹ᤀᤡᤴ ᤀᤡᤳᤌᤢᤱᤃᤧᤴ ᤁᤢᤕᤧᤶᤒᤠ᤹ᤀᤡᤴ ᤜᤡᤱᤅᤠᤱ ᤘᤠ᤹ᤖ ᤌᤠᤖᤡᤰ ᤛᤠᤶᤕᤥᤌᤡᤶᤔᤡᤸᤗᤧ ᤂᤧᤴ ᤁᤢᤕᤧᤶᤒᤠ᤹ᤀᤡᤴᤏᤢ ᤀᤡᤄᤣ᤺ᤰᤂᤢᤀᤠᤱ ᤘᤠ᤹॥ ᤁᤖ ᤁᤢᤕᤧᤶᤒᤠ᤹ᤀᤡᤴ ᤛᤡ᤺ᤏᤧ ᤑᤠ᤹ᤃᤪ ᤂᤧᤴ ᤔᤣ᤺ᤰᤂᤡᤶᤌᤡᤶᤗᤠᤶ ᤆᤥ᤺ᤰᤕᤢᤶᤓᤥᤔᤠ ᤐᤥ᤺ᤱᤗᤥ॥
ROM 7:3 ᤜᤧᤰᤁᤣᤗ᤹ᤖᤡᤰᤁᤣ ᤁᤢᤕᤧᤶᤒᤠ᤹ᤀᤡᤴ ᤁᤢᤜᤡᤱᤘᤧᤳ ᤘᤠ᤹ᤖᤀᤣ ᤂᤧᤸᤗᤧ ᤘᤣ᤹ ᤔᤏᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤏᤧ ᤑᤠ᤹ᤃᤪ ᤂᤧᤱᤃ ᤛᤠᤶᤕᤥᤌᤡᤶᤔᤡᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤳᤋᤢ᤹ᤖᤥ॥ ᤁᤖ ᤁᤢᤕᤧᤶᤒᤠ᤹ᤀᤡᤴ ᤛᤡ᤺ᤀᤠᤱᤃ ᤂᤢᤏᤧ᤹ ᤔᤣ᤺ᤰᤂᤡᤶᤌᤡᤶᤗᤠᤶ ᤆᤥ᤺ᤰᤕᤢᤶᤓᤥᤔᤠ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤘᤣ᤹ ᤔᤏᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢᤒᤠ ᤔᤧᤒᤥ᤺ᤱᤏᤧᤸᤗᤥ॥
ROM 7:4 ᤜᤧᤰᤁᤣ᤺ᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤪᤡᤛ᤻ᤋᤧᤴ ᤛᤩᤧ᤺ᤸᤗᤧ ᤂᤡᤏᤡ᤹ᤀᤠᤱ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤡᤸᤗᤧ ᤀᤡᤃᤧᤓᤢᤳᤋᤡᤀᤠᤱ ᤁᤧᤘᤕᤡᤒᤠᤀᤥᤗᤠᤶ ᤁᤧᤒᤠ᤺ᤰᤂᤡᤖᤥ॥ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤠᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤀᤠᤏᤡ᤹ᤃ ᤛᤡ᤺ᤔᤧᤴᤗᤠᤶᤒᤠ ᤁᤢᤜᤡᤱᤘᤧᤳ ᤁᤧᤒᤥ᤺ᤱᤒᤠᤴᤏᤢ ᤌᤡᤰᤜᤢᤵ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥
ROM 7:5 ᤀᤠᤏᤡ᤹ᤃ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤀᤠᤕᤢᤰᤋᤧᤀᤠᤱ ᤀᤠᤘᤕᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤥ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤴ ᤑᤥ᤺ᤰᤂᤢᤀᤠᤱ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤑᤧᤴ ᤕᤠ᤺ᤶᤒᤰᤁᤡᤸᤗᤧ ᤛᤡ᤺ᤔᤧᤴ ᤋᤠᤖᤢ᤹ᤖᤥ॥
ROM 7:6 ᤁᤖ ᤀᤠᤸᤗᤥᤃ. ᤋᤃᤡ ᤀᤠᤏᤡ᤹ ᤛᤶᤍᤠᤱ ᤕᤢᤰ ᤁᤧᤈᤥ᤺ᤰᤐᤠ ᤛᤠᤶᤕᤥᤌᤡᤶᤗᤠᤶᤒᤠ ᤆᤥ᤺ᤰᤕᤢᤶᤓᤥ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹॥ ᤀᤠᤸᤗ ᤀᤠᤏᤡ᤹ᤃ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤘᤕᤧᤸᤗᤧ ᤛᤣᤘᤠ ᤀᤠᤈᤥᤃᤢᤶᤒᤠ ᤜᤧᤰᤁᤣ ᤔᤧ᤺ᤴ. ᤁᤖ ᤛᤣᤛᤣᤔᤠᤱᤗᤠᤶᤒᤠ ᤁᤢᤛᤱ ᤜᤡᤱᤔᤴᤏᤥ ᤛᤣᤘᤠ ᤀᤠᤈᤥᤃᤢᤶᤗᤥ॥
ROM 7:7 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤛᤠᤶᤕᤥᤌᤡᤶᤔᤡᤴ ᤗᤠᤕᤥᤒᤡ᥅ ᤛᤧᤰᤂᤠᤛᤠᤱ ᤔᤧ᤺ᤴᤗᤥ᥄ ᤁᤖ ᤛᤠᤶᤕᤥᤌᤡᤶᤔᤡᤴ ᤜᤥ᤺ᤵᤋᤧᤸᤗᤧᤃ ᤀᤡᤱᤃᤠ᤹ ᤀᤠᤜᤡᤱᤔᤴᤏᤥᤒᤠ ᤗᤠᤕᤥᤜᤠ᤹ ᤔᤧᤴᤏᤡ᤺ᤒᤠᤴᤔᤧᤴ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ. “ᤂᤧᤏᤧ᤹ ᤔᤧᤄᤡ᤺ᤵᤛᤧᤴᤏᤧ᤹” ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤴᤏᤡᤸᤗᤧᤃ ᤀᤡᤱᤃᤠ᤹ ᤂᤡ᤺ᤶᤔᤠᤴ ᤋᤠᤵᤑᤧ᤺ᤶᤒᤠᤖᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤒᤠᤖᤥ॥
ROM 7:8 ᤁᤖ ᤁᤴ ᤗᤠᤕᤥ᤺ᤸᤗᤧ ᤛᤠᤶᤕᤥᤀᤡᤱᤈᤠ᤺ᤱᤗᤠᤶ ᤛᤢᤕᤧᤶ ᤂᤥ᤺ᤛᤢᤀᤠᤱ ᤀᤡᤱᤃᤠ᤹ ᤀᤠᤛᤡᤃᤠᤱ ᤁᤠᤰ ᤐᤖᤡᤰᤗᤧᤴ ᤂᤡ᤺ᤶᤔᤠ ᤏᤡᤱᤘᤠ᤹ᤀᤡᤴ ᤑᤥ᤺ᤰᤂᤢ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤜᤥ᤺ᤵᤋᤧᤸᤗᤧᤃ ᤗᤠᤕᤥ᤺ᤸᤗᤧ ᤁᤢᤔᤢᤰᤛᤠᤶ ᤜᤥ᤺ᤵᤋᤧᤒᤠᤖᤥ॥
ROM 7:9 ᤋᤃᤡ ᤀᤡᤱᤃᤠ᤹ ᤛᤠᤶᤕᤥᤌᤡᤶᤔᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱᤅᤡᤸᤗᤧ ᤏᤢ᤺ᤒᤠ ᤘᤕᤧ. ᤁᤖ ᤛᤠᤶᤕᤥᤀᤡᤱᤈᤠ᤺ᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤜᤡᤱᤔᤴᤏᤥ ᤗᤠᤕᤥ᤺ᤴ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤀᤡᤱᤃᤠ᤹ ᤛᤩᤠᤱᤗᤥ॥
ROM 7:10 ᤁᤴ ᤛᤠᤶᤕᤥᤀᤡᤱᤈᤠ᤺ᤱᤅᤡᤸᤗᤧᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤋᤠ᤺ᤵᤔᤠ ᤁᤧᤒᤥ᤺ᤱᤒᤠ ᤘᤕᤧ ᤁᤖ ᤂᤧᤸᤗᤧᤃ ᤛᤡ᤺ᤔᤠᤏᤡ ᤋᤠᤖᤢ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥
ROM 7:11 ᤌᤣᤀᤠᤱᤓᤧᤸᤗᤧ ᤗᤠᤕᤥ᤺ᤸᤗᤧ ᤛᤠᤶᤕᤥᤀᤡᤱᤈᤠ᤺ᤱᤗᤠᤶ ᤛᤢᤕᤧᤶ ᤂᤥ᤺ᤛᤢᤀᤠᤱ ᤀᤡᤱᤃᤠ᤹ ᤀᤡᤱᤗᤧᤰᤋᤠᤱᤗᤥ. ᤜᤧᤰᤁᤩᤠᤱ ᤒᤠ ᤁᤴ ᤛᤠᤶᤕᤥᤀᤡᤱᤈᤠ᤺ᤱᤗᤠᤶ ᤀᤡᤱᤃᤠ᤹ ᤛᤧᤖᤠᤱᤗᤥ॥
ROM 7:12 ᤜᤧᤰᤁᤣᤛᤠᤱ ᤛᤠᤶᤕᤥᤌᤡᤶᤔᤡᤴ ᤛᤣᤛᤣᤒᤠ ᤆᤥ᤺ᤰᤐᤠᤸᤗᤧ ᤁᤢᤀᤡᤱᤈᤠ᤺ᤱᤜᤠ᤹ ᤛᤣᤛᤣᤒᤠ. ᤛᤠᤶᤕᤥᤏᤡᤒᤠ ᤏᤢ ᤏᤢ᤺ᤒᤠ ᤆᤥ᤺ᤰᤗᤥ॥
ROM 7:13 ᤜᤧᤰᤁᤣ᤺ᤸᤗᤧ ᤏᤢ᤺ᤒᤠ ᤐᤠ᤺ᤴᤏᤡᤸᤗᤧ ᤀᤡᤱᤃᤠ᤹ ᤀᤠᤗᤠᤃᤡ ᤛᤡ᤺ᤔᤧᤴ ᤋᤠᤖᤢᤒᤡ᥅ ᤔᤧᤍᤠᤖᤢᤴᤗᤥ. ᤁᤖ ᤗᤠᤕᤥ᤺ᤴ ᤗᤠᤕᤥᤀᤣᤖᤥ ᤗ᤹ᤖᤡᤰ ᤁᤢᤛᤡᤱ ᤏᤡ᤺ᤵᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤗᤠᤕᤥ᤺ᤸᤗᤧ ᤏᤢ᤺ᤒᤠ ᤐᤠ᤺ᤴᤗᤠᤶ ᤀᤡᤱᤃᤠ᤹ᤀᤥ ᤕᤠᤶᤛᤠᤶᤃᤧᤴ ᤛᤡ᤺ᤔᤧᤴ ᤋᤠᤖᤢ. ᤜᤧᤰᤁᤣ᤺ᤸᤗᤧ ᤛᤠᤶᤕᤥᤀᤡᤱᤈᤠ᤺ᤱᤅᤡᤸᤗᤧ ᤆᤥᤃᤢᤸᤗᤧ ᤗᤠᤕᤥ᤺ᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤗᤠᤕᤥᤒᤠ ᤆᤥ᤺ᤰ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ॥
ROM 7:14 ᤛᤠᤶᤕᤥᤌᤡᤶᤔᤡᤴ ᤕᤠᤶᤛᤠᤶᤒᤠ ᤆᤥ᤺ᤰ ᤗ᤹ᤖᤡᤰ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤘᤠ᤹. ᤁᤖ ᤀᤡᤱᤃᤠ᤹ ᤕᤠᤶᤛᤠᤶᤒᤠ ᤔᤧᤈᤥ᤺ᤰᤁᤠᤴ ᤜᤧᤰᤁᤩᤠᤱ ᤕᤥ᤺ᤰᤐᤠᤜᤠ᤹ ᤔᤧᤍᤥ᤺ᤰᤐᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤠᤱ ᤗᤠᤕᤥᤀᤥᤀᤣ ᤋᤥ᤺ᤰᤋᤠᤱᤅᤠᤱ ᤘᤠ᤹ᤀᤠᤖᤥ॥
ROM 7:15 ᤀᤡᤱᤃᤠ᤹ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤠᤴ. ᤌᤣᤀᤠᤱᤓᤧᤸᤗᤧ ᤆᤥᤃᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤒᤠᤴ ᤔᤧᤈᤥ᤺ᤰᤁᤠᤴ. ᤁᤖ ᤀᤡᤱᤃᤠ᤹ ᤆᤡ᤺ᤳᤋᤢᤱᤒᤠ ᤐᤠ᤺ᤴᤏᤡᤴᤏᤣ ᤆᤥᤃᤢᤱᤗᤥ॥
ROM 7:16 ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤏᤡ᤺ᤛᤢᤱᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶᤔᤡᤴ ᤏᤢ᤺ᤒᤠ ᤆᤥ᤺ᤰ ᤗ᤹ᤖᤡᤰ ᤋᤧᤴᤍᤡᤱ ᤆᤥᤃᤢᤱᤒᤠ ᤐᤥ᤺ᤱᤗᤥ॥
ROM 7:17 ᤂᤧᤸᤗᤧ ᤆᤥᤃᤢᤸᤗᤧ. ᤀᤠᤸᤗ ᤜᤧᤰᤁᤣ ᤁᤧᤈᤥ᤺ᤰᤐᤧᤴ ᤀᤡᤱᤃᤠ᤹ ᤔᤧ᤺ᤴ. ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤗᤠᤕᤥ᤺ᤸᤗᤧ ᤆᤥᤃᤢᤒᤠᤖᤥ॥
ROM 7:18 ᤌᤣᤀᤠᤱᤓᤧᤸᤗᤧ ᤗᤠᤕᤥ᤺ᤸᤗᤧ ᤁᤢᤎᤡᤶ ᤘᤠ᤹ᤀᤠᤒᤠᤸᤗᤧ ᤀᤡᤱᤃᤠ᤹ ᤀᤠᤛᤢᤳᤏᤠᤀᤥ ᤌᤣᤀᤠᤱ ᤏᤢ᤺ᤒᤠ ᤐᤠ᤺ᤴ ᤜᤥ᤺ᤵ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤏᤢ᤺ᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤳᤋᤢᤱᤛᤠᤱ ᤆᤥ᤺ᤰᤔᤠ ᤔᤧᤛᤢᤰᤁᤠᤴᤗᤥ॥
ROM 7:19 ᤌᤣᤀᤠᤱᤓᤧᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱ. ᤂᤧᤴ ᤔᤧᤈᤥ᤺ᤰᤁᤠᤴ. ᤁᤖ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤴᤈᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠᤴᤏᤧ ᤆᤥᤃᤢᤱᤗ ᤘᤠ᤹ᤀᤠᤖᤥ॥
ROM 7:20 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤈᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤆᤥᤃᤢᤱᤏᤧ ᤑᤠ᤹ᤃᤪ ᤁᤴ ᤁᤧᤈᤥ᤺ᤰᤐᤠᤱᤃ ᤀᤡᤱᤃᤠ᤹ ᤔᤧ᤺ᤴ. ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤗᤠᤕᤥ᤺ᤸᤗᤧ ᤜᤧᤰᤁᤣ ᤆᤥᤃᤢᤒᤠᤖᤥ॥
ROM 7:21 ᤀᤰᤂᤣᤗ᤹ᤖᤡᤰ ᤁᤴ ᤌᤡᤶᤔᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥ᤺ᤛᤢᤱ–ᤀᤡᤱᤃᤠ᤹ ᤏᤢ᤺ᤒᤠ ᤐᤠ᤺ᤴ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤅᤡᤸᤗᤧ ᤋᤠᤵᤑᤧ᤺ᤶᤒᤠᤴ ᤀᤡᤱᤃᤠ᤹ᤏᤢᤀᤣ ᤘᤠ᤹ᤖᤥ॥
ROM 7:22 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤡᤰᤗᤢᤱᤔᤥᤏᤢᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤛ᤺ᤳᤋᤠᤖᤥ॥
ROM 7:23 ᤁᤖ ᤀᤡᤱᤃᤠ᤹ᤀᤥᤃ ᤘᤣ᤹ᤛ᤻ᤔᤠ ᤔᤢᤰᤛᤠᤶᤔᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤏᤡ᤺ᤛᤢᤱ॥ ᤂᤧᤴ ᤔᤢᤰᤛᤠᤶᤔᤡᤸᤗᤧᤃ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤀᤡᤸᤗᤧ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤥ᤺ᤳᤋᤢᤒᤠ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥᤃᤢ᤹. ᤜᤧᤰᤁᤩᤠᤱ ᤗᤠᤕᤥᤀᤥ ᤐᤢᤱᤗᤠᤎᤠᤒᤠ ᤆᤥ᤺ᤰᤁᤠᤀᤠᤱ ᤗᤠᤕᤥ᤺ᤸᤗᤧ ᤀᤡᤱᤃᤠ᤹ ᤕᤢᤰᤁᤠᤖᤥ॥
ROM 7:24 ᤀᤣ. ᤀᤡᤱᤃᤠ᤹ᤃ ᤀᤠᤰᤂᤧᤴ ᤛᤠ᤹ᤖᤡᤰ ᤐᤵᤐᤪᤠᤔᤠ ᤔᤏᤠᤀᤠᤒᤣ᥅ ᤁᤴ ᤗᤠᤕᤥ ᤏᤢ ᤛᤡ᤺ᤔᤧᤸᤗᤧ ᤕᤢᤰᤋᤢᤒᤠ ᤜᤡᤱᤔᤴᤗᤠᤶ ᤜᤠ᤺ᤳᤗᤧ ᤛᤧ᤺ᤵᤔᤠ ᤛᤢᤰᤁᤠᤒᤣ᥅
ROM 7:25 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤛᤧ᤺ᤵᤗᤥ᥄ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤱᤘᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧ ᤁᤢᤛᤣᤘᤠ ᤆᤥᤃᤢᤱ. ᤁᤖ ᤗᤠᤕᤥᤒᤠ ᤌᤡᤶᤔᤡᤸᤗᤧ ᤌᤡᤶᤛᤢᤒᤠ ᤛᤢᤳᤏᤠᤀᤥᤃ ᤗᤠᤕᤥ᤺ᤸᤗᤧ ᤁᤢᤛᤣᤘᤠ ᤆᤥᤃᤢᤱᤗᤥ॥
ROM 8:1 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤁᤧᤘᤠ᤹ᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤴᤇᤡᤴ.
ROM 8:2 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤗᤠᤕᤥ ᤏᤢ ᤛᤡ᤺ᤔᤧᤸᤗᤧ ᤁᤢᤔᤢᤰᤛᤠᤶᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤖᤠᤱᤅᤠᤱ ᤘᤠ᤹ᤖᤥ॥
ROM 8:3 ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤖᤥ॥ ᤂᤢᤏᤧ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥ᤺ᤸᤗᤧ ᤗᤠᤃᤡ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤗᤠᤕᤥᤒᤠ ᤔᤏᤠ ᤁᤢᤀᤡᤛᤡ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤥ ᤐᤠᤱᤄᤢ ᤕᤢ᤺ᤛᤢᤀᤠᤱ ᤏᤠᤛᤡᤱᤃᤧᤴ ᤁᤢᤎᤰᤁᤡᤸᤗᤧ ᤀᤠᤏᤡ᤹ ᤗᤠᤕᤥ᤺ᤴ ᤔᤧᤰᤂᤢᤖᤥ॥
ROM 8:4 ᤀᤰᤂᤣᤗ᤹ᤖᤡᤰ ᤗᤠᤕᤥᤒᤠ ᤛᤢᤳᤏᤠ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤛᤣᤛᤣᤔᤠᤱ ᤁᤢᤀᤡᤛᤡ᤺ᤰ ᤀᤠᤜᤡᤱᤅᤡᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤏᤠ᤺ᤰᤋᤢᤒᤠ ᤛᤠᤶᤕᤥᤏᤡᤒᤠ ᤐᤠ᤺ᤴᤜᤠ᤹ ᤁᤠᤰ ᤀᤠᤏᤡ᤹ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤒᤠᤖᤥ॥
ROM 8:5 ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤁᤧᤜᤡᤱᤒᤠᤜᤠ᤹ᤖᤧᤃ ᤂᤧᤴ ᤛᤢᤳᤏᤠ᤺ᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠᤀᤥᤀᤣ ᤏᤡᤱᤘᤠ᤹ ᤔᤧᤒᤡᤖᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤁᤧᤜᤡᤱᤒᤠᤜᤠ᤹ᤖᤧᤃ ᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠᤀᤥᤀᤣ ᤏᤡᤱᤘᤠ᤹ ᤔᤧᤒᤡᤖᤢ᤹ᤖᤥ॥
ROM 8:6 ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤕᤢᤰᤔᤠ ᤀᤠᤒᤠᤱᤄᤢᤶᤔᤡᤸᤗᤧᤃ ᤀᤠᤛᤡ᤺ᤖᤥ. ᤁᤖ ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤛᤣᤛᤣᤔᤠᤱᤅᤡᤴ ᤕᤢᤰᤔᤠ ᤀᤠᤒᤠᤱᤄᤢᤶᤏᤧ ᤑᤠ᤹ᤃᤪ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤏᤢ ᤛᤏᤠᤖᤢᤱ ᤀᤠᤄᤥ᤺ᤛᤢᤶᤗᤥ॥
ROM 8:7 ᤌᤣᤀᤠᤱᤓᤧᤸᤗᤧ ᤗᤠᤕᤥᤒᤠ ᤛᤢᤳᤏᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ ᤜᤧᤰᤁᤩᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤔᤧᤛᤢᤰᤋᤢᤴᤗᤥ॥
ROM 8:8 ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤕᤢᤰᤋᤢᤛᤡᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤔᤧᤴᤇᤢᤰᤋᤢᤴᤗᤥ॥
ROM 8:9 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤛᤧᤰᤂᤠᤀᤣ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ᤃ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤁᤢᤔᤏᤠ ᤔᤧ᤺ᤴᤏᤡᤱ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤏᤠᤏᤡᤱᤗᤥ॥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤴᤏᤢ ᤂᤪᤡᤛ᤻ᤋᤖᤧ ᤁᤢᤛᤣᤛᤣᤔᤠᤱᤅᤡᤴ ᤜᤥ᤺ᤵ ᤂᤧᤴ ᤂᤪᤡᤛ᤻ᤋᤖᤧ ᤁᤢᤔᤏᤠ ᤔᤧ᤺ᤴᤗᤥ॥
ROM 8:10 ᤁᤖ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤛᤡ᤺ᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤜᤡᤱᤗᤥ॥
ROM 8:11 ᤜᤧᤰᤁᤩᤠᤱ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤘᤠ᤹ᤏᤧ ᤑᤠ᤹ᤃᤪ ᤒᤠ ᤂᤧᤴ ᤂᤡᤏᤡ᤹ᤀᤥ ᤁᤧᤘᤠ᤹ᤒᤠ ᤛᤣᤛᤣᤔᤠᤱᤗᤠᤶ ᤂᤪᤡᤛ᤻ᤋ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠᤸᤗᤧ ᤂᤡᤏᤡ᤹ᤀᤠᤱ ᤁᤢᤜᤡᤱᤘᤧᤳ ᤁᤧᤈᤥᤃᤡ᤹ᤖᤥ॥
ROM 8:12 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ ᤀᤠᤏᤡ᤹ ᤔᤧᤴᤈᤥ᤺ᤰᤁᤣ ᤔᤧᤶᤒᤥ᤺ᤱᤔᤏᤠᤒᤠ ᤐᤠ᤺ᤴᤜᤠ᤹ ᤘᤠ᤹. ᤁᤖ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤜᤧᤰᤁᤣᤀᤣ ᤆᤥ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥
ROM 8:13 ᤂᤡᤏᤡ᤹ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤛᤩᤧ᤹ᤀᤡᤖᤥ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤗᤠᤕᤥᤒᤠ ᤕᤠ᤺ᤶᤒᤰᤜᤠ᤹ ᤁᤧᤗᤧᤖᤢᤶᤏᤧ ᤑᤠ᤹ᤃᤪ ᤁᤧᤜᤡᤅᤡ᤹ᤖᤥ॥
ROM 8:14 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤛᤡᤒᤠᤜᤠ᤹ᤀᤣ ᤏᤡᤱᤘᤠ᤹ᤑᤢᤛᤠ᤺ᤛᤡᤖᤥ॥
ROM 8:15 ᤂᤡᤏᤡ᤹ ᤁᤧᤄᤥ᤺ᤛᤢᤶᤒᤠ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤃᤡᤒᤠ ᤕᤥ᤺ᤰ ᤁᤧᤴᤈᤥᤃᤡᤴ. ᤁᤖ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤛᤡ᤺ᤱᤛᤠ᤺ ᤁᤧᤈᤥᤃᤡᤀᤠᤱ ᤘᤠ᤹॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ “ᤐᤠᤏᤢᤍᤡᤱ ᤀᤠᤶᤒᤦ” ᤔᤧᤵᤔᤠ ᤀᤠᤛᤢᤰᤋᤢᤶᤗᤥ॥
ROM 8:16 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤠᤏᤡ᤹ ᤕᤠᤶᤛᤠᤶᤔᤡᤴᤏᤢ ᤋᤱᤅᤠᤱ “ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤏᤡᤱᤗᤥ” ᤑᤠ᤹ᤀᤠᤱ ᤀᤠᤔᤧᤳᤗᤥ॥
ROM 8:17 ᤜᤧᤰᤁᤩᤠᤱ ᤁᤢᤛ᤻ᤛᤠ᤺ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤰ ᤁᤧᤄᤥ᤺ᤒᤠᤛᤡᤖᤥ॥ ᤛᤧᤰᤂᤠᤀᤣ ᤂᤢᤏᤧ᤹ᤏᤢ ᤛᤥᤖᤡᤰ ᤀᤡᤱᤎᤠ᤺ᤱ ᤀᤠᤄᤥ᤺ᤛᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤀᤡᤏᤥᤃᤧᤴ ᤋᤢᤰᤂᤣᤀᤠᤱ ᤀᤠᤈᤠᤏᤧ ᤑᤠ᤹ᤃᤪ ᤀᤠᤏᤡ᤹ᤃ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤗᤰ ᤁᤧᤄᤥ᤺ᤒᤠᤛᤡᤀᤠᤱᤗᤥ॥
ROM 8:18 ᤂᤢᤏᤧ᤹ ᤕᤠᤱᤛᤡ ᤀᤠᤒᤡᤒᤠ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧᤃ ᤁᤴ ᤕᤧᤶᤔᤥ ᤀᤠᤏᤡ᤹ ᤀᤠᤍᤢᤔᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤌᤣᤀᤠᤱ ᤔᤧ᤺ᤴᤗᤥ ᤑᤠ᤹ᤀᤠᤱ ᤀᤡ᤺ᤳᤋᤢᤱᤗᤥ॥
ROM 8:19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤛ᤻ᤛᤠ᤺ᤜᤠ᤹ ᤀᤥᤛᤣ᤺ᤴᤍᤠᤱ ᤐᤥ᤺ᤱᤔᤠ ᤕᤧᤶᤔᤡᤴ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤜᤠᤱᤄᤢᤖ ᤘᤠ᤹ᤖᤥ॥
ROM 8:20 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤑᤧᤳᤗᤠᤖᤧ. ᤜᤧᤰᤁᤣᤃ ᤀᤠᤒᤠᤅᤣᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ ᤁᤖ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧ ᤁᤡ᤺ᤔᤠ ᤐᤣ᤺ᤰᤔᤠᤗᤠᤶᤒᤠ ᤋᤠᤱᤛᤧ᤺ᤵᤐᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤃᤧᤴ ᤆᤥ᤺ᤰᤕᤢᤶᤓᤥ᤺ᤴ ᤔᤧᤄᤥ᤺ᤛᤢᤖ ᤁᤧᤗ᤹ᤒᤠᤴ ᤛᤠ᤹ᤖᤡᤰ ᤏᤡᤱᤛᤠᤱ ᤆᤥᤃᤢᤖ ᤘᤠ᤹॥
ROM 8:22 ᤁᤴ ᤁᤧᤖᤧᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤛᤠᤘᤠ᤺ᤶᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤡᤔᤠ᤹ᤀᤡᤴ ᤁᤢᤀᤡᤛᤡ᤺ᤰ ᤀᤠᤸᤗ ᤌᤠᤖᤡᤰ ᤕᤠ᤺ᤵᤐᤠ ᤏᤢ ᤋᤢᤰᤂᤣ ᤆᤠ᤺ᤒᤠᤴ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥
ROM 8:23 ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤰ ᤔᤧ᤺ᤴ. ᤁᤖ ᤁᤠᤰᤏᤢ ᤋᤃᤡᤒᤠ ᤗᤰ ᤁᤢᤀᤡᤛᤡ᤺ᤰ ᤛᤣᤛᤣᤔᤠᤱᤅᤡᤴ ᤁᤧᤄᤥ᤺ᤒᤠ ᤀᤠᤏᤡ᤹ᤀᤠᤱ ᤀᤠᤕᤠ᤺ᤳᤗ ᤀᤠᤘᤠ᤹ᤖᤥ॥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤀᤠᤈᤥ᤺ᤰᤁᤠᤱ ᤀᤠᤏᤡ᤹ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤗᤠᤕᤥ ᤏᤢ ᤋᤢᤰᤂᤣᤗᤠᤶ ᤆᤥ᤺ᤰᤕᤢᤶᤓᤥ ᤂᤥ᤺ᤛᤢᤖ ᤑᤠ᤹ᤀᤠᤱ ᤀᤠᤕᤠ᤺ᤳᤗ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤖᤥ॥
ROM 8:24 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤧᤴᤗᤵ ᤀᤠᤄᤥ᤺ᤛᤢᤶᤔᤠᤱᤎᤥᤀᤣ ᤁᤴ ᤛᤧᤰᤂᤠᤒᤠ ᤏᤡᤱᤛᤠᤱᤅᤡᤴ ᤀᤠᤃᤳᤋᤢᤶᤔᤠᤱ ᤘᤠ᤹॥ ᤏᤡ᤺ᤔᤏᤠᤒᤠ ᤐᤠ᤺ᤴᤏᤡᤴ ᤏᤡᤱᤛᤠᤱ ᤀᤠᤴᤈᤥᤃᤢᤶᤔᤡᤴᤗᤥ॥ ᤀᤠᤸᤗ ᤋᤃᤡᤛᤠ ᤁᤳᤋᤢᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤏᤡᤱᤛᤠᤱ ᤆᤥᤃᤢ᤹ᤒᤣ᥅
ROM 8:25 ᤁᤖ ᤀᤠᤏᤡ᤹ ᤀᤠᤸᤗ ᤌᤠᤖᤡᤰ ᤔᤧᤱᤄᤥᤀᤣ ᤀᤠᤘᤠ᤹ᤒᤠ ᤐᤠ᤺ᤴᤏᤡᤴ ᤏᤡᤱᤛᤠᤱ ᤀᤠᤈᤥᤃᤢᤶᤔᤡᤸᤗᤧ ᤂᤧᤴ ᤂᤥ᤺ᤔᤠ ᤑᤠ᤹ᤀᤠᤱ ᤏᤠᤛᤡ ᤀᤠᤎ᤺ᤳᤋᤢᤶᤔᤠᤱ ᤀᤠᤜᤠᤱᤄᤢᤶᤗᤥ॥
ROM 8:26 ᤛᤣᤛᤣᤔᤠᤱᤅᤡᤸᤗᤧᤀᤠᤱ ᤀᤠᤏᤡ᤹ ᤁᤧᤛᤠᤰᤐᤠᤀᤥ ᤀᤠᤎᤠᤀᤠᤱ ᤀᤠᤘᤠ᤹ᤀᤡᤸᤗᤧ ᤁᤢᤓᤠ᤹ ᤀᤠᤒᤡ᤹ᤖᤥ॥ ᤂᤧᤴ ᤕᤧᤶᤔᤥ ᤀᤠᤰᤂᤣᤗ᤹ᤖᤡᤰ ᤋᤢᤘᤠ ᤆᤥ᤺ᤰᤔᤠ ᤀᤠᤏᤡ᤹ ᤀᤠᤸᤗᤧᤛ᤻ᤛᤢᤶᤔᤡᤴ. ᤁᤖ ᤀᤠᤏᤡ᤹ ᤐᤠ᤺ᤵᤔᤠᤀᤣ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤛᤢᤳᤗᤠᤜᤠ᤹ᤖᤧᤴ ᤀᤠᤏᤡ᤹ ᤕᤠ᤺ᤵᤔᤠᤴᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤠᤏᤡ᤹ ᤗᤧᤰᤘᤠ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ᤹ᤖᤥ॥
ROM 8:27 ᤜᤧᤰᤁᤩᤠᤱ ᤀᤠᤏᤡ᤹ ᤛᤡᤰᤗᤢᤱᤔᤠᤀᤥᤒᤠ ᤐᤠ᤺ᤴ ᤁᤧᤏᤡ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤏᤡ᤺ᤛᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ᤹ᤖᤥ॥
ROM 8:28 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤔᤧᤵᤐᤠ. ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤢ᤺ᤳᤋᤢᤛᤡᤒᤠᤜᤠ᤹ᤖᤧ ᤗᤠᤃᤡ. ᤂᤢᤏᤧ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ᤺ᤒᤠᤀᤣ ᤐᤥ᤺ᤱᤗ ᤆᤥᤃᤢ᤹ ᤁᤧᤗ᤹ᤒᤠᤴᤏᤠᤱ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
ROM 8:29 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤀᤢᤴᤇᤣ᤺ᤴᤇᤠ ᤁᤢᤛᤡᤱ ᤏᤡ᤺ᤳᤋᤢᤛᤡᤀᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤛᤧ ᤛᤣᤃᤢᤛᤡᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤖᤡᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤀᤥ ᤂᤢᤏᤧ᤹ ᤋᤢᤶᤒᤠ ᤐᤥ᤺ᤰᤂᤧᤖᤥ॥
ROM 8:30 ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤋᤃᤡᤛᤠ ᤛᤣᤃᤢᤛᤡ. ᤂᤧᤱᤜᤠ᤹ᤃ ᤀᤢ᤺ᤳᤋᤢᤛᤡᤀᤠᤱᤗᤥ॥ ᤀᤠᤳᤋᤡᤴᤜᤠ᤹ ᤀᤢ᤺ᤳᤋᤢᤛᤡ᤹. ᤂᤧᤱᤜᤠ᤹ᤃ ᤀᤠᤵᤋᤡᤰ ᤔᤧ᤺ᤴᤏᤣᤒᤠᤀᤠᤱ ᤆᤥᤃᤢᤛᤡ᤹ᤖᤥ॥ ᤀᤠᤳᤋᤡᤴᤜᤠ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡ᤹. ᤂᤧᤱᤜᤠ᤹ᤃ ᤁᤢᤔᤡᤔᤡᤍᤡᤱᤅᤡᤴᤏᤠᤱ ᤐᤡᤖᤢᤛᤡ᤹ᤖᤥ॥
ROM 8:31 ᤜᤧᤰᤁᤣᤏᤧ ᤑᤠ᤹ᤃᤪ ᤀᤠᤏᤡ᤹ ᤌᤣ ᤀᤠᤒᤠ᤺ᤳᤋᤢᤶᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤗᤧᤵᤔᤠᤱ ᤘᤠ᤹ᤏᤧ ᤑᤠ᤹ᤃᤪ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤜᤠ᤺ᤳᤋᤠᤱ ᤐᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ॥
ROM 8:32 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴᤏᤣ ᤔᤧᤍᤠᤱᤄᤢᤴ. ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤂᤢᤏᤧ᤹ ᤛᤡ᤺ᤔᤠ ᤐᤠᤱᤄᤢ॥ ᤂᤢᤏᤧ᤹ ᤂᤪᤡᤛ᤻ᤋᤧᤴᤏᤣ ᤀᤠᤒᤡᤖᤧᤸᤗᤧ ᤁᤠᤰ ᤐᤠ᤺ᤴᤜᤠ᤹ᤀᤠᤱ ᤀᤠᤰᤂᤣᤗ᤹ᤖᤡᤰ ᤀᤠᤏᤡ᤹ ᤐᤡᤔᤠ ᤀᤠᤴᤇᤢᤰᤏᤧᤴᤒᤣ᥅
ROM 8:33 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠᤜᤠ᤹ ᤜᤠ᤺ᤳᤗᤧ ᤀᤠᤵᤋᤡᤰ ᤁᤢ᤺ᤵᤔᤠ ᤛᤢᤰᤋᤢᤛᤡ᤹ᤒᤣ᥅ ᤜᤠ᤺ᤳᤗᤧᤀᤠᤱ ᤔᤧᤛᤢᤰᤋᤢᤴᤇᤡᤴ. ᤌᤣᤀᤠᤱᤓᤧᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥
ROM 8:34 ᤀᤠᤏᤡ᤹ ᤜᤠ᤺ᤳᤗᤧ ᤐᤠ᤺ᤴ ᤌᤡᤰᤔᤠ ᤀᤠᤛᤢᤰᤐᤣ᥅ ᤜᤠ᤺ᤳᤗᤧᤀᤠᤱ ᤀᤠᤴᤇᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴ ᤛᤩᤧᤀᤠᤱ ᤀᤠᤸᤗ ᤂᤢᤏᤧ᤹ᤃ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱᤗᤧᤵᤔᤠᤱ ᤕᤢᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠᤀᤠᤱ ᤆᤥᤃᤢᤖ ᤕᤢᤱᤗᤥ॥
ROM 8:35 ᤜᤠ᤺ᤳᤗᤧ ᤂᤪᤡᤛ᤻ᤋᤖᤧ ᤁᤢᤔᤡ᤺ᤶᤈᤡᤗᤠᤶ ᤛᤧᤶᤔᤠ ᤀᤠᤛᤢᤰᤐᤣ᥅ ᤕᤧᤳᤋᤢᤰᤂᤣ. ᤀᤡᤏᤥᤃᤧᤴ ᤋᤢᤰᤂᤣ. ᤏᤡᤱᤄᤢᤶ. ᤛᤠᤰ. ᤆᤠᤱᤔᤠ ᤘᤠ᤺ᤵᤔᤠ ᤜᤥ᤺ᤵᤔᤠ. ᤁᤡᤵᤔᤠ ᤁᤧᤄᤢ᤺ᤒᤠ ᤕᤧᤶ ᤀᤡᤃᤪ ᤛᤡ᤺ᤔᤧᤸᤗᤧ ᤛᤧᤶᤔᤠ ᤀᤠᤛᤢᤰᤐᤡ᥅
ROM 8:36 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤧᤏᤧ᤹ ᤏᤛᤠ᤺ᤴ ᤆᤥ᤺ᤰᤁᤠᤛᤡᤃᤧᤒᤠᤸᤗᤧ ᤌᤡᤰᤕᤠ᤺ᤴᤎᤰ ᤔᤧᤛᤧᤖᤡᤃᤧ᤹ᤖᤥ॥ ᤛᤧᤵᤔᤠ ᤁᤧᤒᤥ᤺ᤱᤒᤠ ᤔᤧᤸᤗᤢᤰ ᤁᤢᤀᤡᤛᤡ᤺ᤰ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤡᤃᤧᤖᤥ॥”
ROM 8:37 ᤁᤴ ᤁᤠᤰ ᤐᤠ᤺ᤴᤜᤠ᤹ᤀᤥ ᤀᤠᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤂᤪᤡᤛ᤻ᤋᤗᤠᤶᤒᤠ ᤀᤠᤏᤡ᤹ ᤌᤱ ᤁᤧᤏᤠ᤺ᤶᤒᤠᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥
ROM 8:38 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤗᤠᤶ ᤀᤠᤏᤡ᤹ ᤌᤣ᤺ᤸᤗᤧᤀᤠᤱ ᤛᤧᤶᤔᤠ ᤀᤠᤴᤇᤢᤰᤏᤧᤴᤗᤥ ᤁᤧᤗ᤹ᤒᤠᤴ ᤏᤡ᤺ᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤛᤡ᤺ᤔᤧᤴ ᤏᤢ ᤜᤡᤱᤔᤧᤸᤗᤧ. ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤑᤧᤴᤛᤠᤶᤜᤠ᤹ᤖᤧ. ᤁᤴ ᤕᤧᤶ ᤏᤢ ᤋᤠᤕᤧᤶᤒᤠ ᤐᤠ᤺ᤴᤜᤠ᤹ᤖᤧ. ᤀᤡᤃᤪ ᤀᤠᤳᤋᤡᤴ ᤔᤢᤰᤛᤠᤶᤜᤠ᤹ᤖᤧᤀᤠᤱ ᤛᤧᤶᤔᤠ ᤀᤠᤴᤇᤢᤰᤏᤧᤴ.
ROM 8:39 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤡᤸᤗᤧ ᤁᤢᤈᤱᤎᤠᤱᤒᤠ ᤏᤢ ᤁᤢᤛᤡᤃᤠᤱᤒᤠ. ᤀᤡᤃᤪ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤥᤒᤠ ᤔᤢᤰᤛᤠᤶ ᤌᤣ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤗᤠᤶ ᤛᤧᤶᤔᤠ ᤀᤠᤴᤇᤢᤰᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤗᤠᤶ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ᤖᤥ॥
ROM 9:1 ᤀᤡᤱᤃᤠ᤹ ᤐᤠ᤺ᤵᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ॥ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤔᤏᤠᤀᤠ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤋᤠᤴᤗᤥ॥ ᤀᤠᤄᤠᤛᤡᤱᤅᤡᤴ ᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤆᤥ᤺ᤰᤗᤥ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥ᤺ᤰᤛᤢ᤹ᤖᤥ॥
ROM 9:2 ᤀᤠᤔᤡ᤺ᤶ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤀᤡᤱᤃᤠ᤹ ᤏᤡᤱᤘᤠ᤹ᤀᤥ ᤋᤢᤰᤂᤣ᤺ᤸᤗᤧ ᤛᤠ᤹ᤖᤡᤰ ᤕᤠ᤺ᤴᤍᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤒᤠᤅᤣ ᤀᤠᤛᤢᤘᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤴᤗᤵ ᤂᤥ᤺ᤔᤠ ᤔᤧᤛᤢᤰᤋᤢᤸᤗᤧᤃ ᤀᤡᤱᤃᤠ᤹ ᤂᤢᤶᤍᤡᤱᤅᤥ ᤌᤠ᤺ᤔᤠ ᤏᤢ ᤂᤪᤡᤛ᤻ᤋᤗᤠᤶ ᤗᤠ᤺ᤳᤗᤠ᤺ᤳ ᤐᤥ᤺ᤱᤔᤠ ᤛᤢᤰᤋᤠᤱᤒᤠᤔᤧᤴ॥
ROM 9:4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤐᤥ᤺ᤱᤛᤧ ᤛᤣᤃᤢᤛᤡᤀᤠᤱ ᤁᤢᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤔᤠᤱᤜᤢᤵᤜᤠ᤹ ᤆᤥᤃᤢᤀᤠᤱ ᤛᤠᤶᤕᤥᤌᤡᤶᤔᤡᤴ ᤐᤡᤖᤢᤛᤡ॥ ᤂᤧᤱᤜᤠ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤡᤶᤔᤥᤒᤠ ᤛᤣᤘᤠ ᤆᤥ᤺ᤰᤔᤠᤴ ᤏᤢ ᤕᤖᤡᤰ ᤔᤠᤱᤜᤧᤰᤜᤠ᤹ ᤐᤡᤖᤢᤛᤡᤖᤥ॥
ROM 9:5 ᤁᤢᤔᤡᤱ ᤁᤧᤛᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤧᤴ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤋᤠᤰᤌᤧᤒᤠᤛᤡᤖᤥ. ᤜᤧᤰᤁᤩᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤔᤧᤴᤇᤠᤶᤃᤧᤴ ᤌᤰᤁᤥ ᤂᤢᤏᤡ᤹ ᤛᤢᤘᤠᤱᤅᤥᤀᤣ ᤛᤠᤘᤠ᤺ᤴᤇᤡᤱᤗᤥ॥ ᤂᤢᤏᤧ᤹ᤀᤣ ᤁᤧᤖᤧᤰ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤛᤍᤠᤍᤡᤱ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤖᤥ᥄ ᤀᤠᤔᤧᤴ॥
ROM 9:6 ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰᤜᤠ᤹ᤃ ᤔᤧᤃᤧᤖᤧᤶᤒᤠ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗ ᤛᤢᤘᤠᤱᤗᤠᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤁᤧᤖᤧᤰᤁ ᤛᤧᤰᤂᤠᤒᤠ ᤀᤡᤛᤪᤠᤀᤡᤗᤡ ᤔᤧ᤺ᤴᤇᤡᤖᤥ॥
ROM 9:7 ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤒᤥ᤺ᤱᤅᤡᤸᤗᤧᤛᤠ ᤁᤧᤖᤧᤰ ᤛᤧᤰᤂᤠᤒᤠ ᤁᤢᤛ᤻ᤛᤠ᤺ ᤔᤧᤶᤒᤥ᤺ᤱᤏᤧᤴᤗᤥ॥ ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤔᤠᤱᤜᤧᤰ ᤆᤥᤃᤢᤱᤒᤠ ᤁᤧᤛ᤻ᤛᤠ᤺ ᤀᤡᤛᤜᤠᤁᤗᤠᤶᤔᤣ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥ᤺ᤱᤗᤥ॥”
ROM 9:8 ᤁᤴ ᤑᤠ᤹ᤀᤡᤱᤃ ᤀᤒᤪᤠᤜᤠᤔᤖᤧ ᤏᤠᤛᤡᤱᤃᤧᤴ ᤁᤢᤎᤰᤁᤥᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤛᤡ ᤁᤧᤗ᤹ᤒᤠ ᤐᤠ᤺ᤴ ᤔᤧ᤺ᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤏᤧ ᤑᤠ᤹ᤀᤠᤱ ᤐᤡᤖᤢᤒᤠ ᤔᤠᤱᤜᤧᤰᤗᤠᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ᤀᤣ ᤀᤒᤪᤠᤜᤠᤔᤖᤧ ᤛᤧᤰᤂᤠᤒᤠ ᤁᤢᤔᤢ᤹ᤀᤡᤍᤠᤱᤛᤠᤛᤡᤖᤥ॥
ROM 9:9 ᤂᤧᤴ ᤔᤠᤱᤜᤧᤰᤁᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤴᤏᤧᤶᤔᤠ᤹ ᤒᤠ ᤁᤴ ᤕᤧᤶᤔᤥ ᤀᤡᤱᤃᤠ᤹ ᤏᤢ᤺ᤱᤅᤠ ᤋᤠᤀᤠᤖᤥ. ᤜᤧᤰᤁᤩᤠᤱ ᤁᤧᤔᤣ᤺ᤳ ᤛᤠᤖᤠ᤺ᤸᤗᤧ ᤗᤳᤇᤠ ᤕᤧᤶᤒᤡᤳᤇᤠ᤹ᤛᤠ ᤁᤳᤋᤢ᤹ᤖᤥ॥”
ROM 9:10 ᤜᤧᤰᤁᤣᤖᤰ ᤔᤧ᤺ᤴ. ᤁᤖ ᤀᤠᤏᤡᤃᤧ ᤋᤠᤰᤌᤧᤒᤠ ᤀᤡᤛᤜᤠᤁᤗᤠᤶ ᤁᤢᤔᤣ᤺ᤳ ᤖᤡᤒᤣᤰᤁᤠ᤺ᤸᤗᤧ ᤁᤠᤵᤛᤠᤒᤠᤛᤠ᤺ᤜᤠ᤹ ᤁᤳᤋᤢᤛᤡᤀᤠᤱ ᤘᤕᤧ.
ROM 9:11 ᤁᤖ ᤂᤧᤴ ᤁᤠᤵᤛᤠᤒᤠᤛᤠ᤺ᤜᤠ᤹ ᤛᤠᤘᤠ᤺ᤴᤇᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤧᤱᤜᤠ᤹ᤖᤧ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤔᤧᤴᤈᤥ᤺ᤰᤁᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤖᤡᤒᤣᤰᤁᤠ᤺ᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧᤖᤥ. “ᤋᤢᤶᤒᤠᤸᤗᤧ ᤑᤥ᤹ᤒᤠᤴ ᤛᤣᤘᤠ ᤆᤥᤃᤢ᤹ᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤕᤠᤁᤢᤒᤧᤴ ᤗᤢᤱᤔᤠ᤹ ᤋᤢᤰᤋᤢᤱ. ᤁᤖ ᤀᤧᤛᤠᤀᤢ᤺ᤴ ᤆᤡ᤺ᤳᤋᤢᤱᤗᤥ॥” ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤀᤥᤔᤧᤳᤋᤢᤀᤠᤱ ᤔᤧ᤺ᤴ. ᤁᤖ ᤂᤢᤏᤧ᤹ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤛᤥ᤺ᤰ ᤁᤢᤀᤡᤛᤡ᤺ᤰ ᤛᤣᤃᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤖᤥ॥
ROM 9:14 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤔᤧᤗᤥ᤺ᤴᤏᤧᤴᤒᤡ᥅ ᤛᤧᤰᤂᤠᤛᤠᤱ ᤔᤧ᤺ᤴᤗᤥ᥄
ROM 9:15 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴ ᤀᤰᤂᤣ ᤔᤧᤳᤋᤢ. “ᤀᤠᤳᤋᤡᤴ ᤏᤢ᤺ᤖᤡᤰ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤱ ᤂᤧᤴ ᤏᤢ᤺ᤖᤡᤰ ᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤳᤋᤡᤴ ᤗᤢᤱᤔᤠ᤹ ᤋᤢᤰᤔᤠ ᤏᤡᤱᤘᤠ᤹ ᤆᤥᤃᤢᤱ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤱ॥”
ROM 9:16 ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤆᤥ᤺ᤰᤔᤠᤸᤗᤧ ᤀᤡᤃᤪ ᤋᤶᤛᤡᤴ ᤆᤥ᤺ᤰᤔᤠᤸᤗᤧᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤗᤠᤶ ᤁᤠᤰ ᤐᤠ᤺ᤴᤜᤠ᤹ ᤋᤠ᤺ᤖᤥ॥
ROM 9:17 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠᤖᤥᤜᤠᤱᤅᤡᤴ ᤀᤰᤂᤣ ᤔᤧᤳᤋᤢᤀᤠᤱ ᤐᤳ. “ᤂᤧᤏᤧ᤹ ᤁᤧᤛᤶᤍᤠᤱ ᤀᤠᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤅᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤔᤡᤱᤅᤡᤴ ᤀᤡᤱᤓᤥ᤺ᤖ ᤁᤧᤗ᤹ᤒᤠ ᤏᤡᤱᤘᤠ᤹ᤛᤥ᤺ᤰᤁᤥ ᤀᤡᤱᤃᤠ᤹ᤀᤣ ᤂᤧᤏᤧ᤹ ᤜᤠᤱ ᤆᤥ᤺ᤰᤏᤧᤀᤠᤱ ᤘᤠ᤹ᤀᤠᤖᤥ॥”
ROM 9:18 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤏᤢ᤺ᤖᤡᤰ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤏᤢ᤺ᤖᤡᤰ ᤔᤧᤳᤋᤢ᤹. ᤜᤧᤰᤁᤩᤠᤱ ᤀᤠᤳᤋᤡᤴ ᤁᤢᤏᤡᤱᤘᤠ᤹ ᤏᤢ᤺ᤱᤔᤠ ᤁᤧᤛᤠᤰᤐᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴᤏᤡᤴ ᤁᤢᤏᤡᤱᤘᤠ᤹ ᤏᤢ᤺ᤱᤔᤠ ᤁᤧᤛᤠᤰᤐᤠ ᤆᤥᤃᤢ᤹ᤖᤥ॥
ROM 9:19 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤁᤢᤓᤠᤖᤧ ᤀᤡᤱᤃᤠ᤹ ᤀᤰᤂᤣ ᤕᤠᤵᤔᤡ ᤁᤧᤔᤧᤳᤋᤡᤒᤡᤗᤠ. “ᤜᤧᤰᤁᤣᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤛᤠᤱ ᤌᤣᤀᤠᤱ ᤐᤠ᤺ᤴ ᤀᤠᤎᤡᤰᤐᤠᤒᤣ᥅ ᤀᤠᤳᤋᤡᤸᤗᤧᤀᤠᤱ ᤂᤢᤏᤧ᤹ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤵᤔᤠ ᤔᤧᤛᤢᤰᤋᤢᤴᤗᤥ॥”
ROM 9:20 ᤔᤧᤴᤇᤠᤶ ᤕᤠᤵᤔᤡᤀᤣ. ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤢᤖᤠ ᤁᤧᤍᤥ᤺ᤒᤠ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅ ᤆᤥ᤺ᤰᤔᤏᤠᤒᤠ ᤆᤡᤃ᤺ᤰᤘᤠ᤺ᤸᤗᤧ ᤁᤧᤈᤥ᤺ᤰᤐᤧᤴ “ᤌᤣᤀᤠᤱ ᤀᤰᤋᤱᤒᤠ ᤁᤧᤈᤥᤃᤠᤱᤒᤠᤒᤣ᥅” ᤔᤧᤳᤋᤢᤒᤡ᥅
ROM 9:21 ᤛ᤹ᤔᤏᤠᤒᤠ ᤂᤠᤶᤔᤥᤗᤠᤶ ᤁᤥ᤺ᤶᤓᤗᤣ᤺ᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤁᤧᤒᤥ᤺ᤱᤒᤠ ᤑᤢᤈᤡᤰ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤂᤠᤶᤔᤥᤗᤠᤶ ᤔᤧᤴᤈᤥᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤁᤧᤒᤥ᤺ᤱᤒᤠ ᤑᤢᤈᤡᤰ ᤆᤥ᤺ᤰᤔᤠ ᤕᤢᤰ ᤔᤧᤃᤳᤋᤢᤶᤒᤡ᥅
ROM 9:22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤡᤴ ᤏᤢ ᤁᤢᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤕᤢᤰ ᤁᤳᤋᤢᤏᤧ ᤑᤠ᤹ᤃᤪ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤁᤧᤒᤥ᤺ᤱᤒᤠ ᤔᤏᤠᤜᤠ᤹ ᤛᤡᤰᤁᤡᤸᤗᤧ ᤁᤢᤗᤧᤰᤘᤠ ᤏᤠᤛᤡ ᤌ᤺ᤳᤋᤢᤛᤡᤸᤗᤧ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅
ROM 9:23 ᤜᤧᤰᤁᤩᤠᤱ ᤋᤃᤡᤛᤠ ᤁᤢᤔᤡᤔᤡᤍᤡᤱᤅᤡᤴ ᤂᤥ᤺ᤔᤠ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤛᤡᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤜᤠ᤹ ᤀᤡᤔᤧᤸᤗᤢᤱᤒᤠ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤰᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤆᤥᤃᤢᤖᤥ॥
ROM 9:24 ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤕᤜᤢᤍᤡᤛᤠᤱ. ᤌᤡᤶᤔᤧᤴᤍᤱ ᤛᤢᤘᤠᤱᤛᤠᤱ. ᤂᤧᤴ ᤛᤣᤃᤢᤛᤡᤒᤠᤜᤠ᤹ᤃ ᤀᤠᤏᤡ᤹ᤀᤣᤖᤥ॥
ROM 9:25 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤜᤥᤛᤣᤖᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳᤗᤥ. “ᤀᤠᤳᤋᤡᤴᤜᤠ᤹ ᤀᤠᤔᤏᤠ ᤔᤧᤜᤥ᤺ᤵᤋᤧ ᤂᤧᤱᤜᤠ᤹ ᤀᤠᤔᤏᤠ ᤆᤥᤃᤢᤱᤛᤡᤱᤗᤥ॥ ᤋᤃᤡ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤒᤠᤜᤠ᤹. ᤀᤠᤸᤗᤥ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ॥”
ROM 9:26 ᤜᤧᤰᤁᤩᤠᤱ. ᤀᤠᤳᤋᤡᤴ ᤋᤧᤴᤏᤥ “ᤂᤡᤏᤡ᤹ ᤀᤠᤔᤏᤠ ᤁᤧᤜᤥ᤺ᤵᤋᤡ ᤗ᤹ᤖᤡᤰ ᤁᤧᤶᤔᤧᤳᤋᤡᤀᤠᤱ ᤘᤕᤧ. ᤒᤠ ᤂᤧᤴ ᤋᤧᤴᤏᤥ ‘ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤏᤡᤱ’ ᤁᤧᤶᤔᤧᤳᤋᤡ᤹ᤖᤥ॥”
ROM 9:27 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤀᤡᤛᤪᤠᤀᤡᤗᤡᤜᤠ᤹ᤃ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤘᤠᤜᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤜᤧᤰᤁᤣ ᤕᤖᤡᤰ ᤔᤧᤈᤥ᤺ᤰᤛᤠᤱ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤰ ᤋᤠᤱᤔᤧᤛᤧ᤺ᤵᤗᤥ॥
ROM 9:28 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤄᤢᤶᤍᤡᤱᤅᤡᤸᤗᤧᤴ ᤀᤡᤱᤈᤠ᤺ᤱᤅᤡᤴ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤖᤠᤀᤣ ᤁᤧᤳᤋᤢ᤹ᤖᤥ॥”
ROM 9:29 ᤕᤛᤤᤕᤠᤖᤧ ᤀᤡᤛᤪᤠᤀᤡᤗᤖᤧ ᤁᤢᤕᤠ᤺ᤶᤒᤣᤀᤥ ᤁᤴ ᤋᤃᤡᤛᤠ ᤐᤠ᤺ᤳᤋᤢᤀᤠᤱ ᤘᤠ᤹ᤒᤠ ᤜᤧᤰᤁᤣᤀᤣ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤗᤠᤃᤡ ᤁᤢᤔᤢ᤹ᤀᤡᤍᤠᤱᤛᤠ᤺ᤴ ᤀᤠᤴᤎᤠ᤹ᤖᤧᤴᤏᤡᤸᤗᤧᤃ ᤀᤠᤏᤡ᤹ ᤛᤍᤥᤔ ᤏᤢ ᤃᤔᤥᤖᤠ ᤁᤢᤀᤡᤛᤡ᤺ᤰᤁᤣ ᤂᤠᤵᤐᤢ ᤌᤩ᤺ᤱ ᤀᤠᤒᤥ᤺ᤰᤂᤧᤒᤠᤖᤥ॥”
ROM 9:30 ᤜᤧᤰᤁᤣ᤺ᤸᤗᤧ ᤀᤠᤸᤗ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤃ ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤔᤧᤱᤃᤥ᤺ᤳᤋᤢᤴᤇᤠᤱ ᤏᤛᤠ᤺ᤴ ᤔᤧᤈᤥᤃᤢᤒᤠᤗᤠᤶᤒᤠ ᤛᤠᤶᤕᤥᤏᤡᤒᤠ ᤔᤧᤒᤥ᤺ᤰᤂᤧ॥
ROM 9:31 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤋᤶᤛᤡᤴ ᤔᤧᤈᤥᤃᤢᤛᤠᤱ ᤛᤠᤶᤕᤥᤏᤡᤒᤠ ᤔᤧᤴᤒᤥ᤺ᤰᤂᤧᤴᤗᤥ॥
ROM 9:32 ᤌᤣᤀᤠᤱ ᤔᤧᤴᤒᤥ᤺ᤰᤂᤧᤴᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤱᤃ ᤀᤠᤒᤠᤅᤣ ᤕᤠ᤺ᤶᤒᤰᤗᤠᤶᤒᤠ ᤂᤥ᤺ᤔᤠ ᤛᤢᤰᤋᤧᤳ ᤁᤧᤗ᤹ᤒᤠ ᤔᤧᤀᤡ᤺ᤳᤋᤢᤀᤠᤱ ᤏᤛᤠ᤺ᤴᤗᤠᤶᤒᤠ ᤁᤧᤍᤠ᤺ᤒᤠ ᤛᤠᤶᤕᤥᤏᤡᤒᤠᤴ ᤔᤧᤱᤃᤥ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤕᤠᤵᤔᤡ ᤁᤧᤄ᤺ᤒᤠ ᤗᤢᤱᤅᤥ ᤔᤧᤍᤥ᤺ᤰᤋᤧᤀᤠᤱ ᤔᤧᤈᤥ᤺ᤴᤍᤧᤖᤥ॥
ROM 9:33 ᤁᤱᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤖᤢᤛᤗᤧᤶᤔᤥ ᤔᤏᤠᤜᤠ᤹ ᤔᤧᤍᤥ᤺ᤰᤗ ᤑᤠ᤹ᤀᤠᤱ ᤔᤏᤠ ᤁᤧᤄ᤺ᤒᤠ ᤗᤢᤱᤅᤡᤴ ᤏᤧᤛ᤻ᤛᤢᤱᤗᤥ. ᤜᤧᤰᤁᤩᤠᤱ ᤔᤧᤗᤧ᤺ᤱᤅᤠᤱ ᤔᤧᤃᤧᤱᤗ ᤑᤠ᤹ᤀᤠᤱ ᤗᤢᤱᤈᤧᤰ ᤏᤧᤛ᤻ᤛᤢᤱᤗᤥ. ᤁᤖ ᤂᤢᤏᤧ᤹ ᤛᤶᤍᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠᤱᤃ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱ ᤔ᤺ᤔᤥ ᤔᤧᤎᤠᤏᤧᤴᤗᤥ॥”
ROM 10:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ᤃ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤛᤧ᤺ᤵᤗ ᤑᤠ᤹ᤀᤠᤱ ᤛᤡᤰᤗᤢᤱᤔᤥᤏᤢᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤘᤠ ᤆᤥᤃᤢᤱᤗᤥ॥
ROM 10:2 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤂᤢᤏᤡ᤹ ᤛᤡᤰ ᤛᤶ ᤑᤠ᤹ᤀᤠᤱ ᤐᤠ᤺ᤳᤋᤢᤱ. ᤁᤖ ᤀᤠᤰᤂᤣᤀᤠᤱ ᤁᤢᤏᤡᤱᤘᤠ᤹ ᤋᤠ᤺ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤴᤏᤡ᤺ᤛᤢᤴᤗᤥ॥
ROM 10:3 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠ ᤛᤠᤶᤕᤥᤏᤡᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤀᤠᤒᤠᤅᤣ ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤋᤶᤛᤡᤴ ᤔᤧᤈᤥᤃᤢ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤗᤠᤶᤔᤡᤴ ᤔᤧᤏᤠ᤹ᤖᤢᤖᤥ॥
ROM 10:4 ᤂᤪᤡᤛ᤻ᤋᤧᤸᤗᤧᤀᤣ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤋᤢᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤛᤠᤶᤕᤥᤏᤡᤒᤠ ᤔᤧᤒᤥ᤺ᤱᤗᤥ॥
ROM 10:5 ᤔᤥᤛᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤐᤥᤎᤰ ᤆᤥᤃᤢᤀᤠᤱ ᤘᤠ᤹. “ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤏᤠ᤺ᤴ ᤒᤠ ᤂᤧᤴᤗᤠᤶᤒᤠᤀᤣ ᤜᤡᤱᤗᤥ॥”
ROM 10:6 ᤁᤖ ᤏᤛᤠ᤺ᤴ ᤆᤥ᤺ᤰᤔᤠᤀᤠᤱ ᤁᤧᤍᤠ᤺ᤒᤠ ᤛᤠᤶᤕᤥᤏᤡᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “‘ᤜᤠ᤺ᤳ ᤌᤥ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣ᤺ᤰᤐᤠᤒᤣ᥅’ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤧᤴᤏᤧ᤹” (ᤂᤧᤴ ᤑᤠ᤹ᤀᤡᤴ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱ ᤀᤠᤏᤡ᤹ᤀᤥ ᤕᤢ᤺ᤳᤇᤧ ᤂᤪᤡᤛ᤻ᤋᤧᤴ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤢ᤺ᤵᤔᤠ ᤐᤥ᤺ᤱ).
ROM 10:7 ᤀᤡᤃᤪ “‘ᤜᤠ᤺ᤳ ᤕᤥ ᤂᤧᤔᤠᤕᤱᤛᤱᤅᤥ ᤌᤠᤒᤠᤒᤣ᥅’ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤧᤴᤏᤧ᤹” (ᤂᤧᤴ ᤑᤠ᤹ᤀᤡᤴ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤀᤠᤏᤡ᤹ᤀᤥ ᤌᤠᤰᤛᤧ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤌᤥ ᤌᤠᤰᤔᤠ ᤐᤥ᤺ᤱ)॥
ROM 10:8 ᤁᤖ ᤁᤸᤗᤧ ᤌᤣ ᤐᤠ᤺ᤳᤋᤢᤒᤣ᥅ “ᤐᤠ᤺ᤴᤈᤠᤰᤁᤡᤱᤃ ᤁᤧᤒᤣᤛᤠᤱᤅᤣ ᤘᤠ᤹. ᤁᤧᤔᤢᤖᤠᤀᤥ ᤜᤧᤰᤁᤩᤠᤱ ᤁᤧᤛᤡᤰᤗᤢᤱᤔᤥ ᤘᤠ᤹.” ᤂᤧᤱᤃ ᤀᤠᤏᤡᤃᤧ ᤀᤡᤱᤓᤥ᤺ᤛᤢᤶᤒᤧᤒᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤐᤠ᤺ᤴᤈᤠᤰᤗᤥ–
ROM 10:9 ᤂᤧᤏᤧ᤹ ᤁᤧᤔᤢᤖᤠ᤺ᤸᤗᤧ ᤕᤧᤛᤢ᤺ᤴᤏᤣ ᤍᤠᤱᤒᤠᤖᤥ ᤑᤠ᤹ᤀᤠᤱ ᤋᤧᤴᤍᤡᤱ ᤁᤧᤈᤥᤃᤢᤀᤠᤱ ᤁᤧᤛᤡᤰᤗᤢᤱᤔᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤋᤠᤱᤃᤧᤛᤧ᤺ᤵᤗᤥ॥
ROM 10:10 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥᤗᤠᤶ ᤏᤛᤠ᤺ᤴ ᤁᤧᤈᤥᤃᤢᤒᤠᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤒᤥ᤺ᤱ. ᤜᤧᤰᤁᤩᤠᤱ ᤁᤧᤔᤢᤖᤠ᤺ᤸᤗᤧ ᤋᤧᤴᤍᤡᤱ ᤁᤧᤈᤥᤃᤢᤒᤠᤸᤗᤧ ᤛᤧᤴᤗᤵ ᤁᤧᤄᤥ᤺ᤛᤢ᤹ᤖᤥ॥
ROM 10:11 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤂᤢᤏᤧ᤹ ᤛᤶᤍᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠᤱᤃ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱ ᤔ᤺ᤔᤥ ᤔᤧᤎᤠᤏᤧᤴᤗᤥ॥”
ROM 10:12 ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱ ᤗᤢᤶᤔᤥ ᤌᤣᤀᤠᤱ ᤕᤧᤔᤧᤴᤍᤱ ᤐᤠ᤺ᤴ ᤜᤥ᤺ᤵᤗᤥ–ᤗᤳᤇᤠ ᤍᤠᤱᤒᤠᤴᤏᤣ ᤁᤧᤖᤧᤰᤗᤧ ᤂᤢᤏᤡ᤹ ᤍᤠᤱᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱ ᤁᤧᤗᤥ᤺ᤱᤒᤠ ᤁᤧᤖᤧᤰ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹ᤖᤥ॥
ROM 10:13 ᤌᤣᤀᤠᤱᤓᤧᤸᤗᤧ “ᤍᤠᤱᤒᤠᤸᤗᤧ ᤁᤢᤔᤡᤱ ᤁᤧᤗᤥ᤺ᤱᤒᤠ ᤁᤧᤖᤧᤰᤗᤧ ᤛᤧᤴᤗᤵ ᤔᤧᤄᤥ᤺ᤛᤢ᤹॥”
ROM 10:14 ᤁᤖ ᤂᤧᤱᤜᤠ᤹ᤖᤧ ᤏᤛᤠ᤺ᤴᤏᤣ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤀᤡᤸᤗᤧ ᤀᤠᤰᤂᤣᤀᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴ ᤔᤧᤗᤥ᤺ᤰᤂᤢᤒᤣ᥅ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤂᤧᤶᤔᤤ ᤔᤧᤱᤄᤧᤶᤔᤣ ᤔᤧᤘᤠ᤹ᤀᤡᤸᤗᤧ ᤀᤠᤰᤂᤣᤀᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤛᤢᤰᤋᤢ᤹ᤒᤣ᥅ ᤜᤧᤰᤁᤩᤠᤱ ᤀᤡᤱᤓᤴ ᤁᤧᤛᤧᤒᤠ ᤔᤏᤠᤀᤣ ᤔᤧ᤺ᤴᤏᤣ ᤀᤠᤰᤂᤣᤗ᤹ᤖᤡᤰ ᤔᤧᤄᤧᤵᤛᤢᤒᤠᤒᤣ᥅
ROM 10:15 ᤜᤧᤰᤁᤩᤠᤱ ᤜᤠ᤺ᤳᤋᤠᤱ ᤔᤧᤶᤒᤠᤱᤅᤣ ᤀᤠᤰᤂᤣᤀᤠᤱ ᤂᤧᤱᤜᤠ᤹ᤖᤧ ᤀᤡᤱᤓᤴ ᤔᤧᤈᤥᤃᤢ᤹ᤒᤣ᥅ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤛᤢᤏᤠᤀᤡᤱ ᤀᤡᤱᤓᤴ ᤁᤧᤈᤥ᤺ᤰᤐᤧᤴ ᤋᤠ᤺ᤸᤗᤧ ᤀᤠᤰᤂᤧᤴ ᤏᤢ᤺ᤒᤠ ᤐᤥ᤺ᤱᤒᤣ᥄”
ROM 10:16 ᤁᤖ ᤁᤧᤖᤧᤰᤗᤧ ᤛᤢᤏᤠᤀᤡᤱᤅᤡᤴ ᤔᤧᤴᤍᤠ᤺ᤰᤋᤢᤴᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ᤹. “ᤀᤠᤍᤠᤱᤒᤣ. ᤀᤠᤏᤡᤃᤧ ᤀᤡᤱᤓᤥ᤺ᤛᤢᤶᤒᤧᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤏᤛᤠ᤺ᤴ ᤆᤥᤃᤢᤀᤠᤱ ᤘᤠ᤹ᤒᤣ᥅”
ROM 10:17 ᤜᤧᤰᤁᤣᤗ᤹ᤖᤡᤰ ᤏᤛᤠ᤺ᤴᤏᤡᤱᤃ ᤂᤧᤶᤔᤏᤠᤒᤠᤗᤠᤶᤒᤠ ᤋᤠ᤺ᤖᤥ. ᤜᤧᤰᤁᤩᤠᤱ ᤂᤧᤴ ᤂᤧᤶᤔᤏᤠᤒᤠᤱᤃ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤐᤠ᤺ᤴᤈᤠᤰᤗᤠᤶ ᤋᤠ᤺ᤖᤥ॥
ROM 10:18 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤛᤧᤰᤂᤠᤀᤣ ᤔᤧᤱᤄᤧᤶᤔᤣ ᤔᤧᤘᤠ᤹ᤒᤡ᥅ ᤛᤧᤰᤂᤠᤀᤣ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ. ᤁᤴ ᤛᤢᤏᤠᤀᤡᤱ ᤁᤧᤛᤧᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤄᤱᤅᤡᤴ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤛᤧ᤺ᤖᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤋᤧᤴᤏᤥ ᤛᤧ᤺ᤖᤧᤀᤠᤱ ᤘᤠ᤹ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥
ROM 10:19 ᤀᤡᤱᤃᤠ᤹ ᤕᤠᤶᤔᤥ ᤛᤣ᤺ᤴᤍᤥ᤺ᤏᤡᤱ. ᤛᤧᤰᤂᤠᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤡ᥅ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤣᤖᤥ. ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤁᤢᤕᤧᤶᤔᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤅᤠᤱ ᤂᤡᤏᤡ᤹ ᤏᤠᤜᤧᤴᤗ ᤆᤥᤃᤢᤱᤗᤥ. ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤛᤢᤘᤠᤱᤜᤠ᤹ᤗᤠᤶ ᤂᤡᤏᤡ᤹ ᤛᤡᤰ ᤐᤥ᤺ᤰᤗ ᤕᤠ᤺ᤴᤍᤢᤱᤗᤥ॥”
ROM 10:20 ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤀᤠ᤺ᤴᤇᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖᤥ. “ᤀᤡᤱᤃᤠ᤹ ᤕᤠᤵᤔᤡ ᤔᤧᤱᤃᤥ᤺ᤵᤔᤏᤠᤒᤠᤜᤠ᤹ᤖᤧ ᤔᤧᤄᤥ᤺ᤛᤠᤱᤗᤥ. ᤀᤠᤳᤋᤡᤴᤜᤠ᤹ᤖᤧ ᤀᤡᤱᤃᤠ᤹ ᤛᤣ᤺ᤴᤔᤧᤴᤍᤥ᤺ᤛᤠᤱᤅᤡᤴ ᤂᤧᤱᤜᤠ᤹ᤀᤥ ᤀᤡᤱᤃᤠ᤹ ᤀᤠᤒᤠᤅᤣ ᤌᤠ᤺ᤴᤇᤡᤱᤅᤠᤀᤠᤱ ᤘᤠ᤹ᤀᤠᤖᤥ॥”
ROM 10:21 ᤁᤖ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢ᤹. “ᤏᤠᤶᤎᤠᤎᤠ ᤂᤧᤴ ᤀᤠᤎᤡᤱᤃᤠᤏᤡᤜᤠ᤹ ᤏᤢ ᤀᤠᤒᤠ᤺ᤴ ᤔᤧᤱᤄᤧᤶᤔᤏᤠᤒᤠᤜᤠ᤹ ᤋᤠ᤺ᤰᤔᤠᤛᤡ ᤑᤠ᤹ᤀᤠᤱ ᤀᤠᤜᤢᤰᤜᤠ᤹ ᤛᤴᤇᤢᤱᤅᤠᤱ ᤘᤠ᤹ᤀᤠᤖᤥ॥”
ROM 11:1 ᤜᤧᤰᤁᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤣ᤺ᤴᤍᤥ᤺ᤏᤡᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤹ᤖᤢᤛᤡᤒᤠᤒᤡ᥅ ᤛᤧᤰᤂᤠᤛᤠᤱ ᤔᤧᤏᤠ᤹ᤖᤢᤛᤡᤴᤗᤥ᥄ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤒᤧᤴᤈᤠᤔᤡᤏ ᤛᤢᤘᤠᤱᤛ᤻ᤔᤠ ᤀᤡᤛᤪᤠᤀᤡᤗᤡᤀᤠᤖᤥ॥
ROM 11:2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤏᤢᤀᤣ ᤁᤢᤛᤡᤱ ᤏᤡ᤺ᤳᤋᤢᤛᤡᤒᤠ ᤁᤢᤔᤏᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤖᤢᤴᤇᤡᤴᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤒᤠᤴ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅
ROM 11:3 “ᤀᤠᤍᤠᤱᤒᤣ. ᤂᤧᤱᤜᤠ᤹ᤖᤧᤃ ᤁᤧᤒᤠᤱᤄᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤁᤧᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤕᤴᤇᤢᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ᤖᤰ ᤏᤖᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤛᤧᤵᤔᤠ ᤔᤧᤃᤥ᤺ᤳᤋᤠᤖ ᤔᤧᤘᤠ᤹ᤖᤥ॥”
ROM 11:4 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤥᤃᤵ ᤐᤡᤖᤢᤒᤣ᥅ “ᤀᤡᤱᤃᤠ᤹ᤃ ᤒᤠᤗ ᤛᤠᤶᤔᤠᤱᤅᤡᤴ ᤔᤠᤱᤔᤧᤱᤄ᤺ᤔᤏᤠᤒᤠ ᤜᤧᤴᤇᤡᤱ ᤏᤢᤛᤡ (᥍᥆᥆᥆) ᤀᤠᤔᤏᤠᤜᤠ᤹ ᤋᤠᤱᤄᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥”
ROM 11:5 ᤜᤧᤰᤁᤣᤗ᤹ᤖᤡᤰᤁᤣ. ᤁᤴ ᤕᤧᤶᤔᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤸᤗᤧ ᤛᤣᤃᤢᤛᤡᤒᤠ ᤁᤢᤗᤰᤌᤡᤰ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤔᤧᤘᤠ᤹ᤖᤥ॥
ROM 11:6 ᤜᤧᤰᤁᤩᤠᤱ ᤁᤱᤃ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤗᤠᤶ ᤐᤥ᤺ᤰᤂᤧᤒᤠᤖᤥ॥ ᤂᤢᤏᤡ᤹ ᤕᤠ᤺ᤶᤒᤰᤗᤠᤶ ᤐᤥ᤺ᤰᤂᤧᤒᤠᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤴ ᤌᤣᤏᤠᤎᤣ ᤐᤥ᤺ᤰᤂᤧᤒᤠᤖᤥ॥
ROM 11:7 ᤂᤧᤴ ᤑᤠ᤹ᤀᤡᤱᤃ ᤌᤧᤔᤠᤒᤣ᥅ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤔᤧᤃᤥ᤺ᤳᤋᤢᤒᤠᤴ ᤔᤧᤱᤄᤥ᤺ᤛᤢᤴᤗᤥ. ᤁᤖ ᤁᤢᤓᤠ ᤔᤧᤛᤣᤃᤧᤒᤠᤜᤠ᤹ᤖᤧᤏᤧ ᤔᤧᤄᤥ᤺ᤛᤢᤖᤥ॥ ᤘᤣ᤹ᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤆᤥᤃᤢ ᤐᤡᤖᤢᤛᤡᤖᤥ॥
ROM 11:8 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤁᤢᤎᤏᤠ ᤁᤧᤗᤧᤱᤒᤠ ᤆᤥᤃᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤴ ᤕᤧᤶᤎᤠᤖᤡᤰ ᤂᤧᤱᤜᤠ᤹ᤖᤧ ᤏᤡ᤺ᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤢᤏᤡ᤹ ᤔᤡᤰᤜᤠ᤹ ᤌᤣ᤺ᤰᤋᤢᤒᤡᤖᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤶᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤜᤢ᤹ᤖᤢᤒᤡᤛᤡᤀᤠᤱ ᤘᤠ᤹ᤖᤥ॥”
ROM 11:9 ᤍᤠᤀᤢᤍ ᤜᤠᤱᤅᤡᤸᤗᤧ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤐᤠ᤺ᤳᤋᤢᤀᤠᤱ ᤐᤳ. “ᤜᤠᤖᤠ᤹ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤛᤠᤓᤠᤱᤈᤠ᤺ᤸᤗᤧ ᤀᤡᤈᤥᤀᤥ ᤌᤠ᤺ᤛᤢᤛᤡᤖ. ᤂᤢᤏᤡ᤹ ᤛᤠᤓᤠᤱᤈᤠ᤺ᤴ ᤀᤠᤄᤄᤒᤠ ᤐᤠ᤺ᤴ ᤏᤢ ᤂᤢᤶᤍᤡᤱ ᤁᤧᤍᤠ᤺ᤵᤐᤠ ᤐᤠ᤺ᤴ ᤐᤥ᤺ᤱᤗᤖᤥ॥
ROM 11:10 ᤂᤧᤱᤜᤠ᤹ᤖᤧ ᤏᤡ᤺ᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤰᤁᤡᤴ ᤂᤠᤍᤠᤵᤋᤢᤖ. ᤜᤧᤰᤁᤩᤠᤱ ᤂᤢᤏᤡ᤹ ᤀᤣ᤺ᤰᤁᤡᤴ ᤛᤍᤠᤍᤡᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤋᤢ᤺ᤱᤗᤖᤥ॥”
ROM 11:11 ᤜᤧᤰᤁᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤐᤠ᤺ᤴᤎᤡᤰ ᤛᤣᤗᤠᤵᤏᤡᤱ. ᤀᤡᤛᤪᤠᤀᤡᤗᤡᤜᤠ᤹ ᤔᤧᤈᤥ᤺ᤴᤍᤧᤸᤗᤧ ᤐᤥ᤺ᤰᤔᤠᤀᤣ ᤔᤧᤴᤇᤢᤰᤔᤏᤠ ᤌᤠᤖᤡᤰ ᤔᤧᤈᤥ᤺ᤴᤍᤧᤒᤡ᥅ ᤛᤧᤰᤂᤠᤛᤠᤱ ᤔᤧ᤺ᤴᤗᤥ᥄ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤏᤠᤜᤧᤶᤔᤠᤴ ᤋᤠᤖ ᤑᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥᤀᤣ ᤛᤧᤴᤗᤵᤐᤡᤴ ᤋᤩᤧᤖᤥ॥
ROM 11:12 ᤁᤖ ᤕᤜᤢᤍᤡᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤕᤶ ᤕᤶᤒᤠ ᤔᤢ᤹ᤀᤡᤛᤠᤶ ᤋᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤴᤗᤵᤐᤡᤴ ᤔᤧᤏᤠ᤹ᤖᤢᤒᤠᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤐᤕᤶ ᤕᤶᤒᤠ ᤔᤢ᤹ᤀᤡᤛᤠᤶ ᤋᤩᤧᤏᤧ ᤑᤠ᤹ᤃᤪ ᤕᤜᤢᤍᤡᤜᤠ᤹ᤖᤧ ᤛᤧᤴᤗᤵᤐᤡᤴ ᤔᤧᤍᤠ᤺ᤰᤋᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤔᤢ᤹ᤀᤡᤛᤠᤶ ᤋᤠ᤺ᤀᤣᤖᤥ᥄
ROM 11:13 ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤏᤡᤱᤗ ᤐᤳᤋᤠᤖᤥ॥ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤔᤠᤱᤛᤣᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤛᤧᤰᤂᤠᤀᤣ ᤀᤠᤛᤢᤰᤛᤢᤰ ᤋᤶᤛᤡᤴ ᤆᤥᤃᤢᤱᤗᤥ॥
ROM 11:14 ᤜᤧᤰᤁᤣᤗ᤹ᤖᤡᤰ ᤁᤴ ᤀᤠᤔᤠᤱᤛᤣᤘᤠᤗᤠᤶ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠᤜᤧᤶᤔᤠᤴ ᤑᤥ᤺ᤰᤂᤢᤱᤅᤠᤱ ᤂᤧᤱᤜᤠ᤹ᤀᤥ ᤁᤢᤓᤠ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤱᤛᤡᤱᤗ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤗᤥ॥
ROM 11:15 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤏᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤣ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤏᤠᤍᤱ ᤐᤥ᤺ᤱᤏᤧ ᤑᤠ᤹ᤃᤪ ᤕᤜᤢᤍᤡᤜᤠ᤹ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤋᤧᤴᤍᤡᤱ ᤆᤥᤃᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤛᤡ᤺ᤔᤧᤴᤗᤠᤶ ᤜᤡᤱᤔᤴ ᤔᤧᤄᤥ᤺ᤛᤢᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ᥄
ROM 11:16 ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤌᤡᤰᤛᤡᤃᤣ᤺ᤰᤐᤠ ᤗᤰᤁᤡᤴ ᤛᤣᤛᤣ ᤆᤥ᤺ᤰᤏᤧ ᤑᤠ᤹ᤃᤪ ᤁᤧᤏᤶᤒᤠ ᤁᤧᤖᤧᤰ ᤗᤰᤁᤡᤴᤏᤠᤱ ᤛᤣᤛᤣ ᤆᤥ᤺ᤰᤗᤥ॥ ᤛᤡᤱ ᤛᤠ᤺ᤵᤐᤡᤴ ᤛᤣᤛᤣ ᤆᤥ᤺ᤰᤏᤧ ᤑᤠ᤹ᤃᤪ ᤛᤡᤱᤒᤥᤖᤠ᤺ᤰᤜᤠ᤹ᤀᤠᤱ ᤛᤣᤛᤣ ᤔᤧᤒᤥ᤺ᤱᤗᤥ॥
ROM 11:17 ᤁᤢᤓᤠ ᤕᤜᤢᤍᤡᤜᤠ᤹ᤃ ᤏᤢ᤺ᤒᤠ ᤈᤤᤋᤢᤏ ᤛᤡᤱᤒᤢᤱᤗᤠᤶ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤢᤒᤠ ᤛᤡᤱᤒᤥᤖᤠ᤺ᤰ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰ॥ ᤜᤧᤰᤁᤩᤠᤱ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤠᤶᤓᤢᤱ ᤈᤤᤋᤢᤏ ᤛᤡᤱᤒᤥᤖᤠ᤺ᤰ ᤜᤧᤰᤁᤣ ᤁᤧᤈᤥᤃᤡᤛᤠᤱ ᤏᤢ᤺ᤒᤠ ᤈᤤᤋᤢᤏ ᤛᤡᤱᤒᤢᤱᤔᤥᤗᤠᤶ ᤌᤢᤶ ᤏᤢ ᤜᤡᤱᤔᤴ ᤂᤥ᤺ᤔᤠ ᤑᤠ᤹ᤀᤠᤱ ᤂᤢᤏᤡ᤹ ᤗᤧᤰᤘᤠ ᤂᤡᤏᤡ᤹ ᤁᤧᤈᤰᤁᤠᤛᤡᤀᤠᤱ ᤁᤧᤘᤕᤡ᤹ᤖᤥ॥
ROM 11:18 ᤂᤧᤴ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤢᤒᤠ ᤛᤡᤱᤒᤥᤖᤠ᤺ᤰᤜᤠ᤹ᤏᤢ᤺ᤸᤗᤧ ᤀᤠᤏᤡᤃᤧ ᤏᤢ᤺ᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤶᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤢᤛᤠ᤺ᤵᤐᤡᤴ ᤁᤧᤴᤎᤖᤢᤶᤔᤡᤴ. ᤁᤖ ᤁᤢᤛᤠ᤺ᤵᤐᤡᤸᤗᤧᤏᤧ ᤂᤡᤏᤡ᤹ ᤁᤧᤎᤖᤡᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
ROM 11:19 ᤁᤖ. ᤀᤠᤏᤡᤃᤧ ᤂᤧᤴ ᤛᤡᤱᤒᤢᤱᤔᤥ ᤆᤰᤛᤡᤱᤔᤠ ᤑᤠ᤹ᤀᤠᤱ ᤂᤧᤴ ᤛᤡᤱᤒᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤧᤖᤥ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡᤗᤠ॥
ROM 11:20 ᤛᤧᤰᤂᤠᤀᤣᤖᤥ. ᤁᤖ ᤕᤜᤢᤍᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤏᤠᤱᤅᤣ ᤛᤡᤱᤒᤥᤖᤠ᤺ᤰᤁᤡᤴ ᤆᤧᤵᤔᤠᤀᤠᤱ ᤗᤠᤵᤑᤢᤔᤏᤠᤒᤠ ᤁᤢᤀᤡᤛᤡ᤺ᤰ ᤗᤠᤵᤔᤧᤓᤢᤛᤧᤒᤠᤖᤥ॥ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤁᤖ ᤂᤧᤴ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤖᤧᤶᤔᤧ᤹ᤀᤥ॥
ROM 11:21 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤐᤥᤖᤠ᤺ᤰᤜᤠ᤹ᤀᤣ ᤔᤧᤍᤠᤱᤄᤢᤴᤇᤡᤴᤏᤡᤸᤗᤧ ᤂᤡᤏᤡ᤹ᤀᤠᤱ ᤁᤧᤴᤍᤠᤱᤄᤡᤴᤗᤥ॥
ROM 11:22 ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤢᤱᤔᤠ᤹ ᤋᤢᤰᤔᤠᤸᤗᤧ ᤁᤢᤎᤡᤶ ᤏᤢ ᤁᤧᤈᤡ᤺ᤵᤐᤠ ᤆᤥ᤺ᤰ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥ ᤏᤛᤠ᤺ᤴ ᤁᤧᤗᤧᤵᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤧᤛᤠᤰᤐᤠ ᤂᤢᤶᤍᤡᤱ ᤐᤡᤖᤢᤛᤡ᤹. ᤁᤖ ᤂᤡᤏᤡ᤹ ᤁᤢᤗᤢᤱᤃᤢᤶᤔᤥ ᤆᤰᤔᤧᤸᤗ᤹ᤀᤣ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤗᤢᤱᤔᤠ᤹ ᤁᤧᤍᤢᤰᤋᤡ᤹ᤖᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤁᤧᤈᤧᤵᤋᤡᤀᤠᤱ ᤗᤠᤵᤁᤧᤓᤢᤛᤡ᤹ᤖᤥ॥
ROM 11:23 ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤡᤜᤠ᤹ᤖᤧ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤏᤢ᤺ᤱᤏᤧ ᤑᤠ᤹ᤃᤪ ᤂᤢᤏᤧ᤹ ᤕᤠᤶᤔᤥ ᤂᤧᤱᤜᤠ᤹ ᤛᤡᤱᤒᤢᤱᤔᤥ ᤆᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤋᤃᤡ ᤔᤧᤒᤳᤇᤧᤒᤠ ᤋᤧᤴᤏᤥ ᤆᤰᤔᤠ ᤔᤢᤰᤛᤠᤶ ᤁᤳᤋᤢ᤹ᤖᤥ॥
ROM 11:24 ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤃ ᤋᤠᤶᤓᤢᤱ ᤈᤤᤋᤢᤏ ᤐᤥᤖᤠ᤺ᤰ ᤜᤧᤰᤋᤱᤒᤠ ᤁᤧᤈᤥᤃᤡ᤹. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤢ᤺ᤒᤠ ᤈᤤᤋᤢᤏ ᤒᤢᤱᤔᤥ ᤁᤧᤈᤰᤁᤠᤛᤡᤏᤧ ᤑᤠ᤹ᤃᤪ ᤂᤢᤏᤧ᤹ ᤀᤠᤒᤠᤅᤣ ᤁᤢᤈᤧᤰ ᤁᤢᤒᤥᤖᤠ᤺ᤰᤜᤠ᤹ ᤀᤠᤒᤠᤅᤣ ᤁᤢᤒᤢᤱᤔᤥᤀᤣ ᤆᤰᤋᤢᤛᤡᤸᤗᤧ ᤀᤠᤰᤂᤩᤠᤰ ᤁᤢᤛᤡᤰ ᤛᤶᤗ ᤆᤰᤋᤢᤛᤡᤒᤡᤗᤠ॥
ROM 11:25 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤠᤱᤍᤡᤱ ᤁᤧᤴᤗ᤹ᤖᤡᤴᤗ ᤑᤠ᤹ᤀᤠᤱ ᤁᤴ ᤛᤡᤒᤡ᤹ᤃᤧᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤁᤴ ᤛᤡᤒᤡ᤹ᤃᤧᤴ ᤐᤠ᤺ᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤛᤣ᤺ᤰ ᤁᤢᤀᤡᤛᤡ᤺ᤰ ᤏᤛᤠ᤺ᤴ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤕᤖᤡᤰ ᤕᤜᤢᤍᤡᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤔᤧᤴᤏᤢ᤺ᤱᤔᤏᤠᤒᤠ ᤔᤧᤒᤥ᤺ᤱᤗᤥ॥
ROM 11:26 ᤜᤧᤰᤁᤩᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤛᤧ᤺ᤵᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤧᤴᤗᤵᤍᤠᤱᤒᤠᤴ ᤕᤖᤢᤛᤗᤧᤔᤗᤠᤶ ᤋᤠ᤺ᤖᤥ. ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ ᤗᤠᤕᤥᤗᤠᤶ ᤏᤢ᤺ᤰᤋᤢᤛᤡ᤹॥
ROM 11:27 ᤜᤧᤰᤁᤩᤠᤱ. ᤀᤡᤱᤃᤠ᤹ ᤂᤢᤏᤡ᤹ ᤗᤠᤕᤥᤜᤠ᤹ ᤗᤧᤵᤔᤡ ᤐᤡᤖᤢᤱᤛᤡᤱ ᤑᤠ᤹ᤀᤠᤱ ᤂᤧᤱᤜᤠ᤹ᤏᤢ ᤆᤥᤃᤢᤱᤒᤠ ᤀᤠᤔᤠᤱᤜᤢᤵᤐᤡᤴ ᤁᤧᤳᤋᤢᤱᤗᤥ” ᤗ᤹ᤖᤡᤰ ᤕᤠᤶᤔᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥
ROM 11:28 ᤕᤜᤢᤍᤡᤜᤠ᤹ ᤛᤢᤏᤠᤀᤡᤱᤅᤡᤸᤗᤧ ᤁᤢᤏᤡᤱᤔᤡᤛᤡᤖᤥ. ᤁᤖ ᤂᤡᤏᤡ᤹ ᤗᤠᤃᤡᤃ ᤁᤴ ᤏᤢ᤺ᤒᤠᤀᤣ ᤐᤥ᤺ᤰᤂᤧᤖᤥ॥ ᤜᤧᤰᤁᤣᤛᤠᤱ ᤀᤒᤪᤠᤜᤠᤔ. ᤀᤡᤛᤜᤠᤁ. ᤕᤠᤁᤢᤒᤧᤴᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥
ROM 11:29 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤐᤷᤎᤠ᤺ᤶᤜᤠ᤹ ᤏᤢ ᤀᤢ᤺ᤳᤇᤡᤱᤔᤠᤴ ᤕᤠᤱᤏᤠ ᤔᤧᤏᤢ᤺ᤰᤋᤢᤴ॥
ROM 11:30 ᤌᤣᤀᤠᤱᤓᤧᤸᤗᤧ ᤌᤡᤰ ᤕᤧᤶᤔᤥ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤁᤧᤈᤥᤃᤡ᤹. ᤁᤖ ᤕᤜᤢᤍᤡᤜᤠ᤹ ᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤂᤢᤏᤧ᤹ ᤁᤢᤗᤢᤱᤃᤢᤶᤔᤡᤴ ᤀᤠᤸᤗᤥ ᤂᤡᤏᤡ᤹ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
ROM 11:31 ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ ᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤢᤏᤧ᤹ ᤂᤧᤱᤜᤠ᤹ ᤕᤠᤶᤔᤥ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥
ROM 11:32 ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤛᤠᤰᤐᤠ ᤁᤧᤎᤠ᤺ᤒᤠᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤖᤥ॥ ᤁᤖ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤒᤠᤖᤥ॥
ROM 11:33 ᤀᤠᤰᤁᤥ ᤜᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤀᤡᤴ ᤏᤢ ᤁᤢᤏᤧᤜᤡᤏᤡᤱᤘᤠ᤹ᤀᤡᤴ ᤀᤠᤰᤂᤧᤴ ᤀᤡᤔᤧᤸᤗᤢᤱᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠᤒᤣ᥄ ᤂᤢᤏᤧ᤹ ᤁᤢᤄᤠᤛᤧᤴᤏᤡᤴ ᤏᤢ ᤁᤢᤗᤠᤶᤔᤡᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤛᤢᤰᤔᤧᤍᤧᤳᤋᤡᤴᤗᤥ᥄
ROM 11:34 “ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤠ᤺ᤳᤗᤧ ᤏᤡ᤺ᤛᤢᤀᤠᤱ ᤘᤠ᤹ᤒᤣ᥅ ᤜᤧᤰᤁᤩᤠᤱ ᤜᤠ᤺ᤳ ᤂᤢᤏᤧ᤹ ᤛᤢᤈᤠ ᤁᤧᤒᤡᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤒᤣ᥅”
ROM 11:35 ᤀᤡᤃᤪ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤱᤏᤠ ᤏᤢ᤺ᤰᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤂᤢᤏᤧ᤹ ᤐᤡᤖᤢᤀᤠᤱ ᤘᤠ᤹ᤒᤣ᥅”
ROM 11:36 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤗᤠᤶᤒᤠ ᤁᤠᤰ ᤐᤠ᤺ᤴᤜᤠ᤹ᤃ ᤋᤠ᤺. ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤠᤰ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤢᤗᤠᤃᤡᤀᤣ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤛᤍᤠᤍᤡᤱ ᤛᤍᤠᤍᤡᤱ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ᥄ ᤀᤠᤔᤧᤴ॥
ROM 12:1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤘᤠ᤹. ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤁᤢᤜᤡᤱᤘᤧᤳ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤣᤛᤣ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰ ᤋᤥ᤺ᤴᤍᤧᤶᤔᤧ᤹ ᤑᤠ᤹ᤀᤠᤱ ᤛᤠ᤹ᤖᤡᤰ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤕᤠᤶᤛᤠᤶᤃᤧᤴ ᤛᤣᤘᤠ᤺ᤴ ᤒᤠ ᤁᤴᤗᤥ॥
ROM 12:2 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤌᤡᤶᤔᤡᤴᤏᤢ ᤔᤧᤍᤱᤅᤠᤛᤡᤶᤔᤧᤴᤏᤧ᤹ᤀᤥ ᤁᤖ ᤂᤡᤏᤡ᤹ ᤏᤡᤱᤘᤠ᤹ᤒᤠᤴ ᤗᤧᤰᤂᤧᤶᤔᤧ᤹ᤖ ᤁᤢᤛᤱ ᤐᤥ᤺ᤰᤂᤧᤶᤔᤧ᤹ᤖ ᤐᤣᤃᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ᤺ᤒᤠ. ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤁᤢᤏᤡᤱᤘᤠ᤹ᤀᤡᤴ ᤌᤣ ᤘᤠ᤹ ᤂᤧᤴ ᤏᤡᤱᤘᤠ᤹ ᤂᤥ᤺ᤔᤠ ᤁᤧᤛᤢᤰᤋᤢᤶᤗᤥ॥
ROM 12:3 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤗᤢᤱᤃᤢᤶᤗᤠᤶᤒᤠ ᤂᤡᤏᤡ᤹ ᤛᤠᤶᤍᤡᤱ ᤐᤡᤏᤡᤱᤗᤥ॥ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤂᤧᤴᤏᤠᤱᤎᤥ ᤕᤖᤡᤰ ᤔᤧᤀᤡ᤺ᤳᤋᤠᤛᤡᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤏᤛᤠ᤺ᤴᤏᤡᤸᤗᤧ ᤂᤥ᤺ᤵᤋᤢᤒᤠ ᤁᤢᤀᤡᤛᤡ᤺ᤰᤗᤰ ᤛᤡᤱᤛᤡᤱᤅᤠᤱ ᤏᤡᤱᤘᤠ᤹ ᤀᤡ᤺ᤳᤋᤠᤛᤡᤶᤔᤧ᤹ᤀᤥ॥
ROM 12:4 ᤀᤠᤏᤡ᤹ ᤗᤳᤇᤠ ᤌᤰᤁᤥ ᤕᤖᤡᤰ ᤕᤠᤶᤗᤰᤜᤠ᤹ ᤐᤳ. ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤕᤠᤶᤗᤰᤜᤠ᤹ᤖᤧ ᤕᤠ᤺ᤶᤒᤰ ᤗᤳᤇᤠᤖᤰ ᤜᤥ᤺ᤵᤗᤥ.
ROM 12:5 ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤕᤖᤡᤰ ᤀᤠᤘᤠ᤹ᤛᤠᤱ ᤀᤠᤏᤡ᤹ᤃ ᤂᤪᤡᤛ᤻ᤋᤖᤧ ᤗᤳᤇᤠ ᤁᤢᤎᤰᤁᤥᤒᤠ ᤁᤢᤍᤱᤒᤠ ᤕᤠᤶᤗᤰᤛᤡᤖᤥ. ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰ ᤆᤠᤜᤠᤒᤠ ᤀᤠᤈᤥ᤺ᤰᤛᤡᤱᤗᤥ॥
ROM 12:6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤀᤠᤒᤡᤖᤧᤒᤠ ᤐᤖᤡᤰᤐᤖᤡᤰᤐᤠ ᤐᤷᤎᤠ᤺ᤶᤜᤠ᤹ ᤀᤠᤏᤡ᤹ ᤀᤥᤃᤵ ᤆᤥᤃᤢᤶᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤁᤳᤋᤢᤒᤠ ᤁᤢᤏᤛᤠ᤺ᤴᤏᤡᤸᤗᤧ ᤂᤥ᤺ᤵᤋᤢᤒᤠ ᤁᤢᤀᤡᤛᤡ᤺ᤰᤗᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤖ.
ROM 12:7 ᤔᤏᤠᤜᤠ᤹ ᤛᤣᤘᤠ ᤆᤥ᤺ᤰᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤛᤣᤘᤠ ᤆᤥᤃᤢᤖ. ᤏᤡᤛᤠᤶ ᤜᤢ᤹ᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤜᤢ᤹ᤖᤢᤛᤡᤖ.
ROM 12:8 ᤔᤏᤠᤜᤠ᤹ ᤜᤠᤱᤜᤠᤱ ᤔᤧᤵᤔᤠᤛᤡ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡᤖ. ᤔᤏᤠᤜᤠ᤹ ᤑᤠ᤹ᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤑᤠ᤹ᤖᤢᤛᤡᤖ. ᤗᤠᤶᤗᤥ᤺ᤒᤠ ᤐᤥ᤺ᤱᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤏᤡᤱᤘᤠ᤹ ᤐᤡᤖᤢᤀᤠᤱ ᤔᤏᤠᤜᤠ᤹ ᤗᤠᤶᤗᤥᤛᤢᤛᤡᤖ. ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤜᤠᤖᤠ᤹ ᤐᤛ᤺ᤳᤛ᤺ᤳᤗ ᤗᤢᤱᤔᤠ᤹ ᤋᤢᤰᤋᤢᤛᤡᤖᤖᤥ॥
ROM 12:9 ᤁᤢᤈᤧᤰᤁᤠᤱ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹. ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤏᤠ᤹ᤖᤧᤶᤔᤧ᤹. ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢ᤺ᤒᤠ ᤆᤥ᤺ᤰ. ᤒᤠ ᤂᤧᤴ ᤐᤠ᤺ᤴᤏᤥ ᤐᤳᤇᤧᤶᤔᤧ᤹ᤀᤥ॥
ROM 12:10 ᤗᤳᤌᤡᤰ ᤜᤡᤶᤔᤥᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ ᤁᤢᤀᤡᤛᤡ᤺ᤰ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹॥ ᤀᤠᤒᤠᤅᤣᤏᤢ᤺ᤸᤗᤧ ᤕᤖᤡᤰ ᤘᤣ᤹ᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹॥
ROM 12:11 ᤀᤠᤵᤑᤠᤸᤗᤧᤀᤠᤱ ᤗᤧᤶᤛᤢᤘᤠᤒᤠ ᤔᤧᤶᤒᤥ᤺ᤱᤅᤣ ᤂᤡᤏᤡ᤹ ᤛᤡᤰ ᤛᤶᤗ ᤜᤠᤱᤜᤠᤱᤅᤠᤱ ᤍᤠᤱᤒᤠᤸᤗᤧ ᤁᤢᤛᤣᤘᤠ ᤆᤥᤃᤧᤶᤔᤧ᤹ᤀᤥ॥
ROM 12:12 ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤥ. ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤸᤗᤧ ᤏᤠᤛᤡ ᤌ᤺ᤳᤋᤧᤶᤔᤧ᤹ᤀᤥ. ᤋᤢᤘᤠ ᤆᤥ᤺ᤰᤔᤠ ᤔᤧᤗᤧᤖᤧᤶᤔᤡᤴᤏᤧ᤹ᤀᤥ॥
ROM 12:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤂᤢᤏᤡ᤹ ᤆᤠᤕᤥ᤺ᤶᤒᤥᤀᤥ ᤁᤢᤓᤠ᤹ ᤐᤡᤖᤧᤶᤛᤡᤶᤔᤧ᤹. ᤋᤖᤣ ᤋᤥ᤺ᤛᤧᤶᤛᤡᤶᤔᤧ᤹ᤀᤥ॥
ROM 12:14 ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤛᤠᤱᤃᤪᤠ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ᤀᤥ. ᤁᤖ ᤔᤢ᤹ᤀᤡᤛᤠᤶ ᤐᤡᤖᤧᤶᤛᤡᤶᤔᤧ᤹ᤀᤥ॥
ROM 12:15 ᤁᤧᤛ᤺ᤵᤐᤠᤜᤠ᤹ᤏᤢ ᤛ᤺ᤳᤋᤧᤶᤔᤧ᤹. ᤁᤧᤜᤠ᤺ᤵᤐᤠᤜᤠ᤹ᤏᤢ ᤜᤠᤒᤧᤶᤔᤧ᤹ᤀᤥ॥
ROM 12:16 ᤘᤣ᤹ᤜᤠ᤹ᤏᤢ ᤋᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹॥ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤁᤖ ᤔᤧᤴᤈᤥᤈᤥᤒᤠ ᤔᤏᤠᤜᤠ᤹ᤏᤢᤀᤠᤱ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤛ᤻ᤛᤢᤱ ᤑᤠ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ᥄
ROM 12:17 ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹॥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢ᤺ᤒᤠ ᤆᤥ᤺ᤰ. ᤒᤠ ᤂᤧᤴ ᤐᤠ᤺ᤴᤏᤡᤴ ᤆᤥ᤺ᤰᤔᤠ ᤁᤥ᤺ᤳᤋᤧᤶᤔᤧ᤹ᤀᤥ॥
ROM 12:18 ᤁᤧᤖᤧᤰ ᤔᤏᤠᤜᤠ᤹ᤏᤢ ᤂᤡᤏᤡ᤹ ᤛᤢᤰᤛᤢᤰ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥
ROM 12:19 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤀᤠᤵᤑᤠᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤥ ᤗᤧᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤂᤢᤶᤍᤡᤱ ᤐᤡᤔᤠᤃ ᤀᤠᤗᤰᤗᤥ॥ ᤀᤡᤱᤃᤠ᤹ᤀᤣ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤖᤢᤱ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤖᤥ॥”
ROM 12:20 ᤂᤧᤸᤗᤧ ᤁᤢᤗᤧᤰᤘᤠᤃ “ᤂᤧᤏᤧ᤹ ᤁᤧᤏᤡᤱᤔᤡ᤺ᤴ ᤛᤧᤳᤗᤠ᤺ᤰᤔᤠᤸᤗᤧ ᤋᤖᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤁᤢᤈᤠ ᤆᤠᤔᤠ ᤐᤡᤖᤧ᤹॥ ᤂᤧᤴ ᤘᤠᤔᤡ᤺ᤔᤠᤸᤗᤧ ᤋᤖᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤆᤫᤠ᤺ᤳ ᤌᤢᤱᤔᤠ ᤐᤡᤖᤧ᤹॥ ᤂᤧᤏᤧ᤹ ᤀᤰᤂᤣ ᤁᤧᤈᤥᤃᤢᤸᤗᤧ ᤂᤧᤴ ᤛᤡᤖᤡᤱᤔ᤺ᤖᤥ॥”
ROM 12:21 ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤴᤏᤠ᤺ᤴᤏᤧᤴᤗ. ᤁᤖ ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤏᤠ᤺ᤴᤍᤧ᤹ᤀᤥ॥
ROM 13:1 ᤁᤧᤖᤧᤰ ᤔᤏᤠᤜᤠ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤘᤠ᤹ᤖ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠ ᤕᤢᤰᤁᤡᤴᤏᤢ᤺ᤸᤗᤧ ᤘᤣ᤹ ᤕᤢᤰ ᤜᤥ᤺ᤵᤗᤥ॥ ᤛᤢᤜᤠᤱᤕᤢᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤕᤢᤰᤋᤡᤱ ᤆᤥᤃᤢᤛᤡᤒᤠᤖᤥ॥
ROM 13:2 ᤂᤧᤸᤗᤧ ᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤔᤧᤀᤳᤋᤢᤖᤥ॥ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥
ROM 13:3 ᤌᤣᤀᤠᤱᤓᤧᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤕᤢᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤁᤡ᤺ᤔᤠ ᤔᤧᤒᤥ᤺ᤱᤏᤧᤴ. ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤡ᤺ᤔᤠ ᤐᤥ᤺ᤱ॥ ᤕᤢᤰ ᤁᤧᤃᤵᤐᤠᤜᤠ᤹ᤏᤢ ᤔᤧᤱᤃᤡ᤺ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤄᤥ᤺ᤛᤢ᤹ᤖᤥ॥
ROM 13:4 ᤌᤣᤀᤠᤱᤓᤧᤸᤗᤧ ᤂᤧᤴ ᤕᤢᤰ ᤁᤧᤈᤥ᤺ᤰᤐᤠᤱᤃ ᤁᤧᤗᤠᤃᤡ ᤏᤢ᤺ᤒᤠ ᤐᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤖᤥ॥ ᤁᤖ ᤂᤧᤏᤧ᤹ ᤑᤧᤴ ᤕᤠ᤺ᤶᤒᤰ ᤁᤧᤈᤥᤃᤢᤏᤧ ᤑᤠ᤹ᤃᤪ ᤁᤡ᤺ᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤜᤏᤧ ᤋᤠᤓᤣ᤺ᤴ ᤔᤧᤜᤣ᤺ᤛᤢᤴᤗᤥ॥ ᤂᤧᤱᤃ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤸᤗᤥ ᤂᤢᤶᤍᤡᤱ ᤁᤧᤍᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤖᤥ॥
ROM 13:5 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱ ᤔᤧᤱᤄᤥ᤺ᤔᤠ ᤑᤠ᤹ᤀᤠᤱᤗᤰ ᤔᤧ᤺ᤴ. ᤁᤖ ᤀᤠᤒᤠᤅᤣ ᤂᤠᤛᤡᤱᤅᤡᤸᤗᤧ ᤀᤰᤂᤣ ᤆᤥ᤺ᤰᤔᤠ ᤏᤢ᤺ᤒᤠ ᤐᤥ᤺ᤱ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥
ROM 13:6 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤂᤡᤏᤡ᤹ ᤀᤣ᤺ᤱᤕᤠᤱ ᤁᤧᤜᤢᤅᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤒᤠ ᤁᤴ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤂᤡᤏᤡ᤹ ᤁᤧᤜᤢᤅᤢᤶᤒᤠ ᤀᤧ᤺ᤱᤕᤠᤱᤗᤠᤶ ᤑᤠ᤹ᤕᤠᤱ ᤔᤧᤄᤥ᤺ᤛᤢ᤹ᤖᤥ॥
ROM 13:7 ᤁᤠᤰ ᤜᤢᤱᤔᤠ ᤁᤧᤒᤥ᤺ᤱᤒᤠᤴ ᤜᤢᤅᤧᤶᤔᤧ᤹–ᤁᤧᤖᤧᤰ ᤜᤢᤱᤔᤠ ᤁᤧᤒᤥ᤺ᤱᤒᤠ ᤀᤣ᤺ᤱᤕᤠᤱᤜᤠ᤹ ᤜᤢᤅᤧᤶᤔᤧ᤹. ᤁᤧᤖᤧᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤁᤧᤒᤥ᤺ᤱᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤀᤥ॥
ROM 13:8 ᤜᤠᤖᤠ᤹ ᤂᤡᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤋᤢᤰᤛᤡᤱᤔᤠᤀᤠᤱᤎᤥ ᤘᤣ᤹ ᤐᤠ᤺ᤴᤏᤡᤸᤗᤧᤴ ᤛᤡᤱᤏᤠ᤺ᤳᤋᤥ ᤔᤧᤒᤳᤇᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤘᤣ᤹ ᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤃᤧᤳᤋᤢᤶᤗᤥ॥
ROM 13:9 ᤛᤠᤶᤕᤥᤌᤡᤶᤔᤥ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹. ᤔᤏᤠ ᤔᤧᤛᤧᤖᤧᤴᤏᤧ᤹. ᤔᤧᤄᤢ᤺ᤴᤍᤧᤴᤏᤧ᤹. ᤔᤧᤄᤡ᤺ᤵᤛᤧᤴᤏᤧ᤹ ᤗ᤹ᤖᤡᤰ ᤛᤠᤵᤋᤧᤒᤠ ᤀᤡᤱᤈᤠ᤺ᤱᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤀᤡᤱᤈᤠ᤺ᤱᤜᤠ᤹ ᤀᤠᤒᤠᤅᤣ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤧᤳᤗᤥ॥
ROM 13:10 ᤗᤢᤱᤔᤠ᤹ ᤁᤧᤍᤢᤰᤐᤠᤸᤗᤧ ᤜᤠ᤺ᤳᤋᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤗᤢᤱᤔᤠ᤹ ᤋᤢᤰᤛᤡᤱᤔᤠᤴᤏᤣ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤵᤔᤏᤠᤒᤠ ᤐᤥ᤺ᤱᤗᤥ॥
ROM 13:11 ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤸᤗᤥᤒᤠ ᤕᤧᤶᤔᤡᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤗᤥ॥ ᤀᤠᤸᤗ ᤀᤠᤏᤡ᤹ ᤔᤡᤰ ᤕᤢ᤺ᤔᤥᤗᤠᤶ ᤛᤥ᤺ᤔᤠᤀᤠᤱ ᤐᤥ᤺ᤰᤔᤠ ᤕᤧᤶ ᤁᤧᤖᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤋᤃᤡ ᤏᤛᤠ᤺ᤴ ᤀᤠᤈᤥᤃᤢᤶᤒᤠ ᤕᤧᤶᤔᤡᤴᤏᤢ᤺ᤸᤗᤧᤀᤠᤱ ᤁᤢᤔᤏᤠᤜᤠ᤹ ᤋᤠᤱᤛᤧ᤺ᤵᤛᤧ ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤶᤔᤡᤴ ᤀᤠᤸᤗᤥ ᤏᤡ᤺ᤳᤋᤠᤱ ᤘᤠ᤹॥
ROM 13:12 ᤛᤧᤴᤍᤡᤰᤁᤡᤴ ᤗᤧᤰᤗ ᤐᤳᤗᤥ. ᤜᤧᤰᤁᤩᤠᤱ ᤂᤠᤀᤥ᤺ᤵᤔᤠᤴ ᤏᤡ᤺ᤳᤋᤠᤱ ᤋᤠᤖ ᤐᤳᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤂᤠᤍᤠᤶᤔᤥ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤗᤧᤖᤢᤶ ᤜᤧᤰᤁᤩᤠᤱ ᤀᤥ᤺ᤳᤋᤡ᤺ᤸᤗᤧᤴ ᤌᤰᤛᤢᤒᤠᤜᤠ᤹ ᤕᤠᤖᤡᤵ ᤔᤧᤒᤥ᤺ᤱᤒᤠ ᤜᤧᤰᤁᤣ ᤕᤠᤖᤡᤵ ᤐᤥ᤺ᤰᤂᤡᤀᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢᤶᤗᤥ॥
ROM 13:13 ᤀᤠᤏᤡ᤹ᤃ ᤗᤧᤴᤍᤡᤰ ᤀᤠᤘᤠ᤹ᤒᤠ ᤁᤢᤀᤡᤛᤡ᤺ᤰᤁᤣ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤠ᤹ᤔᤠ ᤐᤥ᤺ᤱᤗᤥ. ᤕᤠᤶᤍᤠᤍᤠ ᤀᤠᤔᤔᤒᤠᤸᤗᤧ ᤔ᤺ᤛᤡᤱᤔᤠᤀᤠᤱ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ. ᤆᤠᤖᤠᤶᤔᤠ ᤏᤢ ᤐᤥ᤺ᤵᤔᤠ. ᤂᤣᤔᤠ ᤌᤰᤔᤠ ᤏᤢ ᤏᤠᤜᤧᤳᤇᤡᤱᤔᤠ ᤔᤧ᤺ᤴᤗᤥ॥
ROM 13:14 ᤂᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤒᤠ ᤆᤠᤱ ᤆᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤢᤳᤏᤠ᤺ᤴ ᤆᤠᤰᤂᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤁᤢᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹ᤀᤥ॥
ROM 14:1 ᤏᤛᤠ᤺ᤴᤏᤥ ᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤏᤡᤱᤘᤠ᤹ ᤐᤠ᤺ᤴᤏᤡᤴ ᤀᤡᤱᤍᤥ ᤔᤧᤶᤔᤧᤳᤋᤣ ᤂᤡᤏᤡ᤹ ᤛᤣᤛᤣ ᤋᤱᤈᤢᤶᤔᤥ ᤂᤧᤱᤜᤠ᤹ ᤋᤠ᤺ᤰᤋᤧᤶᤛᤡᤶᤔᤧ᤹ᤀᤥ॥
ROM 14:2 ᤁᤢᤒᤡᤀᤥ. ᤌᤡᤰ ᤏᤛᤠᤏᤡᤒᤠᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤆᤠᤔᤠ ᤌᤢᤱᤔᤠ ᤏᤢ᤹ ᤗ᤹ᤖᤡᤰ ᤏᤛᤠ᤺ᤴ ᤆᤥᤃᤢ᤹. ᤁᤖ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤏᤛᤠᤏᤡᤒᤠᤸᤗᤧᤃ ᤏᤢᤎᤡ-ᤛᤠᤰᤆᤡᤖᤰ ᤆᤖᤥ॥
ROM 14:3 ᤜᤧᤰᤁᤣ᤺ᤸᤗᤧ ᤁᤠᤰ ᤐᤖᤡᤰᤐᤠ ᤁᤢᤈᤠ ᤁᤧᤈᤠᤒᤠᤸᤗᤧ ᤔᤧᤴᤈᤠ᤺ᤔᤏᤠᤒᤠᤴ ᤜᤡᤏᤠ᤺ᤶ ᤔᤧᤔᤧᤳᤋᤢᤴᤗ. ᤜᤧᤰᤁᤩᤠᤱ ᤔᤧᤴᤈᤠ᤺ᤔᤏᤠᤒᤠᤸᤗᤧᤀᤠᤱ ᤁᤠᤰ ᤐᤖᤡᤰᤐᤠ ᤁᤢᤈᤠ ᤁᤧᤈᤠᤒᤠᤴ ᤔᤧᤈᤡ᤺ᤳᤋᤢᤴᤗ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤋᤠ᤺ᤰᤋᤢᤀᤠᤱ ᤘᤠ᤹ᤖᤥ॥
ROM 14:4 ᤘᤣ᤹ᤀᤡᤸᤗᤧ ᤁᤢᤛᤣᤘᤠᤖᤥᤒᤠᤴ ᤀᤡᤱᤍᤥ ᤁᤧᤔᤧᤵᤐᤠ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅ ᤁᤢᤴᤍᤠᤱᤒᤠᤸᤗᤧᤀᤣ ᤁᤢᤛᤣᤘᤠᤖᤥᤒᤠᤸᤗᤧ ᤏᤢ᤺ᤒᤠ ᤐᤠ᤺ᤴ ᤆᤥᤃᤢᤖ ᤘᤠ᤹ᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤠᤛᤧᤴ ᤆᤥᤃᤢ᤹ᤖᤥ॥ ᤍᤠᤱᤒᤠᤸᤗᤧᤀᤣ ᤁᤢᤛᤣᤘᤠᤖᤥᤒᤠᤴ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤓᤠ᤹ ᤐᤡᤖᤢᤖᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤴ ᤁᤢᤓᤠ᤹ ᤐᤡᤔᤠ ᤔᤢᤰᤛᤠᤶ ᤁᤳᤋᤢ᤹ᤖᤥ॥
ROM 14:5 ᤌᤡᤰ ᤏᤛᤠᤏᤡᤒᤠᤸᤗᤧ ᤌᤡᤰ ᤕᤧᤴᤏᤡᤴ ᤘᤣ᤹ᤛ᤻ᤔᤠ ᤕᤧᤴᤏᤡᤴᤏᤢ᤺ᤸᤗᤧᤀᤠᤱ ᤛᤣᤛᤣᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹. ᤁᤖ ᤘᤣ᤹ᤛ᤻ᤔᤠ ᤔᤏᤠ᤺ᤸᤗᤧ ᤁᤠᤰ ᤕᤧᤴᤜᤠ᤹ ᤗᤳᤌᤡᤰᤁᤧ ᤔᤧᤈᤥ᤺ᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹ᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤥ ᤁᤧᤖᤧᤰᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤒᤥ ᤏᤡᤛ᤻ᤛᤣ ᤐᤥ᤺ᤱᤔᤠ ᤐᤥ᤺ᤱᤗᤥ॥
ROM 14:6 ᤌᤡᤰ ᤕᤧᤴᤏᤡᤴ ᤘᤣ᤹ᤛ᤻ᤔᤠ ᤕᤧᤴᤏᤢ᤺ᤸᤗᤧᤀᤠᤱ ᤁᤧᤕᤧᤰᤐᤠ ᤆᤥ᤺ᤰ ᤗ᤹ᤖᤡᤰ ᤁᤧᤀᤡ᤺ᤵᤐᤠᤸᤗᤧ ᤍᤠᤱᤒᤠᤴ ᤀᤡᤱᤎᤠ᤺ᤱ ᤐᤡᤔᤠᤖᤧ ᤗᤠᤃᤡ ᤜᤧᤰᤁᤣ ᤆᤥᤃᤢ᤹॥ ᤛᤠ ᤁᤧᤈᤠᤒᤠᤸᤗᤧ ᤍᤠᤱᤒᤠᤴ ᤀᤡᤱᤎᤠ᤺ᤱ ᤐᤡᤔᤠᤖᤧ ᤗᤠᤃᤡ ᤜᤧᤰᤁᤣ ᤆᤥᤃᤢ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ᤹ᤖᤥ॥ ᤛᤠ ᤔᤧᤴᤈᤠ᤺ᤔᤏᤠᤒᤠᤸᤗᤧ ᤍᤠᤱᤒᤠᤴ ᤀᤡᤱᤎᤠ᤺ᤱ ᤐᤡᤔᤠᤖᤧ ᤗᤠᤃᤡ ᤜᤧᤰᤁᤣ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ᤹ᤖᤥ॥
ROM 14:7 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤀᤠᤜᤡᤱᤛᤠᤱ ᤀᤠᤛ᤻ᤛᤡᤛᤠᤱ ᤀᤠᤏᤡ᤹ ᤀᤠᤒᤠᤅᤣ ᤗᤠᤃᤡ ᤀᤠᤴᤜᤡᤱᤏᤧᤴᤗᤥ॥
ROM 14:8 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤀᤠᤜᤡᤱᤛᤠᤱ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤀᤠᤜᤡᤱ. ᤀᤠᤛ᤻ᤛᤡᤛᤠᤱ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤀᤠᤛᤡ᤺ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤜᤡᤱᤛᤠᤱ ᤀᤠᤛ᤻ᤛᤡᤛᤠᤱ ᤀᤠᤏᤡ᤹ᤃ ᤍᤠᤱᤒᤠᤸᤗᤧᤴᤏᤣᤖᤥ॥
ROM 14:9 ᤒᤠ ᤁᤸᤗᤧ ᤆᤥᤃᤢᤸᤗᤧ. ᤂᤪᤡᤛ᤻ᤋᤧᤴ ᤛᤩᤧ ᤜᤧᤰᤁᤩᤠᤱ ᤁᤢᤛᤡᤘᤧᤳ ᤏᤢ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤐᤥ᤺ᤱᤛᤧ ᤂᤢᤏᤧ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤖᤥ॥
ROM 14:10 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤣᤀᤠᤱ ᤘᤣ᤹ ᤏᤛᤠᤏᤡᤒᤠᤜᤠ᤹ ᤂᤠᤛᤧᤴ ᤁᤧᤗᤥ᤺ᤴᤍᤢᤶᤛᤡᤶᤒᤠᤒᤣ᥅ ᤌᤣᤀᤠᤱ ᤘᤣ᤹ ᤏᤛᤠᤏᤡᤒᤠᤜᤠ᤹ ᤜᤡᤏᤠ᤺ᤶ ᤁᤧᤔᤧᤳᤋᤢᤶᤛᤡᤶᤒᤠᤒᤣ᥅ ᤀᤠᤏᤡ᤹ᤃ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴ ᤕᤢᤰᤏᤠ᤺ᤸᤗᤧ ᤁᤢᤍᤃᤡ ᤕᤧᤵᤔᤠᤀᤣ ᤐᤥ᤺ᤱᤗᤥ॥
ROM 14:11 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤛᤧᤰᤂᤠᤀᤣ ᤔᤠᤱᤜᤧᤰᤛᤡᤱᤅᤠ. ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤡᤱᤃᤠ᤹ ᤀᤠᤍᤃᤡ ᤌᤢᤱᤒᤥᤜᤈ᤹ ᤔᤧᤗᤣ᤺ᤳᤋᤢᤀᤠᤱ ᤛᤠᤶᤒᤥ᤺ᤴ ᤔᤧᤓᤴᤇᤡᤱ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤋᤧᤴᤍᤡᤱ ᤔᤧᤈᤥ᤺ᤰᤁᤠ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥”
ROM 14:12 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤈᤥᤃᤢᤶᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤀᤠᤒᤠᤅᤣ ᤆᤧᤰᤔᤠ ᤐᤥ᤺ᤱᤗᤥ॥
ROM 14:13 ᤂᤧᤸᤗᤧ ᤆᤥᤃᤢᤸᤗᤧ ᤘᤣ᤹ᤜᤠ᤹ ᤀᤡᤱᤍᤥ ᤔᤧᤵᤔᤠᤛᤡ ᤗᤧᤖᤢᤶᤗᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤘᤣ᤹ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤔᤥ ᤀᤠᤄᤄᤒᤠ ᤐᤠ᤺ᤴ ᤀᤡᤃᤪ ᤗᤠᤕᤥᤀᤥ ᤁᤧᤎᤠ᤺ᤒᤠ ᤐᤠ᤺ᤴ ᤏᤧᤛ᤻ᤛᤢᤶ ᤔᤧ᤺ᤴ ᤁᤧᤗ᤹ᤒᤠ ᤏᤡᤛ᤻ᤛᤣ ᤆᤥᤃᤢᤶᤗᤥ॥
ROM 14:14 ᤍᤠᤱᤒᤠ ᤕᤧᤛᤢᤖᤧ ᤁᤢᤕᤢᤰᤗᤠᤶ ᤀᤡᤱᤃᤠ᤹ᤃ ᤀᤠᤳᤋᤡᤴ ᤁᤢᤈᤠ᤺ᤴᤏᤠᤱ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤈᤥ᤺ᤰᤏᤧᤴ ᤑᤠ᤹ᤀᤠᤱ ᤀᤠᤏᤡᤱᤘᤠ᤹ᤀᤥ ᤏᤡᤛ᤻ᤛᤣ ᤘᤠ᤹ᤀᤠ. ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤓᤠ ᤁᤢᤈᤠᤜᤠ᤹ ᤀᤠᤈᤡ᤺ᤴᤈᤡ᤺ᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹. ᤂᤧᤱᤃ ᤂᤢᤏᤧ᤹ ᤁᤢᤗᤠᤃᤡ ᤀᤠᤈᤡ᤺ᤴᤈᤡ᤺ᤶᤒᤠᤀᤣ ᤐᤥ᤺ᤱᤗᤥ॥
ROM 14:15 ᤂᤧᤏᤧ᤹ ᤁᤧᤈᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤴ ᤆᤵᤆᤡ ᤁᤧᤈᤥ᤺ᤰᤐᤠ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤔᤧᤒᤥ᤺ᤱᤏᤧᤸᤗᤥ॥ ᤂᤧᤏᤧ᤹ ᤁᤧᤈᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤴ ᤑᤧᤳᤔᤧᤗᤠ᤺ᤴᤍᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤂᤪᤡᤛ᤻ᤋᤧᤴ ᤛᤩᤧᤀᤠᤱ ᤘᤠ᤹ᤖᤥ॥
ROM 14:16 ᤂᤧᤏᤧ᤹ ᤆᤠᤔᤠ ᤏᤢ᤹ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤑᤧᤳᤗᤠ᤺ᤴᤍᤢᤀᤠᤱ ᤂᤪᤡᤛ᤻ᤋᤖᤧ ᤁᤢᤈᤠ᤺ᤳᤌᤡ ᤔᤧᤒᤣ᤺ᤰᤏᤧᤴᤗᤖᤥ॥
ROM 14:17 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤆᤠᤔᤠ ᤏᤢ ᤌᤢᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤔᤧ᤺ᤴ. ᤁᤖ ᤛᤠᤶᤕᤥᤏᤡᤔᤠ. ᤛᤏᤠᤖᤢᤱ ᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤠᤒᤡᤒᤠ ᤛ᤺ᤵᤔᤠᤸᤗᤧ ᤁᤢᤕᤠ᤺ᤶᤒᤣᤀᤥᤏᤧᤖᤥ॥
ROM 14:18 ᤀᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤛᤣᤘᤠ ᤁᤧᤈᤥ᤺ᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤛᤢ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧᤀᤠᤱ ᤂᤧᤴ ᤔᤏᤠ᤺ᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖ ᤋᤧᤴᤍᤡᤱ ᤔᤧᤈᤥᤃᤢ᤹ᤖᤥ॥
ROM 14:19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤛᤏᤠᤖᤢᤱ ᤋᤠᤖᤢ᤹. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤗᤢᤶᤔᤥ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤐᤠ᤺ᤴ ᤆᤥᤃᤢ᤹. ᤒᤠ ᤂᤧᤴᤏᤣ ᤆᤥ᤺ᤰᤔᤠ ᤛᤠ᤹ᤖᤡᤰ ᤋᤶᤛᤡᤴ ᤆᤥᤃᤢᤶᤗᤥ॥
ROM 14:20 ᤆᤠᤔᤠ ᤌᤢᤱᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹॥ ᤁᤠᤰ ᤁᤢᤈᤠ ᤁᤢᤎᤡᤜᤠ᤹ ᤛᤢᤳᤌᤥ ᤏᤢ ᤛᤣᤛᤣ ᤆᤥ᤺ᤰ. ᤁᤖ ᤔᤏᤠ ᤁᤧᤄ᤺ᤒᤠ ᤁᤢᤈᤠ ᤆᤠᤔᤠᤃ ᤏᤢ᤺ᤒᤠ ᤔᤧᤒᤥ᤺ᤱᤏᤧᤸᤗᤥ॥
ROM 14:21 ᤘᤣ᤹ ᤏᤛᤠᤏᤡᤒᤠᤜᤠ᤹ ᤗᤠᤕᤥᤀᤥ ᤁᤧᤎᤠ᤺ᤒᤠ ᤁᤢᤈᤠ ᤁᤢᤎᤡ ᤔᤧᤴᤈᤠᤔᤠ ᤜᤧᤰᤁᤩᤠᤱ ᤗᤠᤕᤥᤀᤥ ᤁᤧᤎᤠ᤺ᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤠᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
ROM 14:22 ᤁᤴ ᤆᤠᤔᤠ ᤌᤢᤱᤔᤠ ᤐᤠ᤺ᤴᤏᤥ ᤀᤠᤰᤋᤱᤒᤠ ᤏᤛᤠ᤺ᤴ ᤁᤧᤃᤳᤋᤢ᤹ ᤂᤧᤴ ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤧᤏᤧ᤹ ᤁᤧᤗᤢᤶᤔᤥ ᤘᤠ᤹ᤖ॥ ᤀᤠᤳᤋᤡᤴ ᤔᤏᤠ᤺ᤸᤗᤧ ᤆᤠᤔᤠ ᤌᤢᤱᤔᤠ ᤏᤢ᤹ ᤗ᤹ᤖᤡᤰ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤆᤵᤆᤡ ᤔᤧᤈᤥᤃᤢᤴ ᤂᤧᤴᤏᤣ ᤔᤢ᤹ᤀᤡᤛᤠᤒᤠᤖᤥ॥
ROM 14:23 ᤁᤖ ᤆᤵᤆᤡ ᤆᤥ᤺ᤰᤁᤡ ᤁᤧᤈᤠᤒᤠᤴ ᤀᤠᤒᤠᤅᤣ ᤗᤠᤕᤥᤀᤥ ᤌᤠ᤺ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤑᤣ᤺ᤴᤍᤢᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤆ᤹᤺॥ ᤏᤛᤠ᤺ᤴᤗᤠᤶᤒᤠ ᤔᤧᤶᤒᤥ᤺ᤱᤔᤏᤠᤒᤠ ᤁᤠᤰ ᤐᤠ᤺ᤴᤜᤠ᤹ ᤗᤠᤕᤥᤖᤥ॥
ROM 15:1 ᤀᤠᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤏᤡᤱᤘᤠ᤹ ᤋᤠ᤺ᤔᤠ ᤔᤧᤏᤢ᤹ᤏᤧᤴ. ᤁᤖ ᤏᤛᤠ᤺ᤴ ᤁᤧᤛᤢ᤺ᤶᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤐᤥ᤺ᤱᤗᤥ॥
ROM 15:2 ᤀᤠᤏᤡ᤹ ᤁᤧᤖᤧᤰᤗᤧ ᤘᤣ᤹ᤜᤠ᤹ᤖᤧ ᤗᤠᤃᤡ ᤏᤢ᤺ᤒᤠ ᤆᤥ᤺ᤰᤔᤠᤀᤠᤱ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤐᤥ᤺ᤱᤗᤥ॥
ROM 15:3 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤂᤡᤏᤡ᤹ ᤜᤡᤏᤠ᤺ᤶ ᤁᤧᤔᤧᤵᤐᤠᤜᤠ᤹ᤖᤧ ᤁᤧᤶᤔᤧᤳᤋᤡᤒᤠ ᤜᤡᤏᤠ᤺ᤶᤔᤡᤱᤃ ᤀᤡᤱᤃᤠ᤹ ᤀᤠᤛᤶᤍᤠᤱ ᤆᤢᤰᤋᤧᤀᤠᤱ ᤘᤠ᤹ᤖᤥ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧᤀᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ॥
ROM 15:4 ᤐᤣ ᤕᤧᤶᤔᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧ ᤀᤠᤏᤡ᤹ ᤏᤡᤛᤠᤶ ᤀᤠᤜᤢ᤹ᤖ ᤑᤠ᤹ᤀᤠᤱ ᤛᤠᤵᤋᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤏᤠᤛᤡ ᤀᤠᤎ᤺ᤳᤋᤢᤶᤔᤡᤸᤗᤧ ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤗᤠᤶ ᤀᤠᤏᤡ᤹ ᤜᤠᤱᤜᤠᤱ ᤀᤠᤗ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤖᤧᤒᤠ ᤔᤠᤱᤜᤧᤰᤜᤠ᤹ ᤁᤧᤳ ᤑᤠ᤹ᤀᤠᤱ ᤏᤡᤛ᤻ᤛᤣᤀᤣ ᤏᤡᤱᤛᤠᤱ ᤀᤠᤈᤥᤃᤢᤶᤗᤥ॥
ROM 15:5 ᤀᤠᤸᤗ ᤏᤠᤛᤡ ᤌ᤺ᤵᤔᤠ ᤁᤧᤒᤠᤱᤒᤠ ᤏᤢ ᤜᤠᤱᤜᤠᤱ ᤕᤠᤵᤔᤡ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴ ᤘᤕᤧᤒᤠ ᤁᤢᤒᤡ ᤁᤢᤀᤡᤛᤡ᤺ᤰ ᤁᤧᤒᤥ᤺ᤰᤂᤡᤸᤗᤧ ᤂᤡᤏᤡ᤹ ᤗᤢᤶᤔᤥ ᤌᤡᤰᤜᤢᤵ ᤐᤥ᤺ᤱᤔᤠᤀᤠᤱ ᤘᤠ᤹ᤔᤠ ᤁᤧᤒᤠᤱᤄᤡᤖᤖᤥ॥
ROM 15:6 ᤜᤧᤰᤁᤣᤗ᤹ᤖᤡᤰ ᤌᤡᤰ ᤏᤡᤱᤘᤠ᤹ ᤏᤢ ᤌᤡᤰ ᤔᤢᤖᤠ᤺ᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤁᤧᤛᤢᤰᤋᤢᤶᤗᤖᤥ॥
ROM 15:7 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧ ᤂᤪᤡᤛ᤻ᤋᤖᤧ ᤂᤡᤏᤡ᤹ ᤁᤧᤍᤠ᤺ᤰᤋᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤢᤶᤔᤥᤀᤠᤱ ᤋᤠ᤺ᤰᤁᤠᤛᤡᤶᤔᤧ᤹ᤀᤥ॥
ROM 15:8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤠᤰᤌᤧᤒᤠᤜᤠ᤹ ᤐᤡᤖᤢᤛᤡᤒᤠ ᤔᤠᤱᤜᤧᤰᤜᤠ᤹ ᤛᤧᤰᤂᤠᤀᤣ ᤆᤥ᤺ᤰ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤧ ᤂᤪᤡᤛ᤻ᤋᤧᤴ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
ROM 15:9 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤋᤩᤧᤒᤠᤖᤥ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶ ᤁᤧᤛᤠᤵᤐᤠᤸᤗᤧ ᤛᤠᤵᤋᤢᤀᤠᤱ ᤐᤳ. “ᤂᤧᤸᤗᤧ ᤆᤥᤃᤢᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤡᤱᤃᤠ᤹ ᤏᤧᤶᤓᤥᤃᤧᤴ ᤁᤧᤏᤠᤖᤠ ᤑᤥ᤺ᤛᤢᤱᤗᤥ. ᤜᤧᤰᤁᤩᤠᤱ ᤁᤧᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤈᤥ᤺ᤰᤐᤠ ᤛᤣᤘᤠ ᤛᤠᤶᤗᤥ᤺ᤴ ᤛᤠᤶᤔᤧᤳᤋᤢᤱᤗᤥ॥”
ROM 15:10 ᤕᤠᤶᤔᤥ ᤀᤰᤂᤣᤀᤠᤱ ᤛᤠᤵᤋᤧᤀᤠᤱ ᤐᤳ. “ᤌᤡᤶᤔᤧᤴᤍᤱ ᤛᤢᤘᤠᤱᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤀᤥᤔᤢ ᤗ᤹ᤖᤧᤶᤔᤧ᤹ᤀᤥ॥”
ROM 15:11 ᤜᤧᤰᤁᤩᤠᤱ ᤕᤠᤶᤔᤥᤀᤠᤱ. “ᤁᤠᤰ ᤌᤡᤶᤔᤧᤴᤍᤱ ᤛᤢᤘᤠᤱᤛᤣ. ᤍᤠᤱᤒᤠᤸᤗᤧ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤧ᤹ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤔᤧᤓᤥ᤺ᤛᤢᤖ॥”
ROM 15:12 ᤜᤧᤰᤁᤩᤠᤱ ᤕᤠᤶᤔᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤀᤠᤱ ᤛᤠᤵᤋᤢᤀᤠᤱ ᤐᤳ. “ᤕᤡᤛᤤᤖᤧ ᤁᤢᤎᤠ᤺ᤰᤗᤠᤶ ᤔᤏᤠᤎᤡᤰ ᤋᤠ᤺. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤌᤡᤶᤔᤧᤴᤍᤱ ᤛᤢᤘᤠᤱ ᤛᤶᤍᤠᤱ ᤜᤠᤱᤕᤢᤰ ᤆᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤶᤍᤠᤱ ᤏᤡᤱᤛᤠᤱ ᤔᤧᤕᤢᤰᤂᤢ᤹ᤖᤥ॥”
ROM 15:13 ᤂᤡᤏᤡ᤹ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤏᤡᤱᤛᤠᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤧᤛ᤺ᤵᤐᤠ ᤁᤧᤈᤥᤃᤡᤖ ᤜᤧᤰᤁᤩᤠᤱ ᤛᤏᤠᤖᤢᤱ ᤁᤧᤒᤡᤖᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠ. ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤕᤖᤡᤰ ᤏᤡᤱᤛᤠᤱ ᤁᤧᤃᤵᤐᤠ ᤁᤧᤈᤥᤃᤡᤖᤖᤥ॥
ROM 15:14 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤘᤣ᤹ᤜᤠ᤹ ᤏᤢ᤺ᤖᤡᤰ ᤁᤧᤔᤧᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤕᤖᤡᤰ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤘᤣ᤹ᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤀᤡᤱᤃᤠ᤹ ᤏᤡᤛ᤻ᤛᤣ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥
ROM 15:15 ᤜᤧᤰᤁᤣᤛᤠᤱ ᤁᤢᤓᤠ ᤔᤧᤶᤒᤠ᤺ᤳᤋᤣ ᤔᤧᤶᤒᤥ᤺ᤱᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤗ᤹ᤖ ᤑᤠ᤹ᤀᤠᤱ ᤀᤠ᤺ᤴᤇᤡᤱᤅᤠᤖ ᤛᤠᤵᤋᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤗᤢᤱᤃᤢᤶᤗᤠᤶᤒᤠ
ROM 15:16 ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣᤘᤠᤖᤥᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤛᤣᤛᤣᤔᤠᤱᤗᤠᤶ ᤛᤣᤛᤣ ᤔᤧᤒᤥ᤺ᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤛᤡᤒᤠ ᤆᤥᤓᤠ᤹ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤜᤧᤰᤁᤣ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤧᤱᤜᤠ᤹ ᤀᤡᤱᤓᤥ᤺ᤛᤢᤱᤛᤡᤱᤗᤥ॥
ROM 15:17 ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤐᤥ᤺ᤰᤂᤠᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤥᤃᤢᤱᤒᤠ ᤀᤠᤔᤠᤱᤛᤣᤘᤠᤀᤥ ᤀᤡᤱᤃᤠ᤹ᤃ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴ ᤁᤳᤋᤢᤱᤗᤥ॥
ROM 15:18 ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤏᤢ ᤆᤥᤃᤢᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤆᤥ᤺ᤰᤛᤧ ᤂᤪᤡᤛ᤻ᤋᤖᤧ ᤀᤡᤱᤃᤠ᤹ᤗᤠᤶ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤖᤰ ᤀᤠᤱᤍᤡᤱ ᤗ᤹ᤀᤠᤖᤥ॥ ᤘᤣ᤹ ᤐᤠ᤺ᤴᤜᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤀᤠᤴᤗᤥ॥
ROM 15:19 ᤁᤴ ᤕᤠ᤺ᤶᤒᤰᤁᤡᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ ᤕᤖᤢᤛᤗᤧᤔᤗᤠᤶ ᤀᤡᤸᤗᤡᤖᤡᤁᤢᤔ ᤋᤧᤱᤃᤵ ᤌᤠᤖᤡᤰ ᤂᤪᤡᤛ᤻ᤋᤖᤧ ᤁᤠᤰ ᤁᤢᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥
ROM 15:20 ᤘᤣ᤹ ᤔᤏᤠᤜᤠ᤹ᤖᤧ ᤔᤧᤏᤧᤛ᤻ᤛᤢᤒᤠ ᤐᤠᤱᤕᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤁᤢᤀᤡᤛᤡ᤺ᤰ ᤘᤣ᤹ ᤔᤏᤠᤜᤠ᤹ᤖᤧ ᤂᤪᤡᤛ᤻ᤋᤧᤴ ᤀᤡᤱᤔᤧᤓᤥ᤺ᤛᤢᤒᤠ ᤋᤧᤴᤏᤥ ᤀᤡᤱᤃᤠ᤹ ᤂᤪᤡᤛ᤻ᤋᤧᤴ ᤀᤡᤱᤔᤧᤓᤥ᤺ᤀᤠᤴᤗᤥ. ᤁᤖ ᤂᤪᤡᤛ᤻ᤋᤧᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤠ᤹ᤒᤠ ᤋᤧᤴᤏᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤛᤍᤠᤍᤡᤱ ᤏᤡᤱᤘᤠ᤹ ᤁᤳᤋᤢᤱᤗᤥ॥
ROM 15:21 ᤛᤠᤶᤕᤥᤛᤠᤵᤗᤠᤀᤥᤃ ᤀᤰᤂᤣᤗ᤹ᤖᤡᤰᤏᤧ ᤛᤠᤵᤋᤧᤀᤠᤱ ᤐᤳᤗᤥ. “ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤧᤶᤔᤧᤳᤇᤡᤱᤅᤣ ᤁᤧᤘᤠ᤹ᤒᤠᤜᤠ᤹ᤖᤧ ᤔᤧᤏᤡ᤺ᤛᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤧᤱᤄᤧᤶᤔᤣ ᤁᤧᤘᤠ᤹ᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥”
ROM 15:22 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤘᤣ᤹ ᤋᤧᤴᤏᤥ ᤂᤪᤡᤛ᤻ᤋᤧᤴ ᤀᤡᤱᤓᤥ᤺ᤛᤢᤱᤒᤠᤸᤗᤧ ᤂᤡᤏᤡ᤹ᤀᤥ ᤋᤠ᤺ᤔᤠ ᤔᤧᤴᤇᤢᤰᤁᤣ ᤘᤠ᤹ᤀᤠᤖᤥ॥
ROM 15:23 ᤁᤖ ᤁᤴ ᤌᤢᤶᤔᤥ ᤁᤠᤰ ᤐᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗ ᤕᤖᤡᤰ ᤋᤱᤒᤣᤀᤠᤱᤎᤥ ᤂᤡᤏᤡ᤹ᤀᤥ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ.
ROM 15:24 ᤀᤡᤱᤃᤠ᤹ ᤀᤡᤛ᤻ᤐᤧᤏ ᤗᤠᤈᤣ᤹ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ ᤋᤢᤶᤛᤧ ᤖᤥᤔ ᤕᤧᤰᤕᤰᤁᤥ ᤗ᤺ᤶᤔᤠ ᤋᤠ᤺ᤔᤠ ᤀᤠᤏᤡᤱᤘᤠ᤹ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤁᤢᤓᤠ ᤕᤧᤴ ᤛ᤺ᤳᤋᤠᤖ ᤘᤠ᤹ᤀᤠᤀᤠᤱ ᤐᤣ᤺ᤰᤁᤠᤀᤡᤸᤗᤧ ᤕᤠᤶᤔᤥ ᤀᤠᤗᤠᤶᤍᤡ᤺ᤰᤁᤥ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
ROM 15:25 ᤁᤖ ᤀᤠᤸᤗ ᤕᤖᤢᤛᤗᤧᤶᤔᤥᤒᤠ ᤕᤠᤱᤃᤧᤛᤠ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤀᤰᤂᤤᤕᤠ ᤏᤢ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤛᤢᤵᤛᤢᤒᤠ ᤑᤠ᤹ᤕᤠᤱᤅᤡᤴ ᤛᤠ᤺ᤛᤧ ᤀᤡᤱᤃᤠ᤹ ᤕᤖᤢᤛᤗᤧᤔ ᤐᤣ᤺ᤰᤁᤠᤖ ᤐᤳᤋᤠᤖᤥ॥
ROM 15:27 ᤂᤧᤱᤜᤠ᤹ᤖᤧᤃ ᤀᤰᤂᤣ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧᤖᤥ॥ ᤛᤧᤰᤂᤠ᤺ᤸᤗᤧ ᤂᤧᤱᤜᤠ᤹ᤖᤧ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤱᤔᤴᤏᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤁᤧᤒᤥ᤺ᤱᤒᤠᤀᤣ ᤘᤕᤧ. ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤗᤠᤶ ᤁᤧᤍᤠ᤺ᤒᤠ ᤛᤢᤏᤠᤀᤡᤱᤅᤡᤸᤗᤧᤴ ᤕᤠᤶᤛᤠᤶᤃᤧᤴ ᤔᤢ᤹ᤀᤡᤛᤠᤶᤔᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥
ROM 15:28 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤧᤴ ᤑᤠ᤹ᤕᤠᤱᤅᤡᤴ ᤕᤖᤢᤛᤗᤧᤶᤔᤥ ᤋᤣ᤹ᤖᤢᤱᤅᤠᤱ ᤂᤧᤴ ᤔᤧᤄᤥ᤺ᤛᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤱ ᤜᤧᤰᤁᤩᤠᤱ ᤀᤡᤛ᤻ᤐᤧᤏ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ᤀᤥ ᤗ᤺ᤴᤏᤠ᤹ ᤋᤠᤀᤠᤖᤥ॥
ROM 15:29 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤂᤪᤡᤛ᤻ᤋᤖᤧ ᤔᤢᤸᤗᤢᤰ ᤁᤢᤔᤢ᤹ᤀᤡᤛᤠᤶᤔᤡᤴᤏᤢ ᤋᤠ᤺ᤀᤠ ᤁᤧᤗ᤹ᤒᤠᤴ ᤏᤡ᤺ᤛᤢᤱᤗᤥ॥
ROM 15:30 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤏᤠ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤢᤘᤠ ᤀᤠᤈᤥᤃᤧᤶ ᤀᤠᤒᤡᤖᤧᤶᤔᤧ᤹ᤖ ᤀᤡᤱᤃᤠ᤹ ᤀᤡᤏᤥᤃᤧᤴ ᤀᤠᤍᤢᤰᤂᤣᤀᤥ ᤆᤢᤶ ᤀᤠᤔᤧᤳᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
ROM 15:31 ᤕᤜᤢᤍᤡᤕᤠ ᤌᤢᤶᤔᤥᤒᤠ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤋᤠᤱᤛᤧ᤺ᤵᤐᤠᤖ ᤜᤧᤰᤁᤩᤠᤱ ᤕᤖᤢᤛᤗᤧᤔᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤋᤣ᤹ᤖᤢᤱᤒᤠ ᤁᤢᤓᤠ᤹ ᤕᤠᤱᤅᤡᤴ ᤂᤧᤱᤜᤠ᤹ᤖᤧ ᤔᤧᤍᤠ᤺ᤰᤋᤢᤖ ᤑᤠ᤹ᤀᤠᤱᤅᤠᤱ ᤋᤢᤘᤠ ᤆᤥᤃᤧᤶ ᤀᤠᤒᤡᤖᤧᤶᤔᤧ᤹ᤀᤥ॥
ROM 15:32 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤥ ᤛ᤺ᤳᤋᤠᤖ ᤋᤠᤀᤠᤀᤠᤱ ᤛᤥᤛᤥᤖᤡᤰ ᤜᤠᤱᤜᤠᤱ ᤀᤠᤔᤧᤳᤇᤡᤱᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥
ROM 15:33 ᤛᤏᤠᤖᤢᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥
ROM 16:1 ᤁᤡᤱᤁᤪᤡᤕᤠ ᤐᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤛᤣᤘᤠᤖᤥᤔᤠ ᤀᤠᤏᤡ᤹ ᤏᤢᤛᤠ᤹ ᤑᤡᤒᤡᤖᤧ ᤁᤢᤏᤠᤖᤠ ᤑᤥ᤺ᤛᤢᤱᤗᤥ॥
ROM 16:2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤗᤠ᤹ᤖᤢᤛᤡᤒᤠ ᤗᤠᤱᤍᤠ᤺ᤰᤔᤠᤴ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ ᤂᤡᤏᤡ᤹ ᤛᤢᤰᤛᤢᤰ ᤂᤢᤏᤧ᤹ ᤁᤢᤓᤠ᤹ ᤐᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤱᤃᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ ᤁᤢᤓᤠ᤹ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥
ROM 16:3 ᤀᤡᤱᤃᤠ᤹ᤏᤢ ᤛᤥᤖᤡᤰ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤴᤈᤢᤶᤜᤠ᤹ ᤐᤪᤡᤛ᤻ᤁᤡᤗᤠ ᤏᤢ ᤁᤢᤕᤧᤶᤒᤠ᤹ ᤀᤁᤫᤡᤗᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ROM 16:4 ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤛᤧ᤺ᤵᤛᤧ ᤂᤢᤴᤇᤡ᤹ ᤜᤡᤱᤔᤴᤏᤡᤴᤏᤣ ᤁᤧᤛᤠᤰᤐᤠᤀᤥ ᤌᤠᤛᤧᤳᤇᤢᤖᤥ॥ ᤀᤡᤱᤃᤠ᤹ᤖᤰ ᤔᤧ᤺ᤴ. ᤁᤖ ᤕᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤏᤥᤃᤧᤴ ᤔᤧᤒᤡᤖᤢᤛᤡ᤹॥
ROM 16:5 ᤂᤢᤴᤇᤡ᤹ ᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤔᤡ᤺ᤶ ᤀᤠᤴᤈᤢᤶ ᤀᤧᤐᤣᤏᤧᤋᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥ ᤂᤢᤏᤧ᤹ᤃ ᤀᤣᤛᤡᤕᤠ ᤋᤧᤱᤃᤵᤐᤥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠ ᤘᤕᤧᤖᤥ॥
ROM 16:6 ᤂᤡᤏᤡ᤹ ᤗᤠᤃᤡ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤖᤡᤕᤶᤔᤡᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥
ROM 16:7 ᤀᤡᤱᤃᤠ᤹ᤏᤢ ᤛᤠᤰᤐᤠ ᤁᤧᤎᤠ᤺ᤒᤠ ᤕᤜᤢᤍᤡ ᤀᤠᤴᤈᤢᤶ ᤀᤧᤴᤍᤪᤥᤏᤡᤁᤛ ᤏᤢ ᤕᤢᤏᤡᤕᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤢᤴᤇᤡ᤹ᤃ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤋᤃᤡ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤠᤃᤧᤳᤇᤢᤀᤠᤱ ᤘᤕᤧᤳᤇᤡᤖᤥ॥
ROM 16:8 ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤀᤠᤔᤡ᤺ᤶ ᤀᤠᤴᤈᤢᤶ ᤀᤧᤶᤐᤗᤡᤀᤧᤋᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥
ROM 16:9 ᤀᤠᤏᤡᤃᤧᤏᤢ ᤛᤥᤖᤡᤰ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤢᤷᤒᤠᤏᤛ ᤏᤢ ᤀᤠᤔᤡ᤺ᤶ ᤀᤠᤴᤈᤢᤶ ᤀᤡᤛ᤻ᤋᤠᤂᤢᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ROM 16:10 ᤂᤪᤡᤛ᤻ᤋᤀᤥ ᤆᤥᤃᤢᤒᤠ ᤁᤢᤏᤛᤠ᤺ᤴᤏᤡᤴ ᤔᤧᤛᤠ᤹ᤖᤢᤸᤗᤧ ᤏᤢ᤺ᤒᤠ ᤁᤧᤎᤠ᤺ᤵᤐᤠ ᤀᤵᤐᤧᤸᤗᤧᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥ ᤀᤖᤡᤛ᤻ᤋᤥᤒᤢᤗᤛ ᤏᤢ ᤁᤢᤜᤡᤶᤔᤥ ᤁᤧᤘᤠ᤹ᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ROM 16:11 ᤀᤡᤱᤃᤠ᤹ ᤕᤜᤢᤍᤡ ᤀᤠᤴᤈᤢᤶ ᤜᤧᤖᤥᤍᤡᤕᤏᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥ ᤏᤠᤷᤁᤡᤁᤛᤖᤧ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ROM 16:12 ᤋᤪᤡᤑᤣᤏᤠ ᤏᤢ ᤋᤪᤡᤑᤥᤛᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤁᤴ ᤔᤧᤴᤇᤢᤔᤠᤜᤠ᤹ᤖᤧᤃ ᤕᤠᤶᤒᤢᤎᤡᤰᤁᤠᤱ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤧᤳᤇᤢᤖᤥ॥ ᤛᤠ᤹ᤖᤡᤰ ᤕᤠᤶᤒᤢᤎᤡᤰᤁᤠᤱ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤠᤔᤡ᤺ᤶ ᤀᤠᤴᤈᤢᤶ ᤐᤷᤛᤡᤛ᤻ᤛᤧᤴᤏᤠᤱ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥
ROM 16:13 ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤛᤧ ᤛᤣᤃᤢᤒᤠ ᤖᤢᤑᤛ ᤏᤢ ᤁᤢᤶᤔᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤁᤢᤶᤔᤠᤖᤧᤃ ᤀᤡᤱᤃᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤁᤢᤀᤡᤛᤡ᤺ᤰ ᤀᤡ᤺ᤳᤋᤠᤱᤅᤠᤱ ᤘᤕᤧᤖᤥ॥
ROM 16:14 ᤀᤠᤛᤡᤴᤁᤪᤡᤋᤛ. ᤑ᤻ᤗᤧᤃᤏ. ᤜᤷᤔᤠᤛ. ᤐᤠᤋᤪᤥᤒᤠᤛ. ᤜᤷᤔᤣᤛ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤛᤠᤏᤡᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ROM 16:15 ᤑᤡᤗᤥᤗᤥᤃᤛ. ᤕᤢᤗᤡᤕᤠ. ᤏᤧᤖᤡᤀᤛ ᤏᤢ ᤁᤢᤴᤛᤠ᤹ ᤔᤧᤴᤇᤢᤔᤠ᤹. ᤏᤢ ᤀᤥᤗᤡᤶᤐᤠᤛ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
ROM 16:16 ᤂᤡᤏᤡ᤹ᤃ ᤛᤣᤛᤣ ᤔᤡ᤺ᤶᤈᤡ᤺ᤸᤗᤧ ᤛᤣᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤁᤵᤔᤥᤒᤠ ᤁᤠᤰ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥
ROM 16:17 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤕᤧᤔᤧᤴᤍᤱ ᤁᤧᤍᤠ᤺ᤵᤐᤠᤜᤠ᤹ ᤔᤡᤰᤆᤥ ᤔᤧᤳᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤡᤏᤡ᤹ ᤁᤧᤜᤢ᤹ᤀᤠᤛᤡᤒᤠ ᤛᤧᤰᤂᤠ ᤐᤠ᤺ᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤴ ᤔᤧᤜᤢ᤹ᤖᤢᤛᤡᤀᤠᤱ ᤔᤏᤠᤜᤠ᤹ ᤂᤢᤏᤡ᤹ ᤏᤛᤠ᤺ᤴᤏᤥ ᤔᤧᤄ᤺ᤛᤢᤛᤡᤖᤥ॥ ᤀᤰᤋᤱᤒᤠ ᤔᤏᤠᤜᤠ᤹ᤏᤢ ᤔᤠ᤺ᤱᤄᤠᤀᤣ ᤘᤕᤧᤶᤔᤧ᤹.
ROM 16:18 ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧᤃ ᤍᤠᤱᤒᤠ ᤂᤪᤡᤛ᤻ᤋᤖᤧ ᤁᤢᤛᤣᤘᤠ ᤔᤧᤴᤈᤥᤃᤢᤴ. ᤁᤖ ᤀᤠᤒᤠᤅᤣ ᤂᤢᤏᤡ᤹ ᤛᤠᤵᤐᤥ᤺ᤰᤁᤡᤸᤗᤧ ᤗᤠᤃᤡᤖᤰ ᤛᤣᤘᤠ ᤔᤧᤈᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤔᤏᤠ ᤁᤧᤈᤶᤒᤠ ᤏᤢ ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥
ROM 16:19 ᤁᤖ ᤂᤡᤏᤡ᤹ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤈᤥᤃᤡᤒᤠ ᤐᤠ᤺ᤴᤏᤡᤱᤃ ᤁᤧᤖᤧᤰ ᤐᤡᤛᤠᤱ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤛ᤺ᤳᤋᤠᤖᤥ॥ ᤂᤡᤏᤡ᤹ᤃ ᤏᤢ᤺ᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤑᤥᤋᤩᤠ ᤔᤧ᤺ᤴᤏᤣᤒᤠ ᤐᤥ᤺ᤰᤂᤧᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥
ROM 16:20 ᤛᤏᤠᤖᤢᤱ ᤕᤠᤵᤔᤡ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤖᤠᤀᤣ ᤔᤠᤑᤧᤴᤛᤠᤶᤔᤡᤴ ᤂᤡᤏᤡ᤹ ᤗᤠᤱᤓᤥ ᤛᤡᤃᤠᤱ ᤌᤠ᤺ᤛᤢᤀᤠᤱ ᤋᤥ᤹ᤖᤢ᤹ᤖᤥ॥ ᤀᤠᤸᤗ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖ॥
ROM 16:21 ᤀᤡᤱᤃᤠ᤹ᤏᤢ ᤛᤥᤖᤡᤰ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤋᤡᤔᤥᤌᤡ᤺ᤸᤗᤧ ᤜᤧᤰᤁᤩᤠᤱ ᤕᤜᤢᤍᤡ ᤀᤠᤴᤈᤢᤶ ᤗᤢᤛᤡᤕᤛ. ᤕᤧᤛᤥᤏ ᤏᤢ ᤛᤥᤛᤡᤐᤠᤋᤪᤥᤛᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥
ROM 16:22 ᤐᤠᤘᤗᤖᤧ ᤁᤢᤗᤠᤃᤡ ᤁᤴ ᤛᤰᤀᤡᤱᤄᤱᤅᤡᤴ ᤁᤧᤛᤠᤵᤐᤠ ᤀᤡᤱᤃᤠ᤹ ᤋᤷᤋᤡᤕᤛᤖᤧᤀᤠᤱ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤛᤣᤘᤠ ᤜᤠᤰᤏᤡᤱᤗᤥ॥
ROM 16:23 ᤀᤠᤜᤡᤶᤍᤠᤱᤒᤠ ᤃᤠᤕᤛᤖᤧ ᤂᤡᤏᤡ᤹ ᤛᤣᤘᤠ ᤁᤧᤜᤠᤰᤋᤡᤀᤠᤱ ᤘᤠ᤹ᤖᤥ॥ ᤁᤵᤔᤥ ᤃᤠᤕᤛᤖᤧ ᤁᤢᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥ ᤁᤴ ᤕᤧᤰᤕᤰᤁᤥᤒᤠ ᤕᤠᤱᤃᤧᤕᤢᤱᤒᤠ ᤀᤡᤖᤠᤛ᤻ᤋᤛ ᤏᤢ ᤀᤠᤏᤡ᤹ ᤏᤛᤠᤏᤡᤒᤠ ᤆᤢᤶ ᤁᤫᤠᤷᤋᤛᤖᤧᤀᤠᤱ ᤛᤣᤘᤠ ᤜᤠᤅᤧᤳᤇᤢᤀᤠᤱ ᤘᤠ᤹ᤖᤥ॥
ROM 16:25 ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱᤅᤡᤴ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤀᤡᤱᤄᤱᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤥ ᤁᤧᤎᤢᤶᤒᤠ ᤆᤥ᤺ᤰᤔᤠ ᤁᤧᤛᤢᤰᤋᤡ᤹ᤖᤥ॥ ᤁᤴ ᤀᤡᤱᤄᤱᤅᤡᤱᤃ ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤆᤡᤰᤂᤧᤀᤠᤱ ᤘᤕᤧ. ᤁᤖ ᤀᤠᤸᤗᤥ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
ROM 16:26 ᤀᤠᤸᤗᤥ ᤁᤴ ᤛᤢᤏᤠᤀᤡᤱᤅᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤐᤠ᤺ᤴᤗᤠᤶ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤗᤠᤶ ᤁᤧᤖᤧᤰᤗᤧ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤁᤴ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤖ ᤘᤠ᤹ᤖᤥ॥
ROM 16:27 ᤜᤧᤰᤁᤣᤗ᤹ᤖᤡᤰ ᤛᤡᤰᤁᤢᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤕᤧᤛᤢ ᤂᤪᤡᤛ᤻ᤋᤗᤠᤶ ᤛᤍᤠᤍᤡᤱ ᤛᤍᤠᤍᤡᤱ ᤐᤥ᤺ᤱᤗᤖᤥ᥄ ᤀᤠᤔᤧᤴ॥
1CO 1:1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤗᤠᤶᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤛᤣᤃᤠᤱᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤀᤠᤏᤡ᤹ ᤏᤢᤛᤠ᤹ ᤛᤥᤛ᤻ᤌᤧᤏᤣᤛᤗᤠᤶᤒᤠ
1CO 1:2 ᤁᤴ ᤛᤰᤀᤡᤱᤄᤱᤅᤡᤱ ᤁᤥᤖᤴᤌᤡ ᤕᤧᤰᤕᤰᤁᤥ ᤁᤧᤏᤧᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤥᤒᤠ ᤛᤣᤛᤣ ᤁᤢᤔᤏᤠᤜᤠ᤹ ᤜᤠᤰᤁᤠᤛᤡᤃᤧᤖᤥ॥ ᤂᤢᤏᤧ᤹ ᤂᤪᤡᤛ᤻ᤋ ᤕᤧᤛᤢᤗᤠᤶ ᤁᤧᤖᤧᤰ ᤐᤡᤛᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱ ᤁᤧᤗᤥ᤺ᤱᤒᤠᤜᤠ᤹ ᤛᤣᤛᤣ ᤆᤥᤃᤢᤛᤡᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤛᤣᤛᤣ ᤁᤧᤈᤥᤃᤡᤒᤠᤖᤥ॥ ᤂᤪᤡᤛ᤻ᤋᤧᤱᤃ ᤂᤧᤱᤜᤠ᤹ᤖᤧᤴ ᤏᤢ ᤀᤠᤏᤡ᤹ ᤍᤠᤱᤒᤠᤖᤥ॥
1CO 1:3 ᤀᤠᤏᤡ᤹ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱᤅᤡᤴ ᤂᤡᤏᤡ᤹ ᤁᤧᤒᤡᤖᤡᤖ॥
1CO 1:4 ᤂᤪᤡᤛ᤻ᤋ ᤕᤧᤛᤢᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤗᤠᤃᤡ ᤏᤥᤃᤧᤴ ᤐᤡᤖᤢᤱᤗᤥ॥
1CO 1:5 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤂᤡᤏᤡ᤹ᤃ ᤐᤠ᤺ᤴ ᤐᤠ᤺ᤵᤔᤠ ᤔᤢᤰᤛᤠᤶ ᤏᤢ ᤏᤧᤜᤡᤏᤡᤱᤘᤠ᤹ ᤁᤧᤃᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
1CO 1:6 ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤀᤥ ᤛᤧᤰᤂᤠᤀᤣ ᤁᤢᤒᤢᤱ ᤕᤢᤱᤛᤡᤱᤅᤠᤱ ᤘᤠ᤹ᤖᤥ.
1CO 1:7 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤶᤔᤡᤴ ᤁᤧᤜᤠᤱᤄᤢᤶᤔᤡᤸᤗᤧ ᤆᤠᤜᤠᤒᤠ ᤁᤧᤈᤥᤃᤡᤒᤠ ᤁᤧᤖᤧᤰ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤔᤡᤴ ᤂᤡᤏᤡ᤹ ᤁᤧᤃᤳᤋᤢᤶᤗᤥ॥
1CO 1:8 ᤂᤢᤏᤧ᤹ᤀᤣ ᤁᤢᤏᤢᤵᤔᤥ ᤌᤠᤖᤡᤰ ᤏᤛᤠ᤺ᤴᤏᤥ ᤌᤎᤵ ᤔᤧᤸᤗ᤹ᤀᤣ ᤁᤧᤃᤳᤋᤡ᤹. ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴᤏᤥ ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤐᤠ᤺ᤴᤎᤡᤰᤔᤠ ᤁᤧᤴᤇᤢᤰᤋᤡᤴᤗᤥ॥
1CO 1:9 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢ ᤂᤪᤡᤛ᤻ᤋ ᤀᤠᤏᤡ᤹ ᤍᤠᤱᤒᤠᤴᤏᤢ ᤛᤣᤛᤣ ᤋᤱᤈᤢᤶᤔᤥ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
1CO 1:10 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤛᤧᤶᤔᤠ ᤔᤧᤒᤥ᤺ᤱᤏᤧᤴᤗ ᤁᤖ ᤋᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤏᤡᤱᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤀᤡ᤺ᤵᤔᤠᤀᤥᤀᤠᤱ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹ᤀᤥ॥
1CO 1:11 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤂᤧᤔᤠ᤹ ᤐᤥᤃᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤰᤗᤥᤀᤣᤖᤧ ᤁᤢᤜᤡᤶᤛᤕᤱᤅᤥᤒᤠ ᤁᤢᤓᤠᤖᤧ ᤀᤡᤱᤃᤠ᤹ ᤔᤧᤈᤧᤰᤋᤠᤱᤅᤠᤱ ᤘᤠ᤹ᤖᤥ॥
1CO 1:12 ᤀᤠᤸᤗ ᤀᤡᤱᤃᤠ᤹ ᤀᤠᤒᤠ᤺ᤵᤔᤠ ᤐᤠ᤺ᤴᤏᤡᤴ ᤀᤰᤋᤱᤒᤠ ᤘᤠ᤹­­–ᤂᤡᤏᤡ᤹ ᤗᤢᤶᤔᤥ ᤁᤢᤓᤠᤖᤧ ᤐᤠᤘᤗᤧᤴ ᤀᤡᤱᤃᤠ᤹ ᤋᤡᤶᤍᤢᤱ. ᤁᤢᤓᤠᤖᤧ ᤀᤵᤐᤥᤗᤥᤛᤧᤴ ᤋᤡᤶᤍᤢᤱ. ᤘᤣ᤹ᤀᤡᤸᤗᤧ ᤐᤋᤪᤢᤛᤧᤴ ᤋᤡᤶᤍᤢᤱ. ᤀᤠᤸᤗᤛᤠᤱ ᤘᤣ᤹ᤛ᤻ᤔᤠᤸᤗᤧ ᤂᤪᤡᤛ᤻ᤋᤧᤴ ᤋᤡᤶᤍᤢᤱ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤔᤢ᥄
1CO 1:13 ᤌᤣ. ᤂᤪᤡᤛ᤻ᤋᤧᤴ ᤜᤠᤛᤡᤱᤅᤠᤱ ᤘᤠ᤹ᤒᤡ᥅ ᤐᤠᤘᤗᤧᤴ ᤂᤡᤏᤡ᤹ᤗᤠᤃᤡ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤇᤡᤱᤅᤠᤱ ᤘᤠ᤹ᤒᤡ᥅ ᤂᤡᤏᤡ᤹ᤀᤥ ᤀᤠᤳᤋᤡᤴᤜᤠ᤹ ᤐᤠᤘᤗᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤒᤣ᥅
1CO 1:14 ᤀᤡᤱᤃᤠ᤹ ᤁᤪᤡᤛ᤻ᤐᤛ ᤏᤢ ᤃᤠᤕᤛᤧᤴᤗᤰ ᤒᤵᤋᤡᤛ᤻ᤔᤠ ᤐᤡᤖᤢᤱᤛᤡᤱ ᤁᤖ ᤘᤣ᤹ ᤀᤠᤳᤋᤡᤴᤏᤠᤱ ᤒᤵᤋᤡᤛ᤻ᤔᤠ ᤔᤧᤶᤒᤡᤀᤣ ᤘᤠ᤹ᤀᤠᤒᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤗᤥ॥
1CO 1:15 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤐᤠᤘᤗᤖᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤥ᤺ᤰᤂᤡᤃᤧ ᤗ᤹ᤖᤡᤰ ᤐᤠ᤺ᤵᤔᤠ ᤁᤧᤱᤄᤥ᤺ᤛᤢᤶᤔᤡᤴᤗᤥ॥
1CO 1:16 (ᤀᤥᤘᤠ. ᤀᤡᤱᤃᤠ᤹ ᤛ᤻ᤋᤡᤑᤏᤛᤖᤧ ᤁᤢᤜᤡᤶᤛᤕᤱᤒᤠᤜᤠ᤹ᤀᤠᤱ ᤒᤵᤋᤡᤛ᤻ᤔᤠ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤀᤠᤱ ᤐᤡᤖᤢᤱᤛᤡᤱᤒᤡ ᤔᤧ᤺ᤶᤒᤡ ᤂᤧᤱᤃ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤕᤠᤰᤏᤧᤴᤗᤥ॥)
1CO 1:17 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧ ᤀᤡᤱᤃᤠ᤹ ᤒᤵᤋᤡᤛ᤻ᤔᤠ ᤐᤡᤛᤧ ᤐᤠᤱᤄᤠᤱᤒᤠ ᤔᤧ᤺ᤴᤗᤥ ᤁᤖ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧᤏᤧ ᤐᤠᤱᤄᤠᤱᤒᤠᤖᤥ॥ ᤂᤧᤴᤏᤠᤱ ᤔᤧᤴᤇᤠᤶ ᤕᤠᤵᤔᤡ ᤛᤡᤰᤁᤢᤶ ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤛᤢᤳᤗᤠᤜᤠ᤹ᤀᤥᤃ ᤔᤧ᤺ᤴᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤔᤢᤰᤛᤠᤶ ᤔᤧ᤺ᤴᤏᤣᤒᤠ ᤐᤥ᤺ᤱᤗᤥ॥
1CO 1:18 ᤛᤡᤗᤠᤶᤛᤠᤰᤔᤠ ᤛᤡᤱᤅᤡᤸᤗᤧᤴ ᤛᤢᤏᤠᤀᤡᤱᤅᤡᤱᤃ ᤁᤧᤔᤧᤰᤐᤠᤖ ᤁᤧᤒᤣ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤀᤍᤱ ᤐᤠ᤺ᤴᤗᤥ. ᤁᤖ ᤀᤠᤏᤡ᤹ ᤛᤧᤴᤗᤵ ᤁᤧᤄᤥ᤺ᤒᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤥ॥
1CO 1:19 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤛᤡᤰᤁᤢᤶᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤢᤶ ᤏᤡᤱᤘᤠ᤹ᤀᤡᤴ ᤔᤧᤰᤂᤢᤱ. ᤜᤧᤰᤁᤩᤠᤱ ᤆᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤵᤔᤠᤴ ᤁᤢᤛᤢᤶᤔᤧᤴᤍᤶᤔᤏᤠ ᤆᤥᤃᤢᤱᤗᤥ॥”
1CO 1:20 ᤛᤡᤰᤁᤢᤶᤍᤠᤱᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤛᤠᤶᤈᤡᤰ ᤔᤢᤴᤎᤢᤶᤛᤠᤒᤠᤜᤠ᤹ ᤀᤠᤳᤋᤥ ᤔᤧᤘᤠ᤹ᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤛᤡᤰᤁᤢᤶ ᤏᤡᤱᤘᤠ᤹ᤜᤠ᤹ ᤀᤍᤱ ᤁᤢᤀᤡᤛᤡ᤺ᤰ ᤆᤥᤃᤢᤀᤠᤱ ᤔᤧᤘᤠ᤹ᤏᤧᤴᤒᤡ᥅
1CO 1:21 ᤀᤠᤒᤠᤅᤣ ᤛᤡᤰᤁᤢᤶ ᤏᤡᤱᤘᤠ᤹ᤗᤠᤶᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤧ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤀᤥ ᤏᤡᤱᤛᤣ᤺ᤰ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤓᤥ᤺ᤔᤏᤠᤒᤠ ᤀᤍᤱ ᤐᤠ᤺ᤴᤏᤥᤗᤠᤶᤒᤠᤀᤣ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤋᤠᤱᤛᤧ᤺ᤵᤔᤠᤛᤡ ᤏᤡᤱᤘᤠ᤹ ᤆᤥᤃᤢᤖᤥ॥
1CO 1:22 ᤕᤜᤢᤍᤡᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤜᤧᤰᤁᤩᤠᤱ ᤃᤪᤡᤰᤜᤠ᤹ᤖᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤔᤧᤃᤥ᤺ᤳᤋᤢ᤹.
1CO 1:23 ᤁᤖ ᤀᤠᤏᤡᤃᤧᤃ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤂᤪᤡᤛ᤻ᤋᤧᤴᤏᤣ ᤀᤡᤱᤓᤥ᤺ᤛᤢᤶᤒᤧᤖᤥ॥ ᤂᤧᤱᤃ ᤕᤜᤢᤍᤡᤜᤠ᤹ᤖᤧ ᤗᤠᤃᤡ ᤀᤠᤄᤄᤒᤠ ᤐᤠ᤺ᤴ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤀᤍᤱ ᤐᤠ᤺ᤴᤗᤥ.
1CO 1:24 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢ᤺ᤳᤋᤢᤛᤡᤒᤠ ᤏᤧᤵᤔᤠᤱ ᤕᤜᤢᤍᤡ ᤏᤢ ᤃᤪᤡᤁ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶ ᤏᤢ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤖᤥ॥
1CO 1:25 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤍᤱ ᤐᤠ᤺ᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡ ᤛᤡᤰᤁᤢᤶ ᤏᤡᤱᤘᤠ᤹ᤏᤢ᤺ᤸᤗᤧᤀᤠᤱ ᤛᤡᤰᤁᤢᤶᤒᤠ ᤆᤥ᤺ᤰᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤴᤎᤢᤶᤔᤏᤠᤒᤠ ᤁᤢᤒᤠ᤺ᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡ ᤌᤢᤶᤔᤡᤴᤏᤢ᤺ᤸᤗᤧᤀᤠᤱ ᤁᤧᤎᤢᤶᤒᤠ ᤆᤥ᤺ᤰᤗᤥ॥
1CO 1:26 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤀᤢ᤺ᤳᤋᤡᤸᤗᤧ ᤀᤠᤰᤋᤱᤒᤠ ᤁᤧᤈᤥᤃᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤁᤧᤶᤏᤡ᤺ᤛᤡᤸᤗᤧ ᤂᤡᤏᤡ᤹ ᤕᤖᤡᤰᤋᤱᤒᤠ ᤛᤡᤰᤁᤢᤶ ᤏᤡᤱᤘᤠ᤹ᤛᤠᤒᤠ ᤁᤧᤜᤥ᤺ᤵᤋᤡᤖᤥ॥ ᤂᤡᤏᤡ᤹ ᤕᤖᤡᤰᤋᤱᤒᤠ ᤔᤢᤰᤛᤠᤶᤛᤠᤒᤠ ᤏᤢ ᤁᤧᤃᤵᤐᤠ ᤜᤡᤶᤛᤕᤱᤅᤥᤒᤠ ᤁᤧᤜᤥ᤺ᤵᤋᤡᤖᤥ॥
1CO 1:27 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤡᤰᤁᤢᤶᤍᤠᤱᤒᤠ ᤆᤥᤃᤡᤃᤧ᤹ ᤁᤧᤗ᤹ᤒᤠᤜᤠ᤹ ᤛᤡᤖᤡᤱ ᤔ᤺ᤔᤥ ᤌᤠᤔᤠᤛᤡ ᤑᤠ᤹ᤀᤠᤱ ᤀᤍᤱ ᤔᤧᤔᤧᤳᤋᤢᤛᤡᤒᤠᤜᤠ᤹ ᤛᤣᤃᤢᤛᤡᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤏᤡᤃᤧ ᤁᤧᤎᤢᤶᤒᤠ ᤔᤢᤰᤛᤠᤶᤍᤠᤱᤒᤠ ᤗ᤹ᤖᤡᤰ ᤁᤧᤀᤡ᤺ᤵᤐᤠᤜᤠ᤹ ᤛᤡᤖᤡᤱ ᤔ᤺ᤔᤥ ᤌᤠᤔᤠᤛᤡ ᤑᤠ᤹ᤀᤠᤱ ᤔᤧᤴᤎᤢᤶᤔᤏᤠᤒᤠ ᤔᤧᤔᤧᤳᤋᤢᤛᤡᤒᤠᤜᤠ᤹ ᤛᤣᤃᤢᤛᤡᤖᤥ॥
1CO 1:28 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤕᤧᤰᤐᤠᤛᤡᤃᤧ ᤗ᤹ᤖᤡᤰ ᤁᤧᤀᤡ᤺ᤵᤐᤠᤜᤠ᤹ ᤌᤣᤏᤠᤎᤣᤒᤠ ᤆᤥ᤺ᤰᤛᤧ ᤜᤡᤗᤠᤵᤑᤢ ᤁᤧᤒᤥ᤺ᤱᤒᤠᤜᤠ᤹ ᤜᤧᤰᤁᤩᤠᤱ ᤁᤢᤔᤧᤸᤗᤢᤱ ᤔᤧ᤺ᤴᤏᤣᤒᤠ ᤏᤢ ᤜᤏᤧᤒᤠ ᤔᤧᤔᤧᤳᤋᤢᤛᤡᤒᤠᤜᤠ᤹ ᤛᤣᤃᤢᤛᤡᤖᤥ॥
1CO 1:29 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤳᤋᤡᤴᤏᤠᤱ ᤀᤠᤱᤍᤡᤱ ᤔᤧᤗ᤹ᤏᤧᤴᤗᤖᤥ॥
1CO 1:30 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤸᤗᤧᤀᤣ ᤂᤡᤏᤡ᤹ ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤏᤢ ᤛᤣᤛᤣ ᤛᤠᤱᤛᤠᤱ ᤀᤠᤈᤥ᤺ᤰ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤕᤥᤗᤠᤶ ᤕᤠᤵᤔᤡ ᤁᤧᤎᤧ᤹ᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
1CO 1:31 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤠᤳᤋᤡᤸᤗᤧ ᤕᤶᤒᤠ ᤐᤠ᤺ᤴ ᤐᤠ᤺ᤳᤋᤢ᤹. ᤂᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤖᤰ ᤕᤶᤒᤠ ᤐᤠ᤺ᤴ ᤐᤠ᤺ᤳᤋᤢᤖᤖᤥ॥”
1CO 2:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤋᤃᤡ ᤂᤡᤏᤡ᤹ᤀᤥ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤁᤢᤛᤡᤒᤡ᤹ ᤐᤠ᤺ᤴ ᤀᤡᤱᤓᤥ᤺ᤛᤧ ᤋᤩᤠᤱᤅᤡᤸᤗᤧ ᤔᤏᤠ ᤁᤧᤗᤧᤶᤒᤠ ᤐᤠ᤺ᤴ ᤜᤧᤰᤁᤩᤠᤱ ᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤁᤢᤎᤡᤶ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗ ᤀᤡᤱᤃᤠ᤹ ᤔᤧᤴᤍᤠᤒᤧᤴᤗᤥ॥
1CO 2:2 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧ ᤕᤧᤛᤢ ᤂᤪᤡᤛ᤻ᤋᤧᤴ ᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤢᤏᤧ᤹ ᤁᤢᤛᤡ᤺ᤔᤧᤴᤏᤢ᤺ᤸᤗᤧ ᤘᤣ᤹ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤔᤢ᤺ᤶᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤕᤠᤱ॥
1CO 2:3 ᤜᤧᤰᤁᤩᤠᤱ ᤂᤡᤏᤡ᤹ᤀᤥ ᤋᤩᤠᤱᤅᤡᤸᤗᤧ ᤁᤡ᤺ᤛᤠᤱ ᤛᤩᤠᤱᤗ ᤕᤰᤂᤠᤱᤗ ᤋᤩᤠᤱᤗᤥ॥
1CO 2:4 ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤏᤢ ᤀᤡᤱᤓᤥ᤺ᤛᤢᤱᤒᤠ ᤐᤠ᤺ᤴᤏᤡᤱᤃ ᤛᤡᤰᤁᤢᤶ ᤏᤡᤱᤘᤠ᤹ ᤁᤢᤎᤡᤶ ᤏᤢ ᤔᤏᤠ ᤁᤧᤗᤧᤶᤒᤠ ᤐᤠ᤺ᤴᤏᤥ ᤜᤥ᤺ᤵᤋᤧᤖᤥ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤥ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
1CO 2:5 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤸᤗᤧ ᤆᤥᤃᤢᤸᤗᤧ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤆᤥᤃᤢᤸᤗᤧ ᤐᤥ᤺ᤱᤔᤠ ᤐᤥ᤺ᤱᤗᤥ॥
1CO 2:6 ᤜᤧᤰᤁᤣᤛᤠᤱ ᤀᤠᤏᤡᤃᤧᤃ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤍᤢᤶᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤐᤠ᤺ᤴᤜᤠ᤹ ᤐᤠᤖᤡᤃᤧ᤹. ᤁᤖ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤢ ᤂᤧᤵᤔᤥ ᤜᤠᤱᤃᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤢᤶ ᤏᤡᤱᤘᤠ᤹ ᤐᤠ᤺ᤴ ᤔᤧᤒᤠᤖᤡᤃᤧᤴᤗᤥ॥ ᤂᤧᤱᤜᤠ᤹ᤃ ᤔᤧᤔᤧᤰ ᤔᤧᤒᤣ᤺ᤰᤗᤥ॥
1CO 2:7 ᤁᤖ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤡᤰᤂᤢᤀᤠᤱ ᤘᤕᤧᤒᤠ ᤁᤢᤛᤡᤒᤡ᤹ ᤛᤡᤰᤁᤢᤶ ᤏᤡᤱᤘᤠ᤹ᤀᤡᤴᤏᤣ ᤐᤠ᤺ᤳᤋᤢᤶᤒᤧᤖᤥ॥ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤜᤣ᤺ᤰᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤀᤠᤏᤡ᤹ ᤔᤡᤔᤡᤍᤡᤱ ᤐᤥ᤺ᤱᤗ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤕᤧᤖᤥ॥
1CO 2:8 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤃᤧᤈᤥ᤺ᤰᤐᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤘᤕᤧᤸᤗᤧᤃ ᤔᤡᤔᤡᤍᤡᤱᤃᤧᤴ ᤍᤠᤱᤒᤠᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤶᤓᤥ᤺ᤴᤍᤢᤶᤒᤠ ᤘᤕᤧᤔᤧᤴ॥
1CO 2:9 ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤏᤡᤀᤣ. ᤔᤧᤱᤄᤧᤶᤔᤣ ᤜᤧᤰᤁᤩᤠᤱ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ᤖᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ॥”
1CO 2:10 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣᤔᤠᤱᤗᤠᤶᤒᤠ ᤁᤧᤖᤧᤰ ᤂᤧᤴ ᤐᤠ᤺ᤴᤜᤠ᤹ ᤀᤠᤏᤡ᤹ ᤀᤥᤛᤣ᤺ᤴᤍᤠᤱ ᤆᤥᤃᤢ ᤀᤠᤒᤡᤖᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤃᤠᤱᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ᤀᤠᤱ ᤁᤥ᤺ᤳᤋᤢ᤹ᤖᤥ॥
1CO 2:11 ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤀᤠᤒᤠᤅᤣ ᤁᤢᤕᤠᤶᤛᤠᤶᤔᤡᤸᤗᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ᤀᤠᤱ ᤂᤢᤏᤧ᤹ ᤁᤢᤛᤣᤛᤣᤔᤠᤱᤅᤡᤸᤗᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥
1CO 2:12 ᤀᤠᤏᤡ᤹ᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤠᤶᤔᤡᤴ ᤔᤧᤱᤄᤥᤀᤣ ᤀᤠᤘᤠ᤹ᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤒᤠ ᤀᤠᤒᤡᤖᤧᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤛᤣᤛᤣᤔᤠᤱᤅᤡᤴ ᤀᤠᤄᤥ᤺ᤛᤢᤶᤔᤠᤱ ᤘᤠ᤹ᤖᤥ॥
1CO 2:13 ᤀᤠᤸᤗ ᤀᤠᤏᤡᤃᤧ ᤂᤧᤴ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤜᤠ᤹ᤃ ᤔᤧᤴᤇᤠᤶᤃᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶᤒᤠ ᤔᤧ᤺ᤴᤗᤥ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤕᤠᤵᤔᤡ ᤜᤢ᤹ᤖᤡᤃᤧᤒᤠ ᤁᤢᤀᤡᤛᤡ᤺ᤰᤁᤣ ᤕᤠᤶᤛᤠᤶᤃᤧᤴ ᤐᤠ᤺ᤴᤜᤠ᤹ᤃ ᤛᤣᤛᤣᤔᤠᤱ ᤁᤧᤃᤵᤐᤠᤜᤠ᤹ ᤆᤧᤰᤋᤢᤶᤛᤡᤶᤒᤧ᤹ᤖᤥ॥
1CO 2:14 ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤁᤧᤍᤠ᤺ᤒᤠ ᤐᤠ᤺ᤴᤜᤠ᤹ ᤔᤧᤍᤠ᤺ᤰᤋᤢᤴᤗᤥ॥ ᤂᤧᤱᤜᤠ᤹ᤃ ᤂᤢᤏᤧ᤹ ᤁᤢᤗᤠᤃᤡ ᤀᤍᤱ ᤐᤠ᤺ᤴ ᤐᤥ᤺ᤱᤅᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤕᤠᤶᤛᤠᤶᤃᤧᤴ ᤐᤠ᤺ᤴᤜᤠ᤹ᤃ ᤛᤣᤛᤣᤔᤠᤱᤗᤠᤶᤖᤰ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤧᤳᤗᤥ॥
1CO 2:15 ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤒᤠ ᤔᤏᤠ᤺ᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤏᤢ᤺ᤒᤠ ᤆᤥ᤺ᤰᤐᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤛᤠ᤹ᤖᤢ. ᤁᤖ ᤘᤣ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ᤃ ᤔᤧᤴᤇᤠ᤹ᤖᤢᤴᤗᤥ॥
1CO 2:16 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤠ᤺ᤳᤗᤧ ᤏᤡ᤺ᤛᤢᤀᤠᤱ ᤘᤠ᤹ᤒᤣ᥅ ᤜᤧᤰᤁᤩᤠᤱ ᤜᤠ᤺ᤳᤗᤧ ᤂᤢᤏᤧ᤹ ᤜᤢ᤹ᤔᤠ ᤛᤢᤰᤋᤢᤒᤣ᥅” ᤁᤖ ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤏᤡᤱᤘᤠ᤹ᤀᤡᤴ ᤁᤳᤋᤢᤶᤒᤧᤖᤥ॥
1CO 3:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤂᤡᤏᤡ᤹ᤏᤢ ᤐᤠᤖᤠᤱᤅᤡᤸᤗᤧ ᤕᤠᤶᤛᤠᤶᤃᤧᤴ ᤔᤏᤠᤜᤠ᤹ᤏᤢ ᤐᤠᤖᤠᤱᤒᤠ ᤁᤢᤀᤡᤛᤡ᤺ᤰ ᤔᤧᤶᤒᤠ᤺ᤵᤐᤧᤴ. ᤁᤖ ᤀᤡᤰᤛᤠᤒᤠ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ ᤜᤧᤰᤋᤱᤒᤠ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤀᤅᤧ᤺ᤰᤘᤠᤜᤠ᤹ᤏᤢ ᤐᤠ᤺ᤵᤔᤏᤠᤒᤠ ᤁᤢᤀᤡᤛᤡ᤺ᤰ ᤐᤠ᤺ᤖᤠᤱᤗᤥ॥
1CO 3:2 ᤀᤡᤱᤃᤠ᤹ ᤜᤢ᤹ᤏᤡᤱᤒᤠ ᤏᤡᤛᤠᤶᤔᤡᤴ ᤂᤠᤰᤂᤠᤰᤐᤠ ᤋ᤺ᤰ ᤜᤧᤰᤁᤣ ᤔᤧᤈᤥᤃᤧᤴ. ᤁᤖ ᤏᤢ ᤜᤧᤰᤋᤱᤒᤠ ᤆᤥᤃᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤠᤰᤂᤠᤰᤐᤠ ᤋ᤺ᤰ ᤆᤠᤔᤠ ᤔᤧᤴᤇᤢᤰᤁᤣ ᤁᤧᤘᤕᤡᤖᤥ॥ ᤀᤠᤸᤗᤥᤛᤠᤱ ᤂᤠᤰᤂᤠᤰᤐᤠ ᤋ᤺ᤰ ᤆᤠᤔᤠ ᤁᤧᤛᤢᤰᤐᤠ ᤔᤧᤶᤒᤥ᤺ᤱᤅᤣ ᤁᤧᤘᤕᤡ᤹ᤖᤥ.
1CO 3:3 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤸᤗᤥ ᤌᤠᤖᤡᤰ ᤀᤡᤰᤛᤠᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤧᤕᤢᤰᤋᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤗᤢᤶᤔᤥ ᤏᤠᤜᤧᤳᤇᤡᤱᤔᤠ ᤏᤢ ᤂᤧᤔᤠ᤹ ᤘᤠ᤹ᤀᤡᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤀᤡᤰᤛᤠᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤧᤕᤢᤰᤋᤡᤀᤠᤱ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ ᤁᤢᤀᤡᤛᤡ᤺ᤰ ᤁᤧᤶᤒᤥ᤺ᤰᤂᤡᤴᤒᤡ᥅
1CO 3:4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤐᤠᤘᤗᤧᤴ ᤋᤡᤶᤍᤢᤱ ᤗ᤹. ᤘᤧ᤹ᤛ᤻ᤔᤠᤸᤗᤧ ᤀᤡᤱᤃᤠ᤹ ᤀᤵᤐᤥᤗᤥᤛᤧᤴ ᤋᤡᤶᤍᤢᤱ ᤗ᤹ᤀᤡᤸᤗᤧ ᤂᤡᤏᤡ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠ ᤔᤏᤠ ᤜᤧᤰᤋᤱᤒᤠ ᤁᤧᤶᤒᤥ᤺ᤰᤂᤡᤶᤒᤡ᥅
1CO 3:5 ᤀᤵᤐᤥᤗᤥᤛᤧᤴ ᤏᤢ ᤐᤠᤘᤗᤧᤴ ᤜᤠ᤺ᤳᤇᤡᤒᤣ᥅ ᤀᤠᤴᤇᤡᤃᤧᤃ ᤍᤠᤱᤒᤠᤸᤗᤧ ᤔᤢᤖᤠ ᤔᤧᤳᤋᤧᤇᤡᤃᤧᤒᤠ. ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤢᤛᤣᤘᤠᤖᤥᤒᤠᤛᤡᤃᤧᤖᤰᤗᤥ॥ ᤀᤠᤴᤇᤡᤃᤧᤗᤠᤶᤒᤠᤀᤣ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥
1CO 3:6 ᤀᤡᤱᤃᤠ᤹ ᤕᤠ᤹ ᤗᤣ᤺ᤳᤋᤢᤱ. ᤀᤵᤐᤥᤗᤥᤛᤖᤧ ᤆᤫᤠ᤺ᤳ ᤁᤣ᤺ᤳᤋᤢ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤥ᤺ᤛᤢᤖᤥ॥
1CO 3:7 ᤂᤧᤸᤗᤧ ᤆᤥᤃᤢᤸᤗᤧ ᤕᤠ᤹ ᤁᤧᤗᤣ᤺ᤵᤐᤠ ᤏᤢ ᤆᤫᤠ᤺ᤳ ᤁᤧᤃᤣ᤺ᤵᤐᤠᤜᤠ᤹ ᤌᤣᤛᤡᤀᤠᤱ ᤔᤧ᤺ᤴᤗᤥ॥ ᤁᤖ ᤁᤧᤓᤥ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤁᤧᤕᤧᤰᤐᤠᤖᤥ॥
1CO 3:8 ᤕᤠ᤹ᤖᤡ᤺ᤶᤒᤠ ᤁᤧᤗᤣ᤺ᤵᤐᤧᤴ ᤏᤢ ᤆᤫᤠ᤺ᤳ ᤁᤧᤃᤣ᤺ᤵᤐᤠᤱᤃ ᤁᤢᤍᤱᤒᤠᤛᤡᤖᤥ॥ ᤂᤧᤱᤜᤠ᤹ᤖᤧ ᤕᤠᤶᤒᤢᤎᤡᤰ ᤆᤥ᤺ᤰᤛᤢᤒᤠ ᤁᤢᤀᤡᤛᤡ᤺ᤰ ᤀᤠᤒᤠᤅᤣ ᤂᤢᤴᤇᤡ᤹ ᤌᤢᤶᤄᤥ᤺ᤴ ᤂᤥ᤺ᤛᤢ᤹ᤖᤥ॥
1CO 3:9 ᤌᤣᤀᤠᤱᤓᤧᤸᤗᤧ ᤀᤠᤴᤇᤡᤃᤧ ᤛᤥᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤃᤧᤖᤥ॥ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤋᤠᤵ ᤏᤢ ᤁᤢᤜᤡᤶᤏᤡᤱᤗᤥ॥
1CO 3:10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤗᤢᤱᤃᤢᤶᤗᤠᤶᤒᤠ ᤀᤡᤱᤃᤠ᤹ ᤆᤠ᤺ᤵᤐᤠ ᤜᤡᤶ ᤁᤧᤈᤥ᤺ᤰᤐᤠ ᤁᤢᤀᤡᤛᤡ᤺ᤰ ᤜᤡᤶᤐᤠᤱᤕᤰᤁᤡᤴ ᤏᤧᤛ᤻ᤛᤢᤱ. ᤜᤧᤰᤁᤩᤠᤱ ᤘᤣ᤹ᤛ᤻ᤔᤠᤸᤗᤧ ᤂᤧᤴ ᤛᤶᤍᤠᤱ ᤗᤢᤱᤎᤠᤰ ᤛᤧᤳᤋᤢᤖ ᤜᤡᤶ ᤆᤥᤃᤢ᤹॥ ᤁᤖ ᤗᤢᤱᤎᤠᤰ ᤁᤧᤛᤧᤵᤐᤠᤖ ᤜᤡᤶ ᤁᤧᤈᤥ᤺ᤰᤐᤠᤸᤗᤧ ᤜᤡᤶ ᤆᤥᤃᤢᤸᤗᤧ ᤂᤢᤏᤧ᤹ ᤛᤡᤱᤛᤡᤱ ᤗ᤹ᤔᤠ ᤐᤥ᤺ᤱᤗᤥ॥
1CO 3:11 ᤌᤣᤀᤠᤱᤓᤧᤸᤗᤧ ᤋᤃᤡ ᤏᤧᤛ᤻ᤛᤧ ᤆᤢᤖᤧᤒᤠ ᤜᤡᤶᤐᤠᤱᤕᤰᤁᤡᤱᤃ ᤕᤧᤛᤢ ᤂᤪᤡᤛ᤻ᤋᤖᤥ॥ ᤂᤧᤴ ᤏᤧᤔᤏᤠᤒᤠ ᤜᤡᤶᤐᤠᤱᤕᤰᤁᤡᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤘᤣ᤹ ᤜᤡᤶᤐᤠᤱᤕᤰ ᤏᤧᤔᤠ ᤔᤧᤴᤇᤢᤰᤋᤢᤴᤗᤥ॥
1CO 3:12 ᤀᤠᤸᤗ ᤜᤡᤶ ᤁᤧᤈᤥ᤺ᤰᤐᤠᤸᤗᤧ ᤂᤧᤴ ᤛᤶᤍᤠᤱ ᤛᤠᤶᤔᤩᤠᤱ. ᤕᤢᤵᤐᤠ. ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱ. ᤛᤡᤱ. ᤕᤠ᤺ᤴ-ᤛᤢᤱ ᤀᤡᤃᤪ ᤕᤠ᤹ᤗᤠᤱᤅᤡᤸᤗᤧ ᤜᤡᤶ ᤆᤥᤃᤢᤏᤧ ᤑᤠ᤹ᤃᤪ
1CO 3:13 ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤡᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤂᤧᤴ ᤂᤠᤛᤧᤴ ᤕᤧᤴᤏᤥ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤛᤧᤰᤂᤠᤒᤠ ᤆᤥ᤺ᤰᤐᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤔᤡ᤺ᤸᤗᤧᤀᤣ ᤛᤠ᤹ᤖᤢᤖᤥ॥
1CO 3:14 ᤀᤠᤳᤋᤡᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤡ᤺ᤸᤗᤧ ᤔᤧᤈᤏᤧᤴ ᤂᤧᤸᤗᤧ ᤌᤢᤶᤄᤥ ᤂᤥ᤺ᤛᤢ᤹ᤖᤥ॥
1CO 3:15 ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤡ᤺ᤸᤗᤧ ᤌᤩ᤺ᤱ ᤆᤍᤣ᤺ᤛᤢ᤹. ᤂᤧᤴ ᤔᤏᤠ᤺ᤴ ᤕᤶᤒᤠ ᤑᤧᤳᤗᤠ᤹ᤔᤠᤀᤥ ᤌᤠ᤺ᤖᤥ॥ ᤂᤧᤴ ᤋᤠᤱᤛᤧ᤺ᤵᤛᤠᤱ ᤔᤡ᤺ᤸᤗᤧ ᤂᤵᤔᤧ ᤗᤠᤒᤢ ᤛᤧᤖᤢᤒᤠ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥
1CO 3:16 ᤂᤡᤏᤡ᤹ᤃ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤏᤡᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤶᤒᤡ᥅ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤘᤠ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤶᤒᤡ᥅
1CO 3:17 ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤑᤧᤳᤗᤠ᤺ᤴᤍᤢ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤰᤂᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤱᤃ ᤛᤣᤛᤣ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤴ ᤔᤠᤱᤜᤡᤶᤔᤡᤱᤃ ᤂᤡᤏᤡ᤹ᤀᤣᤖᤥ॥
1CO 3:18 ᤂᤡᤏᤡ᤹ ᤀᤡᤱᤔᤧᤗᤧᤰᤁᤠᤛᤡᤶᤔᤡᤴᤏᤧ᤹ᤀᤥ᥄ ᤀᤠᤳᤋᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤡᤰᤁᤢᤶᤍᤠᤱᤒᤠ ᤏᤢ ᤆᤠ᤺ᤵᤐᤠ ᤆᤥ᤺ᤰᤁᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹ ᤜᤠᤖᤠ᤹ ᤂᤧᤴ ᤌᤣᤀᤠᤱ ᤔᤧᤸᤗᤧ᤺ᤔᤏᤠᤒᤠ ᤀᤍᤱ ᤁᤢᤀᤡᤛᤡ᤺ᤰ ᤐᤥ᤺ᤱᤏᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤛᤡᤰᤁᤢᤶᤛᤠᤒᤠ ᤐᤥ᤺ᤱ॥
1CO 3:19 ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡᤰᤁᤢᤶ ᤏᤡᤱᤘᤠ᤹ᤀᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤃ ᤀᤍᤱ ᤐᤠ᤺ᤴ ᤁᤢᤀᤡᤛᤡ᤺ᤰᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ᤃ ᤛᤡᤰᤁᤢᤶᤍᤠᤱᤒᤠᤜᤠ᤹ ᤂᤢᤏᤡ᤹ ᤀᤡᤛᤫᤠᤔᤥ ᤋᤧᤶᤛᤢᤛᤡᤖᤥ॥”
1CO 3:20 ᤜᤧᤰᤁᤩᤠᤱ ᤕᤠᤶᤔᤥ. “ᤛᤡᤰᤁᤢᤶᤛᤠᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤜᤏᤧᤒᤠ ᤆᤥ᤺ᤰ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤏᤡ᤺ᤛᤢᤖᤥ॥”
1CO 3:21 ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤀᤠᤱᤍᤡᤱ ᤔᤧᤴᤗ᤹ᤏᤧᤴᤗᤖᤥ॥ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ᤃ ᤂᤡᤏᤡ᤹ᤀᤡᤴᤏᤧᤖᤥ॥
1CO 3:22 ᤐᤠᤘᤗ. ᤀᤵᤐᤥᤸᤗᤥᤛ. ᤐᤋᤪᤢᤛ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤏᤧᤳᤋᤡᤃᤧᤴ ᤜᤡᤱᤔᤴ. ᤛᤡ᤺ᤔᤧᤴ. ᤁᤥᤕᤧᤶᤒᤠ ᤕᤧᤶᤔᤡᤴ ᤏᤢ ᤋᤠᤕᤧᤶᤔᤡᤴᤏᤠᤱ ᤂᤡᤏᤡ᤹ᤀᤡᤴᤏᤧᤖᤥ॥
1CO 3:23 ᤜᤧᤰᤁᤩᤠᤱ ᤂᤡᤏᤡ᤹ᤃ ᤂᤪᤡᤛ᤻ᤋᤧᤸᤗᤧᤴᤏᤡᤱᤗᤥ॥ ᤜᤧᤰᤁᤩᤠᤱ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ॥
1CO 4:1 ᤜᤧᤰᤁᤣ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴᤜᤠ᤹ ᤁᤵᤔᤠ ᤗᤰ ᤁᤧᤄᤥ᤺ᤒᤠᤛᤡᤃᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤡᤃᤧᤖ ᤐᤥ᤺ᤱᤗᤥ॥
1CO 4:2 ᤀᤠᤸᤗ ᤜᤧᤰᤋᤱᤒᤠ ᤗᤰ ᤁᤧᤄᤥ᤺ᤒᤠ ᤛᤣᤘᤠᤖᤥᤒᤠᤜᤠ᤹ᤃ ᤏᤛᤠ᤺ᤴᤛᤠᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1CO 4:3 ᤂᤡᤏᤡ᤹ ᤀᤡᤃᤪ ᤘᤣ᤹ᤖᤧ ᤂᤠᤛᤧᤴ ᤔᤧᤗᤥ᤺ᤴᤏᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤗᤠᤃᤡᤃ ᤂᤧᤴ ᤕᤶᤒᤠ ᤐᤠ᤺ᤴ ᤔᤧ᤺ᤴᤗᤥ॥ ᤛᤧᤰᤂᤠ᤺ᤸᤗᤧ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤠᤛᤧᤴ ᤔᤧᤗᤥ᤺ᤴᤇᤡᤱᤅᤠᤴᤗᤥ॥
1CO 4:4 ᤀᤡᤱᤃᤠ᤹ ᤌᤧᤔᤠᤀᤠᤱ ᤑᤧᤳᤔᤧᤸᤗᤠ᤺ᤴᤏᤣ ᤘᤠ᤹ᤀᤠ ᤁᤧᤗ᤹ᤒᤠᤃ ᤏᤡᤱᤘᤠ᤹ ᤁᤳᤋᤢᤱ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤑᤥᤋᤩᤠ ᤔᤧ᤺ᤴᤏᤣᤒᤠ ᤆᤥ᤺ᤰᤁᤠ ᤁᤧᤗ᤹ᤒᤠᤃ ᤔᤧ᤺ᤴᤗᤥ॥ ᤍᤠᤱᤒᤠᤸᤗᤧᤀᤣ ᤀᤡᤱᤃᤠ᤹ ᤂᤠᤛᤧᤴ ᤗᤥ᤺ᤴᤏᤠᤖᤥ॥
1CO 4:5 ᤂᤧᤸᤗᤧ ᤆᤥᤃᤢᤸᤗᤧ ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤶᤔᤡᤴᤏᤢ᤺ᤸᤗᤧ ᤋᤃᤡ ᤘᤣ᤹ᤜᤠ᤹ ᤂᤠᤛᤧᤴ ᤔᤧᤗᤥ᤺ᤴᤍᤧᤶᤛᤡᤶᤔᤡᤴᤏᤧ᤹. ᤂᤢᤏᤧ᤹ᤀᤣ ᤂᤠᤍᤠᤶᤔᤥᤒᤠ ᤑᤧᤴ ᤐᤠ᤺ᤴᤜᤠ᤹ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤋᤠᤖᤢ᤹ ᤜᤧᤰᤁᤩᤠᤱ ᤔᤧᤴᤇᤠᤶ ᤏᤡᤱᤘᤠ᤹ᤀᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢ᤹ᤖᤥ॥ ᤂᤧᤴ ᤕᤧᤶᤔᤥᤀᤣ ᤁᤧᤖᤧᤰᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤢᤏᤡ᤹ ᤏᤧᤶᤓᤥᤃᤧᤴ ᤏᤠᤖᤠ ᤑᤥ᤺ᤔᤠᤴ ᤔᤧᤄᤥ᤺ᤛᤢ᤹ᤖᤥ॥
1CO 4:6 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤛᤠᤵᤋᤧᤀᤠᤱ ᤁᤧᤒᤵᤐᤠᤀᤠᤱᤎᤥ ᤌᤣᤀᤠᤱ ᤔᤧᤈᤥᤃᤧᤶᤔᤡᤴᤏᤧ᤹ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤢ ᤀᤵᤐᤥᤗᤥᤛᤖᤧ ᤁᤢᤒᤡ ᤐᤡᤏᤡᤱᤒᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤗᤢᤶᤔᤥ ᤀᤠᤒᤠᤅᤣ ᤔᤏᤠᤖᤧ ᤁᤢᤗᤠᤃᤡ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ॥
1CO 4:7 ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤂᤡᤏᤡ᤹ ᤘᤣ᤹ᤜᤠ᤹ᤏᤢ᤺ᤸᤗᤧ ᤏᤢ᤺ᤒᤠ ᤁᤧᤈᤥᤃᤡᤀᤠᤱ ᤁᤧᤘᤕᤡ᤹ᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤶᤒᤡᤖᤡᤶᤒᤠ ᤌᤣ ᤐᤠ᤺ᤴ ᤂᤡᤏᤡ᤹ ᤁᤧᤃᤳᤋᤢᤶᤒᤣ᥅ ᤂᤢᤏᤧ᤹ ᤁᤧᤒᤡᤖᤡᤒᤠ ᤐᤠ᤺ᤴ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤀᤠᤒᤠᤅᤣ ᤁᤧᤎᤃᤢᤶᤒᤠ ᤜᤧᤰᤁᤣ ᤌᤣᤀᤠᤱ ᤀᤠᤱᤍᤡᤱ ᤁᤧᤗ᤹ᤖᤡᤒᤠᤒᤣ᥅
1CO 4:8 ᤋᤃᤡᤏᤢᤛᤠ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤔᤢ᥄ ᤂᤡᤏᤡ᤹ᤃ ᤋᤃᤡᤀᤣ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤔᤢ᥄ ᤀᤠᤏᤡᤃᤧ ᤔᤧ᤺ᤴᤏᤣᤀᤣ ᤂᤡᤏᤡ᤹ ᤜᤠᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤔᤢ᥄ ᤂᤡᤏᤡ᤹ ᤛᤧᤰᤂᤠᤀᤣ ᤜᤠᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤸᤗᤧᤃ. ᤀᤠᤏᤡᤃᤧᤀᤠᤱ ᤂᤡᤏᤡ᤹ᤏᤢᤀᤣ ᤜᤠᤱ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤔᤧᤴ᥄
1CO 4:9 ᤌᤣᤀᤠᤱᤓᤧᤸᤗᤧ ᤌᤱ ᤁᤧᤏᤠ᤺ᤶᤒᤠᤜᤠ᤹ᤖᤧ ᤂᤢᤏᤡ᤹ ᤋᤡ᤺ᤰᤗᤠᤀᤥ ᤁᤠᤰᤏᤢ᤺ᤸᤗᤧ ᤀᤣᤃᤠᤱ ᤁᤧᤒᤵᤐᤠ ᤛᤡ᤺ᤔᤧᤸᤗᤧ ᤂᤢᤶᤍᤡᤱ ᤁᤧᤄᤥ᤺ᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤁᤠᤰᤏᤢ᤺ᤸᤗᤧ ᤀᤣᤃᤠᤱ ᤑᤳᤇᤡᤃᤧᤀᤠᤱ ᤔᤏᤠᤗᤢᤶᤔᤥ ᤀᤥᤛᤣ᤺ᤴᤍᤠᤱ ᤆᤥᤃᤡᤃᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤜᤧᤰᤁᤩᤠᤱ ᤀᤠᤏᤡᤃᤧᤃ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ. ᤔᤠᤱᤗᤠᤀᤡᤱᤒᤠᤜᤠ᤹ ᤏᤢ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤗᤠᤔᤡᤳᤋᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥
1CO 4:10 ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤀᤍᤱ ᤆᤥᤃᤡᤃᤧ᤹. ᤁᤖ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤛᤡᤰᤁᤢᤶᤛᤠᤒᤠ ᤁᤧᤈᤥᤃᤡᤔᤢᤒᤠ᥄ ᤀᤠᤏᤡᤃᤧ ᤔᤧᤴᤎᤢᤶᤏᤠ ᤆᤥᤃᤡᤃᤧ᤹. ᤁᤖ ᤂᤡᤏᤡ᤹ᤃ ᤁᤧᤎᤢᤶᤒᤠ ᤁᤧᤈᤥᤃᤡᤔᤢᤒᤠ᥄ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤄᤥ᤺ᤛᤢᤶ. ᤁᤖ ᤀᤠᤏᤡᤃᤧᤃ ᤔᤧᤄᤥ᤺ᤛᤢᤶᤒᤧᤶᤔᤢᤒᤠ᥄
1CO 4:11 ᤁᤴ ᤕᤧᤶ ᤌᤠᤖᤡᤰ ᤔᤧᤴᤈᤠ ᤔᤧᤴᤎᤢᤱᤅᤣ ᤛᤠᤰᤔᤧᤴᤈᤠ ᤘᤕᤡᤃᤧ. ᤏᤢ᤺ᤒᤠ ᤆᤠᤱ ᤋᤣ᤺ᤳᤋᤠᤱ ᤔᤧᤃᤳᤋᤢᤶᤒᤧᤴᤏᤠᤱ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤡᤃᤧ᤹ ᤜᤧᤰᤁᤩᤠᤱ ᤀᤠᤏᤡᤃᤧ ᤜᤡᤶᤎᤠ᤺ᤱ ᤔᤧ᤺ᤴᤏᤣ ᤘᤕᤡᤃᤧᤖᤥ॥
1CO 4:12 ᤀᤠᤏᤡᤃᤧ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤢᤶᤒᤧ᤹॥ ᤛᤠᤱᤃᤪᤠ ᤔᤧᤔᤧᤳᤋᤡᤃᤧᤸᤗᤧ ᤔᤢ᤹ᤀᤡᤛᤠᤶ ᤐᤡᤖᤢᤶᤛᤡᤶᤒᤧ᤹. ᤋᤢᤰᤂᤣ ᤔᤧᤈᤠ᤺ᤳᤋᤡᤃᤧᤸᤗᤧ ᤏᤠᤛᤡ ᤌ᤺ᤳᤋᤢᤶᤒᤧᤖᤥ॥
1CO 4:13 ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴ ᤔᤧᤒᤠ᤺ᤳᤋᤢᤸᤗᤧ ᤀᤠᤏᤡᤃᤧ ᤏ᤺ᤶᤏ᤺ᤶᤔᤠᤱ ᤏᤢ᤺ᤖᤡᤰᤁᤠᤱ ᤏᤥᤃᤵ ᤐᤡᤖᤢᤶᤛᤡᤶᤒᤧ᤹ᤖᤥ॥ ᤀᤠᤸᤗᤥ ᤌᤠᤖᤡᤰ ᤀᤠᤏᤡᤃᤧᤃ ᤀᤡᤰᤛᤠᤒᤠ ᤜᤡᤗᤠᤵᤑᤢ ᤏᤢ ᤂᤠᤶᤒᤣ᤺ᤰᤔᤥᤒᤠ ᤋᤠᤶᤈᤡ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥
1CO 4:14 ᤂᤡᤏᤡ᤹ ᤛᤡᤖᤡᤱᤔ᤺ᤔᤥ ᤁᤧᤎᤩᤧ᤹ᤀᤡᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤛᤠᤵᤋᤢᤱᤒᤠ ᤔᤧ᤺ᤴᤗᤥ. ᤁᤖ ᤀᤠᤔᤡ᤺ᤶ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤜᤠ᤹ ᤁᤢᤀᤡᤛᤡ᤺ᤰ ᤛᤠᤶᤍᤡᤱ ᤐᤡᤏᤡᤱᤒᤠᤖᤥ॥
1CO 4:15 ᤂᤪᤡᤛ᤻ᤋᤀᤥ ᤂᤡᤏᤡ᤹ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤛᤡᤰᤛᤠᤶᤒᤠᤜᤠ᤹ ᤁᤧᤃᤳᤋᤢᤶᤛᤡᤶᤛᤠᤱ ᤕᤖᤡᤰ ᤐᤠ᤺ᤜᤠ᤹ᤃ ᤁᤧᤱᤃᤳᤋᤢᤶᤔᤡᤴᤗᤥ. ᤂᤡᤏᤡ᤹ᤀᤥ ᤛᤢᤏᤠᤀᤡᤱ ᤋᤠᤖᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋ ᤕᤧᤛᤢᤀᤥ ᤂᤡᤏᤡ᤹ ᤐᤠ᤺ ᤐᤥ᤺ᤰᤂᤠᤱᤗᤥ॥
1CO 4:16 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤀᤠᤈᤥ᤺ᤱ ᤁᤧᤀᤡ᤺ᤵᤐᤠ ᤐᤥ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
1CO 4:17 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤍᤠᤱᤒᤠᤀᤥ ᤏᤛᤠ᤺ᤴᤛᤠᤒᤠ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ ᤋᤡᤔᤥᤌᤡ᤺ᤴ ᤂᤡᤏᤡ᤹ᤀᤥ ᤐᤠᤱᤄᤢᤱᤗ ᤐᤳᤋᤠᤖᤥ॥ ᤁᤧᤖᤧᤰ ᤛᤣᤛᤣᤜᤢᤵᤗᤰᤁᤥ ᤜᤢ᤹ᤖᤢᤱᤛᤡᤱᤒᤠ ᤀᤠᤏᤡᤛᤠᤶᤔᤡᤴ ᤁᤢᤀᤡᤛᤡ᤺ᤰᤁᤣ ᤂᤪᤡᤛ᤻ᤋ ᤕᤧᤛᤢ᤺ᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ᤛᤢᤶᤔᤥ ᤂᤢᤏᤧ᤹ᤀᤣ ᤋᤠᤖᤢ ᤁᤧᤒᤡᤖᤡ᤹ᤖᤥ॥
1CO 4:18 ᤀᤠᤸᤗ ᤂᤡᤏᤡ᤹ᤀᤥ ᤀᤡᤱᤃᤠ᤹ ᤕᤠᤶᤔᤥ ᤔᤧᤍᤠᤀᤠᤴ ᤑᤠ᤹ᤀᤠᤱ ᤂᤡᤏᤡ᤹ᤀᤥ ᤁᤢᤓᤠᤃ ᤕᤶᤒᤠ ᤁᤧᤗᤧᤱᤅᤠᤛᤡᤀᤠᤱ ᤁᤧᤘᤕᤡ᤹ᤖᤥ॥
1CO 4:19 ᤁᤖ ᤍᤠᤱᤒᤠᤸᤗᤧ ᤏᤡᤱᤘᤠ᤹ ᤆᤥᤃᤢᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤜᤠᤖᤠᤀᤣ ᤋᤠᤀᤠᤖ ᤐᤳᤋᤠᤖᤥ. ᤜᤧᤰᤁᤩᤠᤱ ᤂᤡᤏᤡ᤹ᤀᤥ ᤕᤶᤒᤠ ᤁᤧᤗᤧᤱᤛᤡᤱᤒᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤋᤠ᤹ᤔᤧᤈᤧᤱ ᤑᤠ᤹ᤀᤠᤱᤗᤰ ᤔᤧ᤺ᤴ. ᤁᤖ ᤂᤧᤱᤜᤠ᤹ᤖᤧ ᤀᤠᤰᤋᤱᤒᤠ ᤔᤢᤰᤛᤠᤶ ᤔᤧᤃᤳᤋᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴᤏᤠᤱ ᤏᤡᤱᤘᤠ᤹ ᤂᤥ᤺ᤛᤢᤱᤗᤥ॥
1CO 4:20 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤋᤠ᤹ᤈᤧᤱ ᤐᤠ᤺ᤴᤜᤠ᤹ᤖᤧ ᤔᤧ᤺ᤴ. ᤁᤖ ᤔᤢᤰᤛᤠᤶᤔᤡᤸᤗᤧ ᤀᤥᤛᤣ᤺ᤴᤍᤠᤱ ᤆᤥᤃᤢ᤹ᤖᤥ॥
1CO 4:21 ᤀᤠᤰᤂᤣ ᤆᤥᤃᤢᤱᤒᤠᤴ ᤂᤡᤏᤡ᤹ ᤛᤡᤖᤠ᤹ ᤌᤠᤱᤒᤣ᥅ ᤋᤧ᤺ᤶᤓᤢᤰᤏᤢ ᤂᤡᤏᤡ᤹ᤀᤥ ᤋᤠᤀᤠᤒᤠᤒᤡ ᤀᤡ ᤔᤡ᤺ᤶᤈᤡ ᤏᤢ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤠᤱ ᤋᤠ᤺ᤀᤠᤒᤠᤒᤡ᥅
1CO 5:1 ᤂᤡᤏᤡ᤹ ᤗᤢᤶᤔᤥ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤘᤠ᤹. ᤂᤡᤏᤡ᤹ᤀᤥ ᤗᤳᤇᤠ᤺ᤸᤗᤧ ᤀᤠᤒᤠᤅᤣ ᤁᤢᤶᤔᤠ ᤐᤠ᤺ᤰᤔᤠᤴ ᤔᤣ᤺ᤳ ᤁᤳᤋᤢᤀᤠᤱ ᤘᤠ᤹ᤔᤢ᥄ ᤜᤧᤰᤋᤱᤒᤠ ᤋᤠᤵᤑᤧ᤺ᤶᤒᤠ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤡᤱᤃ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤛᤢᤘᤠᤱᤗᤢᤶᤔᤥᤀᤠᤱ ᤔᤧᤒᤥ᤺ᤱᤏᤧᤸᤗᤥ॥
1CO 5:2 ᤁᤖ ᤂᤡᤏᤡ᤹ᤃ ᤀᤠᤱᤍᤡᤱᤏᤧ ᤁᤧᤗ᤹ᤖᤡ᤹᥄ ᤂᤡᤏᤡ᤹ᤃ ᤔᤣᤖᤡᤱ ᤌᤰᤔᤠ ᤁᤧᤒᤥ᤺ᤱᤒᤠᤏᤧ ᤘᤕᤧ. ᤜᤧᤰᤁᤩᤠᤱ ᤜᤧᤰᤋᤱᤒᤠ ᤔᤏᤠ᤺ᤴ ᤂᤡᤏᤡ᤹ ᤛᤣᤛᤣ ᤋᤱᤈᤢᤶᤗᤠᤶ ᤗ᤺ᤵᤔᤠᤍᤣ᤺ᤔᤠ ᤁᤧᤒᤥ᤺ᤱᤒᤠ ᤘᤕᤧ॥
1CO 5:3 ᤀᤡᤱᤃᤠ᤹ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤀᤠᤏᤡᤱᤘᤠ᤹ᤀᤥᤃ ᤛᤥᤖᤡᤰᤁᤣ ᤘᤠ᤹ᤀᤠᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹ᤀᤠᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤠᤛᤧᤴ ᤗᤥ᤺ᤴᤍᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠᤖᤥ॥
1CO 5:4 ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤛᤣᤛᤣᤜᤢᤵᤗᤰᤁᤥ ᤂᤡᤏᤡ᤹ ᤁᤧᤈᤢᤵᤛᤡᤸᤗᤧ ᤂᤡᤏᤡ᤹ᤏᤢ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤡᤴ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤢᤰᤛᤠᤶᤔᤡᤴᤏᤢ ᤘᤠ᤹ᤀᤡᤸᤗᤧ.
1CO 5:5 ᤂᤧᤴ ᤔᤏᤠ᤺ᤴ ᤛᤣᤛᤣᤜᤢᤵᤗᤰᤗᤠᤶᤒᤠ ᤗ᤺ᤳᤋᤧᤶᤍᤣ᤺ᤛᤧᤶᤔᤧ᤹ᤀᤠᤱ ᤔᤠᤑᤧᤴᤛᤠᤶᤔᤡᤴ ᤜᤢᤰᤛᤢᤵᤋᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤔᤧᤰᤗ ᤜᤧᤰᤁᤩᤠᤱ ᤁᤢᤕᤠᤶᤛᤠᤶᤔᤡᤴ ᤍᤠᤱᤒᤠᤴ ᤏᤢ᤺ᤱ ᤕᤢ᤺ᤒᤠ ᤕᤧᤴᤏᤥ ᤋᤠᤱᤛᤧ᤺ᤵᤗᤖᤥ॥
1CO 5:6 ᤂᤡᤏᤡ᤹ ᤀᤠᤱᤍᤡᤱ ᤗ᤹ᤔᤠᤱᤃ ᤏᤢ᤺ᤒᤠ ᤐᤠ᤺ᤴ ᤔᤧ᤺ᤴᤗᤥ॥ ᤂᤖᤧ᤺ᤱ ᤁᤧᤓᤱᤒᤠ ᤆᤩ᤹ᤛᤡᤰ ᤛᤡᤍᤠ᤹ᤀᤡᤸᤗᤧ ᤁᤧᤖᤧᤰ ᤑᤣ᤹ᤖᤢᤶᤔᤡᤴ ᤕᤢᤰᤋᤢᤒᤠ ᤁᤢᤀᤡᤛᤡ᤺ᤰ ᤆᤩ᤹ᤛᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤖᤧᤰ ᤏᤢ᤺ᤒᤠ ᤐᤠ᤺ᤴᤜᤠ᤹ ᤑᤧᤳᤗᤠ᤺ᤴᤍᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅
1CO 5:7 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤛᤣᤛᤣᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤂᤧᤴ ᤗᤠᤕᤥ ᤁᤧᤈᤥ᤺ᤰᤐᤠ ᤋᤠᤵᤑᤧ᤺ᤶᤒᤠ ᤔᤏᤠ᤺ᤴ ᤂᤡᤏᤡ᤹ ᤗᤢᤶᤔᤥᤗᤠᤶ ᤗ᤺ᤳᤋᤧᤶᤍᤣ᤺ᤛᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤀᤠᤏᤡ᤹ ᤗᤠᤃᤡ ᤛᤡᤍᤢᤱᤈᤓᤠ ᤐᤥ᤺ᤰᤂᤧ ᤆᤢᤖᤧᤀᤠᤱ ᤘᤠ᤹ᤖᤥ. ᤂᤢᤏᤧ᤹ᤀᤣ ᤀᤠᤏᤡ᤹ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤸᤗᤧᤴ ᤔᤧᤸᤗᤢᤰᤛᤠ᤺ᤖᤥ॥
1CO 5:8 ᤀᤠᤏᤡ᤹ᤃ ᤋᤃᤡᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤏᤢ ᤗᤠᤕᤥ ᤜᤧᤰᤋᤱᤒᤠ ᤂᤧ᤹ᤛᤢᤱ ᤁᤢᤎᤡᤶᤒᤠ ᤂᤖᤧ᤺ᤱᤅᤡᤸᤗᤧ ᤔᤧ᤺ᤴ. ᤁᤖ ᤛᤣᤛᤣᤒᤠ ᤏᤢ ᤛᤧᤰᤂᤠᤒᤠ ᤁᤢᤛᤱ ᤂᤖᤧ᤺ᤱᤅᤡᤸᤗᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤗᤧᤴ ᤛᤛᤠᤱᤛᤪᤥ᤺ᤳ ᤆᤥᤃᤢᤶᤗᤥ॥
1CO 5:9 ᤋᤃᤡ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤏᤢ ᤛᤥᤖᤡᤰ ᤔᤧᤘᤕᤧᤶᤔᤡᤴᤏᤧ᤹ ᤗ᤹ᤖᤡᤰ ᤀᤡᤱᤃᤠ᤹ ᤛᤰᤀᤡᤱᤄᤱ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤅᤠᤱ ᤘᤕᤠᤱ॥
1CO 5:10 ᤂᤧᤴ ᤑᤠ᤹ᤀᤡᤱᤃ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤂᤡ᤺ᤶᤕᤰᤐᤠ. ᤀᤡᤱᤗᤧᤰᤐᤠ. ᤏᤠᤘᤠᤀᤡᤳᤗᤠ ᤔᤠᤱᤃᤧᤄᤒᤠᤜᤠ᤹ᤏᤢ ᤔᤧᤘᤕᤧᤶᤔᤡᤴᤏᤧ᤹ ᤁᤧᤗ᤹ᤒᤠᤃ ᤔᤧ᤺ᤴᤗᤥ॥ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶᤒᤠ ᤗ᤺ᤶᤔᤠ ᤐᤣ᤺ᤰᤔᤠ ᤁᤧᤒᤥ᤺ᤱᤒᤠ ᤘᤕᤧᤖᤥ॥
1CO 5:11 ᤁᤖ ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤰᤀᤡᤱᤄᤱ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ. ᤀᤠᤳᤋᤡᤸᤗᤧ ᤀᤠᤒᤠᤅᤣ ᤏᤛᤠᤏᤡᤒᤠ ᤏᤢᤛᤠ᤹ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤡ᤺ᤶᤕᤰᤐᤠ ᤆᤥ᤺ᤰ. ᤏᤠᤘᤠᤀᤡᤳᤗᤠᤜᤠ᤹ ᤛᤣᤘᤠ ᤆᤥᤃᤢ᤹. ᤔᤏᤠ ᤀᤡᤱᤍᤥ ᤔᤧᤳᤋᤢᤛᤡ᤹. ᤌᤡᤔᤛᤠᤱ ᤏᤢ ᤀᤡᤱᤗᤧᤰᤐᤠ ᤆᤥ᤺ᤰ ᤜᤧᤰᤋᤱᤒᤠ ᤔᤏᤠ᤺ᤱᤃ ᤆᤢᤶ ᤔᤧᤗᤣ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤩᤠᤱ ᤜᤧᤰᤋᤱᤒᤠ ᤔᤏᤠ᤺ᤴᤏᤢ ᤛᤥᤖᤡᤰ ᤆᤠᤀᤠᤱ ᤔᤧᤈᤧᤶᤔᤡᤴᤏᤧ᤹ᤀᤥ॥
1CO 5:12 ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤛᤣᤛᤣᤜᤢᤵᤗᤰᤐᤠ ᤗᤠ᤺ᤰᤁᤠᤳᤐᤠ ᤔᤏᤠᤜᤠ᤹ ᤂᤠᤛᤧᤴ ᤗᤥ᤺ᤶᤔᤠᤛᤡ ᤀᤡᤱᤃᤠ᤹ ᤀᤠᤗᤰᤐᤧᤴ ᤔᤧ᤺ᤴᤗᤥ. ᤁᤖ ᤛᤣᤛᤣᤜᤢᤵᤗᤰ ᤛᤡᤃᤠᤱᤒᤠ ᤔᤏᤠᤜᤠ᤹ ᤂᤠᤛᤧᤴ ᤗᤥ᤺ᤶᤔᤠᤃ ᤂᤡᤏᤡ᤹ ᤕᤠ᤺ᤶᤒᤰᤗᤥ॥
1CO 5:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠ᤺ᤰᤁᤠᤳᤐᤠ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ. ᤁᤖ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ “ᤋᤠᤵᤑᤧ᤺ᤶᤒᤠ ᤗᤠᤕᤥ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤂᤡᤏᤡ᤹ ᤗᤢᤶᤔᤥᤗᤠᤶ ᤗ᤺ᤳᤋᤧᤶᤍᤣ᤺ᤛᤧᤶᤛᤡᤶᤔᤧ᤹ᤀᤥ॥”
1CO 6:1 ᤂᤡᤏᤡ᤹ᤀᤥ ᤌᤡᤰᤐᤠᤖᤧ ᤘᤣ᤹ ᤏᤛᤠᤏᤡᤒᤠᤴᤏᤢ ᤂᤧᤔᤠ᤹ ᤑᤥ᤺ᤰᤂᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤂᤠᤛᤧᤴ ᤗᤥ᤺ᤴᤇᤧ ᤂᤪᤡᤛ᤻ᤋᤖᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤥ ᤐᤣ᤺ᤰᤔᤠᤸᤗᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤂᤠᤛᤧᤴᤗᤥ᤺ᤶᤒᤠᤸᤗᤥ ᤀᤠᤰᤂᤣᤀᤠᤱ ᤐᤣ᤺ᤰᤔᤠ ᤁᤧᤀᤠ᤺ᤴᤏᤠᤛᤡᤒᤠᤒᤣ᥅
1CO 6:2 ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤛᤣᤛᤣ ᤕᤠᤵᤔᤡᤜᤠ᤹ᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤂᤠᤛᤧᤴ ᤔᤧᤗᤥ᤺ᤴᤍᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤂᤠᤛᤧᤴᤏᤡᤴ ᤂᤡᤏᤡ᤹ᤀᤣ ᤗᤥ᤺ᤶᤔᤠ ᤐᤥ᤺ᤱᤏᤧ ᤑᤠ᤹ᤃᤪ ᤀᤰᤋᤱᤒᤠ ᤆᤢᤈᤢᤰᤛᤠ ᤐᤠ᤺ᤴᤜᤠ᤹ᤖᤧᤴ ᤂᤠᤛᤧᤴ ᤗᤥ᤺ᤶᤔᤠ ᤁᤧᤴᤇᤢᤰᤋᤢᤶᤔᤡᤶᤒᤡ᥅
1CO 6:3 ᤔᤠᤱᤗᤠᤀᤡᤱᤒᤠᤜᤠ᤹ ᤀᤠᤏᤡ᤹ ᤂᤠᤛᤧᤴ ᤀᤠᤗᤥ᤺ᤴᤍᤢᤶᤛᤡᤶ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤜᤧᤰᤁᤣ᤺ᤸᤗᤧ ᤁᤴ ᤜᤡᤱᤔᤴᤏᤥ ᤌᤡᤰᤕᤠ᤺ᤴᤎᤰᤐᤠ ᤐᤠ᤺ᤴᤜᤠ᤹ᤃ ᤕᤶᤒᤠ ᤔᤧ᤺ᤴᤗᤥ᥄
1CO 6:4 ᤜᤧᤰᤋᤱᤒᤠ ᤐᤠ᤺ᤴᤜᤠ᤹ ᤂᤠᤛᤧᤴ ᤗᤥ᤺ᤴᤇᤧ ᤛᤣᤛᤣᤜᤢᤵᤗᤰᤁᤡᤸᤗᤧ ᤀᤡᤱᤎᤠ᤺ᤱ ᤔᤧᤒᤡᤖᤢᤴᤇᤡᤶᤒᤠ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤥ ᤀᤠᤰᤂᤣᤀᤠᤱ ᤁᤧᤒᤡᤃᤡᤒᤠᤒᤣ᥅
1CO 6:5 ᤁᤱᤃ ᤂᤡᤏᤡ᤹ ᤛᤡᤖᤡᤱᤔ᤺ᤔᤥ ᤁᤧᤎᤩᤧ᤹ᤀᤡᤖ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠᤖᤥ॥ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤂᤧᤔᤠ᤹ ᤐᤥ᤺ᤰᤁᤡᤸᤗᤧ ᤂᤡᤏᤡ᤹ ᤗᤢᤶᤔᤥ ᤗᤳᤌᤡᤰᤁᤠᤱ ᤏᤠᤍᤱ ᤆᤥ᤺ᤰᤔᤠ ᤁᤧᤛᤢᤰᤐᤠ ᤛᤡᤰᤁᤢᤶᤛᤠᤒᤠ ᤔᤏᤠ ᤜᤥ᤺ᤵᤐᤡ᥅
1CO 6:6 ᤁᤖ ᤗᤳᤇᤠ ᤏᤛᤠᤏᤡᤒᤠ ᤏᤢᤛᤠ᤹ᤀᤡᤴ ᤘᤣ᤹ᤛ᤻ᤔᤠ ᤏᤛᤠᤏᤡᤒᤠ ᤏᤢᤛᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤰᤂᤣᤗ᤹ᤖᤡᤰ ᤋᤢ᤺ᤴᤍᤣ᤹ ᤏᤠ᤺ᤳᤇᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴ ᤜᤡᤶᤔᤥ ᤐᤣ᤺ᤰᤐᤠᤒᤣ᥅
1CO 6:7 ᤂᤡᤏᤡ᤹ ᤗᤢᤶᤔᤥ ᤋᤢ᤺ᤴᤍᤣ᤹ᤜᤠ᤹ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤛᤠᤏᤡᤒᤠ ᤜᤡᤱᤔᤴᤏᤥ ᤜᤠᤖᤡ ᤁᤧᤍᤩᤧ᤹ᤀᤡᤒᤠ ᤐᤠ᤺ᤴᤏᤡᤴ ᤌᤠ᤺ᤵᤗᤥ॥ ᤐᤖᤢᤔᤠᤸᤗᤧ ᤌᤣᤀᤠᤱ ᤏᤡᤱᤄᤢᤶᤔᤥ ᤔᤧᤴᤎᤠᤔᤠᤒᤣ᥅ ᤌᤣᤀᤠᤱ ᤀᤡᤱᤗᤧᤰᤁᤥ ᤔᤧᤴᤎᤠᤔᤠᤒᤣ᥅
1CO 6:8 ᤁᤖ ᤂᤡᤏᤡ᤹ ᤀᤠᤒᤠᤅᤣ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤏᤡᤱᤄᤢᤶ ᤏᤢ ᤀᤡᤱᤗᤧᤰ ᤁᤧᤔᤧᤳᤋᤢᤶᤛᤡᤶᤗᤥ॥
1CO 6:9 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤗᤠᤄᤥ ᤔᤧᤱᤄᤥ᤺ᤛᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤀᤡᤱᤗᤧᤰᤁᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤏᤠᤘᤠᤀᤡᤳᤗᤠ ᤔᤠᤱᤃᤧᤄ᤺ᤒᤠᤜᤠ᤹. ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤈᤥ᤺ᤰᤔᤠᤜᤠ᤹. ᤁᤧᤳᤏᤡᤒᤠ ᤁᤧᤳᤏᤡᤔᤠᤜᤠ᤹. ᤔᤧᤴᤇᤢᤔᤠ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤜᤧᤰᤁᤩᤠᤱ ᤕᤧᤶᤒᤡᤳᤇᤠ᤹ ᤕᤧᤶᤒᤡᤳᤇᤠ᤹ᤀᤡᤴᤏᤢ ᤆᤠᤃᤧᤖᤠᤶᤒᤠᤜᤠ᤹.
1CO 6:10 ᤁᤧᤄᤢ᤺ᤵᤐᤠᤜᤠ᤹. ᤂᤡ᤺ᤶᤕᤰᤐᤠᤜᤠ᤹. ᤌᤡ᤺ᤔᤛᤠᤱᤜᤠ᤹. ᤆᤠ᤺ᤳᤌᤡ ᤁᤧᤍᤣ᤺ᤒᤠ ᤏᤢ ᤑᤥᤋᤩᤠᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤗᤠᤄᤥ ᤔᤧᤱᤄᤥ᤺ᤛᤢᤴᤗᤥ॥
1CO 6:11 ᤂᤡᤏᤡ᤹ᤀᤠᤱ ᤁᤢᤓᤠᤃ ᤒᤠ ᤀᤰᤋᤱᤒᤠ ᤁᤧᤘᤕᤡ. ᤁᤖ ᤘᤠᤃᤧᤶᤜᤵᤋᤡ. ᤛᤣᤛᤣ ᤁᤧᤒᤥ᤺ᤰᤂᤡ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶᤒᤠ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤁᤧᤒᤥ᤺ᤰᤂᤡᤖᤥ॥
1CO 6:12 ᤁᤢᤓᤠᤖᤧ ᤔᤧᤒᤠ᤺ᤳᤋᤢ᤹. “ᤀᤡᤱᤃᤠ᤹ ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤂᤥ᤺ᤛᤢᤱ.” ᤁᤖ ᤁᤠᤰ ᤐᤠ᤺ᤴᤜᤠ᤹ ᤀᤠᤏᤡ᤹ ᤗᤠᤃᤡ ᤀᤡᤱᤎᤠ᤺ᤱᤒᤠ ᤔᤧᤈᤥ᤺ᤰᤏᤧᤴᤗᤥ॥ “ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤂᤥ᤺ᤛᤢᤱ.” ᤁᤖ ᤀᤡᤱᤃᤠ᤹ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧᤴᤏᤠᤱ ᤕᤥ᤺ᤰᤐᤠ ᤔᤧᤒᤥ᤺ᤱᤅᤠᤴᤗᤥ॥
1CO 6:13 ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤢᤈᤠ᤺ᤱᤃ ᤛᤠᤵᤐᤥ᤺ᤰᤐᤠᤸᤗᤧ ᤁᤢᤗᤠᤃᤡᤖᤥ. ᤜᤧᤰᤁᤩᤠᤱ ᤛᤠᤐᤥ᤺ᤰᤐᤧᤴ ᤁᤢᤈᤠ᤺ᤸᤗᤧ ᤗᤠᤃᤡᤖᤥ॥” ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤏᤧᤵᤔᤠᤱ ᤔᤧᤰᤂᤢᤛᤡ᤹ᤖᤥ॥ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤔᤧ᤺ᤴᤗᤥ. ᤁᤖ ᤍᤠᤱᤒᤠᤸᤗᤧ ᤁᤢᤗᤠᤃᤡᤖᤥ॥ ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤁᤢᤗᤠᤃᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤍᤠᤱᤒᤠᤸᤗᤧ ᤜᤡᤛᤢ ᤋᤱᤄᤢᤖᤥ॥
1CO 6:14 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤍᤠᤱᤒᤠᤴ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴᤏᤠᤱ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢ᤹ᤖᤥ॥
1CO 6:15 ᤂᤡᤏᤡ᤹ ᤌᤰᤁᤡᤱᤃ ᤂᤪᤡᤛ᤻ᤋᤖᤧ ᤁᤢᤕᤠᤶᤗᤰ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤜᤧᤰᤁᤣ᤺ᤸᤗᤧ ᤂᤪᤡᤛ᤻ᤋᤖᤧ ᤁᤢᤕᤠᤶᤗᤰᤁᤡᤴ ᤋᤣ᤹ᤖᤢᤱᤅᤠᤱ ᤁᤧᤳᤏᤡᤔᤠᤴᤏᤢ ᤁᤠᤶᤛᤢᤱᤒᤠᤒᤡ᥅ ᤀᤠᤵᤑᤠᤸᤗᤧᤀᤠᤱ ᤔᤧᤏᤢ᤹ᤏᤧᤴᤗᤥ᥄
1CO 6:16 ᤀᤠᤳᤋᤡᤴ ᤔᤏᤠ᤺ᤴ ᤁᤧᤳᤏᤡᤔᤠᤴᤏᤢ ᤋᤱ. ᤂᤧᤴᤏᤢᤀᤣ ᤗᤳᤇᤠ ᤌᤰ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡᤒᤡ᥅ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥ᤺ᤱᤛᤡ᤹ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥
1CO 6:17 ᤁᤖ ᤀᤠᤳᤋᤡᤴ ᤍᤠᤱᤒᤠᤴᤏᤢ ᤁᤠᤶ. ᤂᤧᤴ ᤂᤢᤏᤧ᤹ᤏᤢᤀᤣ ᤕᤠᤶᤛᤠᤶᤔᤥᤀᤠᤱ ᤗᤳᤇᤠ ᤐᤥ᤺ᤱᤗᤥ॥
1CO 6:18 ᤆᤠᤖᤠᤶᤔᤥᤗᤠᤶ ᤔᤠ᤺ᤱᤄᤠ ᤘᤕᤧᤶᤔᤧ᤹ᤀᤥ॥ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤠᤰ ᤘᤣ᤹ ᤗᤠᤕᤥᤜᤠ᤹ ᤏᤠᤛᤡᤱᤃᤧᤴ ᤁᤢᤎᤰᤗᤠᤶᤒᤠ ᤗᤠ᤺ᤰᤁᤠᤳ ᤆᤥᤃᤢ᤹. ᤁᤖ ᤆᤠᤖᤠᤶᤔᤠ ᤗᤠᤕᤥ᤺ᤱᤃ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤆᤥᤃᤢ᤹ᤖᤥ॥
1CO 6:19 ᤂᤡᤏᤡ᤹ ᤌᤰᤁᤡᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤜᤡᤶ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ ᤛᤡᤃᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤰᤁᤡᤴ ᤀᤠᤒᤠᤅᤣ ᤂᤡᤏᤡ᤹ᤀᤡᤴ ᤔᤧ᤺ᤴᤗᤥ॥
1CO 6:20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤂᤡᤏᤡ᤹ ᤁᤧᤎᤧ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤔᤧ᤹ᤀᤥ॥
1CO 7:1 ᤀᤠᤸᤗ ᤂᤡᤏᤡ᤹ ᤁᤧᤛᤠᤵᤋᤢᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤀᤡᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ–ᤕᤧᤶᤒᤡᤳᤇᤠ᤹ᤀᤡᤸᤗᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤏᤡᤸᤗᤧᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
1CO 7:2 ᤁᤖ ᤆᤠᤖᤠᤶᤔᤠ ᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰ ᤐᤥ᤺ᤱᤒᤠᤸᤗᤧ ᤆᤥᤃᤢᤸᤗᤧ ᤔᤏᤠ᤺ᤸᤗᤧ ᤀᤠᤒᤠᤅᤣ ᤔᤣᤗᤡᤱᤃᤧᤴ ᤔᤣ᤺ᤳ ᤁᤳᤋᤢᤏᤡᤖᤥ ᤜᤧᤰᤁᤩᤠᤱ ᤔᤧᤴᤇᤢᤔᤠ᤹ᤀᤡᤸᤗᤧᤀᤠᤱ ᤀᤠᤒᤠᤅᤣ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ ᤁᤳᤋᤢᤏᤡᤖᤥ॥
1CO 7:3 ᤜᤧᤰᤁᤩᤠᤱ ᤕᤧᤶᤒᤠ᤹ᤀᤡᤴ ᤀᤠᤒᤠᤅᤣ ᤁᤢᤔᤣ᤺ᤳᤋᤡᤴᤏᤢ ᤀᤡᤶᤔᤠ ᤐᤥ᤺ᤱ. ᤜᤧᤰᤁᤣᤗ᤹ᤖᤡᤰᤁᤣ ᤔᤣ᤺ᤳᤋᤡᤴᤏᤠᤱ ᤀᤠᤒᤠᤅᤣ ᤁᤢᤕᤧᤶᤒᤠ᤹ᤀᤡᤴᤏᤢ ᤀᤡᤶᤔᤠ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤔᤣ᤺ᤰᤂᤡᤶᤗᤧᤴ ᤗᤰᤐᤧᤴᤏᤥ ᤔᤧᤴᤀᤳᤇᤡᤱᤅᤣ ᤆᤥ᤺ᤰᤔᤠ ᤐᤥ᤺ᤱᤗᤥ॥
1CO 7:4 ᤔᤣ᤺ᤳᤋᤡᤸᤗᤧ ᤁᤢᤎᤰ ᤛᤶᤍᤠᤱ ᤀᤠᤒᤠᤅᤣ ᤕᤢᤰ ᤔᤧᤃᤳᤋᤢᤴ ᤁᤖ ᤁᤢᤕᤧᤶᤒᤠ᤺ᤸᤗᤧ ᤁᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤠ᤺ᤸᤗᤧᤀᤠᤱ ᤁᤢᤎᤰ ᤛᤶᤍᤠᤱ ᤀᤠᤒᤠᤅᤣ ᤕᤢᤰ ᤔᤧᤃᤳᤋᤢᤴ ᤁᤖ ᤁᤢᤔᤣ᤺ᤳᤋᤡᤸᤗᤧ ᤁᤳᤋᤢ᤹ᤖᤥ॥
1CO 7:5 ᤔᤣ᤺ᤳ ᤕᤧᤶᤒᤠ᤹ᤃ ᤔᤧᤴᤏᤠ᤹ᤛᤡᤱᤅᤣ ᤔᤧᤴᤀᤳᤇᤡᤱᤅᤣ ᤛᤥᤖᤡᤰ ᤀᤡᤶᤔᤠ ᤐᤥ᤺ᤱᤗᤥ॥ ᤋᤢᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤓᤠ ᤕᤧᤶᤗᤧ ᤗᤠᤃᤡᤖᤰ ᤏᤡᤱᤘᤠ᤹ ᤋᤱᤔᤠᤀᤠᤱ ᤘᤣ᤹ ᤘᤠ᤹ᤔᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤕᤠᤶᤔᤥ ᤂᤡᤏᤡ᤹ᤃ ᤛᤥᤖᤡᤰ ᤘᤕᤧᤶᤔᤧ᤹ᤀᤥ ᤔᤧ᤺ᤴᤏᤧ ᤑᤠ᤹ᤃᤪ ᤕᤠᤶᤌᤰᤏᤡᤱᤘᤠ᤹ ᤌᤶᤔᤠ ᤔᤧᤴᤇᤢᤰᤔᤏᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤄᤡ᤹ᤖᤥ॥
1CO 7:6 ᤁᤱᤃ ᤀᤡᤱᤈᤠ᤺ᤱ ᤁᤢᤀᤡᤛᤡ᤺ᤰᤁ ᤔᤧ᤺ᤴ. ᤁᤖ ᤜᤧᤰᤁᤣ ᤆᤥ᤺ᤰᤔᤠ ᤛᤢᤈᤠ ᤐᤡᤏᤡᤱᤒᤠᤖᤥ॥
1CO 7:7 ᤁᤠᤰ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤁᤢᤀᤡᤛᤡ᤺ᤰ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤁᤖ ᤁᤠᤰ ᤔᤏᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤠᤱ ᤘᤠ᤹ᤔᤠ ᤀᤡᤃᤪ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤘᤠ᤹ᤔᤠ ᤐᤷᤎᤠ᤺ᤶ ᤔᤧᤄᤥ᤺ᤛᤢᤀᤠᤱ ᤘᤠ᤹ᤖᤥ॥
1CO 7:8 ᤀᤠᤸᤗ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤗᤥ–ᤂᤧᤱᤜᤠ᤹ᤃ ᤀᤡᤱᤃᤠ᤹ ᤁᤢᤀᤡᤛᤡ᤺ᤰᤁᤣ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤀᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥
1CO 7:9 ᤁᤖ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤕᤠᤶᤛᤥ᤺ᤵᤔᤠᤴ ᤕᤢᤰᤔᤠ ᤔᤧᤴᤇᤢᤰᤋᤢᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤖᤀᤣ ᤐᤥ᤺ᤱ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠᤖᤠᤶᤔᤠ ᤏᤡᤱᤘᤠ᤹ᤀᤡᤸᤗᤧ ᤕᤧ᤺ᤱᤛᤡᤱᤔᤠᤖ ᤘᤠ᤹ᤔᤠᤏᤢ᤺ᤸᤗᤧ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
1CO 7:10 ᤀᤠᤸᤗ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠᤜᤠ᤹ᤃ ᤀᤡᤱᤃᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ (ᤀᤡᤱᤃᤠ᤹ᤃ ᤔᤧ᤺ᤴ. ᤁᤖ ᤍᤠᤱᤒᤠᤸᤗᤧᤖᤥ) ᤔᤣᤗᤡᤱᤃᤧᤴ ᤔᤣ᤺ᤳᤋᤡᤴ ᤀᤡᤳᤌᤢᤱᤃᤧᤴ ᤁᤢᤕᤧᤶᤒᤠ᤺ᤴᤏᤢ ᤛᤧᤶᤔᤠᤀᤠᤱ ᤘᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥
1CO 7:11 ᤁᤖ ᤂᤧᤴ ᤘᤣ᤹ ᤛᤧᤴᤏᤠᤱ ᤘᤠ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤘᤠ᤹ᤏᤡᤖᤥ. ᤔᤧ᤺ᤴᤏᤧ ᤑᤠ᤹ᤃᤪ ᤀᤡᤳᤌᤢᤱᤃᤧᤴ ᤁᤢᤕᤧᤶᤒᤠ᤺ᤴᤏᤢ ᤏᤠᤍᤱ ᤆᤥ᤺ᤰᤔᤠ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤳᤌᤢᤱᤃᤧᤴ ᤕᤧᤶᤒᤠ᤺ᤸᤗᤧᤀᤠᤱ ᤔᤣᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ ᤔᤧᤏᤠ᤹ᤖᤢᤴᤗᤖᤥ॥
1CO 7:12 ᤀᤠᤸᤗ ᤂᤡᤏᤡ᤹ ᤘᤣ᤹ᤜᤠ᤹ ᤀᤰᤂᤣ ᤔᤧᤳᤏᤡᤱᤗᤥ (ᤁᤱᤃ ᤀᤡᤱᤃᤠ᤹ ᤀᤠᤒᤠ᤺ᤴᤗᤥ. ᤍᤠᤱᤒᤠᤸᤗᤧᤴ ᤔᤧ᤺ᤴᤗᤥ) ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤢᤛᤠ᤹ᤀᤡᤸᤗᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤔᤠ ᤔᤣᤗᤡᤱᤃᤧᤴ ᤔᤣ᤺ᤳ ᤁᤳᤋᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤧᤶᤒᤠ᤹ᤀᤡᤴᤏᤢᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ. ᤂᤧᤴ ᤏᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥
1CO 7:13 ᤜᤧᤰᤁᤣᤗ᤹ᤖᤡᤰᤁᤣ ᤏᤛᤠ᤺ᤴ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤧᤶᤒᤠ᤹ ᤁᤳᤋᤢ᤹ ᤜᤧᤰᤁᤩᤠᤱ ᤂᤧᤴ ᤁᤢᤔᤣ᤺ᤳᤋᤡᤴᤏᤢᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ. ᤂᤧᤸᤗᤧᤀᤠᤱ ᤁᤢᤕᤧᤶᤒᤠ᤹ᤀᤡᤴ ᤗᤠᤵᤑᤢᤔᤠ ᤔᤧᤏᤢ᤹ᤏᤧᤴᤗᤥ॥
1CO 7:14 ᤌᤣᤀᤠᤱᤓᤧᤸᤗᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ᤀᤡᤴ ᤏᤛᤠ᤺ᤴ ᤁᤧᤈᤥ᤺ᤰᤔᤠ ᤔᤣᤗᤡᤱᤃᤧᤴ ᤔᤣ᤺ᤳᤋᤡᤴᤏᤢ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤧᤴ ᤛᤣᤛᤣ ᤆᤥ᤺ᤰᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤀᤡᤳᤌᤢᤱᤃᤧᤴ ᤕᤧᤶᤒᤠ᤺ᤴᤏᤢ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤔᤠ ᤔᤣᤗᤡᤱᤃᤧᤴ ᤔᤣ᤺ᤳᤋᤡᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤣᤛᤣ ᤆᤥ᤺ᤰᤗᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠ᤺ᤜᤠ᤹ ᤀᤠᤛᤢᤳᤌᤥ ᤔᤧᤒᤥ᤺ᤱᤒᤠ ᤘᤕᤧ. ᤁᤖ ᤜᤧᤰᤁᤣ ᤔᤧᤶᤒᤥ᤺ᤱᤏᤧᤴᤗᤥ. ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤛᤣᤛᤣ ᤔᤧᤈᤥ᤺ᤰᤗᤥ॥
1CO 7:15 ᤜᤧᤰᤁᤣᤛᤠᤱ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤔᤠ ᤔᤣᤗᤡᤱᤃᤧᤴ ᤔᤣ᤺ᤳᤋᤡᤸᤗᤧ ᤀᤡᤃᤪ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ᤀᤡᤸᤗᤧ ᤛᤧᤶᤔᤠᤀᤠᤱ ᤐᤣ᤺ᤰᤔᤠᤀᤣ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤐᤣ᤺ᤰᤏᤡᤖᤥ॥ ᤀᤰᤋᤱᤒᤠ ᤕᤠᤰᤏᤠᤶᤔᤥ ᤏᤛᤠ᤺ᤴ ᤁᤧᤈᤥ᤺ᤰᤔᤠ ᤔᤣ᤺ᤳ ᤀᤡᤃᤪ ᤕᤧᤶᤒᤠ᤹ ᤀᤠᤳᤋᤡᤴᤏᤠᤱ ᤀᤡᤓᤢᤳᤋᤥ ᤔᤧᤴᤘᤠ᤹ᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤛᤏᤠᤖᤢᤱᤅᤥ ᤘᤠ᤹ᤛᤧᤏᤧ ᤀᤠᤀᤢ᤺ᤳᤋᤧᤀᤠᤱ ᤀᤠᤘᤠ᤹ᤖᤥ॥
1CO 7:16 ᤏᤛᤠ᤺ᤴ ᤁᤧᤈᤥ᤺ᤰᤔᤠ ᤔᤣ᤺ᤳᤜᤠ᤹ᤖᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤂᤡᤏᤡ᤹ ᤕᤧᤶᤒᤠᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤠᤒᤡ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤠᤜᤠ᤹ᤖᤧᤀᤠᤱ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤔᤠ ᤂᤡᤏᤡ᤹ ᤔᤣ᤺ᤳᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤠᤒᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ॥
1CO 7:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤀᤢ᤺ᤳᤋᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤘᤕᤧ. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧ ᤛᤣ᤺ᤰᤕᤢᤰ ᤁᤧᤈᤥᤃᤧᤒᤠᤀᤥ ᤁᤧᤘᤠ᤹ᤖ ᤐᤥ᤺ᤱᤗᤥ॥ ᤁᤠᤰ ᤛᤣᤛᤣᤜᤢᤵᤗᤰᤁᤥ ᤒᤠ ᤁᤴᤏᤣ ᤀᤡᤱᤃᤠ᤹ ᤀᤠᤈᤥ᤺ᤰᤌᤡᤶᤗᤥ॥
1CO 7:18 ᤜᤧᤰᤁᤣᤛᤠᤱ ᤜᤷᤍᤥ ᤁᤧᤜᤧᤰᤐᤠᤸᤗᤧ ᤏᤛᤠ᤺ᤴ ᤆᤥᤃᤢᤏᤧ ᤑᤠ᤹ᤃᤪ. ᤂᤧᤴ ᤜᤷᤍᤥ ᤔᤧᤴᤜᤧᤰᤔᤏᤠ ᤁᤢᤀᤡᤛᤡ᤺ᤰ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤩᤠᤱ ᤜᤷᤍᤥ ᤔᤧᤴᤜᤧᤰᤔᤏᤠᤒᤠᤸᤗᤧ ᤏᤛᤠ᤺ᤴ ᤆᤥᤃᤢᤏᤧ ᤑᤠ᤹ᤃᤪ. ᤂᤧᤸᤗᤧ ᤜᤷᤍᤥ ᤜᤧᤰᤔᤠ ᤔᤧᤒᤥ᤺ᤱᤏᤧᤸᤗᤥ॥
1CO 7:19 ᤜᤷᤍᤥ ᤜᤧᤰᤔᤠᤴ ᤏᤢ ᤔᤧᤴᤜᤧᤰᤔᤠᤱᤃ ᤕᤶᤒᤠ ᤐᤠ᤺ᤴ ᤔᤧ᤺ᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥ ᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤐᤥ᤺ᤱᤔᤠᤀᤣ ᤁᤧᤕᤧᤰᤐᤠ ᤐᤠ᤺ᤴᤗᤥ॥
1CO 7:20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠ᤺ᤴ ᤀᤢ᤺ᤳᤋᤢᤸᤗᤧ ᤂᤧᤴ ᤀᤠᤰᤋᤱᤒᤠ ᤕᤠᤰᤏᤠᤶᤔᤥ ᤘᤕᤧ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤴ ᤘᤠ᤹ᤖ ᤐᤥ᤺ᤱᤗᤥ॥
1CO 7:21 ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤀᤢ᤺ᤳᤋᤧᤸᤗᤧ ᤕᤥ᤺ᤰ ᤁᤧᤘᤕᤧᤒᤡ᥅ ᤜᤧᤰᤁᤣᤏᤧ ᤑᤠ᤹ᤃᤪ ᤏᤡᤱᤛᤠᤶᤔᤥ ᤔᤧᤎᤩᤧᤴᤏᤧ᤹ᤀᤥ. ᤁᤖ ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤱᤔᤠ ᤋᤶᤛᤡᤴ ᤆᤥᤃᤧ᤹ᤀᤥ॥
1CO 7:22 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤀᤢ᤺ᤳᤋᤢᤸᤗᤧ ᤕᤥ᤺ᤰ ᤁᤧᤘᤠ᤹ᤒᤠ ᤔᤏᤠ᤺ᤴ ᤍᤠᤱᤒᤠᤸᤗᤧ ᤆᤥ᤺ᤰᤕᤢᤶᤓᤥᤒᤠ ᤁᤢᤔᤏᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧ ᤀᤢ᤺ᤳᤋᤢᤸᤗᤧ ᤆᤥ᤺ᤰᤕᤢᤶᤓᤥᤀᤥ ᤁᤧᤘᤠ᤹ᤒᤠ ᤔᤏᤠ᤺ᤱᤃ ᤂᤪᤡᤛ᤻ᤋᤖᤧ ᤁᤢᤕᤥ᤺ᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
1CO 7:23 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤁᤢᤔᤧᤸᤗᤢᤱ ᤜᤢᤅᤢᤀᤠᤱ ᤂᤡᤏᤡ᤹ ᤁᤧᤎᤧ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤔᤧᤴᤇᤠᤶ ᤕᤥ᤺ᤰ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹ᤀᤥ॥
1CO 7:24 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤔᤏᤠ᤺ᤴ ᤀᤢ᤺ᤳᤋᤧᤸᤗᤧ ᤂᤧᤴ ᤀᤠᤰᤋᤱᤒᤠ ᤕᤠᤰᤏᤠᤶᤔᤥ ᤘᤕᤧ. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤠ᤹ᤖ ᤐᤥ᤺ᤱᤗᤥ॥
1CO 7:25 ᤀᤠᤸᤗ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤍᤠᤱᤒᤠᤗᤠᤶ ᤌᤣᤀᤠᤱ ᤀᤡᤱᤈᤠ᤺ᤱ ᤀᤡᤱᤃᤠ᤹ ᤔᤧᤃᤳᤋᤢᤱᤅᤡᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤏᤛᤠ᤺ᤴᤛᤠᤒᤠ ᤔᤏᤠ ᤁᤢᤀᤡᤛᤡ᤺ᤰ ᤛᤢᤈᤠ ᤐᤡᤏᤡᤱᤗᤥ॥
1CO 7:26 ᤁᤥᤕᤧᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤁᤧᤘᤠ᤹. ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤁᤧᤘᤠ᤹ᤀᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥
1CO 7:27 ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤔᤣ᤺ᤰᤂᤡᤶ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤏᤧ ᤑᤠ᤹ᤃᤪ ᤛᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤧᤴᤏᤧ᤹ᤀᤥ॥ ᤂᤧᤏᤧ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤏᤧ ᤑᤠ᤹ᤃᤪ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤧᤴᤏᤧ᤹ᤀᤥ॥
1CO 7:28 ᤁᤖ ᤔᤣ᤺ᤰᤂᤡᤶ ᤁᤧᤈᤥᤃᤢ᤹ᤏᤧ ᤑᤠ᤹ᤃᤪ ᤗᤠᤕᤥ ᤔᤧᤒᤥ᤺ᤱᤏᤧᤸᤗᤥ॥ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠᤸᤗᤧᤀᤠᤱ ᤔᤣ᤺ᤰᤂᤡᤶ ᤆᤥᤃᤢ᤹ᤏᤧ ᤑᤠ᤹ᤃᤪ ᤗᤠᤕᤥ ᤔᤧᤈᤥᤃᤢᤴᤗᤥ॥ ᤁᤖ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤴ ᤜᤡᤱᤔᤴᤏᤥ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤔᤧᤍᤢᤔᤢ᤹ᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤜᤧᤰᤋᤱᤒᤠ ᤋᤢᤰᤂᤣᤀᤥᤗᤠᤶᤒᤠ ᤂᤡᤏᤡ᤹ ᤋᤠᤱᤛᤧ᤺ᤵᤔᤠᤏᤡᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥
1CO 7:29 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠ ᤑᤠ᤹ᤗᤧ. ᤍᤠᤱᤒᤠᤴ ᤜᤠᤖᤠ ᤕᤢ᤺ᤖ ᤐᤳᤗᤥ॥ ᤀᤠᤸᤗᤀᤠᤱᤎᤥ ᤔᤣ᤺ᤳ ᤁᤧᤘᤠ᤹ᤒᤠᤜᤠ᤹ ᤔᤣ᤺ᤳ ᤔᤧ᤺ᤴᤏᤣ ᤁᤧᤘᤠ᤹ᤒᤠᤜᤠ᤹ ᤁᤢᤀᤡᤛᤡ᤺ᤰ ᤘᤠ᤹ᤔᤠ ᤐᤥ᤺ᤱᤗᤥ.
1CO 7:30 ᤜᤧᤰᤁᤩᤠᤱ ᤔᤣᤖᤡᤱ ᤁᤧᤎᤰᤐᤠᤜᤠ᤹ ᤔᤣᤖᤡᤱ ᤔᤧᤴᤎᤰᤔᤏᤠ ᤁᤢᤀᤡᤛᤡ᤺ᤰ. ᤀᤥᤔᤢ ᤁᤧᤗ᤹ᤒᤠᤜᤠ᤹ ᤀᤥᤔᤢ ᤔᤧᤴᤗ᤹ᤔᤏᤠ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤆᤡᤃ᤺ᤰᤘᤠ ᤁᤧᤃᤵᤐᤠᤜᤠ᤹ ᤌᤣᤀᤠᤱ ᤔᤧᤱᤃᤵᤔᤏᤠᤒᤠ ᤁᤢᤀᤡᤛᤡ᤺ᤰ ᤔᤧᤘᤠ᤹ᤏᤡᤖᤥ॥
1CO 7:31 ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤆᤡᤃ᤺ᤰᤘᤠᤜᤠ᤹ ᤀᤥᤃᤵ ᤁᤧᤈᤥ᤺ᤰᤐᤠᤜᤠ᤹ ᤂᤧᤵᤔᤥ ᤏᤡᤱᤘᤠ᤹ ᤔᤧᤶᤒᤡᤔᤏᤠᤒᤠ ᤔᤏᤠ ᤁᤢᤀᤡᤛᤡ᤺ᤰ ᤘᤠ᤹ᤔᤠ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤗᤧᤱᤛᤡᤱᤅᤠᤱ ᤐᤣ᤺ᤰᤗ ᤐᤳᤗᤥ॥
1CO 7:32 ᤁᤴ ᤜᤡᤱᤔᤴᤏᤥᤒᤠ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢᤱᤒᤣ ᤑᤠ᤹ᤀᤠᤱ ᤏᤡᤱᤛᤠᤶᤔᤥ ᤌᤠ᤺ᤖᤥ॥
1CO 7:33 ᤁᤖ ᤔᤣ᤺ᤰᤂᤡᤶ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧᤃ ᤀᤠᤰᤂᤣᤗ᤹ᤖᤡᤰ ᤀᤠᤔᤣ᤺ᤳᤋᤡᤴ ᤁᤢᤏᤡᤱᤘᤠ᤹ ᤋᤠᤛᤢᤱᤒᤣ ᤑᤠ᤹ᤀᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤖᤧᤴ ᤏᤡᤱᤛᤠᤶᤔᤥ ᤌᤠ᤺ᤖᤥ.
1CO 7:34 ᤜᤧᤰᤁᤣᤗ᤹ᤖᤡᤰ ᤁᤢᤏᤡᤱᤘᤠ᤹ ᤜᤠ᤺ᤛᤡᤱᤗᤥ॥ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤹ ᤀᤡᤃᤪ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤸᤗᤧ ᤌᤰᤁᤡᤴ ᤏᤢ ᤕᤠᤶᤛᤠᤶᤔᤡᤴ ᤛᤣᤛᤣ ᤁᤵᤔᤠ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤢ᤹ᤖᤥ॥ ᤁᤖ ᤔᤣ᤺ᤰᤂᤡᤶ ᤁᤧᤒᤥ᤺ᤱᤔᤠ ᤔᤧᤴᤇᤢᤔᤠ᤹ᤀᤡᤸᤗᤧᤃ ᤀᤠᤰᤂᤣᤗ᤹ᤖᤡᤰ ᤀᤠᤕᤧᤶᤒᤠ᤺ᤴ ᤁᤢᤏᤡᤱᤘᤠ᤹ ᤋᤠᤛᤢᤱᤒᤣ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤢ᤹ᤖᤥ॥
1CO 7:35 ᤀᤡᤱᤃᤠ᤹ᤃ ᤂᤡᤏᤡ᤹ᤀᤣ ᤏᤢ᤺ᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤒᤠᤖᤥ॥ ᤂᤡᤏᤡ᤹ ᤔᤣ᤺ᤰᤂᤡᤶ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤛᤠᤰᤏᤡᤱᤒᤠᤃ ᤔᤧ᤺ᤴᤗᤥ॥ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤥ ᤂᤡᤏᤡ᤹ ᤏᤡᤱᤘᤠ᤹ ᤔᤧᤴᤜᤠ᤺ᤛᤡᤱᤅᤣ ᤁᤢᤍᤥ᤺ᤵᤔᤠ ᤐᤠ᤺ᤴᤏᤥ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥
1CO 7:36 ᤀᤠᤳᤋᤡᤴ ᤔᤏᤠ᤺ᤸᤗᤧ ᤂᤢᤏᤧ᤹ᤏᤢ ᤔᤣ᤺ᤰᤂᤡᤶ ᤐᤠ᤺ᤴ ᤁᤧᤒᤢ᤹ᤔᤠ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤢ ᤏᤢ᤺ᤒᤠ ᤐᤠ᤺ᤴ ᤔᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹ᤀᤠᤱ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤠᤱ ᤋᤢᤶ ᤔᤧᤴᤇᤡᤕᤠ᤹ ᤐᤥ᤺ᤱᤗ ᤐᤳᤋᤠᤱ ᤂᤧᤸᤗᤧ ᤂᤢᤏᤧ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤏᤧ ᤑᤠ᤹ᤃᤪ. ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤆᤥᤃᤢᤖᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤸᤗᤧ ᤗᤠᤕᤥ ᤔᤧᤈᤥᤃᤢᤴᤗᤥ॥ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥ᤺ᤱᤗᤥ॥
1CO 7:37 ᤁᤖ ᤀᤠᤳᤋᤡᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤀᤥ ᤀᤡᤃᤢ ᤔᤧᤳᤇᤡᤱᤅᤠᤱ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥ᤺ᤱ ᤁᤧᤗ᤹ᤒᤠ ᤛᤠᤰᤁᤧᤸᤗᤧᤰ ᤜᤥ᤺ᤵᤐᤠᤱ ᤁᤢᤏᤡᤱᤘᤠ᤹ ᤕᤢᤰᤔᤠ ᤛᤢᤰᤋᤢ᤹ᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤏᤢ᤺ᤒᤠᤀᤣ ᤆᤥᤃᤢ᤹ᤖᤥ॥
1CO 7:38 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤸᤗᤧ ᤂᤧᤴ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤏᤢ᤺ᤒᤠᤀᤣ ᤆᤥᤃᤢ᤹. ᤁᤖ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤀᤠᤸᤗᤛᤠᤱ ᤏᤢ᤺ᤒᤠ ᤆᤥᤃᤢ᤹ᤖᤥ॥
1CO 7:39 ᤜᤧᤰᤁᤣᤗ᤹ᤖᤡᤰ ᤕᤧᤶᤒᤠ᤹ᤀᤡᤴ ᤜᤡᤱᤗ ᤌᤠᤖᤡᤰᤗᤰ ᤔᤣ᤺ᤳᤋᤡᤴ ᤁᤢᤕᤧᤶᤒᤠ᤺ᤸᤗᤧ ᤁᤢᤕᤢᤰᤁᤥ ᤘᤠ᤹ᤖᤥ॥ ᤁᤖ ᤁᤢᤕᤧᤶᤒᤠ᤹ᤀᤡᤴ ᤛᤡ᤺ᤀᤠᤱᤃ ᤂᤧᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤘᤣ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤛᤢᤰᤋᤢ᤹. ᤁᤖ ᤂᤧᤴ ᤔᤏᤠ᤺ᤱᤃ ᤏᤛᤠᤏᤡᤒᤠᤀᤣ ᤐᤥ᤺ᤱᤔᤠ ᤐᤥ᤺ᤱᤗᤥ॥
1CO 7:40 ᤁᤖ ᤀᤠᤏᤡᤱᤘᤠ᤹ᤀᤥ ᤂᤧᤸᤗᤧ ᤕᤠᤶᤔᤥ ᤔᤣ᤺ᤰᤂᤡᤶ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤁᤢᤗᤠᤃᤡ ᤏᤢ᤺ᤒᤠ ᤐᤥ᤺ᤱ. ᤜᤧᤰᤁᤩᤠᤱ ᤁᤴ ᤐᤠ᤺ᤳᤋᤢᤱᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤛᤢᤈᤠ ᤐᤡᤏᤡᤱᤒᤠ ᤑᤠ᤹ᤀᤠᤱ ᤀᤡ᤺ᤳᤋᤢᤱᤗᤥ॥
1CO 8:1 ᤀᤠᤸᤗ ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤔᤏᤠᤒᤠ ᤁᤢᤈᤠᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ–ᤀᤠᤏᤡ᤹ ᤁᤧᤖᤧᤰᤗᤧ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤧᤜᤡᤏᤡᤱᤘᤠ᤹ ᤀᤠᤃᤳᤋᤢᤶ ᤗ᤹ᤖᤡᤰ ᤀᤠᤏᤡ᤺ᤛᤢᤶᤗᤥ॥ ᤏᤧᤜᤡᤏᤡᤱᤘᤠ᤹ᤀᤡᤸᤗᤧᤃ ᤀᤠᤱᤍᤡᤱ ᤁᤧᤈᤥ᤺ᤰᤐᤠ ᤀᤠᤈᤥ᤺ᤰᤗᤥ. ᤁᤖ ᤔᤡ᤺ᤶᤈᤡ᤺ᤸᤗᤧ ᤁᤢᤗᤡᤱᤎᤥ ᤀᤠᤃᤧᤳᤗᤥ॥
1CO 8:2 ᤀᤠᤳᤋᤡᤴ ᤔᤏᤠ᤺ᤸᤗᤧ ᤀᤡᤱᤃᤠ᤹ ᤛᤧᤰᤂᤠᤀᤣ ᤗᤧᤛ᤻ᤛᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹. ᤛᤧᤰᤂᤠ᤺ᤸᤗᤧ ᤗᤧᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤂᤧᤸᤗᤧ ᤀᤠᤸᤗᤥ ᤌᤠᤖᤡᤰ ᤔᤧᤸᤗᤧᤀᤣ ᤘᤠ᤹ᤖᤥ॥
1CO 8:3 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤁᤧᤔᤧᤵᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥
1CO 8:4 ᤜᤧᤰᤁᤣ᤺ᤸᤗᤧ ᤀᤠᤸᤗ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤋᤥ᤺ᤶᤔᤏᤠᤒᤠ ᤁᤢᤈᤠ᤺ᤴ ᤆᤠᤔᤠᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤀᤠᤰᤂᤣ ᤑᤠ᤹ᤗᤧ–ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤠᤘᤠᤀᤡᤳᤗᤠᤜᤠ᤹ᤃ ᤌᤣᤛᤡᤀᤠᤱ ᤔᤧ᤺ᤴᤗᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤌᤡᤰᤗᤰ ᤘᤠ᤹ ᤑᤠ᤹ᤀᤠᤱ ᤀᤠᤏᤡ᤹ ᤀᤠᤏᤡ᤺ᤛᤢᤶᤗᤥ॥
1CO 8:5 ᤜᤧᤰᤁᤩᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤠᤱ-ᤛᤠᤶᤔᤠᤱᤜᤠ᤹ ᤔᤧᤘᤠ᤹ᤒᤡᤗᤠ (ᤛᤧᤰᤂᤠ᤺ᤸᤗᤧ ᤀᤰᤋᤱᤒᤠ ᤕᤖᤡᤰ “ᤔᤠᤱ-ᤛᤠᤶᤔᤠᤱᤜᤠ᤹” ᤏᤢ “ᤍᤠᤱᤒᤠᤜᤠ᤹” ᤔᤧᤘᤠ᤹ᤔᤢ).
1CO 8:6 ᤁᤖ ᤀᤠᤏᤡ᤹ᤗᤠᤃᤡᤃ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤥ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤀᤠᤱ ᤂᤢᤏᤧ᤹ ᤁᤢᤗᤠᤃᤡᤀᤣ ᤀᤠᤏᤡ᤹ ᤀᤠᤜᤡᤱᤗᤥ॥ ᤜᤧᤰᤁᤩᤠᤱ ᤌᤡᤰᤗᤰ ᤍᤠᤱᤒᤠ ᤘᤠ᤹ᤖᤥ. ᤂᤢᤏᤧ᤹ᤃ ᤕᤧᤛᤢ ᤂᤪᤡᤛ᤻ᤋᤖᤥ॥ ᤂᤢᤏᤧ᤹ᤗᤠᤶᤒᤠᤀᤣ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤀᤠᤏᤡ᤹ ᤀᤠᤜᤡᤱᤗᤥ॥
1CO 8:7 ᤁᤖ ᤁᤴ ᤐᤠ᤺ᤴᤏᤡᤱᤃ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤸᤗᤧᤛ᤻ᤛᤢᤴᤗᤥ॥ ᤀᤠᤸᤗᤛᤠᤱ ᤁᤢᤓᤠ ᤔᤏᤠᤜᤠ᤹ᤖᤧᤃ ᤀᤢᤴᤇᤣ᤺ᤴ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤔᤧᤄᤕᤢᤒᤠᤸᤗᤧ ᤆᤥᤃᤢᤸᤗᤧ ᤁᤢᤈᤠ ᤔᤧᤈ᤺ᤸᤗᤧ ᤂᤧᤴ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤋᤥ᤺ᤶᤔᤏᤠᤒᤠᤴ ᤔᤧᤀᤡ᤺ᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤡ᤹ ᤂᤠᤛᤡᤱᤅᤡᤱᤃ ᤁᤧᤎᤢᤶᤒᤠ ᤔᤧᤈᤥ᤺ᤰᤏᤧᤶᤒᤠᤸᤗᤧ ᤆᤥᤃᤢᤸᤗᤧ ᤂᤠᤛᤡᤱᤅᤡᤴ ᤀᤠᤛᤢᤳᤌᤥ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
1CO 8:8 ᤁᤖ ᤛᤧᤰᤂᤠ᤺ᤸᤗᤧ ᤆᤠᤔᤏᤠᤒᤠ ᤁᤢᤈᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤒᤠ ᤀᤠᤴᤈᤥ᤺ᤰᤏᤧᤴᤗᤥ॥ ᤀᤠᤏᤡ᤹ ᤁᤢᤈᤠ ᤀᤠᤴᤈᤠᤶᤔᤡᤴᤏᤡᤸᤗᤧ ᤋᤠᤵᤑᤧ᤺ᤶᤒᤠ ᤀᤠᤒᤥ᤺ᤱᤒᤠ ᤏᤢ ᤀᤠᤈᤠᤶᤔᤡᤸᤗᤧ ᤏᤢ᤺ᤒᤠ ᤀᤠᤒᤥ᤺ᤱᤒᤠ ᤔᤧ᤺ᤴᤗᤥ॥
1CO 8:9 ᤁᤖ ᤂᤡᤏᤡ᤹ ᤆᤠᤔᤠ ᤌᤢᤱᤔᤠᤀᤥᤒᤠ ᤆᤥ᤺ᤰᤕᤢᤶᤓᤥ᤺ᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴᤏᤥ ᤔᤧᤴᤎᤢᤶᤔᤏᤠᤒᤠ ᤏᤛᤠᤏᤡᤒᤠᤜᤠ᤹ ᤗᤠᤕᤥᤀᤥ ᤔᤧᤴᤎᤠᤏᤧᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ॥
1CO 8:10 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤆᤠᤔᤠ ᤌᤢᤱᤔᤠ ᤏᤢ᤹ ᤗ᤹ᤖᤡᤰ ᤛᤠᤶᤈᤡᤰ ᤁᤧᤃᤵᤐᤠᤜᤠ᤹ᤖᤧ ᤏᤠᤘᤠᤀᤡᤳᤗᤠ ᤁᤧᤕᤢᤱᤒᤠ ᤔᤠᤱᤜᤡᤶᤔᤥ ᤁᤧᤈᤠᤶᤗ ᤁᤧᤕᤢᤅᤡᤒᤠ ᤏᤛᤠ᤺ᤴ ᤁᤧᤛᤢ᤺ᤶᤒᤠᤜᤠ᤹ᤖᤧ ᤁᤧᤶᤏᤡ᤺ᤛᤡᤸᤗᤧ ᤂᤧᤱᤜᤠ᤹ᤖᤧ ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤔᤏᤠᤒᤠ ᤁᤢᤈᤠ᤺ᤴ ᤆᤠᤔᤠ ᤔᤧᤴᤀᤠ᤺ᤴᤇᤡᤱᤅᤡᤶᤒᤡ᥅
1CO 8:11 ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤛᤡᤰᤁᤢᤶᤍᤡᤱ ᤁᤧᤏᤡᤱᤘᤠ᤹ᤀᤡᤸᤗᤧ ᤏᤛᤠ᤺ᤴᤏᤥ ᤔᤧᤴᤎᤢᤶᤔᤏᤠᤒᤠ ᤏᤛᤠᤏᤡᤒᤧᤴ ᤑᤧᤳᤁᤧᤗᤠ᤺ᤴᤍᤢ᤹ᤖᤥ॥ ᤁᤖ ᤂᤧᤸᤗᤧ ᤁᤢᤗᤠᤃᤡ ᤂᤪᤡᤛ᤻ᤋᤧᤴ ᤛᤩᤧᤀᤠᤱ ᤘᤠ᤹ᤖᤥ॥
1CO 8:12 ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤏᤛᤠᤏᤡᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥᤃᤢ᤹. ᤜᤧᤰᤁᤩᤠᤱ ᤏᤢ᤺ᤒᤠ ᤔᤧ᤺ᤴ ᤑᤠ᤹ᤀᤠᤱ ᤀᤡ᤺ᤳᤋᤢᤒᤠᤴ ᤆᤥ᤺ᤰᤔᤠ ᤁᤧᤒᤠᤱᤄᤢᤸᤗᤧ ᤂᤪᤡᤛ᤻ᤋᤖᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥᤃᤢ᤹ᤖᤥ॥
1CO 8:13 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤆᤠᤱᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤧᤴ ᤗᤠᤕᤥᤀᤥ ᤌᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤛᤠ ᤔᤧᤈᤠᤀᤠᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤗᤠᤕᤥᤀᤥ ᤔᤧᤎᤠᤏᤧᤴᤗᤖᤥ॥
1CO 9:1 ᤘᤣ᤹ᤜᤠ᤹ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤆᤥ᤺ᤰᤕᤢᤶᤓᤥ ᤔᤧᤃᤳᤋᤠᤴᤒᤡ᥅ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤔᤧ᤺ᤴᤏᤠᤒᤡ᥅ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ᤺ᤴ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤡᤰᤁᤡᤸᤗᤧ ᤔᤧᤴᤏᤡ᤺ᤒᤧᤴᤒᤡ᥅ ᤍᤠᤱᤒᤠᤀᤥ ᤕᤠᤶᤒᤢᤎᤡᤰᤐᤠ ᤀᤠᤕᤠ᤺ᤶᤒᤰᤁᤡᤴ ᤂᤡᤏᤡ᤹ᤏᤡᤱᤅᤣ ᤔᤧ᤺ᤶᤒᤡ᥅
1CO 9:2 ᤘᤣ᤹ᤜᤠ᤹ᤖᤧ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤗ᤹ᤖᤡᤰ ᤔᤧᤴᤀᤡ᤺ᤳᤋᤠᤴᤇᤠᤱ ᤂᤡᤏᤡ᤹ᤗᤠᤃᤡᤃ ᤛᤣ᤺ᤰᤕᤢᤰᤔᤡᤒᤠᤀᤠᤀᤣᤖᤥ॥ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤁᤢᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ᤀᤣ ᤋᤛᤡ-ᤐᤷᤔᤠᤱᤃᤡ ᤁᤧᤘᤕᤡ᤹ᤖᤥ॥
1CO 9:3 ᤀᤡᤱᤃᤠ᤹ ᤀᤠᤕᤢᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤜᤠ᤹ᤃ ᤒᤠᤁᤴ ᤏᤥᤃᤵ ᤐᤡᤖᤢᤱᤛᤡᤱᤗᤥ॥
1CO 9:4 ᤀᤠᤏᤡᤃᤧ ᤕᤠ᤺ᤶᤒᤰᤗᤠᤶ ᤆᤠᤔᤠ ᤌᤢᤱᤔᤠ ᤔᤧᤄᤥ᤺ᤛᤢᤶᤒᤧᤶᤒᤡ᥅
1CO 9:5 ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤍᤠᤱᤒᤠᤸᤗᤧ ᤁᤢᤴᤛᤠ᤹ᤛᤡ ᤜᤧᤰᤁᤩᤠᤱ ᤐᤋᤪᤢᤛᤛᤡ ᤁᤢᤀᤡᤛᤡ᤺ᤰ ᤀᤠᤒᤠᤅᤣ ᤏᤛᤠᤏᤡᤔᤠ ᤔᤣ᤺ᤳᤋᤡᤴᤏᤢ ᤗᤠᤶᤍᤡ᤺ᤰ ᤆᤥ᤺ᤰᤔᤠ ᤕᤢᤰ ᤔᤧᤃᤳᤋᤢᤶᤒᤠᤴᤒᤡ᥅
1CO 9:6 ᤀᤡ ᤒᤖᤏᤠᤒᤠᤛ ᤏᤢ ᤀᤡᤱᤃᤠ᤹ᤖᤰ ᤜᤡᤱᤒᤪᤠᤶᤗᤧ ᤗᤠᤃᤡ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥ᤺ᤱᤒᤠᤒᤡ᥅
1CO 9:7 ᤀᤠᤳᤋᤡᤴ ᤔᤏᤠ᤺ᤸᤗᤧ ᤀᤠᤒᤠᤅᤣ ᤐᤣ᤺ᤰᤕᤠᤱᤅᤥ ᤌᤰᤛᤢᤒᤠ ᤕᤠ᤺ᤶᤒᤰ ᤆᤥᤃᤢᤒᤣ᥅ ᤀᤠᤳᤋᤡᤸᤗᤧ ᤆᤧᤸᤗᤧᤰᤛᤣ᤹ᤀᤡᤰ ᤗᤣ᤺ᤳᤋᤢᤀᤠᤱ ᤁᤢᤈᤠ᤹ᤀᤡᤴ ᤔᤧᤈᤏᤧᤴᤒᤣ᥅ ᤀᤠᤳᤋᤡᤸᤗᤧ ᤐᤡᤵᤔᤠ᤺ᤴ ᤜᤡᤱᤄᤢᤀᤠᤱ ᤂᤧᤸᤗᤧ ᤁᤢᤏᤢ᤺ᤴ ᤔᤧᤎᤢᤅᤢᤴᤒᤣ᥅
1CO 9:8 ᤁᤱᤃ ᤀᤡᤱᤃᤠ᤹ ᤔᤧᤴᤇᤠᤶ ᤁᤢᤛᤡᤱ ᤏᤡ᤺ᤵᤔᤥᤖᤰ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤥ. ᤁᤖ ᤛᤠᤶᤕᤥᤌᤡᤶᤔᤡᤸᤗᤧᤀᤠᤱ ᤒᤠ ᤀᤰᤂᤣ ᤔᤧᤒᤠ᤺ᤳᤋᤢᤶᤒᤡ᥅
1CO 9:9 ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤆᤠ ᤁᤧᤏᤢᤰᤐᤠ ᤐᤡᤳᤋᤡᤸᤗᤧ ᤁᤢᤔᤢᤖᤠᤀᤥ ᤆ᤺ᤵᤐᤡᤸᤗᤧ ᤔᤧᤛᤢ᤺ᤵᤋᤧᤴᤏᤧ᤹ᤀᤥ.” ᤌᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤳᤜᤠ᤹ᤖᤰ ᤂᤧᤶᤔᤩᤠᤰ ᤁᤥᤈᤠᤰ ᤔᤧᤳᤋᤢᤛᤡᤒᤡ᥅
1CO 9:10 ᤛᤧᤰᤂᤠᤛᤠᤱ ᤁᤱᤃ ᤀᤠᤏᤡ᤹ ᤗᤠᤃᤡᤀᤣ ᤐᤠ᤺ᤳᤋᤢᤒᤠ ᤔᤧ᤺ᤶᤒᤡ᥅ ᤀᤥᤖᤥ. ᤌᤣᤀᤠᤱᤓᤧᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤁᤧᤎᤥ᤺ᤱᤒᤠ ᤏᤢ ᤐᤥᤃᤢᤃᤧᤴ ᤁᤢᤈᤠ ᤁᤧᤛᤢᤶᤒᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧᤴ ᤗᤰ ᤂᤥ᤺ᤔᤠ ᤂᤢᤏᤧ᤹ ᤏᤡᤱᤛᤠᤱ ᤆᤥᤃᤢ᤹ᤖᤥ॥
1CO 9:11 ᤂᤡᤏᤡ᤹ ᤗᤢᤶᤔᤥ ᤀᤠᤏᤡᤃᤧ ᤕᤠᤶᤛᤠᤶᤃᤧᤴ ᤕᤠ᤹ᤖᤡ᤺ᤶᤒᤠᤴ ᤜᤧ᤹ᤖᤢᤶᤒᤧᤀᤠᤱ ᤘᤕᤡᤃᤧᤏᤧ ᤑᤠ᤹ᤃᤪ ᤂᤡᤏᤡ᤹ᤗᤠᤶ ᤀᤠᤏᤡᤃᤧ ᤆᤠᤜᤠᤒᤠ ᤆᤥᤃᤡᤃᤧᤒᤠ ᤐᤠ᤺ᤴᤜᤠ᤹ ᤂᤥ᤺ᤔᤠ ᤔᤧᤛᤢᤰᤋᤢᤶᤒᤧᤴᤒᤡ᥅
1CO 9:12 ᤘᤣ᤹ᤜᤠ᤹ᤖᤧ ᤂᤡᤏᤡ᤹ᤗᤠᤶ ᤁᤢᤓᤠ᤹ ᤂᤥ᤺ᤔᤠ ᤕᤢᤰ ᤔᤧᤃᤳᤋᤢᤏᤧ ᤑᤠ᤹ᤃᤪ ᤀᤠᤏᤡᤃᤧᤃ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤧᤃᤳᤋᤢᤶᤒᤧᤴᤒᤡ᥅ ᤁᤖ ᤀᤠᤏᤡᤃᤧᤃ ᤁᤴ ᤕᤢᤰᤁᤡᤴ ᤀᤥᤃᤵ ᤔᤧᤈᤥᤃᤢᤶᤒᤧᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠᤃ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤂ᤺ᤔᤠ ᤔᤧ᤺ᤴ ᤑᤠ᤹ᤀᤠᤱ ᤌᤣᤛᤠᤱ ᤌᤖᤢᤶᤒᤧᤖᤥ॥
1CO 9:13 ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤠᤱᤜᤡᤶᤔᤥᤗᤠᤶ ᤋᤥ᤺ᤶᤔᤏᤠᤒᤠ ᤁᤢᤈᤠ᤺ᤴ ᤔᤧᤄᤥ᤺ᤛᤢ᤹ ᤜᤧᤰᤁᤩᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥ ᤋᤥ᤺ᤶᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤗᤰ ᤔᤧᤄᤥ᤺ᤛᤢ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡ᤹ᤒᤡ᥅
1CO 9:14 ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧᤀᤠᤱ ᤛᤢᤏᤠᤀᤡᤱ ᤀᤡᤱᤓᤴ ᤁᤧᤈᤥ᤺ᤰᤐᤠᤜᤠ᤹ ᤛᤢᤏᤠᤀᤡᤱᤗᤠᤶᤒᤠᤀᤣ ᤔᤧᤜᤡᤱᤗ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤆᤥᤃᤢᤀᤠᤱ ᤘᤠ᤹ᤖᤥ॥
1CO 9:15 ᤁᤖ ᤀᤡᤱᤃᤠ᤹ᤃ ᤀᤠᤳᤋᤡᤴᤏᤠᤱ ᤁᤴ ᤕᤢᤰᤜᤠ᤹ ᤀᤥᤃᤵ ᤔᤧᤴᤈᤥ᤺ᤰᤐᤠᤴᤗᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤀᤠᤗᤠᤃᤡ ᤕᤠᤵᤔᤡ ᤁᤧᤈᤥᤃᤡ ᤁᤧᤒᤡᤖᤡᤖ ᤁᤧᤗ᤹ᤒᤠ ᤏᤡᤱᤛᤠᤱᤏᤢ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤒᤠ ᤔᤧ᤺ᤴᤗᤥ॥ ᤁᤴ ᤐᤠ᤺ᤴᤏᤥ ᤆᤥᤃᤢᤱᤒᤠ ᤀᤠᤱᤍᤡᤱᤅᤡᤴ ᤁᤢᤓᤠ ᤔᤏᤠᤜᤠ᤹ᤖᤧ ᤜᤏᤧ ᤔᤧᤈᤥᤃᤢᤏᤧ ᤑᤠ᤹ᤃᤪ ᤛᤡ᤺ᤀᤠᤛᤠᤱ ᤐᤥ᤺ᤱᤗᤥ॥
1CO 9:16 ᤜᤧᤰᤁᤣᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤱᤍᤡᤱ ᤔᤧᤈᤥ᤺ᤰᤁᤠᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤆᤥ᤺ᤰᤔᤠᤀᤣ ᤁᤧᤒᤥ᤺ᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ ᤛᤢᤏᤠᤀᤡᤱ ᤀᤡᤱᤔᤧᤓᤥ᤺ᤀᤠᤴᤏᤧ ᤑᤠ᤹ᤃᤪ ᤆᤡ᤺ᤳᤋᤠᤱ ᤛᤩᤠᤱᤗᤥ᥄
1CO 9:17 ᤁᤖ ᤁᤴ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤗᤠᤶᤔᤣ ᤆᤥᤃᤢᤱᤏᤧ ᤑᤠ᤹ᤃᤪ ᤜᤠᤱᤛᤧᤶᤔᤡᤴ ᤂᤥ᤺ᤛᤢᤱᤗᤥ. ᤁᤖ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤗᤠᤶ ᤔᤧᤈᤥ᤺ᤰᤁᤠᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤠ᤹ᤖᤠᤱᤅᤠᤱ ᤐᤡᤖᤠᤱᤒᤠ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤗᤰᤐᤧᤴᤏᤡᤴᤗᤰ ᤆᤥᤃᤢᤱᤗᤥ॥
1CO 9:18 ᤜᤧᤰᤁᤣ᤺ᤸᤗᤧ ᤀᤠᤜᤠᤱᤛᤧᤶᤔᤡᤱᤃ ᤌᤣ᤺ᤴᤒᤣ᥅ ᤀᤠᤜᤠᤱᤛᤧᤶᤔᤡᤴ ᤒᤠ ᤁᤴᤗᤥ–ᤀᤡᤱᤃᤠ᤹ᤃ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤅᤡᤸᤗᤧ ᤏᤠᤶᤕᤠᤰ ᤔᤧ᤺ᤴᤏᤣ ᤀᤡᤱᤓᤥ᤺ᤔᤠ ᤐᤥ᤺ᤱᤗ॥ ᤜᤧᤰᤁᤣᤗ᤹ᤖᤡᤰ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤅᤡᤸᤗᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤀᤠᤕᤢᤰᤜᤠ᤹ ᤀᤥᤃᤵ ᤔᤧᤈᤥ᤺ᤰᤁᤠᤴᤗᤥ॥
1CO 9:19 ᤀᤡᤱᤃᤠ᤹ᤃ ᤆᤥ᤺ᤰᤕᤢᤶᤓᤥᤀᤥ ᤘᤠ᤹ᤀᤠ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤕᤢᤰᤁᤥ ᤜᤥ᤺ᤵᤐᤠᤛᤠᤱ ᤕᤖᤡᤰ ᤔᤏᤠᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤥ᤺ᤰ ᤐᤥ᤺ᤰᤂᤠᤱᤗᤥ॥
1CO 9:20 ᤕᤜᤢᤍᤡᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤕᤜᤢᤍᤡᤜᤠ᤹ ᤁᤢᤀᤡᤛᤡ᤺ᤰ ᤐᤥ᤺ᤰᤂᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤛᤠᤶᤕᤥ ᤀᤡᤱᤈᤠ᤺ᤱᤖᤧ ᤁᤢᤕᤢᤰᤁᤥᤃ ᤜᤥ᤺ᤵᤋᤠᤱᤛᤠᤱ ᤛᤠᤶᤕᤥ ᤀᤡᤱᤈᤠ᤺ᤱᤅᤥ ᤁᤧᤘᤠ᤹ᤒᤠᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥
1CO 9:21 ᤛᤠᤶᤕᤥᤌᤡᤶ ᤔᤧᤴᤏᤠ᤺ᤵᤔᤏᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥ (ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤴ ᤔᤧᤏᤠ᤺ᤳᤋᤢᤱᤅᤡᤴᤒᤠ ᤔᤧ᤺ᤴ. ᤁᤖ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗᤥ॥)
1CO 9:22 ᤏᤛᤠ᤺ᤴ ᤁᤧᤒᤠ᤺ᤰᤐᤠᤜᤠ᤹ᤏᤢ ᤘᤕᤠᤱᤅᤡᤸᤗᤧ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ᤀᤠᤱ ᤏᤛᤠ᤺ᤴ ᤁᤧᤒᤠ᤺ᤰᤐᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥ ᤁᤢᤓᤠ ᤔᤏᤠᤜᤠ᤹ ᤂᤪᤡᤛ᤻ᤋᤀᤥ ᤋᤠ᤺ᤵᤔᤠ ᤛᤢᤰᤋᤢᤱᤛᤡᤱᤒᤡ ᤑᤠ᤹ᤀᤠᤱ ᤁᤠᤰ ᤔᤏᤠᤜᤠ᤹ ᤁᤢᤀᤡᤛᤡ᤺ᤰᤁᤣ ᤐᤥ᤺ᤰᤂᤠᤱᤗᤥ॥
1CO 9:23 ᤛᤢᤏᤠᤀᤡᤱᤅᤡᤸᤗᤧᤴ ᤔᤢ᤹ᤀᤡᤛᤠᤶᤜᤠ᤹ ᤂᤥ᤺ᤔᤠ ᤛᤢᤰᤋᤢᤱᤗ ᤑᤠ᤹ᤀᤠᤱ ᤛᤢᤏᤠᤀᤡᤱᤅᤡᤸᤗᤧ ᤗᤠᤃᤡᤀᤣ ᤁᤴ ᤁᤠᤰ ᤐᤠ᤺ᤴᤜᤠ᤹ ᤆᤥᤃᤢᤱᤗᤥ॥
1CO 9:24 ᤗᤥ᤺ᤰᤗᤥ᤺ᤰᤁᤣ ᤜᤰᤆᤠ᤺ᤳ ᤏᤠ᤺ᤴᤒᤥᤀᤥ ᤁᤠᤰ ᤔᤏᤠᤜᤠ᤹ ᤔᤧᤗᤥ᤺ᤰ. ᤁᤖ ᤌᤡᤰᤗᤧᤖᤰ ᤌᤢᤶᤄᤥ᤺ᤴ ᤂᤥ᤺ᤛᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤌᤢᤶᤄᤥ᤺ᤴ ᤂᤥ᤺ᤔᤠ ᤑᤠ᤹ᤀᤠᤱ ᤗᤥ᤺ᤰᤋᤧᤶᤔᤧ᤹ᤀᤥ॥
1CO 9:25 ᤀᤠᤸᤗ ᤜᤰᤆᤠ᤺ᤳ ᤁᤧᤈᤠ᤺ᤵᤐᤠ ᤁᤧᤖᤧᤰᤗᤧ ᤁᤧᤛᤠᤰᤐᤠ ᤛᤎᤠᤛᤡᤱᤔᤠ ᤔᤧᤈᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤁᤧᤔᤧᤰᤐᤠ ᤁᤧᤒᤣ᤺ᤰᤐᤠ ᤋᤡᤆ᤺ ᤂᤥ᤺ᤛᤧ ᤜᤧᤰᤁᤣ ᤔᤧᤈᤥᤃᤢ᤹. ᤁᤖ ᤀᤠᤏᤡ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠ ᤌᤢᤶᤄᤥᤃᤧᤴ ᤋᤡᤆ᤺ ᤂᤥ᤺ᤛᤧ ᤜᤧᤰᤁᤣ ᤀᤠᤈᤥᤃᤢᤶᤗᤥ॥
1CO 9:26 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤃ ᤋᤠᤖᤵ ᤔᤧ᤺ᤴᤏᤣ ᤔᤧᤗᤥ᤺ᤰᤁᤠᤴᤗᤥ॥ ᤜᤧᤰᤁᤩᤠᤱ ᤜᤢᤰᤐᤢᤳᤋᤡᤸᤗᤧ ᤛᤢᤖᤡᤳᤔᤠᤀᤥ ᤁᤧᤜᤡᤵᤐᤠ ᤁᤢᤀᤡᤛᤡ᤺ᤰᤁᤠᤱ ᤔᤧᤈᤥ᤺ᤰᤁᤠᤴᤗᤥ॥
1CO 9:27 ᤘᤣ᤹ᤜᤠ᤹ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤛᤡᤱᤅᤠᤱ ᤀᤠᤒᤠᤅᤣᤃ ᤛᤢᤶᤒᤥᤎᤠ ᤔᤧ᤺ᤴᤏᤣᤒᤠ ᤔᤧᤒᤥ᤺ᤱᤅᤠᤴᤗ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤡᤴ ᤀᤡᤱᤃᤠ᤹ ᤀᤠᤕᤢᤰᤁᤥ ᤁᤳᤋᤢᤱ ᤜᤧᤰᤁᤩᤠᤱ ᤀᤠᤕᤥ᤺ᤰ ᤆᤥᤃᤢᤱᤗᤥ॥
1CO 10:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤀᤣ᤺ᤰᤛᤠᤍᤧᤴᤏᤥ ᤔᤥᤛᤠ᤺ᤴᤏᤢ ᤗᤠᤶᤍᤡ᤺ᤰ ᤔᤧᤈᤥᤃᤧᤸᤗᤧ ᤌᤣ ᤐᤥ᤺ᤰᤂᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤂᤠᤵᤔᤡ᤺ᤵᤐᤠᤸᤗᤧ ᤂᤢᤏᤡ᤹ ᤗᤠᤶᤍᤡ᤺ᤰᤁᤥ ᤗᤠᤶᤗᤥᤛᤢᤛᤡᤖ ᤂᤧᤱᤜᤠ᤹ ᤁᤧᤖᤧᤰ ᤘᤠᤜᤱ ᤗᤢᤶᤔᤥ ᤔᤧᤒᤥ᤺ᤰᤂᤧᤖ ᤔᤧᤒᤣᤖᤥ॥
1CO 10:2 ᤂᤧᤱᤜᤠ᤹ ᤁᤧᤖᤧᤰ ᤂᤠᤵᤔᤡ᤺ᤳᤋᤥ ᤏᤢ ᤘᤠᤜᤱᤅᤥ ᤔᤥᤛᤠ᤺ᤴ ᤔᤧᤍᤡᤶᤍᤢᤸᤗᤧ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥
1CO 10:3 ᤂᤧᤱᤜᤠ᤹ ᤁᤧᤖᤧᤰᤗᤧᤃ ᤗᤳᤌᤡᤰ ᤐᤖᤡᤰᤗᤧᤴ ᤕᤠᤶᤛᤠᤶᤃᤧᤴ ᤁᤢᤈᤠ ᤔᤧᤈ.
1CO 10:4 ᤜᤧᤰᤁᤩᤠᤱ ᤗᤳᤌᤡᤰ ᤐᤖᤡᤰᤗᤧᤴ ᤕᤠᤶᤛᤠᤶᤃᤧᤴ ᤆᤫᤠ᤺ᤳᤋᤡᤴ ᤔᤧᤎᤢᤅᤢᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤏᤢᤀᤣ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤕᤠᤶᤛᤠᤶᤃᤧᤴ ᤗᤢᤱᤅᤥᤏᤢ ᤁᤧᤗ᤺ᤶᤒᤠ ᤆᤫᤠ᤺ᤳᤋᤡᤴ ᤔᤧᤎᤢᤅᤢᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤴ ᤗᤢᤱᤅᤡᤱᤃ ᤂᤪᤡᤛ᤻ᤋᤧᤴ ᤘᤕᤧᤖᤥ॥
1CO 10:5 ᤜᤧᤰᤁᤣᤛᤠᤱ ᤂᤧᤱᤜᤠ᤹ᤀᤥ ᤕᤖᤡᤰᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤔᤧᤎᤠᤅᤧᤴ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤀᤣ᤺ᤰᤛᤠᤍᤧᤴᤏᤥᤀᤣ ᤔᤧᤛᤩᤧᤖᤥ॥
1CO 10:6 ᤀᤠᤸᤗ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤑᤧᤴᤐᤠ᤺ᤴᤏᤥ ᤔᤧᤒᤳᤋᤡᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤁᤢᤒᤡ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
1CO 10:7 ᤂᤧᤱᤜᤠ᤹ᤀᤥ ᤁᤢᤓᤠᤖᤧ ᤏᤠᤘᤠᤀᤡᤳᤗᤠ᤺ᤴ ᤔᤠᤱᤔᤧᤄᤕᤢᤒᤠ ᤁᤢᤀᤡᤛᤡ᤺ᤰ ᤔᤧᤄᤕᤧᤶᤔᤡᤴᤏᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤔᤏᤠᤜᤠ᤹ ᤆᤠᤔᤠ ᤏᤢ ᤌᤢᤱᤔᤠᤀᤥ ᤔᤧᤕᤢᤱᤛᤡᤱ. ᤜᤧᤰᤁᤩᤠᤱ ᤔᤧᤒᤥᤃᤧᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤔᤧᤈᤥᤃᤢᤖᤥ॥”
1CO 10:8 ᤂᤧᤱᤜᤠ᤹ᤀᤥ ᤁᤢᤓᤠᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ᤃ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ॥ ᤂᤧᤱᤜᤠ᤹ᤀᤥ ᤌᤡᤰ ᤕᤧᤴᤏᤥᤀᤣ ᤜᤧᤴᤇᤡᤱ ᤏᤧᤳ-ᤛᤢᤶ (᥈᥉.᥆᥆᥆) ᤔᤏᤠᤜᤠ᤹ ᤔᤧᤛᤩᤧᤖᤥ॥
1CO 10:9 ᤂᤧᤱᤜᤠ᤹ᤀᤥ ᤁᤢᤓᤠᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ᤃ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤜᤧᤰᤁᤣ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤛᤣ᤺ᤰᤐᤠᤜᤠ᤹ᤖᤧ ᤔᤧᤀ᤺ᤃᤢᤛᤡᤀᤠᤱ ᤕᤖᤡᤰ ᤔᤧᤛᤩᤧᤖᤥ॥
1CO 10:10 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤀᤥ ᤁᤢᤓᤠᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤁᤠᤏᤠᤰᤏᤠᤰ ᤗ᤹ᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤣ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤔᤧᤶᤓᤤ ᤁᤧᤈᤥ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤛᤧᤖᤢᤛᤡᤖᤥ॥
1CO 10:11 ᤁᤴ ᤜᤡᤴᤍᤥ᤺ᤰᤜᤠ᤹ᤃ ᤀᤠᤏᤡ᤹ ᤗᤠᤃᤡ ᤁᤢᤒᤡ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤀᤠᤱ ᤀᤠᤏᤡ᤹ ᤗᤠᤃᤡ ᤛᤠᤶᤍᤡᤱ ᤐᤥ᤺ᤱᤗ ᤑᤠ᤹ᤀᤠᤱ ᤂᤧᤴ ᤛᤠᤵᤋᤧᤒᤠᤖᤥ॥ ᤀᤠᤏᤡ᤹ᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠ ᤕᤧᤶᤔᤥ ᤁᤧᤵᤔᤠ ᤀᤠᤀᤡ᤺ᤳᤋᤧᤀᤠᤱ ᤀᤠᤘᤠ᤹ᤖᤥ॥
1CO 10:12 ᤏᤢ᤺ᤖᤡᤰ ᤕᤧᤵᤐᤠ ᤁᤧᤗ᤹ᤒᤧᤴ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤖᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤴ ᤆᤥ᤺ᤴᤗᤥ॥
1CO 10:13 ᤂᤡᤏᤡ᤹ ᤜᤡᤱᤔᤴᤏᤥ ᤁᤧᤍᤠ᤺ᤒᤠ ᤁᤠᤰ ᤜᤱᤛᤠ᤹ᤔᤠᤜᤠ᤹ ᤔᤧᤴᤇᤠᤶ ᤕᤠᤵᤔᤡ ᤗᤢᤶᤔᤥ ᤁᤧᤍᤠ᤺ᤒᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ॥ ᤂᤢᤏᤧ᤹ᤃ ᤂᤡᤏᤡ᤹ ᤌᤶᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤜᤱᤛᤠ᤹ᤔᤠᤀᤥ ᤌᤠ᤺ᤔᤠ ᤁᤧᤶᤒᤠᤱᤄᤡᤴᤗᤥ॥ ᤁᤖ ᤌᤶᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤡᤏᤡ᤹ ᤜᤱᤛᤠ᤹ᤔᤠᤀᤥ ᤁᤧᤎᤩᤧ᤹ᤀᤡᤸᤗᤧ ᤂᤢᤏᤧ᤹ᤀᤣ ᤂᤧᤵᤔᤥᤗᤠᤶ ᤋᤠᤱᤛᤧ᤺ᤵᤛᤡᤱᤔᤠ ᤗᤠᤶᤔᤠᤱ ᤁᤧᤒᤡᤖᤡ᤹ᤖᤥ॥
1CO 10:14 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤠᤘᤠᤀᤡᤳᤗᤠ ᤔᤠᤱᤄ᤺ᤔᤠᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥
1CO 10:15 ᤂᤡᤏᤡ᤹ᤃ ᤂᤠᤛᤡᤱ ᤁᤧᤏᤡ᤺ᤵᤐᤠᤏᤡᤱ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤌᤣ ᤔᤧᤳᤏᤡᤱᤗ ᤐᤳᤋᤠ. ᤂᤧᤴ ᤏᤢ᤺ᤖᤡᤰᤁᤠᤱ ᤀᤡ᤺ᤳᤋᤧᤶᤔᤧ᤹ᤀᤥ॥
1CO 10:16 ᤍᤠᤱᤒᤠᤸᤗᤧ ᤁᤢᤛᤠᤓᤠᤱᤈᤠᤀᤥᤒᤠ ᤆᤸᤗᤱᤏᤠ ᤂᤥᤷᤕᤠ᤺ᤴ ᤀᤠᤕᤠᤱᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤏᤥᤃᤧᤴ ᤀᤠᤒᤡᤖᤢᤶ॥ ᤜᤧᤰᤁᤩᤠᤱ ᤂᤧᤴ ᤆᤸᤗᤱᤏᤠ ᤂᤥᤷᤕᤠᤗᤠᤶ ᤀᤠᤎᤢᤅᤢᤶᤔᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤥ ᤗᤰ ᤀᤠᤔᤧᤳᤇᤡᤱ ᤔᤧ᤺ᤶᤒᤡ᥅ ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤄᤧ᤺ᤰᤂᤢᤶᤒᤠ ᤂᤖᤧ᤺ᤱᤅᤡᤴ ᤀᤠᤈᤠᤶᤔᤡᤸᤗᤧ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤗᤰ ᤀᤠᤔᤧᤳᤇᤡᤱ ᤔᤧ᤺ᤶᤒᤡ᥅
1CO 10:17 ᤀᤠᤏᤡ᤹ ᤁᤧᤖᤧᤰᤗᤧ ᤗᤳᤌᤡᤰ ᤂᤖᤧ᤺ᤱᤅᤡᤴ ᤀᤠᤈᤠᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤃ ᤕᤖᤡᤰ ᤀᤠᤘᤠ᤹ᤛᤠᤱ ᤗᤳᤇᤠ ᤏᤠᤛᤡᤱᤃᤧᤴ ᤌᤰᤁᤥᤒᤠᤛᤡᤖᤥ॥
1CO 10:18 ᤀᤡᤛᤪᤠᤀᤡᤗᤛ᤻ᤔᤠ ᤔᤏᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ–ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤈᤠ ᤁᤧᤈᤠᤒᤠᤜᤠ᤹ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥᤒᤠ ᤛᤣᤘᤠᤖᤧᤴ ᤗᤰᤔᤧᤗᤥ᤺ᤛᤡᤱᤗᤥ॥
1CO 10:19 ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠ ᤁᤥ᤺ᤳᤋᤢᤱᤗ ᤐᤳᤋᤠᤒᤣ᥅ ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤔᤏᤠᤒᤠ ᤑᤠ᤹ᤀᤡᤴ ᤌᤧᤔᤠᤒᤣ. ᤀᤡᤃᤪ ᤏᤠᤘᤠᤀᤡᤳᤗᤠᤜᤠ᤹ ᤌᤣᤛᤡᤀᤠᤱᤒᤣ᥅
1CO 10:20 ᤌᤣᤛᤡᤀᤠᤱ ᤔᤧ᤺ᤴᤗᤥ᥄ ᤁᤖ ᤂᤧᤱᤜᤠ᤹ᤖᤧ ᤔᤧᤍᤥ᤺ᤴᤍᤢᤒᤠ ᤛᤡᤍᤢᤱᤈᤓᤠ᤺ᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧ᤺ᤴ. ᤁᤖ ᤑᤧᤴᤛᤠᤶᤜᤠ᤹ᤀᤥ ᤔᤧᤍᤥ᤺ᤴᤍᤢᤒᤠᤖᤥ॥ ᤂᤡᤏᤡ᤹ ᤑᤧᤴᤛᤠᤶᤜᤠ᤹ᤏᤢ ᤔᤧᤃᤠᤶᤔᤠᤛᤡᤶᤔᤡᤴᤏᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
1CO 10:21 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤍᤠᤱᤒᤠᤸᤗᤧᤴ ᤏᤢ ᤑᤧᤴᤛᤠᤶᤔᤡᤸᤗᤧᤴ ᤆᤸᤗᤱᤏᤠ ᤂᤥᤷᤕᤠᤀᤥᤗᤠᤶ ᤛᤥᤛᤥᤖᤡᤰ ᤌᤢᤱᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤍᤠᤱᤒᤠᤸᤗᤧᤴ ᤏᤢ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤛᤠᤓᤠᤱᤈᤠᤗᤠᤶ ᤛᤥᤛᤥᤖᤡᤰ ᤆᤠᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥
1CO 10:22 ᤀᤠᤏᤡ᤹ ᤍᤠᤱᤒᤠᤸᤗᤧ ᤁᤢᤏᤠᤜᤧᤴᤗ ᤆᤥ᤺ᤰᤔᤠ ᤀᤠᤃᤥ᤺ᤳᤋᤢᤶᤒᤠᤒᤡ᥅ ᤀᤠᤏᤡ᤹ ᤂᤢᤏᤧ᤹ᤏᤢ᤺ᤸᤗᤧᤀᤠᤱ ᤁᤧᤎᤢᤶᤒᤠ ᤀᤠᤈᤥ᤺ᤰᤐᤡ᥅
1CO 10:23 ᤂᤡᤏᤡ᤹ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶ. “ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤢ᤹” ᤁᤖ ᤁᤧᤖᤧᤰᤗᤧ ᤀᤡᤴᤎᤠ᤺ᤱ ᤀᤠᤶᤒᤡᤏᤧᤴ॥ “ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤢ᤹” ᤁᤧᤒᤠ᤺ᤳᤋᤢᤶ. ᤁᤖ ᤁᤧᤖᤧᤰᤗᤧᤃ ᤕᤠ᤺ᤶᤒᤰ ᤀᤠᤶᤒᤡᤏᤧᤴᤗᤥ॥
1CO 10:24 ᤀᤠᤳᤋᤡᤸᤗᤧᤀᤠᤱ ᤀᤠᤵᤑᤣ᤺ᤰ ᤗᤠᤃᤡᤖᤰ ᤏᤢ᤺ᤒᤠ ᤐᤥ᤺ᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤁᤖ ᤘᤣ᤹ᤜᤠ᤹ᤖᤧᤗᤠᤃᤡᤀᤠᤱ ᤏᤢ᤺ᤒᤠ ᤐᤥ᤺ᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥ᤺ᤰᤔᤠ ᤐᤥ᤺ᤱᤗᤥ॥
1CO 10:25 ᤐᤠᤱᤈᤢᤶᤔᤥ ᤔᤧᤛᤱᤄᤢᤒᤠ ᤌᤣ ᤛᤠ᤺ᤛᤠᤱ ᤁᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤛᤠᤒᤡ ᤔᤧ᤺ᤶᤒᤡ ᤗ᤹ᤖᤡᤰ ᤛᤣ᤺ᤴᤔᤧᤴᤍᤥ᤺ᤀᤣ ᤆᤧᤶᤔᤧ᤹ᤀᤥ॥
1CO 10:26 ᤌᤣᤀᤠᤱᤓᤧᤸᤗᤧ “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤠᤰ ᤐᤠ᤺ᤴᤜᤠ᤹ᤃ ᤍᤠᤱᤒᤠᤸᤗᤧᤴᤏᤣᤖᤥ॥”
1CO 10:27 ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤂᤧᤏᤧ᤹ ᤆᤠᤈᤠᤛᤧ ᤁᤧᤀᤢ᤺ᤳᤋᤠᤱ ᤐᤣ᤺ᤰᤔᤠ ᤁᤧᤛᤡᤖᤠ᤹ ᤌᤠᤱᤏᤧ ᤑᤠ᤹ᤃᤪ ᤁᤧᤒᤡᤒᤠ ᤌᤧᤔᤠ ᤛᤠ᤺ᤛᤠᤱ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤛᤠᤒᤡ ᤔᤧ᤺ᤶᤒᤡ ᤗ᤹ᤖᤡᤰ ᤛᤣ᤺ᤴᤔᤧᤴᤍᤥ᤺ᤀᤣ ᤆᤩᤧ᤹ᤀᤥ॥
1CO 10:28 ᤁᤖ ᤀᤠᤳᤋᤡᤸᤗᤧ. ᤁᤱᤃ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤛᤠ ᤑᤠ᤹ᤀᤠᤱ ᤁᤧᤔᤧᤳᤏᤧ ᤑᤠ᤹ᤃᤪ ᤂᤧᤴ ᤁᤧᤒᤠ᤺ᤵᤐᤠ ᤔᤏᤠ᤺ᤸᤗᤧ ᤁᤢᤄᤠᤛᤡᤱᤗᤧ ᤗᤠᤃᤡ ᤂᤧᤴ ᤛᤠ᤺ᤴ ᤔᤧᤈᤩᤧᤴᤏᤧ᤹ᤀᤥ॥
1CO 10:29 ᤁᤧᤏᤡᤱᤘᤠ᤹ᤖᤧ ᤔᤧᤕᤧ᤺ᤰᤂᤢᤴᤇᤠᤱ ᤂᤧᤴ ᤁᤧᤒᤠ᤺ᤵᤐᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ᤖᤧ ᤕᤧ᤺ᤰᤂᤢᤒᤡᤗᤠ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠᤖᤥ॥ ᤀᤠᤸᤗ ᤂᤡᤏᤡ᤹ ᤁᤢᤓᤠᤖᤧ ᤀᤰᤂᤣ ᤁᤧᤒᤠ᤺ᤳᤋᤢᤶᤒᤡᤗᤠ. “ᤌᤣᤀᤠᤱ ᤘᤣ᤹ ᤔᤏᤠ᤺ᤸᤗᤧ ᤁᤢᤄᤠᤛᤡᤱᤅᤡᤸᤗᤧ ᤀᤠᤈᤥ᤺ᤰᤕᤢᤶᤓᤥ᤺ᤴ ᤛᤠᤰᤋᤢᤒᤠᤒᤣ᥅
1CO 10:30 ᤀᤡᤱᤃᤠ᤹ ᤏᤥᤃᤧᤴ ᤐᤡᤖᤢᤱᤗ ᤆᤠᤱᤏᤧ ᤑᤠ᤹ᤃᤪ ᤌᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤒᤠ ᤐᤠ᤺ᤴᤏᤥ ᤘᤣ᤹ᤜᤠ᤹ ᤀᤡᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤆᤧ᤹ᤕᤠ ᤀᤡᤱᤍᤥ ᤔᤧᤒᤠ᤺ᤵᤐᤠᤒᤣ᥅”
1CO 10:31 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤌᤣ ᤁᤧᤈᤠᤶ. ᤌᤣ ᤁᤧᤎᤢᤅᤢᤶ ᤜᤧᤰᤁᤩᤠᤱ ᤌᤣ ᤁᤧᤈᤥᤃᤢᤶᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤗᤠᤃᤡ ᤁᤠᤰ ᤆᤥᤃᤧᤶᤔᤧ᤹ᤀᤥ॥
1CO 10:32 ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤗᤠᤶᤒᤠ ᤕᤜᤢᤍᤡ ᤀᤡᤃᤪ ᤘᤣ᤹ ᤛᤢᤘᤠᤱᤒᤠ ᤔᤏᤠ᤺ᤴ ᤀᤡᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤴ ᤂ᤺ᤛᤢᤖ ᤔᤧᤕᤠ᤺ᤴᤍᤠᤶᤔᤡᤴᤏᤧ᤹ᤀᤥ॥
1CO 10:33 ᤀᤡᤱᤃᤠ᤹ᤀᤠᤱ ᤁᤠᤰ ᤐᤖᤡᤰᤗᤧᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡ ᤀᤡ᤺ᤳᤋᤢᤱᤗᤥ॥ ᤀᤡᤱᤃᤠ᤹ᤃ ᤀᤠᤒᤠᤅᤣ ᤏᤢ᤺ᤒᤠ ᤐᤥ᤺ᤱᤔᤠ ᤔᤧᤃᤥ᤺ᤳᤋᤠᤴ ᤁᤖ ᤔᤏᤠᤜᤠ᤹ ᤋᤠᤱᤔᤧᤛᤧ᤺ᤵᤗ ᤑᤠ᤹ᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡ ᤏᤢ᤺ᤒᤠ ᤐᤥ᤺ᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥
1CO 11:1 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤈᤥ᤺ᤱ ᤀᤡ᤺ᤳᤋᤢᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ ᤀᤠᤈᤥ᤺ᤱ ᤀᤡ᤺ᤳᤋᤧᤶᤔᤧ᤹ᤀᤥ॥
1CO 11:2 ᤀᤠᤸᤗ ᤁᤠᤰ ᤐᤠ᤺ᤴᤏᤥ ᤕᤠᤵᤔᤡ ᤏᤡᤱᤘᤠ᤹ ᤁᤧᤀᤡ᤺ᤳᤋᤡᤒᤠ ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤢ᤹ᤏᤡᤱᤒᤠ ᤏᤡᤛᤠᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤒᤠᤀᤥ ᤂᤡᤏᤡ᤹ ᤏᤠᤖᤠ ᤑᤥ᤺ᤛᤢᤱᤗᤥ॥
1CO 11:3 ᤜᤧᤰᤁᤩᤠᤱ ᤕᤧᤶᤒᤡᤳᤇᤠ᤹ᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤐᤠᤱᤃ ᤂᤪᤡᤛ᤻ᤋᤖᤥ. ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤐᤠᤱᤃ ᤂᤢᤏᤡ᤹ ᤕᤧᤶᤒᤠ᤹ᤖᤥ. ᤜᤧᤰᤁᤩᤠᤱ ᤂᤪᤡᤛ᤻ᤋᤖᤧ ᤁᤢᤎᤧᤃᤣ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥ᤺ᤛᤧᤶᤔᤧ᤹ ᤑᤠ᤹ᤀᤠᤱ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
1CO 11:4 ᤁᤢᤎᤧᤃᤣ᤺ᤰ ᤁᤧᤍᤧᤵᤐᤠᤀᤠᤱ ᤋᤢᤘᤠ ᤁᤧᤈᤥ᤺ᤰᤐᤠ ᤀᤡᤃᤪ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤎᤧᤃᤣ᤺ᤰᤐᤠ ᤂᤪᤡᤛ᤻ᤋᤧᤴ ᤜᤡᤏᤠ᤺ᤶ ᤔᤧᤳᤋᤢ᤹ᤖᤥ॥
1CO 11:5 ᤁᤢᤎᤧᤃᤣ᤺ᤰ ᤔᤧᤴᤍᤧᤵᤐᤣ ᤋᤢᤘᤠ ᤁᤧᤈᤥ᤺ᤰᤔᤠ ᤀᤡᤃᤪ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤎᤧᤃᤣ᤺ᤰ ᤁᤢᤕᤧᤶᤒᤠ᤹ᤀᤡᤴ ᤜᤡᤏᤠ᤺ᤶ ᤔᤧᤳᤋᤢ᤹ᤖᤥ॥ ᤁᤱᤃ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤧᤴ ᤏ᤺ᤰᤂᤢᤒᤠ ᤁᤢᤀᤡᤛᤡ᤺ᤰᤗᤥ॥
1CO 11:6 ᤁᤢᤎᤧᤃᤣ᤺ᤰ ᤔᤧᤴᤍᤧᤵᤔᤏᤠᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤎᤧᤃᤣ᤺ᤰᤐᤧᤴ ᤏ᤺ᤰᤂᤢᤖᤖᤥ॥ ᤜᤧᤰᤁᤩᤠᤱ ᤌᤧᤃᤣ᤺ᤰᤀᤡ᤺ᤴ ᤂᤰᤔᤠ ᤀᤡᤃᤪ ᤏ᤺ᤱᤔᤠᤱᤃ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤗᤠᤃᤡ ᤁᤢᤈᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤠ᤺ᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤧᤴ ᤋᤧᤵᤔᤠ ᤐᤥ᤺ᤱᤗᤥ॥
1CO 11:7 ᤁᤖ ᤕᤧᤶᤒᤡᤳᤇᤠ᤹ᤀᤡᤸᤗᤧᤃ ᤌᤧᤃᤣ᤺ᤰᤐᤧᤴ ᤋᤧᤵᤔᤠ ᤔᤧᤏᤢ᤹ᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡ᤺ᤳ ᤏᤢ ᤁᤢᤔᤡᤔᤡᤍᤡᤱᤗᤥ॥ ᤁᤖ ᤔᤧᤴᤇᤢᤔᤠ᤹ᤀᤡᤱᤃ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤡᤔᤡᤍᤡᤱᤗᤥ॥
1CO 11:8 ᤌᤣᤀᤠᤱᤓᤧᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤕᤧᤶᤒᤡᤳᤇᤠ᤹ᤀᤡᤱᤃ ᤔᤧᤴᤇᤢᤔᤠ᤹ᤗᤠᤶᤒᤠ ᤔᤧᤈᤥᤃᤧᤴ ᤁᤖ ᤔᤧᤴᤇᤢᤔᤠ᤹ᤀᤡᤴᤏᤣ ᤕᤧᤶᤒᤡᤳᤇᤠ᤹ᤗᤠᤶ ᤆᤥ᤺ᤰᤔᤏᤠᤔᤠᤖᤥ॥
1CO 11:9 ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤡᤳᤇᤠ᤹ᤀᤡᤱᤃ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤗᤠᤃᤡ ᤔᤧᤈᤥᤃᤧᤴ. ᤁᤖ ᤔᤧᤴᤇᤢᤔᤠ᤹ᤀᤡᤴᤏᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤗᤠᤃᤡ ᤆᤥᤃᤧᤒᤠᤖᤥ॥
1CO 11:10 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤀᤠᤕᤧᤶᤒᤠ᤹ᤀᤡᤸᤗᤧ ᤁᤢᤕᤢᤰᤁᤥ ᤘᤠ᤹ᤀᤠ ᤁᤧᤗ᤹ᤒᤠ ᤔᤡᤰᤛᤣ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤛᤧ ᤁᤢᤎᤧᤃᤣ᤺ᤰᤐᤧᤴ ᤋᤧᤵᤔᤠ ᤐᤥ᤺ᤱᤗᤥ॥
1CO 11:11 ᤁᤖ ᤍᤠᤱᤒᤠᤸᤗᤧ ᤁᤢᤔᤏᤠ ᤗᤢᤶᤔᤥᤃ ᤔᤧᤴᤇᤢᤔᤠ᤹ᤀᤡᤴ ᤕᤧᤶᤒᤡᤳᤇᤠ᤹ᤗᤠᤶᤒᤠ ᤆᤥ᤺ᤁᤩᤢᤶᤓᤥᤔᤠ ᤜᤥ᤺ᤵᤗᤥ. ᤜᤧᤰᤁᤩᤠᤱ ᤕᤧᤶᤒᤡᤳᤇᤠ᤹ᤀᤡᤴᤏᤠᤱ ᤔᤧᤴᤇᤢᤔᤠ᤹ᤗᤠᤶᤒᤠ ᤆᤥ᤺ᤰᤕᤢᤶᤓᤥᤒᤠ ᤜᤥ᤺ᤵᤗᤥ॥
1CO 11:12 ᤌᤣᤀᤠᤱᤓᤧᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤔᤧᤴᤇᤢᤔᤠ᤹ᤀᤡᤴ ᤕᤧᤶᤒᤡᤳᤇᤠ᤹ᤗᤠᤶᤒᤠ ᤗ᤺ᤳᤋᤧᤀᤠᤱ ᤘᤕᤧᤛᤠᤱ ᤁᤠᤰ ᤕᤧᤶᤒᤡᤳᤇᤠ᤹ᤜᤠ᤹ᤃ ᤔᤧᤴᤇᤢᤔᤠᤜᤠ᤹ᤗᤠᤶᤒᤠᤀᤣ ᤛᤠᤔᤧᤘᤠ᤺ᤴᤇᤡᤱᤗᤥ॥ ᤁᤖ ᤁᤠᤰ ᤐᤠ᤺ᤴᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤋᤠ᤺ᤖᤥ॥
1CO 11:13 ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤎᤧᤃᤣ᤺ᤰᤐᤧᤴ ᤔᤧᤴᤍᤧᤵᤐᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤋᤢᤘᤠ ᤆᤥ᤺ᤰᤔᤠ ᤗᤠ᤹ᤖᤢᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤀᤠᤒᤠᤅᤣ ᤀᤡ᤺ᤳᤋᤧᤶᤔᤧ᤹ᤀᤥ॥
1CO 11:14 ᤕᤧᤶᤒᤡᤳᤇᤠ᤹ᤀᤡᤸᤗᤧᤃ ᤁᤣ᤺ᤶᤒᤠ ᤌᤧᤃᤣ᤺ᤰᤀᤡ ᤜᤡᤱᤔᤠᤃ ᤁᤢᤗᤠᤃᤡ ᤆᤠ᤺ᤳᤌᤡ ᤁᤧᤒᤣ᤺ᤰᤐᤠ ᤐᤠ᤺ᤴᤗᤥ ᤑᤠ᤹ᤀᤠᤱ ᤆᤀᤡ᤺ᤳᤗᤠᤶᤒᤠᤀᤣ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥
1CO 11:15 ᤁᤖ ᤔᤧᤴᤇᤢᤔᤠ᤹ᤀᤡᤸᤗᤧᤃ ᤁᤣ᤺ᤶᤒᤠ ᤌᤧᤃᤣ᤺ᤰᤀᤡ ᤁᤳᤋᤢ᤹ᤏᤧ ᤑᤠ᤹ᤃᤪ. ᤂᤧᤴ ᤂᤧᤸᤗᤧ ᤁᤢᤔᤡᤔᤡᤍᤡᤱᤗᤥ. ᤌᤣᤀᤠᤱᤓᤧᤸᤗᤧ ᤁᤣ᤺ᤶᤒᤠ ᤁᤢᤎᤧᤃᤣ᤺ᤰᤀᤡ᤺ᤱᤃ ᤂᤢᤏᤧ᤹ ᤁᤢᤄᤢ᤺ᤱᤔᤠ ᤐᤥ᤺ᤱᤗ ᤑᤠ᤹ᤀᤠᤱ ᤐᤡᤖᤧᤒᤠᤖᤥ॥
1CO 11:16 ᤂᤧᤸᤗᤧ ᤆᤥᤃᤢᤸᤗᤧ ᤁᤢᤓᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤏᤥ ᤐᤠ᤺ᤴᤎᤱ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤏᤧ ᤑᤠ᤹ᤃᤪ ᤀᤠᤏᤡᤃᤧ ᤘᤣ᤹ ᤌᤡᤶ ᤔᤧᤃᤳᤋᤢᤶᤒᤠᤴ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤸᤗᤧᤀᤠᤱ ᤔᤧᤃᤳᤋᤢᤴᤗᤥ॥
1CO 11:17 ᤀᤠᤸᤗ ᤁᤴ ᤀᤡᤱᤈᤠ᤺ᤱᤅᤡᤴ ᤂᤡᤏᤡ᤹ ᤐᤡᤏᤡᤱᤅᤡᤸᤗᤧ ᤂᤡᤏᤡ᤹ ᤏᤠᤖᤠ ᤔᤧᤓᤥ᤺ᤛᤢᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤏᤢ᤺ᤒᤠ ᤐᤠ᤺ᤴ ᤔᤧ᤺ᤴ. ᤁᤖ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤁᤧᤈᤥᤃᤢᤶᤗᤥ॥
1CO 11:18 ᤌᤣᤀᤠᤱᤓᤧᤸᤗᤧ ᤁᤠᤰᤏᤢ ᤋᤃᤡᤃ ᤂᤡᤏᤡ᤹ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤁᤧᤛᤧᤴᤏᤠᤛᤡᤔᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤥ ᤔᤡᤛᤠᤰ ᤏᤛᤠ᤺ᤴᤏᤠᤱ ᤆᤥᤃᤢᤱᤗᤥ॥
1CO 11:19 ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤛᤡᤒᤠᤜᤠ᤹ ᤘᤣ᤹ ᤔᤧᤎᤠ᤺ᤵᤗ ᤑᤠ᤹ᤀᤠᤱ ᤛᤧᤴᤇᤡᤱᤔᤠᤀᤣ ᤐᤥ᤺ᤱᤗᤥ॥
1CO 11:20 ᤂᤡᤏᤡ᤹ ᤛᤥᤖᤡᤰ ᤁᤧᤈᤢᤵᤛᤡᤀᤠᤱ ᤁᤧᤈᤠᤶ ᤁᤧᤎᤢᤅᤢᤶᤒᤠᤱᤃ ᤍᤠᤱᤒᤠᤸᤗᤧᤴ ᤛᤠᤓᤠᤱᤈᤠ ᤔᤧ᤺ᤴᤗᤥ॥
1CO 11:21 ᤌᤣᤀᤠᤱᤓᤧᤸᤗᤧ ᤆᤠᤈᤠᤛᤧ ᤁᤧᤕᤢᤱᤅᤠᤛᤡᤸᤗᤧ ᤁᤧᤖᤧᤰᤗᤧ ᤀᤠᤳᤋᤡᤴᤏᤠᤱ ᤔᤧᤴᤜᤠᤱᤅᤣ ᤀᤠᤒᤠᤅᤣ ᤆᤠ᤺ᤴ ᤆᤠᤔᤠ ᤁᤧᤜᤣ᤺ᤰᤋᤢᤶ. ᤜᤧᤰᤁᤩᤠᤱ ᤁᤢᤓᤠ ᤛᤠᤰᤔᤧᤴᤈᤠ ᤔᤧᤒᤥ᤺ᤱ. ᤁᤢᤓᤠ ᤔᤧᤔᤛᤡᤱᤗᤥ॥
1CO 11:22 ᤂᤡᤏᤡ᤹ ᤜᤡᤶᤔᤥ ᤆᤠᤔᤠ ᤌᤢᤱᤔᤠ ᤁᤧᤴᤇᤢᤰᤋᤢᤶᤔᤡᤶᤒᤡ᥅ ᤀᤡᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤴ ᤁᤢᤏᤠ ᤁᤧᤴᤇᤠ᤹ᤖᤢᤶᤔᤡᤴᤏᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤏᤢ ᤌᤣᤀᤠᤱ ᤔᤧᤱᤃᤵᤔᤏᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠ ᤁᤧᤎᤠᤛᤢᤶ ᤁᤧᤒᤡᤖᤢᤶᤛᤡᤶᤒᤠᤒᤡ᥅ ᤀᤠᤰᤂᤣ ᤔᤧᤳᤏᤡᤱᤒᤠᤒᤣ᥅ ᤌᤣ ᤁᤴ ᤐᤠ᤺ᤴᤏᤥ ᤂᤡᤏᤡ᤹ ᤏᤠᤖᤠ ᤑᤥ᤺ᤛᤢᤱᤒᤠᤒᤡ᥅ ᤛᤧᤰᤂᤠᤛᤠᤱ ᤔᤧᤓᤥ᤺ᤛᤢᤱᤅᤡᤴᤗᤥ᥄
1CO 11:23 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤗᤠᤶ ᤂᤥ᤺ᤛᤢᤱᤒᤠ ᤏᤡᤛᤠᤶᤔᤡᤴ ᤂᤡᤏᤡ᤹ ᤐᤡᤏᤡᤱᤅᤠᤱ ᤘᤠ᤹ᤀᤠᤖᤥ–ᤍᤠᤱᤒᤠ ᤕᤧᤛᤢ᤺ᤴ ᤀᤡᤱᤗᤧᤰᤋᤧᤒᤠ ᤛᤧᤴᤍᤡᤰ ᤂᤢᤏᤧ᤹ ᤂᤖᤧ᤺ᤱᤅᤡᤴ ᤂᤵᤛᤢ.
1CO 11:24 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤖᤧ᤺ᤱᤅᤡᤴ ᤂᤧ᤺ᤰᤂᤢᤖ ᤀᤰᤂᤣ ᤔᤧᤳᤋᤢᤛᤡ. “ᤁᤴ ᤂᤡᤏᤡ᤹ ᤗᤠᤃᤡ ᤏᤠᤛᤡᤱᤃᤧᤴ ᤀᤠᤎᤰᤗᤥ॥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”
1CO 11:25 ᤜᤧᤰᤁᤣᤗ᤹ᤖᤡᤰᤁᤣ ᤔᤧᤈ ᤔᤧᤛᤢᤖᤢᤀᤠᤱ ᤆᤸᤗᤱᤏᤠ ᤂᤥᤷᤕᤠ᤺ᤴ ᤕᤠᤱᤛᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ. “ᤁᤴ ᤀᤠᤔᤠᤰᤂᤡ᤹ᤀᤡᤴ ᤘᤍᤣ᤺ᤴᤍᤧᤀᤠᤱ ᤏᤡ᤺ᤴᤎᤥ ᤐᤥ᤺ᤰᤂᤧᤒᤠ ᤁᤢᤛᤱ ᤔᤠᤱᤜᤢᤵᤐᤡᤴᤗᤥ॥ ᤁᤴ ᤁᤧᤎᤢᤅᤢᤶᤔᤡᤸᤗᤧ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤛᤥᤀᤥ ᤀᤰᤂᤣ ᤆᤥᤃᤧᤶᤔᤧ᤹ᤀᤥ॥”
1CO 11:26 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤴ ᤂᤖᤧ᤺ᤱᤅᤡᤴ ᤁᤧᤈᤠᤶᤔᤡᤸᤗᤧ ᤜᤧᤰᤁᤩᤠᤱ ᤁᤴ ᤂᤥᤷᤕᤠᤗᤠᤶ ᤁᤧᤎᤢᤅᤢᤶᤔᤡᤸᤗᤧ ᤍᤠᤱᤒᤠᤴ ᤔᤧᤴᤕᤢ᤺ᤀᤣ ᤌᤠᤖᤡᤰ ᤁᤢᤛᤡ᤺ᤔᤧᤴ ᤀᤡᤱᤃᤧᤓᤥ᤺ᤛᤢᤶᤗᤥ॥
1CO 11:27 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤸᤗᤧ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖ ᤍᤠᤱᤒᤠᤸᤗᤧ ᤁᤢᤄᤖᤧ᤺ᤱᤅᤡᤴ ᤆ᤹᤺ ᤜᤧᤰᤁᤩᤠᤱ ᤁᤢᤄᤥᤷᤕᤠᤗᤠᤶ ᤌᤢᤅᤢ᤹ ᤂᤧᤸᤗᤧ ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤏᤢ ᤁᤢᤔᤠᤰᤂᤡ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤖᤥ॥
1CO 11:28 ᤂᤖᤧ᤺ᤱ ᤆᤠᤔᤠ ᤏᤢ ᤂᤥᤷᤕᤠᤗᤠᤶ ᤌᤢᤱᤔᤠᤏᤢ᤺ᤸᤗᤧ ᤋᤃᤡ ᤁᤧᤖᤧᤰᤗᤧ ᤀᤡᤱᤃᤠ᤹ ᤛᤢᤶᤒᤥᤎᤠᤒᤠ ᤆᤥ᤺ᤰᤁᤠᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤀᤠᤒᤠᤅᤣ ᤛᤠ᤹ᤛᤡᤱᤔᤠ ᤐᤥ᤺ᤱᤗᤥ॥
1CO 11:29 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤀᤡᤱᤎᤠ᤺ᤱ ᤔᤧᤶᤒᤡᤀᤣ ᤂᤖᤧ᤺ᤱᤅᤡᤴ ᤆ᤹᤺ ᤜᤧᤰᤁᤩᤠᤱ ᤂᤥᤷᤕᤠᤗᤠᤶ ᤌᤢᤅᤢ᤹ ᤂᤧᤸᤗᤧ ᤀᤠᤒᤠᤅᤣ ᤁᤢᤛᤶᤍᤠᤱ ᤂᤠᤛᤧᤴᤏᤡᤴ ᤋᤠᤖᤢᤖᤥ॥
1CO 11:30 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤂᤡᤏᤡ᤹ ᤗᤢᤶᤔᤥ ᤕᤖᤡᤰ ᤕᤧ᤺ᤱᤄᤡ᤺ᤰᤂᤡ᤺ᤰᤐᤠᤜᤠ᤹ ᤏᤢ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤁᤧᤘᤕᤡ᤹॥ ᤜᤧᤰᤁᤩᤠᤱ ᤁᤢᤓᤠᤃ ᤔᤧᤛᤩᤧ ᤔᤧᤒᤣᤀᤠᤱᤗᤥ॥
1CO 11:31 ᤁᤖ ᤀᤠᤒᤠᤅᤣ ᤀᤠᤏᤡ᤹ ᤏᤡᤱᤘᤠ᤹ᤀᤡᤴ ᤛᤧᤰᤂᤠᤀᤣ ᤀᤠᤛᤠ᤹ᤖᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢ ᤂᤢᤶᤍᤡᤱᤅᤥ ᤀᤠᤴᤎᤠᤏᤧᤴᤗᤥ॥
1CO 11:32 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤂᤠᤛᤧᤴ ᤀᤠᤈᤥ᤺ᤰᤁᤡᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰᤁᤣ ᤑᤥᤋᤩᤠᤀᤥ ᤀᤠᤴᤎᤠ᤺ᤴᤏᤧᤴᤗ ᤑᤠ᤹ᤀᤠᤱ ᤜᤧᤴᤎᤡᤶ ᤀᤠᤕᤠᤰᤗᤥ॥
1CO 11:33 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤆᤠᤔᤠ ᤌᤢᤱᤔᤠᤀᤥ ᤁᤧᤈᤢᤵᤛᤡᤸᤗᤧ ᤜᤠᤱᤅᤠᤛᤡᤶᤔᤧ᤹ᤀᤥ॥
1CO 11:34 ᤀᤠᤳᤋᤡᤴ ᤛᤠᤰᤔᤧᤴᤈᤠ ᤘᤠ᤹. ᤂᤧᤸᤗᤧ ᤜᤠᤖᤠ᤹ ᤜᤡᤶᤔᤥᤀᤣ ᤆᤀᤠᤱ ᤋᤠᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤌᤡᤰᤋᤧᤴᤏᤥ ᤁᤧᤈᤢᤵᤛᤡᤸᤗᤧ ᤂᤢᤶᤍᤡᤱᤅᤥ ᤁᤧᤴᤎᤩᤧ᤹ᤀᤡᤴᤗᤖᤥ॥ ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤘᤣ᤹ ᤐᤠ᤺ᤴᤜᤠ᤹ᤖᤧᤴ ᤀᤥ᤺ᤴᤎᤠᤰ ᤐᤡᤏᤡᤱᤗᤥ॥
1CO 12:1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤛᤣᤛᤣᤔᤠᤱᤗᤠᤶᤒᤠᤒᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤕᤡᤒᤠ ᤀᤠᤏᤡᤱᤘᤠ᤹ ᤜᤥ᤺ᤵᤗᤥ॥
1CO 12:2 ᤍᤠᤱᤒᤠ ᤕᤧᤛᤢ᤺ᤴ ᤂᤡᤏᤡ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤁᤧᤘᤕᤡᤸᤗᤧ ᤁᤢᤒᤠ᤺ᤴ ᤔᤧᤴᤗ᤺ᤶᤔᤏᤠ ᤕᤖᤡᤰ ᤐᤖᤡᤰᤐᤠ ᤏᤠᤘᤠᤀᤡᤳᤗᤠᤜᤠ᤹ ᤔᤠᤱᤃᤧᤄᤕᤢᤶᤗ ᤋᤠᤵᤁᤧᤒᤧ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥
1CO 12:3 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤒᤠ ᤀᤠᤳᤋᤡᤸᤗᤧᤀᤠᤱ ᤕᤧᤛᤢ᤺ᤴ ᤛᤠᤱᤃᤪᤠ ᤔᤧᤵᤔᤠ ᤔᤧᤛᤢᤰᤋᤢᤴᤗᤥ. ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤔᤧᤸᤗᤥ᤺ᤀᤣ ᤌᤠᤖᤡᤰ ᤀᤠᤳᤋᤡᤸᤗᤧᤀᤠᤱ ᤕᤧᤛᤢ᤺ᤴᤏᤣ ᤍᤠᤱᤒᤠᤖᤥ ᤐᤠ᤺ᤵᤔᤠ ᤔᤧᤛᤢᤰᤋᤢᤴ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹॥
1CO 12:4 ᤀᤠᤸᤗ ᤕᤖᤡᤰ ᤐᤖᤡᤰᤐᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤔᤧᤘᤠ᤹. ᤁᤖ ᤐᤷᤎᤠ᤺ᤶ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤗᤳᤌᤡᤰᤗᤰ ᤘᤠ᤹ᤖᤥ॥
1CO 12:5 ᤜᤧᤰᤁᤣᤗ᤹ᤖᤡᤰᤁᤣ ᤕᤖᤡᤰ ᤐᤖᤡᤰᤐᤠ ᤔᤠᤱᤛᤣᤘᤠᤜᤠ᤹ ᤔᤧᤘᤠ᤹. ᤁᤖ ᤍᤠᤱᤒᤠᤃ ᤗᤳᤌᤡᤰᤗᤰ ᤘᤠ᤹ᤖᤥ॥
1CO 12:6 ᤜᤧᤰᤁᤣᤗ᤹ᤖᤡᤰᤁᤣ ᤕᤖᤡᤰ ᤐᤖᤡᤰᤐᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤛᤢᤰᤋᤢᤶ. ᤁᤖ ᤒᤠ ᤗᤳᤇᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤁᤧᤖᤧᤰᤗᤠᤶ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥
1CO 12:7 ᤀᤠᤸᤗ ᤛᤣᤛᤣᤜᤢᤵᤗᤰᤁᤥ ᤁᤢᤓᤠ᤹ ᤐᤡᤛᤡᤱᤔᤠᤖᤧ ᤗᤠᤃᤡ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤌᤠ᤺ᤵᤗ ᤑᤠ᤹ᤀᤠᤱ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤁᤠᤰ ᤔᤏᤠᤜᤠ᤹ ᤗᤳᤇᤠᤀᤠᤱ ᤔᤧᤴᤇᤧᤴᤇᤡᤱᤅᤣ ᤐᤡᤖᤧᤀᤠᤱ ᤘᤠ᤹ᤖᤥ॥
1CO 12:8 ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤌᤡᤰᤁᤡᤴ ᤛᤡᤰᤁᤢᤶᤗᤧᤴ ᤐᤠ᤺ᤴᤈᤠᤰ ᤐᤡᤖᤢ᤹. ᤘᤣ᤹ᤛ᤻ᤔᤠᤴ ᤜᤠᤒᤠ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤖᤧᤴ ᤐᤠ᤺ᤴᤈᤠᤰ ᤐᤡᤖᤢ᤹॥
1CO 12:9 ᤘᤣ᤹ᤛ᤻ᤔᤠᤴ ᤜᤠᤒᤠ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤏᤛᤠ᤺ᤴᤗᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ. ᤜᤧᤰᤁᤩᤠᤱ ᤘᤣ᤹ᤀᤡᤴ ᤁᤧᤍᤢᤰᤐᤠ ᤘᤣ᤺ᤶᤔᤠ ᤐᤷᤎᤠ᤺ᤶᤜᤠ᤹ ᤒᤠ ᤂᤧᤴ ᤗᤳᤇᤠ ᤛᤣᤛᤣᤔᤠᤱᤅᤡᤸᤗᤧ ᤐᤡᤖᤢ᤹॥
1CO 12:10 ᤘᤣ᤹ᤛ᤻ᤔᤠᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤘᤣ᤹ᤛ᤻ᤔᤠᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤘᤣ᤹ᤛ᤻ᤔᤠᤴ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠᤶᤛᤠᤶᤜᤠ᤹ ᤛᤧᤶᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤐᤖᤡᤰ ᤐᤖᤡᤰᤐᤠ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤐᤠ᤺ᤵᤔᤠ ᤐᤷᤎᤠ᤺ᤶ ᤐᤡᤖᤢ᤹. ᤜᤧᤰᤁᤩᤠᤱ ᤘᤣ᤹ᤛ᤻ᤔᤠᤴ ᤂᤧᤴ ᤐᤠ᤺ᤴᤍᤠᤱᤜᤠ᤹ ᤗᤧᤱᤔᤠ ᤐᤷᤎᤠ᤺ᤶ ᤐᤡᤖᤢ᤹ᤖᤥ॥
1CO 12:11 ᤁᤱᤜᤠ᤹ ᤁᤧᤖᤧᤰ ᤗᤳᤇᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤛᤡᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤃ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤴ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤗᤳᤇᤠᤀᤠᤱ ᤔᤧᤴᤇᤧᤴᤇᤡᤱᤅᤣ ᤁᤧᤖᤧᤰ ᤐᤡᤖᤢᤛᤡ᤹ᤖᤥ॥
1CO 12:12 ᤏᤠᤛᤡᤱᤃᤧᤴ ᤌᤰᤁᤥ ᤕᤖᤡᤰ ᤕᤠᤶᤗᤰᤜᤠ᤹ ᤔᤧᤒᤳᤗᤥ॥ ᤁᤴ ᤘᤣ᤹ ᤘᤣ᤹ ᤕᤠᤶᤗᤰᤜᤠ᤹ᤗᤠᤶ ᤗᤳᤇᤠ ᤏᤠᤛᤡᤱᤃᤧᤴ ᤌᤰ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤪᤡᤛ᤻ᤋᤖᤧ ᤁᤢᤎᤰᤁᤡᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤆᤥ᤺ᤰᤗᤥ॥
1CO 12:13 ᤒᤠ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤕᤜᤢᤍᤡ. ᤌᤡᤶᤔᤧᤴᤍᤱ ᤛᤢᤘᤠᤱᤒᤠ. ᤕᤥ᤺ᤰ ᤀᤡᤃᤪ ᤆᤥ᤺ᤰᤕᤢᤶᤓᤥᤒᤠ ᤀᤠᤳᤋᤡᤴᤇᤠᤱ ᤌᤡᤰ ᤛᤣᤛᤣᤔᤠᤱᤅᤡᤸᤗᤧ ᤌᤡᤰ ᤌᤰᤁᤥ ᤒᤵᤋᤡᤛ᤻ᤔᤠ ᤀᤠᤈᤥᤃᤧᤀᤠᤱ ᤘᤠ᤹॥ ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰᤗᤧ ᤗᤳᤇᤠ ᤛᤣᤛᤣᤔᤠᤱ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥
1CO 12:14 ᤀᤠᤸᤗ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤗᤳᤌᤡᤰ ᤕᤠᤶᤗᤰᤗᤧᤖᤰ ᤔᤧ᤺ᤴ. ᤁᤖ ᤕᤖᤡᤰ ᤕᤠᤶᤗᤰᤜᤠ᤹ᤖᤧ ᤆᤥᤃᤧᤀᤠᤱ ᤘᤠ᤹ᤖᤥ॥
1CO 12:15 ᤀᤠᤸᤗ ᤗᤠᤱᤅᤡᤸᤗᤧ “ᤀᤡᤱᤃᤠ᤹ ᤜᤢᤰ ᤔᤧ᤺ᤴᤀᤠ. ᤜᤧᤰᤁᤣᤗ᤹ᤖᤡᤰ ᤁᤴ ᤌᤰᤁᤥᤒᤠ ᤕᤠᤶᤗᤰ ᤔᤧ᤺ᤴᤏᤠᤖᤥ” ᤐᤠ᤺ᤳᤋᤢ᤹ᤛᤠᤱ ᤂᤧᤴ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤕᤠᤶᤗᤰ ᤔᤧᤒᤥ᤺ᤱᤏᤧᤴᤒᤡ᥅
1CO 12:16 ᤜᤧᤰᤁᤣᤗ᤹ᤖᤡᤰᤁᤣ ᤏᤧᤰᤂᤥ᤹ᤀᤡᤸᤗᤧ “ᤀᤡᤱᤃᤠ᤹ ᤔᤡᤰ ᤔᤧ᤺ᤴᤀᤠ. ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤌᤰᤁᤥᤒᤠ ᤕᤠᤶᤗᤰ ᤔᤧ᤺ᤴᤏᤠᤖᤥ” ᤐᤠ᤺ᤳᤋᤢ᤹ᤛᤠᤱ ᤂᤧᤴ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤕᤠᤶᤗᤰ ᤔᤧᤒᤥ᤺ᤱᤏᤧᤴᤒᤡ᥅
1CO 12:17 ᤁᤠᤰ ᤏᤠᤛᤡᤱᤃᤧᤴ ᤌᤰᤁᤡᤴᤏᤣ ᤔᤡᤰ ᤐᤥ᤺ᤰᤂᤧᤸᤗᤧᤃ. ᤌᤣ᤺ᤸᤗᤧ ᤂᤧᤶᤔᤏᤠᤒᤠᤒᤣ᥅ ᤁᤠᤰ ᤏᤠᤛᤡᤱᤃᤧᤴ ᤌᤰᤁᤡᤴᤏᤣ ᤏᤧᤰᤂᤥ᤹ ᤐᤥ᤺ᤰᤂᤧᤸᤗᤧᤃ. ᤌᤣ᤺ᤸᤗᤧ ᤏᤠᤶᤔᤏᤠᤒᤠᤒᤣ᥅
1CO 12:18 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤠᤰ ᤕᤠᤶᤗᤰᤜᤠ᤹ ᤀᤠᤒᤠᤅᤣ ᤋᤧᤴᤏᤥ ᤑᤳᤇᤢᤛᤡᤀᤠᤱ ᤐᤳᤗᤥ॥
1CO 12:19 ᤁᤠᤰ ᤕᤠᤶᤗᤰᤁᤡᤴᤏᤣ ᤌᤡᤰ ᤕᤠᤶᤗᤰᤗᤰ ᤐᤥ᤺ᤰᤂᤧᤸᤗᤧᤃ. ᤏᤠᤛᤡᤱᤃᤧᤴ ᤌᤰᤁᤡᤴ ᤀᤠᤳᤋᤥ ᤘᤕᤧᤒᤠᤒᤣ᥅
1CO 12:20 ᤁᤖ ᤀᤠᤸᤗ ᤕᤖᤡᤰ ᤕᤠᤶᤗᤰᤜᤠ᤹ ᤔᤧᤒᤳᤇᤠᤱ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤗᤳᤌᤡᤰᤗᤰ ᤘᤠ᤹ᤖᤥ॥
1CO 12:21 ᤔᤡᤰᤁᤡᤸᤗᤧ ᤜᤢᤰᤁᤡᤴ “ᤀᤡᤱᤃᤠ᤹ ᤂᤧᤏᤧ᤹ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ” ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥ ᤜᤧᤰᤁᤩᤠᤱ ᤌᤧᤃᤣ᤺ᤰᤁᤡᤸᤗᤧᤀᤠᤱ ᤗᤠᤱᤅᤡᤴ “ᤀᤡᤱᤃᤠ᤹ ᤂᤧᤏᤧ᤹ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴᤗᤥ” ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥
1CO 12:22 ᤛᤧᤰᤂᤠ᤺ᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤕᤧ᤺ᤱᤄᤡ᤺ᤰᤂᤡ᤺ᤰᤐᤠ ᤁᤧᤎᤠ᤺ᤵᤐᤠ ᤕᤠᤶᤗᤰᤜᤠ᤹ᤃ ᤛᤠ᤹ᤖᤡᤰ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤆᤥ᤺ᤰᤗᤥ.
1CO 12:23 ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤀᤠᤏᤡ᤹ ᤛᤠ᤹ᤖᤡᤰ ᤁᤧᤕᤧᤰᤐᤠ ᤔᤧᤈᤥ᤺ᤰᤏᤧᤴ ᤗ᤹ᤖᤡᤰ ᤀᤠᤀᤡ᤺ᤳᤋᤢᤶᤒᤠ ᤕᤠᤶᤗᤰᤜᤠ᤹ᤃ ᤀᤠᤏᤡ᤹ ᤛᤠ᤹ᤖᤡᤰᤁᤠᤱ ᤁᤶᤒᤪᤠᤱ ᤀᤠᤔᤧᤳᤋᤢᤶᤗᤥ॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤀᤥᤛᤣ᤺ᤴᤎᤠᤰᤔᤠ ᤔᤧᤴᤏᤢ᤹ᤔᤏᤠ ᤕᤠᤶᤗᤰᤜᤠ᤹ ᤏᤢ᤺ᤖᤡᤰᤁᤠᤱ ᤀᤠᤏᤡ᤹ ᤀᤠᤍᤧᤵᤋᤢᤶᤗᤥ.
1CO 12:24 ᤁᤖ ᤏᤡ᤺ᤔᤠ ᤛᤢᤰᤁᤧᤍᤧᤵᤐᤠ ᤕᤠᤶᤗᤰᤜᤠ᤹ ᤂᤧᤶᤔᤩᤠᤰ ᤛᤠ᤹ᤖᤡᤰ ᤁᤶᤒᤪᤠᤱ ᤀᤠᤶᤔᤧᤳᤋᤢᤶᤔᤡᤴᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤛᤠ᤹ᤖᤡᤰ ᤁᤧᤕᤧᤰᤐᤠ ᤏᤡ᤺ᤔᤧᤴᤎᤠ᤺ᤵᤔᤏᤠᤒᤠ ᤕᤠᤶᤗᤰᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤑᤳᤇᤢᤛᤡᤀᤠᤱ ᤐᤳ॥
1CO 12:25 ᤜᤧᤰᤁᤣᤗ᤹ᤖᤡᤰ ᤏᤠᤛᤡᤱᤃᤧᤴ ᤌᤰᤁᤥ ᤛᤧᤶᤔᤠ ᤔᤧᤒᤥ᤺ᤱᤏᤧᤴᤗ. ᤁᤖ ᤌᤡᤰ ᤕᤠᤶᤗᤰᤁᤡᤸᤗᤧ ᤘᤣ᤹ ᤕᤠᤶᤗᤰᤁᤡᤴ ᤁᤶᤒᤪᤠᤱ ᤆᤥᤃᤢᤏᤡ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤠ᤹ᤖᤥ॥
1CO 12:26 ᤏᤠᤛᤡᤱᤃᤧᤴ ᤌᤰᤁᤥ ᤗᤳᤇᤠ ᤕᤠᤶᤗᤰᤁᤡᤴ ᤋᤢᤰᤂᤣ ᤆᤠᤏᤧ ᤑᤠ᤹ᤃᤪ ᤂᤧᤴᤏᤢᤀᤣ ᤘᤣ᤹ ᤁᤠᤰ ᤕᤠᤶᤗᤰᤜᤠ᤹ᤀᤠᤱ ᤛᤥᤛᤥᤖᤡᤰ ᤋᤢᤰᤂᤣ ᤔᤧᤈᤠᤖᤥ॥ ᤜᤧᤰᤁᤩᤠᤱ ᤗᤳᤇᤠ ᤕᤠᤶᤗᤰᤁᤡᤸᤗᤧ ᤔᤡᤱᤛᤥ ᤀᤡᤱᤎᤠ᤺ᤱ ᤂᤥ᤺ᤛᤢ᤹ᤏᤧ ᤑᤠ᤹ᤃᤪ ᤂᤧᤴᤏᤢ ᤘᤣ᤹ ᤁᤠᤰ ᤕᤠᤶᤗᤰᤜᤠ᤹ᤀᤠᤱ ᤛᤥᤛᤥᤖᤡᤰ ᤔᤧᤛ᤺ᤳᤗᤥ॥
1CO 12:27 ᤀᤠᤸᤗ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰᤏᤡᤱᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤁᤢᤎᤰᤁᤡᤸᤗᤧ ᤁᤢᤕᤠᤶᤗᤰᤏᤡᤱᤗᤥ॥
1CO 12:28 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤎᤰ ᤛᤣᤛᤣᤜᤢᤵᤗᤰᤁᤥ ᤀᤰᤂᤣᤗ᤹ᤖᤡᤰ ᤛᤣ᤺ᤰᤕᤢᤰ ᤆᤥᤃᤢᤛᤡᤀᤠᤱ ᤘᤠ᤹ᤖᤥ– ᤌᤡᤰᤛᤡᤃᤣ᤺ᤰᤐᤥ ᤛᤣ᤺ᤰᤕᤢᤰᤔᤡᤒᤠᤜᤠ᤹. ᤏᤡᤛᤡᤃᤣ᤺ᤰᤐᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹. ᤛᤢᤶᤛᤡᤃᤣ᤺ᤰᤐᤥ ᤛᤡᤰᤛᤠᤶᤒᤠᤜᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤁᤧᤍᤢᤰᤐᤠ ᤔᤏᤠᤜᤠ᤹ ᤁᤧᤘᤣ᤺ᤶᤒᤠᤜᤠ᤹. ᤁᤢᤓᤠ᤹ ᤁᤧᤒᤡᤒᤠᤜᤠ᤹. ᤗᤠᤶᤃᤧᤗᤥ᤺ᤒᤠᤜᤠ᤹. ᤜᤧᤰᤁᤩᤠᤱ ᤐᤖᤡᤰᤐᤖᤡᤰᤐᤠ ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹॥
1CO 12:29 ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤛᤣ᤺ᤰᤕᤢᤰᤔᤡᤒᤠᤛᤡᤒᤡ᥅ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤛᤡᤒᤡ᥅ ᤁᤧᤖᤧᤰ ᤛᤡᤰᤛᤠᤶᤒᤠᤛᤡᤒᤡ᥅ ᤁᤧᤖᤧᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤒᤡ᥅
1CO 12:30 ᤌᤣ ᤁᤧᤖᤧᤰᤗᤧ ᤁᤧᤍᤢᤰᤐᤠ ᤔᤏᤠᤜᤠ᤹ ᤘᤣ᤺ᤶᤔᤠ ᤐᤷᤎᤠ᤺ᤶᤜᤠ᤹ ᤔᤧᤃᤳᤋᤢᤒᤡ᥅ ᤁᤧᤖᤧᤰ ᤘᤣ᤹ ᤐᤠ᤺ᤴᤍᤠᤱ ᤔᤧᤒᤠ᤺ᤵᤐᤡ᥅ ᤁᤧᤖᤧᤰᤗᤧ ᤂᤧᤴ ᤐᤠ᤺ᤴᤍᤠᤱᤜᤠ᤹ ᤗᤧᤱᤔᤠ ᤔᤧᤛᤢᤰᤋᤢᤒᤡ᥅
1CO 12:31 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢ᤺ᤒᤠ ᤐᤷᤎᤠ᤺ᤶᤜᤠ᤹ ᤂᤥ᤺ᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤸᤗ ᤀᤡᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤗᤠᤶ ᤀᤥᤛᤣ᤺ᤴᤎᤠᤰᤏᤡᤱᤗᤥ॥
1CO 13:1 ᤀᤡᤱᤃᤠ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤢ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤍᤠᤱᤜᤠ᤹ᤀᤥ ᤐᤠ᤺ᤳᤋᤠᤛᤠᤱ ᤀᤡᤱᤃᤠ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ᤃ ᤜᤕᤱᤁᤡᤸᤗᤡᤱ ᤁᤧᤈᤥ᤺ᤰᤐᤠ ᤕᤶᤒᤠ ᤁᤡᤱᤏᤠ ᤏᤢ ᤏᤡᤱᤎᤧᤴᤎᤧᤴ ᤁᤧᤔᤧᤵᤐᤠ ᤔᤢᤰᤗᤠ ᤁᤢᤀᤡᤛᤡ᤺ᤰᤗᤰ ᤐᤥ᤺ᤱᤅᤠᤖᤥ॥
1CO 13:2 ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤳᤋᤢᤱᤛᤠᤱ. ᤁᤧᤖᤧᤰ ᤛᤡᤃᤠᤱ ᤐᤠ᤺ᤴᤜᤠ᤹ ᤏᤢ ᤁᤧᤖᤧᤰ ᤏᤧᤜᤡᤏᤡᤱᤘᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤱᤛᤠᤱ. ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤆᤵᤔᤠ ᤏᤛᤠ᤺ᤴ ᤁᤳᤋᤢᤱᤛᤠᤱ. ᤀᤡᤱᤃᤠ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧ᤺ᤴᤏᤠᤖᤥ॥
1CO 13:3 ᤀᤡᤱᤃᤠ᤹ ᤁᤧᤖᤧᤰ ᤀᤠᤕᤠᤱᤛᤠᤁᤢᤴᤎᤣ᤺ᤴ ᤕᤠᤱᤃᤧᤛᤠ᤹ᤒᤠᤜᤠ᤹ ᤜᤠ᤺ᤳᤋᤢᤱᤛᤡᤱᤛᤠᤱ. ᤏᤠᤛᤡᤱᤃᤧᤴ ᤀᤠᤎᤰᤁᤡᤴ ᤔᤡᤜᤠᤰᤁᤥ ᤕᤠᤰᤋᤢᤱᤛᤠᤱ. ᤀᤡᤱᤃᤠ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤏᤧ ᤑᤠ᤹ᤃᤪ ᤌᤣᤀᤠᤱ ᤀᤡᤴᤎᤠ᤺ᤱ ᤔᤧᤄᤥ᤺ᤛᤢᤱᤅᤡᤴᤗᤥ॥
1CO 13:4 ᤔᤡ᤺ᤶᤈᤡ᤺ᤸᤗᤧ ᤏᤠᤛᤡ ᤌ᤺ᤳᤋᤢ᤹ ᤜᤧᤰᤁᤩᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡ᤹॥ ᤔᤡ᤺ᤶᤈᤡ᤺ᤸᤗᤧ ᤁᤢᤏᤠ ᤔᤧᤜᤧᤴᤏᤧᤴᤗᤥ. ᤀᤡᤱᤃᤠ᤹ᤀᤣ᤺ᤰ ᤏᤢ ᤀᤠᤱᤍᤡᤱᤅᤠᤱ ᤔᤧᤗ᤹ᤏᤧᤴᤗᤥ॥
1CO 13:5 ᤔᤡ᤺ᤶᤈᤡ᤺ᤱᤃ ᤔᤧᤜᤧᤴᤇᤡᤱᤅᤡᤴ. ᤀᤠᤒᤠᤅᤣ ᤀᤡᤴᤎᤠ᤺ᤱ ᤏᤢ ᤀᤠᤒᤠᤅᤣ ᤐᤠ᤺ᤴᤗᤰ ᤔᤧᤃᤥ᤺ᤳᤋᤢᤴ॥ ᤔᤡ᤺ᤶᤈᤡ᤺ᤱᤃ ᤜᤠᤖᤠ ᤁᤢᤛᤡᤰ ᤔᤧᤒᤥ᤺ᤰᤏᤧᤴ. ᤑᤧᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤒᤥ ᤔᤧᤕᤢᤰᤂᤢᤴ॥
1CO 13:6 ᤔᤡ᤺ᤶᤈᤡ᤺ᤱᤃ ᤑᤧᤴ ᤐᤠ᤺ᤴᤜᤠ᤹ᤀᤥ ᤔᤧᤛ᤺ᤳᤏᤧᤴ ᤁᤖ ᤛᤧᤰᤂᤠᤀᤥᤖᤰ ᤛ᤺ᤳᤗᤥ॥
1CO 13:7 ᤔᤡ᤺ᤶᤈᤡ᤺ᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤁᤢᤓᤠ᤹ ᤐᤡᤖᤢ᤹. ᤁᤧᤖᤧᤰ ᤐᤠ᤺ᤴᤏᤡᤴ ᤏᤛᤠ᤺ᤴ ᤆᤥᤃᤢ᤹. ᤁᤧᤖᤧᤰ ᤐᤠ᤺ᤴᤏᤡᤴ ᤏᤡᤱᤛᤠᤱ ᤆᤥᤃᤢ᤹. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤠᤛᤡ ᤌ᤺ᤳᤋᤢ᤹ᤖᤥ॥
1CO 13:8 ᤔᤡ᤺ᤶᤈᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴ॥ ᤁᤖ ᤔᤠᤱᤏᤡᤱᤘᤠ᤹ᤐᤠ᤺ᤴᤜᤠ᤹ ᤏᤢ ᤘᤣ᤹ ᤐᤠ᤺ᤴᤍᤠᤱᤜᤠ᤹ ᤏᤢᤵ. ᤜᤧᤰᤁᤩᤠᤱ ᤏᤧᤜᤡᤏᤡᤱᤘᤠ᤹ᤀᤡᤴ ᤔᤠᤒᤣ᤺ᤰᤗᤥ॥
1CO 13:9 ᤀᤠᤏᤡ᤹ ᤔᤡᤛᤠᤰᤗᤰ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤡᤛᤠᤰᤗᤰ ᤀᤠᤒᤠ᤺ᤳᤋᤢᤶᤗᤥ॥
1CO 13:10 ᤁᤖ ᤁᤢᤗᤡᤱᤎᤥ ᤁᤧᤃᤧᤵᤐᤧᤴ ᤋᤠ᤺ᤸᤗᤧ ᤁᤢᤗᤡᤱᤎᤥ ᤔᤧᤱᤃᤧᤵᤔᤏᤠᤒᤠᤴ ᤔᤠᤒᤣ᤺ᤰᤗᤥ॥
1CO 13:11 ᤀᤡᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤡᤸᤗᤧ ᤜᤡᤴᤈᤠ᤹ ᤁᤢᤀᤡᤛᤡ᤺ᤰᤁᤣ ᤐᤠᤖᤠᤱ. ᤜᤡᤴᤈᤠ᤹ ᤁᤢᤀᤡᤛᤡ᤺ᤰᤁᤣ ᤁᤢᤛᤡᤱ ᤏᤡ᤺ᤳᤋᤢᤱ. ᤜᤡᤴᤈᤠ᤹ ᤁᤢᤀᤡᤛᤡ᤺ᤰᤁᤣ ᤀᤡ᤺ᤳᤋᤢᤱ. ᤁᤖ ᤀᤡᤱᤃᤠ᤹ ᤌᤠᤱᤒᤧᤴ ᤁᤧᤖᤠᤱᤅᤡᤸᤗᤧ ᤜᤡᤴᤈᤠ᤹ᤒᤠ ᤐᤠ᤺ᤴᤜᤠ᤹ ᤗᤧᤖᤢᤱᤍᤣ᤺ᤛᤢᤱᤗᤥ॥
1CO 13:12 ᤀᤠᤸᤗᤥ ᤀᤠᤏᤡ᤹ᤃ ᤏᤢ᤺ᤖᤡᤰ ᤔᤧᤴᤎᤠ᤺ᤵᤔᤏᤠᤒᤠ ᤛᤧᤸᤗᤧᤱᤄᤥ ᤀᤠᤏᤡ᤺ᤛᤢᤶᤒᤠ ᤜᤧᤰᤁᤣᤖᤰ ᤀᤠᤏᤡ᤺ᤛᤢᤶᤗᤥ. ᤁᤖ ᤂᤧᤴ ᤕᤧᤶᤔᤥ ᤆᤡᤍᤢᤵ ᤀᤠᤏᤡ᤺ᤛᤢᤶᤗᤥ॥ ᤀᤠᤸᤗᤥ ᤀᤡᤱᤃᤠ᤹ ᤔᤡᤛᤠᤰᤗᤰ ᤁᤢᤛᤡᤱ ᤏᤡ᤺ᤳᤋᤢᤱ. ᤁᤖ ᤂᤧᤴ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤠᤒᤠ ᤜᤧᤰᤁᤣᤀᤣ ᤀᤡᤱᤃᤠ᤹ᤀᤠᤱ ᤁᤠᤰ ᤐᤠ᤺ᤴᤏᤡᤴ ᤛᤖᤰ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥
1CO 13:13 ᤀᤠᤸᤗ ᤏᤛᤠ᤺ᤴ. ᤏᤡᤱᤛᤠᤱ ᤜᤧᤰᤁᤩᤠᤱ ᤔᤡ᤺ᤶᤈᤡ ᤁᤴ ᤛᤢᤶᤛᤡ ᤐᤠ᤺ᤴᤜᤠ᤹ᤖᤰ ᤘᤠ᤹ ᤕᤠ᤺ᤰᤗᤥ॥ ᤁᤖ ᤂᤧᤱᤜᤠ᤹ᤀᤥᤃ ᤔᤡ᤺ᤶᤈᤡᤴ ᤁᤠᤰᤏᤢ᤺ᤸᤗᤧ ᤕᤶᤒᤠᤖᤥ॥
1CO 14:1 ᤂᤧᤸᤗᤧ ᤆᤥᤃᤢᤸᤗᤧ ᤔᤡ᤺ᤶᤈᤡᤴ ᤂᤡᤏᤡ᤹ ᤋᤡᤶᤍᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤜᤠ᤹ ᤂᤥ᤺ᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ ᤁᤢᤳᤆᤠ᤹ᤀᤥᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤐᤷᤎᤠ᤺ᤶᤔᤡᤴ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥
1CO 14:2 ᤌᤣᤀᤠᤱᤓᤧᤸᤗᤧ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤧᤃᤵᤐᤧᤴ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤏᤢ ᤔᤧᤒᤠ᤺ᤳᤏᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤐᤠ᤺ᤳᤗᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤳᤋᤡᤸᤗᤧᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤡᤃᤠᤱ ᤐᤠ᤺ᤴᤜᤠ᤹ ᤛᤣᤛᤣᤔᤠᤱᤗᤠᤶᤒᤠᤏᤧ ᤐᤠ᤺ᤳᤋᤢ᤹ᤖᤥ॥
1CO 14:3 ᤁᤖ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤧᤎᤢᤶᤒᤠ ᤆᤥ᤺ᤰᤔᤠ. ᤜᤠᤱᤜᤠᤱ ᤔᤧᤵᤔᤠ ᤜᤧᤰᤁᤩᤠᤱ ᤛᤰᤔᤠ ᤕᤠᤰᤔᤠ ᤕᤠ᤺ᤶᤒᤰ ᤆᤥᤃᤢᤖᤥ॥
1CO 14:4 ᤘᤣ᤹ ᤐᤠ᤺ᤴᤍᤠᤱᤅᤥ ᤁᤧᤒᤠ᤺ᤵᤐᤠᤸᤗᤧ ᤀᤠᤒᤠᤅᤣᤖᤰ ᤌᤥᤒᤥ ᤆᤥᤃᤢ᤹ᤖᤥ. ᤁᤖ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧᤃ ᤛᤣᤛᤣᤜᤢᤵᤗᤰᤗᤧᤴ ᤕᤠᤶᤛᤠᤶᤃᤧᤴ ᤌᤥᤒᤥ ᤆᤥᤃᤢ᤹ᤖᤥ॥
1CO 14:5 ᤂᤡᤏᤡ᤹ ᤁᤧᤖᤧᤰ ᤘᤣ᤹ ᤐᤠ᤺ᤴᤍᤠᤱᤅᤥ ᤁᤧᤒᤠ᤺ᤖᤡᤒᤠ ᤀᤠᤛᤡᤖᤠ᤹ ᤌᤠᤱᤗᤥ. ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠᤖᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤛᤣᤛᤣᤜᤢᤵᤗᤰ ᤌᤥᤒᤥᤖᤧ ᤗᤠᤃᤡ ᤘᤣ᤹ᤛ᤻ᤔᤠ ᤐᤠ᤺ᤴᤍᤠᤱᤅᤡᤴ ᤁᤧᤗᤧᤱᤒᤠ ᤔᤧᤜᤥ᤺ᤵᤏᤧ ᤑᤠ᤹ᤃᤪ ᤘᤣ᤹ᤛ᤻ᤔᤠ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠᤏᤢ᤺ᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠᤴᤏᤣ ᤕᤶᤒᤠᤖᤥ॥
1CO 14:6 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤳᤋᤠᤖ ᤋᤠᤀᤠᤸᤗᤧ ᤌᤣ ᤀᤡᤴᤎᤠ᤺ᤱ ᤁᤧᤄᤥ᤺ᤛᤢᤶᤒᤣ᥅ ᤁᤖ ᤀᤥᤛᤣ᤺ᤴᤍᤠᤱ ᤐᤠ᤺ᤴ. ᤀᤡᤃᤪ ᤏᤧᤜᤡᤏᤡᤱᤘᤠ᤹ ᤐᤠ᤺ᤴ. ᤀᤡᤃᤪ ᤔᤠᤱᤏᤡᤱᤘᤠ᤹ᤐᤠ᤺ᤴ ᤀᤡᤃᤪ ᤏᤡᤛᤠᤶᤖᤧ ᤐᤠ᤺ᤴᤈᤠᤰᤁᤡᤴ ᤋᤠᤖᤢᤱᤅᤡᤸᤗᤧ ᤂᤡᤏᤡ᤹ ᤗᤠᤃᤡ ᤁᤢᤓᤠ᤹ ᤐᤥ᤺ᤱᤗᤥ॥
1CO 14:7 ᤔᤧᤵᤑᤪᤠ ᤏᤢ ᤁᤥ᤺ᤶ ᤜᤧᤰᤋᤱᤒᤠ ᤁᤢᤛᤰᤔᤠ ᤔᤧᤴᤕᤠᤰᤔᤏᤠᤒᤠ ᤔᤢᤰᤗᤠᤜᤠ᤹ᤗᤠᤶᤒᤠ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰ ᤔᤧᤴᤍᤧᤵᤔᤏᤠ ᤀᤡᤰᤗᤠ ᤗ᤺ᤴᤏᤧ ᤑᤠ᤹ᤃᤪ ᤌᤣ ᤔᤢᤰᤗ ᤐᤳ ᤑᤠ᤹ᤀᤠᤱ ᤜᤠ᤺ᤳᤗᤧ ᤐᤠ᤺ᤵᤔᤠ ᤛᤢᤰᤋᤢᤒᤣ᥅
1CO 14:8 ᤕᤠᤶᤔᤥ ᤌᤢᤳᤋᤢᤖᤡ᤺ᤵᤐᤧᤸᤗᤧ ᤌᤱ ᤆᤥ᤺ᤰᤛᤧ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ ᤁᤧᤗ᤹ᤒᤠ ᤀᤡᤰᤗᤠ᤺ᤴ ᤏᤢ᤺ᤖᤡᤰ ᤗᤠ᤺ᤔᤧᤀᤡᤃᤢᤴᤏᤧ ᤑᤠ᤹ᤃᤪ ᤜᤠ᤺ᤳ ᤌᤱ ᤌᤰᤛᤧ ᤕᤠᤖᤡᤵ ᤐᤥ᤺ᤱᤒᤠᤒᤣ᥅
1CO 14:9 ᤂᤡᤏᤡ᤹ᤏᤢᤀᤠᤱ ᤒᤠ ᤜᤧᤰᤁᤣᤀᤣ ᤐᤥ᤺ᤱᤗᤥ॥ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠ ᤐᤠ᤺ᤴᤏᤥ ᤁᤧᤒᤠᤖᤡᤏᤧ ᤑᤠ᤹ᤃᤪ ᤌᤣ ᤁᤧᤒᤠ᤺ᤳᤋᤢᤶᤗ ᤁᤧᤒᤳᤇᤡ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤢᤒᤣ᥅ ᤂᤡᤏᤡ᤹ᤃ ᤛᤢᤖᤡᤳᤋᤥ ᤁᤧᤒᤠ᤺ᤖᤡᤒᤠ ᤜᤧᤰᤁᤣ ᤐᤥ᤺ᤱᤗᤥ॥
1CO 14:10 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤖᤡᤰ ᤐᤠ᤺ᤴᤍᤠᤱᤜᤠ᤹ ᤘᤠ᤹. ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤁᤢᤒᤣ ᤔᤧ᤺ᤴᤏᤣᤒᤠᤃ ᤜᤥ᤺ᤵᤗᤥ॥
1CO 14:11 ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤏᤧ ᤑᤠ᤹ᤃᤪ ᤁᤧᤒᤠ᤺ᤵᤐᤠᤸᤗᤧ ᤗᤠᤃᤡ ᤀᤡᤱᤃᤠ᤹ᤃ ᤐᤠ᤺ᤴᤔᤧᤴᤍᤱ ᤐᤥ᤺ᤱᤅᤠᤖᤥ. ᤜᤧᤰᤁᤩᤠᤱ ᤁᤧᤒᤠ᤺ᤵᤐᤧᤴ ᤀᤠᤗᤠᤃᤡ ᤐᤠ᤺ᤴᤔᤧᤴᤍᤱ ᤐᤥ᤺ᤱᤗᤥ॥
1CO 14:12 ᤂᤡᤏᤡ᤹ᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤒᤷᤎᤠ᤺ᤶᤜᤠ᤹ ᤂᤥ᤺ᤔᤠ ᤛᤠ᤹ᤖᤡᤰ ᤂᤡᤏᤡ᤹ ᤛᤡᤰ ᤛᤶᤒᤠᤸᤗᤧ ᤆᤥᤃᤢᤸᤗᤧ ᤛᤣᤛᤣᤜᤢᤵᤗᤰᤗᤧᤴ ᤌᤥᤒᤥ ᤁᤧᤒᤥ᤺ᤱᤒᤠ ᤐᤷᤎᤠ᤺ᤶᤜᤠ᤹ ᤀᤥᤃᤵ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥
1CO 14:13 ᤂᤧᤸᤗᤧ ᤆᤥᤃᤢᤸᤗᤧ ᤘᤣ᤹ ᤐᤠ᤺ᤴᤍᤠᤱ ᤐᤠ᤺ᤵᤔᤠ ᤐᤷᤎᤠ᤺ᤶ ᤁᤧᤃᤵᤐᤠᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤐᤠ᤺ᤴ ᤗᤧᤱᤔᤠ ᤛᤢᤰᤋᤢᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤖᤖᤥ॥
1CO 14:14 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤘᤣ᤹ ᤐᤠ᤺ᤴᤍᤠᤱᤅᤥ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤀᤠᤕᤠᤶᤛᤠᤶᤔᤡᤸᤗᤧ ᤋᤢᤘᤠ ᤆᤥᤃᤢ᤹. ᤁᤖ ᤀᤠᤏᤡᤱᤘᤠ᤹ᤀᤡᤸᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥
1CO 14:15 ᤀᤠᤸᤗ ᤀᤠᤰᤂᤣ ᤆᤥᤃᤢᤱᤒᤠᤒᤣ᥅ ᤀᤡᤱᤃᤠ᤹ ᤕᤠᤶᤛᤠᤶᤔᤡᤸᤗᤧ ᤋᤢᤘᤠ ᤆᤥ᤺ᤰᤁᤠ. ᤁᤖ ᤀᤠᤏᤡᤱᤘᤠ᤹ᤀᤡᤸᤗᤧᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤶᤛᤠᤶᤔᤡᤸᤗᤧ ᤛᤠᤶᤗᤥᤀᤠ. ᤁᤖ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤡᤸᤗᤧᤀᤠᤱ ᤛᤠᤶᤗᤥᤀᤠᤖᤥ॥
1CO 14:16 ᤂᤧᤏᤧ᤹ ᤁᤧᤕᤠᤶᤛᤠᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤁᤧᤓᤥ᤺ᤛᤢᤸᤗᤧ ᤂᤧᤏᤧ᤹ ᤏᤢ᤺ᤖᤡᤰᤁᤠᤱ ᤏᤥᤃᤧᤴ ᤁᤧᤒᤡᤖᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ “ᤀᤠᤔᤧᤴ” ᤐᤠ᤺ᤳᤋᤢᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤴ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥
1CO 14:17 ᤂᤧᤏᤧ᤹ᤃ ᤏᤢ᤺ᤖᤡᤰᤁᤠᤱ ᤏᤥᤃᤧᤴ ᤁᤧᤒᤡᤖᤢᤒᤡᤗᤠ. ᤁᤖ ᤘᤣ᤹ ᤔᤏᤠ᤺ᤸᤗᤧᤴ ᤌᤣᤀᤠᤱ ᤌᤥᤒᤥ ᤔᤧᤒᤥ᤺ᤱᤏᤧᤸᤗᤥ॥
1CO 14:18 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤕᤖᤡᤰ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤳᤋᤠᤖᤥ॥
1CO 14:19 ᤜᤧᤰᤁᤣᤛᤠᤱ ᤛᤣᤛᤣᤜᤢᤵᤗᤰᤁᤥᤃ ᤜᤧᤴᤇᤡᤱ ᤌᤡᤒᤥ᤺ᤱ (᥇᥆.᥆᥆᥆) ᤐᤠ᤺ᤴᤛᤢᤳᤗᤠᤜᤠ᤹ ᤘᤣ᤹ ᤐᤠ᤺ᤴᤍᤠᤱᤅᤥ ᤐᤠ᤺ᤵᤔᤠᤴᤏᤢ᤺ᤸᤗᤧᤃ ᤘᤣ᤹ᤜᤠ᤹ ᤏᤡᤛᤠᤶ ᤐᤡᤔᤠᤛᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤁᤧᤍᤧᤵᤐᤠ ᤅᤠᤛᤡ (᥋) ᤐᤠ᤺ᤴᤛᤢᤳᤗᤠᤜᤠ᤹ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥
1CO 14:20 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤜᤡᤴᤈᤠ᤹ᤒᤡᤳᤇᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ ᤀᤡ᤺ᤵᤔᤠ ᤗᤧᤖᤧᤶᤔᤧ᤹ᤀᤥ॥ ᤑᤧᤴ ᤐᤠ᤺ᤴᤏᤥ ᤀᤅᤧ᤺ᤰᤘᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤶᤔᤧ᤹ᤀᤥ. ᤁᤖ ᤏᤡᤱᤘᤠ᤹ ᤀᤡ᤺ᤵᤔᤠᤀᤥᤃ ᤁᤢᤏᤡᤱᤘᤠ᤹ ᤁᤧᤍᤢᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤶᤔᤧ᤹ᤀᤥ॥
1CO 14:21 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤗᤠᤶ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤔᤏᤠ ᤐᤠ᤺ᤴᤍᤠᤱᤗᤠᤶ ᤀᤠᤒᤠᤅᤣ ᤀᤠᤔᤏᤠᤜᤠ᤹ᤏᤢ ᤐᤠ᤺ᤳᤋᤠᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤀᤠᤒᤠ᤺ᤴ ᤔᤧᤱᤄᤧᤵᤛᤢᤴ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤖᤥ॥”
1CO 14:22 ᤘᤣ᤹ ᤐᤠ᤺ᤴᤍᤠᤱ ᤐᤠ᤺ᤵᤔᤠ ᤐᤷᤎᤠ᤺ᤶᤔᤡᤱᤃ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤔᤡᤰᤛᤣ᤺ᤴᤗᤥ॥ ᤜᤧᤰᤁᤣᤛᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤐᤷᤎᤠᤶᤔᤡᤱᤃ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡᤖᤥ॥
1CO 14:23 ᤂᤧᤸᤗᤧ ᤆᤥᤃᤢᤸᤗᤧ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤁᤧᤖᤧᤰ ᤘᤣ᤹ ᤐᤠ᤺ᤴᤍᤠᤱᤅᤥ ᤁᤧᤒᤠᤖᤡᤏᤧ ᤑᤠ᤹ᤃᤪ ᤂᤧᤵᤔᤥ ᤐᤠ᤺ᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ ᤀᤡᤃᤪ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤔᤧᤍᤠ᤺ᤸᤗᤧ ᤌᤣᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤏᤠᤱ ᤂᤡᤏᤡ᤹ ᤁᤧᤖᤧᤰ ᤁᤧᤏᤠᤰᤂᤡ ᤁᤧᤒᤡᤃᤡ᤹ ᤗ᤹ᤖᤡᤰ ᤔᤧᤶᤒᤠ᤺ᤳᤋᤢᤴᤒᤡ᥅
1CO 14:24 ᤁᤖ ᤁᤧᤖᤧᤰᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤔᤧᤒᤠ᤺ᤳᤋᤢᤖ ᤔᤧᤕᤠᤰᤁᤡᤸᤗᤧ ᤏᤛᤠ᤺ᤴ ᤔᤧᤴᤈᤠ᤺ᤰᤔᤏᤠ ᤀᤡᤃᤪ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤔᤏᤠ᤺ᤴ ᤂᤧᤵᤔᤥ ᤋᤠᤏᤧ ᤑᤠ᤹ᤃᤪ ᤂᤧᤸᤗᤧ ᤂᤧᤵᤛᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤛᤡᤰᤗᤢᤱᤔᤠ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤀᤠᤱ ᤁᤢᤏᤡᤱᤘᤠ᤹ᤒᤠᤴ ᤌᤡᤰᤋᤢ᤹ᤖᤥ॥ ᤂᤧᤵᤔᤥ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤂᤧᤸᤗᤧ ᤁᤢᤏᤡᤱᤘᤠ᤹ ᤗᤥ᤺ᤖᤥ॥
1CO 14:25 ᤜᤧᤰᤁᤩᤠᤱ ᤁᤢᤛᤡᤰᤗᤢᤱᤔᤠ ᤛᤡᤃᤠᤱᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤧᤴ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤖ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤘᤠ᤹ᤖᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥
1CO 14:26 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤡᤱᤃᤠ᤹ ᤀᤰᤂᤣ ᤐᤠ᤺ᤳᤋᤢᤱᤗᤥ॥ ᤂᤡᤏᤡ᤹ ᤛᤣᤛᤣᤜᤢᤵᤗᤰᤁᤥ ᤁᤧᤈᤢᤵᤛᤡᤸᤗᤧ ᤗᤳᤌᤡᤰᤁᤡᤸᤗᤧ ᤛᤠᤶᤗᤥ ᤁᤳᤋᤢ᤹. ᤘᤣ᤹ᤛ᤻ᤔᤠᤸᤗᤧ ᤏᤡᤛᤠᤶ ᤁᤳᤋᤢ᤹. ᤘᤣ᤹ᤛ᤻ᤔᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤀᤥᤛᤣ᤺ᤴᤍᤠᤱ ᤐᤠ᤺ᤴ ᤁᤳᤋᤢ᤹. ᤘᤣ᤹ᤛ᤻ᤔᤠᤸᤗᤧ ᤘᤣ᤹ ᤐᤠ᤺ᤴᤍᤠᤱ ᤁᤳᤋᤢ᤹ ᤜᤧᤰᤁᤩᤠᤱ ᤘᤣ᤹ᤛ᤻ᤔᤠᤸᤗᤧ ᤘᤣ᤹ ᤐᤠ᤺ᤴᤍᤠᤱᤅᤡᤴ ᤐᤠ᤺ᤴᤗᤧᤱᤔᤠ ᤐᤷᤎᤠ᤺ᤶ ᤁᤳᤋᤢ᤹ᤖᤥ॥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤣᤛᤣᤜᤢᤵᤗᤰᤁᤡᤴ ᤌᤥᤒᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤥᤃᤵ ᤆᤥ᤺ᤰᤔᤠ ᤐᤥ᤺ᤱᤗᤥ॥
1CO 14:27 ᤘᤣ᤹ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹ ᤔᤧᤒᤠ᤺ᤳᤏᤧ ᤑᤠ᤹ᤃᤪ ᤏᤧᤵᤑᤢᤖᤧᤖᤰ ᤀᤡᤃᤪ ᤛᤢᤶᤛᤡ ᤌᤠᤖᤡᤰᤗᤧ ᤀᤣ᤺ᤰ ᤀᤣ᤺ᤰ ᤔᤧᤒᤠ᤺ᤳᤋᤢᤖ. ᤜᤧᤰᤁᤩᤠᤱ ᤌᤡᤰᤐᤠᤖᤧ ᤐᤠ᤺ᤴ ᤗᤧᤰᤂᤢᤖᤖᤥ॥
1CO 14:28 ᤁᤖ ᤐᤠ᤺ᤴ ᤁᤧᤗᤧᤱᤒᤠᤴ ᤜᤥ᤺ᤵᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ ᤛᤣᤛᤣᤜᤢᤵᤗᤰᤁᤥ ᤛᤫᤠ᤺ᤳ ᤔᤧᤕᤢᤱᤅᤠᤱ ᤀᤠᤒᤠᤅᤣᤏᤢ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤧᤒᤠ᤺ᤳᤗᤖᤥ॥
1CO 14:29 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤏᤧᤵᤑᤢ ᤀᤡᤃᤪ ᤛᤢᤶᤛᤡ ᤔᤧᤒᤠ᤺ᤳᤗ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤛᤠ᤹ᤔᤠ ᤐᤥ᤺ᤱᤗᤥ॥
1CO 14:30 ᤁᤖ ᤂᤧᤵᤔᤥ ᤁᤧᤕᤢᤱᤒᤠ ᤁᤢᤓᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤀᤥᤛᤣ᤺ᤴᤍᤠᤱ ᤐᤠ᤺ᤴᤏᤡᤴ ᤋᤠᤏᤧ ᤑᤠ᤹ᤃᤪ ᤋᤃᤡ ᤁᤧᤒᤠ᤺ᤵᤐᤧᤴ ᤛᤫᤠ᤺ᤳ ᤕᤢᤱᤏᤡᤖᤥ॥
1CO 14:31 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤌᤡᤰᤐᤠ ᤌᤡᤰᤐᤠᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤁᤧᤛᤢᤰᤋᤡ᤹. ᤜᤧᤰᤁᤣ᤺ᤸᤗᤧ ᤁᤧᤖᤧᤰᤗᤧ ᤁᤧᤜᤢ᤹ᤀᤠᤛᤡᤀᤠᤱ ᤕᤠᤶᤈᤠᤱᤘᤠ ᤁᤧᤄᤥ᤺ᤛᤢᤶᤗᤥ॥
1CO 14:32 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤐᤷᤎᤠ᤺ᤶᤔᤡᤴ ᤀᤠᤒᤠᤅᤣ ᤕᤢᤰᤁᤥ ᤁᤵᤔᤠ ᤐᤥ᤺ᤱᤗᤥ॥
1CO 14:33 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤕᤧᤔᤧᤴᤍᤱ ᤔᤧ᤺ᤴ. ᤁᤖ ᤛᤏᤠᤖᤢᤱᤗᤧᤴ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤁᤧᤖᤧᤰ ᤛᤣᤛᤣ ᤔᤏᤠᤜᤠ᤹ᤖᤧ ᤁᤧᤖᤧᤰ ᤂᤢᤏᤡ᤹ ᤛᤣᤛᤣᤜᤢᤵᤗᤰᤁᤥᤒᤠ ᤆᤥ᤺ᤰᤌᤡᤶ ᤁᤢᤀᤡᤛᤡ᤺ᤰ
1CO 14:34 ᤛᤣᤛᤣᤜᤢᤵᤗᤰᤁᤥ ᤆᤢᤶᤗᤢᤱ ᤐᤥ᤺ᤱᤗ ᤐᤳᤋᤡᤸᤗᤧ ᤔᤧᤴᤇᤢᤔᤠᤜᤠ᤹ ᤛᤫᤠ᤺ᤳ ᤕᤢᤱᤔᤠ ᤐᤥ᤺ᤱᤗᤥ॥ ᤂᤧᤱᤜᤠ᤹ ᤂᤧᤴ ᤕᤧᤶᤔᤥ ᤐᤠ᤺ᤵᤔᤠ ᤏᤢ᤺ᤒᤠ ᤔᤧ᤺ᤴ. ᤁᤖ ᤂᤧᤱᤜᤠ᤹ᤃ ᤕᤢᤰᤁᤥ ᤘᤠ᤹ᤔᤠ ᤐᤥ᤺ᤱᤗᤥ॥ ᤛᤠᤶᤕᤥ ᤀᤡᤱᤈᤠ᤺ᤱᤅᤡᤸᤗᤧᤀᤠᤱ ᤜᤧᤰᤁᤣ ᤐᤠ᤺ᤳᤋᤢ᤹ᤖᤥ॥
1CO 14:35 ᤂᤢᤏᤡ᤹ ᤛᤣ᤺ᤴᤍᤥ᤺ᤔᤠ ᤐᤠ᤺ᤴ ᤔᤧᤃᤳᤋᤢ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤶᤔᤥ ᤀᤠᤒᤠᤅᤣ ᤂᤢᤏᤡ᤹ ᤕᤧᤶᤒᤠᤜᤠ᤹ ᤛᤣ᤺ᤴᤔᤧᤍᤥᤛᤢᤛᤡᤖᤖᤥ. ᤌᤣᤀᤠᤱᤓᤧᤸᤗᤧ ᤛᤣᤛᤣᤜᤢᤵᤗᤰ ᤆᤢᤶᤗᤢᤱ ᤐᤥ᤺ᤱᤗ ᤐᤳᤋᤡᤸᤗᤧ ᤔᤧᤴᤇᤢᤔᤠᤜᤠ᤹ ᤋᤠ᤹ᤈᤧᤱᤔᤠᤃ ᤏᤢ᤺ᤶᤔᤠᤛᤡ᤺ᤔᤠ ᤐᤠ᤺ᤴᤗᤥ॥
1CO 14:36 ᤂᤡᤏᤡ᤹ ᤁᤥᤖᤴᤌᤡᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤗᤠᤶᤒᤠ ᤜᤣ᤺ᤰᤛᤡᤱᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ ᤀᤡᤃᤪ ᤂᤡᤏᤡ᤹ᤖᤰ ᤁᤧᤄᤥ᤺ᤛᤢᤶᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤏᤧ ᤑᤠ᤹ᤃᤪ ᤁᤧᤒᤣ᤺ᤴᤍᤡᤀᤠᤱ ᤁᤧᤘᤕᤡᤖᤥ॥
1CO 14:37 ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤀᤠ ᤗ᤹ᤖᤡᤰ ᤀᤡᤃᤪ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶ ᤁᤳᤋᤢᤱ ᤗ᤹ᤖᤡᤰ ᤀᤡ᤺ᤳᤋᤢ᤹ ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤁᤴ ᤐᤠ᤺ᤴᤜᤠ᤹ ᤍᤠᤱᤒᤠᤸᤗᤧ ᤁᤢᤀᤡᤱᤈᤠ᤺ᤱ ᤗ᤹ᤖᤡᤰ ᤋᤧᤴᤍᤡᤱ ᤆᤥᤃᤢᤖᤖᤥ॥
1CO 14:38 ᤂᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤔᤧᤄᤧᤵᤛᤢᤴᤏᤧ ᤑᤠ᤹ᤃᤪ ᤂᤧᤸᤗᤧ ᤁᤢᤒᤠ᤺ᤴᤏᤡᤴᤏᤠᤱ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥
1CO 14:39 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤵᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤘᤣ᤹ ᤐᤠ᤺ᤴᤍᤠᤱ ᤐᤠ᤺ᤵᤔᤠ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹ᤀᤥ॥
1CO 14:40 ᤁᤖ ᤁᤧᤖᤧᤰ ᤐᤠ᤺ᤴᤜᤠ᤹ᤃ ᤌᤧᤵᤌᤧᤵᤐᤠᤱ ᤏᤢ᤺ᤖᤡᤰ ᤆᤥ᤺ᤰᤔᤠ ᤐᤥ᤺ᤱᤗᤥ॥
1CO 15:1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤀᤥ ᤀᤡᤱᤃᤠ᤹ ᤀᤡᤱᤓᤴ ᤆᤥᤃᤢᤱᤒᤠ ᤛᤢᤏᤠᤀᤡᤱᤅᤡᤴ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤥᤀᤥ ᤋᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤴ ᤛᤢᤏᤠᤀᤡᤱᤅᤡᤴ ᤁᤧᤍᤠ᤺ᤰᤋᤢᤶᤔᤠᤱ ᤒᤠ ᤂᤧᤴ ᤏᤛᤠ᤺ᤴᤏᤥ ᤆᤰᤔᤧᤸᤗ᤹ᤀᤣ ᤁᤧᤒᤳᤇᤡᤖᤥ॥
1CO 15:2 ᤀᤡᤱᤃᤠ᤹ ᤀᤡᤱᤓᤴ ᤆᤥ᤺ᤰᤏᤡᤱᤒᤠ ᤂᤧᤴ ᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤁᤧᤴᤗᤧᤖᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤴᤗᤵ ᤁᤧᤄᤥ᤺ᤛᤢᤶᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤱᤃ ᤜᤏᤧᤖᤰ ᤐᤥ᤺ᤱᤗᤥ॥
1CO 15:3 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤥ᤺ᤛᤢᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤜᤢᤰᤛᤢᤵᤏᤡᤱᤅᤠᤱ ᤘᤠ᤹ᤖᤥ–ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤛᤧ ᤛᤩᤧ.
1CO 15:4 ᤂᤢᤏᤧ᤹ ᤔᤧᤗᤢᤵᤋᤢᤒᤠ. ᤛᤢᤶ ᤕᤧᤴᤏᤥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤛᤡ᤺ᤔᤧᤴᤗᤠᤶ ᤜᤡᤅᤧ.
1CO 15:5 ᤂᤢᤏᤧ᤹ ᤐᤋᤪᤢᤛᤧᤴᤏᤢ ᤌᤠ᤺ᤶᤛᤡᤱ. ᤜᤧᤰᤁᤩᤠᤱ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ᤖᤥ ᤌᤠ᤺ᤶᤛᤡᤱᤗᤥ॥
1CO 15:6 ᤕᤠᤱᤛᤡ ᤌᤡᤰᤗᤧᤱᤔᤥ ᤁᤢᤃᤡᤵ ᤅᤠᤛᤡ (᥋᥆᥆) ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤥ ᤌᤠ᤺ᤶᤛᤡᤱᤗᤥ॥ ᤂᤧᤱᤜᤠ᤹ᤀᤥᤃ ᤁᤢᤓᤠ ᤔᤧᤛᤩᤧ ᤔᤧᤒᤣᤛᤠᤱ ᤁᤢᤓᤠᤃ ᤁᤢᤜᤡᤱᤘᤧᤳᤋᤣ ᤔᤧᤘᤠ᤹ᤖᤥ॥
1CO 15:7 ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤁᤢᤒᤖᤥ ᤜᤧᤰᤁᤩᤠᤱ ᤁᤧᤖᤧᤰ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤥ ᤌᤠ᤺ᤶᤛᤡᤱᤗᤥ॥
1CO 15:8 ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤁᤢᤕᤧᤶ ᤔᤧᤱᤃᤧᤳᤋᤣ ᤛᤠᤃᤧᤘᤠ᤺ᤴᤇᤡᤱᤒᤠᤸᤗᤥ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤥᤀᤠᤱ ᤌᤠ᤺ᤶᤛᤡᤱᤗᤥ॥
1CO 15:9 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢ᤺ᤰᤐᤠᤀᤠᤖᤥ॥ ᤀᤡᤱᤃᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤐᤠ᤺ᤵᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤁᤡᤴ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤢᤱᤅᤠᤱ ᤘᤕᤧᤖᤥ॥
1CO 15:10 ᤁᤖ ᤀᤠᤸᤗᤥ ᤀᤡᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤘᤠ᤹ᤀᤠ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧᤀᤣᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤀᤡᤱᤃᤠ᤹ᤀᤥ ᤆᤠᤔᤧᤛᤥ᤺ᤰᤋᤧᤴᤗᤥ॥ ᤂᤧᤴ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠᤃ ᤔᤧ᤺ᤴᤗᤥ ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤒᤠᤖᤥ॥
1CO 15:11 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤛᤠᤱ ᤂᤧᤱᤜᤠ᤹ᤖᤧᤛᤠᤱ ᤀᤡᤱᤓᤴ ᤆᤥ᤺ᤰᤔᤏᤠᤒᤠ ᤛᤢᤏᤠᤀᤡᤱᤅᤡᤴ ᤗᤳᤇᤠᤖᤥ. ᤜᤧᤰᤁᤩᤠᤱ ᤒᤠ ᤂᤧᤴᤏᤣ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥
1CO 15:12 ᤁᤖ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤶᤒᤧᤀᤠᤱ ᤘᤠ᤹ᤀᤡᤸᤗᤧ ᤂᤡᤏᤡ᤹ ᤁᤢᤓᤠᤖᤧ ᤀᤠᤰᤂᤣᤗ᤹ᤖᤡᤰ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤔᤧᤒᤥ᤺ᤱᤏᤧᤴ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶᤒᤠᤒᤣ᥅
1CO 15:13 ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤔᤧᤒᤥ᤺ᤱᤏᤧᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴᤏᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤴᤗᤥ॥
1CO 15:14 ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤔᤧᤜᤡᤅᤧᤴᤏᤧ ᤑᤠ᤹ᤃᤪ ᤀᤠᤏᤡᤃᤧ ᤀᤡᤱᤓᤴ ᤆᤥᤃᤢᤶᤒᤧᤒᤠ ᤏᤢ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤱᤃ ᤜᤏᤧᤖᤰ ᤐᤥ᤺ᤱᤗᤥ॥
1CO 15:15 ᤂᤧᤴᤏᤢ᤺ᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤏᤡᤃᤧ ᤀᤡᤱᤗᤧᤰᤁᤣ ᤐᤥ᤺ᤰᤂᤡᤃᤧᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴ ᤜᤡᤱᤔᤴᤏᤥ ᤑᤥ᤺ᤰᤂᤢ ᤗ᤹ᤖᤡᤰ ᤛᤠ᤺ᤰᤂᤡ ᤐᤡᤖᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤁᤖ ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤁᤧᤛᤡ᤺ᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤜᤡᤱᤔᤴᤏᤥ ᤔᤧᤓᤥ᤺ᤰᤂᤢᤴᤛᤡᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤜᤡᤱᤔᤴᤏᤥ ᤔᤧᤓᤥ᤺ᤰᤂᤢᤴᤗᤥ॥
1CO 15:16 ᤌᤣᤀᤠᤱᤓᤧᤸᤗᤧ ᤁᤧᤛᤡ᤺ᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤔᤧᤴᤜᤡᤱᤏᤧᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴᤏᤠᤱ ᤛᤡ᤺ᤔᤧᤴᤗᤠᤶ ᤔᤧᤜᤡᤅᤧᤴᤗᤥ॥
1CO 15:17 ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤔᤧᤜᤡᤅᤧᤴᤏᤧ ᤑᤠ᤹ᤃᤪ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤜᤏᤧᤒᤠ ᤐᤥ᤺ᤱ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤂᤡᤏᤡ᤹ ᤗᤠᤕᤥᤀᤥᤀᤣ ᤁᤧᤘᤕᤡ᤹ᤖᤥ॥
1CO 15:18 ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤔᤧᤜᤡᤅᤧᤴᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ᤖᤧᤀᤠᤱ ᤛᤧᤴᤗᤵ ᤔᤧᤱᤄᤥᤀᤣ ᤔᤧᤘᤠ᤹ᤖᤥ॥
1CO 15:19 ᤁᤴ ᤜᤡᤱᤔᤴᤗᤧ ᤗᤠᤃᤡᤖᤰ ᤂᤪᤡᤛ᤻ᤋᤀᤥ ᤀᤠᤏᤡ᤹ ᤏᤡᤱᤛᤠᤱ ᤀᤠᤈᤥᤃᤢᤶᤒᤠᤏᤧ ᤑᤠ᤹ᤃᤪ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤗᤢᤱᤔᤠ᤹ ᤛᤩᤠ᤺ᤳ ᤁᤧᤗ᤹ᤒᤠ ᤀᤠᤈᤥ᤺ᤰᤗᤥ॥
1CO 15:20 ᤁᤖ ᤂᤪᤡᤛ᤻ᤋᤧᤱᤃ ᤛᤧᤰᤂᤠᤀᤣ ᤛᤡ᤺ᤔᤧᤴᤗᤠᤶ ᤜᤡᤅᤧᤖᤥ. ᤜᤧᤰᤁᤩᤠᤱ ᤁᤧᤛᤡ᤺ᤒᤠᤀᤠᤱ ᤁᤧᤜᤡᤱᤒᤠᤜᤠ᤹ᤀᤥ ᤂᤢᤏᤧ᤹ᤀᤣ ᤋᤢᤶᤒᤠᤖᤥ॥
1CO 15:21 ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤱᤃ ᤗᤳᤌᤡᤰ ᤔᤏᤠᤗᤠᤶᤒᤠᤀᤣ ᤋᤩᤧ. ᤜᤧᤰᤁᤣᤗ᤹ᤖᤡᤰᤁᤣ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤏᤠᤱ ᤗᤳᤌᤡᤰ ᤔᤏᤠᤗᤠᤶᤒᤠᤀᤣ ᤋᤠ᤺ᤖᤥ॥
1CO 15:22 ᤌᤣᤀᤠᤱᤓᤧᤸᤗᤧ ᤀᤠᤍᤶᤔᤡᤸᤗᤧ ᤁᤢᤎᤠ᤺ᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤛᤡ᤺. ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤜᤡᤱᤗᤥ॥
1CO 15:23 ᤁᤖ ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤕᤧᤶᤔᤡᤴ ᤜᤠᤱᤔᤠᤀᤣ ᤐᤥ᤺ᤱᤗᤥ॥ ᤛᤡ᤺ᤔᤧᤴᤗᤠᤶ ᤁᤧᤜᤡᤱᤒᤠᤜᤠ᤹ᤀᤥ ᤂᤪᤡᤛ᤻ᤋᤧᤱᤃ ᤋᤢᤶᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤱ ᤕᤢ᤺ᤸᤗᤧ ᤁᤢᤔᤏᤠᤜᤠ᤹ ᤔᤧᤜᤡᤱᤗᤥ॥
1CO 15:24 ᤜᤧᤰᤁᤩᤠᤱ ᤁᤢᤏᤢᤵᤔᤠᤴ ᤋᤠ᤺ᤖᤥ॥ ᤂᤧᤴ ᤕᤧᤶᤔᤥ ᤂᤪᤡᤛ᤻ᤋᤖᤧ ᤁᤧᤖᤧᤰ ᤕᤠᤶᤛᤠᤶᤃᤧᤴ ᤜᤠᤱᤕᤢᤰ. ᤕᤢᤰᤜᤠ᤹ ᤏᤢ ᤔᤢᤰᤛᤠᤶᤜᤠ᤹ ᤔᤧᤰᤂᤢᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤢᤰᤛᤢᤵᤋᤢ᤹॥
1CO 15:25 ᤌᤣᤀᤠᤱᤓᤧᤸᤗᤧ ᤁᤢᤏᤡᤱᤔᤡᤜᤠ᤹ ᤁᤢᤕᤢᤰᤁᤥ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤂᤢᤏᤧ᤹ᤃ ᤜᤠᤱ ᤆᤥ᤺ᤰᤔᤠᤀᤣ ᤐᤥ᤺ᤱᤗᤥ॥
1CO 15:26 ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤔᤧᤱᤔᤠ ᤁᤧᤒᤥ᤺ᤱᤒᤠ ᤏᤡᤱᤔᤡ᤺ᤱᤃ ᤛᤡ᤺ᤔᤧᤴᤗᤥ॥
1CO 15:27 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤢᤕᤢᤰᤁᤥ ᤋᤠᤖᤢᤀᤠᤱ ᤘᤠ᤹॥” ᤁᤖ “ᤁᤧᤖᤧᤰ ᤐᤠ᤺ᤴᤜᤠ᤹” ᤁᤢᤕᤢᤰᤁᤥ ᤘᤠ᤹ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤁᤢᤕᤢᤰᤁᤥ ᤘᤠ᤹ ᤁᤧᤗ᤹ᤒᤠᤃ ᤔᤧᤒᤥ᤺ᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤥ ᤏᤧᤛ᤻ᤛᤢᤐᤡᤖᤢᤒᤠᤖᤥ॥
1CO 15:28 ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤕᤢᤰᤁᤥ ᤋᤠ᤺. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤁᤢᤕᤢᤰᤁᤥ ᤁᤧᤍᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤢᤰᤁᤥ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴᤏᤠᤱ ᤋᤠ᤺ᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤁᤧᤖᤧᤰ ᤛᤶᤍᤠᤱ ᤕᤢᤰ ᤁᤧᤈᤥ᤺ᤰᤐᤠ ᤐᤥ᤺ᤱᤗᤥ॥
1CO 15:29 ᤀᤠᤸᤗ ᤛᤡ᤺ᤔᤧᤴᤗᤠᤶ ᤜᤡᤱᤔᤴ ᤔᤧᤒᤥ᤺ᤱᤏᤧᤴᤏᤧ ᤑᤠ᤹ᤃᤪ ᤁᤧᤛᤡ᤺ᤒᤠᤜᤠ᤹ᤖᤧ ᤗᤠᤃᤡ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤁᤢᤒᤣ᤺ᤴ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤁᤧᤛᤡ᤺ᤒᤠᤜᤠ᤹ ᤔᤧᤴᤜᤡᤱᤏᤧᤴᤏᤡᤸᤗᤧ ᤌᤣᤀᤠᤱ ᤔᤏᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤒᤵᤋᤡᤛ᤻ᤔᤠ ᤔᤧᤒᤥ᤺ᤱᤒᤠᤒᤣ᥅
1CO 15:30 ᤜᤧᤰᤁᤩᤠᤱ ᤀᤠᤏᤡᤃᤧᤀᤠᤱ ᤁᤧᤖᤧᤰ ᤕᤧᤶᤔᤥ ᤌᤣᤀᤠᤱ ᤁᤡᤵᤔᤠ ᤁᤧᤄᤢ᤺ᤒᤠᤀᤥ ᤌᤩᤧ᤹ᤀᤡᤃᤧᤖ ᤘᤕᤡᤃᤧᤒᤠᤒᤣ᥅
1CO 15:31 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤂᤡᤏᤡ᤹ᤀᤥ ᤆᤥᤃᤢᤒᤠ ᤐᤠ᤺ᤴᤏᤥᤒᤠ ᤀᤠᤛᤡᤰ ᤛᤶᤔᤠᤸᤗᤧ “ᤀᤡᤱᤃᤠ᤹ ᤌᤡᤰᤕᤠ᤺ᤴᤎᤰ ᤛᤡ᤺ᤔᤠ ᤕᤠᤖᤡᤵ ᤐᤥ᤺ᤱᤅᤠ” ᤐᤠ᤺ᤵᤔᤠ ᤛᤢᤰᤋᤢᤱᤗᤥ॥
1CO 15:32 ᤀᤣᤑᤡᤛᤛ ᤕᤧᤰᤕᤰᤁᤥ ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ ᤌᤱ ᤌᤰᤋᤠᤱᤅᤡᤸᤗᤧ ᤌᤣ ᤀᤡᤴᤎᤠ᤺ᤱ ᤂᤥ᤺ᤛᤢᤱᤒᤣ᥅ ᤁᤧᤛᤡ᤺ᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤔᤧᤴᤜᤡᤱᤏᤧᤴᤏᤧ ᤑᤠ᤹ᤃᤪ “ᤀᤠᤏᤡ᤹ ᤆᤠᤶ ᤌᤢᤅᤢᤶ. ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰᤁ ᤀᤠᤏᤡ᤹ ᤀᤠᤛ᤻ᤛᤡ᤺ᤀᤣᤖᤥ॥”
1CO 15:33 ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ “ᤋᤠᤵᤑᤧ᤺ᤶᤒᤠ ᤋᤣ᤺ᤱᤈᤢᤶᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤏᤢ᤺ᤒᤠ ᤕᤧᤵᤗᤧᤰᤁᤡᤴ ᤑᤧᤳᤗᤠ᤹ᤖᤥ॥”
1CO 15:34 ᤂᤡᤏᤡ᤹ᤃ ᤛᤣᤏᤡᤱᤘᤠ᤹ᤀᤥ ᤏᤢ᤺ᤰᤂᤧᤶᤔᤧ᤹ᤀᤠᤱ ᤗᤠᤕᤥ ᤆᤥ᤺ᤰᤔᤠ ᤗᤧᤖᤧᤶᤔᤧ᤹ᤀᤥ॥ ᤂᤡᤏᤡ᤹ᤀᤥ ᤁᤢᤓᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧ᤺ᤔᤏᤠᤒᤠᤜᤠ᤹ᤀᤠᤱ ᤔᤧᤘᤠ᤹ᤖᤥ॥ ᤁᤱᤃ ᤂᤡᤏᤡ᤹ ᤛᤡᤖᤡᤱ ᤁᤧᤔᤕᤡᤖ ᤑᤠ᤹ᤀᤠᤱ ᤔᤧᤳᤏᤡᤱᤒᤠᤖᤥ॥
1CO 15:35 ᤁᤖ ᤂᤡᤏᤡ᤹ᤀᤥ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤒᤡᤗᤠ. “ᤀᤠᤰᤂᤣᤗ᤹ᤖᤡᤰ ᤁᤧᤛᤡ᤺ᤒᤠᤜᤠ᤹ ᤔᤧᤜᤡᤱᤒᤣ᥅ ᤀᤠᤰᤋᤱᤒᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤔᤧᤄᤥ᤺ᤛᤢ᤹ᤒᤣ᥅”
1CO 15:36 ᤀᤍᤱᤛᤣ. ᤂᤡᤏᤡ᤹ ᤁᤧᤜᤣ᤹ᤖᤢᤶᤒᤠ ᤕᤠ᤹ᤖᤡ᤺ᤶᤒᤠᤴ ᤔᤧᤴᤇᤡ᤺ᤀᤣ ᤌᤠᤖᤡᤰ ᤔᤧᤗᤡᤱᤏᤧᤴᤗᤥ॥
1CO 15:37 ᤂᤡᤏᤡ᤹ ᤁᤧᤜᤣ᤹ᤖᤢᤶᤒᤠ ᤕᤠ᤹ᤖᤡ᤺ᤶᤒᤠᤴ ᤋᤠ᤺ᤴᤍᤡ ᤁᤧᤒᤥ᤺ᤱᤒᤠ ᤁᤢᤒᤢᤱᤅᤡᤴ ᤔᤧ᤺ᤴᤗᤥ. ᤁᤖ ᤛᤡ᤺ᤸᤗᤧᤴ ᤀᤡᤃᤪ ᤘᤣ᤹ ᤐᤖᤡᤰᤗᤧᤴ ᤕᤠ᤹ᤖᤡ᤺ᤶᤒᤠᤴᤗᤰ ᤁᤧᤜᤣ᤹ᤖᤢᤶ॥
1CO 15:38 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤧᤖᤧᤰ ᤕᤠ᤹ᤖᤡ᤺ᤶᤒᤠᤜᤠ᤹ ᤀᤠᤒᤠᤅᤣ ᤐᤖᤡᤰᤐᤠ ᤁᤢᤒᤢᤱᤔᤠ ᤐᤡᤖᤢᤛᤡ᤹ᤖᤥ॥
1CO 15:39 ᤜᤧᤰᤁᤣᤗ᤹ᤖᤡᤰᤁᤣ ᤏᤠᤛᤡᤱᤃᤧᤴ ᤌᤰᤜᤠ᤹ᤀᤠᤱ ᤌᤡᤰ ᤐᤖᤡᤰᤗᤧᤴ ᤔᤧᤜᤥ᤺ᤵᤗᤥ॥ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤌᤡᤰ ᤐᤖᤡᤰᤗᤧᤴ. ᤌᤰᤛᤠᤜᤠ᤹. ᤐᤢᤛᤠᤜᤠ᤹ ᤏᤢ ᤅᤠᤜᤠ᤹ᤖᤧᤴ ᤘᤣ᤹ ᤘᤣ᤹ ᤐᤖᤡᤰᤗᤧᤴ ᤌᤰ ᤘᤠ᤹ᤖᤥ॥
1CO 15:40 ᤋᤠᤱᤛᤠᤰᤐᤥ ᤗᤠᤒᤠ. ᤏᤠᤶ. ᤂᤣ᤺ᤶᤛᤡᤰᤜᤠ᤹ ᤔᤧᤒᤳ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤀᤠᤱ ᤌᤰᤜᤠ᤹ ᤔᤧᤘᤠ᤹ᤖᤥ. ᤁᤖ ᤋᤠᤱᤛᤠᤰᤐᤥᤒᤠ ᤗᤠᤒᤠ. ᤏᤠᤶ. ᤂᤣ᤺ᤶᤛᤡᤰᤜᤠ᤹ᤖᤧ ᤂᤢᤏᤡ᤹ ᤀᤥ᤺ᤵᤔᤠᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤌᤰᤜᤠ᤹ᤖᤧ ᤂᤢᤏᤡ᤹ ᤂᤧᤶᤛᤡᤱᤔᤠᤴ ᤘᤣ᤹ ᤘᤣ᤹ ᤆᤥ᤺ᤰᤗᤥ॥
1CO 15:41 ᤏᤠᤶᤔᤡᤸᤗᤧ ᤁᤢᤀᤥ᤺ᤵᤔᤠᤴ ᤌᤡᤰ ᤐᤖᤡᤰᤗᤧᤴ. ᤗᤠᤒᤠᤸᤗᤧᤴ ᤘᤣ᤹ ᤐᤖᤡᤰᤗᤧᤴ ᤆᤥ᤺ᤰ. ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤀᤥ᤺ᤵᤔᤠᤴ ᤘᤣ᤹ ᤐᤖᤡᤰᤗᤧᤴ ᤆᤥ᤺ᤰ॥ ᤜᤧᤰᤁᤣᤗ᤹ᤖᤡᤰᤁᤣ ᤌᤡᤰ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤀᤥ᤺ᤵᤔᤠᤴ ᤏᤢ ᤘᤣ᤹ᤛ᤻ᤔᤠ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤀᤥ᤺ᤵᤔᤠᤴ ᤘᤣ᤹ ᤘᤣ᤹ ᤆᤥ᤺ᤰᤗᤥ॥
1CO 15:42 ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤆᤥ᤺ᤰᤗᤥ॥ ᤁᤴ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤡ᤹᤺ ᤜᤧᤰᤁᤩᤠᤱ ᤗᤢᤵᤔᤠᤀᤠᤱ ᤁᤡ᤹᤺. ᤁᤖ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠ ᤌᤰᤁᤡᤴ ᤀᤠᤈᤢᤏᤡ ᤐᤥ᤺ᤱᤗᤥ॥
1CO 15:43 ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤗᤢᤵᤐᤡᤸᤗᤧ ᤋᤠᤵᤑᤧ᤺ᤶᤒᤠ ᤏᤢ ᤌᤢᤶ ᤔᤧ᤺ᤴᤏᤣᤒᤠ ᤆᤥ᤺ᤰ. ᤁᤖ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤱᤅᤡᤸᤗᤧ ᤏᤢ᤺ᤒᤠ ᤏᤢ ᤁᤧᤎᤢᤶᤒᤠ ᤐᤥ᤺ᤱᤗᤥ॥
1CO 15:44 ᤏᤠᤛᤡᤱᤃᤧᤴ ᤌᤰᤁᤡᤴ ᤗᤢᤵ. ᤜᤧᤰᤁᤩᤠᤱ ᤕᤠᤶᤛᤠᤶᤃᤧᤴ ᤌᤰᤁᤡᤴ ᤜᤡᤱᤗᤥ॥ ᤏᤠᤛᤡᤱᤃᤧᤴ ᤌᤰ ᤘᤠ᤹ᤒᤠ ᤜᤧᤰᤁᤣᤀᤣ ᤕᤠᤶᤛᤠᤶᤃᤧᤴ ᤌᤰᤁᤡᤴᤏᤠᤱ ᤘᤠ᤹ᤖᤥ॥
1CO 15:45 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤌᤡᤰᤛᤡᤃᤣ᤺ᤰᤛ᤻ᤔᤠ ᤔᤏᤠ ᤀᤠᤍᤶᤔᤡᤱᤃ ᤁᤢᤜᤡᤱᤘᤧᤳ ᤔᤏᤠ ᤐᤥ᤺ᤰᤂᤧ.” ᤕᤠᤱᤛᤡᤒᤠ ᤀᤠᤍᤶᤔᤡᤱᤃ (ᤂᤪᤡᤛ᤻ᤋ) ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤕᤠᤶᤛᤠᤶ ᤐᤥ᤺ᤰᤂᤧᤖᤥ॥
1CO 15:46 ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤠᤛᤡᤱᤃᤧᤴ ᤌᤰᤁᤡᤴ ᤋᤠ᤺. ᤜᤧᤰᤁᤩᤠᤱᤗᤰ ᤕᤠᤶᤛᤠᤶᤃᤧᤴ ᤌᤰᤁᤡᤴ ᤋᤠ᤺ᤖᤥ॥
1CO 15:47 ᤌᤡᤰᤛᤡᤃᤣ᤺ᤰᤐᤠ ᤔᤏᤠ᤺ᤱᤃ ᤂᤠᤶᤒᤣ᤺ᤰᤔᤥᤒᤠ ᤂᤠᤶᤗᤠᤶᤒᤠ ᤆᤥᤃᤧᤀᤠᤱ ᤘᤕᤧ. ᤁᤖ ᤏᤡᤛᤡᤃᤣ᤺ᤰᤛ᤻ᤔᤠ ᤔᤏᤠ᤺ᤱᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠᤒᤠᤖᤥ॥
1CO 15:48 ᤀᤡᤰᤛᤠᤒᤠ ᤔᤏᤠᤜᤠ᤹ ᤂᤠᤶᤔᤡᤸᤗᤧ ᤁᤧᤒᤥ᤺ᤱᤒᤠ ᤔᤏᤠ᤺ᤴ ᤜᤧᤰᤋᤱᤒᤠᤛᤡᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤏᤠᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤏᤠ᤺ᤴ ᤜᤧᤰᤋᤱᤒᤠᤛᤡᤖᤥ॥
1CO 15:49 ᤀᤠᤸᤗᤥ ᤀᤠᤏᤡ᤹ ᤂᤠᤶᤔᤡᤸᤗᤧ ᤁᤧᤒᤥ᤺ᤱᤒᤠ ᤔᤏᤠ᤺ᤴ ᤜᤧᤰᤋᤱᤒᤠ ᤀᤠᤈᤥ᤺ᤰ. ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤔᤏᤠ᤺ᤴ ᤜᤧᤰᤋᤱᤒᤠ ᤀᤠᤒᤥ᤺ᤱᤗᤥ॥
1CO 15:50 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠᤴ ᤁᤴᤗᤥ. ᤏᤧᤰᤛᤠ ᤏᤢ ᤔᤠᤰᤂᤡ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤗᤰ ᤂᤥ᤺ᤔᤠ ᤔᤧᤛᤢᤰᤋᤢᤴᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤔᤧᤰᤐᤠ ᤁᤧᤒᤣ᤺ᤰᤐᤠᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤧᤰᤔᤏᤠᤒᤠᤸᤗᤧᤴ ᤗᤰ ᤂᤥ᤺ᤔᤠ ᤔᤧᤛᤢᤰᤋᤢᤴᤗᤥ॥
1CO 15:51 ᤂᤧᤵᤛᤧᤶᤔᤧ᤹ᤀᤥ᥄ ᤀᤡᤱᤃᤠ᤹ ᤗᤳᤇᤠ ᤛᤡᤒᤡ᤹ᤒᤠ ᤐᤠ᤺ᤴᤎᤡᤰ ᤔᤧᤳᤏᤡᤱ–ᤀᤠᤏᤡ᤹ ᤁᤧᤖᤧᤰ ᤀᤠᤴᤇᤡ᤺ᤏᤧᤴᤗᤥ. ᤁᤖ ᤀᤠᤏᤡ᤹ ᤁᤧᤖᤧᤰ ᤀᤠᤗᤧᤱᤛᤡᤱ ᤀᤠᤒᤣ᤺ᤰᤗᤥ॥
1CO 15:52 ᤛᤵᤑᤠᤖᤧᤛᤠ. ᤔᤡᤰᤆᤡᤖᤠᤵᤐᤥᤛᤠ. ᤌᤢᤳᤌᤢᤖᤡ᤺ᤵᤐᤠᤸᤗᤧ ᤁᤢᤏᤢᤵᤐᤥᤒᤠ ᤀᤡᤰᤗᤠᤀᤥ ᤀᤠᤗᤧᤰᤛᤡᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤌᤢᤳᤌᤢᤖᤡ᤺ᤵᤐᤧᤴ ᤔᤢᤰ ᤜᤧᤰᤁᤩᤠᤱ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠᤜᤠ᤹ ᤔᤧᤶᤔᤧᤰᤔᤏᤠᤒᤠ ᤔᤧᤒᤥ᤺ᤱᤅᤠᤱ ᤔᤧᤜᤡᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰ ᤀᤠᤗᤧᤱᤛᤡᤱ ᤀᤠᤒᤣ᤺ᤰᤗᤥ॥
1CO 15:53 ᤌᤣᤀᤠᤱᤓᤧᤸᤗᤧ ᤁᤴ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤀᤠᤈᤢᤏᤡ ᤌᤰᤁᤥ ᤗᤧᤱᤛᤡᤱᤔᤠ ᤐᤥ᤺ᤱᤗᤥ॥
1CO 15:54 ᤜᤧᤰᤁᤩᤠᤱ ᤁᤴ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤌᤰᤁᤡᤴ ᤔᤧᤴᤇᤡ᤺ᤔᤏᤠᤒᤠ ᤀᤠᤈᤢᤏᤡ ᤌᤰᤁᤥ ᤗᤧᤱᤛᤡᤱᤅᤡᤸᤗᤧ ᤁᤴ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤈᤠᤰᤁᤡᤴ ᤁᤧᤳᤗᤥ. “ᤛᤡ᤺ᤔᤧᤴ ᤌᤱᤅᤥ ᤜᤠᤖᤡ ᤋᤩᤧᤀᤠᤱ ᤘᤠ᤹ᤖᤥ”
1CO 15:55 “ᤛᤡ᤺ᤔᤧᤴᤏᤣ. ᤂᤧᤏᤧ᤹ ᤁᤧᤎᤱᤏᤠ᤺ᤴᤏᤡᤴ ᤀᤠᤳᤋᤥ ᤘᤠ᤹ᤒᤣ᥅ ᤛᤡ᤺ᤔᤧᤴᤏᤣ. ᤂᤧᤏᤧ᤹ ᤁᤧᤔᤢᤰᤛᤠᤶᤔᤡᤴ ᤀᤠᤳᤋᤥ ᤘᤠ᤹ᤒᤣ᥅”
1CO 15:56 ᤛᤡ᤺ᤔᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤗᤠᤕᤥᤗᤠᤶ ᤂᤥ᤺ᤛᤢ᤹ᤖᤥ. ᤜᤧᤰᤁᤩᤠᤱ ᤗᤠᤕᤥ᤺ᤸᤗᤧ ᤁᤢᤔᤢᤰᤛᤠᤶᤔᤡᤱᤃ ᤛᤠᤶᤕᤥ ᤀᤡᤱᤈᤠ᤺ᤱᤗᤠᤶ ᤂᤥ᤺ᤛᤢ᤹ᤖᤥ॥
1CO 15:57 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄ ᤂᤢᤏᤧ᤹ᤀᤣ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤌᤱᤏᤠ᤺ᤴᤏᤡᤴ ᤀᤠᤒᤡ᤹ᤖᤥ॥
1CO 15:58 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤔᤧᤶᤔᤢᤴᤏᤣ ᤘᤕᤧᤶᤔᤧ᤹ᤀᤥ॥ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰᤁᤥ ᤛᤍᤠᤍᤡᤱ ᤐᤥ᤺ᤖᤧᤶᤔᤧ᤹ᤖ ᤐᤣᤃᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤗᤠᤃᤡ ᤂᤡᤏᤡ᤹ ᤕᤠᤶᤒᤢᤎᤡᤰᤁᤡᤴ ᤆᤠᤔᤧᤛᤥ᤺ᤰᤏᤧᤴ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
1CO 16:1 ᤀᤠᤸᤗ ᤕᤖᤢᤛᤗᤧᤔᤛ᤻ᤔᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ ᤕᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤔᤧᤳᤏᤡᤱᤗᤥ–ᤃᤗᤠᤋᤡᤕᤠ ᤌᤢᤶᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤱᤛᤡᤱᤒᤠ ᤜᤧᤰᤁᤣᤀᤣ ᤆᤥᤃᤧᤶᤔᤧ᤹ᤀᤥ॥
1CO 16:2 ᤋᤧᤏᤧᤒᤠ ᤕᤧᤴᤏᤥ ᤂᤡᤏᤡ᤹ ᤁᤧᤖᤧᤰᤗᤧ ᤁᤧᤎᤃᤢᤶᤒᤠ ᤕᤠᤱᤗᤠᤶᤒᤠ ᤁᤢᤓᤠ᤹ ᤕᤠᤱ ᤛᤧᤴᤍᤧᤶᤔᤧ᤹ᤀᤠᤱ ᤑᤢᤰᤂᤧᤶ ᤕᤢᤰᤂᤧᤶᤔᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤋᤠᤀᤠᤸᤗᤧ ᤁᤢᤓᤠ᤹ ᤕᤠᤱ ᤑᤢᤱᤔᤠ ᤔᤧᤒᤥ᤺ᤱᤏᤧᤴ॥
1CO 16:3 ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤵᤔᤥ ᤋᤠᤀᤠᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤏᤠᤜᤠ᤹ ᤏᤡ᤺ᤛᤢᤶ ᤛᤰᤜᤠ᤹ ᤛᤠᤵᤋᤢᤱ ᤐᤡᤖᤢᤱᤛᤡᤱᤅᤠᤱ ᤂᤧᤱᤜᤠ᤹ᤏᤢᤀᤣ ᤂᤡᤏᤡ᤹ ᤁᤧᤓᤥ᤺ᤰᤂᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤜᤠᤱᤔᤠᤍᤣ᤺ᤔᤠ ᤐᤥ᤺ᤱᤗᤥ॥
1CO 16:4 ᤀᤡᤱᤃᤠ᤹ᤀᤠᤱ ᤐᤣ᤺ᤰᤁᤠᤸᤗᤧ ᤏᤢ᤺ᤒᤠ ᤐᤥ᤺ᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ᤏᤢᤀᤣ ᤂᤧᤱᤜᤠ᤹ᤀᤠᤱ ᤔᤧᤒᤣ᤺ᤰᤗᤥ॥
1CO 16:5 ᤀᤡᤱᤃᤠ᤹ ᤔᤧᤛᤣᤍᤥᤏᤡᤕᤠ ᤌᤢᤶᤔᤥ ᤗᤠᤶᤍᤡ᤺ᤰ ᤆᤥ᤺ᤰᤁᤠᤀᤠᤱ ᤂᤡᤏᤡ᤹ ᤋᤢᤶᤛᤧ ᤋᤠᤀᤠ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤛᤣᤍᤥᤏᤡᤕᤠ ᤐᤥ᤺ᤱᤔᤠᤖ ᤗᤠᤶᤍᤡ᤺ᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
1CO 16:6 ᤀᤡᤱᤃᤠ᤹ ᤂᤡᤏᤡ᤹ᤏᤢ ᤛᤵᤑᤠ ᤘᤠ᤹ᤛᤧ ᤋᤠᤀᤠᤒᤡᤗᤠ. ᤐᤥ᤺ᤱᤏᤧ ᤑᤠ᤹ᤃᤪ ᤁᤴ ᤆᤢᤱᤘᤠ᤺ᤶᤔᤠᤀᤥ ᤂᤡᤏᤡ᤹ᤏᤢ ᤘᤠ᤹ᤀᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤧᤵᤔᤥᤗᤠᤶ ᤀᤠᤳᤋᤡ ᤐᤣ᤺ᤰᤁᤠᤛᤠᤱ ᤁᤢᤓᤠ᤹ ᤐᤡᤔᤠ ᤀᤠᤃᤧᤛᤢᤰᤋᤡ᤹ᤖᤥ॥
1CO 16:7 ᤌᤣᤀᤠᤱᤓᤧᤸᤗᤧ ᤁᤴ ᤕᤧᤶᤔᤥ ᤂᤡᤏᤡ᤹ ᤋᤢᤶᤛᤧ ᤛᤵᤑᤠᤖᤰ ᤔᤧ᤺ᤴ. ᤁᤖ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤐᤥ᤺ᤱᤏᤧ ᤑᤠ᤹ᤃᤪ ᤂᤡᤏᤡ᤹ᤏᤢ ᤁᤢᤓᤠ ᤕᤧᤶ ᤌᤠᤖᤡᤰ ᤘᤠ᤹ᤔᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
1CO 16:8 ᤁᤖ ᤐᤧᤴᤋᤡᤁᤥᤛ ᤋᤱᤏᤠᤶ ᤌᤠᤖᤡᤰ ᤀᤡᤱᤃᤠ᤹ ᤁᤵᤔᤥ ᤀᤣᤑᤡᤛᤛ ᤕᤧᤰᤕᤰᤁᤥ ᤕᤠ᤺ᤰᤁᤠᤖᤥ॥
1CO 16:9 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤗᤠᤃᤡ ᤐᤕᤶ ᤕᤠ᤺ᤶᤒᤰ ᤆᤥ᤺ᤰᤔᤠ ᤆᤠᤖᤡᤰ ᤏᤢ᤺ᤒᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤁᤵᤔᤥ ᤕᤖᤡᤰ ᤕᤠᤵᤔᤡ ᤁᤧᤀᤵᤐᤠᤜᤠ᤹ᤀᤠᤱ ᤔᤧᤘᤠ᤹ᤖᤥ॥
1CO 16:10 ᤋᤡᤔᤥᤌᤡ᤺ᤴ ᤂᤧᤵᤔᤥ ᤋᤠ᤺ᤸᤗᤧ ᤏᤢ᤺ᤖᤡᤰᤁᤠᤱ ᤗᤠᤱᤍᤠ᤺ᤰᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰᤁᤣ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥
1CO 16:11 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤢᤏᤠᤔᤧᤴᤇᤠ᤹ ᤔᤧᤶᤔᤧᤳᤋᤢᤴᤗ॥ ᤂᤢᤏᤧ᤹ ᤀᤡᤱᤃᤠ᤹ᤀᤥ ᤑᤧᤴᤏᤡᤸᤗᤧ ᤁᤢᤓᤠ᤹ ᤐᤡᤖᤧᤶᤔᤧ᤹ᤀᤠᤱ ᤐᤠᤱᤄᤧᤶᤔᤧ᤹ᤀᤥ॥ ᤂᤢᤏᤧ᤹ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤁᤧᤳ ᤑᤧᤴ ᤑᤠ᤹ᤀᤠᤱ ᤀᤡᤱᤃᤠ᤹ ᤜᤠᤱᤄᤢᤱᤗ ᤘᤠ᤹ᤀᤠᤖᤥ॥
1CO 16:12 ᤀᤠᤸᤗ ᤏᤢᤛᤠ᤹ ᤀᤵᤐᤥᤗᤥᤛᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤀᤰᤂᤣ ᤔᤧᤳᤏᤡᤱᤗᤥ–ᤂᤢᤏᤧ᤹ ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤢ ᤂᤡᤏᤡ᤹ᤀᤥ ᤑᤧᤴᤗ ᤑᤠ᤹ᤀᤠᤱ ᤛᤠ᤹ᤖᤡᤰ ᤐᤣᤗᤡ ᤑᤠᤰᤋᤢᤱ. ᤁᤖ ᤂᤢᤏᤧ᤹ ᤀᤠᤸᤗᤥ ᤂᤡᤏᤡ᤹ᤀᤥ ᤑᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ॥ ᤂᤢᤏᤧ᤹ ᤏᤢ᤺ᤒᤠ ᤕᤧᤶ ᤂᤥ᤺ᤛᤢᤸᤗᤧᤛᤠ ᤂᤡᤏᤡ᤹ ᤋᤢᤶᤛᤧ ᤑᤧᤴᤗᤥ॥
1CO 16:13 ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ॥ ᤏᤛᤠ᤺ᤴᤏᤥ ᤔᤧᤶᤔᤢᤴᤏᤣ ᤘᤕᤧᤶᤔᤧ᤹ᤀᤥ॥ ᤔᤧᤱᤃᤡ᤺ᤔᤏᤠᤒᤠ ᤏᤢ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ
1CO 16:14 ᤌᤧᤔᤠ ᤁᤧᤈᤥᤃᤢᤶᤛᤠᤱ ᤔᤡ᤺ᤶᤈᤡᤏᤢ ᤆᤥᤃᤧᤶᤔᤧ᤹ᤀᤥ॥
1CO 16:15 ᤛ᤻ᤋᤡᤑᤏᤛᤧᤴ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤛᤡᤶᤗᤥ॥ ᤂᤧᤱᤜᤠ᤹ᤃ ᤀᤰᤂᤤᤕᤠ ᤌᤢᤶᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤏᤛᤠ᤺ᤴ ᤁᤧᤈᤥ᤺ᤰᤐᤠᤛᤡᤖᤥ॥ ᤜᤧᤰᤁᤩᤠᤱ ᤏᤛᤠᤏᤡᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡᤀᤥ ᤀᤠᤒᤠᤅᤣ ᤔᤧᤒᤡᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤏᤡᤱᤗᤥ.
1CO 16:16 ᤀᤰᤋᤱᤒᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤘᤣ᤹ ᤍᤠᤱᤒᤠᤀᤥ ᤕᤠᤶᤒᤢᤎᤡᤰᤁᤠᤱ ᤔᤠᤱᤛᤣᤘᤠᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤀᤥ॥
1CO 16:17 ᤁᤵᤔᤥ ᤛ᤻ᤋᤡᤑᤏᤛ. ᤑᤥᤷᤋᤢᤏᤠᤋᤛ ᤏᤢ ᤀᤰᤂᤤᤁᤛᤛᤡ ᤔᤧᤃᤧᤖᤧ ᤔᤧᤍᤩᤧᤸᤗᤧ ᤀᤡᤱᤃᤠ᤹ ᤐᤛ᤺ᤳᤛ᤺ᤳᤋᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤂᤡᤏᤡ᤹ ᤁᤧᤜᤥ᤺ᤵᤋᤡᤸᤗᤧ ᤀᤡᤱᤃᤠ᤹ ᤆᤠᤜᤠᤒᤠ ᤆᤥᤃᤠᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤒᤡᤖᤠᤱᤅᤠᤱ ᤔᤧᤘᤠ᤹ᤖᤥ॥
1CO 16:18 ᤂᤧᤱᤜᤠ᤹ᤖᤧᤃ ᤂᤡᤏᤡ᤹ ᤜᤠᤱᤜᤠᤱ ᤁᤧᤶᤔᤧᤳᤋᤡᤒᤠ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤜᤠᤱᤜᤠᤱ ᤔᤧᤔᤧᤳᤋᤠᤱᤅᤠᤱ ᤘᤠ᤹ᤖᤥ॥ ᤛᤧᤰᤂᤠᤛᤠᤱ ᤜᤧᤰᤋᤱᤒᤠ ᤔᤏᤠᤜᤠ᤹ᤃ ᤀᤡᤱᤎᤠ᤺ᤱ ᤐᤡᤔᤠᤛᤡ ᤐᤥ᤺ᤱᤗᤥ॥
1CO 16:19 ᤀᤣᤛᤡᤕᤠ ᤋᤧᤱᤃᤵᤐᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤂᤡᤏᤡ᤹ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥ ᤀᤁᤫᤡᤗᤠ ᤏᤢ ᤐᤪᤡᤛ᤻ᤁᤡᤗᤠ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤜᤠ᤹ᤖᤧ ᤍᤠᤱᤒᤠᤀᤥ ᤛᤡᤰᤗᤢᤱᤔᤥᤗᤠᤶ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥
1CO 16:20 ᤁᤵᤔᤥᤒᤠ ᤁᤧᤖᤧᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥ ᤂᤡᤏᤡ᤹ᤃ ᤏᤛᤠᤏᤡᤒᤠ ᤔᤡ᤺ᤶᤈᤡ᤺ᤸᤗᤧ ᤛᤣᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥
1CO 16:21 ᤀᤡᤱᤃᤠ᤹ ᤐᤠᤘᤗᤖᤧ ᤁᤴ ᤛᤣᤘᤠ᤺ᤴ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤛᤠᤵᤋᤢᤱᤅᤠᤱ ᤘᤠ᤹ᤀᤠᤖᤥ॥
1CO 16:22 ᤀᤠᤳᤋᤡᤸᤗᤧ ᤍᤠᤱᤒᤠᤴ ᤔᤡ᤺ᤶᤈᤡ ᤔᤧᤔᤧᤳᤋᤢᤴ ᤜᤠᤖᤠ᤹ ᤂᤧᤱᤃ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤖᤖᤥ॥ ᤀᤠᤍᤠᤱᤒᤣ. ᤕᤧ᤹ᤀᤥ᥄
1CO 16:23 ᤍᤠᤱᤒᤠ ᤕᤧᤛᤢᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖ॥
1CO 16:24 ᤂᤡᤏᤡ᤹ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤗᤢᤱᤔᤠ᤹ ᤋᤢᤰᤏᤡᤱᤗᤥ॥ ᤀᤠᤔᤧᤴ॥
2CO 1:1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤗᤠᤶᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤛᤣᤃᤠᤱᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡᤖᤧ ᤁᤥᤖᤴᤌᤡ ᤕᤧᤰᤕᤰᤁᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰ ᤏᤢ ᤀᤰᤂᤤᤕᤠ ᤋᤧᤱᤃᤵ ᤂᤠᤖᤠᤰ ᤁᤧᤕᤢᤱᤒᤠ ᤁᤠᤰ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤒᤠᤖᤥ॥
2CO 1:2 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤂᤡᤏᤡ᤹ ᤁᤧᤒᤡᤖᤡᤖᤖᤥ॥
2CO 1:3 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤶᤒᤠ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤏᤢ ᤀᤠ᤺ᤴᤇᤡᤱᤔᤠ ᤕᤠᤵᤔᤡ ᤁᤧᤒᤡᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ॥
2CO 1:4 ᤏᤡᤱᤘᤠ᤹ᤑᤢᤔᤠᤱᤗᤠᤶ ᤀᤠᤄᤥ᤺ᤛᤢᤶᤒᤠ ᤀᤠ᤺ᤴᤇᤡᤱᤔᤠᤸᤗᤧ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤘᤠ᤹ᤒᤠᤜᤠ᤹ ᤀᤠ᤺ᤴᤇᤡᤱᤔᤠ ᤐᤡᤔᤠ ᤀᤠᤛᤢᤰᤋᤢᤶᤛᤡᤶᤗ ᤑᤠ᤹ᤀᤠᤱ ᤂᤢᤏᤧ᤹ᤀᤣ ᤁᤠᤰ ᤀᤠᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤀᤠ᤺ᤴᤇᤡᤱᤔᤠ ᤀᤠᤒᤡ᤹ᤖᤥ॥
2CO 1:5 ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤀᤠᤏᤡ᤹ᤀᤠᤱ ᤕᤖᤡᤰ ᤋᤢᤰᤂᤣ ᤀᤠᤈᤠ᤹᤺॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤗᤠᤶ ᤕᤖᤡᤰ ᤀᤠ᤺ᤴᤇᤡᤱᤔᤠᤴ ᤀᤠᤒᤡ᤹ᤖᤥ॥
2CO 1:6 ᤀᤠᤏᤡᤃᤧ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤁᤧ᤺ᤵᤋᤡᤃᤧᤸᤗᤧ ᤂᤧᤱᤃ ᤂᤡᤏᤡ᤹ ᤀᤠ᤺ᤴᤇᤡᤱᤔᤠ ᤏᤢ ᤛᤧᤴᤗᤵᤖᤧ ᤗᤠᤃᤡᤏᤧ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤡᤃᤧᤸᤗᤧ ᤂᤧᤴᤏᤠᤱ ᤂᤡᤏᤡ᤹ ᤀᤠ᤺ᤴᤇᤡᤱᤔᤠᤸᤗᤧ ᤗᤠᤃᤡᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤐᤡᤀᤠᤛᤡᤃᤧᤒᤠ ᤀᤠ᤺ᤴᤇᤡᤱᤔᤠᤗᤠᤶ ᤀᤠᤏᤡᤃᤧ ᤌᤖᤢᤶᤒᤧᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤂᤡᤏᤡ᤹ᤀᤠᤱ ᤏᤠᤛᤡ ᤌ᤺ᤵᤔᤠ ᤁᤧᤛᤢᤰᤋᤢᤶᤗᤥ॥
2CO 1:7 ᤜᤧᤰᤁᤩᤠᤱ ᤀᤠᤏᤡᤃᤧ ᤀᤡᤏᤥᤃᤧᤴ ᤋᤢᤰᤂᤣ ᤆᤩᤧ᤹ᤀᤡᤃᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤋᤢᤰᤂᤣ ᤁᤧᤈᤩᤧ᤹ᤀᤡᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤡᤃᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤀᤠ᤺ᤴᤇᤡᤱᤔᤠ ᤁᤧᤒᤡᤖᤡ᤹ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡᤱᤛᤠᤱᤅᤡᤴ ᤔᤧᤔᤢᤴᤏᤧᤴᤗᤥ॥
2CO 1:8 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤣᤛᤡᤕᤠᤒᤠ ᤋᤧᤱᤃᤵᤐᤥ ᤀᤠᤏᤡᤃᤧ ᤋᤢᤔᤢᤶᤒᤧᤒᤠ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤋᤠ᤺ᤵᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤂᤧᤴ ᤋᤢᤰᤂᤣ᤺ᤱᤃ ᤌᤶᤔᤠ ᤛᤢᤰᤔᤧᤴᤍᤧᤵᤔᤏᤠ ᤁᤢᤀᤡᤛᤡ᤺ᤰ ᤆᤥᤃᤧ. ᤜᤧᤰᤁᤣ᤺ᤸᤗᤧ ᤀᤠᤏᤡᤃᤧ ᤜᤡᤅᤡᤃᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ᤀᤣ ᤔᤧᤴᤀᤡ᤺ᤵᤔᤏᤠᤖᤥ॥
2CO 1:9 ᤛᤧᤰᤂᤠᤀᤣ ᤀᤠᤏᤡᤃᤧᤃ ᤛᤩᤧ᤹ᤀᤡᤃᤧᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤖᤥ॥ ᤁᤖ ᤁᤱᤃ ᤀᤠᤏᤡᤃᤧ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤁᤧᤛᤡ᤺ᤒᤠᤜᤠ᤹ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤋᤠᤱᤛᤧ᤺ᤵᤔᤠ ᤀᤠᤛᤢᤰ ᤁᤧᤗ᤹ᤒᤠ ᤀᤡ᤺ᤵᤔᤠ ᤛᤢᤰᤋᤢᤶᤒᤧᤖ ᤑᤠ᤹ᤀᤠᤱ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥
2CO 1:10 ᤂᤢᤏᤧ᤹ᤃ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤛᤡ᤺ᤔᤧᤴᤗᤠᤶ ᤛᤧ᤺ᤵᤋᤡᤃᤧ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤛᤧ᤺ᤵᤋᤡᤃᤧᤖᤥ॥ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤕᤠᤶᤔᤥᤀᤠᤱ ᤛᤧ᤺ᤵᤋᤡᤃᤧ ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤘᤠ ᤆᤥ᤺ᤰᤏᤢ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡ᤹ ᤑᤠ᤹ᤀᤠᤱ ᤂᤢᤏᤧ᤹ᤀᤥ ᤏᤡᤱᤛᤠᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤀᤠᤏᤡᤃᤧ ᤗᤠᤃᤡ ᤔᤧᤈᤥᤃᤢᤒᤠ ᤋᤢᤘᤠ᤺ᤸᤗᤧᤴ ᤏᤥᤃᤵᤐᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤔᤢ᤹ᤀᤡᤛᤠᤶ ᤐᤡᤖᤡᤃᤧ᤹ ᤜᤧᤰᤁᤩᤠᤱ ᤀᤠᤏᤡᤃᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢ᤹ᤖᤥ॥
2CO 1:12 ᤁᤴ ᤀᤡᤰᤛᤠ ᤂᤠᤶᤒᤣ᤺ᤰᤔᤥᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ ᤋᤃᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤠᤏᤡᤃᤧ ᤕᤧᤵᤗᤧᤰᤁᤡᤴ ᤛᤣᤛᤣ ᤏᤢ ᤁᤢᤍᤥ᤺ᤵᤔᤠ ᤁᤳᤋᤢᤶᤒᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤢᤖᤠ ᤔᤧᤴᤕᤠᤀᤣ ᤐᤠ᤺ᤵᤔᤠ ᤛᤢᤰᤋᤢᤶᤒᤧᤖᤥ॥ ᤁᤱᤃ ᤔᤧᤴᤇᤠᤶ ᤕᤠᤵᤔᤡ ᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤁᤳᤋᤢᤶᤒᤧᤒᤠ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤁᤳᤋᤢᤶᤒᤧᤒᤠᤖᤥ॥
2CO 1:13 ᤂᤡᤏᤡ᤹ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤏᤢ ᤁᤢᤛᤡᤱ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤐᤠ᤺ᤴᤜᤠ᤹ ᤛᤰᤀᤡᤱᤄᤱᤅᤥ ᤌᤣᤀᤠᤱ ᤔᤧᤛᤠᤵᤋᤢᤶᤒᤧᤴᤗᤥ॥ ᤀᤠᤸᤗᤥ ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤔᤡᤛᤠᤰᤗᤰ ᤁᤢᤛᤡᤱᤃᤧᤴᤏᤡ᤺ᤳᤋᤢᤶ. ᤁᤖ ᤌᤡᤰᤕᤧᤴ ᤂᤡᤏᤡ᤹ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶ ᤁᤧᤗ᤹ᤒᤠ ᤀᤡᤱᤃᤠ᤹ ᤏᤡᤱᤛᤠᤱ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ᤺ᤴ ᤏᤢ᤺ᤱ ᤕᤢ᤺ᤒᤠ ᤕᤧᤴᤏᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤘᤣ᤹ ᤔᤏᤠᤜᤠ᤹ ᤏᤢ᤺ᤒᤠ ᤐᤠ᤺ᤴ ᤔᤧᤳᤋᤢᤶᤛᤡᤶᤒᤧᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤏᤢ᤺ᤒᤠ ᤐᤠ᤺ᤴ ᤁᤧᤈᤧᤰᤋᤢᤶᤛᤡᤶᤗᤥ॥
2CO 1:15 ᤀᤠᤏᤡ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤠᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤀᤡᤃᤢ ᤁᤳᤋᤢᤱᤒᤠᤸᤗᤧ ᤆᤥᤃᤢᤸᤗᤧ ᤔᤢ᤹ᤀᤡᤛᤠᤶ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤕᤠᤶᤔᤥ ᤂᤡᤏᤡ᤹ᤀᤥ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤕᤠᤱᤗᤥ॥
2CO 1:16 ᤀᤡᤱᤃᤠ᤹ ᤔᤧᤛᤥᤍᤥᤏᤡᤕᤠ ᤋᤧᤱᤃᤵ ᤐᤣ᤺ᤰᤁᤠᤸᤗᤧ ᤂᤡᤏᤡ᤹ᤀᤥ ᤗ᤺ᤶᤔᤠᤖ ᤐᤣ᤺ᤰᤔᤠ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤏᤢ᤺ᤱᤅᤠᤀᤡᤸᤗᤧᤀᤠᤱ ᤂᤡᤏᤡ᤹ᤀᤥ ᤗ᤺ᤶᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤕᤜᤢᤍᤡᤕᤠ ᤌᤢᤶ ᤐᤣ᤺ᤰᤁᤠᤸᤗᤧ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠ॥
2CO 1:17 ᤂᤡᤏᤡ᤹ᤀᤥ ᤋᤠ᤺ᤔᤠ ᤔᤧᤴᤇᤢᤰᤐᤧᤴ. ᤁᤖ ᤀᤡᤱᤃᤠ᤹ ᤁᤴ ᤜᤏᤧ ᤏᤡᤱᤘᤠ᤹ ᤆᤥᤃᤢᤱᤒᤠ ᤔᤧ᤺ᤴ. ᤜᤧᤰᤁᤩᤠᤱ ᤀᤡᤰᤛᤠᤒᤠ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰ ᤗᤳᤌᤡᤰ ᤔᤢᤖᤠ᤺ᤸᤗᤧ ᤀᤥ ᤏᤢ ᤔᤧ᤺ᤴ ᤗ᤹ᤖᤡᤰ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤔᤧ᤺ᤴᤗᤥ॥
2CO 1:18 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤠᤱ ᤏᤛᤠ᤺ᤴᤛᤠᤒᤠ ᤆᤥ᤺ᤰᤁᤠ॥ ᤀᤡᤱᤃᤠ᤹ ᤆᤥᤃᤢᤱ ᤏᤢ ᤔᤧᤈᤥᤃᤢᤱᤅᤡᤴ ᤗ᤹ᤖᤡᤰ ᤁᤧᤒᤠ᤺ᤵᤐᤠ ᤔᤏᤠ ᤔᤧ᤺ᤴᤏᤠ᤹ᤖᤥ॥
2CO 1:19 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹. ᤋᤡᤔᤥᤌᤡ ᤏᤢ ᤛᤡᤗᤠᤛᤗᤠᤶᤒᤠ ᤏᤡᤱᤘᤠ᤹ᤑᤢᤛᤠ᤺ ᤕᤧᤛᤢ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤀᤡᤱᤓᤥ᤺ᤛᤢᤶᤒᤧᤸᤗᤧ ᤀᤥ ᤏᤢ ᤔᤧ᤺ᤴ ᤁᤧᤗ᤹ᤒᤠ ᤐᤠ᤺ᤴ ᤜᤥ᤺ᤵᤋᤧᤖᤥ॥ ᤁᤖ ᤂᤢᤏᤧ᤹ “ᤀᤥᤖᤥ” ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤆᤥᤃᤢ᤹ᤀᤣᤖᤥ॥
2CO 1:20 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤀᤠᤰᤂᤧᤴ ᤔᤠᤱᤜᤧᤰᤜᤠ᤹ᤛᤠᤱ ᤂᤧᤱᤜᤠ᤹ ᤂᤪᤡᤛ᤻ᤋᤀᤥ “ᤀᤥᤖᤥ” ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗ ᤑᤠ᤹ᤀᤠᤱ ᤀᤠᤏᤡᤃᤧ “ᤀᤠᤔᤧᤴ”. (ᤀᤥᤖᤥ. ᤜᤧᤰᤁᤣ ᤐᤥ᤺ᤱᤗᤖᤥ). ᤐᤠ᤺ᤳᤋᤢᤶᤒᤧᤖᤥ॥
2CO 1:21 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤀᤠᤏᤡ᤹ ᤁᤧᤖᤧᤰ ᤁᤧᤎᤢᤶᤒᤠ ᤀᤠᤈᤥ᤺ᤰ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤕᤠᤵᤔᤡ ᤔᤠᤱᤎᤥ᤺ᤰᤏᤠ ᤀᤠᤒᤡᤖᤧᤀᤠᤱ
2CO 1:22 ᤀᤠᤏᤡ᤹ ᤂᤢᤏᤧ᤹ᤀᤡᤴ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤔᤠᤖᤧ ᤗᤠᤃᤡ ᤛᤣᤛᤣᤔᤠᤱᤅᤡᤴ ᤋᤧᤴᤕᤠᤱ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤛᤡᤰᤗᤢᤱᤔᤥ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤣᤛᤣᤔᤠᤱᤅᤡᤴ ᤀᤠᤒᤡᤖᤧᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤔᤠᤱᤜᤧᤰ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤋᤠ᤺ᤖᤥ ᤑᤠ᤹ᤀᤠᤱ ᤏᤡ᤺ᤴᤎᤥ ᤐᤥ᤺ᤱᤗᤥ॥
2CO 1:23 ᤂᤡᤏᤡ᤹ ᤐᤠ᤺ᤴ ᤔᤧᤔᤧᤳᤏᤡᤱᤅᤡᤴᤗ ᤑᤠ᤹ᤀᤠᤱ ᤁᤥᤖᤴᤌᤡ ᤕᤧᤰᤕᤰᤁᤥ ᤕᤠᤶᤔᤥ ᤔᤧᤴᤍᤠᤒᤠᤴᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤏᤡ᤺ᤛᤢ᤹ᤖᤥ॥
2CO 1:24 ᤀᤠᤏᤡᤃᤧᤃ ᤂᤡᤏᤡ᤹ ᤏᤛᤠ᤺ᤴᤏᤥ ᤕᤢᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤃᤳᤋᤢᤶᤒᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡ᤹. ᤁᤖ ᤂᤡᤏᤡ᤹ ᤁᤧᤛ᤺ᤳᤋᤡᤖ ᤑᤠ᤹ᤀᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤕᤠ᤺ᤶᤒᤰ ᤆᤥᤃᤡᤃᤧᤖᤥ॥
2CO 2:1 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤐᤠ᤺ᤴ ᤔᤧᤳᤇᤧ ᤀᤡᤱᤃᤠ᤹ ᤕᤠᤶᤔᤥ ᤂᤡᤏᤡ᤹ᤀᤥ ᤔᤧᤴᤍᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥
2CO 2:2 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤏᤠᤔᤠᤰᤔᤥ ᤌᤠᤏᤡᤱᤏᤧ ᤑᤠ᤹ᤃᤪ ᤏᤠᤔᤠᤰᤔᤥ ᤌᤠ᤺ᤛᤢᤱᤛᤡᤱᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧ ᤀᤡᤱᤃᤠ᤹ ᤛ᤺ᤳᤋᤠᤖ ᤕᤠ᤺ᤶᤔᤠ ᤛᤢᤰᤁᤠᤒᤣ᥅
2CO 2:3 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤛ᤺ᤵᤔᤠ ᤁᤧᤒᤠᤱᤒᤠᤸᤗᤧᤀᤣ ᤀᤠᤏᤡᤱᤘᤠ᤹ ᤔᤧᤍᤢᤰᤂᤢᤴᤗ ᤑᤠ᤹ᤀᤠᤱ ᤋᤃᤡᤒᤠ ᤛᤰᤀᤡᤱᤄᤱᤅᤥ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤐᤠ᤺ᤴ ᤛᤠᤵᤋᤢᤱᤒᤠᤖᤥ॥ ᤀᤡᤱᤃᤠ᤹ ᤛ᤺ᤳᤋᤠᤸᤗᤧ ᤂᤡᤏᤡ᤹ᤀᤠᤱ ᤁᤧᤛ᤺ᤳᤋᤡ᤹ ᤁᤧᤗ᤹ᤒᤠ ᤛᤧᤰᤂᤠᤀᤣ ᤏᤡ᤺ᤛᤢᤱᤗᤥ॥
2CO 2:4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤗ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱᤅᤣ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠ᤹ᤖᤡᤰ ᤀᤠᤕᤥ᤺ᤶ ᤐᤢ᤹ᤖᤧ ᤜᤧᤰᤁᤩᤠᤱ ᤀᤠᤔᤡᤰᤘᤠ ᤌᤠ᤺ᤛᤢᤱᤗ ᤂᤧᤴ ᤛᤰᤀᤡᤱᤄᤱᤅᤡᤴ ᤀᤡᤱᤃᤠ᤹ ᤜᤠᤰᤏᤡᤱᤅᤠᤱ ᤘᤕᤠᤱᤗᤥ॥
2CO 2:5 ᤀᤡᤱᤃᤠ᤹ ᤂᤡᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤍᤢᤰᤐᤠ ᤐᤠ᤺ᤴ ᤐᤠ᤺ᤵᤔᤠ ᤀᤠᤏᤡᤱᤘᤠ᤹ ᤜᤥ᤺ᤵᤗᤥ. ᤁᤖ ᤀᤡᤱᤃᤠ᤹ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤸᤗᤧ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤠᤱᤒᤠᤏᤢ᤺ᤸᤗᤧᤀᤠᤱ ᤔᤠᤱᤓᤠ ᤕᤖᤡᤰ ᤂᤧᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤳᤋᤡᤀᤠᤱ ᤘᤠ᤹ᤖᤥ॥
2CO 2:6 ᤂᤡᤏᤡ᤹ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤁᤧᤒᤡᤖᤢᤶᤒᤠ ᤂᤢᤶᤍᤡᤱᤅᤡᤴ ᤂᤢᤏᤧ᤹ ᤁᤢᤗᤠᤃᤡ ᤁᤧᤖᤧᤀᤠᤱ ᤘᤠ᤹ᤖᤥ॥
2CO 2:7 ᤜᤧᤰᤁᤣ᤺ᤸᤗᤧ ᤀᤠᤸᤗ ᤂᤧᤴ ᤗᤧᤵᤔᤡ ᤁᤧᤒᤡᤖᤢᤶᤗ ᤐᤥ᤺ᤱ. ᤀᤠ᤺ᤴᤇᤡᤱᤔᤠ ᤁᤧᤒᤡᤖᤢᤶᤗ ᤐᤥ᤺ᤱ. ᤔᤧ᤺ᤴᤏᤧ ᤑᤠ᤹ᤃᤪ ᤂᤧᤱᤃ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤰᤁᤠᤱ ᤏᤡᤱᤛᤠᤶᤔᤥ ᤌᤠ᤺ᤖᤥ॥
2CO 2:8 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤂᤧᤴ ᤔᤏᤠ᤺ᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
2CO 2:9 ᤌᤣᤀᤠᤱ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤰᤀᤡᤱᤄᤱ ᤜᤠᤰᤏᤡᤱᤒᤠ ᤑᤠ᤹ᤗᤧ ᤁᤠᤰ ᤀᤠᤀᤡᤱᤈᤠ᤺ᤱᤜᤠ᤹ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤗ ᤁᤧᤘᤕᤡ᤹ᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤢᤱᤒᤠᤖᤥ॥
2CO 2:10 ᤂᤡᤏᤡ᤹ ᤗᤧᤵᤔᤡ ᤁᤧᤒᤡᤖᤢᤶᤒᤠ ᤔᤏᤠ᤺ᤴ ᤀᤡᤱᤃᤠ᤹ᤀᤠᤱ ᤗᤧᤵᤔᤡ ᤐᤡᤖᤢᤱᤗᤥ॥ ᤗᤧᤵᤔᤡ ᤐᤡᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴ ᤘᤠ᤹ᤏᤧ ᤑᤠ᤹ᤃᤪ. ᤂᤧᤴ ᤗᤧᤵᤔᤡ ᤐᤡᤖᤢᤱᤅᤡᤸᤗᤧ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤂᤡᤏᤡ᤹ ᤗᤠᤃᤡᤀᤣ ᤜᤧᤰᤁᤣ ᤆᤥᤃᤢᤱᤗᤥ॥
2CO 2:11 ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤏᤡ᤹ ᤀᤡᤱᤀᤠᤴᤗᤧᤰᤏᤧᤸᤗ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤱᤒᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤁᤣ ᤁᤢᤕᤠ᤺ᤶᤒᤰᤁᤡᤴ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤘᤠ᤹ᤖᤥ॥
2CO 2:12 ᤀᤠᤸᤗ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤋᤪᤥᤀᤠᤛ ᤐᤣᤃᤠᤱᤅᤡᤸᤗᤧ ᤂᤧᤵᤔᤥ ᤍᤠᤱᤒᤠᤸᤗᤧ ᤀᤡᤱᤓᤥ᤺ᤔᤠ ᤛᤢᤕᤧᤶᤎᤡᤰ ᤐᤡᤖᤠᤱᤗᤥ॥
2CO 2:13 ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤛᤏᤠᤖᤢᤱ ᤜᤥ᤺ᤵᤋᤧᤖᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤄᤱ ᤁᤧᤍᤠ᤺ᤵᤐᤠ ᤀᤠᤴᤛᤠ᤹ ᤋᤡᤋᤛᤧᤴ ᤔᤧᤴᤍᤢᤶᤒᤠᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤛᤧᤶᤔᤢ᤹ᤀᤡ ᤏᤠ᤺ᤰᤋᤢᤱᤛᤡᤱᤅᤠᤱ ᤔᤧᤛᤣᤍᤥᤏᤡᤕᤠ ᤋᤧᤱᤃᤵᤗᤧᤵᤔᤠᤱ ᤐᤣᤃᤠᤱᤗᤥ॥
2CO 2:14 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤍᤠᤍᤡᤱ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤌᤱᤏᤠ᤺ᤶᤒᤠ ᤛᤛ᤺ᤳᤛᤖᤠᤱᤅᤥ ᤗᤠᤶᤀᤠᤗᤥ᤺ᤖᤥ॥ ᤜᤧᤰᤁᤩᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤑᤢᤱᤏᤠᤶᤔᤡᤴ ᤛᤧ᤺ᤒᤠ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤏᤧᤜᤡᤏᤡᤱᤘᤠ᤹ᤀᤡᤴ ᤀᤠᤏᤡ᤹ᤗᤠᤶᤒᤠ ᤁᤧᤖᤧᤰ ᤐᤡᤛᤠᤱ ᤛᤧ᤺ᤛᤢᤖᤥ.
2CO 2:15 ᤌᤣᤀᤠᤱᤓᤧᤸᤗᤧ ᤛᤧᤴᤗᤵ ᤁᤧᤄᤥ᤺ᤒᤠᤖ ᤁᤧᤒᤵᤐᤠ ᤜᤧᤰᤁᤩᤠᤱ ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤏᤡ᤹ ᤜᤡᤱᤔᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤪᤡᤛ᤻ᤋᤖᤧ ᤋᤥ᤺ᤴᤍᤢᤒᤠ ᤑᤢᤱᤏᤠᤶ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
2CO 2:16 ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡ ᤁᤱᤃ ᤛᤡ᤺ᤔᤧᤸᤗᤧ ᤁᤢᤏᤠᤶ ᤁᤢᤀᤡᤛᤡ᤺ᤰ ᤐᤥ᤺ᤱ. ᤁᤖ ᤛᤧᤴᤗᤵ ᤁᤧᤄᤥ᤺ᤒᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤑᤢᤱᤏᤠᤶ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥ ᤀᤰᤋᤱᤒᤠ ᤕᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠ᤺ᤳ ᤗᤠ᤹ᤖᤢᤒᤣ᥅
2CO 2:17 ᤀᤠᤏᤡᤃᤧᤃ ᤘᤣ᤹ᤜᤠ᤹ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤗᤧᤱᤜᤱ ᤁᤧᤈᤥ᤺ᤰᤐᤠᤛᤡᤃᤧᤃ ᤔᤧ᤺ᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤛᤡᤒᤠ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤐᤠᤖᤡᤃᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤳᤋᤡᤃᤧᤖ ᤘᤠ᤹ ᤁᤧᤗ᤹ᤒᤠᤴ ᤏᤡ᤺ᤛᤢᤶᤒᤧᤖᤥ॥
2CO 3:1 ᤀᤠᤸᤗ ᤀᤠᤏᤡᤃᤧ ᤀᤠᤒᤠᤅᤣ ᤆᤶᤛᤡᤱᤔᤠ ᤜᤣ᤺ᤰᤋᤡᤃᤧᤒᤠᤒᤡ᥅ ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤀᤠᤏᤡᤃᤧᤀᤠᤱ ᤂᤡᤏᤡ᤹ ᤗᤠᤃᤡ ᤀᤡᤃᤪ ᤂᤡᤏᤡ᤹ᤗᤠᤶᤒᤠ ᤁᤴ ᤔᤏᤠᤜᤠ᤹ ᤏᤢ᤺ᤖᤡᤰᤁᤠᤱ ᤗᤠᤱᤍᤠ᤺ᤰᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤛᤰᤀᤡᤱᤄᤱ ᤆᤠᤜᤠᤒᤠ ᤔᤧᤈᤥᤃᤡᤃᤧᤴᤗᤥ॥
2CO 3:2 ᤂᤡᤏᤡ᤹ ᤜᤡᤱᤔᤴᤏᤡᤱᤃ ᤁᤠᤰ ᤔᤏᤠᤜᤠ᤹ᤖᤧ ᤏᤡ᤺ᤵᤔᤠ ᤔᤧᤛᤢᤰᤋᤢᤒᤠ ᤏᤢ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤠ ᤔᤧᤴᤇᤠᤶ ᤛᤡᤰᤗᤢᤱᤔᤥ ᤛᤠᤵᤔᤏᤠᤒᤠ ᤛᤰᤀᤡᤱᤄᤱᤗᤥ॥
2CO 3:3 ᤛᤧᤰᤂᤠᤀᤣ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤛᤠᤵᤋᤢᤀᤠᤱ ᤀᤠᤏᤡᤃᤧᤗᤠᤶᤒᤠ ᤜᤠᤅᤢᤒᤠ ᤛᤰᤀᤡᤱᤄᤱᤏᤡᤱᤗᤥ॥ ᤂᤧᤱᤃ ᤏᤠᤰᤆᤠ ᤏᤢ ᤛᤠᤵᤘᤠᤖᤧ ᤔᤧ᤺ᤴ. ᤁᤖ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤛᤣᤛᤣᤔᤠᤱᤅᤡᤸᤗᤧ ᤛᤠᤵᤋᤢᤒᤠᤖᤥ. ᤛᤠᤵᤗᤢᤱᤅᤥ ᤛᤠᤵᤋᤢᤒᤠ ᤔᤧ᤺ᤴ. ᤁᤖ ᤔᤧᤴᤇᤠᤶ ᤛᤡᤰᤗᤢᤱᤔᤥ ᤂᤪᤡᤛ᤻ᤋᤖᤧ ᤛᤠᤵᤋᤢᤒᤠ ᤛᤰᤀᤡᤱᤄᤱᤏᤡᤱᤗᤥ॥
2CO 3:4 ᤂᤪᤡᤛ᤻ᤋᤖᤧ ᤂᤧᤴ ᤐᤠ᤺ᤴᤏᤡᤴ ᤛᤧᤰᤂᤠ ᤆᤥ᤺ᤰ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤀᤣ ᤏᤡ᤺ᤴᤎᤥ ᤆᤥᤃᤡᤃᤧᤖᤥ॥
2CO 3:5 ᤀᤠᤏᤡᤃᤧ ᤀᤠᤒᤠᤅᤣ ᤌᤣᤛᤠᤱ ᤆᤥ᤺ᤰᤔᤠ ᤛᤢᤰᤋᤢᤶᤒᤧ᤹ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤶᤒᤧᤴᤗᤥ. ᤁᤖ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤖᤥ॥
2CO 3:6 ᤂᤢᤏᤧ᤹ᤀᤣ ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤔᤠᤱᤛᤣᤘᤠ ᤆᤥ᤺ᤰᤔᤠ ᤁᤧᤛᤢᤰᤐᤠ ᤆᤥᤃᤡᤃᤧᤀᤠᤱ ᤘᤠ᤹ᤖᤥ॥ ᤁᤱᤃ ᤛᤠᤵᤔᤏᤠᤒᤠ ᤛᤠᤶᤕᤥᤌᤡᤶᤗᤠᤶᤒᤠ ᤔᤧ᤺ᤴ. ᤁᤖ ᤛᤣᤛᤣᤔᤠᤱᤗᤠᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤛᤠᤵᤔᤏᤠᤒᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤛᤧᤳ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤀᤠᤜᤡᤱᤗᤥ॥
2CO 3:7 ᤔᤥᤛᤠᤖᤧ ᤂᤧᤴ ᤛᤠᤶᤕᤥᤌᤡᤶᤔᤡᤴ ᤗᤢᤱᤛᤠᤵᤐᤥ ᤛᤠᤵᤋᤢᤀᤠᤱ ᤔᤡᤔᤡᤍᤡᤱᤅᤡᤴᤏᤢ ᤋᤩᤧ॥ ᤜᤧᤰᤁᤣ᤺ᤸᤗᤧ ᤔᤥᤛᤠᤖᤧ ᤁᤢᤏᤠᤖᤠ᤺ᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤧᤖᤧᤶ ᤗ᤹ᤖᤧᤒᤣᤖ ᤐᤳᤇᤧᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤏᤠᤖᤠ᤺ᤴ ᤀᤥᤔᤧᤵᤔᤠ ᤔᤧᤴᤇᤢᤰᤋᤢᤴᤗᤥ॥
2CO 3:8 ᤜᤧᤰᤁᤣ᤺ᤸᤗᤧ ᤛᤡ᤺ᤔᤧᤴ ᤁᤧᤍᤠ᤺ᤵᤐᤠ ᤛᤠᤶᤕᤥᤌᤡᤶᤔᤡᤴ ᤔᤡᤔᤡᤍᤡᤱᤅᤡᤴᤏᤢ ᤋᤩᤧ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤋᤠᤖᤢᤒᤠ ᤀᤡᤱᤈᤠ᤺ᤱᤅᤡᤱᤃ ᤂᤧᤴᤏᤢ᤺ᤸᤗᤧ ᤕᤖᤡᤰ ᤔᤡᤔᤡᤍᤡᤱᤒᤠ ᤔᤧᤈᤥ᤺ᤰᤏᤧᤴᤒᤡ᥅
2CO 3:9 ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤠ᤺ᤴ ᤁᤧᤎᤡᤰᤐᤠ ᤔᤠᤱᤛᤣᤘᤠ᤺ᤴ ᤔᤡᤔᤡᤍᤡᤱᤒᤠ ᤐᤥ᤺ᤰᤂᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤀᤥ ᤛᤠᤶᤕᤥᤏᤡᤔᤠ ᤁᤧᤍᤠ᤺ᤵᤐᤠ ᤔᤠᤱᤛᤣᤘᤠ᤺ᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥ᤺ᤰᤗᤥ᥄
2CO 3:10 ᤛᤧᤰᤂᤠ᤺ᤸᤗᤧ ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤛᤧᤴᤍᤠᤱᤃᤧᤴ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧ ᤂᤧᤴ ᤋᤃᤡᤒᤠ ᤔᤡᤔᤡᤍᤡᤱᤅᤡᤱᤃ ᤌᤣᤀᤠᤱ ᤔᤧ᤺ᤴᤗᤥ॥
2CO 3:11 ᤌᤣᤀᤠᤱᤓᤧᤸᤗᤧ ᤋᤃᤡᤒᤠᤴ ᤛᤧᤖᤧᤶ ᤗ᤹ᤖᤧ ᤐᤣᤛᤠᤱ ᤔᤡᤔᤡᤍᤡᤱᤒᤠ ᤆᤥᤃᤧᤸᤗᤧ. ᤛᤍᤠᤍᤡᤱ ᤁᤧᤘᤠ᤹ᤒᤠᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥ᤺ᤰᤗᤥ॥
2CO 3:12 ᤀᤠᤏᤡ᤹ᤃ ᤀᤰᤋᤱᤒᤠ ᤏᤡᤱᤛᤠᤱ ᤀᤠᤃᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤛᤧᤰᤂᤠ᤺ᤴ ᤀᤡᤱᤓᤥ᤺ᤔᤠ ᤀᤠᤱᤃᤡᤏᤧᤴ॥
2CO 3:13 ᤀᤠᤏᤡ᤹ᤃ ᤔᤥᤛᤠ᤺ᤴ ᤁᤢᤀᤡᤛᤡ᤺ᤰᤛᤡ ᤔᤧ᤺ᤴᤗᤥ॥ ᤂᤧᤸᤗᤧᤃ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤖᤧᤶ ᤗ᤹ᤖᤧᤒᤣᤖ ᤐᤳᤇᤧᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤔᤧᤴᤏᤡ᤺ᤛᤢᤴᤗ ᤑᤠ᤹ᤀᤠᤱ ᤁᤢᤏᤠ᤺ᤴ ᤋᤧᤵᤋᤢ ᤑᤳᤇᤢᤖᤥ॥
2CO 3:14 ᤁᤖ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤠᤴ ᤁᤧᤛᤠᤰᤐᤠ ᤐᤥ᤺ᤰᤂᤧᤀᤠᤱ ᤀᤠᤸᤗ ᤌᤠᤖᤡᤰᤛᤠᤱ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤴ ᤔᤧᤏᤡ᤺ᤖᤢᤸᤗᤧ ᤛᤧᤰᤂᤠ᤺ᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗ ᤑᤠ᤹ᤀᤠᤱ ᤂᤧᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢ᤹ᤖᤥ॥ ᤁᤴ ᤏᤠᤍᤧᤵᤔᤠᤱᤃ ᤂᤪᤡᤛ᤻ᤋᤧᤴ ᤆᤥ᤺ᤰᤔᤏᤠᤒᤠ ᤏᤛᤠ᤺ᤴᤏᤡᤸᤗᤧᤖᤰ ᤜᤴᤍᤢ᤹ᤖᤥ॥
2CO 3:15 ᤀᤠᤀᤡᤴ ᤌᤠᤖᤡᤰᤛᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤔᤧᤏᤡ᤺ᤖᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤂᤧᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢ᤹ᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
2CO 3:16 ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤍᤠᤱᤒᤠᤴ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤁᤢᤏᤠᤍᤧᤵᤔᤠᤴ ᤜᤴᤗᤥ॥
2CO 3:17 ᤀᤠᤸᤗ ᤍᤠᤱᤒᤠᤱᤃ ᤛᤣᤛᤣᤔᤠᤱᤗᤥ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤠᤳᤋᤥ ᤘᤠ᤹. ᤂᤧᤵᤔᤥ ᤆᤥ᤺ᤰᤕᤢᤶᤓᤥ ᤘᤠ᤹ᤖᤥ॥
2CO 3:18 ᤀᤠᤏᤡ᤹ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤀᤠᤎᤠᤰᤗ ᤑᤠ᤹ᤀᤠᤱ ᤀᤠᤏᤡ᤹ ᤏᤠᤍᤧᤵᤔᤠᤴ ᤜᤖᤧᤀᤠᤱ ᤘᤠ᤹ᤖᤥ॥ ᤍᤠᤱᤒᤠᤴ ᤛᤣᤛᤣᤔᤠᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠ ᤁᤧᤍᤠ᤺ᤒᤠ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤢᤏᤧ᤹ ᤁᤢᤀᤡᤛᤡ᤺ᤰ ᤀᤠᤗᤧᤱᤛᤡᤱᤗ ᤀᤠᤒᤣ᤺ᤰ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤕᤖᤡᤰ ᤔᤡᤔᤡᤱᤍᤡᤱᤒᤠ ᤀᤠᤒᤥ᤺ᤱᤗ ᤀᤠᤒᤣ᤺ᤰᤗᤥ॥
2CO 4:1 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤁᤴ ᤔᤠᤱᤛᤣᤘᤠ᤺ᤴ ᤂᤥ᤺ᤛᤢᤶᤒᤧᤀᤠᤱ ᤘᤕᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧ ᤏᤡᤱᤛᤠᤱ ᤔᤧᤒᤢᤰᤏᤧᤴᤗᤥ॥
2CO 4:2 ᤂᤧᤸᤗᤧ ᤁᤢᤗᤧᤰᤘᤠ ᤀᤠᤏᤡᤃᤧᤃ ᤔᤏᤠᤖᤧ ᤔᤧᤴᤏᤡᤀᤣ ᤆᤥ᤺ᤰᤔᤏᤠᤒᤠ ᤛᤡᤖᤡᤱᤔ᤺ᤔᤠ ᤕᤠ᤺ᤶᤒᤰᤜᤠ᤹ ᤏᤠ᤹ᤖᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤀᤠᤏᤡᤃᤧ ᤀᤡᤱᤗᤧᤰ ᤔᤧᤈᤥᤃᤢᤶᤒᤧᤴᤗᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤕᤥᤎᤥ ᤔᤧᤈᤥᤃᤢᤶᤒᤧᤴᤗᤥ॥ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤳᤋᤡᤃᤧᤖ ᤘᤠ᤹ ᤑᤠ᤹ᤀᤠᤱ ᤏᤡ᤺ᤛᤢᤶᤒᤧᤀᤠᤱ ᤔᤏᤠᤜᤠ᤹ ᤛᤧᤰᤂᤠ ᤐᤠ᤺ᤴᤗᤰ ᤔᤧᤳᤋᤢᤶᤛᤡᤶᤒᤧ᤹. ᤜᤧᤰᤁᤩᤠᤱ ᤁᤠᤰ ᤏᤛᤠ᤺ᤴᤛᤠᤒᤠᤜᤠ᤹ᤖᤧ ᤂᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥
2CO 4:3 ᤀᤠᤏᤡᤃᤧ ᤛᤧ᤺ᤛᤢᤶᤒᤧᤒᤠ ᤛᤢᤏᤠᤀᤡᤱᤅᤡᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢᤀᤠᤱ ᤐᤳᤏᤧ ᤑᤠ᤹ᤃᤪ ᤂᤧᤱᤃ ᤁᤧᤔᤧᤰᤐᤠᤖ ᤁᤧᤒᤣ᤺ᤰᤐᤠᤜᤠ᤹ᤖᤧ ᤗᤠᤃᤡᤖᤰ ᤋᤧᤵᤋᤢ᤹ᤖᤥ॥
2CO 4:4 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤠᤱ ᤔᤠᤑᤧᤴᤛᤠᤶᤔᤡᤸᤗᤧᤀᤣ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤑᤧᤳᤗᤠ᤺ᤴᤍᤢ ᤐᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱᤃᤧᤴ ᤛᤢᤏᤠᤀᤡᤱᤅᤡᤸᤗᤧᤴ ᤀᤥ᤺ᤳᤋᤡ᤺ᤴ ᤏᤡ᤺ᤔᤠ ᤔᤧᤴᤇᤢᤰᤋᤢᤴ॥ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡ᤺ᤳᤗᤥ॥
2CO 4:5 ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤀᤠᤒᤠᤅᤣ ᤕᤠ᤺ᤶᤒᤣᤀᤥ ᤀᤡᤱᤓᤴ ᤔᤧᤈᤥᤃᤢᤶᤒᤧᤴ. ᤁᤖ ᤀᤠᤏᤡᤃᤧᤃ ᤕᤧᤛᤢᤖᤧ ᤁᤢᤗᤠᤃᤡ ᤂᤡᤏᤡ᤹ ᤛᤣᤘᤠᤖᤥᤒᤠ ᤐᤥ᤺ᤰᤂᤡᤃᤧᤒᤠ ᤐᤠ᤺ᤴᤏᤡᤴ ᤏᤢ ᤕᤧᤛᤢ ᤂᤪᤡᤛ᤻ᤋᤧᤴᤏᤣ ᤍᤠᤱᤒᤠᤖᤥ ᤑᤠ᤹ᤀᤠᤱ ᤀᤡᤱᤓᤥ᤺ᤛᤢᤶᤒᤧᤖᤥ॥
2CO 4:6 ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤥ ᤀᤥ᤺ᤳᤋᤡ᤺ᤴ ᤀᤥ᤺ᤳᤗ ᤑᤠ᤹ᤀᤠᤱ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤏᤠᤖᤠᤀᤥ ᤁᤧᤀᤥ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤗᤧᤴ ᤏᤧᤜᤡᤏᤡᤱᤘᤠ᤹ᤀᤡᤴ ᤁᤢᤛᤡᤱ ᤏᤡ᤺ᤵᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤀᤠᤏᤡᤃᤧ ᤛᤡᤰᤗᤢᤱᤔᤥ ᤂᤢᤏᤧ᤹ ᤁᤢᤀᤥ᤺ᤳᤋᤡ᤺ᤴ ᤀᤥ᤺ᤵᤐᤠᤱᤄᤢᤀᤠᤱ ᤘᤠ᤹ᤖᤥ॥
2CO 4:7 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥ᤺ᤵᤐᤠᤱᤄᤢᤒᤠ ᤁᤴ ᤛᤢᤏᤠᤀᤡᤱᤗᤧᤴ ᤀᤥ᤺ᤳᤋᤡ᤺ᤴ ᤀᤠᤏᤡ᤹ᤀᤥ ᤘᤠ᤹. ᤁᤖ ᤁᤴ ᤐᤕᤶ ᤕᤶᤒᤠ ᤔᤢᤰᤛᤠᤶᤔᤡᤱᤃ ᤀᤠᤏᤡ᤹ᤗᤠᤶᤒᤠ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤀᤣ ᤋᤠ᤺ ᤁᤧᤗ᤹ᤒᤠᤴ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤀᤠᤏᤡ᤹ᤃ ᤁᤴ ᤕᤠᤱᤓᤢ ᤕᤠᤰᤔᤏᤠᤒᤠ ᤑᤢᤈᤡᤰ ᤁᤢᤀᤡᤛᤡ᤺ᤰᤗᤰ ᤀᤠᤈᤥ᤺ᤰᤗᤥ॥
2CO 4:8 ᤀᤠᤏᤡᤃᤧᤃ ᤁᤠᤰ ᤐᤡᤛᤠᤱᤗᤠᤶ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤕᤢᤰᤋᤡᤃᤧᤀᤠᤱ ᤘᤕᤡᤃᤧᤛᤠᤱ ᤀᤠᤏᤡᤃᤧᤃ ᤔᤧᤴᤕᤢ᤺ᤳᤋᤣ ᤘᤕᤡᤃᤧᤖᤥ॥ ᤀᤠᤏᤡᤃᤧᤃ ᤜ᤺ᤴᤍᤠ ᤗᤧᤰᤋᤡᤃᤧᤀᤠᤱ ᤘᤕᤡᤃᤧᤛᤠᤱ ᤜᤠᤖᤡ ᤔᤧᤴᤍᤠᤀᤣ ᤘᤕᤡᤃᤧᤖᤥ॥
2CO 4:9 ᤀᤠᤏᤡᤃᤧᤃ ᤋᤢᤰᤂᤣ ᤔᤧᤈᤠ᤺ᤳᤋᤡᤃᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤏᤢ ᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤔᤧᤛᤥ᤺ᤴᤍᤡᤃᤧᤛᤠᤱ ᤕᤠᤶᤔᤥ ᤐᤥᤃᤡᤃᤧ᤹ᤖᤥ॥
2CO 4:10 ᤕᤧᤛᤢᤖᤧ ᤁᤢᤜᤡᤱᤔᤴᤏᤡᤴ ᤀᤠᤏᤡᤃᤧ ᤏᤠᤛᤡᤱᤃᤧᤴ ᤌᤰᤁᤥ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤂᤢᤏᤧ᤹ ᤋᤢᤰᤂᤣ ᤆᤩᤧᤀᤠᤱ ᤛᤩᤧᤒᤠ ᤁᤢᤀᤡᤛᤡ᤺ᤰ ᤌᤡᤰᤕᤠ᤺ᤴᤎᤰ ᤀᤠᤏᤡᤃᤧ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤩᤧ᤹ᤀᤡᤃᤧᤖᤥ॥
2CO 4:11 ᤀᤠᤏᤡᤃᤧ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤥ ᤕᤧᤛᤢᤖᤧ ᤁᤢᤜᤡᤱᤔᤴᤏᤡᤴ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤕᤧᤛᤢᤖᤧ ᤁᤢᤗᤠᤃᤡ ᤌᤡᤰᤕᤠ᤺ᤴᤎᤰ ᤛᤡ᤺ᤔᤠ ᤗᤡᤱᤎᤥᤀᤥ ᤁᤧᤖᤡᤃᤧᤖᤥ॥
2CO 4:12 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤔᤠᤱᤛᤣᤘᤠ ᤆᤥ᤺ᤰᤁᤡ ᤛᤡ᤺ᤔᤠ ᤗᤡᤱᤎᤥᤀᤥ ᤁᤧᤖᤡᤃᤧᤸᤗᤧ ᤂᤡᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤄᤥ᤺ᤛᤢᤶᤗᤥ॥
2CO 4:13 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤏᤛᤠ᤺ᤴ ᤆᤥᤃᤢᤱ. ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤠ᤺ᤖᤠᤱᤗᤥ॥” ᤒᤠ ᤜᤧᤰᤋᤱᤒᤠ ᤏᤛᤠ᤺ᤴᤗᤠᤶᤒᤠᤀᤣ ᤀᤠᤏᤡᤃᤧᤀᤠᤱ ᤏᤛᤠ᤺ᤴ ᤆᤥᤃᤢᤶᤒᤧ᤹. ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠᤖᤡᤃᤧ᤹ᤖᤥ॥
2CO 4:14 ᤍᤠᤱᤒᤠ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶᤒᤠ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠᤸᤗᤧ ᤀᤠᤏᤡ᤹ᤀᤠᤱ ᤕᤧᤛᤢ᤺ᤴᤏᤢ ᤛᤥᤖᤡᤰ ᤁᤢᤜᤡᤱᤘᤧᤳ ᤀᤠᤈᤥ᤺ᤰᤁᤠᤱ ᤀᤠᤏᤡ᤹ ᤁᤧᤖᤧᤰ ᤂᤢᤏᤧ᤹ᤀᤥ ᤀᤠᤍᤠ᤺ᤳᤗᤥ ᤁᤧᤗ᤹ᤒᤠᤴ ᤏᤡ᤺ᤛᤢᤶᤒᤧᤖᤥ॥
2CO 4:15 ᤀᤠᤏᤡᤃᤧ ᤋᤢᤰᤂᤣ ᤆᤩᤧ᤹ᤀᤡᤃᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤃ ᤂᤡᤏᤡ᤹ ᤗᤠᤃᤡᤀᤣ ᤐᤥ᤺ᤰᤂᤧᤒᤠᤖᤥ. ᤜᤧᤰᤁᤣ᤺ᤸᤗᤧ ᤔᤏᤠᤜᤠ᤹ᤖᤧ ᤀᤠᤰᤂᤧᤶᤔᤩᤠᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤔᤧᤄᤥ᤺ᤛᤢ᤹. ᤂᤧᤶᤔᤩᤠᤰ ᤕᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤛᤥ ᤀᤡᤱᤎᤠ᤺ᤱᤅᤡᤴ ᤐᤥ᤺ᤱᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤥᤃᤧᤴᤏᤡᤴ ᤔᤧᤓᤥ᤺ᤛᤢ᤹ᤖᤥ॥
2CO 4:16 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤵᤑᤠᤸᤗᤧᤀᤠᤱ ᤀᤠᤏᤡ᤹ ᤏᤡᤱᤛᤠᤱ ᤔᤧᤒᤢᤰᤏᤧᤴᤗᤥ॥ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤡ᤺ᤒᤣ᤺ᤰᤛᤠᤱ ᤀᤠᤏᤡ᤹ ᤕᤠᤶᤛᤠᤶᤔᤡᤱᤃ ᤌᤡᤰᤕᤠ᤺ᤴᤎᤰ ᤁᤢᤛᤱ ᤐᤥ᤺ᤱᤗ ᤐᤣ᤺ᤰᤗᤥ॥
2CO 4:17 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤀᤠᤍᤢᤔᤢᤶᤒᤠ ᤆᤢᤰᤛᤠ ᤏᤢ ᤛᤵᤑᤠᤎᤡᤰᤐᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤖᤧᤃ ᤔᤧᤴᤏᤢᤵᤔᤏᤠᤒᤠ ᤔᤡᤔᤡᤍᤡᤱ ᤁᤧᤄᤥ᤺ᤒᤠ ᤀᤠᤈᤥ᤺ᤰᤗᤥ॥ ᤜᤧᤰᤁᤩᤠᤱ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧ ᤂᤧᤱᤃ ᤌᤣᤀᤠᤱ ᤔᤧ᤺ᤴᤗᤥ॥
2CO 4:18 ᤀᤠᤸᤗᤥ ᤀᤠᤏᤡ᤺ᤛᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤃ ᤀᤥᤀᤠᤶᤔᤧᤳᤋᤢᤶᤔᤡᤴᤗᤥ. ᤁᤖ ᤏᤡᤔᤧᤴᤍᤧᤵᤔᤏᤠ ᤐᤠ᤺ᤴᤏᤥ ᤀᤥᤀᤠᤔᤧᤳᤋᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤀᤠᤏᤡ᤺ᤛᤢᤶᤒᤠ ᤐᤠ᤺ᤴᤜᤠ᤹ ᤛᤵᤑᤠᤎᤡᤰᤐᤠᤖᤥ. ᤁᤖ ᤏᤡᤔᤧᤴᤍᤧᤳᤔᤏᤠᤒᤠ ᤐᤠ᤺ᤴᤜᤠ᤹ᤃ ᤀᤠᤵᤑᤠᤸᤗᤧᤛᤠᤱ ᤘᤠ᤹ᤖᤥ॥
2CO 5:1 ᤀᤠᤸᤗ ᤀᤠᤏᤡ᤹ ᤀᤠᤘᤠ᤹ᤒᤠ ᤁᤴ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤒᤠ ᤁᤴ ᤀᤡᤰᤛᤠᤀᤥᤒᤠ ᤛᤠ᤺ᤱᤃᤠᤜᤡᤶ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤁᤴ ᤛᤠ᤺ᤱᤃᤠᤜᤡᤶᤔᤡᤴ ᤕ᤺ᤸᤗᤧ ᤔᤏᤠ ᤜᤢᤰᤁᤡᤸᤗᤧ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢ ᤀᤠᤒᤡᤖᤧᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤶᤔᤡᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤖᤥ॥
2CO 5:2 ᤁᤖ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤜᤡᤶᤔᤡᤴ ᤂᤥ᤺ᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤀᤠᤸᤗᤥ ᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤖᤥ.
2CO 5:3 ᤌᤣᤀᤠᤱᤓᤧᤸᤗᤧ ᤆᤠᤱᤅᤡᤸᤗᤧ ᤌᤰᤁᤡᤴ ᤋᤧᤵᤋᤢᤒᤠ ᤜᤧᤰᤁᤣ ᤂᤧᤴ ᤜᤡᤶᤔᤡᤸᤗᤧ ᤀᤠᤍᤧᤵᤐᤠᤱ ᤀᤠᤏᤡ᤹ ᤗᤧᤰᤆᤠᤒᤧᤎᤡ᤺ᤰ ᤀᤠᤶᤒᤥ᤺ᤱᤏᤧᤴᤗᤥ॥
2CO 5:4 ᤌᤣᤀᤠᤱᤓᤧᤸᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤡᤸᤗᤧᤴ ᤛᤠ᤺ᤱᤃᤠᤜᤡᤶᤔᤥ ᤀᤠᤘᤠ᤹ᤖ ᤌᤠᤖᤡᤰ ᤋᤢᤰᤂᤣ᤺ᤸᤗᤧ ᤛᤰᤔᤠ ᤐᤢ᤹ᤀᤠᤱ ᤀᤠᤏᤠᤖᤥ॥ ᤀᤠᤏᤡ᤹ ᤗᤧᤰᤆᤠᤒᤧᤎᤡ᤺ᤰ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤜᤡᤶᤔᤡᤴ ᤀᤠᤸᤗᤛᤠᤱ ᤕᤖᤡᤰ ᤀᤠᤈᤠᤰᤛᤡᤱᤗ ᤑᤠ᤹ᤀᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠ ᤌᤰᤁᤡᤴ ᤔᤧᤴᤇᤡ᤺ᤔᤏᤠᤒᤠ ᤌᤰᤁᤥ ᤗᤧᤱᤛᤡᤱᤗᤥ॥
2CO 5:5 ᤀᤠᤸᤗ ᤒᤠ ᤁᤴ ᤐᤠ᤺ᤴᤏᤡᤸᤗᤧ ᤗᤠᤃᤡᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤁᤢᤛᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤛᤧᤰᤂᤠᤀᤣ ᤀᤠᤄᤥ᤺ᤛᤢᤶ ᤁᤧᤗ᤹ᤒᤠᤴ ᤀᤥᤛᤣ᤺ᤴᤎᤠᤰᤛᤧ ᤋᤧᤴᤕᤠᤱ ᤁᤢᤀᤡᤛᤡ᤺ᤰ ᤛᤣᤛᤣᤔᤠᤱᤅᤡᤴ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥
2CO 5:6 ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤜᤡᤱᤔᤴᤏᤥ ᤀᤠᤘᤠ᤹ᤖ ᤌᤠᤖᤡᤰ ᤍᤠᤱᤒᤠᤴᤏᤢ ᤔᤠ᤺ᤱᤄᤠᤀᤣ ᤀᤠᤘᤠ᤹ ᤁᤧᤗ᤹ᤒᤠ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤛᤠᤱ ᤀᤠᤏᤡ᤹ᤃ ᤛᤍᤠᤍᤡᤱ ᤜᤠᤱᤜᤠᤱ ᤀᤠᤗ᤹ᤖᤥ॥
2CO 5:7 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤏᤡ᤺ᤔᤏᤠᤒᤠᤗᤠᤶᤒᤠ ᤔᤧ᤺ᤴ. ᤁᤖ ᤏᤛᤠ᤺ᤴᤗᤠᤶᤒᤠᤏᤧ ᤀᤠᤜᤡᤱᤗᤥ॥
2CO 5:8 ᤀᤠᤏᤡ᤹ᤃ ᤜᤠᤱᤜᤠᤱ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤧᤰᤂᤠᤀᤣ ᤐᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤜᤡᤱᤔᤠᤏᤢ᤺ᤸᤗᤧᤀᤠᤱ ᤍᤠᤱᤒᤠᤴᤏᤢ ᤛᤥᤖᤡᤰ ᤜᤡᤱᤔᤠ ᤀᤠᤏᤡ᤹ ᤛᤡᤖᤠ᤹ ᤌᤠᤱᤗᤥ॥
2CO 5:9 ᤜᤧᤰᤁᤣ᤺ᤸᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤀᤠᤘᤠ᤹ᤛᤠᤱ. ᤍᤠᤱᤒᤠᤴᤏᤢ ᤀᤠᤜᤡᤱᤛᤠᤱ. ᤀᤠᤏᤡ᤹ ᤏᤡᤱᤛᤣ᤺ᤰᤁᤡᤱᤃ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤖᤥ॥
2CO 5:10 ᤌᤣᤀᤠᤱᤓᤧᤸᤗᤧ ᤂᤠᤛᤧᤴᤗᤧ ᤗᤠᤃᤡ ᤀᤠᤏᤡ᤹ ᤁᤧᤖᤧᤰ ᤂᤪᤡᤛ᤻ᤋᤖᤧ ᤁᤢᤄᤠᤛᤧᤴᤏᤥ ᤕᤧᤵᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤁᤧᤖᤧᤰᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤀᤠᤘᤠ᤹ᤀᤡᤸᤗᤧ ᤀᤠᤈᤥᤃᤢᤶᤒᤠ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤂᤠᤛᤧᤴᤏᤡᤴ ᤀᤠᤄᤥ᤺ᤛᤢᤶᤗᤥ॥
2CO 5:11 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧᤃ ᤍᤠᤱᤒᤠᤸᤗᤧ ᤁᤢᤔᤡᤱᤛᤥ ᤀᤡᤱᤎᤠ᤺ᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤔᤧᤏᤢ᤺ᤱᤗ ᤑᤠ᤹ᤀᤠᤱ ᤜᤠᤱᤜᤠᤱ ᤔᤧᤳᤋᤢᤶᤛᤡᤶᤒᤧ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤀᤠᤰᤋᤱᤒᤠ ᤆᤥᤃᤡᤃᤧ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤏᤡ᤺ᤛᤢ᤹ᤖᤥ. ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤂᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶ ᤁᤧᤗ᤹ᤒᤠᤴ ᤏᤡᤱᤛᤠᤱ ᤆᤥᤃᤢᤶᤒᤧ᤹ᤖᤥ॥
2CO 5:12 ᤕᤠᤶᤔᤥ. ᤀᤠᤏᤡᤃᤧᤃ ᤂᤡᤏᤡ᤹ ᤋᤃᤡ ᤆᤶᤔᤠᤛᤡᤃᤧᤒᤠ ᤔᤧ᤺ᤴᤗᤥ᥄ ᤀᤠᤏᤡᤃᤧ ᤆᤥᤃᤢᤶᤒᤧᤒᤠ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤏᤧᤒᤥ ᤐᤥ᤺ᤔᤠ ᤛᤢᤕᤧᤶ ᤐᤡᤀᤠᤛᤡᤃᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤜᤠ᤹ᤃ ᤔᤧ᤺ᤴ. ᤁᤖ ᤏᤡ᤺ᤔᤏᤠᤒᤠ ᤐᤠ᤺ᤴᤜᤠ᤹ᤀᤥᤖᤰ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤏᤥᤃᤵ ᤐᤡᤔᤠ ᤁᤧᤛᤢᤰᤋᤢᤶᤛᤡᤶᤗᤖᤥ॥
2CO 5:13 ᤀᤠᤏᤡᤃᤧ ᤏᤡᤱᤘᤠ᤹ ᤔᤧᤴᤍᤰᤔᤏᤠᤒᤠ ᤜᤧᤰᤁᤣ ᤗ᤹ᤖᤡᤃᤧᤏᤧ ᤑᤠ᤹ᤃᤪ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠ ᤆᤥᤃᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡᤱᤘᤠ᤹ ᤁᤢᤍᤥ᤺ᤵᤔᤠ ᤁᤧᤃᤵᤐᤠ ᤜᤧᤰᤁᤣ ᤗ᤹ᤖᤡᤃᤧᤏᤧ ᤑᤠ᤹ᤃᤪ ᤁᤴ ᤒᤠ ᤂᤡᤏᤡ᤹ ᤗᤠᤃᤡᤀᤣᤖᤥ॥
2CO 5:14 ᤀᤠᤏᤡᤃᤧ ᤆᤥᤃᤢᤶᤒᤧᤒᤠ ᤐᤠ᤺ᤴᤜᤠ᤹ᤃ ᤂᤪᤡᤛ᤻ᤋᤖᤧ ᤗᤢᤱᤔᤠ᤹ ᤋᤢᤰᤋᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤆᤥᤃᤢᤶᤒᤧᤒᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤛᤩᤧ. ᤂᤧᤸᤗᤧ ᤆᤥᤃᤢᤸᤗᤧ ᤁᤠᤰ ᤀᤠᤛᤩᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥
2CO 5:15 ᤍᤠᤱᤒᤠᤴ ᤁᤧᤖᤧᤰᤗᤧ ᤗᤠᤃᤡ ᤛᤩᤧᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤁᤧᤜᤡᤱᤒᤠᤜᤠ᤹ ᤀᤠᤸᤗᤀᤠᤱᤎᤥ ᤀᤠᤒᤠᤅᤣ ᤗᤠᤃᤡ ᤔᤧ᤺ᤴ. ᤁᤖ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤧᤜᤡᤱᤗᤖᤥ॥
2CO 5:16 ᤂᤧᤸᤗᤧ ᤆᤥᤃᤢᤸᤗᤧ. ᤀᤠᤸᤗᤀᤠᤱᤎᤥ ᤀᤠᤏᤡᤃᤧ ᤔᤧᤴᤇᤠᤶ ᤕᤠᤵᤔᤡ ᤏᤡ᤺ᤔᤥᤗᤠᤶ ᤀᤠᤳᤋᤡᤴᤏᤠᤱ ᤀᤥᤔᤧᤔᤧᤳᤋᤢᤶᤒᤧᤴᤗᤥ॥ ᤋᤃᤡ ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤀᤥᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧᤛᤠᤱ ᤀᤠᤸᤗ ᤀᤠᤏᤡᤃᤧ ᤜᤧᤰᤁᤣ ᤔᤧᤈᤥᤃᤢᤶᤒᤧᤴᤗᤥ॥
2CO 5:17 ᤀᤠᤳᤋᤡᤸᤗᤧ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥᤃᤢ᤹. ᤂᤧᤴ ᤁᤢᤛᤱ ᤔᤏᤠ ᤐᤥ᤺ᤱ॥ ᤜᤧᤰᤁᤩᤠᤱ ᤋᤃᤡᤛ᤻ᤔᤠ ᤐᤠ᤺ᤴᤜᤠ᤹ᤃ ᤗᤧᤰᤋᤧᤒᤣᤀᤠᤱ ᤁᤠᤰ ᤁᤢᤛᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ᥄
2CO 5:18 ᤁᤴ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤐᤥ᤺ᤰᤂᤧᤒᤠᤖᤥ॥ ᤂᤢᤏᤧ᤹ᤀᤣ ᤂᤪᤡᤛ᤻ᤋᤗᤠᤶ ᤀᤠᤒᤠᤅᤣ ᤂᤢᤏᤧ᤹ᤀᤥ ᤀᤠᤏᤡ᤹ ᤀᤠᤍᤠᤖᤧᤒᤠᤖᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤂᤢᤏᤧ᤹ᤀᤥ ᤋᤠ᤺ᤵᤔᤠᤛᤡ ᤔᤠᤱᤛᤣᤘᤠ᤺ᤴ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥
2CO 5:19 ᤂᤧᤴ ᤑᤠ᤹ᤀᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤔᤏᤠᤜᤠ᤹ ᤂᤪᤡᤛ᤻ᤋᤗᤠᤶ ᤂᤢᤏᤧ᤹ᤀᤥ ᤋᤠᤖᤢᤛᤡ᤹॥ ᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥ᤺ᤸᤗᤧᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤴᤇᤡᤴᤗᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤂᤢᤏᤧ᤹ᤀᤥ ᤋᤠ᤺ᤵᤔᤠᤛᤡ ᤛᤢᤏᤠᤀᤡᤱ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥
2CO 5:20 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤜᤠᤱᤗᤠᤀᤡᤱᤒᤠᤛᤡᤃᤧᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤗᤠᤶᤒᤠ ᤐᤣᤗᤡ ᤑᤠᤰᤗ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤂᤪᤡᤛ᤻ᤋ ᤗᤧᤵᤔᤠᤱᤗᤠᤶ ᤀᤠᤏᤡᤃᤧ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥
2CO 5:21 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠᤴ ᤀᤠᤏᤡ᤹ ᤗᤠᤃᤡ ᤗᤠᤕᤥ ᤁᤢ᤺ᤳᤋᤢᤖᤥ॥
2CO 6:1 ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤐᤥ᤺ᤰᤂᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤛᤢᤏᤠᤀᤡᤱᤅᤡᤸᤗᤧ ᤐᤠ᤺ᤴᤏᤡᤴ ᤂᤡᤏᤡ᤹ ᤜᤡᤱᤔᤴᤏᤥ ᤜᤏᤧ ᤐᤥ᤺ᤱᤔᤠ ᤔᤧᤒᤠᤱᤄᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥
2CO 6:2 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤗᤠᤶ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠ᤺ᤴ ᤛᤢᤕᤧᤶᤔᤥ ᤂᤧᤵᤛᤢᤱ. ᤜᤧᤰᤁᤩᤠᤱ ᤛᤧᤴᤗᤵᤐᤡᤸᤗᤧ ᤕᤧᤴᤏᤥ ᤂᤧᤏᤧ᤹ ᤁᤢᤓᤠ᤹ ᤐᤡᤏᤧᤖᤥ॥” ᤀᤡᤱᤃᤠ᤹ ᤛᤧᤰᤂᤠ ᤔᤧᤳᤏᤡᤱ. ᤀᤠᤸᤗᤥ ᤂᤧᤴ “ᤛᤢᤕᤧᤶᤔᤡᤴ” ᤋᤩᤧᤀᤠᤱ ᤘᤠ᤹॥ ᤛᤧᤴᤗᤵᤐᤡᤸᤗᤧᤴ ᤕᤧᤴᤏᤡᤴ ᤀᤠᤀᤡᤴᤏᤣᤖᤥ॥
2CO 6:3 ᤀᤠᤏᤡᤃᤧ ᤔᤠᤱᤛᤣᤘᤠᤀᤥ ᤀᤠᤵᤋᤡᤰ ᤔᤧᤍᤠᤏᤧᤴᤗ ᤑᤠ᤹ᤀᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤴᤏᤠᤱ ᤔᤧᤜᤶᤛᤢᤶᤒᤧᤴᤗᤥ॥
2CO 6:4 ᤁᤖ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤀᤣᤒᤠ ᤁᤢᤛᤣᤘᤠᤖᤥᤒᤠᤛᤡᤃᤧ ᤑᤠ᤹ᤀᤠᤱ ᤁᤠᤰ ᤐᤖᤡᤰᤗᤧ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤰᤁᤠᤛᤡᤃᤧᤖᤥ॥ ᤀᤠᤏᤡᤃᤧ ᤁᤠᤰ ᤋᤢᤰᤂᤣ ᤆᤩᤧ᤹ᤀᤡᤃᤧᤸᤗᤧ. ᤁᤧᤛᤠᤰᤐᤠ ᤐᤠ᤺ᤴ ᤋᤢᤔᤢᤶᤒᤧᤸᤗᤧ ᤜᤧᤰᤁᤩᤠᤱ ᤏᤡᤱᤘᤠ᤹ ᤐᤱᤛᤡᤱᤅᤡᤸᤗᤧ ᤛᤠ᤹ᤖᤡᤰ ᤏᤠᤛᤡ ᤌ᤺ᤳᤋᤢᤶᤒᤧᤖᤥ॥
2CO 6:5 ᤀᤠᤏᤡᤃᤧ ᤋᤧ᤺ᤶᤓᤢᤰ ᤆᤩᤧ᤹ᤀᤡᤃᤧ. ᤐᤢᤱᤗᤠᤜᤡᤶᤔᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ. ᤀᤠᤏᤡᤃᤧ ᤋᤰᤗᤧᤱᤘᤠᤀᤥ ᤕᤖᤡᤰ ᤔᤧᤒᤥᤃᤧᤀᤠᤱ ᤔᤧᤘᤠ᤹ᤖᤥ॥ ᤛᤠ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤶᤒᤧ ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤡᤶᤔᤠ ᤏᤢ ᤆᤠᤔᤠᤀᤠᤱ ᤔᤧᤱᤄᤥᤀᤣ ᤘᤕᤡᤃᤧᤖᤥ॥
2CO 6:6 ᤀᤠᤏᤡᤃᤧ ᤛᤣᤛᤣ ᤜᤡᤱᤔᤴᤗᤠᤶ. ᤂᤠᤛᤡᤱ ᤏᤡ᤺ᤵᤔᤠᤗᤠᤶ. ᤏᤠᤛᤡ ᤌ᤺ᤵᤔᤠᤗᤠᤶ. ᤏᤢ᤺ᤖᤡᤰᤁᤠᤱ ᤗᤢᤱᤔᤠ᤹ ᤋᤢᤰᤔᤠᤗᤠᤶ. ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ. ᤁᤢᤍᤥ᤺ᤵᤔᤠ ᤔᤡ᤺ᤶᤈᤡᤗᤠᤶ. ᤛᤧᤰᤂᤠᤒᤠ ᤛᤢᤏᤠᤀᤡᤱᤄᤱᤗᤠᤶ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤛᤡᤃᤧ ᤑᤠ᤹ᤀᤠᤱ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤰᤁᤠᤛᤡᤃᤧᤖᤥ॥ ᤀᤠᤰᤋᤱᤒᤠ ᤕᤧᤶᤔᤥᤛᤠᤱ ᤀᤠᤏᤡᤃᤧ ᤑᤧᤈᤢᤶ ᤑᤧᤕᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤀᤠᤏᤡᤃᤧ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤣᤖᤥ॥
2CO 6:8 ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤡᤃᤧᤛᤠᤱ ᤔᤧᤶᤒᤡᤖᤡᤃᤧᤴᤇᤠᤱ. ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤔᤧᤔᤧᤳᤋᤡᤃᤧᤛᤠᤱ. ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠ ᤆᤥᤃᤢᤶᤒᤧ᤹ᤖᤥ॥ ᤀᤠᤏᤡᤃᤧ ᤁᤢᤍᤥ᤺ᤵᤔᤠ ᤆᤥᤃᤡᤃᤧ᤹ ᤁᤖ ᤀᤡᤱᤗᤧᤰᤁᤣ ᤔᤧᤔᤧᤳᤋᤡᤃᤧᤖᤥ॥
2CO 6:9 ᤀᤠᤏᤡᤃᤧ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤡᤃᤧᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠ ᤔᤧᤗᤧᤱᤛᤡᤱᤗᤥ॥ ᤛᤡ᤺ᤔᤠᤗᤡᤱᤎᤥ ᤁᤧᤖᤡᤃᤧᤛᤠᤱ ᤁᤢᤜᤡᤱᤘᤧᤳ ᤘᤕᤡᤃᤧᤖᤥ॥ ᤋᤧ᤺ᤶᤓᤢᤰ ᤔᤧᤕᤠ᤺ᤰᤋᤡᤃᤧᤛᤠᤱ ᤔᤧᤴᤇᤡ᤺ᤀᤣ ᤘᤕᤡᤃᤧᤖᤥ॥
2CO 6:10 ᤔᤣᤖᤡᤱᤅᤥ ᤌᤩᤧ᤹ᤀᤡᤃᤧᤛᤠᤱ ᤛᤍᤠᤍᤡᤱ ᤛ᤺ᤳᤋᤡᤃᤧᤖᤥ॥ ᤕᤠᤱᤃᤧᤛᤠ᤹ᤒᤠ ᤆᤥᤃᤡᤃᤧᤛᤠᤱ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤢᤶᤛᤡᤶᤒᤧᤖᤥ॥ ᤌᤣᤀᤠᤱ ᤔᤧᤃᤳᤋᤢᤶᤒᤧᤴᤇᤠᤱ ᤁᤠᤰ ᤐᤠ᤺ᤴ ᤁᤧᤃᤵᤐᤠ ᤁᤢᤀᤡᤛᤡ᤺ᤰ ᤆᤥᤃᤡᤃᤧᤖᤥ॥
2CO 6:11 ᤁᤥᤖᤴᤌᤡᤒᤠ ᤆᤢᤶᤛᤣ. ᤂᤡᤏᤡ᤹ ᤀᤠᤏᤡᤃᤧ ᤏᤡᤱᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤳᤋᤠᤛᤡᤃᤧᤀᤠᤱ ᤘᤕᤡᤃᤧ. ᤂᤡᤏᤡ᤹ᤏᤢᤃ ᤀᤠᤏᤡᤃᤧ ᤏᤡᤱᤘᤠ᤹ᤀᤡᤴ ᤜᤖᤧᤀᤠᤱ ᤘᤠ᤹॥
2CO 6:12 ᤀᤠᤏᤡᤃᤧ ᤗᤢᤱᤔᤠ᤹ ᤔᤧᤍᤢᤰᤁᤠᤛᤡᤃᤧᤶᤒᤠ ᤔᤧ᤺ᤴᤗᤥ. ᤁᤖ ᤂᤡᤏᤡ᤹ᤏᤧ ᤕᤠᤵᤔᤡ ᤗᤢᤱᤔᤠ᤹ ᤋᤢᤰᤔᤠ ᤁᤧᤗᤖᤢᤶᤗ ᤁᤧᤒᤣᤃᤡᤀᤠᤱ ᤁᤧᤘᤕᤡ᤹ᤖᤥ॥
2CO 6:13 ᤀᤡᤱᤃᤠ᤹ᤃ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤵᤔᤏᤠᤒᤠ ᤜᤧᤰᤁᤣ ᤂᤡᤏᤡ᤹ ᤔᤧᤳᤏᤡᤱᤗᤥ–ᤀᤠᤏᤡᤃᤧ ᤏᤡᤱᤘᤠ᤹ᤀᤡᤴ ᤂᤡᤏᤡ᤹ᤏᤢ ᤕᤶᤒᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤀᤡᤴᤏᤠᤱ ᤆᤢᤰᤐᤠ ᤔᤧ᤺ᤴ. ᤕᤶᤒᤠ ᤆᤥᤃᤧᤶᤔᤧ᤹ᤀᤥ॥
2CO 6:14 ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤄᤧ᤺ᤵᤐᤠᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤏᤡᤒᤠ ᤏᤢ ᤗᤠᤕᤥᤒᤠ ᤐᤠ᤺ᤴᤜᤠ᤹ ᤔᤧᤍᤱᤏᤧᤴᤗᤥ᥄ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤏᤢ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤴ ᤔᤧᤍᤱᤏᤧᤴᤗᤥ॥
2CO 6:15 ᤂᤪᤡᤛ᤻ᤋᤧᤴ ᤏᤢ ᤔᤠᤑᤧᤴᤛᤠᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤋᤱᤔᤠ ᤛᤢᤰᤛᤡ᤹ᤒᤣ᥅ ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴᤏᤠᤱ ᤀᤠᤰᤂᤣᤗ᤹ᤖᤡᤰ ᤋᤱᤒᤣ᥅
2CO 6:16 ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤏᤢ ᤏᤠᤘᤠᤀᤡᤳᤗᤠ᤺ᤴ ᤀᤠᤰᤂᤣᤗ᤹ᤖᤡᤰ ᤋᤱᤔᤠ ᤛᤢᤰᤐᤣ᥅ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤡᤶᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤀᤡᤱᤃᤠ᤹ᤃ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤘᤠ᤹ᤀᤠᤀᤠᤱ ᤗᤠᤱᤄᤣ᤺ᤰᤁᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥ᤺ᤱᤅᤠ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤔᤏᤠ ᤔᤧᤒᤥ᤺ᤱᤗᤥ॥”
2CO 6:17 ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤀᤥᤗᤠᤶᤒᤠ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤔᤧᤘᤕᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤠᤈᤡ᤺ᤴᤈᤡ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤛᤢᤛᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ ᤋᤠ᤺ᤰᤏᤡᤱᤗᤥ॥
2CO 6:18 ᤀᤡᤱᤃᤠ᤹ᤃ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ᤺ ᤐᤥ᤺ᤱᤅᤠ. ᤜᤧᤰᤁᤩᤠᤱ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ ᤁᤧᤒᤥ᤺ᤰᤂᤡ᤹ᤖᤥ ᤗ᤹ᤖᤡᤰ ᤔᤢᤰᤛᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥”
2CO 7:1 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ᤃ ᤁᤴ ᤔᤠᤱᤜᤧᤰᤜᤠ᤹ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰ ᤏᤢ ᤕᤠᤶᤛᤠᤶ ᤁᤧᤈᤡ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤛᤣᤛᤣ ᤆᤥ᤺ᤰᤁᤠᤛᤡᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠ᤺ᤱ ᤂᤥ᤺ᤛᤢᤖ ᤑᤠ᤹ᤀᤠᤱ ᤀᤠᤏᤡ᤹ ᤛᤣᤛᤣ ᤐᤥ᤺ᤰᤂᤡᤖ ᤐᤡᤃᤡᤖᤥ॥
2CO 7:2 ᤀᤠᤏᤡᤃᤧ ᤗᤠᤃᤡ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤕᤶᤒᤠ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧ ᤂᤡᤏᤡ᤹ ᤜᤠ᤺ᤳᤋᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤶᤔᤧᤳᤋᤣ ᤘᤕᤡᤃᤧ. ᤂᤡᤏᤡ᤹ ᤜᤠ᤺ᤳᤋᤠᤱ ᤑᤧᤳᤔᤧᤸᤗᤠ᤺ᤴᤏᤣ ᤘᤕᤡᤃᤧ. ᤜᤧᤰᤁᤩᤠᤱ ᤌᤧᤔᤠᤀᤡ ᤂᤥ᤺ᤔᤠ ᤑᤠ᤹ᤀᤠᤱ ᤂᤡᤏᤡ᤹ ᤜᤠ᤺ᤳᤋᤠᤱ ᤀᤡᤱᤔᤧᤸᤗᤧᤰᤁᤣ ᤘᤕᤡᤃᤧᤖᤥ॥
2CO 7:3 ᤀᤡᤱᤃᤠ᤹ᤃ ᤂᤡᤏᤡ᤹ ᤀᤠᤵᤋᤡᤰ ᤁᤢ᤺ᤳᤏᤡᤱ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤂᤡᤏᤡ᤹ᤏᤢ ᤜᤡᤅᤡᤃᤧᤛᤠᤱ ᤛᤩᤧ᤹ᤀᤡᤃᤧᤛᤠᤱ ᤀᤠᤏᤡᤃᤧ ᤛᤡᤰᤗᤢᤱᤔᤥ ᤁᤧᤘᤕᤡ᤹ ᤑᤠ᤹ᤀᤠᤱ ᤋᤃᤡᤀᤣ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥
2CO 7:4 ᤀᤡᤱᤃᤠ᤹ ᤂᤡᤏᤡ᤹ᤏᤢ ᤔᤧᤱᤃᤡᤀᤣ ᤐᤠ᤺ᤵᤔᤠ ᤛᤢᤰᤋᤢᤱ. ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤀᤠᤏᤧᤒᤥ ᤐᤥ᤺ᤖᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤜᤠᤱᤜᤠᤱ ᤗ᤹ᤖᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤏᤡᤃᤧ ᤁᤧᤖᤧᤰ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥
2CO 7:5 ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧ ᤔᤧᤛᤣᤍᤥᤏᤡᤕᤠ ᤌᤢᤶᤔᤥ ᤋᤩᤧ᤹ᤀᤡᤃᤧᤸᤗᤧ ᤁᤴ ᤀᤠᤏᤡᤃᤧ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤏᤠ᤺ᤶᤛᤡᤱᤔᤠ ᤕᤧᤶ ᤔᤧᤄᤥ᤺ᤛᤢᤴ॥ ᤀᤠᤏᤡᤃᤧᤃ ᤁᤠᤰ ᤐᤡᤛᤠᤱᤗᤠᤶᤒᤠ ᤕᤧᤳᤋᤢᤰᤂᤣ᤺ᤸᤗᤧ ᤁᤒᤡᤃᤧᤖᤥ. ᤗᤠ᤺ᤰᤁᤠᤳᤋᤥ ᤐᤠ᤺ᤴᤎᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤛᤡᤃᤠᤱᤒᤠ ᤁᤡ᤺ᤔᤠ ᤛᤡ᤺ᤔᤧᤴ ᤘᤕᤧᤖᤥ॥
2CO 7:6 ᤁᤖ ᤏᤡᤱᤘᤠ᤹ ᤋᤢᤰᤔᤥ ᤁᤧᤎᤠ᤺ᤒᤠᤜᤠ᤹ ᤜᤠᤱᤜᤠᤱ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤡᤋᤛᤖᤧ ᤁᤢᤍᤠ᤺ᤔᤠᤀᤥᤗᤠᤶᤒᤠ ᤜᤠᤱᤜᤠᤱ ᤔᤧᤳᤋᤡᤃᤧᤖᤥ॥
2CO 7:7 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤠ᤺ᤔᤠᤸᤗᤧᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ ᤁᤧᤒᤡᤖᤢᤶᤒᤠ ᤜᤠᤱᤜᤠᤱ ᤗ᤹ᤔᤠ ᤀᤡᤱᤄᤱᤅᤡᤸᤗᤧᤀᤠᤱ ᤜᤠᤱᤜᤠᤱ ᤔᤧᤳᤋᤡᤃᤧᤖᤥ॥ ᤂᤧᤸᤗᤧᤃ ᤀᤠᤰᤂᤧᤴ ᤛᤠ᤹ᤖᤡᤰ ᤂᤡᤏᤡ᤹ ᤀᤡᤱᤃᤠ᤹ ᤕᤠᤵᤔᤡ ᤋᤢᤶᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶ. ᤜᤧᤰᤁᤩᤠᤱ ᤋᤃᤡ ᤐᤣ᤺ᤴᤍᤧᤒᤠ ᤐᤠ᤺ᤴᤏᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤡᤰ ᤋᤢᤃᤧᤒᤠ ᤐᤠ᤺ᤴᤏᤡᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤰᤂᤧᤴ ᤛᤠ᤹ᤖᤡᤰ ᤁᤶᤒᤪᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤆᤧᤰᤋᤡᤃᤧᤖᤥ. ᤜᤧᤰᤁᤣ᤺ᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤛᤠ᤹ᤖᤡᤰ ᤛ᤺ᤳᤋᤠᤱ॥
2CO 7:8 ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤛᤰᤀᤡᤱᤄᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤗᤥᤏᤧᤴᤗᤥ॥ ᤀᤠᤏᤡᤱᤘᤠ᤹ ᤗᤥᤛᤠᤱ ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤛᤰᤀᤡᤱᤄᤱᤅᤡᤸᤗᤧ ᤛᤵᤑᤠᤖᤰ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥
2CO 7:9 ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧ ᤑᤠ᤹ᤀᤠᤱ ᤀᤡᤱᤃᤠ᤹ ᤛ᤺ᤳᤋᤠᤱᤒᤠ ᤔᤧ᤺ᤴ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤒᤠᤸᤗᤧ ᤆᤥᤃᤢᤸᤗᤧ ᤗᤠᤕᤥᤗᤠᤶ ᤁᤧᤜᤡᤴᤍᤡ ᤑᤠ᤹ᤀᤠᤱᤏᤧ ᤀᤡᤱᤃᤠ᤹ ᤛ᤺ᤳᤋᤠᤱᤒᤠᤖᤥ॥ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤔᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤘᤕᤧᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧᤗᤠᤶᤒᤠ ᤂᤡᤏᤡ᤹ ᤀᤡᤶᤔᤥ᤺ᤰ ᤌᤣᤀᤠᤱ ᤔᤧᤒᤥ᤺ᤰᤂᤧᤴᤗᤥ॥
2CO 7:10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤐᤠ ᤏᤡᤱᤘᤠ᤹ ᤋᤢᤰᤔᤠᤸᤗᤧᤃ ᤗᤠᤕᤥᤗᤠᤶ ᤔᤏᤠᤜᤠ᤹ ᤔᤧᤜᤡᤴ. ᤜᤧᤰᤁᤩᤠᤱ ᤂᤧᤴ ᤜᤡᤶᤔᤠᤸᤗᤧ ᤛᤧᤴᤗᤵᤐᤥ ᤗᤠᤶᤗᤥᤛᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤗᤥ᤺ᤔᤠ ᤔᤧᤒᤥ᤺ᤱᤏᤧᤸᤗᤥ॥ ᤁᤖ ᤔᤧᤴᤇᤠᤶ ᤕᤠᤵᤔᤡ ᤏᤡᤱᤘᤠ᤹ ᤁᤢᤀᤡᤛᤡ᤺ᤰᤐᤠ ᤏᤡᤱᤘᤠ᤹ ᤋᤢᤰᤔᤠᤸᤗᤧᤃ ᤛᤡ᤺ᤔᤧᤴ ᤋᤠᤖᤢ᤹ᤖᤥ॥
2CO 7:11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤐᤠ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤔᤠᤸᤗᤧ ᤂᤡᤏᤡ᤹ᤀᤥ ᤌᤧᤔᤠ ᤆᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤂᤧᤸᤗᤧ ᤁᤢᤛᤡᤰᤁᤧᤛᤶᤒᤠ ᤁᤧᤈᤥᤃᤡ᤹ᤀᤠᤱ ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤀᤥᤛᤣ᤺ᤴᤃᤧᤎᤠᤰᤛᤡᤱᤒᤠ ᤁᤧᤈᤥᤃᤡ᤹ᤖᤥ॥ ᤂᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ᤏᤢ ᤁᤢᤛᤠᤰᤁᤧᤴ ᤁᤧᤒᤥ᤺ᤰᤐᤠ ᤁᤧᤈᤥᤃᤡ᤹ᤖᤥ॥ ᤂᤧᤸᤗᤧ ᤗᤠᤕᤥ᤺ᤸᤗᤧ ᤋᤠᤖᤢᤒᤠ ᤂᤢᤶᤍᤡᤱᤅᤡᤴᤏᤢ ᤁᤧᤃᤡᤒᤠ ᤁᤧᤛᤡ᤺ᤒᤠ ᤁᤧᤈᤥᤃᤡᤖᤥ॥ ᤂᤧᤸᤗᤧᤃ ᤀᤡᤱᤃᤠ᤹ᤏᤢ ᤋᤢᤶᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤁᤧᤈᤥᤃᤡ᤹ᤖᤥ॥ ᤂᤧᤸᤗᤧ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤠᤛᤡ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤁᤧᤈᤥᤃᤡ᤹ᤖᤥ॥ ᤂᤡᤏᤡ᤹ᤃ ᤁᤠᤰ ᤐᤠ᤺ᤴᤏᤥ ᤛᤧᤰᤂᤠᤀᤣ ᤑᤥᤋᤩᤠ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤀᤥᤛᤣ᤺ᤴᤃᤧᤎᤠᤰᤁᤠᤛᤡᤖᤥ॥
2CO 7:12 ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤐᤠ᤺ᤴ ᤁᤧᤓᤣ᤺ᤶᤒᤠ ᤏᤢ ᤂᤧᤴ ᤐᤠ᤺ᤴᤗᤠᤶ ᤏᤡᤱᤘᤠ᤹ ᤋᤢᤰᤔᤠᤀᤥ ᤁᤧᤎᤠ᤺ᤒᤠᤜᤠ᤹ᤖᤧ ᤗᤠᤃᤡ ᤂᤧᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤒᤠ ᤔᤧ᤺ᤴᤗᤥ॥ ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤏᤡᤃᤧ ᤗᤧᤵᤔᤠᤱ ᤀᤠᤰᤂᤧᤴ ᤏᤢ᤺ᤒᤠ ᤏᤡᤱᤘᤠ᤹ ᤁᤧᤃᤳᤋᤢᤶ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤛᤠᤵᤋᤢᤱᤒᤠᤖᤥ॥
2CO 7:13 ᤀᤠᤏᤡᤃᤧᤃ ᤁᤴᤗᤠᤶᤒᤠ ᤜᤠᤱᤜᤠᤱ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥ ᤂᤧᤴᤏᤢ᤺ᤸᤗᤧᤀᤠᤱ ᤁᤢᤳᤆᤡᤀᤥ ᤋᤡᤋᤛᤧᤴ ᤂᤡᤏᤡ᤹ ᤁᤧᤖᤧᤰᤗᤧ ᤜᤠᤱᤜᤠᤱ ᤁᤧᤔᤧᤳᤋᤢᤶᤔᤠᤱ ᤁᤢᤏᤡᤱᤘᤠ᤹ ᤁᤧᤍᤠ᤺ᤛᤢᤶᤒᤠᤀᤥ ᤀᤠᤏᤡᤃᤧ ᤛᤠ᤹ᤖᤡᤰᤁᤣ ᤛ᤺ᤳᤋᤡᤃᤧᤀᤠᤱ ᤘᤕᤡᤃᤧᤖᤥ॥
2CO 7:14 ᤂᤡᤏᤡ᤹ ᤀᤠᤏᤧᤒᤥ ᤁᤧᤓᤥ᤺ᤛᤢᤶᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤆᤧᤰᤋᤢᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤎᤠ᤺ᤔᤥ ᤕᤠᤵᤔᤡ ᤁᤧᤴᤎᤠᤛᤡᤴᤗᤥ॥ ᤛᤍᤠᤍᤡᤱ ᤀᤠᤏᤡᤃᤧᤃ ᤂᤡᤏᤡ᤹ ᤛᤧᤰᤂᤠ ᤐᤠ᤺ᤴ ᤔᤧᤳᤋᤠᤛᤡᤃᤧᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤀᤠᤏᤡᤃᤧ ᤏᤧᤒᤥ ᤁᤧᤓᤥ᤺ᤛᤢᤶᤒᤠ ᤐᤠ᤺ᤴᤏᤡᤴ ᤋᤡᤋᤛᤧᤴ ᤆᤧᤰᤋᤢᤶᤒᤧᤒᤠ ᤜᤧᤰᤁᤣᤀᤣ ᤛᤧᤰᤂᤠ ᤁᤧᤖᤧᤒᤠᤴ ᤂᤢᤏᤧ᤹ ᤏᤡ᤺ᤛᤢᤀᤠᤱ ᤘᤠ᤹ᤖᤥ॥
2CO 7:15 ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤒᤥ᤺ᤰᤂᤡᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤁᤡ᤺ᤔᤠ ᤕᤱᤔᤠᤀᤥ ᤗᤠᤱᤃᤧᤍᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤖ ᤂᤡᤏᤡ᤹ ᤗᤧᤵᤔᤠᤱ ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤐᤥ᤺ᤖ ᤐᤳᤗᤥ॥
2CO 7:16 ᤀᤡᤱᤃᤠ᤹ᤃ ᤂᤡᤏᤡ᤹ᤀᤥ ᤛᤧᤰᤂᤠᤀᤣ ᤋᤠ᤺ᤰᤐᤥ ᤆᤥ᤺ᤰᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤛ᤺ᤳᤋᤠᤖᤥ॥
2CO 8:1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤂᤥ᤺ᤛᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥
2CO 8:2 ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤕᤧᤳᤋᤢᤰᤂᤣ ᤔᤧᤍᤢᤔᤢᤛᤠᤱ ᤔᤧᤛ᤺ᤳᤋᤧ. ᤜᤧᤰᤁᤩᤠᤱ ᤕᤠᤱᤔᤧᤛᤠ᤹ᤖᤧᤛᤠᤱ ᤀᤠᤳᤋᤠᤳᤋᤠᤴᤏᤣ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤀᤠᤳᤋᤠᤳᤋᤠᤴᤏᤣ ᤁᤢᤓᤠ᤹ ᤔᤧᤒᤡᤖᤢᤖᤥ॥
2CO 8:3 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤢᤰᤛᤢᤰᤗᤰ ᤔᤧ᤺ᤴ. ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤒᤠᤅᤣ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤔᤧᤒᤡᤖᤢᤒᤠᤴ ᤛᤧᤰᤂᤠᤀᤣ ᤐᤠ᤺ᤳᤋᤢᤱᤗᤥ॥
2CO 8:4 ᤂᤧᤱᤜᤠ᤹ᤖᤧ ᤕᤖᤢᤛᤗᤧᤔᤛ᤻ᤔᤠ ᤏᤛᤠᤏᤡᤒᤠᤜᤠ᤹ ᤀᤠᤏᤡᤃᤧᤀᤠᤱ ᤁᤢᤓᤠ᤹ ᤐᤡᤔᤠ ᤛᤢᤕᤧᤶ ᤀᤠᤒᤡᤖᤧᤶᤔᤧ᤹ ᤗ᤹ᤖᤡᤰ ᤀᤠᤏᤡᤃᤧ ᤀᤧᤳᤗᤧᤱ ᤐᤣᤗᤡ ᤔᤧᤓᤠᤰᤋᤡᤃᤧᤖᤥ॥
2CO 8:5 ᤀᤠᤸᤗ ᤂᤧᤱᤜᤠ᤹ᤖᤧᤃ ᤀᤠᤏᤡᤃᤧ ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤜᤧᤰᤁᤣᤖᤰ ᤔᤧᤴᤈᤥᤃᤢᤴᤗᤥ. ᤁᤖ ᤍᤠᤱᤒᤠᤀᤥ ᤋᤃᤡ ᤔᤧᤒᤡᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤠᤏᤡᤃᤧ ᤁᤠᤰ ᤐᤠ᤺ᤴᤜᤠ᤹ ᤔᤧᤄᤧᤵᤛᤢ॥
2CO 8:6 ᤜᤧᤰᤁᤣ᤺ᤸᤗᤧ ᤋᤡᤋᤛᤖᤧᤀᤣ ᤂᤡᤏᤡ᤹ᤀᤥ ᤋᤃᤡ ᤜᤧᤰᤁᤣ ᤆᤥ᤺ᤰᤔᤠ ᤛᤢᤈᤠ ᤁᤧᤒᤡᤖᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤢ᤺ᤒᤠ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤛᤢᤵᤔᤠᤖᤧ ᤗᤠᤃᤡ ᤁᤢᤓᤠ᤹ ᤁᤧᤒᤡᤖᤡᤖ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤑᤠᤰᤋᤢᤶᤒᤧᤖᤥ॥
2CO 8:7 ᤂᤡᤏᤡ᤹ᤃ ᤁᤠᤰ ᤐᤠ᤺ᤴᤜᤠ᤹ ᤛᤠ᤹ᤖᤡᤰ ᤏᤢ᤺ᤖᤡᤰ ᤁᤧᤈᤥᤃᤢᤶᤗᤥ–ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤍᤡ᤹. ᤏᤢ᤺ᤖᤡᤰᤁᤠᤱ ᤁᤧᤒᤠᤖᤡ᤹. ᤆᤠ᤺ᤵᤐᤠ ᤁᤧᤈᤥᤃᤡ᤹. ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤁᤢᤓᤠ᤹ ᤐᤡᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤃᤳᤋᤢᤶ ᤜᤧᤰᤁᤩᤠᤱ ᤏᤢ᤺ᤖᤡᤰᤁᤠᤱ ᤗᤢᤱᤔᤠ᤹ ᤕᤠᤵᤔᤡ ᤁᤧᤍᤢᤰᤋᤡ᤹॥ ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤐᤡᤔᤠ ᤏᤢ᤺ᤒᤠ ᤕᤠ᤺ᤶᤒᤰᤁᤥᤀᤠᤱ ᤀᤠᤳᤋᤠᤳᤋᤠᤴᤏᤣ ᤂᤡᤏᤡ᤹ ᤏᤡᤱᤘᤠ᤹ ᤜᤴᤍᤧᤶᤔᤧ᤹ᤀᤠᤱ ᤐᤡᤖᤧᤶᤔᤧ᤹ᤀᤥ॥
2CO 8:8 ᤁᤱᤃ ᤀᤡᤱᤃᤠ᤹ ᤂᤡᤏᤡ᤹ ᤁᤧᤈᤥᤃᤢᤶᤗᤀᤣ ᤐᤥ᤺ᤱ ᤁᤧᤗ᤹ᤒᤠ ᤀᤡᤱᤈᤠ᤺ᤱ ᤐᤡᤏᤡᤱᤒᤠ ᤔᤧ᤺ᤴᤗᤥ. ᤁᤖ ᤘᤣ᤹ᤜᤠ᤹ᤖᤧ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤁᤢᤓᤠ᤹ ᤐᤡᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤃᤳᤋᤢᤒᤠᤴᤏᤢ ᤋᤱᤄᤢᤱᤗ ᤂᤡᤏᤡ᤹ ᤘᤣ᤹ᤜᤠ᤹ ᤛᤧᤰᤂᤠᤀᤣ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤛᤠ᤹ᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠᤖᤥ॥
2CO 8:9 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤧᤛᤠᤱ. ᤁᤢᤕᤠᤱᤛᤠ᤹ᤔᤠᤴᤗᤠᤶᤒᤠ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤃᤡ ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤠ ᤐᤥ᤺ᤰᤂᤧᤖᤥ॥
2CO 8:10 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤥᤃ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤢᤈᤠ ᤐᤡᤏᤡᤱᤗᤥ–ᤔᤡ᤺ᤳᤗᤡᤱ ᤂᤡᤏᤡ᤹ ᤁᤧᤜᤣ᤺ᤰᤋᤢᤶᤒᤠ ᤐᤡᤔᤠ ᤕᤠ᤺ᤶᤒᤰᤁᤡᤴ ᤀᤠᤸᤗ ᤁᤧᤛᤢᤖᤢᤶᤔᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤐᤡᤔᤥᤖᤰ ᤔᤧ᤺ᤴ. ᤁᤖ ᤜᤧᤰᤋᤱᤒᤠ ᤁᤢᤓᤠ᤹ ᤐᤡᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤀᤥᤀᤠᤱ ᤁᤠᤰᤏᤢ ᤋᤃᤡ ᤁᤧᤘᤕᤡᤖᤥ॥
2CO 8:11 ᤀᤠᤸᤗ ᤂᤧᤴ ᤕᤠ᤺ᤶᤒᤰᤁᤡᤴ ᤛᤢᤖᤧᤶᤔᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤐᤡᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤀᤥ ᤕᤠᤖᤡᤵ ᤁᤧᤘᤕᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤁᤧᤃᤳᤋᤢᤶᤒᤠᤀᤥᤗᤠᤶᤔᤣ ᤂᤧᤴ ᤕᤠ᤺ᤶᤒᤰᤁᤡᤴ ᤆᤢ᤺ᤳᤗᤖᤥ॥
2CO 8:12 ᤂᤡᤏᤡ᤹ ᤐᤡᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤆᤩᤠ ᤁᤧᤃᤳᤋᤢᤶ ᤒᤠ ᤂᤧᤴᤗᤠᤶᤒᤠ ᤁᤧᤒᤡᤖᤢᤶᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢ᤹ᤖᤥ. ᤁᤖ ᤁᤧᤱᤃᤳᤋᤢᤶᤔᤡᤴᤒᤠᤴ ᤔᤧᤃᤥ᤺ᤳᤋᤢᤴᤗᤥ॥
2CO 8:13 ᤂᤡᤏᤡ᤹ ᤘᤣ᤹ᤜᤠ᤹ ᤕᤠᤱᤕᤠᤱ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤕᤖᤡᤰ ᤁᤧᤒᤡᤖᤢᤶᤛᤡᤶᤒᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤖ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡᤱᤘᤠ᤹ᤃ ᤜᤥ᤺ᤵᤗᤥ. ᤁᤖ ᤁᤧᤖᤧᤰᤁᤥ ᤁᤢᤍᤱᤒᤠ ᤐᤥ᤺ᤱᤗᤖᤥ॥
2CO 8:14 ᤁᤖ ᤁᤴ ᤕᤧᤶᤔᤥ ᤂᤡᤏᤡ᤹ ᤕᤖᤡᤰ ᤁᤧᤃᤳᤋᤢᤶᤒᤠᤗᤠᤶ ᤁᤧᤛᤠᤰᤐᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤐᤡᤔᤠ ᤁᤧᤛᤢᤰᤋᤢᤶᤛᤡᤶ. ᤜᤧᤰᤁᤣᤗ᤹ᤖᤡᤰ ᤋᤠ᤺ᤴᤍᤡ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤘᤕᤡᤸᤗᤧ ᤂᤧᤱᤜᤠ᤹ᤖᤧ ᤕᤖᤡᤰ ᤔᤧᤃᤳᤋᤢᤒᤠᤗᤠᤶᤒᤠ ᤁᤢᤓᤠ᤹ ᤐᤡᤔᤠ ᤁᤧᤶᤛᤢᤰᤋᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰᤁᤥ ᤁᤢᤍᤱᤒᤠ ᤐᤥ᤺ᤱᤗᤥ॥
2CO 8:15 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤠᤳᤋᤡᤸᤗᤧ ᤕᤖᤡᤰ ᤛᤢᤵᤛᤢ. ᤂᤧᤸᤗᤧᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤧᤒᤥ᤺ᤰᤂᤧᤴ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤆᤩ᤹ᤖᤰ ᤛᤢᤵᤛᤢ. ᤂᤧᤸᤗᤧᤴᤏᤠᤱ ᤛᤠ᤹ᤖᤡᤰ ᤛᤢ᤺ᤸᤗᤡᤰ ᤔᤧᤒᤥ᤺ᤰᤂᤧᤴᤗᤥ॥”
2CO 8:16 ᤀᤡᤱᤃᤠ᤹ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤁᤢᤀᤡᤛᤡ᤺ᤰ ᤋᤡᤋᤛᤧᤴᤏᤠᤱ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤗᤥ॥
2CO 8:17 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤡᤏᤡ᤹ ᤋᤢᤶᤔᤠᤖᤧ ᤗᤠᤃᤡ ᤀᤠᤏᤡᤃᤧ ᤐᤣᤗᤡ᤺ᤴ ᤋᤧᤴᤍᤡᤱᤖᤰ ᤔᤧᤈᤥᤃᤢᤴ. ᤁᤖ ᤂᤢᤏᤧ᤹ ᤀᤠᤒᤠᤅᤣ ᤂᤡᤏᤡ᤹ ᤋᤢᤶᤛᤧ ᤋᤠ᤺ᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹ᤖᤥ॥
2CO 8:18 ᤜᤧᤰᤁᤩᤠᤱ ᤀᤠᤏᤡᤃᤧ ᤂᤢᤏᤧ᤹ᤏᤢᤀᤣ ᤁᤠᤰ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤁᤧᤀᤡᤱᤒᤠ ᤘᤣ᤹ ᤏᤢᤛᤠ᤹ᤎᤡᤰ ᤐᤠᤱᤄᤢᤶᤒᤧᤖ ᤐᤳᤇᤡᤃᤧᤖᤥ॥
2CO 8:19 ᤂᤧᤶᤔᤩᤠᤰᤗᤰ ᤔᤧ᤺ᤴ. ᤁᤖ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤂᤧᤴ ᤏᤢᤛᤠ᤹ᤀᤡᤱᤃ ᤁᤢᤓᤠ᤹ ᤕᤠᤱᤅᤡᤴ ᤕᤖᤢᤛᤗᤧᤶᤔᤥ ᤋᤣ᤹ᤔᤠᤖᤧ ᤗᤠᤃᤡ ᤀᤠᤏᤡᤃᤧᤏᤢ ᤐᤣ᤺ᤰᤗ ᤑᤠ᤹ᤀᤠᤱ ᤔᤧᤛᤣᤃᤢᤀᤠᤱ ᤘᤕᤧᤖᤥ॥ ᤁᤴ ᤔᤠᤱᤛᤣᤘᤠ᤺ᤱᤃ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤑᤠ᤹ᤀᤠᤱ ᤜᤧᤰᤁᤩᤠᤱ ᤀᤠᤏᤡᤃᤧ ᤘᤣ᤹ᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤏᤡᤱᤘᤠ᤹ ᤁᤳᤋᤢᤶᤒᤧ ᤁᤧᤗ᤹ᤒᤠ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤆᤥᤃᤢᤶᤒᤧᤖᤥ॥
2CO 8:20 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤔᤧᤒᤡᤖᤢᤒᤠ ᤁᤴ ᤕᤖᤡᤰ ᤁᤢᤓᤠ᤹ ᤕᤠᤱᤅᤡᤴ ᤋᤣ᤹ᤖᤢᤶᤒᤧᤀᤠᤱ ᤔᤏᤠᤜᤠ᤹ ᤜᤠ᤺ᤳᤋᤢᤶᤛᤡᤶᤒᤧᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ ᤔᤧᤱᤄᤥ᤺ᤛᤢᤴᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥
2CO 8:21 ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤍᤠᤱᤒᤠᤸᤗᤧ ᤁᤢᤏᤡ᤺ᤔᤠᤀᤥᤖᤰ ᤔᤧ᤺ᤴ. ᤁᤖ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤸᤗᤧᤀᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤡᤃᤧᤖᤥ॥
2CO 8:22 ᤜᤧᤰᤁᤩᤠᤱ ᤂᤢᤴᤇᤡ᤹ᤏᤢ ᤘᤣ᤹ ᤏᤢᤛᤠ᤹ᤎᤡᤰᤁᤠᤱ ᤐᤠᤱᤄᤢᤶᤒᤧᤖ ᤐᤳᤇᤡᤃᤧᤖᤥ॥ ᤂᤢᤏᤧ᤹ᤃ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥ ᤕᤠᤶᤈᤠᤱᤘᤠ ᤁᤢᤎᤡᤶ ᤆᤥ᤺ᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤕᤖᤡᤰ ᤐᤖᤡᤰᤗᤧ ᤕᤠᤵᤔᤡ ᤀᤥᤛᤣ᤺ᤴᤎᤠᤰᤋᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤶᤍᤠᤱ ᤐᤕᤶ ᤋᤠ᤺ᤰᤐᤥ ᤕᤢᤰᤂᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤕᤠᤶᤈᤠᤱᤘᤠ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
2CO 8:23 ᤋᤡᤋᤛᤧᤱᤃ. ᤀᤡᤱᤃᤠ᤹ᤏᤢ ᤛᤥᤖᤡᤰᤁᤣ ᤂᤡᤏᤡ᤹ ᤁᤢᤓᤠ᤹ ᤐᤡᤔᤠᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤴᤈᤢᤶᤗᤥ॥ ᤜᤧᤰᤁᤩᤠᤱ ᤂᤧᤴ ᤏᤢᤛᤠ᤹ᤜᤠ᤹ᤃ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤀᤡᤱᤛᤠᤒᤠᤛᤡ ᤏᤢ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱ ᤁᤧᤈᤥ᤺ᤰᤐᤠᤛᤡᤖᤥ॥
2CO 8:24 ᤂᤧᤸᤗᤧ ᤆᤥᤃᤢᤸᤗᤧ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤔᤧᤏᤡ᤺ᤛᤢᤖ ᤑᤠ᤹ᤀᤠᤱ ᤂᤡᤏᤡ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤠᤴ ᤏᤢ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤀᤠᤏᤡᤃᤧ ᤏᤧᤒᤥ ᤐᤥ᤺ᤖᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ᤀᤥ ᤁᤧᤍᤠ᤺ᤒᤠᤜᤠ᤹ ᤀᤥᤛᤣ᤺ᤴᤎᤠᤰᤋᤧᤶᤛᤡᤶᤔᤧ᤹ᤀᤥ॥
2CO 9:1 ᤕᤖᤢᤛᤗᤧᤶᤛᤔᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ ᤕᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤛᤠᤵᤔᤠᤖ ᤏᤧᤔᤠ ᤀᤡᤱᤃᤠ᤹ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥
2CO 9:2 ᤌᤣᤀᤠᤱᤓᤧᤸᤗᤧ ᤁᤢᤓᤠ᤹ ᤐᤡᤖᤢᤶᤛᤡᤶ ᤁᤧᤗ᤹ᤒᤠ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤂᤡᤏᤡ᤹ ᤀᤰᤂᤤᤕᤠ ᤌᤢᤶᤔᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤐᤡᤔᤠ ᤕᤠ᤺ᤶᤒᤰᤁᤥ ᤔᤡ᤺ᤳᤗᤡᤱᤅᤠᤱᤎᤥᤀᤣ ᤕᤠᤖᤡᤵ ᤁᤧᤘᤕᤡᤒᤠᤸᤗᤧ ᤀᤡᤱᤃᤠ᤹ ᤀᤠᤏᤧᤒᤥ ᤐᤥ᤺ᤖᤧᤀᤠᤱ ᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤔᤏᤠᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤢᤓᤠ ᤐᤡᤔᤠ ᤕᤠᤖᤡᤵ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤀᤥ ᤕᤖᤡᤰᤗᤧ ᤁᤢᤓᤠ ᤐᤡᤔᤠ ᤕᤠᤶᤈᤠᤱᤘᤠ ᤔᤧᤄᤥ᤺ᤛᤢᤀᤠᤱ ᤔᤧᤘᤠ᤹ᤖᤥ॥
2CO 9:3 ᤜᤧᤰᤁᤩᤠᤱ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤀᤠᤏᤧᤒᤥ ᤐᤥ᤺ᤖᤧᤒᤠ ᤐᤠ᤺ᤴᤏᤡᤴ ᤜᤏᤧ ᤔᤧᤒᤥ᤺ᤱᤅᤡᤴᤗ ᤁᤖ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤕᤠᤖᤡᤵ ᤁᤧᤒᤥ᤺ᤰᤂᤡᤀᤠᤱ ᤁᤧᤕᤢᤅᤡᤖ ᤑᤠ᤹ᤀᤠᤱ ᤋᤃᤡᤀᤣ ᤁᤵᤔᤥᤗᤠᤶ ᤑᤢ᤹ᤏᤢᤛᤠ᤹ᤜᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤗ ᤐᤳᤋᤠᤖᤥ॥
2CO 9:4 ᤁᤢᤓᤠ ᤔᤧᤛᤣᤍᤥᤏᤡᤕᤠᤒᤠ ᤔᤏᤠᤜᤠ᤹ ᤀᤡᤱᤃᤠ᤹ᤏᤢ ᤂᤧᤵᤔᤥ ᤔᤧᤍᤠ᤺ᤸᤗᤧ ᤀᤡᤱᤃᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰ ᤂᤧᤴ ᤕᤠ᤺ᤶᤒᤰᤁᤥ ᤕᤠᤖᤡᤵ ᤔᤧᤶᤒᤥ᤺ᤱᤅᤣ ᤁᤧᤘᤕᤡᤒᤠ ᤁᤧᤶᤍᤢᤔᤡᤏᤧ ᤑᤠ᤹ᤃᤪ ᤀᤠᤏᤡᤃᤧᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ᤀᤠᤱ ᤛᤠ᤹ᤖᤡᤰ ᤛᤡᤖᤡᤱᤔ᤺ᤔᤥ ᤁᤧᤎᤩᤧ᤹ᤀᤡᤖᤥ॥
2CO 9:5 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤔᤠᤱᤜᤧᤰ ᤁᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤁᤢᤓᤠ᤹ ᤕᤠᤱᤅᤡᤴ ᤕᤠᤖᤡᤵ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤧᤴ ᤑᤢ᤹ᤏᤢᤛᤠ᤹ᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤐᤠᤱᤔᤠᤛᤡ ᤏᤢ᤺ᤒᤠ ᤐᤥ᤺ᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤁᤢᤓᤠ᤹ ᤕᤠᤱᤅᤡᤱᤃ ᤏᤡᤱᤘᤠ᤹ ᤋᤢᤰᤗ ᤔᤧ᤺ᤴ. ᤁᤖ ᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ ᤐᤥ᤺ᤱᤗᤥ॥
2CO 9:6 ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧ ᤆᤩ᤹ᤖᤰ ᤕᤠ᤹ᤖᤡ᤺ᤶᤒᤧᤴ ᤜᤣ᤹ᤖᤢ. ᤂᤧᤸᤗᤧ ᤆᤩ᤹ᤖᤰ ᤆᤠ ᤛᤢᤵᤛᤢ᤹ᤖᤥ॥ ᤀᤠᤳᤋᤡᤸᤗᤧ ᤕᤖᤡᤰ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤢ. ᤂᤧᤸᤗᤧ ᤕᤖᤡᤰᤁᤣ ᤆᤠ ᤛᤢᤵᤛᤢ᤹ᤖᤥ॥
2CO 9:7 ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤴᤍᤧᤴᤏᤣ ᤔᤧ᤺ᤴ. ᤁᤖ ᤁᤶᤔᤩᤠᤰ ᤐᤡᤔᤠ ᤛᤢᤰᤋᤢᤶᤒᤧ᤹ ᤗ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ᤀᤥ ᤏᤡ᤺ᤴᤎᤥ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤔᤧᤒᤡᤖᤢᤖᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤛᤡᤖᤠ᤹ ᤌᤠᤱᤗ ᤐᤡᤖᤢ᤹. ᤂᤧᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢ᤹ᤖᤥ॥
2CO 9:8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤧᤒᤡᤖᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤛᤍᤠᤍᤡᤱ ᤁᤧᤃᤳᤋᤢᤶᤔᤠᤱ ᤁᤠᤰ ᤏᤢ᤺ᤒᤠ ᤕᤠ᤺ᤶᤒᤰᤁᤥ ᤕᤖᤡᤰ ᤐᤡᤔᤠ ᤁᤧᤛᤢᤰᤋᤢᤶᤗᤥ॥
2CO 9:9 ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤏᤡᤱᤘᤠ᤹ ᤁᤧᤜᤶᤒᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰᤁᤡᤴ ᤛᤍᤠᤍᤡᤱ ᤛᤍᤠᤍᤡᤱ ᤘᤠ᤹ᤖᤥ॥”
2CO 9:10 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤴᤁᤧᤔ᤺ᤒᤠᤜᤠ᤹ ᤕᤠ᤹ᤖᤡ᤺ᤶᤒᤠ ᤐᤡᤖᤢᤛᤡ ᤜᤧᤰᤁᤩᤠᤱ ᤆᤠᤔᤠ ᤁᤢᤈᤠ ᤐᤡᤖᤢᤛᤡ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤧᤃᤳᤋᤢᤶᤒᤠᤴᤏᤠᤱ ᤑᤥ᤺ᤛᤢ᤹ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰᤁᤡᤴ ᤑᤥ᤺ᤛᤢ᤹ ᤁᤧᤒᤡᤖᤡ᤹ᤖᤥ॥
2CO 9:11 ᤂᤡᤏᤡ᤹ᤃ ᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤖᤡᤰᤗᤧ ᤔᤢ᤹ᤀᤡᤛᤠᤒᤠ ᤁᤧᤈᤥᤃᤡ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤂᤡᤏᤡ᤹ ᤁᤧᤛᤢᤵᤛᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤆᤠᤜᤠᤒᤥ ᤁᤧᤘᤠ᤹ᤒᤠᤜᤠ᤹ ᤐᤡᤖᤢᤶᤛᤡᤶᤒᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢ᤹ᤖᤥ॥
2CO 9:12 ᤂᤡᤏᤡ᤹ ᤁᤧᤛᤢᤵᤛᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤆᤠᤜᤠᤒᤠ ᤔᤧᤈᤥᤃᤧᤀᤠᤱ ᤔᤧᤘᤕᤧᤒᤠᤀᤥ ᤁᤢᤓᤠ᤹ᤖᤰ ᤔᤧᤒᤥ᤺ᤰᤂᤧᤴ ᤁᤖ ᤁᤴ ᤕᤠ᤺ᤶᤒᤰᤁᤡᤸᤗᤧᤃ ᤕᤖᤡᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢᤖᤥ॥
2CO 9:13 ᤁᤴ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥᤗᤠᤶ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤁᤧᤗ᤹ᤒᤠᤴ ᤘᤣ᤹ᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤶᤛᤡᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤒᤥ᤺ᤰᤂᤡᤒᤠᤴ. ᤜᤧᤰᤁᤩᤠᤱ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ ᤁᤧᤜᤴᤍᤢᤶᤔᤠᤱ ᤁᤧᤖᤧᤰ ᤁᤧᤜᤠ᤺ᤳᤋᤢᤶᤛᤡᤶᤒᤠᤴ ᤔᤧᤏᤡ᤺ᤛᤢᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢ᤹ᤖᤥ॥
2CO 9:14 ᤜᤧᤰᤁᤩᤠᤱ ᤂᤡᤏᤡ᤹ᤀᤥᤗᤠᤶ ᤁᤧᤍᤠ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧᤃ ᤛᤡᤰᤗᤢᤱᤔᤥᤗᤠᤶ ᤂᤡᤏᤡ᤹ᤗᤠᤃᤡ ᤋᤢᤘᤠ ᤔᤧᤈᤥᤃᤢ᤹ᤖᤥ॥
2CO 9:15 ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤢᤒᤷᤎᤠᤶᤔᤡᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄
2CO 10:1 ᤀᤡᤱᤃᤠ᤹ ᤐᤠᤘᤗᤧᤴ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧ ᤏ᤺ᤶᤏ᤺ᤶ ᤗ᤹ᤀᤠᤔᤢ. ᤁᤖ ᤔᤠ᤺ᤱᤄᤠ ᤘᤠ᤹ᤀᤠᤸᤗᤧ ᤁᤧᤀᤠ᤺ᤶᤒᤠ ᤆᤥ᤺ᤰᤁᤠᤔᤢ ᤗ᤹ᤖᤡᤰ ᤂᤡᤏᤡ᤹ ᤗᤢᤶᤔᤥ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤔᤢ॥ ᤀᤠᤸᤗ ᤁᤧᤏᤢ᤹ᤒᤠ ᤏᤢ ᤗᤢᤶᤗᤢᤶᤒᤠ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤥᤗᤠᤶ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤁᤧᤀᤠ᤺ᤶᤒᤠ ᤐᤠ᤺ᤴ ᤐᤠ᤺ᤵᤔᤠ ᤕᤠᤵᤔᤡ ᤔᤧᤒᤠᤱᤄᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱ. ᤌᤣᤀᤠᤱᤓᤧᤸᤗᤧ ᤛᤧᤰᤂᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤜᤧᤰᤋᤱᤒᤠ ᤁᤧᤈᤥᤃᤡ᤹ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤜᤠ᤹ᤏᤢ ᤀᤡᤱᤃᤠ᤹ ᤁᤧᤀᤠ᤺ᤶᤒᤠᤀᤣ ᤐᤥ᤺ᤱᤔᤠ ᤛᤢᤰᤁᤠᤖᤥ॥
2CO 10:3 ᤀᤠᤏᤡ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤘᤠ᤹ᤛᤠᤱ ᤀᤡᤰᤛᤠᤒᤠ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰ ᤌᤱ ᤀᤠᤴᤈᤥᤃᤢᤶᤔᤡᤴᤗᤥ॥
2CO 10:4 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤌᤱᤅᤥ ᤕᤠᤱᤔᤏᤠᤒᤠ ᤑᤧᤈᤢᤶ ᤑᤧᤕᤠᤜᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴ. ᤁᤖ ᤀᤠᤏᤡ᤹ ᤑᤧᤈᤢᤶ ᤑᤧᤕᤠᤜᤠ᤹ᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶ ᤏᤠ᤺ᤶᤔᤠ ᤁᤧᤛᤢᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴᤗᤥ॥
2CO 10:5 ᤀᤠᤏᤡ᤹ ᤁᤴ ᤑᤧᤈᤢᤶ ᤑᤧᤕᤠᤜᤠ᤹ᤗᤠᤶ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤗᤧᤰᤁᤣ ᤐᤠ᤺ᤴᤎᤱᤜᤠ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤒᤥ᤺ᤰᤐᤠ ᤀᤠᤄᤄᤒᤠ ᤐᤠ᤺ᤴᤜᤠ᤹ ᤀᤠᤏᤠ᤺ᤴᤍᤢᤶᤗᤥ॥ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤀᤡ᤺ᤳᤋᤢᤒᤠ ᤑᤧᤴ ᤏᤡᤱᤘᤠ᤹ᤜᤠ᤹ ᤐᤢᤱᤗᤠᤎᤠᤒᤠᤴ ᤋᤧᤶᤏᤠ ᤋᤠ᤺ᤵᤔᤏᤠᤒᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧ ᤁᤢᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤧᤒᤥ᤺ᤱᤗ ᤑᤠ᤹ᤀᤠᤱ ᤕᤢᤰᤁᤥ ᤀᤠᤍᤠᤖᤢᤶᤗᤥ॥
2CO 10:6 ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤒᤥ᤺ᤰᤂᤡ ᤁᤧᤈᤢᤖᤡᤀᤠᤱ ᤘᤣ᤹ ᤁᤧᤖᤧᤰ ᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤕᤠᤖᤡᤵ ᤐᤥ᤺ᤰᤂᤡᤃᤧᤖᤥ॥
2CO 10:7 ᤂᤡᤏᤡ᤹ᤃ ᤗᤠ᤺ᤰᤁᤠᤳ ᤁᤧᤎᤠ᤺ᤵᤐᤠ ᤐᤠ᤺ᤴᤜᤠ᤹ᤖᤰ ᤀᤥᤃᤧᤔᤧᤳᤋᤢᤶ. ᤁᤖ ᤂᤡᤏᤡ᤹ᤀᤥ ᤁᤢᤓᤠᤎᤡᤰᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤔᤏᤠᤀᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤏᤧ ᤑᤠ᤹ᤃᤪ ᤂᤧᤸᤗᤧ ᤂᤢᤏᤧ᤹ ᤁᤢᤀᤡᤛᤡ᤺ᤰ ᤀᤠᤏᤡᤃᤧᤀᤠᤱ ᤂᤪᤡᤛ᤻ᤋᤖᤧ ᤁᤢᤔᤏᤠᤛᤡᤃᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤵᤔᤠ ᤐᤥ᤺ᤱᤗᤥ॥
2CO 10:8 ᤍᤠᤱᤒᤠᤸᤗᤧ ᤐᤡᤖᤡᤃᤧᤒᤠ ᤕᤢᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤕᤖᤡᤰ ᤕᤶᤒᤠ ᤁᤧᤗᤧᤱᤛᤡᤱᤒᤠ ᤁᤢᤀᤡᤛᤡ᤺ᤰ ᤌᤠ᤺ᤵᤐᤠᤛᤠᤱ ᤁᤴ ᤐᤠ᤺ᤴᤏᤥ ᤀᤡᤱᤃᤠ᤹ ᤛᤡᤖᤡᤱ ᤔᤧᤔᤀᤠᤴ. ᤌᤣᤀᤠᤱᤓᤧᤸᤗᤧ ᤁᤴ ᤕᤢᤰᤁᤡᤱᤃ ᤂᤡᤏᤡ᤹ ᤑᤧᤳᤗᤠ᤺ᤶᤔᤠ ᤔᤧ᤺ᤴ. ᤁᤖ ᤂᤡᤏᤡ᤹ ᤌᤥᤒᤥ ᤆᤥ᤺ᤰᤔᤠᤖᤧ ᤗᤠᤃᤡᤖᤥ॥
2CO 10:9 ᤀᤡᤱᤃᤠ᤹ᤃ ᤛᤰᤀᤡᤱᤗᤠᤶᤒᤠ ᤂᤡᤏᤡ᤹ ᤕᤱᤔᤠ ᤛᤧᤵᤔᤠ ᤁᤥ᤺ᤳᤏᤡᤱᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ.
2CO 10:10 ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤛᤠᤵᤋᤢᤒᤠ ᤛᤰᤀᤡᤱᤄᤱᤜᤠ᤹ ᤁᤢᤈᤠ᤹ᤀᤡ ᤏᤢ ᤁᤧᤀᤠ᤺ᤶᤒᤠ ᤆᤥ᤺ᤰ. ᤁᤖ ᤂᤧᤴ ᤔᤏᤠ᤺ᤴ ᤀᤠᤏᤡ᤹ᤏᤢ ᤘᤠ᤹ᤀᤡᤸᤗᤧ ᤕᤥ᤺ᤴᤈᤥᤈᤥᤒᤠ ᤆᤥ᤺ᤰ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤠ᤺ᤴᤜᤠ᤹ᤃ ᤌᤣᤀᤠᤱ ᤔᤧ᤺ᤴᤗᤥ॥”
2CO 10:11 ᤀᤰᤋᤱᤒᤠ ᤔᤏᤠᤜᤠ᤹ᤖᤧ ᤀᤠᤏᤡᤃᤧ ᤛᤰᤀᤡᤱᤄᤱᤜᤠ᤹ᤀᤥ ᤐᤠ᤺ᤳᤋᤢᤶᤒᤧᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧᤀᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤕᤠ᤺ᤶᤒᤰ ᤆᤥᤃᤢᤶᤒᤧ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤵᤔᤠ ᤐᤥ᤺ᤱᤗᤥ॥
2CO 10:12 ᤀᤠᤒᤠᤅᤣ ᤀᤡᤱᤃᤠ᤹ᤀᤣ᤺ᤰ ᤁᤧᤗ᤹ᤒᤠᤜᤠ᤹ᤏᤢ ᤀᤠᤏᤡᤃᤧ ᤋᤱᤛᤡᤱᤔᤠ ᤔᤧᤀᤠ᤺ᤴᤏᤠᤛᤡᤃᤧᤴᤗᤥ॥ ᤂᤧᤱᤜᤠ᤹ ᤀᤠᤒᤠᤅᤣ ᤁᤧᤍᤶᤒᤠ ᤔᤧᤗᤧᤱᤛᤡᤱᤅᤠᤱ ᤔᤧᤜᤧᤴᤇᤡᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤂᤠᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ᥄
2CO 10:13 ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤡᤃᤧᤒᤠ ᤕᤢᤰᤁᤥᤖᤰ ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤕᤶᤒᤠ ᤐᤠ᤺ᤴ ᤐᤠ᤺ᤳᤋᤢᤶᤒᤧᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤡᤃᤧᤒᤠ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴᤏᤢ᤺ᤸᤗᤧ ᤘᤣ᤹ ᤐᤠ᤺ᤴᤏᤥ ᤕᤶᤒᤠ ᤐᤠ᤺ᤴ ᤔᤧᤒᤠ᤺ᤳᤋᤢᤶᤒᤧᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ᤀᤥᤀᤠᤱ ᤂᤧᤴ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤀᤠᤱ ᤘᤠ᤹ᤖᤥ॥
2CO 10:14 ᤂᤡᤏᤡ᤹ ᤀᤠᤏᤡᤃᤧ ᤕᤢᤰᤁᤥ ᤁᤧᤘᤕᤡ᤹ ᤗ᤹ᤖᤡᤰ ᤐᤠ᤺ᤳᤋᤢᤶᤒᤧᤸᤗᤧ ᤕᤶᤒᤠ ᤗᤧᤱᤅᤠᤛᤡᤃᤧᤒᤠ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤁᤠᤰᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱ ᤁᤧᤍᤠ᤺ᤵᤐᤠᤃ ᤀᤠᤏᤡᤃᤧᤀᤣ ᤘᤕᤡᤃᤧᤖᤥ॥
2CO 10:15 ᤘᤣ᤹ᤜᤠ᤹ᤖᤧ ᤔᤠᤱᤛᤣᤘᤠ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤔᤧ᤺ᤴ. ᤁᤖ ᤀᤠᤏᤡᤃᤧ ᤆᤥᤃᤢᤶᤒᤧᤒᤠ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥᤖᤰ ᤕᤶᤒᤠ ᤐᤠ᤺ᤴ ᤐᤠ᤺ᤳᤋᤢᤶᤒᤧᤖᤥ॥ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤆᤰᤔᤧᤸᤗ᤹ᤀᤣ ᤐᤥ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤀᤠᤏᤡᤃᤧ ᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴᤏᤠᤱ ᤐᤥ᤺ᤖ ᤁᤧᤗ᤹ᤒᤠ ᤏᤡᤱᤛᤠᤱ ᤁᤳᤋᤢᤶᤒᤧᤖᤥ॥
2CO 10:16 ᤜᤧᤰᤁᤣ᤺ᤸᤗᤧ ᤀᤠᤏᤡᤃᤧ ᤂᤡᤏᤡ᤹ ᤁᤧᤘᤕᤡᤒᤠ ᤋᤧᤴᤏᤡᤴᤏᤢ᤺ᤸᤗᤧᤀᤠᤱ ᤔᤠ᤺ᤱᤄᤠ ᤔᤠ᤺ᤱᤄᤠ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤛᤢᤰᤋᤢᤶᤒᤧᤖᤥ॥ ᤌᤣᤀᤠᤱᤓᤧᤸᤗᤧ ᤘᤣ᤹ᤜᤠ᤹ᤖᤧ ᤔᤧᤈᤥᤃᤢ ᤔᤧᤛᤢᤖᤢᤒᤠ ᤔᤠᤱᤛᤣᤘᤠᤀᤥ ᤀᤠᤏᤡᤃᤧ ᤕᤶᤒᤠ ᤐᤠ᤺ᤴ ᤐᤠ᤺ᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢᤶᤒᤧᤴᤗᤥ॥
2CO 10:17 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤠᤳᤋᤡᤸᤗᤧ ᤕᤶᤒᤠ ᤐᤠ᤺ᤴ ᤐᤠ᤺ᤳᤋᤢ᤹. ᤂᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤖᤰ ᤕᤶᤒᤠ ᤐᤠ᤺ᤴ ᤐᤠ᤺ᤳᤋᤢᤖᤖᤥ॥”
2CO 10:18 ᤌᤣᤀᤠᤱᤓᤧᤸᤗᤧ ᤏᤢ᤺ᤒᤠ ᤆᤥ᤺ᤰᤁᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤍᤠᤛᤢᤴ. ᤁᤖ ᤍᤠᤱᤒᤠᤸᤗᤧ ᤏᤢ᤺ᤒᤠ ᤆᤥ᤺ᤰ ᤔᤧᤳᤋᤢᤒᤠ ᤔᤏᤠ᤺ᤸᤗᤧᤀᤣ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤛᤢ᤹ᤖᤥ॥
2CO 11:1 ᤀᤡᤱᤃᤠ᤹ ᤀᤡᤈᤧ᤺ᤳᤇᤡᤰ ᤀᤍᤱ ᤆᤥ᤺ᤰᤁᤠᤛᤠᤱ ᤕᤠᤵᤔᤡ ᤁᤧᤎ᤺ᤳᤋᤡ᤹ ᤑᤠ᤹ᤀᤠᤱ ᤏᤡᤱᤛᤠᤱ ᤆᤥᤃᤢᤱᤗᤥ॥ ᤂᤡᤏᤡ᤹ ᤀᤠᤎᤖᤧᤶᤔᤧ᤹ᤀᤥ॥
2CO 11:2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤃᤧᤜᤧᤳᤋᤡᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤀᤠᤱ ᤏᤠᤜᤧᤳᤏᤡᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤀᤡᤳᤌᤢᤱᤃᤧᤴ ᤏᤠᤗᤡᤛᤠᤱ ᤂᤪᤡᤛ᤻ᤋᤧᤴᤏᤢᤖᤰ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤡᤔᤠ ᤔᤠᤱᤜᤧᤰ ᤆᤥᤃᤢᤱ ᤐᤡᤏᤡᤱᤅᤠᤱ ᤘᤠ᤹ᤀᤠ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤛᤣᤛᤣᤔᤠ ᤛᤡᤛᤠᤔᤣ᤺ᤳ ᤁᤢᤀᤡᤛᤡ᤺ᤰ ᤂᤢᤏᤧ᤹ᤀᤥᤀᤣ ᤋᤥ᤺ᤶᤔᤠ ᤛᤢᤰᤏᤡᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥
2CO 11:3 ᤁᤖ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤛᤫᤠᤔᤠᤀᤥᤗᤠᤶ ᤜᤘᤠ᤺ᤴ ᤀᤡᤱᤗᤧᤰᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤂᤪᤡᤛ᤻ᤋᤀᤥ ᤁᤧᤍᤥ᤺ᤴᤍᤢᤶᤒᤠ ᤔᤡ᤺ᤶᤈᤡᤴ ᤏᤢ ᤋᤥ᤺ᤴᤍᤥ᤺ᤶᤒᤠ ᤏᤡᤱᤘᤠ᤹ᤀᤡᤴ ᤗᤠᤶᤓᤥ᤺ᤳᤋᤢ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤡ᤺ᤀᤠᤖᤥ॥
2CO 11:4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤥ ᤔᤧᤍᤠᤀᤠᤱ ᤁᤢᤓᤠᤖᤧᤃ ᤀᤠᤏᤡᤃᤧ ᤀᤡᤱᤓᤥ᤺ᤛᤢᤶᤒᤧᤒᤠ ᤕᤧᤛᤢ᤺ᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠ ᤕᤧᤛᤢ᤺ᤴ ᤀᤡᤱᤔᤧᤓᤥ᤺ᤛᤢ᤹ᤏᤧ ᤑᤠ᤹ᤃᤪ. ᤀᤡᤃᤪ ᤁᤧᤄᤥ᤺ᤛᤢᤶᤒᤠ ᤛᤣᤛᤣᤔᤠᤱᤅᤡᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠᤴ ᤁᤧᤄᤥ᤺ᤛᤢᤶᤏᤧ ᤑᤠ᤹ᤃᤪ. ᤀᤡᤃᤪ ᤕᤠᤶᤔᤥ ᤋᤧᤴᤍᤡᤱ ᤁᤧᤈᤥᤃᤢᤶᤒᤠ ᤛᤢᤏᤠᤀᤡᤱᤅᤡᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠ ᤛᤢᤏᤠᤀᤡᤱᤅᤡᤴ ᤁᤧᤍᤠ᤺ᤰᤋᤢᤶᤏᤧ ᤑᤠ᤹ᤃᤪ ᤂᤧᤴ ᤐᤠ᤺ᤴᤜᤠ᤹ ᤁᤧᤎᤖᤢᤶᤔᤠᤱ ᤋᤧᤴᤍᤡᤱ ᤁᤧᤈᤥᤃᤢᤶᤗᤥ॥
2CO 11:5 ᤁᤖ ᤕᤶᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧ ᤀᤡᤱᤃᤠ᤹ᤃ ᤆᤢ᤺ᤰᤁᤠᤒᤡᤗᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤱᤅᤡᤴᤗᤥ॥
2CO 11:6 ᤂᤧᤱᤜᤠ᤹ ᤜᤧᤰᤁᤣ ᤀᤡᤱᤃᤠ᤹ ᤗᤧᤛ᤻ᤛᤢᤱ ᤏᤡ᤺ᤛᤢᤱᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤋᤱᤔᤠᤖ ᤐᤠ᤺ᤵᤔᤠ ᤔᤧᤛᤢᤰᤁᤠᤴᤒᤡᤗᤠ. ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤕᤖᤡᤰ ᤗᤧᤛ᤻ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤋᤃᤡᤛᤠ ᤁᤠᤰ ᤐᤖᤡᤰᤗᤧ ᤏᤢ᤺ᤖᤡᤰᤁᤠᤱ ᤂᤡᤏᤡ᤹ᤀᤥ ᤀᤥᤛᤣ᤺ᤴᤍᤠᤱ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥
2CO 11:7 ᤀᤡᤱᤃᤠ᤹ ᤆᤢᤱᤈᤡᤃᤧᤶᤒᤠ ᤐᤥ᤺ᤰᤂᤠᤱᤅᤠᤱ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤀᤠᤶᤓᤠᤀᤣ ᤂᤡᤏᤡ᤹ ᤀᤡᤱᤓᤥ᤺ᤏᤡᤱᤅᤡᤸᤗᤧ ᤗᤠᤕᤥ ᤆᤥᤃᤢᤱᤒᤡ᥅
2CO 11:8 ᤂᤡᤏᤡ᤹ᤀᤥ ᤔᤠᤱᤛᤣᤘᤠ ᤆᤥᤃᤢᤱᤅᤡᤸᤗᤧ ᤘᤣ᤹ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤁᤢᤓᤠ᤹ ᤕᤠᤱ ᤔᤧᤒᤡᤖᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤀᤠᤶᤓᤠᤀᤣ ᤛᤣᤘᤠ ᤆᤥ᤺ᤰᤛᤧ ᤘᤣ᤹ᤜᤠ᤹ ᤏᤠᤵᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤖᤥ॥
2CO 11:9 ᤜᤧᤰᤁᤩᤠᤱ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤖᤧᤗᤠᤃᤡ ᤂᤡᤏᤡ᤹ ᤀᤠᤳᤋᤡᤴᤏᤠᤱ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤔᤧᤛᤣᤍᤥᤏᤡᤕᤠᤗᤠᤶ ᤁᤧᤍᤠ᤺ᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤀᤡᤱᤃᤠ᤹ ᤕᤠᤵᤔᤡ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤖᤧᤴ ᤋᤱᤃᤠᤶ ᤔᤧᤈᤥᤃᤠᤱ ᤔᤧᤒᤡᤖᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤀᤠᤳᤋᤡᤴᤏᤠᤱ ᤀᤠᤳᤋᤡᤴ ᤐᤖᤡᤰᤗᤧᤀᤠᤱ ᤋᤢᤰᤂᤣ ᤔᤧᤴᤈᤠ᤺ᤳᤏᤡᤱᤅᤡᤸᤗᤥ॥ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤜᤧᤰᤁᤣᤀᤣ ᤆᤥᤃᤢᤱᤗᤥ॥
2CO 11:10 ᤂᤪᤡᤛ᤻ᤋᤖᤧ ᤁᤢᤛᤧᤰᤂᤠ᤺ᤴ ᤀᤡᤱᤃᤠ᤹ᤀᤥ ᤘᤠ᤹ᤖ ᤌᤠᤖᤡᤰ ᤀᤰᤂᤤᤕᤠ ᤌᤢᤶᤔᤥᤒᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤴ ᤕᤶᤒᤠ ᤗᤧᤱᤛᤡᤱᤔᤠ ᤐᤠ᤺ᤴ ᤐᤠ᤺ᤵᤔᤠᤗᤠᤶ ᤛᤠᤰᤔᤠ ᤔᤧᤴᤇᤢᤰᤁᤠᤴᤗᤥ॥
2CO 11:11 ᤌᤣᤀᤠᤱᤒᤣ᥅ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤗᤢᤱᤔᤠ᤹ ᤔᤧᤍᤢᤰᤏᤡᤱᤅᤡᤴᤏᤠᤱᤒᤡ᥅ ᤔᤧ᤺ᤴᤗᤥ᥄ ᤀᤡᤱᤃᤠ᤹ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ॥
2CO 11:12 ᤀᤠᤏᤡᤃᤧ ᤆᤥᤃᤢᤶᤒᤧᤖ ᤘᤕᤡᤃᤧᤒᤠ ᤕᤠ᤺ᤶᤒᤰ ᤜᤧᤰᤋᤱᤒᤠᤀᤣ ᤂᤧᤴ ᤘᤣ᤹ “ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ” ᤔᤧᤈᤥᤃᤢᤀᤠᤱ ᤀᤠᤱᤍᤡᤱ ᤗ᤹ᤔᤠ ᤔᤧᤱᤄᤥ᤺ᤛᤢᤴᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤸᤗᤥ ᤆᤥᤃᤢᤱᤗ ᤘᤠ᤹ᤀᤠᤒᤠ ᤔᤠᤱᤛᤣᤘᤠ᤺ᤴ ᤛᤍᤠᤍᤡᤱ ᤁᤢᤓᤠ᤹ ᤕᤠᤱ ᤔᤧ᤺ᤴᤏᤣ ᤀᤠᤶᤓᤠ ᤆᤥᤃᤢᤱᤗᤥ॥
2CO 11:13 ᤌᤣᤀᤠᤱᤓᤧᤸᤗᤧ ᤜᤧᤰᤋᤱᤒᤠ ᤔᤏᤠᤜᤠ᤹ᤃ ᤑᤥᤋᤩᤠᤒᤠ ᤛᤣ᤺ᤰᤕᤢᤰᤔᤡᤒᤠᤛᤡ ᤏᤢ ᤀᤡᤱᤗᤧᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤔᤧᤗᤧᤱᤛᤡᤱᤗᤥ॥
2CO 11:14 ᤔᤠᤑᤧᤴᤛᤠᤶᤔᤡᤴᤏᤠᤱ ᤀᤥ᤺ᤳᤋᤡ᤺ᤸᤗᤧᤴ ᤔᤠᤱᤗᤠᤀᤡᤱᤒᤠ ᤗᤧᤱᤛᤡᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤌᤣᤀᤠᤱ ᤜᤥ᤺ᤵᤗᤥ॥
2CO 11:15 ᤜᤧᤰᤁᤣᤗ᤹ᤖᤡᤰᤁᤣ ᤂᤧᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ᤀᤠᤱ ᤛᤠᤶᤕᤥᤏᤡᤒᤠ ᤔᤠᤱᤛᤣᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤔᤧᤗᤧᤱᤛᤡᤱᤅᤡᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤜᤥ᤺ᤵᤗᤥ॥ ᤁᤢᤏᤢᤵᤔᤠ ᤕᤧᤴᤏᤥ ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤡᤸᤗᤧ ᤗᤠ᤹ᤖᤢᤒᤠ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥
2CO 11:16 ᤀᤡᤱᤃᤠ᤹ ᤕᤠᤶᤔᤥ ᤐᤠ᤺ᤳᤋᤢᤱ. ᤀᤠᤳᤋᤡᤸᤗᤧᤀᤠᤱ ᤀᤡᤱᤃᤠ᤹ ᤀᤍᤱ ᤁᤢᤀᤡᤛᤡ᤺ᤰ ᤔᤧᤴᤀᤡ᤺ᤳᤋᤠᤴᤗᤖᤥ॥ ᤁᤖ ᤂᤡᤏᤡ᤹ ᤜᤧᤰᤁᤣ ᤕᤠᤵᤔᤡ ᤁᤧᤀᤡ᤺ᤳᤋᤡᤛᤠᤱ ᤀᤡᤱᤃᤠ᤹ ᤆᤩ᤹ᤛᤡᤰ ᤆᤶᤛᤡᤱᤔᤠ ᤂᤥ᤺ᤛᤢᤱᤗ ᤑᤠ᤹ᤀᤠᤱ ᤀᤍᤱ ᤁᤢᤀᤡᤛᤡ᤺ᤰᤁᤣ ᤕᤠᤵᤔᤡ ᤀᤡ᤺ᤳᤋᤧᤀᤠᤱ ᤀᤠᤍᤠ᤺ᤰᤋᤧᤶᤔᤧ᤹ᤀᤥ॥
2CO 11:17 ᤀᤰᤂᤣᤗ᤹ᤖᤡᤰ ᤆᤶᤛᤡᤱᤅᤠᤸᤗᤧ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤀᤡᤱᤃᤠ᤹ ᤀᤍᤱ ᤁᤢᤀᤡᤛᤡ᤺ᤰᤏᤧ ᤆᤥ᤺ᤰᤁᤠᤖᤥ॥
2CO 11:18 ᤘᤣ᤹ ᤔᤏᤠᤜᤠ᤹ ᤕᤠ᤺ᤶᤒᤰᤁᤥ ᤔᤧᤈᤶᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤱᤃᤠ᤹ᤀᤠᤱ ᤆᤶᤛᤡᤱᤅᤠᤖᤥ॥
2CO 11:19 ᤛᤧᤰᤂᤠ᤺ᤸᤗᤧ ᤂᤡᤏᤡ᤹ᤃ ᤛᤡᤰᤁᤢᤶᤛᤠᤒᤠ ᤁᤧᤀᤡ᤺ᤳᤋᤠᤛᤡᤒᤠᤸᤗᤧ ᤀᤍᤱᤜᤠ᤹ᤀᤠᤱ ᤁᤧᤎᤖᤢᤶᤛᤡᤶᤔᤠᤱ ᤘᤠ᤹ᤖᤧᤳᤇ᥄
2CO 11:20 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤧᤱᤜᤠ᤹ᤖᤧ ᤕᤥ᤺ᤰ ᤁᤧᤶᤈᤥᤃᤡ᤹. ᤂᤡᤏᤡ᤹ ᤁᤧᤃᤳᤋᤢᤶᤒᤠᤴ ᤁᤧᤖᤧᤰ ᤔᤧᤍᤣ᤹ᤖᤢ᤹. ᤂᤡᤏᤡ᤹ᤗᤠᤶᤒᤠ ᤀᤡᤴᤎᤠ᤺ᤰ ᤔᤧᤈᤥᤃᤢ᤹. ᤀᤡᤱᤃᤠ᤹ᤀᤣ᤺ᤰ ᤗ᤹ᤖᤡᤰ ᤔᤧᤜᤧᤴᤇᤡᤱ. ᤜᤧᤰᤁᤩᤠᤱ ᤂᤡᤏᤡ᤹ ᤏᤧᤍᤧᤱᤒᤠᤴ ᤁᤧᤶᤗᤧᤰᤂᤡ᤹ ᤁᤧᤶᤒᤡᤖᤡ᤹ᤛᤠᤱ ᤁᤧᤖᤧᤰ ᤁᤧᤎᤖᤢᤶᤛᤡᤶᤔᤠᤱ ᤘᤠ᤹ᤖᤧᤇ॥
2CO 11:21 ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤀᤠᤏᤡᤃᤧᤃ ᤂᤡᤏᤡ᤹ ᤔᤧᤵᤔᤠ ᤀᤠ᤺ᤴᤇᤡᤱᤔᤠ ᤔᤧᤛᤢᤰᤋᤢᤶᤒᤠᤴᤗᤥ ᤗ᤹ᤖᤡᤰ ᤐᤠ᤺ᤵᤔᤠ ᤀᤡᤱᤃᤠ᤹ ᤛᤡᤖᤡᤱ ᤔ᤺ᤀᤠᤖᤥ॥ ᤕᤠᤶᤔᤥ ᤀᤍᤱ ᤁᤢᤀᤡᤛᤡ᤺ᤰ ᤐᤠ᤺ᤳᤋᤠᤖᤥ–ᤀᤠᤳᤋᤡᤴ ᤐᤠ᤺ᤴᤏᤥ ᤂᤧᤱᤜᤠ᤹ ᤔᤧᤜᤧᤴᤇᤡᤱ. ᤀᤡᤱᤃᤠ᤹ᤀᤠᤱ ᤒᤠ ᤂᤧᤴ ᤐᤠ᤺ᤴᤏᤥ ᤜᤧᤴᤇᤡᤱᤔᤠ ᤛᤢᤰᤁᤠᤖᤥ॥
2CO 11:22 ᤂᤧᤱᤜᤠ᤹ ᤜᤡᤒᤪᤢᤛᤡᤒᤡ᥅ ᤀᤡᤱᤃᤠ᤹ᤀᤠᤱ ᤜᤡᤒᤪᤢᤀᤠᤖᤥ॥ ᤂᤧᤱᤜᤠ᤹ ᤀᤡᤛᤪᤠᤀᤡᤗᤡᤛᤡᤒᤡ᥅ ᤀᤡᤱᤃᤠ᤹ᤀᤠᤱ ᤀᤡᤛᤪᤠᤀᤡᤗᤡᤀᤠᤖᤥ॥ ᤂᤧᤱᤜᤠ᤹ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤡᤒᤡ᥅ ᤀᤡᤱᤃᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤀᤠᤖᤥ॥
2CO 11:23 ᤂᤧᤱᤜᤠ᤹ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠᤛᤡᤒᤡ᥅ ᤀᤡᤱᤃᤠ᤹ᤃ ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤢᤛᤣᤘᤠᤖᤥᤒᤠᤀᤠᤖᤥ. ᤁᤖ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤠᤸᤗᤧ ᤁᤢᤎᤏᤠ ᤁᤧᤗᤧᤱᤒᤠ ᤁᤢᤀᤡᤛᤡ᤺ᤰ ᤆᤥ᤺ᤰᤁᤠᤖᤥ॥ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤀᤡᤱᤃᤠ᤹ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤠᤱ. ᤕᤖᤡᤰᤗᤧᤱ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤠᤱ. ᤕᤖᤡᤰᤗᤧᤱ ᤋᤧ᤺ᤶᤓᤢᤰ ᤆᤩᤠᤱ. ᤜᤧᤰᤁᤩᤠᤱ ᤀᤧᤳᤗᤧᤱ ᤛᤡ᤺ᤔᤠ ᤗᤡᤱᤎᤥᤀᤥ ᤁᤧᤖᤠᤱᤗᤥ॥
2CO 11:24 ᤅᤠᤛᤡ ᤗᤧᤱ ᤕᤜᤢᤍᤡᤜᤠ᤹ᤖᤧ ᤀᤡᤱᤃᤠ᤹ ᤛᤢᤶ-ᤑᤠᤱ (᥉᥏) ᤌᤠᤖᤡᤰ ᤋᤧ᤺ᤶᤓᤢᤰ ᤔᤧᤕᤠᤰᤋᤠᤱ.
2CO 11:25 ᤛᤢᤶᤗᤧᤱ ᤖᤥᤔᤡᤜᤠ᤹ᤖᤧ ᤋᤰᤁᤠ᤺ᤳᤋᤡᤸᤗᤧ ᤔᤧᤜᤡᤵᤋᤠᤱ. ᤌᤡᤰᤗᤧᤱ ᤏᤡᤱᤔᤡᤜᤠ᤹ᤖᤧ ᤗᤢᤱᤅᤡᤸᤗᤧ ᤔᤧᤒ᤺ᤳᤋᤠᤱ. ᤛᤢᤶᤗᤧᤱ ᤀᤡᤱᤃᤠ᤹ ᤗᤠᤶᤍᤡ᤺ᤰ ᤆᤥᤃᤠᤱᤒᤠ ᤘᤠᤗᤠᤎᤠ᤺ᤴ ᤏᤡᤒᤧ. ᤜᤧᤰᤁᤩᤠᤱ ᤌᤡᤰᤗᤧᤱ ᤌᤡᤰ ᤕᤧᤴ ᤏᤢ ᤌᤡᤰ ᤛᤧᤴᤍᤡᤰ ᤂᤠᤖᤠᤰ ᤀᤡᤱᤃᤠ᤹ ᤘᤖᤰᤁᤥᤀᤣ ᤕᤠᤃᤠᤱᤗᤥ॥
2CO 11:26 ᤀᤡᤱᤃᤠ᤹ᤃ ᤕᤖᤡᤰᤗᤧᤱ ᤗᤠᤶᤍᤡ᤺ᤰ ᤆᤥᤃᤠᤱᤅᤡᤸᤗᤧ ᤘᤠᤜᤱᤅᤥ ᤜᤧᤰᤁᤩᤠᤱ ᤑᤠ᤺ᤴᤍᤠᤜᤠ᤹ᤗᤠᤶᤒᤠ. ᤀᤠᤒᤠᤅᤣ ᤗᤠᤈᤣ᤹ᤛᤠᤒᤠᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤗᤠᤶᤒᤠ ᤁᤧᤛᤠᤰᤐᤠ ᤋᤢᤰᤂᤣᤜᤠ᤹ ᤋᤢᤔᤢᤱᤗᤥ॥ ᤜᤧᤰᤁᤩᤠᤱ ᤕᤧᤰᤕᤰᤁᤥ. ᤕᤧ᤺ᤱᤄᤠᤍᤧᤴᤏᤥ. ᤘᤖᤰᤁᤥᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤛᤢᤖᤡᤳ ᤁᤣᤈᤱᤅᤥ. ᤜᤧᤰᤁᤩᤠᤱ ᤑᤥᤋᤩᤠᤒᤠ ᤑᤢ᤹ᤏᤢᤛᤠ᤹ᤗᤠᤶᤒᤠᤀᤠᤱ ᤁᤧᤛᤠᤰᤐᤠ ᤋᤢᤰᤂᤣᤜᤠ᤹ ᤋᤢᤔᤢᤱᤅᤠᤱ ᤘᤠ᤹ᤀᤠᤖᤥ॥
2CO 11:27 ᤀᤡᤱᤃᤠ᤹ᤃ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤠᤱ ᤜᤧᤰᤁᤩᤠᤱ ᤕᤖᤡᤰᤗᤧᤱ ᤛᤧᤴᤍᤡᤰ ᤔᤧᤀᤡᤵᤛᤠᤱᤅᤡᤴᤗᤥ॥ ᤛᤧᤳᤗᤠ᤺ᤰᤔᤠ ᤏᤢ ᤘᤠᤔᤡ᤺ᤔᤠᤸᤗᤧ ᤋᤖᤠᤱ ᤜᤧᤰᤁᤩᤠᤱ ᤕᤖᤡᤰᤗᤧᤱ ᤌᤣᤀᤠᤱ ᤆᤠᤔᤠ ᤌᤢᤱᤔᤠ ᤔᤧᤱᤄᤥ᤺ᤒᤠᤴᤗᤥ॥ ᤆᤢᤱᤅᤡᤸᤗᤧ ᤌᤳᤋᤠᤱ ᤌᤣᤀᤠᤱᤓᤧᤸᤗᤧ ᤁᤧᤃᤥ᤺ᤒᤠ ᤆᤠᤱᤍᤣ᤺ᤳ ᤔᤧᤱᤃᤵᤐᤧᤴᤗᤥ॥
2CO 11:28 ᤜᤧᤰᤁᤩᤠᤱ ᤂᤧᤴ ᤋᤢᤰᤂᤣᤜᤠ᤹ᤖᤰ ᤔᤧ᤺ᤴ. ᤁᤖ ᤁᤠᤰ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤗᤠᤃᤡᤀᤠᤱ ᤌᤡᤰᤕᤠ᤺ᤴᤎᤰ ᤏᤡᤱᤛᤠᤶᤔᤥ ᤌᤩᤠᤱᤅᤠᤱ ᤀᤠᤏᤡᤱᤘᤠ᤹ᤒᤥ ᤋᤢᤰᤂᤣ ᤆᤩᤠᤱᤗᤥ॥
2CO 11:29 ᤜᤠ᤺ᤳᤋᤠᤱ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤔᤧᤈᤥ᤺ᤰᤏᤧᤴᤏᤡᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤖᤥ॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤗᤠᤕᤥᤀᤥ ᤔᤧᤎᤠ᤺ᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤢᤰᤗᤥ॥
2CO 11:30 ᤀᤡᤱᤃᤠ᤹ ᤆᤶᤛᤡᤱᤔᤠᤀᤣ ᤐᤥ᤺ᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤁᤧᤎᤢᤶᤒᤠ ᤔᤧᤈᤥ᤺ᤰᤁᤠᤴ ᤗ᤹ᤖᤡᤰ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ᤀᤥᤏᤧ ᤆᤶᤛᤡᤱᤅᤠᤖᤥ॥
2CO 11:31 ᤛᤍᤠᤍᤡᤱ ᤏᤧᤶᤓᤥᤃᤧᤴ ᤁᤢᤏᤠᤖᤠ ᤑᤥ᤺ᤔᤏᤠᤒᤠ ᤍᤠᤱᤒᤠ ᤕᤧᤛᤢᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤋᤢᤱᤅᤡᤴ ᤑᤠ᤹ᤀᤠᤱ ᤏᤡ᤺ᤛᤢ᤹ᤖᤥ॥
2CO 11:32 ᤍᤔᤛ᤻ᤁᤛ ᤕᤧᤰᤕᤰᤁᤥ ᤘᤕᤠᤱᤅᤡᤸᤗᤧ ᤀᤖᤡᤋᤛ ᤜᤠᤱᤅᤡᤸᤗᤧ ᤁᤢᤛᤢᤜᤠᤱᤕᤢᤰᤐᤠᤸᤗᤧ ᤀᤡᤱᤃᤠ᤹ ᤀᤠᤍᤧᤶᤛᤧ ᤕᤧᤰᤕᤰᤁᤥ ᤌᤰᤛᤢᤒᤠᤜᤠ᤹ ᤕᤧᤵᤛᤢᤛᤡᤖᤥ॥
2CO 11:33 ᤁᤖ ᤀᤡᤱᤃᤠ᤹ᤃ ᤗᤢᤶᤓᤢ᤹ᤀᤥ ᤔᤧᤕᤠᤰᤋᤠᤱᤅᤠᤱ ᤕᤧᤰᤕᤰᤗᤧᤴ ᤗᤢᤱᤎᤠᤰᤁᤥᤒᤠ ᤐᤣᤎᤠ᤺ᤵᤗᤠᤶᤒᤠ ᤕᤥ ᤗᤠ᤺ᤰᤁᤠᤳ ᤔᤧᤎᤠᤛᤠᤱ ᤔᤧᤗ᤺ᤳᤋᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤢᤜᤢᤰᤁᤥ ᤔᤧᤴᤎᤠᤒᤠᤴᤗᤥ॥
2CO 12:1 ᤀᤡᤱᤃᤠ᤹ ᤆᤶᤛᤡᤱᤅᤠᤸᤗᤧ ᤌᤣᤀᤠᤱ ᤔᤧᤈᤰᤁᤠᤴᤇᤠᤱ ᤀᤡᤱᤃᤠ᤹ ᤍᤠᤱᤒᤠᤗᤠᤶᤒᤠ ᤂᤥ᤺ᤛᤢᤱᤒᤠ ᤛᤢᤑᤥᤜᤠ᤹ ᤏᤢ ᤀᤥᤛᤣ᤺ᤴᤍᤠᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤆᤶᤛᤡᤱᤅᤠᤖᤀᤣ ᤐᤥ᤺ᤱᤗᤥ॥
2CO 12:2 ᤀᤡᤱᤃᤠ᤹ ᤌᤡᤰ-ᤗᤡ (᥇᥊) ᤋᤱᤒᤣ ᤋᤃᤡ ᤛᤢᤶᤛᤡᤃᤣ᤺ᤰᤐᤠ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤋᤣ᤹ᤖᤧᤀᤠᤱ ᤘᤕᤧᤒᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤎᤡᤰ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤂᤧᤴ ᤔᤏᤠ᤺ᤴ ᤏᤠᤛᤡᤱᤃᤧᤴ ᤌᤰᤁᤥᤒᤡ ᤔᤧ᤺ᤶᤒᤡ ᤀᤡᤱᤃᤠ᤹ ᤔᤧᤏᤡᤀᤠᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ॥
2CO 12:3 ᤀᤡᤱᤃᤠ᤹ ᤁᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤒᤠ ᤔᤏᤠ᤺ᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ (ᤕᤠᤶᤔᤥᤀᤠᤱ ᤐᤠ᤺ᤳᤋᤢᤱ–ᤂᤧᤴ ᤔᤏᤠ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤐᤣ᤺ᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤐᤣᤒᤡ ᤀᤡ ᤛᤢᤑᤥᤖᤰ ᤏᤡ᤺ᤛᤢᤱᤒᤡ ᤀᤡᤱᤃᤠ᤹ ᤔᤧᤏᤡᤀᤠᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ)॥ ᤂᤧᤸᤗᤧ ᤔᤏᤠᤖᤧ ᤐᤠ᤺ᤵᤔᤠ ᤔᤧᤸᤗᤠ᤹ᤔᤏᤠᤒᤠ ᤛᤠ᤹ᤖᤡᤰ ᤛᤣᤛᤣᤒᤠ ᤐᤠ᤺ᤴᤜᤠ᤹ ᤂᤧᤵᤛᤢᤖᤥ॥
2CO 12:5 ᤀᤡᤱᤃᤠ᤹ᤃ ᤀᤰᤋᤱᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤏᤧ ᤆᤶᤛᤡᤱᤅᤠᤖᤥ. ᤁᤖ ᤀᤡᤱᤃᤠ᤹ ᤁᤧᤎᤢᤶᤒᤠ ᤔᤧᤈᤥ᤺ᤰᤁᤠᤴ ᤗ᤹ᤖᤡᤰ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤐᤠ᤺ᤴᤏᤢ᤺ᤸᤗᤧ ᤘᤣ᤹ ᤀᤠᤒᤠᤅᤣ ᤀᤠᤕᤠ᤺ᤶᤒᤣᤀᤥ ᤔᤧᤈᤶᤛᤡᤱᤅᤠᤴᤗᤥ॥
2CO 12:6 ᤀᤡᤱᤃᤠ᤹ᤃ ᤆᤶᤛᤡᤱᤔᤠᤀᤣ ᤐᤥ᤺ᤱᤛᤠᤱ ᤀᤍᤱ ᤔᤧᤒᤥ᤺ᤱᤅᤠᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤧᤰᤂᤠᤀᤣ ᤐᤠ᤺ᤳᤋᤠᤖ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤔᤧᤈᤶᤛᤡᤱᤅᤠᤴᤗᤥ. ᤜᤧᤰᤁᤣᤗ᤹ᤖᤡᤰ ᤆᤥᤃᤢᤱ ᤐᤠ᤺ᤳᤋᤢᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤳᤋᤡᤸᤗᤧᤀᤠᤱ ᤔᤧᤀᤡ᤺ᤳᤋᤠᤴᤗᤖᤥ॥
2CO 12:7 ᤁᤴ ᤐᤕᤶ ᤕᤶᤒᤠ ᤀᤥᤛᤣ᤺ᤴᤍᤠᤱᤜᤠ᤹ ᤂᤥ᤺ᤛᤢᤱᤒᤠᤸᤗᤧ ᤀᤠᤱᤍᤡᤱ ᤔᤧᤗ᤹ᤀᤠᤴᤗ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤋᤡᤱ ᤁᤢᤀᤡᤛᤡ᤺ᤰ ᤀᤠᤄᤄᤒᤠ ᤐᤠ᤺ᤴᤎᤡᤰ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤱᤛᤠᤒᤠᤖᤥ. ᤂᤧᤸᤗᤧ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤠᤖ ᤘᤠ᤹ᤖᤥ॥
2CO 12:8 ᤁᤴ ᤀᤡᤱᤃᤠ᤹ᤀᤥᤏᤢ ᤂᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤛᤢᤶᤗᤧᤱ ᤌᤠᤖᤡᤰ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱ॥
2CO 12:9 ᤁᤖ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ᤀᤥ ᤀᤡᤱᤃᤠ᤹ ᤀᤠᤗᤢᤱᤃᤢᤶᤔᤡᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠ᤹ᤀᤡᤔᤧᤴᤕᤠᤰᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤀᤠᤔᤢᤰᤛᤠᤶᤔᤡᤴ ᤁᤢᤗᤡᤱᤎᤥ ᤁᤧᤳᤗᤥ॥” ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤴ ᤀᤡᤱᤃᤠ᤹ᤀᤥ ᤘᤠ᤹ᤖ ᤑᤠ᤹ᤀᤠᤱ ᤔᤧᤴᤎᤢᤶᤔᤏᤠ ᤀᤠᤒᤠ᤺ᤴᤜᤠ᤹ᤀᤥᤏᤧ ᤛ᤺ᤳᤋᤠᤖ ᤆᤶᤛᤡᤱᤅᤠᤖᤥ॥
2CO 12:10 ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤛᤠ᤹ᤀᤡᤔᤧᤴᤕᤠᤰᤔᤏᤠ ᤐᤠ᤺ᤴᤜᤠ᤹ᤀᤥ. ᤏᤠᤎᤠᤔᤠᤀᤥ. ᤕᤧᤳᤋᤢᤰᤂᤣᤀᤥ. ᤏᤡᤱᤄᤢᤶᤔᤥ ᤏᤢ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ᤀᤥ ᤌᤠᤀᤠᤸᤗᤧᤀᤣ ᤛ᤺ᤳᤋᤠᤖᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤠ᤹ᤀᤡ ᤔᤧᤕᤠᤰᤏᤧᤴᤏᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤎᤢᤶᤒᤠ ᤐᤥ᤺ᤱᤅᤠᤖᤥ॥
2CO 12:11 ᤀᤡᤱᤃᤠ᤹ᤃ ᤀᤍᤱ ᤁᤢᤀᤡᤛᤡ᤺ᤰ ᤐᤥ᤺ᤰᤂᤠᤱᤗᤥ. ᤁᤖ ᤂᤡᤏᤡ᤹ᤀᤣ ᤀᤡᤱᤃᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤕᤠᤵᤔᤡ ᤁᤧᤒᤠᤱᤄᤡᤖᤥ॥ ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤏᤢ᤺ᤒᤠ ᤐᤠ᤺ᤴ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤘᤕᤧ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧ᤺ᤴᤏᤠ᤹ᤛᤠᤱ ᤕᤶᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧ ᤆᤢᤰᤛᤠ ᤔᤧᤈᤥ᤺ᤰᤁᤠᤴᤗᤥ॥
2CO 12:12 ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤏᤠᤛᤡ ᤌ᤺ᤳᤋᤢᤱᤗ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗᤥ॥ ᤒᤠ ᤁᤴ ᤐᤠ᤺ᤴᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢ᤹ᤖᤥ॥
2CO 12:13 ᤂᤡᤏᤡ᤹ ᤀᤠᤳᤋᤡᤴ ᤐᤠ᤺ᤴᤏᤥ ᤘᤣ᤹ᤛ᤻ᤔᤠ ᤛᤣᤛᤣᤜᤢᤵᤗᤰᤜᤠ᤹ᤏᤢ᤺ᤸᤗᤧ ᤁᤧᤛᤢ᤺ᤴᤍᤡᤒᤣ᥅ ᤁᤶᤔᤩᤠᤰᤗᤰᤗᤥ–ᤀᤡᤱᤃᤠ᤹ ᤂᤡᤏᤡ᤹ ᤁᤢᤓᤠ᤹ ᤕᤠᤱ ᤔᤧᤏᤠ᤺ᤰᤏᤡᤱᤅᤡᤴᤗᤥ᥄ ᤀᤰᤂᤣᤗ᤹ᤖᤡᤰ ᤋᤢᤰᤂᤣ ᤆᤠᤳᤏᤡᤱᤒᤠᤀᤥ ᤗᤧᤵᤔᤡ ᤀᤠᤒᤡᤖᤧᤶᤔᤧ᤹ᤀᤥ᥄
2CO 12:14 ᤀᤠᤸᤗ ᤛᤢᤶᤗᤧᤱᤅᤥ ᤂᤡᤏᤡ᤹ ᤛᤠ᤹ᤛᤧ ᤋᤠ᤺ᤔᤠ ᤕᤠᤖᤡᤵ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ᤺ᤴ ᤔᤧ᤺ᤴ. ᤁᤖ ᤂᤡᤏᤡ᤹ᤏᤧ ᤆᤠᤜᤠᤒᤠ ᤆᤥ᤺ᤰᤁᤠᤖᤥ॥ ᤌᤣᤀᤠᤱᤓᤧᤸᤗᤧ ᤛᤠ᤺ᤜᤠ᤹ᤖᤧ ᤔᤠ-ᤒᤠᤜᤠ᤹ᤖᤧᤗᤠᤃᤡ ᤔᤧ᤺ᤴ. ᤁᤖ ᤔᤠ-ᤒᤠᤜᤠ᤹ᤖᤧᤏᤧ ᤛᤠ᤺ᤜᤠ᤹ᤖᤧᤗᤠᤃᤡ ᤕᤠᤱᤛᤠᤁᤢᤴᤎᤣ ᤕᤠᤱᤄᤥ᤺ᤵᤔᤠ ᤐᤥ᤺ᤱᤗᤥ॥
2CO 12:15 ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤀᤡᤱᤃᤠ᤹ ᤁᤳᤋᤢᤱᤒᤠ ᤁᤠᤰ ᤕᤠᤱᤅᤡᤴ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤐᤎᤠᤱᤎᤠᤱᤗ ᤋᤣ᤺ᤛᤢᤱᤗᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤐᤡᤛᤡᤱᤅᤠᤖᤥ॥ ᤀᤡᤱᤃᤠ᤹ ᤂᤡᤏᤡ᤹ ᤕᤖᤡᤰ ᤗᤢᤱᤔᤠ᤹ ᤋᤢᤰᤏᤡᤱᤅᤡᤸᤗᤧ ᤌᤣᤀᤠᤱ ᤂᤡᤏᤡ᤹ ᤆᤩ᤹ᤖᤰ ᤗᤢᤱᤔᤠ᤹ ᤕᤠᤵᤔᤡ ᤁᤧᤍᤢᤰᤋᤡᤒᤠᤒᤣ᥅
2CO 12:16 ᤕᤠᤱ ᤏᤠ᤺ᤰᤏᤡᤱᤅᤠᤱ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤒᤠ ᤐᤠ᤺ᤴᤏᤡᤴ ᤁᤧᤏᤡ᤺ᤛᤢᤶᤗᤥ. ᤁᤖ ᤀᤡᤱᤃᤠ᤹ ᤀᤡᤱᤗᤧᤰᤏᤡᤱᤅᤠᤱ ᤂᤡᤏᤡ᤹ ᤀᤡᤈᤥᤀᤥ ᤌᤠᤏᤡᤱ ᤑᤠ᤹ᤀᤠᤱ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤗᤥ॥
2CO 12:17 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤒᤠ ᤔᤏᤠᤜᤠ᤹ᤗᤠᤶ ᤌᤣᤀᤡ ᤂᤥ᤺ᤛᤢᤱᤗ ᤑᤠ᤹ᤀᤠᤱ ᤀᤡᤱᤗᤧᤰᤏᤡᤱᤒᤡ᥅
2CO 12:18 ᤀᤡᤱᤃᤠ᤹ ᤋᤡᤋᤛᤧᤴ ᤂᤡᤏᤡ᤹ᤀᤥ ᤐᤠᤱᤔᤠ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤅᤠᤱ ᤘᤣ᤹ᤛ᤻ᤔᤠ ᤏᤢᤛᤠ᤹ᤀᤡᤴᤏᤠᤱ ᤂᤢᤏᤧ᤹ᤏᤢᤀᤣ ᤐᤠᤱᤄᤢᤱᤗᤥ॥ ᤋᤡᤋᤛᤖᤧ ᤂᤡᤏᤡ᤹ᤗᤠᤶᤒᤠ ᤌᤣᤀᤡ ᤂᤥ᤺ᤛᤢᤱᤗ ᤑᤠ᤹ᤀᤠᤱ ᤀᤡᤱᤃᤧᤗᤧᤰᤋᤡᤒᤡ᥅ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤴᤇᤡᤃᤧᤃ ᤌᤡᤰ ᤛᤣᤛᤣᤔᤠᤱᤅᤡᤴ ᤁᤳᤇᤢᤃᤧ ᤜᤧᤰᤁᤩᤠᤱ ᤌᤡᤰ ᤗᤠᤶᤔᤥ ᤗᤠᤱᤄᤣᤃᤧᤳᤇᤡᤃᤧᤖᤥ॥
2CO 12:19 ᤀᤠᤏᤡᤃᤧ ᤀᤠᤸᤗ ᤌᤠᤖᤡᤰ ᤂᤡᤏᤡ᤹ᤗᤠᤶᤒᤠ ᤀᤠᤒᤠᤅᤣ ᤛᤧ᤺ᤵᤐᤠᤛᤡᤃᤧᤖ ᤘᤕᤡᤃᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤐᤠᤖᤡᤃᤧᤖ ᤘᤕᤡᤃᤧᤖᤥ॥ ᤀᤠᤏᤡᤃᤧ ᤔᤡ᤺ᤶ ᤆᤢᤶᤛᤣ. ᤀᤠᤏᤡᤃᤧ ᤆᤥᤃᤢᤶᤒᤧᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤆᤥᤃᤢᤶᤒᤧᤒᤠᤖᤥ॥
2CO 12:20 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤀᤡᤱᤃᤠ᤹ ᤏᤡᤱᤛᤠᤱ ᤆᤥᤃᤢᤱᤒᤠ ᤁᤢᤀᤡᤛᤡ᤺ᤰ ᤔᤧᤄᤥ᤺ᤏᤡᤱᤅᤡᤴ. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤕᤠᤵᤔᤡ ᤁᤧᤱᤄᤥᤛᤡᤴᤒᤡ ᤑᤠ᤹ᤀᤠᤱ ᤁᤡ᤺ᤀᤠᤖᤥ॥ ᤀᤡᤱᤃᤠ᤹ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤂᤣᤔᤠ. ᤏᤠᤜᤧᤶᤔᤠ. ᤛᤡᤰ ᤐᤥ᤺ᤰᤔᤠ. ᤛᤧ᤺ᤔᤠ. ᤆᤧ᤹ᤕᤠ ᤐᤱᤔᤠ. ᤔᤏᤠ ᤆᤧᤱᤔᤠ. ᤀᤠᤱᤍᤡᤱ ᤗ᤹ᤔᤠ ᤏᤢ ᤕᤧᤔᤧᤴᤍᤱ ᤕᤧᤵᤗᤧᤰᤜᤠ᤹ᤀᤥ ᤁᤧᤕᤠᤃᤡᤒᤠ ᤋᤢᤶᤏᤡᤱᤒᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤡ᤺ᤀᤠᤖᤥ॥
2CO 12:21 ᤂᤡᤏᤡ᤹ ᤋᤢᤶᤛᤧ ᤕᤠᤶᤔᤥ ᤋᤠᤀᤠᤸᤗᤧ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤋᤃᤡ ᤏ᤺ᤶᤏ᤺ᤶ ᤆᤥ᤺ᤰᤁᤠ ᤑᤠ᤹ᤀᤠᤱ ᤁᤡ᤺ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤋᤃᤡ ᤗᤠᤕᤥ ᤁᤧᤈᤥ᤺ᤰᤐᤠᤀᤠᤱ ᤂᤧᤴ ᤀᤠᤛᤢᤳᤌᤥᤗᤠᤶ. ᤆᤠᤖᤠᤶᤔᤠ ᤕᤠ᤺ᤶᤒᤰᤗᤠᤶ. ᤏᤢ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠᤗᤠᤶ ᤕᤖᤡᤰ ᤔᤧᤴᤜᤡᤶᤔᤏᤠᤒᤠ ᤔᤧᤴᤏᤢ᤺ᤱᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤀᤡᤱᤃᤠ᤹ ᤔᤣᤖᤡᤱ ᤌᤰᤔᤠ ᤐᤥ᤺ᤱᤒᤡᤗᤠᤖᤥ᥄
2CO 13:1 ᤁᤱᤃ ᤂᤡᤏᤡ᤹ᤀᤥ ᤋᤠᤀᤠᤒᤠ ᤛᤢᤶᤛᤡᤃᤣ᤺ᤰᤐᤠ ᤕᤧᤶ ᤐᤥ᤺ᤱᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤏᤧᤵᤇᤡ ᤀᤡᤃᤪ ᤛᤢᤶᤛᤡᤖᤧ ᤋᤥ᤺ᤴᤍᤡ ᤔᤧᤒᤡᤖᤢᤀᤠᤱᤗᤰ ᤁᤠᤰ ᤐᤠ᤺ᤴᤜᤠ᤹ ᤁᤢᤈᤧᤰ ᤐᤥ᤺ᤱᤗᤥ॥”
2CO 13:2 ᤀᤡᤱᤃᤠ᤹ᤃ ᤏᤡᤛᤡᤃᤣ᤺ᤰᤐᤠ ᤕᤧᤶᤔᤥ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧᤀᤣ ᤂᤧᤴ ᤋᤃᤡ ᤗᤠᤕᤥ ᤆᤥ᤺ᤰᤏᤢ ᤁᤧᤘᤠ᤹ᤒᤠᤜᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤕᤧ॥ ᤀᤠᤸᤗ ᤕᤠᤶᤔᤥ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤛᤠᤶᤍᤡᤱ ᤐᤡᤏᤡᤱᤗᤥ–ᤀᤡᤱᤃᤠ᤹ ᤂᤡᤏᤡ᤹ᤀᤥ ᤏᤢ᤺ᤱᤅᤠ ᤋᤠᤀᤠᤸᤗᤧ ᤂᤧᤴ ᤋᤃᤡ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤘᤣ᤹ ᤗᤠᤕᤥ ᤆᤥ᤺ᤰᤏᤢ ᤁᤧᤘᤠ᤹ᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤍᤠᤱᤄᤢᤱᤛᤡᤱᤅᤡᤴᤗᤥ॥
2CO 13:3 ᤀᤡᤱᤃᤠ᤹ᤗᤠᤶᤒᤠ ᤂᤪᤡᤛ᤻ᤋᤧᤴ ᤐᤠ᤺ᤵᤐᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤐᤷᤔᤠᤱᤃᤡ᤺ᤴ ᤁᤧᤄᤥ᤺ᤛᤢᤶᤔᤣᤖᤥ॥ ᤂᤢᤏᤧ᤹ ᤂᤡᤏᤡ᤹ᤏᤢ ᤔᤧᤴᤎᤢᤶᤔᤏᤠᤒᤠ ᤔᤧᤈᤥ᤺ᤰᤏᤧᤴ. ᤁᤖ ᤂᤢᤏᤧ᤹ ᤂᤡᤏᤡ᤹ ᤗᤢᤶᤔᤥ ᤔᤢᤰᤛᤠᤶᤍᤠᤱᤒᤠ ᤆᤥ᤺ᤰᤗᤥ॥
2CO 13:4 ᤂᤪᤡᤛ᤻ᤋᤧᤱᤃ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤴᤎᤢᤶᤔᤏᤠᤒᤠ ᤁᤢᤀᤡᤛᤡ᤺ᤰ ᤔᤧᤓᤥ᤺ᤴᤍᤢ. ᤁᤖᤛᤠᤱ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤁᤢᤜᤡᤱᤘᤧᤳ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡᤃᤧᤀᤠᤱ ᤂᤢᤏᤧ᤹ ᤁᤢᤀᤡᤛᤡ᤺ᤰ ᤔᤧᤴᤎᤢᤶᤔᤏᤠᤒᤠ ᤆᤥᤃᤡᤃᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤂᤢᤏᤧ᤹ᤏᤢᤀᤣ ᤜᤡᤅᤡᤃᤧ᤹ᤖᤥ॥
2CO 13:5 ᤂᤡᤏᤡ᤹ ᤏᤛᤠ᤺ᤴᤏᤡᤴ ᤛᤧᤰᤂᤠᤒᤠ ᤆᤥ᤺ᤰᤐᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤀᤠᤒᤠᤅᤣ ᤛᤠ᤹ᤖᤧᤶᤔᤧ᤹ᤀᤥ॥ ᤕᤧᤛᤢ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤘᤠ᤹ ᤑᤠ᤹ᤀᤠᤱ ᤁᤧᤴᤏᤡ᤺ᤛᤢᤶᤔᤡᤶᤒᤡ᥅ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤜᤥ᤺ᤵᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤁᤢᤛᤠᤱ ᤁᤧᤴᤗᤛ᤻ᤛᤢᤶᤔᤡᤴᤗᤥ॥
2CO 13:6 ᤜᤧᤰᤁᤩᤠᤱ ᤀᤠᤏᤡᤃᤧᤃ ᤁᤢᤛᤠᤱ ᤔᤧᤴᤗ᤺ᤶᤔᤏᤠᤒᤠ ᤔᤧᤶᤒᤥ᤺ᤱᤅᤣ ᤘᤕᤡᤃᤧ ᤁᤧᤗ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥ᤺ᤛᤢᤶ ᤑᤠ᤹ᤀᤠᤱ ᤏᤡᤱᤛᤠᤱ ᤆᤥᤃᤢᤱᤗᤥ॥
2CO 13:7 ᤂᤡᤏᤡ᤹ᤃ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤁᤧᤴᤈᤥᤃᤢᤶᤔᤡᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤘᤠ ᤆᤥᤃᤢᤶᤒᤧ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤗᤢᤶᤔᤥ ᤀᤠᤏᤡᤃᤧ ᤔᤠᤱᤛᤣᤘᤠ᤺ᤴ ᤁᤢᤛᤠᤱ ᤗᤛ᤻ᤛᤢ ᤑᤠ᤹ᤀᤠᤱ ᤌᤠ᤺ᤶᤔᤠᤛᤡᤃᤧᤒᤠ ᤔᤧ᤺ᤴ. ᤁᤖ ᤀᤠᤏᤡᤃᤧ ᤁᤢᤛᤠᤱ ᤔᤧᤗᤛ᤻ᤛᤢᤶᤒᤧᤶᤒᤠ ᤁᤢᤀᤡᤛᤡ᤺ᤰ ᤗ᤹ᤛᤠᤱ ᤂᤡᤏᤡ᤹ ᤏᤢ᤺ᤒᤠ ᤁᤧᤈᤥᤃᤢᤶᤗ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡᤱᤘᤠ᤹ ᤘᤠ᤹ᤖᤥ॥
2CO 13:8 ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤛᤧᤰᤂᤠ᤺ᤸᤗᤧ ᤁᤢᤍᤰᤗᤧᤱᤅᤥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤧᤴᤗᤥ. ᤁᤖ ᤛᤧᤰᤂᤠ᤺ᤸᤗᤧ ᤗᤠᤃᤡᤖᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤖᤥ॥
2CO 13:9 ᤀᤠᤏᤡᤃᤧ ᤔᤧᤴᤎᤢᤶᤔᤏᤠ ᤐᤥ᤺ᤰᤂᤡᤃᤧᤀᤠᤱ ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤸᤗᤧ ᤛ᤺ᤳᤋᤡᤃᤧᤖᤥ॥ ᤀᤠᤏᤡᤃᤧᤃ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤢᤗᤡᤱᤎᤥ ᤁᤧᤃᤧᤖᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤶᤒᤧ᤹ᤖᤥ॥
2CO 13:10 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤐᤠ᤺ᤴᤜᤠ᤹ᤃ ᤂᤡᤏᤡ᤹ᤀᤥ ᤋᤠᤔᤠᤏᤢ᤺ᤸᤗᤧ ᤋᤃᤡ ᤛᤠᤵᤋᤢᤱᤗ ᤐᤳᤋᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤀᤠᤕᤢᤰᤁᤡᤴ ᤛᤠᤰᤗ ᤀᤥᤃᤵ ᤆᤥ᤺ᤰᤔᤠ ᤔᤧᤒᤥ᤺ᤱᤏᤧᤴᤗ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤗᤥ॥ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤁᤴ ᤕᤢᤰᤁᤡᤱᤃ ᤂᤡᤏᤡ᤹ ᤑᤧᤳᤗᤠ᤺ᤴᤇᤧ ᤔᤧ᤺ᤴ. ᤁᤖ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤌᤥᤒᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤡᤖᤠᤱᤒᤠᤖᤥ॥
2CO 13:11 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤢᤏᤢᤵᤔᤥ ᤛᤧᤶᤔᤢ᤹ᤀᤡ ᤛᤣᤘᤠᤖᤥ॥ ᤁᤢᤗᤡᤱᤎᤥ ᤁᤧᤵᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹. ᤏᤡᤱᤘᤠ᤹ᤀᤥ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹. ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤔᤡ᤺ᤶᤈᤡ ᤏᤢ ᤛᤏᤠᤖᤢᤱ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥
2CO 13:12 ᤂᤡᤏᤡ᤹ᤃ ᤏᤛᤠᤏᤡᤒᤠ ᤔᤡ᤺ᤶᤈᤡ᤺ᤸᤗᤧ ᤛᤣᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥
2CO 13:13 ᤁᤵᤔᤥᤒᤠ ᤁᤧᤖᤧᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤡᤏᤡ᤹ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥
2CO 13:14 ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤴ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤛᤣᤛᤣ ᤋᤱᤈᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥
GAL 1:1 ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤐᤠᤘᤗᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥ ᤔᤏᤠᤜᤠ᤹ᤗᤠᤶ ᤏᤢ ᤔᤏᤠ ᤕᤢᤰᤗᤠᤶ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤠᤱᤒᤠ ᤔᤧ᤺ᤴ. ᤁᤖ ᤕᤧᤛᤢ ᤂᤪᤡᤛ᤻ᤋ ᤏᤢ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤕᤠᤵᤔᤡ ᤛᤣᤃᤧᤛᤡᤒᤠᤖᤥ॥
GAL 1:2 ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤘᤠ᤹ᤒᤠ ᤁᤠᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤃᤗᤠᤋᤡᤕᤠ ᤌᤢᤶᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤁᤧᤘᤠ᤹ᤒᤠᤜᤠ᤹ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥
GAL 1:3 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶ ᤏᤢ ᤁᤢᤛᤏᤠᤖᤢᤱᤅᤡᤴ ᤂᤡᤏᤡ᤹ ᤁᤧᤒᤡᤖᤡᤖ॥
GAL 1:4 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤕᤧᤛᤢᤖᤧ ᤁᤴ ᤕᤧᤶᤔᤥᤒᤠ ᤋᤠᤵᤑᤧ᤺ᤶᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤋᤠᤱᤛᤧ᤺ᤵᤔᤠ ᤀᤠᤛᤢᤰᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤕᤥ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤗᤧᤰᤘᤠ ᤛᤩᤧᤖᤥ॥
GAL 1:5 ᤛᤍᤠᤍᤡᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ॥ ᤀᤠᤔᤧᤴ᥄
GAL 1:6 ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤔᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤗᤠᤶ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤰᤂᤧᤴ ᤜᤠᤖᤠ ᤁᤧᤗᤧᤖᤢᤶᤔᤠᤱ ᤘᤣ᤹ᤛ᤻ᤔᤠ ᤛᤢᤏᤠᤀᤡᤱᤅᤥ ᤁᤧᤒᤣᤃᤡᤖ ᤁᤧᤒᤳᤇᤡᤒᤣ॥
GAL 1:7 ᤛᤧᤰᤂᤠ᤺ᤸᤗᤧ ᤂᤧᤱᤃ ᤁᤢᤈᤧᤰ ᤛᤢᤏᤠᤀᤡᤱ ᤔᤧ᤺ᤴᤗᤥ. ᤁᤖ ᤁᤢᤓᤠ ᤔᤏᤠᤜᤠ᤹ᤖᤧᤃ ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤌᤠᤔᤠᤛᤡ ᤑᤠ᤹ᤀᤠᤱ ᤂᤪᤡᤛ᤻ᤋᤧᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱᤅᤡᤴ ᤔᤧᤀᤡᤃᤢ ᤔᤧᤗᤧᤰᤂᤢᤖ ᤔᤧᤘᤠ᤹ᤖᤥ॥
GAL 1:8 ᤁᤖ ᤋᤃᤡ ᤀᤠᤏᤡᤃᤧ ᤂᤡᤏᤡ᤹ ᤀᤡᤱᤓᤥ᤺ᤀᤠᤛᤡᤃᤧᤒᤠ ᤛᤢᤏᤠᤀᤡᤱᤅᤡᤴᤏᤢ᤺ᤸᤗᤧ ᤘᤣ᤹ ᤛᤢᤏᤠᤀᤡᤱᤅᤡᤴ ᤀᤠᤏᤡᤃᤧ ᤀᤡᤱᤓᤥ᤺ᤛᤢᤶᤒᤧ᤹ ᤀᤡᤃᤪ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤓᤥ᤺ᤛᤢ᤹ᤛᤠᤱ ᤂᤧᤴᤏᤡᤴ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤖᤖᤥ॥
GAL 1:9 ᤀᤠᤏᤡᤃᤧ ᤋᤃᤡ ᤔᤧᤳᤋᤠᤛᤡᤃᤧᤒᤠ ᤜᤧᤰᤁᤣ ᤕᤠᤶᤔᤥᤀᤠᤱ ᤔᤧᤳᤋᤠᤛᤡᤃᤧ᤹ᤖᤥ. ᤀᤠᤳᤋᤡᤸᤗᤧ ᤂᤡᤏᤡ᤹ ᤁᤧᤍᤠ᤺ᤰᤋᤢᤶᤒᤠ ᤛᤢᤏᤠᤀᤡᤱᤅᤡᤴᤏᤢ᤺ᤸᤗᤧᤀᤠᤱ ᤘᤣ᤹ᤛ᤻ᤔᤠ ᤛᤢᤏᤠᤀᤡᤱᤅᤡᤴ ᤀᤡᤱᤃᤧᤓᤥ᤺ᤛᤡ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤱᤃᤪᤠ᤺ᤴ ᤂᤧᤸᤗᤧ ᤁᤢᤛᤶᤍᤠᤱ ᤆᤢᤰᤗᤖᤥ॥
GAL 1:10 ᤀᤠᤸᤗ ᤀᤡᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤔᤧ᤺ᤴ. ᤁᤖ ᤀᤡᤱᤃᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠ ᤁᤥ᤺ᤳᤋᤢᤱᤗᤥ॥ ᤀᤠᤸᤗᤛᤠᤱ ᤀᤡᤱᤃᤠ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡᤖᤰ ᤁᤥ᤺ᤳᤋᤢᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤔᤧ᤺ᤴᤏᤠ᤹ᤖᤥ॥
GAL 1:11 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱᤅᤡᤱᤃ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤋᤩᤧᤒᤠ ᤔᤧ᤺ᤴᤗᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥
GAL 1:12 ᤁᤱᤃ ᤔᤧᤴᤇᤠᤶ ᤕᤠᤵᤔᤡᤗᤠᤶᤒᤠ ᤂᤥ᤺ᤛᤢᤱᤒᤠ ᤔᤧ᤺ᤴ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤜᤢ᤹ᤖᤠᤱᤒᤠᤀᤠᤱ ᤔᤧ᤺ᤴ. ᤁᤖ ᤀᤡᤱᤃᤠ᤹ ᤕᤧᤛᤢ ᤂᤪᤡᤛ᤻ᤋᤧᤸᤗᤧᤀᤣ ᤀᤥᤛᤣ᤺ᤴᤎᤠᤰᤋᤠᤱᤅᤠᤱ ᤂᤥ᤺ᤛᤢᤱᤒᤠᤖᤥ॥
GAL 1:13 ᤀᤡᤱᤃᤠ᤹ ᤋᤃᤡ ᤕᤜᤢᤍᤡ ᤛᤠᤶᤕᤥ᤺ᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤰᤋᤱᤒᤠ ᤔᤏᤠ ᤘᤕᤠᤱ ᤜᤧᤰᤁᤩᤠᤱ ᤀᤠᤰᤂᤧᤴ ᤛᤠ᤹ᤖᤡᤰ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱᤅᤠᤱ ᤔᤧᤱᤔᤠ ᤁᤥ᤺ᤳᤋᤢᤱᤛᤡᤱ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
GAL 1:14 ᤀᤡᤱᤃᤠ᤹ ᤕᤜᤢᤍᤡ ᤀᤠᤒᤧᤖᤧᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤕᤜᤢᤍᤡ ᤛᤠᤶᤕᤥᤀᤥ ᤐᤥ᤺ᤔᤠ ᤏᤡᤱᤘᤠ᤹ ᤐᤡᤖᤢᤱ ᤜᤧᤰᤁᤩᤠᤱ ᤀᤠᤶᤒᤠ ᤀᤠᤴᤎᤧᤒᤠᤜᤠ᤹ᤗᤠᤶ ᤁᤧᤒᤥ᤺ᤱᤒᤠ ᤁᤧᤕᤢ᤺ᤒᤠ ᤛᤠᤶᤕᤥᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤢᤛᤡᤰ ᤁᤧᤛᤶᤒᤠ ᤘᤕᤠᤱᤗᤥ॥
GAL 1:15 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤠᤔᤧᤴᤘᤠ᤺ᤴᤇᤡᤱᤅᤣᤀᤠᤱᤎᤥᤀᤣ ᤗᤢᤱᤔᤠ᤹ ᤋᤢᤰᤋᤠᤱ. ᤜᤧᤰᤁᤩᤠᤱ ᤛᤣᤃᤠᤱᤅᤠᤱ ᤛᤣᤘᤠ ᤆᤥ᤺ᤰᤛᤧ ᤀᤢ᤺ᤳᤋᤠᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤛᤡᤱᤗ ᤑᤠ᤹ᤀᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤀᤥ᤺ᤴᤎᤠᤰᤔᤠ ᤁᤢᤛᤡᤖᤠ᤹ ᤌᤠᤅᤧ॥ ᤂᤧᤴ ᤕᤧᤶᤔᤥ ᤀᤡᤱᤃᤠ᤹ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤛᤢᤈᤠ ᤔᤧᤏᤠ᤺ᤰᤋᤢᤱᤛᤡᤱᤅᤡᤴ.
GAL 1:17 ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥᤀᤠᤱ ᤛᤢᤈᤠ ᤏᤠ᤺ᤰᤛᤧ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤌᤥ ᤔᤧᤶᤒᤣ᤺ᤰᤐᤧᤴᤗᤥ. ᤁᤖ ᤀᤡᤱᤃᤠ᤹ᤃ ᤂᤡᤔᤥ ᤀᤖᤒᤡᤕᤠ ᤗᤠᤈᤣ᤹ᤀᤥ ᤐᤣᤃᤠᤱ. ᤜᤧᤰᤁᤩᤠᤱ ᤋᤠ᤺ᤴᤍᤡ ᤀᤡᤱᤃᤠ᤹ ᤍᤔᤛ᤻ᤁᤛ ᤕᤧᤰᤕᤰᤁᤥ ᤏᤢ᤺ᤰᤂᤠᤱ ᤋᤩᤠᤱᤗᤥ॥
GAL 1:18 ᤜᤧᤰᤁᤩᤠᤱ ᤋᤱᤒᤣ ᤛᤢᤶᤛᤡ ᤀᤣᤃᤠᤱᤗᤰ ᤀᤡᤱᤃᤠ᤹ ᤕᤖᤢᤛᤗᤧᤶᤔᤥ ᤐᤋᤪᤢᤛᤖᤧ ᤁᤢᤍᤢᤶᤛᤧ ᤐᤣᤃᤠᤱ. ᤜᤧᤰᤁᤩᤠᤱ ᤂᤢᤏᤧ᤹ᤏᤢᤀᤣ ᤌᤡᤰ-ᤅᤠ (᥇᥋) ᤕᤧᤴ ᤌᤠᤖᤡᤰ ᤕᤢᤅᤠᤱᤗᤥ॥
GAL 1:19 ᤂᤧᤵᤔᤥ ᤍᤠᤱᤒᤠᤸᤗᤧ ᤁᤢᤴᤛᤠ᤹ ᤕᤠᤁᤢᤒᤧᤴᤏᤢ ᤘᤣ᤹ ᤀᤠᤳᤋᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤠᤱ ᤔᤧᤍᤢᤔᤢᤱᤛᤡᤱᤅᤡᤴᤗᤥ॥
GAL 1:20 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤧᤰᤂᤠ ᤐᤠ᤺ᤴ ᤔᤧᤳᤏᤡᤱᤗᤥ. ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤐᤠ᤺ᤴᤜᤠ᤹ ᤀᤡᤱᤗᤧᤰ ᤔᤧ᤺ᤴᤗᤥ॥
GAL 1:21 ᤂᤧᤴ ᤀᤣᤃᤠᤱ ᤀᤡᤱᤃᤠ᤹ ᤛᤡᤖᤡᤕᤠ ᤏᤢ ᤛᤡᤗᤡᤛᤡᤕᤠ ᤌᤢᤶᤔᤥ ᤐᤣᤃᤠᤱᤗᤥ॥
GAL 1:22 ᤕᤜᤢᤍᤡᤕᤠ ᤗᤠᤈᤣ᤹ᤀᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤀᤡᤱᤃᤠ᤹ ᤔᤧᤴᤏᤡᤀᤣ ᤔᤧᤘᤕᤧᤖᤥ॥
GAL 1:23 ᤂᤧᤱᤜᤠ᤹ᤖᤧᤃ ᤋᤃᤡ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤸᤗᤧ ᤔᤧᤱᤔᤠ ᤁᤥ᤺ᤳᤋᤢᤒᤠ ᤏᤛᤠ᤺ᤴᤏᤡᤴ ᤀᤰᤂᤣ᤺ᤸᤗᤧ ᤀᤡᤱᤓᤥ᤺ᤛᤢᤖ ᤘᤠ᤹ᤖᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴᤗᤰ ᤔᤧᤄᤧᤵᤛᤢᤀᤠᤱ ᤔᤧᤘᤕᤧᤖᤥ॥
GAL 1:24 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤆᤥᤃᤢᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥ᤺ᤛᤢᤖᤥ॥
GAL 2:1 ᤋᤱᤒᤣ ᤌᤡᤰ-ᤗᤡ (᥇᥊) ᤀᤣᤃᤠᤱ ᤀᤡᤱᤃᤠ᤹ ᤒᤖᤏᤠᤒᤠᤛᤧᤴᤏᤢ ᤕᤠᤶᤔᤥ ᤕᤖᤢᤛᤗᤧᤔ ᤌᤥ ᤐᤣᤃᤠᤱᤅᤡᤸᤗᤧ ᤋᤡᤋᤛᤧᤴᤏᤠᤱ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤋᤣ᤹ᤖᤢᤱᤅᤠᤱ ᤘᤕᤧ॥
GAL 2:2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤂᤧᤳᤌᤥ ᤐᤣ᤺ᤰᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤀᤥ᤺ᤴᤎᤠᤰᤋᤠᤱᤅᤠᤱ ᤘᤕᤧ॥ ᤀᤡᤱᤃᤠ᤹ ᤂᤧᤵᤔᤥ ᤘᤕᤠᤱᤅᤡᤸᤗᤧ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥ᤺ᤒᤠᤛᤡᤖᤥ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠᤜᤠ᤹ ᤛᤫᤠ᤺ᤳᤋᤠᤱ ᤋᤢᤔᤢᤱᤛᤡᤱᤅᤠᤱ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤓᤥ᤺ᤛᤢᤱᤛᤡᤱᤒᤠ ᤛᤢᤏᤠᤀᤡᤱᤅᤡᤴ ᤆᤧᤰᤋᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤀᤠᤒᤠ᤺ᤴᤏᤡᤴ ᤔᤧᤄᤧᤵᤛᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤠᤱ ᤘᤕᤠᤱ. ᤔᤧ᤺ᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤛᤣᤘᤠ᤺ᤴ ᤜᤏᤧ ᤁᤧᤒᤥ᤺ᤱᤒᤠ ᤘᤕᤧᤖᤥ॥
GAL 2:3 ᤁᤖ ᤀᤠᤴᤍᤣ᤺ᤱᤒᤠ ᤋᤡᤋᤛᤧᤴ ᤌᤡᤶᤔᤧᤴᤍᤱ ᤛᤢᤘᤠᤱ ᤘᤕᤧᤛᤠᤱ ᤂᤧᤸᤗᤧ ᤜᤷᤍᤥ ᤜᤧᤰᤔᤠ ᤐᤥ᤺ᤱ ᤑᤠ᤹ᤀᤠᤱ ᤔᤧᤶᤒᤠ᤺ᤳᤋᤢᤴᤗᤥ॥
GAL 2:4 ᤁᤖ ᤁᤢᤓᤠ ᤀᤡᤱᤗᤧᤰᤁᤣ ᤑᤢ᤹ᤏᤢᤛᤠ᤹ᤜᤠ᤹ ᤂᤪᤡᤛ᤻ᤋ ᤕᤧᤛᤢᤗᤠᤶ ᤂᤥ᤺ᤛᤢᤶᤒᤧᤒᤠ ᤆᤥ᤺ᤰᤕᤢᤶᤓᤥ᤺ᤴ ᤌᤥ᤺ᤶᤛᤧ ᤀᤠᤏᤡᤃᤧᤏᤢ ᤔᤧᤓᤢᤳᤇᤡᤱᤅᤠᤱ ᤀᤠᤏᤡᤃᤧ ᤕᤥ᤺ᤰᤐᤠ ᤜᤧᤰᤁᤣ ᤆᤥ᤺ᤰᤛᤧ ᤂᤢᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤗ᤹ᤖᤡᤰ ᤔᤧᤔᤧᤳᤋᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤁᤠᤰ ᤐᤠ᤺ᤴᤏᤡᤴ ᤐᤥᤃᤧᤒᤠᤖᤥ॥
GAL 2:5 ᤁᤖ ᤀᤠᤏᤡᤃᤧᤃ ᤛᤧᤰᤂᤠᤒᤠ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤖ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤓᤥ᤺ᤰᤂᤢᤒᤠ ᤐᤠ᤺ᤴᤏᤡᤴ ᤛᤵᤑᤠᤎᤡᤰᤁᤠᤱ ᤔᤧᤄᤧᤵᤛᤢᤶᤒᤧᤴᤗᤥ॥
GAL 2:6 ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤐᤠ ᤁᤢᤓᤠ ᤗᤠᤶᤗᤥ᤺ᤒᤠᤜᤠ᤹ᤃ–ᤁᤧᤗᤧᤒᤠ ᤁᤧᤏᤡ᤺ᤒᤠ ᤔᤧᤈᤥ᤺ᤰᤛᤠᤱ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧᤗᤣ᤺ᤳᤋᤠᤛᤡᤱᤅᤡᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤔᤧᤛᤧᤴᤍᤢᤴᤇᤡᤴᤗᤥ–ᤂᤧᤱᤜᤠ᤹ᤖᤧ ᤀᤡᤱᤓᤥ᤺ᤛᤢᤱᤒᤠ ᤛᤢᤏᤠᤀᤡᤱᤅᤥ ᤌᤣᤀᤠᤱ ᤔᤧᤴᤈᤰᤋᤢᤴᤗᤥ॥
GAL 2:7 ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤋᤪᤢᤛᤧᤴ ᤕᤜᤢᤍᤡᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤐᤠᤱᤄᤢᤒᤠ ᤜᤧᤰᤁᤣᤀᤣ ᤀᤡᤱᤃᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠᤛᤡ ᤑᤠ᤹ᤀᤠᤱ ᤗᤰᤐᤧᤴ ᤐᤡᤖᤠᤱᤒᤠᤴ ᤔᤧᤏᤡ᤺ᤛᤢᤖᤥ॥
GAL 2:8 ᤌᤣᤀᤠᤱᤓᤧᤸᤗᤧ ᤐᤋᤪᤢᤛᤧᤖᤧ ᤛᤣ᤺ᤰᤕᤢᤰᤔᤡᤒᤠ ᤁᤢᤕᤠ᤺ᤶᤒᤰᤗᤠᤶ ᤕᤜᤢᤍᤡᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤀᤠᤕᤠ᤺ᤶᤒᤰᤗᤠᤶᤔᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤕᤠ᤺ᤶᤒᤰ ᤆᤥᤃᤢᤖᤥ॥
GAL 2:9 ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥ᤺ᤒᤠ ᤔᤧᤔᤧᤳᤋᤢᤛᤡᤒᤠ ᤕᤠᤁᤢᤒ. ᤐᤋᤪᤢᤛ ᤏᤢ ᤕᤢᤜᤢᤴᤏᤠᤛᤡᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤛᤣᤘᤠᤀᤥ ᤔᤢ᤹ᤀᤡᤛᤠᤶ ᤌᤠ᤺ᤛᤢᤒᤠ ᤔᤧᤏᤡ᤺ᤛᤢᤀᤠᤱ ᤒᤖᤏᤠᤒᤠᤛᤧᤴ ᤏᤢ ᤀᤡᤱᤃᤠ᤹ ᤔᤧᤍᤠ᤺ᤰᤋᤧᤳᤇᤡᤃᤧᤖᤥ॥ ᤂᤧᤱᤜᤠ᤹ ᤀᤠᤴᤇᤡᤃᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤐᤣ᤺ᤰᤔᤠ ᤔᤧᤍᤧᤴᤍᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤢᤍᤡᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤔᤧᤍᤧᤴᤍᤧᤖᤥ॥
GAL 2:10 ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤗᤢᤶᤔᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤑᤠ᤹ᤔᤠᤛᤡ ᤛᤢᤈᤠ ᤔᤧᤒᤡᤖᤡᤃᤧ॥ ᤜᤧᤰᤁᤣ ᤆᤥ᤺ᤰᤔᤠ ᤀᤡᤱᤃᤠ᤹ᤀᤠᤱ ᤀᤠᤛᤡᤖᤠ᤹ ᤌᤠᤅᤧᤖᤥ॥
GAL 2:11 ᤁᤖ ᤐᤋᤪᤢᤛᤧᤴ ᤀᤣᤴᤋᤡᤀᤥᤁ ᤕᤧᤰᤕᤰᤁᤥ ᤋᤩᤧ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤀᤡᤱᤃᤠ᤹ ᤐᤠ᤺ᤴ ᤔᤧᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤕᤧ॥
GAL 2:12 ᤋᤃᤡ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤛᤥᤖᤡᤰ ᤆᤖ ᤘᤕᤧ. ᤁᤖ ᤕᤠᤁᤢᤒᤖᤧ ᤕᤜᤢᤍᤡ ᤁᤢᤴᤈᤢᤶᤜᤠ᤹ ᤂᤧᤵᤔᤥ ᤔᤧᤍᤩᤧᤸᤗᤧ ᤂᤢᤏᤧ᤹ ᤛᤥᤖᤡᤰ ᤕᤢᤱᤔᤠᤀᤠᤱ ᤆᤠᤔᤠ ᤗᤧᤖᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤴᤏᤠᤱ ᤜᤷᤍᤥ ᤜᤧᤰᤔᤠᤀᤣ ᤐᤥ᤺ᤱ ᤁᤧᤗ᤹ᤒᤠ ᤂᤧᤴ ᤔᤏᤠᤜᤠ᤹ᤏᤢ ᤁᤡ᤺ᤛᤧᤀᤠᤱ ᤘᤕᤧᤖᤥ॥
GAL 2:13 ᤜᤧᤰᤁᤩᤠᤱ ᤘᤣ᤹ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤐᤋᤪᤢᤛᤖᤧ ᤁᤡᤛᤪᤢᤰᤐᤠ ᤁᤢᤕᤧᤵᤗᤧᤰᤁᤡᤴ ᤔᤧᤏᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤵᤗᤧᤰᤁᤡᤸᤗᤧ ᤒᤖᤏᤠᤒᤠᤛᤧᤴᤏᤠᤱ ᤗᤧᤰᤂᤢ ᤋᤣ᤹ᤖᤢᤖᤥ॥
GAL 2:14 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤢᤏᤠᤀᤡᤱᤅᤡᤸᤗᤧᤴ ᤛᤧᤰᤂᤠᤒᤠ ᤐᤠ᤺ᤴᤏᤥ ᤔᤧᤶᤒᤳᤇᤧᤶᤒᤠ ᤏᤡ᤺ᤛᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤐᤋᤪᤢᤛᤧᤴ ᤀᤰᤂᤣ ᤔᤧᤳᤋᤢᤱᤗ ᤑᤧ᤺ᤰᤋᤢᤱ. “ᤂᤧᤏᤧ᤹ᤃ ᤕᤜᤢᤍᤡᤏᤧᤛᤠᤱ ᤕᤜᤢᤍᤡ ᤜᤧᤰᤁᤣ ᤁᤧᤴᤘᤠ᤹ᤏᤧᤴ. ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱ ᤁᤢᤀᤡᤛᤡ᤺ᤰ ᤁᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤗᤧᤖᤢ ᤁᤧᤍᤣ᤺ᤛᤢᤒᤠ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤒᤠᤒᤣ᥅”
GAL 2:15 ᤀᤠᤏᤡ᤹ ᤛᤠᤀᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤕᤜᤢᤍᤡᤛᤡ. ᤌᤡᤶᤔᤧᤴᤍᤱ ᤛᤢᤘᤠᤱ ᤜᤧᤰᤋᤱᤒᤠ “ᤗᤠᤕᤥᤒᤠᤛᤡ” ᤔᤧ᤺ᤴᤗᤥ॥
GAL 2:16 ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤔᤧᤛᤢᤰᤏᤧᤴᤗᤥ. ᤁᤖ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥᤃᤢᤀᤠᤱᤗᤰ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤛᤢᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤐᤥ᤺ᤱᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤀᤠᤱ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤀᤠᤈᤥᤃᤢᤶᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤒᤠᤗᤠᤶ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤀᤠᤳᤋᤡᤴᤏᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤔᤧᤒᤥ᤺ᤱᤏᤧᤸᤗᤥ॥
GAL 2:17 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥ᤺ᤰᤔᤠᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤀᤠᤃᤥ᤺ᤳᤋᤢᤶᤔᤡᤸᤗᤧ ᤘᤣ᤹ᤜᤠ᤹ᤖᤧ ᤂᤡᤏᤡ᤹ ᤗᤠᤕᤥᤀᤥ ᤁᤧᤘᤠ᤹ᤒᤠᤏᤡᤱ ᤀᤠᤶᤔᤧᤳᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤀᤠᤗᤧᤖᤢᤶᤔᤠᤱ ᤀᤠᤘᤠ᤹॥ ᤂᤧᤴ ᤑᤠ᤹ᤀᤡᤴ ᤂᤪᤡᤛ᤻ᤋᤖᤧ ᤗᤠᤕᤥᤀᤥ ᤗᤠᤶᤀᤠᤗᤥ᤺ᤒᤠᤒᤡ᥅ ᤜᤧᤰᤁᤣ ᤔᤧ᤺ᤴᤗᤥ᥄
GAL 2:18 ᤂᤧᤸᤗᤧ ᤁᤢᤗᤧᤰᤘᤠ ᤀᤡᤱᤃᤠ᤹ ᤗᤧᤖᤢᤱᤍᤣ᤺ᤛᤢᤱᤒᤠ ᤐᤠ᤺ᤴᤏᤡᤴ ᤕᤠᤶᤔᤥ ᤜᤢ᤹ᤖᤢᤱᤛᤡᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤗᤠᤕᤥᤒᤠ ᤐᤥ᤺ᤱᤅᤠᤖᤥ॥
GAL 2:19 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤥ᤺ᤳᤋᤢᤱᤅᤡᤸᤗᤧ ᤜᤠᤒᤠ ᤂᤧᤴ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤸᤗᤧ ᤀᤠᤵᤋᤡᤰ ᤁᤢ᤺ᤳᤋᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤜᤡᤱᤅᤠᤖ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤧᤴᤗᤵ ᤂᤥ᤺ᤔᤠ ᤋᤶᤛᤡᤴ ᤆᤥ᤺ᤰᤔᤠ ᤗᤧᤖᤢᤱᤗᤥ॥
GAL 2:20 ᤀᤡᤱᤃᤠ᤹ᤃ ᤂᤪᤡᤛ᤻ᤋᤧᤴᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤀᤡᤱᤃᤠ᤹ᤃ ᤔᤧᤜᤡᤱᤅᤠᤴ. ᤁᤖ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤥ ᤜᤡᤱᤗᤥ॥ ᤀᤡᤱᤃᤠ᤹ᤃ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤜᤡᤱᤅᤠᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤀᤥᤒᤠ ᤏᤛᤠ᤺ᤴᤗᤠᤶ ᤜᤡᤱᤅᤠᤖᤥ॥ ᤂᤢᤏᤧ᤹ᤀᤣ ᤗᤢᤱᤔᤠ᤹ ᤋᤢᤰᤋᤠᤱ ᤜᤧᤰᤁᤩᤠᤱ ᤀᤠᤗᤠᤃᤡ ᤁᤢᤜᤡᤱᤔᤴᤏᤡᤴ ᤐᤡᤖᤢᤖᤥ॥
GAL 2:21 ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤌᤣᤏᤠᤎᤣᤒᤠ ᤔᤧᤀᤡ᤺ᤳᤋᤠᤴᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤀᤠᤛᤢᤰᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤜᤏᤧᤖᤰ ᤛᤩᤧᤖᤥ॥
GAL 3:1 ᤃᤗᤠᤋᤡ ᤁᤧᤕᤢᤱᤒᤠ ᤏᤛᤠᤏᤡᤒᤠᤛᤣ. ᤌᤣᤀᤠᤱ ᤂᤡᤏᤡ᤹ ᤀᤍᤱ ᤁᤢᤀᤡᤛᤡ᤺ᤰ ᤁᤧᤈᤥᤃᤡᤒᤠᤒᤣ᥅ ᤜᤠ᤺ᤳᤗᤧ ᤁᤧᤗᤧᤔᤡᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤑᤧᤳᤗᤠ᤺ᤴᤍᤢ ᤁᤧᤒᤡᤖᤡᤒᤣ᥅ ᤂᤡᤏᤡ᤹ ᤋᤃᤡᤀᤣ ᤕᤧᤛᤢ ᤂᤪᤡᤛ᤻ᤋᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤛᤩᤧᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤆᤧᤰᤁᤠᤛᤡᤃᤧᤀᤠᤱ ᤘᤕᤧ॥
GAL 3:2 ᤂᤡᤏᤡ᤹ᤏᤢ ᤐᤠ᤺ᤴᤎᤡᤰ ᤁᤢᤛᤡᤱ ᤏᤡ᤺ᤵᤔᤠ ᤀᤠᤏᤡᤱᤘᤠ᤹ ᤘᤠ᤹–ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤛᤣᤛᤣᤔᤠᤱᤅᤡᤴ ᤁᤧᤄᤥ᤺ᤛᤢᤶᤒᤠᤒᤡ ᤀᤡ ᤛᤢᤏᤠᤀᤡᤱ ᤁᤧᤄᤧᤵᤛᤢᤶᤔᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤗᤠᤶ ᤁᤧᤄᤥ᤺ᤛᤢᤶᤒᤠᤒᤡ᥅
GAL 3:3 ᤌᤣᤀᤠᤱ ᤁᤶᤔᤩᤠᤰ ᤛᤠ᤹ᤖᤡᤰ ᤂᤡᤏᤡ᤹ ᤀᤍᤱ ᤁᤧᤈᤥᤃᤡᤒᤠᤒᤣ᥅ ᤂᤡᤏᤡ᤹ ᤂᤪᤡᤛ᤻ᤋᤠᤏᤡ ᤜᤡᤱᤔᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤁᤧᤜᤣ᤺ᤰᤋᤢᤶᤔᤠᤱ ᤀᤠᤸᤗ ᤀᤠᤒᤠᤅᤣ ᤕᤠ᤺ᤶᤒᤰᤗᤠᤶ ᤁᤢᤗᤡᤱᤎᤥ ᤁᤧᤵᤔᤠ ᤁᤧᤃᤥ᤺ᤳᤋᤡᤒᤠᤒᤡ᥅
GAL 3:4 ᤛᤢᤏᤠᤀᤡᤱᤗᤧ ᤗᤠᤃᤡ ᤂᤡᤏᤡ᤹ ᤁᤶᤔᤩᤠᤰ ᤕᤖᤡᤰ ᤋᤢᤰᤂᤣ ᤜᤏᤧ ᤁᤧᤈᤩᤧ᤹ᤀᤡᤒᤡ᥅ ᤛᤧᤰᤂᤠ᤺ᤸᤗᤧᤃ ᤋᤢᤰᤂᤣ ᤜᤏᤧ ᤁᤧᤴᤈᤩᤧ᤹ᤀᤡᤴᤗᤥ॥
GAL 3:5 ᤂᤡᤏᤡ᤹ ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤔᤧ᤺ᤴ. ᤁᤖ ᤁᤧᤄᤧᤵᤛᤢᤶᤒᤠ ᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤣᤛᤣᤔᤠᤱᤅᤡᤴ ᤁᤧᤒᤡᤖᤡ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤒᤠᤖᤥ॥
GAL 3:6 ᤜᤧᤰᤁᤣᤗ᤹ᤖᤡᤰᤁᤣ ᤀᤒᤪᤠᤜᤠᤔᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤖᤥ॥”
GAL 3:7 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤀᤣ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤁᤢᤶᤔᤧᤴᤇᤠ᤹ᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
GAL 3:8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤂᤢᤏᤡ᤹ ᤏᤛᤠ᤺ᤴᤗᤠᤶ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤛᤡ᤹ ᤁᤧᤗ᤹ᤒᤠ ᤋᤠ᤺ᤴᤍᤡᤒᤠ ᤐᤠ᤺ᤴᤏᤡᤴ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤴ ᤋᤃᤡᤛᤠ ᤀᤰᤂᤣᤗ᤹ᤖᤡᤰ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤆᤥᤃᤢ. “ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤏᤧ᤹ᤗᤠᤶᤒᤠᤀᤣ ᤔᤢ᤹ᤀᤡᤛᤠᤶ ᤔᤧᤄᤥ᤺ᤛᤢ᤹ᤖᤥ॥”
GAL 3:9 ᤂᤧᤸᤗᤧ ᤆᤥᤃᤢᤸᤗᤧ ᤀᤒᤪᤠᤜᤠᤔᤖᤧ ᤏᤛᤠ᤺ᤴ ᤆᤥᤃᤢᤀᤠᤱ ᤔᤢ᤹ᤀᤡᤛᤠᤶ ᤂᤥ᤺ᤛᤢᤒᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥ᤺ᤛᤢ᤹ᤖᤥ॥
GAL 3:10 ᤁᤖ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤁᤧᤖᤧᤰ ᤛᤠᤱᤃᤪᤠᤖᤧ ᤋᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤌᤡᤶ ᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤆᤰᤔᤧᤸᤗ᤹ᤀᤣ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱ ᤂᤥ᤺ᤔᤠ ᤗᤠ᤹ᤖᤢᤛᤡᤀᤠᤱ ᤘᤠ᤹ᤖᤥ॥”
GAL 3:11 ᤛᤠᤶᤕᤥᤌᤡᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤳᤋᤡᤴᤜᤠ᤹ᤀᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤔᤧᤶᤒᤥ᤺ᤱᤏᤧᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤏᤡ᤺ᤍᤧᤳᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤏᤡᤒᤠᤱᤃ ᤏᤛᤠ᤺ᤴᤗᤠᤶᤒᤠᤀᤣ ᤜᤡᤱᤗᤥ॥”
GAL 3:12 ᤛᤠᤶᤕᤥᤌᤡᤶᤔᤡᤴ ᤏᤢ ᤏᤛᤠ᤺ᤴᤏᤡᤴ ᤔᤧᤍᤱᤛᤡᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤌᤡᤶᤔᤥ ᤁᤧᤒᤵᤐᤠ ᤁᤠᤰ ᤀᤡᤱᤈᤠ᤺ᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤧᤴ ᤂᤧᤴᤗᤠᤶᤔᤣ ᤜᤡᤱᤗᤥ॥”
GAL 3:13 ᤁᤖ ᤛᤠᤶᤕᤥᤌᤡᤶᤔᤡᤸᤗᤧ ᤋᤠᤖᤢᤒᤠ ᤂᤢᤶᤍᤡᤱᤅᤡᤸᤗᤧ ᤁᤢᤔᤧᤸᤗᤢᤱᤅᤡᤴ ᤂᤪᤡᤛ᤻ᤋᤖᤧ ᤜᤢᤅᤢᤀᤠᤱ ᤀᤠᤏᤡ᤹ ᤀᤠᤎᤧ᤹ᤖᤧᤖᤥ॥ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤇᤡᤱᤅᤡᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤀᤠᤏᤡ᤹ ᤂᤢᤶᤍᤡᤱᤅᤡᤴ ᤁᤢᤕᤢᤍᤣ᤹ᤖᤢᤖᤥ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤛᤡᤱᤛᤶᤍᤠᤱ ᤁᤧᤓᤥ᤺ᤴᤇᤡᤱᤒᤠ ᤁᤧᤛᤡ᤺ᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤒᤠᤖᤥ॥”
GAL 3:14 ᤂᤪᤡᤛ᤻ᤋᤖᤧ ᤀᤠᤏᤡ᤹ ᤀᤠᤎᤧ᤹ᤖᤧ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴ ᤐᤡᤖᤢᤒᤠ ᤔᤢ᤹ᤀᤡᤛᤠᤶᤔᤡᤴ ᤂᤪᤡᤛ᤻ᤋ ᤕᤧᤛᤢᤗᤠᤶ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤐᤡᤖᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤛᤣᤛᤣᤔᤠᤱᤅᤡᤴ ᤏᤛᤠ᤺ᤴᤗᤠᤶ ᤀᤠᤄᤥ᤺ᤛᤢᤶᤗᤥ॥
GAL 3:15 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤁᤵᤔᤥ ᤔᤧᤴᤇᤠᤶ ᤕᤠᤵᤔᤡ ᤌᤡᤶᤗᤠᤶ ᤁᤢᤒᤡᤎᤡᤰ ᤐᤡᤏᤡᤱᤗᤥ॥ ᤏᤧᤵᤑᤢᤖᤧ ᤔᤠᤱᤜᤧᤰ ᤆᤥ᤺ᤰᤛᤢᤀᤠᤱ ᤐᤠ᤺ᤴ ᤋᤱᤛᤢᤒᤠ ᤛᤠᤵᤗᤠᤀᤥ ᤀᤠᤳᤋᤡᤸᤗᤧᤀᤠᤱ ᤗᤧᤱᤔᤠ ᤏᤢ ᤕᤥ᤹ᤔᤠ ᤔᤧᤛᤢᤰᤋᤢᤴᤗᤥ॥
GAL 3:16 ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤔᤠᤱᤜᤧᤰᤜᤠ᤹ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ “ᤁᤢᤔᤢ᤹ᤀᤡᤍᤠᤱᤛᤠᤜᤠ᤹” ᤑᤠ᤹ᤀᤡᤱᤃ ᤕᤖᤡᤰ ᤔᤏᤠᤜᤠ᤹ ᤔᤧ᤺ᤴ. ᤁᤖ “ᤁᤢᤔᤢ᤹ᤀᤡᤍᤠᤱᤛᤠ᤺ᤴ” ᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ॥ ᤂᤧᤴ ᤑᤠ᤹ᤀᤡᤱᤃ ᤗᤳᤇᤠ ᤔᤏᤠ᤺ᤸᤗᤧᤴ ᤔᤡᤰᤛᤣ᤺ᤴ ᤐᤥ᤺ᤱ. ᤂᤧᤱᤃ ᤂᤪᤡᤛ᤻ᤋᤖᤥ॥
GAL 3:17 ᤁᤵᤔᤥ ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤑᤠ᤹ᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴ ᤔᤠᤱᤜᤢᤵ ᤆᤥᤃᤢᤒᤠᤴ ᤁᤢᤃᤡᤵ ᤗᤡᤛᤡᤀᤠᤱ ᤛᤢᤶᤒᤥ᤺ᤱ (᥊᥉᥆) ᤋᤱᤒᤣ ᤀᤣᤃᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴ ᤛᤠᤶᤕᤥᤌᤡᤶ ᤐᤡᤖᤢᤸᤗᤧ ᤂᤧᤴ ᤔᤠᤱᤜᤢᤵᤐᤡᤴ ᤔᤧᤄᤰᤋᤢᤴᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤂᤰᤋᤢᤔᤧᤴ॥
GAL 3:18 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤏᤡᤱ ᤗ᤹ᤖᤡᤰ ᤆᤥᤃᤢᤒᤠ ᤔᤢ᤹ᤀᤡᤛᤠᤶᤔᤡᤴ ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤗᤠᤶ ᤂᤥᤍᤧᤳᤏᤧ ᤑᤠ᤹ᤃᤪ ᤂᤧᤴ ᤔᤠᤱᤜᤧᤰᤁᤣ ᤔᤧᤒᤥ᤺ᤱᤏᤧᤴ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰᤗᤠᤶᤒᤠᤀᤣ ᤀᤒᤪᤠᤜᤠᤶᤔᤡᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤁᤴ ᤔᤢ᤹ᤀᤡᤛᤠᤶᤔᤡᤴ ᤐᤡᤖᤢᤖᤥ॥
GAL 3:19 ᤜᤧᤰᤁᤣ᤺ᤸᤗᤧ ᤛᤠᤶᤕᤥᤌᤡᤶᤔᤡᤴ ᤌᤣᤀᤠᤱ ᤐᤡᤖᤧᤒᤠᤒᤣ᥅ ᤔᤠᤱᤜᤧᤰ ᤆᤥᤃᤢᤒᤠ ᤔᤢ᤹ᤀᤡᤍᤠᤱᤛᤠ᤺ᤴ ᤔᤧᤴᤍᤠᤀᤣ ᤌᤠᤖᤡᤰ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤴ ᤕᤥ᤹ᤛᤡᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤗᤠᤀᤡᤱᤒᤠᤗᤠᤶ ᤛᤠᤶᤕᤥᤌᤡᤶᤔᤡᤴ ᤐᤠ᤺ᤴᤍᤱᤛᤠᤒᤠ ᤔᤥᤛᤠ᤺ᤴ ᤐᤡᤖᤢᤖᤥ॥
GAL 3:20 ᤀᤠᤸᤗ ᤐᤠ᤺ᤴᤍᤱᤗᤧ ᤗᤠᤃᤡ ᤏᤧᤵᤑᤢ ᤔᤏᤠ ᤆᤠᤜᤠᤒᤠ ᤆᤥ᤺ᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤗᤳᤌᤡᤰᤗᤰ ᤘᤠ᤹ᤖᤥ॥
GAL 3:21 ᤜᤧᤰᤁᤣᤏᤧ ᤑᤠ᤹ᤃᤪ ᤁᤢᤛᤠᤶᤕᤥᤌᤡᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤜᤠ᤹ ᤀᤳᤋᤢᤒᤡ᥅ ᤛᤧᤰᤂᤠ᤺ᤸᤗᤧᤃ ᤜᤧᤰᤁᤣ ᤔᤧ᤺ᤴᤗᤥ᥄ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤛᤱ ᤜᤡᤱᤔᤴᤏᤡᤴ ᤐᤡᤔᤠ ᤀᤠᤛᤢᤰᤋᤧᤸᤗᤧᤃ ᤂᤧᤴ ᤛᤠᤶᤕᤥᤌᤡᤶᤔᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤀᤠᤛᤢᤰᤋᤧᤒᤠᤖᤥ॥
GAL 3:22 ᤁᤖ ᤗᤠᤕᤥ᤺ᤸᤗᤧ ᤁᤠᤰ ᤔᤏᤠᤜᤠ᤹ ᤛᤠᤰᤐᤠ ᤁᤧᤎᤠ᤺ᤒᤠ ᤁᤢᤀᤡᤛᤡ᤺ᤰ ᤆᤥᤃᤢᤛᤡᤀᤠᤱ ᤘᤠ᤹ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤡᤱᤓᤴ ᤆᤥᤃᤢᤀᤠᤱ ᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵᤐᤡᤱᤃ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥ᤺ᤰᤔᤠᤀᤠᤱᤗᤰ ᤂᤥ᤺ᤔᤠ ᤀᤠᤛᤢᤰᤋᤢᤶᤗᤥ॥
GAL 3:23 ᤂᤪᤡᤛ᤻ᤋᤧᤴ ᤋᤠ᤺ᤔᤠᤏᤢ᤺ᤸᤗᤧ ᤋᤃᤡ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤏᤛᤠ᤺ᤴᤏᤡᤴ ᤀᤠᤏᤡ᤹ ᤀᤥᤛᤣ᤺ᤴᤔᤧᤴᤎᤠᤰᤁᤣ ᤌᤠᤖᤡᤰ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤘᤕᤧᤀᤠᤱ ᤀᤠᤏᤡ᤹ ᤁᤧᤖᤧᤰ ᤛᤠᤰᤐᤠ ᤁᤧᤎᤠ᤺ᤒᤠ ᤜᤧᤰᤁᤣ ᤀᤠᤈᤥᤃᤧᤀᤠᤱ ᤀᤠᤘᤕᤧ॥
GAL 3:24 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤠᤏᤡ᤹ ᤏᤛᤠ᤺ᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤂᤪᤡᤛ᤻ᤋᤀᤥ ᤌᤠᤖᤡᤰ ᤗᤠᤶᤗᤥ᤺ᤛᤧ ᤀᤠᤏᤡ᤹ ᤀᤥᤃᤧᤔᤧᤵᤐᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥
GAL 3:25 ᤀᤠᤸᤗ ᤂᤧᤴ ᤏᤛᤠ᤺ᤴᤏᤡᤴ ᤋᤩᤧᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤏᤡ᤹ ᤀᤥᤔᤧᤵᤔᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥
GAL 3:26 ᤂᤪᤡᤛ᤻ᤋ ᤕᤧᤛᤢᤀᤥᤒᤠ ᤂᤡᤏᤡ᤹ ᤏᤛᤠ᤺ᤴᤗᤠᤶ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠ᤺ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
GAL 3:27 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤀᤥ ᤒᤵᤋᤡᤛ᤻ᤔᤠ ᤁᤧᤒᤥ᤺ᤱᤒᤠ ᤁᤧᤖᤧᤰᤗᤧ ᤂᤪᤡᤛ᤻ᤋᤖᤧ ᤏᤢ᤺ᤒᤠ ᤁᤢᤏᤥᤛᤪᤱᤅᤡᤴ ᤁᤢᤛᤱ ᤋᤣ᤺ᤳ ᤁᤧᤈᤠᤰᤂᤢᤶᤒᤠ ᤁᤢᤀᤡᤛᤡ᤺ᤰ ᤁᤧᤈᤠᤰᤂᤢᤶᤔᤠᤱ ᤁᤧᤘᤕᤡ᤹ᤖᤥ॥
GAL 3:28 ᤀᤠᤸᤗ ᤕᤜᤢᤍᤡ. ᤌᤡᤶᤔᤧᤴᤍᤱ ᤛᤢᤘᤠᤱ. ᤕᤥ᤺ᤰ ᤏᤢ ᤆᤥ᤺ᤰᤕᤢᤶᤓᤥᤒᤠ. ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ ᤁᤢᤍᤱᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤪᤡᤛ᤻ᤋ ᤕᤧᤛᤢᤀᤥ ᤗᤳᤇᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
GAL 3:29 ᤂᤡᤏᤡ᤹ ᤂᤪᤡᤛ᤻ᤋᤖᤧ ᤁᤢᤔᤏᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤂᤡᤏᤡ᤹ᤃ ᤀᤒᤪᤠᤜᤠᤔᤖᤧ ᤛᤧᤰᤂᤠ ᤁᤢᤔᤢ᤹ᤀᤡᤍᤠᤱᤛᤠᤏᤡᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴ ᤐᤡᤖᤢᤒᤠ ᤔᤠᤱᤜᤧᤰᤁᤡᤸᤗᤧᤴ ᤗᤰ ᤁᤧᤄᤥ᤺ᤒᤠᤏᤡᤱᤗᤥ॥
GAL 4:1 ᤀᤡᤱᤃᤠ᤹ ᤌᤧᤔᤠ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠ ᤑᤠ᤹ᤗᤧ. ᤗᤰ ᤁᤧᤄᤥ᤺ᤒᤠᤴ ᤜᤡᤴᤈᤠ᤹ ᤘᤠ᤹ᤖ ᤌᤠᤖᤡᤰ ᤕᤖᤡᤰ ᤕᤠᤱᤛᤠᤁᤢᤴᤎᤣᤖᤧ ᤁᤢᤴᤍᤠᤱᤒᤠ ᤁᤧᤒᤥ᤺ᤱᤒᤠ ᤘᤠ᤹ᤛᤠᤱ ᤕᤥ᤺ᤰᤐᤠ ᤁᤢᤀᤡᤛᤡ᤺ᤰᤁᤣ ᤐᤥ᤺ᤱᤗᤥ॥
GAL 4:2 ᤁᤢᤶᤒᤠᤖᤧ ᤕᤢᤰᤋᤡᤱ ᤆᤥᤃᤢᤒᤠ ᤗᤰ ᤂᤥ᤺ᤔᤠ ᤋᤱᤒᤣ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤢᤏᤧ᤹ᤃ ᤁᤶᤒᤪᤠᤱ ᤁᤧᤔᤧᤵᤐᤠ ᤏᤢ ᤀᤥᤃᤧᤔᤧᤵᤐᤠᤸᤗᤧ ᤁᤢᤜᤢᤰᤁᤥᤀᤣ ᤘᤠ᤹ᤖᤥ॥
GAL 4:3 ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ᤀᤠᤱ ᤜᤡᤴᤈᤠ᤹ ᤁᤢᤀᤡᤛᤡ᤺ᤰ ᤀᤠᤘᤕᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤜᤣ᤺ᤰᤛᤡᤱᤔᤥᤒᤠ ᤜᤏᤧᤒᤠ ᤂᤠᤜᤢᤴᤜᤠ᤹ᤖᤧ ᤕᤥ᤺ᤰ ᤀᤠᤈᤥᤃᤧᤀᤠᤱ ᤀᤠᤘᤕᤧᤖᤥ॥
GAL 4:4 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤢᤰᤋᤡᤱ ᤆᤥᤃᤢᤒᤠ ᤕᤧᤶᤔᤡᤴ ᤁᤧᤖᤧᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤐᤠᤱᤄᤢ ᤕᤢ᤺ᤛᤢᤖᤥ॥ ᤂᤢᤏᤧ᤹ ᤛᤡᤛᤠᤍᤡᤱ ᤔᤧᤴᤇᤢᤔᤠ᤹ᤀᤥᤗᤠᤶ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤛᤠᤘᤠ᤺ᤴᤇᤡᤱᤅᤠᤱ ᤘᤕᤧᤖᤥ॥
GAL 4:5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤗᤠᤶ ᤀᤠᤏᤡ᤹ ᤀᤠᤎᤧ᤹ᤖ ᤑᤠ᤹ᤀᤠᤱ ᤜᤧᤰᤁᤩᤠᤱ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤐᤠᤱᤄᤢᤖᤥ॥
GAL 4:6 ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠ᤺ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤠᤏᤡ᤹ ᤛᤡᤰᤗᤢᤱᤔᤥ ᤐᤠᤱᤄᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤏᤢᤍᤡᤱ ᤀᤠᤶᤒᤦ ᤗ᤹ᤖᤡᤰ ᤔᤧᤳᤋᤢ᤹ᤖᤥ॥
GAL 4:7 ᤀᤠᤸᤗᤀᤠᤱᤎᤥ ᤂᤡᤏᤡ᤹ᤃ ᤕᤥ᤺ᤰ ᤁᤧᤜᤥ᤺ᤵᤋᤡ᤹ᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ ᤜᤧᤰᤁᤩᤠᤱ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤂᤡᤏᤡ᤹ ᤗᤰ ᤁᤧᤄᤥ᤺ᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
GAL 4:8 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤵᤔᤠᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤃ ᤜᤏᤧᤒᤠ ᤔᤠᤱᤜᤠ᤹ᤖᤧ ᤂᤢᤏᤡ᤹ ᤕᤥ᤺ᤰ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤖᤥ॥
GAL 4:9 ᤁᤖ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ (ᤀᤡᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤡᤀᤠᤱ ᤘᤠ᤹). ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤢᤒᤢᤱᤏᤠ ᤁᤢᤛᤶᤒᤠ ᤁᤢᤛᤢᤶᤔᤧᤴᤍᤶᤔᤏᤠᤒᤠ ᤂᤠᤜᤢᤴᤜᤠ᤹ᤀᤥ ᤏᤢ᤺ᤱᤔᤠᤀᤠᤱ ᤕᤥ᤺ᤰ ᤐᤥ᤺ᤱᤔᤠ ᤂᤡᤏᤡ᤹ ᤛᤡᤖᤠ᤹ ᤌᤠᤱᤒᤠᤒᤣ᥅
GAL 4:10 ᤂᤡᤏᤡ᤹ᤃ ᤕᤜᤢᤍᤡ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤁᤢᤀᤡᤛᤡ᤺ᤰᤁᤣ ᤕᤧᤴᤜᤠ᤹. ᤗᤠᤜᤠ᤹. ᤆᤢᤱ ᤘᤠ᤺ᤶᤔᤠ ᤜᤠᤱ ᤘᤠ᤺ᤶᤔᤠ ᤕᤧᤶᤜᤠ᤹ ᤏᤢ ᤋᤱᤒᤣᤜᤠ᤹ᤏᤧ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥
GAL 4:11 ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠᤶᤒᤢᤎᤡᤰᤐᤠ ᤕᤠ᤺ᤶᤒᤰᤁᤡᤴ ᤜᤏᤧ ᤐᤥ᤺ᤱᤒᤡᤗᤠ ᤑᤠ᤹ᤀᤠᤱ ᤁᤡ᤺ᤛᤠᤱᤅᤠᤱ ᤘᤕᤠᤱᤗᤥ॥
GAL 4:12 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤧᤴ ᤐᤠ᤺ᤴᤜᤠ᤹ᤗᤠᤶ ᤀᤡᤱᤃᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤋᤃᤡ ᤀᤡᤱᤃᤠ᤹ᤃ ᤂᤡᤏᤡ᤹ ᤜᤧᤰᤁᤣ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤗᤠᤶ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤗᤥ॥ ᤂᤡᤏᤡ᤹ᤃ ᤀᤡᤱᤃᤠ᤹ ᤌᤣᤀᤠᤱ ᤋᤠᤵᤑᤧ᤺ᤸᤗᤡᤰ ᤕᤠᤵᤔᤡ ᤁᤧᤶᤔᤧᤳᤋᤡᤴᤗᤥ॥
GAL 4:13 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤋᤩᤠᤱᤅᤡᤸᤗᤧ ᤀᤠᤕᤠᤶ ᤋᤢᤃᤧᤀᤠᤱ ᤘᤕᤧᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤘᤠ᤹ᤖᤥ॥
GAL 4:14 ᤀᤠᤕᤠᤶ ᤋᤢᤰᤔᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤛᤠᤱ ᤕᤠᤵᤔᤡ ᤁᤧᤴᤈᤡ᤺ᤳᤋᤡᤴ. ᤕᤠᤵᤔᤡ ᤁᤧᤴᤏᤠ᤹ᤖᤡᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤔᤠᤱᤗᤠᤀᤡᤱᤒᤠ ᤀᤡᤃᤪ ᤂᤪᤡᤛ᤻ᤋ ᤕᤧᤛᤢ᤺ᤴ ᤗᤠᤱ ᤁᤧᤍᤠ᤺ᤰᤋᤢᤶᤒᤠ ᤁᤢᤀᤡᤛᤡ᤺ᤰ ᤕᤠᤵᤔᤡ ᤗᤠᤱ ᤁᤧᤍᤠ᤺ᤰᤋᤡᤖᤥ॥
GAL 4:15 ᤂᤡᤏᤡ᤹ ᤂᤧᤴ ᤕᤧᤶᤔᤥ ᤛᤠ᤹ᤖᤡᤰ ᤁᤧᤛ᤺ᤳᤋᤡᤀᤠᤱ ᤁᤧᤘᤕᤡᤒᤠᤴ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤐᤥ᤺ᤱᤔᤠ ᤛᤢᤰᤋᤧᤸᤗᤧᤃ ᤀᤡᤱᤃᤠ᤹ ᤁᤢᤓᤠ᤹ ᤐᤡᤔᤠᤖᤧ ᤗᤠᤃᤡ ᤂᤡᤏᤡ᤹ ᤔᤡᤰᤜᤠ᤹ᤀᤠᤱ ᤁᤧᤕᤃᤢᤶ ᤁᤧᤗ᤺ᤳᤋᤢᤶᤔᤠᤱ ᤀᤡᤱᤃᤠ᤹ ᤕᤠᤵᤔᤡ ᤐᤡᤔᤠ ᤁᤧᤛᤢᤰᤋᤡᤔᤧᤴ ᤑᤠ᤹ᤀᤠᤱ ᤐᤠ᤺ᤵᤔᤠ ᤛᤢᤰᤋᤢᤱ॥
GAL 4:16 ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤒᤠᤸᤗᤧ ᤀᤠᤸᤗᤥ ᤂᤡᤏᤡ᤹ ᤏᤡᤱᤔᤡ ᤐᤥ᤺ᤰᤂᤠᤱᤒᤠᤒᤡ᥅
GAL 4:17 ᤂᤧᤴ ᤔᤏᤠᤜᤠ᤹ᤖᤧᤃ ᤂᤡᤏᤡ᤹ ᤂᤢᤏᤡ᤹ ᤗᤧᤵᤔᤠᤱ ᤀᤢ᤺ᤱᤔᤠᤛᤡ ᤑᤠ᤹ᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰ ᤛᤶᤗᤥ. ᤁᤖ ᤁᤴ ᤂᤡᤏᤡ᤹ᤗᤠᤃᤡ ᤏᤢ᤺ᤒᤠ ᤔᤧ᤺ᤴᤗᤥ॥ ᤂᤧᤱᤜᤠ᤹ᤖᤧᤃ ᤀᤠᤏᤡᤃᤧ ᤋᤰᤗᤧᤱᤘᤠᤀᤥ ᤁᤧᤒᤥᤃᤡᤀᤠᤱ ᤂᤧᤱᤜᤠ᤹ᤖᤰ ᤁᤧᤍᤡᤶᤍᤢᤶᤛᤡᤶᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥
GAL 4:18 ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤘᤣ᤹ᤜᤠ᤹ᤖᤧ ᤂᤡᤏᤡ᤹ ᤗᤠᤃᤡ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤰ ᤛᤶᤏᤧ ᤑᤠ᤹ᤃᤪ ᤏᤢ᤺ᤒᤠᤖᤥ॥
GAL 4:19 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤂᤪᤡᤛ᤻ᤋᤧᤴ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤔᤧᤶᤒᤥ᤺ᤱᤅᤣ ᤌᤠᤖᤡᤰ ᤀᤡᤱᤃᤠ᤹ᤃ ᤀᤠᤸᤗᤥ ᤕᤠᤶᤔᤥ ᤛᤠᤘᤠ᤺ᤶᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ ᤁᤢᤀᤡᤛᤡ᤺ᤰ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥
GAL 4:20 ᤀᤡᤱᤃᤠ᤹ ᤀᤠᤸᤗᤥ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧ ᤀᤰᤂᤣ ᤐᤠ᤺ᤵᤔᤠ ᤔᤧᤒᤥ᤺ᤰᤂᤧᤶᤒᤠ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤜᤧᤰᤁᤣ ᤁᤧᤗ᤹ᤖᤡᤒᤠᤀᤥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤖᤥ॥
GAL 4:21 ᤂᤡᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤘᤠ᤹ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤡ᥅ ᤂᤧᤵᤛᤧᤶᤔᤧ᤹ᤀᤥ᥄ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤡ᥅
GAL 4:22 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤕᤧᤶᤒᤡᤳᤇᤠ᤹ ᤏᤧᤳᤇᤡ ᤘᤕᤧᤳᤇᤡ ᤑᤠ᤹ᤀᤠᤱ ᤐᤠ᤺ᤳᤋᤢ᤹॥ ᤌᤡᤰᤁᤡᤴ ᤛᤣᤘᤠᤖᤥᤔᤠ ᤁᤢᤔᤣ᤺ᤳ ᤗᤧᤵᤔᤠᤱᤒᤠ ᤘᤕᤧ. ᤘᤣ᤹ᤛ᤻ᤔᤠᤴ ᤆᤥ᤺ᤰᤕᤢᤶᤓᤥᤔᤠ ᤁᤢᤔᤣ᤺ᤳ ᤗᤧᤵᤔᤠᤱᤒᤠ ᤘᤕᤧᤖᤥ॥
GAL 4:23 ᤜᤠᤃᤠᤖ ᤔᤧᤵᤔᤏᤠᤔᤠ ᤛᤣᤘᤠᤖᤥᤔᤠ ᤁᤢᤔᤣ᤺ᤳᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤔᤧᤴᤇᤠᤶ ᤏᤡᤱᤘᤠ᤹ᤗᤠᤶ ᤛᤠᤘᤠ᤺ᤴᤇᤡᤱᤒᤠᤖᤥ॥ ᤁᤖ ᤛᤠᤖᤠ ᤔᤧᤵᤔᤏᤠᤔᤠ ᤆᤥ᤺ᤰᤕᤢᤶᤓᤥᤔᤠ ᤀᤠᤒᤠᤅᤣ ᤁᤢᤔᤣ᤺ᤳᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤗᤠᤶ ᤐᤥ᤺ᤰᤂᤧᤒᤠᤖᤥ॥
GAL 4:24 ᤀᤠᤸᤗ ᤁᤴ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤧᤳᤇᤡ ᤔᤠᤱᤜᤢᤵᤐᤡᤸᤗᤧ ᤁᤢᤒᤡᤛᤡᤖᤥ॥ ᤛᤣᤘᤠᤖᤥᤔᤠ ᤜᤠᤃᤠᤖᤖᤧᤱᤃ ᤛᤡᤏᤠᤀᤡ ᤁᤥ᤺ᤰᤔᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤛᤠᤶᤕᤥᤌᤡᤶᤔᤡᤴ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤛᤠᤶᤕᤥᤌᤡᤶᤔᤡᤸᤗᤧ ᤔᤏᤠᤜᤠ᤹ ᤕᤥ᤺ᤰ ᤆᤥᤃᤢᤛᤡᤖᤥ॥
GAL 4:25 ᤀᤠᤸᤗ ᤀᤠᤸᤗᤥᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤖᤒ ᤗᤠᤈᤣ᤹ᤒᤠ ᤛᤡᤏᤠᤀᤡ ᤁᤥ᤺ᤰᤔᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤏᤢ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤖᤧᤰ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤥ᤺ᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥
GAL 4:26 ᤁᤖ ᤆᤥ᤺ᤰᤕᤢᤶᤓᤥᤔᤠ ᤛᤠᤖᤠ᤺ᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤖᤢᤛᤗᤧᤔ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤔᤠᤖᤥ॥
GAL 4:27 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤀᤠᤱ ᤘᤠ᤹. “ᤛᤠᤔᤧᤱᤃᤵᤔᤏᤠᤔᤠᤀᤣ. ᤛ᤺ᤳᤋᤧ᤹ᤀᤥ᥄ ᤂᤧᤏᤧ᤹ ᤛᤠᤃᤧᤴᤘᤠ᤺ᤴᤍᤢᤴᤇᤠᤱ ᤛ᤺ᤳᤋᤧ᤹ᤖ ᤀ᤺ᤰᤋᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤂᤧᤴ ᤘᤣ᤹ ᤔᤧᤴᤇᤢᤔᤠ᤹ᤏᤢ᤺ᤸᤗᤧᤀᤠᤱ ᤛᤠᤔᤧᤱᤃᤵᤔᤏᤠᤔᤠᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤕᤖᤡᤰ ᤔᤧᤒᤥ᤺ᤱᤗᤥ॥”
GAL 4:28 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤀᤡᤛᤜᤠᤁ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤔᤢ᤹ᤀᤡᤍᤠᤱᤛᤠᤏᤡᤱᤗᤥ॥
GAL 4:29 ᤁᤖ ᤂᤧᤴ ᤕᤥ᤺ᤰᤔᤠ ᤔᤣ᤺ᤳᤋᤡᤸᤗᤧ ᤁᤢᤛ᤻ᤛᤠ᤺ ᤀᤡᤛ᤻ᤔᤠᤀᤣᤗᤖᤧ ᤔᤠᤱᤜᤧᤰᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤡᤛᤜᤠᤰᤁᤡᤴ ᤋᤢᤰᤂᤣ ᤆᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤛᤣᤛᤣᤔᤠᤱᤗᤠᤶ ᤀᤠᤏᤡ᤹ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ᤀᤠᤱ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤋᤢᤰᤂᤣ ᤀᤠᤶᤈᤠ᤺ᤳᤗᤥ॥
GAL 4:30 ᤁᤖ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤌᤣ ᤐᤠ᤺ᤳᤋᤢ᤹᥅ “ᤛᤣᤘᤠᤖᤥᤔᤠ ᤔᤧᤴᤇᤢᤔᤠ᤹ᤀᤡᤴ ᤏᤢ ᤁᤢᤛ᤻ᤛᤠ᤺ᤴ ᤏᤠ᤺ᤳᤋᤧᤍᤣ᤺ᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤣᤘᤠᤖᤥᤔᤠᤸᤗᤧ ᤁᤢᤛ᤻ᤛᤠ᤺ᤴ ᤆᤥ᤺ᤰᤕᤢᤶᤓᤥᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤴᤏᤢ ᤛᤥᤖᤡᤰ ᤗᤰ ᤁᤧᤄᤥ᤺ᤒᤠ ᤐᤥ᤺ᤱᤔᤠ ᤔᤧᤛᤢᤰᤏᤧᤴᤗᤥ॥”
GAL 4:31 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ᤃ ᤛᤣᤘᤠᤖᤥᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤛᤡ ᤔᤧ᤺ᤴᤗᤥ. ᤁᤖ ᤀᤠᤏᤡ᤹ᤃ ᤆᤥ᤺ᤰᤕᤢᤶᤓᤥᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ॥
GAL 5:1 ᤂᤪᤡᤛ᤻ᤋᤖᤧ ᤛᤧᤰᤂᤠᤀᤣ ᤆᤥ᤺ᤰᤕᤢᤶᤓᤥ ᤀᤠᤒᤡᤖᤧᤀᤠᤱ ᤘᤠ᤹. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤆᤥ᤺ᤰᤕᤢᤶᤓᤥᤀᤥ ᤔᤧᤶᤔᤢᤴᤏᤣ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤥ᤺ᤰ ᤕᤠᤶᤔᤥ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹ᤀᤥ॥
GAL 5:2 ᤀᤡᤱᤃᤠ᤹ ᤐᤠᤘᤗᤖᤧ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄ ᤜᤷᤍᤥ ᤜᤧᤰᤔᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤡᤏᤡ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤂᤪᤡᤛ᤻ᤋᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤗᤠᤃᤡ ᤜᤏᤧᤒᤠᤖᤰ ᤐᤥ᤺ᤱᤗᤥ॥
GAL 5:3 ᤀᤡᤱᤃᤠ᤹ ᤕᤠᤶᤔᤥ ᤔᤧᤳᤏᤡᤱ. ᤜᤷᤍᤥ ᤜᤧᤰᤔᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤡᤏᤡ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶᤔᤥ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤀᤣ ᤐᤥ᤺ᤱᤗᤥ॥
GAL 5:4 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤂᤪᤡᤛ᤻ᤋᤗᤠᤶ ᤁᤧᤛᤧᤴᤍᤡ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤔᤠ᤺ᤱᤄᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
GAL 5:5 ᤁᤖ ᤀᤠᤏᤡ᤹ ᤏᤛᤠ᤺ᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤱ ᤁᤧᤗ᤹ᤒᤠ ᤏᤡᤱᤛᤠᤱᤅᤡᤴ ᤛᤣᤛᤣᤔᤠᤱᤅᤡᤸᤗᤧ ᤜᤠᤱᤔᤠ ᤀᤠᤓᤠ᤹ᤖᤥ॥
GAL 5:6 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤗᤠᤃᤡᤃ ᤜᤷᤍᤥ ᤜᤧᤰᤔᤠ ᤏᤢ ᤔᤧᤴᤜᤧᤰᤔᤠ ᤐᤠ᤺ᤴᤏᤡᤴ ᤌᤣᤀᤠᤱ ᤔᤧ᤺ᤴᤗᤥ॥ ᤁᤖ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤐᤠ᤺ᤴᤏᤡᤱᤃ ᤀᤠᤏᤡ᤹ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤛᤡᤶᤗᤥ॥
GAL 5:7 ᤂᤡᤏᤡ᤹ᤃ ᤏᤢ᤺ᤖᤡᤰᤁᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹. ᤁᤖ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤜᤠ᤺ᤳᤗᤧ ᤁᤧᤛᤠᤰᤋᤡᤒᤣ᥅
GAL 5:8 ᤁᤴ ᤐᤠ᤺ᤴᤏᤡᤱᤃ ᤛᤧᤰᤂᤠᤛᤠᤱ ᤂᤡᤏᤡ᤹ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤧ᤺ᤴᤗᤥ॥
GAL 5:9 ᤂᤖᤧ᤺ᤱ ᤁᤧᤓᤱᤒᤠ ᤆᤩ᤹ᤛᤡᤰ ᤛᤡᤍᤠ᤹ᤀᤡᤸᤗᤧ ᤁᤧᤖᤧᤰ ᤑᤣ᤹ᤖᤢᤶᤔᤡᤴ ᤕᤢᤰᤋᤢᤒᤠ ᤁᤢᤀᤡᤛᤡ᤺ᤰ ᤗᤳᤇᤠ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤑᤧᤳᤗᤠ᤺ᤴᤍᤢᤛᤡ᤹ᤖᤥ॥
GAL 5:10 ᤂᤧᤴ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤍᤠᤱᤒᤠᤴ ᤋᤠ᤺ᤰᤐᤥ ᤆᤥᤃᤢᤱᤗᤥ॥ ᤏᤡᤱᤘᤠ᤹ ᤁᤧᤓᤥ᤺ᤵᤐᤠ ᤏᤢ ᤋᤢᤰᤂᤣ ᤁᤧᤈᤠ᤺ᤵᤐᤠ ᤀᤠᤳᤋᤡᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢ᤹ᤖᤥ॥
GAL 5:11 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤢᤓᤠᤖᤧ ᤔᤧᤒᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤀᤠᤸᤗᤛᤠᤱ ᤜᤷᤍᤥ ᤜᤧᤰᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤱᤅᤡᤸᤗᤧ ᤌᤣᤀᤠᤱ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤒᤠᤒᤣ᥅ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤥᤗᤠᤶ ᤛᤧᤴᤗᤵ ᤂᤥ᤺ᤍᤧᤳᤗᤥ ᤗ᤹ᤖᤡᤰ ᤀᤡᤱᤓᤴ ᤔᤧᤈᤥᤃᤢᤱᤅᤡᤴᤏᤧ ᤑᤠ᤹ᤃᤪ ᤀᤠᤳᤋᤡᤸᤗᤧᤀᤠᤱ ᤁᤢᤛᤡᤰ ᤔᤧᤄᤧᤅᤧᤴᤒᤠᤔᤧᤴ॥
GAL 5:12 ᤂᤡᤏᤡ᤹ ᤏᤡᤱᤘᤠ᤹ ᤑᤧᤳᤁᤧᤗᤠ᤺ᤶᤒᤠᤜᤠ᤹ᤖᤧᤃ ᤜᤷᤍᤥ ᤜᤧᤰᤔᤠᤖᤰ ᤔᤧ᤺ᤴ. ᤁᤖ ᤁᤢᤒᤢᤱ ᤌᤧᤖᤧ᤺ᤵ ᤔᤧᤜᤧᤃᤢᤛᤠᤱ ᤐᤥ᤺ᤱᤒᤠᤖᤥ॥
GAL 5:13 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤕᤢᤶᤓᤥ ᤐᤥ᤺ᤱᤛᤧ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹॥ ᤂᤧᤱᤃ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤸᤗᤧ ᤔᤢᤖᤠ ᤁᤧᤔᤧᤳᤋᤡᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤕᤠᤶᤍᤠᤍᤠ ᤆᤥ᤺ᤰᤔᤠᤖᤧ ᤗᤠᤃᤡ ᤔᤧ᤺ᤴᤗᤥ. ᤁᤖ ᤗᤢᤱᤔᤠ᤹ ᤋᤢᤰᤛᤡᤱᤔᤠᤀᤠᤱ ᤁᤢᤓᤠ᤹ ᤐᤡᤛᤡᤱᤔᤠᤖᤧ ᤗᤠᤃᤡᤏᤧᤖᤥ॥
GAL 5:14 ᤌᤣᤀᤠᤱᤓᤧᤸᤗᤧ ᤁᤠᤰ ᤛᤠᤶᤕᤥᤌᤡᤶᤔᤡᤴ ᤗᤳᤇᤠ ᤀᤡᤱᤈᤠ᤺ᤱᤅᤥ ᤁᤧᤖᤧᤀᤠᤱ ᤘᤠ᤹ᤖᤥ. “ᤀᤠᤒᤠᤅᤣ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡ᤺ᤰ ᤁᤧᤒᤠᤱᤓᤣ᤹ᤛᤠᤒᤠᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ॥”
GAL 5:15 ᤁᤖ ᤂᤡᤏᤡ᤹ ᤁᤧᤜᤠ᤹ᤀᤠᤛᤡ ᤁᤧᤕᤧ᤺ᤱᤅᤠᤛᤡᤸᤗᤧᤃ ᤔᤧᤒᤥ᤺ᤱᤏᤧᤸᤗᤥ. ᤁᤖ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤀᤠᤒᤠᤅᤣ ᤁᤧᤔᤧᤱᤅᤠᤛᤡ᤹ᤖᤥ॥
GAL 5:16 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤏᤡᤱ. ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥ᤺ᤛᤡᤒᤠ ᤁᤢᤀᤡᤛᤡ᤺ᤰ ᤘᤕᤧᤶᤔᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤧᤴᤈᤥᤃᤢᤶᤔᤡᤴᤗᤥ॥
GAL 5:17 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤴᤏᤠᤱ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤍᤱᤛᤡᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤛᤍᤠᤍᤡᤱ ᤁᤧᤴᤈᤥᤃᤢᤶᤔᤡᤴᤗᤥ॥
GAL 5:18 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥ᤺ᤛᤡᤒᤠ ᤁᤢᤀᤡᤛᤡ᤺ᤰ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤀᤰᤂᤣ ᤜᤧᤰᤁᤣ ᤆᤥᤃᤧ᤹ ᤑᤠ᤹ᤀᤠᤱ ᤔᤧᤶᤔᤧᤳᤋᤣ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤂᤡᤏᤡ᤹ ᤀᤠᤒᤠᤅᤣ ᤁᤧᤈᤥᤃᤢᤶᤗᤥ॥
GAL 5:19 ᤗᤠᤕᤥᤒᤠ ᤏᤡᤱᤘᤠ᤹ᤗᤠᤶ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤜᤠ᤹ ᤏᤡᤎᤠ᤺ᤵᤗᤥ॥ ᤂᤧᤱᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢ᤹. ᤛᤡᤖᤡᤱ ᤀᤠᤔᤔᤒᤠ ᤕᤠ᤺ᤶᤒᤰ ᤔᤧᤈᤥᤃᤢ᤹.
GAL 5:20 ᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤔᤧᤈᤥᤃᤢ᤹. ᤁᤡᤳᤆᤠᤰ ᤔᤧᤈᤥᤃᤢ᤹. ᤔᤏᤠᤜᤠ᤹ ᤔᤧᤈᤡ᤺ᤳᤋᤢᤛᤡ᤹. ᤂᤧᤔᤠ᤹ ᤔᤧᤓᤥ᤺ᤰᤂᤢ᤹. ᤔᤏᤠᤜᤠ᤹ ᤏᤠᤔᤧᤜᤧᤳᤋᤢᤛᤡ᤹. ᤂᤢᤏᤡ᤹ ᤛᤡᤰ ᤐᤥ᤺ᤰ. ᤀᤠᤏᤡᤃᤧᤖᤰ ᤆᤥᤃᤢᤶᤒᤧ ᤐᤠ᤺ᤳᤋᤢᤶᤒᤧ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤀᤣ᤺ᤰ ᤛᤧᤴᤇᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤌᤢᤰᤛᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹.
GAL 5:21 ᤘᤣ᤹ᤜᤠ᤹ᤖᤧ ᤔᤧᤈᤥᤃᤢ ᤔᤧᤈᤒᤠᤴ ᤀᤥᤔᤧᤵᤔᤠ ᤔᤧᤴᤇᤢᤰᤋᤢᤴ. ᤌᤡ᤺ᤸᤗᤧ ᤔ᤺ᤛᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤕᤠᤶᤍᤠᤍᤠ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤒᤠ ᤜᤧᤰᤋᤱᤒᤠ ᤘᤣ᤹ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢ᤹ᤖᤥ॥ ᤋᤃᤡᤒᤠ ᤁᤢᤀᤡᤛᤡ᤺ᤰ ᤛᤠᤶᤍᤡᤱ ᤐᤡᤏᤡᤱᤗᤥ. ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤰ ᤂᤥ᤺ᤔᤠ ᤔᤧᤴᤇᤢᤰᤋᤢᤴᤗᤥ॥
GAL 5:22 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤛᤡᤒᤠ ᤔᤏᤠᤜᤠ᤹ᤖᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡ᤹. ᤂᤧᤱᤜᤠ᤹ ᤔᤧᤛ᤺ᤳ. ᤛᤏᤠᤖᤢᤱᤅᤥ ᤔᤧᤘᤠ᤹. ᤏᤠᤛᤡ ᤔᤧᤎ᤺ᤳ. ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤏᤢ᤺ᤖᤡᤰ ᤔᤧᤔᤧᤳᤋᤢᤛᤡ᤹. ᤂᤧᤱᤜᤠ᤹ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥ᤺ᤰ. ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤧᤈᤥ᤺ᤰ.
GAL 5:23 ᤂᤧᤱᤜᤠ᤹ ᤏ᤺ᤶᤏ᤺ᤶ ᤔᤧᤗ᤹ ᤜᤧᤰᤁᤩᤠᤱ ᤏᤠᤛᤡ ᤔᤧᤎ᤺ᤳᤗᤥ॥ ᤀᤰᤋᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤌᤡᤶ ᤜᤥ᤺ᤵᤗᤥ॥
GAL 5:24 ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤗᤠᤕᤥᤒᤠ ᤏᤡᤱᤘᤠ᤹ ᤏᤢ ᤂᤧᤸᤗᤧ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤢᤰᤁᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤀᤠᤱ ᤘᤠ᤹ᤖᤥ॥
GAL 5:25 ᤛᤣᤛᤣᤔᤠᤱᤅᤡᤸᤗᤧ ᤀᤠᤏᤡ᤹ ᤁᤢᤛᤱ ᤜᤡᤱᤔᤴ ᤀᤠᤒᤡᤖᤧᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤘᤕᤡᤖᤥ॥
GAL 5:26 ᤀᤠᤏᤡ᤹ᤃ ᤀᤠᤱᤍᤡᤱ ᤗ᤹ᤖᤡ ᤔᤧ᤺ᤴ. ᤛᤡᤰ ᤑᤥ᤺ᤱᤛᤡᤱ ᤐᤡᤛᤡᤱᤔᤠ ᤔᤧ᤺ᤴ. ᤜᤧᤰᤁᤩᤠᤱ ᤏᤠᤜᤧᤳᤇᤡᤱᤔᤠ ᤔᤧ᤺ᤴᤗᤥ॥
GAL 6:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤏᤢᤛᤠ᤹ᤎᤡᤰ ᤗᤠᤕᤥᤀᤥ ᤌᤠ᤺ᤸᤗᤧ ᤂᤡᤏᤡ᤹ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥᤛᤡᤒᤠᤜᤠ᤹ᤖᤧ ᤏ᤺ᤶᤏ᤺ᤶᤔᤠᤱ ᤂᤧᤴ ᤋᤥ᤺ᤴᤍᤧᤶᤔᤧ᤹ᤀᤥ॥ ᤁᤖ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤗᤠᤕᤥᤀᤥ ᤌᤠ᤺ᤔᤠ ᤁᤧᤛᤢᤰᤋᤡ᤹ᤖᤥ॥
GAL 6:2 ᤀᤡᤏᤥᤃᤧᤴ ᤋᤢᤰᤂᤣᤀᤥ ᤑᤠ᤹ᤀᤠᤛᤡᤶᤔᤧ᤹ᤀᤥ॥ ᤀᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤖᤧ ᤀᤠᤒᤡᤖᤧᤒᤠ ᤛᤠᤶᤕᤥᤌᤡᤶᤔᤡᤴ ᤁᤧᤃᤧᤳᤋᤢᤶᤗᤥ॥
GAL 6:3 ᤂᤧᤏᤧ᤹ ᤁᤧᤕᤧᤰᤐᤠ ᤁᤧᤴᤈᤥ᤺ᤰᤏᤧᤴᤇᤠᤱ ᤘᤣ᤹ᤜᤠ᤹ ᤁᤢᤓᤠ᤹ ᤐᤡᤔᤠᤛᤡᤀᤥ ᤘᤣ᤹ ᤔᤏᤠᤜᤠ᤹ᤏᤢ᤺ᤸᤗᤧ ᤁᤧᤕᤧᤰᤐᤠ ᤆᤥ᤺ᤰᤁᤠ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤇᤡᤱᤏᤧ ᤑᤠ᤹ᤃᤪ ᤀᤠᤒᤠᤅᤣ ᤀᤡᤱᤃᤧᤗᤧᤰᤛᤡᤱᤗᤥ॥
GAL 6:4 ᤁᤖ ᤂᤡᤏᤡ᤹ ᤜᤡᤱᤔᤴᤏᤥ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤰᤗᤧ ᤀᤠᤒᤠᤅᤣ ᤁᤧᤛᤠ᤹ᤖᤢᤶᤗ ᤐᤥ᤺ᤱ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤏᤢ ᤔᤧᤴᤍᤱᤛᤡᤱᤅᤣ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤏᤡᤱᤘᤠ᤹ ᤋᤠ᤺ᤖᤥ॥
GAL 6:5 ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤁᤢ᤺ᤔᤠ ᤁᤧᤒᤥ᤺ᤱᤒᤠ ᤗᤰᤐᤧᤴᤖᤧᤴ ᤁᤰᤜᤠ᤹ ᤀᤠᤒᤠᤅᤣ ᤁᤢ᤺ᤔᤠᤀᤣ ᤐᤥ᤺ᤱᤗᤥ॥
GAL 6:6 ᤐᤠ᤺ᤴᤈᤠᤰ ᤁᤧᤜᤢ᤹ᤛᤡᤱᤒᤠᤸᤗᤧ ᤂᤢᤏᤧ᤹ ᤁᤳᤋᤢᤒᤠ ᤁᤠᤰ ᤏᤢ᤺ᤒᤠ ᤐᤠ᤺ᤴᤜᤠ᤹ ᤁᤢᤛᤡᤰᤛᤠᤶᤒᤠᤜᤠ᤹ᤏᤢ ᤜᤠ᤺ᤔᤠ ᤐᤥ᤺ᤱᤗᤥ॥
GAL 6:7 ᤂᤡᤏᤡ᤹ ᤀᤡᤱᤔᤧᤗᤧᤰᤁᤠᤛᤡᤶᤔᤡᤴᤏᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤏᤠ᤺ᤴᤍᤡ ᤐᤡᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ ᤔᤏᤠ᤺ᤸᤗᤧ ᤌᤧᤔᤠ᤺ᤴ ᤋᤣ᤺ᤛᤢ᤹. ᤜᤠᤒᤠ ᤂᤧᤴ ᤛᤢᤵᤛᤢ᤹ᤖᤥ॥
GAL 6:8 ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤠᤕᤥᤒᤠ ᤁᤢᤏᤡᤱᤘᤠ᤹ᤀᤡᤴ ᤁᤢᤏᤡᤱᤘᤠ᤹ ᤋᤠ᤺ᤔᤠᤀᤥᤖᤰ ᤋᤣ᤺ᤛᤢ᤹. ᤂᤧᤸᤗᤧ ᤗᤠᤕᤥᤒᤠ ᤁᤢᤏᤡᤱᤘᤠ᤹ᤗᤠᤶ ᤛᤡ᤺ᤔᤧᤴ ᤛᤢᤵᤛᤢ᤹ᤖᤥ॥ ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠᤀᤥ ᤋᤣ᤺ᤛᤢ᤹. ᤂᤧᤸᤗᤧᤃ ᤛᤣᤛᤣᤔᤠᤱᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤛᤢᤵᤛᤢ᤹ᤖᤥ॥
GAL 6:9 ᤀᤠᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤏᤠ᤺ᤛ᤻ᤛᤡ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤸᤗᤧᤖᤢᤶᤔᤡᤴᤏᤧ ᤑᤠ᤹ᤃᤪ ᤛᤢᤕᤧᤶᤔᤥ ᤀᤠᤏᤡ᤹ ᤔᤢ᤹ᤀᤡᤛᤠᤶ ᤀᤠᤛᤢᤵᤛᤢᤶᤗᤥ॥
GAL 6:10 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤛᤢᤕᤧᤶ ᤀᤠᤄᤥ᤺ᤛᤢᤶᤔᤡᤸᤗᤧ ᤁᤠᤰ ᤔᤏᤠᤜᤠ᤹ ᤏᤢ᤺ᤖᤡᤰ ᤔᤧᤵᤔᤠᤛᤡ ᤐᤥ᤺ᤱᤗᤥ॥ ᤁᤢᤏᤥ-ᤁᤢᤒᤡ᤹ᤀᤥᤃ ᤀᤠᤏᤡ᤹ ᤏᤛᤠᤏᤡᤒᤠ ᤜᤡᤶᤛᤕᤱᤜᤠ᤹ ᤏᤢ᤺ᤖᤡᤰ ᤔᤧᤵᤔᤠᤛᤡ ᤐᤥ᤺ᤱᤗᤥ॥
GAL 6:11 ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤕᤶᤕᤶᤒᤠ ᤛᤰᤛᤣ᤹ᤜᤠ᤹ᤀᤥ ᤁᤴ ᤁᤢᤏᤢᤵ ᤐᤠ᤺ᤴᤜᤠ᤹ ᤛᤠᤵᤋᤢᤱᤒᤠᤖᤥ॥
GAL 6:12 ᤂᤧᤴ ᤜᤷᤍᤥ ᤜᤧᤰᤔᤠ ᤁᤧᤒᤠᤱᤒᤠᤜᤠ᤹ᤖᤧ ᤘᤣ᤹ᤜᤠ᤹ᤖᤧ ᤏᤢ᤺ᤒᤠ ᤔᤧᤏᤡ᤺ᤛᤡᤃᤧᤖ ᤑᤠ᤹ᤀᤠᤱ ᤜᤧᤰᤁᤣ ᤔᤧᤈᤥᤃᤢᤒᤠᤖᤥ॥ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤀᤡᤱᤓᤥ᤺ᤔᤠᤸᤗᤧ ᤁᤧᤍᤠ᤺ᤒᤠ ᤋᤢᤰᤂᤣ᤺ᤴ ᤔᤧᤃᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤜᤷᤍᤥ ᤜᤧᤰᤔᤠ ᤁᤧᤶᤒᤠᤱᤄᤡᤒᤠᤖᤥ॥
GAL 6:13 ᤁᤖ ᤂᤧᤴ ᤜᤷᤍᤥ ᤁᤧᤜᤧᤰᤐᤠᤜᤠ᤹ᤖᤧ ᤀᤠᤒᤠᤅᤣᤀᤠᤱ ᤛᤠᤶᤕᤥᤌᤡᤶᤔᤡᤴ ᤔᤧᤴᤏᤠ᤺ᤳᤋᤢᤴᤗᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤀᤠᤱᤍᤡᤱ ᤗ᤹ᤔᤠ ᤔᤧᤄᤥ᤺ᤖ ᤑᤠ᤹ᤀᤠᤱ ᤜᤷᤍᤥ ᤜᤧᤰᤔᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤶᤒᤠᤱᤄᤡ᤹ᤖᤥ॥
GAL 6:14 ᤁᤖ ᤀᤡᤱᤃᤠ᤹ᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤡᤗᤠᤶᤛᤠᤰᤔᤠ ᤁᤢᤛᤡᤱᤅᤡᤴᤏᤢ᤺ᤸᤗᤧ ᤘᤣ᤹ ᤌᤧᤔᤠᤀᤥᤀᤠᤱ ᤀᤠᤱᤍᤡᤱ ᤔᤧᤗ᤹ᤀᤠᤴᤗᤥ॥ ᤂᤪᤡᤛ᤻ᤋᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤧᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤗᤠᤃᤡ ᤌᤣᤀᤠᤱ ᤔᤧ᤺ᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤀᤠᤱ ᤀᤡᤱᤃᤠ᤹ ᤌᤣᤀᤠᤱ ᤔᤧ᤺ᤴᤏᤠᤖᤥ॥
GAL 6:15 ᤜᤷᤍᤥ ᤜᤧᤰᤔᤠᤛᤠᤱ ᤔᤧᤴᤜᤧᤰᤔᤠᤛᤠᤱ ᤌᤣᤀᤠᤱ ᤔᤧᤒᤥ᤺ᤱᤏᤧᤸᤗᤥ. ᤁᤖ ᤁᤢᤛᤱ ᤔᤏᤠ ᤐᤥ᤺ᤱᤔᤠᤴᤏᤣ ᤕᤶᤒᤠ ᤐᤠ᤺ᤴᤗᤥ॥
GAL 6:16 ᤁᤴ ᤐᤠ᤺ᤴᤏᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤏᤠᤖᤢᤱ ᤁᤧᤒᤡᤖᤡᤖ ᤜᤧᤰᤁᤩᤠᤱ ᤗᤢᤱᤔᤠ᤹ ᤁᤧᤍᤢᤰᤋᤡᤖᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤛᤱ ᤀᤡᤛᤪᤠᤀᤡᤗᤡᤛᤡᤖᤥ॥
GAL 6:17 ᤁᤢᤏᤢᤵᤔᤠᤀᤥ. ᤀᤡᤱᤃᤠ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤋᤢᤰᤂᤣ ᤔᤧᤴᤈᤠ᤺ᤳᤋᤠᤴᤗᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤧᤛᤢᤖᤧ ᤁᤢᤕᤥ᤺ᤰᤐᤠᤀᤠ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤔᤡᤰᤛᤣ᤺ᤴᤜᤠ᤹ ᤁᤳᤋᤢᤱᤗᤥ॥
GAL 6:18 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥
EPH 1:1 ᤀᤣᤑᤡᤛᤛ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋ ᤕᤧᤛᤢ᤺ᤴ ᤁᤧᤍᤡᤶᤒᤠ ᤏᤛᤠ᤺ᤴᤛᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠᤛᤣ. ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤠᤱᤒᤠ ᤀᤡᤱᤃᤠ᤹ ᤐᤠᤘᤗᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥
EPH 1:2 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤁᤧᤒᤡᤖᤡᤖ॥
EPH 1:3 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ॥ ᤂᤢᤏᤧ᤹ᤀᤣ ᤕᤧᤛᤢ ᤂᤪᤡᤛ᤻ᤋᤗᤠᤶ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤧᤖᤧᤰ ᤕᤠᤶᤛᤠᤶᤃᤧᤴ ᤔᤢ᤹ᤀᤡᤛᤠᤶᤔᤡᤸᤗᤧ ᤀᤠᤏᤡ᤹ ᤔᤢ᤹ᤀᤡᤛᤠᤒᤠ ᤀᤠᤈᤥᤃᤧᤀᤠᤱ ᤘᤠ᤹॥
EPH 1:4 ᤂᤢᤏᤧ᤹ ᤁᤢᤏᤡ᤺ᤔᤠᤀᤥ ᤛᤣᤛᤣ ᤏᤢ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤂᤪᤡᤛ᤻ᤋᤧᤸᤗᤧ ᤆᤥᤃᤢᤸᤗᤧ ᤀᤡᤰᤛᤠ ᤂᤠᤶᤒᤣ᤺ᤰ ᤐᤥ᤺ᤱᤔᤠᤏᤢ᤺ᤸᤗᤧ ᤋᤃᤡᤛᤠ ᤀᤠᤛᤣᤃᤧᤀᤠᤱ ᤘᤕᤧ॥ ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ
EPH 1:5 ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤢᤛᤡᤖᤠ᤹ ᤌᤠᤅᤧᤖ ᤕᤧᤛᤢ ᤂᤪᤡᤛ᤻ᤋᤗᤠᤶ ᤁᤢᤛ᤻ᤛᤠ᤺ ᤐᤥ᤺ᤱᤛᤧ ᤋᤃᤡᤏᤢᤀᤣ ᤀᤠᤏᤡ᤹ ᤀᤠᤛᤣᤃᤧᤀᤠᤱ ᤘᤕᤧᤖᤥ॥
EPH 1:6 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤛ᤻ᤛᤠ᤺ᤴᤗᤠᤶᤒᤠ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤁᤢᤏᤠᤖᤠ ᤑᤥ᤺ᤛᤢᤶᤗᤥ॥
EPH 1:7 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤀᤠᤒᤡᤖᤧᤖ ᤀᤠᤎᤧ᤹ᤖᤧᤀᤠᤱ ᤘᤠ᤹॥
EPH 1:8 ᤛᤠ᤹ᤖᤡᤰᤁᤣ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ᤖᤥ᥄
EPH 1:9 ᤁᤠᤰ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤂᤠᤛᤡᤱ ᤏᤡ᤺ᤵᤔᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤗᤠᤶᤒᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤛᤡᤒᤡ᤹ ᤐᤠ᤺ᤴᤏᤡᤴ ᤁᤢᤛᤡᤖᤠ᤹ ᤌᤠᤅᤧᤖ ᤁᤢᤛᤡᤱ ᤏᤡ᤺ᤵᤔᤠ ᤀᤠᤒᤠᤱᤄᤧᤀᤠᤱ ᤘᤠ᤹॥
EPH 1:10 ᤜᤧᤰᤁᤩᤠᤱ ᤛᤢᤕᤧᤶᤔᤡᤴ ᤁᤧᤳᤋᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤕᤢᤰ ᤆᤥᤃᤢᤖ ᤑᤠ᤹ᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠ ᤂᤠᤶᤒᤣ᤺ᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤠᤖᤢ᤹ᤖᤥ॥
EPH 1:11 ᤂᤪᤡᤛ᤻ᤋᤧᤴᤏᤢ ᤌᤡᤰᤜᤢᤵ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤀᤠᤱ ᤂᤢᤏᤧ᤹ᤗᤠᤶ ᤗᤰ ᤂᤥ᤺ᤛᤧ ᤀᤠᤛᤣᤃᤧᤀᤠᤱ ᤀᤠᤘᤠ᤹. ᤌᤣᤀᤠᤱᤓᤧᤸᤗᤧ ᤁᤱᤃ ᤋᤃᤡᤏᤢᤛᤠ ᤂᤢᤏᤧ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤜᤧᤰᤁᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥ᤺ᤱᤗᤥ॥
EPH 1:12 ᤜᤧᤰᤁᤣᤗ᤹ᤖᤡᤰ ᤀᤠᤏᤡᤃᤧ ᤕᤜᤢᤍᤡᤜᤠ᤹ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤪᤡᤛ᤻ᤋᤀᤥ ᤏᤡᤱᤛᤠᤱ ᤁᤧᤈᤥ᤺ᤰᤐᤠᤜᤠ᤹ᤀᤣ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤁᤧᤓᤥ᤺ᤒᤠ ᤐᤥ᤺ᤰᤂᤡᤃᤧᤖᤖᤥ॥
EPH 1:13 ᤀᤠᤸᤗ ᤂᤡᤏᤡ᤹ᤀᤠᤱ ᤛᤧᤰᤂᤠᤒᤠ ᤐᤠ᤺ᤴᤈᤠᤰ ᤛᤧᤴᤗᤵᤖᤧᤴ ᤛᤢᤏᤠᤀᤡᤱ ᤁᤧᤄᤧᤵᤛᤢᤶᤗᤥ. ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥᤃᤢᤶᤒᤠ ᤕᤧᤶᤔᤥ ᤂᤡᤏᤡ᤹ᤃ ᤀᤠᤔᤏᤠᤏᤡᤱ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤛᤣᤛᤣᤔᤠᤱᤅᤡᤴ ᤁᤧᤒᤡᤖᤡᤀᤠᤱ ᤘᤠ᤹ᤖᤥ॥
EPH 1:14 ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤌᤧ᤹ᤔᤠ ᤀᤠᤴᤇᤢ᤺ᤳᤏᤧᤴᤗ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤀᤠᤈᤥᤃᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤀᤠᤒᤡ᤹ ᤗ᤹ᤖᤡᤰ ᤛᤣᤛᤣᤔᤠᤱᤅᤡᤴ ᤋᤧᤴᤕᤠᤱ ᤁᤢᤀᤡᤛᤡ᤺ᤰ ᤀᤠᤒᤡᤖᤧᤒᤠᤖᤥ॥ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤁᤧᤓᤥ᤺ᤒᤠ ᤀᤠᤏᤡ᤹ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤒᤠᤖᤥ॥
EPH 1:15 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤀᤠᤱ ᤍᤠᤱᤒᤠ ᤕᤧᤛᤢ᤺ᤴ ᤁᤧᤈᤥᤃᤢᤶᤒᤠ ᤏᤛᤠ᤺ᤴᤏᤡᤴ ᤏᤢ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠ ᤏᤛᤠᤏᤡᤒᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ
EPH 1:16 ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤏᤥᤃᤧᤴ ᤐᤡᤖᤢᤱᤗᤥ॥ ᤀᤡᤱᤃᤠ᤹ ᤆᤥᤃᤢᤱᤒᤠ ᤋᤢᤘᤠᤀᤥ ᤏᤡᤱᤘᤠ᤹ ᤀᤡ᤺ᤳᤏᤡᤱᤗ
EPH 1:17 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤔᤡᤔᤡᤍᤡᤱᤃᤧᤴ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤁᤧᤒᤡᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤛᤣᤛᤣᤔᤠᤱᤅᤡᤴ ᤁᤧᤒᤡᤖᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥
EPH 1:18 ᤂᤡᤏᤡ᤹ ᤂᤠᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤋᤢᤘᤠ ᤆᤥ᤺ᤰᤁᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤗᤰᤁᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤂᤧᤴ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤔᤡᤔᤡᤍᤡᤱᤃᤧᤴ ᤗᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤏᤢ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹ᤖᤥ॥
EPH 1:19 ᤜᤧᤰᤁᤩᤠᤱ ᤂᤢᤏᤧ᤹ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧ ᤀᤠᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤢᤓᤠ᤹ ᤀᤠᤒᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗᤥ॥ ᤜᤠᤒᤠ ᤂᤧᤴ ᤔᤢᤰᤛᤠᤶᤔᤡᤴ
EPH 1:20 ᤀᤥᤃᤵ ᤆᤥᤃᤢᤸᤗᤧ ᤂᤢᤏᤧ᤹ ᤁᤧᤛᤡ᤺ᤒᤠ ᤂᤪᤡᤛ᤻ᤋᤧᤴ ᤁᤢᤜᤡᤱᤘᤧᤳ ᤆᤥᤃᤢ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤋᤧᤴᤏᤥ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤰᤂᤢᤀᤠᤱ ᤕᤢᤱᤗᤥ॥
EPH 1:21 ᤂᤧᤵᤔᤥ ᤂᤪᤡᤛ᤻ᤋᤖᤧ ᤁᤧᤖᤧᤰ ᤛᤢᤜᤠᤱᤃᤧᤶᤒᤠᤜᤠ᤹. ᤕᤢᤰ ᤁᤧᤃᤵᤐᤠᤜᤠ᤹. ᤔᤢᤰᤛᤠᤶ ᤁᤧᤃᤵᤐᤠᤜᤠ᤹. ᤏᤢ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤜᤠ᤹ ᤛᤶᤍᤠᤱ ᤜᤠᤱ ᤆᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤁᤴ ᤕᤧᤶᤔᤥᤖᤰ ᤔᤧ᤺ᤴ. ᤁᤖ ᤁᤧᤍᤠ᤺ᤒᤠ ᤕᤧᤶᤔᤥᤀᤠᤱ ᤂᤢᤏᤧ᤹ ᤘᤣ᤹ ᤁᤧᤖᤧᤰᤏᤢ᤺ᤸᤗᤧᤀᤠᤱ ᤌᤥᤎᤥᤰᤐᤠ ᤆᤥ᤺ᤰ॥
EPH 1:22 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤕᤢᤰ ᤛᤡᤃᤠᤱ ᤁᤧᤖᤧᤰ ᤕᤢᤰᤂᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤗᤧ ᤗᤠᤃᤡ ᤂᤢᤏᤧ᤹ᤀᤣ ᤁᤧᤖᤧᤰ ᤛᤶᤍᤠᤱ ᤁᤢᤎᤧᤃᤣ᤺ᤰ ᤆᤥᤃᤢᤖᤥ॥
EPH 1:23 ᤀᤠᤸᤗ ᤁᤴ ᤛᤣᤛᤣᤜᤢᤵᤗᤰᤁᤡᤱᤃ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤐᤠ᤺ᤴᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤧᤖᤧᤰ ᤁᤢᤗᤡᤱᤎᤥ ᤁᤧᤳᤋᤢ᤹ᤖᤥ॥
EPH 2:1 ᤁᤧᤒᤣ᤺ᤰᤐᤠ ᤕᤧᤶᤔᤥ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤗᤠᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤁᤧᤛᤩᤧ᤹ᤀᤡᤀᤠᤱ ᤁᤧᤘᤕᤡ॥
EPH 2:2 ᤂᤧᤴ ᤕᤧᤶᤔᤥ ᤂᤡᤏᤡ᤹ᤀᤠᤱ ᤁᤴ ᤂᤠᤶᤒᤣ᤺ᤰᤔᤥᤒᤠ ᤌᤡᤶᤔᤡᤴ ᤏᤢ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤈᤢᤶᤔᤥ ᤜᤠᤱ ᤁᤧᤈᤥ᤺ᤰᤐᤠ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤒᤠ᤺ᤴᤏᤡᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ॥ ᤂᤧᤴ ᤛᤠᤶᤔᤡᤴᤏᤣ ᤏᤡᤱᤘᤠ᤹ᤑᤢᤔᤠᤱ ᤀᤡᤱᤈᤠ᤺ᤱ ᤔᤧᤱᤄᤧᤶᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤕᤠ᤺ᤶᤒᤰ ᤆᤥ᤺ᤰᤗ ᤘᤠ᤹ᤖᤥ॥
EPH 2:3 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤢᤴᤇᤥ᤺ᤴ ᤀᤠᤏᤡ᤹ᤀᤠᤱ ᤕᤠᤶ ᤏᤢ ᤏᤡᤱᤘᤠ᤹ᤀᤡᤸᤗᤧ ᤆᤥ᤺ᤰᤔᤠ ᤁᤥ᤺ᤳᤋᤢᤒᤠ ᤗᤠᤕᤥᤒᤠ ᤗᤠᤶᤔᤥ ᤀᤠᤘᤕᤧ॥ ᤂᤧᤱᤜᤠ᤹ ᤜᤧᤰᤁᤣ ᤀᤠᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤥ ᤁᤧᤎᤠ᤺ᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤕᤧᤖᤥ॥
EPH 2:4 ᤁᤖ ᤛᤠ᤹ᤖᤡᤰ ᤗᤢᤱᤃᤢᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤖᤥ॥
EPH 2:5 ᤀᤠᤏᤡ᤹ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤕᤠᤶᤛᤠᤶᤔᤥ ᤀᤠᤛᤩᤧᤀᤠᤱ ᤀᤠᤘᤕᤧᤛᤠᤱ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤂᤢᤏᤧ᤹ ᤁᤢᤜᤡᤱᤘᤧᤳ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ–ᤂᤢᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤸᤗᤧ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤁᤧᤘᤕᤡ᤹॥
EPH 2:6 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤢᤜᤡᤱᤘᤧᤳ ᤀᤠᤈᤥᤃᤧᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤋᤧᤴᤏᤥ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤀᤠᤕᤢᤰᤂᤧᤀᤠᤱ ᤀᤠᤘᤠ᤹ᤖᤥ॥
EPH 2:7 ᤁᤱᤃ ᤁᤧᤍᤠ᤺ᤒᤠ ᤕᤧᤶᤔᤥ ᤂᤢᤏᤧ᤹ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤒᤠᤖᤥ॥ ᤂᤪᤡᤛ᤻ᤋ ᤕᤧᤛᤢᤗᤠᤶ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠ ᤁᤴ ᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥
EPH 2:8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤗᤠᤶᤒᤠ ᤂᤡᤏᤡ᤹ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤁᤧᤘᤕᤡ᤹॥ ᤁᤱᤃ ᤀᤠᤒᤠᤅᤣ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤗᤠᤶ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤷᤎᤠ᤺ᤶᤔᤡᤸᤗᤧ ᤆᤥᤃᤢᤒᤠᤖᤥ॥
EPH 2:9 ᤔᤏᤠᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤀᤰᤂᤣ ᤐᤥ᤺ᤰᤂᤧᤒᤠ ᤔᤧ᤺ᤴᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤀᤠᤱᤍᤡᤱ ᤗ᤹ᤔᤠ ᤐᤠ᤺ᤴᤏᤣ ᤜᤥ᤺ᤵᤗᤥ॥
EPH 2:10 ᤌᤣᤀᤠᤱᤓᤧᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤪᤡᤛ᤻ᤋ ᤕᤧᤛᤢᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤈᤥᤃᤧᤒᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤀᤠᤏᤡ᤹ ᤀᤠᤈᤥᤃᤢᤶᤗ ᤑᤠ᤹ᤀᤠᤱ ᤋᤃᤡᤛᤠ ᤕᤠᤖᤡᤵ ᤆᤥᤃᤢᤀᤠᤱ ᤘᤕᤧᤒᤠᤖᤥ॥
EPH 2:11 ᤂᤧᤸᤗᤧ ᤆᤥᤃᤢᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤅᤥ ᤛᤠᤃᤧᤘᤠ᤺ᤴᤏᤠᤛᤡᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤜᤷᤍᤥ ᤜᤧᤰᤔᤠ ᤌᤡᤶ ᤁᤧᤃᤵᤐᤠᤛᤡᤃᤧ ᤁᤧᤗ᤹ᤒᤠ ᤕᤜᤢᤍᤡᤜᤠ᤹ᤖᤧ ᤂᤡᤏᤡ᤹ “ᤜᤷᤍᤥ ᤔᤧᤴᤜᤧᤰᤔᤏᤠᤏᤡᤱ” ᤁᤧᤶᤔᤧᤳᤋᤡ᤹ (ᤁᤖ ᤂᤧᤱᤃ ᤔᤏᤠᤜᤠ᤹ᤖᤧ ᤏᤠᤛᤡᤱᤃᤧᤴ ᤌᤰᤁᤥ ᤔᤧᤈᤥᤃᤢᤒᤠ ᤌᤡᤶᤗᤰᤗᤥ)॥
EPH 2:12 ᤂᤧᤴ ᤕᤧᤶᤔᤥ ᤂᤡᤏᤡ᤹ ᤂᤪᤡᤛ᤻ᤋ ᤔᤧ᤺ᤴᤏᤣ. ᤀᤡᤛᤪᤠᤀᤡᤗᤒᤠ ᤕᤰᤕᤢᤱᤒᤠ ᤁᤧᤴᤘᤕᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤏᤡᤱ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤔᤠᤱᤜᤢᤵᤜᤠ᤹ ᤔᤧᤱᤄᤥ᤺ᤔᤏᤠᤒᤠ. ᤏᤡᤱᤛᤠᤱ ᤁᤧᤜᤥ᤺ᤵᤐᤠ ᤏᤢ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤥ ᤏᤡᤱᤘᤠ᤹ᤑᤢᤔᤠᤱ ᤔᤧ᤺ᤴᤏᤣ ᤁᤧᤘᤕᤡᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
EPH 2:13 ᤁᤖ ᤂᤡᤏᤡ᤹ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠ᤺ᤱᤄᤠ ᤁᤧᤘᤕᤡᤛᤠᤱ ᤀᤠᤸᤗᤥ ᤂᤡᤏᤡ᤹ ᤂᤪᤡᤛ᤻ᤋ ᤕᤧᤛᤢ᤺ᤴᤏᤢ ᤌᤡᤰᤜᤢᤵ ᤁᤧᤒᤥ᤺ᤱᤒᤠᤜᤠ᤹ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤏᤡ᤺ᤳᤋᤠᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
EPH 2:14 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤗᤠᤶᤒᤠᤀᤣ ᤀᤠᤏᤡ᤹ ᤛᤏᤠᤖᤢᤱ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹॥ ᤂᤢᤏᤧ᤹ᤀᤣ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤧᤛᤧᤶᤒᤠ ᤏᤡᤱᤔᤡᤃᤧᤴ ᤗᤢᤱᤎᤠᤰ ᤁᤢᤀᤡᤛᤡ᤺ᤰᤐᤠ ᤌᤡᤶᤔᤡᤴ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤕᤛ᤻ᤛᤢᤖ ᤂᤧᤱᤜᤠ᤹ ᤌᤡᤰᤜᤢᤵ ᤆᤥᤃᤢᤛᤡᤀᤠᤱ ᤘᤠ᤹॥
EPH 2:15 ᤂᤢᤏᤧ᤹ᤀᤣ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤥᤒᤠ ᤌᤡᤶᤜᤠ᤹ ᤌᤣᤏᤠᤎᤣᤒᤠ ᤆᤥᤃᤢ॥ ᤂᤢᤏᤧ᤹ᤀᤣ ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤛᤏᤠᤖᤢᤱ ᤋᤠ᤺ᤳᤇᤧ ᤏᤧᤳᤇᤡ ᤛᤢᤘᤠᤱᤗᤠᤶᤒᤠ ᤂᤢᤏᤧ᤹ᤏᤢ ᤌᤡᤰᤜᤢᤵ ᤁᤧᤒᤥ᤺ᤱᤒᤠ ᤗᤳᤇᤠ ᤁᤢᤛᤱ ᤛᤢᤘᤠᤱᤎᤡᤰ ᤆᤥᤃᤢᤀᤠᤱ ᤘᤠ᤹ᤖᤥ॥
EPH 2:16 ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤧᤀᤠᤱ ᤀᤠᤏᤡ᤹ ᤏᤧᤳᤇᤡ ᤛᤢᤘᤠᤱᤒᤠ ᤔᤏᤠᤜᤠ᤹ ᤌᤡᤰᤜᤢᤵᤐᤥ ᤀᤠᤍᤠᤖᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤀᤠᤈᤥᤃᤧ. ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤗᤢᤶᤔᤥᤒᤠ ᤆᤡ᤺ᤳᤇᤡᤱᤔᤠᤴ ᤂᤧᤳᤋᤢᤍᤣ᤺ᤛᤢᤖᤥ॥
EPH 2:17 ᤂᤪᤡᤛ᤻ᤋᤧᤴ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤏᤢ ᤏᤡ᤺ᤳᤋᤠᤱ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ᤀᤥ ᤛᤏᤠᤖᤢᤱᤅᤡᤸᤗᤧᤴ ᤛᤢᤏᤠᤀᤡᤱ ᤛᤧ᤺ᤛᤢᤖᤥ॥
EPH 2:18 ᤂᤢᤏᤧ᤹ᤗᤠᤶᤔᤣ ᤀᤠᤏᤡ᤹ ᤁᤧᤖᤧᤰᤗᤧ ᤌᤡᤰ ᤛᤣᤛᤣᤔᤠᤱ ᤀᤠᤄᤥ᤺ᤛᤢᤶᤔᤠᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣ᤺ᤰᤔᤠ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹ᤖᤥ॥
EPH 2:19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤘᤣ᤹ ᤗᤠᤈᤣ᤹ᤒᤠ ᤏᤢ ᤋᤠᤛᤫᤠᤒᤠᤏᤡᤱ ᤔᤧ᤺ᤴ. ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥᤒᤠ ᤕᤰᤕᤢᤱᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
EPH 2:20 ᤀᤠᤏᤡ᤹ᤃ ᤛᤣ᤺ᤰᤕᤢᤰᤔᤡᤒᤠ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤏᤧᤛ᤻ᤛᤢᤒᤠ ᤜᤡᤶᤐᤠᤱᤕᤰᤁᤥ ᤆᤥ᤺ᤰᤔᤏᤠᤒᤠ ᤜᤡᤶ ᤁᤢᤀᤡᤛᤡ᤺ᤰ ᤀᤠᤈᤥ᤺ᤰ॥ ᤜᤧᤰᤁᤩᤠᤱ ᤂᤧᤴ ᤜᤡᤶᤔᤡᤸᤗᤧᤴ ᤁᤧᤕᤧᤰᤐᤠ ᤁᤢᤶᤔᤠᤗᤢᤱᤅᤡᤱᤃ ᤂᤪᤡᤛ᤻ᤋ ᤕᤧᤛᤢ᤺ᤴᤏᤣᤖᤥ॥
EPH 2:21 ᤂᤢᤏᤧ᤹ᤀᤥᤀᤣ ᤁᤠᤰ ᤜᤡᤶᤔᤡᤴ ᤁᤠᤶᤔᤠᤱ ᤍᤠᤱᤒᤠᤸᤗᤧ ᤗᤠᤃᤡ ᤛᤣᤛᤣᤒᤠ ᤔᤠᤱᤜᤡᤶ ᤐᤥ᤺ᤱᤅᤠᤱ ᤐᤥ᤺ᤖ ᤐᤣ᤺ᤰᤗᤥ॥
EPH 2:22 ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤢᤱᤔᤠᤍᤧᤴ ᤁᤧᤒᤥ᤺ᤰᤂᤡ᤹. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣᤔᤠᤱᤗᤠᤶ ᤕᤢᤱᤗᤥ॥
EPH 3:1 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤐᤠᤘᤗᤖᤧ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧ᤺ᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤠᤱᤒᤠᤖᤥ॥
EPH 3:2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤀᤡᤱᤓᤥ᤺ᤔᤠ ᤗᤰᤐᤧᤴᤏᤡᤴ ᤂᤢᤏᤧ᤹ ᤐᤡᤖᤠᤱᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥
EPH 3:3 ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤠᤱᤒᤠ ᤁᤢᤏᤡᤱᤘᤠ᤹ ᤛᤡᤃᤠᤱᤒᤠ ᤐᤠ᤺ᤴᤗᤥ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤋᤃᤡᤛᤠ ᤔᤡᤛᤠᤰ ᤛᤠᤵᤋᤢᤱᤅᤠᤱ ᤘᤠ᤹ᤖᤥ॥
EPH 3:4 ᤁᤴ ᤛᤰᤀᤡᤱᤄᤱᤅᤡᤴ ᤁᤧᤏᤡ᤺ᤖᤢᤶᤔᤠᤱ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥ᤺ᤛᤢᤱᤒᤠ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤡᤒᤡ᤹ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗᤥ॥
EPH 3:5 ᤂᤧᤴ ᤐᤠ᤺ᤴᤏᤡᤴ ᤁᤧᤒᤣ᤺ᤰᤐᤠ ᤕᤧᤶᤔᤥᤒᤠ ᤔᤏᤠᤜᤠ᤹ᤀᤥ ᤀᤥᤛᤣ᤺ᤴᤍᤠᤱ ᤔᤧᤶᤒᤥ᤺ᤱᤅᤣ ᤘᤕᤧ. ᤁᤖ ᤁᤴ ᤕᤧᤶᤔᤥ ᤛᤣᤛᤣᤔᤠᤱᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
EPH 3:6 ᤂᤧᤴ ᤛᤡᤒᤡ᤹ᤒᤠ ᤐᤠ᤺ᤴᤏᤡᤴ ᤒᤠ ᤁᤴᤗᤥ–ᤛᤢᤏᤠᤀᤡᤱᤗᤠᤶᤒᤠᤀᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤕᤜᤢᤍᤡᤜᤠ᤹ᤏᤢ ᤛᤥᤖᤡᤰ ᤕᤢᤰᤛᤠᤒᤠᤛᤡ. ᤛᤥᤖᤡᤰ ᤌᤡᤰᤜᤢᤵ ᤁᤧᤒᤥ᤺ᤱᤒᤠᤛᤡ ᤜᤧᤰᤁᤩᤠᤱ ᤂᤪᤡᤛ᤻ᤋ ᤕᤧᤛᤢᤗᤠᤶ ᤁᤧᤍᤠ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤸᤗᤧᤴ ᤛᤥᤖᤡᤰ ᤗᤰ ᤁᤧᤄᤥ᤺ᤒᤠᤛᤡᤖᤥ॥
EPH 3:7 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤏᤢ ᤁᤢᤔᤢᤰᤛᤠᤶᤗᤠᤶ ᤀᤡᤱᤃᤠ᤹ ᤁᤴ ᤛᤢᤏᤠᤀᤡᤱ ᤁᤧᤛᤧᤒᤠ ᤛᤣᤘᤠᤖᤥᤒᤠ ᤐᤥ᤺ᤰᤂᤠᤱᤗᤥ॥
EPH 3:8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤛᤣᤛᤣ ᤁᤢᤔᤏᤠᤜᤠ᤹ᤏᤢ᤺ᤸᤗᤧ ᤀᤡᤱᤃᤠ᤹ ᤕᤥ᤺ᤕᤥ᤺ᤰᤐᤠ ᤆᤥ᤺ᤰᤁᤠᤛᤠᤱ ᤁᤢᤛᤡᤱ ᤏᤡ᤺ᤵᤔᤠᤀᤣ ᤛᤢᤰᤔᤧᤴᤍᤧᤵᤔᤏᤠᤒᤠ ᤂᤪᤡᤛ᤻ᤋᤖᤧ ᤀᤠᤒᤡᤖᤧᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤓᤥ᤺ᤔᤠᤛᤡ ᤑᤠ᤹ᤀᤠᤱ ᤁᤴ ᤗᤢᤱᤃᤢᤶᤔᤡᤴ ᤀᤡᤱᤃᤠ᤹ ᤐᤡᤖᤠᤱᤗᤥ॥
EPH 3:9 ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢᤏᤠᤜᤢᤖᤡᤀᤠᤱᤎᤥ ᤔᤠ᤹ᤖᤢᤒᤠ ᤐᤠ᤺ᤴᤏᤡᤸᤗᤧᤴ ᤏᤡᤱᤛᤣ᤺ᤰᤁᤡᤴ ᤁᤠᤰ ᤔᤏᤠᤜᤠ᤹ ᤆᤧᤰᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤣᤃᤠᤱᤗᤥ॥
EPH 3:10 ᤀᤰᤂᤣᤗ᤹ᤖᤡᤰ ᤛᤣᤛᤣᤜᤢᤵᤗᤰᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤁᤠᤰ ᤐᤖᤡᤰᤐᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤋᤠᤱᤛᤠᤰᤐᤠᤀᤥᤒᤠ ᤁᤠᤰ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤕᤢᤰ ᤁᤧᤈᤥ᤺ᤰᤐᤠ ᤑᤧᤴᤛᤠᤶᤜᤠ᤹ᤀᤥ ᤀᤥᤛᤣ᤺ᤴᤍᤠᤱ ᤐᤥ᤺ᤱᤗᤥ॥
EPH 3:11 ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤏᤡᤱᤘᤠ᤹ᤛᤥ᤺ᤰ ᤁᤢᤀᤡᤛᤡ᤺ᤰ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤗᤠᤶᤒᤠ ᤁᤢᤗᤡᤱᤎᤥ ᤁᤧᤳᤋᤢᤖᤥ॥
EPH 3:12 ᤂᤢᤏᤧ᤹ ᤆᤥᤃᤢᤸᤗᤧ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤈᤥᤃᤢᤶᤒᤠ ᤏᤛᤠ᤺ᤴᤗᤠᤶᤒᤠ ᤜᤠᤱᤜᤠᤱ ᤗ᤹ᤖᤡᤰ ᤔᤧᤱᤃᤡᤀᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤐᤣ᤺ᤰᤔᤠ ᤀᤠᤄᤥ᤺ᤛᤢᤶᤗᤥ॥
EPH 3:13 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤋᤢᤔᤢᤱᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤁᤧᤏᤡ᤺ᤛᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤛᤠᤱ ᤔᤧᤒᤢᤰᤏᤧᤴᤗ ᤁᤖ ᤂᤧᤱᤃ ᤂᤡᤏᤡ᤹ ᤀᤡᤱᤎᤠ᤺ᤱ ᤁᤧᤄᤥ᤺ᤛᤢᤶᤒᤠ ᤜᤧᤰᤁᤣ ᤀᤡ᤺ᤳᤋᤧᤶᤔᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
EPH 3:14 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤌᤢᤱᤒᤥᤜᤈ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥
EPH 3:15 ᤂᤢᤏᤧ᤹ᤗᤠᤶᤒᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤏᤢ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤕᤱᤜᤠ᤹ᤖᤧ ᤂᤢᤏᤡ᤹ ᤔᤡᤱ ᤔᤧᤄᤥ᤺ᤛᤢ᤹ᤖᤥ॥
EPH 3:16 ᤂᤢᤏᤧ᤹ ᤔᤢᤸᤗᤢᤰ ᤔᤡᤔᤡᤍᤡᤱᤃᤧᤴ ᤁᤢᤔᤢᤰᤛᤠᤶᤗᤠᤶ ᤁᤢᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤥ ᤁᤧᤎᤢᤶᤒᤠ ᤁᤧᤈᤥᤃᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥
EPH 3:17 ᤜᤧᤰᤁᤣᤗ᤹ᤖᤡᤰ ᤏᤛᤠ᤺ᤴᤗᤠᤶ ᤂᤪᤡᤛ᤻ᤋᤧᤴ ᤂᤡᤏᤡ᤹ ᤛᤡᤰᤗᤢᤱᤔᤥ ᤘᤠ᤹ᤖ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤀᤥ ᤂᤡᤏᤡ᤹ ᤛᤠ᤺ᤵ ᤗᤣ᤺ᤳᤇᤡᤱᤅᤠᤱ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤖ.
EPH 3:18 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤏᤢ ᤂᤪᤡᤛ᤻ᤋᤖᤧ ᤀᤠᤰᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰ ᤁᤧᤗ᤹ᤒᤠᤴ ᤁᤠᤰ ᤐᤖᤡᤰᤗᤠᤶ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗᤥ॥
EPH 3:19 ᤜᤧᤰᤁᤩᤠᤱ ᤏᤧᤜᤡᤏᤡᤱᤘᤠ᤹ᤖᤧ ᤔᤧᤄᤥ᤺ᤵᤋᤢᤶᤒᤠ ᤂᤪᤡᤛ᤻ᤋᤖᤧ ᤁᤢᤔᤡ᤺ᤶᤈᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤁᤧᤒᤥ᤺ᤰᤂᤡᤖᤖᤥ॥
EPH 3:20 ᤀᤠᤸᤗ ᤀᤠᤏᤡ᤹ ᤏᤠ᤺ᤰᤔᤏᤠᤒᤠ ᤜᤧᤰᤁᤩᤠᤱ ᤀᤡ᤺ᤵᤔᤏᤠᤒᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤆᤥ᤺ᤰᤔᤠ ᤁᤧᤛᤢᤰᤐᤠ ᤀᤠᤏᤡ᤹ᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤢᤏᤧ᤹ ᤁᤢᤔᤢᤰᤛᤠᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ
EPH 3:21 ᤁᤧᤖᤧᤰ ᤕᤧᤶᤔᤥ. ᤁᤧᤖᤧᤰ ᤔᤧᤴᤇᤠᤶ ᤌᤠ᤺ᤰᤁᤥ. ᤛᤣᤛᤣᤜᤢᤵᤗᤰᤁᤥ ᤏᤢ ᤂᤪᤡᤛ᤻ᤋ ᤕᤧᤛᤢᤀᤥ ᤛᤍᤠᤍᤡᤱ ᤛᤍᤠᤍᤡᤱ ᤁᤢᤏᤠᤖᤠ ᤐᤥ᤺ᤖᤖᤥ॥ ᤀᤠᤔᤧᤴ॥
EPH 4:1 ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤥ᤺ᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹ ᤂᤧᤶᤍᤢ ᤗᤠ᤹ᤖᤢᤛᤡᤒᤠ ᤜᤡᤱᤔᤴᤏᤥ ᤔᤧᤘᤠ᤹ᤒᤠ ᤜᤧᤰᤁᤣ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
EPH 4:2 ᤁᤠᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤏᤢ ᤛᤢᤶᤛᤢᤶᤔᤠᤱ ᤘᤕᤧᤶᤔᤧ᤹॥ ᤜᤧᤰᤁᤩᤠᤱ ᤏᤡᤱᤘᤠ᤹ ᤕᤥ ᤎᤥ ᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤖ ᤏᤠᤛᤡ ᤌ᤺ᤳᤋᤧᤶᤔᤧ᤹ᤀᤥ॥
EPH 4:3 ᤘᤣ᤹ᤜᤠ᤹ᤏᤢ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤠᤱ ᤛᤣᤛᤣᤔᤠᤱᤗᤠᤶ ᤁᤧᤍᤠ᤺ᤒᤠ ᤌᤡᤰᤜᤢᤵᤐᤥ ᤘᤠ᤹ᤔᤠ ᤛᤠ᤹ᤖᤡᤰ ᤁᤥ᤺ᤳᤋᤧᤶᤔᤧ᤹ᤀᤥ॥ ᤛᤣᤛᤣᤔᤠᤱᤗᤠᤶ ᤁᤧᤍᤠ᤺ᤒᤠ ᤌᤡᤰᤜᤢᤵᤐᤥ ᤘᤠ᤹ᤔᤠ ᤑᤠ᤹ᤀᤠᤱ ᤁᤠᤰ ᤐᤖᤡᤰᤗᤧ ᤋᤶᤛᤡᤴ ᤆᤥᤃᤧᤶᤔᤧ᤹ᤖ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥
EPH 4:4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤀᤢ᤺ᤳᤋᤡᤸᤗᤧ ᤗᤳᤇᤠ ᤏᤡᤱᤛᤠᤱ ᤁᤧᤒᤡᤖᤡᤒᤠ ᤁᤢᤀᤡᤛᤡ᤺ᤰᤁᤣ. ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤗᤳᤌᤡᤰ ᤌᤰᤛᤡᤖᤥ॥ ᤜᤧᤰᤁᤩᤠᤱ ᤛᤣᤛᤣᤔᤠᤱ ᤗᤳᤌᤡᤰ ᤘᤠ᤹.
EPH 4:5 ᤍᤠᤱᤒᤠᤴ ᤗᤳᤌᤡᤰ ᤘᤠ᤹. ᤏᤛᤠ᤺ᤴ ᤗᤳᤌᤡᤰ ᤘᤠ᤹. ᤜᤧᤰᤁᤩᤠᤱ ᤒᤵᤋᤡᤛ᤻ᤔᤠᤀᤠᤱ ᤗᤳᤌᤡᤰ ᤘᤠ᤹॥
EPH 4:6 ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤖᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤳᤌᤡᤰ ᤘᤠ᤹ᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤁᤧᤖᤧᤰ ᤛᤶᤍᤠᤱ ᤕᤢᤰ ᤁᤳᤋᤢ᤹. ᤀᤠᤏᤡ᤹ ᤁᤧᤖᤧᤰᤗᤠᤶᤒᤠ ᤕᤠ᤺ᤶᤒᤰ ᤆᤥᤃᤢ᤹. ᤜᤧᤰᤁᤩᤠᤱ ᤀᤠᤏᤡ᤹ ᤁᤧᤖᤧᤰᤁᤥ ᤘᤠ᤹ᤖᤥ॥
EPH 4:7 ᤁᤖ ᤂᤪᤡᤛ᤻ᤋᤖᤧ ᤜᤠᤒᤠ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤀᤡᤛᤡ᤺ᤰ ᤀᤠᤏᤡ᤹ ᤁᤧᤖᤧᤰᤗᤧ ᤐᤷᤎᤠ᤺ᤶ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹॥
EPH 4:8 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤂᤢᤏᤧ᤹ ᤌᤠ᤺ᤱ ᤐᤣ᤺ᤸᤗᤧ ᤏᤠ᤺ᤴᤍᤢᤛᤡᤒᤠᤜᤠ᤹ ᤂᤢᤏᤧ᤹ᤏᤢ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤁᤢᤔᤏᤠᤜᤠ᤹ ᤐᤷᤎᤠ᤺ᤶᤜᤠ᤹ ᤐᤡᤖᤢᤛᤡ॥”
EPH 4:9 ᤀᤠᤸᤗ ᤁᤴ “ᤌᤠ᤺ᤱ ᤐᤣ” ᤑᤠ᤹ᤀᤡᤱᤃ ᤌᤣ᤺ᤴᤒᤣ᥅ ᤁᤴ ᤑᤠ᤹ᤀᤡᤱᤃ ᤂᤢᤏᤧ᤹ᤃ ᤕᤥ ᤂᤠᤶᤒᤣ᤺ᤰ ᤛᤡᤃᤠᤱ ᤌᤠᤖᤡᤰᤁᤠᤱ ᤌᤩᤧ ᤁᤧᤗ᤹ᤒᤠᤏᤧ ᤐᤥ᤺ᤱᤗᤥ॥
EPH 4:10 ᤌᤥᤗᤠᤶᤏᤢ ᤁᤧᤎᤠ᤺ᤒᤠᤴᤏᤣ ᤁᤧᤖᤧᤰ ᤂᤠᤶᤒᤣ᤺ᤰᤔᤠᤀᤥ ᤏᤢ ᤋᤖ᤺ᤱᤃᤧᤴ ᤋᤠᤱᤛᤠᤱᤅᤥ ᤘᤠ᤹ᤖ ᤑᤠ᤹ᤀᤠᤱ ᤋᤠᤱᤛᤠᤰᤐᤧᤴᤏᤢ᤺ᤸᤗᤧᤀᤠᤱ ᤌᤥ ᤌᤠᤖᤡᤰ ᤐᤣ॥
EPH 4:11 ᤂᤢᤏᤧ᤹ᤀᤣ ᤁᤢᤓᤠ ᤛᤣ᤺ᤰᤕᤢᤰᤔᤡᤒᤠ. ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ. ᤛᤢᤏᤠᤀᤡᤱ ᤁᤧᤛᤧᤒᤠ ᤜᤧᤰᤁᤩᤠᤱ ᤏᤛᤠᤏᤡᤒᤠᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤏᤢ ᤛᤡᤰᤛᤠᤶᤒᤠ ᤐᤥ᤺ᤱᤛᤧ ᤐᤷᤎᤠ᤺ᤶᤜᤠ᤹ ᤐᤡᤖᤢᤛᤡᤖᤥ॥
EPH 4:12 ᤜᤧᤰᤁᤣᤗ᤹ᤖᤡᤰ ᤛᤣᤛᤣᤜᤢᤵᤗᤰ ᤂᤪᤡᤛ᤻ᤋᤖᤧ ᤁᤢᤎᤰᤁᤡᤴ ᤌᤥᤒᤥ ᤐᤥ᤺ᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤱᤗᤖᤥ॥
EPH 4:13 ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤁᤧᤖᤧᤰ ᤏᤛᤠ᤺ᤴᤏᤥ ᤏᤢ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤏᤧᤜᤡᤏᤡᤱᤘᤠ᤹ᤀᤥ ᤌᤡᤰᤜᤢᤵ ᤀᤠᤒᤥ᤺ᤱ. ᤜᤧᤰᤁᤩᤠᤱ ᤍᤠᤱᤒᤠᤀᤥ ᤁᤧᤖᤧᤰ ᤂᤠᤛᤡᤱ ᤁᤧᤏᤡ᤺ᤵᤐᤠ ᤀᤠᤒᤥ᤺ᤱᤅᤠᤱ ᤂᤪᤡᤛ᤻ᤋᤀᤥ ᤁᤢᤗᤡᤱᤎᤥ ᤀᤠᤃᤧᤳᤗᤥ॥
EPH 4:14 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤀᤅᤧ᤺ᤰᤘᤠᤜᤠ᤹ ᤁᤢᤀᤡᤛᤡ᤺ᤰ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤀᤠᤶᤒᤥ᤺ᤱᤏᤧᤴ॥ ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤸᤗᤧ ᤜᤡᤵᤋᤢᤀᤠᤱ ᤘᤠ᤺ᤴᤍᤢᤒᤠ ᤂ᤺ᤱᤒᤣᤴ ᤁᤢᤀᤡᤛᤡ᤺ᤰ ᤀᤡᤱᤗᤧᤰᤁᤣ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤢᤈᤠ᤺ᤵᤐᤠ ᤑᤧᤴ ᤏᤡᤛᤠᤶᤔᤡᤸᤗᤧ ᤀᤠᤏᤡ᤹ ᤏᤠ-ᤁᤳᤏᤠ ᤀᤠᤴᤘᤠ᤺ᤴᤏᤧᤴᤗᤥ॥
EPH 4:15 ᤂᤧᤸᤗᤧ ᤁᤢᤗᤧᤰᤘᤠ ᤔᤡ᤺ᤶᤈᤡᤴᤏᤢ ᤛᤧᤰᤂᤠ ᤐᤠ᤺ᤴ ᤀᤠᤒᤠ᤺ᤳᤋᤢᤶᤔᤡᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤀᤠᤏᤡ᤹ ᤁᤠᤰ ᤐᤖᤡᤰᤗᤧ ᤂᤪᤡᤛ᤻ᤋᤧᤴ ᤜᤧᤰᤁᤣᤀᤣ ᤀᤠᤒᤥ᤺ᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤀᤠᤏᤡ᤹ ᤌᤧᤃᤣ᤺ᤰᤐᤠᤖᤥ॥
EPH 4:16 ᤂᤢᤏᤧ᤹ᤗᤠᤶᤒᤠᤀᤣ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤁᤧᤖᤧᤰ ᤕᤠᤶᤗᤰᤜᤠ᤹ ᤆᤰᤛᤡᤱᤅᤠᤱ ᤀᤠᤒᤠᤅᤣ ᤕᤠ᤺ᤶᤒᤰ ᤆᤥᤃᤢᤖ ᤔᤡ᤺ᤶᤈᤡ᤺ᤸᤗᤧ ᤁᤢᤎᤡᤶ ᤐᤥ᤺ᤱᤅᤠᤱ ᤁᤧᤎᤢᤶᤒᤠ ᤐᤥ᤺ᤱᤗ ᤐᤣ᤺ᤰᤗᤥ॥
EPH 4:17 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤍᤠᤱᤒᤠᤸᤗᤧ ᤁᤢᤕᤢᤰᤁᤡᤸᤗᤧ ᤀᤰᤂᤣ ᤔᤧᤳᤏᤡᤱ. ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ ᤔᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤔᤧᤘᤕᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤁᤢᤛᤢᤶᤔᤧᤴᤍᤶᤔᤏᤠᤒᤠ ᤆᤥ᤺ᤰᤗᤥ॥
EPH 4:18 ᤂᤧᤱᤜᤠ᤹ᤖᤧ ᤁᤧᤛᤠᤰᤐᤠ ᤂᤢᤏᤡ᤹ ᤏᤡᤱᤘᤠ᤹ᤀᤡᤸᤗᤧ ᤏᤢ ᤏᤡᤱᤘᤠ᤹ ᤐᤠ᤺ᤰᤔᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤜᤡᤱᤔᤴᤗᤠᤶ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤂᤠᤍᤠᤵᤋᤢᤀᤠᤱ ᤘᤠ᤹॥
EPH 4:19 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤌ᤺ᤵᤐᤠᤱ ᤏᤡᤱᤘᤠ᤹ ᤌᤠᤵᤌᤠᤵ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤁᤧᤖᤧᤰ ᤐᤖᤡᤰᤐᤠ ᤀᤠᤈᤡ᤺ᤴᤈᤡ᤺ᤶᤒᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤏᤥ ᤆᤰᤔᤧᤸᤗ᤹ᤀᤣ ᤏᤡᤱᤘᤠ᤹ ᤔᤧᤒᤡᤖᤢ᤹ᤖᤥ॥
EPH 4:20 ᤁᤖ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤜᤧᤰᤁᤣᤗ᤹ᤖᤡᤰ ᤁᤧᤴᤜᤢ᤹ᤀᤠᤛᤡᤴ॥
EPH 4:21 ᤁᤢᤈᤧᤰᤁᤣ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤵᤛᤢᤶᤔᤠᤱ ᤕᤧᤛᤢᤖᤧ ᤁᤢᤛᤧᤰᤂᤠ᤺ᤴ ᤁᤧᤜᤢ᤹ᤀᤠᤛᤡᤀᤠᤱ ᤁᤧᤘᤕᤡ᤹ᤖᤥ॥
EPH 4:22 ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤁᤧᤘᤕᤡᤸᤗᤧ ᤀᤡᤱᤗᤧᤰᤁᤣ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤑᤧᤳᤗᤠ᤺ᤴᤍᤢᤒᤠ ᤂᤡᤏᤡ᤹ ᤋᤃᤡᤒᤠ ᤕᤧᤵᤗᤧᤰᤁᤡᤴ ᤗᤠᤵᤑᤢᤛᤧᤶᤔᤧ᤹ᤀᤠᤱ
EPH 4:23 ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤏᤢ ᤏᤡᤱᤘᤠ᤹ᤀᤡᤴ ᤁᤢᤛᤱ ᤐᤥ᤺ᤱᤔᤠᤀᤣ ᤐᤥ᤺ᤱ॥
EPH 4:24 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤛᤧᤰᤂᤠ. ᤛᤠᤶᤕᤥᤏᤡᤒᤠ ᤏᤢ ᤛᤣᤛᤣ ᤆᤥᤃᤧᤒᤠ ᤁᤢᤛᤱ ᤕᤧᤵᤗᤧᤰᤁᤡᤴ ᤁᤢᤛᤱ ᤆᤠᤱ ᤁᤢᤀᤡᤛᤡ᤺ᤰ ᤆᤠᤰᤂᤧᤶᤔᤧ᤹ᤀᤥ॥
EPH 4:25 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤗᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤖᤧᤰᤗᤧ ᤗᤧᤖᤧᤶᤔᤧ᤹ᤀᤠᤱ ᤂᤡᤏᤡ᤹ ᤗᤢᤶᤔᤥ ᤛᤧᤰᤂᤠ ᤐᤠᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤗᤳᤇᤠ ᤌᤰᤁᤥᤒᤠ ᤕᤠᤶᤗᤰᤛᤡᤖᤥ॥
EPH 4:26 ᤂᤡᤏᤡ᤹ ᤛᤡᤰ ᤐᤥ᤺ᤰᤛᤠᤱ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹॥ ᤏᤠᤶᤎᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤛᤡᤰ ᤐᤥ᤺ᤰᤔᤠᤴ ᤆᤡᤵᤗ.
EPH 4:27 ᤜᤧᤰᤁᤣᤗ᤹ᤖᤡᤰᤁᤣ ᤔᤠᤑᤧᤴᤛᤠᤶᤔᤡᤴ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤧᤶᤔᤡᤴᤏᤧ᤹ᤀᤥ॥
EPH 4:28 ᤁᤧᤄᤢ᤺ᤶᤒᤠᤸᤗᤧ ᤀᤠᤸᤗᤀᤠᤱᤎᤥ ᤂᤢ᤺ᤵᤔᤠ ᤔᤧᤏᤢ᤹ᤏᤧᤴᤗᤥ. ᤁᤖ ᤂᤧᤸᤗᤧ ᤔᤧᤱᤃᤵᤔᤏᤠᤒᤠᤜᤠ᤹ ᤐᤡᤔᤠ ᤛᤢᤰᤋᤢᤛᤡᤖ ᤑᤠ᤹ᤀᤠᤱ ᤕᤠᤶᤒᤢᤎᤡᤰᤁᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤣ ᤐᤥ᤺ᤱᤗᤥ॥
EPH 4:29 ᤂᤡᤏᤡ᤹ ᤋᤠᤵᤑᤧ᤺ᤶᤒᤠ ᤐᤠ᤺ᤴ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ. ᤁᤖ ᤁᤧᤄᤧᤶᤒᤠᤜᤠ᤹ᤖᤧ ᤁᤢᤓᤠ᤹ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤁᤢᤛᤢᤶᤃᤧᤍᤶᤒᤠ ᤏᤢ ᤜᤠᤱᤜᤠᤱ ᤁᤧᤔᤧᤵᤐᤠ ᤐᤠ᤺ᤴᤗᤰ ᤐᤠᤖᤧᤶᤔᤧ᤹॥
EPH 4:30 ᤜᤧᤰᤁᤩᤠᤱ ᤁᤧᤈᤥᤃᤢᤶᤒᤠ ᤐᤠ᤺ᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤍᤢᤰᤂᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤁᤠᤰ ᤆᤥ᤺ᤰᤕᤢᤶᤓᤥ ᤂᤥ᤺ᤔᤠ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤀᤠᤔᤏᤠᤏᤡᤱ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣᤔᤠᤱᤅᤡᤴ ᤁᤧᤒᤡᤖᤡᤀᤠᤱ ᤘᤠ᤹ᤖᤥ॥
EPH 4:31 ᤁᤧᤖᤧᤰ ᤛᤡᤰ ᤁᤢ᤺ᤔᤠ. ᤛᤡᤰ ᤐᤥ᤺ᤰᤔᤠ. ᤕᤠ᤺ᤰ ᤗᤧ᤹ᤔᤠ. ᤜᤕᤱᤁᤡᤸᤗᤡᤱ ᤆᤥ᤺ᤰᤔᤠ. ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤐᤠ ᤔᤏᤠ ᤆᤡ᤺ᤵᤔᤠ ᤗᤧᤖᤧᤶᤔᤧ᤹ᤀᤥ॥
EPH 4:32 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤗᤠᤶ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤒᤡᤖᤡᤒᤠ ᤜᤧᤰᤁᤣᤀᤣ. ᤂᤡᤏᤡ᤹ᤀᤠᤱ ᤗᤧᤵᤔᤡ ᤐᤡᤀᤠᤛᤡᤶᤔᤧ᤹ᤖ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤠᤱ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤳᤋᤠᤛᤡᤶᤔᤧ᤹ᤀᤥ॥
EPH 5:1 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤜᤧᤰᤁᤣ ᤐᤥ᤺ᤱᤔᤠ ᤁᤥ᤺ᤳᤋᤧᤶᤔᤧ᤹ᤀᤥ॥
EPH 5:2 ᤂᤪᤡᤛ᤻ᤋᤖᤧ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤀᤠᤏᤡ᤹ ᤗᤠᤃᤡ ᤛᤩᤧᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥ ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤁᤢᤏᤠᤶ ᤁᤧᤏᤢ᤹ᤒᤠ ᤏᤢ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤀᤠᤒᤠᤅᤣ ᤐᤡᤛᤡᤱᤗᤥ॥
EPH 5:3 ᤁᤖ ᤕᤠᤶᤒᤥ᤺ᤵᤔᤠᤴ. ᤁᤠᤰ ᤀᤠᤈᤡ᤺ᤴᤈᤡ᤺ᤶᤒᤠ ᤐᤠ᤺ᤴᤜᤠ᤹ ᤀᤡᤃᤪ ᤂᤡ᤺ᤶᤔᤠ ᤐᤠ᤺ᤴᤏᤡᤴ ᤗᤳᤇᤠᤀᤠᤱ ᤂᤡᤏᤡ᤹ ᤗᤢᤶᤔᤥ ᤔᤧᤘᤠ᤹ᤏᤧᤴᤗ. ᤌᤣᤀᤠᤱᤓᤧᤸᤗᤧ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤔᤧᤄᤧᤶᤍᤢᤴᤇᤡᤴ ᤔᤧᤗᤠ᤹ᤖᤢᤴᤇᤡᤴᤗᤥ॥
EPH 5:4 ᤜᤧᤰᤁᤩᤠᤱ ᤔᤧᤄᤧᤶᤍᤢᤴᤇᤡᤴᤒᤠ ᤔᤧᤴᤈᤡᤰᤁᤪᤠ ᤐᤠ᤺ᤴ. ᤀᤍᤱ ᤐᤠ᤺ᤴ ᤏᤢ ᤔᤠᤱᤒᤠ᤺ᤴ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤔᤠ ᤐᤠ᤺ᤴ ᤐᤠ᤺ᤵᤔᤠ ᤐᤥ᤺ᤱᤗᤥ॥
EPH 5:5 ᤌᤣᤀᤠᤱᤓᤧᤸᤗᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤀᤠᤈᤡ᤺ᤴᤈᤡ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤂᤡ᤺ᤶᤒᤪᤠᤰᤐᤠ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤪᤡᤛ᤻ᤋ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ ᤜᤠᤱᤈᤢᤶᤔᤥ ᤗᤰ ᤔᤧᤱᤄᤥ᤺ᤛᤢᤴ ᤑᤠ᤹ᤀᤠᤱ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤣᤖᤥ॥ ᤂᤧᤴ ᤂᤡ᤺ᤶᤒᤪᤠᤰᤐᤠᤱᤃ ᤏᤠᤘᤠᤀᤡᤳᤗᤠ ᤛᤣᤘᤠ ᤁᤧᤈᤥ᤺ᤰᤐᤠᤀᤣᤖᤥ॥
EPH 5:6 ᤂᤧᤴ ᤜᤧᤰᤋᤱᤒᤠ ᤐᤠ᤺ᤴᤏᤥ ᤜᤠ᤺ᤳᤗᤧᤀᤠᤱ ᤂᤡᤏᤡ᤹ ᤜᤏᤧᤒᤠ ᤐᤠ᤺ᤴᤗᤠᤶ ᤀᤡᤱᤗᤧᤰᤔᤠ ᤁᤧᤴᤇᤢᤰᤋᤡᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤜᤏᤧᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴ ᤂᤢᤏᤧ᤹ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠᤒᤠᤜᤠ᤹ᤀᤥ ᤌᤠ᤺ᤖᤥ॥
EPH 5:7 ᤂᤧᤸᤗᤧ ᤆᤥᤃᤢᤸᤗᤧ ᤜᤧᤰᤋᤱᤒᤠ ᤔᤏᤠᤜᤠ᤹ᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ.
EPH 5:8 ᤌᤣᤀᤠᤱᤓᤧᤸᤗᤧ ᤋᤃᤡ ᤂᤡᤏᤡ᤹ᤀᤠᤱ ᤂᤠᤍᤠᤶᤔᤥ ᤁᤧᤘᤕᤡ. ᤁᤖ ᤀᤠᤸᤗ ᤂᤡᤏᤡ᤹ ᤍᤠᤱᤒᤠᤴᤏᤢ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤀᤥ᤺ᤳᤋᤡᤀᤥ ᤁᤧᤘᤕᤡ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀᤥ᤺ᤳᤋᤡᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤘᤕᤧᤶᤔᤧ᤹॥
EPH 5:9 ᤌᤣᤀᤠᤱᤓᤧᤸᤗᤧ ᤀᤥ᤺ᤳᤋᤡᤀᤥ ᤁᤧᤘᤠ᤹ᤒᤠᤜᤠ᤹ᤖᤧ ᤁᤧᤖᤧᤰ ᤏᤢ᤺ᤒᤠ. ᤛᤠᤶᤕᤥᤏᤡᤒᤠ ᤏᤢ ᤛᤧᤰᤂᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢ᤹॥
EPH 5:10 ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤐᤠ᤺ᤴᤜᤠ᤹ ᤁᤥ᤺ᤳᤋᤧᤶᤔᤧ᤹॥
EPH 5:11 ᤂᤠᤍᤠᤶᤔᤠᤗᤢᤶᤔᤥᤒᤠ ᤁᤢᤛᤢᤶᤔᤧᤴᤍᤶᤔᤏᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤔᤧᤃᤠᤶᤔᤠᤛᤡᤶᤔᤧᤴᤏᤧ᤹. ᤁᤖ ᤂᤧᤴ ᤜᤧᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤏᤢ᤺ᤒᤠ ᤔᤧ᤺ᤴ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤧᤶᤛᤡᤶᤔᤧ᤹॥
EPH 5:12 ᤌᤣᤀᤠᤱᤓᤧᤸᤗᤧ ᤗᤠᤕᤥ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤛᤫᤠ᤺ᤳᤋᤠᤱ ᤔᤧᤈᤥᤃᤢᤒᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠᤀᤠᤱ ᤀᤠᤏᤢ᤺ᤴᤗᤥ॥
EPH 5:13 ᤁᤖ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤀᤠᤰᤂᤧᤴ ᤋᤠᤵᤑᤧ᤺ᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤥ᤺ᤳᤋᤡᤀᤥ ᤌᤠ᤺ᤵᤗᤥ॥
EPH 5:14 ᤌᤣᤀᤠᤱᤓᤧᤸᤗᤧ ᤀᤥ᤺ᤳᤋᤡ᤺ᤸᤗᤧ ᤌᤥ᤹ᤖᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤏᤡᤎᤠ᤺ᤵᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤢᤓᤠᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. “ᤁᤧᤀᤡᤶᤒᤠᤛᤣ. ᤛᤥᤖᤧᤶᤔᤧ᤹᥄ ᤛᤡ᤺ᤔᤧᤴᤗᤠᤶ ᤐᤥᤃᤧᤶᤔᤧ᤹. ᤜᤧᤰᤁᤩᤠᤱ ᤂᤪᤡᤛ᤻ᤋᤖᤧ ᤁᤢᤀᤥ᤺ᤳᤋᤡ᤺ᤴ ᤂᤡᤏᤡ᤹ᤀᤥ ᤀᤥ᤺ᤳᤗᤥ॥”
EPH 5:15 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹. ᤀᤍᤱ ᤜᤧᤰᤁᤣ ᤔᤧ᤺ᤴ. ᤁᤖ ᤛᤡᤰᤁᤢᤶᤛᤠᤒᤠ ᤜᤧᤰᤁᤣ ᤘᤕᤧᤶᤔᤧ᤹॥
EPH 5:16 ᤁᤠᤰ ᤛᤢᤕᤧᤶᤔᤡᤴ ᤏᤢ᤺ᤖᤡᤰᤁᤠᤱ ᤀᤥᤃᤵ ᤆᤥᤃᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤕᤧᤶᤔᤡᤴ ᤋᤠᤵᤑᤧ᤺ᤶᤒᤠ ᤆᤥ᤺ᤰ॥
EPH 5:17 ᤂᤧᤸᤗᤧ ᤆᤥᤃᤢᤸᤗᤧ ᤀᤍᤱ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹. ᤁᤖ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤠᤱ ᤆᤥᤃᤧᤶᤔᤧ᤹॥
EPH 5:18 ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤧᤔᤀᤠᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤗᤠᤶᤀᤠᤗᤥ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤶᤔᤧ᤹ᤀᤥ॥
EPH 5:19 ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢ ᤛᤠᤶᤗᤥᤜᤠ᤹. ᤛᤣᤘᤠᤛᤠᤶᤗᤥᤜᤠ᤹ ᤜᤧᤰᤁᤩᤠᤱ ᤕᤠᤶᤛᤠᤶᤃᤧᤴ ᤛᤠᤶᤗᤥᤜᤠ᤹ᤀᤥ ᤐᤠᤖᤧᤶᤔᤧ᤹ᤀᤠᤱ ᤛᤡᤰᤗᤢᤱᤔᤥᤗᤠᤶᤒᤠ ᤁᤢᤛᤠᤃᤧᤏᤢ᤹ᤒᤠ ᤀᤡᤰᤗᤠ᤺ᤸᤗᤧ ᤍᤠᤱᤒᤠᤴ ᤛᤠᤶᤔᤧᤳᤋᤧᤶᤔᤧ᤹ᤀᤥ॥
EPH 5:20 ᤛᤍᤠᤍᤡᤱ ᤁᤠᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹॥
EPH 5:21 ᤀᤠᤸᤗ ᤂᤪᤡᤛ᤻ᤋᤧᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤏᤠᤒᤠᤸᤗᤧ ᤆᤥᤃᤢᤸᤗᤧ ᤌᤡᤰᤁᤡᤴ ᤘᤣ᤹ᤀᤡᤸᤗᤧ ᤁᤢᤕᤢᤰᤁᤥ ᤘᤕᤧᤶᤔᤧ᤹ᤀᤥ॥
EPH 5:22 ᤔᤣᤗᤡᤱᤃᤧᤴ ᤔᤣ᤺ᤳᤇᤣ. ᤍᤠᤱᤒᤠᤸᤗᤧ ᤁᤢᤕᤢᤰᤁᤥ ᤘᤠ᤹ᤔᤏᤠᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤕᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥
EPH 5:23 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴ ᤛᤣᤛᤣᤜᤢᤵᤗᤰᤁᤡᤸᤗᤧ ᤁᤢᤎᤧᤃᤣ᤺ᤰ ᤘᤠ᤹ᤒᤠ ᤁᤢᤀᤡᤛᤡ᤺ᤰ ᤕᤧᤶᤒᤠ᤹ᤀᤡᤴᤏᤠᤱ ᤔᤣ᤺ᤳᤋᤡᤸᤗᤧ ᤁᤢᤎᤧᤃᤣ᤺ᤰᤗᤥ॥ ᤀᤠᤸᤗ ᤛᤣᤛᤣᤜᤢᤵᤗᤰᤁᤡᤴ ᤂᤪᤡᤛ᤻ᤋᤖᤧ ᤁᤢᤎᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤧᤴ ᤛᤣᤛᤣᤜᤢᤵᤗᤰᤁᤡᤸᤗᤧᤴ ᤛᤧᤴᤗᤵᤍᤠᤱᤒᤠᤖᤥ॥
EPH 5:24 ᤀᤠᤸᤗ ᤛᤣᤛᤣᤜᤢᤵᤗᤰᤁᤡᤴ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤥ ᤘᤠ᤹ᤒᤠ ᤁᤢᤀᤡᤛᤡ᤺ᤰᤁᤣ. ᤔᤣ᤺ᤳᤜᤠ᤹ᤀᤠᤱ ᤁᤠᤰ ᤐᤠ᤺ᤴᤜᤠ᤹ᤀᤥ ᤕᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥ᤺ᤱᤗᤥ॥
EPH 5:25 ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ᤛᤣ. ᤂᤪᤡᤛ᤻ᤋᤖᤧ ᤛᤣᤛᤣᤜᤢᤵᤗᤰᤁᤡᤴ ᤗᤢᤱᤔᤠ᤹ ᤋᤢᤰᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤔᤣ᤺ᤳᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥ ᤂᤢᤏᤧ᤹ᤃ ᤛᤣᤛᤣᤜᤢᤵᤗᤰᤗᤧ ᤗᤠᤃᤡ ᤁᤢᤜᤡᤱᤔᤴᤏᤡᤴ ᤐᤡᤖᤢᤖᤥ॥
EPH 5:26 ᤂᤪᤡᤛ᤻ᤋᤖᤧ ᤛᤣᤛᤣᤜᤢᤵᤗᤰᤁᤡᤴ ᤛᤣᤛᤣ ᤆᤥ᤺ᤰᤛᤧ ᤆᤫᤠ᤺ᤳᤋᤡᤸᤗᤧ ᤘᤠᤜᤵᤋᤢᤀᤠᤱ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤛᤣᤛᤣᤛᤠᤱᤛᤠᤱ ᤆᤥᤃᤢᤖᤥ॥
EPH 5:27 ᤂᤢᤏᤧ᤹ᤃ ᤀᤡᤃᤧᤛᤢ᤹ᤒᤠ ᤏᤢ ᤛᤧᤖᤧᤶ ᤔᤧ᤺ᤴᤏᤣᤒᤠ ᤀᤡᤃᤪ ᤀᤰᤋᤱᤒᤠ ᤌᤣᤀᤠᤱ ᤔᤧᤶᤒᤵᤔᤏᤠᤒᤠ. ᤛᤣᤛᤣ ᤏᤢ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤔᤡᤔᤡᤍᤡᤱᤃᤧᤴ ᤛᤣᤛᤣᤜᤢᤵᤗᤰᤁᤡᤴ ᤀᤠᤒᤠᤅᤣᤀᤥ ᤋᤥ᤺ᤶᤔᤠ ᤛᤢᤰᤋᤢᤖ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤖᤥ॥
EPH 5:28 ᤜᤧᤰᤁᤣᤗ᤹ᤖᤡᤰᤁᤣ ᤕᤧᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤌᤰᤁᤡᤴ ᤏᤢ᤺ᤖᤡᤰ ᤔᤧᤔᤧᤳᤋᤢᤒᤠ ᤜᤧᤰᤁᤣ ᤂᤢᤏᤡ᤹ ᤔᤣ᤺ᤳᤜᤠ᤹ ᤏᤢ᤺ᤖᤡᤰ ᤔᤧᤵᤔᤠᤛᤡ ᤐᤥ᤺ᤱ. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤔᤣ᤺ᤳᤋᤡᤴ ᤗᤢᤱᤔᤠ᤹ ᤋᤢᤰᤋᤢ᤹. ᤂᤧᤴ ᤀᤠᤒᤠᤅᤣ ᤗᤢᤱᤔᤠ᤹ ᤋᤢᤰᤛᤡᤱᤗᤥ॥
EPH 5:29 ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤈᤡ᤺ᤳᤋᤢᤴ. ᤁᤖ ᤂᤪᤡᤛ᤻ᤋᤖᤧ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤸᤗᤧ ᤀᤠᤒᤠᤅᤣ ᤁᤢᤎᤰᤁᤡᤴ ᤁᤶᤒᤪᤠᤱ ᤔᤧᤳᤋᤢ᤹ᤖᤥ॥
EPH 5:30 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤂᤢᤏᤧ᤹ ᤁᤢᤎᤰᤁᤡᤸᤗᤧᤴ ᤕᤠᤶᤗᤰᤛᤡᤖᤥ॥
EPH 5:31 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤧᤸᤗᤧ ᤆᤥᤃᤢᤸᤗᤧ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤶᤒᤠ ᤏᤢ ᤁᤢᤶᤔᤠᤛᤡ ᤗᤧᤖᤢᤛᤡᤀᤠᤱ ᤁᤢᤔᤣ᤺ᤳᤋᤡᤴᤏᤢ ᤌᤡᤰᤜᤢᤵ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥ᤺ᤱᤛᤡ᤹॥”
EPH 5:32 ᤁᤴ ᤐᤠ᤺ᤴᤏᤡᤱᤃ ᤏᤡᤱᤘᤠ᤹ ᤁᤧᤔᤠᤒᤠ ᤛᤡᤒᤡ᤹ ᤐᤠ᤺ᤴᤗᤥ. ᤁᤖ ᤀᤡᤱᤃᤠ᤹ᤃ ᤂᤪᤡᤛ᤻ᤋ ᤏᤢ ᤛᤣᤛᤣᤜᤢᤵᤗᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤱᤒᤠᤖᤥ॥
EPH 5:33 ᤁᤖ ᤂᤡᤏᤡ᤹ᤀᤠᤱ ᤁᤧᤀᤡ᤺ᤳᤋᤢᤶᤗ ᤐᤥ᤺ᤱᤗᤥ. ᤂᤡᤏᤡ᤹ ᤁᤧᤖᤧᤰ ᤀᤠᤒᤠᤅᤣ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤔᤣ᤺ᤳᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤔᤣ᤺ᤳᤜᤠ᤹ᤖᤧᤀᤠᤱ ᤂᤡᤏᤡ᤹ ᤕᤧᤶᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤀᤥ॥
EPH 6:1 ᤜᤡᤴᤈᤠ᤹ᤒᤡᤳᤇᤠᤛᤣ. ᤍᤠᤱᤒᤠᤸᤗᤧ ᤁᤢᤔᤏᤠ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤐᤠ᤺ ᤔᤠᤜᤠ᤹ᤖᤧ ᤔᤢᤖᤠ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤰᤂᤣ ᤆᤥ᤺ᤰᤔᤠᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥
EPH 6:2 “ᤂᤡᤏᤡ᤹ ᤐᤠ᤺ ᤏᤢ ᤔᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹”–ᤁᤱᤃ ᤔᤠᤱᤜᤧᤰᤏᤢᤒᤠ ᤌᤡᤰᤛᤡᤃᤣ᤺ᤰᤐᤠ ᤀᤡᤱᤈᤠ᤺ᤱᤗᤥ–
EPH 6:3 ᤂᤢᤴᤇᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ “ᤂᤡᤏᤡ᤹ ᤁᤧᤏᤢ᤺ᤖᤡ ᤁᤧᤍᤠᤛᤡᤖᤥ. ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤢᤎᤠ᤺ᤰ ᤁᤣ᤺ᤶᤒᤠ ᤁᤧᤒᤥ᤺ᤰᤂᤡ᤹ᤖᤥ॥”
EPH 6:4 ᤐᤠᤏᤢᤍᤡᤱ ᤐᤠ᤺ᤛᤣ. ᤂᤡᤏᤡ᤹ ᤛᤠ᤺ᤜᤠ᤹ ᤂᤢᤏᤡ᤹ ᤛᤡᤰ ᤔᤧᤓᤥ᤺ᤰᤂᤧᤶ ᤔᤧᤒᤡᤖᤧᤶᤛᤡ᤺ᤔᤧᤴᤏᤧ᤹. ᤁᤖ ᤍᤠᤱᤒᤠᤸᤗᤧ ᤁᤢᤜᤧᤴᤎᤡᤶ ᤏᤢ ᤁᤢᤏᤡᤛᤠᤶᤔᤥ ᤌᤠᤱᤒᤧᤴ ᤔᤧᤴᤇᤡᤴ ᤁᤧᤳᤋᤧᤶᤛᤡᤶᤔᤧ᤹ᤀᤥ॥
EPH 6:5 ᤛᤣᤘᤠᤖᤥᤒᤠᤛᤣ. ᤁᤧᤃᤡ᤺ᤛᤡ ᤁᤧᤕᤰᤂᤡᤖ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤗᤠᤶ ᤂᤪᤡᤛ᤻ᤋᤖᤧ ᤁᤢᤛᤣᤘᤠ ᤁᤧᤈᤥᤃᤢᤶᤒᤠ ᤜᤧᤰᤁᤣ ᤁᤴ ᤀᤡᤰᤛᤠᤒᤠ ᤂᤡᤏᤡ᤹ ᤍᤠᤱᤒᤠᤜᤠ᤹ᤖᤧ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹॥
EPH 6:6 ᤂᤡᤏᤡ᤹ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤸᤗᤧᤖᤰ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤁᤢᤀᤡᤛᤡ᤺ᤰ ᤛᤡᤰᤗᤢᤱᤔᤥᤗᤠᤶᤔᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤧᤰᤁᤣ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥
EPH 6:7 ᤔᤏᤠᤜᤠ᤹ ᤛᤣᤘᤠ ᤁᤧᤈᤥᤃᤢᤶᤛᤡᤶᤒᤠ ᤜᤧᤰᤁᤣ ᤔᤧ᤺ᤴ. ᤁᤖ ᤍᤠᤱᤒᤠᤴ ᤛᤣᤘᤠ ᤁᤧᤈᤥᤃᤢᤶᤒᤠ ᤜᤧᤰᤁᤣ ᤂᤡᤏᤡ᤹ ᤛᤡᤖᤠ᤹ ᤐᤎᤠᤱᤎᤠᤱᤗ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥
EPH 6:8 ᤕᤥ᤺ᤰᤐᤠᤛᤠᤱ ᤕᤥ᤺ᤰᤐᤠ ᤔᤧ᤺ᤶᤒᤠᤛᤠᤱ. ᤀᤠᤳᤋᤡᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤸᤗᤧ ᤆᤥᤃᤢᤒᤠ ᤜᤧᤰᤁᤣᤀᤣ ᤍᤠᤱᤒᤠᤗᤠᤶ ᤜᤠᤱᤛᤧᤶ ᤂᤥ᤺ᤛᤢ᤹ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
EPH 6:9 ᤜᤧᤰᤁᤩᤠᤱ ᤍᤠᤱᤒᤠᤛᤣ. ᤂᤡᤏᤡ᤹ ᤛᤣᤘᤠᤖᤥᤒᤠᤜᤠ᤹ᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ ᤕᤱᤔᤠ ᤔᤧᤛᤧᤖᤧᤶᤛᤡᤔᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤴ ᤏᤢ ᤂᤡᤏᤡ᤹ ᤍᤠᤱᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤀᤣ᤺ᤰᤐᤀᤣ᤺ᤰ ᤔᤧᤈᤥᤃᤢᤴ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
EPH 6:10 ᤀᤠᤸᤗ ᤁᤢᤏᤢᤵᤔᤠ ᤐᤠ᤺ᤴ–ᤍᤠᤱᤒᤠᤸᤗᤧ ᤐᤕᤶ ᤕᤶᤒᤠ ᤁᤢᤔᤢᤰᤛᤠᤶᤔᤡᤸᤗᤧᤀᤣ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥
EPH 6:11 ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤈᤧᤶᤓᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤰᤔᤠ ᤁᤧᤛᤢᤰᤋᤡᤖ ᤑᤠ᤹ᤀᤠᤱ ᤌᤰᤛᤢᤒᤠ ᤆᤠᤱᤅᤡᤸᤗᤧ ᤌᤰᤛᤢᤒᤠᤴ ᤁᤠᤵᤋᤢᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤠᤰ ᤑᤧᤈᤢᤶ ᤑᤧᤕᤠ᤺ᤴ ᤁᤠᤵᤛᤡᤱᤅᤧᤶᤔᤧ᤹ᤀᤥ॥
EPH 6:12 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤌᤱᤅᤡᤱᤃ ᤔᤧᤴᤇᤠᤶ ᤕᤠᤵᤔᤡᤏᤢ ᤔᤧ᤺ᤴ. ᤁᤖ ᤜᤠᤱᤃᤧᤈᤥ᤺ᤰᤐᤠᤜᤠ᤹. ᤕᤢᤰᤍᤠᤱᤒᤠᤜᤠ᤹. ᤁᤴ ᤂᤠᤃᤧᤔᤠᤰᤐᤠ ᤂᤠᤶᤒᤣ᤺ᤰᤁᤥᤒᤠ ᤔᤢᤰᤛᤠᤶᤜᤠ᤹ ᤜᤧᤰᤁᤩᤠᤱ ᤋᤠᤱᤛᤠᤰᤐᤠᤀᤥᤒᤠ ᤁᤠᤰ ᤑᤧᤴᤛᤠᤶᤜᤠ᤹ᤏᤢ ᤌᤰᤔᤏᤠᤒᤠ ᤌᤱᤗᤥ॥
EPH 6:13 ᤂᤧᤸᤗᤧ ᤆᤥᤃᤢᤸᤗᤧ ᤑᤧᤴ ᤕᤧᤶᤜᤠ᤹ ᤋᤠ᤺ᤸᤗᤧ ᤛᤧ᤺ᤵᤛᤡᤱᤔᤠ ᤁᤧᤛᤢᤰᤁᤠᤛᤡᤖ ᤑᤠ᤹ᤀᤠᤱ ᤌᤰᤛᤢᤒᤠ ᤆᤠᤱᤅᤡᤸᤗᤧ ᤌᤰᤛᤢᤒᤠᤴ ᤁᤠᤵᤋᤢᤒᤠ ᤜᤧᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤠᤰ ᤐᤠ᤺ᤴᤏᤡᤸᤗᤧ ᤁᤠᤵᤛᤡᤱᤅᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤴ ᤌᤱ ᤀᤣᤃᤠᤱ ᤂᤡᤏᤡ᤹ ᤌᤎᤵ ᤔᤧᤸᤗ᤹ᤀᤣ ᤕᤧᤵᤔᤠ ᤁᤧᤛᤢᤰᤋᤡ᤹ᤖᤥ॥
EPH 6:14 ᤜᤧᤰᤁᤣ᤺ᤸᤗᤧ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤕᤧᤒᤧᤶᤔᤧ᤹॥ ᤂᤡᤏᤡ᤹ ᤛᤧᤰᤂᤠ᤺ᤸᤗᤧᤴ ᤑ᤹ᤀᤡ᤺ᤴ ᤕᤢᤵᤛᤧᤶᤔᤧ᤹ ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠ ᤛᤧ᤺ᤵᤆᤠᤱᤅᤡᤴ ᤆᤠᤰᤂᤧᤶᤔᤧ᤹.
EPH 6:15 ᤜᤧᤰᤁᤩᤠᤱ ᤛᤏᤠᤖᤢᤱ ᤁᤧᤍᤠ᤺ᤵᤐᤠ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤁᤧᤒᤣ᤺ᤰᤐᤠ ᤗᤠᤱᤛᤢ᤺ᤵᤐᤡᤴ ᤆᤠᤰᤂᤧᤶᤔᤧ᤹ᤀᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ॥
EPH 6:16 ᤂᤧᤴᤗᤰ ᤔᤧ᤺ᤴ. ᤁᤖ ᤏᤛᤠ᤺ᤴᤏᤡᤸᤗᤧᤴ ᤂᤥ᤺ᤴ ᤕᤠᤱᤅᤠᤛᤡᤶᤔᤧ᤹॥ ᤂᤧᤴᤗᤠᤶ ᤂᤡᤏᤡ᤹ ᤔᤠᤑᤧᤴᤛᤠᤶᤔᤡᤸᤗᤧ ᤁᤧᤀᤠᤒᤡᤒᤠ ᤔᤡᤖᤠ᤺ᤰ ᤀᤡᤛᤣ᤺ᤱᤒᤠ ᤋᤥ᤺ᤱᤜᤠ᤹ᤗᤠᤶ ᤛᤧ᤺ᤵᤛᤡᤱᤔᤠ ᤁᤧᤛᤢᤰᤋᤡ᤹ᤖᤥ॥
EPH 6:17 ᤑᤧᤴᤈᤣ᤹ ᤋᤠᤱᤄᤢ᤺ᤰᤁᤡᤴ ᤁᤢᤀᤡᤛᤡ᤺ᤰ ᤛᤧᤴᤗᤵᤐᤡᤴ ᤂᤢ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤠᤓᤣ᤺ᤴ ᤕᤠᤱᤅᤠᤛᤡᤶᤔᤧ᤹. ᤂᤧᤱᤃ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤗᤥ॥
EPH 6:18 ᤁᤧᤖᤧᤰ ᤕᤧᤶᤜᤠ᤹ᤀᤥ ᤁᤧᤖᤧᤰ ᤐᤖᤡᤰᤗᤧᤴ ᤋᤢᤘᤠ ᤏᤢ ᤕᤧᤰᤐᤣᤗᤡᤜᤠ᤹ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥ᤺ᤛᤡᤒᤠ ᤁᤢᤀᤡᤛᤡ᤺ᤰ ᤋᤢᤘᤠ ᤆᤥᤃᤧᤶᤔᤧ᤹॥ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤖ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤋᤢᤘᤠ ᤆᤥ᤺ᤰᤔᤠ ᤐᤡᤔᤠᤛᤡ ᤔᤧᤗᤧᤖᤧᤶᤔᤡᤴᤏᤧ᤹ᤀᤥ॥
EPH 6:19 ᤀᤡᤱᤃᤠ᤹ ᤛᤢᤏᤠᤀᤡᤱ ᤛᤧ᤺ᤛᤢᤱᤅᤡᤸᤗᤧ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤈᤠᤰᤁᤡᤴ ᤂᤥ᤺ᤛᤢᤱᤗ ᤜᤧᤰᤁᤩᤠᤱ ᤔᤧᤱᤃᤡᤀᤣ ᤛᤢᤏᤠᤀᤡᤱᤅᤡᤸᤗᤧᤴ ᤛᤡᤒᤡ᤹ ᤐᤠ᤺ᤴᤜᤠ᤹ ᤀᤡᤱᤓᤥ᤺ᤔᤠ ᤛᤢᤰᤋᤢᤱᤗ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤗᤠᤃᤡᤀᤠᤱ ᤋᤢᤘᤠ ᤀᤠᤈᤥᤃᤧ᤹ ᤀᤠᤒᤡᤖᤧ᤹ᤀᤥ॥
EPH 6:20 ᤛᤢᤏᤠᤀᤡᤱᤅᤡᤴ ᤛᤧ᤺ᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤀᤡᤄᤣ᤺ᤱᤅᤥ ᤁᤧᤎᤠ᤺ᤒᤠ ᤜᤠᤱᤗᤠᤀᤡᤱᤒᤠᤀᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤜᤧᤰᤁᤣᤀᤣ ᤔᤧᤱᤃᤡ ᤔᤧᤴᤕᤱᤅᤣ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤢᤱᤗ ᤑᤠ᤹ᤀᤠᤱ ᤋᤢᤘᤠ ᤀᤠᤈᤥᤃᤧ᤹ ᤀᤠᤒᤡᤖᤧ᤹ᤀᤥ॥
EPH 6:21 ᤀᤡᤱᤃᤠ᤹ ᤀᤠᤰᤂᤣ ᤗ᤹ᤀᤠ ᤜᤧᤰᤁᤩᤠᤱ ᤌᤣ ᤆᤥᤃᤢᤱᤗ ᤘᤠ᤹ᤀᤠ. ᤂᤧᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤒᤠ ᤏᤢᤛᤠ᤹ ᤏᤢ ᤍᤠᤱᤒᤠᤀᤥ ᤏᤛᤠ᤺ᤴᤛᤠᤒᤠ ᤛᤣᤘᤠᤖᤥᤒᤠ ᤋᤢᤂᤡᤁᤛᤖᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤈᤧᤰᤋᤡ᤹ᤖᤥ॥
EPH 6:22 ᤀᤠᤏᤡᤃᤧ ᤀᤠᤰᤂᤣᤗ᤹ᤖᤡᤰ ᤘᤕᤡᤃᤧ ᤁᤧᤗ᤹ᤒᤠᤴ ᤁᤧᤔᤧᤳᤋᤡᤀᤠᤱ ᤂᤡᤏᤡ᤹ ᤜᤠᤱᤜᤠᤱ ᤁᤧᤈᤥᤃᤡᤖ ᤑᤠ᤹ᤀᤠᤱᤅᤣ ᤂᤢᤏᤧ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤒᤠᤖᤥ॥
EPH 6:23 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤏᤠᤖᤢᤱ ᤁᤧᤒᤡᤖᤡᤖ ᤜᤧᤰᤁᤩᤠᤱ ᤂᤪᤡᤛ᤻ᤋᤧᤴ ᤆᤰᤔᤧᤸᤗ᤹ᤀᤣ ᤏᤛᤠ᤺ᤴ ᤆᤥ᤺ᤰᤔᤠ ᤏᤢ ᤂᤡᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖᤖᤥ॥
EPH 6:24 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤔᤡ᤺ᤶᤈᤡ ᤁᤧᤔᤧᤵᤐᤠ ᤁᤧᤖᤧᤰᤏᤢ ᤗᤢᤱᤃᤢᤶᤔᤡᤴ ᤛᤍᤠᤍᤡᤱ ᤘᤠ᤹ᤖᤖᤥ॥
PHI 1:1 ᤑᤡᤗᤡᤵᤐᤡ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤛᤣᤛᤣ ᤁᤢᤔᤏᤠᤜᤠ᤹ ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥ᤺ᤒᤠᤜᤠ᤹ ᤏᤢ ᤔᤠᤱᤛᤣᤘᤠᤖᤥᤒᤠᤛᤣ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣᤘᤠᤖᤥᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤋᤡᤔᤥᤌᤡᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤖᤥ॥
PHI 1:2 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱᤅᤡᤴ ᤂᤡᤏᤡ᤹ ᤁᤧᤒᤡᤖᤡᤖ॥
PHI 1:3 ᤏᤡᤱᤘᤠ᤹ ᤀᤡ᤺ᤳᤏᤡᤱᤒᤠ ᤕᤧᤶ ᤌᤵᤔᤣ ᤀᤡᤱᤃᤠ᤹ ᤛᤣᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤗᤥ.
PHI 1:4 ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤋᤢᤘᤠ ᤆᤥ᤺ᤰᤁᤠᤸᤗᤧ ᤀᤠᤵᤑᤠᤸᤗᤧᤛᤠᤱ ᤛ᤺ᤳᤋᤠᤖ ᤋᤢᤘᤠ ᤆᤥ᤺ᤰᤁᤠ.
PHI 1:5 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤢᤏᤠᤀᤡᤱ ᤁᤧᤄᤧᤵᤛᤢᤶᤒᤠ ᤌᤡᤰᤛᤡᤃᤣ᤺ᤰᤐᤠ ᤕᤧᤴᤏᤠᤱᤎᤥ ᤀᤠᤸᤗ ᤌᤠᤖᤡᤰ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧ᤺ᤔᤠᤀᤥ ᤀᤡᤱᤃᤠ᤹ᤏᤢ ᤛᤥᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
PHI 1:6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤥ ᤏᤢ᤺ᤒᤠ ᤕᤠ᤺ᤶᤒᤰ ᤜᤣ᤺ᤰᤋᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤪᤡᤛ᤻ᤋ ᤕᤧᤛᤢᤖᤧ ᤕᤠᤶᤔᤥ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴ ᤌᤠᤖᤡᤰᤗᤧ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤢ ᤛᤢᤖᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤥ ᤏᤡᤱᤘᤠ᤹ ᤏᤡ᤺ᤴᤎᤥᤀᤥ ᤘᤠ᤹ᤀᤠᤖᤥ॥
PHI 1:7 ᤂᤡᤏᤡ᤹ ᤕᤠ᤺ᤶᤒᤣᤀᤥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠᤴ ᤗᤠ᤹ᤖᤢ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤏᤡᤱᤅᤠᤱ ᤘᤠ᤹ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤕᤠᤰᤁᤠᤛᤠᤱ. ᤛᤢᤏᤠᤀᤡᤱᤅᤡᤸᤗᤧᤴ ᤛᤧᤰᤂᤠ᤺ᤴ ᤋᤠᤱᤛᤧ᤺ᤵᤋᤢᤱᤛᤠᤱ ᤀᤡᤃᤪ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤢᤱᤛᤠᤱ. ᤂᤡᤏᤡ᤹ ᤀᤡᤱᤃᤠ᤹ᤏᤢ ᤛᤥᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧᤴ ᤗᤰ ᤁᤧᤄᤥ᤺ᤒᤠ ᤁᤧᤒᤥ᤺ᤰᤂᤡ᤹ᤖᤥ॥
PHI 1:8 ᤂᤪᤡᤛ᤻ᤋ ᤕᤧᤛᤢᤖᤧ ᤜᤧᤰᤁᤣᤀᤣ ᤗᤢᤱᤔᤠ᤹ ᤋᤢᤰᤏᤡᤱᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱ ᤁᤧᤗ᤹ᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡ᤺ᤛᤢ᤹ᤖᤥ॥
PHI 1:9 ᤀᤡᤱᤃᤠ᤹ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤢᤱᤗᤥ–ᤂᤡᤏᤡ᤹ ᤀᤠᤸᤗᤛᤠᤱ ᤕᤖᤡᤰ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤀᤠᤱ ᤏᤧᤜᤡᤏᤡᤱᤘᤠ᤹ ᤏᤢ ᤂᤠᤛᤡᤱ ᤏᤡ᤺ᤵᤔᤠᤸᤗᤧ ᤁᤧᤒᤥᤖᤡᤖ ᤁᤧᤒᤣᤃᤡᤖ.
PHI 1:10 ᤜᤧᤰᤁᤣᤗ᤹ᤖᤡᤰ ᤛᤠ᤹ᤖᤡᤰ ᤏᤢ᤺ᤒᤠ ᤐᤠ᤺ᤴᤜᤠ᤹ ᤛᤣ᤺ᤰᤔᤠ ᤜᤧᤰᤁᤩᤠᤱ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴ ᤌᤠᤖᤡᤰ ᤛᤣᤛᤣ ᤏᤢ ᤑᤥᤋᤩᤠ ᤔᤧ᤺ᤴᤏᤣ ᤘᤠ᤹ᤔᤠ ᤁᤧᤛᤢᤰᤋᤢᤶᤗ.
PHI 1:11 ᤜᤧᤰᤁᤩᤠᤱ ᤂᤡᤏᤡ᤹ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤓᤠ᤹ᤗᤠᤶ ᤕᤖᤡᤰ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤱᤗᤥ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤡᤔᤡᤍᤡᤱ ᤏᤢ ᤏᤠᤖᤠ ᤑᤥ᤺ᤔᤠᤴ ᤐᤥ᤺ᤱᤗᤥ॥
PHI 1:12 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗ ᤀᤡᤱᤃᤠ᤹ ᤋᤢᤔᤢᤱᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤃ ᤛᤢᤏᤠᤀᤡᤱ ᤛᤧ᤺ᤔᤠ ᤁᤢᤓᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥
PHI 1:13 ᤌᤣᤀᤠᤱᤓᤧᤸᤗᤧ ᤜᤠᤱᤜᤡᤶ ᤋᤠᤱᤃᤧᤛᤧ᤺ᤵᤐᤠ ᤁᤠᤰ ᤌᤰᤛᤢᤒᤠᤜᤠ᤹ ᤏᤢ ᤁᤵᤔᤥ ᤁᤧᤘᤠ᤹ᤒᤠ ᤁᤠᤰ ᤔᤏᤠᤜᤠ᤹ᤖᤧᤀᤠᤱ ᤀᤡᤱᤃᤠ᤹ ᤂᤪᤡᤛ᤻ᤋᤧᤴ ᤛᤣᤘᤠ ᤆᤥᤃᤢᤱᤒᤠᤸᤗᤧ ᤀᤡᤄᤣ᤺ᤱᤅᤥ ᤌᤩᤠᤱᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥
PHI 1:14 ᤀᤡᤱᤃᤠ᤹ ᤐᤢᤱᤗᤠᤜᤡᤶᤔᤥ ᤌᤩᤠᤱᤅᤠᤱ ᤘᤠ᤹ᤀᤠᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤋᤱᤒᤠ ᤏᤛᤠᤏᤡᤒᤠᤜᤠ᤹ᤖᤧᤃ ᤛᤠ᤹ᤖᤡᤰ ᤀᤠ᤺ᤴᤇᤡᤱᤔᤠ ᤔᤧᤄᤥ᤺ᤛᤢᤀᤠᤱ ᤔᤧᤱᤃᤡᤀᤣ ᤜᤠᤱᤜᤠᤱᤅᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤘᤣ᤹ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ᤹ᤖᤥ॥
PHI 1:15 ᤁᤢᤓᤠᤖᤧᤃ ᤏᤠᤔᤧᤜᤧᤳᤋᤠᤀᤠᤱ ᤂᤣᤔᤠ ᤌᤰᤔᤠ ᤏᤡᤱᤘᤠ᤹ᤗᤠᤶ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤔᤧᤓᤥ᤺ᤛᤢ᤹. ᤁᤖ ᤁᤢᤓᤠᤖᤧᤃ ᤏᤥᤏᤡᤱᤘᤠ᤹ᤏᤢ ᤜᤧᤰᤁᤣ ᤔᤧᤈᤥᤃᤢ᤹ᤖᤥ॥
PHI 1:16 ᤂᤧᤴ ᤏᤥᤏᤡᤱᤘᤠ᤹ᤏᤢ ᤀᤡᤱᤃᤧᤓᤥ᤺ᤒᤠᤜᤠ᤹ᤖᤧᤃ ᤗᤢᤱᤔᤠ᤹ ᤔᤧᤍᤢᤰᤋᤠᤱᤒᤠᤸᤗᤧ ᤜᤧᤰᤁᤣ ᤔᤧᤈᤥᤃᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤢᤏᤠᤀᤡᤱᤅᤡᤸᤗᤧᤴ ᤛᤧᤰᤂᤠ᤺ᤴ ᤋᤠᤱᤛᤧ᤺ᤵᤛᤧ ᤀᤡᤱᤃᤠ᤹ ᤛᤣ᤺ᤰᤕᤢᤰ ᤐᤥ᤺ᤰᤂᤠᤱᤒᤠ ᤑᤠ᤹ᤀᤠᤱ ᤔᤧᤏᤡ᤺ᤛᤢᤀᤠᤱ ᤔᤧᤘᤠ᤹ᤖᤥ॥
PHI 1:17 ᤜᤧᤰᤁᤩᤠᤱ ᤂᤧᤴ ᤏᤠᤜᤧᤶᤔᤠ ᤏᤡᤱᤘᤠ᤹ᤗᤠᤶ ᤀᤡᤱᤃᤧᤓᤥ᤺ᤒᤠᤜᤠ᤹ᤖᤧᤃ ᤏᤥᤏᤡᤱᤘᤠ᤹ᤗᤠᤶ ᤔᤧ᤺ᤴ. ᤁᤖ ᤂᤰᤂᤫᤠ ᤏᤡᤱᤘᤠ᤹ᤀᤡᤸᤗᤧ ᤛᤢᤏᤠᤀᤡᤱ ᤀᤡᤱᤔᤧᤓᤥ᤺ᤛᤢᤀᤠᤱ ᤐᤢᤱᤗᤠᤜᤡᤶᤔᤥ ᤕᤠᤰᤁᤠᤸᤗᤧ ᤀᤠᤸᤗᤛᤠᤱ ᤋᤢᤰᤂᤣ ᤕᤥ᤹ᤛᤡᤱᤏᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤈᤥᤃᤢ᤹ᤖᤥ॥
PHI 1:18 ᤆᤩᤠᤛᤠᤱ. ᤀᤠᤸᤗ ᤀᤠᤳᤋᤡᤴ ᤐᤖᤡᤰᤗᤧᤛᤠᤱ. ᤏᤥᤏᤡᤱᤘᤠ᤹ᤀᤡᤸᤗᤧ ᤀᤡᤃᤪ ᤑᤧᤴ ᤏᤡᤱᤘᤠ᤹ᤀᤡᤸᤗᤧ. ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤥ᤺ᤸᤗᤧᤃ ᤏᤢ᤺ᤒᤠᤀᤣᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤛ᤺ᤳᤋᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤰᤔᤧᤸᤗ᤹ᤀᤣ ᤛ᤺ᤳᤋᤠ.
PHI 1:19 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤗᤠᤃᤡ ᤁᤧᤈᤥᤃᤢᤶᤒᤠ ᤐᤣᤗᤡᤃᤧᤴ ᤋᤢᤘᤠᤗᤠᤶ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤐᤡᤀᤠᤒᤠ ᤁᤢᤓᤠ᤹ᤗᤠᤶᤒᤠ ᤀᤡᤱᤃᤠ᤹ ᤆᤥ᤺ᤰᤕᤢᤶᤓᤥ ᤂᤥ᤺ᤛᤢᤱ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥
PHI 1:20 ᤀᤡᤱᤃᤠ᤹ᤃ ᤀᤠᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤡᤖᤡᤱᤔ᤺ᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤎᤠᤀᤠᤴᤏᤡ ᤁᤖ ᤀᤡᤱᤃᤠ᤹ ᤜᤠᤱᤜᤠᤱ ᤁᤧᤗ᤹ᤒᤠ ᤐᤥ᤺ᤱᤅᤠᤱ ᤛᤡ᤺ᤀᤠᤛᤠᤱ ᤜᤡᤱᤅᤠᤛᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤗᤠᤶᤒᤠ ᤀᤠᤸᤗᤥ ᤜᤧᤰᤁᤣ ᤛᤍᤠᤍᤡᤱ ᤂᤪᤡᤛ᤻ᤋᤖᤧ ᤁᤢᤔᤡᤱᤛᤥ ᤀᤡᤱᤎᤠ᤺ᤱ ᤐᤥ᤺ᤱᤗ ᤑᤠ᤹ᤀᤠᤱ ᤐᤕᤶ ᤏᤡᤱᤘᤠ᤹ ᤏᤢ ᤏᤡᤱᤛᤠᤱ ᤆᤥᤃᤢᤱᤗᤥ॥
PHI 1:21 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤜᤡᤱᤅᤠᤏᤧ ᤑᤠ᤹ᤃᤪ ᤕᤧᤛᤢ ᤂᤪᤡᤛ᤻ᤋᤖᤧ ᤗᤠᤃᤡ ᤐᤥ᤺ᤱ. ᤜᤧᤰᤁᤩᤠᤱ ᤛᤡ᤺ᤀᤠ ᤐᤣ᤺ᤰᤁᤠᤛᤠᤱ ᤀᤡᤱᤃᤠ᤹ ᤀᤠᤗᤠᤃᤡ ᤀᤡᤴᤎᤠ᤺ᤱᤅᤣ ᤐᤥ᤺ᤱᤗᤥ॥
PHI 1:22 ᤁᤖ ᤀᤡᤱᤃᤠ᤹ ᤜᤡᤱᤅᤠᤏᤧ ᤑᤠ᤹ᤃᤪ ᤂᤪᤡᤛ᤻ᤋᤖᤧ ᤁᤢᤛᤣᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰ ᤂᤥ᤺ᤛᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤌᤧᤔᤠ᤺ᤴ ᤛᤣᤃᤢᤱᤒᤠᤒᤣ᥅ ᤔᤧᤏᤡᤀᤠᤴᤗᤥ᥄
PHI 1:23 ᤀᤡᤱᤃᤠ᤹ᤃ ᤌᤥ ᤏᤠ ᤕᤥ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤛᤧᤰᤂᤠ᤺ᤸᤗᤧ ᤀᤡᤱᤃᤠ᤹ᤃ ᤁᤴ ᤜᤡᤱᤔᤴᤏᤡᤴ ᤗᤧᤖᤢᤱᤅᤠᤱ ᤂᤪᤡᤛ᤻ᤋᤧᤴᤏᤢᤀᤣ ᤘᤠ᤹ᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤗᤠᤃᤡᤃ ᤂᤧᤴ ᤛᤠ᤹ᤖᤡᤰ ᤏᤢ᤺ᤒᤠ ᤐᤥ᤺ᤱᤗᤥ॥
PHI 1:24 ᤁᤖ ᤀᤡᤱᤃᤠ᤹ ᤜᤡᤱᤔᤠᤀᤠᤱ ᤘᤠ᤹ᤔᤠᤃ ᤂᤡᤏᤡ᤹ ᤗᤠᤃᤡ ᤛᤠ᤹ᤖᤡᤰ ᤁᤧᤕᤧᤰᤐᤠ ᤐᤥ᤺ᤱᤗᤥ॥
PHI 1:25 ᤀᤡᤱᤃᤠ᤹ ᤁᤴ ᤐᤠ᤺ᤴᤏᤥ ᤏᤡᤛ᤻ᤛᤣᤀᤣ ᤘᤠ᤹ᤀᤠᤖᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤁᤧᤎᤢᤶᤒᤠ ᤐᤥ᤺ᤱᤅᤠᤱ ᤂᤧᤴᤗᤠᤶᤒᤠ ᤁᤧᤛ᤺ᤳᤋᤡ᤹ ᤁᤧᤗ᤹ᤒᤠᤴ ᤏᤡ᤺ᤛᤢᤱᤗᤥ॥
PHI 1:26 ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤠᤶᤔᤥ ᤏᤢ᤺ᤱᤅᤠ ᤋᤠᤀᤠᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠᤸᤗᤧ ᤂᤪᤡᤛ᤻ᤋ ᤕᤧᤛᤢᤀᤥ ᤂᤡᤏᤡ᤹ ᤛᤠ᤹ᤖᤡᤰ ᤁᤧᤛ᤺ᤳᤋᤡ᤹ᤖᤥ॥
PHI 1:27 ᤁᤠᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤐᤠ᤺ᤱᤃ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤗᤠ᤹ᤖᤢᤒᤠ ᤜᤡᤱᤔᤴᤏᤥ ᤂᤡᤏᤡ᤹ ᤘᤕᤧᤶᤔᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤀᤠᤱ ᤏᤡ᤺ᤏᤡᤱᤛᤠᤱ ᤀᤡᤃᤪ ᤂᤡᤏᤡ᤹ ᤕᤠ᤺ᤶᤒᤣᤀᤥᤖᤰ ᤂᤧᤵᤛᤢᤱᤛᤠᤱ ᤂᤡᤏᤡ᤹ ᤛᤢᤏᤠᤀᤡᤱᤅᤡᤸᤗᤧᤴ ᤏᤛᤠ᤺ᤴᤏᤥ ᤁᤧᤍᤱᤅᤠᤛᤡᤀᤠᤱ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤏᤡ᤺ᤛᤢᤱᤗᤥ॥
PHI 1:28 ᤂᤡᤏᤡ᤹ ᤁᤧᤀᤵᤐᤠᤜᤠ᤹ᤖᤧ ᤀᤠᤳᤋᤡᤴ ᤐᤠ᤺ᤴᤏᤥᤀᤠᤱ ᤕᤱᤔᤠ ᤁᤧᤔᤧᤴᤇᤧᤖᤡᤴᤗᤖᤥ॥ ᤁᤱᤃ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤰᤔᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤡᤏᤡ᤹ ᤛᤧᤴᤗᤵ ᤂᤥ᤺ᤔᤠ ᤔᤡᤰᤛᤣ᤺ᤴᤗᤥ॥
PHI 1:29 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥ᤺ᤰᤔᤠᤖᤰ ᤔᤧ᤺ᤴ. ᤁᤖ ᤂᤢᤏᤧ᤹ ᤁᤢᤗᤠᤃᤡ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠᤀᤠᤱ ᤛᤢᤕᤧᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
PHI 1:30 ᤜᤧᤰᤁᤩᤠᤱ ᤐᤣᤕᤧᤶᤔᤥ ᤁᤧᤏᤡ᤺ᤛᤢᤶᤒᤠ ᤀᤡᤏᤥᤃᤧᤴ ᤀᤠᤍᤢᤰᤂᤣ᤺ᤴ ᤀᤠᤸᤗᤥ ᤌᤠᤖᤡᤰᤁᤠᤱ ᤌᤖᤢᤱᤗ ᤘᤠ᤹ᤀᤠᤒᤠᤴ ᤁᤧᤄᤧᤵᤛᤢᤶᤗ ᤁᤧᤘᤕᤡ᤹॥ ᤜᤠᤒᤠ ᤁᤴ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤂᤡᤏᤡ᤹ᤀᤠᤱ ᤁᤧᤍᤢᤔᤢᤶᤗ ᤁᤧᤘᤕᤡ᤹ᤖᤥ॥
PHI 2:1 ᤂᤪᤡᤛ᤻ᤋᤧᤴᤏᤢ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤒᤠᤗᤠᤶ ᤜᤠᤱᤜᤠᤱ ᤁᤧᤗ᤹ᤖᤡ᤹. ᤂᤢᤏᤧ᤹ ᤁᤢᤔᤡ᤺ᤶᤈᤡᤗᤠᤶ ᤛᤰᤔᤠ ᤁᤧᤳ. ᤛᤣᤛᤣᤔᤠᤱᤅᤡᤴᤏᤢ ᤋᤱᤈᤢᤶᤔᤥ ᤁᤧᤘᤕᤡ᤹. ᤂᤡᤏᤡ᤹ ᤛᤡᤰᤗᤢᤱᤔᤥᤗᤠᤶ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤒᤠᤸᤗᤧ ᤆᤥᤃᤢᤸᤗᤧ
PHI 2:2 ᤏᤡᤱᤘᤠ᤹ ᤁᤧᤍᤱᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤗᤳᤇᤠ ᤔᤡ᤺ᤶᤈᤡᤀᤥ. ᤗᤳᤇᤠ ᤏᤡᤱᤘᤠ᤹ᤀᤥ ᤏᤢ ᤗᤳᤇᤠ ᤏᤡᤱᤘᤠ᤹ᤛᤥ᤺ᤰᤁᤥ ᤘᤕᤧᤶᤔᤧ᤹ᤖ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ॥
PHI 2:3 ᤂᤰᤂᤫᤠ ᤏᤡᤱᤘᤠ᤹ ᤏᤢ ᤀᤠᤱᤍᤡᤱ ᤗ᤹ᤔᤠᤗᤠᤶ ᤌᤣᤀᤠᤱ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤆᤢᤱᤈᤡᤃᤧᤴ ᤏ᤺ᤶᤛᤡᤱᤔᤠᤗᤠᤶ ᤘᤣ᤹ᤜᤠ᤹ ᤀᤠᤵᤑᤣ᤺ᤰᤏᤢ᤺ᤸᤗᤧᤀᤠᤱ ᤁᤧᤕᤧᤰᤐᤠ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ॥
PHI 2:4 ᤂᤡᤏᤡ᤹ ᤀᤠᤒᤠᤅᤣ ᤏᤢ᤹ᤔᤠ ᤋᤠᤔᤠᤴᤗᤰ ᤔᤧ᤺ᤴ. ᤁᤖ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤏᤢ᤹ᤔᤠ ᤋᤠ᤺ᤔᤠᤴᤏᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
PHI 2:5 ᤂᤪᤡᤛ᤻ᤋ ᤕᤧᤛᤢᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
PHI 2:6 ᤂᤪᤡᤛ᤻ᤋᤧᤴ ᤛᤧᤰᤂᤠᤀᤣ ᤏᤡᤱᤘᤠ᤹ᤑᤢᤔᤠᤱ ᤘᤕᤧ. ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤢᤍᤱᤒᤠ ᤐᤥ᤺ᤱᤔᤠᤀᤠᤱ ᤘᤠ᤹ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤴᤗᤥ॥
PHI 2:7 ᤂᤧᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤌᤣᤀᤠᤱ ᤔᤧ᤺ᤴᤏᤣᤒᤠ ᤆᤥ᤺ᤰᤛᤡᤱᤅᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰᤐᤠ ᤛᤣᤘᤠᤖᤥᤒᤠ ᤐᤥ᤺ᤰᤂᤧᤖᤥ॥
PHI 2:8 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰ ᤘᤕᤧᤸᤗᤧ ᤂᤢᤏᤧ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤃᤧᤶᤒᤠ ᤐᤥ᤺ᤰᤂᤧᤀᤠᤱ ᤁᤢᤓᤠᤱ ᤁᤧᤓᤣ᤺ᤶᤒᤠ ᤁᤢᤀᤡᤛᤡ᤺ᤰ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤛᤩᤧᤖᤥ॥
PHI 2:9 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤠᤰᤏᤢ᤺ᤸᤗᤧ ᤌᤥ᤺ᤛᤢᤃᤧᤴ ᤕᤢᤱᤍᤧᤴᤏᤥ ᤕᤢᤰᤂᤢᤀᤠᤱ ᤘᤣ᤹ ᤔᤡᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤶᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤒᤠ ᤔᤡᤱ ᤐᤡᤖᤢᤖᤥ॥
PHI 2:10 ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤢ ᤂᤠᤶᤒᤣ᤺ᤰᤔᤥᤒᤠ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰᤗᤧ ᤕᤧᤛᤢᤖᤧ ᤁᤢᤔᤡᤱᤅᤡᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠᤖᤧ ᤗᤠᤃᤡ ᤌᤢᤱᤒᤥ ᤔᤧᤗᤣ᤺ᤳᤋᤢ᤹ᤖᤥ॥
PHI 2:11 ᤕᤧᤛᤢ ᤂᤪᤡᤛ᤻ᤋᤧᤴᤏᤣ ᤍᤠᤱᤒᤠ ᤗ᤹ᤖᤡᤰ ᤁᤧᤖᤧᤰᤗᤧ ᤔᤧᤒᤠ᤺ᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠ᤺ᤱ ᤂᤥ᤺ᤛᤢ᤹ᤖᤥ॥
PHI 2:12 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧ ᤛᤍᤠᤍᤡᤱ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤘᤕᤡᤒᤠ ᤜᤧᤰᤁᤣ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤀᤡᤱᤈᤠ᤺ᤱᤃᤧᤶᤒᤠ ᤐᤥ᤺ᤱᤔᤠ ᤀᤠᤸᤗᤛᤠᤱ ᤁᤧᤕᤧᤰᤐᤠ ᤆᤥ᤺ᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡ᤺ᤛᤧᤶᤔᤧ᤹ᤖ ᤁᤧᤄᤥ᤺ᤛᤢᤶᤒᤠ ᤛᤧᤴᤗᤵᤐᤡᤴ ᤁᤢᤗᤡᤱᤎᤥ ᤁᤧᤳᤋᤧᤶᤔᤧ᤹ᤀᤥ॥
PHI 2:13 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤒᤥ᤺ᤰᤂᤡᤖ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤂᤢᤏᤧ᤹ᤀᤣ ᤂᤡᤏᤡ᤹ᤀᤥ ᤕᤠ᤺ᤶᤒᤰ ᤆᤥᤃᤢᤖ ᤘᤠ᤹ᤖᤥ॥
PHI 2:14 ᤁᤠᤰ ᤐᤠ᤺ᤴᤜᤠ᤹ ᤗᤢᤱᤔᤧᤴᤜᤠ᤺ᤳᤋᤣ ᤏᤢ ᤐᤠ᤺ᤴᤎᤱ ᤔᤧᤴᤈᤥ᤺ᤰᤁᤣ ᤆᤥᤃᤧᤶᤔᤧ᤹॥
PHI 2:15 ᤜᤧᤰᤁᤩᤠᤱ ᤂᤡᤏᤡ᤹ᤃ ᤛᤣᤛᤣ ᤏᤢ ᤑᤥᤋᤩᤠ ᤔᤧ᤺ᤴᤏᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡ᤹. ᤜᤧᤰᤁᤩᤠᤱ ᤁᤴ ᤀᤡᤰᤛᤠᤒᤠ ᤋᤠᤰᤁᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤏᤢ ᤁᤧᤘᤕᤡᤸᤗᤧ ᤂᤠᤔᤠᤰᤗᤢᤶᤔᤥ ᤁᤧᤀᤥ᤺ᤵᤐᤠ ᤀᤥ᤺ᤳᤋᤡᤜᤠ᤹ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤗᤢᤶᤔᤥ ᤁᤧᤀᤥ᤺ᤳᤋᤡ᤹ᤖᤥ॥
PHI 2:16 ᤜᤧᤰᤁᤩᤠᤱ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤈᤠᤰᤁᤡᤴ ᤗᤡᤱᤒᤡᤳᤋᤠᤱ ᤏᤛᤠ᤺ᤴ ᤆᤥᤃᤧᤶᤔᤧ᤹. ᤜᤧᤰᤁᤣᤗ᤹ᤖᤡᤰ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴᤏᤥ ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠᤶᤒᤢᤎᤡᤰᤐᤠ ᤕᤠ᤺ᤶᤒᤰᤜᤠ᤹ ᤆᤠᤔᤧᤛᤥ᤺ᤰᤋᤧᤴᤒᤠ ᤐᤠ᤺ᤴᤏᤡᤴ ᤏᤡ᤺ᤔᤠ ᤛᤢᤰᤋᤢᤱᤗᤥ॥
PHI 2:17 ᤍᤠᤱᤒᤠᤀᤥᤒᤠ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤏᤢ ᤛᤣᤛᤣ ᤔᤠᤱᤛᤣᤘᤠ᤺ᤱᤃ ᤁᤧᤍᤥ᤺ᤴᤍᤢᤶᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤂᤧᤴ ᤛᤡᤍᤢᤱᤈᤓᤠᤀᤥ ᤕᤥ᤹ᤔᤠ ᤐᤥ᤺ᤱᤛᤠᤱ ᤀᤡᤱᤃᤠ᤹ ᤀᤥᤔᤢ ᤗ᤹ᤀᤠ. ᤜᤧᤰᤁᤩᤠᤱ ᤂᤡᤏᤡ᤹ᤏᤢᤀᤣ ᤛ᤺ᤳᤋᤠᤖᤥ॥
PHI 2:18 ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤀᤥᤔᤢ ᤗ᤹ᤖᤧᤶᤔᤧ᤹ᤖ ᤀᤡᤱᤃᤠ᤹ᤏᤢ ᤛ᤺ᤳᤋᤧᤶᤔᤧ᤹ᤀᤥ॥
PHI 2:19 ᤍᤠᤱᤒᤠ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤐᤥ᤺ᤱᤏᤧ ᤑᤠ᤹ᤃᤪ ᤂᤡᤏᤡ᤹ᤀᤥ ᤜᤠᤖᤠᤀᤣ ᤋᤡᤔᤥᤌᤡ᤺ᤴ ᤐᤠᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤄᤱᤅᤡᤴ ᤂᤧᤵᤛᤢᤱᤅᤡᤸᤗᤧ ᤜᤠᤱᤜᤠᤱ ᤗ᤹ᤀᤠᤖᤥ॥
PHI 2:20 ᤛᤧᤰᤂᤠᤀᤣ ᤂᤡᤏᤡ᤹ ᤁᤧᤏᤢ᤺ᤖᤡ ᤁᤧᤍᤠ᤺ᤛᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ ᤔᤏᤠ ᤂᤢᤏᤧ᤹ᤏᤢ᤺ᤸᤗᤧ ᤘᤣ᤹ ᤀᤡᤱᤃᤠ᤹ᤏᤢ ᤜᤠ᤺ᤳᤋᤠᤱ ᤜᤥ᤺ᤵᤗᤥ.
PHI 2:21 ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤒᤠ᤺ᤴᤏᤡᤱᤃ ᤔᤧ᤺ᤴ. ᤁᤖ ᤀᤠᤒᤠᤅᤣ ᤐᤠ᤺ᤴᤗᤰ ᤔᤧᤃᤥ᤺ᤳᤋᤢ᤹ᤖᤥ॥
PHI 2:22 ᤁᤖ ᤂᤢᤏᤧ᤹ ᤀᤠᤰᤂᤧᤴ ᤗᤠ᤹ᤖᤢᤒᤠ ᤔᤏᤠ ᤆᤥ᤺ᤰ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤣᤖᤥ॥ ᤁᤢᤛ᤻ᤛᤠ᤺ᤸᤗᤧ ᤁᤢᤶᤒᤠ᤺ᤴᤏᤢ ᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤀᤡᤱᤃᤠ᤹ᤏᤢ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ॥
PHI 2:23 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤏᤢ ᤌᤣᤎᤣ ᤐᤥ᤺ᤱᤅᤡ. ᤂᤧᤴ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥ᤺ᤛᤢᤱᤏᤠᤔᤧ᤺ᤴᤏᤣ. ᤋᤡᤔᤥᤌᤡ᤺ᤴ ᤂᤡᤏᤡ᤹ᤀᤥ ᤐᤠᤱᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥
PHI 2:24 ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤐᤥ᤺ᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤒᤠᤅᤣ ᤂᤡᤏᤡ᤹ᤀᤥ ᤜᤠᤖᤠᤀᤣ ᤋᤠᤀᤠ ᤁᤧᤗ᤹ᤒᤠᤴ ᤏᤡᤛ᤻ᤛᤣᤀᤣ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
PHI 2:25 ᤁᤖ ᤀᤠᤸᤗᤥᤃ ᤀᤡᤐᤠᤑᤪᤥᤍᤡᤋᤛᤧᤴ ᤂᤡᤏᤡ᤹ᤀᤥ ᤕᤠᤱᤏᤠ ᤐᤠᤱᤔᤠ ᤁᤧᤕᤧᤰᤐᤠ ᤏᤡ᤺ᤛᤢᤱᤗᤥ॥ ᤀᤠᤴᤇᤡᤃᤧ ᤛᤥᤖᤡᤰ ᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥᤃᤢᤛᤡᤃᤧ. ᤜᤧᤰᤁᤩᤠᤱ ᤛᤢᤏᤠᤀᤡᤱ ᤛᤧ᤺ᤔᤠ ᤌᤱᤅᤡᤴᤏᤠᤱ ᤛᤥᤛᤥᤖᤡᤰ ᤌᤰᤋᤧᤛᤡᤃᤧ॥ ᤂᤢᤏᤧ᤹ᤃ ᤀᤡᤱᤃᤠ᤹ ᤁᤢᤓᤠ᤹ ᤐᤡᤛᤧ ᤁᤧᤒᤠᤱᤄᤢᤶᤒᤠ ᤂᤡᤏᤡ᤹ ᤀᤡᤱᤛᤠᤒᤠᤖᤥ॥
PHI 2:26 ᤂᤢᤏᤧ᤹ ᤁᤢᤕᤠᤶ ᤋᤢᤃᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤄᤧᤵᤛᤢᤶᤒᤠᤀᤥ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤗᤢᤱᤔᤠ᤹ ᤕᤥ᤺ᤴᤍᤧᤀᤠᤱ ᤂᤡᤏᤡ᤹ ᤋᤢᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤠ᤹ᤖᤥ॥
PHI 2:27 ᤏᤡᤛ᤻ᤛᤣᤀᤣ ᤂᤢᤏᤧ᤹ ᤛᤠ᤹ᤖᤡᤰ ᤋᤢᤃᤧᤀᤠᤱ ᤂᤵᤔᤧᤴ ᤛᤩᤧ. ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤖᤰ ᤔᤧ᤺ᤴ. ᤁᤖ ᤀᤡᤱᤃᤠ᤹ᤀᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤋᤢᤰᤂᤣᤀᤥ ᤔᤧᤎᤠᤀᤠᤴᤗ ᤑᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤋᤠᤱᤗᤥ॥
PHI 2:28 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤡᤏᤡ᤹ᤀᤥ ᤐᤠᤱᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤧᤏᤡ᤺ᤛᤢᤶᤔᤠᤱ ᤁᤧᤛ᤺ᤳᤋᤡ᤹. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤏᤡᤱᤘᤠ᤹ᤀᤡᤴ ᤕᤠᤱᤕᤠᤱ ᤐᤥ᤺ᤱᤗᤥ॥
PHI 2:29 ᤂᤢᤏᤧ᤹ ᤍᤠᤱᤒᤠᤀᤥ ᤛ᤺ᤳᤋᤧᤶᤔᤧᤖ ᤗᤠᤱᤍᤠ᤺ᤰᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤜᤧᤰᤋᤱᤒᤠ ᤔᤏᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤀᤥ.
PHI 2:30 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤗᤠᤃᤡ ᤐᤡᤔᤠ ᤁᤧᤴᤇᤢᤰᤋᤢᤶᤔᤡᤴᤒᤠ ᤁᤢᤓᤠ᤹ᤀᤡᤴ ᤂᤢᤏᤧ᤹ ᤐᤡᤖᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤰᤗᤧ ᤗᤠᤃᤡ ᤂᤢᤏᤧ᤹ ᤂᤵᤔᤧᤴ ᤛᤩᤧᤖᤥ॥
PHI 3:1 ᤀᤠᤸᤗ ᤁᤢᤏᤢᤵᤔᤥ. ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠᤀᤥ ᤛ᤺ᤳᤋᤧᤶᤔᤧ᤹ᤀᤥ॥ ᤕᤠᤶᤔᤥ ᤒᤠ ᤀᤰᤂᤣᤗ᤹ᤖᤡᤰ ᤗᤳᤇᤠ ᤐᤠ᤺ᤴᤏᤡᤴ ᤛᤠᤵᤔᤠᤖ ᤏᤧᤔᤠᤃ ᤀᤠᤗᤠᤃᤡ ᤌᤣᤀᤠᤱ ᤋᤢᤰᤂᤣ ᤔᤧᤒᤥ᤺ᤱᤏᤧᤴ. ᤜᤧᤰᤁᤩᤠᤱ ᤁᤸᤗᤧᤃ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤋᤠᤱᤛᤧ᤺ᤵᤗᤥ॥
PHI 3:2 ᤜᤷᤍᤥ ᤜᤧᤰᤔᤠ ᤁᤧᤒᤠᤱᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤁᤡᤵᤔᤠ ᤁᤧᤄᤢ᤺ᤒᤠ ᤂᤩᤠᤒᤠ ᤜᤧᤰᤋᤱᤒᤠᤛᤡᤖᤥ॥
PHI 3:3 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣᤔᤠᤱᤗᤠᤶ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤰ ᤛᤧᤰᤂᤠ ᤜᤷᤍᤥ ᤁᤧᤜᤧᤰᤐᤠᤛᤡᤖᤥ॥ ᤀᤠᤏᤡ᤹ᤃ ᤔᤧᤴᤇᤠᤶ ᤕᤠ᤺ᤶᤒᤰᤁᤥ ᤋᤠ᤺ᤰᤐᤥ ᤀᤠᤴᤕᤢᤰᤂᤢᤶᤔᤡᤸᤗᤥ. ᤂᤧᤸᤗᤧ ᤁᤢᤗᤧᤰᤘᤠ ᤀᤠᤏᤡ᤹ᤗᤠᤃᤡ ᤂᤪᤡᤛ᤻ᤋ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤴᤏᤥᤏᤧ ᤀᤠᤛ᤺ᤳᤗᤥ॥
PHI 3:4 ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤒᤠᤅᤣ ᤜᤧᤰᤁᤣᤗ᤹ᤖᤡᤰ ᤋᤠ᤺ᤰᤐᤥ ᤕᤢᤱᤔᤠ ᤛᤢᤰᤋᤢᤱᤒᤡᤗᤠ॥ ᤀᤠᤳᤋᤡᤸᤗᤧ ᤔᤧᤴᤇᤠᤶ ᤕᤠ᤺ᤶᤒᤰᤁᤥ ᤋᤠ᤺ᤰᤐᤥ ᤕᤢᤱᤔᤠ ᤛᤢᤰᤋᤢᤱ ᤗ᤹ᤖᤡᤰ ᤀᤡ᤺ᤳᤋᤢ᤹. ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤡᤱᤃᤠ᤹ ᤋᤠ᤺ᤰᤐᤥ ᤕᤢᤱᤔᤠ ᤛᤢᤰᤋᤢᤱ–
PHI 3:5 ᤛᤠᤘᤠ᤺ᤴᤇᤡᤱᤅᤠᤱᤒᤠ ᤕᤧᤳᤇᤡ (᥎) ᤕᤧᤴᤏᤥ ᤜᤷᤍᤥ ᤔᤧᤜᤧᤃᤠᤱ ᤔᤧᤒᤡᤖᤠᤱ. ᤀᤡᤱᤃᤠ᤹ ᤔᤡᤱᤛᤥ ᤀᤡᤱᤎᤠ᤺ᤱᤒᤠ ᤒᤧᤴᤈᤠᤔᤡᤏ ᤛᤢᤘᤠᤱᤛ᤻ᤔᤠ ᤀᤡᤛᤪᤠᤀᤡᤗᤡ ᤔᤏᤠᤀᤠ. ᤜᤡᤒᤪᤢᤜᤠ᤹ᤀᤥ ᤛᤠ᤹ᤖᤡᤰ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤜᤡᤒᤪᤢᤀᤠ. ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤀᤥᤃ ᤀᤡᤱᤃᤠ᤹ ᤁᤧᤏᤡ᤺ᤒᤠ ᤁᤧᤗᤧᤒᤠ ᤑᤖᤡᤛᤡᤀᤠᤖᤥ
PHI 3:6 ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤥ ᤛᤡᤰᤁᤧᤛᤶᤒᤠ ᤘᤕᤠᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤁᤡᤴ ᤋᤢᤰᤂᤣ ᤆᤠ᤺ᤳᤋᤢᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤖ ᤑᤠ᤹ᤀᤠᤱ ᤁᤠᤰ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤱᤃ ᤏᤢ᤺ᤖᤡᤰᤁᤠᤱ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱ॥
PHI 3:7 ᤁᤖ ᤀᤠᤳᤋᤡᤴ ᤐᤠ᤺ᤴᤜᤠ᤹ ᤀᤠᤗᤠᤃᤡ ᤀᤡᤱᤎᤠ᤺ᤱᤒᤠ ᤆᤥᤃᤧ. ᤂᤧᤱᤜᤠ᤹ ᤁᤧᤖᤧᤰ ᤂᤪᤡᤛ᤻ᤋᤖᤧ ᤆᤥᤃᤢᤸᤗᤧ ᤁᤢᤔᤧᤸᤗᤢᤱ ᤔᤧ᤺ᤴᤏᤣᤒᤠ ᤀᤡ᤺ᤳᤋᤢᤱᤗᤥ॥
PHI 3:8 ᤂᤧᤴᤗᤰ ᤔᤧ᤺ᤴ. ᤁᤖ ᤀᤠᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢ᤺ᤴ ᤁᤢᤛᤡᤱ ᤏᤡ᤺ᤵᤔᤠ ᤂᤥ᤺ᤔᤠᤱᤃ ᤁᤠᤰᤏᤢ᤺ᤸᤗᤧ ᤏᤢ᤺ᤒᤠ ᤐᤠ᤺ᤴ ᤐᤥ᤺ᤰᤂᤧᤒᤠᤸᤗᤧ ᤁᤠᤰ ᤐᤠ᤺ᤴᤜᤠ᤹ᤃ ᤜᤏᤧᤒᤠᤀᤣ ᤀᤡ᤺ᤳᤋᤢᤱᤅᤠᤱ ᤂᤢᤏᤧ᤹ ᤁᤢᤗᤠᤃᤡ ᤗᤠᤱ ᤜᤠᤰᤋᤢᤱᤍᤣ᤺ᤛᤢᤱᤗᤥ॥ ᤂᤪᤡᤛ᤻ᤋᤧᤴ ᤂᤥ᤺ᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤱᤜᤠ᤹ ᤋᤠᤶᤈᤡᤖᤰ ᤀᤡ᤺ᤳᤋᤢᤱᤗᤥ॥
PHI 3:9 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤢᤏᤧ᤹ᤀᤡᤴ ᤐᤥ᤺ᤱᤅᤠᤏᤡ ᤑᤠ᤹ᤀᤠᤱ ᤜᤧᤰᤁᤣ ᤀᤡ᤺ᤳᤋᤢᤱᤗᤥ॥ ᤀᤡᤱᤃᤠ᤹ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤠᤶᤕᤥᤏᤡᤒᤠ ᤐᤥ᤺ᤱᤔᤠ ᤔᤧᤴᤇᤢᤰᤐᤧᤴᤗᤥ. ᤁᤖ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥᤃᤢᤱᤒᤠᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤏᤡᤒᤠ ᤆᤥ᤺ᤰᤁᤠᤖᤥ॥
PHI 3:10 ᤀᤡᤱᤃᤠ᤹ᤃ ᤂᤪᤡᤛ᤻ᤋᤧᤴ ᤏᤢ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤔᤢᤰᤛᤠᤶᤔᤡᤴ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤏᤥᤃᤧᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤀᤡᤱᤃᤠ᤹ᤀᤠᤱ ᤋᤢᤰᤂᤣ ᤆᤠᤔᤠᤀᤠᤱ ᤁᤢᤛᤡ᤺ᤔᤧᤴᤏᤥ ᤛᤥᤖᤡᤰ ᤐᤥ᤺ᤱᤔᤠ ᤏᤡᤱᤘᤠ᤹ ᤆᤥᤃᤢᤱ.
PHI 3:11 ᤜᤧᤰᤁᤩᤠᤱ ᤀᤠᤰᤂᤣᤗ᤹ᤖᤡᤰᤛᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤱᤃ ᤂᤥ᤺ᤔᤠ ᤛᤢᤰᤋᤢᤱᤗ ᤁᤧᤗ᤹ᤒᤠ ᤏᤡᤱᤛᤠᤱ ᤁᤳᤋᤢᤱᤗᤥ॥
PHI 3:12 ᤀᤡᤱᤃᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤥ᤺ᤛᤢᤱ ᤀᤡᤃᤪ ᤁᤢᤛᤠᤱ ᤗᤛ᤻ᤛᤢᤱ ᤛᤢᤖᤢᤱᤅᤠᤱ ᤘᤠ᤹ᤀᤠ ᤁᤧᤗ᤹ᤒᤠᤃ ᤔᤧ᤺ᤴᤗᤥ. ᤁᤖ ᤀᤡᤱᤃᤠ᤹ᤃ ᤁᤴ ᤐᤠ᤺ᤴᤜᤠ᤹ ᤂᤥ᤺ᤔᤠ ᤑᤠ᤹ᤀᤠᤱ ᤋᤃᤡ ᤐᤥᤀᤠᤖ ᤐᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤒᤠ ᤂᤧᤸᤗᤧ ᤗᤠᤃᤡ ᤂᤪᤡᤛ᤻ᤋ ᤕᤧᤛᤢᤖᤧ ᤋᤠᤱᤛᤧ᤺ᤵᤋᤠᤱᤒᤠᤖᤥ॥
PHI 3:13 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ᤃ ᤀᤠᤸᤗᤛᤠᤱ ᤁᤠᤰ ᤐᤠ᤺ᤴᤜᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤗᤳᤇᤠ ᤕᤠ᤺ᤶᤒᤰᤁᤡᤴ ᤆᤥᤃᤢᤱ–ᤐᤣᤕᤧᤶᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤑᤧ᤺ᤳᤇᤢᤱᤅᤠᤱ ᤀᤡᤱᤃᤠ᤹ᤃ ᤋᤃᤡ ᤗᤧᤵᤔᤠᤱᤏᤧ ᤗᤢᤒᤢᤒᤢ ᤐᤥᤀᤠᤖᤥ॥
PHI 3:14 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤛᤧᤶᤔᤡᤴ ᤂᤥ᤺ᤔᤠ ᤑᤠ᤹ᤀᤠᤱ ᤋᤃᤡ ᤐᤥᤀᤠᤖ ᤐᤳᤋᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤸᤗᤧ ᤗᤠᤃᤡᤀᤣ ᤂᤪᤡᤛ᤻ᤋ ᤕᤧᤛᤢᤗᤠᤶᤒᤠ ᤀᤢ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥
PHI 3:15 ᤀᤠᤏᤡ᤹ ᤁᤠᤰ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤍᤢᤶᤒᤠᤜᤠ᤹ᤖᤧᤃ ᤀᤰᤋᤱᤒᤠ ᤐᤠ᤺ᤴᤜᤠ᤹ᤀᤥ ᤋᤧᤴᤍᤡᤱ ᤆᤥ᤺ᤰᤔᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤘᤣ᤹ ᤐᤖᤡᤰᤗᤧ ᤁᤧᤀᤡ᤺ᤳᤋᤢᤶᤏᤧ ᤑᤠ᤹ᤃᤪ ᤂᤧᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤏᤢ᤺ᤖᤡᤰᤁᤠᤱ ᤀᤥᤛᤣ᤺ᤴᤃᤧᤎᤠᤰᤋᤡ᤹ᤖᤥ॥
PHI 3:16 ᤁᤖ ᤀᤠᤸᤗᤥ ᤌᤠᤖᤡᤰ ᤌᤣ ᤏᤛᤠ᤺ᤴ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹ ᤂᤧᤵᤔᤥᤀᤣ ᤔᤧᤶᤔᤢᤴᤏᤣ ᤘᤕᤡᤖᤥ॥
PHI 3:17 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤜᤡᤱᤅᤠᤒᤠ ᤁᤢᤀᤡᤛᤡ᤺ᤰ ᤀᤠᤈᤥ᤺ᤱ ᤁᤧᤀᤡ᤺ᤵᤐᤠ ᤐᤥ᤺ᤰᤂᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤕᤠᤵᤔᤡ ᤁᤧᤍᤡᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤱᤔᤴᤏᤥᤗᤠᤶ ᤜᤢ᤹ᤛᤡᤱᤅᤧᤶᤔᤧ᤹ᤀᤥ
PHI 3:18 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤖᤡᤰᤗᤧᤱ ᤔᤧᤳᤏᤡᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤠᤔᤡᤰᤘᤠ ᤌᤠ᤺ᤛᤢᤱᤗ ᤔᤧᤳᤏᤡᤱ. ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤧᤵᤗᤧᤰᤁᤡᤸᤗᤧᤀᤣ ᤂᤧᤱᤜᤠ᤹ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤸᤗᤧ ᤁᤢᤏᤡᤱᤔᤡᤛᤡ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥
PHI 3:19 ᤁᤢᤏᤢᤵᤔᤥ ᤂᤧᤱᤜᤠ᤹ ᤔᤧᤔᤧᤰᤗᤥ. ᤂᤧᤱᤜᤠ᤹ᤖᤧ ᤕᤠᤶᤍᤠᤍᤠ ᤏᤢ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠᤴᤏᤣ ᤂᤢᤏᤡ᤹ ᤔᤠᤱᤗᤥ. ᤂᤢᤏᤡ᤹ ᤛᤡᤖᤡᤱᤔ᤺ᤔᤠ ᤐᤠ᤺ᤴᤜᤠ᤹ᤀᤥ ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤥ॥ ᤂᤧᤱᤜᤠ᤹ᤖᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤀᤥᤖᤰ ᤂᤢᤏᤡ᤹ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤘᤠ᤹ᤖᤥ॥
PHI 3:20 ᤁᤖ ᤀᤠᤏᤡ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤕᤰᤕᤢᤱᤒᤠᤛᤡᤖᤥ. ᤜᤧᤰᤁᤩᤠᤱ ᤀᤠᤏᤡ᤹ᤃ ᤂᤧᤵᤔᤥᤗᤠᤶ ᤁᤧᤕᤢ᤺ᤒᤠ ᤛᤧᤴᤗᤵᤍᤠᤱᤒᤠ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤛᤡᤰ ᤛᤶᤔᤠᤱ ᤀᤠᤜᤠᤱᤄᤢᤶᤗᤥ॥
PHI 3:21 ᤂᤢᤏᤧ᤹ᤀᤣ ᤁᤠᤰ ᤐᤠ᤺ᤴᤜᤠ᤹ ᤁᤢᤕᤢᤰᤁᤥ ᤁᤵᤔᤠ ᤔᤢᤰᤛᤠᤶ ᤁᤳᤋᤢ᤹. ᤜᤧᤰᤁᤩᤠᤱ ᤒᤠ ᤂᤧᤴ ᤔᤢᤰᤛᤠᤶᤔᤡᤸᤗᤧ ᤀᤠᤏᤡ᤹ ᤆᤵᤗᤧᤰᤘᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤔᤡᤔᤡᤍᤡᤱᤃᤧᤴ ᤁᤢᤎᤰᤁᤡᤴ ᤁᤢᤀᤡᤛᤡ᤺ᤰ ᤗᤧᤰᤂᤢ᤹ᤖᤥ॥
PHI 4:1 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤜᤧᤰᤁᤣᤗ᤹ᤖᤡᤰ ᤍᤠᤱᤒᤠᤴ ᤆᤰᤔᤧᤸᤗ᤹ᤀᤣ ᤏᤛᤠ᤺ᤴ ᤆᤥᤃᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱ ᤜᤧᤰᤁᤩᤠᤱ ᤏᤡ᤺ᤔᤠ ᤏᤡᤱᤘᤠ᤹ ᤆᤥ᤺ᤰᤏᤡᤱ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤣ ᤀᤠᤛ᤺ᤵᤔᤠᤴ ᤏᤢ ᤀᤠᤕᤠ᤺ᤶᤒᤰᤁᤡᤸᤗᤧᤴ ᤌᤢᤶᤄᤥᤏᤡᤱᤗᤥ॥
PHI 4:2 ᤀᤠᤸᤗ ᤀᤡᤱᤃᤠ᤹ ᤂᤧᤴ ᤏᤧᤵᤑᤢ ᤔᤧᤴᤇᤢᤔᤠ᤹ ᤀᤡᤕᤥᤍᤡᤕᤠ᤺ᤴ ᤏᤢ ᤛᤢᤴᤋᤢᤂᤣ᤺ᤴ ᤍᤠᤱᤒᤠᤸᤗᤧ ᤁᤢᤔᤏᤠ ᤘᤠ᤹ᤛᤡᤒᤠᤸᤗᤧ ᤆᤥᤃᤢᤸᤗᤧ ᤏᤠᤍᤱ ᤆᤥ᤺ᤰᤛᤡᤖ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤖᤥ॥
PHI 4:3 ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤖᤧ ᤂᤥ᤺ᤵᤋᤢᤒᤠ ᤀᤠᤴᤈᤢᤶᤔᤣ. ᤁᤴ ᤔᤧᤴᤇᤢᤔᤠᤜᤠ᤹ ᤁᤢᤓᤠ᤹ ᤐᤡᤖᤧᤛᤧ᤹ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤕᤠ᤺ᤶᤒᤰᤁᤡᤴ ᤀᤡᤱᤃᤠ᤹ᤏᤢ ᤕᤠᤶᤒᤢᤎᤡᤰᤁᤠᤱ ᤆᤥᤃᤧᤳᤇᤢ॥ ᤂᤧᤱᤜᤠ᤹ᤖᤧ ᤰᤗᤣᤔᤧᤴᤋ ᤜᤧᤰᤁᤩᤠᤱ ᤘᤣ᤹ ᤀᤡᤱᤃᤠ᤹ᤏᤢ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤆᤢᤶᤜᤠ᤹ᤏᤢᤀᤠᤱ ᤕᤠ᤺ᤶᤒᤰ ᤆᤥᤃᤧᤳᤇᤢᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤡᤴ ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳᤗᤥ॥
PHI 4:4 ᤍᤠᤱᤒᤠᤴᤏᤢ ᤂᤡᤏᤡ᤹ ᤌᤡᤰᤜᤢᤵ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤛᤍᤠᤍᤡᤱ ᤛ᤺ᤳᤋᤧᤶᤔᤧ᤹ᤀᤥ॥ ᤕᤠᤶᤔᤥᤀᤠᤱ ᤔᤧᤳᤏᤡᤱ–ᤛ᤺ᤳᤋᤧᤶᤔᤧ᤹ᤀᤥ᥄
PHI 4:5 ᤂᤡᤏᤡ᤹ ᤛᤢᤶᤛᤢᤶ ᤗ᤹ᤔᤠᤱᤃ ᤘᤣ᤹ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤖᤖᤥ॥ ᤍᤠᤱᤒᤠᤱᤃ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥
PHI 4:6 ᤀᤠᤳᤋᤡᤴ ᤐᤠ᤺ᤴᤏᤥᤀᤠᤱ ᤏᤡᤱᤛᤠᤶᤔᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ. ᤁᤖ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤖ ᤋᤢᤘᤠ ᤏᤢ ᤕᤧᤰᤐᤣᤗᤡᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤡᤏᤡ᤹ ᤐᤣᤗᤡᤜᤠ᤹ ᤋᤥ᤺ᤴᤍᤧᤶᤔᤧ᤹ᤀᤥ॥
PHI 4:7 ᤜᤧᤰᤁᤩᤠᤱ ᤔᤧᤴᤇᤠᤶ ᤏᤡᤱᤘᤠ᤹ᤖᤧ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤏᤠᤖᤢᤱᤅᤡᤸᤗᤧᤀᤣ ᤂᤡᤏᤡ᤹ ᤛᤡᤰᤗᤢᤱᤔᤠ ᤏᤢ ᤏᤡᤱᤘᤠ᤹ᤀᤡᤴ ᤂᤪᤡᤛ᤻ᤋ ᤕᤧᤛᤢᤀᤥ ᤋᤠᤱᤛᤧ᤺ᤵᤋᤢ᤹ᤖᤥ॥
PHI 4:8 ᤀᤠᤸᤗ ᤁᤢᤏᤢᤵᤔᤥ. ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤛᤧᤰᤂᤠᤒᤠ. ᤛᤢᤶᤒᤥᤎᤠᤒᤠ. ᤁᤢᤍᤥ᤺ᤵᤔᤠ. ᤛᤣᤛᤣᤒᤠ. ᤛᤡᤖᤠ᤹ ᤁᤧᤎᤠᤱᤒᤠ. ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤒᤠ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤛᤠ᤹ᤖᤡᤰ ᤏᤢ᤺ᤒᤠ ᤏᤢ ᤏᤧᤶᤓᤥ᤺ᤔᤠ ᤗᤠ᤹ᤖᤢᤒᤠ ᤆᤥ᤺ᤰ. ᤂᤧᤴ ᤐᤠ᤺ᤴᤜᤠ᤹ᤀᤣ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥
PHI 4:9 ᤀᤡᤱᤃᤠ᤹ᤗᤠᤶ ᤁᤧᤜᤢ᤹ᤀᤠᤛᤡᤒᤠ. ᤁᤧᤄᤥ᤺ᤛᤢᤶᤒᤠ. ᤁᤧᤄᤧᤵᤛᤢᤶᤒᤠ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤥ ᤁᤧᤏᤡ᤺ᤛᤢᤶᤒᤠ ᤐᤠ᤺ᤴᤜᤠ᤹ ᤁᤢᤀᤡᤛᤡ᤺ᤰ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤏᤠᤖᤢᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥
PHI 4:10 ᤀᤡᤱᤃᤠ᤹ ᤍᤠᤱᤒᤠᤴ ᤛᤠ᤹ᤖᤡᤰ ᤁᤢᤏᤠᤖᤠ ᤑᤥ᤺ᤛᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤠᤶᤔᤥ ᤕᤠᤵᤔᤡ ᤗᤢᤱᤔᤠ᤹ ᤋᤢᤰᤔᤠ ᤁᤧᤜᤣ᤺ᤰᤋᤡᤖᤥ॥ ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤘᤠ᤹. ᤁᤖ ᤂᤧᤴ ᤀᤥᤛᤣ᤺ᤴᤎᤠᤰᤔᤠ ᤛᤢᤕᤧᤶᤔᤡᤴᤏᤣ ᤔᤧᤱᤄᤥᤀᤣ ᤁᤧᤘᤕᤡᤖᤥ॥
PHI 4:11 ᤀᤡᤱᤃᤠ᤹ᤃ ᤆᤠᤜᤠᤒᤥ ᤘᤠ᤹ᤀᤠ ᤑᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤏᤢ ᤘᤠ᤹ᤛᤠᤱ ᤜᤥ᤺ᤵᤛᤠᤱ ᤏᤡᤱᤘᤠ᤹ ᤋᤠᤔᤠᤀᤠᤱ ᤘᤠ᤹ᤔᤠ ᤜᤢ᤹ᤛᤡᤱᤅᤠᤱᤅᤠᤱ ᤘᤠ᤹ᤀᤠᤖᤥ॥
PHI 4:12 ᤀᤡᤱᤃᤠ᤹ ᤆᤠᤜᤠᤒᤥ ᤘᤠ᤹ᤔᤠ ᤏᤢ ᤕᤖᤡᤰ ᤁᤵᤔᤠ ᤑᤠ᤹ᤀᤡᤴ ᤌᤧᤔᤠᤒᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤜᤧᤰᤁᤩᤠᤱ ᤀᤠᤰᤋᤱᤒᤠ ᤕᤠᤰᤏᤠᤶᤔᤥ ᤘᤠ᤹ᤀᤠᤛᤠᤱ. ᤆᤠᤔᤠ ᤌᤢᤱᤔᤠ ᤀᤡᤃᤪ ᤛᤠᤰᤔᤧᤴᤈᤠ ᤘᤠ᤹ᤔᤠ ᤐᤥ᤺ᤱᤛᤠᤱ. ᤕᤖᤡᤰ ᤁᤵᤔᤠ ᤀᤡᤃᤪ ᤆᤠᤜᤠᤒᤠᤀᤥ ᤘᤠ᤹ᤔᤠ ᤐᤥ᤺ᤱᤛᤠᤱ. ᤏᤡᤱᤘᤠ᤹ ᤋᤠᤔᤠᤀᤠᤱ ᤘᤠ᤹ᤔᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤜᤢ᤹ᤛᤡᤅᤠᤱᤅᤠᤱ ᤘᤠ᤹ᤀᤠᤖᤥ॥
PHI 4:13 ᤀᤡᤱᤃᤠ᤹ᤃ ᤍᤠᤱᤒᤠᤸᤗᤧ ᤁᤧᤎᤢᤶᤒᤠ ᤆᤥ᤺ᤰᤁᤠᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤢᤱᤗᤥ॥
PHI 4:14 ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤡᤏᤥᤃᤧᤴ ᤀᤠᤍᤢᤰᤂᤣᤀᤥ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡᤒᤠᤴ ᤏᤢ᤺ᤒᤠᤀᤣ ᤁᤧᤈᤥᤃᤢᤶᤗᤥ॥
PHI 4:15 ᤁᤠᤰᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤛᤢᤏᤠᤀᤡᤱᤅᤡᤴ ᤋᤠᤖᤢᤱᤅᤠᤱ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤗᤠᤶ ᤌᤠᤛᤡᤱᤅᤠᤱᤅᤡᤸᤗᤧ ᤘᤣ᤹ ᤀᤠᤳᤋᤡᤴ ᤛᤣᤛᤣᤜᤢᤵᤗᤰᤜᤠ᤹ᤖᤧᤀᤠᤱ ᤁᤢᤓᤠ᤹ ᤔᤧᤶᤒᤡᤖᤠᤱᤅᤡᤴᤗᤥ. ᤁᤖ ᤂᤡᤏᤡ᤹ ᤑᤡᤗᤡᤵᤐᤡᤒᤠᤜᤠ᤹ᤖᤧᤖᤰ ᤁᤢᤓᤠ᤹ ᤕᤠᤱ ᤕᤠᤵᤔᤡ ᤁᤧᤒᤡᤖᤡᤒᤠᤴ ᤁᤧᤏᤡ᤺ᤛᤢᤶᤗᤥ॥
PHI 4:16 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤌᤡᤛ᤻ᤛᤗᤥᤏᤡᤁᤠ ᤕᤧᤰᤕᤰᤁᤥ ᤘᤕᤠᤱᤅᤡᤸᤗᤧ ᤆᤠᤜᤠᤒᤥ ᤘᤕᤠᤱ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤡᤰᤗᤧᤱ ᤏᤡᤗᤧᤱ ᤁᤢᤓᤠ᤹ ᤕᤠᤱ ᤕᤠᤵᤔᤡ ᤀᤠᤃᤧᤜᤠᤰᤋᤡᤖᤥ॥
PHI 4:17 ᤀᤡᤱᤃᤠ᤹ ᤂᤡᤏᤡ᤹ᤗᤠᤶ ᤁᤢᤓᤠ᤹ ᤂᤥ᤺ᤔᤠ ᤑᤠ᤹ᤀᤠᤱᤃ ᤔᤧ᤺ᤴᤗᤥ. ᤁᤖ ᤁᤢᤓᤠ᤹ ᤕᤠᤵᤔᤡ ᤁᤧᤒᤡᤖᤡᤒᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤘᤠ ᤔᤢ᤹ᤀᤡᤛᤠᤶᤔᤡᤴ ᤂᤡᤏᤡ᤹ ᤁᤧᤒᤡᤖᤡᤖ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
PHI 4:18 ᤁᤴ ᤕᤧᤶᤔᤥ ᤀᤡᤱᤃᤠ᤹ ᤆᤠᤜᤠᤒᤠ ᤆᤥᤃᤠᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠ᤺ᤴᤜᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤡᤐᤠᤑᤪᤥᤍᤡᤋᤛᤖᤧ ᤁᤢᤜᤢᤰᤁᤥᤗᤠᤶ ᤁᤧᤜᤠᤅᤢᤶᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤏᤢ ᤁᤢᤏᤡᤱᤘᤠ᤹ ᤋᤠᤛᤢᤒᤠ ᤁᤢᤏᤠᤶ ᤁᤧᤏᤢ᤹ᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰᤐᤠ ᤁᤢᤓᤠ᤹ ᤕᤠᤱᤅᤡᤴ ᤀᤡᤱᤃᤠ᤹ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥
PHI 4:19 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶ ᤀᤠᤳᤋᤠᤳᤋᤠᤴᤏᤣ ᤁᤢᤕᤠᤱᤛᤠᤁᤢᤴᤎᤣ᤺ᤸᤗᤧ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤋᤢ᤹ ᤁᤧᤒᤡᤖᤡ᤹ᤖᤥ॥
PHI 4:20 ᤀᤠᤸᤗ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤍᤠᤍᤡᤱ ᤛᤍᤠᤍᤡᤱ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤥ॥ ᤀᤠᤔᤧᤴ॥
PHI 4:21 ᤂᤧᤵᤔᤥᤒᤠ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ ᤁᤵᤔᤥ ᤁᤧᤘᤠ᤹ᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥
PHI 4:22 ᤁᤠᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤁᤢᤳᤆᤡᤀᤥ ᤛᤡᤈᤖᤗᤧ ᤁᤢᤜᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ. ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥
PHI 4:23 ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥
COL 1:1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤗᤛ᤻ᤛᤡ ᤕᤧᤰᤕᤰᤁᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤛᤠᤏᤡᤒᤠᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤱᤛᤧ ᤛᤣᤃᤠᤱᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤒᤠᤖᤥ॥ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤏᤠᤖᤢᤱ ᤏᤢ ᤗᤢᤱᤃᤢᤶ ᤁᤧᤒᤡᤖᤡᤖᤖᤥ॥
COL 1:3 ᤀᤠᤏᤡᤃᤧ ᤂᤡᤏᤡ᤹ ᤗᤠᤃᤡ ᤋᤢᤘᤠ ᤆᤥᤃᤢᤶᤒᤧᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤢᤶᤒᤧ᤹ᤖᤥ.
COL 1:4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤴ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤧ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥
COL 1:5 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤌᤣ ᤏᤡᤱᤛᤠᤱ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤢ᤺ᤖᤡᤰᤁᤠᤱ ᤕᤠᤱᤄᤥ᤺ᤳᤋᤧᤀᤠᤱ ᤘᤠ᤹ᤖᤥ॥ ᤋᤃᤡ ᤂᤡᤏᤡ᤹ ᤛᤧᤰᤂᤠᤒᤠ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡᤸᤗᤧᤛᤠ ᤁᤴ ᤏᤡᤱᤛᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ॥ ᤂᤧᤱᤃ ᤛᤢᤏᤠᤀᤡᤱᤅᤡᤴᤏᤣᤖᤥ॥
COL 1:6 ᤂᤡᤏᤡ᤹ ᤛᤢᤏᤠᤀᤡᤱᤅᤡᤴ ᤁᤧᤄᤧᤵᤛᤢᤶ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤁᤠᤰ ᤛᤧᤰᤂᤠᤀᤥ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠ ᤕᤧᤴᤏᤠᤱᤎᤥ ᤂᤡᤏᤡ᤹ ᤗᤢᤶᤔᤥ ᤐᤥ᤺ᤱᤗ ᤐᤵᤐᤠ ᤜᤧᤰᤁᤣᤀᤣ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤔᤏᤠᤗᤢᤶᤔᤥ ᤛᤢᤏᤠᤀᤡᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤋᤠᤖᤢᤖ ᤐᤥ᤺ᤖ ᤐᤳᤗᤥ॥
COL 1:7 ᤂᤧᤴ ᤐᤠ᤺ᤴᤏᤡᤴ ᤀᤠᤏᤡᤃᤧᤏᤢ ᤛᤥᤖᤡᤰ ᤔᤠᤱᤛᤣᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤡᤐᤠᤑᤪᤠᤛᤗᤠᤶ ᤁᤧᤜᤢ᤹ᤀᤠᤛᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ᤃ ᤗᤢᤱᤔᤠ᤹ ᤋᤢᤰᤋᤢᤶᤒᤧᤒᤠ ᤀᤠᤏᤡᤃᤧ ᤗᤧᤰᤘᤠ ᤂᤡᤏᤡ᤹ ᤗᤢᤶᤔᤥ ᤂᤪᤡᤛ᤻ᤋᤖᤧ ᤁᤢᤏᤛᤠ᤺ᤴᤛᤠᤒᤠ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠᤖᤥ॥
COL 1:8 ᤛᤣᤛᤣᤔᤠᤱᤅᤡᤸᤗᤧ ᤂᤡᤏᤡ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤈᤥᤃᤡᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤕᤠᤵᤔᤡ ᤆᤧᤰᤋᤧᤖᤥ॥
COL 1:9 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤠᤏᤡᤃᤧ ᤂᤧᤵᤛᤢᤶᤒᤧᤀᤠᤱᤎᤥᤀᤣ ᤂᤡᤏᤡ᤹ ᤗᤠᤃᤡ ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥᤃᤢᤶᤒᤧᤖᤥ॥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤀᤡ᤺ᤳᤇᤡᤱᤛᤠᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤈᤡᤰᤃᤧᤴ ᤁᤢᤏᤡᤱᤘᤠ᤹ᤀᤡᤸᤗᤧ ᤂᤡᤏᤡ᤹ ᤁᤧᤎᤡᤶᤛᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤶᤒᤧᤖᤥ॥
COL 1:10 ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ᤺ᤴ ᤗᤠ᤹ᤖᤢᤒᤠ ᤜᤡᤱᤔᤴᤏᤥ ᤛᤢᤶᤒᤥᤎᤠᤛᤠᤒᤠ ᤁᤧᤒᤥ᤺ᤰᤂᤡᤖ. ᤜᤧᤰᤁᤣᤗ᤹ᤖᤡᤰ ᤁᤠᤰ ᤐᤖᤡᤰᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤧᤍᤠ᤺ᤛᤢᤶᤗ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤸᤗᤛᤠᤱ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤔᤠᤱ ᤁᤠᤰ ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤛᤢᤶᤗ ᤑᤠ᤹ᤀᤠᤱ ᤀᤠᤏᤡᤃᤧ ᤋᤢᤘᤠ ᤆᤥᤃᤢᤶᤒᤧᤖᤥ॥
COL 1:11 ᤂᤢᤏᤧ᤹ ᤁᤢᤔᤡᤔᤡᤍᤡᤱᤃᤧᤴ ᤁᤢᤔᤢᤰᤛᤠᤶᤗᤠᤶᤒᤠ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤀᤠᤏᤡᤃᤧ ᤋᤢᤘᤠ ᤆᤥᤃᤢᤶᤒᤧ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠ ᤁᤠᤰ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤴ ᤏᤢ ᤏᤠᤛᤡ ᤌ᤺ᤵᤔᤠᤴ ᤁᤧᤄᤥ᤺ᤛᤢᤶᤗᤖᤥ॥ ᤜᤧᤰᤁᤩᤠᤱ ᤛ᤺ᤵᤔᤧᤸᤗᤧ ᤁᤢᤎᤡᤶ ᤁᤧᤒᤥ᤺ᤰᤂᤡᤖᤖᤥ.
COL 1:12 ᤜᤧᤰᤁᤩᤠᤱ ᤛᤍᤠᤍᤡᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤔᤠ ᤐᤥ᤺ᤱ. ᤂᤢᤏᤧ᤹ᤀᤣ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤧᤴ ᤀᤥ᤺ᤳᤋᤡᤀᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋᤖᤧ ᤁᤢᤛᤣᤛᤣ ᤔᤏᤠᤜᤠ᤹ᤖᤧ ᤔᤧᤄᤥ᤺ᤛᤢᤒᤠ ᤗᤰ ᤁᤧᤄᤥ᤺ᤒᤠ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ॥
COL 1:13 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤣ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧᤴ ᤜᤠᤱᤈᤢᤶᤗᤠᤶ ᤀᤠᤛᤧ᤺ᤵᤋᤧᤀᤠᤱ ᤀᤠᤒᤢᤃᤧᤴ ᤁᤢᤔᤡ᤺ᤶ ᤁᤢᤛ᤻ᤛᤠ᤺ᤸᤗᤧ ᤁᤢᤜᤠᤱᤈᤢᤶᤔᤥ ᤀᤠᤏᤡ᤹ ᤀᤠᤍᤠ᤺ᤖᤧᤀᤠᤱ ᤘᤠ᤹ᤖᤥ॥
COL 1:14 ᤏᤡᤱᤘᤠ᤹ᤑᤢᤛᤠ᤺ᤗᤠᤶ ᤀᤠᤏᤡ᤹ ᤆᤥ᤺ᤰᤕᤢᤶᤓᤥ ᤀᤠᤒᤡᤖᤧ. ᤜᤧᤰᤁᤩᤠᤱ ᤁᤠᤰ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤗᤠᤕᤥᤜᤠ᤹ ᤗᤧᤵᤔᤡ ᤀᤠᤒᤡᤖᤧᤖᤥ॥
COL 1:15 ᤂᤪᤡᤛ᤻ᤋᤧᤴ ᤔᤧᤴᤏᤡ ᤔᤧᤴᤎᤠ᤺ᤵ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡ᤺ᤳᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳ ᤛᤶᤍᤠᤱ ᤕᤢᤰᤛᤠᤒᤠ ᤆᤥ᤺ᤰᤗᤥ॥
COL 1:16 ᤂᤪᤡᤛ᤻ᤋᤗᤠᤶ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤒᤠᤖᤥ॥ ᤂᤢᤏᤧ᤹ᤃ ᤏᤡᤃᤧᤎᤠ᤺ᤵᤐᤠ ᤏᤢ ᤏᤡᤔᤧᤴᤎᤠ᤺ᤵᤔᤏᤠ ᤐᤠ᤺ᤴᤜᤠ᤹. ᤜᤠᤱᤜᤠ᤹ ᤏᤢ ᤜᤠᤱᤈᤢᤶᤜᤠ᤹. ᤜᤠᤱᤃᤧᤈᤥ᤺ᤰᤐᤠᤜᤠ᤹ ᤏᤢ ᤕᤢᤰᤛᤠᤒᤠᤜᤠ᤹ᤀᤠᤱ ᤆᤥᤃᤢᤛᤡᤒᤠᤖᤥ॥ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤂᤪᤡᤛ᤻ᤋᤗᤠᤶ ᤏᤢ ᤂᤪᤡᤛ᤻ᤋᤖᤧ ᤁᤢᤗᤠᤃᤡᤀᤣ ᤐᤥ᤺ᤰᤂᤧᤒᤠᤖᤥ॥
COL 1:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤁᤠᤰ ᤐᤠ᤺ᤴᤜᤠ᤹ ᤛᤥᤛᤥᤖᤡᤰ ᤜᤢᤵᤛᤡᤱᤅᤠᤱ ᤐᤳᤗᤥ॥
COL 1:18 ᤜᤧᤰᤁᤩᤠᤱ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤛᤣᤛᤣᤜᤢᤵᤗᤰᤗᤥ. ᤂᤧᤴ ᤛᤣᤛᤣᤜᤢᤵᤗᤰᤁᤡᤸᤗᤧ ᤁᤢᤎᤧᤃᤣ᤺ᤰᤐᤠᤱᤃ ᤂᤢᤏᤧ᤹ᤀᤣᤖᤥ॥ ᤂᤢᤏᤧ᤹ᤃ ᤋᤥᤗᤡᤱᤛᤥᤔᤢ. ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠ ᤁᤠᤰᤁᤥ ᤋᤢᤶᤒᤠᤖᤥ. ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤁᤠᤰ ᤛᤶᤍᤠᤱ ᤕᤢᤰᤛᤠᤒᤠ ᤆᤥ᤺ᤰᤗᤥ॥
COL 1:19 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤗᤡᤱᤎᤥ ᤁᤧᤵᤔᤠᤴ ᤕᤧᤛᤢ ᤂᤪᤡᤛ᤻ᤋᤀᤥ ᤏᤧᤔᤠ ᤁᤢᤛᤡᤖᤠ᤹ ᤌᤠᤅᤧᤖᤥ॥
COL 1:20 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢᤒᤠᤀᤥᤗᤠᤶᤒᤠ ᤀᤠᤒᤠᤅᤣᤗᤠᤃᤡ ᤛᤏᤠᤖᤢᤱ ᤆᤥᤃᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤏᤢ ᤋᤠᤱᤛᤠᤰᤐᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤠᤶᤔᤥ ᤀᤠᤒᤠᤅᤣ ᤂᤢᤏᤧ᤹ᤀᤥ ᤏᤠᤍᤱ ᤆᤥᤃᤢᤀᤠᤱ ᤏᤢ᤺ᤰᤋᤢ ᤋᤠᤖᤢᤖᤥ॥
COL 1:21 ᤐᤣᤒᤠ ᤕᤧᤶᤔᤥ ᤂᤡᤏᤡ᤹ ᤑᤧᤴ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤖᤥ॥ ᤂᤡᤏᤡ᤹ ᤂᤢᤏᤧ᤹ᤗᤠᤶᤒᤠ ᤁᤧᤛᤧᤴᤍᤡᤀᤠᤱ ᤔᤠ᤺ᤱᤄᤠ ᤁᤧᤘᤕᤡᤖᤥ॥
COL 1:22 ᤁᤖ ᤀᤠᤸᤗᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤍᤃᤡ ᤛᤣᤛᤣᤛᤠᤱᤛᤠᤱ ᤏᤢ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤒᤠ ᤁᤢᤛᤡ᤺ᤔᤧᤴᤗᤠᤶᤒᤠ ᤏᤠᤍᤱᤅᤥ ᤁᤧᤍᤠ᤺ᤖᤡᤀᤠᤱ ᤘᤠ᤹ᤖᤥ॥
COL 1:23 ᤁᤖ ᤂᤡᤏᤡ᤹ ᤁᤧᤄᤧᤵᤛᤢᤶᤒᤠ ᤛᤢᤏᤠᤀᤡᤱᤅᤡᤸᤗᤧ ᤏᤡᤱᤛᤠᤱᤅᤥ ᤔᤧᤶᤔᤢᤴᤏᤣ ᤏᤢ ᤋᤠᤵᤔᤧᤶᤒᤧ᤹ᤀᤣ ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤏᤛᤠ᤺ᤴ ᤆᤥ᤺ᤰᤔᤠᤀᤣ ᤐᤥ᤺ᤱᤗᤥ॥ ᤜᤠᤒᤠ ᤁᤴ ᤛᤢᤏᤠᤀᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤀᤡᤱᤔᤧᤓᤥ᤺ᤛᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤴ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤐᤠᤘᤗᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠ ᤐᤥ᤺ᤰᤂᤠᤱᤗᤥ॥
COL 1:24 ᤕᤧᤛᤢ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰᤁᤡᤱᤃ ᤛᤣᤛᤣᤜᤢᤵᤗᤰᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ ᤗᤠᤃᤡ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤌᤶᤔᤠ ᤛ᤺ᤳᤋᤠᤖᤥ॥ ᤌᤶᤔᤠ ᤁᤧᤒᤥ᤺ᤱᤒᤠ ᤂᤪᤡᤛ᤻ᤋᤖᤧ ᤀᤡᤏᤥᤃᤧᤴ ᤁᤢᤍᤢᤰᤂᤣᤜᤠ᤹ ᤀᤡᤱᤃᤠ᤹ ᤌᤖᤢᤱᤗᤥ॥
COL 1:25 ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤗᤧᤴ ᤛᤣᤘᤠᤖᤥᤒᤠ ᤐᤥ᤺ᤰᤂᤠᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤠᤰ ᤁᤢᤎᤡᤶᤔᤥ ᤂᤡᤏᤡ᤹ᤀᤥ ᤀᤡᤱᤓᤥ᤺ᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤣ᤺ᤰᤕᤢᤰ ᤆᤥᤃᤠᤱᤅᤠᤱ ᤘᤠ᤹ᤀᤠᤖᤥ
COL 1:26 ᤁᤴ ᤛᤡᤒᤡ᤹ ᤐᤠ᤺ᤴᤜᤠ᤹ᤃ ᤀᤢᤏᤠᤜᤢᤖᤡᤀᤠᤱᤎᤥ ᤐᤣᤒᤠ ᤔᤧᤴᤇᤠᤶ ᤌᤠ᤺ᤰᤜᤠ᤹ᤀᤥ ᤆᤡᤰᤂᤢᤀᤠᤱ ᤘᤕᤧ. ᤁᤖ ᤀᤠᤸᤗᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤀᤥ᤺ᤴᤎᤠᤰᤋᤢᤛᤡᤀᤠᤱ ᤘᤠ᤹ᤖᤥ॥
COL 1:27 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤁᤢᤔᤡᤔᤡᤍᤡᤱᤃᤧᤴ ᤀᤡᤔᤧᤸᤗᤢᤱᤒᤠ ᤛᤡᤒᤡ᤹ ᤐᤠ᤺ᤴᤏᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤂᤢᤏᤧ᤹ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹ᤖᤥ॥ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤘᤠ᤹ᤒᤠᤴᤏᤣ ᤛᤡᤒᤡ᤹ ᤐᤠ᤺ᤴᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤁᤧᤍᤠ᤺ᤒᤠ ᤁᤢᤔᤡᤔᤡᤍᤡᤱᤃᤧᤴ ᤗᤰᤁᤡᤴ ᤂᤡᤏᤡ᤹ ᤁᤧᤄᤥ᤺ᤛᤢᤶᤗᤥ॥
COL 1:28 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡ ᤐᤡᤃᤡᤃᤧ᤹ᤛᤠᤱ ᤁᤠᤰ ᤔᤏᤠᤜᤠ᤹ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤥ᤺ᤛᤢᤶᤛᤡᤶᤒᤧ᤹ᤖᤥ॥ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤡᤃᤧᤒᤠ ᤁᤠᤰ ᤛᤡᤰᤁᤢᤶᤔᤡᤸᤗᤧ ᤛᤠᤶᤍᤡᤱ ᤏᤢ ᤂᤠᤜᤢᤴ ᤐᤡᤖᤢᤶᤛᤡᤶᤒᤧ᤹. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴᤏᤢ ᤌᤡᤰᤜᤢᤵ ᤐᤥ᤺ᤱᤔᤠᤴ ᤁᤢᤗᤡᤱᤎᤥ ᤁᤧᤳᤗ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤋᤥ᤺ᤶᤔᤠᤛᤡ ᤀᤠᤏᤡᤃᤧ ᤏᤡᤱᤘᤠ᤹ ᤁᤳᤋᤢᤶᤒᤧᤖᤥ॥
COL 1:29 ᤁᤴ ᤕᤠ᤺ᤶᤒᤰᤁᤥ ᤂᤪᤡᤛ᤻ᤋᤖᤧ ᤐᤡᤖᤠᤱᤒᤠ ᤀᤠᤛᤡᤃᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤐᤕᤶ ᤕᤶᤒᤠ ᤔᤢᤰᤛᤠᤶᤗᤠᤶ ᤕᤠᤶᤒᤢᤎᤡᤰᤁᤠᤱ ᤛᤩᤠᤱᤔᤧᤴᤍᤠᤱ ᤐᤳᤋᤠᤖᤥ॥
COL 2:1 ᤂᤡᤏᤡ᤹ ᤏᤢ ᤗᤠᤀᤥᤍᤡᤁᤡᤕᤠ ᤐᤠᤱᤈᤢᤶᤒᤠ ᤛᤣᤛᤣᤜᤢᤵᤗᤰ ᤜᤧᤰᤁᤩᤠᤱ ᤘᤣ᤹ ᤕᤠᤵᤔᤡ ᤔᤧᤴᤍᤢᤶᤔᤣ ᤁᤧᤘᤠ᤹ᤒᤠ ᤁᤧᤖᤧᤰ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤗᤠᤃᤡ ᤛᤩᤠᤱᤔᤧᤴᤍᤠᤱ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠ ᤁᤧᤗ᤹ᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥
COL 2:2 ᤂᤡᤏᤡ᤹ ᤁᤧᤖᤧᤰᤗᤧ ᤛᤡᤰᤗᤢᤱᤔᤥ ᤜᤠᤱᤜᤠᤱ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤥ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤖ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤖᤧᤰᤗᤧ ᤁᤢᤗᤡᤱᤎᤥ ᤀᤡ᤺ᤳᤇᤡᤱᤛᤠᤶ ᤁᤧᤄᤥ᤺ᤛᤢᤶᤔᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤖᤥ॥ ᤂᤧᤴ ᤁᤢᤛᤡᤒᤡ᤹ ᤐᤠ᤺ᤴᤏᤡᤱᤃ ᤂᤪᤡᤛ᤻ᤋᤧᤴᤏᤣᤖᤥ॥
COL 2:3 ᤂᤢᤏᤧ᤹ᤀᤣ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤛᤠᤶᤈᤡᤰ ᤏᤡᤱᤘᤠ᤹ᤖᤧ ᤁᤢᤒᤢᤴᤗᤥ॥
COL 2:4 ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤄᤧᤶᤃᤧᤏᤢ᤹ᤒᤠ ᤐᤠ᤺ᤴᤜᤠ᤹ᤗᤠᤶ ᤀᤡᤱᤃᤧᤔᤧᤸᤗᤧᤰᤋᤡᤴᤗ ᤑᤠ᤹ᤀᤠᤱ ᤀᤰᤂᤣ ᤔᤧᤳᤏᤡᤱᤒᤠᤖᤥ॥
COL 2:5 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ᤏᤢ ᤔᤠ᤺ᤱᤄᤠ ᤘᤠ᤹ᤀᤠᤛᤠᤱ ᤀᤠᤏᤡᤱᤘᤠ᤹ᤀᤡᤴ ᤂᤡᤏᤡ᤹ᤏᤢ ᤛᤥᤖᤡᤰᤁᤣ ᤘᤠ᤹ᤖᤥ॥ ᤜᤧᤰᤁᤩᤠᤱ ᤜᤡᤱᤔᤠ ᤁᤧᤒᤥ᤺ᤱᤒᤠ ᤜᤡᤱᤔᤴᤏᤥ ᤁᤧᤜᤡᤅᤡᤒᤠ ᤏᤢ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤏᤥ ᤕᤥ-ᤎᤥ ᤔᤧᤸᤗ᤹ᤀᤣ ᤁᤧᤘᤕᤡᤒᤠ ᤂᤧᤵᤛᤢᤱᤅᤠᤱ ᤛᤠ᤹ᤖᤡᤰ ᤛ᤺ᤳᤋᤠᤖᤥ॥
COL 2:6 ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤪᤡᤛ᤻ᤋ ᤕᤧᤛᤢ ᤍᤠᤱᤒᤧᤴ ᤏᤛᤠ᤺ᤴ ᤁᤧᤈᤥᤃᤢᤶ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ᤏᤢ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤆᤰᤔᤧᤸᤗ᤹ᤀᤣ ᤜᤡᤅᤧᤶᤔᤧ᤹ᤀᤥ॥
COL 2:7 ᤂᤢᤏᤧ᤹ᤀᤥ. ᤁᤧᤜᤢ᤹ᤀᤠᤛᤡᤒᤠ ᤏᤡᤛᤠᤶᤔᤥ. ᤛᤠ᤺ᤵ ᤗᤣ᤺ᤳᤋᤧᤶᤔᤧ᤹ᤀᤠᤱ ᤐᤥ᤺ᤖᤧᤶᤔᤧ᤹. ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤖ ᤍᤠᤱᤒᤠᤴ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ॥
COL 2:8 ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤧ᤺ᤱᤃᤪ ᤔᤧᤴᤇᤠᤶ ᤕᤠᤵᤔᤡᤖᤧ ᤔᤧᤈᤥᤃᤢᤒᤠ ᤁᤢᤄᤧᤶᤃᤧᤏᤢ᤹ᤒᤠ ᤀᤡᤱᤗᤧᤰᤐᤠ ᤏᤡᤛᤠᤶᤜᤠ᤹ᤖᤧ ᤁᤧᤕᤢᤰᤋᤡ᤹ᤖᤥ॥ ᤂᤧᤴ ᤏᤡᤛᤠᤶᤜᤠ᤹ᤃ ᤂᤪᤡᤛ᤻ᤋᤗᤠᤶ ᤔᤧ᤺ᤴ. ᤁᤖ ᤔᤧᤴᤇᤠᤶᤌᤠ᤺ᤰᤗᤠᤶ ᤁᤧᤕᤢ᤺ᤒᤠ ᤌᤡᤶ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤜᤣ᤺ᤰᤛᤡᤱᤔᤥᤒᤠ ᤜᤏᤧᤒᤠ ᤂᤠᤜᤢᤴᤗᤠᤶ ᤁᤧᤍᤠ᤺ᤒᤠᤖᤰᤗᤥ॥
COL 2:9 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤀᤥᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠᤛᤡᤱᤃᤧᤴ ᤌᤰᤁᤥ ᤁᤢᤗᤡᤱᤎᤥ ᤁᤧᤳᤗᤥ॥
COL 2:10 ᤜᤧᤰᤁᤩᤠᤱ ᤂᤢᤏᤧ᤹ᤀᤥᤀᤣ ᤂᤡᤏᤡ᤹ ᤁᤢᤗᤡᤱᤎᤥ ᤁᤧᤵᤔᤠᤴ ᤁᤧᤄᤥ᤺ᤛᤢᤶᤔᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤁᤠᤰ ᤔᤢᤰᤛᤠᤶ ᤏᤢ ᤕᤢᤰ ᤛᤶᤍᤠᤱ ᤕᤢᤰᤛᤠᤒᤠᤖᤥ॥
COL 2:11 ᤜᤷᤍᤥ ᤜᤧᤰᤔᤠᤸᤗᤧ ᤏᤠᤛᤡᤱᤃᤧᤴ ᤌᤰᤗᤠᤶ ᤏᤧᤰᤛᤠ ᤛᤧᤶᤒᤣ᤺ᤰᤐᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤖᤧ ᤁᤢᤜᤷᤍᤥ ᤜᤧᤰᤔᤠᤸᤗᤧ ᤂᤡᤏᤡ᤹ ᤗᤠᤕᤥ ᤆᤥ᤺ᤰᤔᤠ ᤏᤡᤱᤘᤠ᤹ᤀᤡᤴ ᤛᤧᤴᤍᤢᤍᤣ᤹ᤖᤢᤀᤠᤱ ᤘᤠ᤹ᤖᤥ॥ ᤁᤱᤃ ᤔᤧᤴᤇᤠᤶ ᤜᤢᤰᤁᤥᤗᤠᤶ ᤐᤥ᤺ᤰᤂᤧᤒᤠ ᤔᤧ᤺ᤴ. ᤁᤖ ᤂᤪᤡᤛ᤻ᤋᤗᤠᤶ ᤐᤥ᤺ᤰᤂᤧᤒᤠᤖᤥ॥
COL 2:12 ᤒᤵᤋᤡᤛ᤻ᤔᤠ ᤁᤧᤒᤥ᤺ᤰᤂᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤧᤜᤢᤔᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤔᤢᤰᤛᤠᤶᤔᤥ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤜᤡᤅᤡᤀᤠᤱ ᤁᤧᤘᤕᤡ᤹ᤖᤥ॥
COL 2:13 ᤂᤡᤏᤡ᤹ᤃ ᤗᤠᤕᤥᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤁᤧᤜᤥ᤺ᤵᤋᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤥ ᤁᤢᤛᤡᤘᤧᤳ ᤁᤧᤘᤕᤡ. ᤁᤖ ᤀᤠᤸᤗᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤱᤘᤧᤳ ᤁᤧᤈᤥᤃᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ ᤀᤠᤏᤡ᤹ ᤁᤠᤰ ᤗᤠᤕᤥᤜᤠ᤹ ᤗᤧᤵᤔᤡ ᤀᤠᤒᤡᤖᤧᤀᤠᤱ ᤘᤠ᤹॥
COL 2:14 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤵᤐᤠ ᤀᤠᤵᤋᤡᤰ ᤛᤰᤜᤠ᤹ ᤌᤧ᤺ᤰᤂᤢᤍᤣ᤺ᤛᤢᤀᤠᤱ ᤂᤢᤏᤧ᤹ ᤂᤧᤴ ᤁᤧᤖᤧᤰ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤂᤡᤵᤛᤢᤀᤠᤱ ᤂᤧᤳᤋᤢᤍᤣ᤺ᤛᤢᤖᤥ॥
COL 2:15 ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤔᤢᤰᤛᤠᤶᤜᤠ᤹ ᤏᤢ ᤕᤢᤰᤜᤠ᤹ ᤏᤠᤵᤋᤢᤛᤡᤀᤠᤱ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤌᤱ ᤏᤠ᤺ᤴᤍᤢᤛᤡ. ᤜᤧᤰᤁᤣᤗ᤹ᤖᤡᤰᤁᤣ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤎᤠ᤺ᤛᤢ ᤐᤡᤖᤢᤛᤡᤖᤥ॥
COL 2:16 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤛᤠᤶᤕᤥ ᤋᤱᤏᤠᤶ. ᤗᤠᤛᤡᤒᤠ ᤛᤛᤠᤱᤛᤪᤥ᤺ᤳ. ᤏᤠ᤺ᤶᤛᤡᤱ ᤕᤧᤴᤏᤥ ᤏᤢ ᤆᤠᤔᤏᤠᤒᤠ ᤌᤢᤱᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤀᤠᤵᤋᤡᤰ ᤁᤧᤔᤧᤴᤃᤢ᤺ᤳᤋᤡᤴᤗᤖᤥ॥
COL 2:17 ᤁᤴ ᤐᤠ᤺ᤴᤜᤠ᤹ᤃ ᤁᤧᤍᤠ᤺ᤒᤠ ᤐᤠ᤺ᤴᤜᤠ᤹ᤖᤧᤴ ᤛᤠᤶᤔᤪᤡ᤺ᤵᤐᤠᤖᤰ ᤘᤕᤧᤖᤥ. ᤁᤖ ᤛᤧᤰᤂᤠ ᤐᤠ᤺ᤴᤏᤡᤱᤃ ᤂᤪᤡᤛ᤻ᤋᤖᤥ॥
COL 2:18 ᤀᤠᤏᤡᤃᤧ ᤛᤢᤑᤥ ᤏᤡ᤺ᤶᤔᤏᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤖ. ᤏᤡᤃᤧᤍᤧᤵᤐᤠ ᤐᤠ᤺ᤴᤏᤥᤖᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤜᤠᤱᤛᤧᤶ ᤔᤧᤱᤄᤥ᤺ᤔᤏᤠᤒᤠ ᤁᤧᤔᤧᤴᤈᤥᤃᤡᤴᤗᤖᤥ॥ ᤁᤱᤜᤠ᤹ᤃ ᤌᤣᤏᤠᤎᤣ ᤗᤠᤕᤥᤒᤠ ᤏᤡᤱᤘᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤖᤥ॥
COL 2:19 ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤁᤢᤎᤧᤃᤣ᤺ᤰ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤌᤣᤀᤠᤱ ᤋᤱᤈᤢᤶ ᤜᤥ᤺ᤵᤗᤥ॥ ᤁᤱᤃ ᤂᤢᤏᤧ᤹ᤗᤠᤶᤒᤠ ᤏᤠᤛᤡᤱᤃᤧᤴ ᤌᤰᤗᤧᤴ ᤁᤠᤰ ᤕᤠᤶᤗᤰᤁᤡᤸᤗᤧ ᤁᤶᤒᤪᤠᤱ ᤂᤥ᤺ᤛᤢ᤹ ᤜᤧᤰᤁᤩᤠᤱ ᤌᤡᤰᤜᤢᤵ ᤐᤥ᤺ᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤐᤥ᤺ᤖ ᤐᤣ᤺ᤰᤗᤥ॥
COL 2:20 ᤂᤡᤏᤡ᤹ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤁᤧᤛᤩᤧ᤹ᤀᤡᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤒᤠ ᤜᤏᤧᤒᤠ ᤂᤠᤜᤢᤴᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤒᤡᤖᤡᤀᤠᤱ ᤘᤠ᤹ᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤀᤥᤃᤵ ᤔᤧᤈᤥᤃᤧᤴᤏᤧ᤹. ᤂᤧᤴ ᤔᤧᤛᤠ᤹ᤖᤧᤴᤏᤧ᤹. ᤜᤧᤰᤁᤩᤠᤱ ᤔᤧᤛᤢᤛᤧᤴᤏᤧ᤹ ᤁᤧᤗ᤹ᤒᤠ ᤀᤡᤰᤛᤠᤒᤠ ᤌᤡᤶᤜᤠ᤹ ᤌᤣᤀᤠᤱ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤒᤠᤒᤣ᥅
COL 2:22 ᤁᤴ ᤐᤠ᤺ᤴᤜᤠ᤹ᤃ ᤀᤥᤃᤵ ᤆᤥ᤺ᤰᤔᤠᤀᤠᤱ ᤔᤠᤒᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤕᤢᤰᤂᤢᤒᤠ ᤏᤡᤛᤠᤶ ᤏᤢ ᤌᤡᤶᤜᤠ᤹ᤖᤰᤗᤥ॥
COL 2:23 ᤂᤧᤴ ᤜᤧᤰᤋᤱᤒᤠ ᤌᤡᤶᤜᤠ᤹ᤃ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤗᤧᤱᤛᤡᤱᤔᤠ ᤏᤢ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤠ᤺ᤳᤇᤡᤱᤔᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤜᤧᤰᤁᤣ ᤗ᤹. ᤁᤖ ᤁᤸᤗᤧ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤏᤥᤛᤪᤱᤅᤡᤸᤗᤧᤴ ᤑᤧᤴ ᤏᤡᤱᤘᤠ᤹ᤀᤡᤴ ᤕᤢᤰᤔᤠ ᤔᤧᤛᤢᤰᤋᤢᤴᤗᤥ॥
COL 3:1 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤂᤪᤡᤛ᤻ᤋᤧᤴᤏᤢᤀᤣ ᤁᤢᤜᤡᤱᤘᤧᤳ ᤁᤧᤈᤥᤃᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ ᤁᤥ᤺ᤳᤋᤧᤶᤔᤧ᤹ᤖ ᤘᤕᤧᤶᤔᤧ᤹ᤀᤥ॥ ᤂᤧᤳᤌᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤔᤢᤰᤛᤠᤶᤍᤧᤴᤏᤥ ᤂᤪᤡᤛ᤻ᤋᤧᤴ ᤕᤢᤰᤂᤢᤀᤠᤱ ᤕᤢᤱᤗᤥ॥
COL 3:2 ᤁᤵᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ᤖᤰ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥
COL 3:3 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴ ᤛᤩᤧ᤺ᤸᤗᤧ ᤂᤡᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤁᤧᤛᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤧᤰᤂᤠᤒᤠ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤴ ᤂᤪᤡᤛ᤻ᤋᤧᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤡᤰᤂᤧᤀᤠᤱ ᤘᤠ᤹ᤖᤥ॥
COL 3:4 ᤂᤡᤏᤡ᤹ ᤛᤧᤰᤂᤠᤒᤠ ᤏᤧᤳᤋᤡᤃᤧᤴ ᤜᤡᤱᤔᤴᤏᤡᤱᤃ ᤂᤪᤡᤛ᤻ᤋᤖᤥ॥ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤠ᤺ᤶᤛᤡᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤡᤔᤡᤍᤡᤱᤅᤥ ᤁᤧᤎᤠ᤺ᤶᤔᤠᤛᤡᤖᤥ॥
COL 3:5 ᤂᤧᤸᤗᤧ ᤆᤥᤃᤢᤸᤗᤧ ᤔᤧᤴᤇᤢᤔᤠ᤹ ᤏᤢ ᤕᤧᤶᤒᤡᤳᤇᤠ᤹ᤜᤠ᤹ ᤆᤠᤖᤠᤶᤔᤠ ᤐᤠ᤺ᤴᤏᤡᤴ. ᤆᤡ᤺ᤴᤈᤡᤴᤒᤠ ᤁᤧᤈᤥ᤺ᤰᤐᤠ ᤕᤠ᤺ᤶᤒᤰ. ᤆᤠᤖᤠᤶᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤴ. ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤴ ᤏᤢ ᤂᤡ᤺ᤶᤕᤰ ᤆᤥ᤺ᤰᤔᤠᤴ ᤜᤧᤰᤋᤱᤒᤠ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤏᤥᤛᤪᤱᤃᤧᤴ ᤕᤧᤵᤗᤧᤰᤜᤠ᤹ᤃ ᤏᤠᤘᤠᤀᤡᤳᤗᤠ᤺ᤴ ᤔᤠᤱᤄ᤺ᤔᤏᤠᤒᤠᤖᤥ॥ ᤂᤡᤏᤡ᤹ ᤂᤧᤴ ᤁᤠᤰ ᤕᤢᤰᤋᤧᤶᤔᤧ᤹ᤀᤥ॥
COL 3:6 ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤛᤶᤍᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤆᤢᤰᤗᤥ॥
COL 3:7 ᤀᤢᤴᤇᤥ᤺ᤴᤒᤠ ᤂᤡᤏᤡ᤹ ᤜᤡᤱᤔᤴᤏᤥ ᤒᤠ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠ ᤁᤧᤘᤕᤡᤖᤥ॥
COL 3:8 ᤁᤖ ᤀᤠᤸᤗᤥᤃ ᤂᤡᤏᤡ᤹ᤀᤠᤱ ᤛᤡᤰ ᤐᤥ᤺ᤰᤔᤠᤴ. ᤛᤠᤰᤁᤧᤴᤏᤡᤴ. ᤏᤠᤜᤧᤶᤔᤠᤴ. ᤜᤡᤏᤠ᤺ᤶ ᤔᤧᤳᤇᤡᤱᤔᤠᤴ. ᤔᤧᤴᤇᤡᤰᤁᤪᤠ ᤐᤠ᤺ᤴᤜᤠ᤹ ᤁᤠᤰ ᤗᤧᤵᤔᤠ ᤋᤣ᤺ᤔᤠᤀᤣ ᤐᤥ᤺ᤱᤗᤥ॥
COL 3:9 ᤂᤡᤏᤡ᤹ ᤀᤡᤱᤗᤧᤰ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤋᤃᤡᤒᤠ ᤗᤠᤕᤥᤒᤠ ᤛᤢᤳᤏᤠ᤺ᤴ ᤏᤢ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤜᤠ᤹ ᤁᤠᤰ ᤁᤧᤗᤧᤖᤢᤶ ᤁᤧᤍᤣ᤺ᤛᤢᤶᤔᤠᤱ ᤁᤧᤘᤕᤡ᤹.
COL 3:10 ᤜᤧᤰᤁᤩᤠᤱ ᤂᤡᤏᤡ᤹ᤃ ᤁᤢᤛᤱ ᤛᤢᤳᤏᤠ᤺ᤴ ᤋᤣ᤺ᤳ ᤜᤧᤰᤁᤣ ᤁᤧᤈᤠᤰᤂᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ᤃ ᤏᤠᤘᤠᤃᤧᤴ ᤆᤀᤡ᤺ᤳᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤂᤢᤏᤧ᤹ ᤁᤢᤀᤡ᤺ᤳ ᤜᤧᤰᤁᤣ ᤁᤧᤒᤥ᤺ᤰᤂᤡᤖ ᤁᤧᤒᤳᤇᤡᤖᤥ॥
COL 3:11 ᤀᤠᤸᤗ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤕᤜᤢᤍᤡ. ᤜᤷᤍᤥ ᤁᤧᤜᤧᤰᤐᤠ ᤏᤢ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ. ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ. ᤕᤥ᤺ᤰ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹ ᤛᤧᤴᤇᤡᤱᤔᤠ ᤜᤥ᤺ᤵᤗᤥ. ᤁᤖ ᤂᤪᤡᤛ᤻ᤋᤧᤏᤗᤰ ᤁᤧᤕᤧᤰᤐᤠ ᤆᤥ᤺ᤰ. ᤜᤧᤰᤁᤩᤠᤱ ᤂᤢᤏᤧ᤹ ᤁᤠᤰ ᤐᤠ᤺ᤴᤜᤠ᤹ᤀᤥᤀᤣ ᤘᤠ᤹ᤖᤥ॥
COL 3:12 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹. ᤛᤣᤛᤣ ᤏᤢ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤜᤠ᤹ᤖᤧ. ᤗᤢᤱᤍᤢᤰᤁᤡᤴ. ᤗᤢᤱᤔᤠ᤹ ᤋᤢᤰᤛᤡᤱᤔᤠᤴ. ᤏᤥᤏᤡᤱᤘᤠ᤹ᤀᤡᤴ. ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤗ᤹ᤔᤠᤴ ᤏᤢ ᤏᤠᤛᤡ ᤌ᤺ᤵᤔᤠᤴ ᤆᤠᤱ ᤁᤢᤀᤡᤛᤡ᤺ᤰ ᤆᤠᤰᤛᤡᤱᤔᤠ ᤐᤥ᤺ᤱᤗᤥ॥
COL 3:13 ᤂᤡᤏᤡ᤹ᤃ ᤘᤣ᤹ᤜᤠ᤹ᤏᤢ ᤏᤠᤛᤡ ᤌ᤺ᤳᤇᤡᤱᤔᤠ ᤐᤥ᤺ᤱᤅᤠᤱ ᤏᤡᤱᤘᤠ᤹ ᤋᤢᤰᤔᤠ ᤐᤠ᤺ᤴᤜᤠ᤹ ᤘᤠ᤹ᤛᤠᤱ ᤗᤧᤵᤔᤡ ᤐᤡᤀᤠᤛᤡᤶᤔᤧ᤹ᤀᤥ॥ ᤍᤠᤱᤒᤠᤸᤗᤧ ᤗᤧᤵᤔᤡ ᤁᤧᤒᤡᤖᤡᤒᤠ ᤁᤢᤀᤡᤛᤡ᤺ᤰᤁᤣ ᤗᤧᤵᤔᤡ ᤐᤡᤀᤠᤛᤡᤶᤔᤧ᤹ᤀᤥ॥
COL 3:14 ᤜᤧᤰᤁᤩᤠᤱ ᤁᤴ ᤁᤧᤖᤧᤰᤏᤢ᤺ᤸᤗᤧ ᤕᤖᤡᤰ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥ ᤂᤧᤸᤗᤧᤀᤣ ᤂᤡᤏᤡ᤹ ᤌᤡᤰᤜᤢᤵ ᤐᤥ᤺ᤱᤔᤠ ᤁᤢᤗᤡᤱᤎᤥ ᤁᤧᤃᤧᤳᤋᤡ᤹ᤖᤥ॥
COL 3:15 ᤜᤠᤖᤠ᤹ ᤂᤪᤡᤛ᤻ᤋᤖᤧ ᤁᤢᤛᤏᤠᤖᤢᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤕᤢᤰᤋᤢᤖᤖᤥ. ᤌᤣᤀᤠᤱᤓᤧᤸᤗᤧ ᤛᤏᤠᤖᤢᤱᤅᤥ ᤘᤠ᤹ᤔᤠ ᤑᤠ᤹ᤀᤠᤱ ᤂᤡᤏᤡ᤹ᤃ ᤗᤳᤌᤡᤰ ᤏᤠᤛᤡᤱᤃᤧᤴ ᤌᤰᤁᤥ ᤀᤢ᤺ᤳᤇᤡᤱᤔᤠ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥
COL 3:16 ᤜᤠᤖᤠ᤹ ᤂᤪᤡᤛ᤻ᤋᤖᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤋᤡᤶᤔᤠᤱ ᤘᤠ᤹ᤖᤖᤥ॥ ᤂᤡᤏᤡ᤹ ᤒᤠ ᤁᤴ ᤐᤠ᤺ᤴᤈᤠᤰᤁᤡᤸᤗᤧ ᤜᤢ᤹ᤀᤠᤛᤡᤶᤔᤧ᤹. ᤜᤧᤰᤁᤩᤠᤱ ᤁᤠᤰ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤛᤢᤈᤠ ᤐᤡᤀᤠᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤛᤣᤘᤠ ᤆᤥ᤺ᤰᤔᤠ ᤛᤠᤶᤗᤥᤜᤠ᤹. ᤕᤠᤶᤛᤠᤶᤃᤧᤴ ᤛᤠᤶᤗᤥᤜᤠ᤹ ᤏᤢ ᤛᤣᤛᤣᤔᤠᤱᤗᤠᤶ ᤁᤧᤍᤠ᤺ᤒᤠ ᤛᤠᤶᤗᤥᤜᤠ᤹ ᤛᤠᤶᤃᤧᤔᤧᤳᤋᤢᤶᤔᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥᤏᤢᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ॥
COL 3:17 ᤂᤡᤏᤡ᤹ ᤆᤩᤠ ᤁᤧᤒᤠ᤺ᤳᤋᤢᤶᤛᤠᤱ ᤆᤩᤠ ᤁᤧᤈᤥᤃᤢᤶᤛᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤀᤥ॥
COL 3:18 ᤔᤣᤗᤡᤱᤃᤧᤴ ᤔᤣ᤺ᤳᤇᤣ. ᤂᤡᤏᤡ᤹ ᤀᤡᤳᤌᤢᤱᤃᤧᤴ ᤕᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ ᤀᤰᤂᤣ ᤆᤥ᤺ᤰᤔᤠᤃ ᤍᤠᤱᤒᤠᤀᤥ ᤗᤠ᤹ᤖᤢᤖᤥ॥
COL 3:19 ᤜᤧᤰᤁᤩᤠᤱ ᤀᤡᤳᤌᤢᤱᤃᤧᤴ ᤕᤧᤶᤒᤠ᤹ᤛᤣ. ᤂᤡᤏᤡ᤹ ᤔᤣᤗᤡᤱᤃᤧᤴ ᤔᤣ᤺ᤳᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤧᤶᤛᤡᤶᤔᤡᤴᤏᤧ᤹ ᤁᤖ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥
COL 3:20 ᤜᤡᤴᤈᤠ᤹ᤒᤡᤳᤇᤠᤛᤣ. ᤂᤡᤏᤡ᤹ ᤐᤠ᤺ ᤔᤠᤜᤠ᤹ᤖᤧ ᤔᤢᤖᤠ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤏᤡᤴ ᤀᤠᤵᤑᤠᤸᤗᤧᤛᤠᤱ ᤂᤧᤵᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤏᤡᤸᤗᤧ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢ᤹ᤖᤥ॥
COL 3:21 ᤐᤠᤏᤢᤍᤡᤱ ᤐᤠ᤺ᤛᤣ. ᤂᤡᤏᤡ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤢᤰᤂᤧᤶ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤢᤏᤡ᤹ ᤏᤡᤱᤘᤠ᤹ ᤐᤱᤛᤡᤱᤗᤥ॥
COL 3:22 ᤛᤣᤘᤠᤖᤥᤒᤠᤛᤣ. ᤀᤡᤰᤛᤠᤒᤠ ᤂᤡᤏᤡ᤹ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤐᤠ᤺ᤴ ᤁᤧᤄᤧᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥ ᤁᤱᤃ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤡᤔᤠᤛᤡᤖᤧ ᤗᤠᤃᤡᤖᤰ ᤔᤧ᤺ᤴ. ᤁᤖ ᤁᤠᤰ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤀᤡᤴᤏᤢ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥᤖᤧ ᤗᤠᤃᤡ ᤆᤥᤃᤧᤶᤔᤧ᤹ᤀᤥ॥
COL 3:23 ᤂᤡᤏᤡ᤹ ᤆᤩᤠ ᤁᤧᤈᤥᤃᤢᤶᤛᤠᤱ ᤔᤏᤠᤖᤧ ᤗᤠᤃᤡ ᤔᤧ᤺ᤴ. ᤁᤖ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤖ ᤆᤥᤃᤧᤶᤔᤧ᤹ᤀᤥ॥
COL 3:24 ᤌᤣᤀᤠᤱᤓᤧᤸᤗᤧ ᤜᤠᤱᤛᤧᤶ ᤁᤢᤀᤡᤛᤡ᤺ᤰ ᤍᤠᤱᤒᤠᤸᤗᤧ ᤐᤡᤏᤡᤱ ᤁᤧᤔᤧᤳᤋᤡᤒᤠ ᤗᤰᤁᤡᤴ ᤂᤥ᤺ᤛᤢᤶᤒᤧ᤹ ᤁᤧᤗ᤹ᤒᤠᤴ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤍᤠᤱᤒᤠ ᤂᤪᤡᤛ᤻ᤋᤧᤴ ᤛᤣᤘᤠ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥
COL 3:25 ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤸᤗᤧ ᤁᤧᤛᤠᤰᤐᤠ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ॥ ᤂᤧᤵᤔᤥᤃ ᤔᤏᤠ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠᤴ ᤌᤣᤀᤠᤱ ᤔᤧᤒᤥ᤺ᤱᤏᤧᤸᤗᤥ॥
COL 4:1 ᤛᤣᤘᤠᤖᤥᤒᤠᤸᤗᤧ ᤁᤢᤴᤍᤠᤱᤒᤠᤛᤣ. ᤂᤡᤏᤡ᤹ ᤛᤣᤘᤠᤖᤥᤒᤠᤜᤠ᤹ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ᤀᤠᤱ ᤍᤠᤱᤒᤠᤎᤡᤰ ᤁᤧᤃᤳᤋᤢᤶ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ॥
COL 4:2 ᤆᤰᤔᤧᤸᤗ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤧᤶᤔᤧ᤹ᤖ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥
COL 4:3 ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤶ ᤜᤴᤍᤢ ᤐᤡᤖᤡᤃᤧᤖ ᤑᤠ᤹ᤀᤠᤱ ᤀᤠᤏᤡᤃᤧ ᤗᤠᤃᤡᤀᤠᤱ ᤋᤢᤘᤠ ᤀᤠᤈᤥᤃᤧᤶ ᤀᤠᤒᤡᤖᤧᤶᤔᤧ᤹ᤀᤥ॥ ᤒᤠ ᤂᤧᤴ ᤐᤠ᤺ᤴᤏᤡᤴ ᤀᤡᤱᤓᤥ᤺ᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ᤃ ᤁᤴ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤠᤱᤅᤠᤱ ᤘᤠ᤹ᤀᤠᤖᤥ॥
COL 4:4 ᤀᤡᤱᤃᤠ᤹ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤁᤴ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤀᤡᤱᤓᤥ᤺ᤔᤠ ᤛᤢᤰᤋᤢᤱᤗ ᤑᤠ᤹ᤀᤠᤱ ᤋᤢᤘᤠ ᤀᤠᤈᤥᤃᤧᤶ ᤀᤠᤒᤡᤖᤧᤶᤔᤧ᤹ᤀᤥ॥
COL 4:5 ᤂᤡᤏᤡ᤹ᤃ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤂᤪᤡᤛ᤻ᤋᤠᤏᤡ ᤔᤧ᤺ᤶᤒᤠᤜᤠ᤹ᤏᤢ ᤘᤕᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤡ᤹ᤏᤢ ᤀᤡᤱᤓᤥ᤺ᤔᤠ ᤁᤠᤰ ᤛᤢᤕᤧᤶᤜᤠ᤹ ᤏᤢ᤺ᤖᤡᤰᤁᤠᤱ ᤀᤥᤃᤵ ᤆᤥᤃᤧᤶᤔᤧ᤹ᤀᤥ॥
COL 4:6 ᤜᤠᤖᤠ᤹ ᤕᤢᤶᤔᤡᤸᤗᤧ ᤁᤢᤈᤠ᤺ᤴ ᤁᤢᤈᤠᤃᤧᤏᤢ᤹ᤒᤠ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤐᤠ᤺ᤴᤇᤣ᤺ᤰᤘᤠ᤺ᤴ ᤗᤢᤱᤃᤢᤶ ᤁᤢᤎᤡᤶᤒᤠ ᤏᤢ ᤁᤢᤄᤧᤶ ᤁᤧᤏᤢ᤹ᤒᤠ ᤐᤥ᤺ᤱᤗᤖᤥ. ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ ᤁᤧᤖᤧᤰ ᤏᤢ᤺ᤒᤠ ᤏᤥᤃᤵ ᤐᤡᤔᤠ ᤁᤧᤛᤢᤰᤋᤢᤶᤛᤡᤶᤗᤥ॥
COL 4:7 ᤋᤢᤂᤡᤁᤛᤖᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥᤒᤠ ᤀᤡᤱᤄᤱᤅᤡᤴ ᤂᤡᤏᤡ᤹ ᤁᤧᤈᤧᤰᤋᤡ᤹ᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤒᤠ ᤏᤛᤠᤏᤡᤒᤠ ᤏᤢᤛᤠ᤹ ᤏᤢ ᤏᤛᤠ᤺ᤴᤛᤠᤒᤠ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤜᤧᤰᤁᤩᤠᤱ ᤍᤠᤱᤒᤠᤀᤥ ᤛᤣᤘᤠᤖᤥᤒᤠ ᤆᤢᤶᤗᤥ॥
COL 4:8 ᤁᤵᤔᤥᤒᤠ ᤁᤠᤰ ᤀᤠᤏᤡᤃᤧ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤈᤧᤰᤋᤡᤖ ᤑᤠ᤹ᤀᤠᤱ ᤂᤢᤏᤧ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤗ ᤐᤳᤋᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤜᤠᤱᤜᤠᤱ ᤁᤧᤈᤥᤃᤡ᤹ᤖᤥ.
COL 4:9 ᤂᤢᤏᤧ᤹ ᤂᤡᤏᤡ᤹ᤏᤢᤀᤣᤒᤠ ᤌᤡᤰᤐᤠ ᤀᤥᤏᤧᤛᤡᤔᤛᤧᤴᤏᤢ ᤑᤧᤴᤗ ᤐᤳᤗᤥ॥ ᤂᤢᤏᤧ᤹ ᤏᤛᤠ᤺ᤴᤛᤠᤒᤠ ᤏᤢ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤒᤠ ᤏᤢᤛᤠ᤹ᤖᤥ॥ ᤂᤧᤱᤜᤠ᤹ᤖᤧ ᤁᤵᤔᤥ ᤁᤧᤒᤥ᤺ᤱᤒᤠᤖ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ᤏᤢ ᤆᤧᤱᤛᤢᤖᤥ॥
COL 4:10 ᤀᤖᤡᤛ᤻ᤋᤠᤷᤂᤛᤧᤴ ᤀᤡᤱᤃᤠ᤹ᤏᤢ ᤛᤥᤖᤡᤰ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤒᤖᤏᤠᤒᤠᤛᤖᤧ ᤁᤢᤸᤗᤠᤶᤛᤠ ᤔᤷᤁᤢᤛᤖᤧ ᤛᤣᤘᤠ ᤁᤧᤜᤠᤰᤋᤡᤖᤥ॥ ᤔᤷᤁᤢᤛᤖᤧ ᤁᤢᤕᤠ᤺ᤶᤒᤣᤀᤥ ᤋᤃᤡᤛᤠ ᤀᤥ᤺ᤴᤎᤠᤰ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠ॥ ᤂᤡᤏᤡ᤹ᤀᤥ ᤗ᤺ᤴᤏᤡᤸᤗᤧ ᤗᤠᤱᤍᤠ᤺ᤰᤔᤠ ᤐᤡᤖᤧᤶᤔᤧ᤹ᤀᤥ॥
COL 4:11 ᤕᤢᤛ᤻ᤋᤛ ᤔᤧᤵᤔᤏᤠᤒᤠ ᤕᤧᤛᤢᤖᤧᤀᤠᤱ ᤛᤣᤘᤠ ᤁᤧᤜᤠᤰᤋᤡᤀᤠᤱ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤀᤥ ᤂᤧᤱᤜᤠ᤹ᤖᤰ ᤕᤜᤢᤍᤡ ᤏᤛᤠᤏᤡᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤜᤠᤱᤜᤠᤱ ᤔᤧᤔᤧᤳᤋᤠᤱᤅᤠᤱ ᤘᤠ᤹ᤖᤥ॥
COL 4:12 ᤂᤡᤏᤡ᤹ᤏᤢᤀᤣᤒᤠ ᤌᤡᤰᤐᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤛᤣᤘᤠᤖᤥᤒᤠ ᤀᤡᤐᤠᤑᤪᤠᤛᤖᤧ ᤂᤡᤏᤡ᤹ ᤛᤣᤘᤠ ᤁᤧᤜᤠᤰᤋᤡᤖᤥ॥ ᤂᤢᤏᤧ᤹ᤃ ᤂᤡᤏᤡ᤹ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤎᤢᤶᤒᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤜᤧᤰᤁᤩᤠᤱ ᤁᤠᤰ ᤏᤡᤱᤘᤠ᤹ᤑᤢ ᤏᤡᤱᤘᤠ᤹ᤀᤥ ᤋᤠ᤺ᤰᤐᤥᤃᤧᤶᤒᤠ ᤁᤧᤈᤥᤃᤡᤖ ᤑᤠ᤹ᤀᤠᤱ ᤛᤍᤠᤍᤡᤱ ᤛᤠ᤹ᤖᤡᤰ ᤋᤢᤘᤠ ᤆᤥᤃᤢ᤹ᤖᤥ॥
COL 4:13 ᤀᤡᤱᤃᤠ᤹ ᤛᤧᤰᤂᤠ ᤐᤠ᤺ᤴ ᤔᤧᤳᤏᤡᤱ. ᤂᤡᤏᤡ᤹ ᤏᤢ ᤗᤠᤀᤥᤍᤡᤁᤡᤕᤠ ᤜᤧᤰᤁᤩᤠᤱ ᤜᤤᤖᤠᤐᤥᤗᤡᤛ ᤕᤧᤰᤕᤰᤁᤥᤒᤠ ᤂᤪᤡᤛ᤻ᤋᤠᤏᤡᤜᤠ᤹ᤖᤧ ᤗᤠᤃᤡ ᤕᤠᤶᤒᤢᤎᤡᤰᤁᤠᤱ ᤂᤢᤏᤧ᤹ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ॥
COL 4:14 ᤀᤠᤏᤡᤃᤧ ᤔᤡ᤺ᤶ ᤆᤢᤶ ᤛᤡᤍᤠ᤹ᤛᤠᤶᤒᤠ ᤗᤢᤁᤠ ᤏᤢ ᤍᤣᤔᤠᤛᤖᤧᤀᤠᤱ ᤛᤣᤘᤠ ᤜᤠᤱᤛᤢ᤹ᤖᤥ॥
COL 4:15 ᤗᤠᤀᤥᤍᤡᤁᤡᤕᤠᤒᤠ ᤏᤛᤠᤏᤡᤒᤠᤜᤠ᤹ ᤜᤧᤰᤁᤩᤠᤱ ᤋᤢᤳᤋᤢᤃᤧᤶᤔᤠ ᤏᤢᤶᤑᤠᤛ ᤏᤢ ᤁᤢᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤀᤥ ᤛᤣᤘᤠ ᤋᤥ᤺ᤴᤍᤧᤶ ᤀᤠᤒᤡᤖᤧᤶᤔᤧ᤹ᤀᤥ॥
COL 4:16 ᤁᤴ ᤛᤰᤀᤡᤱᤄᤱᤅᤡᤴ ᤂᤡᤏᤡ᤹ᤀᤥ ᤏᤡ᤺ᤳ ᤆᤢ᤺ᤳᤋᤠᤱ ᤗᤠᤀᤥᤍᤡᤁᤡᤕᤠᤒᤠ ᤛᤣᤛᤣᤜᤢᤵᤗᤰᤁᤥᤒᤠᤜᤠ᤹ᤖᤧᤀᤠᤱ ᤔᤧᤏᤡ᤺ᤖᤢᤖ ᤑᤠ᤹ᤀᤠᤱ ᤐᤡᤖᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤰᤋᤢᤱᤛᤡᤱᤒᤠ ᤛᤰᤀᤡᤱᤄᤱᤅᤡᤴ ᤂᤡᤏᤡ᤹ᤀᤠᤱ ᤏᤡ᤺ᤖᤧᤶᤔᤧ᤹ᤀᤥ॥
COL 4:17 ᤀᤷᤂᤡᤐᤛᤧᤴ ᤍᤠᤱᤒᤠᤸᤗᤧ ᤁᤧᤒᤡᤖᤧᤒᤠ ᤕᤠ᤺ᤶᤒᤰᤁᤡᤴ ᤆᤰᤔᤧᤸᤗ᤹ᤀᤣ ᤆᤥᤃᤧᤛᤢᤖᤧ᤹ᤀᤥ ᤗ᤹ᤖᤡᤰ ᤔᤧᤳᤋᤧᤶ ᤀᤠᤒᤡᤖᤧᤶᤔᤧ᤹ᤀᤥ॥
COL 4:18 ᤀᤡᤱᤃᤠ᤹ ᤐᤠᤘᤗᤖᤧ ᤁᤴ ᤛᤣᤘᤠ᤺ᤴ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤛᤠᤵᤋᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤢᤱᤗᤠᤜᤡᤶᤔᤥ ᤕᤠᤰᤁᤠᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥
1TH 1:1 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤌᤡᤛ᤻ᤛᤗᤥᤏᤡᤁᤠ ᤕᤧᤰᤕᤰᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤕᤠᤵᤔᤡᤜᤠ᤹ᤀᤥ. ᤀᤡᤱᤃᤠ᤹ ᤐᤠᤘᤗ. ᤛᤡᤗᤠᤛ ᤏᤢ ᤋᤡᤔᤥᤌᤡᤗᤠᤶᤒᤠ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤒᤠᤖᤥ॥ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤛᤏᤠᤖᤢᤱ ᤏᤢ ᤗᤢᤱᤃᤢᤶ ᤁᤧᤄᤥ᤺ᤛᤢᤶᤗᤖᤥ॥
1TH 1:2 ᤀᤠᤏᤡᤃᤧ ᤋᤢᤘᤠᤀᤥ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤠᤛᤡᤃᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤗᤠᤃᤡ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤢᤶᤒᤧ᤹ᤖᤥ॥
1TH 1:3 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤏᤛᤠ᤺ᤴᤗᤠᤶᤒᤠ ᤁᤧᤈᤥᤃᤢᤶᤒᤠ ᤂᤡᤏᤡ᤹ ᤕᤠ᤺ᤶᤒᤰᤁᤡᤴ. ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤔᤠᤱ ᤛᤩᤠᤱ ᤔᤧᤴᤍᤠᤱ ᤁᤧᤈᤥᤃᤢᤶᤒᤠᤴ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤕᤠᤶᤔᤥ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤏᤡᤱᤛᤠᤱᤗᤠᤶ ᤁᤧᤍᤠ᤺ᤒᤠ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤴ ᤀᤠᤏᤡᤃᤧ ᤆᤰᤔᤧᤸᤗ᤹ᤀᤣ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧᤖᤥ॥
1TH 1:4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤠᤒᤠᤅᤣ ᤁᤢᤔᤏᤠ ᤐᤥ᤺ᤱᤛᤧ ᤁᤧᤛᤣᤃᤡᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤧ ᤏᤡ᤺ᤛᤢᤶᤒᤧᤖᤥ॥
1TH 1:5 ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤀᤥ ᤋᤠᤖᤢᤶᤒᤧᤸᤗᤧ ᤐᤠ᤺ᤴᤏᤥᤖᤰ ᤔᤧᤘᤕᤧᤴ. ᤁᤖ ᤔᤢᤰᤛᤠᤶᤔᤥ ᤘᤕᤧᤖᤥ॥ ᤜᤧᤰᤁᤩᤠᤱ ᤁᤱᤃ ᤛᤣᤛᤣᤔᤠᤱᤗᤠᤶ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤛ᤻ᤔᤠ ᤘᤕᤧ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤗᤥ॥ ᤀᤠᤏᤡᤃᤧ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧ ᤀᤠᤏᤡᤃᤧ ᤜᤡᤱᤔᤴᤏᤡᤴ ᤀᤠᤰᤋᤱᤒᤠ ᤘᤕᤧ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤔᤠᤱ ᤘᤠ᤹ᤖᤥ॥
1TH 1:6 ᤀᤠᤰᤂᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤛᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤀᤥᤔᤢᤗ᤹ᤔᤠᤀᤥ ᤛᤢᤏᤠᤀᤡᤱᤅᤡᤴ ᤁᤧᤍᤠ᤺ᤰᤋᤢᤶ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤃ ᤍᤠᤱᤒᤠᤸᤗᤧᤴ ᤏᤢ ᤀᤠᤏᤡᤃᤧ ᤆᤥ᤺ᤱ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤖᤥ॥
1TH 1:7 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠ ᤌᤢᤶᤔᤥᤒᤠ ᤁᤧᤖᤧᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤁᤢᤒᤡ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
1TH 1:8 ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤔᤧᤛᤣᤍᤥᤏᤡᤕᤠ ᤏᤢ ᤀᤰᤂᤤᤕᤠᤀᤥᤖᤰ ᤔᤧᤛᤧ᤺ᤖᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥᤒᤠ ᤂᤡᤏᤡ᤹ ᤏᤛᤠ᤺ᤴᤏᤡᤴᤏᤠᤱ ᤁᤠᤰ ᤐᤡᤛᤠᤱ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤏᤡᤃᤧ ᤘᤣ᤹ ᤐᤠ᤺ᤴ ᤐᤠ᤺ᤵᤔᤠ ᤌᤣᤀᤠᤱ ᤜᤥ᤺ᤵ.
1TH 1:9 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤥ ᤋᤩᤧ᤹ᤀᤡᤃᤧᤸᤗᤧ ᤕᤠᤵᤔᤡ ᤁᤧᤍᤠ᤺ᤰᤋᤡᤒᤠ ᤐᤠ᤺ᤴ ᤏᤢ ᤏᤠᤘᤠᤀᤡᤳᤗᤠ ᤛᤣᤘᤠ ᤆᤥ᤺ᤰᤔᤥᤗᤠᤶ ᤁᤧᤏᤢ᤺ᤰᤂᤡᤀᤠᤱ ᤛᤧᤰᤂᤠ ᤏᤢ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤱᤃ ᤁᤠᤰ ᤔᤏᤠᤜᤠ᤹ᤖᤧᤀᤣ ᤔᤧᤈᤧᤰᤂᤢ ᤔᤧᤒᤠ᤺ᤳᤋᤢ᤹ᤖᤥ॥
1TH 1:10 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤄᤢᤒᤠ ᤁᤢᤛ᤻ᤛᤠ᤺ ᤕᤧᤛᤢᤖᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤢᤕᤢ᤺ᤔᤧᤴ ᤁᤧᤜᤠᤱᤄᤢᤶᤒᤠᤴ ᤔᤧᤔᤧᤳᤋᤡᤃᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤀᤣ ᤁᤧᤍᤠ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤋᤠᤱᤀᤠᤛᤧ᤺ᤵᤗᤥ॥
1TH 2:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧᤃ ᤂᤡᤏᤡ᤹ᤀᤥ ᤋᤠ᤺ᤔᤏᤠᤒᤠᤴ ᤜᤏᤧ ᤔᤧᤒᤥ᤺ᤰᤂᤧᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥
1TH 2:2 ᤁᤖ ᤂᤡᤏᤡ᤹ᤀᤥ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤑᤡᤗᤡᤵᤐᤡ ᤕᤧᤰᤕᤰᤁᤥ ᤀᤠᤏᤡᤃᤧ ᤏᤠᤔᤧᤎᤠ᤺ᤛᤢ ᤔᤧᤒᤡᤖᤡᤃᤧᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤡᤃᤧᤒᤠᤱᤃ ᤂᤡᤏᤡ᤹ ᤁᤧᤏᤡ᤺ᤛᤢᤶ ᤁᤧᤗᤧᤛ᤻ᤛᤢᤶᤔᤠᤱᤅᤣ ᤁᤧᤘᤕᤡ᤹ᤖᤥ॥ ᤔᤏᤠᤜᤠ᤹ᤖᤧ ᤀᤠᤏᤡᤃᤧ ᤛᤠ᤹ᤖᤡᤰ ᤔᤧᤀᤳᤋᤡᤃᤧᤛᤠᤱ ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠ᤺ᤴᤇᤡᤱᤔᤠ ᤐᤡᤖᤡᤃᤧᤖᤥ॥
1TH 2:3 ᤀᤠᤏᤡᤃᤧ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤴ ᤋᤠᤵᤑᤧ᤺ᤶᤒᤠ ᤀᤡᤃᤪ ᤆᤡ᤺ᤴᤈᤡ᤺ᤶᤒᤠ ᤏᤡᤱᤘᤠ᤹ᤗᤠᤶ ᤋᤩᤧᤒᤠ ᤔᤧ᤺ᤴᤗᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤀᤠᤳᤋᤡᤴᤏᤠᤱ ᤀᤡᤱᤗᤧᤰ ᤔᤧᤵᤔᤠ ᤔᤧᤃᤥ᤺ᤳᤋᤢᤶᤒᤧᤴᤗᤥ॥
1TH 2:4 ᤂᤧᤸᤗᤧ ᤁᤢᤗᤧᤰᤘᤠ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤕᤠᤵᤔᤡ ᤛᤢᤶᤒᤥᤎᤠᤛᤠᤒᤠ ᤀᤡ᤺ᤳᤋᤡᤃᤧᤀᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤗᤰᤐᤧᤴ ᤐᤡᤖᤡᤃᤧᤀᤠᤱ ᤘᤠ᤹ᤒᤠᤸᤗᤧ ᤀᤠᤵᤑᤠᤸᤗᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣᤖᤰ ᤐᤠᤖᤡᤃᤧ᤹ᤖᤥ॥ ᤀᤠᤏᤡᤃᤧᤃ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤶᤒᤧᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤆᤥᤃᤢᤶᤒᤧ᤹ᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤛᤡᤰᤗᤢᤱᤔᤠᤴ ᤛᤠ᤹ᤖᤢᤖᤥ॥
1TH 2:5 ᤀᤠᤏᤡᤃᤧ ᤂᤡᤏᤡ᤹ᤀᤥ ᤋᤩᤧ᤹ᤀᤡᤃᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤏᤠ ᤁᤧᤗᤧᤶᤒᤠ ᤐᤠ᤺ᤴ ᤔᤧᤒᤠ᤺ᤳᤋᤢᤶᤒᤧᤴ ᤗ᤹ᤖᤡᤰ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤱᤅᤡᤴ ᤀᤠᤏᤡᤃᤧ ᤜᤢᤰᤁᤥ ᤌᤠ᤺ᤔᤠ ᤐᤠ᤺ᤴᤜᤠ᤹ᤀᤠᤱ ᤔᤧᤒᤠ᤺ᤳᤋᤢᤶᤒᤧᤴ॥ ᤂᤧᤴ ᤐᤠ᤺ᤴᤜᤠ᤹ᤖᤧᤴ ᤋᤥ᤺ᤴᤍᤡᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤘᤠ᤹ᤖᤥ॥
1TH 2:6 ᤀᤠᤳᤋᤡᤴ ᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶᤒᤠ ᤀᤠᤏᤡᤃᤧ ᤔᤡᤱᤛᤥᤎᤠ᤺ᤱᤛᤥ ᤁᤧᤈᤥᤃᤢᤶᤏᤡ. ᤏᤠᤖᤠ ᤁᤧᤓᤥ᤺ᤛᤢᤶᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤶᤒᤧᤴ. ᤜᤧᤰᤁᤩᤠᤱ ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤡᤃᤧᤛᤠᤱ ᤂᤡᤏᤡ᤹ ᤕᤖᤡᤰ ᤐᤠ᤺ᤴᤜᤠ᤹ ᤔᤧᤏᤠ᤺ᤰᤁᤠᤛᤡᤃᤧᤴᤗᤥ॥
1TH 2:7 ᤁᤖ ᤂᤡᤏᤡ᤹ ᤗᤢᤶᤔᤥ ᤀᤅᤧ᤺ᤰᤘᤠ᤺ᤴ ᤁᤢᤶᤔᤠᤖᤧ ᤁᤶᤒᤪᤠᤱ ᤔᤧᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤏ᤺ᤶᤏ᤺ᤶᤔᤠᤱ ᤁᤶᤒᤪᤠᤱ ᤔᤧᤳᤋᤠᤛᤡᤃᤧᤀᤠᤱ ᤘᤠ᤹ᤖᤥ॥
1TH 2:8 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤥᤖᤰ ᤔᤧ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤌᤣᤛᤠᤱ ᤆᤥ᤺ᤰᤔᤠ ᤕᤠᤖᤡᤵ ᤘᤕᤡᤃᤧ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤛᤠ᤹ᤖᤡᤰ ᤀᤠᤏᤡᤃᤧ ᤗᤢᤱᤔᤠ᤹ ᤋᤢᤰᤁᤠᤛᤡᤃᤧᤖᤥ॥
1TH 2:9 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧ ᤋᤢᤰᤂᤣ᤺ᤴ ᤏᤢ ᤕᤠᤶᤒᤢᤎᤡᤰᤁᤡᤴ ᤛᤧᤰᤂᤠᤀᤣ ᤂᤡᤏᤡ᤹ ᤏᤡᤱᤘᤠ᤹ᤛᤥᤀᤥ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤀᤥ ᤀᤡᤱᤓᤴ ᤆᤥᤃᤢᤶᤒᤧᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤴᤈᤩᤧ᤹ᤀᤡᤴᤗ ᤑᤠ᤹ᤀᤠᤱ ᤀᤠᤏᤡᤃᤧ ᤛᤧᤴᤍᤡᤰ ᤗᤧᤴᤍᤡᤰ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ॥
1TH 2:10 ᤀᤠᤏᤡᤃᤧᤃ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤏᤢ ᤀᤠᤰᤂᤣᤴ ᤛᤣᤛᤣ. ᤛᤠᤶᤕᤥᤏᤡᤒᤠ ᤏᤢ ᤑᤥᤋᤩᤠ ᤔᤧ᤺ᤴᤏᤣᤒᤠ ᤕᤧᤵᤗᤧᤰᤁᤥ ᤘᤕᤡᤃᤧ ᤗ᤹ᤖᤡᤰ ᤁᤧᤏᤡ᤺ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤂᤡᤏᤡ᤹ ᤁᤧᤘᤕᤡ᤹ᤖᤥ॥
1TH 2:11 ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤠᤒᤢᤍᤡᤱ ᤁᤢᤛ᤻ᤛᤠ᤺ᤴ ᤁᤶᤒᤪᤠᤱ ᤔᤧᤳᤋᤢ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ ᤁᤠᤰ ᤁᤶᤒᤪᤠᤱ ᤔᤧᤳᤋᤠᤛᤡᤃᤧᤒᤠᤴ ᤂᤡᤏᤡ᤹ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
1TH 2:12 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤜᤡᤱᤔᤴᤏᤥ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤀᤠ᤺ᤴᤇᤡᤱᤔᤠ ᤐᤡᤀᤠᤛᤡᤃᤧ ᤜᤠᤱᤜᤠᤱ ᤔᤧᤳᤋᤠᤛᤡᤃᤧᤖ ᤆᤰᤔᤧᤸᤗ᤹ᤀᤣ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤂᤢᤏᤧ᤹ᤀᤣ ᤀᤠᤒᤠᤅᤣ ᤔᤡᤔᤡᤍᤡᤱᤃᤧᤴ ᤁᤢᤜᤠᤱᤈᤢᤶᤔᤥ ᤗᤰ ᤂᤥ᤺ᤛᤧ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
1TH 2:13 ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤏᤥᤃᤧᤴ ᤐᤡᤖᤢᤶᤒᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤀᤥ ᤋᤠᤖᤢᤶᤒᤧᤸᤗᤧ ᤂᤧᤱᤃ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤂᤢᤏᤡ᤹ ᤐᤠ᤺ᤴᤈᤠᤴ ᤜᤧᤰᤁᤣ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤋᤧᤴᤍᤡᤱ ᤁᤧᤈᤥᤃᤢᤶ॥ ᤀᤠᤸᤗ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤴᤏᤡᤴ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤰᤗᤥ॥
1TH 2:14 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤕᤜᤢᤍᤡᤕᤠ ᤌᤢᤶᤔᤥ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤱ ᤁᤧᤀᤡ᤺ᤳᤋᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤧᤱᤜᤠ᤹ ᤏᤡᤱᤄᤢᤶ ᤔᤧᤔᤧᤳᤋᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤀᤠᤒᤠᤅᤣ ᤗᤠᤈᤣ᤹ᤛᤠᤒᤠᤜᤠ᤹ᤖᤧ ᤋᤢᤰᤂᤣ ᤁᤧᤶᤈᤠ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
1TH 2:15 ᤕᤜᤢᤍᤡᤜᤠ᤹ᤖᤧᤃ ᤀᤢᤏᤠᤜᤢᤖᤡᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ᤺ᤴᤏᤠᤱ ᤔᤧᤛᤧᤖᤢᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤧᤀᤠᤱ ᤏᤡᤱᤄᤢᤶ ᤔᤧᤔᤧᤳᤋᤡᤃᤧᤀᤠᤱ ᤔᤧᤏᤠ᤺ᤳᤋᤡᤃᤧ ᤔᤧᤗ᤺ᤳᤋᤡᤃᤧᤖᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤴᤍᤠ᤺ᤛᤢᤴ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤀᤳᤋᤢᤛᤡᤖᤥ॥
1TH 2:16 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛᤧᤴᤗᤵ ᤔᤧᤱᤄᤥ᤺ᤛᤢᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤔᤠ ᤀᤠᤏᤡᤃᤧ ᤕᤠᤵᤔᤡ ᤛᤠᤰᤔᤠ ᤋᤶᤛᤡᤴ ᤔᤧᤈᤥᤃᤢᤖ ᤔᤧᤘᤠ᤹ᤖᤥ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤢᤶᤛᤡᤱᤗ ᤐᤳᤗᤥ॥ ᤁᤖ ᤀᤠᤸᤗᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤧᤴ ᤂᤧᤱᤜᤠ᤹ᤀᤥ ᤆᤢᤰᤋᤧᤀᤠᤱ ᤘᤠ᤹ᤖᤥ॥
1TH 2:17 ᤀᤠᤸᤗ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧᤃ ᤛᤵᤑᤠᤖᤰ ᤂᤡᤏᤡ᤹ᤏᤢ ᤛᤧᤴᤍᤡᤃᤧᤀᤠᤱ ᤘᤕᤡᤃᤧᤛᤠᤱ ᤏᤡᤱᤘᤠ᤹ᤀᤥᤃ ᤔᤧ᤺ᤴᤗᤥ॥ ᤂᤡᤏᤡ᤹ᤏᤢ ᤋᤢᤶᤔᤠ ᤕᤶᤒᤠ ᤏᤡᤱᤘᤠ᤹ ᤘᤠ᤹ᤒᤠᤸᤗᤧ ᤂᤡᤏᤡ᤹ᤀᤥ ᤏᤢ᤺ᤱᤔᤠ ᤋᤠ᤺ᤔᤠ ᤛᤠ᤹ᤖᤡᤰ ᤋᤶᤛᤡᤴ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥
1TH 2:18 ᤀᤠᤏᤡᤃᤧ ᤂᤡᤏᤡ᤹ᤀᤥ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤠᤘᤗ ᤀᤠᤒᤠᤅᤣᤀᤠᤱ ᤀᤧᤳᤗᤧᤱ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢᤱ. ᤁᤖ ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤏᤡᤃᤧ ᤗᤠᤶ ᤛᤠᤰᤋᤡᤃᤧᤖᤥ॥
1TH 2:19 ᤀᤠᤸᤗ ᤂᤡᤏᤡ᤹ᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ᤺ᤴ ᤏᤢ᤺ᤱ ᤕᤢ᤺ᤸᤗᤧ ᤂᤢᤏᤧ᤹ ᤁᤢᤍᤃᤡ ᤀᤠᤏᤡᤃᤧ ᤏᤡᤱᤛᤠᤱ ᤏᤢ ᤛ᤺ᤵᤔᤠᤴ ᤂᤡᤏᤡ᤹ᤏᤡᤱᤗᤥ॥ ᤜᤧᤰᤁᤩᤠᤱ ᤀᤠᤏᤡᤃᤧ ᤛᤡᤰ ᤛᤶᤃᤧᤴ ᤋᤡᤆ᤺ ᤁᤢᤀᤡᤛᤡ᤺ᤰ ᤜᤠᤱᤜᤠᤱᤃᤧᤴ ᤌᤢᤶᤄᤥ᤺ᤴ ᤂᤡᤏᤡ᤹ ᤔᤧ᤺ᤴᤏᤡᤱᤒᤡ᥅
1TH 2:20 ᤛᤧᤰᤂᤠᤛᤠᤱ ᤀᤠᤏᤡᤃᤧ ᤛ᤺ᤵᤔᤠ ᤏᤢ ᤏᤧᤒᤥ ᤁᤧᤓᤶᤒᤠᤃ ᤂᤡᤏᤡ᤹ᤏᤡᤱᤅᤣᤖᤥ॥
1TH 3:1 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤧᤃ ᤏᤠᤛᤡ ᤌ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤏᤠᤱ ᤀᤧᤌᤧᤴᤛ ᤕᤧᤰᤕᤰᤁᤥ ᤀᤠᤏᤡᤃᤧᤖᤰ ᤘᤠ᤹ᤔᤠ ᤗᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥
1TH 3:2 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤀᤠᤏᤡᤃᤧᤏᤢ ᤛᤥᤖᤡᤰ ᤀᤡᤱᤓᤴ ᤁᤧᤈᤥ᤺ᤰᤐᤠ ᤀᤠᤏᤡᤃᤧ ᤏᤢᤛᤠ᤹ ᤋᤡᤔᤥᤌᤡ᤺ᤴ ᤂᤡᤏᤡ᤹ᤀᤥ ᤐᤠᤱᤄᤢᤶᤒᤧᤀᤠᤱ ᤘᤠ᤹ᤖᤥ॥ ᤜᤠᤖᤠ᤹ ᤂᤢᤏᤧ᤹ᤀᤣ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡᤖ. ᤜᤠᤱᤜᤠᤱ ᤁᤧᤔᤧᤳᤋᤡᤖᤖᤥ॥
1TH 3:3 ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤴ ᤐᤛᤠᤰᤁᤧᤛᤠᤰᤐᤠ ᤏᤡᤱᤄᤢᤶᤔᤡᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴᤏᤡᤴ ᤔᤧᤸᤗᤧᤖᤢᤴᤗᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤀᤠᤈᤥᤃᤢᤶᤔᤡᤸᤗᤧ ᤀᤰᤋᤱᤒᤠ ᤏᤡᤱᤄᤢᤶᤜᤠ᤹ᤃ ᤋᤠᤀᤣ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤔᤣᤖᤥ.
1TH 3:4 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧᤛᤠ ᤋᤃᤡᤀᤣ ᤀᤠᤰᤋᤱᤒᤠ ᤋᤢᤰᤂᤣ᤺ᤴ ᤋᤠ᤺ ᤑᤠ᤹ᤀᤠᤱ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤄᤢᤶᤔᤡᤴ ᤋᤩᤧᤀᤠᤱ ᤘᤠ᤹ᤒᤠᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥
1TH 3:5 ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤴᤏᤠᤱᤎᤥ ᤏᤠᤛᤡ ᤌ᤺ᤵᤔᤠ ᤔᤧᤴᤇᤢᤰᤐᤧᤴᤏᤠᤱ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤛᤠ᤹ᤛᤧ ᤋᤡᤔᤥᤌᤡ᤺ᤴ ᤐᤠᤱᤄᤢᤱᤅᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤂᤡᤏᤡ᤹ ᤜᤱᤃᤧᤛᤠ᤹ᤖᤡᤀᤠᤱ ᤀᤠᤏᤡᤃᤧ ᤆᤥ᤺ᤰᤔᤏᤠᤒᤠ ᤕᤠᤶᤒᤢᤎᤡᤰᤁᤡᤴ ᤜᤏᤧᤖᤰ ᤐᤥ᤺ᤰᤂᤧᤒᤡ ᤑᤠ᤹ᤀᤠᤱ ᤁᤡ᤺ᤛᤠᤱᤅᤠᤱ ᤘᤕᤠᤱᤗᤥ॥
1TH 3:6 ᤁᤖ ᤋᤡᤔᤥᤌᤡ᤺ᤴ ᤂᤡᤏᤡ᤹ᤀᤥᤗᤠᤶ ᤀᤠᤏᤡᤃᤧᤀᤥ ᤋᤩᤧᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤏᤢ ᤔᤡ᤺ᤶᤈᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ᤺ᤒᤠ ᤀᤡᤱᤄᤱ ᤋᤠᤖᤢ. ᤜᤧᤰᤁᤩᤠᤱ ᤂᤡᤏᤡ᤹ ᤀᤥᤔᤢ ᤁᤧᤗ᤹ᤖᤡᤖ ᤕᤠᤵᤔᤡ ᤏᤡᤱᤘᤠ᤹ ᤁᤧᤀᤡ᤺ᤳᤋᤡᤒᤠ. ᤛᤠ᤹ᤖᤡᤰ ᤋᤢᤶᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤕᤠᤵᤔᤡ ᤆᤧᤰᤋᤡᤃᤧᤖᤥ॥ ᤂᤧᤴ ᤁᤢᤀᤡᤛᤡ᤺ᤰᤁᤣ ᤀᤠᤏᤡᤃᤧᤀᤠᤱ ᤂᤡᤏᤡ᤹ ᤋᤢᤶᤔᤠ ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥
1TH 3:7 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧ ᤁᤠᤰ ᤁᤧᤛᤠᤰᤐᤠ ᤐᤠ᤺ᤴ ᤏᤢ ᤋᤢᤰᤂᤣ ᤗᤠᤰᤂᤣᤜᤠ᤹ᤀᤥᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤶᤒᤧᤸᤗᤧ ᤀᤠᤏᤡᤃᤧ ᤜᤠᤱᤜᤠᤱ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥
1TH 3:8 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤀᤥ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤸᤗᤧᤃ ᤛᤧᤰᤂᤠᤀᤣ ᤀᤠᤏᤡᤃᤧ ᤛᤰᤔᤠ ᤋᤠ᤺ᤖᤥ॥
1TH 3:9 ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠ᤹ᤖᤡᤰ ᤏᤥᤃᤧᤴ ᤐᤡᤖᤢᤶᤒᤠᤖᤥ॥ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤠᤏᤡᤃᤧ ᤛᤠ᤹ᤖᤡᤰ ᤛ᤺ᤳᤋᤡᤃᤧᤀᤠᤱ ᤘᤕᤡᤃᤧᤖᤥ॥
1TH 3:10 ᤀᤠᤏᤡᤃᤧᤃ ᤂᤡᤏᤡ᤹ᤏᤢ ᤋᤢᤶᤔᤠᤀᤠᤱ ᤂᤡᤏᤡ᤹ ᤏᤛᤠ᤺ᤴ ᤁᤧᤛᤢ᤺ᤶᤒᤠ ᤐᤠ᤺ᤴᤜᤠ᤹ᤀᤥ ᤁᤧᤎᤢᤶᤒᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤁᤠᤰ ᤏᤡᤱᤘᤠ᤹ᤗᤠᤶᤒᤠ ᤋᤢᤘᤠ ᤆᤥᤃᤡᤃᤧᤖᤥ॥
1TH 3:11 ᤀᤠᤸᤗ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤏᤢ ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤖᤧ ᤂᤡᤏᤡ᤹ᤀᤥ ᤋᤠ᤺ᤔᤠ ᤗᤠᤶ ᤜᤴᤍᤢ ᤐᤡᤖᤡᤃᤧᤖᤖᤥ॥
1TH 3:12 ᤜᤧᤰᤁᤩᤠᤱ ᤀᤠᤏᤡᤃᤧ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤃᤧᤒᤠ ᤜᤧᤰᤁᤣᤀᤣ ᤜᤠᤖᤠ᤹ ᤍᤠᤱᤒᤠᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤒᤥ᤺ᤱᤒᤠᤖ ᤁᤧᤒᤣ᤺ᤰᤐᤠ ᤁᤧᤈᤥᤃᤡᤖᤖᤥ॥
1TH 3:13 ᤂᤡᤏᤡ᤹ ᤏᤡᤱᤘᤠ᤹ᤒᤠᤴ ᤜᤠᤱᤜᤠᤱ ᤔᤧᤳᤋᤢᤏᤡᤖᤥ. ᤀᤰᤂᤣᤗ᤹ᤖᤡᤰ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ᤺ᤴ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ᤏᤢ ᤕᤠᤶᤔᤥ ᤕᤢ᤺ᤸᤗᤧ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤛᤣᤛᤣ ᤏᤢ ᤑᤥᤋᤩᤠ ᤔᤧ᤺ᤴᤏᤣ ᤁᤧᤈᤥᤃᤡᤖᤖᤥ॥
1TH 4:1 ᤀᤠᤸᤗ ᤁᤢᤏᤢᤵᤔᤥ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤖ ᤜᤡᤱᤔᤠ ᤐᤥ᤺ᤱ ᤗ᤹ᤖᤡᤰ ᤀᤠᤏᤡᤃᤧᤗᤠᤶ ᤁᤧᤜᤢ᤹ᤀᤠᤛᤡᤒᤠ ᤜᤧᤰᤁᤣᤀᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹॥ ᤁᤖ ᤀᤠᤸᤗᤛᤠᤱ ᤕᤖᤡᤰ ᤏᤢ᤺ᤖᤡᤰᤁᤠᤱ ᤁᤴ ᤐᤠ᤺ᤴᤜᤠ᤹ ᤁᤧᤈᤥᤃᤢᤶᤗᤀᤣ ᤐᤥ᤺ᤱ ᤑᤠ᤹ᤀᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥
1TH 4:2 ᤌᤣᤀᤠᤱᤓᤧᤸᤗᤧ ᤁᤴ ᤂᤡᤏᤡ᤹ ᤐᤡᤀᤠᤛᤡᤃᤧᤒᤠ ᤀᤡᤱᤈᤠ᤺ᤱᤜᤠ᤹ᤃ ᤍᤠᤱᤒᤠ ᤕᤧᤛᤢᤖᤧ ᤁᤢᤕᤢᤰᤁᤥᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥
1TH 4:3 ᤂᤡᤏᤡ᤹ ᤛᤣᤛᤣ ᤁᤧᤘᤕᤡᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤁᤠᤰ ᤘᤣ᤹ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ ᤆᤠᤖᤠᤶᤔᤥᤗᤠᤶ ᤁᤧᤒᤥ᤺ᤱᤒᤠ ᤆᤡ᤺ᤴᤈᤡ᤺ᤶᤒᤠᤀᤥᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥
1TH 4:4 ᤘᤣ᤹ᤜᤠ᤹ᤖᤧ ᤀᤡᤱᤎᤠ᤺ᤱ ᤁᤧᤶᤒᤡᤖᤡᤏᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤣᤛᤣ ᤁᤵᤔᤠ ᤐᤥ᤺ᤱ ᤁᤧᤗ᤹ᤒᤠᤱᤃ ᤂᤡᤏᤡ᤹ ᤗᤧᤔᤠ ᤐᤥ᤺ᤱᤗᤥ॥
1TH 4:5 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠ ᤛᤢᤘᤠᤱᤜᤠ᤹ ᤜᤧᤰᤁᤣ ᤗᤠᤶᤔᤠ ᤑᤧᤴ ᤏᤡᤱᤘᤠ᤹ ᤁᤵᤔᤠ ᤔᤧᤏᤢ᤹ᤏᤧᤴᤗᤥ॥
1TH 4:6 ᤀᤰᤂᤣᤗ᤹ᤖᤡᤰ ᤁᤴ ᤐᤠ᤺ᤴᤏᤥ ᤀᤠᤳᤋᤡᤸᤗᤧᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤏᤢ ᤗᤠᤶᤛᤡᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤁᤠᤰ ᤜᤧᤰᤋᤱᤒᤠ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡ ᤑᤠ᤹ᤀᤠᤱ ᤋᤃᤡᤛᤠ ᤀᤠᤏᤡᤃᤧ ᤛᤠᤶᤍᤡᤱ ᤐᤡᤀᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥
1TH 4:7 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤃ ᤆᤡ᤺ᤴᤈᤡ᤺ᤶᤒᤠ ᤜᤡᤱᤔᤴᤏᤥ ᤔᤧ᤺ᤴ. ᤁᤖ ᤛᤣᤛᤣ ᤛᤠᤱᤛᤠᤱᤅᤠᤱ ᤜᤡᤱᤔᤠ ᤗ᤹ᤖᤡᤰ ᤀᤠᤀᤢ᤺ᤳᤋᤧᤒᤠᤖᤥ॥
1TH 4:8 ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤁᤴ ᤏᤡᤛᤠᤶᤔᤡᤴ ᤏᤠ᤹ᤖᤢ. ᤂᤧᤸᤗᤧᤃ ᤔᤧᤴᤇᤠᤶᤃᤧᤴ ᤕᤠᤵᤔᤡ᤺ᤴ ᤔᤧ᤺ᤴ. ᤁᤖ ᤂᤡᤏᤡ᤹ ᤛᤣᤛᤣᤔᤠᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤹ᤖᤢᤒᤠᤖᤥ॥
1TH 4:9 ᤀᤠᤸᤗ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤶᤔᤥ ᤀᤠᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤛᤠᤵᤔᤠᤖ ᤏᤧᤔᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱ ᤑᤠ᤹ᤀᤠᤱ ᤁᤧᤜᤢ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥
1TH 4:10 ᤛᤧᤰᤂᤠ᤺ᤸᤗᤧ. ᤁᤠᤰ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤏᤛᤠᤏᤡᤒᤠᤜᤠ᤹ᤏᤢᤀᤠᤱ ᤒᤠ ᤜᤧᤰᤁᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗᤛᤠᤱ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥
1TH 4:11 ᤛᤏᤠᤖᤢᤱᤅᤥ ᤜᤡᤱᤔᤴ ᤂᤡᤏᤡ᤹ ᤜᤡᤱᤔᤴᤗᤧ ᤋᤠᤖᤠᤵ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧ ᤋᤃᤡᤛᤠ ᤔᤧᤳᤋᤠᤛᤡᤃᤧᤒᤠ ᤁᤢᤀᤡᤛᤡ᤺ᤰ ᤛᤫᤠ᤺ᤳ ᤘᤕᤧᤶᤔᤧ᤹ᤀᤠᤱ ᤀᤠᤒᤠᤅᤣ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤖ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥
1TH 4:12 ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧ ᤀᤡᤱᤎᤠ᤺ᤱ ᤁᤧᤶᤒᤡᤖᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤆᤠᤕᤠ᤺ᤶᤒᤥᤀᤥ ᤁᤢᤓᤠᤖᤧ ᤗᤠᤃᤡ ᤘᤣ᤹ ᤔᤏᤠᤜᤠ᤹ᤀᤥ ᤋᤠ᤺ᤰᤐᤥ ᤆᤥ᤺ᤰᤔᤠ ᤔᤧᤒᤥ᤺ᤱᤏᤧᤸᤗᤥ॥
1TH 4:13 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤧᤛᤡ᤺ᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧ ᤔᤧᤴᤏᤡᤀᤣ ᤔᤧᤘᤕᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤧᤛᤢᤀᤥ ᤏᤡᤱᤛᤠᤱ ᤁᤧᤜᤥ᤺ᤵᤐᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤔᤣᤖᤡᤱ ᤔᤧᤎᤰᤋᤧᤶᤔᤡᤴᤏᤧ᤹ᤀᤥ॥
1TH 4:14 ᤌᤣᤀᤠᤱᤓᤧᤸᤗᤧ ᤕᤧᤛᤢ᤺ᤴ ᤛᤩᤧᤀᤠᤱ ᤕᤠᤶᤔᤥ ᤜᤡᤅᤧᤒᤠ ᤐᤠ᤺ᤴᤏᤥ ᤀᤠᤏᤡ᤹ ᤏᤛᤠ᤺ᤴ ᤀᤠᤈᤥᤃᤢᤶ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤛᤡᤀᤠᤱ ᤕᤧᤛᤢ᤺ᤴᤏᤢᤀᤣ ᤋᤠᤖᤢᤛᤡᤖᤥ॥
1TH 4:15 ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤢᤒᤠ᤺ᤴᤈᤠᤴᤗᤠᤶᤒᤠ ᤀᤠᤏᤡᤃᤧ ᤀᤰᤂᤣ ᤐᤠ᤺ᤳᤋᤢᤶᤒᤧᤖᤥ. ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤶ ᤌᤠᤖᤡᤰ ᤀᤠᤏᤡ᤹ ᤔᤧᤴᤇᤡ᤺ᤀᤣ ᤁᤧᤘᤠ᤹ᤒᤠᤜᤠ᤹ᤖᤧ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠᤜᤠ᤹ ᤀᤠᤰᤂᤣᤀᤠᤱᤛᤠᤱ ᤗᤠᤶᤀᤠᤶᤒᤠᤰᤋᤢᤶᤛᤡᤶᤔᤡᤴᤗᤥ॥
1TH 4:16 ᤌᤣᤀᤠᤱᤓᤧᤸᤗᤧ ᤋᤢᤶᤔᤠᤱᤗᤠᤀᤡᤱᤒᤠᤸᤗᤧ ᤁᤢᤀᤡᤰᤗᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤢᤳᤋᤢᤖᤡ᤺ᤵᤐᤠᤸᤗᤧ ᤁᤢᤀᤡᤰᤗᤠᤏᤢ ᤍᤠᤱᤒᤠᤴᤏᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗ ᤕᤢ᤺ᤖᤥ॥ ᤜᤧᤰᤁᤩᤠᤱ ᤁᤠᤰ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ ᤛᤡ᤺ᤔᤧᤴᤗᤠᤶ ᤜᤡᤱᤔᤴᤏᤥ ᤁᤠᤰᤏᤢ ᤋᤃᤡ ᤔᤧᤜᤡᤱᤅᤠᤱ ᤔᤧᤒᤥ᤺ᤰᤗᤥ॥
1TH 4:17 ᤜᤧᤰᤁᤩᤠᤱ ᤀᤠᤏᤡ᤹ ᤀᤡᤰᤛᤠᤀᤥ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠᤜᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤍᤢᤶᤛᤧ ᤋᤠᤱᤛᤠᤰᤐᤠᤀᤥ ᤌᤠ᤺ᤱ ᤀᤠᤒᤱ ᤀᤠᤍᤣ᤹ᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤀᤠᤓᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤛᤍᤠᤍᤡᤱ ᤍᤠᤱᤒᤠᤴᤏᤢ ᤀᤠᤘᤠ᤹ᤖᤥ॥
1TH 4:18 ᤁᤴ ᤐᤠ᤺ᤴᤜᤠ᤹ᤗᤠᤶᤒᤠ ᤜᤠᤱᤜᤠᤱ ᤔᤧᤳᤋᤠᤛᤡᤶᤔᤧ᤹ᤀᤥ॥
1TH 5:1 ᤀᤠᤸᤗ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤧᤴ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥ᤺ᤱ ᤑᤠ᤹ᤀᤠᤱ ᤕᤧᤶ ᤏᤢ ᤕᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤧᤔᤠᤀᤠᤱ ᤂᤡᤏᤡ᤹ᤗᤠᤃᤡ ᤀᤠᤏᤡᤃᤧ ᤛᤠᤵᤔᤠᤖ ᤏᤧᤔᤠ ᤔᤧᤒᤥ᤺ᤱᤏᤧᤸᤗᤥ॥
1TH 5:2 ᤌᤣᤀᤠᤱᤓᤧᤸᤗᤧ ᤔᤧᤴᤀᤡ᤺ᤳᤋᤣ ᤘᤠ᤹ᤔᤠᤸᤗᤧ ᤛᤧᤴᤍᤡᤰ ᤁᤧᤄᤢ᤺ᤶᤒᤠᤴ ᤂᤢ᤺ᤳᤇᤧ ᤋᤠᤒᤠ ᤁᤢᤀᤡᤛᤡ᤺ᤰ ᤍᤠᤱᤒᤠᤴ ᤏᤢ᤺ᤱ ᤕᤢ᤺ᤒᤠ ᤕᤧᤴᤏᤡᤴ ᤜᤰᤆᤄᤳ ᤐᤥ᤺ᤱ ᤑᤠ᤹ᤀᤠᤱ ᤂᤡᤏᤡ᤹ ᤀᤠᤒᤠᤅᤣ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥
1TH 5:3 ᤔᤏᤠᤜᤠ᤹ ᤛᤏᤠᤖᤢᤱ ᤏᤢ ᤋᤠᤱᤛᤧ᤺ᤵᤐᤡᤴ ᤘᤠ᤹ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤘᤠ᤹ᤀᤡᤸᤗᤧ ᤔᤧᤴᤇᤢᤔᤠ᤹ᤀᤡᤴ ᤜᤰᤆᤄᤳ ᤛᤠᤍᤢᤱᤅᤡᤸᤗᤧ ᤋᤖᤢᤒᤠ ᤁᤢᤀᤡᤛᤡ᤺ᤰ ᤔᤧᤰᤔᤠᤴ ᤋᤠᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤐᤡᤶᤔᤠ ᤔᤧᤴᤇᤢᤰᤏᤧᤴᤗᤥ॥
1TH 5:4 ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤗᤠᤕᤥᤀᤥ ᤁᤧᤘᤠ᤹ᤒᤠᤜᤠ᤹ ᤁᤢᤀᤡᤛᤡ᤺ᤰ ᤔᤠᤰᤆᤡᤃᤧᤴ ᤂᤠᤍᤠᤶᤔᤥ ᤁᤧᤜᤥ᤺ᤵᤋᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤴᤏᤡᤴ ᤁᤧᤄᤢ᤺ᤶᤒᤧᤴ ᤜᤰᤆᤄᤳ ᤋᤠᤒᤠ ᤁᤢᤀᤡᤛᤡ᤺ᤰ ᤋᤠ᤺ᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤠ᤺ᤔᤠᤀᤥ ᤁᤧᤴᤎᤩᤧ᤹ᤀᤡᤴᤗᤥ॥
1TH 5:5 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤠᤰ ᤂᤠᤀᤥ᤺ᤵᤔᤠᤴ ᤏᤢ ᤗᤧᤴᤍᤡᤰᤗᤧᤴ ᤁᤢᤔᤢ᤹ᤀᤡᤍᤠᤱᤛᤠᤏᤡᤱᤗᤥ॥ ᤀᤠᤏᤡ᤹ᤃ ᤛᤧᤴᤍᤡᤰ ᤏᤢ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤁᤢᤔᤏᤠᤛᤡ ᤔᤧ᤺ᤴᤗᤥ॥
1TH 5:6 ᤂᤧᤸᤗᤧ ᤆᤥᤃᤢᤸᤗᤧ ᤘᤣ᤹ ᤔᤏᤠᤜᤠ᤹ ᤜᤧᤰᤁᤣ ᤀᤠᤏᤡ᤹ ᤀᤡᤵᤛᤡ ᤔᤧ᤺ᤴ. ᤁᤖ ᤛᤡᤱᤛᤡᤱ ᤕᤧᤰᤕᤧᤰ ᤏᤢ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤀᤥ ᤘᤠ᤹ᤔᤠ ᤐᤥ᤺ᤱᤗᤥ॥
1TH 5:7 ᤌᤣᤀᤠᤱᤓᤧᤸᤗᤧ ᤁᤧᤀᤡᤶᤒᤠᤜᤠ᤹ᤃ ᤛᤧᤴᤍᤡᤰ ᤔᤧᤀᤡᤶ. ᤁᤧᤔ᤺ᤛᤡᤱᤒᤠᤜᤠ᤹ᤀᤠᤱ ᤛᤧᤴᤍᤡᤰᤁᤣ ᤔᤧᤔᤛᤡᤱᤗᤥ॥
1TH 5:8 ᤁᤖ ᤀᤠᤏᤡ᤹ᤃ ᤗᤧᤴᤍᤡᤰᤗᤧ ᤁᤢᤔᤏᤠ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ ᤌ᤺ᤖᤢᤶᤔᤠᤱ ᤛᤠᤱᤒᤣ ᤛᤧ᤺ᤵᤆᤠᤱ ᤁᤢᤀᤡᤛᤡ᤺ᤰ ᤏᤛᤠ᤺ᤴ ᤏᤢ ᤔᤡ᤺ᤶᤈᤡᤴ ᤆᤠᤰᤂᤢᤶ. ᤜᤧᤰᤁᤩᤠᤱ ᤛᤧᤰᤂᤠᤀᤣ ᤛᤧᤴᤗᤵ ᤀᤠᤄᤥ᤺ᤛᤢᤶ ᤁᤧᤗ᤹ᤒᤠ ᤏᤡᤱᤛᤠᤱᤅᤡᤴ ᤋᤠᤱᤂᤢ᤺ᤰ ᤁᤢᤀᤡᤛᤡ᤺ᤰ ᤂᤢ᤺ᤰᤂᤢᤶ.
1TH 5:9 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤃ ᤂᤢᤶᤍᤡᤱ ᤂᤥ᤺ᤔᤠ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤛᤧᤴᤗᤵ ᤂᤥ᤺ᤔᤠ ᤑᤠ᤹ᤀᤠᤱ ᤋᤃᤡᤏᤢᤀᤣ ᤛᤣ᤺ᤰᤕᤢᤰ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ॥
1TH 5:10 ᤂᤢᤏᤧ᤹ ᤀᤠᤏᤡ᤹ ᤗᤧᤰᤘᤠ ᤛᤩᤧᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤍᤠᤱᤒᤠᤴ ᤕᤢ᤺ᤸᤗᤧ ᤀᤠᤏᤡ᤹ ᤆᤠᤱᤈᤠᤱᤅᤠᤱ ᤀᤠᤕᤢᤱᤛᤠᤱ ᤀᤠᤀᤡᤶᤔᤠᤱ ᤀᤠᤏᤧᤛᤠᤱ ᤀᤠᤏᤡ᤹ ᤁᤧᤖᤧᤰ ᤂᤢᤏᤧ᤹ᤏᤢᤀᤣ ᤜᤡᤱᤔᤠ ᤀᤠᤛᤢᤰᤗᤖᤥ॥
1TH 5:11 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤜᤠᤱᤜᤠᤱ ᤔᤧᤳᤋᤠᤛᤡ. ᤁᤧᤎᤢᤶᤒᤠ ᤆᤥ᤺ᤰᤁᤠᤛᤡᤖᤥ॥ ᤛᤧᤰᤂᤠ᤺ᤸᤗᤧ ᤒᤠ ᤜᤧᤰᤁᤣᤀᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥
1TH 5:12 ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤕᤠᤶᤒᤢᤎᤡᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤍᤠᤱᤒᤠᤀᤥ ᤂᤡᤏᤡ᤹ ᤏᤡᤛᤠᤶ ᤏᤢ ᤛᤠᤶᤍᤡᤱ ᤁᤧᤒᤡᤒᤠ ᤗᤠᤶᤗᤥ᤺ᤒᤠᤜᤠ᤹ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
1TH 5:13 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤔᤡ᤺ᤶᤈᤡ ᤔᤧᤳᤋᤧᤶᤛᤡᤶᤔᤧ᤹ᤀᤠᤱ ᤛᤠ᤹ᤖᤡᤰᤁᤣ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤛᤏᤠᤖᤢᤱᤏᤢ ᤘᤕᤧᤶᤔᤧ᤹ᤀᤥ॥
1TH 5:14 ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤗᤧᤶᤛᤫᤠᤒᤠᤜᤠ᤹ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤧᤶᤛᤡᤶᤔᤧ᤹. ᤁᤡᤛᤪᤢᤰᤐᤠᤜᤠ᤹ ᤜᤠᤱᤜᤠᤱ ᤔᤧᤳᤋᤧᤶᤛᤡᤶᤔᤧ᤹. ᤁᤢᤓᤠ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠᤜᤠ᤹ ᤁᤢᤓᤠ᤹ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤁᤧᤖᤧᤰᤏᤢ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤀᤥ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥
1TH 5:15 ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤋᤠᤵᤑᤧ᤺ᤶᤒᤠᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤗᤢᤶᤔᤥ ᤜᤧᤰᤁᤩᤠᤱ ᤘᤣ᤹ᤜᤠ᤹ᤏᤢᤀᤠᤱ ᤏᤢ᤺ᤒᤠ ᤔᤧᤳᤇᤡᤱᤔᤠ ᤛᤍᤠᤍᤡᤱ ᤋᤶᤛᤡᤴ ᤆᤥᤃᤧᤶᤔᤧ᤹ᤀᤥ॥
1TH 5:16 ᤛᤍᤠᤍᤡᤱ ᤀᤥᤔᤢ ᤗ᤹ᤖᤧᤶᤔᤧ᤹.
1TH 5:17 ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥᤃᤧᤶᤔᤧ᤹.
1TH 5:18 ᤜᤧᤰᤁᤩᤠᤱ ᤁᤠᤰ ᤘᤠᤏᤠᤶ ᤕᤠᤰᤏᤠᤶᤔᤥ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤧᤶᤔᤧ᤹ ᤁᤧᤗ᤹ᤒᤠ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥
1TH 5:19 ᤛᤣᤛᤣᤔᤠᤱᤅᤡᤴ ᤔᤧᤀᤳᤋᤧᤶᤔᤡᤴᤏᤧ᤹ᤀᤥ॥
1TH 5:20 ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤁᤢᤏᤠᤔᤧᤴᤇᤠ᤹ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
1TH 5:21 ᤁᤠᤰ ᤔᤠᤱᤏᤡᤱᤘᤠ᤹ᤐᤠ᤺ᤴᤜᤠ᤹ ᤛᤠ᤹ᤖᤧᤶᤔᤧ᤹ ᤜᤧᤰᤁᤩᤠᤱ ᤏᤢ᤺ᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤋᤠ᤺ᤰᤋᤧᤶᤔᤧ᤹.
1TH 5:22 ᤁᤖ ᤁᤠᤰ ᤑᤧᤴ ᤐᤠ᤺ᤴᤗᤠᤶ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥
1TH 5:23 ᤀᤠᤸᤗ ᤕᤠᤵᤔᤡ ᤛᤏᤠᤖᤢᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤣᤛᤣ ᤁᤧᤈᤥᤃᤡᤖᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤢ᤺ᤔᤠ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤁᤧᤖᤧᤰ ᤜᤡᤱᤔᤴᤏᤡᤴ–ᤕᤠᤶᤛᤠᤶ. ᤛᤰᤔᤠᤛᤠᤶ. ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ–ᤑᤥᤋᤩᤠ ᤔᤧ᤺ᤴᤏᤣ ᤛᤣᤛᤣ ᤁᤳᤋᤢᤏᤡᤖᤥ॥
1TH 5:24 ᤂᤡᤏᤡ᤹ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰᤐᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤆᤥᤃᤢᤀᤣᤖᤥ॥
1TH 5:25 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤧ ᤗᤠᤃᤡ ᤋᤢᤘᤠ ᤀᤠᤈᤥᤃᤧᤶ ᤀᤠᤒᤡᤖᤧᤶᤔᤧ᤹ᤀᤥ॥
1TH 5:26 ᤜᤧᤰᤁᤩᤠᤱ ᤁᤧᤖᤧᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧ ᤔᤡ᤺ᤶᤈᤡᤏᤢ ᤛᤣᤘᤠ ᤔᤕᤧᤶᤔᤧ᤹ᤀᤥ॥
1TH 5:27 ᤍᤠᤱᤒᤠᤸᤗᤧ ᤁᤢᤕᤢᤰᤗᤠᤶᤒᤠ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤁᤴ ᤛᤰᤀᤡᤱᤄᤱᤅᤡᤴ ᤁᤠᤰ ᤏᤛᤠᤏᤡᤒᤠᤜᤠ᤹ ᤏᤡ᤺ᤵᤔᤠ ᤐᤠᤱᤄᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤏᤡᤱᤗᤥ॥
1TH 5:28 ᤀᤠᤸᤗ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥
2TH 1:1 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤀᤥ ᤌᤡᤛ᤻ᤛᤗᤥᤏᤡᤁᤠᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤁᤢᤕᤠᤵᤔᤡᤜᤠ᤹ᤀᤥ ᤀᤡᤱᤃᤠ᤹ ᤐᤠᤘᤗ. ᤛᤡᤗᤠᤛ ᤏᤢ ᤋᤡᤔᤥᤌᤡᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤒᤠᤖᤥ॥
2TH 1:2 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤂᤡᤏᤡ᤹ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤁᤧᤒᤡᤖᤡᤖ॥
2TH 1:3 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤍᤠᤍᤡᤱ ᤏᤥᤃᤧᤴ ᤐᤡᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤜᤧᤰᤁᤣ ᤆᤥ᤺ᤰᤔᤠᤃ ᤗᤠ᤹ᤖᤢᤀᤣᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤒᤥ᤺ᤖᤡᤖ ᤁᤧᤒᤳᤇᤡᤀᤠᤱ ᤗᤢᤱᤔᤠ᤹ ᤁᤧᤍᤢᤰᤁᤠᤛᤡᤒᤠ ᤐᤠ᤺ᤴᤏᤡᤴ ᤐᤥ᤺ᤖ ᤐᤳᤗᤥ॥
2TH 1:4 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤣ᤹ ᤁᤢᤛᤣᤛᤣᤜᤢᤵᤗᤰᤜᤠ᤹ᤀᤥ ᤀᤠᤏᤡᤃᤧ ᤏᤧᤒᤥ ᤆᤠᤱᤈᤠᤱ ᤔᤧᤳᤋᤢᤶᤒᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤁᤠᤰ ᤁᤧᤛᤠᤰᤐᤠ ᤐᤠ᤺ᤴ ᤏᤢ ᤋᤢᤰᤂᤣᤜᤠ᤹ ᤆᤰᤔᤧᤸᤗ᤹ᤀᤣ ᤁᤧᤎᤖᤢᤶᤔᤠᤱ ᤁᤧᤘᤕᤡ᤹ᤖᤥ॥
2TH 1:5 ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤏᤡᤒᤠ ᤂᤠᤛᤧᤴ ᤆᤥᤃᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤎ᤺ᤖᤢᤶᤗ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤧᤴ ᤛᤢᤶᤒᤥᤎᤠᤛᤠᤒᤠ ᤁᤧᤒᤥ᤺ᤰᤂᤡ᤹ᤖᤥ॥
2TH 1:6 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤏᤡᤒᤠ ᤆᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤂᤢᤏᤧ᤹ ᤂᤢᤶᤍᤡᤱ ᤐᤡᤖᤢᤛᤡ᤹ᤖᤥ॥
2TH 1:7 ᤍᤠᤱᤒᤠ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤏᤢ᤺ᤱ ᤕᤢ᤺ᤸᤗᤧ ᤂᤡᤏᤡ᤹ ᤋᤢᤰᤂᤣᤀᤥᤗᤠᤶ ᤏᤠ᤺ᤶᤛᤡᤱᤔᤠ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤀᤠᤏᤡᤃᤧᤀᤠᤱ ᤏᤠ᤺ᤶᤛᤡᤱᤔᤠ ᤂᤥ᤺ᤛᤢᤶᤒᤧ᤹ᤖᤥ॥ ᤂᤢᤏᤧ᤹ ᤁᤢᤔᤢᤰᤛᤠᤶᤃᤧᤴ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤔᤡᤖᤠ᤺ᤰᤁᤥ ᤕᤢ᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ ᤏᤢ ᤔᤡ᤺ᤶᤈᤡ ᤍᤠᤱᤒᤠ ᤕᤧᤛᤢᤖᤧ ᤁᤢᤛᤢᤏᤠᤀᤡᤱ ᤋᤧᤴᤍᤡᤱ ᤆᤥ᤺ᤰᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖᤥ॥
2TH 1:9 ᤂᤧᤱᤜᤠ᤹ᤖᤧᤃ ᤔᤧᤴᤏᤢᤵᤔᤏᤠᤒᤠ ᤔᤧᤰᤔᤠ ᤂᤢᤶᤍᤡᤱ ᤔᤧᤄᤥ᤺ᤛᤢ᤹. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤍᤃᤡᤗᤠᤶ ᤏᤢ ᤔᤢᤰᤛᤠᤶᤃᤧᤴ ᤁᤢᤔᤡᤔᤡᤍᤡᤱᤗᤠᤶ ᤘᤣ᤹ ᤔᤧᤛᤧᤴᤗᤥ॥
2TH 1:10 ᤂᤢᤏᤧ᤹ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴᤏᤥ ᤀᤠᤒᤠᤅᤣ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤀᤥᤗᤠᤶ ᤔᤡᤔᤡᤍᤡᤱ ᤏᤧᤶᤓᤥ᤺ᤔᤠ ᤋᤠ᤺ᤰᤋᤢᤖᤥ॥ ᤂᤧᤵᤔᤥᤃ ᤂᤡᤏᤡ᤹ᤀᤠᤱ ᤁᤧᤘᤕᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤡᤱᤓᤴ ᤆᤥ᤺ᤰᤁᤠᤛᤡᤃᤧᤒᤠ ᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤁᤧᤈᤥᤃᤢᤶᤗᤥ॥
2TH 1:11 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤀᤢ᤺ᤳᤋᤡᤒᤠ ᤜᤡᤱᤔᤴᤏᤥ ᤛᤢᤶᤒᤥᤎᤠᤛᤠᤒᤠ ᤁᤧᤒᤥ᤺ᤰᤂᤡᤏᤡ. ᤜᤧᤰᤁᤩᤠᤱ ᤂᤡᤏᤡ᤹ ᤏᤥᤏᤡᤱᤘᤠ᤹ᤛᤥ᤺ᤰ. ᤏᤛᤠ᤺ᤴ. ᤏᤢ ᤁᤧᤈᤥᤃᤢᤶᤒᤠ ᤏᤥᤕᤠ᤺ᤶᤒᤰᤜᤠ᤹ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤗᤡᤱᤎᤥ ᤁᤧᤃᤧᤳᤋᤡ ᤁᤧᤒᤡᤖᤡᤏᤡ ᤑᤠ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤆᤰᤔᤧᤸᤗ᤹ᤀᤣ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤠᤛᤡᤃᤧᤖ ᤂᤡᤏᤡ᤹ ᤕᤠ᤺ᤶᤒᤥᤀᤥ ᤋᤢᤘᤠ ᤆᤥᤃᤢᤶᤒᤧ᤹ᤖᤥ॥
2TH 1:12 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤗᤠᤶ ᤍᤠᤱᤒᤠ ᤕᤧᤛᤢᤖᤧ ᤁᤢᤏᤠᤖᤠ ᤁᤧᤓᤥ᤺ᤛᤢᤶᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤂᤡᤏᤡ᤹ᤀᤠᤱ ᤀᤡᤱᤎᤠ᤺ᤱ ᤁᤧᤄᤥ᤺ᤛᤢᤶᤗᤥ॥
2TH 2:1 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢ᤺ᤔᤧᤴ ᤏᤢ ᤂᤢᤏᤧ᤹ᤀᤥ ᤀᤠᤏᤡ᤹ ᤁᤠᤰ ᤏᤛᤠᤏᤡᤒᤠ ᤑᤢᤱᤛᤡᤱᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ. ᤍᤠᤱᤒᤠᤖᤧ ᤁᤢᤕᤢ᤺ᤔᤧᤴ ᤐᤥ᤺ᤰᤂᤧ ᤆᤢᤖᤧ ᤑᤠ᤹ᤀᤠᤱ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤵᤔᤠᤀᤠᤱ ᤗᤢᤱᤔᤠ᤹ ᤛᤥ᤺ᤶᤔᤠ ᤔᤧ᤺ᤴᤗᤥ ᤗ᤹ᤖᤡᤰ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤢᤓᤠᤖᤧᤃ ᤀᤠᤏᤡᤃᤧᤗᤠᤶᤒᤠ ᤁᤧᤍᤠ᤺ᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ. ᤀᤡᤱᤓᤴ. ᤜᤧᤰᤁᤩᤠᤱ ᤛᤠᤵᤋᤢᤶᤒᤧᤒᤠ ᤛᤰᤀᤡᤱᤄᤱᤅᤡᤸᤗᤧ ᤁᤢᤒᤣ᤺ᤴ ᤐᤡᤷᤒᤣ᤺ᤴ ᤔᤧᤀᤡ᤺ᤳᤋᤢ ᤔᤧᤒᤠ᤺ᤳᤋᤢᤖᤥ॥
2TH 2:3 ᤁᤖ ᤀᤰᤂᤣᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤡᤱᤗᤧᤰ ᤁᤧᤔᤧᤶᤔᤧᤳᤋᤡᤴᤗ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤡᤴ ᤔᤧᤴᤍᤠᤀᤣ ᤘᤠ᤹ᤖᤥ॥ ᤂᤧᤴ ᤕᤧᤶᤔᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡᤃ ᤁᤢᤏᤢᤵᤔᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤕᤶ ᤒᤡᤑᤩᤢᤱ ᤐᤥ᤺ᤱ. ᤜᤧᤰᤁᤩᤠᤱ ᤐᤕᤶ ᤗᤠᤕᤥ ᤁᤧᤈᤥ᤺ᤰᤐᤠ ᤐᤠᤰᤁᤢᤶᤓᤡᤀᤥ ᤁᤧᤒᤣ᤺ᤰᤐᤠ ᤔᤏᤠ᤺ᤴ ᤌᤠ᤺ᤶᤛᤡᤱᤗᤥ॥
2TH 2:4 ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤛᤣᤘᤠ ᤔᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤳᤋᤢᤛᤡᤀᤠᤱ ᤁᤠᤰᤏᤢ᤺ᤸᤗᤧ ᤕᤶᤒᤠ ᤗᤧᤱᤛᤡᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ ᤗ᤹ᤖᤡᤰ ᤔᤧᤳᤇᤡᤱᤗ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥ ᤗᤠ᤺ᤳᤋᤠᤱ ᤕᤢᤱᤛᤡᤱᤗᤥ॥
2TH 2:5 ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧᤛᤠ ᤔᤧᤳᤏᤡᤱᤒᤠ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴᤒᤡ᥅
2TH 2:6 ᤐᤕᤶ ᤗᤠᤕᤥ ᤁᤧᤈᤥ᤺ᤰᤐᤧᤴ ᤜᤠᤖᤠ᤹ ᤁᤢᤕᤧᤶ ᤁᤧᤳᤋᤠᤱᤗᤰ ᤌᤠ᤺ᤶᤛᤡᤱᤗ ᤑᤠ᤹ᤀᤠᤱ ᤁᤢᤗᤠᤶ ᤁᤧᤛᤠᤰᤐᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤣᤖᤥ॥
2TH 2:7 ᤋᤃᤡᤏᤢᤀᤣ ᤗᤠᤕᤥ᤺ᤸᤗᤧ ᤛᤡᤃᤠᤱᤃᤧᤴ ᤔᤢᤰᤛᤠᤶᤔᤡᤴ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤗᤠᤶ ᤁᤧᤛᤠᤰᤐᤧᤴ ᤁᤢᤗᤠᤶᤔᤥᤗᤠᤶ ᤔᤧᤱᤄᤧᤳᤋᤣ ᤌᤠᤖᤡᤰ ᤂᤧᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤗᤠ᤺ᤰᤁᤠᤳ ᤔᤧᤎᤠ᤺ᤵᤏᤧᤴᤗᤥ॥
2TH 2:8 ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤗᤠᤕᤥ ᤁᤧᤈᤥ᤺ᤰᤐᤧᤴ ᤌᤠ᤺ᤶᤛᤡᤱᤗᤥ॥ ᤁᤖ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤛᤠ᤺ᤱᤃᤢᤃᤧᤴ ᤛᤰᤔᤠ᤺ᤸᤗᤧ ᤔᤢ᤺ᤳᤋᤢ ᤛᤧᤖᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤢ᤺ᤔᤠᤸᤗᤧ ᤔᤡᤔᤡᤍᤡᤱᤃᤧᤴ ᤁᤢᤀᤥ᤺ᤴᤎᤠᤰᤁᤡᤸᤗᤧ ᤂᤧᤴ ᤔᤧᤶᤓᤤ ᤆᤥᤃᤢᤖᤥ॥
2TH 2:9 ᤐᤕᤶ ᤗᤠᤕᤥ ᤁᤧᤈᤥ᤺ᤰᤐᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤕᤖᤡᤰ ᤐᤖᤡᤰᤗᤧᤴ ᤑᤥᤋᤩᤠᤒᤠ ᤔᤡᤰᤛᤣ᤺ᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢᤖ ᤋᤠ᤺ᤖᤥ॥
2TH 2:10 ᤂᤧᤸᤗᤧ ᤔᤧᤶᤓᤤ ᤁᤧᤒᤥ᤺ᤱᤒᤠᤜᤠ᤹ ᤁᤠᤰ ᤐᤖᤡᤰᤗᤧᤴ ᤑᤧᤴ ᤕᤠ᤺ᤶᤒᤰᤜᤠ᤹ᤖᤧ ᤀᤡᤱᤗᤧᤰ ᤔᤧᤳᤋᤢᤛᤡ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤧᤰᤂᤠ᤺ᤴ ᤔᤡ᤺ᤶᤈᤡ ᤔᤧᤵᤔᤠᤖ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤏᤠ᤹ᤖᤢᤀᤠᤱ ᤔᤧᤘᤠ᤹ᤖᤥ॥
2TH 2:11 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤖᤠ᤹ ᤀᤡᤱᤗᤧᤰᤁᤡᤴ ᤏᤛᤠ᤺ᤴ ᤔᤧᤈᤥᤃᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ᤀᤥ ᤀᤡᤱᤗᤧᤰᤁᤣ ᤔᤢᤰᤛᤠᤶᤔᤡᤴ ᤐᤠᤱᤄᤢᤖᤥ॥
2TH 2:12 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤧᤰᤂᤠ᤺ᤴ ᤏᤛᤠ᤺ᤴ ᤔᤧᤴᤈᤥᤃᤢᤴ. ᤁᤖ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤀᤣ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥
2TH 2:13 ᤍᤠᤱᤒᤠᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧ ᤛᤍᤠᤍᤡᤱ ᤏᤥᤃᤧᤴ ᤐᤡᤔᤠᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤃᤧᤴ ᤛᤢᤳᤌᤥ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤗᤠᤶ ᤏᤢ ᤛᤧᤰᤂᤠᤀᤥ ᤏᤛᤠ᤺ᤴ ᤆᤥ᤺ᤰᤔᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤋᤠᤱᤛᤧ᤺ᤵᤛᤡᤱᤔᤠ ᤑᤠ᤹ᤀᤠᤱ ᤁᤧᤛᤣᤃᤡᤖᤥ॥
2TH 2:14 ᤒᤠ ᤁᤴ ᤐᤠ᤺ᤴᤏᤡᤸᤗᤧ ᤗᤠᤃᤡ ᤀᤠᤏᤡᤃᤧ ᤀᤡᤱᤓᤥ᤺ᤛᤢᤶᤒᤧᤒᤠ ᤛᤢᤏᤠᤀᤡᤱᤗᤠᤶ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱᤅᤡᤴ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤁᤧᤀᤢ᤺ᤳᤋᤡᤒᤠᤖᤥ॥
2TH 2:15 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤴ ᤏᤢ ᤛᤰᤀᤡᤱᤄᤱᤗᤠᤶᤒᤠ ᤁᤧᤄᤥ᤺ᤛᤢᤶᤒᤠ ᤏᤡᤛᤠᤶᤔᤡᤴ ᤋᤰᤋᤧᤶᤔᤧ᤹ᤀᤥ॥
2TH 2:16 ᤀᤠᤸᤗ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋ ᤏᤢ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤁᤢᤗᤢᤱᤃᤢᤶᤒᤠ ᤔᤧᤴᤏᤢᤵᤔᤏᤠᤒᤠ ᤜᤠᤱᤜᤠᤱ ᤏᤢ ᤐᤏᤢᤏᤢ᤺ᤒᤠ ᤏᤡᤱᤛᤠᤱᤅᤡᤴ ᤀᤠᤒᤡᤖᤧᤖᤥ॥
2TH 2:17 ᤂᤢᤏᤧ᤹ᤀᤣ ᤂᤡᤏᤡ᤹ ᤜᤠᤱᤜᤠᤱ ᤁᤧᤔᤧᤳᤋᤡᤖ ᤜᤧᤰᤁᤩᤠᤱ ᤁᤠᤰ ᤁᤧᤈᤥᤃᤢᤶᤒᤠ ᤏᤢ᤺ᤒᤠ ᤕᤠ᤺ᤶᤒᤰᤁᤥ ᤏᤢ ᤁᤧᤒᤠ᤺ᤳᤋᤢᤶᤒᤠ ᤐᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡᤖᤖᤥ॥
2TH 3:1 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤢᤏᤢᤵᤔᤥ ᤀᤠᤏᤡᤃᤧ ᤕᤠ᤺ᤶᤒᤣᤀᤥ ᤋᤢᤘᤠ ᤆᤥᤃᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤠᤛᤡᤃᤧ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤁᤢᤛᤢᤏᤠᤀᤡᤱᤅᤡᤴ ᤁᤠᤰ ᤐᤡᤛᤠᤱ ᤜᤠᤖᤠ ᤛᤧ᤺ᤖ ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤖᤢᤶᤒᤠ ᤜᤧᤰᤁᤣᤀᤣ ᤘᤣ᤹ᤜᤠ᤹ᤖᤧᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤖᤖᤥ॥
2TH 3:2 ᤀᤠᤏᤡᤃᤧ ᤋᤠᤵᤑᤧ᤺ᤶᤒᤠ ᤏᤢ ᤁᤢ᤹ᤀᤡ ᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤵᤔᤡ ᤋᤠᤱᤛᤧ᤺ᤵᤋᤡᤃᤧᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶ ᤀᤠᤒᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤃ ᤛᤢᤏᤠᤀᤡᤱᤅᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥
2TH 3:3 ᤁᤖ ᤍᤠᤱᤒᤠᤱᤃ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ॥ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤢ᤹ᤀᤡᤃᤧᤓᤧ᤹ᤒᤠ ᤔᤠᤑᤧᤴᤛᤠᤶᤔᤥᤗᤠᤶ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤁᤧᤎᤢᤶᤒᤠ ᤁᤧᤈᤥᤃᤡ᤹ᤖᤥ॥
2TH 3:4 ᤜᤧᤰᤁᤩᤠᤱ ᤀᤠᤏᤡᤃᤧ ᤜᤢ᤹ᤀᤠᤛᤡᤃᤧᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤁᤧᤍᤠ᤺ᤒᤠ ᤕᤧᤶᤔᤥᤀᤠᤱ ᤁᤧᤈᤥᤃᤢᤶ ᤁᤧᤗ᤹ᤒᤠ ᤍᤠᤱᤒᤠᤀᤥ ᤋᤠ᤺ᤰᤐᤥ ᤆᤥ᤺ᤰᤁᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥
2TH 3:5 ᤜᤠᤖᤠ᤹ ᤍᤠᤱᤒᤠᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡ ᤏᤢ ᤂᤪᤡᤛ᤻ᤋᤖᤧ ᤁᤧᤒᤡᤖᤡᤒᤠ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤥ ᤗᤠᤶᤃᤧᤗᤥ᤺ᤛᤡᤖᤖᤥ॥
2TH 3:6 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤀᤠᤏᤡᤃᤧ ᤂᤡᤏᤡ᤹ ᤀᤡᤱᤈᤠ᤺ᤱ ᤐᤡᤀᤠᤛᤡᤃᤧ᤹ᤖᤥ॥ ᤀᤠᤳᤋᤡᤴ ᤗᤧᤶᤛᤫᤠᤒᤠ ᤆᤥ᤺ᤰᤁᤠᤱ ᤀᤠᤏᤡᤃᤧ ᤀᤥ᤺ᤴᤎᤠᤰ ᤐᤡᤖᤢᤶᤒᤧᤒᤠ ᤐᤠ᤺ᤴᤏᤥ ᤔᤧᤒᤳᤏᤧᤴ. ᤂᤧᤴᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥
2TH 3:7 ᤀᤠᤏᤡᤃᤧ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧ ᤀᤠᤰᤂᤣᤗ᤹ᤖᤡᤰ ᤀᤠᤏᤡᤃᤧ ᤆᤥ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥ᤺ᤱ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤁᤧᤏᤡ᤺ᤛᤢᤶᤗᤥ॥ ᤀᤠᤏᤡᤃᤧᤃ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧ ᤗᤧᤶᤛᤫᤠᤒᤠ ᤔᤧᤈᤥᤃᤡᤃᤧᤴ.
2TH 3:8 ᤜᤧᤰᤁᤩᤠᤱ ᤀᤠᤏᤡᤃᤧ ᤔᤏᤠᤜᤠ᤹ᤖᤧ ᤔᤧᤒᤡᤖᤡᤃᤧᤒᤠ ᤆᤠᤔᤠ ᤌᤢᤱᤔᤠᤴ ᤁᤢᤔᤧᤸᤗᤢᤱ ᤔᤧᤴᤜᤢᤱᤅᤣ ᤜᤏᤧ ᤔᤧᤈᤠᤶᤒᤧᤴ ᤔᤧᤎᤢᤅᤢᤶᤒᤧᤴᤗᤥ॥ ᤁᤖ ᤂᤡᤏᤡ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤛᤡᤃᤧᤴᤗ ᤑᤠ᤹ᤀᤠᤱ ᤀᤠᤏᤡᤃᤧ ᤛᤧᤴᤍᤡᤰ ᤗᤧᤴᤍᤡᤰ ᤕᤠᤶᤒᤢᤎᤡᤰᤐᤠ ᤐᤥ᤺ᤰᤂᤡᤃᤧᤀᤠᤱ ᤕᤠ᤺ᤶᤒᤰ ᤆᤥᤃᤢᤶᤒᤧᤖᤥ॥
2TH 3:9 ᤀᤠᤏᤡᤃᤧ ᤜᤧᤰᤁᤣᤗ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤶᤒᤧᤒᤠᤱᤃ ᤁᤢᤓᤠ᤹ ᤂᤥ᤺ᤔᤠ ᤗᤠᤄᤥ ᤔᤧᤃᤳᤋᤢᤶᤒᤧᤴᤏᤠᤱ ᤔᤧ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤁᤢᤒᤡ ᤐᤥ᤺ᤱᤅᤠᤱ ᤂᤡᤏᤡ᤹ ᤕᤠᤵᤔᤡ ᤆᤥ᤺ᤱ ᤁᤧᤀᤡ᤺ᤳᤋᤡᤖ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤶᤒᤧᤒᤠᤖᤥ॥
2TH 3:10 ᤂᤡᤏᤡ᤹ᤏᤢ ᤘᤕᤡᤃᤧᤸᤛᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤍᤧᤶᤔᤏᤠᤒᤠᤸᤗᤧ ᤜᤠᤖᤠ᤹ ᤆᤠᤀᤠᤱ ᤔᤧᤈᤏᤧᤴᤗ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤀᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥
2TH 3:11 ᤌᤣᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤋᤠᤛᤡᤃᤧᤒᤠ ᤑᤠ᤹ᤗᤧ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤏᤠᤒᤠ ᤁᤢᤓᤠ ᤗᤧᤶᤛᤫᤠᤒᤠ ᤔᤏᤠᤜᤠ᤹ ᤔᤧᤘᤠ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤥ ᤏᤢ ᤐᤠ᤺ᤴᤏᤥᤖᤰ ᤜᤢᤰᤔᤧᤃᤣ᤺ᤳᤋᤢ ᤁᤧᤗ᤹ᤒᤠᤴ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥
2TH 3:12 ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤡᤱᤅᤥ ᤀᤡᤱᤈᤠ᤺ᤱᤃᤧᤴ ᤛᤠᤶᤍᤡᤱ ᤂᤧᤱᤜᤠ᤹ ᤐᤡᤖᤢᤶᤛᤡᤶᤒᤧ᤹–ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤔᤧᤴᤜᤶᤛᤡᤱᤅᤣ ᤀᤠᤒᤠᤅᤣ ᤕᤠ᤺ᤶᤒᤰ ᤔᤧᤈᤥ᤺ᤰᤁᤠᤱ ᤔᤧᤈᤖ॥
2TH 3:13 ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤛᤠᤶᤔᤥ ᤂᤡᤏᤡ᤹ ᤁᤧᤘᤕᤡᤛᤠᤱ ᤛᤢᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤵᤑᤠᤸᤗᤧᤀᤠᤱ ᤔᤧᤏᤠᤛᤧᤶᤔᤡᤴᤏᤧ᤹ᤀᤥ॥
2TH 3:14 ᤀᤠᤏᤡᤃᤧ ᤁᤴ ᤛᤰᤀᤡᤱᤄᤱ ᤛᤠᤵᤋᤢᤶᤒᤧᤒᤠ ᤐᤠ᤺ᤴ ᤔᤧᤱᤄᤧᤶᤔᤏᤠ ᤔᤏᤠ᤺ᤴ ᤂᤡᤏᤡ᤹ ᤗᤢᤶᤔᤥ ᤘᤠ᤹ᤏᤧ ᤑᤠ᤹ᤃᤪ ᤂᤧᤴ ᤏᤢ᤺ᤖᤡᤰᤁᤠᤱ ᤔᤡᤰᤆᤥ ᤔᤧᤳᤋᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤴ ᤛᤡᤖᤡᤱ ᤔ᤺ᤖ ᤑᤠ᤹ᤀᤠᤱ ᤂᤧᤴᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥
2TH 3:15 ᤜᤧᤰᤁᤣᤛᤠᤱ ᤂᤧᤴ ᤏᤡᤱᤔᤡ ᤜᤧᤰᤁᤣᤃ ᤔᤧ᤺ᤴ. ᤁᤖ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ ᤁᤢᤀᤡᤛᤡ᤺ᤰ ᤀᤡ᤺ᤳᤋᤧᤶᤔᤧ᤹ᤖ ᤛᤠᤶᤍᤡᤱ ᤐᤡᤖᤧᤶᤔᤧ᤹ᤀᤥ॥
2TH 3:16 ᤀᤠᤸᤗ ᤛᤏᤠᤖᤢᤱ ᤍᤠᤱᤒᤠᤸᤗᤧ ᤁᤠᤰ ᤐᤖᤡᤰᤗᤠᤶ ᤆᤰᤔᤧᤸᤗ᤹ᤀᤣ ᤛᤏᤠᤖᤢᤱ ᤁᤧᤒᤡᤖᤡᤖ॥ ᤍᤠᤱᤒᤠᤱᤃ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥
2TH 3:17 ᤀᤡᤱᤃᤠ᤹ ᤐᤠᤘᤗᤖᤧ ᤁᤴ ᤛᤣᤘᤠ᤺ᤴ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤛᤠᤵᤋᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤡᤱᤃᤠ᤹ ᤀᤠᤛᤰᤀᤡᤱᤄᤱᤅᤡᤸᤗᤧᤴ ᤔᤡᤰᤛᤣ᤺ᤴᤏᤡᤴ ᤒᤠ ᤁᤴᤗᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤛᤠᤵᤋᤢᤱᤗ ᤐᤳᤋᤠᤖᤥ॥
2TH 3:18 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤥ॥
1TI 1:1 ᤏᤛᤠ᤺ᤴᤏᤥ ᤛᤧᤰᤂᤠᤀᤣ ᤀᤠᤔᤡ᤺ᤶ ᤀᤠᤛ᤻ᤛᤠ᤺ ᤋᤡᤔᤥᤌᤡᤀᤣ. ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤠᤏᤡ᤹ ᤏᤡᤱᤛᤠᤱ ᤀᤠᤈᤥᤃᤢᤶᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤀᤡᤱᤈᤠ᤺ᤱᤗᤠᤶ ᤀᤡᤱᤃᤠ᤹ ᤁᤢᤛᤣ᤺ᤰᤕᤢᤰᤔᤡᤒᤠ ᤐᤠᤘᤗᤗᤠᤶᤒᤠ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤂᤧᤏᤧ᤹ᤃ ᤗᤢᤱᤃᤢᤶ. ᤗᤢᤱᤔᤠ᤹ ᤋᤢᤰᤔᤠ ᤏᤢ ᤛᤏᤠᤖᤢᤱ ᤀᤥᤛᤣ᤺ᤴᤃᤧᤎᤠᤰᤗ ᤑᤠ᤹ᤀᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤧ᤹ᤖᤥ॥
1TI 1:3 ᤀᤡᤱᤃᤠ᤹ ᤔᤧᤛᤣᤍᤥᤏᤡᤕᤠ ᤌᤢᤶᤔᤥ ᤐᤣᤃᤠᤱᤅᤡᤸᤗᤧ ᤂᤧᤏᤧ᤹ ᤐᤣᤗᤡ ᤑᤠᤰᤏᤧᤒᤠ ᤁᤢᤀᤡᤛᤡ᤺ᤰ ᤂᤧᤏᤧ᤹ ᤀᤣᤑᤡᤛᤛᤀᤥ ᤀᤣ ᤕᤠ᤺ᤰᤋᤧ᤹ᤀᤥ॥ ᤂᤧᤵᤔᤥ ᤁᤢᤓᤠ ᤔᤏᤠᤜᤠ᤹ᤖᤧ ᤀᤡᤱᤗᤧᤰᤐᤠ ᤏᤡᤛᤠᤶ ᤔᤧᤜᤢ᤹ᤖᤢᤛᤡᤖ ᤔᤧᤕᤠᤰ॥ ᤂᤧᤱᤜᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤒᤠᤱᤄᤧᤛᤧᤴᤏᤧ᤹ᤀᤥ॥
1TI 1:4 ᤂᤧᤱᤜᤠ᤹ ᤀᤢᤏᤠᤜᤢᤖᤡᤒᤠ ᤂᤧᤍᤠ᤹ ᤏᤢ ᤁᤣ᤺ᤶ ᤁᤣ᤺ᤶᤒᤠ ᤔᤡᤱᤛᤪᤠᤜᤠ᤹ ᤗᤧᤵᤔᤠᤍᤣ᤺ᤔᤠ ᤔᤧᤳᤋᤧᤛᤧ᤹ᤀᤥ॥ ᤂᤧᤸᤗᤧᤃ ᤐᤠ᤺ᤴᤎᤱᤃᤧᤴ ᤂᤧᤔᤠ᤹ᤖᤰ ᤑᤥ᤺ᤰᤂᤢ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠ ᤁᤢᤕᤠ᤺ᤶᤒᤰᤁᤥ ᤌᤣᤀᤠᤱ ᤔᤧᤈᤰᤋᤢᤴᤗᤥ॥ ᤂᤧᤱᤃ ᤏᤛᤠ᤺ᤴᤗᤠᤶᤒᤠᤖᤰ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥
1TI 1:5 ᤁᤴ ᤀᤡᤱᤈᤠ᤺ᤱᤅᤡᤸᤗᤧᤴ ᤏᤡᤱᤘᤠ᤹ᤛᤥ᤺ᤰᤁᤡᤱᤃ ᤛᤣᤛᤣ ᤏᤡᤱᤘᤠ᤹. ᤏᤢ᤺ᤒᤠ ᤂᤠᤛᤡᤱ ᤏᤢ ᤛᤧᤰᤂᤠᤒᤠ ᤏᤛᤠ᤺ᤴᤗᤠᤶ ᤁᤧᤗ᤺ᤶᤒᤠ ᤔᤡ᤺ᤶᤈᤡᤖᤥ॥
1TI 1:6 ᤂᤧᤴ ᤐᤠ᤺ᤴᤜᤠ᤹ᤀᤥᤗᤠᤶ ᤁᤢᤓᤠ ᤔᤏᤠᤜᤠ᤹ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤜᤏᤧᤒᤠ ᤐᤠ᤺ᤴᤎᤱᤅᤥ ᤗᤠᤶ ᤔᤧᤒᤥ᤺ᤳᤋᤧᤀᤠᤱ ᤔᤧᤘᤠ᤹ᤖᤥ॥
1TI 1:7 ᤂᤧᤱᤜᤠ᤹ᤖᤧᤃ ᤛᤠᤶᤕᤥᤌᤡᤶ ᤁᤧᤜᤢ᤹ᤒᤠ ᤐᤥ᤺ᤱᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱ. ᤁᤖ ᤂᤧᤱᤜᤠ᤹ᤖᤧ ᤏᤡᤛ᤻ᤛᤣᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤛᤢᤳᤗᤠᤜᤠ᤹ ᤀᤠᤒᤠᤅᤣ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥
1TI 1:8 ᤛᤠᤶᤕᤥᤌᤡᤶᤔᤡᤴ ᤏᤢ᤺ᤖᤡᤰᤁᤠᤱ ᤀᤥᤃᤵ ᤆᤥ᤺ᤰᤔᤠᤸᤗᤧ ᤏᤢ᤺ᤒᤠᤀᤣ ᤐᤥ᤺ᤱ ᤑᤠ᤹ᤀᤠᤱ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1TI 1:9 ᤛᤧᤰᤂᤠᤀᤣ ᤀᤠᤏᤡ᤹ ᤁᤴ ᤐᤠ᤺ᤴᤏᤡᤱᤃ ᤁᤢᤛᤡᤱ ᤏᤡ᤺ᤵᤔᤠᤀᤣ ᤐᤥ᤺ᤱᤗᤥ–ᤛᤠᤶᤕᤥᤌᤡᤶᤔᤡᤱᤃ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤛᤠᤶᤕᤥᤌᤡᤶ ᤁᤧᤓᤣ᤺ᤶᤒᤠᤜᤠ᤹ ᤏᤢ ᤀᤡᤱᤈᤠ᤺ᤱ ᤔᤧᤱᤄᤧᤶᤔᤏᤠᤒᤠᤜᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹. ᤗᤠᤕᤥᤒᤠᤜᤠ᤹. ᤀᤠᤛᤢᤳᤌᤥᤜᤠ᤹. ᤛᤠᤶᤕᤥ ᤔᤧᤴᤀᤡ᤺ᤵᤔᤏᤠᤒᤠᤜᤠ᤹. ᤐᤠ-ᤔᤠ ᤁᤧᤛᤧᤵᤐᤠᤜᤠ᤹. ᤔᤏᤠ ᤁᤧᤛᤧᤵᤐᤠᤜᤠ᤹.
1TI 1:10 ᤆᤠᤃᤧᤖᤠᤶᤒᤠᤜᤠ᤹. ᤕᤧᤶᤒᤡᤳᤇᤠ᤹ᤏᤢ ᤕᤧᤶᤒᤡᤳᤇᤠ᤹ᤀᤣ ᤕᤠᤶᤃᤧᤒᤥ᤺ᤵᤐᤠᤜᤠ᤹. ᤕᤥ᤺ᤰᤐᤠ ᤁᤧᤀᤡᤱᤒᤠ ᤁᤧᤛᤱᤒᤠᤜᤠ᤹. ᤜᤧᤰᤁᤩᤠᤱ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹. ᤀᤡᤱᤗᤧᤰ ᤋᤥ᤺ᤴᤍᤡ ᤁᤧᤒᤡᤒᤠᤜᤠ᤹. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤏᤡᤛᤠᤶᤒᤢᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤛᤠᤶᤕᤥᤌᤡᤶᤔᤡᤴ ᤆᤥᤃᤧᤒᤠᤖᤥ॥
1TI 1:11 ᤁᤴ ᤏᤡᤛᤠᤶᤜᤠ᤹ᤃ ᤔᤢ᤹ᤀᤡᤛᤠᤶ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤛᤢᤏᤠᤀᤡᤱᤅᤥ ᤂᤥ᤺ᤍᤧᤳᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤢᤏᤠᤀᤡᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤀᤡᤱᤓᤥ᤺ᤔᤠ ᤗᤰᤐᤧᤴ ᤐᤡᤖᤠᤱᤅᤠᤱ ᤘᤠ᤹ᤀᤠᤖᤥ॥
1TI 1:12 ᤀᤡᤱᤃᤠ᤹ ᤁᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤌᤢᤶ ᤕᤠᤵᤔᤡ ᤁᤧᤒᤡᤒᤠ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢ᤺ᤸᤗᤧ ᤏᤛᤠ᤺ᤴᤛᤠᤒᤠ ᤀᤡ᤺ᤳᤋᤠᤱᤅᤠᤱ ᤁᤢᤔᤠᤱᤛᤣᤘᤠ ᤆᤥ᤺ᤰᤛᤧ ᤛᤣᤃᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤕᤠᤶᤔᤥ ᤏᤥᤃᤧᤴ ᤐᤡᤖᤢᤱᤗᤥ॥
1TI 1:13 ᤀᤡᤱᤃᤠ᤹ ᤐᤣᤕᤧᤶᤔᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤐᤠᤖᤠᤱ. ᤁᤢᤔᤏᤠᤜᤠ᤹ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱ ᤜᤧᤰᤁᤩᤠᤱ ᤁᤢᤈᤠ᤺ᤳᤌᤡ ᤋᤣ᤺ᤛᤢᤱ॥ ᤜᤧᤰᤁᤣᤛᤠᤱ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤠᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤢᤏᤧ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤘᤕᤠᤱᤒᤠᤸᤗᤧ ᤆᤥᤃᤢᤸᤗᤧ ᤌᤣ ᤆᤥᤃᤢᤱᤗ ᤐᤳᤇᤠᤱ ᤌᤣᤀᤠᤱ ᤔᤧᤴᤏᤡ᤺ᤒᤠᤴᤗᤥ॥
1TI 1:14 ᤀᤠᤏᤡ᤹ ᤕᤜᤘᤣ ᤍᤠᤱᤒᤠᤸᤗᤧᤃ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤗᤥ. ᤜᤧᤰᤁᤩᤠᤱ ᤂᤪᤡᤛ᤻ᤋ ᤕᤧᤛᤢᤀᤥ ᤂᤥᤃᤧᤍᤧᤵᤐᤠ ᤏᤛᤠ᤺ᤴ ᤏᤢ ᤔᤡ᤺ᤶᤈᤡᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤐᤡᤖᤠᤱᤗᤥ॥
1TI 1:15 ᤂᤪᤡᤛ᤻ᤋ ᤕᤧᤛᤢ᤺ᤴ ᤗᤠᤕᤥᤒᤠᤜᤠ᤹ ᤋᤠᤱᤛᤧ᤺ᤵᤛᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤩᤧ ᤁᤧᤗ᤹ᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤛᤠᤱ ᤋᤧᤴᤍᤡᤱ ᤏᤢ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤋᤧᤳᤗᤥ॥ ᤂᤧᤴ ᤗᤠᤕᤥᤒᤠᤜᤠ᤹ᤀᤥ ᤀᤡᤱᤃᤠ᤹ ᤛᤠ᤹ᤖᤡᤰ ᤗᤠᤕᤥᤒᤠ ᤆᤥᤃᤠᤱᤗᤥ.
1TI 1:16 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤄᤥ᤺ᤒᤠᤜᤠ᤹ᤖᤧ ᤗᤠᤃᤡ ᤁᤢᤒᤡ ᤐᤥ᤺ᤱᤅᤠᤏᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤠᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤗᤠᤕᤥᤒᤠ ᤔᤏᤠ᤺ᤴ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤗᤥ॥
1TI 1:17 ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤠᤱᤅᤡᤴ. ᤀᤠᤈᤢᤏᤡ ᤏᤢ ᤀᤠᤗᤧᤰᤂᤠ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤔᤡᤔᤡᤍᤡᤱ ᤛᤍᤠᤍᤡᤱ ᤐᤥ᤺ᤱᤗᤖᤥ॥ ᤀᤠᤔᤧᤴ॥
1TI 1:18 ᤀᤠᤛ᤻ᤛᤠ᤺ ᤋᤡᤔᤥᤌᤡᤀᤣ. ᤁᤴ ᤀᤡᤱᤈᤠ᤺ᤱᤅᤡᤴ ᤋᤃᤡᤏᤢᤛᤠ ᤁᤧᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤥ᤺ᤰᤂᤧᤒᤠ ᤁᤢᤀᤡᤛᤡ᤺ᤰ ᤁᤴ ᤗᤰᤐᤧᤴᤏᤡᤴ ᤂᤧᤏᤧ᤹ ᤐᤡᤏᤧᤖᤥ॥ ᤂᤧᤱᤜᤠ᤹ ᤂᤧᤏᤧ᤹ ᤁᤧᤀᤡ᤺ᤳᤋᤢᤖ ᤁᤧᤏᤠ᤺ᤳᤋᤢᤸᤗᤧ ᤏᤢ᤺ᤖᤡᤰᤁᤠᤱ ᤌᤱ ᤆᤥ᤺ᤰᤔᤠ ᤜᤧᤰᤁᤩᤠᤱ ᤏᤥ-ᤏᤛᤠ᤺ᤴ ᤏᤢ ᤛᤣᤛᤣ ᤂᤠᤛᤡᤱᤅᤡᤴ ᤁᤵᤔᤠ ᤁᤧᤛᤢᤰᤋᤢ᤹ᤖᤥ॥ ᤁᤢᤓᤠ ᤔᤏᤠᤜᤠ᤹ᤖᤧ ᤁᤴ ᤔᤧᤏᤠ᤹ᤖᤢᤀᤠᤱ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤔᤧᤏᤢᤵᤛᤢᤀᤠᤱ ᤔᤧᤘᤠ᤹ᤖᤥ॥
1TI 1:20 ᤂᤧᤱᤜᤠ᤹ᤃ ᤜᤠᤀᤡᤔᤣᤏᤡᤕᤛ ᤏᤢ ᤀᤗᤧᤰᤈᤧᤴᤍᤖᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤗᤧᤵᤔᤠ ᤐᤥ᤺ᤱ ᤁᤧᤗ᤹ᤒᤠ ᤜᤢ᤹ᤏᤧᤳᤇᤡᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤀᤡᤱᤃᤠ᤹ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶᤔᤥ ᤗᤧᤖᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥
1TI 2:1 ᤜᤧᤰᤁᤣ᤺ᤸᤗᤧ. ᤁᤠᤰᤏᤢ᤺ᤸᤗᤧ ᤋᤃᤡ. ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤜᤧᤰᤁᤩᤠᤱ ᤜᤠᤱᤜᤠ᤹ ᤏᤢ ᤘᤣ᤹ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤐᤣᤗᤡ. ᤋᤢᤘᤠᤜᤠ᤹. ᤕᤧᤰᤐᤣᤗᤡᤃᤧᤴ ᤋᤢᤘᤠᤜᤠ᤹ ᤏᤢ ᤜᤧᤏᤠ ᤏᤥᤃᤧᤴᤜᤠ᤹ ᤋᤥ᤺ᤶᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤐᤣᤗᤡ ᤑᤠᤰᤏᤡᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤛᤏᤠᤖᤢᤱᤅᤥ ᤏᤢ ᤕᤧᤶᤕᤧᤶᤘᤠ ᤜᤡᤱᤔᤴᤏᤥ. ᤜᤧᤰᤁᤩᤠᤱ ᤛᤠᤶᤏᤡᤔᤥ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱᤅᤥ ᤜᤡᤱᤔᤠ ᤀᤠᤛᤢᤰᤗᤖᤥ॥
1TI 2:3 ᤁᤱᤃ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤏᤢ ᤏᤢ᤺ᤒᤠ ᤆᤥ᤺ᤰᤗᤥ॥
1TI 2:4 ᤂᤢᤏᤧ᤹ᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤛᤧᤰᤂᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤋᤠᤱᤔᤧᤛᤧ᤺ᤵᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥
1TI 2:5 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤌᤡᤰᤗᤰ ᤘᤠ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤴᤇᤠᤶ ᤕᤠᤵᤔᤡ ᤗᤢᤶᤔᤥ ᤐᤠ᤺ᤴᤍᤱᤛᤠᤒᤠᤴᤏᤠᤱ ᤌᤡᤰᤗᤰ ᤘᤠ᤹ᤖᤥ॥ ᤂᤧᤴ ᤐᤠ᤺ᤴᤍᤱ ᤁᤧᤈᤥ᤺ᤰᤐᤠ ᤔᤏᤠ᤺ᤱᤃ ᤂᤪᤡᤛ᤻ᤋ ᤕᤧᤛᤢᤖᤥ॥
1TI 2:6 ᤂᤢᤏᤧ᤹ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤠᤕᤥᤗᤠᤶ ᤌᤧ᤹ᤔᤠ­ᤛᤡᤀᤠᤱ ᤜᤡᤱᤔᤠᤛᤡ ᤑᤠ᤹ᤀᤠᤱ ᤁᤢᤔᤧᤸᤗᤢᤱᤅᤡᤸᤗᤧ ᤁᤢᤗᤧᤰᤘᤠ ᤀᤠᤵᤑᤣ᤺ᤰ ᤐᤡᤛᤡᤱᤗᤥ॥ ᤁᤴ ᤐᤠ᤺ᤴᤏᤡᤸᤗᤧ ᤋᤥ᤺ᤴᤍᤡ᤺ᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤢᤕᤧᤶᤔᤥ ᤐᤡᤖᤢᤀᤠᤱ ᤘᤠ᤹॥
1TI 2:7 ᤂᤧᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴ ᤏᤢ ᤛᤧᤰᤂᤠᤒᤠ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤛᤣ᤺ᤰᤕᤢᤰᤔᤡᤒᤠ ᤏᤢ ᤛᤡᤰᤛᤠᤶᤒᤠ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤛᤣ᤺ᤰᤕᤢᤰ ᤆᤥᤃᤠᤱᤗᤥ॥ ᤀᤡᤱᤃᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤋᤠᤴᤗᤥ. ᤛᤧᤰᤂᤠᤒᤠ ᤐᤠ᤺ᤴᤏᤣ ᤐᤠ᤺ᤳᤋᤢᤱᤗᤥ॥
1TI 2:8 ᤀᤡᤱᤃᤠ᤹ ᤁᤠᤰ ᤕᤧᤶᤒᤡᤳᤇᤠ᤹ᤛᤠ᤺ᤜᤠ᤹ᤖᤧ ᤀᤠᤳᤋᤠᤴᤇᤠᤱ ᤕᤠ᤺ᤰᤔᤧᤸᤗᤧ᤹ᤀᤣ. ᤔᤧᤱᤄᤣᤀᤣ ᤔᤧᤴᤎᤰᤁᤣ ᤜᤧᤰᤁᤩᤠᤱ ᤛᤣᤛᤣᤒᤠ ᤜᤢᤰᤜᤠ᤹ ᤔᤧᤓᤥ᤺ᤰᤂᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤋᤢᤘᤠ ᤔᤧᤈᤥᤃᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱᤗᤥ॥
1TI 2:9 ᤜᤧᤰᤁᤩᤠᤱ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤛᤡᤱᤛᤡᤱᤅᤠᤱ ᤏᤢ᤺ᤖᤡᤰᤁᤠᤱ ᤆᤠᤱᤜᤠ᤹ ᤔᤧᤈᤠᤰᤂᤢᤖᤖᤥ॥ ᤜᤧᤰᤁᤩᤠᤱ ᤀᤥᤗᤡᤀᤥᤗᤡᤒᤠ ᤌᤠ᤺ᤰ ᤑ᤺ᤔᤠ. ᤛᤠᤶᤔᤩᤠᤱ ᤏᤢ ᤘᤣ᤹ ᤀᤡᤔᤧᤸᤗᤢᤱᤒᤠ ᤘᤠ᤺ᤳᤋᤡ. ᤜᤧᤰᤁᤩᤠᤱ ᤀᤡᤔᤧᤸᤗᤢᤱᤒᤠ ᤆᤠᤱᤜᤠ᤹ᤖᤧ ᤔᤧᤴᤈᤥ᤺ᤰᤛᤡᤱᤅᤡᤸᤗ.
1TI 2:10 ᤂᤧᤴᤏᤢ᤺ᤸᤗᤧᤃ ᤂᤧᤱᤜᤠ᤹ ᤂᤧᤶᤍᤢ ᤗᤠ᤹ᤖᤢᤛᤡᤒᤠ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤏᤡᤖᤥ॥ ᤂᤧᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤱ ᤁᤧᤗ᤹ᤔᤠ ᤔᤧᤴᤇᤢᤔᤠᤜᤠ᤹ ᤂᤧᤶᤍᤢ ᤗᤠ᤹ᤖᤢᤛᤡᤖᤥ॥
1TI 2:11 ᤔᤧᤴᤇᤢᤔᤠᤜᤠ᤹ ᤛᤫᤠ᤺ᤳᤋᤠᤱ ᤕᤢᤰᤁᤥ ᤘᤠ᤹ᤔᤠᤀᤠᤱ ᤜᤢ᤹ᤛᤡᤱᤔᤠ ᤐᤥ᤺ᤱᤗᤥ॥
1TI 2:12 ᤀᤡᤱᤃᤠ᤹ᤃ ᤔᤧᤴᤇᤢᤔᤠᤜᤠ᤹ᤖᤧ ᤕᤧᤶᤒᤡᤳᤇᤠ᤹ᤜᤠ᤹ ᤜᤢ᤹ᤔᤠᤛᤡ ᤏᤢ ᤕᤢᤰᤁᤥ ᤁᤵᤔᤠᤛᤡ ᤕᤢᤰ ᤔᤧᤒᤡᤖᤢᤱᤛᤡᤱᤅᤡᤴᤗᤥ॥ ᤁᤖ ᤔᤧᤴᤇᤢᤔᤠᤜᤠ᤹ᤃ ᤛᤫᤠ᤺ᤳ ᤔᤧᤘᤠ᤹ᤖᤖᤥ॥
1TI 2:13 ᤌᤣᤀᤠᤱᤓᤧᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤸᤗᤧ ᤀᤠᤍᤶᤔᤡᤴ ᤋᤃᤡ ᤜᤧᤰᤁᤩᤠᤱ ᤜᤘᤠ᤺ᤱᤃ ᤕᤠᤱᤛᤡ ᤐᤥ᤺ᤰᤂᤧᤒᤠᤖᤥ॥
1TI 2:14 ᤜᤧᤰᤁᤩᤠᤱ ᤀᤠᤍᤶᤔᤡᤴ ᤀᤡᤱᤗᤧᤰᤁᤥ ᤌᤩᤧᤒᤠ ᤔᤧ᤺ᤴ. ᤁᤖ ᤔᤧᤴᤇᤢᤔᤠ᤹ᤀᤡᤴ ᤔᤠᤑᤧᤴᤛᤠᤶᤔᤡᤸᤗᤧ ᤀᤡᤱᤗᤧᤰᤋᤢᤀᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤑᤣ᤺ᤴᤍᤢᤀᤠᤱ ᤗᤠᤕᤥ ᤆᤥᤃᤢᤖᤥ॥
1TI 2:15 ᤁᤖ ᤔᤧᤴᤇᤢᤔᤠ᤹ᤀᤡᤴ ᤆᤰᤔᤧᤸᤗ᤹ᤀᤣ ᤏᤛᤠ᤺ᤴᤏᤥ. ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡᤀᤥ ᤜᤧᤰᤁᤩᤠᤱ ᤛᤣᤛᤣ ᤜᤡᤱᤔᤴᤏᤥ ᤘᤠ᤹ᤏᤧ ᤑᤠ᤹ᤃᤪ ᤛᤠᤃᤵᤔᤥᤗᤠᤶ ᤋᤠᤱᤛᤧ᤺ᤵᤗᤥ॥
1TI 3:1 ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤠᤶᤗᤥ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤛᤧᤰᤂᤠᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤥᤏᤡᤱᤘᤠ᤹ ᤆᤥᤃᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥
1TI 3:2 ᤂᤧᤸᤗᤧ ᤆᤥᤃᤢᤸᤗᤧ ᤗᤠᤶᤗᤥ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤱᤃ ᤀᤠᤵᤋᤡᤰ ᤔᤧ᤺ᤴᤏᤣᤒᤠ. ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ. ᤏᤡᤱᤘᤠ᤹ ᤜᤠᤱᤃᤧᤃᤧᤶᤛᤡᤱᤒᤠ. ᤏᤢ᤺ᤖᤡᤰᤁᤠᤱ ᤂᤠᤛᤡᤱ ᤁᤧᤏᤡ᤺ᤵᤐᤠ. ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ. ᤋᤖᤣ ᤁᤧᤍᤥ᤺ᤒᤠ ᤏᤢ ᤔᤏᤠᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1TI 3:3 ᤂᤢᤏᤧ᤹ᤃ ᤀᤠᤔᤔᤒᤠ ᤌᤡ᤺ ᤁᤧᤎᤢᤱᤒᤠ ᤏᤢ ᤁᤢᤛᤡᤰ ᤁᤧᤈᤶᤒᤠ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴ. ᤁᤖ ᤗᤢᤶᤗᤢᤶ ᤁᤧᤗ᤹ᤒᤠ ᤏᤢ ᤛᤏᤠᤖᤢᤱᤛᤠᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣᤀᤥ ᤏᤡᤱᤘᤠ᤹ ᤁᤧᤒᤡᤒᤠᤀᤠᤱ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥
1TI 3:4 ᤂᤢᤏᤧ᤹ᤃ ᤀᤠᤵᤑᤣ᤺ᤰ ᤁᤢᤜᤡᤶᤛᤕᤱ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤵᤔᤠ ᤁᤧᤛᤢᤰᤐᤠ ᤜᤧᤰᤁᤩᤠᤱ ᤁᤢᤛ᤻ᤛᤠ᤺ᤜᤠ᤹ᤖᤧ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤏᤢ ᤁᤢᤀᤡᤱᤈᤠ᤺ᤱ ᤔᤧᤄᤧᤵᤛᤢᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1TI 3:5 ᤌᤣᤀᤠᤱᤓᤧᤸᤗᤧ ᤀᤠᤵᤑᤣ᤺ᤰ ᤁᤢᤜᤡᤶᤛᤕᤱ ᤁᤶᤒᤪᤠᤱ ᤔᤧᤵᤔᤠ ᤔᤧᤴᤇᤢᤰᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤵᤔᤠ ᤛᤢᤰᤋᤢᤒᤣ᥅
1TI 3:6 ᤂᤢᤏᤧ᤹ᤃ ᤁᤢᤛᤱ ᤏᤛᤠᤏᤡᤒᤠ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤀᤠᤱᤍᤡᤱ ᤗ᤹ᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤶᤍᤡᤱ ᤂᤥ᤺ᤛᤢᤒᤠ ᤁᤢᤀᤡᤛᤡ᤺ᤰ ᤂᤧᤸᤗᤧᤀᤠᤱ ᤂᤢᤶᤍᤡᤱ ᤂᤥ᤺ᤛᤢ᤹ᤖᤥ॥
1TI 3:7 ᤂᤢᤏᤧ᤹ᤃ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤢᤏᤧ᤹ ᤁᤢᤏᤠᤎᤠ᤺ᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤈᤥᤀᤥ ᤌᤠ᤺ᤖᤥ॥
1TI 3:8 ᤒᤠ ᤜᤧᤰᤁᤣᤗ᤹ᤖᤡᤰ ᤛᤣᤛᤣᤜᤢᤵᤗᤰᤐᤠ ᤔᤠᤱᤛᤣᤘᤠᤖᤥᤒᤠᤜᤠ᤹ᤃ ᤏᤥ ᤕᤧᤵᤗᤧᤰᤛᤠᤒᤠ ᤏᤢ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤂᤧᤱᤜᤠ᤹ ᤕᤖᤡᤰ ᤌᤡ᤺ ᤁᤧᤎᤢᤱᤒᤠ ᤏᤢ ᤑᤧᤴ ᤗᤠᤶᤔᤥᤗᤠᤶ ᤕᤠᤱ ᤁᤧᤎᤰᤐᤠ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥
1TI 3:9 ᤂᤧᤱᤜᤠ᤹ᤃ ᤛᤣᤛᤣ ᤂᤠᤛᤡᤱᤅᤡᤸᤗᤧ ᤀᤠᤏᤡ᤹ ᤏᤛᤠ᤺ᤴ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤁᤧᤃᤵᤐᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1TI 3:10 ᤂᤧᤱᤜᤠ᤹ ᤛᤣ᤺ᤰᤕᤢᤰ ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤡ᤹ ᤕᤧᤵᤗᤧᤰ ᤏᤢ ᤛᤢᤶᤒᤥᤎᤠ᤺ᤴ ᤛᤠ᤹ᤔᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤏᤢ᤺ᤒᤠ ᤆᤥ᤺ᤰᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠᤖᤥᤒᤠᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤖᤖᤥ॥
1TI 3:11 ᤔᤠᤱᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤔᤣ᤺ᤳᤜᤠ᤹ᤀᤠᤱ ᤀᤡᤱᤎᤠ᤺ᤱᤛᤠᤔᤠ ᤔᤧᤒᤥ᤺ᤱᤗ ᤐᤥ᤺ᤱ. ᤁᤖ ᤆᤧ᤹ᤕᤠ ᤁᤧᤒᤱᤔᤠ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤧᤱᤜᤠ᤹ᤃ ᤛᤡᤰ ᤀᤧ᤺ᤵᤔᤠ ᤁᤧᤛᤢᤰᤔᤠ ᤏᤢ ᤁᤠᤰ ᤐᤠ᤺ᤴᤏᤥ ᤏᤛᤠ᤺ᤴᤛᤠᤔᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1TI 3:12 ᤔᤠᤱᤛᤣᤘᤠᤖᤥᤒᤠᤱᤃ ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ. ᤏᤢ᤺ᤖᤡᤰᤁᤠᤱ ᤜᤡᤴᤈᤠ᤹ᤒᤡᤳᤇᤠ ᤏᤢ ᤜᤡᤶᤛᤕᤱ ᤁᤶᤒᤪᤠᤱ ᤔᤧᤵᤔᤠ ᤁᤧᤛᤢᤰᤐᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1TI 3:13 ᤌᤣᤀᤠᤱᤓᤧᤸᤗᤧ ᤔᤠᤱᤛᤣᤘᤠᤖᤥᤒᤠᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤕᤠ᤺ᤶᤒᤰ ᤔᤧᤈᤥᤃᤢᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤄᤥ᤺ᤛᤢ᤹. ᤜᤧᤰᤁᤩᤠᤱ ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤠ᤹ᤒᤠ ᤂᤢᤏᤡ᤹ ᤏᤛᤠ᤺ᤴᤏᤥ ᤜᤠᤱᤜᤠᤱᤅᤠᤱ ᤘᤠ᤹ᤔᤠ ᤔᤧᤛᤢᤰᤗᤥ॥
1TI 3:14 ᤀᤡᤱᤃᤠ᤹ ᤂᤧᤏᤧ᤹ᤀᤥ ᤜᤠᤖᤠᤀᤣ ᤋᤠ᤺ᤔᤠ ᤏᤡᤱᤛᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤛᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤒᤠᤖᤥ॥
1TI 3:15 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤛᤢ᤺ᤛᤠᤱᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤀᤠᤰᤂᤣᤗ᤹ᤖᤡᤰ ᤘᤠ᤹ᤔᤠ ᤐᤣ᤺ᤰᤔᤠ ᤐᤥ᤺ᤱ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤣᤖᤥ॥ ᤁᤢᤔᤏᤠᤜᤠ᤹ᤃ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤗᤥ॥ ᤂᤧᤱᤃ ᤛᤧᤰᤂᤠ᤺ᤸᤗᤧᤴ ᤜᤠᤱᤛᤡᤳᤗᤠᤱ ᤏᤢ ᤏᤧ᤺ᤶᤓᤥᤖᤥ॥
1TI 3:16 ᤀᤠᤏᤡ᤹ ᤛᤠᤶᤕᤥᤖᤧ ᤛᤡᤃᤠᤱ ᤐᤠ᤺ᤴᤏᤡᤱᤃ ᤐᤕᤶ ᤕᤶᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤠᤏᤡ᤹ ᤋᤧᤴᤍᤡᤱ ᤀᤠᤈᤥᤃᤢᤶᤗᤥ– ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤵᤑᤣ᤺ᤰ ᤏᤠᤛᤡᤱᤃᤧᤴ ᤌᤰᤁᤥ ᤌᤠ᤺ᤶᤛᤡᤱᤗᤥ. ᤛᤣᤛᤣᤔᤠᤱᤗᤠᤶ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ. ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡ᤺ᤛᤢᤖᤥ. ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤢᤏᤧ᤹ ᤀᤡᤱᤓᤥ᤺ᤛᤧᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤏᤧ᤹ ᤏᤛᤠ᤺ᤴ ᤔᤧᤈᤥᤃᤢᤖᤥ. ᤔᤡᤔᤡᤍᤡᤱᤅᤥ ᤂᤢᤏᤧ᤹ ᤌᤠ᤺ᤱ ᤐᤱᤛᤡᤱ ᤐᤣᤖᤥ᥄
1TI 4:1 ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤏᤢ᤺ᤖᤡᤰᤁᤠᤱ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧᤀᤠᤱ ᤀᤠᤘᤠ᤹ᤖᤥ. ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤕᤧᤶᤔᤥ ᤁᤢᤓᤠ ᤔᤏᤠᤜᤠ᤹ᤖᤧ ᤏᤛᤠ᤺ᤴᤏᤡᤴ ᤔᤧᤗᤧᤖᤢᤀᤠᤱ ᤀᤡᤱᤗᤧᤰᤁᤣᤒᤠ ᤑᤧᤴᤛᤠᤶᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤒᤢᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ᤖᤥ॥
1TI 4:2 ᤁᤴ ᤏᤡᤛᤠᤶᤜᤠ᤹ᤃ ᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤋᤠ᤺ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤱᤃ ᤁᤧᤃᤥ᤺ᤒᤠ ᤑᤧᤴᤈᤣ᤹ᤀᤡᤸᤗᤧ ᤕᤧᤶᤔᤠᤀᤠᤱ ᤁᤧᤎ᤺ᤵᤐᤠ ᤁᤧᤒᤥ᤺ᤱᤒᤠ ᤁᤢᤀᤡᤛᤡ᤺ᤰ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥ᤺ᤔᤏᤠᤒᤠ ᤐᤥ᤺ᤱᤗᤥ॥
1TI 4:3 ᤂᤧᤱᤜᤠ᤹ᤖᤧᤃ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤏᤢ ᤁᤢᤓᤠ ᤁᤢᤈᤠ ᤁᤢᤎᤡ ᤆᤠᤔᤠ ᤌᤢᤱᤔᤠᤀᤠᤱ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠᤔᤠ ᤑᤠ᤹ᤀᤠᤱ ᤆᤥᤃᤢᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤏᤛᤠ᤺ᤴᤛᤠᤒᤠ ᤏᤢ ᤛᤧᤰᤂᤠ ᤐᤠ᤺ᤴ ᤁᤧᤏᤡ᤺ᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤔᤠᤀᤠᤱ ᤆᤠᤔᤠ ᤏᤢ᤹ᤖᤥ॥
1TI 4:4 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢ᤺ᤒᤠ ᤆᤥ᤺ᤰᤗᤥ॥ ᤜᤧᤰᤁᤩᤠᤱ ᤀᤵᤔᤠ ᤔᤧᤏᤢ᤹ᤏᤧᤴᤗᤥ. ᤁᤖ ᤏᤥᤃᤧᤴ ᤐᤡᤔᤠᤀᤠᤱ ᤋᤧᤴᤍᤡᤱᤃᤧᤴ ᤛᤢᤍᤠ᤺ᤰᤔᤠ ᤏᤢ᤹ᤖᤥ॥
1TI 4:5 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤐᤣᤗᤡᤃᤧᤴ ᤋᤢᤘᤠ᤺ᤸᤗᤧ ᤁᤠᤰ ᤛᤣᤛᤣ ᤆᤥᤃᤢ᤹ᤖᤥ॥
1TI 4:6 ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤁᤧᤜᤢ᤹ᤖᤢᤛᤡ ᤜᤧᤰᤁᤩᤠᤱ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤒᤠ ᤛᤧᤰᤂᤠ ᤏᤡᤛᤠᤶ ᤏᤢ ᤏᤛᤠ᤺ᤴᤃᤧᤴ ᤐᤠ᤺ᤴᤈᤠᤰᤁᤥ ᤁᤧᤜᤢ᤹ᤛᤡᤱᤗ ᤁᤧᤎᤠᤱᤏᤧ ᤑᤠ᤹ᤃᤪ ᤂᤧᤏᤧ᤹ᤃ ᤂᤪᤡᤛ᤻ᤋ ᤕᤧᤛᤢᤖᤧ ᤏᤢ᤺ᤒᤠ ᤁᤢᤛᤣᤘᤠᤖᤥᤒᤠ ᤁᤧᤒᤥ᤺ᤱᤗᤥ॥
1TI 4:7 ᤁᤖ ᤂᤧᤏᤧ᤹ ᤁᤢᤒᤢᤱᤏᤠ ᤁᤢᤛᤶᤒᤠ ᤜᤏᤧᤒᤠ ᤂᤧᤍᤠ᤹ᤜᤠ᤹ᤗᤠᤶ ᤔᤠ᤺ᤱᤄᤠᤀᤣ ᤘᤕᤧ᤹ᤀᤥ॥ ᤂᤧᤴᤏᤢ᤺ᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤔᤠ ᤛᤎᤠᤛᤡᤱᤅᤧ᤹ᤀᤥ॥
1TI 4:8 ᤏᤠᤛᤡᤱᤃᤧᤴ ᤌᤰ ᤛᤎᤠᤛᤡᤱᤔᤠᤸᤗᤧ ᤁᤢᤓᤠᤖᤰ ᤀᤡᤴᤎᤠ᤺ᤱ ᤀᤠᤒᤡ᤹. ᤁᤖ ᤕᤠᤶᤛᤠᤶᤃᤧᤴ ᤛᤎᤠᤛᤡᤱᤔᤠᤗᤠᤶ ᤁᤠᤰ ᤐᤖᤡᤰᤗᤧᤴ ᤀᤡᤴᤎᤠ᤺ᤱ ᤀᤠᤄᤥ᤺ᤛᤢᤶ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥ ᤜᤡᤱᤔᤴᤗᤧᤴ ᤔᤠᤱᤜᤧᤰᤁᤡᤴ ᤁᤴ ᤕᤧᤶᤔᤥᤒᤠ ᤏᤢ ᤋᤠᤕᤧᤶᤔᤥᤒᤠ ᤜᤡᤱᤔᤴᤏᤥ ᤀᤠᤄᤥ᤺ᤛᤢᤶᤗᤥ॥
1TI 4:9 ᤁᤱᤃ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤁᤧᤖᤧᤰᤗᤧ ᤋᤧᤶᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤗᤥ॥
1TI 4:10 ᤒᤠ ᤁᤴ ᤏᤡᤱᤘᤠ᤹ᤛᤥ᤺ᤰᤁᤥ ᤕᤠᤶᤒᤢᤎᤡᤰ ᤏᤢ ᤋᤶᤛᤡᤴ ᤀᤠᤈᤥᤃᤢᤶ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤏᤡᤱᤛᤠᤱᤅᤡᤴ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤏᤧᤛ᤻ᤛᤢᤶᤔᤠᤱ ᤀᤠᤘᤠ᤹ᤖᤥ॥ ᤂᤢᤏᤧ᤹ᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ. ᤜᤧᤰᤁᤩᤠᤱ ᤁᤢᤏᤥ-ᤁᤢᤒᤡ᤹ᤀᤥᤃ ᤂᤢᤏᤧ᤹ᤀᤥ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤴᤗᤥ॥
1TI 4:11 ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤈᤠ᤺ᤱ ᤐᤡᤖᤧᤛᤧ᤹ᤀᤠᤱ ᤜᤢ᤹ᤖᤧᤛᤧ᤹ᤀᤥ॥
1TI 4:12 ᤂᤧᤏᤧ᤹ ᤏᤠᤗᤡᤱᤃᤧᤴ ᤌᤠᤱᤒᤧᤴ ᤁᤧᤘᤠ᤹ᤒᤠᤸᤗᤧ ᤀᤠᤳᤋᤡᤸᤗᤧᤀᤠᤱ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤏᤧᤴᤗᤖᤥ. ᤁᤖ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤒᤠ᤺ᤴ ᤛᤢᤳᤗᤠᤀᤥ. ᤕᤧᤵᤗᤧᤰᤁᤥ. ᤔᤡ᤺ᤶᤈᤡᤀᤥ. ᤏᤛᤠ᤺ᤴᤏᤥ. ᤜᤧᤰᤁᤩᤠᤱ ᤛᤣᤛᤣᤒᤠ ᤜᤡᤱᤔᤴᤏᤥ ᤁᤢᤒᤡ ᤐᤥ᤺ᤰᤂᤧ᤹ᤀᤥ॥
1TI 4:13 ᤀᤡᤱᤃᤠ᤹ ᤔᤧᤴᤍᤠᤀᤣ ᤌᤠᤖᤡᤰ ᤛᤣᤛᤣᤜᤢᤵᤗᤰᤁᤥ ᤛᤠᤶᤕᤥᤛᤠᤵᤗᤠ ᤏᤡ᤺ᤵᤔᤥ. ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠᤀᤥ ᤏᤢ ᤏᤡᤛᤠᤶ ᤜᤢ᤹ᤔᤠ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥
1TI 4:14 ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤁᤧᤛᤶᤍᤠᤱ ᤂᤢᤏᤡ᤹ ᤜᤢᤰ ᤔᤧᤏᤧᤛ᤻ᤛᤢᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴᤗᤠᤶ ᤁᤧᤄᤥ᤺ᤛᤢᤒᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤔᤡᤴ ᤜᤏᤧᤒᤠ ᤔᤧᤀᤡ᤺ᤳᤋᤧᤴᤏᤧ᤹ᤀᤥ॥
1TI 4:15 ᤂᤧᤏᤧ᤹ ᤁᤴ ᤔᤢᤖᤠ ᤔᤧᤳᤏᤧᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤠᤱ ᤆᤰᤔᤧᤸᤗ᤹ᤀᤣ ᤂᤧᤵᤔᤥ ᤐᤳᤇᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤌᤥᤒᤥ᤺ᤴ ᤔᤧᤏᤡ᤺ᤛᤢᤖᤖᤥ॥
1TI 4:16 ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣ᤺ᤰ ᤏᤢ ᤁᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤥ ᤛᤡᤱᤛᤡᤱ ᤗ᤹ᤖᤧ᤹ᤀᤥ॥ ᤆᤰᤔᤧᤸᤗ᤹ᤀᤣ ᤂᤧᤵᤔᤥ ᤐᤳᤇᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤰᤁᤣ ᤁᤧᤈᤥᤃᤢᤏᤧ ᤑᤠ᤹ᤃᤪ ᤂᤧᤏᤧ᤹ ᤀᤠᤵᤑᤣ᤺ᤰ ᤏᤢ ᤂᤧᤏᤧ᤹ ᤁᤧᤒᤠ᤺ᤴ ᤁᤧᤄᤧᤶᤒᤠᤜᤠ᤹ ᤋᤠᤱᤃᤧᤛᤧ᤺ᤵᤋᤢᤛᤡ᤹ᤖᤥ॥
1TI 5:1 ᤂᤍᤠᤰᤔᤡ ᤔᤏᤠ᤺ᤴ ᤔᤧᤓᤧ᤺ᤰᤋᤧᤴᤏᤧ᤹. ᤁᤖ ᤀᤠᤵᤑᤣ᤺ᤰ ᤐᤠᤏᤢᤍᤡᤱ ᤁᤧᤶᤒᤠ ᤁᤢᤀᤡᤛᤡ᤺ᤰ ᤀᤡ᤺ᤳᤋᤧ᤹ᤀᤠᤱ ᤂᤠᤜᤢᤴ ᤐᤡᤖᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤏᤧ᤹ᤏᤢ᤺ᤸᤗᤧ ᤐᤠ᤺ᤰᤐᤠᤜᤠ᤹ ᤀᤠᤵᤑᤣ᤺ᤰ ᤁᤧᤴᤛᤠ᤹ᤛᤡ ᤁᤢᤀᤡᤛᤡ᤺ᤰ ᤀᤡ᤺ᤳᤋᤧᤛᤧ᤹ᤀᤥ॥
1TI 5:2 ᤂᤍᤠᤰᤔᤡ ᤔᤧᤴᤇᤢᤔᤠᤜᤠ᤹ ᤀᤠᤵᤑᤣ᤺ᤰ ᤔᤠᤏᤢᤍᤡᤱ ᤁᤧᤶᤔᤠ ᤁᤢᤀᤡᤛᤡ᤺ᤰ ᤀᤡ᤺ᤳᤋᤧᤛᤧ᤹. ᤜᤧᤰᤁᤩᤠᤱ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤜᤠ᤹ ᤛᤣᤛᤣ ᤏᤡᤱᤘᤠ᤹ᤀᤥ ᤀᤠᤵᤑᤣ᤺ᤰ ᤔᤠᤱᤃᤧᤴᤏᤠ ᤏᤧ᤹ᤏᤢᤛᤠ᤹ ᤁᤢᤀᤡᤛᤡ᤺ᤰ ᤀᤡ᤺ᤳᤋᤧᤛᤧ᤹ᤀᤥ॥
1TI 5:3 ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤜᤥ᤺ᤵᤐᤠ ᤛᤧᤰᤂᤠᤛ᤻ᤔᤠ ᤔᤣᤔᤣᤍᤢᤔᤠᤜᤠ᤹ ᤁᤢᤓᤠ᤹ ᤐᤡᤖᤧᤛᤧ᤹ᤀᤥ॥
1TI 5:4 ᤁᤖ ᤂᤧᤴ ᤔᤣᤔᤣᤍᤢᤔᤠᤜᤠ᤹ᤖᤧ ᤛᤠᤔᤧᤴᤇᤠ᤹ᤜᤠ᤹ ᤔᤧᤃᤳᤋᤢᤛᤡᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ᤖᤧ ᤂᤧᤴ ᤔᤣᤔᤣᤍᤢᤔᤠᤜᤠ᤹ ᤁᤶᤒᤪᤠᤱ ᤔᤧᤔᤧᤳᤋᤢᤛᤡᤖᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤠᤜᤠᤒᤠᤀᤥ ᤁᤧᤖᤧᤰᤗᤧ ᤋᤱᤃᤠᤶ ᤔᤧᤈᤥᤃᤢ ᤔᤧᤒᤡᤖᤢᤛᤡᤖᤖᤥ॥ ᤌᤣᤀᤠᤱᤓᤧᤸᤗᤧ ᤁᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢ᤹ᤖᤥ॥
1TI 5:5 ᤁᤖ ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤁᤧᤜᤥ᤺ᤵᤔᤠ ᤔᤣᤔᤣᤍᤢᤔᤠᤸᤗᤧ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤡᤱᤛᤠᤱ ᤆᤥᤃᤢᤏᤡ. ᤜᤧᤰᤁᤩᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤆᤰᤔᤧᤸᤗ᤹ᤀᤣ ᤂᤢᤏᤧ᤹ᤗᤠᤶ ᤁᤢᤓᤠ᤹ ᤂᤥ᤺ᤛᤢᤱᤏᤡ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤖᤖᤥ॥
1TI 5:6 ᤁᤖ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠᤀᤥ ᤁᤧᤘᤠ᤹ᤔᤠ ᤔᤣᤔᤣᤍᤢᤔᤠᤱᤃ ᤁᤢᤜᤡᤱᤘᤧᤳ ᤘᤠ᤹ᤛᤠᤱ ᤁᤧᤛᤡ᤺ᤔᤠ ᤁᤢᤀᤡᤛᤡ᤺ᤰᤗᤥ॥
1TI 5:7 ᤁᤴ ᤐᤠ᤺ᤴᤜᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤏᤡᤛᤠᤶ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤀᤠᤵᤋᤡᤰ ᤔᤧ᤺ᤴᤏᤣ ᤔᤧᤜᤡᤱᤅᤠᤱ ᤔᤧᤘᤠ᤹ᤏᤡᤖᤥ॥
1TI 5:8 ᤁᤖ ᤀᤠᤳᤋᤡᤸᤗᤧ ᤀᤠᤵᤑᤣ᤺ᤰ ᤁᤠ᤹ᤀᤡ ᤛᤥ᤹ᤎᤥ᤺ᤰ ᤏᤢ ᤁᤢᤏᤥ-ᤁᤢᤒᤡ᤹ᤀᤥ ᤀᤠᤵᤑᤣ᤺ᤰ ᤜᤡᤶᤛᤕᤱᤅᤡᤴᤏᤠᤱ ᤁᤶᤒᤪᤠᤱ ᤔᤧᤔᤧᤳᤋᤢᤴ. ᤂᤧᤸᤗᤧᤃ ᤏᤛᤠ᤺ᤴᤏᤡᤴ ᤏᤠ᤹ᤖᤢ᤹. ᤜᤧᤰᤁᤩᤠᤱ ᤂᤧᤱᤃ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠᤖᤥ॥
1TI 5:9 ᤋᤱᤒᤣ ᤋᤢᤰᤁᤡᤵᤐᤠᤱᤎᤥ ᤁᤧᤃᤧᤵᤔᤠ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ᤖᤰ ᤔᤣᤔᤣᤍᤢᤔᤠ ᤔᤡᤱᤛᤪᤠᤀᤥ ᤛᤠᤵᤋᤧ᤹ᤀᤥ॥ ᤂᤧᤱᤜᤠ᤹ᤃ ᤌᤡᤰᤗᤧᤱᤖᤰ ᤔᤣ᤺ᤰᤂᤡᤶ ᤁᤧᤒᤥ᤺ᤱᤔᤠ
1TI 5:10 ᤜᤧᤰᤁᤩᤠᤱ ᤏᤢ᤺ᤒᤠ ᤕᤠ᤺ᤶᤒᤰᤁᤥ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤄᤥ᤺ᤔᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤂᤧᤱᤃ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤁᤧᤔᤧᤵᤔᤠ. ᤗᤠᤶᤍᤡ᤺ᤰᤐᤠᤜᤠ᤹ ᤋᤖᤣ ᤁᤧᤍᤥᤔᤠ. ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤱ ᤘᤠᤃᤧᤜᤵᤔᤠ. ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤁᤧᤒᤡᤔᤠ. ᤜᤧᤰᤁᤩᤠᤱ ᤏᤢ᤺ᤒ᤻ ᤏᤢ᤺ᤒᤠ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤁᤧᤒᤡᤔᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
1TI 5:11 ᤁᤖ ᤔᤧᤴᤇᤡᤕᤠ᤹ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤡᤴ ᤔᤣᤔᤣᤍᤢᤔᤠ ᤔᤡᤱᤛᤪᤠᤀᤥ ᤔᤧᤛᤠᤵᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤅᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ ᤐᤡᤔᤠ ᤔᤧᤗᤧᤖᤢ ᤔᤧᤍᤣ᤺ᤛᤢᤖᤥ॥
1TI 5:12 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣ᤺ᤰᤐᤠ ᤔᤠᤱᤜᤧᤰᤁᤡᤴ ᤔᤧᤗᤧᤖᤢ ᤔᤧᤍᤣ᤺ᤛᤢᤀᤠᤱ ᤂᤢᤶᤍᤡᤱᤅᤥ ᤔᤧᤎᤠ᤺ᤖᤥ॥
1TI 5:13 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤡᤶᤜᤡᤶ ᤋᤠᤰᤁᤶᤔᤠᤖ ᤀᤓᤥᤛᤡᤱᤔᤠ. ᤗᤧᤶᤛᤫᤠᤔᤠ ᤐᤥ᤺ᤱᤔᤠ ᤔᤧᤜᤢ᤹ᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠ᤹ᤈᤧᤱᤔᤠ. ᤆᤧ᤹ᤕᤠ ᤐᤱᤔᤠ. ᤔᤏᤠ ᤕᤠ᤺ᤶᤒᤰᤁᤥ ᤜᤢᤰ ᤁᤧᤕᤠᤰᤔᤠ ᤜᤧᤰᤁᤣᤗ᤹ᤖᤡᤰ ᤔᤧᤶᤒᤠ᤺ᤳ ᤐᤠ᤺ᤴᤜᤠ᤹ ᤁᤧᤒᤠ᤺ᤵᤔᤠ ᤔᤧᤒᤥ᤺ᤱᤗᤥ॥
1TI 5:14 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ᤃ ᤔᤧᤴᤇᤡᤕᤠ᤹ ᤔᤣᤔᤣᤍᤢᤔᤠᤜᤠ᤹ᤖᤧᤃ ᤜᤠᤖᤠ᤹ ᤔᤣ᤺ᤰᤂᤡᤶ ᤔᤧᤈᤥᤃᤢᤖ. ᤛᤠ᤺ ᤔᤧᤃᤳᤋᤢᤛᤡᤖ. ᤜᤡᤶᤎᤠ᤺ᤱ ᤀᤥᤔᤧᤔᤧᤳᤋᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤏᤡᤱᤔᤡᤜᤠ᤹ᤖᤧ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤌᤣᤀᤠᤱ ᤐᤠ᤺ᤵᤔᤠ ᤔᤧᤱᤄᤥ᤺ᤛᤢᤴᤏᤡᤖᤥ॥
1TI 5:15 ᤌᤣᤀᤠᤱᤓᤧᤸᤗᤧ ᤁᤢᤓᤠ ᤔᤣᤔᤣᤍᤢᤔᤠᤜᤠ᤹ᤃ ᤋᤃᤡᤛᤠ ᤔᤠᤑᤧᤴᤛᤠᤶ ᤗᤧᤵᤔᤠᤱ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥
1TI 5:16 ᤁᤖ ᤏᤛᤠᤏᤡᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤜᤡᤶᤛᤕᤱᤅᤥ ᤔᤣᤔᤣᤍᤢᤔᤠᤜᤠ᤹ ᤔᤧᤘᤠ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤴ ᤋᤢᤰᤂᤣ᤺ᤴ ᤛᤣᤛᤣᤜᤢᤵᤗᤰᤁᤥ ᤔᤧᤒᤥ᤺ᤱᤏᤧᤴᤗᤖᤥ॥ ᤛᤣᤛᤣᤜᤢᤵᤗᤰᤁᤡᤸᤗᤧ ᤛᤧᤰᤂᤠᤀᤣ ᤁᤠ᤹ᤀᤡ ᤛᤥ᤹ᤎᤥ᤺ᤰ ᤁᤧᤜᤥ᤺ᤵᤔᤠᤜᤠ᤹ᤖᤰ ᤁᤢᤓᤠ᤹ ᤐᤡᤔᤠᤛᤡ ᤐᤥ᤺ᤱᤗᤥ॥
1TI 5:17 ᤜᤧᤰᤁᤩᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤁᤢᤏᤥ-ᤁᤢᤒᤡ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤏᤢ ᤐᤣᤗᤡᤃᤧᤴ ᤐᤠ᤺ᤴᤈᤠᤰ ᤜᤢ᤹ᤔᤠᤀᤥ ᤛᤠ᤹ᤖᤡᤰ ᤕᤠᤶᤒᤢᤎᤡᤰ ᤁᤧᤈᤥ᤺ᤰᤐᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤁᤢᤓᤠ᤹ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱ ᤂᤥ᤺ᤔᤠ ᤗᤠ᤹ᤖᤢᤛᤡᤖᤥ॥
1TI 5:18 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤆᤠ ᤁᤧᤏᤢᤰᤐᤠ ᤐᤡᤳᤋᤡᤸᤗᤧ ᤁᤢᤔᤢᤖᤠ᤺ᤴ ᤆ᤺ᤵᤐᤡᤸᤗᤧ ᤔᤧᤛᤢ᤺ᤵᤋᤧᤴᤏᤧ᤹ᤀᤥ.” ᤜᤧᤰᤁᤩᤠᤱ “ᤕᤠ᤺ᤗᤡᤰᤁᤡᤴ ᤏᤠᤶᤕᤠᤰ ᤂᤥ᤺ᤔᤠ ᤗᤠ᤹ᤖᤢᤖᤥ॥”
1TI 5:19 ᤏᤧᤳᤇᤡ ᤀᤡᤃᤪ ᤛᤢᤶᤛᤡ ᤔᤏᤠᤜᤠ᤹ᤖᤧ ᤔᤧᤒᤡᤖᤢᤒᤠ ᤋᤥ᤺ᤴᤍᤡᤜᤠ᤹ ᤂᤧᤵᤛᤧᤀᤠᤱᤗᤰ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤎᤡᤰᤋᤢᤛᤡᤒᤠ ᤀᤠᤵᤋᤡᤰᤁᤡᤴ ᤀᤥᤔᤧᤳᤋᤧ᤹ᤀᤥ॥
1TI 5:20 ᤗᤠᤕᤥ ᤁᤧᤈᤥ᤺ᤰᤐᤠᤖ ᤁᤧᤘᤠ᤹ᤒᤠ ᤗᤠᤶᤗᤥ᤺ᤒᤠᤜᤠ᤹ ᤁᤠᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤑᤧ᤺ᤰᤋᤧᤛᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤔᤧᤃᤡᤏᤡᤖᤥ॥
1TI 5:21 ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤪᤡᤛ᤻ᤋ ᤕᤧᤛᤢᤖᤧ ᤂᤢᤴᤇᤡ᤹ ᤋᤃᤡ ᤜᤧᤰᤁᤩᤠᤱ ᤔᤧᤛᤣᤃᤧᤒᤠ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ. ᤔᤏᤠᤜᤠ᤹ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠᤛᤡ ᤏᤢ ᤔᤏᤠ ᤛᤧᤶᤔᤠᤛᤡ ᤔᤧ᤺ᤴ. ᤜᤧᤰᤁᤩᤠᤱ ᤁᤠᤰ ᤌᤡᤶᤜᤠ᤹ ᤀᤡ᤺ᤳᤋᤧ ᤏᤠ᤺ᤳᤋᤧ᤹ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤏᤧᤖᤥ॥
1TI 5:22 ᤔᤠᤱᤛᤣᤘᤠ ᤕᤠ᤺ᤶᤒᤰᤁᤥ ᤗᤠᤶᤗᤥ᤺ᤒᤠ ᤛᤣ᤺ᤰᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤛᤶᤍᤠᤱ ᤜᤢᤰ ᤏᤧᤔᤠ ᤕᤠ᤺ᤶᤒᤰᤁᤡᤴ ᤜᤠᤖᤠ ᤔᤧᤈᤥᤃᤧᤴᤏᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤀᤥ ᤔᤧᤴᤎᤠᤀᤣ ᤂᤧᤏᤧ᤹ᤃ ᤛᤣᤛᤣᤀᤣ ᤘᤕᤧ᤹ᤀᤥ॥
1TI 5:23 ᤂᤧᤏᤧ᤹ ᤁᤧᤛᤠᤵᤐᤥ᤺ᤰᤐᤧᤴ ᤋᤢᤰᤁᤡᤸᤗᤧ ᤆᤫᤠ᤺ᤳᤗᤰ ᤔᤧᤎᤢᤅᤧᤴᤏᤧ᤹ᤀᤥ. ᤁᤖ ᤛᤡᤍᤠ᤹ ᤐᤥ᤺ᤱᤗ ᤑᤠ᤹ᤀᤠᤱ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤌᤢᤅᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤀᤧᤳᤗᤧᤱ ᤁᤧᤍᤢᤰᤁᤠᤱ ᤁᤧᤘᤠ᤹ᤖᤥ॥
1TI 5:24 ᤁᤢᤓᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤱᤃ ᤏᤢ᤺ᤖᤡᤰ ᤌᤠ᤺ᤵᤐᤠᤱ ᤂᤠᤛᤧᤴᤏᤥ ᤔᤧᤎᤠ᤺ᤖᤥ. ᤁᤖ ᤁᤢᤓᤠᤖᤧᤱᤃ ᤕᤠᤱᤛᤡᤖᤰ ᤌᤠ᤺ᤵᤗᤥ॥
1TI 5:25 ᤒᤠ ᤜᤧᤰᤁᤣᤗ᤹ᤖᤡᤰ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤌᤠ᤺ᤵ. ᤁᤖ ᤔᤧᤴᤎᤠ᤺ᤵᤔᤏᤠᤒᤧᤴᤏᤠᤱ ᤆᤡᤱᤛᤡᤱᤔᤠ ᤔᤧᤛᤢᤰᤏᤧᤴᤗᤥ॥
1TI 6:1 ᤁᤠᤰ ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤛᤡ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤏᤡ᤹ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤌᤣᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤖᤥ॥
1TI 6:2 ᤏᤛᤠᤏᤡᤒᤠ ᤍᤠᤱᤒᤠ ᤁᤧᤃᤵᤐᤠ ᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠᤜᤠ᤹ ᤜᤠᤖᤠ᤹ ᤀᤡᤱᤎᤠ᤺ᤱ ᤂᤥ᤺ᤔᤠ ᤛᤢᤶᤒᤥᤎᤠᤒᤠ ᤔᤧᤈᤥ᤺ᤰ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤖᤥ॥ ᤂᤧᤱᤜᤠ᤹ᤃ ᤏᤛᤠ᤺ᤴᤏᤥ ᤂᤢᤏᤡ᤹ ᤑᤢ᤹ᤏᤢᤛᤠ᤹ᤛᤡᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧᤃ ᤏᤢ᤺ᤖᤡᤰᤁᤠᤱ ᤂᤢᤏᤡ᤹ ᤏᤛᤠᤏᤡᤒᤠ ᤍᤠᤱᤒᤠᤜᤠ᤹ᤖᤧᤴ ᤛᤣᤘᤠ ᤔᤧᤈᤥᤃᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤀᤡᤴᤎᤠ᤺ᤱ ᤁᤧᤄᤥ᤺ᤒᤠᤜᤠ᤹ᤃ ᤗᤢᤱᤔᤠ᤹ ᤋᤢᤰᤛᤡᤱᤔᤏᤠᤒᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤛᤡᤀᤣᤖᤥ॥ ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤂᤧᤴ ᤛᤣᤘᤠᤖᤥᤒᤠᤜᤠ᤹ ᤜᤢ᤹ᤔᤠᤛᤡ ᤐᤥ᤺ᤱ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤜᤠ᤹ ᤆᤥ᤺ᤰ ᤐᤠᤱᤔᤠᤛᤡ ᤐᤥ᤺ᤱᤗᤥ॥
1TI 6:3 ᤀᤠᤳᤋᤡᤸᤗᤧ ᤀᤡᤱᤗᤧᤰᤁᤣ ᤏᤡᤛᤠᤶ ᤜᤢ᤹ᤖᤢᤛᤡ᤹ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤧᤰᤂᤠᤒᤠ ᤁᤢᤏᤡᤛᤠᤶ ᤏᤢ ᤛᤧᤰᤂᤠᤒᤠ ᤁᤢᤛᤠᤶᤕᤥᤏᤡᤒᤠ ᤏᤡᤛᤠᤶᤔᤥ ᤔᤧᤒᤳᤏᤧᤴ.
1TI 6:4 ᤂᤧᤱᤃ ᤀᤠᤱᤍᤡᤱ ᤗ᤹ᤔᤠᤖᤧ ᤕᤶᤒᤠ ᤗᤧᤱᤛᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤌᤣᤀᤠᤱ ᤔᤧᤗᤧᤛ᤻ᤛᤢᤴᤗᤥ॥ ᤁᤖ ᤁᤢᤒᤢᤱᤏᤠ ᤁᤢᤛᤶᤒᤠ ᤐᤠ᤺ᤴᤛᤢᤳᤗᤠᤀᤥ ᤐᤠ᤺ᤴᤌᤰᤁᤠᤱ ᤂᤧᤔᤠ᤹ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤸᤗᤧ ᤏᤠᤜᤧᤶᤔᤠ. ᤂᤧᤔᤠ᤹. ᤆᤠ᤺ᤳᤌᤡ ᤐᤣ᤺ᤰᤔᤠ ᤏᤢ ᤋᤠᤵᤑᤧ᤺ᤶᤒᤠ ᤆᤵᤆᤡᤜᤠ᤹ᤖᤰ ᤋᤠᤖᤢᤖᤥ॥
1TI 6:5 ᤂᤧᤸᤗᤧ ᤑᤧᤴ ᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤏᤥ ᤔᤧᤶᤒᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤧᤔᤠ᤹ ᤑᤥ᤺ᤰᤂᤢ᤹ᤖᤥ॥ ᤂᤧᤱᤜᤠ᤹ᤖᤧᤃ ᤛᤠᤶᤕᤥ ᤀᤡ᤺ᤵᤔᤠ ᤏᤠ᤺ᤵᤔᤠ ᤑᤠ᤹ᤀᤡᤴ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤗᤠᤶ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ᤹ᤖᤥ॥
1TI 6:6 ᤁᤖ ᤏᤡᤱᤘᤠ᤹ ᤋᤠᤔᤠᤏᤢᤒᤠ ᤛᤠᤶᤏᤡᤔᤠᤴᤏᤣ ᤕᤶᤒᤠ ᤀᤡᤴᤎᤠ᤺ᤱ ᤘᤠ᤹ᤖᤥ॥
1TI 6:7 ᤀᤠᤏᤡ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤧᤔᤠᤀᤠᤱ ᤔᤧᤴᤍᤠ᤺ᤳᤋᤣ ᤀᤠᤍᤩᤧ. ᤜᤧᤰᤁᤩᤠᤱ ᤀᤠᤸᤗ ᤀᤠᤒᤣ᤺ᤰᤁᤡᤸᤗᤧᤀᤠᤱ ᤌᤣᤀᤠᤱ ᤔᤧᤴᤍᤣ᤹ᤀᤣ ᤀᤠᤒᤣ᤺ᤰᤗᤥ॥
1TI 6:8 ᤜᤧᤰᤁᤣ᤺ᤸᤗᤧ ᤆᤠᤔᤠ ᤌᤢᤱᤔᤠ ᤏᤢ ᤆᤠᤱᤔᤠ ᤀᤠᤄᤥ᤺ᤛᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ ᤏᤡᤱᤘᤠ᤹ ᤋᤠ᤺ᤔᤠ ᤐᤥ᤺ᤱᤗᤥ॥
1TI 6:9 ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥ᤺ᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ ᤕᤖᤡᤰ ᤕᤠᤱ ᤌᤰᤔᤠ ᤜᤱᤛᤠ᤹ᤔᤠᤀᤥ ᤏᤢ ᤕᤖᤡᤰ ᤐᤖᤡᤰᤐᤠ ᤔᤧᤰᤔᤠᤀᤥ ᤁᤧᤍᤣ᤹ᤒᤠ ᤀᤡ᤺ᤀᤥ ᤔᤧᤎᤠ᤺ᤖᤥ॥ ᤂᤧᤸᤗᤧᤃ ᤂᤧᤱᤜᤠ᤹ ᤋᤢᤰᤂᤣᤀᤥ ᤏᤢ ᤔᤧᤰᤔᤠᤀᤥ ᤌᤠ᤺ᤛᤢᤛᤡ᤹ᤖᤥ॥
1TI 6:10 ᤌᤣᤀᤠᤱᤓᤧᤸᤗᤧ ᤕᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠᤱᤃ ᤁᤠᤰ ᤐᤖᤡᤰᤗᤧᤴ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ᤖᤧ ᤁᤢᤒᤢᤱᤗᤥ॥ ᤁᤢᤓᤠᤖᤧᤃ ᤕᤠᤱᤛᤠᤁᤢᤴᤎᤣ᤺ᤴ ᤔᤡ᤺ᤶᤈᤡ ᤔᤧᤔᤧᤳᤋᤢᤖ ᤂᤢᤏᤡ᤹ ᤏᤛᤠ᤺ᤴᤗᤠᤶ ᤋᤠᤵᤔᤧᤒᤣ᤹ᤖᤧ ᤔᤧᤒᤣᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤗᤧᤴ ᤋᤢᤰᤂᤣ᤺ᤸᤗᤧ ᤋᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥
1TI 6:11 ᤁᤖ ᤂᤧᤏᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤁᤴ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧ᤹ᤀᤥ. ᤜᤧᤰᤁᤩᤠᤱ ᤛᤠᤶᤕᤥᤏᤡᤒᤠ. ᤛᤠᤵᤆᤢᤘᤠᤒᤠ. ᤏᤛᤠ᤺ᤴᤛᤠᤒᤠ. ᤔᤡ᤺ᤶᤈᤡᤛᤠᤒᤠ. ᤏᤠᤛᤡ ᤁᤧᤎ᤺ᤵᤐᤠ. ᤜᤧᤰᤁᤩᤠᤱ ᤆᤢᤱᤈᤡᤃᤧᤴ ᤏ᤺ᤶᤔᤠᤸᤗᤧ ᤁᤢᤎᤡᤶ ᤐᤥ᤺ᤱᤔᤠ ᤋᤶᤛᤡᤴ ᤆᤥᤃᤧ᤹ᤀᤥ॥
1TI 6:12 ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤌᤢᤶᤄᤥ ᤂᤥ᤺ᤔᤠ ᤑᤠ᤹ᤀᤠᤱ ᤏᤛᤠ᤺ᤴᤗᤧᤴ ᤌᤱᤅᤡᤴ ᤏᤢ᤺ᤖᤡᤰᤁᤠᤱ ᤌᤰᤋᤧ᤹ᤀᤥ॥ ᤕᤖᤡᤰ ᤋᤥ᤺ᤴᤍᤡᤜᤠ᤹ ᤋᤃᤡ ᤂᤧᤏᤧ᤹ ᤏᤛᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤋᤧᤴᤍᤡᤱ ᤁᤧᤈᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤒᤡᤖᤧᤀᤠᤱ ᤁᤧᤘᤕᤧᤖᤥ॥
1TI 6:13 ᤁᤠᤰ ᤐᤠ᤺ᤴᤜᤠ᤹ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤐᤴᤋᤡᤕᤛ ᤐᤡᤗᤠᤋᤛᤖᤧ ᤁᤢᤍᤃᤡ ᤏᤢ᤺ᤒᤠ ᤋᤥ᤺ᤴᤍᤡ ᤁᤧᤒᤡᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤍᤃᤡ ᤁᤴ ᤀᤡᤱᤈᤠ᤺ᤱᤅᤡᤴ ᤐᤡᤏᤧᤖᤥ.
1TI 6:14 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤕᤠᤶᤔᤥ ᤀᤥᤛᤣ᤺ᤴ ᤔᤧᤴᤎᤠᤰᤛᤡᤱᤅᤣ ᤌᤠᤖᤡᤰ ᤁᤧᤄᤥ᤺ᤛᤢᤒᤠ ᤂᤧᤴ ᤀᤡᤱᤈᤠ᤺ᤱᤅᤡᤴ ᤀᤡ᤺ᤳᤋᤧ ᤏᤠ᤺ᤳᤋᤧᤖ ᤛᤣᤛᤣ ᤏᤢ ᤀᤠᤵᤋᤡᤰ ᤔᤧ᤺ᤴᤏᤣ ᤁᤳᤋᤧ᤹ᤀᤥ॥
1TI 6:15 ᤂᤢᤏᤧ᤹ᤀᤣ ᤔᤢ᤹ᤀᤡᤛᤠᤶ ᤍᤠᤱᤒᤠ ᤏᤢ ᤜᤠᤱᤕᤢᤰ ᤍᤠᤱᤒᤠ ᤜᤧᤰᤁᤩᤠᤱ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤐᤕᤶ ᤜᤠᤱ ᤏᤢ ᤍᤠᤱᤒᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤐᤕᤶ ᤍᤠᤱᤒᤠᤸᤗᤧᤀᤣ ᤛᤢᤕᤧᤶᤔᤥ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤀᤥᤛᤣ᤺ᤴᤎᤠᤰᤛᤡᤱᤔᤠᤴ ᤋᤠᤖᤢ᤹ᤖᤥ॥
1TI 6:16 ᤂᤢᤏᤧ᤹ᤀᤥᤖᤰ ᤀᤠᤈᤢᤏᤡ ᤘᤠ᤹ᤖᤥ. ᤂᤢᤏᤧ᤹ ᤛᤢ᤺ᤔᤠ ᤏᤢ ᤁᤧᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤀᤥ᤺ᤳᤋᤡᤀᤥ ᤕᤢᤱᤗᤥ॥ ᤂᤢᤏᤧ᤹ᤃ ᤀᤠᤳᤋᤡᤸᤗᤧᤀᤠᤱ ᤔᤧᤴᤏᤡᤀᤣ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡ᤺ᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥ ᤂᤢᤏᤧ᤹ᤀᤡᤴᤏᤣ ᤛᤍᤠᤍᤡᤱ ᤔᤢᤰᤛᤠᤶ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱ ᤐᤥ᤺ᤱᤗᤖᤥ॥ ᤀᤠᤔᤧᤴ॥
1TI 6:17 ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤧᤛᤧ᤹–ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤴᤗ᤹ᤏᤧᤴᤗᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤛᤠᤱᤅᤡᤴ ᤆᤵᤗᤧᤰᤘᤠ ᤕᤠᤱᤛᤠᤁᤢᤴᤎᤣᤀᤥ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤕᤢᤰᤂᤢᤖᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤏᤡᤱᤘᤠ᤹ ᤋᤠᤖ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤁᤠᤰ ᤀᤠᤒᤡ᤹ᤖᤥ॥
1TI 6:18 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤠ᤹ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤒᤥ᤺ᤱᤗ ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ᤏᤢ ᤜᤠ᤺ᤔᤠ ᤆᤠᤔᤠ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤖ. ᤛᤢᤕᤠ᤺ᤶᤒᤰ ᤔᤧᤈᤥᤃᤢᤖ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤧᤛᤧ᤹ᤀᤥ॥
1TI 6:19 ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤋᤠᤕᤧᤶᤔᤡᤸᤗᤧᤴ ᤏᤧᤶᤓᤥᤃᤧᤴ ᤐᤠᤱᤕᤰ ᤔᤧᤕᤢᤰᤂᤢᤖᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤰᤂᤠᤒᤠ ᤜᤡᤱᤔᤴᤏᤡᤴ ᤔᤧᤍᤧᤶᤛᤢ ᤔᤧᤕᤢᤰᤂᤢᤖᤖᤥ॥
1TI 6:20 ᤋᤡᤔᤥᤌᤡᤀᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤁᤳᤋᤧ᤹ᤀᤥ॥ ᤁᤢᤒᤢᤱᤏᤠ ᤁᤢᤛᤶᤒᤠ ᤀᤍᤱ ᤋᤠ᤹ᤈᤧᤱ ᤏᤢ ᤋᤰᤗᤧᤱᤘᤠ ᤐᤠ᤺ᤴᤜᤠ᤹ᤃ ᤀᤡᤱᤗᤧᤰᤐᤠ ᤛᤠᤶᤈᤡ᤺ᤰᤗᤥ. ᤂᤧᤴᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧ᤹ᤀᤥ॥
1TI 6:21 ᤁᤢᤓᤠᤖᤧ ᤂᤧᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤏᤛᤠ᤺ᤴᤏᤡᤸᤗᤧ ᤏᤡᤱᤘᤠ᤹ᤛᤥ᤺ᤰᤗᤠᤶ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤧᤏᤧ᤹ᤀᤥ ᤘᤠ᤹ᤖᤖᤥ॥
2TI 1:1 ᤀᤠᤔᤡ᤺ᤶ ᤀᤠᤛ᤻ᤛᤠ᤺ ᤋᤡᤔᤥᤌᤡᤀᤣ. ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤠ᤹ᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧᤴ ᤔᤠᤱᤜᤧᤰ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤀᤥᤗᤠᤶ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤣᤃᤠᤱᤒᤠ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤐᤠᤘᤗᤗᤠᤶ ᤁᤴ ᤛᤰᤀᤡᤱᤅᤡᤴ ᤜᤠᤰᤏᤧ᤹ᤖᤥ॥ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤗᤢᤱᤃᤢᤶ. ᤗᤢᤱᤔᤠ᤹ ᤋᤢᤰᤔᤠ ᤏᤢ ᤛᤏᤠᤖᤢᤱᤅᤡᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥
2TI 1:3 ᤀᤡᤱᤃᤠ᤹ ᤀᤠᤎᤠ᤺ᤰᤌᤧᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤛᤣᤛᤣ ᤂᤠᤛᤡᤱᤗᤧ ᤂᤢᤏᤧ᤹ ᤁᤢᤛᤣᤘᤠ ᤆᤥᤃᤢᤱ॥ ᤜᤧᤰᤁᤩᤠᤱ ᤛᤍᤠᤍᤡᤱ ᤀᤡᤱᤃᤠ᤹ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤛᤧᤴᤍᤡᤰ ᤗᤧᤴᤍᤡᤰ ᤂᤧᤏᤧ᤹ ᤏᤡᤱᤘᤠ᤹ ᤀᤡ᤺ᤳᤏᤧᤀᤠᤱ ᤂᤢᤏᤧ᤹ ᤏᤥᤃᤧᤴ ᤐᤡᤖᤢᤱᤗᤥ॥
2TI 1:4 ᤂᤧᤏᤧ᤹ ᤁᤧᤔᤡᤰᤘᤠ᤺ᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤡᤸᤗᤧ ᤁᤧᤛᤠ᤹ᤛᤧ ᤋᤠ᤺ᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤥᤔᤢᤗ᤹ᤔᤠᤸᤗᤧ ᤁᤢᤎᤡᤶ ᤐᤥ᤺ᤱᤅᤠᤔᤧᤴ॥
2TI 1:5 ᤀᤡᤱᤃᤠ᤹ ᤂᤧᤏᤧ᤹ ᤛᤧᤰᤂᤠᤒᤠ ᤁᤧᤏᤛᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤂᤧᤏᤧ᤹ᤀᤠᤱ ᤁᤧᤕᤢᤔᤠ᤹ ᤗᤥᤀᤡᤛ ᤏᤢ ᤁᤧᤶᤔᤠ ᤕᤢᤏᤡᤛᤖᤧ ᤁᤳᤋᤧᤳᤇᤢᤒᤠ ᤜᤧᤰᤋᤱᤒᤠ ᤏᤢ᤺ᤒᤠ ᤏᤛᤠ᤺ᤴ ᤁᤧᤃᤳᤋᤢ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤛ᤻ᤛᤣ᤹ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥
2TI 1:6 ᤁᤴ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤱ ᤐᤡᤏᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤐᤷᤎᤠ᤺ᤶᤔᤡᤴ ᤁᤧᤍᤡ᤺ᤵᤐᤠ ᤔᤡ ᤁᤢᤀᤡᤛᤡ᤺ᤰ ᤁᤳᤋᤧ᤹ᤀᤥ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ॥
2TI 1:7 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤖᤧᤒᤠ ᤛᤣᤛᤣᤔᤠᤱᤅᤡᤸᤗᤧ ᤀᤠᤏᤡ᤹ ᤁᤡᤛᤪᤢᤰᤐᤠ ᤀᤠᤴᤈᤥ᤺ᤰᤏᤧᤴ. ᤁᤖ ᤔᤢᤰᤛᤠᤶ. ᤔᤡ᤺ᤶᤈᤡ. ᤜᤧᤰᤁᤩᤠᤱ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ ᤀᤠᤒᤡ᤹॥
2TI 1:8 ᤂᤧᤸᤗᤧ ᤆᤥᤃᤢᤸᤗᤧ ᤍᤠᤱᤒᤠᤸᤗᤧᤴ ᤛᤠ᤺ᤰᤂᤡ ᤐᤡᤔᤠ ᤏᤢ ᤁᤢᤗᤠᤃᤡ ᤀᤡᤱᤃᤠ᤹ ᤛᤠᤰᤐᤠ ᤁᤧᤎᤠ᤺ᤒᤠᤴᤏᤢ ᤂᤧᤏᤧ᤹ ᤛᤡᤖᤡᤱ ᤔᤧᤔᤕᤧᤴᤏᤧ᤹ᤀᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤥ ᤀᤠᤏᤡᤃᤧᤏᤢ ᤛᤥᤖᤡᤰ ᤂᤧᤏᤧ᤹ᤀᤠᤱ ᤛᤢᤏᤠᤀᤡᤱᤗᤧ ᤗᤠᤃᤡ ᤋᤢᤰᤂᤣ ᤆᤧ᤹ᤀᤥ॥
2TI 1:9 ᤂᤢᤏᤧ᤹ᤀᤣ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤋᤧᤀᤠᤱ ᤀᤠᤵᤑᤣ᤺ᤰ ᤛᤣᤛᤣ ᤁᤢᤔᤏᤠ ᤐᤥ᤺ᤱᤛᤧ ᤀᤠᤛᤣᤃᤧᤀᤠᤱ ᤀᤠᤘᤠ᤹ᤖᤥ॥ ᤁᤱᤃ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤐᤥ᤺ᤰᤂᤧᤒᤠ ᤔᤧ᤺ᤴᤗᤥ. ᤁᤖ ᤂᤢᤏᤧ᤹ ᤀᤠᤵᤑᤣ᤺ᤰ ᤁᤢᤏᤡᤱᤘᤠ᤹ᤛᤥ᤺ᤰ ᤏᤢ ᤁᤢᤗᤢᤱᤃᤢᤶᤖᤧ ᤆᤥᤃᤢᤒᤠᤖᤥ॥ ᤋᤥᤗᤡᤱᤛᤥᤔᤢᤀᤠᤱᤎᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤴ ᤗᤢᤱᤃᤢᤶᤔᤡᤴ ᤀᤠᤒᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤛᤣ᤺ᤰ ᤆᤥᤃᤢᤀᤠᤱ ᤘᤕᤧ॥
2TI 1:10 ᤁᤖ ᤀᤠᤸᤗᤥ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢ᤺ᤴ ᤋᤩᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤂᤢᤏᤧ᤹ᤀᤥ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ॥ ᤂᤢᤏᤧ᤹ᤀᤣ ᤛᤡ᤺ᤔᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤔᤧᤰᤂᤢᤀᤠᤱ ᤛᤢᤏᤠᤀᤡᤱᤗᤠᤶ ᤏᤧᤳᤋᤡᤃᤧᤴ ᤜᤡᤱᤔᤴ ᤏᤢ ᤀᤠᤈᤢᤏᤡ ᤜᤡᤱᤔᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤖᤥ॥
2TI 1:11 ᤁᤴ ᤛᤢᤏᤠᤀᤡᤱᤅᤡᤸᤗᤧ ᤗᤠᤃᤡ ᤀᤡᤱᤃᤠ᤹ ᤛᤣᤛᤣ ᤛᤣ᤺ᤰᤕᤢᤰᤔᤡᤒᤠ. ᤛᤡᤰᤛᤠᤶᤒᤠ. ᤜᤧᤰᤁᤩᤠᤱ ᤀᤡᤱᤃᤧᤓᤥ᤺ᤒᤠ ᤐᤥ᤺ᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤰᤕᤢᤰ ᤆᤥᤃᤠᤱᤗᤥ॥
2TI 1:12 ᤜᤧᤰᤁᤩᤠᤱ ᤒᤠ ᤂᤧᤸᤗᤧ ᤆᤥᤃᤢᤸᤗᤧᤀᤣ ᤀᤡᤱᤃᤠ᤹ ᤋᤢᤰᤂᤣ ᤆᤠᤀᤠᤖ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤛᤡᤖᤡᤱ ᤔᤧᤔᤀᤠᤴᤗᤥ. ᤌᤣᤀᤠᤱᤓᤧᤸᤗᤧ ᤜᤠ᤺ᤳ ᤀᤡᤱᤃᤠ᤹ ᤏᤛᤠ᤺ᤴ ᤆᤥᤃᤢᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤏᤡ᤺ᤛᤢᤱᤅᤠᤱ ᤘᤠ᤹ᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤢᤜᤢᤰᤁᤥ ᤐᤡᤖᤢᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴ ᤌᤠᤖᤡᤰ ᤛᤧ᤺ᤵᤋᤢᤀᤠᤱ ᤁᤳᤋᤢ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡᤛ᤻ᤛᤣ ᤘᤠ᤹ᤀᤠᤖᤥ॥
2TI 1:13 ᤀᤡᤱᤃᤠ᤹ ᤜᤢ᤹ᤏᤧᤒᤠ ᤛᤧᤰᤂᤠ ᤏᤡᤛᤠᤶᤜᤠ᤹ᤖᤧ ᤁᤢᤒᤡᤜᤠ᤹ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤥ. ᤜᤧᤰᤁᤩᤠᤱ ᤂᤪᤡᤛ᤻ᤋ ᤕᤧᤛᤢᤀᤥ ᤂᤥᤃᤧᤍᤧᤵᤐᤠ ᤔᤡ᤺ᤶᤈᤡ ᤏᤢ ᤏᤛᤠ᤺ᤴᤏᤥ ᤏᤢ᤺ᤖᤡᤰᤁᤠᤱ ᤘᤕᤧ᤹ᤀᤥ॥
2TI 1:14 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤀᤠᤏᤡ᤹ᤀᤥ ᤁᤧᤘᤠ᤹ᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤓᤠ᤹ᤗᤠᤶ ᤏᤢ᤺ᤖᤡᤰᤁᤠᤱ ᤁᤳᤋᤧ᤹ᤀᤥ॥
2TI 1:15 ᤀᤣᤛᤡᤕᤠᤛ᤻ᤔᤠ ᤌᤢᤶᤔᤥᤗᤠᤶ ᤁᤧᤍᤠ᤺ᤒᤠ ᤁᤠᤰ ᤏᤛᤠᤏᤡᤒᤠᤜᤠ᤹ᤖᤧ ᤀᤡᤱᤃᤠ᤹ ᤔᤧᤗᤧᤖᤠᤱ ᤔᤧᤍᤣ᤺ᤛᤠᤱᤒᤠ ᤐᤠ᤺ᤴᤜᤠ᤹ᤃ ᤂᤧᤏᤧ᤹ ᤁᤧᤏᤡ᤺ᤛᤢᤖᤥ॥ ᤂᤧᤱᤜᤠ᤹ᤀᤥ ᤑᤢᤃᤣᤗᤛ ᤏᤢ ᤜᤷᤔᤥᤈᤣᤏᤛᤧᤴᤏᤠᤱᤗᤥ॥
2TI 1:16 ᤍᤠᤱᤒᤠᤸᤗᤧ ᤜᤠᤖᤠ᤹ ᤀᤥᤏᤣᤛᤡᤑᤥᤖᤛᤖᤧ ᤁᤢᤜᤡᤶᤛᤕᤱᤅᤡᤴ ᤗᤢᤱᤔᤠ᤹ ᤋᤢᤰᤋᤢᤖᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤐᤢᤱᤗᤠᤜᤡᤶᤔᤥ ᤘᤕᤠᤱᤅᤡᤸᤗᤧ ᤂᤢᤏᤧ᤹ ᤕᤖᤡᤰ ᤗᤧᤱ ᤜᤠᤱᤜᤠᤱ ᤔᤧᤳᤇᤧ ᤀᤠᤍᤢᤶᤛᤧ ᤋᤠ᤺ᤔᤠ ᤔᤧᤏᤢ᤺ᤴᤍᤧᤴ.
2TI 1:17 ᤁᤖ ᤂᤢᤏᤧ᤹ ᤖᤥᤔ ᤕᤧᤰᤕᤰᤁᤥ ᤁᤧᤖᤧᤀᤠᤱ ᤛᤠ᤹ᤖᤡᤰ ᤁᤥ᤺ᤳᤋᤠᤱᤅᤠᤱ ᤀᤡᤱᤃᤠ᤹ ᤋᤢᤔᤠᤱᤗᤥ॥
2TI 1:18 ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤴᤏᤥ ᤜᤠᤖᤠ᤹ ᤍᤠᤱᤒᤠᤸᤗᤧ ᤂᤢᤏᤧ᤹ ᤗᤢᤱᤃᤢᤶ ᤀᤥᤛᤣ᤺ᤴᤎᤠᤰᤋᤢᤏᤡᤖᤥ॥ ᤀᤡᤱᤃᤠ᤹ ᤀᤣᤑᤡᤛᤛᤀᤥ ᤘᤕᤠᤱᤅᤡᤸᤗᤧ ᤀᤠᤰᤂᤧᤴ ᤛᤠ᤹ᤖᤡᤰ ᤁᤢᤓᤠ᤹ ᤐᤡᤖᤠᤱ ᤁᤧᤗ᤹ᤒᤠ ᤐᤠ᤺ᤴᤏᤡᤱᤃ ᤂᤧᤏᤧ᤹ ᤁᤧᤏᤡ᤺ᤛᤢᤀᤣᤖᤥ॥
2TI 2:1 ᤜᤧᤰᤁᤣ᤺ᤸᤗᤧ ᤀᤠᤛ᤻ᤛᤠ᤺ᤀᤣ. ᤂᤧᤏᤧ᤹ᤃ ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤠ᤹ᤒᤠ ᤗᤢᤱᤃᤢᤶᤗᤠᤶᤒᤠ ᤁᤧᤎᤢᤶᤒᤠ ᤐᤥ᤺ᤰᤂᤧ᤹ᤀᤥ॥
2TI 2:2 ᤕᤖᤡᤰ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤄᤧᤵᤛᤢᤒᤠ ᤀᤠᤒᤠ᤺ᤴᤏᤡᤴ ᤁᤧᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤏᤠᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤏᤛᤠ᤺ᤴᤛᤠᤒᤠ ᤘᤣ᤹ ᤔᤏᤠᤜᤠ᤹ ᤜᤢᤰᤛᤢᤵᤋᤧᤛᤧ᤹ᤀᤥ॥
2TI 2:3 ᤂᤪᤡᤛ᤻ᤋ ᤕᤧᤛᤢᤖᤧ ᤛᤧᤰᤂᤠᤀᤣᤒᤠ ᤁᤢᤎᤰᤛᤢᤒᤠ ᤁᤢᤀᤡᤛᤡ᤺ᤰ ᤂᤧᤏᤧ᤹ ᤀᤠᤏᤡᤃᤧᤏᤢ ᤋᤢᤰᤂᤣ ᤆᤠᤔᤠᤀᤥ ᤆᤢᤶ ᤐᤥ᤺ᤰᤂᤧ᤹ᤀᤥ॥
2TI 2:4 ᤌᤰᤛᤢᤒᤠ ᤋᤢᤖᤠᤀᤥ ᤁᤧᤕᤠᤰᤐᤠ ᤀᤠᤳᤋᤡᤴ ᤌᤰᤛᤢᤒᤠᤴᤏᤠᤱ ᤜᤡᤶ ᤕᤠ᤺ᤶᤒᤰᤁᤥ ᤔᤧᤜᤶᤛᤡᤱᤅᤡᤴ. ᤁᤖ ᤂᤧᤸᤗᤧᤃ ᤂᤢᤏᤧ᤹ ᤁᤢᤎᤰᤋᤢᤶᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤏᤡᤱᤘᤠ᤹ ᤆᤥᤃᤢ᤹ᤖᤥ॥
2TI 2:5 ᤜᤰᤆᤠ᤺ᤳᤋᤥ ᤁᤧᤗᤥ᤺ᤰᤐᤧᤴ ᤜᤰᤆᤠ᤺ᤳᤋᤥᤒᤠ ᤌᤡᤶᤜᤠ᤹ ᤁᤢᤀᤡᤛᤡ᤺ᤰ ᤔᤧᤗᤥ᤺ᤰᤏᤧᤴᤏᤧ ᤑᤠ᤹ᤃᤪ ᤂᤧᤸᤗᤧ ᤌᤢᤶᤄᤥ ᤔᤧᤄᤥ᤺ᤛᤢᤴᤗᤥ॥
2TI 2:6 ᤕᤠᤶᤒᤢᤎᤡᤰᤁᤠᤱ ᤕᤠ᤺ᤴᤃᤧᤔ᤺ᤒᤠ ᤔᤏᤠ᤺ᤸᤗᤧᤀᤣ ᤁᤧᤍᤢᤶᤒᤠ ᤆᤠ᤺ᤴ ᤁᤠᤰᤏᤢ ᤋᤃᤡ ᤂᤢᤏᤧ᤹ᤀᤣ ᤆᤠᤔᤠ ᤂᤥ᤺ᤔᤠ ᤐᤥ᤺ᤱᤗᤥ॥
2TI 2:7 ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤑᤠ᤹ᤀᤠᤱ ᤀᤡ᤺ᤳᤇᤡᤱᤛᤠᤶ ᤁᤧᤒᤡ᤹ᤖᤥ॥
2TI 2:8 ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤧᤜᤡᤱᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥ ᤀᤡᤱᤃᤠ᤹ ᤀᤡᤱᤓᤴ ᤆᤥᤃᤢᤱᤒᤠ ᤛᤢᤏᤠᤀᤡᤱᤅᤡᤴ ᤒᤠ ᤁᤴᤏᤣᤖᤥ॥
2TI 2:9 ᤒᤠ ᤂᤧᤴ ᤛᤢᤏᤠᤀᤡᤱᤅᤡᤴ ᤀᤡᤱᤃᤠ᤹ ᤀᤡᤱᤓᤥ᤺ᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤋᤢᤰᤂᤣ ᤆᤠᤀᤠᤖ ᤘᤠ᤹ᤀᤠ. ᤜᤧᤰᤁᤩᤠᤱ ᤁᤢᤓᤠᤱ ᤁᤧᤓᤣ᤺ᤶᤒᤠ ᤁᤢᤀᤡᤛᤡ᤺ᤰᤁᤠᤱ ᤀᤡᤄᤣ᤺ᤱᤅᤥ ᤌᤠ᤺ᤀᤠᤖᤥ॥ ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤱᤃ ᤀᤠᤵᤑᤠᤸᤗᤧᤀᤠᤱ ᤀᤡᤄᤣ᤺ᤱᤅᤥ ᤔᤧᤎᤠᤏᤧᤴᤗᤥ॥
2TI 2:10 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤂᤪᤡᤛ᤻ᤋ ᤕᤧᤛᤢᤀᤥ ᤛᤧᤴᤗᤵ ᤏᤢ ᤔᤧᤴᤏᤢᤵᤔᤏᤠᤒᤠ ᤔᤡᤔᤡᤍᤡᤱ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤁᤠᤰ ᤋᤢᤰᤂᤣᤜᤠ᤹ ᤀᤡᤱᤃᤠ᤹ ᤌᤶᤔᤠ ᤛᤢᤰᤋᤢᤱᤗᤥ॥
2TI 2:11 ᤁᤴ ᤐᤠ᤺ᤵᤔᤏᤠᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ. ᤀᤠᤏᤡ᤹ ᤂᤢᤏᤧ᤹ᤏᤢᤀᤣ ᤀᤠᤛᤩᤧᤀᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤢᤏᤧ᤹ᤏᤢᤀᤣ ᤀᤠᤜᤡᤱᤗᤥ॥
2TI 2:12 ᤀᤠᤏᤡ᤹ ᤆᤰᤔᤧᤸᤗ᤹ᤀᤣ ᤏᤠᤛᤡ ᤀᤠᤎ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤜᤠᤱ ᤀᤠᤈᤥᤃᤢᤶ॥ ᤀᤠᤏᤡ᤹ ᤂᤢᤏᤧ᤹ ᤀᤠᤏᤠ᤹ᤖᤢᤔᤏᤧ ᤑᤠ᤹ᤃᤪ. ᤂᤢᤏᤧ᤹ᤀᤠᤱ ᤀᤠᤏᤡ᤹ ᤀᤠᤏᤠ᤹ᤖᤥ॥
2TI 2:13 ᤀᤠᤏᤡ᤹ ᤏᤛᤠ᤺ᤴᤛᤠᤒᤠ ᤀᤠᤶᤒᤥ᤺ᤱᤏᤧᤴᤇᤠᤱ ᤂᤢᤏᤧ᤹ᤃ ᤏᤛᤠ᤺ᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤠᤵᤑᤣ᤺ᤰ ᤏᤠ᤹ᤛᤡᤱᤔᤠ ᤔᤧᤛᤢᤰᤏᤧᤴᤗᤥ॥
2TI 2:14 ᤛᤣᤛᤣᤜᤢᤵᤗᤰᤁᤥᤒᤠ ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤜᤠᤖᤠ᤹ ᤂᤧᤱᤜᤠ᤹ ᤐᤠ᤺ᤴᤛᤢᤳᤗᤠᤀᤥ ᤐᤠ᤺ᤴᤎᤱ ᤔᤧᤴᤈᤥ᤺ᤰᤏᤧᤴᤗ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤧᤛᤧ᤹ᤀᤥ॥ ᤂᤧᤴ ᤐᤠ᤺ᤴᤎᤱᤅᤡᤸᤗᤧ ᤏᤢ᤺ᤒᤠ ᤔᤧᤒᤥ᤺ᤱᤏᤧᤴ. ᤁᤖ ᤁᤧᤄᤧᤶᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤶᤔᤥ᤺ᤰᤗᤰ ᤐᤥ᤺ᤱᤗᤥ॥
2TI 2:15 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤌᤠᤱᤗ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤁᤧᤛᤢᤰᤛᤢᤰ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤐᤣᤗᤡᤃᤧᤴ ᤁᤢᤒᤠ᤺ᤴᤈᤠᤰᤁᤡᤴ ᤌᤥ ᤕᤥ ᤔᤧᤴᤈᤥ᤺ᤰᤁᤣ ᤜᤢ᤹ᤖᤧᤛᤧ᤹ᤖ ᤛᤡᤖᤡᤱ ᤔ᤺ᤔᤠ ᤔᤧᤶᤒᤥ᤺ᤱᤅᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤐᤥ᤺ᤰᤂᤧ᤹ᤀᤥ॥
2TI 2:16 ᤁᤖ ᤂᤧᤏᤧ᤹ᤃ ᤁᤢᤒᤢᤱᤏᤠ ᤁᤢᤛᤶᤒᤠ ᤀᤍᤱ ᤐᤠ᤺ᤴᤎᤱᤅᤥᤗᤠᤶ ᤀᤣ᤺ᤰ ᤘᤕᤧ᤹ᤀᤥ॥ ᤜᤧᤰᤋᤱᤒᤠ ᤐᤠ᤺ᤴᤎᤱᤅᤡᤸᤗᤧ ᤏᤛᤠᤏᤡᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠ᤺ᤱᤄᤠ ᤋᤣ᤹ᤖᤢᤛᤡᤖᤥ॥
2TI 2:17 ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤘᤣ᤺ᤵᤔᤏᤠᤒᤠ ᤕᤠᤱᤄᤣ᤺ᤰ ᤁᤢᤀᤡᤛᤡ᤺ᤰᤗᤥ॥ ᤀᤰᤋᤱᤒᤠ ᤛᤡᤰᤛᤠᤶᤒᤠᤜᤠ᤹ᤀᤥᤃ ᤜᤠᤀᤡᤔᤣᤏᤡᤕᤛ ᤏᤢ ᤑᤡᤗᤣᤋᤛᤛᤡᤖᤥ॥
2TI 2:18 ᤂᤧᤱᤜᤠ᤹ᤖᤧᤃ ᤛᤧᤰᤂᤠᤒᤠ ᤔᤠᤖᤠᤶᤔᤡᤴ ᤗᤧᤖᤧᤳᤇᤢᤀᤠᤱ ᤀᤠᤏᤡ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤱᤃ ᤋᤃᤡ ᤐᤥ᤺ᤰᤂᤧ ᤆᤢᤖᤧᤖᤥ ᤗ᤹ᤖᤡᤰ ᤜᤢ᤹ᤛᤢᤛᤡᤀᤠᤱ ᤁᤢᤓᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤗᤧᤱᤛᤢᤖ ᤘᤠ᤹ᤛᤡᤖᤥ॥
2TI 2:19 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤛᤠᤶᤔᤡᤸᤗᤧᤴ ᤕᤢᤰᤛᤡᤱᤃᤧᤴ ᤐᤠᤱᤕᤢᤰᤁᤡᤴ ᤔᤧᤶᤔᤢᤴᤏᤣᤀᤣ ᤏᤧᤖᤥ. ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤛᤠᤵ ᤗᤰᤛᤡᤱᤅᤠᤱ ᤘᤠ᤹ᤖᤥ. “ᤍᤠᤱᤒᤠᤸᤗᤧ ᤀᤠᤵᤑᤣ᤺ᤰ ᤁᤢᤔᤏᤠᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤛᤡ᤹ᤖᤥ.” ᤜᤧᤰᤁᤩᤠᤱ “ᤍᤠᤱᤒᤠᤸᤗᤧ ᤁᤢᤔᤡᤱ ᤁᤧᤗᤥ᤺ᤱᤒᤠᤜᤠ᤹ ᤁᤠᤰ ᤗᤠᤕᤥᤗᤠᤶ ᤔᤠ᤺ᤱᤄᤠᤀᤣ ᤔᤧᤒᤥ᤺ᤱᤗᤖᤥ॥”
2TI 2:20 ᤕᤶᤒᤠ ᤜᤡᤶᤔᤥ ᤕᤖᤡᤰ ᤐᤖᤡᤰᤗᤧᤴ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤜᤧᤰᤁᤩᤠᤱ ᤛᤡᤱ ᤏᤢ ᤂᤠᤶᤔᤡᤸᤗᤧᤴ ᤆᤧᤳᤌᤩᤠ ᤏᤢ ᤂᤵᤐᤩᤠᤜᤠ᤹ ᤔᤧᤘᤠ᤹ᤖᤥ॥ ᤁᤢᤓᤠᤃ ᤀᤡᤱᤎᤠ᤺ᤱᤒᤠ ᤏᤢ ᤁᤢᤓᤠ ᤀᤡᤱᤎᤠ᤺ᤱᤔᤧ᤺ᤴᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤐᤥ᤺ᤱᤗᤥ॥
2TI 2:21 ᤀᤠᤳᤋᤡᤸᤗᤧ ᤑᤧᤴ ᤕᤠ᤺ᤶᤒᤰᤁᤡᤴ ᤗᤧᤖᤢᤀᤠᤱ ᤛᤣᤛᤣ ᤆᤥ᤺ᤰᤛᤡᤱ. ᤂᤧᤱᤃ ᤀᤡᤱᤎᤠ᤺ᤱᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤢᤴᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰᤁᤥ ᤀᤠᤳᤋᤡᤴ ᤏᤢ᤺ᤒᤠ ᤕᤠ᤺ᤶᤒᤰᤁᤥᤛᤠᤱ ᤂᤧᤱᤃ ᤀᤥᤃᤵ ᤐᤥ᤺ᤱᤔᤠ ᤕᤠᤖᤡᤵ ᤐᤥ᤺ᤱᤗᤥ॥
2TI 2:22 ᤌᤠᤱᤒᤧᤴ ᤔᤧᤴᤇᤡᤕᤠ᤹ ᤗ᤹ᤔᤠᤗᤠᤶ ᤁᤧᤍᤠ᤺ᤒᤠ ᤑᤧᤴ ᤏᤡᤱᤘᤠ᤹ᤗᤠᤶ ᤀᤣ᤺ᤰ ᤘᤕᤧ᤹ᤀᤥ॥ ᤜᤧᤰᤁᤩᤠᤱ ᤛᤣᤛᤣ ᤏᤡᤱᤘᤠ᤹ᤀᤥᤗᤠᤶ ᤍᤠᤱᤒᤠᤴᤏᤢ ᤋᤢᤘᤠ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤏᤢ ᤛᤠᤶᤕᤥᤏᤡᤔᤥ. ᤏᤛᤠ᤺ᤴᤏᤥ. ᤔᤡ᤺ᤶᤈᤡᤀᤥ ᤜᤧᤰᤁᤩᤠᤱ ᤛᤏᤠᤖᤢᤱᤅᤥ ᤘᤕᤧ᤹ᤀᤥ॥
2TI 2:23 ᤁᤖ ᤁᤢᤒᤢᤱᤏᤠ ᤁᤢᤛᤶᤒᤠ ᤐᤠ᤺ᤴᤎᤱᤅᤡᤴ ᤏᤠ᤹ᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤂᤧᤔᤠ᤹ᤖᤰ ᤑᤥ᤺ᤰᤂᤢ᤹ᤖᤥ॥
2TI 2:24 ᤍᤠᤱᤒᤠᤸᤗᤧ ᤁᤢᤛᤣᤘᤠᤖᤥᤒᤠᤴ ᤂᤣᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤢᤏᤧ᤹ᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ. ᤜᤢ᤹ᤔᤠ ᤁᤧᤛᤢᤰᤐᤠ. ᤜᤧᤰᤁᤩᤠᤱ ᤏᤡᤱᤘᤠ᤹ ᤜᤠᤱᤃᤧᤃᤧᤶᤛᤡᤱᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥
2TI 2:25 ᤜᤧᤰᤁᤩᤠᤱ ᤋᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠᤜᤠ᤹ᤀᤠᤱ ᤛᤡᤰ ᤏ᤺ᤶᤏ᤺ᤶᤔᤠᤱ ᤂᤠᤜᤢᤴ ᤐᤡᤔᤠ ᤁᤧᤛᤢᤰᤐᤠ ᤐᤥ᤺ᤱᤔᤠ ᤐᤥ᤺ᤱ. ᤜᤧᤰᤁᤣᤗ᤹ᤖᤡᤰ ᤛᤧᤰᤂᤠᤒᤠ ᤐᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤗᤠᤕᤥᤗᤠᤶ ᤏᤢ᤺ᤰᤋᤢ ᤋᤠᤖᤢᤛᤡᤖᤖᤥ॥
2TI 2:26 ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤐᤠᤱᤔᤠᤛᤡ ᤑᤠ᤹ᤀᤠᤱ ᤀᤡᤈᤥ ᤕᤢᤰᤋᤢᤛᤡᤒᤠ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤣ᤺ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤈᤥᤗᤠᤶ ᤐᤡᤶᤔᤠ ᤔᤧᤛᤢᤰᤗᤥ॥
2TI 3:1 ᤀᤠᤸᤗ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤁᤧᤛᤠᤰᤐᤠ ᤕᤧᤶ ᤋᤠ᤺ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤛᤥᤀᤥ ᤕᤢᤰᤂᤧ᤹ᤀᤥ॥
2TI 3:2 ᤂᤧᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤃ ᤀᤠᤵᤑᤣ᤺ᤰᤗᤰ ᤔᤡ᤺ᤶᤈᤡ ᤁᤧᤔᤧᤳᤇᤡᤱᤒᤠ. ᤕᤠᤱᤛᤠᤁᤢᤴᤎᤣᤖᤰ ᤔᤡ᤺ᤶᤈᤡ ᤁᤧᤔᤧᤵᤐᤠ ᤏᤢ ᤀᤠᤵᤑᤣ᤺ᤰᤗᤰ ᤕᤶᤒᤠᤛᤡᤃᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤵᤐᤠ. ᤀᤠᤱᤍᤡᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤔᤏᤠ ᤆᤠ᤺ᤳᤌᤡ ᤁᤧᤍᤣ᤺ᤒᤠ ᤔᤧᤒᤥ᤺ᤱᤗᤥ॥ ᤂᤧᤱᤜᤠ᤹ᤃ ᤐᤠ ᤔᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤔᤧᤶᤒᤵᤔᤏᤠᤒᤠ. ᤀᤥᤒᤧ ᤁᤧᤈᤥᤃᤢ ᤁᤧᤒᤡᤖᤠᤱᤒᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤴᤀᤡ᤺ᤵᤔᤏᤠᤒᤠ. ᤜᤧᤰᤁᤩᤠᤱ ᤛᤠᤶᤕᤥ ᤔᤧᤴᤀᤡ᤺ᤵᤔᤏᤠᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤒᤥ᤺ᤱᤗᤥ॥
2TI 3:3 ᤂᤧᤱᤜᤠ᤹ᤖᤧ ᤀᤠᤳᤋᤡᤴᤜᤠ᤹ᤀᤠᤱ ᤗᤢᤱᤔᤠ᤹ ᤔᤧᤴᤍᤢᤰᤋᤢᤴᤛᤡᤴ. ᤘᤣ᤹ᤜᤠ᤹ ᤗᤧᤵᤔᤡ ᤔᤧᤶᤒᤡᤖᤢᤴᤇᤡᤴ. ᤜᤧᤰᤁᤩᤠᤱ ᤆᤧ᤹ᤕᤠ ᤁᤧᤔ᤺ᤒᤠ. ᤜᤧ᤹ᤗᤧ᤹ᤗᤧᤒᤠ. ᤁᤡᤵᤔᤠ ᤁᤧᤄᤢ᤺ᤒᤠ. ᤏᤢ᤺ᤒᤠ ᤐᤠ᤺ᤴ ᤛᤡᤖᤠ᤹ ᤔᤧᤴᤎᤠᤱᤔᤏᤠᤒᤠ ᤔᤧᤒᤥ᤺ᤱᤗᤥ॥
2TI 3:4 ᤂᤧᤱᤜᤠ᤹ ᤘᤣ᤹ ᤔᤏᤠ ᤀᤡᤱᤗᤧᤰ ᤁᤧᤔᤧᤵᤐᤠ. ᤏᤡᤱᤘᤠ᤹ᤋᤠᤍᤠ ᤁᤧᤈᤥ᤺ᤰᤐᤠ. ᤀᤠᤱᤍᤡᤱᤅᤠᤱ ᤀᤡᤱᤃᤠ᤹ᤀᤣ᤺ᤰ ᤁᤧᤗ᤹ᤒᤠ ᤔᤧᤒᤥ᤺ᤱᤗᤥ॥ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤧᤰᤘᤠ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠ ᤆᤥ᤺ᤰᤔᤠᤀᤣ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥
2TI 3:5 ᤂᤧᤱᤜᤠ᤹ᤃ ᤛᤠᤶᤕᤥᤒᤠ ᤔᤧᤗᤧᤱᤛᤡᤱ ᤁᤖ ᤔᤢᤰᤛᤠᤶᤔᤡᤴ ᤔᤧᤴᤜᤧᤵᤋᤢᤴᤗᤥ॥ ᤀᤰᤋᤱᤒᤠ ᤔᤏᤠᤜᤠ᤹ᤏᤢ ᤂᤧᤏᤧ᤹ᤃ ᤀᤣ᤺ᤰ ᤘᤕᤧ᤹ᤀᤥ॥
2TI 3:6 ᤁᤢᤓᤠᤃ ᤜᤡᤶ ᤜᤡᤶ ᤔᤧᤒᤣ᤺ᤰᤁᤠᤱ ᤗᤠᤕᤥ᤺ᤸᤗᤧ ᤁᤧᤵᤋᤢᤛᤡᤔᤠᤜᤠ᤹ ᤏᤢ ᤁᤠᤰ ᤐᤖᤡᤰᤗᤧᤴ ᤕᤠᤶᤏᤡᤱᤘᤠ᤹ᤀᤥ ᤁᤧᤒᤵᤔᤠ ᤏᤡᤱᤘᤠ᤹ ᤛᤢᤱᤃᤡᤰᤔᤠ ᤔᤧᤴᤇᤢᤔᤠᤜᤠ᤹ ᤕᤢᤰᤁᤥ ᤔᤧᤍᤠᤖᤢᤛᤡᤖᤥ॥
2TI 3:7 ᤂᤧᤴ ᤔᤧᤴᤇᤢᤔᤠᤜᤠ᤹ ᤀᤠᤰᤂᤧᤴ ᤔᤧᤜᤢ᤹ᤛᤡᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠ᤺ᤴ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
2TI 3:8 ᤈᤣᤴᤏᤛ ᤏᤢ ᤈᤣᤶᤒᤪᤛᤛᤡᤖᤧ ᤔᤥᤛᤠ᤺ᤴ ᤔᤧᤀᤳᤋᤢᤒᤠ ᤁᤢᤀᤡᤛᤡ᤺ᤰ ᤂᤧᤴ ᤔᤏᤠᤜᤠ᤹ᤖᤧ ᤛᤧᤰᤂᤠ᤺ᤴ ᤔᤧᤀᤳᤋᤢᤖᤥ॥ ᤂᤧᤴ ᤔᤏᤠᤜᤠ᤹ ᤑᤧᤴᤏᤡᤱᤘᤠ᤹ᤒᤠᤛᤡᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤛᤧᤰᤂᤠᤒᤠ ᤔᤧᤈᤥ᤺ᤰᤏᤧᤴ॥
2TI 3:9 ᤁᤖ ᤂᤧᤱᤜᤠ᤹ᤖᤧ ᤒᤠ ᤜᤧᤰᤁᤣᤖᤰ ᤆᤥ᤺ᤰᤔᤠᤖ ᤘᤠ᤹ᤔᤠ ᤔᤧᤴᤇᤢᤰᤋᤢᤴᤗᤥ॥ ᤈᤣᤴᤏᤛ ᤏᤢ ᤈᤣᤶᤒᤪᤛᤛᤡ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤖᤧᤀᤠᤱ ᤂᤢᤏᤡ᤹ ᤀᤍᤱ ᤆᤥ᤺ᤰᤔᤠᤴᤏᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢ᤹ᤖᤥ॥
2TI 3:10 ᤁᤖ ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ. ᤀᤠᤕᤧᤵᤗᤧᤰᤁᤡᤴ. ᤜᤡᤱᤔᤴᤗᤧᤴ ᤀᤠᤏᤡᤱᤘᤠ᤹ᤛᤥ᤺ᤰᤁᤡᤴ. ᤀᤠᤏᤛᤠ᤺ᤴᤏᤡᤴ. ᤀᤠᤜᤠᤱᤃᤧᤶᤛᤡᤱᤔᤠᤴ. ᤀᤠᤔᤡ᤺ᤶᤈᤡᤴ. ᤀᤠᤏᤠᤛᤡ ᤌ᤺ᤵᤔᤠᤴ. ᤋᤢᤰᤂᤣ ᤆᤩᤠᤱᤒᤠ ᤐᤠ᤺ᤴᤜᤠ᤹. ᤀᤠᤍᤢᤰᤂᤣᤜᤠ᤹ ᤁᤧᤖᤧᤰ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤣᤴᤋᤡᤀᤥᤁ. ᤀᤠᤀᤡᤁᤥᤏᤡᤕᤔ ᤏᤢ ᤗᤢᤛ᤻ᤋᤪᤠᤀᤥ ᤀᤡᤱᤃᤠ᤹ ᤋᤢᤔᤢᤱᤒᤠ ᤁᤧᤖᤧᤰ ᤋᤢᤰᤂᤣᤜᤠ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤁᤖ ᤍᤠᤱᤒᤠᤸᤗᤧ ᤁᤠᤰ ᤂᤧᤴ ᤋᤢᤰᤂᤣ ᤗᤠᤰᤂᤣᤗᤠᤶ ᤀᤡᤱᤃᤠ᤹ ᤛᤧ᤺ᤵᤋᤠᤱᤗᤥ॥
2TI 3:12 ᤂᤪᤡᤛ᤻ᤋ ᤕᤧᤛᤢᤀᤥ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤱᤃ ᤋᤢᤰᤂᤣ ᤆᤠᤀᤣᤖᤥ॥
2TI 3:13 ᤁᤖ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠ ᤏᤢ ᤀᤡᤱᤃᤧᤗᤧᤰᤐᤠ ᤔᤏᤠᤜᤠ᤹ᤃ ᤘᤣ᤹ ᤔᤏᤠᤜᤠ᤹ ᤀᤡᤱᤗᤧᤰᤋᤢᤶᤛᤡᤶᤒᤠ. ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤶᤛᤡᤶᤒᤠ ᤗ᤹ᤖᤡᤰ ᤔᤧᤀᤡ᤺ᤳᤋᤢᤖ ᤔᤧᤒᤣ᤺ᤰᤁᤡᤸᤗᤧ ᤀᤠᤵᤑᤣ᤺ᤰ ᤀᤡᤱᤔᤧᤗᤧᤰᤛᤡᤱᤗ ᤛᤠ᤹ᤖᤡᤰᤁᤠᤱ ᤋᤠᤵᤑᤧ᤺ᤶᤒᤠ ᤔᤧᤒᤥ᤺ᤱᤗ ᤔᤧᤒᤣ᤺ᤰᤗᤥ॥
2TI 3:14 ᤁᤖ ᤂᤧᤏᤧ᤹ᤃ ᤁᤧᤄᤥ᤺ᤛᤢᤒᤠ ᤏᤡᤛᤠᤶᤔᤥ ᤆᤰᤔᤧᤸᤗ᤹ᤀᤣ ᤐᤳᤇᤧ᤹ᤀᤥ॥ ᤂᤧᤴ ᤏᤡᤛᤠᤶᤜᤠ᤹ ᤛᤧᤰᤂᤠᤀᤣ ᤔᤧᤈᤥ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤛᤠᤶ ᤁᤧᤜᤢ᤹ᤒᤠᤜᤠ᤹ ᤋᤠ᤺ᤰᤐᤥ ᤕᤢᤱᤔᤠ ᤁᤧᤛᤢᤰᤋᤢᤛᤡ᤹ᤖᤥ॥
2TI 3:15 ᤂᤧᤏᤧ᤹ ᤁᤧᤈᤢ᤺ᤰᤋᤧᤀᤠᤱᤎᤥ ᤏᤢ᤺ᤖᤡᤰᤁᤠᤱ ᤛᤣᤛᤣ ᤛᤠᤶᤕᤥᤛᤠᤵᤗᤠ ᤁᤧᤗᤧᤛ᤻ᤛᤢᤀᤠᤱ ᤁᤧᤘᤠ᤹ᤖᤥ॥ ᤒᤠ ᤁᤴ ᤐᤠ᤺ᤴᤜᤠ᤹ᤀᤥᤗᤠᤶ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤠ ᤂᤥᤃᤧᤍᤧᤵᤐᤠ ᤛᤧᤴᤗᤵᤖᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤁᤧᤄᤥ᤺ᤛᤢ᤹ᤖᤥ॥
2TI 3:16 ᤁᤠᤰ ᤛᤠᤶᤕᤥᤛᤠᤵᤗᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤈᤠᤱᤘᤠᤗᤠᤶ ᤀᤠᤒᤡᤖᤧᤒᤠᤖᤥ. ᤜᤧᤰᤁᤩᤠᤱ ᤂᤧᤱᤃ ᤛᤠᤶᤕᤥᤏᤡᤒᤠ ᤏᤡᤛᤠᤶ ᤐᤡᤔᤠ. ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤏᤢ᤺ᤖᤡᤰᤁᤠᤱ ᤋᤥ᤺ᤶᤔᤠ. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤀᤥ᤺ᤴᤎᤠᤰ ᤐᤡᤔᤠ. ᤛᤠ᤹ᤖᤡᤰ ᤕᤠ᤺ᤶᤒᤰ ᤀᤠᤒᤡ᤹ᤖᤥ॥
2TI 3:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤖᤧ ᤁᤠᤰ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ ᤀᤠᤒᤡᤖᤧᤒᤠᤖᤥ॥
2TI 4:1 ᤂᤪᤡᤛ᤻ᤋ ᤕᤧᤛᤢ᤺ᤴ ᤜᤠᤱ ᤆᤥ᤺ᤰᤛᤧ ᤕᤢ᤺ᤸᤗᤧ ᤁᤠᤰ ᤁᤢᤜᤡᤱᤘᤧᤳ ᤏᤢ ᤁᤢᤛᤡᤘᤧᤳ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤂᤢᤴᤇᤡ᤹ ᤋᤃᤡ ᤀᤡᤱᤈᤠ᤺ᤱ ᤐᤡᤏᤧᤖᤥ–
2TI 4:2 ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧ᤹॥ ᤀᤠᤵᤑᤠᤸᤗᤧᤛᤠᤱ ᤛᤢᤏᤠᤀᤡᤱ ᤛᤧ᤺ᤔᤠ ᤂᤧᤏᤧ᤹ᤃ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤕᤧ᤹ᤀᤥ॥ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤗ ᤏᤡᤛᤠᤶᤏᤢ ᤔᤏᤠᤜᤠ᤹ ᤏᤢ᤺ᤖᤡᤰᤁᤠᤱ ᤂᤠᤜᤢᤴ ᤐᤡᤖᤧᤛᤧ᤹. ᤑᤧ᤺ᤰᤋᤧᤛᤧ᤹. ᤜᤧᤰᤁᤩᤠᤱ ᤜᤠᤱᤜᤠᤱ ᤔᤧᤳᤋᤧᤛᤧ᤹ᤀᤥ॥
2TI 4:3 ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤛᤠᤶ ᤂᤧᤶᤔᤠ ᤂᤢᤏᤡ᤹ ᤛᤡᤖᤠ᤹ ᤔᤧᤴᤎᤠᤱᤔᤏᤠ ᤕᤧᤶ ᤋᤠᤖ ᤐᤳ॥ ᤁᤖ ᤂᤧᤱᤜᤠ᤹ᤖᤧᤃ ᤀᤠᤒᤠᤅᤣ ᤕᤠᤶᤏᤡᤱᤘᤠ᤹ᤀᤥ ᤔᤧᤒᤣ᤺ᤰᤁᤠᤱ ᤂᤢᤏᤡ᤹ ᤂᤧᤶᤔᤠ ᤛᤡᤖᤠ᤹ ᤁᤧᤎᤠᤱᤒᤠ ᤐᤠ᤺ᤴᤗᤰ ᤂᤧᤶᤔᤠ ᤑᤠ᤹ᤀᤠᤱ ᤒᤠ ᤜᤧᤰᤋᤱᤒᤠ ᤐᤠ᤺ᤴ ᤁᤧᤒᤠ᤺ᤵᤐᤠ ᤛᤡᤰᤛᤠᤶᤒᤠᤜᤠ᤹ ᤔᤧᤗᤢᤵᤛᤢᤛᤡᤖᤥ॥
2TI 4:4 ᤂᤧᤱᤜᤠ᤹ᤖᤧᤃ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤔᤧᤏᤠ᤹ᤖᤢᤀᤠᤱ ᤂᤢᤏᤡ᤹ ᤁᤢᤒᤢᤱᤏᤠ ᤁᤢᤛᤶᤒᤠ ᤂᤧᤍᤠ᤹ᤜᤠ᤹ ᤗᤧᤵᤔᤠᤱ ᤏᤡᤱᤘᤠ᤹ ᤔᤧᤒᤡᤖᤢ᤹ᤖᤥ॥
2TI 4:5 ᤁᤖ ᤂᤧᤏᤧ᤹ᤃ ᤁᤠᤰ ᤐᤖᤡᤰᤐᤠ ᤘᤠᤏᤠᤶᤔᤥ ᤜᤠᤱᤜᤠᤱ ᤘᤕᤧ᤹ᤀᤠᤱ ᤋᤢᤰᤂᤣ᤺ᤴ ᤌᤖᤧ᤹. ᤛᤢᤏᤠᤀᤡᤱ ᤛᤧ᤺ᤛ᤻ᤛᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤔᤠᤱᤛᤣᤘᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤴ ᤆᤥᤃᤧ ᤛᤢᤖᤧ᤹ᤀᤥ॥
2TI 4:6 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤡ᤺ᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰ ᤆᤥ᤺ᤰ॥
2TI 4:7 ᤀᤡᤱᤃᤠ᤹ᤃ ᤀᤠᤛᤢᤰᤛᤢᤰ ᤏᤢ᤺ᤖᤡᤰᤁᤠᤱ ᤏᤛᤠ᤺ᤴᤗᤧᤴ ᤌᤱ ᤌᤰᤋᤠᤱᤅᤠᤱ. ᤀᤠᤗᤥ᤺ᤰᤔᤠᤴ ᤛᤢᤖᤢᤱᤅᤠᤱ ᤘᤠ᤹ᤀᤠ ᤜᤧᤰᤁᤩᤠᤱ ᤏᤛᤠ᤺ᤴᤏᤡᤴ ᤔᤧᤶᤔᤠᤀᤣ ᤁᤳᤋᤢᤱᤅᤠᤱ ᤘᤠ᤹ᤀᤠᤖᤥ॥
2TI 4:8 ᤀᤠᤏᤡ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤍᤠᤱᤒᤠᤸᤗᤧ ᤂᤧᤴ ᤕᤧᤴᤏᤥ ᤛᤠᤶᤕᤥᤏᤡᤒᤠ ᤋᤡᤆ᤺ᤴ ᤜᤠᤱᤛᤧᤶ ᤁᤢᤀᤡᤛᤡ᤺ᤰ ᤐᤡᤀᤠᤖᤥ॥ ᤀᤡᤱᤃᤠ᤹ᤖᤰ ᤔᤧ᤺ᤴ. ᤁᤖ ᤂᤢᤏᤧ᤹ ᤁᤢᤎᤠ᤺ᤴᤇᤡᤱᤔᤠᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤁᤧᤜᤠᤱᤒᤠ ᤁᤠᤰᤗᤧ ᤔᤧᤄᤥ᤺ᤛᤢ᤹ᤖᤥ॥
2TI 4:9 ᤂᤧᤏᤧ᤹ ᤀᤡᤱᤃᤠ᤹ᤀᤥ ᤜᤠᤖᤠ ᤑᤧᤶᤔᤠ ᤁᤧᤛᤢᤰᤛᤢᤰ ᤋᤶᤛᤡᤴ ᤆᤥᤃᤧ᤹ᤀᤥ॥
2TI 4:10 ᤌᤣᤀᤠᤱᤓᤧᤸᤗᤧ ᤍᤣᤔᤠᤛᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤔᤧᤳᤋᤢ ᤜᤧᤰᤁᤩᤠᤱ ᤀᤡᤱᤃᤠ᤹ ᤗᤧᤖᤠᤱᤅᤠᤱ ᤌᤡᤛ᤻ᤛᤗᤥᤏᤡᤁᤠ ᤐᤣᤀᤠᤱ ᤘᤠ᤹ᤖᤥ॥ ᤁᤪᤣᤛᤣᤴᤛᤧᤴ ᤃᤗᤠᤋᤡᤕᤠ ᤌᤢᤶᤔᤥ ᤐᤣᤀᤠᤱ ᤘᤠ᤹ ᤜᤧᤰᤁᤩᤠᤱ ᤋᤡᤋᤛᤧᤴ ᤍᤠᤸᤔᤠᤋᤡᤕᤠ ᤌᤢᤶᤔᤥ ᤐᤣᤖᤥ॥
2TI 4:11 ᤀᤡᤱᤃᤠ᤹ᤏᤢᤃ ᤗᤢᤁᤠᤖᤰ ᤘᤠ᤹ᤖᤥ॥ ᤂᤧᤏᤧ᤹ ᤁᤧᤓᤧᤴᤏᤡᤸᤗᤧ ᤔᤷᤁᤢᤛᤧᤴᤏᤠᤱ ᤂᤧᤏᤧ᤹ᤏᤢ ᤛᤥᤖᤡᤰ ᤑᤧᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤰᤁᤥ ᤂᤧᤸᤗᤧ ᤕᤖᤡᤰ ᤁᤢᤓᤠ᤹ ᤐᤡᤀᤠᤖᤥ॥
2TI 4:12 ᤀᤡᤱᤃᤠ᤹ ᤋᤢᤂᤡᤁᤛᤧᤴ ᤀᤣᤑᤡᤛᤛᤀᤥ ᤐᤠᤱᤄᤢᤱᤍᤣ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥
2TI 4:13 ᤂᤧᤏᤧ᤹ ᤁᤧᤓᤧᤴᤏᤡᤸᤗᤧ ᤋᤪᤥᤀᤠᤛᤗᤠᤶ ᤁᤠᤷᤐᤛᤧᤸᤗᤥ ᤏᤧᤛ᤻ᤛᤢᤱᤎᤠᤱᤒᤠ ᤆᤢᤱᤃᤠ ᤏᤢ ᤛᤠᤵᤐᤴᤜᤠ᤹ ᤑᤧᤳᤋᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤛᤧᤜᤥᤒᤠ ᤛᤠᤵᤐᤴᤏᤡᤴ ᤏᤡᤱᤘᤠ᤹ ᤔᤧᤶᤓᤣ᤺ᤴᤏᤣ ᤑᤧᤳᤋᤧ᤹ᤀᤥ॥
2TI 4:14 ᤑᤧᤴ ᤁᤧᤎᤰᤐᤠ ᤀᤗᤧᤰᤈᤧᤴᤍᤖᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤠᤱᤗᤥ॥ ᤍᤠᤱᤒᤠᤸᤗᤧ ᤜᤠᤖᤠ᤹ ᤁᤢᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤐᤡᤖᤢᤏᤡᤖᤥ॥
2TI 4:15 ᤂᤧᤏᤧ᤹ᤀᤠᤱ ᤂᤧᤴᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤘᤕᤧ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤏᤡᤃᤧ ᤏᤡᤛᤠᤶᤔᤡᤴ ᤛᤠ᤹ᤖᤡᤰ ᤀᤳᤋᤢᤖᤥ॥
2TI 4:16 ᤌᤡᤰᤛᤡᤃᤣ᤺ᤰᤐᤥ ᤀᤡᤱᤃᤠ᤹ ᤂᤠᤛᤧᤴᤗᤥᤒᤠᤸᤗᤥ ᤔᤧᤍᤠᤖᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤕᤠᤵᤔᤡ ᤁᤢᤓᤠ᤹ ᤔᤧᤶᤒᤡᤖᤠᤱᤅᤡᤴ. ᤁᤖ ᤁᤧᤖᤧᤰᤗᤧ ᤀᤡᤱᤃᤠ᤹ ᤔᤧᤗᤧᤖᤠᤱᤅᤠᤱ ᤔᤧᤒᤣᤖᤥ॥ ᤁᤴ ᤐᤠ᤺ᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤂᤠᤛᤧᤴ ᤔᤧᤈᤥᤃᤢᤴᤏᤡᤖᤥ॥
2TI 4:17 ᤁᤖ ᤍᤠᤱᤒᤠᤴ ᤀᤡᤱᤃᤠ᤹ᤏᤢ ᤘᤕᤧᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤢᤏᤠᤀᤡᤱ ᤂᤧᤶᤔᤠ ᤔᤧᤄᤥ᤺ᤛᤢᤏᤡ ᤑᤠ᤹ᤀᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤔᤠ ᤁᤧᤛᤢᤰᤐᤠ ᤐᤥ᤺ᤱᤔᤠ ᤌᤢᤶ ᤐᤡᤖᤠᤱᤗᤥ॥ ᤍᤠᤱᤒᤠᤸᤗᤧᤃ ᤀᤡᤱᤃᤠ᤹ ᤌᤧᤖᤡᤱᤒᤠᤸᤗᤧ ᤁᤢᤔᤢᤖᤠᤀᤥᤗᤠᤶᤔᤠᤱ ᤛᤧ᤺ᤵᤋᤠᤱᤗᤥ॥
2TI 4:18 ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤁᤠᤰ ᤑᤧᤴ ᤐᤠ᤺ᤴᤏᤥᤗᤠᤶ ᤛᤧ᤺ᤵᤐᤠᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤢᤜᤠᤱᤈᤢᤶᤔᤥ ᤁᤶᤒᤪᤠᤱ ᤔᤧᤳᤋᤠᤖ ᤋᤣ᤹ᤀᤠᤖᤥ॥ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤐᤥ᤺ᤱᤏᤡᤖᤥ॥ ᤀᤠᤔᤧᤴ॥
2TI 4:19 ᤀᤡᤱᤃᤠ᤹ ᤐᤪᤡᤛ᤻ᤁᤡᤗᤠ ᤏᤢ ᤀᤁᤫᤡᤗᤠ ᤜᤧᤰᤁᤩᤠᤱ ᤀᤥᤏᤣᤛᤡᤑᤥᤖᤛᤖᤧ ᤁᤢᤜᤡᤶᤛᤕᤱᤜᤠ᤹ ᤀᤠᤛᤣᤘᤠᤔᤢ ᤔᤧᤳᤋᤧᤛᤧ᤹ᤀᤥ॥
2TI 4:20 ᤀᤡᤖᤠᤛ᤻ᤋᤛᤧᤴ ᤁᤥᤖᤴᤌᤡᤀᤥ ᤘᤕᤧ ᤗᤠᤖᤧᤖᤥ॥ ᤜᤧᤰᤁᤩᤠᤱ ᤋᤪᤥᤑᤡᤔᤛᤧᤴ ᤋᤢᤃᤧᤖ ᤘᤕᤧᤒᤠᤸᤗᤧ ᤔᤡᤗᤣᤋᤛᤀᤥᤀᤣ ᤐᤰᤌᤠᤱᤗᤥ॥
2TI 4:21 ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤆᤢᤱᤘᤠ᤺ᤶᤔᤠ ᤋᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤋᤠ᤺ᤔᤠ ᤋᤶᤛᤡᤴ ᤆᤥᤃᤧ᤹ᤀᤥ॥ ᤕᤢᤒᤗᤛ. ᤜᤧᤰᤁᤩᤠᤱ ᤐᤢᤍᤣᤏᤛ. ᤗᤡᤏᤛ. ᤰᤗᤦᤍᤡᤕᤠ ᤜᤧᤰᤁᤩᤠᤱ ᤁᤠᤰ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤠᤱ ᤂᤧᤏᤧ᤹ ᤛᤣᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥
2TI 4:22 ᤍᤠᤱᤒᤠᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤁᤧᤖᤧᤰᤏᤢ ᤘᤠ᤹ᤖᤖᤥ॥
TIT 1:1 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤐᤠᤘᤗᤗᤠᤶᤒᤠ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤧ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤔᤏᤠᤜᤠ᤹ ᤂᤢᤏᤡ᤹ ᤏᤛᤠ᤺ᤴᤏᤥ ᤁᤢᤓᤠ᤹ ᤐᤡᤔᤠᤛᤡ ᤜᤧᤰᤁᤩᤠᤱ ᤀᤠᤏᤡ᤹ ᤛᤠᤶᤕᤥᤖᤧ ᤀᤠᤜᤢ᤹ᤖᤧᤒᤠ ᤛᤧᤰᤂᤠᤀᤥ ᤗᤠᤶᤗᤥ᤺ᤔᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤣᤃᤠᤱᤗᤥ॥
TIT 1:2 ᤁᤴ ᤛᤧᤰᤂᤠ᤺ᤸᤗᤧ ᤆᤥᤃᤢᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧ ᤏᤡᤱᤛᤠᤱᤅᤡᤴ ᤀᤠᤄᤥ᤺ᤛᤢᤶ. ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤡᤱᤗᤧᤰ ᤔᤧᤶᤒᤠ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤶᤔᤡᤸᤗᤧ ᤁᤢᤜᤣ᤺ᤰᤛᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤁᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤸᤗᤧ ᤔᤠᤱᤜᤧᤰᤁᤡᤴ ᤆᤥᤃᤢᤀᤠᤱ ᤘᤕᤧᤖᤥ॥
TIT 1:3 ᤜᤧᤰᤁᤩᤠᤱ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤥ. ᤛᤣ᤺ᤰᤕᤢᤰ ᤆᤥᤃᤢᤒᤠ ᤛᤢᤕᤧᤶᤔᤥ ᤁᤢᤒᤠ᤺ᤴᤈᤠᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤠᤱᤅᤠᤱ ᤂᤧᤴ ᤀᤡᤱᤓᤴ ᤆᤥ᤺ᤰᤔᤠ ᤗᤰᤐᤧᤴ ᤂᤥ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥
TIT 1:4 ᤀᤠᤴᤇᤡ᤹ ᤗᤳᤇᤠ ᤏᤛᤠ᤺ᤴᤏᤥ ᤛᤧᤰᤂᤠᤛ᤻ᤔᤠ ᤀᤠᤛ᤻ᤛᤠ᤺ ᤋᤡᤋᤛᤣ. ᤜᤠᤖᤠ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤁᤧᤒᤡᤖᤖᤥ॥
TIT 1:5 ᤂᤧᤏᤧ᤹ᤃ ᤀᤡᤱᤃᤠ᤹ ᤁᤪᤣᤋ ᤗᤠᤈᤣ᤹ᤀᤥ ᤔᤧᤴᤈᤢ᤺ᤳᤋᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤛᤢ᤺ᤵᤔᤠ ᤜᤧᤰᤁᤩᤠᤱ ᤐᤡᤏᤧᤒᤠ ᤀᤥ᤺ᤴᤎᤠᤰ ᤁᤢᤀᤡᤛᤡ᤺ᤰ ᤁᤠᤰ ᤐᤠᤱᤈᤢᤶᤜᤠ᤹ᤀᤥᤒᤠ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤛᤣ᤺ᤰᤕᤢᤰ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤐᤰᤌᤠᤏᤧᤒᤠᤖᤥ॥
TIT 1:6 ᤋᤢᤶᤗᤠᤶᤗᤥ᤺ᤒᤠᤱᤃ ᤑᤥᤋᤩᤠ ᤔᤧ᤺ᤴᤏᤣᤒᤠ ᤏᤢ ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ ᤐᤥ᤺ᤱᤔᤠ ᤐᤥ᤺ᤱ॥ ᤜᤧᤰᤁᤩᤠᤱ ᤁᤢᤛ᤻ᤛᤠ᤺ᤜᤠ᤹ᤀᤠᤱ ᤂᤷᤔᤧᤴᤍᤰ ᤏᤢ ᤐᤠ᤺ᤴ ᤔᤧᤱᤄᤧᤶᤔᤏᤠᤒᤠ ᤔᤧ᤺ᤴ. ᤁᤖ ᤏᤛᤠᤏᤡᤒᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥
TIT 1:7 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰ ᤁᤧᤄᤥ᤺ᤒᤠᤖᤥ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤃ ᤑᤥᤋᤩᤠ ᤔᤧ᤺ᤴᤏᤣᤒᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ–ᤀᤠᤱᤍᤡᤱ ᤁᤧᤗ᤹ᤒᤠ ᤏᤢ ᤜᤠᤖᤠ ᤁᤢᤛᤡᤰ ᤁᤧᤒᤥ᤺ᤰᤐᤠ. ᤌᤡ᤺ ᤛᤡᤈᤱᤘᤠ᤺ᤸᤗᤧ ᤁᤧᤔ᤺ᤒᤠ. ᤁᤧᤀᤠ᤺ᤶᤒᤠ. ᤑᤧᤴ ᤕᤠ᤺ᤶᤒᤰᤗᤠᤶ ᤕᤠᤱ ᤁᤧᤎᤰᤐᤠ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥
TIT 1:8 ᤁᤖ ᤂᤢᤏᤧ᤹ᤃ ᤋᤖᤣ ᤁᤧᤍᤥ᤺ᤒᤠ ᤏᤢ ᤏᤢ᤺ᤒᤠ ᤐᤠ᤺ᤴᤜᤠ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ ᤜᤠᤱᤃᤧᤶᤛᤠᤒᤠ. ᤛᤠᤶᤕᤥᤏᤡᤒᤠ. ᤛᤣᤛᤣ ᤏᤢ ᤜᤧᤴᤌᤡᤶᤒᤠ ᤐᤥ᤺ᤱᤔᤠᤀᤣ ᤐᤥ᤺ᤱᤗᤥ॥
TIT 1:9 ᤂᤢᤏᤧ᤹ᤃ ᤜᤢ᤹ᤛᤡᤱᤒᤠ ᤛᤧᤰᤂᤠᤛ᤻ᤔᤠ ᤐᤠ᤺ᤴᤈᤠᤰᤁᤥ ᤘᤠ᤹ᤔᤠᤀᤣ ᤐᤥ᤺ᤱ. ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤘᤣ᤹ᤜᤠ᤹ ᤛᤧᤰᤂᤠᤛ᤻ᤔᤠ ᤏᤡᤛᤠᤶᤗᤠᤶᤒᤠ ᤜᤠᤱᤜᤠᤱ ᤔᤧᤵᤔᤠᤛᤡ ᤏᤢ ᤂᤧᤴ ᤏᤡᤛᤠᤶ ᤁᤧᤀᤵᤐᤠᤜᤠ᤹ᤖᤧ ᤂᤢᤏᤡ᤹ ᤐᤣ᤺ᤴᤍᤡ᤺ᤴ ᤀᤥᤛᤣ᤺ᤴᤎᤠᤰᤔᤠ ᤛᤢᤰᤋᤢᤛᤡ᤹ᤖᤥ॥
TIT 1:10 ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤕᤖᤡᤰ ᤕᤢᤰᤁᤥ ᤔᤧᤴᤕᤢᤱᤔᤏᤠᤒᤠ ᤏᤢ ᤐᤠ᤺ᤴᤑᤠᤋᤪᤧᤜᤠ᤹. ᤘᤣ᤹ ᤀᤡᤱᤗᤧᤰ ᤁᤧᤔᤧᤵᤐᤠᤜᤠ᤹ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤀᤥ ᤕᤖᤡᤰᤃ ᤕᤜᤢᤍᤡ ᤜᤷᤍᤥ ᤜᤧᤰᤔᤠ ᤌᤡᤶ ᤏᤠ᤺ᤵᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤁᤧᤒᤠ᤺ᤵᤐᤠᤛᤡᤖᤥ॥
TIT 1:11 ᤂᤧᤱᤜᤠ᤹ᤃ ᤛᤫᤠ᤺ᤳ ᤆᤥ᤺ᤰᤔᤠᤛᤡᤀᤣ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤑᤧᤴ ᤕᤠ᤺ᤶᤒᤰᤗᤠᤶᤒᤠ ᤕᤠᤱᤛᤠᤁᤢᤴᤎᤣ ᤌᤰᤛᤧ ᤂᤧᤱᤜᤠ᤹ᤖᤧ ᤜᤢ᤹ᤔᤠ ᤔᤧᤴᤏᤢ᤹ᤔᤏᤠᤒᤠ ᤏᤡᤛᤠᤶ ᤔᤧᤜᤢ᤹ᤖᤢᤛᤡᤖ ᤁᤢᤓᤠ ᤜᤡᤶᤛᤕᤱᤜᤠ᤹ ᤁᤠᤰ ᤑᤧᤳᤔᤧᤗᤠ᤺ᤴᤍᤢᤛᤡᤖ ᤔᤧᤕᤠᤰᤗᤥ॥
TIT 1:12 ᤜᤧᤰᤁᤩᤠᤱ ᤁᤱᤃ ᤁᤪᤣᤋ ᤁᤧᤕᤢᤱᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤂᤠᤃᤧᤀᤡᤰᤐᤠᤎᤡᤰᤗᤧ ᤀᤠᤵᤑᤣ᤺ᤰ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤁᤪᤣᤋ ᤁᤧᤕᤢᤱᤒᤠᤜᤠ᤹ᤃ ᤛᤍᤠᤍᤡᤱ ᤀᤡᤱᤗᤧᤰ ᤁᤧᤒᤠ᤺ᤵᤐᤠ. ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠ ᤋᤠᤶᤓᤢᤱ ᤌᤰᤛᤠ ᤜᤧᤰᤋᤱᤒᤠ ᤜᤧᤰᤁᤩᤠᤱ ᤗᤧᤶᤛᤢᤘᤠᤒᤠ ᤋ᤺ᤰ ᤌᤧ᤺ᤰᤁᤣ ᤔᤧᤈᤥ᤺ᤰᤗᤥ॥”
TIT 1:13 ᤁᤴ ᤐᤠ᤺ᤳᤋᤧᤒᤠ ᤐᤠ᤺ᤴᤜᤠ᤹ᤃ ᤛᤧᤰᤂᤠᤀᤣᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤛᤠᤏᤡᤒᤠᤜᤠ᤹ ᤀᤠᤸᤗᤛᤠᤱ ᤏᤢ᤺ᤖᤡᤰᤁᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤑᤧ᤺ᤰᤋᤧᤛᤧ᤹ᤀᤥ॥
TIT 1:14 ᤜᤧᤰᤁᤩᤠᤱ ᤛᤧᤰᤂᤠ᤺ᤴ ᤁᤧᤀᤵᤐᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤈᤠ᤺ᤱᤅᤡᤴ ᤏᤢ ᤕᤜᤢᤍᤡ ᤂᤧᤍᤠ᤹ᤜᤠ᤹ ᤂᤧᤱᤜᤠ᤹ᤖᤧ ᤂᤧᤶᤔᤠ ᤔᤧᤗᤧᤖᤢ ᤔᤧᤍᤣ᤺ᤛᤢᤖᤖᤥ॥
TIT 1:15 ᤛᤣᤛᤣ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ᤏᤢ ᤁᤠᤰ ᤐᤠ᤺ᤴᤜᤠ᤹ ᤛᤣᤛᤣᤀᤣ ᤆᤥ᤺ᤰᤗᤥ. ᤁᤖ ᤆᤡ᤺ᤴᤈᤡ᤺ᤶᤒᤠ ᤏᤢ ᤏᤛᤠ᤺ᤴ ᤔᤧᤱᤃᤵᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤌᤣ᤺ᤴᤏᤠᤱ ᤛᤣᤛᤣ ᤔᤧᤈᤥ᤺ᤰᤁᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤏᤢ ᤂᤠᤛᤡᤱᤅᤡᤴ ᤑᤧᤳᤗᤠ᤹ᤖᤧᤀᤠᤱ ᤘᤠ᤹ᤖᤥ॥
TIT 1:16 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧ ᤗ᤹ᤖᤡᤰ ᤔᤧᤒᤠ᤺ᤳᤋᤢ᤹. ᤁᤖ ᤀᤠᤒᤠᤅᤣ ᤕᤠ᤺ᤶᤒᤰᤁᤥᤗᤠᤶ ᤔᤧᤏᤠ᤹ᤖᤢᤖᤥ॥ ᤂᤧᤱᤜᤠ᤹ᤃ ᤕᤠᤶᤃᤧᤛᤡᤱᤒᤠ ᤏᤢ ᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠ ᤔᤧᤈᤥ᤺ᤰᤁᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥
TIT 2:1 ᤁᤖ ᤂᤧᤏᤧ᤹ᤃ ᤛᤧᤰᤂᤠᤒᤠ ᤏᤢ᤺ᤒᤠ ᤏᤡᤛᤠᤶᤒᤢᤱ ᤗᤠ᤹ᤖᤢᤒᤠ ᤏᤡᤛᤠᤶ ᤜᤢ᤹ᤖᤧᤛᤧ᤹ᤀᤥ॥
TIT 2:2 ᤂᤍᤠᤰᤔᤡᤜᤠ᤹ ᤗᤢᤶᤗᤢᤶᤒᤠ ᤐᤥ᤺ᤱᤔᤠ. ᤋᤢᤶᤔᤩᤠᤜᤠᤱ ᤗᤠ᤹ᤖᤢᤛᤡᤒᤠ ᤀᤡᤱᤎᤠ᤺ᤱᤛᤠᤒᤠ ᤐᤥ᤺ᤱᤔᤠ. ᤏᤡᤱᤘᤠ᤹ ᤜᤠᤱᤃᤧᤶᤛᤡᤱ ᤁᤧᤈᤥ᤺ᤰᤐᤠ ᤐᤥ᤺ᤱᤔᤠ. ᤛᤧᤰᤂᤠᤒᤠ ᤏᤛᤠ᤺ᤴ ᤁᤧᤃᤵᤐᤠ. ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤜᤧᤰᤁᤩᤠᤱ ᤏᤠᤛᤡ ᤁᤧᤎ᤺ᤵᤐᤠ ᤐᤥ᤺ᤱᤔᤠ ᤐᤥ᤺ᤱ ᤔᤧᤳᤋᤧᤛᤧ᤹ᤀᤥ॥
TIT 2:3 ᤜᤧᤰᤁᤣᤗ᤹ᤖᤡᤰᤁᤣ ᤂᤍᤠᤰᤔᤡ ᤔᤧᤴᤇᤢᤔᤠᤜᤠ᤹ ᤛᤠᤶᤏᤡᤔᤠ ᤔᤧᤴᤇᤢᤔᤠ᤹. ᤗᤠ᤹ᤖᤢᤛᤡᤔᤠ ᤏᤢ ᤆᤠ᤺ᤳᤌᤡᤀᤡᤱᤎᤠ᤺ᤱᤛᤠᤔᤠ ᤐᤥ᤺ᤱᤔᤠ ᤐᤥ᤺ᤱ ᤔᤧᤳᤋᤧᤛᤧ᤹ᤀᤥ॥ ᤂᤧᤱᤜᤠ᤹ᤃ ᤔᤏᤠ ᤔᤧᤴᤈᤧᤱᤔᤏᤠᤔᤠ ᤏᤢ ᤆᤧ᤹ᤕᤠ ᤔᤧᤶᤒᤱᤔᤏᤠᤔᤠ ᤔᤧᤒᤥ᤺ᤱᤗ ᤐᤥ᤺ᤱ. ᤌᤡ᤺ ᤔᤛᤠᤱ ᤐᤥ᤺ᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤃ ᤘᤣ᤹ᤜᤠ᤹ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤢ᤹ᤔᤠᤛᤡ ᤐᤥ᤺ᤱᤗᤥ॥
TIT 2:4 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ᤏᤢ᤺ᤸᤗᤧ ᤐᤠ᤺ᤰᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤕᤧᤶᤒᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤡ᤺ᤶᤈᤡ ᤔᤧᤵᤔᤠᤛᤡ.
TIT 2:5 ᤏᤡᤱᤘᤠ᤹ ᤜᤠᤱᤃᤧᤶᤛᤡᤱ ᤁᤧᤈᤥ᤺ᤰᤔᤠ ᤐᤥ᤺ᤱᤔᤠ ᤏᤢ ᤛᤣᤛᤣ ᤁᤧᤘᤠ᤹ᤔᤠ. ᤏᤢ᤺ᤖᤡᤰᤁᤠᤱ ᤜᤡᤶᤎᤠ᤺ᤱ ᤁᤧᤍᤰᤔᤠ ᤐᤥ᤺ᤱᤔᤠ. ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤔᤠ ᤜᤧᤰᤁᤩᤠᤱ ᤂᤢᤏᤡ᤹ ᤕᤧᤶᤒᤠᤜᤠ᤹ᤖᤧ ᤕᤢᤰᤁᤥ ᤘᤠ᤹ᤔᤠ ᤐᤥ᤺ᤱ ᤑᤠ᤹ᤀᤠᤱ ᤜᤢ᤹ᤔᤠᤛᤡ ᤐᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤡᤏᤠ᤺ᤶ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥
TIT 2:6 ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤌᤠᤱᤒᤧᤴᤜᤠ᤹ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱ ᤁᤧᤈᤥ᤺ᤰᤐᤠ ᤐᤥ᤺ᤱᤔᤠ ᤐᤥ᤺ᤱ ᤑᤠ᤹ᤀᤠᤱ ᤂᤠᤜᤢᤴ ᤐᤡᤔᤠᤛᤡ ᤐᤥ᤺ᤱᤗᤥ॥
TIT 2:7 ᤂᤧᤏᤧ᤹ ᤀᤠᤵᤑᤣ᤺ᤰᤁᤠᤱ ᤏᤢ᤺ᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤒᤡ ᤐᤥ᤺ᤰᤂᤧ᤹. ᤜᤧᤰᤁᤩᤠᤱ ᤁᤧᤏᤡᤛᤠᤶᤔᤥ ᤏᤥᤏᤡᤱᤘᤠ᤹ᤛᤠᤒᤠ ᤏᤢ ᤋᤠ᤺ᤰᤐᤥᤛᤠᤒᤠ ᤐᤥ᤺ᤰᤂᤧ᤹ᤀᤥ॥
TIT 2:8 ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤧᤈᤠ᤺ᤳᤌᤡ ᤔᤧᤴᤍᤣ᤺ᤛᤢᤴᤗ ᤑᤠ᤹ᤀᤠᤱ ᤏᤢ᤺ᤒᤠ ᤐᤠ᤺ᤴ ᤐᤠᤖᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤒᤡᤑᤩᤢᤱᤒᤠᤜᤠ᤹ᤖᤧᤀᤠᤱ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤎᤠᤖᤥ॥
TIT 2:9 ᤛᤣᤘᤠᤖᤥᤒᤠᤜᤠ᤹ ᤂᤢᤏᤡ᤹ ᤜᤡᤶᤍᤠᤱᤒᤠᤜᤠ᤹ᤖᤧᤴ ᤀᤡᤱᤈᤠ᤺ᤱᤃᤧᤶᤒᤠ ᤐᤥ᤺ᤱᤔᤠ. ᤁᤠᤰ ᤐᤠ᤺ᤴᤏᤥ ᤂᤢᤏᤡ᤹ ᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤕᤠᤱᤏᤠ ᤔᤢᤖᤠᤍᤥᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤜᤢ᤹ᤖᤧᤛᤧ᤹ᤀᤥ॥
TIT 2:10 ᤂᤧᤱᤜᤠ᤹ ᤔᤧᤴᤄᤢ᤺ᤴᤏᤧᤴᤗ ᤁᤖ ᤁᤧᤖᤧᤰ ᤐᤠ᤺ᤴᤏᤥ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤧᤒᤥ᤺ᤱᤗ. ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤠᤰ ᤕᤠ᤺ᤶᤒᤰᤁᤥᤗᤠᤶ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤏᤡᤛᤠᤶᤔᤡᤸᤗᤧᤴ ᤔᤡᤱᤛᤥᤎᤠ᤺ᤱᤛᤥ ᤐᤥ᤺ᤖᤖᤥ॥
TIT 2:11 ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤛᤧᤴᤗᤵ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤀᤥᤛᤣ᤺ᤴᤎᤠᤰᤋᤢᤛᤡᤀᤠᤱ ᤘᤠ᤹ᤖᤥ॥
TIT 2:12 ᤂᤧᤴ ᤁᤢᤗᤢᤱᤃᤢᤶᤗᤠᤶᤒᤠ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤒᤠ ᤜᤡᤱᤔᤴ ᤏᤢ ᤀᤡᤰᤛᤠᤍᤡᤱᤒᤠ ᤕᤧᤶᤏᤡᤱᤘᤠ᤹ ᤋᤠᤍᤠᤒᤠ ᤐᤠ᤺ᤴᤜᤠ᤹ ᤗᤧᤵᤔᤠᤍᤣ᤺ᤔᤠ ᤐᤥ᤺ᤱ ᤑᤠ᤹ᤀᤠᤱ ᤀᤠᤜᤢ᤹ᤛᤡᤱᤅᤠᤱ ᤁᤴ ᤜᤡᤱᤔᤴᤏᤥ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠ. ᤁᤢᤍᤥ᤺ᤵᤔᤠ ᤏᤢ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤜᤡᤱᤔᤠ ᤑᤠ᤹ᤀᤠᤱ ᤀᤥ᤺ᤴᤎᤠᤰ ᤀᤠᤈᤥ᤺ᤰᤗᤥ॥
TIT 2:13 ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤐᤕᤶ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤔᤡᤔᤡᤍᤡᤱᤏᤢ ᤁᤢᤕᤢ᤺ᤔᤧᤴ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤀᤡᤸᤗᤧ ᤀᤠᤏᤡ᤹ ᤜᤠᤱᤜᤠᤱᤒᤠ ᤏᤡᤱᤛᤠᤱᤅᤡᤸᤗᤧ ᤁᤢᤎᤡᤶ ᤀᤠᤘᤠ᤹ᤖᤥ॥
TIT 2:14 ᤀᤠᤏᤡ᤹ ᤁᤠᤰ ᤗᤠᤕᤥᤗᤠᤶ ᤌᤧ᤹ᤔᤠᤛᤡ. ᤀᤠᤒᤠᤅᤣ ᤛᤣᤛᤣ ᤁᤢᤔᤏᤠ ᤆᤥ᤺ᤰᤔᤠᤛᤡ ᤜᤧᤰᤁᤩᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤛᤡᤰ ᤁᤧᤛᤶᤒᤠ ᤆᤥ᤺ᤰᤔᤠᤛᤡ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤂᤢᤏᤧ᤹ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤐᤡᤛᤡᤱᤗᤥ॥
TIT 2:15 ᤁᤠᤰ ᤕᤢᤰᤏᤢ ᤁᤴ ᤐᤠ᤺ᤴᤜᤠ᤹ ᤜᤢ᤹ᤖᤧᤛᤧ᤹. ᤜᤠᤱᤜᤠᤱ ᤔᤧᤳᤋᤧᤛᤧ᤹. ᤜᤧᤰᤁᤩᤠᤱ ᤑᤧ᤺ᤰᤋᤧᤛᤧ᤹॥ ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤴᤔᤧᤳᤏᤧᤴᤗᤖᤥ॥
TIT 3:1 ᤜᤠᤱᤃᤧᤈᤥ᤺ᤰᤐᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥ᤺ᤱ. ᤀᤡᤱᤈᤠ᤺ᤱᤃᤧᤶᤒᤠ ᤐᤥ᤺ᤱᤔᤠ ᤐᤥ᤺ᤱ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤛᤠᤱ ᤁᤠᤰ ᤐᤖᤡᤰᤗᤧᤴ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤠᤖᤡᤵ ᤐᤥ᤺ᤱᤔᤠ ᤐᤥ᤺ᤱ ᤑᤠ᤹ᤀᤠᤱ ᤏᤛᤠᤏᤡᤒᤠᤜᤠ᤹ ᤕᤠᤶᤔᤥ ᤔᤧᤳᤋᤧᤛᤧ᤹ᤀᤥ॥
TIT 3:2 ᤜᤧᤰᤁᤩᤠᤱ ᤘᤣ᤹ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤆᤧ᤹ᤕᤠ ᤐᤱᤔᤠ ᤔᤧᤏᤢ᤹ᤏᤧᤴ. ᤂᤣᤔᤠ ᤌᤰᤔᤠ ᤔᤧᤏᤢ᤹ᤏᤧᤴ. ᤁᤖ ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤐᤥ᤺ᤱ ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤏᤢ ᤏ᤺ᤶᤏ᤺ᤶᤔᤠᤱ ᤘᤠ᤹ᤔᤠ ᤐᤥ᤺ᤱ ᤗ᤹ᤖᤡᤰ ᤂᤧᤱᤜᤠ᤹ ᤔᤧᤳᤋᤧᤛᤧ᤹ᤀᤥ॥
TIT 3:3 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤀᤠᤱ ᤌᤡᤰᤗᤧᤱ ᤀᤍᤱ ᤏᤢ ᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ. ᤀᤡᤱᤗᤧᤰᤁᤣ. ᤕᤠᤶᤏᤡᤱᤘᤠ᤹ ᤋᤠᤍᤠ ᤏᤢ ᤕᤠᤶ ᤋᤠᤍᤠᤖᤧ ᤀᤠᤕᤢᤰᤋᤧᤀᤠᤱ ᤀᤠᤘᤕᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤡᤰ ᤐᤥ᤺ᤰᤔᤠ ᤏᤢ ᤏᤠᤜᤧᤶᤔᤠᤀᤥ ᤀᤠᤘᤕᤧ. ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤠᤈᤡ᤺ᤳᤋᤢᤶᤛᤡᤶᤔᤠᤱ ᤀᤠᤘᤕᤧᤖᤥ॥
TIT 3:4 ᤁᤖ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤢ᤹ᤔᤠᤴ ᤏᤢ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤧᤴ ᤌᤠ᤺ᤶᤛᤡᤱᤅᤡᤸᤗᤧ
TIT 3:5 ᤂᤢᤏᤧ᤹ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤋᤧᤖᤥ॥ ᤁᤱᤃ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤏᤢ᤺ᤒ᤻ ᤏᤢ᤺ᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰᤁᤡᤸᤗᤧ ᤐᤥ᤺ᤰᤂᤧᤒᤠ ᤔᤧ᤺ᤴᤗᤥ. ᤁᤖ ᤂᤢᤏᤧ᤹ ᤀᤠᤵᤑᤣ᤺ᤰ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤋᤠᤱᤀᤠᤛᤧ᤺ᤵᤋᤧᤒᤠᤖᤥ. ᤜᤧᤰᤁᤩᤠᤱ ᤛᤣᤛᤣᤔᤠᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤱ ᤔᤏᤠ ᤆᤥ᤺ᤰᤛᤧ ᤀᤠᤏᤡ᤹ ᤗᤠᤕᤥ᤺ᤴ ᤘᤠᤜᤵᤋᤢᤀᤠᤱ ᤁᤢᤛᤱ ᤜᤡᤱᤔᤴ ᤀᤠᤒᤡᤖᤧᤖᤥ॥
TIT 3:6 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤛᤣᤛᤣᤔᤠᤱᤅᤡᤴ ᤀᤠᤏᤡ᤹ᤀᤥ ᤐᤠᤱᤄᤢ
TIT 3:7 ᤜᤧᤰᤁᤣᤗ᤹ᤖᤡᤰ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤈᤥᤃᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤛᤧᤰᤂᤠ ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤏᤢ ᤗᤰ ᤁᤧᤄᤥ᤺ᤒᤠ ᤐᤥ᤺ᤱᤔᤠ ᤀᤠᤛᤢᤰᤋᤢᤶᤗᤥ॥
TIT 3:8 ᤁᤴ ᤐᤠ᤺ᤵᤔᤏᤠᤒᤠᤴ ᤛᤧᤰᤂᤠᤀᤣᤖᤥ॥ ᤁᤴ ᤐᤠ᤺ᤴᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤐᤳᤇᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤛᤡᤱᤛᤡᤱᤅᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥ᤺ᤱᤗᤥ॥ ᤁᤴ ᤐᤠ᤺ᤴᤜᤠ᤹ᤃ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤗᤠᤃᤡ ᤏᤢ᤺ᤒᤠ ᤏᤢ ᤁᤢᤓᤠ᤹ ᤁᤧᤒᤡᤒᤠ ᤐᤠ᤺ᤴᤗᤥ॥
TIT 3:9 ᤁᤖ ᤀᤍᤱ ᤐᤠ᤺ᤴᤎᤱᤜᤠ᤹. ᤁᤣ᤺ᤶ ᤁᤣ᤺ᤶᤒᤠ ᤔᤡᤱᤛᤪᤠᤜᤠ᤹ᤖᤧᤴ ᤐᤠ᤺ᤴᤎᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤔᤠ᤹ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤀᤥᤃᤵ ᤔᤧᤶᤒᤥ᤺ᤱᤔᤏᤠ ᤏᤢ ᤀᤡᤴᤎᤠ᤺ᤱ ᤔᤧ᤺ᤴᤏᤣᤒᤠ ᤐᤠ᤺ᤴᤗᤥ॥
TIT 3:10 ᤜᤧᤰᤁᤣᤗ᤹ᤖᤡᤰ ᤂᤧᤔᤠ᤹ ᤁᤧᤓᤥ᤺ᤱᤒᤠᤜᤠ᤹ ᤏᤡᤗᤧᤱ ᤌᤠᤖᤡᤰ ᤛᤠᤶᤍᤡᤱ ᤐᤡᤖᤧᤛᤧ᤹. ᤜᤧᤰᤁᤣᤛᤠᤱ ᤂᤧᤔᤠ᤹ ᤑᤥ᤺ᤱᤔᤠ ᤔᤧᤸᤗᤧᤖᤢᤴᤏᤧ ᤑᤠ᤹ᤃᤪ ᤂᤧᤴ ᤔᤏᤠᤜᤠ᤹ᤏᤢ ᤔᤠ᤺ᤱᤄᤠ ᤘᤕᤧ᤹ᤀᤥ॥
TIT 3:11 ᤜᤧᤰᤋᤱᤒᤠ ᤔᤏᤠᤜᤠ᤹ᤃ ᤑᤧᤳᤁᤧᤗᤠ᤹ᤒᤠ ᤏᤢ ᤗᤠᤕᤥᤒᤠ ᤔᤧᤈᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤡ᤹ ᤀᤠᤒᤠᤅᤣ ᤗᤠᤕᤥ᤺ᤸᤗᤧ ᤌᤡᤰᤋᤢᤛᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧ᤹ᤀᤥ॥
TIT 3:12 ᤀᤡᤱᤃᤠ᤹ ᤀᤠᤷᤋᤡᤔᤛᤧᤴ ᤔᤧ᤺ᤴᤇᤠᤱ ᤋᤢᤂᤡᤁᤛᤧᤴ ᤂᤧᤏᤧ᤹ᤀᤥ ᤐᤠᤱᤄᤢᤱᤗᤥ॥ ᤂᤧᤱᤜᤠ᤹ᤀᤥ ᤗᤳᤇᤠ᤺ᤴ ᤁᤧᤳᤏᤢᤔᤧ᤺ᤴᤏᤣ ᤂᤧᤏᤧ᤹ ᤁᤧᤛᤢᤰᤛᤢᤰ ᤏᤡᤁᤥᤐᤥᤗᤡᤛ ᤕᤧᤰᤕᤰᤁᤥ ᤑᤧᤶᤔᤠ ᤋᤶᤛᤡᤴ ᤆᤥᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤆᤢᤱ ᤘᤠ᤺ᤶᤔᤠᤀᤥᤒᤠ ᤋᤠᤵᤑᤧ᤺ᤶᤒᤠ ᤘᤠᤏᤠᤶᤔᤡᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤵᤔᤥᤀᤣ ᤘᤠ᤹ᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
TIT 3:13 ᤁᤢᤓᤠᤱᤛᤧᤶᤒᤠ ᤈᤡᤏᤛᤧᤴ ᤏᤢ ᤀᤵᤐᤥᤗᤥᤛᤧᤴ ᤂᤢᤴᤇᤡ᤹ ᤗᤠᤶᤍᤡ᤺ᤰᤁᤥ ᤌᤣᤀᤠᤱ ᤁᤧᤛᤠᤰᤐᤠᤀᤥ ᤔᤧᤎᤠᤛᤡᤴᤗ ᤑᤠ᤹ᤀᤠᤱ ᤁᤢᤓᤠ᤹ ᤐᤡᤖᤧᤛᤧ᤹ᤀᤥ॥
TIT 3:14 ᤜᤧᤰᤁᤩᤠᤱ ᤀᤠᤏᤡ᤹ ᤔᤏᤠᤜᤠ᤹ᤖᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤛᤧᤰᤂᤠᤀᤣ ᤁᤧᤛᤠᤰᤐᤠᤀᤥ ᤁᤧᤎᤠ᤺ᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤔᤧᤜᤢ᤹ᤛᤡᤱᤗᤖᤥ॥ ᤂᤧᤱᤜᤠ᤹ ᤀᤡᤖᤧᤶ ᤀᤡᤖᤧᤶ ᤗ᤹ᤖᤡᤰ ᤔᤧᤴᤘᤠ᤹ᤏᤧᤴᤗᤖᤥ॥
TIT 3:15 ᤀᤡᤱᤃᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤧᤏᤧ᤹ ᤛᤣᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤵᤐᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤠᤏᤡᤃᤧ ᤛᤣᤘᤠ ᤘᤠ᤹ᤔᤢ ᤔᤧᤳᤋᤧᤛᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤋᤢᤘᤠ ᤆᤥ᤺ᤰᤁᤠᤖᤥ॥
PHM 1:1 ᤀᤠᤴᤇᤡᤃᤧ ᤔᤡ᤺ᤶ ᤆᤢᤶ ᤏᤢ ᤛᤥᤛᤥᤖᤡᤰ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤑᤡᤗᤣᤔᤥᤏ. ᤀᤠᤏᤡ᤹ ᤏᤛᤠᤏᤡᤔᤠ ᤏᤢᤛᤠ᤹ ᤀᤵᤑᤡᤕᤠ. ᤀᤠᤴᤇᤡᤃᤧᤏᤢ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤀᤷᤂᤡᤐᤛ ᤜᤧᤰᤁᤩᤠᤱ ᤁᤧᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤏᤠᤛᤣ. ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧ᤺ᤛᤢᤱᤅᤡᤸᤗᤧ ᤐᤢᤱᤗᤠᤎᤠᤒᤠ ᤁᤧᤒᤥ᤺ᤱᤒᤠ ᤀᤡᤱᤃᤠ᤹ ᤐᤠᤘᤗ ᤏᤢ ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤁᤠᤛᤡᤃᤧᤖᤥ॥
PHM 1:3 ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤂᤡᤏᤡ᤹ ᤁᤧᤒᤡᤖᤡᤖ॥
PHM 1:4 ᤀᤠᤴᤛᤠ᤹ ᤑᤡᤗᤣᤔᤥᤴᤏᤣ. ᤂᤧᤏᤧ᤹ ᤁᤧᤗᤠᤃᤡ ᤋᤢᤘᤠ ᤆᤥ᤺ᤰᤁᤠᤸᤗᤧ ᤀᤡᤱᤃᤠ᤹ ᤛᤣᤘᤠ ᤆᤥᤃᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤍᤠᤍᤡᤱ ᤏᤥᤃᤧᤴ ᤐᤡᤖᤢᤱᤗᤥ.
PHM 1:5 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤧᤈᤥᤃᤢᤒᤠ ᤁᤧᤎᤢᤶᤒᤠ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤛᤣᤛᤣ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤀᤠᤖᤥ॥
PHM 1:6 ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤴ ᤘᤣ᤹ᤜᤠ᤹ ᤁᤧᤈᤧᤰᤋᤢᤛᤡᤸᤗᤧ ᤂᤪᤡᤛ᤻ᤋᤖᤧ ᤀᤠᤒᤡᤖᤧᤒᤠ ᤁᤠᤰ ᤔᤢ᤹ᤀᤡᤛᤠᤶᤜᤠ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥
PHM 1:7 ᤀᤠᤴᤛᤠ᤹ᤀᤣ. ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱ ᤜᤧᤰᤁᤩᤠᤱ ᤀᤠ᤺ᤴᤇᤡᤱᤔᤠ ᤂᤥ᤺ᤛᤢᤱᤅᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ ᤜᤠᤱᤜᤠᤱ ᤁᤧᤈᤥᤃᤢᤛᤡᤀᤠᤱ ᤁᤧᤘᤠ᤹ᤖᤥ॥
PHM 1:8 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤀᤥ ᤁᤧᤘᤠ᤹ᤒᤠ ᤀᤠᤕᤢᤰᤗᤠᤶ ᤂᤧᤏᤧ᤹ ᤌᤧᤔᤠ ᤆᤥ᤺ᤰᤔᤠ ᤐᤥ᤺ᤱ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤔᤠ ᤛᤢᤰᤏᤧᤛᤠᤱ.
PHM 1:9 ᤀᤡᤱᤃᤠ᤹ ᤂᤍᤠᤰᤔᤡ ᤐᤠᤘᤗ. ᤀᤠᤸᤗᤥ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤒᤢᤱᤗᤠᤌᤠᤒᤠ ᤁᤧᤒᤥ᤺ᤱᤒᤠᤸᤗᤧ. ᤀᤠᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤐᤣᤗᤡ ᤑᤠᤰᤏᤧ᤹ᤖᤥ॥
PHM 1:10 ᤀᤥᤏᤧᤛᤡᤔᤛᤧᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ ᤑᤠ᤹ᤀᤠᤱ ᤀᤡᤱᤃᤠ᤹ ᤂᤧᤏᤧ᤹ ᤐᤣᤗᤡ ᤑᤠᤰᤏᤧ᤹ᤖᤥ॥ ᤂᤢᤏᤧ᤹ᤃ ᤐᤢᤱᤗᤠᤜᤡᤶᤔᤥ ᤕᤠᤃᤠᤱᤅᤡᤸᤗᤧᤀᤣ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤏᤥ ᤋᤠᤖᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤛ᤻ᤛᤠ᤺ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
PHM 1:11 ᤀᤢᤴᤇᤥ᤺ᤴ ᤀᤥᤏᤧᤛᤡᤔᤛᤧᤱᤃ ᤂᤧᤏᤧ᤹ ᤁᤧᤗᤠᤃᤡ ᤌᤣᤀᤠᤱ ᤕᤠ᤺ᤶᤒᤰ ᤔᤧᤶᤒᤡᤔᤏᤠᤒᤠ ᤘᤕᤧ. ᤁᤖ ᤀᤠᤸᤗᤃ ᤀᤠᤴᤇᤡ᤹ ᤏᤧᤵᤔᤠᤱᤗᤧ ᤗᤠᤃᤡ ᤕᤠ᤺ᤶᤒᤰ ᤁᤧᤒᤡᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
PHM 1:12 ᤀᤡᤱᤃᤠ᤹ ᤂᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤔᤏᤠ᤺ᤴ ᤂᤧᤏᤧ᤹ᤀᤥ ᤕᤠᤱᤏᤠ ᤐᤠᤱᤄᤢᤱᤅᤠᤱ ᤘᤠ᤹ᤀᤠᤖᤥ॥
PHM 1:13 ᤛᤧᤰᤂᤠ᤺ᤸᤗᤧ ᤂᤢᤏᤧ᤹ᤃ ᤀᤡᤱᤃᤠ᤹ ᤁᤵᤔᤠ ᤀᤠᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤛᤢᤏᤠᤀᤡᤱ ᤛᤧ᤺ᤛᤢᤱᤒᤠᤸᤗᤧ ᤆᤥᤃᤢᤸᤗᤧ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤌᤩᤠᤱᤅᤠᤱ ᤕᤠᤰᤁᤠᤸᤗᤧ ᤂᤧᤏᤧ᤹ ᤁᤧᤗᤧᤰᤘᤠ ᤂᤢᤏᤧ᤹ ᤑᤠ᤹ᤔᤠ ᤛᤢᤰᤋᤠᤱᤒᤠᤖᤥ॥
PHM 1:14 ᤁᤖ ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤢ᤺ᤒᤠ ᤕᤠ᤺ᤶᤒᤰᤁᤡᤴ ᤛᤠᤰᤁᤧᤸᤗᤧᤰᤁᤠᤱ ᤔᤧ᤺ᤴ. ᤁᤖ ᤀᤠᤒᤠᤅᤣ ᤁᤧᤏᤡᤱᤘᤠ᤹ᤗᤠᤶᤒᤠ ᤐᤥ᤺ᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤴ ᤐᤠ᤺ᤴᤏᤥ ᤁᤧᤏᤡᤱᤘᤠ᤹ ᤔᤧ᤺ᤴᤏᤣ ᤀᤡᤱᤃᤠ᤹ ᤌᤣᤀᤠᤱ ᤆᤥ᤺ᤰᤔᤠ ᤀᤠᤏᤡᤱᤘᤠ᤹ ᤜᤥ᤺ᤵᤗᤥ॥
PHM 1:15 ᤂᤢᤏᤧ᤹ᤃ ᤛᤍᤠᤍᤡᤱᤗᤧ ᤗᤠᤃᤡ ᤂᤧᤏᤧ᤹ᤀᤥ ᤕᤠᤶᤔᤥ ᤏᤢ᤺ᤱᤔᤠ ᤋᤠ᤺ᤔᤠ ᤑᤠ᤹ᤀᤠᤱᤏᤧ ᤛᤵᤑᤠᤖᤧ ᤗᤠᤃᤡ ᤂᤧᤏᤧ᤹ᤏᤢ ᤛᤧᤴᤍᤧᤒᤠᤖᤧᤳᤇ᥄
PHM 1:16 ᤀᤠᤸᤗ ᤂᤢᤏᤧ᤹ᤃ ᤕᤥ᤺ᤰᤐᤠ ᤜᤧᤰᤁᤣ ᤔᤧ᤺ᤴᤗᤥ. ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤏᤡ᤹ ᤏᤛᤠᤏᤡᤒᤠ ᤏᤢᤛᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤒᤠᤴᤏᤢ᤺ᤸᤗᤧᤀᤠᤱ ᤂᤧᤏᤧ᤹ ᤏᤠᤛᤡᤱᤃᤧᤴ ᤌᤰᤁᤥ ᤏᤢ ᤍᤠᤱᤒᤠᤀᤥ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢᤒᤠ ᤏᤢᤛᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
PHM 1:17 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤀᤡᤱᤃᤠ᤹ ᤀᤠᤒᤠᤅᤣ ᤁᤧᤴᤈᤢᤶ ᤁᤧᤀᤡ᤺ᤳᤋᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤋᤠᤀᤠᤸᤗᤧ ᤗᤠᤱᤍᤠ᤺ᤰᤔᤠ ᤁᤧᤒᤡᤀᤠᤒᤠ ᤁᤢᤀᤡᤛᤡ᤺ᤰᤁᤣ ᤂᤢᤏᤧ᤹ᤀᤠᤱ ᤗᤠᤱᤍᤠ᤺ᤰᤔᤠ ᤐᤡᤖᤧ᤹ᤀᤥ॥
PHM 1:18 ᤂᤧᤸᤗᤧ ᤐᤠ᤺ᤴ ᤑᤣ᤺ᤴᤍᤢ ᤁᤧᤒᤡᤖᤧᤀᤠᤱ ᤘᤠ᤹ ᤀᤡᤃᤪ ᤂᤧᤏᤧ᤹ ᤁᤧᤛᤡᤱᤏᤠ᤺ᤳ ᤜᤢᤱᤔᤠ ᤁᤳᤋᤢ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤀᤠᤔᤡᤱᤅᤥ ᤛᤠᤵᤋᤧ ᤕᤢᤰᤂᤧ᤹ᤀᤥ॥
PHM 1:19 ᤀᤡᤱᤃᤠ᤹ ᤐᤠᤘᤗᤖᤧ ᤜᤢᤅᤢᤱ ᤐᤡᤏᤧ ᤑᤠ᤹ᤀᤠᤱ ᤀᤠᤵᤑᤣ᤺ᤰ ᤀᤠᤜᤢᤰᤁᤡᤸᤗᤧ ᤁᤴ ᤛᤠᤵᤋᤢᤱᤗ ᤐᤳᤋᤠᤖᤥ॥ ᤂᤧᤏᤧ᤹ ᤀᤠᤒᤠᤅᤣᤀᤠᤱ ᤂᤪᤡᤛ᤻ᤋᤀᤥ ᤁᤢᤛᤱ ᤜᤡᤱᤔᤴ ᤀᤡᤱᤃᤠ᤹ᤗᤠᤶᤒᤠ ᤁᤧᤄᤥ᤺ᤛᤢ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤴᤏᤧ᤹ᤀᤥ॥
PHM 1:20 ᤀᤠᤴᤛᤠ᤹ᤀᤣ. ᤍᤠᤱᤒᤠᤀᤥ ᤂᤢᤏᤧ᤹ ᤗᤠᤱᤍᤠ᤺ᤰᤋᤠᤱ ᤐᤡᤖᤠᤱᤅᤧ᤹. ᤜᤧᤰᤁᤣᤗ᤹ᤖᤡᤰ ᤂᤪᤡᤛ᤻ᤋᤀᤥ ᤀᤡᤱᤃᤠ᤹ ᤜᤠᤱᤜᤠᤱ ᤔᤧᤳᤋᤠᤱᤅᤧ᤹ᤀᤥ॥
PHM 1:21 ᤀᤡᤱᤃᤠ᤹ ᤛᤠᤵᤋᤢᤱᤗ ᤐᤳᤋᤠᤸᤗᤧᤛᤠ ᤐᤣᤗᤡ ᤑᤠᤰᤏᤧᤒᤠᤴ ᤏᤡᤛ᤻ᤛᤣ ᤁᤧᤈᤥᤃᤢ᤹. ᤜᤧᤰᤁᤩᤠᤱ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤧᤈᤥᤃᤢ᤹ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ॥
PHM 1:22 ᤜᤧᤰᤁᤩᤠᤱ ᤗᤳᤇᤠ ᤐᤠ᤺ᤴ ᤘᤠ᤹–ᤀᤡᤱᤃᤠ᤹ ᤀᤠᤕᤢᤱᤔᤠᤖᤧ ᤗᤠᤃᤡ ᤕᤠᤰᤑᤠᤎᤡᤰ ᤕᤠᤖᤡᤵ ᤆᤥᤃᤠᤱ ᤐᤡᤖᤠᤱᤅᤧ᤹. ᤌᤣᤀᤠᤱᤓᤧᤸᤗᤧ ᤁᤧᤈᤥᤃᤢᤒᤠ ᤋᤢᤘᤠ᤺ᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ᤀᤥ ᤏᤢ᤺ᤱᤅᤠ ᤋᤠᤀᤠᤒᤡ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥
PHM 1:23 ᤂᤪᤡᤛ᤻ᤋ ᤕᤧᤛᤢᤀᤥ ᤀᤡᤱᤃᤠ᤹ᤏᤢ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤠ᤺ᤒᤠ ᤀᤡᤐᤠᤑᤪᤠᤛᤖᤧ ᤂᤧᤏᤧ᤹ ᤛᤣᤘᤠ ᤁᤧᤜᤠᤰᤋᤧᤀᤠᤱ ᤘᤠ᤹ᤖᤥ॥
PHM 1:24 ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ᤏᤢ ᤛᤥᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤷᤁᤢᤛ. ᤀᤖᤡᤛ᤻ᤋᤠᤷᤂᤛ. ᤍᤣᤔᤠᤛ ᤏᤢ ᤗᤢᤁᤠᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥
PHM 1:25 ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥
HEB 1:1 ᤀᤢᤴᤇᤣ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶᤒᤠ ᤀᤠᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤏᤢ ᤕᤖᤡᤰᤗᤧᤱ ᤐᤖᤡᤰ ᤐᤖᤡᤰᤗᤠᤶᤒᤠ ᤐᤠᤖᤧᤖᤥ॥
HEB 1:2 ᤁᤖ ᤀᤠᤸᤗ ᤁᤴ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥᤃ ᤂᤢᤏᤧ᤹ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤗᤠᤶᤒᤠ ᤀᤠᤏᤡ᤹ᤏᤢ ᤐᤠᤖᤧᤀᤠᤱ ᤘᤠ᤹ᤖᤥ॥ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤱᤃ ᤂᤢᤏᤧ᤹ ᤁᤠᤰ ᤐᤠ᤺ᤴᤏᤥ ᤗᤰ ᤁᤧᤄᤥ᤺ᤒᤠ ᤆᤥᤃᤢᤀᤠᤱ ᤂᤢᤏᤧ᤹ᤗᤠᤶᤒᤠᤀᤣ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴᤏᤠᤱ ᤏᤧᤛ᤻ᤛᤢᤖᤥ॥
HEB 1:3 ᤁᤴ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤗᤧᤰᤗᤥ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤳᤏᤠ᤺ᤸᤗᤧ ᤁᤢᤀᤡᤳᤇᤠᤵᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤔᤢᤰᤛᤠᤶᤃᤧᤴ ᤁᤢᤒᤠ᤺ᤴᤈᤠᤰᤗᤠᤶᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤐᤠ᤺ᤴᤜᤠ᤹ ᤘᤠ᤹ᤖ ᤕᤠ᤺ᤴᤍᤢ᤹ᤖᤥ॥ ᤂᤢᤏᤧ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤠᤕᤥᤗᤠᤶ ᤛᤣᤛᤣᤛᤠᤱᤛᤠᤱ ᤐᤥ᤺ᤱᤔᤠ ᤋᤱᤃᤠᤶ ᤆᤥᤃᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤛᤡᤱᤗᤥ॥
HEB 1:4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤆᤥᤃᤢᤀᤠᤱ ᤘᤠ᤹॥ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤡᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤔᤡᤱ ᤂᤢᤏᤧ᤹ ᤐᤡᤖᤢᤀᤠᤱ ᤘᤠ᤹ᤖᤥ॥
HEB 1:5 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤔᤠᤱᤗᤠᤀᤡᤱᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤋᤢᤴᤇᤡᤴ. “ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤏᤧ ᤑᤠ᤹ᤀᤠᤱ ᤀᤡᤱᤓᤥ᤺ᤛᤢᤱᤗᤥ. ᤀᤠᤀᤡᤴ ᤀᤡᤱᤃᤠ᤹ ᤂᤧᤏᤧ᤹ ᤐᤠᤏᤢᤍᤡᤱ ᤁᤧᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥” ᤕᤠᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤀᤡᤱᤃᤠ᤹ᤃ ᤂᤢᤏᤧ᤹ ᤐᤠᤏᤢᤍᤡᤱ ᤁᤢᤶᤒᤠ ᤐᤥ᤺ᤱᤅᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ ᤐᤥ᤺ᤱᤗᤥ॥”
HEB 1:6 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠᤖᤢᤸᤗᤧ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ᤹. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤛᤣᤘᤠ ᤔᤧᤈᤥᤃᤢᤖᤖᤥ॥”
HEB 1:7 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢ᤹. “ᤀᤡᤱᤃᤠ᤹ᤃ ᤀᤠᤔᤠᤱᤗᤠᤀᤡᤱᤒᤠᤜᤠ᤹ ᤛᤢᤖᤡᤳ ᤁᤣᤈᤱ ᤆᤥᤃᤢᤱᤛᤡᤱ. ᤜᤧᤰᤁᤩᤠᤱ ᤀᤠᤛᤣᤘᤠᤖᤥᤒᤠᤜᤠ᤹ ᤔᤡᤖᤠ᤺ᤰ ᤆᤥᤃᤢᤱᤛᤡᤱᤗᤥ॥”
HEB 1:8 ᤁᤖ ᤂᤢᤏᤧ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤜᤠᤱᤈᤢᤶᤔᤡᤱᤃ ᤛᤍᤠᤍᤡᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤠᤱᤋᤰᤁᤠ᤺ᤳᤋᤡᤸᤗᤧᤃ ᤁᤧᤔᤏᤠᤜᤠ᤹ᤀᤥ ᤛᤠᤶᤕᤥᤏᤡᤔᤠᤴᤏᤢ ᤜᤠᤱ ᤁᤧᤈᤥᤃᤢ᤹ᤖᤥ॥
HEB 1:9 ᤂᤧᤏᤧ᤹ ᤛᤠᤶᤕᤥᤏᤡᤔᤠᤴ ᤔᤡ᤺ᤶᤈᤡ ᤁᤧᤔᤧᤳᤋᤢ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠᤴ ᤁᤧᤈᤡ᤺ᤳᤋᤢᤀᤠᤱ ᤘᤠ᤹॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤛ᤺ᤳᤋᤧᤀᤠᤱ ᤏᤡ᤺ᤱᤃᤣ᤺ᤸᤗᤧ ᤔᤠᤱᤌᤢᤰᤔᤠ ᤁᤧᤒᤡᤖᤧᤀᤠᤱ ᤁᤧᤴᤈᤢᤶᤜᤠ᤹ᤏᤢ᤺ᤸᤗᤧᤀᤠᤱ ᤌᤠ᤺ᤱ ᤁᤧᤕᤢᤰᤂᤧᤖᤥ॥”
HEB 1:10 ᤂᤢᤏᤧ᤹ ᤕᤠᤶᤔᤥ ᤐᤠ᤺ᤳᤋᤢ᤹. “ᤕᤜᤘᤣ ᤍᤠᤱᤒᤣ. ᤋᤥᤗᤡᤱᤛᤥᤔᤢᤀᤥ ᤂᤧᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤧᤶᤓᤥᤃᤧᤴ ᤐᤠᤱᤕᤰ ᤁᤧᤏᤧᤛ᤻ᤛᤢ ᤜᤧᤰᤁᤩᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤁᤡᤴ ᤁᤧᤜᤢᤰᤁᤡᤸᤗᤧ ᤁᤧᤈᤥᤃᤢᤖᤥ॥
HEB 1:11 ᤂᤧᤱᤜᤠ᤹ ᤔᤧᤔᤧᤰ ᤔᤧᤒᤣ᤺ᤰ ᤁᤖ ᤂᤧᤏᤧ᤹ ᤛᤍᤠᤍᤡᤱ ᤁᤧᤘᤠ᤹ᤖᤥ॥ ᤂᤧᤱᤜᤠ᤹ᤃ ᤆᤠᤱᤍᤣ᤺ᤳ ᤁᤢᤀᤡᤛᤡ᤺ᤰ ᤔᤧᤕ᤺ᤳ ᤔᤧᤍᤧ᤺ᤱ ᤔᤧᤒᤣ᤺ᤰᤗᤥ॥
HEB 1:12 ᤂᤧᤏᤧ᤹ ᤗᤃᤣ᤺ᤳᤋᤡᤴ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤁᤧᤓᤠᤰᤋᤢᤛᤡᤖᤥ ᤜᤧᤰᤁᤩᤠᤱ ᤁᤢᤍᤪᤧ᤺ᤰ ᤆᤠᤱᤍᤣ᤺ᤳ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ ᤗᤠᤵᤁᤧᤓᤢᤛᤢᤛᤡᤖᤥ॥ ᤁᤖ ᤂᤧᤏᤧ᤹ᤃ ᤀᤠᤵᤑᤠᤸᤗᤧᤀᤠᤱ ᤁᤧᤴᤗᤧᤰᤛᤡᤱᤅᤡᤴ ᤜᤧᤰᤁᤩᤠᤱ ᤂᤧᤏᤧ᤹ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤖᤥ॥”
HEB 1:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤁᤢᤀᤡᤛᤡ᤺ᤰ ᤀᤠᤳᤋᤡᤴ ᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤋᤢᤴᤇᤡᤴᤗᤥ. “ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ ᤁᤧᤕᤢᤰᤁᤥ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤅᤧ᤹ᤀᤥ॥”
HEB 1:14 ᤁᤖ ᤔᤠᤱᤗᤠᤀᤡᤱᤒᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤴᤗᤵ ᤐᤡᤖᤢᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤛᤠᤶᤛᤡᤖᤰᤗᤥ॥
HEB 2:1 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤀᤠᤄᤧᤵᤛᤢᤶᤒᤠ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤧᤰᤂᤠ᤺ᤴ ᤀᤠᤸᤗᤛᤠᤱ ᤕᤖᤡᤰ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤐᤡᤔᤠᤀᤣ ᤐᤥ᤺ᤱᤗᤥ. ᤔᤧ᤺ᤴᤏᤧ ᤑᤠ᤹ᤃᤪ ᤀᤠᤏᤡ᤹ ᤂᤧᤵᤔᤥᤗᤠᤶ ᤀᤠᤗᤧ᤺ᤱ ᤀᤠᤒᤣ᤺ᤰᤗᤥ॥
HEB 2:2 ᤌᤣᤀᤠᤱᤓᤧᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤀᤡᤱᤔᤧᤓᤥ᤺ᤛᤢᤒᤠ ᤀᤡᤱᤄᤱᤅᤡᤴ ᤛᤧᤰᤂᤠ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤴ ᤁᤧᤓᤣ᤺ᤶᤒᤠᤜᤠ᤹ ᤏᤢ ᤀᤡᤱᤈᤠ᤺ᤱ ᤂᤧᤶᤔᤠ ᤔᤧᤴᤍᤧᤶᤏᤠᤒᤠᤜᤠ᤹ ᤁᤧᤖᤧᤰ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤂᤢᤶᤍᤡᤱ ᤐᤡᤖᤢᤛᤡ॥
HEB 2:3 ᤀᤠᤏᤡ᤹ᤀᤠᤱ ᤁᤴ ᤐᤕᤶ ᤕᤶᤒᤠ ᤛᤧᤴᤗᤵᤐᤡᤴ ᤀᤠᤏᤠ᤹ᤖᤢᤶᤏᤧ ᤑᤠ᤹ᤃᤪ ᤀᤠᤰᤂᤣᤗ᤹ᤖᤡᤰ ᤋᤠᤱᤔᤠ ᤀᤠᤛᤢᤰᤐᤠᤒᤣ᥅ ᤁᤴ ᤛᤧᤴᤗᤵᤐᤡᤴ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤠᤰᤏᤢ ᤋᤃᤡ ᤀᤡᤱᤓᤥ᤺ᤛᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶ ᤁᤧᤄᤧᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤀᤠᤏᤡ᤹ ᤏᤡ᤺ᤴᤎᤥ ᤀᤠᤶᤈᤥᤃᤧ ᤀᤠᤶᤒᤡᤖᤧᤀᤠᤱ ᤘᤠ᤹ᤖᤥ॥
HEB 2:4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤂᤢᤏᤧ᤹ ᤆᤥᤃᤢᤒᤠ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤗᤠᤶᤒᤠ ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤏᤛᤠᤏᤡᤒᤠᤜᤠ᤹ ᤜᤠ᤺ᤳᤋᤢᤛᤡᤒᤠ ᤛᤣᤛᤣᤔᤠᤱᤅᤡᤸᤗᤧᤴ ᤐᤷᤎᤠ᤺ᤶᤜᤠ᤹ᤗᤠᤶᤒᤠ ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤖᤥ॥
HEB 2:5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤁᤴ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤒᤡᤖᤢᤴᤇᤡᤴᤗᤥ॥
HEB 2:6 ᤁᤖ ᤛᤠᤶᤕᤥᤛᤠᤵᤗᤠᤀᤥ ᤌᤡᤰ ᤋᤧᤴᤏᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤔᤏᤠ᤺ᤴ ᤌᤣᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ. ᤀᤡᤃᤪ ᤔᤧᤴᤇᤠᤶ ᤕᤠᤵᤔᤡ᤺ᤴ ᤜᤠ᤺ᤳᤋᤠᤱ ᤁᤶᤒᤪᤠᤱ ᤁᤧᤔᤧᤳᤋᤢᤒᤣ᥅
HEB 2:7 ᤂᤧᤱᤜᤠ᤹ᤃ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ᤺ᤸᤗᤧ ᤆᤩ᤹ᤖᤰ ᤕᤥᤕᤥᤰ ᤁᤧᤈᤥᤃᤢᤛᤡ. ᤂᤧᤱᤜᤠ᤹ ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱᤗᤧ ᤋᤡᤆ᤺ᤴ ᤁᤧᤄᤢ᤺ᤰᤋᤢᤛᤡᤖᤥ॥
HEB 2:8 ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤕᤢᤰᤂᤢᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤕᤢᤰᤂᤢᤸᤗᤧ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤍᤠᤖᤢᤴᤒᤠ ᤌᤣᤀᤠᤱ ᤜᤥ᤺ᤵᤗᤥ॥ ᤜᤧᤰᤁᤣᤛᤠᤱ ᤁᤴ ᤕᤧᤶᤔᤥ ᤁᤠᤰ ᤐᤠ᤺ᤴᤜᤠ᤹ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤒᤠ ᤀᤠᤴᤏᤡ᤺ᤛᤢᤶᤔᤡᤴᤗᤥ॥
HEB 2:9 ᤁᤖ ᤀᤠᤏᤡ᤹ ᤕᤧᤛᤢ᤺ᤴ ᤀᤠᤏᤡ᤺ᤛᤢᤶᤗᤥ॥ ᤂᤢᤏᤧ᤹ᤃ ᤔᤠᤱᤗᤠᤀᤡᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤆᤩ᤹ᤖᤰ ᤕᤥᤕᤥᤰ ᤘᤕᤧ. ᤀᤠᤸᤗᤃ ᤂᤢᤏᤧ᤹ ᤛᤡ᤺ᤔᤧᤴᤏᤥ ᤋᤢᤰᤂᤣ ᤆᤩᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱᤅᤡᤸᤗᤧᤴ ᤋᤡᤆ᤺ᤴ ᤂᤢ᤺ᤰᤋᤢᤀᤠᤱ ᤘᤠ᤹॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤂᤢᤏᤧ᤹ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡ ᤛᤡ᤺ᤔᤧᤴ ᤛᤠ᤹ᤖᤢᤖᤥ॥
HEB 2:10 ᤁᤠᤰ ᤐᤠ᤺ᤴᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ. ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤜᤠ᤹ᤃ ᤁᤢᤔᤢᤰᤛᤠᤶᤗᤠᤶᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤏᤧᤛ᤻ᤛᤧᤒᤠᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢ᤺ᤴ ᤀᤡᤏᤥᤃᤧᤴ ᤋᤢᤰᤂᤣᤗᤠᤶᤒᤠ ᤁᤢᤗᤡᤱᤎᤥ ᤁᤧᤳᤋᤢᤸᤗᤧ ᤏᤢ᤺ᤒᤠ ᤏᤢ ᤁᤢᤍᤱᤒᤠ ᤐᤠ᤺ᤴ ᤆᤥᤃᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤧᤛᤢᤖᤧ ᤕᤖᤡᤰ ᤔᤢ᤹ᤀᤡᤍᤠᤱᤛᤠᤜᤠ᤹ ᤛᤧᤴᤗᤵᤐᤥ ᤗᤠᤶᤗᤥᤛᤢᤛᤡ᤹ᤀᤠᤱ ᤁᤢᤔᤡᤔᤡᤍᤡᤱᤅᤡᤸᤗᤧᤴ ᤗᤰ ᤁᤧᤄᤥ᤺ᤒᤠ ᤔᤧᤒᤥ᤺ᤰᤂᤧᤖᤥ॥
HEB 2:11 ᤔᤏᤠᤜᤠ᤹ ᤗᤠᤕᤥᤗᤠᤶ ᤛᤣᤛᤣ ᤁᤧᤈᤥ᤺ᤰᤐᤠ ᤕᤧᤛᤢ᤺ᤴ ᤏᤢ ᤛᤣᤛᤣ ᤁᤧᤒᤥ᤺ᤱᤒᤠᤜᤠ᤹ᤃ ᤗᤳᤌᤡᤰ ᤜᤡᤶᤛᤕᤱᤛᤡᤖᤥ. ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤀᤠᤴᤛᤠ᤹ᤛᤡ ᤔᤧᤵᤔᤠᤛᤡ ᤂᤢᤏᤧ᤹ ᤔᤧᤏᤢ᤺ᤴᤏᤧᤴᤗᤥ॥
HEB 2:12 ᤂᤢᤏᤧ᤹ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶᤔᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤳᤋᤢ᤹. “ᤀᤡᤱᤃᤠ᤹ ᤁᤧᤔᤡᤱᤅᤡᤴ ᤀᤠᤴᤛᤠ᤹ᤛᤡ ᤀᤡᤱᤓᤥ᤺ᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤁᤧᤔᤏᤠ ᤗᤢᤶᤔᤥ ᤀᤡᤱᤃᤠ᤹ ᤏᤧᤶᤓᤥᤃᤧᤴ ᤁᤧᤏᤠᤖᤠ ᤑᤥ᤺ᤛᤢᤱᤗᤥ॥”
HEB 2:13 ᤜᤧᤰᤁᤩᤠᤱ ᤕᤠᤶᤔᤥ ᤐᤠ᤺ᤳᤋᤢ᤹. “ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤛᤠ᤺ᤴ ᤕᤢᤰᤂᤢᤱᤗᤥ॥” ᤂᤢᤏᤧ᤹ ᤕᤠᤶᤔᤥᤀᤠᤱ ᤐᤠ᤺ᤳᤋᤢ᤹. “ᤀᤡᤱᤃᤠ᤹ ᤁᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤠᤱᤒᤠ ᤔᤏᤠᤜᤠ᤹ᤏᤢ ᤘᤠ᤹ᤀᤠᤖᤥ॥”
HEB 2:14 ᤂᤧᤴ ᤔᤏᤠᤜᤠ᤹ᤖᤧᤃ ᤏᤠᤛᤡᤱᤃᤧᤴ ᤌᤰ ᤔᤧᤃᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴᤏᤠᤱ ᤂᤧᤱᤜᤠ᤹ ᤜᤧᤰᤁᤣᤀᤣ ᤐᤥ᤺ᤰᤂᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤒᤠᤅᤣ ᤁᤢᤛᤡ᤺ᤔᤧᤴᤗᤠᤶᤒᤠ ᤛᤡ᤺ᤔᤧᤸᤗᤧᤴ ᤔᤢᤰᤛᤠᤶ ᤁᤧᤃᤵᤐᤠ ᤔᤠᤑᤧᤴᤛᤠᤶᤔᤡᤴ ᤔᤧᤶᤓᤤ ᤆᤥᤃᤢ॥
HEB 2:15 ᤜᤧᤰᤁᤩᤠᤱ ᤛᤡ᤺ᤔᤧᤴᤏᤢ ᤁᤧᤃᤡ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤁᤡ᤺ᤔᤧᤸᤗᤧ ᤜᤡᤱᤜᤡᤱ ᤌᤠᤖᤡᤰ ᤕᤥ᤺ᤰ ᤆᤥᤃᤢᤛᤡᤒᤠᤜᤠ᤹ ᤆᤥ᤺ᤰᤕᤢᤶᤓᤥ ᤐᤡᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤜᤧᤰᤁᤣ ᤆᤥᤃᤢᤒᤠᤖᤥ॥
HEB 2:16 ᤛᤧᤰᤂᤠ᤺ᤸᤗᤧᤃ ᤂᤢᤏᤧ᤹ ᤔᤠᤱᤗᤠᤀᤡᤱᤒᤠᤜᤠ᤹ᤃ ᤔᤧ᤺ᤴ. ᤁᤖ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤏᤧ ᤁᤶᤒᤪᤠᤱ ᤔᤧᤳᤋᤢᤛᤡ᤹ᤖᤥ॥
HEB 2:17 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤁᤧᤈᤥ᤺ᤰᤐᤠ ᤗᤢᤱᤃᤢᤶᤛᤠᤒᤠ ᤏᤢ ᤏᤛᤠ᤺ᤴᤛᤠᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤛᤧ ᤁᤠᤰ ᤐᤖᤡᤰᤗᤧ ᤀᤠᤏᤡ᤹ ᤜᤧᤰᤁᤣ ᤐᤥ᤺ᤱᤔᤠ ᤐᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤕᤥ᤺ᤸᤗᤧᤴ ᤗᤧᤵᤔᤡ ᤐᤡᤔᤠ ᤁᤧᤛᤢᤰᤐᤠ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥
HEB 2:18 ᤂᤢᤏᤧ᤹ ᤜᤱᤛᤠ᤹ᤔᤥ ᤌᤩᤧᤀᤠᤱ ᤀᤠᤒᤠᤅᤣ ᤋᤢᤰᤂᤣ ᤆᤩᤧᤒᤠᤸᤗᤧ ᤆᤥᤃᤢᤸᤗᤧ ᤜᤱᤛᤠ᤹ᤔᤥ ᤁᤧᤎᤠ᤺ᤒᤠᤜᤠ᤹ᤃ ᤂᤢᤏᤧ᤹ ᤁᤢᤓᤠ᤹ ᤐᤡᤔᤠ ᤛᤢᤰᤋᤢᤛᤡ᤹ᤖᤥ॥
HEB 3:1 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤛᤣᤛᤣ ᤁᤢᤔᤏᤠ ᤐᤥ᤺ᤱᤔᤠᤀᤠᤱ ᤛᤠᤱᤃᤪᤠᤶᤐᤣᤍᤠᤱ ᤐᤣ᤺ᤰᤔᤠ ᤗᤰ ᤁᤧᤄᤥ᤺ᤛᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤛᤣ᤺ᤰᤕᤢᤰᤔᤡᤒᤠ ᤏᤢ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤑᤠ᤹ᤀᤠᤱ ᤋᤧᤴᤍᤡᤱ ᤀᤠᤈᤥᤃᤢᤶᤒᤠ ᤕᤧᤛᤢ᤺ᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
HEB 3:2 ᤔᤥᤛᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤒᤠ ᤁᤢᤀᤡᤛᤡ᤺ᤰ ᤕᤧᤛᤢ᤺ᤴᤏᤠᤱ ᤂᤢᤏᤧ᤹ ᤛᤣ᤺ᤰᤕᤢᤰ ᤁᤧᤈᤥ᤺ᤰᤐᤠᤸᤗᤥ ᤋᤠ᤺ᤰᤐᤥᤛᤠᤒᤠ ᤐᤥ᤺ᤰᤂᤧ॥
HEB 3:3 ᤜᤡᤶᤔᤡᤴᤏᤢ᤺ᤸᤗᤧᤀᤠᤱ ᤜᤡᤶ ᤁᤧᤈᤥ᤺ᤰᤐᤧᤴ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤧᤛᤢ᤺ᤴ ᤔᤥᤛᤠ᤺ᤴᤏᤢ᤺ᤸᤗᤧᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱᤛᤠᤒᤠ ᤐᤥ᤺ᤰᤂᤧᤖᤥ॥
HEB 3:4 ᤁᤧᤖᤧᤰ ᤜᤡᤶᤜᤠ᤹ᤃ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠᤖᤥ. ᤁᤖ ᤁᤠᤰ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥
HEB 3:5 ᤀᤠᤸᤗ ᤔᤥᤛᤠ᤺ᤱᤃ ᤁᤧᤍᤠ᤺ᤒᤠ ᤕᤧᤶᤔᤥ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤛᤣᤘᤠᤖᤥᤒᤠ ᤘᤕᤧᤖᤥ॥
HEB 3:6 ᤁᤖ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥ ᤏᤛᤠ᤺ᤴᤛᤠᤒᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤖᤥ॥ ᤂᤪᤡᤛ᤻ᤋᤀᤥᤒᤠ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤏᤡᤱᤛᤠᤱᤅᤡᤴ ᤔᤧᤸᤗᤧᤳᤋᤣ ᤜᤠᤱᤜᤠᤱᤅᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤛᤕᤱᤅᤥᤒᤠᤛᤡᤖᤥ॥
HEB 3:7 ᤂᤧᤸᤗᤧ ᤆᤥᤃᤢᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤜᤧᤰᤁᤣ. “ᤀᤠᤀᤡᤴ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤧᤄᤧᤵᤛᤢᤶᤔᤡᤸᤗᤧ
HEB 3:8 ᤀᤣ᤺ᤰᤛᤠᤍᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤱᤔᤧᤛᤠ᤹ᤖᤢᤒᤠ ᤕᤧᤶᤔᤥ ᤒᤡᤑᤩᤢᤱ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤒᤠᤴ ᤁᤧᤎᤢᤱᤒᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥
HEB 3:9 ᤂᤧᤵᤔᤥ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤏᤠᤛᤡ ᤌ᤺ᤵᤔᤠᤴ ᤔᤧᤛᤠ᤹ᤖᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤱᤒᤣ ᤗᤡᤒᤥ᤺ᤱ (᥊᥆) ᤌᤠᤖᤡᤰ ᤆᤥᤃᤢᤱᤒᤠ ᤀᤠᤕᤠ᤺ᤶᤒᤰᤁᤡᤴ ᤔᤧᤏᤡ᤺ᤛᤢ॥
HEB 3:10 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤌᤠ᤺ᤰᤜᤠ᤹ᤏᤢ ᤀᤡᤱᤃᤠ᤹ ᤀᤠᤛᤡᤰ ᤐᤥᤃᤧᤀᤠᤱ ᤐᤠ᤺ᤳᤋᤢᤱ. ‘ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤠᤴ ᤛᤍᤠᤍᤡᤱ ᤋᤠᤵᤐᤧ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤗᤠᤶᤔᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤔᤧᤘᤠ᤹ᤖᤥ॥’
HEB 3:11 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤀᤰᤂᤣᤗ᤹ᤖᤡᤰ ᤔᤠᤱᤜᤧᤰᤛᤡᤱᤅᤠᤱᤗᤥ. ‘ᤂᤧᤱᤜᤠ᤹ᤃ ᤀᤡᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤏᤠ᤺ᤶᤛᤡᤱᤔᤠ ᤋᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥’”
HEB 3:12 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤋᤠᤵᤑᤧ᤺ᤶᤒᤠ ᤏᤢ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤂᤡᤏᤡ᤹ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤔᤠ᤺ᤱᤄᤠ ᤁᤧᤴᤈᤥᤃᤡᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥
HEB 3:13 “ᤀᤠᤀᤡᤴ” ᤘᤠ᤹ᤖ ᤌᤠᤖᤡᤰ ᤂᤡᤏᤡ᤹ᤃ ᤌᤡᤰᤕᤠ᤺ᤴᤎᤰ ᤜᤠᤱᤜᤠᤱ ᤔᤧᤳᤇᤡᤱᤅᤧᤶᤔᤧ᤹ ᤜᤧᤰᤁᤣᤗ᤹ᤖᤡᤰ ᤗᤠᤕᤥ᤺ᤸᤗᤧ ᤁᤢᤀᤡᤱᤗᤧᤰᤁᤥ ᤁᤧᤴᤎᤩᤧ᤹ᤀᤡᤴᤗ ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤔᤧᤎ᤺ᤵᤛᤢᤴᤗᤖᤥ॥
HEB 3:14 ᤀᤠᤏᤡ᤹ ᤋᤃᤡ ᤏᤛᤠ᤺ᤴ ᤀᤠᤈᤥᤃᤢᤶᤒᤠ ᤕᤧᤶᤔᤥ ᤂᤢᤏᤧ᤹ ᤋᤠ᤺ᤰᤐᤥ ᤀᤠᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤁᤢᤏᤢᤵᤔᤥ ᤌᤠᤖᤡᤰ ᤏᤛᤠ᤺ᤴᤛᤠᤒᤠ ᤀᤠᤒᤥ᤺ᤱᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴᤏᤢ ᤗᤰ ᤁᤧᤄᤥ᤺ᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥
HEB 3:15 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤍᤡᤱ ᤀᤠᤒᤡ᤹ᤖᤥ. “ᤀᤠᤀᤡᤴ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤧᤄᤧᤵᤛᤢᤶᤔᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤒᤡᤑᤩᤢᤱ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎ᤺ᤵᤐᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥”
HEB 3:16 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤗᤠ᤺ᤴ ᤔᤧᤄᤧᤵᤛᤢᤛᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤒᤡᤑᤩᤢᤱ ᤁᤧᤈᤥ᤺ᤰᤐᤠᤜᤠ᤹ ᤀᤠᤳᤋᤡᤴᤜᤠ᤹ ᤔᤧᤘᤕᤧᤒᤣ᥅ ᤜᤠᤒᤠ ᤂᤧᤴ ᤔᤥᤛᤠᤖᤧ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢᤛᤡᤒᤠ ᤔᤏᤠᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
HEB 3:17 ᤜᤧᤰᤁᤩᤠᤱ ᤋᤱᤒᤣ ᤗᤡᤒᤥ᤺ᤱ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴ ᤁᤧᤓᤥ᤺ᤱᤒᤠᤜᤠ᤹ ᤀᤠᤳᤋᤡᤴᤜᤠ᤹ ᤔᤧᤘᤕᤧᤒᤣ᥅ ᤀᤣ᤺ᤰᤛᤠᤍᤧᤴᤏᤥ ᤗᤠᤕᤥ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠ ᤔᤏᤠᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
HEB 3:18 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤁᤧᤱᤄᤥ᤺ᤛᤡᤴᤗᤥ ᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤏᤢ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧᤒᤣ᥅ ᤁᤢᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ ᤔᤏᤠᤜᤠ᤹ᤏᤢᤀᤣ ᤔᤧ᤺ᤶᤒᤡ᥅
HEB 3:19 ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤃ ᤂᤢᤏᤡ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤡᤱᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤔᤧᤱᤄᤥ᤺ᤛᤢᤶᤒᤠᤴ ᤀᤠᤏᤡ᤺ᤛᤢᤶᤗᤥ॥
HEB 4:1 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤔᤠᤱᤜᤧᤰ ᤘᤠ᤹ᤖᤀᤣ ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤁᤴ ᤔᤠᤱᤜᤧᤰᤁᤡᤴ ᤔᤧᤱᤄᤥ᤺ᤔᤏᤠᤒᤠ ᤔᤧᤶᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤡᤖᤥ॥
HEB 4:2 ᤀᤠᤏᤡ᤹ᤀᤥ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤥᤀᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤛᤧᤀᤠᤱ ᤘᤕᤧ. ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤒᤠ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤴᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤌᤣᤀᤠᤱ ᤀᤡᤴᤎᤠ᤺ᤱ ᤔᤧᤱᤄᤥ᤺ᤛᤢᤴᤗᤥ॥
HEB 4:3 ᤁᤖ ᤀᤠᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤰ ᤁᤴ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤗᤠ᤺ᤳᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. “ᤀᤠᤛᤡᤰ ᤐᤥᤃᤧᤀᤠᤱ ᤂᤧᤱᤜᤠ᤹ᤃ ᤀᤡᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴ ᤑᤠ᤹ᤀᤠᤱ ᤔᤠᤱᤜᤧᤰᤛᤡᤱᤅᤠᤱᤗᤥ॥” ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤡᤱᤃ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤸᤗᤧᤛᤠ ᤆᤥᤃᤧ ᤛᤢᤖᤧᤀᤠᤱ ᤘᤕᤧᤖᤥ॥
HEB 4:4 ᤗᤳᤇᤠ ᤛᤠᤶᤕᤥᤛᤠᤵᤗᤠ ᤗᤰᤁᤥ ᤏᤢᤛᤡᤃᤣ᤺ᤰᤐᤠ ᤕᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤏᤢ ᤏᤢᤛᤡᤃᤣ᤺ᤰᤐᤠ ᤕᤧᤴᤏᤥ ᤏᤠ᤺ᤶᤛᤡᤱᤗᤥ॥”
HEB 4:5 ᤜᤧᤰᤁᤩᤠᤱ ᤕᤠᤶᤔᤥ ᤂᤧᤴ ᤘᤣ᤹ᤛ᤻ᤔᤠ ᤗᤰᤁᤥ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. “ᤂᤧᤱᤜᤠ᤹ᤃ ᤀᤡᤱᤃᤠ᤹ ᤕᤠᤖᤡᤵ ᤆᤥᤃᤢᤱᤒᤠ ᤏᤠ᤺ᤶᤛᤡᤱᤍᤧᤴᤏᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥”
HEB 4:6 ᤁᤢᤓᤠᤖᤧᤃ ᤀᤠᤸᤗᤛᤠᤱ ᤂᤧᤴ ᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤔᤧᤄᤥ᤺ᤛᤢ᤹॥ ᤁᤖ ᤘᤣ᤹ᤜᤠ᤹ᤖᤥᤃ ᤛᤢᤏᤠᤀᤡᤱᤅᤡᤴ ᤋᤃᤡ ᤀᤡᤱᤓᤥ᤺ᤛᤧᤀᤠᤱ ᤘᤕᤧᤛᤠᤱ ᤂᤧᤱᤜᤠ᤹ ᤀᤡᤱᤈᤠ᤺ᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤴᤗᤠ᤺ᤛᤧᤴᤗᤥ॥
HEB 4:7 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤥ ᤗᤠ᤺ᤵᤔᤠ ᤘᤣ᤹ᤛ᤻ᤔᤠ ᤕᤧᤴᤎᤡᤰ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹॥ ᤂᤧᤴ ᤕᤧᤴᤏᤡᤱᤃ ᤀᤠᤀᤡᤴᤏᤣᤖᤥ॥ ᤂᤧᤴ ᤋᤃᤡ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤍᤠᤀᤢᤍ ᤜᤠᤱᤗᤠᤶ ᤂᤢᤏᤧ᤹ ᤕᤖᤡᤰ ᤕᤧᤶ ᤀᤣᤃᤠᤱ ᤕᤠᤶᤔᤥ ᤐᤠ᤺ᤳᤋᤢ. “ᤀᤠᤀᤡᤴ ᤂᤢᤏᤧ᤹ ᤁᤢᤀᤡᤰᤗᤠ᤺ᤴ ᤁᤧᤄᤧᤵᤛᤢᤶᤔᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤎ᤺ᤵᤐᤠ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥”
HEB 4:8 ᤌᤣᤀᤠᤱᤓᤧᤸᤗᤧ ᤕᤜᤥᤛᤢᤖᤧ ᤂᤧᤱᤜᤠ᤹ ᤁᤴ ᤏᤠ᤺ᤶᤛᤡᤱᤔᤠ ᤋᤧᤴᤏᤡᤴ ᤐᤡᤖᤢᤛᤡᤀᤠᤱ ᤘᤕᤧᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤧᤰᤁᤣᤗ᤹ᤖᤡᤰ ᤘᤣ᤹ᤛ᤻ᤔᤠ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤠᤱᤛᤡ ᤔᤧᤒᤠ᤺ᤳᤋᤢᤴᤒᤠ ᤔᤧᤴ॥
HEB 4:9 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤏᤠ᤺ᤶᤛᤡᤱ ᤕᤧᤴᤏᤡᤴ ᤋᤠ᤺ᤔᤠ ᤁᤧᤒᤥ᤺ᤱᤒᤠ ᤘᤠ᤹ᤖᤥ॥
HEB 4:10 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤕᤠ᤺ᤶᤒᤰᤗᤠᤶᤒᤠ ᤏᤠ᤺ᤶᤛᤡᤱᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠ᤺ᤶᤛᤡᤱᤍᤧᤴᤏᤥ ᤁᤧᤗᤠ᤺ᤵᤐᤠᤜᤠ᤹ᤀᤠᤱ ᤂᤢᤏᤡ᤹ ᤕᤠ᤺ᤶᤒᤰᤗᤠᤶᤒᤠ ᤔᤧᤏᤠ᤺ᤶᤛᤡᤱᤗᤥ॥
HEB 4:11 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤂᤧᤴ ᤏᤠ᤺ᤶᤛᤡᤱᤔᤥ ᤗᤠ᤺ᤵᤔᤠ ᤛᤡᤰ ᤛᤶᤗ ᤏᤡᤱᤘᤠ᤹ ᤆᤥᤃᤢᤶᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤓᤣ᤺ᤴᤍᤢᤀᤠᤱ ᤔᤧᤔᤧᤃᤧᤒᤠ ᤁᤢᤀᤡᤛᤡ᤺ᤰ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤔᤧᤰᤏᤧᤴᤗᤖᤥ॥
HEB 4:12 ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤱᤃ ᤁᤢᤜᤡᤱᤘᤧᤳ ᤏᤢ ᤆᤥ᤺ᤰᤛᤠᤶᤒᤠ ᤆᤥ᤺ᤰᤗᤥ॥ ᤂᤧᤱᤃ ᤏᤧᤵᤈᤠᤱ ᤗᤧᤵᤔᤠᤱ ᤁᤢᤕᤠ ᤁᤧᤒᤵᤐᤠ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤴᤏᤢ᤺ᤸᤗᤧᤀᤠᤱ ᤂᤠᤃᤧᤛᤢᤰᤐᤠ ᤆᤥ᤺ᤰᤗᤥ॥ ᤂᤧᤸᤗᤧ ᤛᤰᤔᤠᤛᤠᤶᤔᤡᤴᤏᤢ ᤕᤠᤶᤛᤠᤶᤔᤡᤴ ᤛᤧᤴᤍᤢ᤹ ᤜᤧᤰᤁᤩᤠᤱ ᤕᤧᤵᤐᤠᤸᤗᤧ ᤁᤢᤍᤢᤶᤒᤧ᤹ ᤏᤢ ᤁᤢᤛᤡ᤺ᤴ ᤗᤛ᤻ᤛᤢᤀᤠᤱ ᤛᤧᤴᤍᤢ᤹॥ ᤀᤠᤏᤡ᤹ ᤏᤡᤱᤘᤠ᤹ᤛᤢᤶᤔᤡᤴ ᤏᤢ ᤏᤡᤱᤘᤠ᤹ ᤀᤡ᤺ᤵᤔᤠᤴ ᤛᤧᤶᤔᤠ ᤛᤢᤰᤋᤢ᤹ᤖᤥ॥
HEB 4:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤗᤠᤶᤒᤠ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤌᤧᤔᤠ᤺ᤴᤏᤠᤱ ᤆᤡᤱᤛᤡᤱᤔᤠ ᤔᤧᤛᤢᤰᤏᤧᤴᤗᤥ॥ ᤂᤢᤏᤧ᤹ ᤁᤢᤍᤃᤡ ᤁᤠᤰ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤏᤡᤎᤠ᤺ᤵᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤂᤠᤖᤠ᤺ᤳ ᤂᤢᤏᤧ᤹ᤀᤣ ᤀᤠᤏᤡ᤹ ᤐᤡᤔᤠ ᤐᤥ᤺ᤱᤗᤥ॥
HEB 4:14 ᤀᤠᤸᤗ. ᤀᤠᤏᤡ᤹ ᤋᤧᤴᤍᤡᤱ ᤀᤠᤈᤥᤃᤢᤶᤒᤠ ᤏᤛᤠ᤺ᤴᤏᤡᤴ ᤌᤖᤢᤶᤗᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤒᤣ᤺ᤰᤐᤠᤀᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠ᤺ ᤕᤧᤛᤢ ᤐᤕᤶ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤠᤏᤡ᤹ ᤀᤠᤃᤳᤋᤢᤶᤗᤥ॥
HEB 4:15 ᤀᤠᤏᤡ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤀᤠᤴᤈᤥ᤺ᤰᤏᤧᤶᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤠᤱ ᤀᤠᤏᤡ᤹ ᤜᤧᤰᤁᤣᤀᤣ ᤁᤠᤰ ᤐᤖᤡᤰᤐᤠ ᤜᤱᤛᤠ᤹ᤔᤠᤴ ᤋᤠ᤺ᤰᤋᤢ. ᤁᤖ ᤂᤢᤏᤧ᤹ ᤗᤠᤕᤥ ᤔᤧᤈᤥᤃᤢᤴᤗᤥ॥
HEB 4:16 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤔᤧᤱᤃᤡᤀᤣ ᤔᤧᤴᤏᤢ᤺ᤴᤏᤣ ᤗᤢᤱᤃᤢᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠᤀᤥ ᤋᤩᤧ᤹ᤀᤡᤖᤥ॥ ᤂᤧᤵᤔᤥᤃ ᤀᤠᤏᤡ᤹ ᤆᤠᤜᤠᤒᤥ ᤀᤠᤎᤠ᤺ᤸᤗᤧ ᤁᤢᤓᤠ᤹ ᤂᤥ᤺ᤔᤠ ᤑᤠ᤹ᤀᤠᤱ ᤗᤢᤱᤍᤢᤰ ᤏᤢ ᤗᤢᤱᤃᤢᤶᤔᤡᤴ ᤀᤠᤄᤥ᤺ᤛᤢᤶᤗᤥ॥
HEB 5:1 ᤀᤠᤳᤋᤡᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴᤇᤠᤱ ᤔᤏᤠᤜᤠ᤹ᤗᤠᤶᤒᤠᤀᤣ ᤛᤣ᤺ᤰᤁᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤛᤧ ᤛᤣ᤺ᤰᤕᤢᤰ ᤐᤥ᤺ᤱᤗᤥ॥ ᤂᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤂᤥ᤺ᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤗᤠᤃᤡ ᤆᤥᤓᤠ᤹ ᤏᤢ ᤛᤡᤍᤢᤱᤈᤓᤠ ᤋᤥ᤺ᤴᤍᤢ᤹ᤖᤥ॥
HEB 5:2 ᤂᤢᤏᤧ᤹ᤃ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥᤀᤣ ᤁᤧᤘᤠ᤹ᤒᤠᤜᤠ᤹ ᤜᤧᤰᤁᤩᤠᤱ ᤋᤠᤵᤁᤧᤒᤧ᤹ᤒᤠᤜᤠ᤹ᤏᤢ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤠᤱ ᤘᤠ᤹ᤔᤠ ᤛᤢᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤒᤠᤅᤣᤀᤠᤱ ᤐᤠ᤺ᤴ ᤑᤣ᤺ᤶᤔᤠ ᤁᤧᤛᤢᤰᤐᤠ ᤔᤧᤴᤇᤠᤶ ᤕᤠᤵᤔᤡᤀᤣᤖᤥ॥
HEB 5:3 ᤒᤠ ᤂᤧᤸᤗᤧ ᤆᤥᤃᤢᤸᤗᤧᤀᤣ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤸᤗᤧ ᤗᤠᤃᤡᤖᤰ ᤔᤧ᤺ᤴ. ᤁᤖ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤕᤥ᤺ᤸᤗᤧ ᤗᤠᤃᤡᤀᤠᤱ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤀᤣ ᤐᤥ᤺ᤱᤗᤥ॥
HEB 5:4 ᤀᤠᤳᤋᤡᤸᤗᤧᤀᤠᤱ ᤀᤠᤒᤠᤅᤣ ᤁᤴ ᤔᤡᤱᤛᤥ ᤀᤡᤱᤎᤠ᤺ᤱᤅᤡᤴ ᤋᤠ᤺ᤰᤔᤠ ᤔᤧᤛᤢᤰᤋᤢᤴᤗᤥ. ᤁᤖ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤢ᤺ᤵᤔᤠᤀᤣ ᤐᤥ᤺ᤱᤗᤥ॥
HEB 5:5 ᤂᤪᤡᤛ᤻ᤋᤖᤧᤀᤠᤱ ᤀᤰᤂᤣᤗ᤹ᤖᤡᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤔᤠ ᤔᤡᤱᤛᤥ ᤀᤡᤱᤎᤠ᤺ᤱᤅᤡᤴ ᤀᤠᤒᤠᤅᤣ ᤔᤧᤍᤠ᤺ᤰᤋᤢᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤣ᤺ᤰᤕᤢᤰ ᤆᤥᤃᤢᤖ ᤔᤧᤳᤋᤢ. “ᤂᤧᤏᤧ᤹ᤃ ᤀᤡᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤏᤧ ᤑᤠ᤹ᤀᤠᤱ ᤀᤡᤱᤓᤥ᤺ᤛᤢᤱᤗᤥ. ᤀᤠᤀᤡᤴ ᤀᤡᤱᤃᤠ᤹ ᤂᤧᤏᤧ᤹ ᤐᤠᤏᤢᤍᤡᤱ ᤁᤧᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥”
HEB 5:6 ᤜᤧᤰᤁᤩᤠᤱ ᤛᤠᤶᤕᤥᤛᤠᤵᤗᤠᤀᤥᤒᤠ ᤘᤣ᤹ᤛ᤻ᤔᤠ ᤗᤰᤁᤥ ᤂᤢᤏᤧ᤹ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ᤹. “ᤂᤧᤏᤧ᤹ᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤏᤧᤖᤥ॥”
HEB 5:7 ᤕᤧᤛᤢ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤠᤛᤡᤱᤃᤧᤴ ᤌᤰᤁᤥ ᤘᤕᤧᤸᤗᤧ ᤂᤢᤏᤧ᤹ ᤔᤡᤰᤘᤠᤏᤢ ᤆᤰᤆᤰ ᤛᤠ᤹ᤖᤡᤰ ᤜᤠᤒᤧᤖ ᤛᤡ᤺ᤔᤧᤴᤗᤠᤶ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤐᤧᤴ ᤐᤣᤗᤡ ᤑᤠᤰᤋᤢᤖ ᤋᤢᤘᤠ ᤆᤥᤃᤢᤖᤥ॥ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤢᤖ ᤛᤣᤘᤠ ᤆᤥᤃᤢᤒᤠᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤋᤢᤘᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤖᤥ॥
HEB 5:8 ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤘᤕᤧᤛᤠᤱ ᤋᤢᤰᤂᤣ ᤆᤩᤧᤒᤠᤀᤥᤗᤠᤶ ᤀᤡᤱᤈᤠ᤺ᤱᤃᤧᤶᤒᤠ ᤐᤥ᤺ᤱᤔᤠ ᤜᤢ᤹ᤛᤡᤱ.
HEB 5:9 ᤜᤧᤰᤁᤩᤠᤱ ᤁᤢᤛᤠᤱ ᤗᤛ᤻ᤛᤢᤀᤠᤱ ᤁᤢᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤖᤧᤰᤗᤧ ᤗᤠᤃᤡ ᤂᤢᤏᤧ᤹ ᤔᤧᤴᤏᤢᤵᤔᤏᤠᤒᤠ ᤛᤧᤴᤗᤵᤖᤧ ᤁᤢᤒᤢᤴ ᤐᤥ᤺ᤰᤂᤧᤖᤥ॥
HEB 5:10 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤛᤣ᤺ᤰᤕᤢᤰ ᤆᤥᤃᤢᤖᤥ॥
HEB 5:11 ᤁᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤀᤠᤏᤡᤃᤧ ᤕᤖᤡᤰ ᤐᤠ᤺ᤵᤔᤠ ᤁᤳᤋᤢᤶᤒᤧᤖᤥ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤐᤥᤎᤰ ᤆᤥ᤺ᤰᤔᤠ ᤛᤠᤰᤗᤥ॥
HEB 5:12 ᤛᤧᤰᤂᤠ᤺ᤸᤗᤧ ᤁᤴ ᤕᤧᤶ ᤌᤠᤖᤡᤰᤗᤧᤃ ᤂᤡᤏᤡ᤹ᤃ ᤘᤣ᤹ᤜᤠ᤹ ᤁᤧᤜᤢ᤹ᤒᤠ ᤛᤡᤰᤛᤠᤶᤒᤠ ᤐᤥ᤺ᤱᤔᤠ ᤁᤧᤒᤥ᤺ᤱᤒᤠ ᤘᤕᤧ. ᤁᤖ ᤂᤡᤏᤡ᤹ᤏᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤸᤗᤧ ᤁᤢᤜᤣ᤺ᤰᤛᤡᤱᤔᤠ ᤏᤡᤛᤠᤶᤔᤡᤴ ᤕᤠᤶᤔᤥ ᤜᤢ᤹ᤔᤠ ᤁᤧᤒᤥ᤺ᤱᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ᤃ ᤁᤢᤈᤠ ᤆᤠᤔᤠ ᤔᤧᤴᤇᤢᤰᤔᤏᤠ ᤏᤢᤖᤰ ᤁᤧᤎᤢᤱᤒᤠ ᤀᤅᤧ᤺ᤰᤘᤠ ᤁᤢᤀᤡᤛᤡ᤺ᤰ ᤁᤧᤘᤕᤡ᤹ᤖᤥ॥
HEB 5:13 ᤏᤢᤖᤰ ᤁᤧᤎᤢᤱᤒᤠᤴ ᤀᤅᤧ᤺ᤰᤘᤠ ᤆᤥ᤺ᤰᤁᤠᤱ ᤂᤧᤸᤗᤧ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤌᤣᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ॥
HEB 5:14 ᤁᤖ ᤁᤢᤈᤠ᤺ᤱᤃ ᤋᤢᤶᤛᤩᤠᤰ ᤁᤧᤒᤥ᤺ᤱᤒᤠᤸᤗᤧ ᤗᤠᤃᤡᤏᤧᤖᤥ॥ ᤂᤧᤱᤃ ᤆᤰᤔᤧᤸᤗ᤹ᤀᤣ ᤛᤎᤠᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤏᤢ᤺ᤒᤠ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤛᤧᤶᤔᤠ ᤛᤢᤰᤋᤢ᤹ᤖᤥ॥
HEB 6:1 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤃ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤁᤢᤜᤣ᤺ᤰᤛᤡᤱᤔᤠ ᤏᤡᤛᤠᤶᤜᤠ᤹ ᤗᤧᤖᤢᤶᤔᤠᤱ ᤁᤢᤛᤠᤱ ᤗ᤺ᤔᤠ ᤗᤧᤵᤔᤠᤱ ᤋᤃᤡ ᤐᤥ᤺ᤖᤡᤖᤥ॥ ᤀᤠᤏᤡ᤹ᤃ ᤛᤡ᤺ᤔᤧᤴᤏᤥ ᤁᤧᤍᤣ᤹ᤒᤠ ᤗᤠᤕᤥᤒᤠ ᤐᤠ᤺ᤴᤜᤠ᤹ᤗᤠᤶ ᤜᤡᤶᤔᤠ ᤐᤠ᤺ᤴᤜᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥ᤺ᤰᤔᤠ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤜᤠ᤹. ᤜᤧᤰᤁᤩᤠᤱ ᤒᤵᤋᤡᤛ᤻ᤔᤠᤜᤠ᤹ᤖᤧ ᤁᤢᤕᤠ᤺ᤶᤒᤣᤒᤠ ᤏᤡᤛᤠᤶᤜᤠ᤹. ᤜᤢᤰ ᤏᤧᤔᤠ ᤐᤠ᤺ᤴᤜᤠ᤹. ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤂᤢᤶᤍᤡᤱ ᤜᤧᤰᤋᤱᤒᤠ ᤁᤢᤜᤣ᤺ᤰᤛᤡᤱᤔᤠ ᤏᤡᤛᤠᤶᤜᤠ᤹ ᤕᤠᤶᤔᤥ ᤐᤠ᤺ᤳᤋᤢᤶ ᤔᤧ᤺ᤴᤗᤥ॥
HEB 6:3 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢᤏᤧ ᤑᤠ᤹ᤃᤪ ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛᤠᤱ ᤗ᤺ᤔᤠ ᤗᤧᤵᤔᤠᤱ ᤋᤃᤡ ᤀᤠᤒᤥ᤺ᤖᤥ॥
HEB 6:4 ᤁᤖ ᤋᤃᤡᤛᤠ ᤛᤧᤰᤂᤠᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤁᤧᤏᤡ᤺ᤒᤠᤜᤠ᤹. ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧᤴ ᤐᤷᤎᤠ᤺ᤶ ᤁᤧᤛᤠ᤹ᤒᤠᤜᤠ᤹. ᤛᤣᤛᤣᤔᤠᤱ ᤗᤰ ᤁᤧᤄᤥ᤺ᤒᤠ ᤔᤏᤠᤜᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤸᤗᤧ ᤁᤢᤏᤥ-ᤁᤢᤍᤠ᤺ᤴ ᤏᤢ ᤋᤠ᤺ᤕᤧᤶᤗᤧᤴ ᤔᤢᤰᤛᤠᤶ ᤁᤧᤛᤠ᤹ᤒᤠᤜᤠ᤹ᤖᤧ ᤏᤛᤠ᤺ᤴᤏᤡᤴ ᤔᤧᤗᤧᤖᤢ ᤔᤧᤍᤣ᤺ᤛᤢ᤹ᤏᤧ ᤑᤠ᤹ᤃᤪ ᤂᤧᤱᤜᤠ᤹ ᤏᤢ᤺ᤰᤔᤠ ᤋᤠ᤺ᤵᤔᤠᤛᤡ ᤛᤢᤰᤔᤧᤴᤍᤧᤳᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤗᤠᤶᤒᤠ ᤏᤡᤱᤘᤠ᤹ᤑᤢᤛᤠ᤺ᤴ ᤕᤠᤶᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤀᤠᤱ ᤔᤏᤠᤗᤢᤶᤔᤥ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢᤒᤠ ᤜᤧᤰᤁᤣ ᤐᤥ᤺ᤱᤗᤥ॥
HEB 6:7 ᤐᤠᤱᤃᤧᤴᤍᤡᤱ ᤘᤠᤜᤡᤳᤋᤡᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤘᤠᤖᤰᤂᤢ᤹. ᤜᤧᤰᤁᤩᤠᤱ ᤀᤡᤰ ᤁᤧᤔ᤺ᤒᤠᤴ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤁᤧᤎᤥ᤺ᤰᤐᤠ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤌᤠ᤺ᤛᤢᤀᤠᤱ ᤕᤖᤡᤰ ᤁᤢᤈᤠ ᤌᤥ᤺ᤰᤗ ᤆᤥᤃᤢ᤹ᤖᤥ॥
HEB 6:8 ᤁᤖ ᤂᤧᤵᤔᤥ ᤋᤡᤱ ᤏᤢ ᤛᤡᤎᤪᤠ᤺ᤰᤐᤠᤖᤰ ᤗᤡᤱᤏᤧ ᤑᤠ᤹ᤃᤪ ᤂᤧᤴ ᤀᤡᤰᤋᤠᤵᤐᤡᤴ ᤀᤡᤏᤠ᤺ᤶ ᤐᤥ᤺ᤱᤅᤠᤱ ᤀᤡᤰ ᤁᤧᤔ᤺ᤒᤠᤸᤗᤧ ᤛᤠᤱᤃᤪᤠ ᤔᤧᤳᤋᤢᤀᤠᤱ ᤑᤠ᤺ᤳᤋᤪᤠ ᤁᤣ᤺ᤳᤋᤢ᤹ᤖᤥ॥
HEB 6:9 ᤀᤠᤔᤡ᤺ᤶ ᤋᤣ᤺ᤱᤈᤢᤶᤛᤣ. ᤀᤠᤏᤡᤃᤧ ᤀᤰᤂᤣᤗ᤹ᤖᤡᤰ ᤐᤠᤖᤡᤃᤧᤛᤠᤱ ᤂᤡᤏᤡ᤹ ᤕᤠ᤺ᤶᤒᤣᤀᤥᤃ ᤛᤧᤴᤗᤵᤐᤡᤴ ᤁᤧᤃᤠᤵᤐᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤁᤧᤈᤥᤃᤢᤶ ᤁᤧᤗ᤹ᤒᤠ ᤛᤧᤰᤂᤠᤀᤣ ᤏᤡ᤺ᤛᤢᤶᤒᤧᤖᤥ॥
HEB 6:10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥᤃᤢ᤹ᤖᤥ–ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ ᤋᤃᤡ ᤁᤢᤓᤠ᤹ ᤁᤧᤒᤡᤖᤢᤶᤛᤡᤶᤔᤡᤸᤗᤧ ᤂᤢᤏᤧ᤹ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤢᤶᤒᤠ ᤔᤡ᤺ᤶᤈᤡᤴ ᤂᤢᤏᤧ᤹ ᤏᤡᤱᤘᤠ᤹ ᤔᤧᤓᤢ᤺ᤳᤇᤢᤴᤗᤥ॥ ᤂᤧᤱᤃ ᤀᤠᤸᤗᤥ ᤌᤠᤖᤡᤰᤁᤠᤱ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥
HEB 6:11 ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤒᤠ ᤂᤧᤴ ᤕᤠᤶᤈᤠᤱᤘᤠ᤺ᤴ ᤂᤡᤏᤡ᤹ ᤜᤡᤱᤜᤡᤱ ᤌᤠᤖᤡᤰ ᤁᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡᤱᤘᤠ᤹ ᤆᤥᤃᤢᤶᤒᤧ᤹ᤖᤥ॥
HEB 6:12 ᤜᤧᤰᤁᤩᤠᤱ ᤂᤡᤏᤡ᤹ ᤗᤧᤶᤛᤫᤠᤒᤠ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤏᤛᤠ᤺ᤴ ᤏᤢ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠᤴ ᤗᤰ ᤁᤧᤄᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤱ ᤀᤡ᤺ᤳᤋᤧᤶᤔᤧ᤹ᤀᤥ ᤁᤧᤗ᤹ᤒᤠ ᤀᤠᤏᤡᤃᤧ ᤏᤡᤱᤘᤠ᤹ ᤘᤠ᤹ᤖᤥ॥
HEB 6:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴᤏᤢ ᤔᤠᤱᤜᤧᤰ ᤆᤥᤃᤢᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤡᤱᤅᤡᤴᤏᤢ᤺ᤸᤗᤧ ᤘᤣ᤹ ᤕᤶᤒᤠ ᤔᤡᤱ ᤜᤥ᤺ᤵᤋᤧᤒᤠᤸᤗᤧ ᤀᤠᤒᤠᤅᤣ ᤁᤢᤔᤡᤱᤅᤥ ᤀᤰᤂᤣᤗ᤹ᤖᤡᤰ ᤔᤠᤱᤜᤧᤰᤛᤡᤱᤗᤥ.
HEB 6:14 “ᤛᤧᤰᤂᤠᤀᤣ ᤀᤡᤱᤃᤠ᤹ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤕᤖᤡᤰ ᤑᤥ᤺ᤛᤢᤱᤛᤡᤱᤗᤥ॥”
HEB 6:15 ᤜᤧᤰᤁᤣᤗ᤹ᤖᤡᤰ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤗ ᤜᤠᤱᤄᤢᤀᤠᤱ ᤔᤠᤱᤜᤧᤰᤁᤥ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤂᤥ᤺ᤛᤢᤖᤥ॥
HEB 6:16 ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤀᤠᤒᤠᤅᤣᤏᤢ᤺ᤸᤗᤧ ᤕᤶᤒᤠ ᤔᤡᤱᤅᤥ ᤔᤠᤱᤔᤧᤜᤧᤰᤛᤡᤱ ᤜᤧᤰᤁᤩᤠᤱ ᤂᤧᤴ ᤔᤠᤱᤜᤧᤰᤁᤡᤸᤗᤧ ᤁᤠᤰ ᤐᤠ᤺ᤴᤎᤱ ᤔᤧᤏᤢᤵᤛᤢ᤹ᤖᤥ॥
HEB 6:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤂᤢᤴ ᤁᤧᤗ᤹ᤒᤠᤴ ᤁᤢᤔᤠᤱᤜᤧᤰ ᤁᤧᤄᤥ᤺ᤒᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤒᤠᤸᤗᤧ ᤂᤢᤏᤧ᤹ ᤔᤠᤱᤜᤧᤰᤛᤡᤱᤗᤥ॥
HEB 6:18 ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤀᤠᤱ ᤔᤠᤱᤜᤧᤰᤛᤡᤱᤗᤥ॥ ᤁᤴ ᤏᤧᤳᤇᤡ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤱᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤗᤧᤰ ᤐᤠ᤺ᤵᤔᤠᤀᤣ ᤔᤧᤛᤢᤰᤋᤢᤴ॥ ᤀᤠᤏᤡ᤹ ᤂᤢᤏᤧ᤹ ᤁᤢᤃᤶᤒᤪᤠᤱᤅᤥ ᤋᤠᤱᤛᤧ᤺ᤵᤛᤡᤱᤛᤧ ᤁᤧᤒᤣ᤺ᤰᤐᤠᤜᤠ᤹ᤖᤧ ᤀᤠᤄᤥ᤺ᤛᤢᤶ ᤁᤧᤗ᤹ᤒᤠ ᤏᤡᤱᤛᤠᤱᤅᤡᤴ ᤀᤠᤸᤗᤧᤖᤢᤶᤔᤡᤴᤏᤡᤸᤗᤧ ᤜᤠᤱᤜᤠᤱ ᤀᤠᤗ᤹ᤖᤥ॥
HEB 6:19 ᤁᤴ ᤏᤡᤱᤛᤠᤱᤅᤡᤸᤗᤧ ᤀᤠᤏᤡ᤹ ᤜᤡᤱᤔᤴᤏᤡᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢ᤹ᤖᤥ॥ ᤁᤴ ᤏᤡᤱᤛᤠᤱ ᤀᤠᤈᤥᤃᤢᤶᤒᤠ ᤕᤧᤛᤢ᤺ᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤑᤥ᤺ᤴᤍᤠ ᤛᤡᤃᤠᤱᤒᤠ ᤛᤣᤛᤣᤒᤠᤍᤧᤴᤏᤥ ᤗᤠ᤺ᤳᤗᤥ॥
HEB 6:20 ᤂᤧᤵᤔᤥᤃ ᤕᤧᤛᤢ᤺ᤴ ᤀᤠᤏᤡ᤹ ᤗᤠᤃᤡ ᤋᤃᤡᤛᤠ ᤐᤣᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤛᤍᤠᤍᤡᤱ ᤁᤧᤘᤠ᤹ᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
HEB 7:1 ᤁᤴ ᤔᤸᤁᤡᤛᤧᤍᤧᤰᤁᤡᤱᤃ ᤛᤠᤗᤧᤶ ᤕᤧᤰᤕᤰᤐᤠ ᤜᤠᤱ ᤏᤢ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤖᤥ॥ ᤀᤒᤪᤠᤜᤠᤶᤔᤡᤸᤗᤧ ᤜᤠᤱᤜᤠ᤹ ᤌᤱ ᤌᤰᤔᤠ ᤏᤠ᤺ᤴᤍᤢᤛᤡᤀᤠᤱ ᤏᤢ᤺ᤰᤂᤧᤖ ᤐᤳᤇᤧᤸᤗᤧ ᤔᤸᤁᤡᤛᤧᤍᤧᤰᤁᤡᤸᤗᤧ ᤂᤢᤏᤧ᤹ ᤋᤢᤔᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢ॥
HEB 7:2 ᤜᤧᤰᤁᤩᤠᤱ ᤀᤒᤪᤠᤜᤠᤔᤖᤧᤀᤠᤱ ᤜᤠᤱᤜᤠ᤹ ᤏᤠᤵᤋᤢᤛᤡᤒᤠ ᤁᤠᤰ ᤆᤡᤃ᤺ᤰᤘᤠᤜᤠ᤹ᤖᤧᤴ ᤌᤡᤒᤥ᤺ᤱᤗᤰ ᤂᤢᤏᤧ᤹ ᤐᤡᤖᤢᤖᤥ॥ ᤔᤸᤁᤡᤛᤧᤍᤧᤁᤖᤧ ᤁᤢᤔᤡᤱᤅᤡᤸᤗᤧ ᤁᤢᤒᤣ᤺ᤱᤃ “ᤛᤠᤶᤕᤥᤏᤡᤒᤠ ᤜᤠᤱ” ᤐᤥ᤺ᤱ. ᤜᤧᤰᤁᤩᤠᤱ ᤛᤠᤗᤣᤶᤔᤥᤒᤠ ᤜᤠᤱᤖᤧ ᤁᤢᤒᤣ᤺ᤱᤃ “ᤛᤏᤠᤖᤢᤱ ᤜᤠᤱ” ᤐᤥ᤺ᤱᤗᤥ॥
HEB 7:3 ᤂᤢᤏᤧ᤹ ᤁᤢᤶᤒᤠ. ᤁᤢᤶᤔᤠ. ᤁᤢᤛᤢᤎᤧᤒᤠ ᤁᤢᤎᤠ᤺ᤰᤌᤧᤒᤠᤜᤠ᤹ ᤜᤧᤰᤁᤩᤠᤱ ᤁᤢᤛᤠᤘᤠ᤺ᤴᤇᤡᤱᤔᤠᤴ ᤏᤢ ᤁᤢᤛᤡ᤺ᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤛᤠᤵᤋᤧᤒᤠ ᤜᤥ᤺ᤵᤗᤥ॥ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤛᤠ᤺ ᤁᤢᤀᤡᤛᤡ᤺ᤰ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤖᤥ॥
HEB 7:4 ᤀᤠᤸᤗ ᤔᤸᤁᤡᤛᤧᤍᤧᤰᤁᤡᤴ ᤀᤠᤏᤡ᤹ ᤋᤠᤰᤌᤧᤒᤠ ᤀᤒᤪᤠᤜᤠᤔᤖᤧᤀᤣ ᤜᤠᤱᤜᤠ᤹ ᤏᤠᤵᤋᤢᤛᤡᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤌᤡᤒᤥ᤺ᤱᤗᤰ ᤐᤡᤖᤢᤒᤠᤸᤗᤧ ᤂᤢᤏᤧ᤹ ᤀᤠᤰᤂᤧᤴ ᤕᤶᤒᤠ ᤆᤥᤃᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
HEB 7:5 ᤀᤠᤸᤗ ᤏᤡᤱᤘᤠ᤹ᤑᤢᤛᤠᤶᤒᤠ ᤗ᤹ᤖᤡᤰ ᤛᤣ᤺ᤰᤕᤢᤰ ᤁᤧᤒᤥ᤺ᤱᤒᤠ ᤗᤧᤒᤡᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤑᤢ᤹ᤏᤢᤛᤠ᤹ ᤀᤒᤪᤠᤜᤠᤔᤖᤧ ᤁᤢᤔᤢᤀᤡᤍᤠᤱᤛᤠᤜᤠ᤹ᤗᤠᤶᤒᤠᤀᤣ ᤌᤡᤒᤥ᤺ᤱᤗᤰ ᤋᤠ᤺ᤰᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
HEB 7:6 ᤁᤖ ᤁᤴ ᤔᤸᤁᤡᤛᤧᤍᤧᤰᤁᤡᤱᤃ ᤗᤧᤒᤡᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤜᤥ᤺ᤵᤋᤧᤛᤠᤱ ᤂᤧᤸᤗᤧ ᤀᤒᤪᤠᤜᤠᤔᤗᤠᤶ ᤌᤡᤒᤥ᤺ᤱᤗᤰ ᤋᤠ᤺ᤰᤋᤢᤀᤠᤱ ᤔᤠᤱᤜᤧᤰ ᤁᤧᤄᤥ᤺ᤒᤠ ᤀᤒᤪᤠᤜᤠᤶᤔᤡᤴ ᤔᤢ᤹ᤀᤡᤛᤠᤶ ᤌᤠ᤺ᤛᤢ ᤐᤡᤖᤢᤖᤥ॥
HEB 7:7 ᤀᤠᤸᤗ ᤆᤢᤰᤐᤠ ᤔᤏᤠ᤺ᤸᤗᤧ ᤕᤶᤒᤠᤗᤠᤶ ᤔᤢ᤹ᤀᤡᤛᤠᤶ ᤂᤥ᤺ᤛᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤳᤋᤡᤸᤗᤧᤀᤠᤱ ᤔᤧᤀᤳᤋᤢᤴᤗᤥ॥
HEB 7:8 ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤡᤒᤥ᤺ᤱᤗᤰ ᤔᤧᤍᤠ᤺ᤰᤋᤢ. ᤁᤖ ᤔᤸᤁᤡᤛᤧᤍᤧᤰᤁᤡᤱᤃ ᤂᤧᤱᤜᤠ᤹ᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤠᤔᤧᤳᤗᤥ॥
HEB 7:9 ᤜᤧᤰᤁᤩᤠᤱ ᤌᤡᤒᤥ᤺ᤱᤗᤰ ᤁᤧᤍᤠ᤺ᤰᤐᤠ ᤗᤧᤒᤡ᤺ᤸᤗᤧ ᤀᤒᤪᤠᤜᤠᤶᤗᤠᤶᤒᤠ ᤌᤡᤒᤥ᤺ᤱᤗᤰ ᤔᤸᤁᤡᤛᤧᤍᤧᤰᤁᤡᤴ ᤜᤢᤅᤢᤖᤥ ᤐᤠ᤺ᤵᤔᤠᤀᤠᤱ ᤀᤠᤛᤢᤰᤋᤢᤶᤗᤥ.
HEB 7:10 ᤌᤣᤀᤠᤱᤓᤧᤸᤗᤧ ᤔᤸᤁᤡᤛᤧᤍᤧᤁᤖᤧ ᤀᤒᤪᤠᤜᤠᤶᤔᤡᤴ ᤋᤢᤔᤢᤸᤗᤧ ᤗᤧᤒᤡ᤺ᤱᤃ ᤛᤠᤔᤧᤴᤘᤠ᤺ᤴᤇᤡᤱᤅᤣ ᤘᤕᤧ ᤁᤖ ᤋᤠ᤺ᤴᤍᤡ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤐᤥ᤺ᤱᤗᤥ॥
HEB 7:11 ᤜᤠᤖᤢᤏᤖᤧ ᤁᤢᤎᤠ᤺ᤰ ᤗᤧᤒᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤢᤰ ᤔᤧᤄᤥ᤺ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤔᤏᤠᤜᤠ᤹ᤖᤧ ᤛᤠᤶᤕᤥᤌᤡᤶ ᤔᤧᤄᤥ᤺ᤛᤢᤀᤠᤱ ᤔᤧᤘᤕᤧ॥ ᤀᤠᤸᤗ ᤜᤠᤖᤢᤏᤖᤧ ᤁᤢᤎᤠ᤺ᤰᤗᤠᤶᤒᤠᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤔᤏᤠᤜᤠ᤹ ᤁᤢᤗᤡᤱᤎᤥ ᤁᤧᤵᤔᤠ ᤛᤢᤰᤋᤢᤛᤡᤀᤠᤱ ᤘᤕᤧᤸᤗᤧᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤘᤣ᤹ᤛ᤻ᤔᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤆᤠᤜᤠᤒᤠ ᤔᤧᤈᤥᤃᤧᤶᤒᤠᤔᤧᤴᤗᤥ॥
HEB 7:12 ᤜᤧᤰᤁᤩᤠᤱ ᤘᤣ᤹ ᤐᤖᤡᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤋᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤴᤏᤠᤱ ᤗᤧᤰᤔᤠᤀᤣ ᤐᤥ᤺ᤱᤗᤥ॥
HEB 7:13 ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤘᤣ᤹ᤛ᤻ᤔᤠ ᤌᤠ᤺ᤰᤗᤠᤶᤒᤠᤒᤠᤖᤥ. ᤁᤖ ᤂᤧᤴ ᤌᤠ᤺ᤰᤁᤥᤗᤠᤶ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤖᤥ॥
HEB 7:14 ᤀᤠᤏᤡ᤹ ᤍᤠᤱᤒᤠᤱᤃ ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰᤗᤠᤶᤒᤠ ᤛᤠᤘᤠ᤺ᤴᤇᤡᤱᤅᤧᤒᤠ ᤑᤠ᤹ᤀᤠᤱ ᤁᤧᤖᤧᤰᤗᤧ ᤔᤧᤏᤡ᤺ᤛᤢᤀᤣᤖᤥ ᤁᤖ ᤕᤜᤢᤍᤠ᤺ᤸᤗᤧ ᤁᤢᤎᤠ᤺ᤰᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤣ᤺ᤰᤔᤏᤠᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤥᤛᤠᤖᤧ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ॥
HEB 7:15 ᤀᤠᤸᤗ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤘᤣ᤹ᤛ᤻ᤔᤠ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤋᤠ᤺ᤸᤗᤧ ᤁᤴ ᤛᤠᤶᤕᤥᤌᤡᤶ ᤗᤧᤰᤋᤧᤒᤠ ᤐᤠ᤺ᤴᤏᤡᤴ ᤀᤠᤸᤗᤛᤠᤱ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤵᤔᤠ ᤛᤢᤰᤋᤧᤳᤗᤥ॥
HEB 7:16 ᤂᤢᤏᤧ᤹ᤃ ᤔᤧᤴᤇᤠᤶ ᤌᤠ᤺ᤰᤐᤠ ᤛᤠᤰᤌᤡᤶ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠ ᤔᤧ᤺ᤴ. ᤁᤖ ᤔᤧᤶᤔᤧᤰᤔᤏᤠᤒᤠ ᤜᤡᤱᤔᤴᤗᤧᤴ ᤔᤢᤰᤛᤠᤶᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤒᤠᤖᤥ॥
HEB 7:17 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “ᤂᤧᤏᤧ᤹ᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤏᤧᤖᤥ॥”
HEB 7:18 ᤀᤰᤂᤣᤗ᤹ᤖᤡᤰ ᤋᤃᤡᤛ᤻ᤔᤠ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱᤅᤡᤴ ᤂᤠᤖᤥ᤺ᤳᤋᤡ ᤐᤥ᤺ᤰᤂᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠ ᤏᤢ ᤕᤖᤡᤰ ᤁᤢᤛᤢᤶᤔᤧᤴᤍᤶᤔᤏᤠᤒᤠ ᤆᤥᤃᤧᤖᤥ॥
HEB 7:19 ᤛᤠᤶᤕᤥᤌᤡᤶᤔᤡᤸᤗᤧ ᤌᤣᤀᤠᤱ ᤁᤢᤗᤡᤱᤎᤥ ᤁᤧᤵᤔᤠ ᤔᤧᤛᤢᤰᤋᤢᤴ. ᤁᤖ ᤏᤡᤱᤛᤠᤱ ᤀᤠᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤂᤧᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤆᤥ᤺ᤰ. ᤜᤧᤰᤁᤩᤠᤱ ᤂᤧᤸᤗᤧᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤀᤠᤍᤣ᤹ᤖᤥ॥
HEB 7:20 ᤂᤪᤡᤛ᤻ᤋᤧᤴ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤗᤥ ᤗ᤹ᤖᤡᤰ ᤔᤠᤱᤜᤧᤰᤛᤡᤱᤗᤥ. ᤁᤖ ᤘᤣ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤃᤡ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤣᤗ᤹ᤖᤡᤰ ᤔᤠᤱᤔᤧᤜᤧᤰᤛᤡᤱᤅᤡᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥᤖᤰ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “‘ᤂᤧᤏᤧ᤹ᤃ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤛᤠᤶᤒᤠᤏᤧᤖᤥ’ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤀᤠᤱ ᤀᤠᤏᤡᤱᤘᤠ᤹ ᤔᤧᤗᤧᤱᤅᤠᤴᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤴ ᤔᤠᤱᤜᤧᤰᤛᤡᤱᤅᤠᤱ ᤘᤠ᤹ᤖᤥ॥”
HEB 7:22 ᤒᤠ ᤁᤴ ᤔᤠᤱᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤋᤃᤡᤒᤠ ᤔᤠᤱᤜᤢᤵᤐᤡᤴᤏᤢ᤺ᤸᤗᤧᤀᤠᤱ ᤐᤏᤢᤏᤢ᤺ᤒᤠ ᤔᤠᤱᤜᤢᤵᤐᤡᤴ ᤕᤧᤛᤢᤖᤧᤀᤣ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹ᤖᤥ॥
HEB 7:23 ᤋᤃᤡᤛ᤻ᤔᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤕᤖᤡᤰ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤛᤩᤧᤀᤠᤱ ᤛᤍᤠᤍᤡᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤗᤥ॥
HEB 7:24 ᤁᤖ ᤕᤧᤛᤢ᤺ᤴ ᤀᤠᤵᤑᤠᤸᤗᤧᤀᤠᤱ ᤔᤧᤛᤡ᤺ᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤛᤍᤠᤍᤡᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤱᤗᤥ॥
HEB 7:25 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤍᤠ᤺ᤒᤠᤜᤠ᤹ ᤂᤢᤏᤧ᤹ ᤛᤍᤠᤍᤡᤱ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤛᤡ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤛᤧ ᤛᤍᤠᤍᤡᤱ ᤜᤡᤱᤗᤥ॥
HEB 7:26 ᤂᤢᤏᤧ᤹ᤃ ᤀᤠᤏᤡ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤣᤛᤣ ᤏᤢ ᤑᤥᤋᤩᤠ ᤔᤧ᤺ᤴᤏᤣ. ᤗᤠᤕᤥ᤺ᤸᤗᤧ ᤔᤧᤍᤧᤳᤋᤢᤶᤒᤠ ᤆᤥ᤺ᤰᤗᤥ॥ ᤂᤢᤏᤧ᤹ᤃ ᤗᤠᤕᤥᤒᤠᤜᤠ᤹ᤗᤠᤶ ᤛᤧᤴᤍᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤠᤰᤏᤢ᤺ᤸᤗᤧ ᤕᤶᤒᤠ ᤔᤡᤱᤛᤥ ᤀᤡᤱᤎᤠ᤺ᤱᤗᤧ ᤕᤢᤰᤏᤠ᤺ᤴ ᤂᤥ᤺ᤛᤢᤀᤠᤱ ᤘᤠ᤹ᤖᤥ॥
HEB 7:27 ᤂᤢᤏᤧ᤹ᤃ ᤘᤣ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤢᤀᤡᤛᤡ᤺ᤰ ᤌᤡᤰᤕᤠ᤺ᤴᤎᤰ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤔᤧᤒᤥ᤺ᤱᤏᤧᤸᤗᤥ॥ ᤂᤧᤱᤜᤠ᤹ᤖᤧᤃ ᤁᤠᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤗᤠᤕᤥᤜᤠ᤹ᤖᤧ ᤗᤠᤃᤡ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤜᤠ᤹ᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤔᤧᤈᤥᤃᤢᤖᤥ॥ ᤁᤖ ᤕᤧᤛᤢᤖᤧᤃ ᤌᤡᤰᤗᤧᤱᤔᤠᤀᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤛᤧ ᤀᤠᤒᤠᤅᤣ ᤋᤥ᤺ᤴᤇᤡᤱᤅᤠᤱ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥
HEB 7:28 ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤴ ᤑᤣ᤺ᤶᤔᤠ ᤁᤧᤛᤢᤰᤐᤠ ᤔᤧᤴᤇᤠᤶ ᤕᤠᤵᤔᤡ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣ᤺ᤰᤕᤢᤰ ᤆᤥᤃᤢᤛᤡ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶ ᤐᤡᤖᤢᤛᤡᤀᤠᤱ ᤀᤣᤃᤠᤱ ᤔᤠᤱᤜᤧᤰᤛᤡᤱᤒᤠ ᤐᤠ᤺ᤴᤏᤡᤸᤗᤧ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤛᤍᤠᤍᤡᤱᤗᤧ ᤗᤠᤃᤡ ᤁᤢᤗᤡᤱᤎᤥ ᤁᤧᤳᤋᤢᤀᤠᤱ ᤛᤣ᤺ᤰᤕᤢᤰ ᤆᤥᤃᤢᤖᤥ॥
HEB 8:1 ᤀᤠᤏᤡᤃᤧ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤒᤠ ᤁᤴᤗᤥ–ᤀᤠᤏᤡ᤹ᤏᤢ ᤀᤰᤋᤱᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤗᤥ॥
HEB 8:2 ᤂᤢᤏᤧ᤹ᤃ ᤛᤣᤛᤣᤍᤧᤴᤏᤥ ᤔᤠᤱᤛᤣᤘᤠ ᤆᤥᤃᤢ᤹ᤖᤥ. ᤂᤧᤴ ᤛᤣᤛᤣᤍᤧᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤔᤧᤈᤥᤃᤢᤒᤠ ᤔᤧ᤺ᤴ. ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤆᤥᤃᤢᤒᤠ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤗᤥ॥
HEB 8:3 ᤁᤧᤖᤧᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤆᤥᤓᤠ᤹ ᤏᤢ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤑᤠ᤹ᤀᤠᤱ ᤛᤣ᤺ᤰᤕᤢᤰ ᤔᤧᤒᤥ᤺ᤰᤂᤧᤒᤠᤖᤥ. ᤜᤧᤰᤁᤣ᤺ᤸᤗᤧ ᤁᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤋᤥ᤺ᤶᤔᤠ ᤑᤠ᤹ᤀᤠᤱ ᤌᤣᤀᤡᤃ ᤁᤵᤔᤠᤀᤣ ᤐᤥ᤺ᤱᤗᤥ॥
HEB 8:4 ᤂᤢᤏᤧ᤹ ᤂᤠᤶᤒᤣ᤺ᤰᤔᤥᤀᤣ ᤘᤕᤧᤸᤗᤧᤃ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥ᤺ᤰᤂᤧᤴᤒᤠᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤆᤥᤓᤠ᤹ ᤁᤧᤍᤥ᤺ᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤋᤃᤡᤏᤢᤛᤠ ᤔᤧᤘᤠ᤹ᤖᤥ॥
HEB 8:5 ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠ ᤔᤧᤈᤥᤃᤢᤒᤠ ᤛᤣᤛᤣᤍᤧᤴᤏᤡᤱᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤛᤧᤰᤂᤠᤛ᤻ᤔᤠ ᤛᤣᤛᤣᤍᤧᤴᤏᤡᤸᤗᤧ ᤁᤢᤒᤡᤀᤡᤳᤇᤠᤵᤗᤰᤗᤥ॥ ᤌᤣᤀᤠᤱᤓᤧᤸᤗᤧ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤀᤡ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤍᤡᤱ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤴ ᤁᤧᤈᤥᤃᤢᤸᤗᤧ ᤁᤥ᤺ᤰᤔᤠ ᤛᤶᤍᤠᤱ ᤁᤧᤏᤡ᤺ᤛᤢᤒᤠ ᤜᤧᤰᤁᤣ ᤕᤥᤎᤥ ᤔᤧᤶᤒᤥ᤺ᤱᤅᤣ ᤆᤥᤃᤧ᤹ᤀᤥ॥”
HEB 8:6 ᤁᤖ ᤕᤧᤛᤢᤖᤧ ᤂᤥ᤺ᤛᤢᤒᤠ ᤔᤠᤱᤛᤣᤘᤠ᤺ᤱᤃ ᤂᤧᤱᤜᤠ᤹ᤖᤧᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥ᤺ᤰᤗᤥ. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤂᤢᤏᤧ᤹ ᤐᤠ᤺ᤴᤍᤱ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤋᤃᤡᤛ᤻ᤔᤠᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤆᤥ᤺ᤰ. ᤌᤣᤀᤠᤱᤓᤧᤸᤗᤧ ᤁᤴ ᤁᤢᤛᤱ ᤔᤠᤱᤜᤢᤵᤐᤡᤱᤃ ᤏᤢ᤺ᤒ᤻ ᤏᤢ᤺ᤒᤠ ᤔᤠᤱᤜᤧᤰᤜᤠ᤹ᤀᤥᤏᤧ ᤆᤥᤃᤧᤀᤠᤱ ᤘᤠ᤹ᤖᤥ॥
HEB 8:7 ᤌᤣᤀᤠᤱᤓᤧᤸᤗᤧ ᤋᤃᤡᤛ᤻ᤔᤠ ᤔᤠᤱᤜᤢᤵᤐᤡᤴ ᤑᤥᤋᤩᤠ ᤔᤧ᤺ᤴᤏᤣᤒᤠ ᤘᤕᤧᤸᤗᤧᤃ ᤘᤣ᤹ᤛ᤻ᤔᤠ ᤔᤠᤱᤜᤢᤵᤐᤡᤴ ᤆᤠᤜᤠᤒᤠ ᤔᤧᤈᤥᤃᤧᤴᤒᤠᤖᤥ॥
HEB 8:8 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ᤀᤥ ᤑᤥᤋᤩᤠ ᤂᤥ᤺ᤛᤢᤀᤠᤱ ᤐᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹. ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤕᤧᤶᤔᤥ. ᤀᤡᤱᤃᤠ᤹ ᤀᤡᤛᤪᤠᤀᤡᤗᤛ᤻ᤔᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤠᤛ᤻ᤔᤠ ᤔᤏᤠᤜᤠ᤹ᤏᤢ ᤁᤢᤛᤱ ᤛᤣᤛᤣᤔᤠᤱᤜᤢᤵ ᤆᤥᤃᤢᤱ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥
HEB 8:9 ᤁᤴ ᤁᤢᤛᤱ ᤔᤠᤱᤜᤢᤵᤐᤡᤱᤃ ᤔᤡᤛᤪᤗᤠᤶ ᤀᤠᤜᤢᤰᤁᤡᤸᤗᤧ ᤋᤧᤶᤛᤢᤱᤛᤡᤱᤅᤠᤱ ᤗᤠᤶᤗᤥᤛᤢᤱ ᤗ᤺ᤳᤋᤢᤱᤛᤡᤱᤒᤠ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤏᤧᤸᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤥ ᤏᤛᤠ᤺ᤴᤛᤠᤒᤠ ᤔᤧᤶᤒᤥ᤺ᤰᤂᤧᤴ ᤜᤧᤰᤁᤩᤠᤱ ᤁᤶᤒᤪᤠᤱ ᤔᤧᤵᤔᤠ ᤗᤧᤖᤢᤱᤛᤡᤱᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥
HEB 8:10 ᤂᤧᤴ ᤕᤧᤶ ᤀᤣᤃᤠᤱ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ᤏᤢ ᤁᤴ ᤛᤣᤛᤣᤔᤠᤱᤜᤢᤵᤐᤡᤴ ᤆᤥᤃᤢᤱ. ᤂᤢᤏᤡ᤹ ᤏᤡᤱᤘᤠ᤹ᤒᤥ ᤀᤠᤎᤡᤶᤜᤠ᤹ ᤁᤣ᤺ᤳᤋᤢᤱ ᤐᤡᤖᤢᤱᤛᤡᤱᤅᤠᤱ ᤂᤢᤏᤡ᤹ ᤛᤡᤰᤗᤢᤱᤔᤥ ᤛᤠᤵᤋᤢᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥ᤺ᤱᤅᤠᤀᤠᤱ ᤂᤧᤱᤜᤠ᤹ ᤀᤠᤔᤏᤠ ᤔᤧᤒᤥ᤺ᤱᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥
HEB 8:11 ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤗᤠᤈᤣ᤹ᤒᤠ ᤔᤏᤠ᤺ᤴ ᤜᤢ᤹ᤔᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤍᤠᤱᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤗ᤹ᤖᤡᤰ ᤔᤧᤵᤔᤠᤛᤡ ᤔᤧᤒᤥ᤺ᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ॥
HEB 8:12 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤗᤧᤵᤔᤡ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤢᤏᤡ᤹ ᤗᤠᤕᤥ᤺ᤴ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤱᤅᤡᤴᤗᤥ॥”
HEB 8:13 ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤢᤛᤱ ᤔᤠᤱᤜᤢᤵ ᤐᤠ᤺ᤳᤋᤢᤸᤗᤧ ᤋᤃᤡᤛ᤻ᤔᤠᤴ ᤕᤢᤰ ᤔᤧ᤺ᤴᤏᤣᤒᤠ ᤆᤥᤃᤢᤒᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤕᤢᤰ ᤔᤧ᤺ᤴᤏᤣᤒᤠ ᤏᤢ ᤀᤥᤃᤵ ᤔᤧᤶᤒᤥ᤺ᤱᤔᤏᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤇᤠᤱ ᤜᤠᤖᤠᤀᤣ ᤔᤠᤒᤣ᤺ᤰᤗᤥ॥
HEB 9:1 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤌᤡᤰᤛᤡᤃᤣ᤺ᤰᤛ᤻ᤔᤠ ᤔᤠᤱᤜᤢᤵᤐᤥ ᤛᤣᤘᤠ ᤆᤥ᤺ᤰᤔᤠ ᤌᤡᤶᤜᤠ᤹ ᤘᤕᤧ. ᤜᤧᤰᤁᤩᤠᤱ ᤀᤡᤰᤛᤠᤀᤥ ᤛᤣᤛᤣᤒᤠ ᤋᤧᤴᤏᤠᤱ ᤏᤧᤛ᤻ᤛᤧᤖᤥ॥
HEB 9:2 ᤂᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤏᤧᤳᤇᤡ ᤕᤠᤰᤑᤠ ᤏᤧᤛ᤻ᤛᤧ॥ ᤂᤧᤵᤔᤥ ᤌᤡᤰᤛᤡᤃᤣ᤺ᤰᤛ᤻ᤔᤠ ᤕᤠᤰᤑᤠᤀᤥ ᤛᤣᤔᤡ ᤕᤢᤱᤍᤧᤴ. ᤆᤵᤋᤧᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤜᤠ᤹ ᤏᤧᤛ᤻ᤛᤧ॥ ᤁᤴ ᤋᤧᤴᤏᤡᤴ ᤛᤣᤛᤣᤒᤠ ᤋᤧᤴ ᤔᤧᤔᤧᤳᤋᤢᤖᤥ॥
HEB 9:3 ᤜᤧᤰᤁᤩᤠᤱ ᤂᤧᤵᤔᤥ ᤑᤥ᤺ᤴᤍᤠᤎᤡᤰ ᤐᤳᤇᤧ॥ ᤂᤧᤴ ᤑᤥ᤺ᤴᤍᤠ᤺ᤸᤗᤧ ᤌᤣ᤺ᤰᤋᤢᤒᤠ ᤏᤡᤛᤡᤃᤣ᤺ᤰᤐᤠ ᤕᤠᤰᤑᤠ᤺ᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴ ᤔᤧᤔᤧᤳᤋᤢᤖᤥ॥
HEB 9:4 ᤂᤧᤵᤔᤥ ᤛᤠᤶᤔᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤎᤡᤰ ᤏᤢ ᤛᤠᤶᤔᤩᤠᤱᤅᤡᤸᤗᤧ ᤛᤢ᤺ᤵᤔᤏᤠᤒᤠ ᤔᤠᤱᤜᤢᤵᤐᤡᤸᤗᤧᤴ ᤛᤴᤍᤥ᤺ᤰᤁᤡᤴ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤛᤴᤍᤥ᤺ᤰ ᤛᤡᤃᤠᤱ ᤔᤴᤏᤠ ᤁᤧᤕᤠᤰᤐᤠ ᤛᤠᤶᤔᤩᤠᤱ ᤂᤵᤐᤩᤠ᤺ᤴ. ᤁᤢᤑᤧᤰᤔᤣ᤺ᤳ ᤁᤧᤒᤵᤐᤠ ᤜᤠᤖᤢᤏᤖᤧ ᤁᤢᤍᤰᤁᤠ᤺ᤳᤋᤡᤴ ᤏᤢ ᤌᤡᤒᤥ᤺ᤱ ᤛᤠᤶᤕᤥ ᤀᤡᤱᤈᤠ᤺ᤱ ᤁᤧᤒᤵᤐᤠ ᤔᤠᤱᤜᤢᤵᤐᤡᤸᤗᤧᤴ ᤗᤢᤱᤛᤠᤵᤜᤠ᤹ ᤕᤠᤃᤧᤖᤥ॥
HEB 9:5 ᤂᤧᤴ ᤛᤴᤍᤥ᤺ᤰ ᤛᤶᤍᤠᤱ ᤁᤖᤢᤒ ᤔᤧᤵᤔᤏᤠᤒᤠ ᤔᤡᤔᤡᤍᤡᤱᤃᤧᤴ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤒᤪᤡ᤺ᤵᤐᤠᤸᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤂᤥ᤺ᤔᤠ ᤋᤧᤴᤏᤡᤴ ᤀᤡ᤺ᤵᤋᤧᤳᤇᤢᤀᤠᤱ ᤕᤧᤒᤧᤳᤇᤡᤖᤥ॥ ᤁᤖ ᤀᤠᤸᤗᤥ ᤁᤴ ᤁᤠᤰ ᤐᤠ᤺ᤴᤜᤠ᤹ᤃ ᤀᤠᤏᤡᤃᤧ ᤏᤢ᤺ᤖᤡᤰᤁᤠᤱ ᤐᤠ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤗᤥ॥
HEB 9:6 ᤀᤠᤸᤗ ᤁᤠᤰ ᤁᤴ ᤐᤠ᤺ᤴᤜᤠ᤹ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤌᤡᤰᤕᤠ᤺ᤴᤎᤰ ᤂᤧᤴ ᤗᤠ᤺ᤰᤁᤠᤳᤐᤠ ᤛᤣᤛᤣᤒᤠ ᤋᤧᤴᤏᤥ ᤔᤠᤱᤛᤣᤘᤠ ᤆᤥ᤺ᤰᤛᤧ ᤔᤧᤗᤠ᤺ᤛᤧ॥
HEB 9:7 ᤁᤖ ᤛᤡᤃᤠᤱ ᤗᤧᤵᤔᤠᤱᤒᤠ ᤁᤠᤰᤏᤢ᤺ᤸᤗᤧ ᤛᤣᤛᤣ ᤋᤧᤴᤏᤥᤃ ᤔᤠᤏᤡᤱᤘᤠ᤹ᤑᤢᤛᤠᤶᤒᤧᤴᤗᤰ ᤋᤱᤒᤣᤖᤧ ᤌᤡᤰᤗᤧᤱ ᤔᤠᤰᤂᤡ᤹ᤏᤢ ᤗᤠ᤺ᤛᤧᤖᤥ॥ ᤂᤧᤴ ᤔᤠᤰᤂᤡ᤹ᤀᤡᤱᤃ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤕᤥᤖᤧ ᤗᤠᤃᤡ ᤏᤢ ᤔᤏᤠᤜᤠ᤹ᤖᤧ ᤔᤧᤴᤏᤡ ᤔᤧᤸᤗᤧᤀᤣ ᤔᤧᤈᤥᤃᤢᤒᤠ ᤗᤠᤕᤥᤜᤠ᤹ ᤗᤧᤵᤔᤡ ᤂᤥ᤺ᤔᤠᤖᤧ ᤗᤠᤃᤡ ᤂᤢᤏᤧ᤹ ᤋᤥ᤺ᤴᤍᤢᤖᤥ॥
HEB 9:8 ᤛᤣᤛᤣᤔᤠᤱᤅᤡᤸᤗᤧ ᤁᤴ ᤁᤠᤰ ᤐᤠ᤺ᤴᤗᤠᤶᤒᤠ ᤗᤠ᤺ᤰᤁᤠᤳᤐᤠ ᤛᤣᤛᤣᤒᤠ ᤋᤧᤴᤏᤡᤴ ᤏᤧᤖ ᤌᤠᤖᤡᤰ ᤛᤡᤃᤠᤱᤛ᤻ᤔᤠ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤗᤠ᤺ᤵᤔᤠ ᤗᤠᤶᤔᤡᤴ ᤔᤧᤜᤖᤧᤴ ᤑᤠ᤹ᤀᤠᤱ ᤔᤏᤠᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥
HEB 9:9 ᤁᤱᤃ ᤀᤠᤀᤡᤴ ᤋᤠ᤺ᤴᤍᤡᤰᤐᤠ ᤕᤧᤶᤔᤡᤴ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤔᤡᤰᤛᤣ᤺ᤴᤗᤥ॥ ᤂᤧᤸᤗᤧᤃ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤍᤥ᤺ᤴᤍᤢᤒᤠ ᤆᤥᤓᤠ᤹ᤀᤡᤴ ᤏᤢ ᤛᤡᤍᤢᤱᤈᤓᤠᤜᤠ᤹ᤖᤧ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤛᤢᤳᤌᤥ ᤔᤧᤴᤈᤥᤃᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤀᤠᤎᤠᤰᤗᤥ॥
HEB 9:10 ᤂᤧᤴ ᤐᤠ᤺ᤴᤜᤠ᤹ᤃ ᤆᤠᤔᤠ ᤌᤢᤱᤔᤠ ᤏᤢ ᤐᤖᤡᤰᤐᤖᤡᤰᤐᤠ ᤛᤢᤳᤌᤥ ᤆᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤘᤠᤜᤵᤛᤡᤱᤔᤠ ᤌᤡᤶᤖᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤁᤢᤛᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤧᤱᤜᤠ᤹ᤃ ᤏᤠᤛᤡᤱᤃᤧᤴ ᤌᤰᤁᤥ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤒᤥ᤺ᤱᤒᤠ ᤌᤡᤶᤜᤠ᤹ ᤘᤕᤧᤖᤥ॥
HEB 9:11 ᤁᤧᤖᤧᤰ ᤋᤩᤧ ᤆᤢᤖᤧᤒᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤁᤧᤒᤡᤒᤠ ᤂᤪᤡᤛ᤻ᤋᤧᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ᤃ ᤐᤕᤶ ᤕᤶᤒᤠ ᤏᤢ ᤁᤢᤛᤠᤱ ᤁᤧᤗ᤺ᤒᤠ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠ᤺ᤛᤧᤖᤥ॥ ᤂᤧᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤴ ᤔᤧᤴᤇᤠᤶ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠᤒᤠ ᤔᤧ᤺ᤴᤗᤥ. ᤐᤠ᤺ᤵᤔᤠᤀᤣ ᤐᤥ᤺ᤱᤅᤡᤸᤗᤧ ᤂᤧᤱᤃ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤸᤗᤧᤴᤏᤠᤱ ᤔᤧ᤺ᤴᤗᤥ॥
HEB 9:12 ᤂᤢᤏᤧ᤹ᤃ ᤔᤧᤴᤍᤠᤰ ᤏᤢ ᤐᤡᤳ ᤔᤠᤰᤂᤡ᤹ᤀᤡᤴ ᤔᤧ᤺ᤴ. ᤁᤖ ᤂᤢᤏᤧ᤹ᤃ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤐᤡᤛᤧ ᤂᤧᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤒᤠᤅᤣ ᤁᤢᤔᤠᤰᤂᤡ᤹ᤀᤡᤴ ᤋᤥ᤺ᤴᤍᤢᤖ ᤗᤠ᤺ᤛᤧᤖᤥ॥
HEB 9:13 ᤔᤧᤴᤍᤠᤰ ᤏᤢ ᤁᤢᤶᤒᤠᤒᤠ ᤐᤡᤳ ᤔᤠᤰᤂᤡ᤹ᤀᤡᤸᤗᤧ ᤛᤠᤱᤔᤠᤛᤡᤸᤗᤧ ᤜᤧᤰᤁᤩᤠᤱ ᤁᤖ᤺ᤱ ᤐᤡᤵᤔᤠ᤺ᤴ ᤀᤥ᤹ᤔᤠᤀᤠᤱ ᤁᤧᤗ᤺ᤶᤒᤠ ᤂᤠᤵᤐᤢ᤺ᤸᤗᤧ ᤀᤠᤛᤢᤳᤌᤥ ᤔᤏᤠᤜᤠ᤹ ᤆᤢ᤺ᤵᤔᤠᤛᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤁᤡᤴ ᤛᤢᤳᤌᤥ ᤐᤥ᤺ᤱᤏᤧ ᤑᤠ᤹ᤃᤪ
HEB 9:14 ᤂᤧᤴᤏᤢ᤺ᤸᤗᤧᤃ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤰᤂᤩᤠᤰ ᤕᤖᤡᤰ ᤛᤢᤳᤌᤥ ᤀᤠᤈᤥ᤺ᤰ᥄ ᤂᤢᤏᤧ᤹ ᤔᤧᤴᤏᤢᤵᤔᤏᤠᤒᤠ ᤛᤣᤛᤣᤔᤠᤱᤗᤠᤶ ᤁᤢᤛᤠᤱ ᤁᤧᤗ᤺ᤒᤠ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤒᤠᤅᤣ ᤋᤥ᤺ᤴᤇᤡᤱᤗᤥ॥ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤁᤢᤔᤠᤰᤂᤡ᤹ᤀᤡᤸᤗᤧ ᤛᤡ᤺ᤔᤧᤴᤏᤥ ᤁᤧᤍᤣ᤹ᤒᤠ ᤕᤠ᤺ᤶᤒᤰᤗᤠᤶ ᤀᤠᤏᤡ᤹ ᤂᤠᤛᤡᤱᤅᤡᤴ ᤛᤢᤳᤌᤥ ᤆᤥᤃᤢ᤹ᤖᤥ॥
HEB 9:15 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤗᤰᤁᤡᤴ ᤀᤢ᤺ᤳᤋᤢᤛᤡᤒᤠᤜᤠ᤹ᤖᤧ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤂᤪᤡᤛ᤻ᤋᤧᤴ ᤁᤢᤛᤱ ᤔᤠᤱᤜᤢᤵᤗᤧᤴ ᤐᤠ᤺ᤴᤍᤱᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤥᤃᤢᤒᤠ ᤗᤠᤕᤥᤗᤠᤶ ᤂᤧᤱᤜᤠ᤹ ᤌᤧ᤹ᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤛᤩᤧᤒᤠᤖᤥ॥
HEB 9:16 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤛᤡ᤺ᤀᤠᤸᤗᤧ ᤀᤠᤕᤠᤱᤛᤠᤁᤢᤴᤎᤣ᤺ᤴ ᤂᤢᤏᤧ᤹ ᤂᤥ᤺ᤛᤢ᤹ ᤑᤠ᤹ᤀᤠᤱ ᤆᤥᤃᤢᤒᤠ ᤛᤠᤵᤗᤠ ᤔᤢᤴᤎᤣ᤺ᤱᤃ. ᤂᤧᤴ ᤛᤠᤵᤗᤠ ᤔᤢᤴᤎᤣ ᤁᤧᤛᤠᤵᤐᤠ ᤔᤏᤠ᤺ᤴ ᤛᤩᤧ ᤁᤧᤗ᤹ᤒᤠ ᤐᤷᤔᤠᤱᤃᤡ ᤐᤥ᤺ᤱᤅᤠᤱᤗᤰ ᤛᤧᤰᤂᤠ ᤐᤥ᤺ᤱᤗᤥ॥
HEB 9:17 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤡᤱᤘᤧᤳ ᤘᤠ᤹ᤖ ᤌᤠᤖᤡᤰ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤛᤧᤰᤂᤠ ᤔᤧᤒᤥ᤺ᤱᤏᤧᤸᤗᤥ. ᤁᤖ ᤔᤏᤠ᤺ᤴ ᤛᤡ᤺ᤀᤠᤱᤗᤰ ᤛᤧᤰᤂᤠ ᤐᤥ᤺ᤱᤗᤥ॥
HEB 9:18 ᤒᤠ ᤂᤧᤸᤗᤧ ᤆᤥᤃᤢᤸᤗᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤴᤏᤠᤱ ᤔᤠᤰᤂᤡ᤹ ᤘᤠᤔᤧᤴᤍᤧ᤺ᤴᤏᤣ ᤌᤠᤖᤡᤰ ᤛᤧᤰᤂᤠ ᤔᤧᤒᤥ᤺ᤱᤏᤧᤸᤗᤥ॥
HEB 9:19 ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤁᤢᤛᤠᤶᤕᤥ ᤀᤡᤱᤈᤠ᤺ᤱᤜᤠ᤹ ᤐᤡᤖᤢᤛᤡᤀᤠᤱ ᤂᤧᤸᤗᤧ ᤜᤡᤛᤵ ᤛᤡᤱᤒᤥᤖᤠ᤺ᤰ ᤏᤢ ᤜᤧ᤺ᤰᤁᤧᤗ᤹ᤒᤠ ᤛᤧᤔᤢᤖᤡᤰᤁᤡᤴ ᤆᤫᤠ᤺ᤳᤋᤥ ᤑᤢᤵᤔᤏᤠᤒᤠ ᤐᤡᤳᤛᤠᤳ ᤏᤢ ᤔᤧᤴᤍᤠᤰ ᤔᤠᤰᤂᤡ᤹ᤀᤥ ᤏᤡ᤺ᤵᤛᤢᤀᤠᤱ ᤛᤠᤶᤕᤥᤌᤡᤶ ᤛᤠᤵᤗᤠ ᤏᤢ ᤁᤠᤰ ᤔᤏᤠ ᤛᤶᤍᤠᤱ ᤛᤠᤰᤂᤢᤖᤥ॥
HEB 9:20 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤡᤒᤠ ᤔᤠᤱᤜᤢᤵᤐᤡᤴ ᤛᤧᤰᤂᤠ ᤁᤧᤈᤥ᤺ᤰᤐᤠ ᤔᤠᤰᤂᤡ᤹ᤀᤡᤴ ᤜᤠᤒᤠ ᤁᤴᤗᤥ॥”
HEB 9:21 ᤜᤧᤰᤁᤣᤗ᤹ᤖᤡᤰᤁᤣ ᤔᤥᤛᤠ᤺ᤸᤗᤧ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤏᤢ ᤛᤣᤘᤠ ᤆᤥ᤺ᤰᤔᤠᤸᤗᤧ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤁᤠᤰ ᤛᤠᤔᤠᤑᤢᤔᤠ ᤛᤶᤍᤠᤱ ᤔᤠᤰᤂᤡ᤹ᤀᤡᤴ ᤛᤠᤰᤂᤢᤖᤥ॥
HEB 9:22 ᤛᤧᤰᤂᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤕᤖᤡᤰ ᤁᤢᤛᤡᤰ ᤐᤠ᤺ᤴᤜᤠ᤹ᤃ ᤔᤠᤰᤂᤡ᤹ᤖᤧ ᤛᤢᤳᤌᤥ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤔᤠᤰᤂᤡ᤹ ᤘᤠᤔᤧᤴᤍᤧ᤺ᤴᤏᤣᤃ ᤗᤠᤕᤥ᤺ᤴ ᤗᤧᤵᤔᤡ ᤔᤧᤒᤥ᤺ᤱᤏᤧᤸᤗᤥ॥
HEB 9:23 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤜᤧᤰᤋᤱᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤡᤜᤠ᤹ ᤛᤣᤛᤣ ᤛᤢᤳᤌᤥ ᤆᤥ᤺ᤰᤔᤠ ᤐᤥ᤺ᤰᤂᤧ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠ᤺ᤴᤜᤠ᤹ᤀᤣ ᤛᤢᤳᤌᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤂᤧᤴᤏᤢ᤺ᤸᤗᤧ ᤏᤢ᤺ᤒᤠ ᤛᤡᤍᤢᤱᤈᤓᤠ᤺ᤴ ᤆᤠᤜᤠᤒᤠ ᤆᤥᤃᤧ॥
HEB 9:24 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤸᤗᤧ ᤁᤢᤒᤡ ᤁᤢᤀᤡᤛᤡ᤺ᤰᤐᤠ ᤔᤧᤴᤇᤠᤶ ᤜᤢᤰᤁᤡᤸᤗᤧ ᤆᤥ᤺ᤰᤔᤏᤠ ᤛᤣᤛᤣᤒᤠ ᤋᤧᤴᤏᤥ ᤔᤧᤗᤠ᤺ᤛᤧᤴ. ᤁᤖ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡᤀᤣ ᤀᤠᤏᤡ᤹ ᤗᤠᤃᤡ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠ᤺ᤛᤧᤖᤥ॥
HEB 9:25 ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤋᤧᤴᤏᤥ ᤋᤱᤒᤣ ᤌᤵᤔᤣ ᤌᤰᤛᤠ ᤔᤠᤰᤂᤡ᤹ᤏᤢ ᤗᤠ᤺ᤛᤧᤒᤠ ᤁᤢᤀᤡᤛᤡ᤺ᤰ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠ᤺ᤛᤧᤸᤗᤧ ᤂᤢᤏᤧ᤹ ᤀᤧᤳᤗᤧᤱ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤱᤛᤧ ᤔᤧᤗᤠ᤺ᤛᤧᤴᤗᤥ॥
HEB 9:26 ᤔᤧ᤺ᤴᤏᤡᤸᤗᤧᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤐᤥ᤺ᤰᤂᤧᤀᤠᤱᤎᤥ ᤂᤢᤏᤧ᤹ ᤕᤖᤡᤰᤗᤧᤱ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠ ᤁᤧᤒᤥ᤺ᤱᤒᤠ ᤘᤕᤧ. ᤁᤖ ᤂᤢᤏᤧ᤹ᤃ ᤁᤴ ᤁᤢᤏᤢᤵᤔᤠ ᤕᤧᤶᤔᤥ ᤕᤖᤡᤰᤗᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤔᤠᤛᤡ ᤑᤠ᤹ᤀᤠᤱ ᤌᤡᤰᤗᤧᤱᤔᤠᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤖᤥ॥
HEB 9:27 ᤔᤧᤴᤇᤠᤶ ᤕᤠᤵᤔᤡ ᤁᤧᤖᤧᤰ ᤌᤡᤰᤗᤧᤱᤃ ᤛᤡ᤺ᤔᤠ ᤐᤥ᤺ᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤥ ᤕᤧᤵᤔᤠ ᤐᤥ᤺ᤱᤒᤠ ᤁᤢᤀᤡᤛᤡ᤺ᤰ
HEB 9:28 ᤂᤪᤡᤛ᤻ᤋᤧᤴ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤜᤠ᤹ ᤁᤢ᤺ᤛᤧ ᤌᤡᤰᤗᤧᤱᤔᤥ ᤛᤡᤍᤢᤱᤈᤓᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤠᤶᤔᤥ ᤕᤢ᤺ᤸᤗᤧ ᤀᤠᤏᤡ᤹ ᤗᤠᤕᤥᤜᤠ᤹ ᤁᤢ᤺ᤛᤧᤃ ᤔᤧ᤺ᤴ. ᤁᤖ ᤂᤢᤏᤧ᤹ ᤁᤢᤕᤢ᤺ᤔᤠᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤁᤧᤜᤠᤱᤒᤠᤜᤠ᤹ ᤛᤧᤴᤗᤵ ᤐᤡᤛᤧᤏᤧ ᤕᤢ᤺ᤖᤥ॥
HEB 10:1 ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤱᤃ ᤋᤠ᤺ᤴᤍᤡ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤁᤧᤎᤠᤰᤐᤠ ᤛᤠᤶᤒᤪᤡ᤺ᤵᤐᤠ ᤁᤢᤀᤡᤛᤡ᤺ᤰᤗᤰᤗᤥ. ᤛᤧᤰᤂᤠᤒᤠ ᤐᤠ᤺ᤴ ᤔᤧ᤺ᤴᤗᤥ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤏᤠ᤺ᤰᤋᤢᤒᤠ ᤋᤱᤒᤣ ᤌᤵᤔᤣ ᤀᤧᤳᤗᤧᤱ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤂᤧᤴ ᤛᤣᤛᤣ ᤔᤠᤱᤃᤧᤄᤒᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤁᤢᤗᤡᤱᤎᤥ ᤔᤧᤃᤧᤳᤋᤢᤴᤇᤡᤴᤗᤥ॥
HEB 10:2 ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤗᤡᤱᤎᤥ ᤁᤧᤵᤔᤠ ᤛᤢᤰᤋᤢᤛᤡᤸᤗᤧᤃ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤆᤰ ᤗ᤹ᤖᤧᤒᤠᤖᤥ॥ ᤜᤧᤰᤁᤣ᤺ᤸᤗᤧ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤌᤡᤰᤗᤧᤱᤔᤥ ᤁᤠᤰ ᤐᤖᤡᤰᤗᤧ ᤛᤢᤳᤌᤥ ᤔᤧᤒᤥ᤺ᤰᤂᤧᤔᤧᤴ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤧᤗᤥ᤺ᤖᤧᤴᤒᤠᤔᤧᤴ॥
HEB 10:3 ᤁᤖ ᤂᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤕᤥ᤺ᤴ ᤋᤱᤒᤣ ᤌᤵᤔᤣ ᤏᤡᤱᤘᤠ᤹ᤛᤢᤶᤔᤥ ᤋᤠᤖᤢᤖᤥ.
HEB 10:4 ᤌᤣᤀᤠᤱᤓᤧᤸᤗᤧ ᤁᤢᤶᤒᤠᤒᤠ ᤐᤡᤳ ᤏᤢ ᤔᤧᤴᤍᤠᤰ ᤔᤠᤰᤂᤡ᤹ᤀᤡᤸᤗᤧ ᤗᤠᤕᤥᤜᤠ᤹ ᤘᤠᤍᤣ᤹ᤔᤠ ᤔᤧᤛᤢᤰᤋᤢᤴᤗᤥ॥
HEB 10:5 ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤧ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤢ. “ᤛᤡᤍᤢᤱᤈᤓᤠ ᤏᤢ ᤆᤥᤓᤠ᤹ᤜᤠ᤹ ᤂᤧᤏᤧ᤹ ᤏᤡᤱᤘᤠ᤹ ᤁᤧᤴᤈᤥᤃᤢᤴᤗᤥ. ᤁᤖ ᤏᤠᤛᤡᤱᤃᤧᤴ ᤌᤰᤁᤡᤴ ᤋᤥ᤺ᤶᤔᤠ ᤑᤠ᤹ᤀᤠᤱ ᤁᤧᤒᤡᤖᤠᤱᤗᤥ॥
HEB 10:6 ᤔᤡᤎᤡᤱᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤏᤢ ᤗᤠᤕᤥᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤱᤘᤠ᤹ ᤔᤧᤍᤩᤧᤏᤧᤴᤗᤥ॥
HEB 10:7 ᤜᤧᤰᤁᤩᤠᤱ ᤕᤠᤶᤔᤥ ᤀᤡᤱᤃᤠ᤹ ᤐᤠ᤺ᤳᤋᤢᤱ. ‘ᤀᤥᤔᤧᤳᤋᤧ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤣ. ᤛᤠᤶᤕᤥᤛᤠᤵᤗᤠᤀᤥ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤵᤐᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤁᤧᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤁᤵᤔᤥ ᤋᤩᤠᤱᤅᤠᤱ ᤘᤠ᤹ᤀᤠᤖᤥ॥’”
HEB 10:8 ᤂᤪᤡᤛ᤻ᤋᤖᤧ ᤋᤃᤡ ᤐᤠ᤺ᤳᤋᤢ. “ᤂᤧᤏᤧ᤹ ᤛᤡᤍᤢᤱᤈᤓᤠ ᤏᤢ ᤋᤥ᤺ᤶᤔᤏᤠᤒᤠ ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤀᤠᤱ ᤋᤥ᤺ᤶᤔᤏᤠᤒᤠ ᤏᤢ ᤗᤠᤕᤥᤖᤧ ᤗᤠᤃᤡ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤋᤠ᤺ᤰᤔᤠ ᤏᤡᤱᤘᤠ᤹ ᤁᤧᤴᤈᤥᤃᤢᤴᤗᤥ ᤜᤧᤰᤁᤩᤠᤱ ᤁᤧᤏᤡᤱᤘᤠ᤹ᤀᤠᤱ ᤔᤧᤍᤩᤧᤏᤧᤴᤗᤥ॥” (ᤜᤧᤰᤁᤣᤛᤠᤱ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤔᤧᤍᤥ᤺ᤴᤍᤢᤖᤥ)॥
HEB 10:9 ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤁᤧᤏᤡᤱᤘᤠ᤹ ᤜᤧᤰᤁᤣ ᤆᤥ᤺ᤰᤛᤧ ᤁᤵᤔᤥ ᤋᤩᤠᤱᤅᤠᤱ ᤘᤠ᤹ᤀᤠᤖᤥ॥” ᤂᤢᤏᤧ᤹ ᤁᤢᤛᤱ ᤔᤠᤱᤜᤢᤵᤐᤡᤴ ᤕᤢᤰᤛᤡᤱ ᤆᤥ᤺ᤰᤛᤧ ᤋᤃᤡᤛ᤻ᤔᤠ ᤔᤠᤱᤜᤢᤵᤐᤡᤴ ᤂᤠᤖᤥ᤺ᤳᤋᤡ ᤆᤥᤃᤢᤖᤥ॥
HEB 10:10 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤗᤠᤶᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠᤗᤠᤶ ᤀᤠᤏᤡ᤹ ᤛᤣᤛᤣ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥
HEB 10:11 ᤋᤃᤡᤒᤠ ᤔᤠᤱᤜᤢᤵᤐᤥᤃ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤖᤧᤰᤗᤧ ᤌᤡᤰᤕᤠ᤺ᤴᤎᤰ ᤛᤠᤶᤕᤥᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤗᤳᤇᤠ ᤐᤖᤡᤰᤐᤠ ᤛᤡᤍᤢᤱᤈᤓᤠ᤺ᤴ ᤀᤧᤳᤗᤧᤱ ᤔᤧᤍᤥ᤺ᤴᤍᤢᤖᤥ. ᤁᤖ ᤂᤧᤸᤗᤧᤃ ᤀᤠᤵᤑᤠᤸᤗᤧᤀᤠᤱ ᤗᤠᤕᤥ᤺ᤴ ᤋᤣ᤹ᤔᤠ ᤔᤧᤛᤢᤰᤋᤢᤴᤗᤥ॥
HEB 10:12 ᤁᤖ ᤀᤠᤏᤡ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤕᤧᤛᤢ ᤂᤪᤡᤛ᤻ᤋᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤥ ᤌᤡᤰᤗᤧᤱᤔᤥ ᤛᤍᤠᤍᤡᤱᤗᤧ ᤗᤠᤃᤡ ᤗᤠᤕᤥ᤺ᤴ ᤋᤣ᤹ᤔᤠ ᤑᤠ᤹ᤀᤠᤱ ᤀᤠᤒᤠᤅᤣ ᤛᤡᤍᤢᤱᤈᤓᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤛᤡᤱᤗᤥ॥
HEB 10:13 ᤂᤧᤴ ᤕᤧᤶᤔᤠᤱᤎᤥ ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤁᤢᤕᤢᤰᤁᤥ ᤔᤧᤴᤍᤠ᤺ᤳᤇᤡᤱᤅᤣ ᤌᤠᤖᤡᤰ ᤜᤠᤱᤄᤢᤛᤡᤖ ᤕᤢᤱᤗᤥ॥
HEB 10:14 ᤌᤣᤀᤠᤱᤓᤧᤸᤗᤧ ᤁᤴ ᤗᤳᤌᤡᤰ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤕᤥᤗᤠᤶ ᤛᤣᤛᤣ ᤁᤧᤒᤥ᤺ᤱᤒᤠᤖ ᤁᤧᤒᤵᤐᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥
HEB 10:15 ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧᤀᤠᤱ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤗᤥ.
HEB 10:16 “ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. ‘ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤏᤢ ᤆᤥᤃᤢᤱᤒᤠ ᤁᤢᤛᤱ ᤔᤠᤱᤜᤢᤵᤐᤡᤴ ᤒᤠ ᤁᤴᤗᤥ–ᤀᤡᤱᤃᤠ᤹ ᤀᤠᤎᤡᤶᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤗᤢᤱᤔᤥ ᤕᤢᤰᤂᤢᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤘᤠ᤹ᤒᤥ ᤛᤠᤵᤋᤢᤱ ᤐᤡᤖᤢᤱᤛᤡᤱᤗᤥ॥’”
HEB 10:17 ᤂᤢᤏᤧ᤹ ᤕᤠᤶᤔᤥᤀᤠᤱ ᤐᤠ᤺ᤳᤋᤢ. “ᤀᤡᤱᤃᤠ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤜᤠ᤹ ᤏᤢ ᤑᤧᤴ ᤕᤠ᤺ᤶᤒᤰᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤱᤅᤡᤴᤗᤥ॥”
HEB 10:18 ᤀᤠᤸᤗ ᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤗᤠᤕᤥᤜᤠ᤹ ᤗᤧᤵᤔᤡ ᤐᤥ᤺ᤱᤔᤠ ᤑᤠ᤹ᤀᤠᤱ ᤛᤡᤍᤢᤱᤈᤓᤠ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ॥
HEB 10:19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤏᤧ᤹ᤏᤢᤛᤠ᤹ ᤏᤢ ᤑᤢ᤹ᤏᤢᤛᤠ᤹ᤛᤣ. ᤀᤠᤏᤡ᤹ᤃ ᤁᤠᤰᤏᤢ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤛᤣᤛᤣᤒᤠ ᤋᤧᤴᤏᤥ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤗᤠᤶ ᤜᤠᤱᤜᤠᤱᤅᤠᤱ ᤗᤠ᤺ᤵᤔᤠ ᤀᤠᤄᤥ᤺ᤛᤢᤶ॥
HEB 10:20 ᤁᤴ ᤁᤢᤛᤱ ᤏᤢ ᤜᤡᤱᤔᤴ ᤁᤧᤒᤡᤒᤠ ᤗᤠᤶᤔᤡᤴ ᤀᤠᤏᤡ᤹ ᤗᤠᤃᤡ ᤛᤣᤛᤣ ᤑᤥ᤺ᤴᤍᤠ᤺ᤴ ᤜᤶᤒᤠ ᤁᤢᤀᤡᤛᤡ᤺ᤰ ᤜᤖᤧᤀᤠᤱ ᤘᤠ᤹ᤖᤥ–ᤂᤧᤴ ᤛᤣᤛᤣ ᤑᤥ᤺ᤴᤍᤠ᤺ᤱᤃ ᤕᤧᤛᤢᤖᤧ ᤏᤠᤛᤡᤱᤃᤧᤴ ᤁᤢᤎᤰᤗᤥ॥
HEB 10:21 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤀᤠᤏᤡ᤹ ᤐᤕᤶ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤀᤠᤃᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ.
HEB 10:22 ᤀᤠᤏᤡ᤹ ᤋᤥ᤺ᤴᤍᤥ᤺ᤶᤒᤠ ᤛᤣᤛᤣ ᤛᤡᤰᤗᤢᤱᤔᤠᤴᤏᤢ ᤜᤧᤰᤁᤩᤠᤱ ᤜᤠᤱᤜᤠᤱᤒᤠ ᤏᤛᤠ᤺ᤴᤏᤡᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤐᤣᤃᤡᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤣᤛᤣ ᤆᤥ᤺ᤰᤛᤧ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤏᤡ᤹ ᤋᤠᤵᤑᤧ᤺ᤶᤒᤠ ᤂᤠᤛᤡᤱᤅᤡᤴ ᤛᤠᤰᤂᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤣᤛᤣᤒᤠ ᤆᤫᤠ᤺ᤳᤋᤡᤸᤗᤧ ᤘᤠᤜᤵᤋᤢᤀᤠᤱ ᤘᤠ᤹ᤖᤥ॥
HEB 10:23 ᤜᤧᤰᤁᤩᤠᤱ ᤀᤠᤏᤡ᤹ ᤀᤠᤃᤳᤋᤢᤶ ᤗ᤹ᤖᤡᤰ ᤋᤧᤴᤍᤡᤱ ᤀᤠᤈᤥᤃᤢᤶᤒᤠ ᤏᤡᤱᤛᤠᤱᤅᤡᤴ ᤔᤧᤸᤗᤧᤳᤋᤣ ᤁᤳᤋᤢᤶᤗᤥ. ᤌᤣᤀᤠᤱᤓᤧᤸᤗᤧ ᤔᤠᤱᤜᤧᤰ ᤁᤧᤈᤥ᤺ᤰᤐᤠᤱᤃ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ॥
HEB 10:24 ᤀᤠᤸᤗ ᤀᤠᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤏᤢ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤀᤠᤰᤂᤣᤀᤠᤱ ᤀᤠᤛᤢᤰᤋᤢᤶ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤶᤗᤥ॥
HEB 10:25 ᤁᤢᤓᤠ ᤏᤛᤠᤏᤡᤒᤠᤜᤠ᤹ᤖᤧ ᤛᤥᤖᤡᤰ ᤆᤢᤶᤔᤠ ᤕᤧᤵᤗᤧᤰ ᤔᤧᤱᤃᤳᤋᤢᤴ. ᤁᤖ ᤀᤠᤏᤡ᤹ᤃ ᤛᤥᤖᤡᤰ ᤆᤢᤶᤔᤠ ᤗᤧᤖᤢᤶ ᤔᤧ᤺ᤴᤗᤥ॥ ᤁᤖ ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤴᤏᤡᤴ ᤏᤡ᤺ᤳᤋᤠᤱ ᤋᤠᤖ ᤐᤵᤐᤠ ᤂᤡᤏᤡ᤹ ᤁᤧᤏᤡ᤺ᤛᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤜᤠᤱᤜᤠᤱ ᤔᤧᤳᤋᤠᤛᤡ᤹ᤖᤥ॥
HEB 10:26 ᤀᤠᤏᤡ᤹ ᤛᤧᤰᤂᤠ᤺ᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤛᤠᤱ ᤏᤡ᤺ᤏᤡ᤺ᤒᤠᤀᤣ ᤗᤠᤕᤥ ᤀᤠᤈᤥᤃᤢᤶᤗ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤧᤴ ᤗᤠᤕᤥᤗᤠᤶ ᤗᤧᤵᤔᤡ ᤐᤡᤔᤠ ᤁᤧᤛᤢᤰᤐᤠ ᤛᤡᤍᤢᤱᤈᤓᤠ ᤌᤣᤀᤠᤱ ᤜᤥ᤺ᤵᤗᤥ॥
HEB 10:27 ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤴ ᤜᤧᤰᤋᤱᤒᤠ ᤗᤠᤕᤥ ᤁᤧᤈᤥ᤺ᤰᤐᤠᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤂᤢᤶᤍᤡᤱᤅᤡᤴ ᤛᤧᤰᤂᤠᤀᤣ ᤂᤥ᤺ᤛᤢ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥ᤺ᤰᤐᤠ ᤂᤧᤴ ᤔᤏᤠ᤺ᤴ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡ᤺ᤸᤗᤧ ᤔᤧᤰᤂᤢ᤹ᤖᤥ॥
HEB 10:28 ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤴ ᤁᤧᤏᤠ᤹ᤒᤠ ᤔᤏᤠ᤺ᤴ ᤏᤧᤳᤇᤡ ᤀᤡᤃᤪ ᤛᤢᤶᤛᤡᤖᤧ ᤔᤧᤒᤡᤖᤢᤒᤠ ᤐᤷᤔᤠᤱᤃᤡ ᤘᤠ᤹ᤏᤧ ᤑᤠ᤹ᤃᤪ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤔᤧ᤺ᤴᤏᤧ ᤛᤡ᤺ᤔᤠ ᤐᤥ᤺ᤱ॥
HEB 10:29 ᤏᤡᤱᤘᤠ᤹ᤑᤢᤛᤠ᤺ᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤧᤴ. ᤀᤠᤒᤠᤅᤣ ᤛᤣᤛᤣ ᤁᤧᤈᤥ᤺ᤰᤐᤠ ᤔᤠᤱᤜᤢᤵᤐᤡᤸᤗᤧᤴ ᤔᤠᤰᤂᤡ᤹ᤀᤡᤴ ᤀᤠᤛᤢᤳᤌᤥ ᤁᤧᤈᤥ᤺ᤰᤐᤧᤴ ᤜᤧᤰᤁᤩᤠᤱ ᤗᤢᤱᤃᤢᤶ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤁᤧᤀᤵᤐᤧᤴ ᤂᤧᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤂᤢᤶᤍᤡᤱ ᤂᤥ᤺ᤔᤠ ᤗᤠ᤹ᤖᤢᤖᤥ॥
HEB 10:30 ᤌᤣᤀᤠᤱᤓᤧᤸᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤂᤢᤶᤍᤡᤱ ᤐᤡᤔᤠ ᤀᤠᤗᤰᤐᤧᤴᤗᤥ. ᤀᤡᤱᤃᤠ᤹ᤀᤣ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤖᤢᤱ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠᤴ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ ᤀᤰᤂᤣᤀᤠᤱ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤕᤜᤘᤣ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤢᤔᤏᤠᤜᤠ᤹ ᤂᤠᤛᤧᤴ ᤗᤥ᤺ᤴᤍᤢᤛᤡ᤹ᤖᤥ॥”
HEB 10:31 ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤔᤠᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤐᤠ᤺ᤴᤗᤥ᥄
HEB 10:32 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤥ᤺ᤳᤋᤡ᤺ᤴ ᤁᤧᤏᤡ᤺ᤛᤢᤶᤔᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤒᤠ ᤋᤃᤡᤒᤠ ᤕᤧᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤂᤡᤏᤡ᤹ ᤛᤠ᤹ᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤛᤠᤱ ᤏᤛᤠ᤺ᤴᤏᤥ ᤀᤕᤠᤰ ᤔᤧᤸᤗ᤹ᤀᤣ ᤁᤧᤘᤕᤡᤒᤠᤴ ᤀᤡ᤺ᤳᤋᤧᤶᤔᤧ᤹ᤀᤥ॥
HEB 10:33 ᤁᤢᤓᤠ ᤕᤧᤶᤔᤥᤃ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤜᤡᤏᤠ᤺ᤶ ᤁᤧᤶᤔᤧᤳᤋᤡᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹॥ ᤜᤧᤰᤁᤩᤠᤱ ᤁᤢᤓᤠ ᤕᤧᤶᤔᤥᤃ ᤜᤧᤰᤋᤱᤒᤠ ᤐᤠ᤺ᤴᤏᤥ ᤁᤧᤎᤠ᤺ᤒᤠᤜᤠ᤹ᤏᤢ ᤛᤥᤖᤡᤰ ᤁᤧᤘᤕᤡᤀᤠᤱ ᤁᤢᤓᤠ᤹ ᤁᤧᤒᤡᤖᤢᤶᤛᤡᤶᤗᤥ॥
HEB 10:34 ᤂᤡᤏᤡ᤹ᤃ ᤐᤢᤱᤗᤠᤜᤡᤶᤔᤥ ᤁᤧᤎᤠ᤺ᤒᤠᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶ॥ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤶᤏᤠᤵᤋᤡ ᤁᤧᤶᤍᤣ᤹ᤖᤡᤛᤠᤱ ᤁᤧᤛ᤺ᤳᤋᤡᤖ ᤏᤠᤛᤡᤁᤧᤎ᤺ᤳᤋᤢᤶ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠ ᤕᤠᤶᤛᤠᤶᤃᤧᤴ ᤕᤠᤱᤛᤠᤁᤢᤴᤎᤣ᤺ᤴ ᤁᤧᤃᤳᤋᤢᤶ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
HEB 10:35 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤡᤛ᤻ᤛᤣᤒᤠ ᤏᤛᤠ᤺ᤴᤏᤡᤴ ᤔᤧᤗᤧᤖᤧᤶᤔᤡᤶᤏᤧ᤹ᤀᤥ॥ ᤂᤧᤸᤗᤧ ᤕᤶᤒᤠ ᤜᤠᤱᤛᤧᤶᤔᤡᤴ ᤋᤠᤖᤢᤖᤥ॥
HEB 10:36 ᤂᤡᤏᤡ᤹ ᤏᤠᤛᤡᤁᤧᤎ᤺ᤳᤋᤢᤶᤗ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤧᤈᤥᤃᤢᤶᤔᤡᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤧᤄᤥ᤺ᤛᤢᤶᤗᤥ॥
HEB 10:37 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢ᤹. “ᤀᤠᤰᤂᤥ ᤛᤵᤔᤠᤀᤠᤱ ᤁᤧᤍᤠ᤺ᤒᤠᤖ ᤁᤧᤒᤵᤐᤧᤴ ᤋᤠ᤺ᤀᤣᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤛᤢ᤺ᤏᤧᤴᤗᤥ॥
HEB 10:38 ᤁᤖ ᤀᤡᤱᤃᤠ᤹ ᤀᤠᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤏᤛᤠ᤺ᤴᤗᤠᤶᤒᤠᤀᤣ ᤔᤧᤜᤡᤱᤗᤥ॥ ᤂᤧᤱᤜᤠ᤹ ᤀᤡᤱᤃᤠ᤹ᤗᤠᤶ ᤔᤧᤏᤢ᤺ᤱ ᤔᤧᤒᤣ᤺ᤰᤏᤧ ᤑᤠ᤹ᤃᤪ ᤂᤧᤱᤜᤠ᤹ᤏᤢ ᤀᤠᤛᤡᤰ ᤂᤧᤱᤗᤥ॥”
HEB 10:39 ᤁᤖ ᤀᤠᤏᤡ᤹ᤃ ᤁᤧᤏᤢ᤺ᤱᤒᤠ ᤁᤧᤒᤣ᤺ᤰᤐᤠᤀᤠᤱ ᤁᤧᤔᤧᤰᤐᤠ ᤔᤏᤠᤛᤡ ᤔᤧ᤺ᤴᤗᤥ. ᤁᤖ ᤀᤠᤏᤡ᤹ᤃ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤔᤧᤰᤔᤠᤗᤠᤶ ᤋᤠᤱᤛᤧ᤺ᤵ ᤁᤧᤄᤥ᤺ᤒᤠᤛᤡᤖᤥ॥
HEB 11:1 ᤀᤠᤸᤗ ᤏᤛᤠ᤺ᤴ ᤑᤠ᤹ᤀᤡᤴ ᤌᤧᤔᤠ ᤑᤠ᤹ᤗᤧ ᤏᤡᤱᤛᤠᤱ ᤀᤠᤈᤥᤃᤢᤶᤒᤠᤴ ᤛᤧᤰᤂᤠᤀᤣ ᤐᤥ᤺ᤱ ᤜᤧᤰᤁᤩᤠᤱ ᤀᤠᤴᤏᤡ᤺ᤛᤢᤶᤔᤡᤴᤒᤠᤴ ᤛᤧᤰᤂᤠᤀᤣ ᤘᤠ᤹ ᤑᤠ᤹ᤀᤠᤱ ᤏᤡᤛ᤻ᤛᤣ ᤆᤥ᤺ᤰᤔᤠᤖᤥ॥
HEB 11:2 ᤀᤢᤏᤠᤜᤢᤖᤡᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤩᤧᤖᤥ॥
HEB 11:3 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳ ᤆᤥᤃᤢᤒᤠ ᤑᤠ᤹ᤀᤠᤱ ᤀᤠᤏᤡ᤹ ᤏᤛᤠ᤺ᤴᤗᤠᤶᤒᤠ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ. ᤜᤧᤰᤁᤣᤗ᤹ᤖᤡᤰ ᤏᤡ᤺ᤔᤏᤠᤒᤠ ᤐᤠ᤺ᤴᤜᤠ᤹ᤃ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤗᤠᤶ ᤐᤥ᤺ᤰᤂᤧᤒᤠᤖᤥ॥
HEB 11:4 ᤏᤛᤠ᤺ᤴᤗᤠᤶᤒᤠᤀᤣ ᤜᤠᤒᤡᤗᤖᤧ ᤁᤢᤶᤓᤢ᤹ ᤁᤕᤡᤏᤧᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠ ᤛᤡᤍᤢᤱᤈᤓᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤛᤡᤍᤢᤱᤈᤓᤠ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤀᤠᤱ ᤂᤧᤴᤗᤠᤶᤒᤠᤀᤣ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤔᤏᤠ ᤔᤧᤳᤋᤢᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤛᤩᤧᤛᤠᤱ ᤀᤠᤸᤗᤥ ᤌᤠᤖᤡᤰ ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤸᤗᤧ ᤏᤢ᤺ᤒᤠ ᤐᤠ᤺ᤴ ᤀᤠᤜᤢ᤹ᤖᤥ॥
HEB 11:5 ᤏᤛᤠ᤺ᤴᤗᤠᤶᤒᤠᤀᤣ ᤜᤏᤥᤰᤁᤧᤴ ᤔᤧᤴᤇᤡᤀᤣ ᤁᤢᤜᤡᤱᤘᤧᤳ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤠ᤺ᤱ ᤋᤣ᤹ᤖᤧᤖᤥ॥ ᤂᤢᤏᤧ᤹ ᤁᤢᤎᤰᤁᤡᤴ ᤂᤥ᤺ᤔᤧᤍᤧᤳᤋᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤠ᤺ᤱ ᤋᤣ᤹ᤖᤢᤖᤥ॥ ᤂᤢᤏᤧ᤹ ᤌᤠ᤺ᤱ ᤋᤣ᤹ᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠᤛᤢᤀᤠᤱ ᤘᤕᤧ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤋᤥ᤺ᤴᤍᤡ ᤐᤡᤖᤢ᤹ᤖᤥ॥
HEB 11:6 ᤜᤧᤰᤁᤩᤠᤱ ᤏᤛᤠ᤺ᤴ ᤔᤧ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤛᤢᤰᤔᤧᤍᤧᤳᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤀᤥ ᤁᤧᤍᤠ᤺ᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤘᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤂᤢᤏᤧ᤹ ᤁᤧᤃᤥ᤺ᤵᤐᤠᤜᤠ᤹ ᤜᤠᤱᤛᤧᤶ ᤐᤡᤖᤢᤛᤡ᤹ᤖᤥ ᤗ᤹ᤖᤡᤰ ᤏᤛᤠ᤺ᤴ ᤆᤥ᤺ᤰᤔᤠᤀᤣ ᤐᤥ᤺ᤱᤗᤥ॥
HEB 11:7 ᤏᤛᤠ᤺ᤴᤗᤠᤶᤒᤠᤀᤣ ᤏᤢᤜᤠᤖᤧ ᤁᤢᤜᤡᤶᤛᤕᤱᤜᤠ᤹ ᤋᤠᤱᤛᤧ᤺ᤵᤛᤧ ᤘᤠᤗᤠᤎᤠ ᤆᤥᤃᤢᤖᤥ॥ ᤋᤃᤡ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥ᤺ᤱᤅᤣ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤀᤠᤸᤗ ᤐᤥ᤺ᤱᤗᤥ ᤗ᤹ᤖᤡᤰ ᤛᤠᤶᤍᤡᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤂᤧᤵᤛᤢᤀᤠᤱ ᤜᤧᤰᤁᤣ ᤆᤥᤃᤢᤖᤥ॥ ᤂᤢᤏᤧ᤹ ᤁᤢᤏᤛᤠ᤺ᤴᤗᤠᤶᤒᤠᤀᤣ ᤂᤧᤴ ᤕᤧᤶᤔᤥᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧ ᤜᤧᤰᤁᤩᤠᤱ ᤏᤛᤠ᤺ᤴᤗᤠᤶ ᤁᤧᤍᤠ᤺ᤒᤠ ᤛᤠᤶᤕᤥᤏᤡᤒᤠ ᤗᤰ ᤁᤧᤄᤥ᤺ᤒᤠ ᤐᤥ᤺ᤰᤂᤧᤖᤥ॥
HEB 11:8 ᤏᤛᤠ᤺ᤴᤗᤠᤶᤒᤠᤀᤣ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤂᤧᤵᤛᤢ॥ ᤜᤧᤰᤁᤩᤠᤱ ᤀᤢ᤺ᤳᤋᤢᤀᤠᤱ ᤐᤣᤃᤧ᤹ ᤔᤧᤳᤋᤢᤒᤠ ᤗᤠᤈᤣ᤹ᤀᤥ ᤐᤣᤖᤥ॥ ᤂᤧᤴ ᤗᤠᤈᤣ᤹ᤀᤡᤱᤃ ᤋᤠ᤺ᤴᤍᤡ ᤂᤢᤏᤧ᤹ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤁᤢᤗᤰ ᤘᤕᤧᤖᤥ॥ ᤂᤢᤏᤧ᤹ ᤀᤠᤳᤋᤠᤴ ᤐᤣ᤺ᤰᤁᤠᤖ ᤐᤳᤋᤠ ᤑᤠ᤹ᤀᤠᤱ ᤌᤣᤀᤠᤱ ᤔᤧᤏᤡ᤺ᤛᤢᤴᤗᤥ॥
HEB 11:9 ᤏᤛᤠ᤺ᤴᤗᤠᤶᤒᤠᤀᤣ ᤂᤢᤏᤧ᤹ ᤔᤠᤱᤜᤧᤰᤁᤥ ᤂᤥ᤺ᤛᤢᤒᤠ ᤗᤠᤈᤣ᤹ᤀᤥ ᤜᤡᤶ ᤆᤥᤃᤢᤀᤠᤱ ᤕᤠ᤺ᤰᤋᤧᤛᤠᤱ ᤂᤢᤏᤧ᤹ᤃ ᤔᤠ᤺ᤱᤄᤠ ᤗᤠᤈᤣ᤹ᤀᤥ ᤋᤠᤵᤁᤧᤒᤧ᤹ᤒᤠᤀᤠᤱ ᤁᤧᤘᤠ᤹ᤒᤠ ᤁᤢᤀᤡᤛᤡ᤺ᤰ ᤘᤕᤧᤖᤥ॥ ᤂᤢᤏᤧ᤹ᤏᤢ ᤛᤥᤖᤡᤰ ᤔᤠᤱᤜᤧᤰᤗᤧᤴ ᤗᤰ ᤁᤧᤄᤥ᤺ᤒᤠ ᤀᤡᤛᤜᤠᤁ ᤏᤢ ᤕᤠᤁᤢᤒ ᤁᤢᤀᤡᤛᤡ᤺ᤰ ᤂᤢᤏᤧ᤹ᤀᤠᤱ ᤛᤠ᤺ᤱᤃᤠᤜᤡᤶᤔᤥ ᤘᤕᤧᤃᤳᤋᤧᤖᤥ॥
HEB 11:10 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤔᤧᤴᤏᤢᤵᤔᤏᤠᤒᤠ ᤐᤠᤱᤕᤰ ᤁᤧᤏᤧᤒᤠ ᤕᤧᤰᤕᤰᤌᤡᤰ ᤁᤥ᤺ᤳᤋᤢᤖ ᤘᤕᤧᤖᤥ॥ ᤂᤧᤴ ᤕᤧᤰᤕᤰᤁᤡᤸᤗᤧᤴ ᤀᤡᤳᤇᤠᤵ ᤁᤧᤛᤠᤵᤐᤠᤀᤠᤱ ᤁᤧᤈᤥ᤺ᤰᤐᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥
HEB 11:11 ᤀᤒᤪᤠᤜᤠᤔᤖᤧ ᤁᤢᤔᤣ᤺ᤳ ᤛᤠᤖᤠ᤺ᤴ ᤛᤠᤔᤧᤱᤃᤵᤔᤏᤠᤔᤠ ᤘᤕᤧ ᤜᤧᤰᤁᤩᤠᤱ ᤛᤠᤃᤵᤔᤠ ᤗᤧᤳᤋᤢᤀᤠᤱ ᤘᤕᤧᤛᤠᤱ ᤏᤛᤠ᤺ᤴᤗᤠᤶᤒᤠᤀᤣ ᤛᤠᤃᤵᤔᤠ ᤛᤢᤰᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤠᤱᤜᤧᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰ ᤑᤠ᤹ᤀᤠᤱ ᤀᤡ᤺ᤳᤋᤢᤖᤥ॥
HEB 11:12 ᤜᤧᤰᤁᤣᤗ᤹ᤖᤡᤰ ᤁᤴ ᤛᤡ᤺ᤔᤠ ᤁᤧᤀᤡ᤺ᤵᤐᤠ ᤔᤏᤠᤎᤡᤰᤗᤠᤶᤒᤠ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰ ᤏᤢ ᤘᤠᤜᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡ᤺ᤰ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤒᤥ᤺ᤰᤂᤧᤖᤥ॥
HEB 11:13 ᤁᤴ ᤁᤠᤰ ᤏᤛᤠ᤺ᤴᤛᤠᤒᤠᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰ ᤔᤧᤱᤄᤥᤀᤣ ᤔᤧᤛᤩᤧ. ᤁᤖ ᤂᤧᤱᤜᤠ᤹ᤖᤧᤃ ᤔᤠ᤺ᤱᤄᤠᤗᤠᤶ ᤂᤧᤴ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤴ ᤗᤠᤱᤔᤧᤍᤠ᤺ᤰᤋᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤣ᤹ ᤗᤠᤈᤣ᤹ᤒᤠ ᤏᤢ ᤋᤠᤰᤁᤧᤃᤶᤒᤠ ᤘᤕᤡᤃᤧᤖᤧᤳᤇ ᤗ᤹ᤖᤡᤰ ᤋᤧᤴᤍᤡᤱ ᤔᤧᤈᤥᤃᤢᤖᤥ॥
HEB 11:14 ᤀᤰᤂᤣᤗ᤹ᤖᤡᤰ ᤁᤧᤒᤠ᤺ᤵᤐᤠ ᤔᤏᤠᤜᤠ᤹ᤖᤧᤃ ᤛᤧᤰᤂᤠᤛᤠᤱ ᤀᤠᤒᤠᤅᤣ ᤂᤢᤏᤡ᤹ ᤗᤠᤈᤣ᤹ᤀᤡᤴ ᤔᤧᤃᤥ᤺ᤳᤋᤢᤖ ᤔᤧᤘᤠ᤹ᤒᤠ ᤏᤡ᤺ᤴᤎᤥ ᤐᤥ᤺ᤱᤗᤥ॥
HEB 11:15 ᤂᤧᤱᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠ ᤗᤠᤈᤣ᤹ᤀᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤸᤗᤧᤃ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤕᤧᤶ ᤔᤧᤄᤥ᤺ᤛᤢᤒᤠᤔᤧᤴ॥
HEB 11:16 ᤁᤖ ᤂᤧᤱᤜᤠ᤹ᤖᤧᤃ ᤂᤧᤴᤏᤢ᤺ᤸᤗᤧᤀᤠᤱ ᤏᤢ᤺ᤒᤠᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤈᤣ᤹ᤀᤡᤴ ᤂᤥ᤺ᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤐᤠ᤺ᤵᤔᤠ ᤂᤧᤱᤜᤠ᤹ᤏᤢ ᤛᤡᤖᤡᤱ ᤔᤧᤔᤕᤧᤴᤏᤠᤱ ᤂᤢᤏᤡ᤹ ᤗᤠᤃᤡ ᤏᤢ᤺ᤒᤠ ᤕᤧᤰᤕᤰᤌᤡᤰ ᤕᤠᤖᤡᤵ ᤆᤥᤃᤢ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥
HEB 11:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ ᤛᤠ᤹ᤖᤢᤸᤗᤧ ᤂᤢᤏᤧ᤹ ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤜᤠᤰᤁᤡᤴ ᤛᤡᤍᤢᤱᤈᤓᤠ ᤁᤢᤀᤡᤛᤡ᤺ᤰ ᤋᤥ᤺ᤴᤍᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤜᤠᤁᤗᤠᤶᤒᤠᤀᤣ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥ᤺ᤱᤗᤥ ᤗ᤹ᤖᤡᤰ ᤔᤠᤱᤜᤧᤰ ᤐᤡᤖᤢᤀᤠᤱ ᤘᤕᤧᤛᤠᤱ ᤀᤒᤪᤠᤜᤠᤶᤔᤡᤸᤗᤧ ᤗᤳᤌᤡᤰᤗᤰ ᤁᤢᤛ᤻ᤛᤠ᤺ᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠ ᤕᤠᤖᤡᤵ ᤐᤥ᤺ᤰᤂᤧᤖᤥ॥
HEB 11:19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡ᤺ᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ॥ ᤜᤧᤰᤁᤩᤠᤱ ᤛᤧᤰᤂᤠ᤺ᤸᤗᤧᤃ. ᤂᤢᤏᤧ᤹ ᤁᤢᤛᤡᤘᤧᤳ ᤁᤢᤀᤡᤛᤡ᤺ᤰ ᤐᤥ᤺ᤰᤂᤧᤒᤠ ᤀᤡᤛᤜᤠᤰᤁᤡᤴ ᤕᤠᤶᤔᤥ ᤁᤢᤜᤡᤱᤘᤧᤳᤋᤣ ᤂᤥ᤺ᤛᤢᤖᤥ॥
HEB 11:20 ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤜᤠᤁᤖᤧᤀᤠᤱ ᤕᤠᤁᤢᤒ ᤏᤢ ᤀᤧᤛᤠᤀᤢ᤺ᤴ ᤂᤢᤴᤇᤡ᤹ ᤁᤧᤍᤠ᤺ᤒᤠ ᤕᤧᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤢ᤹ᤀᤡᤛᤠᤶ ᤌᤠ᤺ᤛᤢᤐᤡᤖᤢᤛᤡᤖᤥ॥
HEB 11:21 ᤏᤛᤠ᤺ᤴᤗᤠᤶᤒᤠᤀᤣ ᤕᤠᤁᤢᤒᤧᤴ ᤛᤡ᤺ᤔᤠ ᤕᤧᤶᤔᤥ ᤁᤢᤍᤰᤁᤠ᤺ᤳᤋᤡᤸᤗᤧ ᤋᤰᤛᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤆᤥᤃᤢᤖ ᤕᤢᤛᤢᤑᤖᤧ ᤁᤠᤰ ᤁᤢᤛ᤻ᤛᤠ᤺ᤜᤠ᤹ ᤔᤢ᤹ᤀᤡᤛᤠᤶ ᤌᤠ᤺ᤛᤢᤐᤡᤖᤢᤛᤡᤖᤥ॥
HEB 11:22 ᤏᤛᤠ᤺ᤴᤗᤠᤶᤒᤠᤀᤣ ᤕᤢᤛᤢᤑᤖᤧᤀᤠᤱ ᤛᤡ᤺ᤔᤠ ᤀᤡ᤺ᤳᤋᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤔᤧᤗ᤺ᤴ ᤔᤧᤒᤣ᤺ᤰᤐᤠ ᤐᤠ᤺ᤴᤏᤡᤴ ᤆᤧᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤁᤢᤕᤧᤵᤐᤡᤴᤏᤠᤱ ᤂᤢᤏᤡ᤹ᤏᤢᤀᤣ ᤔᤧᤍᤣ᤹ᤖᤢᤖ ᤗ᤹ᤖᤡᤰ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥
HEB 11:23 ᤏᤛᤠ᤺ᤴᤗᤠᤶᤒᤠᤀᤣ ᤔᤥᤛᤠ᤺ᤴ ᤛᤠᤘᤠ᤺ᤴᤇᤡᤱᤅᤡᤸᤗᤧ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤗᤠ ᤛᤢᤶᤛᤡ ᤌᤠᤖᤡᤰ ᤆᤡᤰᤂᤧᤳᤇᤢᤀᤠᤱ ᤁᤳᤋᤧᤳᤇᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤅᤧ᤺ᤰᤘᤠ᤺ᤴ ᤛᤠ᤹ᤖᤡᤰ ᤏᤢ᤺ᤒᤠ ᤏᤡ᤺ᤛᤧᤳᤇᤢ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴᤏᤠᤱ ᤔᤧᤃᤡᤖᤧᤳᤇᤢᤴᤗᤥ॥
HEB 11:24 ᤔᤥᤛᤠ᤺ᤴ ᤌᤠᤱᤒᤧᤴ ᤁᤧᤖᤧᤸᤗᤧ ᤏᤛᤠ᤺ᤴᤗᤠᤶᤒᤠᤀᤣ ᤑᤠᤖᤥ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤀᤠ ᤐᤠ᤺ᤵᤔᤠ ᤔᤧᤍᤧᤴᤍᤧᤴᤗᤥ॥
HEB 11:25 ᤂᤢᤏᤧ᤹ ᤗᤠᤕᤥᤒᤠ ᤛᤢᤰᤂᤣᤘᤠᤀᤥ ᤛᤵᤑᤠᤎᤡᤰ ᤘᤠ᤹ᤔᤠᤏᤢ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤵᤔᤡᤜᤠ᤹ᤏᤢ ᤋᤢᤰᤂᤣᤘᤠᤀᤥ ᤘᤠ᤹ᤔᤠᤀᤣ ᤏᤡᤱᤘᤠ᤹ ᤆᤥᤃᤢᤖᤥ॥
HEB 11:26 ᤔᤡᤛᤪ ᤗᤠᤈᤣ᤹ᤛ᤻ᤔᤠ ᤕᤠᤱᤛᤠᤁᤢᤴᤎᤣ᤺ᤴᤏᤢ᤺ᤸᤗᤧᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤏᤡᤱᤄᤢᤶᤔᤥ ᤌᤠᤔᤠᤀᤣ ᤏᤢ᤺ᤒᤠ ᤀᤡ᤺ᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤡᤴ ᤋᤠ᤺ᤴᤍᤡ ᤂᤥᤃᤧᤍᤧᤵᤐᤠ ᤌᤢᤶᤄᤥᤀᤥ ᤐᤳᤇᤧᤖᤥ॥
HEB 11:27 ᤏᤛᤠ᤺ᤴᤗᤠᤶᤒᤠᤀᤣ ᤂᤢᤏᤧ᤹ᤃ ᤏᤡ᤺ᤔᤧᤴᤎᤠ᤺ᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡ᤺ᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤜᤠᤱᤅᤡᤸᤗᤧ ᤁᤢᤛᤡᤰᤁᤡᤴᤏᤢ ᤔᤧᤃᤡᤛᤧᤴᤏᤠᤱ ᤔᤡᤛᤪᤗᤠᤶ ᤗ᤺ᤴᤍᤧᤐᤣᤒᤠᤴ ᤐᤣᤒᤠᤀᤣ ᤐᤥ᤺ᤰᤂᤧᤀᤠᤱ ᤔᤧᤏᤢ᤺ᤰᤂᤧᤴ॥
HEB 11:28 ᤏᤛᤠ᤺ᤴᤗᤠᤶᤒᤠᤀᤣ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤢᤶᤒᤠ ᤛᤠ᤺ᤜᤠ᤹ ᤁᤧᤔᤧᤱᤒᤠᤸᤗᤧ ᤛᤢ᤺ᤔᤠ ᤔᤧᤛᤢᤰᤋᤢᤴᤇᤡᤴᤗ ᤑᤠ᤹ᤀᤠᤱ ᤂᤢᤏᤧ᤹ ᤔᤠᤰᤂᤡ᤹ᤀᤡᤴ ᤑᤡᤴᤍᤢᤖ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤌᤡᤶᤔᤡᤴ ᤜᤣ᤺ᤰᤋᤢᤖᤥ॥
HEB 11:29 ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ ᤛᤧᤱᤛᤧᤱᤒᤠ ᤂᤠᤶᤔᤥ ᤗᤠᤱᤔᤧᤄᤣᤃᤧᤖ ᤜᤧ᤺ᤳᤋᤠᤱᤒᤠ ᤘᤠᤜᤱᤅᤡᤴ ᤔᤧᤃᤠ᤺ᤰᤋᤢᤀᤠᤱ ᤏᤠᤎᤠ᤺ᤶᤒᤡ ᤔᤧᤒᤣᤖᤥ. ᤁᤖ ᤔᤡᤛᤪᤡᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤸᤗᤧ ᤂᤧᤱᤜᤠ᤹ ᤁᤠᤰ ᤂᤩᤠᤶ ᤔᤧᤜᤢᤔᤧ ᤔᤧᤛᤩᤧᤖᤥ॥
HEB 11:30 ᤏᤛᤠ᤺ᤴᤗᤠᤶᤒᤠᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤕᤧᤖᤡᤜᤥ ᤕᤧᤰᤕᤰᤁᤡᤴ ᤔᤧᤃᤒᤢᤀᤠᤱ ᤂᤧᤸᤗᤧ ᤁᤢᤄᤡᤖᤡᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤧᤖᤥ॥
HEB 11:31 ᤏᤛᤠ᤺ᤴᤗᤠᤶᤒᤠᤀᤣ ᤕᤧᤖᤡᤜᤥᤀᤥᤔᤠ ᤁᤧᤳᤏᤡᤔᤠ ᤖᤠᤜᤠᤒᤖᤧ ᤀᤡᤛᤪᤠᤀᤡᤗᤡ ᤌᤥ᤺ᤶᤈᤡᤒᤠᤜᤠ᤹ ᤋᤖᤧᤍᤥ᤺ᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤔᤧᤱᤄᤧᤔᤏᤠᤒᤠᤜᤠ᤹ᤏᤢ ᤔᤧᤛᤩᤧᤏᤧᤴᤗᤥ॥
HEB 11:32 ᤂᤧᤴ ᤕᤠᤖᤡᤰᤁᤠᤱᤎᤥ ᤀᤡᤱᤃᤠ᤹ ᤌᤣ ᤐᤠ᤺ᤵᤔᤠᤒᤣ᥅ ᤃᤡᤍᤡᤕᤥᤏ. ᤒᤠᤖᤠᤁ. ᤛᤡᤶᤛᤏ. ᤕᤡᤵᤋᤠᤜ. ᤍᤠᤀᤢᤍ. ᤛᤠᤔᤢᤀᤧᤗ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤐᤠ᤺ᤵᤔᤠ ᤕᤧᤶ ᤔᤧᤃᤳᤋᤠᤴᤗᤥ॥
HEB 11:33 ᤂᤧᤱᤜᤠ᤹ᤖᤧᤃ ᤏᤛᤠ᤺ᤴᤗᤠᤶᤒᤠᤀᤣ ᤜᤠᤱᤈᤢᤶᤜᤠ᤹ ᤔᤧᤏᤠ᤺ᤴᤍᤢ. ᤛᤠᤶᤕᤥᤏᤡᤒᤠ ᤂᤠᤛᤧᤴ ᤔᤧᤗᤥ᤺ᤴᤍᤢ. ᤔᤠᤱᤜᤧᤰ ᤆᤥ᤺ᤰᤔᤏᤠᤒᤠ ᤐᤠ᤺ᤴᤜᤠ᤹ ᤔᤧᤄᤥ᤺ᤛᤢ॥ ᤂᤧᤱᤜᤠ᤹ᤖᤧ ᤌᤧᤖᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠ᤺ᤴ ᤔᤧᤛᤢᤒᤢ.
HEB 11:34 ᤐᤕᤶ ᤕᤶᤒᤠ ᤔᤡᤖᤠ᤺ᤰᤜᤠ᤹ ᤔᤧᤛᤧᤖᤢ. ᤋᤠᤓᤣᤗᤠᤶᤒᤠ ᤋᤠᤱᤔᤧᤛᤧ᤺ᤵᤋᤧ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠ᤹ᤀᤡ ᤜᤥ᤺ᤵᤋᤧᤛᤠᤱ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤌᤱᤅᤥ ᤔᤢᤰᤁᤧᤃᤢᤒᤠ ᤔᤧᤒᤥ᤺ᤰᤂᤧᤀᤠᤱ ᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤛᤡᤖᤥ॥
HEB 11:35 ᤔᤧᤴᤇᤢᤔᤠᤜᤠ᤹ᤖᤧ ᤁᤧᤛᤡ᤺ᤒᤠ ᤁᤧᤒᤣ᤺ᤰᤐᤠ ᤀᤠᤒᤠᤅᤣ ᤂᤢᤏᤡ᤹ ᤔᤏᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤄᤥ᤺ᤛᤢᤛᤡᤖᤥ॥ ᤘᤣ᤹ᤜᤠ᤹ᤖᤧ ᤛᤡ᤺ᤔᤧᤴ ᤀᤣᤃᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤂᤥ᤺ᤔᤠ ᤑᤠ᤹ᤀᤠᤱ ᤆᤥ᤺ᤰᤕᤢᤶᤓᤥ ᤐᤥ᤺ᤱᤔᤠ ᤔᤧᤴᤍᤧᤴᤍᤧᤴᤏᤠᤱ ᤏᤡᤱᤄᤢᤶᤔᤡᤴ ᤔᤧᤍᤠ᤺ᤰᤋᤢᤖᤥ॥
HEB 11:36 ᤁᤢᤓᤠᤃ ᤜᤡᤏᤠ᤺ᤶ ᤔᤧᤔᤧᤳᤋᤢᤛᤡᤀᤠᤱ ᤋᤧ᤺ᤶᤓᤢᤰ ᤔᤧᤕᤠᤰᤋᤢᤛᤡ. ᤁᤢᤓᤠᤃ ᤀᤡᤔᤧᤄᤣ᤺ᤰᤂᤢᤛᤡᤀᤠᤱ ᤐᤢᤱᤗᤠᤜᤡᤶᤔᤥ ᤔᤧᤛᤠᤰᤋᤢᤛᤡᤖᤥ॥
HEB 11:37 ᤁᤢᤓᤠ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢᤛᤡ. ᤁᤢᤓᤠ ᤆᤧᤴᤍᤡᤖᤡ᤺ᤸᤗᤧ ᤔᤧᤈᤧᤖᤢ ᤔᤧᤛᤧᤖᤢᤛᤡ. ᤁᤢᤓᤠᤃ ᤋᤠᤓᤣ᤺ᤸᤗᤧ ᤔᤧᤈᤧᤵᤋᤢ ᤔᤧᤛᤧᤖᤢᤛᤡᤖᤥ॥ ᤁᤢᤓᤠᤃ ᤏᤡᤱᤄᤢᤶ ᤏᤢ ᤋᤢᤰᤂᤣ ᤔᤧᤈᤩᤧᤀᤠᤱ ᤆᤠᤜᤠᤒᤥ ᤔᤧᤘᤕᤧᤸᤗᤧ ᤔᤧᤸᤗᤢᤰ ᤏᤢ ᤔᤧᤴᤍᤠᤰ ᤛᤧᤜᤥᤒᤠ ᤆᤠᤱ ᤔᤧᤈᤠᤰᤂᤢ॥
HEB 11:38 ᤂᤧᤱᤜᤠ᤹ᤃ ᤗᤢᤱᤓᤢᤰᤁᤢ ᤏᤢ ᤂᤠᤶᤓᤢᤰᤁᤢᤜᤠ᤹ᤀᤥ ᤕᤠᤱᤎᤥ᤺ᤰᤁᤡ ᤕᤧ᤺ᤱᤄᤠᤍᤧᤴᤏᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠ᤺ᤳᤋᤡ ᤔᤧᤀᤡᤖᤧᤖ ᤔᤧᤘᤕᤧᤖᤥ॥ ᤂᤧᤴ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤢᤶᤒᤥᤎᤠᤒᤠ ᤜᤥ᤺ᤵᤋᤧᤖᤥ॥
HEB 11:39 ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤛᤠ᤺ᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤍᤠᤛᤢᤛᤠᤱ ᤂᤧᤱᤜᤠ᤹ᤏᤢ ᤆᤥᤃᤧᤒᤠ ᤔᤠᤱᤜᤧᤰᤁᤡᤴ ᤔᤧᤱᤄᤥᤀᤣ ᤔᤧᤛᤩᤧ ᤔᤧᤒᤣᤖᤥ॥
HEB 11:40 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤛᤠᤱ ᤛᤠ᤹ᤖᤡᤰ ᤏᤢ᤺ᤒᤠ ᤏᤡᤱᤛᤣ᤺ᤰ ᤀᤠᤏᤡ᤹ ᤁᤧᤖᤧᤰᤗᤧ ᤗᤠᤃᤡ ᤁᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤃ ᤀᤠᤏᤡ᤹ᤏᤢᤖᤰ ᤁᤢᤗᤡᤱᤎᤥ ᤔᤧᤃᤧᤳᤗᤥ॥
HEB 12:1 ᤂᤧᤸᤗᤧ ᤆᤥᤃᤢᤸᤗᤧ ᤏᤛᤠᤏᤡᤒᤠ ᤜᤡᤱᤔᤴᤗᤧ ᤁᤢᤕᤠ᤺ᤶᤒᤣᤀᤥ ᤁᤶᤔᤩᤠᤰ ᤕᤖᤡᤰ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤕᤠᤵᤔᤡ ᤁᤧᤜᤶᤒᤠ ᤐᤠ᤺ᤴᤜᤠ᤹ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤕᤠᤵᤔᤡ ᤁᤧᤄ᤺ᤒᤠ ᤗᤠᤕᤥᤜᤠ᤹ ᤗᤠᤵᤑᤢᤛᤢᤶᤗᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧᤛ᤻ᤛᤢ ᤀᤠᤒᤡᤖᤧᤒᤠ ᤗᤥ᤺ᤰᤗᤥ᤺ᤰᤁᤣ ᤆᤠ᤺ᤳᤋᤥ ᤏᤠᤛᤡ ᤌ᤺ᤳᤋᤢᤶᤗ ᤗᤥ᤺ᤰᤋᤡᤖᤥ॥
HEB 12:2 ᤀᤠᤏᤡ᤹ ᤏᤛᤠ᤺ᤴᤏᤡᤴ ᤁᤧᤜᤣ᤺ᤰᤐᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤕᤧᤛᤢ᤺ᤴ ᤀᤥᤔᤧᤳᤋᤢᤶᤗᤥ॥ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤀᤥᤔᤢ ᤗ᤹ᤔᤠᤸᤗᤧ ᤗᤠᤃᤡ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤏᤢ ᤏᤠᤎᤠᤔᤠᤴ ᤂᤢᤏᤧ᤹ ᤌᤣᤀᤠᤱ ᤔᤧᤴᤀᤡ᤺ᤳᤋᤣ ᤌᤖᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧ ᤁᤢᤈᤢᤵᤛᤠᤱᤗᤧᤵᤔᤠᤱ ᤕᤢᤱᤛᤡᤱᤗᤥ॥
HEB 12:3 ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤍᤰᤗᤧᤱᤅᤥ ᤔᤧᤍᤠᤖᤢᤒᤠ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤁᤧᤎᤶᤒᤠ ᤕᤧᤛᤢ᤺ᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤒᤥ ᤏᤠᤕᤥ ᤁᤧᤶᤒᤥ᤺ᤰᤂᤡᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛᤰᤔᤠᤀᤠᤱ ᤔᤧᤒᤢ᤹ᤏᤧᤴᤗᤥ॥
HEB 12:4 ᤂᤡᤏᤡ᤹ ᤗᤠᤕᤥ᤺ᤸᤗᤧ ᤁᤢᤍᤰᤗᤧᤱᤘᤠᤀᤥᤒᤠ ᤌᤱᤅᤥ ᤁᤧᤘᤕᤡᤛᤠᤱ ᤛᤡ᤺ᤔᤠᤗᤡᤱᤎᤥᤀᤥ ᤌᤠᤖᤡᤰ ᤔᤧᤱᤃᤧᤳᤋᤣ ᤁᤧᤘᤕᤡ᤹ᤖᤥ॥
HEB 12:5 ᤂᤡᤏᤡ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤛᤣ ᤗ᤹ᤖᤡᤰ ᤁᤧᤶᤔᤧᤳᤋᤡᤒᤠ ᤂᤠᤜᤢᤴᤏᤡᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅ “ᤀᤠᤒᤢᤃᤧᤴ ᤀᤠᤛ᤻ᤛᤠ᤺ᤀᤣ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤧᤴᤌᤡᤶᤔᤡᤴ ᤕᤠᤱᤕᤠᤱ ᤔᤧᤀᤡ᤺ᤳᤋᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤓᤧ᤺ᤰᤁᤡᤸᤗᤧ ᤁᤧᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹ᤀᤥ.
HEB 12:6 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤗᤢᤱᤔᤠ᤹ ᤋᤢᤰᤋᤢ᤹. ᤂᤧᤴ ᤜᤧᤴᤌᤡᤶ ᤕᤠᤰᤋᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤧᤴᤍᤡᤱ ᤆᤥᤃᤢᤒᤠ ᤀᤠᤳᤋᤡᤴ ᤁᤢᤛ᤻ᤛᤠ᤺ᤴᤇᤠᤱ ᤂᤢᤶᤍᤡᤱ ᤐᤡᤖᤢ᤹ᤖᤥ॥”
HEB 12:7 ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤜᤧᤴᤌᤡᤶ ᤁᤢᤀᤡᤛᤡ᤺ᤰ ᤌᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤁᤢᤀᤡᤛᤡ᤺ᤰ ᤁᤧᤀᤡ᤺ᤳᤋᤡ᤹ᤖᤥ॥ ᤀᤠᤳᤋᤡᤴ ᤐᤠ᤺ᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤜᤧᤴᤌᤡᤶ ᤔᤧᤕᤠᤰᤋᤢᤴᤒᤣ᥅
HEB 12:8 ᤂᤡᤏᤡ᤹ ᤀᤠᤳᤋᤡᤴᤜᤠ᤹ᤖᤧ ᤐᤠ᤺ᤗᤠᤶ ᤁᤠᤰ ᤛᤠ᤺ᤜᤠ᤹ᤖᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤜᤧᤴᤌᤡᤶᤔᤡᤴ ᤁᤧᤱᤄᤥ᤺ᤛᤢᤶᤔᤡᤴᤏᤧ ᤑᤠ᤹ᤃᤪ ᤂᤡᤏᤡ᤹ᤃ ᤛᤧᤰᤂᤠᤒᤠ ᤛᤠ᤺ ᤔᤧ᤺ᤴ. ᤁᤖ ᤂᤥ᤹ᤛᤠᤏᤡᤱᤗᤥ॥
HEB 12:9 ᤀᤠᤸᤗ ᤀᤡᤰᤛᤠᤒᤠ ᤀᤠᤏᤡ᤹ ᤐᤠ᤺ᤜᤠ᤹ᤖᤧ ᤜᤧᤴᤌᤡᤶ ᤀᤠᤔᤩᤠᤰᤋᤧᤸᤗᤧᤃ ᤀᤠᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤀᤠᤒᤡᤖᤢᤶᤛᤡᤶᤗᤥ॥ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤏᤡ᤹ ᤕᤠᤶᤛᤠᤶᤔᤡᤸᤗᤧᤴ ᤐᤠ᤺ᤸᤗᤧ ᤜᤧᤴᤌᤡᤶ ᤀᤠᤕᤠᤰᤁᤡᤸᤗᤧ ᤀᤠᤏᤡ᤹ ᤛᤧᤰᤂᤠᤒᤠ ᤜᤡᤱᤔᤴ ᤂᤥ᤺ᤔᤠ ᤑᤠ᤹ᤀᤠᤱ ᤂᤧᤴ ᤜᤧᤴᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤋᤠ᤺ᤔᤠ ᤐᤥ᤺ᤱᤗᤥ॥
HEB 12:10 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤒᤠ ᤀᤠᤏᤡ᤹ ᤐᤠ᤺ᤜᤠ᤹ᤖᤧ ᤁᤢᤓᤠ ᤋᤱᤒᤣ ᤌᤠᤖᤡᤰ ᤂᤢᤏᤡ᤹ ᤔᤧᤗᤧᤛ᤻ᤛᤢ ᤔᤧᤏᤡ᤺ᤛᤢᤒᤠ ᤕᤠᤖᤡᤰ ᤜᤧᤴᤌᤡᤶ ᤀᤠᤶᤕᤠᤰᤗᤥ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤀᤡᤛᤡ᤺ᤰ ᤛᤣᤛᤣᤒᤠ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤀᤠᤏᤡ᤹ ᤀᤡᤴᤎᤠ᤺ᤰᤗᤧ ᤗᤠᤃᤡ ᤂᤢᤏᤧ᤹ ᤜᤧᤴᤌᤡᤶ ᤀᤠᤕᤠᤰᤗᤥ॥
HEB 12:11 ᤀᤠᤳᤋᤡᤴ ᤜᤧᤴᤌᤡᤶᤔᤡᤴᤏᤠᤱ ᤂᤥ᤺ᤔᤠ ᤕᤧᤶᤔᤥ ᤂᤧᤴ ᤛᤡᤖᤠ᤹ ᤁᤧᤎᤠᤱᤒᤠ ᤔᤧᤈᤥ᤺ᤰᤏᤧᤴᤗᤥ ᤁᤖ ᤁᤱᤃ ᤛᤠᤰᤗᤥ. ᤜᤧᤰᤁᤣᤛᤠᤱ ᤕᤠᤱᤛᤡ ᤂᤧᤴ ᤜᤧᤴᤌᤡᤶᤗᤠᤶ ᤛᤃᤧᤎᤠᤛᤡᤱᤒᤠᤜᤠ᤹ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤔᤧᤜᤡᤱᤅᤠᤱ ᤛᤏᤠᤖᤢᤱ ᤔᤧᤄᤥ᤺ᤛᤢ᤹ᤖᤥ॥
HEB 12:12 ᤂᤧᤸᤗᤧ ᤆᤥᤃᤢᤸᤗᤧ ᤛᤥᤖᤥ ᤁᤧᤗ᤹ᤒᤠ ᤜᤢᤰᤜᤠ᤹ ᤑᤥ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤌᤧᤃᤰᤁᤰ ᤁᤧᤕᤱᤒᤠ ᤌᤢᤱᤒᤥᤜᤠ᤹ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹॥
HEB 12:13 ᤗᤠᤱᤛᤰᤐᤠᤜᤠ᤹ ᤔᤧᤘᤣ᤺ᤳᤋᤠᤱ ᤔᤧᤴᤈᤥ᤺ᤴᤏᤣ ᤔᤧᤱᤃᤧᤱᤅᤣ ᤗᤠᤱᤄᤣ᤺ᤰᤔᤠ ᤔᤧᤛᤢᤰᤗ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤶᤔᤡᤴ ᤋᤥ᤺ᤴᤍᤧᤶᤔᤧ᤹ᤀᤥ॥
HEB 12:14 ᤁᤠᤰ ᤔᤏᤠᤜᤠ᤹ᤏᤢ ᤛᤏᤠᤖᤢᤱᤅᤥ ᤘᤠ᤹ᤔᤠ ᤏᤢ ᤛᤣᤛᤣ ᤐᤥ᤺ᤱᤔᤠ ᤁᤠᤰ ᤐᤖᤡᤰᤗᤧ ᤋᤶᤛᤡᤴ ᤆᤥᤃᤧᤶᤔᤧ᤹ᤀᤥ॥ ᤛᤣᤛᤣ ᤔᤧᤶᤒᤥ᤺ᤱᤅᤣᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤕᤜᤘᤣ ᤍᤠᤱᤒᤠᤴ ᤔᤧᤏᤡ᤺ᤛᤢᤴᤗᤥ॥
HEB 12:15 ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤀᤠᤳᤋᤡᤴᤏᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤔᤧᤱᤄᤥ᤺ᤔᤏᤠᤒᤠ ᤔᤧᤒᤥ᤺ᤱᤏᤧᤴᤗ. ᤛᤡᤰ ᤐᤥ᤺ᤰᤔᤠᤸᤗᤧ ᤂᤣᤔᤠ ᤌᤰᤔᤠ ᤔᤧᤓᤥ᤺ᤰᤂᤢᤴᤗ. ᤜᤧᤰᤁᤩᤠᤱ ᤂᤧᤴ ᤏᤡᤱ ᤁᤢᤀᤡᤛᤡ᤺ᤰᤐᤠ ᤛᤡᤰᤁᤢ᤺ᤔᤠᤸᤗᤧ ᤘᤣ᤹ ᤔᤏᤠᤜᤠ᤹ᤀᤠᤱ ᤔᤧᤈᤡ᤺ᤴᤍᤢᤴᤇᤡᤸᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥
HEB 12:16 ᤜᤧᤰᤁᤩᤠᤱ ᤀᤠᤳᤋᤡᤴᤏᤠᤱ ᤆᤠᤃᤧᤗᤠᤶᤒᤠ ᤀᤡᤃᤪ ᤀᤧᤛᤠᤀᤢ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤥ᤺ᤵᤔᤏᤠ ᤔᤧᤶᤒᤥ᤺ᤱᤏᤧᤴᤗᤖᤥ॥ ᤂᤧᤸᤗᤧᤃ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤋᤢᤶᤒᤠ ᤁᤢᤕᤢᤰᤁᤡᤴ ᤗᤧᤰᤋᤢᤖᤥ॥
HEB 12:17 ᤜᤧᤰᤁᤩᤠᤱ ᤕᤠᤱᤛᤡ ᤁᤢᤶᤒᤠᤗᤠᤶᤒᤠ ᤔᤢ᤹ᤀᤡᤛᤠᤶ ᤂᤥ᤺ᤔᤠ ᤑᤠ᤹ᤀᤠᤱ ᤀᤠᤰᤂᤧᤴ ᤁᤥ᤺ᤳᤋᤢᤛᤠᤱ ᤂᤧᤴ ᤏᤠ᤹ᤖᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥ ᤂᤧᤸᤗᤧ ᤁᤢᤔᤡᤰᤘᤠ ᤌᤠ᤺ᤛᤢᤖ ᤔᤢ᤹ᤀᤡᤛᤠᤶ ᤂᤥ᤺ᤔᤠ ᤏᤡᤱᤘᤠ᤹ ᤆᤥᤃᤢᤛᤠᤱ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤗᤠᤶᤒᤠ ᤏᤢ᤺ᤱᤔᤠ ᤕᤧᤶᤔᤡᤴ ᤗᤧᤰᤋᤧᤒᤣᤀᤠᤱ ᤘᤕᤧᤖᤥ॥
HEB 12:18 ᤂᤡᤏᤡ᤹ᤃ ᤛᤡᤏᤠᤀᤡ ᤁᤥ᤺ᤰᤔᤠ ᤜᤧᤰᤋᤱᤒᤠ ᤛᤢ᤺ᤔᤠ ᤛᤢᤰᤁᤧᤍᤧᤵᤐᤠ ᤍᤧᤴᤏᤥ ᤔᤧᤴᤍᤠᤀᤣ ᤁᤧᤘᤕᤡ᤹. ᤜᤧᤰᤁᤩᤠᤱ ᤔᤡ ᤁᤧᤍᤡ᤺ᤵᤐᤠ. ᤂᤠᤃᤧᤍᤠᤶᤒᤠ. ᤔᤠᤰᤁᤧᤗ᤹ᤒᤠ ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤛᤥᤖᤡᤳ ᤁᤣᤈᤱ ᤁᤧᤜᤢᤒᤠ ᤍᤧᤴᤏᤥ. ᤌᤢᤳᤋᤢᤖᤡ᤺ᤵᤐᤠ ᤔᤢᤰᤋᤧᤒᤠ ᤀᤡᤰᤗᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤀᤡᤰᤗᤠ᤺ᤸᤗᤧ ᤁᤢᤒᤣᤛᤠᤱ ᤔᤧᤴᤍᤠᤀᤣ ᤁᤧᤘᤕᤡ᤹ᤖᤥ॥ ᤂᤧᤴ ᤁᤧᤄᤧᤶᤒᤠᤜᤠ᤹ᤖᤧ ᤕᤠᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤀᤡᤰᤗᤠᤀᤥ ᤂᤢᤏᤡ᤹ᤏᤢ ᤔᤧᤒᤠ᤺ᤳᤏᤧᤴᤗ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥
HEB 12:20 ᤌᤣᤀᤠᤱᤓᤧᤸᤗᤧ “ᤁᤴ ᤁᤥ᤺ᤰᤔᤠᤴ ᤁᤧᤛᤢᤒᤠ ᤀᤠᤳᤋᤡᤴ ᤌᤰᤛᤠ᤺ᤴᤇᤠᤱ ᤗᤢᤱᤅᤡᤸᤗᤧ ᤗᤧᤵᤋᤧᤶ ᤛᤧᤖᤧᤶᤔᤧ᤹” ᤁᤧᤗ᤹ᤒᤠ ᤀᤡᤱᤈᤠ᤺ᤱᤅᤡᤴ ᤂᤧᤱᤜᤠ᤹ᤖᤧ ᤌ᤺ᤵᤔᤠ ᤔᤧᤴᤇᤢᤰᤋᤢᤴᤗᤥ॥
HEB 12:21 ᤁᤴ ᤏᤡᤕᤠᤖᤠ᤺ᤱᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤆᤥᤃᤧ. ᤜᤧᤰᤁᤩᤠᤱ ᤔᤥᤛᤠᤖᤧᤀᤠᤱ ᤀᤡᤱᤃᤠ᤹ᤃ ᤀᤠᤃᤡ᤺ᤔᤠᤸᤗᤧ ᤕᤱᤅᤠᤖᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥
HEB 12:22 ᤁᤖ ᤂᤡᤏᤡ᤹ᤃ ᤛᤡᤕᤥᤏ ᤁᤥ᤺ᤰᤔᤠᤀᤥ. ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤰᤕᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤖᤢᤛᤗᤧᤶᤔᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡᤖᤥ॥ ᤂᤡᤏᤡ᤹ᤃ ᤜᤧᤴᤇᤡᤱ ᤜᤧᤴᤇᤡᤱᤅᤠᤱᤎᤥ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤥᤔᤢ ᤗ᤹ᤔᤠᤖᤧ ᤁᤢᤎᤡᤶᤒᤠ ᤂᤢᤏᤡ᤹ ᤆᤢᤶᤗᤢᤱᤅᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥
HEB 12:23 ᤂᤡᤏᤡ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤢᤏᤡ᤹ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤁᤧᤘᤠ᤹ᤒᤠ ᤋᤢᤶᤒᤠ ᤗᤰ ᤁᤧᤄᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤆᤢᤶᤗᤢᤱᤅᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ᤃ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ. ᤜᤧᤰᤁᤩᤠᤱ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤔᤧᤈᤥᤃᤧᤒᤠ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤗᤢᤶᤔᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥
HEB 12:24 ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤏᤠᤜᤠ᤹ ᤗᤢᤶᤔᤥ ᤁᤢᤛᤱ ᤔᤠᤱᤜᤢᤵᤗᤧᤴ ᤐᤠ᤺ᤴᤍᤱᤛᤠᤒᤠ ᤕᤧᤛᤢᤖᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹॥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤜᤠᤒᤡᤗᤖᤧ ᤁᤢᤔᤠᤰᤂᤡ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤢ᤺ᤒᤠ ᤐᤠ᤺ᤴ ᤁᤧᤒᤠ᤺ᤵᤐᤠ ᤛᤠᤱᤔᤏᤠᤒᤠ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤥ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡᤖᤥ॥
HEB 12:25 ᤂᤡᤏᤡ᤹ᤏᤢ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤏᤠ᤹ᤔᤠ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤒᤠ ᤀᤡᤱᤃᤧᤛᤠᤒᤠ ᤔᤥᤛᤠ᤺ᤸᤗᤧ ᤁᤢᤛᤠᤶᤍᤡᤱᤅᤡᤴ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤴᤇᤧ᤺ᤵᤋᤧᤴᤏᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤍᤡᤱ ᤀᤠᤒᤡ᤺ᤸᤗᤧ ᤀᤠᤏᤡ᤹ ᤀᤠᤏᤠ᤹ᤖᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ᤀᤠᤱ ᤀᤠᤴᤍᤠᤱᤏᤧᤴᤗᤥ॥
HEB 12:26 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤡᤏᤠᤀᤡ ᤁᤥ᤺ᤰᤔᤠᤗᤠᤶ ᤐᤠᤖᤧᤸᤗᤧ ᤁᤢᤀᤡᤰᤗᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤰᤂᤢ. ᤁᤖ ᤀᤠᤸᤗᤥ ᤂᤢᤏᤧ᤹ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹. “ᤕᤠᤶᤔᤥ ᤌᤡᤰᤗᤧᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤗᤰ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤡᤴᤏᤠᤱ ᤕᤰᤂᤢᤱᤗᤥ॥”
HEB 12:27 ᤁᤴ “ᤕᤠᤶᤔᤥ ᤌᤡᤰᤗᤧᤱ” ᤐᤠ᤺ᤵᤔᤏᤠᤒᤠ ᤛᤢᤳᤗᤠ᤺ᤸᤗᤧᤃ ᤁᤠᤰ ᤏᤠᤘᤠᤃᤧᤴ ᤆᤀᤡ᤺ᤳᤋᤡᤴ ᤕᤱᤅᤠᤱ ᤆᤳᤇᤡᤱ ᤐᤣ᤺ᤰᤗᤥ ᤁᤧᤗ᤹ᤒᤠᤴ ᤀᤥᤛᤣ᤺ᤴᤀᤠᤎᤠᤰᤗᤥ. ᤁᤖ ᤕᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤜᤠ᤹ᤖᤰ ᤏᤧᤕᤠ᤺ᤰᤗᤥ॥
HEB 12:28 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤕᤱᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤜᤠᤱᤈᤢᤶᤔᤡᤴ ᤀᤠᤄᤥ᤺ᤛᤢᤶᤗ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤡᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤋᤠ᤺ᤔᤠ ᤑᤠ᤹ᤀᤠᤱ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤀᤡ ᤁᤡᤖᤢᤶᤗ ᤛᤣᤘᤠ ᤆᤥᤃᤢᤶᤗᤥ॥
HEB 12:29 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ “ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤁᤠᤰ ᤔᤡᤍᤡᤰᤔᤠ ᤁᤧᤛᤢᤰᤐᤠ ᤐᤠ᤺ᤴᤜᤠ᤹ ᤂᤠᤵᤐᤢ ᤌᤩ᤺ᤱ ᤁᤧᤈᤥ᤺ᤰᤐᤠ ᤔᤡᤖᤥ॥”
HEB 13:1 ᤀᤠᤸᤗ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤆᤰᤔᤧᤸᤗ᤹ᤀᤣ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ॥
HEB 13:2 ᤜᤡᤶᤔᤥ ᤁᤧᤍᤠ᤺ᤒᤠᤜᤠ᤹ ᤋᤖᤣ ᤔᤧᤴᤍᤥ᤺ᤛᤡᤱᤅᤣ ᤔᤧᤒᤠᤱᤄᤧᤶᤛᤡᤶᤔᤧᤴᤏᤧ᤹ᤀᤥ॥ ᤁᤢᤓᤠᤖᤧ ᤜᤧᤰᤁᤣ ᤔᤧᤈᤥᤃᤢᤸᤗᤧ ᤏᤡᤱᤘᤠ᤹ ᤔᤧᤱᤄᤥᤀᤣ ᤔᤠᤱᤗᤠᤀᤡᤱᤒᤠᤜᤠ᤹ ᤋᤖᤣ ᤔᤧᤍᤥ᤺ᤛᤢᤛᤡᤀᤠᤱ ᤘᤠ᤹ᤖᤥ॥
HEB 13:3 ᤂᤡᤏᤡ᤹ᤀᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤐᤠ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡᤒᤠ ᤁᤢᤀᤡᤛᤡ᤺ᤰᤁᤣ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤥ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤀᤠᤱ ᤁᤧᤘᤕᤡᤒᤠ ᤜᤧᤰᤁᤣ ᤀᤡ᤺ᤳᤋᤧᤶᤔᤧ᤹ᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥
HEB 13:4 ᤋᤧᤴᤎᤠᤶᤃᤧᤴ ᤔᤣ᤺ᤰᤂᤡᤶᤔᤡᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤔᤣ᤺ᤳ ᤕᤧᤶᤒᤠ᤹ ᤗᤢᤶᤔᤥ ᤏᤛᤠ᤺ᤴᤛᤠᤒᤠ ᤐᤥ᤺ᤱᤔᤠ ᤐᤥ᤺ᤱᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹ᤖᤥ॥
HEB 13:5 ᤕᤠᤱᤛᤠᤁᤢᤴᤎᤣ ᤌᤰᤔᤠᤀᤥ ᤛᤩᤠᤱᤐᤧᤴᤍᤠᤱ ᤔᤧᤒᤳᤇᤧᤶᤔᤡᤴᤏᤧ᤹ᤀᤥ. ᤁᤖ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ᤀᤥᤀᤣ ᤂᤡᤏᤡ᤹ ᤏᤡᤱᤘᤠ᤹ ᤋᤠᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹. “ᤀᤡᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤡᤱᤅᤡᤴ. ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤡᤱᤅᤡᤴᤗᤥ॥”
HEB 13:6 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤜᤠᤱᤜᤠᤱᤅᤠᤱ ᤀᤰᤂᤣ ᤐᤠ᤺ᤵᤔᤠ ᤀᤠᤛᤢᤰᤋᤢᤶᤗᤥ. “ᤀᤡᤱᤃᤠ᤹ ᤕᤠᤵᤔᤡ ᤁᤢᤓᤠ᤹ ᤁᤧᤒᤡᤒᤧᤱᤃ ᤍᤠᤱᤒᤠᤸᤗᤥ. ᤀᤡᤱᤃᤠ᤹ ᤔᤧᤃᤡᤀᤠᤴᤗᤥ॥ ᤀᤡᤱᤃᤠ᤹ ᤜᤠ᤺ᤳᤗᤧ ᤌᤣ ᤔᤧᤵᤔᤠ ᤛᤢᤰᤁᤠᤒᤣ᥅”
HEB 13:7 ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤁᤧᤜᤢ᤹ᤒᤠ ᤂᤡᤏᤡ᤹ ᤗᤠᤶᤗᤥ᤺ᤒᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ॥ ᤂᤢᤏᤡ᤹ ᤜᤡᤱᤔᤴᤏᤥᤒᤠ ᤏᤢ᤺ᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ ᤏᤛᤠ᤺ᤴ ᤔᤧᤈᤥᤃᤢᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤆᤥᤃᤧᤶᤔᤧ᤹ᤀᤥ॥
HEB 13:8 ᤕᤧᤛᤢ ᤂᤪᤡᤛ᤻ᤋᤧᤱᤃ ᤔᤡ᤺ᤵᤔᤠ. ᤀᤠᤀᤡᤴ ᤜᤧᤰᤁᤩᤠᤱ ᤀᤠᤓᤧᤸᤗᤧᤛᤠᤱ ᤁᤢᤀᤡᤛᤡ᤺ᤰ ᤘᤠ᤹ᤖᤥ॥
HEB 13:9 ᤐᤖᤡᤰ ᤐᤖᤡᤰᤐᤠ ᤁᤢᤛᤱ ᤏᤡᤛᤠᤶᤜᤠ᤹ᤀᤥ ᤗᤠᤶᤔᤧᤒᤥ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤛᤠᤰᤌᤡᤶ ᤁᤢᤀᤡᤛᤡ᤺ᤰᤐᤠ ᤆᤠᤔᤠ ᤌᤢᤱᤔᤠᤸᤗᤧᤃ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤗᤠᤶᤒᤠᤏᤧ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤁᤧᤎᤢᤶᤒᤠ ᤐᤥ᤺ᤱᤔᤠ ᤏᤢ᤺ᤒᤠ ᤐᤥ᤺ᤱᤗᤥ॥ ᤜᤧᤰᤋᤱᤒᤠ ᤆᤠᤔᤠ ᤌᤢᤱᤔᤠ ᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤌᤣᤀᤠᤱ ᤀᤡᤴᤎᤠ᤺ᤰ ᤔᤧᤱᤄᤥ᤺ᤛᤢᤴᤗᤥ॥
HEB 13:10 ᤜᤧᤰᤁᤩᤠᤱ ᤀᤠᤏᤡ᤹ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤎᤡᤰ ᤀᤠᤃᤳᤋᤢᤶ॥ ᤂᤧᤵᤔᤥ ᤋᤥ᤺ᤶᤔᤏᤠᤒᤠ ᤆᤥᤓᤠ᤹ᤜᤠ᤹ ᤛᤣᤛᤣ ᤛᤠ᤺ᤱᤃᤠᤜᤡᤶᤔᤥ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤣᤀᤠᤱ ᤆᤠᤔᤠ ᤕᤢᤰ ᤜᤥ᤺ᤵᤋᤧᤖᤥ॥
HEB 13:11 ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤠᤰᤏᤢ᤺ᤸᤗᤧ ᤛᤣᤛᤣᤒᤠ ᤍᤧᤴᤏᤥ ᤌᤰᤛᤠ ᤔᤠᤰᤂᤡ᤹ᤀᤡᤴ ᤕᤠᤱᤛᤡᤱᤅᤠᤱ ᤗᤠᤕᤥᤖᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤗᤠ᤺ᤳᤗᤥ. ᤁᤖ ᤌᤰᤛᤠ᤺ᤱᤃ ᤔᤏᤠ ᤘᤠ᤹ᤔᤠ ᤐᤠᤱᤈᤢᤶᤔᤡᤸᤗᤧ ᤗᤠ᤺ᤰᤁᤠᤳ ᤔᤡ ᤔᤧᤎᤡᤰᤂᤢᤖᤥ॥
HEB 13:12 ᤒᤠ ᤁᤸᤗᤧ ᤆᤥᤃᤢᤸᤗᤧ ᤕᤧᤛᤢ᤺ᤴᤏᤠᤱ ᤀᤠᤒᤠᤅᤣ ᤁᤢᤔᤠᤰᤂᤡ᤹ᤀᤡᤸᤗᤧ ᤔᤏᤠᤜᤠ᤹ ᤛᤢᤳᤌᤥ ᤆᤥ᤺ᤰᤛᤧ ᤕᤧᤰᤕᤰ ᤗᤠ᤺ᤰᤁᤠᤳ ᤛᤩᤧᤖᤥ॥
HEB 13:13 ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ᤀᤠᤱ ᤂᤢᤏᤧ᤹ᤀᤥ ᤐᤥ᤺ᤰᤂᤡᤀᤠᤱ ᤗᤠ᤺ᤰᤁᤠᤳ ᤐᤡᤃᤡ. ᤜᤧᤰᤁᤩᤠᤱ ᤂᤢᤏᤧ᤹ ᤋᤠ᤺ᤰᤋᤢᤒᤠ ᤜᤡᤏᤠ᤺ᤶᤔᤡᤴ ᤋᤠ᤺ᤰᤋᤢᤶᤗᤥ॥
HEB 13:14 ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤍᤠᤍᤡᤱ ᤁᤧᤏᤧᤒᤠ ᤕᤧᤰᤕᤰ ᤀᤠᤱᤃᤳᤋᤢᤶᤔᤡᤴᤗᤥ. ᤁᤖ ᤀᤠᤏᤡ᤹ᤃ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤕᤧᤰᤕᤰᤁᤡᤴ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤖᤥ॥
HEB 13:15 ᤀᤠᤸᤗ ᤕᤧᤛᤢᤖᤧ ᤁᤢᤓᤠ᤹ᤗᤠᤶᤒᤠ ᤀᤠᤏᤡ᤹ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤁᤢᤏᤠᤖᤠ ᤑᤥ᤺ᤛᤢᤶᤗᤥ॥ ᤂᤧᤱᤃ ᤂᤢᤏᤧ᤹ ᤍᤠᤱᤒᤠ ᤗ᤹ᤖᤡᤰ ᤋᤧᤴᤍᤡᤱ ᤆᤥ᤺ᤰᤔᤏᤠᤒᤠ ᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤆᤥᤓᤠ᤹ᤖᤥ॥
HEB 13:16 ᤀᤠᤸᤗ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤁᤶᤒᤪᤠᤱ ᤔᤧᤳᤇᤡᤱᤔᤠ ᤁᤢᤓᤠ᤹ ᤐᤡᤛᤡᤱᤔᤠ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤰᤋᤱᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢᤖᤥ॥
HEB 13:17 ᤂᤡᤏᤡ᤹ ᤗᤠᤶᤗᤥ᤺ᤒᤠᤜᤠ᤹ᤖᤧ ᤁᤧᤶᤔᤧᤳᤋᤡᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤶᤒᤪᤠᤱ ᤁᤧᤶᤔᤧᤳᤋᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤗᤰᤐᤧᤴᤛᤠᤒᤠ ᤔᤧᤒᤥ᤺ᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤧᤴ ᤕᤠ᤺ᤶᤒᤰᤁᤡᤴ ᤔᤧᤛ᤺ᤳᤗ ᤏᤡᤱᤘᤠ᤹ ᤔᤧᤴᤍᤢᤰᤁᤣ ᤔᤧᤈᤥᤃᤢᤖᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤍᤢᤰᤛᤢᤶ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤗᤠᤃᤡ ᤌᤣᤀᤠᤱ ᤀᤡᤴᤎᤠ᤺ᤰ ᤔᤧᤒᤥ᤺ᤱᤏᤧᤸᤗᤥ॥
HEB 13:18 ᤀᤠᤏᤡᤃᤧ ᤗᤠᤃᤡ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤧᤃ ᤛᤣᤛᤣ ᤂᤠᤛᤡᤱ ᤁᤳᤋᤢᤶᤒᤠ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤗᤧᤴ ᤔᤡᤱᤛᤥ ᤀᤡᤱᤎᤠ᤺ᤱᤅᤥ ᤜᤡᤱᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ ᤑᤠ᤹ᤀᤠᤱ ᤏᤡᤛ᤻ᤛᤣ ᤘᤕᤡᤃᤧᤖᤥ॥
HEB 13:19 ᤀᤠᤸᤗᤥ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤕᤠᤶᤔᤥ ᤜᤠᤖᤠᤀᤣ ᤋᤠ᤺ᤔᤠ ᤛᤢᤰᤁᤠᤏᤡᤖᤥ ᤑᤠ᤹ᤀᤠᤱ ᤀᤠᤗᤠᤃᤡ ᤋᤢᤘᤠ ᤆᤥᤃᤧᤶᤔᤧ᤹ ᤗ᤹ᤖᤡᤰ ᤐᤣᤗᤡ ᤑᤠᤰᤏᤡᤱᤗᤥ॥
HEB 13:20 ᤀᤠᤸᤗ ᤐᤕᤶ ᤕᤶᤒᤠ ᤔᤧᤸᤗᤢᤰᤁᤶᤒᤠ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ᤺ᤸᤗᤧ ᤔᤧᤴᤏᤢᤵᤔᤏᤠᤒᤠ ᤔᤠᤱᤜᤢᤵᤐᤡᤸᤗᤧ ᤁᤢᤔᤠᤰᤂᤡ᤹ᤀᤡᤴ ᤘᤠᤃᤧᤍᤣ᤺ᤶᤒᤠᤀᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤛᤏᤠᤖᤢᤱᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ
HEB 13:21 ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤆᤥ᤺ᤰᤔᤠ ᤆᤠᤜᤠᤒᤠ ᤁᤧᤈᤥᤃᤡᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧ ᤁᤧᤃᤠᤵᤋᤡᤖᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤁᤠᤰ ᤐᤠ᤺ᤴᤜᤠ᤹ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤂᤡᤏᤡ᤹ᤀᤥ ᤆᤥᤃᤢᤏᤡᤖᤥ॥ ᤜᤧᤰᤁᤩᤠᤱ ᤛᤍᤠᤍᤡᤱ ᤛᤍᤠᤍᤡᤱ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤏᤡᤖᤥ॥ ᤀᤠᤔᤧᤴ॥
HEB 13:22 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤁᤴ ᤋᤠᤱᤛᤠ ᤛᤰᤀᤡᤱᤄᤱᤅᤥ ᤁᤧᤒᤵᤐᤠ ᤂᤠᤜᤢᤴᤜᤠ᤹ ᤏᤡᤱᤘᤠ᤹ᤒᤥ ᤋᤠ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥
HEB 13:23 ᤀᤠᤏᤡ᤹ ᤏᤢᤛᤠ᤹ ᤋᤡᤔᤥᤌᤡ᤺ᤴ ᤐᤢᤱᤗᤠᤜᤡᤶᤔᤥᤗᤠᤶ ᤗᤧᤖᤧᤀᤠᤱ ᤘᤠ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤂᤥ᤺ᤛᤧᤶᤔᤧ᤹ ᤁᤧᤗ᤹ᤒᤠ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤂᤢᤏᤧ᤹ ᤁᤵᤔᤥ ᤀᤡᤱᤃᤠ᤹ᤀᤥ ᤜᤠᤖᤠᤀᤣ ᤋᤠ᤺ᤏᤧ ᤑᤠ᤹ᤃᤪ ᤂᤡᤏᤡ᤹ ᤋᤢᤶᤛᤧ ᤀᤠᤴᤇᤡᤃᤧ ᤛᤥᤖᤡᤰ ᤑᤧᤴᤇᤡᤃᤧ᤹ᤖᤥ॥
HEB 13:24 ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤁᤧᤖᤧᤰ ᤗᤠᤶᤗᤥ᤺ᤒᤠᤜᤠ᤹ ᤏᤢ ᤏᤛᤠᤏᤡᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ ᤁᤵᤔᤥ ᤀᤡᤋᤠᤗᤡ ᤗᤠᤈᤣ᤹ᤒᤠ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥
HEB 13:25 ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥
JAM 1:1 ᤁᤧᤖᤧᤰ ᤗᤠᤈᤣ᤹ᤀᤥ ᤁᤧᤛᤧᤒᤠᤀᤠᤱ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤕᤜᤢᤍᤡᤛᤣ. ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤀᤡᤱᤃᤠ᤹ ᤕᤠᤁᤢᤒᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥
JAM 1:2 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤁᤠᤰ ᤐᤖᤡᤰᤗᤧᤴ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤸᤗᤧ ᤂᤧᤱᤃ ᤛᤠ᤹ᤖᤡᤰ ᤛ᤺ᤵᤔᤏᤠᤒᤠ ᤐᤠ᤺ᤴᤗᤥ ᤑᤠ᤹ᤀᤠᤱ ᤀᤡ᤺ᤳᤋᤧᤶᤔᤧ᤹ᤀᤥ.
JAM 1:3 ᤌᤣᤀᤠᤱᤓᤧᤸᤗᤧ ᤀᤠᤰᤂᤩᤠᤖᤡᤰ ᤏᤛᤠ᤺ᤴᤛᤠᤒᤠ ᤁᤧᤈᤥᤃᤡ ᤑᤠᤀᤠᤱ ᤏᤡᤱᤘᤠ᤹ ᤛᤠ᤹ᤔᤥ ᤁᤧᤎᤩᤧ᤹ᤀᤡᤸᤗᤧ ᤂᤡᤏᤡ᤹ ᤏᤠᤛᤡ ᤌ᤺ᤵᤔᤠᤴ ᤐᤥ᤺ᤖᤥ ᤁᤧᤗ᤹ᤒᤠᤴ ᤁᤧᤏᤡ᤺ᤛᤢᤶᤗᤥ॥
JAM 1:4 ᤜᤧᤰᤁᤩᤠᤱ ᤏᤠᤛᤡ ᤌ᤺ᤵᤔᤠᤴ ᤁᤢᤗᤡᤱᤎᤥ ᤁᤧᤳᤗ ᤌᤠᤖᤡᤰ ᤐᤥ᤺ᤖ ᤐᤥ᤺ᤱᤗᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤎᤢᤶᤒᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ᤀᤥ ᤁᤢᤗᤡᤱᤎᤥ ᤔᤧᤱᤃᤧᤵᤔᤏᤠᤒᤠ ᤐᤠ᤺ᤴ ᤌᤣᤀᤠᤱ ᤔᤧᤒᤥ᤺ᤱᤏᤧᤸᤗᤥ॥
JAM 1:5 ᤁᤖ ᤂᤡᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤁᤧᤈᤥᤃᤡᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤒᤡᤖᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤢᤕᤠ᤺ᤰ ᤔᤧᤸᤗᤧ᤹ᤀᤣ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤁᤧᤏᤠ᤺ᤰᤐᤠᤜᤠ᤹ ᤁᤧᤖᤧᤰ ᤐᤡᤖᤢᤛᤡ᤹ᤖᤥ॥
JAM 1:6 ᤁᤖ ᤁᤧᤏᤠ᤺ᤰᤐᤠᤸᤗᤧ ᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤂᤥ᤺ᤛᤢᤱ ᤑᤠ᤹ᤀᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤏᤠ᤺ᤰᤋᤢᤖ ᤐᤥ᤺ᤱᤗᤥ॥ ᤆᤵᤆᤡ ᤁᤧᤈᤥ᤺ᤰᤐᤠᤱᤃ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤔᤢ᤺ᤳᤋᤢᤸᤗᤧ ᤘᤠᤜᤱᤅᤥ ᤁᤧᤒᤥ᤺ᤰᤐᤠ ᤘᤠᤓᤧᤸᤗᤧᤱᤅᤡᤴ ᤁᤢᤀᤡᤛᤡ᤺ᤰ ᤕᤥ ᤏᤠ ᤌᤥᤒᤠ ᤐᤥ᤺ᤱᤗᤥ॥
JAM 1:7 ᤜᤧᤰᤁᤣᤗ᤹ᤖᤡᤰ ᤆᤵᤆᤡ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥᤗᤠᤶ ᤌᤣ ᤐᤠ᤺ᤴᤏᤠᤱ ᤂᤥ᤺ᤛᤢᤱ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤴᤗᤖᤥ॥
JAM 1:8 ᤂᤧᤱᤃ ᤁᤢᤏᤡᤱᤘᤠ᤹ ᤁᤧᤗᤠᤶᤒᤠ ᤔᤏᤠᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤠᤰ ᤆᤥᤃᤢᤒᤠ ᤕᤠ᤺ᤶᤒᤰᤁᤥ ᤆᤥᤃᤢᤱᤒᤡ ᤔᤧᤈᤥ᤺ᤰᤁᤠᤴᤒᤡ ᤗ᤹ᤖᤥ॥
JAM 1:9 ᤕᤠᤱᤃᤧᤛᤠ᤹ᤒᤠ ᤏᤛᤠᤏᤡᤒᤠᤴ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤡᤱᤛᤥ ᤀᤡᤱᤎᤠ᤺ᤱ ᤂᤥ᤺ᤛᤢᤸᤗᤧ ᤛ᤺ᤳᤗ ᤐᤥ᤺ᤱᤗᤥ॥
JAM 1:10 ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏ᤺ᤶᤏ᤺ᤶᤒᤠ ᤐᤥ᤺ᤱᤅᤡᤸᤗᤧ ᤛ᤺ᤳᤗ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤃᤧᤗᤧᤶᤒᤠᤀᤠᤱ ᤔᤰᤁᤧᤎᤠ ᤁᤧᤒᤣ᤺ᤰᤐᤠ ᤋᤠᤶᤓᤢᤱ ᤑᤢᤱ ᤁᤢᤀᤡᤛᤡ᤺ᤰ ᤀᤡᤗᤧᤶᤒᤣ᤺ᤰᤗᤥ॥
JAM 1:11 ᤌᤣᤀᤠᤱᤓᤧᤸᤗᤧ ᤏᤠᤶᤛᤧᤀᤠᤱ ᤏᤠᤶᤗᤠ᤺ᤱᤔᤠᤸᤗᤧ ᤕᤠ᤺ᤴᤛᤢᤱᤅᤡᤴ ᤜᤣ᤺ᤛᤢ᤹ ᤜᤧᤰᤁᤩᤠᤱ ᤑᤢᤱᤅᤡᤴᤏᤠᤱ ᤔᤰᤌᤠᤀᤠᤱ ᤏᤢ᤺ᤒᤠ ᤁᤢᤎᤠ᤺ᤵᤔᤧᤴ ᤐᤣ᤺ᤰᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤕᤠᤱᤛᤠᤁᤢᤴᤎᤣᤛᤠᤒᤠᤴᤏᤠᤱ ᤂᤢᤏᤧ᤹ ᤕᤠ᤺ᤶᤒᤰ ᤆᤥᤃᤢᤖ ᤐᤳᤋᤡᤸᤗᤧᤀᤣ ᤛᤡ᤺ ᤐᤣ᤺ᤰᤗᤥ॥
JAM 1:12 ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤏᤠᤛᤡ ᤁᤧᤎ᤺ᤵᤐᤧᤱᤃ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤡᤱᤘᤠ᤹ ᤛᤠ᤹ᤔᤠᤀᤥ ᤌᤠ᤺ᤸᤗᤧ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤋᤡᤆ᤺ᤴ ᤂᤧᤸᤗᤧ ᤂᤥ᤺ᤛᤢ᤹ᤖᤥ॥
JAM 1:13 ᤜᤧᤰᤁᤩᤠᤱ ᤜᤱᤛᤠ᤹ᤔᤥ ᤁᤧᤎᤠ᤺ᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤱᤛᤠ᤹ᤖᤠᤱᤗᤥ ᤑᤠ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤒᤠ᤺ᤳᤋᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤑᤧᤴ ᤐᤠ᤺ᤴᤗᤠᤶᤒᤠ ᤜᤱᤔᤧᤛᤠ᤹ᤏᤧᤴᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤜᤱᤔᤧᤛᤠ᤹ᤖᤢᤴᤇᤡᤴᤗᤥ॥
JAM 1:14 ᤁᤖ ᤁᤠᤰ ᤔᤏᤠᤜᤠ᤹ ᤀᤠᤒᤠᤅᤣ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤜᤱᤛᤠ᤹ᤔᤥ ᤔᤧᤎᤠ᤺ᤖᤥ॥
JAM 1:15 ᤁᤴ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤀᤠᤏᤡ᤹ ᤀᤠᤕᤢᤰᤁᤠᤱ ᤗᤠᤕᤥ ᤆᤥ᤺ᤰᤔᤠ ᤀᤠᤒᤠᤱᤗᤥ. ᤜᤧᤰᤁᤩᤠᤱ ᤗᤠᤕᤥ᤺ᤸᤗᤧ ᤀᤠᤏᤡ᤹ ᤛᤡ᤺ᤔᤧᤴᤏᤥ ᤀᤠᤍᤣ᤹ᤖᤥ॥
JAM 1:16 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤡᤱᤗᤧᤰᤁᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥
JAM 1:17 ᤁᤠᤰ ᤏᤢ᤺ᤒᤠ ᤏᤢ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤐᤷᤎᤠ᤺ᤶᤔᤡᤱᤃ ᤌᤠ᤺ᤱ ᤋᤠᤱᤛᤠᤰᤐᤥ ᤁᤧᤀᤥ᤺ᤵᤐᤠ ᤀᤥ᤺ᤳᤋᤡᤜᤠ᤹ ᤁᤧᤈᤥ᤺ᤰᤐᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤕᤢ᤺ᤖᤥ॥ ᤂᤧᤴ ᤀᤥ᤺ᤳᤋᤡᤜᤠ᤹ᤃ ᤛᤠᤶᤒᤪᤡ᤺ᤵᤐᤠ ᤁᤢᤀᤡᤛᤡ᤺ᤰ ᤗᤧᤱᤒᤣ᤺ᤰ. ᤁᤖ ᤂᤢᤏᤧ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤱᤏᤧᤴᤗᤥ॥
JAM 1:18 ᤂᤢᤏᤧ᤹ ᤆᤥᤃᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤁᤠᤰᤏᤢ ᤋᤃᤡ ᤁᤧᤍᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤆᤠᤛᤥ᤺ᤰ ᤁᤢᤀᤡᤛᤡ᤺ᤰ ᤀᤠᤒᤥ᤺ᤱᤗ ᤑᤠ᤹ᤀᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤀᤡᤸᤗᤧ ᤛᤧᤰᤂᤠᤒᤠ ᤁᤢᤒᤠ᤺ᤴᤈᤠᤰᤗᤠᤶ ᤁᤢᤛ᤻ᤛᤠ᤺ ᤀᤠᤈᤥᤃᤧᤀᤠᤱ ᤘᤠ᤹॥
JAM 1:19 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤠᤄᤧᤶᤔᤠᤀᤥ ᤁᤧᤖᤧᤰ ᤆᤠᤳᤋᤧᤶᤔᤧ᤹ᤀᤥ. ᤁᤖ ᤐᤠ᤺ᤵᤔᤠᤀᤥ ᤏᤢ ᤛᤡᤰ ᤐᤥ᤺ᤰᤔᤠᤀᤥ ᤛᤢ᤺ᤛᤧᤶᤔᤧ᤹ᤀᤥ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥
JAM 1:20 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤡᤰᤁᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥
JAM 1:21 ᤂᤧᤸᤗᤧ ᤆᤥᤃᤢᤸᤗᤧ ᤋᤠᤵᤑᤧ᤺ᤶᤒᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤜᤠ᤹ ᤗᤧᤖᤧᤶᤍᤣ᤺ᤛᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥ ᤗᤣ᤺ᤳᤋᤢᤒᤠ ᤂᤡᤏᤡ᤹ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤐᤠ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤏ᤺ᤶᤏ᤺ᤶᤔᤠᤱ ᤋᤠ᤺ᤰᤋᤧᤶᤔᤧ᤹ᤀᤥ॥
JAM 1:22 ᤁᤖ ᤐᤠ᤺ᤴᤈᤠᤰᤁᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤶᤔᤧ᤹ᤀᤥ॥ ᤐᤠ᤺ᤴᤈᤠᤰ ᤁᤧᤄᤧᤶᤒᤠᤖᤰ ᤁᤧᤒᤥ᤺ᤰᤂᤡ᤹ᤏᤧ ᤑᤠ᤹ᤃᤪ ᤀᤠᤒᤠᤅᤣ ᤀᤡᤱᤃᤧᤗᤧᤰᤁᤠᤛᤡ᤹ᤖᤥ॥
JAM 1:23 ᤐᤠ᤺ᤴᤈᤠᤰᤁᤡᤴ ᤁᤧᤄᤧᤵᤛᤢᤶ ᤁᤖ ᤂᤧᤴ ᤁᤢᤀᤡᤛᤡ᤺ᤰ ᤁᤧᤴᤈᤥᤃᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤸᤗᤧᤱᤄᤥᤀᤥ ᤂᤡᤏᤡ᤹ ᤏᤠᤖᤠ ᤀᤥᤃᤧᤔᤧᤳᤋᤢᤶᤒᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
JAM 1:24 ᤂᤡᤏᤡ᤹ ᤀᤠᤒᤠᤅᤣ ᤀᤥᤃᤧᤔᤧᤳᤋᤠᤛᤡᤀᤠᤱ ᤀᤠᤏᤡᤃᤧ ᤀᤠᤰᤋᤱᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤒᤠᤴ ᤁᤧᤒᤣᤃᤡᤏᤢᤔᤧ᤺ᤴᤏᤣ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤗᤥ॥
JAM 1:25 ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤛᤣᤛᤣ ᤛᤠᤶᤕᤥᤌᤡᤶᤔᤡᤴ ᤂᤧᤵᤛᤢᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤴ. ᤁᤖ ᤂᤧᤸᤗᤧ ᤆᤰᤔᤧᤸᤗ᤹ᤀᤣ ᤏᤢ᤺ᤖᤡᤰ ᤀᤥᤔᤧᤳᤋᤢᤀᤠᤱ ᤂᤧᤵᤛᤢᤒᤠ ᤐᤠ᤺ᤴᤜᤠ᤹ ᤆᤥᤃᤢ᤹. ᤂᤧᤸᤗᤧ ᤆᤥᤃᤢᤒᤠ ᤁᤠᤰ ᤁᤢᤕᤠ᤺ᤶᤒᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤐᤡᤖᤢ᤹ᤖᤥ॥
JAM 1:26 ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤛᤠᤶᤕᤥᤛᤠᤒᤠ ᤆᤥ᤺ᤰᤁᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹. ᤁᤖ ᤁᤢᤗᤧᤛᤥ᤺ᤵᤐᤧᤴ ᤕᤢᤰᤁᤥ ᤔᤧᤃᤳᤋᤢᤴᤏᤧ ᤑᤠ᤹ᤃᤪ ᤂᤧᤱᤃ ᤀᤡᤱᤗᤧᤰᤛᤡᤱᤅᤠᤱ ᤂᤧᤸᤗᤧ ᤁᤢᤛᤠᤶᤕᤥ᤺ᤱᤃ ᤜᤏᤧᤖᤰ ᤐᤥ᤺ᤱᤗᤥ॥
JAM 1:27 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤒᤠ ᤛᤢᤳᤌᤥ ᤏᤢ ᤛᤣᤛᤣᤒᤠ ᤛᤠᤶᤕᤥᤛᤠᤒᤠ ᤐᤥ᤺ᤱᤔᤠᤱᤃ ᤒᤠ ᤁᤴᤗᤥ–ᤕᤧᤳᤇᤠᤒᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤂᤢᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤀᤥ ᤁᤶᤒᤪᤠᤱ ᤔᤧᤵᤔᤠᤛᤡ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤵᤔᤡ ᤁᤧᤈᤡ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤔᤠ᤺ᤱᤄᤠ ᤘᤠ᤹ᤔᤠᤖᤥ॥
JAM 2:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤔᤡᤔᤡᤍᤡᤱᤃᤧᤴ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧᤃ ᤘᤣ᤹ ᤔᤏᤠᤜᤠ᤹ ᤛᤧᤶᤔᤠᤛᤡ ᤔᤧᤏᤢ᤹ᤏᤧᤴᤗᤥ॥
JAM 2:2 ᤀᤠᤸᤗ ᤂᤡᤏᤡ᤹ ᤛᤣᤛᤣ ᤆᤢᤶᤗᤢᤱᤅᤥ ᤔᤏᤠᤎᤡᤰ ᤛᤠᤶᤔᤩᤠᤱ ᤛᤫᤠ᤺ᤃᤧᤵᤐᤡᤴ ᤏᤢ ᤏᤢ᤺ᤒᤠ ᤆᤠᤱ ᤆᤠᤰᤂᤢᤀᤠᤱ ᤋᤠ᤺. ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤶᤔᤥᤀᤣ ᤕᤠᤱᤃᤧᤛᤠ᤹ᤒᤠ ᤆᤡᤖᤡᤱᤗᤡᤱᤒᤠ ᤆᤠᤱ ᤁᤧᤈᤠᤱᤒᤠ ᤔᤏᤠᤎᤡᤰᤁᤠᤱ ᤋᤠᤏᤧ ᤑᤠ᤹ᤃᤪ.
JAM 2:3 ᤂᤧᤴ ᤏᤢ᤺ᤒᤠ ᤆᤠᤱ ᤁᤧᤈᤠᤱᤒᤠ ᤔᤏᤠ᤺ᤴ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤒᤡᤖᤢᤶᤗ “ᤁᤵᤔᤥ ᤏᤢ᤺ᤒᤠ ᤋᤧᤴᤏᤥ ᤕᤢᤅᤧ᤹ᤀᤥ” ᤁᤧᤔᤧᤳᤋᤢᤶ. ᤁᤖ ᤂᤧᤴ ᤕᤠᤱᤃᤧᤛᤠ᤹ᤒᤠᤴ “ᤂᤧᤏᤧ᤹ ᤂᤧᤳᤏᤠ ᤕᤧᤒᤧ᤹” ᤀᤡᤃᤪ “ᤁᤵᤔᤥ ᤂᤠᤶᤔᤥ ᤕᤢᤅᤧ᤹” ᤁᤧᤔᤧᤳᤋᤢᤶᤏᤧ ᤑᤠ᤹ᤃᤪ.
JAM 2:4 ᤂᤡᤏᤡ᤹ᤃ ᤀᤠᤒᤠᤅᤣ ᤗᤢᤶᤔᤥ ᤔᤏᤠ ᤁᤧᤛᤧᤶᤒᤠ ᤏᤢ ᤑᤧᤴ ᤏᤡᤱᤘᤠ᤹ᤗᤠᤶ ᤂᤠᤛᤧᤴᤗᤥ᤺ᤶᤒᤠ ᤁᤧᤶᤒᤥ᤺ᤰᤂᤡᤴᤒᤡ᥅
JAM 2:5 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤧᤵᤛᤧᤶᤔᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤏᤛᤠ᤺ᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥ᤺ᤰᤛᤧ ᤏᤢ ᤁᤢᤜᤠᤱᤈᤢᤶ ᤗᤰ ᤂᤥ᤺ᤛᤧ ᤛᤣᤃᤢᤛᤡᤀᤠᤱ ᤘᤠ᤹॥ ᤂᤧᤴ ᤜᤠᤱᤈᤢᤶᤔᤡᤱᤃ ᤂᤢᤏᤧ᤹ ᤁᤠᤰ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤐᤡᤔᤠᤛᤡ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤠ᤹ᤖᤥ॥
JAM 2:6 ᤁᤖ ᤂᤡᤏᤡ᤹ᤃ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤏᤠᤃᤧᤎᤠ᤺ᤛᤢᤶ ᤁᤧᤒᤡᤖᤢᤶᤛᤡᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤡᤱᤄᤢᤶ ᤁᤧᤔᤧᤵᤐᤠᤀᤠᤱ ᤂᤠᤛᤧᤴ ᤜᤡᤶᤔᤥ ᤁᤧᤀᤢ᤺ᤱᤒᤠ ᤁᤧᤍᤣ᤹ᤒᤠᤜᤠ᤹ ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
JAM 2:7 ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤏᤢ᤺ᤒᤠ ᤁᤢᤔᤡᤱᤅᤡᤴ ᤆᤠ᤺ᤳᤌᤡ ᤁᤧᤍᤣ᤺ᤒᤠᤜᤠ᤹ ᤂᤧᤱᤜᤠ᤹ᤀᤣ ᤔᤧ᤺ᤴᤇᤡᤒᤡ᥅
JAM 2:8 ᤛᤧᤰᤂᤠᤀᤣ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤂᤡᤏᤡ᤹ ᤐᤠᤱᤓᤣ᤹ᤛᤠᤒᤠᤜᤠ᤹ ᤀᤠᤒᤠᤅᤣ ᤁᤢᤀᤡᤛᤡ᤺ᤰᤁᤣ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤢᤜᤠᤱᤃᤧᤴ ᤌᤡᤶᤔᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤏᤢ᤺ᤒᤠᤀᤣ ᤁᤧᤈᤥᤃᤢᤶᤗᤥ॥
JAM 2:9 ᤁᤖ ᤂᤡᤏᤡ᤹ ᤔᤏᤠᤜᤠ᤹ ᤁᤧᤛᤧᤴᤍᤢᤶᤛᤡᤶᤏᤧ ᤑᤠ᤹ᤃᤪ ᤗᤠᤕᤥ ᤁᤧᤈᤥᤃᤢᤶᤔᤠᤱ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤓᤠᤱ ᤁᤧᤓᤣ᤺ᤶᤒᤠ ᤑᤠ᤹ᤀᤠᤱ ᤀᤠᤵᤋᤡᤰ ᤁᤧᤃᤢ᤺ᤳᤋᤡ᤹ᤖᤥ॥
JAM 2:10 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤧᤖᤧᤰ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹ ᤁᤖ ᤗᤳᤌᤡᤰ ᤐᤠ᤺ᤴᤏᤡᤴ ᤑᤣ᤺ᤴᤍᤢᤏᤧ ᤑᤠ᤹ᤃᤪ. ᤂᤧᤸᤗᤧ ᤁᤧᤖᤧᤰ ᤛᤠᤶᤕᤥᤌᤡᤶᤔᤡᤴ ᤑᤣ᤺ᤴᤍᤢᤒᤠ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥
JAM 2:11 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ “ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤴᤏᤧ᤹ᤀᤥ” ᤗ᤹ᤖᤡᤰ ᤐᤠ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ “ᤔᤏᤠ ᤔᤧᤛᤧᤖᤧᤴᤏᤧ᤹” ᤗ᤹ᤖᤡᤰᤁᤠᤱ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤴᤈᤥᤃᤢᤴᤇᤠᤱ ᤔᤏᤠ ᤁᤧᤛᤧᤳᤏᤧ ᤑᤠ᤹ᤃᤪ. ᤂᤧᤏᤧ᤹ ᤛᤠᤶᤕᤥᤌᤡᤶ ᤁᤧᤓᤣ᤺ᤶᤒᤠ ᤁᤧᤒᤥ᤺ᤱᤗᤥ॥
JAM 2:12 ᤜᤧᤰᤁᤣ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡ᤺ᤴ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤛᤠᤶᤕᤥᤌᤡᤶᤗᤠᤶ ᤂᤠᤛᤧᤴ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤔᤏᤠ᤺ᤴ ᤁᤢᤀᤡᤛᤡ᤺ᤰ ᤐᤠᤖᤧᤶᤔᤧ᤹ ᤆᤥᤃᤧᤶᤔᤧ᤹ᤀᤥ.
JAM 2:13 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤛᤡᤱᤅᤣ ᤘᤣ᤹ᤜᤠ᤹ ᤂᤠᤛᤧᤴ ᤗᤥ᤺ᤴᤍᤢᤛᤡ᤹. ᤂᤧᤸᤗᤧᤴᤏᤠᤱ ᤁᤢᤄᤠᤛᤧᤴᤏᤡᤴ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤐᤥ᤺ᤱᤗᤥ॥ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠᤸᤗᤧ ᤏᤡᤱᤘᤠ᤹ᤑᤢ ᤂᤠᤛᤧᤴᤏᤡᤴ ᤔᤧᤃᤡᤖᤢᤴᤗᤥ᥄
JAM 2:14 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤳᤋᤡᤴ ᤔᤏᤠ᤺ᤸᤗᤧ ᤏᤛᤠ᤺ᤴ ᤁᤳᤋᤢᤱ ᤗ᤹ᤖᤡᤰ ᤐᤠ᤺ᤳᤋᤢ᤹ ᤁᤖ ᤕᤠ᤺ᤶᤒᤰ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤜᤧᤰᤋᤱᤒᤠ ᤏᤛᤠ᤺ᤴᤏᤡᤸᤗᤧ ᤂᤧᤴ ᤋᤠᤱᤛᤧ᤺ᤵᤔᤠ ᤛᤢᤰᤋᤢ᤹ᤒᤡ᥅
JAM 2:15 ᤀᤠᤸᤗ ᤑᤢ᤹ᤏᤢᤛᤠ᤹ ᤀᤡᤃᤪ ᤏᤧ᤹ᤏᤢᤛᤠ᤹ ᤌᤡᤰᤗᤧ ᤆᤠᤱ ᤋᤣ᤺ᤳ ᤔᤧᤃᤳᤋᤢᤴ ᤜᤧᤰᤁᤩᤠᤱ ᤌᤡᤰᤕᤠ᤺ᤴᤎᤰᤐᤠ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤃᤳᤋᤢᤴ.
JAM 2:16 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ “ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ. ᤏᤢ᤺ᤖᤡᤰ ᤆᤧ᤹ ᤌᤢᤅᤧ᤹ᤀᤠᤱ ᤐᤃᤥᤃᤥ᤺ᤖ ᤘᤕᤧ᤹ᤀᤥ” ᤔᤧᤳᤋᤢ᤹. ᤁᤖ ᤂᤧᤴ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤌᤣᤀᤠᤱ ᤁᤢᤓᤠ᤹ ᤔᤧᤒᤡᤖᤢᤴᤏᤧ ᤑᤠ᤹ᤃᤪ ᤌᤣ ᤏᤢ᤺ᤒᤠ ᤐᤥ᤺ᤰᤂᤧᤀᤠᤱᤒᤣ᥅
JAM 2:17 ᤜᤧᤰᤁᤣᤗ᤹ᤖᤡᤰᤁᤣ ᤏᤛᤠ᤺ᤴᤏᤡᤴ ᤁᤧᤃᤳᤋᤢᤶᤛᤠᤱ ᤂᤧᤴ ᤁᤢᤀᤡᤛᤡ᤺ᤰ ᤕᤠ᤺ᤶᤒᤰ ᤁᤧᤴᤈᤥᤃᤢᤶᤔᤡᤴᤏᤧ ᤑᤠ᤹ᤃᤪ. ᤂᤧᤴ ᤏᤛᤠ᤺ᤴᤏᤡᤱᤃ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥ᤺ᤱᤗᤥ॥
JAM 2:18 ᤀᤠᤸᤗ ᤁᤢᤓᤠᤖᤧ ᤔᤧᤒᤠ᤺ᤳᤋᤢᤒᤡᤗᤠ. “ᤂᤧᤏᤧ᤹ ᤏᤛᤠ᤺ᤴ ᤁᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤕᤠ᤺ᤶᤒᤰ ᤁᤳᤋᤢᤱ॥” ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. “ᤂᤧᤏᤧ᤹ ᤕᤠ᤺ᤶᤒᤰᤁᤡᤸᤗᤧ ᤔᤧᤃᤠᤵᤋᤢᤶᤒᤠ ᤁᤧᤏᤛᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤠ᤺ᤶᤒᤰᤗᤠᤶ ᤀᤠᤏᤛᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤏᤧ᤹ᤖᤥ॥”
JAM 2:19 ᤁᤢᤳᤆᤠ᤹ᤀᤣ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤠ᤹ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥᤃᤢ᤹॥ ᤂᤧᤱᤃ ᤏᤢ᤺ᤒᤠᤖᤥ᥄ ᤑᤧᤴᤛᤠᤶᤜᤠ᤹ᤖᤧᤀᤠᤱ ᤂᤧᤴ ᤐᤠ᤺ᤴᤏᤡᤴ ᤏᤛᤠ᤺ᤴ ᤔᤧᤈᤥᤃᤢᤀᤠᤱ ᤔᤧᤃᤡᤖ ᤌᤧᤃᤰᤁᤰᤏᤠ ᤔᤧᤕᤱᤗᤥ॥
JAM 2:20 ᤀᤍᤱᤛᤣ. ᤕᤠ᤺ᤶᤒᤰᤁᤡᤸᤗᤧ ᤔᤧᤃᤠᤵᤋᤢᤶᤒᤠ ᤏᤛᤠ᤺ᤴᤏᤡᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥ᤺ᤱ ᤁᤧᤗ᤹ᤒᤠ ᤐᤷᤔᤠᤱᤃᤡ᤺ᤴ ᤁᤧᤃᤥ᤺ᤳᤋᤢᤶᤒᤡ᥅
JAM 2:21 ᤀᤠᤏᤡ᤹ ᤋᤠᤰᤌᤧᤒᤠ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ᤺ ᤀᤡᤛᤜᤠᤰᤁᤡᤴ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥ ᤛᤡᤍᤢᤱᤈᤓᤠ ᤆᤥ᤺ᤰᤛᤧ ᤋᤥ᤺ᤴᤍᤢᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤂᤢᤏᤧ᤹ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤆᤥᤃᤢᤒᤠ ᤔᤧ᤺ᤶᤒᤡ᥅
JAM 2:22 ᤂᤢᤏᤧ᤹ ᤁᤢᤏᤛᤠ᤺ᤴᤏᤡᤴ ᤁᤢᤕᤠ᤺ᤶᤒᤰᤁᤡᤸᤗᤧ ᤁᤠᤵᤋᤢᤒᤠᤴ ᤏᤢ ᤒᤠ ᤂᤧᤴ ᤕᤠ᤺ᤶᤒᤰᤁᤡᤸᤗᤧᤀᤣ ᤁᤢᤏᤛᤠ᤺ᤴᤏᤡᤴ ᤁᤢᤗᤡᤱᤎᤥ ᤁᤧᤳᤋᤢᤒᤠᤴ ᤁᤧᤏᤡ᤺ᤛᤢᤶᤗᤥ॥
JAM 2:23 ᤁᤴ ᤐᤠ᤺ᤴᤏᤡᤱᤃ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ. “ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥᤃᤢ. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤠᤶᤕᤥᤏᤡᤒᤠ ᤗᤣ᤺ᤳᤋᤢᤖᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤴᤈᤢᤶ ᤑᤠ᤹ᤀᤠᤱ ᤔᤧᤳᤋᤢᤖᤥ॥
JAM 2:24 ᤏᤛᤠ᤺ᤴᤗᤠᤶᤖᤰ ᤔᤧ᤺ᤴ. ᤁᤖ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤕᤠ᤺ᤶᤒᤰᤗᤠᤶᤔᤠᤱ ᤀᤠᤵᤋᤡᤰ ᤔᤧ᤺ᤴᤏᤣᤒᤠ ᤀᤠᤒᤥ᤺ᤱ ᤑᤠ᤹ᤀᤠᤱ ᤁᤧᤏᤡ᤺ᤛᤢᤶᤗᤥ॥
JAM 2:25 ᤜᤧᤰᤁᤣᤗ᤹ᤖᤡᤰᤁᤣ ᤁᤧᤳᤏᤡᤔᤠ ᤖᤠᤜᤠᤒᤖᤧ ᤌᤥ᤺ᤶᤈᤡᤒᤠᤜᤠ᤹ ᤋᤖᤣ ᤋᤥ᤺ᤛᤢᤛᤡᤀᤠᤱ ᤂᤧᤱᤜᤠ᤹ ᤋᤠᤱᤛᤧ᤺ᤵᤛᤧ ᤘᤣ᤹ ᤗᤠᤶ ᤐᤠᤱᤄᤢᤛᤡᤒᤠ ᤁᤢᤕᤠ᤺ᤶᤒᤰᤁᤡᤸᤗᤧᤀᤣ ᤂᤧᤴ ᤀᤠᤵᤋᤡᤰ ᤔᤧ᤺ᤴᤏᤣᤔᤠ ᤐᤥ᤺ᤰᤂᤧᤖᤥ॥
JAM 2:26 ᤕᤠᤶᤛᤠᤶ ᤔᤧ᤺ᤴᤏᤣᤒᤠ ᤏᤠᤛᤡᤱᤃᤧᤴ ᤌᤰᤁᤡᤴ ᤁᤢᤛᤡᤘᤧᤳ ᤐᤥ᤺ᤱᤒᤠ ᤁᤢᤀᤡᤛᤡ᤺ᤰᤁᤣ ᤕᤠ᤺ᤶᤒᤰ ᤔᤧ᤺ᤴᤏᤣᤒᤠ ᤏᤛᤠ᤺ᤴᤏᤡᤴᤏᤠᤱ ᤁᤢᤛᤡᤘᤧᤳ ᤐᤥ᤺ᤱᤗᤥ॥
JAM 3:1 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤕᤖᤡᤰ ᤛᤡᤰᤛᤠᤶᤒᤠ ᤐᤥ᤺ᤱᤔᤠ ᤔᤧᤃᤥ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤡᤰᤛᤠᤶᤒᤠᤜᤠ᤹ ᤘᤣ᤹ᤜᤠ᤹ᤏᤢ᤺ᤸᤗᤧ ᤁᤧᤛᤠᤰᤐᤠ ᤂᤠᤛᤧᤴᤏᤥ ᤀᤠᤎᤠ᤹᤺ ᤁᤧᤗ᤹ᤒᤠᤴ ᤁᤧᤏᤡ᤺ᤛᤢᤶᤗᤥ॥
JAM 3:2 ᤀᤠᤏᤡ᤹ ᤁᤧᤖᤧᤰ ᤕᤖᤡᤰ ᤐᤠ᤺ᤴᤜᤠ᤹ᤀᤥ ᤀᤠᤒᤣ᤺ᤴᤗᤥ. ᤁᤖ ᤀᤠᤳᤋᤡᤴ ᤔᤏᤠ᤺ᤴ ᤀᤠᤒᤠᤅᤣ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤔᤧᤒᤣ᤺ᤴᤏᤡᤴᤏᤧ ᤑᤠ᤹ᤃᤪ ᤛᤧᤰᤂᤠᤛᤠᤱ ᤂᤧᤸᤗᤧᤃ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤕᤢᤰᤁᤥ ᤁᤵᤔᤠ ᤛᤢᤰᤋᤢ᤹. ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤴ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤐᤥ᤺ᤱᤗᤥ॥
JAM 3:3 ᤀᤴᤏᤡᤸᤗᤧ ᤁᤢᤔᤢᤖᤠᤀᤥ ᤆᤢᤰᤛᤠ ᤁᤖᤧᤗᤡ᤺ᤴ ᤁᤣ᤺ᤵᤔᤠᤀᤠᤱ ᤂᤧᤴ ᤕᤶᤒᤠ ᤌᤰᤛᤠ᤺ᤴ ᤀᤠᤳᤋᤠᤴ ᤋᤣ᤹ᤔᤠ ᤏᤡᤱᤘᤠ᤹ ᤀᤠᤈᤥᤃᤢᤶ ᤂᤧᤵᤔᤥᤀᤣ ᤋᤣ᤹ᤔᤠ ᤀᤠᤛᤢᤰᤋᤢᤶᤗᤥ॥
JAM 3:4 ᤜᤧᤰᤁᤣᤗ᤹ᤖᤡᤰᤁᤣ ᤘᤠᤗᤠᤎᤠ᤺ᤴ ᤕᤶᤒᤠ ᤆᤥ᤺ᤰ. ᤜᤧᤰᤁᤩᤠᤱ ᤕᤶᤒᤠ ᤛᤢᤖᤡᤳᤋᤡᤸᤗᤧ ᤔᤢ᤺ᤳᤋᤢ ᤋᤣ᤹ᤖᤢᤛᤠᤱ ᤘᤠᤍᤥ ᤆᤠ᤺ᤰᤐᤠᤸᤗᤧ ᤏᤠ ᤁᤳᤏᤠ ᤁᤧᤜᤡᤒᤠ ᤆᤢᤰᤛᤠ ᤛᤠᤔᤠ᤺ᤸᤗᤧ ᤘᤠᤗᤠᤎᤠ᤺ᤴ ᤀᤠᤳᤋᤠᤴᤛᤠᤱ ᤋᤣ᤹ᤔᤠ ᤛᤢᤰᤋᤢ᤹ᤖᤥ॥
JAM 3:5 ᤜᤧᤰᤁᤣᤗ᤹ᤖᤡᤰᤁᤣ ᤗᤧᤛᤥ᤺ᤵᤐᤧᤴᤏᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤆᤢ᤺ᤰᤛᤠᤱ ᤁᤴ ᤕᤶᤒ᤻ ᤕᤶᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤍᤡᤱ ᤗ᤹ᤖᤥ॥ ᤆᤢᤰᤛᤠ ᤔᤡᤛᤣ᤺ᤰᤁᤡᤸᤗᤧ ᤕᤶᤒᤠ ᤋᤠᤶᤓᤢᤱᤅᤡᤴ ᤂᤠᤵᤐᤢ ᤌᤩ᤺ᤱ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ ᤗ᤹ᤖᤡᤰ ᤀᤡ᤺ᤳᤋᤧᤶᤔᤧ᤹ᤀᤥ᥄
JAM 3:6 ᤜᤧᤰᤁᤣᤗ᤹ᤖᤡᤰᤁᤣ ᤗᤧᤛᤥ᤺ᤵᤐᤠᤱᤃ ᤔᤡ ᤜᤧᤰᤋᤱᤒᤠᤖᤥ॥ ᤁᤱᤃ ᤏᤠᤛᤡᤱᤃᤧᤴ ᤌᤰᤁᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤒᤢᤱᤗᤥ॥ ᤂᤧᤴ ᤗᤧᤛᤥ᤺ᤵᤐᤠᤸᤗᤧ ᤔᤏᤠ᤺ᤸᤗᤧ ᤁᤠᤰ ᤏᤠᤛᤡᤱᤃᤧᤴ ᤁᤢᤎᤰᤁᤡᤴ ᤆᤡ᤺ᤴᤍᤢ᤹ᤀᤠᤱ ᤁᤢᤜᤡᤱᤔᤴᤏᤡᤴ ᤁᤧᤖᤧᤰ ᤔᤡᤎᤡᤰᤂᤢ᤹ᤖᤥ॥ ᤂᤧᤴ ᤔᤡᤱᤃ ᤂᤧᤔᤠᤕᤱᤛᤱᤗᤠᤶᤔᤣ ᤗ᤺ᤴᤗᤥ॥
JAM 3:7 ᤁᤠᤰ ᤐᤖᤡᤰᤐᤠ ᤌᤰᤛᤠ ᤐᤢᤛᤠ. ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤏᤢ ᤘᤠᤜᤱᤅᤥᤒᤠ ᤌᤰᤛᤠᤜᤠ᤹ ᤂᤢᤶᤔᤠ ᤛᤢᤰᤔᤧᤍᤧᤳᤗᤥ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤄᤢᤶᤛᤢᤛᤡ᤹ᤖᤥ.
JAM 3:8 ᤁᤖ ᤗᤧᤛᤥ᤺ᤵᤐᤠᤱᤃ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤂᤢᤶᤔᤠ ᤔᤧᤛᤢᤰᤋᤢᤴᤗᤥ॥ ᤁᤱᤃ ᤕᤢᤰᤁᤥ ᤁᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤋᤠᤵᤑᤧ᤺ᤶᤒᤠ ᤆᤥ᤺ᤰ. ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤁᤧᤛᤧᤵᤐᤠ ᤏᤡᤱᤅᤡᤸᤗᤧ ᤁᤢᤎᤡᤶᤒᤠ ᤆᤥ᤺ᤰᤗᤥ॥
JAM 3:9 ᤒᤠ ᤁᤴ ᤗᤧᤛᤥ᤺ᤵᤐᤠᤸᤗᤧᤀᤣ ᤀᤠᤏᤡ᤹ ᤍᤠᤱᤒᤠ ᤏᤢ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤀᤠᤓᤥ᤺ᤛᤢᤶ. ᤜᤧᤰᤁᤩᤠᤱ ᤒᤠ ᤁᤴᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤒᤡ ᤁᤢᤀᤡᤳᤇᤠᤵᤐᤥ ᤆᤥᤃᤢᤛᤡᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤠᤰᤔᤢᤖᤠ ᤀᤠᤔᤧᤳᤋᤢᤶᤛᤡᤶᤗᤥ॥
JAM 3:10 ᤜᤧᤰᤁᤣᤗ᤹ᤖᤡᤰ ᤗᤳᤇᤠ ᤔᤢᤖᤠᤀᤥᤗᤠᤶ ᤔᤢ᤹ᤀᤡᤛᤠᤶ ᤏᤢ ᤛᤠᤰᤔᤢᤖᤠ᤺ᤴ ᤗ᤺ᤴᤗᤥ॥ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤰᤂᤣ ᤐᤥ᤺ᤱᤔᤠᤃ ᤔᤧᤏᤢ᤹ᤏᤧᤴᤗᤥ॥
JAM 3:11 ᤗᤳᤌᤡᤰ ᤘᤠᤒᤢᤴᤏᤥᤗᤠᤶ ᤁᤢᤈᤠ ᤁᤧᤏᤢ᤹ᤒᤠ ᤏᤢ ᤁᤧᤗᤠ᤺ᤰᤐᤠ ᤆᤫᤠ᤺ᤳᤋᤡᤴ ᤐᤢᤴᤒᤡ᥅
JAM 3:12 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤐ᤺ᤳᤇᤣ᤹ᤀᤡᤸᤗᤧ ᤁᤢᤒᤢᤱᤔᤥ ᤈᤤᤋᤢᤏᤧᤸᤗᤧ ᤁᤢᤛᤣ᤹ ᤌᤥ᤺ᤰᤐᤡ. ᤀᤡᤃᤪ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤔᤥ ᤐ᤺ᤳᤇᤣ᤹ᤀᤡᤴ ᤌᤥ᤺ᤰᤐᤡ᥅ ᤔᤧᤎᤥ᤺ᤰᤏᤧᤴᤗᤥ᥄ ᤜᤧᤰᤁᤩᤠᤱ ᤁᤧᤗᤠ᤺ᤰᤐᤠ ᤘᤠᤒᤢᤴᤏᤥᤗᤠᤶ ᤁᤢᤈᤠ ᤁᤧᤏᤢ᤹ᤒᤠ ᤆᤫᤠ᤺ᤳᤋᤡᤴ ᤔᤧᤒᤢᤴᤏᤧᤴᤗᤥ॥
JAM 3:13 ᤂᤡᤏᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤛᤡᤰᤁᤢᤶᤛᤠᤒᤠ ᤏᤢ ᤀᤡᤳᤇᤡᤱᤛᤠᤶᤛᤠᤒᤠᤸᤗᤧ ᤏᤢ᤺ᤒᤠ ᤁᤢᤜᤡᤱᤔᤴᤏᤥᤗᤠᤶ ᤜᤧᤰᤁᤩᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤁᤧᤍᤠ᤺ᤒᤠ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤔᤥ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤗᤠᤶ ᤀᤥᤛᤣ᤺ᤴᤎᤠᤰᤛᤡᤱᤗᤖᤥ॥
JAM 3:14 ᤁᤖ ᤂᤡᤏᤡ᤹ ᤋᤡᤱᤍᤡᤱᤃᤧᤴ ᤏᤠᤜᤧᤶᤔᤠ ᤏᤢ ᤀᤠᤒᤠᤅᤣᤖᤰ ᤏᤢ᤹ᤔᤠ ᤋᤠ᤺ᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤈᤥᤃᤢᤶᤒᤠ ᤗᤠᤕᤥ᤺ᤴ ᤀᤠᤱᤍᤡᤱ ᤁᤧᤗ᤹ᤖᤡᤖ ᤜᤧᤰᤁᤩᤠᤱ ᤀᤡᤱᤗᤧᤰ ᤁᤧᤒᤠᤖᤡᤖ ᤔᤧᤔᤠ᤹ᤖᤧᤶᤔᤡᤴᤏᤧ᤹ᤀᤥ॥
JAM 3:15 ᤀᤰᤋᤱᤒᤠ “ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤱᤃ” ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤧ᤺ᤴ. ᤁᤖ ᤀᤡᤰᤛᤠᤒᤠ ᤏᤢ ᤕᤠᤶᤏᤡᤱᤘᤠ᤹ᤒᤠ ᤆᤥ᤺ᤰ. ᤜᤧᤰᤁᤩᤠᤱ ᤂᤧᤱᤃ ᤔᤠᤑᤧᤴᤛᤠᤶᤗᤠᤶ ᤋᤠ᤺ᤖᤥ॥
JAM 3:16 ᤌᤣᤀᤠᤱᤓᤧᤸᤗᤧ ᤀᤠᤳᤋᤥ ᤏᤠᤜᤧᤶᤔᤠ ᤏᤢ ᤀᤠᤒᤠᤅᤣᤖᤰ ᤏᤢ᤹ᤔᤠ ᤋᤠ᤺ᤔᤠ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠ ᤔᤧᤘᤠ᤹. ᤂᤧᤵᤔᤥ ᤕᤧᤔᤧᤴᤍᤱ ᤐᤠ᤺ᤴ ᤏᤢ ᤁᤠᤰ ᤐᤖᤡᤰᤗᤧᤴ ᤑᤧᤴ ᤐᤠ᤺ᤴ ᤐᤥ᤺ᤱᤗᤥ॥
JAM 3:17 ᤁᤖ ᤌᤠ᤺ᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤁᤠᤰᤏᤢ᤺ᤸᤗᤧ ᤋᤃᤡᤃ ᤛᤣᤛᤣᤒᤠ ᤆᤥ᤺ᤰ. ᤜᤧᤰᤁᤩᤠᤱ ᤛᤏᤠᤖᤢᤱᤒᤠ. ᤗᤢᤶᤗᤢᤶᤒᤠ. ᤘᤣ᤹ᤜᤠ᤹ᤏᤢ ᤁᤧᤍᤱᤒᤠ. ᤗᤢᤱᤍᤢᤰ ᤁᤢᤎᤡᤶ. ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤎᤡᤶ. ᤔᤏᤠ ᤔᤧᤴᤇᤧᤶᤔᤏᤠᤒᤠ ᤏᤢ ᤏᤛᤠ᤺ᤴᤛᤠᤒᤠ ᤆᤥ᤺ᤰᤗᤥ॥
JAM 3:18 ᤛᤏᤠᤖᤢᤱ ᤁᤧᤍᤠ᤺ᤵᤐᤠᤜᤠ᤹ᤖᤧ ᤕᤠ᤹ᤖᤡ᤺ᤶᤒᤠᤴ ᤋᤣ᤺ᤔᤏᤠᤒᤠ ᤁᤢᤀᤡᤛᤡ᤺ᤰ ᤛᤏᤠᤖᤢᤱᤅᤡᤴ ᤔᤧᤍᤣ᤺ᤛᤢ᤹. ᤜᤧᤰᤁᤩᤠᤱ ᤕᤖᤡᤰ ᤁᤢᤈᤠ ᤔᤧᤛᤢᤵᤛᤢᤒᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ᤖᤧ ᤕᤖᤡᤰ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤔᤧᤛᤢᤵᤛᤢᤛᤡ᤹ᤖᤥ॥
JAM 4:1 ᤂᤡᤏᤡ᤹ ᤗᤢᤶᤔᤥ ᤌᤧᤔᤠ᤺ᤸᤗᤧ ᤂᤣᤔᤠ ᤌᤰᤔᤠᤜᤠ᤹ ᤋᤠᤖᤢ᤹ᤒᤣ᥅ ᤂᤧᤱᤜᤠ᤹ᤃ ᤂᤡᤏᤡ᤹ ᤛᤡᤃᤠᤱ ᤌᤱ ᤁᤧᤈᤥ᤺ᤰᤐᤠ ᤑᤧᤴ ᤏᤡᤱᤘᤠ᤹ᤗᤠᤶ ᤗ᤺ᤶᤒᤠ ᤔᤧ᤺ᤶᤒᤡ᥅
JAM 4:2 ᤂᤡᤏᤡ᤹ ᤂᤥ᤺ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤁᤧᤱᤄᤥ᤺ᤛᤢᤶᤔᤡᤴ॥ ᤜᤧᤰᤁᤩᤠᤱ ᤂᤡ᤺ᤶᤒᤪᤠᤰ ᤁᤧᤈᤥᤃᤢᤶᤔᤠᤱ ᤔᤏᤠ ᤁᤧᤛᤧᤖᤢᤶᤛᤡᤶᤗᤥ॥ ᤜᤧᤰᤁᤣᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤂᤥ᤺ᤔᤠ ᤁᤧᤴᤇᤢᤰᤋᤢᤶᤔᤡᤴ ᤜᤧᤰᤁᤩᤠᤱ ᤁᤧᤄᤣ᤹ᤀᤡ ᤁᤧᤎᤰᤋᤡ᤹॥ ᤀᤠᤸᤗᤛᤠᤱ ᤁᤧᤱᤄᤥ᤺ᤛᤢᤶᤔᤡᤴ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤴᤏᤠ᤺ᤰᤋᤢᤶᤔᤡᤴᤗᤥ॥
JAM 4:3 ᤂᤡᤏᤡ᤹ ᤁᤧᤏᤠ᤺ᤰᤋᤢᤶ ᤁᤖ ᤁᤧᤱᤄᤥ᤺ᤛᤢᤶᤔᤡᤴ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤑᤠ᤹ᤀᤠᤱ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤁᤧᤏᤠ᤺ᤰᤋᤢᤶᤗᤥ॥
JAM 4:4 ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤛᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤁᤧᤔᤧᤵᤐᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤐᤥ᤺ᤱ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤜᤠ᤹ ᤔᤡ᤺ᤶᤈᤡ ᤁᤧᤔᤧᤵᤐᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤐᤥ᤺ᤱᤗᤥ॥
JAM 4:5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤀᤥ ᤕᤢᤰᤂᤢᤒᤠ ᤛᤣᤛᤣᤔᤠᤱᤅᤡᤸᤗᤧ ᤛᤠ᤹ᤖᤡᤰᤁᤣ ᤁᤢᤏᤠᤜᤧᤴ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤜᤏᤧᤖᤥ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅
JAM 4:6 ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤕᤠᤶᤔᤥ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢ᤹. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤀᤳᤋᤢᤛᤡ᤹. ᤁᤖ ᤏ᤺ᤶᤏ᤺ᤶᤒᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥”
JAM 4:7 ᤂᤧᤸᤗᤧ ᤆᤥᤃᤢᤸᤗᤧ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤒᤠᤅᤣ ᤐᤡᤀᤠᤛᤡᤶᤔᤧ᤹ᤀᤥ॥ ᤔᤠᤑᤧᤴᤛᤠᤶᤔᤡᤴ ᤀᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤂᤡᤏᤡ᤹ᤗᤠᤶ ᤔᤠ᤺ᤱᤄᤠ ᤂᤧᤳᤇᤡᤱᤗᤥ॥
JAM 4:8 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤋᤩᤧᤶᤔᤧ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤂᤡᤏᤡ᤹ ᤐᤣᤛᤠᤱ ᤋᤠ᤺ᤖᤥ॥ ᤂᤡᤏᤡ᤹ ᤗᤠᤕᤥᤒᤠᤛᤣ. ᤗᤠᤕᤥ ᤆᤥ᤺ᤰᤔᤠ ᤗᤧᤖᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤜᤡᤸᤗᤡᤰᤗᤡᤰᤐᤠ ᤏᤡᤱᤘᤠ᤹ ᤁᤧᤃᤵᤐᤠᤛᤣ. ᤂᤡᤏᤡ᤹ ᤛᤡᤰᤗᤢᤱᤔᤠᤴ ᤛᤣᤛᤣ ᤆᤥᤃᤧᤶᤔᤧ᤹ᤀᤥ
JAM 4:9 ᤗᤠᤕᤥ ᤁᤧᤈᤥᤃᤢᤶᤒᤠᤀᤥ ᤔᤣᤖᤡᤱ ᤌᤰᤋᤧᤶᤔᤧ᤹. ᤜᤠᤒᤧᤶᤔᤧ᤹ᤀᤥ॥ ᤂᤡᤏᤡ᤹ ᤀᤣ᤺ᤵᤔᤠᤴ ᤔᤣᤖᤡᤱ ᤌᤰᤔᤥ. ᤜᤧᤰᤁᤩᤠᤱ ᤂᤡᤏᤡ᤹ ᤛ᤺ᤵᤔᤧᤴ ᤋᤢᤰᤂᤣᤀᤥ ᤗᤧᤰᤂᤧᤶᤔᤧ᤹ᤀᤥ॥
JAM 4:10 ᤍᤠᤱᤒᤠᤸᤗᤧ ᤁᤢᤍᤃᤡ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤓᤥ᤺ᤛᤡ ᤁᤧᤒᤡᤖᤡ᤹ᤖᤥ॥
JAM 4:11 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤘᤣ᤹ᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥ ᤀᤠᤳᤋᤡᤴ ᤁᤢᤴᤛᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤑᤧᤴ ᤐᤠ᤺ᤴ ᤐᤠ᤺ᤳ ᤀᤡᤃᤪ ᤀᤠᤳᤋᤡᤸᤗᤧ ᤁᤢᤴᤛᤠ᤹ ᤀᤠᤵᤋᤡᤰ ᤁᤢ᤺ᤳᤋᤢ᤹. ᤂᤧᤱᤃ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤠᤱ ᤛᤠᤶᤕᤥᤌᤡᤶᤔᤡᤴ ᤂᤠᤛᤧᤴ ᤗᤥ᤺ᤴᤍᤢ᤹ᤖᤥ॥ ᤀᤠᤸᤗ ᤛᤠᤶᤕᤥᤌᤡᤶᤔᤡᤴ ᤂᤠᤛᤧᤴ ᤁᤧᤗᤥ᤺ᤴᤍᤢ᤹ᤏᤧ ᤑᤠ᤹ᤃᤪ. ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤧ᤺ᤴ. ᤁᤖ ᤛᤠᤶᤕᤥᤌᤡᤶᤔᤡᤸᤗᤧᤴ ᤂᤠᤛᤧᤴᤗᤥ᤺ᤶᤒᤠ ᤁᤧᤒᤥ᤺ᤱᤗᤥ॥
JAM 4:12 ᤛᤠᤶᤕᤥᤌᤡᤶ ᤁᤧᤒᤡᤒᤠ ᤏᤢ ᤂᤠᤛᤧᤴᤍᤠᤱᤒᤠᤃ ᤌᤡᤰᤗᤰ ᤘᤠ᤹ᤖᤥ॥ ᤂᤢᤏᤧ᤹ᤏᤢᤀᤣ ᤋᤠᤱᤛᤧ᤺ᤵᤔᤠ ᤏᤢ ᤔᤧᤱᤔᤠ ᤔᤢᤰᤛᤠᤶ ᤘᤠ᤹ᤖᤥ॥ ᤁᤖ ᤂᤧᤏᤧ᤹ᤃ ᤀᤠᤒᤠᤅᤣ ᤐᤠᤱᤓᤣ᤹ᤛᤠᤒᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤧᤴ ᤜᤠ᤺ᤳᤏᤧᤒᤣ᥅
JAM 4:13 ᤀᤠᤀᤡᤴ ᤀᤡᤃᤪ ᤋᤠ᤺ᤴᤍᤡᤰ ᤀᤠᤏᤡᤃᤧ ᤕᤧᤰᤕᤰᤌᤡᤰᤁᤥ ᤐᤡᤃᤡᤃᤧ᤹ᤀᤠᤱ ᤂᤧᤵᤔᤥ ᤋᤱᤒᤣᤎᤡᤰ ᤘᤕᤡᤃᤧ. ᤜᤧᤰᤁᤩᤠᤱ ᤗᤧᤱᤜᤱ ᤆᤥᤃᤢᤶᤒᤧ᤹ᤀᤠᤱ ᤕᤠᤱ ᤌᤃᤢᤶᤒᤧ᤹ ᤗ᤹ᤖᤡᤰ ᤁᤧᤒᤠ᤺ᤵᤐᤠᤛᤣ. ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ.
JAM 4:14 ᤌᤣᤀᤠᤱᤓᤧᤸᤗᤧ ᤋᤠ᤺ᤴᤍᤡᤰ ᤌᤣ ᤐᤥ᤺ᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤴᤏᤡ᤺ᤛᤢᤶᤔᤡᤴᤗᤥ॥ ᤂᤡᤏᤡ᤹ ᤜᤡᤱᤔᤴᤏᤡᤱᤃ ᤛᤵᤑᤠᤎᤡᤰ ᤁᤧᤎᤠ᤺ᤵᤐᤠᤀᤠᤱ ᤁᤧᤔᤠᤒᤠ ᤁᤧᤒᤣ᤺ᤰᤐᤠ ᤋᤢᤱᤜᤡ᤺ᤰ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥
JAM 4:15 ᤂᤡᤏᤡ᤹ ᤜᤧᤰᤁᤣ ᤐᤠ᤺ᤵᤔᤠᤸᤗᤧ ᤁᤢᤗᤧᤰᤘᤠᤃ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤐᤥ᤺ᤱᤏᤧ ᤑᤠ᤹ᤃᤪ ᤜᤡᤅᤡᤃᤧᤀᤠᤱ ᤀᤰᤂᤣ ᤜᤧᤰᤁᤣ ᤆᤥᤃᤢᤶᤒᤧ᤹ ᤐᤠ᤺ᤵᤔᤠ ᤁᤧᤒᤥ᤺ᤱᤒᤠᤏᤧ ᤘᤕᤧ॥
JAM 4:16 ᤁᤖ ᤂᤡᤏᤡ᤹ᤃ ᤀᤠᤒᤠᤅᤣ ᤏᤡᤱᤛᤣ᤺ᤰᤁᤥᤏᤧ ᤀᤠᤱᤍᤡᤱ ᤁᤧᤗ᤹ᤖᤡᤀᤠᤱ ᤁᤧᤜᤧᤴᤏᤠ᤹ᤛᤡᤖᤥ॥ ᤂᤧᤴ ᤜᤧᤰᤋᤱᤒᤠ ᤁᤠᤰ ᤜᤧᤴᤇᤡᤱᤔᤠᤱᤃ ᤋᤠᤵᤑᤧ᤺ᤶᤒᤠ ᤐᤠ᤺ᤴᤗᤥ॥
JAM 4:17 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤛ᤻ᤛᤢᤀᤠᤱᤛᤠᤱ ᤔᤧᤈᤥᤃᤢᤴᤏᤧ ᤑᤠ᤹ᤃᤪ ᤂᤧᤸᤗᤧ ᤗᤠᤕᤥ ᤆᤥᤃᤢ᤹ᤖᤥ॥
JAM 5:1 ᤕᤠᤱᤛᤠᤁᤢᤴᤎᤣᤛᤠᤒᤠᤛᤣ. ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤀᤠᤸᤗ ᤂᤡᤏᤡ᤹ ᤛᤶᤍᤠᤱ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤛᤠ᤹ᤖᤡᤰ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤜᤠ᤺ᤒᤧᤶᤔᤧ᤹ ᤑᤡ᤺ᤰᤋᤧᤶᤔᤧ᤹ᤀᤥ॥
JAM 5:2 ᤂᤡᤏᤡ᤹ ᤕᤠᤱᤛᤠᤁᤢᤴᤎᤣ᤺ᤱᤃ ᤕ᤺ᤵᤐᤣ᤺ᤰᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤱ ᤋᤣ᤺ᤳᤜᤠ᤹ ᤌᤰ ᤌᤠ᤺ᤖᤥ॥
JAM 5:3 ᤂᤡᤏᤡ᤹ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤜᤏᤧᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤔᤡ᤺ᤸᤗᤧ ᤗᤠᤒᤢᤒᤠ ᤁᤢᤀᤡᤛᤡ᤺ᤰ ᤋᤠ᤺ᤰᤐᤥ ᤁᤧᤈᤥᤃᤢᤶᤒᤠ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤂᤡᤏᤡ᤹ ᤏᤧᤰᤛᤠ᤺ᤴ ᤆᤖᤥ॥ ᤂᤡᤏᤡ᤹ ᤕᤖᤡᤰ ᤕᤠᤱᤃᤧᤄᤥ᤺ᤳᤋᤢᤶᤒᤠ ᤕᤠᤱᤛᤠᤁᤢᤴᤎᤣ᤺ᤱᤃ ᤋᤠ᤺ᤴᤍᤡ ᤂᤠᤛᤧᤴ ᤆᤥ᤺ᤰᤔᤠ ᤕᤧᤴᤏᤥ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤥ᤺ᤱᤗᤥ॥
JAM 5:4 ᤀᤥᤔᤧᤳᤋᤧᤶᤔᤧ᤹ᤀᤥ᥄ ᤂᤡᤏᤡ᤹ ᤀᤡᤰᤋᤠᤵᤐᤥ ᤏᤠᤶᤕᤠᤰ ᤔᤧᤶᤒᤡᤀᤣ ᤕᤠ᤺ᤶᤒᤰᤁᤥ ᤁᤧᤓᤳᤇᤢᤶᤛᤡᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠᤶᤕᤠᤰᤁᤡᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀ᤺ᤰᤗᤥ॥ ᤂᤧᤴ ᤆᤠᤃᤧᤛᤢᤶᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ᤺ᤱᤃ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤠ᤹ᤖᤥ॥
JAM 5:5 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤡᤏᤡ᤹ ᤕᤠᤶᤍᤠᤍᤠ ᤏᤢ ᤀᤠᤒᤠᤅᤣᤖᤰ ᤏᤡᤱᤘᤠ᤹ ᤋᤠᤍᤠ ᤁᤧᤘᤕᤡ᤹ᤀᤠᤱ ᤛᤧᤵᤔᤠ ᤕᤧᤴᤏᤥ ᤌᤠᤖᤡᤰ ᤌᤰᤛᤠ᤺ᤴ ᤆᤠᤗᤢᤵᤔᤏᤠᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤆᤠᤃᤧᤗᤢᤵᤐᤠᤛᤡᤀᤠᤱ ᤁᤧᤘᤕᤡᤖᤥ॥
JAM 5:6 ᤂᤡᤏᤡ᤹ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤳᤋᤢᤶᤛᤡᤶᤔᤠᤱ ᤁᤧᤛᤧᤖᤢᤶᤛᤡᤶᤛᤠᤱ ᤁᤧᤔᤧᤴᤀᤳᤋᤡᤴᤗᤥ॥
JAM 5:7 ᤂᤧᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤕᤧᤶᤔᤡᤴ ᤁᤧᤜᤠᤱᤄᤢᤶᤔᤡᤸᤗᤧ ᤂᤡᤏᤡ᤹ ᤏᤠᤛᤡ ᤌ᤺ᤵᤔᤠᤀᤠᤱ ᤜᤠᤱᤔᤠᤀᤣ ᤐᤥ᤺ᤱᤗᤥ॥ ᤀᤡᤰᤔ᤺ᤒᤠᤸᤗᤧ ᤁᤢᤀᤡᤰᤋᤠᤵᤐᤥ ᤀᤡᤔᤧᤸᤗᤢᤱᤒᤠ ᤁᤢᤈᤠ᤹ ᤏᤢ᤺ᤖᤡᤰᤁᤠᤱ ᤌᤥ᤺ᤰᤗ ᤑᤠ᤹ᤀᤠᤱ ᤜᤠᤱᤘᤠ᤺ᤶᤔᤠ ᤏᤢ ᤆᤢᤱᤘᤠ᤺ᤶᤔᤠᤀᤥ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤏᤠᤛᤡ ᤌ᤺ᤳᤋᤢᤀᤠᤱ ᤜᤠᤱᤄᤢᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
JAM 5:8 ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤏᤠᤛᤡ ᤁᤧᤎ᤺ᤵᤐᤠ ᤏᤢ ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥
JAM 5:9 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤆᤧ᤹ᤕᤠ ᤔᤧᤔᤧᤳᤋᤠᤛᤡᤶᤔᤡᤴᤏᤧ᤹ᤀᤥ॥ ᤔᤧ᤺ᤴᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤂᤠᤛᤧᤴ ᤆᤥᤃᤢ᤹ᤖᤥ॥ ᤐᤕᤶᤒ᤻ ᤕᤶᤒᤠ ᤂᤠᤛᤧᤴᤍᤠᤱᤒᤠᤴ ᤋᤠ᤺ᤔᤠ ᤀᤡ᤺ᤳᤋᤧᤀᤠᤱ ᤘᤠ᤹ᤖᤥ᥄
JAM 5:10 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤀᤢᤴᤇᤣ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤀᤥᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ᤖᤧ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤏᤠᤛᤡ ᤔᤧᤎ᤺ᤳᤋᤢᤀᤠᤱ ᤁᤢᤒᤡ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥
JAM 5:11 ᤀᤥᤔᤧᤳᤋᤧᤶᤔᤧ᤹. ᤀᤡᤏᤥᤃᤧᤴ ᤋᤢᤰᤂᤣᤀᤥ ᤏᤠᤛᤡ ᤁᤧᤎ᤺ᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡ ᤑᤠ᤹ᤀᤠᤱ ᤀᤠᤀᤡ᤺ᤳᤋᤢᤶᤛᤡᤶᤗᤥ॥ ᤀᤕᤢᤒᤖᤧ ᤁᤢᤏᤠᤛᤡ ᤌ᤺ᤵᤔᤠᤱᤃ ᤂᤡᤏᤡ᤹ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤍᤠᤱᤒᤠᤸᤗᤧ ᤏᤢ᤺ᤒᤠ ᤐᤠ᤺ᤴᤜᤠ᤹ ᤋᤠᤖᤢ ᤐᤡᤖᤢᤒᤠᤴ ᤁᤧᤏᤡ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤍᤠᤱᤒᤠᤱᤃ ᤔᤡ᤺ᤶᤈᤡ ᤏᤢ ᤗᤢᤱᤍᤢᤰ ᤁᤢᤎᤡᤶ ᤆᤥ᤺ᤰᤗᤥ॥
JAM 5:12 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗ ᤛᤠᤱᤃᤪᤠᤶᤐᤣᤍᤠᤱ ᤀᤡᤃᤪ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤜᤧᤰᤁᤩᤠᤱ ᤘᤣ᤹ ᤌᤣ ᤐᤠ᤺ᤴᤏᤥᤀᤠᤱ ᤔᤠᤱᤔᤧᤜᤧᤰᤁᤠᤛᤡᤶᤔᤧᤴᤏᤧ᤹ᤀᤥ॥ ᤜᤠᤖᤠ᤹ ᤂᤡᤏᤡ᤹ ᤐᤠ᤺ᤴᤏᤡᤴ ᤀᤥᤏᤧ ᤑᤠ᤹ᤃᤪ “ᤀᤥ” ᤔᤧ᤺ᤴᤏᤧ ᤑᤠ᤹ᤃᤪ “ᤔᤧ᤺ᤴ” ᤐᤥ᤺ᤱᤗᤖᤥ. ᤔᤧ᤺ᤱᤃᤪ ᤂᤡᤏᤡ᤹ ᤂᤢᤶᤍᤡᤱᤅᤥ ᤁᤧᤎᤩᤧ᤹ᤀᤡᤖᤥ॥
JAM 5:13 ᤂᤡᤏᤡ᤹ᤀᤥ ᤜᤠ᤺ᤳ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤘᤠ᤹ᤒᤣ᥅ ᤜᤠᤖᤠ᤹ ᤂᤧᤸᤗᤧ ᤋᤢᤘᤠ ᤆᤥᤃᤢᤖᤖᤥ॥ ᤜᤠ᤺ᤳ ᤀᤥᤔᤢ ᤗ᤹ᤔᤠᤀᤥ ᤘᤠ᤹᥅ ᤜᤠᤖᤠ᤹ ᤂᤧᤸᤗᤧ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥ᤺ᤔᤠ ᤛᤠᤶᤗᤥ᤺ᤴ ᤛᤠᤶ ᤔᤧᤳᤋᤢᤖᤖᤥ॥
JAM 5:14 ᤜᤧᤰᤁᤩᤠᤱ ᤂᤡᤏᤡ᤹ᤀᤥ ᤜᤠ᤺ᤳ ᤋᤢᤰᤐᤣ᥅ ᤜᤠᤖᤠ᤹ ᤂᤧᤸᤗᤧ ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠ ᤋᤢᤶᤓᤠᤰᤛᤠᤜᤠ᤹ ᤀᤢ᤺ᤳᤋᤢᤛᤡᤖᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤘᤣ᤺ᤳᤗ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤏᤡ᤺ᤱᤃᤣ᤺ᤴ ᤔᤧᤜᤢ᤺ᤳᤋᤢᤀᤠᤱ ᤋᤢᤘᤠ ᤔᤧᤈᤥᤃᤢᤖᤖᤥ॥
JAM 5:15 ᤜᤧᤰᤁᤩᤠᤱ ᤏᤛᤠ᤺ᤴᤗᤠᤶᤒᤠ ᤆᤥ᤺ᤰᤔᤏᤠᤒᤠ ᤋᤢᤘᤠ᤺ᤸᤗᤧ ᤂᤧᤴ ᤁᤧᤍᤢᤰᤐᤧᤴ ᤘᤣ᤺ᤳᤗᤥ॥ ᤍᤠᤱᤒᤠᤸᤗᤧ ᤂᤧᤴ ᤘᤣ᤺ᤴᤍᤢ᤹ᤖᤥ॥ ᤂᤧᤸᤗᤧ ᤗᤠᤕᤥ ᤆᤥᤃᤢᤀᤠᤱ ᤘᤕᤧᤛᤠᤱ. ᤍᤠᤱᤒᤠᤸᤗᤧ ᤂᤧᤴ ᤗᤧᤵᤔᤡ ᤐᤡᤖᤢ᤹ᤖᤥ॥
JAM 5:16 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤗᤠᤕᤥᤜᤠ᤹ ᤔᤧᤳᤋᤠᤛᤡᤶᤔᤧ᤹ᤀᤠᤱ ᤜᤡᤴᤍᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤧᤘᤣ᤺ᤴᤍᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠ ᤐᤡᤀᤠᤛᤡᤶᤔᤧ᤹ᤀᤥ॥ ᤛᤠᤶᤕᤥᤏᤡᤒᤠ ᤔᤏᤠ᤺ᤸᤗᤧ ᤁᤢᤍᤢᤘᤠ᤺ᤴ ᤔᤢᤰᤛᤠᤶᤒᤠ ᤆᤥ᤺ᤰᤁᤠᤱ ᤕᤶᤒᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥
JAM 5:17 ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴᤏᤠᤱ ᤀᤠᤏᤡ᤹ ᤜᤧᤰᤋᤱᤒᤠ ᤔᤏᤠᤀᤣ ᤆᤥᤃᤧᤖᤥ॥ ᤂᤢᤏᤧ᤹ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤸᤗᤧ ᤂᤧᤴ ᤗᤠᤈᤣ᤹ᤀᤥ ᤋᤱᤒᤣ ᤛᤢᤶᤛᤡᤀᤠᤱ ᤋᤢᤰᤛᤡ ᤗᤠ ᤌᤠᤖᤡᤰ ᤘᤠᤜᤡᤳᤔᤠᤴ ᤔᤧᤎᤩᤧᤴᤏᤧᤴᤗᤥ॥
JAM 5:18 ᤕᤠᤶᤔᤥ ᤂᤧᤸᤗᤧ ᤋᤢᤘᤠ ᤆᤥᤃᤢ. ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤗᤠᤶ ᤘᤠᤜᤡᤳᤔᤠᤴ ᤌᤩᤧᤀᤠᤱ ᤂᤠᤶᤒᤣ᤺ᤰᤔᤠᤀᤥ ᤐᤥᤃᤢᤃᤧᤴ ᤁᤢᤈᤠ ᤌᤥ᤺ᤰᤋᤧᤖᤥ॥
JAM 5:19 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤛᤧᤰᤂᤠᤗᤠᤶ ᤋᤠᤵᤁᤧᤒᤧ᤹ᤒᤠᤀᤠᤱ ᤁᤧᤒᤣ᤺ᤰᤐᤧᤴ ᤏᤢ᤺ᤰᤋᤧᤶ ᤋᤠᤖᤧᤶᤔᤧ᤹ᤀᤥ॥
JAM 5:20 ᤁᤴ ᤐᤠ᤺ᤴᤏᤥ ᤏᤢ᤺ᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ–ᤀᤠᤳᤋᤡᤸᤗᤧ ᤗᤠᤕᤥᤒᤠᤴ ᤋᤠᤵᤑᤧ᤺ᤶᤒᤠ ᤁᤢᤗᤠᤶᤔᤥᤗᤠᤶ ᤏᤢ᤺ᤰᤋᤢ ᤋᤠᤖᤢ᤹. ᤂᤧᤸᤗᤧᤃ ᤂᤧᤴᤏᤡᤴ ᤛᤡ᤺ᤔᤧᤴᤗᤠᤶ ᤋᤠᤱᤛᤧ᤺ᤵᤋᤢᤀᤠᤱ ᤕᤖᤡᤰ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤁᤧᤄᤥ᤺ᤒᤠ ᤆᤥᤃᤢ᤹ᤖᤥ॥
1PE 1:1 ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤐᤋᤪᤢᤛᤗᤠᤶᤒᤠ ᤐᤴᤋᤡᤕᤛ. ᤃᤗᤠᤋᤡᤕᤠ. ᤁᤠᤵᤐᤠᤍᤥᤁᤡᤕᤠ. ᤀᤣᤛᤡᤕᤠ ᤜᤧᤰᤁᤩᤠᤱ ᤒᤡᤌᤠᤏᤡᤕᤠ ᤌᤢᤶᤜᤠ᤹ᤀᤥ ᤁᤧᤛᤧᤒᤠᤀᤠᤱ ᤁᤧᤕᤢᤱᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤘᤧᤵᤔᤡᤒᤠ ᤁᤢᤀᤡᤛᤡ᤺ᤰ ᤁᤧᤘᤠ᤹ᤒᤠ ᤁᤢᤔᤏᤠᤜᤠ᤹ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥
1PE 1:2 ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤋᤃᤡᤛᤠ ᤁᤢᤛᤡᤱ ᤁᤧᤏᤡ᤺ᤳᤋᤡᤒᤠ ᤁᤢᤀᤡᤛᤡ᤺ᤰ ᤁᤢᤔᤏᤠ ᤐᤥ᤺ᤱᤛᤧ ᤁᤧᤛᤣᤃᤡᤀᤠᤱ ᤛᤣᤛᤣᤔᤠᤱᤅᤡᤸᤗᤧ ᤛᤢᤳᤌᤥ ᤁᤧᤈᤥᤃᤡᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤀᤡᤱᤈᤠ᤺ᤱᤃᤧᤶᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤢᤔᤠᤰᤂᤡ᤹ᤀᤡᤸᤗᤧ ᤛᤣᤛᤣᤛᤠᤱᤛᤠᤱ ᤁᤧᤈᤥᤃᤡᤖᤥ॥ ᤜᤠᤖᤠ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶ ᤏᤢ ᤁᤢᤛᤏᤠᤖᤢᤱᤅᤡᤴ ᤀᤠᤸᤗᤛᤠᤱ ᤕᤖᤡᤰ ᤂᤡᤏᤡ᤹ᤀᤥ ᤘᤠ᤹ᤖᤖᤥ॥
1PE 1:3 ᤜᤠᤖᤠ᤹ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤐᤠᤏᤢᤍᤡᤱ ᤁᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥ᤺ᤖᤖᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤕᤶᤒᤠ ᤁᤢᤗᤢᤱᤃᤢᤶᤔᤡᤸᤗᤧ ᤀᤠᤏᤡ᤹ ᤁᤢᤛᤱ ᤛᤠᤘᤠ᤺ᤴᤇᤡᤱᤔᤠ ᤀᤠᤒᤡᤖᤧᤀᤠᤱ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤜᤡᤱᤄᤢᤒᤠᤸᤗᤧ ᤆᤥᤃᤢᤸᤗᤧ ᤜᤠᤱᤜᤠᤱᤒᤠ ᤏᤡᤱᤛᤠᤱ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥
1PE 1:4 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤠᤵᤑᤠᤸᤗᤧᤀᤠᤱ ᤀᤠᤛᤢᤳᤌᤥ ᤔᤧᤶᤒᤥ᤺ᤱᤔᤏᤠ. ᤀᤡᤔᤧᤸᤗᤧᤶᤔᤏᤠ ᤔᤧᤶᤒᤣ᤺ᤰᤔᤏᤠᤒᤠ ᤏᤢ ᤔᤧᤴᤕ᤺ᤵᤔᤏᤠ ᤔᤧᤴᤃᤡ᤺ᤔᤏᤠ ᤀᤡᤔᤧᤸᤗᤢᤱᤒᤠ ᤗᤰ ᤀᤠᤏᤡ᤹ ᤗᤠᤃᤡ ᤕᤢᤰᤂᤢᤀᤠᤱ ᤘᤠ᤹ᤖᤥ॥
1PE 1:5 ᤁᤢᤏᤢᤵᤔᤠ ᤕᤧᤶᤔᤥ ᤀᤥᤛᤣ᤺ᤴᤍᤠᤱ ᤐᤥ᤺ᤱᤔᤠ ᤁᤧᤀᤡ᤺ᤵᤐᤠ ᤛᤧᤴᤗᤵᤐᤡᤴ ᤔᤧᤴᤍᤠᤀᤣ ᤌᤠᤖᤡᤰ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤋᤠᤱᤃᤧᤛᤧ᤺ᤵᤋᤡᤀᤠᤱ ᤘᤠ᤹॥
1PE 1:6 ᤂᤧᤴ ᤐᤠ᤺ᤴᤏᤥ ᤁᤧᤛ᤺ᤳᤋᤡ᤹ᤖᤥ. ᤜᤧᤰᤁᤣᤛᤠᤱ ᤛᤵᤑᤠᤖᤧ ᤗᤠᤃᤡ ᤂᤡᤏᤡ᤹ ᤕᤖᤡᤰ ᤐᤖᤡᤰᤗᤧᤴ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤁᤧᤎᤖᤢᤶᤗᤀᤣ ᤐᤥ᤺ᤱᤗᤥ॥
1PE 1:7 ᤔᤡ᤺ᤸᤗᤧ ᤛᤠᤶᤔᤩᤠᤱᤅᤡᤴ ᤕᤥ᤺ᤴᤍᤢᤀᤠᤱ ᤛᤢᤳᤌᤥ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤂᤧᤴ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤖᤧᤃ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤛᤠ᤹ᤖᤢᤀᤠᤱ ᤁᤧᤎᤢᤶᤒᤠ ᤏᤢ ᤛᤢᤳᤌᤥ ᤆᤥᤃᤢ᤹ᤖᤥ. ᤁᤖ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤂᤧᤴ ᤛᤠᤶᤔᤩᤠᤱᤅᤡᤴᤏᤢ᤺ᤸᤗᤧᤀᤠᤱ ᤀᤡᤔᤧᤸᤗᤢᤱᤒᤠ ᤆᤥ᤺ᤰᤗᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤴ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤏᤠᤛᤡ ᤁᤧᤎ᤺ᤳᤋᤢᤶᤏᤧ ᤑᤠ᤹ᤃᤪ ᤕᤧᤛᤢ ᤂᤪᤡᤛ᤻ᤋᤧᤴ ᤕᤢ᤺ᤸᤗᤧ ᤏᤧᤶᤓᤥᤃᤧᤴ ᤏᤠᤖᤠ ᤑᤥ᤺ᤔᤠᤴ. ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱ ᤁᤧᤄᤥ᤺ᤛᤢᤶᤗᤥ॥
1PE 1:8 ᤂᤡᤏᤡ᤹ ᤀᤠᤵᤑᤠᤸᤗᤧᤀᤠᤱ ᤂᤢᤏᤧ᤹ ᤔᤧᤴᤏᤡᤀᤣ ᤁᤧᤘᤕᤡᤛᤠᤱ ᤂᤢᤏᤧ᤹ ᤔᤡ᤺ᤶᤈᤡ ᤁᤧᤔᤧᤳᤋᤢᤶᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤂᤢᤏᤧ᤹ ᤁᤧᤴᤏᤡ᤺ᤛᤢᤶᤔᤡᤴᤇᤠᤱ ᤂᤢᤏᤧ᤹ ᤛᤶᤍᤠᤱ ᤏᤛᤠ᤺ᤴ ᤁᤧᤈᤥᤃᤢᤶᤔᤠᤱ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤡᤔᤡᤍᤡᤱᤃᤧᤴ ᤛ᤺ᤵᤔᤠᤸᤗᤧ ᤁᤢᤎᤡᤶ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
1PE 1:9 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤕᤠᤶᤛᤠᤶᤔᤡᤸᤗᤧᤴ ᤛᤧᤴᤗᤵᤐᤡᤴ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
1PE 1:10 ᤒᤠ ᤁᤴ ᤛᤧᤴᤗᤵᤐᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤢᤴᤇᤣ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤏᤢ᤺ᤖᤡᤰᤁᤠᤱ ᤔᤧᤃᤥ᤺ᤳᤋᤢ ᤜᤧᤰᤁᤩᤠᤱ ᤂᤧᤴ ᤂᤡᤏᤡ᤹ᤀᤥ ᤋᤠ᤺ᤔᤠ ᤁᤧᤒᤥ᤺ᤱᤒᤠ ᤗᤢᤱᤃᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ ᤐᤠ᤺ᤴ ᤔᤧᤒᤠᤖᤧᤖᤥ॥
1PE 1:11 ᤂᤧᤱᤜᤠ᤹ᤀᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋᤖᤧ ᤁᤢᤛᤣᤛᤣᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤏᤠᤛᤡ ᤌ᤺ᤵᤔᤠ ᤁᤧᤒᤥ᤺ᤱᤒᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤏᤢ ᤕᤠᤱᤛᤡ ᤁᤧᤒᤥ᤺ᤱᤒᤠ ᤔᤡᤔᤡᤍᤡᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤃᤡᤛᤠ ᤂᤧᤱᤜᤠ᤹ ᤔᤧᤳᤋᤢᤛᤡᤖᤥ॥ ᤁᤴ ᤐᤠ᤺ᤴᤜᤠ᤹ ᤀᤠᤰᤂᤣᤗ᤹ᤖᤡᤰ ᤐᤥ᤺ᤱ ᤜᤧᤰᤁᤩᤠᤱ ᤀᤠᤵᤑᤠᤸᤗᤧ ᤐᤥ᤺ᤱ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥
1PE 1:12 ᤂᤢᤏᤡ᤹ ᤔᤠᤱᤛᤣᤘᤠ᤺ᤴ ᤀᤠᤒᤠᤅᤣ ᤂᤧᤱᤜᤠ᤹ᤖᤧ ᤗᤠᤃᤡ ᤔᤧ᤺ᤴ. ᤁᤖ ᤂᤡᤏᤡ᤹ ᤗᤠᤃᤡ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥ ᤜᤧᤰᤁᤩᤠᤱ ᤀᤠᤸᤗ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶᤒᤠ ᤛᤢᤏᤠᤀᤡᤱᤅᤡᤴ ᤀᤡᤱᤃᤧᤶᤓᤥ᤺ᤛᤡᤖᤥ॥ ᤔᤠᤱᤗᤠᤀᤡᤱᤒᤠᤜᤠ᤹ᤖᤧᤀᤠᤱ ᤁᤴ ᤐᤠ᤺ᤴᤜᤠ᤹ ᤀᤥᤔᤧᤵᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤔᤧᤘᤕᤧ॥
1PE 1:13 ᤂᤧᤸᤗᤧ ᤆᤥᤃᤢᤸᤗᤧ ᤔᤠᤱᤛᤣᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ᤀᤥ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤀᤡᤴ ᤕᤥᤎᤥ ᤔᤧᤶᤔᤧᤳᤋᤣ ᤘᤕᤧᤶᤔᤧ᤹ᤀᤥ॥ ᤕᤧᤛᤢ ᤂᤪᤡᤛ᤻ᤋᤧᤴ ᤏᤢ᤺ᤱ ᤕᤢ᤺ᤸᤗᤧ ᤁᤧᤄᤥ᤺ᤛᤢᤶᤒᤠ ᤗᤢᤱᤃᤢᤶᤔᤡᤴ ᤁᤢᤗᤡᤱᤎᤥ ᤁᤧᤳᤗ ᤏᤡᤱᤛᤠᤱ ᤆᤥᤃᤧᤶᤔᤧ᤹ᤀᤥ॥
1PE 1:14 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠ᤺ᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤢᤛ᤻ᤛᤠ᤺ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤋᤃᤡ ᤔᤧᤴᤏᤡᤀᤣ ᤔᤧᤸᤗᤧᤀᤣ ᤁᤧᤘᤕᤡᤸᤗᤧ ᤁᤧᤈᤥᤃᤢᤶᤒᤠ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ᤀᤥ ᤕᤠᤶᤔᤥ ᤔᤧᤒᤳᤇᤧᤶᤔᤡᤴᤏᤧ᤹ᤀᤥ॥
1PE 1:15 ᤁᤖ ᤂᤡᤏᤡ᤹ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤁᤧᤈᤥᤃᤢᤶ ᤁᤧᤒᤠ᤺ᤳᤋᤢᤶᤒᤠ ᤁᤠᤰ ᤐᤠ᤺ᤴᤏᤥ ᤛᤣᤛᤣ ᤘᤕᤧᤶᤔᤧ᤹ᤀᤥ॥
1PE 1:16 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤀᤡᤱᤃᤠ᤹ ᤛᤣᤛᤣ ᤘᤠ᤹ᤀᤠᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤛᤣᤛᤣ ᤘᤕᤧᤶᤔᤧ᤹ᤀᤥ॥”
1PE 1:17 ᤋᤢᤘᤠ ᤁᤧᤈᤥᤃᤢᤶᤒᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤂᤠᤛᤧᤴ ᤆᤥᤃᤢᤛᤡᤸᤗᤧ ᤀᤣ᤺ᤰ ᤐᤀᤣ᤺ᤰ ᤔᤧᤈᤥᤃᤢᤴᤇᤡᤴᤗᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤕᤡᤖ ᤌᤠᤖᤡᤰ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤔᤧ᤹ᤖ ᤘᤕᤧᤶᤔᤧ᤹ᤀᤥ॥
1PE 1:18 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤐᤠᤎᤧᤒᤠᤗᤠᤶᤒᤠ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤗ ᤁᤧᤕᤢ᤺ᤖᤢᤶᤒᤠ ᤜᤏᤧᤒᤠ ᤌᤡᤶᤜᤠ᤹ᤗᤠᤶ ᤁᤧᤔᤧᤰᤐᤠ ᤁᤧᤒᤣ᤺ᤰᤐᤠ ᤛᤠᤶᤔᤩᤠᤱ ᤕᤢᤵᤐᤠ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤖᤧ ᤁᤧᤎᤧ᤹ᤖᤡᤀᤠᤱ ᤋᤠᤱᤃᤧᤛᤧ᤺ᤵᤋᤡᤒᤠ ᤔᤧ᤺ᤴ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥
1PE 1:19 ᤁᤖ ᤔᤧᤱᤃᤠ᤺ᤴᤏᤣᤒᤠ ᤏᤢ᤺ᤒᤠ ᤔᤧᤸᤗᤢᤰᤛᤠ ᤁᤢᤀᤡᤛᤡ᤺ᤰᤐᤠ ᤂᤪᤡᤛ᤻ᤋ ᤕᤧᤛᤢᤖᤧ ᤀᤡᤔᤧᤸᤗᤢᤱᤒᤠ ᤁᤢᤔᤠᤰᤂᤡ᤹ᤀᤡᤸᤗᤧ ᤂᤡᤏᤡ᤹ ᤁᤧᤎᤧ᤹ᤖᤡᤒᤠᤖᤥ॥
1PE 1:20 ᤂᤢᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤛᤣᤃᤧᤒᤠᤖᤥ. ᤁᤖ ᤂᤡᤏᤡ᤹ᤗᤠᤃᤡ ᤁᤴ ᤁᤢᤏᤢᤵᤔᤠ ᤕᤧᤶᤔᤥ ᤂᤢᤏᤧ᤹ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
1PE 1:21 ᤂᤢᤏᤧ᤹ᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤁᤧᤈᤥᤃᤢᤶ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤡ᤺ᤔᤧᤴᤗᤠᤶ ᤜᤡᤱᤄᤢᤀᤠᤱ ᤁᤢᤔᤡᤔᤡᤍᤡᤱ ᤆᤥᤃᤢ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤏᤛᤠ᤺ᤴ ᤏᤢ ᤏᤡᤱᤛᤠᤱ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥
1PE 1:22 ᤀᤠᤸᤗ ᤛᤧᤰᤂᤠ ᤐᤠ᤺ᤴᤏᤡᤴ ᤂᤧᤶᤔᤠ ᤁᤧᤍᤧᤴᤍᤡᤀᤠᤱ ᤀᤠᤒᤠᤅᤣ ᤛᤢᤳᤌᤥ ᤁᤧᤈᤥ᤺ᤰᤁᤠᤛᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤏᤢ᤺ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶ. ᤜᤧᤰᤁᤣ᤺ᤸᤗᤧ ᤛᤡᤰᤗᤢᤱᤔᤥᤗᤠᤶᤔᤣ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ᤀᤥ॥
1PE 1:23 ᤂᤡᤏᤡ᤹ᤃ ᤁᤧᤔᤧᤰᤐᤠᤀᤠᤱ ᤁᤧᤒᤣ᤺ᤰᤐᤠ ᤕᤠ᤹ᤖᤡ᤺ᤶᤒᤠᤗᤠᤶ ᤔᤧ᤺ᤴ. ᤁᤖ ᤁᤢᤜᤡᤱᤘᤧᤳ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤥᤗᤠᤶ ᤁᤢᤛᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥
1PE 1:24 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤃ ᤕᤠ᤺ᤴ ᤛᤢᤱ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤣ᤺ᤶᤛᤡᤱᤔᤧᤱᤃ ᤑᤢᤱᤅᤡᤸᤗᤧᤴ ᤁᤢᤀᤡᤛᤡ᤺ᤰ ᤆᤥ᤺ᤰ॥ ᤕᤠ᤺ᤴ ᤛᤢᤱᤅᤡᤴ ᤀᤡᤖᤧᤶ. ᤜᤧᤰᤁᤩᤠᤱ ᤑᤢᤱᤅᤡᤴ ᤗᤢ᤺ᤰᤌᤠ.
1PE 1:25 ᤁᤖ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤱᤃ ᤛᤍᤠᤍᤡᤱ ᤛᤍᤠᤍᤡᤱ ᤘᤠ᤹ᤖᤥ॥” ᤜᤧᤰᤁᤩᤠᤱ ᤂᤡᤏᤡ᤹ᤀᤥ ᤀᤡᤱᤓᤥ᤺ᤛᤧᤒᤠ ᤛᤢᤏᤠᤀᤡᤱᤅᤡᤴ ᤒᤠ ᤂᤧᤴ ᤐᤠ᤺ᤴᤈᤠᤰᤁᤡᤴᤗᤥ॥
1PE 2:1 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤃ ᤔᤏᤠ ᤋᤢᤰᤂᤣ ᤁᤧᤈᤠ᤺ᤵᤐᤠ ᤁᤠᤰ ᤑᤧᤴ ᤕᤠ᤺ᤶᤒᤰᤜᤠ᤹ ᤗᤧᤖᤧᤶᤍᤣ᤺ᤛᤧᤶᤔᤧ᤹ᤀᤥ॥ ᤀᤡᤱᤗᤧᤰ ᤌᤣᤀᤠᤱ ᤔᤧᤒᤠ᤺ᤳᤋᤧᤶᤔᤡᤴᤏᤧ᤹. ᤛᤠᤶᤕᤥᤏᤡᤒᤠ ᤔᤧᤗᤧᤱᤅᤠᤛᤡᤶᤔᤧᤴᤏᤧ᤹. ᤏᤠᤜᤧᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤐᤠ ᤆᤧ᤹ᤕᤠ ᤐᤠ᤺ᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥
1PE 2:2 ᤂᤠᤖᤰ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤅᤧ᤺ᤰᤘᤠ᤺ᤸᤗᤧ ᤏᤢ᤺ᤴ ᤌᤢᤱᤔᤠ ᤁᤥ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤸᤗᤧᤴ ᤛᤢᤳᤌᤥ ᤕᤠᤶᤛᤠᤶᤃᤧᤴ ᤏᤢ᤺ᤴ ᤌᤢᤱᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤂᤧᤴᤗᤠᤶᤒᤠ ᤂᤡᤏᤡ᤹ ᤛᤧᤴᤗᤵᤐᤥ ᤁᤧᤒᤥ᤺ᤖᤡᤖ ᤁᤧᤒᤣᤃᤡ᤹ᤖᤥ॥
1PE 2:3 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤍᤠᤱᤒᤠᤴ ᤏᤢ᤺ᤒᤠ ᤆᤥ᤺ᤰ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
1PE 2:4 ᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤀᤡᤔᤧᤸᤗᤢᤱᤒᤠ ᤁᤢᤜᤡᤱᤘᤧᤳ ᤗᤢᤱ ᤂᤪᤡᤛ᤻ᤋᤀᤥ ᤁᤧᤍᤩᤧ᤹ᤀᤡᤸᤗᤧ
1PE 2:5 ᤂᤡᤏᤡ᤹ᤀᤠᤱ ᤁᤢᤜᤡᤱᤘᤧᤳ ᤗᤢᤱ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤛᤠᤶᤃᤧᤴ ᤔᤠᤱᤜᤡᤶ ᤁᤧᤈᤥᤃᤡ᤹ᤖᤥ॥ ᤂᤡᤏᤡ᤹ᤃ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤧᤍᤠ᤺ᤒᤠ ᤕᤠᤶᤛᤠᤶᤃᤧᤴ ᤛᤡᤍᤢᤱᤈᤓᤠ ᤁᤧᤍᤥ᤺ᤶᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤛᤠᤶᤒᤠᤏᤡᤱᤗᤥ॥
1PE 2:6 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ ᤛᤣ᤺ᤰᤔᤏᤠᤒᤠ ᤏᤢ ᤀᤡᤔᤧᤸᤗᤢᤱᤒᤠ ᤁᤢᤶᤔᤠᤗᤢᤱᤅᤡᤴ ᤕᤖᤢᤛᤗᤧᤶᤔᤥ ᤏᤧᤛ᤻ᤛᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤶᤍᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠᤱᤃ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱ ᤔ᤺ᤔᤥ ᤔᤧᤎᤠᤏᤧᤴᤗᤥ॥”
1PE 2:7 ᤀᤠᤸᤗ ᤂᤡᤏᤡ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤀᤡᤔᤧᤸᤗᤢᤱᤒᤠ ᤗᤢᤱ ᤆᤥ᤺ᤰᤗᤥ. ᤁᤖ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤗᤠᤃᤡᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤗᤢᤱ ᤁᤧᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ ᤁᤢᤶᤔᤠᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
1PE 2:8 ᤜᤧᤰᤁᤩᤠᤱ “ᤂᤧᤴ ᤗᤢᤱᤅᤡᤸᤗᤧ ᤔᤏᤠᤜᤠ᤹ ᤂ᤺ᤛᤢᤛᤡᤀᤠᤱ ᤔᤧᤈᤥ᤺ᤴᤗᤥ॥” ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤸᤗᤧ ᤆᤥᤃᤢᤸᤗᤧ ᤔᤧᤈᤥ᤺ᤴᤗᤥ॥ ᤜᤧᤰᤋᤱᤒᤠ ᤔᤏᤠᤜᤠ᤹ ᤔᤧᤈᤥ᤺ᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤛᤠ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤕᤧ॥
1PE 2:9 ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤣᤃᤡᤒᤠ ᤔᤏᤠ. ᤜᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ. ᤛᤣᤛᤣ ᤛᤢᤘᤠᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤏᤡᤱᤗᤥ॥ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤡᤱᤃᤧᤓᤥ᤺ᤛᤢᤶᤗ ᤑᤠ᤹ᤀᤠᤱ ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤗᤠᤶ ᤏᤡᤱᤘᤠ᤹ ᤁᤧᤔᤠᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
1PE 2:10 ᤋᤃᤡᤃ ᤂᤡᤏᤡ᤹ ᤁᤢᤔᤏᤠ ᤁᤧᤜᤥ᤺ᤵᤋᤡ. ᤁᤖ ᤀᤠᤸᤗᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹॥ ᤋᤃᤡ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤔᤧᤴᤍᤢᤰᤁᤣ ᤁᤧᤘᤕᤡ. ᤁᤖ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤁᤧᤘᤕᤡ᤹ᤖᤥ॥
1PE 2:11 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤁᤵᤔᤥ ᤘᤧᤵᤔᤡᤒᤠ ᤏᤢ ᤔᤠ᤺ᤱᤄᤠ ᤗᤠᤈᤣ᤹ᤒᤠ ᤁᤢᤀᤡᤛᤡ᤺ᤰ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤗᤠᤕᤥᤒᤠ ᤑᤧᤴ ᤏᤡᤱᤘᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤧᤴ ᤗᤠᤕᤥᤒᤠ ᤑᤧᤴ ᤏᤡᤱᤘᤠ᤹ᤀᤡᤱᤃ ᤂᤡᤏᤡ᤹ ᤕᤠᤶᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ॥
1PE 2:12 ᤂᤡᤏᤡ᤹ᤃ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤏᤢ᤺ᤖᤡᤰᤁᤠᤱ ᤏᤢ᤺ᤒᤠ ᤜᤡᤱᤔᤴᤏᤥ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤑᤧᤴ ᤐᤠ᤺ᤴᤜᤠ᤹ ᤁᤧᤈᤥᤃᤢᤶ ᤗ᤹ᤖᤡᤰ ᤐᤠ᤺ᤴ ᤁᤧᤶᤎᤡᤰᤋᤡᤛᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡ᤺ᤛᤢᤖ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢ᤹ᤀᤠᤱ ᤂᤠᤛᤧᤴ ᤆᤥ᤺ᤰᤛᤧ ᤕᤢ᤺ᤒᤠ ᤕᤧᤴᤏᤥ ᤁᤢᤏᤠᤖᤠ ᤔᤧᤓᤥ᤺ᤛᤢ᤹ᤖᤥ॥
1PE 2:13 ᤁᤠᤰ ᤔᤧᤴᤇᤠᤶ ᤕᤢᤰᤛᤠᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰᤏᤢ ᤕᤶᤒᤠ ᤕᤢᤰ ᤁᤧᤃᤵᤐᤠ ᤜᤠᤱᤅᤡᤸᤗᤧ ᤁᤢᤕᤢᤰᤁᤥ ᤘᤕᤧᤶᤔᤧ᤹ ᤁᤧᤗ᤹ᤒᤠ ᤍᤠᤱᤒᤠᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤖᤥ॥
1PE 2:14 ᤂᤡᤏᤡ᤹ᤃ ᤁᤠᤰ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤜᤠ᤹ ᤋᤧᤴᤍᤡᤱ ᤆᤥ᤺ᤰᤔᤠ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤏᤢ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤠᤖᤠ ᤑᤥ᤺ᤔᤠ ᤐᤠᤱᤄᤢᤛᤡᤒᤠᤖᤥ॥
1PE 2:15 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ᤖᤧ ᤐᤠ᤺ᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤔᤢᤖᤠ᤺ᤴ ᤜᤢ᤹ᤖᤧᤶ ᤐᤡᤖᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥
1PE 2:16 ᤂᤡᤏᤡ᤹ᤃ ᤆᤥ᤺ᤰᤕᤢᤶᤓᤥᤒᤠᤏᤡᤱᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤏᤡᤱᤗᤥ. ᤁᤖ ᤆᤥ᤺ᤰᤕᤢᤶᤓᤥᤒᤠᤛᤡᤃᤧ ᤑᤠ᤹ᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤧᤶᤔᤡᤴᤏᤧ᤹॥
1PE 2:17 ᤁᤠᤰ ᤔᤏᤠᤜᤠ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹. ᤘᤣ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹. ᤁᤡ᤺ᤛᤧᤶᤔᤧ᤹ᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤐᤡᤖᤧᤶᤔᤧ᤹ ᤜᤧᤰᤁᤩᤠᤱ ᤜᤠᤱ ᤁᤧᤈᤥ᤺ᤰᤐᤧᤴ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤖᤧᤶᤔᤧ᤹ᤀᤥ॥
1PE 2:18 ᤛᤣᤘᤠᤖᤥᤒᤠᤛᤣ. ᤂᤡᤏᤡ᤹ ᤍᤠᤱᤒᤠᤜᤠ᤹ᤖᤧᤴ ᤁᤠᤰ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥ ᤏᤢ᤺ᤒᤠ ᤏᤢ ᤁᤢᤏᤡᤱᤘᤠ᤹ ᤁᤧᤒᤠ᤺ᤱᤒᤠᤜᤠ᤹ᤖᤧᤴᤗᤰ ᤔᤧ᤺ᤴ. ᤁᤖ ᤁᤧᤀᤠ᤺ᤶᤒᤠ ᤜᤡᤶᤍᤠᤱᤒᤠᤜᤠ᤹ᤖᤧᤴᤏᤠᤱ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ॥
1PE 2:19 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤐᤡᤖᤢᤱ ᤑᤠ᤹ᤀᤠᤱ ᤔᤧᤸᤗᤠ᤹ᤔᤏᤠᤒᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤁᤧᤎᤶᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢ᤹॥
1PE 2:20 ᤂᤡᤏᤡ᤹ ᤕᤠ᤺ᤶᤒᤰ ᤁᤧᤓᤣ᤺ᤴᤍᤢᤶᤔᤠᤱ ᤁᤧᤶᤗ᤺ᤵᤛᤡᤏᤧ ᤑᤠ᤹ᤃᤪ ᤌᤣᤀᤠᤱ ᤕᤶᤒᤠ ᤕᤠ᤺ᤶᤒᤰ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤖ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤁᤧᤎᤖᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤁᤢᤏᤡᤱᤘᤠ᤹ ᤋᤠ᤺ᤖᤥ॥
1PE 2:21 ᤒᤠ ᤂᤧᤸᤗᤧ ᤗᤠᤃᤡ ᤂᤡᤏᤡ᤹ ᤁᤧᤀᤢ᤺ᤳᤋᤡᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧᤀᤠᤱ ᤂᤡᤏᤡ᤹ᤗᤠᤃᤡ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤌᤖᤢᤀᤠᤱ ᤂᤡᤏᤡ᤹ᤗᤠᤃᤡ ᤁᤢᤒᤡ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤡᤏᤡ᤹ᤀᤠᤱ ᤂᤢᤏᤧ᤹ ᤁᤢᤗᤠᤱᤕᤥ᤺ᤰᤁᤡᤴ ᤁᤧᤍᤡᤶᤍᤢᤶᤗ ᤐᤥ᤺ᤱᤗᤥ॥
1PE 2:22 “ᤂᤢᤏᤧ᤹ᤃ ᤌᤣᤀᤠᤱ ᤗᤠᤕᤥ ᤗᤠᤛᤥ᤺ᤳ ᤔᤧᤈᤥᤃᤢᤴ. ᤜᤧᤰᤁᤩᤠᤱ ᤌᤣᤀᤠᤱ ᤀᤡᤱᤗᤧᤰ ᤐᤠ᤺ᤴᤏᤠᤱ ᤔᤧᤒᤠᤖᤧᤴᤗᤥ॥”
1PE 2:23 ᤂᤢᤏᤧ᤹ ᤔᤏᤠᤜᤠ᤹ᤖᤧ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢᤸᤗᤧ ᤂᤧᤱᤜᤠ᤹ᤀᤥ ᤕᤠᤱᤏᤠ ᤐᤠ᤺ᤴ ᤔᤧᤏᤢ᤺ᤰᤋᤢᤴᤗᤥ॥ ᤂᤢᤏᤧ᤹ ᤋᤢᤰᤂᤣ ᤆᤧ᤺ᤸᤗᤧ ᤔᤏᤠ ᤔᤧᤓᤧ᤺ᤰᤋᤢᤴᤇᤡᤴᤗᤥ॥ ᤁᤖ ᤏᤢ᤺ᤒᤠ ᤂᤠᤛᤧᤴᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥᤀᤣ ᤀᤠᤒᤠᤅᤣ ᤜᤢᤰᤛᤢᤵᤛᤡᤱᤗᤥ॥
1PE 2:24 ᤂᤢᤏᤧ᤹ ᤀᤠᤏᤡ᤹ ᤗᤠᤕᤥ ᤗᤠᤛᤥ᤺ᤳᤋᤡᤴ ᤀᤠᤗᤧᤖᤢᤶᤔᤠᤱ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤀᤠᤜᤡᤱᤗ ᤑᤠ᤹ᤀᤠᤱ ᤀᤠᤏᤡ᤹ ᤗᤠᤕᤥ᤺ᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤁᤢᤕᤢᤍᤣ᤹ᤖᤢᤖᤥ॥ ᤂᤢᤏᤧ᤹ ᤁᤢᤃᤠ᤺ᤶᤔᤠᤀᤥᤗᤠᤶ ᤂᤡᤏᤡ᤹ ᤁᤧᤘᤣ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥
1PE 2:25 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤋᤠᤵᤁᤧᤒᤧ᤹ᤒᤠᤖ ᤁᤧᤘᤠ᤹ᤒᤠ ᤔᤧᤸᤗᤢᤰᤜᤠ᤹ ᤁᤢᤀᤡᤛᤡ᤺ᤰ ᤁᤧᤘᤕᤡ. ᤁᤖ ᤀᤠᤸᤗᤥ ᤂᤡᤏᤡ᤹ ᤕᤠᤶᤛᤠᤶᤔᤡᤴ ᤁᤧᤃᤶᤒᤠ ᤏᤢ ᤁᤶᤒᤪᤠᤱ ᤁᤧᤔᤧᤵᤐᤠ ᤍᤠᤱᤒᤠᤀᤥ ᤁᤧᤏᤢ᤺ᤰᤂᤡ ᤁᤧᤍᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥
1PE 3:1 ᤜᤧᤰᤁᤣᤗ᤹ᤖᤡᤰ ᤜᤡᤶᤛᤠᤔᤠᤛᤣ. ᤂᤡᤏᤡ᤹ ᤜᤡᤶᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤀᤥ ᤁᤢᤓᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤔᤧᤈᤥ᤺ᤰᤛᤠᤱ ᤂᤡᤏᤡ᤹ ᤌᤣᤀᤠᤱ ᤔᤧᤶᤔᤧᤳᤋᤣ ᤛᤣᤛᤣᤒᤠ ᤜᤡᤱᤔᤴᤏᤡᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤁᤧᤒᤡᤖᤢᤶᤒᤠ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤛᤢᤰᤋᤢ᤹ᤖᤥ॥
1PE 3:3 ᤂᤡᤏᤡ᤹ᤃ ᤐᤖᤡᤰᤐᤖᤡᤰᤐᤠ ᤌᤠ᤺ᤰ ᤑ᤺ᤔᤠᤴ. ᤛᤠᤶᤔᤩᤠᤱ ᤘᤠ᤺ᤳᤋᤡᤜᤠ᤹ ᤘᤠ᤺ᤵᤔᤠᤴ ᤏᤢ ᤀᤡᤔᤧᤸᤗᤢᤱᤒᤠ ᤏᤠ-ᤏᤠ ᤐᤖᤡᤰᤐᤠ ᤆᤠᤱᤜᤠ᤹ ᤆᤠᤱᤔᤠᤴ. ᤗᤠ᤺ᤰᤁᤠᤳᤗᤠᤶᤒᤠ ᤁᤧᤎᤠ᤺ᤵᤐᤠ ᤆᤥ᤺ᤰᤛᤡᤱᤔᤥ ᤔᤧ᤺ᤴ.
1PE 3:4 ᤁᤖ ᤂᤡᤏᤡ᤹ ᤏᤢ᤺ᤔᤠᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤶᤔᤠ᤺ᤔᤏᤠᤒᤠ ᤛᤢᤶᤛᤢᤶ ᤕᤧᤰᤕᤧᤰ ᤏᤢ ᤏ᤺ᤶᤏ᤺ᤶ ᤗ᤹ᤔᤠᤴ ᤛᤡᤃᤠᤱᤗᤠᤶᤒᤠᤀᤣ ᤏᤡᤎᤠ᤺ᤵᤗ ᤐᤥ᤺ᤱᤗᤥ॥ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤀᤡᤔᤧᤸᤗᤢᤱᤒᤠ ᤆᤥ᤺ᤰᤗᤥ॥
1PE 3:5 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤠ᤺ᤰᤐᤥ ᤁᤧᤈᤥ᤺ᤰᤔᤠ ᤀᤢᤴᤇᤣ᤺ᤴᤛᤔᤠ ᤛᤣᤛᤣ ᤔᤧᤴᤇᤢᤔᤠᤜᤠ᤹ᤖᤧᤀᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤏᤢ᤺ᤔᤠ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤜᤡᤶᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤔᤧᤘᤕᤧᤖᤥ॥
1PE 3:6 ᤁᤢᤒᤡᤀᤥ ᤛᤠᤖᤠᤖᤧ ᤁᤢᤜᤡᤶᤛᤠᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤀᤠᤍᤠᤱᤒᤣ ᤗ᤹ᤖᤡᤰ ᤔᤧᤳᤋᤢᤖᤥ॥ ᤂᤡᤏᤡ᤹ᤀᤠᤱ ᤔᤧᤱᤃᤡᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠᤖᤠᤖᤧ ᤁᤢᤛ᤻ᤛᤠ᤺ ᤔᤧᤴᤇᤢᤔᤠ᤹ᤏᤡᤱᤗᤥ॥
1PE 3:7 ᤜᤡᤶᤛᤠᤒᤠᤛᤣ. ᤂᤡᤏᤡ᤹ᤀᤠᤱ ᤂᤡᤏᤡ᤹ ᤜᤡᤶᤛᤠᤔᤠᤜᤠ᤹ᤏᤢ ᤛᤥᤖᤡᤰ ᤁᤧᤘᤕᤡᤸᤗᤧ ᤀᤡᤱᤎᤠ᤺ᤱ ᤐᤡᤖᤧᤶᤛᤡᤶᤔᤧ᤹ᤖ ᤋᤅᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥ ᤂᤡᤏᤡ᤹ ᤜᤧᤰᤁᤣ ᤁᤧᤎᤢᤶᤔᤠ ᤔᤧᤴᤈᤥ᤺ᤰᤏᤧᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤁᤢᤛᤱ ᤜᤡᤱᤔᤴᤏᤥ ᤂᤧᤱᤜᤠ᤹ᤃ ᤂᤡᤏᤡ᤹ ᤗᤰᤛᤠᤔᤠᤛᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤋᤢᤘᤠ᤺ᤴ ᤌᤣ᤺ᤸᤗᤧᤀᤠᤱ ᤔᤧᤎᤣ᤺ᤰᤋᤢᤴᤗ ᤑᤠ᤹ᤀᤠᤱ ᤏᤢ᤺ᤖᤡᤰ ᤔᤧᤳᤋᤧᤶᤛᤡᤶᤔᤧ᤹ᤀᤥ॥
1PE 3:8 ᤁᤢᤏᤢᤵᤔᤥ. ᤂᤡᤏᤡ᤹ ᤏᤡᤱᤘᤠ᤹ᤀᤥ ᤁᤠᤰ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹. ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹. ᤔᤡ᤺ᤶᤈᤡ ᤔᤧᤳᤋᤠᤛᤡᤶᤔᤧ᤹. ᤜᤠᤱᤜᤠᤱᤘᤠ ᤀᤥᤛᤣ᤺ᤴᤎᤠᤰᤁᤠᤛᤡᤶᤔᤧ᤹ ᤜᤧᤰᤁᤩᤠᤱ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤥ᤺ᤰᤂᤧᤶᤔᤧ᤹ᤀᤥ॥
1PE 3:9 ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤑᤧᤴ ᤐᤠ᤺ᤴ ᤔᤧᤈᤥᤃᤧᤶᤔᤡᤴᤏᤧ᤹. ᤁᤡᤏᤠ᤺ᤴᤍᤡ᤺ᤸᤗᤧ ᤁᤢᤗᤧᤰᤘᤠ ᤁᤡᤏᤠ᤺ᤴᤍᤡ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤁᤖ ᤂᤧᤸᤗᤧ ᤁᤢᤗᤧᤰᤘᤠᤃ ᤔᤢ᤹ᤀᤡᤛᤠᤶ ᤐᤡᤖᤧᤶᤛᤡᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤐᤡᤛᤧ ᤁᤧᤀᤢ᤺ᤳᤋᤡᤀᤠᤱ ᤘᤠ᤹ᤖᤥ॥
1PE 3:10 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤜᤡᤱᤔᤴᤏᤡᤴ ᤔᤡ᤺ᤶᤈᤡ ᤁᤧᤔᤧᤵᤐᤠᤀᤠᤱ ᤛᤢᤕᤧᤴᤜᤠ᤹ ᤀᤥᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤸᤗᤧ ᤑᤧᤴ ᤐᤠ᤺ᤴ ᤐᤠ᤺ᤵᤔᤠ ᤏᤢ ᤀᤡᤱᤗᤧᤰ ᤐᤠ᤺ᤴ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ॥
1PE 3:11 ᤂᤧᤸᤗᤧ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤵᤔᤠᤀᤠᤱ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥ᤺ᤱ॥ ᤛᤏᤠᤖᤢᤱᤅᤥ ᤘᤠ᤹ᤔᤠ ᤋᤶᤛᤡᤴ ᤆᤥᤃᤢᤖ ᤐᤥ᤺ᤱ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤐᤠ᤺ᤴᤏᤥ ᤐᤵᤔᤠᤀᤣ ᤐᤥ᤺ᤱᤗᤥ॥
1PE 3:12 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤘᤠ᤺ᤴ ᤂᤧᤵᤛᤢ᤹. ᤁᤖ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤥ᤺ᤰᤗᤥ॥”
1PE 3:13 ᤂᤡᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤰ ᤛᤶᤒᤠᤸᤗᤧ ᤛᤧᤰᤂᤠᤀᤣ ᤀᤠᤳᤋᤡᤸᤗᤧᤀᤠᤱ ᤂᤠ᤺ᤶᤔᤠ ᤁᤧᤴᤇᤢᤰᤋᤡᤴᤗᤥ॥
1PE 3:14 ᤁᤖ ᤏᤢ᤺ᤒᤠ ᤁᤧᤈᤥᤃᤢᤶᤔᤡᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤁᤧᤒᤡᤖᤡ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ “ᤘᤣ᤹ᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤏᤡᤱᤛᤠᤶᤔᤥᤀᤠᤱ ᤔᤧᤎᤩᤧᤶᤔᤡᤴᤏᤧ᤹ᤀᤥ॥”
1PE 3:15 ᤁᤖ ᤂᤡᤏᤡ᤹ ᤜᤡᤱᤔᤴᤏᤥ ᤂᤪᤡᤛ᤻ᤋᤧᤴ ᤍᤠᤱᤒᤠ ᤗ᤹ᤖᤡᤰ ᤛᤣᤘᤠ ᤆᤥᤃᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤏᤡᤱᤛᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤃᤧᤶᤗᤠᤵᤋᤡᤸᤗᤧ ᤗᤢᤶᤗᤢᤶᤔᤠᤱ ᤀᤡᤱᤎᤠ᤺ᤱᤅᤡᤴᤏᤢ ᤏᤥᤃᤵ ᤐᤡᤔᤠ ᤛᤍᤠᤍᤡᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹ᤀᤥ॥
1PE 3:16 ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤑᤧᤴ ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤪᤡᤛ᤻ᤋᤀᤥᤒᤠ ᤂᤡᤏᤡ᤹ ᤏᤢ᤺ᤒᤠ ᤕᤧᤵᤗᤧᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤛᤡᤖᤡᤱ ᤔᤧᤔᤖ ᤑᤠ᤹ᤀᤠᤱ ᤛᤣᤛᤣ ᤂᤠᤛᤡᤱ ᤁᤳᤋᤧᤶᤔᤧ᤹ᤀᤥ॥
1PE 3:17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤀᤡᤏᤥᤃᤧᤴ ᤋᤢᤰᤂᤣ ᤆᤠᤔᤠᤏᤢ᤺ᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤌᤠᤔᤠᤀᤣ ᤏᤢ᤺ᤒᤠ ᤐᤥ᤺ᤱᤗᤥ॥
1PE 3:18 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤠ᤺ᤳᤇᤧ ᤀᤠᤏᤡ᤹ ᤗᤠᤕᤥᤜᤠ᤹ ᤛᤍᤠᤍᤡᤱ ᤗᤧᤵᤔᤡ ᤐᤡᤔᤠ ᤑᤠ᤹ᤀᤠᤱ ᤌᤡᤰᤗᤧᤱ ᤛᤩᤧᤖᤥ॥ ᤛᤠᤶᤕᤥᤏᤡᤒᤠ ᤂᤪᤡᤛ᤻ᤋᤧᤴ ᤗᤠᤕᤥᤒᤠᤖᤧ ᤁᤢᤗᤧᤰᤘᤠ ᤛᤩᤧᤖᤥ॥ ᤂᤢᤏᤧ᤹ ᤏᤠᤛᤡᤱᤃᤧᤴ ᤌᤰᤁᤥ ᤛᤩᤧ. ᤁᤖ ᤛᤣᤛᤣᤔᤠᤱᤅᤥᤗᤠᤶ ᤕᤠᤶᤔᤥ ᤜᤡᤅᤧᤖᤥ॥
1PE 3:19 ᤒᤠ ᤁᤴ ᤛᤣᤛᤣᤔᤠᤱᤗᤠᤶ ᤐᤣᤀᤠᤱ ᤂᤢᤏᤧ᤹ ᤐᤢᤱᤗᤠᤜᤡᤶᤔᤥ ᤁᤧᤕᤠᤰᤐᤠ ᤑᤧᤴᤛᤠᤶᤜᤠ᤹ ᤀᤡᤱᤓᤥ᤺ᤛᤢᤛᤡᤖᤥ॥
1PE 3:20 ᤂᤧᤱᤜᤠ᤹ᤖᤧᤃ ᤀᤢᤴᤇᤣ᤺ᤴ ᤏᤢᤜᤠ᤺ᤸᤗᤧ ᤘᤠᤗᤠᤎᤠ ᤆᤥᤃᤢᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤛᤡ ᤌ᤺ᤳᤋᤢᤛᤡᤀᤠᤱ ᤜᤠᤱᤄᤢᤛᤡᤸᤗᤧ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴ ᤂᤧᤶᤔᤠ ᤔᤧᤴᤍᤧᤴᤍᤧᤴᤏᤠᤱ ᤔᤧᤘᤕᤧᤖᤥ॥ ᤂᤧᤵᤔᤥ ᤕᤧᤳᤇᤡ ᤔᤏᤠᤜᤠ᤹ᤖᤰ ᤁᤡᤵᤔᤠ ᤁᤧᤄᤢ᤺ᤒᤠ ᤘᤠᤍᤥ᤺ᤰᤔᤥᤗᤠᤶ ᤋᤠᤱᤔᤧᤛᤧ᤺ᤵᤋᤧᤀᤠᤱ ᤔᤧᤘᤕᤧ॥
1PE 3:21 ᤁᤴ ᤘᤠᤍᤥ᤺ᤰᤁᤡᤗᤧᤴ ᤆᤫᤠ᤺ᤳᤋᤡᤱᤃ ᤋᤠᤱᤃᤧᤛᤧ᤺ᤵᤋᤡᤒᤠ ᤒᤵᤋᤡᤛ᤻ᤔᤠᤸᤗᤧ ᤁᤢᤒᤡ ᤜᤧᤰᤋᤱᤒᤠᤖᤥ. ᤁᤱᤃ ᤌᤰᤁᤥᤗᤠᤶ ᤔᤠᤰᤂᤪᤰᤁᤡᤴ ᤘᤠᤃᤧᤜᤵᤋᤢᤶᤒᤠ ᤜᤧᤰᤁᤣᤃ ᤔᤧ᤺ᤴ. ᤁᤖ ᤛᤣᤛᤣ ᤂᤠᤛᤡᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤆᤥ᤺ᤰᤔᤏᤠᤒᤠ ᤔᤠᤱᤜᤧᤰᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤣᤛᤣ ᤂᤠᤛᤡᤱᤅᤡᤱᤃ ᤕᤧᤛᤢ ᤂᤪᤡᤛ᤻ᤋᤧᤴ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠᤗᤠᤶ ᤋᤠ᤺ᤖᤥ॥
1PE 3:22 ᤀᤠᤸᤗ ᤕᤧᤛᤢ ᤂᤪᤡᤛ᤻ᤋᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱ. ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤜᤠ᤹. ᤕᤢᤰᤛᤠᤒᤠᤜᤠ᤹ ᤏᤢ ᤔᤢᤰᤛᤠᤶᤜᤠ᤹ ᤁᤢᤕᤢᤰᤁᤥ ᤁᤳᤋᤢᤛᤡᤖᤥ॥
1PE 4:1 ᤂᤧᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤧᤴ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤩᤧ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤒᤠ ᤜᤧᤰᤋᤱᤒᤠ ᤏᤡᤱᤘᤠ᤹ᤀᤡᤴ ᤁᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤁᤧᤈᤠᤒᤠᤸᤗᤧ ᤗᤠᤕᤥ ᤆᤥ᤺ᤰᤔᤠ ᤗᤧᤖᤢᤀᤠᤱ ᤘᤠ᤹ᤖᤥ॥
1PE 4:2 ᤜᤧᤰᤁᤣ᤺ᤸᤗᤧ ᤂᤧᤴ ᤜᤡᤱᤗ ᤌᤠᤖᤡᤰ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤑᤧᤴ ᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤜᤡᤱᤗᤥ॥
1PE 4:3 ᤌᤣᤀᤠᤱᤓᤧᤸᤗᤧ ᤁᤧᤒᤣ᤺ᤰᤐᤠ ᤕᤧᤶᤔᤥ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤜᤧᤰᤁᤣ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ. ᤑᤧᤴ ᤏᤡᤱᤘᤠ᤹ ᤆᤥ᤺ᤰᤔᤠ. ᤌᤡ᤺ᤸᤗᤧ ᤔ᤺ᤛᤡᤱᤔᤠ. ᤕᤖᤡᤰ ᤆᤠᤔᤠ ᤌᤢᤱᤔᤠᤀᤠᤱ ᤕᤠᤶᤒᤥ᤺ᤳᤇᤧ ᤆᤢᤶᤔᤠ. ᤕᤠᤶᤍᤠᤍᤠᤒᤠ ᤆᤠᤔᤢᤰ ᤌᤡᤔᤢᤰ ᤆᤥ᤺ᤰᤔᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤣᤘᤠ ᤆᤥ᤺ᤰᤔᤠᤀᤥ ᤕᤖᤡᤰ ᤕᤧᤶ ᤁᤧᤍᤣ᤺ᤛᤢᤶᤗᤥ॥
1PE 4:4 ᤂᤧᤱᤜᤠ᤹ᤖᤧ ᤀᤠᤸᤗᤥ ᤜᤧᤰᤋᤱᤒᤠ ᤑᤧᤴ ᤐᤠ᤺ᤴᤜᤠ᤹ ᤂᤢᤏᤡ᤹ᤏᤢ ᤛᤥᤖᤡᤰ ᤁᤧᤶᤒᤳᤇᤡᤴᤒᤠ ᤔᤧᤏᤡ᤺ᤛᤢᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡ᤹ᤖᤥ
1PE 4:5 ᤁᤖ ᤁᤢᤜᤡᤱᤘᤧᤳ ᤏᤢ ᤁᤧᤛᤡ᤺ᤒᤠᤜᤠ᤹ᤖᤧ ᤂᤠᤛᤧᤴ ᤆᤥ᤺ᤰᤔᤠ ᤕᤠᤖᤡᤵ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤱᤜᤠ᤹ᤃ ᤕᤧᤵᤔᤠᤀᤣ ᤐᤥ᤺ᤱᤗᤥ॥
1PE 4:6 ᤒᤠ ᤂᤧᤸᤗᤧ ᤆᤥᤃᤢᤸᤗᤧᤀᤣ ᤀᤠᤸᤗᤥ ᤁᤧᤛᤡ᤺ᤒᤠᤜᤠ᤹ᤀᤠᤱ ᤔᤧᤴᤇᤠᤶ ᤕᤠᤵᤔᤡ ᤜᤧᤰᤁᤣ ᤏᤠᤛᤡᤱᤃᤧᤴ ᤌᤰᤁᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤛᤧᤴ ᤐᤥ᤺ᤱᤗᤥ. ᤁᤖ ᤕᤠᤶᤛᤠᤶᤔᤥ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡ᤺ᤰ ᤔᤧᤜᤡᤱᤗ ᤑᤠ᤹ᤀᤠᤱ ᤛᤢᤏᤠᤀᤡᤱᤅᤡᤴ ᤀᤡᤱᤓᤥ᤺ᤛᤧᤀᤠᤱ ᤘᤠ᤹ᤖᤥ॥
1PE 4:7 ᤁᤠᤰ ᤐᤠ᤺ᤴᤜᤠ᤹ᤖᤧ ᤁᤢᤏᤢᤵᤔᤠᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤘᤠ ᤆᤥ᤺ᤰᤔᤠ ᤁᤧᤛᤢᤰᤋᤡᤖ ᤑᤠ᤹ᤀᤠᤱ ᤛᤣᤛᤣ ᤏᤡᤱᤘᤠ᤹ ᤏᤢ ᤆᤠᤱᤈᤠᤱᤅᤠᤱ ᤘᤕᤧᤶᤔᤧ᤹ᤀᤥ॥
1PE 4:8 ᤁᤠᤰᤏᤢ᤺ᤸᤗᤧ ᤕᤶᤒᤠ ᤐᤠ᤺ᤴᤏᤡᤱᤃ ᤛᤡᤰᤗᤢᤱᤔᤥᤗᤠᤶ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤗᤢᤱᤔᤠ᤹ ᤋᤢᤰᤔᤠᤸᤗᤧᤃ ᤕᤖᤡᤰ ᤗᤠᤕᤥᤜᤠ᤹ ᤋᤧᤵᤋᤢ᤹ᤖᤥ॥
1PE 4:9 ᤜᤧᤰᤁᤩᤠᤱ ᤁᤠᤏᤠᤰᤏᤠᤰ ᤔᤧᤸᤗ᤹ᤀᤣ ᤋᤖᤣ ᤋᤥ᤺ᤀᤠᤛᤡᤶᤔᤧ᤹ᤀᤥ॥
1PE 4:10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤐᤖᤡᤰ ᤐᤖᤡᤰᤐᤠ ᤐᤷᤎᤠ᤺ᤶᤔᤡᤴ ᤁᤧᤄᤥ᤺ᤛᤢᤶᤔᤠᤱ ᤘᤠ᤹॥ ᤁᤠᤰᤗᤧ ᤂᤧᤴ ᤁᤧᤄᤥ᤺ᤛᤢᤶᤒᤠ ᤐᤷᤎᤠ᤺ᤶᤔᤡᤴ ᤁᤢᤓᤠ᤹ ᤐᤡᤛᤡᤱᤔᤠᤀᤥ ᤏᤢ᤺ᤖᤡᤰᤁᤠᤱ ᤕᤠᤅᤧᤶᤔᤧ᤹ᤀᤥ॥
1PE 4:11 ᤐᤠ᤺ᤴᤈᤠᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤁᤢᤀᤡᤛᤡ᤺ᤰ ᤐᤠ᤺ᤳᤋᤢᤖ. ᤘᤣ᤹ᤜᤠ᤹ ᤛᤣᤘᤠ ᤁᤧᤈᤥ᤺ᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤒᤠ ᤌᤢᤶᤔᤡᤸᤗᤧ ᤛᤣᤘᤠ ᤆᤥᤃᤢᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤠᤰ ᤐᤠ᤺ᤴᤏᤥ ᤕᤧᤛᤢ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ॥ ᤁᤠᤰ ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤡᤱᤃ ᤛᤍᤠᤍᤡᤱ ᤂᤢᤏᤧ᤹ᤀᤡᤴᤏᤧᤖᤥ॥ ᤀᤠᤔᤧᤴ॥
1PE 4:12 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤁᤧᤛᤠᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ ᤁᤢᤎᤡᤶᤒᤠ ᤜᤱᤛᤠ᤹ᤔᤥ ᤁᤧᤎᤩᤧ᤹ᤀᤡᤸᤗᤧ ᤂᤡᤏᤡ᤹ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴ ᤐᤥ᤺ᤰᤂᤧ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ.
1PE 4:13 ᤁᤖ ᤂᤪᤡᤛ᤻ᤋᤧᤴ ᤋᤢᤰᤂᤣ ᤆᤩᤧᤒᤠ ᤜᤧᤰᤁᤣ ᤂᤡᤏᤡ᤹ᤀᤠᤱ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤸᤗᤧ ᤛ᤺ᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤢᤕᤢ᤺ᤔᤠ ᤕᤧᤴᤏᤥ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤍᤠᤱ ᤐᤥ᤺ᤱᤅᤡᤸᤗᤧ ᤐᤛ᤺ᤳ ᤁᤧᤛ᤺ᤳᤋᤡ᤹ᤖᤥ॥
1PE 4:14 ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡᤏᤧ ᤑᤠ᤹ᤃᤪ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥
1PE 4:15 ᤂᤡᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤸᤗᤧ ᤔᤏᤠ ᤁᤧᤛᤧᤵᤐᤠ. ᤁᤧᤄᤢ᤺ᤶᤒᤠ. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤥ ᤜᤢᤰ ᤁᤧᤕᤠᤰᤐᤠ ᤔᤏᤠ᤺ᤴ ᤋᤢᤰᤂᤣ ᤆᤠ᤺ᤒᤠ ᤁᤢᤀᤡᤛᤡ᤺ᤰ ᤋᤢᤰᤂᤣ ᤔᤧᤈᤧᤶᤔᤡᤴᤏᤧ᤹ᤀᤥ॥
1PE 4:16 ᤁᤖ ᤂᤪᤡᤛ᤻ᤋᤠᤏᤡ ᤁᤧᤒᤥ᤺ᤰᤂᤡᤒᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤏᤧ ᤑᤠ᤹ᤃᤪ ᤛᤡᤖᤡᤱ ᤔᤧᤔᤕᤧᤶᤔᤡᤴᤏᤧ᤹ᤀᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤡᤱᤅᤡᤴ ᤂᤡᤏᤡ᤹ ᤁᤧᤍᤰᤋᤢᤶᤔᤠᤱ ᤁᤧᤘᤕᤡ᤹ᤖᤥ॥
1PE 4:17 ᤀᤠᤸᤗ ᤂᤠᤛᤧᤴ ᤐᤥ᤺ᤱᤔᤠ ᤕᤧᤶ ᤋᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤀᤥᤏᤢ ᤜᤣ᤺ᤰᤛᤡᤱᤗᤥ॥ ᤀᤠᤸᤗ ᤀᤠᤏᤡ᤹ᤗᤠᤶᤔᤣ ᤂᤠᤛᤧᤴ ᤐᤥ᤺ᤱᤔᤠ ᤜᤣ᤺ᤰᤛᤡᤱᤏᤧ ᤑᤠ᤹ᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤏᤠᤀᤡᤱ ᤂᤧᤶᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤌᤣ ᤔᤧᤒᤥ᤺ᤱᤒᤣ᥅
1PE 4:18 ᤀᤠᤸᤗ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤏᤡᤒᤠᤜᤠ᤹ ᤋᤠᤱᤛᤧ᤺ᤵᤔᤠᤛᤡ ᤛᤠᤰᤏᤧ ᤑᤠ᤹ᤃᤪ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤏᤢ ᤗᤠᤕᤥᤒᤠᤴ ᤌᤣ ᤐᤥ᤺ᤱᤒᤠᤒᤣ᥅”
1PE 4:19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤳᤋᤡᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤔᤧᤎᤠ᤹᤺. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤛᤠᤒᤠ ᤆᤀᤡ᤺ᤳᤍᤠᤱᤒᤠᤀᤥ ᤋᤠ᤺ᤰᤐᤥ ᤔᤧᤕᤢᤰᤂᤢᤖ ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤖᤥ॥
1PE 5:1 ᤀᤠᤸᤗ ᤂᤪᤡᤛ᤻ᤋᤖᤧ ᤀᤡᤏᤥᤃᤧᤴ ᤁᤢᤍᤢᤰᤂᤣ᤺ᤸᤗᤧᤴ ᤋᤥ᤺ᤴᤍᤡ ᤏᤢ ᤋᤠ᤺ᤴᤍᤡ ᤀᤥᤛᤣ᤺ᤴᤍᤠᤱ ᤁᤧᤒᤥ᤺ᤱᤒᤠ ᤔᤡᤔᤡᤍᤡᤱᤅᤡᤸᤗᤧᤴ ᤗᤰᤛᤠᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤛᤣᤛᤣᤜᤢᤵᤗᤰᤁᤥᤒᤠ ᤗᤳᤇᤠ ᤋᤢᤶᤗᤠᤶᤗᤥ᤺ᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤐᤣᤗᤡ ᤑᤠᤰᤏᤡᤱᤗᤥ–
1PE 5:2 ᤂᤡᤏᤡ᤹ ᤁᤶᤒᤪᤠᤱᤅᤥ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤧᤸᤗᤢᤰᤜᤠ᤹ ᤏᤢ᤺ᤖᤡᤰᤁᤠᤱ ᤁᤔᤧᤶᤛᤡᤶᤔᤧ᤹ᤀᤥ–ᤔᤢᤖᤠ ᤀᤠᤶᤔᤧᤳᤋᤡᤸᤗᤧᤖᤰ ᤔᤧ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤁᤔᤧᤶᤛᤡᤶᤔᤧ᤹. ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡᤃ ᤔᤧ᤺ᤴ. ᤁᤖ ᤂᤡᤏᤡ᤹ ᤛᤡᤰ ᤐᤛᤶᤛᤶᤗ ᤛᤣᤘᤠ ᤆᤥᤃᤧᤶᤛᤡᤶᤔᤧ᤹ᤀᤥ॥
1PE 5:3 ᤂᤡᤏᤡ᤹ ᤁᤶᤒᤪᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤛᤶᤍᤠᤱ ᤕᤢᤰ ᤆᤥ᤺ᤰᤔᤠ ᤔᤧ᤺ᤴ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤢᤒᤡ ᤐᤥ᤺ᤱᤔᤠ ᤐᤥ᤺ᤱᤗᤥ॥
1PE 5:4 ᤜᤧᤰᤁᤩᤠᤱ ᤋᤢᤶ ᤔᤧᤸᤗᤢᤰᤁᤶᤒᤠᤴ ᤕᤢ᤺ᤸᤗᤧ ᤀᤠᤵᤑᤠᤸᤗᤧᤀᤠᤱ ᤀᤡᤔᤧᤸᤗᤧᤶᤔᤏᤠᤒᤠ ᤔᤡᤔᤡᤍᤡᤱ ᤏᤢ ᤀᤡᤱᤎᤠ᤺ᤱᤅᤡᤸᤗᤧᤴ ᤋᤡᤆ᤺ ᤁᤧᤄᤥ᤺ᤛᤢᤶᤗᤥ॥
1PE 5:5 ᤂᤡᤏᤡ᤹ ᤌᤠᤱᤒᤧᤴᤛᤠᤛᤣ. ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥ᤺ᤱᤗᤥ॥ ᤂᤡᤏᤡ᤹ ᤁᤠᤰ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤏᤢ᤺ᤖᤡᤰ ᤔᤧᤳᤋᤠᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤀᤳᤋᤢᤛᤡ᤹. ᤁᤖ ᤏ᤺ᤶᤏ᤺ᤶᤒᤠᤜᤠ᤹ ᤗᤢᤱᤃᤢᤶ ᤐᤡᤖᤢᤛᤡ᤹ᤖᤥ॥”
1PE 5:6 ᤂᤧᤸᤗᤧ ᤆᤥᤃᤢᤸᤗᤧ ᤔᤢᤰᤛᤠᤶᤛᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤥ ᤂᤡᤏᤡ᤹ ᤆᤢᤱᤈᤡᤃᤧᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤛᤢᤕᤧᤶᤔᤥ ᤂᤡᤏᤡ᤹ ᤀᤡᤱᤎᤠ᤺ᤱ ᤁᤧᤒᤡᤖᤡᤀᤠᤱ ᤌᤠ᤺ᤱ ᤁᤧᤓᤥ᤺ᤰᤂᤡ᤹ᤖᤥ॥
1PE 5:7 ᤁᤠᤰ ᤂᤡᤏᤡ᤹ ᤏᤡᤱᤛᤠᤶᤜᤠ᤹ ᤂᤢᤏᤧ᤹ᤀᤥ ᤋᤠᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤳᤋᤡ᤹ᤖᤥ॥
1PE 5:8 ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤏᤢ ᤆᤠᤱᤈᤠᤱ ᤗ᤹ᤖᤧᤶᤔᤧ᤹᥄ ᤂᤡᤏᤡ᤹ ᤏᤡᤱᤔᤡ ᤔᤠᤑᤧᤴᤛᤠᤶᤔᤡᤴ ᤁᤧᤜᤢ᤺ᤰᤐᤠ ᤌᤧᤖᤡᤱᤒᤠᤴ ᤁᤢᤀᤡᤛᤡ᤺ᤰ ᤀᤠᤳᤋᤡᤴ ᤂᤥ᤺ᤛᤢᤱᤅᤠᤱ ᤗᤖᤢᤱᤍᤣ᤺ᤛᤢᤱ ᤗ᤹ᤖᤡᤰ ᤁᤥ᤺ᤳᤋᤢᤖ ᤋᤠᤰᤁᤴᤗᤥ॥
1PE 5:9 ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤂᤧᤴ ᤀᤳᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠᤖᤠᤰ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤀᤠᤱ ᤂᤡᤏᤡ᤹ ᤁᤧᤍᤢᤔᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣ ᤜᤧᤰᤋᤱᤒᤠ ᤋᤢᤰᤂᤣᤀᤥᤀᤣ ᤔᤧᤘᤠ᤹ ᤁᤧᤗ᤹ᤒᤠᤴ ᤁᤧᤏᤡ᤺ᤛᤢᤶᤗᤥ॥
1PE 5:10 ᤁᤠᤰ ᤗᤢᤱᤃᤢᤶ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤔᤧᤴᤏᤢᤵᤔᤏᤠᤒᤠ ᤁᤢᤔᤡᤔᤡᤍᤡᤱᤅᤡᤴ ᤗᤰ ᤁᤧᤄᤥ᤺ᤛᤢᤶᤗ ᤑᤠ᤹ᤀᤠᤱ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹ᤖᤥ॥ ᤁᤖ ᤛᤵᤑᤠᤎᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤀᤠᤱ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤢᤗᤡᤱᤎᤥ ᤁᤧᤃᤧᤳᤋᤡ᤹ ᤜᤧᤰᤁᤩᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤏᤢ ᤁᤧᤎᤢᤶᤒᤠ ᤁᤧᤈᤥᤃᤡᤀᤠᤱ ᤔᤧᤶᤔᤢᤶᤔᤏᤠ ᤏᤧᤶᤓᤥᤀᤥ ᤁᤧᤕᤢᤰᤂᤡ᤹ᤖᤥ॥
1PE 5:11 ᤁᤠᤰ ᤔᤢᤰᤛᤠᤶᤔᤡᤴ ᤛᤍᤠᤍᤡᤱ ᤂᤢᤏᤧ᤹ᤀᤡᤴᤏᤣ ᤐᤥ᤺ᤱᤗᤥ॥ ᤀᤠᤔᤧᤴ॥
1PE 5:12 ᤏᤛᤠ᤺ᤴᤛᤠᤒᤠ ᤀᤡ᤺ᤳᤋᤢᤱᤒᤠ ᤏᤢᤛᤠ᤹ ᤛᤡᤗᤠᤛᤖᤧ ᤁᤢᤓᤠ᤹ᤗᤠᤶ ᤁᤴ ᤆᤢᤰᤛᤠ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤀᤡᤱᤃᤠ᤹ ᤜᤠᤱᤜᤠᤱ ᤔᤧᤳᤏᤡᤱᤗ ᤁᤱᤃ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤥ ᤗ᤹ᤖᤡᤰ ᤋᤥ᤺ᤴᤍᤡ ᤐᤡᤏᤡᤱᤗᤥ॥ ᤁᤴ ᤗᤢᤱᤃᤢᤶᤔᤥᤀᤣ ᤂᤡᤏᤡ᤹ ᤌᤎᤵ ᤔᤧᤴᤗ᤹ᤔᤏᤠᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥
1PE 5:13 ᤂᤡᤏᤡ᤹ ᤜᤧᤰᤁᤣᤀᤣ ᤛᤣᤃᤧᤔᤠ ᤒᤧᤒᤡᤗᤥᤴᤒᤠ ᤛᤣᤛᤣᤜᤢᤵᤗᤰᤁᤡᤸᤗᤧ ᤛᤣᤘᤠ ᤁᤧᤜᤠᤰᤋᤡᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤛ᤻ᤛᤠ᤺ ᤔᤷᤁᤢᤛᤖᤧᤀᤠᤱ ᤛᤣᤘᤠ ᤁᤧᤜᤠᤰᤋᤡᤖᤥ॥
1PE 5:14 ᤔᤡ᤺ᤶᤈᤡ᤺ᤸᤗᤧ ᤛᤣᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ॥
2PE 1:1 ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤏᤢ ᤁᤢᤛᤣ᤺ᤰᤕᤢᤰᤔᤡᤒᤠ ᤀᤡᤱᤃᤠ᤹ ᤛᤡᤔᤥᤏ ᤐᤋᤪᤢᤛᤗᤠᤶ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤀᤠᤏᤡᤃᤧ ᤁᤢᤀᤡᤛᤡ᤺ᤰ ᤀᤡᤔᤧᤸᤗᤢᤱᤒᤠ ᤏᤛᤠ᤺ᤴ ᤁᤧᤄᤥ᤺ᤒᤠ ᤂᤡᤏᤡ᤹ ᤁᤧᤖᤧᤰ ᤜᤠᤰᤏᤡᤱᤗᤥ॥ ᤂᤧᤴ ᤏᤛᤠ᤺ᤴᤏᤡᤴ ᤀᤠᤏᤡ᤹ ᤛᤠᤶᤕᤥᤏᤡᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥
2PE 1:2 ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤒᤠ ᤛᤠᤶᤈᤡᤰᤁᤥᤗᤠᤶ ᤗᤢᤱᤃᤢᤶ ᤏᤢ ᤛᤏᤠᤖᤢᤱᤅᤡᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤁᤧᤄᤥ᤺ᤶᤛᤢᤶᤗᤖᤥ॥
2PE 1:3 ᤀᤠᤒᤠᤅᤣ ᤁᤢᤔᤡᤔᤡᤍᤡᤱ ᤏᤢ ᤁᤢᤏᤥ-ᤁᤢᤍᤠᤀᤥ ᤕᤠᤵᤔᤡ ᤁᤧᤀᤢ᤺ᤵᤐᤧᤴ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤜᤡᤱᤔᤴᤏᤥ ᤏᤢ ᤔᤠᤱᤛᤣᤘᤠ ᤆᤥ᤺ᤰᤔᤠᤀᤥ ᤆᤠᤜᤠᤒᤠ ᤀᤠᤈᤥ᤺ᤰᤐᤠ ᤁᤠᤰ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶᤒᤠ ᤂᤢᤏᤧ᤹ ᤀᤠᤒᤡ᤹ᤖᤥ॥
2PE 1:4 ᤒᤠ ᤂᤧᤴ ᤁᤢᤔᤡᤔᤡᤍᤡᤱ ᤏᤢ ᤁᤢᤏᤥ-ᤁᤢᤍᤠᤀᤥᤗᤠᤶ ᤀᤠᤏᤡ᤹ ᤕᤶᤒᤠ ᤏᤢ ᤀᤡᤔᤧᤸᤗᤢᤱᤒᤠ ᤔᤠᤱᤜᤧᤰᤜᤠ᤹ ᤀᤠᤄᤥ᤺ᤛᤢᤶᤔᤠᤱ ᤀᤠᤘᤠ᤹॥ ᤂᤢᤏᤧ᤹ ᤑᤧᤴ ᤏᤡᤱᤘᤠ᤹ᤗᤠᤶ ᤁᤧᤍᤠ᤺ᤒᤠ ᤑᤧᤴ ᤐᤠ᤺ᤴᤜᤠ᤹ᤗᤠᤶ ᤋᤠᤱᤛᤧ᤺ᤵᤔᤠ ᤏᤢ ᤏᤡᤱᤘᤠ᤹ᤑᤢ ᤏᤥᤛᤪᤱ ᤂᤥ᤺ᤔᤠ ᤔᤠᤱᤜᤧᤰ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ॥
2PE 1:5 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤢᤏᤥ-ᤁᤢᤍᤠ ᤕᤥ᤹ᤔᤠ ᤂᤡᤏᤡ᤹ ᤛᤢᤰᤛᤢᤰ ᤋᤶᤛᤡᤴ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤁᤢᤏᤥ-ᤁᤢᤍᤠᤀᤥ ᤛᤠᤶᤈᤡᤰᤁᤡᤴ ᤕᤥ᤹ᤖᤧᤶᤔᤧ᤹.
2PE 1:6 ᤛᤠᤶᤈᤡᤰᤁᤥ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤴ. ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤥ ᤏᤠᤛᤡ ᤌ᤺ᤵᤔᤠᤴ. ᤏᤠᤛᤡ ᤌ᤺ᤵᤔᤥ ᤛᤠᤵᤆᤢᤘᤠ᤺ᤴ ᤕᤥ᤹ᤖᤧᤶᤔᤧ᤹.
2PE 1:7 ᤛᤠᤵᤆᤢᤘᤠᤀᤥ ᤑᤢ᤹ᤏᤢᤛᤠ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠᤴ. ᤜᤧᤰᤁᤩᤠᤱ ᤑᤢ᤹ᤏᤢᤛᤠ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤥ ᤔᤡ᤺ᤶᤈᤡᤴ ᤕᤥ᤹ᤖᤧᤶᤔᤧ᤹ᤀᤥ॥
2PE 1:8 ᤌᤣᤀᤠᤱᤓᤧᤸᤗᤧ ᤁᤴ ᤛᤢᤶᤒᤥᤎᤠ ᤐᤠ᤺ᤴᤜᤠ᤹ ᤁᤧᤕᤥ᤹ᤖᤢᤶᤗ ᤁᤧᤒᤡᤃᤡᤏᤧ ᤑᤠ᤹ᤃᤪ ᤂᤧᤴ ᤐᤠ᤺ᤴᤜᤠ᤹ᤖᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠ ᤂᤡᤏᤡ᤹ ᤛᤠᤶᤈᤡᤰᤁᤥ ᤁᤢᤛᤡ ᤔᤧᤴᤕᤠ᤺ᤶᤔᤏᤠᤒᤠ ᤏᤢ ᤁᤢᤈᤠ᤹ ᤔᤧᤶᤓᤶᤔᤏᤠᤒᤠ ᤐᤥ᤺ᤱᤔᤠᤗᤠᤶ ᤋᤠᤱᤃᤧᤛᤧ᤺ᤵᤋᤡ᤹ᤖᤥ॥
2PE 1:9 ᤁᤖ ᤁᤴ ᤛᤢᤶᤒᤥᤎᤠ ᤐᤠ᤺ᤴᤜᤠ᤹ ᤔᤧᤱᤃᤵᤔᤏᤠᤒᤠᤜᤠ᤹ᤃ ᤔᤠ᤺ᤱᤄᤠᤒᤠ ᤐᤠ᤺ᤴᤜᤠ᤹ ᤔᤧᤴᤏᤡ᤺ᤔᤏᤠᤒᤠ ᤔᤡᤰᤑ᤺ᤶᤒᤠ ᤁᤢᤀᤡᤛᤡ᤺ᤰᤐᤠᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡᤒᤠ ᤗᤠᤕᤥᤜᤠ᤹ ᤘᤠᤜᤵᤋᤧᤒᤧᤴᤏᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢ ᤔᤧᤍᤣ᤺ᤛᤢᤀᤠᤱ ᤘᤠ᤹ᤖᤥ॥
2PE 1:10 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤁᤧᤀᤢ᤺ᤳᤋᤡᤒᤠᤴ ᤏᤢ ᤁᤧᤛᤣᤃᤡᤒᤠᤴ ᤏᤢ᤺ᤖᤡᤰᤁᤠᤱ ᤏᤡ᤺ᤴᤎᤥ ᤆᤥ᤺ᤰᤔᤠ ᤋᤶᤛᤡᤴ ᤆᤥᤃᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤀᤠᤵᤑᤠᤸᤗᤧᤀᤠᤱ ᤁᤧᤴᤈᤥ᤺ᤴᤍᤡᤴᤗᤥ॥
2PE 1:11 ᤀᤰᤂᤣᤗ᤹ᤖᤡᤰ ᤀᤠᤏᤡ᤹ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤔᤧᤴᤏᤢᤵᤔᤏᤠᤒᤠ ᤁᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤖᤧ ᤗᤠᤃᤡ ᤗᤠᤱᤍᤠ᤺ᤰᤔᤠ ᤁᤧᤒᤡᤖᤡᤖᤥ॥
2PE 1:12 ᤂᤧᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤂᤧᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡ᤺ᤛᤢᤶ ᤁᤧᤗᤧᤛ᤻ᤛᤢᤶᤔᤠᤱ ᤛᤧᤰᤂᤠᤀᤥ ᤔᤧᤶᤔᤢᤴᤏᤣ ᤁᤧᤘᤕᤡᤛᤠᤱ ᤛᤍᤠᤍᤡᤱ ᤁᤴ ᤐᤠ᤺ᤴᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ᤛᤢᤶᤔᤥ ᤋᤠ᤺ᤵᤔᤠ ᤐᤡᤔᤠ ᤀᤡᤱᤃᤠ᤹ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤠ᤹ᤀᤠᤖᤥ॥
2PE 1:13 ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤘᤠ᤹ᤀᤠᤖ ᤌᤠᤖᤡᤰ ᤂᤡᤏᤡ᤹ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤛᤢᤶᤔᤥ ᤋᤠᤖᤢᤱᤅᤠᤱ ᤆᤠᤱᤈᤠᤱ ᤔᤧᤳᤏᤡᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥
2PE 1:14 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤀᤥᤛᤣ᤺ᤴᤎᤠᤰᤋᤠᤱᤒᤠ ᤁᤢᤀᤡᤛᤡ᤺ᤰ ᤀᤠᤛᤡ᤺ᤔᤠ ᤕᤧᤴᤏᤡᤴ ᤜᤠᤖᤠᤀᤣ ᤋᤠᤖ ᤐᤳᤗᤥ॥
2PE 1:15 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤡ᤺ᤀᤠ ᤐᤣ᤺ᤰᤁᤠᤛᤠᤱ ᤛᤍᤠᤍᤡᤱ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤠᤛᤢᤰᤛᤢᤰ ᤋᤶᤛᤡᤴ ᤆᤥᤃᤢᤱᤗᤥ॥
2PE 1:16 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶ ᤏᤢ ᤁᤢᤕᤢ᤺ᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ᤏᤢ ᤐᤠᤖᤡᤃᤧᤸᤗᤧ ᤀᤠᤏᤡᤃᤧ ᤐᤠ᤺ᤴ ᤂᤧᤍᤠ᤹ᤜᤠ᤹ ᤆᤥᤃᤢᤶᤒᤣᤀᤠᤱ ᤐᤠ᤺ᤳᤋᤢᤶᤒᤧᤒᤠ ᤔᤧ᤺ᤴᤗᤥ. ᤁᤖ ᤀᤠᤏᤡᤃᤧ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤂᤢᤏᤧ᤹ ᤁᤢᤔᤡᤔᤡᤍᤡᤱᤅᤡᤴ ᤏᤡ᤺ᤛᤢᤶᤒᤧᤖᤥ॥
2PE 1:17 ᤌᤣᤀᤠᤱᤓᤧᤸᤗᤧ ᤔᤡᤔᤡᤍᤡᤱᤃᤧᤴ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤢᤏᤧ᤹ ᤔᤡᤱᤛᤥ ᤀᤡᤱᤎᤠ᤺ᤱ ᤏᤢ ᤔᤡᤔᤡᤍᤡᤱ ᤂᤥ᤺ᤛᤢᤸᤗᤧ ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤖᤥ. ᤂᤢᤏᤧ᤹ᤏᤢ ᤀᤡᤱᤃᤠ᤹ ᤀᤥᤔᤢ ᤗ᤹ᤖᤠᤱᤅᤠᤱ ᤘᤠ᤹ᤀᤠᤖᤥ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤕᤧᤖᤥ॥
2PE 1:18 ᤛᤣᤛᤣ ᤁᤥ᤺ᤰᤔᤠᤀᤥ ᤂᤢᤏᤧ᤹ᤏᤢ ᤘᤠ᤹ᤔᤏᤠ᤺ᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤢ᤺ᤒᤠ ᤁᤴ ᤀᤡᤰᤗᤠ᤺ᤴ ᤀᤠᤏᤡᤃᤧ ᤀᤠᤒᤠᤅᤣ ᤂᤧᤶᤔᤏᤠᤖᤥ॥
2PE 1:19 ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤧᤰᤂᤠ ᤐᤥ᤺ᤰᤂᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤏᤡ᤺ᤴᤎᤥ ᤀᤠᤃᤳᤋᤢᤶᤗᤥ॥ ᤂᤠᤔᤧᤴᤀᤥ᤺ᤳᤋᤣ ᤏᤢ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤋᤠᤴᤇᤥ᤺ᤰᤐᤧᤴ ᤔᤧᤴᤗᤡᤱᤅᤣ ᤌᤠᤖᤡᤰ ᤂᤠᤔᤠᤰᤔᤠᤀᤥ ᤁᤧᤀᤥ᤺ᤵᤐᤠ ᤛᤣᤔᤡ᤺ᤴ ᤜᤧᤰᤁᤣ ᤂᤧᤴ ᤐᤠ᤺ᤴᤈᤠᤰᤁᤡᤴ ᤏᤡᤱᤘᤠ᤹ᤀᤥ ᤁᤧᤕᤢᤰᤂᤢᤶᤔᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥
2PE 1:20 ᤁᤠᤰᤏᤢ᤺ᤸᤗᤧᤀᤠᤱ ᤕᤶᤒᤠ ᤐᤠ᤺ᤴᤏᤡᤱᤃ ᤛᤠᤶᤕᤥᤛᤠᤵᤗᤠᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤋᤩᤧᤒᤠ ᤔᤧ᤺ᤴ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤀᤣ ᤐᤥ᤺ᤱᤗᤥ॥
2PE 1:21 ᤌᤣᤀᤠᤱᤓᤧᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤱᤃ ᤔᤧᤴᤇᤠᤶ ᤏᤡᤱᤘᤠ᤹ᤗᤠᤶ ᤋᤩᤧᤒᤠ ᤔᤧ᤺ᤴᤗᤥ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤒᤠᤖᤧᤒᤠᤖᤥ॥
2PE 2:1 ᤁᤖ ᤀᤢᤴᤇᤥ᤺ᤴ ᤀᤡᤛᤪᤠᤀᤡᤗᤀᤥ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤘᤕᤧᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤗᤢᤶᤔᤥᤀᤠᤱ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ ᤔᤧᤗ᤺ᤴ ᤔᤧᤍᤠᤖᤥ॥ ᤂᤧᤱᤜᤠ᤹ᤖᤧᤃ ᤛᤫᤠ᤺ᤳᤋᤠᤱ ᤕᤠᤵᤔᤡ ᤁᤧᤔᤧᤱᤒᤠ ᤀᤡᤱᤗᤧᤰ ᤐᤠ᤺ᤴᤜᤠ᤹ ᤔᤧᤜᤢ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤸᤗᤢᤱ ᤁᤧᤜᤢᤱᤒᤠᤀᤠᤱ ᤁᤧᤎᤧ᤹ᤒᤠ ᤍᤠᤱᤒᤠᤴᤏᤠᤱ ᤔᤧᤏᤠ᤹ᤖᤢᤀᤠᤱ ᤜᤠᤖᤠᤀᤣ ᤀᤠᤒᤠᤅᤣ ᤂᤢᤏᤡ᤹ᤀᤥ ᤔᤧᤰᤔᤧᤴ ᤔᤧᤍᤠᤖᤢ᤹॥
2PE 2:2 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤡᤴ ᤕᤖᤡᤰᤗᤧ ᤔᤧᤍᤡᤶᤍᤢ ᤔᤧᤏᤠ᤺ᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤛᤧᤰᤂᤠᤒᤠ ᤗᤠᤶᤔᤡᤸᤗᤧᤴᤏᤠᤱ ᤁᤢᤈᤠ᤺ᤳᤌᤡ ᤐᤣ᤺ᤰᤗᤥ॥
2PE 2:3 ᤂᤢᤏᤡ᤹ ᤂᤡ᤺ᤶᤒᤪᤠᤰᤔᤥ ᤁᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤍᤠᤒᤠ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤂᤡᤏᤡ᤹ ᤀᤡᤱᤃᤧᤶᤗᤧᤰᤋᤡᤀᤠᤱ ᤀᤡᤴᤎᤠ᤺ᤰ ᤔᤧᤎᤃᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤢᤶᤍᤡᤱᤅᤡᤴ ᤋᤃᤡᤛᤠ ᤂᤠᤛᤧᤴ ᤆᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤡ᤹ ᤔᤧᤰᤔᤧᤴ ᤏᤡ᤺ᤴᤎᤥ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
2PE 2:4 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥ ᤁᤧᤈᤥ᤺ᤰᤐᤠ ᤔᤠᤱᤗᤠᤀᤡᤱᤒᤠᤜᤠ᤹ᤀᤠᤱ ᤂᤠᤛᤧᤴᤗᤠᤶ ᤔᤧᤍᤠᤱᤄᤢᤴᤇᤡᤴᤗᤥ. ᤁᤖ ᤂᤧᤱᤜᤠ᤹ ᤀᤡᤄᤣ᤺ᤰᤂᤢᤛᤡᤀᤠᤱ ᤂᤧᤔᤠᤕᤱᤛᤱᤅᤥ ᤁᤣ᤺ᤳᤋᤢᤛᤡᤀᤠᤱ ᤂᤠᤛᤧᤴ ᤕᤧᤴ ᤌᤠᤖᤡᤰ ᤂᤧᤴ ᤂᤠᤔᤠᤰᤗᤢᤶᤒᤠ᤺ᤳᤋᤥ ᤔᤧᤕᤠᤰᤗᤥ॥
2PE 2:5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤘᤠᤍᤥ᤺ᤰᤔᤥᤗᤠᤶ ᤔᤧᤰᤂᤢᤛᤡᤸᤗᤧ ᤂᤧᤴ ᤀᤢᤴᤇᤣ᤺ᤴᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤠᤱ ᤔᤧᤍᤠᤱᤄᤢᤴᤇᤡᤴᤗᤥ. ᤁᤖ ᤛᤠᤶᤕᤥᤏᤡᤒᤠ ᤐᤠ᤺ᤴ ᤀᤡᤱᤃᤧᤓᤥ᤺ᤒᤠ ᤏᤢᤜᤠ᤺ᤴ ᤏᤢ ᤘᤣ᤹ ᤏᤢᤛᤡ ᤔᤏᤠᤜᤠ᤹ᤖᤰ ᤋᤠᤱᤄᤢᤛᤡᤖᤥ॥
2PE 2:6 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥ ᤁᤢᤎᤡᤶ ᤛᤍᤥᤔ ᤏᤢ ᤃᤔᤥᤖᤠ ᤕᤧᤰᤕᤰᤜᤠ᤹ᤀᤠᤱ ᤔᤡᤎᤡᤰᤂᤢᤀᤠᤱ ᤂᤠᤵᤐᤢ ᤌᤩ᤺ᤱ ᤆᤥᤃᤢᤛᤡᤀᤠᤱ ᤂᤧᤴ ᤕᤧᤰᤕᤰᤜᤠ᤹ᤖᤧ ᤁᤢᤔᤡᤱ ᤔᤠᤛᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠ ᤂᤧᤴ ᤕᤠᤵᤔᤡᤜᤠ᤹ᤖᤧᤴ ᤀᤠᤰᤋᤱᤒᤠ ᤜᤡᤱᤃᤳ ᤐᤥ᤺ᤱ ᤁᤧᤗ᤹ᤒᤠ ᤁᤢᤒᤡ ᤆᤥᤃᤢᤛᤡᤀᤠᤱ ᤘᤠ᤹ᤖᤥ॥
2PE 2:7 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤒᤠ ᤛᤠᤶᤕᤥᤏᤡᤒᤠ ᤗᤢ᤺ᤋᤧᤱᤃ ᤛᤧ᤺ᤵᤋᤢᤖᤥ॥ ᤂᤢᤏᤧ᤹ᤃ ᤂᤧᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤜᤠ᤹ ᤏᤡ᤺ᤛᤢᤀᤠᤱ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤘᤕᤧᤖᤥ॥
2PE 2:8 (ᤂᤢᤏᤧ᤹ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤌᤡᤰᤕᤠ᤺ᤴᤎᤰ ᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤑᤧᤴ ᤕᤠ᤺ᤶᤒᤰᤁᤡᤴ ᤏᤡ᤺ᤛᤢ ᤂᤧᤵᤛᤢᤸᤗᤧ ᤛᤠᤶᤕᤥᤏᤡᤒᤠ ᤗᤢ᤺ᤳᤋᤧᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤘᤕᤧ॥)
2PE 2:9 ᤜᤧᤰᤁᤣᤗ᤹ᤖᤡᤰ ᤍᤠᤱᤒᤠᤸᤗᤧ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤗᤠᤶ ᤛᤧ᤺ᤵᤔᤠᤛᤡᤀᤠᤱ ᤗᤧᤛ᤻ᤛᤢ᤹ᤖᤥ॥ ᤜᤧᤰᤁᤩᤠᤱ ᤗᤠᤕᤥᤒᤠ ᤔᤏᤠᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖ ᤂᤠᤛᤧᤴ ᤕᤧᤴᤏᤥ ᤌᤠᤖᤡᤰ ᤁᤵᤔᤠᤛᤡᤀᤠᤱ ᤗᤧᤛ᤻ᤛᤢᤖᤥ॥
2PE 2:10 ᤀᤰᤋᤱᤒᤠᤜᤠ᤹ᤃ ᤀᤠᤒᤠᤅᤣ ᤑᤧᤴ ᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤕᤠᤶᤍᤠᤍᤠᤀᤥ ᤁᤧᤘᤠ᤹ᤒᤠ ᤏᤢ ᤍᤠᤱᤒᤠᤸᤗᤧ ᤁᤢᤕᤢᤰᤁᤡᤴ ᤁᤧᤏᤠ᤹ᤒᤠ ᤔᤏᤠᤛᤡᤖᤥ॥ ᤂᤧᤴ ᤀᤠᤎᤡᤱᤃᤠᤏᤡ ᤏᤢ ᤀᤠᤱᤍᤡᤱ ᤁᤧᤗ᤹ᤒᤠ ᤔᤏᤠᤜᤠ᤹ᤖᤧᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤜᤡᤏᤠ᤺ᤶ ᤔᤧᤵᤔᤠᤛᤡ ᤔᤧᤱᤃᤡ᤺ᤏᤧᤴᤗᤥ॥
2PE 2:11 ᤁᤖ ᤁᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤏᤢ᤺ᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ ᤁᤧᤎᤢᤶᤒᤠ ᤏᤢ ᤔᤢᤰᤛᤠᤶᤛᤠᤒᤠ ᤔᤧᤈᤥ᤺ᤰᤛᤠᤱ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠᤛᤡ ᤔᤧᤴᤀᤠ᤺ᤴᤇᤡᤱᤅᤡᤴᤗᤥ॥
2PE 2:12 ᤁᤖ ᤁᤴ ᤔᤏᤠᤜᤠ᤹ᤖᤧᤃ ᤁᤢᤛᤡᤱ ᤔᤧᤴᤏᤡ᤺ᤳᤋᤣᤒᤠ ᤐᤠ᤺ᤴᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤐᤠ᤺ᤴ ᤔᤧᤒᤠ᤺ᤳᤋᤢ᤹ᤖᤥ॥ ᤂᤧᤱᤜᤠ᤹ ᤋᤧᤶᤔᤠᤛᤡᤀᤠᤱ ᤛᤧᤵᤔᤠᤛᤡ ᤑᤠ᤹ᤀᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤔᤧ᤺ᤴᤏᤣ ᤁᤧᤎᤠᤵᤐᤠ ᤌᤰᤛᤠᤜᤠ᤹ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥ ᤁᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ ᤂᤧᤴ ᤌᤰᤛᤠᤜᤠ᤹ ᤁᤢᤀᤡᤛᤡ᤺ᤰᤁᤣ ᤔᤧᤔᤧᤰᤗᤥ॥
2PE 2:13 ᤂᤧᤱᤜᤠ᤹ᤖᤧᤃ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤒᤰᤁᤡᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠᤀᤣ ᤔᤧᤍᤢᤔᤢ᤹ᤖᤥ॥ ᤂᤧᤱᤜᤠ᤹ᤖᤧᤃ ᤗᤧᤴᤍᤡᤰᤛᤠ ᤕᤠᤶᤍᤠᤍᤠ ᤏᤢ ᤏᤡᤱᤘᤠ᤹ᤋᤠᤍᤠ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤡᤏᤡ᤹ᤏᤢ ᤔᤧᤈ ᤔᤧᤎᤢᤅᤢᤸᤗᤧ ᤔᤧᤛ᤺ᤳᤗ ᤀᤡᤱᤃᤧᤶᤗᤧᤰᤋᤡᤀᤠᤱ ᤏᤠᤃᤧᤶᤎᤠᤛᤡ ᤁᤧᤶᤒᤡᤖᤡ᤹ᤖᤥ॥
2PE 2:14 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤰᤁᤡᤸᤗᤧ ᤋᤠᤵᤑᤧ᤺ᤶᤒᤠ ᤕᤠᤶᤍᤠᤍᤠᤒᤠ ᤆᤠᤖᤠᤶᤔᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤀᤠᤱ ᤀᤠᤰᤂᤧᤴ ᤗᤠᤕᤥ ᤔᤧᤈᤥᤃᤢᤛᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤗᤠᤕᤥᤀᤥ ᤔᤧᤎᤠᤛᤢᤛᤡ᤹॥ ᤂᤧᤱᤜᤠ᤹ᤖᤧᤃ ᤂᤡ᤺ᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠ᤹ᤖᤡᤰ ᤔᤧᤗᤧᤛ᤻ᤛᤢ᤹ᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤱᤃᤪᤠᤖᤧ ᤋᤧᤳᤋᤢᤛᤡᤒᤠ ᤔᤏᤠᤛᤡᤖᤥ॥
2PE 2:15 ᤂᤧᤱᤜᤠ᤹ᤖᤧᤃ ᤋᤥ᤺ᤴᤍᤥ᤺ᤶᤒᤠ ᤗᤠᤶᤔᤡᤴ ᤔᤧᤗᤧᤖᤢᤀᤠᤱ ᤂᤧᤱᤜᤠ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤔᤧᤗᤠ᤺ᤛᤧᤀᤠᤱ ᤔᤧᤘᤠ᤹ᤖᤥ॥ ᤒᤥᤀᤖᤖᤧ ᤁᤢᤛ᤻ᤛᤠ᤺ᤜᤠ᤹ ᤒᤠᤗᤠᤔᤖᤧ ᤁᤢᤗᤠᤶᤔᤥ ᤔᤧᤒᤣᤀᤠᤱ ᤔᤧᤘᤠ᤹॥ ᤒᤠᤗᤠᤶᤔᤡᤸᤗᤧᤃ ᤗᤠᤕᤥᤗᤠᤶ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤁᤢᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧ.
2PE 2:16 ᤁᤖ ᤜᤧᤰᤋᤱᤒᤠ ᤑᤧᤴ ᤕᤠ᤺ᤶᤒᤰ ᤆᤥᤃᤢᤒᤠᤸᤗᤧ ᤁᤢᤒᤠ᤺ᤴ ᤔᤧᤴᤗ᤺ᤶᤔᤏᤠᤒᤠ ᤀᤍᤱᤅᤡᤸᤗᤧ ᤂᤢᤏᤧ᤹ ᤑᤧ᤺ᤰᤋᤢ॥ ᤂᤧᤴ ᤀᤍᤱᤅᤡᤸᤗᤧ ᤔᤧᤴᤇᤠᤶ ᤕᤠᤵᤔᤡ ᤐᤠ᤺ᤴᤗᤠᤶᤒᤠ ᤒᤠᤗᤠᤶᤔᤡᤸᤗᤧ ᤁᤧᤏᤠᤱᤒᤠ ᤁᤢᤀᤡᤛᤡ᤺ᤰ ᤆᤥᤃᤢᤒᤠ ᤀᤍᤱ ᤁᤢᤕᤠ᤺ᤶᤒᤰᤁᤡᤴ ᤛᤠᤰᤋᤢᤖᤥ॥
2PE 2:17 ᤀᤰᤋᤱᤒᤠ ᤔᤏᤠᤜᤠ᤹ᤃ ᤁᤧᤈᤵᤐᤠ ᤘᤠᤒᤢᤴ ᤏᤢ ᤛᤢᤖᤡᤳᤔᤠᤸᤗᤧ ᤔᤢ᤺ᤳᤋᤢ ᤋᤣ᤹ᤖᤢᤒᤠ ᤂᤠᤵᤔᤡ᤺ᤵᤐᤠ ᤜᤧᤰᤋᤱᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤔᤠᤰ ᤗᤢᤶᤒᤠ᤺ᤳᤋᤡᤴ ᤕᤠᤖᤡᤵ ᤆᤥᤃᤢᤀᤠᤱ ᤏᤧᤖᤥ॥
2PE 2:18 ᤂᤧᤱᤜᤠ᤹ᤃ ᤁᤢᤛᤢᤶ ᤔᤧᤴᤍᤶᤔᤏᤠ ᤀᤠᤱᤍᤡᤱ ᤀᤡᤛᤣ᤺ᤱᤒᤠ ᤐᤠ᤺ᤴ ᤔᤧᤒᤠ᤺ᤳ. ᤜᤧᤰᤁᤩᤠᤱ ᤂᤠᤖᤰ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤗᤧᤵᤐᤠᤀᤠᤱ ᤍᤠᤱᤒᤠᤀᤥ ᤁᤧᤍᤠ᤺ᤒᤠᤜᤠ᤹ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤸᤗᤧ ᤌᤣᤀᤠᤱ ᤔᤧᤗ᤹ᤏᤧᤴ ᤗ᤹ᤖᤡᤰ ᤔᤧᤜᤢᤛᤢᤛᤡᤖ ᤕᤠᤶᤔᤥ ᤗᤠᤕᤥᤀᤥ ᤔᤧᤎᤠᤛᤢᤛᤡᤖᤥ॥
2PE 2:19 ᤂᤧᤱᤜᤠ᤹ᤃ ᤀᤠᤒᤠᤅᤣ ᤑᤧᤴ ᤏᤡᤱᤘᤠ᤹ ᤕᤧᤵᤗᤧᤰᤁᤡᤸᤗᤧ ᤁᤢᤕᤥ᤺ᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤛᤠᤱ ᤘᤣ᤹ᤜᤠ᤹ᤃ ᤆᤥ᤺ᤰᤕᤢᤶᤓᤥᤖᤧᤴ ᤔᤠᤱᤜᤧᤰ ᤔᤧᤒᤡᤖᤢᤛᤡ᤹॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤔᤏᤠᤜᤠ᤹ ᤕᤢᤰᤋᤢᤛᤡ᤹. ᤂᤧᤱᤜᤠ᤹ ᤒᤠ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤥ᤺ᤰᤐᤠ ᤔᤧᤒᤥ᤺ᤱᤗᤥ॥
2PE 2:20 ᤁᤖ ᤂᤧᤱᤜᤠ᤹ᤖᤧ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤐᤠ᤺ᤴᤗᤠᤶ ᤔᤧᤗ᤺ᤴ ᤜᤧᤰᤁᤩᤠᤱ ᤕᤠᤶᤔᤥ ᤔᤧᤏᤢ᤺ᤱ ᤔᤧᤒᤣ᤺ᤰᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤗᤠᤃᤡ ᤋᤃᤡᤏᤢ᤺ᤸᤗᤧᤀᤠᤱ ᤁᤢᤏᤢᤵᤔᤥᤃ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤥ᤺ᤱᤗᤥ॥
2PE 2:21 ᤂᤧᤱᤜᤠ᤹ᤖᤧ ᤛᤠᤶᤕᤥᤏᤡᤒᤠ ᤗᤠᤶᤔᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤄᤥ᤺ᤛᤢᤒᤠ ᤛᤣᤛᤣ ᤀᤡᤱᤈᤠ᤺ᤱᤅᤡᤴ ᤔᤧᤏᤠ᤹ᤖᤢᤏᤢ᤺ᤸᤗᤧᤃ ᤂᤧᤴ ᤛᤠᤶᤕᤥᤏᤡᤒᤠ ᤗᤠᤶᤔᤡᤴ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤏᤡᤸᤗᤧ ᤏᤢᤖᤧᤒᤠᤖᤥ॥
2PE 2:22 ᤂᤧᤱᤜᤠ᤹ᤃ ᤛᤡᤘᤠᤍᤡᤱ ᤂᤠᤜᤢᤴᤏᤡᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤔᤧᤈᤥ᤺ᤰᤗᤥ. “ᤁᤥ᤺ᤳᤆᤥ᤺ᤸᤗᤧ ᤐᤧᤛ᤻ᤛᤢᤀᤠᤱ ᤁᤢᤒᤧ᤹ᤔᤠ᤺ᤳᤋᤡᤴ ᤀᤠᤒᤠᤅᤣ ᤆᤖᤥ.” ᤜᤧᤰᤁᤩᤠᤱ “ᤑᤠᤰᤁᤡᤴ ᤘᤠᤖᤢ᤺ᤶᤔᤠᤛᤠᤱ ᤕᤠᤶᤔᤥ ᤂ᤺ᤱᤘᤠ ᤏᤧ᤺ᤴᤇᤡᤱᤗᤥ॥”
2PE 3:1 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤜᤠᤰᤏᤡᤱᤒᤠ ᤁᤴ ᤏᤡᤛᤡᤃᤣ᤺ᤰᤐᤠ ᤛᤰᤀᤡᤱᤄᤱᤗᤥ॥ ᤁᤴ ᤏᤧᤵᤔᤠᤱ ᤛᤰᤀᤡᤱᤄᤱᤅᤥ ᤏᤡᤱᤘᤠ᤹ᤛᤢᤶ ᤆᤥ᤺ᤰᤏᤡᤱ ᤐᤡᤏᤡᤱᤗ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤆᤠᤱᤈᤠᤱᤘᤠ ᤆᤥ᤺ᤰᤔᤠ ᤐᤡᤔᤠ ᤁᤥ᤺ᤳᤋᤢᤱᤒᤠᤖᤥ॥
2PE 3:2 ᤕᤖᤡᤰ ᤋᤱᤒᤣ ᤋᤃᤡ ᤛᤣᤛᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠᤸᤗᤧ ᤂᤡᤏᤡ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤗᤠᤶ ᤁᤧᤒᤡᤖᤡᤒᤠ ᤀᤡᤱᤈᤠ᤺ᤱᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥
2PE 3:3 ᤁᤠᤰᤏᤢ ᤋᤃᤡ ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤐᤥ᤺ᤱᤗᤥ॥ ᤁᤢᤏᤢᤵᤔᤠ ᤕᤧᤴᤜᤠ᤹ᤀᤥ ᤁᤡᤏᤠ᤺ᤴᤍᤡ ᤁᤧᤒᤡᤒᤠᤜᤠ᤹ ᤁᤡᤏᤠ᤺ᤴᤍᤡ ᤐᤡᤏᤢ ᤔᤧᤍᤠᤀᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ᤀᤥ ᤔᤧᤘᤠ᤹
2PE 3:4 ᤜᤧᤰᤁᤩᤠᤱ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ. “ᤀᤡᤱᤃᤠ᤹ ᤕᤠᤶᤔᤥ ᤕᤢ᤺ᤀᤠ ᤗ᤹ᤖᤡᤰ ᤔᤠᤱᤜᤧᤰ ᤆᤥᤃᤢᤀᤠᤱ ᤘᤕᤧᤒᤠ ᤔᤧ᤺ᤶᤒᤡ᥅ ᤂᤢᤏᤧ᤹ ᤀᤠᤳᤋᤥ ᤕᤧ᥅ ᤀᤠᤏᤡᤃᤧ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ ᤁᤠᤰ ᤔᤧᤛᤩᤧ ᤔᤧᤒᤣ. ᤜᤧᤰᤁᤩᤠᤱ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤁᤠᤰ ᤐᤠ᤺ᤴᤜᤠ᤹ ᤒᤠ ᤜᤧᤰᤁᤣᤀᤣ ᤏᤧᤖᤥ॥”
2PE 3:5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤐᤣᤗᤡᤃᤧᤴ ᤁᤢᤒᤠ᤺ᤴᤈᤠᤰᤗᤠᤶᤒᤠ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤏᤡ᤺ᤏᤡ᤺ᤒᤠᤀᤣ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤆᤫᤠ᤺ᤳᤗᤠᤶ ᤗ᤺ᤳᤋᤢᤀᤠᤱ ᤆᤫᤠ᤺ᤳᤋᤡᤸᤗᤧᤀᤣ ᤆᤥᤃᤢ.
2PE 3:6 ᤜᤧᤰᤁᤩᤠᤱ ᤒᤠ ᤂᤧᤴ ᤆᤫᤠ᤺ᤳᤗᤠᤶᤒᤠ ᤀᤢᤴᤇᤣ᤺ᤴᤛ᤻ᤔᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤜᤢᤔᤧᤀᤠᤱ ᤔᤧᤃᤧᤖᤥ॥
2PE 3:7 ᤁᤖ ᤒᤠ ᤂᤧᤴ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤸᤗᤧ ᤀᤠᤸᤗᤥᤒᤠ ᤋᤠᤱᤛᤠᤰᤐᤧᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤡᤗᤠᤶᤒᤠ ᤔᤧᤱᤔᤠ ᤑᤠ᤹ᤀᤠᤱ ᤋᤠᤱᤄᤢᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤔᤧᤶᤒᤡᤔᤏᤠ ᤔᤏᤠᤜᤠ᤹ ᤂᤠᤛᤧᤴ ᤕᤧᤴᤏᤥ ᤔᤧᤶᤔᤧᤱᤛᤡᤱᤅᤣ ᤌᤠᤖᤡᤰ ᤋᤠᤱᤛᤠᤰᤐᤧᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤒᤠ ᤕᤠ᤺ᤰᤋᤧᤀᤠᤱ ᤏᤧᤖᤥ॥
2PE 3:8 ᤁᤖ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤗᤳᤇᤠ ᤐᤠ᤺ᤴᤎᤡᤰ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤶᤔᤡᤴᤏᤧ᤹ᤀᤥ–ᤍᤠᤱᤒᤠᤸᤗᤧ ᤁᤢᤗᤠᤃᤡ ᤌᤡᤰ ᤕᤧᤴᤏᤡᤴ ᤋᤱᤒᤣ ᤜᤧᤴᤇᤡᤱ (᥇᥆᥆᥆) ᤁᤢᤀᤡᤛᤡ᤺ᤰ ᤏᤢ ᤜᤧᤴᤇᤡᤱ ᤋᤱᤒᤣᤴ ᤌᤡᤰ ᤕᤧᤴ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥
2PE 3:9 ᤁᤢᤓᤠ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤁᤢᤀᤡᤛᤡ᤺ᤰ ᤍᤠᤱᤒᤠᤸᤗᤧ ᤁᤢᤏᤢ᤺ᤱᤔᤠ ᤕᤢ᤺ᤔᤠ ᤔᤠᤱᤜᤧᤰᤁᤡᤴ ᤁᤧᤵᤔᤠ ᤔᤧᤛᤢ᤺ᤏᤧᤴᤗᤥ. ᤁᤖ ᤂᤢᤏᤧ᤹ ᤏᤠᤛᤡ ᤌ᤺ᤳᤋᤢᤖ ᤂᤡᤏᤡ᤹ ᤁᤧᤜᤠᤱᤄᤡᤖ ᤘᤠ᤹ᤖᤥ॥ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤜᤡᤴᤍᤡᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤁᤧᤶᤔᤧᤃᤡᤴᤗ ᤁᤧᤗ᤹ᤒᤠ ᤂᤢᤏᤧ᤹ ᤏᤡᤱᤘᤠ᤹ ᤆᤥᤃᤢᤖᤥ॥
2PE 3:10 ᤁᤖ ᤍᤠᤱᤒᤠᤴ ᤏᤢ᤺ᤱ ᤕᤢ᤺ᤒᤠ ᤕᤧᤴᤏᤡᤱᤃ ᤛᤧᤴᤍᤡᤰ ᤁᤧᤄᤢ᤺ᤶᤒᤠᤴ ᤂᤢ᤺ᤴᤇᤧ ᤋᤠᤒᤠ ᤁᤢᤀᤡᤛᤡ᤺ᤰ ᤜᤰᤆᤄᤳ ᤐᤥ᤺ᤱᤗᤥ॥ ᤕᤶᤒᤠ ᤀᤡᤰᤗᤠᤀᤥ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤔᤠᤒᤣ᤺ᤰ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤒᤵᤐᤠᤜᤠ᤹ ᤁᤠᤰ ᤔᤡᤍᤡᤰᤁᤠᤱ ᤕᤥ᤺ᤶᤒᤣ᤺ᤰ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤁᤠᤰ ᤐᤠ᤺ᤴᤜᤠ᤹ᤀᤠᤱ ᤔᤡ᤺ᤸᤗᤧ ᤂᤠᤵᤐᤢ ᤌᤩ᤺ᤱ ᤆᤥᤃᤢᤛᤡᤖᤥ॥
2PE 3:11 ᤜᤧᤰᤁᤣᤗ᤹ᤖᤡᤰ ᤁᤠᤰ ᤐᤠ᤺ᤴᤜᤠ᤹ ᤔᤧᤰᤐᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ᤃ ᤛᤣᤛᤣᤒᤠ ᤏᤢ ᤛᤠᤶᤕᤥᤏᤡᤒᤠ ᤜᤡᤱᤔᤴᤏᤥ ᤘᤠ᤹ᤔᤠ ᤐᤥ᤺ᤱᤗᤥ॥
2PE 3:12 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤧᤴᤏᤡᤴ ᤁᤧᤜᤠᤱᤄᤢᤶ. ᤜᤧᤰᤁᤩᤠᤱ ᤁᤢᤕᤧᤴᤏᤡᤴ ᤜᤠᤖᤠ ᤋᤠᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤁᤖ ᤂᤧᤴ ᤕᤧᤴᤏᤥ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤔᤡᤍᤡᤰᤁᤠᤱ ᤔᤧᤰ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤠᤰ ᤐᤠ᤺ᤴᤜᤠ᤹ ᤕᤥ᤺ᤶᤒᤣ᤺ᤰᤗᤥ॥
2PE 3:13 ᤁᤖ ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤁᤢᤛᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤁᤢᤛᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤏᤡᤱᤛᤠᤱ ᤀᤠᤈᤥᤃᤢᤶᤔᤠᤱ ᤀᤠᤜᤠᤱᤄᤢᤶᤗ ᤀᤠᤘᤠ᤹ᤖᤥ॥ ᤂᤧᤵᤔᤥ ᤛᤠᤶᤕᤥᤏᤡᤒᤠ ᤔᤏᤠᤜᤠ᤹ᤖᤰ ᤔᤧᤘᤠ᤹ᤖᤥ॥
2PE 3:14 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤁᤴ ᤐᤠ᤺ᤴᤜᤠ᤹ ᤏᤡᤱᤛᤠᤱ ᤁᤧᤈᤥᤃᤢᤶᤔᤠᤱ ᤁᤧᤜᤠᤱᤄᤢᤶᤒᤠᤸᤗᤧ ᤆᤥᤃᤢᤸᤗᤧ ᤛᤢᤳᤌᤥ ᤏᤢ ᤛᤣᤛᤣᤒᤠ ᤜᤡᤱᤔᤴᤏᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤏᤠᤖᤢᤱᤅᤥ ᤘᤠ᤹ᤔᤠ ᤂᤡᤏᤡ᤹ ᤛᤢᤰᤛᤢᤰ ᤏᤡᤱᤘᤠ᤹ ᤆᤥᤃᤧᤶᤔᤧ᤹ᤀᤥ॥
2PE 3:15 ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤧᤴᤗᤵ ᤔᤧᤄᤥ᤺ᤛᤢᤖ ᤑᤠ᤹ᤀᤠᤱ ᤍᤠᤱᤒᤠᤸᤗᤧ ᤏᤠᤛᤡ ᤌ᤺ᤳᤋᤢᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤀᤠᤏᤡ᤹ ᤔᤡ᤺ᤶ ᤏᤢᤛᤠ᤹ ᤐᤠᤘᤗᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤥ᤺ᤛᤢᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤗᤠᤶ ᤁᤴ ᤐᤠ᤺ᤴᤜᤠ᤹ ᤛᤠᤵᤋᤢᤀᤠᤱ ᤁᤧᤜᤠᤰᤋᤡᤀᤠᤱ ᤘᤕᤧᤖᤥ॥
2PE 3:16 ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤐᤠᤘᤗᤖᤧ ᤒᤠ ᤀᤰᤂᤣᤗ᤹ᤖᤡᤰᤁᤣ ᤁᤢᤛᤰᤀᤡᤱᤄᤱᤜᤠ᤹ᤀᤥ ᤛᤠᤵᤋᤢᤀᤠᤱ ᤘᤕᤧ॥ ᤂᤢᤏᤧ᤹ ᤛᤠᤵᤋᤢᤒᤠ ᤁᤢᤓᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤛᤠᤰᤗᤥ॥ ᤌᤣᤀᤠᤱ ᤔᤧᤸᤗᤧᤔᤏᤠᤒᤠ ᤏᤢ ᤜᤡᤸᤗᤡᤰᤗᤡᤰᤐᤠ ᤔᤏᤠᤜᤠ᤹ᤖᤧᤃ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤒᤣ᤺ᤴ ᤔᤧᤗᤧᤰᤂᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤘᤣ᤹ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ᤖᤧ ᤁᤢᤒᤣ᤺ᤴᤏᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤗᤧᤰᤂᤢᤀᤠᤱ ᤔᤧᤘᤠ᤹॥ ᤜᤧᤰᤁᤣ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤰᤔᤠᤴ ᤀᤠᤒᤠᤅᤣ ᤔᤧᤍᤠᤖᤢᤖᤥ॥
2PE 3:17 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ᤃ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤑᤧᤴ ᤐᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤗᤧᤰᤁᤣ ᤐᤠ᤺ᤴᤏᤡᤸᤗᤧ ᤂᤡᤏᤡ᤹ ᤁᤧᤔᤧᤴᤓᤥ᤺ᤳᤋᤡᤴᤗ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤎᤢᤶᤒᤠ ᤏᤛᤠ᤺ᤴᤗᤠᤶ ᤁᤧᤴᤈᤥ᤺ᤴᤍᤡᤴᤗᤖᤥ॥
2PE 3:18 ᤁᤖ ᤀᤠᤏᤡ᤹ ᤍᤠᤱᤒᤠ ᤏᤢ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤀᤠᤒᤡᤒᤠ ᤏᤧᤜᤡᤏᤡᤱᤘᤠ᤹ᤀᤥ ᤏᤢ ᤁᤢᤗᤢᤱᤃᤢᤶᤔᤥ ᤐᤥ᤺ᤖᤧᤶᤔᤧ᤹ᤀᤥ॥ ᤀᤠᤸᤗᤥ ᤏᤢ ᤛᤍᤠᤍᤡᤱ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱ ᤐᤥ᤺ᤱᤗᤖᤥ᥄ ᤀᤠᤔᤧᤴ॥
1JO 1:1 ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤘᤕᤧᤒᤠ. ᤀᤠᤏᤡᤃᤧ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧᤒᤠ. ᤜᤧᤰᤁᤩᤠᤱ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤏᤡ᤺ᤛᤢᤶᤒᤧᤀᤠᤱ ᤘᤕᤡᤃᤧᤒᤠ. ᤏᤢ᤺ᤖᤡᤰᤁᤠᤱ ᤀᤥᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧᤒᤠ. ᤜᤧᤰᤁᤩᤠᤱ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤛᤢ᤺ᤛᤢᤶᤒᤧᤀᤠᤱ ᤘᤕᤡᤃᤧᤒᤠ ᤜᤡᤱᤔᤴ ᤁᤧᤒᤡᤒᤠ ᤐᤠ᤺ᤴᤈᤠᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤛᤰᤀᤡᤱᤄᤱ ᤜᤠᤰᤁᤠᤛᤡᤃᤧᤖᤥ॥
1JO 1:2 ᤂᤧᤴ ᤜᤡᤱᤔᤴᤏᤡᤴ ᤌᤠ᤺ᤶᤛᤡᤱ. ᤜᤧᤰᤁᤩᤠᤱ ᤀᤠᤏᤡᤃᤧ ᤏᤡ᤺ᤔᤏᤠᤀᤠᤱ ᤂᤧᤸᤗᤧᤴ ᤛᤠ᤺ᤰᤂᤡ ᤐᤡᤔᤏᤠᤖᤥ॥ ᤂᤢᤏᤧ᤹ᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ ᤑᤠ᤹ᤀᤠᤱ ᤂᤡᤏᤡ᤹ ᤔᤧᤳᤋᤠᤛᤡᤃᤧ᤹ᤖᤥ॥ ᤂᤢᤏᤧ᤹ᤃ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤕᤧ. ᤜᤧᤰᤁᤩᤠᤱ ᤀᤠᤏᤡᤃᤧᤀᤥ ᤌᤠ᤺ᤶᤛᤡᤱᤗᤥ॥
1JO 1:3 ᤂᤡᤏᤡ᤹ ᤀᤠᤏᤡᤃᤧᤏᤢ ᤛᤣᤛᤣ ᤋᤱᤈᤢᤶ ᤁᤧᤈᤥᤃᤢᤶᤗ ᤑᤠ᤹ᤀᤠᤱ ᤀᤠᤏᤡᤃᤧ ᤏᤡ᤺ᤔᤏᤠᤒᤠ ᤏᤢ ᤂᤧᤶᤔᤏᤠᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤋᤠᤛᤡᤃᤧᤒᤠᤖᤥ॥ ᤀᤠᤏᤡ᤹ ᤋᤱᤈᤢᤶᤔᤡᤱᤃ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤘᤠ᤹ᤖᤥ॥
1JO 1:4 ᤀᤠᤏᤡᤃᤧ ᤛ᤺ᤵᤔᤠᤴ ᤁᤢᤗᤡᤱᤎᤥ ᤁᤧᤳᤗ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤛᤠᤵᤋᤢᤶᤒᤧᤀᤠᤱ ᤜᤠᤰᤁᤠᤛᤡᤃᤧᤒᤠᤖᤥ॥
1JO 1:5 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤖᤥ. ᤂᤢᤏᤧ᤹ᤀᤥ ᤔᤡ᤺ᤛᤠᤰᤁᤠᤱ ᤂᤠᤍᤠᤶᤔᤠᤴ ᤜᤥ᤺ᤵᤗᤥ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴᤗᤠᤶ ᤂᤧᤵᤛᤢᤶᤒᤧᤀᤠᤱ ᤂᤡᤏᤡ᤹ ᤔᤧᤳᤋᤠᤛᤡᤃᤧᤀᤠᤱ ᤘᤠ᤹ᤖᤥ॥
1JO 1:6 ᤀᤠᤏᤡ᤹ ᤛᤣᤛᤣ ᤋᤱᤈᤢᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤠ᤹ ᤗ᤹ᤖᤡᤰ ᤀᤠᤒᤠ᤺ᤳᤋᤢᤶ ᤁᤖ ᤔᤠᤰᤆᤡᤃᤧᤴ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤗᤠᤕᤥᤀᤥ ᤀᤠᤘᤠ᤹ᤏᤧ ᤑᤠ᤹ᤃᤪ ᤀᤠᤏᤡ᤹ ᤀᤡᤱᤗᤧᤰ ᤐᤠ᤺ᤴ ᤀᤠᤒᤠ᤺ᤳ ᤜᤧᤰᤁᤩᤠᤱ ᤛᤧᤰᤂᤠᤀᤥ ᤀᤠᤴᤘᤠ᤹ᤏᤧᤴᤗᤥ॥
1JO 1:7 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤘᤠ᤹ᤒᤠ ᤁᤢᤀᤡᤛᤡ᤺ᤰ ᤀᤠᤏᤡ᤹ᤀᤠᤱ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤀᤠᤜᤡᤱᤗ ᤀᤠᤘᤠ᤹ᤏᤧ ᤑᤠ᤹ᤃᤪ ᤀᤠᤏᤡ᤹ ᤗᤢᤶᤔᤥ ᤛᤣᤛᤣ ᤋᤱᤈᤢᤶ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤀᤠᤏᤡ᤹ ᤁᤠᤰ ᤗᤠᤕᤥᤗᤠᤶ ᤛᤢᤳᤌᤥ ᤀᤠᤈᤥ᤺ᤰᤗᤥ॥
1JO 1:8 ᤁᤖ ᤀᤠᤏᤡ᤹ ᤗᤠᤕᤥ ᤔᤧ᤺ᤴᤏᤣ ᤀᤠᤘᤠ᤹ ᤗ᤹ᤖᤡᤰ ᤀᤠᤒᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ ᤀᤠᤒᤠᤅᤣ ᤀᤡᤱᤀᤠᤗᤧᤰᤛᤡᤱᤅᤠᤱ ᤛᤧᤰᤂᤠ᤺ᤴ ᤀᤠᤏᤡ᤹ᤀᤥ ᤜᤥ᤺ᤵᤗᤥ॥
1JO 1:9 ᤁᤖ ᤀᤠᤏᤡ᤹ ᤗᤠᤕᤥᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤒᤠ᤺ᤳᤋᤢᤶᤏᤧ ᤑᤠ᤹ᤃᤪ ᤗᤧᤵᤔᤡ ᤀᤠᤒᤡ᤹ᤖᤥ ᤜᤧᤰᤁᤩᤠᤱ ᤀᤠᤏᤡ᤹ ᤁᤠᤰ ᤑᤧᤴ ᤕᤠ᤺ᤶᤒᤰᤁᤥᤗᤠᤶ ᤛᤢᤳᤌᤥ ᤀᤠᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤛᤠ᤺ᤴᤛᤠᤒᤠ ᤏᤢ ᤛᤠᤶᤕᤥᤏᤡᤒᤠ ᤆᤥ᤺ᤰᤗᤥ॥
1JO 1:10 ᤀᤠᤏᤡ᤹ ᤗᤠᤕᤥ ᤔᤧᤴᤈᤥ᤺ᤰᤁᤣ ᤀᤠᤘᤠ᤹ ᤗ᤹ᤖᤡᤰ ᤀᤠᤒᤠ᤺ᤳᤋᤢᤶᤏᤧ ᤑᤠ᤹ᤃᤪ ᤂᤢᤏᤧ᤹ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤀᤠᤈᤥᤃᤢᤶᤔᤠᤱ ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤁᤡᤴ ᤀᤠᤏᤡ᤹ᤀᤥ ᤜᤥ᤺ᤵᤗᤥ॥
1JO 2:1 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤂᤡᤏᤡ᤹ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤁᤖ ᤁᤢᤓᤠᤖᤧ ᤗᤠᤕᤥ ᤔᤧᤈᤥᤃᤢᤛᤠᤱ ᤀᤠᤏᤡ᤹ ᤗᤠᤃᤡ ᤁᤧᤒᤠ᤺ᤵᤐᤠ ᤁᤧᤒᤡᤒᤠ ᤛᤠᤶᤕᤥᤏᤡᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤀᤠᤄᤥ᤺ᤛᤢᤶᤗ ᤑᤠ᤹ᤀᤠᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢ᤹ᤖᤥ॥
1JO 2:2 ᤀᤠᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤡᤍᤢᤱᤈᤓᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤕᤥᤖᤧ ᤗᤠᤃᤡᤖᤰᤃ ᤔᤧ᤺ᤴ. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤖᤧ ᤗᤠᤃᤡᤀᤠᤱ ᤂᤢᤏᤧ᤹ ᤛᤩᤧᤒᤠᤖᤥ॥
1JO 2:3 ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤂᤢᤏᤧ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶ ᤁᤧᤗ᤹ᤒᤠᤴ ᤛᤧᤰᤂᤠ ᤀᤠᤏᤡ᤺ᤛᤢᤶᤗᤥ॥
1JO 2:4 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤜᤠ᤹ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴᤏᤧ ᤑᤠ᤹ᤃᤪ ᤂᤧᤴ ᤔᤏᤠ᤺ᤴ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤖᤥ. ᤜᤧᤰᤁᤩᤠᤱ ᤂᤧᤸᤗᤥ ᤛᤧᤰᤂᤠ᤺ᤴ ᤜᤥ᤺ᤵᤗᤥ
1JO 2:5 ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤛᤠ᤹ᤖᤡᤰ ᤔᤡ᤺ᤶᤈᤡ ᤔᤧᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤘᤠ᤹ ᤁᤧᤗ᤹ᤒᤠᤴ ᤀᤠᤏᤡ᤺ᤛᤢᤶᤗᤥ॥
1JO 2:6 ᤏᤡᤱᤘᤠ᤹ᤑᤢᤔᤠᤱᤅᤥ ᤘᤠ᤹ᤀᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤁᤢᤀᤡᤛᤡ᤺ᤰ ᤆᤥᤃᤢᤖ ᤘᤠ᤹ᤖ ᤐᤥ᤺ᤱᤗᤥ॥
1JO 2:7 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤁᤴ ᤛᤠᤵᤋᤢᤱᤒᤠ ᤀᤡᤱᤈᤠ᤺ᤱᤅᤡᤴ ᤁᤢᤛᤱ ᤀᤡᤱᤈᤠ᤺ᤱᤃ ᤔᤧ᤺ᤴᤗᤥ॥ ᤁᤱᤃ ᤀᤢᤴᤇᤥ᤺ᤴᤏᤠᤱᤎᤥ ᤂᤡᤏᤡ᤹ᤏᤢᤀᤣ ᤁᤧᤘᤠ᤹ᤒᤠ ᤁᤧᤕᤢ᤺ᤒᤠ ᤀᤡᤱᤈᤠ᤺ᤱᤗᤥ॥ ᤁᤴ ᤀᤢᤴᤇᤥ᤺ᤴᤒᤠ ᤀᤡᤱᤈᤠ᤺ᤱᤅᤡᤱᤃ ᤁᤧᤄᤧᤵᤛᤢᤶ ᤁᤧᤛᤢᤖᤢᤶᤒᤠ ᤐᤠ᤺ᤴᤈᤠᤰᤗᤥ॥
1JO 2:8 ᤜᤧᤰᤁᤣᤛᤠᤱ ᤁᤴ ᤛᤠᤵᤋᤢᤱᤒᤠ ᤀᤡᤱᤈᤠ᤺ᤱᤅᤡᤱᤃ ᤁᤢᤛᤱ ᤜᤧᤰᤋᤱᤒᤠ ᤆᤥ᤺ᤰ–ᤂᤧᤸᤗᤧ ᤁᤢᤛᤧᤰᤂᤠ᤺ᤱᤃ ᤂᤪᤡᤛ᤻ᤋᤀᤥ ᤏᤢ ᤂᤡᤏᤡ᤹ᤀᤥ ᤏᤡᤎᤠ᤺ᤒᤧᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤴ ᤗᤧᤰ ᤐᤣ᤺ᤰᤗ ᤐᤳ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤋᤃᤡᤏᤢᤀᤣ ᤀᤥ᤺ᤳᤗ ᤘᤠ᤹ᤖᤥ॥
1JO 2:9 ᤀᤡᤱᤃᤠ᤹ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤘᤠ᤹ᤀᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤆᤡ᤺ᤳᤋᤢᤛᤡ᤹ᤏᤧ ᤑᤠ᤹ᤃᤪ ᤂᤧᤱᤃ ᤀᤠᤸᤗ ᤌᤠᤖᤡᤰᤛᤠᤱ ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤀᤣ ᤘᤠ᤹ᤖᤥ॥
1JO 2:10 ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤧᤱᤃ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤘᤠ᤹. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤁᤧᤄ᤺ᤒᤠ ᤐᤠ᤺ᤴ ᤂᤢᤏᤧ᤹ᤀᤥ ᤌᤣᤀᤠᤱ ᤜᤥ᤺ᤵᤗᤥ॥
1JO 2:11 ᤁᤖ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤁᤧᤈᤡ᤺ᤵᤐᤠᤱᤃ ᤂᤠᤍᤠᤶᤔᤥ ᤘᤠ᤹. ᤜᤧᤰᤁᤩᤠᤱ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤁᤡᤸᤗᤧ ᤂᤢᤏᤧ᤹ ᤀᤠᤳᤋᤠᤴ ᤗᤧᤵᤔᤠᤱ ᤐᤣ᤺ᤰᤗ ᤐᤳ ᤌᤣᤀᤠᤱ ᤏᤡᤱᤘᤠ᤹ ᤔᤧᤄᤥ᤺ᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤠᤸᤗᤧ ᤂᤧᤴ ᤂᤠᤔᤧᤴᤏᤡ᤺ᤔᤏᤠᤒᤠ ᤆᤥᤃᤢᤍᤣ᤺ᤛᤢᤀᤠᤱ ᤘᤠ᤹ᤖᤥ॥
1JO 2:12 ᤀᤠᤔᤡ᤺ᤶ ᤜᤡᤴᤈᤠ᤹ᤒᤡᤳᤇᤠᤛᤣ. ᤂᤪᤡᤛ᤻ᤋᤖᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤗᤠᤶ ᤂᤡᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
1JO 2:13 ᤐᤠᤏᤢᤍᤡᤱ ᤐᤠ᤺ᤛᤣ. ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤌᤠᤱᤒᤧᤴ ᤔᤧᤴᤇᤡᤕᤠ᤹ᤛᤣ. ᤔᤠᤑᤧᤴᤛᤠᤶᤔᤡᤴ ᤂᤡᤏᤡ᤹ ᤁᤧᤏᤠ᤺ᤴᤍᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
1JO 2:14 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤐᤠᤏᤢᤍᤡᤱ ᤐᤠ᤺ᤛᤣ. ᤋᤥᤗᤡᤱᤛᤥᤔᤢᤀᤠᤱᤎᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤌᤠᤱᤒᤧᤴ ᤔᤧᤴᤇᤡᤕᤠ᤹ᤛᤣ. ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤈᤥᤃᤡ᤹. ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤘᤠ᤹. ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤁᤧᤏᤠ᤺ᤴᤍᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
1JO 2:15 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤆᤡᤃ᤺ᤰᤘᤠᤜᤠ᤹ ᤔᤡ᤺ᤶᤈᤡ ᤔᤧᤔᤧᤳᤋᤧᤶᤔᤡᤴᤏᤧ᤹ᤀᤥ॥ ᤀᤠᤳᤋᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤡ᤺ᤶᤈᤡ ᤔᤧᤳᤋᤢ᤹. ᤂᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥
1JO 2:16 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤕᤥᤒᤠ ᤕᤠᤶᤏᤡᤱᤘᤠ᤹ᤀᤡᤴ. ᤔᤡᤰᤗᤥ ᤗᤠᤶᤔᤠᤴ. ᤜᤧᤰᤁᤩᤠᤱ ᤁᤵᤔᤏᤠᤒᤠ ᤏᤢ ᤆᤥ᤺ᤰᤔᤏᤠᤒᤠ ᤐᤠ᤺ᤴᤏᤥ ᤜᤧᤴᤇᤡᤱᤔᤠᤴ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤔᤧᤍᤠᤏᤧᤴ. ᤁᤖ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶᤒᤠᤏᤧ ᤋᤠ᤺ᤖᤥ॥
1JO 2:17 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣ᤺ᤰ. ᤜᤧᤰᤁᤩᤠᤱ ᤂᤧᤸᤗᤧ ᤆᤥᤃᤢᤱ ᤑᤠ᤹ᤀᤠᤱ ᤀᤡ᤺ᤳᤋᤢ ᤛᤥ᤺ᤰᤋᤢᤒᤠ ᤐᤠ᤺ᤴᤜᤠ᤹ᤀᤠᤱ ᤗᤧᤰᤁᤠᤱ ᤐᤣ᤺ᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤁᤧᤈᤥ᤺ᤰᤐᤠᤱᤃ ᤛᤍᤠᤍᤡᤱ ᤘᤠ᤹ᤖᤥ॥
1JO 2:18 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤁᤢᤏᤢᤵᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤅᤡᤱᤃ ᤋᤠ᤺ ᤗ᤹ᤖᤡᤰ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹॥ ᤀᤠᤸᤗᤥᤛᤠ ᤂᤧᤴ ᤜᤧᤰᤋᤱᤒᤠ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤜᤠ᤹ ᤕᤖᤡᤰ ᤔᤧᤍᤩᤧ ᤔᤧᤈᤢᤖᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤥᤗᤠᤶ ᤁᤢᤏᤢᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1JO 2:19 ᤂᤧᤱᤜᤠ᤹ᤃ ᤀᤠᤏᤡ᤹ᤗᤠᤶ ᤔᤧᤗ᤺ᤴᤍᤧ ᤔᤧᤒᤣ. ᤁᤖ ᤛᤧᤰᤂᤠ᤺ᤸᤗᤧᤃ ᤂᤧᤱᤜᤠ᤹ ᤀᤠᤏᤡ᤹ ᤔᤏᤠᤜᤠ᤹ ᤔᤧᤴᤘᤕᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ ᤔᤏᤠᤜᤠ᤹ ᤔᤧᤘᤕᤧᤸᤗᤧᤃ ᤂᤧᤱᤜᤠ᤹ ᤀᤠᤏᤡ᤹ᤏᤢᤀᤣ ᤔᤧᤕᤠ᤺ᤰᤋᤧᤒᤠ ᤔᤧ᤺ᤴᤗᤥ॥ ᤁᤖ ᤂᤧᤱᤜᤠ᤹ᤖᤧ ᤐᤰᤀᤠᤶᤎᤩᤧᤀᤠᤱ ᤔᤧᤒᤣᤒᤠᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤀᤠᤏᤡ᤹ᤜᤠ᤹ ᤔᤧ᤺ᤴᤇᤡ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ॥
1JO 2:20 ᤁᤖ ᤂᤡᤏᤡ᤹ᤃ ᤛᤣᤛᤣᤒᤠ ᤂᤪᤡᤛ᤻ᤋᤖᤧ ᤛᤣᤛᤣᤔᤠᤱ ᤁᤧᤒᤡᤖᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤛᤧᤰᤂᤠ᤺ᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
1JO 2:21 ᤂᤡᤏᤡ᤹ ᤛᤧᤰᤂᤠ᤺ᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤧᤰᤂᤠ᤺ᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶ ᤑᤠ᤹ᤀᤠᤱ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗᤥ॥ ᤜᤧᤰᤁᤩᤠᤱ ᤗᤳᤇᤠ ᤀᤡᤱᤗᤧᤰ ᤐᤠ᤺ᤴᤎᤡᤰᤁᤠᤱ ᤛᤧᤰᤂᤠᤗᤠᤶ ᤔᤧᤍᤠᤏᤧᤴ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥
1JO 2:22 ᤀᤡᤱᤃᤧᤗᤧᤰᤐᤧᤴ ᤜᤠ᤺ᤵᤐᤣ᥅ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧ᤺ᤴ ᤑᤠ᤹ᤀᤠᤱ ᤁᤧᤒᤠ᤺ᤵᤐᤧᤴᤏᤣ ᤀᤡᤱᤗᤧᤰᤐᤠᤖᤥ॥ ᤀᤠᤳᤋᤡᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤏᤠ᤹ᤖᤢᤛᤡ᤹ ᤒᤠ ᤂᤧᤴᤏᤣ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤒᤠᤖᤥ॥
1JO 2:23 ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤁᤧᤏᤠ᤹ᤒᤧᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤹ᤖᤢ᤹. ᤁᤖ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤋᤧᤴᤍᤡᤱ ᤆᤥᤃᤢ᤹ᤖᤥ॥
1JO 2:24 ᤜᤧᤰᤁᤣ᤺ᤸᤗᤧ ᤏᤛᤠᤏᤡᤒᤠ ᤁᤧᤒᤥ᤺ᤰᤂᤡᤀᤠᤱᤎᤥᤀᤣ ᤁᤧᤄᤧᤵᤛᤢᤶᤒᤠ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ ᤛᤡᤰᤗᤢᤱᤔᤥ ᤏᤢ᤺ᤖᤡᤰᤁᤠᤱ ᤕᤢᤰᤂᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤕᤢᤰᤂᤢᤶᤏᤧ ᤑᤠ᤹ᤃᤪ ᤛᤍᤠᤍᤡᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴᤏᤢ ᤛᤥᤖᤡᤰ ᤁᤧᤘᤕᤡ᤹ᤖᤥ॥
1JO 2:25 ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤐᤡᤏᤡᤱ ᤑᤠ᤹ᤀᤠᤱ ᤆᤥᤃᤢᤒᤠ ᤔᤠᤱᤜᤧᤰᤁᤡᤱᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥
1JO 2:26 ᤀᤡᤱᤃᤠ᤹ᤃ ᤂᤡᤏᤡ᤹ ᤀᤡᤱᤗᤧᤰ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤅᤠᤱ ᤘᤠ᤹ᤖᤥ॥
1JO 2:27 ᤁᤖ ᤂᤡᤏᤡ᤹ᤀᤥᤃ ᤂᤪᤡᤛ᤻ᤋᤖᤧ ᤁᤧᤒᤡᤖᤡᤒᤠ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤎᤢᤰᤏᤠ᤺ᤴ ᤘᤠ᤹ ᤕᤠ᤺ᤰᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤜᤢ᤹ᤒᤠ ᤜᤠ᤺ᤳᤋᤠᤱ ᤆᤠᤜᤠᤒᤠ ᤁᤧᤴᤈᤥᤃᤡᤴ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤜᤢ᤹ᤖᤡ᤹॥ ᤂᤧᤴ ᤁᤧᤜᤢ᤹ᤖᤡᤒᤠ ᤐᤠ᤺ᤴᤏᤡᤱᤃ ᤀᤡᤱᤗᤧᤰ ᤔᤧ᤺ᤴᤗᤥ. ᤁᤖ ᤛᤧᤰᤂᤠᤀᤣᤖᤥ॥ ᤜᤧᤰᤁᤣ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤧᤜᤢ᤹ᤖᤡᤒᤠ ᤏᤡᤛᤠᤶᤔᤡᤴ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤀᤠᤱ ᤂᤪᤡᤛ᤻ᤋᤧᤴ ᤔᤧᤸᤗᤧᤳᤋᤣ ᤘᤕᤧᤶᤔᤧ᤹ᤀᤥ॥
1JO 2:28 ᤀᤠᤸᤗ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤕᤧᤛᤢ᤺ᤴ ᤕᤢ᤺ᤸᤗᤧ ᤔᤧᤱᤃᤡᤀᤣ ᤏᤢ ᤛᤡᤖᤡᤱ ᤔᤧᤶᤔᤀᤣ ᤂᤢᤏᤧ᤹ᤀᤥ ᤋᤥ᤺ᤴᤇᤡᤱᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤪᤡᤛ᤻ᤋᤧᤴ ᤔᤧᤸᤗᤧᤳᤋᤣ ᤘᤕᤧᤶᤔᤧ᤹ᤀᤥ॥
1JO 2:29 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤏᤡᤒᤠ ᤆᤥ᤺ᤰ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥ ᤜᤧᤰᤁᤣ᤺ᤸᤗᤧ ᤁᤠᤰ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤴ ᤏᤡᤱᤘᤠ᤹ᤑᤢᤛᤠ᤺ ᤐᤥ᤺ᤰᤂᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴᤏᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥
1JO 3:1 ᤀᤥᤔᤧᤳᤋᤧᤶᤔᤧ᤹ᤀᤥ᥄ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤰᤂᤧᤴ ᤕᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹᥄ ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤐᤠᤸᤗᤧ ᤆᤥᤃᤢᤸᤗᤧ ᤀᤠᤛ᤻ᤛᤠ᤺ᤏᤡᤱᤗᤥ ᤑᤠ᤹ᤀᤠᤱ ᤀᤠᤏᤡ᤹ ᤀᤠᤔᤧᤳᤗᤥ॥ ᤀᤠᤏᤡ᤹ᤃ ᤛᤧᤰᤂᤠᤀᤣ ᤁᤢᤛ᤻ᤛᤠ᤺ᤛᤡᤀᤣᤖᤥ᥄ ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤏᤡ᤹ᤀᤠᤱ ᤁᤢᤛᤡᤱ ᤀᤠᤔᤧᤴᤏᤡ᤺ᤳᤏᤧᤴᤗᤥ॥
1JO 3:2 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤸᤗᤥ ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ॥ ᤜᤧᤰᤁᤣᤛᤠᤱ ᤌᤣ ᤀᤠᤒᤥ᤺ᤱ ᤑᤠ᤹ᤀᤠᤱ ᤏᤢ᤺ᤖᤡᤰᤁᤠᤱ ᤔᤧᤴᤎᤠ᤺ᤵᤐᤣ ᤘᤠ᤹ᤖᤥ॥ ᤁᤖ ᤂᤪᤡᤛ᤻ᤋᤧᤴ ᤏᤢ᤺ᤱ ᤕᤢ᤺ᤸᤗᤧ ᤀᤠᤏᤡ᤹ᤃ ᤂᤢᤏᤧ᤹ ᤁᤢᤀᤡᤛᤡ᤺ᤰᤁᤣ ᤀᤠᤒᤥ᤺ᤱ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤀᤠᤰᤋᤱᤒᤠ ᤆᤥ᤺ᤰ ᤜᤧᤰᤋᤱᤒᤠᤀᤣ ᤀᤠᤏᤡ᤺ᤛᤢᤶᤗᤥ॥
1JO 3:3 ᤜᤧᤰᤁᤣ᤺ᤸᤗᤧ ᤂᤪᤡᤛ᤻ᤋᤀᤥ ᤂᤧᤴ ᤜᤧᤰᤋᤱᤒᤠ ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤁᤠᤰᤗᤧ ᤂᤪᤡᤛ᤻ᤋᤧᤴ ᤛᤣᤛᤣ ᤆᤥ᤺ᤰᤐᤠ ᤁᤢᤀᤡᤛᤡ᤺ᤰ ᤀᤠᤒᤠᤅᤣ ᤛᤣᤛᤣ ᤔᤧᤈᤥ᤺ᤰᤛᤡᤱᤗᤥ॥
1JO 3:4 ᤗᤠᤕᤥ ᤁᤧᤈᤥ᤺ᤰᤐᤠ ᤁᤠᤰᤗᤧ ᤛᤠᤶᤕᤥᤌᤡᤶᤔᤡᤴ ᤔᤧᤓᤣ᤺ᤴᤍᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤗᤠᤕᤥ᤺ᤴᤏᤣ ᤛᤠᤶᤕᤥᤌᤡᤶᤔᤡᤴ ᤑᤣ᤺ᤔᤏᤠᤒᤠᤖᤥ॥
1JO 3:5 ᤀᤠᤏᤡ᤹ ᤗᤠᤕᤥ᤺ᤴ ᤂᤧᤵᤔᤠᤖᤧ ᤗᤠᤃᤡ ᤂᤪᤡᤛ᤻ᤋᤧᤴ ᤕᤧᤒᤠᤱᤃ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤥ ᤗᤠᤕᤥ ᤜᤥ᤺ᤵᤗᤥ॥
1JO 3:6 ᤜᤧᤰᤁᤣ᤺ᤸᤗᤧ ᤀᤠᤳᤋᤡᤴ ᤂᤪᤡᤛ᤻ᤋᤀᤥ ᤘᤠ᤹. ᤂᤧᤸᤗᤧ ᤗᤠᤕᤥ ᤆᤥᤃᤢᤖ ᤔᤧᤘᤠ᤹ᤏᤧᤴᤗᤥ॥ ᤁᤖ ᤀᤠᤳᤋᤡᤸᤗᤧ ᤗᤠᤕᤥ ᤆᤥᤃᤢᤖ ᤘᤠ᤹. ᤂᤧᤸᤗᤧ ᤂᤢᤏᤧ᤹ ᤔᤧᤴᤏᤡᤀᤣ ᤏᤢ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤠ᤹ᤖᤥ॥
1JO 3:7 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤡᤏᤡ᤹ ᤀᤡᤱᤃᤧᤔᤧᤸᤗᤧᤰᤋᤡᤴᤗᤖᤥ॥ ᤀᤠᤳᤋᤡᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤆᤥᤃᤢ᤹ ᤂᤧᤱᤃ ᤂᤪᤡᤛ᤻ᤋᤧᤴ ᤁᤢᤀᤡᤛᤡ᤺ᤰ ᤛᤠᤶᤕᤥᤏᤡᤒᤠ ᤐᤥ᤺ᤱᤗᤥ॥
1JO 3:8 ᤗᤠᤕᤥ ᤁᤧᤈᤥ᤺ᤰᤐᤠᤖ ᤁᤧᤘᤠ᤹ᤒᤠ ᤔᤏᤠ᤺ᤱᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤏᤠᤖᤥ. ᤌᤣᤀᤠᤱᤓᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤗᤠᤕᤥ ᤆᤥᤃᤢᤖ ᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤴ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤔᤧᤱᤛᤧ ᤕᤧᤒᤠᤖᤥ॥
1JO 3:9 ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤢᤛᤱ ᤗ᤹ᤖᤡᤰ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤠᤳᤋᤡᤸᤗᤧᤀᤠᤱ ᤗᤠᤕᤥ ᤆᤥᤃᤢᤖ ᤔᤧᤘᤠ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤥᤛᤪᤱᤅᤡᤴ ᤂᤢᤏᤧ᤹ᤀᤥ ᤘᤠ᤹ᤖᤥ॥ ᤂᤢᤏᤧ᤹ ᤗᤠᤕᤥ ᤆᤥ᤺ᤰᤁᤡ ᤘᤠ᤹ᤔᤠ ᤔᤧᤛᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤘᤠ᤺ᤴᤇᤡᤱᤅᤠᤱ ᤘᤠ᤹ᤖᤥ॥
1JO 3:10 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤏᤢ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤛ᤻ᤛᤠ᤺ᤜᤠ᤹ᤀᤥ ᤔᤧᤴᤍᤱᤔᤏᤠ ᤐᤠ᤺ᤴᤏᤡᤴ ᤀᤠᤶᤓᤠ ᤁᤴᤗᤥ–ᤀᤠᤳᤋᤡᤸᤗᤧ ᤛᤠᤶᤕᤥᤌᤡᤶ ᤁᤢᤀᤡᤛᤡ᤺ᤰ ᤏᤢ᤺ᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴ ᤜᤧᤰᤁᤩᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴ ᤂᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ ᤔᤧ᤺ᤴᤗᤥ॥
1JO 3:11 ᤀᤠᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱ ᤁᤧᤗ᤹ᤒᤠ ᤀᤡᤱᤄᤱᤅᤡᤱᤃ ᤋᤃᤡᤀᤠᤱᤎᤥᤀᤣ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹ᤖᤥ॥
1JO 3:12 ᤂᤡᤏᤡ᤹ᤃ ᤁᤕᤡᤏᤧᤴ ᤜᤧᤰᤁᤣ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹ᤀᤥ॥ ᤂᤧᤱᤃ ᤔᤠᤑᤧᤴᤛᤠᤶᤔᤡᤸᤗᤧᤴ ᤘᤕᤧᤀᤠᤱ ᤂᤧᤸᤗᤧ ᤀᤠᤒᤠᤅᤣ ᤁᤢᤴᤛᤠ᤹ᤀᤡᤴ ᤛᤧᤖᤢᤖᤥ॥ ᤌᤣᤀᤠᤱ ᤛᤧᤖᤢᤒᤠᤓᤧᤸᤗᤧ ᤂᤧᤸᤗᤧ ᤀᤠᤒᤠᤅᤣ ᤁᤢᤕᤠ᤺ᤶᤒᤰᤜᤠ᤹ ᤋᤠᤵᤑᤧ᤺ᤶᤒᤠ ᤆᤥᤃᤧ. ᤁᤖ ᤁᤢᤴᤛᤠ᤹ᤖᤧ ᤁᤢᤕᤠ᤺ᤶᤒᤰᤜᤠ᤹ ᤛᤠᤶᤕᤥᤏᤡᤒᤠ ᤆᤥᤃᤧ॥
1JO 3:13 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥
1JO 3:14 ᤀᤠᤏᤡ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤃ ᤛᤡ᤺ᤔᤧᤴᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤀᤠᤈᤳᤇᤡᤱᤅᤠᤱ ᤀᤠᤘᤠ᤹ ᤑᤠ᤹ᤀᤠᤱ ᤀᤠᤏᤡ᤺ᤛᤢᤶᤗᤥ॥ ᤁᤖ ᤀᤠᤳᤋᤡᤸᤗᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴ. ᤂᤧᤱᤃ ᤀᤠᤸᤗᤥᤛᤠᤱ ᤛᤡ᤺ᤔᤧᤴᤏᤥᤀᤣ ᤘᤠ᤹ᤖᤥ॥
1JO 3:15 ᤀᤠᤳᤋᤡᤸᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤆᤡ᤺ᤳᤋᤢᤛᤡ᤹. ᤂᤧᤱᤃ ᤔᤏᤠ ᤁᤧᤛᤧᤵᤐᤠᤖᤥ॥ ᤜᤧᤰᤁᤩᤠᤱ ᤔᤏᤠ ᤁᤧᤛᤧᤵᤐᤠ ᤁᤧᤖᤧᤰᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤔᤧᤱᤄᤥ᤺ᤛᤢᤴ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡ᤺ᤛᤢᤶᤗᤥ॥
1JO 3:16 ᤕᤧᤛᤢ ᤂᤪᤡᤛ᤻ᤋᤧᤱᤃ ᤀᤠᤏᤡ᤹ ᤗᤧᤰᤘᤠ ᤛᤩᤧᤒᤠᤸᤗᤧ ᤛᤧᤰᤂᤠᤒᤠ ᤔᤡ᤺ᤶᤈᤡᤴ ᤀᤠᤰᤋᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ ᤀᤠᤏᤡ᤹ᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤛᤡ᤺ᤔᤠᤀᤠᤱ ᤕᤠᤖᤡᤵ ᤐᤥ᤺ᤱᤔᤠ ᤐᤥ᤺ᤱᤗᤥ॥
1JO 3:17 ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤃᤵᤐᤠ ᤔᤏᤠ᤺ᤸᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤱ ᤔᤧᤘᤠ᤹ᤒᤠ ᤏᤡ᤺ᤛᤢᤛᤠᤱ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡᤴᤏᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤧᤴ ᤔᤏᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤴ ᤘᤠ᤹ᤒᤣ᥅
1JO 3:18 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤀᤠᤏᤡ᤹ᤃ ᤐᤠ᤺ᤴᤏᤥ ᤏᤢ ᤔᤢᤖᤠ᤺ᤸᤗᤧᤖᤰ ᤗᤢᤱᤔᤠ᤹ ᤋᤢᤰᤁᤠᤛᤡ ᤔᤧ᤺ᤴᤗᤥ॥ ᤀᤠᤏᤡ᤹ ᤛᤧᤰᤂᤠ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱᤗᤥ॥ ᤜᤧᤰᤋᤱᤒᤠ ᤗᤢᤱᤔᤠ᤹ ᤋᤢᤰᤛᤡᤱᤔᤠᤴ ᤕᤠ᤺ᤶᤒᤰᤁᤥᤗᤠᤶ ᤏᤡ᤺ᤍᤧᤳᤗᤥ॥
1JO 3:19 ᤀᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤁᤠᤛᤡᤏᤧ ᤑᤠ᤹ᤃᤪ ᤀᤠᤏᤡ᤹ᤃ ᤛᤧᤰᤂᤠ᤺ᤸᤗᤧ ᤁᤢᤔᤏᤠᤛᤡ ᤑᤠ᤹ᤀᤠᤱ ᤀᤠᤏᤡ᤺ᤛᤢᤶᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤏᤡᤱᤘᤠ᤹ᤀᤡᤸᤗᤧᤀᤣ ᤐᤠ᤺ᤴ ᤀᤠᤎᤡᤰᤛᤠᤱ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤋᤥ᤺ᤴᤇᤡᤱᤔᤠ ᤀᤠ᤺ᤴᤇᤡᤱᤃᤧᤴ ᤜᤠᤱᤜᤠᤱ ᤀᤠᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤀᤠᤏᤡ᤹ ᤏᤡᤱᤘᤠ᤹ᤏᤢ᤺ᤸᤗᤧᤀᤠᤱ ᤐᤕᤶ ᤕᤶᤒᤠ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡ᤺ᤛᤢᤖᤥ॥
1JO 3:21 ᤜᤧᤰᤁᤣ᤺ᤸᤗᤧ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ ᤏᤡᤱᤘᤠ᤹ᤀᤡᤸᤗᤧᤀᤣ ᤐᤠ᤺ᤴ ᤀᤠᤴᤎᤡᤰᤏᤧᤴᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤜᤠᤱᤜᤠᤱᤅᤠᤱ ᤀᤠᤏᤡ᤹ ᤋᤠ᤺ᤔᤠ ᤀᤠᤛᤢᤰᤗᤥ॥
1JO 3:22 ᤜᤧᤰᤁᤩᤠᤱ ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤒᤠ ᤏᤢ ᤂᤢᤏᤧ᤹ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤕᤠ᤺ᤶᤒᤰ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤀᤠᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤀᤠᤒᤡ᤹ᤖᤥ॥
1JO 3:23 ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤅᤡᤱᤃ ᤒᤠ ᤁᤴᤗᤥ–ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤏᤛᤠ᤺ᤴ ᤆᤥ᤺ᤰᤔᤠ ᤐᤥ᤺ᤱ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤡᤖᤧᤒᤠ ᤀᤡᤱᤈᤠ᤺ᤱ ᤁᤢᤀᤡᤛᤡ᤺ᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱᤗᤥ॥
1JO 3:24 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱᤅᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤘᤠ᤹ ᤜᤧᤰᤁᤩᤠᤱ ᤂᤧᤸᤗᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤠ᤹ᤖᤥ॥ ᤀᤠᤏᤡ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤠ᤹ ᤑᤠ᤹ᤀᤠᤱ ᤂᤢᤏᤧ᤹ ᤀᤠᤒᤡᤖᤧᤒᤠ ᤛᤣᤛᤣᤔᤠᤱᤗᤠᤶ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1JO 4:1 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤕᤖᤡᤰ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤔᤧᤗ᤺ᤴᤍᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤛᤣᤛᤣᤔᤠᤱᤗᤠᤶ ᤐᤠ᤺ᤳᤋᤠ ᤁᤧᤗ᤹ᤒᤠᤜᤠ᤹ ᤁᤠᤰ ᤏᤛᤠ᤺ᤴ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ. ᤁᤖ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠᤛᤡᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤛᤠ᤹ᤖᤧᤶᤛᤡᤶᤔᤧ᤹ᤀᤥ॥
1JO 4:2 ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠᤛᤡᤒᤡ ᤔᤧ᤺ᤶᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤔᤠ ᤁᤧᤛᤢᤰᤋᤢᤶᤗᤥ–ᤜᤠ᤺ᤳᤗᤧ ᤕᤧᤛᤢ ᤂᤪᤡᤛ᤻ᤋᤧᤴ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤐᤥ᤺ᤰᤂᤧᤀᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤋᤩᤧ ᤗ᤹ᤖᤡᤰ ᤋᤧᤴᤍᤡᤱ ᤆᤥᤃᤢ᤹. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠ᤺ᤒᤠᤖᤥ॥
1JO 4:3 ᤁᤖ ᤜᤠ᤺ᤳᤗᤧ ᤕᤧᤛᤢ ᤂᤪᤡᤛ᤻ᤋᤧᤴ ᤏᤠᤛᤡᤱᤃᤧᤴ ᤌᤰᤁᤥ ᤋᤩᤧ ᤗ᤹ᤖᤡᤰ ᤋᤧᤴᤍᤡᤱ ᤔᤧᤈᤥᤃᤢᤴ. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤧ᤺ᤴ. ᤁᤖ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤒᤠᤸᤗᤧ ᤁᤢᤛᤠᤶᤗᤠᤶᤒᤠ ᤋᤩᤧᤒᤠᤖᤥ॥ ᤂᤧᤱᤃ ᤋᤠ᤺ ᤁᤧᤗ᤹ᤒᤠᤴ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤃᤡᤛᤠ ᤂᤧᤱᤃ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥
1JO 4:4 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤏᤡᤱᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤏᤠ᤺ᤴᤍᤢᤶᤛᤡᤶᤔᤠᤱ ᤁᤧᤘᤕᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤀᤥ ᤁᤧᤘᤠ᤹ᤒᤠ ᤛᤣᤛᤣᤔᤠᤱᤅᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤀᤥ ᤁᤧᤘᤠ᤹ᤒᤠᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥ᤺ᤰᤗᤥ॥
1JO 4:5 ᤂᤧᤱᤜᤠ᤹ᤃ ᤀᤡᤰᤛᤠᤀᤥᤒᤠᤛᤡᤖᤥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤐᤠ᤺ᤴᤏᤣ ᤔᤧᤒᤠ᤺ᤳᤋᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧᤀᤣ ᤔᤧᤄᤧᤵᤛᤢ᤹ᤖᤥ॥
1JO 4:6 ᤁᤖ ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤛᤡᤖᤥ॥ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢ᤹. ᤂᤧᤸᤗᤧ ᤀᤠᤏᤡ᤹ ᤐᤠ᤺ᤴᤏᤡᤴ ᤂᤧᤵᤛᤢ᤹. ᤁᤖ ᤀᤠᤳᤋᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤔᤧ᤺ᤴ. ᤂᤧᤸᤗᤧ ᤀᤠᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴᤗᤥ॥ ᤀᤰᤂᤣᤗ᤹ᤖᤡᤰ ᤛᤧᤰᤂᤠ ᤁᤧᤒᤠ᤺ᤵᤐᤠ ᤛᤣᤛᤣᤔᤠᤱᤅᤡᤴ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠ ᤛᤠᤶᤔᤡᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1JO 4:7 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ᤃ ᤗᤢᤱᤔᤠ᤹ ᤋᤢᤰᤁᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤔᤏᤠ ᤗᤢᤱᤔᤠ᤹ ᤋᤢᤰᤔᤠᤱᤃ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤠ᤺ᤖᤥ॥ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤧᤱᤃ ᤏᤡᤱᤘᤠ᤹ᤑᤢᤛᤠ᤺ᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥
1JO 4:8 ᤀᤠᤳᤋᤡᤸᤗᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤴᤇᤡᤴ. ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤔᤏᤠ ᤗᤢᤱᤔᤠ᤹ ᤁᤧᤍᤢᤰᤐᤠ ᤆᤥ᤺ᤰᤗᤥ॥
1JO 4:9 ᤂᤢᤏᤧ᤹ᤃ ᤀᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ᤖᤥ–ᤀᤠᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤄᤥ᤺ᤛᤢᤶᤗ ᤑᤠ᤹ᤀᤠᤱ ᤌᤡᤰᤗᤰ ᤁᤧᤘᤠ᤹ᤒᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢ᤺ᤛᤢᤖᤥ॥
1JO 4:10 ᤛᤧᤰᤂᤠᤒᤠ ᤔᤡ᤺ᤶᤈᤡ᤺ᤱᤃ ᤒᤠ ᤁᤴᤗᤥ–ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤀᤠᤔᤧᤳᤋᤢᤶᤒᤠ ᤔᤧ᤺ᤴ. ᤁᤖ ᤂᤢᤏᤧ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤀᤠᤏᤡ᤹ ᤗᤠᤕᤥᤖᤧ ᤂᤢᤶᤍᤡᤱᤅᤡᤸᤗᤧ ᤁᤢᤗᤧᤰᤘᤠᤀᤥ ᤛᤡᤍᤢᤱᤈᤓᤠ ᤐᤥ᤺ᤱᤔᤠᤖᤧ ᤗᤠᤃᤡ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢ᤺ᤛᤢᤖᤥ॥
1JO 4:11 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤶᤔᤩᤠᤰ ᤛᤠ᤹ᤖᤡᤰ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ᤀᤡᤸᤗᤧ ᤀᤠᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤛᤡᤱᤔᤠᤀᤣ ᤐᤥ᤺ᤱᤗᤥ॥
1JO 4:12 ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤘᤠ᤹ᤖᤥ॥ ᤁᤖ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤛᤡᤱᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤀᤥ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤀᤠᤏᤡ᤹ᤀᤥ ᤔᤏᤠᤜᤠ᤹ᤖᤧ ᤔᤧᤏᤡ᤺ᤛᤢ᤹ᤖᤥ॥
1JO 4:13 ᤂᤢᤏᤧ᤹ ᤁᤢᤛᤣᤛᤣᤔᤠᤱᤅᤡᤴ ᤀᤠᤏᤡ᤹ ᤀᤠᤒᤡᤖᤧᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤏᤡ᤹ᤀᤥ ᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1JO 4:14 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ ᤐᤥ᤺ᤱᤔᤠᤖᤧ ᤗᤠᤃᤡ ᤐᤠᤱᤄᤢ ᤕᤢ᤺ᤛᤢᤒᤠ ᤐᤠ᤺ᤴᤏᤡᤱᤃ ᤀᤠᤏᤡᤃᤧ ᤏᤡ᤺ᤛᤢᤶᤒᤧᤀᤠᤱ ᤀᤡᤱᤓᤥ᤺ᤛᤢᤶᤒᤧᤖᤥ॥
1JO 4:15 ᤀᤠᤳᤋᤡᤸᤗᤧ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤛᤠ᤺ ᤑᤠ᤹ᤀᤠᤱ ᤋᤧᤴᤍᤡᤱ ᤆᤥᤃᤢ᤹. ᤂᤢᤏᤧ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤘᤠ᤹ ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤘᤠ᤹ᤖᤥ॥
1JO 4:16 ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶ ᤜᤧᤰᤁᤩᤠᤱ ᤏᤛᤠ᤺ᤴ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤔᤡ᤺ᤶᤈᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤘᤣ᤹ ᤔᤏᤠᤜᤠ᤹ ᤆᤰᤔᤧᤸᤗ᤹ᤀᤣ ᤔᤡ᤺ᤶᤈᤡ ᤁᤧᤔᤧᤵᤐᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤘᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤀᤥ ᤘᤠ᤹ᤖᤥ॥
1JO 4:17 ᤀᤠᤏᤡ᤹ᤀᤥ ᤔᤡ᤺ᤶᤈᤡᤴ ᤁᤢᤗᤡᤱᤎᤥ ᤁᤧᤳᤋᤡᤸᤗᤧ ᤀᤠᤏᤡ᤹ ᤂᤠᤛᤧᤴ ᤕᤧᤴᤏᤥ ᤜᤠᤱᤜᤠᤱᤅᤠᤱ ᤘᤠ᤹ᤔᤠ ᤀᤠᤛᤢᤰᤗᤥ॥ ᤌᤣᤀᤠᤱᤓᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤏᤡ᤹ᤀᤠᤱ ᤂᤪᤡᤛ᤻ᤋᤧᤴ ᤁᤢᤀᤡᤛᤡ᤺ᤰ ᤀᤠᤈᤥ᤺ᤰᤗᤥ॥
1JO 4:18 ᤔᤡ᤺ᤶᤈᤡᤀᤥᤃ ᤁᤡ᤺ᤔᤠ ᤕᤱᤔᤠ ᤜᤥ᤺ᤵ॥ ᤁᤖ ᤁᤢᤗᤡᤱᤎᤥ ᤁᤧᤃᤧᤵᤐᤠ ᤔᤡ᤺ᤶᤈᤡ᤺ᤸᤗᤧ ᤁᤧᤖᤧᤰ ᤁᤡ᤺ᤔᤠ ᤕᤱᤔᤠᤴ ᤂᤧᤳᤋᤢᤍᤣ᤺ᤛᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤡ᤺ᤔᤠ ᤕᤱᤔᤠᤱᤃ ᤂᤢᤶᤍᤡᤱᤅᤡᤸᤗᤧ ᤋᤠᤖᤢ᤹ᤖᤥ॥ ᤀᤠᤳᤋᤡᤴ ᤔᤏᤠ᤺ᤴ ᤁᤡ᤹᤺. ᤂᤧᤱᤃ ᤔᤡ᤺ᤶᤈᤡᤀᤥ ᤁᤢᤗᤡᤱᤎᤥ ᤔᤧᤱᤃᤧᤳᤋᤣ ᤘᤠ᤹ᤖᤥ॥
1JO 4:19 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤋᤃᤡ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ᤀᤠᤱ ᤘᤣ᤹ᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤛᤡᤶᤗᤥ॥
1JO 4:20 ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤳᤋᤢᤱ ᤗ᤹ ᤁᤖ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤆᤡ᤺ᤳᤋᤢᤛᤡ᤹ᤏᤧ ᤑᤠ᤹ᤃᤪ ᤂᤧᤱᤃ ᤀᤡᤱᤗᤧᤰᤐᤠᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤏᤡ᤺ᤛᤢᤒᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤋᤢᤰᤔᤠ ᤔᤧᤛᤢᤰᤋᤢᤴᤇᤡᤴᤏᤡᤸᤗᤧ ᤏᤡ᤺ᤔᤧᤴᤍᤧᤵᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤰᤂᤣᤗ᤹ᤖᤡᤰ ᤔᤡ᤺ᤶᤈᤡ ᤔᤧᤵᤔᤠ ᤛᤢᤰᤋᤢᤒᤣ᥅
1JO 4:21 ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤳᤋᤢ᤹. ᤂᤧᤸᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤀᤠᤱ ᤗᤢᤱᤔᤠ᤹ ᤋᤢᤰᤔᤠᤛᤡᤀᤣ ᤐᤥ᤺ᤱᤗᤥ ᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤀᤡᤱᤈᤠ᤺ᤱ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥
1JO 5:1 ᤀᤠᤳᤋᤡᤸᤗᤧ ᤕᤧᤛᤢ᤺ᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤑᤠ᤹ᤀᤠᤱ ᤏᤛᤠ᤺ᤴ ᤆᤥᤃᤢ᤹. ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤐᤠ᤺ᤴ ᤔᤡ᤺ᤶᤈᤡ ᤁᤧᤔᤧᤵᤐᤧᤸᤗᤧ ᤁᤢᤛ᤻ᤛᤠ᤺ᤴᤏᤠᤱ ᤔᤡ᤺ᤶᤈᤡ ᤔᤧᤳᤋᤢ᤹ᤖᤥ॥
1JO 5:2 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤀᤠᤔᤧᤳᤋᤢᤶᤔᤠᤱ ᤁᤢᤀᤡᤱᤈᤠ᤺ᤱᤜᤠ᤹ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤛᤡᤶ ᤁᤧᤗ᤹ᤒᤠᤴᤏᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1JO 5:3 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤑᤠ᤹ᤀᤡᤱᤃ ᤁᤢᤀᤡᤱᤈᤠ᤺ᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤜᤠ᤹ ᤀᤠᤏᤡ᤹ ᤗᤠᤃᤡ ᤔᤧᤛᤠᤰᤏᤧᤴ.
1JO 5:4 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤴᤍᤢ᤹ᤖᤥ॥ ᤀᤠᤏᤡ᤹ ᤏᤛᤠ᤺ᤴᤏᤡᤸᤗᤧᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤴᤍᤢ᤹ᤖᤥ॥
1JO 5:5 ᤜᤠ᤺ᤳᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤶᤔᤠ ᤛᤢᤰᤋᤢ᤹ᤒᤣ᥅ ᤕᤧᤛᤢ᤺ᤴᤏᤣ ᤏᤡᤱᤘᤠ᤹ᤑᤢᤛᤠ᤺ᤖᤥ ᤑᤠ᤹ᤀᤠᤱ ᤏᤛᤠ᤺ᤴ ᤁᤧᤈᤥ᤺ᤰᤐᤠᤸᤗᤧᤖᤰ ᤛᤢᤰᤋᤢ᤹ᤖᤥ॥
1JO 5:6 ᤕᤧᤛᤢ ᤂᤪᤡᤛ᤻ᤋᤧᤴ ᤕᤧᤀᤠᤱ ᤆᤫᤠ᤺ᤳᤋᤥ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤁᤢᤔᤠᤰᤂᤡ᤹ᤀᤡᤴ ᤘᤠᤍᤣ᤺ᤴᤍᤢ॥ ᤂᤢᤏᤧ᤹ᤃ ᤆᤫᤠ᤺ᤳᤗᤠᤶᤖᤰ ᤔᤧᤕᤧᤏᤧᤴ ᤁᤖ ᤆᤫᤠ᤺ᤳ ᤏᤢ ᤔᤠᤰᤂᤡ᤹ ᤏᤧᤵᤔᤠᤱᤗᤠᤶ ᤕᤧᤖᤥ॥ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ ᤑᤠ᤹ᤀᤠᤱ ᤀᤠᤒᤠᤅᤣ ᤋᤥ᤺ᤴᤍᤡ ᤐᤡᤖᤢ᤹. ᤌᤣᤀᤠᤱᤓᤧᤸᤗᤧ ᤛᤣᤛᤣᤔᤠᤱᤅᤡᤴᤏᤣ ᤛᤧᤰᤂᤠ ᤆᤥ᤺ᤰᤗᤥ॥
1JO 5:7 ᤜᤧᤰᤁᤣ᤺ᤸᤗᤧ ᤛᤢᤶᤛᤡ ᤋᤥ᤺ᤴᤍᤡᤜᤠ᤹ ᤔᤧᤘᤠ᤹ᤖᤥ–
1JO 5:8 ᤂᤧᤱᤜᤠ᤹ ᤛᤣᤛᤣᤔᤠᤱ. ᤆᤫᤠ᤺ᤳ ᤜᤧᤰᤁᤩᤠᤱ ᤔᤠᤰᤂᤡ᤹ᤖᤥ॥ ᤜᤧᤰᤁᤩᤠᤱ ᤁᤴ ᤛᤢᤶᤒᤪᤠᤱᤗᤧ ᤗᤳᤇᤠ ᤐᤠ᤺ᤴᤏᤥ ᤋᤥ᤺ᤴᤍᤡ ᤔᤧᤒᤡᤖᤢ᤹ᤖᤥ॥
1JO 5:9 ᤀᤠᤏᤡ᤹ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤥ᤺ᤴᤍᤡᤀᤥ ᤏᤛᤠ᤺ᤴ ᤀᤠᤈᤥᤃᤢᤶᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤥ᤺ᤴᤍᤡᤱᤃ ᤂᤧᤴᤏᤢ᤺ᤸᤗᤧᤀᤠᤱ ᤁᤢᤈᤧᤰ ᤆᤥ᤺ᤰ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤐᤡᤖᤢᤒᤠᤖᤥ॥
1JO 5:10 ᤜᤧᤰᤁᤣᤗ᤹ᤖᤡᤰ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤁᤢᤛᤡᤰᤗᤢᤱᤔᤠᤀᤥ ᤁᤴ ᤋᤥ᤺ᤴᤍᤡᤴ ᤕᤢᤱᤗᤥ॥ ᤁᤖ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴ ᤔᤧᤈᤥᤃᤢᤴ. ᤂᤧᤸᤗᤧ ᤂᤢᤏᤧ᤹ ᤀᤡᤱᤗᤧᤰᤐᤠ ᤆᤥᤃᤢ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤡᤖᤢᤒᤠ ᤋᤥ᤺ᤴᤍᤡᤀᤥ ᤂᤧᤸᤗᤧ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤘᤠ᤹ᤖᤥ॥
1JO 5:11 ᤋᤥ᤺ᤴᤍᤡ᤺ᤱᤃ ᤀᤠᤶᤓᤠ ᤁᤴᤗᤥ–ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤒᤡᤖᤧᤀᤠᤱ ᤀᤠᤘᤠ᤹. ᤜᤧᤰᤁᤩᤠᤱ ᤁᤴ ᤜᤡᤱᤔᤴᤏᤡᤱᤃ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤗᤠᤶ ᤋᤠ᤺ᤖᤥ॥
1JO 5:12 ᤜᤠ᤺ᤳᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴ ᤏᤛᤠ᤺ᤴ ᤆᤥᤃᤢᤀᤠᤱ ᤘᤠ᤹. ᤂᤧᤸᤗᤧ ᤁᤴ ᤜᤡᤱᤔᤴᤏᤡᤴ ᤁᤳᤋᤢ᤹॥ ᤁᤖ ᤜᤠ᤺ᤳᤗᤧ ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤔᤧᤴᤈᤥ᤺ᤰᤁᤣ ᤘᤠ᤹. ᤂᤧᤸᤗᤧ ᤁᤴ ᤜᤡᤱᤔᤴᤏᤡᤴᤏᤠᤱ ᤔᤧᤃᤳᤋᤢᤴᤗᤥ॥
1JO 5:13 ᤀᤡᤱᤃᤠ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤄᤥ᤺ᤛᤢᤶᤔᤠᤱ ᤁᤧᤘᤕᤡ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤁᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
1JO 5:14 ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰ ᤋᤢᤘᤠᤀᤥ ᤀᤠᤏᤠ᤺ᤰᤋᤢᤶᤔᤡᤸᤗᤧ ᤂᤢᤏᤧ᤹ ᤀᤠᤏᤡ᤹ ᤐᤠ᤺ᤴᤏᤡᤴ ᤂᤧᤵᤛᤢ᤹ ᤑᤠ᤹ᤀᤠᤱ ᤏᤡ᤺ᤴᤎᤥ ᤀᤠᤒᤥ᤺ᤱᤗᤥ॥
1JO 5:15 ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤵᤑᤠᤸᤗᤧᤛᤠᤱ ᤀᤠᤏᤠ᤺ᤰᤋᤢᤶᤒᤠ ᤐᤠ᤺ᤴᤜᤠ᤹ ᤂᤧᤵᤛᤢ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤏᤧ ᤑᤠ᤹ᤃᤪ ᤂᤢᤏᤧ᤹ ᤀᤠᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤀᤠᤒᤡ᤹ᤀᤣᤖᤥ ᤑᤠ᤹ᤀᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥
1JO 5:16 ᤜᤠ᤺ᤳᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤌᤡᤰᤗᤧ ᤛᤡ᤺ᤔᤧᤴ ᤌᤠᤖᤡᤰ ᤔᤧᤴᤍᤣ᤹ᤔᤏᤠ ᤗᤠᤕᤥ ᤆᤥᤃᤢᤒᤠ ᤏᤡ᤺ᤛᤢ᤹. ᤂᤧᤴ ᤗᤠᤕᤥᤗᤠᤶ ᤏᤢ᤺ᤱᤏᤡ ᤑᤠ᤹ᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ ᤐᤡᤖᤢᤖᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤖᤢ᤹ᤖᤥ॥ ᤁᤱᤃ ᤛᤡ᤺ᤔᤧᤴ ᤌᤠᤖᤡᤰ ᤔᤧᤴᤍᤣ᤹ᤔᤏᤠ ᤗᤠᤕᤥ ᤁᤧᤈᤥ᤺ᤰᤐᤠᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤐᤠ᤺ᤳᤋᤢᤱᤒᤠᤖᤥ॥ ᤁᤖ ᤛᤡ᤺ᤔᤧᤴ ᤌᤠᤖᤡᤰ ᤁᤧᤍᤣ᤹ᤒᤠ ᤗᤠᤕᤥᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥
1JO 5:17 ᤁᤠᤰ ᤑᤧᤴ ᤕᤠ᤺ᤶᤒᤰ ᤆᤥ᤺ᤰᤔᤠᤃ ᤗᤠᤕᤥᤖᤥ॥ ᤜᤧᤰᤁᤣᤛᤠᤱ ᤛᤡ᤺ᤔᤧᤴ ᤌᤠᤖᤡᤰ ᤔᤧᤴᤍᤣ᤹ᤔᤏᤠᤒᤠ ᤗᤠᤕᤥᤀᤠᤱ ᤘᤠ᤹ᤖᤥ॥
1JO 5:18 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤳᤋᤢᤒᤠ ᤛᤠ᤺ᤸᤗᤧ ᤗᤠᤕᤥ ᤆᤥᤃᤢᤖ ᤔᤧᤘᤠ᤹ᤏᤧᤴ ᤑᤠ᤹ᤀᤠᤱ ᤀᤠᤏᤡ᤹ ᤏᤢ᤺ᤖᤡᤰᤁᤠᤱ ᤀᤠᤏᤡ᤺ᤛᤢᤶᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ᤺ᤸᤗᤧ ᤂᤧᤴ ᤋᤠᤱᤛᤧ᤺ᤵᤋᤢ᤹ᤀᤠᤱ ᤁᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤧᤴ ᤛᤢ᤺ᤔᤠᤀᤠᤱ ᤔᤧᤛᤢᤰᤋᤢᤴᤗᤥ॥
1JO 5:19 ᤀᤠᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ. ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤜᤢᤰᤁᤥ ᤌᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤺ᤛᤢᤶᤗᤥ॥
1JO 5:20 ᤏᤡᤱᤘᤠ᤹ᤑᤢᤛᤠ᤺ᤴ ᤕᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗ ᤑᤠ᤹ᤀᤠᤱ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤸᤗᤥ ᤀᤠᤏᤡ᤹ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤀᤠᤘᤠ᤹ᤖᤥ॥ ᤂᤢᤏᤧ᤹ᤀᤣ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥
1JO 5:21 ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤛᤣ. ᤏᤠᤘᤠᤀᤡᤳᤗᤠᤜᤠ᤹ᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥
2JO 1:1 ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠᤸᤗᤧ ᤛᤣ᤺ᤰᤔᤏᤠᤔᤠ ᤋᤢᤶᤔᤩᤠᤱᤜᤠᤱᤔᤠ ᤏᤢ ᤁᤢᤛ᤻ᤛᤠ᤺ᤜᤠ᤹ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤡ᤺ᤶᤈᤡ ᤔᤧᤳᤏᤡᤱᤗᤥ. ᤜᤧᤰᤁᤩᤠᤱ ᤛᤧᤰᤂᤠ᤺ᤴ ᤁᤢᤛᤡᤱ ᤁᤧᤏᤡ᤺ᤵᤐᤠ ᤁᤧᤖᤧᤰᤗᤧᤀᤠᤱ ᤔᤡ᤺ᤶᤈᤡ ᤁᤧᤶᤔᤧᤳᤋᤡ᤹ᤖᤥ॥
2JO 1:2 ᤌᤣᤀᤠᤱᤓᤧᤸᤗᤧ ᤛᤧᤰᤂᤠ᤺ᤱᤃ ᤀᤠᤏᤡ᤹ᤀᤥ ᤘᤠ᤹. ᤜᤧᤰᤁᤩᤠᤱ ᤛᤍᤠᤍᤡᤱ ᤀᤠᤏᤡ᤹ᤏᤢᤀᤣ ᤘᤠ᤹ᤖᤥ॥
2JO 1:3 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ ᤕᤧᤛᤢ ᤂᤪᤡᤛ᤻ᤋᤗᤠᤶ ᤁᤧᤍᤠ᤺ᤒᤠ ᤗᤢᤱᤃᤢᤶ. ᤗᤢᤱᤔᤠ᤹ ᤋᤢᤰᤔᤠᤴ ᤏᤢ ᤛᤏᤠᤖᤢᤱᤅᤡᤴ ᤀᤠᤏᤡ᤹ ᤛᤧᤰᤂᤠ ᤏᤢ ᤔᤡ᤺ᤶᤈᤡᤀᤥ ᤁᤧᤘᤠ᤹ᤒᤠᤜᤠ᤹ᤏᤢ ᤘᤠ᤹ᤖᤖᤥ॥
2JO 1:4 ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠ᤺ᤱ ᤀᤠᤒᤡᤖᤧᤒᤠ ᤁᤢᤀᤡᤛᤡ᤺ᤰ ᤁᤢᤓᤠ ᤁᤧᤛ᤻ᤛᤠ᤺ᤜᤠ᤹ ᤛᤧᤰᤂᤠᤀᤥ ᤗᤠᤱᤔᤧᤄᤣ᤺ᤰᤗ ᤔᤧᤘᤠ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤱᤅᤠᤱ ᤀᤡᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤛᤔᤧᤀᤠᤱ ᤘᤠ᤹ᤀᤠᤖᤥ॥
2JO 1:5 ᤜᤧᤰᤁᤩᤠᤱ ᤀᤠᤸᤗ. ᤀᤠᤔᤡ᤺ᤶ ᤋᤢᤶᤔᤩᤠᤱᤜᤠᤱᤔᤠᤀᤣ. ᤀᤠᤏᤡ᤹ ᤁᤠᤰ ᤗᤢᤱᤔᤠ᤹ ᤋᤢᤰᤁᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤐᤣᤗᤡ ᤑᤠᤰᤏᤧ᤹ᤖᤥ॥ ᤁᤴ ᤁᤢᤛᤱ ᤀᤡᤱᤈᤠ᤺ᤱᤃ ᤛᤠᤵᤏᤡᤱᤒᤠ ᤔᤧ᤺ᤴᤗᤥ. ᤁᤖ ᤁᤱᤃ ᤋᤃᤡᤀᤠᤱᤎᤥᤀᤣ ᤀᤠᤏᤡ᤹ᤏᤢ ᤘᤕᤧᤖᤥ॥
2JO 1:6 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤑᤠ᤹ᤀᤡᤴ ᤂᤢᤏᤧ᤹ ᤁᤢᤀᤡᤱᤈᤠ᤺ᤱᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤐᤥ᤺ᤱᤔᤠᤖᤥ॥ ᤋᤃᤡᤀᤠᤱᤎᤥ ᤂᤡᤏᤡ᤹ ᤁᤠᤰᤗᤧ ᤁᤧᤄᤧᤵᤛᤢᤶᤒᤠ ᤀᤡᤱᤈᤠ᤺ᤱᤅᤡᤴ ᤒᤠ ᤁᤴᤗᤥ–ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥ᤺ᤱᤗᤥ॥
2JO 1:7 ᤕᤖᤡᤰ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤛᤧ᤺ᤖᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧᤃ ᤕᤧᤛᤢ ᤂᤪᤡᤛ᤻ᤋᤧᤴ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤐᤥ᤺ᤰᤂᤧᤀᤠᤱ ᤏᤠᤛᤡᤱᤃᤧᤴ ᤌᤰᤁᤥ ᤋᤩᤧᤒᤠ ᤑᤠ᤹ᤀᤠᤱ ᤏᤛᤠ᤺ᤴ ᤔᤧᤴᤈᤥᤃᤢᤴᤗᤥ॥ ᤀᤰᤋᤱᤒᤠ ᤔᤏᤠ᤺ᤱᤃ ᤀᤡᤱᤗᤧᤰᤐᤠ ᤏᤢ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤒᤠᤖᤥ॥
2JO 1:8 ᤂᤧᤸᤗᤧ ᤆᤥᤃᤢᤸᤗᤧ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤡᤏᤡ᤹ ᤁᤠᤰ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤸᤗᤧᤴ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤂᤡᤏᤡ᤹ ᤜᤠᤱᤛᤧᤶᤔᤡᤴ ᤁᤧᤔᤠᤒᤠ ᤔᤧ᤺ᤴ. ᤁᤖ ᤁᤧᤄᤥ᤺ᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥
2JO 1:9 ᤂᤪᤡᤛ᤻ᤋᤖᤧ ᤁᤢᤏᤡᤛᤠᤶᤒᤢᤱᤅᤥᤗᤠᤶ ᤔᤠ᤺ᤱᤄᤠ ᤁᤧᤘᤠ᤹ᤒᤠ ᤔᤏᤠ᤺ᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤘᤠ᤹ᤏᤧᤴᤗᤥ॥ ᤁᤖ ᤂᤢᤏᤧ᤹ ᤁᤢᤏᤡᤛᤠᤶᤒᤢᤱᤅᤡᤴᤏᤢ ᤔᤧᤸᤗᤧᤳᤋᤣ ᤁᤧᤘᤠ᤹ᤒᤠᤴᤏᤢ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤁᤩᤠᤱ ᤀᤠᤒᤢᤍᤡᤱ ᤁᤢᤛ᤻ᤛᤠ᤺ᤴ ᤏᤧᤵᤔᤠᤱ ᤘᤠ᤹ᤛᤡᤖᤥ॥
2JO 1:10 ᤂᤪᤡᤛ᤻ᤋᤖᤧ ᤛᤧᤰᤂᤠᤒᤠ ᤁᤢᤏᤡᤛᤠᤶᤒᤢᤱᤅᤡᤴ ᤔᤧᤴᤜᤢ᤹ᤔᤏᤠᤒᤠ ᤔᤏᤠ᤺ᤴ ᤂᤧᤏᤧ᤹ ᤁᤧᤜᤡᤶᤔᤥ ᤋᤠᤏᤧ ᤑᤠ᤹ᤃᤪ ᤂᤧᤴ ᤁᤧᤜᤡᤶᤔᤥ ᤗᤠ᤺ᤵᤔᤠ ᤔᤧᤒᤠᤱᤄᤧᤴᤏᤧ᤹ ᤜᤧᤰᤁᤩᤠᤱ ᤗᤠᤱᤅᤠᤱ ᤔᤧᤍᤠ᤺ᤰᤋᤧᤴᤏᤧ᤹ᤀᤥ॥
2JO 1:11 ᤀᤠᤳᤋᤡᤸᤗᤧ ᤂᤧᤴ ᤔᤏᤠ᤺ᤴ ᤗᤠᤱᤍᤠ᤺ᤰᤋᤢ᤹. ᤂᤧᤱᤃ ᤂᤧᤸᤗᤧ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤜᤠ᤹ᤀᤥ ᤆᤢᤶ ᤁᤧᤔᤧᤵᤐᤠ ᤁᤢᤀᤡᤛᤡ᤺ᤰ ᤐᤥ᤺ᤱᤗᤥ॥
2JO 1:12 ᤀᤡᤱᤃᤠ᤹ ᤕᤖᤡᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤛᤠᤵᤔᤠ ᤁᤳᤋᤢᤱᤛᤠᤱ. ᤁᤴ ᤐᤠ᤺ᤴᤜᤠ᤹ ᤛᤰᤀᤡᤱᤄᤱᤅᤥᤗᤠᤶ ᤔᤧ᤺ᤴ. ᤁᤖ ᤂᤡᤏᤡ᤹ ᤋᤢᤶᤏᤡᤱᤅᤠᤱᤅᤣ ᤋᤠ᤹ᤈᤧᤱᤔᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤛᤥᤛᤥᤖᤡᤰ ᤛᤠ᤹ᤖᤡᤰ ᤀᤠᤛ᤺ᤳᤗᤥ॥
2JO 1:13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤔᤠ ᤁᤧᤴᤛᤠ᤹ᤖᤧ ᤁᤢᤛ᤻ᤛᤠ᤺ᤜᤠ᤹ᤖᤧ ᤂᤧᤏᤧ᤹ ᤛᤣᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥
3JO 1:1 ᤛᤧᤰᤂᤠᤀᤣ ᤗᤢᤱᤔᤠ᤹ ᤋᤢᤰᤏᤧᤒᤠ ᤀᤠᤔᤡ᤺ᤶ ᤀᤠᤴᤈᤢᤶ ᤃᤠᤕᤛᤣ. ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤁᤥᤒᤠ ᤋᤢᤶᤗᤠᤶᤗᤥ᤺ᤒᤠᤗᤠᤶ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤧ᤹ᤖᤥ॥
3JO 1:2 ᤀᤠᤔᤡ᤺ᤶ ᤀᤠᤴᤈᤢᤶᤔᤣ. ᤂᤧᤏᤧ᤹ ᤁᤧᤕᤠᤶᤛᤠᤶᤔᤥ ᤁᤧᤏᤢ᤹ ᤁᤧᤍᤠ᤺ᤒᤠ ᤜᤧᤰᤁᤣᤀᤣ ᤂᤧᤏᤧ᤹ ᤏᤠᤛᤡᤱᤃᤧᤴ ᤁᤧᤎᤰᤁᤥ ᤜᤧᤰᤁᤩᤠᤱ ᤁᤠᤰ ᤐᤠ᤺ᤴᤏᤥ ᤁᤧᤏᤢ᤹ ᤁᤧᤍᤠᤖ ᤑᤠ᤹ᤀᤠᤱ ᤋᤢᤘᤠ ᤆᤥ᤺ᤰᤁᤠᤖᤥ॥
3JO 1:3 ᤁᤢᤓᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤡᤱᤃᤠ᤹ᤀᤥ ᤔᤧᤍᤩᤧᤀᤠᤱ ᤂᤧᤏᤧ᤹ ᤛᤧᤰᤂᤠᤀᤥ ᤏᤛᤠ᤺ᤴᤛᤠᤒᤠ ᤁᤧᤘᤠ᤹ᤒᤠ ᤏᤢ ᤛᤍᤠᤍᤡᤱ ᤛᤧᤰᤂᤠᤀᤥ ᤗᤠᤱᤄᤣ᤺ᤰᤏᤢ ᤁᤧᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤈᤧᤰᤋᤠᤱᤅᤡᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱ॥
3JO 1:4 ᤀᤡᤱᤃᤠ᤹ ᤀᤠᤔᤡ᤺ᤶ ᤀᤠᤛ᤻ᤛᤠ᤺ᤜᤠ᤹ ᤛᤧᤰᤂᤠᤒᤠ ᤏᤛᤠ᤺ᤴᤏᤥ ᤗᤠᤱᤄᤣ᤺ᤰᤏᤢ ᤔᤧᤘᤠ᤹ᤒᤠ ᤐᤠ᤺ᤴ ᤂᤧᤵᤛᤢᤱᤅᤡᤸᤗᤧ ᤛ᤺ᤳᤋᤠᤒᤠ ᤐᤠ᤺ᤴᤏᤠᤱᤎᤥ ᤘᤣ᤹ ᤌᤣᤀᤠᤱ ᤕᤶᤒᤠ ᤐᤠ᤺ᤴ ᤜᤥ᤺ᤵᤗᤥ॥
3JO 1:5 ᤀᤠᤔᤡ᤺ᤶ ᤀᤠᤴᤈᤢᤶᤔᤣ. ᤂᤧᤏᤧ᤹ᤃ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤇᤡᤴᤇᤠᤱ ᤁᤢᤓᤠ᤹ ᤁᤧᤒᤡᤖᤢᤛᤡᤸᤗᤧ ᤏᤢ᤺ᤒᤠ ᤕᤠ᤺ᤶᤒᤰ ᤁᤧᤈᤥᤃᤢ᤹ᤖᤥ॥
3JO 1:6 ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤱᤜᤠ᤹ᤖᤧ ᤁᤵᤔᤥᤒᤠ ᤛᤣᤛᤣᤜᤢᤵᤗᤰᤁᤡᤴ ᤔᤧᤈᤧᤰᤋᤢᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤍᤡ᤺ᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤖ ᤁᤢᤓᤠ᤹ ᤁᤧᤒᤡᤖᤢᤛᤡᤸᤗᤧ ᤏᤢ᤺ᤒᤠ ᤁᤧᤈᤥᤃᤢ᤹ᤖᤥ॥
3JO 1:7 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤂᤪᤡᤛ᤻ᤋᤖᤧ ᤁᤢᤔᤠᤱᤛᤣᤘᤠ ᤆᤥ᤺ᤰᤛᤧ ᤗᤠᤶᤍᤡ᤺ᤰᤁᤥ ᤔᤧᤎᤠᤛᤡᤱᤅᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤥᤗᤠᤶᤃ ᤌᤣᤀᤠᤱ ᤁᤢᤓᤠ᤹ ᤔᤧᤴᤍᤠ᤺ᤰᤁᤣ ᤔᤧᤘᤠ᤹ᤖᤥ॥
3JO 1:8 ᤜᤧᤰᤋᤱᤒᤠ ᤔᤏᤠᤜᤠ᤹ ᤀᤠᤏᤡ᤹ ᤏᤛᤠᤏᤡᤒᤠᤜᤠ᤹ᤖᤧ ᤁᤢᤓᤠ᤹ ᤐᤡᤔᤠᤛᤡᤀᤣ ᤐᤥ᤺ᤱᤗᤥ॥ ᤀᤰᤂᤣᤗ᤹ᤖᤡᤰ ᤑᤠ᤹ᤔᤠᤛᤡᤸᤗᤧ ᤛᤧᤰᤂᤠ᤺ᤸᤗᤧ ᤗᤠᤃᤡ ᤂᤢᤏᤡ᤹ ᤕᤠ᤺ᤶᤒᤰᤁᤥ ᤗᤰᤆᤢᤶ ᤀᤠᤒᤥ᤺ᤱᤗᤥ॥
3JO 1:9 ᤀᤡᤱᤃᤠ᤹ ᤛᤣᤛᤣᤜᤢᤵᤗᤰᤁᤥ ᤛᤰᤀᤡᤱᤄᤱ ᤛᤠᤵᤋᤢᤱᤅᤠᤱ ᤘᤕᤧ. ᤁᤖ ᤗᤠᤶᤗᤥ᤺ᤒᤠ ᤐᤥ᤺ᤱᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤍᤡᤕᤥᤋᤪᤡᤑᤛᤖᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴᤗᤥ॥
3JO 1:10 ᤀᤡᤱᤃᤠ᤹ ᤂᤧᤵᤔᤥ ᤋᤠᤀᤠᤸᤗᤧ ᤂᤧᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤜᤧᤰᤁᤩᤠᤱ ᤀᤠᤏᤡᤃᤧ ᤋᤰᤗᤧᤱᤘᤠᤀᤥ ᤐᤠ᤺ᤳᤋᤢᤒᤠ ᤋᤠᤵᤑᤧ᤺ᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤋᤠ᤹ᤈᤧᤱᤅᤥ ᤗ᤺ᤳᤋᤢᤱᤅᤣᤖᤥ॥ ᤂᤧᤸᤗᤧ ᤂᤧᤶᤔᤩᤠᤰᤗᤰ ᤔᤧ᤺ᤴ. ᤁᤖ ᤂᤧᤵᤔᤥ ᤗᤠᤶᤍᤡ᤺ᤰ ᤆᤥ᤺ᤰᤁᤡ ᤁᤧᤍᤠ᤺ᤒᤠ ᤂᤧᤴ ᤏᤛᤠᤏᤡᤒᤠᤜᤠ᤹ᤀᤠᤱ ᤗᤠᤱᤍᤠ᤺ᤰᤔᤠ ᤔᤧᤒᤡᤖᤢᤴᤇᤡᤴᤗᤥ॥ ᤜᤧᤰᤁᤩᤠᤱ ᤂᤢᤏᤡ᤹ ᤗᤠᤱᤍᤠ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤜᤧᤰᤁᤣ ᤆᤥ᤺ᤰᤔᤠ ᤔᤧᤒᤠᤱᤄᤢᤴᤇᤡᤴ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤣᤛᤣᤜᤢᤵᤗᤰᤁᤥᤗᤠᤶ ᤗ᤺ᤳᤋᤢᤍᤣ᤺ᤛᤢᤛᤡ᤹ᤖᤥ॥
3JO 1:11 ᤀᤠᤔᤡ᤺ᤶ ᤀᤠᤴᤈᤢᤶᤔᤣ. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ᤖᤧᤴ ᤔᤧ᤺ᤴ. ᤁᤖ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ᤖᤧᤴ ᤆᤥ᤺ᤱ ᤁᤧᤀᤡ᤺ᤵᤐᤠ ᤐᤥ᤺ᤰᤂᤧ᤹ᤀᤥ॥ ᤜᤠ᤺ᤳᤗᤧ ᤏᤢ᤺ᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ᤹ ᤂᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ॥ ᤜᤠ᤺ᤳᤗᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ᤹ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤴᤏᤡᤀᤣ ᤘᤠ᤹ᤖᤥ॥
3JO 1:12 ᤍᤧᤔᤧᤋᤪᤡᤕᤛᤖᤧ ᤁᤢᤕᤠ᤺ᤶᤒᤣᤀᤥ ᤁᤧᤖᤧᤰᤗᤧ ᤏᤢ᤺ᤒᤠ ᤔᤧᤒᤠ᤺ᤳᤋᤢ᤹ᤖᤥ॥ ᤜᤧᤰᤁᤩᤠᤱ ᤁᤢᤜᤡᤱᤔᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤰᤂᤠ ᤐᤠ᤺ᤴᤏᤡᤴᤏᤢ ᤋᤱᤗᤥ॥ ᤀᤠᤏᤡᤃᤧᤀᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤏᤢ᤺ᤒᤠ ᤐᤠ᤺ᤴᤏᤣ ᤐᤠ᤺ᤳᤋᤢᤶᤒᤧ ᤜᤧᤰᤁᤩᤠᤱ ᤀᤠᤏᤡᤃᤧ ᤋᤥ᤺ᤴᤍᤡᤴ ᤛᤧᤰᤂᤠ ᤑᤠ᤹ᤀᤠᤱ ᤁᤧᤏᤡ᤺ᤛᤢᤀᤣᤖᤥ॥
3JO 1:13 ᤂᤧᤏᤧ᤹ᤏᤢ ᤀᤡᤱᤃᤠ᤹ ᤕᤖᤡᤰ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤁᤳᤋᤢᤱ ᤁᤖ ᤛᤰᤀᤡᤱᤄᤱᤅᤥ ᤔᤧ᤺ᤴ.
3JO 1:14 ᤁᤖ ᤀᤡᤱᤃᤠ᤹ ᤂᤧᤏᤧ᤹ᤏᤢ ᤜᤠᤖᤠᤀᤣ ᤋᤢᤶᤔᤠ ᤏᤡᤱᤛᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤠᤴᤇᤡ᤹ ᤀᤠᤍᤢᤶᤛᤡ᤹ᤀᤠᤱ ᤛᤥᤖᤡᤰ ᤋᤠ᤹ᤀᤠᤈᤧᤱᤛᤡ᤹ᤖᤥ॥
3JO 1:15 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤏᤠᤖᤢᤱᤅᤡᤴ ᤂᤧᤏᤧ᤹ᤏᤢ ᤘᤠ᤹ᤖᤖᤥ॥ ᤜᤧᤰᤁᤩᤠᤱ ᤁᤵᤔᤥᤒᤠ ᤀᤠᤏᤡ᤹ ᤋᤣ᤺ᤱᤈᤢᤶᤜᤠ᤹ᤖᤧ ᤛᤣᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥ ᤂᤧᤵᤔᤥᤒᤠ ᤁᤧᤖᤧᤰ ᤀᤠᤏᤡ᤹ ᤋᤣ᤺ᤱᤈᤢᤶᤜᤠ᤹ᤀᤥᤀᤠᤱ ᤀᤡᤱᤃᤠ᤹ ᤀᤠᤛᤣᤘᤠ᤺ᤴ ᤋᤥ᤺ᤴᤍᤠᤱ ᤐᤡᤖᤠᤱᤅᤧ᤹ᤀᤥ॥
JUD 1:1 ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣᤘᤠᤖᤥᤒᤠ ᤏᤢ ᤕᤠᤁᤢᤒᤖᤧ ᤁᤢᤴᤛᤠ᤹ ᤀᤡᤱᤃᤠ᤹ ᤕᤜᤢᤍᤠᤗᤠᤶ. ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢ᤺ᤳᤋᤢᤛᤡᤒᤠ. ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤏᤢ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤁᤶᤒᤪᤠᤱ ᤔᤧᤳᤋᤢᤛᤡᤒᤠᤜᤠ᤹. ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤗᤥ॥
JUD 1:2 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤡᤖ. ᤕᤖᤡᤰ ᤛᤏᤠᤖᤢᤱᤅᤡᤴ ᤁᤧᤒᤡᤖᤡᤖ ᤜᤧᤰᤁᤩᤠᤱ ᤏᤢ᤺ᤖᤡᤰ ᤁᤧᤔᤧᤳᤋᤡᤖᤖᤥ॥
JUD 1:3 ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤄᤥ᤺ᤛᤢᤶᤒᤠ ᤛᤧᤴᤗᤵᤖᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ᤀᤥ ᤛᤰᤀᤡᤱᤄᤱ ᤜᤠᤱᤔᤠ ᤛᤠ᤹ᤖᤡᤰᤁᤣ ᤀᤡᤱᤃᤠ᤹ ᤀᤠᤛᤡᤖᤠ᤹ ᤌᤠᤅᤧᤀᤠᤱ ᤘᤕᤧᤖᤥ॥ ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤜᤢᤰᤛᤢᤵᤋᤢᤛᤡᤒᤠ ᤏᤛᤠ᤺ᤴᤏᤡᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤗᤠᤶᤒᤠ ᤋᤠᤱᤃᤧᤛᤧ᤺ᤵᤋᤢᤶᤗ ᤑᤠ᤹ᤀᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤔᤠᤀᤣ ᤁᤧᤒᤥ᤺ᤱᤒᤠ ᤏᤡ᤺ᤛᤢᤱᤗᤥ॥
JUD 1:4 ᤀᤡᤱᤃᤠ᤹ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱ ᤔᤧ᤺ᤴᤏᤣᤒᤠ ᤁᤢᤓᤠ ᤔᤏᤠᤜᤠ᤹ ᤛᤫᤠ᤺ᤳᤋᤠᤱ ᤂᤡᤏᤡ᤹ ᤗᤢᤶᤔᤥ ᤔᤧᤗᤠ᤺ᤛᤧᤀᤠᤱ ᤔᤧᤘᤠ᤹ᤖᤥ॥ ᤋᤃᤡᤛᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤴ ᤜᤧᤰᤋᤱᤒᤠ ᤔᤏᤠᤜᤠ᤹ᤖᤧ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ ᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤐᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤒᤡ᤹ ᤗ᤹ᤖᤡᤰ ᤔᤧᤒᤠ᤺ᤳᤋᤢ᤹. ᤜᤧᤰᤁᤩᤠᤱ ᤀᤠᤏᤡ᤹ ᤌᤡᤰᤗᤰ ᤜᤠᤱ ᤁᤧᤈᤥ᤺ᤰᤐᤠ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥ᤺ᤰᤔᤠ ᤔᤧᤴᤍᤧᤴᤏᤧᤴᤗᤥ॥
JUD 1:5 ᤁᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡ᤺ᤛᤢᤶᤛᤠᤱ ᤕᤠᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤥᤀᤥ ᤀᤡᤱᤃᤠ᤹ ᤋᤠᤖᤢᤱ ᤐᤡᤏᤡᤱᤗᤥ–ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤋᤠᤱᤛᤧ᤺ᤵᤋᤢᤛᤡᤀᤠᤱ ᤗ᤺ᤳᤋᤢᤛᤡᤛᤠᤱ ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤕᤠᤱᤛᤡ ᤔᤧᤰᤂᤢᤛᤡᤖᤥ॥
JUD 1:6 ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤏᤡ᤹ ᤘᤠ᤹ᤔᤠ ᤋᤧᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤕᤢᤰᤁᤥ ᤔᤧᤴᤘᤠ᤹ᤔᤏᤠᤒᤠ ᤔᤠᤱᤗᤠᤀᤡᤱᤒᤠᤜᤠ᤹ ᤕᤶᤒᤠ ᤂᤠᤛᤧᤴ ᤕᤧᤴ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤠᤔᤠᤰᤗᤢᤶᤒᤠ᤺ᤳᤋᤥ ᤀᤡᤄᤣ᤺ᤰᤂᤢ ᤕᤢᤰᤂᤢᤛᤡᤀᤠᤱ ᤔᤧᤕᤢᤱᤗᤥ॥
JUD 1:7 ᤜᤧᤰᤁᤩᤠᤱ ᤛᤍᤥᤔ ᤏᤢ ᤃᤔᤥᤖᤠ ᤜᤧᤰᤁᤩᤠᤱ ᤂᤡᤖᤡᤒᤠ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤀᤠᤱ ᤀᤡ᤺ᤳᤋᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤃ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤁᤠᤰ ᤐᤖᤡᤰᤐᤠ ᤕᤠᤶᤃᤧᤛᤡᤱᤒᤠ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤥ ᤗᤠᤶ ᤔᤧᤒᤥ᤺ᤳᤋᤧᤀᤠᤱ ᤔᤧᤘᤕᤧ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤴᤇᤡ᤺ᤔᤏᤠ ᤁᤧᤍᤡ᤺ᤵᤐᤠ ᤔᤡᤗᤠᤶᤒᤠ ᤂᤠᤛᤧᤴᤏᤥ ᤔᤧᤎᤩᤧᤒᤠ ᤐᤠ᤺ᤴᤏᤡᤴ ᤔᤡᤰᤛᤣ᤺ᤴ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
JUD 1:8 ᤛᤧᤵᤔᤠᤱ ᤔᤧᤔᤠᤰᤋᤢᤒᤠ ᤁᤢᤀᤡᤛᤡ᤺ᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤴ ᤀᤡᤱᤗᤧᤰᤁᤣ ᤛᤡᤰᤛᤠᤶᤒᤠᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤌᤰᤁᤥ ᤗᤠᤕᤥ ᤔᤧᤈᤥᤃᤢ᤹. ᤍᤠᤱᤒᤠᤸᤗᤧ ᤁᤢᤕᤢᤰᤁᤡᤴ ᤔᤧᤏᤠ᤹ᤖᤢᤀᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤠ᤺ᤳᤗᤥ॥
JUD 1:9 ᤁᤖ ᤋᤢᤶᤔᤠᤱᤗᤠᤀᤡᤱᤒᤠ ᤔᤡᤂᤠᤀᤧᤗᤖᤧᤀᤠᤱ ᤔᤥᤛᤠᤖᤧ ᤁᤧᤛᤡ᤺ᤒᤠ ᤁᤢᤎᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤑᤧᤴᤛᤠᤶᤔᤡᤴᤏᤢ ᤐᤠ᤺ᤴᤎᤰᤋᤧᤸᤗᤧ ᤔᤠᤑᤧᤴᤛᤠᤶᤔᤡᤴ ᤐᤠ᤺ᤴᤎᤡᤰᤔᤠ ᤔᤧᤀᤠ᤺ᤴᤇᤡᤱᤅᤡᤴᤗᤥ. ᤁᤖ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤧᤓᤧ᤺ᤰᤗ᥄ ᤖᤰ ᤔᤧᤳᤋᤢᤖᤥ॥
JUD 1:10 ᤁᤖ ᤁᤴ ᤔᤏᤠᤜᤠ᤹ᤃ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤆᤧ᤹ᤕᤠ ᤐᤠ᤺ᤴ ᤔᤧᤒᤠ᤺ᤳᤗᤥ॥ ᤜᤧᤰᤁᤩᤠᤱ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤜᤥ᤺ᤵᤐᤠ ᤌᤰᤛᤠ ᤁᤢᤀᤡᤛᤡ᤺ᤰᤗᤰ ᤐᤠ᤺ᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤀᤠᤱ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ᤖᤧᤀᤣ ᤔᤧᤰᤂᤢᤛᤡ᤹ᤖᤥ॥
JUD 1:11 ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤁᤕᤡᤏᤖᤧ ᤁᤢᤗᤠᤕᤥᤒᤠ ᤗᤠᤶᤔᤡᤴ ᤔᤧᤏᤠ᤺ᤳᤋᤢᤀᤠᤱ ᤘᤠ᤹. ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡ ᤒᤠᤗᤠᤔᤖᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤔᤧᤈᤥᤃᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤥᤖᤜᤖᤧ ᤒᤡᤑᤩᤢᤱ ᤆᤥᤃᤢᤀᤠᤱ ᤔᤧᤃᤧᤒᤠ ᤁᤢᤀᤡᤛᤡ᤺ᤰ ᤔᤧᤔᤧᤰᤗᤥ॥
JUD 1:12 ᤂᤧᤱᤜᤠ᤹ᤃ ᤂᤡᤏᤡ᤹ ᤛᤣᤛᤣᤜᤢᤵᤗᤰᤁᤥ ᤛᤥᤖᤡᤰ ᤆᤢᤶᤔᤠᤀᤠᤱ ᤆᤠ᤺ᤔᤏᤠᤒᤠ ᤛᤠᤓᤠᤱᤈᤠ ᤁᤧᤈᤡ᤺ᤶᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤀᤥᤔᤧᤶᤔᤧᤳᤇᤡᤱᤅᤣ ᤀᤠᤒᤠᤅᤣᤖᤰ ᤔᤧᤈ ᤔᤧᤎᤢᤱᤅᤢ᤹ᤖᤥ॥ ᤂᤧᤱᤜᤠ᤹ᤃ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤐᤰᤂᤢ ᤋᤣ᤹ᤖᤢᤒᤠ ᤆᤫᤠ᤺ᤳ ᤔᤧ᤺ᤴᤏᤣᤒᤠ ᤂᤠᤶᤍ᤺ᤶᤒᤠ ᤏᤢ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠᤒᤠ ᤛᤡᤱᤒᤢᤱ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰ॥ ᤂᤧᤱᤜᤠ᤹ ᤁᤧᤛᤡ᤺ᤒᤠ ᤛᤡᤱᤒᤢᤱ ᤜᤧᤰᤁᤣᤖᤰ ᤔᤧ᤺ᤴ ᤁᤖ ᤁᤧᤀᤠ᤺ᤰᤐᤠᤀᤠᤱ ᤁᤧᤜᤣᤒᤠ ᤁᤧᤛᤡ᤺ᤒᤠ ᤛᤡᤱᤒᤢᤱ ᤁᤢᤀᤡᤛᤡ᤺ᤰ ᤔᤧᤈᤥ᤺ᤰᤗᤥ॥
JUD 1:13 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰᤁᤡᤴ ᤘᤠᤜᤱᤅᤥ ᤁᤧᤒᤥ᤺ᤰᤐᤠ ᤕᤶᤒᤠ ᤘᤠᤓᤧᤸᤗᤧᤱᤅᤡᤸᤗᤧ ᤁᤢᤒᤢᤳᤌᤢᤱᤘᤠ ᤁᤢᤀᤡᤛᤡ᤺ᤰ ᤆᤥ᤺ᤰᤗᤥ॥ ᤂᤧᤱᤜᤠ᤹ᤃ ᤁᤧᤀᤡᤒᤠᤖ ᤁᤧᤘᤠ᤹ᤒᤠ ᤂᤣ᤺ᤶᤛᤡᤰ ᤁᤢᤀᤡᤛᤡ᤺ᤰᤐᤠ ᤔᤏᤠᤛᤡᤖᤥ. ᤂᤧᤱᤜᤠ᤹ᤖᤧ ᤗᤠᤃᤡ ᤂᤠᤔᤠᤰ ᤋᤧᤴᤏᤡᤴ ᤛᤍᤠᤍᤡᤱ ᤕᤠᤖᤡᤵ ᤆᤥᤃᤧᤀᤠᤱ ᤘᤠ᤹ᤖᤥ॥
JUD 1:14 ᤀᤠᤍᤶᤗᤠᤶ ᤏᤢᤛᤡᤃᤣ᤺ᤰᤐᤠ ᤁᤢᤔᤢ᤹ᤀᤡᤍᤠᤱᤛᤠ ᤜᤏᤥᤁᤖᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤋᤃᤡᤛᤠ ᤀᤰᤂᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤋᤢᤀᤠᤱ ᤘᤠ᤹. “ᤀᤥᤔᤧᤳᤋᤧᤶᤔᤧ᤹ᤀᤥ. ᤍᤠᤱᤒᤠᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤛᤣᤛᤣ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤖ ᤐᤳᤗᤥ॥
JUD 1:15 ᤂᤢᤏᤧ᤹ ᤁᤠᤰ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢᤛᤡ᤹. ᤜᤧᤰᤁᤩᤠᤱ ᤁᤠᤰ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴ ᤕᤠ᤺ᤶᤒᤰᤜᤠ᤹ ᤏᤢ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤑᤧᤴ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡ᤹ᤖᤥ॥”
JUD 1:16 ᤁᤱᤜᤠ᤹ᤃ ᤁᤠᤏᤠᤰᤏᤠᤰ ᤁᤧᤗ᤹ᤒᤠᤜᤠ᤹. ᤁᤢᤏᤡᤱᤘᤠ᤹ ᤔᤧᤴᤍᤠ᤺ᤔᤏᤠ ᤗᤢᤱᤃᤧᤜᤠ᤺ᤵᤐᤠᤜᤠ᤹ ᤜᤧᤰᤁᤩᤠᤱ ᤀᤠᤒᤠᤅᤣ ᤏᤡᤱᤘᤠ᤹ ᤌᤠᤵᤌᤠᤵ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤏᤢ ᤀᤠᤒᤠᤅᤣ ᤀᤡᤴᤎᤠ᤺ᤰᤗᤧ ᤗᤠᤃᤡ ᤘᤣ᤹ᤜᤠ᤹ ᤁᤧᤗᤧᤶᤒᤠᤛᤡᤖᤥ॥
JUD 1:17 ᤁᤖ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤋᤃᤡᤛᤠ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥
JUD 1:18 ᤂᤧᤱᤜᤠ᤹ᤖᤧᤃ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧ. “ᤁᤢᤏᤢᤵᤔᤠ ᤕᤧᤶᤔᤥ ᤁᤡᤏᤠ᤺ᤴᤍᤡ ᤁᤧᤈᤥ᤺ᤰᤐᤠᤜᤠ᤹ ᤔᤧᤍᤠᤀᤠᤱ ᤀᤠᤒᤠᤅᤣ ᤑᤧᤴ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ᤋᤠᤍᤠ ᤔᤧᤈᤥᤃᤢᤖᤥ॥”
JUD 1:19 ᤒᤠ ᤁᤴ ᤔᤏᤠᤜᤠ᤹ᤖᤧᤀᤣ ᤂᤡᤏᤡ᤹ ᤗᤢᤶᤔᤥ ᤂᤧᤔᤠ᤹ ᤔᤧᤓᤥ᤺ᤰᤂᤢᤀᤠᤱ ᤁᤧᤶᤛᤧᤴᤍᤡ᤹ᤖᤥ॥ ᤂᤧᤴ ᤛᤣᤛᤣᤔᤠᤱ ᤔᤧ᤺ᤴᤏᤣᤒᤠ ᤔᤏᤠᤜᤠ᤹ᤖᤧ ᤁᤴ ᤜᤡᤱᤔᤴᤏᤥᤒᤠ ᤕᤠᤶᤏᤡᤱᤘᤠ᤹ ᤐᤠ᤺ᤴᤜᤠ᤹ᤀᤥᤖᤰ ᤏᤡᤱᤘᤠ᤹ ᤔᤧᤒᤡᤖᤢ᤹.
JUD 1:20 ᤁᤖ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤂᤡᤏᤡ᤹ ᤛᤣᤛᤣ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤠᤱ ᤛᤣᤛᤣᤔᤠᤱᤅᤥ ᤋᤢᤘᤠ ᤆᤥᤃᤧᤶᤔᤧ᤹ᤖ ᤘᤕᤧᤶᤔᤧ᤹ᤀᤥ॥
JUD 1:21 ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤗᤢᤱᤔᤠ᤹ ᤁᤧᤍᤢᤰᤋᤡᤀᤠᤱ ᤁᤧᤒᤡᤖᤡᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤜᤠᤱᤄᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤔᤡ᤺ᤶᤈᤡ ᤔᤧᤳᤋᤧᤶᤔᤧ᤹ᤀᤥ॥
JUD 1:22 ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤥ᤺ᤰᤔᤥ ᤆᤵᤆᤡ ᤁᤧᤈᤥ᤺ᤰᤐᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹.
JUD 1:23 ᤜᤧᤰᤁᤩᤠᤱ ᤗᤠᤕᤥ᤺ᤸᤗᤧ ᤆᤥᤃᤢᤸᤗᤧ ᤔᤡᤀᤥ ᤗᤠ᤺ᤵᤔᤠ ᤁᤧᤀᤡ᤺ᤵᤐᤠᤜᤠ᤹ᤃ ᤀᤢ᤺ᤰᤂᤧᤶᤛᤡᤶᤔᤧ᤹ᤀᤠᤱ ᤋᤠᤱᤛᤧ᤺ᤵᤋᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤔᤡᤸᤗᤧ ᤂᤢᤏᤡ᤹ ᤗᤠᤕᤥ᤺ᤸᤗᤧ ᤁᤧᤴᤗᤡ᤺ᤰᤋᤡᤴᤗ ᤑᤠ᤹ᤀᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥
JUD 1:24 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤗᤠᤕᤥᤀᤥ ᤌᤠ᤺ᤔᤠᤗᤠᤶ ᤂᤡᤏᤡ᤹ ᤛᤧ᤺ᤵᤔᤠ ᤁᤧᤛᤢᤰᤋᤡ᤹. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤢᤔᤡᤔᤡᤍᤡᤱᤅᤡᤸᤗᤧ ᤁᤢᤍᤃᤡ ᤗᤠᤕᤥ ᤔᤧ᤺ᤴᤏᤣ ᤐᤕᤶ ᤛ᤺ᤵᤔᤠᤴᤏᤢ ᤋᤠ᤺ᤵᤔᤠ ᤁᤧᤛᤢᤰᤋᤡ᤹ᤖᤥ॥
JUD 1:25 ᤕᤧᤛᤢ ᤂᤪᤡᤛ᤻ᤋᤗᤠᤶ ᤀᤠᤏᤡ᤹ ᤛᤧᤴᤗᤵ ᤁᤧᤒᤡᤒᤠ ᤌᤡᤰᤗᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤔᤡᤍᤡᤱ. ᤜᤠᤱᤕᤢᤰ. ᤔᤢᤰᤛᤠᤶ ᤜᤧᤰᤁᤩᤠᤱ ᤕᤢᤰᤁᤡᤴ ᤋᤥᤗᤡᤱᤛᤥᤔᤢᤀᤠᤱᤎᤥ ᤛᤍᤠᤍᤡᤱ ᤛᤍᤠᤍᤡᤱ ᤂᤥ᤺ᤔᤠ ᤗᤠ᤹ᤖᤢᤖᤥ᥄ ᤀᤠᤔᤧᤴ᥄
REV 1:1 ᤁᤴ ᤛᤠᤵᤐᤴᤏᤥ ᤕᤧᤛᤢ ᤂᤪᤡᤛ᤻ᤋᤖᤧ ᤀᤥᤛᤣ᤺ᤴᤍᤠᤱ ᤆᤥᤃᤢᤒᤠ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤐᤳᤗᤥ॥ ᤂᤧᤴ ᤀᤥᤛᤣ᤺ᤴᤍᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗ ᤜᤠᤖᤠᤀᤣ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤑᤢ ᤛᤣᤘᤠᤖᤥᤒᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤐᤡᤖᤢᤖᤥ॥ ᤁᤴ ᤐᤠ᤺ᤴᤜᤠ᤹ ᤁᤢᤛᤣᤘᤠᤖᤥᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤛᤡᤱ ᤏᤡ᤺ᤳᤋᤢᤖ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤔᤠᤱᤗᤠᤀᤡᤱᤒᤠᤴ ᤐᤠᤱᤄᤢᤖᤥ॥
REV 1:2 ᤕᤢᤜᤢᤴᤏᤠᤖᤧᤃ ᤂᤢᤏᤧ᤹ ᤂᤧᤵᤛᤢᤒᤠ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤋᤢᤒᤠ ᤁᤠᤰ ᤛᤧᤰᤂᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢ᤹ᤖᤥ॥
REV 1:3 ᤁᤵᤔᤥ ᤁᤧᤒᤵᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤏᤡ᤺ᤵᤐᤧᤴ ᤔᤢ᤹ᤀᤡᤛᤠᤒᤠᤖᤥ. ᤜᤧᤰᤁᤩᤠᤱ ᤂᤧᤴ ᤁᤧᤄᤧᤶᤒᤠᤜᤠ᤹ ᤏᤢ ᤂᤧᤵᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤁᤴ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤱᤔᤠ ᤕᤧᤶ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥
REV 1:4 ᤀᤡᤱᤃᤠ᤹ ᤕᤢᤜᤢᤴᤏᤠ᤺ᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤀᤣᤛᤡᤕᤠ ᤋᤧᤱᤃᤵᤐᤥ ᤁᤧᤏᤧᤒᤠ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ ᤜᤠᤰᤏᤡᤱᤗᤥ॥ ᤀᤠᤸᤗᤥ ᤁᤧᤘᤠ᤹ᤒᤠ. ᤀᤢᤏᤠᤜᤢᤖᤡᤀᤥᤀᤠᤱ ᤘᤕᤧ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤁᤧᤍᤠ᤺ᤒᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏᤢ ᤁᤢᤜᤠᤱᤕᤢᤰᤏᤠ ᤋᤃᤠᤱᤒᤠ ᤏᤢᤛᤡ ᤛᤠᤶᤜᤠ᤹ᤗᤠᤶ. ᤜᤧᤰᤁᤩᤠᤱ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤐᤠ᤺ᤴ ᤁᤧᤒᤠ᤺ᤵᤐᤠ. ᤁᤧᤛᤡ᤺ᤒᤠᤀᤥᤗᤠᤶ ᤕᤠᤶᤔᤥ ᤁᤧᤜᤡᤱᤒᤠᤜᤠ᤹ᤀᤥ ᤌᤡᤰᤛᤡᤃᤣ᤺ᤰᤐᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤗᤢᤱᤃᤢᤶ ᤏᤢ ᤛᤏᤠᤖᤢᤱ ᤜᤠᤖᤠ᤹ ᤂᤡᤏᤡ᤹ᤀᤥ ᤘᤠ᤹ᤖᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤀᤠᤏᤡ᤹ ᤗᤠᤕᤥᤗᤠᤶ ᤁᤢᤔᤠᤰᤂᤡ᤹ᤀᤡᤸᤗᤧ ᤛᤧᤴᤗᤵ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥
REV 1:6 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱ ᤏᤢ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤗᤳᤇᤠ ᤁᤢᤜᤠᤱᤈᤢᤶᤔᤥ ᤁᤢᤛᤣᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ॥ ᤜᤠᤖᤠ᤹ ᤕᤧᤛᤢ ᤂᤪᤡᤛ᤻ᤋᤀᤥ ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶ ᤛᤍᤠᤍᤡᤱ ᤛᤍᤠᤍᤡᤱ ᤐᤥ᤺ᤱᤗᤖᤥ᥄ ᤀᤠᤔᤧᤴ॥
REV 1:7 ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ᤃ ᤂᤠᤵᤔᤡ᤺ᤵᤐᤥ ᤕᤢ᤺ᤖ ᤐᤳᤗᤥ॥ ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ ᤏᤢ ᤂᤢᤏᤧ᤹ ᤁᤧᤎᤢᤵᤐᤠᤜᤠ᤹ᤖᤧᤀᤠᤱ ᤔᤧᤏᤡ᤺ᤛᤢ᤹ᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤆᤥᤃᤢᤸᤗᤧ ᤔᤣᤖᤡᤱ ᤔᤧᤎᤰᤗᤥ॥ ᤜᤠᤖᤠ᤹ ᤀᤰᤂᤣᤀᤣ ᤐᤥ᤺ᤱᤗᤖᤥ᥄ ᤀᤠᤔᤧᤴ॥
REV 1:8 ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ. ᤀᤸᤑᤠ ᤏᤢ ᤀᤥᤔᤣᤃᤠ ᤀᤡᤱᤃᤠ᤹ᤀᤣᤖᤥ. ᤀᤠᤸᤗᤥ ᤁᤧᤘᤠ᤹ᤒᤠ. ᤀᤢᤏᤠᤜᤢᤖᤡᤀᤥᤀᤠᤱ ᤘᤕᤠᤱ ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤁᤧᤍᤠ᤺ᤒᤠ ᤔᤢᤰᤛᤠᤶᤍᤠᤱᤒᤠᤀᤠᤖᤥ ᤗ᤹ᤖᤡᤰ ᤐᤠ᤺ᤳᤋᤢ᤹॥
REV 1:9 ᤀᤡᤱᤃᤠ᤹ ᤕᤢᤜᤢᤴᤏᤠ᤺ᤴ ᤏᤛᤠ᤺ᤴᤏᤥ ᤂᤡᤏᤡ᤹ ᤑᤢ᤹ᤀᤠᤖᤥ॥ ᤂᤪᤡᤛ᤻ᤋ ᤕᤧᤛᤢ᤺ᤴ ᤏᤛᤠ᤺ᤴ ᤆᤥ᤺ᤰᤔᤧᤸᤗᤧ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤔᤧᤄᤥ᤺ᤛᤢᤒᤠ ᤏᤡᤱᤄᤢᤶᤔᤡᤴ ᤂᤡᤏᤡ᤹ᤏᤢ ᤛᤥᤛᤥᤖᤡᤰ ᤏᤠᤛᤡ ᤌ᤺ᤳᤋᤢᤱᤗ ᤌᤖᤢᤱᤅᤠᤱ ᤘᤠ᤹ᤀᤠᤖᤥ॥ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤏᤢ ᤆᤥᤃᤢᤒᤠ ᤐᤠ᤺ᤴᤜᤠ᤹ ᤀᤡᤱᤓᤴ ᤆᤥᤃᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤐᤳᤔᤥᤛ ᤘᤠᤃᤵᤗᤠᤈᤣ᤹ᤀᤥ ᤛᤠᤰᤐᤠ ᤁᤧᤎᤠ᤺ᤒᤠ ᤔᤧᤈᤥᤃᤠᤱ ᤔᤧᤍᤣ᤹ᤖᤠᤱᤅᤠᤱ ᤘᤕᤠᤱ॥
REV 1:10 ᤍᤠᤱᤒᤠᤸᤗᤧ ᤁᤢᤕᤧᤴᤏᤥ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤠᤱᤅᤠᤱ ᤘᤕᤠᤱᤅᤡᤸᤗᤧ ᤀᤠᤀᤣᤃᤠᤱᤗᤠᤶ ᤌᤢᤳᤌᤢᤖᤡ᤺ᤵᤐᤠᤸᤗᤧ ᤐᤕᤶ ᤕᤶᤒᤠ ᤁᤢᤀᤡᤰᤗᤠ ᤜᤧᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ॥
REV 1:11 ᤂᤧᤴ ᤀᤡᤰᤗᤠ᤺ᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤁᤧᤏᤡ᤺ᤛᤢᤒᤠ ᤐᤠ᤺ᤴᤜᤠ᤹ ᤛᤠᤵᤋᤧ᤹ᤀᤠᤱ ᤀᤣᤑᤡᤛᤛ. ᤀᤡᤛ᤻ᤔᤷᤏᤠ. ᤐᤷᤃᤠᤔᤔ. ᤌᤡᤕᤠᤋᤡᤖᤠ. ᤛᤠᤷᤍᤡᤛ. ᤑᤡᤗᤠᤍᤣᤸᤑᤡᤕᤠ ᤏᤢ ᤗᤠᤀᤥᤍᤡᤁᤡᤕᤠ ᤕᤧᤰᤕᤰᤜᤠ᤹ᤀᤥᤒᤠ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ ᤜᤠᤰᤋᤧᤛᤧ᤹ᤀᤥ॥”
REV 1:12 ᤀᤡᤱᤃᤠ᤹ᤏᤢ ᤁᤧᤒᤠ᤺ᤵᤐᤧᤴ ᤜᤠ᤺ᤳᤏᤡᤒᤣ ᤑᤠ᤹ᤀᤠᤱ ᤂᤡᤖᤡ ᤜᤡᤛᤡᤱᤅᤠᤱᤅᤡᤸᤗᤧ ᤂᤧᤵᤔᤥ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤜᤠ᤹ ᤏᤡ᤺ᤛᤢᤱᤛᤡᤱ॥
REV 1:13 ᤂᤧᤸᤗᤧ ᤁᤢᤗᤢᤶᤔᤥ ᤌᤥᤗᤠᤶᤒᤠ ᤕᤥ ᤗᤠᤱᤈᤰᤁᤥ ᤌᤠᤖᤡᤰ ᤋᤣ᤺ᤳ ᤁᤧᤈᤠᤱᤒᤠ ᤜᤧᤰᤁᤩᤠᤱ ᤁᤢᤛᤱᤒᤣ᤹ᤀᤥ ᤛᤠᤶᤔᤩᤠᤱ ᤑᤕᤢᤶ ᤐᤧᤷᤄᤧᤰ ᤁᤧᤜᤣᤒᤠ “ᤔᤧᤴᤇᤠᤶᤛᤠ᤺ᤴ” ᤜᤧᤰᤋᤱᤒᤠᤎᤡᤰ ᤏᤡ᤺ᤛᤢᤱᤗᤥ॥
REV 1:14 ᤂᤧᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤏᤠ᤺ᤱᤅᤡᤴ ᤜᤧᤰᤁᤣ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤏᤢ ᤂᤡ᤺ ᤜᤧᤰᤁᤣ ᤑ᤺ ᤗ᤹ᤖᤧᤖᤥ॥ ᤂᤢᤏᤧ᤹ ᤁᤢᤔᤡᤰᤁᤡᤱᤃ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤆᤥᤃᤧᤖᤥ॥
REV 1:15 ᤂᤢᤏᤧ᤹ ᤁᤢᤗᤠᤱᤜᤠ᤹ᤃ ᤌᤌᤏᤠᤒᤠᤴ ᤔᤡᤀᤥ ᤀᤥ᤹ᤔᤠᤸᤗᤧ ᤛᤧᤸᤗᤧᤱ ᤛᤧᤸᤗᤧᤱ ᤀᤥ᤺ᤵᤐᤠ ᤁᤢᤀᤡᤛᤡ᤺ᤰ. ᤜᤧᤰᤁᤩᤠᤱ ᤁᤢᤀᤡᤰᤗᤠ᤺ᤱᤃ ᤐᤕᤶ ᤕᤶᤒᤠ ᤘᤎᤠ᤺ᤶᤔᤡᤴ ᤛ᤺ᤰᤐᤠ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥
REV 1:16 ᤂᤢᤏᤧ᤹ ᤁᤢᤈᤢᤵᤛᤠᤱ ᤜᤢᤰᤁᤡᤸᤗᤧ ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤋᤧᤶᤛᤢᤛᤡᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤁᤢᤔᤢᤖᤠᤀᤥᤗᤠᤶ ᤏᤧᤵᤈᤠᤱ ᤗᤧᤵᤔᤠᤱ ᤂᤠᤃᤧᤛᤢᤰᤐᤠ ᤁᤢᤕᤠ ᤁᤧᤒᤵᤐᤠ ᤋᤠᤓᤣ᤺ᤴ ᤗ᤺ᤴᤍᤧᤀᤠᤱ ᤐᤳᤇᤧᤖᤥ॥ ᤜᤧᤰᤁᤩᤠᤱ ᤁᤢᤏᤠᤖᤠ᤺ᤱᤃ ᤗᤧᤴᤍᤡᤰ ᤁᤧᤀᤥ᤺ᤵᤐᤠ ᤏᤠᤶᤔᤡᤴ ᤜᤧᤰᤁᤣ ᤔᤡᤰ ᤁᤧᤈᤧᤶᤒᤠ ᤆᤥᤃᤧᤖᤥ॥
REV 1:17 ᤜᤧᤰᤁᤩᤠᤱ ᤂᤢᤏᤧ᤹ ᤏᤡ᤺ᤛᤢᤱᤅᤠᤱ ᤀᤡᤱᤃᤠ᤹ᤃ ᤛᤡ᤺ᤔᤠᤗᤡᤱᤎᤥᤀᤥ ᤁᤧᤖᤠᤱᤅᤠᤱ ᤁᤢᤗᤠᤱᤈᤰᤐᤥ ᤜᤷᤃᤢᤵᤛᤠ ᤆᤥ᤺ᤴᤍᤠᤱᤗᤥ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤜᤢᤰᤁᤡᤴ ᤀᤠᤛᤶᤍᤠᤱ ᤏᤧᤛ᤻ᤛᤢᤀᤠᤱ ᤀᤰᤂᤣ ᤔᤧᤳᤋᤠᤱᤗᤥ. “ᤔᤧᤃᤡᤛᤧᤴᤏᤧ᤹ᤀᤥ ᤀᤡᤱᤃᤠ᤹ ᤋᤥᤗᤡᤱᤛᤥᤔᤢ ᤏᤢ ᤁᤢᤏᤢᤵᤔᤠᤀᤠᤖᤥ॥
REV 1:18 ᤁᤢᤜᤡᤱᤘᤧᤳ ᤁᤧᤒᤥ᤺ᤱᤒᤧᤱᤃ ᤀᤡᤱᤃᤠ᤹ᤀᤣᤖᤥ॥ ᤀᤡᤱᤃᤠ᤹ ᤛᤩᤠᤱᤅᤠᤱ ᤘᤕᤠᤱ. ᤁᤖ ᤀᤥᤔᤧᤳᤋᤧ᤹. ᤀᤡᤱᤃᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤕᤠᤶᤔᤥ ᤜᤡᤅᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤛᤡ᤺ᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤸᤗᤧᤴ ᤋᤡᤔᤡᤰᤜᤠ᤹ ᤀᤡᤱᤃᤠ᤹ ᤁᤳᤋᤢᤱᤗᤥ॥
REV 1:19 ᤂᤧᤸᤗᤧ ᤆᤥᤃᤢᤸᤗᤧ ᤀᤠᤸᤗ ᤂᤧᤏᤧ᤹ ᤁᤧᤏᤡ᤺ᤛᤢᤒᤠ ᤀᤠᤸᤗᤥ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤏᤢ ᤋᤠ᤺ᤴᤍᤡ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤛᤠᤵᤋᤧ᤹ᤀᤥ॥
REV 1:20 ᤂᤧᤏᤧ᤹ ᤀᤡᤱᤃᤠ᤹ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤁᤧᤏᤡ᤺ᤛᤢᤒᤠ ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤏᤢ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤜᤠ᤹ᤖᤧᤴ ᤛᤡᤒᤡ᤹ ᤐᤠ᤺ᤴᤜᤠ᤹ᤃ ᤒᤠ ᤁᤴᤗᤥ–ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤏᤢᤛᤡ ᤛᤣᤛᤣᤜᤢᤵᤗᤰᤜᤠ᤹ᤀᤥᤒᤠ ᤔᤠᤱᤗᤠᤀᤡᤱᤒᤠᤛᤡᤖᤥ. ᤜᤧᤰᤁᤩᤠᤱ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴᤜᤠ᤹ ᤏᤢᤛᤡ ᤛᤣᤛᤣᤜᤢᤵᤗᤰᤛᤡᤖᤥ॥”
REV 2:1 “ᤀᤣᤑᤡᤛᤛ᤻ᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤜᤠ᤹ᤃ ᤁᤢᤈᤢᤵᤛᤠᤱ ᤜᤢᤰᤁᤡᤸᤗᤧ ᤏᤢᤛᤡ ᤂᤣ᤺ᤶᤛᤡᤰᤜᤠ᤹ ᤁᤧᤍᤧᤶᤒᤠ ᤏᤢ ᤏᤢᤛᤡ ᤛᤠᤶᤔᤩᤠᤱ ᤛᤣᤔᤡᤕᤢᤱᤍᤧᤴ ᤗᤢᤶᤔᤥᤗᤠᤶ ᤗᤠᤱᤃᤧᤄᤣ᤺ᤰᤐᤠᤸᤗᤧ ᤐᤠ᤺ᤳᤋᤢᤒᤠᤖᤥ–
REV 2:2 ‘ᤂᤧᤏᤧ᤹ ᤀᤠᤰᤂᤧᤴ ᤛᤠ᤹ᤖᤡᤰ ᤕᤠᤶᤒᤢᤎᤡᤰᤐᤠ ᤏᤢ ᤏᤠᤛᤡᤁᤧᤎ᤺ᤵᤐᤠ ᤁᤧᤈᤥ᤺ᤰ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ ᤏᤠᤛᤡ ᤁᤧᤴᤎ᤺ᤳᤋᤢᤴᤇᤡᤶᤒᤠᤴ ᤏᤢ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠ ᤔᤧ᤺ᤴᤇᤡᤛᤠᤱ ᤀᤠᤏᤡᤃᤧ ᤛᤣ᤺ᤰᤕᤢᤰᤔᤡᤒᤠᤛᤡᤃᤧ ᤁᤧᤗ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤁᤧᤛᤠ᤹ᤖᤢᤀᤠᤱ ᤂᤧᤱᤜᤠ᤹ ᤀᤡᤱᤗᤧᤰᤐᤠᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥ᤺ᤛᤢᤒᤠᤴ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥
REV 2:3 ᤜᤧᤰᤁᤩᤠᤱ ᤂᤧᤏᤧ᤹ ᤏᤠᤛᤡ ᤌ᤺ᤵᤔᤠᤴ ᤁᤧᤃᤳᤋᤢᤀᤠᤱ ᤀᤡᤱᤃᤠ᤹ ᤀᤠᤗᤠᤃᤡ ᤋᤢᤰᤂᤣ ᤁᤧᤈᤩᤧᤒᤠᤴ ᤏᤢ ᤀᤡᤱᤃᤠ᤹ ᤁᤧᤸᤗᤧᤖᤠᤱᤅᤡᤶᤒᤠᤴ ᤏᤡ᤺ᤛᤢᤱᤗᤥ॥
REV 2:4 ᤁᤖ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤳᤇᤠ ᤐᤠ᤺ᤴᤎᤡᤰ ᤐᤠ᤺ᤵᤔᤠᤀᤣ ᤐᤥ᤺ᤱ–ᤋᤃᤡ ᤔᤡ᤺ᤶᤈᤡ ᤁᤧᤔᤧᤳᤋᤠᤱᤒᤠ ᤕᤠᤖᤡᤰ ᤀᤰᤂᤣ᤺ᤸᤗᤧ ᤀᤡᤱᤃᤠ᤹ ᤔᤡ᤺ᤶᤈᤡ ᤁᤧᤶᤔᤧᤳᤋᤠᤴᤗᤥ॥
REV 2:5 ᤂᤧᤏᤧ᤹ ᤋᤃᤡ ᤔᤡ᤺ᤶᤈᤡ ᤁᤧᤔᤧᤳᤋᤠᤱᤒᤠ ᤔᤡ᤺ᤶᤈᤡᤗᤠᤶ ᤀᤠᤰᤂᤧᤶᤔᤩᤠᤰ ᤔᤠ᤺ᤱᤄᤠ ᤁᤧᤒᤥ᤺ᤰᤂᤧᤀᤠᤱ ᤁᤧᤘᤠ᤹ ᤂᤧᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹॥ ᤂᤧᤏᤧ᤹ ᤗᤠᤕᤥᤗᤠᤶ ᤜᤡᤴᤍᤧ᤹ᤀᤠᤱ ᤋᤃᤡ ᤁᤧᤈᤥᤃᤢᤒᤠ ᤜᤧᤰᤁᤣᤀᤣ ᤆᤥᤃᤧ᤹ᤀᤥ॥ ᤂᤧᤏᤧ᤹ ᤁᤧᤗᤠᤕᤥᤀᤥᤏᤢ ᤁᤧᤴᤏᤢ᤺ᤱᤏᤧᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤋᤠᤀᤠ ᤜᤧᤰᤁᤩᤠᤱ ᤁᤧᤛᤣᤔᤡᤕᤢᤱᤍᤧᤴᤏᤡᤴ ᤁᤢᤕᤢᤱᤍᤧᤴᤏᤥᤗᤠᤶ ᤂᤧᤳᤋᤢᤱᤍᤣ᤺ᤛᤢᤱᤗᤥ॥
REV 2:6 ᤁᤖ ᤗᤳᤇᤠ ᤏᤢ᤺ᤒᤠ ᤐᤠ᤺ᤴᤎᤡᤰ ᤂᤧᤏᤧ᤹ ᤁᤧᤃᤳᤋᤢ᤹ᤖᤥ–ᤏᤡᤁᤥᤗᤠᤀᤡᤳᤋᤡ ᤔᤧᤵᤔᤏᤠᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤆᤡ᤺ᤳᤋᤢᤱᤒᤠ ᤜᤧᤰᤁᤣ ᤂᤧᤏᤧ᤹ᤀᤠᤱ ᤁᤧᤈᤡ᤺ᤳᤋᤢᤖᤥ॥
REV 2:7 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄ ᤁᤧᤏᤠ᤺ᤶᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤱᤛᤣ᤹ ᤀᤡᤰᤁᤥᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤔᤠᤸᤗᤧ ᤁᤢᤈᤠ᤹ᤀᤡᤴ ᤆᤠᤔᤠ ᤐᤡᤖᤢᤱᤗᤥ॥’”
REV 2:8 “ᤀᤡᤛ᤻ᤔᤷᤏᤠᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤅᤡᤴ ᤁᤢᤜᤣ᤺ᤰᤛᤡᤱᤔᤠ ᤏᤢ ᤁᤢᤏᤢᤵᤔᤠ. ᤁᤧᤛᤡ᤺ᤒᤠᤀᤠᤱ ᤕᤠᤶᤔᤥ ᤁᤢᤜᤡᤱᤘᤧᤳ ᤁᤧᤒᤥ᤺ᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ–
REV 2:9 ‘ᤁᤧᤍᤢᤔᤢᤒᤠ ᤏᤡᤱᤄᤢᤶᤜᤠ᤹ ᤏᤢ ᤁᤧᤕᤠᤱᤛᤠ᤹ᤔᤠᤴ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ. ᤁᤖ ᤛᤧᤰᤂᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤈᤥ᤺ᤰᤗᤥ॥ ᤀᤠᤏᤡᤃᤧ ᤕᤜᤢᤍᤡᤛᤡᤃᤧ ᤁᤧᤗ᤹ᤒᤠᤜᤠ᤹ᤖᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤆᤧ᤹ᤕᤠ ᤁᤧᤔᤧᤵᤐᤧᤴ ᤀᤡᤱᤃᤠ᤹ ᤏᤡ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤜᤠ᤹ᤃ ᤕᤜᤢᤍᤡᤛᤡ ᤔᤧ᤺ᤴ. ᤁᤖ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤏᤠᤛᤡᤖᤥ॥
REV 2:10 ᤀᤠᤸᤗ ᤂᤧᤏᤧ᤹ᤀᤥ ᤁᤧᤍᤠ᤺ᤒᤠᤖ ᤁᤧᤒᤵᤐᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤏᤢ ᤔᤧᤃᤡᤛᤧᤴᤏᤧ᤹ᤀᤥ॥ ᤂᤧᤵᤛᤧ᤹ᤀᤥ. ᤁᤧᤏᤛᤠ᤺ᤴᤏᤡᤴ ᤜᤱᤛᤠ᤹ᤔᤠᤖᤧ ᤗᤠᤃᤡ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤓᤠ ᤂᤡᤏᤡ᤹ ᤐᤢᤱᤗᤠᤜᤡᤶᤔᤥ ᤁᤧᤎᤧᤰᤋᤡ᤹ᤛᤠᤱ ᤌᤡᤒᤥ᤺ᤱ ᤕᤧᤴ ᤌᤠᤖᤡᤰᤗᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤈᤩᤧ᤹ᤀᤡᤖᤥ॥ ᤛᤡ᤺ᤔᤠᤗᤡᤱᤎᤥᤀᤥ ᤁᤧᤃᤧᤖᤡᤛᤠᤱ ᤀᤡᤱᤃᤠ᤹ ᤏᤛᤠ᤺ᤴ ᤆᤥ᤺ᤰᤔᤠ ᤕᤠᤵᤔᤡ ᤀᤠᤸᤗᤧᤖᤧᤶᤔᤡᤴᤏᤧ᤹ᤀᤥ. ᤜᤧᤰᤁᤩᤠᤱ ᤁᤧᤏᤠ᤺ᤴᤍᤢᤶᤔᤠᤱ ᤁᤧᤄᤥ᤺ᤛᤢᤶᤒᤠ ᤌᤢᤶᤄᤥ᤺ᤸᤗᤧ ᤗᤠᤃᤡ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤐᤡᤏᤡᤱᤗᤥ॥
REV 2:11 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄ ᤁᤧᤏᤠ᤺ᤶᤒᤠᤴ ᤏᤡᤛᤡᤃᤣ᤺ᤰᤐᤠ ᤛᤡ᤺ᤔᤧᤸᤗᤧᤀᤠᤱ ᤌᤣᤀᤠᤱ ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥’”
REV 2:12 “ᤐᤷᤃᤠᤔᤔᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤅᤡᤴ ᤏᤧᤵᤈᤠᤱ ᤗᤧᤵᤔᤠᤱ ᤁᤢᤕᤠ ᤁᤧᤒᤵᤐᤠ ᤂᤠᤃᤧᤛᤢᤰᤐᤠ ᤋᤠᤓᤣ ᤁᤧᤃᤵᤐᤠᤸᤗᤧ ᤐᤠ᤺ᤳᤋᤢᤒᤠᤖᤥ–
REV 2:13 ‘ᤂᤧᤏᤧ᤹ ᤔᤠᤑᤧᤴᤛᤠᤶᤔᤡᤸᤗᤧ ᤜᤠᤱ ᤆᤥᤃᤢᤒᤠ ᤋᤧᤴᤏᤥ ᤁᤧᤘᤠ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥ ᤁᤖᤛᤠᤱ ᤂᤧᤏᤧ᤹ᤃ ᤆᤰᤔᤧᤸᤗ᤹ᤀᤣ ᤀᤡᤱᤃᤠ᤹ ᤏᤛᤠ᤺ᤴ ᤁᤧᤈᤥ᤺ᤰᤁᤠᤖ ᤁᤧᤘᤠ᤹॥ ᤏᤛᤠ᤺ᤴᤛᤠᤒᤠ ᤀᤠᤍᤥ᤺ᤴᤍᤡ ᤁᤧᤒᤠ᤺ᤵᤐᤠ ᤀᤣᤴᤋᤡᤐᤠᤛᤧᤴ ᤔᤠᤑᤧᤴᤛᤠᤶᤔᤡᤴ ᤁᤧᤘᤠ᤹ᤒᤠ ᤂᤡᤏᤡ᤹ ᤕᤧᤰᤕᤰᤁᤥ ᤔᤧᤛᤧᤖᤢᤛᤠᤱ ᤂᤧᤏᤧ᤹ᤃ ᤁᤧᤏᤛᤠ᤺ᤴᤏᤡᤴ ᤁᤧᤴᤗᤧᤖᤢᤴᤗᤥ॥
REV 2:14 ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤁᤢᤓᤠ ᤐᤠ᤺ᤴ ᤐᤠ᤺ᤵᤔᤠᤀᤣ ᤐᤥ᤺ᤱᤗᤥ–ᤂᤡᤏᤡ᤹ᤀᤥ ᤁᤢᤓᤠᤖᤧᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤒᤠᤗᤠᤔᤖᤧ ᤁᤢᤏᤡᤛᤠᤶᤔᤡᤴ ᤔᤧᤏᤠ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤀᤢᤴᤇᤥ᤺ᤴ ᤒᤠᤗᤠᤔᤖᤧᤃ ᤀᤡᤛᤪᤠᤀᤡᤗᤡᤜᤠ᤹ ᤗᤠᤕᤥᤀᤥ ᤔᤧᤎᤠᤖ ᤑᤠ᤹ᤀᤠᤱ ᤏᤠᤘᤠᤀᤡᤳᤗᤠᤀᤥ ᤋᤥ᤺ᤶᤔᤏᤠᤒᤠ ᤆᤠ ᤆᤠᤔᤠ ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤒᤠᤗᤠᤁ ᤜᤠᤱᤅᤡᤴ ᤜᤢ᤹ᤖᤢᤀᤠᤱ ᤘᤕᤧᤖᤥ॥
REV 2:15 ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤥ ᤁᤢᤓᤠᤃ ᤏᤡᤁᤥᤗᤠᤀᤡᤳᤋᤡ ᤔᤧᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤴ ᤁᤧᤏᤠ᤺ᤵᤐᤠᤜᤠ᤹ ᤔᤧᤘᤠ᤹ᤖᤥ॥
REV 2:16 ᤜᤧᤰᤋᤱᤒᤠ ᤗᤠᤕᤥᤗᤠᤶ ᤜᤡᤴᤍᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤜᤠᤖᤠᤀᤣ ᤋᤠᤀᤠᤀᤠᤱ ᤀᤠᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤋᤠᤓᤣ᤺ᤴᤏᤢ ᤂᤧᤴ ᤏᤡᤁᤥᤗᤠᤀᤡᤳᤋᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤁᤠᤖᤥ॥
REV 2:17 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄ ᤁᤧᤏᤠ᤺ᤶᤒᤧᤴ ᤀᤡᤱᤃᤠ᤹ ᤆᤡᤱᤔᤏᤠᤒᤠ ᤔᤴᤏᤠ᤺ᤴ ᤐᤡᤖᤢᤱᤗᤥ॥ ᤜᤧᤰᤁᤩᤠᤱ ᤂᤧᤴ ᤑ᤺ᤃᤧᤗ᤹ᤒᤠ ᤗᤢᤱᤎᤡᤰᤁᤠᤱ ᤐᤡᤖᤢᤱᤗᤥ॥ ᤂᤧᤵᤔᤥ ᤁᤢᤛᤱ ᤔᤡᤱ ᤛᤠᤵᤋᤧᤀᤠᤱ ᤐᤳᤗᤥ. ᤂᤧᤴ ᤁᤧᤄᤥ᤺ᤒᤠᤸᤗᤧᤖᤰ ᤁᤢᤛᤡᤱ ᤏᤡ᤺ᤳᤋᤢ᤹ᤖᤥ॥’”
REV 2:18 “ᤌᤡᤕᤠᤋᤡᤖᤠᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤅᤡᤴ ᤁᤢᤔᤡᤰᤁᤡᤴ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤏᤢ ᤁᤢᤗᤠᤱᤜᤠ᤹ ᤌᤌᤏᤠᤒᤠ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤏᤡᤱᤘᤠ᤹ᤑᤢᤛᤠ᤺ᤸᤗᤧ ᤐᤠ᤺ᤳᤋᤢᤒᤠᤖᤥ–
REV 2:19 ‘ᤂᤧᤏᤧ᤹ ᤁᤧᤕᤠ᤺ᤶᤒᤰᤁᤡᤴ. ᤁᤧᤔᤡ᤺ᤶᤈᤡᤴ. ᤁᤧᤏᤛᤠ᤺ᤴᤏᤡᤴ. ᤁᤧᤔᤠᤱᤛᤣᤘᤠ᤺ᤴ ᤜᤧᤰᤁᤩᤠᤱ ᤂᤧᤏᤧ᤹ ᤋᤢᤰᤂᤣ ᤁᤧᤎ᤺ᤖᤢᤒᤠᤴ ᤀᤡᤱᤃᤠ᤹ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤀᤠᤸᤗᤥᤃ ᤂᤧᤏᤧ᤹ ᤋᤃᤡᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤠᤱᤛᤣᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰ ᤑᤠ᤹ᤀᤠᤱ ᤏᤡ᤺ᤛᤢᤱᤗᤥ॥
REV 2:20 ᤜᤧᤰᤁᤣᤛᤠᤱ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤡᤱᤃᤠ᤹ ᤗᤳᤇᤠ ᤐᤠ᤺ᤴᤎᤡᤰ ᤐᤠ᤺ᤵᤔᤠᤀᤣ ᤐᤥ᤺ᤱ–ᤂᤧᤏᤧ᤹ᤃ ᤀᤡᤈᤣᤒᤧᤗ ᤔᤧᤵᤔᤏᤠᤔᤠ ᤔᤧᤴᤇᤢᤔᤠ᤹ᤀᤡᤴ ᤏᤠᤛᤡ ᤁᤧᤎ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤂᤧᤸᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤔᤠᤀᤠ ᤗ᤹ᤖᤡᤰ ᤔᤧᤳᤇᤡᤱᤗᤥ॥ ᤁᤖ ᤀᤡᤱᤃᤠ᤹ ᤀᤠᤛᤣᤘᤠᤖᤥᤒᤠᤜᤠ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤋᤥ᤺ᤶᤔᤏᤠᤒᤠ ᤆᤠᤜᤠ᤹ ᤆᤠᤔᤠ ᤜᤢ᤹ᤖᤢᤛᤡᤀᤠᤱ ᤀᤡᤱᤗᤧᤰᤋᤢᤛᤡ॥
REV 2:21 ᤀᤡᤱᤃᤠ᤹ ᤂᤧᤴᤏᤡᤴ ᤁᤢᤗᤠᤕᤥᤗᤠᤶ ᤜᤡᤴᤗ ᤑᤠ᤹ᤀᤠᤱ ᤕᤧᤶ ᤐᤡᤖᤢᤱ ᤁᤖ ᤂᤧᤴ ᤕᤠᤶᤒᤥ᤺ᤵᤔᤠ ᤁᤢᤕᤠ᤺ᤶᤒᤰᤁᤥᤗᤠᤶ ᤜᤡᤶᤔᤠ ᤔᤧᤍᤧᤴᤏᤧᤴᤗᤥ॥
REV 2:22 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤱ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤴᤜᤡᤴᤏᤧᤴᤏᤧ ᤑᤠ᤹ᤃᤪ ᤁᤠᤰ ᤀᤡᤱᤃᤠ᤹ ᤕ᤹ ᤌᤧᤳᤋᤢᤛᤡᤖ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥
REV 2:23 ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤛᤧᤖᤢᤱᤛᤡᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤀᤡᤱᤃᤠ᤹ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤏᤢ ᤛᤡᤰᤗᤢᤱᤔᤠ ᤁᤧᤏᤡ᤺ᤒᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ ᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ ᤁᤧᤖᤧᤰ ᤐᤡᤏᤡᤱᤗᤥ॥
REV 2:24 ᤁᤖ ᤑᤧᤴ ᤏᤡᤛᤠᤶᤔᤡᤴ ᤔᤧᤴᤏᤠ᤺ᤵᤔᤏᤠᤒᤠᤜᤠ᤹ ᤏᤢ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴ ᤔᤧᤒᤠ᤺ᤳᤋᤢᤒᤠ ᤏᤡᤛᤠᤶᤔᤡᤴᤏᤠᤱ ᤔᤧᤴᤜᤢ᤹ᤛᤡᤱᤔᤏᤠᤒᤠᤜᤠ᤹ ᤂᤡᤏᤡ᤹ ᤌᤡᤕᤠᤋᤡᤖᤠᤀᤥᤒᤠ ᤘᤣ᤹ ᤔᤏᤠᤜᤠ᤹ ᤘᤣ᤹ ᤁᤰ ᤔᤧᤃᤢ᤺ᤳᤏᤡᤱᤅᤡᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤳᤏᤡᤱᤗᤥ॥
REV 2:25 ᤁᤖ ᤀᤡᤱᤃᤠ᤹ ᤔᤧᤴᤕᤢ᤺ᤀᤣ ᤌᤠᤖᤡᤰ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤏᤛᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤋᤰᤋᤧᤶᤔᤧ᤹ᤀᤠᤱ ᤁᤳᤋᤧᤶᤔᤧ᤹ᤀᤥ॥
REV 2:26 ᤁᤧᤏᤠ᤺ᤶᤒᤠ ᤜᤧᤰᤁᤩᤠᤱ ᤁᤢᤏᤢᤵᤔᤥ ᤌᤠᤖᤡᤰ ᤀᤠᤕᤠ᤺ᤶᤒᤰᤁᤡᤴ ᤁᤧᤈᤥ᤺ᤰᤐᤠᤖ ᤁᤧᤘᤠ᤹ᤒᤠᤴ ᤀᤡᤱᤃᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤢᤰᤁᤥ ᤁᤵᤔᤠᤛᤡ ᤕᤢᤰ ᤐᤡᤖᤢᤱᤗᤥ॥
REV 2:27 ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤗᤠᤶ ᤕᤢᤰ ᤂᤥ᤺ᤛᤢᤱᤒᤠ ᤁᤢᤀᤡᤛᤡ᤺ᤰ ᤂᤢᤏᤧ᤹ ᤕᤢᤰ ᤐᤡᤖᤢᤱᤗᤥ॥ ᤂᤧᤸᤗᤧ ᤑᤧᤴᤈᤣ᤹ ᤋᤰᤁᤠ᤺ᤳᤋᤡᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤢᤰᤁᤥ ᤁᤳᤋᤢᤛᤡ᤹. ᤜᤧᤰᤁᤩᤠᤱ ᤂᤠᤶ ᤁᤢ᤺ᤴᤍᤠ᤺ᤴ ᤕ᤺ᤵᤐᤠ ᤁᤢᤀᤡᤛᤡ᤺ᤰ ᤂᤧᤱᤜᤠ᤹ ᤕ᤺ᤵᤛᤢᤛᤡ᤹ᤖᤥ॥
REV 2:28 ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤔᤏᤠ᤺ᤴ ᤋᤠᤴᤇᤥ᤺ᤰᤐᤧᤴᤏᤠᤱ ᤐᤡᤖᤢᤱᤗᤥ॥
REV 2:29 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄’”
REV 3:1 “ᤛᤠᤷᤍᤡᤛᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤅᤡᤴ ᤏᤢᤛᤡ ᤂᤣ᤺ᤶᤛᤡᤰᤐᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤛᤡ ᤁᤢᤛᤣᤛᤣᤔᤠᤱ ᤁᤧᤃᤵᤐᤠᤸᤗᤧ ᤐᤠ᤺ᤳᤋᤢᤒᤠᤖᤥ– ‘ᤂᤧᤏᤧ᤹ ᤁᤠᤰ ᤁᤧᤕᤠ᤺ᤶᤒᤰᤜᤠ᤹ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ ᤑᤠ᤹ᤀᤠᤱ ᤀᤡᤱ ᤛᤧ᤺ᤖᤧᤀᤠᤱ ᤘᤠ᤹ᤛᤠᤱ ᤂᤧᤏᤧ᤹ᤃ ᤁᤢᤛᤡᤘᤧᤳ ᤁᤢᤀᤡᤛᤡ᤺ᤰ ᤁᤧᤈᤥ᤺ᤰᤗᤥ॥
REV 3:2 ᤜᤧᤰᤁᤣ᤺ᤸᤗᤧ ᤐᤥᤃᤧ᤹ᤀᤥ. ᤛᤡ᤺ᤔᤠ ᤁᤧᤈᤥ᤺ᤰᤐᤠᤀᤠᤱ ᤁᤧᤍᤠᤱᤒᤠ ᤁᤧᤕᤠᤰᤐᤠ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤁᤧᤎᤢᤶᤒᤠ ᤆᤥᤃᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤡᤏᤡ᤹ ᤕᤠ᤺ᤶᤒᤰᤜᤠ᤹ ᤁᤢᤗᤡᤱᤎᤥ ᤔᤧᤱᤃᤧᤳᤋᤣ ᤘᤠ᤹ᤒᤠᤴ ᤀᤡᤱᤃᤠ᤹ ᤏᤡ᤺ᤛᤢᤱ॥
REV 3:3 ᤂᤧᤏᤧ᤹ ᤁᤧᤄᤧᤵᤛᤢᤒᤠ ᤏᤢ ᤁᤧᤜᤢ᤹ᤛᤡᤱᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤀᤡ᤺ᤳᤋᤧ᤹॥ ᤜᤧᤰᤁᤩᤠᤱ ᤂᤧᤴ ᤋᤧᤴᤍᤡᤱ ᤆᤥᤃᤧ᤹ᤀᤠᤱ ᤁᤧᤗᤠᤕᤥᤗᤠᤶ ᤜᤡᤴᤍᤧ᤹ᤀᤥ॥ ᤁᤖ ᤁᤧᤶᤒᤥ᤺ᤰᤏᤧᤴᤏᤧ ᤑᤠ᤹ᤃᤪ ᤁᤧᤄᤢ᤺ᤶᤒᤠᤴ ᤛᤢᤸᤗᤡ ᤋᤠᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤋᤠᤀᤠᤖᤥ. ᤜᤧᤰᤁᤩᤠᤱ ᤋᤠ᤺ᤀᤠᤒᤠ ᤕᤧᤶᤔᤡᤴ ᤂᤧᤏᤧ᤹ ᤁᤧᤴᤏᤡ᤺ᤛᤢᤴ॥
REV 3:4 ᤁᤖ ᤛᤠᤷᤍᤡᤛᤀᤥ ᤀᤠᤸᤗ ᤌᤠᤖᤡᤰ ᤂᤢᤏᤡ᤹ ᤋᤣ᤺ᤳ ᤆᤠᤱᤜᤠ᤹ ᤗᤠᤕᤥ᤺ᤸᤗᤧ ᤔᤧᤴᤈᤡ᤺ᤴᤏᤣ ᤁᤧᤈᤠᤱᤒᤠ ᤁᤢᤓᤠ ᤔᤏᤠᤜᤠ᤹ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤑ᤺ᤃᤧᤗ᤹ᤒᤠ ᤋᤣ᤺ᤳ ᤔᤧᤈᤠᤰᤂᤢᤀᤠᤱ ᤀᤡᤱᤃᤠ᤹ᤏᤢ ᤗᤠᤱᤔᤧᤄᤣ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤛᤢᤶᤒᤥᤎᤠᤛᤠᤒᤠ ᤔᤧᤈᤥ᤺ᤰᤗᤥ॥
REV 3:5 ᤂᤧᤱᤜᤠ᤹ ᤜᤧᤰᤁᤣ ᤁᤧᤏᤠ᤺ᤶᤒᤠ ᤁᤠᤰᤗᤧ ᤑ᤺ᤃᤧᤗ᤹ᤒᤠ ᤋᤣ᤺ᤳ ᤔᤧᤈᤠᤰᤂᤢ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤱᤅᤡᤴ ᤜᤡᤱᤔᤴᤗᤧᤴ ᤛᤠᤵᤐᤴᤏᤥᤗᤠᤶ ᤀᤠᤵᤑᤠᤸᤗᤧᤀᤠᤱ ᤔᤧᤍᤢ᤺ᤰᤁᤠᤴᤗᤥ. ᤁᤖ ᤐᤠᤏᤢᤍᤡᤱ ᤀᤠᤶᤒᤠ ᤏᤢ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤱᤜᤠ᤹ ᤋᤧᤴᤍᤡᤱ ᤆᤥᤃᤢᤱᤛᤡᤱᤗᤥ॥
REV 3:6 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄॥’”
REV 3:7 “ᤜᤧᤰᤁᤩᤠᤱ ᤑᤡᤗᤠᤍᤣᤸᤑᤡᤕᤠᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤅᤡᤴ ᤛᤣᤛᤣ ᤏᤢ ᤛᤧᤰᤂᤠᤒᤠ ᤜᤧᤰᤁᤩᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤍᤡᤔᤡᤰ ᤁᤧᤃᤵᤐᤧᤸᤗᤧ ᤐᤠ᤺ᤳᤋᤢᤒᤠᤖᤥ॥ ᤂᤢᤏᤧ᤹ ᤜᤴᤍᤢᤒᤠᤴ ᤜᤠ᤺ᤳᤗᤧᤀᤠᤱ ᤛᤢᤵᤔᤠ ᤔᤧᤛᤢᤰᤋᤢᤴ. ᤜᤧᤰᤁᤩᤠᤱ ᤂᤢᤏᤧ᤹ ᤛᤢᤒᤢᤒᤠᤴ ᤜᤠ᤺ᤳᤗᤧᤀᤠᤱ ᤜᤶᤔᤠ ᤔᤧᤛᤢᤰᤋᤢᤴᤗᤥ॥
REV 3:8 ‘ᤂᤧᤏᤧ᤹ ᤁᤧᤕᤠ᤺ᤶᤒᤰᤜᤠ᤹ ᤀᤡᤱᤃᤠ᤹ ᤏᤡ᤺ᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤁᤧᤍᤃᤡ ᤀᤡᤱᤃᤠ᤹ ᤜᤴᤍᤢᤱᤅᤠᤱ ᤁᤧᤒᤵᤐᤠ ᤗᤠᤶᤎᤣ᤺ᤵᤐᤧᤴ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤛᤢᤵᤔᤠ ᤔᤧᤴᤇᤢᤰᤋᤢᤴᤗᤥ॥ ᤂᤧᤏᤧ᤹ᤃ ᤔᤡᤛᤠᤰᤗᤰ ᤁᤧᤎᤢᤶᤛᤠᤱ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤁᤧᤏᤠ᤺ᤳᤋᤢᤀᤠᤱ ᤁᤧᤘᤠ᤹ ᤜᤧᤰᤁᤩᤠᤱ ᤀᤡᤱᤃᤠ᤹ᤀᤥ ᤏᤛᤠ᤺ᤴᤛᤠᤒᤠ ᤁᤧᤒᤥ᤺ᤰᤂᤧᤀᤠᤱ ᤁᤧᤘᤠ᤹ᤖᤥ॥
REV 3:9 ᤁᤢᤓᤠᤖᤧ ᤀᤠᤏᤡᤃᤧ ᤕᤜᤢᤍᤡᤛᤡᤃᤧ ᤔᤧᤗ᤹ ᤁᤖ ᤂᤧᤱᤜᤠ᤹ ᤔᤧ᤺ᤴᤇᤡᤖᤥ. ᤂᤧᤱᤜᤠ᤹ᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤏᤠ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤛᤡᤖᤥ॥ ᤂᤧᤵᤛᤧ᤹ᤀᤥ. ᤂᤧᤱᤜᤠ᤹ ᤁᤧᤗᤠᤱᤈᤰᤐᤥ ᤔᤧᤏ᤺ᤶᤛᤡᤱᤅᤠᤱ ᤔᤧᤍᤠᤖ ᤆᤥᤃᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ᤀᤣ ᤗᤢᤱᤔᤠ᤹ ᤋᤢᤰᤏᤧ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥
REV 3:10 ᤂᤧᤏᤧ᤹ ᤏᤡᤱᤄᤢᤶ ᤁᤧᤍᤢᤔᤢᤸᤗᤧ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤅᤧ᤹ᤀᤥ ᤑᤠ᤹ᤀᤠᤱ ᤀᤡᤱᤃᤠ᤹ ᤐᤡᤏᤧᤒᤠ ᤀᤡᤱᤈᤠ᤺ᤱᤅᤡᤴ ᤋᤧᤴᤍᤡᤱ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤍᤠ᤺ᤒᤠ ᤀᤡᤏᤥᤃᤧᤴ ᤐᤕᤶ ᤕᤶᤒᤠ ᤋᤢᤰᤂᤣᤗᤠᤶ ᤀᤡᤱᤃᤠ᤹ ᤋᤠᤱᤛᤧ᤺ᤵᤏᤧ᤹ᤖᤥ॥ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤠᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤛᤠ᤹ᤛᤧ ᤋᤠᤖ ᤐᤳᤗᤥ॥
REV 3:11 ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖ ᤐᤳᤋᤠᤖᤥ॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤏᤠ᤺ᤴᤍᤢᤀᤠᤱ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤌᤢᤶᤄᤥ᤺ᤴ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤧᤔᤧᤴᤏᤠᤵᤏᤧᤴᤗ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤃᤳᤋᤢᤒᤠ ᤐᤠ᤺ᤴᤜᤠ᤹ ᤏᤢ᤺ᤖᤡᤰᤁᤠᤱ ᤋᤠᤱᤛᤣ᤺ᤵᤋᤧ ᤁᤳᤋᤧ᤹ᤀᤥ॥
REV 3:12 ᤁᤧᤏᤠ᤺ᤶᤒᤠᤱᤃ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤀᤡᤱᤃᤠ᤹ ᤛᤡᤳᤗᤠᤱ ᤆᤥᤃᤢᤱᤗᤥ॥ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤠᤵᤑᤠᤸᤗᤧᤀᤠᤱ ᤔᤧᤈᤳᤇᤡᤱᤅᤡᤴᤗᤥ॥ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤂᤧᤸᤗᤥ ᤀᤡᤱᤃᤠ᤹ ᤛᤠᤵᤋᤢᤱ. ᤜᤧᤰᤁᤩᤠᤱ ᤂᤧᤸᤗᤥ ᤀᤡᤱᤃᤠ᤹ ᤁᤢᤛᤱ ᤀᤠᤔᤡᤱᤅᤡᤴᤏᤠᤱ ᤛᤠᤵᤋᤢᤱᤗᤥ॥ ᤜᤧᤰᤁᤩᤠᤱ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤕᤧᤰᤕᤰ ᤁᤢᤛᤱ ᤕᤖᤢᤛᤗᤧᤔᤡᤸᤗᤧ ᤁᤢᤔᤡᤱᤅᤡᤴᤏᤠᤱ ᤂᤧᤸᤗᤥ ᤛᤠᤵᤋᤢᤱᤗᤥ॥ ᤂᤧᤱᤃ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤐᤠᤱᤄᤢ ᤕᤢ᤺ᤛᤢ᤹॥
REV 3:13 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄’”
REV 3:14 “ᤗᤠᤀᤥᤍᤡᤁᤡᤕᤠᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤗᤠᤀᤡᤱᤒᤠᤴ ᤁᤴ ᤀᤡᤱᤄᤱᤅᤡᤴ ᤛᤠᤵᤋᤧ᤹ᤀᤥ॥ ᤁᤴ ᤀᤡᤱᤄᤱᤅᤡᤴ ᤀᤠᤔᤧᤴ ᤔᤧᤵᤔᤏᤠᤒᤠ. ᤏᤛᤠ᤺ᤴᤛᤠᤒᤠ ᤏᤢ ᤛᤧᤰᤂᤠᤒᤠ ᤋᤥ᤺ᤴᤍᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧᤛ᤻ᤛᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤜᤠᤱᤃᤧᤈᤥ᤺ᤰᤐᤠᤸᤗᤧ ᤐᤠ᤺ᤳᤋᤢᤒᤠᤖᤥ–
REV 3:15 ‘ᤂᤧᤏᤧ᤹ ᤁᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ॥ ᤂᤧᤏᤧ᤹ᤃ ᤁᤧᤴᤇᤧ᤺ᤶᤏᤧᤴᤏᤠᤱ. ᤁᤧᤱᤃᤥ᤺ᤏᤧᤴᤏᤠᤱ॥ ᤂᤧᤏᤧ᤹ᤃ ᤁᤧᤃᤥ᤺ᤒᤠ ᤔᤧ᤺ᤱᤃᤪ ᤁᤧᤛᤧ᤺ᤶᤒᤠ ᤁᤧᤒᤥ᤺ᤰᤂᤧᤸᤗᤧ ᤏᤢ᤺ᤖᤧᤒᤠᤔᤧᤴ᥄
REV 3:16 ᤂᤧᤏᤧ᤹ᤃ ᤁᤧᤴᤇᤧ᤺ᤶᤏᤧᤴᤏᤠᤱ. ᤁᤧᤱᤃᤥ᤺ᤏᤧᤴᤏᤠᤱ ᤁᤖ ᤔᤰᤁᤥᤃᤥᤖᤰ ᤁᤧᤗ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤗᤠ᤺ᤰᤁᤠᤳ ᤀ᤺ᤏᤧ ᤗ᤺ᤳᤏᤧ᤹ᤖᤥ॥
REV 3:17 ᤂᤧᤏᤧ᤹ᤃ. ᤀᤡᤱᤃᤠ᤹ ᤕᤠᤱᤛᤠᤁᤢᤴᤎᤣᤛᤠᤒᤠᤀᤠ. ᤀᤡᤱᤃᤠ᤹ ᤌᤣᤀᤠᤱ ᤆᤠᤜᤠᤒᤠ ᤔᤧᤈᤥ᤺ᤰᤁᤠᤴ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥ ᤂᤧᤏᤧ᤹ ᤀᤠᤰᤂᤧᤴ ᤁᤢᤒᤠᤱ ᤁᤧᤒᤣ᤺ᤰᤐᤠ. ᤗᤢᤱᤔᤠ᤹ ᤁᤧᤍᤢᤰᤐᤠ. ᤕᤠᤱᤃᤧᤛᤠ᤹ᤒᤠ. ᤔᤡᤰᤑ᤺ᤶᤒᤠ ᤏᤢ ᤗᤧᤰᤆᤠᤒᤧᤎᤡ᤺ᤰ ᤁᤧᤈᤥ᤺ᤰ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤱᤄᤥ᤺ᤛᤢᤴᤗᤥ॥
REV 3:18 ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥ᤺ᤱᤔᤠ ᤁᤧᤛᤢᤰᤗ ᤑᤠ᤹ᤀᤠᤱ ᤔᤡᤀᤥ ᤕᤥ᤺ᤶᤔᤏᤠᤒᤠ ᤀᤡᤛᤣ᤺ᤱᤒᤠ ᤛᤠᤶᤔᤩᤠᤱᤅᤡᤴ ᤀᤡᤱᤃᤠ᤹ᤀᤥᤗᤠᤶ ᤀᤡᤅᤧ᤹ᤀᤥ ᤗ᤹ᤖᤡᤰ ᤛᤢᤈᤠ ᤐᤡᤏᤧ. ᤗᤧᤰᤆᤠᤒᤧᤎᤡ᤺ᤰᤐᤠ ᤁᤧᤎᤰᤁᤡᤴ ᤋᤧᤵᤋᤧ᤹ᤀᤠᤱ ᤏᤢ᤺ᤶᤔᤠ ᤔᤧᤒᤥ᤺ᤱᤏᤧᤴᤗ ᤑᤠ᤹ᤀᤠᤱ ᤑ᤺ᤃᤧᤗ᤹ᤒᤠ ᤋᤣ᤺ᤳᤋᤡᤴ ᤀᤡᤅᤧ᤹ᤀᤥ. ᤜᤧᤰᤁᤩᤠᤱ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤱᤔᤠ ᤑᤠ᤹ᤀᤠᤱ ᤔᤡᤰ ᤛᤡᤍᤠ᤹ᤀᤡᤴ ᤀᤡᤅᤧ᤹ᤀᤥ॥
REV 3:19 ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤒᤠᤜᤠ᤹ ᤑᤧ᤺ᤰᤋᤢᤱᤛᤡᤱᤅᤠᤱ ᤋᤥ᤺ᤴᤍᤢᤱᤛᤡᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤏᤢ᤺ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤛᤡᤰ ᤁᤧᤛᤶᤒᤠ ᤐᤥ᤺ᤰᤂᤧᤶᤔᤧ᤹ᤀᤥ॥ ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ॥
REV 3:20 ᤂᤧᤵᤛᤧ᤹ᤀᤥ᥄ ᤀᤡᤱᤃᤠ᤹ ᤗᤠᤶᤎᤣ᤺ᤵᤐᤥ ᤕᤧᤵᤐᤠᤀᤠᤱ ᤂᤰ ᤂᤰ ᤔᤧᤳᤋᤢᤱ॥ ᤀᤠᤀᤡᤰᤗᤠ᤺ᤴ ᤂᤧᤵᤛᤢᤀᤠᤱ ᤗᤠᤶᤎᤣ᤺ᤵᤐᤧᤴ ᤜᤴᤏᤠ᤹ ᤐᤡᤀᤠᤏᤧ ᤑᤠ᤹ᤃᤪ. ᤀᤡᤱᤃᤠ᤹ ᤜᤡᤶᤛᤡᤃᤠᤱ ᤗᤠ᤺ᤳᤋᤠᤀᤠᤱ ᤂᤧᤴᤏᤢ ᤛᤥᤖᤡᤰ ᤆᤠ ᤆᤠᤛᤢᤃᤧ᤹ᤖᤥ॥
REV 3:21 ᤏᤛᤠ᤺ᤴᤏᤥ ᤁᤧᤏᤠ᤺ᤶᤒᤠᤴ ᤐᤠᤏᤢᤍᤡᤱ ᤀᤠᤶᤒᤠᤏᤢ ᤁᤢᤜᤠᤱᤕᤢᤰᤏᤠᤀᤥ ᤀᤡᤱᤃᤠ᤹ ᤏᤠ᤺ᤴᤍᤢᤱᤅᤠᤱ ᤕᤢᤱᤔᤠ ᤂᤥ᤺ᤛᤢᤱᤒᤠ ᤁᤢᤀᤡᤛᤡ᤺ᤰ ᤀᤡᤱᤃᤠ᤹ᤏᤢ ᤀᤠᤜᤠᤱᤕᤢᤰᤏᤠᤀᤥ ᤕᤢᤱᤔᤠ ᤕᤢᤰ ᤐᤡᤖᤢᤱᤗᤥ॥
REV 3:22 ᤛᤣᤛᤣᤔᤠᤱᤅᤡᤸᤗᤧ ᤛᤣᤛᤣᤜᤢᤵᤗᤰᤜᤠ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄’”
REV 4:1 ᤁᤴ ᤀᤣᤃᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤶᤎᤣ᤺ᤵᤐᤧᤴ ᤜᤸᤗᤧᤰ ᤜᤖᤧᤀᤠᤱ ᤐᤳᤇᤧᤒᤠ ᤏᤡ᤺ᤛᤢᤱᤗᤥ॥ ᤜᤧᤰᤁᤩᤠᤱ ᤋᤃᤡ ᤂᤧᤵᤛᤢᤱᤒᤠ ᤌᤢᤳᤌᤢᤖᤡ᤺ᤵᤐᤠᤸᤗᤧ ᤁᤢᤀᤡᤰᤗᤠ ᤁᤢᤀᤡᤛᤡ᤺ᤰ ᤕᤠᤶᤔᤥ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ᤏᤢ ᤐᤠᤖᤧᤖᤥ. “ᤁᤳᤌᤥ ᤌᤠᤅᤧ᤹ᤀᤥ. ᤀᤠᤸᤗ ᤀᤡᤱᤃᤠ᤹ ᤋᤠ᤺ᤴᤍᤡ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤀᤥ᤺ᤴᤎᤠᤰᤏᤧ᤹ᤖᤥ॥”
REV 4:2 ᤂᤡᤔᤥ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ ᤌᤢᤰᤋᤠᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤍᤃᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤎᤡᤰ ᤏᤡ᤺ᤛᤢᤱ.
REV 4:3 ᤂᤧᤵᤔᤥ ᤁᤧᤕᤢᤱᤒᤠᤸᤗᤧ ᤁᤢᤏᤠᤖᤠ᤺ᤱᤃ ᤁᤧᤀᤥ᤺ᤵᤐᤠ ᤔᤠᤱᤗᤢᤱ ᤏᤢ ᤁᤢᤜᤧ᤺ᤳᤗᤢᤱ. ᤀᤡᤔᤧᤸᤗᤢᤱᤒᤠ ᤗᤢᤱ ᤁᤢᤀᤡᤛᤡ᤺ᤰ ᤀᤥ᤺ᤳᤋᤧᤖᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤄᤡᤖᤡ ᤗᤢᤱᤛᤣ᤺ᤰᤁᤢᤶ ᤔᤠᤱᤗᤢᤱ ᤜᤧᤰᤁᤣ ᤁᤧᤗᤧᤰᤐᤠ ᤏᤠᤶᤎᤡᤱᤃᤥ ᤐᤳᤇᤧ॥
REV 4:4 ᤜᤠᤱᤕᤢᤰᤏᤠ᤺ᤸᤗᤧ ᤁᤢᤄᤡᤖᤡ ᤏᤧᤳ-ᤗᤡ (᥈᥊) ᤘᤣ᤹ ᤜᤠᤱᤕᤢᤰᤏᤠᤜᤠ᤹ ᤔᤧᤕᤢᤅᤧ ᤜᤧᤰᤁᤩᤠᤱ ᤂᤧᤵᤔᤥ ᤑ᤺ᤃᤧᤗ᤹ᤒᤠ ᤋᤣ᤺ᤳ ᤁᤧᤈᤠᤱᤒᤠ ᤛᤠᤶᤔᤩᤠᤱ ᤋᤡᤆ᤺ ᤁᤧᤄᤢ᤺ᤱᤒᤠ ᤏᤧᤳ-ᤗᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤕᤢᤅᤧᤖᤥ॥
REV 4:5 ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤗᤠᤶ ᤛᤠ᤺ᤶᤓᤣ ᤗᤧᤰᤋᤧ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤖᤧᤱ ᤄᤢᤖᤢᤱ ᤗ᤹ᤖᤡᤰ ᤋᤠᤱᤛᤠᤱ ᤁᤧᤗᤥ᤺ᤱᤒᤠ ᤀᤡᤰᤗᤠᤜᤠ᤹ ᤗ᤺ᤴᤍᤧᤖᤥ॥ ᤂᤧᤵᤔᤥ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤠᤱ ᤏᤢᤛᤡ ᤛᤣᤔᤡᤜᤠ᤹ ᤔᤧᤍᤡᤖᤧᤖ ᤔᤧᤕᤢᤅᤧ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤛᤡ ᤁᤢᤛᤣᤛᤣᤔᤠᤱᤛᤡᤖᤥ॥
REV 4:6 ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤠᤱ ᤛᤡᤛᤠ ᤜᤧᤰᤋᤱᤒᤠ ᤘᤜ᤺ᤱ ᤏᤧᤛ᤻ᤛᤧᤖᤥ॥ ᤂᤧᤱᤃ ᤔᤠᤱᤗᤢᤱ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤆᤥᤃᤧ॥ ᤜᤧᤰᤁᤩᤠᤱ ᤁᤢᤗᤢᤶᤔᤥ. ᤜᤠᤱᤕᤢᤰᤏᤠ᤺ᤸᤗᤧ ᤁᤢᤄᤡᤖᤡ. ᤀᤣᤃᤠᤱ ᤋᤃᤠᤱ ᤁᤠᤰ ᤐᤡᤛᤠᤱ ᤔᤡᤰ ᤀᤡᤛ᤻ᤛᤣ᤺ᤱ ᤁᤧᤒᤵᤐᤠ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤕᤧᤒᤧᤖᤥ॥
REV 4:7 ᤌᤡᤰᤛᤡᤃᤣ᤺ᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤱᤃ ᤌᤡᤖᤡᤱᤒᤠᤴ ᤜᤧᤰᤁᤣ ᤗ᤹ᤖᤧ॥ ᤏᤡᤛᤡᤃᤣ᤺ᤰᤐᤧᤴ ᤐᤡᤳ ᤜᤧᤰᤁᤣ ᤗ᤹ᤖᤧ॥ ᤛᤢᤶᤛᤡᤃᤣ᤺ᤰᤐᤠᤸᤗᤧ ᤁᤢᤏᤠᤖᤠ᤺ᤴ ᤔᤧᤴᤇᤠᤶ ᤕᤠᤵᤔᤡ ᤏᤠᤖᤠ ᤜᤧᤰᤁᤣ ᤗ᤹ᤖᤧ॥ ᤜᤧᤰᤁᤩᤠᤱ ᤗᤡᤛᤡᤃᤣ᤺ᤰᤐᤠᤱᤃ ᤁᤧᤒᤧᤒᤠᤖ ᤁᤧᤒᤵᤐᤠ ᤔᤢᤕᤠ ᤜᤧᤰᤋᤱᤒᤠ ᤆᤥᤃᤧᤖᤥ॥
REV 4:8 ᤂᤧᤴ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤛᤡ ᤗᤠᤵᤜᤠ᤹ ᤔᤧᤒᤳᤇᤧ. ᤜᤧᤰᤁᤩᤠᤱ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤏᤢ ᤗᤠᤵᤐᤡᤸᤗᤧ ᤁᤢᤎᤡᤶ ᤁᤠᤰ ᤐᤡᤛᤠᤱ ᤔᤡᤰ ᤀᤡᤛ᤻ᤛᤣ᤺ᤱ ᤐᤳᤇᤧᤖᤥ॥ ᤂᤧᤱᤜᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖ ᤛᤠᤶᤔᤧᤗᤥ᤹᤺. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣ. ᤛᤣᤛᤣ. ᤛᤣᤛᤣᤒᤠ ᤆᤥ᤺ᤰᤗᤥ॥ ᤂᤢᤏᤧ᤹ ᤀᤢᤏᤠᤜᤢᤖᤡᤀᤥ ᤘᤕᤧ. ᤀᤠᤸᤗᤥᤀᤠᤱ ᤘᤠ᤹. ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤋᤠ᤺ᤖᤥ॥”
REV 4:9 ᤂᤧᤴ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠ᤺ᤱ. ᤏᤢ ᤏᤥᤃᤧᤴᤖᤧᤴ ᤛᤠᤶᤗᤥ᤺ᤴ ᤛᤠᤶᤔᤧᤔᤧᤳᤋᤢᤸᤗᤧ
REV 4:10 ᤂᤧᤴ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤗ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤛᤣᤘᤠ ᤔᤧᤈᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤡᤆ᤺ᤴ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤠᤱ ᤔᤧᤏᤧᤛ᤻ᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ.
REV 4:11 “ᤂᤧᤏᤧ᤹ᤃ ᤀᤠᤏᤡᤃᤧ ᤍᤠᤱᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤏᤧ᤹ᤖᤥ॥ ᤂᤧᤏᤧ᤹ᤃ ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠ᤺ᤱ ᤜᤧᤰᤁᤩᤠᤱ ᤔᤢᤰᤛᤠᤶᤖᤧᤴ ᤏᤠᤖᤠ ᤑᤥ᤺ᤛᤢᤶᤒᤧᤒᤠ ᤀᤠᤏᤡᤃᤧ ᤛᤣᤘᤠᤃᤧᤴ ᤛᤠᤶᤗᤥ᤺ᤴ ᤋᤠ᤺ᤰᤔᤠ ᤛᤢᤶᤒᤥᤎᤠᤛᤠᤒᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤢ. ᤜᤧᤰᤁᤩᤠᤱ ᤛᤡᤰᤁᤢᤶᤍᤡᤱ ᤁᤧᤏᤡᤱᤘᤠ᤹ᤗᤠᤶ ᤂᤧᤱᤜᤠ᤹ ᤔᤧᤒᤥ᤺ᤰᤂᤣ. ᤜᤧᤰᤁᤩᤠᤱ ᤜᤡᤱᤔᤴ ᤁᤧᤒᤡᤖᤢᤛᤡᤀᤠᤱ ᤘᤠ᤹ᤖᤥ॥”
REV 5:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥ ᤀᤣᤃᤠᤱ ᤋᤃᤠᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤵᤁᤡᤳᤋᤡᤴ ᤁᤳᤋᤢᤒᤠ ᤏᤡ᤺ᤛᤢᤱ॥ ᤂᤧᤴ ᤛᤠᤵᤁᤡᤳᤋᤡᤴ ᤔᤧᤛᤢᤒᤢᤀᤠᤱ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤔᤧᤕᤢᤰᤋᤢᤀᤠᤱ ᤐᤳᤇᤧᤖᤥ॥
REV 5:2 ᤜᤧᤰᤁᤩᤠᤱ ᤂᤧᤵᤔᤥ ᤔᤢᤰᤛᤠᤶᤛᤠᤒᤠ ᤔᤠᤱᤗᤠᤀᤡᤱᤒᤠᤴ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ. “ᤁᤴ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤁᤧᤛᤢᤰᤐᤠ ᤏᤢ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤁᤧᤛᤢᤰᤐᤠ ᤜᤠ᤺ᤳ ᤘᤠ᤹ᤒᤣ᥅”
REV 5:3 ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱᤅᤠᤱ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱ ᤀᤥᤔᤧᤵᤔᤠ ᤁᤧᤛᤢᤰᤐᤠ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ॥
REV 5:4 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤜᤠᤒᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤏᤡ᤺ᤵᤔᤠ ᤁᤧᤛᤢᤰᤐᤠ ᤛᤢᤶᤒᤥᤎᤠᤛᤠᤒᤠ ᤀᤠᤳᤋᤡᤴᤏᤠᤱ ᤂᤥ᤺ᤔᤠ ᤛᤢᤰᤔᤧᤍᤧᤳᤋᤧᤴᤗᤥ॥
REV 5:5 ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤎᤡᤰᤗᤧ ᤀᤡᤱᤃᤠ᤹ ᤔᤧᤳᤋᤠᤱ. “ᤔᤧᤜᤠᤒᤧᤏᤧ᤹ᤀᤥ᥄ ᤀᤥᤔᤧᤳᤋᤧ᤹. ᤕᤜᤢᤍᤠ ᤛᤢᤘᤠᤱᤒᤠ ᤌᤡᤖᤡᤱᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ᤺ᤸᤗᤧ ᤁᤴ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤜᤧᤰᤁᤩᤠᤱ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤛᤢᤰᤋᤢ᤹ᤖᤥ॥”
REV 5:6 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤒᤣᤛᤠᤱ. ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ. ᤔᤧᤸᤗᤢᤰᤛᤠ᤺ᤴ ᤕᤧᤒᤧᤒᤠ ᤏᤡ᤺ᤛᤢᤱ॥ ᤂᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥ ᤂᤧᤸᤗᤧ ᤏᤢᤛᤡ ᤁᤢᤍᤠᤱᤜᤠ᤹ ᤕᤢᤅᤧ ᤜᤧᤰᤁᤩᤠᤱ ᤏᤢᤛᤡ ᤁᤢᤔᤡᤰᤜᤠ᤹ ᤔᤧᤒᤳᤇᤧᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤐᤠᤱᤄᤢᤛᤡᤒᤠ ᤏᤢᤛᤡ ᤁᤢᤛᤣᤛᤣᤔᤠᤱᤛᤡᤖᤥ॥
REV 5:7 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤴ ᤋᤩᤧᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥᤗᤠᤶ ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱ॥
REV 5:8 ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱᤅᤡᤸᤗᤧ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱ॥ ᤂᤧᤴ ᤁᤧᤖᤧᤰᤗᤧ ᤂᤢᤏᤡ᤹ ᤜᤢᤰᤁᤥ ᤛᤠᤖᤠᤱᤃᤡ ᤜᤧᤰᤋᤱᤒᤠ ᤔᤢᤰᤗᤠ ᤏᤢ ᤛᤠᤱᤛᤡᤱᤖᤧ ᤁᤧᤍᤡᤶᤒᤠ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹ ᤔᤧᤃᤳᤋᤢ॥ ᤂᤧᤴ ᤛᤠᤱᤛᤡᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤖᤥ॥
REV 5:9 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤔᤧᤳᤋᤢᤖᤥ. “ᤂᤧᤏᤧ᤹ᤃ ᤛᤠᤵᤁᤡᤳᤋᤡᤴ ᤐᤱᤔᤠᤀᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤢᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤛᤢᤶᤒᤥᤎᤠᤛᤠᤒᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤁᤧᤶᤛᤧᤖᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣᤜᤠ᤹ᤗᤠᤶ ᤔᤏᤠᤜᤠ᤹ ᤂᤧᤏᤧ᤹ ᤁᤧᤔᤠᤰᤂᤡ᤹ᤀᤡᤸᤗᤧ ᤁᤧᤎᤧ᤹ᤖᤢᤛᤡᤖᤥ.
REV 5:10 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤁᤢᤜᤠᤱᤈᤢᤶᤔᤥ ᤁᤢᤛᤣᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤈᤥᤃᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤱ ᤔᤧᤈᤥᤃᤢ᤹ᤖᤥ॥”
REV 5:11 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ᤺ᤴ ᤂᤧᤵᤛᤢᤱᤅᤠᤱ ᤀᤥᤔᤧᤳᤋᤢᤱᤛᤡᤱᤅᤡᤸᤗᤧ ᤂᤧᤵᤔᤥ ᤜᤠᤱᤕᤢᤰᤏᤠ᤺ᤴ ᤏᤢ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤂᤡᤖᤡ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤒᤠ ᤏᤡ᤺ᤛᤢᤱ॥
REV 5:12 ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤖᤥ. “ᤂᤧᤴ ᤔᤧᤛᤧᤖᤢᤒᤠ ᤔᤧᤸᤗᤢᤰᤛᤠ᤺ᤴ. ᤔᤢᤰᤛᤠᤶ ᤏᤢ ᤕᤠᤱᤛᤠᤁᤢᤴᤎᤣ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤌᤢᤶ. ᤔᤡᤱᤛᤥ ᤀᤡᤱᤎᤠ᤺ᤱ. ᤔᤡᤔᤡᤍᤡᤱ. ᤏᤢ ᤏᤠᤖᤠ ᤑᤥ᤺ᤔᤠ ᤛᤢᤶᤒᤥᤎᤠᤛᤠᤒᤠ ᤆᤥ᤺ᤰᤗᤥ᥄”
REV 5:13 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤛᤡᤃᤠᤱᤒᤠ. ᤜᤧᤰᤁᤩᤠᤱ ᤘᤠᤜᤱᤅᤥᤒᤠ ᤁᤧᤖᤧᤰ ᤐᤠᤌᤢᤱᤛᤠᤜᤠ᤹ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤒᤠ ᤂᤧᤵᤛᤢᤱᤗᤥ. “ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤏᤠᤖᤠ ᤑᤥ᤺ᤔᤠᤴ. ᤔᤡᤱᤛᤥ ᤀᤡᤱᤎᤠ᤺ᤱ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶ ᤛᤍᤠᤍᤡᤱ ᤛᤍᤠᤍᤡᤱ ᤐᤥ᤺ᤱᤗᤖᤥ᥄”
REV 5:14 ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ “ᤀᤠᤔᤧᤴ” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤴ ᤛᤣᤘᤠ ᤔᤧᤈᤥᤃᤢᤛᤡᤖᤥ॥
REV 6:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤏᤢᤛᤡ ᤀᤣ᤺ᤵᤛᤠᤵᤐᤥ ᤌᤡᤰᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤒᤠ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥ ᤌᤡᤰᤛᤡᤃᤣ᤺ᤰᤐᤠᤸᤗᤧ ᤋᤠᤱᤛᤠᤰᤐᤧᤴ ᤁᤧᤗᤥ᤺ᤱᤒᤠ ᤀᤡᤰᤗᤠᤀᤥ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥
REV 6:2 ᤜᤧᤰᤁᤩᤠᤱ ᤑ᤺ᤍᤠᤱᤒᤠ ᤀᤴᤎᤡᤰ ᤏᤡ᤺ᤛᤢᤱ॥ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤜᤢᤰᤁᤥ ᤗᤳᤇᤠ ᤗᤡᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤧᤴ ᤋᤡᤆ᤺ᤎᤡᤰ ᤔᤧᤒᤡᤖᤢᤀᤠᤱ ᤌᤱ ᤁᤧᤏᤠ᤺ᤶᤒᤠ ᤁᤢᤀᤡᤛᤡ᤺ᤰ ᤁᤠᤰ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤌᤠᤛᤡᤱᤗᤥ॥
REV 6:3 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤏᤡᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤏᤡᤛᤡᤃᤣ᤺ᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥
REV 6:4 ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤘᤣ᤹ᤛ᤻ᤔᤠ ᤀᤴᤎᤡᤰ ᤗ᤺ᤴᤍᤧ ᤑᤧᤖᤧ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤧᤳᤇᤡᤱᤗ ᤑᤠ᤹ᤀᤠᤱ ᤀᤴ ᤁᤧᤕᤢᤰᤐᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤛᤏᤠᤖᤢᤱᤅᤡᤴ ᤂᤧᤵᤔᤠᤍᤣ᤺ᤔᤠ ᤔᤢᤰᤛᤠᤶ ᤔᤧᤒᤡᤖᤢ॥ ᤜᤧᤰᤁᤩᤠᤱ ᤕᤶᤒᤠ ᤋᤠᤓᤣᤎᤡᤰᤁᤠᤱ ᤂᤧᤴ ᤔᤧᤒᤡᤖᤢ॥
REV 6:5 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤛᤢᤶᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤛᤢᤶᤛᤡᤃᤣ᤺ᤰᤐᤠ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥ ᤜᤧᤰᤁᤩᤠᤱ ᤔᤠᤰᤋᤠᤱᤒᤠ ᤀᤴᤎᤡᤰ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤜᤢᤰᤁᤥ ᤋᤧᤴᤍᤢᤖᤡᤎᤡᤰ ᤁᤳᤋᤢ॥
REV 6:6 ᤜᤧᤰᤁᤩᤠᤱ ᤂᤧᤵᤔᤥ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥᤗᤠᤶ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤌᤡᤰ ᤕᤧᤴᤒᤠ ᤏᤠᤶᤕᤠᤰ ᤁᤡᤗᤥ ᤌᤡᤰ ᤔᤠᤛᤡ ᤜᤧᤰᤁᤩᤠᤱ ᤌᤡᤰ ᤕᤧᤴᤒᤠ ᤏᤠᤶᤕᤠᤰ ᤁᤡᤗᤥ ᤛᤢᤶᤛᤡ ᤜ᤺ᤰᤛᤡ᤺ ᤐᤥ᤺ᤱᤗᤥ॥ ᤁᤖ ᤈᤤᤋᤢᤏ ᤏᤡ᤺ᤱᤃᤣ᤺ᤴ ᤏᤢ ᤆᤧᤸᤗᤧᤰᤛᤣ᤹ ᤌᤡ᤺ᤴ ᤑᤧᤳᤔᤧᤗᤠ᤺ᤴᤍᤧᤏᤧ᤹ᤀᤥ॥”
REV 6:7 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤗᤡᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤗᤡᤛᤡᤃᤣ᤺ᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥
REV 6:8 ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤶᤍᤠᤱᤒᤠ ᤀᤴᤏᤡᤴ ᤂᤧᤵᤔᤥ ᤏᤡ᤺ᤛᤢᤱᤗᤥ॥ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤔᤡᤱᤃ “ᤛᤡ᤺ᤔᤧᤴ” ᤘᤕᤧ॥ ᤜᤧᤰᤁᤩᤠᤱ ᤂᤧᤔᤠᤕᤱᤛᤱᤅᤥᤒᤠ ᤁᤧᤛᤡ᤺ᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤗᤰ ᤗᤡᤛᤡᤀᤥ ᤁᤢᤗᤰ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤌᤱ. ᤛᤠᤰ. ᤋᤢᤰᤔᤠ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤗᤠᤶ ᤛᤧᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤕᤢᤰ ᤔᤧᤒᤡᤖᤢᤛᤡᤖᤥ॥
REV 6:9 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤅᤠᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤔᤧᤈᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤔᤧᤛᤧᤖᤢᤛᤡᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤜᤠ᤹ ᤀᤡᤱᤃᤠ᤹ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤡᤃᤠᤱ ᤏᤡ᤺ᤛᤢᤱᤛᤡᤱᤗᤥ॥
REV 6:10 ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤛᤣᤛᤣ ᤏᤢ ᤛᤧᤰᤂᤠᤒᤠ ᤔᤢᤰᤛᤠᤶᤍᤠᤱᤒᤠᤀᤣ. ᤂᤧᤏᤧ᤹ ᤕᤠᤵᤔᤡ ᤁᤧᤛᤧᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤵᤑᤠᤸᤗᤧ ᤂᤠᤛᤧᤴ ᤁᤧᤗᤥ᤺ᤴᤍᤢᤛᤡᤀᤠᤱ ᤂᤢᤶᤍᤡᤱ ᤁᤧᤒᤡᤖᤢᤛᤡᤒᤠᤒᤣ᥅”
REV 6:11 ᤂᤧᤱᤜᤠ᤹ ᤁᤠᤰ ᤑ᤺ᤍᤠᤱᤒᤠ ᤋᤣ᤺ᤳ ᤔᤧᤒᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤧᤰᤁᤣᤀᤣ ᤛᤧᤵᤔᤠ ᤁᤧᤒᤥ᤺ᤱᤒᤠ ᤘᤣ᤹ ᤛᤣᤘᤠᤖᤥᤒᤠᤜᤠ᤹ ᤜᤧᤰᤁᤩᤠᤱ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ ᤔᤧᤴᤇᤧᤳᤇᤡᤱᤅᤣ ᤌᤠᤖᤡᤰ ᤜᤠᤱᤄᤧᤶᤔᤧ᤹ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥
REV 6:12 ᤀᤠᤸᤗ ᤔᤧᤸᤗᤢᤰᤛᤠ᤺ᤸᤗᤧ ᤋᤢᤰᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤒᤠ ᤏᤡ᤺ᤛᤢᤱ॥ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤗᤢᤵᤗᤡ ᤌᤠᤅᤧ. ᤏᤠᤶᤔᤡᤴᤏᤠᤱ ᤔᤠᤰᤌᤰᤋᤧᤀᤠᤱ ᤔᤠᤰᤋᤠᤱᤒᤠ ᤐᤥ᤺ᤰᤂᤧ. ᤗᤠ᤺ᤒᤠᤴᤏᤠᤱ ᤔᤠᤰᤂᤡ᤹ ᤁᤢᤀᤡᤛᤡ᤺ᤰ ᤜᤧ᤺ᤳᤋᤠᤱᤒᤠ ᤐᤥ᤺ᤰᤂᤧ ᤐᤣ.
REV 6:13 ᤜᤧᤰᤁᤩᤠᤱ ᤐ᤺ᤳᤇᤣ᤹ᤒᤢᤱᤔᤠᤴ ᤛᤢᤖᤡᤳᤔᤠᤸᤗᤧ ᤛᤠ᤹ᤖᤡᤰ ᤘᤠ᤺ᤴᤍᤢᤸᤗᤧ ᤔᤧᤴᤍᤢᤶᤔᤏᤠᤒᤠ ᤐ᤺ᤳᤇᤣ᤹ᤜᤠ᤹ ᤔᤰᤌᤠᤒᤠ ᤁᤢᤀᤡᤛᤡ᤺ᤰ ᤕᤖᤡᤰ ᤂᤣ᤺ᤶᤛᤡᤰᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠᤱᤛᤠᤰᤐᤥᤗᤠᤶ ᤔᤰᤔᤧᤎᤩᤧᤖᤥ॥
REV 6:14 ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴᤏᤠᤱ ᤛᤠᤵᤁᤡᤳᤋᤡᤴ ᤁᤢᤀᤡᤛᤡ᤺ᤰ ᤁᤡᤳᤇᤡᤱᤅᤠᤱ ᤆᤳᤇᤡᤱ ᤐᤣᤖᤥ॥ ᤁᤠᤰ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤢ ᤘᤠᤃᤵᤂᤠᤶᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤖᤥ॥
REV 6:15 ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹. ᤜᤠᤱᤕᤢᤰᤐᤠᤜᤠ᤹. ᤌᤰᤗᤡᤜᤠᤱᤜᤠ᤹. ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹. ᤁᤧᤎᤢᤶᤒᤠ ᤔᤢᤰᤁᤧᤃᤢᤒᤠᤜᤠ᤹. ᤜᤧᤰᤁᤩᤠᤱ ᤁᤠᤰ ᤕᤥ᤺ᤰᤐᤠᤜᤠ᤹ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹ ᤁᤧᤖᤧᤰ ᤁᤥ᤺ᤰᤔᤠᤀᤥᤒᤠ ᤑᤢᤰᤁᤢᤜᤠ᤹ ᤏᤢ ᤕᤠᤰᤁᤣ᤺ᤰᤜᤠ᤹ᤀᤥ ᤔᤧᤈᤡᤱᤛᤡᤱᤗᤥ॥
REV 6:16 ᤂᤧᤱᤜᤠ᤹ᤖᤧ ᤁᤥ᤺ᤰᤔᤠᤜᤠ᤹ ᤏᤢ ᤗᤢᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤖᤥ. “ᤀᤠᤏᤡᤃᤧ ᤛᤶᤍᤠᤱ ᤔᤰᤌᤩᤧ᤹ᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤛᤡᤰᤁᤧᤴᤗᤠᤶᤒᤠ ᤕᤠᤵᤔᤡ ᤀᤠᤎᤣ᤺ᤰᤋᤧ᤹ ᤀᤠᤈᤡᤰᤂᤧ᤹ᤀᤥ᥄
REV 6:17 ᤌᤣᤀᤠᤱᤓᤧᤸᤗᤧ ᤁᤵᤔᤥ ᤂᤢᤴᤇᤡ᤹ ᤁᤡᤵᤔᤠ ᤁᤧᤄᤢ᤺ᤒᤠ ᤛᤡᤰ ᤐᤥ᤺ᤰᤔᤠᤸᤗᤧᤴ ᤕᤶᤒᤠ ᤕᤧᤴ ᤋᤩᤧᤀᤠᤱ ᤘᤠ᤹॥ ᤜᤠ᤺ᤳᤗᤧ ᤂᤧᤴ ᤌ᤺ᤵᤔᤠ ᤛᤢᤰᤋᤢᤒᤣ᥅”
REV 7:1 ᤁᤴ ᤀᤣᤃᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤗᤡᤛᤡ ᤁᤢᤛᤢᤰᤐᤥ ᤁᤧᤕᤧᤵᤐᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤠᤶᤒᤣ᤺ᤰᤔᤥ. ᤘᤠᤜᤱᤅᤥ. ᤛᤡᤱᤒᤢᤱᤜᤠ᤹ᤀᤥ ᤛᤢᤖᤡᤳ ᤁᤣᤈᤱ ᤔᤧᤜᤢᤏᤧᤴᤗ ᤑᤠ᤹ᤀᤠᤱ ᤗᤡᤛᤡ ᤐᤡᤛᤠᤱᤗᤠᤶ ᤛᤢᤖᤡᤳ ᤁᤣᤈᤱᤅᤡᤴ ᤔᤧᤎᤣ᤺ᤰᤋᤢᤒᤠ ᤏᤡ᤺ᤛᤢᤱ॥
REV 7:2 ᤜᤧᤰᤁᤩᤠᤱ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤣ᤺ᤵᤛᤠᤵ ᤁᤧᤒᤱᤒᤠ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤌᤠᤅᤧᤒᤠ ᤏᤡ᤺ᤛᤢᤱ॥ ᤂᤧᤸᤗᤧ ᤂᤧᤴ ᤂᤠᤶᤒᤣ᤺ᤰᤔᤠᤴ ᤏᤢ ᤘᤠᤜᤱᤅᤡᤴ ᤑᤧᤳᤗᤠ᤺ᤶᤔᤠ ᤕᤢᤰ ᤁᤧᤄᤥ᤺ᤒᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤳᤋᤢᤛᤡ.
REV 7:3 “ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤥᤘᤠᤒᤠᤀᤥ ᤀᤠᤏᤡᤃᤧ ᤀᤣ᤺ᤵᤛᤠᤵ ᤔᤧᤴᤕᤢᤰᤁᤣ ᤌᤠᤖᤡᤰ ᤂᤡᤏᤡ᤹ ᤂᤠᤶᤒᤣ᤺ᤰᤔᤠᤴ. ᤘᤠᤜᤱᤅᤡᤴ. ᤛᤡᤱᤒᤢᤱᤜᤠ᤹ ᤌᤣᤀᤠᤱ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹ᤀᤥ॥”
REV 7:4 ᤜᤧᤰᤁᤩᤠᤱ ᤂᤢᤏᤡ᤹ ᤋᤥᤘᤠᤒᤠᤀᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤛᤡᤒᤠᤜᤠ᤹ ᤔᤧᤏᤡ᤺ᤖᤢᤛᤡᤒᤠ ᤂᤧᤵᤛᤢᤱ॥ ᤁᤠᤰ ᤀᤡᤛᤪᤠᤀᤡᤗᤒᤠ ᤛᤢᤘᤠᤱᤜᤠ᤹ᤖᤥᤗᤠᤶ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤧᤘᤕᤧᤖᤥ–
REV 7:5 ᤕᤜᤢᤍᤠ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤖᤢᤒᤣᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤃᤠᤍ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆).
REV 7:6 ᤀᤠᤛᤣᤖ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤏᤠᤵᤋᤠᤗᤡ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤔᤏᤛ᤻ᤛᤣ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆).
REV 7:7 ᤛᤡᤔᤡᤕᤥᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤗᤧᤒᤡ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤀᤡᤛ᤻ᤛᤠᤁᤠᤖ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆).
REV 7:8 ᤈᤒᤢᤗᤢᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤕᤢᤛᤢᤑ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆). ᤜᤧᤰᤁᤩᤠᤱ ᤒᤧᤴᤈᤠᤔᤡᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈᥆᥆᥆)॥
REV 7:9 ᤁᤴ ᤀᤣᤃᤠᤱ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤔᤏᤠᤜᤠ᤹. ᤁᤧᤖᤧᤰ ᤗᤠᤈᤣ᤹ᤜᤠ᤹. ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹ᤗᤠᤶ. ᤜᤠᤱᤕᤢᤰᤏᤠ᤺ᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤁᤒᤪᤡᤱ ᤔᤧᤕᤧᤒᤧᤒᤠ ᤏᤡ᤺ᤛᤢᤱᤛᤡᤱ॥ ᤂᤧᤱᤜᤠ᤹ᤖᤧ ᤑ᤺ᤍᤠᤱᤒᤠ ᤋᤣ᤺ᤳ ᤔᤧᤈᤠᤰᤂᤢᤀᤠᤱ ᤂᤢᤏᤡ᤹ ᤜᤢᤰᤁᤥ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤥᤖᤠ᤺ᤰᤜᤠ᤹ ᤔᤧᤒᤰᤂᤢᤀᤠᤱ ᤔᤧᤕᤧᤒᤧ॥
REV 7:10 ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤗ᤹ᤖᤡᤰ ᤔᤧᤀ᤺ᤰᤋᤧ. “ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤢᤰᤛᤠᤶ ᤁᤳᤇᤢ᤹ᤖᤥ॥”
REV 7:11 ᤜᤧᤰᤁᤩᤠᤱ ᤜᤠᤱᤕᤢᤰᤏᤠ᤺ᤴ. ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤂᤢᤏᤡ᤹ ᤁᤒᤪᤡᤱ ᤁᤧᤖᤧᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤀᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤗ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤛᤣᤘᤠ ᤔᤧᤈᤥᤃᤢᤖᤥ.
REV 7:12 “ᤀᤠᤔᤧᤴ᥄ ᤏᤠᤖᤠ ᤑᤥ᤺ᤔᤠᤴ. ᤔᤡᤔᤡᤍᤡᤱᤅᤡᤴ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ. ᤏᤥᤃᤧᤴᤏᤡᤴ. ᤀᤡᤱᤎᤠ᤺ᤱᤅᤡᤴ. ᤔᤢᤰᤛᤠᤶᤔᤡᤴ ᤏᤢ ᤌᤢᤶᤔᤡᤴ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤣᤖᤥ॥ ᤀᤠᤔᤧᤴ᥄”
REV 7:13 ᤜᤧᤰᤁᤩᤠᤱ ᤋᤢᤶᤗᤠᤶᤗᤥ᤺ᤒᤠᤎᤡᤰᤗᤧ ᤀᤡᤱᤃᤠ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥ᤺ᤛᤠᤱ “ᤁᤴ ᤑ᤺ᤍᤠᤱᤒᤠ ᤋᤣ᤺ᤳ ᤁᤧᤈᤠᤱᤒᤠᤜᤠ᤹ ᤜᤠ᤺ᤳᤇᤡᤒᤣ᥅ ᤜᤧᤰᤁᤩᤠᤱ ᤀᤠᤳᤋᤥᤗᤠᤶ ᤔᤧᤍᤩᤧᤒᤠᤒᤣ᥅”
REV 7:14 ᤀᤡᤱᤃᤠ᤹ ᤂᤢᤏᤧ᤹ ᤏᤥᤃᤵ ᤐᤡᤖᤢᤱ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤔᤧᤏᤡ᤺ᤛᤢᤱᤛᤡᤱᤅᤡᤴᤗᤥ. ᤂᤧᤏᤧ᤹ᤀᤣ ᤁᤧᤏᤡ᤺ᤛᤢ᤹ᤖᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤁᤴᤜᤠ᤹ᤃ ᤐᤕᤶ ᤕᤶᤒᤠ ᤏᤡᤱᤄᤢᤶᤗᤠᤶ ᤁᤧᤍᤠ᤺ᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥ ᤂᤢᤏᤡ᤹ ᤋᤣ᤺ᤳ ᤆᤠᤱᤜᤠ᤹ ᤘᤠᤔᤧᤜᤵᤋᤢᤀᤠᤱ ᤑ᤺ᤍᤠᤱᤒᤠ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥
REV 7:15 ᤂᤧᤸᤗᤧ ᤆᤥᤃᤢᤸᤗᤧᤀᤣ ᤁᤱᤜᤠ᤹ᤃ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤧᤕᤧᤵᤐᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤁᤢᤜᤡᤶᤔᤥ ᤛᤣᤘᤠ ᤔᤧᤈᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤂᤢᤏᤡ᤹ᤏᤢ ᤘᤠ᤹ᤀᤠᤱ ᤁᤶᤒᤪᤠᤱ ᤔᤧᤳᤋᤢᤛᤡ᤹ᤖᤥ॥
REV 7:16 ᤁᤱᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤧᤳᤗᤠ᤺ᤰᤔᤠ ᤏᤢ ᤀᤠᤱᤃᤢᤃᤧᤴ ᤘᤠᤔᤡ᤺ᤔᤠᤸᤗᤧ ᤔᤧᤍᤖᤢᤛᤡᤴᤗᤥ॥ ᤜᤧᤰᤁᤩᤠᤱ ᤏᤠᤶᤛᤠᤱᤅᤡᤸᤗᤧᤀᤠᤱ ᤛᤧ᤺ᤵᤔᤠᤀᤠᤱ ᤔᤧᤛᤧ᤺ᤵᤋᤢᤛᤡᤴ. ᤕᤧᤶᤔᤠᤀᤠᤱ ᤔᤧᤕᤧᤶᤍᤢᤛᤡᤴᤗᤥ॥
REV 7:17 ᤌᤣᤀᤠᤱᤓᤧᤸᤗᤧ ᤜᤠᤱᤕᤢᤰᤏᤠ ᤗᤢᤶᤔᤥ ᤁᤧᤘᤠ᤹ᤒᤠ ᤔᤧᤸᤗᤢᤰᤛᤠ᤺ᤸᤗᤧ ᤁᤱᤜᤠ᤹ ᤁᤔᤢᤛᤡ᤹. ᤂᤢᤏᤧ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤘᤠᤒᤢᤴᤏᤥ ᤗᤠᤶᤗᤥᤛᤢᤛᤡᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤔᤡᤰᤘᤠ᤺ᤴ ᤋᤢᤃᤢ ᤐᤡᤖᤢᤛᤡ᤹ᤖᤥ॥”
REV 8:1 ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤏᤢᤛᤡᤃᤣ᤺ᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤢᤔᤢᤰ ᤁᤢᤓᤪᤧ᤺ᤱ ᤌᤠᤖᤡᤰ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧ॥
REV 8:2 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤏᤡ᤺ᤛᤢᤱᤛᤡᤱ॥ ᤂᤧᤱᤜᤠ᤹ ᤏᤢᤛᤡ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤔᤧᤒᤡᤖᤢᤛᤡᤖᤥ॥
REV 8:3 ᤜᤧᤰᤁᤩᤠᤱ ᤛᤠᤶᤔᤩᤠᤱ ᤛᤠᤱᤋᤧᤖᤧᤱ ᤁᤧᤒᤱᤒᤠ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤴ ᤋᤩᤧᤀᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤗᤥ॥ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠ᤺ᤴᤏᤢ ᤋᤥ᤺ᤶᤔᤠ ᤑᤠ᤹ᤀᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤡᤒᤠ ᤛᤠᤶᤔᤩᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥ ᤛᤠᤱᤛᤡᤱ ᤜᤠ᤺ᤶᤔᤠ ᤑᤠ᤹ᤀᤠᤱ ᤕᤖᤡᤰ ᤛᤠᤱᤛᤡᤱ ᤔᤧᤒᤡᤖᤢᤖᤥ॥
REV 8:4 ᤜᤧᤰᤁᤩᤠᤱ ᤛᤠᤱᤛᤡᤱ ᤔᤡ᤺ᤰᤂᤢ᤺ᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤢᤘᤠ᤺ᤴ ᤛᤥᤖᤡᤰ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤜᤢᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤥ ᤌᤠ᤺ᤱ ᤁᤧᤖᤧᤖᤥ॥
REV 8:5 ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤛᤠᤱᤋᤧᤖᤧᤱᤅᤡᤴ ᤕᤠᤱᤛᤡᤱᤅᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥᤒᤠ ᤔᤡᤄᤠ᤺ᤱᤅᤡᤴ ᤛᤠᤱᤋᤧᤖᤧᤱᤅᤥ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤑᤢᤛᤢ ᤌᤠ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱ ᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤜᤧᤰᤁᤩᤠᤱ ᤗᤢᤵᤗᤡ ᤌᤠᤅᤧᤖᤥ॥
REV 8:6 ᤜᤧᤰᤁᤩᤠᤱ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤏᤢᤛᤡ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤔᤢ᤺ᤵᤔᤠ ᤑᤠ᤹ᤀᤠᤱ ᤕᤠᤖᤡᤵ ᤔᤧᤈᤥᤃᤢᤖᤥ॥
REV 8:7 ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤔᤠᤰᤂᤡ᤹ᤏᤢ ᤁᤧᤓᤢᤳᤇᤡᤱᤒᤠ ᤑ᤺ᤴ ᤏᤢ ᤔᤡ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤰᤛᤡᤱᤗ ᤌᤠ᤺ᤔᤠ ᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤛᤡᤱᤒᤢᤱᤜᤠ᤹. ᤜᤧᤰᤁᤩᤠᤱ ᤁᤠᤰ ᤛᤖᤣ᤺ᤳᤁᤩᤠ᤺ᤵᤐᤠ ᤕᤠ᤺ᤴᤜᤠ᤹ ᤔᤡᤍᤡᤃᤧᤒᤣᤖᤥ॥
REV 8:8 ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤔᤡ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤐᤕᤶ ᤕᤶᤒᤠ ᤁᤥ᤺ᤰᤔᤠ ᤜᤧᤰᤋᤱᤒᤠᤴ ᤘᤠᤜᤱᤅᤥ ᤗᤠᤵᤑᤢᤛᤡᤱᤗᤥ॥ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤘᤠᤜᤱᤅᤡᤴ ᤔᤠᤰᤂᤡ᤹ ᤐᤥ᤺ᤰᤂᤧ ᤐᤣᤖᤥ॥
REV 8:9 ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤘᤠᤜᤱᤅᤥ ᤁᤧᤕᤠᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤛᤩᤧ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤘᤠᤗᤠᤎᤠᤜᤠ᤹ᤀᤠᤱ ᤔᤧᤕᤖᤧ ᤔᤧᤒᤣᤖᤥ॥
REV 8:10 ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤋᤠᤱᤛᤠᤰᤐᤥᤗᤠᤶ ᤕᤶᤒᤠ ᤂᤣ᤺ᤶᤛᤡᤰᤐᤠᤴ ᤁᤧᤍᤡ᤺ᤵᤐᤠ ᤋᤡᤕᤠᤗᤥ ᤁᤢᤀᤡᤛᤡ᤺ᤰ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤕᤱᤄᤱ ᤏᤢ ᤘᤠᤒᤢᤴᤜᤠ᤹ᤀᤥ ᤔᤰᤌᤩᤧᤖᤥ॥
REV 8:11 ᤂᤧᤴ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤔᤡᤱᤃ “ᤐᤄᤡ᤺ᤰ ᤁᤧᤄᤡ᤺ᤰᤐᤠ” ᤘᤕᤧ॥ ᤂᤧᤸᤗᤧ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤆᤫᤠ᤺ᤳᤋᤡᤴ ᤁᤧᤄᤡ᤺ᤰᤐᤠ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤆᤫᤠ᤺ᤳᤋᤡᤴ ᤔᤧᤎᤢᤅᤢᤀᤠᤱ ᤕᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤩᤧᤖᤥ॥
REV 8:12 ᤀᤠᤸᤗ ᤗᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤏᤠᤶ. ᤗᤠᤒᤠ. ᤏᤢ ᤂᤣ᤺ᤶᤛᤡᤰᤐᤠᤜᤠ᤹ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤕᤠᤱᤄᤢᤀᤠᤱ ᤂᤧᤱᤜᤠ᤹ᤖᤧ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤀᤥ᤺ᤳᤋᤡ᤺ᤴ ᤔᤕᤧᤖᤥ॥ ᤜᤧᤰᤁᤩᤠᤱ ᤗᤧᤴᤍᤡᤰ ᤏᤢ ᤛᤧᤴᤍᤡᤰᤗᤧᤴᤏᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤂᤠᤍᤠᤔᤧᤖᤥ॥
REV 8:13 ᤜᤧᤰᤁᤩᤠᤱ ᤀᤡᤱᤃᤠ᤹ ᤌᤠ᤺ᤱ ᤀᤥᤔᤧᤳᤋᤢᤱᤅᤡᤸᤗᤧ ᤋᤠᤱᤛᤠᤰᤐᤥ ᤁᤧᤒᤧᤒᤠᤖ ᤁᤧᤒᤵᤐᤠ ᤔᤢᤕᤠᤎᤡᤰ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤒᤠ ᤂᤧᤵᤛᤢᤱᤗᤥ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠᤜᤠ᤹ᤀᤥ ᤋᤢᤰᤂᤣ. ᤋᤢᤰᤂᤣ. ᤋᤢᤰᤂᤣᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤘᤣ᤹ᤛ᤻ᤔᤠ ᤛᤢᤶᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤌᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤵᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥”
REV 9:1 ᤜᤧᤰᤁᤩᤠᤱ ᤅᤠᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤋᤠᤱᤛᤠᤰᤐᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤰᤁᤧᤎᤠ᤺ᤒᤠ ᤂᤣ᤺ᤶᤛᤡᤰᤐᤠᤎᤡᤰ ᤏᤡ᤺ᤛᤢᤱᤗᤥ॥ ᤂᤧᤴ ᤂᤣ᤺ᤶᤛᤡᤰᤐᤧᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤒᤠ ᤋᤡᤔᤡᤰᤁᤡᤴ ᤔᤧᤒᤡᤖᤢ॥
REV 9:2 ᤂᤧᤴ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤡᤴ ᤜᤴᤍᤢᤸᤗᤧ ᤂᤧᤵᤔᤥᤗᤠᤶ ᤀᤠᤳᤋᤠᤳᤋᤠᤴᤏᤣ ᤕᤶᤒᤠ ᤔᤡᤜᤠ᤺ᤳᤗᤢᤱᤅᤥᤗᤠᤶ ᤁᤧᤗ᤺ᤶᤒᤠ ᤁᤢᤀᤡᤛᤡ᤺ᤰ ᤔᤡ᤺ᤰᤂᤢ᤺ᤴ ᤌᤠᤅᤧ. ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤛᤡᤍᤧᤵ ᤋᤧᤵᤋᤢᤀᤠᤱ ᤏᤠᤶᤔᤡᤴ ᤀᤡ᤺ᤵᤋᤢᤍᤣ᤺ᤛᤢᤖᤥ॥
REV 9:3 ᤜᤧᤰᤁᤩᤠᤱ ᤔᤡ᤺ᤰᤂᤢᤀᤥᤗᤠᤶ ᤏᤡ᤺ᤱᤄᤢ᤺ᤰᤘᤠᤜᤠ᤹ ᤔᤧᤗ᤺ᤴᤍᤧᤀᤠᤱ ᤂᤠᤶᤒᤣ᤺ᤰᤔᤥ ᤔᤧᤈᤢᤰᤋᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠᤱᤛᤠᤰᤂᤧᤒᤰᤐᤠᤜᤠ᤹ᤖᤧ ᤜᤧᤰᤁᤣ ᤛᤡᤰᤔᤠ ᤔᤢᤰ ᤔᤧᤒᤡᤖᤢᤛᤡᤖᤥ॥
REV 9:4 ᤂᤧᤱᤜᤠ᤹ ᤕᤠ᤺ᤴ ᤐᤥ᤺ᤰᤗᤠᤜᤠ᤹. ᤛᤡᤱᤒᤢᤱᤜᤠ᤹ ᤑᤧᤳᤗᤠ᤺ᤶᤔᤠ ᤔᤧ᤺ᤴ. ᤁᤖ ᤂᤢᤏᤡ᤹ ᤋᤥᤘᤠᤒᤥ ᤏᤡᤱᤘᤠ᤹ᤑᤢᤔᤠᤱ ᤀᤣ᤺ᤵᤛᤠᤵ ᤔᤧᤶᤒᤵᤔᤏᤠᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤰ ᤋᤢᤰᤂᤣ ᤆᤠ᤺ᤳᤋᤧᤶᤛᤡᤶᤔᤧ᤹ ᤔᤧᤔᤧᤳᤋᤢᤛᤡᤖᤥ॥
REV 9:5 ᤂᤧᤱᤜᤠ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤧᤖᤧᤶᤛᤡᤶᤔᤡᤴᤏᤧ᤹ ᤁᤖ ᤗᤠ ᤅᤠᤛᤡ ᤌᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤀᤡᤱᤈᤠ᤺ᤱ ᤔᤧᤒᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤱᤃ ᤋᤠᤱᤛᤠᤰᤂᤧᤒᤰᤐᤠᤸᤗᤧ ᤀᤠᤛᤡᤰᤁᤡᤸᤗᤧ ᤋᤢᤰᤐᤠ ᤜᤧᤰᤋᤱᤒᤠ ᤘᤕᤧᤖᤥ॥
REV 9:6 ᤂᤧᤴ ᤕᤧᤴᤜᤠ᤹ᤀᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤛᤡ᤺ᤔᤧᤴ ᤔᤧᤃᤥ᤺ᤳᤋᤢ. ᤁᤖ ᤔᤧᤱᤄᤥ᤺ᤛᤢᤴᤗᤥ॥ ᤜᤧᤰᤁᤩᤠᤱ ᤛᤡ᤺ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤛᤠᤱ ᤔᤧᤴᤇᤡ᤺ᤏᤧᤴᤗᤥ॥
REV 9:7 ᤂᤧᤴ ᤏᤡ᤺ᤱᤄᤢ᤺ᤰᤘᤠᤜᤠ᤹ᤃ ᤌᤱᤅᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤀᤴ ᤁᤢᤀᤡᤛᤡ᤺ᤰ ᤏᤡ᤺ᤔᤧᤎᤠᤒᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤁᤥ ᤛᤠᤶᤔᤩᤠᤱ ᤋᤡᤆ᤺ ᤜᤧᤰᤋᤱᤒᤠᤴ ᤔᤧᤄᤢ᤺ᤰᤂᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤢᤏᤡ᤹ ᤏᤠᤖᤠ᤺ᤱᤃ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥
REV 9:8 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤀᤡ᤺ᤱᤃ ᤔᤧᤴᤇᤢᤔᤠ᤹ᤖᤧᤴ ᤜᤧᤰᤁᤣ ᤁᤣ᤺ᤶᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤠᤒᤥ᤹ᤜᤠ᤹ᤃ ᤌᤧᤖᤡᤱᤒᤠᤸᤗᤧ ᤁᤢᤜᤠᤒᤥ᤹ ᤜᤧᤰᤁᤣ ᤗ᤹ᤖᤧᤖᤥ॥
REV 9:9 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤱᤒᤣ᤹ᤔᤥ ᤑᤧᤴᤈᤣ᤹ ᤛᤧ᤺ᤵᤆᤠᤱ ᤔᤧᤈᤠᤰᤂᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤵᤐᤡᤱᤃ ᤌᤱᤅᤥ ᤀᤴᤗᤠᤜᤠ᤹ ᤁᤧᤀᤢ᤺ᤱᤒᤠᤀᤠᤱ ᤁᤧᤗᤥ᤺ᤰᤐᤠ ᤁᤢᤀᤡᤛᤡ᤺ᤰ ᤛ᤺ᤰᤋᤧᤖᤥ॥
REV 9:10 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤣ᤺ᤱᤃ ᤋᤠᤱᤛᤠᤰᤂᤧᤒᤰᤐᤠᤸᤗᤧ ᤁᤢᤔᤣ ᤁᤢᤀᤡᤛᤡ᤺ᤰ ᤆᤥᤃᤧ. ᤜᤧᤰᤁᤩᤠᤱ ᤂᤢᤏᤡ᤹ ᤔᤣ᤺ᤸᤗᤧ ᤗᤠ ᤅᤠᤛᤡ ᤌᤠᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤔᤢᤰᤛᤠᤶ ᤔᤧᤃᤳᤋᤢ॥
REV 9:11 ᤂᤢᤏᤡ᤹ ᤜᤠᤱᤅᤡᤱᤃ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤘᤕᤧᤖᤥ॥ ᤂᤧᤸᤗᤧ ᤁᤢᤔᤡᤱᤃ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤀᤒ᤻ᤒᤠᤍᤥᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤀᤐᤥᤸᤗᤡᤕᤥᤴᤗᤥ (ᤁᤱᤜᤠ᤹ᤖᤧ ᤁᤢᤒᤣ᤺ᤱᤃ “ᤁᤧᤔᤧᤱᤒᤠ” ᤐᤥ᤺ᤱᤗᤥ)॥
REV 9:12 ᤂᤧᤴ ᤌᤡᤰᤛᤡᤃᤣ᤺ᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤱᤃ ᤐᤣᤖᤥ॥ ᤁᤖ ᤀᤥᤔᤧᤳᤋᤧᤶᤔᤧ᤹ᤀᤥ. ᤘᤣ᤹ᤛ᤻ᤔᤠ ᤏᤧᤳᤇᤡ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤋᤠ᤺ᤔᤠ ᤁᤧᤒᤥ᤺ᤱᤒᤠ ᤘᤠ᤹ᤖᤥ॥
REV 9:13 ᤜᤧᤰᤁᤩᤠᤱ ᤋᤢᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡᤒᤠ ᤛᤠᤶᤔᤩᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤡᤛᤡ ᤁᤢᤛᤢᤰᤐᤥ ᤁᤧᤒᤵᤐᤠ ᤜᤠᤛᤶᤛᤶᤒᤠᤀᤥᤏᤢ ᤀᤡᤰᤗᤠᤎᤡᤰ ᤗ᤺ᤴᤍᤧᤒᤠ ᤂᤧᤵᤛᤢᤱ॥
REV 9:14 ᤂᤧᤴ ᤀᤡᤰᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤂᤧᤴ ᤌᤢᤳᤋᤢᤖᤡ᤺ᤵᤐᤠ ᤁᤧᤃᤵᤐᤠ ᤋᤢᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤴ ᤔᤧᤳᤋᤢ. “ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤠᤜᤱᤅᤥ ᤀᤡᤄᤣ᤺ᤱᤔᤏᤠᤛᤡᤒᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤗᤧᤖᤧᤛᤧ᤹॥”
REV 9:15 ᤜᤧᤰᤁᤣᤗ᤹ᤖᤡᤰ ᤒᤠ ᤁᤴ ᤋᤱᤒᤣ. ᤗᤠ. ᤕᤧᤴ. ᤏᤢ ᤁᤢᤔᤢᤰᤗᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧᤀᤠᤱ ᤁᤧᤘᤠ᤹ᤒᤠ ᤂᤧᤴ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤁᤢᤛᤢᤰᤘᤠ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤔᤧᤗᤧᤖᤢᤛᤡᤖᤥ॥
REV 9:16 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ ᤕᤢᤱᤛᤡᤱ ᤏᤧᤳᤇᤡ (᥈᥆.᥆᥆.᥆᥆.᥆᥆᥆) ᤔᤧᤘᤕᤧᤒᤠ ᤂᤢᤏᤡ᤹ ᤂᤠᤏᤡ᤺ᤳᤋᤡᤴ ᤂᤧᤵᤛᤢᤱᤗᤥ॥
REV 9:17 ᤀᤡᤱᤃᤠ᤹ ᤏᤡ᤺ᤛᤢᤱᤒᤠ ᤛᤢᤑᤥᤀᤥ ᤀᤴᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹ ᤀᤰᤋᤱᤒᤠ ᤔᤧᤈᤥᤃᤧ–ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤱᤒᤣ᤹ ᤛᤧ᤺ᤵᤆᤠᤱᤅᤡᤴ ᤔᤡ ᤜᤧᤰᤁᤣ ᤜᤧ᤺ᤳᤋᤠᤱᤒᤠ. ᤁᤢᤓᤡᤱᤗᤢᤱ ᤜᤧᤰᤁᤣ ᤑᤡᤱᤍᤠᤱᤒᤠ ᤏᤢ ᤁᤠᤴᤎᤠᤰ ᤜᤧᤰᤁᤣ ᤀᤶᤍᤠᤱᤒᤠ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤀᤴᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤐᤠᤱᤃ ᤌᤧᤖᤡᤱᤒᤠᤸᤗᤧᤴ ᤁᤢᤀᤡᤛᤡ᤺ᤰ ᤆᤥᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤀᤥᤗᤠᤶ ᤔᤡ. ᤔᤡ᤺ᤰᤂᤢ᤹ ᤏᤢ ᤁᤠᤴᤎᤠᤰᤁᤡᤴ ᤗ᤺ᤴᤍᤧᤖᤥ॥
REV 9:18 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤴ ᤀᤴᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤜᤠ᤹ᤀᤥᤗᤠᤶ ᤁᤧᤗ᤺ᤶᤒᤠ ᤔᤡ. ᤔᤡ᤺ᤰᤂᤢ᤹ ᤏᤢ ᤁᤠᤴᤎᤠᤰᤗᤧᤴ ᤛᤢᤶᤛᤡ ᤔᤡᤴᤍᤣ᤹ᤀᤥᤗᤠᤶ ᤔᤧᤛᤩᤧᤖᤥ॥
REV 9:19 ᤀᤴᤜᤠ᤹ᤖᤧ ᤂᤢᤏᤡ᤹ ᤔᤢᤰᤛᤠᤶᤔᤡᤱᤃ ᤂᤢᤏᤡ᤹ ᤔᤢᤖᤠᤜᤠ᤹ᤀᤥ ᤏᤢ ᤔᤣᤜᤠ᤹ᤀᤥ ᤐᤳᤇᤧᤖᤥ॥ ᤂᤢᤏᤡ᤹ ᤔᤣᤜᤠ᤹ᤃ ᤀᤛᤣ᤺ᤰᤐᤠ ᤁᤢᤀᤡᤛᤡ᤺ᤰ ᤁᤢᤎᤧᤃᤣ᤺ᤰ ᤁᤧᤒᤵᤐᤠ ᤆᤥᤃᤧᤖᤥ॥ ᤂᤧᤴ ᤌᤧᤃᤣ᤺ᤰᤜᤠ᤹ᤖᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤠ᤺ᤶᤔᤠᤛᤡ ᤔᤢᤰᤛᤠᤶ ᤔᤧᤃᤳᤋᤢᤖᤥ॥
REV 9:20 ᤜᤧᤰᤁᤩᤠᤱ ᤁᤴ ᤔᤡᤴᤍᤣ᤹ᤗᤠᤶ ᤔᤧᤴᤇᤡ᤺ᤔᤏᤠ ᤘᤣ᤹ ᤔᤏᤠᤜᤠ᤹ ᤀᤠᤒᤠᤅᤣ ᤔᤧᤈᤥᤃᤢᤒᤠ ᤑᤧᤴ ᤕᤠ᤺ᤶᤒᤰᤁᤥᤗᤠᤶ ᤔᤧᤴᤜᤡᤴᤍᤧᤴᤗᤥ॥ ᤀᤠᤸᤗᤛᤠᤱ ᤂᤧᤱᤜᤠ᤹ᤖᤧ ᤑᤧᤴᤛᤠᤶᤜᤠ᤹ ᤏᤢ ᤔᤧᤶᤒᤠ᤺ᤵᤔᤏᤠ. ᤔᤧᤴᤏᤡ᤺ᤔᤏᤠ ᤜᤧᤰᤁᤩᤠᤱ ᤗᤠᤱᤔᤧᤱᤄᤣ᤺ᤰᤔᤏᤠ ᤛᤠᤶᤔᤩᤠᤱ. ᤕᤢᤵᤐᤠ. ᤌᤌᤏᤠᤒᤠ. ᤗᤢᤱ ᤏᤢ ᤛᤡᤱᤅᤡᤸᤗᤧᤴ ᤏᤠᤘᤠᤀᤡᤳᤗᤠᤜᤠ᤹ ᤛᤣᤘᤠ ᤆᤥ᤺ᤰᤔᤠ ᤔᤧᤸᤗᤧᤖᤢᤴᤗᤥ॥
REV 9:21 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤏᤠ ᤛᤧᤵᤔᤠ. ᤁᤡᤳᤆᤠᤰ ᤆᤥ᤺ᤰᤔᤠ. ᤕᤠᤶᤒᤥ᤺ᤵᤔᤠ ᤏᤢ ᤂᤢ᤺ᤶᤔᤠᤗᤠᤶ ᤔᤧᤴᤜᤡᤴᤍᤧᤴᤗᤥ॥
REV 10:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤘᤣ᤹ ᤔᤢᤰᤛᤠᤶᤍᤠᤱᤒᤠ ᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤱ॥ ᤂᤧᤴ ᤂᤠᤵᤔᤡ᤺ᤳᤋᤡᤸᤗᤧ ᤐᤴᤇᤡᤱᤅᤠᤱ ᤘᤕᤧ. ᤁᤢᤎᤧᤃᤣ᤺ᤰ ᤛᤶᤍᤠᤱᤃ ᤏᤠᤶᤎᤡᤱᤃᤥ᤺ᤴ ᤐᤳᤇᤧ. ᤂᤢᤏᤧ᤹ ᤁᤢᤏᤠᤖᤠ᤺ᤱᤃ ᤏᤠᤶᤔᤡᤴ ᤜᤧᤰᤁᤣ ᤔᤡᤰ ᤁᤧᤈᤧᤶᤒᤠ ᤆᤥᤃᤧ. ᤜᤧᤰᤁᤩᤠᤱ ᤁᤢᤗᤠᤱᤜᤠ᤹ᤃ ᤔᤡ ᤁᤧᤍᤡ᤺ᤵᤐᤠ ᤛᤡᤳᤗᤠᤱ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥
REV 10:2 ᤂᤧᤸᤗᤧ ᤁᤢᤜᤢᤰᤁᤥ ᤆᤢᤰᤛᤠ ᤑᤠ᤺ᤱᤔᤏᤠᤒᤠ ᤛᤠᤵᤁᤡᤳᤌᤡᤰ ᤁᤳᤋᤢ॥ ᤂᤧᤸᤗᤧ ᤁᤢᤈᤢᤵᤛᤠᤱ ᤗᤠᤱᤅᤡᤸᤗᤧ ᤘᤠᤜᤱᤅᤥ ᤏᤢ ᤁᤢᤓᤧᤴᤇᤠᤱ ᤗᤠᤱᤅᤡᤸᤗᤧ ᤂᤠᤶᤒᤣ᤺ᤰᤔᤥ ᤋᤥ᤹ᤖᤢᤀᤠᤱ ᤕᤧᤒᤧᤖᤥ॥
REV 10:3 ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤴ ᤌᤧᤖᤡᤱᤒᤠᤴ ᤜᤢ᤺ᤰᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖᤥ॥ ᤂᤢᤏᤧ᤹ ᤀ᤺ᤰᤋᤧᤸᤗᤧ ᤋᤠᤱᤛᤠᤰᤐᤧᤴ ᤏᤢᤛᤡᤗᤧᤱ ᤗᤥ᤺ᤰᤂᤢᤖᤥ॥
REV 10:4 ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤋᤠᤱᤛᤠᤰᤐᤠ ᤁᤧᤗᤥ᤺ᤱᤒᤠᤸᤗᤧ ᤁᤢᤒᤠ᤺ᤴᤏᤡᤴ ᤛᤠᤵᤔᤠᤀᤣ ᤀᤡ᤺ᤳᤋᤢᤱᤅᤠᤱ ᤐᤳᤇᤠᤱ. ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤴ ᤏᤢᤛᤡ ᤂᤧᤖᤧᤱ ᤄᤢᤖᤢᤱ ᤁᤧᤗ᤹ᤒᤠᤸᤗᤧ ᤁᤢᤒᤠ᤺ᤴᤏᤡᤴ ᤔᤧᤛᤠᤵᤋᤧᤴᤏᤧ᤹. ᤁᤖ ᤂᤧᤱᤜᤠ᤹ ᤔᤠ᤹ᤖᤧᤀᤠᤱ ᤁᤳᤋᤧ᤹ᤀᤥ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ॥
REV 10:5 ᤜᤧᤰᤁᤩᤠᤱ ᤀᤡᤱᤃᤠ᤹ ᤏᤡ᤺ᤛᤢᤱᤒᤠ ᤂᤧᤴ ᤘᤠᤜᤱᤅᤥ ᤏᤢ ᤂᤠᤶᤒᤣ᤺ᤰᤔᤥ ᤁᤧᤕᤧᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤡᤴ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤑᤥ᤺ᤰᤂᤢᤖ
REV 10:6 ᤛᤠᤱᤃᤪᤠᤶᤐᤣᤍᤠᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤏᤢ ᤘᤠᤜᤱ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤛᤍᤠᤍᤡᤱ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤗᤥ॥ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤐᤠ᤺ᤳᤋᤢ. “ᤀᤠᤸᤗ ᤂᤧᤴ ᤕᤧᤶᤔᤡᤴ ᤋᤠ᤺ᤔᤠ ᤕᤖᤡᤰ ᤜᤥ᤺ᤵᤗᤥ.
REV 10:7 ᤁᤖ ᤏᤢᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤢᤛᤣᤘᤠᤖᤥᤒᤠᤜᤠ᤹ ᤋᤃᤡ ᤀᤡᤱᤓᤴ ᤆᤥᤃᤢᤛᤡᤒᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤒᤡ᤹ ᤐᤠ᤺ᤴᤜᤠ᤹ ᤁᤧᤳᤗᤥ॥”
REV 10:8 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤢᤱᤒᤠ ᤀᤡᤰᤗᤠ᤺ᤸᤗᤧ ᤕᤠᤶᤔᤥ ᤀᤰᤂᤣ ᤔᤧᤳᤋᤠᤱ. “ᤐᤣᤃᤧ᤹ᤀᤠᤱ ᤂᤧᤴ ᤘᤠᤜᤱᤅᤥ ᤏᤢ ᤂᤠᤶᤒᤣ᤺ᤰᤔᤥ ᤁᤧᤕᤧᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤂᤧᤴ ᤁᤧᤒᤠ᤺ᤱᤒᤠ ᤛᤠᤵᤁᤡᤳᤋᤡᤴ ᤋᤠ᤺ᤰᤋᤧ᤹॥”
REV 10:9 ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤥ ᤐᤣᤃᤠᤱᤅᤠᤱ ᤂᤧᤴ ᤆᤢᤰᤛᤠ ᤛᤠᤵᤁᤡᤳᤋᤡᤴ ᤏᤠ᤺ᤰᤋᤢᤱ॥ ᤂᤧᤸᤗᤧ ᤔᤧᤳᤋᤠᤱ. “ᤁᤫᤧ᥄ ᤁᤴ ᤋᤠ᤺ᤰᤋᤧ᤹ᤀᤠᤱ ᤆᤩᤧ᤹. ᤁᤴ ᤁᤧᤈ᤺ᤸᤗᤧ ᤁᤧᤔᤢᤖᤠᤀᤥ ᤛᤰᤘᤠᤄᤢ ᤜᤧᤰᤁᤣ ᤐᤗᤡᤶᤗᤡᤶᤛᤠᤱ ᤁᤧᤛᤠᤵᤐᤥ᤺ᤰᤐᤥ ᤗᤠ᤺ᤳᤋᤠᤱ ᤐᤄᤡ᤺ᤰᤂᤡ᤺ᤰᤗᤥ॥”
REV 10:10 ᤜᤧᤰᤁᤩᤠᤱ ᤂᤧᤴ ᤆᤢᤰᤛᤠ ᤛᤠᤵᤁᤡᤳᤋᤡᤴ ᤁᤢᤜᤢᤰᤁᤥᤗᤠᤶ ᤋᤠ᤺ᤰᤋᤢᤱᤅᤠᤱ ᤀᤡᤱᤃᤠ᤹ ᤆᤠᤱ॥ ᤂᤧᤴ ᤆᤠᤱᤅᤡᤸᤗᤧ ᤀᤠᤔᤢᤖᤠᤀᤥ ᤐᤗᤡᤶᤗᤡᤶᤍᤧ. ᤁᤖ ᤀᤠᤛᤠᤵᤐᤥ᤺ᤰᤐᤥ ᤗᤠ᤺ᤛᤧᤀᤠᤱ ᤐᤄᤡ᤺ᤰᤂᤡ᤺ᤰᤋᤧᤖᤥ॥
REV 10:11 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤕᤖᤡᤰ ᤔᤏᤠᤜᤠ᤹. ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤕᤖᤡᤰ ᤐᤠ᤺ᤴᤍᤠᤱᤜᤠ᤹ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤕᤠᤶᤔᤥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤳᤋᤢᤖᤀᤣ ᤐᤥ᤺ᤱᤗᤥ॥”
REV 11:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤢᤛᤡ᤺ᤰᤔᤠ ᤛᤡᤱ ᤁᤢᤀᤡᤛᤡ᤺ᤰ ᤋᤰᤁᤠ᤺ᤳᤎᤡᤰ ᤔᤧᤒᤡᤖᤠᤱᤅᤠᤱ ᤀᤰᤂᤣ ᤔᤧᤔᤧᤳᤋᤠᤱ. “ᤐᤣᤃᤧ᤹ᤀᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶ ᤏᤢ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤴ ᤛᤡ᤺ᤰᤋᤧ᤹. ᤜᤧᤰᤁᤩᤠᤱ ᤂᤧᤵᤔᤥ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ᤀᤠᤱ ᤏᤡᤖᤧᤛᤧ᤹ᤀᤥ॥
REV 11:2 ᤁᤖ ᤜᤡᤶᤔᤡᤸᤗᤧ ᤗᤰᤂᤢᤶᤔᤡᤴ ᤔᤧᤛᤡ᤺ᤰᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤃ ᤁᤧᤖᤧᤰ ᤗᤠᤈᤣ᤹ᤒᤠ ᤛᤢᤘᤠᤱᤜᤠ᤹ ᤐᤡᤖᤧᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤧ᤹ᤕᤥ ᤗᤠ ᤗᤡ-ᤏᤧᤳ (᥊᥈) ᤌᤠᤖᤡᤰ ᤛᤣᤛᤣ ᤕᤧᤰᤕᤰᤁᤡᤴ ᤔᤧᤛ᤹ᤖᤢ ᤔᤧᤗᤠ᤺ᤰᤋᤢ᤹ᤖᤥ॥
REV 11:3 ᤜᤧᤰᤁᤩᤠᤱ ᤀᤡᤱᤃᤠ᤹ ᤏᤧᤳᤇᤡ ᤀᤠᤍᤥ᤺ᤴᤍᤡ ᤁᤧᤒᤡᤒᤠᤜᤠ᤹ ᤕᤢᤰ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤃᤡ ᤋᤣ᤺ᤳ ᤆᤠᤱᤛᤢᤀᤠᤱ ᤜᤧᤴᤇᤡᤱ ᤌᤡᤰ ᤁᤡᤵ ᤏᤧᤳᤇᤡᤀᤠᤱ ᤋᤢᤰᤐᤥ᤺ᤱ (᥇.᥈᥌᥆) ᤕᤧᤴ ᤌᤠᤖᤡᤰ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤇᤡᤖᤥ॥”
REV 11:4 ᤂᤢᤴᤇᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰ ᤍᤠᤱᤒᤠᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤏᤧᤳᤇᤡ ᤈᤤᤋᤢᤏ ᤛᤡᤱᤒᤢᤱ ᤏᤢ ᤏᤧᤳᤇᤡ ᤛᤣᤔᤡᤕᤢᤱᤍᤧᤴᤛᤡᤖᤥ॥
REV 11:5 ᤀᤠᤳᤋᤡᤴᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤔᤡᤖᤠ᤺ᤰᤁᤡᤸᤗᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤗᤠᤒᤢ ᤛᤧᤖᤢᤛᤡ᤹ᤖᤥ॥ ᤀᤰᤂᤣᤗ᤹ᤖᤡᤰ ᤂᤢᤴᤇᤡ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ ᤛᤡ᤺ᤔᤠᤀᤣ ᤐᤥ᤺ᤱᤗᤥ॥
REV 11:6 ᤂᤧᤱᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤐᤠ᤺ᤳᤇᤢᤖ ᤌᤠᤖᤡᤰ ᤐᤠᤱᤃᤧᤴᤍᤡᤱ ᤘᤠᤜᤡᤳᤔᤠᤴ ᤔᤧᤎᤠᤏᤧᤴᤗ ᤑᤠ᤹ᤀᤠᤱ ᤋᤖ᤺ᤱᤃᤧᤴ ᤋᤠᤱᤛᤠᤰᤐᤧᤴ ᤛᤢᤵᤔᤠ ᤔᤢᤰᤛᤠᤶ ᤁᤳᤇᤢ᤹ᤖᤥ॥ ᤜᤧᤰᤁᤩᤠᤱ ᤕᤱᤄᤱ ᤏᤢ ᤘᤠᤜᤱᤅᤡᤴ ᤔᤠᤰᤂᤡ᤹ᤀᤥ ᤗᤧᤱᤔᤠ ᤔᤢᤰᤛᤠᤶᤔᤠᤱ ᤁᤳᤇᤢ᤹. ᤕᤠᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤴᤇᤡ᤹ ᤏᤡᤱᤘᤠ᤹ ᤜᤧᤰᤁᤣᤀᤣ ᤁᤠᤰ ᤐᤖᤡᤰᤗᤧᤴ ᤔᤡᤴᤍᤣ᤹ᤜᤠ᤹ᤀᤠᤱ ᤋᤠ᤺ᤵᤔᤠ ᤛᤢᤰᤛᤢ᤹ᤖᤥ॥
REV 11:7 ᤂᤢᤴᤇᤡ᤹ ᤋᤥ᤺ᤴᤍᤡ ᤐᤡᤔᤠ ᤛᤢ᤺ᤳᤇᤢᤀᤠᤱ ᤂᤧᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤗᤠᤶ ᤁᤧᤗ᤺ᤶᤒᤠ ᤂᤧᤴ ᤌᤰᤛᤠ᤺ᤸᤗᤧ ᤂᤢᤴᤇᤡ᤹ᤏᤢ ᤌᤱ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤏᤧᤵᤔᤈᤠᤱ ᤏᤠ᤺ᤴᤍᤢᤛᤡ᤹ᤀᤠᤱ ᤛᤧᤖᤢᤛᤡ᤹ᤖᤥ॥
REV 11:8 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤱᤃ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤸᤗᤧ ᤁᤢᤔᤠᤖᤠᤶᤔᤥ ᤏᤧᤛᤡᤖᤥ॥ ᤂᤧᤵᤔᤥᤀᤣ ᤂᤢᤴᤇᤡ᤹ ᤍᤠᤱᤒᤠᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢ ᤔᤧᤛᤧᤖᤢᤀᤠᤱ ᤘᤕᤧᤖᤥ॥ ᤂᤧᤴ ᤕᤧᤰᤕᤰᤁᤡᤱᤃ ᤛᤍᤥᤔ ᤕᤧᤰᤕᤰ ᤏᤢ ᤔᤡᤛᤪ ᤗᤠᤈᤣ᤹ ᤜᤧᤰᤋᤱᤒᤠᤖᤥ॥
REV 11:9 ᤜᤧᤰᤁᤩᤠᤱ ᤕᤧᤴ ᤛᤢᤶᤛᤡᤀᤠᤱ ᤗᤧᤴᤈᤥ ᤌᤠᤖᤡᤰ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣ᤹ᤜᤠ᤹ᤗᤠᤶ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤀᤥᤔᤧᤔᤧᤳᤋᤢᤛᤠᤱ ᤀᤡᤵᤐᤢᤱᤅᤥ ᤗᤢᤵᤔᤠᤃ ᤔᤧᤶᤒᤠᤱᤄᤢᤴᤇᤡᤴᤗᤥ॥
REV 11:10 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤩᤧᤳᤇᤡᤒᤠᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ ᤌᤠᤱᤅᤠᤱ ᤔᤧᤛ᤺ᤳᤗᤥ. ᤜᤧᤰᤁᤩᤠᤱ ᤔᤡᤰᤋᤥ᤺ᤰ ᤔᤧᤒᤡᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤧᤵᤑᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠᤜᤠ᤹ ᤛᤠ᤹ᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤆᤠ᤺ᤳᤋᤧᤳᤇᤢᤀᤠᤱ ᤘᤕᤧᤳᤇᤡᤖᤥ॥
REV 11:11 ᤁᤖ ᤕᤧᤴ ᤛᤢᤶᤛᤡᤀᤠᤱ ᤗᤧᤴᤈᤥ ᤀᤣᤃᤠᤱ ᤂᤧᤱᤜᤠ᤹ ᤏᤧᤵᤔᤠᤱᤅᤥ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠ᤺ᤴ ᤗᤠ᤺ᤛᤧᤀᤠᤱ ᤏᤧᤵᤔᤠᤱ ᤐᤥᤃᤧᤳᤇᤡᤀᤠᤱ ᤕᤧᤒᤧᤳᤇᤡᤖᤥ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤥᤃᤧᤔᤧᤵᤐᤠᤖ ᤁᤧᤒᤵᤐᤠ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥
REV 11:12 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤳᤌᤥ ᤌᤠᤅᤧᤳᤇᤧ᤹ ᤁᤧᤗ᤹ᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤀᤠᤱ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤡᤖ ᤔᤧᤒᤳᤇᤧᤸᤗᤧᤛᤠ ᤌᤥ ᤂᤠᤵᤔᤡ᤺ᤳᤋᤥ ᤗᤠ᤺ᤛᤧᤳᤇᤡᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣᤛᤧᤳᤇᤡᤖᤥ॥
REV 11:13 ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤕᤧᤶᤔᤥ ᤐᤕᤶ ᤕᤶᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤀᤠᤱ ᤂᤧᤴ ᤕᤧᤰᤕᤰᤁᤡᤴ ᤌᤡᤒᤥ᤺ᤱ ᤗᤰ ᤕᤖᤧᤸᤗᤧ ᤜᤧᤴᤇᤡᤱ ᤏᤢᤛᤡ (᥍᥆᥆᥆) ᤔᤏᤠᤜᤠ᤹ ᤜᤍ᤹ ᤔᤧᤛᤩᤧᤖᤥ॥ ᤜᤧᤰᤁᤩᤠᤱ ᤔᤧᤴᤇᤡ᤺ᤔᤏᤠ ᤁᤠᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤢᤰᤛᤠᤶᤍᤠᤱᤒᤠ ᤆᤥ᤺ᤰ ᤑᤠ᤹ᤀᤠᤱ ᤔᤡᤔᤡᤍᤡᤱ ᤔᤧᤒᤡᤖᤢᤖᤥ॥
REV 11:14 ᤂᤧᤴ ᤏᤡᤛᤡᤃᤣ᤺ᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤱᤃ ᤐᤣ. ᤁᤖ ᤀᤥᤔᤧᤳᤋᤧᤶᤔᤧ᤹ᤀᤥ. ᤛᤢᤶᤛᤡᤃᤣ᤺ᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤱᤃ ᤜᤠᤖᤠᤀᤣ ᤋᤠᤖ ᤐᤳᤗᤥ॥
REV 11:15 ᤜᤧᤰᤁᤩᤠᤱ ᤏᤢᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤶᤒᤠ ᤀᤡᤰᤗᤠᤜᤠ᤹ ᤀᤰᤂᤣᤗ᤹ᤖᤡᤰ ᤋᤩᤧᤖᤥ. “ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤠᤏᤡ᤹ ᤍᤠᤱᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤁᤢᤜᤠᤱᤈᤢᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤆᤰᤔᤧᤸᤗ᤹ᤀᤣ ᤛᤍᤠᤍᤡᤱ ᤛᤍᤠᤍᤡᤱ ᤜᤠᤱ ᤆᤥᤃᤢ᤹ᤖᤥ॥”
REV 11:16 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤀᤠᤒᤠᤅᤣ ᤂᤢᤏᤡ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤘᤠ ᤔᤧᤈᤥᤃᤢᤖ
REV 11:17 ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤢᤏᤠᤜᤢᤖᤡᤀᤠᤱᤎᤥᤏᤢ ᤀᤠᤸᤗᤥ ᤌᤠᤖᤡᤰ ᤁᤧᤘᤠ᤹ᤒᤠ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤧ ᤏᤠᤈᤶᤃᤧᤴ ᤏᤥᤃᤧᤴ ᤐᤡᤀᤠᤛᤡᤃᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤐᤕᤶ ᤕᤶᤒᤠ ᤁᤧᤔᤢᤰᤛᤠᤶᤔᤡᤴ ᤁᤧᤍᤠ᤺ᤰᤋᤢᤀᤠᤱ ᤁᤧᤘᤠ᤹ ᤜᤧᤰᤁᤩᤠᤱ ᤜᤠᤱᤕᤢᤰ ᤆᤥ᤺ᤰᤔᤠ ᤁᤧᤜᤣ᤺ᤰᤋᤢᤀᤠᤱ ᤁᤧᤘᤠ᤹ᤖᤥ॥
REV 11:18 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ᤏᤢ ᤂᤢᤏᤡ᤹ ᤕᤠ᤺ᤰᤗᤧ᤹ᤖᤧᤀᤠᤱ ᤘᤠ᤹. ᤁᤖ ᤀᤠᤸᤗ ᤂᤧᤏᤧ᤹ ᤁᤧᤛᤡᤰ ᤐᤥ᤺ᤰᤔᤠ ᤕᤧᤶ ᤁᤧᤖᤧᤀᤠᤱ ᤘᤠ᤹॥ ᤁᤧᤛᤡ᤺ᤒᤠᤜᤠ᤹ ᤂᤠᤛᤧᤴ ᤆᤥ᤺ᤰᤔᤠᤛᤡ ᤕᤧᤶ ᤋᤩᤧᤀᤠᤱ ᤘᤠ᤹॥ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤃᤡᤒᤠ ᤆᤢᤰᤛᤠ ᤏᤢ ᤕᤶᤒᤠ. ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤧᤛᤣᤘᤠᤖᤥᤒᤠᤜᤠ᤹ ᤜᤧᤰᤁᤩᤠᤱ ᤁᤧᤛᤣᤛᤣ ᤔᤏᤠᤜᤠ᤹ ᤜᤠᤱᤛᤧᤶ ᤐᤡᤔᤠᤛᤡ ᤛᤢᤕᤧᤶ ᤋᤩᤧᤀᤠᤱ ᤘᤠ᤹॥ ᤀᤠᤸᤗ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤔᤧᤱᤒᤠᤜᤠ᤹ ᤔᤧᤱᤔᤠᤛᤡ ᤕᤧᤶᤔᤠᤱ ᤋᤩᤧᤀᤠᤱ ᤘᤠ᤹ᤖᤥ॥”
REV 11:19 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤜᤖᤧᤀᤠᤱ ᤂᤧᤴ ᤛᤡᤃᤠᤱᤒᤠ ᤔᤠᤱᤜᤢᤵᤐᤡᤸᤗᤧᤴ ᤛᤴᤍᤥ᤺ᤰᤁᤡᤴᤏᤠᤱ ᤏᤡ᤺ᤎᤠᤒᤧᤖᤥ॥ ᤜᤧᤰᤁᤩᤠᤱ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱ ᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤗᤢᤵᤗᤡ ᤌᤠᤅᤧ. ᤜᤧᤰᤁᤩᤠᤱ ᤕᤶᤒ᤻ ᤕᤶᤒᤠ ᤑ᤺ᤴ ᤌᤩᤧᤖᤥ॥
REV 12:1 ᤜᤧᤰᤁᤩᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤥ ᤀᤡᤱᤃᤠ᤹ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴ ᤏᤡ᤺ᤛᤢᤱᤗᤥ॥ ᤂᤧᤵᤔᤥ ᤆᤠᤱ ᤆᤠᤱᤔᤏᤠᤒᤠ ᤁᤢᤀᤡᤛᤡ᤺ᤰ ᤏᤠᤶᤔᤡᤴ ᤁᤧᤈᤠᤱᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧᤖᤥ॥ ᤂᤧᤸᤗᤧ ᤁᤢᤗᤠᤱᤓᤥᤛᤠᤱ ᤗᤠᤒᤠᤴ ᤐᤳᤇᤧ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰ ᤛᤶᤍᤠᤱ ᤌᤡᤰ-ᤏᤧᤳ ᤂᤣ᤺ᤶᤛᤡᤰᤜᤠ᤹ᤖᤧᤴ ᤋᤡᤆ᤺ ᤂᤢ᤺ᤰᤂᤢᤀᤠᤱ ᤐᤳᤇᤧ॥
REV 12:2 ᤂᤧᤴ ᤔᤧᤴᤇᤢᤰᤔᤠ ᤘᤕᤧ ᤜᤧᤰᤁᤩᤠᤱ ᤁᤢᤛᤠᤘᤠ᤺ᤶᤔᤠ ᤕᤧᤶᤔᤡᤴ ᤋᤩᤧᤒᤠᤸᤗᤧ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤋᤖᤢᤀᤠᤱ ᤕᤠᤖᤧᤖ ᤘᤕᤧ॥
REV 12:3 ᤜᤧᤰᤁᤩᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤥ ᤕᤠᤶᤔᤥ ᤀᤡᤱᤃᤠ᤹ ᤘᤣ᤹ᤛ᤻ᤔᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰᤁᤠᤱ ᤏᤡ᤺ᤛᤢᤱᤗᤥ–ᤂᤧᤵᤔᤥ ᤜᤧ᤺ᤳᤁᤧᤗ᤹ᤒᤠ ᤏᤢᤛᤡ ᤁᤢᤎᤧᤃᤣ᤺ᤰ ᤁᤧᤒᤵᤐᤠ ᤐᤕᤶ ᤕᤶᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤘᤕᤧᤖᤥ॥ ᤂᤧᤸᤗᤧ ᤏᤢᤛᤡ ᤁᤢᤎᤧᤃᤣ᤺ᤰᤜᤠ᤹ᤀᤥ ᤏᤢᤛᤡ ᤋᤡᤆ᤺ᤜᤠ᤹ ᤂᤢ᤺ᤰᤂᤢᤀᤠᤱ ᤐᤳᤇᤧ॥ ᤂᤧᤸᤗᤧ ᤌᤡᤒᤥ᤺ᤱ ᤁᤢᤍᤠᤱᤜᤠ᤹ ᤕᤢᤅᤧᤖᤥ॥
REV 12:4 ᤂᤧᤸᤗᤧ ᤁᤢᤔᤣ᤺ᤸᤗᤧ ᤋᤠᤱᤛᤠᤰᤐᤥᤒᤠ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤂᤣ᤺ᤶᤛᤡᤰᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤥ ᤛᤢ᤺ᤴᤍᤢ ᤌᤠ᤺ᤛᤢᤛᤡᤖᤥ॥ ᤜᤧᤰᤁᤩᤠᤱ ᤀᤅᤧ᤺ᤰᤘᤠ᤺ᤴ ᤛᤠᤘᤠ᤺ᤴᤍᤢᤸᤗᤧ ᤗᤖᤢᤱᤍᤣ᤺ᤛᤢᤱ ᤑᤠ᤹ᤀᤠᤱ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤍᤃᤡ ᤂᤧᤴ ᤐᤣᤀᤠᤱ ᤕᤧᤶᤛᤡᤱᤗᤥ॥
REV 12:5 ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤑᤧᤴᤈᤣ᤹ ᤋᤰᤁᤠ᤺ᤳᤋᤡᤸᤗᤧ ᤁᤠᤰ ᤔᤧᤴᤇᤠᤶ ᤛᤢᤘᤠᤱ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤀᤅᤧ᤺ᤰᤘᤠᤛᤠ᤺ᤴ ᤛᤠᤘᤠ᤺ᤴᤍᤢ॥ ᤂᤧᤴ ᤀᤅᤧ᤺ᤰᤘᤠ᤺ᤴ ᤛᤠᤘᤠ᤺ᤴᤇᤡᤱᤏᤠᤔᤧ᤺ᤴᤏᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤜᤧᤰᤁᤩᤠᤱ ᤁᤢᤜᤠᤱᤕᤢᤰᤏᤠᤀᤥ ᤌᤠ᤺ᤱ ᤔᤧᤄᤧᤳᤋᤢ ᤔᤧᤍᤣ᤹ᤖᤢᤖᤥ॥
REV 12:6 ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤜᤧᤴᤇᤡᤱ ᤌᤡᤰ ᤁᤡᤵ ᤏᤧᤳᤇᤡᤀᤠᤱ ᤋᤢᤰᤐᤥ᤺ᤱ (᥇.᥈᥌᥆) ᤕᤧᤴ ᤌᤠᤖᤡᤰ ᤆᤠ ᤔᤧᤵᤔᤠ ᤑᤠ᤹ᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤋᤧᤴᤏᤥ ᤂᤧᤳᤇᤡᤱ ᤐᤣᤖᤥ॥
REV 12:7 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤋᤧᤴᤎᤱ ᤐᤥ᤺ᤰᤂᤧᤖᤥ॥ ᤔᤡᤂᤠᤀᤣᤗᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤌᤱ ᤔᤧᤈᤥᤃᤢᤖᤥ॥
REV 12:8 ᤁᤖ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤏᤢ ᤂᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤌᤱᤅᤥ ᤜᤠᤖᤡ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤢᤏᤡ᤹ ᤕᤢᤱᤔᤠ ᤋᤧᤴᤏᤡᤴ ᤔᤧᤔᤠ᤺ᤛᤢ॥
REV 12:9 ᤁᤴ ᤐᤕᤶ ᤕᤶᤒᤠ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤱᤃ ᤀᤢᤴᤇᤥ᤺ᤴᤒᤠ ᤀᤛᤣ᤺ᤰᤐᤧᤴᤗᤥ. ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤔᤠᤑᤧᤴᤛᤠᤶ ᤀᤡᤃᤪ ᤛᤤᤋᤠᤏ ᤔᤧᤔᤧᤳᤋᤢᤖᤥ॥ ᤂᤧᤱᤃ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤑᤢᤛᤧᤖᤥ॥
REV 12:10 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤰᤋᤱᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤴᤗᤵ. ᤁᤢᤔᤢᤰᤛᤠᤶ. ᤁᤢᤜᤠᤱᤈᤢᤶ ᤏᤢ ᤂᤢᤏᤧ᤹ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤸᤗᤧ ᤁᤢᤕᤢᤰᤁᤡᤴ ᤋᤩᤧᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤏᤡ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤖ ᤁᤧᤏᤧᤒᤠᤴ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤔᤧᤓᤢᤛᤢ ᤔᤧᤎᤠᤛᤢᤖᤥ॥
REV 12:11 ᤀᤠᤏᤡ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ᤖᤧᤃ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤠᤰᤂᤡ᤹ ᤏᤢ ᤂᤧᤱᤜᤠ᤹ᤖᤧ ᤀᤡᤱᤔᤧᤓᤥ᤺ᤛᤢᤒᤠ ᤛᤧᤰᤂᤠ᤺ᤸᤗᤧ ᤂᤧᤴ ᤔᤠᤑᤧᤴᤛᤠᤶᤔᤡᤴ ᤔᤧᤏᤠ᤺ᤴᤍᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤛᤡ᤺ᤔᤠᤀᤠᤱ ᤔᤧᤱᤃᤡᤛᤧᤴᤗᤥ॥
REV 12:12 ᤂᤧᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠᤛᤣ. ᤛ᤺ᤳᤋᤧᤶᤔᤧ᤹ᤀᤥ᥄ ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤢ ᤘᤠᤜᤱᤅᤥ ᤁᤧᤘᤠ᤹ᤒᤠᤛᤣ. ᤂᤡᤏᤡ᤹ᤃ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ. ᤌᤣᤀᤠᤱᤓᤧᤸᤗᤧ ᤔᤠᤑᤧᤴᤛᤠᤶᤔᤡᤱᤃ ᤂᤡᤏᤡ᤹ᤀᤥ ᤌᤩᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰᤁᤧᤴ ᤐᤥᤃᤧ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤕᤧᤶᤔᤡᤴ ᤛᤢ᤺ᤸᤗᤡᤰᤗᤰ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤘᤠ᤹॥”
REV 12:13 ᤜᤧᤰᤁᤩᤠᤱ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤔᤧᤓᤢᤛᤠᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤴ ᤀᤅᤧ᤺ᤰᤘᤠᤛᤠ᤺ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤀᤡᤴ ᤋᤢᤰᤂᤣ ᤆᤠ᤺ᤳᤇᤧ ᤏᤠ᤺ᤵᤔᤠ ᤜᤣ᤺ᤰᤋᤢ॥
REV 12:14 ᤁᤖ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤔᤧᤕᤠᤱᤄᤢᤴᤗ ᤑᤠ᤹ᤀᤠᤱ ᤀᤣ᤺ᤰᤛᤠᤍᤧᤴᤏᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤆᤡᤱᤛᤡᤱᤔᤠᤍᤧᤴᤏᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤛᤢᤰᤗ ᤑᤠ᤹ᤀᤠᤱ ᤐᤕᤶ ᤕᤶᤒᤠ ᤏᤧᤳᤇᤡ ᤔᤢᤕᤠ ᤗᤠᤵᤜᤠ᤹ ᤔᤧᤒᤡᤖᤢᤖᤥ॥ ᤂᤧᤵᤔᤥ ᤋᤱᤒᤣ ᤛᤢᤶᤛᤡᤀᤠᤱ ᤁᤢᤓᤪᤧ᤺ᤱ ᤌᤠᤖᤡᤰ ᤂᤢᤏᤧ᤹ ᤆᤠ ᤔᤧᤔᤧᤳᤋᤢ᤹ᤖᤥ॥
REV 12:15 ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤆᤫᤠ᤺ᤳᤋᤡᤸᤗᤧ ᤘᤠᤍᤣ᤺ᤶᤔᤠ ᤋᤣ᤺ᤔᤠᤀᤠᤱ ᤛᤧᤵᤔᤠ ᤑᤠ᤹ᤀᤠᤱ ᤕᤱᤄᤱ ᤁᤩᤠ᤺ᤵᤐᤠ ᤆᤫᤠ᤺ᤳᤋᤡᤴ ᤁᤢᤔᤢᤖᤠᤀᤥᤗᤠᤶ ᤀ᤺ᤛᤢ ᤗ᤺ᤳᤋᤢᤖᤥ॥
REV 12:16 ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤀ᤺ᤛᤢ ᤗ᤺ᤳᤋᤢᤒᤠ ᤕᤱᤄᤱᤅᤡᤴ ᤁᤠᤰ ᤗᤖᤢᤍᤣ᤺ᤛᤢᤀᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤁᤢᤓᤠ᤹ ᤐᤡᤖᤢᤖᤥ॥
REV 12:17 ᤜᤧᤰᤁᤩᤠᤱ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤔᤧᤴᤇᤢᤔᤠ᤹ᤀᤡᤴᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤏᤠ᤺ᤵᤐᤠ ᤁᤧᤀᤡ᤺ᤵᤐᤠ ᤏᤢ ᤕᤧᤛᤢᤖᤧ ᤁᤢᤏᤡᤛᤠᤶ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤘᤣ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤏᤢ ᤌᤱ ᤆᤥᤃᤢᤖᤥ॥
REV 12:18 ᤜᤧᤰᤁᤩᤠᤱ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤘᤠᤜᤱᤅᤡᤸᤗᤧ ᤁᤢᤕᤠᤀᤥ ᤕᤧᤶᤛᤡᤱᤗᤥ॥
REV 13:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤘᤠᤜᤱᤅᤥᤗᤠᤶ ᤁᤧᤗ᤺ᤶᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤏᤢᤛᤡ ᤁᤢᤎᤧᤃᤣ᤺ᤰᤜᤠ᤹ᤀᤥ ᤌᤡᤒᤥ᤺ᤱ ᤁᤢᤍᤠᤱᤜᤠ᤹ ᤔᤧᤒᤳᤇᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤠᤱᤜᤠ᤹ᤀᤥ ᤌᤡᤒᤥ᤺ᤱ ᤋᤡᤆ᤺ᤜᤠ᤹ ᤂᤢ᤺ᤰᤂᤢᤀᤠᤱ ᤐᤳᤇᤧ॥ ᤂᤧᤸᤗᤧ ᤁᤧᤖᤧᤰ ᤁᤢᤎᤧᤃᤣ᤺ᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤔᤡᤱ ᤛᤠᤵᤋᤧᤀᤠᤱ ᤐᤳᤇᤧ॥
REV 13:2 ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤱᤃ ᤌᤰᤁᤣᤒᤠ ᤁᤢᤀᤡᤛᤡ᤺ᤰ ᤏᤡ᤺ᤛᤢᤱ. ᤁᤖ ᤂᤧᤸᤗᤧ ᤁᤢᤗᤠᤱᤜᤠ᤹ ᤔᤠ᤹᤺ᤕᤢᤒᤠᤸᤗᤧᤴ ᤏᤢ ᤁᤢᤔᤢᤖᤠ᤺ᤱᤃ ᤌᤧᤖᤡᤱᤒᤠᤸᤗᤧᤴ ᤜᤧᤰᤋᤱᤒᤠ ᤆᤥᤃᤧᤖᤥ॥ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤀᤠᤒᤠᤅᤣ ᤁᤢᤔᤢᤰ. ᤁᤢᤜᤠᤱᤕᤢᤰᤏᤠ᤺ᤴ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤁᤢᤕᤢᤰᤁᤡᤴ ᤐᤡᤖᤢᤖᤥ॥
REV 13:3 ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤌᤡᤰ ᤁᤢᤎᤧᤃᤣ᤺ᤰᤐᤧᤴ ᤛᤡ᤺ᤔᤠᤗᤡᤱᤎᤥᤀᤥ ᤁᤧᤖᤧᤖ ᤌᤠᤖᤡᤰ ᤁᤠ᤺ᤴᤍᤧᤀᤠᤱ ᤐᤳᤇᤧᤒᤠ ᤏᤡ᤺ᤍᤧᤳᤋᤧ. ᤁᤖ ᤕᤠᤱᤛᤡ ᤂᤧᤴ ᤁᤧᤃᤠ᤺ᤶᤒᤠ ᤕᤠᤱᤄᤣ᤺ᤰᤁᤡᤴ ᤘᤣ᤺ᤳᤋᤧᤖᤥ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤧᤴ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤔᤧᤍᤡᤶᤍᤢᤖᤥ॥
REV 13:4 ᤔᤏᤠᤜᤠ᤹ᤖᤧ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤛᤣᤘᤠ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤕᤢᤰᤁᤡᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤐᤡᤖᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤛᤣᤘᤠ ᤔᤧᤈᤥᤃᤢ. “ᤁᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤜᤧᤰᤋᤱᤒᤠ ᤜᤠ᤺ᤳ ᤘᤠ᤹ᤒᤣ᥅ ᤁᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴᤏᤢ ᤌᤱ ᤆᤥ᤺ᤰᤔᤠ ᤁᤧᤛᤢᤰᤐᤠ ᤜᤠ᤺ᤳ ᤘᤠ᤹ᤀᤠᤱᤒᤣ᥅”
REV 13:5 ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤀᤠᤱᤍᤡᤱ ᤐᤠ᤺ᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤐᤠ᤺ᤵᤔᤠ ᤔᤧᤒᤠᤱᤄᤢᤖᤥ॥ ᤜᤧᤰᤁᤩᤠᤱ ᤗᤡ-ᤏᤧᤳ ᤗᤠ (᥊᥈) ᤌᤠᤖᤡᤰ ᤁᤢᤒᤠ᤺ᤵᤐᤠ᤺ᤳ ᤆᤥ᤺ᤰᤔᤠ ᤕᤢᤰ ᤂᤥ᤺ᤛᤢᤖᤥ॥
REV 13:6 ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱ ᤏᤢ ᤁᤢᤕᤢᤱᤍᤧᤴ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤋᤣ᤺ᤛᤢ ᤐᤡᤖᤢᤛᤡᤖᤥ॥
REV 13:7 ᤜᤧᤰᤁᤩᤠᤱ ᤂᤧᤴ ᤌᤰᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤀᤠᤱ ᤏᤠ᤺ᤶᤔᤠᤛᤡ ᤕᤢᤰ ᤂᤥ᤺ᤛᤢᤖᤥ॥ ᤜᤧᤰᤁᤩᤠᤱ ᤕᤠᤶᤔᤥ ᤂᤧᤴ ᤌᤰᤛᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤛᤶᤍᤠᤱ ᤕᤢᤰ ᤆᤥ᤺ᤰᤔᤠ ᤂᤥ᤺ᤛᤢᤖᤥ॥
REV 13:8 ᤛᤧᤵᤔᤏᤠᤒᤠ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤜᤡᤱᤔᤴᤗᤧ ᤁᤢᤛᤠᤵᤐᤴᤏᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤡ᤹ ᤔᤡᤱ ᤔᤧᤴᤇᤠᤵᤐᤣ ᤁᤧᤘᤠ᤹ᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤗᤧ ᤂᤧᤴ ᤌᤰᤛᤠ᤺ᤴ ᤛᤣᤘᤠ ᤔᤧᤈᤥᤃᤢᤖᤥ॥
REV 13:9 ᤀᤠᤸᤗ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄
REV 13:10 ᤐᤢᤱᤗᤠᤜᤡᤶᤔᤥ ᤌᤠ᤺ᤔᤠ ᤁᤧᤒᤥ᤺ᤱᤒᤠᤴ. ᤐᤢᤱᤗᤠᤜᤡᤶᤔᤥ ᤌᤠ᤹᤺ ᤜᤧᤰᤁᤩᤠᤱ ᤋᤠᤓᤣᤗᤠᤶ ᤛᤡ᤺ᤔᤠ ᤁᤧᤒᤥ᤺ᤱᤒᤠᤴ. ᤋᤠᤓᤣᤗᤠᤶᤒᤠᤀᤣ ᤛᤡ᤺ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤀᤡᤏᤥᤃᤧᤴ ᤋᤢᤰᤂᤣ᤺ᤴ ᤏᤠᤛᤡ ᤌ᤺ᤵᤔᤠ ᤐᤥ᤺ᤱᤅᤠᤱ ᤏᤛᤠ᤺ᤴᤛᤠᤒᤠ ᤐᤥ᤺ᤱᤔᤠᤀᤠᤱ ᤘᤠ᤹ᤔᤠᤀᤣ ᤐᤥ᤺ᤱᤗᤥ॥
REV 13:11 ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤘᤣ᤹ᤛ᤻ᤔᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠᤎᤡᤰ ᤗ᤺ᤴᤍᤧ ᤌᤠᤅᤧᤒᤠ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤌᤢ᤺ᤶᤒᤠᤸᤗᤧᤴ ᤁᤢᤀᤡᤛᤡ᤺ᤰ ᤏᤧᤳᤇᤡ ᤁᤢᤍᤠᤱ ᤕᤢᤅᤧ. ᤁᤖ ᤂᤧᤱᤃ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤁᤢᤀᤡᤛᤡ᤺ᤰ ᤐᤠᤖᤧᤖᤥ॥
REV 13:12 ᤂᤧᤸᤗᤧ ᤌᤡᤰᤛᤡᤃᤣ᤺ᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤠᤰ ᤁᤢᤕᤢᤰᤜᤠ᤹ ᤀᤥᤃᤵ ᤆᤥᤃᤢᤖᤥ॥ ᤂᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤡ᤺ᤔᤠᤗᤡᤱᤎᤥ ᤌᤠᤖᤡᤰ ᤁᤧᤃᤠ᤺ᤶᤒᤠᤀᤠᤱ ᤁᤧᤜᤡᤱᤒᤠ ᤂᤧᤴ ᤌᤡᤰᤛᤡᤃᤣ᤺ᤰᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤴ ᤛᤣᤘᤠ ᤆᤥ᤺ᤰᤔᤠ ᤐᤠᤱᤄᤢᤛᤡᤖᤥ॥
REV 13:13 ᤜᤧᤰᤁᤩᤠᤱ ᤂᤧᤸᤗᤧᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤀᤠᤱ ᤋᤖ᤺ᤱᤍᤡᤱ ᤋᤠᤱᤛᤠᤱᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤡᤖᤠ᤺ᤰᤁᤠᤱ ᤌᤠ᤺ᤛᤢᤖᤥ॥
REV 13:14 ᤌᤡᤰᤛᤡᤃᤣ᤺ᤰᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤗᤧᤰᤘᤠ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤂᤥ᤺ᤛᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤡᤱᤗᤧᤰᤋᤢᤛᤡᤖᤥ॥ ᤂᤧᤸᤗᤧ ᤂᤧᤴ ᤛᤡ᤺ᤔᤠᤗᤡᤱᤎᤥᤀᤥ ᤌᤠᤖᤡᤰ ᤋᤠᤓᤣ᤺ᤸᤗᤧ ᤁᤧᤃᤠ᤺ᤶᤒᤠᤀᤠᤱ ᤕᤠᤶᤔᤥ ᤁᤧᤜᤡᤱᤒᤠ ᤌᤡᤰᤛᤡᤃᤣ᤺ᤰᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤔᤡᤱᤛᤥ ᤁᤢᤎᤠ᤺ᤱᤛᤥᤀᤥ ᤏᤠᤘᤠᤀᤡᤳᤗᤠ ᤆᤥ᤺ᤰ ᤐᤠᤱᤄᤢᤛᤡᤖᤥ॥
REV 13:15 ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤌᤡᤰᤛᤡᤃᤣ᤺ᤰᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧᤴ ᤏᤠᤘᤠᤀᤡᤳᤗᤠ᤺ᤴ ᤐᤠ᤺ᤵᤔᤠ ᤛᤢᤰᤗ ᤜᤧᤰᤁᤩᤠᤱ ᤂᤧᤴ ᤛᤣᤘᤠ ᤆᤥ᤺ᤰᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤛᤧᤖᤢᤛᤡᤖ ᤑᤠ᤹ᤀᤠᤱ ᤂᤧᤴ ᤏᤠᤘᤠᤀᤡᤳᤗᤠᤀᤥ ᤛᤠ᤺ᤱᤃᤢᤃᤧᤴ ᤛᤰᤔᤠ ᤁᤣ᤺ᤵᤔᤠ ᤔᤢᤰᤛᤠᤶ ᤂᤥ᤺ᤛᤢᤖᤥ॥
REV 13:16 ᤂᤧᤸᤗᤧ ᤕᤶᤒᤠ ᤆᤢᤰᤐᤠ. ᤕᤠᤱᤛᤠᤁᤢᤴᤎᤣᤛᤠᤒᤠ ᤏᤢ ᤕᤠᤱᤁᤧᤛᤠ᤹ᤒᤠ. ᤕᤥ᤺ᤰᤐᤠ ᤏᤢ ᤆᤥ᤺ᤰᤕᤢᤶᤓᤥᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤢᤏᤡ᤹ ᤆᤢᤵᤛᤠᤱ ᤜᤢᤰᤁᤥ ᤀᤡᤃᤪ ᤂᤢᤏᤡ᤹ ᤋᤥᤘᤠᤒᤥ ᤀᤡᤒᤢᤃᤧᤴ ᤔᤡᤰᤛᤣ᤺ᤴ ᤗᤰᤔᤠ ᤐᤠᤱᤄᤢᤛᤡᤖᤥ॥
REV 13:17 ᤂᤧᤴ ᤀᤡᤒᤢᤃᤧᤴ ᤔᤡᤰᤛᤣ᤺ᤴ ᤔᤧ᤺ᤴᤏᤣ ᤛᤱᤔᤠ ᤏᤢ ᤀᤡᤱᤔᤠ ᤀᤠᤳᤋᤡᤸᤗᤧᤀᤠᤱ ᤔᤧᤛᤢᤰᤋᤢᤴᤗᤥ॥ ᤂᤧᤴ ᤔᤡᤰᤛᤣ᤺ᤴᤏᤡᤱᤃ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤔᤡᤱ ᤀᤡᤃᤪ ᤁᤢᤔᤡᤱᤅᤡᤸᤗᤧ ᤁᤢᤄᤠᤏᤡ᤺ᤳ ᤐᤥ᤺ᤱᤗᤥ॥
REV 13:18 ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤵᤔᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤆᤥ᤺ᤰᤗᤥ॥ ᤀᤠᤳᤋᤡᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤛᤠᤒᤠ ᤆᤥ᤺ᤰ ᤜᤠᤖᤠ᤹ ᤂᤧᤸᤗᤧ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤄᤠᤏᤡ᤺ᤳᤋᤡᤸᤗᤧ ᤁᤢᤒᤣ᤺ᤴ ᤑᤠ᤺ᤰᤂᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤳᤇᤠ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤄᤠᤏᤡ᤺ᤳᤗᤥ॥ ᤂᤧᤴ ᤂᤠᤏᤡ᤺ᤳᤋᤡᤱᤃ ᥌᥌᥌ᤖᤥ॥
REV 14:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤴ ᤛᤡᤕᤥᤏ ᤁᤥ᤺ᤰᤔᤠ ᤛᤶᤍᤠᤱ ᤕᤧᤒᤧᤒᤠ ᤏᤡ᤺ᤛᤢᤱᤗᤥ॥ ᤂᤢᤏᤧ᤹ᤏᤢ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤏᤠᤜᤠ᤹ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤥᤘᤠᤒᤥ ᤂᤢᤏᤧ᤹ ᤁᤢᤔᤡᤱ ᤏᤢ ᤐᤠᤏᤢᤍᤡᤱ ᤁᤢᤶᤒᤠᤖᤧ ᤁᤢᤔᤡᤱᤅᤡᤴ ᤛᤠᤵᤋᤧᤀᤠᤱ ᤐᤳᤇᤧᤖᤥ॥
REV 14:2 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤕᤶ ᤕᤶᤒᤠ ᤆᤫᤠ᤺ᤳ ᤛ᤺ᤰᤋᤧᤒᤠ ᤁᤢᤀᤡᤛᤡ᤺ᤰ ᤏᤢ ᤂᤧᤖᤧᤱ ᤄᤢᤖᤢᤱ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱᤗᤥ॥ ᤂᤧᤴ ᤁᤧᤛ᤺ᤰᤐᤧᤴ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤛᤥᤖᤡᤰ ᤛᤠᤖᤠᤱᤃᤡ ᤔᤧᤔᤢᤰᤂᤢᤒᤠ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥
REV 14:3 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧᤴ ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤢᤛᤱ ᤛᤠᤶᤗᤥ᤺ᤴ ᤛᤠᤶᤔᤧᤔᤧᤳᤋᤢᤒᤠ ᤀᤡᤱᤃᤠ᤹ ᤂᤧᤵᤛᤢᤱᤗᤥ॥ ᤂᤧᤴ ᤛᤠᤶᤗᤥ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤌᤧ᤹ᤔᤏᤠᤒᤠ ᤂᤧᤴ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤏᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤜᤢ᤹ᤛᤡᤱᤔᤠ ᤔᤧᤴᤇᤢᤰᤋᤢᤴᤗᤥ॥
REV 14:4 ᤂᤧᤱᤜᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤢᤔᤠ᤹ᤏᤢ ᤔᤧᤶᤒᤥ᤺ᤳᤋᤣ ᤔᤧᤘᤕᤧ ᤜᤧᤰᤁᤩᤠᤱ ᤀᤠᤒᤠᤅᤣ ᤛᤣᤛᤣ ᤔᤧᤃᤳᤇᤡᤱᤅᤠᤱ ᤔᤧᤘᤕᤧᤖᤥ॥ ᤂᤧᤱᤜᤠ᤹ᤃ ᤔᤧᤸᤗᤢᤰᤛᤠ᤺ᤴ ᤀᤠᤳᤋᤠᤴ ᤐᤣ᤺ᤰᤛᤠᤱ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤁᤧᤍᤡᤶᤒᤠᤛᤡᤖᤥ॥ ᤂᤧᤱᤜᤠ᤹ᤃ ᤁᤠᤰᤏᤢ ᤋᤃᤡ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤁᤢᤀᤡᤛᤡ᤺ᤰ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤸᤗᤢᤰᤛᤠ᤺ᤀᤥ ᤋᤥ᤺ᤶᤔᤠᤛᤡ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤗᤠᤶ ᤁᤢᤔᤧᤸᤗᤢᤱ ᤜᤢᤱᤔᤏᤠᤀᤠᤱ ᤌᤧ᤹ᤔᤏᤠᤒᤠᤛᤡᤖᤥ॥
REV 14:5 ᤂᤧᤱᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤀᤡᤱᤗᤧᤰ ᤐᤠ᤺ᤴ ᤔᤧᤶᤒᤠ᤺ᤳᤋᤢᤴᤏᤠᤱ ᤑᤥᤋᤩᤠ ᤔᤧ᤺ᤴᤏᤣ ᤔᤧᤘᤠ᤹ᤖᤥ॥
REV 14:6 ᤜᤧᤰᤁᤩᤠᤱ ᤀᤡᤱᤃᤠ᤹ ᤋᤠᤱᤛᤠᤰᤐᤥ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤐᤧᤖᤧᤖ ᤐᤳᤇᤧᤒᤠ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤔᤧᤴᤏᤢᤵᤔᤏᤠᤒᤠ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤔᤠ ᤁᤳᤋᤢᤖᤥ॥
REV 14:7 ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡ᤺ᤛᤧᤶᤔᤧ᤹ᤀᤠᤱ ᤔᤡᤔᤡᤍᤡᤱ ᤐᤡᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤄᤠᤛᤧᤴ ᤆᤥ᤺ᤰᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ॥ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤠᤜᤱ ᤏᤢ ᤆᤫᤠ᤺ᤳᤋᤡᤸᤗᤧ ᤁᤢᤒᤢᤴᤜᤠ᤹ᤖᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠᤴ ᤛᤣᤘᤠ ᤆᤥᤃᤧᤶᤔᤧ᤹ᤀᤥ॥”
REV 14:8 ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤀᤣᤃᤠᤱ ᤁᤧᤒᤵᤐᤠ ᤏᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀ᤺ᤰᤋᤧ. “ᤒᤧᤒᤡᤗᤥᤏᤡᤴ ᤔᤧᤃᤧᤖᤥ. ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴ ᤔᤧᤃᤧᤖᤥ॥ ᤂᤧᤴ ᤕᤧᤰᤕᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤡᤈᤱᤘᤠ᤺ᤸᤗᤧ ᤔᤕᤢᤛᤡᤒᤠ ᤁᤢᤀᤡᤛᤡ᤺ᤰ ᤕᤠᤶᤒᤥ᤺ᤵᤔᤠᤸᤗᤧ ᤔ᤺ᤛᤢᤛᤡᤀᤠᤱ ᤘᤠ᤹ᤖᤥ॥”
REV 14:9 ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤂᤢᤴᤇᤡ᤹ ᤀᤣᤃᤠᤱ ᤋᤡᤶᤍᤢᤛᤡᤖ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧ. “ᤜᤠ᤺ᤳᤗᤧ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤆᤥᤃᤢ᤹. ᤜᤧᤰᤁᤩᤠᤱ ᤁᤢᤍᤥ᤹ᤘᤠᤒᤥ ᤀᤡᤃᤪ ᤁᤢᤜᤢᤰᤁᤥ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴ ᤗᤰᤋᤢ᤹.
REV 14:10 ᤂᤧᤸᤗᤧᤃ ᤌᤣᤀᤠᤱ ᤔᤧᤶᤓᤢᤳᤋᤣᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤡᤸᤗᤧᤴ ᤂᤥᤷᤕᤠ᤺ᤴᤗᤠᤶ ᤌᤢᤱᤔᤠᤀᤣ ᤐᤥ᤺ᤱᤗᤥ॥ ᤜᤧᤰᤁᤩᤠᤱ ᤂᤧᤱᤃ ᤔᤧᤸᤗᤢᤰᤛᤠ᤺ᤴ ᤏᤢ ᤛᤣᤛᤣ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤠᤴᤎᤠᤰ ᤏᤢ ᤔᤡ᤺ᤸᤗᤧ ᤗᤠᤒᤢᤖ ᤋᤢᤰᤂᤣ ᤆᤠᤖᤥ॥
REV 14:11 ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠ ᤔᤡ᤺ᤸᤗᤧ ᤔᤡ᤺ᤰᤂᤢ᤹ᤀᤡᤱᤃ ᤛᤍᤠᤍᤡᤱ ᤛᤍᤠᤍᤡᤱ ᤌᤠ᤺ᤱ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤴ ᤛᤧᤴᤍᤡᤰ ᤗᤧᤴᤍᤡᤰ ᤀᤠᤵᤑᤠᤸᤗᤧᤀᤠᤱ ᤔᤧᤏᤢᤵᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤔᤧᤈᤥᤃᤢᤀᤠᤱ ᤁᤢᤔᤡᤱᤅᤡᤸᤗᤧᤴ ᤀᤡᤒᤢᤃᤧᤴ ᤔᤡᤰᤛᤣ᤺ᤴᤏᤡᤴ ᤔᤧᤗᤰᤋᤢᤀᤠᤱ ᤔᤧᤘᤕᤧᤖᤥ॥”
REV 14:12 ᤂᤧᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠ᤺ᤱ ᤁᤧᤄᤧᤶᤒᤠᤜᤠ᤹ ᤏᤢ ᤕᤧᤛᤢ᤺ᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤏᤠᤛᤡ ᤌ᤺ᤵᤔᤠᤀᤣ ᤐᤥ᤺ᤱᤗᤥ॥
REV 14:13 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤡᤰᤗᤠᤎᤡᤰ ᤀᤰᤂᤣᤗ᤹ᤖᤡᤰ ᤐᤠᤖᤧᤒᤠ ᤂᤧᤵᤛᤢᤱ. “ᤁᤴ ᤐᤠ᤺ᤴᤏᤡᤴ ᤛᤠᤵᤋᤧ᤹. ᤀᤠᤸᤗᤀᤠᤱᤎᤥ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡ᤺ᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥” ᤛᤣᤛᤣᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤛᤧᤰᤂᤠᤀᤣ ᤂᤧᤱᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ. ᤂᤧᤱᤜᤠ᤹ ᤂᤢᤏᤡ᤹ ᤕᤠᤶᤒᤢᤎᤡᤰᤗᤠᤶ ᤔᤧᤏᤠ᤺ᤶᤛᤡᤱ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤜᤠᤱᤛᤧᤶ ᤔᤧᤄᤥ᤺ᤛᤢ᤹ᤖᤥ॥”
REV 14:14 ᤜᤧᤰᤁᤩᤠᤱ ᤀᤡᤱᤃᤠ᤹ “ᤔᤧᤴᤇᤠᤶᤛᤠ᤺ᤴ” ᤜᤧᤰᤋᤱᤒᤠᤎᤡᤰ ᤑ᤺ᤃᤧᤗ᤹ᤒᤠ ᤂᤠᤵᤔᤡ᤺ᤳᤋᤥ ᤕᤢᤅᤧᤒᤠ ᤏᤡ᤺ᤛᤢᤱᤗᤥ॥ ᤂᤢᤏᤧ᤹ ᤛᤠᤶᤔᤩᤠᤱ ᤋᤡᤆ᤺ᤴ ᤂᤢ᤺ᤰᤂᤢᤀᤠᤱ ᤐᤳᤇᤧ ᤜᤧᤰᤁᤩᤠᤱ ᤁᤢᤜᤢᤰᤁᤥ ᤂᤠᤃᤧᤛᤢᤰᤐᤠ ᤁᤠᤳᤆᤩᤠ᤺ᤴ ᤁᤳᤋᤢᤖᤥ॥
REV 14:15 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥᤗᤠᤶ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤴ ᤗ᤺ᤴᤍᤧᤀᤠᤱ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤂᤧᤴ ᤂᤠᤵᤔᤡ᤺ᤳᤋᤥ ᤁᤧᤕᤢᤱᤒᤠᤴ ᤔᤧᤳᤋᤢ. “ᤁᤧᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤆᤠ ᤛᤢᤵᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤆᤠ ᤛᤢᤶᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ᤺ᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤢᤶᤛᤧᤀᤠᤱ ᤏᤧᤖᤥ॥”
REV 14:16 ᤜᤧᤰᤁᤩᤠᤱ ᤂᤧᤴ ᤂᤠᤵᤔᤡ᤺ᤳᤋᤥ ᤁᤧᤕᤢᤱᤒᤠᤸᤗᤧ ᤁᤢᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤠᤱ ᤜᤧᤃᤢᤖ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤆᤠ᤺ᤴ ᤛᤢᤵᤛᤢ᤹ᤖᤥ॥
REV 14:17 ᤂᤧᤴ ᤀᤣᤃᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤗᤠᤶ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤗ᤺ᤴᤍᤧ॥ ᤂᤧᤸᤗᤧᤀᤠᤱ ᤁᤢᤜᤢᤰᤁᤥ ᤂᤠᤃᤧᤛᤢᤰᤐᤠ ᤁᤠᤳᤆᤩᤠ᤺ᤴ ᤁᤳᤋᤢᤖᤥ॥
REV 14:18 ᤜᤧᤰᤁᤩᤠᤱ ᤛᤠᤱᤛᤡᤱ ᤜᤠ᤺ᤶᤔᤠᤍᤧᤴᤏᤥᤗᤠᤶ ᤔᤡ᤺ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤴ ᤗ᤺ᤴᤍᤧᤀᤠᤱ ᤂᤧᤸᤗᤧ ᤂᤧᤴ ᤂᤠᤃᤧᤛᤢᤰᤐᤠ ᤁᤠᤳᤆᤩᤠ ᤁᤧᤃᤵᤐᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤔᤧᤳᤋᤢ. “ᤂᤧᤴ ᤂᤠᤃᤧᤛᤢᤰᤐᤠ ᤁᤧᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤆᤧᤸᤗᤧᤰᤛᤣ᤹ᤜᤠ᤹ ᤛᤢᤵᤛᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤋᤢᤶᤛᤧᤄᤧᤖᤧᤀᤠᤱ ᤐᤳᤗᤥ॥”
REV 14:19 ᤜᤧᤰᤁᤣ᤺ᤸᤗᤧ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤃᤠᤳᤆᤩᤠ᤺ᤴ ᤕᤠᤱᤛᤡᤱᤅᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤆᤧᤸᤗᤧᤰᤛᤣ᤹ᤜᤠ᤹ ᤛᤢᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤡᤸᤗᤧᤴ ᤐᤕᤶ ᤕᤶᤒᤠ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤁᤣ᤺ᤳᤋᤢ᤹ᤖᤥ॥
REV 14:20 ᤜᤧᤰᤁᤩᤠᤱ ᤕᤧᤰᤕᤰ ᤗᤠ᤺ᤰᤁᤠᤳ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤔᤧᤗᤠ᤺ᤰᤋᤢ ᤔᤧᤛ᤹ᤖᤢᤀᤠᤱ ᤂᤧᤵᤔᤥᤗᤠᤶ ᤔᤠᤰᤂᤡ᤹ ᤗ᤺ᤴᤍᤧᤖᤥ॥ ᤂᤧᤴ ᤔᤠᤰᤂᤡ᤹ᤀᤡᤴ ᤀᤴᤜᤠ᤹ᤖᤧ ᤂᤢᤏᤡ᤹ ᤁᤖᤧᤗᤡ ᤌᤠᤖᤡᤰ ᤌᤠ᤺ᤱ ᤌᤠᤅᤧᤀᤠᤱ ᤁᤢᤃᤡᤵ ᤛᤢᤶᤛᤡ (᥉᥆᥆) ᤁᤡᤗᤥᤔᤡᤋᤖ ᤌᤠᤖᤡᤰ ᤘᤠᤃᤢᤛᤧ ᤐᤣᤖᤥ॥
REV 15:1 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤣ᤹ᤛ᤻ᤔᤠ ᤏᤡᤱᤘᤠ᤹ ᤁᤧᤔᤠᤒᤠ ᤏᤢ ᤐᤕᤶ ᤕᤶᤒᤠ ᤀᤡᤒᤢᤃᤧᤴ ᤔᤡᤰᤛᤣ᤺ᤴᤏᤡᤴ ᤀᤡᤱᤃᤠ᤹ ᤏᤡ᤺ᤛᤢᤱᤗᤥ–ᤂᤧᤵᤔᤥ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤏᤢᤛᤡ ᤁᤢᤏᤢᤵᤔᤥᤒᤠ ᤔᤡᤴᤍᤣ᤹ᤜᤠ᤹ ᤔᤧᤃᤳᤋᤢᤖᤥ॥ ᤂᤧᤴ ᤔᤡᤴᤍᤣ᤹ᤜᤠ᤹ᤀᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤴ ᤏᤢᤒᤧᤀᤠᤱ ᤘᤠ᤹ᤖᤥ॥
REV 15:2 ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤡ ᤏᤢ ᤁᤧᤒᤢᤵᤐᤠ ᤛᤧᤸᤗᤧᤱᤄᤥ ᤁᤢᤀᤡᤛᤡ᤺ᤰᤐᤠ ᤘᤠᤜᤱᤎᤡᤰ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤁᤢᤕᤠᤀᤥ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ. ᤁᤢᤏᤠᤘᤠᤀᤡᤳᤗᤠ ᤏᤢ ᤂᤧᤸᤗᤧ ᤁᤢᤔᤡᤱᤅᤡᤸᤗᤧ ᤁᤢᤄᤠᤏᤡ᤺ᤳᤋᤡᤴ ᤁᤧᤏᤠ᤺ᤶᤒᤠᤜᤠ᤹ ᤂᤧᤵᤔᤥ ᤔᤧᤕᤧᤒᤧᤒᤠ ᤏᤡ᤺ᤛᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤛᤠᤖᤠᤱᤃᤡᤜᤠ᤹ ᤔᤧᤃᤳᤋᤢᤖᤥ॥
REV 15:3 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠ ᤔᤥᤛᤠᤖᤧ ᤁᤢᤛᤠᤶᤗᤥ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤛᤠᤶᤗᤥ᤺ᤴ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤔᤧᤳᤋᤢ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤕᤠ᤺ᤶᤒᤰᤜᤠ᤹ᤃ ᤐᤕᤶ ᤕᤶᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤆᤥ᤺ᤰᤗᤥ॥ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤣ. ᤂᤧᤏᤧ᤹ ᤁᤧᤗᤠᤶᤜᤠ᤹ᤃ ᤏᤢ᤺ᤒᤠ ᤏᤢ ᤛᤧᤰᤂᤠᤒᤠ ᤆᤥ᤺ᤰᤗᤥ॥
REV 15:4 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ᤃ ᤜᤠ᤺ᤳᤗᤧ ᤁᤧᤱᤃᤡᤳᤏᤧᤴᤒᤣ᥅ ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤧᤏᤠᤖᤠ ᤔᤧᤓᤥ᤺ᤛᤢᤶᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤖᤰ ᤛᤣᤛᤣᤒᤠ ᤁᤧᤈᤥ᤺ᤰ॥ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤍᤠ᤺ᤀᤠᤱ ᤂᤧᤏᤧ᤹ ᤛᤣᤘᤠ ᤁᤧᤶᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤏᤡᤒᤠ ᤁᤧᤕᤠ᤺ᤶᤒᤰᤁᤡᤴ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥”
REV 15:5 ᤜᤧᤰᤁᤩᤠᤱ ᤀᤥᤔᤧᤳᤋᤢᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵᤐᤡᤸᤗᤧ ᤛᤠ᤺ᤱᤃᤠᤜᤡᤶᤔᤡᤴ ᤜᤖᤧᤒᤠ ᤏᤡ᤺ᤛᤢᤱᤗᤥ॥
REV 15:6 ᤂᤧᤴ ᤜᤡᤶᤔᤥᤗᤠᤶ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤏᤢᤛᤡ ᤔᤡᤴᤍᤣ᤹ᤜᤠ᤹ ᤔᤧᤕᤠᤱᤛᤡᤱᤅᤠᤱ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤖᤥ॥ ᤂᤧᤱᤜᤠ᤹ᤖᤧᤃ ᤑ᤺ ᤗ᤹ᤖᤡᤰ ᤁᤧᤀᤥ᤺ᤵᤐᤠ ᤏᤢ ᤛᤣᤛᤣᤒᤠ ᤋᤣ᤺ᤳ ᤔᤧᤈᤠᤰᤂᤢᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤂᤢᤏᤡ᤹ ᤛᤱᤒᤣ᤹ᤀᤥ ᤐᤧᤷᤄᤧᤰ ᤛᤠᤶᤔᤩᤠᤱ ᤆᤧᤵᤑᤣᤳ ᤔᤧᤜᤣᤛᤢᤀᤠᤱ ᤐᤳᤇᤧᤖᤥ॥
REV 15:7 ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥ ᤌᤡᤰᤁᤡᤸᤗᤧ ᤂᤧᤴ ᤁᤠᤰ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤛᤍᤠᤍᤡᤱ ᤛᤍᤠᤍᤡᤱ ᤁᤧᤜᤡᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤡᤸᤗᤧ ᤁᤧᤍᤡᤶᤒᤠ ᤏᤢᤛᤡ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹ ᤐᤡᤖᤢᤛᤡᤖᤥ॥
REV 15:8 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤏᤢ ᤁᤢᤔᤢᤰᤛᤠᤶᤗᤠᤶ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤸᤗᤧ ᤔᤠᤱᤜᤡᤶᤔᤡᤴ ᤛᤡᤍᤠᤰ ᤌᤡᤶᤛᤢᤖᤥ॥ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤂᤧᤴ ᤏᤢᤛᤡ ᤔᤡᤴᤍᤣ᤹ᤜᤠ᤹ ᤔᤧᤴᤃᤧᤳ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤀᤠᤳᤋᤡᤴᤜᤠ᤹ᤀᤠᤱ ᤔᤠᤱᤜᤡᤶᤔᤥ ᤗᤠ᤺ᤵᤔᤠ ᤔᤧᤴᤇᤢᤰᤋᤧᤴᤗᤥ॥
REV 16:1 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥᤗᤠᤶ ᤁᤧᤗ᤺ᤶᤒᤠ ᤕᤶᤒᤠ ᤀᤡᤰᤗᤠ᤺ᤸᤗᤧ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡᤖ ᤕᤠᤃᤧᤒᤠ ᤂᤧᤵᤛᤢᤱ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧᤴ ᤏᤢᤛᤡ ᤂᤥᤷᤕᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤢᤰᤂᤧᤶᤔᤧ᤹ᤀᤥ॥”
REV 16:2 ᤜᤧᤰᤁᤩᤠᤱ ᤌᤡᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤴ ᤐᤣᤀᤠᤱ ᤁᤢᤄᤥᤷᤕᤠ᤺ᤴ ᤂᤠᤶᤒᤣ᤺ᤰᤔᤥ ᤜᤢᤰᤂᤢ. ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴ ᤁᤧᤗᤰᤐᤠ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤛᤣ ᤔᤠᤱᤃᤧᤄ᤺ᤒᤠᤜᤠ᤹ ᤕᤠᤶᤃᤧᤛᤡᤱᤒᤠ ᤏᤢ ᤛᤠ᤹ᤖᤡᤰ ᤁᤧᤍᤢᤰᤐᤠ ᤕᤠᤱᤄᤣ᤺ᤰᤁᤡᤸᤗᤧ ᤂᤢᤏᤡ᤹ ᤌᤰᤁᤡᤴ ᤛᤡᤍᤧᤵ ᤋᤧᤵᤋᤢᤖ ᤗ᤺ᤴᤍᤧᤖᤥ॥
REV 16:3 ᤜᤧᤰᤁᤩᤠᤱ ᤏᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤘᤠᤜᤱᤅᤥ ᤜᤢᤰᤂᤢ. ᤜᤧᤰᤁᤩᤠᤱ ᤂᤧᤴ ᤘᤠᤜᤱᤅᤡᤱᤃ ᤁᤧᤛᤡ᤺ᤒᤠ ᤔᤏᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤡᤴ ᤜᤧᤰᤁᤣ ᤗᤧᤱᤛᤡᤱ ᤐᤣᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤁᤧᤕᤠᤰᤐᤠ ᤁᤠᤰ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤛᤩᤧᤖᤥ॥
REV 16:4 ᤜᤧᤰᤁᤩᤠᤱ ᤛᤢᤶᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤕᤱᤄᤱ ᤏᤢ ᤘᤠᤒᤢᤴᤜᤠ᤹ᤀᤥ ᤜᤢᤰᤂᤢᤀᤠᤱ ᤂᤧᤱᤜᤠ᤹ ᤔᤠᤰᤂᤡ᤹ ᤐᤥ᤺ᤰᤂᤧ ᤐᤣᤖᤥ॥
REV 16:5 ᤜᤧᤰᤁᤩᤠᤱ ᤆᤫᤠ᤺ᤳ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤢᤒᤠ ᤀᤡᤱᤃᤠ᤹ ᤂᤧᤵᤛᤢᤱ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤛᤣᤛᤣ ᤁᤧᤘᤕᤧ ᤜᤧᤰᤁᤩᤠᤱ ᤀᤠᤸᤗᤥᤀᤠᤱ ᤛᤣᤛᤣ ᤁᤧᤘᤠ᤹ᤖᤥ॥ ᤁᤴ ᤔᤡᤴᤍᤣ᤹ᤜᤠ᤹ ᤁᤧᤒᤠᤱᤄᤢᤀᤠᤱ ᤂᤠᤛᤧᤴ ᤁᤧᤈᤥᤃᤢᤛᤡᤸᤗᤧ ᤁᤧᤄᤠᤛᤧᤴᤏᤡᤴ ᤁᤢᤍᤥ᤺ᤵᤔᤠ ᤆᤥ᤺ᤰᤗᤥ॥
REV 16:6 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤴ ᤔᤧᤛᤧ᤺ᤛᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤠᤰᤂᤡ᤹ᤀᤡᤴ ᤌᤢᤱᤔᤠ ᤁᤧᤒᤠᤱᤄᤢᤛᤡᤖᤥ॥ ᤂᤧᤱᤃ ᤂᤧᤱᤜᤠ᤹ ᤗᤠ᤹ᤖᤢᤛᤡᤒᤠ ᤂᤢᤶᤍᤡᤱᤅᤡᤴ ᤘᤕᤧᤖᤥ॥”
REV 16:7 ᤜᤧᤰᤁᤩᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤈᤥᤃᤢᤒᤠ ᤂᤠᤛᤧᤴᤏᤡᤴ ᤛᤧᤰᤂᤠᤒᤠ ᤏᤢ ᤛᤠᤶᤕᤥᤏᤡᤒᤠ ᤆᤥ᤺ᤰᤗᤥ॥”
REV 16:8 ᤜᤧᤰᤁᤩᤠᤱ ᤗᤡᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤏᤠᤶᤔᤥ ᤜᤢᤰᤂᤢᤀᤠᤱ ᤏᤠᤶᤔᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤡ᤺ᤸᤗᤧ ᤀᤥ᤹ᤔᤠᤛᤡ ᤕᤢᤰ ᤂᤥ᤺ᤛᤢᤖᤥ॥
REV 16:9 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤠᤶᤔᤡᤸᤗᤧ ᤛᤠ᤹ᤖᤡᤰ ᤀᤥ᤹ᤖᤢᤛᤡᤸᤗᤧ ᤂᤧᤴ ᤔᤡᤴᤍᤣ᤹ᤜᤠ᤹ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤥᤏᤢ ᤔᤧᤴᤜᤡᤴᤍᤧᤴ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤔᤡᤍᤡᤱᤅᤠᤱ ᤔᤧᤶᤒᤡᤖᤢᤴᤗᤥ॥
REV 16:10 ᤜᤧᤰᤁᤩᤠᤱ ᤅᤠᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤜᤠᤱᤕᤢᤰᤏᤠ ᤛᤶᤍᤠᤱ ᤜᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤁᤢᤜᤠᤱᤈᤢᤶᤔᤡᤴ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤛᤡᤍᤧᤵ ᤋᤧᤵᤋᤢᤖᤥ॥ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤠᤒᤧ ᤔᤧᤓᤡ᤺ᤰᤋᤧᤖᤥ॥
REV 16:11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠᤱᤄᤣ᤺ᤰᤜᤠ᤹ ᤛᤠ᤹ᤖᤡᤰ ᤋᤢᤃᤧᤒᤠᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ॥ ᤀᤠᤸᤗᤛᤠᤱ ᤂᤧᤱᤜᤠ᤹ ᤂᤢᤏᤡ᤹ ᤑᤧᤴ ᤕᤠ᤺ᤶᤒᤰᤁᤥᤏᤢ ᤔᤧᤴᤜᤡᤴᤍᤧᤴᤗᤥ॥
REV 16:12 ᤜᤧᤰᤁᤩᤠᤱ ᤋᤢᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤠᤜᤱᤅᤥ ᤜᤢᤰᤂᤢᤀᤠᤱ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤴ ᤆᤒᤧᤒᤣᤖᤥ. ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤌᤱ ᤆᤥ᤺ᤰᤛᤧ ᤁᤧᤓᤧᤶᤒᤠ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤔᤠᤖᤠᤶᤔᤡᤴ ᤕᤠᤖᤡᤵ ᤐᤥ᤺ᤰᤂᤧᤖᤥ॥
REV 16:13 ᤜᤧᤰᤁᤩᤠᤱ ᤂᤧᤵᤔᤥ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ. ᤌᤰᤛᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤔᤢᤖᤠᤀᤥᤗᤠᤶ ᤛᤢᤶᤛᤡ ᤐᤍ᤺ᤰ ᤜᤧᤰᤋᤱᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤑᤧᤴᤛᤠᤶᤜᤠ᤹ ᤔᤧᤗ᤺ᤴᤍᤧᤒᤠ ᤏᤡ᤺ᤛᤢᤱᤛᤡᤱᤗᤥ॥
REV 16:14 ᤂᤧᤱᤜᤠ᤹ᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤑᤧᤴᤛᤠᤶᤛᤡᤖᤥ॥ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤁᤢᤕᤧᤴᤏᤥ ᤌᤱ ᤆᤥ᤺ᤰᤛᤧ ᤂᤧᤱᤜᤠ᤹ ᤔᤧᤛᤢᤵᤛᤢ ᤔᤧᤍᤠᤖᤢᤛᤡ᤹॥
REV 16:15 ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤀᤡᤱᤃᤠ᤹ᤃ ᤁᤧᤄᤢ᤺ᤵᤐᤠ ᤁᤢᤀᤡᤛᤡ᤺ᤰ ᤛᤫᤠ᤺ᤳᤋᤠᤱ ᤋᤠᤀᤠᤖᤥ॥ ᤜᤠ᤺ᤳ ᤔᤧᤴᤀᤡᤶᤔᤣ ᤛᤡᤱᤛᤡᤱ ᤘᤠ᤹ᤀᤠᤱ ᤁᤢᤍᤣ᤺ᤳ ᤆᤠᤱᤜᤠ᤹ ᤂᤢᤏᤧ᤹ᤏᤢ ᤁᤳᤋᤢ ᤂᤧᤱᤃ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤧᤰᤆᤠᤒᤧᤎᤡ᤺ᤰ ᤗᤠᤱᤄᤣ᤺ᤰᤔᤠᤀᤠᤱ ᤛᤡᤖᤡᤱ ᤔ᤺ᤔᤥ ᤌᤠ᤺ᤔᤠ ᤔᤧᤒᤥ᤺ᤱᤏᤧᤸᤗᤥ॥”
REV 16:16 ᤜᤧᤰᤁᤩᤠᤱ ᤜᤡᤒᤪᤢ ᤐᤠ᤺ᤴᤍᤠᤱᤅᤥ “ᤀᤠᤖᤔᤠᤃᤧᤍ᤻ᤍᤥᤏ” ᤔᤧᤵᤔᤏᤠᤒᤠ ᤋᤧᤴᤏᤥ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤁᤠᤰ ᤜᤠᤱᤜᤠ᤹ ᤔᤧᤛᤢᤵᤛᤢᤛᤡ᤹॥
REV 16:17 ᤜᤧᤰᤁᤩᤠᤱ ᤏᤢᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠ᤺ᤴ ᤛᤢᤖᤡᤳ ᤁᤣᤈᤱᤅᤥ ᤜᤢᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤜᤠᤱᤕᤢᤰᤏᤠᤗᤠᤶ ᤀᤠᤸᤗ ᤆᤢᤖᤧᤖᤥ ᤁᤧᤗ᤹ᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤖᤥ॥
REV 16:18 ᤜᤧᤰᤁᤩᤠᤱ ᤂᤧᤵᤔᤥ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱ ᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤰᤋᤱᤒᤠ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤗᤢᤵᤗᤡ ᤌᤠᤅᤧᤒᤠᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤔᤧᤘᤕᤧᤖᤥ॥
REV 16:19 ᤜᤧᤰᤁᤩᤠᤱ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰ ᤒᤧᤒᤡᤗᤥᤏᤡᤴ ᤂᤧᤸᤗᤧᤰ ᤐ᤺ᤰᤂᤧᤖ ᤛᤢᤶᤛᤡ ᤗᤰᤁᤥ ᤜᤠ᤺ᤛᤡᤱᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤗᤠᤈᤣ᤹ᤒᤠ ᤕᤧᤰᤕᤰᤜᤠ᤹ ᤌᤩ᤺ᤱ ᤐᤥ᤺ᤰᤂᤧᤖᤥ॥ ᤒᤧᤒᤡᤗᤥᤏᤖᤧ ᤁᤠᤰ ᤁᤢᤗᤠᤕᤥᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡ᤺ᤳᤋᤢᤀᤠᤱ ᤁᤡᤵᤔᤠ ᤁᤧᤄᤢ᤺ᤒᤠ ᤁᤢᤛᤠᤰᤁᤧᤴᤏᤡᤸᤗᤧ ᤁᤧᤍᤡᤶᤒᤠ ᤂᤥᤷᤕᤠᤗᤠᤶ ᤂᤧᤴ ᤌᤢᤱᤔᤠ ᤐᤠᤱᤄᤢᤖᤥ॥
REV 16:20 ᤗᤢᤵᤗᤡ ᤌᤠᤅᤧᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤘᤠᤃᤵᤗᤠᤈᤣ᤹ᤜᤠ᤹ ᤏᤢ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤔᤧᤔᤕᤧ ᤔᤧᤒᤣᤖᤥ॥
REV 16:21 ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤛᤶᤍᤠᤱ ᤋᤠᤱᤛᤠᤰᤐᤥᤗᤠᤶ ᤕᤶᤒ᤻ ᤕᤶᤒᤠ ᤑ᤺ᤴ ᤌᤩᤧᤖᤥ॥ ᤂᤧᤴ ᤑ᤺ᤴᤏᤡᤱᤃ ᤗᤡᤒᤥ᤺ᤱ (᥊᥆) ᤗᤡᤒᤥ᤺ᤱ ᤁᤡᤗᤥ ᤌᤠᤖᤡᤰ ᤁᤧᤗᤡ᤺ᤵᤐᤠ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤃ ᤁᤴ ᤑ᤺ᤴᤏᤡᤸᤗᤧᤴ ᤔᤡᤴᤍᤣ᤹ᤀᤡᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤡᤴᤍᤣ᤹ᤀᤡᤱᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢ᤺ᤒᤠ ᤆᤥᤃᤧᤖᤥ॥
REV 17:1 ᤜᤧᤰᤁᤩᤠᤱ ᤂᤧᤴ ᤂᤥᤷᤕᤠᤜᤠ᤹ ᤁᤧᤃᤵᤐᤠ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤀᤥ ᤌᤡᤰᤐᤠ ᤑᤧᤖᤧᤀᤠᤱ ᤀᤰᤂᤣ ᤔᤧᤳᤋᤠᤱ. “ᤑᤧᤖᤧ᤹. ᤀᤡᤱᤃᤠ᤹ ᤂᤧᤏᤧ᤹ ᤂᤧᤴ ᤁᤢᤀᤡᤱ ᤁᤢᤏᤠᤶ ᤁᤧᤛᤧ᤺ᤔᤠ ᤁᤧᤳᤏᤡᤔᤠᤸᤗᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤂᤢᤶᤍᤡᤱᤅᤡᤴ ᤀᤥᤛᤣ᤺ᤴᤎᤠᤰᤏᤧ᤹ᤖᤥ॥ ᤂᤧᤴ ᤁᤧᤳᤏᤡᤔᤠᤴ ᤕᤖᤡᤰ ᤆᤫᤠ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤁᤧᤏᤧᤒᤠ ᤕᤶᤒᤠ ᤕᤧᤰᤕᤰᤁᤡᤴᤗᤥ॥
REV 17:2 ᤂᤧᤴ ᤁᤧᤳᤏᤡᤔᤠᤴᤏᤢᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤡᤈᤱᤘᤠ᤺ᤸᤗᤧ ᤔᤕᤢᤛᤡᤒᤠ ᤜᤧᤰᤁᤣ ᤂᤢᤏᤧ᤹ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤔᤕᤢᤛᤡᤀᤠᤱ ᤔᤧᤘᤠ᤹ᤖᤥ॥”
REV 17:3 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤠᤱᤅᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤐᤰᤂᤠᤱ ᤋᤣ᤹ᤖᤠᤱᤗᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤏᤢᤛᤡ ᤁᤢᤎᤧᤃᤣ᤺ᤰ ᤁᤧᤒᤵᤐᤠ ᤏᤢ ᤌᤡᤒᤥ᤺ᤱ ᤁᤢᤍᤠᤱ ᤁᤧᤕᤢᤱᤒᤠ ᤜᤧ᤺ᤳ ᤁᤧᤗ᤹ᤒᤠ ᤌᤰᤛᤠ ᤛᤶᤍᤠᤱ ᤔᤧᤴᤇᤢᤔᤠ᤹ᤎᤡᤰ ᤕᤢᤅᤧᤒᤠ ᤏᤡ᤺ᤛᤢᤱ॥ ᤂᤧᤴ ᤌᤰᤛᤠ᤺ᤸᤗᤧ ᤁᤢᤎᤰ ᤁᤢᤗᤧᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤐᤳᤇᤧ॥
REV 17:4 ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤱᤃ ᤐᤖᤠᤴᤗᤠ ᤏᤢ ᤜᤧ᤺ᤳ ᤁᤧᤗ᤹ᤒᤠ ᤆᤠᤱ ᤆᤠᤰᤛᤡᤱᤅᤠᤱ ᤛᤠᤶᤔᤩᤠᤱ. ᤔᤢᤎᤡᤱᤗᤢᤱ ᤏᤢ ᤋᤧᤰᤛᤣ᤺ᤰᤗᤢᤱᤜᤠ᤹ ᤘᤠ᤺ᤳᤇᤡᤱ ᤆᤥ᤺ᤰᤛᤡᤱᤅᤠᤱ ᤘᤕᤧᤖᤥ॥ ᤂᤧᤸᤗᤧ ᤁᤢᤜᤢᤰᤁᤥ ᤛᤡᤰᤁᤧᤗᤧ᤺ᤱᤒᤠ ᤏᤢ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤁᤢᤓᤧᤴ ᤕᤠ᤺ᤶᤒᤰᤜᤠ᤹ᤖᤧ ᤁᤧᤍᤡᤶᤒᤠ ᤛᤠᤶᤔᤩᤠᤱ ᤂᤥᤷᤕᤠ᤺ᤴ ᤐᤰᤂᤢᤀᤠᤱ ᤘᤕᤧᤖᤥ॥
REV 17:5 ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤥ᤹ᤘᤠᤒᤥᤃ ᤁᤢᤒᤣ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤔᤡᤱᤎᤡᤰ ᤛᤠᤵᤋᤧᤀᤠᤱ ᤐᤳᤇᤧᤖᤥ– “ᤐᤕᤶᤒ᤻ ᤕᤶᤒᤠ ᤕᤧᤰᤕᤰ ᤒᤧᤒᤡᤗᤥᤏ. ᤁᤧᤳᤏᤡᤔᤠᤜᤠ᤹ᤖᤧ ᤂᤢᤏᤡ᤹ ᤔᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤔᤠᤖᤥ॥”
REV 17:6 ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤀᤥᤔᤧᤳᤋᤢᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠᤜᤠ᤹ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤖᤢᤔᤣᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤸᤗᤧ ᤔᤕᤢᤀᤠᤱ ᤘᤕᤧᤒᤠ ᤏᤡ᤺ᤛᤢᤱᤅᤠᤱ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤔᤕᤧᤖᤥ॥
REV 17:7 ᤁᤖ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤀᤰᤂᤣ ᤔᤧᤳᤋᤠᤱ. “ᤌᤣᤀᤠᤱ ᤁᤧᤏᤡᤱᤘᤠ᤹ ᤔᤠ᤺ᤒᤠᤒᤣ᥅ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤢ ᤏᤢᤛᤡ ᤁᤢᤎᤧᤃᤣ᤺ᤰ ᤁᤧᤒᤵᤐᤠ ᤜᤧᤰᤁᤩᤠᤱ ᤌᤡᤒᤥ᤺ᤱ ᤁᤢᤍᤠᤱ ᤁᤧᤕᤢᤱᤒᤠ ᤌᤰᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤡᤒᤡ᤹ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤳᤏᤧ᤹ᤖᤥ॥
REV 17:8 ᤂᤧᤴ ᤁᤧᤏᤡ᤺ᤛᤢᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤱᤃ ᤁᤢᤜᤡᤱᤘᤧᤳ ᤘᤕᤧ. ᤁᤖ ᤂᤧᤴ ᤀᤠᤸᤗᤥ ᤜᤥ᤺ᤵᤗᤥ॥ ᤂᤧᤱᤃ ᤕᤠᤶᤔᤥ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤗᤠᤶ ᤌᤠᤱᤅᤠᤱ ᤔᤧᤴᤏᤢᤵᤔᤏᤠᤒᤠ ᤔᤧᤰᤔᤠᤀᤥ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤂᤢᤏᤡ᤹ ᤔᤡᤱ ᤔᤧᤶᤒᤵᤔᤏᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤁᤴ ᤁᤧᤛᤡ᤺ᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤏᤡ᤺ᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤠᤖᤥ॥
REV 17:9 ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤆᤥ᤺ᤰᤗᤥ॥ ᤂᤧᤴ ᤏᤢᤛᤡ ᤌᤧᤃᤣ᤺ᤰᤐᤠᤜᤠ᤹ᤃ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤕᤢᤱᤒᤠ ᤏᤢᤛᤡ ᤁᤥ᤺ᤰᤔᤠᤜᤠ᤹ᤖᤥ॥
REV 17:10 ᤂᤧᤴ ᤏᤢᤛᤡ ᤌᤧᤃᤣ᤺ᤰᤐᤠᤜᤠ᤹ᤃ ᤏᤢᤛᤡ ᤜᤠᤱᤛᤡᤀᤠᤱᤗᤥ॥ ᤅᤠᤛᤡ ᤜᤠᤱᤜᤠ᤹ᤃ ᤀᤠᤛᤣ᤺ᤴᤇᤠ ᤔᤧᤛᤩᤧ ᤔᤧᤒᤣᤖᤥ. ᤋᤢᤰᤛᤡᤃᤣ᤺ᤰᤐᤠᤸᤗᤧ ᤀᤠᤸᤗᤥ ᤜᤠᤱ ᤆᤥᤃᤢ᤹ ᤜᤧᤰᤁᤩᤠᤱ ᤏᤢᤛᤡᤃᤣ᤺ᤰᤐᤠᤱᤃ ᤋᤠᤔᤠᤀᤣ ᤘᤠ᤹ᤖᤥ॥ ᤁᤖ ᤂᤧᤴ ᤋᤠᤀᤠᤱ ᤛᤵᤑᤠᤖᤰ ᤜᤠᤱ ᤆᤥᤃᤢ᤹ᤖᤥ॥
REV 17:11 ᤂᤧᤴ ᤋᤃᤡ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤖ ᤀᤠᤸᤗᤥ ᤁᤧᤜᤥ᤺ᤵᤐᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤕᤧᤳᤇᤡᤃᤣ᤺ᤰᤐᤠ ᤜᤠᤱᤗᤥ॥ ᤂᤧᤴ ᤘᤣ᤹ᤛ᤻ᤔᤠ ᤏᤢᤛᤡ ᤜᤠᤱᤜᤠ᤹ ᤜᤧᤰᤋᤱᤒᤠ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤂᤧᤴᤏᤠᤱ ᤔᤧᤰᤗᤥ॥
REV 17:12 ᤂᤧᤴ ᤁᤧᤏᤡ᤺ᤛᤢᤒᤠ ᤌᤡᤒᤥ᤺ᤱ ᤁᤢᤍᤠᤱᤜᤠ᤹ᤃ ᤌᤡᤒᤥ᤺ᤱ ᤜᤠᤱᤛᤡᤖᤥ॥ ᤂᤧᤱᤜᤠ᤹ᤖᤧᤃ ᤀᤠᤸᤗ ᤌᤠᤖᤡᤰ ᤜᤠᤱ ᤆᤥ᤺ᤰᤔᤠ ᤕᤢᤰ ᤔᤧᤱᤄᤥᤀᤣ ᤔᤧᤘᤠ᤹ᤖᤥ. ᤁᤖ ᤂᤧᤱᤜᤠ᤹ᤖᤧ ᤌᤰᤛᤠ᤺ᤴᤏᤢ ᤛᤥᤖᤡᤰ ᤛᤵᤑᤠᤖᤰ ᤜᤠᤱ ᤆᤥ᤺ᤰᤔᤠ ᤕᤢᤰ ᤔᤧᤄᤥ᤺ᤛᤢ᤹ᤖᤥ॥
REV 17:13 ᤂᤧᤱᤜᤠ᤹ᤖᤧᤃ ᤌᤡᤰ ᤜᤢᤵ ᤔᤧᤒᤥ᤺ᤱᤅᤠᤱ ᤂᤢᤏᤡ᤹ ᤔᤢᤰᤛᤠᤶ ᤏᤢ ᤕᤢᤰᤁᤡᤴ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤔᤧᤒᤡᤖᤢ᤹ᤖᤥ॥
REV 17:14 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤔᤧᤈᤥᤃᤢ᤹. ᤁᤖ ᤔᤧᤸᤗᤢᤰᤛᤠ᤺ᤸᤗᤧ. ᤂᤢᤏᤧ᤹ ᤀᤢ᤺ᤳᤋᤢᤛᤡᤒᤠ ᤛᤣᤃᤢᤛᤡᤒᤠ ᤏᤛᤠ᤺ᤴᤛᤠᤒᤠᤜᤠ᤹ᤏᤢ ᤛᤥᤖᤡᤰ. ᤂᤧᤱᤜᤠ᤹ ᤏᤠ᤺ᤴᤍᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤛᤠ᤺ᤱᤃ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤗᤥ॥”
REV 17:15 ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤁᤧᤏᤡ᤺ᤛᤢᤒᤠ ᤂᤧᤴ ᤁᤢᤀᤡᤱ ᤁᤢᤏᤠᤶ ᤁᤧᤛᤧ᤺ᤔᤠ ᤁᤧᤳᤏᤡᤔᤠᤴ ᤕᤢᤱᤒᤠ ᤆᤫᤠ᤺ᤳᤜᤠ᤹ᤃ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤗᤠᤈᤣ᤹ᤜᤠ᤹ ᤏᤢ ᤐᤠ᤺ᤴᤍᤠᤱᤛᤡᤖᤥ॥
REV 17:16 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡ᤺ᤛᤢᤒᤠ ᤂᤧᤴ ᤜᤧ᤺ᤳ ᤁᤧᤗ᤹ᤒᤠ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤏᤢ ᤌᤡᤒᤥ᤺ᤱ ᤋᤠᤱᤜᤠ᤹ᤖᤧ ᤂᤧᤴ ᤁᤧᤳᤏᤡᤔᤠᤴ ᤔᤧᤈᤡ᤺ᤳᤋᤢᤀᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤔᤧᤏᤠᤵᤋᤢᤀᤠᤱ ᤂᤧᤴ ᤗᤧᤰᤆᤠᤒᤧᤎᤡ᤺ᤰ ᤔᤧᤈᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤰᤛᤠ᤺ᤴ ᤔᤧᤈᤀᤠᤱ ᤁᤧᤏᤶᤒᤠᤴ ᤔᤡ ᤔᤧᤎᤡᤰᤂᤢ᤹ᤖᤥ॥
REV 17:17 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤔᤧᤱᤃᤧᤳᤋᤣ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡ᤺ᤳᤋᤢᤒᤠ ᤁᤢᤏᤡᤱᤘᤠ᤹ ᤜᤧᤰᤁᤣᤀᤣ ᤂᤧᤴ ᤌᤡᤒᤥ᤺ᤱ ᤜᤠᤱᤜᤠ᤹ ᤆᤥ᤺ᤰ ᤐᤠᤱᤄᤢᤛᤡ᤹. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤃ ᤌᤡᤰᤜᤢᤵ ᤔᤧᤒᤥ᤺ᤱᤅᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤂᤢᤏᤡ᤹ ᤜᤠᤱ ᤆᤥ᤺ᤰᤔᤠ ᤕᤢᤰᤁᤡᤴ ᤔᤧᤒᤡᤖᤢ᤹ᤖᤥ॥
REV 17:18 ᤂᤧᤏᤧ᤹ ᤁᤧᤏᤡ᤺ᤛᤢᤔᤠ ᤂᤧᤴ ᤔᤧᤴᤇᤢᤔᤠ᤹ᤀᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤛᤶᤍᤠᤱ ᤕᤢᤰ ᤁᤧᤈᤥ᤺ᤰᤔᤠ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴᤗᤥ॥”
REV 18:1 ᤂᤧᤴ ᤀᤣᤃᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤐᤕᤶ ᤕᤶᤒᤠ ᤕᤢᤰᤛᤠᤒᤠ ᤘᤣ᤹ᤛ᤻ᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤱᤗᤥ॥ ᤂᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤥ᤹ᤖᤢᤖᤥ॥
REV 18:2 ᤜᤧᤰᤁᤩᤠᤱ ᤂᤧᤸᤗᤧ ᤐᤕᤶ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖ ᤀ᤺ᤰᤋᤧᤖᤥ. “ᤒᤧᤒᤡᤗᤥᤏᤡᤴ ᤔᤧᤃᤧᤖᤥ. ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴ ᤔᤧᤃᤧᤖᤥ᥄ ᤂᤧᤴ ᤀᤠᤸᤗ ᤗᤣ᤺ᤳᤇᤠᤶ ᤑᤢᤱᤛᤠᤶ ᤏᤢ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤘᤠ᤹ᤔᤠ ᤋᤧᤴ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤵᤔᤥᤃ ᤁᤠᤰ ᤐᤖᤡᤰᤗᤧᤴ ᤛᤡᤰᤁᤧᤗᤧ᤺ᤱᤒᤠ ᤏᤢ ᤀᤠᤛᤢᤳᤌᤥ ᤐᤢᤜᤠ᤹ ᤕᤠᤱᤔᤧᤎᤥ᤺ᤰᤗᤥ॥
REV 18:3 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤁᤧᤘᤠ᤹ᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤢᤕᤠᤶᤒᤥ᤺ᤵᤔᤠ ᤛᤡᤈᤱᤘᤠ᤺ᤸᤗᤧ ᤔᤕᤢᤛᤡ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤖᤧ ᤂᤧᤴᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤸᤗᤧ ᤕᤠᤶᤍᤠᤍᤠ ᤏᤢ ᤏᤡᤱᤘᤠ᤹ᤋᤠᤍᤠᤒᤠ ᤁᤢᤜᤡᤱᤔᤴᤏᤡᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤧᤱᤜᤱᤒᤠᤜᤠ᤹ ᤛᤠ᤹ᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥ᤺ᤰᤂᤧᤖᤥ॥”
REV 18:4 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤘᤣ᤹ ᤀᤡᤰᤗᤠᤎᤡᤰ ᤂᤧᤵᤛᤢᤱᤗᤥ. “ᤀᤠᤕᤠᤵᤔᤡᤛᤣ. ᤂᤧᤴ ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤶᤔᤧ᤹ᤀᤥ᥄ ᤂᤧᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤄᤥ᤺ᤛᤢᤒᤠ ᤂᤢᤶᤍᤡᤱᤅᤡᤴ ᤁᤧᤄᤥ᤺ᤛᤢᤶᤗᤥ.
REV 18:5 ᤌᤣᤀᤠᤱᤓᤧᤸᤗᤧ ᤁᤢᤗᤠᤕᤥ᤺ᤱᤃ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤗᤢᤶᤛᤡᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤸᤗᤧ ᤁᤠᤰ ᤁᤢᤓᤧᤴ ᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥
REV 18:6 ᤂᤧᤱᤃ ᤀᤠᤰᤂᤣ ᤔᤧᤵᤔᤠ ᤗᤠ᤹ᤖᤢ᤹. ᤒᤠ ᤜᤧᤰᤁᤣᤀᤣ ᤔᤧᤳᤋᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤁᤠᤰ ᤁᤢᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠᤴ ᤏᤡᤗᤧᤱ ᤌᤠᤖᤡᤰ ᤏᤢ᤺ᤰᤋᤧᤶᤐᤡᤖᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ᤜᤠ᤹ᤖᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤒᤠ ᤂᤥᤷᤕᤠᤀᤥᤒᤠ ᤋᤢᤰᤂᤣ᤺ᤸᤗᤧ ᤁᤢᤗᤧᤰᤘᤠ ᤏᤡᤗᤧᤱ ᤌᤠᤖᤡᤰ ᤁᤢᤄᤥᤷᤕᤠᤀᤥ ᤕᤥ᤹ᤖᤧᤶ ᤐᤡᤖᤧᤶᤔᤧ᤹ᤀᤥ॥
REV 18:7 ᤂᤧᤴ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠᤒᤠ ᤏᤢ ᤛᤢᤰᤂᤣᤘᤠᤀᤥ ᤘᤕᤧᤒᤠ ᤕᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤧᤶᤔᤧ᤹ᤀᤠᤱ ᤔᤣᤖᤡᤱ ᤌᤰᤗ ᤕᤠ᤺ᤴᤍᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ. ‘ᤀᤡᤱᤃᤠ᤹ᤃ ᤐᤕᤶ ᤕᤶᤔᤠ ᤜᤠᤱᤔᤠᤀᤠᤖᤥ. ᤀᤡᤱᤃᤠ᤹ᤃ ᤔᤣᤔᤣᤍᤢᤔᤠ ᤔᤧ᤺ᤴᤏᤠᤖᤥ. ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤣᤖᤡᤱ ᤔᤧᤎᤰᤁᤠᤴᤗᤥ ᤑᤠ᤹ᤀᤠᤱ ᤜᤧᤴᤇᤡᤱᤅᤠᤱ ᤘᤠ᤹ᤖᤥ॥
REV 18:8 ᤂᤧᤸᤗᤧ ᤆᤥᤃᤢᤸᤗᤧ ᤌᤡᤰ ᤕᤧᤴᤏᤥᤀᤣ ᤂᤧᤸᤗᤥ ᤛᤡ᤺ᤔᤧᤴ. ᤔᤣᤖᤡᤱ ᤌᤰᤔᤧᤴ. ᤜᤧᤰᤁᤩᤠᤱ ᤛᤠᤰᤘᤠ᤺ᤸᤗᤧᤴ ᤔᤡᤴᤍᤣ᤹ᤀᤡᤴ ᤋᤠ᤺ᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤡ᤺ᤸᤗᤧ ᤂᤠᤵᤐᤢ ᤌᤩ᤺ᤱ ᤐᤥ᤺ᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤢᤶᤍᤡᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤔᤢᤰᤛᤠᤶᤍᤠᤱᤒᤠ ᤆᤥ᤺ᤰᤗᤥ॥’”
REV 18:9 ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤔᤡᤍᤡᤰᤁᤠᤱ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤴ ᤂᤢᤏᤧ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤕᤠᤶᤍᤠᤍᤠ ᤘᤠ᤹ᤔᤠᤀᤥ ᤆᤢᤶ ᤁᤧᤔᤧᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ᤖᤧ ᤔᤧᤏᤡ᤺ᤛᤢ᤹ᤀᤠᤱ ᤔᤧᤜᤠ᤺ᤵᤗ ᤔᤣᤖᤡᤱ ᤔᤧᤎᤰᤗᤥ॥
REV 18:10 ᤂᤧᤱᤜᤠ᤹ ᤂᤧᤸᤗᤧ ᤁᤢᤍᤢᤰᤂᤣ᤺ᤴᤏᤢ ᤔᤧᤃᤡ. ᤜᤧᤰᤁᤩᤠᤱ ᤔᤠ᤺ᤱᤄᤠ ᤔᤧᤕᤧᤵᤐᤠᤱ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ. “ᤀᤠᤕᤠᤰᤁᤥ. ᤀᤠᤕᤠᤰᤁᤥ᥄ ᤁᤧᤎᤢᤶᤒᤠ ᤏᤢ ᤐᤕᤶ ᤕᤶᤒᤠ ᤒᤧᤒᤡᤗᤥᤏ ᤕᤧᤰᤕᤰᤁᤣ. ᤛᤵᤑᤠᤖᤧᤛᤠ ᤁᤧᤄᤢᤶᤍᤡᤱᤅᤡᤴ ᤋᤩᤧᤀᤠᤱ ᤘᤠ᤹ᤖᤥ᥄”
REV 18:11 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤧᤱᤜᤱᤒᤠᤜᤠ᤹ ᤔᤧᤜᤠ᤺ᤵᤗ ᤔᤣᤖᤡᤱ ᤔᤧᤎᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤆᤡᤃ᤺ᤰᤘᤠᤜᤠ᤹ ᤕᤠᤶᤔᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤀᤡᤅᤢᤴᤗᤥ॥
REV 18:12 ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤡ᤹ ᤛᤠᤶᤔᤩᤠᤱ. ᤕᤢᤵᤐᤠ. ᤔᤢᤎᤡᤱᤗᤢᤱ. ᤋᤧᤰᤛᤣ᤺ᤰ. ᤜᤧᤰᤁᤩᤠᤱ ᤏᤢ᤺ᤒ᤻ ᤏᤢ᤺ᤒᤠ ᤏᤠᤀᤡᤏᤠᤛᤢ᤺ᤳ. ᤐᤖᤠᤴᤗᤠ ᤏᤢ ᤜᤧ᤺ᤳ ᤁᤧᤗ᤹ᤒᤠ ᤋᤣ᤺ᤳᤜᤠ᤹. ᤀᤛᤣ᤺ᤰᤂᤡ ᤋᤣ᤺ᤳ. ᤜᤧᤰᤁᤩᤠᤱ ᤁᤠᤰ ᤐᤖᤡᤰᤗᤧᤴ ᤁᤢᤏᤠᤶ ᤁᤧᤏᤢ᤹ᤒᤠ ᤛᤡᤱᤜᤠ᤹. ᤜᤧᤰᤁᤩᤠᤱ ᤋᤰᤔᤡᤒᤠᤸᤗᤧ ᤁᤢᤃᤣ᤺ᤱ. ᤀᤡᤔᤧᤸᤗᤢᤱᤒᤠ ᤛᤡᤱᤜᤠ᤹ᤗᤠᤔ. ᤌᤳᤏᤠᤔᤠᤜᤠ᤹ᤗᤠᤔ. ᤑᤧᤴᤈᤣ᤹ᤗᤠᤔ ᤏᤢ ᤘᤠᤗᤧᤱᤗᤢᤱᤗᤠᤶ ᤆᤥ᤺ᤰᤔᤏᤠᤒᤠ ᤁᤠᤰ ᤐᤖᤡᤰᤗᤧᤴ ᤆᤡᤃ᤺ᤰᤘᤠᤜᤠ᤹.
REV 18:13 ᤜᤧᤰᤁᤩᤠᤱ ᤏᤠᤶᤛᤡᤱ ᤜᤰ. ᤔᤠᤖᤢᤰᤜᤠ᤹. ᤁᤢᤏᤠᤶ ᤁᤧᤏᤢ᤹ᤒᤠ ᤛᤠᤱᤛᤡᤱ. ᤔᤢᤷᤖ. ᤐᤠᤱᤒ᤺ᤳ ᤑᤢᤱᤔᤠ. ᤆᤧᤸᤗᤧᤰᤛᤣ᤹ ᤌᤡ᤺. ᤈᤤᤋᤢᤏ ᤏᤡ᤺ᤱᤃᤣ᤺ᤴ. ᤑᤧ᤹ᤖᤢᤶ. ᤛᤡ᤺. ᤜᤧᤰᤁᤩᤠᤱ ᤐᤡᤳ ᤛᤠ᤺ᤱᤘᤧᤳ. ᤔᤧᤸᤗᤢᤰᤜᤠ᤹. ᤀᤴᤜᤠ᤹. ᤀᤴᤗᤠᤜᤠ᤹. ᤜᤧᤰᤁᤩᤠᤱ ᤕᤥ᤺ᤰᤐᤠ ᤕᤥ᤺ᤰᤔᤠᤜᤠ᤹ ᤏᤢ ᤌᤱᤅᤥ ᤔᤧᤏᤠᤵᤋᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤴᤀᤡᤅᤢᤴᤇᤡᤴᤗᤥ॥
REV 18:14 ᤗᤧᤱᤜᤱᤒᤠᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢ᤹ᤖᤥ. “ᤂᤧᤏᤧ᤹ ᤁᤠᤰ ᤀᤠᤒᤠᤅᤣ ᤁᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤠ ᤏᤢ᤺ᤒ᤻ ᤏᤢ᤺ᤒᤠ ᤆᤡᤃ᤺ᤰᤘᤠᤜᤠ᤹ ᤁᤠᤰ ᤔᤧᤔᤕᤧ ᤔᤧᤒᤣᤖᤥ॥ ᤜᤧᤰᤁᤩᤠᤱ ᤁᤧᤕᤠᤱᤛᤠᤁᤢᤴᤎᤣ ᤏᤢ ᤁᤧᤄᤧᤶᤛᤡᤱᤔᤠᤜᤠ᤹ᤀᤠᤱ ᤔᤕᤧᤒᤣᤖᤥ॥ ᤂᤧᤱᤜᤠ᤹ᤃ ᤂᤧᤏᤧ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤧᤱᤄᤥ᤺ᤛᤢᤴᤗᤥ॥”
REV 18:15 ᤂᤧᤴ ᤕᤧᤰᤕᤰᤁᤥ ᤗᤧᤱᤜᤱ ᤆᤥ᤺ᤰᤛᤧ ᤁᤧᤍᤠ᤺ᤒᤠᤀᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤒᤥ᤺ᤱᤒᤠ ᤗᤧᤱᤜᤱᤒᤠᤜᤠ᤹ᤃ ᤔᤠ᤺ᤱᤄᤠᤀᤣ ᤔᤧᤕᤧᤵᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤧᤸᤗᤧ ᤁᤢᤍᤢᤰᤂᤣ᤺ᤴᤏᤢ ᤛᤠ᤹ᤖᤡᤰ ᤔᤧᤃᤡᤖᤥ॥ ᤂᤧᤱᤜᤠ᤹ ᤔᤧᤜᤠ᤺ᤵᤗ ᤔᤣᤖᤡᤱ ᤌᤰᤏᤢ
REV 18:16 ᤀᤰᤂᤣ ᤔᤧᤗ᤹ᤖᤥ. “ᤀᤠᤕᤠᤰᤁᤥ. ᤀᤠᤕᤠᤰᤁᤥ᥄ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤱᤃ ᤏᤢ᤺ᤒ᤻ ᤏᤢ᤺ᤒᤠ ᤏᤠᤀᤡᤏᤠᤛᤢ᤺ᤳ. ᤐᤖᤠᤴᤗᤠ ᤏᤢ ᤜᤧ᤺ᤳ ᤁᤧᤗ᤹ᤒᤠ ᤋᤣ᤺ᤳ ᤑᤢᤱᤜᤠ᤹ ᤆᤠᤰᤛᤡᤱᤅᤠᤱ ᤛᤠᤶᤔᤩᤠᤱᤜᤠ᤹. ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤜᤧᤰᤁᤩᤠᤱ ᤋᤧᤰᤛᤣ᤺ᤰᤁᤡᤸᤗᤧᤴ ᤘᤠ᤺ᤳᤋᤡᤜᤠ᤹ ᤁᤧᤘᤠ᤺ᤵᤔᤠ ᤔᤧᤴᤇᤢᤔᤠ᤹ᤀᤡᤴ ᤁᤢᤀᤡᤛᤡ᤺ᤰ ᤛᤠ᤹ᤖᤡᤰ ᤏᤢ᤺ᤒᤠ ᤆᤥᤃᤧᤖᤥ॥
REV 18:17 ᤛᤵᤑᤠᤖᤧᤛᤠ ᤁᤠᤰ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤸᤗᤧ ᤔᤠ᤺ᤛᤢᤍᤣ᤺ᤛᤢᤖᤥ᥄” ᤁᤠᤰ ᤘᤠᤗᤠᤎᤠ ᤍᤠᤱᤒᤠᤜᤠ᤹. ᤘᤠᤗᤠᤶᤍᤡ᤺ᤰᤐᤠᤜᤠ᤹. ᤘᤠᤗᤠᤎᤠ ᤆᤠ᤺ᤰᤐᤠᤜᤠ᤹ ᤏᤢ ᤘᤠᤜᤱᤅᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤈᤠᤒᤠᤜᤠ᤹ ᤔᤠ᤺ᤱᤄᤠ ᤔᤧᤕᤧᤵᤐᤠᤱ
REV 18:18 ᤂᤧᤱᤜᤠ᤹ᤖᤧ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴ ᤔᤡᤍᤡᤃᤧᤀᤠᤱ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤴ ᤔᤧᤏᤡ᤺ᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰ. “ᤁᤴ ᤐᤕᤶ ᤕᤶᤒᤠ ᤕᤧᤰᤕᤰ ᤜᤧᤰᤋᤱᤒᤠ ᤕᤧᤰᤕᤰᤁᤡᤱᤃ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ᥄”
REV 18:19 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤠᤶᤜᤡ᤺ᤰᤁᤡᤴ ᤂᤢᤏᤡ᤹ ᤌᤧᤃᤣ᤺ᤰ ᤛᤶᤍᤠᤱ ᤔᤧᤈᤢ᤺ᤳᤇᤡᤱᤅᤠᤱ ᤔᤧᤜᤠ᤺ᤵᤗ. ᤔᤧᤓᤡ᤺ᤰᤗ. ᤔᤣᤖᤡᤱ ᤌᤰᤏᤢ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ. “ᤀᤠᤕᤠᤰᤁᤥ. ᤀᤠᤕᤠᤰᤁᤥ᥄ ᤁᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤥᤃ. ᤕᤖᤡᤰ ᤘᤠᤗᤠᤎᤠ ᤍᤠᤱᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤗᤠᤶ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥ᤺ᤰᤂᤧᤖᤥ॥ ᤁᤖ ᤛᤵᤑᤠᤖᤧᤛᤠ ᤂᤧᤴ ᤕᤧᤰᤕᤰᤁᤡᤴ ᤁᤠᤰ ᤔᤧᤃᤧᤖᤥ॥
REV 18:20 ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤛᤣ. ᤂᤧᤴ ᤔᤧᤃᤧᤒᤠᤀᤥ ᤛ᤺ᤳᤋᤧᤶᤔᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹. ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤛᤣ. ᤛ᤺ᤳᤋᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤄᤢᤶ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤀᤠᤱ ᤘᤠ᤹ᤖᤥ॥”
REV 18:21 ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤔᤠᤱᤗᤠᤀᤡᤱᤒᤠᤎᤡᤰᤗᤧ ᤐᤕᤶ ᤕᤶᤒᤠ ᤗᤢᤱᤛᤢᤶ ᤜᤧᤰᤋᤱᤒᤠ ᤗᤢᤱᤎᤡᤰ ᤐᤰᤂᤢᤀᤠᤱ ᤕᤥ ᤘᤠᤜᤱᤅᤥ ᤗᤠᤵᤑᤢᤛᤢ ᤌᤠ᤺ᤛᤢᤖ ᤀᤰᤂᤣ ᤐᤠ᤺ᤳᤋᤢᤖᤥ. “ᤐᤕᤶ ᤕᤶᤒᤠ ᤕᤧᤰᤕᤰ ᤒᤧᤒᤡᤗᤥᤏᤡᤴᤏᤠᤱ ᤒᤠ ᤀᤰᤂᤣᤗ᤹ᤖᤡᤰᤁᤣ ᤗᤠᤵᤑᤢᤖᤥ. ᤜᤧᤰᤁᤩᤠᤱ ᤂᤧᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤏᤡᤔᤧᤎᤠ᤺ᤵᤏᤧᤴᤗᤥ॥
REV 18:22 ᤜᤧᤰᤁᤩᤠᤱ ᤛᤠᤖᤠᤱᤃᤡ. ᤔᤧᤵᤑᤪᤠᤔᤠ ᤏᤢ ᤌᤢᤳᤋᤢᤖᤡ᤺ᤵᤐᤠ ᤔᤢᤰᤐᤠ ᤀᤡᤰᤗᤠ᤺ᤴ ᤜᤧᤰᤁᤩᤠᤱ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤶᤗᤥᤜᤠ᤹ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶ ᤔᤧᤍᤧᤳᤏᤧᤴᤗᤥ॥ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤐᤠ ᤛᤠᤵᤆᤥ᤺ᤰᤃᤧᤶᤒᤠᤜᤠ᤹ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤥᤔᤧᤴᤍᤣᤳᤏᤧᤴᤗᤥ॥ ᤕᤠᤶᤔᤥ ᤗᤢᤱᤛᤢᤶ ᤕᤢ᤺ᤵᤔᤏᤠᤒᤠᤀᤠᤱ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶ ᤔᤧᤍᤧᤳᤏᤧᤴᤗᤥ॥
REV 18:23 ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤣᤔᤡ ᤔᤧᤀᤥ᤺ᤳᤏᤧᤴᤗᤥ. ᤜᤧᤰᤁᤩᤠᤱ ᤛᤡᤛᤠᤔᤣ᤺ᤳ ᤏᤢ ᤏᤠᤗᤡᤛᤠᤱᤅᤡᤸᤗᤧ ᤂᤢᤴᤇᤡ᤹ ᤀᤡᤰᤗᤠ᤺ᤴᤏᤠᤱ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶ ᤔᤧᤍᤧᤳᤏᤧᤴᤗᤥ॥ ᤂᤧᤏᤧ᤹ ᤁᤧᤗᤧᤱᤜᤱᤒᤠᤜᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤢᤰᤛᤠᤶᤛᤠᤒᤠ ᤏᤢ ᤁᤧᤀᤡᤱᤒᤠ ᤁᤧᤎᤢᤶᤒᤠᤜᤠ᤹ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤏᤧ᤹ ᤑᤧᤴᤛᤠᤶ ᤔᤢᤴᤎᤢᤶᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤡᤱᤃᤧᤗᤧᤰᤋᤢᤛᤡᤖᤥ॥
REV 18:24 ᤒᤧᤒᤡᤗᤥᤏᤣ. ᤂᤧᤏᤧ᤹ ᤁᤧᤔᤠᤖᤠᤶᤜᤠ᤹ᤀᤥᤀᤣ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤧᤵᤔᤏᤠᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤴ ᤛᤧ᤺ᤖᤧᤀᤠᤱ ᤘᤕᤧᤖᤥ॥”
REV 19:1 ᤂᤧᤴ ᤀᤣᤃᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤖᤡᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧᤒᤠ ᤜᤧᤰᤁᤣ ᤂᤧᤵᤛᤢᤱᤗᤥ. “ᤜᤠᤸᤗᤧᤗᤢᤕᤠ᥄ ᤛᤧᤴᤗᤵ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤡᤱᤃ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ.
REV 19:2 ᤌᤣᤀᤠᤱᤓᤧᤸᤗᤧ ᤁᤢᤄᤠᤛᤧᤴᤏᤡᤱᤃ ᤛᤧᤰᤂᤠᤒᤠ ᤏᤢ ᤏᤢ᤺ᤒᤠ ᤆᤥ᤺ᤰᤗᤥ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤁᤢᤕᤠ᤺ᤶᤒᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤈᤡ᤺ᤶᤔᤠ ᤂᤧᤴ ᤐᤕᤶ ᤕᤶᤔᤠ ᤁᤧᤳᤏᤡᤔᤠᤴ ᤂᤢᤶᤍᤡᤱ ᤐᤡᤖᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ ᤂᤧᤸᤗᤧ ᤛᤧᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤀᤠᤱ ᤘᤠ᤹ᤖᤥ॥”
REV 19:3 ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤜᤠᤸᤗᤧᤗᤢᤕᤠ᥄ ᤂᤧᤴ ᤕᤧᤰᤕᤰᤁᤡᤴ ᤔᤡᤍᤡᤰᤁᤠᤱ ᤔᤡ᤺ᤰᤂᤢ᤹ᤀᤡᤱᤃ ᤛᤍᤠᤍᤡᤱ ᤌᤠ᤺ᤱ ᤐᤣ᤺ᤰᤗᤥ॥”
REV 19:4 ᤜᤧᤰᤁᤩᤠᤱ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤏᤢ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤠᤶᤒᤥ᤺ᤴ ᤔᤧᤓᤴᤇᤡᤱᤗ ᤛᤣᤘᤠ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤀᤠᤔᤧᤴ. ᤜᤠᤸᤗᤧᤗᤢᤕᤠ᥄”
REV 19:5 ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤗᤠᤶ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤋᤩᤧᤖᤥ. “ᤁᤠᤰ ᤆᤢᤰᤐᤠᤗᤠᤶ ᤕᤶᤒᤠ ᤌᤠᤖᤡᤰ ᤂᤢᤏᤧ᤹ᤏᤢ ᤁᤧᤃᤡᤒᤠ ᤁᤢᤛᤣᤘᤠᤖᤥᤒᤠᤛᤣ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥ᤺ᤛᤧᤶᤔᤧ᤹ᤀᤥ᥄”
REV 19:6 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ ᤜᤧᤰᤋᤱᤒᤠ ᤀᤡᤰᤗᤠ᤺ᤴ ᤂᤧᤵᤛᤢᤱ॥ ᤂᤧᤱᤃ ᤐᤕᤶ ᤕᤶᤒᤠ ᤆᤫᤠ᤺ᤳ ᤛ᤺ᤰᤋᤧᤒᤠ ᤁᤢᤀᤡᤛᤡ᤺ᤰ ᤏᤢ ᤂᤧᤖᤧᤱ ᤄᤢᤖᤢᤱ ᤗ᤹ᤖᤧᤖ ᤗᤥ᤺ᤰᤂᤢᤀᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧ. “ᤜᤠᤸᤗᤧᤗᤢᤕᤠ᥄ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱ ᤆᤥᤃᤢ᤹ᤖᤥ॥
REV 19:7 ᤀᤠᤸᤗ ᤀᤠᤏᤡ᤹ ᤛᤠ᤹ᤖᤡᤰᤁᤣ ᤛ᤺ᤳᤋᤡ. ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤔᤡᤍᤡᤱ ᤐᤡᤖᤢᤶᤗᤥ. ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤛᤠ᤺ᤸᤗᤧ ᤋᤧᤴᤎᤠᤶᤃᤧᤴ ᤁᤢᤔᤣ᤺ᤰᤂᤡᤶᤔᤡᤴ ᤋᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤢᤛᤡᤛᤠᤔᤣ᤺ᤳᤋᤡᤴ ᤀᤠᤒᤠᤅᤣ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥
REV 19:8 ᤛᤡᤛᤠᤔᤣ᤺ᤳᤋᤡᤱᤃ ᤑ᤺ᤃᤧᤗ᤹ᤒᤠ ᤁᤧᤀᤥ᤺ᤵᤐᤠ ᤏᤢ᤺ᤒᤠ ᤏᤠᤀᤡᤏᤠᤛᤢ᤺ᤳ ᤆᤠᤱ ᤆᤠᤱᤔᤠ ᤔᤧᤒᤡᤖᤢᤀᤠᤱ ᤘᤠ᤹॥” (ᤏᤢ᤺ᤒᤠ ᤏᤠᤀᤡᤏᤠᤛᤢ᤺ᤳ ᤆᤠᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰᤗᤥ॥)
REV 19:9 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤠᤱ. “ᤁᤴ ᤐᤠ᤺ᤴᤏᤡᤴ ᤛᤠᤵᤋᤧ᤹–ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤀᤢ᤺ᤳᤋᤢᤛᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥” ᤂᤧᤸᤗᤧ ᤕᤠᤶᤔᤥ ᤀᤡᤱᤃᤠ᤹ ᤔᤧᤳᤋᤠᤱ. “ᤁᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠ ᤁᤢᤒᤠ᤺ᤴᤈᤠᤰᤛᤡᤖᤥ॥”
REV 19:10 ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤂᤢᤏᤧ᤹ ᤛᤣᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤗᤠᤱᤅᤥ ᤛᤠᤶᤒᤥ᤺ᤴ ᤑᤴᤇᤡᤅᤠᤱ. ᤁᤖ ᤂᤧᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ᥄ ᤀᤡᤱᤃᤠ᤹ᤃ ᤂᤧᤏᤧ᤹ ᤏᤢ ᤁᤧᤶᤓᤢ᤹ ᤁᤧᤴᤛᤠ᤹ᤛᤡ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠ ᤏᤢ ᤕᤧᤛᤢ᤺ᤴ ᤋᤥ᤺ᤴᤍᤡ ᤁᤧᤒᤡᤒᤠᤀᤠᤖᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤛᤣᤘᤠ ᤆᤥᤃᤧ᤹᥄” ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤳᤋᤢᤒᤠ ᤛᤧᤰᤂᤠ ᤐᤠ᤺ᤴᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡ᤹ᤖᤥ॥
REV 19:11 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤖᤧᤒᤠ ᤏᤡ᤺ᤛᤢᤱ. ᤜᤧᤰᤁᤩᤠᤱ ᤂᤧᤵᤔᤥ ᤑ᤺ᤍᤠᤱᤒᤠ ᤀᤴᤎᤡᤰ ᤘᤕᤧ॥ ᤂᤧᤴ ᤛᤶᤍᤠᤱ ᤁᤧᤕᤢᤱᤒᤠᤸᤗᤧ ᤁᤢᤔᤡᤱᤅᤡᤴ “ᤏᤛᤠ᤺ᤴᤛᤠᤒᤠ” ᤏᤢ “ᤛᤧᤰᤂᤠ” ᤔᤧᤔᤧᤳᤋᤢᤖᤥ॥ ᤂᤢᤏᤧ᤹ᤃ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥᤃᤢ᤹ ᤜᤧᤰᤁᤩᤠᤱ ᤌᤱ ᤆᤥᤃᤢ᤹ᤖᤥ॥
REV 19:12 ᤂᤢᤏᤧ᤹ ᤁᤢᤔᤡᤰᤜᤠ᤹ᤃ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤆᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤕᤖᤡᤰ ᤋᤡᤆ᤺ᤜᤠ᤹ ᤔᤧᤒᤳᤇᤧ॥ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤁᤢᤔᤡᤱ ᤛᤠᤵᤋᤧᤀᤠᤱ ᤐᤳᤇᤧ॥ ᤂᤧᤸᤗᤧ ᤁᤢᤒᤣ᤺ᤱᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ. ᤁᤖ ᤂᤢᤏᤧ᤹ᤖᤰ ᤁᤢᤛᤡᤱ ᤏᤡ᤺ᤳᤋᤢᤖᤥ॥
REV 19:13 ᤂᤢᤏᤧ᤹ᤃ ᤔᤠᤰᤂᤡ᤹ᤀᤥ ᤏᤡ᤺ᤶᤔᤏᤠᤒᤠ ᤋᤣ᤺ᤳ ᤆᤠᤰᤂᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤱᤃ “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤗᤥ”॥
REV 19:14 ᤜᤧᤰᤁᤩᤠᤱ ᤑ᤺ᤃᤧᤗ᤹ᤒᤠ ᤏᤢ ᤛᤣᤛᤣᤒᤠ ᤏᤠᤀᤡᤏᤠᤛᤢ᤺ᤳ ᤋᤣ᤺ᤳ ᤁᤧᤈᤠᤱᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤑ᤺ᤃᤧᤗ᤹ᤒᤠ ᤀᤴᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥
REV 19:15 ᤂᤢᤏᤧ᤹ ᤁᤢᤔᤢᤖᤠᤀᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤠᤃᤧᤛᤢᤰᤐᤠ ᤋᤠᤓᤣ᤺ᤴ ᤗ᤺ᤴᤍᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤑᤧᤴᤈᤣ᤹ ᤋᤰᤁᤠ᤺ᤳᤋᤡᤸᤗᤧ ᤕᤢᤰ ᤆᤥᤃᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤗᤠᤱᤅᤡᤸᤗᤧ ᤆᤧᤸᤗᤧᤰᤛᤣ᤹ᤀᤡᤴ ᤛ᤹ᤔᤏᤠᤒᤠ ᤜᤧᤰᤁᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤁᤢᤏᤡᤱᤔᤡᤜᤠ᤹ ᤛ᤹ᤖᤢᤛᤡᤖᤥ॥
REV 19:16 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤥ ᤏᤢ ᤁᤢᤛᤧᤒᤱᤒᤥ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤏᤢ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤇᤧ॥
REV 19:17 ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤠᤱᤗᤠᤀᤡᤱᤒᤠᤎᤡᤰ ᤏᤠᤶᤔᤥ ᤕᤧᤒᤧᤒᤠ ᤏᤡ᤺ᤛᤢᤱ. ᤂᤧᤸᤗᤧ ᤋᤠᤱᤛᤠᤰᤐᤥ ᤁᤧᤒᤧᤒᤠᤖ ᤁᤧᤘᤠ᤹ᤒᤠ ᤁᤠᤰ ᤁᤡᤍᤠᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤩᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤐᤕᤶ ᤕᤶᤒᤠ ᤛᤠᤓᤠᤱᤈᤠᤀᤥ ᤆᤢᤵᤛᤧᤶᤔᤧ᤹ᤀᤥ॥
REV 19:18 ᤜᤠᤱᤜᤠ᤹. ᤌᤰᤋᤢᤶᤒᤠᤜᤠ᤹. ᤌᤰᤛᤢᤒᤠᤜᤠ᤹. ᤜᤧᤰᤁᤩᤠᤱ ᤀᤴᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹. ᤜᤧᤰᤁᤩᤠᤱ ᤕᤥ᤺ᤰᤐᤠ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹. ᤆᤢᤰᤐᤠ ᤏᤢ ᤕᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤧᤰᤛᤠ᤺ᤴ ᤆᤠᤛᤧ ᤋᤩᤧᤶᤔᤧ᤹ᤀᤥ॥”
REV 19:19 ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤀᤴ ᤁᤧᤕᤢᤰᤐᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤢᤵᤛᤧᤒᤠ ᤏᤡ᤺ᤛᤢᤱᤛᤡᤱᤗᤥ॥
REV 19:20 ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤂᤢᤏᤧ᤹ ᤁᤢᤍᤃᤡ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤴ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴ ᤔᤧᤍᤧᤶᤛᤢᤛᤡᤖᤥ॥ ᤂᤧᤸᤗᤧ ᤔᤢᤰᤛᤠᤶᤖᤧ ᤁᤢᤎᤡᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤖᤧ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴ ᤁᤧᤗᤰᤐᤠ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤀᤡᤱᤗᤧᤰᤋᤢᤛᤡᤀᤠᤱ ᤘᤕᤧᤖᤥ॥ ᤂᤧᤱᤜᤠ᤹ ᤏᤧᤵᤔᤠᤱ ᤁᤢᤜᤡᤱᤘᤧᤳᤋᤣ ᤁᤠᤴᤎᤠᤰ ᤁᤧᤍᤡ᤺ᤵᤐᤠ ᤔᤡᤖᤠ᤺ᤰ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢᤛᤢᤛᤡᤖᤥ॥
REV 19:21 ᤜᤧᤰᤁᤩᤠᤱ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤋᤠᤓᤣᤗᤠᤶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤔᤧᤛᤩᤧᤀᤠᤱ ᤁᤠᤰ ᤁᤡᤌᤜᤠ᤹ᤖᤧ ᤂᤢᤏᤡ᤹ ᤏᤧᤰᤛᤠ᤺ᤴ ᤂᤠᤄᤠ ᤔᤧᤈᤖᤥ॥
REV 20:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤠᤱᤗᤠᤀᤡᤱᤒᤠᤎᤡᤰ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤱ॥ ᤂᤧᤸᤗᤧ ᤁᤢᤜᤢᤰᤁᤥ ᤂᤧᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤒᤠ ᤋᤡᤔᤡᤰᤁᤡᤴ ᤏᤢ ᤐᤕᤶ ᤕᤶᤒᤠ ᤑᤧᤴᤌᤰᤁᤪᤱᤅᤡᤴ ᤁᤳᤋᤢᤖᤥ॥
REV 20:2 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤋᤧᤶᤛᤢᤀᤠᤱ ᤋᤱᤒᤣ ᤜᤧᤴᤇᤡᤱ (᥇᥆᥆᥆) ᤌᤠᤖᤡᤰ ᤂᤧᤴᤏᤡᤴ ᤀᤡᤄᤣ᤺ᤰᤂᤢᤖᤥ॥ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤱᤃ ᤀᤢᤴᤇᤥ᤺ᤴᤒᤠ ᤀᤛᤣ᤺ᤰ. ᤔᤠᤑᤧᤴᤛᤠᤶ ᤀᤡᤃᤪ ᤛᤤᤋᤠ᤺ᤴᤏᤠᤱ ᤔᤧᤔᤧᤳᤋᤢᤖᤥ॥
REV 20:3 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤔᤠᤑᤧᤴᤛᤠᤶᤔᤡᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤢ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤋᤱᤒᤣ ᤜᤧᤴᤇᤡᤱ (᥇᥆᥆᥆) ᤌᤠᤖᤡᤰ ᤀᤠᤳᤋᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤠᤱ ᤀᤡᤱᤗᤧᤰ ᤔᤧᤵᤔᤠ ᤔᤧᤛᤢᤰᤋᤢᤴᤇᤡᤴᤗ ᤑᤠ᤹ᤀᤠᤱ ᤂᤧᤸᤗᤧ ᤁᤢᤛᤢ᤺ᤵᤏᤠ᤺ᤴ ᤛᤢᤒᤢᤀᤠᤱ ᤀᤣ᤺ᤵᤛᤠᤵ ᤗᤰᤋᤢᤖᤥ॥ ᤂᤧᤴ ᤀᤣᤃᤠᤱ ᤛᤵᤑᤠᤖᤧ ᤗᤠᤃᤡ ᤂᤧᤴ ᤗᤧᤵᤔᤠᤀᤣ ᤐᤥ᤺ᤱᤗᤥ॥
REV 20:4 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤜᤠ᤹ ᤏᤡ᤺ᤛᤢᤱᤛᤡᤱ॥ ᤂᤧᤵᤔᤥ ᤂᤠᤛᤧᤴ ᤗᤥ᤺ᤶᤔᤠ ᤕᤢᤰ ᤁᤧᤄᤥ᤺ᤒᤠᤜᤠ᤹ ᤔᤧᤕᤢᤅᤧ॥ ᤜᤧᤰᤁᤩᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤀᤥᤛᤣ᤺ᤴᤍᤠᤱ ᤆᤥᤃᤢᤒᤠ ᤛᤧᤰᤂᤠ᤺ᤴ ᤏᤢ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤌᤧᤃᤣ᤺ᤰᤐᤠ ᤔᤧᤄᤰᤋᤢ ᤔᤧᤛᤧᤖᤢᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤜᤠ᤹ ᤏᤡ᤺ᤛᤢᤛᤡᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤧᤴ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤁᤢᤏᤠᤘᤠᤀᤡᤳᤗᤠ᤺ᤴ ᤛᤣᤘᤠ ᤔᤧᤴᤈᤥᤃᤢᤴ ᤜᤧᤰᤁᤩᤠᤱ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴᤏᤠᤱ ᤂᤢᤏᤡ᤹ ᤋᤥᤘᤠᤒᤥ ᤀᤡᤃᤪ ᤜᤢᤰᤁᤥ ᤔᤧᤴᤍᤠ᤺ᤰᤋᤢᤴᤏᤠᤱ ᤘᤕᤧᤖᤥ॥ ᤂᤧᤱᤜᤠ᤹ᤃ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤀᤠᤱ ᤂᤪᤡᤛ᤻ᤋᤧᤴᤏᤢ ᤋᤱᤒᤣ ᤜᤧᤴᤇᤡᤱ ᤌᤠᤖᤡᤰ ᤜᤠᤱ ᤔᤧᤈᤥᤃᤢᤖᤥ॥
REV 20:5 (ᤘᤣ᤹ ᤁᤧᤛᤡ᤺ᤒᤠᤜᤠ᤹ᤃ ᤋᤱᤒᤣ ᤜᤧᤴᤇᤡᤱ ᤔᤧᤸᤗᤧᤰᤁᤣ ᤌᤠᤖᤡᤰ ᤔᤧᤴᤜᤡᤅᤧᤴᤗᤥ॥) ᤁᤱᤃ ᤌᤡᤰᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤗᤥ॥
REV 20:6 ᤌᤡᤰᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤁᤧᤄᤥ᤺ᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡ ᤏᤢ ᤛᤣᤛᤣᤒᤠᤛᤡᤖᤥ॥ ᤂᤧᤱᤜᤠ᤹ ᤏᤡᤛᤡᤃᤣ᤺ᤰᤐᤠ ᤛᤡ᤺ᤔᤧᤸᤗᤧ ᤌᤣᤀᤠᤱ ᤔᤧᤵᤔᤠ ᤔᤧᤛᤢᤰᤋᤢᤛᤡᤴ. ᤁᤖ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤪᤡᤛ᤻ᤋᤖᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥ᤺ᤱᤅᤠᤱ ᤂᤪᤡᤛ᤻ᤋᤧᤴᤏᤢ ᤋᤱᤒᤣ ᤜᤧᤴᤇᤡᤱ ᤌᤠᤖᤡᤰ ᤜᤠᤱ ᤔᤧᤈᤥ᤺ᤰᤗᤥ॥
REV 20:7 ᤜᤧᤰᤁᤩᤠᤱ ᤋᤱᤒᤣ ᤜᤧᤴᤇᤡᤱ ᤁᤧᤳ ᤆᤢ᤺ᤳᤋᤠᤱ ᤔᤠᤑᤧᤴᤛᤠᤶᤔᤡᤴ ᤛᤠᤰᤋᤧᤒᤠ ᤋᤧᤴᤏᤥᤗᤠᤶ ᤗᤧᤳᤗᤥ॥
REV 20:8 ᤜᤧᤰᤁᤩᤠᤱ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗ᤺ᤴ ᤌᤠᤱᤅᤠᤱ ᤁᤠᤰ ᤐᤡᤛᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹–“ᤃᤥᤃ” ᤏᤢ “ᤔᤠᤃᤥᤃ” ᤔᤧᤵᤔᤏᤠᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹–ᤀᤡᤱᤗᤧᤰᤋᤢᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤵᤛᤢᤛᤡᤖᤥ॥ ᤂᤧᤱᤜᤠ᤹ᤃ ᤀᤠᤳᤋᤠᤳᤋᤠᤴᤏᤣ ᤕᤧ᤺ᤱᤄᤠ ᤁᤢᤀᤡᤛᤡ᤺ᤰ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤔᤧᤈᤥ᤺ᤰᤗᤥ॥
REV 20:9 ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠ ᤂᤠᤶᤒᤣ᤺ᤰᤔᤠᤴ ᤛᤡᤍᤧᤵ ᤔᤧᤍᤧᤵᤋᤢᤖ ᤔᤧᤒᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤢᤒᤠ ᤕᤧᤰᤕᤰᤁᤡᤴ ᤔᤧᤃᤒᤢᤖᤥ॥ ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡᤖᤠ᤺ᤰ ᤌᤩᤧᤀᤠᤱ ᤂᤧᤱᤜᤠ᤹ ᤗᤠᤒᤢ ᤛᤧᤖᤢᤛᤡᤖᤥ॥
REV 20:10 ᤜᤧᤰᤁᤩᤠᤱ ᤂᤢᤏᤡ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤔᤠᤑᤧᤴᤛᤠᤶᤔᤡᤴ ᤔᤡᤖᤠ᤺ᤰ ᤏᤢ ᤁᤠᤴᤎᤠᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤢᤖᤥ॥ ᤂᤧᤵᤔᤥᤃ ᤁᤡᤵᤔᤠ ᤁᤧᤄᤢ᤺ᤒᤠ ᤌᤰᤛᤠ᤺ᤴ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤧᤴᤏᤠᤱ ᤋᤃᤡᤛᤠ ᤗᤠᤵᤔᤧᤓᤢᤛᤢᤛᤡᤀᤠᤱ ᤕᤠᤃᤧᤳᤇᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤛᤧᤴᤍᤡᤰ ᤗᤧᤴᤍᤡᤰ ᤛᤍᤠᤍᤡᤱ ᤂᤧᤵᤔᤥ ᤋᤢᤰᤂᤣ ᤔᤧᤈᤠᤖᤥ॥
REV 20:11 ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤕᤶ ᤕᤶᤒᤠ ᤑ᤺ᤃᤧᤗ᤹ᤒᤠ ᤜᤠᤱᤕᤢᤰᤏᤠ᤺ᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠᤴ ᤏᤡ᤺ᤛᤢᤱᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤂᤢᤏᤧ᤹ ᤁᤢᤍᤃᤡᤗᤠᤶ ᤂᤧᤳᤏᤧᤳᤇᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤏᤡ᤺ᤔᤧᤍᤧᤳᤋᤧᤳᤇᤡᤴᤗᤥ॥
REV 20:12 ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤶᤒᤠ ᤆᤢᤰᤐᤠ ᤁᤠᤰ ᤁᤧᤛᤡ᤺ᤒᤠᤜᤠ᤹ ᤂᤧᤴ ᤜᤠᤱᤕᤢᤰᤏᤠ ᤋᤃᤡ ᤔᤧᤕᤧᤒᤧᤒᤠ ᤏᤡ᤺ᤛᤢᤛᤡᤱ. ᤜᤧᤰᤁᤩᤠᤱ ᤂᤧᤵᤔᤥ ᤛᤠᤵᤐᤴᤜᤠ᤹ ᤔᤧᤜᤴᤍᤧ॥ ᤂᤧᤵᤔᤥ ᤘᤣ᤹ ᤛᤠᤵᤐᤴᤎᤡᤰᤁᤠᤱ ᤜᤴᤍᤧ॥ ᤂᤧᤱᤃ ᤜᤡᤱᤔᤴᤗᤧᤴ ᤛᤠᤵᤐᤴᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤠᤵᤐᤴᤜᤠ᤹ᤀᤥ ᤛᤠᤵᤋᤧᤀᤠᤱ ᤐᤳᤇᤧᤒᤠ ᤁᤧᤛᤡ᤺ᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤂᤢᤏᤡ᤹ ᤂᤠᤛᤧᤴ ᤐᤥ᤺ᤰᤂᤧᤖᤥ॥
REV 20:13 ᤜᤧᤰᤁᤩᤠᤱ ᤘᤠᤜᤱᤅᤡᤸᤗᤧᤀᤠᤱ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤛᤡ᤺ᤒᤠᤜᤠ᤹ ᤏᤢ᤺ᤰᤋᤢᤛᤡᤖᤥ॥ ᤛᤡ᤺ᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤸᤗᤧᤀᤠᤱ ᤂᤢᤴᤇᤡ᤹ᤀᤥ ᤁᤧᤘᤠ᤹ᤒᤠ ᤁᤧᤛᤡ᤺ᤒᤠᤜᤠ᤹ ᤏᤢ᤺ᤰᤋᤧᤳᤇᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰ ᤁᤧᤖᤧᤰᤗᤧᤴ ᤂᤠᤛᤧᤴ ᤐᤥ᤺ᤰᤂᤧᤖᤥ॥
REV 20:14 ᤜᤧᤰᤁᤩᤠᤱ ᤛᤡ᤺ᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤴ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤧᤳᤇᤡᤖᤥ॥ ᤁᤴ ᤔᤡᤖᤠ᤺ᤰ ᤗᤢᤶᤒᤠ᤺ᤳᤋᤡᤱᤃ ᤏᤡᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤥ॥
REV 20:15 ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤂᤢᤴᤇᤡ᤹ ᤔᤡᤱ ᤔᤧᤶᤒᤵᤔᤏᤠᤒᤠᤜᤠ᤹ ᤁᤧᤖᤧᤰ ᤔᤡᤖᤠ᤺ᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢ᤺ᤛᤧᤖᤥ॥
REV 21:1 ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤢᤛᤱ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤁᤢᤛᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤡ᤺ᤛᤢᤱᤛᤡᤱ. ᤌᤣᤀᤠᤱᤓᤧᤸᤗᤧ ᤋᤃᤡᤒᤠ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤰᤂᤧ ᤐᤣᤀᤠᤱ ᤋᤢᤶᤒᤥᤍᤡᤱ ᤘᤠᤜᤱᤅᤡᤴᤏᤠᤱ ᤔᤧᤏᤧᤛ᤻ᤛᤧᤴᤗᤥ॥
REV 21:2 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣ ᤕᤧᤰᤕᤰ. ᤁᤢᤛᤱ ᤕᤖᤢᤛᤗᤧᤶᤔᤡᤴ. ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤱᤃᤪᤠᤶᤐᤣᤍᤠᤱᤏᤢ ᤕᤧ᤺ᤖ ᤐᤳᤇᤧᤒᤠ ᤏᤡ᤺ᤛᤢᤱ॥ ᤂᤧᤱᤃ ᤏᤠᤗᤡᤛᤠᤱᤅᤡᤴ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤏᤢ᤺ᤒ᤻ ᤏᤢ᤺ᤒᤠ ᤘᤠ᤺ᤳᤋᤡ ᤏᤢ ᤆᤠᤱᤜᤠ᤹ᤖᤧ ᤕᤠᤖᤡᤵ ᤆᤥ᤺ᤰᤔᤏᤠᤔᤠ ᤛᤡᤛᤠᤔᤣ᤺ᤳ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥
REV 21:3 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤀᤥᤗᤠᤶ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤒᤠ ᤂᤧᤵᤛᤢᤱᤗᤥ. “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤘᤠ᤹ᤔᤠ ᤋᤧᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤏᤢ ᤛᤥᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤘᤠ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤢᤛᤣᤛᤣ ᤕᤠᤵᤔᤡ ᤔᤧᤒᤥ᤺ᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤂᤧᤱᤜᤠ᤹ᤏᤢ ᤘᤠ᤹ᤀᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥ᤺ᤱᤗᤥ॥
REV 21:4 ᤂᤢᤏᤧ᤹ ᤁᤧᤖᤧᤰᤗᤧ ᤂᤢᤏᤡ᤹ ᤔᤡᤰᤁᤥᤗᤠᤶ ᤔᤡᤰᤘᤠ᤺ᤴ ᤋᤢᤃᤢ ᤐᤡᤖᤢᤛᤡ᤹॥ ᤀᤠᤳᤋᤡᤴᤏᤠᤱ ᤕᤠᤶᤔᤥ ᤔᤧᤴᤇᤡ᤺ᤏᤧᤴ. ᤔᤣᤖᤡᤱ ᤔᤧᤴᤎᤰᤏᤧᤴ. ᤔᤧᤴᤜᤠ᤺ᤵᤏᤧᤴ. ᤔᤧᤴᤍᤢᤰᤏᤧᤴ ᤔᤧᤴᤕ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤋᤃᤡᤒᤠ ᤐᤠ᤺ᤴᤜᤠ᤹ᤃ ᤗᤧᤰᤋᤧᤒᤣᤖᤥ॥”
REV 21:5 ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤀᤥᤔᤧᤳᤋᤧ᤹. ᤁᤠᤰ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤁᤢᤛᤱ ᤆᤥᤃᤢᤱᤗ ᤐᤳᤋᤠᤖᤥ॥” ᤜᤧᤰᤁᤩᤠᤱ ᤀᤰᤂᤣᤀᤠᤱ ᤔᤧᤳᤋᤠᤱ. “ᤁᤴ ᤐᤠ᤺ᤴᤜᤠ᤹ ᤛᤠᤵᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤜᤠ᤹ᤃ ᤏᤛᤠ᤺ᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤛᤧᤰᤂᤠᤒᤠ ᤆᤥ᤺ᤰᤗᤥ॥”
REV 21:6 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤁᤠᤰ ᤐᤥ᤺ᤰᤂᤧ ᤆᤢᤖᤧᤖᤥ᥄ ᤀᤸᤑᤠ ᤏᤢ ᤀᤥᤔᤣᤃᤠ ᤀᤡᤱᤃᤠ᤹ᤀᤣᤖᤥ. ᤋᤥᤗᤡᤱᤛᤥᤔᤢ ᤏᤢ ᤁᤢᤏᤢᤵᤔᤠᤴ ᤀᤡᤱᤃᤠ᤹ᤀᤣᤖᤥ॥ ᤜᤠ᤺ᤳ ᤀᤠᤱᤃᤢᤃᤧᤴ ᤘᤠᤔᤡ᤺ᤰᤔᤠᤸᤗᤧ ᤋᤖᤢ᤹. ᤂᤧᤴ ᤀᤡᤱᤃᤠ᤹ ᤁᤢᤔᤧᤸᤗᤢᤱ ᤔᤧ᤺ᤴᤏᤣᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤸᤗᤧ ᤘᤠᤒᤢᤴᤗᤠᤶ ᤌᤢᤱᤔᤠ ᤐᤡᤖᤢᤱᤗᤥ॥
REV 21:7 ᤜᤠ᤺ᤳᤗᤧ ᤏᤠ᤺ᤴᤍᤢ᤹. ᤂᤧᤸᤗᤧ ᤁᤴ ᤁᤠᤰ ᤔᤢ᤹ᤀᤡᤛᤠᤶᤜᤠ᤹ ᤂᤥ᤺ᤛᤢ᤹ᤖᤥ॥ ᤀᤡᤱᤃᤠ᤹ ᤂᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤐᤥ᤺ᤱᤅᤠᤀᤠᤱ ᤂᤧᤴ ᤀᤡᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ᤺ ᤐᤥ᤺ᤱᤗᤥ॥
REV 21:8 ᤁᤖ ᤁᤡᤛᤪᤢᤰᤐᤠᤜᤠ᤹. ᤏᤛᤠ᤺ᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹. ᤑᤧᤰᤁᤧᤗᤠ᤹ᤒᤠᤜᤠ᤹. ᤔᤏᤠ ᤁᤧᤛᤧᤵᤐᤠᤜᤠ᤹. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤑᤧᤴᤛᤠᤶ ᤔᤢᤴᤎᤢᤶ ᤁᤧᤏᤠ᤺ᤵᤐᤠᤜᤠ᤹. ᤏᤠᤘᤠᤀᤡᤳᤗᤠ ᤛᤣᤘᤠ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤘᤠ᤹ᤔᤠᤍᤧᤱᤃ ᤁᤠᤴᤎᤠᤰ ᤏᤢ ᤔᤡ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤗᤢᤶᤒᤠ᤺ᤳᤋᤥ ᤐᤥ᤺ᤱᤗᤥ॥ ᤂᤧᤱᤃ ᤏᤡᤛᤡᤃᤣ᤺ᤰᤐᤠ ᤛᤡ᤺ᤔᤧᤴᤗᤥ॥”
REV 21:9 ᤜᤧᤰᤁᤩᤠᤱ ᤁᤢᤏᤢᤵᤔᤥᤒᤠ ᤏᤢᤛᤡ ᤔᤡᤴᤍᤣ᤹ᤜᤠ᤹ᤖᤧᤴ ᤏᤢᤛᤡ ᤂᤥᤷᤕᤠ ᤁᤧᤒᤱᤒᤠ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤀᤥ ᤌᤡᤰᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤑᤧᤖᤧ᤹. ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤔᤣᤗᤡᤱᤃᤧᤴ ᤁᤢᤔᤣ᤺ᤳ ᤁᤧᤒᤥ᤺ᤱᤔᤠ ᤛᤡᤛᤠᤔᤣ᤺ᤳᤋᤡᤴ ᤀᤥᤛᤣ᤺ᤴᤎᤠᤰᤏᤧ᤹ᤖᤥ॥”
REV 21:10 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤠᤱᤅᤠᤱ ᤐᤕᤶ ᤕᤶᤒᤠ ᤁᤣ᤺ᤶᤒᤠ ᤁᤥ᤺ᤰᤔᤠ ᤛᤶᤍᤠᤱ ᤐᤰᤂᤠᤱ ᤋᤣ᤹ᤖᤠᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤱᤃᤪᤠᤶᤐᤣᤍᤠᤱᤏᤢ ᤕᤧ᤺ᤖ ᤐᤳᤇᤧᤒᤠ ᤛᤣᤛᤣ ᤕᤧᤰᤕᤰ ᤕᤖᤢᤛᤗᤧᤶᤔᤡᤴ ᤀᤥᤛᤣ᤺ᤴᤎᤠᤰᤋᤠᤱᤗᤥ॥
REV 21:11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤧᤴ ᤁᤢᤎᤡᤶ ᤆᤥᤃᤧ. ᤜᤧᤰᤁᤩᤠᤱ ᤔᤠᤱᤗᤢᤱ ᤏᤢ ᤛᤧᤖᤢᤶᤗᤢᤱ ᤁᤢᤀᤡᤛᤡ᤺ᤰᤐᤠ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤆᤥᤃᤧᤖᤥ॥
REV 21:12 ᤜᤧᤰᤁᤩᤠᤱ ᤂᤧ᤹ᤕᤥ ᤌᤡᤰ-ᤏᤧᤳ ᤋᤠ᤺ᤰᤜᤴᤜᤠ᤹ ᤁᤧᤒᤵᤐᤠ ᤕᤶᤒᤠ ᤁᤣ᤺ᤶᤒᤠ ᤗᤢᤱᤎᤠᤰ ᤕᤧᤒᤧᤖᤥ॥ ᤂᤧᤴ ᤋᤠ᤺ᤰᤜᤴᤜᤠ᤹ᤀᤥ ᤌᤡᤰ-ᤏᤧᤳ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤋᤠ᤺ᤰᤜᤴᤜᤠ᤹ᤀᤥ ᤀᤡᤛᤪᤠᤀᤡᤗᤖᤧᤴ ᤌᤡᤰ-ᤏᤧᤳ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤔᤧᤛᤠᤵᤋᤢᤀᤠᤱ ᤐᤳᤇᤧ॥
REV 21:13 ᤜᤧᤰᤁᤩᤠᤱ ᤏᤠᤶᤃᤧᤴ ᤗᤧᤵᤔᤠᤱ ᤛᤢᤶᤛᤡ. ᤏᤠᤶᤎᤠ ᤗᤧᤵᤔᤠᤱ ᤛᤢᤶᤛᤡ. ᤌᤠᤱᤃᤧᤳ ᤗᤧᤵᤔᤠᤱ ᤛᤢᤶᤛᤡ. ᤜᤧᤰᤁᤩᤠᤱ ᤗᤠᤱᤃᤧᤳ ᤗᤧᤵᤔᤠᤱ ᤛᤢᤶᤛᤡ ᤋᤠ᤺ᤰᤜᤴᤜᤠ᤹ ᤔᤧᤒᤳᤇᤧᤖᤥ॥
REV 21:14 ᤂᤧᤴ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤸᤗᤧ ᤌᤡᤰ-ᤏᤧᤳ ᤁᤢᤏᤧ᤺ᤶᤓᤥ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤴ ᤛᤶᤍᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤌᤡᤰ-ᤏᤧᤳ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤐᤳᤇᤧᤖᤥ॥
REV 21:15 ᤀᤡᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤜᤢᤰᤁᤥ ᤕᤧᤰᤕᤰᤁᤡᤴ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤋᤠ᤺ᤰᤜᤴᤜᤠ᤹ ᤏᤢ ᤗᤢᤱᤎᤠᤰᤜᤠ᤹ ᤛᤡ᤺ᤰᤔᤠ ᤑᤠ᤹ᤀᤠᤱ ᤛᤠᤶᤔᤩᤠᤱᤅᤡᤸᤗᤧᤴ ᤁᤢᤛᤡ᤺ᤰᤔᤠ ᤋᤰᤁᤠ᤺ᤳᤋᤡᤴ ᤁᤳᤋᤢᤖᤥ॥
REV 21:16 ᤂᤧᤴ ᤕᤧᤰᤕᤰᤁᤡᤱᤃ ᤗᤡᤛᤡ ᤁᤢᤛᤢᤰᤐᤠ ᤁᤧᤒᤵᤐᤠ ᤆᤥᤃᤧᤖᤥ॥ ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤏᤢ ᤁᤢᤓᤧᤖᤧ᤺ᤱᤃ ᤁᤢᤍᤱᤒᤠ ᤆᤥᤃᤧᤖᤥ॥ ᤂᤧᤴ ᤁᤢᤛᤡ᤺ᤰᤔᤠᤸᤗᤧ ᤛᤡ᤺ᤰᤋᤢᤸᤗᤧ ᤂᤧᤱᤃ ᤜᤧᤴᤇᤡᤱ ᤏᤧᤳᤇᤡᤀᤠᤱ ᤁᤡᤵ ᤗᤡᤛᤡ (᥈᥊᥆᥆) ᤁᤡᤗᤥᤔᤡᤋᤖ ᤏᤧᤛ᤻ᤛᤧᤖᤥ॥ ᤂᤧᤸᤗᤧ ᤁᤢᤗᤠᤶᤋᤡ. ᤁᤢᤓᤧᤖᤧ ᤏᤢ ᤁᤢᤗᤡᤱᤃᤧᤴᤏᤡᤴᤏᤠᤱ ᤁᤢᤍᤱᤒᤠ ᤆᤥᤃᤧᤖᤥ॥
REV 21:17 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤗᤢᤱᤎᤠᤰᤁᤡᤴ ᤛᤡ᤺ᤰᤋᤢ. ᤜᤧᤰᤁᤣ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤥᤃᤵ ᤔᤧᤈᤥᤃᤢᤒᤠ ᤁᤢᤛᤡ᤺ᤰᤔᤠᤴ ᤁᤢᤀᤡᤛᤡ᤺ᤰ ᤂᤧᤴ ᤁᤡᤵᤌᤡᤰᤁᤠᤱ ᤗᤡ-ᤗᤡ (᥇᥊᥊) ᤜᤢᤰᤛᤡᤰ ᤏᤧᤛ᤻ᤛᤧᤖᤥ॥
REV 21:18 ᤂᤧᤴ ᤗᤢᤱᤎᤠᤰᤁᤡᤱᤃ ᤔᤠᤱᤗᤢᤱᤗᤧᤴ ᤔᤧᤈᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤧᤰᤕᤰᤁᤡᤱᤃ ᤏᤢ᤺ᤒᤠ ᤛᤠᤶᤔᤩᤠᤱ ᤛᤧᤸᤗᤧᤱᤄᤥ ᤁᤢᤀᤡᤛᤡ᤺ᤰ ᤁᤧᤗᤧᤰᤐᤠ ᤆᤥᤃᤧᤖᤥ॥
REV 21:19 ᤗᤢᤱᤎᤠᤰᤁᤡᤸᤗᤧ ᤁᤢᤏᤧ᤺ᤶᤓᤥᤀᤥᤃ ᤕᤖᤡᤰ ᤐᤖᤡᤰᤗᤧᤴ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤔᤧᤓᤳᤇᤢᤀᤠᤱ ᤐᤳᤇᤧ॥ ᤌᤡᤰᤛᤡᤃᤣ᤺ᤰᤐᤧᤴ ᤛᤧᤖᤢᤶᤗᤢᤱ. ᤏᤡᤛᤡᤃᤣ᤺ᤰᤐᤧᤴ ᤁᤢᤓᤡᤱᤗᤢᤱ. ᤛᤢᤶᤛᤡᤃᤣ᤺ᤰᤐᤧᤴ ᤁᤢᤜᤧ᤺ᤳᤗᤢᤱ. ᤗᤡᤛᤡᤃᤣ᤺ᤰᤐᤧᤴ ᤗᤢᤱᤛᤣ᤺ᤰᤁᤢᤶ.
REV 21:20 ᤅᤠᤛᤡᤃᤣ᤺ᤰᤐᤧᤴ ᤔᤢᤎᤡᤱᤗᤢᤱ. ᤋᤢᤰᤛᤡᤃᤣ᤺ᤰᤐᤧᤴ ᤗᤢᤱᤛᤧᤖᤢᤶᤒᤠ. ᤏᤢᤛᤡᤃᤣ᤺ᤰᤐᤧᤴ ᤀᤶᤗᤧᤱᤗᤢᤱ. ᤕᤧᤳᤇᤡᤃᤣ᤺ᤰᤐᤧᤴ ᤗᤢᤱᤔᤡᤱ. ᤑᤠᤱᤛᤡᤃᤣ᤺ᤰᤐᤧᤴ ᤁᤢᤖᤡᤱᤗᤢᤱ. ᤌᤡᤒᤥ᤺ᤱ ᤛᤡᤃᤣ᤺ᤰᤐᤧᤴ ᤁᤢᤜᤡ᤺ᤰᤗᤢᤱ. ᤌᤡᤰ-ᤌᤡᤰ ᤛᤡᤃᤣ᤺ᤰᤐᤧᤴ ᤑᤢ᤺ᤳᤋᤠᤱᤗᤢᤱ. ᤜᤧᤰᤁᤩᤠᤱ ᤌᤡᤰ-ᤏᤧᤳ ᤛᤡᤃᤣ᤺ᤰᤐᤧᤴ ᤜᤧ᤺ᤰᤁᤱᤗᤢᤱᤅᤡᤸᤗᤧᤴ ᤔᤧᤈᤥᤃᤢᤀᤠᤱ ᤘᤕᤧᤖᤥ॥
REV 21:21 ᤂᤧᤵᤔᤥ ᤌᤡᤰ-ᤏᤧᤳ ᤋᤠ᤺ᤰᤜᤴᤜᤠ᤹ᤃ ᤌᤡᤰ-ᤏᤧᤳ ᤋᤧᤰᤛᤣ᤺ᤰᤗᤧᤴ ᤘᤕᤧ–ᤗᤳᤇᤠ ᤋᤠ᤺ᤰᤜᤴᤏᤡᤴ ᤗᤳᤇᤠ ᤋᤧᤰᤛᤣ᤺ᤰᤁᤡᤸᤗᤧ ᤆᤥᤃᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤔᤠᤖᤠᤶᤔᤡᤱᤃ ᤛᤧᤸᤗᤧᤱᤄᤥ ᤁᤢᤀᤡᤛᤡ᤺ᤰ ᤁᤧᤗᤧᤰᤐᤠ ᤏᤢ᤺ᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤆᤥᤃᤧᤖᤥ॥
REV 21:22 ᤀᤡᤱᤃᤠ᤹ ᤂᤧᤴ ᤕᤧᤰᤕᤰ ᤛᤡᤃᤠᤱ ᤔᤠᤱᤜᤡᤶᤔᤡᤴ ᤔᤧᤴᤏᤡ᤺ᤒᤠᤴᤗᤥ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤴᤏᤣ ᤂᤧᤴ ᤕᤧᤰᤕᤰᤁᤥᤒᤠ ᤔᤠᤱᤜᤡᤶᤗᤥ॥
REV 21:23 ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤧᤎᤥ᤹ᤒᤠ ᤏᤠᤶ ᤏᤢ ᤗᤠᤒᤠ ᤌᤣᤀᤠᤱ ᤆᤠᤜᤠᤒᤠ ᤔᤧᤈᤥᤃᤧᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧᤀᤣ ᤂᤧᤴ ᤕᤧᤰᤕᤰᤁᤡᤴ ᤌᤥ᤹ᤖᤢᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤣᤔᤡ᤺ᤱᤃ ᤔᤧᤸᤗᤢᤰᤛᤠ᤺ᤴᤏᤣᤖᤥ॥
REV 21:24 ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤌᤥ᤹ᤖᤢᤒᤠ ᤀᤥ᤺ᤳᤋᤡᤀᤥ ᤔᤧᤘᤠ᤹ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤅᤡᤴ ᤂᤧᤵᤔᤥ ᤔᤧᤍᤠᤖᤢ᤹॥
REV 21:25 ᤂᤧᤴ ᤕᤧᤰᤕᤰᤁᤡᤸᤗᤧᤴ ᤋᤠ᤺ᤰᤜᤴᤏᤡᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤛᤢᤵᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤛᤧᤴᤍᤡᤰ ᤜᤥ᤺ᤵᤗᤥ॥
REV 21:26 ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱᤅᤡᤴ ᤏᤢ ᤂᤢᤏᤡ᤹ ᤔᤡᤔᤡᤍᤡᤱᤅᤡᤴ ᤂᤧᤴ ᤕᤧᤰᤕᤰᤁᤥ ᤔᤧᤍᤠᤖᤢ᤹॥
REV 21:27 ᤂᤧᤵᤔᤥᤃ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤜᤡᤱᤔᤴᤏᤡᤸᤗᤧᤴ ᤛᤠᤵᤐᤴᤏᤥ ᤔᤡᤱ ᤛᤠᤵᤋᤧᤀᤠᤱ ᤁᤧᤒᤵᤐᤠᤜᤠ᤹ᤖᤰ ᤔᤧᤗᤠ᤺ᤳᤗᤥ॥ ᤁᤖ ᤀᤠᤛᤢᤳᤌᤥ ᤐᤠ᤺ᤴ ᤏᤢ ᤛᤡᤰᤁᤧᤗᤧ᤺ᤱᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ ᤀᤠᤳᤋᤡᤴᤏᤠᤱ ᤂᤧᤴ ᤕᤧᤰᤕᤰᤁᤥ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥
REV 22:1 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤃᤠ᤹ ᤔᤠᤱᤗᤢᤱ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤕᤱᤄᤱᤅᤡᤴ ᤀᤥᤛᤣ᤺ᤴᤎᤠᤰᤋᤠᤱᤗᤥ॥ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤱᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠᤖᤥ॥ ᤂᤧᤴ ᤕᤱᤄᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤜᤠᤱᤕᤢᤰᤏᤠᤗᤠᤶ ᤘᤃᤢᤛᤧᤖ
REV 22:2 ᤂᤧᤴ ᤕᤧᤰᤕᤰᤁᤥᤒᤠ ᤔᤠᤖᤠᤶ ᤗᤢᤶᤔᤥ ᤕᤧᤖᤥ॥ ᤕᤱᤄᤱᤅᤡᤸᤗᤧ ᤁᤢᤕᤠᤀᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤡᤴ ᤕᤢᤅᤧᤖᤥ॥ ᤂᤧᤴ ᤛᤡᤱᤒᤢᤱᤅᤥ ᤋᤱᤒᤣ ᤗᤠᤘᤠ ᤌᤡᤰ-ᤏᤧᤳ ᤐᤖᤡᤰᤗᤧᤴ ᤛᤡᤱᤛᤣᤜᤠ᤹ ᤌᤥ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤛᤡᤱᤒᤢᤱᤅᤡᤸᤗᤧ ᤁᤢᤓᤧᤰᤘᤠᤜᤠ᤹ᤃ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤘᤣ᤺ᤶᤒᤠ ᤛᤡᤍᤠ᤹ ᤆᤥᤃᤧᤖᤥ॥
REV 22:3 ᤂᤧᤴ ᤕᤧᤰᤕᤰᤁᤥ ᤀᤠᤸᤗᤀᤠᤱᤎᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤍᤠ᤺ᤰᤋᤢᤴᤇᤡᤴᤒᤠ ᤗᤳᤇᤠᤀᤠᤱ ᤔᤧᤜᤥ᤺ᤵᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤜᤠᤱᤕᤢᤰᤏᤠ᤺ᤴ ᤂᤧᤵᤔᤥ ᤐᤥ᤺ᤱᤗᤥ. ᤜᤧᤰᤁᤩᤠᤱ ᤁᤢᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤛᤣᤘᤠ ᤔᤧᤈᤥᤃᤢ᤹ᤖᤥ॥
REV 22:4 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ᤺ᤴ ᤔᤧᤏᤡ᤺ᤛᤢ᤹. ᤜᤧᤰᤁᤩᤠᤱ ᤁᤢᤔᤡᤱᤅᤡᤴ ᤂᤢᤏᤡ᤹ ᤋᤥᤘᤠᤒᤥ ᤛᤠᤵᤋᤧᤀᤠᤱ ᤐᤳᤗᤥ॥
REV 22:5 ᤂᤧᤵᤔᤥ ᤕᤠᤶᤔᤥ ᤛᤧᤴᤍᤡᤰ ᤔᤧᤒᤥ᤺ᤱᤏᤧᤴ. ᤜᤧᤰᤁᤩᤠᤱ ᤌᤥ᤹ᤔᤠᤖᤧ ᤗᤠᤃᤡ ᤛᤣᤔᤡ ᤏᤢ ᤏᤠᤶᤛᤠᤱᤅᤠᤱ ᤆᤠᤜᤠᤒᤠ ᤔᤧᤈᤥ᤺ᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤂᤢᤏᤡ᤹ ᤀᤥ᤺ᤳᤋᤡ ᤐᤥ᤺ᤱ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤍᤠᤍᤡᤱ ᤜᤠᤱ ᤔᤧᤈᤥᤃᤢ᤹ᤖᤥ॥
REV 22:6 ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤃᤠ᤹ ᤔᤧᤳᤋᤠᤱ. “ᤁᤴ ᤐᤠ᤺ᤴᤈᤠᤰᤜᤠ᤹ ᤋᤠ᤺ᤰᤐᤥ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤛᤧᤰᤂᤠᤒᤠ ᤆᤥ᤺ᤰᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤜᤠ᤹ ᤛᤣᤛᤣᤔᤠᤱ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤜᤠ᤹ ᤀᤠᤸᤗ ᤜᤠᤖᤠᤀᤣ ᤐᤥ᤺ᤱᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤁᤢᤔᤠᤱᤗᤠᤀᤡᤱᤒᤧᤴ ᤐᤠᤱᤄᤢ ᤕᤢ᤺ᤛᤢᤖᤥ॥”
REV 22:7 ᤕᤧᤛᤢᤖᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖᤥ᥄ ᤜᤧᤰᤁᤩᤠᤱ ᤁᤴ ᤛᤠᤵᤐᤴᤏᤥ ᤁᤧᤒᤵᤐᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ॥”
REV 22:8 ᤀᤡᤱᤃᤠ᤹ ᤕᤢᤜᤢᤴᤏᤠᤖᤧ ᤁᤴ ᤐᤠ᤺ᤴᤜᤠ᤹ ᤏᤡ᤺ᤛᤢᤱ ᤂᤧᤵᤛᤢᤱᤗᤥ॥ ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤏᤡ᤺ᤛᤢᤱ ᤂᤧᤵᤛᤢᤱᤅᤡᤸᤗᤧ ᤁᤴ ᤐᤠ᤺ᤴᤜᤠ᤹ ᤕᤠᤵᤔᤡ ᤀᤥᤛᤣ᤺ᤴᤃᤧᤎᤠᤰᤐᤠ ᤔᤠᤱᤗᤠᤀᤡᤱᤒᤠᤴ ᤛᤣᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤢᤗᤠᤱᤈᤰᤐᤥ ᤛᤠᤶᤒᤥ᤺ᤴ ᤜᤒᤳ ᤑᤴᤇᤡᤱᤅᤠᤱᤗᤥ॥
REV 22:9 ᤁᤖ ᤂᤧᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤀᤡᤱᤃᤠ᤹ ᤛᤣᤘᤠ ᤔᤧᤈᤥᤃᤠᤱᤅᤡᤴᤏᤧ᤹᥄ ᤀᤡᤱᤃᤠ᤹ᤃ ᤂᤧᤏᤧ᤹ ᤁᤢᤀᤡᤛᤡ᤺ᤰ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤁᤧᤶᤓᤢ᤹ ᤁᤧᤴᤛᤠ᤹ᤛᤡ ᤏᤢ ᤁᤴ ᤛᤠᤵᤐᤴᤏᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤘᤠᤖᤥᤒᤠᤀᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤛᤣᤘᤠ ᤆᤥᤃᤧ᤹ᤀᤥ᥄”
REV 22:10 ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. “ᤁᤴ ᤛᤠᤵᤐᤴᤏᤥᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤜᤠ᤹ ᤔᤧᤔᤠ᤹ᤖᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤠᤰ ᤐᤠ᤺ᤴᤜᤠ᤹ ᤁᤧᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥
REV 22:11 ᤜᤠᤖᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤣ ᤔᤧᤈᤥᤃᤢᤖᤖᤥ. ᤁᤧᤈᤡ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤈᤡ᤺ᤴᤇᤡᤱᤗ ᤔᤧᤘᤠ᤹ᤖᤖᤥ. ᤁᤖ ᤛᤠᤶᤕᤥᤏᤡᤒᤠᤜᤠ᤹ᤖᤧ ᤛᤠᤶᤕᤥᤏᤡᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤜᤧᤰᤁᤩᤠᤱ ᤛᤣᤛᤣᤒᤠᤜᤠ᤹ ᤛᤣᤛᤣᤀᤣ ᤔᤧᤘᤠ᤹ᤏᤡᤖᤥ॥”
REV 22:12 ᤕᤧᤛᤢᤖᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤧ᤹ᤀᤥ. ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖᤥ᥄ ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰ ᤁᤢᤀᤡᤛᤡ᤺ᤰᤁᤣ ᤂᤢᤶᤍᤡᤱᤅᤡᤴ ᤏᤢ ᤜᤠᤱᤛᤧᤶᤔᤡᤴ ᤐᤡᤖᤢᤱᤛᤡᤱᤗᤥ॥
REV 22:13 ᤀᤡᤱᤃᤠ᤹ ᤀᤸᤑᤠ ᤏᤢ ᤀᤥᤔᤣᤃᤠ. ᤋᤃᤡᤒᤠ ᤏᤢ ᤀᤣᤃᤠᤱᤒᤠ. ᤜᤧᤰᤁᤩᤠᤱ ᤁᤢᤜᤣ᤺ᤰᤛᤡᤱᤔᤠ ᤏᤢ ᤁᤢᤏᤢᤵᤔᤠᤀᤠᤖᤥ॥
REV 22:14 ᤜᤧᤰᤁᤩᤠᤱ ᤂᤢᤏᤡ᤹ ᤋᤣ᤺ᤳᤜᤠ᤹ ᤛᤣᤛᤣ ᤗ᤹ᤖᤡᤰ ᤘᤠᤃᤧᤜᤵᤐᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤋᤠ᤺ᤰᤜᤴᤜᤠ᤹ᤀᤥᤗᤠᤶ ᤕᤧᤰᤕᤰᤁᤥ ᤗᤠ᤺ᤵᤔᤠ ᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤥᤗᤠᤶ ᤆᤠᤔᤠ ᤕᤢᤰ ᤔᤧᤄᤥ᤺ᤛᤢ᤹ᤖᤥ॥
REV 22:15 ᤁᤖ ᤁᤥ᤺ᤳᤆᤥ ᤜᤧᤰᤋᤱᤒᤠ ᤕᤧᤵᤗᤧᤰ ᤁᤧᤃᤵᤐᤠᤜᤠ᤹. ᤏᤡᤱᤘᤠ᤹ ᤁᤧᤔᤠᤒᤠ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹. ᤆᤠᤃᤧᤖᤠᤶᤒᤠᤜᤠ᤹. ᤔᤏᤠ ᤁᤧᤛᤧᤵᤐᤠᤜᤠ᤹. ᤏᤠᤘᤠᤀᤡᤳᤗᤠ ᤔᤠᤱᤃᤧᤄ᤺ᤒᤠᤜᤠ᤹ ᤜᤧᤰᤁᤩᤠᤱ ᤁᤠᤰ ᤀᤡᤱᤗᤧᤰ ᤐᤠ᤺ᤵᤔᤠ ᤂᤢᤏᤡ᤹ ᤛᤡᤖᤠ᤹ ᤁᤧᤎᤠᤱᤒᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ ᤗᤠ᤺ᤰᤁᤠᤳᤋᤣ ᤔᤧᤘᤠ᤹ᤖᤥ॥
REV 22:16 ᤀᤡᤱᤃᤠ᤹ ᤕᤧᤛᤢᤖᤧ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤗᤠᤃᤡ ᤁᤴ ᤐᤠ᤺ᤴᤜᤠ᤹ ᤔᤧᤳᤇᤧ ᤀᤠᤔᤠᤱᤗᤠᤀᤡᤱᤒᤠᤴ ᤂᤡᤏᤡ᤹ᤀᤥ ᤐᤠᤱᤄᤢᤱᤅᤠᤱ ᤘᤠ᤹ᤀᤠᤖᤥ॥ ᤀᤡᤱᤃᤠ᤹ᤃ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤀᤠᤖᤥ. ᤜᤧᤰᤁᤩᤠᤱ ᤋᤠᤴᤇᤥ᤺ᤰᤐᤠᤀᤠᤖᤥ॥”
REV 22:17 ᤛᤣᤛᤣᤔᤠᤱᤅᤡᤴ ᤏᤢ ᤛᤡᤛᤠᤔᤣ᤺ᤳᤋᤡᤸᤗᤧ ᤐᤠ᤺ᤳᤇᤢ᤹. “ᤕᤧ᤹ᤀᤥ᥄” ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤁᤧᤄᤧᤶᤒᤠᤸᤗᤧᤀᤠᤱ “ᤕᤧ᤹ᤀᤥ᥄” ᤐᤠ᤺ᤳᤋᤢᤖᤥ॥ ᤀᤠᤳᤋᤡᤴ ᤀᤠᤱᤃᤢᤃᤧᤴ ᤘᤠᤔᤡ᤺ᤰᤔᤠᤸᤗᤧ ᤋᤖᤢᤀᤠᤱ ᤘᤠ᤹. ᤂᤧᤴ ᤋᤠᤖᤖᤥ॥ ᤀᤠᤳᤋᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤁᤢᤔᤧᤸᤗᤢᤱ ᤔᤧ᤺ᤴᤏᤣᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤴ ᤌᤢᤅᤢᤖᤖᤥ॥
REV 22:18 ᤁᤴ ᤛᤠᤵᤐᤴᤏᤥᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤄᤧᤶᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤡᤱᤃᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤗᤥ–ᤜᤠ᤺ᤳᤗᤧ ᤁᤴ ᤛᤠᤵᤐᤴᤏᤥ ᤌᤣᤀᤡ ᤕᤥ᤹ᤖᤢ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤁᤴ ᤛᤠᤵᤐᤴᤏᤥ ᤆᤧᤱᤔᤏᤠᤒᤠ ᤔᤡᤴᤍᤣ᤹ᤜᤠ᤹ ᤂᤧᤴ ᤁᤧᤕᤥ᤹ᤒᤠᤸᤗᤧ ᤁᤢᤛᤶᤍᤠᤱ ᤕᤥ᤹ᤖᤢᤖᤥ॥
REV 22:19 ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤴ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤸᤗᤧᤴ ᤛᤠᤵᤐᤴᤏᤥᤗᤠᤶ ᤌᤣᤀᤡ ᤂᤰᤋᤢ᤹. ᤁᤴ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤛᤡᤱᤒᤢᤱᤅᤥᤗᤠᤶ ᤜᤧᤰᤁᤩᤠᤱ ᤛᤣᤛᤣ ᤕᤧᤰᤕᤰᤁᤥᤗᤠᤶ ᤂᤧᤸᤗᤧ ᤂᤥ᤺ᤔᤠ ᤁᤧᤒᤥ᤺ᤱᤒᤠ ᤗᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤰᤋᤢ᤹ᤖᤥ॥
REV 22:20 ᤁᤴ ᤐᤠ᤺ᤴᤏᤡᤴ ᤛᤠ᤺ᤰᤂᤡ ᤁᤧᤒᤡᤒᤠᤸᤗᤧ ᤐᤠ᤺ᤳᤋᤢ᤹. “ᤛᤧᤰᤂᤠᤀᤣ ᤀᤡᤱᤃᤠ᤹ ᤜᤠᤖᤠᤀᤣ ᤕᤢ᤺ᤀᤠᤖᤥ॥” ᤀᤠᤔᤧᤴ᥄ ᤍᤠᤱᤒᤠ ᤕᤧᤛᤢᤀᤣ. ᤕᤧ᤹ᤀᤥ᥄
REV 22:21 ᤍᤠᤱᤒᤠ ᤕᤧᤛᤢᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ ᤁᤧᤖᤧᤰᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥
