﻿ᤛᤣ᤺ᤰᤕᤢᤰᤔᤡᤒᤠᤜᤠ᤹.
22.
“ᤀᤠᤍᤠᤱᤒᤠᤛᤣ. ᤀᤠᤶᤓᤢ᤹ ᤀᤠᤴᤛᤠ᤹ᤛᤣ. ᤂᤡᤏᤡ᤹ ᤋᤃᤡ ᤐᤠ᤺ᤳᤋᤢᤱᤒᤠ ᤀᤠᤏᤠᤱᤛᤡᤱᤔᤠ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥” 
ᤀᤰᤂᤣᤗ᤹ᤖᤡᤰ ᤜᤡᤒᤪᤢ ᤐᤠ᤺ᤴᤏᤥ ᤂᤢᤏᤧ᤹ ᤐᤠᤖᤧᤒᤠ ᤔᤧᤄᤧᤵᤛᤢᤀᤠᤱ ᤁᤠᤰ ᤛᤫᤠ᤺ᤳ ᤔᤧᤒᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤐᤠᤘᤗᤖᤧ ᤀᤰᤂᤣ ᤔᤧᤳᤋᤢᤛᤡ. 
“ᤀᤡᤱᤃᤠ᤹ ᤛᤡᤗᤡᤛᤡᤕᤠᤛ᤻ᤔᤠ ᤋᤠᤷᤛᤛ᤻ᤛᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤜᤢᤍᤡᤀᤠᤖᤥ. ᤁᤖ ᤒᤠ ᤁᤵᤔᤥ ᤕᤖᤢᤛᤗᤧᤶᤔᤥᤀᤣ ᤌᤠᤱᤒᤧᤴ ᤁᤧᤖᤠᤱᤅᤠᤱ ᤋᤢᤳᤋᤢᤃᤧᤴ ᤋᤢᤶᤔᤩᤠᤱᤜᤠᤱ ᤛᤡᤰᤛᤠᤶᤒᤠ ᤃᤔᤠᤗᤡᤕᤗᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤠᤱᤗᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤶᤕᤥᤌᤡᤶ ᤏᤢ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤏᤠ᤺ᤳᤋᤢ ᤔᤧᤕᤢᤖᤢᤒᤠ ᤛᤠᤰᤌᤡᤶᤜᤠ᤹ ᤁᤵᤔᤥ ᤜᤢ᤹ᤛᤡᤱᤅᤠᤱᤗᤥ॥ ᤀᤠᤀᤡᤴ ᤂᤡᤏᤡ᤹ ᤜᤧᤰᤁᤣᤀᤣ ᤀᤡᤱᤃᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤎᤠ᤺ᤱ ᤐᤡᤔᤠ ᤁᤢᤛᤡᤰ ᤁᤧᤛᤶᤒᤠ ᤘᤕᤠᤱᤗᤥ॥ 
ᤂᤧᤸᤗᤧ ᤆᤥᤃᤢᤸᤗᤧ ᤂᤧᤴ ᤍᤠᤱᤒᤠᤸᤗᤧ ᤁᤢᤗᤠᤶ ᤁᤧᤍᤡᤶᤒᤠᤜᤠ᤹ ᤛᤡ᤺ᤔᤧᤴ ᤌᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱ. ᤜᤧᤰᤁᤩᤠᤱ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ᤜᤠ᤹ ᤋᤧᤶᤛᤢᤱᤛᤡᤱᤅᤠᤱ ᤐᤢᤱᤗᤠ ᤜᤡᤶᤔᤥ ᤛᤠᤰᤋᤢᤱᤛᤡᤱᤗᤥ॥ 
ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤁᤠᤰ ᤕᤧᤈᤢᤶᤓᤥᤒᤠ ᤔᤏᤠᤜᤠ᤹ᤖᤣ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤗᤠᤶ ᤀᤡᤱᤃᤠ᤹ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤕᤜᤢᤍᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤧᤶᤔᤠ ᤕᤢᤰ ᤁᤧᤒᤡᤒᤠ ᤛᤰᤀᤡᤱᤄᤱᤜᤠ᤹ᤀᤠᤱ ᤂᤥ᤺ᤛᤢᤱᤅᤠᤱ ᤀᤡᤱᤃᤠ᤹ ᤂᤧᤵᤔᤥ ᤁᤴ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤕᤖᤢᤛᤗᤧᤶᤔᤥ ᤋᤧᤶᤔᤠ ᤋᤠ᤺ᤵᤔᤠᤛᤡᤀᤠᤱ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤍᤔᤛ᤻ᤁᤛᤀᤥ ᤐᤣᤃᤠᤱᤗᤥ॥ 
ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤗᤠᤶᤍᤡ᤺ᤰᤁᤥ ᤐᤣᤃᤠᤱᤗ ᤐᤳᤇᤠᤱᤅᤡᤸᤗᤧ ᤍᤔᤛ᤻ᤁᤛ ᤁᤢᤒᤣᤛᤠᤱ ᤁᤧᤖᤠᤱᤅᤡᤸᤗᤧ ᤗᤧᤴᤍᤡᤰ ᤐᤥ᤺ᤰᤂᤧᤖ ᤐᤳᤇᤧ. ᤂᤧᤵᤔᤥ ᤜᤰᤆᤄᤳ ᤋᤠᤱᤛᤠᤰᤐᤥᤗᤠᤶ ᤀᤡᤱᤃᤠ᤹ ᤀᤠᤄᤡᤖᤡ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤗᤧᤰᤋᤧᤖᤥ॥ 
ᤀᤡᤱᤃᤠ᤹ ᤂᤧᤵᤔᤥ ᤜᤷᤃᤢᤵ ᤆᤥ᤺ᤴᤍᤠᤱᤅᤡᤸᤗᤧ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. ‘ᤛᤠᤘᤗᤀᤣ. ᤛᤠᤘᤗᤀᤣ. ᤀᤡᤱᤃᤠ᤹ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅’ 
ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤛᤣ᤺ᤴᤍᤥᤛᤢᤱ ‘ᤂᤧᤏᤧ᤹ᤃ ᤜᤠ᤺ᤳᤏᤧᤒᤣ. ᤀᤠᤍᤠᤱᤒᤣ᥅’ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤏᤥᤃᤵ ᤐᤡᤖᤠᤱ. ‘ᤀᤡᤱᤃᤠ᤹ᤃ ᤋᤢᤰᤂᤣ ᤁᤧᤈᤠ᤺ᤳᤋᤢᤖ ᤁᤧᤘᤠ᤹ᤒᤠ ᤏᤠᤛᤖᤋᤒᤠ ᤕᤧᤛᤢᤀᤠᤖᤥ॥’ 
ᤂᤧᤵᤔᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤱᤃ ᤔᤧᤏᤡ᤺ᤛᤢ. ᤁᤖ ᤀᤡᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤀᤡᤰᤗᤠ᤺ᤴ ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ॥ 
ᤀᤡᤱᤃᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤱ. ‘ᤀᤠᤍᤠᤱᤒᤣ. ᤀᤠᤸᤗ ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠᤒᤣ᥅’ ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤔᤧᤳᤋᤠᤱ. ‘ᤐᤥᤃᤧ᤹ᤀᤠᤱ ᤍᤔᤛ᤻ᤁᤛᤀᤥ ᤐᤣᤃᤧ᤹॥ ᤂᤧᤵᤔᤥ ᤂᤧᤏᤧ᤹ ᤆᤥ᤺ᤰᤔᤠ ᤁᤧᤒᤥ᤺ᤱᤒᤠ ᤐᤠ᤺ᤴᤜᤠ᤹ ᤁᤢᤓᤠᤖᤧ ᤁᤧᤶᤔᤧᤳᤗᤥ॥’ 
ᤂᤧᤴ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤗᤧᤰᤋᤧᤒᤠᤸᤗᤧ ᤀᤠᤔᤡᤰᤁᤡᤴ ᤆᤧᤔᤢᤀᤠᤱ ᤂᤠᤏᤡ᤺ᤔᤠ ᤔᤧᤴᤇᤢᤰᤁᤣ ᤔᤡᤰᤑ᤺ᤶᤒᤠ ᤁᤢᤀᤡᤛᤡ᤺ᤰ ᤐᤥ᤺ᤰᤂᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ᤏᤢ ᤛᤥᤖᤡᤰ ᤗᤠᤶᤍᤡ᤺ᤰ ᤁᤧᤈᤥ᤺ᤰᤐᤠ ᤀᤠᤴᤍᤣ᤺ᤱ ᤀᤠᤴᤈᤢᤶᤜᤠ᤹ᤖᤧ ᤀᤠᤜᤢᤰᤁᤥ ᤔᤧᤍᤧᤶᤛᤠᤱᤗ ᤍᤔᤛ᤻ᤁᤛᤀᤥ ᤔᤧᤃᤧᤳᤋᤠᤱᤗᤥ॥ 
ᤜᤧᤰᤁᤩᤠᤱ ᤂᤧᤵᤔᤥ ᤜᤏᤏᤡᤕᤠ ᤔᤧᤵᤔᤏᤠᤒᤠ ᤀᤠᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶ ᤁᤧᤏᤠ᤺ᤵᤐᤠ ᤁᤧᤀᤡ᤺ᤵᤐᤠ ᤛᤠᤶᤕᤥᤏᤡᤒᤠ ᤔᤏᤠᤎᤡᤰ ᤀᤠᤍᤢᤶᤛᤧ ᤋᤩᤧ॥ ᤂᤧᤱᤃ ᤍᤔᤛ᤻ᤁᤛᤀᤥ ᤁᤧᤘᤠ᤹ᤒᤠ ᤁᤠᤰ ᤕᤜᤢᤍᤡᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠ᤺ᤱ ᤔᤧᤒᤡᤖᤢᤒᤠ ᤔᤏᤠ ᤘᤕᤧᤖᤥ॥ 
ᤂᤢᤏᤧ᤹ ᤀᤡᤱᤃᤠ᤹ ᤘᤕᤠᤱᤒᤠ ᤋᤧᤴᤏᤥ ᤋᤩᤧᤀᤠᤱ ᤀᤰᤂᤣ ᤔᤧᤳᤋᤠᤱ. ‘ᤏᤢᤛᤠ᤹ ᤛᤠᤘᤗᤀᤣ. ᤀᤠᤸᤗᤥ ᤂᤧᤏᤧ᤹ ᤕᤠᤶᤔᤥ ᤏᤡ᤺ᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧ᤹ᤀᤥ.’ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤔᤥ ᤂᤢᤏᤧ᤹ ᤏᤡ᤺ᤔᤠ ᤛᤢᤰᤋᤢᤱᤗᤥ॥ 
ᤂᤧᤸᤗᤧ ᤔᤧᤳᤋᤠᤱ. ‘ᤂᤧᤏᤧ᤹ᤃ ᤀᤠᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤛᤡᤱ ᤏᤡ᤺ᤵᤔᤠ. ᤛᤠᤶᤕᤥᤏᤡᤒᤠ ᤁᤢᤔᤏᤠ ᤕᤧᤛᤢ᤺ᤴ ᤏᤡ᤺ᤔᤠ ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴ ᤂᤧᤶᤔᤠ ᤑᤠ᤹ᤀᤠᤱ ᤁᤧᤛᤣᤃᤧᤀᤠᤱ ᤁᤧᤘᤠ᤹ᤖᤥ॥ 
ᤂᤧᤏᤧ᤹ ᤁᤧᤏᤡ᤺ᤛᤢᤒᤠ ᤏᤢ ᤁᤧᤄᤧᤵᤛᤢᤒᤠ ᤐᤠ᤺ᤴᤜᤠ᤹ᤖᤧᤴ ᤁᤠᤰ ᤔᤏᤠᤜᤠ᤹ᤀᤥ ᤁᤢᤍᤥ᤺ᤴᤍᤡ ᤁᤧᤒᤥ᤺ᤱᤗᤥ॥ 
ᤀᤠᤸᤗ ᤌᤣ᤺ᤴ ᤁᤧᤜᤠᤱᤄᤢᤒᤠᤒᤣ᥅ ᤐᤥᤃᤧ᤹ᤀᤠᤱ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧ᤹. ᤜᤧᤰᤁᤩᤠᤱ ᤕᤧᤛᤢ᤺ᤴ ᤏᤛᤠ᤺ᤴ ᤆᤥᤃᤧ᤹ᤀᤠᤱ ᤁᤧᤗᤠᤕᤥᤗᤠᤶ ᤛᤣᤛᤣ ᤐᤥ᤺ᤰᤂᤧ᤹ᤀᤥ॥’ 
ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤢᤛᤗᤧᤶᤔᤥ ᤕᤠᤶᤔᤥ ᤏᤢ᤺ᤰᤂᤠᤱ ᤐᤣᤃᤠᤱᤅᤠᤱ ᤔᤠᤱᤜᤡᤶᤔᤥ ᤋᤢᤘᤠ ᤆᤥ᤺ᤰᤁᤡ ᤕᤢᤅᤠᤱᤅᤡᤸᤗᤧ ᤀᤡᤱᤃᤠ᤹ ᤛᤢᤑᤥ ᤏᤡ᤺ᤛᤢᤱᤗᤥ॥ 
ᤂᤧᤵᤔᤥ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱᤗᤥ. ‘ᤕᤖᤢᤛᤗᤧᤔᤗᤠᤶ ᤜᤠᤖᤠ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤁᤵᤔᤥᤒᤠ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤒᤡᤖᤢᤒᤠ ᤋᤥ᤺ᤴᤍᤡᤴ ᤔᤧᤴᤍᤠ᤺ᤰᤋᤢᤴᤗᤥ॥’ 
ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤂᤢᤏᤧ᤹ ᤔᤧᤳᤋᤢᤱ. ‘ᤀᤠᤍᤠᤱᤒᤣ. ᤀᤡᤱᤃᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤐᤣᤃᤠᤱᤅᤠᤱ ᤂᤧᤏᤧ᤹ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤋᤧᤶᤛᤢᤱᤛᤡᤱᤅᤠᤱ ᤗ᤺ᤵᤛᤢᤱᤛᤡᤱ ᤜᤧᤰᤁᤩᤠᤱ ᤐᤢᤱᤗᤠᤜᤡᤶᤔᤥ ᤛᤠᤰᤋᤢᤱᤛᤡᤱᤒᤠ ᤐᤠ᤺ᤴᤜᤠ᤹ᤃ ᤂᤧᤱᤜᤠ᤹ᤖᤧ ᤔᤧᤏᤡ᤺ᤛᤢᤖᤥ॥ 
ᤜᤧᤰᤁᤩᤠᤱ ᤛ᤻ᤋᤡᤑᤏᤛᤧᤴ ᤔᤧᤛᤧᤖᤢᤸᤗᤧ ᤀᤡᤱᤃᤠ᤹ᤃ ᤋᤥ᤺ᤴᤍᤡ ᤐᤥ᤺ᤰᤂᤠᤱᤅᤠᤱ ᤂᤧᤴ ᤐᤠ᤺ᤴᤏᤡᤴ ᤋᤧᤴᤍᤡᤱ ᤆᤥᤃᤢᤱᤅᤠᤱ ᤂᤧᤴ ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤆᤠᤱᤍᤣ᤺ᤳᤜᤠ᤹ ᤁᤥᤛᤢᤱᤗ ᤕᤧᤒᤠᤱᤗᤥ॥’ 
ᤁᤖ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤔᤧᤳᤋᤠᤱ. ᤐᤣᤃᤧ᤹. ‘ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤔᤠ᤺ᤱᤄᤠ ᤔᤠ᤺ᤱᤄᤠ ᤌᤠᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤀᤠᤕᤠ᤺ᤶᤒᤣᤀᤥ ᤀᤡᤱᤓᤴ ᤆᤥ᤺ᤰᤛᤧ ᤐᤠᤱᤏᤧ᤹ᤖᤥ॥’” 
ᤁᤴ ᤐᤠ᤺ᤳᤋᤢᤖ ᤌᤠᤖᤡᤰ ᤔᤏᤠᤜᤠ᤹ᤖᤧ ᤐᤠᤘᤗᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤖᤥ. ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱ ᤗ᤹ᤖᤡᤰ ᤐᤠ᤺ᤴᤛᤢᤳᤗᤠ᤺ᤴ ᤐᤠ᤺ᤳᤋᤢᤏᤠᤔᤧ᤺ᤴᤏᤣ ᤂᤧᤱᤜᤠ᤹ ᤔᤧᤀ᤺ᤰᤋᤧᤖ ᤀᤰᤂᤣ ᤗ᤹ᤔᤠ ᤔᤧᤜᤣ᤺ᤰᤋᤧ. “ᤁᤴ ᤛᤧᤵᤔᤠᤀᤣ ᤐᤥ᤺ᤱ᥄ ᤀᤠᤸᤗ ᤁᤴ ᤔᤏᤠ᤺ᤴ ᤁᤢᤜᤡᤱᤘᤧᤳ ᤗᤧᤵᤔᤠ ᤔᤧᤏᤢ᤹ᤏᤧᤴᤗᤥ᥄” 
ᤀᤰᤂᤣᤗ᤹ᤖᤡᤰ ᤛᤡᤰᤁᤡᤸᤗᤧ ᤀᤠᤒᤠᤅᤣ ᤂᤢᤏᤡ᤹ ᤛᤢᤱᤄᤣ᤺ᤰᤘᤠᤜᤠ᤹ ᤔᤧᤎᤧ᤺ᤰᤂᤢᤖ ᤂᤠᤶᤜᤡ᤺ᤰᤜᤠ᤹ ᤌᤥ ᤔᤧᤛᤧ᤺ᤛᤢᤖ ᤔᤧᤀ᤺ᤰᤋᤧ॥ 
ᤀᤠᤸᤗ ᤖᤥᤔᤡ ᤌᤰᤐᤧᤒᤠᤸᤗᤧ ᤁᤴ ᤏᤡ᤺ᤛᤢᤀᤠᤱ ᤐᤠᤘᤗᤧᤴ ᤋᤢᤖᤠ ᤜᤡᤶᤛᤡᤃᤠᤱ ᤋᤠ᤺ᤵᤔᤠᤀᤠᤱ ᤁᤴ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤕᤜᤢᤍᤡᤜᤠ᤹ ᤔᤧᤀ᤺ᤰᤋᤧᤒᤠᤒᤣ᥅ ᤗ᤹ᤖᤡᤰ ᤏᤡᤱᤘᤠ᤹ ᤂᤥ᤺ᤔᤠ ᤑᤠ᤹ᤀᤠᤱ ᤋᤧ᤺ᤶᤓᤢᤰ ᤕᤠᤰᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤖᤥ॥ 
ᤋᤡᤗᤡᤱᤃᤠᤜᤠ᤹ᤖᤧ ᤋᤧ᤺ᤶᤓᤢᤰ ᤕᤠᤰᤔᤠ ᤑᤠ᤹ᤀᤠᤱ ᤐᤠᤘᤗᤧᤴ ᤀᤡᤄᤣ᤺ᤱᤔᤠ ᤔᤧᤜᤣ᤺ᤰᤋᤢᤸᤗᤧ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤌᤰᤋᤢᤶᤒᤧᤴ ᤐᤠᤘᤗᤖᤧ ᤀᤰᤂᤣ ᤔᤧᤳᤋᤢ. “ᤖᤥᤔᤡ ᤕᤰᤕᤢᤱᤒᤠᤴᤏᤠᤱ ᤀᤠᤵᤋᤡᤰ ᤔᤧ᤺ᤴᤏᤣ ᤋᤧ᤺ᤶᤓᤢᤰ ᤕᤠᤰᤔᤠ ᤖᤥᤔᤡ ᤌᤡᤶᤔᤡᤸᤗᤧ ᤁᤧᤒᤡᤖᤡᤒᤡ᥅” 
ᤌᤰᤋᤢᤶᤒᤧᤸᤗᤧ ᤂᤧᤴ ᤌᤰᤐᤧᤒᤠᤴ ᤐᤣᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤴ ᤌᤣ᤺ᤴ ᤁᤧᤈᤥᤃᤢᤖ ᤁᤧᤒᤵᤐᤣ᥅ ᤁᤴ ᤔᤏᤠ᤺ᤱᤃ ᤖᤥᤔᤡ ᤕᤰᤕᤢᤱᤒᤠᤔᤢᤖᤥ᥄” 
ᤂᤧᤴ ᤌᤰᤐᤧᤒᤠᤴ ᤋᤩᤧᤀᤠᤱ ᤐᤠᤘᤗᤧᤴ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤖᤥᤔᤡ ᤕᤰᤕᤢᤱᤒᤠᤏᤧᤴᤒᤡ᥅” ᤜᤧᤰᤁᤩᤠᤱ ᤐᤠᤘᤗᤖᤧ ᤀᤥᤖᤥ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥ 
ᤂᤧᤴ ᤌᤰᤐᤧᤒᤠᤸᤗᤧ ᤔᤧᤳᤋᤢ. “ᤁᤖ ᤀᤡᤱᤃᤠ᤹ᤃ ᤕᤖᤡᤰ ᤕᤠᤱᤛᤠᤁᤢᤴᤎᤣᤖᤧ ᤁᤴ ᤖᤥᤔᤡ ᤕᤰᤕᤢᤱᤒᤠ ᤕᤢᤰᤁᤡᤴ ᤀᤡᤅᤢᤱᤒᤠᤖᤥ॥” ᤐᤠᤘᤗᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ᤃ ᤛᤠᤘᤠ᤺ᤴᤇᤡᤅᤠᤱᤅᤡᤸᤗᤧᤛᤠ ᤖᤥᤔᤡᤀᤠᤖᤥ॥” 
ᤁᤖ ᤂᤢᤏᤧ᤹ ᤛᤣ᤺ᤴᤗᤠᤵᤔᤠ ᤕᤠᤖᤡᤵ ᤁᤧᤒᤥ᤺ᤱᤒᤠᤜᤠ᤹ᤖᤧ ᤜᤰᤆᤄᤳ ᤂᤢᤏᤧ᤹ ᤔᤧᤗᤧᤖᤢ ᤔᤧᤎ᤺ᤀᤠᤱ ᤔᤧᤒᤣ. ᤜᤧᤰᤁᤩᤠᤱ ᤐᤠᤘᤗᤧᤴ ᤖᤥᤔᤡ ᤕᤰᤕᤢᤱᤒᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤂᤧᤴ ᤌᤰᤐᤧᤒᤠᤴᤏᤠᤱ ᤁᤡ᤺ᤛᤧᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤠᤛᤧᤴ ᤔᤧᤴᤗᤥ᤺ᤴᤏᤣ ᤂᤧᤴ ᤀᤡᤄᤣ᤺ᤰᤂᤢᤀᤠᤱ ᤘᤕᤧᤖᤥ॥ 
ᤁᤖ ᤁᤢᤍᤠ᤺ᤴᤍᤡᤰᤔᤠ ᤂᤧᤴ ᤖᤥᤔᤡ ᤌᤰᤐᤧᤒᤠᤸᤗᤧ ᤌᤣᤀᤠᤱ ᤕᤜᤢᤍᤡᤜᤠ᤹ᤖᤧ ᤐᤠᤘᤗᤧᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤂᤧᤴ ᤗᤧᤖᤢ॥ ᤜᤧᤰᤁᤩᤠᤱ ᤁᤠᤰ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤧᤈᤢᤶᤓᤥ ᤆᤢᤶᤗᤢᤱ ᤆᤥ᤺ᤰᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤖ ᤐᤠᤘᤗᤧᤴ ᤂᤧᤵᤔᤥ ᤔᤧᤍᤠᤖᤢᤀᤠᤱ ᤂᤢᤏᤡ᤹ ᤋᤃᤡ ᤔᤧᤕᤧᤵᤛᤢᤖᤥ॥ 
