GEN 1:1 Ma mwena handru badeh Kindrei mwesekei munyak ma kandrah.
GEN 1:2 Ya munyak kahis le badeh ma lakou aliy bwe, ndras badeh nohowan handru udu bolo lulik. Eme ya boto-on ta Malawi Ndrabun ta Kindrei badeh edek bwele-e gwa.
GEN 1:3 Eme Kindrei eme, iy anya eh, “Kon kaleu.” Eme badeh kon aleu. Eme iy anyolom badeh ma iy sekesek handru.
GEN 1:4 Ano iy atehei ndrokowan udu aliy, udu bolo len hawe lulik.
GEN 1:5 Eme iy tondrohani kon aleu badeh, “Len,” ma tondrohani lulik badeh, “Ben.” Ano kon eben ano kon aleu badeh len ari ah.
GEN 1:6 Ano Kindrei anya eh, “Ya abo lakou i buku asi jor badeh keme kasahan ki la-uh kon, ari kudu ndrandrahun labai ya ari kudu ndrandrahun labai.” Eme badeh asahan i le buku aliy.
GEN 1:7 Eme badeh Kindrei mwesekei lakou i buku asi jor badeh apwai gwa badu andri ma apwai gwa badu loken.
GEN 1:8 Eme iy tondrohaniy lakou i buku asi jor nane badeh “Kandrah.” Ano kon eben ano kon aleu badeh, len la-uh ai.
GEN 1:9 Ano Kindrei anya ja eh, “Abo gwa badu bahandra kandrah badeh keme lese ma hawe munyak kasahan.” Eme asahan i le buku aliy.
GEN 1:10 Eme Kindrei badeh tondrohani kon soboren badeh, “Munyak” ma iy tondrohani gwa udu se nane dah, “Ndras.” Eme Kindrei anyolom badeh ma iy sekesek handru.
GEN 1:11 Ano iy anya eh, “Abo kei ma bwidiu kasahan bwele-e munyak, kato-ou buwa kei ma kato-ou salin ya iri badeh ndrateheyan labai.” Eme badeh asahan i le buku aliy.
GEN 1:12 Eme saba buwa kei ateh bolo munyak eme loken, badeh Kindrei anyolom ma iy sekesek handru.
GEN 1:13 Ano kon eben ano kon aleu badeh len taloh ai.
GEN 1:14 Ano Kindrei anya ja eh, “Lakou ta anya badeh kanya bada kandrah ta apou len ma ben, ma kaleheyani kalem ta an ta len ma hawe ta jaha ma hawe len ta atudun nyamon tinan ta atukum.
GEN 1:15 Eme oro doh kameh adeu lomada oro kameh anya udu kandrah eme bwele-e munyak.” Eme badeh asahan i le buku aliy.
GEN 1:16 Ya eme Kindrei badeh mwesekei lakou la-uh tinan ta anya, iy mwesekei an baden eh ta atondrok len ai. Ya bun baden eh ta atondrok ben ai; ma hawe iy mwesekei iri ndrau ale.
GEN 1:17 Ano iy atehei lakou ta anya udu kandrah badeh ta adeu lomadan eme andri bwele-e munyak ai;
GEN 1:18 i doh ta atondrok len hawe ben ma ta apou len ma lik. Eme Kindrei anyolom badeh ma iy sekesek handru.
GEN 1:19 Ano kon eben ano kon aleu len hahuw ai.
GEN 1:20 Ano Kindrei anya ja eh, “Ya abo lakou mulin kasahan bolo gwa ma reu kaso na sirih.”
GEN 1:21 Kindrei badeh ndramwesekei iri ni tinan badu ndras ma hawe iri saba lakou mulin ala ado bolo gwa badeh ndrano, ma iri badeh ndrateheyan labai. Eme Kindrei anyolom badeh ma iy sekesek handru.
GEN 1:22 Eme iy atehei nyosowan i tiri ma iy anya, “Iri mulin badu gwa kadeu nah ma iri kaweleyani ndras, ma iri sirih ale kasahan solo-an.”
GEN 1:23 Eme kon eben ano kon aleu len limeh ai.
GEN 1:24 Ano Kindrei anya eh, “Abo iri saba lakou katin haka badeh kasahan bwele-e munyak. Iri katin haka ndriliu ma ndriliu bwe, nadu bwisik ma tinan badeh kasahan. Ya iri badeh ndrateheyan labai.” Eme asahan i le buku aliy.
GEN 1:25 Ya eme Kindrei badeh mwesekei iri mari doh ano iy anyolom eme badeh iy sekesek handru.
GEN 1:26 Ano Kindrei anya ja eh, “Ya abo i dah kameh to kamwekes ndramak awas ai; ya teheyan ma kone oro ki le buku to. Ya eme oro kameh katondrok iri ni, katondrok iri sirih ma katondrok iri katin haka ndriliu ma ndriliu bwe, bwisik ma tinan.”
GEN 1:27 Ano Kindrei badeh mwesekei ndramak awas mwesekei teheyan ma konen i le buku iy, mwesekei mwan ma hawe badih.
GEN 1:28 Ano badeh iy atehei nyosowan i turu ma tiye i turu i buku doh, “Ah badeh kamwekes nah ya lundriye ah oro kaweleyani kon munyak mari ma kado katondrok. Ma jo atehei ah badeh katondrok iri ni katondrok iri sirih ma hawe iri katin haka ndriliu.
GEN 1:29 Ya saba buwa kei badeh ah kaimon le ai.
GEN 1:30 Arile iri katin haka ndriliu hawe iri sirih baden eh, jo atehei nyamon tiri badeh bwidiu ma hawe la-u kei i ta nyumon tiri ai.” Eme badeh asahan le ai.
GEN 1:31 Eme Kindrei anyolom lakou mari iy mwesekei doh badeh ma iy sekesek handru ta aliy. Ano kon eben ano kon aleu badeh len onoh ai.
GEN 2:1 Eme ya kon mari ma kandrah badeh ndramwesekei ndrano ai.
GEN 2:2 Eme na len onoh badeh lahou ta Kindrei ano. Eme na len ndro taloh badeh iy amunyau.
GEN 2:3 Eme iy nyosowani len ndro taloh ma atehei ere len, tasah na len doh badeh iy mwesekei lakou mari ma iy amunyau.
GEN 2:4 Eme ya i dah nyala lakou mari badu munyak asahan i buku sah. Na len Laban Kindrei mwesekei kon munyak mari,
GEN 2:5 badeh sese kei bateh bwe, ari buwa kei badeh bateh bada ndren bwe, tasah iy batiye ur badeh bandruk bwe, ma lau ta apou ndren bwe.
GEN 2:6 Arile gwa ja badeh udu bolo ndren eme loken badeh asabu bwele-e munyak.
GEN 2:7 Ano badeh Laban Kindrei rawi ndren eme loken, ano iy amwekes ndramak na aliy; ano badeh iy aluhi kohan handru i no-on ma ndramak dah asahan awas.
GEN 2:8 Ano badeh Laban Kindrei mwesekei bilin nyaran Iden udu loboho an eme loken. Ano badeh iy tiye ndramak nane, iy mwesekei dah udu aliy ai.
GEN 2:9 Iy badeh mwesekei saba kei mwasin badeh ateh udu aliy ma edeu salin. Eme udu alih ta bilin badeh kei lu-ei le, kei doh ta edeu koham winiyan bano bwe. Ma kei ale ta edeu tanan ndra-in ma tanan mwasin.
GEN 2:10 Ma gwa rawa badeh arorou, udu bolo Iden ta edeu gwa i ta bilin; ano udu doh badeh, apou i handra.
GEN 2:11 Gwa rawa ma bwena eh, badeh aloh gwa Pison, badeh arorou awudi kon munyak aloh nyaran Habilah.
GEN 2:12 Ya bek nyikilikin aloh gol badeh, udu aliy ma kei ta suluw badeh udu aliy ma hawe bek mwasin mwasin badeh udu aliy ale.
GEN 2:13 Ya andra gwa rawa ja aloh gwa Gihon; badeh arorou awudi kon munyak aloh Kus.
GEN 2:14 Ano andra gwa taloh badeh gwa Taigres; iy badeh arorou loboho an eme loken ta kon Aseriya. Ano andra gwa hahuw badeh nyaran gwa Yupretis.
GEN 2:15 Ano badeh Laban Kindrei atehei ndramak nane udu bilin loboho kon Iden ta iy kinyor ma iy katondrok.
GEN 2:16 Ano iy tiye i tan, “Ou badeh winiyan aimon buwa kei mari badu bolo bilin;
GEN 2:17 Arile kei ala ta leheya tanan ndra-in ma ta leheya tanan mwasin badeh ou saimon buwan ndri-i labai. I buku na len ou aniy kameh, ou kameh amak.”
GEN 2:18 Ano Laban Kindrei lomondra i buku doh, “Ei, bamwenen se bwe, i buku ndramak udu ya iy badeh le ari le. Jo kamwesekei ari seben mwasin ta aseben iy.”
GEN 2:19 Eme iy andrei ndren eme, ano iy mwesekei iri katin haka mari ma hawe iri sirih. Ano badeh iy tukumwi iri ase ala hawe i ndramak nane dah ta iy katondrohan nyara iri.
GEN 2:20 Eme ma iy tondrohani nyara iri sirih mari ma hawe iri katin haka mari; arile ari toro badeh mwasin ta asahan borobwar tan bwe.
GEN 2:21 Ano ja badeh Laban Kindrei badeh mwesekei ndramak dah amadin tuk; eme iy i ndramatinou kahis le badeh iy andrei ndruwi kabeden ari. Ano iy lowosani odan i hamon ja.
GEN 2:22 Eme iy mwesekei badih dah nane na ndruwi kabede ndramak dah ano sirini iy ili hawen.
GEN 2:23 Ano ndramak dah anya ja eh, “Kabwe ai; i dah i buku le jo amwenen. Ndruwin andrei badeh badu ndruwik ma odan badeh badu odak amwenen. Ya eme iy badeh badih, tasah iy badeh asahan ta ndramak mwan.”
GEN 2:24 Eme ya ta katin doh badeh i mwan badeh karuwani taman uru tinen ya iy keme len hawe udun ya uru badeh ka ari buruwen.
GEN 2:25 Ya uru ma la-uh badeh kolau bwe, arile uru badeh buli uru bama uru bwe.
GEN 3:1 Eme ya mwak badeh tanan tan badeh ndrala labai udu bolo iri katin haka mari ala Laban Kindrei mwesekei. Eme ya mwak lelen i badih, “Em Kindrei tiye i tam handru ta ou badeh saimon buwa kei badu bolo bilin dah?”
GEN 3:2 Eme i badih anya eh, “Aru badeh winiyan aimon buwa kei badu bilin.
GEN 3:3 Arile kei udu alih ta bilin badeh Kindrei tiye anya, aru badeh saimon buwan. Ma aru sanyokar ale, bakameh aru amak.”
GEN 3:4 Eme badeh mwak anya eh, “Badeh wasai oh; ou winiyan bamak bwe.
GEN 3:5 Kindrei tiye badeh, tasah iy tanan i buku ou aniy kameh ou kameh asahan i buku iri Kindrei. Ma ou kameh atanam lakou mwasin ma lakou ndra-in.”
GEN 3:6 Eme i badih dah anyolom kei dah ma buwan badeh mwasin labai ta aimon, eme iy lomondra, “Mwasin handru en i buku jo kasahan badih ta tanan.” Eme iy andrei rayah ma iy aimon ai. Ano badeh iy andrei rayah i mine udun ma udun aimon ale.
GEN 3:7 Eme uru aniy le badeh, ma uru akohok tanan ma uru atanan ai, uru badeh kolau bwe; eme ma uru asowek la-u kei aloh pik i se ma uru taliye ai.
GEN 3:8 Eme na beyeh doh le badeh uru anuhun Laban Kindrei edek bolo bilin le badeh, uru aton ala bolo ndrokowa kei udu bolo bilin.
GEN 3:9 Eme Laban Kindrei aloh iy, “Ou ndraheh?”
GEN 3:10 Eme iy anya eh, “Jo anuhun ou ado bolo bilin; eme jo inoh ma jo aton tam, tasah jo kolau bwe.”
GEN 3:11 “Are tiye ta ah anya, ah kolau bwe?” Kindrei ndremenya, “Ah ndrani buwa kei ala jo mene anya ah saimon en?”
GEN 3:12 Eme i mwan anya eh, “I badih ou atehei iy udu hawek kada-ah, badeh atehei buwa kei eme ma jo iniy.”
GEN 3:13 Eme badeh Laban Kindrei lelen i badih, “Ou anya amwekes tasah?” Eme iy anya eh, “Mwak wendreyani jo ma jo iniy.”
GEN 3:14 Ano Laban Kindrei tiye i ta mwak, “Ou le kameh ou akohok isi ta aliy. Ou le ari badu bolo iri katin haka mari, ala adek ma seselek ya jo tandrakan ou le ari. Na len dah ma na len eme kameh, ou kameh seselek na baha ndrinem ma ou kameh kaniyam kameh ndren na len ari i buku ari udu le buku doh.
GEN 3:15 “Ya jo kameh mwesekei ou hawe i badih kameh ah kameh baseken ah bwe; nadu ah kameh uru kameh andra-i udu le buku doh. Ya nadu i badih kameh tihisiy batum abwesek ma i dah kameh ou kameh aso ma aimon katin.”
GEN 3:16 Ano iy tiye i ta i badih, “Jo kameh amwekes isi labai i buku nah ere ndrinem ma i dah kameh jo edeu sisi-in i buku ou anya adeu nah. Ya ta i doh kameh ou kameh anya udum sala len, arile i mwan le badeh atondrok ou.”
GEN 3:17 Eme iy tiye i ta i mwan, “Ou anuhun boho udum ma ou aniy buwa kei mene jo tiye anya ou saimon. Ya eme ta lakou ou ndramwesekei, i dah kameh munyak andra-i. Ya i dah kameh len ou ado kameh ou amwekes lahou boto-on boto-on ta amwekes munyak ta atah nam nyamon.
GEN 3:18 Ya i dah kameh iri bwidiu bobodon kameh ateh ma i dah kameh ou kameh aimon buwa kei badu lokei.
GEN 3:19 Ma i dah kameh ou amwekes lahou boto-on ma sa-ar asahan ta amwekes nyamon. Winiya len ou le barala hamon barala munyak ja mene amwekes ou na aliy, ma ou kameh a munyak leleyah.”
GEN 3:20 Adam tondrohani nyara udun badeh Ewa, tasah iy badeh tine iri lau mari.
GEN 3:21 Eme Laban Kindrei mwesekei kolau i turu na ku-i katin haka ma iy tani i turu.
GEN 3:22 Ano Kindrei tiye, “Abo iri ndramak badeh ndrasahan ndra buku to ai, ndratanan saba lakou mwasin ma saba lakou ndra-in. Eme ya iy badeh sakohok buwa kei ala ta amwekes kohan udu le buku doh ma iy badeh saimon. Bakameh iy kameh kohan kudu le buku doh.”
GEN 3:23 Eme ma Laban Kindrei suni iy iu i len ta bilin Iden ma mwesekei iy apou munyak ala mene bwidi iy mene asahan na aliy.
GEN 3:24 Eme ya loboho an eme loken manan ta bilin badeh iy atehei iri angelo, lau ta ndrokei; ma samen badeh anya ili eme udu mada san ta i bolo bilin Iden, badeh ta nohowa lau same mirihik ta kei ta edeu kohan mwasin.
GEN 4:1 Ano badeh Adam amadin hawe udun, eme ma ndrine udun i tinan.
GEN 4:2 Eme ma iy atehei nah mwan; ano iy tiye, “Laban aseben jo ma nah mwan ndrasahan.” Eme iy tondrohani nyaran Ken. Ano badeh iy atehei mwan ari ja nyaran Abol. Eme badeh Abol badeh asahan ndramak ta atondrok iri katin haka, ma hawe Ken badeh asahan ndramak ta bilin.
GEN 4:3 Ano oro ado sese badeh, Ken eme badeh andrei nyamon rayah badu bilin eme iy asun i nyara salom i ta Laban.
GEN 4:4 Ano Abol eme andrei nadu sipsip ari kasen mwasin handru, ano badeh iy idiy imek. Eme iy edeu i nyara salom mwasin. Eme ya Laban Kindrei badeh sekesek ma aseken Abol ma salom tan.
GEN 4:5 Arile ta Ken badeh iy baseken handru bwe. Eme badeh Ken i bolosen handru ma ndrinen isi handru en.
GEN 4:6 Ano badeh Kindrei tiye i ta Ken, “Ou a bolosen ta sasah? Badam asaram ta sasah?
GEN 4:7 I buku none ou amwekes lakou mwasin, i dah nane ou sekesek; arile ou ndramwesekei kandriyen ndra-in, eme karei ma lomondra ndra-in abe-en ou ma abwe-ek ou udu konam. Eme ou abadok doh?”
GEN 4:8 Ano badeh Ken tiye sahou i ta nadu tinen Abol, “Talu ka-au kala len.” Eme uru au ame len badeh, Ken eme tubuni iy, eme ma iy idi nadu tinen imek.
GEN 4:9 Ano Laban eme ndremenya Ken, “Nadu tinem ndraheh?” Eme iy anya, “Jo tanan bwe oh, jo atondrok iy ai?”
GEN 4:10 Ano Laban tiye, “I buku sah ou amwekes budon ndra-in dah? Ndraye nadu tinem asah eden udu bolo ndren kede-eh; eden eme tek ta ou kameh akohok isi saluwen.
GEN 4:11 Eme ya i dah kameh munyak kameh andra-i na bales tasah na ou. Munyak badeh ndranyuwi ndraye nadu tinem i buku none ari lakou bohon asak le, na len ou adai iy.
GEN 4:12 Ya i buku none ou anya atah baso kameh, munyak kameh winiyan bamwekes bateh bwe, ma ou kameh ta tekedek le.”
GEN 4:13 Eme Ken tiye i ta Laban i buku doh, “Ou tiye sahou badeh maha-an labai eme tek.
GEN 4:14 Ou kameh tikahei jo iu ta munyak ma ta tondrok ai, ma jo kameh edek le ai, ya are ndrondron jo kameh idi le jo ai?”
GEN 4:15 Arile Laban anya eh, “Bwe, i buku none are idi ou, i dah kameh lau ndro taloh amak i saluwem.” Eme Laban atehei kalem i ta Ken ta tiye tanan i tare ndrondron iy badeh sadai iy.
GEN 4:16 Eme Ken iu, iu ta mada Laban ili udu munyak aloh, “Lolo-an Le,” udu loboho an eme loken ta bilin Iden.
GEN 4:17 Ano badeh Ken uru udun atehei nadu uru eme tondrohani nyaran Inok. Ano badeh Ken tahi kon tinan ari ma tondrohani nyaran i nyara nadun.
GEN 4:18 Eme Inok atehei nadun ari tondrohani nyaran Irat, ya iy badeh tama Mahuja-el. Eme Mahuja-el atehei nadun mwan ari nyaran Matusa-el ya iy badeh tama Lemek.
GEN 4:19 Lemek badeh sudi badih la-uh, Adah hawe Silah.
GEN 4:20 Eme Adah badeh edeu Jabel eme iy badeh tubu iri lau ta amadin asiu balei, ma iri doh badeh lahou tiri ta atondrok iri katin haka.
GEN 4:21 Ya nadu tinen Jubel badeh tubu iri lau ta oloh bala-eu ma ta adi ndran.
GEN 4:22 Silah badeh edeu Tubal Ken; iy badeh tubu iri lau ta amwekes lakou ta lahou i buku samen na hayen nyikilikin. Ya nadu tinen badeh nyaran Namah.
GEN 4:23 Ano Lemek tiye i ta udun uru, “Adah ah Silah ah kanuhun jo! Jo badeh ndradai loweu ari ndramak, tasah iy anya ka-um jo.
GEN 4:24 I buku none lau ndro taloh amak ta saluwe Ken imek, badeh kameh ndro tonoh ndro taloh (77) kameh amak i buku none iri kadai jo.”
GEN 4:25 Ano Adam uru udun atehei nadu uru mwan ari ja. Eme udun tiye, “Kindrei badeh atehei nah mwan ari i saluwe Abol ala Ken mene idi iy.” Eme iy tondrohani nyaran badeh Set.
GEN 4:26 Eme Set atehei nadun mwan ari tondrohani nyaran Inos. Eme kabatana doh badeh iri lau baraloh nyara Laban barala ta atudun ai.
GEN 5:1 Ya i dah sare Adam oro ai. Len Kindrei mwesekei lau awas badeh, iy mwesekei konen i le buku iy.
GEN 5:2 (Iy mwesekei uru ari mwan ma badih ano iy atehei nyosowan i turu ma tondrohani uru “Lau”).
GEN 5:3 Len Adam jaha tan asahan rinek tonoh (130) badeh nadun ari asahan ya konen i le buku iy, eme iy tondrohani nyaran Set.
GEN 5:4 Ano hamon ta aliy badeh Adam udu winiya jaha ndru lunek (800), ma iy badeh nadun rayah ale udu aliy.
GEN 5:5 Ano jaha tan i ndro rawa tonoh (930) badeh ma iy imek.
GEN 5:6 Len Set jaha tan asahan rinek limeh (105), badeh nadun ari asahan nyaran Inos.
GEN 5:7 Eme iy udu winiya jaha ndru lunek ndro taloh (807) ma iy badeh nadun rayah ale udu aliy.
GEN 5:8 Ano jaha tan asahan ndro rawa ronoh la-uh (912) badeh iy imek.
GEN 5:9 Len Inos jaha tan asahan ndro ronoh (90), badeh iy atehei nadun ari nyaran Kenan,
GEN 5:10 eme iy badeh udu winiya jaha ndru lunek ronoh limeh (815). Iy badeh nadun rayah udu aliy ale.
GEN 5:11 Ano jaha tan asahan ndro rawa limeh (905) badeh ma iy imek.
GEN 5:12 Ano len Kenan jaha tan asahan ndro tonoh (70) badeh iy atehei nadun ari nyaran Mahalalel,
GEN 5:13 ano iy udu winiya jaha ma ndru lunek hanoh (840) ma iy nadun rayah ale udu aliy.
GEN 5:14 Ano jaha tan asahan ndro rawa ronoh (910) badeh iy imek.
GEN 5:15 Ano len Mahalalel jaha tan asahan ndro hanoh limeh (65) badeh iy atehei nadun mwan ari nyaran Jaret.
GEN 5:16 Ano iy udu badeh winiya jaha ndru lunek tonoh (830). Ma iy badeh nadun rayah udu aliy ale.
GEN 5:17 Ano na jaha ndru lunek ndro tonoh limeh (895) badeh iy imek.
GEN 5:18 Ano na len Jaret jaha tan asahan rinek ndro hanoh la-uh (162) badeh iy atehei nadun mwan ari nyaran Inok.
GEN 5:19 Ano iy udu winiya jaha ma ndru lunek (800). Ma iy ale nadun rayah ale udu aliy.
GEN 5:20 Ano na jaha ndro rawa ndro hanoh la-uh (962), badeh ma iy imek.
GEN 5:21 Ano len Inok jaha tan asahan ndro hanoh limeh (65) badeh, iy atehei nadun mwan ari nyaran Matusala.
GEN 5:22 Ano hamon ta aliy badeh Inok badeh in hamon ta sahou ta Kindrei winiya jaha tonek (300), ma nadun rayah ja asahan.
GEN 5:23 Iy udu badeh winiya jaha ma tonek ndro hanoh limeh (365).
GEN 5:24 Iy anuhun sahou ta Kindrei ma iy in hamon ta Kindrei handru; ano iy amai leleyah, Kindrei kuhi iy iu.
GEN 5:25 Ano len Matusala jaha tan asahan rinek ndru lunoh ndro taloh (187) badeh iy atehei nadun ari mwan badeh nyaran Lemek.
GEN 5:26 Ano iy udu winiya jaha ndru tuluwi ndru lunoh la-uh (782) ma iy nadun rayah badeh udu aliy ale.
GEN 5:27 Ano jaha tan asahan ndro rawa ndro hanoh ndro ari (969) badeh ma iy imek.
GEN 5:28 Ano len Lemek jaha tan asahan rinek ndru lunoh la-uh (182) badeh iy atehei nadun mwan ari nyaran Nowa.
GEN 5:29 Eme iy tiye i buku doh, “Tasah ta munyak mene ndrandra-i, i dah kameh i nah dah kameh aseben taha ta lahou boto-on taha amwekes.” Eme iy tondrohani nyaran badeh Nowa.
GEN 5:30 Eme Lemek badeh udu le winiya jaha lemenek ndro ronoh limeh (595) ma nadun rayah udu aliy ale.
GEN 5:31 Ano jaha tan asahan ndro tonek ndro tonoh ndro taloh (777) badeh ma, iy imek.
GEN 5:32 Ano hamon Nowa jaha tan asahan lemenek (500), badeh iy atehei nadun mwan oro ma taloh, Sem eh, Ham eh, ma hawe Jepet.
GEN 6:1 Na len iri lau weleyani kon munyak ma badih asahan ame len,
GEN 6:2 eme iri lau rayah batun badu kandrah, badeh anyolom iri badih badeh konen konen, eme iri asoh iri ala seken tiri udu tiri.
GEN 6:3 Ano Laban Kindrei anya eh, “Jo baseken kohak handru bado tiri luluwen bwe, iri ndramak leleyah labai. Na len dah ma len hamon eme kameh koha iri bado luwen bwe, winiya basakalawi jaha rinek lunoh bwe.”
GEN 6:4 Na len doh badeh ma na len eme kameh iri lau tinan tinan le, ado bwele-e munyak. Iri badeh lundriye badih awas ma lau badu kandrah. Iri badeh lau ndra handru le ma lau nyara iri tinan le, na len mene ndra-au.
GEN 6:5 Eme ya len Kindrei anyolom iri lau mari are bolo munyak badeh kandriyen tiri badeh ndrandra-i labai, ma budon tiri badeh ndra karei ma lomondra ndra-in na len mari.
GEN 6:6 Eme iy tikisiy, tasah iy mene mwesekei iri ma atehei iri ado bwele-e munyak. Eme ma batun isi handru.
GEN 6:7 Eme ma iy anya eh, “Jo tikisiy iri lau jo mwesekei ma hawe iri katin haka hawe sirih, arile jo kameh idi iri mari kameh amak ai.”
GEN 6:8 Arile Kindrei ja badeh sekesek handru labai ta Nowa.
GEN 6:9 Ya i dah badeh nyala Nowa ai. Nowa badeh nadun mwan badeh taloh; Sem eh, Ham eh, hawe Jepet. Nowa bamwekes se lakou bandra-i bwe ai, na len iy udu loken. Iy badeh anuhun sahou ma lakou mari mwasin ta Kindrei badeh iy in hamon ta aliy le ai.
GEN 6:11 Arile iri lau mari badeh amwekes lakou leleyah, amwekes karei ma lomondra ndra-in tinan labai udu mada Kindrei.
GEN 6:12 Kindrei anyolom eme munyak badeh, iy anyolom karei ma lomondra ndra-in tiri lau ndrala labai ai, tasah lau badeh amwekes lakou leleyah udu le buku doh.
GEN 6:13 Eme Kindrei tiye i ta Nowa, “Jo badeh ndratehei budon ta edeu sendrehendreh i tiri lau mari. Jo kameh idi iri ma munyak amak, tasah munyak badeh ndradah ta lomondra ndra-in tiri.
GEN 6:14 Ou badeh awuri ra-ei ndron na kei ki tam; ou mwesekei rum kudu aliy ano ou alesei ka-u ndron manan ma bolon.
GEN 6:15 Ou badeh tomondrohei nyaha ndron badeh kasahan rinek tonoh taloh (133) mita, ya tinan ta ndron badeh kasahan lunoh la-uh (22) mita ano tinan ta i loken badeh kasahan ronoh taloh (13) mita.
GEN 6:16 Ano ou mwesekei ndruwi bolobon ma ka-un i loboho loke reu kudu aliy, ki winiya hanoh hahuw sentimita ma ka-un ale ki buku aliy. Ya ou mwesekei sarasar ki taloh ma ou atehei mada san kudu kabede ndron.
GEN 6:17 Jo kameh bwidi kon munyak kameh atuh ma lakou mari mulin badeh kameh amak.
GEN 6:18 Arile jo kameh amwekes sahou randra le hawem. Ano ou a ndron hawe udum, hawe nadum oro ma udu oro.
GEN 6:19 Ou andrei iri lakou mulin, ari mwan ari badih badeh kawek ndron ta iri badeh samak.
GEN 6:21 Ou kuhi saba nyamon ki nam ma tiri ale badeh kewek.”
GEN 6:22 Eme Nowa badeh anuhun sahou ya iy mwekesei i le buku aliy.
GEN 7:1 Eme Laban Kindrei tiye i ta Nowa, eme iy anya eh, “Ado mari ka ndron; jo badeh anyolom ou le badeh ado bolo munyak dah, ou amwekes kandriyen mwasin.
GEN 7:2 Ou kuhi ndro taloh katin haka mwasin ta asun ta salom, ari mwan hawe ari badih, ma ou kuhi ari ari katin haka ndra-in, mwan ma badih ndra-in ta salom.
GEN 7:3 Ou ale kuhi ndro taloh sirih, ari mwan ari badih. Ou an hamon ta bohok, tasah oro sirih ma katin haka randrah doh randrah doh kameh ado ma kameh adeu nah ja ado bwele-e munyak.
GEN 7:4 Ya len ndro taloh ano kameh jo kameh edeu ur undruk winiya len ma ben hanoh (40) ta adi iri mulin mari jo mene mwesekei.”
GEN 7:5 Eme Nowa badeh mwesekei lakou mari Kindrei tiye.
GEN 7:6 Nowa badeh jaha tan asahan ndro hawa (600) eh, badeh kon munyak atuh.
GEN 7:7 Eme ya iy hawe udun, ma nadun oro hawe udu oro an ndron, tasah kon kameh atuh ai,
GEN 7:8 ma hawe ari mwan ari badih katin haka ma iri sirih ndra-in ma mwasin badeh an ndron hawe Nowa, i le buku Kindrei ndratiye.
GEN 7:10 Ano len ndro taloh ano badeh kon atuh.
GEN 7:11 Eme len Nowa jaha tan asahan ndro hawa (600), eme, len ronoh ndro taloh na bun la-uh; badeh gwa udu baha munyak eme loken, ma kandrah asak.
GEN 7:12 Ano badeh ur eme andri winiya len ma ben hanoh.
GEN 7:13 Ya eme na len doh badeh Nowa hawe udun ma nadu uru mwan ma taloh hawe udu nadun oro badeh a ndron ai,
GEN 7:14 ma hawe iri katin haka ndriliu ma ndriliu bwe, tinan ma bwisik ma saba sirih ale, ya iri ndrateheyan labai.
GEN 7:15 Ari mwan ari badih katin haka mulin badeh a ndron hawe Nowa, i buku none Kindrei ndratiye. Ano Nowa oro a bolon badeh, Kindrei le sulu-i kou ili.
GEN 7:17 Eme ur undruk udu bolo len hanoh nane eme ma ndron badeh telebek.
GEN 7:18 Gwa eme loken labai, eme badeh ma ndron ateheh bwele-e gwa.
GEN 7:19 Eme uluw eme loken labai eme badeh mandrei lawe-en sakalawi mandrei mari badeh atuh.
GEN 7:20 Eme gwa eme loken, eme loken badeh nyahan ta aliy asahan taloh ranah udu ta mandrei nane iu i loken.
GEN 7:21 Eme iri mulin mari badu munyak badeh amak, iri sirih eneh, iri katin haka eneh ma ndramak awas badeh amak ai.
GEN 7:22 Iri lakou mari mulin ado munyak badeh amak le ai.
GEN 7:23 Laban Kindrei badeh idi iri mulin mari ado munyak badeh amak ma lau awas ma katin haka ma sirih badeh amak. Iri mulin le ado badeh, Nowa le hawe iri mulin rayah nane a ndron hawen.
GEN 7:24 Gwa badeh bala se andri bwe winiya len rinek lomonoh (150).
GEN 8:1 Kindrei badeh balen bamani Nowa ma hawe iri katin haka nane an hawen an ndron bwe; eme iy bwidi jor atohou ma amwekes gwa i lok i andri.
GEN 8:2 Eme gwa badu baha munyak badeh badek bwe ma mada san ta gwa badu kandrah ili. Ya ur amondrei.
GEN 8:3 Eme udu bolo len rinek lomonoh (150) badeh gwa i lok ai.
GEN 8:4 Eme na len ronoh ndro taloh (17) udu bolo bun ndro taloh badeh mwe-e ndron amar ta mandrei Ararat.
GEN 8:5 Gwa badeh i lok kahis le eme na len ari asahan mwena ta bun ronoh badeh no-o mandrei asahan.
GEN 8:6 Ano len hanoh ano badeh Nowa sihi kadam asak.
GEN 8:7 Eme iy suni sirih ari ta aimon lakou abola nyara Raben badeh iu ili. Eme iy bame hamon bwe, iy atah atah le winiya gwa amar.
GEN 8:8 Ano ja badeh iy suni ban ili ta anyolom gwa ndra andri de bwe.
GEN 8:9 Arile gwa bala se andri bwe eme ban dah basilahei ndrahun ta manyah bwe, eme iy atah eme hamon eme ndron. Eme Nowa atehei minen i manan andrei iy eme bolon.
GEN 8:10 Ano Nowa abe-en ben ndro taloh ja ano badeh iy suni ban ili ja.
GEN 8:11 Eme ban nane eme hamon eme hawen na beyeh ma la-u kei aloh olip badeh udu bohon eme, ya eme Nowa ndratanan ai, gwa ndra andri ai.
GEN 8:12 Ano iy bini-i ben ndro taloh iu ano iy suni ban ili ja; eme ban dah ili ma ili ya iy bame hamon bwe.
GEN 8:13 Ano na len Nowa jaha tan asahan ndro hanek ari (601), na len ma mwena asahan ta bun ari badeh gwa amar. Eme Nowa abe-ei bwele-e ndron eme iy anyolom ili eme ma iy anyolom munyak anya kabosar ai.
GEN 8:14 Eme na len lunoh ndro taloh (27) badeh munyak abosar mara-ei.
GEN 8:15 Eme Kindrei tiye i ta Nowa, “Ou ma udum ma hawe nadum oro ma udu oro kame len ta ndron.
GEN 8:17 Ou kuhi iri sirih ma iri katin haka kame len hawem, ma iri kadeu nah ma kaseker kaweleyani kon munyak mari.”
GEN 8:18 Ya eme Nowa eme len ta ndron hawe udun, ma hawe nadun oro ma hawe udu nadun oro,
GEN 8:19 ma hawe iri katin haka ma iri sirih arakou le adek ame len ta ndron, randrah doh randrah doh badeh adek ase.
GEN 8:20 Ano Nowa eme tukumwi bek; ano iy andrei ari ari badu tiri katin haka ma hawe iri sirih ari ari mwasin badeh iy asun iri ma buruwen in bada bek dah i nyara salom i ta Laban.
GEN 8:21 Eme mahu bubure salom dah mwesekei Laban sekesek handru eme ma iy tiye udu ndrinen i buku doh, “Jo kameh winiya badeu maha bame ta munyak ja bwe ai, tasah tiri lau amwekes lakou; jo tanan na len iy ma loweu le badeh budon tan ma ndra-in le. Eme ya jo kameh winiyan badai iri lau mari ja bwe ai, i buku jo mene amwekes dah ja bwe ai.”
GEN 8:22 “I dah mada an ta atah basoh Ma i dah kameh mada an ta a-eh Ma abwe-eh udu aliy, I buku munyak udu le. Ya i dah kameh kon anyala Ma kon i nyarahan, Kon an ma hawe kon ur Udu bolo len ma ben.”
GEN 9:1 Eme Kindrei atehei nyosowan i bwele-e Nowa hawe nadun oro ano ma iy tiye, “Ado kadeu nah ma lundriye ado oro kaweleyani kon munyak mari.
GEN 9:2 Ya i dah kameh iri katin haka, sirih ma hawe iri ni kameh anoh adoh, ma iri kameh are baha tondrok tado.
GEN 9:3 Eme ado badeh kaimon iri hawe bara la-u kei; jo atehei mari doh ta nyumon tado.
GEN 9:4 Arile lakou ari le doh badeh ado saimon, lakou mulin ma ndra; jo anya ndri-i, ndra ki-iu op, tasah lakou doh badeh kohan ma ndrayen udu aliy.
GEN 9:5 I buku none are lau idi iri lau awas amak, i dah kameh iy kameh akohok sisi-in ta aliy. Ma jo kameh edeu isi i tare katin haka i buku none iy aimon lau amak.
GEN 9:6 Tasah ndramak badeh mwesekei iy konen i le buku Kindrei, eme ya i buku none are lau idi ari ndramak imek, badeh iy ndramak nane doh, badeh lowan oro kadai iy kimek.
GEN 9:7 “Ado badeh kamwekes nah kasola eme lundriye ado oro kado ma kaweleyani bolo munyak mari.”
GEN 9:8 Ano Kindrei tiye i ta Nowa hawe nadun oro,
GEN 9:9 “Na dah jo kameh amwekes sahou randra le hawem ma hawe tubum oro,
GEN 9:10 ma hawe iri mulin mari ala ado ndron mene ame len hawem.
GEN 9:11 Na sahou dah jo amwekes sahou randra le hawem, ya jo tandrakan jo kameh winiyan badai lakou mulin mari bwe ai, na len kon atuh bwe ai; ma badai munyak ma winiyan kon winiyan batuh ja badeh bwe ai.
GEN 9:12 Ya na kalem dah udu le ta sahou randra le, jo badeh amwekes hawem ma hawe iri mulin mari hamon asahan.
GEN 9:13 Jo kameh edeu betekenyabwiu udu bolo asi kandrah. I doh badeh kalem ta sahou randra le tek i hawem ma hawe iri mulin mari badu munyak.
GEN 9:14 Ya i buku none jo tubulu-i kandrah na asi kandrah ma betekenyabwiu asahan,
GEN 9:15 badeh kameh jo abudon tandrakan tek mene ewek tam, ma i tiri katin haka mulin mari ta kon winiyan batuh ta adai iri ja bwe ai.
GEN 9:16 Ya buku none betekenyabwiu asahan bolo asi kandrah ya i buku jo anyolom kameh, jo kameh lomondrani sahou randra le tek hawe iri mulin mari badu munyak.
GEN 9:17 Eme i dah kalem tek jo edeu udu ndrokowak hawe iri mulin mari.” Nowa Hawe Lundriyen Oro
GEN 9:18 Eme ya nadu Nowa oro ame len ta ndron badeh, kadok badeh nyaran Sem, bwaneh badeh nyaran Ham ya silih Jepet. (Ham badeh tama Kenan).
GEN 9:19 Nadu Nowa oro ma taloh doh baden adeh tubu iri lau mari badu munyak.
GEN 9:20 Nowa badeh ndramak ta amwekes bilin ma hawe iy ndramak ta atah wa-in ma mwena.
GEN 9:21 Ano hamon ta iy a-un wa-in ano badeh ma iy ibo lolo-ou ma iy amadin kolau bwe, udu bolo asiu balei.
GEN 9:22 Eme tama Kenan Ham badeh eme anyolom taman kolau bwe eme ma iy suburuk i ta nadu tinen uru.
GEN 9:23 Ano Sem uru Jepet ame andrei kolau, ano uru talahani udu kona uru. Eme uru adek na kona uru ala badeh tubulu-i tama uru. Ya mada uru badeh batou tama uru bwe.
GEN 9:24 Ano boto-on ta wa-in ano badeh Nowa amak iy i tanan ai nadun bwaneh badeh amwekes lakou nane doh i tan,
GEN 9:25 eme iy anya, “Jo tandrakan Kenan kameh i bonyo-ou ta nadu tinen uru.
GEN 9:26 Katudun Laban Kindrei ta Sem! Kenan kameh i bonyo-ou ta Sem.
GEN 9:27 Ya Kindrei badeh mwesekei kane Jepet ki sola! Ya lundriyen badeh kamanyah kado hawe lau ta Sem oro. Ya Kenan badeh ki bonyo-ou ta Jepet.”
GEN 9:28 Ano hamon ta kon atuh badeh Nowa udu winiya jaha tuluwi lemenek (350).
GEN 9:29 Ano jaha tan asahan ndro rawa lemenek (950) badeh ma iy imek.
GEN 10:1 I dah sare nadu Nowa oro; oro badeh Sem eh, Ham eh ma hawe Jepet. Hamon ta kon atuh badeh ano badeh oro nah ma taloh nadu oro udu aliy.
GEN 10:2 Ya nadu Jepet oro badeh Goma, Megok, Madai, Jaban, Tubal, Misek ma hawe Tiras ya eme i dah badeh nyara tubu oro.
GEN 10:3 Nadu Goma oro badeh iri lau ala ado kon Askanas, iri ado kon Ripat ma ado kon Togama.
GEN 10:4 Ya nadu Jaban oro badeh ado kon Elisah, ado kon Spa-in, ado kon Saipres ma kon Rodes.
GEN 10:5 Oro badeh tubu iri lau badu busu. Ya i dah baden eh tubu Jepet oro. Oro badeh manyah ado boho kamen ra-em ra-em ado kon rakon rakon. Ya boho kamen ra-em ra-em asehek bohon randrah labai udu kon nane doh.
GEN 10:6 Nadu Ham badeh Kus, Ijip, Libiya, ma hawe Kenan ya oro doh badeh tubu oro nyara oro i dah.
GEN 10:7 Tubu iri Kus doh badeh badu kon Seba, badu kon Habilah, badu kon Sabtah, badu kon Rama ma kon Sabteka. Tubu Rama badeh lau badu kon Seba hawe kon Dedan.
GEN 10:8 Nadu Kus ari badeh nyaran Nimrot, iy badeh ma mwena asahan ndramak ta inyek kon
GEN 10:9 ma na seben ta Kindrei badeh iy badeh asahan ndramak ta bwisir ta katin haka, eme ya iri lau anya, “Kindrei badeh kabwidi ou kasahan ndramak ta bwisir ta katin haka ki le buku Nimrot!”
GEN 10:10 Ma mwena handru badeh iy badeh atondrok Babilon ma hawe kon Irek, kon Akat ya oro kon ma taloh doh badeh udu bolo kon tinan Babilon.
GEN 10:11 Udu munyak doh badeh iy iu ili Aseriya ma tahi kon tinan aloh Ninibeh, kon Rehobot Ir, kon Kalah,
GEN 10:12 ma Resen badeh udu ndrokowa Ninibeh ma ndrokowa kon tinan aloh Kalah.
GEN 10:13 Ya tubu Ijip badeh lau badu kon Lidiya, badu kon Anam, badu kon Lehap, badu kon Naptuh,
GEN 10:14 badu kon Patrus, badu kon Kasluh ma kon Krit, ya na oro doh le badeh iri Pilistin asahan.
GEN 10:15 Nadu Kenan oro badeh kadok badeh Sidon ano badeh Het, ya i dah nyara tubu oro ai.
GEN 10:16 Kenan badeh tubu iri badu Jebusa, tubu iri Amora, tubu iri badu Gigasa,
GEN 10:17 tubu iri badu Hiba, tubu iri badu Aka, tubu iri badu Sina,
GEN 10:18 tubu iri badu Abada, tubu iri badu Samara ma hawe tubu iri badu Hamata. Ya oro boho kamen mari ta Kenan badeh aseker.
GEN 10:19 Ya kobek ta Kenan badeh ili taku kum ano ili isos Gerar mirihik ta kon Gasa. Ano ili loboho lan ili isos Sodom, Gomorah, isos Admah ma hawe isos Sebo-im mirihik ta Lasa.
GEN 10:20 I doh tubu Ham oro ya oro badeh manyah boho kamen ra-em ra-em ado munyak toro ma boho kamen toro badeh asehek boho kon toro randrah labai.
GEN 10:21 Ya Sem bwele-en ta Jepet badeh tubu iri Hiburu mari.
GEN 10:22 Ya nadu Sem oro badeh Ilam eh, Asur eh, Apaset eh, Lut eh, ma hawe Aram. Ya tubu oro lau ala nyara oro doh.
GEN 10:23 Badeh lau ala are kon Us, are Hul, are Geta, are Mesek, badeh tubu Aram oro.
GEN 10:24 Apaset badeh tama Silah ma Silah ja badeh tama Eba.
GEN 10:25 Eba badeh nadun badeh la-uh; ari badeh nyaran Pelek, tasah na len doh badeh lau badu munyak apou iri; ya iy ari ja badeh nyaran Joktan.
GEN 10:26 Ya iri lau badu kon Almodat, badu Selep, badu Hasamabet, badu Jerah,
GEN 10:27 badu Hadoram, badu Usal, badu Diklah,
GEN 10:28 badu Obal, badu Abima-el, badu Siba,
GEN 10:29 badu Opir, badu Habilah, ma hawe Jobap. Oro mari doh badeh nadu Joktan le.
GEN 10:30 Ya munyak oro are aliy badeh tinan tan badeh udu kon Mesa ili isos Separ udu loboho bolo mandrei loboho an eme loken.
GEN 10:31 Ya i dah badeh tubu Sem oro ya oro manyah boho kamen ra-em ra-em ado loboho munyak toro, ya oro badeh boho kon toro bala le randra bwe. Iy ari asehek tan labai iy ari asehek tan labai.
GEN 10:32 Iri lau mari doh badeh lundriye Nowa, kon ari i buku ari asahan ta boho kamen ra-em ra-em. Kon atuh ya hamon ta aliy kon munyak badeh asahan na lundriye Nowa oro.
GEN 11:1 Ma mwena handru badeh lau badu munyak badeh asehek boho kon randra le.
GEN 11:2 Eme iri badeh adek ala ame loboho an eme loken, eme iri ame Babilon ma ado aliy ado ai.
GEN 11:3 Ano badeh iri lelen iri ari ari, “Ado kame! Ya to kapon ndren ma kamwekes kabadok.” Eme iri asun ndren i bek ano iri amwekes alis i ta bek ta kasabata-an ki se.
GEN 11:4 eme iri anya, “Taha kamwekes asiu bokok kudu bolo kon dah ki loken bolo asi kandrah, eme ma to kasore nyara to ma to badeh saseker sala bolo munyak mari.”
GEN 11:5 Eme badeh Laban eme andri bolo kon nane doh ma anyolom asiu nane iri atah ma atudun dah.
GEN 11:6 Ano ma iy anya, “Iri lau dah badeh iri rabuk le, ma iri asehek sahou randra le; I dah ma mwena ai, ta iri amwekes lakou dah. Mirihik kameh iri amwekes lakou leleyah na seken tiri ai.
GEN 11:7 To ka-au ka andri, katubuni boho kon tiri, eme ya iri sanuhun sahou tiri ari ari.”
GEN 11:8 Eme badeh Laban sekerei iri badeh winiya munyak mari, ma iri ruwani asiu bokok ma iri batah bwe ai.
GEN 11:9 Kon tinan nane doh nyaran Babilon, tasah Kindrei badeh tubuni boho kon tiri lau mari ma kabatana doh badeh iri lau aseker ma weleyani kon munyak mari.
GEN 11:10 Ya i dah badeh lundriye Sem oro. Hamon ta kon atuh ya jaha la-uh ano badeh Sem badeh jaha tan asahan rawa (100), eme badeh nadun ari asahan nyaran Apaset.
GEN 11:11 Hamon ta aliy badeh iy udu winiya jaha lemenek (500) ma hawe nadun rayah ale udu aliy.
GEN 11:12 Ya na len Apaset jaha tan asahan tonoh limeh (35) eme nadun ari asahan nyaran Silah.
GEN 11:13 Hamon ta aliy badeh iy udu winiya jaha hanek taloh (403) ma iy atehei nadun rayah udu aliy.
GEN 11:14 Eme Silah jaha tan asahan tonoh (30) badeh eme iy atehei nadun ari nyaran Eba.
GEN 11:15 Hamon ta aliy iy udu winiya jaha hanek taloh (403) ma atehei nadun rayah ale.
GEN 11:16 Ano len Eba jaha tan asahan tonoh hahuw (34) badeh iy atehei nadun ari nyaran Pelek.
GEN 11:17 Ano hamon ta aliy badeh iy udu winiya jaha hanek tonoh (430) ma atehei nadun rayah ale udu aliy.
GEN 11:18 Ano len Pelek jaha tan asahan tonoh (30) badeh iy atehei nadun ari nyaran Reu.
GEN 11:19 Ano hamon ta aliy badeh iy udu winiya jaha lunek ndro ari (209) ma iy atehei nadun rayah ale udu aliy.
GEN 11:20 Ano len Reu jaha tan asahan tonoh la-uh (32) badeh iy atehei nadun ari nyaran Serak.
GEN 11:21 Eme hamon ta aliy badeh iy udu winiya jaha lunek ndro taloh (207) ma iy atehei nadun rayah ale udu aliy.
GEN 11:22 Ano na len Serak jaha tan asahan tonoh (30) badeh iy atehei nadun ari nyaran Nahor.
GEN 11:23 Ano hamon ta aliy badeh iy udu winiya jaha lunek (200) ma iy tuwi nadun rayah udu aliy ale.
GEN 11:24 Ano na len Nahor jaha tan asahan lunoh ndro ari (29) badeh iy atehei nadun ari nyaran Tera.
GEN 11:25 Ano hamon ta aliy badeh iy udu winiya jaha rinek ronoh ndro ari (119) ma tuwi nadun rayah ale udu aliy.
GEN 11:26 Ano hamon ta Tera jaha tan asahan ndro tonoh (70) badeh iy atehei Abram atehei Nahor ma hawe Haran.
GEN 11:27 I dah lundriye Tera oro, iy ala tama Abram tama Nahor hawe Haran. Haran badeh tama Lot.
GEN 11:28 Eme Haran badeh imek udu kon tan amwenen udu Ur udu Babilon. Ya taman badeh bamak bwe iy udu le.
GEN 11:29 Ano Abram sudi Sarai i tan ma Nahor sudi nadu Haran badih nyaran Milkah. Ya Haran badeh tama Iska.
GEN 11:30 Sarai badeh bato-ou nah bwe, iy badeh kis.
GEN 11:31 Tera kuhi nadun Abram hawe udun Sarai ma hawe nadu tubun Lot, iu ndrine Haran. Eme ma oro au ame len ta kon tinan Ur udu bolo Babilon ma au ala munyak Kenan. Eme oro ala asos Haran ma ado aliy ai.
GEN 11:32 Eme Tera imek udu aliy ya jaha tan badeh lunek limeh (205).
GEN 12:1 Ano Laban tiye i ta Abram, “Ou au ta munyak tam ma ou au ta lowam oro hawe asiu ta tamam ya ou au ai, ala kon munyak jo kameh leheya tam.
GEN 12:2 Jo kameh edeu lundriyem oro asahan solo-an ma i dah kameh oro asahan kon rakon buruwen. Ya i dah kameh, jo nyosowani ou ma nyaram kameh lau mari i tanan ma nyosowan kameh i tiri lau.
GEN 12:3 Jo kameh nyosowani are aseken ou. Arile jo kameh edeu isi i tare lau aten ou. Na ou le kameh jo kameh edeu nyosowan i lau kon rakon rakon buruwen.”
GEN 12:4 Eme na len Abram jaha tan asahan ndro tonoh limeh (75) iy edek udu Haran eme len i buku none Laban ndratiye tan, ma Lot i hawen ale.
GEN 12:5 Eme Abram andrei udun Sarai hawe Lot, nadu uru nadu tinen Haran, ma hawe lakou tan mari hawe iri lohowan tan. Iri mene ado Haran au ala munyak Kenan. Len oro asahan Kenan badeh
GEN 12:6 Abram edek ili eme bolo munyak doh, eme iy asahan ta kei ndrabun badu Moreh, kon ndrabun udu Sekem (na len doh badeh iri Kenan are aliy).
GEN 12:7 Eme Laban asahan hawe Abram ma iy tiye i tan i buku doh, “I dah kon munyak kameh jo edeu i ta lundriyem oro ai.” Ano Abram tukumwi bek i ta Laban mene asahan hawen.
GEN 12:8 Ano badeh iy edek ili loboho kum kon mandrei solo-an udu loboho lan eme loken kon tinan nyaran Betel, ano iy tahi asiu balei udu loboho an i andri ndrokowa Betel hawe Ai, udu loboho an eme loken. Ano iy tutuni bek ma iy aloh nyara Laban.
GEN 12:9 Ano iy edek rakon i rakon loboho kum loboho kon Kenan.
GEN 12:10 Eme ya Kenan badeh nyamon bwe, eme iri akohok andra-i labai, eme badeh Abram iu i andri manyah sese udu loboho kum ta Ijip.
GEN 12:11 Na len iy anya ki bilisiu ta kobek ta Ijip, iy tiye i ta udun, “Ou badeh ou badih konen labai.
GEN 12:12 I buku none iri Ijip anyolom ou kameh iri anya ou kede-eh uduk ma i dah kameh iri kameh adai jo ya ou kameh ado.
GEN 12:13 Ou kameh tiye tiri, ou badeh nadu tine, tasah na ou kameh iri kameh badai jo bwe, ma iri kameh tondrokei jo kameh udu mwasin.”
GEN 12:14 Eme iy sakalawi kobek i bilisiu badeh iri Ijip anyolom udun badeh konen labai,
GEN 12:15 eme iri lau ta lahou badu bolo asiu ta kabin anyolom iy badeh konen labai, eme iri ala asehek i ta kabin, eme ma iri andrei iy ili loboho ndrahu kabin.
GEN 12:16 Na iy le badeh kabin tondrokei Abram udu mwasin, nyohonei iy iri katin haka aloh sipsip, nyohonei iy katin haka aloh me, nyohonei iy katin haka aloh bulumakau, nyohonei iy katin haka aloh donki hawe katin haka aloh kamel ma hawe iri bonyo-ou tan ale.
GEN 12:17 Laban eme atehei sik i tan ma hawe iri lau are bahan, tasah iy mene andrei Sarai.
GEN 12:18 Eme kabin tiye Abram eme ya iy lelen iy, “Ou amwekes sasah eme tek dah?
GEN 12:19 I buku sah ou anya i dah nadu tinem, eme ya jo kandrei iy keme uduk. Udum doh, ou andrei iy ma ah ka-au!”
GEN 12:20 Eme kabin tiye iri lau tan tiyani iy eme len ta kon munyak doh hawe udun ma iri lakou tan mari.
GEN 13:1 Lot i hawe Abram uru udun ma hawe lakou ta Abram mari, eme oro au ala loboho rai ta Ijip ano oro ala loboho kum ta Kenan.
GEN 13:2 Abram badeh tan lakou solo-an handru en, iri katin haka i buku none iri sipsip, me hawe bulumakau, bek nyikilikin silba hawe gol.
GEN 13:3 Ano badeh iy udu doh edek i rakon rakon ili Betel. Eme iy asahan kon mene ndrokowa Betel hawe Ai kon mene iy udu aliy bwena.
GEN 13:4 Eme iy eme ta bek mene iy tukumwi ma iy aloh nyara Laban.
GEN 13:5 Lot badeh tan iri sipsip, me ma bulumakau ale i buku none udun nadun oro hawe iri lohowan tan ale.
GEN 13:6 Eme ya uru badeh munyak hawe bwidiu solo-an bwe, winiya uru ma la-uh bwe, tasah uru badeh katin haka turu badeh solo-an labai.
GEN 13:7 Eme iri lau ta tondrok katin haka ta Abram hawe ta Lot badeh andra-i. (Na len doh badeh iri Kenan hawe iri Perisa badeh manyah ado munyak nane doh).
GEN 13:8 Ano badeh Abram tiye ta Lot anya eh, “Talu badeh lowa talu, arile lau tam hawe lau tek badeh andra-i.
GEN 13:9 Eme ya talu kapou talu. Ou aseken munyak loboho heh bwena? I buku none ou aseken bilisiu badeh bilisiu baden eh jo ki aliy ai.”
GEN 13:10 Eme Lot anyolom ili eme iy anyolom nyamak Jordan ili isos So-ar badeh gwa solo-an i buku none bilin ta Kindrei ma i buku none munyak badu Ijip. (I doh badeh Kindrei basulumwi kon tinan Sodom hawe Gomora bwe le).
GEN 13:11 Eme Lot badeh solo-ei nyamak mari badu Jordan badeh i tan, eme iy iu i loboho lan ai. I dah sihide uru ma la-uh atalan i buku sah.
GEN 13:12 Ya Abram badeh udu munyak Kenan udu ai, ya Lot baden eh ili manyah udu bolo kon tinan nyamak ma manyah mirihik ta Sodom.
GEN 13:13 Iri badeh kandriyen tiri badeh ndrandra-i labai ta mada Kindrei.
GEN 13:14 Ano hamon ta Lot ndra-au badeh, Laban tiye ta Abram, “Kon ou are aliy baden, ou suri ou, ma ou anyolom kili keme ki jaha, ki rai, ki kum ma ki lan.
GEN 13:15 Jo kameh edeu munyak doh i tam ma lundriyem oro kameh nyaran bwe, winiya ari lau winiyan bandromwei bwe; on badeh winiyan andromwei.
GEN 13:17 Ou ala anyolom kili bwele-e munyak mari, munyak jo kameh edeu i tam.”
GEN 13:18 Eme Abram ili tahi asiu udu mirihik ta kei ndrabun loboho Mamre udu Hibron, eme udu doh badeh iy tukumwi bek ta salom i ta Laban.
GEN 14:1 Na len kabin Amrapel badu Babilon, Ariyok badu Elasar, Sedola-oma badu Ilam ma Tidal badu Go-im,
GEN 14:2 oro badeh ala amwekes bahun i ta kabin ma limeh: oro kabin doh badeh, Bera badu Sodom, Birsa badu Gomora, Sinah badu Admah, Semeber badu Sebo-im ma hawe kabin badu Bela (So-ar).
GEN 14:3 Ya oro kabin ma limeh doh badeh atukum ase ma lau ta bahun badeh ado nyamak Sidim, na dah badeh aloh gwa ndras nyakadan.
GEN 14:4 Oro badeh mene are baha tondrok ta Sedola-oma winiya jaha ronoh la-uh arile na jaha ronoh taloh badeh oro bwale oro ta are bahan.
GEN 14:5 Na jaha ronoh hahuw badeh Sedola-oma hawe iri kabin ta seben tan badeh, ame ma lau ta bahun tiri, ame andrei iri Repa-im an Asterot Karna-im, ma Susim an Ham, iri Emim ado loboho munyak ta Kiriyata-im,
GEN 14:6 ma hawe iri Hora ado mandrei Idom, tikahei iri ala Elparan loboho ka-u lomale an (kon ndra an le).
GEN 14:7 Ano oro tubuni oro, ano oro ame Kades (aloh Enmispat). Oro andrei munyak mari tiri Amaleka ma andrei Amora kon oro manyah ado Hasason Tamar.
GEN 14:8 Ano iri kabin badu Sodom, badu Gomora, badu Admah, badu Sebo-im ma Bela tukumwi iri lau ta bahun tiri, ma amwekes bahun ado nyamak Sidim, amwekes bahun, hawe iri kabin badu Ilam, badu Go-im badu Babilon hawe Elasar. Kabin limeh amwekes bahun i la-u kabin hahuw.
GEN 14:10 Eme nyamak doh badeh lawes udu aliy eme ya iri kabin badu Sodom hawe Gomora anya katobwak ta bahun eme badeh iri taku a bolo lawes amwekes na lakou sabata-an nane dah, eme ya oro kabin taloh le badeh taku akoh a mandrei.
GEN 14:11 Eme oro kabin ma hahuw dah andrei lakou mari badu Sodom hawe Gomora, ma nyamon ale ma oro au.
GEN 14:12 Ya Lot nadu nadu tine Abram badeh oro ado Sodom, eme badeh iri andrei oro ma lakou toro mari.
GEN 14:13 Eme ndramak ari ta atobwak eme badeh tiye nyala Abram ta lakou mari. Abram badeh Hiburu. Iy manyah udu mirihik ta kei ta aton ta Mamre badu Amora. Mamre hawe nadu tinen Eskol ma Aner badeh, oro lau ta seben Abram.
GEN 14:14 Eme Abram anuhun iri badeh ndrakuhi Lot oro. Eme iy nyuruwini iri lau ta bahun tan badeh ame, iri mari a se badeh asahan tonek ronoh ndru la-uh (318). Eme iri tikahei iri badeh ala asos Dan.
GEN 14:15 Ano iy apwai lau ta bahun tan, ano na ben badeh iri ala amwekes bahun tikahei iri ala asos Hobah loboho Damaskus.
GEN 14:16 Eme iy kuhi lakou mari mene andrei eme hamon. Ma hawe lowan Lot hawe lakou tan mari ma hawe iri badih ma hawe lau rayah ta bolo kou.
GEN 14:17 Ano len Abram eme hamon ta bahun ta i la-u Sedola-oma ma hawe iri kabin badeh, eme badeh kabin badu Sodom ili aturuk iy udu nyamak Sabeh (aloh Nyamak ta kabin).
GEN 14:18 Eme kabin Melsisedek, kabin badu Salem, lau ta ndrokowa lau hawe Kindrei ta Kindrei badu loken, eme atiye jabi hawe wa-in i na Abram.
GEN 14:19 Eme iy atehei nyosowan i tan, ano iy anya, “Ya abo, Kindrei badu loken, ou ta amwekes munyak ma kandrah, ou nyosowani Abram!
GEN 14:20 Kindrei badu loken atehei boto-on i tam ta bahun, ya masiye badeh ki ta Kindrei!” Eme badeh Abram eme atehei lakou tan rayah, i buku ronoh, iy atehei ari i tan ya i buku rinek, ronoh i tan, lakou doh iy andrei ta bahun eme badeh atehei i ta Melsisedek.
GEN 14:21 Ano kabin ta Sodom tiye i ta Abram, “Lakou tam mari kudu gwek, jo aseken le lau tek.”
GEN 14:22 Eme Abram anya eh, “Jo badeh tandrakan ta mada Laban Kindrei badu loken, ndramak ta amwekes munyak ma kandrah, ta jo winiyan basolo-ei ari lakou tam bwe, i buku none saba lakou nadu bwisik i buku kam hawe ku-i katim. Bakameh hamon ou asehek, ‘Jo le badeh jo mwesekei Abram tan lakou solo-an.’
GEN 14:24 Jo kameh winiyan basolo-ei ari lakou bwe. Jo aseken lakou le iri lau tek mene andrei ma ndraniy badeh keme ai. Arile Aner, Eskol hawe Mamre, oro lau ta aseben jo badeh kakohok ki toro ai.”
GEN 15:1 Ano hamon ja badeh lele asahan ta Abram, eme iy anuhun Laban tiye i tan, “Abram, ou sanoh! Jo kameh i turuk tam ma jo kameh edeu nyosowan tinan labai i tam.”
GEN 15:2 Arile Abram anya eh, “O Laban Kindrei, jo kada-ah nah bwe, ya saba lakou mwasin kameh ou kameh atehei eme la-uk? Lau ta atondrok lakou tek badeh Eliyesar badu Damaskus.
GEN 15:3 Ou badeh badeu tek rayah nah bwe, eme i dah kameh lau ari badu bolo oro lohowan tek kameh atondrok lakou mari tek ai.”
GEN 15:4 Ano iy anuhun Laban tiye tan ja, “Eliyesar lohowan tam badeh kameh batondrok lakou tam bwe, i dah kameh nadum amwenen kameh atondrok.”
GEN 15:5 Eme Laban kuhi iy eme manan ma tiye, “Ou anyolom ki loke bada kandrah ya none ou ondrek ndrau se, ou kameh lundriyem oro kameh i solo-a ndrau don.”
GEN 15:6 Eme badeh Abram atehei budon tan handru in ta Laban, tasah ta katin doh badeh Laban sekesek ma aseken iy ma aloh iy mwasin labai tan.
GEN 15:7 Ano Laban anya eh, “Jo badeh Laban, jo le badeh kuhi ou ado Ur udu Babilon ame len, ya jo badeh edeu munyak dah i tam.”
GEN 15:8 Eme Abram ndremenya, “Laban Kindrei, i buku sah jo ki tanan i dah munyak tek amwenen.”
GEN 15:9 Eme Kindrei anya eh, “Ou andrei ari bulumakau, ari rem ma hawe ari me jaha taloh ma hawe ari ban hawe ari ku.”
GEN 15:10 Eme Abram andrei oro katin haka ma taloh, ma taloh sirih dah i mada Kindrei. Eme sapwai katin haka dah i lusi, eme tulusi atehei in bilisiu ya tulusi atehei in bilisiu, arile sirih le badeh iy bapwai bala lusi bwe.
GEN 15:11 Eme iri manyuwe atah ame andri badeh anya kaimon, arile Abram tikahei iri au.
GEN 15:12 Eme an anya ki-iu ki andri badeh, Abram amadin tuk, ya lulik ma nohowan eme la-un.
GEN 15:13 Eme Laban tiye i tan, “Lundriyem oro kameh a buku lau badu leheleh ado munyak len labai; oro kameh a bonyo-ou udu gwek ma i dah kameh maha ndra-in handru i la-u oro winiya jaha hanek (400).
GEN 15:14 Ya jo badeh kameh edeu maha ma isi i ta kon heh iri are bonyo-ou tiri. Ano buku none iri ame len ta kon doh kameh, iri kameh kuhi lakou mari eme hawe iri.
GEN 15:15 Ou kameh ado alon winiyan isi basahan tam bwe winiya ou le barala lek hawe tamam oro.
GEN 15:16 I dah kameh lau rebesem au, ano rebesem au, ano rebesem au, ano rebesem au. Ano lundriyem oro barame dah ja ai. Tasah jo kameh winiyan batikahei iri Amora ba-au bwe, winiya kandriyen ndra-in tiri i tinan labai, ano jo baramwekes maha ma isi barala tiri ai.”
GEN 15:17 Ano len an amai ano kon ilik badeh kasu-er ma jih anya ma seselek, ma hawe sun anya asahan, ma edek ndrokowa katin haka dah.
GEN 15:18 Ano ma kabatana doh badeh, Laban amwekes sahou randra le hawe Abram, ano Kindrei tiye, “Jo badeh tandrakan ta edeu munyak i ta lundriyem oro badeh, kobek tan badeh udu Ijip ili taku gwa Yupretis,
GEN 15:19 hawe munyak tiri Keni, ma munyak tiri Kenis ma munyak tiri Kadmon,
GEN 15:20 ma munyak Hita ma munyak tiri Perisa ma munyak tiri Repa-im,
GEN 15:21 ma munyak Amora, ma munyak tiri Kenan, ma munyak tiri Gigasa ma hawe munyak tiri Jebus badeh ta lundriyem oro.”
GEN 16:1 Abram Sarai badeh badeu tan ari nah bwe. Arile iy badeh badih ari udu aliy i nyara badih ta lahou tan ya iy badu Ijip.
GEN 16:2 Eme iy tiye i ta Abram, “Laban badeh tawi jo, eme badeh jo bato-ou nah bwe. I buku sah, baden eh ou ala amadin hawe badih ta lahou tek? Koro-an iy katuwiy nah keme tek.” Eme Abram badeh aseken budon ta Sarai.
GEN 16:3 Eme Sarai atehei Haga badeh i hawe udun ta nyeu. (i doh asahan badeh, len Abram eme udu Kenan jaha ronoh).
GEN 16:4 Eme badeh Abram amadin hawe Haga ma Haga ndrinen i tinan. Eme len Haga tanan iy badeh ndratuwi nah, iy anyolom Sarai badeh anya jo le ai.
GEN 16:5 Ano Sarai tiye i ta Abram, “Ou le mwesekei badeh ma Haga banyolom jo bala mwasin bwe. Jo le badeh suni iy amadin hawem eme kabatana doh badeh iy atona iy badeh ndratuwi nah, eme ma iy madan andra-i eme tek. Eme Laban le baranyolom talu, ou mwasin de jo mwasin!”
GEN 16:6 Eme Abram anya eh, “Mwasin labai iy badeh ta lahou tam iy udu baha tondrok tam; Saba lakou ou anya amwekes ki tan ou amwekes ai.” Eme badeh iy amwekes tibine i ta Haga andra-i labai, eme Haga atobwak.
GEN 16:7 Eme Angelo ta Laban eme ndruni iy udu gwa li udu lomale an, gwa doh badeh udu ka-u san ili Sur.
GEN 16:8 Eme iy anya eh, “Haga, ou badeh badih ta lahou ta Sarai, ou ado heh ame, ma ou anya ahe.” Eme iy anya eh, “Jo badeh atobwak eme len, ta badih ta kati asiu.”
GEN 16:9 Eme iy tiye i tan, “Ou a hamon ja ma ou asahan bonyo-ou tan.”
GEN 16:10 Ano iy tiye, “Jo kameh edeu lundriyem oro a sola, winiya ari lau bandromwei bwe.”
GEN 16:11 Angelo ta Laban tiye i tan ale, “Ou kede-eh nah mwan ere ndrinem eme ou tondrohani nyaran badeh ki Isma-el, tasah Laban badeh ndranuhun ndrelen ma tikisiy tam.
GEN 16:12 Arile nadum kameh ta ramwes, iy kameh ta amwekes ramwes i la-u lau mari. Ma iri lau mari kameh budon tiri andra-i i tan, ma iy kameh udu ndrahun len labai ta lowan oro.”
GEN 16:13 Ano Haga aloh nyara Laban ma tiye sahou tan i buku doh, “Ou Kindrei ou ndranyolom jo, jo ndratou, ou are ala anyolom jo.”
GEN 16:14 Eme ma iri aloh li doh badeh li ta Ber Lahai Roi, moson “Gwa li ta Kindrei, ou anyolom jo,” udu ndrokowa Kades hawe Beret.
GEN 16:15 Eme Haga atehei nadu Abram mwan; eme badeh Abram tondrohani nyaran Isma-el.
GEN 16:16 Na len doh badeh Abram jaha tan ndru lunoh onoh (86).
GEN 17:1 Na len Abram jaha tan asahan ndro ronoh ndro ari (99), Laban badeh asahan hawen tiye, “Jo dah jo Kindrei jo tek boto-on. Ou anuhun jo ma len mari badeh ou amwekes kandriyen mwasin le.
GEN 17:2 Jo kameh amwekes sahou randra le hawem ma edeu lundriyem oro a sola.”
GEN 17:3 Eme Abram aluh i andri ma bulin i andri bada munyak, ano Kindrei anya eh,
GEN 17:4 “Jo amwekes sahou randra le dah hawem. Jo badeh tandrakan, ou badeh kameh asahan tubu iri lau mari badu kon munyak.
GEN 17:5 Nyaram kameh bala Abram bwe ai, nyaram kameh Abraham, tasah ou kameh asahan tubu iri lau badu kon munyak solo-an.
GEN 17:6 Jo kameh edeu lundriyem oro a sola, eme oro rayah kameh asahan kabin.
GEN 17:7 “Jo kameh balek winiyan bamani tandrakan tek i tam ma hawe i ta lundriyem oro na len, eme, eme, bwe. Sahou randra le dah, winiyan ta bano bwe. Jo kameh asahan Kindrei tam ma Kindrei ta lundriyem oro.
GEN 17:8 Ou badeh badu leheleh ta kon Kenan mari, jo kameh edeu i tam ma i ta lundriyem oro udu le buku doh ma jo kameh i Kindrei toro.”
GEN 17:9 Ano Kindrei tiye ta Abraham, “Ou ma lundriyem oro badeh ndrine ado kise, ta sahou randra le hawek ma lau rebesem hamon ame.
GEN 17:10 I dah sahou randra le tek ou samaniy, udu ndrokowak hawe ndrokowam hawe lundriyem oro: lau mwan mari badeh kasan ku-i lakou tiri ki-iu.
GEN 17:11 Na dah ma na len hamon eme ou badeh asan ku-i lakou ta nah ki-iu i buku len tan kasahan ndru la-uh. Iri ta lahou tam badu leheleh ma badu asiu tam ale. I doh badeh ta leheya sahou randra le udu ndrokowa talu ma la-uh.
GEN 17:13 Ado ari ari badeh kasan ki-iu eme ya mada lau kanyolom i dah badeh kalem ta leheya sahou randra le tek ma ou badeh udu le buku doh.
GEN 17:14 Are lau mwan basan ku-i lakou tan bwe, iy badeh lau tek bwe, tasah iy babudon sahou randra le tek hawen bwe.”
GEN 17:15 Ano Kindrei tiye ta Abraham, “Ou badeh saloh udum Sarai ja ai; na dah ma na len eme badeh ou aloh Sara.
GEN 17:16 Jo kameh edeu nyosowan i tan ma iy kameh atehei ari nah i tam. Jo kameh atehei nyosowan i tan ma iy kameh asahan tine iri lau mari badu kon rakon buruwen, ma kabin kameh asahan ta lundriyen oro.”
GEN 17:17 Eme Abraham aluh ya bulin i andri bada munyak eme iy lomondra ili ma iy akodei iy ta ehe-en anya eh, “Winiyan ari ndramak jaha tan rinek (100) winiyan mwesekei nah? Ya Sara badeh jaha tan ndro ronoh (90), ya iy winiyan tuwi ale?”
GEN 17:18 Eme Abraham tiye ta Kindrei, “I buku sah ou winiyan batehei Isma-el bame nah badu ndrinek bwe?”
GEN 17:19 Arile Kindrei anya eh, “Bwe ai. Udum Sara kameh atehei nah ari i nadum ya ou tondrohani nyaran badeh ki Aisik. Jo bamani sahou randra le hawen ma lundriyen oro bwe. I doh ta udu le buku doh. Ya winiyan ta bano bwe.
GEN 17:20 Ya ndrelen tam ta Isma-el baden eh, jo ndranuhun; jo kameh nyosowani iy handru; ma jo kameh mwesekei iy asahan sola ma kanen kameh i sola. Iy kameh asahan tama oro lau ta batun ma ronoh la-uh ma jo kameh edeu iy asahan kon rakon buruwen.
GEN 17:21 Arile jo kameh bamani sahou randra le hawe nadum Aisik bwe. I dah kameh adeu iy na jaha eme.”
GEN 17:22 Eme Kindrei asehek sahou i ta Abraham ano badeh iy iu ai.
GEN 17:23 Eme Na len doh le badeh, Abraham anuhun sahou ta Kindrei ma iy sani ku-i lakou ta Isma-el iu hawe tiri lau mwan are asiu tan ale. Iri doh badeh iri lau ta lahou tan badu bolo asiu. Iri lau ala adeu iri ado hawen ma hawe iri lau rayah ta sisih ale.
GEN 17:24 Abraham jaha tan asahan ndro ronoh ndro ari (99) badeh, sani ku-i lakou tan iu,
GEN 17:25 ya Isma-el badeh jaha tan ronoh taloh.
GEN 17:26 Uru ma la-uh badeh asan ku-i lakou turu iu na len ari le,
GEN 17:27 ma hawe iri lau ta lahou mari ta Abraham.
GEN 18:1 Ano na len, kon i nyarahan badeh Abraham eme manyah udu mada san ta asiu balei tan, eme ya Kindrei asahan hawen. Madan eme loke badeh iy anyolom lau taloh badeh ales.
GEN 18:2 Iy anyolom oro le badeh iy sakaliye ili aturuk oro ano iy aluh i andri, bulin i ta bada munyak.
GEN 18:3 Ano iy anya eh, “Laban, ado sa-au ta kon tek, ado kado; jo dah ta atondrok ou.
GEN 18:4 Gwa doh ado kasikine kati ado, ano ado kamunyau kado baha kei badeh.
GEN 18:5 Jo kameh akohok rayah nyamon ta aseben ado, tasah san lawe-en labai. Ado badeh anuhun jo ma ado ame asiu tek, eme ya jo katondrok ado ma kaseben ado.” Eme oro anya eh, “Wurah handru, aso aseken kandriyen tam labai.”
GEN 18:6 Ano Abraham i bolo balei badeh asehek i ta Sara, “Suwi Ou andrei rayah palawa ma ou asun sabe jabi ramen.”
GEN 18:7 Ano iy sakaliye ili bolo iri katin haka badeh andrei bulumakau kasen mwasin handru, iy andrei atehei i mine ndramak ta lahou tan ari ili sesek ma ajeh.
GEN 18:8 Ano iy andrei sur simidin ta katin haka ma hawe bulumakau kasen nane ndrajuhi dah, bwese-ei i hawe oro. Eme oro aimon ai. Ya Abraham badeh ales udu baha kei.
GEN 18:9 Eme oro ndremenya iy, “Udum Sara ndraheh?” Eme iy anya eh, “Iy udu bolo asiu balei.”
GEN 18:10 Ano Laban anya eh, “Jo kameh eme ja, na bolo jaha eme, ma udum Sara kameh nah udu ndrinen.” Ya Sara badeh udu mada san ta asiu balei udu konan.
GEN 18:11 Sara hawe Abraham badeh uru ndra alon handru ma jaha turu badeh ndra sola labai, ma Sara badeh winiyan bato-ou nah ja bwe ai.
GEN 18:12 Eme Sara badeh akodei iy ma iy ehe-en ma iy lomondra, “Jo badeh ndra ndrolo-oh, ma iy lau tek ndra alon, jo kameh barasekesek ta lakou dah de bwe.”
GEN 18:13 Ano Laban tiye i ta Abraham, “I buku sah Sara ehe-en ma anya eh, ‘Handru eh, jo kada-ah ndra alon, jo kameh ato-ou nah?’
GEN 18:14 Lakou mari kede-eh manamun ta Laban le ai. Jo kameh eme hamon na len ta aliy amwenen udu bolo jaha eme, ma Sara kameh tuwi nah mwan.”
GEN 18:15 Eme Sara inoh ma mwesekei wasai anya eh, “Jo behe-en bwe.” Arile iy anya eh, “Ou ehe-en handru.”
GEN 18:16 Ano badeh oro lau dah au, adek ala, ano oro anyolom eme andri ta Sodom ma Abraham atiye oro ma anyolom oro au.
GEN 18:17 Eme Laban anya eh, “Jo winiyan batonei sasah jo anya kamwekes ta mada Abraham bwe ai.
GEN 18:18 Lundriyen oro kameh asahan kon tinan ari buruwen, ma na iy le badeh kameh, jo kameh atehei nyosowan i tiri kon munyak tinan mari.
GEN 18:19 Jo badeh ndrasehek tan ta atehei iy badeh kabatanau nadun oro hawe lau badu asiu tan kanuhun le jo, ma kamwekes kandriyen mwasin le handru. I buku none oro an hamon ta batanau mari, jo tandrakan ta amwekes lakou mari i tan.”
GEN 18:20 Ano Laban tiye, “Ndrelen ta bada Sodom hawe Gomora tinan labai, ma karei ma lomondra ndra-in ndrandra-i labai.
GEN 18:21 Eme ya jo ki-iu ki andri kanyolom i buku none lakou oro amwekes doh handru de bwe, i buku none ndrelen toro ndrame.”
GEN 18:22 Eme uru lau dah au ala Sodom, arile Abraham le ales udu le mada Laban udu.
GEN 18:23 Ano Abraham eme mirihik ma iy lelen, “Ou kameh adai iri lau mwasin ma lau ndra-in ale?
GEN 18:24 I buku none lau mwasin ma lomonoh (50) i dah kameh ou sulumwi kon de bwe, ma ou sulumwi kon mari ano. Ya ou winiyan basebenei bwe ai, ta lau ma lomonoh (50) bado bwe ai.
GEN 18:25 Ou winiyan bamwesekei bwe. I buku none ou mwesekei kameh iri lau mwasin kameh ado bolo lau ndra-in ale. Ya iy kameh winiyan bwe. Iri lau ta anuhun sahou badu munyak badeh anuhun sahou badeh mwasin ja.”
GEN 18:26 Ano Laban tiye, “I buku none oro lau lomonoh (50) mwasin ado Sodom eh, badeh kameh jo winiyan basulumwi kon mari bwe.”
GEN 18:27 Eme Abraham tiye ja, “Jo badeh ndrasehek sahou boto-on labai ndra ta Laban. Jo badeh lakou leleyah, jo munyak ma koloweh leleyah.
GEN 18:28 Ya ki buku none lau limeh le ka-au udu baha lomonoh (50), ou winiyan sulumwi kon de bwe?” Eme Laban tiye, “I buku none jo anyolom lau hanoh limeh (45) ado aliy, badeh kameh jo winiyan basulumwi bwe ai.”
GEN 18:29 Eme iy ndremenya ja i tan, “I buku sah i buku none lau hanoh (40) kado aliy?” Eme iy tiye, “Buku none oro lau hanoh le, jo winiyan bamwesekei bwe.”
GEN 18:30 Ano Abraham tiye, “Laban ei, ou sabolosen, jo kasehek, ya i buku none tonoh (30) ado aliy?” Eme iy tiye, “Buku none oro lau tonoh le, jo winiyan bamwesekei bwe.”
GEN 18:31 Eme Abraham tiye, “Len ndra-au badeh jo ndrasehek sahou boto-on ndra ta Laban, ki buku none lunoh (20) ado aliy, mwasin?” Eme iy tiye, “Oro lunoh le badeh jo winiyan basulumwi kon bwe.”
GEN 18:32 Ano iy tiye, “Laban ou sabolosen; jo anya kasehek sahou san rasan le ja. Ya ki buku none lau ronoh le mwasin de bwe?” Eme iy anya eh, “Buku none lau ronoh le badeh jo winiyan basulumwi bwe.”
GEN 18:33 Eme Laban asehek sahou hawe Abraham ano badeh iy iu ai, eme ma Abraham i asiu ai.
GEN 19:1 Lot badeh manyah udu mada san ta i bolo kon na beyeh, eme badeh uru Angelo la-uh asahan hawen. Iy anyolom uru le badeh iy edek ili hawe uru ma akor ma bulin i andri bada munyak.
GEN 19:2 Eme iy tiye, “Laban, ah ma la-uh kame asiu tek tasah jo ta lahou ta ah. Ah kasikine kati ah ma ah kamadin ben ari, ano ma ndraben ah bara-au.” Eme uru anya, “Bwe ai, aru kameh amadin na ben dah ado lohalak bolo kon.”
GEN 19:3 Arile iy andresei uru ma uru ala asiu tan. Ano Lot tiye oro lau ta lahou tan mwesekei jabi ramen yis bala bolon bwe i nuru lau dah.
GEN 19:4 Eme oro bamadin bwe le badeh, iri lau loweu hawe iri lau-en mari badu kon Sodom badeh ala awudi asiu.
GEN 19:5 Eme iri aloh Lot, “Oro lau ame na ben nane ndraheh? Oro kameh manan aso anya katou oro!”
GEN 19:6 Eme Lot sulu-i kou ano iy eme manan, ma atuwi kou ili.
GEN 19:7 “Ado kawas tek, ado samwekes kandriyen badeh.
GEN 19:8 Naduk badih ma la-uh kada-ah, uru bakohok se mwan bwe. Jo katiye uru kame manan ya ado badeh kamwekes sasah na seken tado ki turu. Ya ado samwekes ari lakou sala toro, oro badeh are baha tondrok tek.”
GEN 19:9 Eme oro anya, “Ou abelek!” Ma oro tiye, “Ou lau dah badeh badu leheleh ame dah, eme ya ou anya amwekes kandriyen ta sahou ai. Oro kameh, bwe ai, arile aso kameh adeu maha tinan labai i tam.” Oro andres Lot boto-on labai ano oro anya katokos asiu.
GEN 19:10 Arile oro lau ado bolon sulu-i kou ma aluwi Lot i bolon ano sulu-i kou ili.
GEN 19:11 Ano badeh oro bwidi mada iri agwah, eme ma iri banyolom kou bwe.
GEN 19:12 Ano uru lau ma la-uh dah lelen Lot, “Ou ari lowam, o ari molosou ta nadum, o ari nadu mwan ma badih udu kon dah de bwe. O ari lau udu bolo kon dah tam de bwe. Ou kuhi oro ka-au ta kon dah.
GEN 19:13 Tasah aso kameh asun kon dah. Laban badeh anuhun ndrelen tiri, eme iy suni aso ame ta asun.”
GEN 19:14 Eme Lot ili badeh asehek ta masa-an oro, ala sudi nadun oro badih. Iy tiye, “Suwi ado kame len ta kon dah, Laban kameh asun kon dah.” Arile udu nadun oro anya badeh iy ibo nyorei le.
GEN 19:15 Na boholen badeh oro Angelo wekewek Lot, “Suwi! Ou kuhi udum ma nadum badih ma la-uh ya ado ka-au. Eme ya ado samak, len kon kameh andrakak!”
GEN 19:16 Eme Lot badeh babotatahan bwe. Laban tikisiy iy eme iy kuhi udun ma nadun uru na lim ma sariye oro ame len ta kon.
GEN 19:17 Eme oro ame len le badeh iy ari tiye anya eh, “Ado kabotataha batu ado! Ado sanyolom same hamon, ma ado samunyau loboho kon bwidiu udu aliy. Ado katobwak ka mandrei, bakameh ado kamak.”
GEN 19:18 Arile Lot tiye i turu, “Ndri-i, Laban tek!
GEN 19:19 Ou badeh anuhun jo labai, ma mwesekei jo, ma ou sebenei kohak. Mandrei udu len labai, jo winiyan batobwak bala aliy bwe. Koro-an maha ma sisi-in tinan labai kabwidi jo kimek.
GEN 19:20 Ou ndranyolom kon bwisik udu mirihik ai kodo-oh. Ma kon doh nadu bwisik, eme jo katobwak ki aliy. Ma jo kameh winiyan bamak bwe.”
GEN 19:21 Eme iy anya eh, “Abo mwasin jo aseken. Jo badeh winiyan basulumwi kon badeh bwe.
GEN 19:22 Suwi ado kala suwi! Jo badeh winiyan bamwekes ari lakou bwe winiyan ado ndrasos.” Eme ta katin doh badeh kon doh aloh So-ar, tasah kon doh bwisik.
GEN 19:23 Lot oro ala asos le So-ar badeh, an eme loken la-u kon.
GEN 19:24 Ano badeh Laban mwesekei jih nyarahan labai anya udu kandrah eme sulumwi Sodom hawe Gomora.
GEN 19:25 Eme badeh sulumwi iri lau mari, sulumwi nyamak ma hawe sulumwi baso mari ano. Lakou mari badeh andrakak.
GEN 19:26 Eme udu Lot anyolom i hamon badeh ma iy ibin i bek.
GEN 19:27 Eme ma ndraben ta len ari ja, Abraham amak ma iy ili ndrahu kon iy mene ales udu aliy mada Laban,
GEN 19:28 eme iy anyolom i andri ili Sodom hawe Gomora ma hawe munyak ma nyamak mari loboho doh badeh iy anyolom kasu-er i loken. I buku none kasu-er ta jih nyarahan badeh i loken.
GEN 19:29 Len Kindrei sulumwi kon tinan ma nyamak mene Lot manyah udu aliy, eme iy badeh bamaniy Abraham bwe ya eme iy mwesekei Lot atobwak ma iy udu mwasin. Loboho Iri Mowaba Ma Amora
GEN 19:30 Ano Lot hawe nadun uru badih ma la-uh badeh ruwani So-ar, eme oro ala manyah ado bolo mandrei, tasah iy badeh inoh ta manyah udu So-ar. Oro ma taloh badeh manyah ado munu bek.
GEN 19:31 Eme len ari badeh nadu Lot badih bwele-en tiye i ta nadu tinen badih bahan, “Tama talu badeh ndra alon, eme ari lau ja kede-eh ja bwe ai, ta amadin talu bwe, i buku none kandriyen ta munyak mari.
GEN 19:32 Talu kamwesekei tama talu badeh ka-un wa-in eme iy kamadin talu ya talu kato-ou nah.”
GEN 19:33 Eme na ben doh badeh uru atehei wa-in i ta tama uru, ano badeh iy bwele-en turu badeh amadin hawen bwena. Iy amadin hawen badeh ano iy suri iy badeh, Lot batona bwe.
GEN 19:34 Len ari ja badeh iy bwele-en tiye i ta iy bahan, “Na ben badeh jo amadin tama, talu kamwesekei iy ka-un wa-in na ben dah, eme ou ala amadin hawen ja eme ma talu kato-ou nah kasahan ta tama talu.”
GEN 19:35 Eme uru mwesekei tama uru a-un wa-in na ben doh ano iy bahan ili amadin hawen. Eme i le buku aliy, iy amadin hawen badeh, ano iy suri iy eme loken badeh Lot batona se bwe.
GEN 19:36 Eme uru ma la-uh tuwi nah nadu tama uru.
GEN 19:37 Iy bwele-en badeh atehei nadun eme len badeh tondrohani nyaran badeh Mowab, moson “Ta tama.” Eme iy badeh tama iri Mowaba na len dah.
GEN 19:38 Iy bahan badeh atehei nah mwan ale, eme tondrohani nyaran badeh Ben-ami, moson “Nadu tama oro.” Eme na len dah badeh iy badeh tama iri Amora.
GEN 20:1 Ano badeh Abraham ruwani ndrahunen bwena, eme iy edek ili loboho Negeb ma manyah udu ndrokowa Kades hawe Sur. Iy udu Gerar badeh luwen bwe,
GEN 20:2 eme badeh Abraham tiye anya Sara badeh nadu tinen. Ano kabin badu Gerar nyaran Abimelek atehei sahou ili andrei Sara ili.
GEN 20:3 Arile Kindrei asahan ta Abimelek na ameh na ben ma tiye i tan, “Ou kameh amak tasah ou andrei badih tasou badeh.”
GEN 20:4 Eme badeh Abimelek bala mirihik tan bwe, eme iy tiye, “Laban, jo badeh mwasin labai, ou kameh adai jo ma iri lau tek ai?
GEN 20:5 Abraham tiye badeh anya iy nadu tinen, eme Sara ale tiye i buku aliy. Jo mwesekei doh badeh budon tek bandra-i bwe ma jo bamwesekei ari lakou ndra-in bwe.”
GEN 20:6 Eme Kindrei tiye i tan na ameh, “Jo tanan, ou badeh budon tam bandra-i bwe, eme jo badeh bamwesekei ou bamwekes lomondra ndra-in bame badak bwe, ma bamwesekei ou batawi iy bwe.
GEN 20:7 Ya eme na le dan, badeh ou atehei udun ki hamon. Tasah iy badeh ndramak ta boho Kindrei iy kameh amwekes salom i tam, i buku bwe, jo tiye tanan tam ou kameh amak ma hawe iri lau tam mari.”
GEN 20:8 Eme na ma ndraben badeh iy luhi iri lau ta lahou badu bolo asiu tan ame, eme badeh iy asehek nyala iri. Eme badeh iri anoh.
GEN 20:9 Ano badeh Abimelek luhi Abraham eme bolon ma tiye, “Ou amwekes sasah eme taso dah? Jo mwesekei madam andra-i ta sasah handru, eme ya ou adeu maha tinan eme la-u aso ma tondrok tek dah? Lakou ou amwekes dah badeh ou winiyan bamwekes bame tek bwe ai.”
GEN 20:10 Ano badeh Abimelek ndremenya Abraham, “Saba katin handru ou badeh amwekes kandriyen dah?”
GEN 20:11 Eme Abraham anya eh, “Jo abudon le i buku doh, iri lau badu kon dah banoh Kindrei bwe, eme i dah kameh iri kadai jo, tasah na uduk.
GEN 20:12 Arile iy badeh nadu tine handru. Iy badeh nadu tama arile, nadun ta tine ta tewedeu jo bwe, eme badeh jo sudi iy.
GEN 20:13 Eme Kindrei tiye jo eme len ta munyak, eme kon leheleh, eme badeh jo tiye i tan ta iy badeh kaleheya mwasin tan hawe seken tan udu tek handru ki tiri kon mari, ta jo badeh nadu tinen.”
GEN 20:14 Ano badeh Abimelek eme badeh kuhi katin haka sipsip ma bulumakau ma hawe iri bonyo-ou mwan ma badih atehei i ta Abraham, ma iy atehei udun Sara i hamon.
GEN 20:15 Eme badeh Abimelek tiye i tan, “Munyak tek udu madam kede-eh, ou manyah ado aliy na seken tam.”
GEN 20:16 Ya i ta Sara badeh iy tiye i buku doh, “Jo kameh edeu ta nadu tinem kameh wa-iralou hayen nyikilikin amwekes na silba. Ta leheya udu mada iri lau tam mari, ta ou badeh bamwekes ari kandriyen ndra-in bwe, eme iri lau mari katanan ou badeh bamwekes ari lakou bandra-i bwe.”
GEN 20:17 Ano badeh Abraham amwekes salom i ta Kindrei, ma Kindrei mwesekei Abimelek ma hawe udun hawe oro bonyo-ou badih tan badeh ato-ou nah ja.
GEN 20:18 Tasah ta udu Abraham Sara le mene, Kindrei mene sokei lakou ta amwekes nah tiri lau mari badu baha tondrok ta Abimelek.
GEN 21:1 I buku none Kindrei mene ndrasehek ma ndratandrakan ndra-au ta iy badeh tikisiy Sara labai,
GEN 21:2 Eme udu bada Abraham i alon badeh, Sara ndrinen i tinan ma iy tuwi nah mwan i nadun. Amwenen le ta len mene Kindrei tandrakan iy.
GEN 21:3 Eme badeh Sara atehei nah dah eme len badeh, Abraham tondrohani nyaran Aisik.
GEN 21:4 Ano len ta nadun Aisik asahan ndru la-uh badeh Abraham sani ku-i lakou tan iu, i buku Kindrei ndratiye tan.
GEN 21:5 Abraham jaha tan asahan rinek (100) badeh nadun Aisik eme len.
GEN 21:6 Eme badeh Sara tiye, “Kindrei badeh atehei sekesek eme ndrinek ma buku none iri lau mari anuhun kameh iri kameh sekesek hawek.”
GEN 21:7 Ano iy tiye le, “Are tiye i ta Abraham anya, Sara kameh winiyan nyowo-ei nah bwe? Arile udu bada alon tan badeh jo ndratehei nah mwan ai.”
GEN 21:8 Iy nah badeh i tinan ano na len Aisik aruwe sur badeh, Abraham mwesekei tine nyamon.
GEN 21:9 Arile Sara anyolom nadu i badih Haga badu Ijip, atehei i nadu Abraham badeh bobose, eme iy tiye ta Abraham, “Ou tikahei badih ta lahou tam ma hawe nadun ki-iu, tasah nadun kameh winiyan bakohok ari lakou hawe nadum Aisik bwe.”
GEN 21:11 Eme Abraham abudon la bwe, tasah iy badeh nadun le.
GEN 21:12 Arile Kindrei tiye, “Ou sabudon tinan labai ta nah nadu badih ta lahou tam kede-eh. Ou badeh anuhun boho Sara asehek tam, tasah na Aisik le kameh lundriyem oro asahan.
GEN 21:13 Jo kameh edeu nadu badih ta lahou tam kameh asahan kon rakon buruwen, tasah iy badeh nadum le.”
GEN 21:14 Na ma ndraben ta len ari ja badeh Abraham kuhi nyamon rayah ma hawe bwisi gwa (amwekes na ku-i katin haka) idih na gwa atehei i mine Haga. Iy bwese-ei i nah badeh tukuni i konan ma tiye uru au. Eme iy edek leleyah ili bolo lomale an Bersiba.
GEN 21:15 Eme gwa udu bolo bwisin ano badeh, iy nyahani i nah udu bolo bwidiu udu ai.
GEN 21:16 Eme iy ili manyah udu len. Ano iy abudon, “Jo bwalek anyolom nah mwan kodo-oh imek.” Eme iy anya keden.
GEN 21:17 Eme Kindrei anyolom i nah dah eden, eme badeh Angelo ta Kindrei udu kandrah aloh i ta Haga, “Ou ndra buku sah badeh? Ou sanoh, Kindrei badeh ndranuhun i nah eden kede-eh.
GEN 21:18 Ou bwese-ei iy keme loken ma ou apon iy, tasah jo kameh amwekes lundriyen oro kameh asahan kon tinan rakon handru.”
GEN 21:19 Ano badeh Kindrei mwesekei madan asak badeh, iy atou gwa li. Eme iy andrei bwisi gwa ili badeh asuniy ma i nah dah a-un.
GEN 21:20 Iy badeh i tinan, Kindrei badeh udu hawen le. Iy badeh ndrahu manyah tan udu kon lomale an, eme iy badeh asahan nyekelen handru ta beteleu.
GEN 21:21 Iy manyah udu lomale an nyaran Paran, ano tinen badeh andrei badih ari badu Ijip i udun.
GEN 21:22 Na len doh badeh Abimelek hawe Pikol ndramak ta mwena ta bahun tan tiye i ta Abraham, “Sasah ou amwekes badeh Kindrei udu hawem.
GEN 21:23 Na dah udu mada Kindrei badeh ou tandrakan ta ou badeh sawasai jo ma lundriye naduk oro. Jo badeh tikisiy ou labai, eme jo aseken ou badeh tikisiy jo ale ma kon munyak ou manyah are aliy dah.”
GEN 21:24 Eme Abraham tandrakan.
GEN 21:25 Ano badeh Abraham eme nunu-uh Abimelek ta gwa li oro lau ta lahou ta Abimelek solo-ei.
GEN 21:26 Eme Abimelek anya, “Aliy, jo tanan are amwekes badeh bwe. Ou batiye tek bwe, nane le jo badeh baranuhun.”
GEN 21:27 Eme badeh Abraham kuhi sipsip hawe bulumakau eme atehei i ta Abimelek. Eme uru amwekes sahou randra le.
GEN 21:28 Ano Abraham kuhi sipsip kasen ndro taloh tan eme len,
GEN 21:29 eme badeh Abimelek ndremenya Abraham, “Saba moson ta ou atehei sipsip kasen ndro taloh udu len kede-eh?”
GEN 21:30 Eme iy tiye, “Ou kuhiy sipsip kasen ma ndro taloh doh, tasah gwa li badeh jo a-eh.”
GEN 21:31 Eme nyara kon doh badeh Bersiba, moson “Li ta tandrakan,” tasah uru lau ma la-uh badeh tandrakan ado aliy.
GEN 21:32 Hamon ta sahou randra le ano udu Bersiba badeh, hawe Pikol ndramak ta bwena ta bahun tan badeh uru au a hamon ala Pilistin.
GEN 21:33 Ano Abraham tahi kei tamarisk udu Bersiba, eme iy aloh nyara Laban, Kindrei ta udu le buku doh.
GEN 21:34 Eme Abraham badeh manyah ili eme udu munyak ta Pilistin luluwen labai.
GEN 22:1 Udu hamon ta aliy badeh Kindrei none Abraham. Eme iy tiye i tan, “Abraham!” Eme Abraham anya eh, “Jo kada-ah.”
GEN 22:2 Ano Kindrei tiye, “Ou andrei Aisik, nadum ala adem handru in tan kede-eh badeh ou ala loboho Moreya. Jo kameh leheya mandrei kameh i tam ma ou asun iy ki nyara salom.”
GEN 22:3 Eme Abraham amak na ma ndraben, abedei ndro-o jih ano andrei i ta asun salom eme iy atehei i bwele-e katin haka donki ma andrei Aisik hawe uru lau ta lahou tan la-uh. Eme oro adek ala kon Kindrei ndratiye tan.
GEN 22:4 Len la-uh ano ya i bada len taloh badeh Abraham atou kon nane udu len.
GEN 22:5 Eme badeh iy tiye i turu lau ta lahou tan, “Ah kado dah ma donki kado jo hawe Aisik badeh aru kala kodo-oh. Aru kameh ala atudun ano badeh aru barame hamon hawe ah ja.”
GEN 22:6 Ano Abraham andrei ndro-o jih ta asun atehei i kase nadun Aisik eme iy andrei jih ma samen. Eme uru adek se ala badeh,
GEN 22:7 Aisik ndremenya taman Abraham, “Tama?” Eme Abraham anya, “Abo naduk sasah?” “Ndro-o jih hawe jih kada-an ai, ya sipsip ta asun ta salom ndrahe bah?”
GEN 22:8 Eme Abraham anya eh, “Naduk, Kindrei le baradeu sipsip kasen barame ta asun ta salom.” Eme uru ma la-uh adek ala.
GEN 22:9 Eme uru ala asos kon mene Kindrei tiye tan badeh, iy eme tukumwi bek i loken ta asun. Ano badeh iy kuhi ndro-o jih i bwele-en. Ano badeh i sawei nadun Aisik badeh atehei iy i bwele-e ndro-o jih udu bada bek dah.
GEN 22:10 Eme iy andrei samen anya kamundroh le iy badeh,
GEN 22:11 Angelo ta Laban aloh udu kandrah eme anya, “Abraham! Abraham!” Eme Abraham anya, “Jo kada-ah.”
GEN 22:12 “Ou sadai iy ma ou samwekes sasah sala tan, jo badeh tanan, ou badeh anoh Kindrei labai, eme ou basolo-ei nadum bwe.”
GEN 22:13 Eme Abraham madan eme loken badeh iy anyolom katin haka rem badeh andra batun badeh malou sakabwitiniy iy. Eme iy ruwani Aisik, iy ili badeh tawi rem dah eme, akohok kon ta Aisik ta salom.
GEN 22:14 Eme Abraham tondrohani nyara kon nane doh badeh, “Kindrei Kameh Atehei.” Eme ma taku len dah aloh, “Mandrei doh badeh Laban Kameh Atehei.”
GEN 22:15 Ano badeh Angelo ta Laban udu kandrah aloh ja i ta Abraham ma tiye, “Ou badeh banoh ta adeu nadum ou aseken labai bwe, jo tandrakan handru jo kameh amwekes lundriyem oro kameh nyaran bwe, oro kameh a solo-a ndrau badu loken ma solo-a on badu babi. Lundriyem oro kameh akohok lakou mari tiri lau ta ndra-i i tam udu kon tinan tiri.
GEN 22:18 Ya nyosowan ta lundriye nadum oro kameh ili la-u kon munyak mari, tasah na ou anuhun sahou tek.”
GEN 22:19 Ano badeh Abraham uru au ala hawe uru lau ta lahou tan nane ma oro au ala Bersiba. Eme Abraham udu Bersiba udu le.
GEN 22:20 Ano udu len hamon badeh Abraham anuhun nadu tinen Nahor udun Milkah badeh atehei nadun ma ndru la-uh:
GEN 22:21 Kadok badeh Us ano Bus ano badeh Kemu-el tama Aram,
GEN 22:22 Keset, Haso, Pildas, Jidlap ma Betu-el, tama Rebeka.
GEN 22:23 Milkah badeh atehei nah ndru la-uh nane doh.
GEN 22:24 Udu Nahor badih ta mada san nyaran Reumah badeh atehei Tebah, Gaham, Tahas hawe Ma-akah.
GEN 23:1 Sara badeh udu winiya jaha rinek lunoh ndro taloh (127).
GEN 23:2 Iy imek badeh udu Kiriyat Arba (aloh Hibron) udu munyak Kenan, eme Abraham ili moroha iy ma eden i la-un.
GEN 23:3 Ano Abraham suri iy udu ka-u udun eme loken badeh, iy tiye i tiri Hita. Iy tiye i buku doh,
GEN 23:4 “Jo badeh badu leheleh eme udu ndrokowa ado. Jo anya kisih sese munyak loboho dah eme ya jo ka-eh uduk ki aliy.”
GEN 23:5 Eme iri Hita tiye i ta Abraham,
GEN 23:6 “Laban, ou anuhun aso. Udu bolo ahi dah, ou badeh ou lau ta Kindrei. Ou ahi udum badeh ki munu bek na seken tam le. Ari ndramak badeh winiyan bala bwalen ta lek (munu bek) tan ta a-eh bada kei tam kede-eh bwe.”
GEN 23:7 Ano badeh iy ales ma iy aluh i andri mada iri lau mari badu Hita ta munyak tiri.
GEN 23:8 Eme Abraham tiye i tiri, “I buku none ado aseken ta jo kihiy bada kei tek dah, badeh ado kanuhun jo, ado kala hawe Epron nadu Sohar, badeh ado ka nyara bohok,
GEN 23:9 eme kasihinei munu bek ta Makpelah, i doh tan amwenen udu ka-u munyak tan badeh. Ado kandremenyani iy ta sihinen handru badeh sabe, eme ma kudu mada ado, jo kasihinei ki ndrahu a-eh tek.”
GEN 23:10 Eme Epron badeh manyah udu hawe iri Hita ndrahu kon ta atukum, mada san ta i bolon; eme iri lau mari badeh anuhun iy asehek;
GEN 23:11 “Laban ou anuhun, lo ndranye oro lau tek mari kede-eh, jo kameh atehei munyak mari ma munu bek udu aliy kede-eh i tam. Ta ou badeh ahi udum ki aliy.”
GEN 23:12 Eme ja badeh Abraham aluh i andri udu mada iri lau mari ta munyak dah.
GEN 23:13 Lo ndranye iri lau mari badeh iy tiye ta Epron, “Aha kanuhun jo, i buku none aha aseken badeh jo kasihinei munyak mari. I buku ado aseken sisih badeh, jo kihiy uduk ki aliy.”
GEN 23:14 Eme Epron tiye ta Abraham,
GEN 23:15 “Laban, ou anuhun jo, munyak badeh sihinen badeh hanek (400) boroh amwekes na silba; arile lakou doh badeh talu barasehek ta aliy ndrokowa talu. Ou ahi udum.”
GEN 23:16 Eme Abraham aseken budon ta Epron eme ma iy andromoi sihine lakou mari iy nane aloh udu ndranye lau mari badu Hita nane dah: badeh hanek (400) boroh amwekes na silba i buku none maha ta aliy udu ndrokowa lau ta atondrok.
GEN 23:17 Eme udu ndranye iri Hita mari nane ame ado mada san ta i bolo kon dah, munyak ta Epron ma munu bek hawe iri kei udu kobek udu Makpelah mirihik ta Mamre badeh atehei i ta Abraham.
GEN 23:19 Ano badeh Abraham atehei udun Sara i munu bek udu munyak Makpelah mirihik ta Mamre (aloh Hibron) udu munyak Kenan.
GEN 23:20 Eme munyak doh badeh ma munu bek udu aliy badeh ta Abraham handru badu mine iri Hita i tan ta mada lek.
GEN 24:1 Abraham badeh ndra alon labai, ma jaha tan ndra sola, eme Laban badeh atehei nyosowan i la-un ta mada san mari.
GEN 24:2 Eme iy tiye i ta lau ta lahou tan ta atondrok badu asiu tan, ma iy ta atondrok lakou mari tan, “Ou tawi baha bak ta kalem,
GEN 24:3 Jo badeh aseken ou tandrakan na nyara Laban, iy Kindrei badu kandrah ma munyak, ta ou sakohok badih sala ta naduk badu kenan, kon jo manyah udu hawe iri dah,
GEN 24:4 arile ou kameh ala kon tek ala hawe lowak oro amwenen akohok ari badih ki ta naduk Aisik.”
GEN 24:5 Eme iy lau ta lahou tan tiye, “Ya ki buku none iy badih ki bwalen ta eme kameh ki buku sah bah?”
GEN 24:6 Abraham anya eh, “Ou badeh sandrei naduk sawek badeh.
GEN 24:7 Laban Kindrei badu kandrah le badeh kuhi jo eme len ta boho kamen ta tama udu munyak tek, iy tiye ma tandrakan jo ta edeu munyak dah i ta lundriyek oro. Iy kameh suni angelo ili bwena tam, ta aseben ou kandrei ari badih badu badeh keme ta naduk.
GEN 24:8 I buku none i badih bwalen ta eme hawem eme, badeh batanau tek balem kamani ai. Arile ou sandrei naduk sawek badeh.”
GEN 24:9 Ano badeh i lau ta lahou tan dah tawi baha ba Abraham dah ma tandrakan bohon i tan ta nyala lakou nane dah.
GEN 24:10 Ano badeh i lau ta lahou tan dah andrei katin haka ronoh kamel ma hawe lakou rayah mwasin ta Abraham badeh, ma iy iu ili Aram Nahara-em ma edek iu ili kon Nahor mene udu aliy.
GEN 24:11 Eme iy bwidi iri kamel manyah ado andri ka-u gwa li udu manan ta kon; i doh na beyeh ai, mada an tiri badih ta ame a-us gwa.
GEN 24:12 Ano badeh iy amwekes salom, “O Laban, Kindrei ta Abraham len dah ou atehei keme tek, ma ou leheya tikisiy tam ki ta Abraham.
GEN 24:13 Ou anyolom jo badeh ales udu ka-u gwa dah ya nadu iri lau badih badu kon kameh ame ta a-us gwa.
GEN 24:14 Kasahan i buku none jo katiye ki ta i badih, ‘Ei, bwisi gwa tam ki andri ya jo anya ka-un se gwa,’ Ya i buku none iy anya, ‘Abo ou a-un; ma jo kedeu gwa ki ta kamel tam.’ Eme badih doh baden adeh, ki ta nadu i lau tam Aisik. Eme ya jo kameh i tanan ou badeh leheya mwasin tam i ta Abraham.”
GEN 24:15 Iy ano salom le badeh, Rebeka edek ma sabok tan udu kasen eme. Iy badeh nadu Betu-el ya Betu-el i ndrine Milkah, udu nadu tine Abraham Nahor.
GEN 24:16 Iy badeh konen labai, ma iy ma bihin le; ari lau bakohok iy bwe le. Iy edek ili gwa li, asuni sabok tan ano iy eme hamon ja badeh,
GEN 24:17 iy lau ta lahou dah edek ili suwi badeh tiye, “Ei, jo anya ka-un se gwa badu bolo sabok tam badeh?”
GEN 24:18 Eme iy anya, “Laban tek, Ou a-un.” Eme Rebeka suri sabok tan atehei i minen ma iy a-un.
GEN 24:19 Iy atehei gwa ili iy a-un, ano badeh iy tiye, “Jo kili ka-us rayah gwa ale ki wa-i oro kamel tam winiya oro le barakoh ta a-un.”
GEN 24:20 Eme badeh iy solowei gwa i bolo bwisi gwa toro kamel, ano badeh iy ibotatahan ili mada gwa li asuni gwa ja eme, winiya le oro kamel akoh na gwa.
GEN 24:21 Eme i lau ta lahou dah anyolom iy le, iy bawadei bwe, iy anyolom ma iy lomondra, “Laban kameh baratehei jo barasekesek de bwe.”
GEN 24:22 Ano oro kamel a-un gwa ano badeh, lau ta lahou dah lihidi bek nyikilikin ta ndrundrun ta no-o ndramak eme len, maha i le winiyan maha, la-uh ja ta bohan badeh maha sese ta bohan.
GEN 24:23 Ano iy anya, “Ou nadu are handru? Ou tiye tek asiu ta tamam badeh winiyan aso amadin aliy na ben dah de bwe?”
GEN 24:24 Eme iy tiye, “Jo badeh nadu Betu-el, Betu-el i ndrine Milkah uru Nahor.”
GEN 24:25 Ano iy asehek le ili, “Bwidiu solo-an asoker ma asiu tado ta amadin na ben dah winiyan.”
GEN 24:26 Eme iy aluh kandrun i andri ma iy atudun Laban,
GEN 24:27 tiye, “Katudun Laban, Laban ma Kindrei ta Abraham, iy badeh amwekes sahou tandrakan hawe Abraham ta iy bamani iy bwe. Eme Laban le badeh tiyani jo edek ili isos asiu ta lowan oro.”
GEN 24:28 Eme badih dah sakaliye ili asiu ta tinen ma asehek nyalan ta sahou mari.
GEN 24:29 Ya Rebeka badeh nadu tinen mwan ari nyaran Leban, eme iy edek suwi, suwi ili hawe iri lau ado mada gwa.
GEN 24:30 Iy anyolom bek nyikilikin ta no-o ndramak ano, ma anyolom bokomwak udu boha nadu tinen ma Rebeka asehek nyalan, ano badeh iy edek ili badeh anyolom i lau dah ales udu mirihik ta kamel mirihik ta gwa udu aliy kahis le,
GEN 24:31 “Ou badeh Laban atehei nyosowan udu tam. Ou ales are dah abosah? Jo badeh ndralowosani bolo asiu ma ndralowosani ndrahune oro kamel.”
GEN 24:32 Eme oro ala asiu, iy ili boho asiu, ano oro bwese-ei lakou udu la-u kamel eme andri. Eme atehei bwidiu asoker i noro kamel ma gwa i wa-in ma i wa-i lau tan ma i toro ta sikine kati oro.
GEN 24:33 Ano badeh bwese-ei nyamon eme batalan, eme iy anya eh, “Jo katiye sahou tek op, ano jo baraimon.” Eme Leban anya eh, “Abo ou asehek taso.”
GEN 24:34 Eme iy anya, “Jo dah jo lau ta lahou ta Abraham.
GEN 24:35 Laban badeh ndratehei nyosowan ndra ta Abraham mwasin labai, ma iy badeh tan lakou solo-an labai. Kindrei badeh atehei tan sipsip, bulumakau, silba ma hawe gol ma atehei tan iri lau ta lahou tan mwan ma badih ma hawe iri kamel hawe donki.
GEN 24:36 Udu Abraham Sara badeh ndra alon handru eme iy atehei tan nah mwan ari, ma atehei tan lakou mari iy aseken.
GEN 24:37 Eme Abraham badeh tiye sahou boto-on ma tandrakan ma tiye, jo badeh sakohok ari badih nadu iri Kenan sala ta nadun badu munyak iy manyah udu aliy doh,
GEN 24:38 arile iy tiye tek badeh keme hawe lowa taman oro keme boho kamen tan amwenen kakohok ari badih ki ta nadun.
GEN 24:39 “Ano jo ndremenya Abraham, ‘Ya i buku none i badih bwalen ta eme hawek kameh i buku sah bah?’
GEN 24:40 “Eme iy tiye, ‘Laban, ala jo edek hawen dan badeh kameh barasuni angelo tan barawek hawem ma i dah kameh tedek tam udu mwasin, ma ou kameh winiyan andrei ari badih eme ta naduk badu boho kamen tek amwenen badu hawe lowa tama.
GEN 24:41 Na len ou ala boho kamen tek, ya i buku none oro batehei iy bame bwe, badeh na tandrakan tek le ou ame hamon.’
GEN 24:42 “Eme jo eme na len dah, eme mada gwa, jo tiye, ‘O Laban, Kindrei ta Abraham, i buku none seken tam handru, ou atehei len ta tekedek tek jo eme ta aliy dah badeh keme minek.
GEN 24:43 I buku none ari badih keme dah ta a-us gwa, ya jo katiye ki tan, “Ei, jo anya ka-un se gwa badu bolo sabok tam badeh,”
GEN 24:44 ya i buku none iy katiye anya, “Ou a-un ma jo ka-us rayah gwa ki wa-i kamel tam oro ale,” Iy don baden adeh, kameh ou anya ki ta nadu Abraham!’
GEN 24:45 “Salom tek udu ndra ndrinek le badeh, Rebeka asahan ma bwisi sabok tan udu kasen eme. Eme iy ili a-us gwa, ano jo tiye i tan, ‘Ei, jo anya ka-un se gwa tam.’
GEN 24:46 “Eme suwi labai badeh iy suri sabok udu kasen eme andri ma iy tiye, ‘Ou a-un,’ ma ‘Jo ka-us rayah gwa ki wa-i kamel tam oro ale.’ Eme badeh jo a-un gwa, ya iy edeu gwa i toro kamel.
GEN 24:47 “Eme badeh jo ndrmenya iy, ‘Ou nadu areh?’ “Iy anya eh, ‘Jo badeh nadu Betu-el i ndrine Nahor, ala Milkah atehei nadun.’ Ano badeh jo atehei bek nyikilikin i no-on ma hawe atehei bokomwak i bohan,
GEN 24:48 Ano jo aluh i andri ma atudun Laban. Jo asore Laban, Kindrei ta Abraham, ta iy badeh tiyani jo eme amwenen ta nadu tubu, nadu tine Abraham ta iy udu nadum.
GEN 24:49 Eme ya, i buku none ou tikisiy Abraham eh, badeh ou asumon; ya i buku none bwe eh, badeh ou asehek tek. Eme ya jo kasilah madan san ari ja.”
GEN 24:50 Eme Leban hawe Betu-el uru tiye, “Tanan dah badeh badu ta Laban labai; aru badeh winiyan basehek sasah ta aliy bwe.
GEN 24:51 Rebeka badeh kada-ah; ou andrei iy kewek ki ta nadu Abraham i buku le Kindrei ndratiye.”
GEN 24:52 Eme lau ta lahou ta Abraham anuhun uru tiye, ano le badeh iy aluh i andri bada munyak ta mada Laban Kindrei.
GEN 24:53 Ano badeh lau ta lahou dah badeh lihidiy gol hawe silba nyikilikin hawe ra-ei kolau ma atehei i ta Rebeka; ano iy ale edeu lakou rayah sowan tinan handru i ta nadu tine Rebeka hawe tinen.
GEN 24:54 Ano badeh iy ma hawe lau nane badu hawen badeh aimon nyamon ma a-un gwa, ano badeh oro amadin. Ano iy amak mandraben handru iy anya, “Ou satawi jo, jo ki-iu ki hamon ja hawe Abraham.”
GEN 24:55 Arile nadu tine Rebeka hawe tinen tiye anya, “Rebeka winiyan bawek bwe, iy kudu winiya len ma ronoh kano badeh, iy barawek.”
GEN 24:56 Eme iy tiye i turu, “Ah badeh satawi aru sado. Laban badeh ndramwesekei san tek ndramwe-es; ou atehei jo ki-iu ki hawe Abraham.”
GEN 24:57 Ano uru anya, “To kaluhi iy keme ya to kandremenya seken tan.”
GEN 24:58 Eme oro luhi Rebeka eme, ano oro lelen iy, “Ou aseken ala hawe ndreh kede-eh de bwe?” Eme badeh iy anya eh, “Ehe, jo aseken ta ili.”
GEN 24:59 Eme badeh oro tiye iy, ma hawe oro badih ta tondrok iy ala hawe iy lau ta lahou ta Abraham ma lau tan.
GEN 24:60 Ano oro batanau ma tiye tan, “Nadu tine aso, lundriyem kasahan sola wa-iralou ano wa-iralou, ma lundriyem oro kadai lau ta amwekes lomondra ndra-in i toro!”
GEN 24:61 Ano badeh Rebeka hawe badih tan badeh alokou oro ano badeh sawei kamel i hamon hawe oro lau. Eme oro lau ta lahou andrei Rebeka ma oro au.
GEN 24:62 Aisik badeh udu Negeb ndrame ndra-en Ber Lahai Roi.
GEN 24:63 Iy edek leleyah ili lobwidiu na beyeh eme madan anya kili badeh iy anyolom iri kamel adek ame mirihik.
GEN 24:64 Rebeka anyolom eme loken iy atou Aisik. Eme iy udu bwele-e kamel eme andri,
GEN 24:65 ma ndremenya oro lau ta lahou ta Abraham, “Are lau edek udu lobwidiu len eme, nyaha le to dah?” Eme iy lau ta lahou dah anya eh, “I doh Aisik.” Eme badeh Rebeka kuhi kolau su-i badan ma batun.
GEN 24:66 Ano lau ta lahou ta Abraham badeh asehek nyala Aisik ta lakou mari iy amwekes,
GEN 24:67 Eme Aisik kuhi iy ili bolo asiu balei ta tinen Sara, ma iy andrei Rebeka i udun. Rebeka asahan udun ma iy aseken iy labai; ki buku none tinen imek badeh iy babudon bwe ai, badih ta seben iy udu aliy.
GEN 25:1 Abraham sudi badih ari ja nyaran Katura.
GEN 25:2 Eme badeh iy atehei nadun oro badeh Simran, Joksan, Medan, Midiyen, Isbak ma hawe Su-ah.
GEN 25:3 Seba hawe Dedan badeh tama uru badeh Joksan; ya lundriye Dedan oro badeh aloh Asura hawe aloh Letusa ma hawe Le-uma.
GEN 25:4 Ya nadu Midiyen oro badeh Epah, Eper, Hanok, Abida ma hawe Elda-ah. Oro doh bu-u oro badeh Katura.
GEN 25:5 Abraham badeh atehei lakou tan mari badeh i ta nadun Aisik.
GEN 25:6 Hawe iy udu ndra loken kahis le badeh, iy atehei lakou rayah i ta nadun ta udun ta nyeu ma tiye oro au a len ta lewa nadun Aisik. Oro ado munyak loboho an eme loken.
GEN 25:7 Abraham udu i alon handru ma jaha tan badeh asahan rinek ndru lunoh limeh (175).
GEN 25:8 Eme Abraham jaha tan i solo-an labai ano aden taku ma iy imek; iu i hawe tubun oro.
GEN 25:9 Eme badeh nadun uru, Aisik hawe Isma-el badeh ahi iy udu munu bek Makpelah mirihik ta Mamre udu manan ta Epron nadu Sohar badu Hita,
GEN 25:10 munyak le mene Abraham sihinei bwena badu mine iri Hita. Abraham badeh ahi iy udu hawe udun Sara.
GEN 25:11 Ano hamon ta Abraham ndramak badeh, Kindrei atehei nyosowan i ta nadun Aisik. Iy manyah badeh udu mirihik ta Ber Lahai Roi.
GEN 25:12 I dah badeh sare nadu Abraham Isma-el, nadun ta badih ta lahou ta Sara nyaran Haga badu Ijip.
GEN 25:13 Ya i dah badeh nyara nadu Isma-el oro, Kadok badeh Nebayot, Kedar, Adbe-el, Mibsam,
GEN 25:14 Misma, Dumah, Masa,
GEN 25:15 Hadat, Tema, Jetur, Napis ma hawe Kedemah.
GEN 25:16 I doh badeh nyara nadu Isma-el oro. Nyara oro lau ma ronoh la-uh doh badeh asahan boho kamen ma ronoh la-uh, in hamon ta ndrahu manyah udu kon ma ta tekedek tiri.
GEN 25:17 Isma-el badeh udu winiya jaha tan asahan rinek tonoh ndro taloh (137). Aden taku badeh ma iy imek iu i hawe tubun oro bwena.
GEN 25:18 Lundriyen oro badeh manyah ado loboho Habila ili taku Sur mirihik ta kobek badu Ijip, i buku none ou adek ala loboho Aseriya. Oro badeh manyah are len labai, ta lundriye Abraham oro.
GEN 25:19 I dah badeh sare nadu Abraham Aisik. Abraham badeh atehei Aisik,
GEN 25:20 ano Aisik jaha tan asahan hanoh (40) badeh iy sudi nadu Betu-el Rebeka. (iy badu Aram badu Mesopotamiya nadu tine Leban).
GEN 25:21 Rebeka badeh kis iy bato-ou nah bwe, eme Aisik badeh amwekes salom i nyaran i ta Laban. Eme Laban badeh anuhun salom tan, eme ndrine Rebeka i tinan.
GEN 25:22 Eme uru nah are ndrinen badeh nyokolokon eme ma iy anya, “I buku sah lakou dah asahan tek?” Eme iy lelen Laban.
GEN 25:23 Eme Laban tiye i tan, “Kon tinan munyak badeh udu ndrinem, Ma uru lau ma la-uh ado ndrinem kameh atalan; Iy ari kameh i boto-on labai ja ta iy ari, Ma iy bwele-en kameh i ta asore i bahan.”
GEN 25:24 Eme badeh len eme mirihik ta iy anya kedeu nadun keme len, badeh uru mwimwir ado ndrinen.
GEN 25:25 Iy eme len bwena badeh badan saraman ma lamin solo-an; eme uru tondrohani nyaran Iso.
GEN 25:26 Ano ja badeh nadu tinen in hamon eme len ja badeh, minen tawi bwisimwe-e kati Iso. Eme nyaran badeh i Jekop. Aisik badeh jaha tan asahan ndro tonoh (60) eh, Rebeka atehei uru ame len.
GEN 25:27 Uru ma la-uh badeh a tinan ma Iso badeh asahan ndramak ta mwi. Iy ndramak ta edek i lokei. Arile Jekop badeh ndramak bohon bwe, iy badu bolo iri asiu balei le.
GEN 25:28 Aisik badeh aseken Iso, tasah Iso badeh atiye katin haka badu lokei eme, ya iy aimon, ya Rebeka badeh aseken Jekop.
GEN 25:29 Len ari badeh Jekop badeh amwekes ndranoh, eme Iso badeh edek udu lokei eme badeh iy imeson handru.
GEN 25:30 Eme iy tiye ta Jekop, “Suwi, se ndranoh saraman badeh keme jo kaimon. Jo ndrameson!” (eme badeh aloh iy Idom moson saraman).
GEN 25:31 Eme Jekop anya eh, “Badeh jo ki kadok eh?”
GEN 25:32 Eme Iso tiye, “Ou anyolom, jo kimek ai! Kadok badeh ari sasah tek?”
GEN 25:33 Arile Jekop anya, “Ou tandrakan bwena op.” Eme badeh iy tandrakan iy, ma atehei Jekop asahan kadok.
GEN 25:34 Ano badeh Jekop andrei jabi ramen rayah ma ndranoh ndronoha lentil i nan ma iy aimon ma iy a-un gwa ano iy suri iy ma iy iu. Iso badeh ndrakahei tanan mwasin nane ndra-au.
GEN 26:1 Ano badeh munyak doh nyamon bwe, i buku none len bwena Abraham mene i ndra loken. Eme Aisik badeh ili hawe kabin badu Pilistin, Abimelek udu Gerar.
GEN 26:2 Eme badeh Laban asahan hawen tiye, “Ou sala Ijip, ou manyah ado munyak jo ndrasehek tam.
GEN 26:3 Ou ado munyak dah ado sese, jo kameh udu hawem ma jo kameh atehei nyosowan i tam. Jo kameh edeu tam hawe edeu ta lundriyem oro ta munyak dah ma jo kameh leheya tandrakan tek handru mene i ta tama Abraham.
GEN 26:4 Jo kameh amwekes lundriyem oro a sola, solo-a ndrau badu kandrah ma edeu munyak mari dah i toro, ma eme iri kon munyak tinan mari kameh ndremenya jo ta kadeu nyosowan ki la-u iri, i buku none jo edeu nyososwan i ta lundriyem oro dah,
GEN 26:5 tasah Abraham badeh anuhun bohok ma hawe anuhun batanau tek.”
GEN 26:6 Eme Aisik badeh manyah udu Gerar udu gwek.
GEN 26:7 Eme oro lau badu kon doh badeh ndremenya Aisik ta udun, eme iy badeh inoh, ma iy anya, “Iy badeh nadu tine.” Iy lomondra badeh i buku doh, Rebeka badeh konen labai eme koro-an iri lau badu kon doh kadai iy, tasah na Rebeka.
GEN 26:8 Aisik udu kon doh luluwen eme badeh, Abimelek kabin badu Pilistin anyolom udu mada kadam i andri badeh iy anyolom Aisik badeh awadei Rebeka.
GEN 26:9 Eme Abimelek luhi Aisik eme ano iy tiye, “Rebeka badeh udum handru! I buku sah ou anya, iy nadu tinem?” Eme badeh Aisik anya, “Jo lomondra koro-an na iy kameh iri kadai jo.”
GEN 26:10 Ano badeh Abimelek tiye, “Ou amwekes sasah eme taso dah. I buku none ari ndramak katawi udum nane, i dah nane aso ato-ou maha ta aliy, arile kati lakou dah badeh ou.”
GEN 26:11 Eme Abimelek badeh tiye sahou boto-on i tiri lau mari: “Ou are lau amwekes kandriyen ndra-in i ta ndramak dah hawe udun kameh, ou amak.”
GEN 26:12 Ano Aisik badeh tahi baso udu munyak doh, eme uni udu bolo oro baso ari ari nane iy tahi doh, badeh oro ari ari ato-ou rinek rinek sakalawi bwena mene ndra-au, tasah Laban atehei nyosowan i la-un.
GEN 26:13 Iy badeh tan lakou solo-an handru, eme ma lakou tan badeh asahan solo-an eme iy asahan ndramak ari tan lakou solo-an labai.
GEN 26:14 Iy badeh katin haka tan solo-an labai ma iri lau ta lahou tan solo-an ale, eme badeh mada iri Pilistin alikis.
GEN 26:15 Eme iri gwa li mene iri lau ta lahou ta taman Abraham mene a-eh, badeh iri Pilistin ala sokei na ndren.
GEN 26:16 Ano Abimelek anya, “Aisik, ou au ta mada aso; ou badeh tam lakou solo-an labai ma hawe ou ndra boto-on labai.”
GEN 26:17 Eme Aisik suri iy ma iy iu ta kon doh, eme iy ili manyah udu nyamak Gerar.
GEN 26:18 Ano badeh Aisik ili ja ihiy gwa li rayah ja mene taman Abraham udu ndra loken a-eh, mene iri Pilistin sokei, udu kona Abraham imek. Eme iy aloh nyara iri gwa li i buku none taman mene tondrohani.
GEN 26:19 Ano badeh oro lau ta lahou ta Aisik amwekes lahou ado nyamak doh, eme oro takalahei gwa sakaliye bolo ndren.
GEN 26:20 Eme oro lau ta tondrok katin haka badu Gerar badeh andres hawe oro lau ta tondrok katin haka ta Aisik anya, gwa doh toro. Eme iy tondrahani nyara gwa doh Isek, moson “Andres,” tasah oro badeh andres ta aliy hawen.
GEN 26:21 Ano badeh oro ahi ari ja, eme oro andra-i manyuwa aliy le; eme tondrohani badeh Sitnah, moson, “Oro ta andra-i badu bilisiu.”
GEN 26:22 Eme iy ili ja ihi ari ja, eme badeh oro bandra-i ta aliy bwe ai. Eme iy tondrohani nyaran badeh Rehobot, moson “Ndra winiyan ai.” Eme iy tiye, “Laban ndratehei seken ndra winiya to ai, ya to winiyan asahan amwe-es ai.”
GEN 26:23 Ano udu doh badeh iy iu ili loken ili Bersiba.
GEN 26:24 Eme na ben doh badeh Laban asahan hawen tiye, “Jo dah badeh jo Kindrei ta tamam Abraham. Ou sanoh, jo udu hawem; tasah ta i lau ta lahou tek Abraham le, jo kameh atehei nyosowan i tam ma jo kameh edeu kane lundriyem oro kameh a sola.”
GEN 26:25 Eme udu doh badeh Aisik tukumwi bek i loke ta salom ma aloh nyara Laban, ma udu doh le badeh iy tahi asiu balei ma oro lau ta lahou tan ahi gwa li.
GEN 26:26 Ano udu badeh, Abimelek hawe ndramak ta budon tan Ahusat hawe nadramak ta mwena ta bahun tan Pikol badeh oro ado Gerar ame.
GEN 26:27 Eme Aisik ndremenya oro, “Ado badeh mene lomondra ndra-in tado udu tek ma ado sobolei jo eme len, ya ado anya kame dah kabosah?”
GEN 26:28 Eme oro tiye, “Aso badeh anyolom Laban badeh udu hawem eme aso tiye, To badeh kamwekes budon ta sahou randra le kudu ndrokowa to.
GEN 26:29 Aso aseken ou tandrakan, ta ou badeh samwekes bahun same taso, i buku none aso samwekes sawek tam. Aso amwekes mwasin i tam ma ou manyah mwasin le. Ya eme na dah aso ndratanan ndramwe-es ai, Laban badeh atehei nyosowan udu tam.”
GEN 26:30 Eme badeh Aisik mwesekei tine nyamon oro aimon ma a-un gwa.
GEN 26:31 Ano na mandraben badeh uru ma la-uh amwekes sahou randra le ma tandrakan i la-un, ano Aisik batanau oro ma oro kawas tan au ai.
GEN 26:32 Na len doh badeh oro lau ta lahou ta Aisik asahan, ya tiye nyalan ta gwa li mene oro a-eh. Oro anya, “Aso badeh ndrasilahei gwa.”
GEN 26:33 Eme tondrohani nyara gwa li doh, Siba moson “Tandrakan.” I don adeh san kon tinan Bersiba akohok nyaran adeh.
GEN 26:34 Len Iso jaha tan asahan hanoh badeh iy sudi Judit uru Basemat, uru badu Hita. Judit badeh nadu Beri ya Basemat badeh nadu Elon.
GEN 26:35 Uru badeh mwesekei manyah ta Aisik hawe Rebeka bado mwasin bwe.
GEN 27:1 Ano len Aisik i alon handru ma boto-on tan ano badeh, madan agwah ma iy winiyan banyolom kon bwe, eme iy aloh i ta nadun kadok Iso, eme iy tiye tan, “Naduk.” Eme iy anya, “Jo kada-ah.”
GEN 27:2 Eme Aisik tiye, “Jo kada-ah badeh ndra alon ai, jo bala tanan len ta imek tek bwe.
GEN 27:3 Ou andrei bonara ma nyah tam ma ou a lokei adai ari katin haka ndriliu keme.
GEN 27:4 Ou juhi nyamon simidin badeh ma ou tiyani keme, eme ya jo udu ndra loken kahis le, jo katehei nyosowan ki tam.”
GEN 27:5 Ya Rebeka badeh ndranuhun sahou nane Aisik asehek i ta nadun Iso. Eme Iso iu ili lokei orou katin haka badeh,
GEN 27:6 Rebeka tiye i ta nadun Jekop, “Jo badeh anuhun tamam tiye i ta nadu tinem Iso anya,
GEN 27:7 iy badeh kidi ari katin haka ano iy kajuhiy nyamon simidin badeh kili nan iy kaimon, eme ya udu mada Laban badeh iy katehei nyosowan ki tan, koro-an iy kimek.
GEN 27:8 Eme ya, naduk Jekop ou anuhun kamwe-es, ma ou an hamon ta sahou tek jo asehek tam dah:
GEN 27:9 Ou ala kuhi me kasen la-uh keme ya jo kajuhiy ma kamwesekei ki simidin kamwenen ta seken ta tamam.
GEN 27:10 Ano badeh ou andrei ki na tamam kaimon, ndrakan iy in ndra loken le, eme iy katehei nyosowan kewek tam.”
GEN 27:11 Eme Jekop tiye i ta tinen Rebeka, “Arile nadu tine Iso badeh lamin solo-an ya jo badeh badak lamin bwe.
GEN 27:12 Ya i buku none tama kanyokar badak kameh, i dah kameh iy anya jo wasai, ma iy kameh madan andra-i tek ma jo kameh winiyan bakohok nyosowan bwe.”
GEN 27:13 Eme badeh tinen tiye i tan, “Naduk, ou anuhun le jo, ou ala andrei me keme, losen tam badeh kameh jo ato-ou.”
GEN 27:14 Eme iy ili andrei eme badeh atehei i mine tinen, eme iy juhiy nyamon i simidin, amwenen le ta seken ta taman Aisik.
GEN 27:15 Ano badeh Rebeka andrei awin ta kadok tan udu bolo asiu eme, atehei i la-u bwaneh tan Jekop.
GEN 27:16 Ano iy andrei ku-i me asiniy i bohan ma balen.
GEN 27:17 Ano iy atehei nyamon simidin nane dah i mine Jekop ma jabi ramen nane lowosani dah.
GEN 27:18 Eme iy ili hawe taman badeh iy anya, “Tama.” Eme taman anya, “Abo naduk, Ou are badeh?”
GEN 27:19 Eme Jekop anya, “Jo tama jo kadok tam, lakou ou nane tiye jo ndramwesekei ai, ou suri ou ma ou aimon katin haka tek, eme ya ou adeu nyosowan keme la-uk.”
GEN 27:20 Eme Aisik anya, “Naduk ou takalahei suwi i buku sah?” Eme iy tiye, “Laban Kindrei badeh atehei len mwasin tek.”
GEN 27:21 Ano Aisik tiye i tan, “Naduk, ou ame mirihik ya jo kanyokar badam, ou badeh naduk Iso handru de bwe.”
GEN 27:22 Eme Jekop i hawe taman Aisik, ano Aisik anyokar iy eme Aisik anya, “Ei, nyaro balen i buku none Jekop arile bohan badeh boha Iso.”
GEN 27:23 Iy bala tanan iy bala mwasin bwe, tasah lami bohan badeh i buku none nadu tinen Iso; eme badeh iy atehei nyosowan i tan.
GEN 27:24 Eme Aisik ndremenya, “Ou dah naduk Iso handru?” Eme iy anya, “Ehe, jo handru.”
GEN 27:25 Ano Aisik anya, “Naduk ou tiyani katin haka ndrajuhiy keme jo kaimon, eme ya jo kedeu nyosowan ki tam.” Eme Jekop bwese-ei ili iy aimon; ano iy andrei wa-in ili ma iy a-un le.
GEN 27:26 Ano Taman Aisik anya, “Ou ame dah ma ou atamas jo.”
GEN 27:27 Eme iy ili badeh atamas iy. Eme Aisik ihon mahu awin tan badeh, ma iy atehei nyosowan i tan ma tiye, “Mahu naduk badeh i buku none kanyeu badu bilin. Laban atehei nyosowan i ta aliy.
GEN 27:28 Ya Kindrei atehei tam rahu badu kandrah, ma munyak ki mwasin. Iy badeh kedeu tam kalom ma wa-in solo-an.
GEN 27:29 Ya iri kon munyak tinan badeh katudun ou, ma iri lau kaluh ki tam, ma ou atondrok nadu tinem oro, ma nah badu ndrine tinem oro kaluh ki tam. Ya oro are amwekes maha i tam badeh kakohok isi ma oro are adeu nyosowan i tam kameh akohok nyosowan ale.”
GEN 27:30 Aisik atehei nyosowan i la-u Jekop ano badeh Jekop iu i len ta taman le badeh, nadu tinen Iso udu lokei eme.
GEN 27:31 Eme iy juhiy nyamon simidin ma bwese-ei i na taman. Ano badeh iy tiye i ta taman, “Tama, ou suri ou ma ou aimon katin haka, eme ya ou atehei nyosowan tam keme la-uk.”
GEN 27:32 Eme badeh taman ndremenya Iso, “Ou are dah?” Eme iy anya, “Jo kadok tam Iso.”
GEN 27:33 Eme Aisik totoreh ma iy anya, “Are lau nane andrei katin haka nane tiyani eme dah? Jo baraimon barano ai, ou bame bwe le, eme jo ndratehei nyosowan ndra la-un ma i dah kameh erah ai.”
GEN 27:34 Eme Iso anuhun boho taman badeh, iy tabaniy bohon i ta ndrelen. Eme iy anya, “Tama jo ale, jo ale ou atehei nyosowan ki la-uk!”
GEN 27:35 Arile taman tiye, “Nadu tinem eme wendreyani jo ma iy ndrandrei nyosowan ndra la-un.”
GEN 27:36 Ano Iso anya, “Iy Jekop doh? Iy ndra bukuhiy no-ok san la-uh ai: iy asahan kadok ano na dah ja badeh, iy andrei nyosowan tek?” Ano iy ndremenya, “Nyosowan rayah ou tawiy udu kede-eh tek de bwe?”
GEN 27:37 Eme Aisik tiye i ta Iso, “Jo badeh atehei Jekop atondrok ou ma mwesekei lowan oro badeh asahan lau ta lahou tan. Ma jo badeh ndratehei kalom hawe wa-in ndra tan. Saba lakou udu kede-eh ja kameh jo kedeu tam, naduk?”
GEN 27:38 Eme Iso tiye i ta taman, “Tama ou ari udu kede-eh, ou nyosowani keme tek. Ou nyosowani jo ale!” Ano ma iy eden bohon i loken.
GEN 27:39 Eme badeh taman Aisik tiye i tan, “Manyah tam kameh udu len labai ta lakou mari badu munyak, Rahu badu kandrah kameh bawek tam bwe Ma munyak tam kameh mada lihin bwe.
GEN 27:40 Ou kameh manyah na boto-on ta beteleu, Ma ou kameh asahan bonyo-ou ta nadu tinem. Arile i buku none ou a bolosen badeh kameh Ou kameh atobwak ta are baha tondrok tan.”
GEN 27:41 Iso badeh bwalen atou Jekop handru en, tasah taman badeh ndratehei nyosowan ndra la-un. Eme iy lomondra le udu tan, “Len ta tama badeh ndrame bakep; ano badeh jo kameh idi Jekop imek.”
GEN 27:42 Eme len Rebeka, anuhun lau tiye boho nadun kadok Iso badeh, iy suni lau tiye Jekop eme ma iy tiye, “Nadu tinem Iso badeh ndrasehek ta anya kidi ou amak.
GEN 27:43 Eme badeh naduk ou anuhun bohok: ou badeh atobwak ala hawe nadu tine Leban udu kon Haran.
GEN 27:44 Ou ala ado gwek winiya ndrine nadu tinem kamwunum,
GEN 27:45 ma ndra iy kamani sasah ou mine amwekes i badan. Ano jo barasuni lau barawek barakohok ou barame hamon. Bwe kameh ah ma la-uh kamak ai!”
GEN 27:46 Ano badeh Rebeka tiye ta Aisik, “Jo ndrawoyah ta udu Iso badu Hita kede-eh. I buku none Jekop kasudi ari badih ki buku doh jo kameh imek.”
GEN 28:1 Eme badeh Aisik luhi Jekop eme ano iy batanau iy ma atehei nyosowan i tan: “Ou badeh sasoh badih badu Kenan, ndri-i.
GEN 28:2 Ou badeh ales ala Padan Aram, ala asiu ta tama tinem Betu-el. Ou ala sudi ari badih badu bolo nadu Leban nadu tine tinem oro badeh.
GEN 28:3 Ma Kindrei badeh kudu hawem ma katehei nyosowan ki la-um ma lundriyem ki sola ma kasahan lau rakon buruwen.
GEN 28:4 Hawe iy badeh katehei nyosowan ki ta lundriyem oro, i buku none iy atehei nyosowan i ta Abraham. Ma hawe ou andrei lakou mari badu munyak ou manyah ado aliy dah, lakou mene Kindrei atehei i ta Abraham.”
GEN 28:5 Ano Aisik badeh tiye Jekop ili Padan Aram i hawe Leban iu ndrine Betu-el. Leban badeh nadu tine Rebeka ya Rebeka badeh tine Jekop uru Iso.
GEN 28:6 Eme Iso badeh ndratanan Aisik badeh ndratehei nyosowan ndra ta Jekop ma tiye iy ndra-au ndrala Padan Aram ta kasoh badih badu doh, na len iy edeu nyosowan i tan ma batanau iy badeh sasoh badih badu Kenan.
GEN 28:7 Eme Iso ale tanan taman uru badeh ndratiye iy ndra-au ndrala kon Padan Aram.
GEN 28:8 Ano badeh Iso badeh i tanan ai, ta Aisik badeh baseken badih badu Kenan bwe;
GEN 28:9 Eme Iso ili hawe Isma-el edek ndrine Abraham. Ya Isma-el badeh nadun badih la-uh udu aliy. Uru badeh nyara uru Mahalat hawe Nebayot. Eme badeh Iso sudi Mahalat i tan.
GEN 28:10 Eme Jekop udu Bersiba eme len ma iy iu ili Haran.
GEN 28:11 Iy edek ili kon ari, an i andri ma iy amadin. eme iy andrei bek ari i nyara kason tan badeh ma iy amadin.
GEN 28:12 Eme badeh iy ameh ma iy atou kandren udu andri i kandrah ma atou iri angelo ta Kindrei badeh adek andri loken bada kandren dah.
GEN 28:13 Eme udu bwele-e kandren badeh Laban udu aliy tiye, “Jo dah jo Laban Kindrei ta tamam Abraham ma Kindrei ta Aisik. Jo kameh edeu munyak ou amadin ado aliy dah kameh i ta lundriyem oro.
GEN 28:14 Lundriyem oro kameh a sola i buku none kasu ndren badu munyak ma oro kameh aseker ala kum, ala lan, ma loboho an i andri. Iri lau mari badu munyak kameh jo edeu nyosowan i la-u iri tasah na ou hawe lundriyem oro.
GEN 28:15 Ou kameh heh a heh jo kameh udu hawem ma madak kameh udu tam ano jo le kameh, tiyaniy ou ame hamon ja ame munyak dah. Jo kameh winiyan bakahei ou bwe, winiyan le lakou jo mene tandrakan ou barasahan.”
GEN 28:16 Ano Jekop amak badeh iy lomondra, “Handru labai jo ndratanan, Laban kede-eh udu kon dah.”
GEN 28:17 Eme iy inoh labai ma iy anya, “Kon dah i buku sah handru! Handru labai i dah asiu ta Kindrei, i dah badeh mada san ta i bolo kandrah labai.”
GEN 28:18 Eme na mandraben badeh Jekop andrei kason ta batun dah tutuni udu loken i buku bek ta salom ano iy solowei ndrelekei i bwele-en ta kalem hawe ta ndrahu salom ta Kindrei.
GEN 28:19 Kon doh bwena aloh Lus arile iy aloh ja badeh Betel, moson, “Asiu ta Kindrei.”
GEN 28:20 Ano badeh Jekop tandrakan, “I buku none Kindrei udu hawek ma madan udu tek, udu bolo tekedek tek dah badeh iy kedeu nek nyamon ma kalawik kolau.
GEN 28:21 Eme ya jo kedek kili asiu ta tama ma mwasin le, ano badeh Laban barasahan Kindrei tek.
GEN 28:22 Ma bek jo tutuni udu loken kodo-oh badeh kameh asahan asiu ta Kindrei. Ma udu bolo lakou mari ou adeu eme tek badeh kameh jo edeu sese ja i hamon i tam, i buku none ronoh, badeh kameh jo edeu ari ewek tam.”
GEN 29:1 Ano Jekop edek ili badeh, asahan munyak tiri lau badu an eme loken.
GEN 29:2 Eme iy eme badeh atou gwa li ari badeh udu manan ma oro sipsip tulumuk manyah ado andri awudiy. Iri katin haka badeh a-un le gwa doh, gwa doh badeh bek malahan badeh turuki madan.
GEN 29:3 I buku none len iri katin haka ame, badeh kameh iri lau ta tondrok katin haka kameh suri madan iu, ano iri a-us wa-i iri gwa. Ano ja kameh iri tundruwi bek ta madan i hamon i bwele-en.
GEN 29:4 Eme Jekop badeh lelen oro lau ta tondrok katin haka, “Ado nadu tine ado badu heh?” Eme oro anya, “Aso badu Haran.”
GEN 29:5 Eme iy tiye, “Ado tanan Leban, iy ala nadu tubu Nahor en?” Eme oro anya, “Ehe, aso tanan iy.”
GEN 29:6 Ano Jekop ndremenya, “Iy mwasin de bwe?” Eme oro anya, “Ehe iy udu mwasin, ya nadun Rejel asa ma sipsip tan eme ah.”
GEN 29:7 Eme Jekop anya, “Ado kanyolom an udu ndra loken kahis; iri katin haka winiyan bame se bwe le kahis. Ado ka-us gwa ki toro sipsip ma ado kasariye oro ka hamon ta bwidiu ja.”
GEN 29:8 Eme oro tiye, “Aso winiyan bwe, winiya oro sipsip kase ya katukumwi bek ta madan ki-iu ta mada gwa. Ano badeh aso bara-us gwa barala tiri sipsip.”
GEN 29:9 Eme iy asehek sahou i toro kahis le badeh, Rejel ma sipsip ta taman oro ame. Iy badih ta atondrok sipsip le.
GEN 29:10 Eme Jekop anyolom ili badeh atou Rejel ma sipsip ta kalin Leban eme. Eme iy ili badeh atuwi bek ta mada gwa iu ma a-us gwa i wa-i sipsip ta kalin oro.
GEN 29:11 Ano badeh Jekop tawi Rejel badeh ma iy tabani bohon i ta ndrelen.
GEN 29:12 Eme iy asehek nyala Rejel ta iy badeh nadu Rebeka lowa taman ari ai. Ano Rejel sakaliye ili kon badeh tiye ta taman.
GEN 29:13 Eme iy anuhun le badeh, i doh kalin, nadu nadu tinen, eme iy ibotatahan ili atou iy. Eme iy tawi iy ma iy sekesek iy ano badeh iy kuhi iy ma uru au ala asiu. Eme Jekop asehek nyalan ta lakou mari.
GEN 29:14 Ano badeh Leban tiye tan, “Ou badeh to rabuk amwenen.” Jekop badeh udu hawen badeh bun ari,
GEN 29:15 eme badeh Leban tiye i ta Jekop, “Ou kede-ek lowak, eme ou badeh sabudon anya i dah kameh ou amwekes lahou tek leleyah bwe? Ou tiye tek, sihinem badeh na sasah handru.”
GEN 29:16 Leban badeh nadun badih, badeh la-uh, iy aluh badeh nyaran Liya ya iy sah badeh nyaran Rejel.
GEN 29:17 Liya badeh madan mwasin, arile Rejel badeh konen labai, i buku tariye ka-ukon.
GEN 29:18 Ya Jekop badeh aseken Rejel labai, eme iy anya, “Jo kameh ibo gok tam jaha ndro taloh ta sah tam Rejel.”
GEN 29:19 Eme Leban anya, “Mwasin handru ta Rejel badeh ki tam, jo bwalek iy i ta ari lau buku liliy. Ou ado hawek ado.”
GEN 29:20 Eme Jekop badeh amwekes lahou ta Leban jaha ma ndro taloh ta akohok Rejel. Iy amwekes lahou boto-on ya eme jaha ndro taloh doh badeh i buku none len la-uh le, tasah iy aseken Rejel labai.
GEN 29:21 Ano Jekop tiye i ta Leban, “Kabwe ai, len ndrano ai, ya uduk keme ya jo kamadin iy.”
GEN 29:22 Eme Leban nyuruwini iri lau mari badu kon ame ma iri amwekes tine nyamon.
GEN 29:23 Arile kon eben badeh iy atehei nadun Liya badeh ili hawe Jekop ma uru amadin uru.
GEN 29:24 Ma Leban atehei badih ari nyaran Silpah badeh i badih ta lahou ta Liya.
GEN 29:25 Kon anya kaleu badeh Rejel bwe, Liya. Eme Jekop tiye ta Leban, “Ou amwekes sasah eme tek dah? Jo amwekes lahou tam badeh ta Rejel labai? Ou wasai jo ta sasah?”
GEN 29:26 Eme Leban anya, “Kandriyen tahi badu dah badeh i bahan winiyan bala tasou bwena ta iy bwele-en bwe.
GEN 29:27 Ou abe-en len ta molak sandre ari kano op, ano Rejel barawek. Arile, ou amwekes lahou tek jaha ndro taloh ja.”
GEN 29:28 Eme Jekop mwesekei i buku le aliy. Eme iy udu hawe Liya badeh sandre ari ano badeh iy atehei Rejel i udun ja.
GEN 29:29 Ano Leban badeh atehei badih ta lahou ari i nyara badih ta lahou ta Rejel, nyaran badeh Bilhah.
GEN 29:30 Eme Jekop badeh amadin Rejel ale, ma iy aseken iy labai ja ta Liya. Eme iy amwekes lahou ta Leban jaha ma ndro taloh ta Rejel.
GEN 29:31 Na len Laban anyolom Jekop badeh baseken Liya handru bwe, iy mwesekei iy badeh ato-ou nah ja. Arile Rejel badeh iy kis.
GEN 29:32 Eme Liya ndrinen i tinan eme badeh iy atehei kadok tondrohani nyaran Ruben. Eme iy anya, “Laban badeh ndratou maha-an tek ma i dah kameh uduk aseken jo ai.”
GEN 29:33 Ano ja badeh ndrinen i tinan ja ma iy tuwi nah mwan, tondrohani nyaran badeh Simiyon. Eme iy anya, “Laban badeh anyolom Jekop baseken jo bwe, eme iy atehei tek nah ja dah.”
GEN 29:34 Ano ja badeh ndrinen i tinan ja, iy tuwi nah mwan ja ma tondrohani nyaran Lebi. Eme iy anya, “I dah kameh uduk kameh budon tan abadok tek, tasah jo badeh atehei nah mwan taloh i tan.”
GEN 29:35 Ano ja badeh ndrinen i tinan ja badeh iy tuwi nah mwan ari ja, eme iy tondrohani nyaran badeh, Juda. Eme iy anya, “Na len dah kameh jo kameh atudun Laban.” Ano badeh iy ano ta ato-ou nah.
GEN 30:1 Ano na len Rejel anyolom iy bato-ou nah nadu Jekop bwe badeh, eme madan alikis nadu tinen. Eme badeh iy tiye i ta Jekop, “Ou atehei nah ki ndrinek, bwe kameh jo imek ai!”
GEN 30:2 Eme Jekop ibolosen i tan eme iy tiye, “Jo winiyan bakohok ndrahu Kindrei bwe, iy le badeh baramwekes ou barato-ou nah!”
GEN 30:3 Ano badeh Rejel anya, “I doh badih ta lahou tek Bilhah doh. Ou amadin iy ya iy kato-ou nah keme tek. Eme na iy le badeh lundriyek oro kasola.”
GEN 30:4 Eme iy atehei Bilhah badeh i nyara udu Jekop ma Jekop amadin iy, eme ma iy tuwi nah mwan.
GEN 30:6 Ano badeh Rejel tiye, “Kindrei badeh ndramwesekei sahou ma iy ndratehei seken tek; iy badeh anyolom tikisiy tek ma iy atehei tek nah mwan.” Eme nah doh badeh tondrohani nyaran badeh Dan.
GEN 30:7 Ano badih ta lahou ta Rejel ndrinen tinan ja ma iy tuwi nadu Jekop mwan ari ja.
GEN 30:8 Eme Rejel anya, “Jo badeh amwekes lahou boto-on labai hawe nadu tine eme ma jo ndrasakalawi iy.” Eme iy tondrohani nyaran badeh Nabtali.
GEN 30:9 Eme Liya anyolom iy badeh bato-ou nah bwe badeh, eme iy andrei badih ta lahou tan Silpah badeh atehei iy i ta Jekop i buku none udun.
GEN 30:10 Eme Silpah tuwi nah nadu Jekop.
GEN 30:11 Eme Liya badeh anya, “Jo ndramwe-es ai,” eme iy tondrohani nyaran Gat.
GEN 30:12 Ano Silpah badih ta lahou ta Liya tuwi nadu Jekop mwan ari ja.
GEN 30:13 Eme iy tiye, “Jo badeh sekesek labai! I dah kameh iri badih kameh aloh jo, ‘Sekesek.’” Eme iy tondrohani nyaran Aser.
GEN 30:14 Na len bwidiu wit uni badeh Ruben ili lokei badeh ndruni kei ta nah aloh mandrake, eme iy kuhiy eme atehei i mine tinen Liya. Eme Rejel eme iy anya, “Liya, nek rayah mandrake ta nadum keme.”
GEN 30:15 Arile i tan badeh iy anya, “Ou mene ndrandrei uduk ka-i ai. Ya i dah kameh mandrake kewek la-un ale?” Eme Rejel tiye i buku doh, “I buku none ou atehei mandrake ta nadum, ou kameh amadin hawe Jekop na ben kameh.”
GEN 30:16 Eme Jekop udu lokei eme na beyeh badeh, Liya ili aturuk iy, eme Liya tiye, “Jo badeh andrei mandrake ta naduk, atehei ndra na Rejel eme ya na ben kameh ou ame amadin jo.” Eme badeh iy ili badeh amadin iy na ben.
GEN 30:17 Eme Kindrei anuhun Liya, eme Liya ndrinen i tinan ma iy atehei kuwim tan nadu Jekop.
GEN 30:18 Eme Liya anya, “Jo badeh atehei badih ta lahou tek i ta uduk, eme Kindrei badeh atehei nah i sihinek.” Eme tondrohani nyaran badeh Isakar.
GEN 30:19 Ano badeh Liya ndrinen i tinan ja iy tuwi nadu Jekop ja So-on tan.
GEN 30:20 Ano Liya anya, “Kindrei badeh ndratehei tek lakou mwasin labai. Na dah kameh uduk kameh anyolom jo udu mwasin ta madan ai, ma iy kameh masiye jo, tasah jo badeh ndratuwi nah onoh ndra nadun.” Eme iy tondrohani nyaran badeh Sebulun.
GEN 30:21 Ano udu ja badeh iy tuwi badih ma tondrohani nyaran badeh Dinah.
GEN 30:22 Ano badeh Kindrei lomondrani Rejel; iy anuhun iy, eme iy mwesekei ndrom ta ato-ou nah ja amwe-es.
GEN 30:23 Eme ma ndrinen i tinan ma iy tuwi mwan. Ano iy tiye, “Kindrei badeh ndramwesekei tikisiy tek badeh ndrano.”
GEN 30:24 Eme iy tondrohani nyaran badeh Josep, ano ma iy tiye, “Jo aseken Kindrei kedeu tek rayah nah ja.”
GEN 30:25 Rejel atehei Josep eme len ano badeh Jekop tiye ta Leban, “Ou satawi jo, jo anya ki-iu ki kon tek.
GEN 30:26 Jo mene amwekes lahou tam ta uduk uru ma la-uh ma oro nah. Ou atehei oro kame ma jo ki-iu ki len tam. Ou badeh tanam jo mwasin labai len jo amwekes lahou tam.”
GEN 30:27 Arile Leban anya, “Ou badeh mwasin ta madak ya ou winiyan ba-au bwe. Ou ado. Jo badeh ndrada kau, Laban atehei nyosowan eme tek tasah na ou.”
GEN 30:28 Ano badeh iy tiye le, “Abo, sabe ou aseken jo kisih ou.”
GEN 30:29 Eme badeh Jekop anya, “Ou tanam lahou jo amwekes, ma san jo atondrok iri katin haka tam udu mwasin labai.
GEN 30:30 Lakou tam sola bwe len jo eme, arile na dah ndra sola, tasah Laban atehei minen udu la-um, tasah na jo; ma loboho heh jo edek i aliy. Arile na dah badeh jo anya kasilah lakou ta aseben asiu tek ai.”
GEN 30:31 Eme iy lelen, “Jo katehei sasah tam?” Eme Jekop anya, “Ou sanyohan jo lakou. I buku none ou aseken tanan tek doh; jo badeh kameh atondrok katin haka tam ilih le:
GEN 30:32 Jo kameh anyolom iri katin haka tam mari, ma jo kameh lebelei iri sipsip kasen bokodon ma hawe iri me busuwen are len. I doh sihinek ai.
GEN 30:33 Eme ya i buku none len hamon ou kameh i tanam jo badeh ta wasai bwe, buku na ben ou anya ame adeu sihinek. I buku none ari me belen udu bolon tek ma hawe i buku none ari sipsip kasen bokodon udu bolon tek, badeh jo bene-ei tam ai.”
GEN 30:34 Eme Leban anya, “Mwasin. Ki buku none bohom baden.”
GEN 30:35 Arile na len doh le badeh Leban lebelei iri me mwan busuwen ma hawe iri me badih busuwen ma iri sipsip bokodon. Ano iy atehei nadun oro ta atondrok.
GEN 30:36 Ano badeh Leban atehei len taloh udu ndrokowan hawe Jekop ta adek. Ya Jekop badeh atondrok kati haka rayah ta Leban ai.
GEN 30:37 Ano badeh Jekop tatasei andra kei popola ma almon rayah ma kei badeh alim ku-i kei winiya belen asahan bada iri.
GEN 30:38 Eme badeh tatahiy andra kei doh badeh udu bwena ta bwekei ta gwa tiri katin haka. Iy tatahiy udu doh, tasah iri katin haka amwekes mada bun tiri na len iri ame a-un gwa. Eme iri katin haka kanyolom badeh iri kales kala ka-un gwa.
GEN 30:39 Ya i buku none iri me amwekes mada bun tiri are bwena ta kei dah, i dah kameh iri adeu nah bokodon hawe nah busuwen.
GEN 30:40 Ano badeh Jekop lebelei iri sipsip badeh are len labai ta me, ya batala iri badeh ili tiri katin haka busuwen ta Leban. Eme san doh badeh iri katin haka tan bala bolon ta Leban bwe.
GEN 30:41 I buku none iri katin haka boto-on mada bun tiri asahan badeh, Jekop tatahiy andra kei udu bwena ta bwekei ta gwa tiri katin haka eme iri ame amunyau ma iri amwekes mada bun tiri.
GEN 30:42 Arile iri katin haka boto-on bwe badeh iy batehei iri bala aliy bwe. Eme badeh iri katin haka boto-on bwe baden eh a hawe Leban ai, ya boto-on badeh a hawe Jekop ai.
GEN 30:43 I san le doh badeh Jekop asahan ndramak tan lakou solo-an labai. Tan badeh iri katin haka solo-an, ma iri lau tan ta lahou solo-an ma hawe iri kamel hawe donki solo-an ado aliy.
GEN 31:1 Ano badeh Jekop eme anuhun nadu Leban oro asehek anya, “Jekop badeh tan lakou sola kede-eh badeh ta lakou ta tama to le.”
GEN 31:2 Eme Jekop eme badeh atona kandriyen ta Leban bala buku none mwena mene bwe.
GEN 31:3 Ano Laban Kindrei tiye ta Jekop, “Ou au a hamon ala munyak ta tamam oro ma ala hawe lowam oro, ya jo kameh madak udu tam.”
GEN 31:4 Eme iy suni sahou i ta Rejel uru Liya ame hawen ame lobwidiu hawe katin haka udu hawen dah.
GEN 31:5 Eme iy tiye i turu, “Jo anyolom kandriyen ta tama ah amwekes eme tek bala buku none bwena mene bwe, arile Kindrei ta tama badeh udu hawek.
GEN 31:6 Ah tana ah, jo badeh amwekes lahou ta tama ah boto-on labai,
GEN 31:7 arile tama ah badeh mwesekei wasai san ronoh ta anya kisih jo; eme Kindrei badeh bamwesekei lomondra ta amwekes isi eme tek bwe.
GEN 31:8 I buku none iy katiye, ‘Iri me busuwen badeh sihinem, badeh kameh ma iri katin haka ala bada iri busuwen kameh tam le.’ Ma buku none iy katiye, ‘Iri me torowanan badeh sihinem, badeh kameh ma iri katin haka ala ato-ou bada iri torowanan badeh kameh tam le.’ Oro kasen ala busuwen badeh tek ai.
GEN 31:9 Eme badeh Kindrei badeh kuhi katin haka ta tamam oro badeh atehei eme tek.
GEN 31:10 “Na mada bun tiri katin haka ta adeu nah badeh jo ameh. Jo ameh iri me mwan badeh amwekes mada bun hawe iri katin haka torowanan ma hawe busuwen.
GEN 31:11 I doh badeh angelo ta Kindrei tiye na ameh, anya, ‘Jekop.’ Eme jo anya, ‘Jo kada-ah.’
GEN 31:12 Eme iy tiye, ‘Ou anyolom ki loke tiri me mwan amwekes mada bun hawe iri katin haka torowanan busuwen kede-eh. Jo le badeh amwekes kandriyen doh, tasah jo badeh ndranyolom kandriyen mari Leban amwekes ewek badam.
GEN 31:13 Jo dah badeh jo Kindrei mene asahan hawem udu Betel, eme ou mene tutuni bek i loke i buku none kalem ta abudon jo ma ou mene mwitiniy ndrelekei ta olip i bwele-en ma ou tandrakan eme tek. Na len dah badeh ou ruwani kon dah ya ou au ala munyak tam amwenen.’”
GEN 31:14 Ano Rejel uru Liya tiye, “Aru kameh winiyan bakohok munyak ta tama aru bwe ai.
GEN 31:15 Iy badeh amwekes aru i buku none lau badu leheleh. Iy atehei aru a ta sisih ma iy ale ndrani sihine aru, mene ndrano.
GEN 31:16 Handru labai lakou mari Kindrei kuhiy udu hawe tama aru badeh taru ma hawe lundriye aru oro. Ou an hamon ta sasah Kindrei asehek tam badeh.”
GEN 31:17 Ano Jekop eme, nyahani nadun ma udun uru ala manyah ado bwele-e kamel,
GEN 31:18 eme iy edek iu sariye iri katin haka tan i bwena tan, ma hawe lakou tan mari badu Padan Aram, edek iu ili hawe taman Aisik ili munyak Kenan.
GEN 31:19 Ya Leban badeh ndra-au, ndrasan lami iri sipsip, eme badeh Rejel ili badeh bene-ei ndramak, (asehek na sukumada kei) ta taman dah.
GEN 31:20 Ma ale Jekop badeh batiye tanan ta Leban badu Aram ta oro nane atobwak doh bwe.
GEN 31:21 Eme iy atobwak ma hawe lakou tan mari ili gwa i bilisiu ili loboho mandrei badu munyak Gileyat.
GEN 31:22 Udu len la-uh iu, ano i bada len taloh badeh lau tandra-un ta Leban, ta Jekop badeh ndratobwak.
GEN 31:23 Eme iy kuhi lowan oro a hawen, eme oro sakaniy an hamon toro, eme na len ndro taloh oro ala badeh tawi oro ado munyak Gileyat.
GEN 31:24 Ano badeh Kindrei asahan ta Leban badu Aram na ameh tiye i tan i buku doh, “Balem kudu tam kamwe-es, ou badeh sandres oro.”
GEN 31:25 Jekop badeh tahi asiu balei tan badeh udu bolo mandrei Gileyat, amwenen le na len Leban oro lowan ala asos ma oro amadin doh ale.
GEN 31:26 Ano Leban tiye i ta Jekop, “Ou amwekes sasah dah? Ou badeh ndrawendreyani jo, eme ou tuwi naduk uru i buku none lau ta ateu ta bahun.
GEN 31:27 I buku sah ou aton le ma ou wendreya le ma ou atobwak? I buku sah ou batandra-un tek bwe. Eme ya ou au ma sekesek ma wari ma ada ndran?
GEN 31:28 Ou badeh ale batehei jo babose se nadu tubu oro ma hawe naduk uru bwe. Ou amwekes kandriyen dah bamwenen bwe.
GEN 31:29 Jo badeh jo tek boto-on udu aliy ta amwekes maha ma isi ewek tam; arile na ben badeh Kindrei ta tamam badeh tiye tek, ta jo badeh balek kudu tek kamwe-es, jo badeh sasehek sahou ndra-in o sahou mwasin sawek tam ndri-i labai!
GEN 31:30 Jo tanan ou badeh koham ndrapwe ta ala kon tam, arile ou badeh ndrabene-ei sukumada kei badu asiu tek.”
GEN 31:31 Eme Jekop anya, “Jo badeh inoh, jo anya koro-an ou ka tawi nadum uru kado.
GEN 31:32 Arile i buku none ou silahei are andrei sukumada kei tam badeh iy kimek, ma udu mada lowa talu oro badeh, ou anyolom i buku none ari lakou tam udu bolon tek handru, badeh ou andrei kewek hamon.” Arile Jekop badeh tanan bwe, Rejel badeh andrei sukumada kei nane doh.
GEN 31:33 Eme badeh Leban asilah bolo asiu balei ta Jekop ano iy i bolon ta Liya ano badeh iy i bolon turu badih ta lahou dah, eme badeh iy batakalei ari lakou bwe. Iy udu asiu balei ta Liya eme len ano iy i bolon ta Rejel.
GEN 31:34 Rejel badeh andrei sukumada kei badu asiu ta taman badeh, tonei udu baha ndrahu manyah ta udu bwele-e kamel udu bada munyak ma iy manyah udu la-un. Leban badeh silahei bolo asiu balei mari arile iy batakalei ari lakou bwe.
GEN 31:35 Eme Rejel tiye i ta taman, “Tama, ou sabolosen, jo badeh winiyan bales bare loken bwe; mada bun tek ndrasahan.” Eme iy asilah sukumada kei ta asiu tan, arile iy batakahei bwe.
GEN 31:36 Eme Jekop i bolosen, Anya, “Sasah jo mwesekei andra-i dah? Saba kandriyen jo mwesekei ya ou ame atikah jo dah?
GEN 31:37 Na dah ou badeh ndratakalahei bolo lakou tek mari. Ou silahei sasah badu asiu tam jo andrei? Abo, ou atehei keme manan ya lau tam ma lau tek kanyolom, are mwasin.
GEN 31:38 Jo badeh udu hawem jaha lunoh ai, arile iri sipsip ma me tam badeh baruwe ta ato-ou nah bwe, ma jo badeh baimon ari katin haka tam bwe.
GEN 31:39 Iri katin haka ndriliu aimon katin haka tam, arile jo bandrei bawek hawem bwe; jo le atehei saluwen. Arile ou badeh andrekei sihinen udu minek ewek na ben na len, buku none amai.
GEN 31:40 Jo badeh an suluwmi jo na len ma nyala iniy jo na ben, ma jo bakohok matinou bamwenen bwe,
GEN 31:41 udu le buku doh winiya jaha ma lunoh jo udu asiu tam. Jo badeh amwekes lahou tam ta akohok nadum badih uru jaha ma ronoh hahuw, ano jaha onoh ta katin haka tam. Arile ou wendreyani jo ta adeu sihinek san ronoh.
GEN 31:42 Ki buku none Kindrei ta tama, Kindrei ta Abraham ma Aisik bare hawek bwe; i dah nane ou suni jo ki-iu na ari minek ma katik le. Arile Kindrei badeh atou maha ma isi udu tek ma lahou tinan jo mwesekei, eme na ben mene ou atou losen tan.”
GEN 31:43 Eme Leban anya, “Uru badih kede-eh naduk, oro nah kede-eh badeh naduk ma hawe oro katin haka kede-eh tek. Lakou mari udu mada kede-eh tek le ai. Ya sasah na dah jo kamwekes ki bada naduk uru hawe nadu naduk oro?”
GEN 31:44 Ano Leban tiye, “Talu kamwekes sahou randra le, ki buku none kalem ta ndrokowa talu.”
GEN 31:45 Eme badeh Jekop tutuni bek i loken i buku none kei ales.
GEN 31:46 Ano iy tiye i ta lowan oro, “Ado katukumwi rayah bek.” Eme oro tukumwi bek i se ano badeh oro aimon nyamon ado mirihik ta aliy.
GEN 31:47 Eme Leban tondrohaniy kon doh Jegar Sahaduta, moson, “Bek ta tandrakan” i boho kon Aram, hawe Jekop tondrahani Galit, i boho kon Hiburu moson i le buku aliy.
GEN 31:48 Ano badeh Leban tiye, “Bek tukumwi dah i nyara kalem udu ndrokowak hawe ndrokowam na dah.” Tasah badeh aloh Galit.
GEN 31:49 I doh badeh aloh ale Mispah, moson, “Bokok,” tasah iy anya, “Laban Kindrei badeh madan kudu tam ma kudu tek len talu banyolom talu bwe.
GEN 31:50 I buku none ou batondrok naduk uru bala mwasin bwe, ya i buku none ou asoh badih ari ja, ya lau bare hawe talu banyolom bwe, arile Kindrei le baranyolom talu ma baradeu talu barala ta sahou.”
GEN 31:51 Ano badeh Leban tiye i ta Jekop le, “Bek tukumwi doh ma bek tutuni doh badeh jo mwesekei badeh ta ndrokowa talu.
GEN 31:52 Tukumwi bek ma tutuniy bek doh badeh kalem ta tandrakan ta talu. Ta jo winiyan basakalawi bek tukumwi kede-eh bawek bilisiu ta amwekes isi bwe ai, ma ou ale sasakalawi bek tukumwiy ma bek tutuniy same bilisiu samwekes isi same tek.
GEN 31:53 Winiya le Kindrei ta Abraham, ta Nahor, ma Kindrei ta tamam oro badeh baranuhun talu.” Eme Jekop tandrakan i ta nyara Kindrei ta taman Aisik.
GEN 31:54 Eme iy amwekes salom i bada bek udu mandrei ma tiye iri lowan aimon nyamon. Oro aimon ano badeh oro amadin ben ari.
GEN 31:55 Na mandraben badeh Leban atamas ma sekesek nadu tubun oro ma hawe nadun uru ma edeu nyosowan i toro. Ano badeh iy iu i hamon ja i kon tan.
GEN 32:1 Jekop ale suri iy ma iy iu, eme badeh angelo ta Kindrei eme asahan hawen.
GEN 32:2 Jekop anyolom oro badeh iy tiye, “I dah badeh ndrahu Kindrei!” Eme ma iy tondrohaniy badeh Mahana-em, moson, “Oro lumuk.”
GEN 32:3 Eme Jekop eme badeh suni lau tan rayah ala bwena hawe nadu tinen Iso udu munyak Se-ir udu kon tinan Idom.
GEN 32:4 Eme iy tiye i toro, “Ado katiye sahou ki ta Iso ki buku doh: ‘Jo badeh Jekop. Jo ndramak ta lahou tam. Jo badeh udu hawe Leban amwekes lahou tan eme taku len dah.
GEN 32:5 Jo badeh tek iri bulumakau udu aliy, iri donki udu aliy, iri sipsip udu aliy, iri me udu aliy ma hawe lau mwan ma badih ta lahou tek ale udu aliy. Eme jo atiye sahou doh ewek tam, ta ou aseken jo de bwe.’”
GEN 32:6 Ano oro lau ta tiye sahou ame hamon badeh tiye ta Jekop i buku doh, “Aso ala nadu tinem Iso tiye; iy badeh eme ta atou ou, ma lau tan ma hanek (400) ado hawen ame.”
GEN 32:7 Jekop eme badeh iy inoh andra-i, eme badeh iy apwai lau ma katin haka sipsip, bulumakau ma hawe kamel tan i lumuk.
GEN 32:8 Iy abudon badeh i buku doh, “I buku none iy amwekes bahun i la-u oro rabuk eh, badeh oro rabuk katobwak ai.”
GEN 32:9 Ano badeh Jekop amwekes salom i buku doh: “O Kindrei ta tama Abraham ma Kindrei ta tama Aisik, ou Laban ou tiye eme tek anya, jo badeh ki-iu ki hamon kili kon tinan ta lowak oro ma ou kameh adeu lundriyek oro a sola.
GEN 32:10 Jo badeh bamwenen ta kandriyen mwasin tam bwe ma ba-en hamon tam i buku none ou leheya ndramak ta lahou tam bwe. Jo mene andrei le kandro tek len aso mene ame bilisiu ta gwa Jordan. Arile na dah jo ndra lumuk.
GEN 32:11 Jo badeh inoh, jo amwekes salom, ou sebenei jo ta mine nadu tine Iso eme, koro-an iy kamwekes bahun keme tek ma oro nah ma hawe tine oro.
GEN 32:12 Arile ou badeh ndratiye, ou kameh adeu kanek ma ou kameh adeu lundriyek oro kameh nyaran bwe, i buku none on badu babi, winiya are lau winiyan bandromwoi bwe.”
GEN 32:13 Eme iy amadin ben ari eme badeh iy atehei lakou ta adeu i ta nadu tinen Iso:
GEN 32:14 iy atehei lunek (200) me badih, lunoh me mwan, lunek (200) sipsip badih ma lunoh mwan,
GEN 32:15 iy atehei tonoh kamel badih ma hawe rayah kasen, atehei hanoh bulumakau badih ma ronoh bulumakau mwan ano lunoh donki badih ma ronoh donki mwan.
GEN 32:16 Iy apwai oro katin haka, rabuk are doh, rabuk are doh. Ano iy weleyani oro lau ta lahou tan atondrok, eme iy ari atondrok rabuk, iy ari atondrok rabuk, i le buku doh. Eme iy tiye i toro, “Ado kadek kabwena tek ya ndrokowa to sese udu aliy tiri katin haka.”
GEN 32:17 Eme iy tiye ta ndramak badu bwena: “Ya i buku none nadu tine Iso kandruni ado, ya i buku none iy kandremenya ado, ‘Ado lau tare ame dah ya ado ado heh ame dah? ma katin haka mari ado bwena kede-eh tare?’
GEN 32:18 Eme ado katiye ki buku doh, ‘Oro badeh ta ndramak ta lahou tam Jekop. Oro doh tam ai. Ya Jekop badeh in hamon taso eme.’”
GEN 32:19 Ano iy ale tiye oro nane are hamon toro badu mwena ma hawe oro badu hamon tiri katin haka dah:
GEN 32:20 “Ma ado samaniy ta tiye, ‘Jekop in hamon eme.’” Jekop badeh abudon, “Jo kameh tamarei iy na lakou ki tan ma iy kameh mani kandriyen jo mene amwekes, i buku none jo ndruni iy.”
GEN 32:21 Eme iri lakou ta anyohan Iso na aliy badeh in mwena ili. Ya Jekop udu amadin ben ari.
GEN 32:22 Ano na ben doh badeh Jekop suri iy, eme iy kuhi udun ma la-uh, kuhi uru badih ma la-uh ta lahou tan ma hawe nadun oro ma ronoh ari mwan badeh, oro adek ala bilisiu ala gwa Jabok.
GEN 32:23 Iy tiyani oro a bilisiu ta gwa ano badeh iy tiyani iri lakou tan mari i bilisiu ale.
GEN 32:24 Jekop le ari badeh in hamon, eme badeh ndramak ari ili badeh uru akek, uru akek winiya le kon aleu.
GEN 32:25 Eme ndramak dah atona boto-on tan anya kano le badeh, iy atehei minen i ba Jekop le badeh, ma ban asoh.
GEN 32:26 Ano iy ndramak dan anya, “Jo ki-iu ai, kon ndra leu.” Arile Jekop anya, “Jo winiyan baruwani ou ba-au bwe, ndra ou atehei nyosowan eme tek.”
GEN 32:27 Eme ndramak dah ndremenya iy, “Nyaram areh?” Eme iy anya, “Nyarak Jekop.”
GEN 32:28 Ano badeh ndramak dan anya, “Nyaram kameh bala Jekop ja bwe ai, nyaram kameh aloh Isra-el, tasah ou badeh boto-on labai ta akek i la-u Kindrei hawe iri ndramak.”
GEN 32:29 Eme Jekop anya, “Abo, ou tiye nyaram keme tek.” Arile iy anya, “Ou anya atanam nyarak ta sasah?” Ano badeh iy atehei nyosowan i la-un udu doh.
GEN 32:30 Eme badeh Jekop tondrohani nyara kon Peniyel, moson “Mada Kindrei.” Eme iy anya, “Jo badeh anyolom Kindrei udu madak amwenen arile jo bamak bwe.”
GEN 32:31 An eme loken badeh iy udu Peniyel iu ma soka le, tasah ta ban.
GEN 32:32 Eme ta katin doh badeh iri lundriye iri Isra-el badeh baimon ndrubulo katin haka bwe, tasah Jekop badeh edek andra-i na ban.
GEN 33:1 Jekop anyolom ili badeh iy atou Iso hawe lau tan ma hanek (400) badeh adek ame; eme iy eme andromwoi oro nah i le winiya Liya uru Rejel hawe uru badih turu ta lahou turu.
GEN 33:2 Eme iy atehei nadun oro rayah ado hawe uru badih ta lahou tan ma la-uh ado bwena. Ano badeh Liya hawe oro nah rayah are hamon toro ano badeh udu hamon toro badeh iy atehei Rejel uru Josep ado hamon.
GEN 33:3 Jekop le udu bwena, eme iy aluh i andri bada munyak san ndro taloh udu mada Iso.
GEN 33:4 Arile Iso sakaliye ili badeh tawi Jekop ma atamas iy, eme ma uru aden.
GEN 33:5 Ano mada Iso i loke badeh anyolom badih hawe iri nah. Eme iy ndremenya, “Are oro are hamon ame dah?” Eme Jekop anya, “Oro doh badeh Kindrei tikisiy jo eme iy atehei eme tek.”
GEN 33:6 Ano badeh uru badih ta lahou ma hawe nadu oro ame mirihik ma oro aluh a andri.
GEN 33:7 Ano ja Liya hawe nadun oro ame ja aluh a andri ale. Ano udu hamon handru badeh Rejel uru nadun Josep am ma uru ale aluh a andri.
GEN 33:8 Eme badeh Iso ndremenya, “Oro lau jo ndrondron oro mene, moson i buku sah?” Eme badeh Jekop anya, “Badeh ta anya kanuhun ou sekesek tek de bwe.”
GEN 33:9 Arile Iso tiye, “Nadu tine, jo badeh lakou tek solo-an labai udu aliy. Kudu gwek tam ai.”
GEN 33:10 Arile Jekop tiye, “Bwe ai, i buku none ou ndraseken jo badeh, ou andrei. Jo badeh sekesek ta atou madam badeh i buku none jo sekesek ta atou Kindrei, ou badeh amwekes kandriyen mwasin ma ou ndraseken.
GEN 33:11 Abo, ou andrei lakou tek jo andrei eme hawem dah; Kindrei badeh tikisiy jo labai, eme iy badeh atehei lakou mari dah eme tek.” Jekop eme andresei iy, andresei iy ma iy andrei.
GEN 33:12 Ano Iso tiye, “Jo ki hawem ma talu ma la-uh ka-au.”
GEN 33:13 Eme Jekop tiye, “Ou tanam oro nah badeh babadok bwe le, eme ya jo badeh katondrok iri sipsip hawe iri bulumakau ma nadu iri bwisik. Ya ki buku none iri adek na len ari buruwen kameh ma iri kamak.
GEN 33:14 Abo, ou adek a bwena tek, ya jo badeh kedek kamunum ki-in hamon. Jo kameh edek amunum hawe oro bulumakau ma hawe oro nah, winiya le jo le barateu ado barado Se-ir.”
GEN 33:15 Eme Iso anya, “Abo, lau tek rayah kado hawem kado.” Eme Jekop anya, “Ou anya amwekes badeh ta sasah? I doh nane jo anya kanuhun le seken tam.”
GEN 33:16 Eme na len doh le badeh Iso, iu ili Se-ir.
GEN 33:17 Arile Jekop badeh ili Sukot ma iy tahi asiu tan hawe tahi mandron rayah tiri katin haka tan. Eme nyara kon Sukot badeh, moson, “Mandron,” badeh asahan kabatana doh.
GEN 33:18 Jekop udu Padan Aram, eme asahan mwasin le eme kon tinan Sekem udu Kenan, eme atehei ndrahu manyah tan udu rai mirihik ta kon tinan.
GEN 33:19 Iy sihinei munyak doh badeh ta lundriye Hamor, tama Sekem na su-ubek kanen i winiya rinek silba boroh.
GEN 33:20 Ano iy tukumwi bek ta salom ma aloh “El Elohe Isra-el,” moson, “Kindrei tahi Isra-el.”
GEN 34:1 Liya badeh atehei nah ari badih nyaran Dinah nadu Jekop. Eme iy ili badeh manyah hawe iri badih badu munyak doh.
GEN 34:2 Eme badeh nadu Hamor nyaran Sekem badeh badu Hiba, iy atondrok loboho doh, eme badeh iy anyolom Dinah badeh iy mwesekei karei i tan.
GEN 34:3 Iy ibis nadu Jekop Dinah labai, eme badeh iy atamar ma indrek iy kaseken iy.
GEN 34:4 Eme Sekem tiye ta taman, “Tama ou andrei badih bihin kodo-oh keme uduk.”
GEN 34:5 Nadu Jekop oro mwan badeh ado ndra lobwidiu atondrok iri katin haka, eme Jekop anuhun nadun badih badeh lau ndratawi iy. Eme iy bamwekes ari lakou bwe winiya le nadun oro ame.
GEN 34:6 Eme tama Sekem badeh ili hawe Jekop asehek sahou hawen.
GEN 34:7 Eme nadu Jekop oro badeh barado lobwidiu barame ai. Eme oro anuhun nyala karei le badeh, boho oro asak ma ndrine oro isi labai. Tasah Sekem badeh mwesekei kandriyen ndra-in ma bobose iri Isra-el handru ta iy tawi Dinah nadu Jekop badih, lakou ndrabun handru ta amwekes.
GEN 34:8 Arile Hamor tiye i toro, “Naduk, Sekem badeh ndrinen eden ta nadu ado badih labai. Ado katehei iy keme ma iy ki udu naduk.
GEN 34:9 To kasehek sahou ki randra ta to badeh kasoh to kili keme kudu ndrokowa to.
GEN 34:10 Eme ya ado kado hawe aso kado munyak dah kado; ado badeh kamanyah loboho heh seken tado udu aliy ma ado badeh kamwekes sasah ki tado ma ado katiye lakou tado ta sisih kili keme.”
GEN 34:11 Ano Sekem tiye i ta tama Dinah hawe nadu tinen oro, “Ado aseken sasah le, eme sasah ado aseken jo kedeu kewek tado.
GEN 34:12 Ado katiye sasah ado aseken ma ado kadeu masah ta nadu ado ki loken jo winiyan atehei. Buku none ado katehei badih kede-eh keme uduk.”
GEN 34:13 Tasah nadu oro Dinah badeh badan ndrandra-i, eme badeh nadu Jekop oro abukoh no-o Sekem uru taman le.
GEN 34:14 Eme oro tiye i turu, “Aso winiyan basumon bwe ai, aso winiyan bamwekes kandriyen dah bwe; Aso winiyan batehei nadu tine aso badih winiyan bala tare ku-i lakou tan ba-au bwe.
GEN 34:15 Aso badeh aseken le i buku none iri nah mwan tam kasan ku-i iri ki-iu ki buku taso.
GEN 34:16 Ano badeh aso baradeu nadu aso badih barawek ma tado barame taso. Ma aso kameh ado manyah hawe ado ma to asahan ari buruwen.
GEN 34:17 I buku none ou baseken budon taso bwe, i dah kameh aso au ma hawe nadu tine aso badih.”
GEN 34:18 Tanan toro badeh mwasin ta ndranye Hamor uru nadun Sekem. Sekem badeh iy kadok, eme iy babe-en ta amwekes budon nane bwe ai, tasah iy badeh ndraseken nadu Jekop badih labai ai.
GEN 34:20 Eme badeh Hamor hawe nadun Sekem badeh uru adek ala loboho mada san ta i bolo kon tinan turu ma tiye i tiri lau badu kon doh.
GEN 34:21 Eme uru tiye, “Oro lau kede-eh kawas mwasin tato. Oro kamanyah kado munyak tato ma oro katiye sasah ki ta asih; munyak kada-ah winiya oro mari. To badeh winiyan asoh nadu oro badih ma oro ale, winiyan asoh tato.
GEN 34:22 I buku none to kasan ku-i lakou ta mwan ki-iu i le buku toro eh, i dah kameh oro kameh ado ma to kameh asahan ari buruwen. I buku none bwe eh, oro kameh au.
GEN 34:23 I dah kameh iri katin haka toro ma hawe lakou mari toro kameh i tato. Eme to katiye mwasin, oro sa-au oro kado hawe to kado.”
GEN 34:24 Eme iri lau mari badu kon doh badeh aseken budon ta Hamor uru nadun Sekem, eme iri sani ku-i lakou tiri mwan iu.
GEN 34:25 Ano badeh len taloh ano, oro lau badeh ndrana toro mene ta baka sasan bano bwe le. Nadu Jekop ma hawe nadu tine Dinah, Simiyon uru Lebi badeh banoh bwe, uru ma samen ta bahun turu ala kon tinan badeh mwetehei iri lau mwan mari,
GEN 34:26 ma hawe Hamor uru nadun Sekem ale. Ano badeh uru aluwi Dinah udu asiu ta Sekem eme andri ma uru au.
GEN 34:27 Ano udu hamon turu nadu Jekop oro mari ala kon tinan mene tawi Dinah udu aliy, oro ala badeh adek bwele-e lau amak ma bene-ei lakou mari, tasah ta kandriyen ndra-in ta karei i bada Dinah.
GEN 34:28 Eme oro ala andrei iri katin haka sipsip, ma donki ma hawe lakou mari udu kon tinan doh.
GEN 34:29 Eme oro kuhi lakou mwasin toro mari ma tawi badih ma nah hawe tuwi lakou mari badu asiu.
GEN 34:30 Ano badeh Jekop tiye i ta Simiyon uru Lebi, “Ah badeh ndramwesekei nono-ou ndrame tek; eme iri lau badu Kenan hawe badu Perisa ma lau mari badu munyak dah kameh mada iri andra-i eme tek. Jo badeh lau sola bwe; i buku none iri mari kase kame kamwekes bahun keme la-uk kameh, to mari kameh amak.”
GEN 34:31 Arile oro anya, “Aso bwale aso iri amwekes nadu tine aso i buku none badih ta mada san.”
GEN 35:1 Ano badeh Kindrei tiye ta Jekop, “Ou au ala atah asiu ma atukum bek ki loke ta salom ki ta Kindrei kudu Betel. Iy mene asahan hawem len ou mene atobwak ta nadu tinem Iso ma ou manyah ado aliy.”
GEN 35:2 Ano Jekop eme badeh tiye nadun hawe udun ma hawe iri lau are hawen dah anya, “Ado kakahei iri kindrei badu leheleh tado ki-iu; Ya ado katubuni lomondra tado ma ado kasin iri kolau ha-un:
GEN 35:3 Ano ado kame to ka-au kala Betel ma jo katukum bek ta salom ki ta Kindrei. Ta iy mene aseben jo len jo mene udu ndra-in ma jo edek i heh badeh madan udu le tek.”
GEN 35:4 Eme badeh iri mari andrei kindrei tiri mene badu leheleh i mine Jekop ma hawe buwadin ta ndranye iri ili, ma Jekop kuhiy ma ihiy udu baha kei aloh o-uk mirihik ta kon Sekem.
GEN 35:5 Ano len Jekop oro nadun suri oro au badeh nohonoh i la-u iri lau mari badu kon mirihik ta kon tinan nane, eme iri badai oro bwe.
GEN 35:6 Eme Jekop ma hawe iri lau tan mari badeh ame asos Lus, na dah aloh badeh Betel udu munyak Kenan.
GEN 35:7 Eme iy tutuni bek ta salom eme tondrohani kon doh in hamon ta nyara Kindrei badu El Betel, tasah Kindrei mene asahan madan len iy mene atobwak ta nadu tinen Iso.
GEN 35:8 Ma badih ta tondrok ta Rebeka nyaran Debora badeh imek, eme ahi iy badeh udu loboho kum ta Betel baha kei o-uk. Ma tondrohani loboho doh badeh, Alon Bakut, “Kei o-uk ndrahu ndrelen.”
GEN 35:9 Ano len Jekop udu Padan Aram eme hamon badeh, Kindrei asahan hawen ja ma atehei nyosowan i la-un.
GEN 35:10 Eme badeh Kindrei tiye i tan, “Ou badeh nyaram Jekop, arile i dah kameh baloh ou Jekop bwe ai, na dah kameh aloh nyaram Isra-el.”
GEN 35:11 Eme badeh Kindrei tiye i tan, “Jo dah jo Kindrei, jo tek boto-on labai. Ou badeh amwekes nah ma sola. Iri nah badu kon munyak tinan kasahan ta lau tam, ma ou badeh tama iri kabin na len hamon kameh asahan.
GEN 35:12 Jo kameh edeu munyak mene jo edeu i ta Abraham uru Aisik kameh ewek tam, ma jo kameh edeu ale i ta lundriyem ame.”
GEN 35:13 Ano Kindrei ruwani iy ma iy iu ai.
GEN 35:14 Ano udu kon nane Kindrei asehek sahou hawen nane, Jekop tutuni bek toka udu loken ta budon tan samaniy. Ano iy solowei gwa i la-un; ma solowei ndrelekei ta olip i la-un ta salom.
GEN 35:15 Eme iy tondrohani nyara kon doh Betel.
GEN 35:16 Ano Jekop oro ruwani Betel ma oro au. Eme oro bala mirihik ta Eprat bwe le badeh, Rejel atona iy anya kedeu nadun ma iy akohok andra-i handru ta isi.
GEN 35:17 Eme isi ta adeu nah amaha badeh iri badih ta lahou ta nah tiye i tan, “I dah nah mwan ja, Rejel; ou sanoh.”
GEN 35:18 Arile bwe ai, iy anya kimek, eme kohan anya kano le badeh iy tondrohani nyaran Benoni, moson “Naduk ta tikisiy.” Arile udu ja, taman tondrohani nyaran ja Benjamin, moson “Naduk ta anyo-ou jo.”
GEN 35:19 Eme badeh ahi iy udu ka-u san ta kon Eprat na len dah aloh Betelehem.
GEN 35:20 Eme Jekop tutuni bek i loken ta abudon udun udu aliy, eme na dah udu aliy le.
GEN 35:21 Ano Jekop edek ili le badeh ma manyah udu loboho bilisiu ta bokok Eder.
GEN 35:22 Isra-el oro manyah ado doh le, eme badeh nadun Ruben ili amadin hawe Bilhah, badih ta taman Isra-el ta nyeu. Eme Isra-el eme anuhun nyala aliy. Jekop badeh nadun ma ronoh la-uh.
GEN 35:23 Nadu Liya oro mwan kadok badeh Ruben, ano Simiyon, ano Lebi, ano Juda, ano Isakar hawe Sebulun.
GEN 35:24 Ya Nadu Rejel oro badeh Josep uru le Benjamin.
GEN 35:25 Ya nadu bonyo-ou ta Rejel Bilhah badeh Dan hawe Naptali.
GEN 35:26 Ano nadu bonyo-ou ta Liya Silpah badeh Gat hawe Aser. Oro mari doh badeh nadu Isra-el adeu oro are Padan Aram.
GEN 35:27 Ano Jekop ili hawe Taman Aisik ili Mamre mirihik ta Kiriyat Arba, loboho mene Abraham uru Aisik manyah are aliy.
GEN 35:28 Aisik badeh udu winiya jaha rinek ndru lunoh (180) ma iy imek mwasin le ari isi bwe ili hawe tubun oro. Eme badeh nadun uru Iso hawe Jekop ahi iy.
GEN 36:1 I dah nyala lundriye Iso oro nyaran ari ja aloh Idom.
GEN 36:2 Iso badeh Sudi badih ari badu Kenan nyaran Adah: Adah badih i ndrine Elon badu Hita, ma udu Iso Oholibamah badeh i ndrine Anah ma Anah bu-un badeh Sibiyon badu Hiba;
GEN 36:3 Ya Iso ale badeh sudi Basemat ya Basemat badeh nadu tine Nebayot. Uru mala-uh badeh nadu Isma-el.
GEN 36:4 Eme Adah badeh atehei Elipas; ano Basemat atehei Reu-el;
GEN 36:5 ano Oholibamah atehei Je-us, Jalam hawe Korah. Oro mari doh badeh adek ndrine Iso le ari, ma adeu oro ado Kenan.
GEN 36:6 Ano badeh Iso ma nadun oro mari ma hawe udun ma katin haka tan mari hawe lakou tan mari udu Kenan badeh oro suri oro ame len ta nadu tinen Jekop ala munyak ari ja.
GEN 36:7 Iy iu badeh, tasah munyak nane uru nadu tinen Jekop ado aliy doh nane winiya uru bwe; uru badeh turu katin haka solo-an labai.
GEN 36:8 Eme Iso ala aloh Idom badeh manyah udu bolo mandrei ndrokowa Se-ir.
GEN 36:9 Eme i dah badeh Sare lundriye Iso oro, tubu iri lau Idom badu munyak Se-ir:
GEN 36:10 Udu Iso Adah badeh atehei nah mwan ari badeh nyaran Elipas. Ano udu Elipas eme atehei nadun mwan malimeh: Oro badeh Teman, Omar, Sepo, Gatam ma hawe Kenas. Ya ta udu Elipas ari ja badeh Timna atehei nadun ari nyaran Amalek. Ya udu Iso ari ja nyaran Basemat badeh atehei nadun ari le mwan nyaran Reu-el. Ano Reu-el eme badeh tuwi nadun oro ma hahuw: Oro badeh Nahat, Serah, Samah hawe Misah.
GEN 36:14 Ano udu Iso ari ja nyaran Oholibamah atehei nadun mwan taloh: Je-us, Jalam hawe Korah. Oholibamah iu ndrine Anah, ya Anah iu ndrine Sibiyon.
GEN 36:15 I doh badeh oro nadu Iso le, oro lau ta atondrok: Nadu Iso kadok Elipas badeh tubu iri lau ta atondrok: Oro badeh Teman, Omar, Sepo, Kenas,
GEN 36:16 Korah, Gatam hawe Amalek. Oro doh nadu tubu udu Iso, Adah. Iri doh badeh iri lau ta tondrok au ndrine Elipas ado Idom.
GEN 36:17 Nadu Iso Reu-el, badeh tama iri lau ta atondrok: Oro badeh Nahat, Serah, Samah hawe Misah. Oro doh badeh lau ta atondrok, oro badeh lundriye Reu-el badu Idom. Ya oro badeh tubu Basemat, ya Basemat badeh udu Iso.
GEN 36:18 Ya i dah badeh lundriye udu Iso nyaran Oholibamah: Oro lau ta tondrok ya nyara Oro badeh Je-us, Jalam hawe Korah.
GEN 36:19 Ya udu Iso badeh Oholibamah nadu Anah. Oro lau doh badeh nadu Iso ale, aloh Idom. Iri doh badeh lau ta atondrok.
GEN 36:20 Ya i dah badeh lundriye Se-ir oro; Se-ir badeh badu kon Idom. Oro badeh Lotan, Sobal, Sibiyon, Anah, Dison, Eser hawe Disan. Nadu Se-ir oro doh badeh ndramak ta budon badu Hora.
GEN 36:22 Ya i doh nadu Lotan uru: Uru badeh Hori hawe Heman. Ya nadu tine Lotan badih ari udu aliy nyaran Timna.
GEN 36:23 Ya lundriye nadu Sobal oro badeh: Alban, Manahat, Ebal, Sepo hawe Onam.
GEN 36:24 Ya lundriye Sibiyon oro badeh: Ayah hawe Anah. Anah doh badeh ari labai, iy doh badeh ala silahei gwa lakon nyarahan udu kon lomale an kon ndra an le, na len amwenen ta iy ili sariye donki ta taman Sibiyon aimon bwidiu.
GEN 36:25 Ya nadu Anah oro badeh: Nadu uru badeh mwan Dison hawe badih Oholibamah.
GEN 36:26 Eme nadu Dison oro badeh: Hemdan, Itron, Esban hawe Keran.
GEN 36:27 Ya nadu Eser badeh: Bilhan, Saban hawe Akan.
GEN 36:28 Ya nadu Disan badeh: Us hawe Aran.
GEN 36:29 Ya i dah badeh oro lau ta budon badu Hora: oro badeh Lotan, Sobal, Sibiyon, Anah, Dison, Eser hawe Disan. Oro ari ari an munyak toro loboho munyak Se-ir.
GEN 36:31 Oro lau dah asahan kabin tiri Idom udu bwena len iri Isra-el ari basahan kabin bwe le.
GEN 36:32 Oro badeh Bela nadu Be-or badeh asahan kabin ta Idom. Kon tinan tan badeh nyaran Dinhabah.
GEN 36:33 Ano na len Bela imek badeh, Jobap nadu Serah badu Bosrah badeh asahan saluwen, i kabin.
GEN 36:34 Ano ja Jobap imek badeh Husam badu kon munyak tiri Teman badeh asahan saluwen i kabin.
GEN 36:35 Ano len Husam imek badeh nadu Bedat nyaran Hadat badeh akohok kon tan asahan kabin. Iy bwena mene amwekes bahun i tiri Midiyen ano ma iy asahan kabin ta kon munyak Idom. Kon tinan tan badeh nyaran Abit.
GEN 36:36 Ano na len Hadat imek badeh Samlah badu kon Masrekah akohok kon tan asahan kabin.
GEN 36:37 Ano na len Samlah imek badeh Sa-ul badu Rehobot badu gwa lakon akohok kon tan asahan kabin.
GEN 36:38 Ano na len Sa-ul imek badeh nadu Akbor nyaran Ba-al Hanan akohok kon asahan kabin.
GEN 36:39 Ano na len nadu Akbor nyaran Ba-al Hanan imek badeh Hadat akohok kon tan asahan kabin ma udun badeh nyaran Mehetabel badih i ndrine Matret, ma Matret i ndrine Mesahap. Ya kon tinan Hadat badeh nyaran Pau. Eme Iso badeh tama iri Idom mari.
GEN 36:40 I doh badeh nyara iri kabin badu ndrine Iso. Oro ari ari badeh ado boho kamen toro ma are munyak toro. Oro badeh Timna, Albah, Jetet, Oholibamah, Elah, Pinon, Kenas, Teman, Mipsar, Maktiyel hawe Iram. Oro doh badeh kabin tiri badu Idom, ari ari atondrok boho kamen tan udu munyak oro manyah ado aliy.
GEN 37:1 Jekop badeh manyah udu munyak mene taman udu aliy aloh munyak Kenan.
GEN 37:2 Ya eme i dah sare nadu Jekop oro: Josep badeh ma loweu le, jaha tan badeh ma ronoh ndro taloh le. Iy badeh udu atondrok katin haka hawe nadu tinen oro ta lundriye Bilhah hawe Silpah, udu Jekop ta nyeu. Oro badeh atondrok iri sipsip hawe me. Ano badeh iy eme, asehek nyala taman ta kandriyen ndra-in ta nadu tinen oro.
GEN 37:3 Jekop badeh aseken Josep tinan labai ja ta nadun oro mari. Tasah nadun doh badeh iy atehei iy badeh udu suniya iy ndra alon. Eme Jekop eme, mwesekei awin lawe-en moroyan labai i ta Josep.
GEN 37:4 Eme nadu tinen oro anyolom tama oro badeh aseken Josep tinan labai ja toro. Eme oro ame badeh amwekes budon ndra-in i tan ma oro badeh bawadei iy bwe hawe basehek sahou mwasin bala tan bwe.
GEN 37:5 Ano badeh Josep eme ameh, eme iy asehek nyala nadu tinen oro. Eme badeh mwesekei budon toro andra-i labai ja tan.
GEN 37:6 Eme Josep asehek i toro anya, “Ado kanuhun ameh tek doh:
GEN 37:7 To mari badeh ado lobwidiu aseu bwidiu wit ise, eme oro bwidiu wit tek badeh toka udu loken. Eme badeh tado mari badeh ame badeh awudi tek, eme ma oro aluh andri i ta tek.”
GEN 37:8 Ano nadu tinen oro tiye i tan anya, “Ou kede-eh anya, i dah kameh ou a kabin ma atondrok aso ai?” Eme badeh oro badeh no-o oro atok tan labai ai, tasah ta iy asehek nyala ameh tan i toro.
GEN 37:9 Ano ja badeh iy ameh ja, eme iy asehek ta nadu tinen oro, “Ado kanuhun, jo ameh ja, i doh ja badeh an hawe bun ma hawe ndrau ma ronoh ari badeh aluh i andri eme tek.”
GEN 37:10 Ano badeh iy asehek ameh doh i ta taman, eme badeh taman arah i tan, “Ameh tam badeh i buku sah badeh? Ou abudon anya i dah kameh tinem ma nadu tinem oro hawe jo kameh kandru aso kameh i andri tam?”
GEN 37:11 Eme nadu tinen oro badeh mada oro badeh alikis tan, arile taman tawiy udu budon tan.
GEN 37:12 Nadu tine Josep oro ndra-au ndrasariye iri katin haka ndrala ndraimon bwidiu mirihik ta Sekem.
GEN 37:13 Eme badeh Jekop tiye i ta Josep, “Ou tanam nadu tinem oro badeh atiye iri katin haka badeh aimon bwidiu ado mirihik ta Sekem. Ou ame, jo anya kaseken ou a hawe oro.” Eme iy anya, “Mwasin jo aseken.”
GEN 37:14 Eme taman tiye i tan, “Ou ala anyolom nadu tinem oro ma hawe iri katin haka, oro ado mwasin de bwe em, oro ado ndra-in, ano ou ame hamon asehek tek.” Ano badeh taman suni iy edek udu nyamak Hibron ili. Eme Josep asahan Sekem badeh,
GEN 37:15 ndramak ari ndruni iy edek leleya eme, eme iy ndremenya Josep, “Ou takaleh sasah?”
GEN 37:16 Eme badeh iy anya eh, “Jo asilah nadu tine oro. Oro badeh atondrok katin haka. Ou tanam oro ado heh de bwe?”
GEN 37:17 Eme ndramak dah anya, “Oro badeh ndra-au. Jo anuhun oro badeh tiye anya oro kameh ala Dotan.” Eme Josep in hamon toro ili badeh asahan hawe oro mirihik ta Dotan.
GEN 37:18 Oro anyolom iy edek udu ndra len eme kahis le badeh, oro atilik nyala oro ta anya kadai iy.
GEN 37:19 Eme oro tiye i toro ari ari: “Iy ndramak ta ameh asa eme ah! Abo, to kadai iy ma kakahei iy ki bolo oro ari lek, ano to kato-en anya, iy badeh katin haka ndriliu ndrani iy. Ano badeh to kanyolom sasah kameh kasahan ta ameh tan.”
GEN 37:21 Arile Ruben eme anuhun badeh iy anya kaseben ta akohok iy udu mine oro. Eme ma iy anya, “Ndri-i to sadai iy.
GEN 37:22 Kakahei iy le, ki bolo lek kudu lomale an dah, ya to sadai iy ndrayen samou.” Ruben asehek sahou doh badeh, ta iy anya kaseben iy ma iy katiyani iy ki hamon hawe taman.
GEN 37:23 Ano badeh Josep eme isos hawe nadu tinen oro le badeh, oro tawi iy, sadi awin moroyan tan. Awin iy edeu doh nane sowan badeh tinan labai.
GEN 37:24 Ma oro bwese-e iy ma akahei iy i bolo lek gwa bolon bwe dah.
GEN 37:25 Ano oro manyah aimon nyamon, ano oro suri mada oro eme loken badeh oro anyolom iri lau ta Isma-el badeh adek are loboho Gileyat ame. Udu bwele-e kamel badeh lakou solo-an labai, lakou i buku none spais kei ta ndrelekei, bam hawe mer ndraye kei ta bekebek ndrana. Oro badeh adek ala Ijip ta atiye lakou ta sisih.
GEN 37:26 Eme badeh Juda tiye i ta nadu tinen oro, “Saba lakou kameh kasahan ki ta to ki buku none to kadai nadu tine to, ano to kabisiniy?
GEN 37:27 Ado kame iy badeh nadu tine to, to katehei iy ki ta sisih. To badeh sadai iy, tasah iy badeh nadu tine to ma ndraye to le.” Eme badeh nadu tinen oro aseken.
GEN 37:28 Eme iri lau rayah badu Midiyen ame badeh, oro aruwi Josep udu bolo lek eme loken. Ma oro atehei iy i ta sisih i toro Midiyen na su-ubek lunoh silba boroh i tiri lau badu Isma-el ma iri kuhi iy iu ili Ijip.
GEN 37:29 Ano badeh Ruben eme mada lek anya katou nadu tinen, arile nadu tinen aliy bwe. Eme badeh iy sadiy awin tan ma iy tikisiy andra-i labai.
GEN 37:30 Eme iy ili hawe nadu tinen oro ma tiye, “Jo kameh barabwidiy barala buku sah handru? Iy nah badeh aliy bwe!”
GEN 37:31 Ano badeh oro adai me ari imek ano oro andrei awin tan badeh tahiy i ta ndra.
GEN 37:32 Eme badeh oro andrei awin i hawe tama oro ma oro tiye, “Ou none anyolom awin doh se, koro-an ta nadum.” Aso badeh ndruniy.
GEN 37:33 Eme iy anya, “I dah ta naduk le ai. Josep badeh ndramak handru, rayah katin haka ndriliu badeh ndrasadi iy ma ndrani iy.”
GEN 37:34 Eme Jekop tikisiy ma iy sadiy awin tan eme iy asiniy awin ta tikisiy amwekes na lami me ma iy eden ndranye nadun ben solo-an.
GEN 37:35 Nadun oro mwan ma badih ame atamar iy, arile winiyan bwe, iy bwalen. Eme iy tiye, “Winiyan bwe. Jo kameh eden winiya jo imek ta naduk.” Eme badeh iy eden ili le, ta ndranye nadun.
GEN 37:36 Ano udu badeh, udu kon Ijip badeh iri Midiyen atehei Josep ja i ta sisih i ta Podipa. Podipa badeh ndramak ta lahou badu bolo asiu ta kabin, ma iy ndramak ta mwena ta ndrokei.
GEN 38:1 Na len doh badeh Juda ruwani nadu tinen oro ma iy iu i andri ili hawe ndramak ari badu Adulam nyaran Hirah.
GEN 38:2 Eme udu doh badeh Juda awadei hawe badih ari badu Kenan nadu Su-a. Eme iy sudi iy ano iy amadin hawen.
GEN 38:3 Ma ndrinen i tinan ano ma iy atehei nah mwan ari tondrohani nyaran Er.
GEN 38:4 Ano ja badeh iy atehei mwan ari ja, tondrohani nyaran Onan.
GEN 38:5 Ano iy atehei ari ja ale ma tondrohani nyaran Silah. Iy atehei iy badeh udu Aksip.
GEN 38:6 Ano Juda andrei badih ari nyaran Tamar i ta nadun Er.
GEN 38:7 Arile Er nadu Juda badeh kandriyen tan badeh bamwenen ta mada Laban bwe; eme Laban idiy iy imek.
GEN 38:8 Ano badeh Juda tiye ta Onan, “Ou amadin hawe nyawe nadu tinem ma ou mwesekei lahou ki handru, ta ou a udun ki saluwe nadu tinem. Eme ma ou amwekes ari nah ki ta nadu tinem.”
GEN 38:9 Arile Onan badeh tanan, i dah kameh nah kameh bala lundriyen bwe; eme i buku none len mari iy amadin udu nadu tinen kameh gwa tan iu leleya bada munyak. Ya i dah kameh basahan nah nadu nadu tinen bwe.
GEN 38:10 Kandriyen iy amwekes doh bamwenen ta mada Laban bwe; eme Laban idiy iy imek ale.
GEN 38:11 Ano Juda tiye i ta udu nadun badih Tamar, “Ou badeh ado badih nyau ado asiu tam ado gwek, winiya le Silah ki tinan.” Iy badeh abwerei koro-an iy kameh kimek ki le buku nadu tinen oro ale. Eme Tamar badeh iu i hamon i asiu ta taman.
GEN 38:12 Ano udu luluwen badeh, udu Juda iu ndrine Su-a imek. Ano tikisiy tan ta udun ano badeh, uru kawas tan Hirah badu Adulam badeh ala Timnah ala hawe iri lau asan lami sipsip tan.
GEN 38:13 Eme na len lau tiye ta Tamar anya, nyanan mwan badeh ndra-au ndrala Timnah ndrasan lami sipsip,
GEN 38:14 eme iy eme badeh asini awin ta udun nyau mene iy edeu iu, ano andrei awi jam tubuluhi bulin na aliy. Ano nyahani iy manyah udu mada san ta kon Ina-im kon tinan ari udu san ili Timnah. Ma iy badeh tanan, nadu Juda mwan Silah badeh ndra winiya tasou, arile iy bala tasou bala tan bwe le.
GEN 38:15 Eme Juda anyolom iy badeh iy anya i badih ta mada san, tasah iy tubuluhi batun.
GEN 38:16 Iy banyolom iy bamwenen bwe, eme iy edek ili hawen ili ka-u san ma tiye, “Ou ame jo anya kamadin ou.” Arile iy badeh nyanan. Eme iy anya, “I buku none jo kamadin hawem sasah handru ou kameh atehei keme tek.”
GEN 38:17 Eme iy anya, “Jo kameh edeu tam ari me kasen.” Eme iy tiye, “Ou atehei ari lakou ki nyara tandrakan tam, winiya ou le baratiyani barame.”
GEN 38:18 Eme iy anya, “Saba lakou ki nyara tandrakan jo atehei tam?” Eme iy anya, “Na lakou ta balem ma ring hawe kandro tarou ta minem.” Eme iy atehei i minen ma iy amadin hawen, ano iy atehei nah i ndrinen ma ndrinen i tinan.
GEN 38:19 Ano hamon Tamar iu badeh iy asiniy awin ja iu. Ano iy asiniy awin ta nyau tan iy la-un ja.
GEN 38:20 Ano udu badeh iy suni kawas tan Hirah badu Adulam atiye me ili, ma tiye tan kakuhi lakou ta nyara tandrakan tan udu hawe i badih doh keme hamon. Arile iy ili badeh, iy batakalahei iy bwe.
GEN 38:21 Eme iy ndremenya iri lau nane manyah ado doh, “I badih ta mada san ala manyah udu ka-u san Ina-im ndraheh?” Eme iri anya, “Ari badih ta mada san dah bwe oh.”
GEN 38:22 Eme iy iu i hamon ja ili hawe Juda ma iy tiye, “Jo badeh batakalahei iy bwe. Ma iri lau badu kon doh anya, iri ari badih ta mada san i buku doh bare don bwe.”
GEN 38:23 Eme Juda anya, “Lakou doh ki tan kudu gwek. Jo bwalek iri lau sondrokonya ma sehe-en to. Jo badeh none ta anya kisih iy, arile ou takaleh iy labwe.”
GEN 38:24 Udu, bun taloh ano badeh, lau asehek ta Juda anya, “Nadu nyanam Tamar badeh ndra buku badih ta mada san ma nyolom tan ndra randra ma iy ndrinen ndra tinan.” Eme Juda anya, “Katiyani iy keme ma kasulumwi iy kimek.”
GEN 38:25 Ano iri andrei iy eme len, ano iy suni sahou i ta nyanan mwan Juda eme: “Jo badeh nah udu ndrinek dah nadu ndramak lakou tan dah. Ou tanam lakou dah ma tarou udu badan de bwe?”
GEN 38:26 Juda anyolom ma iy tanan, ano iy tiye, “Iy badeh tiye sahou handru. Jo badeh ndra bwe ai, ta tandrakan tek, jo mene ndratehei iy ndratasou ndra ta Silah ai.” Eme iy bamadin hawen ja bwe ai.
GEN 38:27 Ben ano ta iy anya kedeu nadun keme len badeh, iri silahei iy badeh nah mwimwir udu ndrinen.
GEN 38:28 Nah anya keme len badeh iy ari badeh minen eme len; eme badih ta lahou ta nah andrei kam saraman, eme iy sawei boha nah dah. Eme iy tiye, “I dah, eme len bwena.”
GEN 38:29 Arile iy ruwani minen ja badeh, nadu tinen mwan eme len, ano iy tiye, “San ta iy eme len asa i le buku doh!” Eme badeh nyaran i Peres, moson “Iy eme len bwena.”
GEN 38:30 Ano badeh kam saraman udu boha nadu tinen in hamon eme len ja, eme tondrohani nyaran Serah, moson “Lomadan saraman.”
GEN 39:1 Ya Josep badeh ndrakuhi iy badeh ndrala Ijip. Podipa ndramak ta lau ta bolo asiu hawe ta bwena ta ndrokei sihine iy udu mine iri lau badu Isma-el. Iri mene kuhi iy ili doh.
GEN 39:2 Eme Laban badeh udu hawe Josep, ma lakou mari iy amwekes badeh ndra mwasin le. Eme Josep badeh manyah tan badeh badu asiu ta Podipa,
GEN 39:3 eme Podipa anyolom Laban udu hawen ma mwesekei iy amwekes lakou ndra mwasin le.
GEN 39:4 Eme iy anyolom Josep badeh udu mwasin ta madan, eme iy asahan ndramak ta lahou tan; ano Podipa anyolom iy badeh winiyan, eme iy atehei iy atondrok asiu tan ma lakou tan mari.
GEN 39:5 Na len iy atehei Josep atondrok asiu tan ma lakou tan mari, Laban badeh atehei nyosowan i la-u asiu ta Podipa. Tasah na Josep le badeh, Laban atehei nyosowan i la-u lakou mari ta Podipa badu bolo asiu ma manan ale.
GEN 39:6 Eme lakou mari iy atehei udu baha tondrok ta Josep. Iy badeh babudon ta lakou mari bwe, nyamon le iy aimon. Josep badeh ndramak ari buruwen ma iy badeh konen labai.
GEN 39:7 Ano udu sese badeh udu Podipa budon tan andra-i ta Josep eme iy ndremenyani iy ta iy kili hawen ki bada sau.
GEN 39:8 Arile Josep bwalen, ma iy tiye, “Jo badeh atondrok lakou mari. Podipa winiyan babwerei bwe, tasah iy atehei budon i tek ta jo badeh winiyan tondrokei lakou mari badu asiu tan ma lakou tan mari.
GEN 39:9 Ari lau ja bado bwele-ek ja udu asiu dah bwe, jo le. Podipa badeh batawiy ari lakou bare minen ja bwe, arile udun: Tasah ou badeh udun labai. I buku sah handru kameh jo kamwekes kandriyen ndra-in ma karei ki ta Kindrei?”
GEN 39:10 Eme iy badeh ndremenya seken ta Josep len ari i buku ari, ta iy kili bada sau hawen, arile Josep bwalen.
GEN 39:11 Ano na len ari badeh Josep anya kili bolo asiu kamwekes lahou tan. Eme ari lau ta lahou badeh bare aliy bwe.
GEN 39:12 Eme udu Podipa tawi awin tan indrek iy, “Ou ame sau hawek.” Arile Josep atobwak eme manan, awin tan ta bwele-en le badeh udu ndra minen udu gwek.
GEN 39:13 Eme udu Podipa anyolom awin tan badeh udu minen udu badeh,
GEN 39:14 eme iy luhi iri lau ta lahou tan ame. Eme iy tiye i toro, “Ado kanyolom. Iy ndramak badu Hiburu ala andrei iy mene eme hawe taha dah badeh bobose taha handru. Iy eme bolon dah badeh anya kamadin jo, arile jo eme arah.
GEN 39:15 Iy anuhun jo arah le badeh, iy ruwani awin tan udu ka-uk udu ai, iy le atobwak eme len ta asiu ma iy iu.”
GEN 39:16 Eme badeh awin tan udu ka-un udu gwek winiya le udun eme.
GEN 39:17 Ano iy asehek i ta udun i buku doh, “Iy ndramak ta lohowan badu Hiburu ou kuhi iy eme kede-eh anya kateu jo.
GEN 39:18 Eme jo arah i ta lau kaseben jo le badeh, iy ruwani awin tan udu ka-uk udu ma iy atobwak i manan ta asiu.”
GEN 39:19 Eme udu Podipa tiye i tan, “Iy ndramak ta lahou tam badeh amwekes kandriyen doh eme tek.” Eme iy anuhun sahou udun asehek i tan badeh, eme ndrinen i buku jih.
GEN 39:20 Eme Podipa tawi Josep ma atehei iy i bolo kou, ndrahune iri lau ta bolo kou ta kabin areu aliy.
GEN 39:21 Arile Josep udu bolo kou badeh, Laban udu hawen, Laban tikisiy iy ma mwesekei ndramak ta atondrok bolo kou badeh aseken iy.
GEN 39:22 Eme ndramak ta atondrok iri badeh atehei Josep badeh atondrok iri lau mari nane are bolo kou nane dah.
GEN 39:23 Eme iy ndramak ta atondrok ari lakou bwe, lakou badeh udu baha nyolom ta Josep, tasah Laban badeh udu hawe Josep, eme badeh mwesekei Josep winiyan amwekes lahou mari.
GEN 40:1 Ano udu, len rayah ja hamon badeh uru ndramak ta lohowan, ndramak ta lohowan ta kabin badu Ijip. Iy ari ndramak ta atiye wa-in, ya iy ari ndramak ta mwena ta amwekes jabi ramen. Uru badeh mwesekei kabin i bolosen.
GEN 40:3 Eme kabin atehei uru a bolo kou bolo asiu ta ndramak ta ndrokei. Ado bolon hawe Josep.
GEN 40:4 Eme ndramak ta mwena ta ndrokei atehei ben solo-an i turu, eme iy atehei Josep badeh i ta lahou turu.
GEN 40:5 Ano uru ado bolo kou luluwen sese badeh, iy ndramak ta atiye wa-in hawe ndramak ta amwekes jabi ramen ta kabin badu Ijip badeh ameh. Ameh turu badeh i buku doh, ta iy ari moson i randrah labai, ta iy ari moson i randrah labai.
GEN 40:6 Ano Josep mandraben eme hawe uru badeh iy anyolom uru badeh tikisiy.
GEN 40:7 Eme Josep ndremenya uru, “Ah tikisiy ta sasah na len dah?”
GEN 40:8 Eme uru anya, “Aru mala-uh badeh ameh, arile ari ndramak ta tobolowe moso ameh taru bwe.” Ano Josep badeh tiye i turu, “Kindrei badeh ta edeu moso ameh, eme ah kasehek ameh ta ah.”
GEN 40:9 Eme iy ndramak ta atiye wa-in asehek ameh tan i ta Josep i buku doh, “Jo badeh ameh malou wa-in badeh ateh udu bwena tek,
GEN 40:10 ma wa-in doh badeh andran ma taloh. Eme la-un ateh le badeh buwan asahan ma buwan uni.
GEN 40:11 Eme jo badeh tawi bwiniu ta kabin udu minek ano jo andrei buwa wa-in eme ma jo apis gwa tan i bolon. Ano badeh jo atehei i mine kabin.”
GEN 40:12 Eme Josep tiye, “Moson badeh i buku doh: Andra wa-in ma taloh badeh moson len taloh.
GEN 40:13 Len taloh ano kameh kabin kameh tiye ou ano ta bolo kou, ma iy kameh atehei ou a hamon ta lahou tam ja. Ma i dah kameh ou kameh atiye wa-in bwiniu i minen i buku bwena le mene.
GEN 40:14 Arile ou samani jo, i buku none ou ado mwasin, ma ou tikisiy jo eme ou asehek nyala kabin, ma kameh iy sebenei jo eme len ta bolo kou.
GEN 40:15 Bwena ndra-au badeh iri bene-ei jo udu munyak ta Hiburu eme dah; eme udu badeh jo bamwekes ari lakou bandra-i bwe, arile iri atehei jo i bolo kou leleyah.”
GEN 40:16 Ano iy ndramak ta amwekes jabi ramen anuhun Josep badeh tiye moso ameh badeh mwasin, eme iy tiye ta Josep, “Jo ale ameh; Jo ameh badeh, udu bwele-e batuk badeh bwak jabi ramen ma taloh.
GEN 40:17 Udu bwak bwele-e batuk loken badeh saba jabi ramen ta kabin udu bolon, eme iri sirih ame badeh aimon.”
GEN 40:18 Eme Josep anya, “Moson ta aliy badeh i buku doh: Len taloh ano badeh kameh, kabin kameh andrei batum kameh iu.
GEN 40:19 Ma i dah kameh tatahiy badam udu ta kei ya iri sirih kameh ame aimon odam.”
GEN 40:20 Eme na len taloh badeh amwenen ta len ta kabin, tinen atehei iy eme len, eme iy mwesekei tine nyamon niri lau ta lahou tan badu bolo asiu tan. Eme iy kuhi ndramak ta atiye wa-in ma ndramak ta amwekes jabi ramen uru ado bolo kou ame len, eme uru ame badeh ales are mada iri lau ta lahou tan badu bolo asiu dah.
GEN 40:21 Ano iy ruwani iy ndramak ta atiye wa-in; eme ma iy iu i ta lahou tan bwena mene, eme ma iy atehei bwiniu wa-in dah i mine kabin.
GEN 40:22 Arile iy ndramak ta amwekes jabi ramen le badeh, iy tatahiy badan. Ma tatahiy i buku none Josep mene ndrasehek ndra-au.
GEN 40:23 Arile ndramak ta atiye wa-in badeh balen ndramaniy sahou mene Josep asehek tan.
GEN 41:1 Jaha la-uh ano badeh, kabin badu Ijip badeh ameh. Iy ameh badeh, iy ameh iy badeh ales udu gwa Na-el.
GEN 41:2 Eme badeh iy anyolom oro bulumakau ma ndro taloh tinan bada oro nyimirin badeh asahan gwa ame loke an kapa gwa aimon bwidiu.
GEN 41:3 Ano ja iy anyolom bulumakau ndro taloh ja asahan; oro doh badeh sali oro bwe, ndruwin ndruwin. Oro ame ales are hawe oro bulumakau bwena nane are kapa gwa.
GEN 41:4 Eme badeh oro bulumakau sali oro bwe nane dah aniy oro bulumakau sali oro udu aliy dah, ano badeh ma kabin amak.
GEN 41:5 Ano iy amadin ja badeh iy ameh ja. Eme iy anyolom bada kalom ari le, eme badeh udu bada kalom ari le doh badeh iy anyolom buwa kalom ma ndro taloh tinan badeh sukik udu badan badeh ndruni.
GEN 41:6 Ano ja badeh iy anyolom bada kalom ari le ja, eme badeh udu bada kalom ari le doh badeh iy anyolom buwa kalom ma ndro taloh badeh awa-is ma siyer rai oloh ili eme.
GEN 41:7 Eme oro kalom ma ndro taloh awa-is nane dah sakalamiy oro kalom buwa oro tinan dah. Eme kabin amak badeh iy anya, “Jo dah nane ameh.”
GEN 41:8 Eme iy tikisiy handru, eme na mandraben badeh iy suni sahou i tiri lau mari ta kau tan ma hawe iri lau ta budon tan badu Ijip ame. Eme iy asehek ameh tan i tiri, arile iri ari winiyan batiye moso ameh bala tan bwe.
GEN 41:9 Ano ndramak ta atiye wa-in tiye i ta kabin, “Jo anya kasehek tam, jo badeh ndramwekes lakou ndrandra-i.
GEN 41:10 Ou mene a bolosen i tek ma hawe i ta ndramak ta atondrok ta amwekes jabi ramen. Ano ou mene atehei aru a bolo kou udu bolo asiu ta ndramak ta bwena ta ndrokei.
GEN 41:11 Eme na ben ari badeh aru ma la-uh ameh, ya ameh taru badeh, ta iy ari badeh moson randra labai, ya ta iy ari moson randra labai.
GEN 41:12 Ya nah loweu ari badeh Hiburu badeh udu hawe aru. Iy badeh lohowan ta ndramak ta bwena ta ndrokei. Eme aru asehek ameh taru i tan badeh eme iy tubuniy moson eme taru.
GEN 41:13 Eme badeh asahan i le handru; jo badeh ou atehei jo i hamon ta lahou tek, arile ou andrei bale ndramak ta bwena ta amwekes jabi ramen.”
GEN 41:14 Ano kabin suni lau ala suwi badeh andrei Josep udu bolo kou eme. Ano Josep ili isik lami behesen, iy asiniy awin ano badeh iy ili ales ere mada kabin.
GEN 41:15 Eme kabin tiye i tan, “Jo badeh ameh, eme ari ndramak badeh batiye moson bame tek bwe. Eme ndramak ari tiye tek anya, ou badeh winiyan tobolowe moso ameh.”
GEN 41:16 Eme Josep tiye, “Jo le, jo winiyan bwe, arile Kindrei le winiyan tiye moson i tam.”
GEN 41:17 Ano badeh kabin asehek ameh tan, “Jo ameh badeh, jo badeh ales udu kapa gwa Na-el.
GEN 41:18 Eme jo anyolom oro bulumakau ma ndro taloh tinan ma bada oro nyimirin are gwa ame badeh aimon bwidiu ado kapa gwa.
GEN 41:19 Ano ja badeh jo anyolom oro bulumakau ma ndro taloh sali oro bwe, ndruwin ndruwin are gwa ame loken. Jo bwena batou ari bulumakau munya-un bala buku none doh udu munyak Ijip bwena bwe.
GEN 41:20 Eme oro aniy bulumakau tinan nyimirin dan.
GEN 41:21 Oro ndraniy, arile ndramak anyolom badeh i buku none oro baniy bwe, oro ma ndrusarak kahis le. Eme badeh ma jo amak.
GEN 41:22 Ano ja badeh jo ameh ja, eme jo anyolom bada kalom ari le, eme udu bada kalom ari le doh badeh jo anyolom buwa kalom ma ndro taloh tinan badeh sukik udu badan badeh ndruni.
GEN 41:23 Ano ja jo anyolom bada kalom ari le ja, eme badeh udu bada kalom ari le doh badeh, jo anyolom buwa kalom ma ndro taloh tinan bwe awa-is ma siyer rai aloh ili eme.
GEN 41:24 Eme oro buwa kalom salin bwe dah sakalamiy oro tinan nyimirin dah. Ya eme jo asehek ameh doh i tiri lau ta kau, arile iri winiyan batiye moson bame tek bwe.”
GEN 41:25 Ano badeh Josep tiye i ta kabin, “Ameh tam ma la-uh badeh moson i randra le; Kindrei badeh asehek tam ta lakou kameh iy kameh amwekes eme bakep ai.”
GEN 41:26 Oro bulumakau tinan ma ndro taloh badeh moson jaha ma ndro taloh. Ya oro buwa kalom tinan ma ndro taloh badeh moson jaha ma ndro taloh ale.
GEN 41:27 Ya oro bulumakau ndruwin ma ndro taloh, oro an hamon ame ma buwa kalom ma ndro taloh awa-is siyer rai oloh badeh, moson, jaha ndro taloh kameh nyamon bwe.
GEN 41:28 I doh i buku le jo asehek tam kabin, luwen bwe kameh Kindrei badeh leheya tam lakou kameh iy amwekes.
GEN 41:29 I dah kameh jaha ndro taloh kameh munyak Ijip kameh idih na nyamon.
GEN 41:30 Ano udu hamon ta aliy na jaha ndro taloh ja kameh len ta son, len kameh nyamon bwe; eme jaha mwasin mene kameh lau maniy, tasah nyamon bwe kameh weleyani kon mari.
GEN 41:31 Len ta nyamon solo-an mene lau ndramaniy, tasah len ta nyamon bwe eme kameh akohok andra-i labai.
GEN 41:32 Moso ameh tam badeh Kindrei ndrasani ben, ya luwen bwe kameh asahan ai.
GEN 41:33 “Eme na dah badeh ou adeu ari lau ta budon ma lau ta tanan eme ou atehei iy katondrok kon munyak mari badu Ijip.
GEN 41:34 Ou ale tiye lau rayah ta lahou ta bolo asiu katondrok kon ari ari, iri kakohok lunoh nyamon badu bolo rinek rakum rakum na len ta nyamon amasu dah.
GEN 41:35 Udu baha tondrok tam ou tiye toro, udu bolo jaha ndro taloh mwasin dah oro kakohok nyamon badeh ma oro katehei kudu bolo asiu bolo kon tinan dah. Ma oro badeh katondrok.
GEN 41:36 Eme buku none jaha ndro taloh ta son asahan kameh, arau kameh i niri kon mari na len ta son kameh asahan Ijip. Eme kameh iri lau winiyan bakohok bandra-i ta son bwe.”
GEN 41:37 Eme kabin hawe iri lau ta lahou tan ta bolo asiu aseken budon tan, ma tiye i toro, “To winiyan basilahei ari ndramak i buku none Josep kede-eh bwe ai, iy badeh malawi ndrabun ta Kindrei udu tan.”
GEN 41:39 Ano kabin tiye i ta Josep, “Kindrei badeh ndraleheyani lakou mari doh i tam. Eme ya ou kede-eh ndramak ta budon ma ou kede-eh ndramak ta tanan labai, ari ndramak bala buku none ou bwe.
GEN 41:40 Jo kameh atehei ou atondrok munyak mari; ma iri lau mari kameh anuhun le ou. Boto-on tek badeh udu bwele-em ya boto-on tam badeh udu bahan tek.
GEN 41:41 Na dah jo badeh atehei ou atondrok munyak mari badu Ijip.”
GEN 41:42 Eme kabin andrei ring tan amwenen atehei i andra lime Josep. Eme kabin asiniy awin i badan ma atehei gol sen nyikilikin i balen.
GEN 41:43 Ano iy atehei Josep manyah udu la-u sau, sau doh iri katin haka aliu, ma sau doh badu bahan ta kabin; ano iri lau ta ndrokei ta atudun adek an mwena tan aloh, “Aha kabelek! Aha kabelek!” Josep badeh ndrasahan ndramak ta atondrok munyak tinan mari badu Ijip.
GEN 41:44 Ano kabin tiye i tan, “Jo badeh kabin, eme ari ndramak badu Ijip mari dah, winiyan are lau winiyan batudun iy bwe, i buku none ou batiye ehe bala tan bwe.”
GEN 41:45 Eme iy tondrohani Josep i badu Ijip badeh aloh Sepenat Paneya. Ano iy atehei badih i udun nyaran Asenat ya iy badih doh badeh nadu Podipera. Ya Podipera badeh iy Pris badu kon tinan On. Josep badeh jaha tan asahan tonoh badeh iy eme amwekes lahou ta kabin badu Ijip. Eme iy ruwani ndrahu kabin eme iy edek ili anyolom kon mari badu Ijip.
GEN 41:47 Udu bolo jaha mwasin badeh munyak ato-ou nyamon solo-an labai,
GEN 41:48 eme iri nyamon solo-an labai. Eme Josep badeh akohok ano badeh iy atehei iri ado bolo asiu udu kon tinan. Udu bolo bilin awudi kon tiri ari ari, badeh iy atukum nyamon ma atehei udu kon tinan.
GEN 41:49 Iy ma mwena ondrek kalom. Ano badeh kalom nyaran bwe, solo-a on badu ndras, eme badeh iy badeh babudon ta ondrek bwe.
GEN 41:50 Ben ta nyamon bwe basahan bwe le badeh, udu Josep Asenat badeh atehei nadun mwan la-uh.
GEN 41:51 Eme Josep tiye, “Kindrei badeh ndramwekes jo ndramaniy isi tek ma ndramaniy iri lowa tama oro.” Eme iy tondrohani kadok tan badeh nyaran Manase.
GEN 41:52 Ano ja Josep tiye, “Kindrei badeh ndratehei jo ndrasola udu munyak ta ndra-i dah; eme iy tondrohani bwaneh tan Ipra-im.”
GEN 41:53 Ano badeh jaha ma ndro taloh ta nyamon solo-an udu Ijip nane iri lau sekesek ndrano.
GEN 41:54 Eme i buku none Josep ndratiye len ta nyamon bwe asahan ai. Kon mari badeh nyamon bwe, arile munyak Ijip le, nyamon udu aliy.
GEN 41:55 Eme udu sese iri lau badu Ijip nyamon bwe, iri ameson, eme iri aden i ta kabin ta nyamon. Eme kabin tiye iri ala hawe Josep ma iri kanuhun le Josep.
GEN 41:56 Ano udu nyamon bwe ma son akohok kon munyak mari eme Josep sihiy asiu ta nyamon ma edeu kalom i ta sisih i niri lau badu Ijip.
GEN 41:57 Eme iri lau mari badu bolo munyak ame Ijip, ame hawe Josep asih nyamon, tasah kon mari ndrandra-i labai ta nyamon bwe.
GEN 42:1 Na len Jekop badeh anuhun, udu Ijip badeh kalom udu aliy, eme Jekop tiye i ta nadun oro, “Ado kede-eh abosah le kede-eh?
GEN 42:2 Jo anuhun badeh, anya Ijip badeh kalom udu aliy; eme ado kala kasih nato rayah, bwe kameh to amak ta son ai.”
GEN 42:3 Eme badeh nadu tine Josep oro ma ronoh badeh ala Ijip ala asih kalom.
GEN 42:4 Arile Jekop badeh batiye nadu tine Josep Benjamin bala hawe oro bala bwe, tasah iy badeh inoh koro-an lakou katok tan.
GEN 42:5 Nadu Jekop oro ala hawe iri lau ame asih kalom, tasah munyak Kenan badeh nyamon bwe.
GEN 42:6 Eme Josep badeh atondrok munyak mari badu Ijip, ya iy badeh edeu kalom ta sisih i tiri lau mari badu kon munyak. Eme nadu tine Josep oro ame badeh aluh andri bada munyak i ta Josep.
GEN 42:7 Eme Josep badeh ndraseleyani nadu tinen oro, arile iy badeh amwekes iy i buku none iy tanan oro bwe. Eme Josep ndremenya oro boto-on, “Ado badu heh ame dah?” Eme oro anya, “Aso badeh badu Kenan, aso ame dah ta asih nyamon.”
GEN 42:8 Josep badeh ndraseleyani nadu tinen oro, arile nadu tinen oro baseleyani iy bwe.
GEN 42:9 Eme Josep badeh abudon ameh mene iy ameh oro ma iy tiye, “Ado dah badeh ado lalou; ado ame dah ta asilah kon munyak boto-on de bwe.”
GEN 42:10 Eme oro anya, “Bwe Laban, aso ame dah i buku none lohowan ame ta asih nyamon.
GEN 42:11 Aso badeh nadu tinen aso, aso nadu ndramak ari le ya aso badeh lalou bwe, aso badeh ta wasai bwe, aso tiye sahou handru.”
GEN 42:12 Ano Josep tiye, “Bwe! Ado kede-eh ame ta anya kasilah kon munyak dah boto-on tan bwe udu heh.”
GEN 42:13 Ano oro tiye, “Aso nadu tine aso badeh ma ronoh la-uh; aso nadu ndramak ari le udu munyak Kenan. Eme nadu tinen aso ari badeh ndramak, arile iy ari le bahan badeh udu hawe tama aso.”
GEN 42:14 Eme Josep anya, “I buku le jo nane ndrasehek ndra-au eh. Ado kede-eh lalou!
GEN 42:15 I dah kameh asilah tanan ta takaleh ado! Jo badeh tandrakan ta nyara kabin, ta ado kameh winiyan ba-au bwe, ndra ado kandrei nadu tine ado bahan keme.
GEN 42:16 Ado ari kala kandrei iy. Ado mari kameh ado, iri lau ta ndrokei kameh atondrok ado, ndra kasilahei labai, ado tiye sahou handru de bwe. Eme kabin in ndra loke kahis, iy ki tanan ado badeh lalou.”
GEN 42:17 Ano badeh Josep atehei oro a bolo kou len taloh.
GEN 42:18 Ano na len taloh badeh Josep tiye i toro, “Jo badeh ndramak ta inoh Kindrei, ado kamwekes lahou doh ma ado kameh bamak bwe:
GEN 42:19 Ta kasilah ado tiye sahou handru badeh, ari tado kudu bolo kou kudu. Ado mari badeh ka-au kala katiye kalom ado ndrasihinei kede-eh ki na lowa tama ado ameson are kodo-oh.
GEN 42:20 Ano ado katiyani nadu tine ado bahan keme hawek. I doh kameh jo i tanan ado tiye sahou handru, ma jo kameh winiyan badai ado bwe ai.” Eme oro asumon, ma oro tiye i toro ari ari, “Handru labai, na dah to akohok maha tato, ta to mene amwekes i bada nadu tine mene. To badeh anyolom isi ma maha tan mene iy aloh ta seben, arile to banuhun iy bwe. Eme adeh, to are bolo maha dah.”
GEN 42:22 Eme Ruben tiye, “Jo mene tiye anya, ado sadai iy samak, arile ado banuhun bohok bwe. Na i dah to akohok maha ta imek tan ai.”
GEN 42:23 Josep badeh anuhun ma iy tanan sahou mari oro asehek, arile oro baseleyani iy bwe, tasah ndramak ari badeh udu hawe oro ta tobolowe sahou toro i ta Josep.
GEN 42:24 Ano badeh Josep ruwani oro ado, eme iy ili badeh eden. Iy eden ano iy eme hamon badeh tiye sahou i toro ja, ano iy andrei Simiyon ma sawei iy, udu mada oro ma andrei iy iu.
GEN 42:25 Ano Josep eme badeh tiye iri anyuhiy ndrom ta nadu tinen oro na kalom ma tiye iri badeh atehei su-ubek toro ari ari i hamon i bolo ndrom toro, ma edeu noro nyamon ta san. Eme oro lakou doh ano badeh,
GEN 42:26 nadu tinen oro alokou ndrom kalom toro asih nane dah i bwele-e donki toro, ano ma oro au ai.
GEN 42:27 Eme oro adek ala amadin ben ari ado san. Eme na ben doh badeh iy ari toro anya kaseh ndrom tan anya kakohok nyamon kanyohan donki tan. Eme udu mada ndrom badeh iy atou su-ubek tan badeh udu aliy.
GEN 42:28 Eme iy aloh i ta nadu tinen oro, “Su-ubek tek ndrame hamon ja, asah udu mada ndrom tek kada-ah.!” Eme badeh oro abwerei labai, eme oro anya, “Kindrei amwekes sasah eme tato dah?”
GEN 42:29 Eme oro ame asahan hawe tama oro ame Kenan. Ano badeh oro asehek ta tama oro ta lakou mari nane asahan bada oro:
GEN 42:30 “Aso ala badeh ndramak ta atondrok munyak mari badu Ijip badeh asehek sahou nyarahan eme taso ma iy tiye anya aso badeh lalou.
GEN 42:31 Eme aso anya, ‘Aso dah lalou bwe! Aso tiye sahou handru, aso bawasai bwe!
GEN 42:32 Aso badeh ma ronoh la-uh, nadu ndramak ari le. Ya nadu tine aso ari badeh ndramak ya nadu tine aso ari le bahan badeh udu hawe tama aso udu kon.’
GEN 42:33 Eme ndramak dah tiye, ‘I dah kameh jo kameh takaleh ado kede-eh tiye sahou handru de bwe.’ Eme iy anya, ‘Ari tado kameh kudu hawek kudu; ya ado mari kede-eh le kala katiye kalom ki na tama ado oro.’
GEN 42:34 Ano iy tiye, ‘Ano ado katiyani nadu tine ado bahan keme hawek. Eme i dah kameh jo kameh i tanan ado badeh tiye sahou handru, ado badeh lalou bwe; ano ja kameh jo atehei nadu tine ado ewek hamon, ya ado kameh ado asih lakou.’”
GEN 42:35 Ano oro solowei ndrom toro, eme oro mari badeh atou su-ubek toro mari eme hamon; eme oro atou su-ubek badeh, oro ma hawe tama oro badeh anoh.
GEN 42:36 Ano tama oro tiye i toro, “Ado mari kede-eh anya kamwekes naduk kamai ma iy ki-iu ai? Josep mene ndra-au, ano Simiyon ndra-au ale; ano na dah ado anya kakohok Benjamin ja ai. Jo le kameh akohok maha ma isi ta aliy!”
GEN 42:37 Ano Ruben tiye i ta taman, “Tama, i buku none jo bandrei Benjamin bame hamon bwe, badeh ou adai naduk mwan ma la-uh ki saluwen. Ou atehei iy keme minek, jo kameh winiyan tondrokei iy ma jo kameh winiyan andrei iy eme hamon.”
GEN 42:38 Arile Jekop tiye, “Naduk winiyan bawek hawe ado bwe; nadu tinen mene ndramak, eme iy le ari le udu kada-ah. Koro-an ari lakou katok tan kudu san. Ya jo badeh ndra alon, koro-an ado kameh kamwesekei jo katikisiy ma jo kimek.”
GEN 43:1 Eme kon Kenan akohok andra-i ta nyamon bwe,
GEN 43:2 ano oro aniy kalom mene oro asih badu Ijip ano, badeh Jekop tiye i ta nadun oro, “Ado ka hamon ja kasih rayah nyamon nato ja.”
GEN 43:3 Eme Juda tiye i tan, “I ndramak mene tiye taso anya, i buku none aso bandrei nadu tine aso Benjamin bala bwe, aso winiyan bales bare madan bwe.
GEN 43:4 I buku none ou aseken ta nadu tine aso keme hawe aso badeh, aso ala asih nam nyamon ai.
GEN 43:5 I buku none ou batehei iy bame bwe, i dah kameh aso winiyan bala bwe. Tasah ndramak doh tiye mene anya, i buku none aso bandrei iy bala bwe, aso winiyan bales bare madan bwe.”
GEN 43:6 Ano Jekop anya, “I buku sah ado tiye ta ndramak doh anya, nadu tine ado ari udu aliy? Ado atehei maha ma tikisiy solo-an eme tek.”
GEN 43:7 Eme oro anya, “Ndramak doh ndremenya aso san solo-an. Iy ndremenya lowa aso, ano iy ndremenya anya, ‘Tama ado udu aliy? Ya nadu tine ado ari udu aliy ja de bwe?’ Eme aso badeh tiye tan: tasah aso nane bala tanan bwe, ta budon tan nane anya aso kandrei nadu tine aso nane anya kili bwe.”
GEN 43:8 Ano Juda tiye i ta taman Jekop, “Ou atehei nah keme hawek, ma aso ka-au. Bwe kameh to mari amak ai.
GEN 43:9 Jo le kameh balek udu tan, i buku none jo batiyani iy bame hamon bwe, badeh kameh jo akohok maha ta aliy len jo udu ndra loken udu bolo munyak dah.
GEN 43:10 To are dah abe-en luluwen labai anuhun boho tama to, samada to ndrala ano to ndrame san lusan ai.”
GEN 43:11 Ano tama oro badeh tiye toro, “I buku none badeh handru eh, ado kandrei lakou ta bilin dah katehei ki bolo ndrom tado kewek ki ta ndramak ta atondrok munyak mari badu Ijip: Ado kandrei sese ndrelekei ta resen, rayah bwirik, rayah spais (lakou i buku lei), rayah buwa pistasin, ma hawe almon (buwa kei i buku nyalin).
GEN 43:12 Ado kandrei su-ubek mene udu mada ndrom tado mene kewek, koro-an i doh mene bale ari ndramak ndramaniy ma hawe ado kandrei rayah su-ubek kewek ale ta asih nyamon.
GEN 43:13 Eme ado kandrei nadu tine ado, ado kala ano badeh ado kame hamon suwi.
GEN 43:14 Laban Kindrei kamwekes ndramak doh katikisiy ado, ya i katehei Benjamin hawe nadu tine ado Simiyon keme hamon hawe ado. I buku none naduk uru jo maniy uru, badeh jo winiyan babwidiy se lakou bwe.”
GEN 43:15 Eme oro andrei lakou ta i ta ndramak nane, andrei su-ubek mene udu mada ndrom mene hawe su-ubek rayah ma hawe nadu tine oro Benjamin oro au ala Ijip. Eme oro ala adeu lakou i mine Josep.
GEN 43:16 Eme badeh Josep anyolom Benjamin udu hawe oro le badeh iy tiye tiri lohowan tan ta bwena ta asiu tan, “Kandrei oro lau dah ka asiu tek. Ado kadai ari katin haka ma kajuhiy kudu le, i dah kameh oro aimon nyamon hawek na mada an ronoh la-uh.”
GEN 43:17 Eme ndramak ta lohowan dah anuhun le boho Josep eme iy andrei oro a asiu.
GEN 43:18 Eme oro ala asiu badeh, oro ndranoh, eme badeh oro lomondra, “Andrei to ame dah ta su-ubek mene udu mada ndrom ta tato le ai, len ma mwena handru to ame dah asih nyamon. Ya i dah kameh iri tawi to ma iri kameh andrei iri donki tato ma to kameh asahan bonyo-ou tan.”
GEN 43:19 Udu mada san ta i bolo asiu badeh oro tiye i ta ndramak ta atondrok iri lohowan,
GEN 43:20 “Ou anuhun aso, aso ma mwena handru badeh ndrame dah ndrasih nyamon.
GEN 43:21 Eme aso adek ala hamon badeh aso amadin ben ari ado san, eme aso anya kase ndrom taso badeh, aso atou su-ubek silba aso asih nyamon na aliy mene udu mada ndrom taso. Eme aso ndrandrei ndrame udu hawe aso dah.
GEN 43:22 Ma aso ale andrei su-ubek rayah ale ta asih naso nyamon ja. Aso bala tanan bwe are handru atehei su-ubek silba udu mada ndrom taso.”
GEN 43:23 Ano ndramak ta lahou dah anya, “Ado sabudon ma ado badeh satikisiy. Sebwe Kindrei tado ma Kindrei ta tama ado atehei su-ubek udu mada ndrom tado.” Eme iy anya, “Jo ndrandrei su-ubek tado ta nyamon.” Ano iy andrei Simiyon eme len hawe oro.
GEN 43:24 Ano ndramak ta lohowan dah kuhi oro a asiu. Ano iy asuni gwa ta sikine kati oro ili, ma iy ale anyohan donki.
GEN 43:25 Eme oro lihidiy lakou ta i ta Josep udu le, tasah Josep badeh ndratiye, i dah kameh oro aimon nyamon hawen na mada an ronoh la-uh.
GEN 43:26 Ano Josep eme asiu badeh oro andrei iri lakou nane anya ki tan dah ki bolo asiu hawen. Eme oro ala aluh andri bada munyak i tan.
GEN 43:27 Ano Josep ndremenya oro, “Ado ado mwasin de bwe? Ado mene tiye tek ta tama ado, ya iy udu mwasin ale? Iy bamak bwe le, ma boto-on tan kahis le?”
GEN 43:28 Eme oro tiye, “Laban, tama aso badeh bamak bwe le, iy badeh boto-on tan kahis le.” Ano oro aluh andri i tan.
GEN 43:29 Eme Josep anyolom nadu tinen Benjamin, tasah uru ma la-uh asahan ta badih ari le, eme iy tiye, “Iy doh nadu tine ado bahan ai, ala ado mene asehek tek en.” Eme Josep tiye, “Naduk Kindrei badeh atehei nyosowan i la-um.”
GEN 43:30 Ano badeh Josep ruwani oro, tasah ndrinen eden handru ta nadu tinen oro. Eme iy akohok andra-i handru ma iy ili bolo rum tan ma iy eden.
GEN 43:31 Ano Josep sikine madan, ano iy eme len, iy baden bwe ai. Ano iy tiye iri atiye nyamon eme.
GEN 43:32 Josep badeh udu bada sau ari labai eme nyamon tan ili, ya nadu tinen oro badeh ado rasou labai. Ya iri lau badu Ijip badeh are len labai aimon nyamon tiri labai, tasah iri Ijip badeh winiyan baimon nyamon hawe iri Hiburu bwe, tasah iri Ijip badeh sumukok iri.
GEN 43:33 Eme oro badeh manyah in hamon ta jaha toro. Kadok, ano Bwaneh, ano Silih, ano Sabak, ano Kubwe, ano So-on, i le buku doh ili taku ta iy bahan handru. Oro manyah ado bada sau ya batala oro badeh ili ta Josep. Eme badeh boho oro asak ta anyolom oro ari ari nane manyah ado andri i buku doh.
GEN 43:34 Eme iri badeh akohok nyamon badu bada sau ta Josep badeh i noro. Ya nyamon i na Benjamin badeh solo-an labai, i buku none i na lau limeh. Eme badeh oro aimon nyamon ma a-un gwa ma oro asoh koha oro labwe.
GEN 44:1 Ano badeh Josep tiye sahou i ta ndramak ta lohowan tan ta atondrok asiu tan, “Ou anyuhi nyamon ma solo-an ki bolo ndrom toro lau kede-eh, winiya oro winiyan bwese-ei ma ou atehei su-ubek toro mari ki hamon bolo ndrom toro ari ari.
GEN 44:2 Ou atehei bwiniu tek le badeh ki bolo ndrom ta iy bahan ki hawe su-ubek tan ta kalom.” Eme iy mwesekei i le buku aliy in hamon ta boho Josep.
GEN 44:3 Ano na mandraben badeh oro au ma donki toro adek au.
GEN 44:4 Oro bala len ta kon tinan handru bwe le badeh, Josep tiye i ta ndramak ta mwena ta atondrok iri lohowan tan badu bolo asiu, “Ou ala sakaniy oro lau nane. Ya i buku none ou ala tawi oro badeh, ou ndremenya oro ki buku doh, ‘Jo amwekes mwasin ewek tado, ya buku sah ado amwekes budon ndra-in i bada budon ndra-in?
GEN 44:5 I buku sah ado bene-ei bwiniu silba tek? Bwiniu doh badeh ala jo a-un gwa na aliy. Ma bwiniu doh badeh kau tek. Ado badeh ndrandra-i handru!’”
GEN 44:6 Ano ndramak ta lahou dah isos hawe oro, eme iy tiye sahou nane i toro.
GEN 44:7 Eme oro anya, “Ou tiye sahou i buku badeh eme taso dah i buku sah badeh? Aso tandrakan handru aso babwidiy ari lakou bwe.
GEN 44:8 Ou tanam aso, aso mene andrei su-ubek mene udu bolo ndrom udu munyak Kenan mene ewek hamon. Ya ta saba katin handru aso kabene-ei silba badu asiu ta tinan tam?
GEN 44:9 Ndramak ta lohowan ta Laban, i buku none ou silahei are andrei, iy badeh kadai iy kimek ma aso mari badeh kasahan bonyo-ou tado.”
GEN 44:10 Ano iy anya, “Jo aseken budon badeh; arile iy ndramak le andrei bwiniu badeh kameh asahan bonyo-ou, ya ado mari ka-au ai.”
GEN 44:11 Eme oro suri ndrom toro suwi i andri, ano oro sihiy ndrom toro.
GEN 44:12 Eme ndramak ta lohowan takaleh bolo ndrom toro amwenen handru. Udu ta kadok ili taku ta iy bahan, eme iy ndruniy bwiniu dah udu bolo ndrom ta Benjamin.
GEN 44:13 Eme oro sadi awin toro ma oro tikisiy labai, ano badeh oro atehei lakou toro i bwele-e donki toro, eme oro adek a hamon ja ala kon tinan.
GEN 44:14 Oro ame hamon ame asiu badeh, Josep udu aliy le kahis. Eme oro aluh andri i tan,
GEN 44:15 eme Josep anya, “Ado mwesekei sasah handru dah? Ado badeh winiyan atanan jo badeh udu aliy winiyan takalahei ado na kau.”
GEN 44:16 Eme Juda tiye, “Ndramak tinan, aso baratiye sasah handru barawek tam? Aso kandres ou barala buku sah? Aso katiye aso bwe barala buku sah? Kindrei badeh ndranyolom aso, aso badeh ndrandra-i. I dah kameh Benjamin le ari winiyan bala bonyo-ou tam le bwe, i dah kameh aso mari.”
GEN 44:17 Eme Josep anya, “Bwe! Jo winiyan bamwekes kandriyen badeh bwe! I dah kameh iy ndramak le nane andrei bwiniu tek le kameh i bonyo-ou tek. Ado mari badeh ka-au ka hamon hawe tama ado ma mwasin.”
GEN 44:18 Ano badeh Juda ili hawe Josep tiye, “Ndramak ta tondrok, ou sabolosen, ou anuhun jo anya kasehek sahou tek. Ou sabolosen same tek; ou badeh i buku none le kabin.
GEN 44:19 Ou badeh mene ndremenya aso anya, ‘Tama ado udu aliy, ma hawe nadu tine ado udu aliy?’
GEN 44:20 Eme aso anya, ‘Ehe, aso badeh tama aso udu aliy ma hawe nadu tine aso udu aliy. Udu suniya tama aso i alon badeh iy atehei Benjamin ya nadu tinen ari badeh ndramak. Iy le ari badeh udu aliy; ma taman badeh aseken iy tinan labai.’
GEN 44:21 Eme ou mene tiye anya, aso badeh katiyani iy keme, eme badeh aso andrei iy eme ta ou badeh kanyolom iy.
GEN 44:22 Eme aso mene tiye tam anya, taman badeh kameh winiyan batehei iy bwe, i buku none iy keme, kameh taman kameh imek.
GEN 44:23 Eme badeh ou tiye anya, aso winyan bame bare madak bwe, i buku none nadu tine aso bame bwe.
GEN 44:24 “Eme na len aso ala hamon badeh aso tiye ta tama aso.
GEN 44:25 Ano badeh tama aso tiye aso badeh ame hamon ja kasih nyamon.
GEN 44:26 Eme aso tiye tan, ‘Aso winiyan bala bwe; bala mada ndramak doh bwe i buku none nadu tine aso bahan bame hawe aso bwe. I buku none nadu tine aso bahan eme hawe aso, badeh aso winiya ala ai.’
GEN 44:27 Eme tama aso tiye taso, ‘Ado badeh tanan uduk Rejel badeh atehei nah i naduk badeh la-uh le.
GEN 44:28 Ya iy ari badeh ndramak. Sebwe iy badeh iri katin haka ndriliu ndrasadi iy, tasah kabatana aliy le badeh jo se batou madan bwe.
GEN 44:29 Jo badeh ndra alon. I buku none ado andrei iy ewek kameh, jo kameh tikisiy ma na tikisiy tek i badan le kameh mwesekei jo imek!’”
GEN 44:30 Eme Juda tiye, “Ndramak tinan, I buku none jo ki hamon ya tama kanyolom Benjamin bado hawek bwe kameh, i dah kameh iy imek. Iy badeh ndra alon labai ma budon tan badeh aso ta nah le dah, ya i dah kameh tikisiy tan le kameh kidiy iy kimek.”
GEN 44:32 Eme Juda tiye ja, “Jo dah badeh ndratandrakan tama ta jo kameh akohok maha ta Benjamin; i buku none jo batiyani iy bala hamon hawe taman bwe, ma i dah kameh jo kameh akohok maha ta aliy winiya jo le baramak.
GEN 44:33 Eme na dah ndramak tinan, jo kameh akohok kon tan asahan bonyo-ou udu; ou atehei iy ki-iu ki hawe nadu tinen oro.
GEN 44:34 Jo winiyan bala hamon hawe tama bwe, i buku none Benjamin bame bwe. Jo badeh bwalek anyolom tama akohok maha ma isi ta aliy.”
GEN 45:1 Ano udu mada iri lohowan ta Josep badeh, Josep winiyan batawi iy bwe, eme iy tiye iri lohowan tan mari au. Ari ndramak badeh bare hawen bwe eme badeh iy asehek ta nadu tinen oro ta iy badeh are lau handru.
GEN 45:2 Eme Josep tabani bohon i loken ta ndrelen eme badeh iri Ijip anuhun, eme badeh iri ala tandra-un ta kabin udu loboho ndrahu manyah tan.
GEN 45:3 Ano Josep tiye i ta nadu tinen oro, “Jo dah, Jo Josep. Tama udu loken kahis le?” Arile nadu tinen oro anuhun badeh oro toroyani oro eme oro batiye sahou bwe.
GEN 45:4 Ano Josep tiye i toro, “Abo, ado kameh mirihik.” Eme oro ame, ano iy tiye, “Jo dah, jo Josep ado mene atehei jo i ta sisih eme Ijip.
GEN 45:5 Ya ado sanoh ma ado satehei budon ndra-in sawek tado, tasah ado mene atehei jo i ta sisih eme Ijip, ndri-i. I doh badeh Kindrei le tiyani jo eme bwena ta aseben lau mari badeh samak.
GEN 45:6 I dah jaha la-uh ai, ta nyamon bwe udu bolo munyak dah; arile jaha limeh kahis, i dah kameh ari nyamon winiyan batahiy bwe ma i dah kameh ari len ta akohok nyamon bwe.
GEN 45:7 Kindrei atehei jo eme bwena dah i san randra labai, ta aseben ado ma lundriye ado samak.
GEN 45:8 Eme i dah ado handru batiyani jo bame dah bwe, i dah Kindrei labai. Kindrei atehei jo asahan ndramak ta lahou tan badu bolo asiu ta kabin, ari ndramak ja bare bwele-ek bwe. Jo badeh atondrok munyak mari badu kon dah; jo badeh atondrok Ijip mari.
GEN 45:9 “Ya abo, ado ka hamon suwi ka hawe tama ma ado katiye tan i dah badeh boho nadum Josep: ‘Kindrei badeh ndratehei jo ndratondrok kon Ijip mari; ado kala ma ado kame suwi;
GEN 45:10 Ou ma hawe nadum oro ma nadu tubum oro, iri sipsip, iri me, iri bulumakau ma hawe lakou tam mari kame kamanyah kado loboho Gosen, kado mirihik tek.
GEN 45:11 I buku none ado ado Gosen badeh kameh madak kameh udu tado. Jaha limeh ta nyamon bwe badeh kahis le; eme jo badeh bwalek ou, ma hawe lowam oro ma hawe iri katin haka tado badeh sakohok sandra-i ta son.’”
GEN 45:12 Ano badeh Josep tiye le, “Ya ado mari, ma ou ale Benjamin, ado badeh ndranyolom jo badeh Josep handru.
GEN 45:13 Ado katiye ta tama ta jo badeh jo le ai udu Ijip ma ado kasehek tan ta lakou mari ado ndranyolom na mada ado. Ano ado kandrei iy suwi keme dah.”
GEN 45:14 Ano Josep korotani nadu tinen Benjamin ma iy eden; ma Benjamin tawi iy ma iy eden ale.
GEN 45:15 Ano badeh ma ndrelen le, iy korotani nadu tinen oro ma iy eden. Ano badeh ma nadu tinen oro asehek sahou hawen.
GEN 45:16 Ano na len sahou ili asahan ndranye kabin udu ndrahun manyah tan, ta nadu tine Josep oro badeh ndrame, eme badeh kabin hawe iri lau ta lahou tan badu bolo asiu tan badeh sekesek handru.
GEN 45:17 Eme kabin tiye ta Josep, “Ou tiye ta nadu tinem oro ka lokou lakou ki la-u katin haka toro ma oro kala Kenan.
GEN 45:18 Oro kala kandrei tama oro ma hawe lowa oro ano oro kame hamon. Jo kameh edeu munyak mwasin handru badu Ijip i toro, ma i dah kameh edeu toro lakou winiyan len oro ado ado.
GEN 45:19 Oro katiye toro badeh andrei sau aliu na katin haka badu Ijip kili, ya udu oro ma hawe nadu oro ka la-un ma tama oro ki la-un ya oro ka tiyani oro kame dah.
GEN 45:20 Oro badeh sabudon ta lakou toro mari, tasah lakou mari mwasin badu Ijip badeh kameh i toro.”
GEN 45:21 Ano nadu Jekop oro bwidiy i le buku aliy. Eme Josep atehei sau ta aliu na katin haka, i buku none mene ndratiye ma hawe nyamon i noro ta san.
GEN 45:22 Josep ale edeu toro ari ari awin ta adeu ta asin, arile Benjamin le badeh iy atehei tonek silba boroh hawe limeh awin ta asin.
GEN 45:23 Ano iy atehei ta taman ronoh donki idih na lakou mwasin badu Ijip ma atehei ronoh donki ja idih na kalom hawe jabi ramen ma hawe nan rayah nyamon ta san.
GEN 45:24 Eme badeh iy tiye ta nadu tinen oro au ai, ma iy tiye i toro, “Ado sandra-i sado san.”
GEN 45:25 Ano oro ruwani Ijip ma adek a hamon ala hawe tama oro Jekop ala Kenan.
GEN 45:26 Eme oro tiye ta tama oro anya, “Josep badeh bamak bwe! Iy badeh atondrok kon Ijip mari!” Eme Jekop badeh andru-uk ma batehei budon tan bahis bala ta sahou toro handru bwe.
GEN 45:27 Arile udu, oro asehek sahou mari badu boho Josep i tan, ano iy anyolom iri sau aliu na donki mene Josep atehei i mine oro badu Ijip eme badeh, ma balen aleu.
GEN 45:28 Eme Jekop anya, “Naduk Josep badeh bamak bwe, iy udu kede-eh le! Jo kili kanyolom iy koro-an jo kimek.”
GEN 46:1 Ano badeh Jekop lokowani lakou tan mari ma iy iu ili Bersiba, eme badeh iy amwekes Salom i ta Kindrei ta taman Aisik.
GEN 46:2 Eme badeh, na ben udu bolo ameh Kindrei asehek sahou i tan anya, “Jekop ei!” Eme Jekop asumon anya, “Jo kada-ah!”
GEN 46:3 Eme iy anya, “Jo dah jo Kindrei, Kindrei ta tamam. Ou sanoh ta ala Ijip; jo kameh amwekes lundriyem oro kameh asola ma asahan kon rakon buruwen udu doh.
GEN 46:4 Jo kameh udu hawem ewek Ijip ano jo kameh tiyani lundriyem oro kameh ame hamon ja ame munyak dah ja. Ou amak kameh Josep kameh udu hawem.”
GEN 46:5 Ano Jekop udu Bersiba eme len. Eme nadun oro badeh atehei tama oro Jekop, ma nadu oro bwisik ma hawe udu oro badeh, ado bolo asiu sau mene kabin atehei.
GEN 46:6 Eme badeh oro andrei iri katin haka toro ma hawe lakou toro mari mene badu Kenan, eme oro adek ala Ijip. Jekop badeh kuhi nadun oro mari a hawen:
GEN 46:7 nadun oro, nadu tubun oro, nadu oro badih ma hawe nadu tubun oro, oro mari ano.
GEN 46:8 Ya kane lowa Isra-el oro ala Ijip hawen asa i doh: oro badeh kadok tan badeh Ruben,
GEN 46:9 ma hawe nadun oro: oro badeh Hanok, Palu, Hesron ma hawe Karmi.
GEN 46:10 Ano Simiyon ma nadun oro badeh: Jemu-el, Jamin, Ohat, Jakin, Sohar ma hawe Sa-ul. Oro doh badeh badu ndrine udun badu Kenan.
GEN 46:11 Lebi ma nadun oro badeh: Gerson, Kohat ma hawe Merari.
GEN 46:12 Juda ma nadun oro badeh: Er, Onan, Silah, Peres, ma Serah. (Ya nadu Juda uru ma la-uh badeh Er hawe Onan badeh amak ado ndra Kenan). Ya nadu Peres uru badeh Hesron hawe Hamul.
GEN 46:13 Isakar ma nadun oro badeh: Tola, Pu-ah, Jasup hawe Simron.
GEN 46:14 Ya Sebulun oro nadun badeh: Seret, Elon hawe Jalel.
GEN 46:15 Oro doh badeh nah nadu udu Jekop aloh Liya badeh, adeu oro ame len badeh ado Padan Aram ma hawe nadun badih ari badeh nyaran Dinah. Eme ya kane nadu Isra-el oro mari iu ndrine Liya badeh asahan tonoh taloh.
GEN 46:16 Ya i dah nadu Gat oro: oro badeh Sepon, Hagi, Suni, Esbon, Eri, Arot hawe Areli.
GEN 46:17 Ya nadu Aser oro badeh Imnah, Isbah, Isbi, Beriya ma hawe nadu tine oro badih Serah. Ya nadu Beriya oro badeh Heber hawe Malkiyel.
GEN 46:18 Oro doh badeh ma ronoh onoh nadu Isra-el iu ndrine Silpah. Silpah doh badeh badih ta lohowan ta Leban eme Leban badeh atehei i ta nadun badih Liya.
GEN 46:19 Ano udu Isra-el Rejel badeh atehei nadu Isra-el la-uh le: badeh Josep uru Benjamin.
GEN 46:20 Ano udu Ijip badeh Josep badeh nadun la-uh, uru badeh Manase hawe Ipra-im. Uru doh badeh au ndrine udu Josep nyaran Asenat. Ya Asenat badeh iy badih, nadu Podipera, pris badu kon On.
GEN 46:21 Ya nadu Benjamin oro badeh: Bela, Beser, Asbel, Gera, Naman, Ehi, Ros, Mupim, Hupim hawe At.
GEN 46:22 Oro ma ronoh hahuw doh au ndrine udu Isra-el aloh Rejel.
GEN 46:23 Ano Dan badeh nadun badeh Husim.
GEN 46:24 Ya nadu Naptali oro badeh: Jase-el, Guni, Jeser hawe Silem.
GEN 46:25 Oro ma ndro taloh doh nadu Isra-el badu ndrine Bilhah. Bilhah badeh badih ta lohowan ta Leban atehei i ta nadun badih Rejel.
GEN 46:26 Ya kane nadu Isra-el oro mari ma lundriye nadun oro ise ala Ijip badeh ma ndro hanoh onoh (66). I doh nadun oro le amwenen, bondrek udu nadun oro bwe.
GEN 46:27 Ano ja badeh nadu Josep uru ma la-uh adeu uru ado Ijip, eme kane nadu Isra-el oro hawe tama oro i se badeh asahan ndro tonoh (70) ala doh.
GEN 46:28 Ano badeh Jekop suni Juda ili badeh ta tiye ta Josep ma ta leheya san ki tan ta iy keme Gosen.
GEN 46:29 Eme oro asahan badeh, Josep sandroh i bwele-e sau tan aliu na katin haka ma iy ili hawe taman ili Gosen. Eme iy isos hawe taman le badeh Josep akabah i la-u taman atehei minen i balen ma iy eden luluwen handru.
GEN 46:30 Ano Jekop tiye i ta Josep, “Jo badeh anya kimek ai, arile na dah jo ndranyolom ou ma jo ndratanan ai, ou badeh bamak bwe.”
GEN 46:31 Ano Josep tiye i ta nadu tinen ma hawe lowa taman oro mari, “Jo kameh ili hawe kabin asehek tan ta nadu tine oro ma hawe lowa tama oro mene manyah ado Kenan badeh ndrame hawek.
GEN 46:32 Jo kameh tiye tan ta ado badeh lau ta atondrok iri katin haka ma ado badeh ndrandrei iri sipsip hawe iri bulumakau hawe lakou mari tado badeh ndrame.
GEN 46:33 Ya i buku none kabin kaloh ado kala, ya iy kandremeya ado ta lahou tado sasah handru,
GEN 46:34 badeh ado katiye tan, ‘Lahou taso handru badeh ta atondrok iri katin haka aso atondrok eme eme taku dah, i buku none tubu aso mene amwekes.’ I buku ado tiye i buku doh kameh, iy kameh atehei ado kameh manyah ado Gosen.” Josep asehek doh badeh, tasah iy badeh tanan iri Ijip badeh bwale iri ta atondrok iri katin haka ma sumukok iri lau atondrok.
GEN 47:1 Ano Josep kuhi nadu tine oro ma limeh ala hawe kabin. Eme Josep tiye i ta kabin, “Tama ma nadu tine oro badeh ado Kenan ndrame. Oro badeh ame ma katin haka toro ta aimon bwidiu, hawe lakou toro mari. Oro badeh are loboho Gosen.”
GEN 47:2 Ano iy leheya nadu tinen oro ala ta kabin.
GEN 47:3 Eme kabin ndremenya oro, “Saba lahou tado?” Eme oro anya, “Lahou taso badeh ta atondrok iri katin haka sipsip, i buku none tubu aso oro bwena mene.
GEN 47:4 Aso ame manyah ado munyak tinan dah, tasah munyak Kenan badeh nyamon bwe, ma bwidiu tiri katin haka taso ndrano. Ya eme aso ndremenya ou, ou winiyan atehei aso manyah ado loboho Gosen de bwe?”
GEN 47:5 Ano kabin tiye i ta Josep, “Na dah tamam hawe nadu tinem oro badeh ndrame,
GEN 47:6 eme munyak mari badu Ijip dah badeh i toro ai. Oro badeh kamanyah kado loboho munyak mwasin handru, udu loboho Gosen. Ma i buku none oro lau rayah mwasin ta atondrok katin haka ado bolo oro badeh, jo aseken oro katondrok katin haka tek ale.”
GEN 47:7 Ano ja Josep andrei taman ili leheya iy i ta kabin. Eme Jekop atehei nyosowan tan i la-u kabin.
GEN 47:8 Ano kabin ndremenya Jekop anya, “Jaha tam sabe bah?”
GEN 47:9 Eme Jekop tiye, “Jaha tek ta jo edek le badeh asahan rinek tonoh (130). Ya udu bolo oro jaha doh badeh sola bwe, arile jo akohok maha solo-an, bala buku none jaha ta tubu oro mene solo-an bwe.”
GEN 47:10 Ano Jekop atehei nyosowan i ta kabin ma iy iu i len tan.
GEN 47:11 Ano badeh Josep atehei taman hawe nadu tinen oro manyah ado Ijip. Atehei oro manyah ado munyak mwasin ma lakou mwasin udu bolo kon tinan aloh Ramisis i buku none le kabin ndratiye.
GEN 47:12 Ano Josep edeu nyamon i na taman, i na nadu tinen oro ma hawe i na nadu tinen oro bahan hawe lowa taman oro mari ale ya iy anyohan oro badeh in hamon ta kane nadun oro.
GEN 47:13 Ano badeh nyamon bwe badeh akohok andra-i handru, ma kon mari badeh nyamon bwe. Kon Ijip hawe Kenan badeh akohok andra-i labai.
GEN 47:14 Eme iri badeh asih kalom ano Josep andrei su-ubek doh ili ndrahu kabin.
GEN 47:15 Ano na len su-ubek tiri Ijip hawe Kenan ano badeh, iri ame hawe Josep ndremenya, “Ou anyohan ahi nyamon! Bwe kameh ahi kamak ai! Su-ubek tahi badeh ndrasihinei ndrano.”
GEN 47:16 Eme Josep anya, “I buku none su-ubek taha ndrano badeh, aha kadeu katin haka taha keme ta asih nyamon.”
GEN 47:17 Eme badeh iri atiye katin haka tiri, iri katin haka aloh hos, iri sipsip, iri me, iri bulumakau hawe iri donki i mine Josep. Ano Josep edeu niri nyamon ili. Na jaha doh badeh Josep edeu nyamon i niri, tasah iri asih na katin haka tiri mari.
GEN 47:18 Ano udu jaha ari ja asahan badeh iri ame hawe Josep tiye, “Josep ahi winiyan batonei ari lakou ta madam bwe. Su-ubek tahi ndrano hawe katin haka tahi mari mene ndrawek tam. Ahi ari lakou ja ta edeu ewek tam ja bwe ai, arile ahi ndramak salin hawe munyak tahi le.
GEN 47:19 Ou samwekes ahi samak. Ou amwekes ari lakou! Ou samwekes bilin tahi sado leleyah. Ou asih munyak tahi na nyamon. Aso kameh a bonyo-ou ta kabin ya iy badeh kandrei munyak taso ki tan. Ou adeu naso kalom ma hawe ou adeu tahi badun ta atah ki bolo bilin tahi.”
GEN 47:20 Eme Josep sihinei munyak mari udu Ijip i ta kabin. Eme andrei iri lau mari badu Ijip badeh adeu munyak tiri badeh i ta sisih; tasah nyamon bwe badeh akohok andra-i; eme munyak mari badeh asahan munyak ta kabin.
GEN 47:21 Josep badeh mwesekei iri lau mari badu Ijip badeh asahan bonyo-ou.
GEN 47:22 Munyak le iy basihinei bwe badeh, munyak tiri pris. Iri pris badeh badeu munyak tiri bala ta sisih bwe, tasah kabin badeh edeu niri nyamon mwasin udu le buku doh, ta iri badeh winiyan manyah ado aliy udu le buku doh.
GEN 47:23 Eme Josep badeh tiye i tiri, “Aha ndratou, jo badeh ndrasihinei aha ma munyak taha ndra ta kabin. Ya buwa kalom ki taha ma aha atah ki bolo bilin taha.
GEN 47:24 Ya i buku none len ta nyamon kuni badeh, udu bolo nyamon taha ronoh badeh aha kadeu la-uh badu bolo ronoh ki ta kabin. Ya iri buwa kalom mari erah badeh ki taha ta atah ma ki ta nyumon taha ma lowa aha oro mari.”
GEN 47:25 Ano oro tiye, “Ou badeh amwekes kandriyen mwasin eme tahi; ma ahi bamak bwe. Ahi kameh a bonyo-ou ta kabin ai.”
GEN 47:26 Eme Josep badeh mwesekei batanau boto-on i tiri lau mari badu Ijip ta kadeu la-uh badu bolo nyamon tiri ronoh ki ta kabin ki buku nyamon kuni. Eme kandriyen doh eme eme taku na len dah. Arile munyak tiri Pris le badeh bwe ai, bala ta kabin bwe.
GEN 47:27 Iri lau badu Isra-el badeh manyah ado loboho Gosen udu Ijip. Eme iri badeh tiri lakou solo-an labai ma nadu iri badeh ndrasola le.
GEN 47:28 Jekop badeh manyah udu Ijip badeh winiya jaha ronoh ndro taloh, eme jaha tan mari ise badeh asahan rinek hanoh ndro taloh (147).
GEN 47:29 Ano len mirihik ta Jekop anya kimek badeh, iy luhi nadun Josep eme ano iy tiye i tan, “Josep ou atehei minem ki ndrokowa bak ma ou amwekes tandrakan ta ou badeh sahi jo sado Ijip dah ndri-i.
GEN 47:30 Jo badeh aseken ou badeh ahi jo, kili hawe tama oro mene ado aliy; ou badeh tuwi jo udu Ijip dah ki len ma ou ahi jo badeh kudu hawe tama oro.” Eme Josep tiye, “Jo kameh amwekes i buku bohom badeh.”
GEN 47:31 Ano badeh Jekop tiye, “Ou tandrakan ta i dah kameh ou mwesekei.” Eme Josep tandrakan ma Jekop udu bada sau tan badeh edeu wurah.
GEN 48:1 Ano udu sese badeh iri tiye ta Josep ta taman badeh ndrabosik. Ano badeh Josep kuhi nadun uru ma la-uh, Ipra-im hawe Manase, eme oro ala hawe Jekop.
GEN 48:2 Eme Jekop anuhun nadun Josep eme ta atou iy badeh, eme ma boto-on tan asahan ma iy suri iy ma iy manyah udu loken bada sau.
GEN 48:3 Ano Jekop tiye i ta Josep, “Kindrei tinan badeh asahan hawek udu kon Lus udu munyak Kenan badeh atehei nyosowan eme tek.
GEN 48:4 Eme Kindrei tiye i tek i buku doh, ‘Jo kameh edeu nadum oro kameh asola ma lundriyem oro ari ari kameh asahan kon tinan rakon buruwen; ma jo kameh edeu munyak dah kameh i ta lundriyem i buku ari lakou i toro udu le buku doh.’”
GEN 48:5 Ano Jekop tiye le, “Josep, nadum uru ma la-uh, Ipra-im hawe Manase badeh adeu uru ado Ijip udu hamon ta jo asahan dah, arile uru badeh tek le, i buku none le Ruben uru Simiyon.
GEN 48:6 Buku none ou adeu nah udu hamon turu ja badeh tek bwe ai; badeh tam labai; ya oro kameh akohok lakou badu mine Ipra-im uru Manase.
GEN 48:7 Jo amwekes doh badeh, tasah ta tinem Rejel le. Na len jo udu Padan Aram eme len badeh ma aso are ndra munyak badu Kenan kahis le, ya aso bame mirihik ta kon Eprat bwele badeh Rejel imek. Eme jo amwekes tikisiy ano badeh jo ihiy iy udu ka-u san ili kon Eprat.” (Eprat kon doh na dah badeh aloh Betelehem).
GEN 48:8 Ano badeh Jekop anyolom nadu Josep uru badeh iy ndremenya, “Nadu are uru mwan dah?”
GEN 48:9 Eme Josep anya, “Uru doh badeh naduk, Kindrei atehei eme tek na len jo udu Ijip dah.” Ano Jekop tiye, “Ou andrei uru kameh dah jo kedeu nyosowan ki turu.”
GEN 48:10 Mada Jekop badeh anya kagwah, tasah iy badeh ndra alon labai, eme badeh iy winiyan banyolom kon bala mwasin bwe. Eme Josep andrei nadun uru badeh ame hawe Jekop, eme badeh Jekop tawi uru a batalan.
GEN 48:11 Ano Jekop tiye i ta Josep, “Jo mene anya i dah kameh jo winiyan banyolom ou bwe, arile Kindrei le mwesekei jo eme badeh ndranyolom ou hawe nadum uru mwan ma la-uh.”
GEN 48:12 Ano badeh Josep bwese-ei uru ado bada ba Jekop, ano iy aluh kandrun i andri bada munyak udu mada taman.
GEN 48:13 Ano Josep atehei Ipra-im udu bilisiu kamweu ta Jekop ya atehei Manase badeh udu bilisiu salin ta Jekop.
GEN 48:14 Arile Jekop eme badeh atehei minen salin i sakan i bwele-e batu Ipra-im, aliy i bahan ai, ya minen kamweu badeh i bwele-e batu i kadok Manase.
GEN 48:15 Ano Jekop edeu nyosowan i la-u Josep: “Kindrei ala tama Abraham, tama Aisik ta atudun badeh katehei nyosowan ki la-u uru nah dah! Ma Kindrei ala udu hawek atondrok jo eme eme taku na len dah katehei nyosowan ki la-u uru le!
GEN 48:16 Angelo ala sebenei jo ma lakou batok tek bwe badeh katehei nyosowan ki la-u uru! Eme ma iri katanan ah badeh badu hawek, hawe badu hawe tama Abraham uru Aisik kudu le buku doh! Ma lundriye uru badeh ki sola ma lundriye nadu uru ka sola!”
GEN 48:17 Eme Josep badeh tikisiy handru ta anyolom taman badeh atehei minen salin i la-u Ipra-im; eme badeh Josep tawi mine taman udu bwele-e batu Ipra-im atehei i bwele-e batu Manase.
GEN 48:18 Eme Josep tiye, “Tama bala buku badeh bwe. Iy kadok asah i dah; ou atehei minem salin ki bwele-e batun.”
GEN 48:19 Eme taman bwalen ma iy tiye, “Naduk jo tanan. Lundriye Manase oro kameh asahan lau boto-on ale, arile lundriye nadu tinen oro bahan kameh boto-on labai ja ta iy kadok Manase, ma lundriyen oro kameh asahan solo-an ma kameh asahan kon tinan solo-an.”
GEN 48:20 Eme na len doh badeh iy atehei nyosowan i la-u uru tiye anya, “Iri lau mari badu Isra-el kameh aloh nyara ah ta adeu nyosowan. Iri kameh aloh anya, ‘Kindrei kamwekes ou i buku none Ipra-im hawe Manase!’” San doh le badeh, eme badeh Jekop badeh atehei Ipra-im udu mwena ta Manase.
GEN 48:21 Ano Jekop tiye i ta Josep, “Ou badeh ndranyolom jo, jo badeh anya kimek ai, arile Kindrei le kameh udu hawem ma iy le kameh winiyan tiyani ou ala hamon ja ala munyak ta tubum oro.
GEN 48:22 Nadu tinem oro bwe ai, ou le badeh jo atehei kon Sekem i tam, i doh munyak mada lihin, jo mene andrei ta bahun udu mine iri Amora eme na boto-on ta samen hawe bonara tek.”
GEN 49:1 Ano badeh Jekop luhi nadun oro mari ame ano i tiye, “Ado mari kawudi jo, ya jo kasehek sahou ki tado ta sasah kameh asahan tado na len hamon kameh eme:
GEN 49:2 “Ado nadu Isra-el mari kame le se kanuhun tama ado.
GEN 49:3 “Ruben, ou badeh kadok tek, ma ou badeh boto-on tek Ma ou badeh kadok tek ou asahan mwena ma ou uni handru ta boto-on. Ou boto-on labai ja ta naduk mwan mari ma ou le ai.
GEN 49:4 Ou kameh budon tam bado rasi bwe i buku none wadah atohou, arile i dah kameh boto-on tam kameh ano, Tasah ou mene babeleben sau ta udu tamam ari bwe, eme ou ala amadin iy.
GEN 49:5 “Ya Simiyon ah Lebi badeh nadu tine ah. Ah badeh sahou ta-ah nyarahan ta amwekes bahun.
GEN 49:6 Jo winiyan bawek hawe ah ta sahou kamu ta ah bwe. Ma jo winiyan bawek hawe ah na len ta asehek sahou bwe. Eme na losen ta-ah ma i dah kameh ah kameh atokos kati iri katin haka hawe amundroh lau leleyah.
GEN 49:7 Jo batanau ah ka-i ai, tasah losen ta-ah badeh ndra-in handru Labai handru i buku siyer atohou eme i doh badeh ndra-in. Ah kameh winiyan bakohok ari munyak bwe, ma ah kameh aseker bolo munyak mari badu Isra-el dah. Ma iy ari i rasi labai ya iy ari iu i rasi labai ta lau badu Isra-el.
GEN 49:8 “Juda, ou kameh nadu tinem oro kameh atudun ou. Tasah ou ateu bale lau ta amwekes bahun ewek tam. Nadu tinem oro kameh kandru oro kameh aluh i andri tam.
GEN 49:9 Juda, ou badeh boto-on i buku none katin haka layon; Ou adai iri lau ano, ou ame hamon ame ndrahunem ja, ame manyah ma ales boham hawe katim, Ari lau winiyan balisiy ou bwe.
GEN 49:10 Juda, ou kameh kandro ta kabin kameh winiyan ba-au tam bwe, Ma lundriyem oro kameh asahan kabin le ai, Winiya le ndramak salin le barasahan. Iri kon munyak rakon rakon buruwen kameh atiye lakou i tam, Ma iri kameh aluh kandru i andri i nyara kalem ta anuhun sahou tiri i tam.
GEN 49:11 Ou kameh aseu donki kasen tam badeh i ta bada malou wa-in mwasin, ta bada wa-in seselek handru udu ta aliy. Ma ou kameh sikine awin tam na ndraye wa-in saraman.
GEN 49:12 Madam badeh asaram i buku none wa-in le. Ma lihim badeh belen i buku none ma-o sur belen.
GEN 49:13 “Sebulun kameh manyah tan kameh udu babi mirihik ta ndras. Madasu tan badeh mwasin tiri ndron gwa. Ya kobek tan badeh ili isos kon Sidon.
GEN 49:14 “Isakar badeh boto-on labai ja ta donki. Iy amadin ndrokowa lakou ta ndrahu manyah badeh udu bwele-e donki.
GEN 49:15 Arile iy badeh anyolom ndrahu manyah badeh mwasin labai, ma anyolom munyak badeh mwasin, Eme badeh iy aseken ta amwekes lahou, Eme ma iy akor ta ato-ou iri lakou.
GEN 49:16 “Dan kameh asahan ndramak ta anuhun sahou tiri lau tan, i buku none iri boho kamen ra-em ra-em badu Isra-el.
GEN 49:17 Dan kameh asahan i buku none mwak udu ka-u san, ta atoh kati iri katin haka aloh hos, Ma ndramak manyah udu bwele-en kameh i bwak i le konan i andri.
GEN 49:18 “Laban, jo badeh abe-en ou ta aseben tam.
GEN 49:19 “Gat kameh iri lau ta bahana kameh atohou a la-un arile iy kameh tikahei iri au.
GEN 49:20 “Munyak ta Aser kameh ateh ta nyamon mwasin, Ma na nyamon tan le doh kameh iy edeu i na kabin.
GEN 49:21 “Naptali kameh i buku none katin haka aloh diya, Iy badeh konen ili labai ma iy asehek sahou mwasin ma iy kameh sakaliye leleyah ili eme.
GEN 49:22 “Josep kameh i buku none bada malou wa-in, seselek ka-u gwa. Eme badan badeh seselek i loken bada kabwek.
GEN 49:23 Iri lau ta amwekes budon ndra-in i badan kameh ame amwekes bahun boto-on labai i tan, ma atikah iy na bonara hawe nyah,
GEN 49:24 Arile bonara tan badeh boto-on labai, Ma iy badeh bohan boto-on labai, I doh badeh na boto-on ta mine Kindrei ta Isra-el, Ma na boto-on ta ndramak ta atondrok iri katin haka, iy bek ta Isra-el ta winiyan batokos bwe.
GEN 49:25 I dah badeh na Kindrei ta tamam le aseben ou, Ma i dah kameh Kindrei tinan le kameh atehei minen udu la-um, na nyosowan tan badu kandrah Ma na nyosowan ta gwa waru badu baha munyak, Ma na nyosowan tiri bulumakau hawe tiri nah,
GEN 49:26 Ma nyosowan ta tamam badeh sakalawi nyosowan ta kalom hawe kanyeu, Ma sakalawi nyosowan tiri mandrei kede-eh, Ma sakalawi nyosowan ta munyak mwasin badu ta buli ndrondro-ou kudu le buku doh, badeh kiroh keme la-u Josep, Tasah iy badeh udu mwena ta nadu tinen oro mari.
GEN 49:27 “Benjamin badeh i buku none ari mwi ndriliu, Na mandraben hawe na beyeh kameh iy abuyeh nyamon, Iy idiy ano iy aimon ma iy akohok rayah.”
GEN 49:28 Oro ma ronoh la-uh doh badeh asahan boho kamen ma ronoh la-uh badu Isra-el. Eme i dah nyosowan ta tama oro edeu i la-u oro ari ari in hamon ta kandriyen toro.
GEN 49:29 Ano Jekop tiye sahou batanau i ta nadun oro, “Jo kameh iu i hawe tama oro ai, eme ado badeh katehei jo ki munu lek udu bilin ta Epron badu Hita.
GEN 49:30 Munu bek udu kon Makpelah, mirihik ta Mamre udu Kenan, mene Abraham sihinei ta Epron badu Hita i ndrahu lek ta ndramak imek ma hawe bilin mari.
GEN 49:31 Ndrahune Abraham uru udun Sara, ndrahu Aisik uru udun Rebeka, ma jo mene ihiy Liya udu aliy.
GEN 49:32 Munu bek doh udu aliy ma bilin badeh mene ndrasihinei badu tiri Hita.”
GEN 49:33 Ano Jekop asehek sahou ta batanau i ta nadun oro ano le badeh, iy suri katin ma luka i bada sau ma aden taku ma iy imek iu i hawe iri lau tan.
GEN 50:1 Eme badeh Josep morohani iy i andri i la-u taman ma iy tawi buli taman ma iy eden.
GEN 50:2 Ano badeh Josep tiye i tiri lau ta komba ta atondrok taman.
GEN 50:3 Ili badeh winiya len ta komba asahan hanoh. Ya iri lau badu Ijip aden ili winiya len ndro tonoh.
GEN 50:4 Ano len ta ndrelen ano badeh, Josep tiye i tiri lau ta lahou ta kabin badu bolo asiu anya, “Ado katiyani sahou tek doh ki ta kabin:
GEN 50:5 Na len suniya tama anya kimek badeh iy tiye, Jo badeh ndratandrakan ta a-eh iy kili munu bek mene iy ndralosowaniy udu munyak Kenan. Eme ya i buku none ou aseken eh, jo anya kili ka-eh tama ano badeh jo barame hamon ja.”
GEN 50:6 Eme kabin anya, “Mwasin, iy kili kihiy taman i buku none iy mene ndratandrakan ta amwekes.”
GEN 50:7 Eme badeh Josep iu ili a-eh taman. Eme iri lau ta lahou badu bolo asiu ta kabin, iri lau tinan ta anuhun sahou, ma hawe iri lau ta lahou ta mwena badu Ijip badeh a hawe Josep.
GEN 50:8 Ma udu Josep ma nadun uru, hawe nadu tinen oro mari ala. Ma hawe lowa taman, iri Isra-el, ala hawen ale. Arile nadu oro bwisik, hawe iri sipsip, iri me ma hawe iri bulumakau badeh ado loboho Gosen ado.
GEN 50:9 Eme iri lau hawe sau aliu na katin haka mari ma lau ado bwele-e iri katin haka aloh hos, iri lau solo-an handru en a hawe Josep.
GEN 50:10 Ano len iri ame asos Atat kon ndrahu iri aburoh wit loboho rai ta Jordan badeh iri mari aden boho iri loken luluwen handru. Ma Josep tiye i tiri ado doh aden winiya len ma ndro taloh.
GEN 50:11 Eme iri lau badu kati kon Kenan badeh anyolom iri lau nane aden ado Atat badeh iri tiye, “Iri lau badu Ijip badeh amwekes kabek ma aden tare doh!” Eme badeh iri tondrohani nyara kon doh ili Abel Misra-em, moson, “Iri Ijip aden.”
GEN 50:12 Eme badeh nadu Isra-el oro badeh mwesekei i le buku tama oro mene tiye i toro.
GEN 50:13 Ano badeh iri bwese-ei iy ili atehei iy ili munu bek Makpelah loboho rai ta Mamre udu bolo bilin udu Kenan. Bilin mene Abraham sihinei ta Epron ndramak badu Hita i ta ndrahu a-eh ndramak imek.
GEN 50:14 Josep ihiy taman ano badeh iy iu i hamon ja ili Ijip hawe nadu tinen oro hawe iri lau badu Ijip nane ala ta a-eh taman.
GEN 50:15 Udu hamon ta tama oro imek badeh, nadu tine Josep oro tiye, “Ki buku sah kameh i buku none Josep badeh kabudon ndra-in keme tato ma i buku none iy kamwekes budon ta amwekes ki saluwen ta kandriyen ndra-in mene to amwekes i badan?”
GEN 50:16 Eme badeh oro suni sahou ili ta Josep i buku doh: “Suniya tama to anya kimek badeh,
GEN 50:17 iy tiye tam badeh ta ou badeh balem sabudon ta kadriyen ndra-in mene aso amwekes ewek tam, ma i dah kameh aso kameh are baha Kindrei ta tamam.” Eme Josep anuhun badeh ma iy eden.
GEN 50:18 Ano badeh nadu tinen oro amwenen ala badeh kandru oro aluh i tan; Eme oro anya, “Aso are madam dah aso badeh bonyo-ou.”
GEN 50:19 Arile Josep tiye i toro, “Ado sanoh; jo badeh winiyan bakohok kon ta Kindrei bwe.
GEN 50:20 Ado badeh amwekes kandriyen ndra-in eme tek, arile Kindrei badeh mwesekei asahan mwasin labai ta aseben lau mari are kede-eh, ma iri mari bamak bwe.
GEN 50:21 Ado badeh sanoh ta ari lakou. Jo kameh atondrok ado ma nadu ado oro.” Ano badeh Josep tiye budon mwasin i toro ma mwesekei ndrine oro ta tikisiy iu.
GEN 50:22 Ano badeh Josep badeh manyah udu Ijip le hawe lowa taman oro; eme badeh Josep badeh i alon, jaha tan ili asahan rinek ronoh (110) badeh ma iy imek.
GEN 50:23 Iy badeh udu anyolom nadu tubun oro badu ndrine nadun Ipra-im. Iy anyolom nadu Makir oro; Makir badeh nadu Manase. Oro doh badeh i buku none nadun oro.
GEN 50:24 Ano Josep tiye i ta nadu tinen oro, “Jo badeh mirihik kimek ai, arile Kindrei kameh tondrokei ado kameh udu mwasin ma iy le kameh winiyan kuhiy ado ame len ma iy kameh tiyani ado ala munyak mene iy tandrakan i ta Abraham, i ta Aisik hawe Jekop.”
GEN 50:25 Ano badeh Josep tiye iri lau tan amwekes tandrakan. Eme Josep anya, “Ado katandrakan keme tek i buku none Kindrei kasariye ado ka hamon kala munyak Kenan badeh ado kakuhiy badak kewek.”
GEN 50:26 Eme Josep badeh udu winiya jaha tan asahan rinek ronoh (110) badeh iy imek. Iy imek badeh udu Ijip. Eme iri lau ta komba atondrok badan ma atehei iy i bolo kes.
RUT 1:1 Udu bolo len tiri Isra-el bwena, Kabin badeh atondrok kon tiri. Eme bwidiy nyamon winiya iri bwe. Eme ndramak ari badu Betlehem, udu loboho Juda, lokowaniy iy, udun ma nadun uru ma la-uh, iy andrei oro au ala loboho kon tiri Mowap.
RUT 1:2 Nyara ndramak doh badeh Elimelek, nyara udun Nawomi; nyara nadun ma la-uh badeh Malon uru Kiliyon. Oro badu boho kamen ta Eparata.
RUT 1:3 Oro ado, ano badeh, Elimelek imek, nyau tan hawe nadun uru ma la-uh ado ai.
RUT 1:4 Nadun uru ma la-uh badeh atasou, uru andrei butuhu Mowap ma la-uh. Nyara uru badeh Opa uru Rut. Oro manyah ado Mowap badeh, winiya jaha ma ronoh.
RUT 1:5 Ano badeh Malon uru Kiliyon amak. Eme tine uru Nawomi le ari udu ai, udun ma nadun uru ma la-uh ndramak.
RUT 1:6 Nawomi udu Mowap badeh iy anuhun Laban atehei nyosowan i tiri lau tan i ta nyamon tiri. Eme Nawomi alokou iy ma nyanan uru ma la-uh ala hawen ta ala kon tan Juda.
RUT 1:7 Oro tuwiy lokou toro ma oro adek au ala hamon ala Juda.
RUT 1:8 Oro ala ado ndrukulu san ranah badeh, Nawomi asehek i ta nyanan uru, anya, “Ah kala hamon ka kon ta ah. Ma ah kala kado hawe tine ah. Laban badeh kameh amekes mwasin ewek ta ah buku ah amekes mwasin ndrame tek, ma toro ma taloh ndramak.
RUT 1:9 Ma i dah kameh Laban katehei ah ka asiu ja.” Nawomi eme tawi uru ma uru taku a ta ndrelen.
RUT 1:10 Uru ame tiye i ta Nawomi, “Bwai, aru kameh an hamon tam ala hawe iri lau tam.”
RUT 1:11 Nawomi anya, “Bwai, ah nadu nyanak ma la-uh, ah ka hamon ai. Buku sah ah anya kame hawek nane? Naduk ndraheh ja kameh ah katasou ka turu?
RUT 1:12 Ah kala hamon ai. Jo winiya bala tasou ja bwai, buku jo ki tasou ja na ben kameh, jo katuwiy la-uh nah mwan ja?
RUT 1:13 Ah kameh atondrok uru a tinan, ano, ah barala turu? I dah kameh bwidiy ah winiya batasou bala ta ari mwan ja bwai! Ah naduk badih ma la-uh, ah tana ah. Laban ndratehei konan ndrame tek, eme ma jo tikisiy ah ma la-uh en!”
RUT 1:14 Eme badeh uru ma la-uh atehei boho uru i ta ndrelen ja. Ano Opa tawi nyanan Nawomi ma iy eden. Ano ma iy iu i hamon. Arile Rut badeh bwalen ta ili hamon.
RUT 1:15 Nawomi eme tiye tan, “Rut, kayom ndra-au ndrala hamon ndra hawe lowan oro ai, ma hawe kindrei tan. Ou ala hawen ale!”
RUT 1:16 Eme Rut anya, “Ou sasabolon jo, jo badeh anya kewek hawem; buku saba kon ou ala aliy, jo kameh ewek ale. Saba kon ou ado aliy, jo kameh udu aliy ale. Buku lowam oro, badeh kameh lowak ale; buku Kindrei tam badeh, kameh Kindrei tek ale.
RUT 1:17 Buku ou amak ado heh, jo kameh imek udu hawem ale, ma ahiy jo udu kon nane jo imek udu aliy. Jo bwalek ari lakou kabwidiy ndrokowa talu kudu aliy. Imek le badeh kameh bwidiy ndrokowa talu ai. Jo tandrakan en, buku jo ba-en hamon ta sahou tek nane jo asehek bwe eh, i dah kameh Kindrei amekes se lakou maha-an eme tek.”
RUT 1:18 Nawomi anyolom Rut badeh winiya baruwaniy iy bwe, eme iy basehek sahou ja bwai.
RUT 1:19 Eme uru ma la-uh adek ala asos Betlehem. Uru asos le badeh, mani iri lau atur, eme iri badih anya, “Kede-eh Nawomi handru deh?”
RUT 1:20 Nawomi tiye ili toro anya, “Ado saloh jo Nawomi. Tasah Kindrei, boto-on marakon udu tan badeh, bwidiy tikisiy tinan labai eme tek.
RUT 1:21 Jo mene iu badeh, lakou tek solo-an labai. Ano Laban anya kandrei jo keme hamon ja badeh, tek ari lakou ja bwe. Ado saloh jo Nawomi ai, tasah Laban boto-on labai badeh, atehei maha-an solo-an eme la-uk.”
RUT 1:22 Nawomi uru nyanan Rut, i badih badu Mowap, ame hamon kon ta Nawomi ja. Uru asahan Betlehem badeh, udu bada len tiri ta akohok nyamon iri aloh bali, badu bilin tiri.
RUT 2:1 Bowas badeh iy nadu batun, iy badeh badu hawe udu Nawomi bwena Elimelek.
RUT 2:2 Len ari badeh Rut tiye i ta Nawomi i buku doh: “Jo anya kili bolo bilin anya kanyidiu na talu bali, iri lau mwan nane mwetehei, erah in andri, buku ari ndramak aso-ok jo kanyidiu bali ki-in hamon tan.” Nawomi anya, “Mwasin, ou ala.”
RUT 2:3 Eme Rut edek iu ili bolo bilin. Iy edek in hamon tiri lau ta amondroh ma iri lau ta atukum bali. Iy anyidiu nan iri bali erah in andri. Iy anyidiu ili, ili, eme ma iy i tanan bilin dah ta ndramak ari nyaran Bowas. Bowas badeh, badu boho kamen ta Elimelek.
RUT 2:4 Bowas udu Betlehem eme anya katou oro lau tan. Iy eme isos, iy anyolom oro le badeh, iy anya, “Laban udu hawe ado.” Eme oro lau tan tiye sahou sekesek i tan anya, “Laban atehei nyosowan tan ewek tam.”
RUT 2:5 Bowas eme ndremenya ndramak ta atondrok oro lau tan, “Are badih bihin kodo-oh?”
RUT 2:6 Eme ndramak ta atondrok oro lau tan anya, “Iy badih bihin kodo-oh, iy badu kon Mowap. Iy in hamon ta Nawomi, uru ame dah.
RUT 2:7 Iy eme ndremenya jo anya, iy aso-ok ta edek in hamon tiri lau anya kanyidiu nan bali. Iy anyidiu na mandraben eme isos nane dah, eme i dah iy baramunyau adeh, in bolo mandron kodo-oh.”
RUT 2:8 Eme Bowas tiye ta Rut i buku doh, “Naduk badih, ou anuhun, jo anya kabatanau ou. Jo bwalek ou ala anyidiu bare bali badu bilin ta ndramak ari ja. Jo aso-ok ou anyidiu bare bali badu dah le kabwai. Ou ado, ma ou abo gok hawe oro badih tek kede-eh.
RUT 2:9 Ou anyolom bilin, ma ou an hamon toro. Buku oro anya katukum bare bali badeh, ou ado hawe oro. Jo ndrabatanau oro lau tek ale ta oro sanyolom ndra-in sawek tam. Buku balem anya kamar ta gwa, ou ala a-un gwa udu bolo sabok oro lau tek ndrasuniy.”
RUT 2:10 Ano Rut atubwa bwilindru-un ma bwilin ili andri ta munyak, ma iy anya, “Jo badih leheleh labai, buku sah ou anyolom jo, ma ou amekes mwasin eme tek?”
RUT 2:11 Bowas tiye i ta Rut i buku doh, “Iri lau tiye tek badeh ta lakou marakon ou amekes an hamon ta nyanam Nawomi udu ndrabada len udum imek. Jo tanak ou ruwaniy tamam uru tinem, ma kon tam amwenen; i buku sah handru ou ame dah manyah ado bolo kon rakon ja, lau rayah ja, ou bala tanam iri bwena bwe.
RUT 2:12 Laban Kindrei tiri Isra-el kasihinei ou, ta iri lahou ou ndramwesekei. Ou ado bahandran ma iy kameh turukiy ou udu mwasin, i buku nadu kakaro udu bahandra bani tinen.”
RUT 2:13 Rut anya, “Ou badeh amekes kandriyen mwasin labai eme tek. Ndramak tinan, ou ale batanau jo tiri sahou mwasin. Jo badih mwasin bwe, bala buku oro badih tam kede-eh. Arile ou badeh asehek sahou ta batanau eme tek ma bwidiy ndrinek udu mwasin ja.”
RUT 2:14 Oro anya kaimon nyamon ai. Bowas eme aloh Rut anya, “Ou ame dah. Ou aimon raon jabi ramen, ou atehei jabi ramen kili bolo wain, ou aimon.” Rut eme manyah udu andri hawe oro badih ta lahou ta Bowas. Bowas eme atehei na Rut bali raon iri ndraturuhiy le. Rut andrei ma iy aimon ili ma ndrinen irek, arile nyamon tan raon erah.
RUT 2:15 Rut suriy iy, iy edek ili bolo bilin le badeh, Bowas eme tiye toro lau tan anya, “Iy kudu gwek kanyidiu kabede iri rabos, rabos nane in andri kodo-on! Ado sabolosen sala tan.
RUT 2:16 Ado kasoh raon bare bali badu bolo iri nane ndrabawei ndrarabos, kili tan. Ma jo bwalek ado sasehek iy.”
RUT 2:17 Rut badeh anyidiu bare iri bali mari ili le se isos an amai. Iy tukumwiy marakon ili le se ano, iy ubwiy bare iri bali dah, eme maha-a salin asahan kilo ma ronoh.
RUT 2:18 Iy eme bwese-ei ndrom bali tan, ma iy edek iu ili bolo kon tinan ma iy leheya ili ta nyanan, ta bare bali sabe iy tukumwiy, ma iy leheya bakatikibwah tan ili ta nyanan ale.
RUT 2:19 Nawomi ndremenya iy, “Ou nane atukum bare bali badu loboho heh le? Bilin tare lau handru ou nane abo gok an bolon? Kindrei atehei nyosowan kili ta ndramak nane atou ou ma sebenei ou!” Rut asehek ili ta Nawomi anya, “Jo nane ibo gok in bolo bilin ta ndramak ari nyaran Bowas.”
RUT 2:20 Nawomi tiye tan, “Laban kanyosowaniy iy! Laban winiya bamaniy tandrakan tan i tiri lau ndramak ma iri lau bamak bwe le.” Eme Nawomi asehek ja, “Iy ndramak badeh badu hawe to handru en! To badeh boho kamen ari le. Iy kameh atondrok talu.”
RUT 2:21 Ano Rut anya, “Bowas tiye tek i buku doh, jo badeh kibo gok hawe oro badih tan winiya le gok ta atukum bare iri bali marakon ano.”
RUT 2:22 Nawomi tiye Rut, “Nadu nyanak, i dah kameh kandriyen ndra-in buku ou ala abo gok ala bolo bilin ta ndramak ari ja. Kora-on lakou kasahan tam ja. Mwasin ta ou abo gok le hawe oro badih ta Bowas ai.”
RUT 2:23 Eme Rut ibo gok udu le mirihik hawe oro badih ta Bowas. Oro atukum bare bali ili, ili winiya le bare iri bali ma wit marakon ano. Eme ma iy in hawe nyanan udu gwek.
RUT 3:1 Nawomi eme tiye Rut i buku doh, “Jo kameh atik ou a bahandra ari mwan, ma ou ki tam asumwem amwenen.”
RUT 3:2 Nawomi anya, “Rut, ou anuhun, ndreh Bowas badeh, ou ale abo gok hawe oro badih tan badeh, iy badu mirihik tato handru en! Ou anuhun, ben kameh iy ili ndrahune gok, ta amekes bwisi bali iu.
RUT 3:3 Abo, ou ala anyu, ano ou solowei suluw ki badam. Ou nyosowaniy ou na ra-ei awin tam mwasin handru en! Ano, ou ala mirihik ta ndrahune gok tan, arile iy satou ou, ma iy sala tanan ou labai. Ou atondrok an aliy winiya le iy aimon nyamon ma a-un gwa tan ano labai en!
RUT 3:4 Buku iy manyah in andri, anya kamadin badeh, ou anyolom ndrahunen ta matinou kamwenen. Buku ou atou iy ndramadin tuk badeh, ou ala sihiy kolau ta katin ki-iu, ano ma ou amadin an hamon ta katin. Ano kameh iy barasehek budon tan barawek tam ai.”
RUT 3:5 Rut anya, “Mwasin, jo ndranuhun bohom, i dah kameh jo in le ta budon tam baden ai.”
RUT 3:6 Ano Rut edek ili ndrahune gok tan ta aleben bali, i buku le nyanan Nawomi ndrasihidiy tan.
RUT 3:7 Bowas aimon nyamon ano, eme ma nyamon sekeyani iy, ma bwidiy madan anya kamadin. Iy eme edek ili akahei iy in bata bali marakon iri tukumwiy i se badeh, ma iy amadin. Rut anyolom iy ano badeh, iy edek amwunum le ili sihiy kolau ta katin iu, ma iy amadin in katin.
RUT 3:8 Ili ben alih badeh Bowas soro-on ma iy anya katobolowe iy, eme ma manin atur ta atou badih ari amadin in katin.
RUT 3:9 Bowas eme aloh, “Ou are lau?” Rut eme asumon, “Jo Rut, jo badih ta gok tam ari ai. Jo tanak, ou badeh badu hawe Elimelek. I dah kameh jo aso-ok ou atondrok jo, ma ou aseben jo, ma jo kewek tam ai.”
RUT 3:10 Bowas anuhun boho Rut ano iy eme tiye i ta Rut i buku doh: “Laban nyosowaniy ou. Naduk, kandriyen ou amekes eme tek badeh, udu bwele-e kandriyen mara-ei ou amekes i ta nyanam Nawomi ma bwena handru. Ou basilah ari ndramak loweu bwe eh! Iy nadu batun, deh, nadu batun bwe deh, ou a tasou a tan.”
RUT 3:11 Ano Bowas anya, “Mwasin, Rut ou sanoh. Lau marakon an bolo kon dah badeh tanan ou badih ari mwasin. Saba lakou ou aso-ok badeh, jo winiyan.” Boas anya, “Badeh handru, jo badeh badu hawem, ma jo badeh kameh atondrok ou.
RUT 3:12 Arile ndramak ari udu kede-eh badeh, badu hawem handru ai. Jo badeh bwe.
RUT 3:13 Mwasin, i dah kameh ou ado. Bi-i ma ndraben talu baranuhun iy ndramak doh. Buku iy abudon ta atondrok ou eh, mwasin. Buku bwe eh, i dah kameh jo atondrok ou ai. Sahou tek badeh handru labai. Laban badeh ndratanan, kabwe. Abo, ou ala hamon amadin winiya le mandraben.”
RUT 3:14 Eme iy ili hamon amadin in hawen ili winiya kon aleu. Rut badeh bwalen iri lau atou iy, eme iy amak mandraben handru en, tasah Bowas bwalen ari lau i tanan ta Rut udu hawen.
RUT 3:15 Bowas anya, “Rut, ou talahaniy ra-ei kolau tam ki-in andri.” Rut eme bwidiy i buku le bohon oh. Bowas eme solowei bali ili bwele-e kolau nane dah. Maha-an ta bali doh asahan kilo ma lunoh. Bowas eme aseben iy suriy ili konan. Ano Rut tuwiy ma iy iu ili hamon ili kon tinan.
RUT 3:16 Rut ili isos kon hawe nyanan. Eme Nawomi ndremenya iy, “Naduk, ou amekes i buku sah handru?” Rut eme asehek i ta Nawomi ta iri lakou marakon Bowas amekes i tan.
RUT 3:17 Rut anya, “Iy bwalen jo eme hamon hawem leleyah, iy eme anyuhiy na talu bali dah.”
RUT 3:18 Nawomi anya, “Ou ado le, anyolom saba lakou handru kameh asahan. Na len dah kameh iy winiya bamunyau bwe, winiya le sahou ma budon tan marakon amwenen.”
RUT 4:1 Bowas eme edek ili manyah udu mada san i kon tinan, ndrahune iri ta atukum. Iy manyah udu le badeh, iy anyolom i ndreh nane badu hawe Elimelek oro dah edek eme. Eme Bowas aloh iy, “Borak, ou ame, talu kamanyah sese o.” Iy eme edek ili manyah udu hawen.
RUT 4:2 Ano Bowas ili andrei oro kabin ma ronoh badu bolo kon tinan dah ame manyah ado hawe uru ale. Oro ame manyah ado andri.
RUT 4:3 Ano Bowas asehek i ta boran, “Nawomi mene udu kon tiri Mowap, iy badeh ndrame hamon. Iy aso-ok ari ndramak kasihinei munyak mene ta bora to Elimelek.
RUT 4:4 Eme ma jo anya kanuhun ou ta aliy. Buku ou aso-ok eh, mwasin, ou sihinei na le dan, udu mada oro kabin ma ronoh manyah kede-eh. Buku ou bwalem eh, ou asehek kamwenen, tasah ou le badeh kabwai. Buku ou bwe eh, badeh kameh jo ai.” Eme iy ndreh dah anya, “Jo kame isih munyak doh.”
RUT 4:5 Bowas eme tiye i tan anya, “Buku ou kameh asih munyak udu mine Nawomi uru nyau badu Mowap, mwasin, ou andrei Rut ale kewek udum. I dah kameh munyak kudu ndra mine ado lowa iy ndramak mene ndramak ndra-au.”
RUT 4:6 Ndreh dah anya, “Anya i buku baden eh? Jo winiyan ta isih munyak badeh bwai. Jo bwalek ta apou iri lokowak ili ta naduk oro amwenen hawe nadu ndramak ari ja. Jo kameh bwai, ou sihinei ki tam ai.”
RUT 4:7 Kandriyen tiri Isra-el bwena ta apou, o ta adeu, o ta akohok munyak badeh, i buku doh: Buku sahou amwenen badeh kameh ndramak ari kameh tolowei ku-i katin iu, iy atehei ili ta ari ndramak ja. I doh ta leheya munyak doh ndra tan.
RUT 4:8 Ndreh nane dah asehek ili ta Bowas, “Mwasin, ou sihinei ai.” Iy eme tolowei ku-i katin iu, iy eme atehei i ta Bowas.
RUT 4:9 Ano Bowas asehek i toro kabin ma ronoh dah ma lau rayah ja, “Aha marakon ndranuhun, ma aha ndranyolom, Jo badeh ndrasihinei lakou mara-ei ta Elimelek, ma nadun uru Malon uru Kiliyon udu mine Nawomi.
RUT 4:10 Jo asehek i buku doh: Rut badeh badu kon tiri Mowap, iy badeh nyawe Malon, Jo kameh andrei iy i uduk. Jo amekes i buku doh ta iri lokowa Malon badeh, kudu ndra hawe nyawen. I buku nyaran in ta munyak ma i dah kameh nadun oro winiya bamaniy bwe. Buku na len dah aha marakon ndranyolom.”
RUT 4:11 Oro kabin ma ronoh nane dah ma iri lau mari anya, “Ehe! Ahi ndranuhun, ma ahi ndranyolom. Ahi asolom Laban kameh kasebenei iy badih badeh ewek asiu tam. Iy ki le buku Rejel uru Leya. Uru badeh tuwiy nah solo-an labai, eme bwidiy lau badu Isra-el i sola labai. Ou kameh asahan nadu batun, badu boho kamen ta Eparata, bolo Betlehem kameh nyaram le kabwe.
RUT 4:12 Laban winiya atehei ta ah nah solo-an, ma lundriyem oro winiya asahan a tinan i buku lundriye Peres, nadu Juda uru Tamar mwan.”
RUT 4:13 Bowas eme andrei Rut i udun, ma iy eme andrei iy ili asiu tan. Laban atehei nyosowan i ta Rut, ma Rut nah udu tan. Eme ma iy tuwiy nah mwan.
RUT 4:14 Iri badih ame asehek i ta Nawomi, “Katutuniy nyara Laban. I deh, iy ndratehei nah ari mwan kede-eh ndra nadu bwiliyem ta aseben ou. Ma nyaran kameh iri Isra-el winiya bamaniy bwe.
RUT 4:15 Nyanam badeh aso-ok ou labai! Ma iy badeh bwidiy gok tam solo-an labai, bala buku ndro taloh nadum badu ndrinem amwenen bwe. I deh, iy ndratehei tam nah ari ma nah kede-eh kameh bwidiy manyah tam hamon kameh udu mwasin, ma iy tondrokei ou winiya le imek tam.”
RUT 4:16 Nawomi eme bwese-ei iy, tukuniy iy udu batalan ma iy tondrokei iy.
RUT 4:17 Iri badih badu kon doh badeh asehek anya, “Nawomi badeh ndratuwiy nah mwan ari.” Eme oro badih nane ame tondrohaniy nyaran ili Obet. Eme Obet badeh i tama Jesi, eme ja Jesi i tama Debit.
RUT 4:18 I dah Sare tubu Debit oro udu ndrabada Peres eme asahan ta Debit: Peres tuwiy Hesron, Hesron eme tuwiy Ram, Ram eme tuwiy Aminadap, Aminadap eme tuwiy Nason, Nason eme tuwiy Salmon, Salmon eme tuwiy Bowas, Bowas eme tuwiy Obet, Obet eme tuwiy Jesi, eme ma Jesi tuwiy Debit.
JON 1:1 Laban asehek sahou i ta nadu Amitai nyaran Jona.
JON 1:2 Laban tiye i buku doh: “Jo aso-ok ou suriy ou, ou ala bolo kon tinan Ninibe. Ou tiye sahou boto-on kili tiri mwan ma badih ki buku doh, ‘Laban ndranyolom aha amwekes kandriyen ndra-in solo-an labai.’”
JON 1:3 Ano le badeh, Jona suriy iy, iy atobwak ta Laban. Iy atobwak ili kon tinan Jopa. Iy ili badeh iy anyolom ndron ta jam ra-ei badeh, alokou ta sakaliye kili Tasis. Iy ili ndremenya ndramak ta atondrok ndron. Eme ndramak ta atondrok ndron aso-ok, ano iy tiye Jona ta isih ndron ta iy ili bolon. Iy sihinei ndron ma iy sandroh ili bolon ta ili Tasis. Ano ndron alakak ta ili Tasis.
JON 1:4 Eme Laban bwidiy jor abakak udu no-o ndron toro. Jor eme bwidiy bayau atohou a tinan, ma bwidiy ndron anya katahan.
JON 1:5 Iri lau ta ndron nane dah ndranoh ndrandra-i labai. Iri ame aden ili ta kindrei tiri labai. Ano, oro ame sihiy bolo ndron, oro akeh lakou raon ili bolo bayau, ta amwekes ndron katelebek. Arile Jona ndramadin tuk in bolo ndron andri handru on!
JON 1:6 Ndramak tinan ta atondrok ndron dah ili andri bolo ndron, iy mete-ei Jona. “Ou amadin ta sah? Ou amak, ou asolom kili ta kindrei tam. Sebwe kindrei tam kameh winiyan anuhun to, ma iy winiya aseben to samak.”
JON 1:7 Eme oro lau ta ndron asehek sahou boto-on labai, anya, “Abo, kandrei nyara taha marakon ado bolo ndron dah, katukumwiy kise, kanyuhiy kili bolo ari ndrom, ano kasoroya, buku nyara are lau taku badeh, i doh iy le ai.” Eme oro soroya ili badeh, nyara Jona taku.
JON 1:8 Ano le badeh oro lau ndremenyaniy Jona, “Abo, ou tiye taso, ou bwidiy saba lakou handru? Buku sah handru laba jor ndra-in atohou eme bwele-e to? Abo, ou tiye taso, saba gok tam handru? Ou badu heh handru? Saba kon tinan tam handru? Ou badu hawe lau heh handru?”
JON 1:9 Ano Jona tiye i toro, “Jo badeh badu Hiburu. Jo inoh Laban Kindrei badu kandrah. Iy badeh Kindrei, iy bwidiy ndras ma kon munyak.”
JON 1:10 Jona eme tiye i toro, “Jo badeh atobwak ta Laban.” Eme badeh oro lau ta ndron dah anuhun, eme ma bwidiy oro anoh andra-i labai. Eme oro tiye i ta Jona anya, “Ou badeh, bwidiy kandriyen ndra-in handru en! Tasah ou atobwak ta Laban!”
JON 1:11 Jor ma bayau atohou ili laba tinan le ai. Eme oro lau ta ndron dah ndremenyani Jona, “Aso kamwekes saba kandriyen handru kewek tam, ta bayau kameres ma aso ma ndron kasakaliye kudu mwasin?”
JON 1:12 Jona tiye i toro, “Ado kabwese-ei jo, kakahei jo kili bolo ndras. I dah kameh ma jor amondrei ma bayau ameres. Tasah, jo le adeh bwidiy, ma jor atohou eme bwele-e to.”
JON 1:13 Arile oro bakahei iy bala bolo ndras bwe. Oro ame a ta bahau anya kabahau oro kala amik, arile winiyan bwe. Jor ma bayau abadok udu le gwek ai.
JON 1:14 Oro ame aden ili ta Laban. “Laban, aso asolom ou; ou sadiy aso buku aso akahei Jona kili bolo ndras. Tasah iri budon dah, tam. Eme ma, bwidiy iri lakou mari asahan.”
JON 1:15 Ano oro bwese-ei Jona, eme oro akahei iy ili bolo ndras. Eme ma jor amondrei ma bayau ameres.
JON 1:16 Oro ame anyolom, ma oro anoh Laban tinan labai. Oro adi katin haka ari i ta salom, ano oro atudun Laban, ma tandrakan ta a hamon tan.
JON 1:17 Eme badeh Laban tiye laba tine kon ni ari eme le badeh, sakalamiy Jona iu ili bolo ndrinen. Jona in bolo ndrine ni doh winiya taloh len, taloh ben.
JON 2:1 Jona udu bolo ndrine ni badeh, iy asolom ili ta Laban Kindrei tan.
JON 2:2 Jona anya, “Laban, jo ndrandra-i ai. Jo aloh ewek tam, eme ma ou anuhun bohok. Jo ale udu kon ndra-in tiri lau ndramak. Jo eme eden ewek tam, ma ou ame anuhun ndrelen tek.
JON 2:3 “Ou akahei jo, iu amai ili bolo ndras andri handru on! Ndras tubuluhiy jo amai mara-ei. Eme ou bwidiy goi atohou eme bwele-ek.
JON 2:4 Jo eme asehek i buku doh. Ou ndratikahei jo ndra-au. Arile jo kameh atou asiu tam ndrabun ja.
JON 2:5 “Goi atohou eme bwele-ek, ma bwidiy kohak anya kano. Eme ma ndras tubuluhiy jo mara-ei. Korak badu bolo ndras badeh tabuwiy batuk.
JON 2:6 Jo badeh iu ili andri kati iri mandrei marakon udu bolo ndras. Budon tek badeh anya, jo kameh erah udu gwek. Arile Laban, ou Kindrei tek handru. Ou andrei kohak eme hamon ja.
JON 2:7 Laban, jo atona buku jo anya kimek, eme bwidiy jo abudon ou ja. Ma salom tek ewek asahan tam udu bolo asiu tam ndrabun handru.
JON 2:8 “Iri lau badeh atubwa bwilindru-u iri i ta kindrei ta wendreya, iri maniy san mwasin ta an hamon tam.
JON 2:9 Arile jo anya kiyah wariy ta atudun nyaram, ma jo anya kedeu salom kewek tam. Lakou mari jo ndratandrakan ndrawek tam badeh, kameh jo kabwidiy. Laban, ou le ari, badeh, ou andrei ahi ame hamon hawem, ma ou atehei koha ahi eme hamon ja.”
JON 2:10 Eme ma Laban tiye ni, ma ni eya ili babi ma iy amuriy Jona ili loke bada babi.
JON 3:1 Udu rasan ja badeh, Laban asehek sahou ili ta Jona. Laban anya,
JON 3:2 “Ou suri ou, ou adek ala bolo kon tinan tiri Ninibe. Sahou jo ndrasehek tam mene badeh, jo aso-ok ou ala tininiy kili tiri badih ma mwan badu bolo kon tinan Ninibe.”
JON 3:3 Jona badeh in le hamon ta boho Laban. Eme ma iy iu ili Ninibe. Ninibe badeh, kon laba tinan labai. Buku ndramak anya kedek kudu bilisiu kili bilisiu badeh, winiya len taloh.
JON 3:4 Jona edek ili bolo kon tinan Ninibe. Len ari ma buruwen badeh, iy edek le ai. Iy ili isos alih le badeh, iy asehek i tiri lau ai. Iy anya, “Buku len ma hanoh ano badeh, kon Ninibe kameh bohon ili andri.”
JON 3:5 Eme badeh iri lau mwan ma badih badu kon Ninibe badeh anuhun sahou ta Kindrei udu boho Jona. Iri ame atehei budon tiri marakon i le ta Kindrei. Iri anya, “Taha kabeles taha ta nyamon. Taha lau bwele-en ma iri lau ado baha taha badeh, kasin awin ta tikisiy, ta leheya tikisiy tataha.” Iri ame bwidiy i buku iri lau tinan tiri tiye.
JON 3:6 Sahou ili asahan le ta Kabin tiri Ninibe le badeh, iy suriy iy eme len ta koyeu tan. Iy asiniy awin tan mwasin iu, iy eme asiniy awin ndra-in ta tikisiy ili la-un. Iy ili manyah udu bolo koloweh, ta leheya tikisiy tan.
JON 3:7 Iy eme tiye sahou boto-on labai ili bolo kon tinan Ninibe i buku doh: “Jo Kabin ma oro lau tek, aso aso-ok aha lau mwan ma badih kabeles aha ta nyamon. Aha mwan ma badih, iri bulumakau, iri sipsip, taha badeh saimon nyamon ma sa-un gwa.
JON 3:8 Taha marakon ma iri katin haka tataha badeh, kadeu awin ndra-in ta tikisiy kili bwele-e taha. Ma taha kaden boto-on kili ta Kindrei, ta kandriyen ndra-in taha amwekes, ma taha kamaniy iri kandriyen ndra-in ki-iu. Taha katehei budon kili ta Kindrei le ari.
JON 3:9 Buku taha ka-en hamon tiri budon marakon don eh, sebwe Kindrei kameh kamaniy budon ta losen, ma taha winiya bamak bwe.”
JON 3:10 Kindrei eme anyolom iri, iri maniy kandriyen ndra-in tiri nane iri amwekes, eme ma iy tikisiy iri, ma iy bamwekes maha-an bala tiri bwe, i buku ma bwena iy anya kamwekes.
JON 4:1 Arile Jona badeh basekesek bwe, eme ma bwidiy ndrinen ibolosen, tasah Kindrei batubuniy boho kon bala andri bwe.
JON 4:2 Jona eme asolom, “Laban, jo tanak, i dah kameh lakou asahan. Jo i tanak badeh udu ndra kon tek, i doh le badeh bwidiy jo mene atobwak ili Tasis. Jo tanak ou badeh, Kindrei. Ou ta leheya kandriyen ta tikisiy. Ou winiya babolosen suwi bwe. Tikisiy tam badeh tinan labai. Jo tanak, ou kameh maniy kandriyen ndra-in, ma ou winiya bamwekes maha-an bala toro bwe.”
JON 4:3 “Laban, jo anya kandremenya ou, jo aso-ok ou andrei jo kimek ki-iu. Jo bwalek ta udu. Buku jo kimek, i dah kameh mwasin ai. Buku jo bamak bwe badeh, i dah kameh ndra-in.”
JON 4:4 Laban eme asumon sahou ta Jona anya, “Ou abolosen badeh, katin sah?”
JON 4:5 Jona eme edek ili manyah udu loboho an eme loken. Iy eme bwidiy nadu mandron ra-em ta iy in korohan ma iy atondrok, ma iy anya kanyolom saba lakou handru kameh asahan ta kon tinan Ninibe.
JON 4:6 Laban Kindrei eme bwidiy badamalou ari ateh ma seselek ili bwele-e mandron ta Jona. La-u badamalou dah eme turukiy an basulumwiy batun bwe, eme bwidiy Jona sekesek handru en.
JON 4:7 Udu mandraben, an eme loken. Kindrei eme tiye koromweh ari ili iniy kandro badamalou dah, ma malou dah asara.
JON 4:8 An eme loke udu le alih badeh, Kindrei eme ja bwidiy jor rai nyarahan labai eme ma an nyarahiy batun ma bwidiy madan abuluw, ma bwidiy iy nyamun bwe. Jona anya, “Jo kimek badeh kameh mwasin ai. Buku jo bamak bwe, badeh kameh ndra-in.”
JON 4:9 Kindrei eme tiye ta Jona i buku doh: “Badamalou badeh asara eme bwidiy ou abolosen neh? Ou abolosen badeh, katin sah?” Jona eme asehek sahou ja, “Ehe, losen tek badeh amwenen. Jo ibolosen badeh, winiyan bwidiy jo kimek ki-iu.”
JON 4:10 Eme Laban tiye i ta Jona i buku doh: “Badamalou badeh ateh na ben, iy asara na ben ari ja. Ou bamwekes ari lakou bala tan bwe, ma ou babwidiy iy batinan bwe. Arile ou tikisiy badamalou badeh, tinan labai.
JON 4:11 Badeh kameh tikisiy tek tinan ili ta kon Ninibe, tasah Ninibe badeh kon tinan labai. Ma kane iri badih ma mwan udu bwele-e kane 120,000 ja. Ma bulumakau tiri badeh solo-an labai.”
MAT 1:1 Idah nyara tubu Jises Krais, nadu Debit, iy ale nadu Abraham.
MAT 1:2 Udu bada Abraham eme isos bada kabin Debit, kane tubun oro mari ndratorowenei: Abraham atehei Aisik, Aisik atehei Jekop, Jekop atehei Juda hawe nadu tinen oro mari.
MAT 1:3 Ano Juda atehei Peres uru Sera, tine uru badeh Tamar, Peres atehei Hesron, Hesron atehei Ram,
MAT 1:4 Ram atehei Aminadap, Aminadap atehei Nason, Nason atehei Salmon,
MAT 1:5 Salmon atehei Bowas, Bowas badeh tinen Rahap, Bowas atehei Obet, Obet badeh tinen Rut, Obet atehei Jesi,
MAT 1:6 Jesi atehei kabin Debit. Udu kabatana kabin Debit eme isos bada len iri tawi iri lau badu Isra-el au ala bolo kou ala Babilon, nyara tubu iri ale ndratorowenei: Debit atehei Solomon, ya tinen bwena badeh udu Uraya.
MAT 1:7 Solomon atehei Rehobowam, Rehobowam atehei Abijah, Abijah atehei Asa,
MAT 1:8 Asa atehei Jehosapat, Jehosapat atehei Jehoram, Jehoram atehei Usiya,
MAT 1:9 Usiya atehei Jotam, Jotam atehei Ahas, Ahas atehei Hesekaya,
MAT 1:10 Hesekaya atehei Manase, Manase atehei Amon, Amon atehei Josaya,
MAT 1:11 Josaya atehei Johowakin ma nadu tinen oro. Ma udu bada len doh badeh, iri tawi iri Isra-el a bolo kou ala Babilon.
MAT 1:12 Udu bada len tiri Isra-el ndrame len ta bolo kou udu Babilon, eme isos bada len ta Jises Krais asahan, nyara tubun oro mari badeh ndratorowenei: Johowakin atehei Seyaltiyel, Seyaltiyel atehei Serubabel,
MAT 1:13 Serubabel atehei Abiyut, Abiyut atehei Eliyakim, Eliyakim atehei Asor,
MAT 1:14 Asor atehei Sadok, Sadok atehei Akim, Akim atehei Eliyut,
MAT 1:15 Eliyut atehei Eliyesa, Eliyesa atehei Matan, Matan atehei Jekop,
MAT 1:16 Jekop atehei Josep, Josep udu Mariya, ya Mariya tuwi Jises, aloh iy Krais; Kindrei suni iy eme ta akohok iri lau tan ame hamon.
MAT 1:17 Ya idoh sare tubu Jises Krais udu ndra bada Abraham eme isos bada kabin Debit sare oro asahan ronoh hahuw (14). Ya ronoh hahuw (14) ja udu bada kabin Debit ili isos bada iri Isra-el ado bolo kou ado Babilon, ya ronoh hahuw (14) ja udu bada iri Isra-el ado bolo kou ado Babilon eme isos bada Jises Krais asahan.
MAT 1:18 Idah sare Jises Krais eme asahan. Tinen Mariya san tan ta tasou ili ta Josep, arile bwena turu, uru bala tasou bwe le, Mariya badeh ndratanan iy kameh tuwi nah ari na boto-on ta Malawin Ndrabun.
MAT 1:19 Josep badeh iy ndramak ari ta amekes kandriyen mwasin, arile iy bwalen ta asehek Mariya eme lewan ta lau mari sanuhun; eme ma iy amekes budon ta iy kisan tasou turu ki-iu kamunum le.
MAT 1:20 Arile iy abudon kahis le badeh, angelo ari ta Kindrei asahan ta Josep udu bolo ameh ya asehek i buku doh, “Josep nadu Debit, ou sanoh ta akohok Mariya ewek udum. Tasah, na boto-on ta Malawin Ndrabun Mariya susune nah.
MAT 1:21 Iy kameh tuwi nah mwan, ya ou kameh tondrohani nyaran Jises, tasah iy kameh sebenei iri lau ta karei ma lomondra ndra-in.”
MAT 1:22 Lakou mari doh asahan ta amekes amwenen sahou ta Kindrei iy ndrasehek ndrala tiri propet asahan ili handru:
MAT 1:23 Badih ari bamadin hawe mwan bwe kameh susune nah ya iy kameh atehei nah mwan, ya idah kameh iri lau aloh iy Imanyuwel (moson i buku doh, “Kindrei udu hawe taha”).
MAT 1:24 Ya Josep amak eme loken, iy andrei Mariya i udun, i buku none sahou angelo ta Kindrei ndrasehek tan ta amekes.
MAT 1:25 Arile, iy bamadin hawe udun bwe winiya len ta Mariya atehei nadun mwan. Eme ya Josep tondrohani nyaran Jises.
MAT 2:1 Hamon ta Jises ndrasahan udu Betlehem udu bolo kon tinan Judiya, udu bada len ta kabin Herot, oro lau ta tanan badu loboho an eme loke ame Jerusalem,
MAT 2:2 ma oro ndremenya, “Iy nah nane ndrasahan ma iy kameh asahan kabin tiri Juwis, iy ndraheh? Aso anyolom ndrau tan anya udu loboho mada an eme loken, eme ma aso ame dah ta atudun iy.”
MAT 2:3 Kabin Herot anuhun, eme ma manin atur labai, ma mani iri lau mari badu Jerusalem atur ale.
MAT 2:4 Eme iy aloh iri lau ado batu tinan tiri pris ma iri lau tanan ta leheya batanau malen mari ame le se ma iy lelen oro, “Mesaya kameh asahan heh?”
MAT 2:5 Eme oro lau nane dah tiye anya, “Udu Betlehem bolo kon tinan Judiya. Tasah propet, lau ta atiye sahou ta Kindrei ndratorowenei:
MAT 2:6 Arile ou Betlehem ado bolo munyak Judiya, ou basahan hamon toro kon ale nyara oro tinan udu bolo munyak Judiya bwe handru. Idah kameh ndramak ari badu hawe aha amwenen kameh asahan, ma iy kameh asahan ndramak ta atondrok iri lau tek Isra-el.”
MAT 2:7 Ano Herot aloh oro lau ta tanan nane amunum le ame, ma iy ndremenya oro ta len amwenen ta ndrau asahan.
MAT 2:8 Ano iy suni oro ala Betlehem, ma iy tiye i toro i buku doh, “Ado kala kasilah kamwenen ta iy nah badeh. I buku none ado ala silahei iy, sahou keme tek ja. Ya jo ale, anya kewek katudun iy.”
MAT 2:9 Oro anuhun sahou ta kabin Herot, ano ma oro au, ya ndrau mene anya udu loboho an eme loke, ili ja anya udu bwena toro ili udu bwele-e kon amwenen iy nah dah asahan udu aliy.
MAT 2:10 Na len oro atou ndrau anya, oro sekesek handru.
MAT 2:11 Oro ame asos asiu, oro atou nah dah udu hawe tinen Mariya, eme ya oro atehei bwili ndru-u oro i andri, ma atudun nadun. Ano oro aseh kohei kohoya luk toro, ma adeu gol hawe suluw ta amekes kasu-er ili manahun mwasin, ma hawe kei ta suluw aloh mer.
MAT 2:12 Na ben oro amadin ma oro ameh Kindrei batanau oro sala hamon ja sala hawe kabin Herot, oro kala hamon kala kon toro kala san rasan ja.
MAT 2:13 Udu bada len oro anya ka-au le badeh, angelo ta Kindrei ari eme tiye ta Josep udu bolo ameh na ben. Iy tiye i buku doh, “Ou amak! Ou andrei iy nah hawe tinen, ma ado katobwak ka-au kala Ijip. Ado kado gwek winiya jo le baratiye ou, tasah Herot kameh asilah iy nah dah ta idi iy kimek.”
MAT 2:14 Josep amak eme loken iy andrei iy nah dah hawe tinen ma oro atobwak na le ben au ala Ijip.
MAT 2:15 Iy udu gwek winiya le kabin Herot imek, ma idah mesekei sahou asahan handru ma amwenen le i buku Laban ndrasihidiy i ta propet: “Jo aloh naduk eme len ta Ijip.”
MAT 2:16 Herot i tanan oro lau ta tanan badeh, ndrawendreyani iy. Eme ma iy ibolosen handru ma iy atehei sahou boto-on i tiri lau ta bahun tan ta kadai iri nah mwan mari badu Betlehem. Iri nah doh ala jaha tiri udu kalama jaha la-uh eme andri. Iy atehei sahou ta adai nah mwan mari kamak, amwenen ta len iy i tanan ma iy seleyani oro lau ta tanan.
MAT 2:17 Eme ma, sahou mene propet Jeremaya asehek badeh, asahan handru ma amwenen le:
MAT 2:18 “Bohon aloh udu kon Rama, ndrelen tinan ma hawe tikisiy tinan. Resel eden ndranye nadun oro, eme ma iy bwalen lau samekes ndrinen samwenen ja ai, tasah nadun oro ndrano ndra-au.”
MAT 2:19 Hamon ta Herot imek, angelo ari ta Kindrei asahan ta Josep udu bolo ameh udu Ijip,
MAT 2:20 ma iy tiye i buku doh: “Ou amak, ou andrei iy nah kede-eh hawe tinen, ado ka-u kala hamon kamanyah kado munyak Isra-el. Oro lau mene anya kanone kadai iy nah dah kimek, oro ndramak.”
MAT 2:21 Eme ya Josep amak iy andrei iy nah dah ma hawe tinen oro au ala hamon ala munyak Isra-el.
MAT 2:22 Arile Josep anuhun Akela-us ja badeh, atondrok Judiya, ma iy akohok ndrahune taman Herot. Eme ma bwidi iy inoh ta ili loboho doh. Arile, udu bolo ameh ta Josep, Kindrei batanau iy ta oro ka-au kala loboho Galili.
MAT 2:23 Eme ma iy ili manyah udu kon ari aloh Nasaret. Ya sahou dah asahan ma amwenen le i buku le iri propet ndrasihidiy: “Idah kameh iri aloh iy lau badu Nasaret.”
MAT 3:1 Udu bolo oro len doh Jon ta alomwa eme bwena atiye sahou ma asehek sahou udu bolo kon lomale an ta Judiya.
MAT 3:2 Ma iy asehek i buku doh, “Aha katobolowe ndrine aha, tasah tondrok ta Kindrei ndrame mirihik.”
MAT 3:3 Idah iy le propet Aisaya asehek ta nyala aliy, “Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.’”
MAT 3:4 Jon isin awin iri amekes na lami kamel, ma iy edeu ku-i bulumakau udu bada ndrukulun i buku malou ta aseu awin tan. Iy badeh, kaniyan sabaye ma hawe bwirik badu lokei.
MAT 3:5 Iri lau badu Jerusalem, badu Judiya ma iri lau badu kon mari badu loboho Jodan ame hawen.
MAT 3:6 Eme ma iri asehek budon ma lomondra ndra-in ta karei tiri i ta Kindrei, ma iy alomwa iri ta sikine kandriyen ndra-in tiri iu udu gwa Jodan.
MAT 3:7 Arile iy atou ja iri Parasi ma hawe oro Sadusi ame le hawen, ta iy kalomwa iri, eme ma iy tiye i toro Parasi ma Sadusi i buku doh: “Ado nadu mwak ndra-in. Are lau tiye ado ta atobwak au a len ta losen ta Kindrei kameh eme?
MAT 3:8 Ado kadeu nah ma ado kabatanau oro ta oro katubuni ndrine oro ta kandriyen ndra-in toro ki san ta tikisiy.
MAT 3:9 Ya ado sabudon ado ma satiye ado sala buku doh: ‘Aso badeh tama aso Abraham, eme ya aso anya, aso mwasin le ai.’ Arile bwe. Jo katiye tado kamwenen: Kindrei winiyan mesekei bek dah asahan i nadu Abraham.
MAT 3:10 Samen kamondrou ta Kindrei badeh, ndrala ndrado mwe-e kei, ya iri kei ala bato-ou sali iri bala mwasin bwe, idah kameh amundroh iri ala andri, ano ma akeh iri au ala bolo jih.
MAT 3:11 Jo alomwa ado na gwa ta leheya ado badeh, ndratubuni ndrine ado ma ado tikisi kandriyen ndra-in tado. Arile ndramak ari in hamon tek eme kameh, boto-on tan badeh, sakalawi boto-on tek ja. Jo badeh, mwasin handru bwe, ta bwese ku-i katin bwe. Iy kameh inyu ado na boto-on ta Malawin Ndrabun ma aleben ado buku jih.
MAT 3:12 Iy andrei lakou tan udu minen ta asorok bada kalom eme len lewa salin ma iy kameh atukum sali kalom tan ili asiu ta asumwe nyamon, ma idah kameh iy asun iri bada kalom ili bolo jih ta winiyan bamak bwe.”
MAT 3:13 Jises udu Galili eme amwenen ili gwa Jodan ta Jon kinyu iy.
MAT 3:14 Arile Jon bwalen, eme iy tiye i buku doh, “Ou nane anyu jo ah, anya jo kinyu ou ja?”
MAT 3:15 Eme ya Jises tiye i buku doh, “Ou anyu jo ma idah kameh talu mesekei iri lakou Kindrei anya talu kamekes.” Eme ma Jon aseken.
MAT 3:16 Jon ta alomwa anyuwi Jises le badeh, ma Jises eme loken ta gwa Jodan ma nawin bwe kandrah asak, ma iy atou Malawin Mwasin ta Kindrei atah i buku ban eme andri amwenen le bwele-en ma manyah udu bwele-en.
MAT 3:17 Eme ya aloh ari udu kandrah tiye i buku doh, “Badeh naduk handru, jo aseken iy labai, iy le mesekei jo sekesek handru tan.”
MAT 4:1 Ano Malawin Ndrabun andrei Jises iu ili kon lomale an ta balik kanone iy.
MAT 4:2 Hamon ta Jises abeles iy ta nyamon udu bolo hanoh (40) len hanoh (40) ben eme ma iy imeson.
MAT 4:3 Ya balik eme asahan hawen, ma iy tiye i buku doh, “I buku none ou anya ou Nadu Kindrei, ou asehek sahou kili toro bek dah kasahan jabi ramen.”
MAT 4:4 Eme ya Jises tiye i buku doh, “Ndratorowenei, ‘Lau winiyan balelei le jabi ramen ta samak bwe, arile na sahou mari eme len asahan boho Kindrei.’”
MAT 4:5 Ano balik andrei iy, uru au ala Jerusalem kon ndrabun, eme ma balik atehei iy ales udu bwele-e no-o asiu tinan ta Kindrei loken on.
MAT 4:6 Ano balik tiye i tan i buku doh, “Ou anya ou Nadu Kindrei handru eh, ou akahei ou ado dah ala andri. Tasah i buku ndratorowenei, ‘Kindrei kameh edeu sahou batanau ili tiri angelo tan ame ta aseben ou. Ma idah kameh, iri bwese-ei ou, ma bek winiyan batahi katim bwe.’”
MAT 4:7 Jises tiye i buku doh i tan, “Ndratorowenei ale, ‘Ou satehei Laban Kindrei tam sala ta bolo none.’”
MAT 4:8 Ano ja balik andrei iy uru au ala bwele-e mandrei ari lawe-en, eme ma balik leheya iy ta boto-on ma lomadan tiri kon tinan mari badu munyak, iri kabin atondrok.
MAT 4:9 Eme ma balik tiye i ta Jises i buku doh, “Jo winiyan atehei lakou mari dah ewek tam, i buku ou atehei bwili ndru-um i andri keme tek, ma atudun nyarak.”
MAT 4:10 Jises tiye i tan i buku doh, “Ou a len, Satan, tasah ndratorowenei ale, ‘Ou atudun le nyara Laban Kindrei tam, ma ou a-en hamon tan le ari kabwe.’”
MAT 4:11 Ano ya balik ruwani iy udu, ma iy iu, eme iri angelo ta Kindrei ame bwese-ei Jises ma aseben iy.
MAT 4:12 Na len Jises anuhun iri ndratehei Jon ta alomwa ndrala bolo kou, iy iu ili Galili ja.
MAT 4:13 Ano iy ruwani Nasaret ma iy iu ili manyah udu Kapena-um. Ya kon doh udu mirihik ta gwa li ari udu bolo munyak ta Sebulun ma udu bolo munyak ta Naptali.
MAT 4:14 Iri lakou doh asahan ta amekes sahou dah abadok ma i handru i le buku propet Aisaya ndrasihidiy:
MAT 4:15 “Munyak ta Sebulun ma munyak ta Naptali, san amwenen ili ndras amwenen le ta Jodan. Ya Galili badeh, munyak tiri lau badu leheleh,
MAT 4:16 ya iri lau badeh ado bolo lulik arile iri ndratou lomadan tinan ndrasahan; udu bwele-e oro lau ale ado bolo munyak udu koroha imek eme ya lomadan ndrasahan tiri.”
MAT 4:17 Udu bada len doh Jises asehek sahou ma bwena handru, eme ma iy tiye i buku doh: “Ado katobolowe ndrine ado, ma ado katikisiy handru ta kandriyen ndra-in tado, tasah tondrok ta Kindrei ndrame mirihik.”
MAT 4:18 Jises edek kabede gwa li Galili ma iy atou Saimon, iri aloh iy ale Pita, uru nadu tinen Enduru. Uru akeh kubwin ili bolo gwa li ta akohok ni, tasah uru lau ta bwisir ta ni.
MAT 4:19 Eme Jises tiye i turu i buku doh, “Ah kame ka-en hamon tek. Ya idah kameh jo leheya ah san ta akohok lau.”
MAT 4:20 Eme ya nawin bwe uru ruwani kubwin turu, ma uru au a-en hamon tan.
MAT 4:21 Iy edek ili bwena ja, ma iy atou Jemis nadu Sebedi hawe nadu tinen Jon. Uru ado bolo ndron hawe tama uru Sebedi, lowosa kubwin toro. Jises eme aloh uru,
MAT 4:22 eme ya, nawin bwe uru ruwani ndron ma hawe tama uru udu gwek, ma uru au a-en hamon ta Jises.
MAT 4:23 Jises edek ili loboho Galili mara-ei, leheya ma asehek sahou mwasin ta tondrok ta Kindrei udu bolo asiu ta atukum tiri Juwis, ma iy bwidi iri sik ndra-in mari udu bada iri lau iu.
MAT 4:24 Nyaran ma sihide lahou iy amekes aseker i bolo Siriya mara-ei, eme ya iri lau atiye iri lau sik udu tiri, ma iri lau sik tiri bwidi iri sisi-in labai, ya hawe iri lau balik lolowa iri ma bwidi iri lolo-ou, ma hawe iri lau kati iri ma mine iri winiyan ta bales bwe. Iri tiyani iri lau mari doh ame hawen, eme ma iy bwidi iri lau mari doh amwenen ja.
MAT 4:25 Eme ma iri lau solo-an badu Galili, ma iri lau badu Dekapolis, ma iri lau badu Jerusalem, ma iri lau badu Judiya, ma hawe iri lau badu kon udu loboho Jodan bilisiu ya iri lau mari doh adek a-en hamon tan.
MAT 5:1 Na len iy atou iri lau mari doh iy ili loken bwele-e mandrei, ma iy manyah udu aliy. Eme ya oro lau badu hamon tan ame hawen.
MAT 5:2 Eme ma iy leheya oro, ma iy asehek sahou i toro i buku doh,
MAT 5:3 “Sekesek handru i toro lau ala ado ndra-in ta budon ma hawe manyah toro, idah kameh Kindrei atondrok oro ma oro kameh akohok iri lakou mwasin tan.
MAT 5:4 “Sekesek handru i toro lau ala ado ndra-in ta tikisiy ma ndrelen, idah kameh Kindrei bahabah oro ma oro ado ta sekesek handru.
MAT 5:5 “Sekesek handru i toro lau ala batudun oro ma nyara oro le bwe. Oro kameh akohok iri lakou mwasin badu munyak i buku le Kindrei ndratandrakan.
MAT 5:6 “Sekesek handru i toro lau ala abadok ta asilah budon mwasin ma hawe manyah mwasin ta Kindrei i buku oro ameson ta nyamon ma i buku bale oro amar ta gwa ta a-un, ya idah kameh oro adih handru.
MAT 5:7 “Sekesek handru i toro lau ala abadok ta amekes kandriyen ta tikisi lau, ya idah kameh tikisiy ta Kindrei tinan ili bwele-e oro.
MAT 5:8 “Sekesek handru i toro lau ala budon ma kandriyen toro udu mwasin, ya idah kameh oro atou Kindrei.
MAT 5:9 “Sekesek handru i toro lau ala abadok ta amekes kandriyen mwasin ta mondrei, ya idah kameh iri aloh oro nadu Kindrei.
MAT 5:10 “Sekesek handru i toro lau ala iri lau adai oro ma iri tawi oro ma andrei oro ala bolo kou, tasah oro badeh amekes kandriyen mwasin, ya idah kameh Kindrei kameh atondrok oro ma oro kameh akohok iri lakou mwasin tan.
MAT 5:11 “Sekesek handru ewek tado tasah, iri lau asehek sahou ta bobose ado ma iri adai ado ma iri asehek sahou ndra-in handru ta wasai ewek tado, tasah ado a-en hamon tek.
MAT 5:12 Ya, ado kasekesek, tasah ndramas mwasin udu kandrah kodo-oh abe-en ado. Idoh i le buku san iri lau ndradai iri propet mene ndrame bwena tado.”
MAT 5:13 Jises asehek ili le i buku doh, “Ado kaseben iri lau i buku ndras aseben nyamon ta munyak dah. Arile, i buku nyiminye ndras aliy bwe, ki buku sah handru kameh nyiminye ndras doh kasahan ja? Ndras doh bala mwasin ta i bolo ari nyamon bwai. Mwasin handru ta kakahei ndras doh ki-iu ma lau katisih na kati iri.
MAT 5:14 “Ado kasahan buku lomadan ta lomada iri lau ado bwele-e munyak. Ya, i buku kon tinan ari udu bwele-e mandrei, iy winiyan baton bwe. Iri lau ado len winiyan atou lomadan.
MAT 5:15 Eme ya iri lau telemei sun, iri batehei bado bahandra bwekei bwe. Iri atehei udu ndrahunen loken, tasah lomadan kameh lomatani lau mari ado bolo asiu.
MAT 5:16 I le buku san dah lomada ado kanya kili bwena ta lau. Ya idah kameh iri lau atou lahou tado ma kandriyen mwasin tado, eme ya iri lau kameh sekesek ma atudun tama ado Kindrei udu kandrah.”
MAT 5:17 Jises asehek ili le i buku doh, “Ya ado sabudon sala buku doh, anya jo eme dah ta akeh batanau malen, ma iri propet au, bwe; jo eme dah ta atikah oro au bwe, jo eme dah ta amekes batanau malen abadok ma amekes sahou tiri propet ta Kindrei kabadok ma i handru.
MAT 5:18 “Jo tiye tado handru i buku doh: Idah kameh munyak ma kandrah kameh amai iu. Arile sese kono-o tarou ta batanau malen winiyan bamai ba-au bwe, winiya le lakou mari Kindrei anya kamekes, kasahan i handru.
MAT 5:19 “Ya are lau winiyan banuhun randra sahou nadu bwisik ta batanau malen bwe, ma iy leheya lau ta iri ka-en hamon ta kandriyen tan doh, iy winiyan basahan bala tinan bado ta tondrok ta Kindrei, bwe. Arile, are lau none ma leheya lau ta iri kanuhun ma kamekes batanau malen, iy kameh, aloh nyaran i tinan handru udu bolo tondrok ta Kindrei.
MAT 5:20 “Ya jo katiye tado, ado winiyan ala bolo tondrok ta Kindrei, arile i buku none budon tado handru, ma kandriyen mwasin tado winiyan basakalawi budon ma kandriyen mwasin tiri Parasi ma hawe iri lau ta leheya kandriyen ta Moses bwe, ado winiyan bala bolo tondrok ta Kindrei bwe.”
MAT 5:21 Jises asehek ili le i buku doh, “Ado ndranuhun sahou ndrabatanau ndrala tiri lau rebesem bwena, ‘Ou sadai ndramak samak.’ I buku none are lau idi ari ndramak imek, iy lau doh kameh ales ili ta mada sahou tinan handru.
MAT 5:22 Arile jo katiye handru, i buku none are lau andra-i i hawe nadu tinen, iy kameh ales ili ta mada sahou tinan, ya are lau tiye ili ta nadu tinen i buku doh: ‘Ou badeh, mwasin ta laleyah le,’ ya idah kameh ou ala ales a ta mada sahou tinan ta kansol tiri Isra-el. Ya are lau tiye ili ta nadu tinen i buku doh, ‘Ou lolo-ou,’ ya idah kameh mirihik ou ales ala bolo jih.
MAT 5:23 “Eme ma, i buku none ou anya ala atiye salom tam kili ndrahune salom, ou abudon bwena op, buku nadu tinem badeh iy tan sahou udu tam,
MAT 5:24 ya, ou ruwani salom tam kudu andri bwena ta mada koto-ok op. Ou ala hawe nadu tinem, ou asehek sahou mwasin kili ta nadu tinem, ta leheya ndrine sen tam hawe nadu tinem ndrano ai. Ano ya ou ame barala baradeu salom tam barala bwele-e mada koto-ok ta salom.
MAT 5:25 Buku ari ndramak tan losen udu tam ya iy atehei ou ala ta mada sahou, ou asehek sahou mwasin kili tan suwi na len ah ma la-uh adek san kahis le, bwe kameh iy atehei ou ala mine ndramak ta anuhun sahou, eme ya ndramak ta anuhun sahou atehei ou ala mine iri lulik, ya iri lulik atehei ou ala bolo asiu lulik.
MAT 5:26 Jo katiye tam handru, ou winiyan bame len bwe, winiya le ou sihinei labai na luk in hamon ta maha-an tam.”
MAT 5:27 Jises asehek ili le i buku doh, “Ya ado ndranuhun sahou mene iri ndrasehek, ‘Ou samekes karei hawe badih tasou.’
MAT 5:28 Arile, jo katiye kewek tam, ki buku none ari ndramak kanyolom boto-on kili bada ari badih ta amekes budon ndra-in ta karei kili tan, iy ndramak doh ndramesekei karei hawe iy badih doh ndrado ndrinen kabwe.
MAT 5:29 Ya i buku none madam salin suni ou ala bolo kandriyen ndra-in ta karei, ou holowani madam salin keme len, ya ou akahei ki-iu. Mwasin ta ou holowani madam salin ki-iu, ndra-in ta sakahei ou ma buruwen sala bolo jih ta udu le buku doh.
MAT 5:30 Ya, i buku none minem salin suni ou ta amekes kandriyen ndra-in ta karei, mwasin ta ou saniy ki-iu ya ou akahei ki-iu. Mwasin ta ou sani minem salin ki-iu, ndra-in ta sakahei ou ma buruwen sala bolo jih ta udu le buku doh.”
MAT 5:31 Jises asehek ili le i buku doh, “Sahou ndrasehek kabwe, ‘Ya, i buku none ari lau kisan tasou tan ma katikah udun ki-iu, iy katehei ramen la-ukei ma sahou boto-on in aliy ta asan tasou, ya iy katehei ki minen ta asan tasou.’
MAT 5:32 Arile jo katiye ki buku doh, i buku none are lau kisan tasou tan ma katikah udun ki-iu, ya iy badih tan badeh, bamadin hawe ari ndramak ja bwe, iy badeh, amekes udun i buku badih ta madasan. Iy mwan ale andrei badih ari bwena, udun ndratikahei iy, iy ale amekes kandriyen ta karei.”
MAT 5:33 Jises asehek ili le i buku doh, “Ya idah ado ndranuhun sahou ale ndrasehek ndrala ta lau rebesem bwena ndra-au, ‘Buku ou tandrakan i ta nyara Laban ta amekes sahou tam i handru, ou a-en hamon le ta sahou nane ou amekes ili ta Laban le ari.’
MAT 5:34 Arile jo katiye tam, ou satandrakan ta amekes iri sahou tam i handru, ndri-iy; ya ou satandrakan kandrah, tasah kandrah badeh kon ndrahu koyeu ta Kindrei manyah udu aliy.
MAT 5:35 Ya ou satandrakan sala ta munyak ale, tasah munyak badeh ta ndrahu kati Kindrei udu aliy. Ya ou satandrakan sala ta Jerusalem, tasah Jerusalem badeh kon ta kabin tinan.
MAT 5:36 Ya ou satandrakan sala ta batum, ndri-iy, tasah ou winiyan bamesekei ramen lami batum asahan belen deh asahan bokodon bwe.
MAT 5:37 Ya buku ou asehek sahou, ‘Ehe,’ ‘Ehe’ le kai-iy ai. I buku ou asehek sahou, ‘Bwe,’ ‘Bwe’ le kai-iy ai. Ya, i buku none iri sahou boto-on labai asahan ja, badeh, asahan ta balik.”
MAT 5:38 Jises asehek ili le i buku doh, “Ya ado ndranuhun sahou dah ndrasehek i buku doh, ‘I buku none are lau sudi madam eme len, ya ou ala sudi madan keme len ale. Ya i buku none are lau tubwani lihim, ya ou ala tubwani lihin ale.’
MAT 5:39 Arile jo katiye tam, ou sadeu saluwe kandriyen ndra-in ta ndramak are edeu kandriyen ndra-in ewek tam, ndri-iy. Ya i buku none are lau ubwi lim ili kapam salin, mwasin, ou tubuni kapam kamweu kili ja, ya iy kubwi lim ki aliy ale.
MAT 5:40 Ya are lau anya katehei ou ala ta mada sahou ta iy anya kakohok awin tam kili tan, mwasin, ou atehei awin tam lawe-en kili ale.
MAT 5:41 Ya, ki buku none ari lau ta bahun kandrek ou, ma iy anya ou bwese lakou tan a hawen ta ah kadek san winiya kilomita ari, mwasin, ou ala, ah kadek san winiya kilomita la-uh ja.
MAT 5:42 Ya ki buku none ari lau kandremenya ou ta ari lakou tam kili tan, mwasin, ou atehei kili tan. Ya are lau aseken ta akohok lakou tam bwena, ano iy anya katehei kewek hamon ja, mwasin, ou atehei lakou kili tan, ya ou satehei konam sala tan.”
MAT 5:43 Jises asehek ili le i buku doh, “Ado ndranuhun sahou dah ndrasehek i buku doh, ‘Ou aseken iri lau badu mirihik tam le amwenen. Ya ou bwalem iri lau amekes ndra-in ewek tam.’
MAT 5:44 Arile jo katiye tam, ou aseken iri lau amekes budon ndra-in ewek tam. Ma ou amekes salom ki ta Kindrei ta iy kaseben iri lau amekes ndra-in ewek tam ta adai ou.
MAT 5:45 Ya idah kameh ou asahan nadu Kindrei handru badu loken. Iy edeu an tan anya i bwele-e lau ndra-in ma i bwele-e lau mwasin ale. Ma iy edeu ur tan i bwele-e lau ta kandriyen ma lomondra mwasin, ma i bwele-e lau ta kandriyen ma lomondra ndra-in ale.
MAT 5:46 Ya, i buku ou aseken iri lau le nane aso-ok ou, ya bundruwe lakou tam doh, eme hamon kameh i buku sah bah? Ya iri lau ta kolowa luk ta takis amekes i le buku aliy.
MAT 5:47 Eme ya, i buku none ou asehek sahou mwasin i le ta nadu tinem le amwenen, ya ou asahan mwasin ja tiri lau rayah ja na sasah bah? Ya iri lau badu leheleh amekes ale i le buku aliy.
MAT 5:48 Ou ado le mwasin handru i le buku tamam udu kandrah udu le mwasin handru.”
MAT 6:1 Jises asehek ili le i buku doh, “Ado kabudon kamwenen ta ado saleheya kandriyen mwasin tado sala mada lau ta lau kamasiye ado, ndri-iy. Ya, i buku none ado leheya kandriyen mwasin tado i mada lau ta iri kamasiye ado, ado winiyan bakohok sihine ado udu mine tama ado udu kandrah bwe.
MAT 6:2 “Ya, i buku ado kadeu lakou ili tiri lau ndra-in, ado soloh ndrah ta lau katanan ado, ndri-iy, sala buku iri lau ta wasai amekes udu bolo asiu ta atukum, ma udu bolo iri kon tinan ale, ta iri lau kamasiye ma katudun oro. Jo katiye handru, oro ndrakohok sihine oro ndrano kabwe.
MAT 6:3 Arile ado anya kadeu lakou kili tiri lau ndra-in, ado kamekes kudu ndra kabwak, ta iri mwan ma badih sado mirihik, sanyolom aha amekes.
MAT 6:4 Eme ma, saba lakou ado adeu i tiri lau ndra-in, ado katone kamai labai. Ya tama ado udu kandrah ndratou ado adeu lakou i san kabwak, ma idah kameh iy edeu sihine ado.”
MAT 6:5 Jises asehek ili le i buku doh, “Na len ado anya kasolom, ado sasolom sala buku iri lau ta wasai, tasah iri lau ta wasai anya kasolom kameh, iri aseken ta ales ado loken ado bolo asiu ta salom, ma iri aseken ta amekes salom ado bolo bosoh tiri kon tinan ta lau katou iri. Ya jo katiye tado handru, oro ndrandrei sihine oro mara-ei ndrano kabwe.
MAT 6:6 Arile, ado anya kasolom, ado kala bolo asiu tado, ya ado kasulu-i kou kili, ma ado kasolom kili ta tama ado, iri lau winiyan batou iy bwe. Ano ya, tama ado udu kandrah ndratou ado amekes lakou i san kabwak, ma idah kameh iy edeu sihine ado.
MAT 6:7 Ya ado anya kasolom, ado samekes sahou solo-an, sala buku none iri lau badu leheleh asolom. Iri anya Kindrei kameh anuhun salom tiri tasah iri badeh asehek sahou solo-an.
MAT 6:8 Ado sala buku none oro, tasah tama ado ndratanan saba lakou ado aseken ano ado ndremenya iy ta aliy.
MAT 6:9 Ya idah san ta salom ado ka-en hamon ta aliy: Tama aso, ou ado kandrah. Nyaram badeh, ki ndrabun.
MAT 6:10 Ma ou ame atondrok kon mari. Ahi kamesekei lahou na so-ok tam udu munyak, i le buku ndramesekei udu kandrah.
MAT 6:11 Ou anyohan aso na nyamon, winiyan ta len dah.
MAT 6:12 Ou mani kandriyen ndra-in taso, i le buku aso mani iri kandriyen ndra-in iri amekes eme taso.
MAT 6:13 Ma ou satehei aso sala bolo iri none. Arile, ou sebenei aso ta sala bolo kandriyen ndra-in ta balik.
MAT 6:14 Aha kasolom ki buku doh. Tasah, buku aha mani kandriyen ndra-in tiri mwan ma badih rayah, tama aha udu kandrah kameh winiyan mani kandriyen ndra-in taha ale.
MAT 6:15 Arile, buku aha bamani kandriyen ndra-in nane iri mwan ma badih rayah amekes ewek taha, bwe, tama aha ale kameh winiyan bamani iri kandriyen ndra-in nane aha amekes, bwe.”
MAT 6:16 Jises asehek ili le i buku doh, “Ki buku none ado anya kabeles ado ta nyamon, ado samekes teheya mada ado sandra-i sala buku iri lau ta wasai amekes. Ya iri lau ta wasai leheya mada iri ma teheya iri ta lau katou iri, kabeles iri ta nyamon. Jo katiye tado handru, oro ndrandrei sihine oro mara-ei ndrano kabwe.
MAT 6:17 Arile, ki buku none ado anya kabeles ado ta nyamon, ado kadeu ndrelekei kili batu ado, ma ado kasikine mada ado.
MAT 6:18 Ya idah kameh iri lau winiyan baseleyani ado adeu ndrabun ili ta nyamon bwe, arile ili ta tama ado ala ado winiyan batou badan bwe, ya tama ado, iy ndratou saba lakou ado ndramesekei amunum le, ma iy kameh edeu sihine ado.”
MAT 6:19 Jises asehek ili le i buku doh, “Ado satukum tado iri lakou badu munyak, ndri-iy, tasah idah kameh iri amu-uk ma ndranyem kameh iniy ano iu, ma iri lau ta bahana kameh apwai asiu ma bene-ei iu.
MAT 6:20 Arile ado katukum tado lakou mwasin handru badu kandrah, ya amu-uk hawe ndranyem winiyan baniy bano bwe, ma iri lau ta bahana winiyan bapwai asiu ma winiyan babene-ei bwe.
MAT 6:21 Tasah, i buku none ou tam lakou solo-an udu bolo munyak dah, kameh mesekei ou abudon solo-an ta aliy.”
MAT 6:22 Jises asehek ili le i buku doh, “Mada ado badeh, i buku lomada sun ta atelem bolo oda ado. Ya, i buku none mada ado udu mwasin, ya idah kameh bolo ado mara-ei idih na lomadan.
MAT 6:23 Arile, i buku none mada ado ndra-in, ya idah kameh bolo ado mara-ei idih na lulik. Ya, i buku none lomadan udu bolo ado i lulik, ya idah kameh lulik i tinan labai.”
MAT 6:24 Jises asehek ili le i buku doh, “Ari ndramak winiyan bateu lahou ta lau tinan la-uh bala le rasan bwe. Ya idah kameh iy i bwalen iy ari, ya iy aseken iy ari; deh bwe, kameh, iy anuhun sahou ta iy ari labai ja, ta iy ari. Ado winiyan balelei Kindrei ta atondrok ado, ma hawe aseken luk ta atondrok ado bala le rasan bwe.”
MAT 6:25 Jises asehek ili le i buku doh, “Idah jo katiye tado, ado sabwerei ta manyah tado, saba lakou kameh ado aimon, ma saba lakou kameh ado a-un, ma ta bada ado ale, saba lakou kameh ado kataliye. Sebwe koha ado sakalawi nyamon, ma bada ado sakalawi kalawi ado, neh?
MAT 6:26 Ado katou iri sirih ateleh loken. Iri batah nyamon bwe, ma iri babwe-eh buwa nyamon bwe. Ma hawe iri batukum nyamon bala asumwe nyamon bwe, arile tama ado badu kandrah anyohan iri. Sebwe ado winiyan basakalawi iri sirih doh bwe nadeh?
MAT 6:27 Buku ado abwerei ta iri lakou doh, idah kameh winiyan edeu ari len ja ili hawe len ta manyah tado, ta ado luluwen deh? Bwe!
MAT 6:28 “Tasah handru ado abudon andra-i ta kolau ma awin? Ado kanone kanyolom iri kanyeu ateh ado ndrahune iri se. Ya iri babo gok bwe, ma iri bamekes kalawi iri bwe.
MAT 6:29 Arile, jo katiye tado, bwena mene kabin Solomon asini iri awin tan mwasin mara-ei handru ano, arile nyasou tiri kanyeu ja sakalawi nyasou ta kabin Solomon.
MAT 6:30 Idah Kindrei edeu nyasou ma awin ili tiri bwidiu badu lokei, iri bwidiu ado na len dah, ano na len bi-i akeh iri au ala bolo jih ta asun iu. I buku sah, sebwe Kindrei winiyan badeu kolau ma awin bawek tado bwe nadeh? Budon tado handru tinan bwe?
MAT 6:31 Ya ado sabudon sandra-i ma satiye sala buku doh, ‘Aso kaimon saba lakou bah? Aso ka-un sasah bah? Ya aso kadeu saba lakou bah?’
MAT 6:32 Iri lau badu leheleh aseken ma asilah iri lakou mari doh. Ado sala buku iri, tasah tama ado udu kandrah tanan saba lakou ado aseken.
MAT 6:33 Arile, ado kanyolom bwena kili ta tondrok ta Kindrei ma ta kandriyen mwasin tan, ano ya iri lakou mari doh Kindrei kameh edeu ewek tado.
MAT 6:34 Ya ado sabudon ta len bi-i, tasah len bi-i badeh, tan lomondra ma lahou tan labai. Kora-on aha kandruni maha-an ta bi-i ja, iy kameh sakalawi lakou nane ou abudon boto-on labai ta aliy na len dah.”
MAT 7:1 Jises asehek ili le i buku doh, “Ou satiye kandriyen ta ndramak ari ja, bwe kameh ou ale ala ta mada sahou tinan.
MAT 7:2 I le buku san tam ou tiye kandriyen ta ndramak ari ja, ya idah kameh ou ales ala ta mada sahou ale. Tasah, Kindrei kameh seleya kandriyen tam i buku le kandriyen ou ale amekes ili tiri mwan ma badih rayah ja.
MAT 7:3 “I buku sah handru, ou nyowonya mutahu kei udu mada nadu tinem ari ja, arile ou batona sobola kei ranah ma buruwen udu madam bwe nadeh?
MAT 7:4 I buku sah handru, ou tiye ili ta nadu tinem ari ja i buku doh: ‘Jo kandrei mutahu kei ranah ma buruwen udu madam keme len,’ arile len mari ou batona sobola kei ranah ma buruwen udu bolo madam bwe?
MAT 7:5 Ou lau ta wasai, ma bwena ou andrei sobola kei udu bolo madam keme len op, ano ou kameh anyolom amwenen handru ta akohok mutahu kei udu mada nadu tinem ari ja eme len.
MAT 7:6 “Ou sadeu nyamon ndrabun sala na mwi. Ya ou sakeh sa-un tam sala bwena ta bou. Buku ou akeh eh, idah kameh iri bou adek ala bwele-en ma tihisiy na kati iri, ano iri bou doh kameh tubuni iri ame hamon ja ani ou, ma sekese-ei ou ale bwisik.”
MAT 7:7 Jises asehek ili le i buku doh, “Ado kandremenya, ya ado kameh akohok. Ado kasilah, ya ado kameh takalahei. Ado kalim kou, ya kou kameh asak tado.
MAT 7:8 Tasah, iy are lau ndremenya, iy kameh akohok. Iy are lau asilah, iy kameh takalahei. Ya, iy are lau alim kou, ya kou kameh asak tan.
MAT 7:9 Ya, ou, i buku none nadum kandremenya ou ta jabi ramen, ya ou taman kameh adeu nan bek deh?
MAT 7:10 Bwe, iy ndremenya ta ari ni, ya ou kameh adeu nan mwak deh?
MAT 7:11 Ya, i buku none ou tanam ou ndra-in, arile ou tanam ta adeu lakou mwasin ili ta nadum oro; ou winiyan atanam handru, tama ado udu kandrah kameh sekesek labai ta edeu lakou mwasin ale ili toro are lau ndremenya iy!
MAT 7:12 Ya, udu bolo lakou mari, ou amekes kili tiri lau, saba lakou ou aseken iri lau kamekes kewek tam ale. Idah amwenen le ta sahou batanau ta Moses, ma hawe sahou leheya tiri propet.”
MAT 7:13 Jises asehek ili le i buku doh, “Ado kala san ta loboho kou bwisik, tasah san ta kou ili bolo jih badeh, san tinan labai. Ya lau solo-an labai adek ala san aliy.
MAT 7:14 Arile san ili ta kou bwisik ales ili kon ta manyah mwasin ma winiyan ta bano bwe. Ya idah kameh lau sola handru bwe adek ala san aliy.”
MAT 7:15 Jises asehek ili le i buku doh, “Ado katondrok ado kamwenen handru tiri propet ta wasai. Iri ame hawe ado kameh bilibik ala buku none iri sipsip, ta bada oro le. Arile udu bolo ndrine oro badeh, oro ala buku none iri mwi ndra-in ta atoh.
MAT 7:16 Ado winiyan seleyaniy amwenen handru ta saba lakou asahan ta kandriyen oro amekes, tasah, malou bobodon ndra-in winiyan bato-ou buwa waen bwe. Ya iri lau abwe-eh buwa pik eme ta bwidiu ndra-in? Bwe!
MAT 7:17 I le buku aliy, iri kei mwasin ato-ou buwa kei mwasin, arile kei ndra-in ato-ou buwa kei ndra-in.
MAT 7:18 Ya kei mwasin winiyan bato-ou buwa kei ndra-in bwe, ya kei ndra-in winiyan bato-ou buwa kei mwasin bwe.
MAT 7:19 Ya iri kei mari ala bato-ou buwa kei mwasin bwe idah kameh amundroh i andri ma akeh ili bolo jih ta asun iu.
MAT 7:20 Ya ado kameh ala tanan mwasin labai tiri propet ta wasai, tasah ado seleya amwenen handru ta saba lakou asahan ta kandriyen oro amekes.
MAT 7:21 “Ado sabudon sala buku doh, ‘Iri lau mari aloh Jises i Laban iri winiyan ala bolo tondrok ta Kindrei udu kandrah.’ Arile, oro le lau ala amekes lahou ta tama udu kandrah.
MAT 7:22 Ya len doh kameh asahan, lau solo-an kameh asehek eme tek i buku doh, ‘Laban, Laban, ta nyaram aso asehek sahou ta Kindrei buku propet, ya ta nyaram aso atikah balik udu bwele-e lau au a len, ya ta nyaram aso amekes lahou tinan solo-an.’
MAT 7:23 Arile jo kameh tiye tiri handru, ‘Jo tanan ado bwe, ado ka-au ka len tek. Ado lau ta amekes kandriyen ndra-in.’”
MAT 7:24 Jises asehek ili le i buku doh, “Sendrehendreh ta aliy i buku doh: Are lau anuhun sahou tek dah ma iy in hamon ta aliy, iy i buku none ndramak tan budon mwasin, iy atah asiu tan udu bwele-e bek.
MAT 7:25 Ya ur undruk eme andri, ma wadah in gwa ma siyer atohou boto-on ili isos bada asiu. Arile batohowei asiu bwe, tasah asiu doh ndru ta aliy ili ihis bada bek.
MAT 7:26 Arile, are lau iy anuhun sahou tek dah, arile iy ba-en hamon ta aliy bwe, iy i buku none ndramak tan budon mwasin bwe, iy atah asiu tan udu bwele-e on laleyah.
MAT 7:27 Ya ur undruk eme andri, ma wadah in gwa ma siyer atohou boto-on ili isos bada asiu ma tohowei asiu taku i andri, ma atohou andra-i labai.”
MAT 7:28 Jises ano ta sehek sahou doh, ya iri lau mari mani iri atur ta leheya tan.
MAT 7:29 Tasah iy leheya iri i buku none ndramak tan boto-on, iy bala buku none iri lau ta leheya kandriyen malen bwe.
MAT 8:1 Jises edek udu mandrei eme andri, ya lau solo-an labai a-en hamon tan.
MAT 8:2 Ya ndramak ari sik lepra udu tan eme hawen, ma iy atehei bwili ndru-un i andri, ma iy tiye i buku doh, “Laban, i buku none ou aseken ou winiyan mesekei jo kamwenen ja udu mada Kindrei.”
MAT 8:3 Jises eme atehei minen i badan ma tawi iy, ma iy tiye, “Jo aseken. Ya ou amwenen ja.” Nawin bwe sik lepra iu ma iy amwenen ja.
MAT 8:4 Ano Jises tiye i tan, “Ou sasehek sala ta ari lau, ndri-iy, arile ou ales ala hawe iri pris, leheya badam ki tiri kanyolom. Ano ou adeu lakou kili ta salom i le buku Moses mene ndrabatanau, ya eme iri kanyolom ma katanan ou badeh, ndramwenen ja.”
MAT 8:5 Jises edek eme isos Kapena-um, ndramak batun tinan ta tondrok lau ta bahun eme hawen, ta ndremenya iy ta seben.
MAT 8:6 Ya iy ndramak batun tinan tiye i buku doh, “Laban, ndramak ta ndrahu so-ok tek ibo sik ndra-in labai udu kon, ma iy winiyan ta banyokolokon bwe. Iy akohok sisi-in tinan labai.”
MAT 8:7 Jises tiye i tan i buku doh, “Jo kameh ewek mesekei iy amwenen.”
MAT 8:8 Ya ndramak batun tinan tiye i buku doh, “Laban, jo ndramak ndra-in, jo winiyan baseken ou ta ame bolo asiu tek bwe, arile jo aseken ou asehek le sahou, ya ndramak ta ndrahu so-ok tek doh kamwenen ja.
MAT 8:9 Tasah, jo amwenen udu bahandra boto-on ta batun tinan ta tondrok lau mari ta bahun, ma jo badeh, lau tek rinek (100) ta bahun ale ado bahandrak. I buku none jo katiye ki ta ari lau anya, ‘Ou ala,’ idah kameh iy ilih. Ya, i buku none jo katiye anya, ‘Ou ame,’ idah kameh iy eme. I buku none jo katiye ki ta ndramak ta ndrahu so-ok tek anya, ‘Ou bwidi lahou doh,’ ya idah kameh iy bwidiy.”
MAT 8:10 Jises anuhun sahou doh ma manin atur, ma iy tiye ili tiri lau a-en hamon tan i buku doh, “Jo katiye tado handru, jo bandruni ari lau badu Isra-el tan budon tinan bala buku iy lau dah bwe.
MAT 8:11 Jo katiye tado, lau solo-an badu leheleh kameh ame, badu loboho an eme loken, ma badu loboho an i andri. Ya iri kameh akohok ndrahune iri ta manyah ta nyamon tinan hawe Abraham, ma hawe Aisik, ma hawe Jekop udu bahandra tondrok ta Kindrei.
MAT 8:12 Arile, oro lau ala Kindrei mene tiye oro ala ado bolo tondrok tan kameh akeh oro au ala manan, ala bolo lulik, ya oro kameh aden, ma andrebek lihi oro.”
MAT 8:13 Ano Jises tiye ili ta ndramak batun tinan tiri lau ta bahun, “Ou ala kon, saba lakou ou aseken, ndramesekei in hamon ta budon tam tinan handru.” Eme ya ndramak ta ndrahu so-ok tan ndramwenen ja na le liliy.
MAT 8:14 Na len Jises edek eme ili asiu ta Pita, iy atou salahu Pita ibo sik. Badan nyarahan ma iy amadin in bada sau.
MAT 8:15 Jises eme tawi le minen ma badan nyarahan nane iu, ma badih doh suri iy le eme loke, ma iy amekes na Jises nyamon.
MAT 8:16 Mirihik kon anya ka beyeh, ya iri lau atiye lau solo-an nane balik udu bwele-e iri ame hawe Jises, eme ma iy asehek le sahou ili tiri malawin ndra-in, ma tikahei iri au, ma iy mesekei iri lau mari amwenen ja.
MAT 8:17 Idoh ta amekes sahou ta propet Aisaya ndrasihidiy, asahan handru: “Iy amwenen bwese-ei sik tataha ma iy andrei sik ndra-in tataha iu i len.”
MAT 8:18 Jises atou iri lau solo-an labai awudi iy, eme ma iy tiye i toro lau tan au ala kapa gwa bilisiu.
MAT 8:19 Ano ndramak ari ta leheya kandriyen malen eme hawe Jises, ma iy tiye tan i buku doh, “Ndramak ta leheya, loboho heh ou ala aliy, jo kameh in le hamon tam.”
MAT 8:20 Jises tiye i tan i buku doh, “Iri mwi badu lokei, munu iri udu aliy, ya iri sirih ale awi iri ta matinou udu aliy. Arile, jo Nadu Ndramak Awas, badeh, ari ndrahu matinou tek, bwe.”
MAT 8:21 Ano ndramak ari badu hamon tan eme tiye i ta Jises, “Laban, jo kili kihi tama op. Ano jo barawek bara-en hamon tam.”
MAT 8:22 Arile Jises tiye i tan i buku doh, “Ndri-iy ai! Ou ame a-en hamon tek, ya iri lau amak badeh, kado gwek. Idah kameh, iri lau badu hawe iri barala bara-eh iri.”
MAT 8:23 Ano Jises sandroh ili bolo ndron ra-ei, ma hawe oro lau tan ma ronoh la-uh a-en hamon tan.
MAT 8:24 I le mani tur, siyer laba tinan atohou eme bwele-e gwa li Galili, eme ma bayau atohou eme bolo ndron. Arile Jises amadin.
MAT 8:25 Ya oro lau tan ala mete-ei iy, ma oro tiye i buku doh, “Laban, ou aseben to! Bwe kameh to katuh ai!”
MAT 8:26 Jises tiye i buku doh, “Ado budon tado nadu bwisik labai, i buku sah ado anoh tinan labai?” Ano iy suri iy eme loken, ma tiye sahou boto-on i ta siyer ma hawe bayau, eme ma siyer ma bayau amondrei i le rasan.
MAT 8:27 Eme ma oro lau tan mani oro atur, ma oro ndremenya oro, “Are ndramak i buku iy dah? Ya siyer ma bayau anuhun iy!”
MAT 8:28 Jises oro ame asos kapa gwa li loboho kon tiri lau Gadara. Eme ya uru lau ma la-uh doh malawin ndra-in udu bwele-e uru, ma uru ado mada lek adek ame hawe Jises. Ya malawin ndra-in mesekei uru ala lolo-ou ndra-in labai, ma iri lau winiyan badek bala san doh bwe.
MAT 8:29 Eme ya uru ndremenya Jises ma uru arah i buku doh, “Ou Nadu Kindrei, ou anya amekes sasah keme taru? Ou ame dah ta adeu sisi-in eme taru, bwena ta len amwenen ta aliy?”
MAT 8:30 Eme ya, udu len sese, bou rakou aimon nyamon.
MAT 8:31 Eme ya malawin ndra-in tiye sahou tikisiy i ta Jises anya, “I buku ou tikahei aso ame len, ya ou suni aso kala bwele-e bou.”
MAT 8:32 Eme iy tiye i toro, “Ado kala!” Eme iri malawin ndra-in ame len. Ano iri sandroh a bwele-e bou, ma bou rakou nane dah sakaliye are bwele-e mandrei ame andri ala bolo gwa li, ma oro amak.
MAT 8:33 Eme ma oro lau ta atondrok bou nane dah atobwak au ala kon tinan, ma ala asehek tiri lau ta lakou mari asahan tiri bou, ma hawe lakou asahan turu lau nane dah malawin ndra-in udu bwele-e uru.
MAT 8:34 Ano ma lau mari badu kon nane dah au ala ta atou Jises. Oro atou Jises, eme ma oro ndremenya iy, ta iy karuwani kon tiri ma iy ki-iu.
MAT 9:1 Jises sandroh i bolo ndron ra-ei, ma iy iu i hamon i kapa gwa bilisiu ili kon tan amwenen.
MAT 9:2 Eme ma, iri lau ra-on bwese-ei ndramak ari badan imek ta eme atou iy. Ndramak nane amadin bada nyahan tan. Jises atou buku none budon toro boto-on labai in tan, ma iy tiye i ta ndramak nane badan imek anya, “Ou abadok, naduk! Kandriyen ndra-in tam ndrasikinei ndra-au.”
MAT 9:3 Eme ma oro lau ra-on ta leheya kandriyen malen nunu-uh i buku doh, “Ndramak kede-eh asehek sahou ndra-in i bada Kindrei.”
MAT 9:4 Arile, Jises tanan budon toro ma iy anya, “Tasah handru ado abudon ndra-in i buku badeh in bolo ndrine ado?
MAT 9:5 Buku sah, san manamun ndraheh, jo kasehek anya, ‘Kandriyen ndra-in tam ndrasikine ndra-au,’ deh bwe, katiye, ‘Ou suri ou, ma ou adek’?
MAT 9:6 Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai, udu bwele-e munyak dah ta tiye i ta ndramak ta mani kandriyen ndra-in tan iu.” Eme ma iy tiye i ta ndramak nane badan imek, iy anya, “Ou suri ou, ma ou andrei nyahan tam ma ou au a kon!”
MAT 9:7 Ndramak nane suri iy eme loken, ma iy iu i kon.
MAT 9:8 Eme ma, iri lau mari nane atou, ma iri anoh, ma iri atudun nyara Kindrei, tasah Kindrei badeh, edeu iri boto-on i buku doh ili tiri lau mwan ma badih.
MAT 9:9 Eme ma Jises edek ili, ya iy atou ndramak ari nyaran Metiu manyah ereu bolo asiu tan ta gok ta akohok luk ta takis, eme ma iy tiye i tan, “Ou ame an hamon tek.” Eme Metiu suri iy ma iy in hamon tan.
MAT 9:10 Ano, Jises manyah udu bolo asiu ta Metiu. Ya iri lau solo-an ta akohok luk ta takis, ma hawe iri Juwis ale ba-en hamon ta kandriyen ta batanau ta Moses bwe, ame aimon nyamon hawen, ma oro lau tan.
MAT 9:11 Eme oro Parasi atou, ma oro orou sahou i ta Jises, ma oro tiye toro lau tan buku doh, “Tasah handru ndramak ta leheya tado aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?”
MAT 9:12 Jises anuhun sahou toro, ma iy tiye, “Iri lau ale babo sik bwe, iri winiyan baso-ok ndramak ta anyumor bwe. Arile, iri lau tiri sik le badeh, aseken seben.
MAT 9:13 Ado kala kabudon kati sahou sokek dah kamwenen, ‘Jo baso-ok salom laleyah aha amekes eme tek bwe, arile jo aso-ok handru aha kamekes kandriyen ta tikisiy ki ta ndramak ari ja.’” Eme Jises anya ja, “Jo eme dah ta aseben lau mwasin le, bwe. Jo eme dah badeh, ta aseben iri lau ta karei ma lomondra ndra-in udu tiri kasahan mwasin.”
MAT 9:14 Jises hawe oro lau tan aimon nyamon kahis le badeh, oro lau ra-on ta Jon ta alomwa ame ndremenya iy i buku doh, “I buku sah handru ahi lau ta Jon hawe oro Parasi abeles ahi ta nyamon, ya oro lau tam bwe?”
MAT 9:15 Eme Jises asumon i buku doh, “I buku none ndramak tasou bolohau udu aliy, ado winiyan babilisi oro lau ta molak bwe! Arile, na len hamon eme kameh, iri lau ta kaliu tan kuhi iy eme len, ma oro kameh, winiyan baimon nyamon bwe, oro kameh beleben, ma abeles oro ta nyamon.
MAT 9:16 “Ado kanuhun. Ari ndramak winiyan bakuhi ranah kolau ha-un, ya suwidiy ja i manamunu awin malen bwe. Buku iri bwidiy i buku doh, ya iri sikine awin, kolau ha-un nane kameh bosokou, ma awin malen kameh atarah ja, eme ma, munun kameh i tinan labai ja.
MAT 9:17 Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen doh kameh tuburok, ma kohan kameh tarani ku-i me nane, ma waen kamou, ma iu laleyah. Ma ku-i me ale kameh andra-i. Arile, iri lau asolou waen ha-un i bolo ku-i me ale ma bweseken kahis le, ma uru ma la-uh kameh ado mwasin.”
MAT 9:18 Jises asehek sahou ili toro lau ta Jon kahis le, ndramak ari tinan ta atondrok eme atehei bwili ndru-un ere mirihik ta kati Jises, ya iy tiye i buku doh, “Naduk badih ndramak na nane, arile jo aso-ok ou ame atehei le minem le ki tan, ya iy kamak ja.”
MAT 9:19 Iy tiye ano le badeh, Jises suri iy, ma iy in hamon tan, ma oro lau tan ale an hamon tan.
MAT 9:20 Oro adek ala badeh, iy badih ari ja ereu san, sik ndra udu tan winiya jaha ronoh la-uh. Iy badih doh sokohani iy i ndrokowa iri lau ili in hamon ta Jises, ma iy abudon i buku doh, “Buku none jo katawi le kiri awin tan, sebwe jo winiyan amwenen.” Eme ma, iy atehei minen le i ta kiri awin ta Jises.
MAT 9:22 Arile Jises tubuni iy, iy atou badih doh, ma iy anya, “Ou sabudon sandra-i, ndri-iy, naduk. Ou atehei budon tam handru in tek, ma mesekei ou asahan amwenen.” Eme na le liliy, sik tan ano, ma iy asahan amwenen.
MAT 9:23 Hamon ta aliy, Jises eme asahan asiu ta ndramak tinan nane. Eme iy atou iri lau ta kabek aden areu aliy. Iri lau doh oloh bala-eu, ma iri taya andra-i labai.
MAT 9:24 Eme Jises tiye i toro i buku doh, “Ado ka-au ka len. Iy nadu badih kede-eh bamak bwe, iy asah amadin le kede-eh.” Iri anuhun sahou tan, ma iri ehe-en iy andra-i labai.
MAT 9:25 Arile Jises abadok, ma tikahei iri ala manan. Eme ma iy ili bolo asiu, ma iy tawi mine nadu badih nane, ma iy amak ja.
MAT 9:26 Eme ma, sahou nyala lakou nane Jises mesekei aseker i bolo kon loboho nane doh.
MAT 9:27 Jises ruwani kon nane, ma iy edek ili, ma uru lau la-uh mada uru bwe adek an hamon tan, ma uru aloh i tan anya, “O nadu tubu kabin Debit, ou tikisi aru!”
MAT 9:28 Jises ili bolo asiu ra-em, ma uru lau ma la-uh nane ame hawen. Ma iy ndremenyani uru, “Ah atehei budon boto-on handru ta jo winiyan mesekei ah amwenen deh bwe?” Ma uru anya, “Ehe, Laban, aru atehei budon taru handru.”
MAT 9:29 Eme Jises atehei minen i mada uru, ma iy anya, “Ah atehei budon boto-on in tek, ma lakou mwasin nane ah aseken kasahan ta ah.”
MAT 9:30 Se nawin bwe mada uru asak. Arile, Jises atehei sahou boto-on anya, “Ah sasehek nyala ari lau ja, ta lakou asahan ta ah dah, ndri-iy.”
MAT 9:31 Arile, uru ala asehek nyala lakou nane Jises mesekei asahan turu ili nyala iri lau mari badu loboho kon tinan nane doh.
MAT 9:32 Kala le uru lau mala-uh nane ruwani Jises, oro lau ra-on kuhi ndramak ari bohon bwe, ma malawin ndra-in ereu la-un.
MAT 9:33 Eme ma Jises tikahei malawin ndra-in nane iu, ma ndramak nane bohon bwe asehek sahou ja. Eme ya iri lau mari mani iri atur labai, ma anya, “Aden! Bwena mene ari lakou buku doh basahan bolo kon tinan Isra-el bwe, handru en!”
MAT 9:34 Arile, iri Parasi anya, “Iy atikah malawin ndra-in iu tasah, tinan tiri malawin ndra-in badeh, edeu boto-on ili tan ta amekes lakou doh.”
MAT 9:35 Hamon ta aliy, Jises edek ili bolo iri kon tinan ma bwisik mari, ma iy leheya iri in bolo asiu ta atukum tiri. Iy atiye sahou mwasin ta Kindrei aso-ok iri lau mwan ma badih, ma iy aso-ok iri kame baha tondrok mwasin tan. Ma Jises ale mesekei iri lau mari tiri sik in bada iri amwenen ja.
MAT 9:36 Eme Jises atou iri lau solo-an labai atukum, ma iy tikisi iri. Tasah, budon tiri inyon laleyah ta san ta takaleh Kindrei, ma iri ado ndra-in labai, buku none sipsip lau ta atondrok iri bwe.
MAT 9:37 Eme ma Jises tiye toro lau tan anya, “Ado katou, nyamon solo-an labai ndruni in bolo bilin, arile lau solo-an bwe, ta gok ta akohok nyamon nane doh bwe.
MAT 9:38 Eme ya ado kasolom ki ta Laban ta kati bilin, ta iy kasuni lau kala katukumwi iri nyamon tan.”
MAT 10:1 Jises luhi oro lau tan ma ronoh la-uh ame hawen, ma iy edeu boto-on ili toro ta atikah malawin ndra-in in la-u lau mwan ma badih iu, ma amekes iri lau tiri sik in bada iri amwenen ja.
MAT 10:2 Nyara oro aposel ma ronoh la-uh i buku doh: Ari in bwena badeh, Saimon, nyaran ari ja Pita, ma nadu tinen Enduru. Ano, Jemis hawe Jon, uru nadu Sebedi.
MAT 10:3 Ano Pilip uru Batolomiu, ma Tomas, hawe Metiu, iy lau ta akohok luk ta takis, ma hawe Jemis nadu Alpeyus, ma Tadeyus.
MAT 10:4 Ma hawe Saimon, iy lau badu bolo iri Selot, ma Judas Iskariyot, ndramak doh hamon kameh iy edeu sa-oh ta Jises.
MAT 10:5 Jises suni oro lau tan ma ronoh la-uh ala, ma iy atehei sahou i toro i buku doh, “Ado sala bolo kon ale iri lau badu Isra-el bwe, ndri-iy. Ma ado sala bolo kon tinan tiri Samariya.
MAT 10:6 Ado kala hawe iri lau mwan ma badih ale badu boho kamen tiri Isra-el amwenen, iri amai buku none sipsip iri lau ta atondrok iri bwe.
MAT 10:7 Ado kala kasehek nyala iri buku doh, ‘Mirihik kameh Kindrei eme atondrok iri lau badu kon munyak.’
MAT 10:8 Ado kala kamekes kamwenen iri lau abo sik, ma ado kamak iri lau ale ndramak, ma kamekes kamwenen iri lau sik lepra udu bada iri, ma ado katikah iri malawin ndra-in udu la-u iri lau ki-iu. Lakou ado ndrakohok dah, ado akohok laleyah, ma sihinen bwe. Ya ado ale kadeu laleyah kili tiri lau mwan ma badih. Ado sakohok luk ta gok ado amekes, ndri-iy.
MAT 10:9 “Ado sakohok gol, silba ma hawe kaba su-iy sareu mine ado, ndri-iy.
MAT 10:10 Ya buku ado adek, ado sabwese kohei ta nyamon, ndri-iy. Ma ado sakohok awin la-uh deh ku-i kati ado, deh ari kei ja ta edek hawe ado, ndri-iy. Ado kala laleyah le. Tasah, ndramak ibo gok, iri lau mwan ma badih kameh anyohan iy na nyamon, ma adeu lakou i tan.
MAT 10:11 “Buku none ado ala bolo ari kon tinan deh, ari kon bwisik, ado kanyolom kamwenen are lau handru badu bolo kon doh sekesek ta akohok ado, ya ado ka-en hawen winiya le ado ruwani kon nane doh.
MAT 10:12 Buku none ado ala bolo ra-em asiu, ado kasehek toro lau ta asiu ki buku doh, ‘Kindrei katondrokei ado, ma ado kado mwasin.’
MAT 10:13 Ya buku none oro lau badu asiu nane sekesek ta akohok ado, mwasin, sahou tado mwasin kudu la-u oro. Arile, buku none oro basekesek ta akohok ado bwe, mwasin, ado kakuhi sahou tado mwasin nane keme hamon ja.
MAT 10:14 Buku none ari ndramak basekesek ta akohok ado ala asiu tan bwe, ma basekesek ta anuhun sahou tado bwe, mwasin. Ya buku none ado ruwani asiu deh kon nane, ado katuruhi kasu on ma ndren ta kati ado ki-iu, ma ado ka-au.
MAT 10:15 Jo asehek sahou handru ewek tado, na len Kindrei edeu lau ala ta mada sahou eme kameh, kon tinan dah kameh, bwese maha-an laba tinan tinan labai sakalawi ja maha-an mene asahan tiri lau ndra-in badu kon tinan Sodom ma Gomora.”
MAT 10:16 Jises asehek sahou ili ja buku doh, “Ado kanuhun! Jo kasuni ado buku none le sipsip ili bolo iri mwi badu lokei. Arile, ado kamekes budon ki mwasin buku none le mwak amekes, arile ado samekes kandriyen ndra-in ta amekes ndra-in ili bada ndramak ari ja. Aha kasahan ki buku le sirih aloh ban ale ba-um ari lakou bwe.
MAT 10:17 “Arile, mada ado kaleu! Ado kanyolom iri lau kamwenen. Iri kameh atehei ado ala mada iri kansol ta anuhun sahou, ya iri kameh a-um aha na bala oseu an bolo asiu tiri ta atukum, tasah ado an hamon ta sahou tek.
MAT 10:18 Handru labai! Iri kameh seheyani ado ala mada iri lau ta atondrok, ma hawe iri kabin, ma iri kameh atehei ado ala ta mada sahou. Idoh le, ado winiyan leheya sahou tek ili tiri, ma hawe iri lau mwan ma badih badu leheleh ale.
MAT 10:19 Buku none iri atehei ado ala ta mada sahou, ado sabwerei, ta saba san ado kasehek sahou, ma ta saba sahou kameh ado kasehek. Ado sabudon sandra-i, ndri-iy. Na len doh amwenen kameh Kindrei leheya ado ta saba sahou kameh asahan boho ado ta ado asehek.
MAT 10:20 Tasah, idoh ado amwenen basehek sahou bwe. Malawi Ndrabun ta tama ado amwenen kameh asehek sahou na boho ado.
MAT 10:21 “Na len doh kameh, ndramak atehei nadu tinen amwenen ili ta mada sahou, ya iy kameh edeu sa-oh tan. Ya tama iri ra-on ale kameh amekes i buku aliy ili ta nadu iri. Ma iri nah ra-on kameh asahan lau ta bahun ili ta tama ma tine iri, ma iri kameh atehei iri ala mada iri lau tinan ta kadai iri kamak.
MAT 10:22 Ya iri lau mari kameh baseken ado bwe, tasah ado badeh, an hamon ta sahou tek. Arile, are lau ales boto-on, ma baruwani budon tan ba-au tek bwe, winiya le len ta maha-an doh ano, Kindrei kameh andrei iy eme hamon.
MAT 10:23 Ya buku none are lau mwan deh badih badu saba kon tinan amekes ndra-in ewek tado, mwasin, ado katobwak kala kon tinan ari ja. Jo asehek sahou handru ewek tado, ado winiyan babwidi gok dah bano bwe udu bolo iri kon tinan badu Isra-el, ya jo Nadu Ndramak Awas ta Kindrei kameh eme hamon ja.
MAT 10:24 “Ado kanuhun. Ari ndramak ta akohok tanan basakalawi ndramak ta leheya iy bwe. Ari bonyo-ou basakalawi ndramak ta atondrok iy bwe.
MAT 10:25 Arile, buku none ari ndramak ta akohok tanan asahan buku none ndramak ta leheya iy, mwasin. Ya buku none ari bonyo-ou asahan buku none ndramak ta atondrok iy, mwasin. Iri lau tinan badu Isra-el tondrohani jo tama boho kamen, nyarak Belsabul. Ya idoh ado katana ado, iri kameh tondrohani nyara ado i le ndra-in labai, tasah, ado lau mwan ma badih an hamon tek.”
MAT 10:26 Jises asehek sahou ili ja buku doh, “Ado sanoh tiri lau ale anya kamekes ndra-in ewek tado. Lakou mari ale aton kede-eh kameh asahan eme lewan, lau mari kameh anuhun ma atou na mada iri.
MAT 10:27 Ya sahou jo asehek tado dan, hamon ado kasehek nyala iri lau mari. Sahou jo ohei nyala ado le dah, arile hamon, ado kales kare bwele-e ndrahu tukum tiri lau, ya ado kasehek nyala saba lakou jo asehek nyala ado dah, ki tinan ta lau mari kanuhun.
MAT 10:28 Ado sanoh tiri lau ale winiyan idi bada ado na dah, arile iri winiyan badai malawi ado bwe. Arile ado kanoh labai ta Kindrei, tasah iy winiyan idi malawim ma badam udu bolo jih ale anya udu le buku doh.
MAT 10:29 “Ado tana ado, iri lau asih sirih nadu bwisik ma la-uh na luk bororoh le, neh? Arile, tama ado badeh, atondrok uru sirih doh udu mwasin labai. Ari winiyan bamak bwe buku none tama ado baso-ok ta iy imek bwe.
MAT 10:30 Kindrei ale ndrandromwei lami batu ado mari, ya iy tanan ado mwasin labai.
MAT 10:31 Ya, ado sanoh tiri lakou ndra-in iri lau anya kamekes kewek tado. Kindrei winiyan tondrokei ado. Ado kanuhun! Ereu budon ta Kindrei, iri sirih badeh, lakou laleyah, arile iy atondrok iri. Eme ya iy winiyan tondrokei ado areu mwasin labai ja.
MAT 10:32 “Eme ma, are lau ale asehek ili tiri lau mwan ma badih buku none iy badu hawek, jo ale kameh asehek ta tama udu kon loken buku iy ndramak doh badu hawek handru.
MAT 10:33 Arile, are lau asehek ta ndramak ari ja buku iy badu hawek bwe, jo ale kameh asehek ta tama udu kon loken, buku iy lau doh badu hawek bwe ale.”
MAT 10:34 Jises asehek sahou ili ja buku doh, “Ado satehei budon buku jo eme ta amekes mondrei. Bwe! Jo eme ta amekes buku doh bwe. Jo eme ta apou lau.
MAT 10:35 Handru, jo eme, ‘ta amekes kandriyen ta andres asahan. Idah kameh, lau mwan kameh andres i la-u taman, ya nadu badih kameh andres i la-u tinen. Ya salahun uru kayon kameh andres uru, i le buku aliy.
MAT 10:36 Lowa ndramak amwenen kameh amekes bahun i tan.’
MAT 10:37 “Buku lau mwan o badih aso-ok taman uru tinen, idoh mwasin, arile, ki buku none iy baso-ok jo handru bwe ja, iy winiyan basahan lau tek bwe. Ya buku ndramak aso-ok nadun mwan deh badih, mwasin ale. Arile, ki buku none iri baso-ok jo handru bwe ja, iri winiyan basahan lau tek bwe le.
MAT 10:38 Ya, are lau mwan deh badih balokou iy ta imek ereu hamon tek bwe, buku none ndramak ta imek iy kabwese kei tondreh tan amwenen, iy badeh, winiyan basahan lau tek bwe.
MAT 10:39 Iy are lau iy atehei budon boto-on ta amekes manyah tan kudu mwasin, iy winiyan batakalahei kohan mwasin bwe. Arile, are lau anya ki-in hamon tek, ya iy babudon ta kohan nadah bwe, iy winiyan akohok manyah mwasin hamon.”
MAT 10:40 Jises asehek sahou ili ja buku doh, “Are lau akohok ado ma aseben ado, idoh i buku none le iri akohok jo ma aseben jo. Ma are lau akohok jo, idoh i buku none le iy akohok Kindrei, iy suni jo eme dah.
MAT 10:41 Buku none are lau akohok ari propet ta Kindrei, ma nyowo-ei iy udu asiu tan, hamon kameh Kindrei akunoh iy, buku le sihine iri lau ta atiye bohon. Ya buku none are lau akohok iri lau mwasin ili asiu tan ma anyo-ou iri, hamon kameh Kindrei akunoh iri buku le sihine iri lau mwasin.
MAT 10:42 Ya are lau atehei le ari bwiniu gwa i wa-i are lau laleyah badu hamon tek, mwasin, jo asehek handru ewek tado: Sihine i lau doh winiyan ba-au laleyah bwe.”
MAT 11:1 Jises tiye sahou ili toro lau tan ma ronoh la-uh ano, iy ruwani kon nane, ya iy edek ili bolo iri kon tinan loboho Galili. Ya iy leheya ma asehek sahou nyala Kindrei ili tiri.
MAT 11:2 Kala doh Jon ta alomwa ereu bolo kou. Iy anuhun yoyou ta gok mari Krais amekes, ya iy suni oro lau tan ra-on ala atou Jises. Iy tiye toro
MAT 11:3 ta ndremenya Jises i buku doh, “Sebwe ou ndramak aloh Krais, Kindrei mene tandrakan ta iy kameh suni iy eme. Buku none bwe, sebwe ahi kabe-en ndramak ari ja nadeh?”
MAT 11:4 Eme Jises asumon boho oro i buku doh, “Ado kala hamon katiye ta Jon ta saba lakou ado ndratou ma ndranuhun dah:
MAT 11:5 Iri lau mada iri bwe, iri atou kon ja, iri kati iri ndra-in iri adek ja, iri lau lepra udu bada iri, iri asahan amwenen, ma iri ndranye iri bwe, iri anuhun kon ja, ya iri lau ndramak, iri ndrasahan ndrame awas ja, ma hawe sahou ta nyala sahou mwasin badeh, ndratiyaniy ndrala bolo iri lau, lakou bwe.
MAT 11:6 Eme ya, sekesek ki toro lau heh le nane bataku ta budon toro bwe, tasah ta jo le.”
MAT 11:7 Eme oro lau ta Jon au ala hamon. Eme ma Jises asehek sahou ili tiri lau nyala Jon, “Buku sah, aha mene ala kon lomale an, anya katou sasah? Ari bwidiu awa-is nyukunyok ereu bolo jor neh? Sebwe bwe nadeh!
MAT 11:8 Aha ala anya katou sah handru? Ndramak ari atehei awin mwasin ereu badan? Bwe oh! Iri lau asin awin mwasin badeh, badu bolo asiu tiri kabin.
MAT 11:9 Saba lakou handru aha anya kala katou? Sebwe aha anya kala katou propet? Ehe, aha atou iy, ma jo katiye tado kamwenen, iy badeh sakalawi iri lau mari mene ta atiye boho Kindrei ndra-au ndrala bwena.
MAT 11:10 Eme sahou torowenei udu bolo buk ndrabun tiye i buku doh, ‘Jo kameh suni ndramak ari ewek bwena tam. Iy kameh atehe san tam.’
MAT 11:11 Jo tiye tado amwenen, Jon ta alomwa badeh sakalawi iri lau mari tine iri tuwi iri ereu kon munyak eme kala dah. Arile, are lau nyaran bwe, udu baha tondrok ta Kindrei eme kameh sakalawi nyara Jon ja.
MAT 11:12 Kala mene Jon ta alomwa leheya sahou ta Kindrei eme winiya na len dah, iri lau solo-an ta bahun abo gok boto-on labai ta tiyani tondrok ta Kindrei keme bolo munyak, ya iri anya kasuni ari lau ta ereu bwena tiri.
MAT 11:13 Bwena handru kala Jon basahan bwe le, iri sahou mari ta Moses hawe iri propet badeh, leheya saba lakou Kindrei anya kamekes.
MAT 11:14 Ya buku none ado anya kanuhun, ado katunuhun kamwenen. Buk ndrabun ta Kindrei anya, propet Alaija kameh eme. Ya iy asehek nyala Jon amwenen. Iy badeh, ndramak nane nyaran Alaija, iri mene asehek anya, iy kameh eme.
MAT 11:15 Ou are lau ndranyem udu aliy, ou anuhun.
MAT 11:16 “Arile, jo kasehek iri lau na len dah ki buku sah handru? Iri badeh, i buku none le iri nah nadu bwisik manyah areu mada ba-en. Ra-on arah i ta ra-on i buku doh,
MAT 11:17 ‘Aso oloh bala eu ta molak ewek tado, arile ado bada mana bwe; ya aso ayah wari ta kabek, arile ado bataya bwe.’”
MAT 11:18 Jises leheya kati sahou sokek i buku doh, “Kala Jon mene eme, iy abeles iy ta nyamon ta iy kedeu budon tan boto-on kili ta Kindrei, ma iy ba-un gwa waen bwe, ma iri lau anya, ‘Aha sanuhun ndramak kede-eh, ndri-iy. Malawin ndra-in ereu la-un!’
MAT 11:19 Ya, jo Nadu Ndramak Awas, jo eme aimon nyamon, ma a-un gwa waen hawe iri lau. Eme ma iri lau asehek jo i buku doh, ‘Aden, aha katou iy ndramak ta aimon nyamon tinan, ma iy ndramak ta a-un gwa waen solo-an labai. Iy ndramak ndra-in labai. Tasah handru iy amekes kawas hawe iri lau ta akohok takis, ma iri lau ba-en hamon ta batanau ta Moses bwe?’ Ehe, iri amekes sahou i buku doh. Arile, are lau mwan ma badih ale idih ta budon ta Kindrei, iy kameh amekes kandriyen mwasin, ya iri lau kameh atana iri buku none ndramak doh edek san mwasin handru.”
MAT 11:20 In bolo iri kon tinan ra-on mene, Jises amekes lahou tinan udu mada iri, arile iri batubuni ndrine iri bwe, eme Jises ibolosen ili tiri lau badu kon tinan nane doh.
MAT 11:21 Iy tiye i buku doh, “Ado lau badu kon Korasin hawe ado lau badu kon Betsaida, ado katou! Sisi-in tinan labai kameh ewek bwele-e ado. Tasah, ki buku none lau ra-on mene kala kon tinan Tair hawe Saidon ma kamekes lahou tinan buku none jo ndramekes ereu ndrokowa ado, sebwe ndra bwena iri lau badu kon ma lubuk doh ndrasin awin bokodon, ma ndratahi iri na koloweh, ta leheya buku none iri tikisiy handru ta kandriyen ndra-in tiri mene, iri ndrabwidiy.
MAT 11:22 Arile, jo tiye tado na dah, na len Kindrei le tanan ta adeu lau ala ta mada sahou, ado kameh bwese maha-an udu bwele-en labai ja ta kon Tair hawe Saidon.
MAT 11:23 “Ya aha lau badu Kapena-um, sebwe iri lau ra-on ja kameh bwese nyara ado ili loken ili kandrah nadeh? Bwe handru en! Kindrei kameh akahei ado ala bolo jih, kon tiri lau ndra-in amak ado aliy. Tasah, buku none iri lau kala kon Sodom ma kamekes iri lahou tinan buku none jo amekes ereu ndrokowa ado dah, sebwe Sodom ereu kede-eh kahis le nadeh!
MAT 11:24 Eme ma jo tiye tado amwenen. Hamon na len Kindrei le tanan ta adeu lau ala ta mada sahou, maha-an asahan tado kameh sakalawi ja maha-an mene asahan tiri lau badu Sodom. Tasah, ado atou iri lakou mari jo amekes, arile ado batehei budon boto-on ba-en hamon tek bwe.”
MAT 11:25 Kala doh Jises tiye buku doh, “Tama, ou Laban badu munyak ma kandrah. Jo masiye ou! Tasah, ou tone lakou dah, ta mada iri lau ta tanan, ma hawe iri lau anya iri tanan labai, ya ou leheyani i tiri nah, tana iri lakou bwe.
MAT 11:26 Ehe, idoh asahan na seken tam le.”
MAT 11:27 Eme ma, Jises asehek ili ja buku doh, “Tama ndratehei lakou mari ndrame minek. Ya ari ndramak ja winiyan bala tanan jo bala mwasin bwe. Tama le ari tanan jo udu mwasin labai. Ya ari ndramak ja winiyan bala tanan tama bala mwasin bwe; jo nadun le ari tanan iy, hawe oro lau le jo ndranyowonyani oro ndrala mada taman, oro le tana oro tama.
MAT 11:28 “Aha lau mwan ma badih abo gok boto-on labai ta asahan mwasin ereu mada Kindrei, ma akohok maha-an labai, aha mari kame hawek, ma jo kabwidi aha kamunyau.
MAT 11:29 Aha kakohok tanan tek, ma ka-en hamon ta sahou tek, buku none le bulumakau udu le ya taman aseu kei ranah i tondreh in balen ta amekes iy aliu iri lakou. Ehe, aha kakohok tanan udu tek, tasah jo amekes lakou i san ta manamun i tiri lau mwan ma badih, ma jo babolosen ma basobolon ari ndramak bwe. Ya iri lakou tek kameh bamekes maha-an bala ta ari ndramak bwe, ya manyah taha kameh udu mwasin.
MAT 11:30 Ehe, lakou mari jo ndratiye taha, aha ka-en hamon ta aliy; idoh boto-on handru bwe, ya lakou mari jo edeu ewek taha ta bwese badeh, maha-an handru bwe.”
MAT 12:1 Ano, udu bolo len ari ta amunyau, Jises hawe oro lau tan adek bolo bilin ari ta wit. Oro lau tan amak son, ya oro abwe-eh buwa iri wit, ma oro aimon.
MAT 12:2 Iri lau Parasi atou lakou nane doh, ma iri abolosen i ta Jises buku doh, “Hei, ou anuhun! Oro lau tam abwe-eh buwa wit na len ta amunyau. Kandriyen doh ndrabun handru ta amekes na len ta amunyau.”
MAT 12:3 Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen ta kundruh ta lakou mene kabin Debit mesekei bwena bwe nadeh? Jo asehek ta lakou kala Debit hawe oro lau tan mene amak son.
MAT 12:4 Ya, iy ili bolo asiu ta Kindrei, ya kuhi jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Ehe, Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.
MAT 12:5 Ya, sebwe aha banyolom sahou ereu bolo batanau malen bwe nadeh? Anya iri pris badeh kabo gok bolo asiu tinan ta Kindrei na len ta amunyau, idoh iri ba-en hamon ta sahou na len ta amunyau bwe, arile idoh kandriyen ndra-in bwe.
MAT 12:6 Arile, jo tiye tado, ndramak ari in dah, iy sakalawi ja asiu tinan ta Kindrei, ma kandriyen ta len ta amunyau ale.
MAT 12:7 Sahou ta Kindrei ereu bolo buk ndrabun anya, ‘Jo baso-ok salom laleyah aha amekes eme tek bwe, arile jo aso-ok handru aha kamekes kandriyen ta tikisiy ki ta ndramak ari ja.’ Buku none aha tana aha kati sahou ta Kindrei doh, sebwe aha winiyan babolosen, ma bamekes sahou ndra-in bala bada ari ndramak iy kandriyen ndra-in badan bwe. Arile bwe, aha tanan kati sahou dah handru bwe.
MAT 12:8 Jo asehek tado, oro lau tek badeh, babwidi ari kandriyen ndra-in bwe, tasah jo Nadu Ndramak Awas, ya jo tama len ta amunyau.”
MAT 12:9 Ano Jises ruwani kon nane, ma iy ili bolo asiu ari tiri ta atukum.
MAT 12:10 Ya in bolo asiu ta atukum nane iy ndruni ndramak ari minen raka ndramak. Iri lau ra-on anya kadeu Jises kili ta mada sahou, eme ya oro ndremenyani iy i buku doh, “Taha winiyan amekes iri lau abo sik amwenen na len ta amunyau, deh bwe?”
MAT 12:11 Jises ndremenya oro anya, “Ya ki buku none ari tado tan ari sipsip, ya sipsip nane kataku ki bolo lek na len ta amunyau. Ado tana ado, sebwe ndramak nane winiyan tawi sipsip, ma aluwi iy eme loken nadeh? Handru, iy ibo gok na len ta amunyau, tasah buku none iy bamekes bwe, sipsip doh kameh imek, neh?
MAT 12:12 Ya ado kanuhun! Iri lau mwan ma badih badeh, sakalawi sipsip ja. Eme ya, mwasin ta aha kamekes kandriyen mwasin, ma kaseben iri lau abo sik na len ta amunyau.”
MAT 12:13 Iy tiye toro ano, iy tubuni iy ma iy tiye i ta ndramak nane minen ndra-in, iy anya, “Minem kales!” Nawin bwe ndramak nane minen ales, ma minen amwenen buku le minen raka mwasin nane.
MAT 12:14 Jises bwidi buku doh, ma iri Parasi ruwani asiu ta atukum, ma iri asehek ma atilik nyala iri ta takaleh san ta kadai Jises kimek.
MAT 12:15 Kala doh Jises i tanan budon tiri Parasi ta oro anya kamekes saba lakou i tan, eme iy ruwani kon tinan nane doh, ma iy edek iu ili. Iri lau mwan ma badih solo-an an hamon tan, eme ma iy mesekei iri mari amwenen ta sik tiri.
MAT 12:16 Eme Jises batanau iri ta iri sasehek nyaran sala ta ndramak ari ja, ma sasehek nyala gok iy ndramesekei ta aseben iri.
MAT 12:17 Iy mesekei lakou doh in hamon ta sahou randra Kindrei mene tiye ta propet nyaran Aisaya. Iy mene torowenei i buku doh,
MAT 12:18 “Iy ndramak dah, ta amekes gok tek handru. Jo aso-ok iy handru, ndrinek badeh, sekesek tan handru. Jo kameh atehei Malawik Mwasin i la-un, ya iy kameh asehek nyala gok tek mwasin ta jo kameh akohok iri lau mari badu kon munyak dah ame hamon.
MAT 12:19 Iy winiyan babolosen ma barah laleyah bwe. Iri lau mwan ma badih winiyan banuhun iy asehek sahou laleyah ereu madasan, ma ereu mada baen bwe.
MAT 12:20 Bale banap badeh, boto-on bwe, ma anya kibok, iy winiyan batubwaniy bwe, ma iy winiyan basemete-ei sun ale banya bamwenen bwe. Iy kameh ibo gok udu le winiya le iy mesekei iri lau mari atana iri gok jo amekes ta akohok iri ame hamon.
MAT 12:21 Ya iri lau mwan ma badih badu boho kamen tiri Isra-el bwe, kameh atehei budon i tan, ma iri kameh abe-en iy akohok iri ame hamon.”
MAT 12:22 Kala doh oro lau ra-on kuhi ndramak ari malawin ndra-in udu la-un. Oro kuhi iy eme hawe Jises. Ndramak doh nane iy madan bwe, ma bohon bwe ale. Eme Jises mesekei iy amwenen, ma iy anyolom na madan ma asehek sahou na bohon ja.
MAT 12:23 Iri lau mari boho iri asak, ma iri anya, “Sebwe ndramak kede-eh nadu tubu kabin Debit ale taha abe-en iy ta eme kede-eh nadeh?”
MAT 12:24 Arile, oro Parasi anuhun iri lau nane asehek sahou i buku doh, ma oro anya, “Bwe, iy ndramak nane Krais bwe, iy ndramak nane atikah malawin ndra-in ereu la-u ndramak nane iu badeh, na boto-on ta Belsabul, tinan tiri balik.”
MAT 12:25 Arile Jises ndrandrei budon toro, ndra-in i tan, eme iy asehek i toro i buku doh, “Buku none iri lau badu kon munyak tinan kapou iri ranah i len, ma ranah i len, ma iri amekes bahun, iri lau badu kon doh kameh andra-i. Ya buku none iri lau badu kon rakon, deh badu boho kamen ra-em aseker, ma amekes bahun, iri lau doh winiyan bales boto-on bwe.
MAT 12:26 Ya ki buku oro lau ta Satan katikah Satan, ma oro lau tan kapou oro ki lumuk, ya ki buku sah handru iy tan boto-on ta atondrok iri lakou?
MAT 12:27 Ya, ki buku none Belsabul aseben jo handru, ma jo katikah iri malawin ndra-in, ya are lau handru aseben iri lau taha ta atikah malawin ndra-in? Sebwe balik aseben oro nadeh? Iri gok oro lau tado amekes, leheya buku none sahou tado badeh, bamwenen bwe.
MAT 12:28 Arile ado kanuhun, i buku none Malawin Ndrabun ta Kindrei aseben jo ta atikah iri malawin ndra-in, ado ndratana ado kabwe, Kindrei ndrame ta atondrok aha lau mwan ma badih badu Isra-el.
MAT 12:29 “Ya buku none ari ndramak anya ki bolo asiu ta ari ndramak boto-on, ma kabahana iri lakou tan, iy kameh amekes sah handru? Ma bwena handru iy kameh sawei iy ndramak boto-on nane na malou boto-on. Ano, iy winiyan akohok iri lakou ereu asiu ta ndramak nane.
MAT 12:30 “Ya eme are lau iy kawas tek bwe, iy ndramak ta amekes bahun eme tek. Ya are lau baseben jo ta atukum iri lau kame ka-en hamon ta Kindrei bwe, iy kameh atikah iri lau ka-en ndra len ta Kindrei.
MAT 12:31 Eme ma ado kanuhun, ya jo kasehek tado, Kindrei kameh mani kandriyen ndra-in, ma sahou ndra-in mari lau mwan ma badih amekes. Arile are lau aluhe i bada nyara Malawin Ndrabun, Kindrei winiyan bamani kandriyen ndra-in tan doh bwe.
MAT 12:32 Ma are lau asehek sahou ndra-in i bada Nadu Ndramak Awas, Kindrei le kameh winiyan mani kandriyen ndra-in tan. Arile, are lau amekes sahou ndra-in i bada Malawin Ndrabun, Kindrei winiyan bamani kandriyen ndra-in tan doh na len dah, deh na len eme hamon, bwe-en.”
MAT 12:33 Jises asehek sahou ra-on ja i buku doh, “Buku none kei mwasin, buwa kei doh kameh mwasin ale. Arile, buku none kei doh ndra-in, buwa kei doh ndra-in ale. Lau kanyolom buwa kei mwena, hamon iri barala tana iri buku kei doh mwasin deh bwe.
MAT 12:34 Idoh buku le aha Parasi. Aha lau buku le mwak ndra-in, ya aha winiyan bamekes sahou mwasin na boho aha bwe. Tasah, boho ndramak badeh, asehek iri budon solo-an ale idih ereu bolo ndrinen amwenen.
MAT 12:35 Buku none ndramak mwasin ma budon mwasin solo-an idih ereu ndrinen, idon adeh, iy ale amekes kandriyen mwasin ale. Iri lau ndra-in, tiri budon ndra-in solo-an ereu ndrine iri, ma iri ale amekes kandriyen ndra ndra-in le.
MAT 12:36 Arile jo tiye tado, na len hamon Kindrei le tanan ta edeu lau ala ta mada sahou ma anuhun sahou ta lau mari, iy kameh bwetenei iri sahou ndra-in iri mene ndrasehek, iy kameh anuhun sahou mari iri asehek laleyah.
MAT 12:37 Ehe, sahou doh handru! Tasah, Kindrei kameh aleben aha ta sahou mene aha ndrasihidiy. Ma, na idoh Kindrei kameh aloh aha lau mwasin deh lau ndra-in, kandriyen tan ndra-in udu badan.”
MAT 12:38 Jises asehek sahou ano, eme oro lau ra-on ta leheya kandriyen tiri Juwis hawe oro Parasi ra-on asehek sahou i ta Jises i buku doh, “Ndramak ta leheya, aso aso-ok ou amekes ari kalem ta leheya eme taso, buku ou amekes gok ta Kindrei handru.”
MAT 12:39 Arile Jises asumon i buku doh, “Iri lau mwan ma badih ta len dah badeh, iri ndra-in handru, ma iri batehei ndrine iri handru bala ta Kindrei bwe. Iri ndremenya ta anya katou kalem, arile winiyan bwai. Kalem ari le kameh iri atou, kalem ta propet Jona.
MAT 12:40 Ehe, Jona badeh, in bolo ndrine ni tinan in gwek na taloh len ma taloh ben. Idoh ya jo Nadu Ndramak Awas ale kameh, jo kameh ereu bolo lek na taloh len ma taloh ben.
MAT 12:41 Na len Kindrei le tanan ta edeu iri lau ala ta mada sahou, iri lau mwan ma badih badu Ninibe ale kameh ales ala ta mada sahou, ma iri kameh asehek sahou boto-on labai i taha lau ta len hamon dah. Tasah, iri lau badu Ninibe anuhun sahou Jona asehek, ma iri tubuni ndrine iri. Na idah, ndramak ari ereu ndrokowa ado dah, sakalawi ja Jona, arile ado banuhun sahou tan, ma batubuni ndrine ado bwe!
MAT 12:42 Na len hamon ta Kindrei kameh atehei iri lau mari badu kon munyak dah ala ta mada sahou, badih tinan kabin badu kon tinan Seba, kon tan in le loboho kum, kameh ales ereu mada sahou, iy kameh asehek ma nyowonya iri kandriyen ndra-in taha lau ta len hamon dah amekes. Tasah, iy badih kabin doh ereu len labai ta Isra-el, arile iy eme ta anuhun le kabin Solomon leheya iri tanan mwasin tan. Na dah, ndramak ari ereu ndrokowa ado, iy sakalawi ja Solomon, arile ado banuhun sahou bwe, ma ado batubuniy ndrine ado bwe.”
MAT 12:43 Jises asehek sahou ja anya, “Buku none ari ndramak tikahei malawi balik ereu la-u ari ndramak iu, malawi balik doh iu laleyah i bolo kon lomale an ta iy katakaleh ari kon ja, iy kili aliy. Arile, iy winiyan batou ari kon mwasin ta iy ili aliy bwe.
MAT 12:44 Iy kameh asehek, ‘Jo ndrawoyah ai, sebwe jo kili hamon kili asiu tek bwena mene jo ereu aliy.’ Eme iy ili hamon anyolom asiu nane ereu laleyah, ndrasahan ha-un, ma ndranyosowani kabwe.
MAT 12:45 Ehe, iy atou buku doh, eme iy ili hamon ja andrei oro malawi ndra-in ndro taloh ja sakalawi iy ta amekes kandriyen ndra-in. Ya oro kameh ala bolo asiu nane. Ya eme ndramak dah, bala buku bwena mene, ja bwai, iy ndrandra-i labai ai. Jo asehek tado, kandriyen buku doh kameh asahan taha lau mwan ma badih ndra-in ereu kon munyak na len dah.”
MAT 12:46 Jises asehek sahou hawe iri lau mari nane kahis le, tinen hawe oro nadu tinen ame ales areu manan. Oro anya kasehek sahou hawen.
MAT 12:47 Ndramak ari asehek tan anya, “Jises ei, tinem ma hawe nadu tinem oro ales ado manan, oro anya kasehek sahou hawem.”
MAT 12:48 Jises asehek ta ndramak nane, “Ado anya tine handru, are lau bah? Ya nadu tine oro handru, lau heh bah?”
MAT 12:49 Eme Jises nyowonya ili toro lau tan ma iy anya, “Jo asehek tado, tine ma nadu tine oro handru asah idah!
MAT 12:50 Tasah, are lau ale in hamon ta so-ok ta tama in kon tan udu kandrah, iri badeh, nadu tine mwan ma badih handru, ma tine handru.”
MAT 13:1 Na le len nane Jises ruwani asiu nane, ma iy ili manyah udu kapa gwa li Galili.
MAT 13:2 Iri lau solo-an atukum ta anuhun iy. Eme iy ili manyah in bolo ndron ra-ei in gwa, ya iri lau mari nane dah, ales an kapa gwa an amik ai.
MAT 13:3 Jises asehek sahou sokek solo-an i tiri. Iy asehek i buku doh, “Ado kanuhun! Ndramak ari ili sabara badu wit ili bolo bilin.
MAT 13:4 Iy akeh ili, badu wit ra-on taku in san, ya iri sirih ame aniy.
MAT 13:5 Ra-on taku in bwele-e bek, ndren solo-an mwe-en bwe, ma badu wit ateh suwi.
MAT 13:6 Arile, an eme loken ma iy anya boto-on, iy sulumwi wit nane, tasah kandron bala bolo munyak handru bwe, eme ma iy ame-er mara-ei ma imek ai.
MAT 13:7 Ya badu wit ra-on taku i bolo iri malou bobodon, ma malou bobodon nane ateh eme loken, ma tubuluhi wit nane ma iy bato-ou buwan bwai.
MAT 13:8 Arile, badu wit ra-on taku i bolo ndren mwasin, ma iy ato-ou buwan. Ra-on ato-ou rinek (100), ra-on ato-ou ndro hanoh (60), ra-on ato-ou tonoh (30).
MAT 13:9 Ou are lau ndranyem udu aliy, ou anuhun.”
MAT 13:10 Hamon ta aliy, oro lau ta Jises ame ndremenya i buku doh, “Tasah handru ou amekes sahou sokek ili tiri lau?”
MAT 13:11 Ma Jises asumon i buku doh, “Kindrei aseken ado lau tek katanan iri sahou mene aton ta nyala tondrok ta Kindrei. Arile iy baleheya bala tiri lau ra-on ja bwe.
MAT 13:12 Buku none ari ndramak tanan tan tinan udu aliy, iy kameh akohok tanan rasan ja i la-un. Arile, ndramak tanan tan sese le, idah kameh kuhiy mari iu.
MAT 13:13 Na kati budon le don adeh, jo amekes sahou sokek i tiri, tasah: ‘Mada iri asak, arile iri batou saba lakou iri atou bwe. Iri anuhun sahou, arile iri tanan moson ta aliy bwe.’
MAT 13:14 Ya iri lau don adeh, sahou randra ta propet nyaran Aisaya asahan handru. Iy mene torowenei i buku doh, ‘Ado kameh anuhun sahou san solo-an, arile ado kameh winiya bala tanan kati sahou handru bwe. Ado kameh anyolom san solo-an, arile ado kameh winiyan baseleyani ari lakou bwe.
MAT 13:15 Tasah, ndrine iri ndraso, ma ndranye iri ndrawoyah ta anuhun sahou. Ya iri ndraturuki mada iri. Kora-on mada iri katou, ma ndranye iri kanuhun, ma budon tiri ki tanan, ya iri katubuni ndrine iri keme tek, ma jo kabwidi iri kamwenen ja.’
MAT 13:16 Arile ado kasekesek le ka-en. Tasah, mada ado anyolom iri lakou, ma ndranye ado aleu ale ta anuhun sahou tek.
MAT 13:17 Jo asehek sahou handru ewek tado. Bwena mene propet solo-an, ma iri lau solo-an an hamon ta Kindrei aso-ok handru ta atou iri lakou aha atou na dah. Arile, iri batou bwe. Iri aso-ok handru ta anuhun iri sahou aha anuhun jo asehek. Arile iri banuhun bwe.”
MAT 13:18 Jises asehek sahou ja i buku doh, “Ado kanuhun moson ta sahou sokek ta ndramak akeh buwa wit ili bolo bilin tan.
MAT 13:19 Iri lau rayah anuhun sahou mwasin nyala tondrok ta Kindrei, arile iri tanan katin handru bwe. Iri buku none le buwa wit taku ereu san, ya balik eme kuhi iu suwi handru sahou mwasin Kindrei tahiy ereu budon tiri.
MAT 13:20 Ya iri buwa wit taku in bwele-e bek, i buku le iri lau anuhun sahou, ya nawin bwe iri kuhiy ma iri sekesek ta aliy.
MAT 13:21 Arile buwa wit doh kandron aliy bwe, ya i bareu luwen bwe. Ya i buku none ndrine sen asahan deh bwe-em ndra-i asahan, tasah ta sahou ta Kindrei, ya idah kameh, suwi suwi iri taku.
MAT 13:22 Ya iri buwa wit taku ereu ndrokowa iri malou bobodon, idoh leheya iri lau ale anuhun sahou ta Kindrei, arile iri abudon boto-on ta lakou badu kon munyak. Ya iri abudon boto-on labai ta atukum iri luk, ma iri lakou ra-on ja. Ya idoh sokei sahou ta Kindrei eme ma bwidi iri bato-ou sali iri bwe.
MAT 13:23 Arile, iri buwa wit ale taku in munyak mwasin badeh, i buku le iri lau anuhun sahou ta Kindrei, ya iri tanan katin handru. Eme ya iri ato-ou sali iri, ra-on ato-ou rinek (100), ra-on ndro hanoh (60), ra-on tonoh (30).”
MAT 13:24 Jises asehek sahou sokek ari ja i toro. Iy asehek i buku doh, “Tondrok ta Kindrei i buku none le ndramak ari atah buwa wit mwasin le udu bilin tan.
MAT 13:25 Arile iri lau amadin, ndramak ta bahun i ta ndramak nane eme, ya iy tahi iri buwa bwidiu ndra-in ereu ndrokowa wit, ano iy ndra-au.
MAT 13:26 Hamon wit nane asahan hawe bwidiu ndra-in kone uru i le se. Eme ya wit anya kato-ou buwan, iri lau ta gok atou bwidiu ndra-in ereu ndrokowa wit.
MAT 13:27 Eme ma, iri lau ta gok ala hawe tama bilin, ma asehek tan, ‘Ndramak tinan, aso anya ou mene tahi le badu wit in bolo bilin tam. Buku sah handru ya bwidiu ndra-in doh ateh ale?’
MAT 13:28 “Ya tama bilin nane asehek i toro, ‘Ari ndramak ta bahun ndrabwidi kandriyen doh.’ Eme ya iri lau ta gok ndremenyani iy, ‘Ou aso-ok aso kala kasudi bwidiu ndra-in nane?’
MAT 13:29 “Arile iy anya, ‘Ndri-iy, kora-on ado asoh bwidiu ndra-in nane ado kasudi wit ale.
MAT 13:30 Mwasin, ado karuwani uru ma la-uh winiya le len ta akohok nyamon. Na len ta akohok nyamon jo katiye toro lau ta amekes gok doh: Ado katukumwi bwidiu ndra-in bwena, ya kasawei ki se ta asun i jih. Arile ado katukumwi iri wit keme bolo asiu ta nyamon tek.’”
MAT 13:31 Jises asehek sahou sokek ari ja i toro. Iy asehek i buku doh, “Tondrok ta Kindrei badeh, i buku buwa kei ari iri aloh mastet. Ndramak ari kuhi buwa mastet ya iy ili tahiy in bolo bilin tan.
MAT 13:32 Buwa mastet badeh, nadu bwisik handru. Arile buku none iy ateh eme tinan, iy kameh sakalawi ja iri buwa kei badu bolo bilin nane. Iy asahan buku ra-ei kei tinan, ya iri sirih atah ame amekes awi iri udu bada andran.”
MAT 13:33 Jises asehek sahou sokek ari ja. Iy anya, “Ado kanuhun! Tondrok ta Kindrei kameh asahan buku none yis. Ari badih kuhi yis nane ma iy tubuni i hawe rahak ndrom tinan palawa. Iy tubuni ili ili winiya palawa mara-ei apus eme loken.”
MAT 13:34 Iri sahou nane Jises amekes i tiri lau, iy amekes i sahou sokek le. Iy basehek ari sahou bame lewan bala tiri bwe. Iy asehek sahou sokek le.
MAT 13:35 Na kandriyen doh, Jises mesekei eme handru sahou randra propet ndratiye in bolo buk ndrabun. Iy tiye i buku doh, “Jo kameh asehek sahou sokek ewek taha, ma jo kameh asehek kundruh ta iri lakou solo-an bwena mene aton, kala munyak asahan, eme isos na len dah.”
MAT 13:36 Jises ruwani iri lau mari nane, ma iy i bolo asiu ra-em. Kala iy ili bolon, oro lau tan ame, ma asehek anya, “Aso aso-ok ou asehek keme taso moson ta sahou sokek ta bwidiu ndra-in ateh in bolo bilin.”
MAT 13:37 Eme Jises anya, “Abo, ndramak nane ta atah wit in bolo bilin badeh, jo dah, jo Nadu Ndramak Awas.
MAT 13:38 Ya bilin badeh, kon munyak dah. Buwa wit badeh, iri lau mwasin badu hawe Kindrei. Ya bwidiu ndra-in doh badeh, iri lau ndra-in badu hawe balik amwenen.
MAT 13:39 Iy lau ta bahun i ta Kindrei eme tahi buwa bwidiu na ben, idoh, balik. Ya len ta akohok nyamon kameh, leheya buku none munyak dah anya kano ai. Iri lau ta gok badeh, iri angelo ta Kindrei.
MAT 13:40 “Iri lau atukum iri bwidiu ndra-in nane ma asun i jih, i buku none le iri angelo kameh amekes kandriyen buku le aliy, buku none Kindrei anya kasun kon munyak dah.
MAT 13:41 Jo Nadu Ndramak Awas, jo kameh atehei oro angelo tek ame akeh iu iri lakou mari ereu mada Kindrei ale amekes budon ta lau andra-i, ma hawe iri lau ta amekes kandriyen ndra-in.
MAT 13:42 Ma oro kameh akahei iri ala bolo jih ale winiyan bamak bwe-en. In bolo jih doh kameh oro aden andra-i labai, ma oro asenyer lihi oro kameh ili ta isi tinan labai kameh oro akohok.
MAT 13:43 Arile, na len doh kameh, oro lau nane a-en hamon ta kandriyen ta tama oro Kindrei kameh ala bolo tondrok tan, ma lomada oro kameh anya buku an anya. Are lau iri anuhun sahou dah, iri kabudon kamwenen.”
MAT 13:44 Jises asehek sahou ja anya, “Tondrok ta Kindrei kameh asahan buku none le ko-on iri lau ra-on tone ereu bolo bilin. Ndramak ari eme a-eh ndren ma iy atou, ma iy tone ja. Iy sekesek labai, ya ili mada ba-en, ma iy atehei iri lakou tan mari i ba-en, ma iri lau sihinei iu. Ya iy ili sihinei bilin nane ko-on ereu bolon, tasah idah ko-on nane ndrala tan ma iy winiyan akohok.”
MAT 13:45 Jises asehek sahou ja, “Sahou sokek ari ja i buku doh: Tondrok ta Kindrei i buku none ndramak ari ta amekes ba-en, anya katakaleh sa-un mwasin.
MAT 13:46 Ya buku iy atou ari sa-un mwasin handru, eme ya iy ili atehei iri lakou tan mari i ta ba-en, ma iy ili sihinei sa-un mwasin nane. Tasah, iy aso-ok sa-un nane handru sakalawiy iri lakou tan mari.”
MAT 13:47 Jises asehek kundruh ili ja: “Sahou sokek ari ja i buku doh. Tondrok ta Kindrei i buku none le ari kubwin iri lau akahei ili bolo gwa li. Ya kubwin nane akohok iri ni buku liliy.
MAT 13:48 Ano kubwin irek, iri lau aluwi eme babi. Ya oro manyah ma atukum iri ni mwasin i bolo bwak. Arile iri ni ndra-in oro akeh iu.
MAT 13:49 Hamon, buku Kindrei anya kon munyak dah ano, idah kameh asahan tiri mwan ma badih ale. Oro angelo kameh ame akohok iri lau ndra-in ereu ndrokowa iri lau mwasin ale areu hamon ta Kindrei.
MAT 13:50 Ya oro kameh akahei iri lau ndra-in nane ala bolo jih ale winiyan bamak bwe-en. In bolo jih doh kameh oro aden ma asenyer lihi oro ta isi tinan labai oro atona.”
MAT 13:51 Ya Jises ndremenya oro i buku doh, “Sebwe ado tana ado kati sahou dah deh bwe?” Ya oro asumon i buku doh, “Ehe, aso tanan.”
MAT 13:52 Eme ya Jises asehek i toro i buku doh, “Abo, jo asehek tado, are lau iy tanan ta batanau malen ta Moses, ma iy ndra-en baha tondrok ta Kindrei, iy kameh asahan buku none tama asiu ra-em tinan. Ma iy winiyan ili bolo asiu ya akohok iri lakou mwasin sowan tinan, ma tiyani iri lakou ha-un, ma hawe iri lakou malen eme lewan.”
MAT 13:53 Jises asehek iri sahou sokek nane ano, iy iu i len ta kon nane,
MAT 13:54 ya iy ili kati kon tan amwenen. Ya iy ili bolo asiu ta atukum tiri ma iy leheya sahou ta Kindrei i tiri. Iri anuhun sahou tan, ma mani iri atur, ma iri ndremenya, “Iy ndramak dah akohok tanan ereu heh? Ya are lau edeu boto-on i tan, ma iy amekes iri lahou tinan solo-an?
MAT 13:55 Taha tana taha, iy ndramak dah nadu ndramak ari ta atah asiu. Ya tinen Mariya, ma Jemis hawe Josep ma Saimon hawe Judas oro, nadu tinen.
MAT 13:56 Ya oro nadu tinen badih mari areu hawe taha kede-eh. Eme ya buku sah handru, ya iy amekes iri lakou doh?”
MAT 13:57 Oro asehek i buku doh, ma oro atehei kona oro i tan. Arile, Jises asehek i toro, “Iri propet ta atiye boho Kindrei nyara iri tinan ereu kon mari. Arile ereu kati kon tan amwenen, ma ereu boho kamen tan amwenen iy asahan buku lau laleyah.”
MAT 13:58 Eme iy bamekes iri lahou tinan solo-an bareu kon dah bwe, tasah iri batehei budon tiri ba-en tan handru bwe.
MAT 14:1 Kala doh iri lau mwan ma badih badu kon Nasaret atehei kona iri i ta Jises, Herot Antipas ndramak ta in bwena ta kon tinan Galili, iy anuhun kundruh ta iri lakou Jises amekes.
MAT 14:2 Eme ya iy asehek ta iri lau ta gok tan, “Ndramak doh iy Jon ta alomwa le ai. Iy ndramak ja ereu bolo lek ndrame loken. Eme ya iy ndrakohok boto-on ta amekes iri lahou tinan doh.”
MAT 14:3 Ehe, Herot abudon buku doh. Tasah, bwena ndra-au o-on iy tiye iri tawi Jon ta alomwa, ma sawei iy ma atehei iy i bolo asiu lulik. Herot amekes doh, tasah iy sudi udu nadu tinen Pilip nyaran Herodiyas.
MAT 14:4 Eme ma Jon asehek ta Herot i buku doh, “Ou ndrandra-i tasah, ou sudi udu nadu tinem!”
MAT 14:5 Herodiyas aso-ok ta Herot kidi Jon. Arile, Herot bwalen ma iy inoh. Tasah, lau solo-an badu Isra-el atehei budon boto-on anya Jon badeh, propet.
MAT 14:6 Na len ari, iri kabin ra-on ame aimon nyamon hawe Herot. Na len oro ame atukum doh ta abudon len tine Herot tuwi iy. Ya na len doh, nadu Herodiyas badih eme idi mana ta amekes ndrine oro kabin nane kasekesek. Herot sekesek labai ta mana tan nane.
MAT 14:7 Eme ya iy edeu wurah i tan ma iy amekes sahou randra hawen i buku doh, “Jo tandrakan handru, saba lakou ou ndremenya jo ta aliy, jo winiyan atehei ewek tam.”
MAT 14:8 Eme ya iy ili ndremenya tinen ta iy kamekes ki buku sah handru. Tinen atehei budon i tan. Eme ya iy ili asehek ta Herot ma oro kabin nane, “Jo aso-ok ou adai Jon ta alomwa ma ou atehei batun ki bolo bwekei, ya ou atehei keme tek.”
MAT 14:9 Herot anuhun sahou doh ya ndrinen andra-i labai. Arile iy abudon ta iy nane ndratandrakan ereu mada oro kabin aimon nyamon hawen nane, ya iy bwalen akohok bwilima ta tobolowe sahou tan nane iy ndrasihidiy. Eme ya iy tiye toro lau tan ta bahun ta kala kabwidi buku le sahou ta badih nane ndrasehek.
MAT 14:10 Eme lau ta bahun tan ala ma iy sani bale Jon ereu bolo asiu lulik.
MAT 14:11 Eme ya iri kuhi batun ereu bolo bwekei raben eme, ma iri atehei i mine nadu badih nane, ma iy bwese-ei ili hawe tinen.
MAT 14:12 Ya oro lau ta Jon, badu hamon tan, ame bwese-ei bada kei le, ya oro ala ahi iy i lek ano oro ala tiye ta Jises.
MAT 14:13 Jises anuhun buku iri ndradai Jon ndramak, eme ma iy ruwani kon nane ma iy suni ndron ra-ei ili kon ari doh lau aliy bwe. Iy ma oro lau tan badu hamon tan le ala. Arile iri lau solo-an anuhun saba kon Jises ndrala aliy, ma iri ruwani kon tinan tiri ma iri adek ala takaleh iy.
MAT 14:14 Eme Jises anya ki amik, iy atou iri lau solo-an labai, ma iy tikisi iri, ma iy amekes iri lau bada iri ndra-in amwenen.
MAT 14:15 Kon abeyeh ya oro lau ta Jises ame tiye tan i buku doh, “Kon dah lau aliy bwe, ya mirihik an iu i andri ai. Ou tiye iri lau kede-eh ka-au kala bolo kon lau an aliy ma iri kasih niri nyamon.”
MAT 14:16 Arile Jises tiye toro lau tan i buku doh, “Tasah handru ya iri ka-au? Ado kadeu niri nyamon.”
MAT 14:17 Eme oro tiye tan, “Naso nyamon solo-an bwe, arile kada-ah limeh jabi ramen hawe ni ma la-uh le.”
MAT 14:18 Eme iy tiye toro, “Ado kandrei jabi ramen hawe ni nane keme minek.”
MAT 14:19 Eme ya Jises tiye tiri lau mwan ma badih ta kamanyah ka-en andri bada bwidiu. Eme iy kuhi jabi ramen ma limeh ma hawe ni ma la-uh nane, ya iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah ma iy edeu ili mine oro lau tan, ma oro lau tan adeu i niri lau mwan ma badih.
MAT 14:20 Iri mari aimon ma ndrine iri idih. Ya iri tukumwi tikibwah nane i se asahan bwak ma ronoh la-uh.
MAT 14:21 Kane iri lau mwan mara-ei aimon nyamon badeh ma lamawa (5,000), idoh bondrek iri badih ma nah bwe.
MAT 14:22 Eme Jises tiye toro lau tan kasandroh kala bolo ndron, ma oro ka bwena kala kapa gwa bilisiu. Ya iy le udu hamon ta atiye iri lau ka-au.
MAT 14:23 Iy tiye iri lau mari au ano iy le ari iu ili bwele-e mandrei, ta iy kasolom. Mada an amai iu i andri, iy le ari udu bwele-e mandrei nane.
MAT 14:24 Ndron ndra-au ndrala len labai, ma jor ale udu bwena eme ma bayau nyokoda ndron andra-i labai.
MAT 14:25 Mirihik boho len, Jises edek bwele-e gwa ili hawe oro lau tan nane.
MAT 14:26 Arile, oro atou iy edek bwele-e gwa, ma oro anoh andra-i labai, ma oro totoreh. Oro anya, “Nyam! Nyam!” Oro anoh ma oro arah andra-i labai.
MAT 14:27 Arile, suwi labai Jises aloh i toro i buku doh, “Ndrine ado kamunum! Jo, jo! Ado sanoh!”
MAT 14:28 Eme Pita asumon bohon i buku doh, “Laban, buku none ou handru eh, mwasin ou tiye, ya jo kedek bwele-e gwa kewek hawem.”
MAT 14:29 Eme Jises tiye i tan, “Ou ame.” Eme ya Pita ruwani ndron, ma iy edek bwele-e gwa ili hawe Jises.
MAT 14:30 Arile iy atou jor boto-on labai ya iy inoh, ma iy atuh sese ili bolo gwa, eme iy aloh i buku doh, “Laban, ou sebenei jo!”
MAT 14:31 Suwi labai Jises atehei minen ma tawi Pita. Eme iy tiye tan i buku doh, “Ou budon tam boto-on handru bwe. Tasah handru budon la-uh asahan tam?”
MAT 14:32 Eme uru ma la-uh sandroh ala bolo ndron, ma jor amondrei.
MAT 14:33 Eme ma oro lau areu bolo ndron nane asolom i ta Jises ma oro anya, “Handru labai, ou Nadu Kindrei handru.”
MAT 14:34 Jises hawe oro lau tan ala bilisiu, ma oro asos loboho kon Genesaret.
MAT 14:35 Iri lau badu kon doh atou Jises, ma iri seleyani iy, ma iri atehei sahou ili kon mari badu mirihik, ma iri tiyani iri lau mari abo sik ame hawen.
MAT 14:36 Eme iri ndremenya Jises boto-on labai ta iy kalelei iri lau nane sik udu tiri katehei le mine iri kili kiri awin tan. Eme iri lau mari nane ateu awin tan, iri asahan amwenen ja.
MAT 15:1 Na len ari oro Parasi hawe oro lau ta leheya kandriyen tiri Juwis, ruwani Jerusalem ma oro ame atou Jises, ma oro ndremenyani iy i buku doh,
MAT 15:2 “Buku sah handru oro lau tam ba-en hamon ta sahou batanau mene iri tubu taha ndrasihidiy ndrame tataha bwena bwe? Buku none oro anya kaimon nyamon oro basikine mine oro bwe.”
MAT 15:3 Jises asumon oro i buku doh, “Buku sah handru ado an hamon ta budon ma kandriyen tado amwenen, ya ado ba-en hamon ta batanau ta Kindrei bwe?
MAT 15:4 Kindrei anya, ‘Ou a-en bahandra tamam uru tinem, ma ou anuhun sahou turu,’ ma, ‘Are lau aluhe taman uru tinen, iy kimek ta aliy.’
MAT 15:5 Arile, ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak tan luk ta aseben taman uru tinen, arile iy tiye turu, “Luk jo anya kaseben ah na aliy jo ndraleheyani ta edeu i ta Kindrei.”’
MAT 15:6 Ya, ta san doh ado aseken ndramak doh sabudon taman ma samekes mwasin sala tan, ndri-iy. Ta kandriyen doh ado atehei i andri labai sahou ta Kindrei, ya ado bwese-ei eme loken iri kandriyen ado akohok ta tubu aha iri.
MAT 15:7 Ado lau ta wasai, amwenen handru i buku none propet Aisaya leheyani kandriyen tado handru kala iy tiye i buku doh,
MAT 15:8 ‘Iri lau mwan ma badih dah bwese nyarak eme loken na boho iri le, arile ndrine iri ereu len labai.
MAT 15:9 Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’”
MAT 15:10 Eme Jises aloh iri lau mwan ma badih a hawen ma iy tiye tiri i buku doh, “Ado kanuhun ma kabudon kamwenen.
MAT 15:11 Saba lakou i bolo boho ari ndramak, idoh babwidi iy bandra-i bwe. Arile, lakou bohon asehek, idoh mesekei ndramak andra-i.”
MAT 15:12 Hamon ta aliy oro lau ta Jises ame tiye tan i buku doh, “Sebwe ou ndratanam oro Parasi ndranuhun sahou tam ma ndrine oro ndrandra-i labai tam.”
MAT 15:13 Eme Jises asumon i buku doh, “Tama udu kandrah tan bilin udu aliy. Ya iri lakou mari ale iy batah bwe-en, idoh kameh iy asoh ma kandron iu.
MAT 15:14 Ado sabudon oro lau doh, oro badeh buku lau mada iri bwe, arile oro anya kaleheya san ki ta ndramak ari ja. Arile, buku none ari ndramak madan bwe anya kaleheya san ki ta ndramak ari ja madan bwe, uru ma la-uh kameh taku a bolo lek.”
MAT 15:15 Eme Pita tiye ta Jises buku doh, “Winiyan ou asehek keme lewan moson ta sahou sokek ou asehek i tiri lau mwan ma badih nane, ya aso kanuhun.”
MAT 15:16 Eme Jises tiye toro, “Buku sah? Ado ale budon tado baleu bwe le?
MAT 15:17 Sebwe ado tana ado bwe; saba lakou i bolo boho ndramak, badeh iu ili bolo ndrine ndramak ano ndramak iu akeh ili sareu.
MAT 15:18 Arile, saba lakou bohon asehek badeh, asahan ta budon ta ndramak, ya lakou doh mesekei ndramak andra-i.
MAT 15:19 Iri lakou mari ale asahan ta budon ta ndramak badeh, lolowa ndramak amekes lomondra ndra-in. Lakou buku none, budon ndra-in, kandriyen ta adai ndramak imek, ya iri kandriyen mari ta karei, ma kandriyen ta amekes tasou andra-i, kandriyen ta bahana, kandriyen ta amekes sahou wasai ereu mada iri lau ta anuhun sahou, ma kandriyen ta amekes sahou ndra-in i bada ndramak ari ja.
MAT 15:20 Iri kandriyen mari doh mesekei ndramak andra-i adeh. Arile buku none ndramak aimon nyamon bwena ya iy basikine minen bwe, kandriyen doh bamesekei iy bandra-i bwe.”
MAT 15:21 Eme Jises ruwani kon doh ma iy iu ili loboho kon tinan Tair ma Saidon.
MAT 15:22 Badih ari badu kon Kenan iy ereu mirihik ta kon tinan Tair hawe Saidon, iy eme ma iy aloh i buku doh, “Laban, ou nadu Debit, ou tikisi jo. Malawin ndra-in ndrabwidi naduk badih ndrandra-i labai.”
MAT 15:23 Arile Jises basumon iy bwe. Eme oro lau tan ame tiye tan i buku doh, “Iy badih doh arah, arah in hamon ta to eme. Ou suni iy ki-iu.”
MAT 15:24 Eme Jises asumon oro i buku doh, “Kindrei suni jo eme ta aseben le iri sipsip badu Isra-el ale ndranyon.”
MAT 15:25 Arile iy badih nane eme mirihik ta Jises ma iy atehei bwili ndru-un i andri, ma iy anya, “Laban, jo aso-ok ou sebenei jo handru.”
MAT 15:26 Eme Jises asumon iy i buku doh, “Bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.”
MAT 15:27 Arile badih nane anya, “Laban, ou asehek sahou handru. Arile iri nadu mwi aimon kahu nyamon taku in bahandra sau ta nyamon ta tama iri ale.”
MAT 15:28 Jises anuhun sahou doh ma iy asumon i buku doh, “Badih, budon tam boto-on labai. Saba lakou ou aso-ok kameh asahan tam, iy winiyan asahan.” Kala le don nadun badih asahan amwenen ja.
MAT 15:29 Eme Jises ruwani kon doh ma iy edek iu ili kapa gwa li Galili. Iy ili bwele-e ka-u mandrei ma iy manyah.
MAT 15:30 Iri lau solo-an ame hawen. Iri atiye iri lau kati iri ndra-in ma iri lau mada iri ndra-in ma ndruwi iri hewon, ma boho iri bwe, ma iri lau solo-an bada iri ndra-in. Iri atehei iri an mirihik ta kati Jises. Ma iy mesekei iri asahan amwenen.
MAT 15:31 Eme iri lau mwan ma badih atou iri lau boho iri bwe asehek sahou, ma iri ndruwi iri hewon asahan amwenen, ma iri lau kati iri ndra-in adek ja, ma iri lau mada iri bwe atou kon, ma iri abudon solo-an. Eme iri atudun nyara Kindrei badu Isra-el i loken.
MAT 15:32 Jises luhi oro lau tan ma iy tiye toro i buku doh, “Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe. Jo bwalek iri amak son ya jo kasuni iri ka-au. Kora-on mada iri kabuluw ya iri kataku kareu san.”
MAT 15:33 Eme oro lau tan tiye anya, “Kon dah lau aliy bwe. Idah kameh to kakohok jabi ramen solo-an badu heh, ya to kanyohonei iri lau solo-an an kon lomale an dah?”
MAT 15:34 Eme Jises ndremenyani oro, “Nado jabi ramen sabe udu aliy?” Eme oro anya, “Ndro taloh le, ma hawe iri nadu ni rayah bwisik.”
MAT 15:35 Eme ya Jises tiye tiri lau mwan ma badih kamanyah kado andri bada munyak.
MAT 15:36 Eme iy andrei jabi ramen ma ndro taloh nane, ma nadu ni, ma iy edeu wurah i ta Kindrei. Ano iy boso-ei, ma atehei ili mine oro lau tan, ma oro lau tan adeu ili niri lau.
MAT 15:37 Lau mari aimon ma ndrine iri idih. Ano iri tukumwi tikibwah asahan bwak ma ndro taloh.
MAT 15:38 Iri lau aimon nyamon doh, kane iri badeh, ma hawa (4,000), idoh bondrek iri badih ma nah bwe.
MAT 15:39 Eme Jises tiye iri mwan ma badih au. Ano iy sandroh i bolo ndron, ya oro ala loboho Magadan.
MAT 16:1 Iri Parasi hawe Sadusi ame hawe Jises anya kanone iy. Oro tiye tan ta amekes ari lahou tinan ta leheya buku none iy amekes gok ta Kindrei handru.
MAT 16:2 Arile iy asumon oro i buku doh, “Na beyeh ado anya, ‘Mada kon ndra saram. Sebwe idah kameh jor bwe ma kon mondrei nadeh.’
MAT 16:3 Na mandraben ado anya, ‘Asi kandrah ndra bokodon ma mada kon ndra saram. Sebwe na idah kameh jor atohou ma ur undruk nadeh.’ Ehe, ado atou kalem ere bolo kandrah, ma tiye amwenen. Arile ado batou ma baleheya bamwenen iri kalem ta len dah bwe.
MAT 16:4 Iri lau mwan ma badih ta len dah badeh, lau ndra-in handru, ma iri batehei ndrine iri handru bala ta Kindrei bwe. Iri ndremenya ta anya katou kalem, arile winiyan bwai. Kalem ari le kameh iri atou, kalem ta Jona.” Eme ma Jises ruwani iri ma iy iu.
MAT 16:5 Jises hawe oro lau tan ala kapa gwa li bilisiu, arile oro lau tan maniy, ma oro bakohok jabi ramen bwe.
MAT 16:6 Eme Jises tiye toro i buku doh, “Ado kanyolom kamwenen. Mada ado kaleu ta yis tiri Parasi hawe Sadusi.”
MAT 16:7 Eme oro lau tan asehek sahou ndrokowa oro amwenen, “Sebwe iy amekes sahou doh tasah to bakohok jabi ramen bwe nadeh?”
MAT 16:8 Arile, Jises tanan ta sahou nane oro asehek, eme iy tiye i buku doh, “Ado lau budon tado tinan handru bwe. Buku sah handru ado asehek, anya ado jabi ramen bwe?
MAT 16:9 Sebwe mada ado baleu bwe le nadeh? Ado ndramaniy ja, ta limeh jabi ramen mene iri lau ma lamawa (5,000) aimon? Ma bwak sabe mene erah ado anyuhiy?
MAT 16:10 Ado ndramaniy ja ta jabi ramen ma ndro taloh iri lau ma hawa (4,000) mene aimon, ma bwak sabe ado anyuhiy?
MAT 16:11 Buku sah handru budon tado kede-eh baleu bwe le? Jo babudon ta jabi ramen bwe. Mada ado kaleu ta yis tiri Parasi hawe Sadusi.”
MAT 16:12 Oro anuhun sahou doh, ma oro atana oro buku iy basehek ta mada oro kaleu ta yis ta amekes jabi ramen, bwe. Arile, iy anya mada oro kaleu ta sahou toro Parasi hawe Sadusi oro leheya iri lau na aliy.
MAT 16:13 Jises iu ili loboho kon tinan Sesariya Pilipai. Kala doh iy ndremenya oro lau tan i buku doh, “Iri lau anya Nadu Ndramak Awas, iy are lau handru?”
MAT 16:14 Eme oro anya, “Lau ra-on anya ou Jon ta alomwa. Ya ra-on anya ou Alaija, ya ra-on anya ou Jeremaya, deh ou ari propet.”
MAT 16:15 Eme Jises ndremenya oro, “Ya ado amwenen anya jo are lau?”
MAT 16:16 Saimon Pita asumon iy i buku doh, “Ou Krais, Kindrei suni ou ame dah. Ou Nadu Kindrei kohan handru udu aliy.”
MAT 16:17 Eme Jises asumon sahou tan i buku doh, “Saimon, ou nadu Jon, ou winiyan sekesek. Tasah, ari ndramak badu kon munyak baleheya ou ta sahou dah bwe. Idoh tama le udu kandrah, iy leheyani sahou dah ewek tam.
MAT 16:18 Ya jo tiye tam i buku doh: Ou Pita, ya jo kameh amekes iri mwan ma badih tek asahan i buku asiu salom tek, ya ou kameh aseben iri i buku ndru bek aseben asiu ales boto-on udu bwele-e munyak dah, ya Satan hawe boto-on ta imek kameh winiyan batohowei asiu salom tek doh bala andri bwe.
MAT 16:19 Ya jo kameh amekes nyaram ki buku nyarak. Iri lakou ou asehek iri mwan ma badih kamekes udu munyak dah, mwasin, Kindrei udu kandrah mukuni ale. Ya saba lakou ou turukiy udu kon munyak, idoh kameh Kindrei ale turukiy udu kandrah.”
MAT 16:20 Eme Jises batanau oro lau tan boto-on labai i buku doh, “Ado sasehek nyala lakou dah sala ta ari ndramak, anya jo badeh, Krais, ndri-iy.”
MAT 16:21 Kala doh Jises leheya oro lau tan anya iy ki-iu kili Jerusalem. Ya iy kameh akohok sisi-in solo-an labai ereu mine iri lau tinan areu bwena, ma hawe iri lau tinan tiri pris, hawe iri lau tanan ta sahou batanau. Ya iri kameh adai iy imek, ya len taloh ano iy kameh amak ja.
MAT 16:22 Pita anuhun sahou doh, ya iy seheyani Jises i kabwak, ma iy ibolosen i tan i buku doh, “Laban, sebwe lakou doh kameh winiyan basahan tam bwe nadeh.”
MAT 16:23 Arile Jises tubuni iy ma iy asehek ta Pita i buku doh, “Satan, ou a len a konak! Ou anya aturuk san tek. Ou ba-en hamon ta budon ta Kindrei bwe. Ou a-en hamon le ta budon tiri lau.”
MAT 16:24 Eme Jises tiye toro lau tan i buku doh, “Buku none ari ndramak anya ki-in hamon tek, mwasin, iy kamani iri so-ok tan mari, ya iy kabwese-ei kei tondreh tan, ya iy ki-in hamon tek.
MAT 16:25 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja.
MAT 16:26 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru? Ya lau kadeu saba sowan handru kameh ta akohok kohan keme hamon?
MAT 16:27 Nadu Ndramak Awas kameh eme ma lomadan ta taman. Ya iy kameh eme hawe oro angelo tan. Na len doh kameh iy edeu ndramas i tiri lau mwan ma badih i le winiya le kandriyen iri amekes.
MAT 16:28 Jo asehek sahou handru ewek tado. Lau ra-on ales areu bolo to dah kameh bamak bwe, ya iri kameh atou Nadu Ndramak Awas eme hamon ma atondrok kon munyak i buku kabin.”
MAT 17:1 Len onoh ano, Jises kuhi Pita uru Jemis hawe nadu tinen Jon. Iy kuhi oro ala bwele-e mandrei ari loken labai, ya oro le ado aliy.
MAT 17:2 Oro ado, oro anyolom ili bada Jises ndratubuniy ndra randrah ja. Ya bwilin anya buku none an. Ya awin tan asahan belen, handru en!
MAT 17:3 Eme Moses uru Alaija asahan, ma oro lau ta Jises nane atou uru asehek sahou hawen.
MAT 17:4 Pita atou lakou doh ya iy asehek ta Jises i buku doh, “Laban, mwasin handru ta aso are ndra kada-ah. Buku none ou aso-ok jo katahi mandron ki taloh kudu dah; ra-em tam, ra-em ta Moses, ma ra-em ta Alaija.”
MAT 17:5 Pita asehek sahou kahis le, asi kandrah ari anya labai ili tubuluhi oro. Ya sahou randra asahan bolo asi kandrah nane asehek i buku doh, “Idah naduk handru. Jo aso-ok iy labai, ma jo sekesek tan handru. Ado kanuhun sahou tan.”
MAT 17:6 Oro lau ta Jises nane anuhun sahou doh, ya oro atehei bwili ndru-u oro i andri, ma bwili oro i bada munyak, ma oro anoh labai.
MAT 17:7 Arile, Jises eme mirihik toro, ma iy tawi oro ma iy anya, “Ado kareu loken, ado sanoh, ndri-iy.”
MAT 17:8 Eme oro suri mada oro eme loken, oro batou ari ndramak ja bwe, oro atou Jises le ari.
MAT 17:9 Eme oro are bwele-e mandrei ame andri, Jises batanau oro boto-on buku doh, “Saba lakou ado ndratou, ado sasehek ta ari ndramak ili winiya le Nadu Ndramak Awas amak ereu bolo lek eme loken ja.”
MAT 17:10 Eme oro lau tan ndremenyani iy i buku doh, “Buku sah iri lau ta leheya kandriyen tiri Juwis anya Alaija kameh eme bwena op?”
MAT 17:11 Iy asumon oro i buku doh, “Sahou badeh handru. Alaija kameh eme, iy kameh lowosa iri lakou mari.
MAT 17:12 Arile jo asehek tado i buku doh, Alaija ndrame, arile iri lau tana iri iy bwe. Iri an hamon ta budon tiri amwenen, ya iri amekes iri kandriyen mari i badan. Ya iri kandriyen doh kameh iri amekes i bada Nadu Ndramak Awas ale.”
MAT 17:13 Jises asehek i buku doh, ya oro lau tan atana oro buku iy asehek ta Jon ta alomwa.
MAT 17:14 Jises hawe oro lau tan ma taloh ame ndruni iri lau solo-an. Eme ndramak ari asahan ta Jises, ma iy atehei bwili ndru-un i andri,
MAT 17:15 ma iy anya, “Laban, ou tikisi naduk mwan. Iy asahan lolo-ou, ya badan udu ndra-in labai. Len ra-on iy kataku i bolo jih, len ra-on kameh iy taku i bolo gwa.
MAT 17:16 Jo tiyani iy ili hawe oro lau tam, arile oro winiyan babwidi iy bamwenen bwe.”
MAT 17:17 Eme Jises asehek sahou i buku doh, “Ado lau mwan ma badih batehei budon handru bwe, budon ma kandriyen tado bamwenen bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.”
MAT 17:18 Eme Jises ibolosen i ta malawi balik nane, ma balik ruwani nah nane, ma nawin bwe, lolo-ou tan ano.
MAT 17:19 Hamon ta aliy oro lau tan ame hawen, ma oro ndremenya iy i buku doh, “Buku sah handru ya aso winiyan batikahei malawin ndra-in nane iu bwe?”
MAT 17:20 Eme iy tiye toro i buku doh, “Budon tado boto-on handru bwe, mesekei ado winiyan bwe. Jo asehek tado handru, buku budon tado kasahan ki buku badu buwa kei mastet, idoh ado winiyan tiye ta mandrei idoh, ‘Ou suri ou, ya ou ala kodo-oh;’ iy winiyan ili. Ya idah kameh ari lakou ja batawi ado ta amekes lahou bwe.”
MAT 17:22 Jises hawe oro lau tan atukum areu loboho kon Galili. Eme Jises asehek i toro i buku doh, “Iri kameh atehei Nadu Ndramak Awas ili mine iri lau.
MAT 17:23 Ya iri lau kameh adai iy imek, ya hamon ta len taloh kameh iy amak ja.” Oro lau tan anuhun sahou doh, oro tikisiy labai.
MAT 17:24 Hamon ta aliy Jises hawe oro lau tan ala asahan kon tinan Kapen-um. Ya iri lau ta akohok takis ta asiu tinan ta Kindrei asahan ta Pita, ya oro ndremenya iy i buku doh, “Sebwe ndramak ta leheya ado edeu luk ale i ta asiu tinan ta Kindrei nadeh?”
MAT 17:25 Eme Pita asumon anya, “Ehe.” Eme Pita iu ili bolo asiu, Pita basehek sahou bwe le, Jises eme ndremenyani iy, “Saimon ou abudon buku sah? Iri kabin badu kon munyak akohok luk ta takis ere mine are lau eme? Oro akohok ere mine oro lau toro amwenen, deh, oro akohok ereu mine ndramak ari ja?”
MAT 17:26 Eme Pita anya, “Oro akohok luk ta takis ta ndramak ari ja.” Eme Jises tiye tan, “Idoh ya oro lau toro amwenen kameh bakeh luk ta takis bwe.
MAT 17:27 Arile, kora-on to kabwidiy, ma oro kabolosen keme ta to. Ou ala kapa gwa ou akeh jai. Ari ni ou aluwiy ma bwena, idoh ou sihi bohon, ya ou kameh atou luk ari ereu bohon. Ou andrei luk doh ou ala atehei ki mine oro. Idoh ta takis ta talu ma la-uh.”
MAT 18:1 Kala doh oro lau ta Jises ame hawen ma ndremenya iy, “Are lau nyaran tinan ereu baha tondrok ta Kindrei?”
MAT 18:2 Eme Jises luhi nadu nah ari nadu bwisik eme ales ereu ndrokowa oro.
MAT 18:3 Ano iy tiye i buku doh, “Jo tiye sahou handru ewek tado, buku none ado batubuni ndrine ado bwe, ma basahan buku none nah nadu bwisik dah bwe, ado winiyan bala bolo tondrok ta Kindrei bwe.
MAT 18:4 Ndramak atehei budon tan asahan buku le nah, ndramak doh kameh nyaran asahan tinan ereu bolo tondrok ta Kindrei.
MAT 18:5 Ya buku none ari ndramak abudon jo ya iy aseben ari nadu nah bwisik buku nah dah, badeh iy aseben jo.”
MAT 18:6 Jises asehek ja anya, “Buku none ari ndramak bwidi ari nadu nah ale atehei budon tan eme tek taku ta kandriyen ndra-in, sebwe mwasin ta ndramak doh kasawei ari bek maha-an ki balen ma kakahei iy katuh kili bolo ndras lawe-en ya iy kimek.
MAT 18:7 “Sisi-in tinan labai kameh i bwele-e iri lau badu kon munyak, iri nane amekes ndramak ari ja taku ta kandriyen ndra-in. Handru, iri kandriyen ndra-in doh kameh asahan. Arile jo tikisiy handru ta ndramak mesekei asahan.
MAT 18:8 Buku none minem deh katim aliu ou ta amekes kandriyen ndra-in, mwasin ou saniy ya ou akahei ki-iu! Sebwe mwasin ta ou minem raka le ma ou katim raka le ta akohok koham mwasin ta ereu le buku doh. Kora-on minem ma la-uh ma katim ma la-uh udu aliy, ya iri kakahei ou ala bolo jih ale winiyan bamak bwe-en!
MAT 18:9 Ya, buku none madam aluwi ou ta amekes kandriyen ndra-in, sebwe mwasin ta ou sudiy ma ou akahei ki-iu! Mwasin ta ou madam ari le ya ou akohok koham mwasin ta ereu le buku doh, kora-on madam ma la-uh kudu aliy, ya iri kakahei ou ala bolo jih ta anya ereu le buku doh.
MAT 18:10 “Ado kabudon kamwenen. Kora-on ado anya ari ereu ndrokowa oro nah kede-eh lakou laleyah. Bwe handru. Jo asehek tado amwenen, ereu kandrah oro angelo toro badeh, len mari oro areu mada tama ereu kandrah.”
MAT 18:12 Jises asehek sahou ja anya, “Ado abudon buku sah? Buku none ari ndramak tan rinek (100) sipsip udu aliy, ya buku none ari sipsip tan amai, sebwe iy winiyan bala batakaleh bwe nadeh? Neh? Bwe labai. Iy kameh ruwani oro sipsip tan ma ndro ronoh ndro ari (99) nane areu bwele-e mandrei are gwek, ma iy kameh iu ili takaleh ari nane amai.
MAT 18:13 Jo asehek sahou handru ewek tado, buku none iy takalahiy, iy kameh sekesek labai. Iy sekesek toro ndro ronoh ndro ari (99) sipsip nane bamai bwe, arile, buku none iy takalahei sipsip ari nane amai, sekesek tan kameh i tinan labai.
MAT 18:14 Buku le tama ado udu kandrah, iy bwalen ari nadu nah kede-eh samai.”
MAT 18:15 Jises asehek sahou ja i buku doh, “Buku none nadu tinem bwidi kandriyen ndra-in ewek tam, mwasin ta ou ala atou iy, ya ah kasehek sahou ki se ta kandriyen nane. Buku none iy anuhun sahou tam, mwasin, ou ndrandrei nadu tinem ndrame hamon.
MAT 18:16 Arile, buku none iy banuhun sahou tam bwe, mwasin, ou andrei ari deh la-uh ndramak ja kewek hawem, ya, ‘Buku lau la-uh o taloh asehek anya, oro anyolom ari ndramak amekes kandriyen ndra-in, mwasin ta aha kasehek sahou hawen.’
MAT 18:17 Arile, buku none iy banuhun sahou toro bwe, mwasin, ou tiye ki tiri lau mwan ma badih badu bolo iri lau ta Kindrei. Buku batun boto-on ma iy bwalen anuhun sahou toro ale, mwasin, ou atou iy buku none ari ndramak tanan Kindrei bwe, deh iy ndramak ta kolowa luk ta takis ta lau.
MAT 18:18 “Jo asehek sahou handru ewek tado, iri lakou ado asehek iri mwan ma badih kamekes udu munyak dah, mwasin, Kindrei udu kandrah sekesek ale. Ya saba lakou ado turukiy udu kon munyak, idoh kameh Kindrei ale turukiy udu kandrah.
MAT 18:19 Ya jo asehek ja ewek tado. Buku none ah la-uh lau badu kon munyak atehei budon ta ah i se ta ari lakou, ya ah asolom ta amekes, o, ta akohok lakou doh, mwasin tama udu kandrah winiyan atehei ewek ta-ah.
MAT 18:20 Ya, buku none lau la-uh deh lau taloh ame atukum ta nyarak, mwasin, jo amwenen kameh ereu ndrokowa oro.”
MAT 18:21 Kala doh Pita eme hawe Jises ma ndremenyani iy i buku doh, “Laban, san sabe buku nadu tine kamekes ndra-in keme tek, ya jo kamani kandriyen ndra-in tan doh? Sebwe san ndro taloh le nadeh?”
MAT 18:22 Ya Jises asumon iy i buku doh, “Jo basehek anya ou mani kandriyen ndra-in tan san ndro taloh le bwe. Jo anya ou mani kandriyen ndra-in tan san ndro taloh, ano san ndro taloh ja, ano san ndro taloh ja, ili ili winiya asahan san nyaran bwe.
MAT 18:23 Ado kanuhun, tondrok ta Kindrei i buku none ari kabin anya kakohok iri luk oro lau tan ta gok mene andrei buku dinau udu minen, ma oro batehei saluwen bwe le.
MAT 18:24 Iy anya kamekes lakou doh le, iri tiyani ndramak ari eme hawen, iy kameh kisih luk ki hamon ki ta kabin nane na luk solo-an labai (K10,000,000).
MAT 18:25 Arile iy ndramak nane tan luk ta edeu saluwe luk nane bwe. Eme ma, kabin nane anya iy kameh atehei iy ndramak nane hawe udun ma nadun ala mada ba-en, ya ari ndramak kasihinei oro kala lau ta gok buku bonyo-ou tan. Ya oro kandrei iri lakou mari ta ndramak nane ki mada ba-en ale ya ta kandriyen doh oro winiyan andrei luk tan mari eme hamon.
MAT 18:26 Eme ndramak ta gok nane anuhun sahou doh, iy atehei bwili ndru-un in mirihik ta kati kabin nane, ma iy tiye ta kabin nane i buku doh, ‘Ou tikisi jo, ma ou abe-en jo, idah kameh jo winiyan atehei ewek hamon iri luk mari mene jo akohok tam.’
MAT 18:27 Eme ndramak tinan ta lau ta gok nane tikisi iy, ma iy ruwani iy, ma tiye tan ta iy sadeu luk sala hamon sala tan, ndri-iy ai.
MAT 18:28 “Arile, ndramak ta gok nane iu ili manan, ya iy atou ndramak ari ta gok badu hawen, iy mene andrei luk tan winiya rinek (K10) le. Eme ma iy tawi ndramak badu hawen nane ta gok, iy tawi balen ma iy asehek sahou boto-on i tan i buku doh, ‘Ou adeu iri luk mari mene ou akohok tek, keme hamon.’
MAT 18:29 Lau ta gok badu hawen nane anuhun sahou doh, ma iy atehei bwili ndru-un i andri, ya iy tiye ta ndramak nane i buku doh, ‘Ou tikisi jo, ya ou abe-en jo. Idah kameh jo winiyan atehei ewek hamon iri luk mari mene jo akohok tam.’
MAT 18:30 Arile, ndramak nane bwalen. Eme iy atehei lau badu hawen nane i bolo kou winiya le ndramak nane atehei i hamon iri luk mari iy andrei ta ndramak nane.
MAT 18:31 “Oro lau ta gok ra-on ja badu hawe uru lau nane atou kandriyen doh, ya ndrine oro andra-i labai. Eme oro ala tiye ta tinan toro.
MAT 18:32 Eme ya tinan nane luhi ndramak ta gok nane, ma tiye tan i buku doh, ‘Ou lau ta gok ndra-in. Nane ou aden eme tek, ya jo anya ou sasih same hamon iri luk mari mene ou akohok tek.
MAT 18:33 Jo tikisi ou handru. Arile, buku sah handru ya ou batikisi iy lau ta gok badu hawem nane bwe?’
MAT 18:34 Ndramak tinan nane ndrinen irih ya iy atehei iy lau ta gok nane i bolo kou ma iy tiye iri lau ta ndrokei katehei maha-an ki tan winiya le iy kasihinei iri luk tan mari nane kili hamon.
MAT 18:35 “Idoh buku le tama udu kandrah, iy kameh amekes iri kandriyen doh ewek taha mari, buku aha bamani iri kandriyen ndra-in nadu tine aha ari ja amekes ewek taha bwe.”
MAT 19:1 Jises asehek sahou tan nane ano, iy ruwani kon Galili ma iy iu ili loboho kon Judiya ereu kapa gwa Jodan bilisiu.
MAT 19:2 Eme iri lau solo-an an hamon tan, ya iy mesekei bada iri nane udu ndra-in amwenen ja.
MAT 19:3 Eme oro Parasi rayah ame atou Jises ma oro anya kanone iy. Oro ndremenyani iy i buku doh, “Sebwe sahou batanau tataha anya, lau winiyan tikahei udun na saba katin udu budon tan amwenen nadeh?”
MAT 19:4 Jises asumon boho oro i buku doh, “Sebwe ado batou tarou ta Kindrei ereu bolo buk ndrabun tan bwe nadeh? Bwena handru kala Kindrei mene ‘mesekei lakou mari, iy mesekei lau mwan ma badih.’
MAT 19:5 Eme Kindrei anya, ‘Ta katin le doh, iy mwan karuwani taman uru tinen ya iy keme len hawe udun, ya uru kasahan ari buruwen.’
MAT 19:6 Kindrei asehek anya, bada uru la-uh bwe, bada uru ndrasahan ari le buruwen. Idoh le, saba lakou Kindrei ndrasawei mari ndrase, ari ndramak sasaniy ja ai.”
MAT 19:7 Ya oro Parasi tiye tan i buku doh, “Ya buku sah handru Moses atehei sahou batanau eme tataha ya iy asehek anya ndramak winiyan atorou la-ukei ta amendren tasou ya iy atehei i mine badih ano iy winiyan aruwe badih iu?”
MAT 19:8 Eme Jises asumon i buku doh, “Batu ado boto-on labai, eme Moses aruwe ado ta atikah badih iu. Arile bwena handru kandriyen doh bwe.
MAT 19:9 Jo asehek ewek tado i buku doh. Buku none udu ari ndramak bamekes madasarah bwe, ya udun ruwani iy, ma iy i tasou i ta badih ari ja, iy le mesekei karei i tan.”
MAT 19:10 Oro lau ta Jises anuhun sahou doh, ya oro asehek i buku doh, “Buku none ndramak anya ki-in hamon ta kandriyen buku doh ya iy in hawe udun, sebwe mwasin mwan satasou, ndri-iy.”
MAT 19:11 Jises asehek i toro i buku doh, “Iri lau mari winiyan bakohok sahou dah bwe. Kindrei atehei boto-on i ta lau ra-on le.
MAT 19:12 Ado kanuhun. Iri lau rayah areu kede-eh iri ale batasou bwe. Lau ra-on bada iri andra-i kala tine iri tuwi iri. Lau ra-on asan iri, ma iri winiyan bamekes nah bwe, ya ra-on abudon ta amekes gok ta Kindrei, ya iri abeles iri ya iri batasou bwe. Arile, are lau winiyan akohok sahou dah, iy kakohok.”
MAT 19:13 Kala doh iri lau atiye iri nah bwisik ame hawe Jises. Iri aso-ok anya Jises katehei minen ki la-u iri nah nane, ya iy kasolom. Arile oro lau ta Jises abolosen i tiri lau nane.
MAT 19:14 Arile Jises tiye toro lau tan i buku doh, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.”
MAT 19:15 Eme iy atehei minen i la-u iri nah nane, ano iy ruwani kon nane ma iy iu.
MAT 19:16 Eme ndramak ari eme atou Jises ma iy anya, “Ndramak ta leheya, jo kamekes saba kandriyen mwasin handru ya jo kakohok kohan mwasin ta ereu le buku doh len mari?”
MAT 19:17 Jises tiye i tan i buku doh, “Tasah handru ya ou ndremenya jo ta kandriyen mwasin? Ndramak ari le Kindrei, iy mwasin labai. Arile, buku none ou anya akohok kohan mwasin ta ereu le buku doh, ou a-en hamon ta sahou batanau ta Kindrei.”
MAT 19:18 Eme ndramak nane ndremenya Jises ja i buku doh, “Ou asehek ta saba sahou batanau handru?” Jises anya, “Iri sahou batanau ale anya, ‘Ou sadai ndramak samak, ou samekes karei ta badih tasou. Ou sabahana, ou sawasai, ma sadeu iri lau laleyah sala ta mada sahou, ndri-iy.
MAT 19:19 Ou a-en bahandra tamam uru tinem, ma ou anuhun sahou turu.’ Ya, ‘Ou aseken iri lau ari ari badu hawem, i le buku ou aso-ok ou le.’”
MAT 19:20 Eme ndramak loweu nane asehek ta Jises i buku doh, “Jo badeh, in hamon ta sahou batanau mari, ya saba lakou ja jo kamekes?”
MAT 19:21 Eme Jises asehek tan i buku doh, “Buku none ou anya asahan ndramak mwasin handru, mwasin, ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”
MAT 19:22 Ndramak loweu nane anuhun sahou doh, ya budon tan andra-i, ma iy iu ai, tasah tan lakou solo-an labai.
MAT 19:23 Eme Jises tiye toro lau tan i buku doh, “Jo tiye handru ewek tado, idah kameh, boto-on labai ta ndramak tan lakou solo-an, i buku none iy anya kili bolo tondrok ta Kindrei!
MAT 19:24 Jo asehek tado ja, masakan boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja ta kamel i buku iy i bolo manamunu nunu.”
MAT 19:25 Oro lau tan anuhun sahou doh mani oro atur labai, ma oro anya, “Buku none i buku baden eh, are lau handru kameh winiyan akohok kohan mwasin ta ereu le buku doh?”
MAT 19:26 Eme Jises anyolom amwenen i toro, ma iy anya, “Lau winiyan bwe. Arile Kindrei winiyan mesekei lakou mari.”
MAT 19:27 Ya Pita asumon bohon anya, “Ou atou, aso ndraruwani lakou mari, ya aso ndra-en hamon tam. Ya idah kameh aso kakohok sasah handru?”
MAT 19:28 Jises asehek i toro i buku doh, “Jo asehek handru ewek tado, na len lakou mari asahan ha-un, ya Nadu Ndramak Awas kameh akohok nyaran i tinan, ma iy kameh manyah udu koyeu ta kabin, koyeu doh tan amwenen. Na len doh ado lau ale an hamon tek, ado ale kameh manyah ado koyeu ma ronoh la-uh mwasin, ma ado kameh anuhun sahou toro boho kamen ma ronoh la-uh badu Isra-el.
MAT 19:29 Ya are mwan ma badih ale abudon nyarak, ma iy ruwani asiu tan ma nadu tinen mwan ma buru-un, ma taman uru tinen, nadun ma bilin tan, iy kameh akohok ndramas buku san rinek (100) ja i la-un, ma akohok kohan mwasin ta ereu le buku doh.
MAT 19:30 Arile lau solo-an na dah areu bwena, iri kameh ame hamon. Ya iri lau solo-an na dah areu hamon iri kameh ame bwena.”
MAT 20:1 Jises asehek sahou ja anya, “Jo asehek dah tiri lau ale anya ka-en bwena, tasah tondrok ta Kindrei i buku le ndramak ari tan munyak solo-an. Na mandraben handru iy iu ili takaleh iri lau ta ame abo gok ta bolo bilin waen tan.
MAT 20:2 Oro lau ta gok nane ndraso-ok ta akohok luk ronoh (K1) ta len ari, eme ndramak nane suni oro ala abo gok bolo bilin waen tan.
MAT 20:3 “Mada an eme ndro ari ndramak nane ili ma iy atou oro lau ra-on areu laleyah areu mada ba-en.
MAT 20:4 Eme iy tiye toro i buku doh, ‘Ado ale kala kabo gok bolo bilin waen. Ya jo kameh isih ado winiya le gok ado bwidiy.’
MAT 20:5 Eme oro ala. “Ya, na mada an udu alih ma mada an taloh beyeh, ndramak nane ili amekes buku aliy ale.
MAT 20:6 Eme na mada an limeh na beyeh, iy ili ja iy atou oro lau ra-on ales laleyah, eme iy ndremenyani oro, ‘Buku sah handru ya len ari ma buruwen dah ado ales laleyah ya ado bamekes ari gok bwe?’
MAT 20:7 “Oro asumon bohon buku doh, ‘Ari ndramak badeu gok bame taso bo-oh.’ “Ndramak nane anya, ‘Mwasin, ado ale kala kabo gok bolo bilin waen tek.’
MAT 20:8 “Kon abeyeh handru tama bilin waen nane tiye ta ndramak ta in bwena ta gok tan buku doh, ‘Ou luhi oro lau ta gok kame ya ou adeu sihine oro. Ou adeu sihine oro lau ame hamon ta gok bwena, kano ou adeu sowa oro lau mari kili kisos are lau eme bwena handru ta gok.’
MAT 20:9 “Eme oro lau nane abo gok na mada an limeh ame akohok sihine oro; oro ari, ari akohok luk ronoh (K1).
MAT 20:10 Eme oro lau nane oro abo gok ma bwena handru oro ame, oro abudon buku oro kameh akohok luk solo-an ja. Arile bwe. Oro akohok luk ronoh (K1), ndramak ari, ari.
MAT 20:11 Oro atou luk oro akohok ma oro abolosen i ta tama bilin waen nane buku doh,
MAT 20:12 ‘Oro lau ame hamon oro babo gok luwen bwe, arile ou adeu sihine oro i buku le aso akohok. Arile aso abo gok boto-on handru na mandraben eme isos dah, ya an sulumwi aso andra-i labai.’
MAT 20:13 “Tama bilin nane anuhun sahou doh ya iy tiye ta ndramak ari toro lau ta gok nane anya, ‘Kawas tek, jo bamekes ari ndra-in bawek tam bwe, sebwe na mandraben handru, talu asehek ta ou kameh akohok luk ronoh (K1), neh?
MAT 20:14 Ou akohok sihinem ma ou a-au ai. Na so-ok tek amwenen ya jo edeu sihine i ndramak nane in hamon eme i buku le ado nane ame bwena.
MAT 20:15 Idoh lakou tek amwenen. Sebwe jo winiyan ba-en hamon ta budon tek amwenen ta ondrek luk tek bwe nadeh, neh? Buku none jo anya kamekes kandriyen mwasin ki toro lau doh, buku sah handru ya ou abudon andra-i.’”
MAT 20:16 Eme Jises anya, “Idoh i buku le iri lau ale an hamon handru, oro kameh ame bwena. Ya oro lau ale an bwena, oro kameh ame hamon ja.”
MAT 20:17 Jises edek iu ili Jerusalem. Iy kuhi oro lau tan ma ronoh la-uh ala a ka-un, ya oro adek kahis le, Jises tiye toro i buku doh,
MAT 20:18 “Ado kanuhun, na dah to ala loke ala Jerusalem, ma iri kameh atehei Nadu Ndramak Awas ili mine iri tinan tiri pris ma hawe iri lau ta leheya kandriyen tiri Juwis. Ya iri kameh atehei iy ili ta mada sahou, ma iri kameh atilik sahou i se ta kadai iy kimek.
MAT 20:19 Ya oro kameh atehei iy ili mine iri lau ra-on badu leheleh, ta oro lau doh kabobose iy, ma ka-um iy na malou sakabuk i bek, ma katehei iy ki bada kei tondreh. Ya hamon ta len taloh iy kameh amak ja.”
MAT 20:20 Hamon ta aliy tine uru nah ma la-uh nadu Sebedi hawe nadun uru ame atou Jises. Eme iy atehei bwili ndru-un i andri ma iy anya kandremenya Jises ta lakou ari.
MAT 20:21 Eme Jises ndremenyani iy anya, “Ou aso-ok saba lakou?” Iy badih nane asehek ta Jises i buku doh, “Jo aso-ok ou asehek anya naduk uru ma la-uh dah kameh manyah areu mirihik hawem areu kon tam ta atondrok, ari ereu minem salin, ari ereu minem kamweu.”
MAT 20:22 Jises anuhun sahou doh ma iy asumon i buku doh, “Ado tana ado saba lakou ado ndremenya kede-eh bo-oh! Sebwe ah winiyan a-un na bwiniu jo kameh a-un na aliy dah nadeh?” Uru asumon, “Aru winiyan.”
MAT 20:23 Jises tiye turu buku doh, “Handru, bwiniu kameh jo a-un na aliy, ah kameh a-un na aliy ale. Arile, are kameh manyah ereu minek salin ma are kameh manyah ereu minek kamweu, idoh jo winiyan batiye bwai. Tasah, kon doh tiri lau ale tama Kindrei ndralowosani iri kabwe.”
MAT 20:24 Ya eme oro lau tan ma ronoh anuhun sahou turu, oro abolosen labai ili turu.
MAT 20:25 Arile Jises luhi oro mari ame hawen, ma iy asehek i toro i buku doh, “Ado tana ado, iri kabin tiri lau badu leheleh badeh, iri boto-on labai ta atondrok iri lau tiri, ma iri batanau boto-on labai ta iri lau tiri kanuhun sahou tiri handru.
MAT 20:26 Arile kandriyen doh sa-en ndrokowa ado, ndri-iy. Ndramak anya ki tinan kereu ndrokowa ado, iy kasahan lau ta gok kereu ndrokowa ado.
MAT 20:27 Ya are lau anya kereu bwena tado, iy kasahan ndramak ta gok laleyah kereu ndrokowa ado.
MAT 20:28 Idoh le Nadu Ndramak Awas eme ta iri lau kabo gok i tan bwe. Iy eme ta aseben iri, ma ta edeu kohan ta akunoh lau mari.”
MAT 20:29 Jises hawe oro lau tan ruwani kon tinan Jeriko, ma oro au. Iri lau solo-an labai an hamon toro.
MAT 20:30 Uru lau la-uh manyah areu kabede san. Uru mada uru bwe, uru anuhun le buku Jises edek eme. Eme ma, uru arah boto-on buku doh, “Laban, ou nadu tubu kabin Debit, ou tikisi aru!”
MAT 20:31 Iri lau solo-an abolosen i turu ma iri tiye turu ta uru kandru-uk. Arile, bwai, uru aloh ma arah boto-on le gwek anya, “Laban, ou nadu tubu kabin Debit, ou tikisi aru!”
MAT 20:32 Eme Jises udu rasi ma aloh i turu, “Ah aso-ok jo kamekes sasah kewek ta ah?”
MAT 20:33 Uru asumon sahou tan i hamon i buku doh, “Laban, aru aso-ok ou sihi mada aru kasak.”
MAT 20:34 Eme Jises tikisi uru, ma iy atehei minen i mada uru, ma nawin bwe mada uru amwenen, ma uru anyolom kon ja. Ma uru an hamon ta Jises.
MAT 21:1 Jises hawe oro lau tan ame mirihik ta Jerusalem, oro asahan kon Betapes ereu mandrei Olip. Eme Jises suni uru lau tan ma la-uh,
MAT 21:2 ma iy tiye turu buku doh, “Ah kala kon to anyolom i aliy don. Suwi labai ah kameh atou donki ari iri sawei udu aliy, ma nadun ale udu hawen. Ah katolowei malou ma kasirini uru kame hawek.
MAT 21:3 Ya, buku none ari ndramak kandremenya ah, ah katiye ki buku doh, ‘Laban gok udu turu, ano iy baratiyani uru barame hamon ja.’”
MAT 21:4 Lakou dah asahan ta amekes sahou mene propet ndrasehek bwena asahan handru,
MAT 21:5 “Kasehek sahou dah ki tiri lau mwan ma badih badu Sayon, ‘Ado kanyolom, kabin tado eme ai. Iy eme buku ari ndramak nyaran bwe, ya iy manyah udu bwele-e donki ari. Ehe, iy manyah udu bwele-e donki ari ndramak bamanyah ba-en bwele-en bwena bwe.’”
MAT 21:6 Eme uru lau tan ma la-uh nane ala bwidiy buku le nane iy ndratiye turu.
MAT 21:7 Uru ame sirini donki uru nadun nane, ya uru atehei kolau turu lawe-en badu bwele-e awin turu i la-u uru donki ma la-uh nane, ya Jises manyah udu bwele-en.
MAT 21:8 Ya iri lau solo-an ame talaha awin tiri lawe-en badu bwele-e iri i san. Ya iri ra-on ala amundroh andra kei, ya iri anyehe ili san.
MAT 21:9 Iri lau ra-on adek ala bwena ta Jises ma hawe iri ra-on adek an hamon tan, ya iri mari arah i buku doh, “Hosana! Kasekesek ki ta nadu Debit! Kasore nyaran! Iy eme ta nyara Laban!” “Hosana! Kasekesek ki loken mara-ei!”
MAT 21:10 Jises iu ili bolo kon Jerusalem, ya iri lau mari badu bolo kon tinan nane mani iri lau mari atur tan, ma iri ndremenya iri i buku doh, “Idoh are lau handru?”
MAT 21:11 Eme iri lau mwan ma badih nane adek hawen anya, “Idah propet nyaran Jises, iy badu kon Nasaret, badu loboho Galili.”
MAT 21:12 Jises ili loboho bolo asiu tinan ta Kindrei ya iy atikah iri lau amekes ba-en udu asiu doh. Iy bukudi iri sau tiri lau ta tokoha luk, ma hawe bwabwai tiri lau asih iri sirih aloh ban.
MAT 21:13 Ya iy tiye tiri i buku doh, “Buk ndrabun tiye i buku doh, ‘Asiu tek dah, asiu ta amekes salom labai,’ arile ado ndramesekei asiu tek, ndrasahan ‘asumwe iri lau ta bahana.’”
MAT 21:14 Jises udu bolo asiu tinan ta Kindrei, ya iri lau mada iri bwe, ma hawe kati iri ndra-in ame hawen, ma iy mesekei iri amwenen.
MAT 21:15 Arile iri pris tinan hawe iri lau tanan ta sahou batanau atou iri lahou tinan iy amekes, ma oro anuhun iri nah arah udu bolo kou ta asiu tinan buku doh, “Hosana! Sekesek i ta nadu Debit!” Idoh mesekei ndrine oro andra-i.
MAT 21:16 Ma oro ndremenya Jises i buku doh, “Sebwe ou ndranuhun sahou oro amekes doh?” Eme Jises asumon boho oro i buku doh, “Ehe, jo ndranuhun. Arile, sebwe ado banyolom sahou doh bwe, ‘Iri nadu nah atudun nyaran ili loken.’”
MAT 21:17 Eme iy ruwani oro ma iy iu i len ta kon nane ma iy ili udu Betani na ben doh.
MAT 21:18 Na mandraben handru Jises edek iu i hamon i kon tinan nane ja, ya iy imeson andra-i labai.
MAT 21:19 Iy atou kei pik ra-ei ales udu kabede san, ya iy ili mirihik ta aliy. Arile iy batou ari buwan ba-en aliy bwe. La-un le udu aliy. Eme iy tiye ta kei nane buku doh, “Ou winiyan bato-ou salim ja bwai.” Na le liliy kei pik doh asara ai.
MAT 21:20 Oro lau tan atou lakou doh, ya mani oro atur. Eme oro anya, “Buku sah ya kei doh asara suwi labai?”
MAT 21:21 Eme Jises asumon boho oro i buku doh, “Jo asehek sahou handru ewek tado, buku none ado atehei budon handru in ta Kindrei ya ado babwerei bwe, ado winiyan mesekei kandriyen jo amekes i ta kei pik nane. Ya idoh le bwe, buku none ado tiye i ta mandrei dah, ‘Ou suri ou ya ou sandroh ala bolo ndras,’ lakou doh kameh asahan buku le ado nane ndratiye.
MAT 21:22 Ya buku none ado atehei budon boto-on ma asolom, iri lakou ado asolom ta akohok, ado winiyan kuhiy.”
MAT 21:23 Jises iu ili hamon ili asiu tinan ta Kindrei nane ja, ya iy leheya iri lau mwan ma badih ta bolo sahou mwasin. Eme ya iri lau tinan tiri pris ma hawe iri lau-en ame hawen, ya oro ndremenyani iy i buku doh, “Ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?”
MAT 21:24 Jises asumon boho oro i buku doh, “Jo ale jo anya kandremenya ado ta lakou ari. Ya, buku none ado tiye amwenen eme tek, sebwe jo kameh tiye ewek tado are lau handru atehei boto-on eme tek ta amekes gok dah.
MAT 21:25 Kala Jon mene alomwa iri lau, iy akohok boto-on badu heh? Lakou doh badu kandrah deh, badu kon munyak le?” Eme oro andres udu ndrokowa oro le i buku doh, “Buku none to katiye anya, ‘Idoh lakou badu kandrah,’ idah kameh iy ndremenyani to ja anya, ‘Buku sah handru ya ado batehei budon tado bala ta aliy bwe?’
MAT 21:26 Arile buku none to katiye anya, ‘Idoh kandriyen tiri lau le,’ idah kameh to anoh iri lau ale, tasah iri anya, Jon badeh, propet ta Kindrei handru.”
MAT 21:27 Eme oro asumon boho Jises i buku doh, “Aso tana aso bwe.” Eme Jises tiye toro i buku doh, “Jo ale jo winiyan batiye bawek tado are lau handru atehei nyaran tinan eme tek ya jo amekes iri gok dah.”
MAT 21:28 Jises asehek sahou i toro pris ma hawe oro lau tinan ja i buku doh, “Ehe, ya ado abudon buku sah? Ndramak ari nadun la-uh. Iy ili hawe nadun kadok iy tiye tan buku doh, ‘Naduk, ou ala abo gok bolo bilin waen.’
MAT 21:29 Nadun tiye tan buku doh, ‘Jo bwalek.’ Arile hamon iy tubuni budon tan ja ya iu ili ibo gok.
MAT 21:30 Ya ndramak nane ili hawe nadun bwaneh ja, ya iy asehek i buku le aliy ili tan ja. Ya nadun tiye tan buku doh, ‘Abo tama.’ Arile iy bala bwe.
MAT 21:31 Ya uru nah ma la-uh doh are lau handru in hamon ta budon ta tama uru?” Eme oro lau nane anya, “Nadun kadok.” Eme Jises tiye toro i buku doh, “Jo asehek tado handru, iri lau ta akohok luk ta takis taha ma hawe iri badih ta madasarah kameh ala bwena ala bolo tondrok ta Kindrei.
MAT 21:32 Tasah, Jon asahan tado bwena ma iy leheya kandriyen mwasin ewek tado, arile ado batehei budon boto-on bala ta aliy bwe. Arile iri lau ta akohok luk taha ta takis, ma hawe iri badih ta madasarah atehei budon boto-on i tan, ma ado atou kandriyen doh, arile ado batubuni budon tado bwe. Ma ado batehei budon boto-on bala ta aliy bwe.”
MAT 21:33 Jises asehek i tiri lau tinan ja i buku doh, “Ado kanuhun sahou sokek ari ja i buku doh: Ndramak ari bwidi bilin ta waen ari, ma iy bwidi kou awudiy. Ma in bolo bilin nane iy ihi lek ari ta atik ma apis buwa waen, ano iy tahi asiu ra-em ta atondrok. Ano iy atehei bilin ili mine iri salibah ta atondrok. Ma iy iu ili kon rakon ja.
MAT 21:34 Ya mirihik ta buwa waen nane uni, iy suni iri lohowan tan ala hawe iri lau nane iy atehei bilin i tiri ta atondrok, ta iri kakohok ra-on buwa waen ki hamon ki tan.
MAT 21:35 “Arile oro salibah ta bilin tawi oro lohowan tan, ubwi ari, adai iy ari, ma orowei ari na bek.
MAT 21:36 Hamon ta aliy tama bilin suni oro lohowan tan ra-on ja ta gok ala, kane oro solo-an ja sakalawi oro nane ala bwena. Ya oro lau ta gok ta bilin nane tawi oro ya mesekei kandriyen ili toro i buku le bwena nane.
MAT 21:37 Eme hamon ta aliy tama bilin suni nadun amwenen ili hawe oro. Tama bilin nane abudon buku doh, ‘Sebwe oro kameh anuhun boho naduk.’
MAT 21:38 “Arile oro salibah ta bilin atou nadun edek eme, ya oro asehek sahou ndrokowa oro buku doh, ‘Ei, nadun eme, to kadai iy, ma to kakuhi iri lakou tan mari.’
MAT 21:39 Eme oro tawi iy, ma kuhi iy iu ili kona bilin, ma oro adai iy imek.
MAT 21:40 “Ya ado abudon buku sah? Buku tama bilin keme, eme iy kameh amekes saba lakou handru kili toro salibah nane abo gok an bolo bilin nane?”
MAT 21:41 Eme oro asehek tan buku doh, “Iy kameh idi oro lau doh amak, ma iy kameh atehei bilin ili mine iri lau rayah ja kabo gok ta aliy, ya buku none buwa waen uni, iy kameh akohok ra-on ale.”
MAT 21:42 Eme Jises ndremenya oro i buku doh, “Sebwe ado banyolom sahou doh ereu bolo buk ndrabun ta Kindrei bwe nadeh, sahou i buku doh, ‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek. Idah san ta Laban amekes, ma mwasin labai ta mada taha.’
MAT 21:43 “Ya jo asehek tado, Kindrei kameh kuhi tondrok tan ereu mine aha lau badu Isra-el eme hamon, ya iy kameh atehei ili mine iri lau ra-on ja ale winiyan a-en hamon ta so-ok tan amwenen.
MAT 21:44 Are lau oro taku a bada bek doh kameh, ndruwi oro kameh ibok i le bwisik, arile, are lau oro i buku none bek doh, taku i la-u oro, idah kameh ati-i oro abwesek.”
MAT 21:45 Oro tinan tiri pris hawe oro Parasi anuhun sahou sokek Jises amekes, oro tana oro buku Jises amekes sahou doh i la-u oro.
MAT 21:46 Idoh mesekei budon toro ta ateu Jises handru, arile oro anoh iri lau mwan ma badih, tasah iri lau mwan ma badih anya Jises badeh, propet.
MAT 22:1 Jises amekes sahou sokek ili tiri lau ja i buku doh:
MAT 22:2 “Tondrok ta Kindrei i buku none ari kabin, nadun mwan anya ki tasou, ya kabin nane mesekei tine nyamon.
MAT 22:3 Ma mwena handru iy atehei sahou ili tiri lau kame ta nyamon ta tasou ta nadun. Ya, na len ta nyamon amwenen iy suni oro lohowan tan ala kaloh iri kame ta nyamon. Arile iri bwale iri.
MAT 22:4 “Ya iy suni oro lohowan tan ra-on ja, ma iy tiye toro i buku doh, ‘Ado kala katiye tiri lau nane jo ndraluhi iri, ma ado katiye toro buku doh, jo ndralowosani nyamon kabwe. Iri bulumakau mwan ma hawe iri bou apar jo ndradai kabwe, ma jo ndralowosani lakou mari kabwe. Aha kame le kaimon nyamon ta tasou.’
MAT 22:5 “Oro lohowan tan au ala tiye tiri lau nane, arile iri bwale iri anuhun, ma iri au ala amekes budon tiri amwenen. Ari iu ili bolo bilin tan, ari iu ili amekes gok ta akohok luk tan amwenen.
MAT 22:6 Iri rayah tawi oro lohowan ta kabin nane luhani oro, ma adai oro amak.
MAT 22:7 Eme ya kabin nane ibolosen, ma iy suni oro lau tan ta bahun ala adai iri lau nane, ma sulumwi kon tiri andrakak iu.
MAT 22:8 “Eme kabin nane anya, ‘Nyamon ta tasou ndralowosaniy kabwe, oro lau nane jo aloh oro ma bwena, ado kamani oro.
MAT 22:9 Ado kadek kala madasan mari, ya are lau ado ndruniy, ado kaluhi iri kame ta nyamon ta tasou.’
MAT 22:10 Iy tiye i buku doh, ya oro lohowan tan nane au ala kon mari, ma oro luhi iri lau mwasin ma ndra-in ale ame. Asiu ta tasou nane aso na lau.
MAT 22:11 “Iri lau mari nane manyah ado andri, ya kabin nane eme bolon atou iri. Madan ili, iy atou ndramak ari, iy batehei awin ta ame bolo nyamon ta tasou nane bwe.
MAT 22:12 Eme kabin nane ndremenyani iy, ‘Kawas tek, buku sah handru ou basini ari awin mwasin ta ame bolo nyamon ta tasou dah bwe?’ Iy ndramak nane basumon bwe.
MAT 22:13 “Kabin nane tiye toro lau ta ndrokei tan anya, ‘Ado kasawei katin ma minen ya ado kakahei iy ki-iu kili manan bolo lulik. Bolo lulik doh kameh iri lau aden andra-i labai ma lihi iri kameh asenyer andra-i labai.’
MAT 22:14 “Ado kanuhun. Kindrei aloh taha mari. Arile iy ndralebelei ndramak ari, ari ta ili bolon.”
MAT 22:15 Eme iri Parasi au ala manan atilik sahou tiri i se, ta takaleh madasan ta bolowa Jises ya sahou tan kinyon ma iri katehei iy ki mada sahou.
MAT 22:16 Iri suni oro ra-on tiri hawe oro lau ra-on ta Herot, ala atou Jises, ma oro tiye tan i buku doh, “Ndramak ta leheya, aso tanan, ou lau ta asehek sahou handru. Ya, na sahou handru ou ale leheya iri lau mwan ma badih ta kandriyen ta Kindrei. Ou banoh ta ari ndramak bwe. Ya, ou asehek sahou ari le ili tiri lau mari, buku ndramak nyaran tinan, deh, ndramak iy nyaran bwe.
MAT 22:17 Eme ya, ou asehek kamwenen keme taso. Ou abudon buku sah? Mwasin ta taha kadeu takis ki ta Sisa, deh, ndri-iy?”
MAT 22:18 Arile Jises ndratanan budon toro ndra-in. Eme ya, iy asehek i buku doh, “Ado lau ta wasai, buku sah handru ado anya kanone jo?
MAT 22:19 Ado kaleheya keme tek ari luk nane ado asih takis tado na aliy.” Eme oro andrei luk bororoh ari ili minen.
MAT 22:20 Eme Jises ndremenyani oro i buku doh, “Malawi ndramak ma nyaran kede-eh are lau handru?”
MAT 22:21 Oro anya “Ta Sisa.” Iy tiye toro, “Mwasin, saba lakou ta Sisa, ado kadeu ki ta Sisa. Ya saba lakou ta Kindrei, ado kadeu ki ta Kindrei.”
MAT 22:22 Oro anuhun sahou doh ma boho oro asak. Eme ma, oro ruwani iy ma oro au ai.
MAT 22:23 Na len le nane, oro Sadusi ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe. Eme oro ndremenyani Jises i buku doh,
MAT 22:24 “Ndramak ta leheya, Moses bwena mene anya, ‘Buku none ari ndramak imek, ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’
MAT 22:25 “Ya, len ari bwena, oro lau ma ndro taloh nadu tine oro areu ndrokowa ahi dah. Eme kadok toro i tasou ta badih ari, ya iy nadun bwe ma iy imek. Ma iy ruwani udun i mine nadu tinen oro.
MAT 22:26 Bwaneh andrei iy, nadun bwe ale ma iy imek. Silih andrei iy buku aliy le, badih nane andromwei oro mari ano ili isos ta kalai.
MAT 22:27 Oro amak, ya hamon ta aliy badih nane imek ale.
MAT 22:28 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro mari.”
MAT 22:29 Eme Jises asumon boho oro i buku doh, “Ado ndrandra-i labai, tasah ado tana ado tarou ereu bolo buk ndrabun ta Kindrei bwe. Ma ado tana ado boto-on ta Kindrei bwe ale. Eme ya ado asehek sahou laleyah.
MAT 22:30 Na len iri lau ndramak kameh amak ame awas ja, ya iri kameh winiyan bala batasou ja bwe. Iri kameh asahan buku iri angelo areu kandrah.
MAT 22:31 Handru labai. Iri lau ndramak bwena, hamon kameh iri amak ja. Sebwe ado batou bolo tarou ta Kindrei iy mene asehek ewek tado bwe nadeh? Iy asehek i buku doh,
MAT 22:32 ‘Jo Kindrei ta Abraham, ta Aisik, ma ta Jekop.’ Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le.”
MAT 22:33 Iri lau mari anuhun sahou doh, mani iri atur ta sahou tan.
MAT 22:34 Kala doh oro Parasi anuhun buku Jises ndrasokei san toro Sadusi. Eme oro Parasi tukumwi oro a se ma oro ame atou Jises.
MAT 22:35 Ereu ndrokowa oro, ndramak ari iy tanan labai ta sahou batanau. Iy anya kanone Jises na sahou ya iy ndremenyani iy i buku doh,
MAT 22:36 “Ndramak ta leheya, saba sahou batanau badeh, tinan handru ma sakalawi iri sahou batanau mari?”
MAT 22:37 Eme Jises asumon i buku doh, “‘Ou aseken Laban tam Kindrei na ndrinem mari, ma na koham handru mari, ma hawe na budon tam mari.’
MAT 22:38 Sahou batanau dah tinan handru ma iy batanau udu bwele-en labai.
MAT 22:39 Ya sahou batanau ari ja i buku le aliy, ‘Ou aseken iri lau ari ari badu hawem, i le buku ou aso-ok ou le.’
MAT 22:40 Sahou batanau ma la-uh doh kati iri sahou batanau malen mari hawe sahou tiri propet ale.”
MAT 22:41 Oro Parasi atukum kahis le, Jises ndremenyani oro buku doh,
MAT 22:42 “Ado abudon i buku sah handru ta ndramak taha aloh Krais o Mesaya? Iy nadu are handru?” Eme oro tiye i tan i buku doh, “Iy nadu Debit.”
MAT 22:43 Jises ndremenya oro ja i buku doh, “Ya i buku sah handru ya Malawi Ndrabun atehei budon i ta Debit ya Debit aloh ndramak nane ‘Laban’? Debit asehek i buku doh,
MAT 22:44 ‘Laban Kindrei tiye i ta Laban tek i buku doh: “Ou ame manyah ado loboho minek salin, winiya jo le baratehei iri lau ta amekes budon ndra-in i tam barado bahandra katim.”’
MAT 22:45 “Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?”
MAT 22:46 Ari toro winiyan basumon boho Jises bwe. Kala le doh, iri anoh ta ndremenya Jises ta randra sahou ja.
MAT 23:1 Hamon ta aliy Jises asehek sahou ili tiri lau mwan ma badih hawe oro lau tan.
MAT 23:2 Iy asehek i buku doh, “Iri lau ta leheya batanau malen hawe iri Parasi leheya aha ta sahou batanau, buku le Moses bwena mene amekes.
MAT 23:3 Iri sahou mari oro asehek ewek taha badeh, aha kanuhun ma ka-en hamon ta aliy. Arile kandriyen oro amekes, ado sa-en hamon ta aliy, tasah oro asehek iri sahou, arile oro ba-en hamon ta sahou toro bwe.
MAT 23:4 I buku le oro atisih lau na kandriyen malen solo-an labai ta iri ka-en hamon ta aliy, arile oro winiyan batehei mine oro ta aseben bwe.
MAT 23:5 “Iri lakou mari oro amekes doh, ta amekes iri lau katou. Oro asin nyeh ndra tinan ta asolom ereu mine oro ma bwili oro, ma oro aseu malou lawe-en ereu kiri awin toro.
MAT 23:6 Iri anya kamanyah kareu le ndrahu kon ta atudun ta nyamon tinan, ma bwabwai mwasin badu ndrahu tukum tiri Juwis.
MAT 23:7 Ya oro anya lau mari kasumon oro na len ta baen. Ma oro anya lau kaloh oro ‘ndramak ta leheya.’
MAT 23:8 “Arile lau saloh ado ‘ndramak ta leheya,’ ndri-iy. Tasah ndramak ari le, iy ndramak tinan ta leheya ado, ya ado mari badeh, nadu tine ado.
MAT 23:9 Ya ereu kon munyak dah ado saloh ari ndramak tama ado, ndri-iy. Ndramak ari le tama aha, ya iy udu kandrah.
MAT 23:10 Ya iri saloh ado ‘ndramak ereu bwena,’ ndri-iy, tasah ndramak ari le ereu bwena, iy Mesaya o Krais.
MAT 23:11 Ndramak nyaran tinan ereu ndrokowa aha iy kasahan lohowan taha.
MAT 23:12 Ndramak atudun nyaran amwenen ili loken, nyaran kameh eme andri, ya are lau amekes nyaran amwenen eme andri, nyaran kameh ili loken.”
MAT 23:13 Jises asehek sahou ja i buku doh, “Ado lau tanan ta batanau malen ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Tasah, ado ndrasulu-i kou ta ala bolo kon mwasin udu kandrah ereu mada iri lau. Ado ale winiyan bala bolon bwe. Ya, buku none iri lau anya kala bolon, ado aturuk san tiri.
MAT 23:15 “Ado lau tanan ta batanau malen ma ado Parasi, ado kabudon kamwenen! Sisi-in laba tinan doh kameh ewek bwele-e ado! Ado kalime ado la-uh! Ado adek bolo kon ma bwele-e ndras mari ta amekes ndramak ari le ta in hamon taha. Ya buku none iy in hamon taha, ado mesekei iy ndramak ta i bolo jih, i buku none ado le. Ado mesekei kandriyen tan asahan ndra-in, sakalawi tado ja.
MAT 23:16 “Ado lau mada ado bwe! Sisi-in laba tinan doh kameh ewek bwele-e ado! Ado anya kaleheya san ki tiri lau, ado kabudon kamwenen. Ado asehek i buku doh, ‘Buku none ndramak asehek sahou handru i ta asiu tinan ta Kindrei, ma iy tandrakan handru i ta kon loken, idoh lakou laleyah. Arile, buku none ndramak asehek i ta gol ereu bolo asiu ta Kindrei, ma iy tandrakan ili kon loken, idoh kameh iy kabwidi lakou buku iy nane ndrasehek.’
MAT 23:17 Ado lolo-ou ma mada ado bwe. Saba lakou iy mwasin ereu mada Kindrei? Gol mwasin deh, asiu tinan ta Kindrei? Ado tana ado bwe nadeh? Buku none gol ereu asiu tinan ta Kindrei, gol doh bamesekei asiu tinan ta Kindrei bala mwasin bwe; asiu ta Kindrei le mwasin, ma iy mesekei gol doh asahan mwasin ma ndrabun.
MAT 23:18 Ya ado ale anya, ‘Buku none ari ndramak tandrakan in bwele-e mada koto-ok, idoh ari lakou handru bwe. Arile, buku none iy tandrakan in bwele-e iri lakou ta asun ere bwele-e mada koto-ok, iy kamesekei buku iy nane ndratandrakan.’
MAT 23:19 Ado mada ado bwe. Saba lakou mwasin ereu mada Kindrei, iri lakou ta asun nane deh, o mada koto-ok? Iri lakou ta asun nane ereu bwele-e mada koto-ok, idoh lakou laleyah. Arile, mada koto-ok le mesekei iri lakou ta asun nane asahan ndrabun ta Kindrei.
MAT 23:20 Ya, buku none ou tandrakan ereu bwele-e mada koto-ok, idoh ou asehek sahou ndrabun handru. Ou ndratandrakan udu bwele-e mada koto-ok ma hawe iri lakou mari ta salom nane ereu bwele-e mada koto-ok nane.
MAT 23:21 Ya buku none ou tandrakan ili bwele-e asiu tinan ta Kindrei, ou ndratandrakan ndrala bwele-e asiu tinan ta Kindrei ma ndrala bwele-e Kindrei ale, tasah ou ado bolo asiu tan.
MAT 23:22 Ya are lau tandrakan ili kandrah, iy ndratandrakan ndrala ndrahu manyah ta Kindrei ma Kindrei ale, tasah idoh ndrahunen ta manyah.
MAT 23:23 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Iri bake mari badu bolo bilin ado apou ari, ari i ronoh, ronoh, ya ado adeu ari ari badu bolo ronoh doh, i ta Kindrei. Idoh mwasin, arile ado ndramani iri sahou tinan badu bolo batanau ta Kindrei, buku none kandriyen ta anuhun sahou amwenen, ma tikisiy lau, ma adeu budon boto-on i ta Laban. Sebwe mwasin ta ado ka-en hamon ta sahou batanau tinan ma ado samani iri sahou batanau bwisik nane ale.
MAT 23:24 Ado mada ado bwe. Ado anya kaleheya san ki tiri lau, arile ado amwenen batou san bwe. Ado atou lakou nadu bwisik buku buruku udu bolo suw tado, ya ado abo gok ta akohok eme len, arile ado batou lakou tinan buku kamel udu bolo suw tado, ya ado a-un le ma sakalami lakou mari.
MAT 23:25 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado sikine kona bwesam ma kona bwekei amwenen, arile nyamon ale ado apwe irek in bolo bwekei tado, ado akohok i san ta bahana ma san ta ndrakok.
MAT 23:26 Ado Parasi, ado mada ado bwe! Ado kasikine bolo bwesam ma bolo bwekei op, ano konan barasahan mwasin ale.
MAT 23:27 “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado buku none ari lek ta lau ndramak areu bolon, konan badeh, iri nyosowaniy na iri kanyeu ma iri lakou konen mwasin labai, arile bolon kodo-oh ndrarahak le ndruwi ndramak ma manahun ndra-in labai.
MAT 23:28 Ado a buku aliy adeh. Iri lau atou bada ado, iri anya ado mwasin. Arile bolo oda ado kodo-oh irek ta sahou wasai ma kandriyen ta ba-en hamon ta sahou batanau bwe.”
MAT 23:29 Jises asehek sahou ili ja i buku doh, “Ado lau ta leheya kandriyen tiri Juwis ma ado Parasi, mada ado kaleu! Sisi-in laba tinan doh kameh ewek bwele-e ado! Ado kalime ado la-uh! Ado a-eh lek mwasin tiri propet, ma ado anyasou lek tiri lau mwasin.
MAT 23:30 Ma ado anya, ‘Buku none to ka-en hawe iri tubu taha bwena, sebwe to winiyan baseben ta adai iri propet ta Kindrei amak bwe.’
MAT 23:31 Na sahou ado amekes doh, ado leheya buku none ado nadu iri lau mene adai iri propet ta Kindrei bwena.
MAT 23:32 Mwasin, ado kadek, ado kabwidiy kano iri kandriyen ndra-in mene iri tubu aha mene ndramesekei!
MAT 23:33 “Ado mwak ndra-in. Kindrei kameh atehei ado ala ta mada sahou, ma ado kameh ala bolo jih. Ya ado kasahan kamwenen ki buku sah handru?
MAT 23:34 Ado kanuhun kamwenen! Jo kameh suni iri propet ma iri lau budon tiri mwasin ma iri lau tanan mwasin ta leheya ado, ame atou ado. Arile ado kameh adai iri ra-on amak ma atahi iri ra-on ala bada kei tondreh, hawe iri ra-on kameh ado ubwi iri na malou an bolo asiu ta atukum taha. Ya ado kameh sobolon iri ereu bolo kon tinan taha ma oro kameh sakaliye au ala kon rakon ja.
MAT 23:35 Kandriyen ta adai iri lau mwasin don adeh, mesekei maha-an eme kon munyak. Maha-an doh kameh ereu bwele-e ado amwenen. Iri adai iri lau mwasin udu ndra kabatana ndraye Ebol eme isos ndraye Sekaraya nadu Berekaya, iy ndramak ale ado adai ereu ndrokowa asiu tinan ta Kindrei ma mada koto-ok. Ado amwenen kameh akohok iri maha-an ta kandriyen ndra-in doh.
MAT 23:36 Jo asehek sahou handru ewek tado, sohowa iri kandriyen ndra-in doh kameh ewek bwele-e aha lau mwan ma badih ale kede-en.”
MAT 23:37 Jises asehek sahou ja anya, “Jerusalem, Jerusalem, jo tikisi ado labai, ado adai iri propet, ma ado ateu iri lau Kindrei suni iri ame atou ado, ma ado orowei iri na bek ma adai iri amak. San solo-an jo anya katukumwi nadum oro, buku none iri kakaro tukumwi nadu iri areu bahandra bani iri. Arile ado bwale ado!
MAT 23:38 Nadah asiu ta salom tado kameh andra-i ma udu laleyah.
MAT 23:39 Jo asehek tado amwenen, ado winiyan batou jo ja bwe, winiya le len hamon kameh ado anya, ‘Kasekesek ki ta ndramak doh iy eme ta nyara Laban.’”
MAT 24:1 Jises ruwani asiu tinan ta Kindrei ma iy iu i len, ya oro lau tan ame leheya i tan asiu tinan ta Kindrei nane, konen handru.
MAT 24:2 Eme iy asehek sahou ja i toro i buku doh, “Ado ndratou iri lakou mari ta asiu kede-eh? Jo tiye tado amwenen, ari ndruwi asiu bek kameh winiyan bales bareu loken bwe. Iri marakon kameh ato-oh iu i andri.”
MAT 24:3 Jises eme manyah udu bwele-e mandrei Olip, oro lau tan aton le ame ndremenya iy anya, “Ou tiye keme taso, na saba len handru kameh lakou doh kasahan? Ya saba kalem kameh leheya aso buku none len tam ta eme hamon, ma kon munyak ano.”
MAT 24:4 Jises asumon oro i buku doh, “Ado kanyolom kamwenen, ya ari ndramak sawendreyani ado, ndri-iy.
MAT 24:5 Iri lau solo-an kameh ame anya iri asehek sahou tek ma anya, ‘Jo dah Krais.’ Ya iri kameh wendreyani lau solo-an.
MAT 24:6 Ado kameh anuhun kurutuwe bahun ereu mirihik, ma yoyou ta bahun ereu len. Arile, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh, kahis le.
MAT 24:7 Tasah, kon munyak tinan ari kameh amekes bahun i ta kon tinan ari, ya kabin badu kon rakon kameh amekes bahun i ta kabin badu kon rakon ja. Son kameh asahan bolo kon, ma kon ari ari kameh ndroi asahan.
MAT 24:8 Iri lakou mari doh anya kasahan buku none sisi-in ta badih anya kato-ou nah.
MAT 24:9 “Ano, iri kameh ateu ado, ma a-um ado, ma adai ado amak. Iri lau badu kon munyak tinan mari kameh baseken ado bwe, tasah ado an hamon tek.
MAT 24:10 Na len doh kameh iri lau solo-an aruwe budon tiri udu tek iu, ma au ala hamon. Iri ari, ari kameh nyowonya ndramak ari ja ili tiri lau ndra-in, ma iri kameh bwale iri ndramak ari ja.
MAT 24:11 Iri propet solo-an ta wasai kameh asahan, ma iri kameh wendreyani iri lau solo-an.
MAT 24:12 Kandriyen ndra-in solo-an kameh asahan, ma iri lau solo-an kameh ruwani kandriyen ta aseken ndramak ari ja.
MAT 24:13 Arile, are lau tawiy ili isos munyak ano, Kindrei kameh winiyan akohok iy i hamon ja.
MAT 24:14 Sahou mwasin dah nyala tondrok ta Kindrei kameh tiyaniy ili isos kon mari, ta iri lau marakon kanuhun, ano kon munyak dah barano.
MAT 24:15 “Hamon kameh aha anyolom ‘lakou munya-un ndra-in’ propet Daniyel mene tiye, lakou doh munya-un ndra-in ales udu kon ndrabun ta iy sare aliy. (Are lau anyolom sahou dah iy kabudon kamwenen.)
MAT 24:16 Are lau iri are kon Judiya katobwak kala bolo mandrei.
MAT 24:17 Are lau ereu bwele-e asiu loken sala hamon sala bolo asiu sakohok lakou tan, ndri-iy.
MAT 24:18 Ya are lau ereu bolo bilin sala hamon sala sakohok kolau tan, ndri-iy.
MAT 24:19 Len doh kameh len ndra-in labai tiri badih ale nah ere tiri, ma badih nah ma nyandren.
MAT 24:20 Aha kasolom ki ta Kindrei ta aha satobwak na len ta jor ma ur, ma na len ta amunyau, ndri-iy.
MAT 24:21 Tasah, na len ndra-in doh eme kameh kon mari kameh andra-i handru en, sakalawi iri len ndra-in mene kabatana Kindrei bwidi munyak eme taku dah. Ya ari ja hamon winiyan basakalawiy bwai.
MAT 24:22 Arile, Kindrei ndrasani kane len doh. Ya i buku none iy basaniy bwe, ari ndramak winiyan basakalawiy bwe. Arile, toro lau le nane Kindrei ndranyowonyani oro, iy kameh sani len doh kameh a mo-on.
MAT 24:23 Ya buku none ari ndramak katiye taha, ‘Krais asah idah!’ deh, ‘Laban asah in kenoh!’ Aha sanuhun, ndri-iy labai.
MAT 24:24 Tasah, idah kameh, krais ta wendreya ma hawe propet ta wendreya kameh asahan. Ya iri kameh amekes iri lahou tinan ma kalem ta wendreya iri lau, ma iri ale anya kanone iri lau ala budon ta Kindrei udu tiri kataku.
MAT 24:25 Aha ndranuhun! Jo ndratiye taha bwena.
MAT 24:26 “Ya, buku none lau asehek anya, ‘Laban ndrame, iy ereu bolo kon lomale an.’ Aha sala, ndri-iy. Ya buku none iri anya, ‘Iy asah aton kenah,’ aha satehei budon taha sala ta aliy, ndri-iy.
MAT 24:27 Len ta Nadu Ndramak Awas eme hamon kameh mada lau mari atou iy. Iy kameh eme buku le kalik anya ereu rai, lau areu ndra jaha kameh atou ale.
MAT 24:28 Kon ale oda ari lakou, o ndramak ereu aliy, idoh kamen adeh, iri sirih ta aimon lakou bolo-an le kameh atukum areu aliy.”
MAT 24:29 “Hamon ta len ndra-in asahan, ‘An kameh ilik, ma bun kameh winiyan banya bwe. Ya ndrau udu kandrah kameh taku ereu kandrah eme andri, ma boto-on mari badu kandrah kameh nyukunyok.’
MAT 24:30 “Hamon ta aliy, idah kameh kalem ta Nadu Ndramak Awas asahan bolo kandrah, ya lau mari badu munyak kameh aden, ma iri kameh atou Nadu Ndramak Awas asahan ereu bwele-e asi kandrah, ma boto-on tan ma lomadan tinan labai.
MAT 24:31 Ya kurutuwe ndrah kameh anyar tinan labai, ma iy kameh suni oro angelo tan au ala kati jor ma hahuw ereu bolo munyak dah, ta atukum iri lau tan, ala budon tan udu tiri, ereu kon ranah ili taku ranah ame hawen.
MAT 24:32 “Ado kanyolom kei pik, ya iy kameh tiye tado. Buku none andran irek ta gwa ma nyabun asahan, ado tana ado, idah kameh mirihik kon i le an ai.
MAT 24:33 Ya, buku none aha anyolom iri lakou nane jo ndrasehek, aha tana aha len ndrame bakep, ya Nadu Ndramak Awas ndrareu le mada kou ta eme hamon ai.
MAT 24:34 Jo tiye tado handru en! Iri lau rebesem areu kede-eh kahis na len dah kameh bamak bwe le, iri lakou mari doh kameh asahan.
MAT 24:35 Kandrah hawe kon munyak dah kameh ano iu, arile sahou tek le kameh winiyan bano bwe.
MAT 24:36 “Ari ndramak bala tanan len, deh, mada an ta Laban eme hamon bwe. Iri angelo badu kandrah ale ma nadun ale tanan bwe, taman le ari tanan.
MAT 24:37 Len ta Nadu Ndramak Awas eme kameh asahan, buku le iri lakou mene asahan na len ta Nowa.
MAT 24:38 Na len bwena ta wadah asahan, iri lau amekes nyamon tinan, iri a-un gwa, iri mwan ma badih atasou ili eme, ili le isos ta len Nowa oro ala bolo ndron tan tinan.
MAT 24:39 Arile, iri lau tana iri bwe, winiya le wadah eme aluwi iri mari au. Len ta Nadu Ndramak Awas kameh asahan buku le len mene ndrasahan bwena.
MAT 24:40 Na len doh, uru lau la-uh kameh abo gok se ereu bolo bilin, ya ari kameh iu, ya ari kameh udu api.
MAT 24:41 Uru badih la-uh kameh alim badu wit areu se, ari kameh andrei iy iu, ya ari kameh udu api.
MAT 24:42 “Aha kanyolom kamwenen, tasah aha tanan saba len Laban taha eme hamon, bwe.
MAT 24:43 Arile, budon tado kaleu ta tanan doh: Buku tama asiu i tanan, saba ben handru iri lau ta bahana kameh ame apou asiu tan, iy kameh winiyan bamadin bwe, iy kameh atehei ndrokei, tasah iy winiyan bamukuni iri lau ame apou asiu tan bwe.
MAT 24:44 Ya buku none aha ale, aha kalokou aha na len mari. Tasah, Nadu Ndramak Awas kameh asahan na len aha batehei budon ta iy eme bwe.
MAT 24:45 “Are lau iy mwasin ta gok, ma iy budon mwasin? Iy don adeh, tinan tan ndratehei tondrok tiri lau tan ra-on ja ndra-en bahandran ta adeu niri nyamon na len ari ari, iy le tanan.
MAT 24:46 Sekesek handru in bwele-e ndramak doh, buku none tinan tan eme takalahi iy amekes gok tan mwasin.
MAT 24:47 Jo tiye tado handru, tinan tan kameh atehei iy ta atondrok iri lakou tan mari.
MAT 24:48 Arile, buku none iy lau ta gok ndra-in katiye anya, ‘Ndramak ta asiu doh kameh winiyan bame suwi bwe,’
MAT 24:49 ya iy kameh a-um iri lau ta gok hawen, ma iy kameh ili aimon nyamon ma a-un gwa lolo-ou hawe iri lau ta a-un gwa lolo-ou.
MAT 24:50 Ya, na len ari, tinan ta ndramak nane ta gok kameh eme hamon na len iy ndramak nane tanan bwe.
MAT 24:51 Tinan tan kameh sani iy i lunah, ma mesekei iy akohok maha-an buku le iri lau kalime iri la-uh. Iy kameh anyar, ma asenyer lihin.
MAT 25:1 “Tondrok ta Kindrei udu kandrah i buku le oro badih bihin ma ronoh. Ndramak ari anya ki tasou. Eme ma, iri badih bihin doh bwese-ei sun toro ta ala ndruni iy in san ma tiyani iy eme ta molak.
MAT 25:2 Oro limeh badeh bale oro bwe, ya oro limeh oro tanan labai.
MAT 25:3 Oro limeh bale oro bwe nane bwese-ei lam toro, oro bakohok ra-on ndrelekei ja bwe.
MAT 25:4 Oro limeh nane bale oro udu aliy, oro kuhi lam toro, ma oro kuhi ndrau ndrelekei ari ale.
MAT 25:5 Ndramak nane ta tasou bame suwi bwe, ya oro badih nane mada oro amadin, ya oro amadin.
MAT 25:6 “Na ndrukulu ben alih, iri anuhun ndramak ari aloh i buku doh, ‘Iy ndrame, ndramak ta tasou ndrame! Aha kame katou iy.’
MAT 25:7 “Eme oro badih ma ronoh nane amak, mine oro i ta sun toro, anya katelem ja.
MAT 25:8 Eme ya, oro limeh nane bale oro bwe, tiye toro limeh nane bale oro udu aliy, ‘Ado kanyohan aso sese ndrelekei tado, sun taso anya kamak ai.’
MAT 25:9 “Arile oro limeh nane bale oro udu aliy anya, ‘Sebwe winiya to bwe nadeh! Ado ka hamon kala kasih ra-on ja kewek tado.’
MAT 25:10 “Eme oro badih ma limeh nane adek au ala hamon ala asih toro ndrelekei, oro adek ala anya kasih le badeh, ndramak ta tasou nane asahan, ya oro limeh nane ndralowosani oro ma oro abe-en iy, oro au ala bolo asiu hawen, ma oro aimon nyamon ta tasou nane, ma iri sulu-i kou ihis.
MAT 25:11 “Luwen bwe oro badih limeh nane ame hamon aloh anya, ‘Laban, Laban, ou sulu-i kou, aso anya kawek asiu.’
MAT 25:12 “Arile iy asumon boho oro anya, ‘Jo tiye handru, jo tanan ado bwe oh!’
MAT 25:13 “Eme ya, ado kanyolom kamwenen, tasah ado tana ado bwe, saba len, ma saba mada an handru, kameh iy eme hamon ja.
MAT 25:14 “Tondrok ta Kindrei kameh i buku le ndramak ari anya kedek kili kon ari leheleh, ya iy luhi oro lohowan tan ya iy indrom luk tan ili toro ta oro katondrok.
MAT 25:15 Iy abudon kandriyen ta gok ma nyamu lohowan tan ari, ari. Eme ya, i ta iy ari, iy atehei lamalou (K5,000), i ta ari ja iy atehei lulou (K2,000), i ta ari ja iy atehei ralou (K1,000), ano iy akohok tekedek tan iu ili kon len.
MAT 25:16 Iy nane kuhi lamalou (K5,000), nawin bwe iy ili amekes ba-en na luk tan, eme ya iy kuhi lamalou (K5,000) ja ili hawen.
MAT 25:17 Ya iy nane kuhiy lulou (K2,000) mesekei buku aliy ale, ma iy kuhi lulou (K2,000) ja ili hawen tan nane.
MAT 25:18 Arile, iy ari nane kuhiy ralou (K1,000) le, ili ihi lek ili bolo ndren, ma iy tone luk ta tinan tan nane.
MAT 25:19 “Jaha solo-an iu ano tinan toro lohowan nane eme hamon, ma iy ndremenya oro ta luk tan mene iy atehei ili mine oro.
MAT 25:20 Ndramak nane kuhi lamalou (K5,000) eme madan ma iy anya, ‘Tinan tek, ou mene atehei lamalou (K5,000) eme tek. Jo ili ja mesekei lamalou (K5,000) ja ndrala hawen.’
MAT 25:21 “Tinan tan anya, ‘Lohowan tek, ou ndramak mwasin, ou ndranyowo-ei lakou nadu bwisik, idah kameh jo mesekei ou atondrok lakou tinan; ou ala bolo kon tek ta sekesek.’
MAT 25:22 “Ya iy ndramak nane kuhi lulou (K2,000) eme madan ma iy anya, ‘Tinan tek, ou atehei lulou (K2,000) eme minek, jo ndramesekei lulou (K2,000) ja ndrala hawen.’
MAT 25:23 “Tinan tan tiye tan, ‘Ou ndramak mwasin; Ou ndranyowo-ei lakou nadu bwisik, idah kameh jo mesekei ou atondrok lakou tinan, ou ala bolo kon tek ta sekesek.’
MAT 25:24 “Iy ndramak nane kuhi ralou (K1,000) le eme bwena ma iy anya, ‘Tinan tek, jo tanan ou badeh, ndramak ta losen. Ou akohok lakou laleyah ma akohok lakou badu bwisi limem bwe.
MAT 25:25 Eme ya, jo inoh, ma jo ili tone luk tek nane ili bolo ndren. Idoh luk ralou (K1,000) tam kewek hamon.’
MAT 25:26 “Arile tinan tan anya, ‘Ou ndramak ndra-in ma ou lau ta awoyah! Ou tanam jo kameh akohok lakou jo batah bwe, ma jo kameh atukum nyamon bolo kon mari ale jo bakeh badu nyamon bala aliy bwe.
MAT 25:27 Tasah handru ou mene batehei luk tek bala mine iri lau ta amekes luk asahan solo-an bwe? Ya, buku none jo asahan, jo kameh akohok luk tek ma saba lakou ja badu hawen.
MAT 25:28 Ado kakuhi luk ralou (K1,000) ereu minen keme len, ma katehei kili mine iy lau tan nane akohok lamalou (K5,000) i bwele-e lamalou (K5,000) mene udu minen ta atondrok.
MAT 25:29 Tasah, i ta ndramak ari, ari tan lakou udu aliy, idah kameh iy akohok solo-an ja ili la-un. Arile, ndramak tan lakou bwe, ya sese le iy tawiy, idah kameh kuhi mari ano iu.
MAT 25:30 Ya, ta lohowan ndra-in nane, ado kakahei iy kili bolo kon lulik. Kon doh iri kameh aden ma asenyer lihi iri.’”
MAT 25:31 Jises asehek sahou ili ja anya, “Na len Nadu Ndramak Awas eme ma lomadan, iri angelo tan ale ereu hawen, iy kameh manyah ereu koyeu tan lomadan handru.
MAT 25:32 Ya, iri lau mari badu munyak kameh ame atukum areu madan, ya iy kameh apou iri, ari i len, ari i len, buku none iri lau ta atondrok lebelei iri sipsip hawe me.
MAT 25:33 Ma iy kameh atehei iri sipsip ala minen salin, ma iri me kameh ala minen kamweu.
MAT 25:34 “Ya kabin kameh tiye toro lau areu minen salin anya, ‘Ado kame, tama ndranyosowani ado. Ado kame kakohok ndrahune ado, tama ndralowosaniy kala munyak dah ma ha-un kahis le.
MAT 25:35 Tasah, bwena jo imek son, ou adeu nek nyamon, balek amar ou atehei wa-ik gwa, jo lau badu leheleh ou luhi jo ili asiu.
MAT 25:36 Jo kolau bwe, ou atehei kolau ra-ei eme jo taniy, jo ibo sik ou ame tondrokei jo, jo in bolo kou, ou ame anyolom jo.’
MAT 25:37 “Ya iri lau mwasin kameh asumon iy anya, ‘Laban, na saba len ahi atou ou amak son, ya aso nyohonei ou; ya, na saba len balem amar ya aso atehei wa-im gwa?
MAT 25:38 Na saba len aso atou ou lau badu leheleh, ya aso luhi ou ame asiu; ya, ou kolau ta taliye bwe, ya aso atehei kolau ra-ei ewek ya ou taniy?
MAT 25:39 Ya na saba len ou abo sik, ya, ou areu bolo kou, ya aso awek anyolom ou?’
MAT 25:40 “Ya kabin kameh asumon i buku doh, ‘Handru, jo tiye tado, buku none ou ndrabwidiy ndrala ta ari nadu tinek laleyah kede-eh, ou ndrabwidiy ndrame tek.’
MAT 25:41 “Ya iy kameh tiye toro lau areu minen kamweu i buku doh, ‘Ado ka-au ka len! Lakou ndra-in udu la-u ado. Ado kala bolo jih, tama ndralowosaniy ta balik hawe oro angelo tan.
MAT 25:42 Tasah, jo imek son ado banyohan jo nyamon bwe, balek asamar ado badeu wa-ik gwa bwe.
MAT 25:43 Jo lau badu leheleh ado baluhi jo bawek asiu bwe, jo kolau ta taliye bwe, ado badeu kolau bame tek ta taliye bwe, jo ibo sik ma jo in bolo kou ado bame banyolom jo bwe.’
MAT 25:44 “Oro kameh asumon i buku doh, ‘Laban na kahis aso atou ou amak son, deh, balem amar, deh, ou lau badu leheleh, deh, ou kolau ta taliye bwe, deh, ou abo sik, deh, ou a-en bolo kou, ya aso banyohan ma bawek batou ou bwe?’
MAT 25:45 “Iy kameh asumon i buku doh, ‘Handru jo tiye tado, buku none ou bamekes bala ta ari ndramak laleyah kede-eh bwe, ou bamekes bame tek bwe le.’
MAT 25:46 “Ya oro kameh au ala bolo kon ndra-in, arile iri lau mwasin kameh au ala bolo kon mwasin.”
MAT 26:1 Jises bwidi iri sahou doh ano, iy tiye toro lau tan anya,
MAT 26:2 “Ado tana ado, len la-uh hamon kameh taha abudon len tinan ta Pasoba, ma Nadu Ndramak Awas kameh, iri atehei iy ili mine iri lau ndra-in, ma oro kameh tatahi iy ili bada kei tondreh.”
MAT 26:3 Na len doh iri tinan tiri pris hawe iri lau tinan areu bwena tiri Isra-el atukum areu asiu ta tinan tiri pris, nyaran Kayapas.
MAT 26:4 Oro atilik sahou toro i se ta takaleh san ta wendreya Jises, ma kateu iy, ma kadai iy kimek.
MAT 26:5 Arile, oro tiye anya, “To samekes na len tinan ta nyamon, ndri-iy, koro-an iri lau kabokoro-ei ma bahun tinan kasahan.”
MAT 26:6 Jises udu Betani udu asiu ta Saimon, iy bwena lepra udu tan.
MAT 26:7 Jises udu andri aimon nyamon kahis le, badih ari eme ma bwisi ndrau ari ma ndrelekei manahun mwasin udu bolon, lakou doh sowan tinan labai, ma iy solowei ili batu Jises.
MAT 26:8 Oro lau tan atou, ma oro abolosen ma oro anya, “Aden! Tasah handru iy asolou ndrelekei mwasin doh iu laleyah?
MAT 26:9 Ndrelekei doh nane katehei kili mada ba-en ya luk solo-an asahan ta aliy, ya katehei ki tiri lau tiri lakou bwe.”
MAT 26:10 Arile, Jises tanan budon toro, ma iy anya, “Ado abudon ndra-in i ta badih kede-eh tasah? Badih kede-eh ndramesekei lakou tinan ma mwasin labai ndrame tek.
MAT 26:11 Iri lau tiri lakou bwe kameh len mari ado hawe ado, arile jo kameh winiyan bado hawe ado len mari bwe.
MAT 26:12 Iy solowei ndrelekei doh eme badak ta alokou jo ta ili bolo lek.
MAT 26:13 Handru, jo tiye tado. Saba kon iri atiye sahou mwasin ili udu bolo kon munyak dah, saba lakou iy ndrabwidiy dah kameh iri asehek ta aliy ta abudon nyaran.”
MAT 26:14 Ano ya iy ari ereu ndrokowa oro ronoh la-uh nyaran Judas Iskariyot, iy ili atou oro tinan tiri pris.
MAT 26:15 Ma iy tiye toro, “Saba lakou handru kameh ado atehei eme tek, buku none jo atehei iy ewek mine ado?” Eme oro sihinei iy na bek nyikilikin silba ma tonoh (30).
MAT 26:16 Kala doh iy takaleh madasan ta katehei iy kili mine oro.
MAT 26:17 Na len ma bwena ta nyamon tinan ta jabi ramen oro bamekes yis bala bolon bwe, oro lau ta Jises ame ndremenya iy anya, “Saba kon ou aso-ok aso kalowosaniy ta to kaimon nyamon ta Pasoba kudu aliy?”
MAT 26:18 Eme iy anya, “Ado kala bolo kon tinan kala katou ndramak ari ma katiye ki tan, ‘Ndramak ta leheya anya, len tek ndrame mirihik; jo kameh aimon nyamon udu asiu tam hawe oro lau tek.’”
MAT 26:19 Eme oro lau ta Jises mesekei buku le Jises nane ndrasehek, ma oro lowosani nyamon ta Pasoba ma asiu buku le aliy.
MAT 26:20 Kon abeyeh Jises hawe oro lau tan ma ronoh la-uh manyah ado andri ta aimon nyamon.
MAT 26:21 Oro aimon nyamon kahis le, iy tiye, “Jo asehek sahou handru ewek tado, iy ari ereu bolo ado kede-eh kameh atehei jo ili mine iri lau ndra-in.”
MAT 26:22 Eme oro tikisiy handru en, ma oro ari ari ndremenya iy anya, “Laban ou tiye, jo deh, bwe?”
MAT 26:23 Eme iy asumon boho oro anya, “Are lau na dah edeu minen i bolo bwekei hawek, iy kameh adeh, atehei jo ili mine iri lau ndra-in.
MAT 26:24 Nadu Ndramak Awas kameh imek i buku le tarou mene ndratorowenei ta nyalan. Arile sisi-in laba tinan kameh i bwele-e ndramak iy ale atehei Nadu Ndramak Awas ili mine iri lau ndra-in, sebwe mwasin tinen mene satuwi iy, ndri-iy!”
MAT 26:25 Judas, iy lau kameh edeu iy ili mine iri lau ndra-in, ndremenya anya, “Ndramak ta leheya, jo deh bwe?” Jises tiye tan, “Ou ndratiye badeh, kabwai.”
MAT 26:26 Kala oro aimon nyamon doh, Jises kuhi jabi ramen, ma iy asolom i la-un, iy boso-ei i noro lau tan, ma iy anya, “Ado kakohok ma ado kaimon, idah odak amwenen.”
MAT 26:27 Ano iy kuhi bwiniu waen, ma iy edeu wurah i ta aliy, ano iy edeu wa-i oro lau tan, iy anya, “Ado mari ka-un.
MAT 26:28 Tasah, idah ndrayek ta sahou randra le, ndrayek amou ta sikine lau mari ta kandriyen ndra-in tiri.
MAT 26:29 Jo asehek tado, jo kameh winiyan ba-un ndraye buwa waen dah hawe ado ja bwe, winiya le len jo kameh a-un ja i san ha-un hawe ado udu bolo tondrok ta tama amwenen.”
MAT 26:30 Eme oro ayah wari ari ta atudun, ano ma oro au ala mandrei Olip.
MAT 26:31 Ano Jises tiye toro i buku doh, “Ado mari kameh ruwani jo, ma sakaliye au na ben dah, tasah iri ndratorowei bwena udu bolo buk ndrabun i buku doh, ‘Jo kameh idi ndramak ta tondrok, ya iri sipsip tan kameh aseker laleyah.’
MAT 26:32 Arile, hamon ta aliy kameh jo amak ja, ya jo kameh ili bwena tado ili Galili.”
MAT 26:33 Pita asumon iy i buku doh, “Buku none oro mari atou lakou asahan tam, ya oro anoh ma aseker, jo kameh winiyan baruwani ou bwe.”
MAT 26:34 Jises tiye tan anya, “Handru jo asehek tam. Na ben dah kameh, kakaro baden bwe le, ou kameh besebes anya ou tanam jo bwe san tulusin.”
MAT 26:35 Pita tiye tan anya, “Jo winiyan basehek sahou badeh bwe, buku none jo imek hawem jo winiyan babesebes anya jo tanan ou, bwe.” Eme ya oro lau tan mari asehek sahou buku aliy ale.
MAT 26:36 Ano Jises ma hawe oro lau tan au ala kon ari aloh Getsemeni. Eme iy tiye i toro lau tan, “Ado kamanyah kado dah, ya jo kameh ili sese kodo-oh asolom.”
MAT 26:37 Iy kuhi Pita hawe nadu Sebedi uru ma la-uh, iy tikisiy ma budon tan andra-i labai.
MAT 26:38 Iy tiye toro anya, “Jo tikisiy labai, ma jo anya kimek. Ado kado dah ma mada ado katele hawek.”
MAT 26:39 Eme Jises edek ili bwena sese, ma iy taku i le batalan. Eme ma iy asolom i buku doh, “Tama, buku none winiyan eh, ou kuhi maha-an ta tikisiy udu bwele-ek dah ki-iu, arile idoh budon tek le, ou amekes saba lakou ou tanam mwasin.”
MAT 26:40 Ano, iy eme hamon iy atou oro lau tan ndramadin, ma iy tiye ta Pita, “Buku sah handru ya ado winiyan bareu loken luluwen hawek bwe?
MAT 26:41 Ado kanyolom ma ado kasolom ki ta Kindrei ta ado sataku sala bolo kandriyen ndra-in. Ndrine ado aso-ok handru ta amekes gok, arile oda ado badeh, boto-on handru bwe.”
MAT 26:42 San rasan ja Jises iu ili len ma iy asolom, “Tama, buku none maha-an dah winiyan ba-au bwe winiya le jo kanyuwiy, mwasin, tama jo in hamon ta budon tam.”
MAT 26:43 Ano ja iy eme hamon atou oro ndramadin ja, tasah mada oro amadin labai.
MAT 26:44 Jises ruwani oro areu gwek, iy iu ili hamon asolom san rasan ja, iy tiye sahou buku le iy nane ndrasehek ndrala ta taman.
MAT 26:45 Ano iy eme hamon atou oro lau tan ma iy anya, “Ado kede-eh amadin ma amunyau kahis le? Ado katou! Mada an ndrano ai. Idah kameh, Nadu Ndramak Awas kameh ili mine iri lau ndra-in ai.
MAT 26:46 Ado kareu loken, to ka-au. Ado katou, iy ndramak ta atiye jo ili mine iri lau ndra-in asah ndrasahan idah.”
MAT 26:47 Iy asehek sahou kahis le, Judas, iy badu hawe oro lau ma ronoh la-uh nane, iy edek eme hawen, hawe iri lau solo-an handru en, ma samen ma kei udu mine iri. Iri tinan tiri pris ma ndramak ereu bwena tiri lau suni oro ame.
MAT 26:48 Judas nane ndratiye toro i buku doh, “Are lau jo atehei bohok i bohon, badeh iy le ai, ado katawi iy ai.”
MAT 26:49 Judas ales amwenen ili hawe Jises ma iy anya, “Ei, ou ndramak ta leheya!” Ma iy atehei bohon i boho Jises.
MAT 26:50 Eme Jises asumon bohon anya, “Kawas tek, sasah ou anya amekes, ou amekes ai.” Iri lau ame atehei mine iri i ta Jises ma tawi iy.
MAT 26:51 Ndramak ari badu hawe Jises aluwi samen tan, ma sani ka-u ndranye bonyo-ou ta tinan tiri pris iu.
MAT 26:52 Jises tiye tan, “Ou atehei samen tam ki hamon ki ndrahunen! Are lau akohok samen, iy kameh imek na samen.
MAT 26:53 Sebwe ou tanam bwe nadeh? Jo winiyan ndremenya tama, ya iy winiyan suni iri angelo solo-an labai, kane iri sakalawi iri lau ta bahun badu kon munyak tinan ma ronoh la-uh, tukumwi i le se.
MAT 26:54 Arile, buku none jo kamesekei buku doh, sahou ta Kindrei ereu bolo buk ndrabun tan kameh basahan handru bwe. Buk ndrabun ta Kindrei anya, iri lakou doh kasahan tek.”
MAT 26:55 Kala doh Jises asehek tiri lau nane ta ateu iy anya, “Buku sah ya ado ame ma samen hawe kei ta ateu jo, jo ari lau ta amekes ramwes deh? Len mari jo manyah udu bolo asiu tinan ta Kindrei ma jo asehek sahou ma leheya aha, ya aha bateu jo bwe.
MAT 26:56 Arile iri lakou mari dah asahan ta amekes sahou iri propet mene ndratorowenei asahan i handru.” Eme oro lau ta Jises mari ruwani iy ma oro atobwak au.
MAT 26:57 Iri lau nane tawi Jises kuhi iy ili asiu ta Kayapas iy tinan tiri pris. Iri lau ta leheya kandriyen tiri Juwis ma hawe iri lau-en atukum ado aliy.
MAT 26:58 Arile, Pita in hamon tiri ili, iy ili isos bada kowah ta mada asiu ta Kayapas. Iy iu ili bolo kowah ma iy manyah hawe iri lau ta ndrokei, iy anya kanyolom saba lakou handru kameh asahan ta Jises.
MAT 26:59 Oro tinan tiri pris ma hawe iri lau mari ta kansol nane anya kanone katakaleh ari sahou wasai kihis bada Jises ma iri kadai iy kimek.
MAT 26:60 Iri lau solo-an ame asehek sahou wasai, arile iri batakalahei ari lakou ndra-in Jises mesekei bwe. Hamon ta aliy uru lau la-uh asahan.
MAT 26:61 Ma uru anya, “Ndramak kede-eh anya, ‘Jo winiyan tohowei asiu tinan ta Kindrei, ya len taloh hamon jo winiyan tahiy i loken ja.’”
MAT 26:62 Tinan tiri pris suri iy ereu loken ma iy tiye ta Jises anya, “Ou randra sahou ta tiye i ta sahou nane doh oro to-en ewek tam deh bwe?”
MAT 26:63 Arile bwai, iy andru-uk le ai. Ano, tinan tiri pris asehek sahou i tan ja anya, “Jo ndremenya ou na nyara Kindrei kohan udu aliy, ya ou tandrakan handru ki loken ma ou tiye taso. Ou kede-eh Krais handru deh bwe? Ya ou Nadu Kindrei?”
MAT 26:64 Jises asumon bohon anya, “Ou ndrasehek badeh kabwai. Arile jo tiye tado, hamon kameh ado anyolom Nadu Ndramak Awas kameh manyah udu loboho lim salin ta Kindrei iy boto-on labai, ya iy kameh udu bwele-e asi jor badu kandrah eme.”
MAT 26:65 Eme ma tinan tiri pris ibolosen ta sahou doh ya iy tarani awin tan le ma iy anya, “Iy ndrabobose nyara Kindrei kabwai. Ya buku sah ja to anya kasilah sahou ta i badan ja? Ado mari ndranuhun sahou bobose nane.
MAT 26:66 Ya ado abudon i buku sah?” Eme iri asumon anya, “Iy ndrabwidi kandriyen ndra-in, ya iy kimek ta aliy.”
MAT 26:67 Ano iri amuri bwilin ma a-um iy, ya oro ra-on atahan lim i kapan,
MAT 26:68 ma anya, “Ou ndramak Kindrei ndraleheyaniy, ou asehek sahou buku none iri propet. Ou tiye taso, are lau a-um ou doh?”
MAT 26:69 Pita manyah udu manan boho asiu, ya badih ari lohowan ta tinan tiri pris eme atou iy, ma iy anya, “Ou ale, ou are hawe Jises badu Galili.”
MAT 26:70 Arile Pita besebes udu mada iri lau mari anya, “Jo tanak saba sahou ou asehek kede-eh bo-oh.”
MAT 26:71 Ya Pita suri iy ma iy iu ili manyah udu madasan ta eme asiu. Badih ta lohowan ari ja atou iy, ma iy tiye toro lau areu mirihik tan anya, “Iy ndramak kede-eh badu hawe Jises badu Nasaret.”
MAT 26:72 Pita anuhun ma iy anya ja, “Jo tanan ndramak badeh bwe, handru!” Ma iy tandrakan ale.
MAT 26:73 Luwen bwe iri lau areu san ame, ma tiye ta Pita, “Handru labai, ou kede-eh ari ai badu hawe oro, tasah sehek sahou tam kede-eh buku le aliy, handru en!”
MAT 26:74 Ano Pita tandrakan boto-on labai, “Jo asehek sahou handru, jo tanan ndramak badeh, bo-oh. Buku none jo wasai, Kindrei kamesekei maha-an keme la-uk.” Iy asehek sahou ano le badeh, kakaro eden.
MAT 26:75 Ano, Pita bwetenei sahou ta Jises ndratiye ndrala tan anya, “Kakaro baden bwe le, ou kameh besebes anya ou tanam jo bwe san tulusin.” Eme iy iu ili len, ma iy eden andra-i labai.
MAT 27:1 Na mandraben handru en, iri tinan tiri pris ma hawe iri lau tinan amekes budon i bada Jises ta kadai iy kimek.
MAT 27:2 Iri sawei iy, ma tiyani iy ili, ma atehei iy ili mine tinan tiri Rom nyaran Pailat.
MAT 27:3 Judas, ndramak ta edeu Jises ili mine iri lau ndra-in, iy i tanan ta iri atehei maha-an i la-u Jises, iy tubuni budon tan, ma iy kuhi luk silba bororoh ma tonoh (30) iu ili hamon ili mine tinan tiri pris ma tinan tiri lau.
MAT 27:4 Iy anya, “Jo ndrabwidi kandriyen ndra-in. Ndramak jo atehei ewek mine ado badeh, babwidi ari kandriyen ndra-in bwe, ya ado kameh adai iy imek.” Oro asumon bohon i buku doh, “Ari lakou taso bwe, badeh lokowam labai.”
MAT 27:5 Iy akahei luk nane ili andri in bolo asiu tinan ta Kindrei, ma iy sakaliye iu. Eme iy ili simidi iy.
MAT 27:6 Tinan tiri pris kuhi luk nane ma iy anya, “Luk dah ta sa-oh. To satehei sala hawe luk badu bolo asiu tinan ta Kindrei, ndri-iy.”
MAT 27:7 Oro mari atehei sahou i se, ya luk nane oro sihinei munyak ranah tiri lau ta amekes kun na ndren, ya munyak doh iri a-eh iri lau badu leheleh amak ala aliy.
MAT 27:8 Idoh le ya iri aloh munyak doh, “Munyak ta ndra,” eme isos dah.
MAT 27:9 Idoh mesekei sahou ta propet nyaran Jeremaya asahan handru anya, “Oro kuhi luk silba bororoh ma tonoh (30), kanen badeh, iri lau badu Isra-el sekesek ta akohok buku none sihinen,
MAT 27:10 Ya na luk nane oro sihinei munyak tiri lau ta amekes kun, buku none le Laban tiye tek.”
MAT 27:11 Jises ales udu bwena ta tinan tiri Rom, ma iy ndremenya iy anya, “Ou kabin tiri Juwis, neh?” Jises anya, “Ou ndrasehek badeh, kabwai.”
MAT 27:12 Arile, iy basumon ari sahou bwe-en, kala tinan tiri pris hawe tinan tiri lau to-en sahou ili tan.
MAT 27:13 Eme Pailat tiye tan buku doh, “Oh anuhun iri sahou doh iri lau to-en ewek la-um kede-eh deh bwe?”
MAT 27:14 Arile Jises basehek ari sahou bwe, idoh mesekei tinan tiri Rom abudon solo-an labai.
MAT 27:15 Jaha mari na len ta nyamon tinan, ndramak in bwena ta kon tinan ruwani ndramak ari badu bolo kou eme len. Iri lau le aloh nyaran, ya Pailat kameh aruwe iy ili mine iri.
MAT 27:16 Na len doh ndramak ari nyaran Barabas udu bolo kou ale tasah iy ta amekes kandriyen ta ramwes.
MAT 27:17 Iri lau tukumwi iri, ma Pailat ndremenya iri anya, “Aha aso-ok are lau jo karuwaniy kewek mine aha? Barabas deh Jises, iri asehek anya iy Krais, Kindrei suni iy eme.”
MAT 27:18 Pailat asehek buku doh, tasah iy tanan, ndrine iri ndra-in ta Jises, ma iri tiyani iy eme mada sahou.
MAT 27:19 Ma kala Pailat manyah udu bada koyeu tan ta anuhun sahou kahis le, udun atehei sahou eme anya, “Ou samekes ari lakou sala bada iy lau badeh, ndri-iy, tasah na ben jo ameh jo atou ndramak badeh, ya ameh doh mesekei budon tek andra-i labai.”
MAT 27:20 Eme iri tinan tiri pris ma oro lau tinan tiri lau sosokok iri lau solo-an dah anya, “Aha kaloh, ‘Ahi aso-ok Barabas keme mine ahi, ya ou adai Jises kimek.’”
MAT 27:21 Pailat ndremenya iri ja, “Are lau handru aha aso-ok jo karuwaniy kewek mine aha?” Iri arah, “Barabas!”
MAT 27:22 Eme Pailat ndremenya iri, “Ya jo kamekes sasah ki ta Jises iri aloh Krais?” Iri mari anya, “Katahi iy ki bada kei tondreh!”
MAT 27:23 Iy anya, “Buku sah handru, saba lakou ndra-in handru iy mesekei?” Arile bwai, iri sarakau i loken le gwek anya, “Katahi iy ki bada kei tondreh!”
MAT 27:24 Pailat ndratanan ai, buku iri kameh winiyan banuhun sahou tan bwai, ya mirihik bahun anya kasahan. Eme iy kuhi gwa, ma iy sikine minen ereu mada iri lau mari, ma iy anya, “Ado sato-en sahou same la-uk buku none ndramak dah imek. Lokowa ado ai!”
MAT 27:25 Eme iri lau mari anya, “Ndrayen badeh, keme la-u ahi, ma nadu ahi!”
MAT 27:26 Pailat eme ruwani Barabas ili mine iri, arile iy atehei Jises ili mine iri lau ta bahun, ta iri ka-um iy na malou sakabuk i bek. Ano iy atehei Jises ili mine iri lulik ta katahi iy kili ta kei tondreh.
MAT 27:27 Iri lau ta bahun ta Pailat kuhi Jises ili bolo asiu tinan ta atukum tiri Rom, ma iri mari tukumwi iri ame ales are madan.
MAT 27:28 Eme iri tarani kolau tan iu, ma atehei kolau ari saraman lawe-en ili la-un.
MAT 27:29 Ya oro tabuwi bada malou bobodon i se buku none barak ma atehei ili batun. Ano oro atehei bala banap ari ili minen salin; ano oro atehei bwili ndru-u oro in bwena tan ma oro bobose iy anya, “Ou kabin tiri Juwis ou, areu le buku doh len mari!”
MAT 27:30 Eme oro amuri iy, ano oro kuhi bala banap nane ereu mine oro ubwiy i batun.
MAT 27:31 Oro bobose iy ano, oro tolowei kolau saraman nane udu la-un iu, eme ma oro tani kolau tan amwenen ili hamon i badan. Ano oro sirini iy iu ili ta kadai iy ki bada kei tondreh.
MAT 27:32 Oro adek au ala len, oro ndruni ndramak ari badu Sairini nyaran Saimon. Oro lau ta bahun andrekei iy bwese-ei kei tondreh ta Jises.
MAT 27:33 Oro ame asos kon iri aloh Golgata, moson ta aliy iri aloh, “Kon ta bwisi bar ta ndramak.”
MAT 27:34 Oro atehei waen, oro tubuni i hawe gwa ari nyakadan labai anya iy ka-un, arile Jises atona, eme iy ba-un bwai.
MAT 27:35 Oro atahi iy i bada kei tondreh, ano oro atehei kolau tan i andri ma oro amekes laki na aliy, ta andrei kolau tan i le winiya iri.
MAT 27:36 Ano oro manyah ado andri, ma oro atondrok iy.
MAT 27:37 Udu bwele-e batun loken, oro torowenei sahou tanan ta bobose anya, “Idah Jises, Kabin tiri Juwis.”
MAT 27:38 Ano oro atahi uru lau la-uh ta bahana areu mirihik ta Jises. Iy ari ereu minen salin, ya iy ari ereu minen kamweu.
MAT 27:39 Eme ya iri lau adek mirihik tan, nyokoda batu iri ili eme ma bobose Jises i buku doh,
MAT 27:40 “Ou adeh, ou mene anya ou kameh tohowei asiu tinan ta Kindrei eme andri, ano kameh ou tutuniy ja na len taloh le. Ya abo, ou sebenei ou le ai, buku none ou Nadu Kindrei, ou ame andri ta kei tondreh badeh!”
MAT 27:41 Oro tinan tiri pris ma iri lau ta leheya kandriyen tiri Juwis ma tinan tiri lau bobose Jises buku aliy ale.
MAT 27:42 Iri anya, “Iy sebenei iri lau rayah, arile iy winiyan basebenei iy amwenen bwe! Iy badeh, kabin tiri Isra-el; iy keme andri ta kei tondreh, ya eme aso kameh atehei budon taso in hamon tan.
MAT 27:43 Iy atehei budon tan in ta Kindrei, ma iy anya, iy badeh, Nadu Kindrei. Mwasin, aso anya katou iy kasebenei iy amwenen na dah
MAT 27:44 Uru lau mala-uh nane sukik areu hawen ale asehek sahou ndra-in i tan ale.
MAT 27:45 Na mada an udu le alih, lulik tubuluhi kon marakon udu gwek winiya mada an i taloh na beyeh.
MAT 27:46 Mada an ili taloh na beyeh, Jises arah boto-on labai anya, “Eli, Eli, lama sabaktani?” moson ta aliy i buku doh, “Kindrei tek, Kindrei tek, buku sah handru ya ou ruwani jo?”
MAT 27:47 Eme iri lau ra-on areu mirihik anuhun sahou tan ma anya, “Iy kede-eh aloh Alaija!”
MAT 27:48 Eme ma, suwi handru oro ari toro sakaliye ili kuhi konyei ari, tolomwani i bolo waen titi-in, ma atehei ili no-o banap ma atehei ili bohon ta iy ka-un.
MAT 27:49 Arile oro ra-on anya, “Kareu op, to kanyolom, idah kameh Alaija eme aseben iy deh bwe.”
MAT 27:50 Eme Jises arah tinan labai ja, ano iy ruwani kohan ma iy imek.
MAT 27:51 Kala doh amwenen kolau tinan badu bolo asiu tinan ta Kindrei atarah i ma lusi ereu loken eme andri. Munyak totoreh ma iri bek asak, i ma lusi.
MAT 27:52 Ma lek tiri lau mwasin ndramak bwena asak, ma iri lau mwasin ta Kindrei amak ame loken.
MAT 27:53 Iri ruwani lek tiri. Hamon ta Jises amak eme loken, iri ala bolo kon tinan Jerusalem, ma iri lau solo-an atou iri.
MAT 27:54 Iri lau ta bahun ma tinan tiri nane atondrok Jises nane atou kon totoreh ma iri lakou mari nane asahan, oro anoh labai ma oro anya, “Handru labai, iy kede-eh Nadu Kindrei handru!”
MAT 27:55 Iri badih solo-an ale ales areu len anyolom le, iri mene areu hamon tan adek loboho Galili ame ta aseben iy.
MAT 27:56 Ereu ndrokowa iri badeh, Mariya badu Makdala ma hawe Mariya ari ja tine Jemis uru Josep ma hawe udu Sebedi ale.
MAT 27:57 Kon abeyeh, ndramak ari nadu batun, tan luk solo-an badu Arimateya asahan, nyaran Josep. Iy badeh, ndramak ari ale badu hamon ta Jises.
MAT 27:58 Iy ili atou Pailat ta ndremenya bada kei, ma Pailat atehei sahou ta oro katehei bada kei kili mine Josep.
MAT 27:59 Eme Josep kuhi bada kei eme andri, ma su-i iy na kolau ari ha-un,
MAT 27:60 ma atehei iy ili bolo lek tan ma ha-un le iy ihiy in bolo munu bek. Ano iy tundruwi bek ari laba tinan ili turuki madan ano iy iu ai.
MAT 27:61 Mariya badu Makdala hawe Mariya ari ja uru ale manyah anyolom ili boho lek nane.
MAT 27:62 Len ta alokou iri lakou ta len ta amunyau ano, ya len ari hamon, iri tinan tiri pris ma hawe iri Parasi ala atou Pailat.
MAT 27:63 Oro tiye tan buku doh, “Tinan, aso bwetenei sahou ari ndramak ta wasai kede-eh mene asehek kala iy mene ereu loken kahis le, iy anya, ‘Hamon ta len taloh, jo kameh amak eme loken ja.’
MAT 27:64 Idoh le ya ou tiye, ya oro katondrokei mada lek nane kamwenen winiya len taloh, koro-an oro lau tan same sabwese-ei bada kei sa-au, ano oro kameh asehek tiri lau anya iy ndramak ndrame loken. Sahou wasai doh kameh ndra-in ja sakalawi wasai nane ndrasahan bwena.”
MAT 27:65 Pailat tiye toro anya, “Ado kakuhi iri lulik kala katondrokei lek nane, ya oro katondrokei kamwenen handru en.”
MAT 27:66 Eme oro ala turuki mada lek nane, ma oro lulik ales areu aliy ta atondrok.
MAT 28:1 Len ta amunyau ano, ma ndra wahun ta len ma bwena ta wik ari ja, Mariya Makdala ma Mariya ari ja uru adek ala ta anyolom mada lek ta Jises.
MAT 28:2 I le mani tur, munyak nyukunyok ili eme, ya angelo ari badu kandrah eme andri ma susuwini bek badu mada lek iu i len. Ano iy ili manyah udu aliy.
MAT 28:3 Konen i buku none kalik, ya kolau tan badeh, belen i buku none asi kandrah belen mara-ei.
MAT 28:4 Oro lulik ta atondrok iy nane anoh labai, ya oro totoreh ma oro asahan buku none iri lau ndramak.
MAT 28:5 Arile angelo nane asehek sahou ili turu badih nane anya, “Ah sanoh, jo tanan ah takaleh Jises, mene iri tatahi iy i bada kei tondreh.
MAT 28:6 Iy bareu dah bwe, iy ndramak ndrame awas ja! Idoh buku none le iy mene ndrasehek. Ah kame katou ndrahunen mene iy amadin udu aliy.
MAT 28:7 Ano ah kala suwi katandra-un toro lau tan ta iy ndramak ndrame loken, ya iy ndra-au ndrala bwena ndrala Galili. Ya idah kameh, ado winiyan anyolom iy ereu doh, buku jo ndrasehek.”
MAT 28:8 Eme ma, uru ruwani lek nane suwi suwi, uru anoh arile uru sekesek, uru sakaliye ala tiye toro lau tan.
MAT 28:9 I le mani tur, Jises asahan hawe uru ma iy anya, “Ndraben ta-ah.” Uru ame mirihik tan ma tawi katin ma asolom ili tan.
MAT 28:10 Jises tiye turu, “Ah sanoh, ndri-iy, ah kala katiye ta nadu tinek oro kala Galili, ya oro katou jo kameh in doh.”
MAT 28:11 Kala uru badih nane adek kahis le, oro lau ta ndrokei ra-on ta atondrok mada lek nane au ala bolo kon tinan, ma tiye iri tinan tiri pris nyala lakou mari nane asahan.
MAT 28:12 Tinan tiri pris atukum hawe iri lau tinan, ma tukumwi sahou toro i ari, ano oro atehei luk tinan labai ili toro lau ta ndrokei nane.
MAT 28:13 Ma iri tiye toro anya, “Ado kasehek ki buku doh, ‘Na ben, oro lau tan ame ya ndrabene-ei bada kei ndra-au, kala aso amadin kahis le.’
MAT 28:14 Buku none tinan badu kon anuhun sahou dah, aso kameh winiyan asehek sahou i tan, ya ado kameh winiyan bame mada sahou bwe.”
MAT 28:15 Eme oro lau ta atondrok mada lek nane kuhi luk ma oro ala amekes buku le oro nane ndranuhun. Sahou dah aseker ereu ndrokowa iri Juwis eme isos na len dah.
MAT 28:16 Oro lau ta Jises ma ronoh ari nane au ala mandrei ari udu Galili buku Jises ndratiye toro ta ala aliy.
MAT 28:17 Ereu doh oro atou iy, ma oro atudun nyaran, arile oro ra-on badeh, budon toro i la-uh.
MAT 28:18 Eme Jises eme mirihik toro ma tiye toro anya, “Boto-on ma lakou mari badu kandrah ma munyak badeh udu minek.
MAT 28:19 Ado kala kon mari, ya kamesekei iri lau mari kasahan lau tek, ado kalomwa iri na nyara tama, ma nadun ma hawe Malawi Ndrabun.
MAT 28:20 Ma ado kaleheya iri ta lakou mari jo ndratiye tado. Ya jo kameh in hawe ado na len mari, winiya le munyak dah ano.”
MAR 1:1 Idah sahou mwasin ma mwena asahan ta nyala Jises Krais, Nadu Kindrei.
MAR 1:2 I buku none propet Aisaya ndratorowenei, “Jo kameh suni ndramak ari ewek bwena tam. Iy kameh ta atehe san tam.”
MAR 1:3 “Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.’”
MAR 1:4 Ya eme Jon ta alomwa asahan bolo kon lomale an ta atiye sahou mwasin ma inyu iri lau, ma tiye tiri katubuni ndrine iri, ma Kindrei kameh sikine kandriyen ndra-in tiri mara-ei iu.
MAR 1:5 Eme iri lau mari badu loboho Judiya ma badu kon tinan Jerusalem ame anuhun iy. Eme ma iri asehek budon ma lomondra ndra-in ta karei tiri i ta Kindrei, ma iy alomwa iri ta sikine kandriyen ndra-in tiri iu udu gwa Jodan.
MAR 1:6 Jon isin awin iri amekes na lami kamel, ma iy aseu balaban, iri amekes na ku-i bulumakau udu ndrukulun i buku malou ta aseu awin tan. Ya iy badeh, kaniyan sabaye ma hawe bwirik badu lokei.
MAR 1:7 Eme iy tiye i buku doh, “Ndramak ari in hamon tek eme kameh boto-on tan sakalawi boto-on tek ja. Jo badeh, mwasin handru bwe, ta aluh i andri ta talou malou ta molowa ku-i katin bwe.
MAR 1:8 Jo badeh, alomwa ado na gwa, arile iy kameh inyu ado na boto-on ta Malawin Ndrabun.”
MAR 1:9 Eme nawin bwe na len doh, Jises ere Nasaret udu bolo Galili eme, ma Jon inyu iy in gwa Jodan.
MAR 1:10 Ano, Jises edek udu gwa eme loken le badeh, nawin bwe iy atou kandrah asak, ma Malawin Mwasin atah i buku ban eme andri eme bwele-en.
MAR 1:11 Ya, eme aloh ari udu kandrah tiye i buku doh, “Ou badeh, naduk handru, ma ou adek handru. Ou le mesekei jo sekesek labai.”
MAR 1:12 Ano suwi labai Malawin Ndrabun tiyani Jises iu ili kon lomale an.
MAR 1:13 Eme Jises udu gwek winiya len ma hanoh (40) hawe iri katin haka, eme Satan none iy kataku, arile iri angelo ta Kindrei badu loken ame bwese-ei Jises ma aseben iy.
MAR 1:14 Ano hamon ta iri ndratehei Jon ta alomwa ndrala bolo kou, Jises eme asahan Galili ta atiye sahou mwasin ta Kindrei.
MAR 1:15 Eme iy tiye i buku doh, “Len ndrasahan ai, ma tondrok ta Kindrei ndrame bakep! Ya ado katubuni ndrine ado ta karei ma lomondra ndra-in tado, ya ado katehei budon tado handru ki ta sahou mwasin.”
MAR 1:16 Ya eme Jises edek kabede gwa li Galili ili, ma iy atou Saimon hawe nadu tinen Enduru. Uru akeh kubwin turu ili bolo gwa li ta akohok ni, tasah uru lau ta bwisir ta ni.
MAR 1:17 Eme Jises tiye i turu i buku doh, “Ah kame ka-en hamon tek ma jo kaleheya ah, san ta akohok lau.”
MAR 1:18 Eme ya nawin bwe uru ruwani kubwin turu, ma uru au a-en hamon tan.
MAR 1:19 Ano Jises edek ili bwena sese ja, iy atou Jemis uru Jon an hawe tama uru Sebedi. Oro an ndron toro lowosa kubwin toro.
MAR 1:20 Eme iy atou uru le badeh, ma iy aloh i turu, eme uru ruwani tama uru Sebedi hawe lau ta kubwin nane an gwek ai. Eme ma uru an hamon ta Jises.
MAR 1:21 Ano oro ame kon tinan Kapena-um na bolo len ta amunyau, eme ma Jises ili bolo asiu ta atukum tiri Juwis, ma leheya iri lau.
MAR 1:22 Eme iri lau mari mani iri atur ta leheya tan, tasah iy leheya iri, bala buku none iri lau ta leheya kandriyen tiri Juwis, bwe. Arile, iy leheya iri, i buku none ari ndramak leheya tan boto-on labai.
MAR 1:23 Eme nawin bwe, udu bolo asiu ta atukum tiri Juwis nane dah, ndramak ari malawin ndra-in udu bwele-en.
MAR 1:24 Eme iy aloh, “Jises badu Nasaret, ou anya amekes sasah keme taso? Ou ame dah ta adai aso kamak ai? Jo tanan ou are handru kede-eh, ou badeh, ndramak ndrabun ta Kindrei.”
MAR 1:25 Arile Jises tiye sahou boto-on i ta malawin ndra-in anya, “Ou andru-uk ma ou ame len ta ndramak badeh!”
MAR 1:26 Eme ma malawin ndra-in nane dah mesekei ndramak dah totoreh ma anyar bohon i loken, ano iy ruwani iy ma iy eme len.
MAR 1:27 Eme iri lau mari mani iri atur, ma iri ndremenya iri ari ari, “Saba lakou handru dah? Idah tanan ha-un ja nadeh? Sahou ta ndramak dah boto-on labai, iy tiye le badeh, malawin ndra-in anuhun bohon ma iri au.”
MAR 1:28 Eme ma sahou ta nyalan aseker ili bolo kon mari badu loboho Galili.
MAR 1:29 Ano nawin bwe oro ame len ta asiu ta atukum tiri Juwis ma oro adek ales ala asiu ta Saimon uru Enduru, ma Jemis uru Jon a hawe oro.
MAR 1:30 Eme salahu Saimon ibo sik, badan nyarahan in bada sau. Eme Jises asahan le badeh, oro tiye i tan.
MAR 1:31 Eme Jises ili hawen tawi minen ma suri iy eme loken, eme ma badan nyarahan nane iu, ma iy amekes noro nyamon.
MAR 1:32 Eme na beyeh an anya ki andri badeh, iri atiye iri lau mari sik ma hawe lau malawin ndra-in udu bwele-e iri ame hawen.
MAR 1:33 Eme iri lau mari badu kon tinan mara-ei atukum ala loboho le madasan ta asiu.
MAR 1:34 Eme Jises mesekei iri lau, saba sik udu tiri badeh, amwenen ja, ma tikahei iri malawin ndra-in solo-an au. Eme iy tiye iri malawin ndra-in kandru-uk le, tasah iri tanan iy.
MAR 1:35 Ano na mandraben ma wahun an bame loken bwe le, Jises suri iy ma edek eme len ta asiu ma edek iu ili kon ari doh, lau bare aliy bwe. Eme ma iy udu aliy asolom.
MAR 1:36 Arile Saimon hawe oro lau nane an hawen ala takaleh iy.
MAR 1:37 Eme oro ndruni iy ma asehek i tan, “Iri lau mari asilah ou.”
MAR 1:38 Eme Jises tiye i toro, “To ka-au ka kon rayah ja, ya jo kameh kasehek sahou ki aliy, tasah jo dah eme ta aliy amwenen ai.”
MAR 1:39 Eme ma iy edek ili loboho Galili mara-ei asehek sahou in bolo asiu ta atukum tiri Juwis ma atikah iri malawin ndra-in au.
MAR 1:40 Eme ndramak ari sik lepra udu tan eme atehei bwili ndru-un i andri, ma iy ndremenya Jises i buku doh, “I buku none ou aseken, ou winiyan mesekei jo kamwenen ja udu mada Kindrei.”
MAR 1:41 Eme Jises tikisi iy labai, eme iy atehei minen i badan ma tiye i tan i buku doh, “Jo aseken. Ya ou amwenen.”
MAR 1:42 Eme ma nawin bwe, lepra udu badan amai iu laleyah ma iy ndramwenen ja.
MAR 1:43 Eme iy suni iy iu ma tiye sahou boto-on i tan i buku doh, “Ou sala sasehek ta ari lau ja ai, ndri-iy. Arile, ou ales ala hawe iri pris, leheya badam ki tiri kanyolom, ano ou adeu salom ta asun i le buku Moses mene ndrabatanau, ya eme iri kanyolom ma katanan ou badeh, ndramwenen ja.”
MAR 1:45 Arile bwai, ndramak nane dah ili asehek i tiri lau mari. Eme handru labai iy asehek san solo-an labai, eme Jises winiyan bala kon tinan bwe. Arile iy udu ndra kon nane lau aliy bwe doh, eme ma iri lau badu heh, badu heh ame le hawen.
MAR 2:1 Na len ra-on hamon ja, Jises eme hamon eme Kapena-um, eme ma sahou ta nyalan ndraseker, tasah iy ndrame bolo kon.
MAR 2:2 Eme iri atukum ala le, eme ma bolo asiu aso ma reu bwe, eme asiu winiya lau bwe, ma loboho madasan aso ale. Eme Jises asehek sahou mwasin i tiri.
MAR 2:3 Ya eme oro lau ma hahuw bwese-ei ndramak ari badan imek anya keme hawe Jises.
MAR 2:4 Arile iri lau solo-an labai, eme oro winiyan batiyani iy bala hawe Jises bwe. Eme oro bosokei bwele-e asiu amwenen le bwele-e Jises ales udu aliy, eme oro atehei ndramak nane dah in bada nyahan tan ili andri amwenen le ta batala Jises.
MAR 2:5 Eme Jises anyolom budon toro boto-on labai in tan, ya eme iy tiye sahou i ta ndramak nane badan imek anya, “Naduk, kandriyen tam ndra-in mari badeh, ndrasikine mara-ei ndra-au.”
MAR 2:6 Ya eme oro lau ra-on ta leheya kandriyen tiri Juwis manyah are doh ale, ya eme oro ari ari lomondra,
MAR 2:7 “I buku sah handru iy asehek sahou ndra-in i buku doh i ta Kindrei? Ari ndramak winiyan basikine kandriyen ndra-in bwe. Kindrei le ari, kabwe!”
MAR 2:8 Suwi labai Jises ndratanan budon toro, eme iy tiye i toro, “Tasah handru iri budon solo-an doh udu ndrine ado?
MAR 2:9 Katiye ki manamwun ki buku sah handru ki ta ndramak badan imek dah, ‘Kandriyen ndra-in tam ndrasikine ndra-au,’ deh, bwe katiye, ‘Ou suri ou, ou andrei nyahan tam ma ou adek’?
MAR 2:10 Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai, udu bwele-e munyak dah ta tiye i ta ndramak ta mani kandriyen tan ndra-in iu.”
MAR 2:11 Eme Jises tiye i ta ndramak badan imek dah, “Jo tiye tam, ou suri ou, ou andrei nyahan tam ma ou au a kon!”
MAR 2:12 Eme iri mari anyolom ndramak nane dah suri iy eme loken, andrei nyahan tan ma iy edek iu. Eme iri mari mani iri atur labai, ma iri atudun nyara Kindrei i buku doh, “Ahi ndra bwena bwena batou ari lakou bala buku dah bwe!”
MAR 2:13 Ano Jises iu i hamon ja ili kapa gwa li Galili. Eme iri lau mari atukum ame hawen ma iy leheya iri.
MAR 2:14 Ano iy edek ili, ma iy atou ndramak ari ta akohok luk ta takis, nadu Alpeyus nyaran Libai. Iy manyah ereu bolo asiu tan ta gok ta akohok luk ta takis. Eme Jises tiye i tan, “Ou ame an hamon tek.” Eme Libai suri iy ma iy in hamon tan.
MAR 2:15 Ano Jises manyah udu bolo asiu ta Libai. Ya iri lau solo-an ta akohok luk ta takis, ma hawe iri Juwis ale ba-en hamon ta kandriyen ta batanau ta Moses bwe, ma hawe oro lau tan ame aimon nyamon hawen. Ya iri lau solo-an ale an hamon tan.
MAR 2:16 Eme oro lau ta leheya kandriyen tiri Juwis ma hawe oro Parasi atou Jises aimon nyamon udu hawe iri lau ta lomondra ndra-in ma hawe iri lau ta akohok luk ta takis. Eme oro tiye i toro lau ta Jises, “Tasah handru iy aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?”
MAR 2:17 Eme Jises anuhun oro, ma iy tiye toro i buku doh, “Iri lau ale babo sik bwe, iri winiyan baso-ok ndramak ta anyumor iri bwe. Arile iri lau tiri sik le badeh, aseken seben. Jo eme dah ta aseben lau mwasin le bwe. Jo eme dah badeh, ta aseben iri lau ta karei ma ta lomondra ndra-in udu tiri kasahan mwasin.”
MAR 2:18 Udu bolo len doh, oro lau ta Jon ma hawe iri Parasi, abeles iri ta nyamon. Eme lau ra-on ame ndremenya Jises anya, “I buku sah handru oro lau ta Jon ta alomwa ma hawe iri lau tiri Parasi abeles iri ta nyamon, arile oro lau tam ja, bwe?”
MAR 2:19 Eme Jises asumon boho oro i buku doh, “I buku none ndramak tasou bolohau udu aliy, ado winiyan babilisi oro lau ta molak bwe! Arile, na len hamon eme, idah kameh iri kuhi iy eme len, ma na len doh, oro kameh winiyan baimon nyamon bwe.
MAR 2:20 Arile, len hamon eme kameh, ndramak doh kameh, iri lau ta amekes kaliu i tan kuhi iy eme len. Ma na bolo len doh ale kameh oro winiyan baimon nyamon bwe.
MAR 2:21 “Ado kanuhun. Ari ndramak winiyan bakuhi ranah kolau ha-un, ya suwidiy ja i manamunu awin malen bwe. Buku iri bwidiy i buku doh, ya iri sikine awin, kolau ha-un nane kameh bosokou, ma awin malen kameh atarah ja, eme ma munun kameh i tinan labai ja ai.
MAR 2:22 Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen kameh tuburok, ma kohan kameh tarani ku-i me nane, ma waen kameh iu laleyah. Tasah waen ha-un badeh, ndrahunen ku-i me ha-un.”
MAR 2:23 Ano, udu bolo len ari ta amunyau, Jises ma hawe oro lau tan adek bolo bilin ari ta wit. Eme oro lau tan abwe-eh buwa wit nane dah.
MAR 2:24 Eme ya oro Parasi ame tiye i ta Jises, “Hei, ou anuhun! Tasah handru oro abwe-eh buwa wit na len ta amunyau? I buku sah oro ba-en hamon ta kandriyen tahi bwe?”
MAR 2:25 Eme Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen bado ta kundruh ta lakou kabin Debit mene mesekei bwe nadeh? Jo asehek ta lakou kala Debit hawe oro lau tan aso-ok lakou tasah oro ameson.
MAR 2:26 Ya eme iy ili bolo asiu ta Kindrei ya kuhi jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Lakou idoh asahan na len pris, Abiyata in ndra tinan tiri pris. Ehe, Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.”
MAR 2:27 Eme ma Jises asehek sendrehendreh i buku doh, “Mesekei len ta amunyau badeh, ta aseben ndramak labai, arile bamesekei ndramak ta aseben len ta amunyau bo-oh.
MAR 2:28 Eme ma jo Nadu Ndramak Awas, ya jo tama len ta amunyau.”
MAR 3:1 Eme Jises iu i hamon ja ili asiu ta atukum tiri Juwis, ya eme ndramak ari in aliy, minen imek.
MAR 3:2 Oro lau rayah ado aliy, eme ya oro anya katakaleh madasan ta kadeu Jises ki ta mada sahou. Eme iri atehei mada iri udu tan, i buku iy kamesekei ndramak dah kamwenen na len ta amunyau dah, deh bwe.
MAR 3:3 Eme Jises tiye i ta ndramak nane minen imek dah, “Ou ame mwena dah.”
MAR 3:4 Ya eme iy ndremenya iri, “Saba kandriyen mwasin kameh taha kamekes na len ta amunyau? Kamekes kandriyen mwasin ta aseben koha lakou deh, bwe kamekes kandriyen ndra-in ta adai lau?” Eme iri basehek randra sahou bwe.
MAR 3:5 Eme Jises anyolom ili eme i tiri, eme iy ibolosen, arile bwai, ndrinen ale tikisi iri, tasah iri badeh, ndrandra-i ma ndrine iri ndraso. Ano, iy tiye i ta ndramak nane dah anya, “Minem kales!” Eme iy talasei minen ma minen amwenen ja.
MAR 3:6 Eme oro Parasi ame len ta asiu ta atukum, ma oro au suwi labai atukum hawe iri lau rayah ta Herot, eme ma oro asehek ma atilik nyala oro ta takaleh san ta kadai Jises kimek.
MAR 3:7 Ano Jises ma hawe oro lau tan ame gwa li Galili, ma hawe iri lau solo-an labai an hamon tan. Iri lau badeh, badu Galili, badu Judiya,
MAR 3:8 ya badu Jerusalem, badu loboho Idumiya, badu loboho kapa gwa Jodan bilisiu ma hawe badu mirihik ta kon tinan Tair hawe Saidon. Iri lau solo-an doh nane ame hawe Jises, tasah iri anuhun lakou solo-an iy amekes.
MAR 3:9 Iri lau solo-an labai, eme Jises tiye i toro lau tan lowosani ndron ra-ei ta iy ki aliy, koro-an lau katisi iy.
MAR 3:10 Iy ndramesekei iri lau solo-an ndramwenen, ya eme iri lau sik udu tiri ndrokowa iri ame hawen, tasah oro anya kateu le badan.
MAR 3:11 Ya eme loboho heh, loboho heh, Jises ili badeh, iri lau malawin ndra-in udu bwele-e iri atou iy le badeh, iri atarah a andri ma aloh, “Ou badeh, Nadu Kindrei!”
MAR 3:12 Eme Jises batanau iri ta iri sanyowonya iy are lau handru, ndri-iy.
MAR 3:13 Eme Jises iu ili bwele-e mandrei i loke ma iy aloh oro lau ala so-ok tan udu toro. Eme ma oro ame hawen.
MAR 3:14 Eme iy andrei oro lau ma ronoh la-uh dah, eme ma Jises tondrohani nyara oro i aposel, lau badu hawen ma iy kameh tiye oro au a len atiye sahou.
MAR 3:15 Ma iy edeu boto-on i toro ta atikah malawin ndra-in ki-iu.
MAR 3:16 Ya idah nyara oro lau tan ma ronoh la-uh: Saimon (Jises tondrohani nyaran Pita), Nadu Sebedi uru, Jemis uru Jon (eme Jises tondrohani nyara uru Bowanekes, moson “Nadu Kuruh”), ya hawe Enduru, Pilip, Batolomiu, Metiu, Tomas, ma Jemis nadu Alpeyus, Tadeyus, Saimon Selot, Judas Iskariyot, iy ale ndramak doh hamon kameh iy edeu sa-oh ta Jises.
MAR 3:20 Eme Jises iu i kon. Udu ja, lau solo-an labai atukum, eme Jises hawe oro lau tan ari len ta aimon nyamon bwe.
MAR 3:21 Eme lowan oro anuhun, ma oro anya kala kakohok iy, tasah iri lau anya, “Iy badeh, ndra lolo-ou.”
MAR 3:22 Iri lau ra-on ta leheya kandriyen tiri Juwis are Jerusalem ame asehek anya, “Jises badeh, Belsabul ndra bwele-en!” Iri ra-on ja anya, “Idoh tinan tiri malawin ndra-in edeu boto-on i tan ta atikah iri au.”
MAR 3:23 Ya eme Jises aloh iri lau ame hawen ma iy asehek sahou sokek ra-on, “Ki buku sah handru tama iri balik Satan katikah Satan?
MAR 3:24 Ki buku sah handru, buku rakon kon buruwen kapou uru ki la-uh ya uru kadai uru, idah kameh ndrokowa uru udu aliy.
MAR 3:25 “Ya, ki buku iri lau badu boho kamen ra-em kaseker, idah kameh iri lau doh winiyan bales boto-on bwe.
MAR 3:26 Ya, ki buku oro lau ta Satan kapou oro ki lumuk, idah kameh iy boto-on bwe, ma kameh nyaran mirihik ano.
MAR 3:27 “Ya, buku none ndramak anya ki bolo asiu ta ndramak boto-on, ma kabahana iri lakou tan, iy kameh amekes sah handru? Ma bwena handru iy kameh sawei iy ndramak boto-on nane na malou boto-on. Ano iy winiyan akohok iri lakou ereu asiu ta ndramak nane.
MAR 3:28 “Jo tiye tado handru! Kindrei kameh winiyan mani kandriyen ndra-in ta lau, ma sahou ndra-in lau asehek.
MAR 3:29 Arile, are lau aluhe i bada nyara Malawin Ndrabun, Kindrei kameh winiyan bamani kandriyen ndra-in tan doh bwe, tasah maha-an tan winiyan bano bwe.”
MAR 3:30 Jises tiye sahou doh, tasah oro ra-on tiye anya, “Iy badeh, malawin ndra-in udu bwele-en.”
MAR 3:31 Eme tine Jises hawe nadu tinen oro asos. Oro ales are manan ya oro suni sahou ili ta ndremenya iy.
MAR 3:32 Ya lau solo-an labai manyah ma awudi Jises, eme oro tiye i tan, “Jises ei, tinem hawe nadu tinem oro are manan kodo-oh, oro anya ou ala.”
MAR 3:33 Eme Jises tiye, “Ado anya tine handru, are lau bah? Ya nadu tine oro handru, lau heh bah?”
MAR 3:34 Iy anyolom ili eme i toro lau nane manyah dah, eme ma iy tiye, “Jo asehek tado, tine ma nadu tine oro handru, asah ado mari manyah kede-eh!
MAR 3:35 Are lau in hamon ta so-ok ta Kindrei, iri badeh, nadu tine mwan ma badih handru, ma tine handru.”
MAR 4:1 Ano ja, Jises leheya iri lau an kapa gwa li Galili. Iri lau solo-an labai atukum ta anuhun iy, eme iy sandroh in ndron ra-ei ma manyah udu bolo ndron ere bwele-e gwa, ya iri lau mari nane dah, an kapa gwa amik ai.
MAR 4:2 Eme iy asehek sahou solo-an i tiri na sahou sokek, eme udu bolo leheya tan, iy tiye i tiri i buku doh,
MAR 4:3 “Aha kanuhun! Ndramak ari ili sabara badu wit ili bolo bilin,
MAR 4:4 ya eme iy akeh ili, badu wit ra-on taku in san, ya iri sirih ame aniy.
MAR 4:5 Ra-on ja taku in bwele-e bek, ndren solo-an mwe-en bwe, ma badu wit ateh suwi.
MAR 4:6 Arile, an anya eme loken nyarahan boto-on labai, ma sulumwi wit nane, tasah kandron bala bolo munyak alih bwe, eme ma iy ame-er mara-ei ma imek.
MAR 4:7 Ya badu wit ra-on ja taku in bolo bada malou bobodon. Bada malou bobodon nane ateh eme loken, ma tubuluhi wit nane ma iy bato-ou buwan bwai.
MAR 4:8 Arile buwa wit ra-on taku i bolo ndren mwasin, ma iy ateh i tinan ma iy ato-ou buwan solo-an labai. Eme buwan ra-on ato-ou tonoh (30), ya ra-on ato-ou ndro hanoh (60) ma ra-on ja ato-ou rinek (100).”
MAR 4:9 Ano, Jises isan sendrehendreh ta sahou i buku doh, “Ou are lau ndranyem udu aliy, ou anuhun kamwenen.”
MAR 4:10 Eme ma lau solo-an aseker, ano Jises le ari, ma hawe lau ra-on badu bolo oro nane ma hawe oro lau tan anuhun, ma oro ndremenya Jises ta saba moson handru ta sahou sokek nane ndra-au.
MAR 4:11 Eme iy tiye i toro, “Kindrei aseken ado lau tek katanan iri sahou mene aton ta nyala tondrok ta Kindrei. Arile iri rayah bare hawe to dah bwe, jo asehek i san ta sahou sokek,
MAR 4:12 ‘Iri kameh anuhun sahou san solo-an, arile iri kameh winiya bala tanan kati sahou handru bwe. Iri kameh anyolom san solo-an, arile iri kameh winiyan baseleyani ari lakou bwe. Koro-an iri katubuni ndrine iri ja ma Kindrei kameh sikine lomondra ndra-in tiri iu.’”
MAR 4:13 Eme Jises ndremenya oro, “Budon tado kede-eh aleu ta sahou sokek dah deh bwe? Ki buku sah kameh budon tado kaleu ta sahou sokek mara-ei?
MAR 4:14 Ndramak ta sabara buwa kei doh, i buku ndramak ta atiye sahou ta Kindrei.
MAR 4:15 San rayah, sahou ta Kindrei taku in san. Ya iri lau doh anuhun. Arile, Satan eme ja, sokosowei sahou mwasin nane Kindrei tahiy ereu budon tiri.
MAR 4:16 Lau rayah i buku none buwa wit taku in bwele-e bek. Ya eme suwi labai iri anuhun sahou ta Kindrei ma sekesek le,
MAR 4:17 arile bala ndrine iri handru bwe ma bare gwek luluwen bwe. Ya i buku none ndrine sen asahan deh bwe-em ndra-i asahan, tasah ta sahou ta Kindrei, ya idah kameh, suwi suwi iri taku.
MAR 4:18 Lau rayah ja, i buku none buwa wit taku in ndrokowa bada malou bobodon. Idoh i buku none iri anuhun sahou ta Kindrei,
MAR 4:19 arile iri abudon boto-on labai ta lakou solo-an badu kon munyak. Ya iri abudon boto-on labai ta atukum iri luk, ma iri lakou ra-on ja. Ya idoh sokei sahou ta Kindrei, eme ma bwidi iri bato-ou sali iri bwe.
MAR 4:20 Ya lau rayah ja, i buku none buwa wit ateh in munyak mwasin. Iri anuhun sahou ta Kindrei, eme iri tawiy ma iri ato-ou sali iri. Rayah asahan tonoh (30), rayah ndro hanoh (60), ma rayah asahan rinek (100).”
MAR 4:21 Eme Jises asehek le ili, “Ndramak ari iy telemei sun, iy winiyan batehei bado bahandra bwekei bwe, ma iy ale winiyan batehei bala bahandra sau bwe le, arile iy kameh atehei udu ndrahunen loken.
MAR 4:22 Lakou mari aton kede-eh kameh eme lewan, ya saba lakou tubuluhiy kameh andrei lakou ta tubuluhen iu.
MAR 4:23 Ou anuhun, i buku ndranyem udu aliy, ou anuhun kamwenen!”
MAR 4:24 Eme Jises tiye i tiri, “Ndranyem kirih ki ta sahou ou anuhun! Saba maha-an ou amekes i tiri, kameh i le buku maha-an ou akohok. Eme kameh, ou akohok maha-an solo-an labai ja i hawen.
MAR 4:25 Are ndramak tanan tan mwasin udu aliy, iy kameh akohok tanan mwasin labai ja i la-un. Ya ndramak tanan tan sese le, tanan tan sese le doh kameh kuhiy mari iu.”
MAR 4:26 Eme Jises asehek ili le, “Ya tondrok ta Kindrei i buku none ndramak sabara buwa kei ili bolo bilin.
MAR 4:27 Iy amadin na ben ma amak na len, eme buwa kei ateh, arile iy bala tanan bwe, i buku sah handru ateh.
MAR 4:28 Munyak le anyohan buwa kei ateh ma edeu salin. Ma mwena handru iy i tinan ano, nyandren asahan ano ja, buwan asahan.
MAR 4:29 Len ta buwa kei uni badeh, ndramak andrei samen ili isan, tasah len ta akohok badeh, ndrano.”
MAR 4:30 Eme Jises ndremenya, “Taha kasehek tondrok ta Kindrei kameh ki buku sah handru? Saba sahou sokek taha kasehek kaleu?
MAR 4:31 Tondrok ta Kindrei i buku none buwa kei ari iri aloh mastet. Badun badeh, nadu bwisik labai udu bolo munyak idah. Ndramak andrei, iy ili tahiy i bolo munyak.
MAR 4:32 Ano, ateh eme loke ma i tinan sakalawi ja iri buwa kei badu bolo bilin. Iy asahan buku ra-ei kei ma edeu andran. Eme iri sirih winiyan ame amekes ndrahu iri ta aton.”
MAR 4:33 Ya eme Jises asehek sahou i tiri lau na sahou sokek solo-an i buku le doh, iy tiye san solo-an handru winiya iri akohok amwenen.
MAR 4:34 Iy asehek i tiri na sahou sokek le, arile iy le ma hawe oro lau tan le ja, iy asehek moso sahou marakon i toro.
MAR 4:35 Na len mirihik ta kon akoroh, Jises tiye i toro lau tan i buku doh, “To ka-au kala kapa gwa bilisiu.”
MAR 4:36 Eme iri lau marakon an gwek, oro suni Jises i hawe oro, ya ndron ra-on ja a hawe oro ale.
MAR 4:37 Eme laba siyer atohou ya bayau i tinan, eme ndron bokobwak, bayau eme ndron, ndrai idih, ya mirihik ndron anya katuh.
MAR 4:38 Arile, Jises amadin in bada sau hamon ta ndron, eme oro ala mete-ei iy, ma oro tiye i tan, “Ndramak ta leheya, ou batikisi to bwe nadeh? I buku to kamak?”
MAR 4:39 Eme iy amak eme loke, ma iy asehek sahou i ta siyer ma bayau anya, “Ou amondrei! Bahun ka-iy ai!” Eme siyer ma bayau amondrei ma gwa ndras ameres udu le udu.
MAR 4:40 Eme Jises tiye i toro, “Ado anoh tasah? Buku sah ado batehei budon tado ba-en tek bwe?”
MAR 4:41 Eme ma mani oro atur labai, ma oro ndremenya oro ari ari anya, “Iy are lau handru? Ya siyer ma bayau anuhun iy!”
MAR 5:1 Oro ame asos kapa gwa li loboho kon tiri lau Gerasa.
MAR 5:2 Jises udu ndron eme andri le badeh, ndramak ari badu mada lek, malawin ndra-in udu bwele-en eme asahan hawen.
MAR 5:3 Ya ndramak nane dah ndrahu matinou tan badu mada lek ta lau amak, ya ari lau winiyan basawei iy bwe, sen winiyan bwe.
MAR 5:4 San solo-an aseu iy na sen ma sei i sakan, arile iy mindrindri sen amendreh, ma iy sekese-ei andra-i labai, ya ari lau iy boto-on, iy winiyan batawi iy bwe ale.
MAR 5:5 Ben len ben len, iy in mada lek ndrokowa mandrei anyar ma alim iy na bek.
MAR 5:6 Ya eme iy atou Jises i ndra len on, eme iy sakaliye ili taku udu katin ma atudun nyaran.
MAR 5:7 Eme Jises tiye i tan, “Ou malawin ndra-in, ou ame len ta ndramak badeh.” Eme iy anyar bohon i tinan anya, “Jises Nadu Kindrei, ou anya amekes sasah keme tek? Jo tandrakan ta nyara Kindrei, ou samekes sisi-in same tek.”
MAR 5:9 Eme Jises ndremenyani iy, “Nyaram are lau?” Eme iy anya, “Nyarak badeh, Solo-an, tasah aso nyaran bwe!”
MAR 5:10 Eme ya iy asehek sahou ta tikisiy i ta Jises i buku doh, “Ou satikahei aso sa-au ta kon dah.”
MAR 5:11 Eme ya bou rakou buruwen aimon nyamon an ka-u mandrei.
MAR 5:12 Eme malawin ndra-in tiye sahou tikisiy i ta Jises anya, “Ou tikahei aso ka bwele-e bou.”
MAR 5:13 Eme Jises tiye i toro, “Abo, ado ka-au.” Eme malawin ndra-in nane dah ame len ma a bwele-e bou. Ya kane oro bou doh, i buku none luwa (2,000), eme oro sakaliye are bwele-e mandrei ame andri ala bolo gwa li, ma oro amak.
MAR 5:14 Eme ma lau ta atondrok iri bou doh atobwak au a kon tinan ma hawe a lokei asehek i tiri lau. Eme ma iri lau ame anyolom.
MAR 5:15 Iri ame hawe Jises ma iri anyolom ndramak nane malawin ndra-in mene udu la-un nane dah manyah udu andri ai. Iy ndratani kolau ma budon tan ndramwenen ja ai. Eme ma iri anoh.
MAR 5:16 Ya oro lau nane anyolom dah, ala asehek nyala iri ta ndramak mene, malawin ndra-in udu la-un badeh, ndramwenen ja, ma hawe bou.
MAR 5:17 Eme iri tiye Jises ta iy ki-iu ki rasi ja ta loboho doh.
MAR 5:18 Suniya Jises anya ki-iu kili bolo ndron, ya ndramak nane malawin ndra-in udu bwele-en eme tiye sahou tikisiy i ta Jises, ta iy anya ki hawen.
MAR 5:19 Arile Jises bwalen, eme iy tiye i tan, “Ou a kon hawe lowam oro, ya ou asehek nyala oro ta lahou tinan Laban ndramesekei ndrawek tam, ma iy tikisi ou, ma iy mesekei ou ndramwenen ja.”
MAR 5:20 Ya eme ndramak nane dah, iu ili bolo kon ma ronoh udu loboho Dekapolis asehek ta nyala lahou tinan mene, Jises ndramesekei i tan, ya eme iri lau marakon lomondra solo-an.
MAR 5:21 Eme Jises i ndron ja iu i kapa gwa bilisiu, eme ya lau solo-an labai, atukum ame le kapa gwa hawen.
MAR 5:22 Eme ndramak ari ta atondrok asiu ta atukum tiri Juwis nyaran Jairus, iy atou Jises ma iy eme taku in katin.
MAR 5:23 Eme Jairus tiye sahou tikisiy i tan i buku doh, “Naduk badih badeh, mirihik ta anya kimek ai, ou ame atehei minem ki tan ya iy kamak ja.”
MAR 5:24 Eme Jises i hawen, ma hawe iri lau solo-an an hamon tan ala ale, ma awudi iy udu le alih.
MAR 5:25 Eme ya badih ari udu aliy, sik ndra udu tan winiya jaha ma ronoh la-uh.
MAR 5:26 Iy ndrakahei luk sabe kolek ndra tiri lau ta anyumor ma amekes iy kamwenen, arile bwe, sik tan bamwenen se bwai. Ya iy akohok sisi-in kahis le, ma sik ja asahan boto-on le gwek.
MAR 5:27 Iy ndranuhun nyala Jises bwena, eme iy sokohani iy i ndrokowa iri lau ili in hamon tan, eme iy tawi kiri awin ta Jises,
MAR 5:28 tasah iy anya, “I buku none jo katawi le kiri awin tan kameh jo amwenen ja.”
MAR 5:29 Eme se nawin bwe, sik ndra tan iu ma ano mara-ei, eme iy atona bolo odan badeh, ndramwenen mara-ei.
MAR 5:30 Jises ndratanan boto-on tan ndrame len, eme iy tubuni madan i tiri lau marakon, eme ma iy tiye, “Are lau tawi awin tek?”
MAR 5:31 Eme oro lau tan anya, “Ou atou lau ahas badam badeh, i buku sah handru, ma ou tiye anya ja, ‘Are lau tawi jo?’”
MAR 5:32 Eme madan ili eme, iy anya kasilah are lau nane amekes lakou doh.
MAR 5:33 Eme badih nane dah tanan lakou nane asahan tan, eme iy inoh ma iy totoreh, ma iy morohani iy i andri kati Jises eme ma iy asehek sasah mene asahan tan.
MAR 5:34 Eme Jises tiye i tan anya, “Nadu badih den, ou atehei budon tam handru in tek, ma mesekei ou asahan amwenen. Ou au ma ndrinem kamunum, tasah sik tam ndra-au ma ndrano mara-ei.”
MAR 5:35 Eme iy asehek sahou kahis le, lau ra-on ado asiu ta Jairus ame tiye ta Jairus, “Nadum badih ndramak. I buku sah ou asehek sahou kahis i ta ndramak ta leheya badeh?”
MAR 5:36 Eme Jises banuhun sahou toro bwe, eme iy tiye i ta Jairus, “Ou sanoh, budon tam handru ki-in tek.”
MAR 5:37 Eme Jises bwalen ari lau sa-en hamon tan, arile Pita le, Jemis le hawe Jon nadu tine Jemis, oro le a hawen ala.
MAR 5:38 Oro ame asos asiu ta Jairus, eme Jises atou iri lau ta kabek taya andra-i labai.
MAR 5:39 Eme Jises i bolon tiye i tiri, “I buku sah ado aden ma taya ndranyen? Nah kede-eh bamak bo-oh, iy amadin le oh.”
MAR 5:40 Eme iri ehe-en iy. Arile iy tikahei iri ame len ta asiu, eme Jises hawe tama nah hawe tinen ma hawe oro lau tan le ala bolo asiu, nane iy nadu badih imek in aliy.
MAR 5:41 Eme Jises tawi minen ma tiye i tan i buku doh, “Talita kumi,” moson, “Nadu badih, jo tiye i tam, ou amak ame loke.”
MAR 5:42 Eme se nawin bwe, nadu badih dah suri iy ma iy edek (jaha tan badeh, ronoh la-uh). Eme suwi labai mani oro atur.
MAR 5:43 Eme Jises tiye sahou batanau i toro lau, ta oro sala sasehek ta ari ndramak ja ndri-iy, eme iy tiye i toro, “Ado kadeu nyamon ki nan.”
MAR 6:1 Eme Jises iu i len ta kon nane iy udu aliy, eme iy iu ili kon tan amwenen, ma hawe oro lau tan ale ala hawen.
MAR 6:2 Eme na bolo len ta amunyau, iy leheya iri lau an asiu ta atukum tiri Juwis. Eme lau solo-an anuhun iy asehek sahou, ma mani iri atur, ma iri ndremenya, “Iy ndramak kede-eh, iy akohok tanan doh badu heh handru? Aden! I buku sah iy amekes lahou tinan na minen!
MAR 6:3 Taha tana taha, iy ndramak kede-eh ta atah asiu, ma iy nadu Mariya, nadu tine Jemis, Joses, Judas hawe Saimon, ya nadu tinen oro badih, are hawe to kada-ah, neh?” Oro asehek i buku doh, ma oro atehei kona oro i tan.
MAR 6:4 Eme Jises tiye i tiri anya, “Iri propet ta atiye boho Kindrei, nyara iri tinan ereu kon mari. Arile ereu kati kon tan amwenen, ma ereu boho kamen tan amwenen, ma ndrokowa oro ndraye oro rabuk, iy asahan buku lau laleyah.”
MAR 6:5 Eme Jises winiyan bamekes ari lahou tinan bareu kon dah bwai, arile iy le edeu minen i bwele-e iri le lau sik udu tiri, eme ma sik tiri iu.
MAR 6:6 Eme Jises manin atur, tasah iri batehei budon tiri handru ba-en tan bwe. Jises leheya boto-on tan, arile oro lau tan bala tanan iy bala mwasin bwe (Kalan 6:6–8:21) Eme ma Jises iu ili kon ari ari ta leheya iri lau.
MAR 6:7 Eme iy luhi oro lau tan ma ronoh la-uh ame hawen, eme iy tiye oro la-uh la-uh a se, ma eme iy suni oro au ala bolo kon mara-ei ta atiye sahou mwasin ili tiri mwan ma badih. Ma iy ale edeu boto-on i toro ta atikah iri malawin ndra-in iu.
MAR 6:8 Iy tiye sahou batanau i toro, ta oro winiyan akohok kandro le ta adek hawe oro, arile oro sakohok ari lakou sala hawe oro, lakou i buku jabi ramen, lakou i buku kohei ma luk, ndri-iy labai, ma ale sa-en ndrakali oro. Arile iy tiye i toro kasin le ku-i kati oro ya oro sasin awin la-uh. Oro kasin ari le ka-iy, ma hawe kandro ta lime oro.
MAR 6:10 Iy ale tiye i toro, “I buku none ado ala asahan rakon kon, ma iri lau badu kon doh atehei ado ala bolo ra-em asiu, ya ado ka-en le aliy kado gwek winiya le len ado anya ka-au kala kon rakon ja.
MAR 6:11 Ya, i buku none ado asahan rakon kon, ya iri lau badu kon doh basekesek ta akohok ado ala asiu tiri bwe, ma iri basekesek ta anuhun sahou tado bwe, ya buku ado anya ka-au, ado katuruhi kasu on ma ndren ta kati ado ki-iu, ya ado ka-au. Ya eme ta kalem doh iri kalomondra ta kandriyen ndra-in tiri.”
MAR 6:12 Jises asehek sahou ano, ya oro lau tan au ala atiye sahou tan i tiri lau mwan ma badih. Oro asehek i tiri i buku doh: “Aha katubuni kona aha kili tiri kandriyen ndra-in marakon taha, ma katehei budon taha kili ta Kindrei le ari.”
MAR 6:13 Ya, malawin ndra-in solo-an labai udu bwele-e iri mwan ma badih, eme ma oro lau ta Jises ame, abo gok ta atikah iri malawin ndra-in solo-an iu. Ma oro atah ndrelekei ta kei olip i bada iri lau abo sik ma iri amwenen ja.
MAR 6:14 Eme kabin Herot anuhun sahou nyala Jises ndraseker winiya le bolo kon. Eme iri lau ra-on anya, “Jon ta alomwa mene ndramak ja ereu bolo lek tan ndrame loken, eme ma boto-on tan bwena ndrame hamon ja, ya boto-on tan udu ta Jises, eme iy amekes lahou tinan.”
MAR 6:15 Iri ra-on anya ja, “Iy Alaija,” ya iri ra-on anya ja, “Iy propet, i buku none le lau ta tiye boho Kindrei bwena ndra-au o-on.”
MAR 6:16 Herot anuhun, ya iy anya ja, “Kede-eh Jon ta alomwa! Jo mene ndrasani batun, arile iy ndramak ja!”
MAR 6:17 Ya Herot bwena ndra-au o-on tiye iri tawi Jon ta alomwa, ma sawei iy ma atehei iy i bolo asiu lulik. Herot amekes doh, tasah iy mene sudi udu nadu tinen Pilip nyaran Herodiyas.
MAR 6:18 Eme ma Jon tiye Herot anya, “Ou ndrandra-i tasah, ou sudi udu nadu tinem!”
MAR 6:19 Eme Herodiyas badeh, tan losen in ta Jon ma iy anya kidi iy, arile iy udu bahandra tondrok ta Herot,
MAR 6:20 ma Herot ale, inoh Jon, tasah Jon badeh, ndramak mwasin labai ta mada Kindrei, eme ma Herot badai iy bwe. Batun aso ta anuhun Jon, arile iy aso-ok ta anuhun iy labai ja.
MAR 6:21 Ya, madasan ta Herot kidi Jon asahan i buku doh: Eme len ta Herot mene tinen tuwi iy anya kasahan, eme ya iy iwer nyamon i niri lau tan badu bolo asiu hawe iri lau tinan ta bahun ma hawe lau batun badu Galili.
MAR 6:22 Eme budon ndra-in ta Herodiyas asahan i buku doh. Eme nadu Herodiyas badih eme bolon idi mana, eme mesekei ndrine Herot hawe iri lau nane sekesek, ya eme kabin tiye i ta nadu badih bihin dah, “Ou aso-ok sasah handru? Jo winiyan atehei saba lakou i tam i buku ou aso-ok.”
MAR 6:23 Eme iy tiye ja, “Jo tandrakan ou, jo tiye sahou handru en, jo winiyan atehei saba lakou i tam i buku none ou ndremenya ta aliy i buku none ranah lakou jo atondrok jo winiyan atehei i tam.”
MAR 6:24 Ya eme badih bihin dah iu i manan, tiye i ta tinen, “Saba lakou jo katiye?” Eme tinen anya ja, “Jo aso-ok batu Jon ta alomwa.”
MAR 6:25 Eme badih bihin dah iu i bolon suwi suwi ili hawe kabin ma tiye, “Jo aso-ok na le dah ou adai Jon ta alomwa ma ou atehei batun ki bolo raben bwekei, ya ou bwese-ei keme tek.”
MAR 6:26 Eme sahou doh mesekei kabin tikisiy handru en, iy abudon ta iy nane ndratandrakan ereu mada oro kabin aimon nyamon hawen nane, ya iy bwalen akohok bwilima ta tobolowe sahou tan iy ndrasihidi ta nadu badih nane doh.
MAR 6:27 Eme suwi labai iy suni ndramak ta bahun ari ili bolo asiu lulik mwetehei batu Jon eme.
MAR 6:28 Eme iy andrei batun i bolo bwekei ma atehei i mine badih bihin dah, eme ma badih bihin dah atehei i mine tinen.
MAR 6:29 Eme oro lau ta Jon anuhun, oro ame andrei bada kei, oro su-iy, ma ala ahi iy i lek.
MAR 6:30 Eme oro aposel ame hamon ame hawe Jises, ma oro asehek nyalan ta lakou mari oro amekes.
MAR 6:31 Iri lau solo-an solo-an ame au ame au, eme Jises hawe oro lau tan badeh, ari len ta aimon nyamon bwe. Ya eme Jises tiye i toro, “To ka-au ka kon rasi ja kamunyau op.”
MAR 6:32 Ya eme oro le ala ndron ra-ei, ma oro au ala kon rasi sese len ja, lau aliy bwe.
MAR 6:33 Arile, iri lau ra-on ndratou oro au, ma iri ndratanan, idoh oro le ai, eme iri lau badu kon tinan loboho doh adek a san loke ala mwena ta Jises oro lau tan, a kon nane oro anya ka aliy.
MAR 6:34 Eme oro anya ka amik le badeh, Jises atou iri lau solo-an labai, ma iy tikisi iri, tasah iri badeh, a buku none sipsip, ari ndramak ta atondrok iri bwe, ma eme iy leheya iri ta lakou solo-an.
MAR 6:35 Ya mirihik kon anya keben ai, eme oro lau tan ame tiye i buku doh, “Mirihik kon eben ai, ma loboho dah mundrindriyou.
MAR 6:36 Ou tiye iri lau kede-eh ka-au kala kon mirihik ma ndrahu oro kasih noro nyamon ta aimon.”
MAR 6:37 Arile, Jises tiye toro anya, “Ado kadeu niri nyamon.” Eme oro anya ja, “Jises, ou aseken aso kala kasilah sihine ndramak ta bun ma ndru la-uh ki se, ma kasih jabi ramen ma kanyohan oro?”
MAR 6:38 Ya eme Jises tiye i toro ja, “Ado kala kondrek. Jabi ramen tado sabe udu aliy?” Eme oro ala atou, ano oro tiye i tan anya, “Limeh jabi ramen hawe la-uh ni.”
MAR 6:39 Eme Jises tiye oro lau tan kapwai iri lau dah, ma katiye iri kamanyah ka-en andri bada bwidiu.
MAR 6:40 Eme oro apwai iri lau nane dah manyah an se, ra-on rinek (100) ado se ai, ra-on ja lomonoh (50) an se ai, i le buku doh.
MAR 6:41 Eme Jises andrei jabi ramen ma limeh hawe ni ma la-uh dah, iy eme anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah, ma iy edeu ili mine oro lau tan. Eme oro ala adeu ili winiya iri lau mari, ma Jises ale boso-ei ni ma la-uh ma oro adeu i le winiya iri ale.
MAR 6:42 Iri mari aimon nyamon doh ma ndrine iri idih.
MAR 6:43 Ano oro lau tan bwese tikibwah tiri erah i bwak ma ronoh la-uh.
MAR 6:44 Ya kane lau mwan mara-ei aimon jabi ramen nane dah ma lamawa (5,000).
MAR 6:45 Suwi suwi Jises tiye oro lau tan kasandroh kala bolo ra-ei ndron, ma oro kasowe kala bwena kala kapa gwa Betsaida bilisiu. Ya iy le kameh udu hamon ta atiye iri lau ka-au.
MAR 6:46 Iy tiye iri lau au, ano iy iu ili bwele-e mandrei ta iy kasolom.
MAR 6:47 Eme kon a beyeh, ya ndron toro lau tan udu le alih ta gwa li, Jises lebai le in ndra amik kahis.
MAR 6:48 Eme iy atou oro lau tan ndrawoyah ta abahau, tasah jor atohou boto-on i bada ndron toro. Mirihik boho len, Jises edek bwele-e gwa ili hawe oro. Iy anya kedek ki bwena toro,
MAR 6:49 arile, oro atou iy edek bwele-e gwa eme oro anya, “Nyam! Nyam!” Eme ma oro anyar,
MAR 6:50 tasah oro mari anyolom iy, ma oro anoh andra-i labai. Arile, Jises aloh i toro suwi i buku doh, “Ndrine ado kamunum! Jo, jo! Ado sanoh!”
MAR 6:51 Eme iy i ndron hawe oro ma jor amondrei, eme oro lau tan badeh, boho oro asak,
MAR 6:52 tasah budon toro baleu ta jabi ramen mene moson i buku sah, bwe, ma budon toro ale ndraso.
MAR 6:53 Eme oro ala bilisiu, ma oro asos loboho kon Genesaret, eme oro sawei ndron toro i hanai udu ai.
MAR 6:54 Oro are ndron ame loken le badeh, iri lau seleyani Jises.
MAR 6:55 Ya eme iri lau badu loboho doh sakaliye ame ma atiye iri lau abo sik an bada nyahan ame hawen, eme iri anuhun Jises udu heh, iri ala le ai.
MAR 6:56 Eme Jises ili heh ili heh, ili kon bwisik, ili kon tinan, ili kon lokei, eme iri tiyani iri lau sik udu tiri ala ndrahu baen, ya ndremenya Jises boto-on labai ta iy kalelei iri katehei le mine iri kili kiri awin tan. Eme iri lau mari nane ateu awin tan, iri asahan amwenen ja.
MAR 7:1 Eme iri lau ra-on ta leheya kandriyen tiri Juwis, iri badeh, ado Jerusalem ame hawe iri Parasi, atukum ame hawe Jises.
MAR 7:2 Ya iri ndratou oro lau ra-on ta Jises aimon nyamon, ya oro basikine mine oro bala buku none kandriyen tiri Parasi bwe.
MAR 7:3 Tasah iri Parasi ma hawe iri Juwis mari badeh, winiyan baimon nyamon bwe, i buku none iri basikine mine iri bwena bwe, tasah iri an hamon ta kandriyen ta tubu iri.
MAR 7:4 Ya i buku none iri are baen ame, ya nyamon badu baen iri winiyan baimon bwe, i buku none nyamon basikine bwe. Iri badeh, an hamon ta kandriyen solo-an labai, i buku none san ta sikine bwiniu ma kun hawe kun kaba ma hawe sau.
MAR 7:5 Ya eme iri Parasi ma hawe iri lau ta leheya kandriyen tiri Juwis ndremenya Jises i buk doh, “I buku sah oro lau tam aimon nyamon ya oro basikine mine oro bwe, ya oro ba-en hamon ta kandriyen ta tubu ahi iri bwe?”
MAR 7:6 Eme Jises tiye i tiri, “Amwenen handru i buku none propet Aisaya ndratiye nyala aha! Aha asehek na boho aha le, i buku none iy ndratorowenei, ‘Iri lau mwan ma badih dah bwese nyarak eme loken na boho iri le, arile ndrine iri ereu len labai.
MAR 7:7 Iri asehek sahou batanau ta lau le, arile iri anya, “Idah sahou ta Kindrei.” Idoh ya iri asolom laleyah eme tek.’”
MAR 7:8 Eme Jises anya, “Aha ndraruwani kandriyen ta Kindrei, eme aha an hamon ta kandriyen tiri ndramak.”
MAR 7:9 Eme ja iy tiye i tiri, “Batu aha ndrala labai, ya eme aha baseken batanau ta Kindrei bwai, eme ma aha tawi kandriyen taha le.
MAR 7:10 Moses mene ndratiye, ‘Ou a-en bahandra tamam uru tinem, ma ou anuhun sahou turu,’ ma, ‘Are lau aluhe taman uru tinen, iy kimek ta aliy.’
MAR 7:11 “Arile ado Parasi ma ado lau ta leheya kandriyen tiri Juwis tiye i buku doh, ‘I buku none ari ndramak luk tan ta aseben taman uru tinen, arile iy tiye turu i buku doh, “Luk jo anya kaseben ah na aliy badeh, Korban (moson ta aliy, ndraleheyani ta adeu i ta Kindrei).”’
MAR 7:12 Ya, ta san doh ado baseken iy baseben taman uru tinen bwe.
MAR 7:13 Ta kandriyen doh le ado atehei sahou ta Kindrei i andri mara-ei, ma hawe lahou ra-on ja badu hawen, ya ado bwese-ei iri kandriyen solo-an ado akohok ta tubu aha iri ja eme loken mara-ei.”
MAR 7:14 Eme Jises aloh iri lau mwan ma badih a hawen ja, ya eme iy tiye tiri i buku doh, “Aha mari kanuhun jo, ma aha kabudon kamwenen.
MAR 7:15 Saba lakou badu manan i bolo boho ari ndramak, badeh winiyan bamesekei iy bandra-i bwe. Arile lakou udu bolo bohon eme len idoh kameh, mesekei ndramak andra-i adeh.” [
MAR 7:16 “I buku none are ndramak ndranyen udu aliy, badeh iy kanuhun!”]
MAR 7:17 Ano iy ruwani iri lau ma iy ili bolo asiu, eme ma oro lau tan ndremenya iy ta sahou sokek nane.
MAR 7:18 Eme ma Jises tiye i toro, “Buku sah? Ado ale budon tado baleu bwe le? Sebwe ado tana ado bwe, sasah udu manan i bolo ndramak, badeh winiyan bamesekei ndramak bandra-i bwe,
MAR 7:19 tasah idoh winiyan bala budon bwe, arile ili ndrabai ano ndramak iu akeh ili sareu.” (Eme sehek ta aliy, Jises anya, nyamon mari mwasin ta aimon le ai.)
MAR 7:20 Eme Jises asehek ili le, “Saba lakou ala udu bolo boho ndramak eme len, lakou don adeh, mesekei ndramak andra-i.
MAR 7:21 Lakou ala udu bolo budon ta ndramak eme len, ma lolowa ndramak amekes lomondra ndra-in. Lakou buku none, kandriyen mari ta karei, kandriyen ta bahana, kandriyen ta adai ndramak imek, ma kandriyen ta amekes tasou andra-i.
MAR 7:22 Ya i buku none kandriyen ta madalakis ta lakou ta ndramak, ya kandriyen ta ramwes, kandriyen ta wendreya l au, kandriyen ta aten lau, kandriyen ta atudun nyaram, ma hawe kandriyen ta nyaladan.
MAR 7:23 Iri kandriyen mari doh badu bolo ndramak eme len ma mesekei ndramak andra-i adeh.”
MAR 7:24 Ano Jises suri iy ma iy iu ili loboho kon tinan Tair ma Saidon. Eme ya iy i bolo asiu ra-em. Eme Jises anya, iri sala tanan iy udu doh, arile iy winiyan batone iy bwai.
MAR 7:25 Eme suwi labai badih ari anuhun nyalan, eme ya iy eme taku i andri kati Jises, tasah nadun badih badeh, malawin ndra-in udu la-un.
MAR 7:26 Badih dah kandriyen tan badu Grik, arile iy badu Siroponisiya, eme iy lelen Jises katikahei malawin ndra-in udu la-u nadun badih keme len.
MAR 7:27 Eme Jises tiye i tan i buku doh, “Kanyohan iri nah bwena op, tasah bamwenen ta ari lakou bwe, i buku none iri andrei nyamon tiri nah ma iri akahei i na nadu mwi.”
MAR 7:28 Arile, iy tiye i ta Jises i buku doh, “Laban, ou asehek sahou handru. Arile iri nadu mwi an bahandra sau badeh, aimon kahu nyamon tiri nah.”
MAR 7:29 Eme iy tiye i tan, “Ya ta sehek ta aliy, ou au ai. Malawin ndra-in nane udu la-u nadum badih badeh, ndra-au.”
MAR 7:30 Eme badih dah iu i kon, ma iy atou nadun ales in bada sau, ya malawin ndra-in badeh, ndra-au.
MAR 7:31 Ano Jises udu loboho Tair edek iu ili Saidon, ma iy edek ja ili loboho gwa li Galili, ano ili loboho kon ma ronoh udu bolo Dekapolis.
MAR 7:32 Eme iri lau ra-on tiyani ndramak ari ndranyen siu ma iy bohon bwe, eme oro ndremenya Jises katehei minen ki bwele-en.
MAR 7:33 Eme Jises andrei iy udu bolo iri lau nane eme len, ya Jises sakaruk i kandro minen ma iy atehei i munu ndranye ndramak nane ma i bada kalimen ale.
MAR 7:34 Eme Jises anyolom i kandrah ma ndrinen eden labai, eme iy tiye i ta ndramak nane dah, “Epata,” moson ta aliy i buku doh, “Ou asak!”
MAR 7:35 Se nawin bwe, ndranye iy ndramak dah asak ma kalimen nyokolokon ma iy asehek sahou amwenen mara-ei ja.
MAR 7:36 Ano Jises tiye sahou batanau i toro anya, “Ado sasehek sala ta ari ndramak.” Jises tiye i toro san solo-an solo-an, arile bwai, oro asehek le ili ai.
MAR 7:37 Eme iri anuhun, ma mani iri atur. Eme iri tiye i buku doh, “Lakou mari iy amekes doh, ndra amwenen le ai. Iy mesekei ndramak ndranyen siu ma hawe bohon bwe, amwenen ja!”
MAR 8:1 Udu bolo len doh iri lau solo-an labai atukum ame le hawen. Iri ado, ya iri nyamon ta aimon bwai. Eme Jises luhi oro lau tan ala hawen, ma iy asehek i toro i buku doh,
MAR 8:2 “Jo tikisi iri lau dah. Iri an hawek ndra winiya len taloh ai, ma niri nyamon ta aimon bwe.
MAR 8:3 Ya i buku none jo katiye iri ma son tiri ka-au ka kon tiri, kora-on mada iri kabuluw ya iri kataku kado san, tasah iri rayah mene ame, san tiri lawe-en labai.”
MAR 8:4 Eme oro lau tan anya, “Kon dah lau aliy bwe. Are lau kameh winiyan salahani niri nyamon udu bolo kon lomale an le dah?”
MAR 8:5 Eme Jises ndremenyani oro, “Nado jabi ramen sabe udu aliy?” Eme oro anya, “Ndro taloh le.”
MAR 8:6 Eme iy tiye i tiri lau mwan ma badih kamanyah kado andri bada munyak. Eme iy andrei jabi ramen ma ndro taloh dah, eme iy edeu wurah i ta Kindrei. Ano iy boso-ei ma atehei ili mine oro lau tan, ma oro adeu ili niri lau.
MAR 8:7 Oro ale ni toro ra-on udu aliy, eme Jises asehek sahou ta nyosowan i ta aliy. Ano iy tiye oro lau tan adeu i le winiya iri.
MAR 8:8 Eme iri aimon ma ndrine iri idih. Ano oro lau ta Jises tukumwi tikibwah tiri erah asahan i bwak ma ndro taloh.
MAR 8:9 Ya kane iri lau nane doh i buku hawa (4,000). Ano iy tiye iri lau mwan ma badih au ala hamon ala kon tiri.
MAR 8:10 Eme Jises i bolo ndron ra-ei hawe oro lau tan ma oro au ala loboho kon Dalmanuta.
MAR 8:11 Ano iri Parasi ame ya andres hawe Jises. Iri anya kanone iy ma iri ndremenya iy kamekes kalem badu kandrah ta leheya buku none iy amekes gok ta Kindrei handru.
MAR 8:12 Eme ya budon tan ihis in bolo ndrinen o-on, eme iy anya, “Ki buku sah handru iri lau mwan ma badih ta len dah anya katou kalem? Jo tiye tado handru en! Idah kameh kalem handru winiyan basahan tiri lau na len dah bwai.”
MAR 8:13 Eme Jises ruwani iri Parasi areu, ma iy i ndron ma iu i len ili kapa gwa li bilisiu.
MAR 8:14 Ya oro lau ta Jises ndramaniy ta akohok jabi ramen, oro andrei rabah le i ndron.
MAR 8:15 Eme Jises anya, “Mada ado kaleu ta yis tiri Parasi ma ta Herot.”
MAR 8:16 Eme oro tiye nyala oro ari ari, “Sebwe iy amekes sahou doh tasah to bakohok jabi ramen bwe nadeh?”
MAR 8:17 Eme Jises tanan ta sahou nane oro asehek, eme iy tiye i toro, “Buku sah handru ado asehek, anya ado jabi ramen bwe? Sebwe mada ado baleu bwe le nadeh? Bar tado boto-on?
MAR 8:18 Ado mada ado udu aliy ya ado batou bwe? Ma ndranye ado udu aliy ya ado banuhun bwe?
MAR 8:19 Ado ndramaniy ja, ta jo mene boso-ei jabi ramen ma limeh i niri lau ma lamawa (5,000) mene deh bwe? Ya bwak sabe mene erah ado andrei?” Eme oro anya, “Ma ronoh la-uh.”
MAR 8:20 “Ya ado ndramaniy ja ta jabi ramen ma ndro taloh i niri lau ma hawa (4,000), ma bwak sabe mene erah ado andrei?” Eme oro anya, “Bwak ma ndro taloh.”
MAR 8:21 Eme Jises tiye i toro, “Budon tado kede-eh baleu bwe le?”
MAR 8:22 Ano Jises hawe oro lau tan au ala asahan Betsaida. Eme ma iri lau ra-on sirini ndramak ari madan kaseu, ya oro tiyani iy eme hawe Jises. Ma oro tiye i ta Jises i buku doh: “Aso aso-ok ou atehei minem kili bwele-e iy ndramak dan op.”
MAR 8:23 Eme Jises tawi mine ndramak madan kaseu nane dah ma sirini iy eme len ta kon. Eme Jises sakaruk i madan ma atehei minen i bwele-e madan, ma iy anya, “Ou atou ari lakou deh bwe?”
MAR 8:24 Eme ya iy anyolom i loke ma iy anya, “Ehe, jo atou iri lau, iri a buku none kei adek ma seselek laleyah.”
MAR 8:25 Ano ja Jises atehei minen i bwele-e mada ndramak dah ja, ma ndramak dah madan atau i loke eme ma iy anyolom lakou amwenen mara-ei.
MAR 8:26 Eme Jises anya, “Ou au ala asiu tam ya ou sala bolo kon.”
MAR 8:27 Eme ma Jises hawe oro lau tan adek san anya kala loboho kon tinan Sesariya Pilipai, eme ya Jises ndremenya oro lau tan, “Iri lau anya jo are lau handru?”
MAR 8:28 Eme oro tiye i tan, “Iri ra-on anya ja ou Jon ta alomwa, ya iri ra-on anya ja, ou Alaija, ya iri ra-on anya ja, ou ari propet.”
MAR 8:29 Eme Jises ndremenya oro, “Ya ado amwenen anya jo are lau handru?” Eme Pita asumon bohon i buku doh, “Ou kede-eh Krais handru oh.”
MAR 8:30 Eme Jises batanau oro satiye ta ari lau ja ai, ndri-iy.
MAR 8:31 Ma iy leheya oro ta, Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh iri adai iy imek, ya len taloh ano iy kameh amak ja.
MAR 8:32 Iy asehek aleu amwenen i toro lau tan. Eme Pita anuhun sahou doh, ya iy seheyani Jises i kabwak, ma iy ibolosen i tan anya, “Ou sato-en sala buku badeh!”
MAR 8:33 Arile Jises tubuni iy ma iy anyolom oro lau tan, eme ma iy to-en Pita anya, “Satan, ou a len a konak! Ou ba-en hamon ta budon ta Kindrei bwe. Ou a-en hamon le ta budon tiri lau.”
MAR 8:34 Eme Jises luhi iri lau solo-an solo-an ma hawe oro lau tan, eme ma tiye i toro, “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese kei tondreh tan, ya iy ki-in hamon tek.
MAR 8:35 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ma atiye sahou mwasin tek, ya kohan ano, iy kameh winiyan andrei kohan ja.
MAR 8:36 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru?
MAR 8:37 Ya lau kadeu saba sowan handru kameh ta akohok kohan keme hamon?
MAR 8:38 Ou are lau bwilim ama jo ma ta sahou tek udu bolo lau rebesem dah ta maliye Kindrei ma lomondra ndra-in, Nadu Ndramak Awas kameh bwilin ama ou ale, i buku none len hamon kameh, iy eme ma hawe lomada taman hawe iri angelo, lau ndrabun badu loken.”
MAR 9:1 Eme Jises asehek i toro i buku doh, “Jo asehek sahou handru ewek tado. Lau ra-on ales ereu bolo to dah kameh winiyan bamak bwe, ya iri kameh anyolom tondrok ta Kindrei ma hawe boto-on tan kameh asahan.”
MAR 9:2 Len onoh ano, Jises kuhi Pita, Jemis ma hawe Jon a hawen, ma Jises kuhi oro ala bwele-e mandrei ari loken labai, ya oro le ado aliy. Oro ado, oro anyolom ili bada Jises ndratubuniy ndra randrah ja.
MAR 9:3 Ma awin tan ndra nyikilikin asahan i belen ma sakalawi belen ta lakou mari badu munyak dah, i buku kasikine.
MAR 9:4 Eme oro lau tan ma taloh nane dah atou Alaija uru Moses asahan, ma asehek sahou hawen.
MAR 9:5 Eme Pita atou lakou doh ya iy asehek ta Jises i buku doh, “Ndramak ta leheya, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.”
MAR 9:6 Pita asehek sahou doh, tasah iy hawe uru nane anoh, eme iy bala tanan sahou nane iy asehek bwe.
MAR 9:7 Eme ma asi kandrah asahan ma tubuluhi oro, ya sahou ari asahan bolo asi kandrah nane asehek i buku doh, “Idah naduk handru. Jo aseken iy labai, ya ado kanuhun sahou tan.”
MAR 9:8 Eme suwi labai oro anyolom ili, ma oro batou ari lau hawe oro bwe, arile Jises le ari.
MAR 9:9 Eme oro are bwele-e mandrei ame andri, Jises batanau oro i buku doh, “Saba lakou ado ndratou ma ndranuhun, ado sasehek sala ta ari ndramak, ili winiya le Nadu Ndramak Awas amak ereu bolo lek tan eme loken.”
MAR 9:10 Eme oro basehek bwe, toro le, eme udu ndrokowa oro le, oro ndremenya oro ta saba moson, “Ta amak ta imek tan,” ma i buku sah handru.
MAR 9:11 Eme oro ndremenya Jises i buku doh, “Buku sah iri lau ta leheya kandriyen tiri Juwis anya Alaija kameh eme bwena op?”
MAR 9:12 Eme iy tiye i toro anya, “Sahou badeh, handru. Alaija eme bwena handru ta lowosa iri lakou mari. Ya i buku sah handru ja sahou mene torowenei anya idah kameh Nadu Ndramak Awas kameh akohok sisi-in solo-an ma iri kameh bwale iri iy?
MAR 9:13 Arile jo asehek tado i buku doh, Alaija ndrame, arile iri an hamon ta budon tiri amwenen, ya iri amekes iri kandriyen mari i badan, i buku none ndratorowenei sihiden.”
MAR 9:14 Eme oro ame hawe oro lau ra-on ja ta Jises, eme oro anyolom lau solo-an solo-an awudi oro ma iri lau ta leheya kandriyen tiri Juwis ame andres hawe oro lau ta Jises.
MAR 9:15 Eme nawin bwe, iri lau atou Jises ma mani iri atur ma iri sakaliye ala hawen ma sekesek ma anyumos badan.
MAR 9:16 Eme ya Jises ndremenya oro lau tan, “Ado andres hawe iri ta sasah handru?”
MAR 9:17 Eme ndramak ari udu bolo iri anya, “Ndramak ta leheya, jo atiye naduk eme hawem ai, tasah malawin ndra-in udu la-un, ya iy winiyan basehek sahou bwe.
MAR 9:18 I buku none asahan, malawin ndra-in kameh moraha iy i andri bada ndren, ma bubusi bohon eme len ma iy andrebek lihin ale, ma iy sorokok en. Eme jo tiye oro lau tam katikahei malawin ndra-in doh ki-iu, arile oro winiyan batikahei ba-au bwe.”
MAR 9:19 Eme Jises tiye i toro, “Ado lau mwan ma badih batehei budon tado handru bame tek bwe. Len sabe kameh jo kereu hawe ado, ano ado barala tanan boto-on ta Kindrei? Ado katiyani nah badeh, keme hawek.”
MAR 9:20 Eme oro tiyani iy i hawen. Eme malawin ndra-in anyolom Jises, ma iy morohani nah dah i andri bada ndren ma iy tundrundru ma bubusi bohon atau.
MAR 9:21 Eme Jises ndremenya tama i nah nane dah, “Malawin ndra-in udu la-un len sabe handru?” Eme iy anya, “Iy ma nadu bwisik le badeh, asahan ai.
MAR 9:22 San solo-an iy moraha iy i jih ma i gwa anya kamekes iy kimek. Ya i buku none saba lakou ou winiyan mesekei, ya ou tikisi aso, ma ou sebenei aso!”
MAR 9:23 Eme Jises tiye i tan i buku doh, “I buku sah handru ou anya, i buku jo winiyan? Lakou mari winiyan asahan i tare lau i buku none budon tan handru in tek.”
MAR 9:24 Eme tama nah nane dah aloh, “Laban, jo badeh, budon tek sese le in tam, arile ou aseben jo ja ya budon tek handru ki tam.”
MAR 9:25 Eme ya Jises anyolom iri lau solo-an solo-an sakaliye a le se ame, eme iy tiye sahou boto-on i ta malawin ndra-in anya, “Ou malawin ndra-in, ou bohom bwe, ou ndranyem siu, jo tiye tam, ou ame len tan ma ou same hamon ja ai!”
MAR 9:26 Ano malawin ndra-in nane anyar ma iy morohani i nah dah i andri ma iy amei, eme ma malawin ndra-in nane udu bwele-en eme len, ya i nah mwan dah sorokok i buku none iy ndramak, eme iri lau solo-an anya ja, “Iy ndramak.”
MAR 9:27 Arile Jises tawi minen, ma suri iy eme loken.
MAR 9:28 Eme Jises iu i asiu, ma oro lau tan ndremenya iy anya, “Buku sah handru ya aso winiyan batikahei malawin ndra-in nane iu bwe?”
MAR 9:29 Eme iy tiye i toro, “Lakou i buku dah winiyan batikahei bame len na saba san ja bwe, arile na salom i ta Kindrei le winiyan ai.”
MAR 9:30 Eme ma, Jises hawe oro lau tan ruwani kon doh ame len, ma oro adek ales au ala bolo Galili. Ya Jises bwalen lau sala tanan ta iy udu heh handru.
MAR 9:31 Tasah iy anya kaleheya oro lau tan, “Iri kameh atehei Nadu Ndramak Awas ili mine iri lau. Ya iri lau kameh adai iy imek. Ano len ma taloh ja kameh iy amak ja.”
MAR 9:32 Arile budon toro baleu ta sahou tan nane bwe, eme oro anoh ta ndremenya iy.
MAR 9:33 Eme oro ame asahan Kapena-um, oro ame ala ado bolo asiu ra-em. Eme Jises ndremenya oro lau tan, “Ado andres ta sasah nane an san?”
MAR 9:34 Arile, oro batiye randra sahou bwe, tasah oro adek san doh, oro le andres oro, ta are handru udu bwele-en toro mari.
MAR 9:35 Eme Jises manyah udu andri, ano iy luhi oro lau tan ma ronoh la-uh ame hawen, ano iy tiye i toro, “Are lau anya ki bwena badeh, iy ki-in ndrobek, ma iy ki ndrahu so-ok ta lau mari.”
MAR 9:36 Eme Jises andrei nadu nah ari nadu bwisik eme ales ereu ndrokowa oro. Eme iy awudi iy na minen ya eme iy tiye i toro,
MAR 9:37 “Ya buku none ari ndramak abudon jo, ya iy aseben ari nadu nah bwisik buku nah dah, badeh iy aseben jo. Ma are lau oro aseben jo, badeh, oro baseben jo le bwe, arile oro ale aseben Kindrei iy nane suni jo eme dah.”
MAR 9:38 Eme Jon tiye i ta Jises, “Ndramak ta leheya, aso atou ndramak ari atikah malawin ndra-in eme len na boto-on ta nyaram, ya eme aso anya kabarah iy, tasah iy badu hawe to bwe.”
MAR 9:39 Eme Jises tiye i toro, “Ado sabarah iy, tasah are lau amekes lahou tinan na boto-on ta nyarak, suwi labai iy winiyan batiye ndra-in ta nyarak bwe.
MAR 9:40 Ya are lau tan bahun tato bwe, iy badeh, kawas tato ma iy badu hawe to.
MAR 9:41 Jo tiye tado handru! Are lau atehei bwiniu gwa i wa-im, tasah ou badu hawe Krais, sihine i lau doh winiyan ba-au laleyah bwe.
MAR 9:42 “Buku none ari ndramak bwidi ari nadu nah ale atehei budon tan eme tek taku ta kandriyen ndra-in, sebwe mwasin ta ndramak doh kasawei ari bek maha-an ki balen ya kakahei iy katuh kili bolo ndras ki-in gwek kimek.
MAR 9:43 Ya i buku none minem aliu ou ta amekes kandriyen ndra-in, mwasin ou saniy ki-iu! Sebwe mwasin ta minem raka le ka-iy ta akohok koham mwasin ta ereu le buku doh. Kora-on minem ma la-uh udu aliy, ya ou kameh ala bolo jih ta winiyan bamak bwe!
MAR 9:45 Ya, i buku none katim aliu ou ta amekes kandriyen ndra-in ou saniy ki-iu! Sebwe mwasin ta katim raka le ka-iy ta akohok koham mwasin ta ereu le buku doh. Kora-on katim ma la-uh udu aliy, ya iri kakahei ou ala bolo jih ale ta winiyan bamak bwe!
MAR 9:47 Ya, buku none madam aluwi ou ta amekes kandriyen ndra-in, sebwe mwasin ta ou holowaniy ma kakahei ki-iu! Mwasin ta madam ari le ka-iy, ya ou ala bahandra tondrok ta Kindrei, kora-on madam ma la-uh kudu aliy, ya iri kakahei ou ala bolo jih ta anya ereu le buku doh.
MAR 9:48 Ya bolo jih doh, ‘Iri nadu un aimon iri lau ndramak, ya iri winiyan bamak bwe. Ma jih asun iri lau ndramak ale winiyan bamak bwe.’ Iri lau ndramak ado bolo jih doh kameh akohok sisi-in solo-an ndra-in ta udu le buku doh.
MAR 9:49 “Lau marakon kameh asah i buku none ndras hawe jih. Jih badeh, i buku none sisi-in ta leheya kandriyen ta ndramak mwasin, ya ndras i bolo nyamon badeh, ta amekes nyamon i simidin. Eme ma aha marakon kandrei sahou ta Kindrei ma katehei ki buku ndras kudu bolo oda aha, ma iy kameh winiyan atisih iri kandriyen ndra-in.
MAR 9:50 Ndras mwasin, arile i buku none iy mani nyiminyen, ya idah kameh ou baramesekei nyiminyen barame hamon barala buku sah bah? Ou badeh, i buku ndras ki-in bolo odam ya ndrinem kamunum ki ta ndramak ari ari.”
MAR 10:1 Eme ma Jises hawe oro lau tan ruwani kon Kapena-um, ma oro au ala loboho kon Judiya ereu kapa gwa Jodan bilisiu. Eme ma iri lau solo-an solo-an atukum ame hawen ja, ya eme i buku none kandriyen tan ala iy ndramekes ndramekes ndra-au, eme ma iy leheya iri.
MAR 10:2 Eme iri Parasi ame hawe Jises anya kanone iy. Eme iri ndremenya iy, “Sebwe sahou batanau tataha anya, ndramak winiyan atikah udun iu deh bwe?”
MAR 10:3 Eme Jises tiye i tiri anya, “Moses mene batanau sasah handru i taha?”
MAR 10:4 Eme iri anya, “Moses tiye tahi anya ndramak winiyan atorou la-ukei ta amendren tasou, ya iy atehei i mine badih tan ano iy winiyan aruwe badih tan iu.”
MAR 10:5 Eme Jises tiye i tiri i buku doh, “Batu ado boto-on labai, eme Moses torowenei batanau i taha.
MAR 10:6 Arile, bwena handru kala Kindrei mene ‘mesekei lakou mari, iy mesekei lau mwan ma badih.’
MAR 10:7 ‘Ta katin le doh, iy mwan karuwani taman uru tinen ya iy keme len hawe udun,
MAR 10:8 ya uru kasahan ari buruwen.’ Kindrei asehek anya, bada uru la-uh bwai, bada uru ndrasahan ari le buruwen.
MAR 10:9 Idoh le, saba lakou Kindrei ndrasawei mari ndrase, ari ndramak sasaniy ja ai.”
MAR 10:10 Eme oro a hamon a asiu, oro lau tan ndremenya iy ta sahou mene.
MAR 10:11 Eme Jises tiye i toro, “Ndramak tikahei udun iu ya i buku none iy sudi badih ari ja, iy le mesekei karei i tan.
MAR 10:12 Ma ale i buku none iy badih tikahei udun mwan ya i buku none iy ili i tasou i ta mwan ari ja, badeh, iy mesekei karei i tan ale.”
MAR 10:13 Ano iri lau atiye iri nah ala hawe Jises ta iy kedeu minen ki bada iri. Eme oro lau tan abolosen i tiri.
MAR 10:14 Eme Jises seleyaniy, ma iy ibolosen i toro lau tan, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.
MAR 10:15 Jo tiye sahou handru ewek tado. I buku ado basahan buku none iri nah bwisik bwe, ado kameh winiyan bala bolo tondrok ta Kindrei bwe.”
MAR 10:16 Eme iy nyuruwini iri nah nane ame hawen. Iy atehei minen i bwele-e oro ari ari, ma asehek sahou ta nyosowan boto-on i tiri nah dah.
MAR 10:17 Eme Jises anya kedek san anya ki-iu le badeh, ndramak ari sakaniy in hamon tan eme, aluh udu andri mada Jises, ma iy ndremenya iy, “Ndramak ta leheya, ou mwasin handru. Jo kamekes saba kandriyen handru ya jo kakohok kohan mwasin ta ereu le buku doh len mari?”
MAR 10:18 Eme Jises tiye i tan i buku doh, “Tasah handru ou aloh jo mwasin handru? Ari ndramak badeh, bala mwasin i buku none Kindrei bwe, Kindrei le ari, kabwe.
MAR 10:19 Ou tanam batanau ta Kindrei, ‘Ou sadai ndramak samak, ou samekes karei ta badih tasou, ou sabahana, ou sawasai, madam salikis. Arile, ou a-en bahandra tamam uru tinem, ma ou anuhun sahou turu.’”
MAR 10:20 Eme ndramak dah anya, “Ndramak ta leheya, jo ma loweu eme taku dah, jo in hamon ta sahou batanau mari le ai.”
MAR 10:21 Eme Jises anyolom iy ndramak dah, ma iy tikisi iy, ma iy anya, “Lakou ari le kahis. Ou ala atehei iri lakou tam mari kili mada ba-en, ya luk ou akohok ta iri lakou tam nane ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”
MAR 10:22 Ndramak dah anuhun, ma sa-ar asahan bwilin, ma iy tikisiy labai, tasah tan lakou solo-an labai, ma iy bwalen ta edeu iu, ya eme ma iy edek iu.
MAR 10:23 Iy ndramak nane ndra-au ai. Eme Jises anyolom ili eme, ma iy tiye i toro lau tan i buku doh, “Idah kameh boto-on labai ta ndramak tan lakou solo-an, i buku none iy anya kili bolo tondrok ta Kindrei!”
MAR 10:24 Eme oro lau tan badeh, boho oro asak, tasah ta sahou iy asehek. Eme Jises asehek ili le, “Ado naduk, idah kameh boto-on labai ta ndramak anya kili bolo tondrok ta Kindrei!
MAR 10:25 Masakan boto-on boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja ta kamel i buku iy i bolo manamunu nunu.”
MAR 10:26 Jises asehek, ma mani oro atur labai. Eme ma oro ndremenya iy, “Buku none i buku baden eh, are lau handru kameh winiyan akohok kohan mwasin ta ereu le buku doh?”
MAR 10:27 Eme Jises anyolom amwenen i toro, ma iy anya, “Lau winiyan bwe, arile Kindrei badeh, bala buku aliy bwe. Kindrei le ari winiyan amekes iri lakou marakon.”
MAR 10:28 Jises asehek, ma Pita anya, “Ou atou, aso ndraruwani lakou taso mari, ya aso ndra-en hamon tam.”
MAR 10:29 Pita asehek i buku doh, ma Jises asehek i toro anya, “Jo tiye tado handru. Are lau ruwani asiu tan, ma nadu tinen mwan, ma buru-un, ma taman uru tinen, ma nadun, ma bilin tan tasah ta jo, ma ta sahou mwasin,
MAR 10:30 iy kameh akohok lakou solo-an handru na len dah. Iy kameh akohok ndramas buku san rinek (100) ja i bwele-e lakou tan bwena. Ndramas doh buku asiu solo-an ja, ma nadu tinen mwan solo-an ja ma buru-un solo-an solo-an ja, ma tinen hawe nadun ma bilin solo-an, ma ale hawe iri lau amekes ndra-in i tan ale. Arile len hamon, Kindrei kameh winiyan edeu kohan handru i tan ta winiyan bano bwe ta udu le buku doh.
MAR 10:31 Arile lau solo-an na len dah areu bwena, iri kameh ame hamon. Ya iri lau solo-an na len dah areu hamon iri kameh kala bwena.”
MAR 10:32 Ano Jises hawe iri lau ado san adek ala Jerusalem, ma Jises edek iu i bwena tiri, eme ma oro lau tan mani oro atur, ma iri lau an hamon tan badeh, anoh. Eme Jises ma hawe oro lau tan ma ronoh la-uh a ka-un ya eme iy tiye nyala oro ta sasah kameh asahan badan.
MAR 10:33 Eme iy tiye nyala oro i buku doh, “Ado kanuhun, na dah to ala loke ala Jerusalem, ma iri kameh atehei Nadu Ndramak Awas ili mine iri tinan tiri pris ma hawe iri lau ta leheya kandriyen tiri Juwis. Ya iri kameh atehei iy ili ta mada sahou, ma iri kameh atilik sahou i se ta kadai iy kimek, ma iri kameh adeu iy i mine iri lau badu leheleh.
MAR 10:34 Ma iri kameh bobose iy ma omor iy ma a-um iy na malou sakabuk i bek ma hawe adai iy imek, arile hamon ta len taloh kameh iy amak ja.”
MAR 10:35 Eme nadu Sebedi, Jemis uru Jon ame hawe Jises, eme uru tiye i tan, “Ndramak ta leheya, aru anya kandremenya ou, saba lakou aru ndremenya, ou mesekei keme taru.”
MAR 10:36 Eme Jises anya, “Saba lakou ah aseken jo kamesekei kewek ta-ah?”
MAR 10:37 Eme uru tiye i tan, “I buku none ou aseken, aru anya kamanyah ka-en hawem, ari kamanyah kudu bilisiu minem salin, ya ari kamanyah kudu bilisiu minem kamweu kudu bolo lomadan tam.”
MAR 10:38 Arile Jises tiye i turu, “Ah bala tanan ta saba lakou ah ndremenya kede-eh bo-oh! Sebwe ah winiyan a-un na bwiniu jo kameh a-un na aliy dah nadeh? Ya, sebwe ah winiyan anyu na inyu jo kameh inyu na aliy?”
MAR 10:39 Eme uru tiye i tan, “Aru winiyan.” Eme Jises tiye i turu ja, “Handru, bwiniu kameh jo a-un na aliy, ah kameh a-un na aliy ale, ma inyu, jo inyu na aliy, ah kameh anyu na aliy ale.
MAR 10:40 Arile, are kameh manyah ereu minek salin ma are kameh manyah ereu minek kamweu, idoh jo winiyan batiye bwai. Tasah kon doh tiri lau ale tama Kindrei ndralowosani iri kabwe.”
MAR 10:41 Ya eme oro lau tan ma ronoh anuhun sahou turu, oro anya kabolosen ki ta Jemis uru Jon.
MAR 10:42 Ano Jises luhi oro lau tan mari ame hawen ma iy tiye i toro i buku doh, “Ado tana ado, iri lau lomondra ta atondrok iri lau badu leheleh badeh, tiri boto-on ta atondrok iri lau tiri, ma iri badeh, batanau boto-on labai ta iri lau tiri kanuhun sahou tiri handru.
MAR 10:43 Arile, kandriyen doh sa-en ndrokowa ado, ndri-iy. Ndramak anya ki tinan kereu ndrokowa ado, iy kasahan lau ta gok kereu ndrokowa ado.
MAR 10:44 Ma are anya kereu bwena tado iy kasahan ndramak ta gok laleyah kereu ndrokowa ado.
MAR 10:45 Tasah Nadu Ndramak Awas ale eme ta iri lau kamekes gok tan, bwe. Iy eme ta aseben iri, ma ta edeu kohan ta akunoh lau mari.”
MAR 10:46 Ano oro ame Jeriko, ya Jises hawe oro lau tan anya ka-au ta Jeriko ma hawe iri lau solo-an solo-an. Eme nadu Timeyus nyaran Batimeyus, iy madan bwe, manyah udu ka-u san anyolou iri lau ta lakou.
MAR 10:47 Eme iy anuhun, idoh Jises badu Nasaret le ai, eme iy aloh, “Jises, ou nadu tubu kabin Debit, ou tikisi jo!”
MAR 10:48 Eme iri lau solo-an abolosen i tan ma tiye iy kandru-uk, arile bwai, iy aloh ma arah boto-on le gwek ai, “Nadu tubu kabin Debit ou tikisi jo!”
MAR 10:49 Eme Jises udu rasi ma tiye sahou i tan i buku doh, “Ado kaluhi iy keme.” Eme ma oro luhi Batimeyus ma oro tiye sahou i tan i buku doh, “Ndrinem kamunum! Ou suri ou ma ou ame. Jises aloh ou!”
MAR 10:50 Eme Batimeyus suri iy ales i loken suwi suwi. Iy asini kolau ta bwele-en iu, ma ruwaniy udu api, ma iy edek amwenen ili hawe Jises.
MAR 10:51 Iy edek ili isos le badeh, Jises tiye i tan i buku doh, “Ou aso-ok jo kamekes sasah ki tam?” Eme ndramak madan kaseu dah anya, “Ndramak ta leheya, jo anya kanyolom kon ja.”
MAR 10:52 Eme Jises tiye i tan, “Ou au ai, budon tam handru ndramesekei ou ndramwenen ja.” Eme ma nawin bwe madan amwenen ma iy anyolom ja ma iy in hamon ta Jises.
MAR 11:1 Eme oro ame mirihik ta Jerusalem ya ame kon Betapes ma Betani udu loboho kesehe mandrei Olip. Eme Jises suni uru lau tan la-uh,
MAR 11:2 ma iy tiye i turu i buku doh, “Ah kala kon to anyolom i aliy don. Suwi labai ah kameh atou nadu donki ari loweu, ari ndramak bamanyah bare bwele-en bwe le. Ya ah katolowei malou ma kasiriniy keme.
MAR 11:3 I buku none are lau kandremenya ah anya, ‘Ah abo sah kede-eh?’ Ah katiye ki buku doh, ‘Laban gok udu tan, ano iy baratiyaniy barame hamon ja!’”
MAR 11:4 Eme uru au ma atou nadu donki badeh, iri sakabwitiniy udu ta kou udu alih ta san ili bolo kon, eme uru tolowei malou iu.
MAR 11:5 Eme iri lau rayah ales are loboho doh ndremenya uru, “Hei, ah anya katalou donki badeh, ta sasah?”
MAR 11:6 Eme uru tiye sahou nane Jises asehek i turu, eme oro tiye uru kandrei ma katiyaniy kili.
MAR 11:7 Eme uru sirini donki ili hawe Jises, ma oro lau tan lowosani kolau toro lawe-en badu bwele-e awin toro i kona donki nane, ya Jises ili manyah udu bwele-en.
MAR 11:8 Eme iri lau solo-an labai talou kolau tiri lawe-en badu bwele-e awin tiri ya iri talaha ili madasan. Ya iri ra-on badeh, ala asan la-u kei badu bilin ma anyehe i andri.
MAR 11:9 Eme iri lau ra-on adek ala bwena ta Jises ma hawe iri ra-on adek an hamon badeh aloh i buku doh, “Hosana! Kasekesek iy! Kasore nyaran! Iy eme ta nyara Laban!
MAR 11:10 Kasore tondrok ta tama Debit kameh, eme! Hosana! Kasekesek ki loken mara-ei!”
MAR 11:11 Eme ma oro ala asos kon tinan Jerusalem. Ma Jises hawe oro lau tan ala bolo asiu tinan ta Kindrei. Ano oro anyolom ili eme i ta lakou mari. Arile, an anya kamai ki-iu ki andri ai. Eme ma oro ruwani Jerusalem ma adek au ala kon bwisik Betani, ma oro amadin doh.
MAR 11:12 Ya eme na len ari ja, oro are Betani ame len, ma Jises imeson andra-i labai.
MAR 11:13 Eme iy ere ndra len, iy atou kei pik ra-ei, suhuyen labai. Eme iy edek ili bada kei dah, anya katou buwa pik dah udu aliy deh bwe. Arile iy ili badeh, iy batou se ari bwe, laba le la-un, tasah bamwenen ta len ta buwa pik bwe.
MAR 11:14 Eme Jises tiye i ta kei nane i buku doh, “Iri lau winiyan baimon salim ja bwai.” Eme oro lau tan anuhun sahou iy asehek.
MAR 11:15 Eme oro ame Jerusalem ma Jises iu ili bolo asiu tinan ta Kindrei ya iy atikah iri lau amekes ba-en udu asiu doh. Eme Jises bukudi iri sau tiri lau ta tokoha luk, ma hawe bwabwai tiri lau asih iri sirih aloh ban.
MAR 11:16 Ya iy baseken are lau sabwese lakou sala bolo asiu doh, ndri-iy.
MAR 11:17 Eme Jises leheya iri mwan ma badih, ma iy tiye i tiri, “Sebwe buk ndrabun ndratiye nadeh? Tiye i buku doh, ‘Asiu tek dah, ta lau mari badu munyak tinan mari ta salom,’ arile aha ndramesekei asiu tek, ndrasahan ‘asumwe iri lau ta bahana.’”
MAR 11:18 Jises asehek i buku doh, ma iri lau tinan tiri pris hawe iri lau ta leheya kandriyen tiri Juwis anuhun iy. Eme iri anoh iy, tasah iri lau mari boho iri asak ta leheya tan. Eme iri lomondra ta anya kadai iy.
MAR 11:19 Len mara-ei Jises hawe oro lau tan amekes i buku doh: Kon a beyeh, oro adek are kon tinan au ala amadin a bolo kon bwisik.
MAR 11:20 Eme mandraben ta len ari ja badeh, oro adek anya kala hamon kala Jerusalem. Eme oro anyolom kei pik mene Jises asehek sahou i tan badeh, ndrasara mara-ei, udu ta la-un ili isos bada kandron.
MAR 11:21 Ya Pita, balen bamaniy bwe, eme iy anya, “Ou anyolom, ndramak ta leheya, kei pik mene ou tiye sahou boto-on i ta aliy, badeh, ndrasara mara-ei!”
MAR 11:22 Pita asehek i buku doh badeh, ma Jises tiye ili toro lau tan anya, “Ado kanuhun! Ado katehei budon tado handru badeh, kili ta Kindrei.
MAR 11:23 Jo asehek sahou handru ewek tado, ou are lau asehek sahou i ta mandrei doh anya, ‘Ou suri ou ya ou sandroh ala bolo ndras,’ ma budon ta nohonoh sa-en ndrinem, arile budon tam handru ki-in ta lakou ou asehek, idah kameh asahan tam buku le ou nane ndratiye.
MAR 11:24 Ya ta sehek ta aliy i buku doh, sasah ou ndremenya i san ta salom, ya budon tam ki-in ta aliy handru i buku ou ndrandrei, idah kameh ou andrei handru.
MAR 11:25 Ya i buku none ou are ales ta salom badeh, ou badeh, balem kamani saba lomondra ndra-in ta bada are lau, ya idah kameh ou ale tamam Kindrei udu kandrah kameh sikine lomondra ndra-in tam iu.” [
MAR 11:26 “Arile, buku ou bamani lomondra ndra-in ta bada iri rayah bwe, tamam Kindrei udu kandrah ale kameh winiyan basikine lomondra ndra-in tam bwe ale.”]
MAR 11:27 Eme oro ame asahan Jerusalem ja. Ya eme iy edek ili bolo asiu tinan ta Kindrei le badeh, iri tinan tiri pris hawe iri lau ta leheya kandriyen tiri Juwis hawe iri lau-en badeh, ame hawen.
MAR 11:28 Eme iri ndremenya Jises, “Ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?”
MAR 11:29 Ya eme Jises tiye i tiri, “Jo ale anya kandremenya aha ta lakou ari. Ano buku none aha tiye amwenen eme tek, sebwe jo kameh tiye ewek taha are lau handru atehei boto-on eme tek ta amekes gok dah.
MAR 11:30 Kala Jon mene alomwa iri lau, iy akohok boto-on badu heh? Lokou doh badu kandrah deh, badu kon munyak le? Aha tiye keme tek.”
MAR 11:31 Eme iri andres udu ndrokowa oro le i buku doh, “Buku none to katiye anya, ‘Idoh lakou badu kandrah,’ idah kameh iy ndremenya to ja anya, ‘Buku sah handru ya aha batehei budon taha bala ta aliy bwe?’
MAR 11:32 Arile, buku none to katiye anya, ‘Idoh kandriyen tiri lau le,’ winiyan bwe nadeh?” Iri lomondra i buku doh. Iri anoh iri lau tasah iri lau anya, Jon badeh, propet ta Kindrei handru.
MAR 11:33 Eme iri asumon boho Jises i buku doh, “Ahi tana ahi bwe.” Eme Jises tiye tiri i buku doh, “Jo ale jo winiyan batiye bawek taha ta are lau handru atehei nyaran tinan eme tek ya jo amekes iri gok dah bwe.”
MAR 12:1 Eme ya Jises asehek sahou sokek i tiri i buku doh, “Ndramak ari badeh, bwidi bilin ari ta waen, ma iy bwidi kou awudiy. Ma udu bolo bilin tan nane doh, iy ihi lek ari ta atik ma apis buwa waen, ano iy tahi asiu ra-em ta atondrok bilin doh. Eme iy ruwani bilin ili mine iri lau salibah ta atondrok. Ma iy iu i kon rakon ja.
MAR 12:2 Eme ya len ta abwe-eh buwa waen asahan, iy eme suni lohowan tan ari ili hawe oro salibah atondrok bilin waen nane dah, anya kakohok rayah buwa waen ki minen.
MAR 12:3 Eme oro salibah ta bilin tawi iy ma adai iy, eme ma oro tikahei iy iu na luka minen ma luka katin.
MAR 12:4 Ano ja, iy suni lohowan tan ari ili hawe oro ja. Eme oro adai iy i batun, ma abolei iy andra-i labai.
MAR 12:5 Ano ja, iy suni lohowan tan ari ili ja. Eme oro adai iy imek, ma hawe iri rayah ja ale oro ubwiy, ma rayah badeh, oro adai imek.
MAR 12:6 Ano, ari le badu bolo oro erah ya idoh nadun amwenen, ya iy badeh, aseken iy labai. Eme tama bilin nane abudon buku doh, ‘Sebwe oro kameh anuhun boho naduk.’
MAR 12:7 Arile oro salibah ta bilin suburuk i toro ari ari i buku doh, ‘Ei, nadun eme, to kadai iy, ma to kakuhi iri lakou tan mari.’
MAR 12:8 Eme oro tawi iy, ma adai iy imek, ma oro akahei iy iu i len ta bilin.
MAR 12:9 “Ya idah kameh tama bilin kamekes saba lakou handru? Iy kameh idi oro lau doh amak, ma iy kameh atehei bilin ili mine iri lau rayah ja katondrok ma kabo gok ta aliy.
MAR 12:10 Handru labai, sebwe ado banyolom sahou doh ereu bolo buk ndrabun ta Kindrei bwe nadeh, sahou i buku doh, ‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek.
MAR 12:11 Idah san ta Laban amekes, ma mwasin labai ta mada taha.’”
MAR 12:12 Eme iri tinan tiri pris hawe iri lau ta leheya kandriyen tiri Juwis hawe iri lau-en nane anya ja Jises asehek sahou sokek doh i bada iri. Eme ma iri anya kateu iy. Arile iri winiyan bwe, tasah iri anoh iri lau solo-an nane dah. Eme iri ruwani iy ma iri au.
MAR 12:13 Ano oro suni iri Parasi rayah hawe lau rayah ta Herot a hawe Jises ma ndremenya ta none iy na sahou.
MAR 12:14 Eme iri ame hawen ma anya, “Ndramak ta leheya, ahi tanan, ou lau ta asehek sahou handru, ma ou banoh are ndramak bwe. Ya ou asehek sahou ari le ili tiri lau mari, buku ndramak nyaran tinan, deh, ndramak iy nyaran bwe, ya ou badeh, leheya san handru ta Kindrei. Ou abudon i buku sah? Mwasin ta taha kadeu takis ki ta Sisa, deh, ndri-iy?”
MAR 12:15 Arile Jises badeh, ndratanan iri asehek sahou na boho iri le, eme ma iy tiye i tiri, “Buku sah handru aha anya kanone jo? Aha kaleheya keme tek ari luk bororoh ya jo kanyolom.”
MAR 12:16 Eme iri andrei ari ili minen, ya eme iy ndremenyani iri i buku doh, “Malawi ndramak ma nyaran kede-eh are lau handru?” Eme iri anya, “Ta Sisa.”
MAR 12:17 Eme Jises tiye i tiri, “Mwasin, saba lakou ta Sisa, aha kadeu ki ta Sisa. Ya saba lakou ta Kindrei, aha kadeu ki ta Kindrei.” Ya eme boho iri asak.
MAR 12:18 Eme iri Sadusi ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe.
MAR 12:19 Eme oro ndremenyani Jises i buku doh, “Ndramak ta leheya, Moses bwena mene torowenei nyala taha anya, ‘Buku none ari ndramak imek, ya udun erah ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’
MAR 12:20 Len ari bwena, oro lau ma ndro taloh, oro badeh, nadu tine oro. Eme kadok toro i tasou ta badih ari, eme ya iy imek ma iy nadun bwe.
MAR 12:21 Ano iy bwaneh sudi udun ja, ano bwaneh imek ma uru nah bwe le. Ano ja silih sudi iy ja eme i le buku aliy, iy imek ma uru nadu uru bwe le.
MAR 12:22 Ya eme oro ma ndro taloh amak, nah bwe le i buku aliy. Ano, udu hamon badeh, ma iy badih ale imek.
MAR 12:23 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro ma ndro taloh nane doh.”
MAR 12:24 Eme Jises tiye i tiri anya, “Aha ndrandra-i labai, tasah aha bala tanan tarou ereu bolo buk ndrabun ta Kindrei bwe. Ma aha tana aha boto-on ta Kindrei bwe ale. Eme ya ado asehek sahou laleyah.
MAR 12:25 Na len iri lau ndramak kameh amak ame awas ja, ya iri kameh winiyan bala tasou ja bwe. Iri kameh asahan buku iri angelo areu kandrah.
MAR 12:26 Handru labai. Iri lau ndramak bwena, hamon kameh iri amak ja. Sebwe aha banyolom ta tarou ta Moses bwe nadeh? Idoh asehek ta nyala len mene Moses atou jih anya udu ta kei. Eme ma Kindrei tiye i ta Moses i buku doh, ‘Jo Kindrei ta Abraham, ta Aisik, ma ta Jekop.’
MAR 12:27 Aha ndrandra-i kede-eh! Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le. Eme ma aha andra-i kede-eh, tasah aha abudon anya, iri lau ale ndramak bwena mene, iri kameh winiyan bamak ja bwe.”
MAR 12:28 Eme ma ndramak ari ta leheya kandriyen tiri Juwis eme bolo iri ma iy anuhun iri andres iri. Eme iy anuhun Jises asehek sahou i tiri ndra mwasin le ai. Eme ma iy ndremenya Jises i buku doh, “Saba sahou batanau badeh, tinan handru ma udu bwele-e iri sahou batanau mari?”
MAR 12:29 Eme Jises anya, “Lakou laba tinan handru asah idoh, ‘Aha kanuhun, aha lau badu Isra-el, Laban badeh, iy le ari, iy Kindrei tataha.
MAR 12:30 Ya ou aseken Laban tam Kindrei na ndrinem mari, ma na koham handru mari, ma na budon tam mari, ma na boto-on tam mari.’
MAR 12:31 Ya la-uh ta aliy ja asah idoh, ‘Ou aseken iri lau ari ari badu hawen, i le buku ou aso-ok ou le.’ Ya ari batanau ja badeh, winiyan basakalawi uru batanau ma la-uh dah bwai. Uru le badeh, maha-an ma udu bwele-en labai.”
MAR 12:32 Eme ma iy ndramak nane dah tiye i ta Jises, “Handru labai, ndramak ta leheya, ou nane tiye handru. Ari Kindrei udu kede-eh ja bwai, iy le ari.
MAR 12:33 Ma ou aseken iy na ndrinem mari, ma na budon tam mari, ma na boto-on tam mari. Ma ou aseken iri lau ari ari badu hawem, i le buku ou aseken ou le, idoh mwasin handru, sakalawi kandriyen ta asun lakou i buku salom i ta Kindrei, ma lakou adai i buku salom i ta Kindrei.”
MAR 12:34 Eme Jises anuhun ma iy asehek mwasin handru, eme iy tiye i tan, “Ou badeh, are mirihik labai ta tondrok ta Kindrei.” Ano, hamon ta aliy iri anoh ma iri bandremenya ari ndremenya bala tan ja bwai.
MAR 12:35 Jises udu ndra bolo asiu tinan ta Kindrei kahis, eme ma iy leheya iri mwan ma badih ta kandriyen ta Kindrei. Iy tiye tiri anya, “Ya aha kanuhun. Debit badeh, ndramak ndra bwena, arile, bolo len mari lundriyen oro badeh, asahan kahis. I buku sah handru iri lau ta leheya kandriyen tiri Juwis anya ja, Krais badeh, nadu Debit?
MAR 12:36 Taha ndratanan, bwena mene Malawin Ndrabun atehei budon i ta Debit le tiye i buku doh, ‘Laban Kindrei tiye i ta Laban tek i buku doh: “Ou ame manyah ado loboho minek salin winiya jo le baratehei iri lau ta amekes budon ndra-in i tam barado bahandra katim.”’
MAR 12:37 Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?” Eme iri lau solo-an handru anuhun ma iri sekesek.
MAR 12:38 Jises leheya iri mwan ma badih kahis ma iy tiye tiri udu bolo leheya tan anya, “Mada aha kaleu tiri lau ta leheya kandriyen tiri Juwis. Iri aseken adek ala ame na kolau moroyan lawe tiri, eme iri anya lau mari kasumon iri na len ta baen.
MAR 12:39 Ya iri anya kamanyah kareu le bwabwai mwasin badu tukum tiri Juwis, ma ndrahu kon ta atudun ta nyamon tinan.
MAR 12:40 Iri bene-ei asiu ta badih nyau, ya iri wendreya ta aliu salom lawe-en lawe-en. Idah kameh iri lau buku doh kameh akohok maha-an laba tinan labai.”
MAR 12:41 Eme Jises manyah udu mirihik ta ndrahune luk udu asiu tinan ta Kindrei, eme ma iy anyolom lau ala ame akeh luk i bolo lakou ta ndrahu luk nane dah. Iri lau tiri lakou solo-an badeh, akeh luk solo-an handru en.
MAR 12:42 Eme ya badih nyau ari tan se lakou bwe badeh, eme akahei luk bororoh saraman ma la-uh le.
MAR 12:43 Eme Jises luhi oro lau tan ame ma iy asehek i toro, “Jo katiye tado handru en! I badih nyau tan lakou bwe kede-eh, akeh luk solo-an labai ja tiri lau rayah kede-eh ja.
MAR 12:44 Tasah iri lau mari kede-eh akahei rayah le badu bolo luk tiri solo-an, arile iy badih nyau tan lakou bwe badeh, ndrakahei luk mari ta sukunyan ndrala.”
MAR 13:1 Eme Jises udu asiu tinan ta Kindrei eme len le badeh, lau tan ari tiye i tan i buku doh, “Ou anyolom ndramak ta leheya, asiu amekes na bek tinan kede-eh, mwasin handru labai ma asiu mari kede-eh konen handru.”
MAR 13:2 Eme Jises tiye tan i buku doh, “Ou anyolom asiu tinan tinan kede-eh deh? Ari ndruwi asiu bek kameh winiyan bales bareu loken bwe. Iri marakon kameh ato-oh iu i andri.”
MAR 13:3 Ya eme Jises manyah udu bwele-e mandrei Olip bilisiu ta asiu tinan ta Kindrei. Iy le ari udu ndra ndrahun, eme Pita ma Jemis hawe Jon uru Enduru ala ndremenya iy anya,
MAR 13:4 “Ou tiye keme taso, na saba len handru kameh iri lakou doh kasahan? Ya saba kalem kameh kasahan bwena ta leheya lakou mari doh buku ndrame bakep?”
MAR 13:5 Eme Jises tiye i toro i buku doh, “Ado kanyolom kamwenen, ya ari ndramak sawendreyani ado, ndri-iy.
MAR 13:6 Iri lau solo-an kameh ame anya iri asehek sahou tek ma anya, ‘Jo dah Krais’ Ya iri kameh wendreyani lau solo-an.
MAR 13:7 Ya i buku none ado anuhun kurutuwe bahun ereu mirihik, ma yoyou ta bahun ereu len, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh kahis le.
MAR 13:8 Tasah, kon munyak tinan ari kameh amekes bahun i ta kon tinan ari, ya kabin badu kon rakon kameh amekes bahun i ta kabin badu kon rakon ja. Ma idah kameh kon ari ari kameh ndroi asahan aliy, ma son kameh asahan bolo kon. Iri lakou mari doh anya kasahan buku none sisi-in ta badih anya kato-ou nah.
MAR 13:9 “Arile, bale aha ki-in taha, tasah iri kameh ateu ado ma adeu aha a mine iri kansol ma atehei aha a ta sahou. Ya iri kameh ubwi aha an bolo asiu ta atukum tiri Juwis, ma aha kameh ales are mada iri lau ta atondrok ma hawe iri kabin. Iri amekes doh ta ado katiye sahou tek mwasin ki tiri ya iri marakon kanuhun ma katanan.
MAR 13:10 Eme ma sahou mwasin badeh, katiye mwena op, ki tiri kon marakon.
MAR 13:11 Ya, i buku none iri atehei aha ka ta sahou, aha sabwerei ta saba sahou kameh aha kasehek. Arile, i buku none len ta aliy asahan, aha kameh asehek sahou Kindrei edeu ewek taha, tasah sahou aha asehek kameh sahou taha bwe, sahou ta Malawin Ndrabun labai.
MAR 13:12 Ya na len doh kameh ndramak atehei nadu tinen amwenen ili ta mada sahou, ya iy kameh edeu sa-oh tan. Ya tama iri ra-on ale kameh amekes buku aliy ili ta nadu iri. Ma iri nah ra-on kameh asahan lau ta bahun ili ta tama ma tine iri, ma iri kameh atehei iri ala mada iri lau tinan ta kadai iri kamak.
MAR 13:13 Ya iri lau mari kameh baseken aha bwe, tasah aha badeh, an hamon tek. Arile, are lau tawi iy ili isos munyak ano, Kindrei kameh winiyan akohok iy i hamon ja.
MAR 13:14 “Idah kameh aha anyolom ‘lakou munya-un ndra-in’ ales udu kon ndrabun ta iy sare aliy. (Are lau anyolom sahou dah iy kabudon kamwenen.) Are lau iri are kon Judiya katobwak kala bolo mandrei.
MAR 13:15 Ya are lau ereu bwele-e asiu loken sala hamon sala bolo asiu sakohok ari lakou tan ja, ndri-iy.
MAR 13:16 Ya are lau ereu bolo bilin sala hamon sala sakohok kolau tan ja, ndri-iy.
MAR 13:17 Len doh kameh len ndra-in labai tiri badih nah ereu tiri, ma badih nah ma nyandren!
MAR 13:18 Ado kasolom ki ta Kindrei ta ado satobwak na len ta jor ma ur.
MAR 13:19 Tasah, len ndra-in doh eme kameh, kon mari kameh andra-i mara-ei, sakalawi ja iri len ndra-in mene kabatana Kindrei bwidi munyak eme taku dah. Ya ari ja hamon winiyan basakalawiy bwai.
MAR 13:20 Arile, Laban ndrasani kane len doh. Ya, i buku none iy basaniy bwe, ari ndramak winiyan basakalawiy bwe. Arile, toro lau le nane Kindrei ndranyowonyani oro, iy kameh sani len doh kameh a mo-on.
MAR 13:21 “Ya buku none ari ndramak katiye taha, ‘Krais asah idah!’ deh, ‘Laban asah in kenoh!’ Aha sanuhun, ndri-iy labai.
MAR 13:22 Tasah, idah kameh krais ta wendreya ma hawe propet ta wendreya kameh asahan. Ya iri kameh amekes iri lahou tinan ma kalem ta wendreya iri lau, ma ale anya kanone iri lau ala budon ta Kindrei udu tiri badeh, kataku.
MAR 13:23 “Bale aha kudu aliy! Lakou mari doh kameh barasahan hamon, eme ya jo ndratiye taha ereu bwena.”
MAR 13:24 “Arile, hamon ta len ndra-in ano, ya udu bolo len doh kameh, ‘An kameh ilik, ma bun kameh winiyan banya bwe.
MAR 13:25 Ya ndrau udu kandrah kameh taku ereu kandrah eme andri, ma boto-on mari badu kandrah kameh nyukunyok.’
MAR 13:26 Ano iri lau kameh anyolom Nadu Ndramak Awas asahan ereu bwele-e asi kandrah, ma boto-on tan ma lomadan tinan labai.
MAR 13:27 Eme ya iy kameh suni iri angelo tan au ala kati jor ma hahuw ereu bolo munyak dah, ta atukum iri lau tan, ala budon tan udu tiri, ereu kon ranah ili taku ranah ame hawen.
MAR 13:28 “Ya aha kanyolom kei pik, ya iy kameh tiye tado. Buku none andran irek ta gwa ma nyabun asahan, aha tana aha, idah kameh kon ndra an le ai.
MAR 13:29 Ya, buku none aha anyolom iri lakou nane jo ndrasehek, aha atana aha len ndrame bakep ai.
MAR 13:30 Jo tiye tado handru! Iri lau rebesem areu kede-eh kahis na len dah kameh bamak bwe le, iri lakou mari doh kameh asahan.
MAR 13:31 Kandrah hawe kon munyak dah kameh ano iu, arile sahou tek le kameh winiyan bano bwe.
MAR 13:32 “Ari ndramak bala tanan len, deh, mada an ta Laban eme hamon bwe. Iri angelo badu kandrah ma nadun ale tanan bwe, taman le ari badeh, tanan ai.
MAR 13:33 Bale aha kudu aliy! Aha kanyolom kamwenen, tasah aha tanan bwe, saba len handru, kameh iy eme hamon ja.
MAR 13:34 Ya idah kameh, i buku none ndramak ari anya kedek kili kon ari leheleh, ya iy atehei iri lohowan tan atondrok ai, iy ari ari in ta lahou tan labai, iy ari ari in ta lahou tan labai. Ma iy tiye ta ndramak ta madasan badeh, madan kaleu.
MAR 13:35 Ya aha kanyolom kamwenen, tasah aha tanan saba len tama asiu kameh eme bwe. Iy kameh asahan na beyeh, deh bwe, iy kameh asahan na ben alih deh, bwe na boho len deh, bwe na ma ndraben an eme loken.
MAR 13:36 Koro-an iy keme i le mani tur, ya iy kameh kasilahei aha amadin kahis le.
MAR 13:37 Lakou jo asehek nyala ado badeh, jo asehek nyala aha mari ya mada aha kaleu!”
MAR 14:1 Ya idah kameh, len la-uh ano, ya hamon ta aliy badeh, len ndrabun aloh Pasoba ma hawe nyamon tinan ta jabi ramen yis bolon bwe, kameh asahan. Eme iri lau tinan tiri pris ma hawe iri lau ta leheya kandriyen tiri Juwis badeh, takaleh madasan ta bahana ta ateu Jises ma anya kadai iy.
MAR 14:2 Tasah, iri anya, “To samekes sado bolo len ta nyamon tinan, ndri-iy, bwe kameh iri lau solo-an kabokoro-ei ma bahun kasahan.”
MAR 14:3 Ya eme Jises udu Betani udu asiu ta Saimon ale lepra mene udu tan. Ya iy manyah udu bada sau aimon nyamon. Eme ya badih ari eme hawen ma bwisi ndrau suluw tan amekes na kandro kei aloh nat. Ya sowan badeh, laba tinan labai. Eme iy tubwani bale bwisi ndrau suluw iu, ano iy asolou i batu Jises.
MAR 14:4 Eme ya oro lau rayah abolosen ma tiye i toro ari ari i buku doh, “Aden! Tasah handru iy asolou suluw doh iu laleyah?
MAR 14:5 Ndrelekei doh nane katehei kili mada ba-en ya winiyan asahan i luk denariyus ere bwele-e tonek (300), ya kanyohan ki tiri lau lakou bwe.”
MAR 14:6 Arile Jises anya, “Ado karuwani iy. Ado abudon andra-i i ta iy badih kede-eh tasah? Badih kede-eh ndramesekei lakou tinan ma mwasin labai ndrame tek.
MAR 14:7 Ya idah kameh, iri lau tiri lakou bwe kameh len mari iri are hawe ado, ma i buku none ado aseken, ado winiyan aseben iri, arile jo kameh winiyan bado hawe ado len mari bwe.
MAR 14:8 Lakou iy badih dah anya kamekes badeh, asah iy ndramesekei dah. Iy asolou suluw badeh, i badak udu bwena dah, ta lowosa jo ta ki lek.
MAR 14:9 Ya jo tiye handru i tado. Saba kon iri atiye sahou mwasin ili udu bolo kon munyak dah, saba lakou iy ndrabwidiy dah kameh iri asehek ta aliy ta abudon nyaran.”
MAR 14:10 Ano ya, iy ari badu hawe oro lau tan ma ronoh la-uh nyaran Judas Iskariyot, iu i hawe iri lau tinan tiri pris anya kedeu sa-oh ta Jises ki mine iri.
MAR 14:11 Eme iri tinan tiri pris anuhun badeh, iri sekesek ma tandrakan Judas ta kanyohan iy na luk. Eme Judas takaleh san ta edeu Jises ki mine iri.
MAR 14:12 Eme na len ma mwena ta nyamon tinan ta jabi ramen yis bolon bwe eme asahan, na len ta adai iri nadu sipsip i ta salom ta Pasoba, eme oro lau ta Jises ndremenya iy, “Ou aseken aso kala heh kamekes ma kalowosa ta to kaimon nyamon ta Pasoba kado aliy?”
MAR 14:13 Eme ya iy suni uru lau tan ma la-uh ma tiye turu i buku doh, “Ah kala bolo kon tinan Jerusalem ya idah kameh ndramak ari bwese gwa in bolo sabok kameh ndruni ah.
MAR 14:14 Eme ah ka-en hamon tan kala asiu ala iy anya ki bolon en, eme ah katiye ki ta ndramak ta asiu ki buku doh: ‘Ndramak ta leheya anya, asiu tan ndraheh? Ya idah kameh oro lau tan ma iy kameh aimon nyamon ta Pasoba a-en aliy.’
MAR 14:15 Ya idah kameh iy leheya ah ta bolo asiu ari udu loken badeh, ndralowosaniy le. Eme ah kala aliy kamekes nyamon tato kudu le ai.”
MAR 14:16 Eme uru lau ta Jises dah adek au a kon tinan, eme uru takalahei i le buku none ndrasihidiy turu, ma oro lowosani nyamon ta Pasoba ma asiu buku le aliy.
MAR 14:17 Ano kon abeyeh Jises eme hawe oro lau tan ma ronoh la-uh ai.
MAR 14:18 Eme oro an ndra andri aimon nyamon badeh, Jises asehek i toro i buku doh, “Jo tiye sahou handru ewek tado, iy ari ereu bolo ado kede-eh kameh atehei jo i mine iri lau ndra-in, iy ala aimon nyamon hawek en.”
MAR 14:19 Eme oro tikisiy labai, ma oro ari ari ndremenya iy anya, “Jo nadeh, jo nadeh?”
MAR 14:20 Eme Jises tiye i toro, “Ari badu bolo ado ma ronoh la-uh dan. Iy are alomwa jabi ramen i bolo bwekei hawek en.
MAR 14:21 Tasah, Nadu Ndramak Awas kameh imek buku le none tarou mene ndratorowenei ta nyalan. Arile, sisi-in laba tinan kameh i bwele-e iy ndramak nane ale atehei Nadu Ndramak Awas ili mine iri lau ndra-in, sebwe mwasin tinen mene satuwi iy, ndri-iy!”
MAR 14:22 Kala oro aimon nyamon doh, Jises kuhi jabi ramen, ma iy asalom i la-un, ano iy boso-ei i noro. Ano iy tiye i toro i buku doh, “Ado kandrei, idah odak amwenen.”
MAR 14:23 Ano iy kuhi bwiniu waen, ma iy edeu wurah i ta aliy, ano iy edeu i wa-i oro lau tan, eme ma oro mari a-un.
MAR 14:24 Eme Jises tiye i toro ja, “Idah ndrayek ta sahou randra le, ma idah kameh amou ta lau mari.
MAR 14:25 Jo tiye tado handru. Jo winiyan ba-un ndraye buwa waen dah hawe ado ja bwe, winiya le len jo kameh a-un ja i san ha-un udu bolo tondrok ta Kindrei.”
MAR 14:26 Eme oro ayah wari ari ta atudun, ano ma oro au ala mandrei Olip.
MAR 14:27 Oro adek ala le kahis, eme ma Jises tiye i toro anya, “Ado mari kameh ruwani jo, tasah iri ndratorowenei bwena udu bolo buk ndrabun asehek i buku doh, ‘Jo kameh idi ndramak ta tondrok, ya iri sipsip tan kameh aseker laleyah.’
MAR 14:28 Arile, hamon ta aliy kameh jo amak ja, ya jo kameh ili bwena tado ili Galili.”
MAR 14:29 Ya eme Pita tiye i tan i buku doh, “I buku none oro mari anoh ma aseker, jo winiyan batobwak bwe.”
MAR 14:30 Eme Jises asehek i tan anya, “Handru jo asehek tam. Na ben dah kameh, kakaro baden san lusan bwe le badeh, ou kameh besebes anya ou tanam jo bwe san tulusin.”
MAR 14:31 Arile, iy tiye sahou boto-on boto-on i buku doh, “Jo winiyan basehek sahou badeh bwe, buku none jo imek hawem jo winiyan babesebes anya jo tanan ou, bwe.” Eme ya oro mari badeh, asehek sahou randra le.
MAR 14:32 Eme ma oro adek au ala kon ari aloh Getsemeni. Eme iy tiye i toro lau tan, “Ado kamanyah kado dah, ya jo kameh asolom ki ta Kindrei.”
MAR 14:33 Ano iy kuhi Pita, Jemis ma hawe Jon oro a hawen, eme Jises atona bolo odan badeh, amaha ma sisi-in hawe iy tikisiy.
MAR 14:34 Eme iy tiye i toro anya, “Jo tikisiy labai, ma jo anya kimek. Ado kado dah ma mada ado katele.”
MAR 14:35 Eme ya Jises edek ili bwena sese, ma iy taku i andri bada ndren. Eme ma iy asolom i buku doh, i buku none winiyan eh, len doh ki-iu ki len tan.
MAR 14:36 Eme ma iy anya, “Tama, tama, lakou mari badeh, ou ndra winiyan le ai. Ou andrei bwiniu dah ki-iu ki len tek, arile idoh budon tek le, ou amekes saba lakou ou tanam mwasin.”
MAR 14:37 Ano iy eme hamon iy atou oro lau tan ma taloh nane dah ndramadin. Eme iy mete-ei oro ma tiye i ta Pita anya, “Saimon, ou kede-eh ndramadin? Buku sah handru ya ou winiyan bareu loken luluwen bwe?
MAR 14:38 Ado kanyolom ma ado kasolom ki ta Kindrei ta ado sataku sala bolo kandriyen ndra-in. Ndrine ado aso-ok handru ta amekes gok, arile oda ado badeh, boto-on handru bwe.”
MAR 14:39 Ano ja iy iu i hamon asolom ma tiye sahou nane le i ta Kindrei.
MAR 14:40 Ano iy eme hamon badeh, iy atou oro ndramadin ja, tasah mada oro badeh, maha-an ta amadin labai. Eme ya oro randra sahou ta tiye i tan bwai.
MAR 14:41 Ano iy eme hamon i san tulusin ja badeh, ma iy anya, “Ado kede-eh amadin ma amunyau kahis le? Ka-iy ai! Mada an ndrasahan. Ado katou! Idah kameh Nadu Ndramak Awas kameh ili mine iri lau ta lomondra ndra-in ai.
MAR 14:42 Ado kareu loken, to ka-au. Ado katou, iy ndramak ta atiye jo ili mine iri lau ndra-in asah ndrasahan kede-eh.”
MAR 14:43 Ya eme Jises asehek sahou kahis le, Judas, iy badu hawe oro lau ma ronoh la-uh nane, edek eme hawen, hawe iri lau solo-an ma samen hawe kei udu mine iri. Iri tinan tiri pris ma hawe iri lau ta leheya kandriyen tiri Juwis ma hawe iri lau-en suni oro ame.
MAR 14:44 Judas nane ndratiye toro i buku doh, “Are lau jo atehei bohok i bohon, badeh iy le ai, ado katawi iy, ma kasirini iy ki-iu ma mwasin.”
MAR 14:45 Eme Judas isos le badeh, iy edek ales amwenen ili hawen ma anya, “Ndramak ta leheya!” Ma iy atehei bohon i boho Jises.
MAR 14:46 Eme ma iri atehei mine iri i ta Jises ma tawi iy.
MAR 14:47 Arile, oro lau tan ari badeh, ales are mirihik nane doh aluwi samen tan, ma iy sani ka-u ndranye bonyo-ou ta tinan tiri pris ari taku iu.
MAR 14:48 Eme Jises tiye i tiri lau marakon doh anya, “Buku sah ya ado ame ma samen hawe kei ta ateu jo, jo ari lau ta amekes ramwes deh?
MAR 14:49 Len mari jo udu hawe aha leheya in asiu tinan ta Kindrei, ya aha bateu jo bwe. Arile bwai. Kasahan ai, ya kamekes sahou ta buk ndrabun kasahan i handru.”
MAR 14:50 Ano oro lau tan mari ruwani iy ma oro atobwak au.
MAR 14:51 Eme ndramak loweu ari in hamon ta Jises ya lakou badan bwe, arile ra-ei le kolau in badan. Eme iri anya kaseu iy,
MAR 14:52 arile iy ruwani kolau tan ma iy ndrakane le sakaliye iu.
MAR 14:53 Eme iri sirini Jises i hawe tinan tiri pris ari. Eme iri tinan tiri pris rayah hawe iri lau-en ma hawe iri lau ta leheya kandriyen tiri Juwis mari nane atukum dah.
MAR 14:54 Ya Pita badeh, edek in ndra hamon o-on, eme iy ili bolo kowah ta asiu ta tinan tiri pris dah. Eme iy manyah udu andri hawe iri lau ta atondrok madasan alakan iy i ta jih.
MAR 14:55 Ano iri tinan tiri pris ma hawe iri lau mari badu hawe iri kansol nane anya kanone katakaleh ari sahou wasai kihis bada Jises ta anya kadai iy kimek, arile iri takaleh labwe.
MAR 14:56 Tasah, iri solo-an labai asehek sahou ta wendreya i tan, arile iri batakalahei ari lakou ndra-in Jises mesekei bwe, ma sahou tiri ba-en badan bwe ale.
MAR 14:57 Eme iri rayah ales are loken badeh, asehek sahou ta wendreya i badan, i buku doh,
MAR 14:58 “Ahi mene ndranuhun iy anya ja, ‘Jo kameh tohowei asiu tinan ta Kindrei dah ala amekes na lim kameh iu, ano na len ma taloh ja kameh jo tutuni ari ja, idoh bamekes na lim bwe.’”
MAR 14:59 Arile bwai, sahou tiri ba-en se badan bwe ale.
MAR 14:60 Eme tinan tiri pris nane suri iy ereu loken bolo iri eme ma iy ndremenya Jises, “Ou randra sahou ta tiye i ta sahou nane doh oro to-en ewek tam deh bwe?”
MAR 14:61 Arile bwai, iy andru-uk le ai, ma iy batiye se sahou bwe. Ano ja tinan tiri pris ndremenya iy ja anya, “Ou kede-eh Krais handru deh bwe? Ya ou Nadu Kindrei ahi katudun ai?”
MAR 14:62 Eme Jises anya, “Ehe, jo adeh badeh. Ya idah kameh aha anyolom Nadu Ndramak Awas kameh manyah udu loboho lim salin ta Kindrei iy boto-on labai, iy kameh udu bwele-e asi jor badu kandrah eme.”
MAR 14:63 Eme ma tinan tiri pris ibolosen ta sahou doh ya iy tarani awin tan le ma iy anya ja, “I buku sah ja to anya kasilah sahou ta i badan ja?
MAR 14:64 Aha mari ndranuhun sahou bobose nane. Ya aha abudon i buku sah?” Eme iri mari anya, “Kadeu iy ki ta sahou ma kadai iy kimek.”
MAR 14:65 Eme iri rayah omor iy, ma iri tubuluhi madan ma a-um iy ma tiye sahou i tan anya, “Ou none tiye i buku ou propet, are lau a-um ou doh!” Eme iri lau ta tondrok madasan andrei iy ma ubwi iy.
MAR 14:66 Ya Pita badeh, manyah udu bolon loboho andri kahis le. Eme badih ari lohowan ta ndramak tinan tiri pris edek eme.
MAR 14:67 Eme iy atou Pita alakan iy eme iy anyolom iy boto-on boto-on. Ano i badih dah anya, “Ou kede-eh ale mene are hawe Jises badu Nasaret adeh.”
MAR 14:68 Arile Pita anya ja, “Bwe oh, jo tanan sasah ou asehek kede-eh bo-oh.” Eme ma Pita edek eme madasan le badeh. [Eme ma kakaro eden.]
MAR 14:69 Ya badih ta lohowan nane dah atou Pita ma iy asehek ja i toro lau ales dah, “Iy ndramak kede-eh iy ari badu hawe oro adeh.”
MAR 14:70 Arile iy anya ja, “Jo tanan bwe oh.” Ano luwen bwe iri lau ales tiye i ta Pita ja, “Handru, ou kede-eh ari badu hawe oro, tasah ou kede-eh badu Galili.”
MAR 14:71 Ano Pita tandrakan boto-on labai, “Jo asehek sahou handru, jo tanan ndramak ala ado asehek iy badeh, bo-oh. Buku none jo wasai, Kindrei kamesekei maha-an keme la-uk.”
MAR 14:72 Iy asehek sahou ano le badeh, kakaro eden san lusan ja. Eme Pita bwetenei sahou mene Jises tiye i tan anya, “Kakaro baden san lusan bwe le, ou kameh besebes anya ou tanam jo bwe san tulusin.” Eme ma iy atehei bohon i ta ndrelen.
MAR 15:1 Ano na mandraben handru badeh, iri tinan tiri pris hawe iri batun tinan ma iri lau ta leheya kandriyen tiri Juwis ma hawe iri kansol rayah ame atukum atilik nyala iri. Ano ma iri sawei Jises ma tiyani iy ili, ma atehei iy ili mine Pailat.
MAR 15:2 Eme Pailat ndremenya iy, “Ou kabin tiri Juwis, neh?” Eme Jises anya, “Ou ndrasehek badeh kabwai.”
MAR 15:3 Eme iri tinan tiri pris badeh, asehek sahou solo-an boto-on i bada Jises.
MAR 15:4 Eme Pailat ndremenya iy ja i buku doh, “Ou ari sahou ta tiye deh bwe? Ou anuhun sahou solo-an labai iri asehek i badam.”
MAR 15:5 Arile Jises batiye randra sahou bwe, idoh mesekei Pailat abudon solo-an labai.
MAR 15:6 Eme ya na len ta nyamon tinan, i buku none kandriyen tan, eme iy ruwani ndramak ari badu bolo kou eme len, i buku are ndramak iri aseken ta aliy.
MAR 15:7 Eme na len doh badeh, ndramak ari nyaran Barabas in bolo kou hawe iri lau rayah ta amekes bahun i bada gabman ta atondrok. Iri mene adai ndramak imek udu bolo len ta bahun.
MAR 15:8 Eme iri lau solo-an ame hawe Pailat ma anya kandremenya iy ta iy katehei ndramak ki mine iri, i buku none iy ndramekes bwena ndra-au ndra-au.
MAR 15:9 Eme iy tiye i tiri, “Aha aseken jo karuwani kabin tiri Juwis kewek mine aha?”
MAR 15:10 Pailat asehek i buku doh, tasah iy ndratanan, ndrine iri tinan tiri pris badeh, ndra-in ta Jises, ma iri tiyani iy eme mada sahou.
MAR 15:11 Arile iri tinan tiri pris badeh, sosokok iri lau solo-an dah anya ja, Pailat karuwani Barabas ki mine iri ai.
MAR 15:12 Eme Pailat ndremenya iri ja, “Ya jo kamekes sasah ki ta ndramak ala aha aloh iy kabin tiri Juwis?”
MAR 15:13 Eme iri arah ja anya, “Katahi iy ki bada kei tondreh!”
MAR 15:14 Eme Pailat tiye i tiri, “Buku sah handru, saba lakou ndra-in handru iy mesekei?” Arile bwai, iri sarakau i loken le gwek anya, “Katahi iy ki bada kei tondreh!”
MAR 15:15 Ya eme Pailat anya kamekes iri lau solo-an nane dah kasekesek, eme ma iy ruwani Barabas i mine iri ai. Arile iy atehei Jises ili mine iri lau ta bahun, ta iri ka-um iy na malou sakabuk i bek. Ano iy atehei Jises ili mine iri lulik ta atideh iy kili bada kei tondreh.
MAR 15:16 Eme oro lau rayah ta bahun aluwi iy eme len i bolo asumwe Pailat (idoh asiu tinan ta atukum tiri Rom). Eme ma oro luhi iri lau solo-an solo-an ta bahun dah ame.
MAR 15:17 Eme iri atehei kolau ari saraman lawe-en ili la-un. Ano iri tabuwi bada malou bobodon i se buku none barak ma atehei ili batun.
MAR 15:18 Eme ma iri wendreya ta asore ma abelek iy ma sarakau anya ja, “Ou kabin tiri Juwis, ou areu le buku doh len mari!”
MAR 15:19 Eme iri ubwi iy na bala banap i batun ma omor iy, ma iri atehei bwili ndru-u iri i andri ma wendreya ta atudun iy.
MAR 15:20 Iri bobose iy ano, iri tolowei kolau saraman nane udu la-un iu, eme ma iri tani kolau tan amwenen ili hamon i badan. Eme iri sirini iy iu i len ta kadai iy ki bada kei tondreh.
MAR 15:21 Eme iri adek ala badeh, iri ndruni ndramak ari nyaran Saimon badu Sairini. Iy badeh, edek udu kon munyak tinan eme, ya iy badeh, tama Aleksandra ma hawe Rupus. Eme iri andrekei iy bwese-ei kei tondreh ta Jises.
MAR 15:22 Eme iri andrei Jises ili kon ari aloh Golgata, moson ta aliy iri aloh, “Kon ta bwisi bar ta ndramak.”
MAR 15:23 Eme iri atehei waen hawe gwa ari nyakadan aloh mer tubuniy i hawen anya iy ka-un, arile iy banyuwiy bwe.
MAR 15:24 Eme ma iri atahi iy i bada kei tondreh, ano iri andrei kolau tan i andri ma iri amekes laki na aliy, ta are winiyan andrei lakou ta Jises.
MAR 15:25 Iri atahi Jises doh na mada an ndro ari na mandraben.
MAR 15:26 Eme iri atahi sahou tanan ta bobose i bada kei tondreh i buku doh, “Idah Kabin tiri Juwis.”
MAR 15:27 Ya udu hawen ale iri atahi uru lau la-uh ta bahana ado kabeden. Ari ereu minen salin, ya ari ereu minen kamweu.
MAR 15:29 Eme ya iri lau adek mirihik badeh, nyokoda batu iri ili eme ma bobose Jises i buku doh, “Ehe! Ou adeh mene anya ou kameh tohowei asiu tinan ta Kindrei eme andri, ano kameh ou tutuniy ja na bolo len taloh le.
MAR 15:30 Ya abo, ou sebenei ou amwenen, ma ou ame andri ta kei tondreh badeh!”
MAR 15:31 Ya eme ale iri tinan tiri pris bobose iy i tiri ari ari ma hawe iri lau ta leheya kandriyen tiri Juwis bobose iy i buku doh, “Iy sebenei iri rayah, arile iy winiyan basebenei iy amwenen bwe!
MAR 15:32 Taha kanyolom, Krais kabin ta Isra-el iy keme andri ta kei tondreh, ya eme ahi kanyolom ma budon tahi handru ki tan!” Ya uru lau ma la-uh sukik areu hawen ale badeh, asehek sahou ndra-in i tan ale.
MAR 15:33 Ano ya an eme udu le alih badeh, lulik tubuluhi kon marakon udu gwek winiya mada an i taloh na beyeh.
MAR 15:34 Eme na mada an taloh na beyeh badeh, Jises arah boto-on labai anya, “Eloi, Eloi, lama sabaktani?” moson ta aliy i buku doh, “Kindrei tek, Kindrei tek, buku sah handru ya ou ruwani jo?”
MAR 15:35 Eme iri lau ra-on areu mirihik anuhun sahou tan ma anya, “Aha kanuhun, iy aloh Alaija.”
MAR 15:36 Eme iy ari sakaliye ili badeh, lomwani konyei idih na waen titi-in. Eme iy atehei ili no-o banap ma atehei ili bohon ta iy ka-un, eme ma iy anya, “To kareu op, to kanyolom, idah kameh Alaija barame baratalou iy barame andri ta kei tondreh deh bwe.”
MAR 15:37 Eme Jises anyar bohon i loken, eme ma kohan ano ma iy imek.
MAR 15:38 Kala doh amwenen kolau tinan badu bolo asiu tinan ta Kindrei atarah i ma lusi ereu loken eme andri.
MAR 15:39 Eme ndramak ari tinan ta bahun badeh, ales ere mwena ta kei tondreh badeh, anyolom Jises nane anyar ma imek i buku sah. Eme ma iy anya, “Handru labai, ndramak kede-eh Nadu Kindrei handru!”
MAR 15:40 Ma ale iri badih rayah ale areu len anyolom. Ya udu bolo iri badih nane doh badeh, Mariya badu Makdala ma hawe Salome ma hawe Mariya tine i loweu Jemis ma Joses.
MAR 15:41 Oro badeh, an hamon ta Jises udu ndra Galili o-on ma aseben iy, ma ale hawe iri badih solo-an ame hawen ame Jerusalem.
MAR 15:42 Eme kon a beyeh ai, len ta lowosa len ta amunyau ai.
MAR 15:43 Eme ya Josep badu Arimateya eme, ya iy badeh, tinan ari badu hawe iri kansol, ma iy badeh, abe-en ma anya katou tondrok ta Kindrei. Iy banoh bwe, eme iy ili hawe Pailat ta ndremenya bada kei.
MAR 15:44 Eme Pailat nunu-uh tasah iy anya, Jises ndramak handru nadeh. Eme iy luhi tinan ari ta bahun eme ya iy ndremenya iy, ta Jises ndramak luluwen ndra-au deh bwe.
MAR 15:45 Eme iy anuhun ndramak tinan ta bahun anya Jises badeh, ndramak handru. Ano Pailat tiye ta Josep badeh, kili kabwese-ei bada kei ai.
MAR 15:46 Eme ya Josep sihinei kolau ra-ei belen eme iy andrei Jises eme andri. Ano iy su-i iy na kolau nane dah, eme iy bwese-ei Jises ili bolo lek ndramak ari doh ihiy in bolo munu bek. Ano iy tundruwi bek tinan ari ili turuki madan.
MAR 15:47 Eme ya Mariya badu Makdala hawe Mariya tine Joses badeh anyolom ndrahune Jises nane nyahani iy in aliy ale.
MAR 16:1 Eme ya len ta amunyau ndrano ai, eme Mariya badu Makdala hawe Salome hawe Mariya tine Jemis badeh, sihinei suluw. Eme oro anya kala kanyas ki bada Jises.
MAR 16:2 Eme ma ndra wahun ta len ma bwena ta wik ari ja, ma ndraben handru oro au a mada lek, an barame loken ai.
MAR 16:3 Eme oro asehek nyala oro ari ari i buku doh, “Are lau kameh kaseben to katundruwi bek tinan udu mada lek ki-iu ki len?”
MAR 16:4 Oro asehek i buku doh, tasah bek badeh, laba tinan labai. Ano oro suri batu oro eme loken le badeh, oro anyolom bek ta mada lek badeh, ndratundruwiy ndra len.
MAR 16:5 Eme oro a bolon badeh, oro atou ndramak loweu ari asini awin belen nyikilikin labai manyah badeh, udu loboho lim salin. Eme ya oro toroyani oro.
MAR 16:6 Eme iy tiye i toro, “Ado satoroyani ado. Ado anya kasilah Jises badu Nasaret iri mene tatahi iy i bada kei tondreh. Iy badeh, ndramak ndrame awas ja! Ya ado kanyolom ndrahunen mene iri nyahani iy in aliy.
MAR 16:7 Arile ado kala katandra-un toro lau tan ma hawe Pita, ya iy ndra-au ndrala bwena ndrala Galili. Ya idah kameh ado winiyan anyolom iy ereu loboho doh, i buku iy mene ndrasehek tado bwena ndra-au.”
MAR 16:8 Eme ma oro ado bolo lek ame manan, ma sakaliye au a kon. Ma mani oro atur ma oro totoreh, eme ma oro basehek nyala ari lau bwe, tasah, oro anoh. [
MAR 16:9 Eme ma ndra wahun ta len ma bwena ta wik ari ja badeh, Jises asahan ma mwena hawe Mariya badu Makdala ala iy mene tikahei oro malawin ndra-in ma ndro taloh ado bwele-en au en.
MAR 16:10 Eme Mariya ili tiye i toro mene an hawe Jises tikisi iy ma aden iy en.
MAR 16:11 Eme oro anuhun Mariya asehek nyala oro anya ja, “Jises ndramak, jo ndranyolom iy.” Arile oro badeh, batehei budon toro handru ba-en ta aliy bwe.
MAR 16:12 Ano hamon ta aliy ja, Jises asahan hawe uru lau tan la-uh ja i san randrah labai, idoh na len uru adek ala kon munyak tinan.
MAR 16:13 Eme uru au a hamon ma asehek nyala iri mari, arile bwai, iri batehei budon tiri handru ba-en ta sahou turu bwe.
MAR 16:14 Ano hamon ja badeh, Jises asahan hawe oro lau tan ma ronoh ari le, ya oro badeh, manyah an andri aimon nyamon. Ya eme iy tiye sahou boto-on i toro, tasah, ta budon toro handru ba-en tan bwe, ma ndrine oro ndrabadok. Ma oro badeh, mene budon toro handru ba-en toro lau mene anyolom iy hamon ta iy amak eme loken ja bwe.
MAR 16:15 Eme ma iy tiye i toro i buku doh, “Ado kala bolo kon munyak mara-ei badeh, katiye sahou mwasin doh ki tiri lau mari.
MAR 16:16 Ya iy are budon tan handru in ta sahou mwasin ma kanyuwi iy, idah kameh Kindrei sebenei kohan. Arile, iy are lau batehei budon tan handru ba-en ta sahou mwasin bwe, idah kameh iy ales ere ta sahou udu mada Kindrei ma iy kameh akohok ndra-in labai, tasah ta lomondra ndra-in tan.
MAR 16:17 Idah kameh kalem asahan ta are lau budon tan handru in ta aliy. Na boto-on ta nyarak le, iri kameh atikah malawin ndra-in iu, ma idah kameh iri asehek boho kon rakon ja nane iri tana iri bwena bwe.
MAR 16:18 Ya, i buku none iri ateu mwak deh, bwe iri a-un gwa nyakadan, idah kameh iri winiyan bakohok sisi-in ma bamak bwe. Ma idah kameh iri adeu mine iri i bwele-e iri lau abo sik, ya idah kameh sik udu tiri iu.”
MAR 16:19 Ya eme Laban Jises asehek sahou i toro ano, ma Kindrei andrei iy iu i loken bolo kandrah, ma iy ili manyah udu loboho mine Kindrei salin.
MAR 16:20 Eme ma oro au a len, ma atiye sahou ili bolo kon mari, ma Laban aseben oro ma amekes kalem asahan ta edeu boto-on i ta sahou toro.]
LUK 1:1 Jo ai, Tiyopilus. Jo atorou la-ukei dah ewek tam: Iri lau solo-an mene ndratorou sahou solo-an ta nyala lakou mene asahan bolo ndrokowa taha.
LUK 1:2 Oro atorou ta nyala lakou mene to ndranuhun bwena mene ndra-au. Ya lakou doh mene, oro atou na mada oro amwenen, udu ndra bada katin eme, eme ma oro a lohowan ta atiye.
LUK 1:3 Ou le ai, Tiyopilus, i buku jo mene ndratakalahei lakou mari doh, ndramwenen udu ndra bada katin eme. Eme jo abudon mwasin handru ta jo katorou sarada lakou mari doh, ki tam.
LUK 1:4 Jo atorou ewek tam, ta ou atanam kamwenen handru ta nyala lakou mene ou ndranuhun ndra-au.
LUK 1:5 Na len kabin Herot atondrok munyak badu Judiya, pris ari udu aliy. Nyaran Sekaraya. Iy asahan ta lundriye pris Abijah oro. Ya udun badeh, nyaran Elisabet, lundriye Aron oro badu hawe oro pris ale.
LUK 1:6 Uru ma la-uh badeh, bamekes se kandriyen ndra-in bandra-i ta mada Kindrei bwe. Uru badeh, an hamon handru ta sahou batanau ta Laban, ma an hamon ta kandriyen ta Laban mari.
LUK 1:7 Uru badeh, ndra alon labai, ya uru bato-ou ari nah bwe. Tasah, Elisabet badeh, kis.
LUK 1:8 Eme na len ari, Sekaraya hawe oro lau badu hawen, amekes lahou ta pris, i ta Kindrei.
LUK 1:9 Eme i buku none in hamon ta kandriyen tiri pris, oro asoh nyek, ta are handru ki bolo bosoh ndrabun udu bolo asiu tinan ta Kindrei, ta asun ndrelekei udu mada koto-ok. Eme nyek badeh, tiye Sekaraya.
LUK 1:10 Ano len ta asun ndrelekei asahan, Sekaraya i bolon, ya iri lau ame are manan atudun, ma amekes salom.
LUK 1:11 Eme angelo ari ta Kindrei badu loken eme, ales udu loboho lim salin bilisiu ta ndrelekei nane, anya udu mada koto-ok dah.
LUK 1:12 Sekaraya atou iy le badeh, iy toroyani iy ma iy inoh.
LUK 1:13 Arile angelo dah tiye i tan, “Sekaraya, ou sanoh. Kindrei ndranuhun salom tam, udum kameh atehei nah mwan ari. Eme ou tondrohani nyaran ki Jon.
LUK 1:14 Buku atehei iy eme len, ado kameh sekesek, ma hawe iri lau mari kameh sekesek ale.
LUK 1:15 Ya udu mada Kindrei, iy kameh asahan ndramak ari tinan handru. Iy sa-un waen hawe gwa boto-on, ndri-iy labai. Atehei iy eme len le badeh, iy kameh idih na Malawin Ndrabun.
LUK 1:16 Iy le kameh tiyani iri lau badu Isra-el kameh ame hamon ja, ame hawe Laban Kindrei tiri.
LUK 1:17 Ma idah kameh iy i bwena ta Laban na boto-on, ma hawe nyaran i tinan i buku none propet Alaija. Ma idah kameh iy kameh tubuni ndrine tama iri nah eme hamon ja, aseken nadu iri; ma iy kameh tubuni ndrine iri lau ta banuhun sahou bwe, ame hamon ta budon lewen ta lau mwasin; ma hawe idah kameh iy lowosa iri lau ta Laban, ado abe-en iy.”
LUK 1:18 Eme Sekaraya tiye i ta angelo, “Ki buku sah kameh jo ki tanan lakou handru dah kasahan? Tasah, aru uduk ma la-uh badeh, ndra alon labai.”
LUK 1:19 Eme angelo dah tiye, “Jo dah, angelo Gabiriyel. Jo ales udu mada Kindrei eme dah, ta asehek nyalam ta sahou mwasin dah.
LUK 1:20 Ma idah kameh ou winiyan basehek sahou bwe; winiya le len ta aliy barasahan. Tasah, ou batehei budon tam handru ba-en ta sahou tek bwe.”
LUK 1:21 Eme iri lau abe-en Sekaraya, abe-en abe-en labwe. Eme iri lomondra anya, “Iy ndra luluwen labai udu bolo asiu tinan ta Kindrei.”
LUK 1:22 Ano Sekaraya eme len badeh, iy winiyan basehek sahou bala tiri bwe. Eme iy asehek sahou na andra lim le i tiri. Eme iri anya, “Iy kede-eh nane amekes lele in asiu tinan ta Kindrei.”
LUK 1:23 Lahou tan ta amekes ano, iy iu i asiu tan.
LUK 1:24 Udu len rayah ano iu, Elisabet nah ere tan. Eme iy udu le asiu winiya bun ma limeh.
LUK 1:25 Eme Elisabet tiye, “Kabwai, Laban ndrasebenei jo i san dah. Iy ndrabwidi maha-an ta bwilima udu tek badeh, ndra-au!”
LUK 1:26 Eme nah udu ta Elisabet asahan bun onoh badeh, Kindrei suni angelo Gabiriyel ja, ili kon Nasaret, udu loboho Galili.
LUK 1:27 Iy anya katiye sahou ta tandrakan ari, anya ki ta badih ari bakohok mwan bwe le, san tan ndra ta ndramak ari nyaran Josep. Ya Josep doh, badu boho kamen ta kabin Debit oro. Ya nyara badih doh, Mariya.
LUK 1:28 Eme angelo Gabiriyel ili asahan hawen ma asumon iy anya, “Bada-an tam! Laban udu hawem, ma iy atehei nyosowan laba tinan ewek la-um!”
LUK 1:29 Eme Mariya manin atur ta sahou ta angelo dah, eme iy lomondra saba sahou tan doh kameh.
LUK 1:30 Eme angelo dah anya, “Mariya, ou sanoh. Kindrei badeh, sekesek tam handru.
LUK 1:31 Idah kameh, ou tuwi nah mwan ari ere ndrinem, eme ou tondrohani nyaran ki Jises.
LUK 1:32 Iy kameh asahan ndramak tinan, ma idah kameh aloh iy Nadu Kindrei udu loken labai. Laban Kindrei kameh mesekei iy asahan kabin, i buku none tubun Debit mene,
LUK 1:33 ma idah kameh iy asahan kabin ta atondrok lundriye Jekop oro, udu le buku doh; ma tondrok tan kameh winiyan bano bwe!”
LUK 1:34 Eme Mariya tiye i ta angelo, “Jo badeh, bakohok ari mwan bwe. Idah kameh ki buku sah handru?”
LUK 1:35 Eme angelo dah anya, “Malawin Ndrabun kameh ewek la-um, ma hawe boto-on ta Kindrei ewek la-um. Ta katin doh le, nah doh kameh i ndrabun ma aloh iy Nadu Kindrei.
LUK 1:36 Ou tanam boram Elisabet, iri asehek anya iy kameh nadun bwe; iy badeh, ndra alon labai. Arile na len dah badeh, nah udu tan bun tan ndrasahan onoh ai.
LUK 1:37 Lakou mari kede-eh Kindrei winiyan mesekei le ai.”
LUK 1:38 Eme Mariya anya, “Jo dah, jo lohowan ta Laban, kasahan ki buku ou asehek badeh!” Eme ma angelo dah iu ai.
LUK 1:39 Ano udu hamon ja, Mariya alokou iy, ano iy edek suwi iu ili bolo ndrondro-ou, badu kon tinan ili kon ari udu bolo Judiya.
LUK 1:40 Iy ma sekesek tan edek iu ili bolo asiu ta Sekaraya atou Elisabet.
LUK 1:41 Eme Elisabet anuhun sahou sekesek ta Mariya, ma nah udu ndrinen nyokolokon. Eme Elisabet idih na Malawin Ndrabun,
LUK 1:42 ma iy asehek sahou boto-on anya, “Ou badeh, nyosowan tam, sakalawi nyosowan tiri badih mari, ma nyosowan ki la-u nah, na len ou kameh adeu iy eme len!
LUK 1:43 Lakou laba tinan dah, asahan eme tek, ta sasah handru? Ya eme tine Laban eme selesen jo dah.
LUK 1:44 Jo anuhun sahou sekesek tam le badeh, ma nah udu ndrinek nyokolokon ta sekesek.
LUK 1:45 Idah kameh ou sekesek handru, tasah budon handru tam ndra-en ta sahou mene Laban ndrasehek tam.”
LUK 1:46 Eme Mariya iyah wari ma tiye i buku doh: “Ndrinek atudun nyara Laban;
LUK 1:47 ma kohak handru sekesek ta Kindrei, ta aseben jo,
LUK 1:48 tasah jo badeh, lohowan tan ma iy tondrokei jo! Na dah kameh iri lau rebesem, ano rebesem kameh aloh jo akohok nyosowan.
LUK 1:49 Tasah, Kindrei tinan labai, iy mesekei lakou tinan labai ndrame tek, ya nyaran badeh, ndrabun.
LUK 1:50 Iy leheya tikisiy tan i tiri lau heh anoh iy; ano ili ta lau rebesem au, ano lau rebesem au, i le buku doh.
LUK 1:51 Iy amekes kalem tinan na bohan; ma iy tikahei iri lau ta budon, udu ndrine iri anya iri le ai, badeh iu.
LUK 1:52 Iy tikahei iri kabin tinan ame andri ta koyeu tiri; ma iy tutuni iri lau, amekes lahou i buku iri nah a loken.
LUK 1:53 Iy nyohonei iri lau ta son na lakou mwasin; ma tikahei iri lau, tiri lakou solo-an au, na luka lim ma na luka kati.
LUK 1:54 Eme iy tawi tandrakan tan i tiri lau badu Isra-el, ma iy bamani tikisiy tan i ta Abraham ma lundriyen oro bwe, ta udu le buku doh, i buku iy mene ndratiye ta tubu ahi iri mene ndra-au.”
LUK 1:56 Mariya udu hawe Elisabet udu gwek winiya bun taloh, ano iy iu i hamon ja ili kon tan.
LUK 1:57 Eme len ano ta Elisabet anya kedeu nadun, iy atehei nah mwan.
LUK 1:58 Eme ya iri lau asiu tiri udu mirihik tan, hawe lowan oro ndranuhun ta Laban amekes mwasin i tan handru. Eme ya oro mari ame sekesek hawen.
LUK 1:59 Ano udu, nah dah len tan asahan ndru la-uh badeh, oro ala ta asan ku-in; eme oro anya katondrohon nyaran, ki nyara taman Sekaraya.
LUK 1:60 Arile tinen anya ja, “Bwe! Nyaran kameh aloh iy Jon.”
LUK 1:61 Eme oro tiye i tan, “Nyara lowa ado ari bala buku aliy, bwe oh!”
LUK 1:62 Ano oro amekes kalem i ta taman ta nyaran nah dah, ki are lau handru.
LUK 1:63 Eme Sekaraya edeu kalem anya, “Ari barak keme, ya jo katorou nyaran.” Eme iy torowenei nyaran badeh, Jon. Eme oro mari, boho oro asak!
LUK 1:64 Eme na le liliy, Sekaraya asehek sahou ja, ma iy atudun Kindrei.
LUK 1:65 Eme iri lau badu mirihik badeh, boho iri asak labai. Eme ma nyala lakou dah aseker ili bolo ndrondro-ou, kon tinan loboho Judiya.
LUK 1:66 Iri lau anuhun nyala aliy, eme iri lomondra ma ndremenya, “Iy nah doh kameh asahan sah handru kameh?” Oro badeh, lomondra i buku doh, tasah boto-on ta Laban udu bwele-en.
LUK 1:67 Ano tama Jon Sekaraya idih na Malawin Ndrabun, ma iy asehek sahou ta lele.
LUK 1:68 “Taha katudun Laban Kindrei ta Isra-el! Tasah, iy ndrame ta akunoh iri lau tan.
LUK 1:69 Iy atehei ndramak ari boto-on eme ta seben taha, badu boho kamen ta lohowan tan Debit,
LUK 1:70 i buku none iy mene atehei sahou kani iri propet ndrabun, bwena mene ndratiye ndra-au,
LUK 1:71 Ya iy aseben taha are mine iri lau ta amekes bahun eme tataha, ma aseben taha ado mine iri lau, ta ato-ou kaliu eme tataha, ame len.
LUK 1:72 Ma iy kameh leheya tikisiy i ta tama taha iri, ma ta budon ta sahou randra le tan mene,
LUK 1:73 ta sahou tandrakan tan mene iy tandrakan i ta Abraham:
LUK 1:74 Ta aseben taha ado mine iri lau ta amekes bahun eme bada taha, ma mesekei taha sanoh ta amekes lahou tan.
LUK 1:75 Ma taha ka ndrabun, ma kado mwasin ta mada Kindrei na len mari, udu bolo manyah tataha.
LUK 1:76 Ya idah kameh ou naduk kameh, aloh ou propet ta Kindrei, udu loken labai; Ma ou kameh au ala bwena atehe san ta Laban,
LUK 1:77 ma atiye sahou tanan i tiri lau tan ta nyala seben, ndrame. Ya iy kameh balen mani karei ma lomondra ndra-in tiri.
LUK 1:78 Tasah, ta tikisiy mwasin ta Kindrei tataha, iy kameh mesekei lomadan ta aseben kameh eme loke la-u taha.
LUK 1:79 Ma anya udu kandrah eme la-u iri lau badu heh, badu heh, are bolo lulik ta imek, ma leheya san ta kati taha, eme san mwasin ta bahun bwe.”
LUK 1:80 Eme iy nah dah, i tinan, ma hawe boto-on ta Malawin Ndrabun udu la-un, ma manyah tan badeh, badu lomale an winiya iy le barasahan barame lewan, mada lau mari badu Isra-el.
LUK 2:1 Na len doh Sisa, ndramak ta atondrok nyaran Akustus, suni sahou i tiri lau mari badu bahandra tondrok ta Rom katorou nyara iri, ma kondrek kane iri lau.
LUK 2:2 Lahou doh ma mwena handru barasahan ai, ta ondrek kane lau na len, Kuriniyus atondrok kon Siriya.
LUK 2:3 Eme iri lau mari ala kon tinan ta tubu iri ari ari, adeu nyara iri.
LUK 2:4 Eme Josep badeh, udu kon tinan Nasaret. Kon doh udu bolo Galili, eme Josep ili. Ano, iy ili loboho Judiya ma ili kon tinan Betlehem. Kon doh mene adeu Debit udu aliy. Eme Josep ili doh, tasah iy badu boho kamen ta Debit.
LUK 2:5 Iy mene, iri amekes san ta Mariya i tan. Eme uru ala doh ta adeu nyara uru. Arile Mariya badeh, nah udu tan.
LUK 2:6 Eme uru ado Betlehem are gwek le badeh, ben asahan ta Mariya anya kedeu nadun.
LUK 2:7 Eme uru ala, iy atehei nadun udu bolo asiu tiri bulumakau. Iy mwan, su-i iy na kolau, ma nyahani iy udu bolo bwekei ta ndrahu nyamon tiri bulumakau, tasah oro badeh, ari asiu ta ala aliy bwe.
LUK 2:8 Ya eme, oro lau rayah ta atondrok iri sipsip badu kon doh, atondrok iri sipsip an lobwidiu na ben.
LUK 2:9 Eme angelo ari ta Laban badu loken eme asahan hawe oro, ma lomadan ta Laban lomatani oro. Eme ya oro anoh andra-i labai.
LUK 2:10 Arile angelo dah, tiye i toro, “Ado sanoh! Ado kanuhun! Jo eme dah ta tiye nyala ado ta sahou mwasin, ma hawe idah kameh amekes lau mari kameh sekesek tinan labai.
LUK 2:11 Na len dah, udu kon tinan ta Debit, nah ari ta seben ado ndrasahan. Iy badeh, Laban Krais!
LUK 2:12 Kalem ta aliy kameh ado atanan iy handru i buku doh: Idah kameh ado atou nah doh kameh su-i iy na kolau, ma nyahani iy, udu bolo bwekei ta ndrahu nyamon ta bulumakau.”
LUK 2:13 Eme nawin bwe, iri angelo solo-an labai badu loken ame hawe angelo ari nane dah, ma iri ayah wari ta atudun nyara Kindrei i buku doh,
LUK 2:14 “Lomadan ki ta Kindrei, udu loken labai bwele-e kandrah, Ma mondrei udu bwele-e munyak i toro are iy aseken oro labai, ado mwasin ta madan.”
LUK 2:15 Ano iri angelo au a len ta mada oro, ma iri au ala kandrah. Eme ya oro lau ta atondrok sipsip ame, ndremenya oro ari ari anya, “To ka-au kala Betlehem, kanyolom lakou nane Laban asehek ta to.”
LUK 2:16 Eme ya oro suri oro suwi suwi, ma oro ala takaleh, ma atou Mariya uru Josep, ma anyolom nah nane dah, amadin udu bolo bwekei ta ndrahu nyamon ta bulumakau.
LUK 2:17 Eme oro lau ta atondrok iri sipsip anyolom iy. Ano oro asehek i tiri ta nyala nah nane dah mene angelo asehek i toro.
LUK 2:18 Ya eme iri lau anuhun sahou nane oro asehek dah, ma iri abudon solo-an labai ta aliy.
LUK 2:19 Eme bale Mariya bamaniy bwe, iy lomondra boto-on labai ta aliy kahis le.
LUK 2:20 Ano oro lau ta atondrok sipsip au ala hamon ja, ma ayah wari ta atudun Kindrei ta lakou mari oro anuhun, ma lakou mari oro anyolom, asahan i buku le angelo mene ndrasihidi toro ndra-au.
LUK 2:21 Eme ya len tan asahan ndru la-uh, idoh len ta asan ku-in. Ano uru tondrohani nyaran i Jises, nyaran mene le, angelo tiye, na len doh mene, nah bare ta Mariya bwe le.
LUK 2:22 Ano, len asahan ta Josep uru Mariya kamekes kandriyen malen ta Moses mene batanau ta sikine uru. Eme uru tiyani nah dah, ili Jerusalem ta leheya iy ki mada Laban,
LUK 2:23 i buku none ndratorowenei udu bolo sahou batanau malen ta Laban, “Ta nah kadok mari badeh, kadeu iri ka mine Laban.”
LUK 2:24 Eme uru ale ala adeu “la-uh ban, ya i buku ban bwe, na la-uh ku, i mine iri pris ta asun” i nyara salom in hamon ta batanau ta Laban.
LUK 2:25 Eme ndramak ari badu Jerusalem nyaran Simiyon badeh, udu aliy. Iy badeh, mwasin handru ta mada Kindrei ma iy inoh Kindrei labai. Ya iy badeh, Malawin Ndrabun udu tan, ma iy abe-en len ta seben ta lau badu Isra-el kameh asahan.
LUK 2:26 Ma Malawin Ndrabun ndratiye tan, ta iy kameh winiyan bamak bwe, winiya iy udu atou tandrakan ta Laban, Krais.
LUK 2:27 Eme Malawin Ndrabun tiye Simiyon ili bolo asiu tinan ta Kindrei. Ano Josep uru Mariya ala atiye nah dah, ili bolo asiu tinan ta Kindrei in hamon le ta batanau mene ndratiye.
LUK 2:28 Eme Simiyon bwese-ei nah dah udu bohan, ma iy edeu wurah i ta Kindrei:
LUK 2:29 “Kabwai Laban, ou bamani tandrakan tam i ta lohowan tam bwe, kabwe, ou anya jo kimek, jo kimek ai ma sekesek.
LUK 2:30 Tasah, udu madak amwenen jo ndranyolom seben tam ai,
LUK 2:31 Ou mene lowosani udu mada lau mari anyolom:
LUK 2:32 Anya ma lomadan eme len, ta leheya ou ame len mada iri lau badu leheleh, ma lomadan anya i tiri lau tam, Isra-el.”
LUK 2:33 Eme tama Jises uru tinen badeh, boho uru asak ta sahou nane Simiyon asehek nyala Jises dah.
LUK 2:34 Ano, Simiyon atehei nyosowan i la-u oro, ano iy tiye i ta Mariya, “Iy nah le doh, Kindrei le edeu iy, ma idah kameh iy aseben iri lau badu Isra-el rayah, ya iri rayah kameh bwale iri iy. Ma idah kameh, iy i kalem ta lau kameh asehek sahou nyarahan i tan,
LUK 2:35 ma idah kameh, iy leheya budon ndra-in tiri kameh eme lewan. Ma idah kameh ou tikisiy handru, i buku none samen madan, mesekei ndrinem tikisiy tinan labai.”
LUK 2:36 Eme ya propet badih ari nyaran Ana nadu Panuwel udu aliy. Iy badu boho kamen ta Aser. Iy udu ta udun jaha ma ndro taloh le, ano udun imek. Iy i nyau udu udu, iy i alon, ma jaha tan asahan ndru lunoh hahuw (84).
LUK 2:37 Ya ben len, ben len, iy abeles iy ta nyamon, ma iy baruwani ta ili asiu tinan ta Kindrei ta amekes solom, ma ta atudun Kindrei, bwe.
LUK 2:38 Eme iy eme isos hawe oro na len doh, ma iy edeu wurah i ta Kindrei, hawe iy asehek nyala nah doh, i tiri lau heh mari abe-en bohon ili bwena, ta ndramak ta akunoh iri Jerusalem.
LUK 2:39 Eme uru mesekei lahou mari in hamon ta batanau mari ta Laban. Ano uru ala hamon ja, ala Galili ma ala kon turu Nasaret.
LUK 2:40 Eme nah dah i tinan i boto-on; ma iy idih ta tanan badu loken, hawe nyosowan ta Kindrei udu tan.
LUK 2:41 Jaha mari ndra-au, tine Jises uru badeh, ala Jerusalem na len ta nyamon tinan tiri Juwis mene ado Ijip ame len, aloh Pasoba.
LUK 2:42 Ano, jaha ta Jises asahan ronoh la-uh, oro ala ta nyamon i le buku bwena.
LUK 2:43 Eme len ta nyamon ano, oro adek ala hamon ala kon, arile Jises badeh, udu ndra Jerusalem udu gwek. Taman uru tinen tana uru bwe;
LUK 2:44 uru anya deh, iy deh udu bolo oro le. Eme oro adek ala len ari buruwen ano badeh, bale uru bwetenei iy. Eme uru takalahei bolo ndrokowa lowa uru, ma kawas turu nane dah,
LUK 2:45 arile uru batakalahei iy bwe. Eme uru adek ja, ala hamon ala Jerusalem takaleh iy.
LUK 2:46 Ya eme i bada len taloh badeh, uru takalahei iy manyah udu bolo iri lau ta leheya kandriyen tiri Juwis. Iy udu asiu tinan ta Kindrei, anuhun iri ma lelen ndremenya i tiri.
LUK 2:47 Eme iri mari anuhun tanan ta sahou iy akeh, i hamon i tiri, ma boho iri asak tan.
LUK 2:48 Eme ya taman uru tinen atou, boho uru asak. Eme tinen tiye i tan, “Naduk, ou amekes saba kandriyen eme taru dah? Aru tamam badeh, bale aru asin ou, ya eme aru ame takaleh ou dah.”
LUK 2:49 Eme iy anya, “I buku sah ah anya kame katakaleh jo? Ah badeh, bala tana ah, ta jo dah udu asiu ta tama bwe nadeh?”
LUK 2:50 Arile uru bakohok bolo sahou tan nane iy asehek i turu dah, bwe.
LUK 2:51 Eme ya, i buku none kandriyen tan ta anuhun sahou badeh, iy i hawe uru, ma oro au ala andri ala Nasaret. Ya eme tinen tone tanan mari doh udu le ndrinen.
LUK 2:52 Eme Jises badeh, salin i tinan ma hawe tanan tan ale i tinan. Ma Kindrei sekesek tan labai, hawe iri lau ale sekesek tan.
LUK 3:1 Idoh, udu bada jaha ronoh limeh ta Sisa ari ja nyaran, Taiberiyus atondrok kon mari; eme Pontiyus Pailat badeh, atondrok kon loboho Judiya. Ya Herot badeh, atondrok kon loboho Galili. Ya nadu tinen Pilip badeh, atondrok kon loboho Ituriya hawe Trakonitis; ma Lisaniyas atondrok Abilene,
LUK 3:2 ya Anas uru Kayapas badeh, uru lau tinan tiri pris. Eme nadu Sekaraya Jon udu kon lomale an, ya eme Kindrei suni sahou i tan.
LUK 3:3 Eme Jon edek ili bolo kon mari badu loboho gwa Jodan ili atiye sahou, ta tiye iri lau katubuni ndrine iri ta kandriyen ndra-in ma Kindrei kameh sikine iu.
LUK 3:4 I buku none propet Aisaya mene ndratorowenei udu bolo tarou tan: “Ndramak ari aloh udu bolo kon lomale an i buku doh, ‘Kalowosa san ta Laban, ma kadik san kales lewan.
LUK 3:5 Bolo sa-eu badeh, katurukiy kanyemes keme loke, ma hawe iri bwili ndrondro-ou hawe mandrei badeh, katiriy kanyemes keme andri, Ma san mwekele-eu badeh, kales le, Ma san totokon badeh, kanyemes le.
LUK 3:6 Ya eme iri lau mari kanyolom ndramak ta seben ta Kindrei.’”
LUK 3:7 Eme iri lau solo-an ame hawe Jon ta iy kinyu iri. Arile, iy tiye i tiri i buku doh, “Aha badeh, mwak ndra-in. Are lau tiye aha ta atobwak au a len ta losen ta Kindrei kameh eme?
LUK 3:8 Ado kadeu nah ma ado kabatanau oro ta oro katubuni ndrine oro ta kandriyen ndra-in toro ki san ta tikisiy. Ya ado sabudon ado ma satiye ado sala buku doh: ‘Aso badeh tama aso Abraham, eme ya aso anya, aso mwasin.’ Arile bwe. Jo katiye tado kamwenen, Kindrei winiyan mesekei iri bek dah, winiyan asahan i nadu Abraham.
LUK 3:9 Samen kamondrou ta Kindrei badeh, ndrala ndrado mwe-e kei, ya iri kei ala bato-ou sali iri bala mwasin bwe, idah kameh amundroh iri ala andri, ano ma akeh iri au ala bolo jih.”
LUK 3:10 Eme iri lau ndremenya, “Ya ahi kameh ki buku sah handru bah?”
LUK 3:11 Eme Jon anya, “Ado lau heh, awin tado la-uh, ado kanyohan ari ki ta ndramak tan awin bwe. Ma are lau nan nyamon udu aliy, iy kanyohan ki na ndramak nan nyamon bwe.”
LUK 3:12 Ano iri lau ta akohok luk ta takis ame anya kanyu iri ma iri ndremenya Jon, “Ndramak ta leheya, ahi ka buku sah handru bah?”
LUK 3:13 Ya eme Jon anya, “Ado sakohok lakou sawek la-u lakou tado bwena ja!”
LUK 3:14 Eme iri lau rayah ta bahun ndremenya iy ja, “Ya, aso ka buku sah bah?” Eme iy tiye i toro, “Ado kasekesek ta sihine ado le. Ya ado sawendreya ta satara luk ta ari ndramak, ma ado sandres ndramak laleyah ta sahou.”
LUK 3:15 Eme ya mada iri lau asak, ma iri lomondra i bada Jon. Eme ya iri anya, “Iy sala Krais?”
LUK 3:16 Eme Jon anya, “Jo alomwa ado na gwa, arile ndramak ari in hamon tek eme kameh, boto-on tan badeh, sakalawi boto-on tek ja. Jo badeh, mwasin handru bwe, ta talou malou ta molowa ku-i katin bwe. Arile, iy kameh inyu ado na boto-on ta Malawin Ndrabun ma aleben ado buku jih.
LUK 3:17 Ma iy andrei lakou tan udu minen ta asorok bada kalom eme len lewa salin. Idah kameh iy atukum sali kalom ili asiu ta asumwe nyamon, ma idah kameh, iy asun iri bada kalom ili bolo jih ta winiyan bamak bwe.”
LUK 3:18 San solo-an, Jon badeh atiye sahou mwasin ta aliu iri.
LUK 3:19 Ya eme Jon asehek sahou boto-on i ta Herot, ndramak ta atondrok, tasah iy sudi udu nadu tinen Pilip Herodiyas i tan, hawe iy amekes kandriyen ndra-in solo-an labai.
LUK 3:20 Ano ma ndra-in labai ja badeh, iy atehei Jon i bolo kou.
LUK 3:21 Jon bala bolo kou bwe le badeh, iy anyuwi iri lau mari, ano iy inyu Jises. Eme ya iy amekes salom le badeh, kandrah asak, ano
LUK 3:22 Malawin Ndrabun atah i buku ban eme andri eme bwele-en. Ya eme aloh ari udu kandrah tiye i buku doh, “Ou badeh, naduk handru, ma ou adek handru; ou le mesekei jo sekesek labai.”
LUK 3:23 Ano Jises jaha tan ndra buku none tonoh (30), iy amekes lahou tan eme len. Eme iri lau mari abudon anya tama Jises badeh, Josep. Arile, tinen badeh, edek ndrine Heli,
LUK 3:24 ano Heli edek ndrine Matat, ano Matat edek ndrine Libai, ano Libai edek ndrine Melki, ano Melki edek ndrine Janai, ano Janai edek ndrine Josep,
LUK 3:25 ano Josep edek ndrine Matatiyas, ano Matatiyas edek ndrine Amos, ano Amos edek ndrine Nahum, ano Nahum edek ndrine Esli, ano Esli edek ndrine Nagai,
LUK 3:26 ano Nagai edek ndrine Mat, ano Mat edek ndrine Matatiyas, ano Matatiyas edek ndrine Semen, ano Semen edek ndrine Josek, ano Josek edek ndrine Joda,
LUK 3:27 ano Joda edek ndrine Jo-anan, ano Jo-anan edek ndrine Resa, ano Resa edek ndrine Serubabel, ano Serubabel edek ndrine Seyaltiyel, ano Seyaltiyel edek ndrine Neri,
LUK 3:28 ano Neri edek ndrine Melki, ano Melki edek ndrine Adi, ano Adi edek ndrine Kosam, ano Kosam edek ndrine Elmadam, ano Elmadam edek ndrine Er,
LUK 3:29 ano Er edek ndrine Josuwa, ano Josuwa edek ndrine Eliyeser, ano Eliyeser edek ndrine Jorim, ano Jorim edek ndrine Matat, ano Matat edek ndrine Libai,
LUK 3:30 ano Libai edek ndrine Simiyon, ano Simiyon edek ndrine Juda, ano Juda edek ndrine Josep, ano Josep edek ndrine Jonam, ano Jonam edek ndrine Eliyakim,
LUK 3:31 ano Eliyakim edek ndrine Meleya, ano Meleya edek ndrine Mena, ano Mena edek ndrine Matata, ano Matata edek ndrine Netan, ano Netan edek ndrine Debit,
LUK 3:32 ano Debit edek ndrine Jesi, ano Jesi edek ndrine Obet, ano Obet edek ndrine Bowas, ano Bowas edek ndrine Salmon, ano Salmon edek ndrine Nason,
LUK 3:33 ano Nason edek ndrine Aminadap, ano Aminadap edek ndrine Atmin, ano Atmin edek ndrine Arni, ano Arni edek ndrine Hesron, ano Hesron edek ndrine Peres, ano Peres edek ndrine Juda,
LUK 3:34 ano Juda edek ndrine Jekop, ano Jekop edek ndrine Aisik, ano Aisik edek ndrine Abraham, ano Abraham edek ndrine Tera, ano Tera edek ndrine Nahor,
LUK 3:35 ano Nahor edek ndrine Seruk, ano Seruk edek ndrine Reu, ano Reu edek ndrine Pelek, ano Pelek edek ndrine Eber, ano Eber edek ndrine Sela,
LUK 3:36 ano Sela edek ndrine Kenan, ano Kenan edek ndrine Apasat, ano Apasat edek ndrine Sem, ano Sem edek ndrine Nowa, ano Nowa edek ndrine Lemek,
LUK 3:37 ano Lemek edek ndrine Matusala, ano Matusala edek ndrine Inok, ano Inok edek ndrine Jaret, ano Jaret edek ndrine Mahalalel, ano Mahalalel edek ndrine Kenan,
LUK 3:38 ano Kenan edek ndrine Inos, ano Inos edek ndrine Set, ano Set edek ndrine Adam, ya ano Adam badeh, nadu Kindrei.
LUK 4:1 Ano Jises udu gwa Jodan eme loken le badeh, iy idih na boto-on ta Malawin Ndrabun. Eme Malawin Ndrabun andrei iy iu ili kon lomale an.
LUK 4:2 Udu loboho kon doh, balik none iy ta iy kataku udu bolo len ma hanoh (40). Udu bolo len doh Jises baimon se nyamon bwe, eme suniya len anya kano badeh, iy imeson.
LUK 4:3 Eme balik tiye i ta Jises i buku doh, “I buku none ou anya, ou Nadu Kindrei, ou asehek sahou ki ta bek kede-eh, kasahan jabi ramen.”
LUK 4:4 Eme Jises tiye i tan i buku doh, “Ndratorowenei, ‘Lau winiyan balelei le jabi ramen ta samak bwe!’”
LUK 4:5 Ano ja, balik andrei iy uru ala loke, suwi suwi iy leheya iy ta kon tinan mari badu munyak, iri kabin atondrok.
LUK 4:6 Eme ma balik tiye i ta Jises i buku doh, “Lakou mari ou atou nane kede-eh, udu minek. Eme ya jo winiyan edeu i tare lau na seken tek, ya eme idah kameh, jo edeu boto-on ma hawe lakou mwasin mari doh kameh i tam,
LUK 4:7 i buku none ou atehei bwili ndru-um keme tek, ma atudun nyarak.”
LUK 4:8 Eme Jises tiye i tan ja i buku doh, “Sahou ta Kindrei badeh, ndratorowenei ale, ‘Ou atudun le nyara Laban Kindrei tam, ma ou a-en hamon tan le ari kabwe.’”
LUK 4:9 Ano ja, balik andrei iy uru ala Jerusalem, eme ma balik atehei iy ales udu bwele-e no-o asiu tinan ta Kindrei loken on. Ano balik tiye i tan i buku doh, “Ou anya ou Nadu Kindrei handru eh, ou akahei ou ado dah ala andri.
LUK 4:10 Tasah, i buku ndratorowenei, ‘Kindrei kameh edeu sahou batanau ili tiri angelo tan ame ta aseben ou ma atondrok ou.
LUK 4:11 Ma idah kameh, iri bwese-ei ou, ma bek winiyan batahi katim bwe.’”
LUK 4:12 Jises tiye i buku doh i tan, “Sahou ta Kindrei badeh, ndratiye, ‘Ou satehei Laban Kindrei tam sala ta bolo none.’”
LUK 4:13 Ano balik none iy ta madasan mari, arile Jises banuhun iy bwe, ano iy ruwani iy ma iy iu, winiya len ari ja, iy barasahan.
LUK 4:14 Ano Jises eme hamon eme Galili, hawe boto-on ta Malawin Ndrabun udu hawen eme. Ya eme sahou ta nyala iri lakou iy amekes badeh, aseker ili winiya loboho doh.
LUK 4:15 Ano iy leheya iri udu asiu ta atukum tiri Juwis, eme ma iri atudun iy.
LUK 4:16 Ano Jises iu i hamon ja ili Nasaret, kon mene iy i tinan udu aliy. Eme i buku none len ta amunyau mari ndra-au, eme na len ta amunyau dah ja, Jises ili bolo asiu ta atukum tiri Juwis.
LUK 4:17 Eme iy ales ere loke, iri atehei tarou ta Aisaya i minen. Ano iy sihi buk i ta sahou nane Aisaya atorou dah. Ano iy aloh:
LUK 4:18 “Malawin Ndrabun ta Laban badeh, udu bwele-ek, Tasah, iy suni jo ta atiye sahou ki tiri lau lakou bwe. Iy suni jo ta tiye sahou ki tiri lau are bolo kou kame len, Ma kamekes iri lau mada iri kaseu, kanyolom ja; Ma ta talou malou tiri lau, ado ndra-in handru ka-au.
LUK 4:19 Ma hawe ta tiye ta Laban kameh aseben iri lau tan na jaha doh.”
LUK 4:20 Ano Jises lukumwi buk nane dah, ya atehei i mine ndramak ta atondrok, ano ma iy udu andri leheya oro. Eme iri lau mari nane ado asiu ta ndrahu tukum tiri Juwis dah, mada oro asoh ili le tan.
LUK 4:21 Ano iy tiye i toro, “Sahou nane ado ndranuhun badeh, ndrasahan handru na len dah.”
LUK 4:22 Eme oro asehek anya, iy ndramak mwasin labai. Ya, mani oro atur, ma oro lomondra solo-an labai ta sahou mwasin iy asehek. Ya eme oro anya, “Iy kede-eh nadu Josep labai, neh?”
LUK 4:23 Ano Jises tiye i toro, “Jo tanan labai, idah kameh ado anya, ‘Ou tiye sahou mwasin ki tam le. Ou badeh, ndramak ta amekes lau oh? Ou amekes kudu kon tam mwena op!’ Ya idah kameh, ado tiye eme tek ale anya, ‘Abo, ou none amekes lahou mene ou amekes udu Kapena-um kudu kon tam amwenen dah se.’”
LUK 4:24 Eme Jises anya, “Jo katiye tado kamwenen, iri lau badu bolo kon tiri propet amwenen badeh, iri winiyan baseken iy bwe.
LUK 4:25 Arile jo katiye tado kamwenen, kabatana Alaija, iri badih nyau badu Isra-el badeh, solo-an labai. Idoh, amwenen na len iri lau badu kon mari mene ameson, tasah ur badeh, bandruk se bwe, winiya jaha taloh ranah.
LUK 4:26 Eme Alaija badeh, bala baselesen oro ari badu Isra-el bwe, arile iy le ili hawe badih nyau ari udu kon Sarepat, udu loboho kon Saidon.
LUK 4:27 Ya na len propet Alaisa in ndra propet badeh, iri Isra-el solo-an badeh, sik lepra udu tiri. Ya udu bolo iri mari badeh, ndramak ari le badu Siriya, nyaran Naman badeh, Alaisa mesekei iy amwenen.”
LUK 4:28 Eme iri mari nane ado bolo asiu ta atukum nane dah anuhun, ma iri abolosen.
LUK 4:29 Eme iri ato-ou ame loken ma aluwi iy eme len ta kon. Eme iri seheyani iy ili loken bwele-e kiri mandrei, kon tinan nane udu aliy dah, ma iri anya kakeh iy ki andri.
LUK 4:30 Arile, Jises asoh bolo ndrokowa iri iu.
LUK 4:31 Ano, na len ari ja, Jises edek iu ili andri i kon tinan ari aloh Kapena-um udu loboho Galili. Ma iy leheya iri lau mwan ma badih na len ta amunyau.
LUK 4:32 Eme iri lau mani iri atur ta bolo leheya tan, tasah sahou tan badeh, nyarahan labai.
LUK 4:33 Eme udu bolo asiu ta atukum nane dah, ndramak ari malawin ndra-in udu la-un. Eme iy aloh bohon i tinan,
LUK 4:34 “Ei! Jises badu Nasaret, ou anya amekes sasah keme taso? Ou ame dah ta adai aso kamak ai? Jo tanan ou are handru kede-eh, ou badeh, ndramak ndrabun ta Kindrei!”
LUK 4:35 Eme Jises tiye i ta malawi ndra-in anya, “Ou andru-uk ma ou ame len ta ndramak badeh!” Eme malawin ndra-in dah morahani ndramak dah i andri ndrokowa iri lau. Ma iri malawin ndra-in ame len ma au, udu mada iri lau mari nane dah. Iri bamesekei ari isi bala bada ndramak dah, bwe.
LUK 4:36 Eme iri lau mani iri mari atur, ma iri asehek i tiri ari ari, “Saba lahou handru dah? Sahou tan nyarahan ma boto-on labai, tasah iy tiye sahou i ta malawin ndra-in le badeh, ma iri ame len!”
LUK 4:37 Eme sahou ta nyala Jises aseker ili bolo kon mari badu loboho doh.
LUK 4:38 Ano Jises udu asiu ta atukum tiri Juwis eme len ales ili asiu ta Saimon. Eme oro asehek i tan ta iy kaseben salahu Saimon. Tasah, iy badeh, ibo sik ma badan badeh, nyarahan nyarahan.
LUK 4:39 Eme Jises edek ili ka-au sau hawen, ma tiye sahou nyarahan i ta sik nane dah. Ano ma badan anyala, ma iy suri iy le eme loke, ma iy amekes noro nyamon.
LUK 4:40 Eme len ta amunyau ano, an anya ki andri, iri atiye iri lau solo-an, saba sik udu tiri ame hawe Jises. Ya eme iy edeu minen i la-u iri mari, ma iy mesekei iri amwenen ja.
LUK 4:41 Ma hawe iri malawin ndra-in solo-an ado la-u iri lau anyar ame len, tiye i buku doh, “Ou badeh, Nadu Kindrei.” Arile, iy tiye iri kandru-uk le, tasah iri ndratanan, iy badeh, Krais.
LUK 4:42 Ano na mandraben handru Jises udu kon tinan eme len, ili kon ari doh, lau bare aliy bwe. Eme iri lau takaleh iy, ma iri ala hawen. Ya eme iri ateu iy na sahou ta iy sa-au, iy badeh, kudu.
LUK 4:43 Arile Jises tiye i tiri, “Bwe! Jo ki-iu kili katiye sahou mwasin ta nyala tondrok ta Kindrei ki tiri kon tinan rayah ja. Tasah, Kindrei suni jo eme dah ta atiye sahou tan.”
LUK 4:44 Eme iy atiye sahou ili loboho Judiya, udu bolo asiu ta tukum tiri Juwis.
LUK 5:1 Ano na len ari ja, Jises badeh, ales udu babi ta gwa li ari aloh Genesaret. Ya iri lau badeh, awudi iy, kon aso, ta anya kanuhun sahou ta Kindrei.
LUK 5:2 Eme madan ili badeh, atou ndron lu-ei ta ni iri aluwi in babi. Oro lau ta ni badeh, ruwani ndron udu gwek, ya oro soroya kubwin toro.
LUK 5:3 Eme Jises sandroh in bolo ndron ta Saimon, eme iy tiye Saimon susuwini iy i len sese ta babi. Ya eme Jises udu ndron badeh, leheya sahou ta Kindrei i tiri lau mari an babi.
LUK 5:4 Eme sahou tan ano le badeh, iy tiye i ta Saimon, “Ado kasowe kame len, ya ado kakeh kubwin tado ki gwa, kawe-ek ni.”
LUK 5:5 Eme Saimon anya, “Ndramak ta leheya, aso badeh, ndramekes na ben ari buruwen ndra-au, arile aso bakohok se ni bwe. Arile, in hamon ta bohom ou ndratiye, jo kameh akeh kubwin ili gwa ja.”
LUK 5:6 Eme oro akahei kubwin i gwa, eme ya kubwin toro anya katarah, tasah ni badeh, solo-an labai.
LUK 5:7 Eme oro anyoleh i toro lau toro are ndron ra-ei ja kame kaseben oro. Ano oro weleyani ndron toro, ma lu-ei na ni, ma ndron toro anya katuh.
LUK 5:8 Eme Saimon Pita anyolom lakou dah asahan, ma iy taku i andri na bwili ndru-un udu kati Jises, ma tiye i buku doh, “Ou sado madak Laban, ou au. Jo badeh, kandriyen tek ndra-in!”
LUK 5:9 Ya eme Saimon hawe oro lau tan ta ni are hawen badeh, mani oro atur labai, tasah ni oro kuhiy solo-an labai.
LUK 5:10 Ma uru lau badu hawe Saimon, Jemis uru Jon nadu Sebedi badeh, mani uru atur ale. Ano Jises tiye i ta Saimon, “Kabwai, ou sanoh; na dah, ma na len hamon eme, ou kameh akohok iri ndramak, i buku ou awe-ek ni badeh.”
LUK 5:11 Eme oro aluwi ndron toro eme babi eme loken, ano oro ruwani lakou toro mari udu api, ma oro an hamon ta Jises.
LUK 5:12 Ano na len ari ja, Jises udu kon tinan ari, ya udu loboho doh badeh, ndramak ari sik lepra ini badan mari. Iy eme atou Jises le badeh, iy morahani iy i andri anyolou iy anya, “Laban, i buku ou aseken ou winiyan mesekei jo kamwenen ja udu mada Kindrei!”
LUK 5:13 Eme Jises atehei minen i badan ma tawi iy, ano iy tiye, “Jo aseken. Ya ou amwenen ja.” Eme ma sik lepra tan amai i le rasan.
LUK 5:14 Ano Jises tiye i tan, “Ou satiye lakou dah, sala ta ari ndramak labai; arile ou ales ala hawe iri pris, leheya badam ki tiri kanyolom; ano ou adeu salom ta asun i le buku Moses mene ndrabatanau. Ya eme iri kanyolom ma katanan ou badeh, ndramwenen ja.”
LUK 5:15 Arile, sahou ta nyala Jises badeh, ndraseker ndra tinan labai, eme ya iri lau solo-an ame ta anuhun sahou tan, ma hawe kamekes iri kamwenen.
LUK 5:16 Arile len solo-an badeh, Jises iu ili kon lau aliy bwe ta asolom.
LUK 5:17 Ano na len ari ja, Jises leheya iri lau mwan ma badih udu bolo asiu ari. Eme iri Parasi, hawe iri lau ta leheya kandriyen tiri Juwis, badu bolo kon tinan Galili, iri badu Judiya ma hawe badu Jerusalem ame manyah anuhun Jises asehek sahou. Ya eme boto-on ta Laban badeh, eme la-u Jises ta amekes iri lau sik udu tiri kamwenen.
LUK 5:18 Eme lau rayah badeh, bwese-ei ndramak ari, badan imek udu bada sau eme. Oro anya kabwese iy keme bolo asiu, ma kadeu iy kudu mada Jises.
LUK 5:19 Arile iri lau solo-an labai, eme oro san ta bwese iy ili bolo asiu bwe. Eme oro bwese-ei ndramak dah i loke bwele-e asiu, ano oro bosokei bwele-e asiu dah, ma atehei ndramak dah, in bada nyahan i andri bolo lau nane dah, ili udu mada Jises.
LUK 5:20 Ya eme Jises anyolom budon toro handru, eme iy tiye i ta ndramak dah, “Kawas tek, kandriyen ndra-in tam ndrasikinei ndra-au.”
LUK 5:21 Eme oro lau ta leheya kandriyen tiri Juwis, hawe oro Parasi badeh, asehek i toro ari ari anya, “Iy ndramak kede-eh bobose o! Iy aluhe Kindrei kede-eh! Ari ndramak winiyan basikine kandriyen ndra-in bwe; Kindrei le ari, kabwe!”
LUK 5:22 Eme Jises badeh, ndratanan budon toro, eme iy tiye i toro, “Tasah handru ado ndremenya solo-an udu ndrine ado?
LUK 5:23 San manamun ndraheh, katiye, ‘Kandriyen ndra-in tam ndrasikine ndra-au,’ deh, bwe katiye, ‘Ou suri ou, ma ou adek.’
LUK 5:24 Jo winiyan leheya ewek tado ma ado ki tana ado, ta Nadu Ndramak Awas badeh, boto-on labai udu bwele-e munyak dah ta tiye i ta ndramak ta mani kandriyen ndra-in tan iu.” Eme Jises tiye i ta ndramak badan imek dah, “Jo tiye tam, ou suri ou, ou andrei nyahan tam ma ou au a kon!”
LUK 5:25 Ano suwi labai, iy suri iy eme loken udu mada iri mari, ma andrei nyahan tan nane, ma iy atudun Kindrei udu bohon, ma iu i kon.
LUK 5:26 Eme iri mari badeh, mani iri atur handru en, ma iri atudun nyara Kindrei. Ya boho iri asak, ma iri tiye i buku doh, “Taha na dah badeh, ndranyolom kalem randrah labai.”
LUK 5:27 Ano Jises eme len badeh, iy atou ndramak ari ta akohok luk ta takis, nyaran Libai, iy manyah ereu bolo asiu tan ta gok ta akohok luk ta takis. Eme Jises tiye i tan, “Ou ame an hamon tek.”
LUK 5:28 Eme Libai ruwani lakou tan mari, ma iy in hamon tan.
LUK 5:29 Ano, Libai mesekei tine nyamon udu asiu tan, i na Jises. Ma hawe iri lau solo-an ta akohok luk ta takis badeh, ame aimon nyamon hawe oro ale.
LUK 5:30 Ya oro Parasi rayah, hawe oro lau rayah ta leheya kandriyen tiri Juwis, badu bolo oro nane dah, nunu-uh oro lau ta Jises anya, “Tasah handru ado aimon nyamon hawe oro lau ta akohok luk ta takis, ma hawe oro lau ale ba-en hamon ta batanau ta Moses bwe?”
LUK 5:31 Ya eme Jises asumon i buku doh, “Iri lau ale babo sik bwe, iri winiyan baso-ok ndramak ta anyumor bwe. Arile, iri lau tiri sik le badeh, aseken seben.
LUK 5:32 Jo eme dah ta aseben lau mwasin le, bwe. Jo eme dah badeh, ta aseben iri lau ta karei ma lomondra ndra-in udu tiri badeh, katubuni ndrine iri, ma iri kasahan mwasin.”
LUK 5:33 Eme ya iri ndremenya Jises anya, “Oro lau ta Jon ta alomwa mene abeles oro ta nyamon, ma hawe oro amekes salom solo-an sese. Ma hawe oro lau tiri Parasi badeh, amekes i le buku oro le; arile oro lau tam badeh, babeles oro ta nyamon bwe.”
LUK 5:34 Eme Jises asumon i buku doh, “I buku none ndramak tasou bolohau udu aliy, ado winiyan babilisi oro lau ta molak bwe!
LUK 5:35 Arile, na len hamon eme kameh, iri lau ta kaliu tan kuhi iy eme len, ma na len doh kameh oro winiyan baimon nyamon bwe.”
LUK 5:36 Ano Jises tiye sahou sokek ari ja i toro i buku doh, “Ari ndramak winiyan batarani kolau ha-un, ya iy winiyan baserehei bala ta ndrabwak, udu ta kolau malen bwe. Ya i buku none iy kaserehei kolau ha-un ki aliy kameh tarani andra-i labai. Ma kolau malen kameh ndrabwak i tinan le gwek, ma winiya kolau ha-un bala winiyan ja bwe.
LUK 5:37 Ari ndramak winiyan basukuni waen ha-un bala bolo ku-i me malen bwe. Buku none iy amekes i buku doh, waen doh kameh tuburok, ma kohan kameh tarani ku-i me nane, ma waen kamou ma iu laleyah; ma ku-i me ale kameh andra-i.
LUK 5:38 Arile, waen ha-un badeh, ki bolo ku-i me ale ma bweseken kahis le.”
LUK 5:39 Eme iy anya, “Ma idah kameh, iri lau ndra-un waen malen kameh bwale iri a-un waen mamakahis le, tasah iri anya waen malen badeh, simidin.”
LUK 6:1 Ano, udu bolo len ari ta amunyau, Jises hawe oro lau tan adek bolo bilin ari ta wit. Eme oro lau tan abwe-eh buwa wit nane dah, ano oro bosowa udu bolo mine oro, ano oro aimon.
LUK 6:2 Eme oro lau rayah ta Parasi anya, “Tasah handru ado abwe-eh buwa wit na len ta amunyau? I buku sah ado ba-en hamon ta kandriyen tahi bwe?”
LUK 6:3 Eme Jises asumon iri i buku doh, “Buku sah handru ya ado abolosen eme tek ma hawe oro lau tek? Sebwe ado babudon bamwenen ta kundruh ta lakou mene kabin Debit mesekei bwena bwe nadeh? Jo asehek ta lakou kala Debit hawe oro lau tan mene amak son.
LUK 6:4 Ya, iy ili bolo asiu ta Kindrei; ya iy andrei jabi ramen nane iri pris ndraleheyaniy ndrala ta mada Kindrei, in bolo bosoh ndrabun handru doh. Debit hawe oro lau tan aniy, arile jabi ramen doh ndrabun handru ta oro aimon. Iri pris le winiyan ta aimon.”
LUK 6:5 Ano Jises edeu sendrehendreh i buku doh, “Jo Nadu Ndramak Awas, ya jo tama len ta amunyau.”
LUK 6:6 Ano na len ta amunyau ari ja badeh, Jises ili leheya sahou udu bolo asiu ta atukum tiri Juwis. Eme ndramak ari udu aliy, minen salin imek.
LUK 6:7 Ya iri Parasi, ma hawe iri lau ta leheya kandriyen tiri Juwis badeh, takaleh madasan ta kadeu Jises ki ta mada sahou. Eme iri atehei mada iri udu tan, i buku iy kamesekei ndramak dah kamwenen na len ta amunyau dah, deh bwe.
LUK 6:8 Arile, Jises ndratanan budon toro, eme iy tiye i ta ndramak minen imek dah anya, “Ou are loke mada lau mari dah!” Eme ndramak minen imek dah, suri iy ere loken.
LUK 6:9 Ano Jises lelen oro, “Jo anya kandremenya ado, saba kandriyen mwasin kameh taha kamekes na len ta amunyau? Kamekes kandriyen mwasin ta aseben koha lakou deh, bwe kamekes kandriyen ndra-in ta adai lau?”
LUK 6:10 Ano, Jises anyolom ili eme i toro mari, ano iy tiye i ta ndramak minen imek dah anya, “Minem kales!” Eme iy talasei minen ma minen ndramwenen ja.
LUK 6:11 Arile, bwai, ndrine oro badeh, isi handru, eme oro asehek nyala oro ari ari, ta saba madasan handru, oro kamekes ki bada Jises.
LUK 6:12 Ano len ari, Jises iu i kabede-e mandrei, ma iy udu gwek ben ari, amekes salom i ta Kindrei.
LUK 6:13 Ano kon aleu, iy luhi oro lau tan ame badeh, iy lebelei oro ronoh la-uh, badu bolo oro ame len, eme iy tondrohani nyara oro badeh, i aposel.
LUK 6:14 Ya oro badeh: Saimon (udu ja, iy aloh iy Pita), ano nadu tinen Enduru; ano Jemis, ano Jon, ano Pilip, ano Batolomiu,
LUK 6:15 ano Metiu, ano Tomas, ano Jemis nadu Alpeyus, ano Saimon aloh Selot,
LUK 6:16 ano Judas nadu Jemis, ma hawe Judas Iskariyot, ndramak kameh ta edeu sa-oh.
LUK 6:17 Ano, iy eme andri hawe oro, ales udu bwele-e munyak nyemesen. Ma hawe iri lau tan solo-an handru ado aliy. Ma ale, iri lau buku liliy badu loboho Judiya, badu loboho Jerusalem, ma hawe lau badu loboho mada ndras ta kon tinan Tair hawe Saidon nane an doh ale. Iri ame badeh, anya kanuhun Jises asehek sahou, ma hawe iri atiye iri lau sik udu tiri ame hawen, ta iy kamekes iri kamwenen.
LUK 6:18 Ma iri lau ala malawin ndra-in udu la-u iri ale, iy mesekei iri amwenen ja.
LUK 6:19 Eme ma iri lau solo-an anya kateu le badan, tasah nyaraha boto-on ta Jises eme len ma mesekei iri mari amwenen ta sik tiri.
LUK 6:20 Ano mada Jises anyolom oro lau tan badeh, ma iy tiye anya: “Ou are lau ou lakou bwe badeh, ou sekesek. Tasah, lakou udu baha tondrok ta Kindrei kameh, tam.
LUK 6:21 Ou are lau, ou ameson badeh, na dah, ou sekesek. Idah kameh, ou adih handru. Ou are lau ou taya na dah, idah kameh, ou sekesek.
LUK 6:22 Ou are lau, iri lau amekes budon ndra-in i tam, ya iri bwale iri ou, hawe iri aluhe, ma hawe iri kaloh ou anya malawin ndra-in udu la-um badeh, ou sekesek, tasah ou badeh, an hamon ta Nadu Ndramak Awas!
LUK 6:23 “Ou sekesek ma ou sandroh ta sekesek i buku lakou doh, katok badam, tasah ndramas mwasin ta lakou doh kameh abe-en ou udu kandrah. Tasah, iri doh mene tubu iri amekes i buku aliy, ili tiri propet.
LUK 6:24 “Arile, ado lau tado lakou solo-an mada ado kaleu! Sisi-in tinan labai kameh ewek bwele-e ado, tasah len ta sekesek mari tado mene ndrano!
LUK 6:25 Ya ado lau bameson bwe kede-eh, mada ado kaleu! Sisi-in tinan labai kameh ewek bwele-e ado, tasah ado kameh akohok andra-i labai ta son. Ya ado lau ta abasa kede-eh, mada ado kaleu! Sisi-in tinan labai kameh ewek bwele-e ado, tasah idah kameh ado aden ma taya.
LUK 6:26 Ma, mada ado kaleu, i buku none oro lau kamasiye ado, ya ado anya, ado le ai. Idah kameh sisi-in tinan labai kameh ewek bwele-e ado. Idoh, i buku none tubu oro mene amekes, anya oro badeh, propet handru. Arile, bwe.
LUK 6:27 “Arile, jo katiye tado, are lau anuhun bohok dah: Ado badeh, kaseken iri lau amekes budon ndra-in ewek tado. Ma hawe ado ale, kamekes kandriyen mwasin ki toro lau ala budon ndra-in toro udu tado,
LUK 6:28 ma hawe ado ale kamekes salom ki ta Kindrei kanyosowani oro lau ala aten ado, hawe oro lau ala amekes bolo manyah tado, udu ndra-in.
LUK 6:29 “Ki buku none ari ndramak kubwi lim ki kapam badeh, ou tubuni bilisiu kili ja, iy kubwiy ale; ya ki buku none iy kandrei awin tam, badeh ou atehei awin tam lawe-en kili ale.
LUK 6:30 “Ya ki buku none are lau kandremenya ou ta ari lakou tam kili tan, mwasin, ou atehei kili tan. Ya ki buku none are lau kandrei lakou tam badeh, ou sandrek same hamon ja.
LUK 6:31 Saba lakou ou aseken iri kamekes kewek tam, badeh, ou amekes ki tiri ki le buku aliy.
LUK 6:32 “Ya, buku none ou aseken oro lau le nane aso-ok ou; idah kameh, ou winiyan akohok nyosowan ta aliy i buku sah bah? Ya iri lau ta karei ma lomondra ndra-in badeh, aseken le iri lau ala amekes kandriyen ndra-in i le buku iri.
LUK 6:33 Ou winiyan bakohok nyosowan laleyah bwe, i buku none ou aseken le iri lau amekes mwasin le ewek tam. Iri lau ta karei ma lomondra ndra-in amekes ale i buku aliy.
LUK 6:34 Ma i buku none ou aseken ta adeu lakou i ta lau mwasin tam le; tasah ou badeh, aseken ta akohok bundruwen keme hamon. Idah kameh, ou winiyan bakohok nyosowan laleyah ta aliy bwe! Iri lau ta karei ma lomondra ndra-in badeh, amekes i buku aliy ale.
LUK 6:35 Ndri-iy labai! Ou badeh, aseken iri lau ta amekes bahun i badam, ma ou amekes mwasin i tiri; ya buku ou adeu lakou, ou sabudon ta bundruwen. Badeh, ou kameh akohok ndramas mwasin labai, ma idah kameh ou asahan nadu Kindrei handru badu loken. Tasah, iy badeh, amekes mwasin i bada iri ta adeu wurah bwe, hawe lau ta kandriyen ndra-in ale.
LUK 6:36 Ou badeh, ki ndramak ta tikisiy, i buku none tamam Kindrei le.”
LUK 6:37 “Ou satiye kandriyen ta ndramak ari ari; ya, ou winiyan bare ta mada sahou tinan bwe; ou samekes sahou boto-on sala ta lau, ya idah kameh, Kindrei bamekes sahou boto-on bawek tam bwe. Ou mani kandriyen ndra-in tiri, ya idah kameh, Kindrei ale, mani kandriyen ndra-in tam.
LUK 6:38 Ou anyohan iri lau lakou, ya idah kameh, Kindrei anyohan ou ale. Ma hawe bundruwe lakou tam eme hamon kameh solo-an labai, ma amou i andri, ma idah kameh, bolo asiu idih na aliy. Idah kameh, ou akohok bundruwe lakou tam, eme hamon kameh in hamon ta bundruwe lakou tam mene. I buku none ou adeu lakou solo-an, idah kameh, ou akohok bundruwe lakou tam in hamon ta lakou tam solo-an. Ya i buku none lakou tam solo-an bwe, idah kameh, ou akohok bundruwe lakou tam i le buku aliy.”
LUK 6:39 Jises ale tiye sahou sokek i toro, “I buku none ari ndramak madan bwe anya kaleheya san ki ta ndramak ari ja madan bwe ale, sebwe uru ma la-uh kameh taku a bolo lek nadeh?
LUK 6:40 Ado kanuhun. Ari ndramak ta akohok tanan basakalawi ndramak ta leheya iy bwe. Arile, i buku none ari ndramak ta akohok tanan asahan buku ndramak ta leheya iy, mwasin.
LUK 6:41 “I buku sah handru, ou nyowonya mutahu kei udu mada nadu tinem ari ja, arile ou batona sobola kei ranah buruwen udu madam bwe nadeh?
LUK 6:42 I buku sah handru, ou tiye ili ta nadu tinem ari ja i buku doh, ‘Nadu tine, jo kandrei mutahu kei ranah buruwen udu madam keme len,’ arile len mari ou batona sobola kei ranah buruwen udu bolo madam bwe? Ou lau ta wasai, ma bwena ou andrei sobola kei udu bolo madam keme len op, ano ou kameh anyolom amwenen handru ta akohok mutahu kei udu mada nadu tinem ari ja eme len.
LUK 6:43 “Kei mwasin badeh, winiyan bato-ou buwa kei ndra-in bwe. Ma kei ndra-in badeh, winiyan bato-ou buwa kei mwasin bwe.
LUK 6:44 Taha winiyan akohok tanan badeh, udu ta buwa kei ari ari ato-ou. Ya malou bobodon ndra-in badeh, winiyan bato-ou buwa kei pik bwe, ma malou kakarik badeh, winiyan bato-ou buwa waen bwe.
LUK 6:45 Idoh badeh, moson i buku doh: Buku none ndramak mwasin ma budon mwasin solo-an idih ereu ndrinen, idon adeh, iy ale amekes kandriyen mwasin ale. Iri lau ndra-in, tiri budon ndra-in solo-an ereu ndrine iri, ma iri ale amekes kandriyen ndra-in le. Tasah, boho ndramak badeh, asehek iri budon solo-an ale idih ereu bolo ndrinen.
LUK 6:46 “Ado aloh jo badeh, ‘Laban, Laban’ ta laleyah le, arile ado ba-en hamon ta sahou tek bwe.
LUK 6:47 Arile, jo winiyan leheya ado ta saba san, i buku ari ndramak keme hawek kanuhun sahou tek, ma iy ki-in hamon ta aliy.
LUK 6:48 Iy badeh, i buku none ndramak a-eh ndru ta asiu tan udu bada ndren boto-on. Ya eme na len ta wadah atohou badeh, batoho-ei asiu tan bala andri bwe. Tasah, ndru-u asiu tan badeh, boto-on.
LUK 6:49 Arile, i buku none ndramak anuhun sahou tek ya eme iy ba-en hamon ta aliy bwe; badeh, iy i buku none ndramak atah asiu tan udu bwele-e ndren laleyah, ya ndru bala andri handru bwe. Ya eme wadah anya katohou, asiu tan taku i andri, ma atokos andra-i labai.”
LUK 7:1 Jises asehek sahou tan i tiri lau doh ano, iy edek eme isos Kapena-um.
LUK 7:2 Eme ndramak batun tinan ta atondrok lau ta bahun udu Kapena-um ale. Iy ma hawe ndramak ta lohowan tan, ma lohowan tan doh badeh, iy aseken iy tinan labai. Arile, iy badeh, ibo sik ma iy anya kimek.
LUK 7:3 Eme ya, batun ta atondrok iri lau ta bahun anuhun Jises ndrame. Ya eme iy suni oro lau-en rayah badu Juwis badeh, ala anya katandra-un Jises keme kamekes lohowan tan dah, kamwenen.
LUK 7:4 Eme oro ala asahan hawe Jises ma oro tiye sahou boto-on i tan anya, “Jises, ndramak ta atondrok iri lau ta bahun doh badeh, mwasin labai, ya iy aseken seben tam.
LUK 7:5 Iy ndramak doh badeh, aseken taha labai, ma iy mene tahi asiu ta tukum tataha.”
LUK 7:6 Ano Jises i hawe oro ili. Ya eme Jises bala mirihik ta asiu bwe le badeh, tinan ta lohowan dah, suni lau rayah ja ala tiye i tan: “Laban, ou sala mirihik ta asiu tan, tasah iy anya, iy ndramak ndra-in, iy winiyan baseken ou ta ala bolo asiu tan bwe.
LUK 7:7 Eme ya iy salin amwenen bame batou ou bwai. Arile iy anya, ou sala, ou asehek le sahou, ya lohowan tan kamwenen ja.
LUK 7:8 Tasah, iy amwenen asehek anya iy badeh, udu bahandra boto-on ta batun tinan ta tondrok lau mari ta bahun, ma iy badeh, tan lau rinek (100) ta bahun ale ado bahandran. I buku iy katiye ki ta ari lau anya, ‘Ou ala,’ idah kameh iy ilih. Ya i buku iy katiye anya, ‘Ou ame,’ idah kameh iy eme. I buku none iy katiye ki ta ndramak ta ndrahu so-ok tan anya, ‘Ou bwidi lahou doh,’ ya idah kameh iy bwidiy.”
LUK 7:9 Ano Jises anuhun sahou doh, manin atur ta aliy. Eme iy tubuni batalan eme hamon, i tiri lau solo-an an hamon tan nane dah badeh, ma iy tiye anya, “Jo katiye tado kamwenen, jo bandruni ari lau badu Isra-el tan budon tinan bala buku iy lau dah bwe.”
LUK 7:10 Ano oro lau nane ala iy suni oro ame dah, ala hamon ala asiu badeh, anyolom lohowan nane doh, ndramwenen ja.
LUK 7:11 Ano udu sese badeh, Jises hawe oro lau tan ma hawe iri lau mari nane are hamon tan badeh, ala kon tinan ari aloh Na-in.
LUK 7:12 Eme iy ili mirihik ta madasan tinan ta ili bolo kon le badeh, iri bwese-ei nadu badih nyau ari badeh, ndramak in bada sau eme. Eme ya iri lau solo-an ale badu kon tinan an hawen ame. Badih nyau doh badeh, nadun mwan ari le doh, kabwe.
LUK 7:13 Eme Laban Jises anyolom iy ma iy tikisi badih nyau dah, tinan labai. Ya eme Jises tiye i tan, “Balem sasin.”
LUK 7:14 Ano Jises edek ili badeh, atehei minen i bwele-e ndramak nane, iri su-i iy ma bwese-ei iy dah, eme iri ado rasi. Ano Jises tiye i ta ndramak loweu nane dah, anya, “Jo tiye tam, ou amak!”
LUK 7:15 Eme ndramak loweu dah, suri iy ma iy asehek sahou. Ano Jises atehei iy i hawe tinen.
LUK 7:16 Eme iri lau mari badeh, boho iri asak ma iri atudun Kindrei. Ma iri anya, “Propet tinan ndrasahan bolo taha. Eme Kindrei badeh, ndrame ta aseben iri lau tan.”
LUK 7:17 Eme ya sahou ta nyala Jises badeh, aseker ili bolo Judiya ma hawe aseker ili bolo kon tinan mirihik ale.
LUK 7:18 Ano, oro lau ta Jon ame asehek nyalan, ta lakou mari oro nane anyolom.
LUK 7:19 Eme Jon luhi uru lau tan la-uh ame, ano iy tiye i turu, “Ah kala hawe Laban badeh, kandremenya iy ki buku doh, ‘Sebwe ou ndramak aloh Krais, Kindrei mene tandrakan ta iy kameh suni iy eme. Buku none bwe, sebwe ahi kabe-en ndramak ari ja nadeh?’”
LUK 7:20 Eme uru ame hawe Jises, ma uru anya, “Jon ta alomwa badeh, suni aru ame dah ta ndremenya ou, ‘Sebwe ou ndramak aloh Krais, Kindrei mene tandrakan ta iy kameh suni iy eme. Buku none bwe, sebwe ahi kabe-en ndramak ari ja nadeh?’”
LUK 7:21 Na len doh badeh, amwenen ta Jises amekes sik udu tiri lau iu, hawe amekes iri lau malawin ndra-in udu la-u iri iu ale. Ma hawe iri lau batou kon bwe, atou kon ja.
LUK 7:22 Eme Jises asumon boho oro i buku doh, “Ah kala hamon katiye ta Jon ta saba lakou ah ndratou, ma ndranyolom dah: Iri lau mada iri bwe, iri atou kon ja, ya iri kati iri ndra-in iri adek ja, ya iri lau lepra udu tiri, bada iri asahan amwenen, ya iri lau ndranye iri banuhun kon bwe, iri ndranuhun kon ja, ya iri lau ndramak, iri ndrasahan ndrame awas ja, ma hawe sahou ta nyala sahou mwasin badeh, ndratiyaniy ndrala bolo iri lau, lakou bwe.
LUK 7:23 Eme ya, sekesek ki toro lau heh le nane bataku ta budon toro bwe, tasah ta jo le.”
LUK 7:24 Ano uru lau ta Jon ma la-uh au ala hamon. Eme Jises asehek i tiri lau ta nyala Jon, “Buku sah, aha mene ala kon lomale an, anya katou sasah? Ari bwidiu awa-is nyukunyok ereu bolo jor neh? Sebwe, bwe nadeh!
LUK 7:25 Ya ado ala atou sah? Ndramak ari atehei awin mwasin ereu badan? Bwe oh! Iri lau ta adeu kolau hawe awin nyikilikin badeh, ado kon ta ndrahu kabin.
LUK 7:26 Eme ya ado ala anyolom are lau? Sebwe ado anya kala kanyolom propet? Ehe, ado atou iy, ma jo katiye tado kamwenen, iy badeh sakalawi iri lau mene ta atiye boho Kindrei ndra-au ndra bwena.
LUK 7:27 Eme sahou torowenei udu bolo buk ndrabun tiye i buku doh, ‘Jo kameh suni ndramak ari ewek bwena tam. Iy kameh atehe san tam.’
LUK 7:28 Eme jo katiye kamwenen kewek tado, Jon badeh, sakalawi iri lau mari tine iri tuwi iri ereu kon munyak eme kala dah. Arile, are lau nyaran bwe, udu baha tondrok ta Kindrei eme kameh sakalawi nyara Jon ja.”
LUK 7:29 Eme iri mwan ma badih hawe iri lau ta akohok luk ta takis anuhun sahou Jises asehek ma oro barala tanan ai, sahou ta Kindrei badeh, mwasin handru. Tasah, oro mene, Jon ndranyu oro.
LUK 7:30 Arile, iri Parasi hawe iri lau ta tanan ta kandriyen tiri Juwis ndra-au mene, baseken budon ta Kindrei bwe, ya eme Jon badeh, banyu iri bwe.
LUK 7:31 Eme iy asehek ili le, “Ya jo kasehek iri lau na len dah ki buku sah handru? Iri ki buku are handru?
LUK 7:32 Iri badeh, i buku none le iri nah nadu bwisik manyah areu mada ba-en. Ra-on arah i ta ra-on i buku doh, ‘Aso oloh bala eu ta molak ewek tado, arile ado bada mana bwe; ya aso ayah wari ta kabek, arile ado bataya bwe.’
LUK 7:33 Tasah, kala Jon mene eme, iy abeles iy ta nyamon ta iy kedeu budon tan boto-on kili ta Kindrei, ma iy ba-un gwa waen bwe, eme ado anya, iy badeh, malawin ndra-in ereu la-un!
LUK 7:34 Ya, jo Nadu Ndramak Awas, jo eme aimon nyamon ma a-un gwa waen hawe iri lau. Eme ma ado asehek jo i buku doh, ‘Aden, ado katou iy ndramak ta aimon nyamon tinan, ma iy ndramak ta a-un gwa waen solo-an labai. Iy ndramak ndra-in labai. Tasah handru iy amekes kawas hawe iri lau ta akohok takis, ma iri lau ba-en hamon ta batanau ta Moses bwe?’
LUK 7:35 Ehe, iri amekes sahou i buku doh. Arile, are lau mwan ma badih ale idih ta tanan mwasin ta Kindrei, ya iri lau kameh atana iri buku none ndramak doh asahan nadu Kindrei handru.”
LUK 7:36 Ano Parasi ari eme badeh, tiye Jises na beyeh ili aimon nyamon ili asiu tan. Eme iy ili manyah, udu andri ndrahu nyamon udu asiu ta Parasi dah.
LUK 7:37 Eme ya badih ari ta madasan udu kon tinan doh badeh, anuhun Jises badeh, udu asiu ta Parasi aimon nyamon. Eme iy andrei bwisi ndrau ari suluw,
LUK 7:38 ya eme iy ili ales udu hamon ta kati Jises eden, ma amekes wa-i madan i kona katin. Ano iy o-ou kona kati Jises na lami batun, ano iy aluh i andri atehei no-on i kati Jises. Ano ja, iy asolou ndrelekei i bwele-e katin.
LUK 7:39 Ya eme ndramak nane andrei Jises i asiu tan doh, anyolom badeh, iy lomondra udu budon tan anya, “Ki buku none ndramak kede-eh, ki ari propet, idah nane, iy ndratona i badih anyokar katin kede-en adeh? Ma iy ndratanan badih doh badeh, ta madasan adeh.”
LUK 7:40 Eme Jises tiye i ta Parasi doh anya, “Saimon, jo tek sahou udu tam.” Eme ya Saimon anya, “Sasah, ndramak ta leheya, ou tiye tek.”
LUK 7:41 Eme Jises anya, “Uru lau la-uh badeh, andrei luk rayah ta ndramak ari atehei i mine uru. Iy ari badeh, andrei rawa (K100), ya iy ari ja, andrei rinek (K10).
LUK 7:42 Eme udu, uru ma la-uh badeh, winiyan batehei saluwe luk ta ndramak doh, bala hamon bwe. Ya eme tama luk doh, anya ndri-iy ai, bale ah kamaniy ai. Eme ya, Saimon, ou abudon are handru kameh aseken tama luk tinan labai.”
LUK 7:43 Eme Saimon anya, “Ta budon tek badeh, ndramak nane andrei luk solo-an.” Eme Jises anya, “Ou seleya badeh, amwenen.”
LUK 7:44 Ano Jises tubuni batalan i ta i badih dah, ano Jises tiye i ta Saimon, “Ou ndratou badih dah amekes lahou dah? Jo eme asiu tam nane, ou badeu gwa ta sikine katik bwe. Arile, iy badeh, sikine katik na wa-i madan ma owei abosar na lami batun.
LUK 7:45 Ou badeh, basekesek jo bwe, arile jo eme asiu le badeh, badih doh, baruwani no-on ta katik bwe le.
LUK 7:46 Ma ou badeh, basolou suluw bala batuk bwe, arile iy badeh, asolou suluw i kona katik.
LUK 7:47 Eme jo katiye tam kamwenen, karei tan mari badeh, ndrasikine ndrano ndra-au, tasah iy badeh, leheya kandriyen ta tikisiy tinan labai. Ya eme, are lau bala tanan ta iy, bamani karei tan ba-au bwe, iy ale winiyan batikisi ari ndramak bwe le.”
LUK 7:48 Ano Jises tiye i ta badih dah, “Kabwe, karei tam ndrasikinei ndra-au.”
LUK 7:49 Eme iri lau rayah nane aimon nyamon hawe oro asehek i toro ari ari anya, “Are ndramak kede-eh? Iy leheya anya iy winiyan sikine karei kede-eh?”
LUK 7:50 Ano Jises tiye i ta badih dah ja, “Ou au ma ou sabwerei, tasah budon tam handru le, sebenei ou.”
LUK 8:1 Eme idoh ano badeh, Jises edek ili eme bolo iri kon tinan mari, hawe ili bolo iri kon bwisik mari, atiye sahou mwasin ta Kindrei aso-ok iri lau mwan ma badih, ma iy aso-ok iri kame baha tondrok mwasin ta Kindrei. Ma hawe oro lau tan ma ronoh la-uh badeh, ado hawen,
LUK 8:2 ma hawe oro badih rayah ale mene Jises amekes sik hawe malawin ndra-in udu bwele-e oro iu badeh, ado hawen ale: Oro badeh, Mariya badu Makdala, iy mene ale malawin ndra-in ma ndro taloh ado la-un ame len;
LUK 8:3 ya Jo-ana, udu ndramak ta atondrok asiu ta Herot nyaran Kusa; ya Susana hawe badih rayah ja. Oro badih doh badeh, adek hawe oro adeu lakou toro amwenen i ta sisih, akohok luk ta aseben oro.
LUK 8:4 Ano udu, iri lau solo-an badu kon tinan ari ari atukum ame hawe Jises, eme iy tiye sahou sokek ari i tiri i buku doh:
LUK 8:5 “Na len ari badeh, ndramak ari ili sabara badu wit ili bolo bilin. Iy akeh ili, badu wit ra-on taku in san; eme ya iri lau adek la-un ma hawe iri sirih atah ame aniy.
LUK 8:6 Ya rayah badeh, taku in bwele-e bek, ano eme apwak, ano awa-is, tasah munyak sese le in bwele-en.
LUK 8:7 Ya rayah ja badeh, taku udu bolo malou bobodon nane ateh eme loken, ma tubuluhi wit nane ma iy bato-ou buwan bwai.
LUK 8:8 Ano rayah ja badeh, taku ili bolo ndren mwasin. Eme ateh eme loken, ato-ou buwan solo-an; ya ra-on ja badeh, ato-ou rinek (100).” Eme iy tiye doh ano badeh, iy aloh anya, “Ou are lau ndranyem udu aliy, ou anuhun.”
LUK 8:9 Ano oro lau tan ndremenya Jises, ta moso sahou sokek nane doh.
LUK 8:10 Eme iy anya, “Kindrei aseken ado lau tek katanan iri sahou mene aton ta nyala tondrok ta Kindrei. Arile, i tiri lau buku liliy badeh, jo asehek i san ta sahou sokek. Eme ya, ‘Iri kameh anyolom anyolom ja, arile iri winiyan baseleyani bwe; ya iri anuhun amwenen, arile batu iri winiyan baleu ta aliy bwe.’”
LUK 8:11 Ano Jises tiye, “Sali sahou sokek asah i buku doh: Buwa wit badeh, moson i buku sahou ta Kindrei.
LUK 8:12 Ya oro buwa wit taku udu san badeh, i buku none lau rayah ai. Oro doh badeh, anuhun sahou ta Kindrei, arile balik eme kuhi iu sahou mwasin Kindrei tahiy ereu budon toro, eme ya oro satehei budon toro handru sa-en ta sahou. Koro-an sahou doh, kasebenei koha oro kudu mwasin.
LUK 8:13 Ya buwa wit taku udu bwele-e bek badeh, i buku none lau rayah ai. Oro doh badeh, sekesek ta anuhun sahou ta Kindrei, arile kandro oro badeh, barih bala andri handru bwe. Ya oro badeh, atehei budon handru, arile bado luwen bwe, eme ya buku none ndrine sen asahan deh, ndra-i asahan toro badeh, oro taku.
LUK 8:14 Ya buwa wit taku udu bolo malou bobodon badeh, i buku none oro lau doh, anuhun sahou ta Kindrei, arile oro ado badeh, abudon boto-on ta lakou solo-an badu kon munyak. Ya oro abudon boto-on labai ta atukum iri luk, ma hawe bale oro asin ta kandriyen badu bada oro tinan labai. Eme ma, oro badeh, buni ta budon bwe.
LUK 8:15 Arile, buwa wit taku udu munyak mwasin badeh, i buku oro lau anuhun sahou ta Kindrei, eme oro tawi sahou doh, udu ndrine oro ihis labai, ma udu le udu, oro ato-ou sali oro mwasin.
LUK 8:16 “Ki buku ari ndramak katelem sun, iy winiyan batone bado bolo sabok bwe, ma iy ale winiyan batehei bala baha sau bwe. Iy kameh suriniy udu loken. Ya, i buku none are lau eme anyolom kameh iy eme asiu.
LUK 8:17 Eme ya lakou mari aton badeh kameh asahan eme lewan. Ma saba lakou tubuluhiy kameh asahan eme lewan ale.
LUK 8:18 Eme ya, ou lomondra kamwenen ta sahou ou anuhun ma an hamon ta aliy. Ndramak tanan tan mwasin udu aliy, iy kameh akohok tanan mwasin labai ja i la-un. Ya eme, are lau anya iy tan tanan sese udu aliy, idah kameh, tanan sese le doh kameh kuhiy mari iu.”
LUK 8:19 Ano, tine Jises hawe nadu tinen oro ame anyolom iy, arile lau solo-an labai ya oro winiyan bala mirihik tan bwe.
LUK 8:20 Eme ndramak ari ili tiye tan anya, “Jises ei, tinem hawe nadu tinem oro ales ado manan, anya katou ou.”
LUK 8:21 Eme Jises tiye i tan anya, “Tine hawe oro nadu tine handru asah oro are hawek anuhun sahou ta Kindrei, ma oro amekes lahou ta aliy dah.”
LUK 8:22 Ano na len ari ja badeh, Jises tiye i toro lau tan anya, “To ka-au kala kapa gwa bilisiu kodo-oh.” Eme oro sandroh a ndron ra-ei badeh, ma oro alakak ala bilisiu.
LUK 8:23 Eme oro alakak ala badeh, Jises ndramadin. Eme laba jor atohou eme andri bwele-e gwa li, ya bayau i tinan ma eme ndron, eme ya oro akohok andra-i labai.
LUK 8:24 Eme oro lau tan ala badeh, mete-ei iy anya, “Laban, Laban, to dah kameh atuh ma amak ai!” Ano Jises suri iy eme loken, tiye sahou boto-on i ta jor hawe bayau, ma jor amondrei hawe bayau ameres.
LUK 8:25 Ano iy tiye i toro, “I deh, budon tado handru ndraheh?” Eme oro anoh, hawe mani oro atur, ma oro tiye i toro ari ari anya, “Iy are lau handru kede-eh? Iy tiye sahou boto-on le badeh, jor hawe bayau anuhun bohon!”
LUK 8:26 Ano, oro alakak ala loboho Gerasa. Kon doh, udu bilisiu ta Galili.
LUK 8:27 Eme Jises sandroh i babi le badeh, ndramak ari badu kon tinan doh, iri malawin ndra-in udu la-un eme hawen. Ya ndramak doh badeh, ndra bwena ndra-au badeh, iy ndrakane le. Iy badeh, ari asumwen bwe, asumwen badeh, munu bek ta ndrahu lau amak ala aliy.
LUK 8:28 Eme iy atou Jises le badeh, iy anyar ma aluh i andri udu mada Jises ma iy aloh i tinan i tan anya, “Jises, Nadu Kindrei badu loken, ou anya amekes sasah keme tek? Ndri-iy, ou samekes sisi-in same badak!”
LUK 8:29 Iy aloh i buku doh, tasah Jises badeh, ndratiye sahou boto-on ndra ta malawin ndra-in ta anya keme len. Ya malawin ndra-in badeh, ndrahas ndrado la-un luluwen labai. Iri sawei minen hawe katin na sen, ma lau ta ndrokei atondrok iy, arile iy mindrindri sen, eme malawin ndra-in lolowa iy ili kon lomale an, ili bolo ndrokowa bek.
LUK 8:30 Eme Jises ndremenya iy, “Nyaram are lau?” Eme iy anya, “Nyarak badeh, Solo-an.” Tasah, malawin ndra-in solo-an ndrado bwele-en badeh nyaran bwe.
LUK 8:31 Eme oro asehek sahou ta tikisiy i ta Jises i buku doh, “Ou satikahei aso sala bolo lek ta isi.”
LUK 8:32 Eme udu loboho doh badeh, bou rakou aimon nyamon are ka-u mandrei. Eme oro tiye sahou ta tikisiy i ta Jises anya, “Ou tikahei aso kala bwele-e iri bou nane doh.” Eme ya Jises tiye le badeh,
LUK 8:33 oro malawin ndra-in are la-un ame len, ma a bwele-e iri bou. Eme oro sakaliye are bwele-e mandrei ame andri ala bolo gwa li, ma oro amak.
LUK 8:34 Eme oro lau ta atondrok iri bou anyolom lakou doh asahan ma oro atobwak au a kon tinan ma hawe a lokei asehek i tiri.
LUK 8:35 Ya eme iri lau ala anyolom. Iri ala asos hawe Jises le badeh, iri atou iy ndramak nane malawin ndra-in mene udu la-un ndramwenen ja. Iy ndratani kolau hawe budon tan ndramwenen ya iy manyah udu kati Jises. Eme ma iri anoh.
LUK 8:36 Ano iri lau nane anyolom dah, ala asehek tiri lau ta nyala ndramak mene malawin ndra-in udu la-un badeh, ndramwenen ja.
LUK 8:37 Ano iri lau badu loboho kon Gerasa tiye Jises ta ki-iu, tasah iri badeh, anoh boto-on tan. Eme ma Jises sandroh i ndron ma anya ki-iu ai.
LUK 8:38 Arile ndramak nane malawin ndra-in udu la-un eme tiye Jises ta iy anya ki hawen. Arile Jises eme tiye iy iu, ma asehek i tan i buku doh,
LUK 8:39 “Ou ala kon asehek tiri ta nyala lahou tinan Kindrei ndramesekei ndrawek tam.” Eme ndramak nane dah, iu ili bolo kon tinan mari doh asehek ta nyala lahou tinan mene Jises ndramesekei i tan.
LUK 8:40 Ano Jises eme hamon le badeh, iri lau solo-an ame sekesek iy, tasah iri mene abe-en iy.
LUK 8:41 Ano, ndramak batun ari badu asiu ta ndrahu tukum tiri Juwis nyaran Jairus, iy eme aluh i andri udu kati Jises. Ano iy tiye sahou tikisiy i ta Jises i buku doh, “Ou ame asiu tek op.”
LUK 8:42 Tasah, nadun ari le badih, jaha tan badeh, ronoh la-uh, ya iy anya kimek. Eme Jises edek ili badeh, kon ndraso tiri lau ma sese le iri kandribitini iy.
LUK 8:43 Ya udu bolo iri nane doh badeh, badih ari udu aliy ya sik ndra badeh, udu tan winiya jaha ronoh la-uh. Eme ari lau badeh, winiyan bamesekei iy bamwenen bwe.
LUK 8:44 Ya eme iy badih nane dah, sokohani iy i ndrokowa iri lau ili in hamon ta Jises, eme iy tawi awin tan, ma se nawin bwe, sik ndra tan iu ma ano mara-ei.
LUK 8:45 Eme Jises ndremenya, “Are lau tawi jo?” Ya eme iri bisiniy, ya eme Pita tiye i tan anya, “Laban, iri lau sola nane ahas badam badeh.”
LUK 8:46 Arile Jises tiye, “Boto-on badu badak ewek len badeh, jo atona ndramak ari tawi jo.”
LUK 8:47 Ano badih dah ndraseleyani iri lau badeh, ndratanan, eme iy eme morohani iy i andri kati Jises. Eme ma udu mada iri lau mari nane iy asehek ta saba katin handru iy ateu bada Jises hawe i buku sah iy amwenen ja.
LUK 8:48 Ano Jises tiye sahou i ta badih nane dah, “Nadu badih, ou atehei budon tam handru in tek, ma mesekei ou asahan amwenen. Ou au ma ndrinem kamunum.”
LUK 8:49 Eme iy asehek sahou kahis le, ndramak ari badu asiu ta ndramak ta batun eme tiye i ta Jairus; “Nadum badih ndramak. Ou sasehek sahou ja sala ta ndramak ta leheya badeh, ndri-iy.”
LUK 8:50 Eme Jises anuhun le badeh, iy tiye i ta Jairus, “Ou sanoh; budon tam handru ki-in tek, ma idah kameh, nadum amwenen ja.”
LUK 8:51 Ano iy eme asahan asiu ta Jairus badeh, iy batiye ari lau bala hawen bala asiu bwe. Pita le, Jon le, Jemis le hawe taman uru tinen le badeh, ala bolo asiu hawen ai.
LUK 8:52 Ya iri lau badeh, aden hawe iri taya ndranyen. Eme Jises anya, “Aha kandru-uk, iy bamak bwe, iy badeh, amadin le oh.”
LUK 8:53 Eme iri ehe-en iy, tasah iri tanan badih badeh, ndramak handru.
LUK 8:54 Arile, Jises tawi mine badih imek dah, ma iy tiye, “Naduk, ou amak!”
LUK 8:55 Eme kohan handru asahan ma iy suri iy. Ano ma Jises tiye oro adeu nyamon i nan.
LUK 8:56 Eme ya taman uru tinen badeh, boho uru asak, arile Jises tiye turu i buku doh: “Ah badeh, sasehek ta ari lau, ndri-iy, ta nyala lahou asahan dan, ndri-iy labai.”
LUK 9:1 Ano, Jises luhi oro lau tan ma ronoh la-uh ame hawen, ano iy edeu boto-on i toro, ta atikah iri malawin ndra-in ka-au hawe edeu boto-on i toro, ta amekes iri lau sik udu tiri kamwenen.
LUK 9:2 Ano, iy tiye oro au ala atiye sahou mwasin, ta nyala tondrok ta Kindrei, ma kamekes iri sik kamwenen.
LUK 9:3 Eme iy tiye i toro anya: “Ado sakohok kandro, ya ado sakohok kohei, ya ado sakohok jabi ramen, ya ado sakohok luk, ma hawe ado sakohok ari kolau ja, sawek hawe ado, na len ta tekedek tado.
LUK 9:4 Ya, i buku none ado kala kon tinan, ya buku ari lau kasumon ado badeh, ado kare asiu tan le kado gwek, winiya le ado barame len ta kon tinan badeh;
LUK 9:5 Ya, i buku none ado kala, ya iri lau basekesek ta akohok ado ala asiu tiri bwe, ya buku ado anya ka-au, ado katuruhi kasu on ma ndren ta kati ado ki-iu, ma ado ka-au. Ya eme ta kalem doh iri kalomondra ta kandriyen ndra-in tiri.”
LUK 9:6 Eme oro ala kon ari ari, ala aliy atiye sahou mwasin, ma amekes sik tiri lau badu heh, badu heh, iu.
LUK 9:7 Eme ya Herot Antipas ndramak ta atondrok Galili badeh, anuhun nyala lahou mari doh. Eme ndrinen badeh, amaha ta aliy, tasah lau rayah asehek anya, Jon ndramak ja ereu bolo lek ndrame loken,
LUK 9:8 ya iri rayah anya ja, Alaija ndrasahan ja, ma hawe iri rayah anya ja, ari propet badu bolo oro bwena mene ndramak ja.
LUK 9:9 Arile bwe, Herot anya, “Jo mene ndramwetehei batu Jon o! Ya are lau handru ja asahan dah?” Eme iy badeh, anya kanyolom ndramak doh.
LUK 9:10 Ano, oro lau tan ame hamon, ya oro asehek nyala Jises ta lakou mari oro amekes. Ano iy kuhi oro ala hawen ma oro ala kon tinan ari aloh Betsaida.
LUK 9:11 Arile, iri lau badeh, ndrandrei budon tan, eme iri an hamon tan ala. Eme iy tiye sahou sekesek i tiri, ano iy asehek sahou ta nyala tondrok ta Kindrei, ma amekes iri lau sik udu tiri amwenen.
LUK 9:12 Ano kon abeyeh, oro lau tan ma ronoh la-uh ame tiye i ta Jises i buku doh, “Ou tiye iri lau kede-eh ka-au kala kon mirihik ma ndrahu iri kasilah niri nyamon, ma kasilah ndrahu iri ta matinou. Tasah, to dah bare kon bwe, to dah are kon laleyah!”
LUK 9:13 Eme Jises tiye i toro, “Ado kadeu niri nyamon.” Eme oro anya, “Aso badeh, nyamon bwe, udu kada-ah badeh, limeh jabi ramen le, hawe la-uh ni. Ki buku none to kala kasih sola ja, keme hawen badeh, winiya iri ai.”
LUK 9:14 Iri lau badeh, i buku lamawa (5,000). Arile, Jises tiye i toro lau tan, “Ado badeh, katukumwi iri lau kase, lomonoh (50) kase, lomonoh (50) kase, ki le buku doh.”
LUK 9:15 Eme oro lau tan mesekei i le buku bohon, ya eme oro tiye iri lau badeh, kamanyah ka-en andri.
LUK 9:16 Ano iy andrei jabi ramen ma limeh, hawe ni ma la-uh nane dah eme, ano iy anyolom iu i loken bolo kandrah, ma iy edeu wurah i ta Kindrei. Ano iy boso-ei jabi ramen dah. Ya eme iy edeu ili mine oro lau tan. Eme oro ala adeu ili winiya iri lau mari.
LUK 9:17 Eme iri aimon ma ndrine iri idih. Ya tikibwah tiri erah, eme oro lau tan anyuhiy i bwak badeh, asahan ronoh la-uh.
LUK 9:18 Ano na len ari ja badeh, Jises hawe oro lau tan le ala rasi ja asolom. Eme iy ndremenya oro lau tan, “Iri lau anya jo are lau handru?”
LUK 9:19 Eme oro anya, “Iri rayah anya ou Jon ta alomwa, ya iri rayah anya ja, ou Alaija; ma iri rayah anya ja, ou badeh, oro ari propet mene ndramak ndrame loke ja.”
LUK 9:20 Eme Jises ndremenya oro, “Ya ado amwenen anya jo are lau?” Eme Pita asumon iy i buku doh, “Ou badeh, Krais, Kindrei suni ou ame dah.”
LUK 9:21 Ma eme Jises batanau oro boto-on ta oro badeh, sasehek ta ari lau ndri-iy.
LUK 9:22 Ano iy tiye, “Nadu Ndramak Awas kameh akohok sisi-in solo-an labai, ma iri lau tinan areu bwena, hawe iri lau tinan tiri pris, ma hawe iri lau ta leheya kandriyen tiri Juwis kameh baseken iy bwe. Ma idah kameh, iri adai iy imek, ya len taloh ano iy kameh amak ja.”
LUK 9:23 Ano iy tiye i toro mari: “Buku none ari ndramak anya ki-in hamon tek, mwasin, iy kamani so-ok tan mari, ya iy kabwese-ei kei tondreh tan na len mari. Ya iy ki-in hamon tek.
LUK 9:24 Tasah, buku none ari ndramak anya katawi kohan kudu, kohan kameh ano. Arile, buku none ari ndramak abudon jo ya kohan ano, iy kameh winiyan andrei kohan ja.
LUK 9:25 Ya, buku none ari ndramak kuhi lakou mari badu kon munyak, ya iy kimek, iri lakou doh kameh sebenei iy i buku sah handru?
LUK 9:26 Ou are lau bwilim ama jo ma ta sahou tek, Nadu Ndramak Awas kameh bwilin ama tan ale, i buku none len hamon kameh, iy eme ma lomadan tan, hawe lomadan ta taman, ma hawe lomadan tiri angelo, lau ndrabun badu loken.
LUK 9:27 Jo asehek sahou handru ewek tado. Lau ra-on ales ereu bolo to dah kameh winiyan bamak bwe, ya iri kameh anyolom tondrok ta Kindrei.”
LUK 9:28 Jises asehek sahou tan ano badeh, udu, ben ndru la-uh ano, iy kuhi Pita, Jon ma hawe Jemis a hawen, ma oro ala bwele-e mandrei ala asolom.
LUK 9:29 Eme iy asolom le badeh, badan asahan i randrah labai, bwilin anya ma awin tan badeh, nyikadin tinan labai, anya i buku kalik.
LUK 9:30 Eme oro atou Moses uru Alaija asahan ma lomadan badu loken ame, asehek sahou hawen ta nyala imek kameh iy bwese udu Jerusalem.
LUK 9:32 Ya Pita hawe Jon uru Jemis badeh, ndramadin tuk, eme oro amak badeh, oro anyolom lomada Jises hawe lomada uru lau nane ales are hawen dah.
LUK 9:33 Eme ya uru lau nane are hawe Jises anya ka-au le badeh, Pita tiye i ta Jises i buku doh, “Laban, mwasin handru ta aso are ndra kada-ah, ya aso katahi taloh mandron kudu dah, ra-em tam, ra-em ta Moses, ma ra-em ta Alaija.” Arile, Pita bala tanan sasah iy asehek doh, bwe.
LUK 9:34 Ya sahou ta Pita udu ndra bohon kahis le badeh, asi kandrah seselek eme anya katubuluhi oro, ma oro anoh.
LUK 9:35 Eme ya sahou ari asahan bolo asi kandrah nane asehek i buku doh, “Idah naduk handru, jo suni iy ewek; ya ado kanuhun sahou tan.”
LUK 9:36 Eme sahou doh ano le badeh, oro atou Jises le ari udu ndrahun. Ya eme oro badeh, tawi le udu budon toro, oro basehek nyala lakou nane udu bolo len doh mene oro atou, bwe.
LUK 9:37 Ben ari oro are bwele-e mandrei, ano oro are mandrei ame andri, ano len ari ja badeh, lau solo-an labai ame hawe Jises.
LUK 9:38 Eme ndramak ari udu bolo iri aloh, “Ndramak ta leheya, jo naduk ari le dah, jo aseken ou ame anyolom iy se.
LUK 9:39 Iy nah doh, malawin ndra-in udu la-un, ya i le mani tur malawin ndra-in kameh amekes iy arah. Ano, iy totoreh hawe bubusi bohon kameh atau; ma amekes badan kameh isi udu gwek, luluwen labai.
LUK 9:40 Eme jo badeh, tiye oro lau tam rayah ta katikahei malawin ndra-in udu la-un doh ki-iu, arile oro winiyan bwe.”
LUK 9:41 Eme Jises asehek sahou i buku doh, “Ado lau mwan ma badih batehei budon handru bwe, budon ma kandriyen tado bamwenen bwe. Len sabe kameh jo kereu hawe ado, ano ado barala tanan boto-on ta Kindrei? Ou tiyani nadum keme dah.”
LUK 9:42 Ano nah dah, edek eme hawe Jises le badeh, malawin ndra-in mudi iy i andri bwidi iy totoreh, ma bubusi bohon atau. Eme Jises ibolosen i ta malawin ndra-in udu la-un iu, ma iy amwenen ja. Eme iy atehei nah dah, i hawe taman.
LUK 9:43 Eme mani iri lau mari atur labai, ta boto-on ta Kindrei. Ya eme iri lau boho iri asak kahis le ta lakou nane Jises amekes, eme ma Jises tiye i toro lau tan,
LUK 9:44 “Ado badeh, katehei ndranye ado kamwenen ki-in ta sahou jo anya kasehek tado: Iri kameh atehei Nadu Ndramak Awas ili mine iri lau ta atondrok.”
LUK 9:45 Arile, budon toro baleu ta sahou tan nane bwe. Tasah, sahou dah badeh, ndraton ma oro bandrei bwe, ma oro ale badeh, anoh ta ndremenya Jises ta aliy.
LUK 9:46 Ano, oro lau ta Jises andres oro, ta are kudu bwele-en toro.
LUK 9:47 Eme Jises badeh, ndratanan budon toro, eme iy andrei nadu nah ari nadu bwisik eme, ales udu kabeden.
LUK 9:48 Ano iy tiye i toro, “Ya buku none ari ndramak abudon jo, ya iy aseben ari nadu nah bwisik buku nah le dah, badeh iy aseben jo. Ma are lau oro aseben jo, badeh oro aseben Kindrei iy nane suni jo eme dah. Tasah, are lau nyaran bwe udu bolo ado kameh, iy doh kameh nyaran i tinan labai.”
LUK 9:49 Eme Jon anya, “Ndramak ta leheya, aso atou ndramak ari atikah malawin ndra-in eme len na boto-on ta nyaram, ya eme aso anya kabarah iy, tasah iy badeh, ari taso bwe.”
LUK 9:50 Eme Jises anya, “Ado sabarah iy, tasah are lau tan bahun tado bwe, iy badeh, kawas tado ma badu hawe ado.”
LUK 9:51 Jises badeh, tanan, mirihik kameh Kindrei akohok iy udu Jerusalem iu i kandrah. Eme ya mesekei budon tan badeh, abadok ta ili Jerusalem.
LUK 9:52 Eme iy suni iri lau rayah ta tiye sahou ala bwena, ala kon Samariya ta lowosa lakou mari lewan;
LUK 9:53 Iy ili, arile iri lau badeh, baseken iy bwe, tasah tekedek tan doh nane ta ili Jerusalem labai.
LUK 9:54 Eme Jemis uru Jon anuhun kandriyen doh badeh, eme uru ndremenya Jises, “Laban, ou aseken to kaloh jih udu kandrah keme andri kasulumwi iri?”
LUK 9:55 Arile, Jises tubuni iy eme, iy tiye boto-on i toro anya, “Bwe.”
LUK 9:56 Eme oro au a kon ari ja.
LUK 9:57 Eme oro adek san ala badeh, ndramak ari tiye i tan anya, “Jises, loboho heh, ou ala aliy, jo kameh in le hamon tam.”
LUK 9:58 Eme Jises tiye i tan i buku doh, “Iri mwi badu lokei, munu iri udu aliy, ya iri sirih ale awi iri ta matinou udu aliy. Arile, jo Nadu Ndramak Awas badeh, ari ndrahu matinou tek, bwe.”
LUK 9:59 Ano, Jises tiye sahou i ta ndramak ari ja anya, “Ou ame an hamon tek.” Eme ndramak dah anya ja, “Laban, jo kili kihi tama op. Ano jo barawek bara-en hamon tam.”
LUK 9:60 Arile Jises tiye i tan ja, “Iri lau amak badeh, kado gwek. Idah kameh, iri lau badu hawe iri barala bara-eh iri. Arile, ou badeh, adek ala atiye sahou ta nyala tondrok ta Kindrei.”
LUK 9:61 Ano ja, ndramak ari ja tiye anya, “Laban, jo kameh in hamon tam; arile jo kili katiye tanan ta lowak oro op.”
LUK 9:62 Eme ya Jises tiye i tan, “I buku none are lau kapou ndren ta bilin, ya iy bamesekei bano bwe, badeh, iy atalei labai, ta amekes lahou badu baha tondrok ta Kindrei.”
LUK 10:1 Udu hamon ta idoh ano badeh, Laban tiye i toro lau ma ndro tonoh la-uh (72) le, ano iy suni uru la-uh, la-uh a se, ala mwena tan ala bolo iri kon tinan ari ari, ma hawe iri kon kameh iy ilih aliy.
LUK 10:2 Ma iy tiye i toro anya, “Ado katou, nyamon solo-an labai ndruni in bolo bilin, arile lau solo-an bwe, ta gok ta akohok nyamon nane doh bwe. Eme ya ado kasolom ki ta Laban ta kati bilin, ta iy kasuni lau kala katukumwi iri nyamon tan.
LUK 10:3 Eme ado kala! Jo suni ado i buku iri nadu sipsip ala bolo iri mwi badu lokei.
LUK 10:4 Ado badeh, sakohok kohei ta ndrahu luk sawek, ya ado sakohok kohei ta ndrahu lakou sawek, ya ado badeh, sakohok ku-i kati ado ale; ya i buku none ado adek ala badeh, ado sare rasi sasumon ma sasehek sahou luluwen hawe ndramak. Ado badeh, kadek kales le kala.
LUK 10:5 Ya i buku none ado anya kala ra-em asiu, badeh, ado katiye anya, ‘Ado mwasin? Nyosowan udu la-u ado.’
LUK 10:6 Ya i buku none are ndramak mwasin udu aliy, iy aseken ado badeh, mwasin tado kudu tan kudu gwek; ya i buku none ndramak baseken sahou mwasin tado bwe, ado kakuhi sahou mwasin nane keme hamon ja.
LUK 10:7 Ya i buku none iri lau mwasin ado aliy, asumon ado badeh, ado kala kado asiu toro kado gwek; kaimon sasah, ka-un sasah oro anyohan ado. Tasah, ndramak ibo gok, iri lau mwan ma badih kameh anyohan iy na nyamon, ma adeu sihinen i tan ta gok. Ado badeh, sasar sala mada asiu ra-em sala ra-em.
LUK 10:8 “Ya, buku none ado ala bolo kon tinan, iri kasumon ado, saba nyamon iri adeu badeh, ado kaimon le.
LUK 10:9 Ma ado kamekes iri lau sik udu tiri kamwenen, ma hawe ado katiye tiri, ‘Tondrok ta Kindrei badeh, ndrame mirihik tado.’
LUK 10:10 Arile, ki buku none ado kala kon tinan, ya iri baseken ado bwe, badeh, udu ndra bolo kon tinan nane badeh, ado katiye anya,
LUK 10:11 ‘Aso anyas ndren ta kon tinan tado udu kati aso iu, ta leheya ki mada ado, tasah ado badeh, baseken sahou, ma ado ndrandra-i labai. Ma ale, ado badeh, ki tanan, ta tondrok ta Kindrei badeh, ndrame mirihik tado. Arile, ado badeh, baseken bwe.’
LUK 10:12 Eme jo katiye tado kamwenen, na len Kindrei edeu lau ala ta mada sahou eme kameh, kon tinan dah kameh bwese maha-an laba tinan labai sakalawi maha-an asahan tiri lau ndra-in badu kon tinan Sodom mene ja!
LUK 10:13 “Eme ya, ado lau badu kon Korasin, hawe ado lau badu kon Betsaida, ado katou! Sisi-in tinan labai kameh ewek bwele-e ado. Tasah, ki buku none lau ra-on mene kala kon tinan Tair hawe Saidon ma kamekes lahou tinan buku none jo ndramekes ereu ndrokowa ado, sebwe ndra bwena iri lau badu kon ma lubuk doh ndrasin awin bokodon, ma ndratahi iri na koloweh, ta leheya buku none iri tikisi handru ta kandriyen ndra-in tiri mene, iri ndrabwidiy.
LUK 10:14 Arile, na len Kindrei le tanan ta adeu lau ala ta mada sahou, ado kameh bwese maha-an udu bwele-en labai ja ta kon Tair hawe kon Saidon.
LUK 10:15 Ya ado lau badu Kapena-um, sebwe iri lau ra-on ja kameh bwese nyara ado ili loken ili kandrah nadeh? Bwe handru en! Kindrei kameh akahei ado ala bolo jih, kon tiri lau ndra-in amak ado aliy.
LUK 10:16 “Ya are lau anuhun ado badeh, iy anuhun jo ale; ya are lau baseken ado bwe, i buku none iy badeh, baseken jo bwe ale. Ma hawe are lau baseken jo bwe, iy ale, baseken Kindrei bwe le, iy ndramak nane suni jo eme dah.”
LUK 10:17 Ano udu badeh, oro lau ma ndro tonoh la-uh (72) nane ame asahan, eme oro sekesek andra-i labai ma oro tiye i ta Jises anya, “Laban, iri malawin ndra-in ale badeh, anuhun boho aso, ya ame len na boto-on ta nyaram.”
LUK 10:18 Eme Jises tiye toro, “Jo badeh, anyolom boto-on ta tama balik Satan badeh, taku udu kandrah eme andri, i buku none kalik takamek.
LUK 10:19 Ado kanuhun! Jo badeh, ndratehei boto-on handru ndrawek tado, ta ado winiyan adek bwele-e mwak ndra-in, hawe adek bwele-e sabiyep; ma boto-on ta sakalau boto-on ta balik; ya eme ari lakou winiyan batok tado bwe.
LUK 10:20 Arile, ado badeh, sasekesek ta ado badeh, sakalawi boto-on ta malawin ndra-in, ndri-iy, arile ado badeh, kasekesek, tasah nyara ado badeh, ndratorowenei udu kandrah.”
LUK 10:21 Na len doh badeh, Jises idih labai na sekesek ta Malawin Ndrabun, eme iy tiye, “Tama, ou Laban badu munyak ma kandrah! Jo masiye ou! Tasah, ou tone lakou dah ta mada iri lau ta tanan, ma hawe iri lau anya iri tanan labai, ya ou leheyani i tiri nah, tana iri lakou bwe. Ehe, idoh asahan na seken tam le.
LUK 10:22 Tama ndratehei lakou mari ndrame minek. Ya ari ndramak ja winiyan bala tanan jo bala mwasin bwe. Tama le badeh, tanan jo udu mwasin labai. Ma ari ndramak ja winiyan bala tanan tama bala mwasin bwe; jo nadun le ari tanan iy, hawe oro lau le jo ndranyowonyani oro ndrala mada taman, oro le tana oro tama.”
LUK 10:23 Ano iy tubuni batalan i toro lau tan le, eme iy tiye i toro, “Sekesek handru i toro are lau an hamon ame kameh anyolom lakou ado ndratou asahan eme lewan dah!
LUK 10:24 Ya eme jo katiye tado, iri propet hawe iri kabin mene badeh, aseken labai ta atou lakou ado atou na dah, arile iri batou bwe. Ma hawe iri aseken labai ta anuhun iri sahou ado anuhun dah, arile iri banuhun bwe.”
LUK 10:25 Ano, ndramak ari tanan ta leheya kandriyen tiri Juwis ales ere loke none Jises. Eme iy anya, “Ndramak ta leheya, jo kamekes sasah handru, ya kohak kudu le buku doh?”
LUK 10:26 Eme Jises tiye i tan, “Torowenei udu bolo tarou malen mene, ou ndratou, tiye i buku sah handru?”
LUK 10:27 Ano ndramak nane dah anya, “Tiye badeh, i buku doh: ‘Ou aseken Laban tam Kindrei na ndrinem mari, ma na koham handru mari, ma na boto-on tam mari, ma hawe na budon tam mari.’ Ma ano ja, ‘Ou aseken iri lau ari ari badu hawem, i le buku, ou aseken ou le.’”
LUK 10:28 Eme Jises anya, “Ou badeh, tiye amwenen labai, ya i buku none ou amekes iri lakou mari doh, idah kameh, koham udu le buku doh.”
LUK 10:29 Arile, ndramak ta leheya kandriyen tiri Juwis doh badeh, anya kaleheya iy le, anya iy ndra ari ai. Eme iy ndremenya Jises anya, “Are oro le handru badu hawek? Ya eme jo kaseken oro.”
LUK 10:30 Ano Jises tiye i hamon i tan, i buku doh: “Ndramak ari badeh, anya kedek kudu Jerusalem kili Jeriko. Eme iy edek ili badeh, iri lalou ado san tawi iy, ma bene-ei lakou tan marakon. Eme iri adai iy andra-i labai imek i kei ra-ei, ma iri ruwani iy udu api. Ya iri atobwak au. Ya iy ndramak nane doh amadin udu ka-u san mirihik anya kimek.
LUK 10:31 Ano, pris ari badeh, edek san nane eme. Iy edek eme badeh, anyolom ndramak nane, arile iy abelek i san bilisiu iu ai.
LUK 10:32 Ano ja, ndramak ari badu boho kamen ta Libai edek san doh, eme ja. Eme iy anyolom ndramak dah, ale, arile iy abelek i san bilisiu iu ai.
LUK 10:33 Arile, udu ja, ndramak ari badu kon Samariya edek eme amwenen ta ndrahune ndramak dah udu aliy, iy atou ndramak doh. Eme iy tikisi ndramak doh, labai.
LUK 10:34 Eme iy ili hawen badeh, solowei ndrelekei hawe waen i badan, ano sawei na kari kolau. Eme iy bwese-ei ndramak dah, i bwele-e donki tan, ma tiyani iy ili asiu ra-em ta ndrahu iri lau. Eme iy atondrok iy.
LUK 10:35 Udu len ari ja badeh, ndramak dah atehei luk ma lunek (K20) i ta ndramak ta asiu dah. Ano iy tiye ta ndramak ta asiu dah, anya, ‘Ou atondrok iy ya i buku none jo eme hamon, idah kameh jo edeu saluwe luk tam, ou ndrakahei ndra-au ta atondrok iy kewek hamon.’
LUK 10:36 “Ya ou anya, udu bolo oro lau ma taloh doh, are handru amekes kandriyen mwasin i ta ndramak nane, iri lalou adai iy doh?”
LUK 10:37 Eme ndramak ta leheya kandriyen tiri Juwis doh, anya, “Iy ndramak ala ili aseben iy en.” Ano Jises tiye sahou i tan i buku doh, “Ou ala amekes kandriyen ki le buku iy ndramak nane amekes doh!”
LUK 10:38 Ano, Jises hawe oro lau tan, adek san au ala bolo kon ari badeh, badih ari nyaran Mata, iy luhi oro ala asiu tan.
LUK 10:39 Ma nadu tinen badih ari badeh, udu aliy ale, ya nyaran Mariya. Iy edek eme manyah udu kati Jises anuhun iy asehek sahou.
LUK 10:40 Eme Mata badeh, nunu-uh ta nadu tinen baseben iy ta amekes lahou hawen bwe. Eme iy ili hawe Jises tiye i tan anya, “Laban, ou batou nadu tine titili jo ta amekes lakou mari kada-ah bwe? Ou tiye iy keme kaseben jo!”
LUK 10:41 Ano Laban tiye, “Mata, ou tikisiy ma ou nunu-uh ta lakou solo-an labai.
LUK 10:42 Kandriyen ari le doh, udu ta Mariya ta anuhun sahou, idoh kandriyen mwasin, ya jo winiyan batiye iy ta aliy bwe.”
LUK 11:1 Na len ari badeh, Jises udu kon ari asolom. Iy amekes salom ano badeh, lau tan oro ari ndremenya iy anya, “Laban, ou leheya aso ta san ta asolom, i buku none Jon mene leheya oro lau tan.”
LUK 11:2 Eme Jises tiye i toro anya, “I buku none ado anya kasolom badeh, ado kasolom ki buku doh: ‘Tama aso, Nyaram badeh, ki ndrabun, Ma ou ame atondrok kon mari.
LUK 11:3 Ou atehei nyamon ki le winiyan ta aso kaimon, na len ari ari.
LUK 11:4 Ou mani kandriyen ndra-in taso, i le buku aso mani kandriyen ndra-in toro are lau le, amekes eme taso. Ma ou satehei aso sala bolo iri none, ndri-iy.’”
LUK 11:5 Ano ja iy tiye i toro, “I buku none ou ari kawas tam udu aliy, ya na ndrukulu ben badeh, ou ala hawe kawas tam anyar iy ta jabi ramen ma tolo-os,
LUK 11:6 tasah kawas tam ari badeh, udu len barame ai, ya eme ou nyamon ta amekes nan bwe.
LUK 11:7 “Eme kawas tam udu asiu anya, ‘Au, ou ame amak jo, na ben alih dah ta sah? Kou taso ndrala, ma naduk oro ale ndramadin. Ya jo winiyan basuri jo, ta edeu nam nyamon bwai.’
LUK 11:8 Eme jo katiye tado kamwenen, ou badeh, kawas tan handru, arile iy winiyan basuri iy banyohan ou nyamon bwe. Arile, ta boto-on ta bwilima tam bwe, ou ndremenya ndremenya ja. Idah kameh, kawas tam kameh suri iy eme loken, anyohan ou na sasah ou aseken ta aliy.
LUK 11:9 “Eme ya jo katiye tado: Ado kandremenya, ya ado kameh akohok. Ado kasilah, ya ado kameh takalahei. Ado kalim kou, ya kou kameh asak tado.
LUK 11:10 Tasah, iy are lau ndremenya, iy kameh akohok. Iy are lau asilah, iy kameh takalahei. Ya iy are lau alim kou, ya kou kameh asak tan.
LUK 11:11 “Ya, i buku none ou badeh, a tama ari nah, ya iy kandremenya ou ta ari ni, ya ou badeu ni bwe? Ya, ou kameh adeu nan mwak ai?
LUK 11:12 O, buku iy kanyar ta ndrusu sirih, idah kameh ou atehei nan sabiyep ai?
LUK 11:13 Ya, ou tanam ou ndra-in, arile ou tanam ta adeu lakou mwasin ili na nadum oro, ou winiyan atanam handru, tama ado udu kandrah kameh sekesek labai ta edeu Malawin Ndrabun ale ili toro are lau ndremenya iy!”
LUK 11:14 Ano udu, Jises tikahei malawin ndra-in udu la-u ndramak ari, mesekei iy basehek sahou bwe. Eme malawin ndra-in dah iu, ma ndramak dah asehek sahou ja. Eme ya iri lau boho iri asak.
LUK 11:15 Arile oro lau rayah anya, “Iy atikah malawin ndra-in iu tasah tinan tiri malawin ndra-in nyaran Belsabul badeh, edeu boto-on ili tan ta amekes lakou doh.”
LUK 11:16 Eme ya iri lau rayah badu bolo oro le badeh, ndremenya iy ma anya kanone iy, ta kamekes kalem badu kandrah ta leheya buku none iy amekes gok ta Kindrei handru.
LUK 11:17 Arile, Jises ndrandrei budon toro ndra-in tan, ya eme iy asehek toro i buk doh, “Ki buku none iri lau badu kon munyak tinan kapou iri ranah i len, ma ranah i len, ma iri amekes bahun, iri lau badu kon doh kameh andra-i. Ya, ki buku none, boho kamen ra-em kaseker, idah kameh, iri lau doh winiyan bales boto-on bwe.
LUK 11:18 Ya, ki buku none oro lau ta Satan kapou oro ki lumuk, ya, ki buku dah handru iy tan boto-on ta atondrok iri lakou? Jo asehek sahou ewek tado dah, tasah ado anya boto-on jo akohok dah, ta atikah iri malawin ndra-in au, badeh, ta Belsabul edeu eme tek.
LUK 11:19 Ya, ki buku none Belsabul aseben jo handru, ma jo katikah iri malawin ndra-in, ya are lau handru aseben iri lau taha ta atikah malawin ndra-in? Sebwe balik aseben oro nadeh? Iri gok oro lau tado amekes, leheya buku none sahou tado badeh, bamwenen bwe.
LUK 11:20 Arile ado kanuhun, i buku none boto-on ta Kindrei amwenen aseben jo ta atikah iri malawin ndra-in, ado ndratana ado kabwe, Kindrei ndrame ta atondrok aha lau mwan ma badih badu Isra-el.
LUK 11:21 “Ya, ki buku ari ndramak boto-on kandrei beteleu tan, ya iy katehei ndrokei ta asiu tan, idah kameh, lakou tan mari udu mwasin.
LUK 11:22 Arile, ki buku none ari ndramak boto-on ja, keme hawen uru kada uru, idah kameh, ndramak hamon nane, kameh idi iy ma kuhi lakou tan ta bahun kameh iu. Ano, iy akohok lakou tan mari ma atehei i tiri lau.
LUK 11:23 “Ya, eme are lau iy kawas tek bwe, iy ndramak ta amekes bahun eme tek. Ya are lau baseben jo ta atukum iri lau kame ka-en hamon ta Kindrei bwe, iy kameh atikah iri lau ka-en ndra len ta Kindrei.
LUK 11:24 “Buku none ari ndramak tikahei malawi ndra-in ereu la-u ari ndramak iu, malawi ndra-in doh iu laleyah i bolo kon lomale an ta iy katakaleh ari kon ja, iy kili aliy. Eme, buku iy batou ari kon mwasin ta iy ili aliy bwe,
LUK 11:25 iy kameh asehek, ‘Jo ndrawoyah ai, sebwe jo kili hamon kili asiu tek bwena mene jo ereu aliy.’ Eme iy ili hamon anyolom asiu nane ereu laleyah, ndrasahan ha-un, ma ndranyosowani kabwe.
LUK 11:26 Ehe, iy atou buku doh, eme iy ili hamon ja andrei oro malawi ndra-in ndro taloh ja sakalawi iy ta amekes kandriyen ndra-in. Ya oro kameh ala bolo asiu nane. Ya eme ndramak dah, bala buku bwena mene ja bwai, iy ndrandra-i labai ai.”
LUK 11:27 Eme Jises asehek sahou kahis le badeh, udu bolo iri lau mari nane dah, badih tasou ari aloh, “Sekesek handru labai i tare badih atehei ou, ma hawe nyohonei ou badeh.”
LUK 11:28 Arile, Jises tiye ja i buku doh, “Sekesek badeh, ki toro are lau anuhun sahou ta Kindrei, ma an hamon ta aliy.”
LUK 11:29 Eme lau ame a sola badeh, Jises tiye i tiri anya, “Iri lau mwan ma badih ta len dah badeh, iri ndra-in handru. Iri ndremenya ta anya katou kalem, arile winiyan bwai, kalem ari le kameh iri atou, kalem ta Jona.
LUK 11:30 Jona badeh, i nyara kalem ta lau badu Ninibe na len bwena mene, ya jo Nadu Ndramak Awas ale, i nyara kalem ta lau na len dah.
LUK 11:31 Na len hamon ta Kindrei kameh atehei iri lau mari badu kon munyak dah ala ta mada sahou, badih tinan kabin badu kon tinan Seba, kon tan in loboho kum, kameh ales ereu ta mada sahou, iy kameh asehek ma nyowonya iri kandriyen ndra-in taha lau ta len hamon dah amekes. Tasah, iy badih kabin doh ereu len labai ta Isra-el, arile iy eme ta anuhun le kabin Solomon leheya iri tanan mwasin tan. Na dah, ndramak ari ereu ndrokowa ado, iy sakalawi ja Solomon, arile ado banuhun sahou, ma batubuni ndrine ado bwe.
LUK 11:32 Na len Kindrei le tanan ta edeu iri lau ala ta mada sahou, iri lau mwan ma badih badu Ninibe ale kameh ales ala ta mada sahou, ma iri kameh asehek sahou boto-on labai i taha lau ta len hamon dah. Tasah, iri lau badu Ninibe anuhun sahou Jona asehek, ma iri tubuni ndrine iri. Na idah, ndramak ari ereu ndrokowa ado dah, sakalawi ja Jona, arile ado banuhun sahou tan, ma batubuni ndrine ado bwe!
LUK 11:33 “I buku none ari ndramak iy katelemei sun, iy winiyan batehei bala kon korohan bwe, ma hawe iy winiyan batehei bado bahandra bwekei bwe; iy kameh atehei udu ndrahunen loken. Ya, i buku none are lau eme anyolom kameh, iy eme asiu.
LUK 11:34 Mada ado badeh, i buku lomada sun ta atelem bolo oda ado. Ya, i buku none mada ado udu mwasin, badeh kameh bolo ado mara-ei idih na lomadan. Arile, i buku none mada ado ndra-in, idah kameh bolo ado kameh ilik.
LUK 11:35 Eme ya mada ado kaleu ta sun udu bolo ado badeh, samak.
LUK 11:36 Ya, i buku none sun lomatani bolo ado mari, ya sese lulik aliy bwe, idah kameh lomadan telemei kon mari. I buku none sun anya badeh, lomatani ado mara-ei.”
LUK 11:37 Eme ya sahou ta Jises ano le bohon badeh, Parasi ari andrei Jises i hawen aimon nyamon. Eme Jises ili manyah udu andri aimon nyamon.
LUK 11:38 Eme ya iy anyolom Jises badeh, basikine minen bwe, ya iy aimon nyamon, eme ya iy lomondra solo-an labai.
LUK 11:39 Ano Jises tiye i tan anya, “Ado Parasi badeh, sikine kona bwesam ma kona bwekei tado le, arile bolo ado badeh, ndrarahak le ko-ak hawe manahun ndra-in.
LUK 11:40 Ado bale ado bwe! Ndramak mene amekes konan badeh, iy ale amekes bolon.
LUK 11:41 Abo, i buku none ado anya kamekes kandriyen mwasin udu bolon ma konan badeh, ado kanyohan lakou udu bolo bwekei ki tiri lau tiri lakou bwe. Ma idoh kameh ado asahan mwasin.
LUK 11:42 “Ado Parasi, mada ado kaleu! Sisi-in laba tinan kameh ewek bwele-e ado! Ado badeh, apou la-ukei mint hawe la-ukei ruwe tado badeh, i ronoh, ronoh. Ano ado adeu ari ari badu bolo ronoh doh, i ta Kindrei. Ado ale, amekes i buku aliy i ta lakou mari badu bilin tado. Idoh mwasin, arile ado ndramani iri kandriyen ta tikisiy hawe kandriyen mwasin ta Kindrei. Sebwe mwasin ta ado ka-en hamon ta sahou batanau tinan ma ado samani iri sahou batanau bwisik nane ale.
LUK 11:43 “Ya ado Parasi, mada ado kaleu! Sisi-in laba tinan ale kameh ewek bwele-e ado! Tasah, ado badeh, aseken le ta manyah ado bada bwabwai mwasin udu ndrahu tukum taha Juwis. Ma hawe ado badeh, aseken lau le badeh, kasumon ado hawe kamasiye ado an bolo ba-en.
LUK 11:44 “Ado ndranuhun! Sisi-in laba tinan doh kameh ewek bwele-e ado! Nyolom ta bada ado badeh, mwasin. Arile bolo ado badeh, ndrandra-i labai, tasah ado badeh, mahu ado ndrala. I buku none iri lau adek ame badeh, banyolom mada lek bwe. Ya eme iri adek bwele-en ma bales balesani iri.”
LUK 11:45 Eme ari badu bolo oro lau ta leheya kandriyen tiri Juwis badeh, tiye i ta Jises anya, “Ndramak ta leheya, ou asehek sahou badeh, eme orowei aso amwenen.”
LUK 11:46 Eme Jises tiye i hamon ja anya, “Ado lau ta leheya kandriyen tiri Juwis, mada ado kaleu! Sisi-in laba tinan ale kameh ewek bwele-e ado! Tasah, ado atisih lau na kandriyen malen solo-an labai ta iri ka-en hamon ta aliy. Arile, ado badeh, batehei mine ado ta aseben bwe.
LUK 11:47 “Ado ndranuhun! Sisi-in laba tinan doh kameh ewek bwele-e ado! Tasah, iri propet mene, tubu ado oro amwenen badeh, adai oro. Eme ado lowosa lek amwenen badeh, ta aliy ai.
LUK 11:48 Eme ya ado kede-eh asakau ado laleyah, i buku none tubu ado mene amekes. Tubu ado oro adai iri propet, ya ado badeh, kani ado ta a-eh lek ai.
LUK 11:49 Ado kanuhun kamwenen! Tasah, ta katin doh, na tanan ta Kindrei mwasin le, iy anya, ‘Jo kameh suni iri propet hawe iri lau ta batun tiri lau ta Kindrei, ala hawe iri. Ma idah kameh, iri adai iri propet rayah amak, hawe adai iri lau rayah ta batun tiri lau ta Kindrei kameh amak ma hawe bwese isi tinan.’
LUK 11:50 Ya eme ado lau na len dah kameh a saluwe iri lau ala adai iri propet mene amak, kabatana munyak asahan le.
LUK 11:51 Udu ndra kabatana ndraye Ebol eme isos ndraye Sekaraya, mene adai iy ya ndrayen amou udu ndrokowa mada koto-ok ma asiu ta atudun. Eme jo bawendreya bwe, ado lau na len dah kameh a saluwe oro bwese isi mari doh.
LUK 11:52 “Ado lau ta leheya kandriyen tiri Juwis, mada ado kaleu! Sisi-in laba tinan ale kameh ewek bwele-e ado! Tasah, ado ndrasulu-i kou ta asiu ta akohok tanan handru ndrala. Eme ya ado amwenen ale, bala se bolon bwe, ya eme iri lau buku liliy anya ka bolon, arile ado aturuk san ta iri sala bolon.”
LUK 11:53 Ano, Jises udu hawe iri anya ki-iu badeh, iri Parasi hawe iri lau ta leheya kandriyen tiri Juwis badeh, asehek sahou ndra-in ta losen i tan, hawe lelen iy ta ndremenya solo-an.
LUK 11:54 Iri anya kamekes iy kasehek saba sahou ndra-in ya iri kabarah iy.
LUK 12:1 Udu, iri lau solo-an solo-an labai, ari ndramak winiyan bandromwei bwe, iri ame atukum ta anya kanuhun Jises. Eme ma kon aso mara-ei, ma rayah adek bwele-e rayah. Tasah, kon ari soson bwe. Ya eme Jises asehek sahou ma mwena i toro lau tan anya, “Mada ado badeh, kaleu ta yis tiri Parasi. Kandriyen ta wasai tiri doh badeh, i buku yis; sese le winiyan ta edeu ili bolo jabi ramen buruwen kolek.
LUK 12:2 Lakou mari ale aton kede-eh kameh asahan eme lewan, lau mari kameh anuhun ma atou na mada iri.
LUK 12:3 Ma saba lakou ado asehek hawe saba lakou ado tone badeh kameh asahan eme lewan mada lau mari. Ma hawe saba lakou ado ohei le ta aliy, udu bolo asiu kameh, iri are bwele-e ndrahu tukum tiri lau kameh asehek i tinan ta lau mari kanuhun.
LUK 12:4 “Jo kasehek ki tado kamwenen ado kawas tek, ado sanoh tiri lau ale winiyan adai bada ado na dah. Badeh, iri adai bada ado le, arile iri winiyan badai malawi ado bwe.
LUK 12:5 Arile, jo anya kaleheya ado ta are handru kameh ado kanoh iy: Ado kanoh labai ta Kindrei, tasah iy winiyan idi ndramak imek, ano iy le tan boto-on udu aliy ta akeh ndramak doh, i bolo jih. Eme jo asehek tado dah badeh, ado kanoh iy.
LUK 12:6 Ado badeh, ndratana ado, iri lau asih sirih nadu bwisik ma limeh na luk bororoh saraman la-uh (2t) le, neh? Arile, tama ado badeh, atondrok sirih doh udu mwasin labai. Kindrei bamani iri ari se bwe.
LUK 12:7 Handru labai, Kindrei ale badeh, ndrandromwei lami batu ado mari, ya iy tanan ado mwasin labai. Ya, ado sanoh tiri lakou ndra-in iri lau anya kamekes kewek tado. Kindrei winiyan tondrokei ado handru. Ado kanuhun! Ereu budon ta Kindrei, iri sirih badeh, lakou laleyah, arile iy atondrok iri. Eme ya iy winiyan tondrokei ado areu mwasin labai ja.
LUK 12:8 “Ya, jo kasehek tado kamwenen, are lau ale asehek ili tiri lau mwan ma badih buku none iy badeh badu hawek, jo Nadu Ndramak Awas ale kameh asehek tiri angelo ta Kindrei buku iy ndramak doh badu hawek handru.
LUK 12:9 Arile, are lau asehek ta ndramak ari ja buku iy badu hawek bwe, jo ale kameh asehek i tiri angelo ta Kindrei buku iy lau doh badu hawek bwe ale.
LUK 12:10 Ma are lau oro asehek sahou ndra-in i bada Nadu Ndramak Awas, Kindrei le kameh winiyan mani kandriyen ndra-in tan. Arile, are lau oro aluhe i bada nyara Malawin Ndrabun, Kindrei winiyan bamani kandriyen ndra-in tan doh bwe.
LUK 12:11 “Ya, i buku none iri katehei ou ales are ta sahou, are bolo asiu ta atukum deh, iri katehei ou ales are mada iri lau ta atondrok kon, badeh, ou sabwerei ou, ta saba sahou kameh ou asehek ta aliy. Ado sabudon sandra-i, ndri-iy.
LUK 12:12 Na le bolo len doh kameh Malawin Ndrabun kameh leheya ou ta sahou ou kameh asehek.”
LUK 12:13 Eme ndramak ari udu bolo iri lau nane doh, tiye i ta Jises buku doh, “Ndramak ta leheya, ou tiye ki ta nadu tine badeh, kapwai lakou ta tama aru ki le winiya aru.”
LUK 12:14 Eme Jises tiye i tan i buku doh, “Ou den, are lau tiye tam anya, jo kanuhun sahou ta apou lakou ta tama ah, ki ta ah nadu tinem?”
LUK 12:15 Ano Jises tiye i tiri mwan ma badih, “Bale ado kudu tado! Mada ado kaleu tado, ta ado badeh, saseken lakou doh, lakou doh le, tasah koha ndramak badeh, winiyan bado luluwen na lakou solo-an doh, bwe. I buku tan lakou solo-an labai, arile iri lakou mari doh kameh winiyan basebenei koham ta udu le buku doh, bwe le.”
LUK 12:16 Ano Jises asehek sahou sokek ari doh, i ndranye oro: “Bilin ta ndramak ari tan lakou solo-an badeh, ato-ou sali iri badeh, solo-an.
LUK 12:17 Eme iy lomondra anya, ‘Idah kameh, barala buku sah bah? Jo ari kon ta adeu iri nyamon tek marakon ki aliy bwai.’
LUK 12:18 “Ano iy anya, ‘Jo kamekes ki buku sah bah? Sebwe jo badeh, kamekes ki buku doh: Jo katokosei asiu ta nyamon ki-iu, ya jo katahiy ki tinan ja. Idoh kameh, winiya iri nyamon hawe iri lakou tek mwasin mari i bolon ai.’
LUK 12:19 Ano iy le asehek nyalan anya, ‘Jo badeh, lakou tek solo-an labai, winiyan udu andrei jaha solo-an. Idah kameh, mesekei jo sekesek ma a-un gwa, tasah manyah tek ndramwenen kabwe.’
LUK 12:20 “Arile, Kindrei tiye i tan anya, ‘Balem bwe, na ben dah kameh ou amak; ya lakou tam mari doh kameh ki tare bah?’
LUK 12:21 “Lakou i buku doh kameh asahan i tare lau, i buku iy anya katukum lakou sola sola badu munyak; arile ta mada Kindrei badeh, lakou doh, bala mwasin ta madan bwe.”
LUK 12:22 Ano Jises tiye i toro lau tan: “Ado sabwerei ta manyah tado, saba lakou kameh ado aimon, ma ta bada ado ale, saba lakou kameh ado kataliye.
LUK 12:23 Koha ado sakalawi nyamon, ma bada ado sakalawi kalawi ado ale.
LUK 12:24 Ado kanone kanyolom iri sirih se: Iri batah nyamon bwe, ma iri babwe-eh nyamon bwe. Ma hawe iri ari asiu ta asumwe nyamon bwe, arile Kindrei le badeh, anyohan iri. Udu budon ta Kindrei ja badeh, iy kameh atondrok ado udu mwasin labai ja tiri sirih!
LUK 12:25 Buku ado abwerei ta iri lakou doh, idah kameh winiyan edeu ari len ja ili hawe len ta manyah tado, ta ado luluwen deh? Bwe!
LUK 12:26 I buku none ado winiyan bamesekei lakou nadu bwisik doh bwe, ya i buku sah ado abwerei ta lakou mari?
LUK 12:27 “Ado kanone kanyolom iri kanyeu ateh se. Ya iri babo gok bwe, ma iri bamekes kalawi iri bwe. Arile, jo katiye tado, bwena mene kabin Solomon asini iri awin tan mwasin mara-ei handru ano, arile nyasou tiri kanyeu ja sakalawi nyasou ta kabin Solomon.
LUK 12:28 Idah Kindrei edeu nyasou ma awin ili tiri bwidiu badu lokei, iri bwidiu ado na len dah, ano na len bi-i akeh iri au ala bolo jih ta asun iu. I buku sah, sebwe Kindrei winiyan badeu kolau ma awin bawek tado bwe nadeh? Budon tado handru tinan bwe?
LUK 12:29 Ya ado sabudon sandra-i ta saba nyamon kameh ado kaimon, hawe sabwerei ta saba gwa kameh ado ka-un, ndri-iy.
LUK 12:30 Tasah, iri lau badu kon munyak tinan mara-ei aseken ma asilah iri lakou doh. Ado sala buku iri, tasah tama ado Kindrei iy tanan saba lakou ado aseken.
LUK 12:31 Arile, ado kanyolom bwena kili ta tondrok ta Kindrei op. Ano ya iri lakou doh Kindrei kameh edeu ewek tado.
LUK 12:32 “Ado marakou sanoh! Tama ado Kindrei badeh, sekesek tado labai, eme ado kameh atondrok lakou hawen.
LUK 12:33 Eme lakou tado mari badeh, kasihinei ki-iu ta luk ya luk ta aliy badeh, ado kadeu ki tiri lau lakou bwe. Ado badeh, katakaleh tado kohei kohoya luk udu kandrah; lakou winiyan ta apus bwe, hawe winiyan ta amu-uk bwe, ma hawe iri lau ta bahana winiyan babene-ei bwe.
LUK 12:34 Tasah, i buku none ou tam lakou solo-an udu bolo munyak dah, kameh mesekei ou abudon solo-an ta aliy.
LUK 12:35 “Ado badeh, kanyasou, hawe kalokou ado, ma katelemei sun tado kudu le, koro-an lakou kasahan,
LUK 12:36 ki buku none iri lohowan abe-en ndramak ta kati asiu udu ta molak eme hamon. Ya i buku none iy eme asumon, oro kameh sulu-i kou asak tan.
LUK 12:37 Idah kameh, udu mwasin toro labai, tasah mada oro badeh, bamadin bwe, na len ndramak ta kati asiu asahan. Eme ya jo katiye tado kamwenen, idah kameh, iy asini awin ta lohowan tan, ano iy tiye oro manyah ado andri ano iy bwese nyamon i noro.
LUK 12:38 Ma idah kameh, mwasin labai i toro lohowan, i buku none ndramak ta asiu eme anyolom oro badeh, abe-en. I buku none iy eme na ndrukulu ben deh, na boho len badeh, oro ndra abe-en iy le.
LUK 12:39 “Arile, budon tado kaleu ta tanan doh: Buku none tama asiu i tanan saba mada an handru iri lau ta bahana kameh ame apou asiu tan, iy kameh atehei ndrokei, tasah iy winiyan bamukuni iri lau ame apou asiu tan bwe.
LUK 12:40 Ya, buku none ado ale, ado kalokou ado na len mari. Tasah, Nadu Ndramak Awas kameh asahan na len ado batehei budon ta iy eme bwe.”
LUK 12:41 Eme Pita anya, “Laban, ou tiye sahou sokek badeh, eme tahi mari deh, bwe, eme taso lau tam le?”
LUK 12:42 Eme Jises tiye i hamon ja anya, “Are lau iy mwasin ta gok, ma iy budon mwasin? Iy don adeh, tinan tan kameh atehei iy ta atondrok iri lau tan ra-on ja an bahandran ta adeu niri nyamon na len ari, ari, iy le tanan.
LUK 12:43 Sekesek handru in bwele-e ndramak doh, buku none tinan tan eme takalahi iy amekes gok tan mwasin.
LUK 12:44 Jo tiye tado handru, tinan tan kameh atehei iy ta atondrok iri lakou tan mari.
LUK 12:45 Arile, buku none iy lau ta gok tan nane katiye anya, ‘Ndramak ta asiu doh kameh winiyan bame suwi bwe,’ ya iy kameh a-um iri lau mwan ma badih ta gok. Ano iy aimon nyamon aimon aimon, ano iy a-un gwa boto-on a-un a-un, ma iy ibo lolo-ou.
LUK 12:46 Ya, na len ari, tinan ta ndramak nane ta gok kameh eme hamon na len iy ndramak nane tanan bwe. Tinan tan kameh sani iy i lunah, ma mesekei iy akohok maha-an buku le iri lau ta tebelese mene.
LUK 12:47 “Ya ki buku none ari lohowan tanan lahou ta tinan tan, ya iy bamesekei bwe, idah kameh, iy bwese maha-an tinan labai.
LUK 12:48 Arile, i buku none ari lohowan bala tanan lahou ta tinan tan bwe, ya iy amekes lahou laleyah, idah kameh, adai iy udu, le udu. Ma i buku none are lau akohok lakou solo-an labai, badeh, iy kedeu solo-an ale, ki hamon; ma i buku none are lohowan katondrok lakou solo-an kudu bahan, iy badeh, kamekes lahou kirih le gwek.
LUK 12:49 “Jo eme dah badeh, ta asun kon munyak. Ki jo aseken handru mene badeh, jih ndranya!
LUK 12:50 Arile, jo kameh ilih bolo isi udu mwena tek eme, eme ya jo aseken keme suwi ya lokohak!
LUK 12:51 Ado anya jo eme munyak dah, ta amekes mondrei? Bwe! Jo katiye tado kamwenen, jo eme kameh ta apou lau.
LUK 12:52 Na dah kameh, oro limeh badu boho kamen ra-em le, arile idah kameh apou oro, taloh a bilisiu ya la-uh a bilisiu ma oro andra-i.
LUK 12:53 Idah kameh, oro apou oro, taman kameh andres i la-u nadun mwan, ma nadun ale kameh andres i la-u taman. Ya tinen kameh andres i la-u nadun badih, ma nadun badih ale kameh andres i la-u tinen. Ya salahun uru kayon kameh andres uru, i le buku aliy.”
LUK 12:54 Eme Jises tiye i tiri anya, “I buku none ado atou kon abakak udu loboho an i andri, idah kameh, ado tanan, ur kameh eme. Ma idah kameh asahan handru.
LUK 12:55 Ya, i buku none ado atou jor lan atohou badeh, ado tanan, idah kameh lolan. Ma idah kameh asahan handru.
LUK 12:56 Bale ado bwe! Ado atou kalem ere bolo kandrah ma munyak, ma tiye amwenen. Arile, buku sah ja ado winiyan batou ma baleheya bamwenen iri kalem ta len dah bwe?
LUK 12:57 “Ya buku sah ado winiyan ta amekes budon ta kandriyen mwasin bwe?
LUK 12:58 Ki buku none ari ndramak tan losen udu tam ya iy katehei ou a ta sahou, ya sahou kahis le, badeh, ou ala hawen ya ah kasehek ta aliy bwena. I buku none ou bala bwe badeh, iy kameh seheyani ou ala mine iri lau ta anuhun sahou. Ano iri lau ta anuhun sahou kameh tiye iri lulik atehei ou ala bolo asiu lulik.
LUK 12:59 Jo katiye tado kamwenen, ado winiyan bame len bwe, winiya le ado sihinei labai na luk in hamon ta maha-an tado.”
LUK 13:1 Ya eme lau rayah are hawe oro na len doh mene tiye i ta Jises ta nyala ndraye iri lau rayah badu Galili badeh, Pailat ndrasolowei ndrala hawe katin haka ta asun ta salom tiri.
LUK 13:2 Eme Jises anya, “Ado abudon i buku sah handru? Ado anya oro lau badu Galili adai oro doh badeh, lomondra ndra-in ma karei toro sakalawi karei ma lomondra ndra-in tiri Galili mari deh bwe? Tasah, oro amak i buku doh?
LUK 13:3 Jo katiye tado kamwenen: Bwe! Arile, i buku none ado batubuni ndrine ado bwe, idah kameh, ado amak i le buku aliy.
LUK 13:4 Ya ado kanone kabudon oro lau ma ronoh ndru la-uh (18) mene asiu boko bek lawe tihisi oro ado Silowam se? Ado badeh, abudon anya oro doh badeh, ndra-in labai ja, sakalawi oro lau are Jerusalem dan ai?
LUK 13:5 Bwe! Jo katiye tado kamwenen. Arile, i buku none ado batubuni ndrine ado bwe le, badeh kameh ado amak i le buku aliy.”
LUK 13:6 Ano Jises asehek sahou sokek nyala ndramak ari anya: “Ndramak ari mene badeh, tahi kei pik udu bolo bilin tan. Ano iy anya kili katou kei doh, ndrato-ou salin deh bwe. Eme iy ili tandrana tandrana, arile iy banyolom ari bwe.
LUK 13:7 Eme iy tiye i ta ndramak ta atondrok anya, ‘Jaha taloh ai, jo eme anya katou kei pik dah, ta salin ya eme, jo se batou ari salin bwe. Kei pik kede-eh a-un gwa ta munyak laleyah, ya eme kamwetehei ki-iu!’
LUK 13:8 “Arile, ndramak ta atondrok bilin anya, ‘Ndri-iy, kudu gwek jaha ari dan op, ya jo kanone kawudi na lek ya jo kakeh sisoh ki mwe-en.
LUK 13:9 Ki buku none ato-ou salin na jaha eme eh, mwasin ai, ya i buku none bwe eh, badeh, baramwetehei bara-au ai.’”
LUK 13:10 Na len ta amunyau ari, Jises leheya iri lau udu asiu ta atukum tiri Juwis.
LUK 13:11 Eme badih ari udu aliy badeh, malawin ndra-in ndramesekei konan ndrahun, andrei jaha ronoh ndru la-uh (18) ai. Eme iy winiyan bales bwe, iy akor le.
LUK 13:12 Eme Jises anyolom iy ma iy luhi iy eme mwena. Ano iy atehei minen i badan, ma tiye i tan anya, “Badih den, ndrokonam ndramwenen!” Eme konan ales ja ma iy atudun Kindrei.
LUK 13:14 Eme ndramak ari batun ta atondrok ndrahu asiu ta atukum badeh, ibolosen ta Jises nane mesekei badih doh badeh, udu bolo len ta amunyau. Eme ndramak dah, asehek eme lewan i tiri lau i buku doh, “Taha badeh, atehei len onoh le, ta taha kamekes lahou; ya buku none ou anya amekes lahou badeh, ou amekes kudu bolo oro len doh. Ya na len ta amunyau badeh, ou samekes lakou!”
LUK 13:15 Eme Laban tiye i tan anya, “Ado ta wasai! Sebwe ado kede-eh batalou iri oks hawe donki na len ta amunyau, ma basariye iri bala ba-un gwa bwe nadeh?
LUK 13:16 Ya ado abudon i buku sah handru ta i badih, badu boho kamen ta Abraham dah, Satan mesekei ndrokonan badeh, samwenen na len ta amunyau?”
LUK 13:17 Ya eme sahou iy tiye dah badeh, mesekei iri lau heh budon tiri ndra-in udu tan badeh, bwili iri ama. Arile, iri lau buku liliy badeh, sekesek labai ta lakou mwasin iy amekes.
LUK 13:18 Ano Jises ndremenya, “Bolo tondrok ta Kindrei badeh, i buku sah handru? Jo kasehek ki buku sah bah?
LUK 13:19 Bolo tondrok ta Kindrei badeh, i buku none buwa kei ari aloh mastet, ndramak tahi in bolo bilin tan. Iy ateh eme loken ma i tinan, ya iri sirih atah ame amekes awi iri udu bada andran.”
LUK 13:20 Ano iy ndremenya ja, “Ya eme jo kasehek bolo tondrok ta Kindrei ki bada sah handru bah?
LUK 13:21 Bolo tondrok ta Kindrei badeh, i buku none yis, badih andrei ya iy tubuni i hawe rahak ndrom tinan palawa. Iy tubuni ili ili winiya palawa mara-ei apus eme loken.”
LUK 13:22 Ano Jises edek ma atiye sahou i tiri lau badu bolo kon tinan, ma i tiri lau badu kon bwisik, ma ili ales ili Jerusalem.
LUK 13:23 Eme ndramak ari ndremenya anya, “Laban, idah kameh, lau rayah le kameh koha iri bano bwe? I buku none iri ala baha tondrok ta Kindrei?” Eme iy tiye i toro,
LUK 13:24 “Ado badeh, kabadok ado ta ala madasan bwisik. Tasah, jo katiye tado kamwenen, iri lau solo-an anya kanone ta ala bolon, arile iri winiyan bwe.
LUK 13:25 Eme ya ki buku none, ndramak ta ali asiu udu bolo asiu, ya iy kasulu-i kou kili, ya ado badeh, kare manan, kaloh anya, ‘Laban, ou sulu-i kou, aso anya kawek asiu.’ Arile ndramak ta ali asiu kameh anya, ‘Ado badu heh badeh? Jo tanan ado bwe oh!’
LUK 13:26 “Ano kameh ado tiye anya, ‘Aso mene aimon nyamon hawe a-un gwa hawem en, ma ou mene leheya aso an bolo kon taso en!’
LUK 13:27 “Arile, idah kameh, iy tiye i toro anya, ‘Jo tanan ado bwe oh! Ya ado are heh ame dah? Ado same madak. Ado ka-au! Ado badeh, lau ta amekes kandriyen ndra-in labai!’
LUK 13:28 “Idah kameh, akeh ado ame len ta baha tondrok ta Kindrei, ala bolo jih, ya ado kameh aden, ma andrebek lihi ado, tasah ado kameh anyolom Abraham, Aisik hawe Jekop ma hawe iri propet mari are baha tondrok tan. Arile, ado le, bwai!
LUK 13:29 Ma idah kameh, iri lau badu leheleh kameh ame, badu loboho an eme loken, ya iri lau badu loboho an i andri, hawe iri lau badu kum, hawe iri lau badu tolau, kameh akohok ndrahune iri ta manyah ta nyamon tinan ado baha tondrok ta Kindrei.
LUK 13:30 Handru labai, idah kameh, lau rayah badu ndrobek kameh ala mwena, ya lau rayah badu mwena kameh ame ndrobek.”
LUK 13:31 Na len doh, iri Parasi rayah ame hawe Jises tiye i tan anya, “Ou au a kon ari ja. Kabin Herot anya kidi ou!”
LUK 13:32 Arile, Jises tiye i toro, “Ado kala katiye ta mwi badu lokei badeh, anya, ‘Jo kameh udu gwek atikah iri malawin ndra-in au, hawe amekes iri lau sik udu tiri iu na dah, ma hawe na bi-i, ano na atoha, lahou tek barano adeh.
LUK 13:33 Aliy ai, arile bwai, jo na dah hawe na bi-i ili isos atoha badeh, jo ndrado Jerusalem ai, tasah udu bolo oro len doh nane ari propet badeh, winiyan bamak bare ari kon buku liliy bwe. Iy imek udu Jerusalem amwenen.’
LUK 13:34 “Jerusalem, Jerusalem, jo tikisi ado labai, ado adai iri propet, ma ado ateu iri lau Kindrei suni iri ame atou ado, ma ado orowei iri na bek ma adai iri amak. San solo-an jo anya katukumwi nadum oro, buku none iri kakaro tukumwi nadu iri areu bahandra bani iri. Arile, ado bwale ado!
LUK 13:35 Nadah asiu ta salom tado kameh udu laleyah. Eme, jo katiye tado kamwenen, ado winiyan batou jo ja bwe, winiya le len hamon kameh ado anya, ‘Kasekesek ki ta ndramak doh iy eme ta nyara Laban.’”
LUK 14:1 Na len ta amunyau ari, Jises aimon nyamon udu asiu ta tinan tiri Parasi ari. Eme iri badeh, atehei mada iri udu tan.
LUK 14:2 Eme udu batalan badeh, ndramak ari badeh, sik pis udu ta bohan hawe katin.
LUK 14:3 Eme Jises ndremenya oro Parasi hawe iri lau tanan ta leheya kandriyen tiri Juwis anya, “Mwasin ta amekes ndramak amwenen na len ta amunyau deh bwe?”
LUK 14:4 Eme iri badeh, ari sahou bwe. Ya eme iy tawi ndramak dah, ma mesekei iy amwenen ma hawe tiye iy iu.
LUK 14:5 Ano Jises ndremenya oro anya, “Ya, ki buku none ari nadu ado, deh ari katin haka tado oks, kataku ki bolo lek na len ta amunyau. Ado tana ado, sebwe ndramak nane winiyan tawi iy ma aluwi iy eme loken nadeh? Handru, iy ibo gok na len ta amunyau, tasah buku none iy bamekes bwe eh, iy kameh imek neh?”
LUK 14:6 Eme oro ari sahou bwe.
LUK 14:7 Eme Jises atou oro lau ame ta nyamon dah badeh, soso-on ndrahu manyah tiri lau tinan udu mirihik ta nyamon, ya eme iy asehek sahou sokek i toro anya,
LUK 14:8 “I buku none ari ndramak katiye ou ala aimon nyamon ta molak hawen, ou badeh, sasoso-on sala bwena, hawe iri lau tinan. Koro-an ari ndramak udu bale iri kodo-oh ja, iri aseken iy.
LUK 14:9 Ki buku i handru kameh, ndramak ta kati nyamon kameh suni ndramak ta tiye ou nane, ame kameh tiye tam anya, ‘Ou suri ou, ya ndramak dah kamanyah kudu badeh.’ Ano kameh bwilim ama andra-i, ma ou ala manyah are ndrobek.
LUK 14:10 Arile, i buku none iri katiye ou ala ta aimon nyamon badeh, ou manyah are ndrobek. Ya i buku none ndramak ta kati nyamon eme atou ou kameh anya, ‘Kawas tek, ou ame manyah ame ndrahu manyah mwasin udu bwena kada-ah.’ Ma idah kameh, iri tinan kameh barala tanan ou ai, ta ou badeh, ndramak ari awas.
LUK 14:11 Eme ya, i buku none are lau anya katudun iy ki loke, iy kameh ari nyaran bwe. Ya are lau amekes iy i buku iri nah nadu bwisik, idah kameh, nyaran i tinan.”
LUK 14:12 Ano Jises tiye i ta ndramak nane kuhi iy aimon nyamon hawen anya, “I buku none ou awer nyamon tinan, badeh, ou sakohok iri kawas le, ma ou sakohok nadu tinem oro le, ma hawe ou sakohok lowam oro le, ma hawe ou sakohok iri lau lakou tiri solo-an, asiu tiri udu ka-u asiu tam le; i buku none ou akohok oro, idah kameh, oro akohok ou ala hawe oro ja, i saluwe ou mene akohok oro.
LUK 14:13 Arile, i buku none ou awer nyamon tinan badeh, ou akohok iri lau tiri lakou bwe, ou akohok iri lau boha iri imek, hawe kati iri imek, ya ou akohok iri lau bada iri imek, ma hawe iri lau mada iri bwe, kawek kaimon nyamon hawem.
LUK 14:14 Ya idah kameh, ou akohok nyosowan ta aliy. Tasah, iri badeh, lakou bwe, eme ya iri badeu saluwen bwe, arile idah kameh, ou akohok bundruwe nyamon tam na len iri lau mwasin amak, ame loken.”
LUK 14:15 Eme ndramak ari badu bolo oro ta tukum ta nyamon tinan anuhun sahou Jises asehek badeh, eme ma iy tiye i ta Jises, “Are lau aimon nyamon udu baha tondrok ta Kindrei eme kameh, iy badeh, kasekesek.”
LUK 14:16 Eme Jises anya, “Ndramak ari badeh, iwer tine nyamon, ya eme iy atehei sahou i tiri lau solo-an labai, ta ame.
LUK 14:17 Eme na len ta nyamon amwenen, ndramak ta iwer nyamon suni lohowan tan ari ili, ta tandra-un iri lau mene sahou i tiri badeh, anya, ‘Ado kame, lakou mari ndra lokowaniy ndrano.’
LUK 14:18 “Arile, iri mari badeh, ari bala bwe, iri anya tiri gok le. Eme iy ari ma mwena eme, tiye anya, ‘Jo badeh, tikisiy handru en, jo barasihinei bilin ranah ai, ya eme jo kili katou op.’
LUK 14:19 “Ano iy ari ja ili tiye anya, ‘Jo badeh, tikisiy handru en, jo barasihinei bulumakau ma ronoh ai, ya eme jo ki-iu kaseu uru la-uh la-uh kase, ma kanone oro ta apou ndren.’
LUK 14:20 “Ano ari ja eme anya, ‘Jo bawek bwai, tasah jo barala tasou ai.’
LUK 14:21 “Ano lohowan dah, iu i hamon tandra-un ta ndramak ta iwer nyamon tan dah. Eme ndramak ta iwer nyamon nane dah, ibolosen, ma tiye lohowan tan dah, anya, ‘Ou ala suwi ala bolo kon badeh, kuhi iri lau tiri lakou bwe kame, ou kuhi iri lau mine iri imek hawe kati iri imek, ou kuhi iri lau mada iri bwe, ma hawe iri lau bada iri imek, ala ado loboho heh, loboho heh, bolo kon badeh, kame.’
LUK 14:22 “Ano lohowan dah anya, ‘Tinan tek, sasah ou tiye badeh, ndrano, arile asiu baso bwe le.’
LUK 14:23 “Ano ja, ndramak ta kati nyamon dah, tiye i ta lohowan tan anya, ‘Ou ala loboho san tinan hawe san bwisik hawe lobwilis badeh, tiye iri lau kame, ya bolo asiu tek kidih.’
LUK 14:24 Eme jo katiye tado kamwenen, idah kameh oro lau mene sahou i toro mwena badeh, winiyan baimon nyamon dah bwe.”
LUK 14:25 Eme ya iri lau solo-an badeh, are hamon ta Jises, eme iy tubuni batalan i hamon i tiri ma iy tiye:
LUK 14:26 “I buku none are lau anya ki-in hamon tek, iy badeh, karuwani tinen uru taman, ma iy karuwani udun hawe nadun oro, ma iy karuwani nadu tinen oro mwan hawe badih. Ma hawe kohan ale, iy sabwerei labai ta aliy. Ya, i buku none iy abudon iri lakou doh tinan labai, badeh, iy ma nah bwisik kahis le, ma iy winiyan basahan lau tek bwe.
LUK 14:27 Ma are lau mwan ma badih balokou iy ta imek bwe, ta ereu hamon tek, buku none ndramak ta imek iy kabwese kei tondreh tan amwenen, iy badeh, winiyan basahan lau tek bwe le.
LUK 14:28 “Ya, i buku none ari tado anya katah bokok, badeh kameh iy winiyan batah bwena bwe op. Idah kameh, iy manyah mwena lomondra ta luk sabe kameh winiyan ta tahi asiu bokok, deh bwe.
LUK 14:29 Ya, i buku iy banyolom bolo luk bwena bwe, ya iy katehei ndru kili ya bano bwe; idah kameh, iri lau atou kameh, iri kabobose iy anya,
LUK 14:30 ‘Katou iy, iy anya katah asiu ki loke badeh, bano bwe.’
LUK 14:31 “O bwe em, ki buku none ari kabin kili kamekes bahun i ta kabin ari ja. Idah kameh iy manyah ma lomondra op, ‘Oro lau ta bahun tek ma 10,000 kada-ah winiyan adai oro lau ta bahun ta kabin ma 20,000 kodo-oh, deh bwe?’
LUK 14:32 I buku none iy winiyan bwe; ya iy kabin ari nane in ndra len kahis le, iy kameh suni oro lau ala tandra-un i tan ta bahun ndri-iy ai, oro kado le ai.
LUK 14:33 I le buku aliy, i buku none are tado baruwani lakou tan mari bado api bwe, badeh, iy winiyan basahan lau tek bwe.
LUK 14:34 “Ndras badeh, mwasin, arile i buku none nyakadan tan ki-iu, idah kameh, ou baramesekei nyiminye ndras doh barame hamon barala buku sah bah?
LUK 14:35 Idah kameh, iy winiyan bakahei bala bwele-e munyak ta amekes munyak amwenen, bwe. Idah kameh akahei iu. I buku none ou are lau ndranyem udu aliy, ou anuhun!”
LUK 15:1 Ano iri lau ta akohok luk ta takis, hawe iri lau ta amekes karei ma lomondra ndra-in ame awudi Jises, ta anuhun sahou tan.
LUK 15:2 Eme ya iri Parasi hawe iri lau ta leheya kandriyen tiri Juwis badeh, nunu-uh anya, “Iy ndramak kede-eh, aseken iri lau ta karei ma lomondra ndra-in hawe aimon nyamon hawe iri.”
LUK 15:3 Ano Jises tiye sahou sokek doh i toro,
LUK 15:4 “Ya, i buku none ari tado sipsip tan ma rinek (100) udu aliy, ya buku none ari sipsip tan kamai; sebwe iy winiyan bala batakaleh bwe nadeh? Neh? Bwe labai. Iy kameh ruwani oro sipsip tan ma ndro ronoh ndro ari (99) nane ado lobwidiu are gwek. Ya idah kameh, iy ili takaleh ari nane amai dah, iy takaleh, takaleh ndra iy takalahei iy labai.
LUK 15:5 Ya, i buku none iy katakalahei iy, idah kameh, iy sekesek handru ma bwese-ei iy kameh udu kasen ma uru au a kon. Ano kameh, iy luhi oro kawas tan hawe oro lau badu mirihik ta asiu tan ame anya, ‘Ado kame kasekesek hawek, ta sipsip tek mene amai, jo ndratakalahei iy ja.’”
LUK 15:7 Eme Jises anya, “Jo katiye tado kamwenen, idah kameh i le buku aliy; sekesek laba tinan labai kameh udu kandrah i buku none ari ndramak ta karei ma lomondra ndra-in katubuni ndrinen. Sakalawi oro lau ma ndro ronoh ndro ari (99) mene oro anya oro mwasin, arile oro batubuni ndrine oro bwe.
LUK 15:8 “Ya, i buku none ari badih badeh, tan luk ronoh bororoh udu aliy, ya ari kamai. Idah kameh, iy telemei sun ma andrei sisir, asir bolo asiu, asir asir, winiya le iy baratakalahei.
LUK 15:9 Ya, i buku none iy takalahei, idah kameh, iy tiye oro kawas tan hawe oro lau asiu toro udu mirihik tan kameh ame ma iy anya, ‘Jo ndratakalahei luk tek bororoh ari mene amai, ado kame kasekesek hawek.’
LUK 15:10 Idah kameh, i le buku aliy; iri angelo badu kandrah kameh sekesek ado mada Kindrei i buku none, ari ndramak katubuni ndrinen.”
LUK 15:11 Eme Jises asehek ili le anya: “Ndramak ari badeh, nadun mwan ma la-uh udu aliy.
LUK 15:12 Eme iy bahan tiye i ta taman anya, ‘Tama ou atehei lakou tek keme ai.’ Eme tama uru apwai lakou tan mari badeh, i turu.
LUK 15:13 “Se luwen bwe, iy bahan eme tukumwi lakou tan mari ma sihinei i ta luk. Eme iy andrei luk ma iy iu ili kon munyak tinan ari. Eme iy sabarani luk tan badeh, i ta lakou laleyah.
LUK 15:14 Udu hamon ta luk tan mari anya kano, kon munyak doh badeh, nyamon bwe. Eme badeh, iy nyamon bwe.
LUK 15:15 Eme iy ili amekes lahou ta ndramak ari badu kon munyak doh, eme iy suni iy ili anyohan iri bou tan.
LUK 15:16 Iy badeh, abudon anya, ‘Jo kini ku-i ndrakeyam ala bou aimon kede-eh kameh, son tek iu ai.’ Arile, ari ndramak banyohan se nyamon bala nan bwe.
LUK 15:17 “Ano iy lomondra i hamon anya, ‘Jo kada-ah anya kimek ta son! Ya oro lau ta lahou ta tama badeh, aimon nyamon solo-an labai, ma nyamon badeh, erah.
LUK 15:18 Jo ki-iu ki hamon hawe tama, ya jo katiye tan ki buku doh: Jo badeh, amekes kandriyen ndra-in i ta Kindrei ma i tam.
LUK 15:19 Jo badeh, mwasin ta asahan nadum ja bwai; jo badeh, kasahan i buku none iri lau ta lahou tam.’
LUK 15:20 Eme iy suri iy, ma edek iu ili hamon hawe taman. Arile, iy udu ndra len kahis le badeh, taman atou iy ma ndrinen eden tan. Eme taman sakaliye ili badeh, akabah i la-un ma tawi iy.
LUK 15:21 “Ano nadun tiye i tan anya, ‘Tama jo badeh, amekes kandriyen ndra-in i ta Kindrei ma i tam. Jo badeh, mwasin ta asahan nadum ja bwai.’
LUK 15:22 “Arile, taman tiye i ta lohowan tan anya, ‘Ou ala suwi andrei ari awin mwasin ha-un, keme kasini ki la-un. Katehei ring ki andra limen hawe kasini ku-i katin kili.
LUK 15:23 Kadai bulumakau kasen, ya to kamekes nyamon tan, ma kasekesek.
LUK 15:24 Tasah, jo anya, naduk dah mene ndramak, arile iy bamak bwe; iy mene amai, arile iy ndrasahan ja.’ Eme iri amekes nyiminye aliy.
LUK 15:25 “Ya nadu tinen bwele-en badeh, udu ndra lokei. Iy eme mirihik ta asiu badeh, iy anuhun ndran hawe lau ada mana.
LUK 15:26 Eme iy luhi lohowan ari eme, iy lelen iy, ‘Iri amekes sasah doh?’
LUK 15:27 Eme lohowan anya, ‘Nadu tinem mene badeh, ndrame hamon ja. Ya eme tamam badeh, idi bulumakau kasen i ta aimon tan, tasah iy badeh, bamak bwe, iy ma mwasin le ndrame hamon ja.’
LUK 15:28 “Eme nadun bwele-en badeh, ibolosen, eme iy bwalen ta i bolon. Eme taman eme manan indrek iy, ta ki bolon.
LUK 15:29 Arile, iy tiye i ta taman anya, ‘Ou anyolom se! Na jaha ndra-au, ndra-au badeh, jo amekes lahou tam i buku none iri bonyo-ou, ya jo batebelese sese ta bohom bwe. Arile, ou badeh, batehei ari me kasen bame ya jo hawe iri kawas tek basekesek bwe.
LUK 15:30 Arile, nadum dah mene sabarani luk tam iu laleyah i tiri badih ta madasan, ya iy eme hamon ja badeh, ou adai bulumakau kasen i nan!’
LUK 15:31 “Eme taman anya, ‘Naduk, ou badeh, badu hawek ya lakou tek mari kameh i tam.
LUK 15:32 Arile, naduk, to badeh, kasekesek hawe kamekes nyiminyen, tasah aso anya iy mene ndramak, arile iy bamak bwe; iy mene amai, arile iy ndrasahan ja!’”
LUK 16:1 Ano Jises asehek sahou sokek ari i toro lau tan anya: “Lohowan ari badeh, atondrok lakou ta ndramak ari, tan lakou solo-an. Ndramak tan lakou solo-an nane dah, anuhun lohowan tan atondrok lakou dah badeh, sabara luk tan laleyah.
LUK 16:2 Eme iy luhi lohowan ta atondrok dah eme, ya iy lelen iy, ‘Jo mene anuhun ou amekes lakou ari. Ou torowenei sasah le ndra-au, hawe sasah le udu kede-eh kudu, ya keme tek. Tasah, ou ndrano, ou winiyan batondrok lakou tek ja bwai.’
LUK 16:3 “Eme lohowan ta atondrok lomondra iy tan le, anya, ‘Jo ki buku sah bah? Ndramak tan lakou solo-an tek kede-eh, ndratikahei jo ndrano ta gok. Ya jo badeh, boto-on ta apou ndren bwe, hawe jo ta bwilima ta anyolou lakou.
LUK 16:4 Jo tanan, jo badeh, ndrano. Eme ya jo badeh, kamekes tanan doh; ya idah kameh iri lau winiyan aseken jo ili asiu tiri ai.’
LUK 16:5 “Eme lohowan ta atondrok dah luhi iri lau mari mene, andrei lakou ta ndramak tan lakou solo-an mene tan dah, ame. Eme iy ndremenya iy ari bwena anya, ‘Ou mene andrei lakou sabe ta ndramak mene tan lakou solo-an?’
LUK 16:6 “Eme iy anya, ‘Jo mene andrei sabok ndrelekei ta olip ma rinek (100).’ “Eme iy anya, ‘Ou manyah atorou, ou mene andrei sabok ma lomonoh (50) le.’
LUK 16:7 “Ano iy ndremenya ndramak ari ja, ‘Ya ou mene andrei sabe?’ “Eme iy anya, ‘Jo mene andrei ndrom sahin wit rinek (100).’ “Eme iy tiye i tan, ‘Ou torowenei ndru lunoh (80) le.’
LUK 16:8 “Eme ndramak tan lakou solo-an nane dah, masiye lohowan tan. Tasah, iy badeh, anyolom bohon ili bwena, ta bolo manyah tan. Idoh badeh, leheya iri lau badu munyak dah badeh, iri tanan mwasin labai ta atondrok lakou tiri. Iri badeh, sakalau iri lau badu lomadan ta Kindrei.
LUK 16:9 “Eme ya jo katiye tado kamwenen, ado badeh, katamar iri lau na lakou tado badu munyak. Ya, i buku none ano badeh, iri kameh aseken ado ala kon ta udu le buku doh.
LUK 16:10 “Are lau winiyan tondrokei lakou bwisik badeh, iy winiyan tondrokei lakou tinan ale; ya are lau winiyan batondrokei lakou bwisik bwe badeh, iy winiyan batondrokei lakou tinan bwe ale.
LUK 16:11 Ya, i buku none ou winiyan batondrokei lakou badu munyak bwe; idah kameh, ou winiyan baratondrokei lakou handru barala buku sah?
LUK 16:12 Ya, i buku none ou winiyan batondrokei lakou ta ari ndramak bwe, ya idah kameh, are lau le kanyohan ou lakou bah?
LUK 16:13 “Lohowan ari winiyan bateu lahou ta lau tinan la-uh bala le rasan bwe. Ya idah kameh iy bwalen iy ari, ya iy aseken iy ari; deh bwe, kameh iy anuhun sahou ta iy ari labai ja, ta iy ari. Ado winiyan balelei Kindrei ta atondrok ado, ma hawe aseken luk ta atondrok ado bala le rasan bwe.”
LUK 16:14 Eme oro Parasi badeh, oro lau ta aseken luk labai, eme oro anuhun sahou mari doh badeh, ma oro bobose iy.
LUK 16:15 Eme Jises tiye i toro anya, “Ado le baden adeh, anya, ado mwasin ta mada lau adeh, arile bwe, Kindrei badeh, tanan ndrine ado. Tasah, sasah lau atou ta mada iri, anya idoh aliy le ai; arile bwe! Ta mada Kindrei anyolom badeh, lakou ndra-in laleyah.”
LUK 16:16 “Sahou ta nyala batanau mene Moses torowenei hawe iri sahou tiri propet badeh, sendrehendreh ta aliy kabatana le Jon ta alomwa, kabwe. Ya, sahou mwasin ta nyala tondrok ta Kindrei badeh, ndratiye udu kabatana Jon ta alomwa, eme taku idah. Eme lau mari badeh, atuw iri alih bolon.
LUK 16:17 Kandrah hawe kon munyak dah kameh ano iu mara-ei. Arile, ari kono-o tarou badu bolo batanau malen winiyan ta bano bwe.
LUK 16:18 “Ya, i buku none are lau katikahei udun ki-iu, ano ja iy kasudi badih ari ja, iy le mesekei karei i tan. Ya i buku none are ndramak kasudi ari badih udun ndratikahei iy, iy le mesekei karei i badan.
LUK 16:19 “Ndramak ari badeh, lakou tan solo-an labai. Iy badeh, anyasou na lakou saraman mwasin asih na luk solo-an, ma iy badeh, iwer nyamon ta aimon na len mari.
LUK 16:20 Udu boho mwendreu tan badeh, ndramak ari nyaran Lasarus. Ya iy badeh, manyah udu andri, ma badan mari ndrarahak le soso-ou.
LUK 16:21 Iy udu aliy badeh, atondrok kahu nyamon ta ndramak tan lakou solo-an kataku, ya iy kaimon. Ya iri mwi badeh, asom mada soso-ou tan.
LUK 16:22 “Ano, Lasarus imek ya iri angelo badu kandrah ame andrei iy ili manyah udu ka-u Abraham. Ano ndramak tan lakou solo-an ale imek, ya eme iri ahi iy.
LUK 16:23 Eme udu bolo jih kodo-oh badeh, odan isi, ma iy anyolom i len badeh, iy atou Lasarus manyah udu ka-u Abraham.
LUK 16:24 Eme iy aloh, ‘Tama Abraham, ou tikisi jo, ya ou suni Lasarus katehei andra limen ki ta gwa keme ta kalimek, ya kanyala. Tasah, jo akohok isi laba tinan labai, udu bolo jih dah!’
LUK 16:25 “Arile, Abraham anya, ‘Naduk, ou none lomondra ou mene ado awas se. Ou badeh, mene akohok lakou mwasin, ya Lasarus mene badeh, anyidiu lakou ndra-in. Arile, na dah, iy manyah udu mwasin ai, ya ou ado ta sisi-in ai.
LUK 16:26 Ya laba tinan labai ja badeh, lek laba tinan labai udu ndrokowa to kada-ah. Ma i buku none, are lau anya kudu dah kewek bilisiu hawem badeh, winiyan bwe. Ma ale, i buku none are lau kudu bilisiu tado badeh, anya keme hawe aso kameh winiyan bwe le.’
LUK 16:27 “Eme iy anya, ‘Tama, ou suni Lasarus kili asiu ta tama oro, katiye tanan ta nadu tine oro ma limeh same bolo sisi-in, jo udu aliy dah.’
LUK 16:29 “Eme Abraham anya, ‘Sahou ta Moses hawe sahou tiri propet badeh, ndrawek toro; Eme nadu tinem oro badeh, kanuhun sahou doh!’
LUK 16:30 “Eme iy anya, ‘Tama Abraham, ki buku none ari lau ndrasu-u, ya iy kamak ki loke, idoh mwasin ai. Winiyan tiye tanan i toro, ma idah kameh, oro ruwani kandriyen ndra-in toro ai.’
LUK 16:31 “Arile, Abraham tiye tan anya, ‘I buku none oro banuhun sahou ta Moses hawe sahou tiri propet bwe, idah kameh oro winiyan banuhun sahou ta su-u udu bolo lek tan amak eme loke, bwe ale.’”
LUK 17:1 Ya eme Jises tiye i toro lau tan anya: “Lakou ala, amekes lau taku ta kandriyen ndra-in ma karei kameh barasahan. Arile, oro lau ta amekes asahan kameh akohok sisi-in ndra-in labai ta aliy!
LUK 17:2 Buku ari ndramak bwidi ari nadu nah kataku ki bolo kandriyen ndra-in, sebwe mwasin ta ndramak doh kasawei ari bek maha-an ki balen, ya kakahei iy katuh kili bolo ndras ki-in gwek ai.
LUK 17:3 Eme ya mada ado kaleu tado. “Ya, i buku none nadu tinem ari amekes kandriyen ndra-in badeh, ou tiye sahou boto-on ki tan. Ya, i buku none iy tubuni ndrinen badeh, ou mani ki-iu.
LUK 17:4 Ya, i buku none iy amekes kandriyen ndra-in i tam san ma ndro taloh, udu bolo len ari. Ya, i buku none iy keme hamon san ndro taloh keme hawem katiye ou, iy ndratubuni ndrinen, badeh, ou mani kandriyen ndra-in nane iy amekes ewek tam.”
LUK 17:5 Eme oro aposel tiye i ta Laban anya, “Ou mesekei budon handru taso ki tinan!”
LUK 17:6 Eme iy anya, “Buku budon tado kasahan ki buku badu buwa kei mastet, badeh, idoh ado winiyan tiye i ta kei malberi dah, anya, ‘Ou sudi ou, ma kandrom keme loke, ya ou ala gwa ndras ma ateh ame loke!’ Idah kameh iy anuhun boho ado.
LUK 17:7 “Ya, i buku none ado ari lohowan tado kapou ndren ta bilin, o, iy katondrok iri sipsip tado; kon abeyeh ya iy badeh, udu bilin eme lewan, ya ou winiyan tiye iy suwi ewek hawem ta aimon nyamon, deh bwe?
LUK 17:8 Winiyan bwe! Idah kameh, ou tiye tan anya, ‘Ou mesekei nyamon tek ta beyeh suwi, ano ou bwese-ei keme bada sau ma ou abe-en jo kaimon nyamon, ma ka-un gwa bwena op. Ano ou baraimon barado hamon.’
LUK 17:9 Ano kameh, iy winiyan edeu wurah i ta lohowan tan, ta anuhun sahou tan, deh bwe? Winiyan bwe!
LUK 17:10 Ya eme ado ale kamekes ki le buku aliy; i buku none ado kamesekei lahou mari iri tiye ado ta amekes, ano ado katiye anya, ‘Aso badeh, lohowan laleyah, aso ndramesekei lahou, arile aso an hamon le ta batanau.’”
LUK 17:11 Ano Jises anya kedek kili Jerusalem eme ya iy andrei san ndrokowa kobek ta Samariya hawe Galili.
LUK 17:12 Eme iy edek anya kili bolo kon ari badeh, oro lau lepra ma ronoh ndruni iy. Ya eme oro are ndra len badeh, aloh i ta Jises anya, “Jises, ndramak ta leheya, ou tikisi aso!”
LUK 17:14 Eme Jises atou oro badeh, ma iy anya, “Ado kala kaleheya bada ado, kili tiri pris.” Eme ya oro adek ala, se nawin bwe ma bada oro ndramwenen ja.
LUK 17:15 Eme iy ari badu bolo oro ma ronoh nane anyolom sik lepra udu badan badeh, ndra-au. Iy eme hamon atou Jises, bohon ndra loken le hawe sekesek, ma iy atudun Kindrei.
LUK 17:16 Iy eme morahani iy udu kati Jises edeu wurah i tan. Ma iy ndramak nane doh badeh, badu Samariya.
LUK 17:17 Jises anyolom i ndramak doh le badeh, ma iy lelen iy anya, “Jo anya kede-eh, ado ma ronoh badeh, ndramwenen. Ya oro ndro ari ndra heh bah?
LUK 17:18 I buku sah handru iy ndramak badu leheleh le badeh, eme hamon edeu wurah? Ya oro lau badu Isra-el ndraheh bah?”
LUK 17:19 Ano Jises tiye i tan, “Ou suri ou, ya ou au; budon tam handru le badeh, ndramesekei ou ndramwenen ja.”
LUK 17:20 Len ari, oro Parasi rayah ame ndremenya Jises, “Na saba len handru kameh tondrok ta Kindrei kasahan tiri mwan ma badih badu kon munyak?” Eme Jises tiye i toro anya, “Tondrok ta Kindrei eme kameh bala buku none kalem ado kameh atou bwe.
LUK 17:21 Iri winiyan basehek anya, ‘Aha kanyolom, iy asah kada-ah,’ o ‘Iy asah kodo-oh.’ Aha kanuhun! Lahou Kindrei amekes kameh udu bolo ndrine aha.”
LUK 17:22 Ano Jises tiye i toro lau tan anya, “Na len eme, ado kameh aseken labai ta atou ari len ta Nadu Ndramak Awas, arile ado kameh winiyan batou bwe.
LUK 17:23 Ya, i buku none iri lau kanyowonya anya, ‘Asah kodo-oh,’ o, iri anya, ‘Asah idah!’ badeh, ado sarou sa-en hamon tiri.
LUK 17:24 Len ta Nadu Ndramak Awas asahan kameh lau mari atou iy. Len tan badeh, i buku none kalik takamek udu kandrah bilisiu ili taku bilisiu.
LUK 17:25 Arile, ma mwena ta aliy, jo kameh bwese maha-an, ma iri lau na bolo len dah kameh adeu kona iri eme tek.
LUK 17:26 “Len ta Nadu Ndramak Awas kameh asahan, buku le iri lakou mene asahan na len ta Nowa.
LUK 17:27 Iri lau amekes nyamon tinan, iri a-un gwa, iri mwan ma badih atasou ili eme, ili le isos ta len Nowa oro ala bolo ndron tan tinan. Eme kon atuh ma iri lau mari amak.
LUK 17:28 “I le buku none Lot oro mene. Iri lau mari badeh, aimon nyamon, iri badeh, a-un gwa, iri badeh, adeu lakou tiri i ta sisih, iri badeh, atah baso i bilin hawe iri atah asiu. Eme iri amekes ili ili,
LUK 17:29 winiya le Lot oro, ado Sodom ame len. Bek solpa anya i buku mada ur taku udu kandrah eme andri, ma sulumwi iri lau mari amak.
LUK 17:30 “Ya eme Nadu Ndramak Awas kameh asahan na len tan amwenen i le buku aliy.
LUK 17:31 Na len doh, are lau ereu bwele-e asiu loken sala hamon sala bolo asiu sakohok lakou tan ndri-iy. Ya are lau ereu bolo bilin iy sala hamon sala asiu tan ja ai, ndri-iy.
LUK 17:32 Ado badeh, samani kundruh ta udu Lot!
LUK 17:33 Are lau abudon labai ta kohan, iy kameh winiyan bandrei bwe handru en. Arile, are lau imek ta lahou tek, kohan handru kameh ta udu le buku doh.
LUK 17:34 Jo katiye tado kamwenen, na ben doh kameh, uru la-uh kameh an sau rasou ya ari kameh iu, ya ari kameh udu api.
LUK 17:35 Ya uru badih la-uh kameh alim badu wit areu se, ari kameh andrei iy iu, ya ari kameh udu api.”
LUK 17:37 Oro lau tan anuhun sahou doh badeh, ma oro ndremenya Jises anya, “Laban, idoh kameh asahan heh handru?” Eme, Jises tiye i toro anya, “Kon ale oda ari lakou, o ndramak ereu aliy, idoh kamen adeh, iri sirih ta aimon lakou bolo-an le kameh atukum areu aliy.”
LUK 18:1 Ano Jises tiye sahou sokek ari i toro lau tan ta oro badeh, saruwani budon handru toro, ma oro saruwani kandriyen ta salom.
LUK 18:2 Eme iy tiye anya, “Udu bolo kon tinan ari, ndramak ari ta anuhun sahou ta lau badeh, udu aliy. Iy badeh, banoh se Kindrei bwe, hawe iy ari tikisi tan, tiri lau bwe.
LUK 18:3 Ya udu kon tinan doh badeh, badih nyau ari udu aliy. Badih nyau doh, eme hawe ndramak ta anuhun sahou san solo-an ta tiye tan anya, ‘Ou aseben jo ta sahou, hawe ndramak ales hawek ta sahou!’
LUK 18:4 “Len solo-an, ndramak ta anuhun sahou badeh, bwalen ta aseben iy. Arile, udu badeh, iy le lomondra i tan anya, ‘Jo badeh, batudun Kindrei ma ba-en hamon tan bwe. Ma hawe jo ale batikisi ari lau bwe.
LUK 18:5 Arile, iy badih nyau kede-eh eme eme ja, eme eme ja, ya jo ndraliliy ai. Arile, ndri-iy ai, jo kaseben iy ta sahou tan ai.’”
LUK 18:6 Eme ya Laban anya, “Ado kanuhun sahou ta ndramak ndra-in ta anuhun sahou doh.
LUK 18:7 Ado abudon i buku sah handru i ta Kindrei? I buku none lau ta Kindrei amwenen, kaden ki tan na len na ben mara-ei. Ado anya idah kameh Kindrei ndrawoyah, ma iy winiyan banuhun boho oro bwai?
LUK 18:8 Jo katiye tado kamwenen, iy kameh anuhun sahou toro ma sebenei oro suwi labai! Arile, i buku none jo Nadu Ndramak Awas keme hamon keme kon munyak dah ja, jo kameh winiyan silahei iri mwan ma badih nane atehei budon tiri handru in tek, deh bwe?”
LUK 18:9 Eme Jises tiye sahou sokek dah, i toro lau anya oro le mwasin, oro an hamon ta kandriyen malen mari, ya oro badeh, anyolom ndra-in i tiri lau buku liliy.
LUK 18:10 Eme iy anya, “Uru lau la-uh badeh, ala bolo asiu tinan ta Kindrei, amekes salom. Iy ari badeh, Parasi, ya iy ari ja badeh, ndramak ta akohok luk ta takis.
LUK 18:11 Eme iy Parasi dah, ales ere loken asolom i badan le, i buku doh, ‘Jo edeu wurah ewek tam Kindrei, ta jo badeh, bala buku none iri lau mari ta ndrakok, hawe bala buku none iri lau ta nyaladan, hawe lau ta amekes madasarah kede-eh, bwe. Ma hawe bala buku none ndramak ta akohok luk ta takis kede-eh, bwe.
LUK 18:12 Ya jo badeh, abeles jo san la-uh la-uh, udu bolo wik ari ari, ma hawe udu bolo iri lakou tek ronoh, ronoh mari, jo edeu ari ari badu bolo iri lakou doh, ewek tam.’
LUK 18:13 “Arile, ndramak ta akohok luk ta takis dah, udu len badeh, ales ere loken ma kandrun i andri, ma hawe minen udu aden, anya, ‘Kindrei, ou tikisi jo, jo ndramak ndra-in ta karei ma lomondra ndra-in.’
LUK 18:14 “Jo katiye tado kamwenen, iy Parasi, bwai, arile ndramak ta akohok luk ta takis dah kameh iu i hamon i asiu tan, ma iy kameh udu mwasin ta mada Kindrei. Eme ya i buku none, are lau atudun iy le, idah kameh, iy ari nyaran bwe, ya i buku none are lau batudun iy bwe, idah kameh nyaran i tinan.”
LUK 18:15 Eme ale iri lau atiye nadu iri bwisik ame hawe Jises ya iy kedeu minen le ki bada iri, ta edeu nyosowan ki tiri. Eme oro lau ta Jises anyolom badeh, oro abolosen i tiri.
LUK 18:16 Arile, Jises luhi oro nah bwisik ame hawen ma iy tiye i toro lau tan, “Ado karuwani iri nah kame hawek. Ado saturuk iri, ndri-iy. Tondrok ta Kindrei badeh, tiri lau buku iri nah nadu bwisik kede-eh.
LUK 18:17 Jo tiye sahou handru ewek tado. I buku ado basahan buku none iri nah bwisik dah bwe, ado kameh winiyan bala bolo tondrok ta Kindrei bwe.”
LUK 18:18 Ano ndramak ari ta atondrok eme ndremenya Jises anya, “Ndramak ta leheya, ou mwasin handru en. Jo kamekes saba kandriyen handru ya jo kakohok kohan mwasin ta ereu le buku doh len mari?”
LUK 18:19 Eme Jises tiye i tan i buku doh, “Tasah handru ou aloh jo mwasin? Ari ndramak badeh, bala mwasin i buku none Kindrei bwe, Kindrei le ari, kabwe.
LUK 18:20 Ou tanam batanau ta Kindrei, ‘Ou samekes karei ta badih tasou, ou sadai ndramak samak, ou sabahana, ou sawasai. Arile, ou a-en bahandra tamam uru tinem, ma ou anuhun sahou turu.’”
LUK 18:21 Eme ndramak dah anya, “Jo ma loweu eme taku dah, jo in hamon ta sahou batanau mari le ai.”
LUK 18:22 Eme Jises anuhun ano, iy tiye i tan, “Lakou ari le kahis. Ou atehei iri lakou tam mari kili ba-en, ya luk ou akohok ta iri lakou tam nane, ou adeu ki tiri lau tiri lakou bwe. Ou amekes i buku doh kameh ou tam lakou mwasin handru udu kandrah. Ano ou bara-en hamon tek.”
LUK 18:23 Eme ndramak dah anuhun badeh, ma sa-ar asahan bwilin, ma iy tikisi labai, tasah tan lakou solo-an labai.
LUK 18:24 Eme Jises anyolom ndramak dah, ano iy anya, “Idah kameh, boto-on labai ta ndramak tan lakou solo-an, i buku none iy anya kili bolo tondrok ta Kindrei!
LUK 18:25 Handru labai, masakan boto-on boto-on labai ta ndramak tan lakou solo-an ta iy ili bolo tondrok ta Kindrei, arile manamun labai ja, ta kamel, i buku iy i bolo manamunu nunu.”
LUK 18:26 Eme oro lau anuhun sahou ta Jises badeh, oro anya, “Buku none i buku baden eh, are lau handru kameh winiyan akohok kohan mwasin ta ereu le buku doh?”
LUK 18:27 Eme Jises tiye i hamon i toro, “Saba lakou lau winiyan bamesekei bwe badeh, Kindrei winiyan mesekei.”
LUK 18:28 Ano Pita tiye i ta Jises anya, “Ou atou, aso ndraruwani lakou mari, ya aso ndra-en hamon tam.”
LUK 18:29 Eme Jises tiye i toro anya, “Jo tiye tado handru. Are lau abudon tondrok ta Kindrei, ma iy ruwani asiu tan, ya are lau ruwani udun oro hawe nadun oro, ma nadu tinen oro, ma taman oro hawe tinen oro ado kon ado gwek,
LUK 18:30 idah kameh, iy akohok lakou solo-an handru labai na dah, hawe akohok kohan mwasin ta ereu le buku doh, na len eme.”
LUK 18:31 Ano Jises kuhi oro lau tan ma ronoh la-uh ala a ka-un, ma iy tiye i toro, “To kameh ala loke ala Jerusalem, ya lakou mari iri propet mene asehek ta nyala Nadu Ndramak Awas, idah kameh asahan i handru.
LUK 18:32 Idah kameh, iri atehei iy ili mine iri lau ra-on badu leheleh. Ma iri kameh bobose iy, ma iri kameh amekes sahou ndra-in ta bwilima i tan, ma hawe omor iy. Ya iri kameh a-um iy na malou sakabuk i bek, ma hawe adai iy imek. Ya ano udu, i bada len taloh kameh iy amak ja.”
LUK 18:34 Arile, oro lau tan badeh, bakohok bolo sahou tan bwe, moson amai labai toro.
LUK 18:35 Jises eme mirihik ta Jeriko badeh, ndramak ari madan bwe, manyah udu ka-u san anyolou lakou.
LUK 18:36 Eme ya iy anuhun iri lau arou ala ame badeh, iy ndremenya iri anya, “Sasah badeh?”
LUK 18:37 Eme iri anya, “Jises badu Nasaret asah, edek san ewek eh.”
LUK 18:38 Eme ya iy aloh anya, “Jises, ou nadu tubu kabin Debit, ou tikisi jo!”
LUK 18:39 Eme oro lau adek an bwena badeh, abolosen i tan ma tiye iy kandru-uk. Arile, bwai, iy aloh ma arah boto-on le gwek anya, “Nadu tubu kabin Debit, ou tikisi jo!”
LUK 18:40 Eme Jises udu rasi ya tiye iri katiye ndramak doh, keme hawen. Iy eme mirihik badeh, Jises tiye i tan,
LUK 18:41 “Ou aso-ok jo kamekes sasah kewek tam?” Ya eme iy anya, “Laban, jo anya kanyolom kon ja.”
LUK 18:42 Eme Jises tiye i tan anya, “Madam kasak, budon handru tam badeh, ndramesekei ou ndramwenen ja.”
LUK 18:43 Eme nawin bwe, madan amwenen ma iy anyolom kon ja. Eme ma iy atudun nyara Kindrei, ma iy in hamon ta Jises. Eme iri lau mari anyolom badeh, iri mari atudun nyara Kindrei.
LUK 19:1 Jises ili bolo kon Jeriko. Iy edek san amwenen ta iu.
LUK 19:2 Ya ndramak ari nyaran Sakiyas udu aliy. Iy ndramak ta atondrok iri lau ta akohok luk ta takis. Ya iy ale tan lakou solo-an.
LUK 19:3 Iy badeh, aseken handru ta atou bada Jises, arile iy badeh, mo-on labai, ya eme koroha iri lau solo-an badeh, iy batou Jises bwe.
LUK 19:4 Eme iy sakaniy i bwena ta san kameh Jises edek eme aliy, ya iy nyikidi kei ari aloh, Sikamo.
LUK 19:5 Jises edek eme isos bahandra kei nane iy udu aliy, ya madan anya ki loke badeh, atou iy. Eme Jises tiye i tan anya, “Sakiyas, ou ame andri suwi, na dah kameh jo anya kewek asiu tam.”
LUK 19:6 Eme iy ales eme andri, ndrinen badeh sekesek labai, ma iy kuhi Jises i asiu tan.
LUK 19:7 Ya eme iri lau atou badeh, iri nunu-uh nunu-uh anya, “Aha kanyolom se! Iy badeh, ilih amadin asiu ta ndramak ari ta amekes kandriyen ndra-in.”
LUK 19:8 Sakiyas eme ales ere loke udu asiu tan, tiye sahou i ta Laban anya, “Laban, ou ndratou! Na dah kameh jo edeu lakou tek ranah mara-ei kameh i tiri lau tiri lakou bwe. Ya, i buku none jo mene ndrabene-ei rayah lakou tiri ndrame tek, idah kameh, jo edeu lakou san hasan ja, i la-u toro mene ja.”
LUK 19:9 Eme Jises tiye i tan i buku doh, “Na len dah Kindrei ndrasebenei oro ndramak badu asiu dah, tasah na dah, ndramak dah, ndrasan lundriye Abraham.
LUK 19:10 Tasah, Nadu Ndramak Awas eme andri dah badeh, ta asilah ma ta aseben are oro taku ta kandriyen ndra-in.”
LUK 19:11 Iri lau anuhun iy asehek sahou nane dah kahis le badeh, iy asehek sahou sokek i tiri, tasah iy ndrame mirihik ta Jerusalem. Eme iri lau lomondra anya, idah kameh Kindrei atondrok kon dan ai?
LUK 19:12 Eme Jises anya, “Na len ari badeh, ndramak batun ta boho kamen ra-em badeh, anya kili kon munyak ari udu len, ta iri kadeu iy kasahan kabin ta atondrok iri, ano iy barame hamon ja.
LUK 19:13 Eme iy luhi oro lohowan tan ma ronoh ame, ya iy atehei luk ma luwa (K200) i mine oro. Udu bolo luk ma luwa (K200) doh badeh, iy ari ari akohok lunek (K20). Ano iy tiye i toro i buku doh, ‘Ado kadeu luk doh, ki ta amekes lahou, ya kaliu bundruwen keme hamon, winiya le jo barasahan.’
LUK 19:14 “Arile, iri lau badu kon tan baseken iy asahan kabin bwe. Eme iri suni iri lau rayah are hamon tan ala, ta tiye i tan anya, ‘Ahi bwale ahi ndramak kede-eh asahan kabin tahi.’
LUK 19:15 “Arile, bwe adeh, iy ndrasahan kabin ai. Ano iy eme hamon eme kon. Eme iy suni sahou ili toro lohowan mene iy edeu luk i mine oro ame, ya iy ndremenya oro ta sabe handru oro ndraluwi ndrame na luk mene.
LUK 19:16 “Eme iy ari ma mwena ili anya, ‘Tinan tek, luk tam mene, badeh, jo ndraluwiy luwa (K200) ja ndrame hawe lunek (K20) mene eme minek.’
LUK 19:17 “Eme kabin tan anya, ‘Lohowan tek, ou mwasin handru. Ou tondrokei luk nadu bwisik asahan sola, ou kameh atondrok kon tinan ronoh udu baha tondrok tam.’
LUK 19:18 “Ano iy ari eme ja anya, ‘Tinan tek, luk tam mene badeh, jo ndraluwiy rawa (K100) ja ndrame hawe lunek (K20) mene eme minek.’
LUK 19:19 “Eme kabin tiye i tan anya, ‘Ou kameh atondrok kon tinan limeh.’
LUK 19:20 “Ano iy ari eme ja anya, ‘Tinan tek, luk tam mene asah idah, jo su-iy na ndrari kolau, ma tone udu abe-en ou.
LUK 19:21 Jo badeh, inoh ou, tasah ou badeh, ndramak ta losen. Ou akohok lakou laleyah ma akohok lakou badu bwisi limem bwe.’
LUK 19:22 “Eme kabin tiye i tan anya, ‘Ou lohowan ndra-in! Jo kameh edeu maha-an ewek tam in hamon ta sahou tam. Ou tanam jo badeh, ndramak ta losen. Jo akohok lakou laleyah ma akohok lakou badu bwisi limek, jo atah bwe.
LUK 19:23 Ya, i buku sah handru, ou batehei luk tek bala bolo buk ta ndrahu luk bwe? Ya, i buku none jo keme hamon badeh, jo winiyan andrei ma hawe bundruwen ale.’
LUK 19:24 “Ano iy tiye i toro lau nane ales are mirihik dah, anya, ‘Ado kakuhi luk ma lunek (K20) tan, ya katehei ki ta ndramak nane luk ma luwa (K200) udu minen.’
LUK 19:25 “Eme oro lau tiye i ta kabin anya, ‘Tinan taso, iy mene ndrandrei luk ma luwa (K200) bwena mene o!’
LUK 19:26 “Arile, ndramak tinan dah, tiye i toro ja anya, ‘Jo katiye tado, are lau oro mene ndrakohok bwena, idah kameh oro akohok i la-un ja. Arile, are lau oro sese le udu aliy, idah kameh kuhi mari ano iu.
LUK 19:27 Ma ado katiyani are lau oro mene anya jo sasahan kabin badeh, kame, ya ado kadai oro kamak kare madak.’”
LUK 19:28 Jises asehek sahou doh, ano iy edek in bwena toro iu ili Jerusalem.
LUK 19:29 Iy edek eme mirihik ta kon Betapes ma Betani, udu loboho kesehe mandrei aloh Olip. Eme iy suni uru lau tan la-uh ma tiye turu anya,
LUK 19:30 “Ah kala kon udu bwena ta to badeh. Ya ah ala bolo kon le kameh ah atou donki ari loweu, ari ndramak bamanyah bare bwele-en bwe le. Ya ah katolowei malou, ma ah kasiriniy keme dah.
LUK 19:31 Ya, i buku none are lau kandremenya ah anya, ‘Ah anya katalou malou tan ta sasah?’ Ah katiye ki buku doh, ‘Laban gok udu tan.’”
LUK 19:32 Eme uru lau tan nane ala badeh, atou udu aliy, i le buku none Jises nane ndrasehek turu.
LUK 19:33 Ya uru talou malou kahis le badeh, iri lau ta nadu donki dah, anya, “Hei, ah anya katalou donki badeh, ta sasah?”
LUK 19:34 Eme uru tiye i tan anya, “Laban gok udu tan.”
LUK 19:35 Eme uru sirini iy ili hawe Jises, ano oro lowosani kolau toro lawe-en badu bwele-e awin toro i konan, ma bwese-ei Jises manyah udu la-un.
LUK 19:36 Eme iy edek ili badeh, iri lau ame asin awin tiri lawe-en ya iri talaha in san.
LUK 19:37 Ano iy edek eme mirihik ta kon tinan, san ili andri ili bwilin ndrondro-ou Olip. Eme iri lau solo-an badu hamon tan badeh, iri sekesek tinan labai, ma hawe iri atudun nyara Kindrei na boho iri i loken, ta lahou tinan mari mene iri ndranyolom ndra-au.
LUK 19:38 Ma iri anya, “Kasekesek ki ta kabin! Kasore nyaran! Iy eme ta nyara Laban!” “Mondrei udu kandrah, ma lomadan ki ta Kindrei badu loken!”
LUK 19:39 Eme oro Parasi rayah ado bolo iri lau nane, tiye i ta Jises anya, “Ndramak ta leheya, ou abarah iri lau tam kandru-uk!”
LUK 19:40 Eme iy tiye i toro anya, “I buku none oro kandru-uk kameh iri bek kameh katubuni iri, ma iri kasarakau.”
LUK 19:41 Eme iy edek eme mirihik ta kon tinan Jerusalem, ma iy anyolom badeh, iy eden ndranye Jerusalem.
LUK 19:42 Iy anya, “Jo badeh, aseken labai na len dah, ado katanan kandriyen ta amekes mondrei. Arile, bwai, ndramai ta mada ado ai.
LUK 19:43 Na len eme kameh iri lau ta amekes bahun ewek tado kameh tabadah munyak eme loke anyek kon tado. Ma iri kameh awudi kon tado mari, ma turuki madasan mari awek bolon.
LUK 19:44 Iri kameh adai ado ma hawe nadu ado oro. Kon ma asiu tado kameh atokos, ari lakou winiyan bado bwe. Tasah, ado banyolom tanan ta Kindrei bwe, ta aseben ado bwe.”
LUK 19:45 Ano Jises ili bolo asiu tinan ta Kindrei, ya iy atikah iri lau asih lakou are aliy, au a manan.
LUK 19:46 Eme iy tiye i tiri anya, “Buk ndrabun tiye i buku doh, ‘Asiu tek dah, asiu ta amekes salom labai,’ arile ado ndramesekei asiu tek badeh, ndrasahan ‘asumwe iri lau ta bahana.’”
LUK 19:47 Eme na len mari badeh, Jises leheya udu asiu tinan ta Kindrei, arile iri tinan tiri pris, ma hawe iri lau ta leheya kandriyen tiri Juwis, ma hawe iri lau batun tiri lau lomondra ta anya kadai iy.
LUK 19:48 Arile, iri takaleh madasan ta kada iy labwe, tasah iri lau mari badeh, tawi sahou tan.
LUK 20:1 Ano na len ari, Jises leheya iri lau ta bolo sahou mwasin udu bolo asiu tinan ta Kindrei. Eme iri lau tinan tiri pris, hawe iri lau ta leheya kandriyen tiri Juwis, ma hawe iri lau ta batun tiri lau badu Isra-el ame hawen.
LUK 20:2 Eme iri tiye i tan anya, “Ou tiye keme taso, ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?”
LUK 20:3 Eme Jises asumon boho oro i buku doh, “Jo anya kandremenya ado ta lakou ari. Ano ado katiye keme tek ja.
LUK 20:4 Kala Jon mene alomwa iri lau, iy akohok boto-on badu heh? Lakou doh badu kandrah deh, badu kon munyak le?”
LUK 20:5 Eme oro asehek nyala aliy udu ndrokowa oro ari ari anya, “Buku none to katiye anya, ‘Idoh lakou badu kandrah,’ idah kameh iy ndremenya to ja anya, ‘Buku sah ado batehei budon tado bala ta aliy bwe?’
LUK 20:6 Arile, i buku none to katiye anya, ‘Idoh kandriyen tiri lau le,’ idah kameh, iri lau korowei to na bek, tasah budon tiri lau ndrahas anya, Jon badeh, propet ta Kindrei handru.”
LUK 20:7 Eme iri asumon bohon i buku doh, “Ahi tana ahi bwe.”
LUK 20:8 Eme Jises tiye tiri i buku doh, “Jo ale, jo winiyan batiye bawek taha are lau handru atehei nyaran tinan eme tek ya jo amekes iri gok dah.”
LUK 20:9 Ano Jises asehek sahou sokek ari ili tiri lau anya, “Ndramak ari bwidi bilin ta waen ari. Eme iy atehei bilin ili mine iri salibah ta atondrok, ma iy iu i kon rakon ja, ma udu gwek luluwen labai.
LUK 20:10 Eme na len ta abwe-eh buwan asahan, iy suni lohowan tan ari ili hawe oro salibah atondrok bilin waen nane dah, anya kakohok rayah buwa waen ki minen. Eme oro salibah adai iy ma tikahei iy iu na luka minen ma luka katin.
LUK 20:11 Ano ja, tama bilin dah, suni lohowan tan ari ili ja. Iy ili i le buku aliy le, oro adai iy ma abolei iy andra-i labai, ma tikahei iy iu na luka minen ma luka katin.
LUK 20:12 Ano ja, iy suni lohowan tan ari ili ja san tulusin ai. Eme oro adai iy, ma iy akohok andra-i labai, ma oro akahei iy eme len.
LUK 20:13 “Ano tama bilin anya, ‘Ki buku sah bah? I buku none jo kasuni naduk amwenen ala jo aseken iy labai kede-eh, sebwe oro kameh anuhun boho naduk.’
LUK 20:14 “Arile, oro salibah ta bilin atou iy edek eme, oro asehek nyala oro anya, ‘Ei, nadun eme, to kadai iy, ma to kakuhi iri lakou tan mari.’
LUK 20:15 Eme oro kuhi iy eme len ta bilin, ma oro adai iy imek. “Ya ado abudon i buku sah? Tama bilin kameh amekes saba lakou handru kili toro salibah nane abo gok an bolo bilin nane?
LUK 20:16 Iy kameh idi oro lau doh amak, ma iy kameh atehei bilin ili mine iri lau rayah ja kabo gok ta aliy.” Ya iri lau anuhun sahou sokek doh aleu labai, eme iri anya, “Sasahan ai, ma ndri-iy ai!”
LUK 20:17 Arile, Jises anyolom boto-on i toro ma i lelen, “Sahou mene ndratorowenei ndra-au, saba moson ta aliy handru? Sahou i buku doh, ‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek.’
LUK 20:18 Are lau oro taku a bada bek doh kameh, ndruwi oro kameh ibok i le bwisik, arile are lau oro i buku none bek doh, taku i la-u oro, idah kameh ati-i oro abwesek.”
LUK 20:19 Eme iri lau ta leheya kandriyen tiri Juwis hawe iri tinan tiri pris nane anya ja Jises asehek sahou sokek doh i bada iri. Eme ma iri anya katakaleh madasan ta ateu iy na le liliy. Arile, oro winiyan bwe, tasah oro anoh iri lau.
LUK 20:20 Eme oro atehei mada oro udu ta Jises, ma oro suni iri lalou rayah atehei mada iri udu ta Jises. Oro amekes oro i buku none lau ta tandra-un sahou handru, ala, anya kasan Jises na sahou. Ya eme oro anya katehei iy ki mine iri lau ta atondrok hawe kili baha boto-on ta tondrok tiri Rom.
LUK 20:21 Eme ya oro lalou lelen Jises anya, “Ndramak ta leheya, aso badeh, tanan sasah ou leheya kede-eh, ndra handru le ai, ma ou badeh, banoh are ndramak bwe. Ou badeh are le alih turu. Tasah, ou badeh, leheya san ta Kindrei handru i tiri lau.
LUK 20:22 Ou abudon i buku sah? Mwasin ta taha kadeu takis ki ta Sisa, deh ndri-iy?”
LUK 20:23 Arile, Jises anyolom ili mada oro ta wasai ma tiye toro anya,
LUK 20:24 “Ado kaleheya keme tek ari luk bororoh. Malawi ndramak ma nyaran kede-eh are lau handru?”
LUK 20:25 Eme oro anya, “Ta Sisa.” Ya eme Jises tiye i toro, “Mwasin, saba lakou ta Sisa, ado kadeu ki ta Sisa. Ya saba lakou ta Kindrei, ado kadeu ki ta Kindrei.”
LUK 20:26 Eme oro anya kawasai iy kasehek sahou ndra-in kudu mada iri lau, ma oro kateu iy. Arile, oro winiyan batawi iy bwe. Eme ya boho oro asak ta sahou tan i toro, ma oro andru-uk.
LUK 20:27 Eme oro Sadusi rayah ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe.
LUK 20:28 Eme oro ndremenyani Jises i buku doh, “Ndramak ta leheya, Moses bwena mene torowenei nyala taha anya, ‘Buku none ari ndramak imek, ya udun erah ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’
LUK 20:29 Ya, len ari bwena, oro lau ma ndro taloh, oro badeh, nadu tine oro. Eme kadok toro i tasou ta badih ari, eme ya iy imek ma iy nadun bwe.
LUK 20:30 Ano iy bwaneh sudi nyawe nadu tinen i tan, eme iy imek, ma nadun bwe le.
LUK 20:31 Ano ja silih sudi nyawe nadu tinen uru ja, eme iy imek ale, nadun bwe le. Eme amekes i buku doh, ili ano ta kalai. Oro mari badeh, amak ari nadu oro bwe.
LUK 20:32 Ano udu hamon badeh, badih imek ale.
LUK 20:33 Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro ma ndro taloh nane doh.”
LUK 20:34 Eme Jises tiye i toro anya, “Lau mwan hawe badih are munyak dah, asoh iri a tasou.
LUK 20:35 Arile, iri mwan hawe iri badih mwasin ta mada Kindrei kameh, na len eme kameh iri amak ame awas ja, iri winiyan bala tasou ja bwe.
LUK 20:36 Iri kameh asahan buku iri angelo, ya iri badeh, nadu Kindrei labai, tasah iri amak ame awas ja.
LUK 20:37 Handru labai. Iri lau ndramak bwena, hamon kameh iri amak ja. Moses ale leheya i buku aliy le. Idoh asehek nyala len mene Moses atou jih anya udu ta kei. Tasah, Moses mene tiye nyala Laban i buku doh: ‘Ou badeh, Kindrei ta Abraham, ta Aisik, ma ta Jekop.’
LUK 20:38 Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le. Handru labai. Iri lau mari mene ndramak ndrasu-u, ma hawe iri lau mari ado loken kahis le, iri mara-ei a buku awas kahis le, tasah Kindrei atondrok iri.”
LUK 20:39 Eme oro lau rayah ta leheya kandriyen tiri Juwis anya, “Ndramak ta leheya, ou tiye sahou badeh, amwenen handru.”
LUK 20:40 Ya eme ma iri anoh, ma iri bandremenya iy ja bwe.
LUK 20:41 Ano Jises ndremenya oro anya, “I buku sah handru iri mwan ma badih anya ja, Krais badeh, nadu Debit?
LUK 20:42 Tasah, udu bolo buk Wari ta Debit tiye i buku doh, ‘Laban Kindrei tiye i ta Laban tek i buku doh: “Ou ame manyah ado loboho minek salin,
LUK 20:43 winiya jo le, baratehei iri lau ta amekes budon ndra-in ewek tam, barabwesek barado bahandra katim.”’
LUK 20:44 Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?”
LUK 20:45 Eme iri lau anuhun kahis le badeh, Jises tiye i toro lau tan anya,
LUK 20:46 “Mada ado kaleu toro lau ta leheya kandriyen tiri Juwis. Oro badeh, aseken adek ala ame na kolau moroyan lawe toro, eme oro anya lau mari kasumon oro na len ta baen. Ya oro anya kamanyah kareu le bwabwai mwasin badu ndrahu tukum tiri Juwis, ma ndrahu kon ta atudun ta nyamon tinan.
LUK 20:47 Oro bene-ei asiu tiri badih nyau, ya iri wendreya ta aliu salom lawe-en lawe-en. Oro lau buku doh kameh akohok maha-an laba tinan labai.”
LUK 21:1 Jises badeh, udu ndra bolo asiu tinan ta Kindrei kahis, iy eme suri madan eme loken badeh, iy atou iri lau tiri lakou solo-an, adeu luk tiri i bolo lakou ta ndrahu luk udu asiu tinan ta Kindrei dah.
LUK 21:2 Ano ja, iy atou badih nyau ari tan se lakou bwe badeh, akahei luk tan bororoh saraman ma la-uh le.
LUK 21:3 Eme Jises anya, “Jo katiye tado handru en! Iy badih nyau tan lakou bwe kede-eh, akeh luk solo-an labai ja ta lau mari.
LUK 21:4 Tasah, iri lau mari kede-eh akahei rayah le badu bolo luk tiri solo-an, arile iy badih nyau tan lakou bwe badeh, atehei luk mari ta sukunyan ndrala.”
LUK 21:5 Eme oro lau tan rayah atou asiu tinan ta Kindrei amekes na bek badeh, konen konen labai; ma lakou moroyan adeu i ta Kindrei, eme oro asehek nyala aliy. Arile, Jises eme tiye i toro,
LUK 21:6 “Ado ndratou lakou mari kede-eh, na len eme kameh ado winiyan batou ari ndruwi asiu bek winiyan bales, bareu loken bwe. Iri marakon kameh ato-oh iu i andri.”
LUK 21:7 Eme oro ndremenya iy anya, “Ndramak ta leheya, na saba len handru kameh lakou doh kasahan? Ya saba kalem kameh kasahan bwena ta leheya lakou doh eme bakep ai?”
LUK 21:8 Eme Jises tiye i buku doh, “Ado kanyolom kamwenen, ya ari ndramak sawendreyani ado, ndri-iy. Iri lau solo-an kameh ame anya iri asehek sahou tek ma anya, ‘Jo dah Krais,’ ma, ‘Len ndra bakep ai, ta Kindrei eme akohok taha ame hamon.’ Arile, ado sa-en hamon toro.
LUK 21:9 Ya, i buku none ado anuhun kurutuwe bahun, hawe lakou maha-an asahan, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh kahis le.”
LUK 21:10 Ano iy tiye i toro ja anya: “Kon munyak tinan ari kameh amekes bahun i ta kon tinan ari; ya kabin badu kon rakon kameh amekes bahun i ta kabin badu kon rakon ja.
LUK 21:11 Ma idah kameh kon ari ari kameh ndroi asahan aliy, ya son kameh asahan bolo kon, hawe sik asahan aliy. Ma idah kameh kalem ta nohowa lau kameh asahan bada kandrah.
LUK 21:12 “Arile, lakou mari doh kahis le kameh iri ateu ado. Ma iri kameh adai ado, ano seheyani ado ala asiu ta atukum tiri Juwis ales are mada sahou. Ano ja kameh iri seheyani ado ala hawe iri kabin hawe iri lau ta atondrok. Iri amekes doh tasah, idoh len ta ado katiye sahou tek mwasin ki tiri.
LUK 21:13 Ma idoh kameh atehe san mwasin i tado kasehek nyala sahou tek ki toro.
LUK 21:14 Arile, ado badeh, kalomondra bohon ki bwena ta ado sabwerei ta sasah kameh ado kasehek.
LUK 21:15 Jo le kameh edeu sahou hawe budon mwasin ewek tado, ya iri lau kameh winiyan bandres ma tebelese budon nane jo edeu ewek tado ta atiye bwe. Ma winiyan babisini sahou tado bwe.
LUK 21:16 Ya tama ado oro, hawe tine ado oro, hawe nadu tine ado oro, hawe lowa ado oro, ma hawe kawas tado oro kameh adeu sa-oh tado, ma eme iri kameh adai ado rayah kameh amak.
LUK 21:17 Ya iri lau mari kameh baseken ado bwe, tasah ado an hamon tek.
LUK 21:18 Arile, ari lami batu ado winiyan ba-au bwe, ma koha ado kameh udu le buku doh.
LUK 21:19 Arile, i buku none ado le kabadok ado, idah kameh, ado le winiyan sebenei koha ado handru.
LUK 21:20 “Ya, i buku none ado katou iri lau ta bahun kawudi Jerusalem, badeh, ado tanan ai, mirihik kameh Jerusalem atokos ai.
LUK 21:21 Eme ya, are lau oro are kon Judiya badeh, katobwak kala bolo mandrei. Ya are lau oro are bolo kon tinan badeh, katobwak kame len. Ma hawe are lau oro are len badeh, sala bolo kon tinan, ndri-iy.
LUK 21:22 Tasah, idoh badeh, len ta adeu maha-an i hamon, amwenen le ta sahou ta Kindrei mene ndratorowenei.
LUK 21:23 Len doh kameh len ndra-in labai tiri badih ale nah ereu tiri, ma badih nah ma nyandren! Tasah, Kindrei kameh ibolosen i tiri lau badu munyak dah, ma iri kameh bwese maha-an laba tinan labai.
LUK 21:24 Ya idah kameh, iri amundroh lau rayah na samen, ya iri rayah kameh kuhi iri a bonyo-ou a kon munyak tinan mari. Ma iri lau badu leheleh kameh atondrok lakou mari badu Jerusalem, winiya le tondrok tiri barano.
LUK 21:25 “Idah kameh kalem asahan ta an, kalem asahan ta bun hawe iri ndrau. Ya iri kon munyak tinan kameh bwese maha-an laba tinan labai, hawe iri anoh ma anyon ala ame ta kurutuwe bayau badu ndras.
LUK 21:26 Lau mari kameh anoh ma mada iri abuluw ta lakou kameh asahan la-u kon munyak, ma boto-on mari badu kandrah kameh nyukunyok.
LUK 21:27 Ano amwenen ta lakou doh, asahan kameh, iri lau kameh anyolom Nadu Ndramak Awas asahan ereu bwele-e asi kandrah, ma boto-on tan ma lomadan tinan labai.
LUK 21:28 Eme ya, i buku none ado atou lakou mari doh kasahan badeh, mada ado katele ai, tasah len ta ndramak ta seben badeh, ndrame bakep ai.”
LUK 21:29 Ano ja iy asehek sahou sokek doh i toro, “Ado kanyolom kei pik hawe iri kei mari kede-eh se.
LUK 21:30 I buku none ado katou la-un ha-un kasahan badeh, ado tana ado, idah kameh kon i le an ai.
LUK 21:31 Ya, buku ado anyolom iri lakou nane jo ndrasehek, ado tana ado tondrok ta Kindrei ndrame bakep ai.
LUK 21:32 Jo tiye tado handru en! Iri lau rebesem areu kede-eh kahis na len dah kameh bamak bwe le, iri lakou doh kameh asahan.
LUK 21:33 Kandrah ma kon munyak dah kameh ano iu, arile sahou tek le kameh winiyan bano bwe.
LUK 21:34 “Bale ado ki tado doh! Ado satehei budon hawe ndrine ado sahis ta lakou badu kon munyak, hawe ado sabulum ndrine ado na nyamon hawe a-un gwa boto-on ta amekes manyah tado kudu mwasin. Bwe kameh, len doh asahan kameh i le mani tur.
LUK 21:35 Tasah, lakou doh kameh asahan eme ta lau mari badu munyak.
LUK 21:36 Arile, na len mari, mada ado kaleu hawe ado kasolom, eme ya ado winiyan ales boto-on ma ado winiyan teleyani lakou doh kameh asahan. Ma hawe ado winiyan ales are mada Nadu Ndramak Awas.”
LUK 21:37 Na len ari ari badeh, Jises leheya udu asiu tinan ta Kindrei. Ano kon eben, iy iu ili mandrei Olip amadin.
LUK 21:38 Eme iri lau mari na mandraben badeh, ala anuhun iy asehek sahou udu asiu tinan ta Kindrei.
LUK 22:1 Kabwai, mirihik ta len ta nyamon tinan, ta jabi ramen yis bolon bwe asahan ai, iri aloh Pasoba.
LUK 22:2 Eme iri lau tinan tiri pris, hawe iri lau ta leheya kandriyen tiri Juwis anya kadi Jises ki san ta bahana le. Tasah, iri badeh, anoh iri lau solo-an ado aliy.
LUK 22:3 Eme Satan badeh, i bolo ndramak ari badu bolo oro lau ma ronoh la-uh ta Jises, nyaran Judas Iskariyot.
LUK 22:4 Eme iy ili edeu sa-oh i tiri lau tinan tiri pris, ma hawe iri lau tinan ta ndrokei ta atondrok asiu tinan ta Kindrei, ma oro asehek nyala aliy; ta Judas kameh edeu Jises ki mine oro ki buku sah handru.
LUK 22:5 Eme oro sekesek ta aliy, ma sekesek ta asih Judas na luk.
LUK 22:6 Eme Judas sekesek ta aliy, ma iy ili takaleh madasan ta kadeu Jises ki san ta bahana le, ya iri lau sala tanan ta aliy labai.
LUK 22:7 Ano, len ta nyamon tinan ta jabi ramen yis bolon bwe badeh, asahan. Len doh, iri aloh Pasoba. Idoh badeh, iri pris adai sipsip kasen ta aimon ta Pasoba.
LUK 22:8 Eme Jises suni Pita uru Jon kala Jerusalem ma tiye turu anya, “Ah kala bwena kalowosa lakou ta to ta aimon na len ta Pasoba.”
LUK 22:9 Eme uru anya, “Ou aseken aru kala heh, kalowosa na to nyamon?”
LUK 22:10 Eme Jises tiye turu anya, “Ah kanuhun. Ah kadek kala bolo kon tinan badeh, ya idah kameh, ah atou ndramak ari bwese-ei gwa in bolo sabok kameh ndruni ah. Eme ah ka-en hamon tan kala asiu iy ili aliy,
LUK 22:11 ma ah katiye ki ta ndramak ta asiu anya, ‘Ndramak ta leheya anya, asiu tan ndraheh? Ya idah kameh oro lau tan ma iy kameh aimon nyamon ta Pasoba a-en aliy.’
LUK 22:12 Idah kameh, iy leheyani ah ta bolo asiu ari udu loken badeh, ndralowosani le. Eme ah kala aliy kamekes nyamon kudu le tato ai.”
LUK 22:13 Eme uru ala amwenen le, i buku boho Jises ndratiye turu nane. Eme oro lowosani nyamon ta Pasoba ma asiu buku le aliy.
LUK 22:14 Eme mada an ta aimon nyamon asahan badeh, Jises hawe oro lau tan manyah ado andri ndrahu nyamon.
LUK 22:15 Ano iy tiye i toro anya, “Jo badeh, aseken handru ta aimon nyamon ta Pasoba dah hawe ado, tasah len hamon eme kameh, jo kameh bwese sisi-in tinan labai.
LUK 22:16 Eme jo katiye tado kamwenen, jo kameh winiyan baimon nyamon na len ta Pasoba ja bwai; winiya le barasahan handru i san ta imek tek i nyara Pasoba, ma tondrok ta Kindrei winiya udu le buku doh.”
LUK 22:17 Ano, Jises kuhi bwiniu ma iy edeu wurah, ma edeu salom, ma tiye anya, “Ado ka-un waen dah, a sese le ki winiya ado.
LUK 22:18 Jo katiye tado kamwenen, jo kameh winiyan ba-un ndraye buwa waen dah ja bwai, winiya le tondrok ta Kindrei barasahan.”
LUK 22:19 Ano Jises kuhi jabi ramen, iy edeu wurah i ta aliy, ano iy boso-ei i noro ma iy anya, “Idah odak amwenen. [Jo edeu ta aseben ado. Ado kamekes kandriyen ki le buku doh ta abudon jo.”
LUK 22:20 Ano i le buku aliy, nyamon ano badeh, iy kuhi bwiniu waen, ma iy anya, “Bwiniu waen dah, kalem ta sahou randra le ha-un ja, ta ndrayek amou ewek ta aseben ado mari.]
LUK 22:21 Arile, ndramak ta edeu sa-oh tek hawe ta edeu jo i mine iri lau ndra-in badeh, manyah udu ndrahu nyamon hawek kada-ah.
LUK 22:22 Nadu Ndramak Awas kameh imek, ya sahou ta aliy bwai. Idoh in hamon ta seken ta Kindrei le. Arile sisi-in laba tinan kameh i bwele-e ndramak iy ale atehei iy ili mine iri lau ndra-in.”
LUK 22:23 Eme oro ndremenya oro ari ari ta are lau handru badu bolo oro doh kameh amekes lakou doh.
LUK 22:24 Ma hawe oro ale andres oro ta are handru kameh kudu bwele-en toro.
LUK 22:25 Eme Jises tiye i toro anya, “Iri kabin tiri lau badu leheleh badeh, atondrok iri lau tiri, ya oro aseken iri lau doh badeh, kaloh oro kawas toro ta aseben oro.
LUK 22:26 Arile, ado badeh, sala buku doh, ndri-iy labai. Are tado nyaran udu loken badeh, katehei iy keme andri ki buku nah bwisik. Ya are tado udu bwena badeh, iy kasahan lau ta gok kereu ndrokowa ado.
LUK 22:27 Are lau handru udu bwele-en? Ndramak ta asiu aimon nyamon deh, bwe, iy lohowan ta atiye nyamon? Sebwe iy ndramak ta asiu dah, nadeh? Arile, jo udu ndrokowa ado badeh, i buku lohowan ta aseben le ado.
LUK 22:28 Ado le badeh, baruwani jo bwe, ado an hawek na len mari jo bwese maha-an.
LUK 22:29 I buku none tama le edeu boto-on dah, eme tek ta atondrok, ya na dah jo kameh edeu ewek tado atondrok i le buku aliy.
LUK 22:30 Eme ya ado kameh aimon nyamon, ma a-un gwa ado bolo tondrok tek, ma ado kameh manyah ado koyeu hawek anuhun sahou toro boho kamen ma ronoh la-uh badu Isra-el.
LUK 22:31 “Ou ndranuhun Saimon! Tama Balik Satan badeh, ndrasumon ta none ado mari ta anya kapou ado, i buku ndramak ta bilin aleben buwa wit i len, ya munyahun i len.
LUK 22:32 Arile, Saimon, jo badeh, ndrasolom ta budon handru tam sataku. Ya, i buku none ou taku, ou badeh, tubuni ndrinem ma ou aseben budon toro kirih ja.”
LUK 22:33 Arile, Pita tiye i ta Jises anya, “Laban, i buku none ou ala bolo kou kameh jo ewek hawem ale. Ya, i buku none ou amak kameh jo imek hawem ale.”
LUK 22:34 Eme Jises tiye i tan anya, “Pita, jo katiye tam kamwenen. Na ben kameh, kakaro baden bwe le, ou kameh besebes anya ou tanam jo bwe san tulusin.”
LUK 22:35 Ano Jises ndremenya oro anya, “Jo mene suni ado ala laleyah, ari kohoya ado bwe, ya ari kohei ndrahu luk tado bwe, ma hawe ari ku-i kati ado bwe. Eme ado andriliu ta ari lakou deh bwe?” Eme oro anya, “Bo-oh, aso bandriliu ta ari lakou bo-oh.”
LUK 22:36 Ya eme iy tiye i toro, “Arile, na dah kameh i buku none ado ari kohei ta kohoya luk bwe, hawe i buku none ado ari kohoya ado ari kohei ta ndrahu lakou bwe badeh, ado kasilah tado ai. Ma i buku none ado ari samen ta bahun bwe, badeh, ado katehei lakou tado ki ta sisih ya ado kasih samen ta bahun ki tado.
LUK 22:37 Sahou mene ndratorowenei anya; ‘Iri lau badeh, ondrek jo ale udu mada sahou, hawe iri lau ndra-in.’ Ya eme, jo katiye tado kamwenen, lakou doh kameh asahan handru eme badak. Handru labai sahou mene ndratorowenei asehek ta nyalak, ndrame bakep handru.”
LUK 22:38 Eme oro lau tan anya, “Laban, ou anyolom samen ta bahun la-uh asah idah.” Eme Jises anya, “Badeh, ka-iy ai.”
LUK 22:39 Ya eme, i buku none Jises mene ndramekes ndra-au ndra-au badeh, iy hawe oro lau tan ala bwili ndrondro-ou Olip.
LUK 22:40 Oro asos badeh, Jises tiye i toro anya, “Ado kasolom ki ta Kindrei ta ado, sataku sala bolo kandriyen ndra-in.”
LUK 22:41 Ano iy ili bwena sese, reu i buku none ndramak korou bek kili kisos aliy en. Eme iy atehei bwili ndru-un i andri ma iy asolom anya,
LUK 22:42 “Tama, na seken tam le, i buku none ou aseken badeh, ou andrei bwiniu ta isi udu hawek ki-iu. Arile idoh budon tek le, ou amekes ta seken tam le kasahan ki handru.” [
LUK 22:43 Eme angelo ari badu kandrah eme edeu boto-on i tan. Eme ya Jises atona maha-an laba tinan labai, ma iy asolom irih le gwek; ma sa-ar tan atekeu i buku none ndra i andri bada munyak.]
LUK 22:45 Ano iy suri iy eme loke edek ili hawe oro lau tan atou oro ndramadin ta tikisiy.
LUK 22:46 Eme iy anya, “Ado amadin ta sasah? Ado kamak kasolom ki ta Kindrei ta ado sataku sala bolo kandriyen ndra-in.”
LUK 22:47 Ya eme iy asehek sahou kahis le, Judas, iy badu hawe oro lau ma ronoh la-uh nane, in mwena ma hawe lau rayah an hamon tan, ame. Iy edek eme hawe Jises anya kedeu bohon ki boho Jises.
LUK 22:48 Arile, Jises lelen iy anya, “Judas, ou kameh adeu bohom eme bohok ma leheya Nadu Ndramak Awas i mine iri lau ai?”
LUK 22:49 Eme oro lau ta Jises anyolom teheya lakou asahan badeh, oro tiye i ta Jises anya, “Laban, aso amundroh oro na samen ai?”
LUK 22:50 Eme ari toro badeh, mwetehei ndranye bonyo-ou ta tinan tiri pris ari, salin iu.
LUK 22:51 Eme Jises eme anya, “Ka-iy ai!” Eme Jises atehei minen i ndranye bonyo-ou dah, ma ndranyen amwenen ja.
LUK 22:52 Ano Jises tiye i tiri tinan tiri pris, ma i tiri tinan ta atondrok asiu tinan ta Kindrei, ma hawe i tiri lau batun tiri Juwis nane, ame ta ateu iy dah anya, “Buku sah ya ado ame ma samen hawe kei? Jo ari lau ta amekes ramwes deh?
LUK 22:53 Jo badeh, udu hawe ado na len mari udu asiu tinan ta Kindrei, eme ya ado bateu jo bwe. Arile, na ben dah, ben tado ta amekes ai, tasah boto-on ta balik badeh, ndratondrok kon ai.”
LUK 22:54 Iri tawi Jises ma andrei iy ili asiu ta tinan tiri pris. Ya Pita badeh, edek udu hamon tiri amunum le, udu ndra len eme.
LUK 22:55 Ya iri badeh, tabani jih udu lohalak ta bolo kowah ta mada asiu doh, ma iri manyah anyan jih. Pita ili badeh, manyah udu hawe iri.
LUK 22:56 Eme badih ari ta lohowan atou Pita udu lomada jih. Eme iy anyolom Pita amwenen badeh, iy anya, “Iy ndramak kede-eh mene, ari badu hawen adeh.”
LUK 22:57 Eme Pita besebes anya, “Ou badih den, jo tanan iy ndramak kede-eh bo-oh.”
LUK 22:58 Ano udu ja badeh, ndramak ari atou iy ja anya, “Ou kede-eh, ari badu hawe oro adeh.” Eme Pita anya, “Aden, jo bwe!”
LUK 22:59 Ano udu luluwen badeh, ndramak ari ja anyolom Pita ili ili, ya iy seleyani Pita ma iy anya, “Iy ndramak kede-eh, badu hawen handru ma iy badu Galili.”
LUK 22:60 Eme Pita anya, “Aden, jo maliye sahou ou asehek badeh!” Pita asehek udu ndra bohon le badeh, kakaro eden.
LUK 22:61 Eme ya Jises tubuni iy, ma anyolom amwenen eme ta Pita. Eme Pita bwetenei sahou ta Laban mene asehek i tan i buku doh: “Na ben dah kameh kakaro baden bwe le, ou kameh besebes anya ou tanam jo bwe san tulusin.”
LUK 22:62 Eme iy iu ili len, ma iy eden andra-i labai.
LUK 22:63 Ya eme oro lau ta ndrokei atondrok Jises badeh, bobose iy ma a-um iy.
LUK 22:64 Eme oro sawei madan na kolau ma oro andrek iy anya, “Abo, buku none ou propet, ou none tiye se, are lau a-um ou doh?”
LUK 22:65 Ma hawe oro asehek sahou ndra-in solo-an i badan.
LUK 22:66 Kon aleu badeh, iri lau tinan atukum ame hawe iri tinan tiri pris, hawe iri lau ta leheya kandriyen tiri Juwis atukum iri ase. Ano iri lau tiyani Jises ili ales udu mada iri.
LUK 22:67 Eme iri anya, “Abo, ou tiye taso! Ou kede-eh Krais deh?” Eme Jises anya, “I buku none jo katiye tado kameh, ado anya jo wasai.
LUK 22:68 Ma i buku none jo kandremenya ado ale kameh, ado winiyan basumon bohok bwe.
LUK 22:69 Arile, na dah ma na len eme kameh Nadu Ndramak Awas kameh manyah udu loboho lim salin ta Kindrei iy boto-on labai.”
LUK 22:70 Eme iri ndremenya iy anya, “Sebwe, ou kede-eh Nadu Kindrei ai?” Eme iy tiye i hamon i toro anya, “Ehe, ado tiye badeh, amwenen handru!”
LUK 22:71 Ano iri anya, “To anya kanuhun bohon ja ta sasah? To ndranuhun amwenen udu bohon kede-eh!”
LUK 23:1 Ano iri lau mari nane suri iri are loken ma tiyani Jises ili hawe Pailat,
LUK 23:2 Eme iri tebeya wasai anya, “Ahi badeh, ndratakalahei ndramak dah amekes bolo manyah tiri lau tahi, bamwenen bwe. Iy tandra-un tiri lau badeh, sakeh luk sala ta Sisa, ma tiye anya, iy badeh, Krais, ma iy kabin tiri Isra-el.”
LUK 23:3 Ya eme Pailat ndremenya iy, “Ou kabin tiri Juwis neh?” Eme Jises anya, “Ou ndrasehek badeh kabwai.”
LUK 23:4 Ano, Pailat aloh i tiri tinan tiri pris, hawe iri lau mari dah, anya, “Jo batou ari lakou ndra-in iy ndramak dah, amekes bo-oh!”
LUK 23:5 Arile, iri sarakau anya, “Iy mene leheya ma amekes ndrokowa iri lau badu loboho Judiya bado mwasin bwe. Iy mene amekes kandriyen doh, udu ndra Galili on, eme taku dah.”
LUK 23:6 Eme Pailat anuhun sahou nane iri asehek ano iy ndremenya iri anya, “Iy badu Galili handru?”
LUK 23:7 Ya eme Pailat akohok tanan amwenen ta kon ta Jises. Kon ta Jises badeh, udu baha tondrok ta Herot, eme iy suni Jises ili hawe Herot. Tasah, na len doh badeh, Herot udu Jerusalem ale.
LUK 23:8 Eme Herot atou Jises badeh, iy sekesek handru, tasah iy ndra mwena mwena ndra-au badeh, aseken ta atou Jises labai. Iy mene anuhun le nyalan, eme na dah, iy anya kanyolom Jises kamekes kalem.
LUK 23:9 Iy ndremenya Jises san solo-an solo-an, arile Jises andru-uk le.
LUK 23:10 Eme iri lau tinan tiri pris, hawe iri lau ta leheya kandriyen tiri Juwis adek ame mirihik asehek sahou boto-on i bada Jises.
LUK 23:11 Ano Herot hawe oro lau ta bahun tan bobose iy, ma atehei kolau moroyan i la-un, ma suni iy i hamon hawe Pailat ja.
LUK 23:12 Na len bwena ndra-au, Herot uru Pailat badeh, ndrokowa uru udu aliy, arile na le len dah, badeh, uru ndra kawas ja.
LUK 23:13 Ano Pailat luhi iri lau hawe iri tinan tiri pris, ma hawe iri lau ta atondrok, hawe iri mari, ame.
LUK 23:14 Ya eme iy tiye i tiri anya, “Ado tiyani ndramak dah eme, ado anya iy badeh, amekes bolo ndrokowa iri lau andra-i. Udu mada ado nane ndra-au badeh, jo batakalahei ari lakou ndramak dah, amekes andra-i, i buku none ado mene asehek, bwe.
LUK 23:15 Ma Herot ale batakalahei ari lakou iy amekes andra-i bwe le. Ya eme ado anyolom, iy suni iy eme hamon ja dah. Iy winiyan bamak laleyah bwe, tasah iy bamesekei ari lakou bandra-i bwe.
LUK 23:16 Ya eme, idah kameh jo tiye iri lau ta bahun tek amekes isi i badan, ano iy bara-au.”
LUK 23:18 Arile, iri mari sarakau i le rasan anya, “Kadai iy, kadai iy! Ya karuwani Barabas keme hawe ahi!”
LUK 23:19 Barabas in bolo kou mene badeh, iy ta amekes bahun udu bolo kon tinan, ma hawe idi ndramak amak.
LUK 23:20 Eme Pailat tiye i toro ja anya, “Katolowei Jises ki-iu ai?”
LUK 23:21 Arile, iri aloh ma sarakau anya ja, “Katahi iy ki bada kei tondreh! Katahi iy ki bada kei tondreh!”
LUK 23:22 Ano i san tulusin ja iy tiye: “Buku sah handru, saba lakou ndra-in handru iy mesekei? Ndramak dah bamesekei se ari lakou bandra-i bwe, ya iy kimek laleyah ai? Eme idah kameh oro lau ta bahun tek ubwi iy ano iy bara-au.”
LUK 23:23 Arile, iri arah ma tiye sahou boto-on anya, “Katahi iy ki bada kei tondreh!” Eme ma abadok i tiri ai.
LUK 23:24 Eme Pailat in hamon ta boho iri ma tiye ta Jises badeh, kadai iy.
LUK 23:25 Ya eme iy ruwani Barabas mene amekes bahun udu kon tinan, ma idi ndramak badeh, udu bolo kou eme len. Ano iy atehei Jises ili mine iri, ma iri amekes sasah na seken tiri ai.
LUK 23:26 Eme iri lau ta bahun badu Rom sirini Jises ili le badeh, iri ndruni ndramak ari nyaran Saimon badu kon Sairini. Iy edek udu kon munyak tinan eme. Eme iri tawi iy, atehei kei tondreh i kasen ma iy bwese udu hamon ta Jises.
LUK 23:27 Na bolo len doh badeh, iri lau mwan ma badih solo-an solo-an labai adek an hamon ta Jises. Ma hawe iri badih solo-an aden ma taya ndranye Jises.
LUK 23:28 Eme Jises tubuni iy ma tiye i toro anya, “Ado badih badu Jerusalem, ado saden ndranyek; ado kaden ndranye ado le, hawe nadu ado oro.
LUK 23:29 Tasah, udu bolo maha-an doh, eme kameh iri tiye anya, ‘Iri badih kis, hawe iri badih bato-ou nah bwe, hawe iri badih ta asus nah bwe kameh ado mwasin ja tiri ala nah udu aliy.’
LUK 23:30 Tasah, na bolo len hamon doh kameh iri lau badu Israel tiye i tiri mandrei anya, ‘Ado katohou kame bwele-e aso!’ Ma hawe tiye i ta bwilin ndrondro-ou anya, ‘Ado tubuluhi aso ma katone aso ta lakou ndra-in doh!’
LUK 23:31 Iri kameh amekes lakou doh, eme badak. Ya jo kameh i buku kei nyamanyak. Ya i buku none len ndra-in handru keme kameh, ado kameh i buku kei sana-an.”
LUK 23:32 Eme uru lau la-uh ndra-in ta tebelese badeh, sariye uru ala ta adeu uru ala bada kei tondreh ale.
LUK 23:33 Eme iri asos kon aloh, “Bwisi bar ta ndramak.” Eme iri atahi Jises i bada kei tondreh. Ma hawe atahi uru lau ma la-uh nane ale. Eme, iy ari udu loboho lim salin ta Jises, ya ari badeh, udu loboho lim kamweu.
LUK 23:34 Eme Jises tiye anya, “Tama, ou mani kandriyen ndra-in toro, tasah oro bala tana oro sasah oro amekes dah bwe.” Eme oro lau ta bahun atehei kolau tan i andri, ma oro amekes laki ta aliy, ta andrei kolau tan i le winiya oro.
LUK 23:35 Iri lau mari badeh, anyolom Jises, ya iri lau ta atondrok badu Juwis badeh, bobose iy anya, “Iy badeh, aseben iri lau rayah oh; ya abo, i buku none iy anya iy Krais handru, Kindrei suni iy; kanone iy kasebenei iy le amwenen se.”
LUK 23:36 Eme ya iri lau ta bahun ame bobose iy ale. Ma iri adeu waen titi-in i tan,
LUK 23:37 ma iri anya, “Buku none ou kabin tiri Juwis handru eh, ou none sebenei ou le se!”
LUK 23:38 Ya sahou tanan ari badeh, torowenei udu bwele-e batu Jises tiye i buku doh: “Idah Kabin tiri Juwis”
LUK 23:39 Eme ndramak ndra-in ari udu ta kei tondreh mirihik tan nane asehek sahou ndra-in i ta Jises anya, “Ou kede-eh Krais, bwe nadeh? Ou sebenei ou, ma hawe aru ah!”
LUK 23:40 Arile, ndramak ari udu bilisiu badeh, ibolosen i tan anya, “Ou kede-eh, banoh Kindrei bwe nadeh? Ou badeh, bwese maha-an i le buku iy kede-eh!
LUK 23:41 Talu bwese maha-an dah, amwenen ai, ta lakou talu amekes, arile iy badeh, bamekes se ari lakou bandra-i bwe.”
LUK 23:42 Ano iy tiye i ta Jises anya, “Jises, i buku none ou ame hamon, ma boto-on tam atondrok kon mari, ou samani jo.”
LUK 23:43 Eme Jises tiye i tan, “Jo katiye tam kamwenen handru en, na le dah kameh, ou ado hawek ado kon mwasin udu kandrah.”
LUK 23:44 Eme, an eme udu le alih badeh, lulik tubuluhi kon marakon udu gwek winiya mada an taloh na beyeh.
LUK 23:45 Ma an banya bwe. Eme ma kolau ta aturuk madasan ta asiu tinan ta Kindrei badeh, atarah i le ma lusi.
LUK 23:46 Eme Jises aloh bohon i loke, anya, “Tama! Jo atehei kohak handru ewek minem.” Iy tiye sahou doh ano le badeh, kohan ano ma iy imek.
LUK 23:47 Eme ndramak ari tinan ta bahun anyolom lakou nane doh asahan badeh, iy atudun nyara Kindrei ma anya, “Handru labai, ndramak kede-eh, mwasin labai ta mada Kindrei.”
LUK 23:48 Ya eme iri lau mari anyolom lakou marakon doh badeh, ndrine iri tikisiy andra-i labai, ma mine iri i ade iri, hawe kandru iri i andri, ma iri adek au.
LUK 23:49 Arile, oro are tanan iy, hawe oro badih mene an hamon tan ado ndra Galili ame badeh, ales ado len anyolom lakou mari doh asahan.
LUK 23:50 Ya eme ndramak ari badu hawe iri kansol nyaran, Josep badeh, ndramak ari mwasin handru ta mada Kindrei. Iy badeh, badu kon ari iri aloh Arimateya udu bolo kon loboho Judiya.
LUK 23:51 Ya iy mene basekesek ta budon tiri mene amekes i bada Jises bwe. Ma hawe iy udu le, abe-en tondrok ta Kindrei kasahan.
LUK 23:52 Eme iy ili hawe Pailat ta ndremenya bada kei.
LUK 23:53 Ano iy eme kuhi bada kei eme andri, su-i iy na kolau ra-ei belen, ma atehei iy i munu bek ari, ndrasaniy bwena, ya lau bala aliy bwe le.
LUK 23:54 Idoh badeh, asahan na len ta alokou len ta amunyau, anya kasahan ai.
LUK 23:55 Eme oro badih mene ado hamon ta Jises ado ndra Galili ame badeh, an hamon ta Josep ala anyolom munu bek nane, hawe anyolom lowosa iy i bolon i andri i buku sah.
LUK 23:56 Ano oro au ala kon anyas ndrelekei hawe suluw ta amekes ki badan. Arile, oro amunyau na len ta amunyau in hamon ta batanau ndratiye.
LUK 24:1 Len ta amunyau ano, ya ma ndra wahun ta len ma bwena ta wik ari ja, oro badih mene andrei ndrelekei hawe suluw, oro mene amekes badeh, oro ala mada lek.
LUK 24:2 Oro ala badeh, anyolom bek ta mada lek ndratundruwiy ndra len.
LUK 24:3 Eme oro ala bolon badeh, oro banyolom Laban Jises bare aliy bwe.
LUK 24:4 Eme ya oro lomondra solo-an solo-an ta aliy le badeh, oro anyolom lau la-uh asini awin lomadan labai i buku kalik ame ales are ka-u oro.
LUK 24:5 Eme oro badih dah, anoh labai badeh, oro aluh ala andri bada munyak. Eme uru lau ma la-uh dah, tiye i toro anya, “Ado anya kame kanyolom ndramak mulin udu ndrahu lau amak dah ta sah?
LUK 24:6 Ado ndramani sahou mene iy tiye tado udu Galili ja? Iy bado dah bwe; Iy ndramak ja!
LUK 24:7 Nadu Ndramak Awas mene atehei iy i mine iri lau ndra-in ta karei ma lomondra ndra-in, ya iri atahi iy i bada kei tondreh, ma iy imek. Ya eme na len taloh ja badeh, iy ndramak ja ndrame loken.”
LUK 24:8 Ano badeh, oro baralomondrani ai.
LUK 24:9 Ano oro ado mada lek ame hamon badeh, oro asehek i toro lau ta Jises ma ronoh ari hawe asehek i tiri lau rayah ja.
LUK 24:10 Oro badih nane badeh, Mariya Makdala, Jo-ana hawe Mariya tine Jemis ma hawe oro lau rayah are hawe oro asehek nyala oro aposel.
LUK 24:11 Arile, oro batehei budon toro handru bala ta sahou toro badih nane bwe, tasah oro anya sahou toro badeh, ari moson bwe.
LUK 24:12 Ya eme Pita suri iy ma sakaliye ili mada lek. Eme iy aluh anya kanyolom kili badeh, atou le kolau le udu api. Ya eme iy eme len badeh, lomondra i tan le, ta lakou nane asahan dah.
LUK 24:13 Eme na le len doh badeh, uru lau ta Jises la-uh badeh, adek ado san ala kon Ema-us. San doh, udu Jerusalem ili Ema-us badeh, i buku none kilomita ronoh ari.
LUK 24:14 Uru adek san asehek nyala lakou mari mene ndra-au.
LUK 24:15 Uru asehek nyala uru ala le, eme Jises asahan hawe uru.
LUK 24:16 Arile, uru baseleyani se iy bwai.
LUK 24:17 Eme iy tiye i turu anya, “Ah asehek nyala ah ta sasah nane adek san dah?” Eme uru ado rasi, ma mada uru i andri ta tikisiy.
LUK 24:18 Eme iy ari nyaran Kliyopas anya, “Ou dah, lau badu leheleh barame Jerusalem ai, ya ou tanam lakou mari mene asahan doh bwe?”
LUK 24:19 Eme iy anya, “Saba lakou asahan deh?” Eme uru anya, “Aru badeh, asehek nyala Jises badu Nasaret. Iy badeh, propet. Iy asehek sahou badeh, sahou tan nyarahan labai, ma iy badeh, udu mwasin labai udu mada iri lau mari, ma udu mada Kindrei, ta bolo lahou tan mari iy amekes.
LUK 24:20 Eme ya iri tinan tiri pris tahi, ma hawe iri lau ta atondrok ahi, atehei iy ili mine iri lau ta bahun badu Rom, ma atahi iy i bada kei tondreh.
LUK 24:21 Arile, ahi badeh, abudon boto-on tan anya, iy le kameh winiyan sebenei iri lau badu Isra-el ado mwasin. Ya eme idah, i bada len taloh ai, ta lakou mari mene asahan.
LUK 24:22 Ma laba tinan ja badeh, oro badih rayah badu hawe aso badeh, mesekei boho aso asak handru ta aliy. Oro badeh, ala mada lek na mandraben nane anya katou iy,
LUK 24:23 arile oro batou iy bado aliy bwe. Eme oro ame badeh, tandra-un nyala aso mari ta aliy, ma oro tiye badeh, anya oro atou oro angelo ale. Ya eme oro angelo tiye i toro anya, ‘Jises ndramak ja.’
LUK 24:24 Eme oro lau taso rayah ja ala atou, i le buku aliy. I buku none oro nane ndrasehek, oro banyolom iy bwe.”
LUK 24:25 Eme iy tiye turu anya, “Ah badeh, ndra bwe oh, ma ndrine ah badeh, edek amunum labai ta budon handru ta lakou mari mene iri propet asehek!
LUK 24:26 Idoh mwasin o? Ta Krais mene bwese maha-an doh, ya eme iy winiyan ili bolo lomadan tan.”
LUK 24:27 Eme iy asehek nyala lakou mari udu bolo sahou ta Kindrei i turu aleu labai, udu ndra kabatana Moses hawe tarou tiri propet, ano i turu.
LUK 24:28 Ya eme oro adek ame mirihik ta kon nane oro anya ka aliy badeh, Jises edek ales ili.
LUK 24:29 Arile, uru anya, “Ei, ou anya a heh? Ou amadin hawe aru na ben dan op, mirihik kon eben ai.” Eme iy eme hamon hawe uru.
LUK 24:30 Eme Jises manyah hawe uru udu andri ndrahu nyamon badeh, andrei jabi ramen ma edeu wurah i ta aliy. Ano iy boso-ei ma edeu i nuru.
LUK 24:31 Eme mada uru aleu, ma uru baraseleyani iy ai. Arile, bwe adeh, iy ndramai ta mada uru ai.
LUK 24:32 Eme uru asehek i turu ari ari anya, “Sahou tan doh mene adeh, mesekei aru abadok ma sekesek adeh! Na len mene, iy edek san hawe talu asehek sahou mari badu bolo sahou ta Kindrei aleu eme ta talu.”
LUK 24:33 Eme uru suri uru suwi suwi ala Jerusalem. Eme uru ala badeh, ndruni oro lau ma ronoh ari ta Jises hawe lau rayah are hawe oro atukum.
LUK 24:34 Eme oro anya, “Handru! Handru! Laban badeh, ndramak handru, iy badeh, asahan hawe Saimon.”
LUK 24:35 Ano, uru asehek nyala oro ta lakou mene asahan san hawe uru, ma hawe asehek ta uru seleyani iy badeh, udu ta iy abo-os jabi ramen.
LUK 24:36 Ya oro asehek nyala lakou doh, kahis le badeh, Jises amwenen asahan alih toro ma tiye anya, “Mondrei kudu hawe ado.”
LUK 24:37 Eme oro anya oro atou nyam, ma oro toroyani oro.
LUK 24:38 Eme iy tiye i toro anya, “Ado anoh ta sasah? I buku sah ado lomondra i buku badeh, udu ndrine ado?
LUK 24:39 Ado kanyolom minek hawe katik se. Idah jo amwenen! Ado ndranyolom ai, nyam badeh, salin bwe, hawe iy ndruwin le, arile jo badeh, salik udu aliy.” [
LUK 24:40 Eme iy tiye sahou ano badeh, iy leheya minen hawe katin i toro.]
LUK 24:41 Eme ya oro sekesek tinan labai, arile budon toro androndro kahis le. Eme iy ndremenya oro anya, “Ado ari nyamon udu aliy deh bwe?”
LUK 24:42 Eme oro atehei ni sese ame-er i minen,
LUK 24:43 eme iy aimon udu mada oro mari atou.
LUK 24:44 Eme iy tiye i toro, “Lakou mene jo udu ndra hawe ado asehek anya: Lakou mari mene ndratorowenei ta nyalak udu bolo tarou malen ta Moses, hawe udu bolo sahou tiri propet, ma hawe udu bolo buk Wari badeh, ndrasahan handru na dah.”
LUK 24:45 Ano, iy amekes budon toro aleu na sahou ta Kindrei.
LUK 24:46 Eme iy asehek i toro anya, “Sahou mene ndratorowenei asah i buku doh: Krais badeh, bwese maha ma iy imek, ya na len taloh ja kameh iy amak ja.
LUK 24:47 Ma sahou ta nyalan winiyan tubuni ndrine iri, ma winiyan sikine karei ma lomondra ndra-in tiri iu, na boto-on ta nyaran. Ya sahou doh badeh, kudu Jerusalem bwena, ano katiye kili bolo kon munyak tinan mari.
LUK 24:48 Ya ado dah badeh, kasehek nyala lakou mari ado ndratou dah.
LUK 24:49 Ma jo kameh suni lakou mene tama mene tandrakan ta aliy badeh kameh, ewek tado. Arile, ado badeh, kado kon tinan dah kado, winiya ado le barakohok boto-on badu loken.”
LUK 24:50 Ano iy kuhi oro ame len ta kon tinan ame loboho Betani, ano iy suruni minen i loke ma iy edeu nyosowan i la-u oro.
LUK 24:51 Eme iy edeu nyosowan i la-u oro le badeh, ma Kindrei andrei iy iu i loken bolo kandrah.
LUK 24:52 Eme oro atudun nyaran, ano oro ma sekesek au a hamon ala Jerusalem.
LUK 24:53 Ya eme na len mari badeh, oro are asiu tinan ta Kindrei adeu wurah i tan.
JOH 1:1 Kon munyak basahan bwe le, Sahou Awas badeh ndrasahan ndra bwena labai. Sahou Awas badeh, udu hawe Kindrei. Sahou Awas badeh, Kindrei.
JOH 1:2 Iy udu hawe Kindrei ndra bwena labai.
JOH 1:3 Na iy le badeh, lakou marakon asahan. Buku iy bwe, lakou marakon winiyan basahan bwe.
JOH 1:4 Iy le badeh, kohan. Kohan anya buku sun ta lomada taha lau badu kon munyak.
JOH 1:5 Sun tan anya udu bolo lulik. Arile lulik winiyan baturuki lomadan bwe.
JOH 1:6 Kindrei suni ndramak ari ta atiye sahou nyaran Jon.
JOH 1:7 Iy eme bwena ta tiye lau marakon ta nyala Sun, ta lau marakon kanuhun ma katehei budon tiri kili ta aliy.
JOH 1:8 Jon amwenen badeh, bala buku Sun doh bwe. Iy eme bwena ta asehek le ta nyala Sun.
JOH 1:9 Iy le ari doh badeh, iy Sun handru, iy eme bolo kon munyak, ta edeu lomadan ili tiri lau marakon.
JOH 1:10 Sahou Awas badeh, ndra bwena labai ndra-en bolo kon munyak. Kon munyak asahan badeh, na iy le amwenen. Arile, iri lau badu kon munyak badeh, bala tanan iy bwe.
JOH 1:11 I buku bolo kon munyak ma hawe iri lau tan amwenen badeh, baso-ok iy ja bwe.
JOH 1:12 Arile, are lau mwan o badih iri atehei budon tiri in tan; ma aso-ok iy labai, iri le doh kameh winiyan asahan nadu Kindrei handru.
JOH 1:13 Iri basahan nadu Kindrei ta ndraye tama taha hawe tine taha iri amwenen bwe, buku uru asehek sahou ta nyala uru kato-ou nah, bwe. Kindrei le ari badeh, bwidi iri asahan nadun, tasah iri atehei budon tiri handru in tan le ari.
JOH 1:14 Sahou Awas eme asahan Ndramak Awas, ma manyah tan udu hawe taha. Ahi ndranyolom lomada Nadu Ndramak Awas. Iy badeh, Nadu Kindrei ari le. Iy irek ta tikisiy ma hawe iri sahou handru.
JOH 1:15 Jon asehek nyala Jises. Iy anya, “Iy le adeh mene jo asehek taha. Jo anya, ‘Iy in hamon tek eme kameh, iy sakalawi jo ja, tasah iy bwena tek labai.’”
JOH 1:16 Iy badeh, irek labai ta kandriyen ta aso-ok ma ta tikisi taha. Iy amekes kandriyen mwasin eme tataha lau mwan ma badih mari, ma taha ndrakohok nyosowan mwasin, eme taha arek ta aliy.
JOH 1:17 Kindrei edeu kandriyen malen ili mine Moses. Arile, kandriyen mwasin ta tikisiy ma ta sahou handru badeh, udu bada Jises Krais.
JOH 1:18 Ari ndramak batou Kindrei bwe le. Nadun le ari badeh, atou iy. Iy i buku le Kindrei, iy manyah udu hawe taman. Nadun le bwidiy, eme ma lau marakon atanan iy.
JOH 1:19 Iri lau ta mwena tiri Juwis ado Jerusalem tiye tiri pris ma hawe iri lau rayah badu boho kamen ta Libai badeh, kala hawe Jon kandremenya iy ki buku doh, “Ya, ou are lau handru?”
JOH 1:20 Jon bawendreya oro bwe, iy asehek sahou handru i tiri anya, “Jo Krais bwe.”
JOH 1:21 Iri ndremenya iy ja, “Ka, ou are lau handru? Sebwe ou Alaija nadeh?” Iy anya, “Jo Alaija bwe.” Iri anya ja, “Sebwe ou ari propet nadeh?” Iy anya, “Jo dah ari propet bwe.”
JOH 1:22 Iri anya, “Abo, ou tiye ki tahi, ou are lau handru? Ahi kameh ala hamon a kon ma kasehek kili tiri lau nane suni ahi ame dah. Ma ahi kasehek ou kili tiri.”
JOH 1:23 Jon asumon boho oro na sahou ta propet Aisaya, “Jo i boho ndramak ari, iy aloh in kon lomale an, ‘Kalowosa san ta Laban ma kadik san kales lewan.’”
JOH 1:24 Iri lau nane ala ta atou Jon badeh, iri Parasi ra-on ado bolo iri ale.
JOH 1:25 Ano iri lelen Jon, “Buku ou anya, ou Mesaya bwe, ou Alaija bwe, ma ou ari propet bwe. Ya, i buku sah ja, ou anyu iri lau?”
JOH 1:26 Jon anya, “Jo inyu iri lau badeh, na gwa. Arile, ndramak ari ales udu hawe to kada-ah, ado tanan ado iy bwe.
JOH 1:27 Iy in hamon tek eme kameh jo bala winiyan ta talou malou ta molowa ku-i katin bwe.”
JOH 1:28 Iri lakou marakon mene asahan doh badeh, udu kon Betani, udu loboho kapa gwa Jodan mene Jon inyu iri lau udu aliy.
JOH 1:29 Udu len ari ja, Jon anyolom Jises edek ales eme hawen, ma iy aloh, “Kede-eh Nadu Sipsip ta Kindrei, iy le adeh andrei taha ame len ta kandriyen ndra-in badu kon munyak.
JOH 1:30 Iy le adeh mene jo asehek iy ewek taha. Jo asehek, ‘Iy ndramak in hamon tek eme kameh, tanan tan kameh udu bwele-en labai ja ta tanan tek. Tasah, iy ndra bwena labai, ano tine baradeu jo.’
JOH 1:31 Jo ma bwena badeh, bala tanan iy bamwenen bwe, arile jo eme dah badeh ta inyu iri lau na gwa, ta iri lau badu Isra-el kameh katanan, iy are lau handru.”
JOH 1:32 Jon eme asehek eme lewan i buku doh, “Jo anyolom Malawin Mwasin badeh, atah udu kandrah i buku ban eme andri, ma erah udu bwele-en.
JOH 1:33 Jo bala tanan iy bala mwasin bwe, arile Kindrei leheyani iy i buku doh eme madak: Iy tiye jo kinyu iri lau na gwa. Idoh iy asehek eme tek, ‘Buku ou anyolom Malawin Mwasin atah eme andri, ma erah udu bwele-en, badeh, iy le ai. Iy kameh inyu iri lau na Malawin Ndrabun.’”
JOH 1:34 Eme Jon asehek, “Handru, jo ndranyolom, ma jo ndrasehek taha. Iy kede-eh Nadu Kindrei handru.”
JOH 1:35 Ano eme len ari ja, Jon ales udu hawe uru lau tan la-uh.
JOH 1:36 Jon anyolom Jises edek eme, ma iy aloh, “Aha kanyolom, iy kede-eh Nadu Sipsip ta Kindrei.”
JOH 1:37 Uru lau ma la-uh nane anuhun boho Jon ano le badeh, uru ame ruwani Jon ma uru an hamon ta Jises.
JOH 1:38 Mada Jises anya keme hamon badeh, iy anyolom lau la-uh adek an hamon tan. Iy eme ndremenyani uru, “Ah aso-ok sah handru?” Uru ame asehek ili tan, “Ndramak ta leheya, ou ado heh handru?”
JOH 1:39 Jises tiye turu, “Ah kame kanyolom.” Ndra beyeh ai, uru ame ala hawen anyolom ndrahunen, ma uru ado hawen ado gwek.
JOH 1:40 Uru lau ma la-uh nane an hamon ta Jises badeh, ndranuhun Jon ndrasehek nyala Jises. Nyara iy ari Enduru, iy nadu tine Saimon Pita.
JOH 1:41 Ano le badeh, Enduru edek ili asilah nadu tinen Saimon. Iy eme ndruni iy ma iy tiye i tan, “Aru badeh ndrandruni Mesaya.” (Iy i buku le Krais.)
JOH 1:42 Enduru andrei nadu tinen Saimon, uru ala hawe Jises. Jises anyolom iy le badeh, ma iy anya, “Ou Saimon nadu Jon, neh? Nyaram kameh Sepas” (Boho kon tiri Aramek aloh Sepas. Boho kon tiri Grik aloh Pita. Moso boho kon ma la-uh doh badeh, Bek).
JOH 1:43 Ano len ari ja, Jises anya kedek kili kon ari iri aloh Galili. Iy ili ndruni ndramak ari nyaran Pilip. Jises eme tiye i tan, “Ou ame an hamon tek.”
JOH 1:44 Pilip i buku le Enduru uru Pita. Oro ma taloh badeh, badu kon tinan ari iri aloh Betsaida.
JOH 1:45 Pilip ili ja ndruni Nataniyel. Iy eme asehek i tan anya, “Aso badeh, ndrandruni ndramak mene Moses hawe iri propet arikiy udu bolo kandriyen malen. Iy Jises badu Nasaret, nadu Josep.”
JOH 1:46 Nataniyel ndremenya, “Saba lakou mwasin kameh asahan Nasaret?” Eme Pilip asumon bohon anya, “Ou ame, anyolom kudu madam amwenen.”
JOH 1:47 Jises anyolom Nataniyel edek ales eme hawen. Iy eme asehek, “Iy ndramak eme dah badeh, iy ndramak ari handru badu Isra-el, iy tanan wendreya bwe!”
JOH 1:48 Nataniyel lelen iy, “Ou atanam jo i buku sah?” Jises eme asehek i tan i buku doh, “Jo anyolom ou badeh, manyah ado bahandra kei ra-ei iri aloh pik. Ano Pilip ewek aloh ou.”
JOH 1:49 Ano Nataniyel asehek sahou i tan ja, “Ndramak ta Leheya, ou kede-eh Nadu Kindrei, ma ou kabin badu Isra-el.”
JOH 1:50 Jises anya, “Ou atehei budon tam eme tek, tasah jo nane asehek tam, jo anyolom ou ado bahandra kei pik? Idah kameh ou anyolom lakou laba tinan labai ja.”
JOH 1:51 Jises tiye i toro, “Jo tiye tado handru, ado kameh anyolom kandrah asak, ma iri angelo ta Kindrei kameh atah ala loken, ano atah ame andri bwele-e Nadu Ndramak Awas.”
JOH 2:1 Udu bada len la-uh anya kili len taloh badeh, iri amekes molak ari udu kon Kana, udu loboho Galili. Tine Jises udu aliy ale.
JOH 2:2 Ndramak ta kati molak nane doh aso-ok Jises hawe oro lau tan kala ta molak tan.
JOH 2:3 Iri ado, waen tiri ano. Tinen eme asehek i tan anya, “Waen tiri badeh ndrano.”
JOH 2:4 Jises eme asehek i ta tinen anya, “Tine, jo bwalek ou ame tiye jo ta amekes lakou. Tasah len tek ta amekes lakou badeh, kahis le.”
JOH 2:5 Tinen eme tiye toro lau ta atondrok waen, “Ado badeh, ka-en hamon ta sahou tan buku iy asehek ewek tado.”
JOH 2:6 Udu loboho doh badeh, bwisi sabok ma onoh udu aliy. Iri Juwis badeh, a-us gwa ili bolon ta sikine iri lakou ta salom ma mine iri na aliy. Bwisi sabok ari ari gwa udu bolon i buku lita rinek (100).
JOH 2:7 Jises tiye i toro bonyo-ou nane dah i buku doh, “Ado kasuni gwa kili bolo bwisi sabok ma onoh kede-eh.” Eme oro ala asuni bwisi sabok ma onoh ili irek madan.
JOH 2:8 Iy eme tiye toro ja anya, “Abo, ado kasolowei se gwa keme len, ado kandrei kili mine ndramak ta atondrok molak dah.” Oro ame bwidiy i buku le bohon asehek oh.
JOH 2:9 Oro ame bwese-ei gwa ili mine ndramak ta atondrok molak nane dah. Iy a-un, iy eme atona nyiminye gwa badeh, ndra buku waen ja. Iy bala tanan bwe, waen badu heh handru. Oro lau tan le badeh, tanan. Iy eme aloh i ta iy tasou ha-un eme len,
JOH 2:10 ma iy asehek i tan i buku doh, “Iri lau ta atiye waen badeh, iri adeu waen mwasin ili mwena. Udu hamon ta iri lau ndra-un solo-an labai, iri ame adeu waen sowan bwisik ili tiri ja. Arile ou badeh, tawi waen sowan tinan labai udu hamon handru, na le nane barame len ai!”
JOH 2:11 Jises amekes lahou tinan hawe kalem ma bwena badeh, udu kon Kana udu loboho Galili. Ma iy leheya boto-on ma kandriyen tan, eme ma iri lau tan anyolom, ma iri atehei budon tiri handru in le tan.
JOH 2:12 Ano le badeh, Jises hawe tinen, nadu tinen, ma hawe oro lau tan adek au ala andri ala Kapena-um. Oro ala ado doh luluwen sese.
JOH 2:13 Ndrame mirihik labai ta len ndrabun tiri Juwis aloh Pasoba ma nyamon tinan anya kasahan, eme Jises iu ili Jerusalem.
JOH 2:14 Jises edek ili isos le badeh, iy ili bolo asiu tinan ta Kindrei, ma iy anyolom iri lau amekes ba-en, tiri bulumakau, sipsip ma ban udu bolo asiu tinan ta Kindrei. Iy ale anyolom oro lau rayah tokoha luk ado bada koyeu toro.
JOH 2:15 Jises eme andrei malou ranah, iy bawei i le se. Iy eme tikahei iri lau ma bulumakau, hawe sipsip tiri au ala manan. Iy eme bukudi iri sau tiri nane ondrek luk udu bwele-en, amou ili andri, ma luk marakon udu bwele-en atalan laleyah.
JOH 2:16 Iy eme asehek sahou boto-on labai ili tiri lau nane amekes ba-en ta ban, “Aha kakohok lakou taha marakon ki-iu ki manan! Aha ka-iy amekes asiu ta tama ili asumwe ba-en taha.”
JOH 2:17 Oro lau tan ame bwetenei ja sahou udu bolo buk ndrabun asehek: “Budon tek ewek asiu tam, O Kindrei, budon tek i buku jih sulumwi bolo odak mara-ei.”
JOH 2:18 Iri Juwis ame asehek sahou boto-on labai i ta Jises, “Ou winiyan amekes saba kalem ma lahou tinan kameh keme tahi kanyolom, ma ahi katanan boto-on tam, ma ahi katanan ou are lau handru?”
JOH 2:19 Jises eme asehek i toro anya, “Katohowei asiu tinan ta Kindrei kede-eh ki-iu, ano kameh jo tahiy na le bolo len ma taloh.”
JOH 2:20 Oro Juwis asehek i ta Jises ja, “Adeh, ahi atah asiu tinan ta Kindrei kede-eh na bolo jaha ma ndro hanoh onoh (46). Ta budon tam anya, ou winiyan tahiy na le bolo len taloh?”
JOH 2:21 Arile, iri bakohok bolo sahou tan bamwenen bwe. Jises asehek, iy amwenen badeh, i buku asiu tinan ta Kindrei.
JOH 2:22 Udu hamon ta Jises amak udu bolo lek tan eme awas ja badeh, eme ma iri lau tan barabwetenei iri sahou mene iy asehek. Eme ma iri atehei budon tiri in ta buk ndrabun, ma in ta iri sahou marakon nane Jises asehek.
JOH 2:23 Iy udu ndra Jerusalem badeh, len ndrabun iri aloh Pasoba tiri Juwis ma hawe nyamon tinan asahan. Iri lau solo-an labai ado aliy anyolom iri lahou tinan hawe kalem iy amekes, ma iri atehei budon tiri marakon in ta nyaran.
JOH 2:24 Arile Jises batehei budon tan bala tiri bwe, tasah iy ndratanan iri marakon.
JOH 2:25 Tasah, iy ndranyolom ma iy ndratanan kandriyen tiri lau marakon. Iy barah ta tanan bwe, ma iy baseken ndramak asehek i tan ta kandriyen tiri lau. Iy badeh, ndratanan budon tiri marakon.
JOH 3:1 Ndramak ari nyaran Nikodemus, iy badu Parasi, iy lau tinan ari ta atondrok kandriyen tiri Juwis. Iy badu hawe iri kansol ta atondrok kandriyen tiri Juwis.
JOH 3:2 Na ben ari Nikodemus ili anya kasehek sahou hawe Jises, eme ma iy asehek anya, “Ndramak ta leheya, ahi tanan, ou badeh, Kindrei suni ou ame ta leheya ahi. Ou badeh, ado hawe Kindrei ame. Ari ndramak winiyan bamekes kalem hawe lahou tinan buku ou amekes kede-eh bwe, tasah Kindrei badeh, udu hawen.”
JOH 3:3 Jises eme asumon bohon anya, “Jo tiye tam handru. Ari ndramak winiyan batou tondrok ta Kindrei bwe. Buku kato-ou iy san rasan ja, san ari le doh badeh, iy kameh winiyan anyolom tondrok ta Kindrei.”
JOH 3:4 Nikodemus eme ndremenya ja i buku doh, “Barala buku sah handru ndramak ndrasahan alon labai, ya iy kili hamon kili ndrine tinen ma kato-ou iy san rasan ja, kasahan buku nah nyandren ja?”
JOH 3:5 Jises asehek i tan ja, “Jo tiye tam handru, ndramak winiyan bala bolo tondrok ta Kindrei bwe, buku badeu iy na gwa ma na Malawin Ndrabun, bwe.
JOH 3:6 Saba lakou oda taha edeu, badeh ta oda taha. Ya saba lakou Malawin Ndrabun edeu, badeh ta Malawin Ndrabun.
JOH 3:7 Manim satur tiri sahou nane jo asehek tam, kato-ou aha san rasan ja.
JOH 3:8 Siyer badeh, atohou salan labai, ou anuhun kurun, arile ou winiyan batiye buku iy atohou udu loboho heh handru eme, o iy atohou ili loboho heh bwe. Taha kameh a buku aliy. Taha lau marakon badeh, kasahan ha-un ja na Malawin Ndrabun.”
JOH 3:9 Nikodemus eme ndremenya ja, “Moson ta aliy i buku sah?”
JOH 3:10 Jises tiye i ta Nikodemus ja anya, “Adeh, ou badeh, ndramak tinan ari ta leheya udu bolo iri Isra-el. Buku sah handru ou bakohok bolo sahou dah bala mwasin bwe?
JOH 3:11 Jo tiye tam handru, ahi asehek nyala lakou ahi tanan. Ma ahi asehek nyala lakou ahi ndranyolom. Arile, aha badeh, bakohok sahou mwasin nane ahi akeh ewek taha, bwe.
JOH 3:12 Jo mene ndrasehek nyala iri lakou badu kon munyak ndrawek tam, arile ou batehei budon tam bala ta aliy bwe. Ya ou atehei budon tam keme tek kameh, kili buku sah handru? Buku jo kasehek tam ta nyala iri lakou badu kandrah ja.
JOH 3:13 Ya ari ndramak bala loken bolo kandrah bwe le. Jo Nadu Ndramak Awas le ari badeh, udu bolo kandrah eme andri.
JOH 3:14 Buku bwena mene Moses atehei mwak udu bada kei, iy eme tutuniy ili loken udu bolo kon lomale an, iri kameh tutuni Nadu Ndramak Awas ili loken i le buku aliy.
JOH 3:15 Buku are lau iy atehei budon tan handru in ta Nadu Ndramak Awas, idah kameh kohan handru winiyan bano bwe, iy kameh ta udu le buku doh.
JOH 3:16 “Sahou doh handru, tasah Kindrei aso-ok taha lau marakon badu kon munyak tinan labai. Iy eme tikisi taha, ma iy atehei nadun mwan ari le eme tataha. Buku are lau iy atehei budon handru in tan, iy kameh winiyan bamak bwe, ma kohan handru kameh ta udu le buku doh.
JOH 3:17 Kindrei atehei nadun eme andri bolo kon munyak ta edeu ndramak ari, ari ala ta mada sahou, bwe; iy eme ta akohok taha ado ta bolo kandriyen ndra-in ame hamon ja.
JOH 3:18 Are lau iy atehei budon tan handru in ta nadun, iy kameh winiyan bado ta mada sahou bwe. Arile, are lau iy batehei budon tan bala ta nadun bwe, iy ndrandra-i ta mada Kindrei; iy kameh ales udu ta mada sahou, tasah iy batehei budon tan handru bala ta Nadu Kindrei ari le bwe.
JOH 3:19 Kati sahou ta Kindrei i buku doh: Sun anya ndra bwena ndrame bolo kon munyak. Arile, iri lau aso-ok lulik tinan labai, iri baso-ok sun bwe, tasah iri badeh, aso-ok labai ta amekes kandriyen ndra-in.
JOH 3:20 Lau marakon amekes kandriyen ndra-in, iri baso-ok sun bwe, ma iri winiyan bame mirihik ta sun bwe. Tasah iri anoh, kora-on kandriyen tiri ndra-in kasahan keme lewan.
JOH 3:21 Arile, are lau iy in hamon ta kandriyen mwasin, badeh iy ndrala mirihik ta sun, ma sun kameh anya i lomadan, ma leheyani gok nane iy amekes, in hamon ta boto-on ta Kindrei.”
JOH 3:22 Ano le badeh, Jises hawe oro lau tan adek au ala lokei loboho Judiya. Iy udu loboho doh luluwen sese hawe oro lau tan, ma iy tiye oro lau tan ta anyu iri lau.
JOH 3:23 Jon badeh, inyu iri lau ale udu Enon udu mirihik ta Salim, tasah loboho doh badeh, iri gwa solo-an udu aliy. Eme iri lau solo-an labai ala le hawen, ta anyu iri. (
JOH 3:24 Udu bolo len doh, kabin Herot batehei Jon bala bolo kou bwe le ai.)
JOH 3:25 Eme losen sese asahan ndrokowa oro lau ta Jon ma hawe ndramak ari badu Juwis, ta kandriyen ta sikine iri lakou ta salom.
JOH 3:26 Ano badeh, oro lau ta Jon ala asehek i tan, “Ndramak ta leheya, iy ndramak mene udu hawem, udu kapa gwa Jodan bilisiu loboho rai, ou mene asehek iy; na len dah badeh, iy inyu iri lau, idah iri lau alih le hawen ai.”
JOH 3:27 Jon anuhun, eme iy asehek i toro, “Ndramak winiyan ateu lahou, buku Kindrei badu kandrah amwenen edeu.
JOH 3:28 Aha ndranuhun jo ndrasehek taha. Jo Krais bwe. Jo badeh, Kindrei suni jo eme bwena ta lowosa le san tan ta iy eme.
JOH 3:29 Aha kabudon sahou tek doh: Ndramak mwan ari sudi badih, iy badih doh kameh ili udun. Kawas ta iy mwan ili ales ereu le ai, iy atehei ndranyen, ma iy sekesek labai ta anuhun boho ndramak nane asoh badih. I buku nane dah, sekesek ndratuhi jo mara-ei.
JOH 3:30 Krais kameh kasahan kabin, ma iri lau marakon ka-en hamon tan. Jo kameh kudu le bahandran.
JOH 3:31 “Iy udu kandrah eme andri, iy kabin udu bwele-en labai. Are lau badu kon munyak, iy badu kon munyak, ma iy kameh asehek nyala iri lakou badu kon munyak amwenen. Iy nane badu kandrah eme andri, iy kameh udu bwele-en labai ja ta lau marakon.
JOH 3:32 Iy asehek saba lakou iy ndranyolom, ma iy ndranuhun, arile ari ndramak baso-ok ta atehei budon ba-en ta sahou tan bwe.
JOH 3:33 Are lau iy andrei sahou tan, ma iy tawiy ihis udu ndrinen, iy lau le doh badeh, tanan sahou ta Kindrei, handru.
JOH 3:34 Are lau Kindrei nane suni iy eme, iy badeh, asehek sahou badu boho Kindrei amwenen. Tasah, Kindrei ndranyuhi iy ndrarek mara-ei na Malawin Mwasin.
JOH 3:35 Taman badeh, aso-ok nadun tinan labai, ma iy eme atehei lakou marakon ili minen.
JOH 3:36 Are lau iy atehei budon tan handru in ta Nadu Kindrei, kohan handru kameh ta udu le buku doh. Are lau iy batehei Nadu Kindrei bado ndrinen bwe, iy kameh winiyan banyolom kohan handru doh bwe, ma losen ta Kindrei kameh udu ndra bwele-en udu gwek.”
JOH 4:1 Jises ndratanan buku iri Parasi badeh, ndranuhun Jises inyu iri lau solo-an labai, ma iri lau tan a solo-an labai ja ta Jon.
JOH 4:2 Handru ta aliy badeh, Jises banyu iri lau bwe, oro lau tan le badeh, anyu iri lau.
JOH 4:3 Jises anuhun iri asehek iy, eme iy udu Judiya edek iu ili hamon ili loboho Galili.
JOH 4:4 Jises anya kili Galili, arile budon tan boto-on badeh, anya kili kon Samariya bwena op.
JOH 4:5 Iy eme ili kon ari udu bolo Samariya iri aloh Sikar, idoh udu mirihik ta nadu munyak sese mene Jekop atehei ili ta nadun Josep.
JOH 4:6 Gwa ta Jekop a-eh udu loboho doh ale. San lawe-en labai eme ma bwidi Jises awoyah ta edek. Iy eme manyah udu mirihik ta gwa nane doh. Mada an badeh, udu le alih.
JOH 4:7 Udu, badih ari badu Samariya eme anya ka-us gwa tan. Jises eme asehek sahou i tan i buku doh, “Wa-ik se gwa.”
JOH 4:8 Iy le ari udu. Oro lau tan badeh, ndra-au ndrala bolo kon tinan ndrasih noro nyamon.
JOH 4:9 Eme iy badih badu Samariya asehek sahou i tan i buku doh: “Ou badu Juwis, jo badih badu Samariya. Buku sah handru ou ndremenya jo ta gwa?” (Iri Juwis badeh winiyan bala hawe iri Samariya bwe.)
JOH 4:10 Jises eme asumon sahou tan ja i buku doh, “Buku ou tanam boto-on ta Kindrei, ma are lau nane ndremenya ou ta gwa, ou winiyan ndremenya iy, iy winiyan edeu wa-im gwa kohan handru udu aliy.”
JOH 4:11 Butuhu Samariya dah anya, “Ndramak tinan, ou akohok wa-im gwa kohan udu aliy badeh, badu heh handru? Gwa kede-eh munun lawe-en labai, ma ou tam ari kawau ta a-us wa-im gwa kede-eh bo-oh.
JOH 4:12 Sebwe ou kabin are loken labai ja ta tama ahi Jekop nadeh? Iy atehei gwa kede-eh eme tahi. Iy amwenen a-un gwa badu aliy; nadun oro ma iri bulumakau tan hawe iri sipsip tan a-un gwa dah ale.”
JOH 4:13 Jises tiye i tan ja i buku doh, “Lau marakon a-un gwa dah, bale iri kameh amar ja.
JOH 4:14 Buku are lau a-un gwa, jo edeu i wa-in, balen kameh winiyan bamar ja bwe. Gwa nane jo edeu i wa-in doh kameh asahan i buku gwa mulin udu bolo odan eme loken ma edeu kohan handru ta winiyan bano bwe, kameh ta udu le buku doh.”
JOH 4:15 Butuhu Samariya tiye i ta Jises ja i buku doh, “Ndramak tinan, wa-ik se gwa badeh. Ma balek kameh winiyan bamar ja bwe. Ma jo kameh winiyan bame hamon ba-us gwa dah ja bwai.”
JOH 4:16 Jises tiye i ta butuhu Samariya ja i buku doh, “Ou ala aloh udum, ano ah ma la-uh kame dah.”
JOH 4:17 Eme iy badih nane dah anya, “Jo ari uduk bo-oh!” Jises tiye i tan ja i buku doh, “Ou asehek handru, ou ari udum bwe.
JOH 4:18 Handru, ou atasou a toro mwan ma limeh. Arile, iy mwan ou an hawen kede-eh badeh, udum handru bwe, ou asehek sahou handru.”
JOH 4:19 Iy badih asehek, “Ndramak tinan, jo ndranyolom ai, ou badeh, propet.
JOH 4:20 Tama ahi iri badeh, atudun nyara Kindrei udu bwele-e mandrei kodo-on. Arile aha Juwis asehek Jerusalem badeh, kon ta atudun nyara Kindrei.”
JOH 4:21 Jises asehek i tan anya, “Ou badih kede-en, ou atehei budon tam marakon keme le tek. Len hamon eme kameh aha winiyan batudun tama taha Kindrei winiyan bado bwele-e mandrei dah bwe, ma iri Juwis ale winiyan batudun iy bado bolo Jerusalem bwe le.
JOH 4:22 Aha Samariya atudun lakou, aha bala tana aha iy bwe. Ahi atudun saba lakou ahi tanan. Tasah lahou ta Kindrei ta akohok taha ame len ta kandriyen ndra-in badeh, asahan tahi Juwis.
JOH 4:23 Len eme, ma ndrasahan ai. Idah kameh iri lau ta atudun iy handru, iri kameh atudun tama i san ta Malawin Ndrabun, ma ta kandriyen handru. Tama badeh, aso-ok iri lau marakon katudun iy le ari.
JOH 4:24 Kindrei badeh, iy Malawin Ndrabun. Are lau atudun iy badeh, ki-in hamon ta san ta Malawin Ndrabun, ma ki-in hamon ta sahou handru.”
JOH 4:25 Badih badu Samariya asehek i ta Jises ja i buku doh, “Jo tanan, idah kameh Mesaya eme, iri aloh iy Krais. Buku iy eme kameh iy barasehek lakou marakon barame tataha.”
JOH 4:26 Jises tiye i tan, “Jo le asah idah, iy ndramak nane ta udu le buku doh. Jo le adeh asehek sahou ewek tam dah.”
JOH 4:27 Iy udu, ano le badeh, oro lau tan are kon tinan ame hamon ame hawen. Eme ma mani oro atur ta atou iy asehek sahou hawe badih ari. Ma oro ame abudon solo-an. Arile, oro bandremenya Jises bala buku doh bwe, “Ou aso-ok saba lakou handru?” o, “Tasah handru ou asehek sahou hawe iy badih kede-eh?”
JOH 4:28 Butuhu Samariya eme ruwani bwisi gwa tan irek na gwa udu andri udu. Iy eme iu ili hamon ili kon, ma iy ili asehek nyala iri lau,
JOH 4:29 “Ei, aha kame katou iy ndramak ari kodo-oh. Iy eme asehek iri kandriyen tek mene jo amekes ndra bwena ndra-au on! Iy sala Krais?”
JOH 4:30 Ano iri ado bolo kon tinan adek ame len ame atou Jises.
JOH 4:31 Iri lau adek kahis le, oro lau tan asehek sahou boto-on ili tan, “Ndramak ta leheya, ou aimon se nyamon.”
JOH 4:32 Iy eme asehek i toro i buku doh, “Nyamon tek in aliy. Ado tanan nyamon doh bwe.”
JOH 4:33 Eme oro lau tan suburuk i toro ari ari anya, “Kora-on ari ndramak ndrame ndratiye nan nyamon, nadeh.”
JOH 4:34 Jises asehek sahou ili toro lau tan i buku doh, “Nyamon tek badeh, ta jo ki-in hamon ta budon ta Kindrei. Iy nane suni jo eme ta amekes gok tan, ma iy aso-ok jo kabwidi marakon kano.
JOH 4:35 Ado asehek i buku doh: ‘winiya bun hahuw ja, nyamon badu bilin buruni.’ Jo katiye tado, mada ado kasak, ado kanyolom kili bolo bilin. Nyamon marakon ndruni.
JOH 4:36 Iri lau abo gok ta a-eh nyamon badu bilin, iri badeh, akohok sihine iri. Ma iri atukum nyamon ta koha taha handru kameh udu le buku doh, winiyan bano bwe. Buku iri lau ta atah nyamon badeh, kala le hawe iri lau nane ta asoh nyamon, iri marakon kasekesek.
JOH 4:37 Sahou tataha asehek badeh, handru, ‘Ndramak ari ta atah bilin, iy ari ja ta asoh sali nyamon.’
JOH 4:38 Jo suni ado ala ta asoh nyamon badu bilin, ado mene babo gok ta aliy bwe. Arile, ado ala bolo bilin ja asoh nyamon nane iri lau rayah ja awoyah ta aliy.”
JOH 4:39 Iri lau solo-an badu bolo kon tinan Samariya badeh, ndratehei budon tiri ndra tan. Tasah, iy badih badu Samariya nane ndrasihidiy ndrala tiri i buku doh, “Iy badeh, asehek iri kandriyen tek marakon bwena jo amekes ndra-au on!”
JOH 4:40 Eme iri lau badu Samariya ame hawen. Iri asehek sahou boto-on i tan ta iy kudu hawe iri sese op. Eme iy in hawe iri winiya len la-uh.
JOH 4:41 Ta sahou tan le badeh, bwidi iri lau solo-an labai atehei budon tiri ili le tan.
JOH 4:42 Iri ame tiye sahou i ta butuhu Samariya i buku doh, “Ma bwena badeh, ahi atehei budon tahi ili le ta Jises, tasah ou ame asehek tahi. Arile, na dah ja badeh, ahi ndratehei budon tahi ndrala tan, tasah ahi ndranuhun udu ndranye ahi amwenen. Ahi ndratanan, iy ndramak kede-eh, iy kameh akohok taha lau marakon badu kon munyak ame hamon.”
JOH 4:43 Jises udu hawe iri Samariya len ma la-uh, ano iy eme edek iu ili Galili. (
JOH 4:44 Jises amwenen mene ndratiye toro, “Iri lau badu bolo kon tiri propet amwenen badeh, winiyan banoh iy bwe.”)
JOH 4:45 Jises edek ili isos Galili. Iri lau ame sekesek ta atou iy, tasah iri ndratou iy amekes lakou marakon udu kala len ndrabun iri aloh Pasoba, ma nyamon tinan udu Jerusalem, iri badeh, ado aliy ale.
JOH 4:46 Jises edek eme hamon eme Kana loboho Galili. Loboho doh mene iy tubuni gwa asahan ili waen ja udu aliy. Iy udu kon tinan Kapena-um badeh, ndramak ari ta atondrok, nadun ibo sik in andri.
JOH 4:47 Iy ndramak ta atondrok nane dah anuhun Jises udu Judiya ndrame Galili. Iy eme ili hawe Jises ta tiye iy kili kanyumor nadun, iy anya kimek.
JOH 4:48 Jises eme tiye i tan i buku doh, “Buku aha banyolom lahou tinan hawe iri kalem bwe, aha kameh winiyan batehei budon taha bame tek bwe.”
JOH 4:49 Iy ndramak ta kabin nane tikisiy labai. Iy eme asehek i ta Jises i buku doh, “Ndramak tinan, ou ame talu kala, bwe kameh naduk imek ai.”
JOH 4:50 Arile, Jises tiye i tan i buku doh, “Ou ala hamon nadum winiyan bamak bwe.” Iy eme atehei budon tan in ta sahou ta Jises, ma iy edek iu ili hamon ja.
JOH 4:51 Iy edek san kahis le badeh, oro lau tan ame aturuk iy udu ndra ndrukulu san ranah. Oro ame asehek i tan i buku doh, “Nadum bamak bwe!”
JOH 4:52 Iy eme ndremenya oro ja, “Mada an udu buku sah handru, eme badan anyala ja?” Oro anya, “Na mene mada an udu le alih, sik tan ano.”
JOH 4:53 Taman ndratanan, mada an udu le alih na mene badeh, amwenen ta Jises asehek sahou i tan, “Nadum winiyan bamak bwe.” Iy eme atehei budon tan ili ta Jises. Eme ma lau marakon nane ado hawen badeh, atehei budon tiri i ta Jises ale.
JOH 4:54 Idoh ili badeh, ili san lusan ai ta Jises amekes lahou tinan ma hawe kalem udu hamon ta iy udu Judiya ta ili Galili.
JOH 5:1 Udu len sabe ano, Jises edek iu ili loken ili Jerusalem ta nyamon tinan ari tiri Juwis.
JOH 5:2 Mirihik ta madasan tiri sipsip loboho Jerusalem doh badeh, gwa li ari udu aliy. Iri tahi beleheleh ma limeh na bek udu kabede gwa li nane doh. I boho kon tiri Hiburu, iri aloh Betesda.
JOH 5:3 Lau solo-an labai amadin ado bahandra beleheleh udu kabede-e gwa li nane doh. Mada iri kaseu, kati iri ndra-in, ma ndruwi iri rayah badeh, ndramak.
JOH 5:5 Ndramak ari ibo sik in loboho doh badeh, winiya jaha ma tonoh ndru la-uh (38).
JOH 5:6 Jises eme anyolom iy amadin in andri, eme iy i tanan iy ndramak kodo-oh ibo sik luluwen labai. Jises eme ndremenya iy, “Ou aso-ok ou amwenen deh?”
JOH 5:7 Ndramak nane ibo sik dah asehek i buku doh, “Ndramak tinan, ari ndramak bado kada-ah ta aseben ta sariye jo ili bolo gwa, buku gwa tuburok. Jo none ta ili bolo gwa, arile ndramak ari ndrasandroh ndrala bwena.”
JOH 5:8 Jises eme tiye i tan i buku doh, “Ou suri ou, ou andrei nyahan tam ma ou adek.”
JOH 5:9 Udu se luwen bwe, iy ndramak nane dah ndramwenen ja. Iy eme bwese-ei nyahan tan, ma iy edek iu. Idoh badeh, udu bolo len ta amunyau.
JOH 5:10 Iri tinan tiri Juwis ame asehek sahou i ta iy ndramak nane ndrabwidi iy ndramwenen dah, “Ya idah len ta amunyau. Idah ba-en hamon ta kandriyen malen tahi mene Moses batanau bwe. Ou sabwese nyahan tam sado bolo len ta amunyau.”
JOH 5:11 Ano iy asehek i toro, “Iy ndramak nane bwidi jo amwenen dah badeh, tiye jo ta bwese nyahan tek, ma iy tiye jo ta edek.”
JOH 5:12 Oro ndremenya iy ja, “Are lau handru tiye tam ta bwese nyahan tam, ma ou adek?”
JOH 5:13 Iy ndramak nane ndramwenen dah bala tanan are lau handru Jises. Lau ale solo-an labai ado loboho doh, eme bwidi Jises ndramai ndrala bolo iri lau.
JOH 5:14 Ano Jises ndruni iy udu asiu tinan ta Kindrei, ma iy tiye i tan, “Ou anyolom, ou ndramwenen kede-eh, ou ka-iy abudon lomondra ndra-in. Bwe kameh lakou ndra-in labai ja asahan tam.”
JOH 5:15 Iy eme ili asehek tiri Juwis, “Nane badeh, Jises bwidi jo amwenen.”
JOH 5:16 Jises amekes iri lakou doh udu bolo len ta amunyau tiri Juwis. Eme ma iri Juwis asilah madasan ta adi iy.
JOH 5:17 Jises asehek ili toro i buku doh, “Tama badeh, iy ta amunyau bwe, iy ibo gok ili le ai. Jo ibo gok i buku le iy.”
JOH 5:18 Idoh le badeh, bwidi iri Juwis abadok ta adai iy. Iri anya, “Ma bwena handru iy ba-en hamon ta len ta amunyau bwe, ano ja, iy anya, taman handru badeh, Kindrei. Iy amekes iy ja i buku le Kindrei.”
JOH 5:19 Arile, Jises asehek i toro i buku doh, “Handru labai jo tiye tado, Nadu Kindrei winiyan bamekes lakou laleyah bwe. Iy winiyan amekes, buku iy atou taman amekes. Tasah, saba lakou taman amekes, nadun ale amekes.
JOH 5:20 Tama aso-ok nadun labai ma iy leheyani iy ta iri lakou iy amekes. Handru, tama winiyan leheya nadun ta lakou laba tinan ja, ma mani ado kameh atur ta aliy.
JOH 5:21 Tama mete-ei iri lau ndramak ma iy atehei kohan ili tiri. Nadun kameh amekes i buku le budon ta taman, iy ale edeu kohan ili tiri lau na le budon tan.
JOH 5:22 Tama batehei ari ndramak bare ta mada sahou bwe. Tasah, gok marakon badeh, iy ndratehei ndrala mine nadun.
JOH 5:23 Kindrei amekes i buku doh ta iri lau marakon kamasiye nadun, i buku le iri lau marakon masiye taman. Are lau bamasiye nadun bwe, iy ale bamasiye taman bwe le. Tasah, tama suni nadun ta eme.
JOH 5:24 “Handru labai, jo katiye tado: Are lau iy anuhun sahou tek ma iy atehei budon in ta iy nane suni jo eme, kohan handru kameh winiyan bano bwe, iy kameh ta udu le buku doh. Iy winiyan bala ta mada sahou bwe. Iy ndrasakalawi imek, ma iy akohok kohan handru.
JOH 5:25 Handru labai, jo katiye tado: Len hamon badeh, ndrasahan. Idah kameh iri lau ndramak anuhun boho Nadu Kindrei. Are lau iy anuhun, iy kameh akohok kohan handru.
JOH 5:26 Tama badeh, kati kohan handru udu tan. Iy edeu boto-on ta kati kohan handru ili ta nadun ale.
JOH 5:27 Ma iy ale ndratehei boto-on ndrala ta nadun ta edeu lau ala ta mada sahou, tasah iy Nadu Ndramak Awas.
JOH 5:28 “Mani aha satur ta len eme. Iri lau ado bolo lek tiri kameh anuhun bohon,
JOH 5:29 ma iri ame len ta bolo lek tiri. Are lau iri amekes mwasin kameh ales ta akohok kohan handru winiyan bano bwe. Iy are lau iy amekes kandriyen ndra-in, iy amak, ano iy ales udu ta mada sahou, ma iy kameh akohok maha-an ta iri kandriyen ndra-in nane iy amekes.
JOH 5:30 “Jo winiyan bamekes lakou na budon tek le ari bwe. Jo edeu iri lau ala ta mada sahou in hamon ta sahou ta tama, iy asehek eme tek. Ma mada sahou tek badeh, amwenen, tasah jo bamekes lakou na budon tek amwenen bwe. Jo amekes lakou in hamon ta tama, iy nane suni jo eme.
JOH 5:31 “Buku jo kasehek jo kili tiri lau, idah kameh sahou jo asehek badeh, wendreya.
JOH 5:32 Ndramak ari udu kede-eh atiye sahou tek ili tiri lau. Jo tanan sahou doh badeh, handru.
JOH 5:33 Aha mene tiyani iri lau taha ala le hawe Jon. Iy badeh, anyolom ma asehek iri sahou handru.
JOH 5:34 Jo amwenen, jo babudon ta sahou ta ari ndramak winiyan basihidi sahou mene jo asehek taha winiyan barih bwe. Jo asehek sahou dah ja, ta aha katehei budon taha ki-in ta sahou tek, ma Kindrei winiyan sebenei manyah taha udu mwasin.
JOH 5:35 Jon badeh, buku sun anya lomadan tinan labai. Len sabe le badeh, aha sekesek ta lomada sun tan.
JOH 5:36 “Jon asehek sahou anya, jo are lau, badeh, handru. Arile, lakou ari udu bwele-en labai ja ta sahou ta Jon, eme leheyani aha, jo are lau: Iri gok nane tama atehei eme tek ta jo kamekes ma jo kabwidi iri kano. Iri gok nane jo amekes doh, eme ma leheyani jo ili tiri lau mwan ma badih i buku tama badeh, suni jo eme kon munyak.
JOH 5:37 Tama le amwenen atehei jo eme. Iy ndratiye taha ta nyala tekedek tek. Aha banuhun se bohon ma aha batou se badan bwe.
JOH 5:38 Aha batawi sahou tan ba-en ndrine aha bwe, ma aha batehei budon taha bala ta iy are lau nane suni jo bwe.
JOH 5:39 Aha abo gok ta asilah sahou iri torowenei udu bolo buk ndrabun, tasah budon taha anya, iri sahou doh kameh adeu taha kohan handru udu le buku doh. Idoh mwasin, arile sahou iri ndratorowenei badeh, nyarak udu aliy, ma kohan handru ale badeh, udu ndra hawek.
JOH 5:40 Arile aha bwale aha ame hawek ta akohok taha kohan handru ta udu le buku doh.
JOH 5:41 “Jo bwalek iri lau masiye jo.
JOH 5:42 Jo ndratanan aha. Jo ndratanan, aha badeh, batehei tikisiy ta Kindrei bado ndrine aha bwe.
JOH 5:43 Jo eme dah badeh, ta nyara tama. Arile aha baso-ok sahou tek bwe. Buku ari ndramak keme, iy kamasiye nyaran, idah kameh aha anuhun sahou tan ai.
JOH 5:44 Aha marakon kede-eh, aha winiyan batehei budon taha bame tek bwe. Winiyan bwe en! Tasah, aha abudon boto-on labai ta akohok ndramas tiri lau taha amwenen. Eme ma aha baso-ok ta akohok ndramas nane Kindrei le ari edeu, bwe.
JOH 5:45 “Aha satehei budon anya, jo tiye ta tama ta aha kameh ales ado ta sahou hawen. Ndramak ari ja udu kede-eh, iy kameh atehei aha a ta mada sahou. Aha anya Moses le kameh winiyan sebenei aha, arile bwe. Moses le kameh atehei aha a ta mada sahou.
JOH 5:46 Buku aha atehei budon taha in ta sahou ta Moses, badeh aha katehei ki-in ta sahou tek ale. Tasah iri sahou ale ndratorowenei badeh, leheyani jo.
JOH 5:47 Arile, aha batehei budon taha ba-en tiri sahou iy atorou bwe. Idah kameh aha winiyan batehei budon taha ba-en ta sahou tek bwe le.”
JOH 6:1 Hamon ta len sabe ano le badeh, Jises hawe oro lau tan sandroh a ndron ra-ei au ala kapa gwa li Galili bilisiu. (Iri ale aloh Gwa Li Taiberiyas.)
JOH 6:2 Eme ma iri lau solo-an labai an hamon toro ala bilisiu ale. Tasah iri ndranyolom iy ndramekes iri lahou tinan ma kalem i tiri lau abo sik asahan amwenen.
JOH 6:3 Ano Jises edek ili loken kabede mandrei ari. Iy eme manyah udu andri hawe oro lau tan.
JOH 6:4 Nyamon tinan ta Pasoba tiri Juwis mirihik anya kasahan.
JOH 6:5 Jises suri batun i loken, iy anyolom lau solo-an labai adek amwenen ame hawe oro. Iy eme ndremenya Pilip, “To kasih jabi ramen niri lau marakon ame dah kameh kala heh handru?”
JOH 6:6 Iy ndremenya doh ta none ndrine Pilip. Tasah, lakou marakon badeh, iy ndrabwetenei ndrano ta iy kameh amekes.
JOH 6:7 Pilip asehek i ta Jises i buku doh: “Sihinek ta bun ma ndru la-uh badeh, winiyan basihinei jabi ramen winiyan bala boho ndramak ari, ari are kede-eh bwe!”
JOH 6:8 Lau tan ari ja badeh, Enduru nadu tine Saimon Pita, iy asehek anya,
JOH 6:9 “Nah ari doh ni tan ma la-uh ma hawe bali ma limeh iri ndrabwidiy le. Arile, barala winiya lau marakon deh?”
JOH 6:10 Jises tiye i toro lau tan i buku doh, “Ado katiye kili tiri lau marakon kamanyah ka-en andri.” Bwidiu solo-an udu kon doh. Eme ma iri lau marakon manyah an andri bwele-e bwidiu. Kane iri mwan marakon i se badeh, asahan ma lamawa (5,000).
JOH 6:11 Ano Jises andrei jabi ramen, iy edeu wurah i ta Kindrei ta aliy. Iy atehei ili mine oro lau tan, oro adeu i niri lau marakon nane manyah an bwele-e bwidiu. Ano iy andrei ni ja, iy amekes i buku le aliy. Iri aimon ili ili winiya le so-ok tiri ano.
JOH 6:12 Ma ndrine iri marakon badeh, idih. Jises eme tiye oro lau tan anya, “Ya ado katukumwi tikibwah tiri nyamon erah, marakon ki le se, sakeh laleyah.”
JOH 6:13 Oro lau tan ame tukumwi tikibwah tiri ili le se, oro anyuhiy ili bwak ma ronoh la-uh.
JOH 6:14 Iri lau marakon nane dah anyolom lahou tinan ma hawe kalem Jises amekes. Iri ame asehek i buku doh, “Aliy le ai, iy propet mene anya keme bolo kon munyak.”
JOH 6:15 Arile, Jises ndratanan budon tiri, iri anya kasehek sahou ki se na boto-on tiri, ma iri anya katehei Jises kasahan kabin tiri. Arile, Jises eme ruwani iri, iy le ari iu ili bwele-e mandrei.
JOH 6:16 Kon ndra beyeh ai, oro lau ta Jises adek ame andri kapa gwa li ja.
JOH 6:17 Oro ala bolo ndron ra-ei, ma oro abahau ala loboho bilisiu Kapena-um. Kon ndraben ai, Jises bala hawe oro bwe le.
JOH 6:18 Jor atohou boto-on eme bwidi bayau a tinan.
JOH 6:19 Oro abahau luluwen sese, i buku kilomita limeh ala len. Mada oro ili anyolom Jises edek bwele-e gwa ili mirihik toro. Eme ma bwidi oro anoh labai.
JOH 6:20 Arile, iy eme tiye ili toro, “Jo, jo, ado sanoh!”
JOH 6:21 Eme bwidi ndrine oro sekesek. Oro ame suni iy i ndron hawe oro. Sese luwen bwe oro ndrasos babi bilisiu nane oro anya kala aliy.
JOH 6:22 Kon aleu len ari ja. Lau ra-on ado kapa gwa bilisiu nane bwena, oro tanan buku Jises badeh, bala ndron hawe oro lau tan bwe. Oro lau tan le badeh, ala.
JOH 6:23 Ano, ndron ra-on badu Taiberiyas ame asos bilisiu, mirihik ta kon iri lau mene ado aliy, aimon jabi ramen Jises edeu wurah i ta aliy.
JOH 6:24 Iri lau marakon banyolom Jises ma hawe oro lau tan bwe. Eme ma iri ala bolo iri ndron ra-on ja, abahau ala bilisiu ala Kapena-um asilah Jises.
JOH 6:25 Iri ame ala ndruni iy udu kapa gwa li bilisiu. Iri ame ndremenyani iy, “Ndramak ta leheya, saba len handru ou asahan dah?”
JOH 6:26 Jises asumon sahou toro i buku doh, “Handru labai jo katiye taha. Aha babwetenei iri lahou tinan ma kalem mene aha anyolom jo amekes, bwe, eme aha ame asilah jo ja. Arile, aha ndrani jabi ramen ma bwidi ndrine aha irek. Ta idoh le, aha abo gok ta asilah jo.
JOH 6:27 Aha sabo gok ta nyamon ale kameh andra-i, ano abola. Aha kabo gok ta nyamon udu luluwen ma udu mwasin, ma nyamon kameh edeu kohan handru ewek taha ma ta udu le buku doh. Nadu Ndramak Awas kameh edeu naha nyamon doh. Taman Kindrei suni nadun eme, ma iy atehei boto-on i tan ta atondrok iri lakou marakon.”
JOH 6:28 Iri ame ndremenya iy ja, “Ahi kamekes saba gok handru, ta ahi winiyan amekes lahou ta Kindrei?”
JOH 6:29 Jises asehek sahou ja i toro i buku doh, “Gok ta Kindrei i buku doh: Aha katehei budon taha kili ta iy ndramak nane Kindrei ndrasuni iy ndrame.”
JOH 6:30 Iri ndremenya iy ja, “Saba kalem ja kameh ou amekes ta ahi kanyolom ma ahi katehei budon tahi ki le tam? Ou amekes sah handru?
JOH 6:31 Tubu ahi iri mene aimon nyamon ari, iri aloh mana i buku jabi ramen, udu bolo kon lomale an. Buku iri ndratorowenei, ‘Iy edeu niri jabi ramen ta aimon badu kandrah.’”
JOH 6:32 Jises asehek i tiri i buku doh, “Handru labai jo tiye taha, Moses badeu naha jabi ramen badu kandrah bwe. Badeh, tama edeu naha jabi ramen handru badu kandrah.
JOH 6:33 Jabi ramen ta Kindrei nane iy udu kandrah eme andri ta edeu kohan handru eme ta kon munyak.”
JOH 6:34 Iri anya, “Ndramak tinan, na le dan ou adeu nahi jabi ramen baden!”
JOH 6:35 Jises tiye i tiri i buku doh, “Jo le, jo jabi ramen handru kohan udu aliy. Are lau iy eme hawek, iy winiyan bamak son bwe, ma are lau iy atehei budon tan eme tek, balen kameh winiyan bamar ta gwa ja bwe.
JOH 6:36 Buku jo ndrasehek taha, aha ndranyolom jo, arile aha batehei budon taha handru bame tek bwe le.
JOH 6:37 Iri lau, tama abudon ta edeu iri ame tek, idah kameh iri ame hawek handru. Buku are lau iy anya keme hawek, jo kameh winiyan batikahei iy ba-au bwe.
JOH 6:38 Jo udu kandrah ndrame andri. Jo eme ta amekes lahou na budon tek le bwe. Jo eme ta amekes iri lahou na budon ta tama, iy nane suni jo eme.
JOH 6:39 Idah badeh, budon tan, iy suni jo eme ta jo samani iri lau nane iy ndraleheyani iri ndrame tek. Buku len hamon, jo kameh kamete-ei iri ja.
JOH 6:40 Budon ta tama badeh, iy aso-ok lau marakon kanyolom kili le ta nadun, ma iri katehei budon tiri kili le ta nadun. Idah kameh koha iri winiyan bano bwe, ta udu le buku doh. Jo eme kameh mete-ei iri lau amak, ame loken ja na len hamon.”
JOH 6:41 Udu ja badeh, iri Juwis abolosen i tan ta iri sahou iy asehek i buku doh, “Jo badeh, jo jabi ramen handru udu kandrah eme andri.”
JOH 6:42 Iri ame nunu-uh i buku doh, “Kede-eh Jises, taha tanan taman uru tinen. Iy le ai, iy nadu Josep. Buku sah ja iy asehek, ‘Jo udu kandrah eme andri’?”
JOH 6:43 Jises eme asehek sahou i tiri i buku doh, “Aha ka-iy nunu-uh.
JOH 6:44 Tama suni jo eme andri. Ari ndramak winiyan bame hawek le manyah bwe, winiya le tama andrei iy eme hawek, ma jo kameh mete-ei iy ili loken na len hamon.
JOH 6:45 Sahou iri ndratorowenei in bolo buk tiri propet tiye i buku doh, ‘Kindrei kameh leheya iri.’ Are lau anuhun tama, ma iy in hamon ta tanan tan, badeh, iri kame hawek.
JOH 6:46 Ari ndramak banyolom tama bwe le. Iy le ari nane udu hawe Kindrei, iy le badeh, ndranyolom tama.
JOH 6:47 Handru labai jo tiye taha. Are lau iy atehei budon tan eme tek, idah kameh kohan handru winiyan bano bwe ta udu le buku doh.
JOH 6:48 Jo badeh, jabi ramen handru ta edeu kohan handru ili tiri lau.
JOH 6:49 Tubu aha iri bwena mene aimon jabi ramen udu kon lomale an, arile iri ndramak.
JOH 6:50 Jabi ramen dah badeh, badu kandrah amwenen eme andri. Buku are lau iy aimon, iy winiyan bamak bwe.
JOH 6:51 Jo jabi ramen kohan handru udu aliy, iy udu kandrah eme andri. Buku are lau iy aimon jabi ramen dah, kohan handru kameh udu le buku doh. Jabi ramen dah i buku odak, ta jo edeu ta koha iri lau badu kon munyak.”
JOH 6:52 Eme ma bwidi losen udu ndrokowa iri Juwis amwenen. Iri anya, “I buku sah handru iy ndramak kede-eh edeu na taha odan?”
JOH 6:53 Jises asehek ili tiri i buku doh, “Handru labai, jo tiye taha. Aha badeh, kaimon oda Nadu Ndramak Awas ma aha ka-un ndrayen. Buku aha bamekes bwe, idah kameh kohan handru doh aha winiyan bakohok bwe.
JOH 6:54 Are lau iy aimon odak, ma iy a-un ndrayek, idah kameh kohan handru udu tan udu le buku doh, ma jo kameh mete-ei iy amak ja na len hamon.
JOH 6:55 Tasah odak badeh, nyamon awas handru ma ndrayek badeh, gwa simidin handru.
JOH 6:56 Are lau iy aimon odak ma iy a-un ndrayek, iy badeh, in hawek ma jo in hawen.
JOH 6:57 Tama badeh awas, ma na boto-on ta tama le jo asahan eme awas. Iy suni jo eme. Buku are lau iy aimon jo, iy winiyan bamak bwe tasah iy aimon jo.
JOH 6:58 Jabi ramen dah badeh, udu kandrah amwenen eme andri. Iy bala buku jabi ramen mene tubu taha iri aimon ado kon lomale an bwe. Iri aimon, arile iri amak. Are lau iy aimon jabi ramen dah badeh, iy winiyan bamak bwe. Kohan handru kameh udu le buku doh.”
JOH 6:59 Jises asehek iri sahou marakon doh, ma iy leheya iri udu bolo asiu ta atukum tiri Juwis udu Kapena-um.
JOH 6:60 Eme oro lau tan anuhun, ma oro solo-an asehek, “Leheya tan doh badeh, baleu se bwe. To kakohok bolo sahou tan barala buku sah handru?”
JOH 6:61 Jises ndratanan oro lau tan badeh, nunu-uh ta sahou nane. Iy eme asehek ili toro i buku doh, “Sahou nane tono-ei ndrine ado deh?
JOH 6:62 Budon tado i buku sah handru, buku ado anyolom Nadu Ndramak Awas iu ili hamon ili kon mene iy udu aliy eme?
JOH 6:63 Oda ndramak winiyan badeu kohan handru bala ta ndramak bwe. Idoh badeh Malawin Ndrabun edeu kohan handru. Sahou jo asehek ewek taha badeh, ta Malawin Ndrabun, ma iri sahou doh edeu koha iri ewek taha.
JOH 6:64 Arile aha rayah badeh, batehei budon taha bwe.” Jises ndratanan are lau iy batehei budon ba-en tan bwe. Iy i tanan udu ndra bada katin ta are lau handru kameh amekes sa-oh tan.
JOH 6:65 Jises asehek ili le i buku doh, “Jo katiye taha: Ari ndramak winiya bame hawek bwe, buku tama badeu boto-on bala tan bwe.”
JOH 6:66 Udu bada len doh, oro lau tan rayah atobwak. Oro ba-en hamon tan ja bwe.
JOH 6:67 Jises eme ndremenyani oro lau tan ma ronoh la-uh, “Ado anya ka-au ale?”
JOH 6:68 Saimon Pita eme asehek ili tan i buku doh, “Laban, are handru kameh aso kala hawen? Sahou ou asehek badeh, kohan handru udu aliy iy winiyan bano bwe, iy kameh ta udu le buku doh.
JOH 6:69 Ahi ndratehei budon tahi marakon ndrawek tam, ma ahi ndratanan, ou badeh, Nadu Kindrei ndrabun ari le.”
JOH 6:70 Ano Jises asehek sahou i toro i buku doh, “Jo andrei ado ma ronoh la-uh badeh, an hamon tek. Arile, iy ari in bolo ado badeh, iy balik.” (
JOH 6:71 Jises asehek Judas nadu Saimon Iskariyot. Judas iy ari badu hawe oro ma ronoh la-uh. Arile, udu hamon ja badeh, iy amekes sa-oh ta adai Jises.)
JOH 7:1 Ano badeh, Jises edek in bolo kon Galili. Iy bwalen edek ili bolo kon Judiya, tasah iri Juwis badeh, atondrok ta adai iy kimek.
JOH 7:2 Idoh mirihik ta len tinan tiri Juwis ta amekes nyamon tinan ta asiu beleheleh.
JOH 7:3 Nadu tinen oro ame asehek i tan i buku doh, “Ou au ala Judiya ma oro lau tam kanyolom ou amekes lahou tinan.
JOH 7:4 Are lau iy anya lau marakon katanan iy badeh, iy winiyan batone ari lakou bwe. Buku ou amekes iri lakou doh, mwasin ta ou leheya ou ala ta lau marakon badu kon munyak.”
JOH 7:5 Nadu tinen oro amwenen badeh, asehek sahou doh, tasah oro batehei budon toro bala tan bwe.
JOH 7:6 Jises asehek sahou amwenen ili ta nadu tinen oro, “Len tek handru badeh, kahis le. Arile len marakon mwasin tado.
JOH 7:7 Ndrine iri lau marakon badu kon munyak winiya bandra-i bawek tado bwe. Ndrine iri kameh andra-i eme tek, tasah jo asehek kandriyen ndra-in iri amekes.
JOH 7:8 Abo, ado kala ta len tinan ma nyamon tinan. Jo winiyan bawek bwe le. Len tek amwenen badeh, kahis le.”
JOH 7:9 Iy asehek sahou ili toro ano, iy udu Galili udu.
JOH 7:10 Nadu tinen oro ndradek ndra-au ndrala ta len tinan ma nyamon tinan tiri Juwis. Ano Jises edek in hamon toro ili, tasah iy bwalen iri lau sanyolom iy.
JOH 7:11 Udu ta len tinan ma nyamon tinan tiri doh, iri Juwis asilah iy. Iri ndremenya, “Iy ndramak doh ndraheh?”
JOH 7:12 Loboho doh badeh, iri lau solo-an labai. Iri badeh, suburuk i tiri ta Jises. Iri rayah asehek Jises i buku doh, “Iy ndramak ari mwasin.” Iri rayah ja asehek anya, “Iy ta wendreya iri lau.”
JOH 7:13 Arile, iri ari winiyan bales bado mada iri lau asehek ta nyala Jises bwe, tasah iri anoh iri Juwis.
JOH 7:14 Len taloh ta nyamon tinan tiri Juwis kahis le, Jises eme edek amwenen ili bolo kowah ta asiu tinan ta Kindrei, iy eme leheya iri lau.
JOH 7:15 Iri lau tinan tiri Juwis ado aliy ale, mani iri atur, eme iri ndremenya iri, “Iy bala ari kon ta leheya bwe, arile iy akohok iri tanan doh badu heh handru?”
JOH 7:16 Jises eme asehek i buku doh, “Saba lakou jo leheya badeh, na budon tek amwenen bwe. Kindrei suni jo eme dah, ma iy edeu iri budon tan eme tek.
JOH 7:17 Buku are lau anya ki-in hamon ta lahou ta Kindrei iy winiyan i tanan sahou nane jo asehek, iy kameh i tanan sahou udu ta Kindrei eme, o, sahou jo asehek na le budon tek amwenen.
JOH 7:18 Are lau iy asehek sahou na le budon tan amwenen badeh, iy ta atudun le nyaran. Arile, are lau iy anya katudun nyara ndramak nane iy suni iy eme, iy ndramak doh asehek sahou handru. Iy ta wendreya bwe.
JOH 7:19 Bwena mene Moses edeu taha sahou batanau ta kandriyen malen. Arile aha ari ba-en hamon ta aliy bwe. Buku sah ja aha anya kadi jo kimek?”
JOH 7:20 Iri lau asehek sahou i tan i buku doh, “Ou kede-eh balik udu bwele-em. Are lau handru anya kidi ou amak?”
JOH 7:21 Jises tiye i tiri i buku doh, “Jo bwidi lahou tinan ari, eme mani aha atur ta aliy.
JOH 7:22 Moses mene tiye i taha ta sani ku-i nadu aha iri. (Kandriyen doh basahan ta Moses bwe. Kandriyen doh udu ndra bada tubu aha iri.) Arile aha asan ku-i nadu aha iri udu bolo len ta amunyau.
JOH 7:23 Buku sani ku-i nah mwan udu bolo len ta amunyau, taha tanan, kandriyen malen ta Moses bandra-i bwe. Taha kede-eh an hamon le ta kandriyen handru ta Moses. Ya buku sah ja aha abolosen eme tek ta jo bwidi ndramak ari amwenen ja udu bolo len ta amunyau?
JOH 7:24 Aha ka-iy seleya lakou na mada aha le. Aha kaseleya iri lakou marakon ki-in san ta kandriyen mwasin.”
JOH 7:25 Lau rayah badu Jerusalem lelen, “Sebwe iy ndramak kede-eh iri anya kadi iy kimek a nadeh?
JOH 7:26 Iy ales, iri ndranyolom iy, ma iri ndranuhun iy leheya iri lau. Ma iri kabin tiri Juwis basehek ari sahou bala tan bwe. Kora-on iri kabin ndratanan iy ndramwenen, ma iri anya, iy ndramak kede-eh Mesaya handru.
JOH 7:27 Arile bwe, ahi tanan iy badu heh handru. Arile, len ta Mesaya handru ta eme hamon kameh ari ndramak winiya bala tanan, iy udu heh eme, bwe.”
JOH 7:28 Jises leheya iri kahis le udu ndra bolo asiu tinan ta Kindrei. Iy asehek sahou bohon a tinan i loken, “Ya, aha tanan jo ma aha tanan jo badu heh handru. Jo bame dah na boto-on tek amwenen bwe. Tama suni jo eme, ma iy badeh, handru. Aha tanan tama bwe,
JOH 7:29 arile jo tanan iy, tasah jo badu hawen. Iy le adeh suni jo eme.”
JOH 7:30 Jises asehek sahou le badeh, eme iri lau rayah ame anya kateu iy. Arile ari ndramak batehei minen bala badan bwe, tasah idoh bamwenen ta len tan bwe le.
JOH 7:31 Arile, iri lau solo-an labai atehei budon tiri ili ta Jises. Iri suburuk i buku doh, “Buku Mesaya keme, iy kameh amekes iri lahou tinan ma kalem solo-an. Arile, iy Jises kede-eh ja, iy amekes iri lahou tinan ma kalem solo-an labai ja. Sebwe iy Jises kede-eh, iy Mesaya nadeh?”
JOH 7:32 Iri Parasi ndranuhun iri lau rayah nane suburuk ta nyala Jises. Eme iri ala hawe iri tinan tiri pris, suni iri lau ta atondrok asiu tinan ta Kindrei kala katawi Jises.
JOH 7:33 Jises eme asehek i tiri i buku doh, “Jo kameh bado hawe aha luluwen bwe. Jo kameh iu ili hawe are lau iy nane suni jo eme.
JOH 7:34 Aha kameh asilah jo, arile aha winiyan basilahei jo bwe. Ma aha kameh winiyan bame kon kameh jo ilih aliy bwe.”
JOH 7:35 Iri Juwis rayah asehek amunum le ili tiri ari ari i buku doh, “Iy ndramak kede-eh anya iy kameh ili kon rakon doh, kameh taha winiyan basilahei iy bwe. Iy kameh ilih saba kon handru? Kora-on iy ki-iu kili bolo kon tinan tiri Grik, iri lau tataha rayah ado aliy? Kora-on iy kili kaleheya iri nadeh?
JOH 7:36 Iy ndramak kede-eh asehek i buku doh: Taha kameh asilah iy, arile taha winiyan basilahei iy bwe. Ma taha kameh winiyan bala kon iy ilih aliy doh bwe. Kati sahou tan kede-eh, tasah handru?”
JOH 7:37 Mirihik ta len tinan tiri Juwis ta nyamon tinan tiri anya kano. Jises eme suri iy ere loken, ma iy asehek sahou i tinan i buku doh, “Buku are lau balen asamar, iy keme hawek ka-un gwa.
JOH 7:38 Buku are lau iy atehei budon tan mara-ei eme tek, idah kameh gwa kaloh udu bolon amou eme len. Idah i buku buk ndrabun ndrasehek.”
JOH 7:39 Jises asehek nyala Malawin Ndrabun. Buku are lau iri atehei budon tiri in tan, hamon kameh iri akohok Malawin Ndrabun. Udu ndra bada len doh Jises bala hamon bala kandrah, ta Kindrei leheya lomadan i tan bwe le. Eme ma Malawin Ndrabun bame andri bwe.
JOH 7:40 Iri lau anuhun sahou badu bohon eme ma iri rayah asehek, “Handru labai, iy ndramak kede-eh badeh, propet.”
JOH 7:41 Iri lau anya, “Iy ndramak kede-eh Mesaya.” Iri rayah ndremenya ja, “I buku sah handru Mesaya udu Galili eme?
JOH 7:42 Buk ndrabun ndrasehek, Mesaya kameh asahan boho kamen ta Debit. Ma buk ndrabun asehek ale ta Mesaya kameh asahan Betlehem kon tinan ta Debit bwena mene udu aliy.”
JOH 7:43 Eme ta Jises le badeh, bwidi iri lau apou iri.
JOH 7:44 Iri lau rayah badeh anya kateu iy, arile mine iri bala se badan bwe.
JOH 7:45 Iri lau ta atondrok asiu tinan ta Kindrei ala hamon hawe iri pris ma iri Parasi. Iri ame ndremenya oro, “Buku sah handru ado batawi Jises bame bwe?”
JOH 7:46 Oro lau ta atondrok asiu tinan ta Kindrei anya, “Ei, ari ndramak basehek sahou bala buku iy ndramak doh asehek bwe!”
JOH 7:47 Iri Parasi tiye ili toro i buku doh, “Sebwe iy ndrawendreya ado ale nadeh?
JOH 7:48 Ya, ado ndranyolom, iri Parasi ma iri pris badeh, batehei budon tiri handru bala tan bwe.
JOH 7:49 Arile, iri lau laleyah badeh, tanan kandriyen malen ta Moses mene bwe. Idah kameh losen ta Kindrei udu bwele-e iri.”
JOH 7:50 Nikodemus badeh, ndrala bwena ndratou Jises. Iy badu hawe iri ale. Iy eme ndremenya iri i buku doh,
JOH 7:51 “Buku sah, kandriyen malen tataha kede-eh winiyan atehei ari ndramak i ta mada sahou, buku taha banuhun iy bwe, ma taha bala tana taha ta saba lakou handru, iy bwidiy andra-i?”
JOH 7:52 Iri ame tiye sahou i tan i buku doh, “Neh? Ou badu Galili ale? Buku ou anyolom bolo buk ndrabun amwenen badeh, ari propet winiyan bame loboho Galili bwe-en.” [
JOH 7:53 Ano le badeh, iri lau marakon au ala hamon ala kon tiri amwenen.
JOH 8:1 Arile, Jises le ari udu, ano iy edek iu ili bwele-e mandrei ari iri aloh mandrei ta Olip.
JOH 8:2 Udu mandraben ma wahun iy edek eme hamon eme andri ili bolo kowah ta asiu tinan ta Kindrei ja. Iri badih ma mwan ame hawen ja. Jises eme manyah ma iy leheya iri.
JOH 8:3 Eme iri lau ta leheya kandriyen malen ta Moses, ma hawe iri Parasi, andrei badih ari eme, atehei iy ales udu mada Jises hawe iri lau marakon. Iri anya iy amekes karei.
JOH 8:4 Iri ame asehek i ta Jises i buku doh, “Ndramak ta leheya, ahi anyolom iy badih kede-eh amekes karei le badeh, eme ahi andrei iy eme dah.
JOH 8:5 Kandriyen malen ta Moses mene batanau taha badeh, i buku are badih, iy amekes karei i buku doh, ahi kandrei bek korowei iy kimek ki-iu. Abo, ou kameh asehek i buku sah handru?”
JOH 8:6 Iri amekes sahou i buku doh anya kawendreya Jises kili ta mada sahou. Arile Jises aluh i andri iy atorou lakou na kandro minen in bada munyak.
JOH 8:7 Iri ndremenya Jises kahis le. Ano iy suri iy ere loken ma iy asehek sahou ili tiri i buku doh, “Ya, are lau handru udu hawe aha kada-ah, iy bamekes se karei bwe-en? Iy kandrei bek, iy korowei i badih kede-eh.”
JOH 8:8 Jises asehek sahou ano iy aluh ili andri ja. Iy atorou lakou na kandro minen in bada ndren ja.
JOH 8:9 Iri marakon anuhun sahou doh badeh, ma iri asilah san tiri ta atobwak. Iri asoh ari ari. Iri lau alon adek au ma bwena. Ano iri rayah ja an hamon tiri. Jises le ari erah udu, hawe iy badih nane ales udu batalan.
JOH 8:10 Jises eme suri iy ere loken ma iy ndremenya iy i buku doh, “Badih den? Iri lau marakon nane ndraheh? Ari tiri batehei ou bala ta mada sahou bwai?”
JOH 8:11 Iy badih nane dah anya, “Bo-oh! Ndramak tinan.” Ano Jises asehek sahou i tan, “Jo ale batehei ou bala ta mada sahou bwe. Ou au ai. Arile, ou sala samekes karei ja ai.”]
JOH 8:12 Ano Jises asehek sahou ili tiri lau ja. Iy asehek ili tiri i buku doh, “Jo badeh, sun ta kon munyak. Are lau iy in hamon tek, iy winiyan ba-en lulik bwe. Iy kameh akohok tan sun kohan udu aliy, kameh edeu kohan udu le buku doh.”
JOH 8:13 Arile iri Parasi asehek i ta Jises i buku doh, “Ou kede-eh asehek iri gok ma kandriyen tam amwenen, eme ma iri lau kameh winiyan batehei budon tiri bala ta iri sahou nane ou asehek bwe.”
JOH 8:14 Jises anya, “Ehe, jo asehek saba lakou eme badak amwenen. Arile iri sahou handru. Jo tanan jo udu heh eme handru, ma jo tanan jo kameh ili heh. Aha bala tanan jo badu heh handru, ma jo kameh ili heh handru, bwe.
JOH 8:15 Aha adeu ndramak i ta mada sahou badeh, in hamon ta budon tataha lau badu munyak amwenen. Arile jo badeu ari ndramak bala ta mada sahou bwe le.
JOH 8:16 Arile, buku jo edeu ndramak i ta mada sahou, jo kameh anuhun sahou tan amwenen labai, tasah jo le ari badeh, banuhun sahou tan bwe; tama suni jo eme ma iy amekes gok hawek ale.
JOH 8:17 Kandriyen taha malen asehek i buku doh, ‘Buku sahou turu lau ma la-uh i le randra eh, uru badeh, tiye sahou handru ai.’
JOH 8:18 Jo badeh, asehek jo amwenen. Ano tama nane suni jo eme dan, iy ale asehek jo.”
JOH 8:19 Iri ndremenya iy, “Tamam ndraheh?” Jises eme tiye tiri i buku doh, “Aha tanan jo bwe, ma aha tanan tama bwe le. Buku aha tanan jo eh, badeh kameh aha tanan tama ale ai.”
JOH 8:20 Jises asehek iri sahou marakon doh badeh, udu bolo len iy leheya iri udu bolo asiu tinan ta Kindrei. Iy ales udu mirihik ta lakou ari ta iri adeu ta ndrahune luk ta nyara salom. Arile ari ndramak babawei iy bwe, tasah len tan handru badeh, kahis le.
JOH 8:21 Jises asehek sahou ili tiri lau ja, “Jo kameh iu ai. Aha kameh asilah jo, arile aha kameh amak ta kandriyen ndra-in taha. Aha kameh winiyan bame kon kameh jo ilih aliy bwe.”
JOH 8:22 Eme bwidi iri Juwis ndremenya iy ja, “Iy kidi iy nadeh? Eme adeh iy asehek i buku doh, ‘Aha winiyan bame kon kameh jo ilih aliy bwe.’”
JOH 8:23 Arile Jises asehek le ai, “Aha lau marakon kede-eh badu kon andri dah. Jo le badu kon loken. Aha marakon badu kon munyak dah. Jo badu kon munyak dah bwe.
JOH 8:24 Jo ndratiye taha, ta aha kameh amak ma ndra-in taha. Buku aha batehei budon taha bame tek bwe, buku, ‘Jo iy ndramak nane iy ta udu le buku doh,’ aha kameh amak hawe kandriyen ndra-in taha.”
JOH 8:25 Iri ame ndremenya iy ja, “Ya ou are lau handru?” Jises eme tiye i tiri, “Jo adeh lakou nane jo ndrasehek taha.
JOH 8:26 Budon tek solo-an labai ta asehek ewek taha ma ta maha-an taha. Arile jo kameh tiye iri kandriyen taha i buku ari ndramak ta anuhun sahou. Jo ndranuhun iri sahou ta are lau nane suni jo eme dah, iy asehek iri sahou handru. Eme jo asehek ili tiri lau badu kon munyak.”
JOH 8:27 Jises asehek taman ili tiri, arile iri bandrei bolo sahou tan bamwenen bwe.
JOH 8:28 Jises eme asehek ili tiri ja, “Buku aha ndratudun Nadu Kindrei ere bada kei tondreh, ma aha kameh atanan, jo iy ndramak nane iy udu le buku doh. Ma jo winiyan bamekes iri lakou na le budon tek le bwe. Jo asehek dah buku tama ndraleheya jo.
JOH 8:29 Are lau iy nane suni jo eme dah iy udu hawek. Iy winiyan bamani jo bwe, tasah jo amekes iri lakou in hamon ta budon tan.”
JOH 8:30 Jises asehek iri sahou doh kahis le, eme iri lau solo-an atehei budon tiri ili tan.
JOH 8:31 Jises eme asehek tiri Juwis nane atehei budon tiri in tan, “Ya, buku aha anuhun sahou tek, ma aha an hamon tiri leheya tek badeh, aha lau tek.
JOH 8:32 Idah kameh aha atanan sahou handru, ma sahou handru kameh bwidi aha mani gok taha bonyo-ou.”
JOH 8:33 Iri Juwis ame asehek i ta Jises, “Ahi dah nadu Abraham handru. Ahi bala buku bonyo-ou ta ari ndramak bwe le. I buku sah ja, ou anya, ahi kameh mani gok tahi bonyo-ou?”
JOH 8:34 Jises asehek sahou ili tiri ja, “Handru labai jo tiye taha, buku are lau iy amekes kandriyen ndra-in, iy badeh, ndra bonyo-ou tiri kandriyen ndra-in.
JOH 8:35 Buku are lau iy bonyo-ou, iy kameh winiyan bala buku nadu iy ndramak ta asiu nane iy in hawe oro, bwe. Arile nadun handru amwenen kameh udu hawe taman uru tinen na len marakon.
JOH 8:36 Ya, buku Nadu Ndramak Awas ndrabwidi aha ndramani iri gok taha bonyo-ou, badeh, kameh aha winiyan bamekes gok ta bonyo-ou ja bwe.
JOH 8:37 Jo tanan aha nadu Abraham handru. Arile aha anya kadi jo kimek, tasah aha batehei budon taha bala ta sahou tek bwe.
JOH 8:38 Jo asehek taha ta iri lakou tama ndraleheya jo. Arile aha amekes lakou an hamon ta tama aha, iy ndrasehek taha.”
JOH 8:39 Iri ame asehek i ta Jises, “Ahi nadu Abraham.” Ano Jises asehek ili tiri ja, “Buku aha nadu Abraham handru eh, ya aha kamekes lakou kili le buku iy ndramekes.
JOH 8:40 Iri lakou marakon jo ndrabwidiy ma sahou handru jo ndrasihidiy ndrawek taha, jo anuhun ta Kindrei. Bwe ja, aha none ta adi jo. Abraham bamekes bala buku aliy bo-oh.
JOH 8:41 Aha amekes iri lakou kede-eh i le buku tama aha amwenen amekes.” Iri Juwis anya, “Ahi nadu andra bweu bwe! Kindrei le ari amwenen badeh, tama ahi, ma ahi dah nadun handru.”
JOH 8:42 Jises asehek ili tiri, “Buku Kindrei tama aha handru eh, badeh, aha kaso-ok jo ai, tasah jo udu hawe Kindrei eme udu kada-ah. Jo bame laleyah na le budon tek amwenen bwe. Iy suni jo ta eme.
JOH 8:43 Buku sah handru aha bakohok bolo iri sahou tek bala mwasin bwe? Tasah aha bandrei kati iri sahou tek bamwenen bwe.
JOH 8:44 Tama aha balik, aha nadun, aha amekes lakou an hamon ta iri lakou iy aso-ok. Udu ndra bada katin eme, iy ta idi lau. Iy bwalen sahou handru, tasah iy tanan ta asehek sahou handru bwe. Iy ta wendreya, ma iy aso-ok ta asehek sahou ta wendreya. Iy badeh, tine wendreya udu tan.
JOH 8:45 Jo badeh, asehek iri sahou handru. Arile, aha ja, batehei budon taha bame ta sahou tek bwe.
JOH 8:46 Are lau taha winiyan nyuwani jo amekes iri kandriyen ndra-in? Buku jo asehek sahou handru, i buku sah, aha batehei budon taha bame tek bwe ja?
JOH 8:47 Are lau iy badu hawe Kindrei handru, iy anuhun saba lakou Kindrei asehek. Katin ta ou bwalem ta anuhun, tasah ou badu hawe Kindrei bwe.”
JOH 8:48 Iri Juwis asehek sahou boto-on i ta Jises i buku doh, “Ahi asehek handru, ou ndramak ndra-in badu Samariya, malawin ndra-in udu bwele-em.”
JOH 8:49 Jises asehek i tiri, “Ari malawin ndra-in bado bwele-ek kada-ah bo-oh. Jo masiye tama, arile aha ja bamasiye jo bwe.
JOH 8:50 Jo bwalek ta atudun nyarak. Ndramak ari kede-eh, iy aso-ok ta atudun nyarak, ma iy kameh ta anuhun sahou tiri lau.
JOH 8:51 Jo asehek taha handru. Are lau iy anuhun sahou, ma iy in hamon ta sahou tek, iy kameh winiyan bamak bwe.”
JOH 8:52 Ndrine iri Juwis irih ta sahou ta Jises, eme iri asehek sahou i buku doh, “Idah ahi ndratanan ndramwenen ai. Ou kede-eh malawin ndra-in udu bwele-em! Abraham ma hawe iri propet badeh, ndramak ndra bwena ndra-au. Arile ou anya ja, ‘Iy are lau iy anuhun ma iy in hamon ta leheya tek, iy winiyan bamak bwe.’
JOH 8:53 Budon tam kede-eh anya ou bwena labai ma ou ado bwele-en labai ta Abraham ja nadeh? Abraham ma iri propet badeh, ndramak ndra-au ndra bwena. Ya ou anya, ou are lau handru?”
JOH 8:54 Jises eme asehek i toro i buku doh, “Buku jo katudun nyarak amwenen, idah kameh basahan bala mwasin bwe. Iy ndramak nane masiye jo badeh, tama amwenen. Aha nane aloh iy Kindrei taha en?
JOH 8:55 Aha bala tanan iy bwe, arile jo tanan iy. Buku jo kasehek anya jo tanan iy bwe eh, badeh, kameh jo ndrawendreya i buku le aha. Arile jo tanan iy, ma jo anuhun sahou tan.
JOH 8:56 Tama aha Abraham ndrasekesek ndrandra-i labai, ta anyolom len tek nane dah. Iy anyolom ma iy sekesek tinan labai.”
JOH 8:57 Iri Juwis asehek i tan ja i buku doh, “Ou bala mirihik ta jaha ma lomonoh (50) bo-oh! I buku sah ja ou ndranyolom Abraham?”
JOH 8:58 Jises tiye ili tiri, “Jo asehek taha handru en. Abraham basahan bwe le badeh, jo iy ndramak nane ta udu le buku doh.”
JOH 8:59 Jises asehek sahou ano le badeh, iri lau akohok bek, iri ame anya korou iy. Arile Jises aton udu bolo asiu tinan ta Kindrei udu. Ano iy iu ili manan.
JOH 9:1 Jises edek ili, eme ma iy anyolom ndramak ari tinen atehei iy madan bwe.
JOH 9:2 Oro lau tan ame ndremenya iy, “Ndramak ta leheya, are lau handru amekes kandriyen ndra-in? Iy ndramak kodo-oh deh, bwe taman uru tinen amekes, ma bwidi madan bwe?”
JOH 9:3 Jises anya, “Iy ma taman uru tinen oro bamekes ari kandriyen ndra-in bwe. Idoh asahan ta iri lau kanyolom gok ta Kindrei kameh asahan ta manyah tan.
JOH 9:4 Len dah, len tataha ta amekes gok ta iy nane suni jo eme. Buku ben asahan, ari ndramak winiya bamekes gok bwe.
JOH 9:5 Buku jo udu ndra kon munyak dah, jo sun handru ta lomada kon munyak.”
JOH 9:6 Iy asehek sahou ano, iy sakaruk ili bada ndren, ano iy rawi sakaruk tan nane ma ndren udu bolo minen eme iy tahiy i mada iy ndramak nane.
JOH 9:7 Iy asehek i tan, “Ou ala sikine madam kili bolo gwa li Silowam.” (Moson ta sahou i buku doh: “Iy tiye iy kili.”) Eme iy ndramak nane edek ili sikine madan, eme ma madan ma la-uh asak. Ano iy edek iu ili kon.
JOH 9:8 Oro lau badu hawen ma oro lau rayah ndranyolom iy bwena anyolou iri lau ta lakou, lelen, “Sala iy ndramak mene ale manyah? ma iy mene anyolou lakou tiri lau?”
JOH 9:9 Oro rayah anya, “Iy le ai.” Oro rayah ja anya, “Bwe, ndramak ari ja. Arile nyolom tan i buku le iy amwenen.” Ano, iy le amwenen eme asehek i toro, “Jo le asah idah.”
JOH 9:10 Oro lau rayah ame lelen iy, “Ya, i buku sah handru madam asak?”
JOH 9:11 Iy eme asehek i toro, “Iy ndramak ari, iri aloh nyaran Jises, tahi ndren i madak ma la-uh. Ano iy tiye jo ili sikine madak ili gwa li Silowam. Jo ili sikine madak, eme ma jo anyolom kon ja.”
JOH 9:12 Oro ame lelen iy ja, “Ya, iy ndramak badeh, ndraheh?” Iy anya, “Jo tanan bwe.”
JOH 9:13 Oro andrei iy ndramak bwena mene madan bwe ili hawe iri Parasi.
JOH 9:14 Na len nane Jises tahi ndren i madan, idoh udu bolo len ndrabun tiri Juwis ta amunyau.
JOH 9:15 Ta idoh, iri Parasi ame lelen i ndramak nane ja, “I buku sah handru madam asak?” Iy eme tiye i tiri, “Iy tahi ndren i madak, ano iy tiye jo ili sikine madak, eme ma madak asak.”
JOH 9:16 Iri Parasi rayah anya, “Iy ndramak nane amekes lakou i buku doh, iy badu hawe Kindrei bwe, tasah iy ba-en hamon ta kandriyen malen ta len ndrabun ta amunyau bwe.” Rayah anya, “I buku sah handru iy ndramak ta amekes kandriyen ndra-in, amekes kalem i buku doh?” Eme ma apwai iri a la-uh.
JOH 9:17 Ano iri Parasi lelen i ndramak nane san rasan ja, “Ou asehek anya iy bwidi madam asak, ya, ou amwenen asehek, i buku sah handru?” Eme ndramak nane anya, “Iy propet ari ai.”
JOH 9:18 Eme ma iri Juwis batehei budon tiri bala ta sahou tan bwe. Iri tiye sahou i ta taman uru tinen kame.
JOH 9:19 Uru ame asahan hawe iri. Iri ame lelen uru, “Kede-eh nadu ah? Iy mene ah asehek anya, ah atehei iy madan bwe? Ya, i buku sah handru madan ndrasak ja?”
JOH 9:20 Taman uru tinen anya, “Aru tanan, kede-eh nadu aru handru, aru atehei iy asahan, madan bwe.
JOH 9:21 Arile aru tanan bwe; i buku sah handru madan ndrasak ja kada-ah, ma are lau handru sihi madan, aru tanan bwe. Aha kandremenya iy. Iy tanan, ma iy winiyan asehek taha.”
JOH 9:22 Taman uru tinen asehek, tasah uru anoh iri Juwis. Iri Juwis ndratehei sahou ndra-en aliy bwena, i buku are lau iy asehek anya Jises badeh, Mesaya, iri kameh tikahei iy udu bolo asiu ta atukum tiri Juwis iu ili manan.
JOH 9:23 Eme taman uru tinen asehek anya, “Iy ndrabadok, ma iy winiyan ta asehek sahou, aha kandremenya iy.”
JOH 9:24 Iri luhi iy ndramak nane eme hamon san rasan ja, ma iri asehek i tan, “Abo, ou tandrakan, ma masiye Kindrei na dah, ma ou asehek sahou handru! Ahi tanan, iy ndramak nane bwidi madam asak, iy badeh, irek ta lomondra ndra-in.”
JOH 9:25 Iy ndramak nane madan ndrasak asehek ili tiri anya, “Jo bala tanan bwai, buku iy ndramak doh lomondra ma kandriyen ndra-in udu tan deh bwe. Lakou ari le jo tanan: Bwena mene jo madak bwe, arile nadah madak ndrasak ja.”
JOH 9:26 Ano iri ndremenya iy ja, “Saba lakou handru iy amekes ewek tam? I buku sah handru iy sihi madam?”
JOH 9:27 Eme iy asehek, “Jo nane ndrasehek taha eh, aha banuhun bwe. Buku sah aha anya kanuhun ja? Sebwe aha anya kasahan iri lau tan ale nadeh?”
JOH 9:28 Eme bwidi iri asehek sahou boto-on i tan, “Ou lau tan ari ai! Ahi lau ta Moses labai!
JOH 9:29 Ahi tanan Kindrei badeh, asehek sahou i ta Moses, arile ta i ndramak badeh, ahi tanan iy bwai, ma ahi bala tanan, iy badu heh, bwe.”
JOH 9:30 Iy ndramak nane madan ndrasak anya, “Adeh! Jo barala tanan, ma baranuhun ai! Aha asehek anya, aha bala tanan, iy badu heh handru, bwe. Jo mene madak bwe, arile iy ndrabwidiy ndrasak ja.
JOH 9:31 Ahi tanan, Kindrei winiyan banuhun are lau, iy ta amekes kandriyen ndra-in, bwe. Arile, iy anuhun le iri lau mwasin ta atudun iy, ma iri an hamon handru ta tanan tan.
JOH 9:32 Taha marakon banuhun se bwe, ta ndramak ari badeh, bwidi ndramak ari, tinen atehei iy madan bwe, asak ja.
JOH 9:33 I buku Jises iy badu hawe Kindrei bwe, iy winiyan babwidiy se lakou bwe.”
JOH 9:34 Eme iri asehek i ta ndramak nane madan ndrasak ja anya, “Tinem atehei ou badeh, udu bolo iri kandriyen ndra-in. I buku sah ja, ou anya leheya ahi?” Eme iri tikahei iy udu bolo asiu ta atukum tiri Juwis iu ili manan.
JOH 9:35 Jises ndranuhun iy ndramak nane iy bwidi madan ndrasak, iri tikahei iy iu ta bolo asiu ta atukum tiri Juwis. Iy ndruni iy, ma iy eme ndremenya iy, “Budon tam kede-eh handru in ta Nadu Ndramak Awas deh?”
JOH 9:36 Iy ndramak nane lelen, “Are lau handru, ndramak tinan? Ou tiye keme tek, ma jo katehei budon tek marakon kili le tan.”
JOH 9:37 Jises anya, “Ou ndranyolom jo kede-eh, jo le asah asehek sahou hawem.”
JOH 9:38 Eme iy ndramak nane anya, “Laban, jo atehei budon tek ndrawek tam.” Ma iy eme aluh i andri udu mada Jises.
JOH 9:39 Ano Jises anya, “Jo eme andri kon munyak ta edeu lau ala ta mada sahou, ta iri lau mada iri bwe, winiyan asak. Ya mada iri lau mene mwasin, idah kameh i kaseu ja.”
JOH 9:40 Iri Parasi rayah ado hawen ala anuhun iy asehek, eme iri ndremenya, “Ou tiye sah? Sebwe mada ahi kaseu ale?”
JOH 9:41 Jises anya, “Buku mada aha bwe handru, badeh, aha bamekes iri kandriyen ndra-in nane doh bwe. Arile aha anya aha ndranyolom ja, badeh kameh kandriyen ndra-in taha udu bwele-e aha kahis.”
JOH 10:1 Jises tiye ja i buku doh, “Jo tiye taha handru, are lau iy badek madasan ta kowah tiri sipsip bwe, iy inyek o iy apou ja san kabede kowah, idoh iy ndramak ta bahana.
JOH 10:2 Ndramak iy edek amwenen ta madasan ta kowah tiri sipsip idoh ndramak handru ta atondrok iri sipsip.
JOH 10:3 Ndramak ta atondrok madasan kameh eme sihi kou, ma iri sipsip ale anuhun bohon amwenen. Iy eme aloh nyara iri, ma iy sirini iri ado bolo kowah ame manan.
JOH 10:4 Iy eme sirini iri sipsip tan marakon ado bolo kowah ame manan, ano iy edek in bwena, ma iri sipsip tan adek a-en hamon tan, tasah iri tana iri iy ma iri anuhun bohon amwenen.
JOH 10:5 Iri winiyan ba-en hamon ta ari ndramak badu kon leheleh bwe, ma idah kameh iri atobwak tan ale, tasah iri anuhun boho ndramak ari ja.”
JOH 10:6 Jises amekes sahou sokek, arile iri bandrei se bolo sahou tan iy asehek ili tiri se bwai.
JOH 10:7 Jises eme asehek sahou san rasan ja, “Jo tiye taha handru, jo madasan handru tiri sipsip.
JOH 10:8 Iri lau rayah ndrame bwena badeh, iri lau ta bahana ma iri ta akohok lakou laleyah, eme ma bwidi iri sipsip banuhun boho iri bwe.
JOH 10:9 Jo le, jo madasan handru, are lau iy anya keme bolon loboho madasan jo udu aliy, iy kameh winiyan bamak bwe. Iy kameh winiyan edek ili bolon, ano iy eme manan ja, ta asilah nan bwidiu nyorowan badu kapa gwa.
JOH 10:10 Iy ndramak ta bahana, iy winiyan bame laleyah bwe, iy eme badeh, ta bahana iri sipsip ma ta adai iri marakon amak au. Jo eme dah badeh, ta edeu koha iri udu luluwen. Ma koha iri winiyan bapwe bwe, idah kameh udu luluwen labai.
JOH 10:11 “Jo le badeh, jo ndramak mwasin handru ta atondrok iri sipsip. Iy ndramak mwasin ta atondrok sipsip badeh, iy winiyan banoh ta imek ta iri sipsip tan bwe.
JOH 10:12 Iy ndramak ibo gok ta akohok ndramas le, iy ndramak doh iy ta atondrok iri sipsip bwe, ma iri sipsip doh, tan bwe. Buku iy anyolom mwi badu lokei sakaliye eme ta aimon iri sipsip, iy kameh inoh, ma iy ruwani iri sipsip areu, iy kameh atobwak iu. Mwi eme ini iri, ma iri kameh atalan laleyah.
JOH 10:13 Iy ndramak nane atobwak iu, tasah iy ta akohok le ndramas ta gok, iy ari ndramak handru ta tanan ta atondrok iri sipsip bwe.
JOH 10:14 “Jo ndramak ari mwasin labai ta atondrok iri sipsip, jo tanan iri sipsip tek amwenen, ma iri sipsip tek amwenen tanan jo.
JOH 10:15 I buku tama, iy tanan jo ma jo ale tanan iy, ma jo winiyan banoh ta imek ta iri sipsip tek bwe.
JOH 10:16 Iri sipsip tek rayah badeh, bado bolo kowah bwe. Gok tek ta akohok iri kame hamon bolo kowah ale. Iri ale katana iri bohok, ma iri kameh ala le rakou, ma ndramak ari le atondrok iri mara-ei.
JOH 10:17 “Katin ta tama aso-ok jo badeh, ta jo atehei ndrinek labai, ma jo banoh ta imek tiri sipsip tek bwe. Ano kameh jo andrei kohak eme hamon ja.
JOH 10:18 Ari ndramak winiyan bandrei kohak ba-au bwe. Na tanan ma budon tek le amwenen jo edeu kohak iu. Boto-on ta adeu ma boto-on ta akohok eme hamon badeh, tek amwenen. Sahou batanau dah jo akohok badu mine tama amwenen.”
JOH 10:19 Sahou nane doh eme ma bwidi ndrokowa iri Juwis udu aliy, ma apwai iri a la-uh.
JOH 10:20 Iri solo-an asehek anya, “Iy badeh, malawin ndra-in udu bwele-en ma iy lolo-ou. Buku sah? Taha sanuhun iy!”
JOH 10:21 Iri lau rayah anya, “Sahou doh bala buku iy ndramak, balik bado bwele-en bo-oh! I buku balik udu bwele-en, iy winiyan babwidi mada ndramak kaseu, basak bwe.”
JOH 10:22 Len ta nyamon tinan anya kasahan Jerusalem ta abudon len nane iri atah asiu tinan ta Kindrei. Idoh udu bolo len ta kon nyala-an asahan ale.
JOH 10:23 Na len doh badeh, Jises edek in bolo asiu tinan ta Kindrei bahandra beleheleh ta Solomon, iri amekes na bek.
JOH 10:24 Iri Juwis ame turuki iy ales udu le alih tiri marakon, eme ma iri ndremenya iy, “Len sabe handru kameh ahi kabe-en ou? Buku ou Mesaya handru, ahi aso-ok ou asehek amwenen keme tahi na le dan!”
JOH 10:25 Jises eme asehek i tiri, “Jo ndrasehek ndrawek taha, arile aha batehei budon taha bala ta sahou tek bwe. Iri lahou tinan jo amekes na boto-on ta nyara tama badeh, ta aha katanan jo,
JOH 10:26 arile aha batehei budon taha bala ta aliy bwe, tasah aha sipsip tek handru bwe.
JOH 10:27 Iri sipsip tek anuhun ma iri tanan bohok. Jo tanan iri, ma iri adek an hamon tek.
JOH 10:28 Jo atehei kohak handru ili tiri, ma iri kameh winiyan bamak bwe, ma ari ndramak winiyan baruwi iri ado minek bala len bwe.
JOH 10:29 Tama amwenen, iy ndratehei iri ndrame tek, iy udu bwele-en labai tiri lakou marakon, ma ari ndramak winiyan baruwi iri ado mine tama ame len bwe.
JOH 10:30 Jo hawe tama, aru ari le.”
JOH 10:31 Sahou tan eme ma bwidi iri Juwis akohok bek anya korou iy ja.
JOH 10:32 Eme Jises asehek sahou i tiri ja i buku doh, “Jo ndraleheyani aha ta iri lahou laba tinan solo-an labai, ta tama. Ta saba lahou tinan handru, aha anya korou jo na bek?”
JOH 10:33 Iri anya, “Ahi winiyan borou ou na bek ta iri lahou tinan rayah ou amekes bwe, arile ou bobose Kindrei, tasah ou ndramak laleyah, ou aloh ou, ma ou amekes ou ja i buku Kindrei.”
JOH 10:34 Jises eme tiye sahou ili tiri anya, “Ta kandriyen malen taha, sahou ta Kindrei randra asehek i buku doh, ‘Jo Kindrei, jo asehek, aha badeh, ndra kindrei.’
JOH 10:35 Bwena mene Kindrei asehek sahou dah ili tiri lau, iy tiye tiri ta iri ndra kindrei. Aha ndranuhun, sahou udu bolo buk ndrabun ta Kindrei kameh udu le buku doh, winiyan bano bwe.
JOH 10:36 Arile jo, tama amwenen leheyani jo, ma iy suni jo eme andri kon munyak. Jo ndrasehek taha, ‘Jo Nadu Kindrei.’ Buku sah ja aha anya, jo bobose Kindrei ma jo anya kakohok ndrahunen?
JOH 10:37 Buku aha anya jo bamekes gok ta tama bwe, mwasin ta aha satehei budon taha same ta sahou tek.
JOH 10:38 Jo badeh, amekes iri gok ta tama. I buku aha batehei budon taha bame ta sahou tek bwe, mwasin, aha katehei budon taha kili le tiri lahou tinan mene jo ndramekes. Tasah, jo aso-ok aha katanan ma aha kabudon kamwenen ki buku doh: Tama badeh, i buku jo, jo i buku le tama. Aru ma la-uh badeh, ari le.”
JOH 10:39 Eme ma bwidi iri anya kateu iy, arile iy eme atobwak iri.
JOH 10:40 Jises eme edek iu ili hamon ili kapa gwa Jodan bilisiu bwena mene Jon ta alomwa inyu iri lau are aliy, ma iy udu aliy udu gwek.
JOH 10:41 Ma iri lau solo-an labai adek ame hawen. Iri ame asehek i tan, “Jon badeh, bamekes ari lahou tinan ma kalem bwe; iri sahou marakon iy asehek nyala iy ndramak doh badeh, marakon amwenen le.”
JOH 10:42 Ma udu bolo kon doh iri lau solo-an labai atehei budon tiri marakon ili le ta Jises.
JOH 11:1 Ndramak ari nyaran Lasarus iy ibo sik in andri. Iy badu Betani, kon ta Mariya uru nadu tinen Mata.
JOH 11:2 Uru ma la-uh doh, nadu tine uru nane, Lasarus, iy ibo sik in andri. Mariya mene ale asolou suluw manahun buburen ili bwele-e kati Laban, ano iy owei na lami batun.
JOH 11:3 Eme uru nadu tinen suni sahou turu ili ta Jises i buku doh, “Laban, kawas tam mene, ou ale aso-ok iy labai badeh, ibo sik in andri.”
JOH 11:4 Jises anuhun le badeh, iy eme tiye, “Sik doh ta amekes ndramak imek bwe. Bwe, idoh eme ta taha kanyolom ma taha katudun Kindrei, ta idoh le nadun kameh akohok nyaran mwasin.”
JOH 11:5 Jises aso-ok Mata uru nadu tinen ma Lasarus tinan labai.
JOH 11:6 Iy akohok sahou ta Lasarus badeh, ibo sik, arile iy eme udu kon doh udu gwek, len la-uh ja.
JOH 11:7 Ano iy eme asehek i toro lau tan, “To ka-au kala hamon ja kala Judiya.”
JOH 11:8 Oro lau tan ame asehek ili tan, “Ndramak ta leheya, na le mene badeh, iri Juwis badu loboho Judiya anya korou ou na bek, arile ou anya ala hamon ala kon doh ja?”
JOH 11:9 Jises asehek sahou i toro lau tan, “Ado sanoh. Len ari ma buruwen mandraben ili winiya beyeh, idoh luluwen labai. Are lau iy edek na len iy winiyan bataku bwe, tasah iy atou lomada len ta kon munyak.
JOH 11:10 Buku iy are edek na ben, iy kameh winiyan banyolom kon bwe, ma iy kameh taku, tasah iy lomadan ari sun bwe.”
JOH 11:11 Iy asehek sahou ano, iy eme ili tiye toro, “Kawas tato Lasarus badeh, amadin tuk le, arile jo kameh ili mete-ei iy amak eme loken ja.”
JOH 11:12 Oro lau tan asehek sahou i tan, “Laban, i buku iy ndramadin tuk, iy kameh winiyan amwenen.”
JOH 11:13 Jises asehek nyala imek tan, arile oro lau tan anya iy kede-eh asehek ta iy amadin le.
JOH 11:14 Ma iy eme asehek amwenen ili toro, “Lasarus ndramak.
JOH 11:15 Jo abudon ado labai, eme bwidi jo sekesek ta to marakon bado hawen bwe. Tasah, ado kameh atehei budon tado eme le tek. Ya, to ka-au kala katou iy.”
JOH 11:16 Ano Tomas (iri aloh iy Didimus) asehek sahou i toro lau ta Jises marakon, “Mwasin, to marakon kala Judiya, ma to kamak ka le hawen ka-au ai!”
JOH 11:17 Jises hawe oro lau tan asahan le badeh, ma iy i tanan Lasarus iri ndratehei iy ndrala munu bek len hahuw ndra-au.
JOH 11:18 Betani udu mirihik ta Jerusalem. Nyolom ta aliy i buku kilomita taloh,
JOH 11:19 ma iri Juwis badeh, solo-an labai ame hawe Mata uru Mariya ta bahabah uru ta imek ta nadu tine uru.
JOH 11:20 Mata ndranuhun, idah kameh Jises eme, iy eme edek ili ndruni iy udu ndra ndrukulu san ranah. Mariya le ari udu asiu turu udu.
JOH 11:21 Mata eme asehek i ta Jises, “Laban, buku ou ado aliy nane, nadu tine winiyan bamak bwe.
JOH 11:22 Arile, jo tanan, na idah kameh Kindrei edeu saba lakou ewek tam buku ou ndremenya iy ta aliy.”
JOH 11:23 Ano Jises asehek sahou i tan i buku doh, “Nadu tinem kameh amak eme loken ja.”
JOH 11:24 Mata anya, “Jo tanan, idah kameh iy amak ja na len hamon.”
JOH 11:25 Jises tiye i tan, “Amak udu bolo lek eme awas ja badeh, jo le ari. Iy are lau atehei budon tan mara-ei eme tek, iy imek arile kohan handru kameh udu mwasin.
JOH 11:26 Ma are lau iy bamak bwe le, iy atehei budon tan mara-ei eme tek, iy winiyan bamak bwe. Ya ou atehei budon tam in ta aliy?”
JOH 11:27 Iy tiye i tan, “Ehe Laban, jo atehei budon tek in tam, tasah ou Mesaya, ma ou Nadu Kindrei. Ou le mene, Kindrei suni ou ame andri bolo kon munyak.”
JOH 11:28 Iy asehek sahou ano le badeh, iy edek eme hamon eme luhi nadu tinen Mariya eme hawen ma iy asehek i tan, “Ndramak ta leheya ndrame, iy anya ou ala hawen.”
JOH 11:29 Mariya anuhun le badeh, iy suri iy ere loken suwi suwi, ma iy edek ili hawe Jises.
JOH 11:30 Jises bame basos bolo kon bwe le, iy udu ndra san ranah nane Mata asahan hawen.
JOH 11:31 Oro Juwis rayah ado hawe Mariya ado asiu ta tikisiy hawen. Eme oro anyolom Mariya suri iy suwi suwi ere loken, ma iy edek iu ili manan. Ano oro an hamon tan ala manan, tasah oro abudon anya, “Kora-on iy kili keden kili mada lek.”
JOH 11:32 Mariya edek ili isos ndrukulu san nane Jises udu aliy, ma iy anyolom iy, iy eme taku ili bada katin ma iy asehek sahou i ta Jises, “Laban, i buku ou ado aliy badeh, nadu tine winiyan bamak bwe.”
JOH 11:33 Jises anyolom iy eden, ma iri Juwis nane adek an hamon tan aden ale, iy anyolom iri aden eme bwidi ndrinen eden tinan labai ta tikisiy.
JOH 11:34 Iy eme lelen iri, “Aha ndratehei iy udu heh?” Iri anya, “Laban, ou ame anyolom.”
JOH 11:35 Eme ma Jises eden.
JOH 11:36 Iri Juwis asehek, “Aha kanyolom iy eden. Iy aso-ok Lasarus tinan labai!”
JOH 11:37 Arile iri rayah asehek anya, “Iy le mene adeh, sihi mada ndramak ari bwe asak. I buku sah iy winiyan basebenei iy ndramak kede-eh ja bwe?”
JOH 11:38 Jises tikisiy tinan labai, iy eme edek ili mirihik ta mada lek. Lek doh udu munu bek iri turuki madan na bek tinan.
JOH 11:39 Jises tiye i tiri, “Aha katundruwi bek udu mada lek kede-eh ki-iu kili len.” Mata nadu tine ndramak nane imek asehek sahou i buku doh, “Laban, manahun ndrala, iy udu bolo lek badeh len hahuw ai.”
JOH 11:40 Ano Jises asehek sahou i tan i buku doh, “Jo nane ndrasehek tam eh, i buku ou atehei budon tam mara-ei eme tek eh, idah kameh ou winiyan anyolom boto-on ta Kindrei.”
JOH 11:41 Iri ame tundruwi bek udu mada lek nane ili len. Ano Jises anyolom ili kandrah, ma iy asehek sahou, “Tama jo edeu wurah i tam ta ou anuhun jo.
JOH 11:42 Jo ndratanan len marakon ou anuhun jo, arile jo asehek sahou dah ta lau badih ma mwan ales ado hawek kada-ah, ta iri kameh katehei budon tiri kewek tam, tasah ou suni jo eme.”
JOH 11:43 Iy asehek ma iy aloh boto-on labai, “Lasarus ou ame manan.”
JOH 11:44 Ndramak imek nane dah edek eme manan, minen ma katin badeh, iri su-iy na kari kolau. Ma kolau ra-ei ja iri su-i madan na aliy. Jises eme asehek i tiri, “Aha kala katolowei kolau ta lek udu badan kodo-oh ki-iu, ma iy kedek.”
JOH 11:45 Iri Juwis solo-an an hamon ame ta atou Mariya, ma iri anyolom saba lakou Jises amekes, ma iri atehei budon tiri marakon i tan.
JOH 11:46 Arile iri rayah ala hamon asehek i tiri Parasi ta saba lakou nane Jises amekes.
JOH 11:47 Eme iri lau tinan tiri pris ma iri Parasi luhi iri kansol ame atukum ma asehek i tiri. Iri ndremenya iri i buku doh, “Taha kamekes kili buku sah handru? Iy ndramak kede-eh amekes iri lahou tinan ma kalem solo-an labai.
JOH 11:48 I buku taha bamekes ari lakou bwe, idah kameh iri lau marakon atehei budon tiri, ma iri an hamon tan. Ano, iri lau ta bahun badu Rom ame kameh tohowei asiu tinan ta Kindrei tataha iu, ma andrei iri lau tataha marakon au.”
JOH 11:49 Ano ndramak tiri ari nyaran Kayapas, iy in bwena tiri pris na le jaha doh. Iy asehek bohon a tinan i loken, “Aha kede-eh tana aha se lakou bwe!
JOH 11:50 Aha babudon se bwai? Mwasin ta ndramak ari le, iy kimek ta saluwe lau marakon. Ndra-in ta lau marakon amak laleyah.”
JOH 11:51 Iy basehek sahou na budon tan amwenen bwe, iy asahan kabin tiri pris na jaha nane doh, iy eme amekes sahou i buku propet ta adi Jises kimek ta saluwe lau marakon badu Juwis;
JOH 11:52 ma iy imek kameh tiri Juwis le bwe, iy imek ta atukum nadu Kindrei iri mene ndratalan, kame hamon ka le se.
JOH 11:53 Ma udu ndra bada len doh ili badeh, iri amekes sa-oh ta adai iy.
JOH 11:54 Eme ma Jises badek bala bame hawe iri Juwis ja bwai. Iy ruwani kon nane iy udu aliy, iy edek iu ili kon ari doh mirihik ta kon lomale an, ili loboho kon ari iri aloh Iparayim, ma iy manyah udu hawe oro lau tan ado kon doh udu gwek.
JOH 11:55 Len ndrabun iri aloh Pasoba ma nyamon tinan ta jabi ramen yis bolon bwe tiri Juwis anya kasahan, eme iri lau solo-an badu loboho doh adek au ala le loken Jerusalem, ta sikine ndraka-an udu tiri iu, ano iri baramekes Pasoba.
JOH 11:56 Iri badeh, asilah Jises, iri ales ado bolo kowah ta asiu tinan ta Kindrei, iri ndremenya iri ari, ari i buku doh, “Saba budon taha handru? Sebwe iy winiyan bame ta nyamon tinan dah bwe nadeh?”
JOH 11:57 Iri lau tinan tiri pris ma iri Parasi ndratehei sahou ndrado aliy, i buku are lau tanan Jises udu heh handru, iy keme katiye tiri ma iri kala katawi iy.
JOH 12:1 Len ma onoh kahis le ta len ndrabun iri aloh Pasoba anya kasahan, Jises eme edek ili asahan Betani, kon ta Lasarus, iy ale mene imek arile Jises mete-ei iy amak ja.
JOH 12:2 Oro ame amekes nadu nyamon sese na Jises. Mata akohok nan nyamon, Lasarus ale manyah udu hawe iri lau nane aimon nyamon hawe Jises.
JOH 12:3 Ano Mariya andrei bwisi ndrau ari, suluw irek udu bolon. Suluw doh iri amekes na kandro kei aloh nat. Manahun ma sowan badeh, tinan labai. Iy eme asolou ili kati Jises, ano iy owei abosar na lami batun. Ma manahu bubure suluw nane doh tuhi bolo asiu mara-ei.
JOH 12:4 Lau tan ari nyaran Judas Iskariyot, iy hamon kameh iy leheyani Jises ili mine iri lau ndra-in, iy asehek i buku doh,
JOH 12:5 “Adeh! Tasah handru iy badih kede-eh amekes i buku doh? Ndrelekei doh nane katehei kili mada ba-en, ya winiyan asahan i luk denariyus ma tonek (300), eme ya kanyohan ki tiri lau lakou bwe.”
JOH 12:6 Iy asehek sahou doh, arile iy babudon ta iri lau nane tiri lakou bwe. Tasah iy ndramak ari ta bahana, iy ta atondrok kohoya luk toro ale; iy akohok ta aseben iy amwenen ta saba lakou iy atehei udu bolo kohei doh.
JOH 12:7 Jises asehek anya, “Iy kudu gwek, mwasin ta iy katawiy kudu winiya le len iri adeu jo anya kili bolo lek.
JOH 12:8 Iri lau tiri lakou bwe kameh len mari ado hawe ado, arile jo kameh winiyan bado hawe ado len mari bwe.”
JOH 12:9 Iri Juwis marakon ndratanan Jises ndrame ndrado Betani, iri ame ta atou iy le bwe, iri ame ta anyolom Lasarus ale, iy mene Jises mete-ei iy udu bolo lek tan amak eme awas ja.
JOH 12:10 Eme iri lau tinan tiri pris amekes sa-oh ta adi Lasarus ale.
JOH 12:11 Ta amak tan le badeh, bwidi iri Juwis ala le ta Jises ma iri atehei budon tiri mari ili le tan.
JOH 12:12 Kon aleu asahan len ari ja, iri lau solo-an labai ndrame ta Pasoba ma nyamon tinan, iri ndranuhun Jises badeh, ndradek ndrame Jerusalem.
JOH 12:13 Iri ame andrei la-u badou udu mine iri ma aloh ta sekesek i ta Jises i buku doh, “Hosana! Kasekesek iy! Kasore nyaran! Iy badeh, eme ta nyara Laban!” “Kasore kabin badu Isra-el!”
JOH 12:14 Jises eme ili ndruni donki ari ma iy sandroh ili manyah udu bwele-en, i buku le iri sahou ta Kindrei ndrasehek udu bolo buk ndrabun:
JOH 12:15 “Aha lau badu Sayon, aha sanoh. ‘Aha kanyolom, kabin taha eme ai. Iy eme, iy manyah udu bwele-e donki ari ndramak bamanyah ba-en bwele-en bwena bwe.’”
JOH 12:16 Ma bwena handru oro lau tan bala tanan ta saba lakou handru, nane iy amekes, bwe. Udu hamon ja ta Jises iu ili hamon ili kandrah, eme oro barabudon iri sahou marakon nane udu bolo buk ndrabun asehek ili badan, ma iri lakou rayah doh oro ndramekes ndrala tan ale.
JOH 12:17 Iri lau marakon ado hawe Jises ndranyolom iy mene aloh Lasarus udu bolo lek tan eme len, ma mete-ei iy nane imek, amak ja. Iri ame, tiyani sahou ili bolo kon mara-ei.
JOH 12:18 Eme ma lau solo-an labai ala ta anyolom iy, tasah iri ndranuhun iy mene amekes kalem.
JOH 12:19 Eme iri Parasi asehek sahou ndrokowa iri, “Taha kanyolom, budon tataha nane basahan bamwenen bwai. Tasah, lau marakon badu kon munyak ndra-en hamon tan!”
JOH 12:20 Oro Grik rayah ado bolo iri nane ala ta salom ta nyamon tinan doh ale.
JOH 12:21 Oro ala hawe Pilip, iy badu kon Betsaida udu loboho Galili, oro ame tiye iy, “Ndramak tinan, aso anya katou Jises.”
JOH 12:22 Pilip eme tiye Enduru, oro adek ala. Eme uru ala tiye Jises.
JOH 12:23 Jises eme tiye toro, “Len dah ndrasahan ta Nadu Ndramak Awas kameh akohok lomadan.
JOH 12:24 Jo tiye tado handru, i buku badu kalom ari bataku bala bwele-e munyak bwe, ma iy bamak bwe, badun ari le udu. Arile, i buku iy imek, idah kameh iy asahan ma iy ato-ou salin solo-an labai.
JOH 12:25 Iy are lau iy atehei budon ma kohan amwenen in ta munyak dah tinan labai, kohan kameh ano laleyah. Arile, buku are lau iy batehei budon ma kohan amwenen ba-en ta munyak dah bwe, kohan kameh winiyan bano bwe, kameh udu le buku doh.
JOH 12:26 Are lau iy anya kamekes gok tek, iy badeh, ki-in le hamon tek, eme ma kon heh jo udu aliy, iy kameh udu hawek ale. Buku are lau iy amekes lahou tek, tama kameh atehei lomadan tinan ili tan.”
JOH 12:27 Jises asehek sahou ja i buku doh, “Len dah jo tikisiy handru labai, ya jo kasehek saba lakou? Jo katiye anya, tama, ou winiyan sebenei jo na bolo len dah deh? Ndri-iy ai, tasah jo eme dah ta ili bolo iri sisi-in.
JOH 12:28 Tama, ou bwidi nyara lomadam kili tinan.” Jises asehek sahou ano le badeh, boho ndramak ari asehek sahou udu bolo kandrah eme andri i buku doh, “Jo ndrabwidi nyara lomadak ndra tinan ndrano. Idah kameh jo kamekes ja.”
JOH 12:29 Iri lau solo-an nane ales ale ado mirihik, anuhun boho ndramak doh. Eme iri lau rayah anya, “Idoh kuruh.” Iri lau rayah ja anya, “Idoh angelo asehek sahou i tan.”
JOH 12:30 Arile Jises eme tiye i tiri, “Sahou nane ta aseben jo bwe, sahou ta aseben aha amwenen.
JOH 12:31 Na len idah kameh Kindrei atehei lau marakon badu kon munyak a ta sahou; na idah kameh iy tikahei kabin badu kon munyak dah iu.
JOH 12:32 Na idah jo udu kon munyak, arile hamon kameh iri tutuni jo ere loken, ma jo kameh aruwi iri lau marakon ame le hawek.” (
JOH 12:33 Iy asehek sahou doh ta leheya san, ta iy kameh imek i buku sah handru.)
JOH 12:34 Iri lau marakon tiye, “Ahi ndranuhun udu ndra bada kandriyen malen ta Moses mene edeu, ‘Mesaya kameh winiyan bamak bwe, iy kameh udu le buku doh.’ I buku sah handru ou asehek anya, ‘Nadu Ndramak Awas kameh iri tutuni iy ili loken bada kei tondreh’? Nadu Ndramak Awas–Iy are lau handru?”
JOH 12:35 Ano Jises tiye i toro, “Aha kameh lomada sun udu hawe aha luluwen sese. Aha kadek ma sun, tasah iy udu ndra hawe aha kahis. Kora-on lulik katubuluhi aha. Are lau iy edek bolo lulik, iy bala tanan ta iy ilih heh handru.
JOH 12:36 Aha katehei budon taha marakon kili le ta lomada sun, buku iy udu ndra hawe aha, ma aha kameh asahan nadu lomada sun.” Jises asehek iri sahou doh ano le, iy ruwani iri ado, iy iu aton ta mada iri lau.
JOH 12:37 Iri lau marakon nane doh anyolom Jises amekes iri kalem solo-an labai, arile iri ari batehei se budon tiri bala tan bwai.
JOH 12:38 Eme ma sahou ta propet Aisaya mene asehek, eme asahan handru: “Laban, are lau handru atehei budon tan in ta sahou tam aso ndrasehek? Ya are lau handru ndranyolom ou amekes iri lahou tinan?”
JOH 12:39 Iri winiyan batehei budon tiri bala ta Jises bwe, tasah propet Aisaya ndrasehek:
JOH 12:40 “Kindrei ndrabwidi mada iri ndralik, ma iy ndrawahei budon tiri, eme ma iri winiyan banyolom, ma winiyan bala tanan ta kati iri lakou mwasin Kindrei amekes bwe. Kindrei anya, ‘Iri kameh winiyan bame hawek ja bwai, ta bwidi iri kamwenen ja.’”
JOH 12:41 Propet Aisaya asehek ta aliy, tasah iy ndranyolom lomada Jises eme ma iy asehek iy.
JOH 12:42 Handru, iri tinan tiri Juwis solo-an atehei budon tiri ili tan. Arile iri anoh iri Parasi, ma iri basehek budon tiri bame len bwe. Iri abudon, kora-on iri katikahei iri kame len ta asiu ta atukum tiri Juwis.
JOH 12:43 Iri babudon ta iri lakou nane Kindrei aso-ok bwe, iri badeh, aso-ok iri lau ta atudun nyara iri le.
JOH 12:44 Jises asehek sahou bohon i tinan, “Buku ari ndramak iy atehei budon tan in tek, badeh, ba-en tek le bwe, badeh, in ta are lau nane iy suni jo eme dah.
JOH 12:45 Buku are lau iy anyolom jo, badeh, iy anyolom are lau iy nane suni jo eme dah ale.
JOH 12:46 Jo ndrame andri bolo kon munyak i buku lomada sun, ta iy are lau atehei budon tan eme tek, iy kameh winiyan ba-en bolo lulik bwe.
JOH 12:47 “I buku iy are lau iy anuhun sahou tek, arile iy ba-en hamon ta aliy bwe, jo winiyan badeu maha-an bala bwele-en bwe. Jo bame ta edeu maha-an ili ta lau marakon badu kon munyak bwe; jo eme dah ta aseben iri.
JOH 12:48 Maha-an udu aliy ta are lau iy atehei konan eme tek, ma iy baso-ok sahou tek bwe, sahou le nane jo ndrasehek kameh edeu maha-an i tan na len hamon.
JOH 12:49 Idoh handru, tasah jo basehek iri sahou dah na budon tek amwenen bwe. Iri budon dah ta tama, iy nane suni jo eme. Iy tiye jo ta iri lakou ta asehek ma iri lakou ta leheya.
JOH 12:50 Jo tanan iri sahou batanau tan badeh, kohan handru udu aliy winiyan bano bwe, kameh ta udu le buku doh. Iri lakou jo asehek badeh, i buku le tama asehek eme tek.”
JOH 13:1 Len ndrabun iri aloh Pasoba ma hawe nyamon tinan ndrame mirihik. Jises ndratanan, udu bolo len doh eme kameh iy ruwani kon munyak ta iy iu ili loken hawe taman. Iy aso-ok iri lau tan marakon ado bolo kon munyak tinan labai, ili winiya le iy imek.
JOH 13:2 Oro manyah aimon nyamon ta beyeh, balik ndratehei budon boto-on labai ndrala ndrine Judas Iskariyot nadu Saimon, ta iy kameh edeu sa-oh ta Jises.
JOH 13:3 Jises tanan taman badeh, ndratehei iri boto-on marakon ndrala bahandra tondrok tan, iy udu hawe Kindrei eme, ano iy kameh iu ili loken hawen ja.
JOH 13:4 Eme ma iy aimon nyamon hawe oro, ano iy suri iy ere loken, iy asini awin badu bwele-en le iu, ma iy andrei kolau ra-ei eme iy tabuwiy i ndrukulun.
JOH 13:5 Ano ja iy solowei gwa ili bolo bwisi sabok ma iy sikine kati oro lau tan, ano iy owei kati oro lau tan abosar na kolau nane iy tabuwiy udu ndrukulun.
JOH 13:6 Iy eme isos hawe Saimon Pita, Saimon Pita eme asehek sahou i buku doh i tan, “Laban, ou anya sikine katik?”
JOH 13:7 Jises asumon sahou ta Pita i buku doh, “Ou bala tanam ta saba lakou jo amekes dah bwe, arile hamon kameh ou barala tanam baramwenen.”
JOH 13:8 Pita anya, “Jo bwalek, ou winiyan basikine katik bwe!” Jises eme asehek sahou i tan ja, “I buku jo basikine katim bwe eh, ou kameh winiya bado hawek bwai.”
JOH 13:9 Saimon Pita anuhun sahou ta Jises nane doh, ma manin atur labai. Eme ma iy asehek sahou i tan ja, “Laban, anya i buku baden eh! Ndri-iy ai, ou sasikine le katik, ou sikine minek ma la-uh ma batuk ale.”
JOH 13:10 Jises anya, “Are lau ndranyu mara-ei, iy winiyan banyu ja bwai, idah kameh kasikine le katin. Bada ado ndra bele, arile jo basehek bada ado marakon bwe.”
JOH 13:11 Iy ndratanan are lau handru kameh edeu sa-oh tan, ta idoh le ma iy eme asehek, “Bada ado ndra bele, arile jo basehek bada ado marakon bwe.”
JOH 13:12 Iy sikine kati oro lau tan ano, iy eme atehei awin tan ili la-un ja, ma iy edek ili hamon manyah ili ndrahunen ja. Iy eme lelen oro lau tan, “Saba lakou jo ndramekes ndrawek tado, ado ndratanan sese deh bwe?
JOH 13:13 Ado aloh jo ndramak ta leheya, ma Laban, mwasin handru ta ado aloh jo i buku doh, tasah, badeh jo amwenen.
JOH 13:14 Jo Laban ma jo ndramak ta leheya, jo nane ndrasikine kati ado. Ado satudun nyara ado, mwasin ta ado kala kasikine kati nadu tine ado iri rayah ja.
JOH 13:15 Jo leheya ado ta kandriyen mwasin, ta ado ari ari kamekes ki buku le jo nane ndramekes.
JOH 13:16 Ado kanuhun kamwenen, iri lau bonyo-ou winiya basakalawi kabin tiri bwe, ma iri salibah ale winiyan bala bwena tare lau nane tiye iy eme ta amekes gok tan bwe ale.
JOH 13:17 Idah ado ndratanan iri lakou marakon nane doh, ya Kindrei winiyan nyosowani ado i buku ado amekes iri lakou marakon doh.
JOH 13:18 “Jo winiyan basehek ado marakon bwe, jo tanan are lau jo ndrandrei, arile sahou udu bolo buk ndrabun asehek, kameh asahan handru, tiye i buku doh, ‘Ndramak nane iy aimon nyamon hawek, iy le kameh edeu sa-oh tek.’
JOH 13:19 “Lakou doh basahan bwe le, jo kasehek tado kere bwena ai, ano lakou barasahan hamon, i buku lakou doh asahan, idah kameh ma ado barabudon ai, jo iy ndramak nane iy udu le buku doh.
JOH 13:20 Ado kanuhun, jo tiye tado handru, are lau iy akohok ma aseben ndramak nane iy amekes lahou tek, idoh i buku none le iy akohok jo ma aseben jo ale. Ma are lau akohok jo, idoh i buku none le iy akohok Kindrei iy suni jo eme dah.”
JOH 13:21 Sahou tan ano le bohon badeh, ndrinen eden ta tikisiy. Iy eme asehek sahou amwenen ili toro lau tan i buku doh, “Jo asehek sahou handru ewek tado, iy ari ereu bolo ado kede-eh kameh atehei jo ili mine iri lau ndra-in.”
JOH 13:22 Oro lau tan anuhun, ma mada oro ari i ta ari, tasah oro bala tanan ta are lau handru Jises asehek.
JOH 13:23 Lau ta Jises ari manyah udu hawen, iy lau doh Jises aso-ok iy labai.
JOH 13:24 Eme Saimon Pita ndrokonya batun ili ta iy lau nane ma iy asehek, “Kandremenya iy, are lau handru ale iy asehek iy doh?”
JOH 13:25 Iy lau tan ari nane dah sosokok ili mirihik ta Jises. Iy eme atehei batun ili batalan ma suburuk i tan, “Ndramak tinan, ou tiye tek, are lau handru?”
JOH 13:26 Jises anya, “Ou anyolom, jo kameh atehei jabi ramen ili bolo suw, ano kameh jo atehei ili nan, badeh, iy le ai.” Iy eme atehei jabi ramen ili bolo suw ano iy atehei ili na Judas Iskariyot nadu Saimon.
JOH 13:27 Judas andrei jabi ramen ano le badeh, balik ndrala bolo iri budon tan mara-ei ai. Jises anya, “Judas, ou ala. Saba lakou nane ou anya amekes, ou amekes suwi.”
JOH 13:28 Oro lau tan ado bada koyeu doh, oro anuhun Jises asehek sahou ili ta Judas, arile oro bakohok bolo sahou tan bwe.
JOH 13:29 Judas badeh, ta atondrok kohei ta luk, eme oro lau rayah anya Jises kede-eh tiye iy ta asih rayah nyamon ta len ndrabun aloh Pasoba nadeh, o, iy kili kedeu rayah lakou kili tiri lau, tiri lakou bwe nadeh.
JOH 13:30 Judas ini jabi ramen ranah nane ano le badeh, iy suri iy iu ili manan, ma kon eben ai.
JOH 13:31 Iy ndra-au ndra manan ndra luluwen sese, Jises eme asehek, “Na idah kameh Nadu Ndramak Awas atudun nyaran, ma Kindrei kameh leheya lomadan i ta lohowan tan Jises.
JOH 13:32 Buku Kindrei atudun iy, se nawin bwe iy atudun uru nadun i le rasan.
JOH 13:33 “Ado naduk, jo kameh bado hawe ado luluwen bwe. Ado kameh asilah jo, arile jo asehek tado i buku jo mene ndrasehek ndrala ta tinan tiri Juwis, ta ado winiya bala kon kameh jo ilih aliy bwe.
JOH 13:34 “Na dah jo edeu kandriyen ta batanau ha-un ewek tado: Ado ari ari badeh, kaso-ok nadu tine ado iri rayah ja. I buku le jo mene aso-ok ado labai, eme ma ado kaso-ok nadu tinem iri rayah ja.
JOH 13:35 Buku ado ari ari aso-ok labai iri lau tek rayah badu hawek, idoh kameh leheyani iri lau marakon badu kon munyak, i buku ado badeh, lau tek handru.”
JOH 13:36 Ano Saimon Pita lelen Jises i buku doh, “Laban, ou kameh alih heh handru?” Jises tiye i tan ja, “Jo ili heh, ou winiyan ba-en hamon tek na dah bwe, arile ou kameh bara-en hamon tek ja na len hamon.”
JOH 13:37 Pita lelen iy ja, “Laban, i buku sah handru jo kameh winiyan bawek hawem na len dah bwe? Jo kameh atehei kohak marakon ewek le tam.”
JOH 13:38 Jises eme tiye i tan ja i buku doh, “Buku sah? Ou winiyan atehei koham marakon eme tek ta aseben jo handru deh? Ou anuhun, jo asehek sahou handru ewek tam, kakaro baden bwe le, ou kameh besebes anya, ou tanam jo bwe san tulusin.”
JOH 14:1 Jises tiye sahou ili toro lau tan, “Ado satikisiy ma ado sabudon solo-an labai. Ado katehei le budon tado mara-ei kili le ta Kindrei ma keme tek ale.
JOH 14:2 Udu bolo kon ta tama doh, iri asiu nadu bwisik solo-an labai udu aliy. Idah kameh jo ilih mwena ta lowosa iri nadu asiu nane doh taha. Buku bado aliy bwe eh, idah jo winiyan basehek iri sahou dah bwe.
JOH 14:3 I buku jo ilih bwena lowosani iri nadu asiu marakon nane doh ano, jo kameh eme hamon ja ta akohok aha ala ado hawek. Tasah jo aso-ok aha kameh ame ado hawek ado kon kameh jo udu aliy.
JOH 14:4 Aha ndratana aha ta san ta ili kon nane jo kameh ilih aliy.”
JOH 14:5 Tomas ndremenya Jises, “Ndramak tinan, ahi bala tanan ta ou alih kon heh handru, ya kili buku sah handru ahi kala tanan ta san ili kon badeh?”
JOH 14:6 Jises eme tiye sahou i ta Tomas, “Jo le ari jo san handru, ma jo kati iri sahou handru, ma kati kohan handru kameh udu le buku doh. Ari ndramak winiya bala hawe tama, bala rasan san ja bwe. Iy kameh keme badak bwena.
JOH 14:7 Na idah ado ndratanan jo ndramwenen, ma idah kameh ado atanan tama udu mwasin labai. Ehe, na idah ili, aha kameh atanan iy udu mwasin labai, ma aha ndranyolom iy.”
JOH 14:8 Pilip lelen Jises, “Ndramak tinan, ou leheya tamam keme taso, idoh le tinan udu budon taso.”
JOH 14:9 Jises tiye i tan, “Pilip, jo udu hawe ado luluwen labai, arile buku sah handru ou bala tanam jo bwe? Are lau iy ndratou jo badeh, iy ndratou tama ale. I buku sah ja ou anya jo kaleheya tama kewek tado ja?
JOH 14:10 Sebwe ou atehei budon tam handru in tek, ta jo in hawe tama, ma tama udu hawek. Iri sahou ale jo ndrasehek ndrawek tado badeh, jo basehek na budon tek amwenen bwe. Tama in hawek, eme iy le amekes iri gok tan amwenen.
JOH 14:11 Aha katehei budon taha keme tek ta sahou jo asehek anya, jo udu hawe tama, ma tama udu hawek ale. Buku sah, aha katehei budon taha kili le ta sahou jo asehek, tasah aha ndranyolom iri gok jo amekes.
JOH 14:12 Jo tiye tado handru, are lau iri atehei budon tiri marakon eme le tek, idah kameh iri amekes iri gok i buku le gok jo amekes. Ehe, ma gok iri amekes idah kameh udu mwasin labai ja ta iri gok jo ndramekes. Tasah, jo kameh ilih hawe tama.
JOH 14:13 Ma jo kameh amekes iri lakou marakon, buku aha ndremenya tama in ta nyarak. Eme ma tama kameh akohok nyaran i tinan i san ta nadun amwenen.
JOH 14:14 Ehe, buku lakou marakon aha ndremenya in ta bwele-e nyarak, idah kameh jo winiyan bwidiy ma atehei ewek taha.”
JOH 14:15 Jises eme asehek sahou ili toro lau tan, “I buku ado aso-ok jo labai, idah kameh ado ka-en hamon tiri sahou batanau tek.
JOH 14:16 Jo kameh ndremenya tama ta iy katiye seben keme ta aseben aha kabadok. Ma iy kameh udu hawe aha udu le buku doh.
JOH 14:17 Seben doh, iy Malawin Ndrabun, iy eme ta asehek sahou handru ta Kindrei. Iri lau marakon badu kon munyak winiya bandrei iy bwe, tasah iri winiyan batou iy bwe, ma iri winiya bala tanan iy bwe. Arile aha le kameh tanan iy ai. Tasah iy in hawe aha, ma iy kameh udu hawe aha, udu le buku doh.
JOH 14:18 “Buku jo iu, ado kameh winiya barah bwe. Jo kameh eme hamon eme hawe aha ja.
JOH 14:19 Mirihik ai, idah kameh iri lau badu kon munyak kameh winiya batou jo ja bwe. Arile aha le kameh atou jo ai. Jo kameh imek, ano jo amak ja. I buku le aha kameh amak, ano aha amak ame awas ja, ma koha aha kameh eme hamon ja ma udu le buku doh.
JOH 14:20 Len doh kameh asahan taha, ma aha kameh atanan ta jo badeh, in hawe tama, aha a-en hawek, ma jo in hawe aha.
JOH 14:21 Are lau iy andrei iri sahou batanau tek ma iy in hamon ta aliy, iy lau doh badeh, aso-ok jo tinan labai. Ma tama kameh aso-ok are lau nane iy aso-ok jo. Jo ale aso-ok iy, ma jo kameh leheya jo amwenen ili tan.”
JOH 14:22 Judas anya, (Idoh Judas Iskariyot bwe, iy ari ja.) “Laban, i buku sah handru ou leheya ou amwenen ame lewan mada aso? Buku sah bala mada iri lau badu kon munyak bwe?”
JOH 14:23 Jises eme tiye i ta Judas, “I buku are lau iy aso-ok jo labai, iy kameh in hamon ta leheya tek. Ma tama kameh aso-ok iy. Eme ma aru ma la-uh kameh ala manyah ado hawen ere le buku doh.
JOH 14:24 Are lau iy baso-ok jo bwe, iy lau doh, iy ba-en hamon ta iri leheya tek bwe. Iri leheya handru nane aha ndranuhun, badeh tek amwenen bwe, ta tama iy nane suni jo eme.
JOH 14:25 “Jo ndratiye tado ta iri lakou dah, mene jo udu hawe ado.
JOH 14:26 Seben badeh, Malawin Ndrabun. Tama kameh suni iy eme in ta bwele-e nyarak. Iy kameh leheya aha ta iri lakou marakon, ma amekes iri budon taha kudu tiri lakou mene jo ndrasehek ndrawek taha.
JOH 14:27 “Mondrei jo ruwani ndrado hawe ado badeh, mondrei tek amwenen. Jo badeu bala buku kon munyak edeu bwe. Aha satikisiy, aha sabudon solo-an ma aha sanoh.
JOH 14:28 Aha ndranuhun jo ndrasehek taha, ‘Jo kameh iu o, arile ano kameh jo eme hamon hawe aha ja.’ Buku aha aso-ok jo labai, aha kasekesek ta jo kameh iu ili hawe tama, tasah nyaran badeh, udu bwele-e nyarak ja.
JOH 14:29 Iri lakou marakon nane doh basahan bwe le, arile jo kasehek taha ai, ta aha kameh anyolom hamon. Ano, aha baratehei budon taha barala tan.
JOH 14:30 “Jo winiya basehek sahou luluwen hawe aha bwai, tasah ndramak ta atondrok kon munyak dah eme. Boto-on tan badeh, winiya batubuluhi boto-on tek bwe.
JOH 14:31 Arile, iri lau marakon badu kon munyak katanan, jo badeh, aso-ok tama tinan labai, tasah jo amekes iri lakou marakon badeh, iy le tiye jo ta amekes.” Ano iy tiye oro lau tan, “Ado kame, to ka-au kala rasi ja.”
JOH 15:1 Jises anya, “Jo bada kei waen handru, tama badeh, iy tama bilin handru.
JOH 15:2 Buku andrak rayah bato-ou sali iri bwe, tama eme atubwa iu. Tama eme apis la-uk rayah ndra-in iu, ta iri kato-ou sali iri kamwenen ma solo-an.
JOH 15:3 Na le iri leheya tek badeh, bwidi aha ndrasahan ha-un.
JOH 15:4 Arile ado badeh, kahis badak, jo kihis bada ado ale. Buku andra waen bahis badan tinan bwe, idah kameh iy winiyan bato-ou salin bwe. Idoh i buku ado bahis badak bwe, ado kameh winiyan bato-ou sali ado bwe.”
JOH 15:5 Jises anya, “Jo bada kei waen handru, ado badeh, andran. Are lau iy ihis badak ma jo ihis badan, idah kameh iy ato-ou salin solo-an labai. Ado winiya bamekes ari lakou bwe, buku ado bahis badak bwe.
JOH 15:6 Are lau iri bahis badak bwe ma bato-ou sali iri bwe, idah kameh akahei iri au. Ma iri kameh asara, ano tukumwi mari i le se, ano iri akahei mara-ei ili bolo jih ta andrakak iu.
JOH 15:7 “Buku aha ahis hawek ma aha tawi iri sahou tek udu ndrine aha ihis, aha winiyan ndremenya jo ta iri saba lakou aha aso-ok. Jo kameh winiyan atehei ewek taha.
JOH 15:8 Tama akohok lomadan tinan labai, ta aha ato-ou buwa kei solo-an labai. I san le doh bwidi aha asahan iri lau tek handru.
JOH 15:9 “Jo aso-ok aha tinan labai, i buku le tama aso-ok jo. Aha ahis ado bolo so-ok tek tinan labai.
JOH 15:10 Buku aha a-en hamon ta sahou batanau tek eh, aha kameh ahis ado ta bolo so-ok tek, i buku le jo ndra-en hamon ta iri sahou batanau mara-ei ta tama, ma jo ihis udu bolo so-ok tan.
JOH 15:11 Jo ndrasehek tado ta lakou marakon doh, ta iri sekesek tek kudu taha, ma kidih bolo oda aha.
JOH 15:12 Sahou batanau tek i buku doh: Aha kaso-ok nadu tine aha ari, ari i buku le jo aso-ok aha labai.
JOH 15:13 I buku ari ndramak iy anya kaleheya so-ok tan tinan labai kili tiri kawas tan, badeh, iy katehei iy mara-ei amwenen kili, iy kimek ta aseben iri. Kandriyen ari le doh udu bwele-e iri kandriyen mari.
JOH 15:14 Aha marakon badeh, ndra kawas tek le ai, i buku aha an hamon ta iri sahou mene jo ndrasehek taha.
JOH 15:15 Jo winiyan baloh aha bonyo-ou ja bwai, tasah iri bonyo-ou bala tana iri ta saba lakou handru iri kabin amekes bwe. Akohok kon ta bonyo-ou eme jo aloh aha kawas tek le, tasah jo ndrasihidiy ndrawek taha iri lakou marakon mene jo anuhun eme ta tama.
JOH 15:16 “Ado basolo-ei jo bwe, jo le amwenen andrei ado, ma jo atehei ado ala ta ato-ou buwa kei solo-an, ma sali iri kameh kudu luluwen. Eme ma buku aha asolom i ta tama, ma aha ndremenya iy in ta nyarak ta saba lakou aha aso-ok, tama winiyan atehei ewek taha.
JOH 15:17 Eme ma jo kabatanau aha buku doh: Aha kaso-ok nadu tine aha iri ari ja.
JOH 15:18 “Ado samaliye, i buku iri lau badu kon munyak baso-ok ado bwe, ado ndratanan, iri ma bwena mene amekes eme tek ale.
JOH 15:19 Buku aha badu kon munyak handru, idah kameh lau badu kon munyak aso-ok aha labai, i buku aha badu hawen handru. Arile, jo akohok aha badu kon munyak dah, eme aha badu aliy bwe. Ta idoh le, bwidiy, ma kon munyak baso-ok aha bwe.
JOH 15:20 “Aha samani iri sahou mene jo ndrasehek ndrawek taha: ‘Iri lau bonyo-ou winiya basakalawi kabin tiri bwe.’ I buku iri lau adai jo, iri kameh adai aha ale; buku iri an hamon tiri leheya tek, iri kameh an hamon ta leheya taha ale.
JOH 15:21 Arile, iri kameh winiyan amekes iri saba lakou ndra-in ewek taha, tasah aha lau tek, ma iri bala tanan ta are lau handru nane suni jo eme dah bwe.
JOH 15:22 “Iri winiyan batona kandriyen ndra-in tiri bwe, buku jo bame basehek tiri bwe. Arile, na dah, jo asehek iri lakou ili tiri, eme ma iri ari madasan ta tone ndra-in tiri bwai.
JOH 15:23 Are lau bwalen jo, iy bwalen tama ale.
JOH 15:24 Iri winiyan batona kandriyen ndra-in tiri bwe, buku jo bamekes lakou bado ndrokowa iri bwe. Arile, na dah, jo amekes iri lakou ale, ari ndramak bamekes se bwe. Iri ndranyolom saba lakou jo amekes, eme ma iri baso-ok aru tama ja bwe.
JOH 15:25 Kandriyen nane iri amekes eme asahan, ta sahou ndratorowenei udu bolo kandriyen malen tiri kameh asahan handru. Sahou i buku doh, ‘Iri baso-ok jo bwe, idoh ari katin bwe.’
JOH 15:26 “Seben kameh eme. Malawin Ndrabun iy eme ta nyowonya iri sahou handru ta nyala Kindrei. Iy badeh, udu hawe tama eme. Iy badu hawe tama, arile jo kameh suni iy amwenen ewek hawe aha. Ma iy kameh asehek taha ta nyala iri gok nane jo amekes ma hawe iri kandriyen tek.
JOH 15:27 Eme ma aha ale kameh asehek jo, tasah aha ado hawek ndra bwena labai, eme asahan nane dah.
JOH 16:1 “Jo mene ndrasehek ndrawek taha, ta aha sataku ma aha samani iri budon taha udu tek.
JOH 16:2 Iri kameh tikahei aha au ala manan ta asiu ta atukum tiri Juwis. Ano ma len asahan ta are lau iy idi aha amak, abudon anya, iri amekes gok doh ta atudun nyara Kindrei.
JOH 16:3 Iri lau kameh amekes kandriyen i buku doh ewek taha, tasah iri bala tanan aru tama bwe.
JOH 16:4 Arile jo ndrasehek iri sahou dah ndrawek taha, i buku len asahan ta iri anya kamekes iri lakou nane doh, eme aha kameh abudon ja, ta sahou jo mene ndrasihidiy ndrawek taha. “Jo ma bwena mene udu hawe aha, arile jo basehek iri lakou marakon nane dah bawek taha bwe.
JOH 16:5 Arile na dah kameh jo ilih hawe tama, iy nane suni jo eme dah. Arile, ado ari bandremenya, ta jo ili heh bwe le.
JOH 16:6 Na dah jo ndrasehek taha, ma ndrine aha irek ta tikisiy.
JOH 16:7 Arile, jo asehek tado handru: Mwasin tado ja badeh, ta jo ki-iu. Tasah, i buku jo ba-au bwe, seben kameh winiyan bame tado bwe. Arile, buku jo iu, idah kameh jo suni iy eme hawe aha.
JOH 16:8 Len iy eme, iy kameh leheya ndra-in tiri lau badu kon munyak eme lewan, i buku iri ndrandra-i ta amekes kandriyen ndra-in, ma ta nyala lakou mwasin, ma nyala len ta sahou ta Kindrei.
JOH 16:9 Iri ndrandra-i labai ta kandriyen ndra-in, tasah iri batehei budon tiri mara-ei bame tek bwe.
JOH 16:10 Iri ndrandra-i ta lakou mwasin, tasah jo ilih hawe tama, ma aha winiyan batou badak ja bwe.
JOH 16:11 Iri ndrandra-i ta len ta sahou ta Kindrei, tasah Kindrei ndratehei maha-an ndrala bwele-e kabin badu kon munyak.
JOH 16:12 “Sahou tek solo-an labai ta asehek ewek taha, arile na dah kameh aha winiyan bakohok bolo iri sahou tek bala mwasin bwe.
JOH 16:13 Arile Malawin Mwasin ta sahou handru eme, iy asehek lakou handru ta nyala Kindrei. Iy kameh in bwena ta leheya aha ala bolo iri lakou handru. Iy winiyan badeu tanan tan amwenen bwe, iy kameh tiye taha ta lakou iy ndranuhun, ma asehek taha ta nyala lakou asahan hamon.
JOH 16:14 Iy kameh edeu lomadan eme tek, tasah iy kameh andrei lakou jo asehek ma tiye ndrawek taha.
JOH 16:15 Iri lakou ta tama marakon badeh, tek. Eme ma jo tiye ili ta Malawin Mwasin kameh kandrei lakou jo edeu i tan, ma iy kasihidiy kewek taha.
JOH 16:16 “Se luwen bwe, aha kameh banyolom jo ja bwe. Ano sese luwen bwe ja, aha kameh anyolom jo ja.”
JOH 16:17 Oro lau tan nunu-uh oro le, “Moso sahou tan iy asehek i buku sah handru, ‘Se luwen bwe, aha kameh banyolom jo ja bwe, ano sese luwen bwe ja, aha kameh anyolom jo ja’? Ya saba moson handru iy asehek, ma iy tiye ale, ‘Idoh, tasah jo iu ili hawe tama?’
JOH 16:18 Moso sahou iy asehek, ‘Se luluwen bwe,’ i buku sah handru? Ahi bandrei se bolo sahou tan bwe.”
JOH 16:19 Jises ndratanan, oro lau tan anya kandremenya iy, eme ma iy asehek ili toro, “Jo nane asehek, ‘Se luwen bwe, aha kameh banyolom jo ja bwe. Ano sese luwen bwe ja, aha kameh anyolom jo ja.’ Idoh, sahou nane ado anya kasehek ta aliy ai?
JOH 16:20 Jo asehek tado handru. Aha marakon kameh aden i tinan, ma aha kameh tikisiy tinan labai, arile iri lau badu kon munyak kameh sekesek; ado kameh tikisiy, arile tikisiy tado kameh asahan ili ta sekesek ja.
JOH 16:21 “Jo anya kasehek sahou sokek ari ki tado: Badih anya kedeu nadun, iy tikisiy labai, tasah len tan ta akohok sisi-in ndrasahan. Arile, iy ndratehei nadun ndrame len, ma iy ndramani iri sisi-in tan nane doh. Iy sekesek, tasah iy ndratehei nadun ndrame len bolo kon munyak.
JOH 16:22 Idoh i buku le ado are ta tikisiy na dah, arile jo kameh anyolom ado ja, ma ndrine ado kameh idih ta sekesek. Iri sekesek doh, ari ndramak winiyan bandrei udu ndrine ado ba-au bwe.
JOH 16:23 Buku len doh asahan, ado kameh bandremenya jo ta saba lakou ja bwai. Jo tiye tado handru. Tama kameh edeu tado iri saba lakou ado aso-ok, buku ado ndremenya iy in ta bwele-e nyarak.
JOH 16:24 Ndra bwena eme asahan nane dah, ado bandremenya tama ta saba lakou ado aso-ok in ta bwele-e nyarak bwe le. Ado kandremenya, idah kameh ado andrei, ma ndrine ado kameh idih labai ta kandriyen ta sekesek udu le buku doh.
JOH 16:25 “Jo badeh, amekes sahou sokek ewek tado. Arile, hamon kameh jo winiyan basehek sahou sokek bawek tado ja bwe, jo kameh asehek sahou amwenen ta tama ewek tado.
JOH 16:26 Buku len doh asahan, ado kameh winiya asolom amwenen i tan in ta bwele-e nyarak, ma jo kameh winiyan bala bwena ta ndremenya iy ja bwai.
JOH 16:27 Tama badeh, aso-ok ado labai. Iy aso-ok ado, tasah ado aso-ok jo labai, ma ado atehei budon tado handru ere tek, ta jo udu hawe Kindrei eme andri.
JOH 16:28 Jo udu hawe tama eme andri kon munyak, ano kameh jo ruwani kon munyak, ma jo iu ili hawe tama.”
JOH 16:29 Ano oro lau tan tiye i buku doh, “Na nane le dah ou barasehek baramwenen ai, ou basehek sahou sokek ja bwe.
JOH 16:30 Aso ndratanan ndramwenen ai, idah ou ndratanam lakou marakon. Iri lau winiya bandremenya ou ja bwe, tasah ou ndratanam budon tiri bwena. Idoh le, bwidi budon ma nyolom taso handru ihis tam, ta ou ado hawe Kindrei ame.”
JOH 16:31 Jises eme tiye ili toro ja, “Na dah budon tado barahis ai?
JOH 16:32 Len nane ndrasahan, ma eme udu kada-ah, buku ado marakon anya katalan, iy ari ari ili ndrahunen amwenen, ya jo le ari kameh erah. Arile jo le ari barah bwe, tasah tama udu hawek ale.
JOH 16:33 Jo mene ndrasehek tado ta mondrei kudu hawe ado. Kati mondrei doh ta ado kahis hawek. Lau badu kon munyak kameh amekes iri maha-an ma tikisiy ewek tado. Arile ado kabadok! Tasah jo ndratisi boto-on ta kon munyak ndra-au ndrala bahandra katik.”
JOH 17:1 Jises asehek sahou dah ano, iy eme anyolom ili loken ili kandrah, ma iy asolom i buku doh, “Tama, len ndrasahan ai. Ou atehei lomadam keme ta nadum, ma nadum ale kameh edeu lomadan ewek tam.
JOH 17:2 Tasah ou ndratehei boto-on tam ndrame tek ta atondrok iri lau marakon, ma jo kameh edeu kohak udu luluwen ili toro lau nane oro atehei budon toro in tek.
JOH 17:3 Kohan handru udu luluwen kameh udu le buku doh. Moson ta aliy i buku doh: Oro katanan ou, ou le ari Kindrei handru, ma oro katanan Jises Krais, iy nane, ou suni iy eme.
JOH 17:4 Jo ndraleheyani lomadam ndrala tiri lau badu kon munyak. Iri gok marakon nane ou tiye jo ta amekes badeh, jo ndrabwidi marakon ndrano.
JOH 17:5 Tama, kon munyak basahan bwe le, jo ndra bwena udu hawem, ma lomadam udu hawek. Na dah, jo aso-ok lomadam le mene keme tek ja.
JOH 17:6 “Jo ndrasehek ou ndrala toro lau tam. Oro lau tam bwena, arile ou andrei oro ado kon munyak ame len, ame are bahandrak. Ma oro a-en hamon tiri sahou tam marakon.
JOH 17:7 Ya na dah, oro ndratanan, iri lakou marakon ou adeu eme tek, badu minem eme.
JOH 17:8 Jo ndratiye toro ta sahou mene ou asehek tek, ma bwidi oro sekesek. Oro ndratanan jo udu hawem eme, ma oro atehei budon toro ewek tam ta ou le suni jo eme.
JOH 17:9 “Jo asolom oro, jo basolom ta iri lau marakon badu kon munyak bwe. Jo asolom toro le lau mene ou atehei oro ame are bahandra tondrok tek, tasah oro lau tam.
JOH 17:10 Oro lau tek, oro lau tam; oro tam, oro tek ale. Iri lau atou oro lau tek nane, ma iri anyolom lomadak handru udu toro.
JOH 17:11 Eme na len dah kameh jo anya kewek hawem ai. Jo winiyan bado kon munyak ja bwai, arile oro kameh are ndra kon munyak areu. Tama, ou ndrabun labai! Ou tondrokei oro kudu mwasin bahandra boto-on ta nyaram, nyaram mene ou tondrohon jo. Ma idah kameh oro asahan ari, i buku le talu.
JOH 17:12 Len jo udu ndra hawe oro, jo atondrok oro udu mwasin labai, are bahandra boto-on ta nyaram, ou mene tondrohon jo. Jo turuki oro na aliy, eme oro mari are mwasin. Iy ari le toro kameh amai iu mara-ei. Idah kameh iri sahou marakon udu bolo buk ndrabun asahan eme lewan handru.
JOH 17:13 Na len dah jo ewek hawem, arile jo udu ndra kon munyak kahis, jo asehek iri lakou dah ili toro, ta sekesek tek tinan kirek ndrine oro.
JOH 17:14 “Jo ndrasihidi iri sahou tam marakon ndrala toro, ano iri lau badu kon munyak baso-ok oro ja bwe. Tasah oro badu kon munyak bwe, i buku jo ale badu kon munyak dah bwe le.
JOH 17:15 Jo bandremenya ou ta andrei oro ado kon munyak au bwe, arile jo ndremenya ou ta tondrokei oro kare ndra len ta ndramak ndra-in balik.
JOH 17:16 I buku le jo badu kon munyak dah bwe, oro ale badu kon munyak dah bwe.
JOH 17:17 Sahou tam handru. Jo aso-ok ou atehei sahou tam handru kamekes gok kili bolo ndrine oro ma kabwidi oro kameh kasahan oro lau tam handru.
JOH 17:18 Jo suni oro ta ala bolo kon munyak, i buku le ou mene suni jo eme andri kon munyak.
JOH 17:19 Jo anya kaseben oro, eme ma jo atehei jo mara-ei ewek tam, ta oro katehei oro mara-ei kewek tam, ma ta oro kameh asahan oro lau tam handru.
JOH 17:20 “Tama, jo basolom toro le lau nane ado hawek kada-ah bwe, arile ta are lau kameh iy atehei budon tan ale in tek, tasah ta sahou tam oro kameh asehek.
JOH 17:21 Jo asolom ta oro kala le ari. Tama, oro kare hawe talu, i buku le ou ado hawek, ma jo udu hawem. Oro kasahan ari le, ta iri lau badu kon munyak kameh anyolom ma atehei budon tiri ewek tam, ta ou suni jo eme.
JOH 17:22 Jo ndratehei lomadam ndrala toro. Lomadam doh mene ou adeu eme tek, ta oro kameh kasahan ka le ari, buku talu ma la-uh badeh, ari le.
JOH 17:23 “Jo udu hawe oro, ya ou ado hawek. Jo aso-ok oro kasahan ari buruwen, ta iri lau badu kon munyak kanyolom ma iri katanan, ta ou suni jo eme. Ma iri ale katanan ta ou aso-ok oro, i buku le ou aso-ok jo tinan labai.
JOH 17:24 “Tama! Ou ndratehei oro ndrame tek, eme jo aso-ok oro kame kare hawek, kare kon kameh jo udu aliy. Ma jo aso-ok oro kanyolom lomadak mene ou adeu eme tek, tasah ou aso-ok jo bwena labai, ano kon munyak barasahan.
JOH 17:25 “Tama, ou mwasin labai! Lau badu kon munyak tana iri ou bwe, arile jo tanan ou mwasin labai. Oro lau tek badu hawek nane, oro tana oro ou le badeh, suni jo eme.
JOH 17:26 Jo ndrasehek iri kandriyen ma nyaram ndrala toro. Jo kameh asehek ili toro kahis le, winiya le oro andrei kandriyen ta aso-ok ndramak ari ari, i buku ou aso-ok jo tinan labai. Jo aso-ok kandriyen doh kihis kudu ndrine oro. Eme ma jo kameh in hawe oro.”
JOH 18:1 Jises asolom ano le badeh, iy hawe oro lau tan, oro adek ala bolo gwa Kindron ala asahan bilisiu. Udu loboho bilisiu nane doh, bilin ta Olip udu aliy, eme Jises ma hawe oro lau tan ala ado bolo bilin nane doh.
JOH 18:2 Judas, iy nane edeu sa-oh ta Jises, iy ndratanan kon nane doh, tasah len marakon ta ndrahune tutukum ta Jises hawe oro lau tan ala le bolo bilin nane doh.
JOH 18:3 Iri tinan tiri pris ma iri Parasi tiye i tiri lau ta bahun badu kon Rom, ma iri lau ta atondrok asiu tinan ta Kindrei ka-en hamon ta Judas. Judas tanan kon doh, eme ma iy in bwena tiri. Iri telemei sun hawe iri lakou ta bahun, iri ala asahan bolo bilin ta Olip nane doh.
JOH 18:4 Jises ndratanan ta iri lakou kameh asahan tan, ma iri lau asahan badan ale. Iy eme suri iy, iy edek ili bwena ma iy ndremenya iri i buku doh, “Aha asilah are lau handru?”
JOH 18:5 Iri anya, “Ahi asilah Jises badu Nasaret.” Jises anya, “Jo iy ndramak nane udu le buku doh, asah idah.” Judas, iy nane edeu sa-oh ta Jises, iy ales udu hawe iri ale.
JOH 18:6 Jises tiye i tiri i buku doh, “Jo iy ndramak nane ta udu le buku doh, asah idah,” eme iri marakon arou ala le kona iri ma iri taku ala andri.
JOH 18:7 Jises eme ndremenya iri ja, “Aha asilah are lau handru?” Iri marakon anya, “Ahi asilah Jises badu Nasaret.”
JOH 18:8 Jises anya, “Jo nane ndrasehek taha eh, jo iy ndramak nane ta udu le buku doh, asah idah. I buku aha asilah jo handru eh, ya oro lau nane ado hawek kada-ah ka-au o.”
JOH 18:9 Iy asehek iri sahou nane doh, eme ta iri lakou iy nane ndrasehek idah kameh marakon asahan handru: “Tama, oro lau marakon ou mene atehei oro ame bahandra tondrok tek, ari toro bamai bwe.”
JOH 18:10 Saimon Pita badeh, samen gwak tan ari udu aliy, iri aloh bainat. Eme iy aluwi samen tan eme len, ma iy sani ka-u ndranye bonyo-ou salin iu. Nyara bonyo-ou nane doh Malkus.
JOH 18:11 Jises anyolom ili ta Pita ma iy asehek sahou i tan anya, “Ou atehei samen tam ki hamon bolo awin ja! I buku sah handru? Bwesam ta sisi-in nane doh, tama atehei eme tek, jo sa-un sala aliy ai?”
JOH 18:12 Ano iri lau nane ta bahun badu kon Rom hawe tinan ta bwena ta bahun tiri, ma hawe iri lau ta atondrok asiu ta Kindrei ame tawi Jises, ma bawei iy.
JOH 18:13 Ano iri andrei iy ma bwena ili hawe Anas. Anas doh badeh, nyana Kayapas, iy badeh, tinan tiri pris ta bolo jaha nane doh.
JOH 18:14 Kayapas mene edeu budon ma iy tiye tiri Juwis i buku doh, “Mwasin, ta ndramak ari le, iy kimek ta saluwe lau marakon. Ndra-in ta lau marakon amak laleyah.”
JOH 18:15 Saimon Pita hawe lau ta Jises ari ja, uru adek an hamon ta Jises. Tinan tiri pris tanan iy lau ta Jises ari doh, eme ma iy lau doh in hamon ta Jises ili bolo kowah ta asiu, ta tinan tiri pris.
JOH 18:16 Arile Pita badeh, bala bolon bwe, iy ales udu ndra manan kona kou udu. Eme iy lau ta Jises ari nane tinan tiri pris tanan iy, eme iy ili ndremenya i badih ta atondrok madasan nane doh ta Pita keme bolon, eme ma iy andrei Pita eme bolon.
JOH 18:17 Iy badih ta atondrok madasan nane doh, anyolom Pita, eme ma iy ndremenya Pita, “Sebwe ou lau ta iy ndramak kodo-oh ale, neh?” Pita eme besebes le, “Bwe, jo lau tan bo-oh.”
JOH 18:18 Ben nane doh nyala-an labai, eme iri lohowan hawe iri lau tinan tabani jih, eme iri ales are aliy ta anyan. Pita anyala ale, iy eme edek ili ales udu hawe iri, ma anyan jih.
JOH 18:19 Uru lau tan ma la-uh nane are ndra manan. Tinan tiri pris eme ndremenya Jises ta oro lau tan ma ta sahou iy ndrasihidiy ndrala tiri lau.
JOH 18:20 Jises eme asehek i tan, “Len marakon jo badeh, asehek sahou ili tiri lau ba-en kabwak bwe, ma jo leheya iri lau marakon badeh, udu bolo asiu ta atukum tiri Juwis, ma udu bolo asiu tinan ta Kindrei, na len marakon iri ala aliy. Jo batone ari sahou bwe.
JOH 18:21 Ya, i buku sah handru ou ndremenya jo ta aliy? Ou ndremenya iri lau nane ndranuhun iri sahou tek. Iri tanan ta saba lakou jo ndrasehek.”
JOH 18:22 Jises asehek sahou doh kahis le badeh, ndramak tinan ari mudi minen i bolo kapan, ma iy asehek i buku doh, “I buku sah handru, ya ou asehek sahou boto-on labai i ta tinan tiri pris i buku doh?”
JOH 18:23 Jises eme asumon sahou tan ja, “Ya, i buku jo ndrasehek saba sahou bamwenen bwe, abo, jo aso-ok ou tiye tiri lau marakon nane ado kada-ah ta saba sahou handru jo asehek. Arile, i buku jo asehek sahou amwenen eh? Ya tasah handru ou a-um jo?”
JOH 18:24 Ano Anas tiye iri kasirini iy kili hawe Kayapas tinan tiri pris. Arile, iri batolowei malou nane iri bawei iy na aliy ba-au bwe le.
JOH 18:25 Pita ales udu hawe iri lau anyan jih kahis le. Eme oro lau rayah anyolom iy ma oro ndremenya iy ja, “Sebwe ou lau tan ari ale?” Arile Pita besebes le, iy anya, “Jo bwe.”
JOH 18:26 Arile ndramak ari, iy lohowan ta tinan tiri pris, iy badu hawe iy ndramak nane Pita sani ndranyen na samen, asehek ja, “Jo mene anyolom ou ado bolo bilin ta Olip hawen oh?”
JOH 18:27 Pita besebes ja, iy anya, “Bwe.” Eme ma nawin bwe kakaro eden.
JOH 18:28 Mandraben ma wahun, iri sirini Jises udu asiu ta Kayapas iu ili asiu ta kabin badu Rom. Iri tinan tiri Juwis bala bolo asiu nane doh bwe, tasah kora-on iri kandraka-an ta mada Kindrei, ma idah kameh iri winiyan baimon nyamon ta len ndrabun aloh Pasoba bwe. Eme iri are ndra manan areu.
JOH 18:29 Pailat eme manan hawe iri, ma iy ndremenya iri, “Aha anya kadeu iy ndramak dah kili ta mada sahou ta saba lakou handru?”
JOH 18:30 Eme iri marakon asumon sahou tan, “I buku iy ndramak ta amekes kandriyen ndra-in bwe, ahi winiyan bandrei iy bame hawem bwe.”
JOH 18:31 Pailat eme asehek i tiri ja, “Mwasin, aha kandrei iy kewek hawe aha, ma aha katehei iy ki ta mada sahou ki-in hamon ta iri kandriyen taha amwenen.” Iri ame asumon sahou ta Pailat ja, “Badeh, ndrabun tinan labai, ta ahi winiyan badai iri lau amekes kandriyen ndra-in amak bwe.”
JOH 18:32 Bwena mene Jises asehek ta iri kandriyen iy kameh imek ta aliy, eme ma iri lakou marakon doh asahan ta amekes sahou tan kasahan handru.
JOH 18:33 Pailat eme anuhun iri sahou i buku doh, eme iy edek iu ili hamon ili bolo asiu tan ja. Eme iy aloh iri lau katiyani Jises kili hawen. Iy eme ndremenya iy, “Ou kabin tiri Juwis, neh?”
JOH 18:34 Jises anuhun ano, eme iy asumon ndremenya tan, “Ou ndremenya jo nane dah, na le budon tam amwenen o rayah lau ja tanan jo, eme iri adeu budon ewek tam?”
JOH 18:35 Pailat eme tiye i ta Jises, “Ou kede-eh anya jo badu Juwis nadeh? Idah iri lau tam amwenen ma iri tinan tiri pris, iri le adeh tiyani ou ame hawek nane dah. Ya ou amekes saba lakou handru eme iri atehei ou a ta sahou?”
JOH 18:36 Jises anya, “Boto-on ta tondrok tek badeh, badu kon munyak dah bwe; i buku boto-on ta tondrok tek badu kon munyak, badeh kameh iri lau tek winiya amekes bahun hawe iri Juwis, ta iri sandrei jo same hawem. Arile boto-on ta tondrok tek badeh, badu kon rakon ja.”
JOH 18:37 Pailat eme ndremenya iy ja, “Ou kabin ari handru, neh?” Jises asehek i tan i buku doh, “Ou anya jo kabin ari, badeh handru. Arile sahou handru bala buku budon tam badeh bwe. Tine atehei jo eme kon munyak ta atiye iri sahou handru, kili tiri lau marakon. Are lau iri an hamon ta sahou handru, kameh anuhun jo.”
JOH 18:38 Pailat ndremenya Jises, “Ya ‘sahou handru,’ saba moson ta aliy?” Pailat asehek sahou ano, iy eme ili manan ja hawe iri Juwis. Iy eme tiye i tiri, “Jo badeh, basilahei ari ndra-in udu tan bwai.
JOH 18:39 Arile, idah in hamon ta kandriyen taha. Jo badeh, ruwani ndramak ari udu bolo asiu lulik eme len laleyah, udu bolo len tinan aloh Pasoba. Ya, aha aso-ok jo karuwani kabin tiri Juwis kewek mine aha?”
JOH 18:40 Iri arah ma aloh i tinan i buku doh, “Iy badeh, bwai. Ahi aso-ok ou ruwani Barabas keme len laleyah.” Barabas badeh, iy ndramak ta bahun ta adai lau amak ma iy ale ta bahana.
JOH 19:1 Ano Pailat atehei Jises ili mine iri lau ta bahun, ta iri ka-um iy na malou iri sakabuk ihis i bek.
JOH 19:2 Iri lau ta bahun tabuwi bada malou bobodon i se buku none barak ma atehei ili batun. Ano iri atehei kolau ra-ei saraman lawe-en ili la-un.
JOH 19:3 Ano iri marakon adek ame hawen ma iri bobose iy i buku doh, “Ou kabin tiri Juwis ou areu le buku doh len mari!” Ano iri a-um iy na bolo mine iri i bolo kapan.
JOH 19:4 Pailat edek eme manan ja, iy asehek sahou ili tiri san rasan ja, “Aha kanuhun, jo kameh andrei iy eme manan hawe aha ta aha kanyolom, ma aha katanan, jo badeh, basilahei ari ndra-in udu tan bwe-en.”
JOH 19:5 Udu, Jises eme manan. Bada malou bobodon nane iri tabuwiy i buku barak udu batun ma awin saraman udu bwele-en ale. Pailat eme tiye ili tiri, “Aha kanyolom iy ndramak nane asah idah!”
JOH 19:6 Iri tinan tiri pris hawe iri lau ta atondrok asiu tinan ta Kindrei anyolom iy le badeh, iri arah, ma iri asehek sahou boto-on i buku doh, “Katatahi iy ki bada kei tondreh! Katatahi iy ki bada kei tondreh!” Pailat eme asehek sahou ili tiri ja, “Aha kandrei iy kewek hawe aha, ano aha baratatahi iy barala ta kei tondreh. Jo winiyan basilahei ari ndra-in tan bwai.”
JOH 19:7 Iri Juwis somolei sahou ta Pailat ja anya, “Ahi badeh, kandriyen tahi malen udu aliy, asehek ta adi ndramak imek, tasah iy le anya, iy Nadu Kindrei.”
JOH 19:8 Pailat anuhun iri asehek i buku doh, eme ma bwidi iy inoh tinan labai.
JOH 19:9 Iy eme iu ili bolo asiu tiri kabin ja, ma iy ndremenya Jises ja, “Ou badu heh handru?” Arile, Jises basumon bohon bwe.
JOH 19:10 Pailat asehek sahou i tan ja, “Tasah handru ou winiya basumon bohok bwe? Ou tanam jo bwe? Jo le ari atondrok, ta jo winiya tiye ou au laleyah, ma jo winiya tatahi ou ala ta kei tondreh ale.”
JOH 19:11 Jises eme tiye i tan ja, “Ou winiya batondrok jo bwe, i buku Kindrei batehei boto-on ta atondrok jo bawek tam bwe. Ta idoh le kameh, are lau iy atehei jo eme minem dah, iri kandriyen tan marakon kameh udu bwele-en labai ja ta iri kandriyen ndra-in tam.”
JOH 19:12 Pailat anuhun iri sahou doh, eme iy asilah san ta Jises ki-iu laleyah. Arile iri Juwis arah i tan ja, “Buku ou ruwani iy ndramak badeh, iu laleyah eh, badeh, kameh ou kawas ta Sisa bwai. Are lau asehek, anya iy kabin, badeh, iy bobose Sisa.”
JOH 19:13 Pailat anuhun iri sahou nane doh, eme iy sirini Jises eme manan ja. Ano Pailat manyah udu andri bada koyeu tiri kabin, udu loboho bolo asiu doh iri aloh “Bek Malahan.” (Iri Hiburu aloh Gabata.)
JOH 19:14 Mada an eme ndrado le alih, mirihik ta len ndrabun iri aloh Pasoba anya kasahan. Pailat eme tiye i tiri Juwis, “Ya, aha kanyolom, idah kabin taha.”
JOH 19:15 Iri lau ame arah ili bwele-e Pailat, “Kadi iy kimek! Kadi iy kimek! Katatahi iy ki bada kei tondreh!” Pailat eme ndremenya iri, “Aha aso-ok jo katatahi kabin taha kede-eh kili ta kei tondreh?” Arile, iri tinan tiri pris anya, “Ahi ari kabin ja bwe. Sisa le ari, kabin tahi.”
JOH 19:16 Eme bwidi Pailat inoh, ma iy atehei Jises ili mine iri, ta iri katatahi iy kili ta kei tondreh. Iri lau ta bahun ame andrei Jises iu ili hawe iri.
JOH 19:17 Iri tiye iy ta bwese kei tondreh tan. Iy bwese-ei ili isos kon ari iri aloh “Kon ta bwisi bar ta ndramak,” ili boho kon tiri Hiburu iri aloh Golgata.
JOH 19:18 Udu loboho doh, iri lau ta bahun tatahi Jises ili ta kei tondreh. Iri tatahi uru lau la-uh ala ta kei tondreh ale. Iy ari udu loboho minen salin, iy ari udu loboho minen kamweu, Jises udu alih turu ma la-uh.
JOH 19:19 Pailat eme torowenei sahou rayah, ano iy tiye oro lau ta bahun tatahiy udu bwisi no-o kei tondreh ta Jises. Tarou nane tiye i buku doh, “Jises Badu Nasaret, Kabin tiri Juwis.”
JOH 19:20 Sahou nane doh iri torowenei ili boho kon tiri Hiburu, boho kon tiri Latin (Rom), ma boho kon tiri Grik. Iri Juwis badeh, solo-an ame anyolom sahou nane iri torowenei udu ta kei tondreh ta Jises. Tasah kon nane iri tatahi Jises udu aliy bado len ta kon tinan nane doh bwe.
JOH 19:21 Eme iri tinan tiri pris anyolom ma iri abolosen. Iri ame asehek ili ta Pailat i buku doh, “Ou satorou sala buku kodo-oh: ‘Kabin tiri Juwis.’ Ndri-iy labai. Ou atorou kili buku doh: ‘Iy ndramak le kede-eh asehek i buku doh: “Jo Kabin tiri Juwis”’”
JOH 19:22 Pailat eme asehek sahou boto-on i tiri, “Ndri-iy ai, saba sahou jo ndratorowenei badeh, kudu gwek ai.”
JOH 19:23 Na len iri lau ta bahun tatahi Jises ili ta kei tondreh, iri andrei awin tan ta bwele-en, iri tarani ili ma ha-ei, ano iri ondrek tiri. Awin tan ra-ei ja ma buruwen ta badan badeh, iri andrei ale.
JOH 19:24 Iri asehek ili tiri ari, ari, “To satarani awin tan mwasin dah, to kamekes laki ta aliy. To kanyolom are handru kameh andrei.” Lakou nane dah bwidiy amwenen ta sahou udu bolo buk ndrabun asahan handru, “Iri andromwei iri awin tek ili le winiya iri. Iri amekes nyorei laki ta awin tek.” Iri kandriyen marakon nane doh, iri lau ta bahun amekes.
JOH 19:25 Ales are mirihik ta kei tondreh ta Jises badeh, tinen, nadu tine tinen, Mariya udu Klopas, ma hawe Mariya badu Makdala.
JOH 19:26 Jises anyolom tinen ma hawe lau tan ari iy aso-ok iy tinan labai ales are hawe tinen. Iy eme asehek sahou ili ta tinen, “Tine, iy ndramak kede-eh nadum handru.”
JOH 19:27 Ano iy asehek ili ta lau tan nane, “Iy badih kede-eh tinem.” Eme udu ndra bada len doh badeh, iy lau ta Jises nane andrei tine Jises ili asiu hawen ma tondrokei iy.
JOH 19:28 Jises tanan ta iri gok tan mara-ei ndrano ai. Iy eme aloh, “Balek ndramar ta gwa.” Iy asehek doh ta amekes sahou udu bolo buk ndrabun eme asahan handru.
JOH 19:29 Kun ari, waen titi-in udu bolon udu mirihik ta kei tondreh tan. Iri lau ta bahun andrei konyei, oro tolomwani i bolo waen titi-in nane doh, ano oro atehei ili no-o kei ari, iri aloh hisop. Ma oro adeu ili bohon.
JOH 19:30 Jises anyuwi waen nane dah ano, ma iy anya, “Kabwai, lahou mara-ei ndrano.” Iy eme atehei batun i andri ma iy ruwani kohan ma iy imek.
JOH 19:31 Len doh badeh, ta alokou len ndrabun ta amunyau tiri Juwis. Len tiri nane doh kameh ndrabun labai. Eme ma iri Juwis bwale iri ta ndramak sukik udu bada kei tondreh na bolo len doh. Eme iri ndremenya Pailat ta atubwa kati oro lau nane are bada kei tondreh, ta oro kamak suwi, ma iri lau ta bahun kandrei oro are bada kei tondreh kame andri.
JOH 19:32 Iri lau ta bahun ala tubwani kati uru lau ma la-uh nane sukik are hawe Jises ado bada kei tondreh.
JOH 19:33 Arile iri ame ta Jises, iri anyolom iy ndramak ndra nane, ma iri batubwani katin bwai.
JOH 19:34 Arile ndramak tiri ari ta bahun eme aso-ei kabede Jises na nyah. Eme ma ndra hawe gwa amou eme len.
JOH 19:35 Jo ndramak nane jo anyolom iri saba lakou nane asahan doh, eme jo asehek, “Lakou marakon doh handru. Jo tanan, lakou marakon jo ndratorowenei ndrano, iri ndra handru le ai. Aha katehei budon taha kili aliy.”
JOH 19:36 Iri lakou marakon nane doh, bwidiy amwenen ta sahou udu bolo buk ndrabun eme asahan handru, “Ari ndruwin winiyan babok bwe.”
JOH 19:37 Sahou randra ja bolo udu buk ndrabun asehek i buku doh, “Iri kameh anyolom i ta ndramak nane iri orowei kabeden na nyah.”
JOH 19:38 Ano, ndramak ari nyaran Josep iy badu kon tinan Arimateya, iy ili ndremenya Pailat ta akohok Jises udu ta kei tondreh keme andri, ta adeu iy kili lek. Josep doh, lau ta Jises ari ale. (Arile iy inoh iri tinan tiri Juwis, iy eme basehek nyaran bame len bwe.) Pailat eme aso-ok, eme Josep ili andrei bada kei udu ta kei tondreh eme andri.
JOH 19:39 Nikodemus, iy le mene ili atou Jises na ben rasan. Iy ili hawe Josep ale. Iy bwese-ei kohei rahak irek tiri suluw ma iri nyasou manahu buburen. Maha-an tiri suluw doh i buku kilo tonoh hahuw (34).
JOH 19:40 Uru lau ma la-uh nane dah andrei bada kei eme andri, uru su-iy na iri kari kolau ma hawe adeu iri suluw i badan. Uru asu iy i buku kandriyen le tiri Juwis ta asu lau amak.
JOH 19:41 Mirihik ta kon tinan nane iri adi Jises, bilin ari udu mirihik ta aliy. Ya udu bolo bilin doh, munu bek ari ma ha-un le, iri badeu ari ndramak imek bala aliy bwe le.
JOH 19:42 Len doh ta alokou len ta amunyau tiri Juwis. Munu bek nane doh udu le mirihik turu, eme uru anyuhi Jises ili bolon.
JOH 20:1 Ma ndra wahun ta len ma bwena ta wik ari ja, Mariya badu Makdala edek ili mada lek anya kanyolom Jises. Iy ili mirihik, iy anyolom bek bado mada lek bwe, iri ndratundruwiy ndra-au ndrala len.
JOH 20:2 Iy sakaliye eme hamon tiye jo hawe Saimon Pita. Jo badeh, lau ta Jises iy aso-ok labai. Mariya tiye taru i buku doh, “Iri ndrabwese-ei Laban udu bolo lek tan ndra-au. Iri ndrabwese-ei iy ndrala heh handru, to bala tanan bwe.”
JOH 20:3 Eme aru Pita adek ala mada lek anya kanyolom.
JOH 20:4 Aru ma la-uh sakaliye taseh ala, arile jo sakalawi Pita eme hamon, jo ili isos mada lek bwena.
JOH 20:5 Jo aluh, ma anyolom ili munu bek. Eme jo anyolom iri kari kolau nane iri asu iy na aliy, arile jo bala munu bek bwe.
JOH 20:6 Saimon Pita in hamon tek eme ja, edek ales amwenen ili munu bek. Iy anyolom iri kari kolau marakon nane iri asu iy na aliy udu api.
JOH 20:7 Ma iy anyolom kolau nane asu batu Jises na aliy. Arile kolau nane doh, bare hawe iri kari kolau rayah nane bwe. Nyolom ta aliy i buku kolau le nane alokom iy.
JOH 20:8 Pita ndra-au ndrala bolon, jo eme edek in hamon tan ili munu bek ale. Eme jo anyolom iri lakou marakon nane doh, ma jo atehei budon tek ili tan i buku Jises badeh, ndramak ndrame awas ja.
JOH 20:9 (Na len doh badeh, aso bala tanan ta buk ndrabun asehek ta Jises kameh amak ja bwe.)
JOH 20:10 Aru anyolom iri lakou marakon udu lek nane ano, aru ame adek au ala hamon ala kon ja.
JOH 20:11 Mariya badu Makdala eden udu mirihik ta mada lek. Iy eden kahis, iy aluh ma anyolom amwenen ili bolo lek.
JOH 20:12 Iy anyolom angelo ma la-uh ado bolo lek, asini awin belen. Uru manyah are loboho bada kei mene udu aliy. Iy ari udu loboho batun, iy ari ja udu loboho kiwin.
JOH 20:13 Uru ndremenya Mariya i buku doh, “Badih den, ou aden ndranye sah?” Iy asumon, “Iri ndrandrei Laban tek ndra-au, jo bala tanan bwe, iri ndratehei iy ndrado heh handru.”
JOH 20:14 Iy asehek sahou ano, iy tubuni madan ili amwenen ta Jises ales udu konan, arile iy baseleyani Jises bwe.
JOH 20:15 Jises eme ndremenya iy, “Badih den, ou aden ndranye sah handru? Ya ou asilah are lau handru?” Iy anya, kede-eh iy ndramak ta bilin doh le ai. Iy anya, “Ndramak den, i buku ou ndrandrei iy ndra-au, ou tiye tek, ou atehei iy udu heh handru, jo kameh kili kandrei iy.”
JOH 20:16 Jises anya, “Mariya.” Mariya tubuni iy amwenen tan, ma iy aloh i boho iri Hiburu anya, “Raboni!” (Moso sahou Raboni badeh, “Ndramak ta leheya.”)
JOH 20:17 Jises anya, “Minem same badak o! Tasah, jo bala loken hawe tama bwe le. Arile ou ala tiye oro lau tek, ou tiye toro, ‘Jo kameh ilih loken hawe tama, iy tama ado. Jo ili hawe Kindrei tek ma Kindrei tado ale.’”
JOH 20:18 Eme Mariya badu Makdala sakaliye eme tiye taso lau tan, “Jo ndratou Laban!” Ma iy asehek taso mari ta iri sahou nane Jises asehek i tan.
JOH 20:19 Na len ma bwena ta wik doh, an i andri badeh, oro lau tan atukum oro a le se ado bolo asiu ari. Oro sulu-i kou toro marakon ihis, tasah oro anoh iri lau tinan badu Juwis. Oro ado le badeh, Jises eme ales udu alih toro, ma iy anya, “Mondrei kudu hawe ado.”
JOH 20:20 Iy asehek sahou ili toro ano, iy eme leheya minen ma kabeden. Oro lau tan badeh, sekesek tinan labai ta anyolom Laban ja.
JOH 20:21 Jises tiye toro ja, “Mondrei kudu hawe ado. Buku le tama suni jo eme, ma jo suni ado ta ala bolo kon munyak.”
JOH 20:22 Ano iy aluhi kohan ili bwele-e oro, ma iy anya, “Malawin Ndrabun ndrawek bolo ndrine ado.
JOH 20:23 I buku ado mani kandriyen ndra-in tiri lau, idah kameh kandriyen ndra-in tiri amai iu. I buku aha bamani kandriyen ndra-in tiri bwe, idah kameh kandriyen tiri udu bwele-e iri udu le buku doh.”
JOH 20:24 Na ben nane doh Jises asahan hawe oro lau tan rayah, arile iy lau tan ari nyaran Tomas, nyaran ari ja Didimus, bado hawe oro bwe.
JOH 20:25 Oro ame asehek ili tan, “Aso ndranyolom Laban!” Arile iy anya, “Jo winiyan batehei budon tek bala tan bwe, jo anya kanyolom mweleke minen ma jo anya kanyokar na minek amwenen. Jo anya katehei kandro minek kili mweleke nyah udu kabeden. Jo kanyolom na madak ma la-uh amwenen, ano jo baratehei budon tek barala tan.”
JOH 20:26 Udu hamon ta len ma ndro taloh ano, oro lau tan atukum ala le asiu nane ja. Na len doh Tomas udu hawe oro ai. Oro sulu-i kou marakon ihis, arile i buku le bwena mene, Jises ili ales udu le alih toro, ma iy anya, “Mondrei kudu hawe ado.”
JOH 20:27 Ano iy tiye ta Tomas, “Ya, ou ame atehei minem keme dah, ma madam kanyolom bolo minek ma la-uh, ou suri ou ame atehei minem keme kabedek. Budon tam sala la-uh. Budon tam keme le tek.”
JOH 20:28 Tomas eme asumon bohon i buku doh, “Ou Laban tek, ma ou Kindrei tek!”
JOH 20:29 Ano Jises tiye ta Tomas, “Ou ndratehei budon tam ndrame tek, tasah ou ndranyolom jo amwenen. Iri lau banyolom jo bwe, arile iri atehei budon tiri eme tek, eme ma sekesek tiri kameh udu bwele-en labai.”
JOH 20:30 Jises amekes iri kalem ma iri gok tinan solo-an labai udu mada oro lau tan. Eme jo batorou iri sahou marakon bala bolo buk dah bwe.
JOH 20:31 Arile katin ta jo atorou iri sahou dah, ta aha katehei budon taha kili le ta Jises. Iy Mesaya, ndramak nane Kindrei suni iy eme kon munyak, ta akohok lau tan marakon badu kon munyak ame hamon. Iy nadu Kindrei. Buku aha atehei budon taha marakon in tan, aha kameh akohok koha aha in le ta nyaran.
JOH 21:1 Udu len sabe ja, Jises asahan hawe oro lau tan ado mirihik ta kapa gwa Galili, iri aloh Li Taiberiyas. Iy asahan hawe oro lau tan i buku doh:
JOH 21:2 Saimon Pita, Tomas (nyaran ari ja Didimus), Nataniyel iy badu Kana udu loboho Galili, ma nadu Sebedi uru ma la-uh, hawe uru lau tan la-uh ja, are hawe oro ale.
JOH 21:3 Saimon Pita asehek toro anya, “Jo kameh ili asilah nato ni!” Oro asehek i tan anya, “Aso anya kawek hawem ale.” Eme oro ala a ndron hawen, oro asowe au ala len. Arile na ben ari ma buruwen oro bakohok ari ni bwe.
JOH 21:4 Kon ndraleu ai, an edek eme loken, eme oro anyolom Jises ales udu bada babi, arile oro lau tan baseleyani iy bwe.
JOH 21:5 Jises eme aloh ili toro, “Ado kawas tek, ari ni keme!” Oro anya, “Ni bwe!”
JOH 21:6 Iy eme aloh i toro ja, “Ado kakahei kubwin tado kili bilisiu loboho lim salin ja, idah kameh ado akohok.” Oro ame akahei kubwin toro ili gwa ja, eme ni solo-an labai ihis udu bolo kubwin toro, ma oro winiyan baruwi kubwin hawe ni udu bolon bame loken bwe.
JOH 21:7 Jo, iy lau nane Jises aso-ok labai, asehek i ta Pita, “Laban asah kodo-oh!” Saimon Pita anuhun le badeh, iy eme asini awin tan ili la-un suwi suwi, tasah awin tan nane iy ibo gok, eme iy asiniy iu. Iy eme sandrakon i gwa ma iy eya iu ili amik.
JOH 21:8 Oro lau tan rayah ado ndra ndron ado gwek ariu kubwin hawe ni, ma oro asowe ame amik ale. Ndron toro badeh, bado len ta babi bwe, i buku mita rinek le.
JOH 21:9 Oro asos bada babi le badeh, oro anyolom jabi ramen ma ni udu bolo mitihi jih.
JOH 21:10 Ano Jises tiye toro, “Ado kakohok rayah ni nane ado akohok badeh, keme loken.”
JOH 21:11 Saimon Pita eme ili ndron ja, aseben oro ta ariu kubwin irek ta ni eme amik. Udu bolo kubwin badeh, ni ma rinek lomonoh taloh (153), iri ni ndra badan le, arile kubwin batarah bwe.
JOH 21:12 Jises aloh ili toro, “Kame kaimon nyamon!” Ade oro lau tan a len sese ta ndremenya iy buku, “Ou are lau?” Tasah oro tanan, idoh Laban le ai.
JOH 21:13 Jises eme ili kapa jih iy andrei jabi ramen, iy eme edeu ili noro lau tan. Ano, iy edeu ni ili noro i buku le aliy.
JOH 21:14 Idoh badeh, i san tulusin ai, ta Jises ili asahan eme awas hawe oro lau tan amwenen, udu hamon ta iy ndramak ndrame awas ja.
JOH 21:15 Udu hamon ta nyamon toro ano, Jises eme ndremenya Saimon Pita, “Saimon, nadu Jon, ou kede-eh aso-ok jo tinan labai ja, toro rayah kede-eh ja nadeh?” Pita anya, “Ehe Laban, ou ndratanam jo, jo badeh, aso-ok ou tinan labai i buku ari kawas.” Jises eme tiye i tan ja, “Ou atondrok iri nadu sipsip tek.”
JOH 21:16 Jises asehek sahou le nane san rasan ja ili tan, “Saimon, nadu Jon, ou kede-eh aso-ok jo handru?” Iy anya, “Ehe Laban, ou ndratanam jo, jo badeh, aso-ok ou labai i buku ari kawas.” Jises eme tiye i tan ja, “Mwasin, ou atondrok iri sipsip tek.”
JOH 21:17 Ili san tulusin ai, Jises asehek sahou le nane ili tan ja, “Saimon, nadu Jon, ou kede-eh aso-ok jo handru?” Eme bwidi Pita tikisiy, tasah Jises badeh, ndremenya iy san tulusin ai, ta sahou randra le doh, “Ou kede-eh aso-ok jo handru deh?” Eme iy asehek i tan, “Laban, ou tanam lakou marakon; ou ale ndratanam jo, jo badeh, aso-ok ou labai!” Jises eme asehek sahou ili tan ja, “Mwasin, ou atondrok iri sipsip tek.
JOH 21:18 “Jo asehek tam handru: Mwena mene ou ma loweu, ou amwenen apeu balaban tam, ma ou adek ala kon solo-an ou aso-ok ta ala aliy. Arile ou ado, ou ala asahan alon, badeh kameh ou suri minem ili loken, ya ndramak ari ja kameh apeu balaban tam, ano iy sirini ou ala kon nane ou bwalem ta ala aliy.”
JOH 21:19 Jises asehek iri sahou marakon nane doh ta leheya kandriyen ta Pita kameh iy imek i buku sah, eme iy atudun nyara Kindrei. Ano iy tiye Pita, “Ou ame an hamon tek.”
JOH 21:20 Pita tubuni madan, eme iy anyolom lau ta Jises ari nane nyaran Jon, Jises ale aso-ok iy tinan labai. Iy in hamon turu eme. Iy doh mene manyah udu mirihik hawe Jises aimon nyamon ado se. Iy ale mene atehei batun ili batala Jises ta ndremenya iy, “Laban, are lau handru kameh edeu sa-oh tam ili mine iri lau ta bahun?”
JOH 21:21 Pita anyolom iy, eme iy ndremenya Jises, “Laban, iy i buku sah handru?”
JOH 21:22 Jises eme asumon iy, “Buku jo aso-ok iy kudu katondrok jo keme hamon, ya saba budon tam? Ou ame a-en hamon tek.”
JOH 21:23 Eme sahou ndraseker ndrala toro lau tan anya, “Iy lau nane doh, winiyan bamak bwai.” Arile Jises basehek ta iy winiyan bamak bwe. Iy anya, “Buku jo aso-ok iy kudu le, winiya le jo eme hamon ja, idoh ari lakou tam bwe.”
JOH 21:24 Jo iy lau nane, jo ndranyolom iri lakou nane doh, ma jo ndratorowenei iri ndrala andri. Ma taha ndratanan, saba lakou jo ndratorowenei, iri ndra handru le ai.
JOH 21:25 Jises amekes iri lakou rayah solo-an, arile jo batorowenei iri bala andri bwe. Buku katorowenei iri marakon ari, ari kili andri, jo anya kon munyak kameh winiya bala winiyan bwe, buku katorowenei marakon.
ACT 1:1 Tiyopilus ei, udu bolo tarou tek mwena mene badeh, jo atorou ta nyala lahou mari Jises amekes ma leheya iri mwan ma badih ma mwena handru,
ACT 1:2 eme, eme taku na len andrei Jises iu i kandrah. Idoh, udu hamon ta iy edeu batanau na boto-on ta Malawin Ndrabun i toro aposel tan, iy mene ndralebelei.
ACT 1:3 Udu hamon ta imek tan ja badeh, iy leheya iy amwenen i toro lau doh, ma leheya lahou solo-an i mada oro ta iy badeh, ndramak ndrame awas ja. Iy badeh, asahan hawe oro udu bolo len ma hanoh (40). Iy asehek sahou i toro ta nyala tondrok ta Kindrei.
ACT 1:4 Ya udu bolo tukum toro ari ja, iy udu hawe oro aimon nyamon, ma iy batanau oro i buku doh: “Ado badeh, sa-au op, ado kado Jerusalem kado kabe-en ndramas tado Malawin Ndrabun. Tama mene tandrakan i tado mene, ado anuhun jo asehek nyala aliy.
ACT 1:5 Tasah, Jon mene inyu ado na gwa, arile len rayah iu, ano kameh, ado anyu na Malawin Ndrabun.”
ACT 1:6 Eme na len oro atukum badeh, oro ndremenya iy anya, “Laban ei, na len dah kameh, ou atudun tondrok ta Isra-el ja ai?”
ACT 1:7 Eme iy tiye i toro i buku doh, “Len ma sasah asahan kameh, udu mine tama le ari. Idoh badeh, ta ado katanan ta aliy bwe.
ACT 1:8 Arile, ado kameh akohok boto-on na len Malawin Ndrabun kameh ewek la-u ado; ma ado kameh atiye sahou tek ili Jerusalem, ili Judiya, ili Samariya, ano kili kon munyak mari.”
ACT 1:9 Eme iy asehek sahou doh i toro ano le badeh, Kindrei kuhi iy udu mada oro iu i loken, ma asi jor turuki iy amai ta mada oro.
ACT 1:10 Eme mada oro badeh, udu le tan, ma iy iu i kandrah. Ya eme suwi suwi badeh, uru lau la-uh asini awin belen mara-ei ales udu ka-u oro.
ACT 1:11 Eme uru anya, “Ado lau badu Galili. Ado ales ado kede-eh, anyolom i kandrah, ta sasah handru? Iy ndramak Jises le doh, kameh, ado anyolom, andrei iy ndra-au ndra kandrah; idah kameh, ado anyolom iy eme andri ja kameh i le buku none ado anyolom iy i loken doh.”
ACT 1:12 Ano oro adek ado bwili ndrondro-ou Olip ala hamon ala Jerusalem. Ya ndrokowa bwili ndrondro-ou doh kilomita ari udu len ta kon tinan Jerusalem.
ACT 1:13 Eme oro asos badeh, oro ala loken a bolo asiu mene oro areu aliy. Oro lau areu aliy badeh, Pita, Jon, Jemis hawe Enduru, Pilip, Tomas, Batolomiu, Metiu, Jemis nadu Alpeyus, Saimon Selot ma hawe Judas nadu Jemis.
ACT 1:14 Oro mari atukum ame se ya oro atehei budon toro i randra le i ta salom. Ma hawe oro badih rayah hawe Mariya tine Jises hawe nadu tine Jises ale udu hawe oro.
ACT 1:15 Eme na len doh badeh, Pita ales ere loken bolo iri lau ta Kindrei, kane iri ma rinek lunoh (120),
ACT 1:16 ma iy tiye anya, “Ado nadu tine mwan ma badih, sahou ta Kindrei mwena mene Malawin Ndrabun mene ndratiye udu boho Debit tiye nyala Judas mene udu bwena tiri eme ateu Jises badeh, ndrasahan handru.
ACT 1:17 Judas badeh, mene badu hawe to ta amekes lahou dah.
ACT 1:18 Eme Judas badeh, sihinei munyak na luk, tasah ta kandriyen ndra-in tan; eme iy taku i andri ma imek ya ndrinen asikak ma ndrinen talou eme len.
ACT 1:19 Eme iri lau badu Jerusalem anuhun badeh, ma tondrohani kon iy imek udu aliy doh i boho kon tiri aloh Akeldama, moson ‘munyak ta ndrahu ndra.’
ACT 1:20 “Tasah, ndratorowenei udu bolo buk Wari badeh, tiye i buku doh: ‘Asiu tan badeh, kudu laleyah, ya ari ndramak sado aliy.’ Ma torowenei ale i buku doh: ‘Ya ndramak ari ki saluwen ta in bwena.’
ACT 1:21 “Ya eme, are lau mene udu hawe to na len mari to adek hawe Laban Jises badeh, ki saluwen?
ACT 1:22 Udu ndra kabatana Jon ta alomwa eme, eme taku kabatana andrei Jises udu hawe to iu i loken. Iy doh badeh, keme hawe to ta asehek nyala Jises mene amak eme awas ja.”
ACT 1:23 Eme oro badeh, aseken lau la-uh: Iy ari badeh, Matiyas. Iy ari ja nyaran taloh: Josep, Barsabas,
ACT 1:24 Ano oro amekes salom anya, “Laban, ou badeh anyolom ndrine lau mari. Ou leheyani keme lewan keme taso ta are turu kasahan aposel ta amekes lahou tam ki saluwe Judas mene iy ndramak ndra-au.”
ACT 1:26 Ano oro asoh nyek. Eme nyek ihis ta Matiyas. Ya eme iy ili hawe oro aposel ma ronoh ari nane dah.
ACT 2:1 Eme len ta Pentikos asahan badeh, oro mari atukum ame kon rasi le.
ACT 2:2 Eme nawin bwe badeh, nyaro lakou asahan i buku none nyaro siyer tinan atohou udu kandrah eme andri idih bolo asiu nane oro areu aliy dah.
ACT 2:3 Eme oro anyolom jih anya eme andri, ma weleyaniy i la-u oro ari ari.
ACT 2:4 Eme Malawin Ndrabun anyuhi ndrine oro, ma mesekei oro badeh, asehek boho kon randra doh, randra doh.
ACT 2:5 Ya udu Jerusalem badeh, iri Juwis ta atudun Kindrei badu kon mari manyah ado aliy.
ACT 2:6 Eme iri anuhun kurutuwe lakou doh badeh, iri arou ame. Tasah, iri ari ari badeh, boho iri asak ta anuhun oro badeh, asehek sahou na boho kon tiri mari.
ACT 2:7 Eme mani iri atur labai, ya iri lomondra ma anya, “Oro lau asehek sahou kede-eh badu Galili o?
ACT 2:8 Arile, i buku sah ja to anuhun oro asehek sahou na boho kon ta to mari?
ACT 2:9 To badeh, badu kon munyak tinan Partiya, Midiya, ma Elam. To ale badu kon munyak tinan Mesopotemiya, Judiya, Kapadosiya, Pontus hawe Esiya.
ACT 2:10 Ma to badeh, badu kon munyak tinan Prijiya, Pampiliya, Ijip, hawe kon rayah badu Libiya udu mirihik ta kon Sairini. Ma udu ndrokowa to badeh, iri lau badu Rom adek ame dah ale.
ACT 2:11 Ma to badeh, Juwis hawe oro lau badu leheleh ala a-en hamon ta leheya tiri Juwis; ma hawe to lau rayah badu busu Krit hawe badu kon munyak tinan Arabiya; badeh, to mari anuhun sahou nyarahan ta lahou tinan ta Kindrei oro asehek i boho kon ta to amwenen.”
ACT 2:12 Eme ya mani iri atur ma budon tiri bameles bwe, ma eme iri ndremenya anya, “Lakou dah, asahan i buku sah handru?”
ACT 2:13 Arile iri rayah badeh, bobose oro anya, “Oro kede-eh, a-un waen solo-an labai.”
ACT 2:14 Ano Pita suri iy ere loken hawe oro ma ronoh ari dah, aloh i tinan ma asehek sahou i tiri anya: “Ado nadu tine badu Juwis ma hawe ado lau mari areu Jerusalem dah, ndranye ado kasak, ya jo kasehek kaleu kewek tado.
ACT 2:15 Oro lau dah badeh, ba-un gwa boto-on bwe. I buku bale ado badeh, bwe. Kon mandraben kahis le oh, mada an barala ndro ari adeh!
ACT 2:16 Arile, idoh lakou mene propet Jowel asehek nyala aliy:
ACT 2:17 “Kindrei anya, ‘Suniya len anya kano kameh, jo kameh solowei Malawik i la-u lau mari badu kon munyak. Ya iri nadu ado mwan ma badih kameh asehek sahou i buku iri propet, ma iri lau loweu tado kameh amekes lele, ma hawe oro lau tado ndrala bada ndramak kameh ameh solo-an.
ACT 2:18 Ma hawe oro lohowan tek mwan ma badih na len eme kameh, jo kameh solowei Malawik i la-u oro, ya oro kameh winiyan asehek sahou i buku iri propet.
ACT 2:19 Jo kameh leheya kalem udu bada kandrah loken, ma udu bada munyak andri ale. Idah kameh, ndra ma hawe jih ma hawe kasu-er hutuwen kameh asahan.
ACT 2:20 Ya an kameh amak ma kon ilik, ma bun kameh asaram i buku ndra. Ya lakou doh kameh asahan bwena op. Ano len tinan ta lomadan ta Laban asahan.
ACT 2:21 Ya lau amekes salom na nyara Laban ma ndremenya iy ta seben kameh, iy winiyan sebenei iri.’
ACT 2:22 “Ado lau badu Isra-el kanuhun sahou doh. Jises Krais badu Nasaret mene, Kindrei suni iy ewek hawe ado. Ya iy mene amekes lahou tinan ma amekes kalem tinan na boto-on ta Kindrei edeu i tan udu ndrokowa ado. Ya ado tanan iy.
ACT 2:23 Bwena mene Kindrei ndratanan iri lakou kameh asahan hamon, ma iy bwidi iri lakou asahan na le tanan ma seken tan. Eme ma, ado badeh, atehei iy i mine iri lau ndra-in, ma iri atahi iy imek i bada kei tondreh.
ACT 2:24 Arile, Kindrei mete-ei iy amak eme awas ja ta imek; ma sebenei iy ta sisi-in ta imek. Tasah, imek badeh, winiyan batawi iy bwe.
ACT 2:25 Tasah, Debit mene asehek nyalan i buku doh: ‘Jo badeh, anyolom Kindrei udu madak na len mari. Tasah, iy badeh, udu loboho lim salin hawek ya jo winiyan banoh bwe.
ACT 2:26 Eme bwidi ndrinek sekesek ma jo asehek ta aliy, Ma jo ale atondrok ta lakou mwasin handru kameh asahan hamon.
ACT 2:27 Tasah, ou winiyan baruwani jo bamak bado bolo munyak dah bwe. Ma ou winiyan baruwani bada lau tam mwasin labai sabola sado bolo lek.
ACT 2:28 Ou badeh, ndraleheyani jo ta san mwasin ta akohok kohak handru ta udu le buku doh. Ou kameh ado hawek ma atehei sekesek tinan labai eme tek.’
ACT 2:29 “Ado nadu tine, jo katiye tado kamwenen. Tubu taha Debit mene imek ma ahi iy. Ya lek tan asah udu hawe to kahis le eme taku dah.
ACT 2:30 Iy badeh, propet ya iy tanan tandrakan ta Kindrei mene tandrakan iy. Kindrei badeh, tandrakan ta lundriyen oro ari kameh asahan kabin, i buku le iy amwenen.
ACT 2:31 Debit ndratanan ta lakou doh, Kindrei anya kamekes hamon, ma iy ndratanan Krais nane, iy kamak udu bolo lek tan keme awas ja. Eme ma iy tiye i buku doh, Kindrei kameh winiyan baruwani iy bado ndrahune iri lau amak ado aliy bwe, ma badan kameh winiyan babola bwe.
ACT 2:32 Kindrei badeh, mete-ei Jises amak eme awas ta imek. Eme ya aso dah badeh, asehek nyala lakou handru mene asahan.
ACT 2:33 Iy ales ili udu loboho lim salin ta Kindrei ma akohok Malawin Ndrabun udu mine taman mene tandrakan. Ma iy solowei Malawin Ndrabun eme, i buku none ado atou hawe anuhun dah. Lakou doh badeh, Jises edeu eme taso.
ACT 2:34 Ya Debit badeh, bala kandrah buku Jises bwe, arile iy anya, ‘Laban Kindrei tiye i ta Laban tek i buku doh: “Ou ame manyah ado loboho minek salin,
ACT 2:35 winiya jo le baratehei iri lau ta amekes budon ndra-in i tam barado bahandra katim.”’
ACT 2:36 “Eme ya ado lau mari badu Isra-el ki tana ado kudu mwasin ta lakou doh: Kindrei badeh, ndrabwidi Jises, ado mene atahi iy i bada kei tondreh, iy ndrasahan Laban ma Krais.”
ACT 2:37 Eme iri lau anuhun sahou doh badeh, ndrine iri tikisiy handru ma tiye i ta Pita hawe oro aposel rayah ja anya, “Ado nadu tine aso, aso ka buku sah bah?”
ACT 2:38 Eme Pita asumon boho oro i buku doh, “Ado mari badeh, katubuni ndrine ado ma kanyu na nyara Jises Krais, ya idah karei ma lomondra ndra-in tado kameh sikine iu. Ma idah kameh, ado akohok Malawin Ndrabun i nyara ndramas ewek tado.
ACT 2:39 Ya tandrakan ta lakou doh badeh, i tado ma hawe i ta nadu ado oro, ma i toro lau badu len. Idoh i toro lau heh Kindrei aloh oro ame hawen.”
ACT 2:40 Pita asehek sahou batanau i toro ma indrek oro anya, “Ado badeh, katondrok ado kamwenen, kora-on ado kala bolo maha kameh eme la-u iri lau ndra-in ado munyak dah.”
ACT 2:41 Eme iri lau solo-an badeh, atehei budon tiri handru i ta sahou tan ma anyuwi oro. Ya kane iri lau mari nane doh, i buku none tuluwi (3,000) i bwele-e iri lau rayah na len doh.
ACT 2:42 Eme iri badeh, aso-ok labai ta a-en hamon ta leheya toro aposel ma atukum ta atudun hawe abo-os jabi ramen ma asolom.
ACT 2:43 Iri mwan ma badih badeh, anyolom kalem hawe lahou tinan solo-an labai Kindrei amekes udu mine iri aposel, eme boho iri asak ta lahou iri aposel amekes, ma iri anoh.
ACT 2:44 Eme ya bolo iri mari badeh, ndrine iri i se, ya iri anyohan lakou i tiri ari ari.
ACT 2:45 Eme iri adeu lakou tiri hawe adeu nyamon tiri i ta sisih ma hawe anyohan iri lau lakou bwe.
ACT 2:46 Ma len mari badeh, iri atukum ala bolo asiu tinan ta Kindrei. Ma iri badeh, ado kon tiri abo-os jabi ramen ma aimon amunum le ma sekesek,
ACT 2:47 ma atudun Kindrei. Ma, iri badeh, mwasin labai udu mada iri lau ta kon doh. Eme ya udu bolo len mari badeh, kane iri lau asola ala hawe iri rayah mene, tasah Kindrei ibo gok ta akohok iri ame hamon.
ACT 3:1 Ya, na mada an taloh na beyeh ari badeh, Pita hawe Jon, uru au ala loken ala asiu tinan ta Kindrei asolom.
ACT 3:2 Eme ndramak ari badan imek kabatana tinen atehei iy eme len. Eme iri bwese-ei iy ili madasan tinan ta i asiu tinan ta Kindrei aloh, “Madasan Mwasin.” Eme iy udu aliy na len mari badeh, anyolou lakou tiri lau adek ala ame ala bolo asiu tinan ta Kindrei.
ACT 3:3 Eme iy anyolom Pita uru Jon ame le badeh, iy anyolou uru ta luk.
ACT 3:4 Eme uru anyolom amwenen i tan. Ano Pita anya, “Madam keme taru!”
ACT 3:5 Ya eme iy anya, uru kameh anyohan iy lakou, ya eme madan i turu.
ACT 3:6 Ano Pita anya, “Aru badeh, luk ta anyohan ou bwe. Arile, sasah taru udu aliy kada-ah, aru kameh atehei ewek tam. Na boto-on ta nyara Jises Krais badu Nasaret badeh, ou suri ou, ma ou adek.”
ACT 3:7 Ya eme Pita tawi minen salin ma suri iy ere loken. Eme katin hawe kusu-u bekan tan abadok ma iy edek.
ACT 3:8 Ano iy ili hawe oro ili bolo asiu tinan ta Kindrei, ma edek ma sandroh ta atudun Kindrei.
ACT 3:9 Ya eme iri lau mari anyolom iy edek ma atudun Kindrei;
ACT 3:10 ma iri seleyani iy, tasah iy badeh, ndramak ta anyolou lakou. Iy mene manyah udu Madasan Mwasin ta i bolo asiu ta Kindrei. Eme ya, mani iri mari atur ma mada iri atau, ta sasah nane ndrasahan tan.
ACT 3:11 Eme ndramak nane ta anyolou lakou tawi Pita uru Jon kahis le badeh, iri lau mani iri atur ya iri sakaliye ala ame ala hawe uru ala beleheleh ta Solomon.
ACT 3:12 Eme Pita anyolom badeh, iy tiye i toro anya, “Aha lau badu Isra-el, mani aha atur ta sasah? Aha anyolom aru boto-on tasah handru? Budon taha kede-eh anya, boto-on mari badeh udu taru, tasah aru mwasin mara-ei ta mada Kindrei, ma aru bwidi iy ndramak kede-eh edek ja. Arile bwe.
ACT 3:13 Kindrei ta Abraham uru Aisik hawe Jekop, ma ta tama taha badeh, bwidi lomadan i ta lohowan tan Jises asahan. Aha mene atehei iy ili mine iri lau adai iy. Pailat anya karuwani iy, arile aha badeh, bwale aha, ma aha baseken iy udu mada Pailat bwe.
ACT 3:14 Aha tubuni kona aha i ta iy ndramak mwasin labai doh, iy bamekes ari kandriyen ndra-in bwe. Iy irek na iri kandriyen mwasin le. Aha bwale aha ta Pailat tolowei Jises. Aha tiye Pailat tolowei iy ndramak ta adi ndramak.
ACT 3:15 Aha badeh, adai ndramak ta edeu kohan handru ta udu le buku doh. Arile, Kindrei le mete-ei iy ta imek eme loken. Eme aru badeh, anyolom na mada aru amwenen ma aru asehek nyala aha.
ACT 3:16 Eme i san ta budon handru in ta nyara Jises badeh, ndramak badan imek, ndra boto-on ja. Ehe, na budon handru in ta Jises le, ndramak badeh, ndramwenen ja. Eme na dah aha anyolom.
ACT 3:17 Eme ya aha nadu tine, jo badeh, tanan, ta aha tanan bala mwasin ta lakou aha amekes i ta Jises bwe; ma hawe oro lau ta atondrok ale.
ACT 3:18 Arile, sahou mene Kindrei atehei i kani iri propet mari asehek badeh, i buku doh: Krais kameh bwese isi. Ma na kandriyen aha amekes i tan, Kindrei bwidi sahou tiri propet tan i handru.
ACT 3:19 Ya eme aha badeh, katubuni ndrine aha ma aha ka-en hamon ta Kindrei. Ma idah kameh, lomondra ndra-in taha kameh Kindrei sikine iu. Ya len ta akohok manyah mwasin ta Laban kameh eme.
ACT 3:20 Ma iy kameh suni Jises eme hamon ja. Iy badeh, Krais, ndramak Kindrei mene ndralebelei ta akohok aha ame hamon ja.
ACT 3:21 Jises kameh udu kandrah udu gwek, winiya le len Kindrei anya kamekes lakou mari kasahan ha-un ja, i buku none iy mene ndrasehek i tiri propet tan ndrabun mwena mene.
ACT 3:22 Moses mene tiye anya, ‘Laban Kindrei kameh tutuni ndramak ari badu bolo aha kameh asahan propet taha. Iy kameh suni iy i le buku iy mene suni jo. Ya eme aha badeh, kanuhun sahou tan mari iy asehek i taha.
ACT 3:23 Ya are lau banuhun bohon bwe, badeh kameh tikahei iy eme len ta bolo lau tan.’
ACT 3:24 “Handru labai, iri propet kabatana Samuwel eme, eme taku dah badeh, mari asehek nyala le len doh.
ACT 3:25 Ya eme aha dah, badeh, lundriye iri propet ta sahou randra le mene Kindrei amekes hawe tubu aha Abraham i buku doh: ‘Na lundriyem oro le kameh, jo kameh edeu nyosowan i la-u iri lau mari badu munyak.’
ACT 3:26 Na len Kindrei tutuni lohowan tan, iy suni iy ewek taha bwena ta adeu nyosowan ewek la-u aha, ta amekes aha badeh, katubuni kona aha ki tiri kandriyen ndra-in.”
ACT 4:1 Pita uru Jon asehek sahou i tiri lau kahis le badeh, iri pris hawe tinan ta ndrokei ta asiu tinan ta Kindrei hawe iri Sadusi badeh, ame hawe uru.
ACT 4:2 Ya ndrine iri badeh, ibolosen i toro aposel. Tasah, oro badeh, leheya iri lau ta nyala Jises Krais ndramak ndrame awas ja ta imek tan, eme ma iri lau mari ale kameh winiyan amak ame awas ja ta imek tiri.
ACT 4:3 Eme iri anya katehei uru a ta mada sahou, arile ndra mirihik ta an i andri. Eme ma iri tawi Pita uru Jon ma atehei uru a bolo kou, andrei ben ari.
ACT 4:4 Arile, iri lau solo-an anuhun sahou turu ma iri atehei budon tiri handru i ta aliy. Ya, eme sebenei iri ma kane iri badeh, i sola asahan lamawa (5,000).
ACT 4:5 Eme na len ari ja badeh, iri lau ta atondrok, hawe iri lau-en, hawe iri lau ta leheya kandriyen malen tiri Juwis atukum ame Jerusalem.
ACT 4:6 Iri lau rayah ta lundriye iri pris badeh, are aliy. Ya Anas tinan tiri pris hawe Kayapas oro lau tan. Jon hawe Aleksandra badeh, ado aliy ale.
ACT 4:7 Eme iri kuhi Pita uru Jon ala ales are mada iri ma iri ndremenya uru, “Na boto-on ma hawe nyara are handru, ah amekes iri lahou dah?”
ACT 4:8 Eme Pita idih na Malawin Ndrabun badeh, ma iy tiye i tiri, “Ado lau ta atondrok, hawe ado lau-en tiri lau!
ACT 4:9 I buku none ado kandremenya aso na dah, ta lahou mwasin aso amekes i ta ndramak badan imek ma kalelen iy kamwenen i buku sah,
ACT 4:10 idah kameh, ado ma hawe iri lau badu Isra-el katanan ta ndramak ales udu mada ado ndramwenen dah badeh, na boto-on ta nyara Jises Krais badu Nasaret. Iy mene ado atahi iy i bada kei tondreh ma iy imek. Ano Kindrei mete-ei iy amak eme awas ta imek tan.
ACT 4:11 Iy badeh, Jises i buku ‘bek, ado lau ta atah asiu bwale ado, na dah, iy ndrasahan kati ndru ta ka-u asiu bek.’
ACT 4:12 Taha badeh, winiyan batakalahei ari seben bare ta ari lau ja bwe; tasah ari lau udu baha kandrah ja kada-ah atehei iy ki nyara seben tataha bwe.”
ACT 4:13 Eme oro anyolom Pita uru Jon badeh, banoh se bwe, uru abadok handru. Ma oro atanan uru badeh, mene bakohok tanan tinan bwe, uru badeh lau badu kon laleyah. Eme ya mani oro atur, ma oro atanan, ta uru lau doh mene badu hawe Jises.
ACT 4:14 Eme oro badeh, basehek randra sahou bala bada uru bwe. Tasah, iy ndramak mene uru mesekei iy amwenen badeh, ales ere hawe Pita uru Jon are mada oro mari.
ACT 4:15 Eme oro badeh, tiye iri lau ta ndrokei katiyani Pita uru Jon ka len ta mada iri kansol, ya eme oro atilik nyala oro,
ACT 4:16 “To kamekes sasah handru ki turu lau kede-eh bah? Iri lau mari manyah ado Jerusalem badeh, ndratanan kalem mwasin uru amekes. Ya eme to winiyan babisiniy bwai.
ACT 4:17 Arile, san le doh badeh, to kabwidi lahou dah saseker badeh, to katiye uru badeh, ka-i ta asehek nyara iy ndramak doh.”
ACT 4:18 Ano oro luhi uru ame bolon ja badeh, tiye i turu sasehek sahou ma saleheya boto-on ta nyara Jises ja, ndri-iy ai.
ACT 4:19 Arile, Pita uru Jon anya, “Ado kanone kaseleya ki tado le se. Mwasin ta mada Kindrei ta aso kanuhun boho ado deh, bwe-em kanuhun boho Kindrei?
ACT 4:20 Ya aso kameh winiyan bandru-uk ta asehek lakou aso ndranyolom na mada aso, ma anuhun na ndranye aso amwenen bwai.”
ACT 4:21 Eme oro kansol nohowa oro abadok le gwek, ma tiye uru au. Oro badeh, winiyan badeu maha-an bala turu bwe, tasah iri lau mari atudun le Kindrei ta lahou tinan mene uru amekes.
ACT 4:22 Jaha ta ndramak nane amwenen badeh, sakalawi hanoh (40).
ACT 4:23 Eme oro tiye uru ame len badeh, ala hawe oro lau turu amwenen, ma asehek nyala oro ta lakou mari, oro tinan tiri pris hawe oro lau-en tiye i turu.
ACT 4:24 Eme oro anuhun badeh, oro asore boho oro i le se i loken, asolom i ta Kindrei. Eme oro anya, “Laban Kindrei, ou le mesekei kandrah ma munyak hawe ndras ma hawe lakou mari udu bahandran ma udu bwele-en.
ACT 4:25 Ou mene asehek sahou na Malawin Ndrabun edek boho lohowam, tubu ahi Debit anya: ‘I buku sah iri lau badu leheleh abolosen le gwek? Ya i buku sah iri lau atilik budon labwe?
ACT 4:26 Iri kabin badu munyak lowosa iri, ma hawe iri lau ta atondrok atukum a se amekes bahun i ta Laban hawe ndramak ta seben tan iy suni iy eme.’
ACT 4:27 Idoh mene handru, Herot hawe Pontiyus Pailat atukum a hawe iri lau badu leheleh ma hawe iri lau badu Isra-el, badu bolo kon tinan dah amekes budon ta adai Jises. Iy badeh, lohowan tam ndrabun ou mene suni iy eme ta amekes gok tam.
ACT 4:28 Oro amekes doh badeh, in hamon le ta budon ma seken tam, ou ndrasehek.
ACT 4:29 Abo, Laban, na dah badeh, ou anuhun iri anya kanohowa aso, arile ou bwidi aso lohowam kabadok ta asehek sahou tam.
ACT 4:30 Talasei minem kamekes lau kamwenen ma kamekes kalem mwasin na boto-on ta nyara lohowam ndrabun, Jises.”
ACT 4:31 Oro asolom ano, kon nane oro atukum are aliy dah, totoreh. Ma eme oro mari badeh, adah na boto-on ta Malawin Ndrabun ma oro abadok ta asehek sahou ta Kindrei.
ACT 4:32 Eme iri lau ta Kindrei, budon tiri hawe ndrine iri i le ari. Iri mari badeh, bamekes ndrakok bala ta sanuw tiri bwe. Arile, iri mari badeh, anyohan lakou tiri, i tiri ari ari.
ACT 4:33 Eme oro aposel asehek sahou ta nyala amak eme awas ja ta Laban Jises na boto-on ta Kindrei. Ya eme Kindrei apwai nyosowan badeh, i la-u iri mari.
ACT 4:34 Eme iri ari ari badeh, bandriliu ta lakou bwe. Ya len rayah, oro lau heh, munyak toro udu aliy hawe asiu toro udu aliy badeh, adeu i ta sisih.
ACT 4:35 Ya luk ta lakou nane oro asih doh badeh, oro atiye ili hawe oro aposel. Ano oro apou i toro lau heh nane, lakou bwe.
ACT 4:36 Eme Josep badeh, badu boho kamen ta Libai, adeu iy udu Saipres, ya oro aposel badeh, aloh iy Banabas (moson “ndramak ta edeu tanan mwasin.”)
ACT 4:37 Iy eme atehei munyak tan i ta sisih. Eme iy andrei luk badeh, atehei i mine oro aposel.
ACT 5:1 Ya eme ndramak ari nyaran Ananayas uru udun Sapira ale atehei munyak turu i ta sisih.
ACT 5:2 Ya uru tanan, uru badeh, tone luk rayah, ya rayah le uru atehei i mine oro aposel.
ACT 5:3 Ano Pita tiye i ta Ananayas anya, “I buku sah handru tama balik Satan ewek ndrinem ma mesekei ou wasai Malawin Ndrabun. Ya eme ou tone luk ranah mene ta munyak ou atehei i ta sisih.
ACT 5:4 Ou tanam ou basihinei bala ta luk bwe le badeh, idoh tam. Ano ou andrei luk ta aliy i tam le ai. Saba lakou mesekei ou, ya ou amekes kandriyen doh? Ou badeh, bawasai lau bwe, arile ou badeh, wasai Kindrei.”
ACT 5:5 Eme Ananayas anuhun le badeh, iy taku i andri ma imek. Eme iri lau anuhun badeh, iri anoh andra-i labai.
ACT 5:6 Ano iri loweu ame su-i iy ma bwese iy eme len ma iri ala ahi iy.
ACT 5:7 Hamon ta awa taloh ano badeh, udun eme ja, ya iy bala tanan sasah nane ndrasahan bwe.
ACT 5:8 Eme Pita ndremenya iy anya, “Idoh le kabwai, ta sihine munyak mene ah udum andrei ta munyak ta ah ai?” Eme iy anya, “Ehe, aliy le badeh.”
ACT 5:9 Eme Pita tiye anya, “I buku sah ah udum anya kanone boto-on ta Malawin Ndrabun ta Laban? Ou ndranuhun! Iri lau ta bwese udum ma a-eh iy asah barame ado madasan kada-ah. Ya iri kameh bwese ou a manan ale.”
ACT 5:10 Eme na le liliy badeh, iy taku i andri udu kati Pita ma imek. Ano iri lau loweu ame anyolom iy ndramak, eme iri bwese-ei iy ili ma ahi iy udu ka-u udun.
ACT 5:11 Eme iri lau ta Kindrei ma hawe iri lau mari anuhun badeh, iri anoh andra-i labai.
ACT 5:12 Eme oro aposel badeh, amekes lahou tinan hawe kalem tinan udu bolo iri lau. Ma hawe iri lau mari ala atehei budon tiri in ta Kindrei badeh, atukum ame bahandra beleheleh ta Solomon udu loboho asiu tinan ta Kindrei.
ACT 5:13 Ya eme iri lau rayah badeh, bala bolo oro lau ta Jises bwe. Iri lau badeh, masiye oro, arile iri anoh ta atukum hawe oro.
ACT 5:14 Arile, bwai, iri lau solo-an labai badeh, atehei budon tiri handru ili le ta Laban, ma andromwei iri hawe iri lau tan nane.
ACT 5:15 Eme ta katin le doh badeh, iri lau bwese iri lau abo sik ala bolo kon tinan. Ma adeu iri an bada sau hawe ndrou ta abe-en i buku none Pita kedek keme badeh, korohan le ki tiri.
ACT 5:16 Eme iri lau solo-an badu kon tinan mirihik ta Jerusalem atiye iri lau tiri abo sik ma hawe malawin ndra-in udu la-u iri ame le hawe oro. Eme iri mari badeh, amwenen ja.
ACT 5:17 Ano, tinan tiri pris hawe oro lau badu hawen, oro badu hawe oro Sadusi, mada oro alikis oro aposel, tasah iri mwan ma badih mara-ei badeh, sekesek labai ta gok toro aposel.
ACT 5:18 Eme ma iri ala tawi oro aposel ma atehei oro ala bolo kou ta ndrahu lau mari.
ACT 5:19 Arile, na ben badeh, angelo ta Laban eme sihi iri madasan ta i bolon asak ma kuhi oro ame len,
ACT 5:20 ya iy tiye oro anya, “Ado kala bolo asiu tinan ta Kindrei katiye nyala lau mari ta sahou mari ta nyala manyah ha-un ta Kindrei.”
ACT 5:21 Eme na mandraben handru badeh, oro ala bolo asiu tinan ta Kindrei i buku le angelo mene ndrasihidiy toro, ma oro leheya iri lau. Eme tinan tiri pris hawe oro lau badu hawen asahan, eme oro luhi oro kansol ma hawe oro lau-en mari badu Isra-el ame, ya iri atilik nyala iri. Ano oro suni sahou ili bolo kou tiye oro aposel kame kales kado mada oro kansol.
ACT 5:22 Arile, oro lau ta atondrok asiu ta Kindrei ala asos bolo kou, iri batou oro aposel bado bolo kou doh bwe. Eme oro a hamon badeh, asehek nyala oro,
ACT 5:23 “Aso ala asos, ma anyolom iri kou badeh, ndrahas, se lakou babwidiy bwe, ma hawe oro lau ta ndrokei are aliy atondrok. Arile, aso sihi kou anya kabolon badeh, oro bado aliy bwe.”
ACT 5:24 Eme oro anuhun sahou doh badeh, ya budon ta tinan ta ndrokei ta asiu ta Kindrei, hawe iri tinan tiri pris lomondra anya sasah kameh asahan bah?
ACT 5:25 Ano ndramak ari eme badeh, anya, “Ei! Oro lau mene, ado atehei oro ala bolo kou badeh, ales areu asiu tinan ta Kindrei kodo-oh leheya iri lau mwan ma badih.”
ACT 5:26 Eme oro batun hawe oro tinan ta ndrokei ala badeh, andrei oro aposel dah. Oro badeh, baseheya oro boto-on bwe, tasah oro anoh, kora-on iri lau korowei oro na bek.
ACT 5:27 Eme oro tiyani oro aposel ame atehei oro ales are mada iri kansol, eme ma iri pris ndremenya oro i buku doh,
ACT 5:28 “Aso tiye sahou boto-on boto-on ndrawek tado, ta ado saleheya boto-on ta nyara ndramak badeh, ja ai, ndri-iy labai. Arile, ado badeh, ndramesekei bolo kon Jerusalem na leheya tado, ma ado anya kamekes aso kabwese maha-an ta ndraye ndramak badeh.”
ACT 5:29 Eme ma Pita hawe oro aposel rayah tiye i hamon anya, “Aso badeh, winiyan banuhun ari ndramak bwe, aso anuhun le Kindrei, kabwai!
ACT 5:30 Kindrei ta tama aso mene mete-ei Jises udu ta imek eme loken. Iy mene ado adai iy imek udu bada kei tondreh.
ACT 5:31 Kindrei eme tutuni iy ere loken udu loboho limen salin, ma iy asahan kabin ma ndramak ta seben. Ma iy badeh, leheya madasan ta ado winiyan tubuni ndrine ado, ma iy winiyan sikine karei ma lomondra ndra-in tiri Isra-el.
ACT 5:32 Ya, eme aso dah badeh, anyolom lakou mari doh, na mada aso amwenen. Ma hawe Malawin Ndrabun ta Kindrei ale bwidiy aleu iri lakou doh. Kindrei badeh, winiyan edeu Malawin i tare lau, buku none iy anuhun bohon.”
ACT 5:33 Ya eme oro kansol anuhun sahou doh badeh, ma bwidi ndrine oro irih mara-ei, ma oro anya kadai oro aposel kamak.
ACT 5:34 Arile, ndramak ari nyaran Gamaliyel, iy tinan tiri, iy badu Parasi, iri beleben iy tinan labai. Iy badeh, ndramak ari ta leheya bolo kandriyen malen, iy ales ere loken bolo iri kansol, ma iy asehek sahou boto-on, ta iri badeh, karuwani mine iri ma oro ka manan sese op.
ACT 5:35 Ano iy tiye sahou i toro kansol anya, “Ado lau badu Isra-el, ado anya kamekes sasah ki toro lau doh badeh, ado kabudon kamwenen bwena op.
ACT 5:36 Len sabe mene ndra-au Tudas asahan, iy amekes iy i buku ndramak ari handru, ya lau ma hanek (400) badeh, a-en hamon tan. Eme iri adai iy imek badeh, iri lau tan aseker, eme ma ari lakou basahan se bwe.
ACT 5:37 Ano, udu hamon tan ja badeh, ndramak ari badu Galili nyaran Judas asahan kabatana len ta ndromondrom kane lau; iy ale aluwi lau solo-an an hamon tan ale. Eme iri adai iy imek ale, ma iri lau tan aseker.
ACT 5:38 Ya, jo katiye tado kamwenen: Oro lau dah badeh, ado karuwani mine ado ki-iu toro! Ya oro ka-au! Ki buku none budon dah i buku none tiri lau laleyah, badeh kameh winiyan bala bala bwe.
ACT 5:39 Arile, buku none budon doh ta Kindrei handru eh, idah kameh ado winiyan batobohei oro bwe; ya ado kameh amekes bahun i bada Kindrei le.”
ACT 5:40 Eme ma sahou tan badeh, tubuni budon toro. Eme iri luhi oro aposel ame bolon, ma ubwi oro na malou sakabuk i bek. Ano iri tiye sahou i toro, hamon oro sasehek sahou na nyara Jises ja ai, ndri-iy, ma eme iri tiye oro au.
ACT 5:41 Eme oro aposel ame len ta mada iri kansol ma sekesek tinan labai ta Kindrei badeh, ndranyulumwi oro badeh, mwasin labai ta bwese maha-an ta nyara Jises.
ACT 5:42 Eme len ari buku ari udu bolo asiu lohalak ta Kindrei ma i asiu ra-em i ra-em, oro badeh, baruwani ta leheya ma ta tiye sahou mwasin ta nyala Jises bwe. Oro asehek boto-on labai ta Jises badeh, Mesaya.
ACT 6:1 Na len doh badeh, kane iri lau nane a-en hamon ta Jises ma atehei budon tiri handru i ta Kindrei i sola le ai. Eme ma iri Juwis nane asehek boho iri Grik badu bolo iri lau ta Kindrei badeh, tebelese hawe iri Juwis rayah nane asehek boho Aramek. Iri Grik anya iri badih nyau tiri badeh, bakohok nyamon sola bwe.
ACT 6:2 Eme oro aposel ma ronoh la-uh ame luhi iri lau ta Kindrei ame, ma tiye i toro i buku doh, “Aha kanuhun, gok ta apou nyamon ma luk ili tiri mwan ma badih badeh, sokei gok taso, ma idoh badeh, bamwenen bwe. Gok taso handru badeh, ta atiye sahou ta Kindrei le kabwe.
ACT 6:3 Ado nadu tine, ado badeh, kalebelei oro lau ma ndro taloh badu bolo ado. Oro lau doh badeh, kadah na Malawin Ndrabun hawe tanan ta aleben budon. Ya to kameh atehei lahou doh kameh i kani oro.
ACT 6:4 Ya aso badeh, budon taso ki le ta salom ma katiye sahou ta Kindrei.”
ACT 6:5 Eme iri mari badeh, sekesek ta budon doh. Eme iri lebelei Stiben, ndramak idih na Malawin Ndrabun hawe ndramak ta budon handru; ale hawe Pilip, Prokorus, Nikanor, Timon, Parmenas, hawe Nikolas badu Antiyok. Iy mene badu Juwis bwe, arile udu ja, iy in hamon ta kandriyen tiri Juwis.
ACT 6:6 Eme iri tiyani oro lau doh ala hawe oro aposel. Eme oro adeu nyosowan i la-u oro ma asolom oro.
ACT 6:7 Eme ya sahou ta nyala Kindrei badeh, aseker. Eme kane iri lau badu Jerusalem atehei budon tiri handru i ta Kindrei i sola suwi suwi. Ma iri pris solo-an badeh, anuhun sahou ma atehei budon handru.
ACT 6:8 Stiben badeh, Kindrei nyosowani iy tinan labai, ma atehei boto-on i tan ta amekes kalem tinan hawe amekes lahou tinan, udu bolo iri lau.
ACT 6:9 Arile, iri lau rayah suri iri badeh, andresei iy. Oro lau doh badeh, badu asiu ta atukum tiri Juwis, ya oro lau nane doh badu boho kamen iri aloh, “Kamen tiri salibah.” Ya, iri lau doh badeh, iri Juwis badu kon tinan Aleksandriya ya kon tinan Sairini. Oro rayah ja badeh, oro Juwis badu kon munyak tinan Silisiya hawe badu bada kon munyak tinan Esiya atukum hawe oro ta tebelese hawe Stiben.
ACT 6:10 Arile, Malawin Ndrabun badeh, edeu budon mwasin i ta Stiben asehek sahou, ya oro winiyan basehek sahou bala tan bwe.
ACT 6:11 Ano, oro tamarei lau rayah tiye boho oro anya, “Aso badeh, anuhun Stiben asehek sahou ndra-in i bada Moses hawe Kindrei.”
ACT 6:12 Eme oro mesekei ndrine iri lau hawe ndrine iri lau-en ma hawe iri Juwis ta leheya kandriyen malen towodau. Eme iri tawi Stiben ma tiyani iy ili hawe iri kansol.
ACT 6:13 Eme iri amekes budon laleyah ma iri wasai anya, “Iy lau doh badeh, asehek sahou ndra-in i bada kandriyen malen hawe kon ndrabun.
ACT 6:14 Aso badeh, anuhun iy tiye anya, ‘Idah kameh, Jises badu Nasaret kameh tokosei kon dah ma hawe tobolowe kandriyen tataha mene Moses edeu eme ta taha.’”
ACT 6:15 Eme oro manyah ado bolo oro kansol anyolom Stiben boto-on ma anyolom bwili Stiben anya i buku ari angelo.
ACT 7:1 Ano pris tinan ndremenya Stiben anya, “Ou amekes iri lakou doh, handru?”
ACT 7:2 Ya, eme Stiben asumon anya, “Wurah lomada ado nadu tine, ma hawe ado tama, ado kanuhun jo! Kindrei badu bolo lomadan mene asahan hawe tubu taha Abraham na len iy mene manyah udu Mesopotemiya mwena, ano iy barala baramanyah barado Haran.
ACT 7:3 Eme Kindrei tiye i ta Abraham anya, ‘Ou ruwani kon tinan tam hawe ou ruwani iri lau tam, ya ou adek au ala kon kameh jo leheya i tam.’
ACT 7:4 “Eme ma iy ruwani kon munyak Kaldiya, iy eme badeh, manyah udu Haran. Iy udu gwek winiya taman imek, ano Kindrei suni iy ili manyah udu kon ado areu aliy dah.
ACT 7:5 Ma iy badeh, badeu se ranah munyak bala tan bwe. Arile, Kindrei badeh, tandrakan iy hawe lundriyen oro kameh, iy kameh edeu munyak i tan ma hawe lundriyen oro asahan hamon. Na len Kindrei tandrakan doh badeh, Abraham ari nadun bwe le.
ACT 7:6 Ya eme Kindrei asehek sahou i ta Abraham i buku doh: ‘Lundriyem oro kameh manyah are kon munyak toro amwenen bwe, ma idah kameh, oro asahan bonyo-ou, winiya jaha ma hanek (400). Ma iri lau ta atondrok oro kameh amekes ndra-in i toro.
ACT 7:7 Ano, jo kameh edeu maha i la-u iri kon munyak nane adeu oro a bonyo-ou, ma jo kameh kuhi oro ame hamon ame kon dah atudun jo ja.’
ACT 7:8 Ano, Kindrei amekes sahou randra le ta nyala asan ku-i lau i ta Abraham. Eme Abraham asahan tama Aisik, ma tinen atehei iy eme len ano. Len tan asahan ndru la-uh badeh, taman Abraham sani ku-in. Ano Aisik badeh, atehei Jekop, ya Jekop asahan tama tubu taha oro ma ronoh la-uh.
ACT 7:9 “Eme nadu tine Josep oro ma ronoh ari badeh, mada oro alikis iy, ma oro atehei iy i ta sisih i buku bonyo-ou ili Ijip. Arile, Kindrei udu hawen,
ACT 7:10 ma sebenei iy ta bolo maha-an mari. Eme iy atehei budon mwasin i ta Josep ma mesekei iy asahan mwasin, mesekei Parou, kabin badu Ijip sekesek. Eme ma iy mesekei Josep asahan tinan ta atondrok kon Ijip ma iri lakou badu bolo asiu ta kabin ale.
ACT 7:11 “Ano, kon mari badu bolo Ijip hawe Kenan badeh, nyamon bwe. Ma edeu maha-an tinan labai, ma tubu taha oro, ari madasan ta takaleh nyamon bwe.
ACT 7:12 Ya, eme Jekop anuhun Ijip badeh, nyamon udu aliy, eme iy suni tubu taha oro ala selesen bwena op.
ACT 7:13 Ano oro ala san lusan ja badeh, Josep baranyowonya, iy are lau handru barala ta nadu tinen oro ai. Ma Parou barala tanan nadu tine Josep oro ai.
ACT 7:14 Ano hamon ta idoh badeh, Josep suni sahou i ta taman Jekop hawe lundriyen oro mari ma ndro tonoh limeh (75) kame.
ACT 7:15 Ano Jekop hawe lundriyen oro mari au ala Ijip. Ya eme iy hawe tubu taha iri amak ado loboho doh.
ACT 7:16 Ya a-eh iri mari badeh, a hamon ja ala Sekem ala lek mene Abraham sihine i ta nadu Hamor oro na luk rayah.
ACT 7:17 “Eme ya suniya len Kindrei anya kamekes tandrakan tan i ta Abraham kasahan handru badeh, kane iri lau tataha ado Ijip i sola le gwek.
ACT 7:18 Ya eme kabin ari asahan ja atondrok Ijip. Iy badeh, tanan Josep se bwe.
ACT 7:19 Iy eme wendreyani iri lau tataha, ma amekes kandriyen ndra-in handru i ta tubu taha iri. Iy indrek iri badeh, kakeh nadu iri ma borolak le kamak ka-au.
ACT 7:20 “Na len doh badeh, tine Moses atehei iy eme len. Iy badeh, konen mwasin labai ma Kindrei aseken iy handru. Udu bolo bun ma taloh badeh, atondrok iy udu le asiu ta taman.
ACT 7:21 Ano na len iri atehei iy eme manan badeh, nadu Parou badih bwese-ei iy eme loken ma nyowo-ei iy i nadun.
ACT 7:22 Eme Moses badeh, akohok tanan tinan labai badu Ijip ma iy badeh, asehek sahou nyarahan labai, ma iy amekes lahou tan badeh, irih labai.
ACT 7:23 “Ano jaha ta Moses asahan hanoh (40) badeh, iy ili selesen iri lau tan badu Isra-el.
ACT 7:24 Eme iy anyolom ndramak ari badu Ijip badeh, idi ndramak ari badu Isra-el andra-i labai. Eme Moses suri iy ili badeh, aseben lau tan badu Isra-el ma iy idi ndramak nane imek.
ACT 7:25 Eme Moses lomondra anya kameh, iri lau tan baraseleyani iy, Kindrei suni iy eme ta aseben iri, arile bwe.
ACT 7:26 Ano na len rasan ja badeh, Moses eme, iy anyolom uru lau la-uh badu Isra-el ada uru. Eme iy ili anya katalou uru ma tiye sahou i turu i buku doh, ‘Ah anya kada ah ta sasah? Ah badeh, nadu tine ah.’
ACT 7:27 “Arile, iy ari nane ta amekes bahun bwena atuwi Moses i hamon ma iy tiye sahou nyarahan i tan anya, ‘Are lau atehei ou atondrok ahi hawe suni ou asehek sahou nyarahan eme tahi?
ACT 7:28 Ou anya adai jo ja, i buku none ou na mene adai iy lau badu Ijip mene imek, neh?’
ACT 7:29 Eme Moses anuhun sahou doh badeh, ma iy atobwak iu ili Midiyen, i buku lau badu leheleh manyah udu kon doh. Ya eme nadun mwan la-uh asahan.
ACT 7:30 “Iy udu gwek jaha ma hanoh (40) ano badeh, angelo ari asahan hawen udu bolo jih anya laleyah udu ta kei udu kon lomale an, udu mirihik ta mandrei Sainai.
ACT 7:31 Eme Moses anyolom jih doh badeh, manin atur, eme iy edek ili mirihik anya katou kamwenen. Eme iy anuhun boho Laban aloh anya,
ACT 7:32 ‘Jo dah badeh, Kindrei ta tamam oro. Jo Kindrei ta Abraham, ta Aisik, ma ta Jekop.’ Eme Moses totoreh, ma inoh ma madan bala loken bwe.
ACT 7:33 “Ano Laban tiye i tan anya, ‘Ou tolowei ku-i katim ki-iu, kon ou ales areu aliy badeh, turuwen.
ACT 7:34 Jo badeh, ndranyolom sisi-in ndra-in labai tiri lau tek are Ijip. Jo badeh, ndranuhun ndrelen tiri, ya eme jo ndrame andri dah ta aseben iri kame len kado mwasin. Abo, ou suri ou ya jo kasuni ou ala hamon ala Ijip ja.’
ACT 7:35 “Iy Moses dah le mene adeh iri badeh, asehek na boho iri anya ‘Are lau atehei ou atondrok ahi ma asehek sahou nyarahan eme tahi?’ Iy le badeh, Kindrei suni iy ili atondrok iri, ma ta akohok iri ame len na seben ta angelo mene asahan hawen udu bolo jih.
ACT 7:36 Iy badeh, kuhi iri ame len ta Ijip ma iy amekes kalem tinan tinan udu Ijip, udu gwa ndras aloh Retsi, ma iy sariye iri ado kon lomale an, jaha ma hanoh (40).
ACT 7:37 Iy Moses le doh mene adeh tiye i tiri lau badu Isra-el anya, ‘Kindrei kameh suni propet ari ewek taha i le buku jo badu bolo ado amwenen.’
ACT 7:38 Iy le badeh, mene udu ndrokowa iri lau badu Isra-el ado kon lomale an udu hawe tama taha iri. Ma iy udu hawe angelo mene asehek sahou i tan udu mandrei Sainai, ma iy akohok sahou awas ta asehek nyala taha.
ACT 7:39 “Arile, tubu taha iri badeh, baseken iy bwe, ma iri tikahei iy ma udu ndrine iri badeh, iri lomondra ili hamon ja ili Ijip.
ACT 7:40 Ya eme iri ame tiye Aron anya, ‘Ou amekes rayah kindrei ya iri ka-en bwena ta to ja. Iy lau Moses ta sariye to ame dah badeh, to bala tanan sasah ndrasahan tan udu mandrei Sainai kodo-oh bwe!’
ACT 7:41 Na len doh badeh, iri mesekei sukumada lakou ari asahan i buku nadu bulumakau. Eme iri atiye lakou i nyara salom eme ta asun i tan, ma iri amekes tine nyamon ta atudun lakou iri amekes na mine iri doh.
ACT 7:42 Arile, Kindrei atehei konan i tiri ma mesekei iri ala atudun iri lakou badu bada kandrah. Idoh amwenen le ta sahou mene torowenei udu bolo tarou tiri propet i buku doh: ‘Aha Isra-el, na len aha mene ado kon lomale an udu bolo jaha ma hanoh (40), aha atiye lakou i nyara salom eme tek deh bwe?
ACT 7:43 Bwe handru! Asiu balei mene aha bwese, tek bwe, ta kindrei ta wasai Molek le, ma sukumada kei i buku ndrau ta kindrei taha ta wasai aloh Repan; oro sukumada kei doh ado asah, ta aha atudun iri. Ya eme idah kameh, jo kameh tikahei aha au a len ala kon munyak tinan Babilon.’
ACT 7:44 “Iri tubu taha iri badeh, mene kuhi asiu balei ta Kindrei ma sahou handru tan udu bolon mirihik tiri, udu kon lomale an. Amekes doh mene in hamon ta boho Kindrei tiye i ta Moses, amekes in hamon ta malawin Moses ndranyolom.
ACT 7:45 Ano udu hamon badeh, tubu taha iri bwese-ei udu mine tama iri, ma an hamon ta Josuwa, ma akohok iri kon munyak tinan mene Kindrei takahei iri au. Eme asiu balei doh udu gwek, eme taku len ta Debit asahan.
ACT 7:46 Eme iy aluwi budon ta Kindrei badeh, aseken iy ma ndremenyani Kindrei i buku none iy kaseken, badeh, iy katahi ra-em asiu ki asumwe Kindrei ta Jekop.
ACT 7:47 Arile bwe, idoh badeh Solomon labai tahi asiu i asumwe Kindrei.
ACT 7:48 “Arile bwe, Kindrei udu bwele-e kindrei mari badeh, bamanyah bado asiu ala lau amekes na mine iri bwe. I buku none propet ari asehek i buku doh,
ACT 7:49 ‘Kandrah badeh, ndrahu manyah tek labai, ma munyak badeh, ndrahu katik. Ma Laban anya, saba asiu handru ado anya kamekes keme asumwek? Ya ndrahu amunyau tek kameh kudu heh bah?
ACT 7:50 Sebwe, jo bamekes lakou mari bwe, nadeh?’
ACT 7:51 “Aha badeh, ta tebelese handru en! Ma ndrine aha badeh, ndradah na kindrei ta wasai i buku iri lau tana iri Kindrei handru bwe, ma ndranye aha ndralun ma aha winiyan banuhun sahou handru ta Kindrei, bwe! Aha badeh, i le buku none tama aha oro mene. Aha banuhun sahou ta Malawin Ndrabun bwe!
ACT 7:52 Are propet asahan bwena mene, ya tama aha oro mene badai iy bwe? Oro mene adai iri propet mene asehek ta nyala ndramak mwasin handru kameh barasahan. Ya eme na dah, iy ndrame, arile aha badeh, atehei sa-oh ma adai iy imek.
ACT 7:53 Aha mene andrei batanau malen udu mine iri angelo, arile aha ba-en hamon ta aliy bwe.”
ACT 7:54 Eme na len iri anuhun sahou doh badeh, iri abolosen handru ma lihi iri asenyer i tan.
ACT 7:55 Arile Stiben badeh, idih handru na Malawin Ndrabun, ya eme iy suri madan ili bolo kandrah, ma iy anyolom lomadan ta Kindrei, ma anyolom Jises ales udu loboho lim salin ta Kindrei.
ACT 7:56 Eme iy anya, “Ado kanyolom! Jo anyolom bolo kandrah asak ma jo anyolom Nadu Ndramak Awas ales udu lim salin ta Kindrei.”
ACT 7:57 Eme iri arah ma sokei ndranye iri na lime iri, ma iri sakaliye ala hawen ma tawi iy,
ACT 7:58 ma aluwi iy eme len ta kon tinan, ma orou iy na bek. Ya iri lau nane amekes sahou wendreya, ta adeu Stiben i ta sahou, badeh, talou awin tiri iu, ya iri akahei ili udu kati iy ndramak loweu ari, nyaran Sol.
ACT 7:59 Iri badeh, abo gok le ta orou Stiben na bek ai, ta adi iy kimek. Iy eme asolom bohon i tinan ili ta Laban i buku doh, “Laban Jises, ou andrei malawik ai.”
ACT 7:60 Ano badeh, iy atehei bwili ndru-un udu andri, ma iy aloh i tinan i ta Kindrei i buku doh, “Laban, balem kamani kandriyen ndra-in toro nane amekes eme tek doh.” Iy asehek sahou doh ano le badeh, ma iy imek.
ACT 8:1 Na len doh Sol badeh, udu aliy anyolom ale ma iy tiye iri ta kadai Stiben kimek. Eme na le bolo len doh badeh, iri lau mwan ma badih nane manyah ado bolo kon tinan Jerusalem amekes ndra-in labai, ili tiri lau nane atehei budon tiri handru in ta Jises, eme ma iri akohok sisi-in laba tinan labai. Eme ma iri atobwak au ala loboho kon munyak tinan Judiya hawe Samariya. Arile, oro aposel le badeh, batobwak bwai.
ACT 8:2 Eme iri lau ta Kindrei rayah ame aden ndranye Stiben. Ano iri ala ahi iy.
ACT 8:3 Iy ndramak Sol doh badeh, edek ta idi iri lau nane atehei budon tiri handru i ta Kindrei. Iy edek ili asiu ra-em ili ra-em takaleh ma aliu iri mwan hawe iri badih ame, ma adeu iri ala bolo kou.
ACT 8:4 Iri lau mwan ma badih nane atehei budon tiri handru in ta Jises badeh, atobwak ala ado bolo kon mara-ei, ma iri atiye sahou mwasin ta nyala Jises ili loboho heh iri adek ma ala ado aliy.
ACT 8:5 Pilip badeh, ili andri bolo kon tinan ari badu loboho Samariya, atiye sahou ili tiri lau ta nyala Jises, ta iy ndramak doh Krais, iy mene Kindrei ndraleheyani iy eme ta aseben taha mari.
ACT 8:6 Eme na len iri lau anuhun sahou ta Pilip asehek ma anyolom kalem iy amekes badeh, ma iri atehei ndranye iri irih labai ta anuhun sahou iy asehek.
ACT 8:7 Ma hawe iri malawin ndra-in badeh, anyar ma ame len ta ndramak, ma hawe lau kati iri imek, ma bada iri imek badeh, mara-ei amwenen ja.
ACT 8:8 Ya iri lahou tinan ta Kindrei eme bolo kon tinan doh badeh, ma bwidi iri lau mara-ei sekesek laba tinan labai.
ACT 8:9 Ya ndramak ari nyaran Saimon udu kon tinan doh ale badeh, amekes balahak san solo-an solo-an ndra-au, ya amekes iri lau mari badu loboho Samariya, boho iri asak ta aliy. Iy badeh, atudun iy anya, iy le kabwai.
ACT 8:10 Ya eme iri lau mari ma tinan ma bwisik badeh, atehei budon tiri i tan anya, “Iy ndramak dah badeh, iy Kindrei, ma boto-on tan ili labai.”
ACT 8:11 Iri lau badeh, an hamon tan, tasah iy badeh, bwidi boho iri asak san solo-an labai, ma amekes kalem luluwen labai.
ACT 8:12 Arile, na len Pilip tiye tiri ta sahou mwasin ta nyala tondrok ta Kindrei ma hawe nyara Jises Krais, iri mwan hawe iri badih badeh, atehei budon tiri in ta sahou ta Pilip, ma alomwa iri.
ACT 8:13 Ma Saimon ale atehei budon tan handru in tiri sahou doh, ya eme alomwa iy ale. Eme ma iy in hamon ta Pilip ili kon rakon, rakon, ma anyolom iri kalem tinan Pilip amekes ma bohon asak.
ACT 8:14 Eme na len oro aposel ado Jerusalem anuhun iri lau badu Samariya badeh, ndrandrei sahou ta Kindrei, eme oro suni Pita uru Jon ala anyolom oro.
ACT 8:15 Eme uru ala asahan hawe oro lau mwan ma badih nane, uru asolom oro ta oro kakohok Malawin Ndrabun,
ACT 8:16 tasah Malawin Ndrabun badeh, bala la-u oro ari bwe le; oro badeh, alomwa oro na nyara Laban Jises le.
ACT 8:17 Ano Pita uru Jon atehei mine uru i la-u oro, ma oro adah na Malawin Ndrabun.
ACT 8:18 Eme na len doh Saimon anyolom oro akohok Malawin Ndrabun i san ta oro aposel adeu lim i la-u oro badeh, iy anya kedeu luk ki ta Pita uru Jon ta asih boto-on turu nane doh.
ACT 8:19 Eme ma iy tiye turu i buku doh, “Ah katehei boto-on badeh, keme tek ale, ya i buku none jo kedeu minek ki la-u are ki la-u are, iri kakohok Malawin Ndrabun ale.”
ACT 8:20 Eme Pita anya, “Ou ndrandra-i kede-eh, ou abudon anya, ou winiyan sihinei ndramas ta Kindrei dah na luk tam badeh? Arile, bwe! Ou ma luk tam badeh, kameh amak.
ACT 8:21 Ou badeh, balem bahas ta lahou dah bwe, tasah ndrinem badeh, bamwenen ta mada Kindrei bwe.
ACT 8:22 Ou tubuni ndrinem ta kandriyen ndra-in badeh, ya ou amekes salom ki ta Laban. Sebwe iy winiyan mani budon ndra-in marakon udu ndrinem badeh ano iu.
ACT 8:23 Tasah, jo anyolom ou badeh, ndradah na iri madalakis hawe kandriyen ndra-in ndrasebete-ei ou.”
ACT 8:24 Ano Saimon anya, “Ndri-iy! Ah kamekes salom kili ta Laban ta aseben jo, ya eme sasah nane ah ndrasehek badeh, kameh sasahan tek.”
ACT 8:25 Ya uru asehek sasah uru tanan ma ndranyolom udu bada Jises amekes ma asehek sahou ta nyala Laban ano badeh, Pita uru Jon au a hamon ja ala Jerusalem. Ya udu bolo tekedek turu au a hamon badeh, uru atiye sahou mwasin ili kon solo-an badu loboho Samariya.
ACT 8:26 Eme angelo ari ta Laban eme tiye Pilip anya, “Ou ala san ili loboho kum, kon lomale an ala udu Jerusalem i andri ili kon tinan Gasa.”
ACT 8:27 Eme iy edek ili badeh, ndruni ndramak ari badu Itiyopiya. Iy badeh, ndramak ari tinan ta atondrok lakou mwasin mwasin ta kabin badih badu Itiyopiya nyaran Kandasi. Iy badeh, mene ili Jerusalem ta atudun Kindrei.
ACT 8:28 Ano, iy udu san ta ki-iu ki kon ja ai. Ya iy badeh, udu bwele-e sau, ya iri hos aliu iy. Eme iy manyah udu bwele-en badeh, anyolom sahou propet Aisaya mene atorou.
ACT 8:29 Eme Malawin Ndrabun tiye Pilip anya, “Ou ala mirihik ta sau ale iri hos aliu kodo-on.”
ACT 8:30 Ano, Pilip sakaliye ili mirihik ta bada sau nane anuhun ndramak dah aloh sahou badu bolo tarou ta propet Aisaya. Eme Pilip ndremenya iy anya, “Batum aleu ta sahou ou aloh badeh, deh bwe?”
ACT 8:31 Eme iy anya, “Batuk kaleu ta aliy ki buku sah? Ki buku none ari ndramak keme kaleheya keme tek.” Ya eme iy tiye Pilip anya, “Ou ame loke manyah ado hawek, ma aseben jo.”
ACT 8:32 Eme ma, Pilip ili loke hawe ndramak doh, anyolom tarou ta buk ndrabun ranah nane, atorou i buku doh, “Iy badeh, i buku none ari sipsip andrei iy eme len ta adai iy; Iy badeh, i buku none ari sipsip nadu bwisik se balohou bwe na len anya kasan lamin; Iy badeh, randra sahou bwe.
ACT 8:33 Iri atehei iy i andri labai, ma iri atehei iy i ta mada sahou, arile iri balelei iy, ta mada sahou tan bwe, Are lau handru barasihidi saren barala ta lundriyen oro? Tasah iri ndradai iy ndramak.”
ACT 8:34 Eme ma ndramak tinan badu Itiyopiya ndremenya Pilip anya, “Abo, ou tiye tek, are propet handru asehek nyalan dah? Iy asehek iy le deh? Bwe-em iy asehek nyala ndramak ari ja?”
ACT 8:35 Ano Pilip asehek nyalan ta sahou nane iy aloh, ma asehek sahou mwasin ta nyala Jises i tan.
ACT 8:36 Eme uru sakaliye ado san ala badeh, asahan ta gwa rayah, eme ndramak tinan badu Itiyopiya dah anya, “Ou anyolom se, gwa asah idah. I buku sah handru, balomwani jo bwai?”
ACT 8:38 Eme iy tiye oro hos tan aliu sau dah udu rasi. Ano Pilip hawe iy ndramak dah, uru ame andri a gwa, ma Pilip alomwa iy.
ACT 8:39 Eme uru ado gwa ame loken le badeh, Malawin Ndrabun ta Laban kuhi Pilip iu, ya ndramak tinan badu Itiyopiya batou iy ja bwe. Arile, iy ma sekesek tan edek iu ai.
ACT 8:40 Ya Pilip badeh, ili ja asahan Asdot; eme iy ili bolo kon tinan mari atiye sahou mwasin ili ili asahan Sesariya.
ACT 9:1 Na bolo len doh, Sol badeh, alohou ta idi iri lau ta Laban marakon kamak ka-au. Eme ma iy amwenen ili hawe batun tiri pris,
ACT 9:2 anya kalelen iy ta iy katorou rayah la-ukei ta tiye nyala Sol badeh, are lau handru. Ya Sol aseken ta atiye iri la-ukei doh i mine iri tinan ta ndrahu tukum tiri Juwis udu kon Damaskus katanan ta aliy. Ya eme i buku none iy kili kanyolom iri lau mwan hawe badih ta a-en hamon ta San ta Laban ado aliy badeh, iy kakuhi iri kala Jerusalem kala bolo kou.
ACT 9:3 Eme iy edek eme mirihik ta kon Damaskus le badeh, se nawin bwe, sun lomadan labai anya udu kandrah eme andri awudi iy.
ACT 9:4 Eme ma iy atarah i andri bada munyak ma ndranyen anuhun sahou aloh i tan anya, “Sol, Sol, buku sah handru ou anya adai jo?”
ACT 9:5 Eme Sol anya, “Laban, ou are lau badeh?” Eme iy anya, “Jo Jises, na len mari, ou ale anya adai le jo kede-en.
ACT 9:6 Abo, ou suri ou, ya ou ala bolo kon tinan Damaskus. Ma idah kameh ndramak ari eme, tiye tam ta sasah kameh ou amekes.”
ACT 9:7 Ya oro lau nane adek hawe Sol doh badeh, boho oro ihis; oro anuhun nyaro boho ndramak, arile oro banyolom ari ndramak bwe.
ACT 9:8 Sol eme suri iy udu bada munyak eme loken, madan anya kasak badeh, iy banyolom se lakou bwe. Eme iri sirini iy ili Damaskus.
ACT 9:9 Len taloh badeh, iy winiyan batou kon bwe, iy ba-un gwa ma baimon nyamon bwe.
ACT 9:10 Ya udu Damaskus doh badeh, ndramak ari ta Jises udu aliy, nyaran Ananayas. Ya Laban badeh, asahan ta lele, tiye i tan anya, “Ananayas, ei!” Eme Ananayas anya, “Abo, Laban, jo udu kada-ah.”
ACT 9:11 Eme Laban tiye i tan anya, “Ou ales ala asiu ta Judas udu loboho nadu san iri aloh San Ales Le. Ya ou ndremenya oro ta ndramak ari badu Tasus, nyaran Sol. Iy badeh, asolom.
ACT 9:12 Udu bolo salom ta Sol badeh, iy anyolom ndramak ari nyaran Ananayas udu bolo lele eme, atehei limen i bwele-en ta amekes madan kasak.”
ACT 9:13 Eme Ananayas anya, “Laban, jo badeh, ndranuhun yoyou ta ndramak badeh, ma ndranuhun sisi-in iy amekes i tiri lau ta Kindrei ado Jerusalem.
ACT 9:14 Iy akohok boto-on badu mine iri tinan tiri pris ta aseu iri lau ala aloh nyaram udu bolo salom tiri.”
ACT 9:15 Arile, Laban tiye i ta Ananayas anya, “Bwe, ou ala! Iy ndramak doh badeh, jo ndralebelei iy ta atiye sahou tek i tiri lau badu leheleh, i tiri kabin tiri ma hawe i tiri lau badu Isra-el.
ACT 9:16 Jo amwenen kameh leheya iy ta iri maha-an ma sisi-in, iy kameh bwese ta nyarak.”
ACT 9:17 Ano Ananayas ili, ma iy ales ili bolo asiu badeh, atehei minen i bwele-e Sol ma iy anya, “Sol ou nadu tine, Laban Jises amwenen suni jo eme hawem; iy le mene adeh asahan hawem udu san ta ou ame dah. Iy suni jo eme dah badeh, ta amekes madam kanyolom kon ja, ma iy aso-ok ou adah na Malawin Ndrabun.”
ACT 9:18 Eme se nawin bwe, lakou i buku none bwisi ni udu madan taku eme len, ma iy anyolom kon ja. Eme iy ales udu loken ma alomwa iy.
ACT 9:19 Ano iy aimon nyamon ma nyamun eme hamon ja. Eme Sol badeh, udu hawe oro lau ta Jises udu Damaskus len solo-an sese.
ACT 9:20 Ya eme iy ales ili kon ndrahu tukum tiri Juwis, iy asehek ta nyala Jises badeh, Nadu Kindrei handru.
ACT 9:21 Eme iri are anuhun iy asehek sahou badeh, mani iri atur anya, “Kede-eh iy ndramak mene udu Jerusalem idi iri lau mene aloh i ta nyaran doh i buku iy asehek kede-eh! Ma iy kede-eh eme ta ateu iri lau kala hawe iri tinan tiri pris ma iri kala bolo kou ai.”
ACT 9:22 Arile, sahou Sol akeh badeh, i nyarahan nyarahan le gwek ma iy asehek sahou aleu handru i tiri Juwis ado Damaskus, ta Jises badeh, Krais handru, Kindrei suni iy eme. Sahou tan bolowani budon tiri Juwis doh, ma bwidi boho iri ihis.
ACT 9:23 Eme udu, udu len solo-an iu badeh, iri Juwis atilik nyala iri ta adi iy kimek. Ya ben len ben len badeh, iri atehei mada iri udu madasan ta kon tinan ta anya kadai iy. Arile, iy badeh, ndrandrei bale iri.
ACT 9:25 Ma iri lau tan badeh, andrei iy na ben ma atehei iy i bolo ndrom sahin rahak iu ta malou i san ta mada munu kowah i andri.
ACT 9:26 Na len Sol eme Jerusalem badeh, iy anya kili hawe oro lau ta Jises, arile oro mari anoh iy. Ma oro atehei budon anya iy badeh, ndramak badu hawe oro bwe.
ACT 9:27 Ndramak ari nyaran Banabas eme badeh, andrei iy, ma uru ala hawe oro aposel. Eme iy asehek nyala oro ta sasah asahan ta Sol na len iy edek ili Damaskus, ya iy anyolom Laban, ma Laban asehek sahou i tan. Ma asehek i toro ta iy udu Damaskus badeh, iy banoh ta asehek sahou, ta nyala nyara Jises nyarahan labai bwe.
ACT 9:28 Ma eme Sol udu hawe oro edek ili eme bolo Jerusalem atiye sahou nyarahan nyarahan ta nyara Laban.
ACT 9:29 Iy asehek sahou ma hawe andres oro lau badu Juwis nane asehek boho Grik, arile oro anya kadai iy kimek.
ACT 9:30 Eme iri lau ta Jises ado doh anuhun badeh, iri kuhi Sol ili Sesariya ma suni iy iu ili kon Tasus.
ACT 9:31 Ano iri lau ta budon handru badu loboho Judiya, Galili hawe Samariya sekesek handru ta iri babwese isi ja bwe. Iri badeh, abadok ma ales boto-on na boto-on ta Malawin Ndrabun. Ma eme, kane iri i sola ma iri anoh Kindrei, eme ma iri atudun iy.
ACT 9:32 Udu bolo tekedek ta Pita ili eme bolo kon munyak doh badeh, ma iy ili selesen oro lau ta Kindrei an kon Lida.
ACT 9:33 Iy ili badeh, ndruni ndramak ari nyaran Aneyas, badan mari imek. Iy in le bada sau andrei jaha ma ndru la-uh.
ACT 9:34 Eme Pita tiye i ta Aneyas anya, “Jises Krais ndramesekei ou ndramwenen. Ou suri ou, ma ou lukumwi kin tam.” Eme, se nawin bwe, iy suri iy eme loken.
ACT 9:35 Eme iri lau manyah ado Lida hawe Saron anyolom badeh, ma iri atehei budon tiri handru i ta Laban.
ACT 9:36 Ya udu kon Jopa badeh, badih ari nyaran Tabita (i boho Grik badeh, aloh iy Dokas). Iy badeh, badih ari ta in hamon ta Kindrei. Eme na len mari, iy amekes kandriyen mwasin i tiri lau, ma iy aseben iri lau, tiri lakou bwe.
ACT 9:37 Na len doh badeh, iy ibo sik ma iy imek. Ya eme iri anyuwi iy, ma nyahani iy udu bolo asiu loken.
ACT 9:38 Lida doh badeh, udu mirihik ta Jopa. Ya eme oro lau ta Jises anuhun Pita badeh, udu Lida. Eme oro suni uru lau la-uh badeh, ala andrek iy anya, “Ou ame suwi.”
ACT 9:39 Eme Pita i hawe uru, ya oro ame asos le badeh, oro kuhi iy iu ili bolo asiu loken. Ya iri badih nyau mari awudi iy, ya iri aden, ma leheya i tan iri awin lawe-en hawe awin rayah ja Dokas amekes, na len i bamak bwe le.
ACT 9:40 Eme Pita tiye iri mari ame len ta bolo asiu. Ano iy atehei bwili ndru-un i andri ya iy asolom. Eme iy tubuni batalan i ta bada kei nane dah ma iy anya, “Tabita, ou ales are loken.” Eme madan asak anyolom Pita, ma iy suri iy.
ACT 9:41 Eme ya Pita tawi minen ma suri iy ales na katin ere loken. Ano, iy aloh i toro lau ta budon handru hawe iri badih nyau ame, ma iy atehei iy i hawe iri, ya kohan ndrame hamon ja.
ACT 9:42 Eme iri lau mari badu loboho Jopa badeh, atanan ta aliy, ma atehei budon tiri handru i ta Laban.
ACT 9:43 Ya eme Pita badeh, udu hawe ndramak ari lahou tan ta asereh ku-i iri katin haka, nyaran Saimon, iy udu gwek sese.
ACT 10:1 Udu kon Sesariya doh badeh, ndramak ari nyaran Koniliyus udu aliy. Iy badeh, batun tinan ta atondrok lau ta bahun ma rinek (100) badu Rom. Iy ma hawe iri lau ta bahun tan badu rakum iri aloh lau ta bahun badu Itali.
ACT 10:2 Koniliyus ma hawe lowan oro badu Juwis bwe, arile iy ma hawe oro mara-ei ado asiu tan badeh, atudun Kindrei le ai. Iy badeh, edeu lakou i tiri lau lakou bwe, ma amekes salom i ta Kindrei na bolo len mari.
ACT 10:3 Eme na beyeh ari, mada an taloh badeh, iy amekes lele. Eme iy anyolom angelo ta Kindrei ari eme asahan hawen anya, “Koniliyus, ei!”
ACT 10:4 Eme Koniliyus anyolom ales i tan ma iy inoh, ma iy anya, “Laban tek, ou aso-ok sasah?” Eme angelo dah anya, “Kindrei ndrasumon salom tam ma iy ndranyolom sasah ou anyohan i tiri lau lakou bwe, ya balen bamani ou bwe.
ACT 10:5 Abo, ou suni rayah lau kala Jopa kakuhi ndramak ari udu aliy nyaran Saimon keme, iri ale aloh iy Pita.
ACT 10:6 Iy badeh, udu asiu ta liyen Saimon, ndramak ta asereh ku-i katin haka, ya asiu tan udu kabede ndras.”
ACT 10:7 Ano iy angelo nane asehek sahou i tan iu badeh, Koniliyus eme luhi uru lohowan tan ame ma hawe ndramak ari ta bahun. Iy ndramak ta bahun doh badeh, atehei budon tan handru in ta Kindrei. Ma iy badeh, ta lohowa Koniliyus na len mari.
ACT 10:8 Koniliyus eme sihidi sahou mari ta angelo nane asehek i tan, ano i toro, ano iy tiye oro ala Jopa.
ACT 10:9 Kon aleu, len ari ja, mada an udu le alih badeh, oro ma taloh ndradek ndrala mirihik ta san ili bolo kon tinan Jopa. Na len doh badeh, an nyarahan labai, Pita eme ili loken asiu ta Saimon ta akohok jor, ma iy anya kamekes salom kili ta Kindrei.
ACT 10:10 Eme Pita imeson handru en, ya eme iy aseken labai ta aimon nyamon. Ya nyamon oro lowosa kahis le badeh, lele asahan tan.
ACT 10:11 Eme iy anyolom kandrah asak ya lakou i buku none ra-ei kolau tinan suwin ma hahuw udu kandrah eme munyak.
ACT 10:12 Udu bolon badeh, iri katin haka randrah randrah, ma hawe iri sasah ta seselek badu bwele-e munyak, hawe iri sirih badu reu, ado bolo lakou nane doh.
ACT 10:13 Ano sahou ari aloh i tan anya, “Ou are loken, adai iri lakou doh, ma ou aimon.”
ACT 10:14 Eme Pita anya, “Laban, bwe, bwe handru en! Jo badeh, baimon se ari nyamon ko-ak i buku doh bwena bwe le!”
ACT 10:15 Eme Kindrei aloh san rasan ja anya, “Ou badeh, saloh anya iri lakou, Kindrei sikinei ko-ak ndra-au, ya ou saloh ko-ak udu aliy ja ai, ndri-iy.”
ACT 10:16 Kindrei aloh i san tulusin ano, suwi labai kolau dah iu i kandrah ja.
ACT 10:17 Pita lomondra moso iri lakou nane iy anyolom kahis le badeh, oro lau nane Koniliyus suni oro ame ndratakalahei asiu nane Pita udu aliy. Ya, eme oro are rasi are madasan are gwek.
ACT 10:18 Eme oro aloh ma ndremenya anya, “Saimon, iri aloh Pita udu aliy deh bwe?”
ACT 10:19 Pita lomondra ta lele kahis le badeh, Malawin Ndrabun tiye i tan anya, “Saimon ei, lau taloh takaleh ou.
ACT 10:20 Ou suri ou, ya ou au ala andri. Ou sanoh ta ala andri hawe oro. Oro badeh, jo suni oro.”
ACT 10:21 Eme Pita ili andri tiye i toro anya, “Ado asilah jo, jo asah idah. Ado ame dah luwa sah?”
ACT 10:22 Eme oro lau anya, “Aso dah ado hawe Koniliyus ndramak batun tiri lau ta bahun badu Rom ame dah. Iy badeh, ndramak mwasin handru ma iy badeh, inoh Kindrei labai, ma iy badeh, iri lau mari badu Isra-el aso-ok iy tinan labai. Angelo ndrabun badeh, tiye tan ta ou ala asiu tan, ya eme iy kanuhun sahou badu bohom.”
ACT 10:23 Ano Pita kuhi oro ala asiu hawen amadin. Eme kon aleu badeh, Pita i hawe oro ma hawe nadu tinen oro rayah badu Jopa ala hawe oro ma oro adek au ala.
ACT 10:24 Ano i bada len ari ja badeh, iy isos Sesariya. Ya Koniliyus badeh, abe-en oro kameh asahan na len doh. Eme iy luhi oro kawas tan, hawe lowan oro badu mirihik tan ala hawen.
ACT 10:25 Eme Pita ili bolo asiu le badeh, Koniliyus asumon iy, ano iy i andri na bwili ndru-un ta sekesek iy.
ACT 10:26 Arile, Pita tiye iy ere loken ma tiye anya, “Jo dah badeh, ndramak laleyah labai.”
ACT 10:27 Pita asehek sahou hawen ano iy i bolon badeh, anyolom iri lau solo-an labai.
ACT 10:28 Eme iy tiye i tiri i buku doh, “Ado badeh, tanan idoh badeh, ba-en hamon ta batanau malen bwe, ta ahi lau badu Juwis winiyan ba-en bolo aha bwe, ma ahi saselesen aha lau badu leheleh. Arile, Kindrei mene ndraleheyani ndrame tek, ta jo badeh, saloh ari ndramak ndra-in ta mada Kindrei.
ACT 10:29 Ya eme ado ala andrei jo eme dah, jo bandremenya ado ta aliy, bwe. Ya abo, sasah handru ado aseken?”
ACT 10:30 Eme Koniliyus anya, “Len hahuw mene ndra-au, na mada an taloh na beyeh badeh, jo udu asiu tek asolom. Nawin bwe badeh, ndramak ari asini awin belen nyikadin, ales udu bwena tek,
ACT 10:31 ma tiye eme tek i buku doh, ‘Kindrei badeh, ndranuhun salom tam ma hawe kandriyen mwasin tam, ta ou adeu lakou laleyah i tiri lau lakou bwe.
ACT 10:32 Ou suni ari ndramak kili Jopa kalelen ta ndramak ari nyaran Saimon Pita. Iy badeh, udu asiu ta liyen Saimon, ndramak ta asereh ku-i katin haka, udu kabede-e ndras.’
ACT 10:33 Eme jo suni oro awek suwi ta atou ou, ma mwasin handru ta ou ame. Ya abo, aso mari kada-ah are mada Kindrei ta anuhun sasah Laban tiye ewek tam ta asehek eme taso.”
ACT 10:34 Ano Pita asehek anya, “Kabwai, na dah jo ndranyolom handru ta Kindrei badeh, baseken ndramak rayah le bwe.
ACT 10:35 Arile, iy badeh, aseken lau mari badu kon munyak tinan labai, buku ndramak ari ari anoh iy, ma amekes kandriyen mwasin le.
ACT 10:36 Ya idah badeh, ado tanan sahou mene Kindrei tiye i tiri lau badu Isra-el, ta iri katiye sahou mwasin ta amekes mondrei i san ta Jises Krais, iy le ari, Laban ta lau mari.
ACT 10:37 Ado badeh, ndratanan sasah mene asahan bolo Judiya in hamon ta Jon ta alomwa atiye sahou ta iri lau kanyuwi iri. Lakou doh asahan udu Galili bwena.
ACT 10:38 Ma ado ndratanan i san mene Kindrei atehei nyosowan ta Malawin Ndrabun hawe boto-on ili ta Jises badu Nasaret. Ma hawe iy edek ili eme ta amekes lahou mwasin hawe amekes iri lau mene are le bahandra boto-on ta balik. Tasah, Kindrei badeh, udu hawen.
ACT 10:39 “Aso dah badeh, anyolom na mada aso amwenen, ta lakou mari iy amekes udu kon munyak tinan tiri Juwis ma hawe Jerusalem. Iri badeh, adai iy ma atahi iy imek i bada kei tondreh.
ACT 10:40 Arile, Kindrei suri iy ta imek tan udu hamon ta len taloh ma leheyani iy i mada iri lau solo-an anyolom iy.
ACT 10:41 Iri lau mari badeh, banyolom iy bwe, arile Kindrei lebelei le aso lau le mene anyolom iy, ma aimon nyamon ma a-un gwa hawen, udu hamon ta iy amak eme loken ta imek.
ACT 10:42 Iy badeh, batanau boto-on labai ta aso katiye sahou kili tiri lau mari ma katiye, iy le badeh, Kindrei atehei lahou i tan ta aleben sahou tiri lau ndramak bwena, ma hawe iri lau ma mulin kahis.
ACT 10:43 Iri propet badeh, tiye nyalan ale, buku none are lau atehei budon handru in tan badeh, karei ma lomondra ndra-in tan kameh, iy maniy i san ta nyaran.”
ACT 10:44 Pita asehek sahou doh kahis le badeh, Malawin Ndrabun eme bwele-e iri lau mari nane anuhun sahou dah.
ACT 10:45 Eme ma iri Juwis ta asan ku-i iri, atehei budon tiri in ta Jises, ado hawe Pita badeh, boho iri asak ta Malawin Ndrabun amou laleyah i tiri lau badu leheleh ale.
ACT 10:46 Tasah, oro anuhun iri badeh, asehek boho kon rakon labai ja, ma atudun Kindrei. Ano Pita anya,
ACT 10:47 “Are lau handru winiyan tawi oro lau doh, ta salomwa oro na gwa? Oro badeh, ndrakohok Malawin Ndrabun i le buku aso mene.”
ACT 10:48 Ya, eme iy tiye ta kalomwa oro na boto-on ta nyara Jises Krais. Ano oro tiye Pita udu hawe oro len sabe op.
ACT 11:1 Oro aposel hawe nadu tine oro badu loboho Judiya anuhun iri lau badu leheleh ale ndrandrei sahou ta Kindrei.
ACT 11:2 Ya, na len Pita ili Jerusalem badeh, oro lau mene atehei budon toro handru i ta Jises ado aliy. Oro ale atehei budon toro boto-on ta asan ku-i oro asehek iy anya,
ACT 11:3 “Ou badeh, ala bolo asiu tiri lau nane basan ku-i iri bwe, aimon nyamon hawe iri.”
ACT 11:4 Pita eme badeh, asehek amwenen i toro ta nyala sasah mene asahan tan i toro:
ACT 11:5 “Jo badeh, udu kon tinan Jopa asolom, eme lele asahan tek le badeh, jo anyolom lakou i buku none ra-ei kolau tinan suwin ma hahuw udu kandrah eme andri. Ya suwin badeh, ma hahuw eme andri batalak le dah.
ACT 11:6 Jo anyolom ili badan badeh, jo atou iri katin haka, randrah randrah, ma hawe iri lakou ta seselek badu bada munyak, iri ndriliu ma hawe iri sirih badu rewa kandrah.
ACT 11:7 Ano, jo anuhun aloh ari anya, ‘Pita, ou suri ou, ya ou adai rayah, ma ou aimon.’
ACT 11:8 “Eme jo anya, ‘Laban, bwe, bwe handru en! Jo badeh, baimon sese iri lakou ko-ak doh, bwe le.’
ACT 11:9 “Eme Kindrei aloh san rasan ja anya, ‘Ou badeh, saloh anya iri lakou Kindrei sikinei ko-ak ndra-au, ou saloh ko-ak udu aliy ja ai, ndri-iy.’
ACT 11:10 Kindrei badeh, aloh i san tulusin ano suwi labai kolau dah iu i kandrah ja.
ACT 11:11 “Ano, amwenen le na bolo len doh badeh, oro lau taloh, iri suni oro are Sesariya ame ales are rasi, boho asiu nane jo udu aliy dah.
ACT 11:12 Eme Malawin Ndrabun tiye tek badeh, ta jo sandrondro ta i hawe oro. Eme nadu tine oro ma onoh dah ame hawek ale, aso ala asiu ta ndramak doh.
ACT 11:13 Eme iy tiye taso ta nyala iy anyolom angelo asahan asiu tan ma tiye, ‘Ou suni oro kala Jopa kandrei ndramak ari nyaran Saimon Pita.
ACT 11:14 Iy kameh tiye sahou tam ma hawe oro lowam mari. Ma na sahou doh Kindrei kameh sebenei ado.’
ACT 11:15 “Ya jo asehek sahou i toro le badeh, Malawin Ndrabun eme la-u oro i buku none asahan eme la-u to ma mwena mene.
ACT 11:16 Ano jo lomondrani sasah Laban mene tiye i buku doh, ‘Jon badeh alomwa ado na gwa, arile ado kameh anyu ado na Malawin Ndrabun.’
ACT 11:17 Jo winiyan batebelese hawe Kindrei bwe, tasah iy edeu ndramas i tiri i le buku iy edeu eme tataha mene, kabatana to atehei budon tato handru in ta Laban Jises Krais.”
ACT 11:18 Eme oro anuhun badeh, oro basehek iy ja bwe, ma boho oro andru-uk ma oro atudun Kindrei i buku doh, “Handru labai, Kindrei badeh, anya kaseben iri lau badu leheleh ale ta iri winiyan tubuni kona iri ili tiri kandriyen ndra-in, ma kakohok manyah mwasin ta Kindrei ta winiyan bano bwe.”
ACT 11:19 Ya oro lau ta budon handru i ta Kindrei mene aseker ta iri mene adai Stiben badeh, iri rayah aseker ala kon munyak tinan Ponisiya, ma busu Saipres ma kon tinan Antiyok atiye sahou i tiri Juwis le.
ACT 11:20 Arile, oro lau rayah badeh, badu Sairini hawe badu Saipres ala Antiyok atiye sahou i tiri lau badu Grik ale ta nyala sahou mwasin nyala Laban Jises Krais.
ACT 11:21 Eme boto-on ta Laban badeh, udu la-u oro, eme lau solo-an badeh, atehei budon tiri handru ma tubuni ndrine iri ja i ta Laban.
ACT 11:22 Eme iri lau ta Kindrei badu Jerusalem anuhun nyala lahou doh badeh, ma iri suni Banabas ili Antiyok.
ACT 11:23 Ya eme na len iy isos badeh, iy sekesek tasah iy anyolom Kindrei atehei nyosowan i tiri, ma iy tiye iri mari kado handru le ta Laban na ndrine iri mari.
ACT 11:24 Iy badeh, ndramak mwasin idih na Malawin Ndrabun hawe budon handru. Ma iy aluwi iri lau solo-an a ta Laban.
ACT 11:25 Ano, Banabas ili takaleh Sol ili Tasus.
ACT 11:26 Eme iy ndruni iy badeh, iy kuhi iy eme Antiyok. Ya eme udu bolo jaha ari ma buruwen badeh, Banabas uru Sol atukum hawe iri lau ta budon handru ta Kindrei ma leheya iri lau solo-an. Oro lau ta Laban, iri lau aloh oro “Kristen” ma mwena badeh, udu Antiyok.
ACT 11:27 Udu bolo len doh badeh, iri propet rayah ale, ado Jerusalem ame andri, ame Antiyok.
ACT 11:28 Eme iy ari badu hawe oro badeh, nyaran Agabus, ales ere loken asehek sahou na boto-on ta Malawin Ndrabun anya, “Idah kameh, kon mari badu loboho tondrok ta Rom kameh nyamon bwe.” Idoh badeh, asahan na len Klodiyas atondrok kon).
ACT 11:29 Eme oro lau ta a-en hamon ta Jises tiye anya, idah kameh, oro ari ari kameh abudon ta oro winiyan adeu lakou ili ta aseben nadu tine oro rayah nane ado Judiya. Oro lau lakou toro solo-an badeh, adeu lakou solo-an ta aseben.
ACT 11:30 Oro amekes budon doh ano badeh, oro atehei luk i mine Banabas uru Sol, ma uru tiyani ili tiri lau ta Kindrei nane ado Jerusalem.
ACT 12:1 Na len doh badeh, kabin Herot ateu lau rayah badu hawe iri lau ta budon handru in ta Kindrei anya kidi oro kamak.
ACT 12:2 Iy badeh, tiye ndramak tan ari ta bahun ili mwetehei Jemis, nadu tine Jon, imek na samen gwak iri aloh bainat.
ACT 12:3 Eme iy anyolom, buku iri Juwis badeh, sekesek ta aliy, iy ili abwiyeh ta aseu Pita ale. Idoh badeh, udu bolo len ta nyamon tinan ta jabi ramen yis bala bolon bwe.
ACT 12:4 Iy tawi iy ano badeh, iy atehei Pita i bolo kou, i mine oro lau ma hahuw, badu bolo oro lau ma habuk ta bahun badeh, tondrokei iy. Oro ndrokei ta Pita badeh hahuw, hahuw ta bolo awa onoh onoh, ben ma len. Budon ta Herot badeh, anya iy keme lewan mada lau mari ta sahou, kudu hamon ta len ta Pasoba.
ACT 12:5 Ya eme iri atehei Pita udu bolo kou udu gwek, arile iri lau atehei budon tiri handru i ta Kindrei badeh, amekes salom boto-on tan, ili ta Kindrei.
ACT 12:6 Na ben ano kon kaleu doh badeh, Herot kameh edeu iy i ta sahou. Ya Pita badeh, amadin ndrokowa uru lau ta bahun ma la-uh. Sawei iy badeh, na sen ma la-uh. Ya, oro lau ta bahun rayah ja badeh, ado ta ndrokei ado madasan tinan, loboho manan.
ACT 12:7 Eme nawin bwe badeh, angelo ta Laban ari asahan, ma lomadan lomatani bolo kou dah. Iy tukuhi kabede Pita ma mete-ei iy amak anya, “Ou suri ou suwi!” Eme badeh, sen asoh laleyah bada bobwan tan.
ACT 12:8 Ano angelo tiye i tan anya, “Ou asini awin tam hawe ku-i katim kili.” Eme Pita mesekei i le buku aliy. Ano iy anya, “Ou atehei kolau tam ta bwele-em kili, ya ou an hamon tek.”
ACT 12:9 Ya eme Pita in hamon ta angelo dah eme manan ta bolo kou. Arile, iy badeh, bala tanan sasah angelo amekes doh bwe. Iy anya badeh, iy amekes lele.
ACT 12:10 Uru adek ame sakalawi ndramak ari ta ndrokei i hamon, ano uru ame sakalawi iy ari ja, ma uru ame asahan madasan amekes na hayen, madan i kon tinan. Eme madasan dah asak laleyah turu, ma uru ame manan. Uru adek san kakan lawe-en sese, ma se nawin bwe angelo doh amai iu laleyah.
ACT 12:11 Ano Pita baraseleyani ai, ta sasah nane asahan ma eme iy anya, “Jo ndratanan ndramwenen handru ai. Laban badeh, suni angelo tan eme sebenei jo ta bolo mine Herot boto-on, ma hawe ta mine iri Juwis mari anya kamekes keme badak.”
ACT 12:12 Eme iy anyolom tanan doh badeh, ma iy iu ili asiu ta Mariya tine Jon Mak. Iri lau solo-an badeh, atukum ala aliy asolom.
ACT 12:13 Eme Pita udu manan atukoh kou, ya eme lohowan badih ari nyaran Roda ili madasan anya katou are lau handru.
ACT 12:14 Eme iy anuhun nyaro bale Pita badeh, iy abasa, ma iy basulu-i kou bwe, ma iy sakaliye i hamon ja tiye anya, “Pita asah udu madasan kodo-oh!”
ACT 12:15 Eme iri anya, “Ou kede-eh budon tam ndra-au oh!” Bwai, iy asehek le ili anya, “Ado kanuhun jo. Ndrakan en! Iy asah udu manan kodo-oh.” Eme iri anya, “Sebwe, malawin eme ales nadeh.”
ACT 12:16 Arile, bwai, Pita atukoh kou udu le gwek, ya eme iri anya kasulu-i kou, oro atou iy. Eme mani iri atur handru.
ACT 12:17 Eme Pita atehei minen i loken amunum le ma iy tiye i toro kandru-uk, ma iy asehek i toro ta nyala Laban kuhi iy udu bolo kou eme len. Ano iy anya, “Ado badeh, kasehek nyala Jemis ma hawe oro nadu tine to oro rayah ja ta aliy. Ano ma iy ruwani oro, ya iy iu ili kon rakon ja.”
ACT 12:18 Eme ya na mandraben badeh, oro lau ta bahun lomondra solo-an ta aliy. Eme oro anya, “Sasah handru ndrasahan ta Pita doh?”
ACT 12:19 Ya eme Herot takaleh ili badeh, iy batakahei bwe, eme iy ndremenya oro lau ta ndrokei ma tiye ta kadai oro kamak. Udu hamon ta idoh badeh, Herot udu Judiya iu ili udu Sesariya winiya ben sabe.
ACT 12:20 Herot badeh, mene andra-i hawe iri lau badu kon Tair hawe Saidon; eme uru atukum ase asahan solo-an badeh, ta ala atou iy. Arile, ma mwena badeh, iri ala anyolom kawas tiri ari op, iy doh badeh, ndramak tinan ari ta asiu ta kabin, nyaran Blastus. Iri badeh, atamar iy, ta iy kati-i losen ta kabin Herot kimek ki-iu laleyah, tasah iri amwenen asih niri nyamon badeh, badu kon ta kabin Herot.
ACT 12:21 Eme na len ta Herot ndratiye, iy asini awin tan ta kabin, ma iy manyah udu bada koyeu asehek sahou i tiri lau.
ACT 12:22 Eme ya iri lau sarakau anya, “Idoh badeh, boho kindrei ari ai, asehek sahou doh, boho ndramak bwe!”
ACT 12:23 Eme nawin bwe, angelo ta Laban mesekei iy ibo sik ma atarah i andri, ma iri nadu un ani iy, ma iy imek, tasah iy batudun Kindrei bwe.
ACT 12:24 Arile, na bolo len doh badeh, sahou ta Laban asahan i tinan ma aseker ili bolo kon mara-ei, ma lau solo-an a-en hamon tan.
ACT 12:25 Ano, na bolo len doh ale gok ta amekes lahou ta Kindrei udu bolo Jerusalem badeh, Banabas uru Sol ndrabwidiy mari ndrano, eme ma, uru kuhi Jon Mak i hawe uru ili hamon ili Antiyok.
ACT 13:1 Udu bolo iri lau atehei budon tiri handru in ta Kindrei badu Antiyok badeh, iri propet rayah, ma hawe iri lau ta leheya rayah ale ado aliy. Nyara oro badeh, Banabas, Simiyon iri aloh iy Nijer, Lusiyus badu Sairini, hawe Mana-en iy mene asahan kawas ta kabin Herot na len iy atondrok kon, ma hawe Sol.
ACT 13:2 Ya eme oro atudun Laban hawe abeles oro ta nyamon ili badeh, ma Malawin Ndrabun anya, “Ado katehei Banabas uru Sol badeh, kare len ta amekes lahou tek mene jo aloh uru kamekes.”
ACT 13:3 Ya oro abeles oro ta nyamon ma salom ano, oro adeu lim i la-u uru, ano suni uru ma la-uh au.
ACT 13:4 Eme Malawin Ndrabun suni uru lau ma la-uh doh au ala andri ala kon Selusiya, akohok ndron, ma alakak au ala busu Saipres.
ACT 13:5 Uru ala asos kon Salamis badeh, oro asehek sahou ta nyala Kindrei udu ndrahu tukum tiri Juwis. Ya Jon udu hawe uru, buku ta aseben uru.
ACT 13:6 Oro badeh, adek awudi busu udu ranah ili taku ranah, ma oro asos kon iri aloh Papos. Eme udu loboho doh badeh, oro ndruni ndramak ari badu Juwis, iy tan balik udu aliy, ma iy wasai iri lau anya, iy propet, nyaran Bajises. I boho Grik badeh, iri aloh iy Elimas, moson, iy ndramak ta balahak. Iy badeh, kawas ta Sejiyus Polus ndramak ta atondrok busu doh. Ma Sejiyus badeh, tanan tan ili labai. Eme iy tiye Banabas uru Sol ame, tasah iy anya kanuhun sahou ta Kindrei. Arile, Elimas badeh, tebelese hawe Sol uru Banabas, tasah iy anya kamekes Sejiyus satehei budon tan handru sala ta Jises.
ACT 13:9 Arile, nyara Sol ari ja badeh, Pol, iy idih na boto-on ta Malawin Ndrabun, anyolom boto-on i ta Elimas, ma iy tiye i tan anya,
ACT 13:10 “Ou badeh, nadu balik amwenen, ma ou badeh, baseken kandriyen mwasin mari bwe! Ou adah labai na kandriyen ta wasai ta balik. Ya, ma saba len kameh ou aruwe ta tobolowe sahou handru ta Laban kasahan wasai?
ACT 13:11 Na le dah kameh, boto-on ta Laban kameh edeu maha-an ewek la-um, ya idah kameh, ou winiyan banyolom kon bwe, winiya le len ta aliy barasahan.” Eme na le liliy badeh, Elimas atona lakou bokodon eme tubuluhi madan ilik, ma iy sokorokar lau ta sariye iy na lim.
ACT 13:12 Eme ndramak ta atondrok busu anyolom badeh, ma bohon asak ta leheya turu ta nyala Jises, ma iy atehei budon tan handru i ta Laban.
ACT 13:13 Eme Pol hawe uru lau badu hawen ruwani Papos, ya oro alakak au ala kon Pega. Pega doh udu bolo kon munyak tinan Pampiliya. Udu doh badeh, Jon ruwani uru ma iy iu i hamon ili Jerusalem.
ACT 13:14 Ano Banabas uru Sol ado Pega ala Antiyok, kon udu loboho Pisidiya. Eme na len ta amunyau, uru ala ndrahu atukum tiri Juwis, ma uru manyah ado aliy.
ACT 13:15 Udu hamon ta iri anuhun sahou aloh badu bolo batanau malen, hawe boho iri propet ano badeh, iri lau ta atondrok ndrahu atukum, suni sahou i turu anya, “Nadu tine ahi, i buku none ah sahou ta batanau ahi badeh, ah kasehek ai.”
ACT 13:16 Eme Pol ales udu loken edeu minen i loken amunum le ma anya, “Ado lau badu Isra-el, hawe ado lau badu leheleh, ado ta atudun Kindrei, ado kanuhun bohok!
ACT 13:17 Kindrei tiri lau badu Isra-el badeh, tiye tama taha iri ma mesekei iri asahan tinan labai, udu bolo len mene iri manyah ado Ijip, ano na le boto-on ta Kindrei, iy andrei iri ado bolo kon Ijip ame len.
ACT 13:18 Ma na bolo jaha hanoh (40) badeh, iy bwese maha-an ta kandriyen tiri ado kon lomale an.
ACT 13:19 Kindrei badeh, tikahei oro kon tinan ma ndro taloh ado munyak Kenan au, ma iy atehei munyak toro i tiri lau tan amwenen.
ACT 13:20 Iri lakou doh asahan udu bolo jaha ma hanek lomonoh (450). “Ano udu hamon ta idoh badeh, Kindrei atehei tiri, iri batun ta atondrok iri eme eme taku, ta Samuwel asahan propet tiri.
ACT 13:21 Ano iri aseken tiri ari kabin, ya eme iy atehei Sol asahan kabin tiri. Iy badeh, nadu Kis, asahan ta lundriye Benjamin. Iy atondrok kon badeh, jaha ma hanoh (40).
ACT 13:22 Eme Kindrei bwidi Sol ano ta kabin, iy atehei Debit i kabin tiri. Eme iy tiye i buku doh ta nyalan, ‘Jo badeh, ndrasilahei nadu Jesi ari, nyaran Debit, ndramak adek handru in tan labai, iy kameh winiyan in hamon ta sasah jo aseken iy ta amekes.’
ACT 13:23 Edek ta lundriyen kameh, Kindrei atehei ndramak ari ta seben iri Isra-el, nyaran Jises. I buku mene iy ndratandrakan ta aliy.
ACT 13:24 Jises basahan bwe le badeh, Jon tiye sahou i tiri lau badu Isra-el katubuni ndrine iri ta kandriyen ta karei ma lomondra ndra-in, ma kalomwa iri.
ACT 13:25 Ya eme suniya lahou ta Jon anya kano badeh, iy anya, ‘Ya, ado anya jo are lau handru? Jo badeh, iy bwe! Arile, are lau iy in hamon tek eme kameh, jo ndramak mwasin bwe, ta talou ku-i katin iu bwe!’
ACT 13:26 “Ya ado nadu tine, lundriye Abraham hawe ado lau badu leheleh ala an hamon ta Kindrei. Sahou ta nyala seben badeh, ndrame tataha.
ACT 13:27 Iri lau badu Jerusalem, ma hawe lau ta atondrok iri badeh, maliye seben tiri Jises, Kindrei nane suni iy eme ta aseben taha, bwe. Iri babudon sahou tiri propet, iri anuhun na bolo len ta amunyau mari bamwenen bwe. Eme ma iri tiye iy kimek. Ya, ta sahou doh, iri amekes sahou mene tiri propet asehek asahan handru.
ACT 13:28 Iri badeh, winiyan basilahei ari kati lakou ta amekes imek i badan bwe, eme ma, iri ndremenya Pailat kidi iy kimek.
ACT 13:29 Ano, udu hamon ta iri amekes sasah i tan, i buku none iri propet mene asehek, eme iri kuhi iy udu bada kei tondreh eme andri ma atehei iy i lek amekes na bek.
ACT 13:30 Arile, Kindrei suri iy udu lek amak eme loken ja.
ACT 13:31 Ma udu bolo len solo-an badeh, oro lau mene ta adek hawen ado Galili ili Jerusalem anyolom iy. Oro badeh, anyolom iy na mada oro amwenen, ma iri asehek sahou tan ili tiri lau badu Isra-el ai.
ACT 13:32 “Eme aso asehek nyala sahou mwasin dah ewek taha: Sasah mene Kindrei tandrakan i ta tubu taha iri badeh,
ACT 13:33 iy ndramesekei ndrasahan handru, ndrame tato nadu oro, i san ta iy suri Jises amak eme loken ja ta imek tan. I buku none ndratorowenei mene udu bolo wari la-uh ta Buk Wari tiye i buku doh: ‘Ou badeh naduk handru. Na dah jo ndrasahan tamam kabwe.’
ACT 13:34 “Eme Kindrei suri iy eme loken ta imek ja, ma iy winiyan bamak ma babola ja bwe. Sahou doh handru, eme ma Kindrei tiye i buku doh: ‘Jo kameh edeu ewek taha iri nyosowan turuwen mene jo tandrakan Debit ta aliy. Idoh kameh asahan handru buku jo ndratiye.’
ACT 13:35 “Ma, buk ndrabun ndrasehek udu bolo sahou rayah ja anya: ‘Ou kameh winiyan baruwani ndramak ndrabun tam bala bolo sisi-in bolo-an ta imek bwai.’
ACT 13:36 “Ya Debit mene amekes lahou ta Kindrei; ano iy imek ma ahi iy udu ka-u tubun oro, ma badan ndrabola ndra-au.
ACT 13:37 Arile, iy ndramak ala Kindrei suri iy eme loken ta imek tan badeh, babola bwe.
ACT 13:38 Eme ma, aha nadu tine, jo badeh, anya aha ki tana aha, i san ta Jises, Kindrei winiyan mani kandriyen ta karei ma lomondra ndra-in. Sahou dah badeh, aso asehek ndrawek taha. Na iy le badeh, are lau atehei budon handru in tan winiyan bala bolo maha-an ta kandriyen ta karei ma lomondra ndra-in mari bwe. Ya, na iy le, Kindrei winiyan aloh ari ndramak mwasin labai ta madan. Iri batanau malen mari ta Moses badeh, winiyan basebenei ou bwe, ma iri winiyan babwidi ou bala mwasin ta madan bwe le.
ACT 13:40 Aha badeh, katondrok aha kudu mwasin, ta sasah iri propet mene ndrasehek, sasahan bada aha. Iri asehek i buku doh:
ACT 13:41 ‘Aha kanyolom, aha lau ta tebelese! Lahou laba tinan tek doh, jo kameh amekes udu bolo ndrokowa aha, arile sebwe aha baso-ok ta anuhun sahou doh bwe, ma aha winiyan batehei budon taha ba-en ta aliy bwe. Aha badeh, anya kasondrokonya, eme ma lakou tado le kameh mani ado atur, ma ado akohok maha-an laba tinan ta aliy.’”
ACT 13:42 Ya eme Pol uru Banabas anya kame len ta ndrahu tukum tiri Juwis badeh, iri lau ndremenya uru badeh, kame hamon ja na len ta amunyau ari ja, kasehek nyala iri ma sola.
ACT 13:43 Eme ma, iri lau au, arile iri Juwis hawe iri lau badu leheleh mene ndra-en hamon ta kandriyen tiri Juwis badeh, a-en hamon ta Pol uru Banabas. Uru aposel ame batanau iri i buku doh, “Aha badeh, kabadok ta bolo manyah mwasin ma tikisiy nane Kindrei ndratehei ndrame tataha.”
ACT 13:44 Ano, na len ta amunyau ari ja badeh, mirihik iri lau mari badu bolo kon tinan mari ame anuhun sahou ta Laban.
ACT 13:45 Eme iri Juwis anyolom iri lau solo-an labai ame badeh, ma mada iri alikis ma bwidi iri asehek sahou ndra-in labai i bada sahou ta Pol nane asehek.
ACT 13:46 Arile, Pol uru Banabas asehek sahou nyarahan labai i tiri anya, “Aru badeh, kasehek sahou ta Kindrei ki taha Juwis bwena op. Arile, aha badeh, baseken bwe, ma sahou taha badeh, leheya i buku, aha kameh winiyan bakohok manyah mwasin ta Kindrei ta udu le buku doh bwai. Eme ma aru kameh ruwani aha kon dah areu, ya, aru kameh ala aseben iri lau badu kon leheleh ai.
ACT 13:47 Tasah, idoh badeh, sahou ta Kindrei batanau aru ta aliy, i buku doh: ‘Jo badeh, atehei ou i buku sun anya lomada iri lau badu leheleh, ma ou ki nyara bohok kaseben iri lau badu bolo munyak mari.’”
ACT 13:48 Eme na len doh iri lau badu leheleh anuhun sahou doh badeh, iri sekesek ma atudun sahou ta Laban. Eme oro lau le Kindrei ndralebelei oro ta akohok koha oro ta udu le buku doh badeh, atehei budon toro handru i ta Kindrei.
ACT 13:49 Eme ya sahou ta Laban badeh, aseker udu loboho kon doh.
ACT 13:50 Arile, iri Juwis ala badeh, sosokei oro lau ta bwena ta kon tinan nane doh, ma hawe sosokei oro badih rayah tinan ta budon. Eme ma budon toro andra-i ta anya kadai Pol uru Banabas ma mesekei uru au ta loboho doh.
ACT 13:51 Eme uru atoroh kasu ndren ta bada kati uru iu ta leheya budon turu i tiri, ma uru ruwani Antiyok ma au ala Ikoniyum.
ACT 13:52 Ma iri lau atehei budon tiri handru in ta Laban ado Antiyok badeh, adah na sekesek ma na Malawin Ndrabun.
ACT 14:1 Udu kon Ikoniyum badeh, Pol uru Banabas ala ndrahu tukum tiri Juwis i buku none uru ndramekes ndra-au ndra-au. Eme uru asehek sahou nyarahan labai, eme iri lau solo-an badu Juwis, hawe iri lau badu leheleh atehei budon tiri handru ihis.
ACT 14:2 Arile, oro Juwis rayah batehei budon toro handru bwe badeh, sosokok budon tiri lau badu leheleh andra-i i bada iri lau ta Laban.
ACT 14:3 Eme Pol uru Banabas are gwek luluwen sese, asehek sahou boto-on ta Laban. Eme Laban leheya sahou ta tikisiy tan, uru asehek i handru i san ta iy edeu boto-on i turu ta amekes kalem ma lahou tinan.
ACT 14:4 Ma eme iri lau badu bolo kon tinan doh, apou iri i lumuk; iri rayah badeh, a-en hamon ta budon tiri Juwis, ya iri rayah badeh, a-en hamon ta budon tiri aposel.
ACT 14:5 Ano, iri Juwis hawe iri lau badu leheleh ala atilik sahou hawe iri lau ta bwena tiri anya, kadai uru ma anya korou uru na bek.
ACT 14:6 Arile, uru takalahei tanan tiri doh, ma eme uru atobwak au ala kon tinan Listra hawe Debi, udu kon tinan Likoniya, ma hawe uru ala loboho kon munyak doh ale.
ACT 14:7 Eme uru atiye sahou mwasin ta nyala Kindrei ili tiri mwan ma badih udu loboho idoh.
ACT 14:8 Eme udu Listra badeh, ndramak ari tinen atehei iy eme len badeh, katin imek. Iy badeh, badek bwe ma iy manyah udu le andri.
ACT 14:9 Eme iy atehei ndranyen i ta Pol asehek sahou. Eme Pol anyolom amwenen i tan badeh, iy anyolom budon tan handru udu aliy ta iy winiyan asahan amwenen ja.
ACT 14:10 Ya eme Pol aloh, “Ou ales na katim are loken!” Eme ma ndramak dah sandroh eme loke ma iy edek ja.
ACT 14:11 Eme iri lau anyolom sasah nane Pol amekes badeh, ma iri aloh i boho kon Likoniya anya, “Iri kindrei badeh, ndrasahan ndrame awas hawe taha!”
ACT 14:12 Eme iri aloh Banabas badeh, Sus ya Pol badeh, iri aloh iy Hermes tasah iy ndramak tinan ta asehek sahou.
ACT 14:13 Ya pris ari ta kindrei Sus, asiu tan ta atudun badeh, udu manan mirihik ta madasan ta kon tinan. Iy kuhi iri bulumakau hawe kanyeu ili madasan ta asiu ta atudun. Tasah, iy ma hawe iri lau anya kamekes salom kili ta Banabas uru Pol.
ACT 14:14 Eme Banabas uru Pol anuhun le badeh, uru tarani awin ta la-u uru iu ma uru sakaliye ala bolo iri lau dah aloh anya,
ACT 14:15 “Ado lau, ado anya kamekes lakou badeh, ta sasah? Aru dah badeh, ndramak laleyah i buku le ado badeh. Aru dah badeh, atiye nyala ado ta sahou mwasin ta ado badeh, katubuni ndrine ado ta lakou ndra-in laleyah i buku badeh, ki ta Kindrei kohan handru udu aliy. Iy le adeh mesekei munyak ma kandrah, ndras ma hawe lakou mari udu bolon.
ACT 14:16 Bwena ndra-au mene iy alelei iri lau mara-ei badu kon munyak adek na seken tiri.
ACT 14:17 Arile, iy badeh, leheya mwasin tan eme lewan ta sasah iy amekes: Iy badeh leheya laban tan i san ta iy edeu ur undruk udu kandrah eme andri ma iy badeh, isan len ta nyamon uni ma akohok; ma iy edeu nado nyamon solo-an solo-an ma iy mesekei ndrine ado idih na sekesek.”
ACT 14:18 Buku, sahou doh uru asehek ai, arile boto-on labai, ta uru satobohei iri. Iri anya kasun salom i turu le ai.
ACT 14:19 Ano iri Juwis rayah badu Antiyok, ma badu Ikoniyum ame andresei iri anuhun boho oro. Eme iri orowei Pol na bek, ma anya deh, iy ndramak, ma aluwi iy eme manan ta kon tinan.
ACT 14:20 Arile, udu hamon ta iri lau atehei budon tiri handru in ta Kindrei awudi iy, ano badeh, iy suri iy eme loken edek iu ili hamon ja ili kon tinan. Ano len ari ja badeh, Pol uru Banabas au ala kon Debi.
ACT 14:21 Uru asehek sahou udu bolo kon tinan doh badeh, ma aluwi iri lau solo-an labai atehei budon tiri handru i ta Kindrei. Ano uru ala hamon ala Listra, ano ala Ikoniyum ma ala Antiyok.
ACT 14:22 Oro ala badeh, batanau iri lau ta budon handru badeh, kabadok ta tanan handru ta bolo budon handru tiri. Eme uru anya, “Taha kameh bwese maha-an solo-an solo-an, ano taha barala baha tondrok ta Kindrei.”
ACT 14:23 Ano Pol uru Banabas atehei lau mwasin kasahan batun ta atondrok iri lau ta Kindrei badu kon rakon rakon. Eme iri abeles iri ta aimon nyamon, ma amekes salom i toro ma atehei oro a mine Laban ta lahou iri atehei i kani oro ta amekes.
ACT 14:24 Ya udu hamon ta uru ala loboho Pisidiya, badeh, uru ame bolo kon munyak tinan Pampiliya.
ACT 14:25 Ya eme uru atiye sahou mwasin i tiri lau ado kon tinan Pega, ano uru ala andri ala kon tinan Ataliya.
ACT 14:26 Ano udu kon Ataliya badeh, uru alakak ala hamon ala Antiyok. Kon tinan doh mene iri lau ta Kindrei suni uru ala a len, ta amekes lahou mene i kani uru i san ta tikisiy ta Kindrei. Uru ndramesekei lahou turu ndrano, ma uru ame hamon ame Antiyok ja.
ACT 14:27 Eme uru ala asos Antiyok badeh, uru nyuruwini iri lau ta Kindrei atukum, ma tiye i tiri ta lahou mari Kindrei ndramesekei na mine uru, ma i buku sah Kindrei ndrasihi san ndra tiri lau badu leheleh ta budon handru.
ACT 14:28 Eme uru ado hawe iri lau ta hamon ta Kindrei luluwen handru ado gwek.
ACT 15:1 Oro lau rayah ado Judiya badeh, ame andri kon Antiyok, ma eme oro leheya iri lau ta budon handru anya, “Ado badeh, winiyan bado mwasin bwe, i buku none ado basan ku-i ado bwe. Idoh badeh, in hamon ta batanau ta Moses tiye.”
ACT 15:2 Sahou doh le badeh, mesekei Pol uru Banabas andres boto-on boto-on ma hawe asehek sahou nyarahan labai i toro. Ya eme iri lebelei Pol uru Banabas ma hawe lau rayah ta budon handru ala hawe uru, ya oro ala Jerusalem, ala atou oro lau ta a-en hamon ta Jises, hawe iri batun tiri lau ta budon handru, ta lelen iri ta tanan doh.
ACT 15:3 Ya eme iri lau ta Kindrei badeh, suni uru au. Ya udu bolo tekedek turu badeh, uru ala bolo kon Ponisiya ma bolo kon Samariya asehek nyala iri ta iri lau badu leheleh badeh, ndratubuni ndrine iri ta kandriyen ndra-in. Eme sahou mwasin doh badeh mesekei iri lau ta budon handru sekesek laba tinan labai.
ACT 15:4 Eme, na len uru ame Jerusalem badeh, iri lau ta Kindrei ma hawe iri aposel ma hawe iri batun tiri lau ta Kindrei sekesek handru turu ame hawe iri. Eme uru asehek i tiri ta nyala iri lakou mari Kindrei ndramesekei na mine uru.
ACT 15:5 Ano oro lau rayah ta budon handru, badu hawe oro lau Parasi ales are loken tiye anya, “Iri lau badu leheleh badeh, ka-en hamon ta batanau ta Moses, ya kasan ku-i iri.”
ACT 15:6 Eme iri aposel hawe iri batun tiri lau ta Kindrei atukum ase badeh, anyolom bolo budon nane doh.
ACT 15:7 Eme hamon ta oro andres luluwen badeh, Pita eme ales ere loken tiye anya, “Ado nadu tine, ado badeh, mene ndratanan ta jo dah mene ndra mwena ndra-au, Kindrei lebelei jo udu bolo ado eme len ta atiye sahou mwasin i tiri lau badu leheleh ta iri kanuhun ma katehei budon handru ki ta Kindrei.
ACT 15:8 Eme ya Kindrei badeh, tanan ndrine iri ma leheyani iy aseken iri i san ta iy atehei Malawin Ndrabun i tiri, i buku none iy amekes eme tato mene.
ACT 15:9 Iy badeh, bamesekei iri bala randrah ja tato bwe; iy badeh, sikine ndrine iri amwenen i san ta budon handru tiri le.
ACT 15:10 Eme ya, i buku sah ado anya kanone Kindrei ma anya kadeu maha-an ki la-u iri lau ta budon handru? Idoh badeh, iri tubu taha hawe to winiyan babwese-ei bwe ale.
ACT 15:11 Bwe, handru en! Taha badeh, atehei budon handru bala san doh bwe. Idoh badeh, i san ta tikisiy ta Laban Jises le, ta koha taha kameh udu le buku doh, i le buku none oro.”
ACT 15:12 Eme iri lau mari badeh, andru-uk ado le anuhun Banabas uru Pol asehek sahou ta nyala kalem ma lahou tinan mene Kindrei amekes udu ndrokowa iri lau badu leheleh na mine uru.
ACT 15:13 Sahou turu ano le badeh, Jemis asehek sahou anya, “Ado nadu tine kanuhun jo.
ACT 15:14 Saimon mene ndrasehek ndraleu ndrame ta taha, ta ma mwena Kindrei leheya tikisiy tan i tiri lau badu leheleh. Ma iy le kuhi oro lau badu bolo iri eme len, ma asahan lau tan amwenen.
ACT 15:15 Eme ya sahou tiri propet amwenen le ta aliy, torowenei i buku doh:
ACT 15:16 ‘Laban anya, “Len hamon eme, jo kameh eme hamon ja ta atudun kandriyen ha-un udu bolo lundriye Debit oro. Oro badeh, ndrandra-i i buku ra-em asiu ndra malen ma irou udu andri. Arile, jo kameh tutuni asiu doh ja, ma asahan ha-un mara-ei ja.
ACT 15:17 Idoh kameh asahan ta iri lau rayah ja kameh katakaleh jo, ma iri lau badu leheleh mari mene, jo aloh oro ame asahan lau tek.” Laban mene asehek i buku doh.
ACT 15:18 Ya eme Laban amekes lakou mari dah, mene lau ndratanan ndra bwena ndra-au ndra-au.’”
ACT 15:19 Eme Jemis asehek sahou ili le i buku doh, “Jo budon tek badeh, i buku doh: To badeh, samekes sabadok labai sala tiri lau badu leheleh, iri ala ndratubuni ndrine iri ndra ta Kindrei.
ACT 15:20 Arile, to atorou ki toro ma katandra-un toro saimon nyamon iri ndratehei ndra mine kindrei ta wendreya, iri amekes na sukumada kei; oro samekes kandriyen ndra-in ta karei; oro saimon oda iri lakou buku me ma bulumakau ndra udu ta aliy, ma sa-un ndraye iri ale.
ACT 15:21 Tasah, ndra bwena labai eme taku len dah, iri atiye sahou ta Moses mene torowenei udu bolo buk tan, ma udu bolo kon mari iri kandriyen malen ta batanau doh, ndrabwena labai udu aliy, ma udu bolo len mari ta tukum badeh, iri asehek ma aloh udu bolo asiu ta atukum tiri Juwis mara-ei. Eme ma iri tanan, buku iri lakou mara-ei doh, ndrabun handru.”
ACT 15:22 Ano iri aposel hawe iri batun tiri lau ta budon handru hawe iri lau ta Kindrei mari amekes budon ta kaleben oro rayah badu bolo iri, ya kasuni oro kala Antiyok hawe Pol uru Banabas. Eme iri lebelei Judas aloh Barsabas ma hawe Sailas. Uru ma la-uh doh badeh, batun badu bolo iri lau ta Kindrei.
ACT 15:23 Eme iri atehei la-ukei dah i mine uru ili: “Ya eme aso aposel hawe aso batun ta lau ta budon handru tiye sahou sekesek taso ewek taha nadu tine aso badu leheleh ta budon handru badu Antiyok, Siriya ma hawe Silisiya.
ACT 15:24 “Aso ndranuhun lau rayah badu hawe aso ndrawek bolo aha. Aso badeu ari budon bala toro bwe, arile oro ndrawek ndrabwidi budon taha ndrandra-i na sahou oro asehek.
ACT 15:25 Ya eme aso badeh, ndra le se ja, ma aso ndralebelei oro nadu tine aso rayah, ma ndrasuni oro ndrawek hawe nadu tine aso, Banabas uru Pol.
ACT 15:26 Uru lau doh badeh, ndratehei koha uru ndra ta imek ta nyara Laban tataha Jises Krais.
ACT 15:27 Ya eme aso suni Judas uru Sailas awek, kasehek na boho uru amwenen, nyala aha ta sasah udu bolo la-ukei, aso atorou.
ACT 15:28 Ya, budon ta Malawin Ndrabun hawe budon taso i le se, ta aso satu aha sala bolo iri batanau mari tiri Juwis. Mwasin ta aha a-en hamon ta iri batanau le doh:
ACT 15:29 Aha saimon nyamon ala ndrala ta salom tiri kindrei nane iri asehek na sukumada kei, ma aha saimon oda iri lakou buku me ma bulumakau ndra udu ta aliy, ma hawe sa-un ndraye iri, ma hawe aha samekes kandriyen ndra-in ta karei. Buku none aha kateleya aha tiri lakou doh, idah kameh aha ado mwasin. Kabwai.”
ACT 15:30 Eme oro lau nane suni oro au ala andri ala Antiyok, ya eme oro nyuruwini iri lau ta Kindrei mari ame le se, ma adeu la-ukei i mine iri.
ACT 15:31 Eme iri anyolom bolo la-ukei, ma iri sekesek ta sahou mwasin ta amekes iri kabadok.
ACT 15:32 Ya eme Judas uru Sailas badeh, propet ale, eme uru asehek sahou nyarahan labai, ta amekes iri nadu tine uru kabadok ale.
ACT 15:33 Ano udu hamon ja, nadu tinen iri badeh, suni oro au ma nyosowan ta bahun bwe, au ala hamon ala hawe oro lau mene suni oro ame.
ACT 15:35 Arile, Pol uru Banabas ado Antiyok ado gwek, ya uru ma hawe iri lau solo-an leheya iri, ma atiye sahou ta Laban.
ACT 15:36 Ano udu sese, Pol tiye i ta Banabas i buku doh, “Talu ka-au kala hamon kaselesen nadu tine talu iri mene udu bolo kon tinan mari mene ta atiye sahou ta Laban ili aliy, ta kala kanyolom iri ado mwasin deh bwe.”
ACT 15:37 Eme ya Banabas aseken Jon aloh iy Mak kili hawe uru.
ACT 15:38 Arile, Pol anya, idoh budon mwasin ta iy kili hawe uru bwe, tasah iy badeh, ndraruwani uru ma gok oro anya kamekes na len oro ala atiye sahou ili Pampiliya.
ACT 15:39 Eme uru andres ili, ma uru aseker. Eme Banabas kuhi Mak i hawen ma uru alakak au ala Saipres.
ACT 15:40 Ya Pol kuhi Sailas i hawen ma nadu tine uru i san ta Laban atehei nyosowan i bwele-e uru ma ndremenya Kindrei ta iy katehei tikisiy tan ki bwele-e uru, eme ma uru au.
ACT 15:41 Ya, uru ala bolo kon munyak tinan Siriya ma hawe Silisiya asehek sahou, ta amekes iri lau ta Kindrei kabadok.
ACT 16:1 Eme Pol edek ili isos Debi ano iy ili Listra. Eme udu kon doh badeh, ndramak ari ta budon handru manyah udu aliy nyaran Timoti. Tinen badu Juwis ma budon tan handru ndra ta Jises, arile taman badu Grik.
ACT 16:2 Iri lau ta Kindrei badu Listra ma Ikoniyum mara-ei badeh, masiye Timoti.
ACT 16:3 Eme Pol anya kakohok iy ki hawen, ya uru kadek. Eme Pol sani ku-in, tasah iy abudon loboho doh badeh, ndrahu iri Juwis, ya iri tanan tama Timoti badeh, badu Grik.
ACT 16:4 Ya eme oro adek ala bolo kon tinan rakon ala rakon badeh, tiye tanan i tiri lau ta budon handru ta batanau oro aposel hawe oro batun tiri lau ta Kindrei ndrasehek ta aliy, udu Jerusalem nyala iri lau, ma iri ka-en hamon ta aliy.
ACT 16:5 Ma iri lau ta Kindrei abadok ta budon handru tiri ma len mari badeh, kane iri edek i sola.
ACT 16:6 Eme Pol hawe oro lau badu hawen, adek ala loboho kon munyak tinan Prijiya hawe Galesiya. Oro badeh, batiye sahou bala bolo kon tinan badu Esiya bwe. Tasah, Malawin Ndrabun badeh, tiye oro sala.
ACT 16:7 Eme, na len oro ame asahan bada kobek ta kon Misiya badeh, oro anya kanone kala kon Bitiniya katiye sahou, arile Malawin Ndrabun ta Jises baseken bwe ale.
ACT 16:8 Ya eme oro sakalawi kon Misiya ma adek ala andri ala kon tinan Trowas.
ACT 16:9 Eme na ben badeh, lele asahan ta Pol ma iy anyolom ndramak ari badu kon Masadoniya ales indrek iy anya, “Ou ame Masadoniya, ma aseben aso.”
ACT 16:10 Eme ya Pol anyolom lele doh ano le badeh, aso alokou aso i le rasan, ta aso kala Masadoniya. Tasah, aso tanan Kindrei badeh, aloh aso kala katiye sahou mwasin ki tiri.
ACT 16:11 Eme aso an ndron are Trowas, alakak ame len ma ales ame busu Samotres. Ano len ari ja, aso asahan Niyapolis.
ACT 16:12 Ya eme udu doh badeh, aso adek ala lokei ala Pilipai. Kon doh badeh, kon ari tinan labai udu bolo kon munyak tinan Masadoniya, ya iri Rom atondrok kon doh. Eme aso ado doh len sabe sese.
ACT 16:13 Eme na len ta amunyau badeh, aso ame manan ta madasan tinan ta kon tinan ame kapa gwa anya katakaleh ndrahune kon ta asolom. Ya eme aso manyah ado andri ma asehek sahou i tiri badih atukum ame loboho doh.
ACT 16:14 Eme udu bolo iri badih nane anuhun sahou doh badeh, badih ari nyaran Lidiya udu aliy. Iy badeh, lahou tan ta asih kolau saraman iri amekes awin moroyan na aliy. Iy badu kon tinan Tayataira, ma iy atehei budon tan mara-ei i ta atudun Kindrei. Eme Laban mesekei ndrinen badeh, aseken labai ta anuhun sahou ta Pol asehek.
ACT 16:15 Eme iy hawe lowan oro mara-ei badeh, alomwa oro, ya eme iy kuhi aso ala asiu tan. Ma eme iy tiye i taso ma indrek aso anya, “I buku none ado lomondra jo badih ta budon handru i ta Laban eh, ado kame kado asiu tek.”
ACT 16:16 Na len ari aso anya kala ndrahune kon ta salom badeh, badih lohowan ari malawin ndra-in udu la-un eme bada aso. Iy winiyan tiye sasah kameh asahan udu bwena eme. Iy badeh, ndrakohok luk solo-an solo-an ndra-au ndra tiri lau ta atondrok iy i san ta sehek sasah asahan udu bwena.
ACT 16:17 Iy doh badeh, edek in hamon ta Pol hawe aso marakon, ma iy aloh anya, “Oro lau dah ala tiye sahou ta koha ado kameh udu le buku doh, badeh, oro lohowan ta Kindrei ere bwele-e kindrei mari badu loken.”
ACT 16:18 Eme iy amekes lahou tan doh badeh, len solo-an labai. Ya eme Pol eme ndrinen isi ta aliy, eme iy tubuni iy ma tiye sahou i ta malawin ndra-in anya, “I san ta boto-on ta nyara Jises, jo tiye ou ame len ta la-u badih badeh!” Eme na le liliy, malawin ndra-in udu bwele-en eme len.
ACT 16:19 Eme oro lau tan nane atanan ta san ta akohok toro luk badeh, ndrano, oro ame tawi Pol uru Sailas, ya seheyani uru ame lohalak ndrahu kon ta anuhun sahou, ame mada iri lau ta atondrok kon.
ACT 16:20 Eme oro kuhi uru ame mada iri lau ta anuhun sahou ma tiye anya, “Uru lau dah badeh, badu Juwis, ya uru amekes nono-ou udu bolo kon tinan tataha.
ACT 16:21 Uru badeh, leheya kandriyen bamwenen ta kandriyen tataha bwe; taha badeh, lau badu Rom, ya kandriyen doh taha banone ma winiyan bamekes bwe.”
ACT 16:22 Eme iri lau arou ala la-u Pol uru Sailas ala adai uru, ya eme iri lau ta anuhun ame tiye iri tarani awin ta la-u uru ma a-um uru na malou sakabuk i bek.
ACT 16:23 Iri ubwi uru andra-i labai, ano iri akahei uru ala bolo kou. Eme iri tiye ndramak ta ndrokei ta bolo kou katehei ndrabek kihis ma katondrok uru kamwenen.
ACT 16:24 Iy anuhun sahou iri tandra-un i tan ano badeh, iy atehei uru ala bolo asiu udu bolon handru, ma sawei kati uru ma totowaniy i bolo sabar.
ACT 16:25 Eme i ndrukulu ben alih badeh, uru asolom ma ayah wari ta atudun Kindrei. Ya eme iri lau rayah are bolo kou i buku uru badeh, anuhun uru ayah wari.
ACT 16:26 Eme nawin bwe, kon totoreh ma sali asiu nane dah nyukunyok. Eme madasan mari ta bolo kou dah asak, ma kati iri lau mari udu bolo sabar dah asoh.
ACT 16:27 Ya eme ndramak ta ndrokei atondrok iri, amak anyolom kou mari asak badeh, iy anya iri are bolo kou ndratobwak. Eme iy andrei samen ta anya kidi iy le badeh,
ACT 16:28 Pol aloh anya, “Ou sadai ou! Aso ba-au bwe, aso mari ado kada-ah!”
ACT 16:29 Eme ndramak ta ndrokei dah tanyarei ta sun ma sakaliye ili taku ma totoreh udu mada Pol uru Sailas.
ACT 16:30 Ano iy kuhi uru ame manan, ma eme iy lelen uru anya, “Ah ma la-uh, jo kamekes sasah handru ya jo kakohok kohak handru ta udu le buku doh?”
ACT 16:31 Eme uru anya, “Ou atehei budon tam handru ki ta Laban, idah kameh koham udu le buku doh ma hawe lowam oro.”
ACT 16:32 Ano, uru asehek sahou ta nyala Laban i tan ma i tiri lau nane are bolo asiu tan doh.
ACT 16:33 Eme na le liliy na ben doh, ndramak ta ndrokei doh kuhi uru ma sikine ndrana turu; ano na le liliy, iy ma hawe lowan oro alomwa oro a gwa.
ACT 16:34 Ano iy andrei uru ala asiu tan mesekei nyamon i nuru. Ma oro lowan mari badeh, sekesek tinan handru, tasah oro badeh, ndratehei budon toro handru ndra-en ta Kindrei.
ACT 16:35 Eme kon aleu, iri lau ta anuhun sahou tiye sahou i toro lau ta mwena tiri lulik ala tiye ta ndramak ta atondrok, katiye iri lau doh ka-au ai.
ACT 16:36 Eme iy tiye sahou i ta Pol uru Sailas anya, “Iri lau ta anuhun sahou anya ah ka-au ai. Abo, ah ka-au ma mwasin.”
ACT 16:37 Arile, Pol eme tiye i tiri lau ta mwena tiri lulik anya, “Aru badeh, lau badu baha tondrok ma kandriyen ta Rom. Ya, i buku sah oro lau ta anuhun sahou doh bwale oro ma banuhun sahou taru bwe. Aru bamekes se ari lakou bandra-i bwe, arile iri ame adai aru udu mada lau mari. Ano oro akahei aru laleyah ame bolo kou dah. Ya, na dah oro anya katone aru ka-au ai? Winiyan bwe, handru en! Oro le kame katiye aru ka-au.”
ACT 16:38 Eme iri lau ta mwena tiri lulik ala hamon tiye i tiri lau ta anuhun sahou, ta Pol uru Sailas badeh, ndra sali kon Rom eme ma iri abwerei iri.
ACT 16:39 Eme iri ame tiye sahou ta tikisiy i turu ma eme iri tiyani uru ame len ta bolo kou ma tiye uru ka-au ta kon tinan.
ACT 16:40 Eme uru ala asiu ta Lidiya, batanau iri lau nane atehei budon tiri handru in ta Jises, ma iri kabadok, ano ma uru au ai.
ACT 17:1 Uru adek ame bolo kon Ampipolis hawe kon Apoloniya ma ame asos kon tinan Tesalonaika. Ya udu kon doh badeh, ndrahu tukum tiri Juwis udu aliy.
ACT 17:2 Eme i buku none kandriyen ta Pol, iy ndramekes ndra-au, ndra-au badeh, iy ili ndrahune tukum. Eme na len taloh ta len ta amunyau ja badeh, iy andres hawe iri ta sahou badu bolo tarou ta Kindrei.
ACT 17:3 Ma, na tarou ta Kindrei le doh iy asehek aleu i tiri, ta Krais, iy mene bwese sisi-in, ma iy amak ta imek eme loken. Eme Pol anya, “Iy Jises nane jo asehek iy i tado dah, iy Krais.”
ACT 17:4 Eme iri Juwis rayah badeh, atehei budon tiri handru in ta sahou ta Pol uru Sailas; ma hawe iri lau solo-an badu Grik ta atudun Kindrei ma hawe iri badih ta mwena solo-an ale.
ACT 17:5 Arile, mada iri Juwis alikis, ya eme iri tukumwi iri lau rayah, budon tiri ndra-in udu bolo ba-en tiye iri ta amekes losen udu bolo kon tinan. Eme iri abotatahan ala asiu ta Jesen takaleh Pol uru Sailas anya kateu uru kame mada iri lau mari.
ACT 17:6 Arile, iri batakalahei uru bwe, eme iri seheyani Jesen hawe oro lau rayah ta Kindrei ame ales are mada iri lau mwena ma aloh anya, “Oro lau ala amekes losen udu bolo kon munyak mari, Jesen luhi oro ala asiu tan asah idah. Oro mari badeh, aluwi budon tiri lau eme len tiri batanau ta kabin badu Rom Sisa, ma tiye i tiri ta nyala kabin ari ja aloh Jises.”
ACT 17:8 Eme iri anuhun sahou doh ano badeh, iri lau tinan ma hawe iri lau nane are bolo kon tinan doh badeh, toroyani iri ma anyon labai.
ACT 17:9 Eme iri lau tinan ta atondrok iri badeh, mesekei Jesen hawe oro lau nane seheyani oro dah, akunoh iri, ano ma tiye oro au.
ACT 17:10 Ano kon ilik le badeh, oro lau ta Kindrei suni Pol uru Sailas au ala kon Beriya. Uru ala asahan badeh, uru ala ndrahu atukum tiri Juwis.
ACT 17:11 Ya eme iri lau badu doh badeh, budon tiri aleu labai ja tiri lau badu Tesalonaika. Tasah, iri badeh, atehei ndranye iri ta anuhun sahou tinan labai, ma na len mari mada iri udu ta tarou anya kanyolom Pol asehek sahou handru deh wasai.
ACT 17:12 Eme iri Juwis solo-an atehei budon tiri handru i ta Kindrei ma hawe iri badih rayah ta mwena badu Grik ma hawe iri mwan solo-an badu Grik ale atehei budon tiri handru.
ACT 17:13 Eme na len iri Juwis badu Tesalonaika anuhun Pol atiye sahou ta nyala Kindrei udu Beriya badeh, eme iri ala doh ale amekes ndrine iri lau atukum doh towodau.
ACT 17:14 Eme na le liliy nadu tine Pol oro ame badeh, suni iy ili mada ndras. Arile, Sailas uru Timoti are Beriya are gwek.
ACT 17:15 Eme oro lau ala hawe Pol badeh, tiyani iy ili isos Atens, ano oro ame hamon ma tuwi sahou ta tiye i ta Sailas uru Timoti, ta uru kame hawen, suwi suwi.
ACT 17:16 Na len Pol udu Atens abe-en Sailas uru Timoti, ndrinen isi handru ta kon tinan doh idih na iri sukumada kei, iri amekes solo-an labai.
ACT 17:17 Ya eme Pol ili bolo asiu ta atukum andres hawe oro Juwis ma hawe iri lau badu Grik ala atudun Kindrei. Ma hawe udu mada lau mari na len mari udu ndrahu tukum ta lau.
ACT 17:18 Eme oro lau rayah aloh oro Epikuriya ma hawe oro lau aloh oro Stowik ame andres hawe Pol. Oro rayah asehek anya, “Iy ndramak doh ta amou gwa laleyah, anya kasehek nyala sasah kede-eh?” Ya oro rayah anya, “Iy kede-eh asehek nyala iri kindrei rayah badu leheleh nadeh?” Oro asehek i buku doh, tasah Pol nane asehek sahou mwasin ta nyala Jises ndramak ta amak ta imek eme loken.
ACT 17:19 Ya eme oro lau rayah tiye Pol ili atou oro lau ta atondrok kandriyen tiri ado kon ta ndrahu tukum aloh Areyapakus. Ma oro tiye i ta Pol i buku doh, “Aso anya kanuhun ma katanan ta tanan ha-un ou asehek badeh.
ACT 17:20 Ou badeh, atiye tanan rayah i randrah labai ta ndranye ahi ma ahi anya kanuhun moson ta aliy i buku sah handru.”
ACT 17:21 (Eme iri lau mari badu kon Atens ma hawe lau badu leheleh manyah ado doh, na len mari badeh, bamekes se ari lahou bwe. Iri badeh, asehek nyala tanan doh ma anuhun tanan ha-un doh.)
ACT 17:22 Ano Pol ales udu loken ta ndrahu tukum tiri aloh Areyapakus doh, ma tiye anya, “Ado lau badu Atens! Jo anyolom ta bolo lahou tado mari, ado lau ta atudun iri kindrei solo-an.
ACT 17:23 Tasah, jo edek bolo kon tinan tado anyolom ndrahune aha ta atudun badeh, jo anyolom tarou ari udu bada koto-ok ta atudun, tiye i buku doh: ‘Ta Kindrei, Ahi Maliye Iy.’ Ya Kindrei ado maliye iy badeh, jo kameh asehek nyala ado na len dah.
ACT 17:24 “Iy Kindrei nane ta amekes munyak ma kandrah ma lakou mari udu bolon. Iy badeh, Laban ta atondrok munyak ma kandrah. Ya iy bamanyah bado bolo asiu ta atudun amekes na lim bwe.
ACT 17:25 Ma iy bandriliu ta se lakou badu mine lau katiye ki tan bwe. Tasah, iy le badeh, iy kati ndramak ta edeu koha taha, ma hawe sasah, sasah ja i ta lau mari.
ACT 17:26 Iy bwidi lau mari asahan badeh, in hamon ta ndramak ari le, ma iy weleyani iri lau mari manyah ado kon rakon rakon udu bolo kon munyak. Ma iy le amwenen sani len ta kon iri manyah ado aliy, ma iy atehei iri kobek ta aliy.
ACT 17:27 Kindrei amekes san doh badeh, ta lau kala katakaleh iy, i buku none bale iri kabwetenei. Tasah, iy badeh, udu le bakep hawe taha ari ari.
ACT 17:28 Ma, na iy le badeh, taha ado mulin ma adek ala doh, ala doh ma to asahan awas dah. I le buku none lau ta asehek kundruh tado ndrasehek ndra-au anya, ‘Taha badeh, nadun labai.’
ACT 17:29 “Ya eme i buku doh, taha badeh, nadu Kindrei ya eme taha satehei budon anya Kindrei kede-eh i buku none ari sukumada kei ndramak asehek na lim, deh, i buku bek nyikilikin gol deh, i buku none bek laleyah bwe.
ACT 17:30 Len bwena mene, Kindrei anyolom lau badeh, bala tanan iy bwe, ya iy batiye iri ta lakou iri amekes laleyah bwe. Arile, na len dah ja, iy batanau lau mari badu heh, badu heh badeh, katubuni ndrine iri.
ACT 17:31 Tasah, iy ndrasani len ta iy kameh aleben lau badu kon munyak mari, na ndramak ari mwasin labai iy ndratehei lahou dah ndra minen. Iy badeh ndraleheyani lakou doh ndrasahan handru ndrame len mada lau mari i san ta iy suni iy amak ta imek tan eme loken.”
ACT 17:32 Eme na len iri anuhun Pol asehek nyala amak eme loken ta imek badeh, iri lau rayah ja badeh, bobose iy. Arile, iri rayah anya, “Ahi anya kanuhun sahou ou nane asehek badeh, ja.”
ACT 17:33 Eme ma iy ruwani iri ma iy iu.
ACT 17:34 Eme iri lau sabe le badeh, atehei budon tiri handru ma iri an hamon ta Pol. Ya udu bolo iri nane doh badeh, Diyonisiyus ale. Iy badeh, tinan ari badu bolo iri lau rayah aloh Areyapakus ma hawe badih ari nyaran Damaris hawe iri lau rayah ja ale.
ACT 18:1 Ano Pol ruwani kon Atens ma iy iu ili Korin.
ACT 18:2 Iy udu Korin udu gwek badeh, iy ndruni ndramak ari badu Juwis nyaran Akwila, ya tinen atehei iy eme len udu kon munyak tinan Pontus. Iy hawe udun Prisila uru barado Itali barame ai. Tasah, Sisa Klodiyas tiye sahou boto-on i tiri Juwis ado kon tinan Rom badeh, ka-au.
ACT 18:3 Eme Pol edek ili selesen uru ma iy udu hawe uru amekes lahou ta asereh asiu balei, tasah lahou turu doh badeh i se buku lahou tan amwenen.
ACT 18:4 Na len ta amunyau mari badeh, iy ili ndrahu tukum tiri Juwis badeh, anya kaliu budon tiri Juwis hawe iri lau badu Grik.
ACT 18:5 Eme na len Timoti uru Sailas ado Masadoniya ame badeh, Pol eme ruwani lahou tan ta asereh asiu balei, ma atehei budon tan ihis labai ta atiye sahou i tiri Juwis ta Jises badeh, iy Krais handru, ndramak Kindrei atehei iy ta akohok iri lau tan ame hamon.
ACT 18:6 Eme iri Juwis abolosen i tan ma bobose iy badeh, iy turuhi awin tan i mada iri ma asehek i tiri i buku doh, “I buku imek asahan tado, ado sato-en ai. Lahou tek ndrano. Kabwai, udu kabatana dah kameh, jo kameh iu ili bolo iri lau badu leheleh ai.”
ACT 18:7 Ano Pol udu ndrahu tukum tiri Juwis eme len badeh, iy iu ili asiu ari udu mirihik le, ili hawe Titiyus Jastus. Iy badu Juwis bwe, arile iy badeh, ta atudun Kindrei.
ACT 18:8 Eme ndramak ta mwena ta atondrok ndrahu tukum tiri Juwis nyaran Krisipus ma lau mari badu asiu tan badeh, atehei budon toro handru i ta Laban; ma hawe iri lau solo-an badu Korin anuhun sahou Pol asehek badeh, ma iri atehei budon tiri handru i ta Laban ma Pol alomwa iri.
ACT 18:9 Eme na ben ari badeh, Laban asehek sahou i ta Pol i san ta ameh i buku doh: “Ou sanoh, ndri-iy, ma ou sandru-uk ta asehek sahou ale. Ou asehek sahou kili.
ACT 18:10 Tasah, jo kameh udu hawem, ya ari ndramak winiyan batawi ou ma winiyan bamekes isi bawek badam bwe. Tasah, iri lau tek solo-an labai are bolo kon tinan dah.”
ACT 18:11 Ya eme Pol udu hawe iri andrei jaha ari ranah, leheya iri na sahou ta Kindrei.
ACT 18:12 Na len iri lau atondrok Rom atehei Galiyo asahan kabin ta kon tinan Akaya, eme iri Juwis atukum ase tawi Pol ma aruwi iy ili ales ere mada sahou.
ACT 18:13 Eme iri anya, “Iy ndramak dah badeh, ndraluwi budon tiri lau ta atudun Kindrei i san ta kandriyen randrah labai ja, ya idoh bamwenen ta kandriyen malen bwe.”
ACT 18:14 Eme Pol anya kasehek sahou le badeh, Galiyo asehek sahou i tiri Juwis anya, “I buku none kandriyen ndra-in rayah iy mesekei badeh, mwasin ta jo kanuhun ado Juwis ai.
ACT 18:15 Arile, idah badeh, andres ta ndremenya ado hawe nyara ado ma andres ta bolo kandriyen malen tado. Ya eme ado kasehek ta aliy kudu ndrokowa ado le. Jo winiyan banuhun hawe baleben ta aliy bwai.”
ACT 18:16 Eme iy tiye oro au ta are mada sahou.
ACT 18:17 Eme iri Korin tawi tinan ta atondrok ndrahu tukum tiri Juwis nyaran Sostenes ma adai iy udu mirihik ta mada sahou. Arile, Galiyo batehei budon bala ta aliy bwe.
ACT 18:18 Eme Pol udu Korin udu gwek luwen sese. Ano iy ruwani nadu tinen oro ado gwek, ya iy ili kon Senkriya anya kalakak kala Siriya, ma Prisila uru Akwila a hawen ale. Iy ba-au bwe le badeh, iy udu Senkriya asiki batun iu tasah tandrakan tan mene ndrano.
ACT 18:19 Oro ala asos Epesus, eme iy ruwani Prisila uru Akwila ado gwek. Iy le ari badeh, ili ndrahu tukum tiri Juwis andres ta sahou hawe iri.
ACT 18:20 Eme iri lelen iy ta iy kudu hawe iri luluwen sese kudu gwek, arile iy bwalen.
ACT 18:21 Arile, iy anya ki-iu badeh, iy tandrakan i toro anya, “I buku none Kindrei aseken, badeh kameh, jo eme hamon ja.” Ano iy alakak udu Epesus iu ai.
ACT 18:22 Na len iy isos Sesariya badeh, iy i loke ili Jerusalem sekesek iri lau ta Kindrei. Ano iy iu ili andri ili Antiyok.
ACT 18:23 Ano, hamon ta iy udu Antiyok sese, Pol udu doh edek ili rakon ili rakon udu bolo kon munyak tinan Galesiya ma Prijiya batanau iri lau ta budon handru kabadok.
ACT 18:24 Udu bolo len doh, ndramak ari badu Juwis nyaran Apolos, ya atehei iy eme len udu Aleksandriya eme kon Epesus. Iy badeh, tanan tan ndrala labai, ma iy tanan bolo sahou ta Kindrei mwasin labai.
ACT 18:25 Iy badeh, tanan labai ta san ta Laban ma abe-ei iy asehek sahou ta nyala Jises ndra mwasin le. Arile, iy badeh, tanan le lahou ta Jon ta alomwa.
ACT 18:26 Eme iy asehek sahou nyarahan nyarahan udu ndrahu tukum tiri Juwis. Eme Prisila uru anuhun iy badeh, uru kuhi iy eme asiu turu ma leheya iy amwenen na bolo sahou ta Kindrei le gwek.
ACT 18:27 Na len Apolos anya kili Akaya badeh, nadu tinen oro ta Kindrei rayah amekes ndrinen abadok ta ili, ma oro atorou la-ukei ili toro lau ta hamon ta Jises kabe-en iy. Eme Apolos asahan badeh, ma iy ndramak mwasin ta aseben oro are mene asahan lau ta budon handru i san ta tikisiy ta Kindrei.
ACT 18:28 Eme iy bwidi andres i hawe iri Juwis udu mada lau mari na buk ndrabun, ma iy leheya i mada iri ta nyala Jises badeh, iy Krais handru, ndramak Kindrei ndratehei iy ta akohok iri lau tan ame hamon.
ACT 19:1 Apolos udu Korin udu gwek ya Pol badeh, andrei san udu bolo kon loken doh eme asahan Epesus. Udu loboho doh badeh, iy ndruni iri lau rayah iri atehei budon tiri handru in ta Kindrei,
ACT 19:2 ma eme iy ndremenya oro anya, “Na len ado atehei budon handru tado i ta Kindrei, Malawin Ndrabun ewek la-u ado deh bwe?” Eme oro tiye i hamon anya, “Bwe, aso badeh, banuhun se ari lakou i buku Malawin Ndrabun badeh, bwe.”
ACT 19:3 Ya eme Pol lelen oro ja anya, “Ya alomwa ado badeh, na alomwa tare?” Eme oro anya, “Alomwa aso badeh, na alomwa ta Jon.”
ACT 19:4 Eme Pol anya, “Alomwa ta Jon amekes badeh, ta i buku none ou tubuni ndrinem ta kandriyen ndra-in tam. Eme iy tiye i tiri lau badeh, katehei budon tiri handru ki-in ta ndramak ari in kona Jon eme. Iy badeh, Jises.”
ACT 19:5 Oro anuhun sahou doh ano badeh, ma alomwa oro na nyara Laban Jises.
ACT 19:6 Eme na len Pol edeu limen i la-u oro badeh, ma Malawin Ndrabun eme la-u oro, ma oro asehek boho kon rakon ja, randrah labai ma asehek sahou i buku iri propet.
ACT 19:7 Oro lau doh badeh, ma ronoh la-uh.
ACT 19:8 Udu bolo bun taloh badeh, Pol ili ndrahu tukum tiri Juwis asehek sahou nyarahan labai, ma andres boto-on ta aliu budon tiri ta nyala bolo tondrok ta Kindrei.
ACT 19:9 Arile, iri rayah badeh, ndrine iri boto-on labai, ma batehei budon tiri bala ta Kindrei bwe, ma iri asehek sahou ndra-in i bada bolo San ta Laban udu ndranye iri lau mari. Ya eme Pol ruwani iri ado gwek ai. Eme iy kuhi oro lau ta budon handru nane dah ala bolo asiu ta leheya ta Tiranus, ma iy udu hawe oro na len mari, ta leheya oro.
ACT 19:10 Pol amekes gok doh winiya jaha la-uh buruwen. Eme ma iri mwan ma badih solo-an labai badu loboho kon tinan Esiya doh anuhun sahou mwasin ta Laban, iri badu Juwis, ma iri badu iri kon leheleh ale.
ACT 19:11 Eme Kindrei leheya kalem randrah labai edek bada Pol.
ACT 19:12 Eme ma nyandroh ta Pol, buku iri andrei ili hawe iri lau ta sik, eme sik tiri ano ma iri malawin ndra-in atobwak tiri.
ACT 19:13 Eme iri Juwis rayah adek ala anya katikah iri malawin ndra-in ado la-u iri lau ka-au na boto-on ta nyara Laban Jises. Eme iri badeh, tiye i buku doh, “I san ta nyara Jises i buku none Pol asehek, jo tiye ou ame len.”
ACT 19:14 Oro lau nane amekes lakou doh badeh, oro ma ndro taloh, oro badeh, nadu tinan tiri pris ari badu Juwis nyaran Skeba.
ACT 19:15 Arile, na len ari, iri amekes lahou toro badeh, ma malawin ndra-in tiye i toro anya, “Jises hawe Pol badeh, jo tanan uru ai, ya ado, are lau bah?”
ACT 19:16 Eme ndramak nane malawin ndra-in udu la-un dah sandroh i la-u oro ribidi oro ma tarani awin toro ma ubwi oro andra-i labai. Eme oro atobwak ado asiu ame len, ma ndraye oro, hawe awin toro atarah iu.
ACT 19:17 Eme na len iri Juwis ma hawe iri lau badu Grik manyah ado Epesus anuhun badeh, iri anoh. Ma eme nyara Laban Jises badeh, bare andri bwai, nyaran i loke le gwek ai.
ACT 19:18 Eme iri lau ta budon handru mene ame tiye sahou ta tikisiy udu mada lau mari ta sasah ndra-in iri ndramekes.
ACT 19:19 Eme oro lau rayah boto-on ta balik mene udu toro ta amekes balahak, atukum iri buk ma lakou toro i se udu mada lau mari ma atehei jih i ta aliy. Oro andromwei sowan nane asahan buku (K150,000) iri winiyan bandromwei bwe.
ACT 19:20 Eme i san le doh badeh, sahou ta Laban aseker ma i tinan, ma amekes iri lau tan abadok le gwek.
ACT 19:21 Ano udu hamon ta lahou mari doh asahan badeh, Pol amekes budon tan ta anya kili Jerusalem. Iy kameh edek ili bolo kon Masadoniya ma Akaya. Eme iy anya, “Jo ili oro kon doh ano, udu hamon ta aliy badeh, jo kili kaselesen Rom ale.”
ACT 19:22 Eme ma, iy suni uru lau ta aseben iy, Timoti uru Erastus ala Masadoniya. Iy le badeh, udu kon munyak tinan Esiya udu gwek luluwen sese.
ACT 19:23 Na len doh badeh, tine losen asahan i bada San ta Laban.
ACT 19:24 Eme udu loboho doh ale, ndramak ari ta amekes iri lakou na hayen hawe silba nyaran Demitiriyus. Iy amekes silba nyolom tan badeh, i buku asiu ta atudun kindrei badih ari nyaran Atemis. Iy ma hawe lau solo-an akohok luk solo-an labai tiri lau ta lahou doh.
ACT 19:25 Eme iy luhi iri lau ta lahou tan ma hawe iri lau amekes lahou i le buku iy, ame, ma iy tiye i tiri i buku doh, “Ado lau mari ado ndratou ai, to mari badeh, akohok luk solo-an eme tato, ta lakou to amekes dah.
ACT 19:26 Iy lau Pol kede-eh, iy ndraluwi iri mwan ma badih solo-an. Iy ndrabolowani budon tiri, i buku ado ndranyolom ma ndranuhun. Ma iy bamekes kandriyen doh bado kon tinan Epesus dah le, bwe. Mirihik andrei loboho kon tinan Esiya ale. Iy asehek buku iri kindrei, lau amekes na lim, idoh kindrei handru bwe.
ACT 19:27 Ya idoh kameh atehei bohosak eme ta lahou tato ta aliu luk nyaran kameh andra-i. Ya idoh le bwe, idah kameh, ma atehei bohosak i ta asiu ta atudun kindrei Atemis ari moson bwe. Ma idah kameh, lomada kindrei badih tiri lau mari badu Esiya ma hawe munyak mari ta atudun kameh atokos.”
ACT 19:28 Eme iri anuhun sahou doh badeh, ma bwidi ndrine iri ibolosen ma iri sarakau anya, “Atemis kindrei badu Epesus badeh, iy le ai!”
ACT 19:29 Eme se nawin bwe, lau mari badu bolo kon tinan mari sarakau. Eme iri tawi uru lau ta Pol ma la-uh. Gayus uru Aristakus, uru badu Masadoniya, ya iri seheyani uru ala lohalak ndrahu tukum ta lau mari.
ACT 19:30 Pol badeh, anya kili mada iri lau mari, arile iri lau ta Kindrei badeh, balelei iy bwe.
ACT 19:31 Ma hawe iri batun rayah badu kon doh, hawe iri kawas tan suni sahou i tan, ta iy badeh, sala ndrahu tukum ta mada lau mari.
ACT 19:32 Iri lau mari badeh, anyon. Iri rayah badeh, sarakau i randrah labai, ya iri rayah i randrah labai. Ya iri lau solo-an bala tanan ta katin ta iri ala doh bwe.
ACT 19:33 Eme iri Juwis andrekei Aleksandra ili udu mwena tiri ma iri rayah sarakau, ta iy ki-in hamon ta boho iri. Eme ma iy tiye iri mari kandru-uk, ya iy kamekes sahou ta aseben iri lau.
ACT 19:34 Arile, udu ja iri atanan iy badeh, badu Juwis, eme iri sarakau i le buku bwena nane anya, “Atemis kindrei badu Epesus badeh, iy le ai.” Iri sarakau ili winiya awa la-uh.
ACT 19:35 Eme ndramak ta atorou lakou badu kon tinan tiye iri andru-uk, ano iy anya, “Aha lau badu Epesus, iri lau badu kon munyak mari tana iri ta kon tinan Epesus badeh, ta atondrok asiu ta atudun kindrei badih Atemis hawe sukumada hayen mene taku udu kandrah eme andri.
ACT 19:36 Iri lakou doh handru ya ari lau winiyan babisiniy bwe. Ya ado kandru-uk ma ado samekes lakou ta bobo-ap.
ACT 19:37 Ya ado ndraluwi uru lau kede-eh ame dah, uru babene-ei ari lakou badu bolo asiu ta tudun ta Atemis bwe, ma uru badeh, batiye sahou ndra-in bala ta kindrei tato bwe oh.
ACT 19:38 Ya i buku none Demitiriyus hawe oro lau ta lahou tan, toro budon ndra-in udu tare lau badeh, len ta amekes sahou udu aliy, ma iri lau ta atondrok are aliy. Oro winiyan tiye ndramak ta ari lakou ndra-in iy ndramesekei.
ACT 19:39 I buku none, ado ari budon ta asehek, badeh, kedek ki-in hamon ta batanau ma kandriyen tataha mari.
ACT 19:40 Ado kanuhun kamwenen! Tasah, idah kameh, to ndrare bohosak, ta to kameh are ta mada sahou ta gabman tinan tasah ta losen, to amekes dah. To ari madasan bwai, ta sasah to amekes dah, ma to ari kati sahou mwasin bwe le.”
ACT 19:41 Sahou tan ano badeh, iy tiye iri aseker au ai.
ACT 20:1 Udu hamon ta sarakau tiri ano badeh, Pol suni sahou i toro lau atehei budon toro handru in ta Kindrei ame. Ya eme iy batanau oro. Ano ma iy edek iu ili Masadoniya.
ACT 20:2 Iy edek loboho doh badeh, iy asehek sahou ta batanau iri lau ili ili, ma iy isos kon munyak tinan tiri Grik.
ACT 20:3 Eme iy udu kon tiri Grik doh udu gwek winiya bun taloh. Eme iy alokou iy ta anya kalakak kili Siriya, arile iy anuhun yoyou, ta iri Juwis badeh, atilik nyala iri ta kadi iy. Ma eme iy bala bwai, iy ili hamon ili Masadoniya.
ACT 20:4 Ya oro lau a hawen badeh, nadu Pirus nyaran Sopater badu kon Beriya, Aristakus hawe Sekundus badu kon Tesalonaika, ya Gayus badu kon Debi, ma hawe Timoti, Titikus ma hawe Tropimus badu kon munyak Esiya.
ACT 20:5 Oro lau doh badeh, ala bwena ala Trowas abe-en aso.
ACT 20:6 Arile, aso badeh, alakak ado Pilipai ala badeh, udu hamon ta nyamon tinan ta jabi ramen yis bolon bwe. Aso alakak na len limeh, ano aso asos Trowas hawe oro. Eme aso ado gwek len ndro taloh.
ACT 20:7 Ano na len ma mwena ta wik ari ja badeh, aso atukum ame le se ta abo-os jabi ramen. Tasah, Pol badeh, anya ki-iu na len bi-i, ya iy asehek sahou ili tiri lau ili, ili asahan ndrukulu ben.
ACT 20:8 Sun solo-an badeh, udu bolo asiu loken nane aso atukum areu aliy doh. Ya lawe ta asiu loken doh i buku asiu tolo-em, ra-em udu bwele-e ra-em.
ACT 20:9 Eme ya ndramak loweu ari nyaran Yutikus manyah udu mada kadam. Iy anuhun Pol asehek sahou ili, ili, ya madan ndrundrun ili, ili, ma iy amadin tuk ili, ano ma iy taku udu loken eme andri. Eme iri anya kasuri iy badeh, iy ndramak.
ACT 20:10 Pol eme andri badeh, akabah i la-u ndramak loweu dah ma tawi iy. Eme iy anya, “Bale ado sasin iy. Kohan udu aliy!”
ACT 20:11 Ano iy ili bolo asiu loken abo-os jabi ramen ma aimon ai. Iy asehek sahou ili winiya boho len, ano iy iu.
ACT 20:12 Eme iri lau andrei iy ndramak loweu dah iu i kon ma mulin le, ma iri batikisiy ja bwe.
ACT 20:13 Aso badeh, a ndron alakak ales amwenen ala kon Asos. Aso ala badeh, ta asowe Pol. Iy amekes san doh, tasah iy badeh, edek na kati ilih aliy.
ACT 20:14 Eme iy eme isos bada aso udu Asos badeh, aso suni iy ma aso au ala Mitileni.
ACT 20:15 Ano i bada len ari ja badeh, aso alakak ala asos Kiyos. Ano na len ari ja badeh, aso alakak ala bilisiu ala Samos, ma na len ari ja badeh, aso asos Miletus.
ACT 20:16 Eme Pol atehei budon ta aso kasakalawi Epesus ta teleya aso badeh, sare loboho munyak tinan badu Esiya sado luluwen. Tasah, iy ibotatahan ta ili isos Jerusalem na len tinan ta Pentikos.
ACT 20:17 Eme Pol udu Miletus badeh, suni sahou i tiri batun tiri lau ta budon handru in ta Kindrei badu Epesus kame katou iy.
ACT 20:18 Eme iri asahan badeh, iy tiye i toro i buku doh, “Ado badeh, ndratanan bolo manyah tek ma mwena handru kabatana jo eme udu hawe ado eme eme taku len dah, udu loboho kon tinan badu Esiya.
ACT 20:19 San solo-an iri Juwis atilik sahou ta anya kanone jo ta bolo lahou jo amekes, eme ma, kandriyen tiri doh bwidi ndrinek maha-an labai, ma jo eden ta aliy san solo-an. Arile, i buku iri atehei nyarak i andri, jo babudon ta aliy bwe, jo amekes le lahou ta Laban.
ACT 20:20 Ado badeh, tanan jo babisiniy ta atiye sahou ta aseben ado se bwe. Arile, jo badeh, asehek udu mada ado mari ma hawe jo ili asiu ra-em i ra-em.
ACT 20:21 Jo badeh, asehek i ndranye iri Juwis hawe iri lau badu Grik katubuni ndrine iri ta kandriyen ta karei ma lomondra ndra-in tiri, ya katehei budon tiri handru ki ta Laban tataha Jises.
ACT 20:22 “Ya na dah jo in hamon ta boho Malawin Ndrabun, jo kameh ili Jerusalem. Ya jo bala tanan ta sasah katok badak udu doh bwe.
ACT 20:23 Jo le badeh, tanan ta Malawin Ndrabun ndrabatanau jo ta i buku jo ili bolo kon tinan mari, idah kameh, maha-an hawe a bolo kou udu aliy abe-en jo.
ACT 20:24 Arile, jo badeh, balek basin ta kohak bwe. Jo le badeh aseken ta jo kisos bilisiu ta bolo sakaliye tek, ma kamesekei kano lahou Laban Jises ndratehei kanik. Lahou doh ta atiye sahou mwasin ta nyala tikisiy ta Kindrei, ma ta leheya eme lewan.
ACT 20:25 “Ya, jo mene edek ewek bolo ado atiye sahou ta nyala tondrok ta Kindrei. Arile, na dah jo tanan idah kameh, ado winiyan banyolom jo ja bwe.
ACT 20:26 Ya eme na dah jo katiye tado kamwenen, ki buku none ado ari kamak, jo winiyan babwese maha-an ta aliy bwe.
ACT 20:27 Tasah, jo badeh, babisiniy ta tiye seken mari ta Kindrei ewek tado bwe.
ACT 20:28 Ado badeh, katondrok ado kamwenen, ma hawe katondrok lau ta Kindrei mene Malawin Ndrabun atehei iri ado baha tondrok tado. Ado badeh, a buku lau ta atondrok sipsip, ado katondrok iri lau ta budon handru ta Kindrei, ala iy mene konohei iri na ndraye nadun amwenen.
ACT 20:29 Ya aha katondrok iri kamwenen, tasah hamon kameh jo ruwani aha, idah kameh lau solo-an ndra-in ame bolo aha ta tobolowe budon hawe manyah taha. Ya kandriyen tiri kameh i buku iri mwi badu lokei ame atikah iri nadu sipsip.
ACT 20:30 Ma na len eme kameh, lau rayah badu bolo ado badeh, kameh tebeya wasai ta aliu iri mwan ma badih ame len ta budon handru, ma ta iri ka-en hamon toro.
ACT 20:31 Ya eme mada ado badeh, kaleu! Ado badeh, ndratanan, na jaha taloh mene jo ndrabatanau ado na ben na len ta aliy. Jo batanau ado ma wa-i madak amou ta tikisiy.
ACT 20:32 “Ya eme ta sendrehendreh ta aliy, na dah jo edeu ado ala baha tondrok ta Kindrei, ma jo aseken ado abudon sahou ta nyala tikisiy tan. Ya sahou doh kameh winiyan mesekei ado abadok, ma winiyan amekes kandriyen tado ki mwasin winiya ado akohok manyah mwasin, Kindrei ndralebelei ndra ta lau tan.
ACT 20:33 Jo badeh, bawasai ta akohok ra-ei kolau tado ma hawe bakohok ari silba hawe bek nyikilikin bwe.
ACT 20:34 Aha amwenen ndratanan jo badeh, ibo gok ma asilah luk ta atondrok jo hawe oro lau are hawek.
ACT 20:35 Ma udu bolo lahou tek mari, jo ndraleheya aha ta san ta kandriyen ta amekes gok boto-on, aha kaseben iri lau nyamu iri bwe. Ma taha kabudon sahou mene Jises asehek i buku doh, ‘Are ndramak, iy edeu lakou ili tare lau, iy badeh, sekesek tinan handru. Ma sekesek ta iy ndramak nane akohok lakou winiyan basakalawi sekesek ta iy ndramak nane aseben iy bwe.’”
ACT 20:36 Sahou ta Pol ano le badeh, iy atehei bwili ndru-un i andri hawe iri mari, ta adeu salom ma wurah i ta Kindrei.
ACT 20:37 Iri marakon tawi iy, ma iri aden, iri tikisi iy tinan labai, ma iri bwale iri iy iu.
ACT 20:38 Iri badeh, tikisiy tinan labai ta iri sahou nane iy asehek tiri anya, iri kameh winiyan banyolom madan ja bwe. Eme ma iri tiyani iy ili isos bolo ndron.
ACT 21:1 Aso adeu wurah ili tiri lau badu Epesus, ma anya, “Aha ndrado ai.” Aso alakak amwenen ala busu ari, iri aloh Kos. Ano, na len ari ja badeh, aso are Kos alakak ala busu Rodes. Aso alakak are busu Rodes au ala asahan kon tinan Patara.
ACT 21:2 Aso ruwani ndron nane aso au aliy ereu ai, aso anuhun ndron ra-ei kameh anya ki-iu kili Ponisiya. Eme ma aso sandroh ala bolo ndron nane doh ja, ere Patara ma alakak au ai.
ACT 21:3 Ahi alakak au ala bolo ndras laleyah, eme ma ahi anyolom busu Saipres udu loboho mine ahi kamweu. Eme ahi alakak ala, ala winiya le ahi asahan kon munyak tinan Siriya. Ma ndron doh ili Tair ta akeh sanuw ale.
ACT 21:4 Aso ala kon doh, ma ndruni oro lau ta Jises rayah, ma aso are hawe oro are gwek, winiya len ma ndro taloh. Udu bolo len doh badeh, boto-on ta Malawin Ndrabun tiye sahou randra ili tiri. Eme ma iri tiye sahou nane doh ili ta Pol i buku doh, “Ou sala kon tinan Jerusalem labai, bwe kameh iri kadai ou amak.”
ACT 21:5 Arile, len ma ndro taloh taso are hawe oro badeh, ndrano ai, eme ma aso ka-au kala hamon kala ndron ja. Eme ma oro lau marakon ta Jises nane, ma udu oro hawe nadu oro, tiyani aso ala babi. Eme ma ahi mari atehei bwili ndru-u ahi i bada on, ma asolom ili ta Kindrei.
ACT 21:6 Aso ateu lim hawe oro, ano aso sandroh ala bolo ndron. Eme ma oro adek au ala hamon ala ndrahune oro ja.
ACT 21:7 Eme ma ndron nane aso an bolon alakak are Tair ales ili kon tinan Tolomes. Eme aso ndruni oro lau ta Jises rayah ja are loboho doh, ma ateu lim hawe oro. Ma aso are hawe oro len ari le.
ACT 21:8 Na len ari ja badeh, ahi alakak are Tolomes ala kon tinan Sesariya. Udu loboho doh, badeh aso ala asahan asiu ta lau ta Jises ari nyaran Pilip, ma aso amadin hawen. Iy ta atiye sahou ta Jises na len mari, ma iy badu hawe oro lau ma ndro taloh mene iri lau ta Kindrei hawe oro aposel badu Jerusalem atehei oro ta aseben iri lau ta Kindrei.
ACT 21:9 Ma Pilip badeh, nadun oro ma hahuw ndra badih le. Oro ndra tinan ndra bihin, arile oro batasou bwe le, ma Malawin Mwasin ta Kindrei badeh, udu hawe oro badih nane doh, eme ma len rayah oro winiyan atiye sahou nane Kindrei edeu ili toro i buku propet.
ACT 21:10 Len sabe aso are hawe Pilip, eme ma propet ari nyaran Agabus udu Judiya eme andri hawe aso.
ACT 21:11 Iy eme asahan hawe aso, ano iy andrei molowa awin ta Pol. Ma iy bawei iy le, katin hawe minen ma la-uh na aliy, ma iy tiye eme taso i buku doh, “Malawin Ndrabun nane tiye eme tek i buku doh, tama molowa awin dah kameh iu ili bolo asiu lulik ili Jerusalem. Iri Juwis badu Jerusalem kameh bawei katin ma minen i buku doh. Ma iri kameh atehei iy ili mine iri lau badu leheleh, ta iri winiyan amekes kandriyen ndra-in i tan.”
ACT 21:12 Aso anuhun sahou doh badeh, eme aso ma hawe oro lau nane are doh, asehek sahou boto-on ili ta Pol i buku doh, “Pol, ou are dah areu, ou winiya bala andri bala Jerusalem bwe.”
ACT 21:13 Arile, Pol tiye i taso ja i buku doh, “Buku sah? Ado satikisi jo, ma ado satehei tikisiy badeh, same tek. Ado kanuhun, jo banoh ta ili bolo asiu lulik ili bolo kon tinan Jerusalem bwe, ma jo banoh bwe ale, buku iri anya kadi jo, tasah jo asehek nyara Jises, iy tinan labai. Eme ma ado winiyan batawi jo ta udu ja bwai.”
ACT 21:14 Aso badeh, winiyan batubuni budon tan bwe, ma aso basehek sahou bala tan ja bwai. Eme ma aso anya, “Ya, Laban, ou bwidi iri lakou kameh asahan na so-ok tam le amwenen.”
ACT 21:15 Len sabe ndrano ndra-au, ano aso lokowani lokowa aso, ta au ala Jerusalem. Aso ame adek au ala kon tinan Jerusalem,
ACT 21:16 ma oro lau rayah ta Jises badu Sesariya adek hawe aso ale. Oro tiyani aso ala asos asiu ta ndramak ari badu busu Saipres nyaran Nason. Iy ndreh doh mene in hamon ta Jises ndra bwena labai. Eme ma aso ado asiu tan.
ACT 21:17 Ya, aso asahan kon tinan Jerusalem badeh, iri lau ta Jises sekesek labai ta anyolom aso.
ACT 21:18 Na len ari ja badeh, Pol hawe aso mari ala anyolom Jemis; ma oro lau ta Jises rayah tinan are aliy ale.
ACT 21:19 Aso ateu lim hawe oro, ma aso mari ja sekesek a le se. Ano Pol asehek nyala iri lakou marakon nane Kindrei amekes ere bolo iri mwan ma badih badu leheleh udu bolo iri len bwena mene iy amekes lahou tan.
ACT 21:20 Iri anuhun nyala lahou ta Pol mari, ano iri atudun nyara Kindrei. Ma iri tiye ta Pol i buku doh, “Nadu tine aso, ou anuhun, ou ndratanam kane lau mwan ma badih nyaran bwe badeh, iri badu Juwis ma iri ndratehei budon tiri ndrala ta Jises. Ma iri mwan ma badih doh badeh, budon tiri irih labai ta a-en hamon ta batanau ta Moses.
ACT 21:21 Iri lau rayah asehek ou ili tiri i buku doh, ‘Pol badeh, leheya iri lau badu Juwis nane are kon munyak tiri lau badu leheleh, ta iri katehei kona iri kili ta batanau ta Moses, ma tiye iri, sasan ku-i iri nah mwan, ma sa-en hamon ta kandriyen tiri Juwis.’
ACT 21:22 Iri kameh kanuhun, ta ou ndrasahan dah. Ya idah kameh, to kamekes kili buku sah handru?
ACT 21:23 Ya, aso aso-ok ou an hamon taso ta saba lakou aso asehek. Udu bolo aso dah, oro lau ma hahuw badu Juwis badeh, ndramekes tandrakan boto-on labai i ta Kindrei, ta abeles lakou rayah ta manyah toro amwenen.
ACT 21:24 Ya, ou ala hawe oro ala bolo asiu tinan ta Kindrei, ma ado kamekes kandriyen ta Kindrei ta amekes ado kasahan ha-un ta mada Kindrei. Ma ou asih lakou toro ta asun i ta salom, ta oro winiyan asik batu oro. I buku ou amekes i buku doh, iri kameh anyolom ou amekes amwenen handru i buku le kandriyen tiri Juwis. Ma iri kameh winiyan batehei budon tiri ba-en ta sahou, iri anuhun lau rayah mene amekes ewek tam.
ACT 21:25 Ahi ndratorowenei la-ukei ramen, ma ndratiyaniy ndrala tiri lau ta Kindrei badu leheleh, ma ahi tiye tiri i buku doh, ‘Aha saimon nyamon ala ndrala ta salom tiri kindrei nane iri asehek na sukumada kei. Ma aha saimon oda iri katin haka ndra udu ta aliy, ma hawe sa-un ndraye iri. Ma aha samekes kandriyen ndra-in ta karei.’”
ACT 21:26 Na len ari ja, Pol andrei oro lau ma hahuw nane doh, ma oro au ala asiu tinan ta Kindrei. Ma oro ala amekes kandriyen tiri Juwis ta iri kasahan ha-un ta mada Kindrei. Ano, oro adek ala bolo asiu tinan ta Kindrei, ma Pol eme tiye iri tinan ta bwena ta asiu ta Kindrei, ta len sabe handru kameh ta kandriyen toro lau ma hahuw kameh amekes ano iu, ma na saba len ja kameh oro kame katiye lakou ta adeu i nyara salom ili ta Kindrei.
ACT 21:27 Eme ma len ma ndro taloh doh, mirihik tiri ta anya kano ai, iri Juwis rayah nane badu loboho kon Esiya anyolom Pol udu bolo asiu tinan ta Kindrei, oro tukumwi lau solo-an badu Juwis, ma iri ala tawi Pol.
ACT 21:28 Iri arah ma aloh i buku doh, “Aha lau badu Isra-el, aha kame kaseben aso. Iy lau dah le adeh, leheya lau badu kon mara-ei, iy bobose iri lau tataha, ta kandriyen malen ta Moses, ma asiu tinan ta Kindrei ale. Ya, iy bamekes kandriyen dah le bwe. Iy akohok iri lau badu Grik ale ame bolo asiu tinan ta Kindrei, ma iri bwidi ndrahune Kindrei nane leheya iy amwenen udu aliy, ma bwidi ajah ta madan.”
ACT 21:29 Iri tiye iy i buku doh, tasah iri mene anyolom ndramak ari nyaran Tropimus, iy badu kon tinan Epesus, edek bolo kon tinan hawe Pol, ma iri abudon anya, Pol kede-eh ndrandrei iy ndrame bolo asiu tinan ta Kindrei dah.
ACT 21:30 Iri lau marakon anuhun sahou doh, ma iri Jerusalem mara-ei badeh, mani iri atur labai, eme iri mari sakaliye ame atukum ala le doh. Iri tawi Pol ma aruwi iy udu bolo asiu tinan ta Kindrei iu ili manan. Ma iri sulu-i kou marakon badu asiu tinan ta Kindrei ili.
ACT 21:31 Iri anya kadi Pol kimek ki-iu, arile tinan ta atondrok lau ta bahun badu Rom, badeh, ndranuhun lau solo-an labai ado Jerusalem ndratukum, ma anya kamekes bahun laba tinan.
ACT 21:32 Eme ma iy andrei iri tinan hawe iri lau ta bahun, iri sakaliye ala loboho nane iri lau mara-ei atukum are aliy. Iri Juwis anyolom tinan ta mwena tiri lau ta bahun hawe iri lau ta bahun le badeh, iri ruwani Pol ma iri ba-um iy ja bwai.
ACT 21:33 Ndramak tinan ta atondrok iri lau ta bahun eme tawi Pol, ma tiye oro lau tan i buku doh, “Ado kasawei iy ndramak dah na la-uh sen.” Eme ma iy ndremenya iri lau nane i buku doh, “Ya, iy ndramak dah, iy are lau handru? Ma iy amekes saba kandriyen ndra-in handru?”
ACT 21:34 Lau solo-an arah boto-on labai, ma iri asehek sahou laleyah. Eme ma ndramak tinan tiri lau ta bahun nane dah winiyan bala tanan ta kati sahou doh bwe. Ma iy aloh oro lau tan kala katiyani Pol kili bolo asiu boto-on tiri ta bahun.
ACT 21:35 Iri lau ta bahun ame tiyani iy ili isos kati kandren ta adek ala loken le badeh, oro anyolom ma anuhun lau sakaliye ame hawe oro, ma arah i buku doh, “Aha kadi iy ndramak badeh, kimek ki-iu!” Eme ma oro lau ta bahun bwese-ei iy i kase oro iu ili loken, ma iri badai iy bwe.
ACT 21:37 Oro lau ta bahun anya katiye Pol kili bolo asiu tiri boto-on, Pol eme asehek sahou i boho kon Grik ili ta ndramak tinan ta atondrok iri lau ta bahun i buku doh, “Buku sah, jo winiyan asehek sahou ewek tam deh bwe?” Mani iy ndramak tinan nane dah atur sese, ma iy asumon boho Pol i buku doh, “Buku sah, ou tanam boho kon tiri Grik?
ACT 21:38 Jo anya ou kede-eh badu Ijip, iy mene ale tukumwi iri lau ta bahun tan ala tebelese hawe iri lau tahi. Ma iy mene atobwak hawe iri lau, kane iri ma hawa (4,000) iri mene adi iri lau anya ka-en hamon ta gabman badu Rom, ma tiyani iri ala are kon lomale an.”
ACT 21:39 Pol eme asehek sahou i tan ja i buku doh, “Jo iy ndramak badeh, bwe. Jo ndramak ari labai badu Juwis, kon tek handru badeh, Tasus, udu bolo kon tinan Silisiya. Ma nyarak badeh, ere bolo buk badu kon tinan doh, arile na idah jo anya kandremenya ou. Jo anya kasehek sahou kili tiri lau mara-ei are kede-eh.”
ACT 21:40 Iy tiye i buku doh, ma tinan tiri lau ta bahun anya, “Mwasin, ou winiyan asehek sahou.” Eme ma Pol atehei minen i loken ta iri kandru-uk. Eme ma iri andru-uk i le rasan, ma iy asehek sahou ili tiri i boho kon Aramek.
ACT 22:1 Eme ma Pol tiye tiri i buku doh, “Aha mari, aha nadu tine, ma aha tama, jo anya kasehek taha kamwenen i buku doh, jo badeh tanan ari lakou jo amekes andra-i bwe. Aha kanuhun kamwenen.”
ACT 22:2 Eme ma iri anuhun iy asehek sahou i tiri i boho kon Aramek, ma iri mara-ei andru-uk, ma bamekes se sahou bwe, tasah iri anuhun iy amwenen labai.
ACT 22:3 Ma iy asehek ili le anya, “Jo badu Juwis, tine tuwi jo badeh, udu kon rakon iri aloh Silisiya udu bolo kon tinan Tasus. Arile, jo ma bwisik, jo ili akohok tanan ta leheya ma jo asahan ili awas badeh, udu kon tinan Jerusalem dah. Bolo len doh, ndramak tinan taha ari nyaran Gamaliyel badeh, leheya jo. Ma jo badeh, akohok tanan handru ta iri kandriyen malen mari ta tubu taha Moses. Jo abadok ma asahan boto-on ta in hamon le ta Kindrei, ta iri sahou tan, i buku le aha lau marakon nane are kada-ah amekes.
ACT 22:4 Bwena mene jo bokoro-ei iri lau a-en hamon ta San ta Jises, andra-i labai. Ma jo anya kidi iri kamak ka-au. Jo badeh, bawei iri mwan ma badih na sen, ano akahei iri ala are bolo asiu lulik.
ACT 22:5 Iri tinan tiri pris tataha hawe iri kansol mari badu Juwis are kede-eh, iri winiyan asehek sahou mari doh ewek taha, ta jo basehek sahou wendreya, ta iri lakou nane doh bwe. Iri lau mene torowenei la-ukei ramen ili tiri Juwis are Damaskus, iri atehei eme minek, ta jo kili kateu iri lau doh, kabawei iri na sen, ma kandrei iri kame Jerusalem ta iri lau tinan tataha kadeu maha-an ki tiri.”
ACT 22:6 Pol asehek i tiri i buku doh, “An udu halas badeh, jo edek ndrame mirihik labai ta kon tinan Damaskus. Se nawin bwe, sun ari lomadan tinan labai anya udu kandrah eme andri awudi jo mara-ei.
ACT 22:7 Ma jo atarah i andri bada munyak, ma ndranyek anuhun ndramak ari aloh jo i buku doh, ‘Sol, Sol, tasah handru ou anya adai jo kimek?’
ACT 22:8 “Eme ma jo asumon bohon i buku doh, ‘Laban, ou are lau badeh?’ Eme iy anya, ‘Jo Jises badu Nasaret, ou nane abo gok ta adai jo kede-eh!’
ACT 22:9 Ya oro lau rayah nane adek hawek badeh, anyolom lomada sun doh, arile oro banuhun boho ndramak nane asehek sahou eme tek bwe.
ACT 22:10 “Eme ma jo ndremenya iy ja, ‘Laban, ou aso-ok jo kamekes saba lakou tam handru?’ “Ma Laban tiye sahou eme tek i buku doh, ‘Ya, ou suri ou ma ou ala bolo kon tinan Damaskus, ya ndramak ari kameh tiye tam ta lakou marakon Kindrei aso-ok ou amekes.’
ACT 22:11 Madak ma la-uh badeh, ilik mara-ei, tasah lomada sun nane doh, lomadan tinan labai, eme ma oro lau nane adek hawek tawi minek, ma sirini jo iu ili bolo kon tinan Damaskus.
ACT 22:12 “Ndramak ari nyaran Ananayas, iy udu bolo kon nane doh. Iy lau ta Jises ari ai, len mari badeh, iy in hamon le tiri kandriyen ta batanau, eme ma iri Juwis nane are Damaskus badeh, aso-ok iy tinan labai.
ACT 22:13 Ya iy eme ales ere mirihik tek, ma iy asehek sahou eme tek i buku doh, ‘Sol, ou nadu tine ahi, na dah kameh ou winiyan anyolom kon ja.’ Sahou ano le bohon badeh, madak asak, ma jo anyolom iy amwenen.
ACT 22:14 “Iy asehek sahou eme tek i buku doh, ‘Kindrei ale mene, tubu taha iri atudun iy badeh, lebelei ou, ma aseken ou akohok tanan tiri lakou marakon iy aso-ok, ma iy aseken ou anyolom iy. Iy badeh, mwasin labai ta madan, ma ou winiyan anuhun iy asehek sahou na bohon amwenen.
ACT 22:15 Ma ou kameh a buku bohon ta tiye tiri lau mari ta saba lakou nane ou ndranyolom, ma ou ndranuhun.
ACT 22:16 Ma, na idah kameh ou sabe-en ja ai! Ou suri ou are loken, alomwa ou, ma ou aloh nyaran kasikine kandriyen tam ndra-in marakon ki-iu.’
ACT 22:17 “Jo eme hamon eme Jerusalem ja, ma iu ili bolo asiu tinan ta Kindrei, jo asolom udu le badeh, jo amekes lele.
ACT 22:18 Eme ma jo anyolom Laban asehek sahou eme tek i buku doh, ‘Ou anuhun, na le dah, ou suri ou a-au ta Jerusalem. Ou suri ou suwi, tasah iri lau kameh winiyan banuhun ou bwe, buku ou asehek nyarak ili tiri.’
ACT 22:19 “Jo anya, ‘Laban, iri marakon ndratanan jo mwasin labai ta jo mene edek ili bolo asiu ta ndrahu tukum tiri Juwis, ra-em ili ra-em, ta apeu iri, ma adai iri lau ale atehei budon tiri in tam.
ACT 22:20 Udu bolo len mene iri adi lau tam ari nyaran Stiben, badeh, jo udu aliy ale, anyolom iri adai iy. Jo badeh, ere aliy ta atondrok awin tiri lau nane adai iy imek na bek. Ya, ta madak badeh, iri amekes kandriyen mwasin i tan.’
ACT 22:21 “Laban tiye jo anya, ‘Ou adek ai, tasah jo aso-ok ou kameh ala bolo iri kon leheleh, ta aseben iri lau leheleh, iri tanan kandriyen tiri Juwis bwe.’”
ACT 22:22 Iri Juwis anuhun sahou ta Pol, arile iri anuhun iy asehek ja ta aseben iri lau badu leheleh, eme ma bwidi ndrine iri ibolosen, ma iri arah boto-on labai anya, “Iy sare kon munyak hawe taha! Kadi iy kimek ki-iu! Iy ndra-in labai, ma iy sado kon munyak dah!”
ACT 22:23 Iri arah, ma asehek sahou laleyah. Iri asini awin tiri udu bwele-e iri iu, iri akeh ili eme laleyah, ma iri akeh kasu-er ta ndren ili loken, atalan laleyah. Idoh leheya buku iri basekesek ta sahou Pol asehek nane bwe.
ACT 22:24 Tinan ta atondrok iri lau ta bahun nane tiye oro lau tan i buku doh, “Ado kandrei Pol keme bolo kowah hawe to. Ma ado ka-um iy na malou sakabuk i bek, winiya le iy baratiye ta saba lakou handru iy amekes, ma to kameh winiyan atanan kati kandriyen nane doh, tasah handru iri Juwis abadok ta adi iy anya kimek ki-iu?”
ACT 22:25 Eme ma iri lau ta bahun ame bawei Pol, ano iri anya ka-um iy ai. Arile, Pol badeh, ales ere mirihik ta ndramak tinan ta bahun ari, iy ta atondrok iri rayah ai. Eme Pol tiye i ta ndramak nane i buku doh, “Ou anuhun se, buku nyara ndramak udu bolo buk badu kon Rom, ya kandriyen ta batanau asehek i buku doh, iy kili ta mada sahou mwena op, ta seleya iy ndramak nane doh, bwidi kandriyen handru o bwe. Ya, i buku sah handru, na idah ja ado kameh anya ka-um jo laleyah?”
ACT 22:26 Ndramak tinan nane dah anuhun sahou ta Pol, ma iy ales amwenen ili hawe tinan ta atondrok iri lau ta bahun mara-ei. Iy asehek i ta tinan tiri i buku doh, “Ou abudon ma ou anuhun kamwenen op, ano ou baramekes saba lakou ndra-in barala tan, tasah nyaran badeh, ere bolo buk badu kon tato dah.”
ACT 22:27 Eme ma tinan ta atondrok iri lau ta bahun mara-ei doh, ili atou Pol, ma iy ndremenya Pol i buku doh, “Ou tiye tek, nyaram in bolo buk badu kon tahi dah handru?” Eme Pol anya, “Ehe, jo asehek handru.”
ACT 22:28 Eme ma ndramak tinan nane dah anya, “Jo badeh, mene akeh luk solo-an labai ta adeu nyarak ili bolo buk badu Rom.” Ma Pol anya, “Badeh, handru, arile tama uru tine badeh, nyara uru udu bolo buk badu Rom bwena labai, eme ma nyarak udu aliy ale.”
ACT 22:29 Eme ma oro lau ta bahun nane bawei Pol ma anya ka-um iy badeh, anuhun sahou doh ja, oro anoh ma oro tolowei iy. Tinan ta atondrok iri lau ta bahun mara-ei nane doh inoh ale, tasah iy badeh, tiye iri lau ta bahun ta bawei Pol na malou ma sen. Ya, iy tanan idoh ndrabun, ndrabun labai ta apeu ari ndramak laleyah, buku nyaran udu bolo buk badu Rom.
ACT 22:30 Na len ari ja badeh, tinan ta atondrok iri lau ta bahun mara-ei nane dah tolowei Pol, ma iy udu bolo kowah laleyah. Ma tinan tiri lau ta bahun mara-ei dah anya kasilah kati sahou doh ale, iri Juwis nane amekes ta adeu Pol i ta mada sahou. Eme ma iy atehei sahou ili tiri tinan tiri pris, ma hawe iri kansol mara-ei tiri Juwis, ta kame ta tukum doh. Ma iy andrei Pol ili atehei iy ales ere mada iri mara-ei.
ACT 23:1 Pol anyolom amwenen mada iri kansol mara-ei, ma iy anya, “Aha nadu tine, Kindrei badeh, ndranyolom iri kandriyen tek mari na bolo len mara-ei, ndrabwena eme asahan dah. Jo batona ari kandriyen ndra-in jo amekes bwe.”
ACT 23:2 Pol asehek sahou doh ili ma tinan tiri pris nyaran Ananayas eme tiye oro lau rayah ales are mirihik ta Pol i buku doh, “Ado katabasi lim ki boho iy ndramak badeh.”
ACT 23:3 Pol tiye ili ta Ananayas i buku doh, “Kindrei kameh a-um ou. Buku ou badeh, atehei awin tiri tinan, arile bahandran ta aliy badeh, ou ndramak ndra-in, ma budon tam ndrandra-i. Ou anya ou ndramak ari handru ta a-en hamon ta kandriyen malen ta Moses, ma aseben ta amekes sahou tek, ya i buku sah, nadah ja ou ndrasakalawi kandriyen malen, ma ou tiye iri lau are kada-ah ta a-um jo laleyah?”
ACT 23:4 Ya, oro lau nane ales are mirihik ta Pol asehek i tan i buku doh, “Hei, Kindrei atehei i ndramak kodo-oh tinan tiri Juwis. Ya, ou sondrokonya iy na sahou badeh, tasah handru?”
ACT 23:5 Eme ma Pol anya, “Ado nadu tine, jo bala tanan buku iy ndramak kodo-oh tinan tiri pris badu Juwis bwe. Buku jo ki tanan badeh, jo winiyan basehek sahou doh bala tan bwe, tasah sahou randra udu bolo buk ndrabun, asehek i buku doh, ‘Aha sasondrokonya iri lau nane atondrok aha.’”
ACT 23:6 Pol ndranyolom buku lau lubuk are bolo tukum nane doh, rabuk Sadusi ya rabuk Parasi. Pol eme aloh i buku doh, “Aha nadu tine! Jo Parasi ari ai, jo nadu iri Parasi amwenen. Ya, nadah ja jo ales udu hawe aha ta aha atehei jo ili ta mada sahou, tasah jo in hamon ta budon tiri Parasi amwenen, ma ahi atehei budon tahi boto-on labai, buku len hamon eme, Kindrei kameh mete-ei iri lau ndramak are bolo lek tiri, amak ame awas ja.”
ACT 23:7 Pol atehei sahou doh ili badeh, ma bwidi losen asahan bolo ndrokowa iri Sadusi ma iri Parasi, ma apwai iri a lubuk.
ACT 23:8 Iri Sadusi anya iri lau ndramak badeh, winiyan bamak bame awas ja bwe, ma iri anya iri malawin mwasin ma angelo bwe, arile iri Parasi badeh, atehei budon tiri mara-ei in toro lakou mari doh, handru.
ACT 23:9 Eme ma bwidi iri arah i tinan labai, eme lau rayah ta leheya kandriyen ta batanau malen ta Moses, iri badu hawe iri Parasi ales are loke, asehek sahou nyarahan labai i buku doh, “Ahi winiyan basilahei ari kandriyen ndra-in ta iy ndramak kede-eh amekes bwe. Buku sah? Buku ari malawin mwasin, o, ari angelo ndradeu sahou ndrala tan!”
ACT 23:10 Losen toro ma lubuk badeh, i tinan le gwek ai. Eme ma, tinan ta atondrok iri lau ta bahun anya, se luwen bwe, iri kameh tarani Pol. Eme ma iy tiye oro lau ta bahun tan rayah anya, “Ado kala bolo tukum kodo-oh, karuwi Pol udu mine iri lau keme len, ma kandrei iy keme, bolo asiu tato boto-on.”
ACT 23:11 Udu, i ben ari ja badeh, Laban eme ales ere mirihik ta Pol, ma iy asehek sahou i tan anya, “Ou abadok ma ou sanoh, ou badeh, ndraleheyani nyarak ndrala bolo kon tinan Jerusalem, ma ou kameh winiyan amekes i buku le aliy kameh, udu kon tinan Rom ale.”
ACT 23:12 Na mandraben ari ja badeh, iri lau rayah badu Juwis atukum ja, ta amekes sahou tandrakan ta adai Pol. Iri badeh, abeles iri winiyan bakohok nyamon, ma gwa bwe, winiya le iri kandrei batu Pol ki-iu labai.
ACT 23:13 Kane iri Juwis nane atilik sahou ta adi Pol badeh, udu bwele-e hanoh (40) ja.
ACT 23:14 Ano iri au ala atou iri tinan tiri pris hawe iri lau tinan ta atondrok iri, ma asehek sahou ili tiri i buku doh, “Ahi marakon ndratandrakan, ta ahi winiyan baimon nyamon ma ba-un gwa bwai, winiya le ahi kandrei batu Pol ki-iu labai.
ACT 23:15 Buku na dah ado hawe iri kansol katehei sahou kili ta tinan ta atondrok iri lau ta bahun badu Rom badeh, katiye tan ki buku doh, ‘Ahi aso-ok aha lau tam katiyani Pol keme andri ja, ma ahi anya kandremenya iy ta lakou rayah ja. Ahi anya katanan kamwenen ta saba lakou handru iy amekes.’ Ya, na len iri tiyani iy, iy edek san kahis le, ahi kameh awe-ek iy, ma adi iy imek.”
ACT 23:16 Arile, nadu kali Pol ari badeh, anuhun ta iri anya kadi Pol kimek. Eme ma iy ili suwi, suwi ili asiu boto-on tiri lau ta bahun, ma iy edek ili bolon anyolom Pol ma tiye sahou nane doh i tan.
ACT 23:17 Eme ma Pol aloh tinan ta lau ta bahun ari eme hawen, ma iy asehek i tan i buku doh, “Ou andrei iy loweu kede-eh kili hawe tinan ta atondrok aha. Iy anya kasehek sahou ari kili tan ta iy kanuhun.”
ACT 23:18 Eme lau ta bahun doh andrei iy, ma sirini iy ili hawe tinan ta atondrok iri mara-ei, ma iy asehek i ta ndramak tinan doh anya, “Iy ndramak udu bolo asiu lulik kodo-oh nyaran Pol aloh jo ili ta jo kandrei iy loweu dah keme katou ou, tasah iy tan sahou ta asehek ewek tam.”
ACT 23:19 Ndramak tinan ta atondrok iri lau ta bahun eme tawi minen, ma sirini iy, uru ala ales are loboho bolo asiu sese doh, ari lau bwe. Iy eme ndremenya iy loweu nane dah, “Ya, ou anya asehek tek ta nyala saba lakou handru?”
ACT 23:20 Iy loweu dah anya, “Iri tinan tiri lau badu Juwis badeh, ndrasehek nyala iri ndra le ari, iri anya, buku bi-i badeh, ou tiyani Pol kili andri kanyolom iri, iri anya katukum, kasehek nyala iri ja, ma iri anya kawendreya, buku iri kanuhun rayah sahou ta Pol ja.
ACT 23:21 Arile, ou sanuhun iri labai, tasah kane iri lau badeh, udu bwele-e kane lau ma hanoh (40), iri kameh are san atondrok ta adai Pol. Ma iri ndratandrakan ndrala ta Kindrei, i buku doh, iri kameh adi Pol imek labai, ano iri barakohok nyamon ma gwa ja ai. Eme ma iri atondrok ou, buku ou aso-ok ta atiye Pol ili hawe iri.”
ACT 23:22 Eme tinan ta atondrok iri lau ta bahun tiye i ta iy loweu i buku doh, “Ou anuhun, ou sasehek labai sala ta ari ndramak ja, ta ou nane ndrasehek nyalak ta sahou dah.” Ma iy tiye iy iu ili hamon ili ndrahunen ja.
ACT 23:23 Eme, tinan ta atondrok iri lau ta bahun luhi uru tinan la-uh ja badu bahandran ame, ma iy asehek i turu anya, “Ya, ah kandrei lau ta bahun ma lunek (200) kawek hawe ah ta ala Sesariya na ben kameh, hawe oro ndro tonoh (70) lau ta bahun, oro winiyan sakaliye ta hos, ma hawe lunek (200) lau ta bahun ja ta orou nyah. Ah katiye iri kado le katondrok mada an kili buku ndro-ari na ben dah.
ACT 23:24 Aha kandrei ari hos ale ta bwese Pol, ma ah katiyani iy kamwenen kili kisos hawe kabin Peliks.”
ACT 23:25 Ano, ndramak tinan ta atondrok iri lau ta bahun mara-ei dah, torowenei la-ukei ramen, sahou udu bolon asehek i buku doh:
ACT 23:26 “Peliks, jo Klodiyas Lisiyas, jo atorou la-ukei ramen dah ewek tam. Ou ndramak tinan labai, ou atondrok kon mara-ei udu loboho badeh. Bada-an tam mwasin ai.
ACT 23:27 Jo tiye oro lau tek tiyani iy ndramak dah ewek hawem, tasah iri Juwis are kada-ah mene tawi iy, ma seheyani iy ili eme, mirihik iri kadi iy kimek. Eme ahi anuhun buku nyaran badeh, udu bolo buk tinan tataha badu Rom. Eme, jo ma hawe iri lau tek ta bahun ala andrei iy ere mine iri Juwis eme len.
ACT 23:28 Eme jo badeh anya ki tanan ta saba katin handru iri amekes kandriyen buku doh i tan. Eme ma jo tiyani iy ili hawe iri kansol badu Juwis.
ACT 23:29 Ma jo badeh, ndranuhun sahou, iri amekes ili ta Pol. Iri atehei iy ili ta mada sahou doh badeh, ta sahou rayah ta kandriyen ta batanau tiri Juwis. Ma iy ale, bamekes ari kandriyen ta iri kadai iy, ma katehei iy kili bolo kou, bwe.
ACT 23:30 Jo anuhun sahou i buku doh, eme ma jo tiye iri lau tek ta bahun tiyani iy kewek hawem suwi, tasah jo ndranuhun sahou ta lau rayah, atukum a le se ta adi iy ndramak dah. Eme jo tiye iri lau nane amekes i buku doh, ta awek hawem, ma ou kameh winiyan lebelei sahou tiri. Ya, sahou tek idoh le, kabwai.”
ACT 23:31 Ya, iri lau ta bahun andrei la-ukei doh, ma a-en hamon ta sahou ta tinan tiri. Iri tondrokei Pol, ma tiyani iy na le ben doh ili isos kon tinan Antipatris.
ACT 23:32 Na len ari ja badeh, iri lau ta bahun nane adek na kati iri ame hamon ame asiu tiri ta bahun ere Jerusalem ja. Arile, iri rayah nane ta hos badeh, tiyani Pol iu isos kon tinan Sesariya.
ACT 23:33 Oro ala asahan kon tinan Sesariya, eme oro lau ta bahun nane tiyani Pol amwenen iu ili hawe kabin ta kon doh. Ma oro atehei la-ukei nane ili minen.
ACT 23:34 Kabin eme anyolom la-ukei doh, ma iy ndremenya Pol, “Ya, ou badu saba kon handru udu loboho Rom?” Pol asehek i tan i buku doh, “Jo badeh, badu kon Silisiya.”
ACT 23:35 Kabin eme tiye Pol, “Mwasin jo winiyan anuhun sahou tam, buku iri lau nane anya kadeu ou ala ta mada sahou, asahan.” Ano iy aloh oro lau tan ta bahun ame, “Ya, ado katiyani Pol kili asiu tinan ta kabin Herot mene tutuniy, ma ado katondrokei iy.”
ACT 24:1 Udu len ma limeh ano iu, eme tinan tiri pris ari badu Juwis, nyaran Ananayas, iy eme ili asahan kon tinan Sesariya. Iy ma hawe iri tinan rayah, ma ndramak ari iy tanan labai ta kandriyen ta batanau ta sahou, nyaran Tertulus. Eme iri ala asahan bada kabin ta kon doh, ma iri asehek sahou marakon ta amekes Pol kili ta sahou.
ACT 24:2 Kabin tinan eme aloh Tertulus ta ili bwena ta asehek sahou. Iy ili ales ere bwena, ma iy asehek iri sahou ta amekes Pol kili ta sahou, i buku doh, “Peliks, ou tinan tahi, ma mwena, jo anya kedeu wurah kewek tam, tasah tanan tam mwasin labai. Eme ma, ahi badu loboho kon doh akohok manyah mwasin, ma ari bahun bwe, tasah ou amekes iri batanau mwasin ta amekes lakou rayah amwenen, ma amekes kon tahi edek amwenen.
ACT 24:3 Na bolo len mara-ei badeh, sekesek tahi tinan labai ere tam, ta idoh ma ahi anya kadeu wurah kewek tam.
ACT 24:4 Jo bwalek aliu sahou lawe-en labai, tasah ou tam gok solo-an ta amekes. Arile, na dah jo anya kandremenya ou ta tikisi aso, ma ou anuhun sahou taso ja, na dah aso anya kasehek kewek tam.
ACT 24:5 “Ya, iy Pol badeh, iy ndramak ari ndra-in labai, ta amekes ramwes solo-an. Ahi tanan, buku iy ta amekes losen ere bolo iri Juwis ere bolo kon mara-ei, ma iy ndramak tinan ari ale, tiri lau nane a-en hamon ta Jises badu kon tinan Nasaret.
ACT 24:6 Ou anuhun, iy ale none ta akohok iri kandriyen ndra-in solo-an eme bolo asiu tinan ta Kindrei. Arile, na bolo len doh badeh, ahi tawi iy. Buku ou ndremenya iy ndramak kede-eh, ou amwenen kameh winiyan silahei iri lakou marakon nane ahi anya kadeu iy kili ta mada sahou ta aliy.”
ACT 24:9 Eme ma iri Juwis nane are bolo tukum doh aloh i le rasan anya, “Iri sahou marakon doh ndra handru le ai.”
ACT 24:10 Eme ma kabin ta kon dah anyoleh, ta iy anya kanuhun boho Pol. Pol eme suri iy, ma iy asehek sahou i buku doh, “Jo tanan ou asahan kabin are loboho tiri Juwis dah, na jaha solo-an labai, eme ma jo sekesek tinan labai ta ou aseben ta anuhun sahou tek nadah.
ACT 24:11 Len ma ronoh la-uh mene le kada-ah badeh, jo ili bolo asiu tinan ta Kindrei udu Jerusalem ta amekes salom. Buku ou lelen iri, idah kameh ou winiyan atanan, buku sahou mari doh, handru.
ACT 24:12 Iri Juwis badeh, anyolom jo, batebelese hawe ari ndramak bwe. Ma jo batukumwi rayah lau ame ta amekes bahun bwe. Iri lau nane ta adeu jo i ta mada sahou dah badeh, banyolom jo andra-i, ma tebelese hawe iri bado bolo asiu tinan ta Kindrei, o ndrahu tukum udu loboho bolo Jerusalem, bo-oh.
ACT 24:13 Ma sahou marakon nane iri asehek ta adeu jo ili ta mada sahou doh badeh, wasai. Ma iri lau kede-eh winiyan baleheya ari lakou nane jo amekes andra-i bwai.
ACT 24:14 Arile, jo anya kasehek lakou ari, iri nane atehei jo i ta mada sahou ta aliy, badeh, kaleu kewek taha: Jo badeh, atudun Kindrei ta tubu ahi ari le, ma jo atehei budon tek mara-ei in hamon ta San ta Jises, iri Juwis kede-eh aloh san randrah ja. Ma jo atehei budon tek mara-ei i tiri lakou ndratorowenei ere bolo kandriyen malen ta Moses, ma ere bolo buk tiri propet.
ACT 24:15 Jo in hamon ta Kindrei, iri lau nane atehei jo ili ta mada sahou badeh, a-en hamon tan ale, ma ahi atondrok, len hamon Kindrei kameh mete-ei iri lau mwasin, ma hawe iri lau ndra-in mene ndramak, kameh amak ame awas ja.
ACT 24:16 Eme ma, na len mari, jo aseken budon tek badeh, kaleu, ma jo ki-in hamon ta kandriyen mwasin ta ere mada Kindrei, ma hawe iri lau badu munyak.
ACT 24:17 “Winiya jaha sabe kolek, jo ruwani kon tinan Jerusalem, jo iu ili bolo iri kon leheleh, ano jo eme hamon ja atiye luk i toro lau tek amwenen, toro lakou bwe, ma hawe iri lakou rayah ta asun i nyara salom ili ta Kindrei.
ACT 24:18 Ya, iri atou jo ere bolo asiu tinan ta Kindrei, ma iri atou jo sikine badak ndrano, in hamon ta kandriyen tiri Juwis ta asahan ha-un ja ta mada Kindrei, ma ari ndramak, o, rayah lau batukum bame hawek, ma aso andra-i bwe. Ma ari ndramak barah laleyah bwe.
ACT 24:19 Arile, iri Juwis rayah badu loboho Esiya are ndra Jerusalem kodo-on. Buku oro lau doh toro sahou ta asehek eme badak, mwasin, oro amwenen kame kare madam dah, ma katehei jo kili ta sahou.
ACT 24:20 Ya, ou ndremenya iri lau are kede-eh se, oro kasehek ta saba kandriyen ndra-in udu tek handru, kala jo ales ere mada tinan ta kansol tiri mene.
ACT 24:21 Sebwe iri badeh, abolosen ta nadu lakou ari le, mene jo amekes. Jo ales ere bolo iri kansol tinan tiri marakon doh, ma jo asehek, ‘Jo atehei budon tek mara-ei in ta Kindrei, iy kameh mete-ei iri lau marakon are bolo lek tiri amak ame awas ja.’ Eme ta katin doh le, iri atehei jo ili ta mada sahou.” Ma Pol ano ta asehek sahou tan marakon.
ACT 24:22 Eme ma Peliks tanan mwasin labai ta iri kandriyen tiri lau ta Kindrei aloh San ta Jises. Ma iy tiye tiri i buku doh, “Ya, buku iy ndramak tinan ta atondrok iri lau ta bahun nyaran Lisiyas udu Jerusalem keme kasahan dah, badeh kameh, jo baranuhun sahou taha ja ai.” Iy asehek sahou i buku doh ma sahou tiri kabwai.
ACT 24:23 Eme ma kabin tinan doh tiye ta tinan ta atondrok iri lau ta bahun nane androkei ta Pol i buku doh, “Ou hawe oro lau tam katehei ndrokei ta Pol kamwenen, arile ado sabawei iy mara-ei. Ado karuwani iy kedek, ma oro lau badu hawen kame kanyolom iy ma katiye nan nyamon.”
ACT 24:24 Len sabe ano iu, eme Peliks hawe udun Ndrusila, ame ta atou Pol. Ndrusila doh, iy badih butuhu Juwis. Peliks eme aloh Pol kili katou iy. Pol eme ili tiye turu ta iri kandriyen ta atehei budon handru in ta Jises Krais.
ACT 24:25 Arile, Pol asehek iri sahou nane ili le, ma iy asehek ta lau ka-en hamon tiri kandriyen mwasin, ma iri katondrok manyah tiri kamwenen, ma iri samekes kandriyen ndra-in. Ma iy asehek ta nyala len hamon, Kindrei kameh seleya manyah ta lau marakon. Peliks anuhun iri sahou doh, ma bwidi iy inoh mara-ei labai. Ma iy tiye Pol i buku doh, “Ou au ai. Buku len rasan ja, jo baraloh ou barame, ma ou barame baratou jo ja.”
ACT 24:26 Peliks anya, Pol badeh, kedeu tan rayah luk, ma iy karuwani iy ere bolo asiu lulik keme len laleyah. Budon tan boto-on udu ta lakou doh, ma iy aloh Pol ili hawen san solo-an labai.
ACT 24:27 Arile, Peliks anya kasahan kawas hawe iri Juwis, ma iy baruwani Pol udu bolo asiu lulik bame len bwe. Eme ma jaha ma la-uh ano iu, ma ndramak ari ja nyaran Porsiyus Pestus akohok kon ta Peliks, ma iy akohok gok tan.
ACT 25:1 Pestus eme asahan Sesariya ta akohok kon ta Peliks. Ano, udu hamon ta len taloh iu, iy iu ili loke ili Jerusalem.
ACT 25:2 Udu Jerusalem doh badeh, iri tinan tiri pris ma hawe tinan tiri Juwis ala anyolom Pestus ta amekes sahou ta adeu Pol i ta mada sahou.
ACT 25:3 Iri Juwis badeh, aso-ok Pestus katiyaniy Pol keme Jerusalem suwi suwi, tasah iri ndratehei sahou ndrado aliy. Iri kameh atondrok ado kabede-e san ta adai Pol kimek.
ACT 25:4 Arile, Pestus eme asehek i tiri i buku doh, “Pol badeh, udu ndra bolo asiu lulik udu Sesariya kahis, arile jo amwenen kameh iu ili hamon ja.
ACT 25:5 Mwasin, iri tinan taha rayah kame hawek kala Sesariya, ma katehei iy ndramak doh kili ta mada sahou, buku iy ndrabwidi saba lakou ndrandra-i handru.”
ACT 25:6 Pestus udu hawe iri ere gwek buku len ma ndru la-uh, o len ma ronoh, ano iy iu ili hamon ili Sesariya. Na len ari ja badeh, iy manyah udu bolo asiu ta anuhun sahou ta lau, ma iy atehei sahou ili tiri lau ta bahun katiyani Pol kili kales kudu madan.
ACT 25:7 Pol eme bolon le badeh, iri Juwis nane are Jerusalem ndrame ndrare bolo asiu doh, awudi iy ma asehek sahou boto-on ta kandriyen solo-an ndra-in ta adeu Pol ili ta mada sahou. Arile, sahou tiri bare bada ari lakou handru bwe.
ACT 25:8 Eme, Pol asehek sahou ta aseben iy i tiri i buku doh, “Jo badeh, bamekes ari ndra-in bala ta batanau malen tiri Juwis, o asiu tinan ta Kindrei, o i bada Sisa, bo-oh!”
ACT 25:9 Pestus anya kamekes ndrine iri Juwis kasekesek, iy eme asehek ili ta Pol i buku doh, “Buku sah, ou aso-ok ta ala hamon ala Jerusalem ja, ma jo kamekes sahou dah ja kere loboho tiri amwenen, deh?”
ACT 25:10 Pol anya, “Bwai, jo ndrales ndrare ta sahou mada Sisa kada-ah kabwai, iy kabin ta atondrok kon tataha Rom. Aha winiyan atehei jo i ta sahou udu bolo asiu ta sahou le dah. Ya, ou ndratanam, jo badeh, bamekes ari ndra-in bala bada iri Juwis kede-eh, bwe-en.
ACT 25:11 Buku jo ba-en hamon ta batanau bwe ma jo ndrabwidi ari kandriyen ndra-in, badeh, iri winiyan atehei jo ili ta sahou ma adai jo imek ta aliy, idoh jo ari sahou ta aliy bwe. Arile, buku sahou nane iri asehek ta adeu jo i ta mada sahou kede-eh, buku sahou wendreya, ya ari ndramak tinan ta kon tataha dah winiyan badai jo bamak laleyah bwe. Jo aso-ok ou andrei jo kamwenen kili hawe Sisa, tinan tataha badu Rom, ma iy amwenen kanuhun sahou dah.”
ACT 25:12 Pestus ili asehek ma anuhun sahou hawe iri lau ta gabman tan, ta akohok rayah tanan mwasin tiri. Ano, Pestus eme hamon asehek ili ta Pol i buku doh, “Ou badeh, aso-ok ta ala Rom, ta Sisa kanuhun sahou tam dah. Ya, ou are bahandra tondrok ta Rom, jo kameh tiyani ou ala hawe Sisa.”
ACT 25:13 Len sabe iu, ano kabin Agripa hawe udun Banis, uru ame Sesariya anya kaselesen Pestus.
ACT 25:14 Uru are loboho doh len sabe iu, ano Pestus asehek ta nyala Pol i ta kabin. Iy anya, “Ndramak ari ere bolo asiu lulik kede-eh, nyaran Pol. Peliks badeh, banuhun sahou tan bano bwe, iy ere ndra bolo asiu lulik kede-eh kahis.
ACT 25:15 Jo mene ili Jerusalem badeh, tinan tiri pris hawe tinan ta bwena ta kandriyen tiri Juwis atukum ta atilik nyala iri ta adeu iy ndramak doh, anya kili ta mada sahou. Eme iri tiye tek i buku doh, ‘Ou anuhun sahou ta iy ndramak kede-eh suwi, ma iri lau ta bahun kadai iy ki-iu.’
ACT 25:16 Eme ma jo anya, ‘Kandriyen ta gapman badu Rom edeu ndramak ili ta sahou i buku doh: Buku rayah lau anya kadeu ari ndramak ki ta sahou, iy ndramak doh badeh, katiye len tan ta asehek sahou hawe oro bwena, op. Gabman winiyan bati-i sahou tan iu laleyah bwe, buku i ndramak nane basehek saba lakou iy amekes bado mada sahou bwe.’
ACT 25:17 Iri asahan hawek le badeh, jo batondrok ja bwai, na len ari ja badeh, jo ndramanyah ndrado bolo asiu ta anuhun sahou, ma jo atehei sahou ili tiri, katiyani Pol keme ta sahou.
ACT 25:18 Arile, iri Juwis ame loken ta adeu iy i ta sahou badeh, jo abudon iri kameh asehek ta nyala iri kandriyen ndra-in iy ndramekes, arile bwai.
ACT 25:19 Iri atehei iy i ta mada sahou badeh, ta budon ma kandriyen tiri in ta bada kei nane nyaran Jises, Pol asehek ta iy amak ndrame awas ja.
ACT 25:20 Jo badeh, winiyan basilahei ari san ta anuhun sahou doh, bwai; eme, jo lelen buku iy kaso-ok ta ili hamon kili Jerusalem, kales ta sahou tan ja.
ACT 25:21 Arile, Pol bwalen, ma iy ndremenya jo katiyani iy kili kon tinan Rom kandremenya Sisa kanuhun sahou doh ja. Jo eme tiye i tan, ta iy kili hamon kili bolo asiu lulik ja, iri lau ta bahun katondrokei iy, winiya le len ta anya katiye iy kili Rom katou Sisa.”
ACT 25:22 Kabin Agripa tiye Pestus, “Jo le amwenen kameh anuhun boho iy ndramak badeh.” Eme Pestus anya, “Mwasin, ou kameh anuhun bohon na bi-i.”
ACT 25:23 Udu, na len ari ja badeh, Agripa uru Banis nyosowani uru na awin turu moroyan, ano uru adek ala bolo asiu tinan tiri ta atukum. Uru ala bolon hawe iri lau tinan ta bahun, ma iri kabin badu kon doh. Eme ma Pestus atehei sahou, ma iri lau ta bahun tiyani Pol eme.
ACT 25:24 Pestus anya, “Kabin Agripa, ma hawe aha lau marakon ame ta tukum dah, aha kanyolom iy ndramak dah se, len marakon iri lau badu Juwis arah eme tek ta adai iy ki-iu. Iri amekes udu kon tinan Jerusalem, ma udu dah ale.
ACT 25:25 Arile, jo silahei amwenen badeh, iy bamekes ari kandriyen ndra-in ta adai iy imek bwe. Eme ma iy amwenen ndremenya jo katiyani iy kili Rom, ma Sisa kanuhun sahou tan doh ja. Eme ma jo anya katiyani iy kili.
ACT 25:26 Arile, jo ari lakou ta atorou ta nyalan ili ta tinan tataha Sisa bwe. Eme, kabin Agripa, jo andrei iy eme ales ere madam, ma aha marakon are kede-eh ale. Taha marakon kanuhun sahou tan op. Ano jo baratou saba sahou tan handru barala ta ramen la-ukei barala ta Sisa.
ACT 25:27 Buku jo kandrei ari ndramak badu bolo asiu lulik kili, ano jo batorowenei ramen la-ukei ta tiye tanan ta saba lakou iri atehei iy ili ta mada sahou bwe, jo amwenen anyolom buku kandriyen doh bamwenen bwe.”
ACT 26:1 Eme ma kabin Agripa tiye Pol, “Ya, nadah, ou asehek sahou tam kamwenen ai.” Pol eme edeu kalem na minen ta iri marakon kanuhun iy.
ACT 26:2 “Kabin Agripa, na len dah jo sekesek tinan labai ta asehek sahou tek dah ewek tam. Iri lau ta atondrok kandriyen tiri Juwis, iri mene amekes sahou solo-an labai eme badak, eme jo anya kasehek sahou tiri doh kewek tam.
ACT 26:3 Arile, ou ndratanam kandriyen tahi Juwis marakon, ma ou ale tanam iri rayah a-en hamon ta budon ari labai, ya iri rayah ja tebelese na sahou, ma iri a-en hamon ta budon ari ja. Sebwe, ou kameh winiyan anuhun sahou tek dah.
ACT 26:4 “Ya, i buku doh, iri tinan ta atondrok kandriyen tiri Juwis marakon badeh, ndratanan manyah tek, mene jo ma loweu manyah udu kati kon amwenen, ma jo eme akohok tanan udu Jerusalem.
ACT 26:5 Iri ndratanan jo ndra bwena labai. Ya, buku oro aso-ok, oro winiyan asehek nyala iri lahou jo ndramekes udu bolo tukum tiri. Bwena mene jo Parasi ari ai; kandriyen tiri badeh boto-on labai, ma jo amekes lahou in hamon ta kandriyen tiri.
ACT 26:6 Eme ma, jo ales ere mada sahou dah, tasah jo atondrok ma atehei budon tek mara-ei in ta sahou tandrakan ta Kindrei, iy atehei ndra bwena i ta tubu ahi iri.
ACT 26:7 Iri boho kamen tahi ma ronoh la-uh atondrok ta akohok tandrakan badeh, asahan. Iri atudun Kindrei na len ma ben mari, ma iri atehei budon tiri mara-ei handru ta iy winiyan mete-ei iri lau ndramak ame loken ame awas ja. O, kabin tek, jo ale atehei budon tek mara-ei in ta atondrok lakou doh. Ta kati sahou le doh, bwidi iri Juwis orowei sahou eme tek.
ACT 26:8 Buku sah handru, aha rayah abudon buku, taha satehei budon tataha sala ta Kindrei, ta iy kameh mete-ei iri lau ndramak, kameh amak ame awas ja?
ACT 26:9 “Aha kanyolom! Bwena mene jo amwenen badeh, ales boto-on labai ta amekes iri gok solo-an, solo-an ta sa-en hamon ta sahou ta Jises badu Nasaret doh.
ACT 26:10 Jo amekes iri gok doh udu Jerusalem. Jo akohok sahou ta ateu lau badeh, badu mine tinan tiri pris badu Juwis, ma jo bawei iri lau nane a-en hamon ta Jises badeh, solo-an labai ala bolo asiu lulik. Buku iri Juwis atehei iri rayah ala ta mada sahou ta adai iri ta amak badeh, jo amwenen ale udu aliy edeu minek ta adai iri amak.
ACT 26:11 Ma len solo-an badeh, jo iu ili bolo asiu ta atukum tiri Juwis, ma jo abwiyeh iri lau ta Jises doh. Ma jo atehei sahou ili ta lau rayah ta a-um iri, ma nohowa iri ta iri kabobose Kindrei. Eme ma ndrinek ibolosen labai, ma jo in hamon tiri ili, ili bolo iri kon udu len labai ta Jerusalem.
ACT 26:12 “Ma jo mene amekes gok i buku doh, ma iri tinan tiri pris badu Juwis badeh, atehei la-ukei ramen eme minek ta atiye kili kon tinan Damaskus ta ateu iri lau ta Kindrei kala bolo asiu lulik.
ACT 26:13 Ndramak tinan, an ndrame loken ndrare le alih. Jo badeh, edek san, se nawin bwe jo anyolom lomada sun ari udu kandrah eme andri. Sun doh lomadan boto-on ma tinan labai ja ta an. Sun doh anya eme bwele-ek, ma hawe oro lau rayah nane adek hawek.
ACT 26:14 Aso mari atarah ala bada munyak, ma jo anuhun boho ndramak ari aloh jo i boho iri Hiburu i buku doh, ‘Sol, Sol, tasah handru, ou anya adai jo kimek? Ou badeh, bwese maha-an ma sisi-in ta kandriyen, buku ou le amwenen morohani katim i ta lakou madan labai.’
ACT 26:15 “Eme ma jo asumon bohon i buku doh, ‘Laban, ou are badeh?’ Eme Laban asehek i buku doh, ‘Jo Jises, ou nane abo gok ta adai jo kede-eh.
ACT 26:16 Arile, ou suri ou, ma ou ales. Nadah, jo ewek hawem, atehei ou ta amekes gok tek. Ma ou kameh atiye sahou ta iri lakou nane ou ndranyolom, ma ta iri lakou jo kameh leheya ou ta aliy.
ACT 26:17 Jo kameh sebenei ou, buku ou ala ado bolo iri lau tam amwenen, ma iri lau leheleh. Jo kameh suni ou ala bolo iri,
ACT 26:18 ta aseh mada iri ilik kanyolom kon ja, ma iri katubuni kona iri kili ta boto-on ta balik, kili hamon ta Kindrei. Kindrei kameh mani kandriyen ndra-in tiri mara-ei, ma iri kameh winiyan akohok kon hawe iri lau nane asahan ndrabun, i san ta iri atehei budon tiri in tek.’”
ACT 26:19 Pol asehek ili le i buku doh, “O kabin Agripa, jo bala bwalek ta lakou badu kandrah mene jo anyolom ma anuhun bwe.
ACT 26:20 Jo atiye sahou ma bwena handru ili tiri lau badu Damaskus. Ano ja, jo atiye ili bolo kon Jerusalem ma Judiya mara-ei, ma ili bolo kon leheleh ale. Jo atiye sahou, ta iri karuwani kandriyen ndra-in tiri ki-iu, ma iri katubuni ndrine iri kili ta Kindrei. Ma iri kamekes kandriyen mwasin ta leheya iri ndratubuni ndrine iri handru.
ACT 26:21 Ta idoh le badeh, iri Juwis ame tawi jo udu ndra bolo asiu tinan ta Kindrei, ma anya kadai jo kimek.
ACT 26:22 Arile, Kindrei tondrokei jo udu mwasin labai, eme isos dah. Eme ma, jo ales ja dah, ma tiye sahou ili tiri lau marakon bwisik, ma tinan, ta saba lakou jo ndranyolom. Jo batiye randra sahou ja bwe. Jo tiye sahou randra le doh, iri propet hawe Moses mene asehek ta aliy kameh asahan.
ACT 26:23 Iri asehek i buku doh, ‘Mesaya, iy ndramak nane Kindrei tiye iy eme ta akohok iri lau tan, iy kameh akohok sisi-in ma iy imek, eme ma iy le ari doh kameh ili bwena labai ta amak ere bolo lek tan eme awas ja. Ma iy kameh atiye sahou ta nyala sun ta Kindrei ili tiri Isra-el, ma ili tiri leheleh ale.’”
ACT 26:24 Pol asehek sahou tan kahis le, arile Pestus eme sokolowa iri sahou tan, ma arah anya, “Pol, balem ndra-au, tanan tam tinan labai, ma bwidi ou asahan lolo-ou!”
ACT 26:25 Eme Pol anya, “Pestus, ou kabin tinan labai! Jo babo lolo-ou bwe. Iri sahou marakon badeh, ndra handru le ai, ta laleyah bwe.
ACT 26:26 Agripa, ou kabin, jo winiyan banoh ta asehek iri lakou marakon ewek tam bwe. Jo tanan lakou marakon doh winiyan bataras madam, ma ndranyem bwe. Ou ndratanam iri marakon, tasah iri lakou marakon doh mene basahan bare kabwak bwe.
ACT 26:27 Agripa, ou kabin, ou atehei iri budon tam mara-ei in ta sahou tiri propet deh bwe? Jo ndratanan, ou atehei budon tam mara-ei in aliy.”
ACT 26:28 Agripa eme ndremenya Pol i buku doh, “Buku sah handru? Ya, na bolo len sese le dah, ou abudon anya, ou kameh winiyan andrekei jo asahan ‘Kristen’ nadeh?”
ACT 26:29 Pol anya, “Buku len sese le, o, len ari ma buruwen badeh, ndra mwasin le. Jo asolom ili ta Kindrei i buku, ou ma hawe iri lau marakon are kede-eh, anuhun sahou tek dan, aha marakon kameh winiyan asahan buku le jo. Arile, jo bwalek ta iri kameh bawei aha na sen, ma atehei aha ala ado bolo asiu lulik.”
ACT 26:30 Eme ma kabin Agripa suri iy ales, Pestus hawe Banis, ma hawe iri rayah nane manyah are hawe oro ma taloh. Iri marakon suri iri ales are loke,
ACT 26:31 ma iri adek ala bolo bosoh ari ja, atilik nyala iri, i buku doh, “Iy ndramak doh badeh, babwidi ari kandriyen ndra-in ta adai iy, o, iy kudu bolo asiu lulik kudu gwek, bwe.”
ACT 26:32 Agripa eme tiye ta Pestus i buku doh, “Ou winiyan tolowei iy ndramak kodo-oh iu laleyah. Arile, iy amwenen aso-ok Sisa kanuhun sahou tan.”
ACT 27:1 Iri atilik nyala iri ano, eme ma nyala iri ndra le randra, ta aso kakohok ndron ta ala kon tinan Rom udu bolo munyak tinan Itali. Iri ame atehei Pol ili hawe iri lau rayah ja nane badu bolo asiu lulik, i mine tinan ari nyaran Juliyus. Iy ta atondrok iri lau ta bahun, kane iri ma rinek (100). Iy badu hawe iri lau ta bahun ta Sisa amwenen.
ACT 27:2 Ahi sandroh ala ndron ra-ei badu kon tinan Adramitiyum. Ndron doh anya kalakak lawe-e le bada kon tinan mara-ei loboho Esiya. Eme ma ahi alakak au a len. Ndramak ari nyaran Aristakus, badu Tesalonaika udu bolo kon munyak tinan Masadoniya badeh, udu bolo ahi ale.
ACT 27:3 Na len ari ja badeh, ahi asahan Saidon. Juliyus badeh, amekes kandriyen mwasin labai handru ili ta Pol, eme iy tiye Pol kili loken kanyolom iri kawas tan, ma iri winiyan adeu nan nyamon.
ACT 27:4 Ahi ado Saidon, alakak au a len bolo ndras, kona busu badu Saipres, tasah jor atohou udu no-o ndron tahi.
ACT 27:5 Ahi ame apou bayau ala bilisiu mirihik ta kon munyak tinan Silisiya, ma Pampiliya, ano ahi asahan Maira udu loboho kon tinan Lisiya.
ACT 27:6 Ahi are doh badeh, tinan ta atondrok lau ta bahun ili atou ndron ra-ei badu Aleksandriya anya kili Itali. Eme ma iy atehei ahi ala bolo ndron doh ja.
ACT 27:7 Len sabe kolek ahi alakak amunum le ai, tasah jor ma bayau laba tinan labai soroya ahi. Iri lau badu bolo ndron doh boto-on labai, ma ahi ala asahan mirihik ta kon tinan Nidus. Arile, jor sokei ahi ma ahi winiyan balakak bala doh ja bwe. Eme ma ahi tubuni ahi ja ala are busu Krit. Mirihik ta no-o sabon Salmone, ma ahi au ala bilisiu mara-ei ta busu.
ACT 27:8 Iri lau badu ndron badeh, boto-on, ma ahi atas Krit le ai. Ma ahi ame asahan kon ari, iri aloh Salan Korohan, bado len ta kon tinan Laseya bwe.
ACT 27:9 Len solo-an iu ma ahi manyah laleyah are loboho doh, ma len ndrabun tiri Juwis ta abeles iri ta nyamon badeh, ndrano ndra-au. Ma bayau atohou a tinan le gwek, eme ma Pol tiye sahou batanau ili tiri i buku doh,
ACT 27:10 “Aha lau marakon, aha kanuhun, jo ndratanan buku taha au nadah, taha kameh ndruni len ndra-in labai, ma lakou solo-an kameh iu. Iri sanuw hawe ndron kameh iu. Taha marakon kameh amak ale.”
ACT 27:11 Arile, tinan ta atondrok lau ta bahun banuhun sahou ta Pol bwai. Iy in hamon le ta budon ta ndramak ta atondrok ndron, ma tama ndron doh amwenen.
ACT 27:12 Sala kon nane doh ari korohan mwasin ta ndron aton ta jor tinan ere aliy bwe. Eme ma iri lau solo-an are bolo ndron nane doh, atehei sahou tiri i le randra ta ahi ka-au le ai. Buku ahi winiyan, asahan Piniks, ma kado aliy katondrok jor tinan nane doh kamondrei. Kon Piniks doh badeh, salan ari le udu bilisiu ili kum, ma loboho an i andri ta busu Krit.
ACT 27:13 Nadu yayah sese le atohou eme loboho kum, iy batohou boto-on handru bwe. Eme ma iri anya, ahi winiyan alakak ala bolo salan ari nane iri asehek ta aliy. Eme ma iri aruwi hanai eme loken, ma ahi alakak lawe-e le bada kon badu Krit au ai.
ACT 27:14 Arile, se nawin bwe, jor tolau laba tinan atohou udu busu eme tahi.
ACT 27:15 Jor eme atok ta ndron badeh, ma ndron mara-ei totoreh, ma winiyan batas bamwenen ja bwe. Oro lau badu ndron anya katobolowe, tobolowe labwe, eme ma oro tubuni ndron in le bwele-e bayau, ma jor atuw ahi le ai.
ACT 27:16 Ahi alakak au ala koroha nadu busu ari, iri aloh Kauda. Oro lau badu bolo ndron badeh, anyolom bwalu bameles bwe, oro ame aluwiy ma boto-on eme bwele-e ndron tinan.
ACT 27:17 Oro aruwiy eme bwele-e ndron tinan, ma oro tabuwi ndron mara-ei ihis na le ndriliki. Oro anoh, kora-on oro katas kala kahis ta kababi udu loboho kiri Libiya. Eme oro lukumwi balei mari eme andri, boto-on ta jor ma bayau le badeh, teheya ndron ma oro.
ACT 27:18 Na len ari ja badeh, jor ma bayau i tinan le gwek. Eme ma iri lau badu ndron badeh, akeh sanuw rayah iu i ndras.
ACT 27:19 Atoha, ano atoha ja badeh, iri lau badu bolo ndron akahei ndriliki ma liwiliu ta balei, mara-ei i bolo ndras.
ACT 27:20 Len sabe buruwen badeh, ahi banyolom an ma ndrau bwai. Jor atohou boto-on ma bwidi bayau a tinan mara-ei, ma bwidi ahi kameh ta amak le ai.
ACT 27:21 Len sabe buruwen badeh, ahi baimon se nyamon bwai. Eme Pol suri iy ales udu bwena tiri lau badu ndron, ma asehek anya, “Buku taha nane ado ndra Krit, aha kanuhun bohok badeh, jor ma bayau dah winiyan basahan tataha bwe, ma ado winiyan bakeh iri sanuw bala ndras bwe.
ACT 27:22 Arile, nadah aha sabwerei, ndrine aha mara-ei kasekesek, tasah taha mara-ei winiyan bamak bwe; ndron le kameh atahan ma atuh iu.
ACT 27:23 Jo badeh, lau ta Kindrei ma jo badeh, lohowan tan; len marakon jo atehei bwili ndru-uk i andri i tan. Na ben nane iy suni angelo tan ari eme ales ere mirihik tek,
ACT 27:24 ma iy tiye tek i buku doh, ‘Pol, ou sanoh! Ou kameh ala ales are mada Sisa. Ou anuhun, Kindrei ndranuhun sahou tam, ma iri lau marakon are bolo ndron hawem kede-eh kameh winiyan bamak bwe.’
ACT 27:25 Ya, aha marakon sanoh! Jo atehei budon tek mara-ei in ta Kindrei, iy kameh winiyan bwidi lakou marakon i buku le iy asehek tek na ben.
ACT 27:26 Arile, taha kameh alakak ala amar ado bwele-e busu rayah.”
ACT 27:27 Winiya ben ronoh hahuw jor teheya ahi ma ndron au ala andri bolo ndras tinan laleyah, iri aloh Medetereniyen. I buku ben alih badeh, oro lau badu ndron atona, buku ahi ndrame mirihik ta kon.
ACT 27:28 Eme ma oro akahei malou i gwa ta tumundroh gwa, buku gwa lawe-en, o, bwe. Oro aruwiy eme loken tomondrohei lawe ta gwa i buku nyahan lunoh (20). Ahi atas ala sese, ano oro tumundroh gwa ja. Oro tomondrohei lawe ta gwa ja doh asahan nyahan ronoh limeh (15).
ACT 27:29 Ma bwidi oro anoh labai, kora-on ndron tahi katas kili bwele-e bek, eme ma oro akahei hanai ma hahuw badu hamon i gwa ta ateu ndron kere rasi. Iri ame asolom ta kon kaleu suwi.
ACT 27:30 Oro lau ta ndron badeh, none ta atobwak, oro tolowei bwalu bwisik ili gwa, ta wendreya ta ala apeu rayah hanai ja ta no-o ndron.
ACT 27:31 Arile, Pol asehek ili tiri tinan ta tondrok lau ta bahun ma iri lau ta bahun i buku doh, “Buku oro lau doh bado ndron bwe, aha kameh winiyan bado bwe.”
ACT 27:32 Oro lau ta bahun ame sani iri ndriliki ta ateu nadu bwalu nane doh, ma ateheh iu ili bolo ndras laleyah.
ACT 27:33 Kon ndraleu, an anya kasahan keme loken ai, Pol eme asehek sahou ili ta lau marakon nane are bolo ndron badeh, kaimon nyamon. Iy tiye i buku doh, “Idah, buku wik la-uh amwenen ai, aha tikisiy tinan labai, ma aha baimon se nyamon bwe.
ACT 27:34 Jo anya kasehek taha marakon i buku doh, aha kaimon nyamon nadah, tasah nyamon kameh amekes ndrine aha abadok, ma udu mwasin. Aha kanuhun, taha marakon kameh are mwasin, ma ari tataha winiyan bamai bwe.”
ACT 27:35 Pol asehek sahou i tiri ano, iy andrei jabi ramen rayah udu minen, iy edeu salom i ta Kindrei udu mada iri, ano iy boso-ei ma iy aimon.
ACT 27:36 Sahou doh ili bwidi ndrine iri lau mari sekesek, ma iri aimon nyamon.
ACT 27:37 Kane ahi lau marakon are bolo ndron nane doh i se badeh, ma lunek ndro tonoh onoh (276).
ACT 27:38 Iri aimon nyamon ano, iri ame akeh lakou rayah buku ndrom wit iu i gwa ta amekes ndron kapek keme loken.
ACT 27:39 Kon aleu amwenen badeh, ahi anyolom bada babi, arile iri lau badu ndron ja badeh, tana iri kon doh ja bwe. Iri ame anyolom salan ari iu ili bolon ma bada babi mwasin ere aliy. Ma oro ame abudon ta akohok ndron kili salan nane doh.
ACT 27:40 Oro ame sani ndriliki ta hanai ma hahuw nane doh atuh iu ili andri bolo ndras. Na le liliy, oro tolowei ndriliki oro nane bawei bos tinan ta kulik na aliy iu. Ano oro sihi balei badu no-o ndron i loken ta jor katuw ndron katas ki-iu kili salan.
ACT 27:41 Arile, ndron atas ili bwele-e kababi ma amar ili bwele-e mek; no-o ndron ili ihis ta kababi udu gwek. Goi atohou eme tabasi mwe-e ndron, ma ndron atahan i le munya-un ndra-in.
ACT 27:42 Iri lau ta bahun amekes budon ta adai iri lau ta bolo kou kamak, iri abudon anya kora-on iri kaya kala amik ma iri katobwak ka-au.
ACT 27:43 Arile, tinan ta atondrok iri lau ta bahun badeh, anya kaseben Pol, ma iy tiye tiri lau tan samekes kandriyen doh. Iy eme tiye tiri lau nane, tana iri ta aya, kasandroh kala gwa, ma kaya kala amik.
ACT 27:44 Ya iri rayah ja a-en hamon tiri, aya a-en bwele-e iri sabar ta ndron tahi nane atahan, ma lakou rayah ja badu ndron atahan ili bwisik. Ahi amekes i buku doh, ma ari tahi bamak bwe.
ACT 28:1 Ahi marakon aya asos babi ndra mwasin le ai. Ahi atanan buku busu doh iri aloh Malta.
ACT 28:2 Iri lau badu busu doh amekes kandriyen mwasin labai eme tahi. Ur undruk laba tinan eme andri ma bwidi bolo kon anyala labai. Eme ma iri tabani jih, ano iri luhi ahi marakon ala anyan jih, ta amekes bolo oda ahi ki nyarahan.
ACT 28:3 Pol ale atubwa ma atukum ndro-o jih rayah, ta edeu i jih. Jih nyarahani mwak ari udu bolo iri ndro-o jih nane doh, ma iy seselek eme len, ma ini mine Pol.
ACT 28:4 Iri lau badu busu doh anyolom mwak sukik udu mine Pol, ma mani iri atur laleyah, ma iri asehek i tiri ari, ari anya, “Sebwe iy ndramak kede-eh ta idi lau nadeh, eme ma mwak ini iy doh! Iy bamak bado ndra bolo ndras bwe, arile kindrei nane ta edeu maha-an i ta lau ta amekes kandriyen ndra-in badeh, bwalen iy ndramak kodo-oh ta udu kon munyak dah nadeh.”
ACT 28:5 Arile, Pol toboroyani mwak nane sukik udu minen taku i jih ma minen bisi bwe, ma se ndra batekeu bwe.
ACT 28:6 Iri lau marakon ado atondrok ta minen kase, ano iy kataku ma kimek. Arile, iri atondrok luluwen labai ma iri banyolom ari lakou basahan tan bwe, iri ame tubuni budon tiri ma asehek budon tiri anya, “Iy kede-eh ari kindrei!”
ACT 28:7 Munyak nane ahi are aliy badeh, ere mirihik ta munyak ta ndreh kabin ta busu doh, nyaran Publiyus. Iy ndreh kabin doh andrei ahi ala asiu tan, ma iy tondrokei ahi udu mwasin labai winiya len taloh.
ACT 28:8 Tama Publiyus badeh, ibo sik in andri, badan nyarahan, ma walou ere tan. Pol eme ili bolo asiu hawen, iy asolom iy, iy atehei minen i bwele-en ma nyumuri iy amwenen ja.
ACT 28:9 Pol amekes i buku doh, ma iri lau badu busu nane doh ame le hawen, ma iy nyumuri iri amwenen ale.
ACT 28:10 Iri lau badu busu doh adeu tahi lakou buku ndramas badeh, solo-an labai, ma ahi anya ka-au badeh, iri adeu nahi lakou buku nyamon ta atondrok ahi are ndron.
ACT 28:11 Bun ma taloh badeh, ahi are busu Malta. Ano ahi a bolo ndron ra-ei mene aton ta jor tolau ere busu doh. Ndron doh badeh, badu kon tinan Aleksandriya. Udu no-o ndron badeh, iri torowenei malawi nadu kindrei Sus ma la-uh udu aliy.
ACT 28:12 Ahi alakak ala asahan kon tinan Sirakus. Ma len taloh ahi are kon tinan doh.
ACT 28:13 Ahi alakak are loboho doh ala asahan kon tinan rakon, iri aloh Regiyum. Na len ari ja badeh, jor atohou udu loboho kum eme, ma na bolo len la-uh le badeh, ahi asahan kon tinan Puteyoli.
ACT 28:14 Loboho bolo kon tinan doh, ahi ndruni lau ta Kindrei rayah, iri ame ndremenya ahi kare hawe iri winiya wik ari op. Ano iri ado, ahi adek amwenen au ala kon tinan Rom.
ACT 28:15 Iri lau ta Kindrei badu Rom anuhun, buku ahi adek ala, eme iri adek ame mada baen ta Apiyus, ma kon iri aloh Asiu Ma Taloh Ta Amunyau, atondrok ahi are aliy. Pol anyolom iri le badeh, ma iy edeu wurah tinan labai i ta Kindrei, ma bwidi ndrinen sekesek labai.
ACT 28:16 Ahi asahan bolo kon tinan Rom badeh, iri lau ta atondrok kon Rom leheyani asiu raem i ta Pol le amwenen udu aliy, ma hawe ndramak ari ta bahun udu hawen ta atondrok iy.
ACT 28:17 Pol udu Rom buku len taloh ai, eme ma iy atehei sahou ili tiri tinan tiri Juwis kame ta tukum ari. Iri marakon ndrame ndratukum ndrano, iy eme tiye tiri i buku doh, “Aha nadu tine, jo in hamon ta kandriyen ta tubu taha iri mene. Jo ale bamekes ari lakou ta bolowa iri lau tataha bwe. Arile, iri tawi jo ili bolo asiu lulik udu Jerusalem, ano iri atehei jo ili mine iri Rom.
ACT 28:18 Iri lau tinan badu Rom ndremenya jo, ma anuhun sahou tek, ma iri anya katalou jo ki-iu laleyah, tasah iri basilahei ari ndra-in jo amekes ta adai jo kimek bwe.
ACT 28:19 Arile, iri Juwis banuhun sahou doh bwe. Eme ma jo ari madasan ja bwe. Jo badeh, anya Sisa kanuhun sahou tek. Arile, bala buku jo anya katehei iri lau tek amwenen ta ari lakou a ta mada sahou bwe.
ACT 28:20 Ta katin doh le, eme jo aloh aha marakon ame. Jo anya kanyolom aha, ma kasehek sahou hawe aha. Tasah, jo atehei budon tek mara-ei, ma jo atondrok sahou tandrakan nane taha lau marakon badu Isra-el atondrok kede-eh. Ta idoh le, iri bawei jo na sen dah.”
ACT 28:21 Iri Juwis tiye Pol i buku doh, “Ahi bakohok ramen la-ukei badu Judiya eme tahi ta tiye nyalam eme dah bwe. Ma ari ndramak badu Juwis bame basehek tahi, ma amekes sahou rayah ndra-in ewek tam, bwe.
ACT 28:22 Arile, nadah, ahi anya kanuhun budon tam le amwenen, tasah ahi tanan, bolo kon mara-ei iri lau amekes sahou ta bobose ili ta lakou nane ha-un asahan bolo taha Juwis kede-eh.”
ACT 28:23 Eme iri asan len tiri ta ame hawe Pol, ma iri lau solo-an ame hawe Pol ala asiu nane iy udu aliy. Na mandraben ili ano beyeh an amai, iy asehek i tiri ta nyala tondrok ta Kindrei le ai. Iy asehek tiri ta kandriyen malen ta Moses, ma sahou iri torowenei udu bolo buk tiri propet bwena. Na iri sahou doh, iy anya kamekes budon tiri mari kili ta Jises.
ACT 28:24 Eme ma iri lau rayah a-en hamon ta sahou ta Pol. Arile, iri rayah badeh, batehei budon tiri ba-en hamon ta sahou tan bwe.
ACT 28:25 Eme ma iri asehek sahou solo-an ta andres ere ndrokowa iri le amwenen, ma iri kadek ka-au. Arile, ma mwena badeh, Pol sihidi sahou randra i tiri i buku doh, “Malawin Ndrabun badeh, asehek sahou handru ili ta tubu taha iri eme boho propet Aisaya. Iy asehek i buku doh:
ACT 28:26 ‘Ou ala asehek kili tiri lau badu Juwis buku doh: “Aha kameh anuhun sahou san solo-an, arile aha kameh winiya bala tanan kati sahou handru bwe. Aha kameh anyolom san solo-an, arile aha kameh winiyan baseleyani ari lakou bwe.”
ACT 28:27 Tasah, budon tiri lau doh badeh, ndrandra-i, ma ndranye iri ndrawoyah ta anuhun iri sahou, ma iri ndratubuluhi mada iri. Kora-on iri kanyolom iri lakou, ma kanuhun iri sahou, ma iri katanan kati sahou handru, ma iri katubuni ndrine iri, ma kame hawek, ma jo kameh bwidi iri asahan mwasin ja.’”
ACT 28:28 Ma Pol isan sahou tan ta ano i buku doh, “Buku aha ndratanan, sahou dah ta lahou mwasin Kindrei amekes ta akohok taha ame hamon ja, badeh, Kindrei ndratehei ndra-au ndrala tiri lau badu kon leheleh. Iri kameh winiya anuhun amwenen!”
ACT 28:30 Jaha ma la-uh badeh, Pol ere le asiu iy sihinei ta iy udu aliy. Iy sekesek labai ta iri lau ame manyah hawen.
ACT 28:31 Iy banoh bwe ta asehek nyala tondrok ta Kindrei i tiri, ma iy leheya iri ta sohowa Laban Jises Krais.
ROM 1:1 Jo Pol, jo badeh, lohowan ta Krais Jises. Jo ale aposel, Kindrei tiye jo, ma aloh jo eme ta atiye sahou tan mwasin.
ROM 1:2 Sahou mwasin doh bwena mene iy tandrakan, ma atehei i kani iri propet, ma torowenei udu bolo tarou tan.
ROM 1:3 Sahou mwasin doh badeh, ta nyala nadun, ya iy badeh, saren tiye iy asahan ta lundriye tubun Debit.
ROM 1:4 Na len Kindrei mete-ei iy amak eme loken ja, Malawin Mwasin ta Kindrei leheya taha buku, Kindrei atehei nyosowan i la-un, ma hawe boto-on i tan ta atondrok lakou tan mari. Iy badeh, Laban Jises Krais.
ROM 1:5 Na iy le badeh, Kindrei atehei lahou dah eme kani aso, ma iy atehei seben eme taso ale, eme ma aso asahan aposel i nyara Krais ta atiye sahou, hawe kaliu iri lau badu kon leheleh mari kanuhun sahou, ma katehei budon tiri handru ki ta Kindrei.
ROM 1:6 Sahou doh badeh, ewek taha lau manyah ado Rom ale. Aha ndranuhun iri lau atiye sahou ta Kindrei ewek taha, ma Kindrei ndraluwi aha ndrame lau ta Jises Krais.
ROM 1:7 Eme ya, jo Pol amwenen atorou la-ukei dah badeh, ewek taha lau mwan ma badih mari badu Rom, ala mene Kindrei aseken aha labai, ma ndraluwi aha mari ndrasahan lau tan amwenen. Ya eme ma, jo aso-ok tama taha Kindrei ma hawe Laban Jises Krais, katehei tikisiy ma mondrei tan kudu taha.
ROM 1:8 Ma mwena handru jo edeu wurah i ta Kindrei tek i san ta Jises Krais ewek taha mari, tasah lau mari badu kon munyak asehek anya, aha badeh, ndratehei budon taha handru ndra-en ta Jises Krais.
ROM 1:9 Aha ndranyolom ai, sahou mene jo asehek i taha badeh, handru, ya Kindrei badeh, tanan. Kindrei le doh badeh, jo atehei ndrinek mari i tan, ma atudun iy, ma jo edek ta atiye sahou mwasin ta nyala nadun. Ma Kindrei tanan, jo badeh, balek bamani aha bwe na len mari
ROM 1:10 udu bolo salom tek. Jo badeh, ndremenya Kindrei udu bolo salom ta iy kasihi san, ya jo kewek kanyolom aha.
ROM 1:11 Jo badeh, aseken labai ta anyolom aha, ma kasehek sahou ta nyosowa Malawin Ndrabun kewek taha, ma kamekes ndrine aha kabadok.
ROM 1:12 Ya eme jo asehek ta aliy ewek taha, ma eme tek ta aseben taha mari i le rasan. Ya aha kameh anyolom budon tek handru, idah kameh, amekes aha abadok, ma jo ale kameh anyolom budon handru taha ma amekes jo kabadok i le buku aliy.
ROM 1:13 Ya eme aha nadu tine, bale aha samani lakou doh: San solo-an solo-an jo lomondra ta anya kewek kanyolom aha, arile lakou badeh, mesekei ta jo sawek, eme eme taku dah. Jo badeh, anya kamekes lahou kudu bolo aha, ma kaseben aha kabadok ta budon handru taha ki ta Jises Krais, ma ka-en hamon ta san tan. I buku none jo mene amekes i tiri lau badu leheleh.
ROM 1:14 Jo anya kedeu saluwe lahou tiri lau mari, ki tiri lau badu Grik ma Grik bwe, ma hawe ki tiri lau ta tanan, ma ki tiri lau tana iri lakou bwe.
ROM 1:15 Ya eme ta katin le doh, jo aseken labai ta atiye sahou mwasin ta nyala Krais ki taha lau mari manyah ado Rom badeh.
ROM 1:16 Jo banoh ma bwilik bama ta sahou mwasin ta Krais bwe, tasah idoh badeh, boto-on ta Kindrei ta akohok are lau iri atehei budon tiri handru i ta sahou mwasin doh ame hamon. Sahou doh ma mwena i tiri Juwis, ano badeh, i tiri lau badu leheleh ale.
ROM 1:17 Sahou doh handru, tasah sahou mwasin leheyani kandriyen mwasin ta Kindrei eme lewan, ta iy aloh iri lau mwasin mara-ei ta madan i san ta budon handru le, udu ndra bada katin eme taku na len dah. I buku none tarou ta Kindrei tiye i buku doh, “Are lau le atehei budon tan handru in ta Kindrei, Kindrei kameh aloh iy mwasin mara-ei ta madan, ma iy ndramak doh le winiyan akohok kohan ha-un ta udu le buku doh.”
ROM 1:18 Tasah, taha tanan Kindrei udu kandrah, iy leheyani losen tan eme lewan eme andri ili la-u iri lau ta tebelese, ma ta kandriyen ndra-in iri amekes. Ya eme na kandriyen tiri le doh, iri anya katisih sahou handru, ma sokei iri lau winiyan bala tanan Kindrei bwe.
ROM 1:19 Handru, losen ta Kindrei eme andri ili la-u iri, tasah iri kandriyen ma tanan mwasin ta Kindrei badeh, iri winiyan atanan ta aliy, tasah Kindrei ndraleheyaniy ndraleu ndrala mada iri.
ROM 1:20 Ya eme kabatana Kindrei mesekei munyak eme taku dah, iri lau anyolom iri lakou iy ndramesekei. Na iri lakou le doh, iri lau winiyan atanan kandriyen rayah ta Kindrei. Handru, iri kandriyen doh amai ta mada iri, arile iri winiyan atanan ta iy badeh, udu kede-eh handru, ma boto-on tan ta udu le buku doh. Eme ma, ta katin doh, iy mesekei iri lau winiyan bawasai anya iri tanan iy bwe.
ROM 1:21 Iri tanan Kindrei badeh, udu kede-eh, arile iri batudun ma bamasiye iy bwe, ma badeu wurah bala tan ta lakou mwasin iy amekes i tiri, bwe. Ya eme budon tiri badeh inyon; bolo iri mara-ei idih na lulik, ma iri bala tanan ndra-in ma mwasin udu heh bwe.
ROM 1:22 Eme iri anya iri lau ta budon, arile bwe, iri a lolo-ou le gwek.
ROM 1:23 Kindrei badeh, lomadan tinan labai ma iy badeh, winiyan bamak bwe, iy ta udu le buku doh. Arile, iri batudun iy ja bwai, iri ja atudun sukumada kei asehek i buku ndramak, ma hawe atudun iri sirih, iri katin haka hawe iri mwak. Iri lakou mara-ei doh kameh amak au.
ROM 1:24 Ya eme ta katin doh le, Kindrei ruwani minen iu tiri, ma iri amekes kandriyen ndra-in in hamon ta boto-on ta seken tiri. Eme ma iri amekes karei hawe iri ari, ari, ma bokoro-ei bada iri amwenen.
ROM 1:25 Eme iri sokolowa sahou handru ta Kindrei na wasai, iri batudun Kindrei handru ta amekes lakou mari bwai. Iri atudun le lakou Kindrei mene amekes. Arile, iy Kindrei le doh badeh, lau katudun iy. Handru!
ROM 1:26 Ya eme ta katin doh badeh, Kindrei ruwani minen iu tiri. Ma eme iri amekes karei hawe iri ari ari. Ma iri badih badeh, amadin iri le amwenen.
ROM 1:27 Ya eme i le buku aliy, iri lau mwan ruwani ta akohok udu iri, ya eme iri mwan amekes kandriyen ndra-in ta karei. Iri lau mwan badeh, amekes karei hawe iri ari ari amwenen. Eme Kindrei edeu maha-an i ta budon ma bolo oda iri, tasah iri amekes karei ndra-in labai i buku doh.
ROM 1:28 Ma laba tinan labai, iri batawi budon ta Kindrei mene leheya iri ta amekes bwe. Eme Kindrei ruwani iri ado ndrahun ta budon ndra-in tiri, ma kandriyen ndra-in iri samekes badeh, iri amekes ja.
ROM 1:29 Eme iri badeh, ndradah ta kandriyen ndra-in mari. Iri adah na kandriyen ta aseken lakou tiri rayah. Iri amekes budon ta amekes isi i tiri lau. Iri amekes madalakis i tiri lau, iri andra-i i la-u iri lau, ma adai iri lau amak. Iri sokolowa ta katehei budon tiri ki ta lakou handru bwe. Iri bahana sahou ndra-in asehek i tiri lau. Iri asehek sahou ta wasai tiri lau udu ndranye lau mari.
ROM 1:30 Iri bwale iri Kindrei ma iri bobose iri lau, ya iri anya iri le ai, ma hawe iri atudun nyara iri, ya iri amekes tanan ha-un ta amekes kandriyen ndra-in, ma iri tebelese boho tama iri hawe tine iri.
ROM 1:31 Iri badeh, ari budon mwasin bwe, ma iri ba-en hamon ta tandrakan nane iri tandrakan ta aliy bwe, ya iri baleheya kandriyen ta aseken ndramak ari ari bala lowan iri bwe, ma iri batehei kandriyen ta tikisiy bala tiri lau bwe.
ROM 1:32 Batanau ta Kindrei anya, buku iri lau ala bolo iri kandriyen ndra-in doh, iri kameh amak. Ya, iri tanan ta batanau mwasin doh, arile iri amekes kandriyen doh ili le anya mwasin, ki tiri lau ta ka bolon ale.
ROM 2:1 Ou are lau anya ou mwasin, ya ndramak kodo-oh ndra-in; balem ki tam! Ou badeh, ari madasan ta atobwak bwe. Tasah, buku none ou anya ndramak kodo-oh ndra-in, arile kandriyen doh ou amekes, badeh ou le amekes Kindrei edeu maha-an ewek la-um.
ROM 2:2 Taha ndratanan, mada sahou ta Kindrei badeh, amwenen labai. Iy aleben lau in hamon ta sahou tan handru.
ROM 2:3 Ya ou badeh, ndramak laleyah le; buku ou anya aleben iri lau rayah ja, arile ou amekes kandriyen ndra-in i le buku aliy; ou anya kameh, ou baratobwak ta bolo maha-an ta Kindrei barala buku sah?
ROM 2:4 Ya eme ou abudon anya, “Bolo tikisiy tan tinan labai, ya iy udu le abe-en lau katubuni ndrine iri, ma iy badeu ndramas ndra-in bala tiri suwi bwe. Idah kameh, jo winiyan bala bolo maha-an ta Kindrei bwe.” Sebwe ou abudon kandriyen mwasin tan doh, i buku lakou laleyah nadeh? Ya eme ou baseleyani se bwai, ta tikisiy tan badeh, ta anya katubuni ndrinem ma katiye ou ame hamon ja.
ROM 2:5 Arile, ou badeh, batum boto-on labai, ma ou batubuni ndrinem bwe. Ou atukum losen ta Kindrei ewek tam i tinan le gwek abe-en len ta losen ta Kindrei kameh asahan eme lewan. Na len doh iy kameh anuhun taha lau mari, ma mada sahou tan badeh, amwenen labai.
ROM 2:6 Kindrei kameh, “edeu sowa iri lau mwan ma badih ari, ari in hamon ta kandriyen iri amekes.”
ROM 2:7 Iri lau rayah amekes gok boto-on ta a-en hamon le ta kandriyen mwasin, tasah iri anya kado bolo lomadan hawe masiye ta Kindrei, ma iri ale anya kakohok kohan handru winiyan bamak bwe. I tiri le kameh Kindrei winiyan edeu kohan handru ta udu le buku doh.
ROM 2:8 Arile, iri lau rayah ja aseken le budon tiri le, ma iri baseken sahou handru bwe, ya iri an hamon ta kandriyen ndra-in, iri kameh bwese maha-an hawe losen ta Kindrei.
ROM 2:9 Are lau iri le amekes kandriyen ndra-in i buku doh, idah kameh, Kindrei le edeu iri mara-ei ala bolo maha-an hawe sisi-in. Idah kameh, ili tiri Juwis bwena, ano kameh ili tiri lau badu leheleh ale;
ROM 2:10 Arile, Kindrei kameh edeu lomadan, masiye hawe mondrei kameh i tiri lau mari le amekes kandriyen mwasin: Ma mwena kameh i tiri Juwis, ano kameh i tiri lau badu leheleh ale.
ROM 2:11 Tasah, Kindrei aleben iri lau mari i san ta kandriyen randra le.
ROM 2:12 Iri are lau bakohok batanau malen Kindrei edeu i mine Moses bwe, i buku none iri amekes karei ma lomondra ndra-in, iri kameh bwese maha-an ta aliy. Ya, iri Juwis bwena mene, ndrakohok batanau malen Kindrei ndradeu ndra mine Moses, ya, i buku none iri amekes karei ma lomondra ndra-in, idah kameh, batanau malen le aleben iri amwenen.
ROM 2:13 Tasah, are lau ndranyen anuhun le batanau malen kameh iy winiyan basahan mwasin ta mada Kindrei bwe. Arile, are lau le in hamon ta batanau malen, Kindrei kameh aloh iy mwasin labai ta madan.
ROM 2:14 Handru labai, batanau malen ta Moses bala tiri lau mara-ei bwe. Arile, len ra-on badeh, budon tiri amwenen mesekei, ma iri an hamon le ta kandriyen ta batanau malen tiye iri ka-en hamon ta aliy. Idoh i buku batanau malen amwenen atondrok iri.
ROM 2:15 Ya idoh leheya i buku Kindrei ndratorowenei kandriyen ta batanau malen ndrala ndrine iri. Eme ma, buku iri anya kamekes kandriyen mwasin, o, iri amekes kandriyen ndra-in, bar tiri badeh, leheya tanan ta amekes budon tiri abadok ta aseben iri.
ROM 2:16 Kindrei kameh abudon ta iri lakou nane doh na len iy suni Jises Krais eme ta manyah anuhun budon ma kandriyen tataha amai, in hamon ta sahou mwasin jo atiye i tiri lau mari.
ROM 2:17 Ou badeh, anya ou ndra ari ai, ta atudun Kindrei, tasah ou badeh, Juwis, ma ou tanam batanau malen mari.
ROM 2:18 Ou badeh, tanam sasah Kindrei aseken ou amekes, ma ou badeh, ndratanan udu bolo batanau malen ta aleben lakou mwasin.
ROM 2:19 Ou anya ou ndratanan handru ta ou winiyan sariye iri lau mada iri bwe, ma ou winiyan asahan buku sun tiri lau ado bolo lulik,
ROM 2:20 ma asahan ndramak ta leheya iri lau bale iri bwe, ma hawe ndramak ta leheya iri nah ma lau loweu ma bihin.
ROM 2:21 Ya eme, ou badeh, leheya iri oh? Ya, i buku sah handru ou winiyan baleheya ou le bwe? Ou tiye anya, “Ado sabahana,” ya ou babahana bwai?
ROM 2:22 Ou tiye anya, “Ado sateu badih udu mwan,” ya ou bateu se badih udu mwan bwai? Ou asehek sahou nyarahan i tiri lau satudun sukumada kei, ya ou bakohok lakou ta atudun sukumada kei badu asiu ta atudun bwai?
ROM 2:23 Ou badeh, anya ou le ai tanam labai ta batanau malen, arile ou ja, ba-en hamon ta batanau malen bwe. Eme ma ou amekes iri lau badu leheleh banoh ta batanau malen ta Kindrei bwe.
ROM 2:24 I buku none ndratorowenei anya, “Na ou le badeh, iri lau badu leheleh bobose nyara Kindrei.”
ROM 2:25 I buku none ou an hamon ta batanau malen, idah kameh, kandriyen ta asan ku-im, kameh bundruwen udu aliy ai. Arile, i buku none ou ba-en hamon ta kandriyen malen bwe, idah kameh ou asahan buku ndramak basan ku-in bwe, ma ou are len ta Kindrei labai.
ROM 2:26 Ya, i buku none iri are lau badu leheleh basan ku-i iri ba-en hamon ta batanau malen bwe, arile iri le badeh, an hamon ta batanau malen, sebwe iri i le buku none iri lau asan ku-i iri, ma iri asahan kawas ta Kindrei nadeh?
ROM 2:27 Eme ya, aha Juwis eh, aha ndrakohok batanau malen ta Kindrei, ma aha badeh, asan ku-i aha, arile aha ba-en hamon ta batanau malen bwe. Eme ma, iri lau badu leheleh basan ku-i iri bwe, i buku none iri a-en hamon ta batanau malen, iri kameh tiye sahou nyarahan labai i taha!
ROM 2:28 Abo, i buku ou badu boho kamen tiri Juwis le badeh, ou basahan Juwis handru bwe. Ya, asan ku-im badeh, lakou ta badam le bwe.
ROM 2:29 Ndramak asahan Juwis handru badeh, na ndrinen labai, ma kandriyen handru ta asan ku-i taha badeh, lakou badu ndrinen labai. Idoh asahan na boto-on ta Malawin Ndrabun le, ya na tarou ta batanau malen bwe. Nyara ndramak doh iri lau bamasiye bwe, Kindrei le badeh, masiye.
ROM 3:1 Buku sahou nane jo atorou ndrawek taha i handru, ya, sebwe iri lau badu Juwis ndrakohok iri lakou mwasin labai tiri lau badu leheleh ja nadeh? Ya saba lakou mwasin kameh asahan tiri Juwis i buku none kasan ku-i iri?
ROM 3:2 Seben solo-an solo-an udu aliy oh! Ya, ari ma bwena badeh, i buku doh: Kindrei mene atehei sahou tan amwenen i tiri Juwis ta atondrok ma aseben iri mwan ma badih winiyan atanan ta iri sahou tan marakon.
ROM 3:3 Handru labai! Iri rayah batehei budon tiri ba-en hamon ta sahou dah bwe. Arile aha abudon i buku sah bah? Sebwe budon ndra-in nane iri a-en hamon ta aliy kameh amekes Kindrei tubuni budon ma karuwani sahou tan ai?
ROM 3:4 Winiyan bwe! Buku lau marakon kamekes kandriyen ta wasai, Kindrei le ari badeh, bwe! Iy badeh, asehek le sahou handru len marakon, i buku none ndratorowenei, “Kindrei, na saba len ou asehek, idah kameh, ou aleben sahou, ndra handru le; ya buku none ari ndramak anya katuw ou a ta mada sahou, idah kameh, ou winiyan bakunoh bwe, iy le kameh kakunoh mara-ei.”
ROM 3:5 Taha kasehek ki buku sah bah? (Jo asehek sahou dah i buku taha ndramak asehek). Ki buku kandriyen ndra-in taha ale amekes, idoh badeh, leheyani iri mwan ma badih ta kandriyen mwasin ta Kindrei, ya idah kameh, taha kasehek saba sahou bah? Taha katiye anya ja, Kindrei edeu maha-an eme la-u taha le badeh, ari katin bwe?
ROM 3:6 Bwe handru en! Buku Kindrei, iy bamwenen bwe, ya barala buku sah ja handru, iy kameh kaleben kandriyen tataha mwan ma badih mari? Iy winiyan bwe, neh?
ROM 3:7 Ya, buku sahou wasai tek ili aseben iri mwan ma badih nane atanan sahou handru ta Kindrei, ma buku wasai doh bwidi nyaran i tinan labai ja, ya buku sah ja iy aloh jo ndramak ta amekes kandriyen ndra-in, ma iy edeu maha-an eme bwele-ek ta aliy?
ROM 3:8 Buku sahou doh handru, sebwe taha kasehek ki buku doh ja ai, “Abo, taha kamekes kandriyen ndra-in, tasah kandriyen mwasin kameh winiyan asahan ta lakou doh.” Sebwe kandriyen i buku doh mwasin, nadeh? Bwe handru! Arile, iri lau mwan ma badih rayah anya, “Handru, sahou ta Pol buku baden eh.” Are oro mwan ma badih orou sahou ndra-in buku doh, Kindrei kameh edeu maha-an i la-u oro.
ROM 3:9 Sendrehendreh ta aliy taha kasehek ki buku sah bah? Sebwe taha lau badu Juwis badeh, are mwasin labai ja tiri lau mwan ma badih rayah ja nadeh? Bwe handru en! Tasah, taha mene ndrasehek, iri Juwis hawe iri lau badu leheleh mari badeh, ado bahandra tondrok ta kandriyen ndra-in mari.
ROM 3:10 Sahou dah handru, i buku none ndratorowenei, “Lau mari badeh, ndra ndra-in le ai, ari mwasin ja bwai;
ROM 3:11 Ari ndramak badeh, tanan mwasin udu tan ja bwai, ma hawe ari ndramak batakaleh tekedek ta Kindrei bwai.
ROM 3:12 Iri mara-ei ndramani san mwasin, ma iri mara-ei ndrasahan lau ndra-in labai. Ari ndramak bamekes se kandriyen mwasin bwai.”
ROM 3:13 “Boho iri badeh, i buku lek ta lau amak bohon apwa le, tasah iri sihi boho iri ta amekes sahou wasai.” “Iri amekes sahou solo-an labai ta bokoro-ei ndramak ari ja, i buku mada lihi mwak ndra-in ta atoh ndramak imek.”
ROM 3:14 “Boho iri badeh, ndrarahak le aten, ma ndra losen le.”
ROM 3:15 “Kati iri edek suwi anya ta kidi ndramak kimek le;
ROM 3:16 Bolo len mara-ei iri abo gok ta bokoro-ei lakou solo-an, ma adeu maha-an ili tiri mwan ma badih.
ROM 3:17 Iri tana iri kandriyen ta manyah ado le hawe iri lau rayah ja bwe.”
ROM 3:18 “Ma iri banoh se Kindrei bwe.”
ROM 3:19 Ya nadah, taha ndratanan, iri sahou mari, batanau ta Kindrei amekes, idoh badeh, i tiri ado bahandra tondrok ta batanau doh. Eme ma, ari mwan o badih ja winiyan basehek anya, “Jo mwasin mara-ei,” bwe. Taha mwan ma badih badu kon marakon amekes lakou ndra-in i ta mada Kindrei, eme ma batanau tan kameh atehei taha mara-ei a ta mada sahou.
ROM 3:20 Tasah, Kindrei atehei batanau tan eme tataha, ta leheya taha ta kandriyen ndra-in tataha i buku sah. Batanau tan le doh, winiyan bamani kandriyen ndra-in tataha bwe. Eme ma, ari ndramak winiyan basahan mwasin ta mada Kindrei na lahou iy amekes in hamon ta batanau malen, bwe.
ROM 3:21 Arile, nadah, Kindrei ndraleheyaniy ndrame tataha ta san rasan ja, ta taha ka-en hamon ta aliy, ma iy kameh aloh taha lau mwasin. Iy basahan ta san ta a-en hamon ta batanau Kindrei edeu i ta Moses, bwe. Arile, buk nane Moses atorou ma buk iri propet atorou ale, iri asehek sahou i san doh, ta Kindrei ki-in hamon ta amekes taha kasahan mwasin.
ROM 3:22 San i buku doh: Buku are mwan o badih iy atehei budon tan handru in ta Jises Krais, Kindrei kameh aloh iy ndramak mwasin. Kindrei bamekes san rasan tiri Juwis, ya san rasan tiri lau badu leheleh ja, bwe. Iy bwidi san rasan le kabwe.
ROM 3:23 Tasah, taha mari badeh, ta amekes kandriyen ndra-in, ma taha asahan i le randra. Taha ataras mara-ei ta kalem mene Kindrei atehei ma taha winiyan bala bolo lomadan tan bwe.
ROM 3:24 Arile, Kindrei tikisi taha, ma i san ta Krais Jises akohok taha ame hamon, iy edeu ndramas tan laleyah eme tataha. Ya, na ndramas tan le doh, iy aloh taha mwasin mara-ei ta madan.
ROM 3:25 Kindrei atehei Jises eme mada lau mari, iy imek i nyara salom ta sikine kandriyen ndra-in ta are atehei budon tan handru i ta ndrayen. Kindrei amekes doh, ta leheya iy badeh, in hamon le ta kandriyen mwasin. Tasah, ndra bwena ndra-au eme taku nadah, iri lau amekes kandriyen ndra-in, arile Kindrei amekes kandriyen amunum mara-ei ili tiri mwan ma badih marakon, ma iy badeu maha-an laba tinan suwi bala ta kandriyen ndra-in nane iri amekes bwe.
ROM 3:26 Arile, na len dah ja, Kindrei suni Jises eme imek i nyara salom ta akunoh kandriyen ndra-in taha mene amekes. Handru, iy amekes i buku doh ta taha winiyan atanan, iy le ari badeh, mwasin mara-ei. Ma iri mwan ma badih marakon atehei budon tiri in ta Jises imek ta akunoh iri ame hamon, Kindrei winiyan aloh iri mwasin ta madan.
ROM 3:27 Ya, i buku Kindrei amekes lakou doh ta aseben taha, ya saba madasan handru kameh taha katudun nyara taha le amwenen? Kameh bwe nadeh! San doh ndraso mara-ei. Arile, ta saba katin handru san doh ndraso mara-ei? Sebwe taha ba-en hamon ta batanau Kindrei edeu i mine Moses mene bwe, eme ya, idoh le badeh, sokei san ta atudun nyara taha le nadeh? Bwe! Kandriyen ta adeu budon handru i ta Jises, idoh le adeh, sokei san mara-ei ta atudun nyara taha.
ROM 3:28 Eme ma, taha atanan, buku mwan o badih atehei budon handru in ta Jises imek ta sikine kandriyen ndra-in tan mara-ei iu, Kindrei winiyan aloh iy mwasin mara-ei. Arile, are mwan o badih in hamon le ta batanau Kindrei mene edeu i mine Moses, Kindrei kameh winiyan basehek anya, iy mwasin mara-ei, bwe. Winiyan bwe!
ROM 3:29 Ya buku sah bah? Sebwe Kindrei badeh, Kindrei tiri Juwis le ai? Ya iri lau badu leheleh bwai? Bwe, iy Kindrei tiri lau badu leheleh ale.
ROM 3:30 Tasah, Kindrei ari le doh kabwe. Iy le kameh anyolom kandriyen tiri lau asan ku-i iri, ma iy anyolom kandriyen tiri lau basan ku-i iri bwe; buku iri ma lubuk atehei le budon tiri handru in ta Jises imek ta sikine kandriyen ndra-in tiri, iy winiyan aloh iri ma lubuk mwasin mara-ei.
ROM 3:31 Ya, buku iri mwan ma badih atehei budon tiri handru in ta Jises ma Kindrei aloh iri mwasin mara-ei, sebwe budon tiri handru doh badeh, akohok ta ano ma tubuloh batanau mene Kindrei edeu ili mine Moses nadeh? Bwai! Kandriyen ta budon handru doh, leheya taha i buku batanau badeh, boto-on le gwek.
ROM 4:1 Abo, taha kasehek tubu taha Abraham ki buku sah bah? Saba tanan iy ndra aliy, ya ma iy takalahei?
ROM 4:2 I buku none iy kasahan mwasin ta mada Kindrei na lahou iy le amekes, badeh nane iy katudun iy le na aliy. Arile, iy winiyan batudun iy bare mada Kindrei bwe.
ROM 4:3 Tarou ta Kindrei tiye i buku sah? “Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.”
ROM 4:4 Arile, i buku none ari ndramak amekes lahou badeh, iy bakohok luk bala buku none ndramas tan, bwe. Iy akohok bundruwe lahou tan labai.
ROM 4:5 Arile, i buku none ndramak bamekes ari lahou ta an hamon ta batanau malen ta Moses bwe, arile iy atehei le budon tan handru i ta Kindrei, ndramas tan badeh i buku doh: Kindrei aloh iy ndramak mwasin handru. Handru! Iri lau nane ta amekes karei ma lomondra ndra-in badeh, Kindrei winiyan aloh iri lau mwasin mara-ei ta madan.
ROM 4:6 Idoh i buku Debit mene ndrasehek nyala iy ndramak nane akohok nyosowan ta ndramas mwasin ta Kindrei doh i san ta budon handru, ma bala san ta lahou bwe:
ROM 4:7 “Ou are lau ta karei ma lomondra ndra-in, ou badeh, sekesek, tasah Kindrei ndrasikine kandriyen ndra-in doh ndra-au. Handru, iy badeh, ndrasokosowei kandriyen ndra-in tam ndra-au.
ROM 4:8 Sekesek ki tare ndramak Laban ndramaniy ma ndrasokosowei kandriyen ndra-in tan ndra-au.”
ROM 4:9 Ya, sekesek ma ndramas doh i tiri lau le asan ku-i iri deh? Bwe, i tiri lau basan ku-i iri bwe ale? Turu ma la-uh. Taha ndrasehek ndrasehek ndra-au: Kindrei anyolom budon handru ta Abraham, ma eme iy aloh iy ndramak mwasin ta madan.
ROM 4:10 Kindrei aloh iy mwasin ta madan udu mwena ta kandriyen ta asan ku-i taha deh, bwe em, kandriyen ta asan ku-i taha asahan mwena? Bwe, Kindrei aloh iy ndramak mwasin ta madan mwena, ano kandriyen doh udu hamon.
ROM 4:11 Ano badeh, barasan ku-in i nyara kalem ta leheya buku Kindrei ndraloh iy ndramak mwasin ta madan. Tasah, iy atehei budon tan handru bwena, ya kandriyen ta asan ku-i taha badeh, udu hamon labai. Ya eme Abraham asahan tama iri lau mari iri an hamon ta san ta budon handru. Handru, iri basan ku-i iri ba-au bwe, arile Kindrei aloh iri lau mwasin mara-ei ta madan.
ROM 4:12 Iy ale badeh, tama iri lau rayah asan ku-i iri. Iri basani ku-i iri laleyah bwe, iri ale anyolom san tubu iri Abraham edek aliy. Ya iri ka le buku iy katehei budon tiri handru ki ta Kindrei i buku none mene na len basani iy bwe.
ROM 4:13 Kindrei tandrakan Abraham ta kon munyak mari kameh i tan, ma i ta lundriyen oro. Arile Kindrei tandrakan Abraham oro badeh, bala san ta oro a-en hamon ta batanau malen, bwe. Iy tandrakan oro kameh akohok munyak mari, tasah Abraham atehei budon tan mara-ei in tan, eme ma Kindrei aloh iy ndramak mwasin mara-ei ta madan.
ROM 4:14 Ya, buku oro are lau a-en hamon ta batanau malen badeh, oro le asahan lundriyen, kandriyen ta atehei budon handru kameh lakou laleyah nyamun bwe, ma tandrakan kameh ari moson bwe.
ROM 4:15 Tasah, taha tanan, lahou ta batanau malen badeh, ta leheya losen, ma ta adeu maha-an i la-u iri mwan ma badih amekes kandriyen ndra-in. Batanau malen winiya baseben taha bakohok tandrakan ta Kindrei bwe. Ya, buku batanau malen aliy bwe eh, iri kandriyen ndra-in ale winiyan basahan ta mada sahou bwe le.
ROM 4:16 Eme ya, Kindrei kameh edeu lakou mene iy tandrakan i ta Abraham kameh i tare lundriyen oro le atehei budon toro handru in tan. Ya eme Kindrei kameh tikisi oro ma edeu lakou tan mari i toro laleyah le. Bala toro le are baha batanau malen, ma hawe bala toro are atehei budon toro handru i buku Abraham le, bwe. I toro ma lubuk. Tasah, iy badeh, tama taha mari.
ROM 4:17 I buku ndratorowenei mene, “Jo badeh, mesekei ou kameh a tama iri kon munyak mari.” Iy badeh, i tama taha mari udu mada Kindrei anyolom, tasah iy atehei budon tan handru in ta Kindrei. Iy badeh, Kindrei ta amak lau amak ame loken ja, ma iy ale Kindrei ta tiye sahou le badeh, lakou asahan.
ROM 4:18 Abraham jaha tan solo-an labai ma nadun bwe, arile iy atondrok Kindrei le gwek, ma iy atehei budon handru, ta Kindrei kameh atehei iy i tama iri lau solo-an. I san doh le badeh, iy asahan tama lau solo-an badu kon munyak. I le buku iy mene ndrasehek tan i buku doh, “Lundriyem oro kameh nyaran bwe.”
ROM 4:19 Handru labai, Abraham badeh, ndra bada ndramak, ma jaha tan ndrasahan rinek (100), ma iy abudon udun Sara badan ndrakoreh, ma badan winiyan ta ato-ou nah bwe. Arile, iy baliliy ta budon tan handru i ta Kindrei bwe.
ROM 4:20 Ma budon tan badeh, bala lundra bwe ta tandrakan ta Kindrei bwe. Arile, budon tan handru badeh, irih le gwek ma iy atudun Kindrei.
ROM 4:21 Ma mesekei iy i tanan handru ta Kindrei badeh, boto-on ta amekes tandrakan tan doh kameh asahan ili handru.
ROM 4:22 Eme ta katin doh, iy abudon ta budon handru ta Abraham, “eme ma Kindrei aloh iy ndramak mwasin ta madan.”
ROM 4:23 Sahou nane, “Kindrei aloh iy ndramak mwasin ta madan” badeh, ta Abraham le, bwe.
ROM 4:24 Sahou doh badeh, winiyan eme tataha lau ale. Tasah, taha atehei budon tataha mara-ei ta Kindrei le mete-ei Laban tataha Jises eme loken ta imek. Eme ta katin doh, iy winiyan aloh taha lau mwasin mara-ei ta madan.
ROM 4:25 Iy mene atehei Jises i mine iri lau adai iy imek ta sikine karei ma lomondra ndra-in tataha. Ano Kindrei mete-ei iy eme loken ja ta leheya taha buku iy amekes ndrokowa taha asahan mwasin i hawen ma ta iy winiyan aloh taha lau mwasin mara-ei ta madan.
ROM 5:1 Taha ndratehei budon tataha ndra tan ma Kindrei ndraloh taha lau mwasin mara-ei ta madan. Eme ma Laban tataha Jises Krais bwidi ndrokowa Kindrei ma ndrokowa taha badeh, udu mwasin, ma iy bwidi ndrine taha kamunum kudu le hawe Kindrei.
ROM 5:2 Jises badeh, ndrasihi san ta taha lau mwan ma badih atehei budon in ta Kindrei, eme ma taha kameh winiyan ala bolo tikisiy tan, na idah taha areu aliy. Ma taha atondrok Kindrei ta akohok taha, idah kameh taha manyah ado lomadan tan mwasin ado kandrah. Ma idoh bwidi taha sekesek ta aliy.
ROM 5:3 Taha basekesek ta idoh le bwe. Taha winiya sekesek ta iri maha-an asahan tataha ale, tasah taha tanan, iri maha-an doh badeh aseben ta amekes ndrine taha abadok.
ROM 5:4 Buku ndrine taha abadok udu le buku doh, idah kameh kandriyen tataha mwasin winiyan sebenei taha, buku iri none anya kasahan. Ya, buku kandriyen tataha mwasin sebenei taha ala bolo iri none don eh, badeh, taha atondrok le Kindrei eme ta aseben taha.
ROM 5:5 Handru, taha atondrok Kindrei ta aseben taha. Taha winiyan babe-en laleyah bwe, winiyan bwe-en! Tasah, Kindrei ndratehei Malawin Ndrabun ndrame. Eme ma Malawin Ndrabun ndranyuhi kandriyen ta Kindrei ta aseken labai iri lau ndrame ndrine taha.
ROM 5:6 Na len amwenen ta taha nyamu taha ta aseben taha le bwe, Kindrei eme sani len ta Krais kameh winiyan imek ta akohok taha lau ta amekes kandriyen ndra-in ame hamon.
ROM 5:7 Handru labai, iy ari tataha winiyan bamak ta aseben ndramak ari, taha aloh iy ndramak mwasin ta mada taha, bwe. Arile, i buku taha anyolom ndramak ari kandriyen tan mwasin labai mara-ei, sebwe taha ari winiyan atehei iy imek ta aseben iy lau doh.
ROM 5:8 Arile, taha mene are ndra bolo iri kandriyen ndra-in kahis le badeh, Krais eme akohok kon tataha, ma iy imek ta aliy. Ta san doh, Kindrei leheyani iri tikisiy ma so-ok tan eme tataha badeh, tinan labai ja.
ROM 5:9 Handru labai! Ndraye Krais amou udu bada kei tondreh, ma ndrayen doh eme sikine taha mari ndra belen mara-ei, ya Kindrei aloh taha, lau mwan ma badih tan mwasin ta madan. Eme ma, idah taha atanan handru, i buku Krais kameh aseben taha tinan labai ja, ta teleya ndramas ndra-in nane doh, Kindrei kameh edeu ili tiri lau mwan ma badih ta amekes kandriyen ndra-in.
ROM 5:10 Bwena mene taha amekes bahun hawe Kindrei kahis le badeh, na le len doh Nadu Kindrei imek. Ta gok ta imek nane doh iy ndrabwidi kandriyen ta bahun mari udu ndrokowa Kindrei hawe taha, ma iy bwidi ndrine taha udu mwasin hawe Kindrei. Na dah, Nadu Kindrei, kohan handru ta udu le buku doh, winiyan bamak ja bwe. Eme ma, taha winiyan atanan handru, na koha nadun le doh, Kindrei kameh andrei taha ame hamon, ma iy kameh aseben taha tinan labai ja.
ROM 5:11 Ya lakou ari ja i buku doh: Kabin tataha Jises Krais, iy le ari bwidi ndrine taha asahan mwasin hawe Kindrei. Eme ma, ta gok tan nane doh, taha sekesek ta Kindrei handru.
ROM 5:12 Taha tanan, ndramak ari le bwidi kandriyen ndra-in, ya, ta kandriyen ndra-in doh le, kandriyen ndra-in mari asahan kon munyak. Ano ja, kandriyen ndra-in tiyani imek eme. Eme ma imek eme andrei lau marakon, tasah lau marakon amekes iri kandriyen ndra-in.
ROM 5:13 Kandriyen ndra-in udu kon munyak bwena labai, ano kandriyen malen ta Moses barasahan. Arile, kandriyen malen ta batanau basehek bwe le badeh, Kindrei babudon tiri kandriyen ndra-in ari, ari tiri lau amekes, bwe.
ROM 5:14 Arile, udu ndra bada len ta Adam eme asahan bada len ta Moses, imek badeh, ibo gok ta ilom lau marakon. Lau rayah bamekes kandriyen ndra-in bala le buku ta Adam amekes bwe, arile imek ilom iri lau i buku le doh ale. Adam badeh, i buku malawi le iy ndramak nane kameh asahan hamon.
ROM 5:15 Arile, kandriyen ndra-in ta Adam nane iy amekes, ma tikisiy ta Kindrei bala le randra bwe. Winiyan bwe-en! Kandriyen ndra-in ta ndramak ari le badeh, eme bwidiy, ma iri lau mwan ma badih solo-an amak. Arile, boto-on ta tikisiy ta Kindrei badeh, udu bwele-en labai ja ta boto-on ta imek, ma asahan solo-an labai ja ta iri mwan ma badih. Ta tikisiy ta ndramak ari le nyaran Jises Krais, Kindrei badeh, bwidi taha asahan lau mwan ma badih mwasin labai ta madan, ma idoh ndramas ari mwasin labai iy edeu eme tataha.
ROM 5:16 Ndramas ta Kindrei ma kandriyen ndra-in ale ta iy ndramak ari le nane, babwidi lakou bala le randra asahan tataha bwe. Winiyan bwe-en! Kandriyen ndra-in ari le ta iy ndramak nane bwidiy, ma Kindrei atehei lau mwan ma badih ala ta mada sahou, ma iy asehek i buku doh, “Iri marakon kandra-i ka-au mara-ei.” Arile, ndramas ta Kindrei i buku doh: Buku iri lau mwan ma badih amekes kandriyen ndra-in solo-an labai, Kindrei eme tikisi iri, iy eme aloh iri lau mwan ma badih mwasin labai ta madan.
ROM 5:17 Ndramak ari mene ta tebelese sahou, eme ma ta kandriyen ndra-in ta iy ndramak ari nane, eme imek asahan i buku kabin ma tihisi lau mara-ei. Arile, tikisiy ta Kindrei hawe ndramas tan, idoh le badeh, udu bwele-en labai ja ta boto-on ta imek, ma tinan labai ja ta lakou mara-ei. Eme ma, taha atanan, handru, ta lau mara-ei akohok tikisiy nane doh ta Kindrei, ma Kindrei aloh iri lau mwasin ta are madan, koha iri mara-ei kameh udu le buku doh, ma iri kameh asahan kabin, ta gok ta iy ndramak ari le nane nyaran Jises Krais.
ROM 5:18 Eme ma, taha kabudon kamwenen tiri sahou doh. Ndramak ari le bwena mene bwidi lakou ari ba-en hamon ta kandriyen ta batanau bwe, iy sakalawiy labai, eme ma, ta kandriyen ndra-in tan nane, Kindrei eme atehei taha lau mwan ma badih mara-ei ala ta mada sahou. I buku le, ndramak ari mene amekes lakou ari in hamon ta kandriyen mwasin labai, eme Kindrei anyolom ta idoh, ma iy eme aloh taha mara-ei lau mwasin labai ta madan, ma kohan handru udu tataha.
ROM 5:19 Ndramak ari le, iy tebelese boho Kindrei, eme ta kandriyen ta tebelese tan nane doh, eme bwidi lau mara-ei asahan lau mwan ma badih mara-ei ta amekes kandriyen ndra-in. I buku le, ndramak ari le, iy in hamon tiri sahou batanau, ta kandriyen tan le doh, lau mwan ma badih solo-an kameh winiya asahan lau mwan ma badih mwasin labai ta mada Kindrei.
ROM 5:20 Udu hamon, iri lau akohok kandriyen ta batanau, eme bwidi iri sakalawi iri kandriyen ta batanau ili labai ja. Iri lau mara-ei amekes kandriyen ndra-in solo-an labai, arile Kindrei badeh tikisi iri tinan labai ja.
ROM 5:21 Kandriyen ndra-in le badeh, bwidi imek asahan, eme ma, ta kandriyen ndra-in le doh, iy asahan i buku kabin. Arile, na idah ja, tikisiy ta Kindrei ndrasahan ndra buku kabin. Tasah, ta gok ta tinan tataha, Jises Krais le, Kindrei badeh, tikisi taha, ano iy aloh taha lau mwan ma badih mwasin labai ta madan, eme ma taha akohok kohan handru kameh ta udu le buku doh.
ROM 6:1 Taha katiye ki buku sah bah? Taha kamekes karei ma lomondra ndra-in, ta Kindrei leheya tikisiy tan ili tinan le gwek ai?
ROM 6:2 Bwe handru en! Taha badeh, buku lau ndramak, ma taha ndraruwani kandriyen ta karei ma lomondra ndra-in. Eme ma, i buku sah handru, ya taha amekes kandriyen doh ili le gwek ai?
ROM 6:3 Sebwe aha tana aha bwe nadeh? Alomwa taha badeh, amekes taha mara-ei asahan ari buruwen hawe Krais Jises, ma hawe alomwa taha a bolo imek tan.
ROM 6:4 Handru, na alomwa taha badeh, taha a bolo imek ta Krais, eme ya, Kindrei ihi taha ala hawen i san ta alomwa taha a bolo imek tan. Eme ya, i buku none Krais mene amak eme loken ta imek tan i san ta boto-on ta taman, ma eme taha ale winiyan manyah ado bolo manyah ha-un.
ROM 6:5 Ya, i buku none taha mene ndrahas ndra ari buruwen ndrala bolo imek hawen, idah kameh, taha ahas ari buruwen hawen ale, ma taha winiyan amak ame loken i buku iy.
ROM 6:6 Sahou doh handru, tasah taha ndratanan ta kandriyen ndra-in ta ndrine taha malen badeh, ndratahiy i bada kei tondreh hawe Krais. Eme ya, bada taha ndra-in ta karei ma lomondra ndra-in ano, ma taha winiyan bala bonyo-ou ta karei ma lomondra ndra-in ja bwe.
ROM 6:7 Tasah, are lau imek hawe Krais badeh, iy ndrano ta karei ma lomondra ndra-in, ma iri kandriyen ndra-in winiyan batondrok iy ja bwe.
ROM 6:8 Ya, i buku none taha ndramak hawe Krais badeh, taha atehei budon tataha handru, ta taha kameh manyah ado hawen ale.
ROM 6:9 Tasah, taha ndratanan, na len Krais amak eme loken ta imek badeh, iy winiyan bamak ja bwe; ya imek winiyan batondrok iy ja bwe.
ROM 6:10 Iy akohok imek san rasan le doh kabwe. Ya, ta kandriyen doh, iy bokoro-ei boto-on ta karei ma lomondra ndra-in. Arile iy amak eme loken ja badeh, iy manyah udu mwasin ta atudun nyara Kindrei.
ROM 6:11 Ya eme i le buku aliy, taha ka-en hamon ta kandriyen ta Krais doh. Ya, taha kasehek nyala taha le ki buku doh: Taha mene ndramak hawe Krais, ya karei ma lomondra ndra-in winiyan batondrok taha ja bwe. Taha ndrahas hawe Krais, eme ma taha ndrakohok koha Kindrei ta udu le buku doh.
ROM 6:12 Eme ya, taha samokon karei ma lomondra ndra-in satondrok bada taha. Bada taha doh kameh imek le. Kora-on kandriyen ndra-in ariu budon tataha ma aha a-en hamon le ta seken ta bada taha.
ROM 6:13 Aha badeh, sadeu sese bada aha sala buku none ndron ta ndrole karei ma lomondra ndra-in. Arile aha kadeu bada aha ki mine Kindrei, i buku none oro lau mene amak, ano Kindrei mesekei oro amak ame loken ja, ma aha kadeu bada aha mari ki buku ndron ta ndrole kandriyen mwasin.
ROM 6:14 Ya eme, karei ma lomondra ndra-in satondrok aha labai, tasah aha badeh, bado bahandra batanau malen ja bwe; aha badeh, ado bahandra tikisiy ta Kindrei labai.
ROM 6:15 Ya taha kasehek ki buku sah bah? Taha badeh, bare bahandra batanau malen ta Moses ja bwe. Taha badeh, are bahandra tikisiy ta Kindrei labai, ma iy aloh taha lau mwasin labai ta madan. Ya, mwasin tataha ka-en hamon ta so-ok tataha le ma amekes kandriyen ndra-in? Bwe handru en!
ROM 6:16 Aha ndratanan, buku none aha katehei aha ka bonyo-ou ta ari ndramak, ma aha kanuhun sahou tan, badeh, aha ndrasahan bonyo-ou tan kabwe. I buku aha a bonyo-ou ta karei ma lomondra ndra-in kameh, ndra-in ta aliy imek. Ya, buku none aha anuhun sahou ta Kindrei kameh, mwasin ta aliy kameh, iy aloh aha lau mwasin mara-ei ta madan.
ROM 6:17 Arile, wurah ki ta Kindrei! Tasah, na len ndra-au aha asahan bonyo-ou ta karei ma lomondra ndra-in; arile ano ja, aha anuhun sahou handru na ndrinem mari udu bolo leheya aha akohok dah.
ROM 6:18 Aha badeh, ndrame len ta karei ma lomondra ndra-in, ya eme aha ndrasahan bonyo-ou ta amekes le kandriyen mwasin ta udu mada Kindrei.
ROM 6:19 Jo asehek sahou dah, i buku taha asehek kede-eh, tasah, i buku none jo kasehek ki san ta Malawin Ndrabun kameh batu aha winiyan bandrei bwe. Na len mene, aha alelei aha a bonyo-ou labai ta karei ma kandriyen ndra-in ta bada aha. Ya i le buku aliy, na dah aha alelei aha mara-ei ka bonyo-ou ta kandriyen mwasin winiyan tiyani manyah taha udu mwasin ma ndrabun buku Kindrei.
ROM 6:20 Na len aha a bonyo-ou ta karei ma lomondra ndra-in badeh, tawi aha, ya aha basahan bonyo-ou ta amekes kandriyen mwasin bwe.
ROM 6:21 Arile, na len mene doh, aha akohok saba lakou mwasin ewek taha ta kandriyen ndra-in aha mene amekes? Iri kandriyen ndra-in nane atehei le bwilima ewek taha, neh? Bundruwe lakou mari doh, imek le!
ROM 6:22 Arile na dah, Kindrei le ndrakunoh aha ndrame len ta karei ma lomondra ndra-in, ya na dah, aha ndrasahan bonyo-ou ta Kindrei. Ya bundruwe lakou aha akohok doh kameh winiyan tiyani ou asahan mwasin handru ala akohok koham handru udu le buku doh.
ROM 6:23 Tasah, sihine karei ma lomondra ndra-in badeh, imek le. Arile, Kindrei edeu ndramas laleyah i ta lau badeh, kohan ta udu le buku doh i san ta Laban Jises Krais le.
ROM 7:1 Aha nadu tine, jo asehek sahou dah i tiri lau ala tanan iri batanau malen. Sebwe aha ndratanan nadeh? Batanau malen badeh, winiyan atondrok ndramak ma mulin na le len iy udu bwele-e munyak dah. I buku iy ndramak, batanau malen winiyan batondrok iy ja bwai.
ROM 7:2 Jo kasehek ki buku doh: Badih tasou asahan ari buruwen hawe udun na len iy bamak bwe. Arile, i buku none udun mwan imek badeh, kandriyen ta asahan ari buruwen badeh, batanau malen tiye ndrano.
ROM 7:3 Ya, i buku none iy badih udun bamak bwe, ya iy ki ta mwan ari ja badeh, iy amekes karei, tasah udun ma mwena bamak bwe; arile ki buku none udun kimek badeh, sahou ta aliy bwai, iy winiyan i tasou ta ndramak ari ja. Idoh badeh, iy bamekes karei bwe, iy udu laleyah.
ROM 7:4 Eme ya, aha nadu tine, aha badeh, i buku aliy. Aha ndrahas hawe bada Krais, eme ma aha ndramak hawen. Ma batanau malen ta Moses winiyan basehek taha ja bwai. Idoh i buku aha ndramak, ma batanau malen winiyan batondrok aha ja bwe, ma aha are laleyah. Nadah, aha atasou a ta mwan ari ja, iy imek ma iy amak eme loken ta imek tan, ta taha winiyan amekes iri kandriyen mwasin Kindrei aso-ok.
ROM 7:5 Tasah, bwena mene, kandriyen ta karei ma lomondra ndra-in badu bolo taha badeh, ndratondrokei taha. Ma batanau malen mesekei kandriyen ta karei ma lomondra ndra-in doh towodau udu bolo oda taha eme loke; eme ya ta katin doh taha mene adek san ta tiyani taha ala bolo imek.
ROM 7:6 Arile, na dah, taha ndramak, ma taha ruwani iri lakou mene tawi taha, ma taha ndrame len. Taha winiyan bare bahandra tondrok ta kandriyen bwena ndratorowenei udu bolo batanau malen ja bwai. Arile taha ka-en hamon ta san ha-un ta Malawin Ndrabun aseben taha.
ROM 7:7 Ya, i buku batanau malen mesekei kandriyen ndra-in towodau udu bolo oda taha eme loke badeh, taha kasehek ki buku sah bah? Batanau malen badeh, kandriyen ndra-in nadeh? Bwe! Arile, na batanau malen le badeh, mesekei jo i tanan karei ma lomondra ndra-in i buku sah. Batanau malen mene tiye anya, “Madam salikis lakou doh, lakou doh!” Ya, buku batanau malen batiye lakou doh bwe, jo badeh, winiyan bala tanan kandriyen ta madalakis i buku sah bwe
ROM 7:8 Arile, kandriyen ta karei ma lomondra ndra-in silahei san ta bokoro-ei jo. Ya iri kandriyen doh i madasan ta batanau malen ma mesekei budon tek towodau ta amekes madak alikis lakou ari, ya lakou ari doh. Tasah, buku none batanau malen mene basehek tek bwe, idah nane karei ma lomondra ndra-in winiyan batowodau boto-on bwe.
ROM 7:9 Kabatana batanau malen bame bwe le badeh, jo anya jo mwasin ta mada Kindrei, ya jo bato-ou ta karei ma lomondra ndra-in bwe; arile na len batanau malen asahan badeh, karei ma lomondra ndra-in towodau udu ndrinek eme loken ma amekes jo imek.
ROM 7:10 Bwena mene jo abudon anya batanau malen eme ta aseben kohak udu le udu, arile bwe, eme ta idi jo imek.
ROM 7:11 Tasah, kandriyen ta karei ma lomondra ndra-in badeh, silahei san tan eme mesekei jo amekes kandriyen ndra-in; eme ya i san le ta batanau malen badeh, karei ma lomondra ndra-in wasai jo ma idi jo imek.
ROM 7:12 Eme ya, taha kasehek batanau malen ki buku sah bah? Kandriyen ta batanau malen le badeh, ndrabun ma mwasin, ma hawe batanau malen ari ari badeh, ndrabun hawe lewen ma mwasin.
ROM 7:13 Handru, batanau malen badeh, mwasin labai. Arile, buku sah ja? Lakou mwasin doh bwidi jo imek deh? Bwe, bala buku badeh, bwe! Arile, idoh badeh, asahan na seken ta kandriyen ndra-in badu bolo oda taha mesekei taha tebelese sahou badu bolo batanau malen ma bwidi taha amak. Kindrei le alelei kandriyen ndra-in amekes gok doh, tasah iy aseken kandriyen ndra-in doh keme lewan, ma iri lau katanan buku kandriyen ta karei ma lomondra ndra-in badeh, ndra-in labai.
ROM 7:14 Taha tanan, batanau malen badeh, Kindrei le edeu. Arile jo badeh, ndrala bonyo-ou ta karei ma lomondra ndra-in, tasah jo ba-en hamon ta seken ta Kindrei bwe.
ROM 7:15 Eme ya, jo bala tanan sasah jo amekes bwe. Tasah, kandriyen mwasin ta jo nane kamekes on, jo bamekes bwai. Arile, jo ja aseken kamekes kandriyen ndra-in nane jo samekes on, badeh, jo amekes ai.
ROM 7:16 Eme ya, i buku none jo amekes sasah nane jo bwalek ta amekes badeh, kandriyen tek doh leheya buku budon tek anya ki-in hamon ta sahou batanau malen asehek ta aliy ai.
ROM 7:17 Ya eme jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.
ROM 7:18 Eme jo tanan ta bolo odak badeh, kandriyen mwasin bado aliy bwe. Handru, bolo budon tek, jo aseken ta amekes kandriyen mwasin, arile winiyan bwe, kandriyen ndra-in udu le bolo odak kada-ah.
ROM 7:19 Eme kandriyen mwasin jo nane anya kamekes badeh, jo bamekes bwai; ya, kandriyen ndra-in anya nane jo samekes badeh, jo amekes ai.
ROM 7:20 Eme ya, i buku none jo amekes sasah nane jo bwalek amekes, jo le amwenen badeh, batiyani kandriyen ndra-in bwe. Idoh badeh, karei ma lomondra ndra-in udu bolo odak le amekes lahou doh.
ROM 7:21 Ya eme sendrehendreh ta aliy i buku doh: Jo anya kamekes kandriyen mwasin badeh, kandriyen ndra-in nane udu bolo odak kodo-on aliu jo amekes le kandriyen ndra-in ja.
ROM 7:22 Ya udu bolo budon tek jo abudon anya batanau malen ta Kindrei badeh, mwasin, ya eme taha kasekesek ma ka-en hamon le ta aliy;
ROM 7:23 arile jo ja anyolom kandriyen randrah ja amekes lahou udu bolo odak mari, ya kandriyen doh akek eme hawe bar tek ta lomondra mwasin. Eme ma kandriyen doh sawei jo udu baha boto-on ta karei ma lomondra ndra-in sokoro-ei bolo odak mari.
ROM 7:24 Eme ya, bolo odak ndrandra-i ai! Ya, are lau handru winiyan sebenei jo udu bolo imek ta karei ma lomondra ndra-in kada-ah?
ROM 7:25 Arile, wurah handru i ta Kindrei, i san ta Laban tataha Jises Krais le! Ya eme ta sendrehendreh jo kasehek i buku doh: Taha mene asehek sahou i lundra; budon tataha asehek anya batanau malen ta Kindrei mwasin, ya eme taha a buku bonyo-ou ka-en hamon ta aliy, arile taha ame ja asehek anya, oda taha atehei taha a buku bonyo-ou ta a bolo kandriyen ndra-in ta bada taha ma mesekei taha andra-i labai.
ROM 8:1 Ya eme sendrehendreh ta lakou mari i buku doh: Are lau asahan ari buruwen hawe Krais Jises badeh, batanau malen ta Kindrei winiyan batiyani iy bala ta mada sahou ma badeu maha-an bala tan ja bwe.
ROM 8:2 Idoh handru, tasah na lahou ta Krais Jises, Malawin Ndrabun le badeh, mesekei taha ahis hawen, ma taha winiyan a-en hamon ta kandriyen ta kohan handru ma manyah mwasin. Ya, iy tolowei taha udu bolo kandriyen ta karei ma lomondra ndra-in, eme ma iri kandriyen doh winyan batondrok taha ma batiyani taha bala san ta imek ja bwe.
ROM 8:3 Tasah, batanau malen badeh, boto-on tan winiyan basakalawi boto-on ta karei ma lomondra ndra-in bwe. Iy badeh, nyowonya le karei ma lomondra ndra-in udu bolo oda taha, ma iy winiyan basikine ba-au bwe. Arile, Kindrei le suni nadun amwenen asahan awas i buku taha ndramak ta karei ma lomondra ndra-in, i nyara salom, ma iy imek ta aseben taha mari. Handru, Kindrei le badeh, atehei Krais i buku none ndramak ta amekes karei ma lomondra ndra-in i saluwe taha.
ROM 8:4 Iy amekes doh, ta talou taha ame len, ya kandriyen mwasin ala batanau malen asehek badeh, kasahan handru, i tataha lau an hamon ta Malawin Ndrabun, ya sa-en hamon ta kandriyen ndra-in badu bolo oda taha aseken.
ROM 8:5 Are lau oro an hamon ta karei ma lomondra ndra-in badu bolo oda oro badeh, ndratehei budon toro ndrahas ndra ta aliy kabwe; arile, are lau oro an hamon ta budon ta Malawin Ndrabun badeh, atehei budon toro handru in hamon tan.
ROM 8:6 Ya eme buku none are lau atehei karei ma lomondra ndra-in udu budon tan labai kameh iy imek; arile, are lau atehei Malawin Ndrabun atondrok bolo budon tan mari kameh iy manyah mwasin udu le buku doh, winiya se losen bwe.
ROM 8:7 Ya, are lau atehei karei ma lomondra ndra-in udu bolo budon tan badeh, kameh mesekei le bahun hawe Kindrei. Tasah, are lau amekes kandriyen i buku doh, iri lau doh badeh, batehei oro bala bahandra tondrok ta batanau malen ta Kindrei bwe, ya iri winiyan ba-en hamon ta batanau tan bwe.
ROM 8:8 Are lau oro atehei oro ala bolo karei ma lomondra ndra-in badu bolo oda oro winiyan bamesekei mada Kindrei basekesek toro bwe.
ROM 8:9 Arile, i buku none aha katehei Malawin Ndrabun katondrok aha handru, ya aha karuwani budon ta karei ma lomondra ndra-in lolowa aha; idah kameh, aha a-en hamon ta budon ta Malawin Ndrabun leheya aha. Tasah, are lau bandrei Malawin Ndrabun ta Krais bwe, iy badeh badu hawe Krais bwe.
ROM 8:10 Karei ma lomondra ndra-in taha bwidi bolo oda aha, ma aha amak. Arile, i buku none aha kandrei Krais kamanyah kudu bolo aha, Malawin Ndrabun kameh manyah mwasin udu ndrine aha, tasah Kindrei le winiyan aloh aha mwasin mara-ei ta madan.
ROM 8:11 Ya, ki buku none Malawin Ndrabun ta Kindrei mene mete-ei Jises ta imek tan amak eme loken, kamanyah kudu bolo aha, iy winiyan mete-ei aha amak ame loken i le buku Krais mene, iy mete-ei iy eme loken. Ma iy kameh aluhi kohan handru kameh i bada aha i san ta Malawin Ndrabun udu bolo aha.
ROM 8:12 Eme ya, aha nadu tine, ta katin doh le, taha kalelei budon ta Malawin Ndrabun katondrok kandriyen ma tekedek tataha mara-ei. Ya, kandriyen ta karei ma lomondra ndra-in saluwi oda taha ma budon tataha, ndri-iy!
ROM 8:13 Tasah, i buku none aha katehei manyah taha mari badu bolo oda aha mari ki mine karei ma lomondra ndra-in, idah kameh, aha amak; arile i buku none aha katehei Malawin Ndrabun kasebenei aha katikahei karei ma lomondra ndra-in badu bolo oda aha ki-iu, idah kameh, aha winiyan bamak bwe, aha kameh ado le buku doh.
ROM 8:14 Tasah, are lau oro alelei budon ta Malawin Ndrabun atondrok oro, oro baden eh, nadu Kindrei.
ROM 8:15 Eme ya, aha bakohok Malawin Ndrabun ta nohowa aha bwe, arile, na Malawin Ndrabun le idih udu bolo oda aha mesekei aha asahan nadu Kindrei handru. Ma na iy le, taha aloh Kindrei anya, “Tama, tama.”
ROM 8:16 Ma ale Malawin Ndrabun tiye udu bolo koha taha anya, “Aha badeh, nadu Kindrei.”
ROM 8:17 Ya, i buku none taha ndrasahan nadun, idah kameh, taha akohok nyosowan mwasin tan udu hawe iri lau tan. Ma idah kameh, taha ma hawe Krais kameh atondrok lakou mene Kindrei atehei udu mine Krais, arile taha ma mwena kabwese maha-an ma isi, iri lau kamekes keme tataha op, ano kameh Kindrei edeu manyah mwasin eme tataha i le buku manyah mwasin ta Krais.
ROM 8:18 Balek lomondra ta maha-an hawe sisi-in taha bwese na len dah badeh; lakou nadu bwisik labai ta manyah mwasin ma lomadan kameh eme, iy leheya eme tataha.
ROM 8:19 Tasah, iri lakou mari badu munyak ma kandrah badeh, ado le abe-en, ma hawe koha iri apwe ta anyolom len eme kameh, Kindrei edeu bwabwai ta masiye i ta nadun iri.
ROM 8:20 Handru, Kindrei mesekei lakou mari mene ta kimek ma kabola na seken ta lakou mari nane bwe. Arile, idoh na seken le ta Kindrei. Iy atehei lakou mari nane iy mesekei kado le kabe-en iri lakou mwasin kameh asahan.
ROM 8:21 Iri lakou mari doh atondrok le len Kindrei ndrasaniy ta amekes kandriyen ta imek ma abola kano. Na len doh amwenen iri lakou mari Kindrei mesekei kameh ado mwasin hawe iri nadu Kindrei, ma iri mara-ei kameh asahan i randrah labai. Iri kameh winiyan bamak ma babola bwe, ma Kindrei kameh edeu nyosowan solo-an solo-an i tiri.
ROM 8:22 Taha ndratanan ta lakou mari Kindrei mesekei atona isi, i buku none isi ta badih anya kedeu nadun keme len. Ma iri lakou doh atondrok len ta Kindrei kameh nyowonya nadun iri ame lewan, winiya taku len dah.
ROM 8:23 Oro lakou ala Kindrei mesekei le bwe; taha mari mene asahan ma mwena handru akohok Malawin Ndrabun badeh, mesekei ndrine taha eden handru udu bolo taha ma taha ado le, ma koha taha apwe ta taha kasahan nadun handru ta nyo-ou. Na len doh kameh taha akohok bada taha ha-un ame hamon.
ROM 8:24 Kindrei mene ndrakohok taha ndrame hamon, tasah taha mene ndratehei budon tataha handru ndra-en tan. Ya nadah ale, taha atondrok ma atehei budon tataha handru ta lakou Kindrei kameh amekes eme tataha. Arile, iri lakou mwasin taha atondrok ta aliy badeh, ki buku none taha akohok handru, idah kameh taha batondrok ta aliy ja bwai. Tasah, buku none are lau ndratakalahei lakou nane doh, idah nane iy winiyan babe-en ja bwe, neh?
ROM 8:25 Arile, taha tanan, i buku none taha anyolom bohon ili bwena ta lakou taha bandrei bwe le badeh, taha ado le abe-en ta aliy.
ROM 8:26 Ya eme i le buku aliy, na len taha nyamu taha bwe badeh, Malawin Ndrabun eme aseben taha. Tasah, taha tana taha san ta amekes salom ki buku sah bwe, taha aden le udu ndrine taha na sahou rayah taha winiyan basehek na boho taha bwe; arile i buku none taha aso ta asehek sahou badeh kameh, Malawin Ndrabun le i nyara boho taha ndremenya Kindrei ta aseben.
ROM 8:27 Kindrei anyolom ndrine taha, ma iy tanan budon ta Malawin Ndrabun ma sasah kameh iy ndremenya iy ta aliy ta aseben taha lau tan. Ma Malawin Ndrabun kameh ndremenya iy boto-on boto-on amwenen le ta budon ta Kindrei.
ROM 8:28 Taha tanan, Kindrei amekes lakou mari mwasin ma ndra-in kameh, asahan mwasin i tare lau aseken iy; oro are lau mene iy aloh oro ame bolo lahou tan.
ROM 8:29 Ta katin doh, oro are lau le Kindrei ndratanan bwena mene, iy ale ndralebelei oro ndrare len ta iri kameh kakohok kone nadun ma hawe kandriyen tan le amwenen. Ya idah kameh, nadun asahan i tuluton tataha, ma taha asahan somwendreu tan.
ROM 8:30 Ma Kindrei ale aloh oro are lau ala iy mene ndralebelei oro, ndrado len kameh asahan nadun; oro le don badeh, iy aloh oro mwasin labai ta madan; ma oro le ala iy aloh oro mwasin labai ta madan kameh, iy atudun oro na len eme.
ROM 8:31 Ya abo, taha katiye sasah ki tiri lakou mari Kindrei amekes doh? Ki buku none iy badu hawe taha ma aseben taha, idah kameh, are lau katikahei taha ai? Winiyan bwe!
ROM 8:32 Kindrei batawi nadun amwenen ba-en gwek bwe, arile iy atehei nadun eme bwese isi ma imek ta akunoh taha mari. Handru, taha ndranyolom iy badeh, ndratehei nadun oh! Ya, idah kameh, aha abudon anya iy winiyan batehei lakou mwasin mari bame tataha bwe? Bwe, idah kameh, iy atehei laleyah i ta nadun ma i tataha ale.
ROM 8:33 Ya, are lau handru kameh winiyan tiye sahou nyarahan barala la-u oro lau nane Kindrei ndralebelei doh? Ari lau winiyan bwe! Kindrei le baraloh taha mwasin mara-ei ta madan.
ROM 8:34 Are lau winiyan tiye anya taha ndrandra-i? Lau bwe! Krais Jises le badeh, mene imek, ya eme ja, iy amak eme loken ili manyah udu kabede taman loboho lim salin! Ya eme iy le aseben taha na sahou.
ROM 8:35 Abo, saba lakou handru winiyan apwai taha are bolo tikisiy ta Krais? Maha-an winiyan deh, sisi-in deh, iri amekes ndra-in eme tataha deh, bilidi awas deh, taha kalawi taha bwe deh, bohosak deh, iri kadai taha kamak deh? Bwe, iri lakou mara-ei doh winiyan bapwai taha ta bolo seken ma tikisiy ta Krais bwe!
ROM 8:36 Ki le buku sahou udu bolo tarou mene ndratiye anya, “Aso lau tam, eme ma, na ou le badeh, aso are bohosak ta imek na len mari; Iri boso-ou aso andra-i labai, i buku none iri bosowa sipsip ta anya kasan balen.”
ROM 8:37 Arile bwe, iri maha-an mari doh, winiyan amekes bahun tinan eme bada taha, arile tikisiy tan eme tataha badeh, tinan labai ja, eme ma iri maha-an mari doh winiyan batisi taha bwe!
ROM 8:38 Tasah, jo badeh, ndratanan labai, ta saba lakou asahan bada taha winiyan bapwai taha ta bolo tikisiy ta Kindrei; jo imek deh jo udu; iri angelo badu kandrah deh, iri malawin ndra-in badu reu; na sasah asahan na dah deh, asahan udu bwena eme; na boto-on badu loke ma badu andri;
ROM 8:39 ma na saba lakou ja Kindrei mesekei, iri lakou mara-ei doh winiyan bapwai taha ta bolo tikisiy ta Kindrei bwe. Tikisiy tan doh eme tataha i san ta Krais Jises, iy Laban tataha.
ROM 9:1 Jo badu hawe Krais. Eme ma, sasah jo asehek dah badeh, wasai bwe, handru. Malawin Ndrabun atondrok bolo budon tek mari ma tiye tek, ta jo badeh, bawasai bwe.
ROM 9:2 Jo balek asin ma ndrinek tikisiy labai tiri lau ndraye ahi rabuk.
ROM 9:3 Ki buku none mwasin eh, jo aseken losen ta Kindrei keme la-uk, ya jo kakohok kon tiri lau ndraye ahi rabuk, keme len ta Krais, ya eme oro le kakohok kohan ta udu le buku doh.
ROM 9:4 Iri badeh, lau tan amwenen, lau badu Isra-el. Iri mene batehei budon tiri ba-en tan bwe, arile iy mene mesekei iri asahan nadun ta nyo-ou, ma edeu lomadan ma boto-on tan mwasin i tiri. Iy mene amekes sahou randra le ma hawe edeu batanau malen, ma hawe leheya san ta asalom ma atudun handru udu bolo asiu tinan tan. Iy amekes iri lakou mwasin doh i tiri hawe edeu tandrakan i tiri.
ROM 9:5 Udu ndra bada tubu iri, sare iri edek eme eme taku bada Krais asahan awas. Iy badeh, Kindrei ma iy udu bwele-e lakou mari. Masiye ma tudun ki tan kudu le buku doh. Handru.
ROM 9:6 Lundriye Isra-el solo-an batehei budon tiri ba-en ta Krais bwe. Ya, ta katin doh, sebwe jo katiye anya, Kindrei ba-en hamon ta tandrakan mene iy amekes i ta Abraham bwe, nadeh? Bwe! Tasah, lundriye Isra-el badeh, solo-an labai, arile iri mara-ei basahan lau handru ta Kindrei bwe, rayah le.
ROM 9:7 Sahou dah handru. Jo ale batiye anya iri lundriye Isra-el doh asahan lundriye Abraham handru, bwe. Bwe labai! Tasah, bwena mene Kindrei tiye i ta Abraham i buku doh, “Lundriyem oro hamon kameh asahan solo-an labai, in hamon ta san ta nadum Aisik amwenen.”
ROM 9:8 Kati sahou doh badeh, i buku doh: Lau solo-an abudon anya Abraham badeh, tubu iri, arile nah adeu eme len i buku taha ndranyolom doh kameh asahan nadu Kindrei ai, bwe. Nah ala asahan i san ta kandriyen ta atehei budon handru in ta tandrakan ta Kindrei, iri nah le don adeh asahan lundriye Abraham handru.
ROM 9:9 Tasah, tandrakan mene tiye i buku doh: “Na len jo ndrasaniy kameh jo eme hamon, ma Sara kameh atehei nah mwan eme len.”
ROM 9:10 Abo, anya sahou ta Kindrei doh le kabwai? Bwe. Nadu Rebeka uru mene ma la-uh badeh, au ndrine ndramak ari le; iy badeh, tubu taha Aisik.
ROM 9:11 Arile, in hamon ta kandriyen tan, Kindrei le lebelei ndramak na le so-ok tan amwenen; iy babudon ta lahou ndramak amekes bwe. Eme ma, kabatana Rebeka batehei uru nah mumwir doh bwe le, ma uru bamekes se kandriyen ndra-in hawe kandriyen mwasin bwe le badeh, Kindrei ndratehei budon tan ndra-en andri kabwe, ta are turu kameh kakohok nyaran ma kasahan lau tan handru. Eme Kindrei tiye Rebeka anya, “Iy kadok kameh asahan lohowan ta iy bwaneh.”
ROM 9:13 I le buku none ndratorowenei udu buk ndrabun ta Kindrei anya, “Jo badeh, aseken Jekob tinan labai, ano ja Iso.”
ROM 9:14 Ya eme taha kasehek ki buku sah bah? Kandriyen ma lomondra ta Kindrei bamwenen bwe? Bwe handru en!
ROM 9:15 Tasah, iy tiye i ta Moses i buku doh, “Na seken tek le, jo anya jo aseken ndramak ari, jo aseken iy, Ma jo anya, jo tikisi ndramak ari, jo tikisi iy.”
ROM 9:16 Ya eme Kindrei lebelei lau badeh, ba-en hamon ta seken ta ndramak, ma hawe ba-en hamon ta lahou bwe; arile idoh badeh, na tikisiy ta Kindrei le.
ROM 9:17 Tasah, sahou mene ndratorowenei tiye i ta Parou asah i buku doh: “Jo mene atehei ou asahan kabin ta anyehe budon ta jo badeh, kaleheya boto-on tek kewek tam. Ya eme ma iri lau kameh winiyan atudun nyarak ma atiye sahou tek i tiri lau badu kon munyak mara-ei.”
ROM 9:18 Ya eme sendrehendreh ta aliy i buku doh: I buku none Kindrei anya kamekes mwasin ki tare lau, badeh, lokowan ai. Ya, i buku none iy anya kamekes are lau sanuhun iy, badeh, lokowan le ai.
ROM 9:19 Eme ya aha ari kameh tiye sahou eme tek anya, “I buku sah handru? I buku Kindrei aseken, iy winiyan tiye iri lau rayah kasahan nadun. O, bwe eh, iy atehei le konan i tiri rayah ja, ma iri kameh amai.” Buku sahou dah handru, ya, na saba katin handru kameh Kindrei winiyan edeu maha-an eme tataha lau ta amekes kandriyen ndra-in? Tasah, ari lau winiyan basokei tanan ma lahou ta Kindrei bwe.
ROM 9:20 Arile, ou saba ndramak handru, ya ou anya asehek sahou i buku badeh, ki ta Kindrei? Buku none ari ndramak kabonei ndren, ya iy kamekes kun ano, kun keme ja katiye i ta ndramak nane ta amekes iy anya, “Ou bamekes jo bamwenen bwe oh”?
ROM 9:21 Bwe, ndramak ta apon ndren badeh, winiyan apon ndren na seken tan. I buku none iy anya kapon ari kasahan kabuluw o, ki rabos ta amekes gok laleyah ta len mari, badeh na seken tan. O, buku none iy anya kapon ari ja ki tariye ka-ukon ta leheya, badeh na seken tan le.
ROM 9:22 Ya eme i le buku aliy. Sebwe Kindrei winiyan leheya losen ma boto-on tan i la-u iri na seken tan nadeh? Eme ya, iy badeh, amunum udu le abe-en oro are lau ale losen tan udu toro. Oro don eh, iy ndralowosaniy ta iy kameh idi oro amak, o, akahei oro au buku kun ndra-in.
ROM 9:23 Kindrei amekes kandriyen buku doh, tasah iy anya kaleheya lakou tan solo-an labai udu bolo lomadan eme la-u taha are le mene iy tikisi taha. Taha lau mene iy lowosani taha ado buku kun tariye ka-ukon ta akohok lakou udu bolo lomadan.
ROM 9:24 Ma taha dah ale, taha lau mene iy aloh taha a buku kun ta akohok tikisiy tan. Taha rayah badu bolo iri Juwis ma rayah badu bolo iri lau badu leheleh.
ROM 9:25 I buku none iy torowenei udu bolo tarou ta propet Hoseya: “Jo kameh aloh iri lau tek bwe, asahan lau tek handru; ma jo kameh aloh iri lau jo baseken iri bwe, kameh jo aloh iri lau tek, jo aseken iri labai.”
ROM 9:26 ma, “Idah kameh, asahan amwenen le ndra kon heh, sahou mene asehek i toro anya, ‘Aha badeh, lau tek bwe,’ udu kon doh kameh aloh iri badeh, ‘nadu Kindrei, iy kohan ta udu le buku doh.’”
ROM 9:27 Ya, Aisaya mene aloh bohon i tinan ta nyala iri Isra-el anya, “I buku none kane lundriye iri Isra-el kameh asahan solo-an i buku le on badu babi, arile oro sabe le kameh Kindrei akohok ame hamon.
ROM 9:28 Tasah, idah kameh, sahou ta Laban ano ma iy kameh edeu maha-an suwi suwi i tiri lau badu munyak.”
ROM 9:29 Idoh asahan i le buku none Aisaya mene ndratiye ndra-au anya, “I buku none Laban ma boto-on tan bamukuni lundriye taha basahan tataha bwe, idah nane taha ndrandra-i i le buku iri Sodom, ma hawe iri Gomora.”
ROM 9:30 Ya eme taha kasehek ki buku doh: Iri lau badu leheleh bamekes lahou boto-on ta asilah madasan ta Kindrei kaloh iri mwasin mara-ei ta madan bwe, arile iri badeh, ndratakalahei madasan ta Kindrei kaloh iri mwasin mara-ei ta madan. Ya, san doh badeh, i san ta budon handru le.
ROM 9:31 Arile, iri lau tan amwenen, iri Isra-el badeh, none boto-on handru ta anya ka-en hamon le ta batanau malen mari ta Moses. Iri aseken Kindrei kaloh iri mwasin mara-ei ta madan, arile iy winiyan bwe.
ROM 9:32 I buku sah handru iy winiyan baloh iri mwasin mara-ei ta madan bwe? Tasah, iri banone na budon handru bwe, iri abudon ma an hamon le ta lahou boto-on iri amekes. Iri bwale iri Krais, ma iri batehei budon tiri ba-en handru tan bwe. Ya eme Krais le asahan i buku “bek ta lau ato-ak bwele-en,” ya iri Isra-el badeh, ato-ak ta bwele-e bek le doh.
ROM 9:33 I le buku tarou ta Kindrei asehek nyala aliy anya, “Ndranye aha kanuhun, jo nyahani bek udu Sayon ta tono-ei kati iri lau kato-ak Ma bek doh kameh tono-ei kati iri lau, ma iy kameh amekes lau taku areu san. Are lau atehei budon tan handru in tan kameh iy winiyan bani bwilima bwe.”
ROM 10:1 Aha nadu tine, jo badeh, bolo ndrinek aseken handru, ta Kindrei kakohok iri lau tek Isra-el kame hamon ma iri samak. Eme ma jo asolom i ta Kindrei ta aseben iri na len mari.
ROM 10:2 Tasah, jo tanan iri mwasin labai, ma jo winiyan asehek i buku doh: Budon tiri badeh, ta amekes lahou ta Kindrei. Arile, budon tiri doh badeh, bamwenen ta tanan ta Kindrei bwe.
ROM 10:3 Ya eme iri bala tanan ta saba san handru Kindrei aloh iri lau mwasin mara-ei ta madan bwe. Ma eme iri amekes na budon ma boto-on tiri laleyah, ya eme iri batehei iri bala baha Kindrei baloh iri mwasin ta madan bwe.
ROM 10:4 Tasah, Krais ndraweneyani batanau malen ta Moses kabwe, ya eme are lau oro atehei budon handru le badeh, Kindrei aloh iy mwasin mara-ei ta madan.
ROM 10:5 Moses asehek kandriyen toro lau nane anya ka-en hamon ta batanau malen; buku none oro anya Kindrei kaloh oro mwasin mara-ei ta madan, Moses tiye oro badeh, kamekes ki buku doh: “Are lau le, iy in hamon ta lakou mari batanau malen asehek, iy kameh akohok kohan ha-un ta udu le buku doh.”
ROM 10:6 Arile, ndramak in hamon ta kandriyen ta budon handru, eme Kindrei aloh iy mwasin mara-ei ta madan, iy ndramak doh in hamon ta sahou doh, “Ndrinem badeh, satiye anya, ‘Are lau winiyan ili bolo kandrah?’” ma kandrei Krais keme andri katiye sahou mwasin keme tataha.
ROM 10:7 “O, ‘Are lau winiyan ili bolo lek ndrahu lau amak?’” kamete-ei Krais keme loken katiye sahou mwasin keme tataha.
ROM 10:8 Arile kati sahou nane i buku doh: “Sahou mwasin asah udu mirihik hawe aha; ma udu boho aha hawe ndrine aha badeh.” Sahou doh badeh, sahou mwasin le nane dah aso atiye anya iri lau katehei budon tiri handru ki-in ta Krais.
ROM 10:9 Ya, i buku none ou asehek na bohom eme lewan anya, “Handru, Jises badeh, iy Laban,” ma ou atehei budon tam handru na ndrinem katiye ta Kindrei badeh, mete-ei Jises ta imek handru, idah kameh, iy akohok ou ame hamon.
ROM 10:10 Tasah, ou badeh, atehei budon tam handru na ndrinem, ya eme Kindrei aloh ou mwasin mara-ei ta madan. Ma ou asehek sahou na bohom eme lewan, ma eme iy akohok ou ame hamon.
ROM 10:11 I le buku none buk ndrabun mene ndrasehek anya, “Are lau atehei budon tan handru in tan kameh iy winiyan bani bwilima bwe.”
ROM 10:12 Tasah, iri Juwis ma hawe iri lau badu leheleh badeh, ari ndrokowa iri aliy bwe. Laban turu ma lubuk badeh, Laban le ari, iy Laban tiri mari. Ma iy edeu nyosowan solo-an mwasin i tiri mari ala aloh nyaran i san ta asolom ma ndremenya iy ta seben.
ROM 10:13 I buku buk ndrabun ale ndrasehek anya, “Lau amekes salom na nyara Laban ma ndremenya iy ta seben kameh, iy winiyan sebenei iri.”
ROM 10:14 Ya, buku none iri batehei budon tiri handru ba-en tan bwe, na saba san handru kameh iri aloh nyaran i san ta salom ma ndremenya iy ta seben? Ya, i buku none iri banuhun sahou ta nyalan bwena bwe, na saba san handru kameh iri atehei budon tiri handru in tan? Ya, i buku none iri lau batiye sahou mwasin bala tiri bwe, na saba san kameh iri anuhun?
ROM 10:15 Ya, i buku none ndramak basuni oro lau rayah bala len bwe, na saba san kameh oro lau nane atiye sahou doh? I buku ndratorowenei udu bolo buk ndrabun, “Lau sekesek handru ta anyolom ma anuhun ndramak atiye sahou mwasin.”
ROM 10:16 Arile, iri lau solo-an badu Isra-el baseken sahou mwasin bwe, oro rayah le. Aisaya amwenen asehek i buku doh, “Laban, are lau handru atehei budon tan in ta sahou tam aso ndrasehek.”
ROM 10:17 Eme ma, taha tanan, taha anuhun sahou ta Kindrei, ya sahou tan badeh, tiyani budon tataha handru asahan. Ma sahou asehek doh badeh, sahou ta nyala Krais.
ROM 10:18 Ya eme jo lelen i buku doh, iri ndranuhun sahou mene deh bwe? Ehe, iri ndranuhun oh! Buk ndrabun tiye, “Sahou badu boho oro ndraseker bolo munyak mari, ma sahou badu boho oro, lau badu len loboho heh, loboho heh ndranuhun kabwe.”
ROM 10:19 Eme ya jo lelen ja, iri Isra-el kede-eh, ndratana iri deh bwe? Ehe, iri ndratanan oh! Ma mwena mene Moses tiye i buku doh, “Jo kameh akohok iri lau laleyah, nyara iri bwe, ma kandriyen tek doh kameh mesekei mada aha alikis iri; Jo kameh akohok iri lau tana iri lakou bwe, ma idoh kameh amekes ndrine aha irih.”
ROM 10:20 Ano Aisaya mene tiye sahou nyarahan i buku doh, “Iri lau ala basilah jo bwe, iri ame ndratakalahei jo; Ya, iri lau ala balomondra ta akohok tanan ta nyalak bwe, jo kameh leheya jo aleu i mada oro.”
ROM 10:21 Arile, Aisaya abudon iri Isra-el ma iy asehek iri badeh, i buku doh, “Udu bolo len mari mari jo indrek iri, ta iri katehei budon tiri handru ki-in tek ma kanuhun sahou tek, arile batu iri boto-on; iri atehei le kona iri eme tek ma banuhun sahou tek bwai.”
ROM 11:1 Ya eme jo lelen anya, sebwe Kindrei baseken iri lau tan bwe nadeh? Bwe, handru en! Jo dah badeh, ndraye Isra-el amwenen, lundriye Abraham badu boho kamen ta Benjamin.
ROM 11:2 Kindrei badeh, winiyan bakahei iri Isra-el bwe, tasah ndra mwena mwena ndra-au iy tanan ta iri badeh, lau tan amwenen. Aha bala tana aha bwe? Tarou mene torowenei udu bolo buk ndrabun asehek nyala Alaija mene ibolosen ma iy asalom i ta Kindrei ma iy asehek kandriyen tiri Isra-el i buku doh,
ROM 11:3 “Laban, iri mene ndradai iri propet tam, ma ndratokosei mada koto-ok tam ta salom ndra-au; eme ma jo le ari erah, ya iri anya kadai jo ale.”
ROM 11:4 Ya eme Kindrei tiye sasah i tan? “Bwe, jo ndrasolo-ei iri lau ma ndru tuluwi (7,000) iri mene batehei bwili ndru-u iri bala andri ta Ba-al bwe, ndrame tek.”
ROM 11:5 Ya eme na len dah i le buku aliy, na tikisiy ta Kindrei le, iy solo-ei oro rayah le tawi oro areu.
ROM 11:6 Iy atehei tikisiy badeh, i kati budon tan, ya buku iy anya kasolo-ei ndramak badeh, iy ba-en hamon ta lahou ndramak amekes doh bwe. Tasah, ki buku none Kindrei kasolo-ei ndramak ki-in hamon le ta lahou iy amekes, idah kameh tikisiy tan ari moson bwe.
ROM 11:7 Ya, asah i buku doh: Iri Isra-el anya katakaleh san ta Kindrei kaloh iri mwasin mara-ei ta madan, arile iri batakalahei bwe. Arile, iri lau rayah le Kindrei solo-ei iri badeh, iri ndruniy. Ya iri mara-ei badu hawe oro nane doh, Kindrei mesekei ndrine iri abadok ta iri winiyan banuhun sahou tan bwe.
ROM 11:8 I buku none ndratorowenei mene ndra-au anya, “Kindrei badeh, wahei budon tiri Isra-el, ma mesekei mada iri agwah ta anyolom lakou, hawe ndranye iri ulun ta anuhun kon, eme, eme, taku na len dah.”
ROM 11:9 Ma Debit ale tiye anya, “Ya abo, jo aseken nyamon tiri ki buku lakou ta wahei iri; ki buku nyamon udu ta samek hawe udu ta lolohon kawahei iri kala kasukik, ma ki buku bek iri kato-ak ma kataku bwele-en, ya iri lakou doh kasahan tiri ta amekes oda iri kakohok sisi-in ta kandriyen ndra-in tiri.
ROM 11:10 Ya abo, jo aseken lakou kawahei mada iri kagwah, ma iri sanyolom kon eh, ma hawe ndruwi kona iri kihun kudu le buku don eh.”
ROM 11:11 Ya eme jo ndremenya ja anya, na len iri Isra-el ato-ak ma taku mene, iri ndrandra-i mara-ei, deh bwe? Bwe! Arile iri atehei kona iri i ta Kindrei, ma iri amekes karei ma lomondra ndra-in. Eme, ta katin doh, Kindrei eme aseben iri lau badu leheleh. Budon tan badeh, iy aseken iri Isra-el kanyolom kandriyen tan ta tikisiy i tiri lau badu leheleh, ma eme iri Isra-el ame, ya mada iri alikis ta aliy.
ROM 11:12 Na len iri lau badu Isra-el atehei kona iri i ta Kindrei, Kindrei le aseben iri lau badu kon munyak. Handru, na len iri Isra-el atelei ma bakohok nyosowan ta Kindrei bwe, iy mesekei iri lau badu leheleh akohok nyosowan solo-an labai ja. Ya, ta seleya ta aliy badeh, i buku doh: I buku none iri Isra-el katubuni kandriyen tiri ma kame hamon hawe Kindrei ja, idah kameh, nyosowan solo-an labai mwasin ja winiyan eme la-u lau mari badu leheleh ma badu Isra-el ale.
ROM 11:13 Ya sasah, sasah kasahan, aha ndratanan ta jo badeh, aposel ta atiye sahou ta ewek taha lau badu leheleh. Kindrei suni jo dah ta amekes lahou tan, ma jo sekesek ma aseken iri lau kanyolom gok jo amekes dah.
ROM 11:14 Tasah, jo abudon i san doh, kameh winiyan mesekei iri lau badu hawek, iri Isra-el kameh, mada iri alikis ta aliy. Ma idah kameh, winiyan sebenei iri rayah ado mwasin.
ROM 11:15 Ya kabatana len doh mene Kindrei baseken iri bwe badeh, mesekei iri lau badu kon munyak asahan kawas ta Kindrei. Eme ma, i buku none len ta aliy kasahan, ya Kindrei kaseken iri Isra-el kame hamon ja, idah kameh, ki buku sah bah? Idah kameh, iri sekesek tinan labai, i buku none iri amak ta imek ame loken.
ROM 11:16 Ya, sahou sokek i buku doh: I buku none ou amekes jabi ramen, ano ou andrei ari ma mwena, ou adeu i ta Kindrei i nyara ndramas badeh, jabi ramen mari ndra tan kabwe. Ma, i buku none kandro kei katehei ki ndramas ki ta Kindrei badeh, ma andran mari kili hawen ale. Idoh leheya buku, bwena mene, Abraham hawe tubu iri Isra-el rayah ndratehei iri ndra ta Kindrei. Eme ya, udu hamon ja, iri lundriye Isra-el kameh ame hawen ale.
ROM 11:17 Iri lau badu Isra-el badeh, i buku kei olip ateh udu bolo bilin. Kindrei eme tubwani andran rayah ma akahei iu. Ya, aha lau badu leheleh badeh, i buku andra kei olip ateh laleyah udu bolo lokei. Eme aha andra olip saniy badu bolo lokei doh badeh, Kindrei andrei aha ala ya tabahani aha ahas ala bada ndro-o andra olip rayah nane udu bolo bilin. Ma eme gwa edek bolo kandron eme ma nyohonei bakatabadah dah akuk ma andra iri basara bwe, uru asahan ari buruwen.
ROM 11:18 Eme ya aha andra olip ta bakatabadah, mada aha sandra-i sala toro andra olip udu bilin ibok mene, ndri-iy. Tasah, aha badeh, andran laleyah; aha akohok nyosowan ma boto-on badeh, edek udu ta kandron le. Kandron badeh, balelei aha bwe.
ROM 11:19 Ya, i buku none ou asehek anya, “Iy ndrasani oro andran kede-eh ndrame andri, tasah iy anya katabahani jo kili bada ndro-on oh.”
ROM 11:20 Handru, arile ou anuhun! Oro mene abok a andri tasah oro batehei budon handru toro bwe. Arile ou ales boto-on ta lakou ari le, ta budon handru tam. Ma ou sabudon anya ou ndra ari ai, ndri-iy; ou abudon ou, ma ou anoh.
ROM 11:21 Ou abudon! Kindrei mene sani iri Isra-el rayah ame andri, i buku ndramak sani andra kei olip amwenen. Ya eme ou ale kameh, buku ou ruwani budon tam handru, iy winiyan sani ou ame andri ale.
ROM 11:22 Ya eme ou none seleya se, Kindrei amekes kandriyen mwasin labai i tiri lau, arile iy ale edeu maha-an i la-u iri ma tiye sahou nyarahan ale. Iy edeu maha-an i la-u iri mene taku, arile iy amekes kandriyen mwasin ewek tam, i buku ou adek amwenen ala le bolo kandriyen mwasin tan. Bwe kameh iy kasani ou ame andri ale.
ROM 11:23 Ya, i buku none iri Isra-el nane katehei budon tiri handru kihis, iri kameh winiyan alih hamon ja ala bada ndro-o iri. Tasah, Kindrei le kameh winiyan tabadah iri ala hamon ala bada ndro-o iri.
ROM 11:24 Ya, ou tanam, ou a buku andra kei olip mene ateh laleyah bolo lokei. Ya, Kindrei eme amekes lahou boto-on labai, iy eme sani ou badu lokei, eme ya iy tabadahani ou ndra bada ndro-o olip udu bolo bilin ndrahas kabwe. Ma idoh kameh, mwasin labai ja ta Kindrei kameh winiyan atehei iri lau badu Isra-el kameh ala hawen ala ndrahune iri amwenen.
ROM 11:25 Aha nadu tine, jo aseken budon taha kaleu ta sali sahou handru bwena mene aton mara-ei. Ma aha sasore nyara aha anya, Kindrei aseken le aha, ya iri Isra-el bwe, ndri-iy. Sali sahou handru bwena mene aton asah idoh: Iri lau rayah badu Isra-el badeh, bwale iri atehei budon tiri handru in ta Jises Krais. Ya iri kameh tunuhun sahou mwasin tan ili winiya le kane iri lau mari badu leheleh ala Kindrei aloh iri badeh, anuhun sahou mwasin ta nyala Jises Krais ma ame bolo tondrok tan.
ROM 11:26 Ma i san doh kameh, buku kane iri lau badu leheleh winiyan eh, Kindrei kameh akohok iri Isra-el mari ame hamon, ma iri kameh ado mwasin i buku none ndratorowenei mene ndra-au, “Ndramak ta seben kameh asahan udu Sayon eme. Iy kameh tikahei kandriyen ta tunuhun sahou tan au a len ta lundriye Jekob oro.
ROM 11:27 Ma idah, sahou randra le tek jo amekes hawe iri, Ma jo kameh sikine kandriyen ndra-in tiri mara-ei iu.”
ROM 11:28 Arile, iy anyolom iri Isra-el badeh, ndratubuni kona iri ndra ta sahou mwasin, ya eme mesekei iri are len labai ta Kindrei; ma eme sihi madasan ta Kindrei amekes mwasin i taha lau badu leheleh. Arile, in hamon ta tandrakan tan bwena mene iy amekes hawe tubu iri Isra-el badeh, iy aseken iri kahis le.
ROM 11:29 Tasah, Kindrei winiyan bapwai tandrakan tan mene iy amekes i tiri lau tan iy aloh iri ma atehei nyosowan i la-u iri, bwe.
ROM 11:30 I le buku none aha lau badu leheleh mene tebelese boho Kindrei; na dah Kindrei tikisi aha. Tasah, na tebelese tiri Isra-el le mesekei aha asahan i buku badeh.
ROM 11:31 Ya i le buku aliy, i san ta Kindrei tikisi aha le badeh, tubuni iri lau badu Isra-el mene tebelese boho Kindrei, na dah kameh akohok tikisiy tan ale.
ROM 11:32 Ma eme ta sendrehendreh ta sahou, jo asehek i buku doh: Kindrei mene alelei lau mari tebelese badeh, ta katin doh: Ta iy kaleheya tikisiy tan keme lewen la-u lau mari.
ROM 11:33 Handru labai, Kindrei amekes mwasin solo-an labai eme tataha mari. Lomondra tan ta aleben ndra amwenen le, Ma tanan tan badeh, ili labai. Taha winiyan batakalahei kati budon tan ta aleben bwe, Ma taha winiyan bala tanan tekedek tan bwe.
ROM 11:34 “Are lau handru, iy ndratanan iri budon marakon ta Laban? Ma, are lau winiyan batanau iy ta sasah?”
ROM 11:35 “Are lau ndradeu lakou ndra ta Kindrei, ya eme iy kedeu bundruwen ki hamon?”
ROM 11:36 Taha mara-ei winiyan bwe! Tasah, lakou mari asahan badeh, iy le amekes; Iy asehek na le bohon badeh, lakou asahan i le buku aliy; Ma iy amekes iri lakou mara-ei badeh, tan le ari. Ya ta katin le doh badeh, taha lau mari katudun iy kudu le buku doh. Handru!
ROM 12:1 Ya eme aha nadu tine i san ta tikisiy tinan ta Kindrei, jo indrek aha katehei bada aha mari ki ndrabun, ki buku salom handru ki ta Kindrei kasekesek ta aliy. Idoh badeh, atudun handru ai.
ROM 12:2 Ma aha sa-en hamon ja ta tekedek ndra-in tiri lau badu munyak dah amekes, ndri-iy. Arile aha kasokosowei budon ndra-in ki-iu na budon mwasin ta Kindrei. I buku none aha a-en hamon ta aliy, idah kameh, aha takalahei seken ta sasah Kindrei anya aha kamekes. Ma iy kameh sekesek, tasah, sasah iy tiye aha ta amekes badeh, ndra amwenen le.
ROM 12:3 Tasah, Kindrei amekes mwasin eme tek, ma iy atehei kalem eme tek ta jo kamekes lahou tan, ya eme jo asehek nyala aha mari i buku doh: Aha satehei budon taha anya aha ndra ari ai, ndri-iy. Arile, aha kamekes budon taha kudu mwasin ta lomondra ki-in hamon ta boto-on ta budon handru ma ta ndramas Kindrei atehei ndrawek taha.
ROM 12:4 Taha ndratanan, bada taha ari ari badeh, ari buruwen, arile andran badeh, solo-an. Ya andran ari ari badeh, iy ari amekes lahou randrah labai ta ari ari.
ROM 12:5 Ya eme taha badeh, i le buku aliy. Taha badeh, solo-an, arile taha asahan ari buruwen ahas hawe le Krais. Ma taha ari ari badeh, kaseben iri rayah ja.
ROM 12:6 Na tikisiy ta Kindrei, taha ari ari ndrakohok ndramas mwasin i le winiya taha, ta amekes lahou tan. I buku none ari ndramak tan lahou mwasin ta akohok sahou propet badu boho Kindrei badeh, iy kamekes ki-in hamon ta boto-on ta budon handru tan le.
ROM 12:7 Ya, i buku none iy tan ta anyo-ou iri lau ta Kindrei badeh, iy kanyo-ou oro kudu mwasin; ya, i buku none iy tan tanan ta leheya bolo budon ta sahou ta Kindrei badeh, iy kaleheya iri lau kudu mwasin.
ROM 12:8 Ya, i buku none iy tan ta amekes budon tiri lau kabadok badeh, iy kamekes iri kabadok kudu mwasin. Ya, i buku none iy tan ta anyohan iri na lakou badeh, iy kanyohan na ndrinen handru ma solo-an. Ya, i buku none iy tan ta atondrok badeh, iy katondrok kudu mwasin labai. Ya, i buku none ndramas tan ta tikisiy ma aseben iri lau maha-an udu tiri badeh, iy kaseben iri ma sekesek.
ROM 12:9 Ou badeh, leheya kandriyen ta tikisiy ki handru. Ou ruwani kandriyen ndra-in ta balik; ya ou tawi kandriyen mwasin kihis.
ROM 12:10 Ou aseken nadu tinem ari ari badu hawem handru. Ou sabudon ou le, arile ou anuhun sahou ta nadu tinem ari ari.
ROM 12:11 Ou saliliy ma ou sawoyah ta amekes lahou ta Laban. Arile ou alelei Malawin Ndrabun aseben ou amekes lahou le kili.
ROM 12:12 Na len ou anyolom bohon i bwena ta lakou Jises kameh edeu tam badeh, ou sekesek. Buku none maha ma isi katok tam, ou sanunu-uh ma ou ado le. Ma, na len mari, ou amekes salom ma ou ado le ta salom; ou sabudon anya Kindrei kameh winiyan bamesekei bwe, ndri-iy.
ROM 12:13 Ou anyohan lakou ki toro lau ta Kindrei, i buku none oro andriliu ta lakou. Ma ou asumon iri lau badu heh, badu heh kawek asiu.
ROM 12:14 Are lau oro amekes maha-an ma isi i tam badeh, ou asolom ki ta Kindrei kanysowani oro le, ma iy sabokoro-ei oro.
ROM 12:15 Are lau oro sekesek badeh, ou ala hawe oro, ado mari kasekesek; ya are lau oro taya ma tikisiy badeh, ou ala hawe oro taya ma tikisiy hawe oro.
ROM 12:16 Ou manyah ado le, nono-ou ndri-iy hawe iri ari ari. Ou satudun ou, ndri-iy, arile ou amekes ou badeh, ala nah nadu bwisik ala hawe iri lau nyara iri bwe. Ya ou samekes ou anya ou tanan labai, ndri-iy.
ROM 12:17 I buku none ari ndramak kamekes ndra-in kewek tam, ou satehei ndra-in sala bada ndra-in, ndri-iy. Ma ou badeh, madam kaleu ki doh, ki doh, ma ou amekes lahou badeh, kamekes ndrine lau mari kasekesek.
ROM 12:18 Ou samekes losen sala ta ari ndramak, ndri-iy; arile i buku winiyan eh, ou manyah amunum le ado hawe iri.
ROM 12:19 Aha kawas tek, aha samekes losen sala tiri, ndri-iy, arile aha katehei ki kani Kindrei kamekes, tasah sahou mene ndratorowenei tiye i buku doh: “Jo kameh atehei maha-an ili tiri, ma jo konohei saba kandriyen nane iri amekes.”
ROM 12:20 Idoh handru, ya mwasin labai ta ou amekes i buku doh, “I buku none ndramak ta amekes bahun i tam kimeson badeh, ou anyohan iy na nyamon; Ma i buku none iy anyar ta gwa badeh, ou adeu gwa ki wa-in. I buku none ou amekes kandriyen mwasin doh i tan, ou kameh winiyan amekes bwilin ama ma tubuni kandriyen tan ndra-in doh iu.”
ROM 12:21 Ou samukuni kandriyen ndra-in sasakalawi ou, ndri-iy; arile ou tihisi kandriyen ndra-in na kandriyen mwasin.
ROM 13:1 Ou anuhun sahou tiri lau ta atondrok kon. Tasah, Kindrei badeh, edeu boto-on i tiri ta atondrok. Iri lau ta atondrok doh badeh, Kindrei le edeu.
ROM 13:2 Ya eme, are lau oro tebelese o amekes bahun i tiri lau ta atondrok, oro tebelese boto-on ale Kindrei amwenen ndratehei. Ya oro kameh bwese maha-an ma isi i la-u oro ta aliy.
ROM 13:3 Tasah, iri lau ta atondrok badeh, lahou tiri ta nohowa lau amekes kandriyen mwasin bwe; arile toro lau heh amekes kandriyen ndra-in labai. I buku none ou anya, ou sanoh tiri lau ta atondrok badeh, ou amekes kandriyen mwasin, ya idah kameh, iy masiye ou.
ROM 13:4 Iri lau ta atondrok doh, Kindrei le edeu iri ta anyolom tekedek tam kudu mwasin. Arile, i buku none ou amekes kandriyen ndra-in bamwenen ta madan bwe, ou anoh iy. Tasah, iri badeh, i nyara Kindrei kameh ateu samen ma winiyan adeu maha-an hawe isi ewek tam.
ROM 13:5 Ya eme ta katin doh, aha kanuhun boho iri lau ta atondrok aha. Idoh badeh, anya ta aha kabelek maha-an hawe isi le bwe. Idoh in hamon ta budon mwasin tiye ou amekes kandriyen mwasin.
ROM 13:6 Ta katin don adeh, aha ala akeh luk ta takis i tiri lau ta atondrok kon adeh. Tasah, iri badeh, lohowan ta Kindrei; iri amekes lahou ta atondrok na len mari.
ROM 13:7 Aha katehei lakou saluwe lakou iri lau mari mene aha ndrandrei, kili hamon ja: Ya, i buku none aha bakeh luk ta takis ta sasah aha akohok eme bolo kon bwe badeh, aha kakeh kili; ya, i buku none aha mene banoh bwe, aha kanoh iri lau ta atondrok kon; ma i buku none aha bamasiye iri mene bwe badeh, aha kamasiye iri.
ROM 13:8 I buku none aha mene ndrandrei ari lakou ta ari ndramak ta aseben aha, ya aha batehei saluwen bala hamon bwe le, badeh, aha katehei kili hamon. Arile, kandriyen ta aseken ndramak ari ja badeh, aha winiyan babwidiy bano bwe. Tasah, kandriyen ta aseken ndramak ari ja badeh, lakou maha-an labai ta aha winiyan batehei mara-ei bala hamon bwe. Ya, iy are lau aseken ndramak badu heh, badu heh badeh, iy in hamon handru ta batanau malen mari.
ROM 13:9 Tasah, taha tanan, batanau malen mene ndratorowenei tiye i buku doh, “Ou sateu badih udu mwan, ya ou sadai ndramak samak, ya ou sabahana, ya madam salikis lakou ta ndramak ari ja.” Ma saba batanau malen ja badu hawe oro doh badeh, sukik le bada batanau ari le doh: “Ou aseken iri lau ari ari badu hawem, i le buku ou aso-ok ou le.”
ROM 13:10 Ya eme are lau aseken lau badu mirihik tan badeh, iy winiyan bamekes budon ndra-in bala tiri bwe. Eme ya sendrehendreh ta aliy i buku doh: Kandriyen ta aseken ndramak ari ari badeh, mesekei ou an hamon ta batanau malen mari.
ROM 13:11 Ma eme aha kamekes kandriyen doh, tasah aha ndratanan ta taha na dah manyah ado bolo len ta aliy ai. Mada an ndrasahan ta aha samadin, tasah ndramak ta aseben taha, ale taha mene atehei budon tataha handru in tan badeh, len tan ndrame bakep, bala buku none kabatana na len mene taha tubuni ndrine taha, bwe.
ROM 13:12 Mirihik kon kaleu ai, ma len kataku ai. Ya eme taha karuwaniy ta amekes kandriyen ndra-in badu lulik, ya taha kasini awin ta bahun ma len.
ROM 13:13 Ma eme taha katondrok tekedek tataha kudu mwasin i buku none lau manyah ado bolo an na len; sala buku none taha ka-un gwa boto-on ma bwidi batu taha asahan lolo-ou, ya taha asehek sahou laleyah, ma amekes karei ma madasarah, ma samekes bahun hawe samekes madalakis sala ta ndramak ari ari, ndri-iy.
ROM 13:14 Arile, aha katehei kandriyen ta Laban Jises Krais ki buku none awin taha, ma aha karuwani budon ta karei ma lomondra ndra-in badu bolo oda aha.
ROM 14:1 Aha kaseken are lau budon tan handru babadok bwe, kewek hawe aha. Ma aha sandres budon tan.
ROM 14:2 Ndramak ari badeh, budon tan abadok, ma eme winiyan mesekei iy aimon nyamon mari. Arile, ndramak ari ja badeh, budon tan babadok bwe ma eme, mesekei iy aimon le nyamon badu bilin.
ROM 14:3 Ya eme iy ndramak ta kaniya nyamon mari, madan sandra-i sala ta ndramak nane aimon nyamon badu bilin le, ndri-iy; ma iy aimon nyamon badu bilin le ale satiye sahou nyarahan sala ta ndramak ta kaniya nyamon mari, ndri-iy. Tasah, Kindrei badeh, baseken iy ari le bwe, iy aseken uru ma la-uh.
ROM 14:4 Ou are ndramak handru ya ou anya asehek ki ta lohowan ta ndramak ari ja? I buku none iy lohowan doh abadok ta ales, o bwe, iy taku ta lahou tan, idoh lahou ta Laban tan le barasehek hawe baraleben iy. Arile, iy kameh abadok ta ales, tasah Laban kameh aseben iy.
ROM 14:5 Ya jo kasehek sahou ari ja doh: Lau rayah abudon hawe aleben anya, “Len rayah badeh, ndrabun ta len rayah;” ya iri rayah abudon anya, “Bwe, len mari i le randra le, ari bala randrah bwe, ya ari bala randrah bwe.” Arile, bwe, uru ma lubuk badeh, budon turu sala la-uh ta nyala kandriyen ta atehei ndrabun ta len rayah.
ROM 14:6 Are lau oro abudon ma aleben anya, “Len rayah badeh, ndrabun ta len rayah” badeh, oro amekes ta atudun Laban; ya are oro ta kaniya nyamon mari badeh, oro amekes ta atudun Laban ale, tasah iy edeu wurah i ta Kindrei ta nyamon nane doh. Ma hawe are lau oro beleben ta baimon nyamon rayah bwe badeh, amekes ta atudun Laban hawe adeu wurah i ta Kindrei i le buku oro ale.
ROM 14:7 Tasah, taha ari ari manyah are kada-ah na budon tataha le bwe, ma taha bamak laleyah na seken tataha bwe le.
ROM 14:8 Ya eme, i buku none iy anya taha amak, taha amak na seken ta Laban le; ya i buku none iy anya taha ado, taha ado na seken tan le. Ya eme, buku none taha ado deh, taha amak, taha mari badeh, badu hawe Laban le.
ROM 14:9 Ya eme ta katin le doh, Krais mene imek, ano iy amak ja, ta iy kasahan Laban ma katondrok lau ndramak ndrasu-u hawe lau bamak bwe.
ROM 14:10 Eme ya aha anya katiye sahou nyarahan ki ta nadu tine aha rayah ja, anya ki sah? Ma mada aha anya kandra-i ta nadu tine aha rayah ja ki sah? Tasah, taha ndramak ndrasu-u, deh, taha bamak bwe, taha mari kameh ales are mada Kindrei ta sahou.
ROM 14:11 I buku none sahou mene ndratorowenei: “Laban tiye anya, ‘Jo ma mulin kahis le; Idah kameh, lau mari aluh a andri ma atehei bwili ndru-u iri i andri are madak, Ma iri mari kameh tiye eme lewen anya, ehe, jo Kindrei handru.’”
ROM 14:12 Ya eme ta sendrehendreh ta aliy i buku doh: Idah kameh, taha ari ari kameh asehek sasah taha amekes ndra-in o mwasin i ta Kindrei.
ROM 14:13 Eme ya, ou sasehek ndramak ari ari anya iy badeh, ba-en hamon ta batanau malen bwe, ndri-iy. Arile ou amekes budon tam ki buku doh: Jo badeh, samekes ari lakou ta amekes nadu tine ari ja ato-ak ta aliy, ma jo samekes ari sahou ta sokoso-ou budon tan, ndri-iy.
ROM 14:14 Eme ya, jo katiye kamwenen; jo dah badu hawe Laban Jises. Ya jo ndratanan handru en, ta nyamon mari kede-eh ndra mwasin le, ya ari ndra-in aliy bwe. Arile, i buku none ari ndramak anya iy beleben badeh, mwasin, lakou ta budon tan ai, ma mesekei iy baimon nyamon bwe.
ROM 14:15 Arile, i buku none ou aimon nyamon nane nadu tinem ari ja beleben, ya mesekei budon tan andra-i badeh, ou bamekes mwasin bala tan bwai, ma kandriyen tam leheya ta ou baseken iy handru bwe. Eme ma, nyamon ou aimon badeh, samesekei budon ta nadu tinem sandra-i. Tasah, ndramak doh, Krais mene imek ta aseben iy!
ROM 14:16 Ya, buku ou abudon anya, “Lakou doh mwasin, jo winiyan ta amekes ai,” arile ou abudon amwenen op! Kora-on lakou ou amekes doh kasahan ndra-in udu bolo budon ta ndramak ari ja.
ROM 14:17 Tasah, tondrok ta Kindrei badeh, bala buku none kandriyen ta aimon nyamon ma a-un gwa mari, ma hawe bala buku none kandriyen ta beleben, bwe. Arile, lakou laba tinan ta tondrok ta Kindrei badeh, ndra kandriyen mwasin le, ma kandriyen ta mondrei le, ma hawe kandriyen ta sekesek le i san ta Malawin Ndrabun.
ROM 14:18 Ma eme, buku are lau amekes lahou mwasin ta Krais i buku doh kameh Kindrei sekesek tan handru. Ma hawe iri lau kameh asehek anya, “Iy ndramak kede-eh badeh, manyah mwasin handru en.”
ROM 14:19 Ya eme ta sendrehendreh ta lakou ndrasehek ndra-au i buku doh: Taha kabadok ta amekes budon ta asan mondrei kudu ndrokowa iri lau ari ari, ma taha kamekes sasah le winiyan sebenei iri abadok ta budon mwasin.
ROM 14:20 Aha sasemete-ei lahou ta Kindrei na andres ta nyamon, ndri-iy. Handru, nyamon mari badeh, ndra mwasin le ta aimon. Arile, ndra-in badeh, i buku ou aimon nyamon ari, ma kandriyen tam doh amekes ndramak ari ja ato-ak ma taku.
ROM 14:21 Mwasin handru ta aha sa-un waen hawe aimon oda lakou ma hawe sasah, sasah ja, kora-on kabini nadu tinem ari ja kataku.
ROM 14:22 Ya eme, sasah ou atehei budon tam abadok i ta aliy anya mwasin badeh, lakou ta ndrokowa ah Kindrei le. Eme ya, buku ndramak amekes ari lakou, ma ndrinen ma budon tan basehek anya lakou doh, ndra-in, bwe, iy kasekesek.
ROM 14:23 Arile, are ndramak androndro ta aimon nyamon badeh, iy bala tanan Kindrei sekesek ta aliy deh, bwe. Ya, buku iy ili le aimon nyamon doh, budon tan badeh, tiye iy ndramesekei kandriyen ndra-in. Tasah, budon tan handru badeh, bahas ta nyamon nane iy aimon bwe. Ya eme i buku doh: Sasah, sasah ou amekes ya batehei budon tam handru ba-en ta aliy bwe, badeh, ou ndrandra-i kabwe.
ROM 15:1 Taha are lau le budon tataha ndrabadok handru, kala kaseben oro are lau babadok bwe le ma kabwese maha-an toro. Ya taha sabudon le taha, ndri-iy.
ROM 15:2 Eme ya jo aseken taha ari ari kamekes kandriyen mwasin ta seben ki ta nadu tine taha oro ari ari badu mirihik tataha, ta sasah le winiyan sebenei iy abadok ta budon mwasin.
ROM 15:3 Tasah, Krais mene amekes lahou, ta aseben iy le bwe. Iy amekes i buku none tarou mene ndratorowenei asehek, “Are lau oro amekes losen i la-um, jo tanan idoh badeh, ndrame la-uk ale.”
ROM 15:4 Tasah, sahou mene ndratorowenei ndra-au ndra-au udu bolo tarou ta Kindrei badeh, ta leheya taha kado le, ma ta amekes taha kabadok ta abe-en lakou mwasin udu bwena tataha eme.
ROM 15:5 Eme ya, jo aseken Kindrei, ndramak ta edeu boto-on ma ta amekes aha abadok, kaseben ndrine aha kudu mwasin ma kare le se, ta bolo tekedek taha a-en hamon ta Krais Jises,
ROM 15:6 ma eme ndrine aha ma boho aha mari badeh, ki le ari katudun Kindrei tama Laban tataha Jises Krais.
ROM 15:7 Eme ya aha kaseken nadu tine aha oro ari ari, i buku none Krais mene aseken aha; ma idah kameh winiyan mesekei iri lau atudun Kindrei.
ROM 15:8 Ya eme jo kasehek taha ta Krais mene eme asahan lohowan tiri Juwis. Iy amekes lahou doh ta leheya Kindrei badeh, tiye sahou handru ta tandrakan tan mene iy amekes i ta tubu iri mene ndra-au.
ROM 15:9 Ya eme, iri lau badu leheleh winiyan atudun Kindrei in hamon ta tikisiy tan i buku none sahou mene ndratorowenei: “Ya eme ta katin doh le, jo kameh udu ndrokowa iri lau badu leheleh atudun nyaram. Ma jo kameh iyah wari ta atudun nyaram.”
ROM 15:10 Ano ja asehek i buku doh: “Ya aha lau badu leheleh badeh, ka le se hawe iri lau ta Kindrei, ya aha kasekesek.”
ROM 15:11 Ma buk ndrabun tiye ale i buku doh, “Aha lau mari badu leheleh katudun Laban, Ma hawe aha lau mari kayah wari ta atudun iy.”
ROM 15:12 Ma propet Aisaya ale asehek anya, “Idah kameh, lundriye Jesi ari kameh barasahan, Iy kameh asahan ta atondrok iri lau badu munyak tinan mara-ei, Ma iri lau badu leheleh kameh atehei budon tiri in tan ma atondrok iy ta sasah mwasin kameh iy edeu i tiri.”
ROM 15:13 Ya jo aseken Kindrei, ndramak ta edeu lakou mwasin, kamesekei bolo oda aha kidih na sekesek, ma hawe oda aha kudu mwasin ki-in hamon ta budon taha handru in tan. Ya eme ma budon taha kameh abadok ta anyolom bohon i bwena ta lakou mwasin na boto-on ta Malawin Ndrabun.
ROM 15:14 Aha nadu tine, budon tek ndrabadok ta aha amwenen badeh, ndradah handru na kandriyen mwasin. Ma aha ndradah na tanan aha mene ndrakuhiy, ma eme winiyan sebenei aha ta leheya ma hawe batanau aha ari ari.
ROM 15:15 Jo nane atorou sahou rayah boto-on labai ewek taha ta tiye nyala aha ta budon taha samaniy. Tasah, na tikisiy ta Kindrei le badeh,
ROM 15:16 iy atehei lahou dah eme kanik ta atiye sahou ta nyala Krais Jises ki tiri lau badu leheleh. Jo badeh, i buku none ari pris amekes lahou ta atiye sahou mwasin ta Kindrei. Ya eme iri lau badu leheleh badeh, i nyara salom jo edeu i mada Kindrei ma eme iy sekesek ta aliy. Ma hawe Kindrei badeh, mesekei iri asahan lau tan handru i san ta iy suni Malawin Ndrabun ili manyah udu bolo oro.
ROM 15:17 Ya eme in bwele-e sahou nane ndrasehek ndra-au, jo winiyan sekesek ta aliy. Tasah jo badeh, ndrahis ndrase hawe Krais Jises, ya aru amekes lahou ta Kindrei.
ROM 15:18 Ma eme jo winiyan basehek ta nyala sasah ja bwai; arile jo le kameh asehek ta nyala sasah Krais atehei eme kanik ta amekes iri lau badu leheleh kanuhun boho Kindrei i san ta sahou mwasin ma tanan handru, jo asehek.
ROM 15:19 Handru, Malawin Ndrabun aseben jo ta asehek sahou, ma iy edeu boto-on eme tek ta amekes kalem ma lahou tinan. Iri lau anyolom ma iri atehei budon tiri handru in ta Krais. Ya eme jo mene edek udu ndra Jerusalem o-on eme eme taku Ilirikum ta atiye sahou mwasin handru ta nyala Krais.
ROM 15:20 Jo bwalek ta atiye sahou mwasin ta nyala Krais ili kon ala lau ndra aliy bwena, kora-on jo ja katah asiu ki bwele-e ndru ta ndramak ari ja. Arile, udu bolo odak mari, jo aseken handru ta atiye sahou mwasin ta nyala Krais kili kon ha-un lau batiyaniy bala aliy bwe le.
ROM 15:21 I buku none sahou mene ndratorowenei tiye i buku doh: “Are lau oro banuhun kundruh nyalan bwena bwe, Idah kameh oro anyolom iy, Ma are lau oro mene banuhun sahou ta nyalan bwe le, Na len dah kameh oro atanan ta aliy.”
ROM 15:22 Ya eme ta katin le doh, lahou tek solo-an jo mene amekes, sokei jo bawek hawe aha bwe.
ROM 15:23 Arile, na dah lahou tek ta amekes udu loboho kon dah badeh, ndrano. Jaha solo-an labai ndra-au jo aseken handru ta ewek atou aha, arile jo mene winiyan bwe.
ROM 15:24 Arile, jo amekes budon ta ewek atou aha udu bolo tekedek tek ili Spen. Jo kameh ewek udu hawe aha, taha sekesek luluwen sese, ano ma jo aseken aha kaseben jo ta rayah lakou ta ili Spen.
ROM 15:25 Arile, na dah jo winiyan bawek bwai; jo kameh ili Jerusalem atiye lakou ta aseben iri lau ta Kindrei badu doh.
ROM 15:26 Tasah, iri lau ta budon handru i ta Kindrei badu kon Masadoniya hawe badu kon Akaya badeh, sekesek handru ta atukum lakou ta aseben oro lau ta Kindrei ado Jerusalem, oro badeh, andriliu ta lakou.
ROM 15:27 Eme iri sekesek handru ta atukum lakou i saluwe sasah mene oro amekes i tiri. Budon i buku doh: Oro lau ta budon handru badu Juwis mene aseben iri lau ta budon handru badu leheleh ta sahou ta Kindrei ta nyala Krais. Ya eme iri lau ta budon handru badu leheleh kadeu saluwen ki hamon ki toro lau ta budon handru badu Juwis na lakou ta aseben bolo manyah toro.
ROM 15:28 Ya eme udu hamon ta jo edeu lakou ta aseben ili toro ano kameh, udu bolo tekedek tek ili kon Spen jo barawek baranyolom aha ai.
ROM 15:29 Jo tanan na len jo ewek hawe aha kameh jo badek laleyah bwe. Jo kameh ewek atiye sahou ma amekes aha adah ma sekesek na nyosowan handru ta Krais.
ROM 15:30 Ya eme aha nadu tine, jo indrek aha i san ta Laban Jises Krais, ma hawe i san ta tikisiy ta Malawin Ndrabun, ta aha kahas hawek, ma kales boto-on ma aha kateu salom keme tek ki ta Kindrei.
ROM 15:31 Aha kaseben jo ta salom ya jo sataku sala mine iri lau ta tebelese ado Judiya. Ya eme ma lahou tek jo amekes udu Jerusalem kamekes bolo iri lau ta Kindrei doh kasekesek ta lakou jo edeu i tiri.
ROM 15:32 Ya jo kameh ewek atou aha ma sekesek, ma, i buku Kindrei aseken ta aliy, idah kameh, jo ewek hawe aha ya taha mari sekesek ma amunyau.
ROM 15:33 Ya kabwai. Mondrei ta Kindrei kudu ndrokowa aha. Handru!
ROM 16:1 Jo anya kasehek tanan ki taha ta nadu tine taha ari badih nyaran Pibi, i buku none iy kasahan bada aha. Iy badeh, lohowan ari mwasin ta Krais Jises udu bolo iri lau ta Kindrei badu kon tinan Senkriya.
ROM 16:2 I buku none iy kasahan hawe aha, jo aseken aha kasumon iy hawe kakuhi iy kewek hawe aha, ki san ta Laban i buku lau ta Kindrei ala amekes kede-eh. Ya sasah iy aseken ta aliy, aha kaseben iy. Tasah iy mene ndraseben iri lau solo-an solo-an ndra-au ma hawe jo ale.
ROM 16:3 Jo anya katiye sahou ta sekesek tek doh ki ta Prisila uru udun Akwila. Uru badeh, ta badu hawek ta amekes lahou ta Krais Jises.
ROM 16:4 Uru banoh bwe, uru aseben jo na len iri lau anya kadai jo. Jo le ari le badeu wurah bala turu le bwe, ahi mari. Iri lau ta Kindrei badu leheleh eneh ma jo eh.
ROM 16:5 Ma sekesek tek ale kili toro lau ta Kindrei atukum are asiu turu badeh.
ROM 16:6 Sekesek tek ja ki ta Mariya. Iy mene amekes lahou boto-on boto-on ma amekes lakou solo-an labai ta aseben aha.
ROM 16:7 Ya sekesek tek doh ki ta Andronikus hawe Juniyas. Uru badeh, ndraye ahi rabuk ta amekes lahou hawek ya uru hawe jo mene aso ado bolo kou. Ya uru ma la-uh badeh, lahou turu ili labai udu bolo ndrokowa oro aposel ta Jises. Ma uru atehei budon turu handru i ta Krais bwena tek.
ROM 16:8 Ya sekesek tek doh ki ta kawas tek Ampiliyatus. Jo aseken iy labai i san ta Laban.
ROM 16:9 Ma sekesek tek ale ki ta Urbanus. Iy mene eme hawek ya aru amekes lahou ta Krais. Ma hawe sekesek tek ki ta kawas tek handru ale Stakis.
ROM 16:10 Sekesek tek doh ki ta Apelis. Nyaran badeh, mwasin, tasah iri lau ndranyolom iy ateu lahou ta Krais udu mwasin.
ROM 16:11 Ya sekesek tek ja ki ta Herodiyon. Iy badeh, badu Juwis ale, ta amekes lahou hawek.
ROM 16:12 Sekesek tek ki turu badih doh, Traipena hawe Traiposa. Uru badih doh amekes lahou mwasin handru ma amekes lahou boto-on boto-on ta Laban.
ROM 16:13 Sekesek tek ki ta Rupus. Iy badeh, mwasin handru ta mada Laban ta amekes lahou tan, ma hawe sekesek tek ale ki ta tinen. Tinen badeh, atondrok jo i buku none nadun handru badu ndrinen amwenen.
ROM 16:14 Sekesek tek ki toro lau doh: Ki ta Asikritus, ki ta Pilegon, ki ta Hermes, ki ta Patrobas hawe Hermas. Ma hawe sekesek tek ale ki toro lau ta Kindrei atukum are hawe oro badeh.
ROM 16:15 Ya sekesek ki toro lau doh: Ki ta Pilologus hawe udun Juliya, ki ta Nereyus hawe nadu tinen badeh, ki ta Olimpas ma hawe ki tiri lau mari ta Kindrei atukum are hawe oro ale.
ROM 16:16 Na len aha atukum, aha kadeu lim ma kasekesek aha ari ari.
ROM 16:17 Ya eme aha nadu tine, jo tiye sahou batanau doh ewek taha i buku doh: Aha badeh, mada aha kaleu tiri lau ta orou bolo lau andra-i ma ano lau aseker. Iri lau doh ta leheya tanan ta wasai bamwenen ta leheya mene aha ndrakohok bwe. Iri kameh aluwi aha rayah kameh ame len ta leheya handru mene. Aha kateleya oro;
ROM 16:18 tasah oro lau i buku doh, baleheya tanan handru ta lahou ta Laban bwe. Oro leheya tanan randrah labai ta abulum le ndrine oro. Oro asehek sahou nyaman nyaman ta asan bale aha, ma hawe amekes sahou mwasin mwasin ta atamar aha; ma oro bolowani budon tiri lau tana iri lakou mwasin o ndra-in bwe, ka-en hamon toro.
ROM 16:19 Iri lau mari ndranuhun nyara aha. Aha badeh, lau ta anuhun sahou. Ya eme mesekei jo idih handru na sekesek ta kandriyen taha. Arile aha kanuhun, jo aseken aha kabudon kamwenen ta kandriyen mwasin aha ka-en hamon ta aliy. Ya kandriyen ndra-in badeh, aha sala aliy. Aha ma mwasin kado.
ROM 16:20 Kindrei badeh, ndramak ta isan mondrei ndrokowa aha ma amekes manyah taha kudu mwasin. Ma, na nawin bwe kameh iy atisih tama balik Satan abwesek udu bolo kati aha. Ya eme jo aseken tikisiy ta Laban tataha Jises kudu hawe aha.
ROM 16:21 Ma eme Timoti, ndramak ta amekes lahou hawek ale tiye sahou sekesek tan ewek taha; ma hawe Lusiyus, hawe Jesen, hawe Sosipater ale. Oro lau ma taloh doh badeh, oro Juwis i le buku jo.
ROM 16:22 Ya sahou udu bolo la-ukei dah badeh, Pol asehek, ya jo Tertiyus atorou bolon. Ya jo asehek sekesek tek ewek taha ale.
ROM 16:23 Ma Gayus ale tiye sekesek tan ewek taha. Iy aloh ma atukum aso lau mara-ei ta Kindrei ala asiu tan, ma hawe iy atondrok aso. Ya Erastus ndramak ta atondrok luk ta kon tinan ma hawe nadu tine taha Kuwartus tiye sekesek turu ewek taha ale.
ROM 16:25 Sendrehendreh ta aliy i buku doh: Taha badeh, katudun Kindrei. Iy le kameh winiyan aseben aha ales boto-on ta bolo budon handru taha, in hamon ta sahou mwasin mene jo atiye ewek taha. Sahou mwasin doh ta nyala Jises Krais, ma hawe in hamon ta sahou bwena mene aton mara-ei kabatana le munyak asahan eme eme taku dah.
ROM 16:26 Arile, na dah, sahou handru mene doh ndrasak. Aso atiye sahou doh amwenen le ta sahou udu bolo tarou tiri propet ta Kindrei mene asehek, ma amwenen le ta batanau ta Kindrei ta bano bwe, kameh ta udu le buku doh. Ya eme iri lau badu kon munyak mari katehei budon tiri handru ki-in tan ma hawe kanuhun le iy.
ROM 16:27 Masiye ma hawe tudun tataha badeh, ki tan udu bolo len dah ma hawe udu bolo len udu bwena eme, kudu le buku doh. Tasah tanan tan badeh, ili labai, eme taha katudun iy i san ta Jises Krais. Handru!
1CO 1:1 Jo Pol, jo aposel ta Krais Jises. Na budon ta Kindrei le iy tiye jo asahan lau ta atiye sahou tan. Aru nadu tine taha Sostenes atorou la-ukei dah ewek taha lau mwan ma badih atudun nyara Kindrei ado kon tinan Korin. Krais Jises andrei aha marakon ame asahan ndrabun ma lau tan amwenen; iy andrei aha hawe iri lau badu kon munyak mara-ei, iri ale atudun iy ma asolom in ta nyaran. Iy Laban tataha ma tiri ale.
1CO 1:3 Salom tek ili ta tama taha Kindrei ma hawe Laban Jises Krais ta uru katikisi aha, ma kabwidi ndrine aha kudu mwasin.
1CO 1:4 Len marakon jo edeu wurah ili ta Kindrei, iy mene amekes kandriyen mwasin ta tikisiy ewek taha, tasah aha lau ta Jises Krais.
1CO 1:5 Aha ndrahis hawe Jises labai, eme ma Kindrei ndratehei iri tanan mari mwasin ndrawek taha, ma iy aseben aha ta iri sahou mwasin aha asehek.
1CO 1:6 Tasah, sahou ta Kindrei ahi mene ndrasihidiy ndrawek taha, ndrado bolo ndrine aha, ma ndrato-ou salin.
1CO 1:7 Ta idoh le, aha barah ta ari nyosowan ta Malawin Ndrabun bwe. Aha ado le ta atondrok len ta Laban tataha Jises Krais eme hamon ja, ma ta iy edeu iri lau badu kon munyak ala ta sahou.
1CO 1:8 Iy le kameh tondrokei aha ado mwasin ili winiya le len hamon. Buku len doh Jises Krais eme hamon ja ta anuhun sahou tataha, ari ndramak winiyan basehek taha ta lakou ndra-in ja bwe.
1CO 1:9 Kindrei le amwenen mene atehei aha, ta ndrine aha kudu mwasin hawe nadun Jises Krais. Kindrei, iy mwasin labai, ma ta wendreya bwe. Iy badeh, in hamon tiri sahou tan, ma taha winiyan atehei budon tataha marakon in tan.
1CO 1:10 Na boto-on le ta Laban Jises Krais tataha, jo anya kasehek taha nadu tine mwan ma badih i san ta nyara Jises Krais. Jo anya kabatanau aha ki buku doh: Sohowa aha marakon badeh, ki le randra, idah kameh ari ndra-i winiya bado ndrokowa aha bwe. Aha sapou aha. Budon ma tanan taha badeh, ki le randra ta iri lakou marakon aha abudon ma asehek.
1CO 1:11 Tasah, oro lau rayah badu asiu ta Kolowe ame asehek tek anya, aha nadu tine badeh, ndra-i udu ndrokowa aha solo-an labai.
1CO 1:12 Aha marakon badeh, aha ari ari asehek sahou i randrah randrah. Iri rayah anya, “Ahi badu hamon ta sahou ta Pol,” ma iri rayah ja anya, “Ahi badu hamon ta sahou ta Apolos,” ma iri rayah ja anya, “Ahi badu hamon ta sahou ta Pita.” Iri rayah ja anya, “Ahi badu hamon ta sahou ta Krais le.”
1CO 1:13 I buku sah handru? Sebwe Krais apwai iy nadeh? Sebwe iri tatahi jo Pol ili bada kei tondreh ta ndra-in taha nadeh? Iri anyu aha, iri aloh nyara Pol ale?
1CO 1:14 Jo edeu wurah i ta Kindrei ta jo banyu aha solo-an bwe. Jo anyuwi Krisipus uru Gayus le.
1CO 1:15 Eme ma, aha sasehek anya, “Ahi anyu badeh, in bwele-e nyara Pol.” (
1CO 1:16 Ehe, jo anyuwi oro lau rayah, oro badeh, ado asiu ta Stepanas. Jo anyuwi lau rayah ja nadeh, arile jo ndramani nyara oro.)
1CO 1:17 Krais tiye jo ta anyu lau bwe, iy tiye jo eme ta tiye sahou tan mwasin. Ya, na len jo mene atiye sahou mwasin ewek taha, jo ba-en hamon ta kandriyen tiri lau ala ta akohok tanan ta andrek iri mwan ma badih ta sahou tiri bwe. Jo bwalek ariu budon taha na sahou badu bohok amwenen. Jo aso-ok gok ta Krais mene bwidiy udu bada kei tondreh, idoh le boto-on labai, winiyan aruwi budon taha.
1CO 1:18 Iri sahou ta nyala Krais imek udu bada kei tondreh badeh, ari moson bwe, ta ndranye iri lau ndramai, ma bakohok seben tan bwe. Arile, ta taha lau ndrakohok seben ta Krais, sahou nane doh, boto-on ta Kindrei.
1CO 1:19 I buku le Kindrei asehek udu bolo buk ndrabun i buku doh, “Jo kameh bokoro-ei tanan tiri lau nane anya kasahan ndramak ta tanan. Jo kameh sani budon tiri lau nane, iri anya iri ndratanan iri lakou solo-an.”
1CO 1:20 Iri lau ta tanan ndraheh? Ya iri lau tanan ta iri kandriyen malen badu bolo buk ndrabun ta Kindrei ndraheh? Iri lau nane ale tawi iri tanan udu bolo batu iri ndraheh? Kindrei ndraleheyani tanan tiri lau ta tanan badu kon munyak i buku lakou laleyah.
1CO 1:21 Kindrei in hamon ta budon tan amwenen, ma ta idoh, iy sani san tiri lau ta tanan, iri anya, iri winiyan atanan iy. Tasah, iri winiyan bala tanan Kindrei ta iri budon solo-an badu munyak ta iri a-en hamon ta aliy, bwe. Kindrei anya kakohok iri mwan ma badih i buku doh: Iri mwan ma badih anuhun sahou mwasin nane ahi aposel atiye, iri lau solo-an badu kon munyak aloh, “sahou moson bwe.” Arile, are lau iri atehei budon tiri ili le ta Krais, Kindrei badeh, sekesek ta akohok iri ame hamon ja.
1CO 1:22 Iri Juwis atehei budon tiri boto-on ta anyolom lahou tinan ma kalem, ya iri Grik badeh, abo gok boto-on ta akohok budon ma tanan mwasin.
1CO 1:23 Arile ahi atiye iri sahou mwasin ta Krais badeh, iri tatahi iy ili bada kei tondreh. Sahou doh badeh, bokoro-ei budon tiri lau Juwis, ma iri atehei kona iri i tan. Ya, iri lau badu leheleh anya, sahou nane doh ta laleyah le.
1CO 1:24 Arile, taha lau mwan ma badih badeh, badu Juwis ma Grik, Kindrei mene andrei taha ndrala tan. Eme ma taha ndratanan, Krais badeh, iy boto-on ta Kindrei, ma iy ale badeh, tanan mwasin ta Kindrei.
1CO 1:25 Handru, lau rayah badu kon munyak abudon i buku doh, budon ma tanan ta Kindrei badeh, ta laleyah le. Arile, budon ma tanan tan badeh, udu bwele-en labai ja tiri lau marakon. Iri lau rayah anya Kindrei nyamun bwe, arile iy boto-on labai ja tiri lau marakon.
1CO 1:26 Aha kawas tek, aha kabudon na len mwena mene ale Kindrei aloh aha asahan lau tan. Ta mada iri lau badu kon munyak badeh, aha solo-an basahan lau ta tanan bwe. Aha solo-an badeh, nyamu aha bwe. Ma aha solo-an basahan ta lau nadu batun bwe.
1CO 1:27 Arile Kindrei badeh, andrei oro lau ta laleyah le badu kon munyak ame atehei iri lau ta tanan labai ala ta bwilima. Iy andrei oro lau nyamu oro bwe badu kon munyak, ta atehei iri lau boto-on labai ala ta bwilima.
1CO 1:28 Iy eme andrei oro lau nyara oro bado kon munyak dah bwe, oro lau doh iri lau rayah anyolom i buku oro lau ndra-in. Handru, Kindrei andrei oro lakou laleyah nane ame ta bwidi iri lakou tinan kasahan lakou laleyah ja.
1CO 1:29 Iy bwidiy i buku doh, ta ari ndramak winiyan batudun nyaran amwenen ere madan bwe.
1CO 1:30 Tasah, Kindrei ndratehei aha ndrahis hawe Krais Jises, ma iy atehei Krais asahan kati iri tanan mwasin tataha. Na iy le, taha asahan ndrabun ma lau mwasin labai ta madan. Ma iy ale i nyara san ta Kindrei akohok taha ame hamon ja.
1CO 1:31 Eme ma, Kindrei aso-ok taha kamekes iri kandriyen, i buku le buk ndrabun tan asehek, “Are lau iy anya katudun nyaran, iy badeh, katudun nyara Laban le ari ta lakou marakon iy ndrabwidiy.”
1CO 2:1 Aha nadu tine, jo eme hawe aha mene asehek sahou handru ta Kindrei ewek taha badeh, jo basehek sahou lawe-en bala buku iri lau ta tanan asehek bwe.
1CO 2:2 Jo udu hawe aha mene, jo amekes budon tek ta mani iri lakou solo-an. Budon tek mara-ei badeh, ta asehek nyala Jises Krais le, hawe imek tan udu bada kei tondreh.
1CO 2:3 Jo mene ewek hawe aha ma mwena badeh, jo se nyamuk bwe-en. Jo totoreh ma jo inoh tinan labai.
1CO 2:4 Ma sahou jo mene asehek, ma sahou mwasin mene jo ndratiye, jo bamekes bala buku ta sahou tiri lau ta tanan badu kon munyak bwe, ta ariu budon taha eme ta tanan tek le, bwe. Jo badeh, leheya boto-on ta Malawin Ndrabun ewek taha, ma aha atehei budon taha mari in le ta sahou doh.
1CO 2:5 Jo amekes i buku doh, tasah jo bwalek tanan tiri lau badu munyak kabwidi budon taha, jo aso-ok boto-on ta Kindrei le kamekes iri budon doh.
1CO 2:6 Handru, ahi aposel atiye sahou ta tanan handru ili tiri lau, ale iri ndra tinan ndra-en. Arile, tanan dah ta kon munyak bwe. Ma tanan dah ale, iri lau boto-on ta atondrok kon munyak badeh, bakohok bwe. Iri boto-on nane doh nyamu iri iu laleyah.
1CO 2:7 Iri tanan jo asehek badeh, iri tanan ndrabun ta Kindrei mene aton ta lau. Kindrei bamekes kon munyak bwe le, iy badeh, ndratandrakan tanan doh bwena labai, ta aseben ma ta akohok taha ala bolo lomadan udu kandrah.
1CO 2:8 Iri kabin marakon badu kon munyak tana iri se tanan dah bwe. Buku iri katanan badeh, iri winiyan batahi Laban badu kandrah bala bada kei tondreh bwe.
1CO 2:9 Arile idah amwenen ta buk ndrabun ta Kindrei asehek, “Lakou mada taha banyolom bwe, ma ndranye taha banuhun bwe, ma basahan ta budon ta lau bwe le, iri lakou mwasin le badeh, Kindrei ndralokowaniy, tiri lau le aso-ok iy handru.”
1CO 2:10 Handru, tanan doh mene aton, arile Malawin Ndrabun ta Kindrei le amwenen eme leheyaniy eme tataha. Tasah, Malawin Ndrabun tanan labai ta anyolom lakou mari, ma iy tanan labai ta anyolom iri budon ma kandriyen mari ta Kindrei mene aton ta mada iri lau.
1CO 2:11 Ndramak ari ja winiyan bala tanan ta budon ta iy ari ja bwe. Malawin mwasin ta ndramak doh udu bolo odan le amwenen, iy le ari tanan. I buku le, ari ndramak bala tanan ta budon ta Kindrei bwe le. Malawin Ndrabun ta Kindrei le amwenen badeh, tanan.
1CO 2:12 Taha bakohok malawi munyak dah bwe, arile Kindrei ndratehei ndrame tataha Malawin Ndrabun tan amwenen. Idoh le bwidi taha babudon bala buku le budon ta lau marakon badu kon munyak abudon bwe. Tasah idoh ale bwidi taha winiya seleyani iri nyosowan ale Kindrei ndratehei ndrame tataha.
1CO 2:13 Iri sahou marakon ahi asehek badeh, ta Malawin Ndrabun ta Kindrei leheya eme tahi. Ari ndramak baleheya ahi ta tanan dah bwe. Malawin Ndrabun le nane doh aseben ahi ta leheya iri lakou mwasin ili tiri lau nane, Malawin Ndrabun udu hawe iri.
1CO 2:14 Are lau, Malawin Ndrabun bado hawen bwe, iy kameh winiyan bakohok iri lakou ta Malawin Ndrabun bwe. Tasah, iy abudon anya, ndramas kede-eh lakou laleyah. Eme ma, iy bala tanan lakou doh bamwenen bwe, tasah Malawin Ndrabun bado hawen ta aseben iy bwe.
1CO 2:15 Oro mwan ma badih nane, Malawin Ndrabun udu hawe oro, badeh, oro winiyan seleyani iri lakou marakon ta Kindrei. Arile, iri lau nane, Malawin Ndrabun bare hawe iri bwe, iri winiyan baseleyani lakou ere ndrine oro mwan ma badih nane, bwe. Ma iri ale winiyan bala tanan lakou ta Kindrei mwasin bwe.
1CO 2:16 Buk ndrabun ndremenya i buku doh, “Are lau handru, iy ndratanan iri budon marakon ta Laban? Ma, are lau winiyan batanau iy ta sasah?” Arile, taha ndratanan saba lakou Krais abudon.
1CO 3:1 Aha nadu tine, aha amekes aha badeh, i buku le iri lau badu kon munyak dah. Eme ma bwidi jo winiyan basehek sahou bawek taha buku iri lau an hamon ta Malawin Mwasin bwe. Na dah, aha anya ka-en hamon ta kandriyen ta Krais, arile aha badeh, a buku iri nadu nah nyandren kahis le.
1CO 3:2 Jo mene isus aha na sur kahis le, ma jo winiyan badeu naha nyamon boto-on bwe, tasah aha mene baimon nyamon boto-on bwe. Ma na idah ale, aha winiyan baimon iri nyamon boto-on bwe le.
1CO 3:3 Tasah, aha an hamon ta kandriyen ndra-in ta kon munyak dah kahis. Handru, kandriyen ta ubun, ma ndrinem ibolosen ili ta nadu tinem ari ja, ma tebelese udu ndrokowa aha kahis. Eme ma kandriyen aha amekes doh, leheya i buku handru, kandriyen taha badeh, ihis kahis hawe iri lau badu kon munyak.
1CO 3:4 Kili buku sah handru? Ndramak ari anya, “Jo ta Pol,” ya iy ari ja anya, “Jo ta Apolos.” Sebwe aha kede-eh an hamon le ta kandriyen badu kon munyak dah nadeh?
1CO 3:5 Aha kabudon kamwenen. Aru Apolos, aru are lau handru? Aru badeh, lohowan ta Kindrei le ta atiye sahou tan, eme ahi ta aseben aha ta aha katehei budon taha ki-in le ta Krais. Ahi ari ari badeh, an hamon le ta gok Kindrei tiye ahi ta amekes.
1CO 3:6 Jo mene atiye sahou mwasin ndrawek taha, idoh i buku jo ndratahi buwa kei. Apolos atiye sahou mwasin ale, i buku iy eme asolou gwa ili tiri, arile Kindrei amwenen bwidi sahou doh ato-ou salin.
1CO 3:7 Eme ma, are lau ta atah ma ta asolou gwa, idoh ari nyara uru bwe. Kindrei amwenen bwidi salin asahan, eme ma iy le ari nyaran udu aliy.
1CO 3:8 Are lau ta atah badeh, i buku le iy ndramak ta asolou gwa i ta buwa kei. Uru kameh akohok ndramas amwenen ta gok uru ndrabwidiy.
1CO 3:9 Aru Apolos badeh, ta amekes gok hawe Kindrei, ya aha badeh a buku bilin ma asiu tan.
1CO 3:10 Jo in hamon ta ndramas Kindrei edeu eme tek, ma jo asahan ndramak ta tanan labai ta atah asiu, eme ma jo ndratahi ndru. Ya, iri rayah an hamon tek ame ja, tahi asiu udu bwele-e ndru doh. Arile to ari, ari kabudon kamwenen ta kandriyen ta atah asiu.
1CO 3:11 Tasah aha ndratanan, Kindrei ndraleheyani Jises Krais i buku ndru-u asiu alih handru. Ari ndramak ja winiyan basahan ndru ta asiu doh ja bwe.
1CO 3:12 Iri lau rayah atah asiu udu bwele-e ndru nane doh, iri atah na lakou boto-on i buku bek iri aloh gol o silba, iri rayah atah na bek nyikilikin sowan tinan labai, iri rayah ja atah na lakou boto-on bwe, i buku kei, rayah atah na la-u kiwi mwi, ya iri rayah atah na kaha kalom.
1CO 3:13 Ya gok tiri lau mari hamon kameh asahan eme lewan, ta len ta sahou ta Laban. Ma len ta sahou doh kameh asahan i buku jih. Ma jih le doh kameh none gok tiri ari ari, ma iri kameh atanan gok tiri mwasin o bwe.
1CO 3:14 Buku are lau tahi asiu tan udu bwele-e ndru nane doh, ma jih basulumwi asiu tan bandrakak bwe, iy kameh akohok ndramas ta gok tan.
1CO 3:15 Handru, buku asiu ta ndramak ta lahou nane doh andrakak mara-ei, ya iri gok ma boto-on tan kameh ano laleyah. Ma ndramak ta lahou le amwenen kameh udu mwasin sese, arile idoh i buku taha andrei iy udu bolo jih eme len.
1CO 3:16 Aha marakon ndratanan ndramwenen ta aha badeh, asiu ndrabun handru ta Kindrei, ma Malawin Mwasin tan in hawe aha.
1CO 3:17 Aha badeh, asiu ndrabun handru ta Kindrei. Kindrei kameh amekes maha-an ili tare lau iy anya katohou asiu tan, tasah aha amwenen, asiu tan ndrabun handru.
1CO 3:18 Kora-on ari ndramak kawendreyani iy le amwenen. Buku ari mwan o badih udu bolo aha, iy in hamon ta kandriyen ta munyak dah, eme ma iy atehei budon tan i buku doh, “Tanan tek tinan labai, ma jo ere bwele-en labai tiri lau ta Kindrei rayah ja.” Mwasin ta iy katehei konan kili ta tanan badu munyak op, ma iy kameh winiyan asahan ndramak ta tanan ta kandriyen handru ta Kindrei.
1CO 3:19 Tasah, iri tanan mwasin badu kon munyak dah, idoh i buku lakou laleyah le ta mada Kindrei. Buk ndrabun ndrasehek ta aliy, “Kindrei akohok iri lau ta tanan badeh, in hamon ta kandriyen ta wasai tiri le amwenen, buku le ndramak asemek bou na lolohon.”
1CO 3:20 Buk ndrabun ale asehek, “Laban ndratanan, iri budon marakon tiri lau ta tanan, i buku lakou laleyah le.”
1CO 3:21 Eme ma kora-on aha kasehek, “Jo le ari nyarak tinan handru, tasah jo ta Pol,” o, “Jo ta Apolos,” o, “Jo ta Pita.” Bwe! Kindrei atehei tek Pol, ma Apolos hawe Pita, aso mari taha, ta aseben aha. Ma lakou mari badeh, taha ale. Kon munyak dah taha. Koha aha nane aha tawiy kede-eh, ta Krais, idoh ale taha. Buku aha amak, badeh, i buku madasan le ta atiye aha ala hawe Krais. Ma lakou mari nane udu kada-ah, ma lakou marakon kameh asahan hamon, iri marakon doh, taha.
1CO 3:23 Eme ma, aha ta Krais, ma Krais ta Kindrei.
1CO 4:1 Aha Korin kabudon ahi ki buku doh: Ahi badeh lohowan ta Krais. Eme ma Kindrei atehei ahi ta atiye sahou handru, ale mene aton tiri lau.
1CO 4:2 Taha tanan, buku taha amekes gok ta ari ndramak, taha badeh, ka-en hamon le ta iri tanan tan.
1CO 4:3 Jo babwerei se bwe-en, i buku aha mari asehek iri kandriyen tek, o iri lau rayah ja anya kasehek iri kandriyen tek kili ta sahou. Tasah jo tanan, jo amwenen kameh winiyan batehei jo bala ta sahou bwe.
1CO 4:4 Tasah, jo bamekes ari lakou bwe, ma jo ale basehek anya jo ndramak mwasin bwe. Arile sahou tek le dah, baleheya jo bwe. Laban le ari badeh, tanan iri kandriyen tek marakon, ma iy winiyan asehek ma edeu jo ili ta sahou.
1CO 4:5 Len ta sahou badeh, kahis, ya aha sasehek kandriyen tiri lau rayah ja, taha kado le katondrok len tan ta iy eme hamon ja. Iy kameh leheya iri lakou marakon aton udu bolo lulik, ma iri saba lakou udu bolo ndrine taha marakon. Ano Kindrei le ari barasehek iri kandriyen ta gok tataha ari, ari, mwasin ma ndra-in. Buku taha amekes mwasin, iy kameh tutuni nyara taha ta aliy.
1CO 4:6 Aha kawas tek, jo abudon ta aseben aha, eme ma, aru Apolos kaleheya kandriyen taru kewek taha, ta aha ka-en hamon tiri kandriyen mwasin i buku buk ndrabun ndrasehek. Aha sasakalau iri batanau mwasin doh. Jo bwalek aha tebelese ta atudun nyara ndramak ari mwasin, ya aha babudon iy ari ja bwe.
1CO 4:7 I buku sah handru? Are lau handru atehei aha asahan kabin? Iri lakou marakon ere taha kede-eh, Kindrei le ari edeu. Neh? I buku Kindrei edeu lakou mwasin labai ewek taha laleyah, ya buku sah ja, aha atudun nyara aha amwenen, anya, aha le amekes iri lakou nane doh?
1CO 4:8 Ehe, sebwe aha marakon ndrarek tiri nyamon mwasin. Sebwe, taha lakou marakon udu aliy nadeh, eme ma bwidi aha manyah ado mwasin. Sebwe aha ndrala labai tahi ja, ma aha ndrasahan buku kabin. Jo tikisiy labai, jo aso-ok labai ta aha kasahan kabin handru, ma ahi kameh awek, atondrok iri lakou hawe aha.
1CO 4:9 Ta nyolom tek badeh, Kindrei atehei ahi aposel ado bolo kon ndra-in labai. Ahi badeh, a buku iri lau ndra-in bawei mine iri ano iri adek ala kon ta ada iri amak. Iri angelo ma iri lau marakon badu kon munyak dah ta anyolom ahi le ai.
1CO 4:10 Tasah, ta atudun nyara Krais le ari badeh, ahi asahan i buku iri lau bale iri bwe, arile Krais badeh, ndrabwidi aha asahan iri lau ta tanan labai. Ahi se boto-on ma ahi nyamu ahi bwe, arile aha ndrabadok kabwe. Ahi se nyara ahi bwe, arile nyara aha badeh, ndra tinan labai.
1CO 4:11 Ndra bwena eme asahan nane dah, ahi badeh, amak ta son, ma bale ahi amar ta gwa, ya ahi badeh, asin iri awin ale ndratarah ndrandra-i en. Iri a-um ahi laleyah, ma ahi ari kon mwasin ta manyah ado aliy bwe.
1CO 4:12 Ahi amekes iri gok marakon badeh, na le boto-on ta mine ahi, iri bobose ma sondrokonya ahi, arile ahi ndremenya Kindrei ta amekes mwasin kili tiri, iri amekes ndra-in ja eme tahi, arile ahi ado le bwese iri maha-an marakon le doh.
1CO 4:13 Iri atenei ahi andra-i labai en, arile ahi asehek sahou mwasin ja ili tiri. Ahi asahan buku iri lakou ndra-in ta akeh iu, ta mada iri lau marakon, ahi badeh, ndra buku lakou ndra-in laleyah ndrajah. Ahi ndra bwena ado le buku doh eme asahan nane dah.
1CO 4:14 Jo atorou la-ukei dah ta amekes bwili aha ama, bwe. Jo atorou, tasah, jo aso-ok aha labai. Aha asahan naduk handru, ma jo anya kamekes budon taha kudu mwasin.
1CO 4:15 Buku lau nyaran bwe leheya aha ta kandriyen ta Krais, jo le ari badeh, tama aha handru. Tasah, jo ndrasehek taha ta nyala Krais Jises, ma aha ndrasahan naduk handru.
1CO 4:16 Ma, jo aso-ok aha kanyolom kandriyen tek, ma aha ka-en hamon ta aliy.
1CO 4:17 Ta idoh le, jo tiye Timoti ewek ta atou aha. Jo aso-ok iy labai, i buku naduk handru. Iy badeh, atondrok iri gok marakon ta Laban udu mwasin labai. Iy kameh winiya asehek taha ta iri kandriyen jo amekes ta in hamon ta Krais. Iri kandriyen nane doh, jo leheya iri lau ta Kindrei are bolo kon mari.
1CO 4:18 Aha rayah anya, jo kameh winiya bawek banyolom aha ja bwe. Eme ma aha rayah atudun nyara aha le, ma amekes lakou laleyah.
1CO 4:19 Arile i buku Laban aso-ok jo ta ewek, badeh, kameh jo ndrado hawe aha ja ai. Ano kameh jo anya kasilah boto-on tiri lau ta tebelese badeh, handru deh, bwe iri asehek sahou ta laleyah le.
1CO 4:20 Taha ndratanan, tondrok ta Kindrei bala buku ta asehek sahou solo-an ta leheya bwe. Iy lakou nyamun udu aliy ma iy boto-on labai.
1CO 4:21 Aha aso-ok jo kamekes saba lakou handru buku jo kasahan hawe aha? Aha aso-ok jo kasehek sahou boto-on kewek taha, ma ka-um aha nadeh? O, aha aso-ok jo kewek ma tikisiy tek ta asehek kandriyen mwasin kamunum kewek taha le ai.
1CO 5:1 Jo anuhun iri kundruh i buku doh, iri kandriyen ndra-in labai ta karei asahan udu bolo ndrokowa aha. Handru, iri lau tana iri Kindrei bwe, iri amekes kandriyen ta karei, arile kandriyen ta karei ere taha ja badeh, ndra-in labai mara-ei ja tiri lau nane ta tana iri Kindrei bwe. Kandriyen nane ahi anuhun i buku doh, ndramak ari amekes karei, o amadin hawe tinen ari ja.
1CO 5:2 Ya, buku sah handru, aha anya aha le ai? Aha kanuhun! Bwili aha kama, ma aha kaden ta iri kandriyen ndra-in doh, ma aha katikahei iy ndramak nane amekes iri kandriyen ndra-in udu bolo aha badeh, kedek ki-iu.
1CO 5:3 Jo ndramak amwenen bado hawe aha bwe, arile malawik mwasin ma iri budon tek marakon badeh, udu hawe aha, i buku jo amwenen udu hawe aha. Jo ndranyulumwi iy ndramak ta karei nane ndrano, eme ma jo ndratehei iy ndrala ta sahou.
1CO 5:4 Jo asehek in ta nyara Jises, tinan tataha mari: Buku aha anya katukum, malawik mwasin badeh, udu hawe aha. Eme, na boto-on ta tinan tataha Jises Krais,
1CO 5:5 aha katikahei iy ndramak doh ki-iu kili len taha. Ma idoh, i buku aha atehei iy ndrala mine tama balik Satan, ta amekes badan ma kandriyen tan badu munyak kandra-i. Taha amekes buku doh, eme ma Kindrei winiyan andrei malawin mwasin ta ndramak nane eme hamon, na len ta Laban kameh eme hamon ja, ta adeu lau marakon ala ta mada sahou.
1CO 5:6 Aha atudun nyara aha amwenen, eme ma kandriyen doh bamwenen bwe. Sebwe aha tanan sahou sokek doh, “Nadu kono-o yis sese le winiyan bwidi jabi ramen mara-ei apus eme loken.” Yis doh leheya kandriyen ndra-in.
1CO 5:7 Aha kakahei iri yis malen doh ki-iu! Ma aha kasahan ki buku jabi ndraborohei le, yis bala bolon bwe le. Handru, jo tanan, aha badeh, i buku jabi ramen, yis bala bolon bwe. Tasah, Krais mene imek ta akunoh ndra-in tataha, i buku sipsip imek ta nyara salom. Eme ma taha kado le hamon ta kandriyen ta len ta Pasoba doh.
1CO 5:8 Eme ma taha kamekes nyamon ta Pasoba. Taha kamani iri kandriyen ndra-in marakon taha amekes, i buku iri lau atukum iri yis malen udu bolo asiu tiri iu, buku iri alokou nyamon ta len tinan nane doh. Ya taha ka-en hamon le ta kandriyen mwasin, ma taha kasehek sahou handru. Kandriyen doh kameh udu tataha i buku jabi ramen yis bala bolon bwe.
1CO 5:9 Udu bolo la-ukei tek ramen mene ndrawek taha, jo tiye ta aha sadek hawe iri lau ta karei.
1CO 5:10 Jo batiye taha ta aha karuwani iri lau badu kon munyak dah, iri ale amekes iri kandriyen ndra-in i buku karei, ma bahana lakou ta lau rayah ja, ma madalikis, ma asolom sukumada kei, bwe. Buku aha anya karuwani iri lau buku doh badeh, aha kamak ka-au, ma bale aha kamani kon munyak mara-ei.
1CO 5:11 Kati sahou jo mene atorou ewek taha, i buku doh: Buku ari mwan o badih aha aloh iy nadu tine aha i san ta Jises, arile, iy ale ta amekes karei, o, iy ta madan alikis lakou, o, iy ta asolom sukumada kei, o, iy ta bobose, o, iy ta a-un gwa lolo-ou, o, iy ta bahana lakou ta ndramak ari ja, iri lau buku doh, aha sado hawe iri ma aha saimon nyamon hawe iri labai.
1CO 5:12 Gok ta edeu iri mwan ma badih ala ta sahou, iri batukum hawe iri lau ta Kindrei bwe, idoh gok ta Kindrei amwenen. Ari gok tek bwe. Arile, aha badeh, kanuhun ma kadeu iri mwan ma badih kala ta sahou badeh, iri lau ale atukum hawe aha amwenen. Idoh buku buk ndrabun asehek, “Aha badeh, katikahei iri mwan ma badih, iri amekes kandriyen ndra-in ka-au kala len taha.”
1CO 6:1 Buku ari taha, iy tebelese ili hawe nadu tinen ari i san ta Jises, i buku sah handru iy mani iri lau ta Kindrei udu? Ya iy ili ja amekes sahou tan udu mada iri lau nane tana iri Kindrei bwe. Bwilin bama ta iy amekes iri kandriyen doh bwe nadeh?
1CO 6:2 Aha ndratanan o, taha lau ta Kindrei kameh adeu lau marakon badu kon munyak ala ta mada sahou. I buku taha adeu lau marakon badu kon munyak ala ta sahou, ya i buku sah handru, aha winiyan ta asehek lakou nadu bwisik doh bado ndrokowa aha bwe?
1CO 6:3 Aha ndratanan o, taha kameh adeu iri angelo ala ta sahou. I buku idoh i handru, taha kameh winiyan ta adeu iri lakou marakon badu munyak a ta sahou.
1CO 6:4 Tasah handru aha adeu iri ndra-i ma tebelese taha ili hawe ndramak ta anuhun sahou, iy nane tanan Kindrei bwe?
1CO 6:5 Jo asehek sahou dah ta bwili aha kama. Buku sah handru? Sebwe aha kede-eh ari ndramak ta tanan ja bwai, ta amekes ndra-i udu ndrokowa uru nadu tinen kudu mwasin ja?
1CO 6:6 Arile bwe, aha ja, adeu nadu tine aha amwenen ales ere ta sahou udu mada ndramak ta anuhun sahou, iy nane tanan Kindrei bwe!
1CO 6:7 Ya, aha kede-eh adeu iri mwan ma badih ta Kindrei rayah ja ala ta mada sahou, ma ta lakou doh, aha ndrataku, ma aha ndramani iri kandriyen ta Kindrei. Buku sah handru, aha balelei iri bamekes laleyah bawek taha bwe? Mwasin ta aha kalelei kili mine iri kakohok saba lakou taha, ma aha satehei iri sales ta sahou, sala hawe iri lau ta anuhun sahou, iri tanan Kindrei bwe.
1CO 6:8 Arile, aha bwale aha a-en hamon ta iri kandriyen mwasin nane doh. Aha amwenen ja badeh, amekes ndra-in udu ndrokowa aha. Ma aha akohok lokowa nadu tine aha amwenen laleyah ale.
1CO 6:9 Aha tanan bwe nadeh? Iri lau ale ta amekes iri kandriyen ndra-in doh, iri kameh winiya bala bolo tondrok ta Kindrei bwe. Aha sawendreya ndrine aha amwenen. Iri lau marakon ale amekes kandriyen ndra-in ta karei, iri lau ale asolom ili ta sukumada kei, iri lau ale amekes karei hawe iri badih tasou, iri lau ale ta amekes iri kandriyen ta bwilima udu aliy hawe iri lau rayah ja,
1CO 6:10 ya iri lau ta bahana, iri lau mada iri alikis ta iri lakou tiri lau rayah ja, ya iri lau ale a-un gwa boto-on ta amekes batu iri ibo lolo-ou, ya iri lau ale ta bobose ma sondrokonya iri lau rayah ja, ya iri lau ale ta ariu lakou ta lau rayah ja. Iri lau marakon doh kameh winiya bala bolo tondrok ta Kindrei bwe.
1CO 6:11 Aha rayah bwena mene i buku iri lau doh. Arile, na dah ja, nyara Laban tataha Jises Krais ma hawe boto-on ta Malawin Mwasin ta Kindrei tataha, anyuwi aha, lebelei aha, ma bwidi aha asahan iri lau tan mwasin ta madan.
1CO 6:12 Aha lau rayah asehek anya, “Ahi winiyan amekes iri lakou marakon, buku ahi anya kamekes.” Arile, jo katiye taha, lakou marakon doh winiya baseben taha bwe. Handru, iri lakou marakon jo winiyan ta amekes, arile jo bwalek alelei ari lakou atondrok jo, ma jo bwalek asahan bonyo-ou ta lakou nane jo amekes.
1CO 6:13 Lau rayah asehek i buku doh, “Nyamon badeh, ta ndrine taha le. Ya ndrine taha badeh, ta akohok nyamon le.” Sahou marakon doh handru, arile Kindrei kameh andrei iri nyamon hawe bada taha iu. Eme ma, aha sakeh bada aha sala ta kandriyen ta karei. Tasah, Laban badeh, atondrok bada taha, ma taha badeh, kalowosa bada taha kamwenen ta amekes gok tan.
1CO 6:14 Na le boto-on ta Kindrei, iy mete-ei Laban udu bolo lek tan eme loken ja. Ma iy kameh mete-ei taha ale.
1CO 6:15 Aha tanan, bada aha badeh, badu hawe bada Krais. Buku jo kandrei bada Krais, eme jo katehei kili hawe bada i badih ta karei, kandriyen doh mwasin o, ndra-in? Idoh bamwenen ta ari kandriyen mwasin bwe!
1CO 6:16 Aha tanan, i buku are lau iy amadin o amekes karei hawe iy badih ta karei, bada uru badeh, ndrasahan ari buruwen kabwe. I buku le buk ndrabun ndrasehek, “Uru kasahan ari buruwen.”
1CO 6:17 Arile, are lau iy ihis handru hawe Laban, iy kameh asahan ari buruwen hawen i san ta Malawin Mwasin.
1CO 6:18 Aha ka ndra len ta iri kandriyen ndra-in ta karei. Iri kandriyen ndra-in rayah taha lau amekes, idoh bamekes bada taha bala bolo ko-ak bwe. Arile, buku ndramak amekes karei, iy ndrabwidi badan mara-ei ndrala bolo ko-ak.
1CO 6:19 Handru, bada aha badeh, taha le bwe. Bada aha badeh, buku asiu ndrok ta Malawin Ndrabun. Sebwe, aha babudon ta aliy bwe nadeh? Kindrei atehei Malawin Mwasin ndrawek taha, ma iy udu bolo oda aha. Eme ma aha taha le bwe, aha ta Kindrei ale.
1CO 6:20 Iy mene sihinei aha ame len ta kandriyen ndra-in na luk tinan labai. Eme ma aha katudun nyara Kindrei na le bada aha mara-ei amwenen.
1CO 7:1 Na len dah jo anya kasehek taha kamwenen ta ndremenya taha udu bolo la-ukei taha ramen mene eme tek. Ndremenya taha i buku doh: “Idoh mwasin ta lau mwan sala tasou?” Na budon tek amwenen badeh, mwasin.
1CO 7:2 Arile, iri kandriyen ta karei solo-an labai udu kede-eh, eme ma, mwasin ta lau mwan ari, ari kasoh badih ki udun amwenen, ya iri badih ari, ari katasou kala ta mwan ale.
1CO 7:3 Bada ndramak mwan tasou badeh, ta udun badih le ari amwenen, ya iy satiye ta aliy. I buku bada badih tasou badeh, ta udun mwan amwenen, ya iy badih sasehek ta aliy.
1CO 7:4 Iy badih winiya batondrok badan amwenen bwe, tondrok ta mwan le ari. I buku le bada iy mwan badeh, tondrok ta udun badih le ari amwenen.
1CO 7:5 Ah ma la-uh atasou badeh, ah sabeles ta amadin se. Handru, buku ah asehek nyala ah ta ben sabe ta ah samadin se, tasah ah anya kamekes gok ta salom, idoh mwasin. Ano ah baramadin se ja. Kora-on ah winiyan babelesei bada ah bado luluwen bwe, ma balik katubuni bale ah ja ta amadin hawe mwan o badih ari ja, ma bwidi bolo tasou ta ah kandra-i.
1CO 7:6 Sahou jo asehek dah, mene aha ndremenya jo ta aliy. Eme ma jo anya, mwasin ta aha katasou. Arile, idoh bala buku ari batanau ta Laban edeu eme tek, ta jo katiye taha, bwe.
1CO 7:7 Handru, jo sekesek ta aha bala tasou bwe, aha i buku le jo. Arile, Kindrei edeu ndramas ma tanan eme tataha bala le randra bwe. Iri rayah akohok ndramas ma tanan ta bala tasou bwe, ya iri rayah ja akohok ndramas ma tanan ta anya katasou.
1CO 7:8 Idah sahou batanau tek ili tiri lau ale bala tasou bwe, hawe iri badih nyau: Aha sala tasou, aha kado laleyah buku le jo.
1CO 7:9 Arile, buku ou winiyan batondrokei badam bwe eh, mwasin ta ou atasou. Kora-on ou are laleyah amekes iri kandriyen solo-an ndra-in.
1CO 7:10 Jo edeu sahou batanau dah ili tiri badih ma mwan ndratasou. Sahou dah tek bwe, sahou ta Laban amwenen: Aha badih, aha ndratasou, aha saruwani iri mwan taha labai.
1CO 7:11 Buku ari badih iy baso-ok mwan tan ja bwe, iy sala tasou ja, iy kudu laleyah op. Buku bwe eh, iy kili hamon ta mwan tan nane ja, ma kamanyah kamwenen kudu hawen. Ma iy mwan satikahei udun sa-au ja.
1CO 7:12 Ta iri badih ma mwan rayah ndratasou badeh, jo le amwenen asehek. Idoh sahou ta Kindrei bwe. Jo le amwenen edeu iri tanan tek ewek taha i buku doh: Ou mwan, buku udum batehei budon tan ba-en ta Krais bwe, arile iy aso-ok ta in hawem, ou satikahei iy sa-au labai.
1CO 7:13 Ou badih, buku udum batehei budon tan ba-en ta Krais bwe, arile iy aso-ok ta in hawem, ou satikahei iy sa-au labai.
1CO 7:14 Tasah, aha tanan, buku are lau mwan iy batehei budon tan ba-en ta Krais bwe, arile, iy i tasou, ma iy ili udu hawe badih ta Kindrei; ta idoh, iy mwan kameh asahan mwasin ta budon ta Kindrei. Ya, buku are badih batehei budon tan ba-en ta Krais bwe, arile, iy i tasou, ma ili udu hawe mwan ta Kindrei; ta idoh, iy badih ale kameh asahan mwasin ta budon ta Kindrei. I buku bwe eh, nadu uru kameh asahan buku iri lau tana iri ta atudun Kindrei bwe. Arile, idah nadu uru ale ndrasahan mwasin ta budon ta Kindrei.
1CO 7:15 I buku udum mwan, o, udum badih iy ba-en hamon ta Laban bwe, iy amekes iri budon ta ruwani ou, mwasin ta ou a-en le hamon ta aliy. Ou winiya bala buku bonyo-ou tan ja bwe. Arile, Kindrei luhi aha ame, iy aso-ok manyah taha kudu mwasin.
1CO 7:16 Ou badih, ou abudon lakou doh kamwenen: Sebwe udum kameh winiyan asahan mwan mwasin ta Kindrei, tasah ta kandriyen tam le. Ya ou mwan ale, ou abudon lakou doh kamwenen: Sebwe udum kameh winiyan asahan badih mwasin ta Kindrei, tasah ta iri kandriyen tam le.
1CO 7:17 Ya iri ndramas ma tanan marakon nane Kindrei ndratehei ndrame tataha lau ari ari, ma saba gok taha are aliy bwena mene, eme Kindrei bwidi taha asahan lau tan; taha kadek le san doh. Jo badeh, edeu batanau i buku doh ili tiri lau ta Kindrei are bolo kon rakon rakon.
1CO 7:18 I buku iri ndrasani ku-im bwena ta len mene Kindrei aloh ou, ou sanone ta tone. I buku iri basani ku-im bwe le, ou sandremenya ta asan.
1CO 7:19 Kandriyen ta asan ma basan ku-i lau mwan bwe, idoh ta laleyah le. Lakou ari le laba tinan badeh: Taha ka-en hamon le ta batanau ta Kindrei le ari.
1CO 7:20 Ya aha sanone ta tobolowe iri saba lakou ja mwena mene aha ado aliy, eme Kindrei andrei aha asahan lau tan.
1CO 7:21 Sebwe ou ado ndra buku iri bonyo-ou eme Kindrei andrei ou? Ya ndrinem sandra-i ta aliy. Arile, i buku ari madasan ou ndruni ta ame len ta kandriyen ta bonyo-ou, badeh, ou adek aliy ai.
1CO 7:22 Tasah, udu budon ta Kindrei amwenen, i buku doh: Bwena mene iri lau bonyo-ou badeh, Laban akohok iri ame asahan lau tan handru, ma iri bado buku bonyo-ou ja bwe. Ma iri ale mene bado buku bonyo-ou bwe, Laban akohok iri ame asahan lau bonyo-ou ta Krais handru.
1CO 7:23 Kindrei sihinei aha ame hamon na luk tinan labai, eme iy bwalen aha ala buku bonyo-ou tiri lau rayah ja.
1CO 7:24 Aha nadu tine handru i san ta Krais, taha kado le ta manyah tataha mene, ale Kindrei ndraleheyani tataha!
1CO 7:25 Aha mene atorou la-ukei ramen eme tek ta ndremenya jo ta nyala iri lau batasou bwe. Arile, jo bala tanan ta ari batanau Laban asehek ta nyala aliy bwe. Eme ma jo anya kasehek taha ta saba lakou udu budon tek. Jo ndratanan aha kameh winiya anuhun jo, tasah Laban tikisi jo, iy eme atehei jo asahan ndramak ta tiye sahou handru le.
1CO 7:26 Taha ndrado bolo maha-an solo-an labai, eme ma, jo abudon i buku doh: Mwasin ta aha kamanyah i buku le aha ado aliy na len dah.
1CO 7:27 Buku ou ndratasou, ou sasilah madasan ta atikah badih iu ja. Buku ou batasou bwe, ou sasilah iri madasan ta atasou.
1CO 7:28 Arile, buku ou atasou, ou bamekes ari kandriyen ndra-in bwe. Ya, buku ari badih bihin i tasou, idoh iy bamekes ari kandriyen ndra-in bwe le. Arile, jo asehek taha lau anya katasou, len marakon kameh aha bwese iri maha-an ta tasou. Eme ma jo aso-ok aha kabelekei iri maha-an doh.
1CO 7:29 Aha nadu tine, jo asehek taha i buku doh, tasah len ta Laban anya keme hamon ja badeh, ndrame mirihik labai. Eme ma, len dah ili, budon tiri lau mwan, udu iri ere aliy, sahis labai ta kandriyen ta tasou le. Kasahan buku budon ta ndramak bala tasou bwe, budon tiri badeh, ihis ta gok ta Laban.
1CO 7:30 Iri lau mwan ma badih tana iri ta ndrelen, iri kado le buku iri baden bwe. Ya iri lau mwan ma badih ta sekesek, iri kado le buku iri basekesek bwe. Ya iri lau mwan ma badih asih lakou, budon tiri badeh bahis ta aliy bwe.
1CO 7:31 Ya iri lau mwan ma badih ale amekes gok ta lakou badu kon munyak, budon tiri badeh, kasahan buku iri mwan ma badih batawi lakou badu kon munyak dah bwe. Tasah, taha ndratanan, kon munyak mara-ei kameh iu.
1CO 7:32 Jo aso-ok aha marakon satehei budon taha boto-on sala ta iri lakou solo-an. Are lau bala tasou bwe, iy badeh atehei budon tan solo-an labai ili ta kandriyen ma gok ta Laban, tasah ta amekes Laban kasekesek.
1CO 7:33 Arile, iy ndramak tasou tikisiy laba tinan labai ta iri lakou marakon badu kon munyak dah, tasah iy anya kamekes udun kasekesek.
1CO 7:34 Eme bwidi budon tan i la-uh. Badih bala tasou bwe, ma badih ma bihin, iy abudon solo-an labai ta iri kandriyen ta Laban, ma iy atehei badan hawe budon tan udu le ta Laban. Arile, badih tasou atehei iri budon tan in tiri lakou marakon badu kon munyak dah, tasah, iy anya kamekes udun kasekesek.
1CO 7:35 Jo amekes iri sahou dah ta amekes budon taha kudu mwasin. Jo bwalek edeu maha-an laleyah ewek taha. Jo aso-ok len marakon manyah taha kudu mwasin ta amekes gok ta Laban, ma ari lakou winiya baruwi budon taha laleyah bwe.
1CO 7:36 Buku ndramak loweu ma badih bihin, lowa uru amekes san turu ta atasou. Uru amekes budon i le ari, ta uru sala tasou op. Arile, iy ndramak mwan abudon anya iy winiyan batondrokei kandriyen tan bwe, ma so-ok tan tinan labai ta iy ki tasou suwi, ma budon tan boto-on labai ta amadin hawe badih; mwasin ta iy ki-in hamon ta budon hawe tanan tan. Ndra-in ma sahou ta aliy bwe, uru ka turu le kabwe.
1CO 7:37 Arile, buku budon ma tanan ta mwan ihis boto-on labai, ma ari lakou winiya bawekewek iy bwe, ma iy winiyan tondrokei budon hawe tanan tan amwenen, ma iy ndratehei budon tan ndrahis labai, ta iy winiyan bala tasou ta badih bihin nane iri atik i tan, mwasin ta uru kameh kare le buku doh. Ma kandriyen doh mwasin.
1CO 7:38 Sendrehendreh ta aliy i buku doh: Mwasin buku taha katasou, arile mwasin labai mara-ei ja, buku taha bala tasou bwe.
1CO 7:39 Iy badih i tasou ili ta ndramak mwan, iy udu bahandran winiya iy ndramak mwan imek. Ano iy badih udu nyau, iy winiya i tasou ja ta are ndramak mwan, amwenen ta budon tan. Arile, iy ki tasou kili ta ndramak, iy atehei iri budon tan marakon handru in ta Laban le ari.
1CO 7:40 Arile jo le ari abudon i buku doh: Buku iy in laleyah, iy kameh udu ta sekesek labai, ya jo abudon jo badeh, Malawin Ndrabun ta Kindrei udu hawek ta edeu tanan mwasin eme tek ale.
1CO 8:1 Udu bolo la-ukei taha ramen eme tek, aha ndremenya ta iri nyamon ale adeu ili mine kindrei iri amekes na sukumada kei. Taha ndratanan iri lakou solo-an. Arile tanan solo-an le bwidi kandriyen ta nyaladan asahan i tinan. Arile, kandriyen ta aso-ok nadu tinem iri rayah ja, badeh, aseben ma bwidi taha lau ta Kindrei abadok.
1CO 8:2 Buku iri lau anya iri tanan labai, iri lau doh tana iri ari lakou bwe-en!
1CO 8:3 Arile Kindrei le ari tanan labai, are lau aso-ok iy handru.
1CO 8:4 Ya buku sah handru? Idoh mwasin ta taha winiya aimon iri nyamon ale nane iri lau adeu ili niri kindrei ta wasai, deh bwe? Taha ndratanan ndra bwena. Kindrei ale iri amekes na sukumada kei udu bolo kon munyak dah, ari koha iri bwe, sukumada kei laleyah. Kindrei solo-an bwe, Kindrei le ari kabwe.
1CO 8:5 Iri lakou solo-an udu bolo kandrah ma udu bolo kon munyak iri aloh “kindrei” hawe “laban,” arile oro marakon nane doh Kindrei ma Laban handru bwe.
1CO 8:6 Kindrei tataha badeh ari le. Iy badeh, tama taha mari. Iy bwidi iri lakou marakon ma taha tan amwenen. Jises Krais le ari badeh, iy Laban tataha. Iri lakou marakon iy amekes, iy le badeh, edeu kohan eme tataha.
1CO 8:7 Arile, lau marakon bala tanan iri lakou dah bwe. Lau ta Kindrei rayah ndrame ndra tinan nane kada-ah atehei budon anya iri sukumada kei doh koha iri udu aliy. Ya, buku oro aimon oda lakou nane iri atehei i mine kindrei nane iri asehek na sukumada kei, eme ma ndrine oro atona lakou doh bamwenen bwe.
1CO 8:8 Arile nyamon le winiya batiyani taha bala mirihik ta Kindrei bwe. Buku taha baimon nyamon bwe, idoh winiyan bamekes taha asahan ndraka-an ta madan, bwe. Ya, buku taha aimon nyamon, idoh ale winiyan bamekes taha asahan mwasin ta madan bwe le.
1CO 8:9 Arile, aha katondrok aha kamwenen. Aha tanan, aha winiyan aimon saba nyamon aha aso-ok. Arile, kora-on kandriyen dah aha amwenen amekes, eme ma budon tiri lau baleu bwe, ma iri taku ala bolo iri kandriyen ndra-in.
1CO 8:10 Tasah handru jo amekes sahou dah? I buku doh: Ou mwan, ou badih, tanan tam tinan. Buku ou ala bolo asiu tinan ta kindrei ta wendreya, iri amekes na sukumada kei, ma ou manyah aimon nyamon. Idoh mwasin, arile, buku ari mwan o badih, iy tanan bwe, kindrei ta wendreya doh, lakou ari laleyah. Iy anyolom ou, ma bwidi iy abudon, idoh mwasin ta aimon nyamon nane iri adeu ili na kindrei ta wendreya.
1CO 8:11 Ta iri kandriyen nane doh, eme tanan tam ili bwidi ndramak nane bado mwasin bwe. Nadu tinem nane doh, Krais imek udu bada kei tondreh ta akohok iy eme hamon.
1CO 8:12 Budon ta lau ta Kindrei rayah basahan baleu mara-ei bwe. I buku aha amekes kandriyen ndra-in doh ili tiri, ma bwidi budon tiri andra-i, aha amekes idoh ili ta Krais ale.
1CO 8:13 I buku iri nyamon nane jo aimon doh ili bwidi nadu tinek ari ja taku ili bolo iri kandriyen ndra-in, mwasin ta jo kabeles jo saimon iri nyamon doh, winiya le jo imek. Bwe kameh jo kabwidi nadu tinek rayah ja kataku kala ta kandriyen ndra-in.
1CO 9:1 Buku sah? Aha tanan gok tek bwe? Ari lakou winiya batawi jo bwe. Jo aposel ari ai. Jo ndranyolom Laban tataha. Jo amekes gok ta Laban, eme ma aha asahan lau ta Kindrei ta gok nane jo amekes dah.
1CO 9:2 Iri rayah atehei budon anya jo aposel ta Kindrei bwe, arile, na gok tek le, aha asahan lau ta Kindrei, eme aha le leheyani buku jo aposel ta Laban handru.
1CO 9:3 Aha lau rayah ndremenya jo ta iri kandriyen tek, eme jo asehek iri sahou i buku doh ili tiri:
1CO 9:4 Sebwe aha anya, aru Banabas sakohok nyamon ma gwa ta gok taru nadeh?
1CO 9:5 Sebwe aha anya, ndra-in ta ahi aposel asoh iri badih ta Kindrei, ma akohok iri ala hawe ahi, i buku oro aposel rayah, ma nadu tine Laban, ma Pita ale amekes nadeh?
1CO 9:6 Sebwe aha anya, aru Banabas le badeh, atondrok aru amwenen, aru winiya bandrek luk taha ta amekes gok taru bwe nadeh?
1CO 9:7 Are lau iy amekes gok ta bahun, iy le amwenen isih lakou ta bahun ma nan nyamon? Sebwe bwe nadeh! Are lau iy inyor bilin, iy winiyan bakohok sali nyamon bwe? Ya are lau ale ta atondrok iri sipsip, iy amwenen ba-un sur tiri bwe?
1CO 9:8 Jo asehek iri sahou dah na budon tek amwenen bwe. Sahou ta Kindrei udu bolo kandriyen malen mene asehek i buku le aliy.
1CO 9:9 Moses mene torowenei sahou udu bolo kandriyen malen i buku doh, “Ou badeh, saseu boho katin haka oks buku none iy kamekes lahou tam ta katisih buwa wit.” Sebwe Kindrei abudon boto-on tiri bulumakau le, eme ma iy amekes iri sahou dah?
1CO 9:10 Bwe, iy atehei budon in tataha, ma iri sahou marakon dah tataha amwenen. Tasah, Kindrei aso-ok taha kamekes iri kandriyen buku doh: Ndramak ibo gok ta apou ndren ta bilin, ma ndramak asokok bwisi rais, uru ma la-uh amekes gok doh, tasah uru ndratanan, idah kameh uru akohok nyamon rayah ta gok turu.
1CO 9:11 Aso aposel asehek sahou mwasin ewek taha badeh, i buku aso atah lakou ta Malawin Mwasin. I buku sah handru? Mwasin ta aso akohok sali nyamon taha ta aseben bada aso amwenen? Bwe, solo-an labai?
1CO 9:12 Buku aha aso-ok iri lau rayah ta akohok lakou taha, badeh, kameh aso kakohok kudu bwele-en labai ja tiri. Arile, iri lakou aso winiyan akohok taha badeh, aso bakohok bwe. Tasah, aso baso-ok ta amekes kandriyen ta aturuk san ta sahou mwasin ta Krais ili tiri mwan ma badih, bwe. Eme ma udu bolo len marakon, aso bwese iri maha-an solo-an labai ta atondrok aso le amwenen.
1CO 9:13 Ou tanam, buku iri lau amekes gok ado bolo asiu tinan ta Kindrei, iri badeh, akohok nyamon badu asiu tinan ta Kindrei. Ya, iri lau amekes gok ta asun sipsip udu bwele-e mada koto-ok, iri badeh, akohok niri oda sipsip nane iri lau adeu ili ta asun ta nyara salom.
1CO 9:14 Idoh i buku Kindrei asehek sahou batanau doh eme tataha: Buku are lau ta atiye sahou tan, iy kakohok iri seben badu tiri lau nane anuhun sahou mwasin.
1CO 9:15 Arile jo amwenen winiya bamekes iri kandriyen nane ale Kindrei tiye jo winiyan ta amekes, bwe. Ma jo batorou iri sahou dah, ta akohok ari lakou taha bwe ale. Mwasin badeh, jo kimek bwena op. Jo asehek i buku doh, tasah, kandriyen tek amwenen badeh, jo tanan ta akohok lakou ta ari mwan o badih, bwe. Ma jo baso-ok ari mwan o badih keme kandrei kati sekesek tek dah ja bwe.
1CO 9:16 Jo winiya batudun nyarak bwe, buku jo asehek anya, jo amekes kandriyen mwasin labai. Ta atiye sahou badeh, gok ta Kindrei edeu eme tek ta jo kamekes. Jo saruwani gok nane doh. Buku jo batiye iri sahou tan doh bwe eh, maha-an tinan kameh eme bwele-ek, ma manyah tek winiya bado mwasin bwe.
1CO 9:17 Buku jo atiye sahou mwasin, tasah jo le aso-ok ta atiye, jo kameh akohok ndramas ta aliy. Arile, buku Kindrei ndratehei jo, mwasin, idoh gok ta Kindrei atehei eme tek ta jo kamekes.
1CO 9:18 Ya, saba lakou kameh i nyara ndramas tek? Iri lakou ale jo winiya akohok ta gok tek ta atiye sahou mwasin, idoh badeh, jo bakohok bwe. Tasah, jo badeh, sekesek le ta asehek sahou mwasin ili ta lau marakon, ari sihinek bwe. Ya iri sekesek nane jo akohok, idoh i buku ndramas tek ai.
1CO 9:19 Jo basahan bonyo-ou ta ari ndramak bwe. Arile, jo badeh, asahan i buku bonyo-ou ta lau marakon. Jo amekes i buku doh, ta ariu lau mwan ma badih solo-an ka-en hamon ta Krais.
1CO 9:20 I buku jo udu hawe iri Juwis, jo akohok kandriyen tiri Juwis amwenen, ma jo kameh winiya ariu iri solo-an ame hamon. Iri badeh, ado bahandra tondrok ta kandriyen malen ta Moses, jo badeh, bwe. Arile jo atehei jo mara-ei udu bahandra kandriyen malen, ta ariu iri Juwis ame hamon ja.
1CO 9:21 Buku jo ili udu hawe iri lau, iri bado bahandra tondrok ta kandriyen malen bwe, badeh, kameh jo kamani kandriyen malen, ta ariu iri ame hamon. Arile, jo bamani kandriyen ta Kindrei bwe. Jo badeh, edek udu bahandra batanau handru ta Krais.
1CO 9:22 Buku jo ili udu hawe iri lau, budon tiri bahis handru ta Krais bwe, jo kameh bwidi manyah tek i buku le iri, ta ariu iri ame hamon. Handru, jo badeh none ta in hamon ta kandriyen tiri mwan ma badih are laleyah, ta none iri madasan mara-ei, ta ariu iri rayah ka-en hamon ta Krais.
1CO 9:23 Jo amekes iri gok marakon doh ta aseben sahou mwasin ta Jises ili bolo kon mara-ei. Eme ma, jo hawe iri mwan ma badih rayah kameh winiyan akohok nyosowa sahou mwasin doh ale.
1CO 9:24 Iri lau sakaliye ta nyorei, iri marakon sakaliye, arile ndramak ari le udu bolo iri marakon kameh akohok ndramas. Ya, aha kasakaliye boto-on ta akohok ndramas doh.
1CO 9:25 Iri mwan ma badih marakon anya kasahan bwena ta iri nyorei, iri badeh atehei iri au ala andri mara-ei in hamon ta so-ok ta bada iri amwenen. Iri amekes i buku doh ta akohok ndramas ta winiya bare luluwen bwe. Arile, ndramas tataha lau ta Kindrei badeh bwe. Taha badeh, kasakaliye boto-on ta akohok ndramas ta ere le buku doh, winiya bandra-i bwe.
1CO 9:26 Jo badeh, amekes i buku ndramak sakaliye boto-on labai, ya iy banyolom bala doh bala doh bwe. Ya jo amekes i buku ndramak ta bahun, iy akeh minen amwenen i ta ndramak, ya iy bakeh minen laleyah bwe.
1CO 9:27 Jo bwidi badak amwenen i buku bonyo-ou tek. Jo a-um badak amwenen ta amekes iy kabadok ta bahun. Jo amekes i buku doh, tasah, kora-on jo kasehek sahou mwasin kili tiri mwan ma badih rayah, ano Kindrei kameh asehek eme tek i buku doh, “Ou ndramalin mara-ei.”
1CO 10:1 Aha nadu tine, jo aso-ok aha kabudon ki-iu kili hamon ta lakou marakon mene asahan ta tubu taha iri Isra-el. Udu bolo len ta Moses bwena mene, tubu taha iri marakon badeh, ado bahandra asi kandrah mene Kindrei atehei ta korohani iri. Ma iri adek bolo ndras aloh Retsi iri apou ala bilisiu.
1CO 10:2 Udu bolo asi kandrah ma bolo gwa ndras doh, iri marakon anyu, eme iri asahan lau ta Moses, ma a-en hamon tan.
1CO 10:3 Iri marakon aimon nyamon nane ale Malawin Mwasin ta Kindrei edeu ili niri.
1CO 10:4 Iri marakon badeh a-un gwa doh mene na boto-on ta Malawin Mwasin ta Kindrei edeu ili wa-i iri. Ya iri a-un gwa udu ta bek, Kindrei mene atehei udu aliy. Ya bek nane doh leheya buku Malawi Krais, iy amwenen mene udu hawe iri ta aseben iri.
1CO 10:5 Arile, Kindrei baso-ok kandriyen tiri lau mwan ma badih solo-an doh bwe. Eme iy idi iri amak, ma iri atalan laleyah are bolo kon lomale an.
1CO 10:6 Eme lakou marakon nane asahan ta leheya taha, ta anyolom, ma mada taha salikis ta iri lakou ndra-in, mene mada iri alikis ta aliy.
1CO 10:7 Aha sa-en hamon tiri lau ta atehei bwili ndru-u iri i andri ili ta kindrei iri amekes na sukumada kei. I buku le buk ndrabun ndrasehek, “Iri lau manyah ado andri aimon nyamon ma a-un gwa, ano iri mwan ala adi mana ma amekes karei hawe iri badih.”
1CO 10:8 Taha samekes iri kandriyen ndra-in ta karei, i buku le iri lau rayah bwena mene amekes. Eme na bolo len ari, lau nyaran bwe (23,000) badeh, amak. Jo bwalek aha samekes iri kandriyen ndra-in ta karei i buku doh.
1CO 10:9 Ma taha sanone Laban, sala buku iri bwena mene amekes, eme ma mwak ndra-in ini iri rayah amak.
1CO 10:10 Ma aha sanunu-uh Kindrei, sala buku iri rayah bwena mene amekes, eme ma angelo ta adai lau amak eme idi iri amak.
1CO 10:11 Iri lakou marakon asahan tiri nane doh ta leheya eme mada taha le. Lakou marakon nane doh iri ndratorowenei ale udu bolo buk ndrabun ta leheya taha lau nane ado kada-ah. Tasah, taha ndrame mirihik ta len ta kon munyak anya kano.
1CO 10:12 Eme i buku ari ndramak anya, iy ales boto-on labai, iy badeh, katondrok iy kudu mwasin. Kora-on iy kataku kandra-i mara-ei.
1CO 10:13 Buku iri none asahan taha, aha winiya atanan, idoh mene ndrasahan tiri mwan ma badih rayah. Arile, Kindrei badeh, in hamon tiri batanau tan, ma iy winiya balelei ari none ta atisih boto-on taha bwe-en. Buku iri none asahan taha, Kindrei kameh amekes san ta aseben aha. San i buku doh: Iy kameh atadau aha abadok, ma aha winiya ales boto-on ta tawiya none doh.
1CO 10:14 Aha kawas tek handru, aha kado ndra len ta kandriyen ta atudun iri kindrei ta wasai, iri amekes na sukumada kei.
1CO 10:15 Tanan taha udu aliy, eme ma jo asehek ewek taha. Aha amwenen baraseleya iri sahou tek.
1CO 10:16 Taha adeu wurah i ta bwesam nane taha lau ta Kindrei a-un na aliy, ma ndremenya Laban ta nyosowaniy op. Bwesam le doh tukumwi taha ala se hawe ndraye Krais. Ya, jabi ramen nane taha abo-os ta taha anya kaimon, idoh badeh, tukumwi taha ahis hawe bada Krais.
1CO 10:17 Handru, jabi ramen badeh, ari le. Eme ma, taha solo-an ahis badan ari le. Tasah, taha marakon badeh, aimon jabi ramen ari le doh.
1CO 10:18 Aha kabudon iri kandriyen tiri Isra-el bwena mene. Na len iri anya kaimon oda sipsip o bulumakau nane iri asun udu bwele-e mada koto-ok, idoh ta atukum iri marakon ame le se hawe Kindrei.
1CO 10:19 Aha kabudon, jo asehek sahou i buku sah? Sebwe jo asehek anya, “Salom nane iri lau adeu ili ta kindrei ta wasai, idoh lakou handru,” o, “Kindrei ta wasai iri amekes na sukumada kei, iy lakou handru ai, neh?”
1CO 10:20 Bwe! Idoh wasai handru. Jo asehek i buku doh: Lakou iri lau ta Kindrei bwe adeu i nyara salom, idoh iri adeu ili tiri balik. Iri badeu bala ta Kindrei bwe. Eme jo bwalek ta aha atukum ala hawe malawi iri balik.
1CO 10:21 Aha winiya ba-un na bwesam ta Laban ma hawe bwesam tiri malawin ndra-in i le rasan bwe. Ma aha ale winiya baimon nyamon bado bada sau ta Laban, ano bada sau tiri malawin ndra-in bwe ale.
1CO 10:22 Buku sah? Sebwe taha kede-eh anya kamekes ndrine Laban kandra-i nadeh? Ya, boto-on tataha kede-eh winiya boto-on tan deh? Winiyan bwe!
1CO 10:23 Aha rayah anya, “Ahi winiya amekes lakou marakon.” Arile jo kasehek taha, lakou marakon kameh winiya baseben taha bwe. Aha rayah anya, “Ahi winiya amekes lakou marakon.” Arile lakou marakon winiya baseben taha basahan lau mwasin ta Kindrei bwe.
1CO 10:24 Taha satehei budon ta aseben taha le amwenen. Taha badeh, katehei budon tataha ta aseben iri rayah ja.
1CO 10:25 Buku ou asih oda iri lakou badu mada ba-en, iri marakon badeh, mwasin ta aimon. Ou satehei budon solo-an ta ndremenya ta oda iri lakou dah, iri ndratehei salom ta kindrei ta wasai ndrala bwele-en, o, bwe.
1CO 10:26 Buk ndrabun ndrasehek, “Kon munyak ma hawe iri lakou marakon udu bwele-en badeh, ta Laban le ari.”
1CO 10:27 I buku ari ndramak iy tanan Jises bwe, iy eme ndremenya aha ta ala aimon nyamon hawen, mwasin ta aha kala. Mwasin ta aha kaimon iri nyamon marakon nane iy amekes ewek naha. Ya, aha sabudon solo-an ma satehei budon boto-on labai ta ndremenya iri nyamon dah asahan buku salom ta kindrei ta wasai ndrala aliy, o, bwe. Aha sandremenya, ndri-iy.
1CO 10:28 Arile, i buku ari ndramak eme asehek ewek taha ja i buku doh, “Nyamon badeh, iri atehei ndrala na kindrei ta wasai.” Badeh, aha saimon labai. Tasah, mwasin ta aha katehei budon taha kili ta ndramak nane tiye aha, eme ma aha saimon nyamon nane doh.
1CO 10:29 Jo basehek bawek taha anya aha amwenen kameh amekes andra-i, bwe. Jo asehek ta iy ndramak ari ja kameh atona i buku aha ndrabwidiy ndrandra-i. Arile, i buku ari ndramak bamekes iri sahou buku doh bwe, jo winiyan ta aimon iri saba lakou jo aso-ok. Ya, tasah handru jo ki-in le hamon ta budon ta ndramak ari ja, ta saba lakou iy anya jo kabeleben ta amekes?
1CO 10:30 Buku jo edeu wurah ili ta iri lakou nane jo aimon, tasah handru ja ndramak ari asehek sahou ndra-in eme tek ta iri lakou nane jo edeu wurah ili ta aliy? Sahou ta iy ndramak nane doh, ari moson bwe.
1CO 10:31 Eme ma, buku ou anya aimon nyamon, o, a-un gwa, o, amekes saba lakou ja, ou amekes iri lakou marakon doh ta atudun nyara Kindrei le ari.
1CO 10:32 Aha katehei budon taha kili tiri Juwis ma iri Grik, ma iri lau mwan ma badih ta Kindrei. Ma, aha samekes ari lakou ja ta amekes budon tiri taku ili ta kandriyen ndra-in ta balik.
1CO 10:33 Handru, aha badeh, kamekes kandriyen i buku le jo amekes. Jo amekes iri lakou marakon doh, ta iri lau winiya aso-ok iri kandriyen tek. Jo bamekes gok ta aseben jo amwenen bwe. Jo ibo gok ta aseben lau mwan ma badih solo-an. Ya, Kindrei kameh winiyan andrei iri marakon ame hamon ja.
1CO 11:1 Aha kanyolom tekedek ma kandriyen tek, ma aha ka-en hamon ta aliy, tasah jo in hamon ta kandriyen ta Krais.
1CO 11:2 Jo atudun aha labai, tasah len marakon badeh, aha abudon jo le ai, ma aha a-en hamon ta leheya jo ndratehei ndrawek taha.
1CO 11:3 Na len dah jo aso-ok aha katanan ale ta sahou dah: Iri lau mwan marakon badeh, are bahandra tondrok ta Krais le ari. Ya iri badih badeh, are bahandra tondrok ta udu iri. Arile Krais badeh, udu bahandra tondrok ta taman Kindrei.
1CO 11:4 Moson ta sahou dah i buku doh: I buku are ndramak mwan iy asolom, o, iy asehek sahou i buku iri propet, iy su-i batun, iy ndramak doh badeh, bwidi bwilima tinan labai ili ta Krais, tasah iy badeh, udu bahandra tondrok tan.
1CO 11:5 Arile are badih iy asolom, o, asehek sahou i buku iri propet, iy basu-i batun bwe, iy badeh bwidi bwilima i ta ndramak nane iy udu bahandra tondrok tan. Idoh i buku badih, iri asiki lami batun mara-ei iu.
1CO 11:6 Buku iri badih batubuloh batu iri bwe badeh, iy kasani lami batun kamo-on. Arile, buku bwilin ama ta asan lami batun amo-on, o, asikiy marakon iu, badeh, iy katubuloh batun.
1CO 11:7 Ndramak mwan satubuloh batun. Tasah konen hawe nyasou tan i buku le Kindrei, ma Kindrei atehei budon ma nyasou mwasin ili tiri i buku le tan amwenen. Ya, badih badeh, leheya budon ma nyasou mwasin ta lau mwan.
1CO 11:8 Tasah, Kindrei bamekes ndramak mwan na kono-o badih bwe. Iy amekes badih badeh, na kono-o iy ndramak mwan.
1CO 11:9 Eme ma Kindrei babudon badih bwe, eme iy bwidi ndramak mwan ta aseben iy. Arile, iy abudon ta ndramak mwan, eme iy bwidi badih ta aseben iy.
1CO 11:10 Eme ma, iri badih kasu batu iri, ta leheya, iri a-en hamon ma anuhun boho udu iri, ma iri angelo kameh winiya anyolom kandriyen mwasin tiri.
1CO 11:11 Arile manyah tataha lau atukum are hawe Krais, eme ma iri badih winiya bare ndrahune iri le bwe, ma iri mwan ale winiya bare ndrahune iri amwenen bwe. Badih udu aliy ta aseben iy mwan, ma mwan udu aliy ta aseben iy badih.
1CO 11:12 Ma bwena handru Kindrei andrei kono-o bada mwan eme iy bwidi badih; udu hamon ja, iri mwan asahan na bada iri badih. Arile, Kindrei badeh, iy kati iri lakou marakon.
1CO 11:13 Aha amwenen kabudon sahou nane doh se. Buku badih, iy basu batun bwe, iy asolom ili ta Kindrei, idoh kandriyen mwasin o bwe?
1CO 11:14 Kandriyen tataha lau mwan ma badih leheyani taha amwenen i buku doh: Buku lami batu lau mwan lawe-en labai, badeh, bamwenen bwe.
1CO 11:15 Arile, i buku iy badih lami batun ateh lawe-en handru, idoh nyasou tan mwasin. Tasah, Kindrei atehei lami batun alawe ta tubuloh batun.
1CO 11:16 Arile, i buku ari ndramak anya kandres ta iri sahou tek nane dah, iy ki tanan i buku doh: Iri badih badeh, katubuloh batu iri buku iri anya kala bolo asiu ta Kindrei ta asolom. Ahi aposel, ma hawe iri lau ta Kindrei rayah ja badeh, ba-en hamon ta kandriyen ari ja bwe.
1CO 11:17 Na len dah jo anya katiye taha ta kandriyen aha marakon ka-en hamon ta aliy. Arile, jo anya kasehek ta kandriyen aha amekes udu bolo len ta aha atukum ta salom. Jo winiya batudun nyara aha ta kandriyen doh bwe. Tasah, kandriyen rayah aha amekes udu bolo tukum ta salom taha badeh, bamwenen bwe, eme ma, bwidi aha atalan.
1CO 11:18 Jo anya kasehek taha ma bwena ta lakou doh: Len ta atukum ta salom badeh, aha atalan laleyah; ari, ari in ndrahunen labai. Jo anuhun i buku iri sahou doh, handru.
1CO 11:19 Tasah, jo anyolom ndrokowa aha lau ta Kindrei badeh udu aliy. Sebwe, Kindrei anya kanone iri lau a-en hamon ta sahou handru le kameh kasahan keme lewan.
1CO 11:20 I buku len taha mari ta atukum, aha abudon anya, “Ahi anya kaimon nyamon ta Laban ai.” Arile, bwe!
1CO 11:21 Tasah, na len aha akohok nyamon, aha ari, ari badeh, batondrok iri lau rayah bwe. Aha abotatahan ta akohok nyamon taha amwenen, ma aha aimon. Eme ma, iri rayah ameson, ma iri rayah ja a-un waen solo-an, ma bwidi iri abo lolo-ou. Handru, idah asahan, tasah aha batukum nyamon bala se ta aseben iri lau, niri nyamon bwe.
1CO 11:22 Buku sah handru? Sebwe, aha badeh, ra-em asumwe aha ta aimon nyamon, ma a-un gwa are aliy bwe? Eme ma aha ame asiu ta Kindrei ta amekes iri kandriyen doh nadeh? Sebwe aha anya, iri lau ta Kindrei doh lakou laleyah, ma aha adeu bwilima ili ta nadu tine aha iri nane baimon nyamon bwe, nadeh? Jo kameh kasehek saba lakou kewek taha bah? Sebwe jo katudun nyara aha ai? Jo winiyan bwai!
1CO 11:23 Buku aha a-en hamon ta kandriyen mene ahi ndratehei ndrawek taha, aha winiyan bamekes kandriyen dah ja bwe. Tasah, sahou mene jo asehek taha badeh, badu mine Laban le ari. Sahou nane i buku doh: Na ben Judas atehei Jises ili mine iri lau ndra-in ta bahun, na le ben doh Jises andrei jabi ramen ere minen,
1CO 11:24 Ma, iy edeu wurah i ta Kindrei, ano iy abo-os jabi ramen doh i bwisik bwisik, ma iy asehek sahou ili toro lau tan i buku doh, “Idah odak amwenen. Jo edeu ta aseben ado. Ado kamekes kandriyen ki buku doh ta abudon jo.”
1CO 11:25 Oro aimon nyamon ano, iy eme kuhi bwiniu, eme iy amekes sahou i buku le bwena nane i buku doh, “Bwiniu waen dah, kalem ta sahou randra le ha-un ja, ta ndrayek amwenen. Len marakon aha atukum ta a-un waen dah, badeh, aha abudon jo.”
1CO 11:26 Len marakon aha aimon jabi ramen, ma aha a-un na bwesam doh, aha badeh, leheya iri lau ta imek ta Laban. Aha kamekes kili, winiya le len tan, ta iy eme hamon ja.
1CO 11:27 Nyamon ta Laban doh, iy lakou ari tinan handru. Arile, i buku ari mwan o badih, iy babudon bamwenen bwena ta iy aimon jabi ramen ta Laban bwe, ma iy a-un waen na bwesam ta Laban laleyah, idoh i buku iy ndrabwidi bada Laban ma ndraye Laban ndrandra-i, ya iy amwenen kameh akohok maha-an ta aliy.
1CO 11:28 Taha marakon kanyolom bolo ndrine taha ari, ari amwenen ma bwena, ano taha baraimon jabi ramen, ma a-un na bwesam ta Laban.
1CO 11:29 Buku ari ndramak, iy aimon jabi ramen, ma iy a-un na bwesam ta Laban laleyah, iy banyolom bamwenen bwe, iy ndramak doh, Kindrei kameh atehei iy i ta sahou, ma edeu maha-an ili tan.
1CO 11:30 Ta katin doh le, eme bwidi aha solo-an labai abo sik, ma aha nyamu aha bwe, eme ma bwidi aha rayah ndramak ndra-au.
1CO 11:31 Buku taha kanyolom ndrine taha ari, ari kamwenen bwena op, maha-an ta nyamon ta Laban kameh winiya basahan ta taha bwe.
1CO 11:32 Arile, i buku Laban edeu maha-an eme tataha, idoh ta aseben taha asahan nadun. Iy amekes i buku doh, ta taha sataku sala hawe iri lau badu kon munyak.
1CO 11:33 Aha kawas tek handru, i buku aha atukum ta aimon nyamon, aha sabotatahan ta aimon nyamon mwena, aha katondrok lau marakon kasahan op, ano aha baraimon nyamon.
1CO 11:34 Buku iy ari imeson labai, iy badeh, kaimon nyamon kudu ndra asiu tan mwena. Aha kamekes kili buku doh, kora-on tukum taha kabwidi aha kales kare ta mada sahou ta Laban. Jo kameh ewek barasehek taha ta iri lakou rayah mene aha ndremenya jo ta aliy.
1CO 12:1 Ya aha kawas tek, na idah jo anya kasehek taha, ta ndremenya taha mene eme tek, ta iri ndramas ta Malawin Ndrabun. Eme kameh, aha winiyan atanan mwasin ta aliy.
1CO 12:2 Aha kabudon, manyah taha bwena mene are ndra bolo lulik, ano aha ame lewan. Aha mene atehei aha ala bolo iri san ndra-in ta kindrei ta wendreya, ari koha iri bwe, iri lau amekes na sukumada kei.
1CO 12:3 Jo aso-ok na dah, aha katanan ta aleben iri malawin ndra-in, ma iri Malawin Mwasin ta Kindrei kamwenen. Buku Malawin Mwasin ta Kindrei irek ere ndrine ari mwan o badih, ma iy asehek sahou i tan, ya iy mwan o badih doh winiyan basehek sahou anya, “Jises ibo lolo-ou,” bwe. Ma ale, buku ari mwan o badih iy barek ta Malawin Ndrabun bwe, iy winiyan basehek anya, “Jises, badeh, Laban,” bwe.
1CO 12:4 Iri ndramas ta Malawin Ndrabun kede-eh solo-an labai. Arile, Malawin Mwasin badeh, ari le, ma iy edeu lakou doh eme tataha.
1CO 12:5 Taha winiyan amekes iri gok solo-an ta Laban. Arile, Laban badeh, ari le.
1CO 12:6 Kandriyen ta amekes gok kede-eh, iri solo-an labai, arile Kindrei badeh, ari le, ma iy edeu boto-on eme tataha lau marakon, ma taha winiya amekes iri gok doh.
1CO 12:7 Malawin Ndrabun badeh, ndraleheyani iy amwenen ndrame lewan ta lau ta Kindrei marakon. Iy amekes i buku doh, ta taha kaseben iri lau rayah ja.
1CO 12:8 Taha lau rayah badeh, winiya asehek sahou ta budon. Ya iri rayah ja winiya asehek sahou ta tanan, arile iri ndramas marakon doh badu mine Malawin Ndrabun le ari.
1CO 12:9 Lau rayah badeh, akohok budon handru badeh, boto-on labai. Ya lau rayah ja badeh akohok boto-on ta anyumor ndramak ibo sik amwenen ja. Iri lau mwan ma badih nane doh akohok ndramas ta Malawin Ndrabun ari le.
1CO 12:10 Ta iy ari ja badeh, iy edeu boto-on ta amekes lahou tinan ma kalem. Ta iy ari ja badeh, iy edeu ndramas ta asehek sahou buku propet. Ya, iy ari ja akohok ndramas ta seleya iri malawin marakon, ta Kindrei, deh bwe. Iy ari badeh, akohok ndramas ta asehek boho kon randrah labai ja. Iy ari ja akohok ndramas ta tobolowe iri boho kon doh, ma asehek ili tiri lau ta Kindrei.
1CO 12:11 Malawin Mwasin ari le nane adeh, amekes iri lakou marakon. Ta so-ok tan le, iy apwai ndramas tan marakon ili ta ndramak ari, ari.
1CO 12:12 Bada taha ari le, lakou solo-an badeh, udu aliy. Iri lakou mara-ei nane doh ahis are bada taha. Bada Krais badeh, i buku aliy.
1CO 12:13 Handru, taha rayah badeh, Juwis, ma rayah bwe. Taha rayah badeh, bonyo-ou, ma taha rayah badeh, bwe. Arile, Malawin Ndrabun ndratehei taha mara-ei ndrala ndrahis ta bada Krais le ari. Iy amekes doh bwena, kala taha mene alomwa taha na Malawin Ndrabun ari le nane, eme ma, Kindrei tiye iy ta eme ndrine taha mara-ei.
1CO 12:14 Sahou dah handru, bada taha kede-eh ari le bwe. Iy badeh, solo-an labai.
1CO 12:15 Sahou sokek ari i buku doh: Sebwe katim kameh asehek i buku doh, “Jo minem bwe. Eme ma, jo badu sese badam bwe.” Buku katim, iy abudon, ma iy asehek i buku le doh, kede-eh handru deh? Bo-oh!
1CO 12:16 O, i buku ndranyem anya, “Jo madam bwe, eme ma jo badu badam bwe.” I buku ndranyem tiye i buku doh, aha sanuhun sahou tan. Iy badeh, badu hawe badam amwenen.
1CO 12:17 I buku badam mara-ei ki madam le, ou winiya banuhun ari lakou bwe. Ma, i buku badam mara-ei ki ndranyem le, ou winiya bahon lakou bwe.
1CO 12:18 Arile, Kindrei ndratehei iri lakou marakon badu bada taha ili le se, in hamon ta tanan ma so-ok tan.
1CO 12:19 I buku badam ki sese le, ya badam handru kameh udu heh?
1CO 12:20 Arile, Kindrei bamekes bala buku aliy bwe. Iri lakou solo-an badeh, udu badam amwenen, arile, badam handru badeh, ari le.
1CO 12:21 Madam winiya basehek sahou bala ta minem anya, “Jo le winiyan, jo baso-ok ou bwe.” Ma batum winiya basehek sahou bala ta katim anya, “Jo le winiyan, jo baso-ok ou bwe.”
1CO 12:22 Badeh, bamwenen se bwai! Iri lakou rayah ou abudon, iri nyamu iri bwe, iri badu badam le amwenen. I buku iri bado badam bwe, badam kameh winiya bamwenen bwe.
1CO 12:23 Iri lakou rayah udu badam ou anya, iri ndra-in sese, ou badeh, nyosowani iri na nyasou solo-an. Ya, iri lakou rayah udu badam, bwilim ale ama ta aliy, ou badeh, tubuluhi iri amai udu mwasin labai.
1CO 12:24 Arile, lakou rayah udu badam, kone iri mwasin ja, badeh, bwai. Handru, Kindrei bwidi bada taha iri marakon ndrala le se. Ma bada taha rayah, i buku nyara iri bwe, Kindrei le amwenen edeu nyara iri.
1CO 12:25 Iy amekes i buku doh, ta bada taha iri satebelese, ma satalan laleyah, arile taha ari, ari winiyan atondrok iri rayah ta kandriyen randra le.
1CO 12:26 Buku bada taha sese atona isi, badeh, bwidi bada taha mara-ei isi. Buku bada taha sese sekesek ta akohok nyaran mwasin, idah kameh bada taha mara-ei sekesek labai.
1CO 12:27 Na dah bada aha marakon ndrahis ndrala bada Krais le ari, ma bada aha ari, ari badu hawe badan.
1CO 12:28 Udu bolo iri lau ta Kindrei, iy atehei iri aposel mwena, ano iri propet, hamon tiri propet, iri lau ta leheya. Ano iy ale atehei lau rayah ta amekes lahou tinan ma kalem, iri rayah ta anyumor lau abo sik, iri rayah ta aseben, iri rayah asahan kabin ta amekes lahou ta Kindrei, ma iri rayah ta asehek iri boho kon randrah labai ja.
1CO 12:29 Gok buku aposel, propet, ndramak ta leheya, ma ndramak ta amekes lahou tinan ma kalem; lau marakon winiya bamekes iri gok doh bwe.
1CO 12:30 Iri gok rayah ja ale, buku anyumor ndramak ibo sik, asehek boho kon randrah labai ja, ta tobolowe moso boho kon mara-ei; lau marakon winiya bamekes iri gok doh bwe.
1CO 12:31 Aha lau mwan ma badih badu Korin kede-eh amekes iri gok solo-an labai ta akohok ndramas ta Malawin Ndrabun. Arile, na dah, jo anya kaleheya aha ta san ari mwasin handru, ma iy udu bwele-en labai. San doh ta ou aso-ok iri lau rayah ja.
1CO 13:1 I buku jo kasehek sahou kili tiri lau mwan ma badih kili boho kon ta lau marakon, ma boho kon tiri angelo ale, arile jo batehei ndrinek mwasin bala tiri bwe, idah kameh jo i buku nyaro ndran, iri adi laleyah, ari moson bwe.
1CO 13:2 Ma i buku jo asehek sahou buku iri propet, ma jo ndratanan ta iri budon marakon ta Kindrei ale basahan bwe le, ma iri tanan marakon rayah ale, ma i buku budon tek boto-on labai winiya tohowei iri mandrei ili rasi ja, arile, i buku jo baso-ok ma batehei ndrinek mwasin bala tiri mwan ma badih bwe, badeh, kameh jo i buku lakou ndra-in laleyah.
1CO 13:3 Ano, i buku jo katehei iri lakou tek marakon kili tiri lau ndra-in, tiri lakou bwe, ma iri lau katawi jo, ma kasulumwi jo kandrakak ki-iu ki nyara salom, arile buku jo baso-ok ma batehei ndrinek mwasin bala tiri bwe, iri kandriyen tek marakon doh kameh winiya baseben se jo bwe!
1CO 13:4 Are ndramak iy aso-ok ndramak ari, ari, badeh, iy ta atondrok le ai; iy amekes kandriyen mwasin labai ta aseben ndramak ari, ari; iy ta madalikis ma lomondra ndra-in bwe, iy winiyan batudun nyaran bwe; ma iy winiyan balim aden bwe.
1CO 13:5 Ta aso-ok ndramak ari, ari, iy winiya bamekes lakou laleyah bwe. Iy winiya babudon iy le bwe, ma ndrinen winiya babolosen suwi bwe. Ta aso-ok ndramak ari, ari iy winiya babudon ndra-in iri nane amekes i tan bwena bwe.
1CO 13:6 Ta aso-ok ndramak ari, ari, iy winiya basekesek hawe iri kandriyen bamwenen bwe, arile iy badeh, sekesek hawe iri kandriyen mwasin ma handru.
1CO 13:7 Ta aso-ok ta ndramak ari, ari, iy udu le bwese iri maha-an. Buku maha-an asahan tan badeh, iy winiyan baruwani budon tan handru bwe, iy atondrok le Kindrei ta aseben iy. Handru, iy udu le ma iy ales boto-on na len mari.
1CO 13:8 Kandriyen ta aso-ok ndramak ari, ari badeh, winiya bano bwe. Arile, sahou iri propet asehek kameh ano. Iri ndramas ta asehek boho kon randrah ja kameh ano, ma hawe iri tanan tiri lau marakon kameh ano ale.
1CO 13:9 Tasah, na dah, tanan tataha tiri lakou badeh, sese le. Ma taha ale asehek sahou i buku iri propet badeh, sese le.
1CO 13:10 Arile, hamon kameh, iri lakou mwasin labai ja kameh asahan, ma iri lakou sese sese nane udu kada-ah kameh ano iu.
1CO 13:11 Sahou sokek ari i buku doh: Bwena mene jo ma nah nadu bwisik kahis, udu kala doh badeh, jo asehek sahou i buku iri nah nadu bwisik. Jo atona lakou i buku le iri nah nadu bwisik. Budon tek i buku nah nadu bwisik. Arile, udu hamon, jo asahan i ndramak awas badeh, jo ruwani kandriyen tiri nah nadu bwisik ano iu. I buku lakou ta Kindrei handru kameh eme, iri lakou sese sese le marakon doh kameh ano iu.
1CO 13:12 Na len dah taha anyolom iri lakou ta Kindrei asahan, arile taha bala tanan iy bala mwasin bwe. Idoh i buku taha anyolom malawi iri lakou doh ere kapa gwa. Handru, na len dah, badeh, jo tanan sese sese le tiri lakou baleu bamwenen handru bwe. Arile, udu hamon ta len dah, jo anyolom mada Kindrei handru, ma jo i tanan iy amwenen, i buku le iy ndratanan jo ndra bwena labai.
1CO 13:13 Kabwai, arile kandriyen ma taloh le. Kandriyen ma taloh kameh winiya bano bwe, oro kameh alih kahis le: Kandriyen ta atehei budon tataha kili ta Kindrei le ari; kandriyen ta atondrok Kindrei le ari; ma kandriyen ta aso-ok ndramak ari, ari. Kandriyen ari le udu bwele-e oro ma taloh badeh, kandriyen ta atehei ndrine taha mwasin ta aso-ok ndramak ari, ari.
1CO 14:1 Ya, aha badeh, ka-en hamon ta kandriyen ta adeu ndrine aha ta aso-ok ndramak ari, ari. Kandriyen le doh udu bwele-en mara-ei. Ma aha ale kaso-ok labai ta akohok iri ndramas, Malawin Ndrabun edeu eme tataha. Handru, ndramas ari le mwasin labai, aha ale asa-ar ma atehei budon taha ta akohok badeh, gok propet. Idoh le badeh, iy katin ta atiye sahou mara-ei ta Kindrei.
1CO 14:2 I buku ou akohok ndramas ta asehek boho kon randrah ja, ale iri lau rayah tana iri bwe, ou asehek amwenen ili ta Kindrei. Iy le ari badeh, tanan iri lakou marakon nane ou asehek. Ari ndramak ja winiya bala tanan ta moso iri sahou nane ou asehek ta aliy bwe. Ou asehek lakou Malawin Mwasin le ari tanan.
1CO 14:3 Arile, buku ou asehek sahou boho Kindrei, ou asehek amwenen ili tiri lau. Iri sahou tam nane doh atadau budon tiri abadok, sekeyani iri ta amekes kandriyen mwasin, ma amekes ndrine iri udu mwasin labai.
1CO 14:4 Are ndramak iy asehek boho kon randrah ja, idoh badeh, aseben ndrinen le ari udu mwasin. Arile iy ndramak iy asehek sahou ta Kindrei, iy ndramak doh badeh, iy atadau ma amekes budon tiri lau ta Kindrei abadok.
1CO 14:5 Jo Pol, jo aso-ok aha lau marakon ki tana aha ta asehek iri boho kon rakon ja. Arile, lakou ari jo aso-ok tinan labai ja badeh, ta aha katiye sahou ta Kindrei. Are lau iy tanan boho iri kon rakon ja, iy katobolowe iri sahou, idah kameh iri lau ta Kindrei winiya akohok boto-on ta iri sahou tan. Buku iy batobolowe iri sahou bwe, iy kameh winiya basahan bala buku ndramak ale atiye sahou ta Kindrei, bwe. Ndramak ta atiye sahou ta Kindrei kameh asahan bwena le ai. Tasah, sahou tan badeh irih, ma atadau iri lau ta Kindrei ta adeu budon tiri handru i tan.
1CO 14:6 Aha nadu tine, ma aha kawas tek, aha kabudon bolo iri sahou doh kamwenen: Jo winiyan ewek hawe aha ma jo winiya asehek boho kon rakon ja. Arile, buku jo basehek taha ta iri sahou rayah ta Kindrei, iy nane leheya eme tek, o, i buku jo badeu taha iri tanan mwasin bwe, o, jo basehek sahou ta Kindrei bwe, o, jo baleheya aha ta moso sahou ta Kindrei bwe, ya, barala buku sah kameh jo kaseben aha?
1CO 14:7 Aha kanuhun sahou sokek dah se: Lakou koha iri bwe, buku ndrah, bala-eu, ma ndran, buku iy bamekes nyaron randrah, randrah bwe, ya, kili buku sah handru kameh taha kanuhun nyaro ndran amwenen?
1CO 14:8 I buku ndran ta luloh bala bwe, are lau handru kameh baralokou lakou? Sebwe kameh bwe nadeh.
1CO 14:9 Aha i buku aliy ale, buku aha asehek boho kon rakon ja, ale iri lau tana iri bwe, ya iri lau katanan moso sahou barala buku sah handru? Idah kameh sahou taha iu laleyah, ari ndramak winiya banuhun bwe.
1CO 14:10 Handru, boho kon tataha badeh, solo-an labai udu bolo kon munyak dah, arile, iri boho kon tataha marakon doh, moso iri sahou mwasin ta ariu budon ta lau mwan ma badih marakon aleu.
1CO 14:11 Buku jo tanan ma jo banuhun boho kon iy ndramak nane asehek doh bwe, idah kameh jo anya, iy kede-eh badu leheleh. Ma iy kede-eh anya, jo badu leheleh ale.
1CO 14:12 Sahou sokek nane dah, badeh, ta kandriyen aha amekes. Aha aso-ok labai ta akohok ndramas ta Malawin Ndrabun, ma aha abudon anya, ndramas ta asehek boho kon rakon ja badeh, ndramas ari mwasin handru. Idoh mwasin, arile aha kabadok ta akohok iri ndramas randrah ja ta atadau lau mwan ma badih ta Kindrei kabadok.
1CO 14:13 Ta katin doh le, i buku taha asehek sahou ili boho kon rakon ja, eme lau rayah tana iri bwe, taha badeh, kasolom kili ta Kindrei ta boto-on tan keme tataha ta tobolowe moso iri sahou kamwenen.
1CO 14:14 Aha kabudon. Buku jo asolom ili ta Kindrei i boho kon rakon ja, idoh badeh, malawik le asolom, arile budon tek mari badeh, udu laleyah, bakohok ari seben bwe.
1CO 14:15 Idah kameh jo kamekes barala buku sah handru? Sebwe, jo kameh asolom ili ta Kindrei na malawik, ma na iri budon tek marakon. Jo ale kiyah wari na malawik, ma na iri budon tek marakon ale.
1CO 14:16 I buku aha adeu wurah ili ta Kindrei na boho kon rakon ja, malawi aha le badeh, asehek. Eme ma, i buku lau rayah laleyah are bolo aha, iri kameh winiyan anuhun sahou doh, deh? Iri kameh winiyan asehek, “Handru,” deh? Bwe! Tasah, iri winiya bala tanan ta saba sahou handru aha asehek ili ta Kindrei, bwe.
1CO 14:17 Aha atudun nyara Kindrei mwasin labai, arile aha batadau iri lau rayah laleyah nane are bolo aha babadok se bwe.
1CO 14:18 Jo Pol, jo edeu wurah i ta Kindrei ta jo winiyan asehek boho kon rakon ja, aha winiyan basehek bala buku jo asehek bwe.
1CO 14:19 Arile, buku iri lau ta Kindrei katukum badeh, jo anya kasehek sahou ma limeh le kili boho kon iri marakon tanan. Jo bwalek ta amekes sahou solo-an labai (lakou buku 10,000) ili boho kon rakon ja, iri nane tanan moson ta aliy bwe. Iri sahou solo-an labai doh kameh baraseben iri barala buku sah? Winiyan bwe-en!
1CO 14:20 Aha kawas tek, budon taha sala buku tiri nadu nah bwisik. Arile, i buku iri nadu nah bwisik badeh, tana iri ari kandriyen ndra-in bwe, aha lau mwan ma badih ta Kindrei badeh, kasahan buku le aliy. Ta kandriyen mwasin handru ja badeh, budon taha keme kasahan ki buku lau mwan ma badih en, iri tana iri ta lakou marakon doh.
1CO 14:21 Udu bolo buk ndrabun, Laban asehek i buku doh: “Jo kameh andrei iri lau leheleh, boho kon tiri randrah ja, ame asehek sahou ili tiri lau tek. Iri lau leheleh kameh asehek sahou ili tiri lau tek i boho kon rakon ja, arile iri lau tek winiya banuhun jo bwe le.”
1CO 14:22 Eme ma, sahou dah leheya taha, ta kandriyen ta amekes sahou ili boho kon rakon ja, Kindrei amekes ta aseben iri lau mwan ma badih batehei budon tiri ba-en tan bwe. Arile, kandriyen ta atiye sahou ta Kindrei eme lewan buku propet, badeh, Kindrei edeu ili tiri lau mwan ma badih, iri atehei budon tiri handru in tan.
1CO 14:23 Eme ma, buku aha lau ta Kindrei atukum a se, ma aha marakon kamekes sahou ta boho kon rakon, rakon, aha kabudon kamwenen op. Buku lau rayah tana iri bwe, ma batehei budon tiri bwe, buku iri kame bolon ale kanuhun aha, iri kameh abudon i buku sah bah? Sebwe, iri kameh asehek i buku doh, “Aha ndralolo-ou.”
1CO 14:24 Arile, i buku are lau nane iy batehei budon tan mari bala ta Kindrei bwe, o, are lau nane bala tanan bwe, iy eme bolon, iy anuhun aha marakon asehek sahou ta propet, idah kameh sahou taha mari orowei ndrinen ma nyuwani iri kandriyen ndra-in tan marakon iy amekes.
1CO 14:25 Iri kandriyen ndra-in tan marakon nane aton mara-ei asahan eme lewan. Iy kameh atehei bwili ndru-un i andri, ma iy atudun nyara Kindrei. Iy kameh tiye i buku doh, “Handru labai, Kindrei udu hawe aha kada-ah.”
1CO 14:26 Aha kawas tek, buku aha anya katukum ta atudun nyara Kindrei, aha kamekes saba lakou handru? Gok taha marakon udu aliy: Iy ari badeh, ta wari ai, iy ari ta leheya lau, iy ari ta asehek sahou Kindrei edeu i tan ta tiye ili tiri lau, iy ari ta asehek boho kon rakon ja; gok ta iy ari ja ta tobolowe boho kon nane doh. Handru, aha kamekes iri lakou marakon doh, ta atadau aha lau ta Kindrei kales boto-on.
1CO 14:27 Buku aha rayah anya kasehek boho kon rakon ja badeh, mwasin ta uru la-uh le, o, oro taloh le ka-iy kamekes. Oro le doh winiyan. Ya oro samekes sahou toro sala le rasan; iy ari asehek tan op, ano, iy ari ja, oro mari kamekes kili le buku doh. Ya ndramak ari ja badeh, kudu aliy ta tobolowe sahou toro.
1CO 14:28 I buku ari ndramak bado aliy ta tobolowe sahou toro bwe, ou amundru le, ou asehek sahou ki tam amwenen ma kili ta Kindrei.
1CO 14:29 Winiya lau la-uh, o, lau taloh ta tiye sahou ta Kindrei buku iri propet. Oro le lau doh winiya tiye sahou ta Kindrei. Ya iri lau rayah ja manyah winiya anuhun moso bolo sahou toro, eme ta Kindrei handru, deh bwe.
1CO 14:30 Buku iy ari nane manyah udu andri, Kindrei asehek sahou i tan, iy ndramak nane asehek sahou badeh, sasehek sahou op, ndramak ari ja kili kasehek sahou.
1CO 14:31 Ta kandriyen nane doh, idah kameh aha marakon winiya asehek sahou; iy ari op, ano iy ari ja. Idah kameh aha marakon winiya akohok tanan hawe boto-on.
1CO 14:32 Handru, aha winiyan a-en hamon ta kandriyen jo ndrasehek taha. Tasah, iri propet ta Kindrei handru badeh, atondrok malawi iri ma boho iri amwenen, buku iri anya kasehek sahou.
1CO 14:33 Jo kasehek, tasah Kindrei kede-eh winiya bawahei iri lakou laleyah bwe. Iy amekes ndrine taha amwenen, ma manyah tataha kudu mwasin.
1CO 14:34 Buku iri lau mwan ma badih ta Kindrei atukum a se, iri badih badeh, winiya bamekes sahou bwe. Iri kandru-uk le ai. Iri lau ta Kindrei tataha rayah kede-eh badeh, amekes i buku le aliy. Iri badih badeh, winiya basahan kabin ta lau ta Kindrei bwe. Iri kare le bahandra tondrok tiri mwan, i buku le sahou batanau iri Juwis ndrasehek.
1CO 14:35 Buku ari badih, iy anya ki tanan moso ari sahou, mwasin ta iy kandremenya udun, buku oro ala hamon ala asiu toro amwenen. Tasah, buku iy badih amekes sahou udu bolo tukum tiri lau ta Kindrei are le se, iy badeh bamekes kandriyen bamwenen bwe, ma iy atehei bwilima ili tan amwenen.
1CO 14:36 Buku sah? Aha kede-eh anya kandriyen taha badeh, mwasin labai ja, tiri lau ta Kindrei rayah ja nadeh? Sebwe, aha le badeh kati sahou handru ta Kindrei ai? Sebwe aha le badeh, akohok sahou ta Kindrei ai? Ya, iri lau mwan ma badih rayah ja bwai? Bwe. Eme ma, jo aso-ok aha ka-en hamon ta sahou jo ndrasehek ndrawek taha.
1CO 14:37 Jo Pol, jo asehek i buku doh: I buku ou are lau, ou anya, ou asehek sahou ta Kindrei buku iri propet, o, ou anya budon ta Malawin Ndrabun udu tam, ou ki tanam kudu mwasin ta iri sahou marakon jo nane atorou ewek taha, idoh badeh, batanau ta Laban.
1CO 14:38 Arile, i buku are lau, iy ba-en hamon ta sahou batanau dah bwe, aha sanuhun iy, ma aha sa-en hamon tan.
1CO 14:39 Aha kawas tek, ma aha nadu tine, aha katehei budon taha mari kili ta atiye sahou ta Kindrei, ma aha satehei ndrabun sala ta are lau ta asehek sahou i boho kon rakon ja.
1CO 14:40 Arile, aha kamekes lakou marakon kili san mwasin, ma ki-in hamon ta kandriyen ta Kindrei.
1CO 15:1 Aha kawas tek, ma aha nadu tine, jo anya kasehek taha ja, ta aha samani iri sahou mwasin ta Kindrei mene jo ndrasehek ndrawek taha. Eme ma, aha ndratehei budon taha boto-on ndra-en hamon ta aliy.
1CO 15:2 Sahou mwasin ta Kindrei le doh badeh, akohok aha ame hamon, buku aha a-en hamon handru ta sahou, jo mene ndrasehek taha. Arile, buku aha bala tanan saba lakou aha atehei budon taha in tan bwe, ma aha atehei budon taha laleyah, eme ma sahou mwasin doh baseben aha bwe.
1CO 15:3 Jo ndrasehek taha ta sahou laba tinan labai, sahou nane doh jo akohok bwena. Moso sahou nane i buku doh: Krais mene imek badeh, ta talou taha ado ta kandriyen ndra-in tataha marakon ame len, i buku le ndratorowenei udu bolo buk ndrabun ta Kindrei.
1CO 15:4 Iri ahi iy ili andri bolo lek; udu bolo len ma taloh ano Kindrei mete-ei iy ja. Idoh le buku sahou udu bolo buk ndrabun ta Kindrei asehek.
1CO 15:5 Krais ma mwena asahan hawe Pita, ano ja iy asahan hawe oro lau tan ma ronoh la-uh.
1CO 15:6 Udu hamon ja, kane iri udu bwele-en ta ma lemenek (500) badeh, anyolom iy. Arile, eme ano kada-ah badeh, iri solo-an are kede-eh kahis, rayah ndramak.
1CO 15:7 Iy ale asahan hawe Jemis, ano iy barasahan hawe oro aposel tan marakon.
1CO 15:8 Udu hamon ta lau marakon ano, iy asahan eme madak amwenen. Kala doh badeh, jo i buku nah, tinen anya kedeu iy bado bada len tan amwenen bwe.
1CO 15:9 Jo badeh, nadu bwisik labai udu bolo iri aposel. Jo asehek i buku doh, tasah jo bwena mene amekes bahun ma adai iri lau ta Kindrei. Idoh le bwidiy, eme, udu budon tek anya, jo nadu bwisik labai ta aha aloh jo buku aposel.
1CO 15:10 Arile, Kindrei badeh, mwasin labai! Iy bwidi jo asahan aposel tan, ma jo udu kada-ah, ma tikisiy tan eme tek badeh, bala laleyah bwe. Jo amekes gok boto-on labai udu bwele-en ja tiri aposel tan. Arile, jo le amwenen bamekes iri gok marakon nane doh bwe. Kindrei tikisi jo, iy eme atehei boto-on eme tek ta amekes iri gok marakon nane doh.
1CO 15:11 Arile, buku jo amekes, o, oro aposel rayah mene amekes gok doh, ari sahou ta aliy bwe. Lakou handru i buku doh: Ahi mari kede-eh atiye sahou ari le doh. Eme ma, aha mara-ei ndratehei budon taha ndra-en ta sahou mwasin doh.
1CO 15:12 I buku ahi aposel atiye iri sahou mwasin ta nyala Krais imek ano iy amak eme awas ja, buku sah handru lau rayah ado bolo aha asehek anya, iri lau marakon ndramak ndra bwena, iri winiya bamak bame awas ja bwe?
1CO 15:13 I buku iri lau doh asehek sahou handru, anya, “Iri lau mene ndramak bwena badeh, winiya bamak bame awas ja bwe;” buku handru eh, taha kasehek anya, “Krais buku aliy ale, Kindrei badeh, bamete-ei iy bwe.”
1CO 15:14 I buku Krais imek, ma iy bamak bame awas ja bwe, idah kameh atiye sahou ta taha doh kameh i lakou laleyah, ma budon taha handru ale winiya baseben aha bwe, ta amak ame awas ja, ma akohok koha aha ta udu le buku doh.
1CO 15:15 Anya i buku aliy eh, ahi ndrasahan buku iri lau ta asehek sahou wendreya ta iri lakou ale Kindrei amekes. Tasah, ahi ndrasihidi sahou mari ndrame lewan tiri lau, i buku Kindrei mene mete-ei Krais imek udu bolo lek tan amak eme awas ja. Arile, buku idoh i handru, ta Kindrei winiyan bamak lau mene ndramak bwena bwe, iy badeh, ale bamete-ei Krais bwe.
1CO 15:16 I buku sahou handru anya iri lau ndramak bwena, Kindrei bamete-ei iri ja bwe, mwasin, taha kasehek ki buk doh, “Kindrei badeh bamete-ei Krais udu bolo lek tan bwe.”
1CO 15:17 Ya, i buku sahou handru anya Kindrei bamete-ei Krais udu bolo lek tan bwe, idah kameh aha atehei budon taha in tan kede-eh winiya baseben aha bwe. Aha kameh ado ndra bolo kandriyen ndra-in taha kahis.
1CO 15:18 Ya, iri lau ale atehei budon tiri marakon in ta Krais, arile iri ndramak bwena, iri lau doh ndra-au laleyah.
1CO 15:19 Taha atehei budon tataha handru in ta Krais, ma atondrok iy ta eme hamon ta akohok taha ja. Arile, buku taha atondrok seben ma mwasin tan eme tataha na len taha are kon munyak dah le, manyah tataha bado mwasin bwe, eme ma, ndra-in tataha ja udu bwele-en labai ta ndra-in tiri lau rayah badu kon munyak dah. Ma iri katikisi taha handru.
1CO 15:20 Arile, bala buku doh bwe. Krais ndramak, ma idoh handru, Kindrei mene mete-ei iy eme hamon eme awas ja. Iy amak ere bwena labai ta lau marakon mene ndramak bwena, i buku nyamon badu bilin uni ma bwena. Idoh ale leheya iri mwan ma badih atehei budon tiri handru in ta Krais, iri ale kameh amak ame awas ja.
1CO 15:21 Sahou dah handru. Tasah, ndramak ari nyaran Adam, iy mene bwidi kandriyen ta imek asahan. Ano ja, ndramak ari, nyaran Krais, eme bwidi kandriyen ta amak eme awas ja badeh, asahan.
1CO 15:22 I buku doh: Iri lau mwan ma badih bwena mene ahis hawe Adam, iri marakon badeh ndramak. I buku le, iri lau mwan ma badih ahis handru hawe Krais, iri kameh amak ame awas ja, ma akohok koha iri mwasin.
1CO 15:23 Arile, taha marakon ado bolo lek tataha kameh amak ame awas ja, na bolo len tataha amwenen. Ma bwena handru badeh, Krais amak eme awas ja. Ano, udu ta len iy anya keme hamon ja, taha lau tan marakon, kameh amak ame awas ja.
1CO 15:24 Na bolo len doh kameh, iri lakou marakon kameh ano iu. Ma Krais kameh bwidi iri kabin marakon, iri lau bwele-en, iri malawin boto-on ta amekes bahun hawe Kindrei, iri marakon doh kameh ano au. Ano kameh, Krais baradeu tondrok tan barala mine taman Kindrei.
1CO 15:25 Tasah, Krais kameh atondrok kon marakon winiyan le Kindrei baratehei iri lau ta ato-ou kaliu barala bahandra katin.
1CO 15:26 Iy asahan nyekelen ta iy amekes bahun hawe iri lau ta ato-ou kaliu, ano kameh iy amekes bahun hawe imek ta akohok iy kano ki-iu ale.
1CO 15:27 Iri torowenei udu bolo buk ndrabun asehek i buku doh, “Kindrei mene atehei iri lakou marakon udu bahandra tondrok tan.” Eme ma, taha atanan, ta Kindrei ndratehei lakou marakon ndrala bahandra tondrok ta Krais. Arile, Kindrei le amwenen bado hawe iri lakou doh bwe.
1CO 15:28 Hamon kameh, iri lakou marakon ano ili le bahandra Krais, ano Nadu Kindrei atehei iy amwenen ili bahandra taman Kindrei, iy mene atehei udu bahandra tondrok ta Krais. Ma Kindrei kameh udu bwena ta atondrok iri lakou marakon.
1CO 15:29 Ya ndremenya tek rayah i buku doh: Sahou ta Kindrei dah kameh mete-ei iri lau mwan ma badih ndramak bwena ado bolo lek tiri amak ame awas ja. Buku sahou dah handru bwe, tasah handru lau rayah ja anyu ta aseben iri lau mene ndramak bwena? Ya, saba tanan handru iri anya kamekes? Ya, buku iri lau mene ndramak, bamak bame awas ja bwe, tasah handru lau rayah anyu ta aseben iri ja?
1CO 15:30 Ou anyolom ahi ale. Len marakon lau rayah anya kadi ahi, tasah ahi badeh, ta atiye sahou ta Jises Krais. Buku Kindrei winiya bamete-ei ahi bwe, tasah handru ahi akohok sisi-in ta amekes iri gok nane doh?
1CO 15:31 Aha nadu tine mwan ma badih, na bolo len marakon jo atona iri lau anya kadi jo kimek ki-iu. Jo asehek sahou handru! Arile, jo sekesek tinan labai ta gok mene jo amekes ta akohok aha ame hawe Jises Krais, eme ma, jo asehek iri sahou dah.
1CO 15:32 I buku sahou handru anya, iri lau ndramak bwena Kindrei bamete-ei iri ja bwe, mwasin taha kasehek ki buku doh: “Abo, ndri-iy ai! Taha kaimon nyamon, ma ka-un gwa na dah; tasah na bi-i kameh taha amak au.” Arile, jo ba-en hamon ta budon ma kandriyen doh bwe. Buku jo anya ki-in hamon ta aliy handru, buku sah ja jo katebelese hawe iri Epesus nane a-en hamon ta kandriyen ndra-in buku iri bondriliu? Ya, buku jo kimek laleyah, jo kameh kudu mwasin ki buku sah handru?
1CO 15:33 Aha sanuhun iri lau rayah awek wendreya aha. Aha ndratanan iri sahou dah: “Buku taha ka-en hamon hawe iri lau ndra-in, idah kameh iri adi kandriyen tataha mwasin iu.”
1CO 15:34 Aha kamani iri kandriyen lolo-ou taha ki-iu, ma budon taha kamwenen. Aha samekes iri kandriyen ndra-in ja ai. Aha kanuhun! Iri taha rayah badeh, bala tanan ta Kindrei bwe le. Jo amekes iri sahou dah ewek taha ta bwili aha kama ta iri kandriyen taha.
1CO 15:35 Sebwe lau rayah kameh ndremenya i buku doh: “Iri lau mwan ma badih iri ndramak ndra bwena ndra-au, i buku sah handru kameh iri kamak kame awas ja? Iri kameh amak ame awas ja, ya bada iri kameh ili buku sah handru?”
1CO 15:36 Are lau mwan o badih iy asehek sahou ale i buku doh, iy se balen bwai! Ya ou ndratanam ta atah buwa kei, i buku babosar ma bamak bwe, idah kameh nyubudon winiya bateh bame loken bwe.
1CO 15:37 Buwa kei nane ou tahiy, idoh bala buku iri kei hamon kameh asahan i kuhuyen bwe. Ou badeh, tahi buwan laleyah.
1CO 15:38 Na so-ok tan le amwenen, Kindrei edeu bada iri, amwenen ta buwa iri ari ari.
1CO 15:39 Bada iri lakou mulin marakon are bwele-e munyak badeh, ari randrah, ari randrah labai. Bada taha ndramak badeh, ari ai, ya bada iri lakou buku bou badeh, i randrah ja ai. Ya iri sirih badeh, bada iri i randrah ale, ma iri ni bada iri i randrah ale.
1CO 15:40 Bolo kandrah badeh, bada iri lakou solo-an udu aliy, ma bolo kon munyak ale, bada iri lakou solo-an udu aliy. Lomada bada iri lakou badu bolo kandrah badeh, i randrah, randrah labai, ya lomada bada iri lakou badu munyak badeh, i randrah labai ja.
1CO 15:41 Taha anyolom an badeh, nyasou tan randrah labai, bun nyasou tan randrah labai, ya iri ndrau anya na ben udu kandrah, nyasou tiri badeh, randrah labai. Ya, udu bolo ndrokowa iri ndrau mari, lomada iy ari ma nyasou tan, i randrah labai ta iy ari ja.
1CO 15:42 Kandriyen ta lau ndramak ndra bolo lek, ma lau amak ame awas ja badeh, i buku le aliy. Bada taha udu bolo lek badeh, abola, ma bada taha udu bolo lek amak eme awas ja badeh, kameh winiya bandra-i ma babola ja bwe.
1CO 15:43 Buku taha amak, iri ahi taha ala bolo lek, idoh lakou ari ndra-in handru. Bada taha udu bolo lek, amak ja eme awas, idoh mwasin ja. Bada taha ndramak a-eh ili bolo ndren, iy ari boto-on bwe. Bada taha udu bolo lek amak eme awas ja, badeh, boto-on labai.
1CO 15:44 Bada taha imek a-eh ili lek, idoh ta munyak labai. Bada taha amak udu bolo lek eme awas ja badeh randrah labai ja, idoh Malawin Ndrabun edeu kohan ili tan.
1CO 15:45 Iri torowenei sahou udu bolo buk ndrabun ta Kindrei i buku doh, “Ndramak ma bwena handru badeh, Adam, iy andrei kohan.” Arile Adam ari ja badeh, asahan hamon labai, iy asahan ta Malawin Mwasin ta edeu kohan handru ili ta lau marakon.
1CO 15:46 Koha kon munyak badeh, asahan bwena handru. Arile, koha Malawin Mwasin asahan hamon, ma iy udu bwele-en labai ja.
1CO 15:47 Adam ma bwena badeh, badu kon munyak. Kindrei bwidi iy badeh, na le munyak. Adam ari hamon ja badeh, badu bolo kandrah.
1CO 15:48 Iri lau marakon badu munyak badeh, a buku le iy ndramak nane badu munyak. Ya iri lau marakon badu kandrah kameh asahan i buku le iy ndramak nane badu kandrah.
1CO 15:49 Na idah ja badeh, taha ado buku le iy ndramak nane badu munyak. I buku hamon ja kameh, taha asahan i buku le iy ndramak nane badu kandrah.
1CO 15:50 Aha nadu tine, jo asehek amwenen ewek taha, ndramak badu munyak dah winiyan bala bolo tondrok ta Kindrei bwe, ma iy winiyan bakohok iri lakou marakon mwasin tan bwe. Ma iri lakou kameh andra-i, iri winiyan bakohok iri lakou ale winiyan bandra-i bwe.
1CO 15:51 Aha mari kanuhun. Jo anya kasehek sahou ari doh, lau banuhun bwena bwe, kewek taha: Idah kameh taha marakon bamak bala lek bwe. Na len Krais eme hamon ja, taha rayah kameh ado ndra loken kahis. Arile taha marakon kameh nyolom tataha i randrah ja, ma taha asahan randrah labai.
1CO 15:52 Idoh kameh asahan suwi labai udu bolo len ta ndrah ari eden in hamon handru. Handru, ndrah nane kameh eden, ma iri lau ndramak ndra bwena, iri marakon kameh amak ame awas ja. Ya iri kameh winiyan bandra-i ja bwe. Ya taha lau ale bamak bwe le, Kindrei kameh tubuni taha ili randrah labai ja.
1CO 15:53 Kandriyen tataha ta ndramak imek doh kameh winiya bado ja bwe. Kindrei kameh akahei mara-ei iu; kohan handru ta udu le buku doh kameh akohok ndrahune kandriyen ta imek nane doh.
1CO 15:54 Handru, bada taha kameh imek, ano abola. Arile, Kindrei kameh tubuni iy ja, ma kohan kameh udu luluwen udu le buku doh. Na bolo len doh sahou udu bolo buk ndrabun asehek, kameh asahan handru: “Kindrei amekes bahun hawe kandriyen ta imek, ma iy idi iri kandriyen ndra-in ta imek marakon ano iu.”
1CO 15:55 “Ya ou, kandriyen ta imek, boto-on tam ta atik iri lau mene, ndraheh?”
1CO 15:56 Nyamu imek ta edeu sisi-in badeh, ta kandriyen ndra-in. Ma boto-on ta kandriyen ndra-in doh, eme ta batanau Kindrei mene atehei ili mine Moses.
1CO 15:57 Arile, taha kadeu wurah kili ta Kindrei. Na le boto-on ta tinan tataha Jises Krais, Kindrei amekes taha abadok, ta adi iri kandriyen ndra-in ta imek marakon kano ki-iu.
1CO 15:58 Eme ma, aha nadu tine mwan ma badih i san ta Krais, aha kabadok, ma aha kado le rasi. Tasah aha ndratanan, lahou boto-on aha amekes ta Laban kameh winiya ba-au laleyah bwe.
1CO 16:1 Na idah jo anya katiye ta luk nane aha anya katukum kili tiri lau mwan ma badih ta Kindrei iri ado Jerusalem. Jo ndraleheyani san ta amekes gok nane doh ndrala tiri lau ta Kindrei badu loboho Galesiya, ma aha ale ka-en hamon le ta kandriyen nane iri amekes.
1CO 16:2 Na len bwena ta wik marakon, aha ari, ari, kabudon ta iri luk nane aha akohok na bolo len mene ndra-au on! Ya, aha kapwai luk, ano aha katehei rayah kamwenen kudu ndra bolo asiu taha kabe-en madasan ta amekes gok ta Laban. Ma luk kameh winiya a sola sese. Eme ma, buku len jo ewek badeh, aha winiya babo gok ta asilah luk ta adeu ili tiri ja, bwai.
1CO 16:3 Len jo asahan badeh, jo aso-ok aha amwenen katehei rayah lau ta atiye luk taha nane ta ili Jerusalem. Jo kameh atehei la-ukei ramen ili mine oro, ma tiye oro ta ala. La-ukei tek doh kameh asehek ta oro lau heh handru, ma oro amekes saba lakou handru.
1CO 16:4 I buku jo abudon ta ili ale, mwasin, oro marakon kame hawek op, ano aso barala.
1CO 16:5 Jo ta ewek hawe aha, arile jo kameh ili anyolom iri lau ado loboho Masadoniya mwena, ano badeh, jo barasahan hawe aha.
1CO 16:6 Sebwe, jo kameh udu hawe aha luluwen sese. Jo bala tanan bwai, sebwe jo kameh udu hawe aha winiya le len ta nyala, ma jor amondrei. Ano, jo anya kili kon rakon ja badeh, jo aso-ok aha kaseben jo ta ili.
1CO 16:7 Aha ndratanan, udu bolo tekedek tek badeh, jo bwalek ewek manyah hawe aha ta ben ari le. Buku Laban aso-ok handru, jo aso-ok labai ta udu hawe aha luluwen sese.
1CO 16:8 Arile, jo anya kudu ndra kon tinan Epesus op, winiya le len tinan ta Pentikos ano.
1CO 16:9 Tasah, Kindrei ndrasihi san, ma iy atehei gok laba tinan eme tek ta aseben lau solo-an kasahan lau tan. Jo anya kamekes gok dah kili ma kabadok, arile handru, lau solo-an ndra-in ale ado aliy ta anya katuruk gok tek sala.
1CO 16:10 Buku Timoti kasahan hawe aha, jo aso-ok aha kaseben iy, ta ndrinen kudu mwasin ta ndrokowa aha, ma iy sanoh. Tasah, iy amekes lahou ta Laban, i buku le jo amekes.
1CO 16:11 Kora-on iri rayah taha kanyolom iy i buku ari ndramak laleyah, ma iri katehei kona iri ki tan. Aha kabwidi ndrinen kudu mwasin, ma aha kaseben iy ta san. Eme ma, iy kameh winiyan eme hamon eme hawek ja. Jo hawe iri lau rayah ta Kindrei atondrok iy ado kada-ah.
1CO 16:12 Ya sahou ta nadu tine taha Apolos, i buku doh: San solo-an labai jo asehek sahou boto-on ili tan, ta iy kili hawe iri rayah lau ta Kindrei, iri kawek kanyolom aha. Arile, iy bwalen ewek na dah. Udu ja, buku iy anyolom len mwasin ta ewek, idah kameh iy barawek ai.
1CO 16:13 Aha katehei ndrokei kamwenen ta Krais kameh eme hamon ja. Ma aha kales boto-on ta budon taha ari le. Aha kabadok kado le, ma aha sanoh.
1CO 16:14 Ta iri lakou marakon aha amekes, aha badeh, ka-en hamon le ta kandriyen ta aso-ok handru iri lau rayah ja.
1CO 16:15 Aha nadu tine i san ta Krais, aha tanan, Stepanas oro badeh, ndrasahan iri lau ta Kindrei ma bwena handru, ta iri lau rayah ja ado bolo kon tinan Akaya. Na so-ok toro le, oro amekes gok ta aseben iri lau ta Kindrei.
1CO 16:16 Jo asehek sahou boto-on ewek taha, ta aha kanuhun ma aha ka-en hamon ta iri lau nane doh, ma ta iri lau amekes gok boto-on ta aseben iri nane amekes gok dah.
1CO 16:17 Stepanas uru Potunatus hawe Akaikus oro ma taloh mene ame hawek. Eme bwidi jo sekesek labai ta anyolom oro, tasah aha marakon winiyan bame dah banyolom jo bwe. Oro ma taloh nane doh akohok ndrahune aha ta amekes gok doh ta aseben jo.
1CO 16:18 Jo badeh abwerei sese, arile oro lau ma taloh doh ame badeh, bwidi ndrinek ma hawe ndrine aha sekesek ale. Eme ma aha badeh, kasekesek iri lau buku doh.
1CO 16:19 Iri lau mwan ma badih ta Kindrei badu bolo kon tinan Esiya tiye sekesek tiri ewek taha. Akwila uru Prisila hawe iri lau mwan ma badih ta Kindrei badeh, atukum ala le asiu turu, eme iri tiye sekesek tiri tinan ewek taha in ta nyara Laban.
1CO 16:20 Iri nadu tine taha rayah are kada-ah tiye sekesek tiri tinan ewek taha ale. Ta kandriyen tataha lau mwan ma badih ta Kindrei, aha marakon kateu mine nadu tine aha ari, ari, iri are ndrokowa aha amwenen.
1CO 16:21 Ta sendrehendreh ta la-ukei tek dah, jo Pol, jo atorou sahou sekesek tek ewek taha na minek le amwenen.
1CO 16:22 Buku ari ndramak mwan, o, badih iy baso-ok Laban bwe, jo aso-ok iy kakohok maha-an ma sisi-in ndra-in kudu le buku doh. Maranata!
1CO 16:23 Tikisiy ta Laban Jisas kudu hawe aha.
1CO 16:24 So-ok tek tinan labai ewek taha mara-ei aha are ahis hawe Krais Jisas. Handru.
2CO 1:1 Jo Pol, jo aposel ari ta Krais Jises. Ta so-ok ta Kindrei le amwenen, iy atehei jo asahan aposel. Jo hawe nadu tine taha ari Timoti, aru mala-uh atorou la-ukei dah ewek taha mwan ma badih ta Kindrei are kon Korin, hawe iri mwan ma badih ta Kindrei marakon are loboho kon munyak tinan Akaya.
2CO 1:2 Aru mala-uh anya tama taha Kindrei, hawe Laban Jises Krais, uru kamekes kandriyen ta tikisiy kewek taha, ma kamekes ndrine aha kamunum.
2CO 1:3 Jo sekesek handru i ta Kindrei, iy tama Laban tataha Jises Krais. Ma iy kati iri kandriyen handru ta tikisiy, ma iy amekes maha-an udu ndrine iri mwan ma badih amunum.
2CO 1:4 Ya, iy bwidi ndrine ahi amunum, na len iri maha-an ame asahan ma ndruni ahi. Tasah, iy bwidi ahi winiyan ta aseben ndrine iri mwan ma badih rayah ja maha-an solo-an labai udu tiri, ma ndrine iri winiyan amunum i buku ahi.
2CO 1:5 Krais mene bwese maha-an ma iy akohok sisi-in. Ahi ale bwese maha-an ma akohok sisi-in i buku le iy. Eme ma, ahi ahis hawe Krais ma Kindrei badeh, aseben ahi i buku le iy mene aseben Krais.
2CO 1:6 Na len ahi bwese maha-an, idoh aseben aha ma Kindrei winiyan andrei aha ame hamon. Na len Kindrei aseben ahi ma ndrine ahi amunum udu le udu, idoh badeh, aseben ndrine aha winiyan udu mwasin ale. Ya, len aha ales boto-on, ma bwese iri maha-an i buku ahi ale bwese, Kindrei badeh, amekes ndrine aha amunum.
2CO 1:7 Eme ma, ahi abudon aha kameh ales boto-on ta iri maha-an asahan. Tasah, ahi tanan aha bwese maha-an hawe ahi, ano kameh Kindrei amekes ndrine aha hawe ndrine ahi amunum.
2CO 1:8 Ahi atorou sahou dah ewek taha. Tasah, ahi anya aha kameh katanan ta iri maha-an doh mene asahan tahi udu bada kon Esiya. Maha-an tinan labai mene ati-i ahi, ma tihisi boto-on tahi. Eme ma ahi abudon i buku: Ahi kameh amak na dah.
2CO 1:9 Handru labai! Ahi atona iri maha-an i buku ndramak lalou atona ta len ndramak ta anuhun sahou asehek ano ta iy kameh imek. Maha-an doh mene asahan tahi ma ahi kameh winiyan babudon ta boto-on tahi amwenen kameh udu awas bwe. Ahi badeh, atehei budon udu ta Kindrei le ari, iy le ari winiyan mete-ei iri mene ndramak ame hamon ame awas ja.
2CO 1:10 Ehe, iri maha-an marakon doh anya kadi ahi kamak, arile Kindrei badeh, aseben ahi, ma ahi bamak bwe. Hamon ale, Kindrei kameh aseben ahi ta iri maha-an doh winiyan badi ahi bamak bwe. Ahi atehei budon tahi handru in ta Kindrei ta iri lakou doh.
2CO 1:11 Ehe, Kindrei kameh amekes lakou doh ja, ma buku aha asolom ili tan ta ahi. Handru, aha amekes salom i buku doh, ma Kindrei kameh anuhun salom doh taha, ma iy aseben ahi. Ma mwan ma badih solo-an kameh anuhun ma bwetenei lakou doh Kindrei amekes eme tahi, ma iri kameh adeu wurah ili ta Kindrei ta aliy.
2CO 1:12 Budon tahi atona sahou dah handru, ma ahi sekesek ta lakou dah: Ta lakou marakon ahi mene amekes ili tiri mwan ma badih badu kon munyak dah, ahi mene a-en hamon ta kandriyen mwasin, ma kandriyen handru. Ahi ba-en hamon ta tanan mene ahi akohok tiri mwan ma badih badu munyak dah bwe. Tikisiy ta Kindrei le mene aseben ahi, ma ahi amekes i buku aliy. Ma ahi mene amekes kandriyen doh ili le kala ahi abo gok hawe aha mwan ma badih badu Korin.
2CO 1:13 Iri la-ukei ale jo atorou ewek taha, sahou rayah udu bolon badeh, bamai bwe. Iri lakou jo atorou badeh, aleu ma aha winiyan atanan moson ta aliy. Na len dah aha bala tanan jo bamwenen bwe, o, ta lakou jo anya kamekes kewek taha. Arile, hamon, jo abudon aha katanan jo kamwenen, ma lakou jo amekes taha. Eme ma hamon, len ta Laban Jises eme ta tunuhun sahou tiri mwan ma badih, aha kameh sekesek ma atudun nyara ahi i buku jo kameh sekesek ma atudun nyara aha ale.
2CO 1:15 Jo anya aha kameh katanan kamwenen ta iri lakou doh jo mene asehek ta aliy. Eme ma, jo mene abudon ma mwena ta a-en hamon ta san ta ili Korin na len jo ili bada kon Masadoniya. Ma hamon kameh jo eme le san dah ma anyolom aha san rasan ja. Ma ta kandriyen doh aha kameh winiyan anyolom aru ma la-uh, ma aru winiyan sekeyani ndrine aha handru. Ma hamon ta idoh, aha winiyan aseben jo, ma tiye jo kili hamon loboho bada kon Judiya ja.
2CO 1:17 Handru! Idoh budon mene jo anya ki-in hamon ta aliy. Arile, jo bawek hamon batou aha bwe. Aha anya jo ndramak ari ta tobolowe lakou laleyah nadeh? Bwe, jo bala buku i ndramak doh anya, “Ehe ma bwe” hawe a-en hamon ta so-ok tek laleyah, bwe.
2CO 1:18 Sahou ta Kindrei handru ta ere le buku doh. Eme ma jo kasehek taha, jo tiye handru buku jo asehek: Jo bala buku ndramak anya “Ehe” udu bohok amwenen, ma jo tone budon “Bwe” ta ndrinek badeh, bwe!
2CO 1:19 Jo hawe Sailas uru Timoti, aso ma taloh mene atiye sahou udu ndrokowa aha. Ma sahou ta Nadu Kindrei, Jises Krais doh handru. Ma aha atanan, Krais badeh, winiyan batubuni iy bwe. Iy badeh in le hamon ta so-ok ta Kindrei, ma iy amekes gok tan ta in hamon tiri sahou tandrakan Kindrei mene amekes eme tataha mwan ma badih.
2CO 1:20 Idoh handru labai: Krais amekes iri sahou tandrakan ta Kindrei asahan handru mara-ei. Idoh leheya taha Kindrei anya “Ehe,” arile ma a-en hamon ta sahou tan. Eme ma, taha kasekesek ma katudun nyara Kindrei ta idoh: Iy in hamon ta sahou tan.
2CO 1:21 Kindrei leheya ahi i buku doh: Ahi hawe aha Korin, taha marakon badeh, Kindrei bwidi taha winiyan ales boto-on hawe Krais. Ma ale, Kindrei mene atehei ahi ta amekes gok aposel dah.
2CO 1:22 Iy mene atehei kalem tan amwenen eme tataha: Iy atehei Malawin Ndrabun eme ndrine taha. Ma Malawin Ndrabun doh i buku ari le tiri lakou Kindrei anya kedeu taha hamon. Eme ma taha winiyan atanan i buku doh: Handru labai, Kindrei kameh edeu iri lakou marakon, iy mene tandrakan ta aliy eme tataha.
2CO 1:23 Kindrei tanan budon tek. Eme ma, buku jo kawendreya badeh, Kindrei winiyan nyowani wendreya tek doh, iri mwan ma badih kameh winiyan atanan ta aliy. Arile, jo bawendreya bwe. Jo asehek handru. Jo bwalek edeu maha-an tinan ewek taha, ma abolosen ewek taha ta kandriyen ndra-in mene asahan ndrokowa aha. Eme ma, jo mene bawek hamon bawek Korin ta anyolom aha ja bwe.
2CO 1:24 Na len jo asehek “Jo ibolosen ewek taha” jo basehek anya ahi atondrok budon taha bwe. Ahi tanan aha ales boto-on ta budon taha. Ahi abo gok le hawe aha, ta amekes aha kasekesek.
2CO 2:1 Eme ma, jo ndraruwi ndrinek. Jo abudon i buku doh: Jo winiyan bala Korin ja, ma amekes maha-an ili tiri ja bwe.
2CO 2:2 Tasah, buku jo bwidi aha tikisiy, ya are lau kameh winiyan bwidi ndrinek kasekesek ja? Bwe nadeh! Aha le lau badeh adeh, amekes ndrinek sekesek.
2CO 2:3 Ehe, aha le badeh, amekes jo sekesek. Eme ma, jo bwalek ewek hawe aha ja, ma amekes sahou boto-on, ma ndrine aha amaha labai, bwe. Eme ma, idoh kati lakou jo atorou ewek taha ma mwena. Jo bwalek ewek edeu maha-an ari ja ewek taha ta kandriyen udu ndrokowa aha. Buku ndrinek sekesek ta koha aha, jo tanan aha ale ado mwasin ma sekesek asahan.
2CO 2:4 Handru, mwena mene jo torowenei la-ukei ramen ewek taha, ma na len doh ndrinek maha-an ma isi, ma jo eden ale. Arile, jo batorou la-ukei doh ta edeu maha-an laleyah ewek taha bwe. Jo anya kaleheya aha buku jo aso-ok aha handru ma jo ibo gok ta aseben aha karuwani kandriyen ndra-in udu ndrokowa aha ki-iu.
2CO 2:5 Na dah, i buku ari ndramak mene ndrabwidi maha-an ndrala tare lau, idoh badeh bame tek bwe, arile idoh ewek taha marakon. (Jo asehek dah, tasah jo amwenen bwalek edeu maha-an ili bwele-e ndramak doh).
2CO 2:6 Aha ranah ma buruwen badeh, ndratikahei iy ndramak mene udu ndrokowa aha ndra-au, idoh ta leheya iy ndrabwidi lakou ndra-in labai. Eme ma idoh winiyan.
2CO 2:7 Na dah, jo aso-ok aha kamani kandriyen tan nane iy amekes ewek taha, ma aha kamekes ndrinen kasekesek. Kora-on maha-an laba tinan kabwidi ndramak doh kandra-i.
2CO 2:8 Eme ma jo asehek taha. Aha kandrei iy keme hamon hawe aha, ma aha kaleheya aha kili tan buku aha badeh aso-ok iy labai.
2CO 2:9 Jo mene atorou la-ukei ewek taha ta none aha le. Jo anya ki tanan aha kameh winiyan a-en hamon tiri sahou tek marakon mene o bwe.
2CO 2:10 Buku aha mani kandriyen ndra-in ta ndramak nane amekes ewek taha, jo ale kameh maniy. Saba lakou jo maniy (buku lakou udu aliy doh jo kamaniy), i buku Krais anyolom jo, jo ale maniy na nyaran ta aseben aha.
2CO 2:11 Tasah, jo abudon i buku doh: Kora-on balik kawendreyani taha ta amekes kandriyen ndra-in kili ta nadu tine taha nane doh, ma iy kameh kamai laleyah ma kandra-i. Taha ndratanan labai ta budon ta balik.
2CO 2:12 Jo ili asahan kon tinan Trowas ta atiye sahou mwasin ta Krais badeh, Laban ndrasihi san tek ta amekes gok dah.
2CO 2:13 Arile, jo tikisiy tinan labai, tasah jo banyolom nadu tine taha Taitus bwe. Eme ma jo batanau iri mwan ma badih ano, jo iu ili kon munyak tinan Masadoniya.
2CO 2:14 Arile, jo baradeu wurah barala ta Kindrei adeh. Tasah, len marakon iy badeh, atehei ahi ala kon rakon, rakon ta atiye lahou tinan, Krais ndrabwidiy ta akohok ahi ame hamon ma amekes ahi asahan lau tan handru. Ehe, buku manahu buburen asahan, ma jor aluhiy iu ili bolo kon marakon, i buku le tekedek tahi aseben iri mwan ma badih marakon akohok tanan ta Kindrei.
2CO 2:15 Handru labai, ahi aposel amwenen badeh, a buku kasu-er ta manahu buburen mwasin, Krais eme andrei, ma iy atehei i ta Kindrei i nyara salom. Manahun doh iu ili ndrokowa iri mwan ma badih iri atehei budon tiri handru in ta Krais, ma iri are san ta iu ili kandrah, ma ta ndrokowa iri mwan ma badih iri batehei budon tiri bwe, ma iri are san ta ili bolo jih nyarahan labai.
2CO 2:16 Ta iri lau are san ta ili bolo jih, ta gok ahi amekes ma ta sahou ahi atiye badeh, asahan i buku manahu lakou kameh imek. Arile sahou ma gok ahi amekes ere ndrokowa iri mwan ma badih are san ta ili kandrah, asahan i buku manahu lakou kohan udu aliy kahis. Are lau handru winiyan amekes iri gok doh?
2CO 2:17 Ahi aposel badeh, bala buku iri lau solo-an ala rakon, rakon ta atiye sahou ta Kindrei bwe. Iri amekes i buku doh ta ariu luk tiri mwan ma badih rayah, ma iri winiyan ado mwasin. Ahi aposel badeh, bwe. Ahi akohok gok dah badu mine Kindrei amwenen, ma ahi bawendreya laleyah bwe. Ndrine ahi badeh, udu mwasin hawe Krais, ma ta mada Kindrei ahi badeh, atiye amwenen iri sahou tan mene iy edeu eme tahi.
2CO 3:1 Buku sah? Aha abudon ahi aposel anya katudun nyara ahi ja nadeh? O, aha anya ahi a buku lau rayah, ma ahi badeh, kadeu ramen la-ukei iri lau mwena ndratorowenei ta atudun nyara ahi nadeh? O, aha ndratorowenei la-ukei ta aseben ahi deh? Bwe.
2CO 3:2 Aha amwenen asahan buku la-ukei ta atudun nyara ahi. Aha badeh, ado bolo budon ma ndrine ahi handru, ma iri mwan ma badih marakon ndratanan ta aliy.
2CO 3:3 Iri mwan ma badih ndratanan, koha aha badeh, i buku ramen la-ukei Krais amwenen atorou. Ehe, ta gok ahi amekes ta atiye sahou mwasin, Krais amekes gok ewek taha i buku ramen la-ukei. Iy batorou la-ukei dah na ndraye kei o atilik udu bada bek bwe. Iy atorou na Malawin Mwasin ta Kindrei kohan handru udu aliy ta atorou ndrine aha mwan ma badih.
2CO 3:4 Ehe, ahi ndratanan, Kindrei ibo gok boto-on labai ta koha aha i san ta Krais, ma aha akohok koha aha badeh, tan amwenen. Eme ma ahi amekes sahou i buku doh: Aha badeh, a buku la-ukei le, leheya iri mwan ma badih, Kindrei atehei ahi a buku aposel tan amwenen.
2CO 3:5 Handru, ahi amwenen winiyan ta amekes gok doh bwe. Eme ma ahi sasehek, sahou tahi amwenen mene bamekes ari lakou bwe. Kindrei le ari badeh aseben ahi, ma bwidi ahi winiyan ta gok.
2CO 3:6 Kindrei amwenen mene bwidi ahi winiyan, ma ahi bwidi gok tan ta sahou randra le ha-un nane doh. Sahou randra le ha-un nane doh, bala buku batanau ta Moses bwena mene bwe. Idoh lakou ha-un ja Malawin Ndrabun badeh, amekes asahan. Batanau malen ta Moses badeh, leheya taha kameh amak le. Iy nyamun ta edeu kohan buku lakou Malawin Ndrabun amekes asahan eme tataha bwe.
2CO 3:7 Bwena mene Kindrei torowenei sahou ta batanau malen badeh, udu bwele-e bek. Ma gok ta batanau doh leheya taha kameh amak le, tasah taha winiyan ba-en hamon handru ma akohok kohan mwasin bwe. Na len Kindrei edeu batanau ili mine Moses, lomada Kindrei badeh, asahan hawen, ma lomotani mada Moses labai. Eme ma, iri mwan ma badih badu Isra-el anoh, ma bwidi iri winiyan banyolom madan bwe. Ano, lomada sun nane udu mada Moses anya i bwisik, ma amak mara-ei.
2CO 3:8 Ya, gok Kindrei amekes ta edeu Malawin Ndrabun eme tataha mwan ma badih marakon, kameh udu bwele-en labai mara-ei ja ta sahou randra le malen mene, ma sun ta Kindrei kameh anya handru amwenen eme tataha.
2CO 3:9 Handru, batanau malen bwena mene edeu taha marakon a ta sahou ma tiye taha kameh amalin ta Kindrei. Ya, batanau malen doh mene asahan hawe lomada Kindrei. I buku le, sahou randra le ha-un doh ja badeh, akohok iri mwan ma badih ame hamon ma aloh iri lau mwasin labai, idoh kameh ibo gok ta edeu tataha sun ta Kindrei solo-an labai.
2CO 3:10 Batanau doh mene iri mwan ma badih badu Isra-el anya lakou laba tinan labai, ma leheyani Kindrei eme tataha, na dah iy asahan laleyah. Tasah, sahou randra le ha-un doh taha aloh sahou mwasin udu bwele-en mara-ei labai ja, ma leheya buku Kindrei aso-ok taha labai.
2CO 3:11 Ehe, batanau bwena doh mene ta udu luluwen bwe, iy asahan hawe sun ta Kindrei. Arile, lakou ha-un doh ja kameh ta udu le buku doh, sun asahan hawen kameh i tinan mara-ei.
2CO 3:12 Ehe, atondrok lakou doh kameh ta ere le buku doh. Eme ma, bwili ahi winiyan bama ta atiye sahou mwasin doh bwe.
2CO 3:13 Arile, ahi batone ari sahou ta sahou mwasin bwe. Ahi tanan kameh asahan i tinan mara-ei. Eme ma ahi bamekes kandriyen buku Moses amekes bwe. Iy mene tone madan na ranah kolau, ma iri mwan ma badih badu Isra-el sanyolom sun doh anya i bwisik ma ano mara-ei.
2CO 3:14 Budon ma ndrine iri lau Isra-el bwena ndrahis, ma iri bala tanan moson o kati batanau doh, Moses mene edeu ili tiri bwe. Ma na dah ale, iri lau Isra-el, iri bala tanan moso kati sahou batanau bwe. Buku iri atehei budon tiri handru in ta Krais, Kindrei kameh winiyan sihi budon tiri, ma iri winiyan atanan handru ta kati moson ta sahou batanau.
2CO 3:15 Ehe, idoh handru, bolo len marakon iri mwan ma badih badu Isra-el anyolom sahou ta Moses udu bolo asiu ta Kindrei, budon tiri ihis, ma iri bala tanan saba lakou Kindrei anya kaleheya iri ta batanau doh bwe. Arile, buku mwan o badih iy tubuni ndrinen ili ta Laban, iy badeh ndrasihi budon tiri ma iri ndratanan Jises Krais iy are lau handru. I buku Kindrei tolowei kolau tubuluhi mada iri, ma iri winiyan anyolom amwenen.
2CO 3:17 Na dah, Laban badeh, ndra Malawin Mwasin; ma are lau Malawin Mwasin ta Laban udu hawen, iri kameh ari maha-an ta a-en hamon ta batanau ta Moses ja bwe. Ma iri ale kameh are len labai ta kandriyen ndra-in.
2CO 3:18 Na dah, taha mwan ma badih marakon asahan lau ta Kindrei, taha badeh, batone kandriyen asahan ta manyah tataha bwe i buku bwena mene Moses amekes. Koha taha badeh, leheya sun ta Kindrei asahan tataha i buku torowe leheya lakou. Eme ma, len marakon taha badeh, akohok sun ta Laban solo-an, solo-an labai, ma idoh tubuni taha, ma taha asahan buku le Laban amwenen. Malawin Mwasin ta Laban bwidi lakou doh eme tataha.
2CO 4:1 Kindrei mwasin, ma iy tikisi ahi, ma iy mene atehei gok ta atiye sahou mwasin dah eme tahi. Eme ma, ahi bawoyah ta amekes gok dah bwe.
2CO 4:2 Ma ale, ahi badeh, bawendreya iri mwan ma badih, o tobolowe sahou ili randrah ja bwe. Ahi ba-en hamon tiri kandriyen ta adeu bwilima i ta nyara Kindrei bwe. Ahi badeh, atiye sahou handru ta Kindrei ili tiri mwan ma badih marakon, ma iri winiyan anuhun. Ta kandriyen doh, ahi leheya iri, kandriyen tahi mwasin, ma iri winiyan atanan gok ahi amekes dah, idoh ale mwasin udu mada Kindrei.
2CO 4:3 Iri mwan ma badih rayah, iri abudon sahou mwasin ahi atiye doh, idoh boto-on labai ta atanan moson ta aliy. Sahou mwasin asahan i buku le, ta iri mwan ma badih anya kandrakak kala bolo jih.
2CO 4:4 Tasah, kindrei ta wendreya badu munyak dah, iy mene wahei budon tiri mwan ma badih doh batehei budon tiri bala ta Kindrei bwe. Eme ma, sun ta sahou mwasin ma lomada Krais, idoh winiyan bala bolo budon ma ndrine iri bwe, ma iri winiyan akohok Krais bwe, konen i buku Kindrei amwenen.
2CO 4:5 Ehe, sahou dah handru, tasah ahi badeh, batiye sahou tahi bwe. Ahi atiye sahou i buku doh: Krais Jises, iy badeh, Laban tataha, ma ahi lau ta gok taha, tasah Jises aloh ahi ta amekes iri gok doh.
2CO 4:6 Ehe, ahi atiye sahou ta Jises. Tasah, bwena mene Kindrei bwidi munyak dah anya, “Sun kanya bolo lulik.” Kindrei amwenen doh irek labai ta sun, ma iy akohok ahi ame hamon ja. Jises Krais, iy le sun doh udu ndrine ahi. Eme ma sun doh aseben ahi leheya iri mwan ma badih, Kindrei i buku sah handru.
2CO 4:7 Lakou mwasin doh badeh, udu bolo oda ahi mwan ma badih. Ma ahi badeh boto-on bwe, buku kun amekes na ndren. Arile, idoh iy mwasin, tasah iy leheyani iri mwan ma badih, ta boto-on ta sahou mwasin nane ahi atiye, idoh ta Kindrei ma boto-on tan sakalawi boto-on tiri lakou mara-ei ja. Ahi amwenen badeh, bwe.
2CO 4:8 Udu bolo iri kon rakon, rakon maha-an badeh, asahan tahi, arile badi ahi bamak bwe. Lakou solo-an badeh, wahei budon tahi, arile budon tahi bala bwe.
2CO 4:9 Iri lau laleyah badeh, atikah ahi ta amekes ndra-in eme tahi, arile Kindrei baruwani ahi bwe. Iri a-um ahi, ma adeu kandriyen ndra-in solo-an eme tahi, arile ahi bamak bwe.
2CO 4:10 Na len marakon, iri lakou abo gok ta adai ahi amak buku Jises mene imek. Arile, ahi bamak bwe le. Idoh leheya iri mwan ma badih buku Jises ale udu ndra awas kahis, ma atondrok ahi.
2CO 4:11 Ehe, ahi badeh, amekes gok ta Jises, ma ta iri len marakon ahi ado awas are kon munyak dah, iri mwan ma badih badeh, none ta adai ahi kamak. Arile, ahi bamak bwe le, ma idoh leheya iri mwan ma badih, buku koha Jises badeh, udu bolo oda ahi, oda ahi doh badu kon munyak le.
2CO 4:12 Handru, ta iri len marakon ahi atiye sahou mwasin, ma iri lau none ta adai ahi aposel kamak. Arile, lakou doh ja atehei kohan handru ta udu le buku doh ewek taha.
2CO 4:13 Udu bolo buk Wari ta bolo buk ndrabun, ndramak ari torowenei i buku doh, “Jo atehei budon tek handru, Kindrei kameh in hamon le ta sahou tan. Eme ma, jo asehek iy ili tiri mwan ma badih.” Ahi aposel ale, budon tahi i buku le ta ndramak doh. Eme ma, ahi badeh, atiye sahou mwasin ta Laban.
2CO 4:14 Tasah ahi badeh, ndratanan, Kindrei mene mete-ei Laban Jises imek udu bolo lek eme awas ja. Eme ma, iy kameh mete-ei ahi ale hawe Jises, ma tiyani ahi hawe aha ala kandrah, ma ado hawen.
2CO 4:15 Iri lakou ndra-in doh mene asahan tahi ta aseben aha. Udu hamon, so-ok ma tikisiy ta Kindrei andrei iri mwan ma badih solo-an labai ame hamon ja, iri kameh winiyan adeu wurah amwenen ili ta Kindrei, ma iri winiyan atudun nyaran.
2CO 4:16 Ahi abudon ta lakou doh kameh asahan. Eme ma, ahi bawoyah ta amekes gok ta Kindrei bwe. Idoh handru, oda ahi sudi boto-on ta nyamu iri, ma hamon kameh iri andra-i. Arile, ndri-iy ai, kohan mwasin Kindrei edeu eme tahi, iy bwidiy asahan ha-un mara-ei ta iri len ari, ari.
2CO 4:17 Iy i buku doh: Iri maha-an marakon badeh, abo gok ta sokoso-ou ahi, iri ta len ranah le, ma tinan handru bwe. Arile, lakou doh lokowani ahi ta akohok manyah mwasin udu kandrah. Ma manyah udu kandrah doh kameh udu bwele-en labai tiri maha-an marakon doh nane asahan tahi.
2CO 4:18 Eme ma, ahi babudon solo-an ta iri lakou marakon doh, ahi winiyan anyolom na mada ahi amwenen, bwe. Ahi atehei budon tahi ili tiri lakou ahi winiyan banyolom udu kandrah bwe. Tasah, iri lakou taha winiyan anyolom na mada taha, idoh kameh ano. Arile, iri lakou udu bolo kandrah, kameh ta udu le buku doh.
2CO 5:1 Ehe, taha atehei budon tataha ta lakou udu bolo kandrah. Tasah, taha ndratanan anya: Hamon, buku bada taha nane kada-ah kameh imek ma andra-i, Kindrei anya kedeu ari ja keme tataha. Idoh badeh, basahan ta kandriyen ta mwan ma badih tasou a-en hamon ta aliy bwe. Kindrei le amwenen kameh amekes udu bolo kandrah kodo-oh, ma iy kameh ta udu le buku don ai.
2CO 5:2 Taha badeh, ndrawoyah ta bada taha nane kada-an ai. Eme ma, taha tikisiy labai ta anya kakohok bada taha badu kandrah doh, kasini kili bwele-e taha i buku ndramak isin awin in bwele-en.
2CO 5:3 Tasah, taha amak badeh, taha baso-ok malawi bada taha ere laleyah.
2CO 5:4 Handru labai, taha lau marakon badeh, bada taha i buku asiu balei. Taha aden, tasah ta maha-a iri sisi-in taha bwese. Taha bala bwale bada taha badu munyak nane dah bwe. Arile, taha badeh, aso-ok bada taha ari ja ha-un nane Kindrei ndratandrakan ta edeu eme tataha, tasah bada taha doh kameh imek ma tubuni iy ja, ma akohok kohan ta ere le buku doh, ma iy winiyan bamak ja bwe.
2CO 5:5 Kindrei le ari badeh, ndralokowani taha ta akohok koha taha ha-un doh. Ma iy ndratehei Malawin Ndrabun ndrame tataha. Handru labai, Malawin Ndrabun, iy i buku sahou tandrakan ta Kindrei, ta iy kameh edeu iri lakou hamon, iy mene tiye ta edeu eme ta taha.
2CO 5:6 Eme ma, ndri-iy ta saba lakou kameh asahan. Taha banoh ta aliy bwe. Taha tanan bada taha na idah i buku asiu taha ado aliy are kon munyak dah. Na bolo len dah, taha bado hawe Laban bare kon tan bwe.
2CO 5:7 Ya, na idah badeh, taha ndratanan iri lakou marakon doh handru. Taha banyolom bwe le, arile taha atehei budon tataha tinan labai, iri atondrok taha are bolo kandrah.
2CO 5:8 Eme ma, taha banoh ta amak bwe. Ta budon tataha, idoh mwasin. Tasah, buku taha amak ma ruwani bada taha doh, taha kameh are hawe Laban ado kati kon handru.
2CO 5:9 Eme ma, buku taha ado hawen are kati kon handru, o, taha are len kahis le, ndri-iy ai; len marakon badeh, taha abudon boto-on labai ta amekes iri kandriyen marakon, Laban aso-ok.
2CO 5:10 Tasah taha tanan, hamon kameh taha marakon ales are ta mada sahou ta Krais, ma iy kameh tunuhun iri lakou marakon taha amekes bwena ndra-au. Eme, buku taha ndramekes kandriyen mwasin na bolo iri len doh, taha are ndra bada taha malen kahis, o taha mene amekes kandriyen ndra-in kahis, idah kameh taha ari, ari akohok sihine taha ili le winiya kandriyen nane taha amekes bwena ndra-au.
2CO 5:11 Taha ndratanan, hamon kameh Krais aleben iri lakou marakon taha amekes mwena ndra-au. Eme ma taha anoh tinan labai, eme ma ahi amekes gok ta ariu budon tiri mwan ma badih katehei budon tiri kili le ta sahou mwasin. Kindrei badeh, tanan budon tataha ma iy tanan ndrine taha handru. Eme ma, ahi atehei budon tahi i buku doh: Aha mwan ma badih badu kon Korin tanan, ahi bamekes kandriyen ta wendreya bawek taha bwe.
2CO 5:12 Ta sahou dah badeh, ahi batudun nyara ahi ja bwe, ya aha winiyan abudon, ahi badeh, lau mwasin, bwe. Ahi torowenei iri sahou dah ta aha kasekesek ahi. Eme ma, aha kameh winiyan atanan ta ndremenya ta sahou tiri mwan ma badih asehek, “Ndramak ki konen, ma bohon ki boto-on ta asehek sahou nyaman handru.” Lau mwan ma badih abudon i buku doh, iri batehei budon tiri bala tiri kandriyen nane iri lau mwasin amekes bwe.
2CO 5:13 Buku jo ibo lolo-ou buku iri mwan ma badih rayah nane asehek, jo anya, ndri-iy ai, jo kamekes le gok ta Kindrei, ma jo kasahan lolo-ou! Arile, ahi lau mwasin, ma ahi amekes gok ta aseben aha ka-en hamon ta sahou mwasin ta Kindrei.
2CO 5:14 Iri lakou marakon ahi amekes badeh, ta aseben ahi bwe. Tasah, tikisiy hawe so-ok ta Krais badeh, tutuni ahi ta amekes gok tan. Tasah, ahi ndratanan ta lakou ari le dah: Ndramak ari le tubuni taha ma iy ndramak, ma idoh i buku taha marakon amak ta iri lakou taha amekes mwena.
2CO 5:15 Handru labai, iy ndratubuni taha marakon, ma iy imek. Iy amekes i buku doh, ta taha mwan ma badih kameh akohok koha taha nane ha-un doh, taha sabudon taha le amwenen, ma sa-en hamon ta so-ok tataha, na len taha are ndra kon munyak dah. Arile, taha katehei budon tataha kili ta Krais le ari, iy mene tubuni taha, ma iy imek, ano iy amak eme awas ja. Eme ma, taha ka-en hamon ta kandriyen, iy amwenen aso-ok.
2CO 5:16 Mwasin labai, na dah badeh, ahi ndrasahan lau ta Kindrei. Eme ma, ahi ba-en hamon ta kandriyen ta ndrine ahi malen mene ja bwai, ma ahi baleben koha ari mwan o badih an hamon ta budon tiri solo-an nane are kon munyak amekes, bwe. Handru labai, bwena mene ahi a-en hamon ta budon badu kon munyak dah, ma i buku taha tunuhun Krais. Arile, nadah badeh, ahi ndratanan, iy are lau handru, ma ahi bamekes ja bwai.
2CO 5:17 Ya, bolo len dah, are lau mwan o badih, atehei budon tiri mara-ei in ta Krais, badeh, Kindrei ndrabwidi iri ndrasahan ha-un labai. Eme ma, kandriyen malen bwena ndra-au mara-ei, ma kandriyen mwasin ha-un ndrasahan.
2CO 5:18 Kindrei le amwenen, kati iri lakou marakon doh. Bwena mene ahi ta amekes bahun i tan, arile na gok Krais amekes, Kindrei aseben ahi asahan mwasin hawen. Ma iy edeu gok dah eme tahi ta aseben iri mwan ma badih rayah ame asahan mwasin.
2CO 5:19 Sahou ahi asehek tiri i buku doh: Ta gok Krais ndrabwidiy, Kindrei ibo gok ta ariu iri mwan ma badih karuwani kandriyen ta bahun, ma kasahan kawas tan ma kamanyah mwasin. Eme ma, iy babudon ja ta iri ndra-in nane iri mwan ma badih amekes bwe. Ma iy edeu gok eme tahi ta atiye sahou tan dah, ma bwidi bahun kano, ma iri mwan ma badih kasahan mwasin ja hawen.
2CO 5:20 Eme ma, ahi akohok boho Krais ma atiye sahou tan. Idoh, i buku Kindrei le amwenen aloh ili tiri lau na boho ahi. Ahi badeh, asehek sahou ta Krais amwenen ili tiri mwan ma badih, ma tiye tiri i buku doh: “Mwasin ta aha karuwani kandriyen ta bahun ma aha kasahan kawas ta Kindrei.”
2CO 5:21 Iy Krais doh, iy tanan ta amekes kandriyen ndra-in bwe, arile Kindrei ndratukumwi kandriyen ndra-in tataha marakon ndrala le bwele-en, ma iy asahan i buku ari ndramak ndra-in handru. Iy amekes i buku doh, ta taha winiyan are hawe Krais, ma na le boto-on tan amwenen, taha winiyan asahan iri mwan ma badih mwasin ta mada Kindrei.
2CO 6:1 Ahi aposel badeh, abo gok hawe Kindrei, ma ahi tiye sahou boto-on ewek taha i buku doh, “Aha badeh, ndrakohok tikisiy ta Kindrei. Eme ma, kora-on aha karuwani laleyah.
2CO 6:2 Tasah, Kindrei tiye udu bolo buk ndrabun i buku doh, “Jo anuhun ndrelen taha ma jo mene aseben aha ta len jo ndratehei ta amekes i buku doh. Ehe, jo mene aseben aha udu ta len jo ndratehei ta akohok iri mwan ma badih ame hamon.” Aha kanuhun! Na dah, len mwasin handru ta Kindrei anya kaseben iri mwan ma badih. Ehe, na len dah ale len ta Kindrei anya kakohok taha mwan ma badih kame hamon kado hawen.
2CO 6:3 Ahi aposel badeh, baso-ok iri mwan o badih kameh bobose gok tahi dah bwe. Eme ma, ahi ba-en hamon ta kandriyen nane ale amekes iri mwan o badih andra-i ma tebelese hawe ahi bwe.
2CO 6:4 Ta iri lakou marakon ahi amekes, ahi badeh, leheya iri mwan ma badih i buku ahi lohowan ta Kindrei handru. Eme ma, bolo len marakon ahi ales boto-on labai ta iri maha-an solo-an anya kasahan tahi. Ma ale iri lakou rayah anya kamekes ahi kandra-i, arile ahi atadau ahi boto-on.
2CO 6:5 Iri lau adai ahi ma atehei ahi ala bolo asiu lulik. Iri tikahei ahi ma luhani ahi. Ahi awoyah ta amekes gok solo-an labai ma bwidi ahi bamadin bamwenen bwe. Na len rayah badeh, ahi ameson ta nahi nyamon bwe.
2CO 6:6 Ahi leheya iri mwan ma badih buku ahi badeh, lohowan ta Kindrei ta idoh: Ahi badeh, a-en hamon ta kandriyen, ari lakou winiyan basahan ta aliy bwe, ma ahi tanan ta sahou mwasin ta Laban. Ndrine ahi winiyan bato-ou ta losen suwi bwe. Ahi abo gok ta amekes kawas hawe iri mwan ma badih, ma Malawin Ndrabun badeh, aseben ahi ta amekes iri lakou doh. Ma ahi ale badeh, amekes iri kandriyen handru ta aso-ok iri mwan ma badih. Na boho ahi laleyah bwe, ahi aseben iri handru.
2CO 6:7 Ahi badeh, asehek sahou handru, ma amekes iri gok na le boto-on ta Kindrei. Ma ahi ale a-en hamon ta kandriyen mwasin, ma idoh leheya i buku beteleu ma nyekelen ahi tawiy ta amekes bahun.
2CO 6:8 Iri mwan ma badih rayah badeh, atudun nyara ahi, ma amekes sahou mwasin eme tahi. Arile, iri sahou rayah badeh, bamwenen tahi bwe, ma bwidi nyara ahi andra-i. Iri anya ahi lau ta wendreya. Arile, bwe. Ahi badeh, asehek le sahou handru.
2CO 6:9 Iri lau rayah anya, ahi badeh, lau laleyah, arile iri anuhun nyara ahi, ma iri tanan ahi badu heh handru. Ahi badeh, anya ki buku ari ndramak iri atehei sa-oh ta adai iy. Arile, ahi bamak bwe. Handru labai, iri badeh, abo gok ta sokoso-ou ahi, arile lakou doh badai ahi bamak bwe.
2CO 6:10 Ahi badeh, atona maha-an solo-an labai, arile idoh kameh winiyan basani sekesek tahi bwe. Ahi bateu lakou solo-an badu kon munyak dah bwe, arile ahi adeu lakou ili tiri mwan ma badih ta aseben budon tiri handru kabadok. Ya, ahi badeh, bateu ari lakou bado mine ahi ja bwe. Ahi badeh, tawi iri lakou solo-an labai badu kon ta Kindrei.
2CO 6:11 Aha kawas tahi badu kon Korin. Aha kanuhun. Ahi anya kasehek kaleu kewek taha. Ahi badeh batone budon tahi bawek taha bwe. Ahi badeh, aso-ok aha labai.
2CO 6:12 Ahi batone ndrine ahi taha bwe. Ahi badeh, aso-ok aha tinan labai. Aha amwenen badeh, tone ndrine aha, ma taha bado mwasin bwe.
2CO 6:13 Eme ma, jo anya kasehek taha i buku ndramak ari asehek ta nadun oro: Ado kasihi ndrine ado ma kaso-ok ahi i buku ahi aso-ok ado tinan labai.
2CO 6:14 Aha lau ta Kindrei, aha sadek hawe iri lau, tana iri Kindrei bwe, ma aseben iri ta a-en hamon ta kandriyen tiri le. Tasah, iri randrah labai. Kandriyen mwasin ma kandriyen ndra-in uru badeh, kawas turu bwe. Len hawe lulik, uru winiyan basahan le rasan bwe.
2CO 6:15 Barala buku sah handru, sohowa Krais uru balik, kili le randra? Sebwe, winiyan bwe! Eme ma, iri lau ta Kindrei, ma iri lau mwan ma badih nane batehei budon tiri ba-en ta Kindrei bwe, iri badeh, winiyan bamekes budon ma kandriyen tiri bala le ari bwe.
2CO 6:16 Kili buku sah bah? Sebwe taha badeh, katehei asiu ndrok ta Kindrei, hawe asiu ta asumwe iri sukumada kei kili le ra-em, nadeh? Sebwe kameh winiyan bwe-en! Ma aha tanan, taha lau ta Kindrei, taha amwenen badeh, asahan buku asiu ndrok ta Kindrei kohan udu aliy, ta udu le buku doh. Ma iy winiyan manyah mwasin udu bolo asiu doh. Bwena mene Kindrei tiye i buku doh, “Jo kameh udu hawe iri ma edek bolo iri. Ma jo kameh asahan Kindrei tiri, ma iri kameh asahan iri lau tek.”
2CO 6:17 Eme ma, Laban tiye taha lau mwan ma badih tan amwenen, “Aha badeh, karuwani iri lau, tana iri Kindrei bwe. Ma aha sa-en hamon ta kandriyen tiri. Ma aha kare ndralen ta kandriyen ndra-in. Eme ma, jo kameh sekesek tinan labai ta akohok aha ame ado hawek.”
2CO 6:18 “Ma jo kameh asahan tama aha, ma aha kameh asahan naduk iri handru. Laban badeh, iy kati iri boto-on mari; iy amwenen asehek i buku doh.”
2CO 7:1 Aha kawas tek handru, Kindrei edeu iri tandrakan doh eme tataha. Eme ma, taha badeh, karuwani iri kandriyen ndra-in ale taha amekes na bada taha o na budon tataha. Ya, taha badeh, kasahan ha-un mara-ei. Taha badeh, katehei budon tataha kili ta Kindrei, ma katehei koha taha mara-ei kili le tan, tasah taha anoh iy.
2CO 7:2 Aha badeh, kaleheya buku: Aha aso-ok ahi labai! Ahi bamekes ndra-in bawek taha bwe. Ahi babokoro-ei aha bwe. Ma ahi bawahei budon taha ta akohok lakou taha eme tahi, bwe.
2CO 7:3 Jo amekes sahou dah ta edeu aha ala ta mada sahou bwe. Tasah, ahi ndrasehek i buku doh: Ahi aso-ok aha tinan labai, eme ma, buku aha amak, ndrine ahi ale badeh, imek hawe aha. O, i buku aha bamak bwe, ahi kameh sekesek ta are hawe aha.
2CO 7:4 Jo asehek amwenen ewek taha. Jo ale batone ari sahou bwe. Jo badeh, sekesek taha, ma atudun nyara aha ta kandriyen aha a-en hamon ta aliy. Ta iri maha-an asahan tahi, jo badeh, abudon aha ma atehei budon in taha, ma idoh bwidi ndrinek amunum, ma jo sekesek tinan labai.
2CO 7:5 Ehe, idoh handru. Na len aso ala asahan bada kon tinan Masadoniya, manyah taso bado mwasin bwe. Tasah, maha-an solo-an labai asahan taso. Ma loboho doh ale, iri mwan ma badih rayah ame tebelese hawe aso, ma bwidi ndrine aso inoh.
2CO 7:6 Kindrei le adeh, bwidi ndrine iri mwan ma badih amunum mara-ei. Ya, na bolo len doh badeh, iy ale bwidi san ta Taitus eme isos hawe ahi, ma idoh bwidi ndrine ahi amunum ale.
2CO 7:7 Ahi anyolom madan, ma bwidi ahi sekesek labai. Tasah, iy asehek nyala ahi ta iri lakou aha amekes i tan. Ma idoh ale bwidi ndrinen amunum mara-ei. Ya, iy asehek tahi ale ta aha aso-ok labai ta anyolom jo, ma ndrine aha eden, ma aha abudon solo-an labai ta manyah mwasin hawek. Eme ma, bwidi jo sekesek tinan mara-ei.
2CO 7:8 Jo tanan, la-ukei mene jo atorou ndrawek taha badeh, bwidi ndrine aha tikisiy. Bwena mene jo tikisiy labai, arile na len dah, jo batikisiy ta jo mene atorou ewek taha bwe. Jo tanan la-ukei badeh, atehei maha-an ma bwidi bwilima ewek taha, arile badeh, ta ere luluwen bwe.
2CO 7:9 Arile, nadah jo ndra sekesek labai. Tasah, tikisiy taha ma iri maha-an doh ja badeh, bwidi aha tubuni ndrine aha asahan mwasin mara-ei. Kindrei le amwenen badeh, atehei iri lakou marakon doh ewek ndrine aha. Eme ma, la-ukei nane jo atorou ewek taha babokoro-ei aha bwe.
2CO 7:10 Idoh handru, iri maha-an ale Kindrei atehei udu bolo ndrine iri mwan ma badih badeh, ta leheya iri ta tobolowe ndrine iri, ma Kindrei winiyan akohok iri ame ta manyah mwasin. Ma are mwan o badih edek san doh winiyan batikisiy ta aliy ja bwe. Arile, maha-an ma bwilima kameh asahan ta ndrine iri lau badu kon munyak. Idoh kameh edeu imek ili tiri le kabwe.
2CO 7:11 Aha kanyolom saba lakou handru Kindrei amekes ta maha-an taha! Iy leheyani kandriyen mwasin ewek taha. Ma iy andrekei aha suwi, suwi, ma aha abo gok boto-on handru ta amekes mondrei ta sahou doh, ma leheya ahi buku, aha ari kandriyen ndra-in ja bwe. Eme ma, aha ato-ou ala ma tebelese hawe iy ndramak nane amekes ndra-in. Aha abwerei labai, kora-on maha-an kasahan ja. Ndrine aha badeh, eden labai ta anyolom ahi, ma aha abudon boto-on labai ta aseben iy ndramak nane amekes ndra-in ewek taha akohok budon mwasin ja. Kandriyen taha leheya ahi buku, nyala aha i le randra, eme ma, iri lau winiyan bato-en aha ta ari lakou bwe.
2CO 7:12 Jo mene atorou la-ukei doh ewek taha, jo batehei budon bala ta iy ndramak nane amekes ndra-in ewek taha bwe. Ma jo ale babudon boto-on ta ndramak akohok andra-i bwe le. Katin ta jo atorou la-ukei mene badeh, i buku doh: Jo anya kaleheya aha amwenen, buku aha badeh, aso-ok ahi labai, ma aha a-en hamon ta boho ahi. Eme ma Kindrei tanan iri lakou mara-ei dah.
2CO 7:13 Lakou le dah badeh, bwidi ndrine ahi amunum mara-ei, ma bwidi ahi sekesek tinan labai! Tasah, Taitus asehek tahi ta kandriyen aha amekes i tan, ma bwerei tan ano mara-ei.
2CO 7:14 Mwena mene ahi atudun nyara aha na len ahi asehek sahou hawe Taitus. Eme ma, ta kandriyen aha amekes i tan badeh, leheya Taitus ta sahou tahi ewek taha mara-ei badeh, ndra handru le ai. Eme ma, bwili ahi bama ta sahou nane ahi amekes bwai. Len mara-ei badeh, ahi a-en le hamon ta sahou handru ma kandriyen taha leheya i buku doh: Ahi badeh, atiye sahou handru.
2CO 7:15 Taitus asahan hawe aha, ma aha anoh ma totoreh, eme ma aha andrei iy ewek hawe aha ma anuhun sahou handru udu bohon. Eme ma, aha a-en hamon tiri lakou marakon nane iy tiye aha ta amekes. Iy abudon i hamon ja, ma iy aso-ok aha tinan labai.
2CO 7:16 Nadah jo sekesek! Tasah, jo atehei budon tek mara-ei badeh, ta aha kameh winiyan amekes kandriyen mwasin ta lakou mara-ei.
2CO 8:1 Aha nadu tine aso i san ta Krais. Aso anya katiye tanan ta kandriyen mwasin ma tikisiy, Kindrei mene edeu ili tiri lau tan, mwan ma badih, are bada kon Masadoniya.
2CO 8:2 Maha-an laba tinan labai asahan tiri ta none budon ma tekedek tiri. Arile, iri badeh, sekesek handru labai. Na bolo len dah badeh, tiri lakou bwe, ma iri asahan buku nadu nyohan. Arile, iri abudon iri lau ta Kindrei rayah, ma iri tukumwi luk solo-an labai, ta aseben iri lau rayah ja.
2CO 8:3 Jo badeh, ndratanan, ma jo asehek amwenen ewek taha: Iri badeh, a-en hamon ta tanan ma so-ok tiri le ta adeu luk doh. Lakou tiri badeh, udu aliy, ta iri anya kadeu. Ehe, ma iri suriy labai, ma iri adeu ranah ili bwele-en ja.
2CO 8:4 Iri abadok labai ta ndremenya ahi kaso-ok ta iri kabo gok hawe iri mwan ma badih ta atukum luk, ma aseben iri lau ta Kindrei are bada kon loboho Judiya mara-ei.
2CO 8:5 Bwena badeh, ahi anya, iri kameh adeu rayah luk ta aseben iri lau ta Kindrei rayah badu Jerusalem. Ma iri bamekes bala buku aliy le bwe. Iri amekes kandriyen mwasin udu bwele-en labai ja. Ma bwena iri asehek ta sahou tandrakan ta iri ka-en hamon ta so-ok ta Laban ta lakou mara-ei. Ano, udu hamon ja, iri tiye ahi i buku doh, iri kameh a-en hamon ja tiri sahou ahi asehek tiri, ya iri amekes doh in hamon ta so-ok ta Kindrei le amwenen.
2CO 8:6 Bwena mene Taitus ewek orowei ndrine aha ta aha katukum luk, ma kaleheya tikisi taha ili tiri lau mwan ma badih ta Kindrei rayah ja. Eme ma, ahi abadok ta iy kewek hamon ja kaseben aha kabwidi iri gok doh kano mara-ei.
2CO 8:7 Ta iri lakou mara-ei doh, aha badeh, amekes kandriyen mwasin labai. Ma aha atehei budon taha tinan labai in ta Kindrei. Aha badeh, amekes lahou boto-on labai ta atiye budon dah. Tanan taha solo-an labai, ma aha ale boto-on ta amekes gok ta Kindrei. Ma aha aso-ok ahi ale. Mwasin, aha badeh, ka-en le hamon ta kandriyen mwasin ta atukum luk, aha ndratehei katin bwena.
2CO 8:8 Jo batiye ta aha katukum luk ma kadeu bwe. Jo asehek ta gok dah, iri lau ta Kindrei mwan ma badih badu kon tinan Masadoniya, iri sekesek ta amekes. Tasah, jo anya kanone aha, ma jo anya ki tanan tikisiy taha handru, o boho aha le.
2CO 8:9 Aha ndratanan Laban tataha Jises Krais, iy tikisi taha marakon tinan labai. Ma iy tawi lakou solo-an. Arile, ta aseben taha, iy ruwani iri lakou mara-ei doh, ma iy asahan buku ndramak laleyah tan ari lakou bwe. Ma iy asahan buku nadu nyohan, ta aseben aha akohok lakou solo-an, Kindrei anya kedeu kewek taha.
2CO 8:10 Ya, ta nyala luk ta salom, jo anya kasehek budon tek kewek taha. Na bolo jaha mene ndra-au on, aha badeh, atudun gok dah, ta atukum luk ta salom. Ma jo kasehek taha buku doh: Aha kabwidi gok dah kano mara-ei op. Tasah, aha badeh, asahan lau ma mwena handru are mwena ta budon ta gok dah, ma ta amekes.
2CO 8:11 Ya, nadah, aha kabwidi gok dah kano mara-ei. Aha ale kasekesek ta amekes gok dah kano mara-ei, i buku aha ma mwena mene sekesek ta atudun. I buku luk taha sabe udu aliy, mwasin, aha kakeh ki-in hamon ta so-ok ma tanan taha.
2CO 8:12 Buku aha aso-ok labai ta adeu lakou, mwasin, Kindrei aso-ok kandriyen badeh. Iy babudon ta lakou aha andriliu ta aliy, bwe. Iy abudon ta lakou badu bolo lokowa aha amwenen, ma iy sekesek le ta ndramas doh aha adeu.
2CO 8:13 Jo batiye ta edeu maha-an ewek taha ta aseben iri mwan ma badih rayah winiyan manyah ado mwasin bwe. Arile, na bolo len dah, aha bandriliu ta ari lakou bwe. Ya, iri lau ta Kindrei rayah badu Judiya badeh, iri ari lakou bwe mara-ei. Eme ma, idoh mwasin, buku hamon aha ado ndra-in, ya, iri ado mwasin ja; iri kameh winiyan abudon ma aseben aha ja. Ta kandriyen doh le, taha mara-ei kameh winiyan manyah ado mwasin.
2CO 8:15 Ya, buk ndrabun tiye i buku doh: “Iri lau ale atukum nyamon solo-an, niri nyamon kameh solo-an bwe. Ya, iri lau atukum nyamon solo-an bwe, niri nyamon kameh solo-an labai.”
2CO 8:16 Jo edeu wurah i ta Kindrei. Iy bwidi ndrine Taitus ato-ou ma iy abudon buku le ahi. Iy ale aso-ok ta aseben aha.
2CO 8:17 Eme ma, iy anya “mwasin” udu bada ahi ndremenya iy ta ewek atou aha. Iy abudon boto-on labai ta ewek, ma iy alokou iy ta ndremenya, buku ahi kaso-ok ta iy kewek.
2CO 8:18 Ahi tiye lau ta Kindrei ari ta ewek hawe Taitus ale. Ta bolo iri lau ta Kindrei mara-ei badeh, nadu tine taha ari le doh, iy nyaran udu aliy ta atiye sahou mwasin.
2CO 8:19 Idoh handru, arile sahou solo-an kahis. Iri mwan ma badih ta Kindrei kada-ah, atehei iy ta edek hawe ahi, ma aseben ahi ta amekes gok ta atukum luk ta salom. Ahi amekes gok dah ta atudun nyara Laban, ma ta leheya iri mwan ma badih ta Kindrei, budon tahi badeh, tinan labai ta aseben iri.
2CO 8:20 Ahi baso-ok ari mwan o badih aluhe kandriyen nane ahi amekes ta atondrok ndramas laba tinan dah, ja bwai. Eme ma, ahi atehei nadu tine taha ari doh, ewek hawe Taitus.
2CO 8:21 Tasah, ahi anya kamekes kandriyen mwasin, Laban aso-ok, ma iri mwan ma badih badu kon munyak mara-ei kanyolom ale.
2CO 8:22 Ahi atehei nadu tine taha lau ta Kindrei ari ewek hawe uru ale. San solo-an ahi none iy ta iri gok mara-ei, ma ahi anyolom iy boto-on handru ta amekes iri gok doh. Nadah badeh, iy atehei budon tan boto-on handru, buku aha kameh amekes kandriyen mwasin ma atukum luk. Eme ma, iy abadok labai ta ewek hawe uru ta aseben uru ma ta amekes gok dah ale.
2CO 8:23 Ya, oro lau ma taloh kameh awek atou aha. Taitus badeh, aha tanan iy ai. Iy badeh, badu hawek handru en, ma aru amekes gok randra le, ta aseben aha. Ma nadu tine taha uru nane badeh, badu dah amwenen. Aha kameh winiya atanan uru ale. Uru badeh, amekes gok tiri mwan ma badih ta Kindrei badu kon dah, ma uru atudun nyara Krais na gok uru amekes.
2CO 8:24 Eme ma, aha kaleheya oro buku aha aso-ok oro tinan labai. Aha katondrok oro ma kaseben oro. Eme ma, iri lau ta Kindrei badu dah kameh winiyan anuhun ma atanan, aha aso-ok oro handru. Ma aha aso-ok nadu tine taha iri mwan ma badih ta Kindrei badu kon mara-ei. Ma iri kameh atanan ahi ta asehek sahou laleyah, ma sekesek laleyah ta gok aha amekes, bwe.
2CO 9:1 Aha ndranuhun ma ndratanan ta ndramas, ahi bwese anya kili ta aseben iri mwan ma badih ta Kindrei. Eme ma, jo batorou sahou lawe-en ta nyala aliy bwe.
2CO 9:2 Tasah, jo ndratanan, aha badeh, aso-ok ta amekes gok dah, ta atukum ma adeu luk ta aseben iri. Eme ma, len mara-ei jo atudun nyara aha, ma tiye iri lau ta Kindrei badu kon tinan Masadoniya. Jo tiye tiri i buku doh: “Na jaha mene ndra-au, iri lau badu Akaya lokowani iri ta amekes gok ta atukum luk.” Ma iri anuhun sahou ta aha amekes gok dah ta aseben iri lau badu Judiya, ma suri ndrine iri lau solo-an badu Masadoniya amekes ale.
2CO 9:3 Arile, jo bwalek sahou ahi amekes ta atudun nyara aha asahan buku sahou laleyah. Mwasin ta aha kalokou le, buku jo mene asehek tiri. Jo abudon ta aliy, eme ma jo tiye nadu tine to oro awek hawe aha.
2CO 9:4 Ehe, ahi abudon handru, aha kameh alokou ta adeu lakou. Eme ma jo abudon, kora-on iri lau ta Kindrei rayah badu Masadoniya kala hawek ale ta atou aha, ma aha balokowani luk bwe, bwilima kameh eme hamon ta to ja.
2CO 9:5 Eme ma, jo abudon ta tiye nadu tine oro ma taloh doh kawek kasahan hawe aha kalokowani ndramas nane aha tandrakan ta adeu ili. Jo kameh in hamon ewek, ya buku iri lau kame hawek iri winiyan atanan, aha amwenen sekesek ta adeu luk doh. Bala buku jo ewek ariu budon taha, ma bwili aha ama ta atukum luk doh.
2CO 9:6 Ya, aha kabudon kamwenen ta sahou dah: Ndramak batah nyamon sola bwe, iy kameh bakohok sali nyamon solo-an bwe. Ya, ndramak atah nyamon solo-an, iy kameh akohok sali nyamon solo-an.
2CO 9:7 Eme ma, aha ari, ari kabudon ndrinem le amwenen op, ma ou tanam ta saba lakou, aha anya kadeu. Kora-on ari mwan o badih, ndrinen basekesek ta edeu lakou bwe, ma iy abudon i buku doh: “Iri mwan ma badih abadok labai ma aruwi jo, ma bwilik ama buku jo badeu rayah luk bwe.” Kora-on iri budon solo-an doh udu taha, ma aha adeu luk. Kindrei badeh, aso-ok ndramak, iy sekesek ma edeu lakou na so-ok ma na budon tan amwenen.
2CO 9:8 Ma Kindrei kameh winiya edeu taha lakou solo-an handru. Ma aha kameh taha lakou solo-an labai ja, ta winiyan aseben manyah taha. Ma lakou solo-an doh kameh udu aliy ta aseben aha ta amekes iri gok mwasin.
2CO 9:9 Udu bolo buk ndrabun, Kindrei asehek i buku doh: “Iy ndramak dah badeh, edeu lakou solo-an labai ili tiri lau ndra-in, Kindrei winiyan bamani budon tiri lakou mwasin nane iy amekes bwe, ma iy kameh nyosowani iy ta udu le buku doh.”
2CO 9:10 Kindrei amwenen kameh edeu buwa kei ta atah ili tiri mwan ma badih. Ma iy ale kameh edeu nyamon ili niri mwan ma badih mara-ei. Eme ma iy kameh edeu taha lakou ili le winiya aha. Ma aha winiyan adeu ili tiri lau ta Kindrei rayah ja. Ma kandriyen taha kameh asahan mwasin mara-ei, i buku ndramak atah buwa kei, ano ato-ou salin solo-an labai.
2CO 9:11 Ya, Kindrei kameh edeu lakou solo-an ewek taha, ma aha kameh winiyan adeu solo-an ale ili ta nadu tine aha iri mwan ma badih ta Kindrei. Aha amekes i buku doh ta ahi bwese ndramas doh iu, ma iri mwan ma badih kameh adeu wurah ili ta Kindrei ta gok aha amekes.
2CO 9:12 Sahou mara-ei dah handru. Gok aha amekes ta adeu luk, kameh aseben iri lau rayah ta Kindrei, iri lakou bwe. Ma idah kameh bwidi iri adeu wurah tinan labai mara-ei ili ta Kindrei.
2CO 9:13 Gok aha amekes dah ta aseben iri lau mwan ma badih ta Kindrei, kameh leheya i buku doh: Aha badeh, aso-ok labai ta aseben iri lau rayah ja. Eme ma, iri kameh atudun nyara Kindrei. Tasah, iri kameh atanan aha badeh, a-en hamon le ta sahou ta Kindrei, ma atiye sahou mwasin ta Krais. Ma ale, udu bolo iri lau ta Kindrei badu Judiya akohok ndramas dah, ma iri kameh winiya atanan aha anya kadeu luk ta aseben iri rayah ale. Iri kameh atudun nyara Kindrei iu ili loken mara-ei.
2CO 9:14 Ma iri kameh atanan Kindrei badeh, amekes kandriyen mwasin labai handru ewek taha. Eme ma, iri kameh aso-ok aha labai, ma iri winiya asolom ili ta Kindrei, iy edeu nyosowan laba tinan ewek taha.
2CO 9:15 Ndramas, Kindrei edeu eme tataha badeh, tinan labai, ma taha winiyan basehek na boho taha bwe. Taha badeh, kadeu wurah kili ta Kindrei ta ndramas tan.
2CO 10:1 Jo Pol, jo ndramak nane iri lau rayah taha asehek nyalak anya, “Pol kede-eh, iy inoh buku iy asehek sahou udu hawe taha, arile iy ja winiya banoh ta asehek sahou boto-on eme tataha ja bwe, buku iy iu ili len.” Ya, aha kanuhun! Krais badeh, batudun nyaran amwenen bwe, iy ta amekes le kandriyen mwasin. Eme ma, ta katin doh le, jo anya kandremenya aha:
2CO 10:2 Jo tiye taha ta len buku jo ewek, jo kameh winiyan asehek sahou boto-on labai ewek taha, arile jo bwalek amekes ai. Arile, jo kameh winiyan amekes ili tiri mwan ma badih nane orou sahou eme badak, anya jo badeh, ba-en hamon ta kandriyen ta Kindrei bwe, ta munyak le.
2CO 10:3 Handru, taha manyah ado kon munyak dah buku lau laleyah, arile ta bahun dah, taha atik balik ili andri, ahi bakohok ari lakou badu munyak ta amekes bahun doh, bwe.
2CO 10:4 Ahi badeh, bakohok boto-on ta lakou badu munyak bwe. Ahi badeh, adek na le boto-on ta Kindrei, ta adi boto-on ta balik mara-ei ano iu.
2CO 10:5 Boto-on ta Kindrei le winiya sani sahou tebelese tiri lau anya kamekes, ma iri budon mara-ei nane turuki san tiri mwan ma badih anya katanan Kindrei. Ma na le boto-on ta Kindrei, badeh, kameh ahi winiyan ta aruwi budon tiri mwan ma badih nane amekes bahun i ta Kindrei, ma katubuni ndrine iri ka-en hamon ta budon ta Krais.
2CO 10:6 Ahi kameh adek na le boto-on ta Kindrei le ai, ta aha kameh winiya anuhun ma a-en hamon ta sahou tan. Hamon kameh, iri mwan ma badih amekes lakou laleyah, ma tebelese sahou. Ahi kameh none boto-on ta Kindrei dah ili tiri, ma adeu kaliu ndra-in ili bwele-e iri.
2CO 10:7 Aha badeh, babudon bamwenen bwe! Aha aleben iri lakou nane aha anyolom badeh, na mada aha le. Ndramak ari, iy ere hawe aha, iy asehek i buku doh, “Jo le ari badeh, akohok boho Krais, ma jo udu bwele-en labai, tiri lau rayah ja.” Ya sahou tek i buku doh: Iy ndramak dah badeh, kabudon ta ndrinen le, ma iy kameh i tanan i buku, jo Pol, jo ale akohok boho Krais.
2CO 10:8 Laban atehei tanan eme tahi ta amekes gok dah. Iy aso-ok ahi katadau budon taha kabadok, ma gok tahi ta sokolowa aha bwe. Eme ma, buku jo sekesek ta atudun nyara ahi sese ta gok ale ahi amekes dah, bwilik kameh winiyan bama ta sahou jo amekes bwe.
2CO 10:9 Arile, jo bwalek atehei budon anya jo atorou iri la-ukei ta nohowa aha.
2CO 10:10 Handru, lau rayah asehek i buku doh eme tek: “Udu bolo iri la-ukei ta Pol badeh, iri sahou solo-an boto-on labai ere aliy, arile buku len iy amwenen asahan ma asehek sahou eme tataha, taha anyolom iy se nyamun bwai, ma iy tanan kandriyen ta asehek sahou bwe le.”
2CO 10:11 Iri lau ale amekes sahou doh, iri kabudon kamwenen ma katanan, buku kandriyen ahi kameh amekes na len ahi awek are hawe aha, idoh kameh in hamon ta sahou ahi torowenei udu bolo la-ukei, na len ahi bare hawe aha bwe.
2CO 10:12 Ahi winiyan basehek ahi a buku le iri lau rayah sekesek ma atudun nyara iri, bwe. Ma ahi winiyan basehek kandriyen tahi i buku le kandriyen tiri bwe le. Iri lau doh badeh, aleben kandriyen tiri na tanan tiri le amwenen. Iy ari, ari aleben kandriyen tan amwenen i hawe kandriyen ta ndramak ari ja. Iri lau amekes i buku doh, iri ari tanan mwasin bwe.
2CO 10:13 Arile, ahi baso-ok ta amekes i buku doh bwe. Ahi kameh atudun le nyara ahi ta iri gok Kindrei atehei eme tahi ta amekes. Kalem le doh badeh, Kindrei lebelei ma iy andromwei eme tahi. Ma aha lau badu kon Korin, aha badeh, are bolo kalem ta gok dah, Kindrei amwenen edeu eme tahi.
2CO 10:14 Kindrei atehei aha ale are bolo kalem ta gok iy edeu eme tahi. Eme ma, jo basakalau kalem Kindrei edeu eme tek bwe, na len jo mene ewek kon Korin ma atiye sahou mwasin ta Krais ewek taha.
2CO 10:15 Ahi batudun nyara ahi ta gok nane iri lau rayah amekes ta kon Kindrei batiye ahi ta ala amekes gok ala aliy bwe. Ahi abudon i buku doh: Budon taha kameh abadok i tinan, eme ma gok nane ahi atehei katin ma mwena udu ndrokowa aha, kameh asahan i tinan mara-ei.
2CO 10:16 Eme ma, nadah jo winiyan ili kon ra-on ja ere len labai taha i loboho an i andri o-on, ta atiye sahou mwasin ta Krais. Arile, jo bwalek ta sakalau kalem nane Kindrei atehei jo ta amekes gok tan, ma atudun nyarak ta gok nane ndramak ari amekes mwena.
2CO 10:17 Kindrei asehek udu bolo buk ndrabun i buku doh, “Are lau iy anya katudun nyaran, iy badeh, katudun nyara Laban le ari ta lakou marakon iy ndrabwidiy.”
2CO 10:18 Tasah, buku are mwan o badih, iri atudun nyara iri le amwenen, bala buku Kindrei abudon kalem udu tiri bwe. Arile, buku Laban le amwenen atudun nyara are mwan o badih, badeh, nyara iy mwan o badih le doh.
2CO 11:1 Na len dah, jo aso-ok aha katehei keme tek ta amekes sahou laleyah op. Aha winiyan atehei deh?
2CO 11:2 Tasah, jo abudon solo-an ta tekedek taha, i buku Kindrei abudon boto-on labai tiri lau mwan ma badih tan, kora-on iri katelei san mwasin. Jo aso-ok aha ka-en hamon handru ta Jises Krais le ari. Jo anya katehei aha kala mine Krais, buku tama badih bihin atik nadun anya kili bahandra mwan tan. Jo aso-ok aha kare le buku badih bihin iy bare bada ari mwan bwe le, winiya le len iy ili bahandra mwan tan nane uru ndra tandrakan ta atasou.
2CO 11:3 Arile, jo badeh, inoh. Jo abudon ta balik ibin i mwak, iy tanan mwasin labai ta kandriyen ta wendreya, ma mwena mene iy ndrawendreya Ip. Kora-on kandriyen ndra-in buku doh, kameh asahan taha, ma aha kameh alelei iri rayah wendreya aha, ma budon taha winiyan bado rasi bwe, ma aha kameh mani Krais mara-ei.
2CO 11:4 Tasah, aha badeh, lau ta atehei budon taha in ta wendreya. Aha winiyan sekesek ma alelei lau rayah, ale asahan hawe aha ma atiye sahou rayah ta Jises, ahi basehek bwe le. Ma iri ale kasehek sahou ta malawi lakou ari ja, sala Malawin Ndrabun mene aha akohok badu mine ahi. Aha winiya anuhun ma a-en hamon ta “sahou mwasin” doh, sala sahou mwasin ta Jises amwenen ahi mene ndrasehek ndrawek taha.
2CO 11:5 Aha kanuhun! Jo amwenen abudon, jo badeh, bare bahandra iri aposel taha nane, aha abudon iri are bwele-en labai, bwe!
2CO 11:6 Handru, bohok badeh, winiyan basehek sahou hawe kandriyen ta andrek bwe. Arile, kandriyen tek ta sahou mwasin badeh, udu bwele-e tanan toro mara-ei ja. Ta iri kandriyen mara-ei ma bolo len mara-ei ahi ndraleheya aha ta iri tanan dah. Eme ma aha ndratanan mwasin labai ta tanan tahi.
2CO 11:7 Udu bolo len mwena jo atiye sahou mwasin ta Kindrei ewek taha, jo bandremenya aha ta luk ta amekes gok dah bwe. Jo amwenen atehei jo ili andri mara-ei ta amekes gok ta atudun aha. Sebwe kandriyen, jo amekes doh, ndra-in nadeh?
2CO 11:8 Jo aso-ok aha katanan. Jo mene akohok luk, ma hawe iri lakou badeh, tiri lau mwan ma badih ta Kindrei rayah labai, ta aseben jo ta amekes gok udu bolo aha. Ta kandriyen i buku doh le bwidi jo ariu lokowa iri lau laleyah.
2CO 11:9 Eme ma, buku bwena mene jo udu hawe aha, jo tek ari lakou bwe, jo batehei maha-an bala ta ari mwan o badih taha bwe. Iri nadu tine taha, iri lau ta Kindrei badu Masadoniya ame asahan Korin, iri badeh, atondrok jo ta lakou mara-ei, buku tek ano mara-ei. Jo badeh, abudon boto-on labai, ta jo bwalek edeu ari maha-an ewek taha ja. Ma jo badeh, in hamon ta budon doh le kahis.
2CO 11:10 Sahou handru ta Krais badeh, udu bolo ndrinek. Eme ma, ta idoh le, jo tiye taha handru ta loboho Akaya mara-ei, ari mwan o badih winiyan baturuki san ta jo atudun nyarak, ta kandriyen jo ale amekes ta adeu sahou mwasin laleyah ili tiri lau mwan ma badih, bwe.
2CO 11:11 Sebwe, budon taha kede-eh ta ndremenya, tasah handru jo amekes i buku doh? Aha anya, jo baso-ok aha bwe, ma jo amekes i buku doh? Bwe handru en! Kindrei tanan, jo badeh, aso-ok aha labai.
2CO 11:12 Katin ta jo amekes, i buku doh: Lau rayah badeh, asilah madasan ta atudun nyara iri le, ma iri anya kasahan buku le ahi, ta mada iri mwan ma badih. Jo badeh, ibo gok ta aturuk san tiri doh. Eme ma, jo kameh ibo gok udu le buku don ai, ma jo kameh winiyan bandrek luk taha ja bwai.
2CO 11:13 Iri lau doh, iri aposel handru bwe. Boho iri irek ta wasai. Iri wendreya ta amekes gok nane, ma tobolowe kandriyen tiri ta andrek iri mwan ma badih. Ma iri aseken iri mwan ma badih kabudon iri badeh, aposel handru ta Krais.
2CO 11:14 Taha winiya atanan, tasah handru iri asahan i buku doh. Balik le amwenen tobolowe kandriyen tan, ma iy bwidi iri mwan ma badih abudon i buku doh, “Sebwe, iy badeh, angelo ta Kindrei ari nadeh?”
2CO 11:15 Eme ma, ari lakou handru bwe, buku iri lau tan ale tubuni kandriyen tiri, ma bwidi iri mwan ma badih tan asahan i buku lau mwasin ta Kindrei le ai. Hamon kameh, Kindrei aleben iri, ma iri kameh akohok maha-an in hamon ta gok nane iri amekes.
2CO 11:16 Jo ndrasehek mwena ndra-au. Ya, nadah jo anya kasehek ja: Iri lau sabudon anya jo lolo-ou ndramak. Arile, buku aha anya jo lolo-ou eh, ka-iy ai. Arile, aha kabwidi san tek, ta jo winiya atudun nyarak sese.
2CO 11:17 Jo ba-en hamon ta tanan ta Laban ta amekes sahou i buku dah, bwe. Jo asehek sahou ma atudun nyarak i buku ndramak lolo-ou amekes.
2CO 11:18 Lau solo-an badeh, atudun nyara iri ta kandriyen, nane iri mwan ma badih badu kon munyak a-en hamon ta aliy. Eme ma, jo ale anya ki-in hamon ta kandriyen badu kon munyak ta atudun nyarak le amwenen.
2CO 11:19 Eme ma jo kameh amekes. Tasah, tanan taha mwan ma badih badeh, tinan labai. Budon taha ale mwasin mara-ei, eme ma aha aso-ok labai ta anuhun ndramak lolo-ou asehek sahou ewek taha.
2CO 11:20 Iri sahou mara-ei doh handru! Buku rayah lau ame ma atondrok aha, o iri kame kandrei lokowa aha mara-ei kano ki-iu, o iri kandrek aha ka-en hamon ta sahou tiri, o iri kati-i aha, o kaluhani aha, ma kasehek sahou ta bobose aha, aha batikahei iri bwe. Aha anyolom iri le ai.
2CO 11:21 Aha nadu tine, jo tikisiy tinan labai! Na len mene ahi are hawe aha, bwilik ama labai ta amekes iri kandriyen solo-an labai, iri lau doh, amekes ewek taha. Mwasin! Saba lakou iri anya katudun nyara iri, jo kameh amekes i buku le aliy.
2CO 11:22 Iri anya iri Juwis? Jo ale jo Juwis! Iri anya iri lau badu Isra-el? Jo ale, jo badu Isra-el! Iri anya tubu iri Abraham? Jo ale i buku aliy!
2CO 11:23 Iri anya iri ta amekes gok ta Krais? (Nadah, jo anya kasehek sahou buku ari ndramak lolo-ou ai.) Jo badeh, udu bwele-e iri ja, ta gok ta Krais. Jo ibo gok boto-on labai, ma jo mwasin mara-ei ja tiri lau ta atiye sahou mwasin. Len tek badeh, solo-an labai ja tiri, ta len sabe jo udu bolo asiu lulik. Iri lau adi jo na malou sakabuk i bek, san solo-an labai, jo winiyan bandromwei bwe. San solo-an labai, jo mirihik kimek.
2CO 11:24 Ya, iri lau ta bwena tiri Juwis badeh, adai jo na malou sakabuk i bek san limeh, ma androm ili asahan san ma tonoh ndro ari (39).
2CO 11:25 San ma tulusin iri lau tinan badu Rom badeh, adai jo na kandro kei. San rasan ja badeh, iri lau orowei jo na bek, arile jo bamak bwe. San ma tulusin ndron atasah udu ndras ma jo amai udu bolo ndras. Ari ben, ari len jo ateheh laleyah udu bolo ndras.
2CO 11:26 San solo-an jo edek ili eme na le kati. Len rayah badeh, jo apou gwa, ma wadah teheyani jo ma jo amai. Len rayah ja, jo ndruni iri lalou, ma mirihik iri kadi jo kimek. Len rayah, iri Juwis, ahi boho kon ari le, iri badeh, anya kadai jo kimek ale. Len rayah iri lau badu kon rakon ja anya kadai jo kimek ale. Eme ma, jo anya kimek kudu kon tinan, ma jo anya kimek kudu kon lau aliy bwe. Len rayah jo anya kimek kudu bolo ndras. Len rayah jo anya kimek kudu mine iri lau iri anya iri lau ta Kindrei amwenen.
2CO 11:27 Ma jo ale andra-i mara-ei ta gok solo-an labai. Len solo-an labai jo ibo gok na ben, ma jo bamadin bamwenen bwe. Jo imeson, ma balek amar ta gwa. Len solo-an jo mani nyamon, jo akohok nyala ma jo awin solo-an bwe!
2CO 11:28 Iri lakou doh le bwe. Lakou rayah udu aliy ale! Na bolo len mara-ei, jo abudon solo-an ta atondrok iri mwan ma badih ta Kindrei atalan are bolo kon laleyah. Ma idoh atehei maha-an laba tinan labai eme tek.
2CO 11:29 Sebwe, budon tiri mwan ma badih rayah badeh, babadok bwe le, eme ma, jo amwenen atona sisi-in doh. Sebwe, iri lakou rayah ndraruwi budon tiri nadeh, ma iri amekes kandriyen ndra-in doh, eme ma bwidi ndrinek andra-i labai tiri lakou doh.
2CO 11:30 Aha mara-ei kanuhun! Sebwe, jo ari madasan ja bwai, ta atudun nyarak amwenen. Eme ma, jo winiyan batudun nyarak ta iri lakou leheya, jo nyamuk, bwe. Jo anya katudun nyarak ta iri lakou leheya jo i buku ari ndramak laleyah.
2CO 11:31 Ma Kindrei badeh, tama Laban Jises, iy le ari tanan, jo bawendreya bwe. Taha katudun nyaran kudu bolo len mara-ei!
2CO 11:32 Bwena mene jo udu Damaskus. Ndramak ari ta bahandra kabin, nyaran Aretas atehei ndrokei udu mada kou tinan badu Damaskus. Iri anya kateu jo, ma kadeu jo kili bolo asiu lulik.
2CO 11:33 Arile, iri lau ta Kindrei rayah badeh, anyuhi jo ili bolo ndrom sahin rahak, ano oro bawei malou i ta lu-u ndrom nane doh, ma oro atehei jo i san ta mada munu kowah le eme andri ma eme manan. Eme ma jo ruwani iy ndramak ta kabin doh ma jo atobwak iu.
2CO 12:1 Jo amwenen ibo gok ta atudun nyarak kahis. Handru, kandriyen doh winiya baseben iri mwan ma badih atanan jo aposel bwe, arile jo ari madasan ja ta leheya aha ta lakou dah bwai. Arile, nadah jo anya kasehek nyala ameh ma sahou rayah Laban asehek eme tek.
2CO 12:2 Jo tanan ndramak ta Krais ari. Udu bolo jaha ronoh hahuw (14) ndra-au, Kindrei badeh, andrei iy ma mwasin iu ili bolo kandrah loken, loken labai handru on. Sebwe, iy ma mwasin o malawin le, jo bala tanan bwai. Kindrei le ari badeh, tanan ai.
2CO 12:3 Jo anya kasehek ja. Jo tanan, Kindrei andrei iy ndramak doh, iu ili bolo kandrah loken, loken labai mara-ei on. Sebwe, iy ma mwasin o malawin le, jo bala tanan bwai. Kindrei le ari badeh, tanan ai. Ya, udu bolo kandrah loken labai nane doh, iy anuhun sahou rayah doh, lau winiyan basehek na boho iri bwe. Ma sahou rayah doh ndrabun labai ta asehek ale.
2CO 12:5 Eme ma, jo anya katudun nyara ndramak doh. Arile, jo winiya batudun nyarak ja bwai. Jo winiyan asehek le ta jo nyamuk bwe, ma jo winiyan atudun nyarak ta lakou doh le.
2CO 12:6 Aha mara-ei kanuhun se! Buku jo anya katudun nyarak amwenen, jo kameh winiyan basahan ndramak ta wasai ja bwai. Iri lakou mara-ei doh, jo winiyan asehek ta aliy, handru, ma mene ndrasahan tek. Arile, jo batudun nyarak amwenen bwe. Tasah, jo bwalek ari ndramak mwan o badih ja anuhun sahou dah, ma abudon anya jo ndramak mwasin. Jo aso-ok aha lau mwan ma badih kanyolom kandriyen jo amekes, ma sahou jo asehek. Ta idoh le, aha winiyan anyolom jo, ma atanan jo.
2CO 12:7 Ya, lakou nane Kindrei leheya eme tek doh badeh, laba tinan labai. Eme ma, iy bwalen jo atudun nyarak ili loken labai mara-ei. Eme ma, iy atehei sik ari eme badak. Sik doh bokoro-ei jo i buku bodo lakou madan, madan tatahi ndramak. Sik doh, i buku ndramak ta balik ari, iy eme ta a-um jo ma tolomwa jo, ta jo satudun nyarak.
2CO 12:8 San tulusin badeh, jo asalom ili ta Laban ta iy kanyumuri sik udu bwele-ek dah ki-iu.
2CO 12:9 Arile, Laban anya, “Jo winiya banyumor ou bwai, arile, jo kameh udu hawem. Idoh le. Tasah, boto-on tek le badeh, ibo gok handru, tiri lau nyamu iri bwe.” Eme ma, jo winiya babudon ta sik dah, ma jo nyamuk ja bwai. Jo sekesek labai ja ta udu buku dah, ma boto-on ta Krais ere hawek.
2CO 12:10 Eme ma, gok jo amekes dah badeh, ta Krais. Buku jo nyamuk bwe, maha-an solo-an akohok jo, iri lau anya kadi jo, mwasin jo kasekesek le ai. Ya, buku jo nyamuk bwe, na len le doh, boto-on ta Kindrei udu bwele-ek.
2CO 12:11 Sahou nane jo amekes ta atudun nyarak, idoh i buku sahou ta ndramak lolo-ou. Jo bwalek ta asehek, arile aha badeh, bwidi ndrinek ta amekes. Tasah, aha amwenen batudun nyarak bwe. Idoh mwasin, aha amekes i buku doh. Arile, bwe. Jo ndramak laleyah, arile jo sakalau iri lau ta wasai mara-ei nane aha aloh iri, “aposel mwasin handru.”
2CO 12:12 Na len mene jo udu hawe aha, jo amekes lakou solo-an labai ta leheya aha, buku jo aposel handru, ma Kindrei amwenen tiye jo ta ewek. Ehe, jo amwenen atehei jo iu ili andri mara-ei, ma amekes iri gok solo-an buku doh: Jo amekes kalem solo-an ndrawek taha, ma lahou tinan rayah bwidi mani iri mwan ma badih atur, ta anyolom boto-on ili ta Kindrei.
2CO 12:13 Jo mene amekes kandriyen le dah ewek taha, jo amekes ili tiri lau ta Kindrei rayah ale are laleyah. Arile, sebwe kandriyen tek ndra-in nadeh! Tasah, jo badeu ari maha-an bawek taha bwe, ma jo amwenen ale bandrek aha ta luk ta amekes gok dah bwe le. Arile, mwasin, aha kamani iri “lakou ndra-in” nane doh jo mesekei ndrawek taha!
2CO 12:14 Ya, na len dah jo alokou jo ta ewek hawe aha, i buku san tulusin ai. Buku jo ewek, jo kameh winiya bandrek luk o saba lakou taha ja bwai. Aha kanuhun! Jo bwalek akohok lakou taha. Tasah, jo baso-ok luk taha bwe. Jo badeh, anya kakohok aha ndramak le amwenen. Aha tanan, iri nah badeh, winiya bamekes gok ta asilah, ma atukum lakou i ta tama ma tine iri bwe. Tama ma tine iri le badeh, winiya asilah ma atukum lakou ta aseben nadu iri le kabwe.
2CO 12:15 Eme ma, jo kameh sekesek ta edeu iri lakou tek mara-ei, ma hawe kohak ewek taha ta aseben aha asahan iri lau boto-on ta Kindrei. Handru, jo badeh, aso-ok aha labai. Arile, sebwe aha tanan lakou doh nadeh? Eme ma, tasah handru aha batehei ndrine aha mara-ei bame tek bwe?
2CO 12:16 Arile, iri taha rayah badeh, asehek ta kandriyen tek i buku doh: “Handru, taha banyolom iy akohok lakou tataha bwai. Arile, tanan tan badeh, mwasin labai ta andrek taha, ma kandriyen ta balagwah ta orou no-o taha ta akohok lokowa taha laleyah.”
2CO 12:17 Ya, i buku sah handru? Badu mine iri lau mene jo tiye iri awek hawe aha nadeh?
2CO 12:18 Jo mene edeu budon mwasin i ta Taitus, ano jo tiye iy ma nadu tine taha ari ja, ta awek hawe aha. Sebwe, uru ndrakohok rayah luk taha ndrado mine uru ndrame nadeh? Sebwe, ndrine aso badeh, bala le ari, ta amekes gok dah bwe nadeh? Sebwe, ahi bamekes kandriyen bala le ari, ma ba-en hamon ta boto-on ta Malawin Ndrabun ari le doh, bwe nadeh? Aha kabudon kamwenen!
2CO 12:19 Sebwe aha kameh anyolom iri sahou mara-ei doh, ma aha kameh abudon ahi torowenei ta amekes sahou tahi kamwenen ta mada aha. Arile, bwe. Ahi ado mada Kindrei i buku nadu tine aha i san ta Krais, ma ahi aseken aha labai. Eme ma, ahi amekes iri sahou dah, ta atadau budon taha kabadok.
2CO 12:20 Tasah, jo inoh sese, ma jo abudon i buku doh, kora-on jo kewek ma katawei aha bala buku ndramak nane jo anya kanyolom ja bwe. Ma kora-on aha ale anya kanyolom jo bala buku ndramak nane aha anya kanyolom. Kora-on jo katou iri kandriyen solo-an doh udu ndrokowa aha. Idoh kandriyen ta tebelese sahou, ma kandriyen ta ndrinem irih i tiri lau rayah ja, ma kandriyen ta amekes lakou laleyah, buku aluhe, sondrokonya, batun boto-on, ma kandriyen ta bolowa lakou laleyah.
2CO 12:21 Ma kora-on jo kewek, ma Kindrei tek kameh kabolei jo kudu mada aha. Kora-on bwilik kama ma jo keden ndranye iri lau rayah are bolo aha mene amekes kandriyen ndra-in. Iri batubuni ndrine iri bwe, ma badeu kona iri bala ta kandriyen ndra-in ta karei bwe, ma kandriyen ta amadin hawe udu ndramak ari ja. Jo inoh labai tiri lakou mari doh.
2CO 13:1 Idah, ili asahan san tulusin ai, ta jo anya kewek katou aha. Buk ndrabun asehek i buku doh, “Buku lau la-uh o taloh asehek anya, oro anyolom ari ndramak amekes kandriyen ndra-in, mwasin ta aha kasehek sahou hawen.”
2CO 13:2 Iri mwan ma badih amekes kandriyen ndra-in bwena, ma aha mwan ma badih rayah ale, aha ndranuhun batanau tek udu bolo len mene jo udu hawe aha. Jo asehek taha ta kandriyen jo anya kamekes, ma nadah badeh, jo udu len labai taha. Arile, jo anya kasehek taha ja: Buku jo ewek atou aha ja, jo winiya balelek iri mwan ma badih nane amekes kandriyen ndra-in ja bwai. Jo kameh ikoh udu bwele-e iri le kabwe.
2CO 13:3 Tasah, aha anya katanan handru, Krais amekes sahou na bohok o bwe. Mwasin, aha kameh winiya atanan amwenen ta lakou mara-ei doh. Krais badeh, bamunyau bwe le, iy ibo gok boto-on labai ta aseben aha.
2CO 13:4 Handru, Krais mene asahan ndramak le, ma iy nyamun handru bwe. Eme ma, iri tatahi iy i bada kei tondreh, ma iy imek. Arile, nadah ja bwe. Na boto-on ta Kindrei laba tinan labai, bwidi iy amak eme awas ja. Ahi aposel badeh, ahis hawe Krais, ma ahi ale lau laleyah, ma ahi nyamu ahi bwe. Arile, na le boto-on ta Kindrei, ahi ale ado hawe Krais. Eme ma, ahi kameh adek bolo aha ta amekes ndrokowa aha kudu mwasin na boto-on dah.
2CO 13:5 Aha katona ndrine aha ma katanan kamwenen, sebwe, aha atehei budon taha handru in ta Jises o bwe. Sebwe, aha ndratanan, Krais Jises badeh, udu ndrine aha. Buku bwe eh, budon taha ndrataras nadeh?
2CO 13:6 Handru, hamon kameh aha winiya atanan ahi aposel handru, ma ahi atehei budon tahi mara-ei in ta Krais.
2CO 13:7 Ma, ahi asalom ili ta Kindrei, ta iy kaseben aha, ma aha samekes ari kandriyen ndra-in. Jo amekes sahou dah ta Kindrei winiya leheya aha, ahi aposel handru. Ahi aso-ok aha kameh kamekes le kandriyen mwasin; iri lau abudon ahi aposel handru o bwe.
2CO 13:8 Aha tanan, taha badeh, winiya bamekes ari lakou ta aturuk o tubuloh sahou mwasin ja bwe. Taha kaseben le ta sahou mwasin dah kabadok boto-on.
2CO 13:9 Aliy, ahi nyamu ahi o bwe, arile, buku aha ales boto-on ta budon taha kahis, ahi kameh sekesek labai. Ma, len mara-ei kameh ahi asalom ili ta Kindrei, ta aha winiya asahan lau tan boto-on labai.
2CO 13:10 Katin ta jo udu ndra len atorou la-ukei ewek taha dah, i buku doh: Jo aso-ok aha kasehek nyala manyah taha op. Buku jo ewek asahan hawe aha, jo bwalek ta tone boto-on ta gok nane Laban edeu eme tek, bwe. Iy atehei eme tek dah, ta atadau aha; ta amekes aha andra-i bwe.
2CO 13:11 Aha nadu tine mwan ma badih, aha ndrado ai, ma bale aha kudu taha. Jo aso-ok aha kabadok ta asahan lau ta Kindrei handru. Aha kanuhun sahou tek, ma katawiy kihis kudu budon taha, ma ndrine aha mara-ei kameh udu mwasin. Kindrei aso-ok aha lau mwan ma badih mara-ei, ma aseben ndrine aha udu mwasin. Iy amwenen kameh udu hawe aha.
2CO 13:12 Ta kandriyen ta taha mwan ma badih ta Kindrei, aha ari, ari badeh, kateu lim hawe nadu tinem mwan ma badih rayah ja.
2CO 13:13 Iri lau mwan ma badih ta Kindrei mara-ei are kada-ah adeu bada an tiri mwasin owek taha.
2CO 13:14 Jo asalom, buku Laban Jises Krais kameh amekes kandriyen mwasin handru owek taha, ma Kindrei kameh aso-ok aha labai, ma Malawi Ndrabun ale kameh ihis udu ndrine aha mara-ei.
GAL 1:1 Jo Pol: Jo badeh, aposel tiri lau ta Kindrei. Jo atorou la-ukei dah ewek taha lau mwan ma badih ta Kindrei ale are bolo kon munyak tinan Galesiya. Iri lau nane ahi amekes lahou se badeh, ale are hawek, ma iri ale anya, bada-an mwasin tiri ewek taha. Jo aposel ari, eme ma jo badeh, edek ma atiye sahou ta Kindrei. Idoh badeh, basahan na seken ta ari ndramak, bwe. Idoh badeh, asahan na seken ta Jises Krais hawe taman Kindrei le amwenen. Uru le amwenen badeh, atehei gok dah eme tek ma suni jo ta atiye sahou mwasin ewek taha. Jises mene imek, arile Kindrei ndramete-ei iy udu ta imek tan badeh, ndrame awas ja.
GAL 1:3 Jo anya kedeu bada-an mwasin kewek taha ale. Tikisiy ma mondrei ta tama taha Kindrei hawe Laban tataha Jises Krais ewek taha.
GAL 1:4 Kindrei mene suni Jises eme andri kon munyak, iy le amwenen imek ta sikine karei ma lomondra ndra-in tataha. Iy bwalen iri kandriyen ndra-in badu munyak dah kabokoro-ei taha. Eme ma, iy eme dah badeh, ta aseben taha, ta iri kandriyen doh kameh winiyan baluwi taha bwe. Idoh, in hamon ta seken ta tama taha Kindrei le.
GAL 1:5 Iy badeh, udu bwele-en labai tiri lakou mara-ei. Boto-on tan hawe lomadan badeh, winiyan bano bwe. Eme ma taha kamasiye ma katudun iy kudu le buku doh! Handru.
GAL 1:6 Aden! Manik badeh, atur labai ta kandriyen aha amekes. Tasah, aha badeh, a-en hamon ta kandriyen mwasin ta Jises nane dah, ma se nawin bwe, aha anya karuwani Kindrei, ta a-en hamon ta kandriyen randrah ja. Ta tikisiy ta Krais le badeh, Kindrei luhi aha ame asahan lau tan. Arile, kandriyen nane aha abudon ta a-en hamon ta aliy badeh, bado se hawe sahou mwasin tan handru bwe.
GAL 1:7 Ya, kandriyen ha-un nane badeh, mwasin handru bwe. Kandriyen ari le doh badeh, mwasin mara-ei. Idoh badeh, kandriyen ta Krais. Iri lau nane ndrasahan hawe aha badeh, iri anya katobolowe kandriyen ta Krais kasahan randrah ja. Ma iri ale anya kabolowa budon ma manyah taha sasahan samwenen.
GAL 1:8 Sahou mwasin ta Krais doh badeh, aso mene leheyani aha ta aliy badeh, mwasin labai. Eme ya, ki buku none aso deh, bwe-em, ari angelo badu kandrah, karuwani sahou mwasin ta Krais doh, ma katiye sahou mwasin ki randrah labai ja, ta aha sa-en hamon ta sahou mene aso atiye dah, badeh, jo aseken ta iy ndramak doh badeh, kakohok maha-an hawe sisi-in ndra-in, ta udu le buku doh!
GAL 1:9 Aso mene ndrasehek ndra-au, ya, na dah badeh, jo anya kasehek ja: Ki buku are lau katiye sahou randrah ja, ta sahou mwasin ta Krais mene aha ndranuhun badeh, jo aso-ok iy ndramak doh badeh, kakohok maha-an ma sisi-in ndra-in labai kudu le buku doh!
GAL 1:10 Jo babudon solo-an ta budon tiri mwan ma badih bwe. Buku iri baso-ok jo bwe, jo ari sahou ta aliy bwe le. Jo ndramak ari ta atiye sahou handru, ma jo aso-ok Kindrei le amwenen kasekesek ta gok tek. Buku iri basekesek ta sahou nane jo asehek bwe, ndri-iy ai. Buku jo ndramak ari ta atamar le iri lau, jo winiyan basahan lohowan ta Krais bwe.
GAL 1:11 Aha nadu tine, jo anya katiye kamwenen ki taha, ta aha katanan ta sahou mwasin jo atiye mene ewek taha badeh, basahan ta budon ta ari ndramak bwe.
GAL 1:12 Jo badeh, bakohok ma banuhun sahou mwasin dah badu boho ari ndramak bwe. Ma ari ndramak baleheya sahou mwasin dah bame tek bwe. Jises Krais le amwenen badeh, leheyani jo ta iri sahou mwasin mara-ei doh.
GAL 1:13 Aha mene ndranuhun ma ndratanan kandriyen ta bolo tekedek tek ma loweu udu bolo iri Juwis. Jo badeh, in hamon ta kandriyen tiri. Jo udu buku doh badeh, ma jo baso-ok iri lau ta Kindrei bwe. Ma jo anya kidi iri lau ta Kindrei kamak kano ka-au.
GAL 1:14 Ya, oro Juwis rebesem badu hawek badeh, jo sakalau oro ja ta kandriyen ta batanau. Jo sakalau oro ta bolo kandriyen ta tubu ahi, iri asehek eme tahi Juwis. Ma eme, budon tek irih labai ta in hamon ta kandriyen ta tubu ahi iri.
GAL 1:15 Jo badeh, in hamon ta kandriyen doh, arile Kindrei baso-ok lakou doh bwe. Arile, jo basahan bwe le, Kindrei badeh, ndratanan jo ai, ma iy ndratehei jo ta amekes lahou tan. Eme ma, na tikisiy tan le badeh, iy atehei jo amekes lahou tan.
GAL 1:16 Iy le amwenen leheyani nadun asahan eme madak, ta jo kameh katiye sahou tan mwasin kili tiri lau badu leheleh. Ya jo bala hawe ari ndramak bakohok tanan tan bwe.
GAL 1:17 Oro aposel ado Jerusalem badeh, bwena tek labai. Arile, jo bala hawe oro bakohok tanan toro bwe. Jo badeh, ili kon ari doh, lau solo-an bado aliy bwe, iri aloh Arabiya. Jo ili ere aliy ano badeh, jo eme hamon eme kon tinan Damaskus.
GAL 1:18 Udu bolo jaha ma taloh ano badeh, jo ili kon tinan Jerusalem ta atou aposel ari, nyaran Pita. Jo udu hawen badeh, len ma ronoh limeh (15) le.
GAL 1:19 Jo badeh, batou oro aposel marakon bwe. Jo badeh, atou le Pita hawe Jemis, nadu tine Laban tataha Jises.
GAL 1:20 Sahou marakon jo atorou ewek taha dah badeh, ndra handru le ai. Jo bawendreya aha bwe. Kindrei tanan saba lakou jo asehek.
GAL 1:21 Ano jo udu Jerusalem iu ili loboho munyak tinan Siriya hawe Silisiya.
GAL 1:22 Na len doh, iri lau ta Kindrei badu Judiya bala tanan jo bwe le.
GAL 1:23 Arile, iri anuhun le, lau asehek anya, “Iy ndramak mene ta idi taha. Arile, nadah ja badeh, iy ndraruwani kandriyen ndra-in doh ndra-au. Bwena badeh, iy bwalen labai ta sahou mwasin ta Krais, arile, nadah ja badeh, iy ndratiye ndrala ta lau ja ai.”
GAL 1:24 Eme ma, iri sekesek ma atudun nyara Kindrei. Tasah, jo badeh, ndra-en hamon ta Jises.
GAL 2:1 Ano, hamon ta jaha ma ronoh hahuw (14) ano badeh, jo hawe Banabas uru Taitus, aso ma taloh au ala hamon ala Jerusalem.
GAL 2:2 Kindrei asehek sahou eme tek, i san ta ameh, eme ma jo ili. Aso ala asahan Jerusalem, ano jo ili atukum hawe iri lau ta mwena tiri lau ta Kindrei. Jo batukum hawe iri lau mari bwe. Jo atukum hawe iri lau ta mwena le tiri. Jo asehek tiri le ta sahou mwasin jo mene ndrasehek tiri mwan ma badih badu leheleh. Jo badeh, abudon i buku doh: “Kora-on iri basekesek ta sahou jo asehek dah bwe, ma iri gok jo amekes dah kameh iu laleyah.” Eme ma jo asehek nyala iri.
GAL 2:3 Ya Taitus badeh, udu hawek na len doh. Iy badu Grik, arile iri lau mene ta Kindrei badu Juwis ado Jerusalem badeh, bandrek iy ta kasan ku-in bwe.
GAL 2:4 Tasah iri lau rayah ta wasai ame bolo oro i buku nadu tine oro tiye anya, are lau anya kasahan lau ta Kindrei badeh, kasan ku-in. Arile winiyan bwe. Iri lau doh badeh, lalou, ya iri aton ame le ta anya kasilah manyah mwasin taha akohok udu bada Jises Krais. Tasah, manyah tataha ba-en hamon ta kandriyen malen bwe. Ma iri anya kamekes taha kasahan bonyo-ou ta kandriyen tiri Juwis.
GAL 2:5 Iri aseken taha mara-ei ka-en hamon ta kandriyen tiri Juwis, arile aso banuhun se sahou ta nyala iri lau doh, bwai! Aso badeh, basekesek ta sahou tiri doh bwe. Buku aso mene ka-en hamon tiri lau ta wasai doh badeh, sebwe sahou handru nane aso ndrasehek ndrawek taha badeh, iu laleyah.
GAL 2:6 Arile, oro tinan tiri lau ta Kindrei badu Jerusalem badeh, bamekes bala buku iri lau ta wasai doh bwe. Taha anya, oro tinan tiri lau ta Kindrei doh badeh, are bwele-en sese tiri lau rayah ja, arile Kindrei ja badeh, baso-ok oro lau tinan nane doh bwe. Iy ja badeh, banyolom oro ta lakou badu manan bwe. Eme ma, lakou laleyah ta budon tek, iri tinan deh bwe. Oro badeh, badeu sahou toro amwenen bala hawe sahou mwasin nane aso asehek ewek taha bwe,
GAL 2:7 tasah, oro ndratanan Kindrei ndratehei lahou ndrame kanik ta atiye sahou mwasin ili tiri lau badu leheleh. I le buku none iy mene atehei, i kani Pita atiye sahou mwasin, i tiri lau badu Juwis.
GAL 2:8 Tasah, na boto-on ta Kindrei le jo asahan aposel ta atiye sahou tan i tiri lau badu leheleh, i le buku none Pita mene asahan aposel ta atiye sahou tan i tiri Juwis.
GAL 2:9 Eme Jemis, Pita hawe Jon badeh, oro lau ta batun dah, ndratanan Kindrei badeh, ndratehei lahou dah ndrame kanik; eme, oro ndrateu lim hawe aru Banabas. Eme, aso ndrasehek sahou randra le, ta aso amekes lahou le. Oro amekes lahou i bolo iri Juwis, ya aru Banabas amekes lahou i bolo iri lau badu leheleh.
GAL 2:10 Sahou ari le oro tiye i buku doh, “Ado kabudon ta aseben iri lau tiri lakou bwe, are bolo aso dah.” Seben dah mene, jo aseken labai ta amekes ale.
GAL 2:11 Na len Pita eme asahan Antiyok badeh, jo asehek i bwilin amwenen, tasah iy bamekes lakou bamwenen bwe.
GAL 2:12 Na len Jemis basuni oro lau rayah bala hawe Pita bwe le badeh, Pita aimon nyamon hawe iri lau badu leheleh. Arile udu, oro lau ta Jemis asahan ale, iy inoh ma iy ruwani ta aimon nyamon hawe oro lau badu leheleh. Eme iy baimon nyamon hawe oro ja bwe. Tasah, iy inoh oro Juwis doh, tiye tiri lau badu leheleh kasan ku-i iri bwena.
GAL 2:13 Eme, oro nadu tine rayah badu Juwis anyolom Pita amekes badeh, ma oro an hamon tan amekes i le buku aliy. Oro tanan kandriyen doh bamwenen ta i bada nadu tine oro, iri lau badu leheleh, bwe. Ma Banabas ale tanan kandriyen doh bamwenen bwe, arile oro aluwi iy in hamon toro ale.
GAL 2:14 Eme, jo anyolom oro ba-en hamon ta sahou handru ta sahou mwasin bwe. Eme jo tiye i ndranye Pita udu mada iri lau mari i buku doh, “Ou badeh, Juwis labai, arile manyah tam ndra buku iri lau badu leheleh. Eme ya ou bala Juwis bwe. Arile na dah, ou barandresei iri lau badu leheleh barakohok kandriyen tiri Juwis barala buku sah handru?”
GAL 2:15 Ya, jo asehek i ta Pita amwenen i buku doh, “Taha ndraye iri Juwis amwenen. Taha bala buku iri lau ta amekes kandriyen ndra-in i buku iri lau badu leheleh ala are baha tondrok ta kandriyen tataha Juwis bwe.
GAL 2:16 Arile ndri-iy ai, ahi tanan labai, ta Kindrei aloh ndramak mwasin mara-ei ta madan badeh, i san ta budon handru le, i ta Jises Krais; ba-en hamon ta batanau malen tiri Juwis, nane leheya kede-eh, bwe. Ma, taha Juwis ale kasahan mwasin ta mada Kindrei i san ta budon handru le in ta Krais Jises, bala san ta a-en hamon ta batanau malen bwe. Tasah, ari ndramak badeh, winiyan bamwenen ta mada Kindrei i buku iy ki-in hamon ta batanau malen asehek, bwe.
GAL 2:17 Taha anya kanone kasahan mwasin ta mada Kindrei i san ta taha ka-en hamon ta Krais ma taha kahas kase hawen. Arile, i buku none taha kasahan ndramak ta karei ma lomondra ndra-in ta mada iri Juwis, i le buku none iri lau badu leheleh, idoh kameh moson ki buku sah? Jises badeh, suni taha amekes kandriyen ndra-in? Bwe!
GAL 2:18 I buku jo anya katudun batanau malen mene jo ndratokosei ndra-au, badeh kameh, jo le nyowani jo ba-en hamon ta batanau malen handru bwe, ma jo kasahan i buku ndramak ta amekes kandriyen ndra-in ja.
GAL 2:19 Tasah, jo tanan, i buku none jo anya kudu baha tondrok ta batanau malen le badeh, gok ta batanau malen le ta suni jo i san ta imek, ma jo ki buku iri lau ndramak. Arile, na dah, gok ta batanau malen doh kano ai. Ya jo badeh, ki hamon ja ta kandriyen mwasin ta mada Kindrei.
GAL 2:20 Jo mene imek hawe Krais udu bada kei tondreh tan, eme na dah, jo badek ba-en hamon ta so-ok tek le amwenen ja bwai, arile na len dah badeh, Krais manyah udu hawek ma jo edek in hamon ta so-ok tan. Handru, na len dah, jo manyah le na budon tek handru i ta Nadu Kindrei. Tasah, iy le tikisi jo, ma iy le akohok kon tek imek udu ta kei tondreh.
GAL 2:21 Eme ma, jo winiyan bakahei tikisiy ta Kindrei bwai. Buku iri batanau mene Kindrei edeu ili tiri lau badu Isra-el, idoh winiyan sebenei taha ta mada sahou ta Kindrei hamon, buku handru eh, Jises winiyan bamak ta aseben taha bwe. Iy badeh, imek laleyah le. Arile, jo winiyan baruwaniy kandriyen ta tikisiy ta Kindrei nane jo in hamon ta aliy bwai.” Eme ma, jo asehek nyala Pita ta aliy.
GAL 3:1 Aha mwan ma badih badu Galesiya, bale aha ndra-au! Are lau ndrawahei budon taha, ma aha ndra bale aha bwe? Jo mene udu hawe aha amwenen badeh, jo leheya aha aleu handru ta iri adai Jises Krais imek, udu bada kei tondreh.
GAL 3:2 Eme jo anya ndremenya aha ta aliy, ma aso-ok aha badeh, kasehek kamwenen keme tek: Aha badeh, akohok Malawin Ndrabun ta Kindrei i san ta aha a-en hamon ta batanau malen deh? Bwe! Aha akohok Malawin Ndrabun i san ta aha anuhun, ma hawe i san ta budon taha handru ki ta sahou mwasin.
GAL 3:3 I buku sah aha a bale aha bwe badeh? Aha bwena mene amekes na Malawin Ndrabun ta Kindrei; ya idah ja kameh, aha anya kamekes na boto-on ta ndramak ai?
GAL 3:4 Sebwe iri maha-an aha ndruniy udu bolo tekedek taha bwena mene, moson bwe nadeh? Bwe! Iri lakou doh moson udu aliy.
GAL 3:5 Aha abudon i buku sah? Kindrei badeh, edeu Malawin Ndrabun ma amekes kalem udu ndrokowa aha. Sebwe iy edeu tasah aha an hamon ta batanau malen? Bwe! Idoh badeh, i san ta anuhun sahou ma hawe ta budon taha handru badeh, i ta sahou mwasin labai.
GAL 3:6 Aha badeh, kalomondra tekedek ta Abraham se: I buku buk ndrabun ndratiye, “Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.”
GAL 3:7 Eme ma, aha badeh, ndranyolom ma ndratanan ndramwenen ta lakou doh: Iri mwan ma badih nane atehei budon tiri handru in ta sahou ta Kindrei, iri doh badeh lundriye Abraham amwenen.
GAL 3:8 Sahou ta Kindrei badeh, ndrasehek ndra bwena, ta iy kameh aloh iri lau badu leheleh mwasin mara-ei ta madan i san ta budon handru le. Eme ma iy ndrasehek ndra ta Abraham ta sahou mwasin ta Krais i buku doh, “Na lundriyem oro le kameh, jo kameh edeu nyosowan i la-u iri lau mari badu munyak.”
GAL 3:9 Abraham atehei budon tan handru i ta Kindrei, ma Kindrei nyosowani iy; eme ma are lau oro atehei budon handru i le buku Abraham badeh, kameh i le buku aliy.
GAL 3:10 Are lau oro abudon anya oro winiyan an hamon le ta batanau malen mari, eme ma Kindrei kameh sekesek ta budon toro doh, badeh kameh oro akohok andra-i na len iri ales an ta mada sahou ta Kindrei. Tasah, ari ndramak winiyan ba-en hamon ta lakou mari batanau malen tiye iy kamekes, bwe. Idoh i buku le sahou ta Kindrei ndratiye, “Are lau ba-en hamon ta lakou mari torowenei udu bolo buk ta batanau malen dah bwe, Kindrei le kameh edeu maha-an i tiri!”
GAL 3:11 Handru, aha winiyan anyolom sahou ta Kindrei tiye ale i buku doh, “Are lau le atehei budon tan handru in ta Kindrei, Kindrei kameh aloh iy mwasin mara-ei ta madan, ma iy ndramak doh le winiyan akohok kohan ha-un ta udu le buku doh.” Eme ma taha ndratanan lakou dah: Ari mwan o badih sabudon anya iy winiyan in hamon ta batanau malen, ma na lahou tan doh iy winiyan akohok kohan ha-un ta udu le buku doh, ndri-iy.
GAL 3:12 Arile, kati budon ta ndramak anya ki-in le hamon ta batanau malen badeh, bala buku none kati budon ta ndramak i san ta budon handru, bwe. Sahou ta Kindrei tiye i buku doh, “Are lau le, iy in hamon ta lakou mari, batanau malen asehek, iy kameh akohok kohan ha-un ta udu le buku doh.”
GAL 3:13 Arile, batanau malen le badeh, leheya taha buku taha winiyan ba-en hamon ta lakou mara-ei batanau malen tiye, bwe, ya taha kakohok maha-an ta aliy. Arile, Krais badeh aseben taha, iy ndrakonohei taha mene ado bolo maha-an ta batanau malen ndrame len. Iy le ari badeh, ari kandriyen ndra-in bwe, arile iy akohok kon tataha bwese maha-an tataha; tasah sahou ta Kindrei tiye i buku doh, “I buku, are lau atahi iy sukik udu bada kei ta kandriyen ndra-in tan badeh, iy udu bahandra maha-an ta Kindrei.”
GAL 3:14 Handru, Krais Jises badeh, ndrakonohei taha ma ndrakohok taha ndrame hamon. Iy ndramesekei lakou doh, tasah iy anya katehei nyosowan keme tataha lau mari. Idoh nyosowan Kindrei mene tandrakan i ta Abraham ki tiri lau badu leheleh. Ya taha akohok nyosowan doh i san ta Krais le ari. Eme ma, taha i san ta budon handru badeh, winiyan akohok boto-on ta Malawin Ndrabun mene Kindrei tandrakan.
GAL 3:15 Aha nadu tine mwan ma badih, jo kameh asehek i buku none lakou taha anyolom na len mari kede-eh: Buku none ndramak la-uh amekes tandrakan ta amekes sahou randra le ta ari lakou, badeh sahou randra le doh abadok. Ari ndramak winiyan batubuniy bwe, ma winiyan badeu ari budon bala ta aliy bwe.
GAL 3:16 Eme ma, udu bolo buk ndrabun, Kindrei amekes i buku le aliy. Iy amekes iri tandrakan i ta Abraham hawe lundriyen oro. Sahou ta Kindrei batiye anya “toro lundriyem solo-an,” bwe. Badeh tiye, “i ta lundriyem ari” le. Ya iy doh badeh, Krais.
GAL 3:17 Moson jo tiye badeh, i buku doh: Ma mwena mene Kindrei amekes sahou randra le, ma iy tandrakan ta iy winiyan bamaniy bwe. Ano udu hamon ta jaha ma hanek tonoh (430) iu, ma batanau malen tiri Juwis barasahan. Eme ma, batanau malen doh, winiyan batokosei sahou randra le bwe, ma winiyan basokosowei tandrakan ta Kindrei amekes i ta Abraham bwena, bwe.
GAL 3:18 I buku none seben ma manyah mwasin ta Kindrei badeh, sukik udu ta kandriyen ta a-en hamon ta batanau malen, taha bakohok bala san ta tandrakan tan mene bwe. Arile bwai, seben ta Kindrei hawe manyah mwasin tan, iy ndratehei ndra ta Abraham i san ta tikisiy ma tandrakan tan le.
GAL 3:19 Ya, lahou ta batanau malen i buku sah bah? Kindrei mene aseken kati kandriyen ndra-in keme lewan. Eme ma, hamon ta iy edeu sahou tandrakan i ta Abraham, iy edeu batanau malen ale. Idoh ta leheya batanau malen doh boto-on ta aliy eme taku kabatana lundriye Abraham le barasahan. Ya ta lundriye Abraham le doh, Kindrei amekes sahou tandrakan i hawen. Ya lakou ari ja i buku doh, batanau malen mene Kindrei atehei i kani iri angelo, ano iri angelo atehei i kani iri lau badu Isra-el.
GAL 3:20 Arile, na len Kindrei amekes sahou tandrakan i ta Abraham iy ba-en hamon ta kandriyen doh bwe. Kindrei le ari asehek sahou amwenen i ta Abraham, ma amekes sahou tandrakan hawen. Eme ma, sahou tandrakan doh badeh, lakou laba tinan labai ja, ma sakalawi batanau malen mari ta Moses.
GAL 3:21 Idoh badeh, ma mesekei batanau malen badek se hawe tandrakan ta Kindrei bwai? Bwe labai! I buku none batanau malen mene ndratehei winiyan edeu kohan ha-un ma mesekei lau manyah mwasin, badeh Kindrei winiyan aloh iri lau mwasin mara-ei ta madan na san ta batanau malen le.
GAL 3:22 Arile bwai! Sahou ta Kindrei ndratiye anya lau mwan ma badih badu kon munyak mara-ei badeh, ado bolo kowah ta karei ma lomondra ndra-in. Kindrei le alelei lakou doh asahan tasah, iy anya katehei nyosowan mwasin tan mene iy tandrakan badeh, ki tiri lau heh atehei budon tiri handru in ta Jises Krais.
GAL 3:23 Ma mwena badeh, budon handru basahan bwe le, batanau malen turuki taha i buku none lau are bolo kou, winiya le, budon handru asahan eme lewan.
GAL 3:24 Handru labai. Krais bame bwe le badeh, taha are ndra bahandra tondrok ta batanau malen. Ya lahou ta batanau malen doh ta tiyani taha ala hawe Krais, ta taha katehei budon tataha handru ki tan, eme ma Kindrei winiyan aloh taha mwasin mara-ei ta madan.
GAL 3:25 Eme na len dah, budon handru ndrasahan ai, ya batanau malen winiyan batondrok taha ja bwe.
GAL 3:26 Aha mari atehei budon taha handru in ta Krais Jises. Ya, na kandriyen doh, aha asahan nadu Kindrei, ma aha ahas hawe Krais.
GAL 3:27 Aha ndralomwa, ma aha ndrala le se hawe Krais, eme ma aha ndrakohok kandriyen ta Krais.
GAL 3:28 Eme ma, iri lau badu hawe Krais badeh, iri Juwis, iri lau badu leheleh, iri bonyo-ou ma iri bonyo-ou bwe, ma hawe iri mwan ma iri badih badeh, ari bala randrah, ari bala randrah ja bwe. Iri mara-ei doh badeh, asahan ari buruwen hawe Krais le ari.
GAL 3:29 Ya, buku none aha badu hawe Krais handru, badeh, aha nadu Abraham ai. Ma idah kameh, aha akohok kohan ha-un ma manyah mwasin mene Kindrei tandrakan ta aliy.
GAL 4:1 Ya, kandriyen tataha ari badeh, i buku sahou sokek ta amekes moso sahou jo atorou dah kaleu kamwenen. Buku ndramak ari munyak tan ranah laba tinan udu aliy, ya, buku iy ndramak doh, nadun mwan ari udu aliy. Nadun amwenen badeh, ibo gok udu bwele-e munyak doh, luluwen labai i buku ari bonyo-ou. Udu hamon, buku taman anyolom nadun ndrasahan awas handru, iy kameh winiyan tiye nadun ta atondrok munyak tan doh.
GAL 4:2 Tasah, iy mene ma bwisik badeh, iy in hamon ta sahou tiri lau ta atondrok iy, ma iy i buku ndramak ari laleyah ta gok le, winiya na len le taman barasan ben tan.
GAL 4:3 Eme ma, nadu sahou sokek jo nane torowenei dah badeh, moson ta aliy i buku doh: I buku taha mene are ndra buku iri nah bwisik badeh, ta budon tataha, ma taha mene a buku bonyo-ou, tasah kandriyen ma batanau solo-an nane badu bolo munyak atondrok taha.
GAL 4:4 Eme na len ta aliy amwenen asahan, Kindrei suni nadun amwenen eme. Iy asahan eme len ta badih awas eme udu baha kandriyen ma batanau malen tiri lau badu Juwis.
GAL 4:5 Ya, Jises eme akunoh taha are bahandra batanau malen tiri bonyo-ou tiri Juwis ame len, ma taha asahan nadu Kindrei. Eme ma, na len dah ja badeh, taha ndrasahan ndra tinan, ma taha winiyan akohok ma atondrok iri lakou mwasin nane tama taha ndratehei ndrame tataha nadun amwenen.
GAL 4:6 Eme ma Kindrei suni Malawin Mwasin ta nadun Jises eme udu ndrine taha ari ari, tasah taha ndrasahan nadun. Eme ma iy bwidi taha aloh i ta Kindrei i buku doh, “Tama, tama.”
GAL 4:7 Eme ma, taha badeh, bado buku nadu Kindrei nyandren, buku bonyo-ou tan ja bwe, tasah taha ndrasahan ndra tinan ndra en, ma Kindrei ndratehei kalem ndrame tataha ta akohok manyah mwasin doh, hamon.
GAL 4:8 Bwena mene ndra-au, aha tana aha Kindrei bwe. Eme aha a bonyo-ou tiri kindrei rayah ja; iri doh badeh, Kindrei handru bwe.
GAL 4:9 Arile, na dah, aha ndratana aha Kindrei handru. O, sebwe jo katiye taha ki buku doh: Kindrei ndratanan aha. Ya, i buku sah ja, aha anya kala hamon ja kala hawe iri malawin ndra-in ja? Iri nyamu iri bwe, ma iri winiyan bala ari lakou handru bwe. I buku sah, aha anya kala bonyo-ou tiri ja?
GAL 4:10 Aha atehei budon taha ihis ta kandriyen tiri Juwis ta len, ta bun, ma jaha, ma hawe len ta ur ma an.
GAL 4:11 Eme ya jo abudon aha solo-an labai. Sebwe, boto-on ta lahou tek ewek taha badeh, iu laleyah?
GAL 4:12 Aha nadu tine, jo aseken aha kanuhun sahou tek. Jo badu hawe iri Isra-el, arile batanau malen tahi badeh, bateu jo bareu bolo kou ja bwai. Eme ma na dah, jo udu bahandra maha-an ta aliy eme len, ma jo udu laleyah buku aha lau badu leheleh amwenen. Arile, nadah ja, aha anya kala bahandra tondrok ta batanau malen ja. Kora-on aha kala bolo kou ta kandriyen taha nane doh. Ndri-iy ai. Aha ka-en hamon tek, buku jo ki-in hamon ta Krais. Aha bamekes ari budon ndra-in bame badak bwe.
GAL 4:13 Aha ndratana aha, ma mwena handru mene jo atiye sahou mwasin ewek taha badeh, sik le sahei, ma jo asehek sahou ta Kindrei mwasin ewek taha.
GAL 4:14 Ya eme sik tek badeh, ndra-in labai, arile aha basumukok jo bwe. Handru, aha nyowo-ei jo, i buku none angelo ta Kindrei badu loken; ya, i buku none Jises Krais keme i buku none jo dah, sebwe aha kandrei iy, ki le buku jo nadeh?
GAL 4:15 Aha mene sekesek handru ta kandriyen mene jo ndramekes. Eme na dah ja, saba lakou ndramesekei aha? Bwena mene, aha winiyan baso-ok jo kameh imeson o barah ta ari lakou bwe-en. Na bolo len bwena mene doh, aha winiyan sekesek ta aha sudi mada aha amwenen, ma atehei eme tek, ta aseben jo.
GAL 4:16 Ya jo asehek sahou handru. Aha abudon anya, jo dah budon tek ndra-in i bada aha, tasah jo atiye sahou handru dah?
GAL 4:17 Iri lau rayah aseken labai ta anya kaliu budon taha ki hawe budon tiri ja, arile budon tiri badeh, ndra-in. Iri anya kasosokok aha same hawek. Eme iri anya kaliu budon taha ki hawe budon tiri ta aseben ma atudun iri le.
GAL 4:18 Ya, i buku none jo udu hawe aha, deh, jo bado hawe aha bwe, mwasin, aha kamekes lahou mwasin le kili. Ma, i buku kati budon taha ta amekes lahou amwenen, aha katehei budon taha handru na len mari kihis ta lahou doh.
GAL 4:19 Eme ya, aha naduk, jo atona isi, ma jo tikisi aha laba tinan labai, i buku isi ta badih anya kedeu nah udu ndrinen eme len. Tasah, len mari jo tikisiy ma abudon aha, ma atondrok kandriyen ta Krais handru barawek ndrine aha.
GAL 4:20 Jo badeh, aso-ok labai ta udu hawe aha, arile jo udu len labai. Buku jo kudu hawe aha, badeh, kameh jo winiyan seleyani aha, ta iri saba lakou handru, i nyara kati maha-an asahan taha badeh, ma jo ale winiyan asehek iri sahou rayah ja. Arile, na len dah badeh, jo anya kasehek boto-on kewek taha, ta maha-an tinan labai udu bwele-ek, eme ma jo atorou la-ukei ramen dah ewek taha ta aliy.
GAL 4:21 Jo anya katiye taha, ta are lau oro anya ka-en hamon ta batanau malen tahi lau badu Isra-el: Aha banuhun batanau malen tiye i buku sah bwe le?
GAL 4:22 Udu bolo buk ndrabun ndratorowenei i buku doh: Abraham nadun mwan ma la-uh. Iy ari, asahan ta udun amwenen Sara, ya iy ari, asahan ta lohowan tan Haga.
GAL 4:23 Eme, nah badu ndrine lohowan tan, adeu iy eme len i buku none iri adeu nah eme len kede-eh. Arile, i nah ta udun handru, adeu iy eme len in hamon le ta tandrakan ta Kindrei.
GAL 4:24 Eme budon dah, moson asahan i la-uh. Uru badih ma la-uh leheya sahou lundra. Nadu Haga oro, sahou randra le, badeh, ari ai. Ya oro badu mandrei Sainai, atehei oro ta asahan bonyo-ou.
GAL 4:25 Haga badeh, moson i buku mandrei Sainai udu bolo kon Arabiya. Eme, kandriyen ta bonyo-ou badu ta Haga ndrame Jerusalem na dah, tasah iy ma hawe lundriyen oro badeh, bonyo-ou kahis le.
GAL 4:26 Arile, Jerusalem badu kandrah badeh, kon tiri bonyo-ou bwe. Iy doh, tine taha mari.
GAL 4:27 Tasah, tarou ta Kindrei badeh, tiye i buku doh: “Ou badih kis badeh, ou sekesek, ou sarakau ma ou sandroh, ou mene batona isi ta nah bwe. Tasah, badih udun ruwani iy kameh nadun i sola, sakalau badih udun udu aliy ja.”
GAL 4:28 Eme, aha nadu tine, aha badeh, nadu Kindrei i hamon ta tandrakan i le buku Aisik.
GAL 4:29 Eme na len doh mene, nah adeu iy eme len i buku nah mari kede-eh, kameh, iy edeu sisi-in i ta nah asahan na boto-on ta Malawin Ndrabun. Ya na dah i buku aliy le.
GAL 4:30 Arile, sahou bolo buk ndrabun tiye i buku doh, “Ou tikahei badih ta bonyo-ou ma nadun uru ka-au. Tasah, nadu badih ta bonyo-ou kameh, winiyan bakohok se lakou badu mine taman bwe. Nah le badu ndrine udun amwenen badeh, bonyo-ou bwe. Iy kameh akohok lakou mari.”
GAL 4:31 Eme, aha nadu tine, taha badeh, lundriye badih ta bonyo-ou bwe. Taha bonyo-ou bwe, taha badeh, lundriye udu Abraham ta badih bwena labai, eme ma taha ado mwasin ai.
GAL 5:1 Taha ado mwasin na dah, tasah Krais kuhi taha, ado bahandra batanau malen ame len. Eme ya aha badeh, kabadok aha, ta aha sala bonyo-ou sala baha maha-an ta batanau malen ja.
GAL 5:2 Aha kanuhun, jo Pol amwenen tiye taha dah: I buku ado anya ka-en hamon ta batanau malen tiri Juwis ta asan ku-i ado, badeh, Krais kameh winiyan baseben ado se bwe.
GAL 5:3 Tasah, jo tiye sahou ndraleu ndrawek taha! Buku aha a-en hamon ta ari batanau malen badu Juwis, i buku ta asan ku-i aha, badeh, aha ka-en hamon ta batanau malen mara-ei tiri Juwis ale.
GAL 5:4 Buku aha anya ka-en hamon ta batanau malen, ya, na san doh aha abudon Kindrei winiyan aloh aha mwasin mara-ei ta madan, aha ndrandra-i kede-eh! Aha winiyan bwe! Arile, ta kandriyen doh badeh, aha ndratehei kona aha badeh, ndrala ta tikisiy ta Kindrei, ma ta kandriyen ta Jises Krais mene imek udu ta kei tondreh, ta aseben taha mwan ma badih marakon.
GAL 5:5 Arile, Malawin Ndrabun ta Kindrei badeh, ibo gok ta amekes budon tahi mara-ei kabadok, na len ahi atondrok manyah mwasin ta Kindrei hamon doh. Ma Krais kameh amekes ahi asahan amwenen handru i le buku iy.
GAL 5:6 Ma, Krais badeh, aso-ok taha labai, eme ma taha aso-ok iy ma a-en hamon tan. I buku ari ndramak iy anya kisan ku-in, o bwe, idoh lakou laleyah. Lakou laba tinan badeh, i buku doh: Taha badeh, katehei budon tataha handru ki-in le ta Krais, tasah taha badeh, aso-ok iy tinan labai.
GAL 5:7 Aha mene an hamon ta kandriyen ta Krais ma aha sakaliye mwasin labai. Ya, are lau handru eme sokei san taha, ma tiye aha tebelese i ta sahou handru? I buku sah iy aruwi aha?
GAL 5:8 Kandriyen ta andrek badeh, bare boho Kindrei aloh ado mene bwe.
GAL 5:9 Aha tana aha kandriyen ta andres badeh, i buku yis. Iri atehei sese le, arile winiyan abe-ei jabi ramen mara-ei.
GAL 5:10 Arile, taha badeh, ahas hawe Krais, eme budon tek ndrabadok ndrala ta Laban, ta aha winiyan bakohok budon ari ja bwe. Eme ma, are lau oro wendreya aha kameh bwese maha-an ta aliy.
GAL 5:11 Aha nadu tine, buku jo amekes sahou ta leheya aha lau mwan ma badih ta Kindrei ka-en hamon ta batanau malen tiri Juwis ta asan ku-i aha; iri Juwis kameh winiyan bamekes kandriyen ta bokoro-ei jo bwe. Arile, jo baleheya aha bala buku badeh, bwe. Eme ma iri abo gok ta bokoro-ei jo le ai. Ma ndrine iri badeh, irih tek kahis, tasah jo badeh, asehek ta nyala kei tondreh mene iri tatahi Jises Krais udu aliy.
GAL 5:12 Ya, i buku none iri rayah kandres labai ta kasan ku-i iri, jo anya, mwasin labai ta oro doh, kasani ku-i oro mari ki-iu!
GAL 5:13 Ya, aha nadu tine, aha ndrasahan mwasin, tasah Kindrei ndraluhi aha ndrame len ta batanau malen tiri Juwis. Arile, aha salelei kandriyen mwasin doh samesekei aha sa-en hamon ta budon ta bada aha badu munyak. Arile, kandriyen ta tikisiy badeh, kamesekei aha kaseben aha ari, ari.
GAL 5:14 Tasah, batanau malen mari eme bahandra batanau ari le: “Ou aseken iri lau ari ari badu hawem, i le buku ou aso-ok ou le.”
GAL 5:15 Arile, i buku none aha anya ka buku mwi amekes isi i tiri ari ari, bale aha kudu aliy. Idah kameh aha bokoro-ei ndrokowa aha, ma aha andra-i mara-ei.
GAL 5:16 Eme ma, jo asehek i buku doh: Aha kalelei Malawin Ndrabun katondrok manyah ma kandriyen taha, ya, i buku aha amekes eh, aha winiyan ba-en hamon ta seken ta kandriyen ta bada aha ja bwe.
GAL 5:17 Tasah, so-ok ma kandriyen ta bada taha i randrah labai, bala buku none so-ok ma kandriyen ta Malawin Ndrabun bwe. Uru ma la-uh doh winiyan badek se bwe. Eme ma, iri lakou aha anya kamekes, aha winiyan bamekes bwe.
GAL 5:18 Arile, i buku none aha a-en hamon ta Malawin Ndrabun eh, badeh, aha ba-en baha batanau malen bwai.
GAL 5:19 Kandriyen ta bada taha badeh, i buku doh: Kandriyen ta karei i buku mwi, kandriyen ndra-in ta sumukok;
GAL 5:20 kandriyen ta adeu budon i ta sukumada kei i nyara Kindrei, ya kandriyen ta kau hawe omor lau; ya kandriyen ta budon ndra-in ta losen hawe sobobo; ya hawe kandriyen ta madalakis; hawe ndramak ndrinen ndra, ma hawe kandriyen ta ndrakok. Ya kandriyen ta amekes iri lau atalan, rayah ka len, ya rayah ka len;
GAL 5:21 Iri kandriyen i buku madalakis ta lakou, ma hawe a-un gwa boto-on ta amekes lau abo lolo-ou, ma ta amekes lakou laleyah. Jo tiye sahou batanau i taha dah, i buku bwena jo ndrasehek taha: Oro are lau amekes kandriyen doh, winiyan bado bahandra tondrok ta Kindrei bwe.
GAL 5:22 Arile, Malawin Ndrabun badeh, edeu kandriyen ta tikisiy, kandriyen ta sekesek, kandriyen ta amekes mondrei, kandriyen ta bohon bwe, kandriyen ta aseben, kandriyen mwasin hawe kandriyen ta amekes lahou mwasin ta budon tan handru,
GAL 5:23 kandriyen ta ou amekes ou batudun ou bwe, ma hawe kandriyen ta budon tam winiyan bandra-i bwe. Ya eme ari batanau malen winiyan baturuki iri kandriyen doh bwe.
GAL 5:24 Eme, are lau oro badu hawe Jises Krais badeh, ndrasani san ta kandriyen ta bada oro satondrok oro. Idoh i le buku oro ndratahi so-ok ndra-in ta bada oro kimek ki-in bada kei tondreh.
GAL 5:25 Malawin Ndrabun edeu kohan handru eme tataha; eme ma taha kalelei iy katondrok bolo tekedek tataha.
GAL 5:26 Taha sabudon anya taha ndra ari ai, bwe. Ma taha sasakalau ndramak ari ari, ma hawe mada taha salikis ndramak ari ja.
GAL 6:1 Aha nadu tine mwan ma badih, ki buku none aha ari kamekes kandriyen ndra-in, aha are an hamon ta Malawin Ndrabun badeh, kaleheya iy kasahan ta budon mwasin i san ta manamun; arile, bale aha ale ki-in taha, kora-on aha kataku ja.
GAL 6:2 Aha badeh, kabwese maha-an ta nadu tine aha ari ja. Ya i buku none aha kamekes kandriyen doh, aha an hamon ta kandriyen ta Krais.
GAL 6:3 I buku none ari ndramak anya kasakau anya, iy le ai, iy le amwenen kameh wendreyani iy.
GAL 6:4 Ndramak ari ari kanyolom kandriyen tan kamwenen labai. Ya, i buku none kandriyen tan mwasin, iy le kasekesek ta lakou mwasin nane, iy amekes. Ya, iy sanyolom iy sala ta lakou, ndramak ari ja amekes.
GAL 6:5 Tasah, ndramak ari ari kameh, bwese maha-an ta kandriyen tan amwenen.
GAL 6:6 Are lau akohok tanan ta ndramak ta leheya iy na sahou ta Krais, mwasin ta iy kaseben ndramak ta leheya tan na lakou mwasin tan.
GAL 6:7 Aha sawasai aha le; ma aha sabudon anya, aha winiyan wahei Kindrei, ndri-iy labai. Tasah, ndramak ari ari kameh, bwese maha-an tan amwenen in hamon ta lakou iy amekes. Idoh handru, tasah taha tanan, saba nyamon taha atah kameh, taha akohok sali nyamon doh amwenen.
GAL 6:8 Are lau anya ki-in hamon ta kandriyen ndra-in badu badan, iy kameh akohok kunoh ma imek ta aliy; arile, are lau anya ki-in hamon ta Malawin Mwasin ta Kindrei, ma amekes iri kandriyen mwasin le, eme ma Malawin Mwasin le kameh winiyan edeu kohan handru ta udu le buku doh.
GAL 6:9 Eme ya, taha sawoyah ta amekes kandriyen mwasin; ya, i buku none taha baruwaniy bwe, badeh kameh, taha akohok ndramas ta aliy na len hamon. Idoh i buku ndramak ta bilin akohok sali nyamon ta lahou boto-on mene iy amekes.
GAL 6:10 Eme ma, na madasan mari Kindrei sihiy, taha kamekes kandriyen mwasin ki ta lau mari. Arile, ma hutuwen badeh, i toro lau ta Kindrei le, ala budon toro ihis handru.
GAL 6:11 La-ukei dah mirihik ano ai. Aha ndranyolom tarou laba tinan jo atorou na minek amwenen aleu ewek taha. Jo aseken aha kanyolom ma kanuhun kamwenen sendrehendreh ta sahou batanau jo amwenen atorou ewek taha dah!
GAL 6:12 Iri lau doh badeh, abadok labai ta asan ku-i aha, iri kameh amekes i buku doh, tasah iri aso-ok nyara iri kasahan ki tinan ta ndranye iri, ma mada iri lau rayah ja. Iri ale badeh, anoh ma abudon i buku doh, “Kora-on iri lau rayah ja katanan, buku to badeh, atehei budon tato mara-ei in ta kei tondreh ta Krais, ma kora-on iri anya kamekes ndra-in keme tato.”
GAL 6:13 Handru, iri asan ku-i iri; arile iri ba-en hamon handru ta batanau malen bwe. Ya iri anya, aha kasan ku-i aha, ta amekes anya iri le ai, tasah aha badeh, ndra-en hamon ta budon tiri.
GAL 6:14 Arile, jo le, jo winiyan batudun nyarak o nyara ndramak ari ja bwe. Jo kamasiye kei tondreh ta Laban tataha Jises Krais le. Tasah iy le imek udu bada kei tondreh tan. Ya, na lahou iy amekes doh, boto-on tiri kandriyen mari badu munyak badeh, ndramak ale udu budon tek. Ya, idoh ale, i buku jo imek udu bada kei tondreh hawen, eme ma jo winiyan ba-en hamon ta kandriyen badu munyak ja bwe.
GAL 6:15 Eme nadah, ari katin bwe, ki buku none asan ku-i taha, o, i buku none basan bwe; arile katin handru i buku doh: Ta ndramak badeh, kasahan ha-un.
GAL 6:16 Ya, are lau oro an hamon ta kandriyen doh, mondrei ma tikisiy kudu hawe oro mara-ei. Oro le badeh, Isra-el handru ta Kindrei.
GAL 6:17 Ya ta sendrehendreh ta aliy i buku doh: Ari ndramak badeh, sadeu jo sala bolo maha-an ma sisi-in ja, tasah jo bwese ndrana udu badak dah ta leheya jo badeh, lohowan ta Jises.
GAL 6:18 Ya eme aha nadu tine mwan ma badih, tikisiy ta Laban Jises Krais kudu hawe malawi aha mari. Handru!
EPH 1:1 Jo Pol, jo aposel ari ta Krais Jises. Na so-ok tan amwenen, Kindrei atehei jo buku ari aposel, ma jo edek rakon, i rakon ta atiye sahou mwasin ta Jises Krais. Jo atorou la-ukei dah ewek taha mwan ma badih ta Kindrei, aha are kon tinan Epesus. Aha badeh, a-en hamon handru ta Krais Jises, ma aha ahis hawen.
EPH 1:2 Jo aso-ok tama taha Kindrei hawe Laban Jises Krais, uru katikisi aha ma kamesekei kandriyen mwasin kewek taha, ma kamekes ndrine aha kudu mwasin.
EPH 1:3 Taha badeh, katudun nyara Kindrei, iy tama Laban tataha Jises Krais. Na Krais le badeh, iy ndratehei tataha lakou marakon mwasin badu kandrah ta aseben malawi taha.
EPH 1:4 Kindrei bamekes kon munyak bwe le badeh, iy ndratehei taha ndrahis hawe Krais. Eme ma, taha kameh winiyan ado mwasin, ma ndrabun, ma ari ndra-in winiyan bado madan bwe.
EPH 1:5 Kindrei aso-ok taha tinan labai, eme ma ndra bwena handru, iy abudon ta atehei taha a buku nadun amwenen, na gok Jises Krais kameh amekes hamon. Ya, Kindrei abudon i buku aliy, eme ma, iy amekes eme tataha.
EPH 1:6 I san ta nadun amwenen Jises Krais, iy aso-ok iy labai, iy tikisi taha ma bwidi kandriyen mwasin labai eme tataha. Eme ma, taha badeh, katudun nyaran ta tikisiy ma seben laba tinan doh.
EPH 1:7 Ya, Krais bwidi kandriyen mwasin labai ndrame tataha. Iy imek ta konohei taha ame hamon, ma ndrayen amou ta sikine kandriyen ndra-in tataha marakon.
EPH 1:8 Kindrei solowei tikisiy tan tinan labai ndrame tataha, iy atehei iri tanan randrah randrah, ma iri budon mwasin eme tataha.
EPH 1:9 Kindrei bwetenei ndra bwena ta lakou iy anya kamekes ta gok ta Krais. Iy in hamon ta budon tan amwenen, ma iy leheya taha ta lakou tan doh, bwena mene aton mara-ei.
EPH 1:10 Budon doh, Kindrei kameh bwidi marakon ano, ta len ta aliy amwenen, ta atukum lakou marakon iy amekes i le se, iri lakou marakon badu kandrah, ma udu bwele-e munyak ma Krais le ari atondrok iri marakon.
EPH 1:11 Kindrei badeh, in hamon le ta budon tan amwenen, iy andromwei taha, ma atehei taha ala ahis hawe Krais. Ehe, buku Kindrei abudon ta amekes ari lakou, iy kameh amekes le. Saba lakou iy anya kamekes na dah, idoh udu budon tan bwena mene ale.
EPH 1:12 Tasah handru Kindrei amekes kandriyen mwasin buku doh eme tataha? I buku doh: Ahi lau badu Juwis ala bwena, ma atehei budon tahi handru in ta Krais ma a-en hamon tan. Eme ma iy anya, ahi kabudon tikisiy tan, ma katudun nyaran.
EPH 1:13 Ma aha lau badu leheleh, aha ndrasahan lau ta Kindrei ale, kala le aha mene anuhun sahou handru. Sahou mwasin doh amekes, ma Kindrei atehei aha ahis hawe Krais. Aha atehei budon taha handru in ta Krais, ma Kindrei ndratehei Malawin Ndrabun ndrawek taha i buku kalem ta lakou, iy ndratandrakan ta edeu.
EPH 1:14 Ehe, Malawin Ndrabun doh, i buku kalem tiri lakou mwasin, Kindrei kameh edeu ewek taha hamon. Aha badeh, lau tan handru. Ya, Kindrei atehei kalem doh udu ta lau tan, winiya le iy konohei taha ame hamon. Iy amekes i buku doh, ta taha winiyan atondrok na len iy anya kakohok taha kala hawen. Ta lakou doh, taha badeh, katudun nyaran kudu loken labai.
EPH 1:15 Jo ndranuhun sahou, ta aha atehei budon taha handru in ta Laban Jises, ma aha badeh, aso-ok iri mwan ma badih ta Kindrei labai.
EPH 1:16 Eme ma, len marakon jo edeu wurah ili ta Kindrei tataha. Jo badeh, bamani kandriyen ta asolom aha bwe. Len marakon ta salom, jo abudon aha ma jo asolom Kindrei kameh kaseben aha.
EPH 1:17 Jo badeh, asolom ili ta Kindrei ta Laban tataha Jises Krais, iy tama taha ari le udu kandrah. Jo asolom ili tan, ta iy kedeu Malawin Mwasin kewek taha, ma iy kedeu tanan mwasin ta kati sahou tan kewek taha, eme ma aha winiyan atanan Kindrei amwenen.
EPH 1:18 Jo asolom ta iy kameh katehei sun kanya kudu ta budon taha. Eme ma, aha kameh winiyan atanan ta ndramak ta seben nane, iy aloh aha katehei budon kihis ki-in tan, ma aha kasekesek le ta atondrok iy. Ya, ma aha kameh winiyan atanan iri lakou, Kindrei ndraleheyani ta amekes ewek taha, idoh mwasin labai.
EPH 1:19 Ma aha kameh winiyan atanan buku, boto-on tan ibo gok ta aseben taha lau atehei budon handru in tan. Idoh badeh, tinan labai, taha winiyan batomondrohei bwe. Nadah, boto-on tinan doh, ibo gok ta koha taha, i buku iy le mene ibo gok ta koha Krais.
EPH 1:20 Iy ndramak, ma na boto-on tan doh Kindrei mete-ei iy, ma atehei iy ili ere loken labai mirihik ta boto-on tan udu kandrah.
EPH 1:21 Nadah, Krais ndra tinan, ma iy ere bwele-en labai tiri kabin marakon badu kandrah, ma iy atondrok iri lau marakon ta bwena, iri kabin ta kon, iri lau boto-on, ma hawe iri tinan. Iy udu bwele-en labai ja tiri lau, nyara iri i tinan na bolo len dah, ma ta len hamon ale.
EPH 1:22 Ya, Kindrei atehei iri lakou marakon ndrala bahandra tondrok ta Krais, ma atehei iy udu bwele-en handru tiri lau mwan ma badih tan.
EPH 1:23 Lau ta Kindrei doh badeh, bada Krais, ma iri badeh adih na Krais, eme ma, lakou mari doh, idih na le Krais.
EPH 2:1 Bwena mene aha mwan ma badih ado buku iri lau ndramak. Tasah, aha tebelese sahou ta Kindrei, ma amekes iri kandriyen solo-an ndra-in.
EPH 2:2 Ya, kala len doh badeh, aha an ndra hamon ta kandriyen ndra-in badu kon munyak. Aha an ndra hamon ta tinan tiri malawin ndra-in balik. Na bolo len dah, malawin ndra-in doh edek ili bolo ndrine iri mwan ma badih ale, ta tebelese sahou ta Kindrei, ma iy atondrok iri.
EPH 2:3 Taha marakon mene badeh, asahan buku iri mwan ma badih doh, ma taha an ndra hamon ta so-ok ndra-in ta budon tataha malen. Ya, taha ndra-en hamon tiri lakou marakon, bada taha ma budon tataha anya kamekes. Taha ado buku le aliy, ma taha kameh winiyan akohok ndramas ndra-in doh, buku iri mwan ma badih rayah ba-en hamon ta Kindrei bwe.
EPH 2:4 Ya, taha amekes kandriyen ndra-in solo-an labai, ma taha a buku iri lau ndramak ta budon ta Kindrei. Arile, iy aso-ok ma tikisi taha tinan labai.
EPH 2:5 Eme ma, iy mete-ei taha asahan ame awas hawe Krais. Ya, Kindrei bwidi kandriyen mwasin eme tataha, ma iy andrei taha ame hamon.
EPH 2:6 Kindrei mene mete-ei taha ame awas ja hawe Krais Jises. Ma ta Krais le badeh, Kindrei aso-ok taha katondrok iri lakou marakon udu kandrah, hawe Krais.
EPH 2:7 Iy amekes iri lakou marakon doh, ta leheya iri mwan ma badih ta len hamon, kandriyen mwasin ma tikisiy tan badeh, laba tinan labai. Ya, Krais Jises amekes ta akunoh taha ame hamon, eme ma, ta gok doh, Kindrei ndraleheyani taha, iy aso-ok iri mwan ma badih labai.
EPH 2:8 Lakou doh, aha amwenen mene bamekes bwe. Kindrei edeu laleyah ewek taha. Aha mene atehei le budon handru in ta Krais, ma na so-ok ta Kindrei le amwenen, iy andrei aha ame hamon ja.
EPH 2:9 Idoh winiyan basahan bala buku ndramas ta gok nane aha amekes, bwe. Eme ma, ari mwan o badih winiyan batudun nyara iri amwenen bwe, ma anya, “Jo le amwenen ibo gok, ma jo asahan mwasin ta budon ta Kindrei, ma iy andrei jo eme hamon ja.” Idoh sahou ta wasai!
EPH 2:10 Tasah, Kindrei le amwenen amekes taha, ma ta gok mene Krais Jises amekes, Kindrei bwidi taha asahan ha-un ja, eme ma taha winiyan amekes kandriyen mwasin buku bwena mene iy lowosa taha, ma aseken taha kamekes, ma ka-en hamon ta aliy.
EPH 2:11 Aha ndratanan, na mine iri le amwenen, iri lau badu Isra-el mene asan ku-i iri. Ma iri aloh aha lau tiri bwe. Eme ma, aha kabudon kili hamon ja, aha mene are buku sah handru.
EPH 2:12 Bolo len doh badeh, aha bahis hawe Krais bwe le. Aha are ndra len labai tiri lau badu Isra-el, iri lau mene Kindrei atehei iri kasahan lau tan amwenen. Iy edeu sahou randra le ili tiri, ta iy kameh nyosowani iri, buku bwena mene iy ndrasehek. Arile, aha are ndra manan ta lakou doh. Handru, aha ado ndra kon munyak dah, arile aha batondrok Kindrei ta akohok aha bwe. Tasah, aha bala tanan sahou randra le ta Kindrei ma tandrakan tan bwe.
EPH 2:13 Ma, aha are ndra len labai ta Kindrei, arile na dah, ndraye Krais badeh, tiyani aha ame, na Krais Jises le, aha are mirihik labai ta Kindrei.
EPH 2:14 Krais le ari bwidi iri mwan ma badih marakon asahan amwenen. Buku sah handru? Bwena mene iri lau badu Isra-el amekes bahun hawe iri lau badu leheleh, ma budon tiri doh asahan i buku kowah udu ndrokowa taha. Arile, na badan amwenen, Krais ndratohowei kowah doh ndra-au, ma iy tukumwi iri lau tataha marakon ala le rabuk.
EPH 2:15 Ma iy ndrakahei kandriyen malen mene ta Moses hawe iri sahou batanau badu hawen badeh ndra-au. Iy amekes i buku doh ta atukum iri mwan ma badih badu Isra-el amwenen, ma iri mwan ma badih badu kon leheleh. Ma iri asahan lau rabuk ha-un ja ahis le hawe Krais. Ta kandriyen doh le, bwidi ndrine taha udu mwasin labai.
EPH 2:16 Ehe, Krais imek udu bada kei tondreh, ma ta gok doh, iy ndrasani kandriyen ta adai lau laleyah udu ndrokowa iri mwan ma badih badu Isra-el amwenen, ma iri mwan ma badih badu kon leheleh, kasahan rabuk le. Eme ma, iy ndradai kandriyen ta bahun laleyah ndra-au.
EPH 2:17 Iy mene eme kon munyak ta atiye sahou mwasin i buku doh: “Na dah aha mwan ma badih marakon, ndrine aha winiyan udu mwasin.” Ya, iy ndratiye sahou mwasin doh ndrawek taha lau nane tanan batanau ta Kindrei bwe, ma iri lau badu Isra-el doh tawi batanau ta Kindrei ma tanan ta aliy.
EPH 2:18 Sahou doh handru. Tasah, na Krais le ari, taha lau marakon akohok Malawin ari le nane doh, ndrasihi san, ta taha winiyan asahan hawe tama taha Kindrei.
EPH 2:19 Eme ma, aha mwan ma badih badu kon leheleh, aha bare buku lau leheleh ja bwe. Idoh ndrano. Na dah aha ndrala le hawe iri lau ta Kindrei, ma ndrasahan lau tan amwenen.
EPH 2:20 Aha asahan buku asiu, Kindrei amekes. Iy mene atah ahi aposel hawe iri propet bwena; ahi asahan buku ndru ta asiu doh. Ya, Krais Jises asahan buku ndru alih ta bwese maha-a asiu marakon doh.
EPH 2:21 Iri ka-e asiu doh badeh, ihis hawe Krais, ma udu boto-on labai. Kindrei le amekes kahis, ma anya kasahan ki tinan handru, ma kasahan asiu ndrabun ta atudun Laban.
EPH 2:22 Ma aha ale ndrahis hawe Krais. Ma Kindrei ndratukumwi taha hawe iri lau ta Kindrei rayah, ma aha ndrasahan asiu tan handru. Eme ma, Kindrei badeh, na Malawin Ndrabun tan, winiyan ere bolo aha.
EPH 3:1 Jo Pol, jo ta amekes lahou ta Krais Jises, eme ma jo udu bolo asiu lulik kada-ah. Tasah, jo badeh, atiye sahou i buku doh: Aha mwan ma badih badu leheleh, aha ale are bolo iri lau ta Kindrei.
EPH 3:2 Sebwe, aha ndranuhun buku, Kindrei badeh, tikisi jo, ma atehei jo ta amekes gok dah; iy amekes ta tikisi aha ale.
EPH 3:3 Sahou dah, ta lakou Kindrei amekes, bwena mene aton kahis, arile Kindrei le amwenen ndraleheyani ndrame tek, eme ma jo ndratorowenei sese ndrawek taha.
EPH 3:4 Na dah, aha anyolom sahou dah, ano aha kameh atanan buku, jo badeh, ndratanan handru ta sahou mene aton ta gok ta Krais amekes.
EPH 3:5 Bolo len marakon bwena badeh, Kindrei batiye baleu bame lewan ta sahou mene aton doh bwe. Arile, idah na Malawin Ndrabun, Kindrei asehek sahou dah aleu eme tahi aposel hawe iri propet tan.
EPH 3:6 Ma sahou i buku doh: Na le sahou mwasin, aha mwan ma badih badu leheleh winiyan asahan rabuk le, ma aha a le se hawe ahi lau badu Isra-el. Eme ma taha marakon kameh winiyan akohok iri lakou Kindrei ndratandrakan ta edeu eme tataha mwan ma badih ahis hawe Jises Krais.
EPH 3:7 Kindrei atehei jo, ya jo asahan lau ta atiye sahou mwasin dah. Kindrei amekes i buku doh, tasah iy tikisi jo, ma na boto-on tan amwenen, iy atehei ndramas eme tek ta atadau budon handru tiri mwan ma badih. Eme ma, gok doh badeh, jo amekes.
EPH 3:8 Jo lau laleyah udu ndrokowa iri mwan ma badih ta Kindrei, arile iy tikisi jo, ma iy atehei jo ta atiye sahou mwasin ili tiri mwan ma badih badu leheleh. Sahou mwasin doh ta iri lakou marakon iri mwan ma badih winiyan akohok ta koha iri, buku iri a-en hamon ta Krais. Ma lakou doh kameh winiyan bano bwe.
EPH 3:9 Bwena mene, Kindrei bwidi iri lakou marakon, ma na len doh badeh, iy tone iri budon tan ta iri kandriyen marakon hamon iy anya kamekes. Ya, budon doh mene aton udu bwena, eme ano dah. Arile, na dah, iy atehei jo ta asehek aleu eme lewan iri budon tan dah.
EPH 3:10 Budon ta Kindrei i buku doh: Na bolo len idah iri mwan ma badih badu Juwis, ma iri mwan ma badih badu leheleh, ndramanyah mwasin ma ndrasahan lau tan. Kindrei aseken iri angelo ma lau tinan tiri ado kandrah, iri kanyolom iri tanan mwasin ta Kindrei doh.
EPH 3:11 Idoh asahan ma in hamon ta budon bwena Kindrei tawiy ma abudon ta amekes na gok ta Jises Krais, Laban tataha mari.
EPH 3:12 Taha ndrahis hawe Krais na budon tataha. Jises badeh, san tataha ta ili asahan hawe Kindrei. Eme ma, taha winiyan banoh ta ame hawen bwe. Tasah, taha tanan iy kameh sekesek labai ta taha ame hawen.
EPH 3:13 Eme ma, jo kasehek taha ai: Sisi-in jo bwese dah, aha sabudon ta aliy ma ndrine aha sandra-i ta aliy. Tasah, iri maha-an doh leheya buku Kindrei tikisiy ma aseken aha mwan ma badih badu leheleh tinan labai, ma iri kameh aseben aha asahan buku Krais.
EPH 3:14 Jo abudon ta tanan ta Kindrei ma lakou laba tinan iy mene amekes, ma bwidi jo atehei bwili ndru-uk i andri ma asolom ili ta tama taha Kindrei.
EPH 3:15 Iy le amwenen tondrohon nyara taha lau tan marakon nane atehei budon handru in tan le, iri mwan ma badih ndramak bwena, ma ado kandrah, ma taha mwan ma badih ado ndra awas are kon munyak kahis.
EPH 3:16 Ya, jo atehei bwili ndru-uk i andri, ma jo asolom i buku doh: Kindrei tan lakou solo-an labai, ma hawe iri boto-on. Eme ma, jo aso-ok iy kamekes ndrine aha kabadok na boto-on ta Malawin Ndrabun tan.
EPH 3:17 Ma aha winiyan atehei budon boto-on in ta Krais, ma iy kameh winiyan manyah hawe aha udu le buku doh. Jo asolom ale ta tikisiy ta Kindrei katadau aha ta amekes kandriyen ta aso-ok lau rayah ja, eme ma aha winiyan ales boto-on buku, kandro kei ateu ndren ta kei ales boto-on.
EPH 3:18 Ya jo aso-ok Kindrei kaseben aha ma hawe iri mwan ma badih marakon tan, ta aha mari winiyan atanan ta sabe handru Krais aso-ok aha. Ma tikisiy tan doh ili lawe-en labai, ma ili loken labai, ma ili andri labai. Ya, ari apus tan bwe!
EPH 3:19 Ya, jo aso-ok aha katanan handru ta tikisiy ta Krais, iy udu bwele-e iri budon tiri mwan ma badih mari. Ma jo aso-ok Kindrei kanyuhi aha na iri lakou iy winiyan atehei ewek ta koha aha, ma aha kameh winiyan arek handru ta aliy.
EPH 3:20 Boto-on tan ibo gok ta koha taha. Boto-on doh winiyan tubuluhi salom ma budon tataha, ma winiyan amekes gok tinan handru.
EPH 3:21 Iri mwan ma badih ta Kindrei amwenen katudun nyaran. Iri kamekes na le nyara Krais Jises, ya lomadan kudu le ta lau rebesem, ano rebesem ja, kudu le buku doh. Handru!
EPH 4:1 Jo Pol, jo udu bolo asiu lulik, ta amekes gok ta Laban dah. Eme ma, jo batanau aha boto-on. Bwena mene, iri atiye sahou mwasin ewek taha, ma aha atehei budon handru in ta Jises. Eme ma, aha ka-en hamon ta kandriyen amwenen ta kohan handru.
EPH 4:2 Aha winiyan batebelese bala tiri mwan ma badih rayah ja bwe. Aha kanuhun sahou tiri ma aha kado le. Ndrine aha sato-ou suwi ta losen sala tiri lau nane amekes ndra-in ewek taha. Aha kaso-ok iri lau ta Kindrei rayah ja, ma sandrek iri ta a-en hamon ta kandriyen aha amekes.
EPH 4:3 Malawin Ndrabun aseben taha ado mwasin, ma lakou doh iy amekes, i buku malou tabuwi taha ahis are le se. Eme ma aha kabadok ta ateu lakou doh kihis.
EPH 4:4 Taha lau ta Kindrei i buku bada taha ari le, ma Malawin Ndrabun ari le udu aliy. Ma udu aliy ale lakou ari laba tinan taha marakon atondrok ta akohok udu kandrah. Lakou doh, Kindrei aloh taha ta akohok hawe iri mwan ma badih tan.
EPH 4:5 Ma Laban ari le laba tinan badeh, Krais. Ma sahou mwasin ari ale taha atehei budon handru in tan le. Ma nyaran badeh, ari le ale mene anyu taha na aliy.
EPH 4:6 Ma Kindrei ari le, iy le ari tama taha marakon. Iy le ari udu bwele-en labai tiri mwan ma badih, ma iy ibo gok ndrokowa iri mwan ma badih, ma iy udu bolo iri mwan ma badih marakon, iri atehei budon tiri handru in tan le ari.
EPH 4:7 Handru, bada taha marakon ari le ta Krais. Arile, iy anyohan taha ari, ari na ndramas laba tinan labai ta i le winiya taha ari, ari ta amekes gok tan,
EPH 4:8 i buku le buk ndrabun asehek: “Krais andrei iri mwan ma badih solo-an labai are bolo asiu lulik, ma iy tiyani iri ala loken. Ma iy edeu ndramas ili tiri mwan ma badih ado bwele-e munyak.”
EPH 4:9 Ya sahou dah, “Iy ili loken,” saba moson ta aliy doh? Iy ndra-au ndrala loken le? Bwe, moso sahou tan i buku doh: Ma mwena iy iu ili andri bolo kon tiri lau ndramak ndra-au ndrasu-u.
EPH 4:10 Ya, ndramak doh ma mwena iy iu ili andri, ano ja iy iu ili loken ale. Iy iu ili loken kon handru ta Kindrei udu aliy ta iri lakou marakon winiyan idih na le Krais.
EPH 4:11 Ndramak doh, iy amwenen edeu ndramas ili tiri mwan ma badih. Ma iy edeu ndramas i buku doh: Iy edeu ndramas ili tiri rayah ta amekes gok aposel. Rayah ta amekes gok propet, rayah ta atiye sahou tan ili kon rakon, rakon. Ma rayah iy edeu ndramas ta atondrok iri lau ta Kindrei, o lau ta leheya.
EPH 4:12 Krais edeu iri ndramas doh ta aseben taha mwan ma badih ta Kindrei winiyan amekes gok tan amwenen. Ma gok tan doh ta amekes taha mwan ma badih solo-an ja kasahan kabadok kahis hawen buku badan amwenen.
EPH 4:13 Ma gok dah kameh ili, ili winiyan le taha marakon atehei budon handru, ma budon tataha randra le kudu aliy, ma taha katanan Nadu Kindrei ale. Eme ma, taha kameh asahan lau awas handru winiyan i buku le Krais.
EPH 4:14 Buku taha asahan i buku doh, badeh, taha winiyan bado buku nadu nah bwisik ja, ta budon taha ateu bwe. Ma iri sahou wasai marakon tiri lau ta tamar winiyan batoroyani budon tataha bwe, ma taha winiyan asahan buku ndron udu bolo bayau. Ma idoh ale winiyan baruwi taha buku jor aluhi ndron bwe, ma taha winiyan bateheh laleyah bwe, ma mani budon handru.
EPH 4:15 Taha kaso-ok iri mwan ma badih, ma kasehek le sahou handru. Buku taha amekes i buku doh, taha kameh asahan boto-on handru, ma ahis handru hawe Krais, iy udu bwele-e taha mwan ma badih.
EPH 4:16 Krais badeh, udu bwele-e taha, iy amekes taha marakon, i buku mine taha, kati taha, mada taha, ma lakou badu badan. Iy aseken taha kabo gok ki-in hamon ta tanan ma nyamun, iy le edeu eme tataha ari, ari. Ma taha badeh, badan ranah ai, taha aseben taha ari, ari, eme ma taha marakon ahis le hawen. Na kandriyen doh, bada taha apar i tinan, ma i boto-on handru. Tasah, kandriyen ta aso-ok Kindrei, ma Kindrei aso-ok taha kasahan ki tinan mara-ei.
EPH 4:17 Ta nyara Laban, jo anya kabatanau aha ki buku doh: Aha sa-en hamon ja, ta kandriyen tiri mwan ma badih badu kon munyak, iri tanan Kindrei bwe. Budon tiri badeh, ari katin bwe.
EPH 4:18 Budon ma ndrine iri badeh, ari tanan ta lakou ta Kindrei badeh, bado se aliy bwai. Iri a buku iri lau adek na lulik, ma iri bateu sun ta lomada san tiri bwe. Ya, ari tanan mwasin bwai, ndrine iri ihis, ma iri baso-ok sahou ta Kindrei bwe. Eme ma, iri are len labai ta kohan mwasin, Kindrei edeu ili tiri lau.
EPH 4:19 Bwili iri bama ja bwai. Eme ma, iri ndra-en hamon ta kandriyen ndra-in, ma ndrine iri ato-ou suwi ta amekes kandriyen solo-an ta karei, ma iri tikisiy labai ta amekes.
EPH 4:20 Arile, kandriyen ta Krais, iri lau mene awek leheya aha ta aliy, badeh, bala buku lakou doh bwe.
EPH 4:21 Jo tanan, aha ndranuhun sahou handru ta Krais, ma iri ndraleheya aha ta iri kandriyen iy aso-ok taha ka-en hamon ta aliy.
EPH 4:22 Sahou ta Krais dah badeh, i buku doh: Bwena mene, aha a-en hamon ta so-ok ta bada aha le amwenen. Iy aso-ok labai, iri kandriyen ta wasai, ma madalakis laleyah, ma hawe kandriyen doh badeh, bokoro-ei iy le. Eme ma, aha karuwi kandriyen malen doh udu ndrine aha keme len.
EPH 4:23 Ya, budon taha kaleu, ma kasahan ha-un.
EPH 4:24 Aha kasahan ha-un ja. Kindrei le amwenen amekes kohan ha-un doh, ma asahan buku Kindrei amwenen. Kandriyen ta kohan ha-un doh, ta amekes taha asahan ndrabun ma mwasin labai ta mada Kindrei.
EPH 4:25 Eme ya, aha sasehek sahou wasai ja ai. Aha kasehek le sahou handru kili tiri mwan ma badih, tasah aha ado bada ndramak ari le.
EPH 4:26 Ma ale, buku aha andra-i ta lakou, ya, bale aha kudu aliy! “Kora-on aha kandra-i ma amekes kandriyen ndra-in.” Kora-on losen taha udu aliy, winiya le an amai iu ili andri na beyeh, ma aha tawi losen doh udu le gwek kahis.
EPH 4:27 Kandriyen ta losen doh, sihi kou ili le ta balik, ta iy eme bolo koha aha, ma aliu aha ta amekes kandriyen ndra-in.
EPH 4:28 Ya, sahou randra ja udu aliy. Iri lau ta bahana, winiyan babahana ja bwe. Na dah, iri kamekes gok. Iri kamekes gok mwasin na le mine iri amwenen, ma tiri lakou kudu aliy, ta adeu kili tiri lau lakou bwe.
EPH 4:29 Aha samukuni boho aha ta asehek iri sahou luhe. Sahou mwasin le kameh winiyan aseben iri mwan ma badih badeh, asahan mwasin. Iri sahou mwasin doh winiyan ta atadau iri mwan ma badih anya kataku, ma ta adeu seben ta Kindrei ili tiri mwan ma badih nane anuhun sahou taha.
EPH 4:30 Aha samekes ndrine Malawin Ndrabun ta Kindrei sandra-i, ta kandriyen aha a-en hamon ta aliy. Aha kabudon kamwenen. Kindrei ndratehei Malawin Ndrabun buku kalem ndrawek taha ta aha katondrok len ta Kindrei eme akohok taha ame hamon ja.
EPH 4:31 Eme ma, taha karuwani iri kandriyen ta ndrine taha ndra-in, losen, ndrinem ato-ou, sahou tebelese, sahou sondrokonya. Ma aha samekes bahun laleyah sala tiri lau.
EPH 4:32 Aha kamekes kandriyen mwasin kili tiri lau rayah, ma ndrine aha kamunum kili tiri. Aha kamani kandriyen ndra-in tiri, i buku le Kindrei mani taha in ta bwele-e nyara Krais.
EPH 5:1 Aha badeh, ndrasahan nadu Kindrei, ma iy aso-ok aha labai. Eme ma, aha ka-en hamon ta kandriyen, iy amwenen amekes.
EPH 5:2 Kandriyen ta aso-ok iri mwan ma badih badeh, katondrok koha aha, buku iy mene atondrok koha Krais. Iy mene tikisi taha, ma iy atehei kohan amwenen eme ta aseben taha. Iy imek, ma atehei kohan ili ta Kindrei i nyara salom manahu buburen labai.
EPH 5:3 Eme ma, kandriyen ta karei, ma lomondra ndra-in marakon, ma hawe kandriyen ta madalakis sasahan ndrokowa aha. Aha mwan ma badih ta Kindrei, kora-on aha kasihi san tiri mwan ma badih, korou sahou kewek taha amekes kandriyen i buku doh.
EPH 5:4 Ma aha ale samekes sahou ndra-in, ma sahou konen bwe, ma sahou nyorei ndra-in. Idoh bamwenen bwe. Ndri-iy labai! Kindrei ndraruwi aha ndrame len ta kandriyen ndra-in, eme ma aha kadeu wurah kili tan, ta iy talawei aha are mine iri kandriyen doh.
EPH 5:5 Jo asehek amwenen ewek taha. Iri mwan o badih, a-en hamon ta kandriyen ta karei, o, a-en hamon ta kandriyen bolo-an, o, a-en hamon ta kandriyen ta madalakis (idoh i buku le kandriyen ta atudun iri kindrei ta wasai); iri mwan ma badih doh kameh, winiyan bame bolon hawe iri lau ta Krais, ma Kindrei kameh winiyan batondrok iri, bwe.
EPH 5:6 Aha katondrok aha kamwenen. Kora-on aha ka-en hamon ta sahou wasai tiri lau anya kariu aha ta a-en hamon tiri kandriyen ndra-in doh, jo mene ndrasehek ta aliy. Tasah, ndrine Kindrei irih tiri mwan ma badih nane tebelese sahou tan, ma a-en hamon tiri kandriyen ndra-in buku doh.
EPH 5:7 Eme ma, aha sabwilibwik ma samekes kawas hawe iri.
EPH 5:8 Tasah, bwena mene aha are ndra bolo kandriyen ta lulik. Arile, na dah, aha ndrasahan iri mwan ma badih ta Laban, ma aha ndrame ta lomada sun, ma iy sihi mada aha ndrasak ta atanan iri kandriyen ndra-in mene aha amekes. Eme ma, aha ka-en hamon ta kandriyen mwasin, buku iri mwan ma badih are ta lomada sun.
EPH 5:9 Sun ta Kindrei badeh, udu hawe aha, ma iy amekes iri kandriyen mwasin, iri kandriyen amwenen, ma kandriyen ta sahou handru asahan eme lewan. Aha badeh, ka-en hamon tiri kandriyen doh.
EPH 5:10 Ma, aha kabadok ta atanan iri kandriyen, ta Laban aso-ok, ma aha ka-en hamon ta aliy.
EPH 5:11 Aha sabwilibwik hawe iri mwan ma badih nane amekes kandriyen ndra-in ta bolo lulik. Iri kandriyen buku doh winiyan bato-ou salin mwasin bwe. Mwasin, ta aha kaleheya iri mwan ma badih, buku iri kandriyen doh ndra-in,
EPH 5:12 ma, hawe iri kandriyen nane aton, ma amekes ndra-in labai! Bwilik ama ta asehek taha ta lakou iri amekes.
EPH 5:13 Arile, sun ta Kindrei doh badeh, nyowonyani kati iri kandriyen marakon. Ma sun ta Kindrei ale winiyan tubuni koha iri mwan ma badih are bolo lulik, ma iri kameh winiyan arek na le lomadan.
EPH 5:14 Sun anya, ma lomadan lomotani lakou marakon ere le lewan. Eme ma, iy asehek i buku doh: “Aha kamak, ma kasuri aha ado bolo imek taha kame loken, ma lomada Krais kameh anya udu bwele-e aha.”
EPH 5:15 Eme ma, bale aha kudu taha, ta kandriyen ta tekedek taha. Aha sadek buku iri mwan ma badih tana iri Kindrei bwe, arile aha kadek buku iri lau ta tanan.
EPH 5:16 Na dah badeh, len tataha ta amekes kandriyen mwasin ta Kindrei. Tasah, len taha are aliy dah badeh, ndrandra-i mara-ei ta kandriyen ndra-in ta balik.
EPH 5:17 Eme ma, aha sala buku iri lau bale iri bwe, arile aha badeh, katanan kamwenen ta so-ok ta Laban, ma ka-en hamon le ta aliy.
EPH 5:18 Aha sa-un waen solo-an ta amekes aha abo lolo-ou. Arile aha badeh, kadih mara-ei na le Malawin Ndrabun.
EPH 5:19 Ma aha kayah wari hawe iri lau ta Kindrei. Aha kayah wari ta Debit, ma iri wari rayah ja ta atudun Kindrei, ma kayah bolos ta Malawin Mwasin ta Kindrei atehei udu bolo ndrine aha kili ta Laban.
EPH 5:20 Na bolo len marakon, aha kadeu wurah kili ta tama taha Kindrei, ta iri lakou marakon, udu bolo nyara Laban tataha Jises Krais.
EPH 5:21 Aha marakon ka-en bahandra iri mwan ma badih ari ari ta Kindrei rayah ja, ma ka-en hamon ta sahou tiri. Tasah, aha marakon badeh, a-en bahandra Krais, ma ta kandriyen doh aha kameh amekes ta atudun nyaran.
EPH 5:22 Aha badih tasou marakon, aha ka-en hamon ta boho iri mwan taha, i buku le aha a-en hamon ta Laban.
EPH 5:23 Tasah, mwan udu bwele-en ma atondrok udun, i buku Krais badeh, udu bwele-e iri mwan ma badih ta Kindrei. Ma iri badeh, badu bada Krais, ma iy mene andrei iri ndrame hamon.
EPH 5:24 Mwan ma badih ta Kindrei, iri badeh, are bahandra Krais. I buku le, aha badih ale, len marakon aha kado bahandra iri mwan taha.
EPH 5:25 Aha lau mwan, aha kaso-ok udu aha iri, i buku le Krais aso-ok iri mwan ma badih ta Kindrei, ma iy atehei kohan amwenen ta aseben iri.
EPH 5:26 Iy amekes i buku doh ta atehei kalem i tiri mwan ma badih ta Kindrei ta iri tan amwenen. Ta sahou tan amwenen iri atehei budon tiri handru in aliy, ma alomwa iri na gwa, eme ma Krais badeh, bwidi iri asahan ha-un handru.
EPH 5:27 Tasah, iy anya kamekes iri mwan ma badih ta Kindrei kasahan mwasin handru ta madan, ma iri kameh ari ndraka-an, ma ari bakuwa, ma iri lakou buku doh bwe. Iri kameh asahan lau ta Kindrei, ma ari ndra-in bwe.
EPH 5:28 Eme ma, aha mwan badeh, kaso-ok udu aha iri i buku le aha aso-ok bada aha amwenen. Are lau mwan aso-ok udun badeh, iy aso-ok ma atondrok iy amwenen.
EPH 5:29 Taha tanan, buku taha badeh, winiyan basumukok bada taha amwenen bwe, arile taha anyohan ma atondrok bada taha iri, i buku le Krais amekes i tiri lau ta Kindrei.
EPH 5:30 Taha mwan ma badih badeh, badu hawe bada Krais.
EPH 5:31 Idoh i buku buk ndrabun asehek: “Ta katin le doh, iy mwan karuwani taman uru tinen ya iy keme len hawe udun, ya uru kasahan ari buruwen.”
EPH 5:32 Sahou sokek dah budon laba tinan labai udu aliy. Jo amwenen, abudon anya idah sahou ta Krais hawe iri mwan ma badih atehei budon tiri handru in tan.
EPH 5:33 Arile, iy tiye i buku doh ale ewek taha lau mwan ari, ari, “Aha badeh, kaso-ok udu aha iri, i buku le aha aso-ok bada aha amwenen.” Ma iri badih ale badeh, katudun nyara udu iri.
EPH 6:1 Ya, aha nadu ahi iri, aha kanuhun ma ka-en hamon ta boho tamam hawe tinem. Tasah, aha badeh, ahis hawe Laban ma idoh amwenen ta budon tan.
EPH 6:2 Buk ndrabun asehek i buku doh, “Ou a-en bahandra tamam uru tinem, ma ou anuhun sahou turu.” Sahou doh badeh, batanau ta Kindrei, ma hawe tandrakan tan.
EPH 6:3 Ma tandrakan nane tiye i buku doh: “Buku aha amekes i buku doh, aha kameh ado mwasin, ma aha kameh ado luluwen are kon munyak.”
EPH 6:4 Aha tama ma tine iri nah, aha sabolosen sala ta nadu aha iri, ma amekes ndrine iri ato-ou ta losen ewek taha. Aha katondrok iri kamwenen, ma kaleheya iri ta sahou ta Laban.
EPH 6:5 Aha bonyo-ou badeh, kabudon iri tinan taha, ma ka-en hamon ta sahou tiri. Aha winiyan bawasai bwe. Aha ka-en hamon ta sahou tiri i le buku aha anuhun, ma a-en hamon ta sahou ta Krais.
EPH 6:6 Kora-on aha amekes gok mwasin udu bolo len, iri ales ta anyolom aha ta andrek iri. Ma hamon iri banyolom aha bwe, aha kameh ajos ta gok. Aha badeh, kasahan buku bonyo-ou ta Krais, ma kamekes gok boto-on na len marakon. Ta kandriyen doh, aha kameh a-en hamon ta so-ok ta Kindrei ta ndrine aha.
EPH 6:7 Ya, aha badeh, kasekesek le ta amekes gok doh, bala buku aha amekes gok tiri lau le bwe. Aha amekes gok doh ta Laban ale.
EPH 6:8 Tasah, aha tanan, are mwan o badih amekes gok mwasin, ya Laban kameh edeu sihine iri. Iy kameh amekes ili tiri mwan ma badih bonyo-ou, ma ili tiri mwan ma badih rayah ale.
EPH 6:9 Aha lau tinan tiri lau bonyo-ou, aha ale kamekes kandriyen mwasin i buku doh kili tiri. Aha karuwani kandriyen ta sahou ndra-in, ma nohowa iri bonyo-ou mwan o badih. Tasah, aha ale tanan, Laban badeh, udu kandrah, ma iy Laban taha, ma tiri lau bonyo-ou ale, ma iy badeh, aleben kandriyen tiri mwan ma badih marakon ta kandriyen randra le.
EPH 6:10 Ya, sendrehendreh ta sohowa la-ukei dah i buku doh: Nyamu Laban badeh, kabadok boto-on kudu hawe aha.
EPH 6:11 Sahou sokek tek rayah i buku doh: Aha kasini iri nyasou marakon ta bahun, Kindrei nane edeu ewek taha, ma aha kameh winiyan ales boto-on ta mada iri sahou ta balik anya kamekes kewek taha.
EPH 6:12 Tasah? Taha badeh, bamekes bahun hawe iri lau le bwe. Taha badeh, amekes bahun hawe iri malawin ndra-in ere bolo kandrah. Ya, taha amekes bahun hawe iri kabin ma iri lau ta bwena, ma iri malawin ndra-in boto-on en, iri ale atondrok kandriyen ta lulik badu kon munyak dah.
EPH 6:13 Eme ma, aha kakohok iri nyasou marakon ta bahun nane Kindrei edeu ewek taha. Ma aha kameh winiyan banoh, ma batobwak ta bahun anya kasahan bwe. Aha kameh ales boto-on ere le buku doh.
EPH 6:14 Ya, aha badeh, kasin iri awin ta bahun doh kudu le ai: Sahou ta Kindrei handru badeh, i buku balaban aha apeu ndrukulu aha na aliy. Ma kandriyen mwasin aha a-en hamon ta aliy, idoh i buku awin kapa iri amekes na hayen, aha asin ta aturuk ade aha ta bahun.
EPH 6:15 Kandriyen ta atiye sahou mwasin ta Kindrei, ta iy anya kamekes mondrei hawe iri mwan ma badih, i buku aha asini ku-i kati aha ta adek ma amekes bahun.
EPH 6:16 Ya, na bolo iri len marakon, aha badeh, kabwese iri lakou doh hawe budon taha handru. Budon doh, i buku rasi sabar aha ndruniy udu kase aha. Na sabar le doh kameh, aha winiyan semete-ei jih ta nyah ta balik.
EPH 6:17 Kindrei andrei aha ndrame hamon. Eme ma, budon doh aha katehei buku barak iri amekes na hayen ta tubuloh bwisi batu aha. Ma aha kakohok iri sahou ta Malawin Mwasin ta Kindrei nane edeu ewek taha. Sahou doh kameh asahan i buku samen kasoh madan madan labai, aha kandrei kudu mine aha ta asan iri sahou ta bahun.
EPH 6:18 Iri lakou doh, aha kamekes hawe salom, ma kandremenya Kindrei ta aseben aha. Aha badeh, kasolom ta iri lakou marakon aha amekes, na boto-on ta Malawin Ndrabun. Ma aha ale katehei ndrokei kamwenen labai, ma aha winiyan bajos bwe. Len marakon aha kasolom ta aseben iri mwan ma badih ta Kindrei.
EPH 6:19 Ma aha kasolom ta aseben jo ale. Jo aso-ok aha kasolom ki buku doh: Kindrei katehei sahou keme bohok, ma jo sanoh ta atiye sahou dah, ta sahou mwasin mene Kindrei tone tiri mwan ma badih.
EPH 6:20 Jo ndramak ta atiye sahou mwasin dah, ma ta idah le jo ili udu bolo asiu lulik. Kindrei atehei jo, ma jo amekes gok ta atiye sahou tan. Eme ma, aha kasolom kili ta Kindrei, ta jo kameh winiyan banoh ta atiye sahou mwasin dah bwe.
EPH 6:21 Tikikus kameh barasehek nyala aha ta iri gok marakon jo amekes. Tikikus badeh, iy nadu tine taha ari handru, ma iy ndramak ari mwasin ta amekes lahou ta Laban. Jo badeh, aso-ok iy labai.
EPH 6:22 Na dah, jo suni iy ta ewek hawe aha, ma aha kameh winiyan atanan ta manyah tahi, ma iy kameh winiyan atadau ndrine aha.
EPH 6:23 Jo aso-ok tama taha Kindrei hawe Laban Jises Krais, uru kamekes ndrine aha nadu tine marakon kamunum. Ma kaseben aha ta aso-ok iri mwan ma badih rayah ja, ma katadau budon taha kabadok kudu turu amwenen.
EPH 6:24 Jo aso-ok Kindrei kamekes kandriyen mwasin kili tiri mwan ma badih nane baruwani kandriyen ta aso-ok handru, Laban tataha Jises Krais.
PHI 1:1 Aru ma la-uh badeh, lohowan ta Krais Jises, jo Pol hawe Timoti. Jo Pol atorou la-ukei dah badeh, hawe budon ta Timoti ale in se hawek, ta ewek tado lau mari, budon tado ihis in ta Krais Jises, ma ado lau ta Kindrei, ado kon Pilipai badeh. Ma hawe i toro lau ta batun ta Kindrei, ma hawe i tiri lau badu ndrokowa ado, ta aseben iri lau ta Kindrei.
PHI 1:2 Eme salom tek i ta tama taha Kindrei, ta tikisiy ma mondrei tan, hawe ta Laban Jises Krais kewek tado.
PHI 1:3 Ya eme na saba len le badeh, jo abudon ado, udu bolo salom tek i ta Kindrei.
PHI 1:4 Ma udu bolo salom tek ale badeh, jo sekesek ewek tado mari,
PHI 1:5 tasah ta madasan ta, ado badeh, sebenei jo laba tinan labai ta atiye sahou ta nyala Jises Krais. Ado amekes udu ndra bada katin, na len ado atehei budon handru tado i ta sahou mwasin ta nyala Jises Krais eme, eme taku na len dah.
PHI 1:6 Tasah, jo badeh, tanan i mwasin handru ta aliy, ta Kindrei mene mesekei lahou udu bolo ado, ma ado a lau tan, winiya le barano na len ta Krais Jises kameh eme hamon ja.
PHI 1:7 Ado badeh, adek ma badu hawek handru en, ta atiye sahou mwasin ta nyala Jises Krais. Eme badeh, jo atona i buku doh, ewek tado ta tikisiy ta Kindrei weleyani eme tato mari. Ya jo udu bolo kou kada-ah ma hawe jo mene ales udu ta sahou badeh, jo batotoreh bwe, jo tiye sali sahou amwenen i toro. Ma jo tiye sahou boto-on i toro ta nyala Jises Krais badeh, wasai bwe, handru.
PHI 1:8 Kindrei badeh, tanan jo badeh ndrinek eden handru ta udu hawe ado, idoh bala wasai bwe. I buku le Jises Krais aseken ado.
PHI 1:9 Eme ya salom tek, jo amekes i tado badeh, i buku doh: Ta kandriyen tado ta tikisiy, ma ta aseben badeh, kabadok kudu ndrine ado kili kili, ma idah kameh winiyan mesekei ado atana ado ta kandriyen mwasin badeh, i buku sah, ma hawe ado kameh winiyan atana ado kandriyen mwasin handru ta Kindrei i buku sah.
PHI 1:10 Ya eme san le doh kameh ado winiyan atana ado, ta saba kandriyen mwasin handru, i buku sah ta bolo kandriyen mari. Ma hawe lau kameh winiyan tiye ado ta asehek sahou handru, ma winiyan batiye ado ta aliy bwe, winiya le len ta Krais barasahan.
PHI 1:11 Ya, i buku none ado adah na kandriyen mwasin ta Kindrei, i san ta Jises Krais aseben ado, idah kameh iri lau anyolom ma iri atudun Kindrei ta aliy.
PHI 1:12 Eme ya ado nadu tine i san ta Jises, jo anya ado ki tana ado ta maha doh, jo bwese badeh, basokei sahou mwasin ta nyala Jises bwe, arile na maha doh le badeh, mesekei sahou mwasin doh i tinan labai i bolo lau mari.
PHI 1:13 Ma, na bolo maha doh ale mesekei iri lau ta ndrokei ta kabin ma lau are kada-ah badeh, ndratanan ta jo udu bolo kou kada-ah, tasah jo lohowan ta Krais.
PHI 1:14 Tasah na jo eme udu bolo kou kada-ah badeh, mesekei nadu tine oro i san ta Laban abadok labai ta asehek sahou ta Kindrei, ma oro batotoreh ta aliy bwe.
PHI 1:15 Eme handru labai, oro lau rayah ta Kindrei atou jo asehek sahou ta nyala Krais, ma mada oro alikis jo. Eme oro anya kakohok ndrahunek kado bwena ja. Arile, oro lau rayah ndrine oro mwasin, oro atiye sahou ta nyala Krais le ai.
PHI 1:16 Eme ya oro nane ndrine oro mwasin ma oro aseken jo, tana oro, ta jo udu bolo kou kada-ah badeh, ta jo tiye sahou ta nyala Krais badeh, handru.
PHI 1:17 Arile, oro lau rayah nane mada oro alikis jo, atiye sahou nyala Krais ma oro anya kasakalau jo, arile budon toro badeh, atalei. Oro badeh, anya kamekes bohosak keme tek udu bolo kou kada-ah.
PHI 1:18 Arile, idoh babwereyaniy se jo bwe. Buku none oro amekes andra-i deh mwasin, badeh, jo sekesek le ta aliy. Tasah, oro ma lubuk atiye le sahou ta nyala Krais. Eme ya mesekei jo sekesek laba tinan labai ta aliy badeh, ili le ai.
PHI 1:19 Tasah jo tanan labai, na salom tado ma hawe na seben tado na boto-on ta Malawin Ndrabun ta Jises Krais badeh, winiyan sebenei jo hawe kohak udu mwasin.
PHI 1:20 Eme ya ndrinek tanan labai ta jo kameh winiyan banoh bwe, ma hawe bwilik kameh winiyan bama bwe na len ta sahou dah, ma hawe i buku len mari eme, jo kameh winiyan batotoreh ta asehek sahou bwe. I buku none, jo imek deh jo udu, arile masiye ma hawe atudun badeh, ki le ta Krais.
PHI 1:21 Eme ya, i buku none jo bamak bwe badeh, jo udu le hawe Krais atiye sahou tan, ya, i buku none jo kimek badeh, kameh jo akohok lakou mwasin labai ja.
PHI 1:22 I buku none jo bamak bwe, jo kameh amekes lahou ta Krais ilih le. Eme ya jo ndrandrondro, jo ki buku sah handru bah?
PHI 1:23 Tasah jo ndrado bolo ndrokowa budon la-uh ai: Jo badeh, aseken labai ta imek, ya jo kili kudu hawe Krais, tasah idoh kameh udu mwasin tek handru.
PHI 1:24 Arile, ta ado le badeh, mwasin labai ta jo kudu hawe ado ta aseben ado.
PHI 1:25 Eme ya jo ndratanan ndramwenen ta jo badeh, samak, jo kudu hawe ado sese op, ta amekes ado kabadok ta budon handru tado, ma ado kasekesek ta aliy.
PHI 1:26 Ya eme i san ta jo udu hawe ado badeh, ma eme ya sekesek tado i ta Krais Jises ki tinan handru.
PHI 1:27 Ma laba tinan labai asah i buku doh: Tekedek tado badeh, ki buku tekedek ta Jises, i buku none sahou handru tan asehek. Eme ya, i buku none jo bawek bwe, deh jo anuhun nyala ado le, jo tanan ado badeh, ales boto-on ta budon randra le. Ma ado asahan ndramak ari le, ta budon tado ta aseben iri lau katehei budon handru tiri ki ta sahou handru ta Kindrei.
PHI 1:28 Ma hawe ado badeh, banoh oro lau ta andres ado ta budon handru tado in ta Jises, bwe. I buku ado banoh oro bwe, ado kameh i nyara kalem ta leheya, oro kameh taku. Ya, i buku none ado amekes doh, idah kameh Kindrei sebenei ado.
PHI 1:29 Eme ya Kindrei edeu budon ma la-uh doh ewek tado: Ado kales ta budon randrah le hawe Krais, ma hawe ado kales boto-on ta bwese isi ta lahou ta Krais.
PHI 1:30 Eme ya ado ale bwese isi i buku none ado mene ndranyolom, jo bwese isi mene udu Pilipai ma hawe ado ndranuhun jo bwese isi udu kon tinan Rom kada-ah.
PHI 2:1 Ado mesekei jo sekesek tinan labai ta kandriyen mwasin tado. Kandriyen ta budon tado badeh, i randra le, ma kandriyen tado ta aseben ndramak ari ari. Ma hawe ado nono-ou ta bolo manyah bwe, ado manyah mwasin le ta budon randra le. Tasah, ado mene Krais mesekei ado abadok na len ado aseken ta aliy. Ma iy atamar ado, ma leheya iy eme lewan, ta iy badeh, aseken ado. Eme ya, na Malawin Ndrabun udu ta Krais ta amekes lahou tan badeh, udu tado ale. Ma hawe ndrine ado aseken ado ari ari, ma hawe ado tikisi ado ari ari. Ya eme kandriyen mari doh badeh, ado amekes ndra handru le, eme mesekei jo sekesek laba tinan labai tado ta bolo tekedek tado doh.
PHI 2:3 Ado samekes kandriyen ta ndrakok ta aseben ado le, ma satudun ado ta aliy. Ma hawe ado satudun le anya, ado ndra ari ai. Arile, ado kamasiye iri, ya bale ado kamani ado.
PHI 2:4 Ma hawe ado sabudon lakou ta aseben ado le, arile ado kabudon ale, ki ta seken ta ndramak ari ari.
PHI 2:5 Budon tado ki le buku budon ta Krais Jises.
PHI 2:6 Handru, iy badeh, Kindrei i buku taman handru, arile iy batawi budon ta iy Kindrei bwe.
PHI 2:7 Arile, iy atehei iy i buku ari ndramak laleyah, i buku ari bonyo-ou ma asahan i buku ndramak awas amwenen.
PHI 2:8 Iy atehei iy amwenen iu ili andri handru ma anuhun taman Kindrei, ma bwese bwilima ili ma imek i bada kei tondreh.
PHI 2:9 Eme ta katin doh, Kindrei tutuni iy ili udu loken labai, ma atehei boto-on i ta nyaran, sakalawi nyara lau mari.
PHI 2:10 Ma ta nyara Jises le kameh lau mari badu bolo kandrah, hawe lau badu bwele-e munyak, ma badu baha munyak kameh aluh ala andri, ma anuhun le iy.
PHI 2:11 Ma hawe lau mari kameh aloh iy i tinan ta ndranye lau mari, ta Jises Krais badeh, iy Laban handru. Na sahou tiri doh kameh atudun nyara Kindrei. Tasah, iy le tama taha mari udu bolo lomadan ta taman Kindrei, ta atondrok munyak mari.
PHI 2:12 Eme ado borobwar tek, i buku none ado mene ndranuhun boho Kindrei na len mari ndra-au ndra-au badeh, ado kamekes ja. Ado samekes na len le, jo udu hawe ado, ndri-iy. Arile na dah, i buku none jo bado hawe ado bwe, ado ari ari kamekes kandriyen mwasin doh, kasahan tinan kili kili udu bada nohonoh i ta Kindrei, i buku none Kindrei sebenei ado.
PHI 2:13 Tasah, Kindrei le badeh, edeu boto-on i tado ta amekes lomondra mwasin ta sasah iy aseken ado ta amekes ma edeu boto-on i tado ta amekes.
PHI 2:14 Sasah ado amekes, ado sanunu-uh ta aliy ma ado sandres ta aliy.
PHI 2:15 Eme iri lau winiyan basehek ado bwe, ma idah kameh lomondra tado asahan mwasin labai. Eme ado nadu Kindrei, kandriyen tado ki mwasin labai kanya i buku ndrau anya kudu bolo ndrokowa iri lau ta amekes kandriyen ndra-in labai katou.
PHI 2:16 Idoh tiye tanan toro ta Kindrei badeh, winiyan sebenei koha oro udu le buku doh. Eme ya, i buku none ado amekes i buku doh kameh mesekei jo winiyan atudun ado na len ta Krais eme hamon apou taha. Tasah, idoh kameh mesekei ado asahan randrah labai, ta leheya lahou tek ewek tado badeh, bala laleyah bwe.
PHI 2:17 Ado mene atehei ado a nyara salom ala ta Kindrei kabatana ado atehei budon tado handru i ta sahou tan. I buku none iri pris adeu lakou i ta salom. Eme ya, ki buku none ndrayek kamou ya jo kimek, idoh kameh i nyara kalem ta sekesek tek ewek tado ta lowosa salom tado. Idoh kameh i nyara kalem ta salom, iri pris asolou waen i ta salom, ta edeu sendrehendreh ta salom mari ano. Ma idah kameh, Kindrei anyolom ma iy kameh sekesek ta aliy.
PHI 2:18 Eme ya ado kasekesek hawek ta aliy.
PHI 2:19 Ya ta nyara Timoti, i buku none Laban Jises asumon eh, kameh jo suni iy ewek hawe ado udu gwek sese. Ya, i buku none iy eme hamon kameh, iy winiyan asehek nyalak ta bolo manyah tado, ma idah kameh mesekei ndrinek sekesek ta aliy.
PHI 2:20 Jo batou ari ndramak bala buku none Timoti bwai, tasah iy abudon ado labai, ta bolo manyah tado, i le buku jo.
PHI 2:21 Tasah, iri lau mari anyolom le, i le bada lakou le ta aseben iri, ya iri babudon lahou ta Jises Krais bwe.
PHI 2:22 Arile ado ndranyolom kandriyen ta Timoti ai. Iy ndraleheya ndrame lewan tado, ta iy badeh, winiyan. Iy mene amekes lahou hawek i buku ari nah amekes lahou udu baha taman, amekes lahou ta sahou mwasin.
PHI 2:23 Jo abudon i buku sah kameh, jo suni iy ewek hawe ado suwi, i buku none jo anyolom manyah tek udu bolo kou kada-ah i buk sah.
PHI 2:24 Ma jo ndratehei budon tek boto-on ndra ta Laban ta nawin bwe kameh iy sebenei jo udu bolo kou, ma jo le amwenen barawek.
PHI 2:25 Arile, jo ndrabudon ndramwenen, ma jo winiyan babe-en bwai, ta jo kameh suni Ipaproditus ewek. Iy badeh, lau ta Kindrei badu hawe to, ma hawe iy badu hawek ta amekes lahou i buku none lau ta bahun ta beteleu ta Kindrei, ndramak ta atondrok. Iy ale mene i saluwe ado ta atiye sahou mene ado tiye iy eme ta aseben jo na len jo aseken seben.
PHI 2:26 Iy kameh ewek hawe ado, tasah iy tikisiy ma kohan apwe ado ma anya katou ado mari. Eme iy tanan ado mene ndranuhun iy ibo sik.
PHI 2:27 Handru labai, iy mene ibo sik ma iy sese le kimek. Arile, Kindrei badeh, batikisi iy le bwe, iy tikisi jo ale, ta jo satikisiy la-un sala la-un. Eme Kindrei mesekei iy amwenen ja.
PHI 2:28 Eme ya jo suni iy ewek hamon ja, ta ado kanyolom iy ma ado kasekesek. Eme ya tikisiy tek kudu le kudu.
PHI 2:29 Ado kamasiye ndramak i buku doh, ma hawe kaseken iy na ndrine ado i san ta Laban.
PHI 2:30 Tasah, iy atehei boto-on ma kohan mari i ta lahou ta Jises, ya sese le iy kimek. Iy atehei boto-on tan hawe kohan mari i ta aliy ta aseben jo, tasah ki ado badeh, winiyan bwe.
PHI 3:1 Kabwai, sahou sese le doh. Ado nadu tine, ta budon handru badu hawek i san ta Kindrei, ado kasekesek, tasah ado ndrase hawe Laban. Eme ya jo baliliy ta atorou ewek tado bwe le, i buku le bwena mene jo atorou ewek, ta leheya ado, ta tiye nyala ado tiri lau ta leheya tanan ta wasai ado, i buku none iri kanone ado.
PHI 3:2 Arile, mada ado kaleu toro mwi ndra-in ado badeh. Oro mwi doh, oro ndramak ndra-in ta amekes kandriyen ndra-in. Oro ndramak doh an hamon ta kandriyen malen tiri Juwis ta asan ku-i iri mwan. Eme oro anya, i san doh kameh oro mwasin labai, ma oro anya, Kindrei kameh kasekesek oro.
PHI 3:3 Eme ya ado satehei budon tado handru sa-en toro, tasah oro asan ku-i oro, eme oro anya, i san doh kameh mesekei oro asahan lau ta Kindrei, arile bwe. Arile, taha lau ala atehei budon tataha handru i ta Kindrei bala san doh bwe, taha asahan lau ta Kindrei i san ta taha ruwani ta amekes kandriyen ndra-in. Ma taha atudun Kindrei i san ta Malawin Ndrabun, hawe taha ale sekesek i le ta Krais ta lakou mene iy mesekei eme tataha. Ya eme taha batehei boto-on ta taha bala ta kandriyen ta lahou badu bada taha amekes, bwe. Idoh badeh, ndrano ndra-au.
PHI 3:4 Ma jo ale, tek budon udu kada-ah ta tiye jo badeh, are handru ma hawe jo winiyan asehek jo badeh, in hamon ta kandriyen malen mari. Eme ya, i buku none are lau anya iy badeh, in hamon ta kandriyen malen mari udu bwelee lau mari, badeh, jo ale tek budon solo-an labai udu kada-ah ja sakalawi toro.
PHI 3:5 Jo badeh, tubu badu Isra-el, badu boho kamen ta Benjamin, eme jo badeh, ndraye lau badu Hiburu amwenen; ma jo badeh, Parasi ari ai, jo in hamon ta kandriyen malen mari. Eme ya ben tek asahan ndru la-uh le mene, asan ku-ik ale.
PHI 3:6 Eme ya jo kede-eh anya ndra mwasin le ai, ta mada Kindrei. Eme jo edek ili eme amekes maha hawe isi i bada iri lau ta Krais. Ya jo kede-eh anya jo badeh, in hamon handru ta batanau mari tiri Juwis. Eme ya iri lau anya jo badeh, amekes lahou doh amwenen handru ta mada Kindrei.
PHI 3:7 Ya eme budon tek i buku aliy ale, jo anya lakou mari doh kameh winiyan mesekei jo asahan mwasin. Arile, na dah budon tek ndra randrah labai, i buku doh: Jo anyolom ma abudon ili badeh, lakou mari doh badeh, bala se ari lakou bwe. Tasah, lakou doh badeh, turuki jo bala tanan Krais bwe.
PHI 3:8 Ma laba tinan labai udu badeh, jo i tanan Krais Jises i Laban tek baden eh. Jo i tanan lakou mari doh bala se lakou bwe, iu laleyah. Eme na Jises le, jo kameh akahei iri lakou doh iu, tasah ari mwasin badu ta aliy winiyan basebenei jo bwe. Lakou doh ndra-au ma ndrano. Eme ya balek ki ta Jises le ma jo kihis hawen le.
PHI 3:9 Jo ihis hawe Krais doh badeh, bala san ta jo in hamon ta kandriyen malen tiri Juwis bwe, arile i san ta budon handru le i ta Krais badeh, jo asahan ndramak mwasin udu mada Kindrei anyolom jo na len jo atehei budon tek handru i ta Krais.
PHI 3:10 Eme ya jo anya kales kere bwele-e boto-on ta Krais mene imek, ano iy amak ja. Ma jo anya kabwese maha hawe isi ta nyaran i le buku none iy mene bwese.
PHI 3:11 I buku none jo imek, jo abudon Kindrei kameh winiyan mete-ei jo amak ja i le buku Krais mene.
PHI 3:12 Idoh ta tiye anya jo badeh, ndratanan Krais ndrala mwasin ai, bwe, ma jo ndramwenen labai ta mada Kindrei ai, bwe le. Arile, jo atadau jo boto-on ilih le kasahan mwasin tan. Eme ya jo abudon ta jo kasahan mwasin i buku Krais kasekesek ta aliy, i buku iy mene andrei jo.
PHI 3:13 Eme ya ado nadu tine badu hawek i san ta budon handru, jo batiye anya jo badeh, ndratawi lakou mwasin mari, bwe. Arile, lakou ari le jo tanan handru asah i buku doh: Jo atehei lakou mari mene ndra-au ndra konak, ya jo sakaliye ya madak ales iu le i bwena ta lakou ere kodo-oh.
PHI 3:14 Winiya le jo barasos, ya Kindrei le kameh baradeu lakou doh barame tek, na len iy aloh taha ala hawe Krais Jises.
PHI 3:15 Eme ya taha lau ala ndruniy ta budon doh badeh, taha kabudon lakou doh kudu mwasin. Ya, i buku none ado rayah abudon i randrah ja, ta lakou doh, kameh Kindrei winiyan leheyaniy aleu ewek tado.
PHI 3:16 Eme ya taha kamekes kandriyen mwasin mene le kili ki-in hamon ta seken ta Kindrei.
PHI 3:17 Eme ya ado nadu tine badu hawek i san ta budon handru, ado ka-en le hamon ta kandriyen tek, ma ado ale ka-en hamon ta kandriyen toro lau mene na len aso ado hawe ado.
PHI 3:18 I buku jo mene ndrasehek tado ya jo asehek tado ja, ma wa-i madak atekeu, ta ado ka-en hamon le ta kandriyen tek, tasah iri lau solo-an tekedek tiri ndrandra-i labai, ya tekedek tiri turuki iri basahan ta bada kei tondreh ta Krais i borobwar tiri bwe.
PHI 3:19 Eme ya sendrehendreh tiri badeh, Kindrei le kameh anuhun sahou tiri ma tiye iri ala bolo jih ta udu le buku doh. Tasah, Kindrei tiye tiri ta amekes kandriyen mwasin, arile bwai. Iri a-en hamon ta budon ndra-in ta ndrine iri ala amekes kandriyen ndra-in ta bwilima. Eme bwili iri sama ta aliy? Iri badeh, masiye iri ja ta aliy, i tiri ari ari. Budon tiri badeh, idih labai ta lakou badu munyak.
PHI 3:20 Arile, kon tataha handru badeh, bado kon munyak dah bwe; kon tataha handru badeh, udu bolo kandrah. Ya eme taha abe-en ndramak ta aseben taha ta kandriyen ndra-in mene, ala Laban Jises Krais udu doh kameh eme.
PHI 3:21 Iy eme kameh nyuruwini lakou mari na boto-on tan kameh udu baha tondrok tan. Ma idah kameh, iy tubuni bada taha badu munyak dah kameh i randrah labai, asahan ha-un i le buku badan, ta udu le buku doh.
PHI 4:1 Ado nadu tine ta budon handru badu hawek i san ta Kindrei. Ado badeh, jo winiyan bakahei ado bwe! Ya jo aseken labai ta kudu hawe ado! Tasah, ado badeh, ndra ari buruwen hawe Krais Jises, ma eme kandriyen tado doh, mesekei jo sekesek labai hawe jo masiye ado handru! Tasah, na ado aseben jo, lahou tek udu ndrokowa ado ba-au laleyah bwe. Eme ya ado nadu tine badu hawek i san ta Kindrei, ado samani sahou tek jo atorou ma asehek ewek tado mene doh. Ado kales boto-on ta budon handru tado i ta Laban. Ma ado badeh, budon tado ki randra le.
PHI 4:2 Eme ya ah badih ma la-uh badeh, Yuwodiya hawe Sintiki, ah kanuhun sahou. Jo aseken ah kase ta budon randra le, ya ah sasobobo ndri-iy. Tasah, ah ma la-uh badeh, nadu tine ah le, badu hawe Laban le.
PHI 4:3 Ehe, ou en, Sisikos, tasah nyaram badeh, moson ndramak ta lahou badu hawek. Jo aseken ou ala aseben budon turu badih ma la-uh badeh, ma ou tiye turu sasobobo uru. Tasah, uru mene are hawek aseben jo ta atiye sahou mwasin. Uru ma la-uh doh mene hawe Klemen ma oro lau rayah aseben jo ta amekes lahou; oro doh mene Kindrei ndratorowenei nyara oro mari ndra bolo buk tan hawe nyara iri lau kameh koha iri udu le buku doh.
PHI 4:4 Eme jo katandra-un tado ja, ado kasekesek Laban kudu le buku doh. Tasah, ado ndra ari buruwen hawe Laban.
PHI 4:5 Ya bale ado samaniy, Laban mirihik eme ai. Eme kandriyen mwasin tado ta ado le, badeh, ado kamekes ki ta lau mari.
PHI 4:6 I buku none ado bwese maha ta abudon solo-an, ado satikisiy ndri-iy. Arile, udu bolo maha mari badeh, ado kasolom ki ta Kindrei ya ado kasehek bolo maha tado ki tan hawe kadeu wurah ki tan ta aliy.
PHI 4:7 Eme na salom tado le, Kindrei kameh mesekei tikisiy tado iu. Arile, ado kameh winiyan bala tanan bala mwasin bwe le, aliy ado atona i buku doh. Eme ya Kindrei badeh, winiyan tawiy, ma winiyan tondrokei budon tado, tasah ado badeh, ahas hawe Krais Jises.
PHI 4:8 Eme ya ado nadu tine badu hawek ta budon handru. Ta sendrehendreh ta aliy, iri lakou doh ado katawiy kihis: Iri lakou ndra handru le, kandriyen mwasin ta amekes iri lau kasekesek, ma kaseben bolo manyah tiri in hamon ta sahou randra le, ma hawe lakou mwasin kameh iri lau asehek ta aliy. Iri lakou doh badeh, ado kabudon ta aliy solo-an.
PHI 4:9 Eme ya saba lakou le mene ado ndratou jo ndramekes, ya ado ndratanan ta aliy, ado katehei ki ta lahou ma kamekes. Ya, i buku none ado amekes kameh, Kindrei, ndramak ta edeu tataha kandriyen ta ado le, kameh udu hawe ado aseben ado.
PHI 4:10 Jo sekesek laba tinan labai i ta Laban ta ado badeh, abudon jo ja, ta lakou. Handru labai, ado abudon jo laba tinan labai. Arile, ado, ado mirihik ndraheh? Ta aseben jo ja i buku bwena.
PHI 4:11 Eme ya jo asehek doh ta anya jo andriliu ta lakou, bwe. Tasah, jo ndraselen ta bolo iri maha doh.
PHI 4:12 Jo tanan ta jo kameh andriliu ta lakou ma jo ale tanan ta jo kameh bandriliu ta lakou bwe. Jo ndraselen ta aliy ta bolo maha-an mari. I buku none ndrinek idih deh, jo imeson o, jo andriliu ta lakou deh, jo bandriliu bwe, jo badeh, ndraselen ma sekesek le.
PHI 4:13 Tasah, jo winiyan amekes lahou mari na boto-on tan iy edeu eme tek.
PHI 4:14 Eme ya jo baseken ta ado kanyohan jo na lakou na len jo udu ta maha-an bwe, arile jo sekesek ta seben tado.
PHI 4:15 Ma laba tinan labai badeh, ado lau badu Pilipai mene tana ado, ma mwena handru, kabatana jo atiye sahou mwasin udu Masadoniya eme len. Idoh mene ado lau ma mwena handru ta budon handru i ta Kindrei are hawek aseben jo ta lakou ili eme, ili eme ta adeu lakou ta aseben.
PHI 4:16 Na len jo mene udu Tesalonaika ya jo aseken lakou, ado baruwani jo bwe.
PHI 4:17 Idoh ta tiye anya ja, jo aseken lakou, bwe. Arile, jo aseken labai ta takaleh rayah lakou ta Kindrei ja kewek la-u lakou rayah mwasin tado mene ado ndrakohok.
PHI 4:18 Eme ya ado ki tanan ta lakou mene ado suni Ipaproditus atiye eme, badeh, solo-an labai tek. Lakou doh i buku none iri lakou asun i ta salom mahu buburen labai eme Kindrei sekesek ta aliy handru.
PHI 4:19 Eme ya Kindrei tek kaweleyani ado na lakou ado aseken ta aliy i san ta Krais Jises. Tasah, iy badeh, tan lakou solo-an labai udu aliy.
PHI 4:20 Eme ya taha mari kamasiye ma hawe katudun tama taha Kindrei kudu le buku doh. Handru.
PHI 4:21 Jo edeu sahou ta sekesek tek ewek tado lau ta Kindrei ari ari ado badeh. Ado ki nyara jo kedeu sahou sekesek i buku none lau ta Krais Jises. Ma oro lau ta aseben ta lahou ado hawek kada-ah, tiye sahou sekesek toro ewek tado ale.
PHI 4:22 Ma hawe oro lau ta budon handru, oro ateu lahou ado asiu tinan ta Sisa hawe oro lau ta budon handru ado kon tinan Rom kada-ah, tiye sahou sekesek i tado.
PHI 4:23 Eme ya udu bolo salom tek i ta Laban Jises Krais hawe tikisiy tan kamekes mwasin kewek tado mari. Handru.
COL 1:1 Jo Pol, jo aposel ari ta Krais Jises. Na so-ok ta Kindrei, iy le amwenen atehei jo asahan buku ari aposel, ma jo edek ili kon rakon, rakon ta atiye sahou mwasin ta Jises Krais.
COL 1:2 Jo hawe nadu tine taha ari nyaran Timoti, aru badeh, atorou la-ukei dah ewek taha lau mwan ma badih ta Kindrei, are bolo kon tinan Kolosi. Aha atehei budon taha handru in ta Krais, ma aha badeh, a buku nadu tine mwan ma badih. Aru aso-ok tama taha Kindrei, katikisi aha ma kabwidi kandriyen mwasin kewek taha, ma kabwidi ndrine aha kudu mwasin.
COL 1:3 Udu bolo salom taru na len marakon badeh, aru asolom aha ma adeu wurah i ta Kindrei, iy tama Laban tataha Jises Krais.
COL 1:4 Ya, aru adeu wurah i ta Kindrei, tasah aru ndranuhun sahou iri asehek nyala aha i buku doh: Bwena mene sahou handru hawe sahou mwasin ta Krais badeh, asahan taha, ma aha ndranuhun. Eme ma, aha atehei budon handru ta Kindrei kameh anyohan aha lakou doh iy ndraleheyaniy ndrawek taha, ma aha atondrok iri lakou nane udu kandrah kodo-oh. Eme ma aha badeh, atehei budon handru in ta Krais Jises, ma aha badeh, aso-ok labai iri lau mwan ma badih ta Kindrei. Sahou mwasin dah aha mene ndranuhun, badeh, ibo gok ta asahan bolo kon munyak solo-an, ma asahan i tinan ma leheyani kandriyen mwasin ili tiri mwan ma badih mari. I buku le iy ma bwena amekes ewek taha udu bada len ari ma bwena badeh, aha anuhun sahou mwasin, ma aha ndratanan, Kindrei badeh, amekes mwasin ewek taha.
COL 1:7 Ma Epapras ndraleheyani aha ta sahou mwasin doh. Iy badeh, ndramak ari mwasin ta amekes lahou ta Krais. Ma iy ibo gok hawe ahi, ahi aso-ok iy labai. Iy badeh, aseben aru, ma iy atondrok gok ta Krais udu mwasin labai ta akohok boho aru ewek taha.
COL 1:8 Iy tiye taru ta kandriyen dah ta aso-ok handru iri mwan ma badih ta Kindrei, Malawin Ndrabun badeh, ndratehei ndrawek taha.
COL 1:9 Ya, ahi ndranuhun sahou dah, ta aha atehei budon taha handru, ma aso-ok labai iri mwan ma badih ta Kindrei. Eme ma, ahi anuhun le badeh, eme na le liliy, ahi asolom ta aseben aha. Ahi baruwani kandriyen ta salom bwe. Ahi badeh asolom, ta Kindrei kaseben aha, ma aha winiyan atanan ta kandriyen iy amwenen aso-ok aha ka-en hamon ta aliy. Ma Malawin Ndrabun tan kameh winiyan edeu taha iri tanan, ma budon mwasin. Ma idoh winiyan idih handru udu bolo aha.
COL 1:10 Aru amekes salom doh, ta aha winiyan adek buku iri mwan ma badih handru ta Laban, ma iy kameh aso-ok iri kandriyen taha marakon. Ma aha kameh winiyan amekes iri gok mwasin. Eme ma, aha kameh winiyan atanan Kindrei amwenen.
COL 1:11 Ma aru ale badeh, asolom buku doh: Ahi aso-ok Kindrei badeh, kedeu boto-on kewek taha na le boto-on tan mwasin. Eme ma, aha kameh winiyan ales boto-on ta bwese iri maha-an marakon, ma ndrine aha kameh winiyan udu le udu. Ma aha kameh sekesek,
COL 1:12 ma adeu wurah i ta tama taha Kindrei. Iy kameh bwidi aha winiyan ta akohok iri lakou iy ndralowosaniy ta ewek taha udu kandrah. Ma aha kameh winiyan akohok lakou doh hawe iri mwan ma badih ta Kindrei are lomada sun tan.
COL 1:13 Ma iy ndratolowei taha are mine balik ndrame len, ma iy ndratehei taha ndrala bahandra tondrok ta nadun Jises Krais, iy aso-ok iy labai.
COL 1:14 Na gok nadun amekes, tama taha Kindrei ndrakonohei taha ndrame hamon, ma iy ndrasikinei kandriyen ndra-in tataha ndra-au.
COL 1:15 Kone Nadu Kindrei badeh, i buku le taman Kindrei, taha winiyan banyolom taman na mada taha bwe. Krais badeh, kadok tan ma iy udu bwele-e iri lakou marakon Kindrei ndrabwidiy.
COL 1:16 Tasah, Krais le amwenen ndrabwidi iri lakou marakon. Iy bwidi lakou udu bwele-e munyak badeh, taha ndranyolom, arile udu bolo kandrah badeh, taha winiyan banyolom bwe. Ma iy ale bwidi iri angelo laba tinan marakon, ma iri malawin mara-ei, ma iri lakou rayah nyamu iri boto-on labai. Ma Kindrei bwidi lakou marakon doh na le mine Krais, ma iri lakou marakon doh badeh, tan le amwenen.
COL 1:17 Bwena mene, lakou marakon basahan bwe le badeh, Krais ndrasahan ai, ma, na le boto-on tan, iy bwidi iri lakou marakon asahan, ma iy le ari atondrok iri.
COL 1:18 Krais badeh, batun ta bada iri lau tan, iri doh badeh, lau ta Kindrei amwenen. Tasah, iy amwenen badeh, kati kohan handru tiri lau ta Kindrei mari doh. Iy le ari badeh, amak eme hamon eme awas ja udu bolo ndrokowa iri mwan ma badih mene ndramak ndra-au ndrasu-u. Eme ma, iy kadok amwenen, ma iy winiyan udu bwele-en ta atondrok lakou marakon.
COL 1:19 Ya, Krais badeh, leheya taman Kindrei amwenen, konen i buku sah handru. Tasah, Kindrei aso-ok iri kohan le amwenen, ma iri boto-on tan marakon kudu ndra ta nadun. Eme ma Kindrei amwenen atehei kohan, ma kandriyen tan marakon i ta Krais.
COL 1:20 Kindrei badeh, atehei nadun asahan bwele-en ta atondrok taha. Tasah, ta ndraye Krais amou udu bada kei tondreh, Kindrei anya kamekes lakou marakon kasahan ari le hawen; iri lakou badu munyak, ma hawe iri lakou badu kandrah ale. Ya, Krais badeh, ndrabwidi boto-on ta kandriyen marakon ta amekes bahun marakon doh, udu ndrokowa Kindrei hawe iri balik mari badeh, ndrano ndra-au.
COL 1:21 Aha ale ado mwasin hawe Kindrei. Arile, bwena mene aha are len labai ta Kindrei, ma aha ta bahun hawen. Tasah, budon taha mene amekes bahun i tan, ma aha amekes kandriyen ta lomondra ndra-in.
COL 1:22 Arile, Krais ndramak ndrala bada kei tondreh, na lakou doh badeh, Kindrei bwidi ndrine aha asahan mwasin labai hawen. Iy amekes buku doh ta atiye aha ame hawen, aha kameh winiyan asahan ndrabun ma ha-un, ma ari ndra-in winiya bado ta madan ja bwe.
COL 1:23 Kindrei kameh bwidi lakou doh, buku aha tawi budon taha handru ihis, ma aha ales boto-on handru. Kora-on ari lakou kariu aha, ma aha kamani kandriyen ta budon boto-on ta sahou mwasin dah, aha mene ndranuhun ta Krais ndrandrei aha ndrame hamon ja. Jo Pol, jo ndrasahan ndramak ta atiye sahou mwasin dah, ma ahi atiye ili tiri lau mwan ma badih marakon are bolo kon munyak dah.
COL 1:24 Na bolo len dah badeh, jo udu bolo asiu lulik, arile jo sekesek ta akohok sisi-in, tasah lakou dah aseben aha. I buku doh: Krais anya, jo kameh bwese sisi-in udu bolo len, ta jo anya katiye sahou mwasin ta aseben iri mwan ma badih ta Kindrei. Lau ta Kindrei doh a buku bada Krais. Eme ma, jo aso-ok sisi-in doh Krais ndraleheyaniy ndrame tek badeh, kaseben iri mwan ma badih ta Kindrei.
COL 1:25 Kindrei amwenen mene ndralebelei jo, ta jo katiye iri sahou tan marakon kewek ta aseben aha. Eme ma, jo badeh, asahan buku ndramak ta lohowa aha mwan ma badih marakon ta Kindrei.
COL 1:26 Na bolo len marakon bwena ndra-au badeh, Kindrei tone sahou dah, bala tiri mwan ma badih marakon bwe. Arile, na dah ja badeh, Kindrei ndrasihi sahou mara-ei dah ndraleu, ma taha mwan ma badih marakon ta Kindrei badeh, ndranuhun.
COL 1:27 Ma Kindrei anya kaleheya taha mwan ma badih tan, ta taha katanan: Sahou aton doh badeh, mwasin labai, ma winiyan aseben iri lau badu Isra-el, ma hawe taha mwan ma badih badu rakon ja ale. Ma sahou aton doh buku: Krais badeh, kohan udu bolo aha, ma aha atondrok iy keme kakohok aha kala kare kandrah hawen.
COL 1:28 Eme ma, ahi aposel badeh, atiye sahou mwasin ta Krais ili tiri mwan ma badih marakon. Ahi leheya iri mwan ma badih ta tanan marakon ahi tawi, ma ahi batanau iri ta iri katondrok iri kamwenen ta a-en hamon tiri sahou marakon ta Kindrei. Tasah, ahi aposel anya katiye iri mwan ma badih ari, ari kala hawe Kindrei. Ma, na len iri asahan hawe Kindrei, ahi aso-ok iri kasahan kamwenen buku Krais ma ahis hawen.
COL 1:29 Ya, ahi aso-ok lakou doh kasahan handru, eme ma, na le boto-on ta Krais edeu eme tek, jo amekes gok dah boto-on labai.
COL 2:1 Jo Pol, jo aso-ok aha katanan lakou dah: Jo badeh, ibo gok boto-on labai ta aseben aha mwan ma badih badu Kolosi, ma iri mwan ma badih badu Leyodisiya, hawe iri mwan ma badih rayah ale banyolom madak bwe le.
COL 2:2 Jo amekes gok boto-on, tasah jo aso-ok ndrine aha kabadok ma aha katukum ka-en hamon ta kandriyen ta aso-ok labai iri nadu tine aha iri mwan ma badih ta Kindrei. Jo badeh, amekes gok boto-on labai, ma idoh kameh atadau budon taha, ma aha winiyan atanan kati sahou aton handru ta Kindrei. Krais amwenen badeh, kati sahou aton.
COL 2:3 Iy amwenen badeh, iy irek labai ta iri tanan mwasin dah, ma sahou aton ta Kindrei, ma iy le amwenen winiyan aseben aha atanan iri lakou marakon ta Kindrei doh.
COL 2:4 Jo amekes sahou dah, tasah jo baso-ok ta lau rayah kameh wendreya aha ta iri sahou ta atamar ma aha kameh winiyan ba-en hamon ta sahou rayah ta Kindrei bwe.
COL 2:5 Handru, jo bado hawe aha bwe. Arile, ta budon tek mara-ei badeh, i buku jo udu hawe aha, ma jo tikisi aha tinan labai. Arile, jo sekesek ta anuhun aha adek a se ma abo gok mwasin, ma aha atehei budon taha handru in ta Krais.
COL 2:6 Aha ndranuhun sahou mwasin ta Laban Krais Jises, ma aha ndratehei budon taha handru ndrala tan. Eme ma, aha badeh, kahis hawe Krais, ma kadek na kandriyen tan. Aha badeh, kahis badan, buku kei ateh ma kandron ateu iy boto-on labai udu bwele-e munyak, ma buku asiu ales udu bwele-e ndru boto-on. Ma aha badeh, atehei budon taha boto-on labai in ta sahou mwasin doh, iri lau mene ndraleheyani aha ta aliy, ma len marakon aha kadeu wurah kili ta Kindrei ta iri lakou mwasin iy ndrabwidiy ndrawek taha.
COL 2:8 Ya, aha katondrok aha kamwenen. Kora-on iri lau rayah kadeu sahou laleyah, ma sahou yoyou kewek taha ta iri budon solo-an ta aha ka-en hamon ta aliy. Ma iri kameh kawendreyani aha ta sahou dah, ma aha kameh anuhun boho iri. Iri lau doh badeh, akohok tanan ta tubu iri, ma tiri malawin ndra-in ale atondrok iri lakou badu kandrah, ma kon munyak. Iri tanan sahou ta Krais bwe.
COL 2:9 Ya, bale aha kudu taha. Tasah, aha ndratanan, koha Kindrei ma kandriyen tan mara-ei badeh, irek udu bada Krais le ari.
COL 2:10 Ma iy udu bwele-en labai tiri lakou boto-on mari. Aha badeh, ta Krais, eme ma, Kindrei ndratehei kohan handru ndrawek taha, ma kohan doh ndrarek udu bolo oda aha.
COL 2:11 I buku doh: Aha ndrahis hawe Krais ma ta kandriyen ta Krais, taha ndraruwani kandriyen ta ndrine taha malen. San ta ruwani kandriyen ta ndrine taha malen dah, i buku kandriyen ta asan ku-i iri nah mwan, buku iri Isra-el amekes. Arile, idoh lakou ta bada taha bwe. Lakou doh Krais bwidiy udu ndrine aha.
COL 2:12 Na len ta alomwa aha badeh, i buku aha ndramak hawe Krais, ma Kindrei ihi aha ala bolo lek hawe Krais. Aha atehei budon taha handru in ta boto-on ta Kindrei, iy mene mete-ei Krais udu bolo lek. Eme ma, na budon taha handru doh, iy mete-ei aha ame hamon ame awas hawe Krais.
COL 2:13 Bwena badeh, aha amekes kandriyen ndra-in solo-an, ma aha a-en hamon ta ndrine aha malen, ma bwidi aha amak. Arile, Kindrei bwidi aha akohok kohan handru hawe Krais, ma Kindrei mani iri kandriyen ndra-in tataha marakon iu.
COL 2:14 Idoh i buku Kindrei ndratarani la-ukei bilisiu, tarou ta batanau udu aliy. Ya tarou mene, turuki taha ta mada sahou, ma anya korou sahou eme tataha ta iri kandriyen ndra-in taha amekes bwena. Arile, Kindrei ndratolowei iri lakou buku doh: Udu kala Jises Krais imek udu bada kei tondreh, Kindrei andrei la-ukei nane doh, iy tatahiy ili bada kei tondreh, ma sokosowei iri tarou ta batanau mari ma sahou ta imek udu aliy iu.
COL 2:15 Ma iy tolowei boto-on ta tinan tiri malawin marakon, ma iri lakou boto-on rayah ja. Ma, na gok ta Krais amekes udu bada kei tondreh, Kindrei ndrasakalawi iri, ma bwidi iri asahan buku lakou laleyah ta mada iri lau marakon.
COL 2:16 Ya, aha kanuhun! Aha badeh, kadeu kona aha kili tiri mwan ma badih anya korou sahou kewek taha ta kandriyen ta batanau ta beleben nyamon ma gwa, ma ta len tinan aha ba-en hamon ta aliy na bolo jaha marakon bwe, o, ta len ta bun ha-un asahan, arile aha basan len hawe iri bwe, o, ta len ta amunyau.
COL 2:17 Iri lakou marakon doh badeh, malawi le iri lakou handru kameh asahan hamon. Arile, Krais le badeh, iy lakou handru.
COL 2:18 Eme ma, buku rayah mwan ma badih asehek ta nyala lakou iri ndranyolom udu bolo ameh tiri, ma buku iri anya korou sahou kewek taha, tasah aha ba-en hamon tiri bwe, ma batehei aha ba-au bala andri mara-ei bwe, ma batehei bwili ndru-u aha bala andri bala tiri angelo bwe; ya, aha badeh, kadeu kona aha kili tiri. Bar tiri mwan ma badih buku doh badeh, ta amekes lakou laleyah. Tasah, iri badeh, a-en hamon ta kandriyen ta ndrine iri malen atondrok iri kahis.
COL 2:19 Ma iri batiye sahou handru ta Krais bwe. Iy udu bwele-e taha, ma taha a buku badan. Iy le badeh, atondrok taha mwan ma badih ta Kindrei, ma taha badeh, asahan buku iri mwan ma badih Kindrei aso-ok. Ma, Krais badeh, i buku batu taha. Batu taha atondrok bada taha, ma bada taha ato-ou eme loken, ma bwidi iri ndruwi taha ma len ta bada taha ihis i le se. Eme ma, bada taha asahan i tinan na le boto-on ta Kindrei.
COL 2:20 Aha tanan, aha badeh, ndramak hawe Krais, ma aha ndramani batanau ndra-in tiri kabin ta bwena tiri malawin ndra-in badu munyak dah. Buku sah handru, na dah ja, aha anya kadek buku iri mwan ma badih badu kon munyak? Kora-on aha ndranuhun rayah mwan ma badih anya kariu aha, ma a-en hamon ta batanau doh:
COL 2:21 “Aha sateu lakou, aha saimon nyamon, ma aha sanyokar lakou na mine aha. Aha amekes i buku doh, badeh, bamwenen ta mada Kindrei bwe.”
COL 2:22 Aha sa-en hamon tiri batanau doh, tasah batanau doh ta nyamon nane, iri lau aimon laleyah ndra-au. Ma ale, iri lau le badeh, amekes batanau dah, ma iri leheya taha ta aliy. Arile, batanau dah ta Kindrei bwe.
COL 2:23 Ma iri batanau doh, ibo gok boto-on ta andrek iri mwan ma badih kamekes kandriyen ta atehei bwili ndru-u iri i andri i ta lakou doh; iri abudon anya Kindrei badeh, sekesek labai ta aliy. Ma iri ale abudon taha badeh, katehei taha kala andri mara-ei ma katehei bwili ndru-u taha kili andri kili tiri angelo, ma ka-um bada taha. Na budon tataha mwan ma badih badu kon munyak, idoh i buku kandriyen mwasin ta tanan udu aliy ta amekes Kindrei kasekesek taha. Arile, lakou doh, winiyan baseben taha ta ruwani kandriyen ta ndrine taha malen iu bwe-en!
COL 3:1 Ya, Kindrei badeh, ndratehei kohan ha-un ndrawek taha, ma iy ndramete-ei aha amak ndrame awas hawe Krais. Eme ma, aha badeh, kabadok ta akohok iri lakou badu kandrah doh. Ere kon doh, Krais badeh, udu buku kabin, ma Kindrei suruni nyaran iu ili loken mara-ei.
COL 3:2 Len marakon badeh, aha kabudon le lakou badu kandrah, ma kaso-ok iri lakou doh. Kora-on aha kabudon le ta iri kandriyen ndra-in mene iri mwan ma badih badu kon munyak a-en hamon ta aliy.
COL 3:3 Tasah, aha badeh, ba-en hamon ta kandriyen badu munyak buku bwena, bwe. Aha a buku lau ndramak bwena labai. Ma kohan ha-un doh aha ndrandrei hawe Krais, idoh iri mwan ma badih badu kon munyak winiyan batou bwe. Udu mirihik hawe Kindrei, ma aton ta mada iri.
COL 3:4 Krais le badeh, kati koha taha handru. Buku len hamon, iy asahan eme lewan, lau marakon winiyan anyolom iy amwenen, ma iri kameh anyolom aha ale are le lewan hawen, ma aha kameh, akohok lomada Kindrei doh.
COL 3:5 Aha badeh, ndramak hawe Krais. Eme ma, aha winiyan ba-en hamon ta kandriyen ndra-in ja bwe. Aha badeh, kadai iri kandriyen mari badu kon munyak udu ndrine aha ki-iu. Jo asehek ta kandriyen buku: Kandriyen ta karei, ma kandriyen ta amadin hawe badih o mwan tasou, ma kandriyen ta kereyani ndrine ndramak ta amekes karei, ma kandriyen ta ndrakok. Idoh i buku aha atehei bwili ndru-u aha i andri ili ta kindrei, iri amekes na sukumada kei. Tasah, lakou badu kon munyak badeh, akohok kon ta Kindrei udu bolo koha aha ja.
COL 3:6 Aha samekes buku doh. Tasah, Kindrei kameh edeu ndramas ndra-in ili tiri mwan ma badih nane amekes iri kandriyen ndra-in buku doh, ma iri ba-en hamon ta sahou tan bwe.
COL 3:7 Bwena mene, aha ale ba-en hamon ta sahou ta Kindrei bwe, ma aha amekes iri kandriyen doh.
COL 3:8 Arile, na dah badeh, aha karuwani iri kandriyen marakon doh: Aha sandra-i sala hawe iri lau rayah ja, ma samekes losen sasahan, o, ndrinem andra-i ili tiri mwan ma badih rayah ja. Ma aha sasondrokonya iri na sahou ndra-in.
COL 3:9 Aha badeh, sawendreya iri mwan ma badih ta Kindrei. Tasah, ta koha aha, aha ndraruwani iri kandriyen marakon ta ndrine aha malen ndra-au.
COL 3:10 Ma aha ndrasahan ha-un ja. Ya, Kindrei le amwenen mene bwidi ndrine aha asahan ha-un ja. Ma len mari, iy edeu tanan ewek taha, ma iy bwidi aha asahan ha-un, ma kone ndramak doh i buku le Kindrei amwenen.
COL 3:11 Eme ma, taha lau marakon ndrasahan ha-un, taha marakon badeh, ari le. Taha sabudon ja buku taha badu Grik, o, badu Juwis, ma taha mene asan ku-i taha, o, taha basan ku-i taha bwe. Ma taha badu boho kon randrah, randrah, o, badu bada kon tinan rakon, rakon, o, taha ado buku bonyo-ou le, o, taha are laleyah. Tasah, Krais le ari udu aliy, ma Krais le amwenen badeh, udu bolo taha marakon.
COL 3:12 Aha badeh, lau ta Kindrei; iy aso-ok aha labai, ma iy ndrandrei aha ndrasahan iri lau tan amwenen. Eme ma, aha badeh, ka-en hamon ta kandriyen buku: Aha katikisi iri lau mwan ma badih marakon, ma kamekes mwasin kili tiri. Aha badeh, katehei so-ok ta bada aha ki-iu kili andri, ma amekes kandriyen kamunum le kili tiri mwan ma badih, ma kalelei iri kamekes ndra-in kewek taha.
COL 3:13 Buku ari ndramak udu bolo ndrokowa aha, ndrinen andra-i udu ta nadu tinen ari ja, iy nane amekes ndra-in ili tan, mwasin ta iy kabwese maha-an doh le ai. Iy kati-iy ma kamani kandriyen ta ndramak nane doh. Tasah, Laban ndramani kandriyen ndra-in taha marakon, ya aha ale kamani kandriyen ndra-in ta nadu tine aha iri rayah ja.
COL 3:14 Kandriyen ta aso-ok iri mwan ma badih badeh, ere bwele-en labai mara-ei ja tiri kandriyen rayah ja mene ndrasehek ndrawek taha. Ma iy badeh, atehei iri kandriyen mwasin marakon ili le winiyan, ma iy tawi ndrine aha mari i le se.
COL 3:15 Krais badeh, ta amekes ndrine taha marakon amunum. Eme ma, aha badeh, katehei ndrine aha mwasin doh, kudu bwena taha ta lakou mari aha amekes. Tasah, Kindrei ndralebelei aha marakon ndra le tan. Eme ma aha kameh winiyan asahan bada aha ari le, ma aha kameh winiyan manyah are le se. Ma aha ale badeh, kadeu wurah kili ta Kindrei ta lakou marakon.
COL 3:16 Sahou ta Krais badeh, kihis handru kudu bolo ndrine aha. Aha badeh, kaleheya, ma kabatanau aha kamwenen na tanan handru doh. Aha kayah wari ta Debit, ma iri wari rayah ja ta salom, ma iri wari Malawin Ndrabun atehei udu ndrine aha ta atudun Kindrei.
COL 3:17 Lakou marakon aha amekes ma asehek badeh, aha kamekes ki-in bwele-e nyara Laban Jises, ma aha kadeu wurah kili tan, ma ta tama taha Kindrei.
COL 3:18 Ya, aha badih tasou, aha badeh, kanuhun boho udu aha iri, ma ka-en hamon tiri. Tasah, aha ta Laban ma kandriyen dah badeh, amwenen labai ta madan.
COL 3:19 Ya, aha mwan tasou, aha badeh, kaso-ok udu aha iri, ma aha samekes ndrine iri sandra-i.
COL 3:20 Ya, aha nah mwan ma badih, aha badeh, kanuhun boho tama aha ma tine aha iri ta lakou marakon. Laban badeh, aso-ok aha ka-en hamon tiri kandriyen buku doh.
COL 3:21 Ya, aha tama iri nah, aha sasehek sahou boto-on ma ndra-in sala ta nadu aha iri, ta amekes ndrine iri kandra-i kewek taha. Bwe kameh iri atona buku, iri winiyan bamekes ari gok mwasin bwe.
COL 3:22 Ya, aha bonyo-ou, aha kanuhun boho ndramak taha ta atondrok aha. Kora-on aha abudon ta andrek iri, ma aha amekes gok mwasin labai na len iri are mirihik anyolom aha le. Aha badeh, katudun nyara Laban, ma na len mari aha kabudon le ta iri san ta amekes gok mwasin.
COL 3:23 Lakou marakon aha amekes, aha badeh, kabadok ta amekes. Bala buku aha amekes gok tiri lau le bwe, aha badeh, amekes gok ta Laban ale.
COL 3:24 Aha ndratanan, hamon kameh Laban edeu ndramas ewek taha. Ndramas doh badeh, iri lakou nane iy ndraleheyaniy ndrala tiri mwan ma badih tan amwenen. Aha kabudon, aha kado buku iri bonyo-ou ta Krais, ma iy le badeh, tinan handru taha.
COL 3:25 Iri mwan o badih, amekes kandriyen ndra-in, iri kameh akohok ndramas in hamon ta kandriyen nane iri amekes. Kindrei badeh, aleben kandriyen tiri mwan ma badih marakon kasahan ari le.
COL 4:1 Aha lau ta atondrok iri lau ta amekes gok taha, aha ale badeh, kamekes mwasin ma kandriyen amwenen kili tiri. Aha tanan, ndramak ta atondrok aha badeh, udu kandrah.
COL 4:2 Aha badeh, katawiy kihis kandriyen ta salom. Buku aha anya kasolom, aha katondrok, ma aha kadeu wurah kili ta Kindrei.
COL 4:3 Aha kasolom ta Kindrei winiyan aseben ahi ale. Aha kandremenya iy kasihi san ta ahi winiyan atiye sahou ta Krais. Sahou dah bwena mene aton, ano na dah badeh, ahi ndrasihiy ndrame len, ma iri mwan ma badih badeh, ndranuhun. Arile, iri rayah baso-ok, ma ba-en hamon ta sahou dah ja bwe. Eme ma, iri mene atehei jo ili bolo asiu lulik.
COL 4:4 Aha badeh, kamekes salom, ta jo winiyan asehek sahou dah kaleu mara-ei, buku Kindrei aso-ok jo kamekes.
COL 4:5 Buku aha are hawe iri mwan ma badih nane, ba-en hamon ta Kindrei bwe, aha badeh, ka-en hamon le ta budon mwasin, ma kamekes iri kandriyen amwenen le. Len mara-ei aha kalokou aha le ta amekes kandriyen ari le, Krais ndramekes ndrala tiri mwan ma badih, kabatana iy mene udu kon munyak, kora-on len mwasin ta asehek sahou mwasin kamai laleyah.
COL 4:6 Len marakon badeh, aha kasehek le sahou mwasin ta winiyan aseben iri mwan ma badih, i buku ndras udu bolo nyamon aseben nyiminye nyamon. Eme ma, buku iri anya kandremenya aha, aha kameh winiyan asehek sahou mwasin amwenen ili tiri.
COL 4:7 Tikikus kameh barasehek taha, tiri gok marakon jo amekes. Tikikus badeh, ibo gok i buku le jo, iy nadu tine taha handru, ma iy ndramak ari mwasin handru ta amekes lahou ta Laban.
COL 4:8 Jo suni iy ta ewek hawe aha ta katin doh le, ta aha winiyan atanan ahi are buku sah handru, ma ta amekes ndrine aha kabadok.
COL 4:9 Jo suni Onesimus ewek hawe Tikikus ale. Onesimus badeh, nadu tine taha ari in hamon le ta sahou handru ta Kindrei, iy badeh, badu hawe aha amwenen. Uru kameh asehek nyala aha, ta iri lakou marakon mene asahan dah.
COL 4:10 Aristakus badeh, udu bolo asiu lulik hawek, iy anya, bada-an ewek taha. Ma Mak badeh, kali Banabas, iy ale anya, bada-an tan ewek taha. Buku iy ewek hawe aha, aha kasekesek ta akohok iy, buku jo ndratehei sahou mene ndrawek taha.
COL 4:11 Ma Jises nane iri aloh Jastus ale edeu bada-an tan mwasin ewek taha. Oro lau ma taloh le doh badeh, badu Juwis, oro amekes gok hawek ta bolo tondrok ta Kindrei, ma oro aseben jo udu mwasin labai.
COL 4:12 Epapras edeu bada-an ewek taha. Iy badeh, badu hawe aha amwenen, ma iy lau ta lahou ta Krais Jises. Len mari iy asolom boto-on labai, ma ndremenya Kindrei ta aseben aha kabadok ta iri kandriyen ta Kindrei, ma atanan handru ta iri lakou marakon Kindrei aso-ok.
COL 4:13 Jo anya katiye taha buku doh, iy badeh, asa-ar handru ta aseben aha, hawe iri mwan ma badih ta Kindrei are kon tinan Leyodisiya, ma Hirapolis.
COL 4:14 Ya Luk badeh, iy dokta tahi, ahi aso-ok iy labai. Luk uru Demas anya, bada-an turu mwasin ewek taha ale.
COL 4:15 Jo aso-ok aha katiye bada-an tek mwasin badeh, kili ta nadu tine iri mwan ma badih, are bolo kon tinan Leyodisiya. Ma bada-an tek mwasin ale kili ta Nimpa hawe iri mwan ma badih ta Kindrei nane atukum are asiu tan.
COL 4:16 Aha kanyolom la-ukei dah, ano aha kasuniy kili tiri lau ta Kindrei are kon tinan Leyodisiya, ma iri kameh winiyan anyolom ale. Ma la-ukei ramen ja, jo atorou ili tiri lau badu Leyodisiya, idoh aha winiyan anyolom ale.
COL 4:17 Ma aha katiye ta Akipus buku doh: “Ou atondrok gok dah, ou mene akohok badu mine Laban, ma ou amekes gok dah kamwenen.”
COL 4:18 Jo Pol, jo atorou sahou sekesek dah ewek taha na minek amwenen. Aha kabudon jo, jo udu ndra bolo asiu lulik kahis. Tikisiy ta Kindrei kudu hawe aha.
1TH 1:1 Jo Pol, jo atorou la-ukei dah. Sailas uru Timoti badeh, are hawek ale. Eme ma, aso ma taloh atehei la-ukei ramen dah ewek taha lau mwan ma badih ta Kindrei are bolo kon tinan Tesalonaika. Aha lau mwan ma badih ta tama taha Kindrei, aso aso-ok Kindrei hawe Laban Jises Krais, uru katikisi aha, ma ndrine aha kudu mwasin.
1TH 1:2 Len mari aso ma taloh adeu wurah i ta Kindrei ta aha, ma aso asolom ili ta tama taha Kindrei, badeh aso aloh nyara aha len marakon udu bolo salom taso.
1TH 1:3 Tasah, aso asolom, badeh, aso abudon i ta budon taha ale eme tutuni kandriyen taha nane mwasin, aha a-en hamon ta aliy, ma ta sa-ar taha, aha amekes ta a-en hamon ta kandriyen ta tikisi nadu tine aha iri rayah ja. Aha atondrok le Laban tataha Jises Krais kameh eme hamon ta akohok taha. Idoh le badeh, bwidi ndrine aha abadok ja, ta iri maha-an mari anya kasahan.
1TH 1:4 Aha nadu tine aso, aso tanan buku Kindrei tikisi aha mari tinan labai, eme ma iy aloh aha ta asahan nadun amwenen.
1TH 1:5 Ahi tanan, Kindrei badeh, ndratiye aha, ta sahou mwasin mene aso atiye ewek taha, badeh, winiyan basahan ndrine aha buku sahou laleyah bwe. Sahou taso badeh, nyamun labai. Ma boto-on ta Malawin Ndrabun ale amekes sahou abadok, ma iy tiye taso ta sahou dah handru. Aha marakon amwenen tanan kandriyen nane aso a-en hamon ta aliy udu ndrokowa aha. Aso amekes i buku doh ta aseben aha mari.
1TH 1:6 Aha badeh, a-en hamon le ta kandriyen taso, ma ta kandriyen ta Laban ale. Lakou i buku doh: Udu bolo len aha anuhun sahou ta Kindrei, ma aha a-en hamon ta aliy, iri lau amekes ndra-in ewek taha, ma maha-an solo-an asahan taha. Arile, ndrine aha baden ta aliy bwe. Eme ma, Malawin Ndrabun suruni aha, ma bwidi aha sekesek.
1TH 1:7 Eme ma, aha asahan mwasin, ma leheya kandriyen ta tekedek taha ili tiri lau ta budon handru are bolo kon tinan Masadoniya hawe Akaya, ma iri a-en hamon le ta kandriyen taha.
1TH 1:8 Handru, aha leheya kandriyen mwasin, tasah len aha a-en hamon ta kandriyen mwasin, eme sahou ta Kindrei aha asehek nane badeh, buku kurutuwe ndran, iu ili len labai. Arile, bala bolo kon tinan Masadoniya hawe Akaya le bwe, kundruh taha atehei budon taha ale ili ta Kindrei badeh, iu ili len labai bolo kon mara-ei. Eme ma aso ari gok ta amekes sahou ta aliy ja bwai.
1TH 1:9 Tasah, iri mwan ma badih badu bolo kon rakon rakon le badeh, asehek amwenen eme taso, ta nyala lakou marakon asahan udu kala aso mene are hawe aha. Iri asehek eme taso i buku doh: “Iri Tesalonaika marakon badeh, ndratubuni budon ma kona iri ndrala tiri kindrei ta wasai, ma iri ndratehei ndrine iri ndrala le ta Kindrei handru. Tasah, iri ame asahan lau mwan ma badih ta Kindrei, iy kati kohan handru.
1TH 1:10 Eme ma, iri atondrok Nadu Kindrei udu kandrah kameh eme akohok iri ame hamon ja.” Nadun doh mene imek, arile taman Kindrei mete-ei iy amak eme awas ja. Iy ndramak nane doh, Jises, iy le kameh talou taha ame len ta losen ta Kindrei kameh asahan tiri lau marakon nane amekes kandriyen ndra-in.
1TH 2:1 Aha nadu tine aso, aha marakon amwenen ndratanan, tekedek taso mene ewek hawe aha badeh, ba-au laleyah bwe.
1TH 2:2 Aha marakon ndratanan, aso mene are Pilipai badeh, iri lau atikah aso, a-um aso, ma aso akohok sisi-in ma maha-an tinan labai ta aliy. Arile, Kindrei tataha ales udu hawe aso, ma atadau ndrine aso, ma aso barou bala hamon, ta bahun nane doh bwe. Aso abadok labai, ma adek ame hawe aha, ma asehek sahou mwasin ta Kindrei ewek taha.
1TH 2:3 Eme ma, aha marakon winiyan atanan aso. Na len mene, kala ahi atiye sahou ewek taha, ahi ba-en hamon ta sahou laleyah ta wasai bwe. Ma ahi babudon ta atudun nyara ahi amwenen, o, ariu luk taha, bwe. Ma aso badeh, winiyan bandrek aha na sahou tahi le amwenen, bwe.
1TH 2:4 Kindrei badeh, ndranone aso, eme ma iy sekesek le ta atehei gok eme taso ta atiye sahou mwasin. Eme ma, aso asehek ewek taha. Arile, aso winiyan basehek sahou bala tiri lau ta iri kaso-ok gok taso bwe. Aso atiye sahou kede-eh ta amekes Kindrei kasekesek ta gok taso mwasin, tasah Kindrei le amwenen tanan bolo ndrine aso, iri lau mari bwe.
1TH 2:5 Sahou dah badeh, handru. Aha marakon tanan, aso badeh, basehek sahou taso ta atamas aha bwe. Kindrei ale tanan ndrine aso, ma aso bamekes gok dah ta tone kandriyen ta madalakis udu bolo ndrine aso amwenen, bwe.
1TH 2:6 Ma aso bamekes gok ta akohok nyara aso i tinan ta aha amwenen, o, ta lau rayah ja, bwe. Handru, aso badeh, aposel ta Krais. Eme ma buku aso aso-ok badeh, aso winiya ndremenya aha ta aseben.
1TH 2:7 Arile, aso mene are hawe aha, aso badeh, manyah amunum le. Aso are le buku badih isus nadun oro.
1TH 2:8 Tasah, aso aso-ok aha labai, eme ma aso anya kasehek nyala aha ta sahou mwasin ta Kindrei le bwe, arile ahi mara-ei badeh, ndralokowani ahi ale ta amak, ta aseben aha. Tasah, aha badeh, mwasin labai ta mada aso.
1TH 2:9 Aha nadu tine aso, aha tanan sahou dah handru labai. Aha tanan, lahou marakon aso ndramesekei, udu bolo len mene aso ame atiye sahou mwasin ta Kindrei eme taha, aso ame dah ta ariu nyamon taha bwe. Eme ma, aso amekes gok boto-on, ma aso asa-ar na len hawe ben, ma ta atondrok aso ta iri lakou marakon.
1TH 2:10 Aha tanan, Kindrei ale tanan kandriyen nane aso amekes ewek taha lau ta Kindrei, idoh amwenen ta madan, ma mada aha lau ta budon handru ale, ma ari lakou bandra-i bwe.
1TH 2:11 Ma aha tanan, kandriyen mwasin tama nah amekes ili ta nadun. Aso badeh, amekes i buku le aliy ili taha ari, ari.
1TH 2:12 Aso badeh, anya kariu budon taha, ma kamekes ndrine aha kabadok, ma kasehek sahou boto-on kewek taha buku doh: Aha kadek kamwenen, ma ka-en hamon ta kandriyen Kindrei aso-ok aha kamekes, tasah iy amwenen winiyan luhi aha ala hawe iri lau tan are bolo lomada sun, ma aha kameh are bolo tondrok tan mwasin udu kandrah.
1TH 2:13 Aso winiyan bamunyau ta adeu wurah ili ta Kindrei bwe. Tasah, ma bwena mene aha anuhun sahou ta Kindrei aso asehek ewek taha, ma aha a-en hamon ta aliy. Aha babudon anya, idah sahou ta lau le, bwe! Aha ndrandrei, buku sahou handru ta Kindrei, ma aha a-en hamon ta aliy. Ma sahou doh abadok ta amekes manyah ma budon taha mwan ma badih kudu mwasin ta madan.
1TH 2:14 Ya, aha nadu tine aso, aso tanan, lakou badeh, handru. Tasah, aha asahan i buku le iri lau mwan ma badih ta Kindrei, iri are loboho bada kon Judiya, iri atehei budon tiri in ta Krais Jises. Aha asahan i buku le iri, ma aha akohok maha-an badu mine iri lau rayah badu Tesalonaika amwenen, i buku iri lau ta Kindrei badu Judiya mene akohok badu mine iri Juwis rayah ale.
1TH 2:15 Iri Juwis badu Isra-el le doh, mene adai iri propet, ma adai Laban Jises ale. Eme ma, na len idah badeh, iri amekes ndra-in eme tahi, ma tikahei ahi are bolo kon mara-ei, ma iri tebelese ta kandriyen nane Kindrei aso-ok labai. Handru, iri badeh, asahan lau ta amekes bahun ili ta lau marakon,
1TH 2:16 tasah iri amekes san ta aturuk ahi, ta sala satiye sahou ta Kindrei sala tiri lau badu leheleh. Handru, iri baso-ok ta Kindrei kakohok iri kame hamon bwe. Eme ma, len marakon badeh, iri amekes kandriyen ndra-in ili solo-an udu le gwek, buku ndramak asuni gwa ili bolo bwesam irek labai, ma anya kamou. Eme ma, Kindrei ibolosen ili tiri, ma maha-an hawe ndramas ndra-in ta kandriyen iri nane amekes, iy ruwaniy eme andri amwenen ili bwele-e iri.
1TH 2:17 Aha nadu tine aso, iri Juwis rayah amekes ma tikahei aso are hawe aha ame len. Ma, na bolo len sese le doh, aso badeh, atona i buku tama nah udu len labai ta nadun oro. Handru, aso ado len labai, ma aso banyolom mada aha bwe. Arile, ndrine aso, ma budon taso mara-ei badeh, udu hawe aha kahis. Eme ma, aso amekes gok ta asilah iri madasan ta awek hamon hawe aha, ma ndrine aso eden labai ta anya kanyolom mada aha ja.
1TH 2:18 Handru, aso aso-ok labai ta awek hamon hawe aha. Jo Pol, jo le amwenen badeh, none san solo-an labai, arile aso basahan hawe aha bwe le. Tasah, ndramak ndra-in, tama balik Satan badeh, aturuk aso ta sawek.
1TH 2:19 Ta sasah handru, aso anya kawek hamon ta anyolom aha ja? I buku doh: Hamon kameh Laban tataha Jises eme hamon, ma taha kameh ales are madan ta sahou. Na len doh, aso katondrok saba lakou handru? Aso kasekesek na saba lakou handru? Aso kameh kasekesek ma kasehek nyala saba ndramas handru? Aso kameh sekesek taha le kabwai.
1TH 2:20 Handru, aha le amwenen badeh, a buku nyara aso tinan ma sekesek taso. Eme ma aso anya kawek hamon ta anyolom mada aha ja, ma kasekesek hawe aha marakon.
1TH 3:1 Ya, aso winiyan babe-en ta anyolom aha ja bwai. Eme ma, aso abudon mwasin ta aru Sailas mala-uh kare Atens Kado.
1TH 3:2 Aha ndratanan, nadu tine taha Timoti, iy ta amekes lahou ta Kindrei ta atiye sahou mwasin ta Krais. Aru ma la-uh suni Timoti ta ewek, ta atadau ma aseben budon taha kabadok.
1TH 3:3 Tasah, aso badeh, baso-ok ta lau rayah are ndrokowa aha, abwerei ta maha-an hawe sisi-in doh, ma iri mani budon tiri ta sahou mwasin ta Krais. Aha amwenen ndratanan, Kindrei mene ndratehei taha ta akohok maha-an ma sisi-in nane doh.
1TH 3:4 Ya, idoh handru. Bwena mene aso are hawe aha, aso tiye taha i buku doh: “Hamon kameh taha akohok sisi-in.” Handru, idoh mene asahan i buku le doh, ma aha ndratanan ta aliy.
1TH 3:5 Aso abudon ta aha i buku sah handru, eme ma jo babe-en ja bwai. Jo suni Timoti nane ta ewek hawe aha. Jo winiyan i tanan ta budon taha udu ndra ta Kindrei kahis deh bwe. Jo abudon anya, kora-on tama balik Satan badeh, kasilah san ta wahei aha, ma aha kamani budon taha, eme ma gok taso ta atiye sahou mwasin kameh iu laleyah.
1TH 3:6 Arile, bwe. Timoti mene ewek udu hawe aha, iy eme hamon, ma na le nane iy barasahan hawe aso ja ai. Ma iy asehek nyala aso, ta iri sahou mwasin le. Iy asehek eme taso i buku doh: Aha badeh, atehei budon taha mari in ta sahou mwasin, ma aha a-en hamon ta kandriyen ta aso-ok handru iri lau rayah ja badeh, kahis le. Iy asehek ale, anya, len mari badeh, aha abudon aso, ma aha sekesek ta len aha abudon aso. Ma aha aso-ok ta anyolom aso, i buku aso ale anya kanyolom aha ale.
1TH 3:7 Aha nadu tine aso, aso anuhun sahou doh Timoti edeu eme taso, eme ma aso atanan aha badeh, atawi budon kahis le, ma sahou ta Timoti doh atadau aso ta iri maha-an nane asahan taso, ma ta iri kandriyen ndra-in iri lau mene amekes eme taso.
1TH 3:8 I buku doh: Aso anuhun aha ndrahis mara-ei hawe Laban, ya ma bwidi ndrine aso sekesek. Idoh i buku ndramak ibo sik, ma iy anya kimek, arile iy amwenen ja, ma iy sekesek tinan labai.
1TH 3:9 Na bolo len mari badeh, aso asolom le ai, aso adeu wurah laba tinan labai, ili le ta Kindrei, ta aha amwenen. Arile, wurah taso amwenen doh badeh, winiyan basakalawi sekesek taso bwe. Tasah, sekesek nane aha adeu eme taso badeh, solo-an labai.
1TH 3:10 Na len ma na ben, aso badeh, asolom ili le ta Kindrei, iy winiyan aseben aso ta awek kanyolom aha, i buku aha abudon amwenen ili ta Kindrei, ya aso anya katadau budon taha, ma aha kameh winiyan atehei budon taha boto-on in le ta Kindrei.
1TH 3:11 Handru, aso aso-ok anya, tama taha Kindrei amwenen hawe Jises, Laban tataha, kasihi san taso, ma aso winiyan awek hawe aha.
1TH 3:12 Aso ale aso-ok ta Laban kanyuhi aha karek handru ta kandriyen ta tikisiy, ma aha kaso-ok labai iri nadu tine aha, ma iri lau rayah ja. Handru, aha kaso-ok iri lau kudu bwele-en labai, i buku aso aso-ok aha tinan labai ale.
1TH 3:13 Buku aha amekes i buku doh, Kindrei kameh winiyan atadau ndrine aha ma manyah taha amwenen. Ma hamon ta len doh, Laban Jises tataha kameh eme hamon ja, hawe iri lau tan marakon. Idah kameh ndrine aha udu mwasin mara-ei, ma aha ari ndra-in ta mada tama taha Kindrei ja bwe.
1TH 4:1 Ya aha nadu tine aso, na dah aso anya katorou sahou ta iri lakou rayah udu kede-eh. Aso anya kabatanau aha ma kasehek sahou boto-on kewek taha in ta nyara Laban Jises. Aso mene leheya aha ta iri kandriyen, ta aha kadek aliy, ma ka-en hamon tiri lakou Kindrei aso-ok. Na dah, aha kede-eh a-en hamon le ta kandriyen buku aso mene asehek taha. Arile, aha ka-en hamon handru ta lakou doh kili le bwena. Eme ma, kandriyen doh kameh, amekes Kindrei kasekesek taha.
1TH 4:2 Aha ndratanan iri batanau, aso mene leheya aha ta aliy na boto-on ta nyara Laban Jises.
1TH 4:3 Handru, so-ok ta Kindrei i buku doh: Koha aha ma manyah taha mara-ei kasahan ndrabun. Aha kateleya aha kare ndra len ta kandriyen ta karei.
1TH 4:4 Ta kandriyen ta tasou, aha ari, ari kakohok tanan ta atondrok bada aha amwenen. Aha badeh, kadeu bada aha ki-in hamon ta kandriyen mwasin ma ndrabun.
1TH 4:5 Aha salelei bada aha ta amekes lomondra ma kandriyen ndra-in, ma madalakis laleyah, i buku iri lau tana iri Kindrei bwe amekes.
1TH 4:6 Buku aha ba-en hamon ta sahou dah bwe, ma amadin hawe udu ndramak ari ja, aha amekes karei ili tiri lau ta Kindrei, iri nadu tine aha, ma wendreya iri ta lakou doh. Ari ndramak samekes kandriyen buku doh, tasah Laban badeh, edeu ndramas ndra-in ili tare lau nane amekes lakou doh. Handru, bwena mene ahi adeu sahou boto-on labai tiri lakou doh ndrawek taha.
1TH 4:7 Handru, koha taha badeh, kasahan ha-un mara-ei, tasah Kindrei batehei taha ba-en hamon ta kandriyen ta karei bwe. Iy atehei taha ta a-en hamon ta kandriyen ha-un, ma ndrabun labai.
1TH 4:8 Eme ma, lau banuhun sahou doh bwe, iy batehei konan bala ta ndramak le bwe. Iy atehei konan ili ta Kindrei, ma Kindrei edeu Malawin Ndrabun tan le amwenen ewek taha ta aseben aha.
1TH 4:9 Ya, jo gok ta atorou rayah sahou ewek taha ta kandriyen ta aso-ok labai iri nadu tine aha, bwe. Tasah, Kindrei ndraleheya aha ta kandriyen doh, ma aha ndratanan ta aliy.
1TH 4:10 Ya, idoh handru, aha leheya kandriyen ta aso-ok labai iri nadu tine aha iri, i tiri lau badu loboho kon tinan mara-ei udu bolo Masadoniya. Idoh mwasin, arile ahi asehek sahou boto-on ewek taha nadu tine ahi: Aha ka-en le hamon ta kandriyen doh, kamwenen kili le ai.
1TH 4:11 Ma aha kabudon boto-on ta aha kamanyah kamwenen kado le, ma ka-en hamon ta gok taha amwenen. Ya aha kamekes gok na mine aha, ma katondrok aha amwenen, buku bwena mene aso ndrasehek boto-on ndrawek taha.
1TH 4:12 Buku aha amekes i buku aliy, idah kameh iri lau tana iri Kindrei bwe, iri anyolom kandriyen doh, aha a-en hamon ta aliy, ma iri kameh atudun nyara aha, ma aha kameh barah ta ari lakou bwe.
1TH 4:13 Aha nadu tine aso, aso aso-ok aha katanan ta saba lakou kameh asahan tiri lau ta Kindrei, iri mene ndramak bwena. Kora-on ndrine aha keden tiri lau mene ndramak, buku iri lau rayah, iri batehei budon tiri handru ba-en ta Kindrei bwe, iri aden ma iri batondrok len ta ndramak mene imek, ano iy amak eme awas ja, bwe.
1TH 4:14 Handru, taha baden buku iri lau rayah bwe. Tasah, taha atehei budon handru in ta Jises imek, ano iy amak eme awas ja. Eme ma, taha ndratanan, na boto-on ta Jises kameh Kindrei atiye iri lau tan mene ndramak, ma iri kameh ame hamon ja hawe Jises.
1TH 4:15 Sahou aso asehek nane dan, idah sahou ta Laban. I buku doh: Len ta Laban eme hamon, taha mwan ma badih, are lau iy udu ndra awas udu munyak dah kahis, taha winiyan bala bwena tiri lau nane ndramak, ma taha ala atou Jises, bwe.
1TH 4:16 Bwe! Kameh asahan i buku doh: Ma mwena kameh Laban ruwani kandrah, ma iy eme andri. Handru, iy kameh aloh boto-on ili tiri lau mwan ma badih kame katukum, ma tinan tiri angelo kameh aloh ale, ma ndrah ta Kindrei kameh ili. Idah kameh, iri mwan ma badih mene ndramak bwena, ma iri atehei budon tiri handru in ta Krais, iri kameh amak ame awas ja, ma bwena handru.
1TH 4:17 Ano, taha mwan ma badih nane bamak bwe le, ado kon munyak dah, Laban kameh akohok taha ala bolo asi kandrah hawe iri mwan ma badih nane, ma taha atukum hawe Laban. Eme ma, taha mara-ei kameh are hawe Laban ta are le buku doh.
1TH 4:18 Handru, aha badeh, katadau ndrine aha kabadok, na sahou dah.
1TH 5:1 Aha nadu tine aso, aso winiyan batorou ari sahou ta tiye nyala aha ta saba len handru, Laban kameh eme hamon ta akohok taha bwe.
1TH 5:2 Tasah, aha amwenen ndratanan len ta Laban eme hamon ja kameh asahan na len iri mwan ma badih babudon bamwenen ta alokou iri bwe. Handru, iy kameh asahan buku ndramak ta bahana, eme na ben.
1TH 5:3 Iri mwan ma badih batehei budon tiri bala ta Kindrei bwe, iri asehek i buku doh: “Aha sabudon! Idah len, mwasin ai, ari bahun ja bwe.” Arile, na le len doh, se nawin bwe, Laban kameh bwidi iri ala munya-un ndra-in labai. Ma lakou doh kameh asahan suwi labai, buku sisi-in ale asahan ta badih iy anya kedeu nadun, ma iri winiyan bateleyani lakou doh bwe.
1TH 5:4 Arile, aha nadu tine aso, aha sanoh. Aha bala buku iri lau ale batehei budon tiri handru bala ta Kindrei bwe. Iri badeh, a buku iri lau are bolo lulik, ma iri winiyan banyolom bamwenen ta lakou asahan suwi kede-eh, bwe.
1TH 5:5 Arile, aha badeh, ta Kindrei, ma iy i buku sun anya, ma lomadan ewek taha. Ma len doh kameh winiyan basahan buku ndramak ta bahana bwe. Tasah, taha badeh, bado bolo lulik ta balik bwe.
1TH 5:6 Eme ma, taha sawoyah ta a-en hamon ta kandriyen mwasin, arile mada taha badeh, kasak kudu le, ma budon tataha badeh, kaleu. Taha sala buku le iri lau amadin laleyah, arile taha katehei budon tataha ta atondrok bada taha kudu mwasin.
1TH 5:7 Tasah, iri lau ta amadin, iri amadin na ben. Ma iri lau ta a-un gwa lolo-ou, iri a-un gwa lolo-ou na ben le.
1TH 5:8 Arile, taha lau ta Kindrei, taha buku iri lau ta len, eme ma mwasin ta taha kabudon kamwenen buku ndramak ba-un gwa lolo-ou bwe. Eme ma, taha katehei budon tataha kamwenen kili ta Kindrei, ma taha kaso-ok nadu tine taha ari, ari. Kandriyen doh i buku ndramak ta bahun, iy asini awin hayen udu batalan ta amekes bahun. Ma taha ale kales, ma katadau taha boto-on ta atondrok Kindrei akohok taha ame hamon ja. Buku taha amekes kandriyen doh, taha a buku ndramak ta bahun atehei barak, iri amekes na hayen udu batun ta amekes bahun.
1TH 5:9 Handru, aha sanoh, Kindrei batehei taha ta akohok isi na len ta losen tan doh asahan eme lewan, bwe. Iy atehei taha badeh, ta akohok seben ta Jises Krais, iy Laban tataha, ma na iy le, iy andrei taha ame hamon.
1TH 5:10 Krais mene imek ta akunoh taha ame hamon ja. Eme ma, buku taha are ndra awas are munyak kahis, o, taha ndramak, ano iy eme hamon, taha kameh are awas hawen.
1TH 5:11 Eme ma, aha marakon kabwidi ndrine nadu tine aha iri ari, ari, ta sahou mwasin doh, ma katadau ndrine iri kili le se, i buku aha amekes dah.
1TH 5:12 Aha nadu tine aso, aso anya kabatanau aha buku doh: Aha badeh, kanoh ma kanuhun boho iri lau amekes gok are ndrokowa aha, ma aha ka-en bahandra iri. Laban atehei iri are badeh, buku ndramak ta atondrok koha aha, ma kandriyen mwasin taha. Ma iri kameh leheya aha ma lowosa budon taha.
1TH 5:13 Eme ma, aha katudun nyara iri, ma kaso-ok iri handru. Tasah, iri amekes gok ta aseben aha ta a-en hamon ta Laban. Eme ma, aha katawi budon randra le ta nadu tine taha iri, ma ndrine taha kamunum kili tiri.
1TH 5:14 Aha nadu tine aso, na dah, aso anya kabatanau aha boto-on buku doh: Aha badeh, kabatanau iri lau ta gwaman, samanyah laleyah. Ma aha ale kamekes gok ta atadau ndrine iri lau ta anoh kabadok, ma kaseben iri lau nyamu iri bwe, katehei budon tiri kili ta Kindrei. Aha badeh, kamekes kamunum kili tiri lau marakon.
1TH 5:15 Handru, kora-on aha kadeu saluwe kandriyen ndra-in kili tiri lau mene amekes kandriyen ndra-in ewek taha bwena. Bwe! Arile, len marakon badeh, aha kabadok ta amekes kandriyen mwasin kili ta nadu tine taha iri, ma hawe iri lau marakon.
1TH 5:16 Bolo iri len marakon aha kasekesek.
1TH 5:17 Ma aha kasolom kudu le buku doh.
1TH 5:18 Handru, aha kadeu wurah ki ta Kindrei ta lakou marakon asahan taha, tasah na Krais Jises le badeh, Kindrei aso-ok aha ka-en hamon ta kandriyen buku doh.
1TH 5:19 Aha sasemete-ei jih ta Malawin Ndrabun udu ta koha aha.
1TH 5:20 Aha badeh, satobolowe kona aha sala ta sahou ta Kindrei, Malawin Ndrabun ale edeu ili tiri propet tan ta tiye ewek taha.
1TH 5:21 Aha badeh, kaleben iri sahou aha anuhun badu boho iri lau, ma aha katawiy kihis, ma ka-en hamon tiri lakou mwasin.
1TH 5:22 Handru, aha badeh, kare ndra len labai tiri kandriyen ndra-in.
1TH 5:23 Ahi aso-ok Kindrei labai. Iy badeh, kati kandriyen mwasin marakon, iy amwenen winiyan amekes aha asahan ha-un, ari kandriyen ndra-in ja bwe. Ma Kindrei winiyan atehei aha, tan amwenen. Handru, iy winiyan atondrok malawi aha, koha aha, ma bada aha, ma aha kameh are mwasin mara-ei. Eme ma ari ndra-in winiyan bare madan bwe, na len Laban tataha Jises Krais eme hamon ta akohok taha ja.
1TH 5:24 Kindrei atehei aha badeh, tan amwenen, ma iy amwenen badeh, mwasin mwasin labai, ma iy kameh amekes aha asahan mwasin, ma ari ndra-in winiyan bare madan ja bwe.
1TH 5:25 Aha nadu tine aso, aha kasolom kili ta Kindrei, iy kameh kaseben aso.
1TH 5:26 Ta kandriyen tataha lau marakon ta Kindrei, aha kateu lim, ma aha kaleheya sekesek taha kili ta nadu tine aha iri marakon.
1TH 5:27 Jo asehek sahou boto-on ewek taha in ta nyara Laban Jises i buku doh: Aha kanyolom, ma kaloh la-ukei dah kili tiri lau ta Kindrei marakon badu Tesalonaika.
1TH 5:28 Aso badeh, aso-ok tikisiy ta Laban tataha Jises Krais kewek kudu hawe aha.
2TH 1:1 Jo Pol, jo atorou la-ukei dah. Sailas uru Timoti badeh, are hawek ale. Eme ma, aso ma taloh atehei la-ukei ramen dah ewek taha lau mwan ma badih ta Kindrei are bolo kon tinan Tesalonaika.
2TH 1:2 Aha lau mwan ma badih ta tama taha Kindrei, ma hawe Laban tataha Jises Krais. Aso aso-ok Kindrei hawe Laban Jises Krais, uru katikisi aha, ma ndrine aha kudu mwasin.
2TH 1:3 Aha nadu tine, len marakon badeh, aso adeu wurah ili ta Kindrei ta aha. Handru, kandriyen ta tiye wurah i ta Kindrei doh amwenen. Tasah, budon taha badeh, asahan boto-on labai. Ma ale, aha marakon badeh, aso-ok nadu tine aha mwan ma badih rayah labai ja. Ma kandriyen mwasin asahan a sola le ai, ere ndrokowa aha.
2TH 1:4 Ta idoh le, aso badeh, atudun nyara aha udu ndrokowa iri mwan ma badih ta Kindrei. Ma aso asehek sahou i buku doh: “Na len iri lau amekes kandriyen ndra-in ili tiri lau badu Tesalonaika, ma len ta maha-an asahan tiri, iri badeh, ales boto-on, ma tawiy ihis budon tiri, ma bwese iri maha-an ma isi.”
2TH 1:5 Ya, ta kandriyen mwasin, ale aha amekes udu bolo iri lau ndra-in ta amekes kandriyen ndra-in laleyah ewek taha, Kindrei badeh, leheya taha i buku doh: Iy badeh, seleya taha mwan ma badih badu kon munyak na le kandriyen mwasin. Aha bwese sisi-in doh, ta aseben iri lau mwan ma badih, ta Kindrei winiyan atondrok iri, ma Kindrei ale kameh winiyan atehei aha ta ala ado bolo iri lau mwan ma badih nane, iy amwenen atondrok iri.
2TH 1:6 Handru, Kindrei kameh amekes kandriyen mwasin buku doh: Hamon, iy edeu maha-an ili tiri mwan ma badih, iri nane adeu maha-an ewek taha. Kindrei abudon, idoh amwenen.
2TH 1:7 Ma iy ale anya kakohok maha-an, aha bwese doh ki-iu, ma iy anya kedeu amunyau kewek taha, ma aso ale. Lakou doh kameh asahan, na len Laban Jises hawe iri angelo tan boto-on, iri are kandrah ame andri, ma asahan ame lewan. Iy kameh eme hawe jih laba tinan, ma nyarahan labai.
2TH 1:8 Udu bolo len doh kameh iy edeu ndramas ndra-in ili tiri mwan ma badih baso-ok Kindrei bwe, ma iri bwale iri ta a-en hamon ta sahou mwasin ta Laban tataha Jises Krais.
2TH 1:9 Ya, iri mwan ma badih doh kameh, akohok ndramas ndra-in labai i buku doh: Laban kameh atehei iri are len labai ta madan, ma ta sun badeh, asahan na boto-on tan, ma iri kameh andrakak are ndra bolo jih ta udu le buku doh.
2TH 1:10 Iri mwan ma badih doh kameh, ano mara-ei udu bolo len ta Krais eme hamon eme munyak ja, ma iri lau marakon ta Kindrei kameh atudun nyaran ta lakou marakon iy amekes ili tiri. Ya, iri lau marakon mene atehei budon tiri handru ndrala tan, iri kameh sekesek. Aha kameh i buku aliy ale. Tasah, aso mene tiye sahou ta Kindrei udu ndrokowa aha amwenen, ma aha atehei budon taha handru in ta sahou doh.
2TH 1:11 Aso abudon ta lakou dah kameh asahan na len ta Krais eme munyak ja, eme ma len marakon aso amekes salom ili ta Kindrei tataha, ta iy kameh kaseben aha. Aso abudon aha ta len mene aha a-en hamon ta Kindrei, ma iy ariu aha ta sahou mwasin ta Krais. Eme ma, aso asalom ta iy amwenen kabwidi aha winiyan ta ala bolo kandriyen mene iy ndratandrakan aha ta amekes. Ma aso ale asolom i ta Kindrei, iy kedeu boto-on kewek taha, ma aha winiyan amekes iri kandriyen mwasin marakon aha anya kamekes. Handru, aha winiyan amekes iri gok marakon aha atehei budon handru in ta Krais, aha anya kamekes.
2TH 1:12 Buku aha amekes kandriyen buku doh, aha winiyan atudun nyara Laban tataha Jises, ma iy winiyan atudun nyara aha ale. Tikisiy ma mwasin ta Kindrei tataha hawe Laban Jises Krais le, winiyan amekes iri lakou marakon doh asahan handru.
2TH 2:1 Ya, aha nadu tine aso, na dah, aso anya katiye taha ta Laban tataha Jises Krais kameh eme hamon eme munyak ja, ma taha kameh atukum ala hawen. Aso asehek taha i buku doh:
2TH 2:2 Mani aha satur laleyah ta sahou rayah, aha anuhun ta Laban Jises, anya iy mene ndrame hamon. Arile, bwe! Kahis. Sebwe malawin ari ta wendreya le atehei sahou doh ndrala ta ari ndramak. O, sebwe ari ndramak asehek na le budon tan amwenen, nadeh. O, sebwe iri rayah anya, aso badeh, atorou la-ukei i buku doh ili tiri. Bwe labai. Buku aha ndranuhun sahou solo-an doh, aha sabudon solo-an ta aliy. Tasah, sahou doh wendreya.
2TH 2:3 Aha sanuhun lau rayah wendreya aha na sahou tiri, o, ta kandriyen rayah. Tasah, len ta Laban ta anya keme hamon doh badeh, winiyan basahan laleyah bwe. Ma bwena, lau solo-an kameh tebelese, ma adeu kona iri ili ta Kindrei, ma ndramak ari doh ta balik, iy ta amekes kandriyen ndra-in, ma iy banuhun sahou batanau bwe, iy kameh asahan eme lewan, ma iri lau kameh atanan iy amwenen. Hamon kameh ndramak doh andrakak udu bolo jih.
2TH 2:4 Iy kameh amekes bahun ili tiri budon solo-an ta lau badu kon munyak a-en hamon ta aliy, ma iy aseken iri katudun iy buku Kindrei. Ma iy ale kameh atudun nyaran amwenen, ma tubuloh budon tiri lau rayah. Eme ma, iy kameh ili manyah udu bolo asiu ndrabun ta Kindrei, ma iy kameh asehek sahou i buku doh: “Jo amwenen, jo Kindrei.”
2TH 2:5 Bwena mene jo udu hawe aha, ma jo asehek nyala aha ta iri lakou marakon doh. Sebwe aha ndramani budon doh nadeh?
2TH 2:6 Aha tanan ale ta lakou ari udu aliy na dah, iy aturuk san ta ndramak ndra-in nane doh, ta iy winiyan asahan eme kon lewan ta mada iri lau na bolo len dah.
2TH 2:7 Ya, aha ndratanan kandriyen dah, ta tebelese sahou batanau badeh, udu aliy, ma asahan amunum, amunum le eme loken. Arile, basahan bala tinan bwe le, ma iy kameh udu le buku doh, winiya le len ta lakou doh nane turuki san ta ndramak ndra-in, Kindrei le ari kameh winiyan aruwi ma andrei lakou doh iu ili len.
2TH 2:8 Na len doh, iy ndramak ta balik kameh asahan eme lewan. Ma iri lau marakon kameh atanan iy. Arile, hamon kameh, Laban Jises eme ja, ma hawe lomada sun tan tinan labai, ma iy kameh idi ndramak ta balik nane na jor ta bohon le amwenen. Ma iy kameh amekes iy ndramak doh asahan lakou laleyah.
2TH 2:9 Tasah, ndramak ta amekes kandriyen ndra-in ma ta tebelese sahou batanau kameh eme hawe boto-on ta balik le. Ma, na boto-on ta balik le, iy kameh amekes iri gok marakon boto-on ma kalem solo-an ta wendreya.
2TH 2:10 Ta kandriyen solo-an doh, iy kameh wendreya iri lau ta ala bolo jih ta andrakak au. Buku iri lau doh mene aso-ok ma anya kanuhun sahou handru, badeh kameh Kindrei winiyan akohok iri ame hamon. Arile, iri baso-ok bwe.
2TH 2:11 Eme ma, Kindrei kameh atehei boto-on ta wendreya ili tiri, ma iri kameh atehei budon tiri in ta sahou wasai.
2TH 2:12 Kindrei amekes lakou doh, tasah iri lau marakon mene batehei budon tiri ba-en ta sahou handru bwe, iri mene sekesek ta kandriyen ndra-in le. Iri kameh akohok ndramas ndra-in labai ta mada sahou ta Kindrei.
2TH 2:13 Arile, aha nadu tine aso mwan ma badih, Laban aso-ok aha labai, ma na len marakon, aso badeh, adeu wurah ili ta Kindrei ta aha. Tasah, ma bwena handru, Kindrei ndratanan aha kameh ta ame hamon. Malawin Ndrabun badeh, ndraleheyani aha ndrala ta Kindrei, ma aha atehei budon taha in ta sahou handru. Ma ta kandriyen doh le, Kindrei andrei aha ame hamon.
2TH 2:14 Iy andrei sahou mwasin handru ta Krais, aso mene tiyaniy ndrawek taha, ma iy aruwi ndrine aha ili le tan. Eme ma, iy anya kedeu sun, ma iri lakou mwasin ta Laban tataha Jises Krais badu kandrah kewek taha.
2TH 2:15 Eme ma, aha nadu tine aso, aha kales boto-on. Ma iri sahou marakon ta Kindrei aso mene leheya aha ta aliy, na boho aso, o, na la-ukei aso atorou ewek taha, sahou doh aha ka-en hamon ta aliy.
2TH 2:16 Laban tataha Jises Krais hawe tama taha Kindrei mene tikisi taha. Eme ma Laban bwidi kandriyen mwasin eme tataha, ma bwidi budon tataha amwenen udu le buku doh. Ma iy aseben taha ta budon, ma taha atondrok Kindrei kamekes manyah tataha kudu mwasin.
2TH 2:17 Eme ma, aso asolom, ta iy katadau ndrine aha hawe koha aha kabadok, ma kaseben aha ta amekes iri kandriyen mwasin, ma asehek sahou mwasin.
2TH 3:1 Na dah, aha nadu tine aso, mwan ma badih, sahou taso ari ja i buku doh: Aha kasolom kili ta Kindrei, iy kaseben aso ta atiye sahou ta Krais, ma sahou ta Laban kameh winiyan sakaliye ili bolo kon mara-ei, iri kandrei, ma katawi kihis kudu budon tiri, i buku le iy mene amekes udu ndrokowa aha, na len aha anuhun, ma atehei budon in ta sahou mwasin doh.
2TH 3:2 Ma aha ale, kasolom kili ta Kindrei, iy kandrei aso are mine iri lau ndra-in kame len; iri badeh, ta amekes kandriyen ndra-in. Tasah, aha tanan, lau solo-an labai badeh, batehei budon tiri handru bala ta Kindrei bwe, ma iri baso-ok gok aso amekes dah bwe.
2TH 3:3 Ya, lau rayah ja badeh, batehei budon tiri bala ta Kindrei bwe, arile Laban badeh, ta amekes kandriyen handru na len mari. Eme ma, taha katehei budon tataha handru ki-in tan, ma iy kameh atadau budon tataha, ma atondrok aha, ma balik kameh winiyan baruwi budon taha bwe.
2TH 3:4 Laban badeh, aruwi budon taso, ma aso atanan aha i buku doh: Iri kandriyen mari, aso mene asehek badeh, aha a-en hamon ta aliy ai. Ma hamon ale kameh, aha amekes i buku le aliy.
2TH 3:5 Aso badeh, aso-ok Laban ki-in bwena taha kaleheya budon mwasin kewek taha, ma aha winiyan atanan Kindrei, iy aso-ok aha labai, ma Krais winiyan aseben aha ta ales boto-on, ma ta bwese maha-an, buku iy mene amekes udu ndra kon munyak.
2TH 3:6 Aha nadu tine aso mwan ma badih, ta bwele-e nyara Laban tataha Jises Krais, aso anya kabatanau aha badeh, buku doh: Aha badeh, kare ndra len ta nadu tine aha iri rayah nane manyah laleyah, ma ba-en hamon ta tanan nane aso adeu ili tiri bwe.
2TH 3:7 Tasah, aha ndratanan, aha badeh, ka-en hamon ta kandriyen taso. Bwena mene, aso are hawe aha, aso bamanyah laleyah bwe!
2TH 3:8 Aso bakohok nyamon rayah badu mine aha laleyah bwe. Aso asih le! Aso abo gok boto-on na len ma ben, aso winiyan badeu maha-an bawek taha bwe.
2TH 3:9 Aso badeh, winiyan ndremenya aha ta aseben aso, arile aso abo gok ta aseben aso le, ta aha kanyolom ma ka-en hamon ta aliy.
2TH 3:10 Aso mene ado hawe ado badeh, aso atehei batanau boto-on labai ewek taha i buku doh, “Are lau, buku iy bamekes gok bwe, iy winiyan bakohok nyamon bwe.”
2TH 3:11 Aso amekes, tasah aso anuhun lau rayah ado bolo aha badeh, bamekes gok bwe. Iri badeh, are laleyah, arile iri asehek sahou solo-an ja, ta lahou ta ndramak ari labai.
2TH 3:12 Ta nyara Laban tataha Jises Krais le badeh, aso batanau iri boto-on, i buku doh: Aha kamanyah kamwenen, kamekes gok ta atondrok manyah taha.
2TH 3:13 Aha nadu tine aso mwan ma badih rayah ja, aha sawoyah ta amekes kandriyen mwasin.
2TH 3:14 Buku iri mwan ma badih rayah ba-en hamon tiri sahou, aso torowenei in bolo la-ukei dah bwe, mada aha kaleu kamwenen kudu tiri. Ma aha sadek hawe iri, ma idah kameh bwidi bwili iri mara-ei ama.
2TH 3:15 Arile, aha sabudon kaliu tiri udu bwele-e aha, ndri-iy. Aha badeh, kabatanau iri, ki buku nadu tine aha iri handru.
2TH 3:16 Laban kudu hawe aha mara-ei. Laban badeh, kati nyosowa mondrei, ya aso aso-ok mondrei tan badeh, kudu hawe aha na len mara-ei kudu le buku doh.
2TH 3:17 Jo Pol, jo atorou sahou sekesek tek ewek taha na minek le amwenen. Ya tarou dah badeh, kalem tek amwenen, jo edeu ndra bwena in bolo iri la-ukei jo atorou ili kon marakon, jo atorou marakon i buku le doh.
2TH 3:18 Tikisiy ma nyosowa mondrei ta Laban Jises Krais badeh, kudu hawe ado mara-ei.
1TI 1:1 Jo Pol: Jo badeh, aposel ari ai, ta Krais Jises. Idoh badeh, asahan na sahou boto-on ta Kindrei, ndramak ta seben taha ma hawe Krais Jises, iy ndramak ta taha katehei budon handru ki tan.
1TI 1:2 Jo atorou la-ukei dah i tam Timoti, ou naduk handru i san ta budon handru: Tikisiy ma mondrei ta tama taha Kindrei ma Krais Jises, iy Laban tataha badeh, kudu hawem.
1TI 1:3 I buku jo mene indrek ou, na len jo edek ili kon Masadoniya, ta ou badeh, ado Epesus ado gwek, ta abarah lau rayah ta wasai ado badeh, saleheya tanan ta wasai.
1TI 1:4 Ma oro sasehek sala le ta nyala kundruh laleyah, ma hawe sasehek sare tubu oro. Bolo iri sahou doh kameh ta amekes ndrales udu bolo oro le, ya winiyan basebenei oro ta budon handru i ta Kindrei bwe, ma hawe winiyan basebenei lahou tan bwe.
1TI 1:5 Budon laba tinan jo asehek dah badeh, ta kandriyen ta tikisiy. Kandriyen ta tikisiy badeh, kasahan kudu ndrine ndramak mwasin keme len. Kaleheya kandriyen mwasin ta bar lewen, ma hawe budon handru.
1TI 1:6 Oro rayah ndraruwani budon doh, ya oro ndra-en hamon ta sahou laleyah.
1TI 1:7 Oro anya kasahan ndramak ta leheya kandriyen malen tiri Juwis, arile oro bala tana oro sasah oro asehek ta aliy doh bwe, ma ale oro tanan katin bwe, arile oro abadok ta aliy le ai.
1TI 1:8 Taha tanan, ta kandriyen malen badeh, mwasin, i buku none ndramak ki-in hamon ta aliy na len mari.
1TI 1:9 Taha tanan ale, kandriyen malen atehei eme badeh, ta leheya iri lau mwasin bwe. Arile, kandriyen malen atehei eme, ta leheya iri lau ta tebelese labai. I buku none iri lau ta banuhun sahou ta Kindrei bwe, ya ta i tiri lau ta amekes karei ma lomondra ndra-in, ya i tiri lau ta a-um tama iri hawe tine iri amak, ma hawe i tiri lau ta adai lau amak.
1TI 1:10 Ya kandriyen malen badeh, ta leheya iri lau ta karei, hawe i tiri lau mwan amekes mwan, ya i tiri badih amekes badih, ma i tiri lau ta bahana iri ndramak, ma hawe i tiri lau ta wasai, hawe i tiri lau ta wasai ta tandrakan handru i loken. Ma hawe i ta saba kandriyen bamwenen ta sahou handru bwe.
1TI 1:11 Sahou handru ta lomadan hawe nyosowan ta Kindrei badeh, udu bolo sahou mwasin tan, eme iy badeh, atehei eme kanik ta atiye.
1TI 1:12 Jo edeu wurah i ta Krais Jises, Laban tataha, tasah iy le badeh, edeu boto-on eme tek. Iy anyolom jo badeh, ta anuhun sahou, eme iy atehei lahou tan eme kanik jo amekes dah.
1TI 1:13 Jo mene bobose nyaran, ma jo mene idi iri lau tan, ma jo badeh, ndramak ta tebelese i badan. Badeh mene, tasah jo batehei budon handru bala tan bwe, ma jo bala tanan iy bala mwasin bwe. Arile, iy tikisi jo labai.
1TI 1:14 Tikisiy ta Laban i tataha badeh, amou handru eme bwele-ek, eme jo atehei budon tek handru i ta Krais Jises, ma jo atehei ndrinek mari i tan. Ya taha are lau ahas hawe Krais badeh, kandriyen doh, kudu tataha.
1TI 1:15 Ya sahou tek dah lau kanuhun, idah sahou handru aha kanuhun: Krais Jises eme andri bolo munyak ta aseben lau ta karei ma ta lomondra ndra-in. Ya jo dah badeh, ndra-in labai ja, sakalawi lau mari.
1TI 1:16 Ta katin doh, Kindrei tikisi jo, ta Krais Jises baruwani jo bwe, eme ya iy kaleheya iy mari udu bolok, tasah jo ndramak ndra-in labai ta lau mari. Ya jo badeh, i buku none ndramak ma mwena handru ta amekes kandriyen ndra-in. Ya, i buku none iri lau ado hamon kame kanyolom, ya eme iri katehei budon tiri handru badeh, ki ta Jises, ma iri kakohok koha iri mwasin, ta bano bwe, ta kudu le buku doh.
1TI 1:17 Eme ya masiye ma tudun badeh, ki ta kabin ta udu le buku doh, ma hawe ki ta kabin ta winiyan ta ano bwe, ma hawe ki ta kabin taha batou iy bwe. Ki ta Kindrei le ari doh, masiye ma tudun ki tan kudu le buku doh. Handru!
1TI 1:18 Eme naduk Timoti, jo atehei sahou batanau ewek kanim. Tasah idoh amwenen le, ta sahou mene iri propet ta Kindrei mene ndrasehek ndra-au ta nyalam. Ou andrei sahou dah ki nyara beteleu tam, ta ou kameh asahan nyekelen mwasin ta bolo bahun.
1TI 1:19 Ma ou tawi budon handru kaleu kudu bar tam. Tasah lau rayah bamekes bar mwasin bwe, ya budon tiri handru badeh, ndrataku.
1TI 1:20 Eme udu bolo oro badeh, Himeneyus hawe Aleksandra. Jo ndratehei uru ndra mine tama balik Satan. Idoh kameh ki bale uru ya hamon badeh, uru samekes luhe ndra-in ja sala ta Kindrei.
1TI 2:1 Ma mwena udu bwele-e lakou mari handru, jo anya kasehek sahou boto-on ki ta lau mari i buku doh, “Ado badeh, kasehek budon tado ma kadeu wurah ma hawe kasolom ki ta Kindrei bwena;
1TI 2:2 ma kamekes ki tiri kabin mari, ma hawe are lau ateu batu lahou tinan ta atondrok, eme ma manyah ta to kudu mwasin; i san ta manyah mwasin ta Kindrei ma ta kandriyen lewen.”
1TI 2:3 Idoh mwasin labai ma amekes Kindrei ta seben taha, kameh sekesek.
1TI 2:4 Tasah, iy aseken lau mari samak ma lau katanan sahou handru.
1TI 2:5 Tasah, Kindrei badeh, iy Kindrei le ari, ma hawe ndramak awas ari le udu ndrokowa Kindrei hawe taha ndramak, badeh Krais Jises le.
1TI 2:6 Iy le badeh, atehei kohan ta akunoh taha lau mari. Idoh asahan handru eme lewan amwenen le, ta Kindrei anya lau mari badeh, samak.
1TI 2:7 Eme ta katin doh baden adeh, jo asahan aposel ta atiye sahou, ma ta leheya iri lau badu leheleh. Ma iy atehei jo ta atiye sahou ta budon handru dah. Eme ya jo bawasai bwe, jo tiye sahou handru.
1TI 2:8 Eme ya budon tek, jo aseken aha lau mwasin ta mada Kindrei badu kon mari kamekes salom ma kasore mine aha ki loke. Ma hawe aha kateu lim, ma aha sasobobo ndri-iy.
1TI 2:9 Ya aha badih, aha kalomondra kolau taha, ma aha kanyasou aha kamwenen; ma aha sanyasou batu aha sala buku none aha adeu lakou i bada aha, i buku none bek nyikilikin, i ndranye aha, hawe buwandralou, ma hawe kolau lomadan sowan tinan labai.
1TI 2:10 Arile, aha kamekes ki san mwasin ta leheya aha i buku badih handru ta atudun Kindrei.
1TI 2:11 Aha badih kakohok kandriyen ta kado le bahandra mwan.
1TI 2:12 Jo baseken aha ales ta leheya lakou ma hawe katondrok iri mwan bwe; aha badeh, kado le.
1TI 2:13 Tasah, ma mwena handru mene bamekes Ip bare bwena bwe, amekes Adam badeh, ere bwena labai.
1TI 2:14 Ma Adam ale bataku bwena bwe, Ip badeh, taku bwena ma iy ba-en hamon ta kandriyen mwasin ta Kindrei bwe.
1TI 2:15 Arile, iri badih katawi kandriyen ta budon handru, ma hawe kandriyen ta tikisiy, ma hawe kandriyen mwasin ta are mada Kindrei, ma iri sala badih ta atudun iri ta anyasou bada iri. Ya buku none iri amekes i buku doh kameh, na len iri adeu nah kameh iri adeu udu mwasin.
1TI 3:1 Idah badeh, jo tiye sahou handru: I buku none are lau aseken handru ta asahan ndramak ta atondrok lau ta Kindrei, lakou doh badeh, mwasin labai.
1TI 3:2 Ndramak ta atondrok lau ta Kindrei, iy badeh ki ndramak, ari ndra-in badan bwe, ya iy badeh, kasoh badih ari le, iy badeh, ki ndramak ta budon mwasin; ma iy badeh ki ndramak ta atondrok badan kudu mwasin. Ma iy badeh, ki ndramak nyaran mwasin handru, ma lau kamasiye iy, ma iy badeh, ki ndramak ta asumon lau mari kame asiu, ma hawe iy badeh, ki ndramak ta tanan ta leheya;
1TI 3:3 Ya iy badeh, sasahan lolo-ou ta gwa boto-on, ma iy badeh, sala ndramak ta ndrine reh. Arile, iy badeh, ki ndramak ta udu le, ma iy badeh, ki ndramak ta amekes mondrei; ma iy sala ndramak ta aseken luk labai.
1TI 3:4 Ma iy ale badeh, katondrok udun ma nadun kudu mwasin ma iy badeh, kaleheya nadun kanuhun sahou hawe kinoh iy.
1TI 3:5 I buku none are lau winiyan batondrok udun ma nadun bwe, iy winiyan batondrokei lau ta Kindrei bwe le.
1TI 3:6 Iy ale winiyan batondrok lau ta Kindrei bwe, buku iy barasahan lau ta Kindrei ai, bwe kameh, budon ta atudun iy kameh i tinan ma idah kameh iy anya, iy le. Ya, buku none iy amekes i buku aliy, idah kameh iy akohok maha-an kameh i le buku balik.
1TI 3:7 Nyaran badeh, ki mwasin ta ndranye lau mari. Ya, ki buku none bwe, badeh kameh iy akohok bwilima ma balik kameh sawei iy.
1TI 3:8 Ya oro lau ta seben badu bolo iri lau ta Kindrei badeh, kandriyen toro ki mwasin labai, ma oro badeh, sala ndramak ta wasai. Oro sa-un gwa boto-on solo-an, iri aloh waen, ma oro samekes ndrakok ta luk toro.
1TI 3:9 Oro katawi sahou handru mene Kindrei tiye ta budon handru ma budon toro kaleu kudu mwasin.
1TI 3:10 Eme ya kanone oro op. I buku none oro ahas, oro winiyan ateu lahou ai. I buku none bwe badeh, oro sateu lahou.
1TI 3:11 Ma udu oro badeh, kandriyen toro ki mwasin, ma oro sasehek sahou ndra-in sala bada ndramak ari ari. Oro badeh, sala badih ta a-un gwa boto-on, ma oro badeh, kasehek sahou handru le ta bolo lahou mari.
1TI 3:12 Ndramak ta seben ta lau ta Kindrei badeh, kasoh badih ari le. Ya iy katondrok nadun ma udun kudu mwasin.
1TI 3:13 Are ndramak ta seben amekes lahou mwasin, nyaran kameh asahan mwasin, ma idah kameh iy winiyan asehek sahou boto-on ta budon handru ta Krais Jises.
1TI 3:14 Jo abudon ta anya kewek katou ou suwi na len jo atorou la-ukei dah ewek tam.
1TI 3:15 Arile, i buku none jo bawek suwi bwe, sahou udu bolo la-ukei dah, winiyan tiye nyala to ta kandriyen ta to kudu mada kindrei udu bolo lau ta Kindrei ki buku sah. To badeh, lau ta Kindrei, ya iy badeh, kohan handru ta udu le buku doh. Tasah, to badeh, tawi sahou handru ta Kindrei i buku to abe-ei i loke i buku bek, udu le buku doh.
1TI 3:16 Lakou laba tinan ta Kindrei aton mene ndrasahan ndrame lewen asah idoh: Jises Krais badeh, asahan ndrame awas, Ma Malawin Ndrabun leheyani iy doh badeh, amwenen handru, Ya eme iri angelo anyolom iy, Ma iri lau tan atiye sahou ta nyalan i tiri lau badu kon munyak mari, Ya iri lau badu kon munyak atehei budon tiri handru i tan. Ano iy iu ili loken i kandrah, ma atondrok lakou mari hawe taman.
1TI 4:1 Malawin Ndrabun tiye aleu i buku doh: Na len hamon eme, lau rayah kameh ruwani budon handru tiri; ya iri kameh an hamon ta malawin ndra-in ta wasai, ma an hamon ta leheya ndra-in tiri balik.
1TI 4:2 Leheya doh aseker na lau ta wasai; budon tiri badeh, mwasin handru bwe. Budon tiri badeh, ndramak, ma bar tiri balomondra bala mwasin bwe.
1TI 4:3 Iri tiye iri lau satasou, ma saimon nyamon rayah ndri-iy. Arile, Kindrei mesekei iri nyamon doh badeh, ta aimon le, i buku none to lau ta budon handru amekes salom, ma adeu wurah ta aliy. Tasah, to badeh, ndratanan sahou handru.
1TI 4:4 Ya, i buku none lakou mari kede-eh, to kamekes salom ki ta aliy, badeh, ndra mwasin le ta aimon; ari lakou badeh, ndra-in ta kakeh ki-iu, bwe.
1TI 4:5 Tasah, sahou ta Kindrei mene, ma hawe salom badeh, mesekei udu mwasin ta mada Kindrei.
1TI 4:6 I buku none ou leheya batanau dah i ta nadu tinem oro, ou lohowan mwasin labai ta Krais Jises. Ma ou ale amekes ou abadok na aliy. Ma idah kameh, ou abadok na sahou ta budon handru mene ou anuhun ma ou a-en hamon ta aliy.
1TI 4:7 Ou sa-en hamon ta kundruh tiri lau ta wasai ma hawe ou sa-en hamon ta sahou laleyah. Arile, ou abadok ou ta bolo manyah mwasin ta Kindrei.
1TI 4:8 I buku none ou amekes ndrayem kaseselek, mwasin; arile san ta Malawin Ndrabun badeh, mwasin labai ja ta ou sakaliye niliy. Tasah, idoh kameh sebenei manyah tam udu mwasin na len dah, ma hawe na len hamon kameh eme.
1TI 4:9 Idoh sahou handru, ya lau mari katehei budon handru ki ta aliy:
1TI 4:10 To asa-ar dah badeh, tasah to abudon boto-on in ta Kindrei. Ma iy ale ta aseben lau mari. Arile, ma hutuwen labai ki toro are atehei budon handru in tan. Tasah, iy badeh, ta ano bwe.
1TI 4:11 Ou batanau iri mwan ma badih ta sahou dah, ma leheya iri ka-en hamon ta aliy.
1TI 4:12 Lau badeh, satehei budon sandra-i anya ou ma loweu le, bwe. Arile, ou badeh, asahan i buku torowe mwasin ta mada lau, ta bolo sehek sahou tam, ma ta bolo tekedek tam. Ma ou ale asahan ta aseben lau mari hawe budon tam ki lewen. Ma hawe ou badeh, ki buku torowe handru ta mada lau ta san ta budon handru.
1TI 4:13 Ou atehei boto-on tam mari ki ta asehek sahou ta bolo tarou mari ki ndranye lau mari, ma ou leheya ma asehek sahou ta Kindrei, winiya jo le barasahan.
1TI 4:14 Ou saruwani nyosowan mwasin ta Malawin Ndrabun udu tam badeh. Idoh mene udu tam, ya iri propet asehek ma hawe iri lau ta bwena ta lahou ta Kindrei mene adeu boto-on na mine iri ewek la-um.
1TI 4:15 Ou atehei ou a bolo sahou doh, ma ou none lahou, eme iri lau kanyolom lahou doh udu ndra badam.
1TI 4:16 Balem ki tam kamwenen ma balem ki ta sahou ou leheya. Ou saruwaniy labai; tasah lakou ou amekes badeh, winiyan sebenei koha iri are anuhun sahou, ma winiyan sebenei ou ale.
1TI 5:1 Ou sabolosen sala tiri lau ndra alon, ndri-iy. Arile, ou atamas iri badeh, ki buku tamam amwenen. Ou atamas iri lau loweu badeh, ki buku none nadu tinem oro handru,
1TI 5:2 ya iri badih en badeh, ki buku tinem, ma hawe iri badih bihin ki buku none nadu tinem oro badih na kandriyen mwasin le.
1TI 5:3 Ou amekes kandriyen mwasin kili tiri badih nyau handru.
1TI 5:4 Arile, i buku none oro are badih nyau, nadu oro ma hawe nadu tubu oro udu aliy, badeh, oro ka-en hamon ta san ta Kindrei, ya katondrok oro badih nyau. Tasah, oro ma bwisik mene, oro awoyah ta anyo-ou oro; kandriyen doh badeh, mwasin ma amwenen ta mada Kindrei.
1TI 5:5 Are badih nyau ndramak ta atondrok iy bwe badeh, iy katehei budon ma boto-on tan na len mari kili le ta Kindrei ta seben.
1TI 5:6 Arile, are badih nyau iy amekes kandriyen ndra-in in hamon ta so-ok ta badan le, malawin mwasin tan badeh, ndramak mara-ei.
1TI 5:7 Katiye sahou batanau doh ki toro, ya lau sasehek oro, ndri-iy.
1TI 5:8 Arile, i buku none oro are batondrok lowan oro bwe, ma oro batondrok nadun ma udun oro bwe, badeh kameh iy sakalawi budon handru, ma iy badeh, ndra-in labai ja, ma kandriyen ndra-in tan badeh kameh sakalawi iri lau ala budon tiri ba-en hamon ta Kindrei ja ai.
1TI 5:9 Ado satorou nyara iri badih nyau ala jaha tiri udu baha ndro hanoh (60) badeh, sala hawe nyara iri badih nyau ala jaha tiri udu bada ndro hanoh (60) i loke. Tasah, iri badih nyau jaha tiri udu bada ndro hanoh (60) i loke badeh, badu hawe iri lau ta Kindrei labai, ya iri lau ta Kindrei atondrok iri labai. Ya iri badih nyau doh mene are ta mwan ari le.
1TI 5:10 Ma iri badeh, nyara iri bandra-i bwe, hawe iri badeh, mene ta leheya nadu iri ta kandriyen mwasin. Ya eme mesekei iri lau badu leheleh badeh, adah asiu. Ma iri badeh, mene badih ta leheya kandriyen mwasin, i buku none lohowan sikine kati iri lau ta Kindrei. Ya ma iri ale badeh, aseben iri lau ado ta maha-an, ma iri atehei ndrine iri badeh, i ta kandriyen mwasin.
1TI 5:11 Arile, iri badih nyau bihin badeh, sala bolo iri badih nyau bwena. Tasah, buku none budon tiri aseken ta anya ki tasou, iri kameh mani lahou ta Krais;
1TI 5:12 ma iri kameh are ta mada sahou, tasah iri mene mani tandrakan tiri hawe Krais.
1TI 5:13 Ma idah kameh, iri lolo-an a asiu ra-em ano asiu ra-em; ma laba tinan ta aliy handru badeh, iri kameh none kandriyen ta asehek lau ma sokolowa bolo lahou ta lau. Ma hawe iri asehek sahou laleyah.
1TI 5:14 Eme, jo abudon ta badih nyau bihin badeh, katasou ja kamekes nah ma katondrok oro. Kora-on iri lau ale budon tiri ndra-in udu ta to, sasehek to.
1TI 5:15 Tasah, iri badih nyau rayah badeh, ndra mine tama balik Satan ma ndra-en hamon tan.
1TI 5:16 Arile, ki buku none ari badih ta Kindrei ya ari badih nyau kudu hawen badeh, iy badeh, katondrok iy. Iy satehei maha doh sala la-u lau ta Kindrei. Eme ya iri lau ta Kindrei ja, bale iri ki tiri badih nyau rayah ja, ala iri lau ta atondrok iri bwe, ya iri katondrok iri.
1TI 5:17 Iri lau ta bwena ta lau ta Kindrei amekes lahou mwasin, kameh akohok sihine iri solo-an labai. Arile, i toro ala atiye sahou ma leheya sahou, kameh oro akohok ere bwele-en ja.
1TI 5:18 Tasah, sahou ta Kindrei tiye i buku doh, “Ou badeh, saseu boho oks buku none iy kamekes lahou tam ta katisih buwa wit,” ma hawe, “Ndramak ta lahou badeh, kakohok sihinen.”
1TI 5:19 Ya, i buku none ou anuhun sahou laleyah, iri kasehek tam, ta sahou ndra-in i bada iri lau ta bwena ta lau ta Kindrei badeh, ndranyem ki-iu ai. Ki buku none uru la-uh deh, oro taloh kasehek badeh, ou baranuhun ai.
1TI 5:20 I buku none oro are lau ta bwena ta lau ta Kindrei kamekes karei ma lomondra ndra-in badeh, ou asehek keme ndranye lau mari kanuhun. Eme ya iri lau mari kanuhun ma iri kanoh ta aliy, ya iri sa-en hamon ta aliy.
1TI 5:21 Udu mada Kindrei ma hawe udu mada Jises hawe iri angelo ndrabun badeh, jo tiye sahou boto-on dah i tam, ta ou badeh, a-en hamon ta sahou batanau dah. Ma ou abudon kamwenen, ou sala mwasin ta ndramak mwasin tam le, ndri-iy. Ou badeh, a mwasin ta ndramak ndra-in ale, i buku le ndramak mwasin tam. I buku none ou manyah anuhun sahou turu, ou areu le alih turu, ta aseben uru ari ari. Ma budon doh badeh, kudu bolo lahou tam mari ou amekes.
1TI 5:22 Ou badeh, sabotatahan ta adeu boto-on sala la-u are lau anya kateu lahou ta Laban ndri-iy. Ma ou sala bolo iri samekes lomondra ndra-in ma karei iri lau amekes. Ou atondrok ou amwenen.
1TI 5:23 Ou badeh, mene abo sik san solo-an, eme ya ou sa-un gwa laleyah, ou badeh, a-un sese waen ki hawen ta amekes ndrinem kudu mwasin.
1TI 5:24 Lomondra ndra-in ma karei ta lau mwan rayah badeh, bamai bwe; idah kameh ilih ilih bwena isos bada len ta sahou. Arile, lomondra ndra-in ma karei ta lau rayah kameh, udu hamon kameh barasahan barame lewan.
1TI 5:25 Idah kameh, i le buku none kandriyen mwasin kameh winiyan bamai bwe; ma hawe kandriyen aton kameh winiyan bamai bwe.
1TI 6:1 Budon tiri lohowan mari badeh, iri kamekes ki ta lau ta atondrok iri badeh, ki buku doh: Saba lahou ndramak ta atondrok iri katiye iri kamekes badeh, ndra iri kamekes le, tasah kandriyen doh badeh, mwasin. Ya, ki buku none iri katebelese, badeh kameh, iri lau kameh bobose nyara Kindrei, ma hawe leheya ta to ale.
1TI 6:2 Ya iri lohowan rayah tiri lau ta Kindrei badeh, sakohok budon anya, “Mwasin ai, ndramak ta Kindrei badeh, nadu tine to labai.” Ndri-iy, ado sakohok iri budon doh; budon doh badeh, bamwenen bwe. Arile, oro lohowan kakohok doh: “Bwe, ndramak ta lau ta Kindrei ta to doh badeh, ndramak ta Kindrei labai, eme ma to kaseken iy. Ma hawe to kamekes lahou boto-on ja ta aseben iy.”
1TI 6:3 Eme ya ou badeh, leheya ma tiye sahou dah ta aliu oro: I buku none oro are lau leheya tanan randra labai; bala buku none sahou handru ta Laban Jises Krais bwe, ma hawe bala buku none sahou handru ta lau ta Kindrei, aso leheya dah bwe; badeh kameh, iy ndra ari ai, arile iy tanan lakou bwe. Ma iy doh badeh, tanan sahou bwe, ma iy ta asoh sahou, ma ta aburoh sahou. Ya idoh kameh tiyani madalakis, losen ta lakou, ma hawe sondrokonya, ma amekes budon laleyah,
1TI 6:5 ma hawe andra-i kameh asahan tiri lau, budon tiri bado mwasin bwe, idah kameh amekes andra-i udu le buku doh. Eme ma, sahou handru badeh bado toro bwe. Eme oro anya kandriyen ta an hamon ta Kindrei badeh kameh amekes oro akohok lakou solo-an.
1TI 6:6 Arile, a-en hamon ta Kindrei badeh, bamekes ou akohok lakou solo-an bwe. I buku none ou tam lakou solo-an, o lakou solo-an bwe oh, badeh ou sekesek ta aliy le ai. Ya sekesek tam doh kameh sakalawiy, ou tam lakou solo-an ja.
1TI 6:7 Taha tanan, tine taha edeu taha ame len bolo kon munyak badeh, taha bakohok ari lakou bame hawe taha, bwe. Ya, buku taha amak, taha winiyan bakohok ari lakou badu munyak bala hawe taha bwe le.
1TI 6:8 Eme ya, i buku none tato kolau, ma hawe nato nyamon udu aliy, badeh, winiya to ka-i ai.
1TI 6:9 Arile, i buku none iri lau anya ka-en hamon tiri lau lakou tiri solo-an, ya kasahan i buku iri. Badeh kameh, iri taku ma arah are bolo kandriyen ta madalakis, ma iri kameh bale iri bwe, ma hawe amekes nono-ou laleyah ta aliu iri le, ma iri taku andra-i handru.
1TI 6:10 Tasah, kandriyen ta ou aseken luk solo-an badeh, kati kandriyen ndra-in mari. Ya lau rayah ala labai ta aseken lakou solo-an, eme aluwi iri ame len labai ta budon handru. Eme ya oro le badeh, amekes bohosak i toro amwenen.
1TI 6:11 Arile, ou ndramak ta Kindrei badeh, teleya lakou doh. Ou badeh, asa-ar ta amekes kandriyen ta ou asahan mwasin ta mada Kindrei. I buku none ou abadok ta kandriyen mwasin ta Kindrei, i buku none kandriyen ta budon handru le, ya, i buku none kandriyen ta ou ales boto-on, ya kandriyen ta tikisiy ma hawe kandriyen ta ou bato-ou ta losen suwi bwe,
1TI 6:12 ou badeh, abadok ta sakaliye ta budon handru. Ma ou anyolom ki bwena ta koham handru ta winiyan bamak bwe. Ma koham handru doh mene Kindrei ndratehei ndrawek tam; na len iy aloh ou ame len, asehek budon tam handru i ndranye lau mari anuhun.
1TI 6:13 Ou amekes iri lakou doh udu mada Kindrei anyolom. Tasah, iy le ari badeh, edeu mulin i ta lakou mari. Ma ou amekes iri lakou doh kudu mada Jises Krais, i buku none iy mene ale ales udu mada Pontiyus Pailat tiye sahou ta budon handru;
1TI 6:14 Ya udu mada Kindrei hawe Jises jo tiye batanau i buku doh, “Ou tawi batanau dah kihis, winiya le Krais barasahan, bwe kameh lau kabobose ou.
1TI 6:15 Ya iy kameh asahan na len Kindrei le tanan, eme ya masiye ma tudun ki tan, tasah iy le ari badeh, atondrok, ma iy le ari badeh, kabin tiri kabin mari ma hawe iy le ari badeh, Laban sakalau Laban mari.
1TI 6:16 Ya iy le ari badeh, ta udu le buku doh, ma iy badeh, manyah udu lomadan labai, winiya ari lau winiyan bala mirihik tan bwe. Udu ndra bwena, eme taku dah, ari lau banyolom iy bwe, ma ari ndramak winiyan batou iy bwe le. Eme ya masiye ma tudun ki tan hawe boto-on ki tan, tasah iy badeh, winiyan ta ano bwe, ma iy badeh, ta udu le buku doh. Handru!”
1TI 6:17 Ou batanau oro lau ala lakou toro solo-an, ta oro satudun oro ma hawe oro satehei budon toro boto-on sa-en ta lakou solo-an toro, tasah lakou doh, winiyan bado luwen bwe. Arile, oro katehei budon toro kabadok ta Kindrei. Tasah, iy badeh, lakou tan solo-an labai, ya idah kameh iy edeu eme tato kasekesek ta aliy.
1TI 6:18 Ou batanau oro ta oro badeh, kadih na kandriyen mwasin hawe kandriyen ta anyohan lakou i tiri lau ari ari.
1TI 6:19 Ya, ki buku none oro kamekes kandriyen doh, idah kameh, oro atukum toro le lakou mwasin labai, ta udu le buku doh na len hamon kameh eme. Ya idah kameh, oro winiyan kuhi koha oro handru.
1TI 6:20 Eme ya Timoti, ou tawi lahou udu kanim badeh, kamwenen labai. Ma ou teleya ou, ta tanan ta wasai ala iri aloh anya, “Tanan handru.” Arile bwe. Badeh bamwenen ta sahou ta kindrei bwe, badeh.
1TI 6:21 Ya iri lau rayah badeh, ndra bolo tanan doh, ma iri ndrala len labai ta budon handru.
2TI 1:1 Jo Pol, jo aposel ta Krais Jises. Tasah, Kindrei mene ndratiye, iy anya kedeu kohan handru keme tataha mwan ma badih na gok Jises Krais amekes. Eme ma, iy atehei jo asahan aposel tan ta atiye sahou mwasin doh.
2TI 1:2 Timoti, ou badeh, buku naduk handru, ta lakou ta Kindrei, eme ma, jo atorou la-ukei ramen ja dah ewek tam. Jo aso-ok tama taha Kindrei hawe Laban tataha Krais Jises, uru mala-uh katikisi ou ma katondrokei ou, ma kabwidi ou ado mwasin.
2TI 1:3 Bwena mene, tubu oro badeh, a-en hamon ta kandriyen ta Kindrei ma atudun nyaran. Eme ma, jo ale ki-in hamon tan ta ndrinek, jo atona kandriyen jo in hamon ta aliy doh ta amekes gok tan, idoh amwenen handru. Na len dah badeh, jo abudon ou, ma jo edeu wurah i ta Kindrei, tasah ou badeh, atehei budon tam handru in tan, ma ou a-en hamon ta kandriyen tan.
2TI 1:4 Jo asolom ili ta Kindrei badeh, jo abudon ale ta len mene jo ruwani ou, ma wa-i madam mene iroh en. Eme ma, jo anya kanyolom ou ja, ma jo kameh sekesek labai.
2TI 1:5 Jo edeu wurah i ta Kindrei ale, eme ma, jo bwetenei budon tam, tasah iy budon handru, iy ta wendreya bwe. Iri budon buku doh, ma bwena udu ta bu-um Lowis, ma hamon ja udu ta tinem Yunis. Ma jo i tanan amwenen, budon doh ere tam ale.
2TI 1:6 Budon doh ere tam handru, eme jo anya katadau budon tam kabadok ta ndramas ta Kindrei nane udu hawem badeh. Ou akohok ndramas doh badeh, kabatana jo asolom ou ma edeu minek udu bwele-em. Eme ma jo aso-ok ou amekes ndramas badeh, kamwenen i buku ndramak asumwe jih ma anya i tinan.
2TI 1:7 Ou tutuni ndramas badeh, ma ou amekes gok Kindrei ndratiye ndrawek tam. Tasah, Malawin Ndrabun, Kindrei atehei eme tataha doh, iy winiyan babwidi taha banoh bwe. Iy badeh, ndranyuhi taha marakon na boto-on tan ta amekes gok tan, ma taha winiyan tikisi iri lau mari, ma taha winiyan atondrok ndrine taha amwenen.
2TI 1:8 Eme ma, bwilim sama ta atiye sahou mwasin ta Laban tataha. Jo kada-ah udu bolo asiu lulik, tasah jo atiye sahou mwasin ta Laban. Eme ma, bwilim sama jo. Ou andrei boto-on ta Kindrei, ma ou alokou ou ta bwese maha randrah le, buku jo bwese maha-an ta bolo gok tek ta atiye sahou mwasin.
2TI 1:9 Kindrei luhi taha, ma iy andrei taha ndrame hamon, ma tondrohon taha asahan lau tan amwenen. Iy babudon ta kandriyen mwasin taha amekes, ma iy akohok taha ame hamon ma tondrohon taha asahan lau tan, bwe. Iy le amwenen abudon ta amekes lakou doh. Ndra bwena handru Kindrei babwidi munyak bwe le, iy abudon ta gok Jises anya kamekes, ma ta doh le iy badeh, tikisi taha, ma iy tondrohon taha ta asahan lau tan.
2TI 1:10 Arile, na len nane kada-ah, Krais Jises iy ndramak ta akohok taha ame hamon badeh, ndrasahan ndrame lewan. Ma ta gok doh badeh, iy amekes tataha, tikisiy ta Kindrei badeh, ndrasahan ndrame lewan mara-ei. Krais Jises mene apwai boto-on ta imek, tasah taha amak badeh, malawi taha bandra-i bwe. Buku taha anuhun sahou tan mwasin ma atehei budon in ta aliy, taha kameh winiyan akohok kohan handru ta udu le buku doh, ma bada taha winiyan bandra-i bwe.
2TI 1:11 Kindrei ndratondrohani jo asahan aposel ma ndramak ta leheya. Tasah, iy aso-ok jo kamekes gok ta atiye sahou mwasin dah.
2TI 1:12 Eme ma, jo bwese maha-an doh, ma jo eme udu bolo asiu lulik kada-ah. Arile, bwilik bama ta udu bolo asiu lulik ma bwese maha-an kada-ah, bwe. Tasah, jo ndratanan Krais Jises, ma jo atehei budon tek handru in tan. Ma jo tanan, iy winiyan tondrokei gok ta atiye sahou tan dah udu mwasin, iy ndratehei ndrame minek, ma gok doh kameh udu mwasin mara-ei ili winiyan le len iy eme hamon ja.
2TI 1:13 Ou a-en hamon ta sahou, ou mene ndranuhun badu bohok. Sahou doh kameh leheya kandriyen ta ou a-en hamon ta aliy, ma ou leheya ki tiri mwan ma badih. Na len ou atiye sahou dah, ou atehei budon tam kabadok kili ta Jises Krais, ma ou aso-ok iri mwan ma badih.
2TI 1:14 Ou atondrok sahou mwasin doh kamwenen, Kindrei mene ndratehei ndrawek minem. Malawin Ndrabun ta Kindrei doh, iy udu bolo taha, iy kameh aseben ou ta atondrok lakou badeh.
2TI 1:15 Sebwe ou ndratanam, mirihik iri mwan ma badih marakon ta Kindrei badu kon tinan Esiya, iri badeh, ndraruwani jo. Pigelus hawe Hermogenes ale ndraruwani jo.
2TI 1:16 Arile, jo aso-ok Kindrei katikisi Onesiporus ma hawe lowan oro, tasah Onesiporus badeh, bwidi ndrinek sekesek san solo-an labai. Ma bwilin bama jo bwe, kala jo udu bolo asiu lulik dah.
2TI 1:17 Arile, na len iy isos Rom, iy asa-ar labai ta asilah jo winiya le iy baranyolom jo.
2TI 1:18 Ou ale ndratanam mwasin labai ta iri seben Onesiporus mene anyohan jo, kala jo udu kon Epesus. Eme ma, jo aso-ok Kindrei katikisi iy ta len doh kameh, iy atehei iri mwan ma badih a ta mada sahou.
2TI 2:1 Ya, Timoti, ou badeh, buku naduk, ta lahou ta Kindrei. Len marakon ou ahas hawe Krais Jises, ma ou ales boto-on na le tikisiy tan eme tataha.
2TI 2:2 Ya, iri sahou marakon ou ndranuhun jo ndrasehek udu bolo iri lau, idoh ou andrei, ma ou asehek kili tiri lau rayah ja, iri katondrok kamwenen, ma iri winiyan leheya iri lau rayah ja ale.
2TI 2:3 Ou ales boto-on are hawek, ma bwese maha-an, buku ndramak ta bahun ta Krais Jises, iy ales boto-on labai.
2TI 2:4 Handru, ou asahan buku ndramak ta bahun. Ndramak ta bahun aso-ok tinan tan udu bwele-en kasekesek ta gok iy amekes, ya iy winiyan bateu gok rayah hawe gok tan ja bwe. Eme ma, ou a-en hamon le ta gok Kindrei ndratehei ndrawek tam, ma ou salelei sala le tiri lakou anya kariu ou.
2TI 2:5 Ou asahan ale buku ndramak iy sakaliye ta nyorei. Ndramak sakaliye ta nyorei, iy badeh, ki-in hamon le ta sahou batanau ta nyorei. Buku bwe, iy winiyan bakohok ndramas doh bwe. Eme ma, ou atondrok koham kamwenen, ma ou a-en hamon le ta gok nane Laban ndratehei ndrawek minem, ma hamon kameh iy edeu ndramas ewek tam.
2TI 2:6 Ou asahan ale buku ndramak atah bilin. Iy asa-ar labai ta atah ma ta atondrok bilin, ma iy amwenen badeh, akohok nyamon ere bwena tiri lau rayah. Eme ma, buku ou amekes gok laba tinan ta Laban Krais Jises, iy kameh edeu lakou mwasin ewek tam.
2TI 2:7 Ou abudon kamwenen ta sahou jo asehek dah. Tasah, buku ou amekes i buku doh, Laban kameh bwidi budon tam mara-ei aleu, ma ou kameh atanam moso iri sahou marakon dah.
2TI 2:8 Len marakon jo aso-ok ou bwetenei gok ta Jises Krais mene amekes, ma idoh winiyan aseben ou ales boto-on, ma bwese iri maha-an. Jises badeh, badu boho kamen hawe kabin Debit, ma iy banoh ta bwese iri maha-an bwe. Iy mene imek, ano Kindrei mete-ei iy eme awas ja. Iri sahou mwasin dah, jo ndrasehek ndrala tiri lau.
2TI 2:9 Ou bwetenei jo ale, ta ales boto-on ma bwese iri maha-an. Jo ndratiye sahou mwasin, eme ma, ta kandriyen le doh iri lau abudon anya jo ndramak ndra-in, ma iri atehei jo ili bolo asiu lulik. Arile, sahou ta Kindrei winiyan bala bado bolo asiu lulik barah bare gwek bwe.
2TI 2:10 Eme ma jo sekesek ta ato-ou iri maha-an mari ale asahan tek. Jo bwese iri maha-an ta aseben iri mwan ma badih marakon Kindrei ndrandromwei iri ndrala tan, ma jo anya, iri kameh kakohok kohan handru ta Jises Krais doh, ma iy kameh winiyan andrei iri ala ado hawen are kandrah ta are le buku doh.
2TI 2:11 Taha kales boto-on ta bwese iri maha-an, tasah sahou dah handru, ma iy asehek i buku doh: “Buku taha amak hawe Krais, taha kameh ado awas hawen ale.
2TI 2:12 Buku taha ales boto-on ta bwese maha-an marakon, taha kameh asahan kabin tiri mwan ma badih are hawen. Buku taha adeu kona taha ili tan, iy kameh edeu konan eme tataha ale.
2TI 2:13 Buku taha anya, taha ka-en hamon tan, arile taha ba-en hamon ta sahou tataha amwenen bwe, ndri-iy ai, iy ki-in hamon ta sahou tan le amwenen, ma iy kameh atehei taha a ta mada sahou. Tasah, iy winiyan batubuni sahou tan amwenen bwe-en!”
2TI 2:14 Len marakon, ou aliu budon tiri lau ta leheya sahou dah, jo mene edeu ndrawek tam. Ma ou asehek boto-on kili tiri ta mada Kindrei ki buku doh: Iri satebelese sala ta sahou batanau. Kandriyen ta sahou tebelese doh kameh winiyan baseben ari ndramak ta in hamon ta Kindrei bwe. Kandriyen doh, ta sokolowa budon tiri lau le ta anuhun sahou solo-an doh.
2TI 2:15 Ou abo gok boto-on handru ta asahan lohowan mwasin ta mada Kindrei, eme ma iy winiyan aso-ok gok tam. Buku ou asahan lohowan mwasin, bwilin winiyan bama ta gok tan bwe, tasah Kindrei anyolom ou, ma ou atiye sahou tan amwenen handru.
2TI 2:16 Bohom sala tiri sahou ndra-in, ari moson bwe. Tasah, iri sahou doh, iri lau amekes ta ariu lau a sola ala le san ta adeu kona iri ili ta Kindrei.
2TI 2:17 Sahou ndra-in tiri doh, i buku ndrana laba tinan ndra-in, iy aimon bada ndramak bilisiu ili ili ma andra-i mara-ei. Himeneyus uru Piletus badeh, badu bolo iri adeh, ta amekes sahou ndra-in doh.
2TI 2:18 Iri lau buku doh badeh, bado se mirihik bwai, ma iri teleya sahou handru. Iri asehek sahou i buku doh: “Kindrei badeh, ndramete-ei iri lau tan ja, ma taha an hamon kada-ah winiyan bamak bame awas ja bwe.” Eme ma, na sahou le doh, iri ndraruwiy ma ndrabolowani budon tiri mwan ma badih rayah handru.
2TI 2:19 Arile, sahou ta Kindrei kameh asahan buku iy mene ndratiye. Iri lau a-en hamon ta Kindrei, iri kameh a buku ndru, Kindrei ndratahiy, ma ales udu le ta atah asiu ili bwele-en. Ma udu ta ndru doh badeh, Kindrei torowenei sahou randra i buku doh: “Laban badeh, ndratanan iri mwan ma badih tan.” Ya, “Are lau anya, iri ta Kindrei ma Kindrei atondrok iri, ya iri katehei kona iri kili ta kandriyen bamwenen bwe.”
2TI 2:20 Bolo iri asiu tinan badeh, bwekei solo-an solo-an udu aliy. Rayah iri amekes na bek nyikilikin ma silba, ma rayah ja iri amekes na kei ma ndren. Iri bwekei, nane amekes na bek nyikilikin ma silba, iri ta gok tinan le buku molak, tasou ha-un, kabek ma tukum ta nyamon tinan. Arile, bwekei iri amekes na kei ma ndren, badeh, ta amekes nyamon ili aliy ta gok nadu bwisik laleyah ta len marakon.
2TI 2:21 Eme ma, iri lau akahei kandriyen ndra-in udu ndrine iri eme len, ma asahan ha-un ja, iri lau doh badeh, buku bwekei iri amekes na bek nyikilikin ma silba, iri lau amekes nyamon i bolon ta gok mwasin ta molak le. Kindrei winiyan akohok iri lau rayah doh, ma iri winiyan amekes gok mwasin. Handru, iri alokou ta amekes iri gok rayah mwasin.
2TI 2:22 Ya, Timoti, buku ou anya asahan buku bwekei mwasin don eh, idoh badeh, ou atobwak a len labai ta iri kandriyen ta ndrine iri lau loweu aso-ok. Ma ou abo gok boto-on in le hamon ta kandriyen mwasin ma amwenen, ma hawe budon mwasin ta Kindrei, kandriyen ta aso-ok iri mwan ma badih rayah ja, kandriyen ta ndrine taha kudu mwasin. Ma ou amekes iri kandriyen doh, hawe iri mwan ma badih, ndrine iri ndraleu mara-ei, ma iri asolom ili ta Kindrei kaseben iri ka-en hamon tan le amwenen.
2TI 2:23 Ma ou adeu konam kili tiri sahou ari katin ma moson bwe. Tasah, ou tanam iri sahou doh badeh, ta amekes kandriyen ta tebelese asahan.
2TI 2:24 Arile, are lau handru amekes gok ta Laban, iy badeh, sasahan ndramak ta tebelese hawe iri lau rayah ja. Iy badeh, kamekes kandriyen mwasin kili tiri lau. Iy ale kasahan ndramak ta leheya, ma iy samekes bundruwe losen sala tiri lau, ma iy kasahan ndramak ta udu le udu.
2TI 2:25 Ma iy kaleheya iri lau nane amekes ndra-in ili tan, ma iy ale kamekes kamunum le ta amekes budon tiri lau nane tebelese hawen. Iy kamekes ki buku doh, tasah Kindrei kameh aseben iri, ma iri kameh winiyan tubuni ndrine iri, ma iri kameh winiyan atanan ta sahou handru, ma iri winiyan a-en hamon tan.
2TI 2:26 Ma iri ale kamani iri kandriyen tiri i buku kubwin ta balik amekes ta aturuk ma amekes iri i ndra-in mara-ei. Balik badeh, ta atamar iri lau ta ka-en hamon ta so-ok tan. Arile, buku iri ndratanan sahou handru, budon tiri kameh winiyan aleu amwenen ja, ma iri kameh winiyan ruwani kubwin ta balik.
2TI 3:1 Ou atanam ta lakou doh: Len badeh, ndra mirihik ta Jises kameh eme hamon, iri lau ndra-in kameh amekes maha-an solo-an asahan, ma amekes i ndra-in mara-ei ja ili tiri mwan ma badih anya ka-en hamon ta kandriyen mwasin.
2TI 3:2 Idah kameh i ndra-in mara-ei, tasah iri lau ndra-in kameh aso-ok iri le amwenen. Ma iri aso-ok luk tinan ale. Iri kameh atudun nyara iri le amwenen, ma iri kameh aluhe iri lau, ma bobose Kindrei. Iri ale kameh tebelese sahou ta tama hawe tine iri amwenen, ma iri tanan sekesek bwe, ma badeu wurah bwe, ma iri winiyan babudon ari lakou laba tinan bwe.
2TI 3:3 Iri ale kameh winiyan bamekes kawas hawe iri lau rayah ja bwe. Ma iri winiyan batehei ndrine iri bamunum bala hawe ari ndramak bwe. Iri kameh andra-i, udu le buku doh! Iri kameh asehek lau laleyah, ma iri winiyan batondrok ndrine iri ma bada iri bamwenen bwe. Iri kameh amekes ndra-in i tiri lau laleyah, ma iri ateu kaliu ta kandriyen mwasin.
2TI 3:4 Iri kameh atehei iri kawas tiri ili mine iri lau ndra-in ta bahun, ma a-en hamon ta budon tiri ndra-in. Iri kameh abudon iri le, ma iri aso-ok, ta amekes bada iri kasekesek, ma iri baso-ok Kindrei bwe.
2TI 3:5 Iri kameh atukum ta salom hawe iri mwan ma badih, ma tiye iri ka-en hamon ta budon tiri lau ta Kindrei. Arile, ta ndrine iri, iri adeu kona iri ili ta kandriyen ta Kindrei nane tubuni koha iri mwan ma badih. Handru, ou are ndra len labai tiri lau doh!
2TI 3:6 Tasah, rayah ado ndrokowa iri atamar iri mwasin labai, ma ala bolo asiu tiri lau, ma iri wasai iri badih budon mwasin bwe, ma iri badih kede-eh atehei budon in ta sahou tiri. Iri badih buku doh, kandriyen ndra-in tiri badeh, solo-an labai. Ma ndrine iri maha-an labai ta kandriyen iri a-en hamon ta aliy, ma aruwi iri sandroh ala ame.
2TI 3:7 Iri a-en hamon ta sahou solo-an, arile iri winiyan ba-en hamon ta sahou handru bwe.
2TI 3:8 Iri lau ta leheya wasai badeh, a buku le Janes hawe Jambres bwena mene. Uru badeh, ta tebelese sahou handru Moses mene asehek. Ya, iri lau ta leheya wasai doh a buku le aliy. Iri abudon, arile, ta lakou rayah ndra-in le, ma Kindrei atehei konan ili tiri, tasah iri batehei budon tiri ba-en ta sahou handru bwe.
2TI 3:9 Arile, kandriyen tiri ta atamar lau ka-en hamon tiri, winiyan basahan tinan bwe. Tasah, iri mwan ma badih kameh atanan kandriyen lolo-ou iri amekes, ma idah kameh iri adeu kona iri, i buku iri mwan ma badih mene badu Ijip anyolom kandriyen ta Janes uru Jambres, ma bar tiri aleu handru ta kandriyen lolo-ou turu.
2TI 3:10 Arile, Timoti, ou badeh, basahan buku iri lau ta leheya wasai bwe. Ou mene are hawek, ma ou ndratanam iri sahou marakon jo leheya, ma ou tanam iri tekedek tek. Ma ou tanam ndrinek, jo atehei budon tek mara-ei in ta Kindrei, ma jo atadau ndrinek, ma ales boto-on ta lakou ndra-in asahan tek. Ma ndrinek ale winiyan barih suwi bala tiri lau bwe. Jo aso-ok iri labai.
2TI 3:11 Ou ndratanam ale ta iri kandriyen iri lau amekes eme tek, ma ta iri sisi-in ndra-in handru jo akohok udu kon Antiyok, Aikoniyam ma Listra. Ou ndratanam iri maha-an solo-an iri adeu eme bwele-ek, arile jo bwese-ei. Laban ndratalawei maha-an marakon udu bwele-ek doh ndra-au ndrala len, ma jo udu mwasin ja.
2TI 3:12 Ehe, sahou dah handru. Iri lau marakon anya kahis hawe Krais Jises, ma ka-en hamon ta kandriyen ta Kindrei, idah kameh iri lau ta adi lau laleyah amekes ndra-in ili tiri.
2TI 3:13 Ma iri lau ndra-in ale kameh amekes kandriyen ndra-in mara-ei ja. Eme ma iri lau ta wasai kameh wendreya iri lau. Balik ale kameh wendreya iri lau ta wasai doh, ma kandriyen tiri kameh asahan ndra-in mara-ei ja.
2TI 3:14 Arile, Timoti, ou tawiy kihis sahou mene ou ndrandrei, ma ou atehei budon tam ki-in aliy. Tasah, ou ndratanam ta ahi lau mene leheya ou. Ahi leheya ou amwenen ta sahou dah.
2TI 3:15 Eme ma, ou ale tanam lakou doh: Ou mene ma nadu nah bwisik kahis, tinem mene leheya ou, ma ou akohok tanan ma bwena ta buk ndrabun. Ou tanam, buk ndrabun dah winiyan ta edeu budon mwasin ewek tam, ma Kindrei kameh andrei ou ame hamon. Tasah, ou atehei budon tam mara-ei in ta Krais Jises.
2TI 3:16 Malawin Mwasin ta Kindrei atehei budon ili tiri lau, ma iri torowenei sahou tan ili bolo buk ndrabun. Eme ma, iri tarou marakon udu bolo buk dah, iri mwasin, ma iri adeu tanan eme tataha ta sahou handru. Ma iri leheya taha ta kandriyen ndra-in tataha, ma lowosa tekedek tataha kamwenen, ma leheya taha ta kandriyen mwasin ma amwenen.
2TI 3:17 Na san doh, Kindrei lowosani iri lohowan tan, kamekes iri gok mwasin.
2TI 4:1 Krais Jises kameh eme hamon ja, ma iy asahan kabin ta atondrok iri mwan ma badih marakon. Ma iy ale kameh aleben iri lau are ndra awas ma iri lau ndramak bwena. Jo abudon ta aliy, ma Kindrei hawe Krais Jises, uru anyolom jo, eme ma jo tiye sahou boto-on ewek tam i buku doh:
2TI 4:2 Ou atiye sahou ta Kindrei. Ya, ou abudon ta lakou doh kameh asahan, ma ou atiye sahou ta Kindrei kili. Buku iri lau alokou iri ta anuhun sahou, o, iri balokou iri bwe, ndri-iy ai. Len marakon ou abadok ta atiye sahou tan kili. Sahou tam badeh, korou ndrine iri ta asor iri ta tobolowe ndrine iri, ma karuwe kandriyen ndra-in. Ou suruni ndrine iri ta a-en hamon ta kandriyen ta Kindrei. Ou leheya iri ki buku doh, arile ou winiyan bandra-i hawe iri bwe. Ou abo gok le, ta leheya iri.
2TI 4:3 Ou amekes ki buku doh, tasah hamon kameh iri lau winiyan baso-ok ta anuhun sahou mwasin bwe. Iri kameh a-en hamon ta so-ok tiri le amwenen, ma amekes kandriyen ndra-in. Eme ma, iri kameh akohok lau ta leheya solo-an labai, ma lau ta leheya doh kameh leheya iri mwan ma badih, ta lakou iri abasa labai ta anuhun.
2TI 4:4 Ma, iri kameh adeu kona iri ili ta sahou handru, ma iri adeu ndranye iri ili ta anuhun iri kundruh laleyah.
2TI 4:5 Arile, ou le amwenen winiyan bamekes buku doh bwe. Ou atondrok budon tam kamwenen na len mari, ma ou abadok ta bwese iri maha-an anya kewek bwele-em. Ou badeh, lohowan ta Kindrei, eme ma ou atiye sahou mwasin tan kili tiri mwan ma badih, ma ou amekes gok tam handru ta aseben iri lau.
2TI 4:6 Ya, ou a-en hamon tiri lakou mene jo ndrasehek tam, tasah len tek ta imek badeh, ndrame mirihik labai. Ma ndrayek kameh amou i buku waen, iri lau ale adeu i ta Kindrei i nyara salom.
2TI 4:7 Jo badeh, akeh lim mwasin labai, ma jo ndrabwidi nyorei doh badeh, ndrano mara-ei. Jo badeh, tawi budon mara-ei doh ihis labai.
2TI 4:8 Ya, ndramas ari udu aliy abe-en jo. Ndramas doh i buku barak ari ta kandriyen mwasin labai jo ndramekes ta bolo nyorei. Laban badeh, anuhun sahou ta lau amwenen labai, ma udu ta len ta sahou, iy kameh edeu barak doh eme tek, ma i tare lau ja nane atehei budon tiri in ta anyolom iy eme hamon ja.
2TI 4:9 Ou asilah san tam, ta ame hawek suwi.
2TI 4:10 Demas badeh, atehei budon tan in tiri lakou mara-ei badu munyak, iy ndraruwani jo, ma iy ndra-au ndrala Tesalonaika. Ya Kresens badeh, ndra-au ndrala Galesiya. Ya Taitus ndrala Dalmesiya.
2TI 4:11 Luk le ari badeh, udu hawek kada-ah. Buku ou anya ame, ou andrei Mak, ah ma la-uh kame, tasah iy mwasin ta aseben jo ta gok tek dah.
2TI 4:12 Jo suni Tikikus ndrala Epesus.
2TI 4:13 Buku ou anya ame, ou andrei awin tek lawe-en mene jo ruwaniy udu hawe Kapus udu ndra Trowas. Ma balem samani iri buk tek, ma hawe iri buk tek rayah ale iri amekes na ku-i katin haka.
2TI 4:14 Balem kudu ta Aleksandra, iy ndramak ta amekes lakou i hayen, tasah iy mene amekes ndra-in solo-an labai eme tek. Laban kameh konohei iy, ta saba lakou iy amekes.
2TI 4:15 Eme, balem kudu tam ta ndramak doh. Tasah, iy mene ndratebelese boto-on labai hawe aso ta sahou ta Laban taha atiye.
2TI 4:16 Ma bwena handru jo ales udu ta sahou, ma asumon boho ndramak ta anuhun sahou badeh, ari ndramak bales bare hawek, ma aseben jo ta asumon sahou bwe-en! Iri lau marakon anoh, ma iri ruwani jo. Jo asalom ili ta Kindrei ta iy sabudon ta ndra-in iri amekes eme tek doh.
2TI 4:17 Arile, Laban ndrame ndrales ndrare hawek, ma iy atadau jo. Eme ma, jo mene winiyan atiye iri sahou mwasin marakon, ma iri lau badu leheleh marakon winiyan anuhun. Ma Kindrei mene aseben jo, ma iy andrei jo eme len ta sahou laba tinan doh. I buku iy ndraruwi jo ndrame len ta lihi layon.
2TI 4:18 Eme ma, jo tanan Kindrei kameh tolowei jo ta iri lakou marakon ndra-in iri lau dah anya kamekes keme tek, ma iy kameh andrei jo ili bolo tondrok tan udu kandrah. Ya, taha badeh, katudun nyaran kudu le buku doh. Handru!
2TI 4:19 Ou tiyani bada-an tek kili ta Prisila uru Akwila, ma kili ta lowa Onesiporus oro.
2TI 4:20 Erastus badeh, ere ndra Korin kahis. Ya, Tropimus badeh, sik udu tan, ma jo ruwani iy udu ndra Miletus.
2TI 4:21 Eme ma, jo aso-ok ou asilah san suwi ta ame. Kora-on len ta ur ma jor laba tinan kasahan. Yubulus, Pudens, Linus, Klodiya, ma iri lau ta Kindrei are kada-ah badeh, anya bada-an tiri mwasin ewek tam.
2TI 4:22 Jo asolom ili ta Laban iy winiyan udu hawe malawim, ma aseben ou. Ma tikisiy ta Kindrei winiyan udu hawe aha lau ta Kindrei mari.
TIT 1:1 La-ukei dah badeh, jo Pol atorou. Jo badeh, Kindrei le tiye jo asahan lohowan tan, ma tiye jo asahan aposel tan ta atiye sahou badu boho Jises Krais. Kindrei amekes doh badeh, ta jo kaleheya oro lau tan badeh, katehei budon toro handru ki-in hamon ta budon handru. Ma hawe jo kaleheya oro kaleu handru ta tanan ta Kindrei. Ya eme na tanan handru ta Kindrei doh badeh, winiyan leheya oro ta manyah mwasin i buku seken ta Kindrei.
TIT 1:2 Eme ya, ta tanan handru doh badeh, oro winiyan atanan oro udu mwasin ta koha oro winiyan ta bano bwe. Ma oro winiyan atanan udu mwasin labai ta Kindrei badeh, ndramak ta wasai bwe. Eme ya udu ndra bada katin, ta lakou mari basahan bwe le badeh, Kindrei tandrakan iri lau tan kameh winiyan bamak bwe. Iri kameh ado hawen udu le buku doh.
TIT 1:3 Ano na len ta aliy asahan badeh, Kindrei, ndramak ta aseben taha atehei sahou dah eme kanik. Ma na le sahou jo tiye doh badeh, mesekei budon tiri lau mari aleu ta nyala Krais.
TIT 1:4 Eme ya la-ukei dah badeh, jo atorou ewek tam, Taitus, tasah ou badeh, i buku naduk handru. Ou badeh, budon tam handru badeh, i le buku tek. Eme ya tikisiy ma mondrei ta tama taha Kindrei hawe Krais Jises ndramak ta aseben taha, kudu hawem.
TIT 1:5 Katin ta jo anya, ou ado busu Krit ado gwek sese badeh, ta ou badeh mesekei lahou doh kano, ma kabadok, ta aliu budon toro kamwenen ja. Eme ya ou leheya iri lau rayah badeh, ma ou adeu iri kasahan batun ta atondrok iri lau ta Kindrei badu kon ari ari. I buku none jo mene ndrasehek tam ndra-au.
TIT 1:6 Ndramak ta batun badeh, nyaran ki mwasin labai, ma iy badeh, udun ari le. Ma hawe nadun oro badeh, ka nah ta budon handru, ma oro sala nah ta tebelese ta amekes lakou laleyah. Arile, oro badeh, ki nah ta anuhun boho tama oro.
TIT 1:7 Eme ya, ndramak ta atondrok iri lau ta Kindrei, hawe ta ateu lahou ta Kindrei badeh, kandriyen tan kudu mwasin, ta iri lau badeh sasehek iy. Ma iy badeh, sabudon anya, iy ndra ari ai. Ma iy badeh, sala ndramak ta ndrinen ato-ou suwi ta losen, ma hawe iy badeh, sala ndramak ta a-un gwa boto-on solo-an. Ma hawe iy sala ndramak ta akeh lim suwi, ma hawe iy sala ndramak ta ndrakok.
TIT 1:8 Arile, iy badeh, ki ndramak ta asumon lau mari kame asiu tan, ma aseken ta aseben lau. Ma iy badeh, ki ndramak ta budon ta amekes lakou kamwenen le. Ma iy ale ki ndramak ta amekes kandriyen mwasin i tiri lau ari ari. Ma hawe iy badeh, ki ndramak ta atehei iy mari i mine Kindrei, ma iy ki ndramak ta winiyan atondrok iy udu mwasin ta kandriyen ndra-in.
TIT 1:9 Iy katawi budon tan handru kihis ta sahou ta Kindrei mene ndratiye, eme iri winiyan anuhun, ma winiyan atehei budon handru tiri i ta aliy, in hamon ta bolo tanan handru. Ma i san le doh kameh winiyan mesekei iri abadok ta budon, ma ale winiyan mesekei iri lau abadok ado bolo sahou ta wasai, ame bada sahou handru.
TIT 1:10 Tasah, iri lau solo-an ba-en hamon ta sahou ta Kindrei bwe. Iri asehek sahou laleyah ma wendreya iri lau. Iri lau ta wendreya doh badeh, iri lau ala ta asan ku-i iri, ya udu bolo iri doh badeh, iri Juwis solo-an.
TIT 1:11 Eme ou ma hawe oro lau ta batun badeh, kabarah oro kandru-uk, tasah oro badeh, sekere-ei iri boho kamen satehei budon tiri handru sa-en hamon ta sahou handru. Oro amekes leheya doh ta amekes madasan ta lau kanyohan oro na luk. Ya kandriyen doh badeh, ndra-in labai.
TIT 1:12 Eme ya ndramak ari ta tiye boho iri anya, “Iri lau badu Krit badeh, ndra ta wasai le, iri badeh, ndra-in labai, ma hawe iri badeh, ta gwaman ta aimon le nyamon.”
TIT 1:13 Kandriyen doh badeh, handru. Eme ou tiye sahou boto-on ki toro lau mene ndra-en hamon ta leheya wasai, kame hamon ma ka-en hamon ta leheya handru.
TIT 1:14 Ma oro satehei ndranye oro sala ta kundruh ta wasai tiri Juwis, ma ale, oro sa-en hamon ta batanau toro lau ale ba-en hamon ta leheya handru bwe, ndri-iy.
TIT 1:15 Ya kati tanan handru i buku doh: I buku none tekedek ta lau udu mwasin ta mada Kindrei, sasah lau beleben badeh, winiyan badai iy bwe, idoh badeh, ndra mwasin le. Arile, i buku none tekedek ta lau bamwenen ta mada Kindrei bwe, ma hawe iri batehei budon handru ba-en tan bwe; iri beleben sasah, arile idoh badeh, bamesekei iri bamwenen ta mada Kindrei bwe le. Ma laba tinan ta aliy badeh, budon toro bala mwasin ja bwe. Oro bala tana oro ndra-in udu heh bwe, hawe oro bala tana oro mwasin udu heh bwe. Eme sasah ndra-in oro amekes badeh, oro batona anya idoh ndra-in bwe. Oro anya ndra mwasin le ai.
TIT 1:16 Oro anya oro tana oro Kindrei, arile kandriyen toro batiye bala buku aliy bwe. Tasah, kandriyen ndra-in toro, Kindrei sumukok, ma oro ta tebelese ma winiyan bamesekei ari kandriyen mwasin ja bwe.
TIT 2:1 Eme Taitus, ou badeh, leheya oro ja ta tanan handru ta Kindrei.
TIT 2:2 Ma ou leheya oro lau-en badeh, ka-en hamon toro kandriyen doh: Oro badeh, budon toro kaleu, ma oro badeh, ki ndramak ala lau mari kanuhun oro, ma oro badeh, ki ndramak ta atondrok bada oro, ma oro badeh, ki ndramak handru ta budon toro kihis ta tanan handru. Ma oro badeh, ki ndramak ta amekes mwasin i ta lau mari, ma hawe oro badeh, ki ndramak ta ado le i buku none oro bwese maha-an solo-an.
TIT 2:3 Eme ou leheya oro badih en ki le buku aliy. Oro badeh, kandriyen toro ki mwasin i buku badih ta Laban. Oro badeh, sasehek lau ma hawe oro sala badih ta a-un gwa boto-on i buku nyamon toro. Oro badeh, ki badih ta leheya lau ta kandriyen mwasin.
TIT 2:4 Ano oro badeh, ki badih winiyan ta leheya iri badih tasou bolohau ta kanuhun ma kaseken udu iri, ma hawe kaseken nadu iri.
TIT 2:5 Ma oro katiye oro katondrok bada oro kudu mwasin ta oro sakohok mwan ari ja. Ma hawe oro ka badih ta gok ma kaleheya oro ta kanuhun boho udu oro. Ya eme, lau badeh, sabobose sahou ta Kindrei.
TIT 2:6 Eme ou batanau oro loweu ki le buku aliy. Oro katondrok bada oro kudu mwasin ta bolo tekedek toro mari.
TIT 2:7 Eme ya udu bolo lahou tam mari, kandriyen tam kudu mwasin labai, ta iri lau kanyolom ou. Ma, i buku none ou leheya iri lau, ou asehek na ndrinem ki handru le.
TIT 2:8 Eme lau sasehek to, tasah to asehek sahou in badan amwenen. Ou amekes lahou doh, ya i buku none are lau kandres to ta aliy badeh, bwilin kameh ama ta aliy, tasah sahou iy asehek doh bamwenen bwe.
TIT 2:9 Ano ou leheya iri bonyo-ou badeh, kanuhun are lau iri are bahan ta bolo lahou mari, ma oro kamekes iy kasekesek, ya oro sasehek iy.
TIT 2:10 Ma hawe oro sakolowa lakou ta lau oro are bahan, sakolowa lakou ari ari sa-au le. Arile, oro badeh, ka lau mwasin ta tiye sahou handru le, ta mada lau mene oro are bahan, ta iy winiyan babwerei oro bwe. Kandriyen toro bonyo-ou badeh, i buku le doh. Eme ta kandriyen mwasin oro amekes doh kameh lau anyolom, ma atanan ta leheya ta Kindrei, ndramak ta akohok taha ado bolo kandriyen ta karei ma lomondra ndra-in, ame hamon.
TIT 2:11 Katin ta ou leheya, ma batanau iri lau ta Kindrei, ka-en hamon ta kandriyen doh badeh, asah i buku doh: Na tikisiy ta Kindrei le, eme la-u taha mari badeh, mesekei iy suni Jises Krais eme munyak, ta sikine karei ma lomondra ndra-in tataha.
TIT 2:12 Ma ale tikisiy tan badeh, leheya budon tataha aleu ta tiye taha sala bolo kandriyen ndra-in bamwenen ta mada Kindrei bwe. Ma taha badeh, karuwani kandriyen ndra-in taha amekes ta bada taha sekesek i buku iri lau badu munyak dah amekes, ki-iu. Arile, taha katondrok bada taha kudu mwasin, ma kamekes kandriyen mwasin i buku none lau handru ta Kindrei, na len mari udu bolo munyak na bolo len dah.
TIT 2:13 To mari badeh, kandriyen tato ki le buku doh na len mari. Tasah, to abe-en lakou kameh eme, eme ma lakou doh kameh mesekei to sekesek ta aliy. Lakou to abe-en doh badeh, Jises Krais ta aseben taha, iy kameh eme, ma hawe lomadan tan. Iy badeh, Kindrei tataha, iy Kindrei boto-on labai, ma iy le badeh, mene sebenei taha ado bolo kandriyen ta karei ma lomondra ndra-in ame hamon.
TIT 2:14 Iy le badeh, atehei iy imek i saluwe taha ta akunoh taha ta lakou ndra-in taha amekes, ma sikinei taha amwenen mara-ei, ma mesekei taha asahan lau tan handru, ma mesekei taha anya kamekes kandriyen mwasin le.
TIT 2:15 Eme oro tanan mari doh badeh, ou leheya oro na len mari, ma ou batanau oro, ma aliu oro, are ba-en hamon ta aliy bwe, kame hamon. Ou amekes lakou mari doh, i buku none ou ndramak handru, ta anoh bwe. Ya iri sabudon anya, ou badeh ari ndramak laleyah, ndri-iy.
TIT 3:1 Ou tiye ki tiri lau ta Kindrei kare bahandra tondrok tiri lau ta atondrok iri, ma kanuhun boho iri. Ma oro lowosa oro kado le ta kamekes lahou mwasin le.
TIT 3:2 Oro saluhe ndra-in sala tiri lau, ma oro sasobobo. Arile, oro kaseken seken tiri lau ari ari kudu bwena ta budon toro. Ma oro kaleheya kandriyen ta satudun oro le ki ta lau mari.
TIT 3:3 Na len ndra-au bwena mene, taha ale i buku aliy. Taha badeh, bale taha bwe. Taha banuhun sahou bwe, ma taha atehei budon tataha i ta sahou wasai. Bolo manyah tataha badeh, ta amekes bada taha sekesek ta kandriyen ndra-in le. Eme taha mene amekes kandriyen ndra-in na len mari. Ma taha ale badeh, mada taha alikis ta lakou tiri lau, ya taha aseken. Ma idoh amekes budon tiri lau badeh, andra-i eme tataha, ma hawe amekes budon tataha andra-i i ta ndramak ari ari.
TIT 3:4 Arile, na len ta tikisiy ta Kindrei, ndramak ta aseben taha asahan kameh,
TIT 3:5 iy sebenei taha badeh, ba-en hamon ta kandriyen mwasin tataha mene bwe. Arile, na tikisiy tan le badeh, iy konohei taha, ma sikine taha asahan randrah labai, asahan lau tan na boto-on ta Malawin Ndrabun.
TIT 3:6 Eme jo katiye kaleu ki tado ta sahou jo asehek dah: Kindrei badeh, tiye Jises Krais, ndramak ta akohok to ado bolo kandriyen ta karei ma lomondra ndra-in ame hamon, ma suni Malawin Ndrabun eme la-u to. Eme ta katin doh, Kindrei le mesekei Malawin Ndrabun tan amekes lahou boto-on udu bolo to.
TIT 3:7 Ya eme, to badeh, kamekes budon ta to kirih ma kabadok, ta bolo manyah tato udu le buku doh hawe Kindrei. Ki buku none ari nah abe-en lakou mwasin badu mine taman. Tasah, na kandriyen ta tikisiy tan le badeh, mesekei to ado mwasin labai ta madan.
TIT 3:8 Eme sahou, jo tiye tam dah badeh, handru. Ou ales ya asehek sahou boto-on ki toro lau ala ndratehei budon toro handru ndra ta Kindrei badeh. Eme ma oro katehei budon toro ki ta amekes kandriyen mwasin. Eme ya leheya dah badeh, mwasin labai ta aseben lau mari.
TIT 3:9 Arile, ou badeh, teleya ou ta tebelese ta sahou laleyah ta sare iri Juwis. Ya, i buku none iri kandres ou ta kandriyen malen tiri Juwis, ou sala ta aliy. Tasah, iri sahou doh, ari moson ta aliy bwe, ma ba-en badan bwe.
TIT 3:10 I buku none are lau leheya tanan randrah labai bamwenen ta leheya handru bwe, ya aliu budon tiri lau iu i len, ou abarah iy kandru-uk ta leheya doh. Ya, i buku none iy amekes le kili badeh, ou abarah iy san rasan ja. Ya, i buku none iy banuhun bwe le, ou teleya iy.
TIT 3:11 Tasah, ou badeh, ndratanam ai, ndramak i buku doh ndratubuni konan ndra ta leheya handru. Ma iy amekes lakou ndra ndra-in le. Buku iy tanan lakou doh bamwenen bwe, arile iy amekes le ili, ma iy le kameh amekes iy udu bolo sahou ta Kindrei.
TIT 3:12 Jo kameh tiye ari turu lau ma la-uh doh awek akohok kon tam, Atemas deh Titikus kameh ewek hawem. Ya, i buku none ari turu asahan le badeh, jo aseken ou ame hawek ame kon tinan Nikopolis. Katin ta jo anya ou ame badeh, i buku doh: Tasah, jo ndratehei budon tek ta ili udu doh, na len ta jor ma ur.
TIT 3:13 Ya, i buku none ndramak ta tanan labai ta batanau nyaran Senas ma hawe Apolos, uru anya kado Krit ka-au badeh, ou aseben uru ta lakou mari uru aseken, ta aseben uru ta bolo tekedek turu.
TIT 3:14 Ma laba tinan ta aliy badeh, iri lau tataha ta Kindrei badu hawe to katanan ta kandriyen mwasin ta aseben ta lakou i buku none iri ado ndra-in ta bolo manyah tiri. Oro ka-en hamon ta kandriyen doh, ya oro samanyah laleyah.
TIT 3:15 Oro are lau ado hawek kada-ah tiye sahou sekesek toro ewek tam. Ma ou badeh, tiye sahou sekesek tek ki toro lau mari aseken aso ado Krit badeh. Ma oro atehei budon handru toro i le buku taso are kada-ah. Ya salom tek i ta Laban Jises Krais ta iy badeh, katehei tikisiy tan ki tado mari ado badeh.
PHM 1:1 Pilemon, jo Pol, jo atorou la-ukei ramen dah ewek tam. Ou badeh, kawas taso mwasin ma to amekes gok randra le. Jo badeh, udu bolo asiu lulik kada-ah, tasah jo atiye sahou mwasin ta Krais Jises ili tiri mwan ma badih. Timoti badeh, i buku nadu tine to, iy udu hawek kada-ah ale,
PHM 1:2 ma jo atorou la-ukei dah ewek tam, ma hawe buru-u to badih ari nyaran Apiya, ma hawe ndramak ari ta bahun tato nyaran Apikus, iy ta amekes lahou ta Krais i buku le to amekes. Ma ewek toro lau ta Kindrei ale atukum awek asiu tam ta atudun Laban.
PHM 1:3 Jo anya kasolom kili ta tama taha Kindrei, ma hawe Laban tataha Jises Krais, ta mondrei ma tikisiy turu mwasin kudu hawe aha na bolo len mari.
PHM 1:4 Len marakon jo asolom ili ta Kindrei tek, jo badeh, abudon ou ma aloh nyaram ta adeu wurah i ta Kindrei.
PHM 1:5 Tasah, jo anuhun iri lau rayah ta Kindrei asehek ou i buku doh, ou badeh, ndratehei ndrinem ndrala ta Laban Jises, ma ou ndratehei budon tam handru ndrala tan. Ma ou ale badeh, aso-ok iri lau mwan ma badih ta Kindrei tinan labai.
PHM 1:6 Eme ma jo asolom ili ta Kindrei i buku doh: Udu bolo len ou tiye budon tam ma asehek ta lau rayah ta aliy, ma idoh kameh winiyan atehei tanan mwasin ewek tam, ma ou ale kameh winiyan atanam handru ta lakou mara-ei mwasin, taha marakon nane akohok badu mine Krais.
PHM 1:7 Ya, nadu tine, ou badeh, aso-ok labai iri mwan ma badih ta Kindrei, ta kandriyen ou amekes doh badeh, bwidi ndrine iri abadok. Eme ma jo sekesek tinan labai tiri kandriyen ou amekes, ma bwidi ndrinek amunum, udu le udu.
PHM 1:8 Jo abudon boto-on labai i tiri lakou nane, ou amekes i tiri, eme ma, iri budon doh udu tek. Jo aso-ok ou bwidi lakou tek ari. Ou badeh, nadu tinek handru i san ta Krais, ma jo winiyan asehek sahou boto-on ewek tam, ta ou a-en hamon ta bohok.
PHM 1:9 Arile bwai, jo bwalek amekes i buku doh. Tasah, kandriyen ta tikisiy badeh, turuki talu ma la-uh. Eme ma jo asehek amunum le ewek tam. Jo Pol, jo kawas tam handru, ma jo badeh, udu ndra bolo asiu lulik kada-ah kahis, tasah katin ta jo atiye sahou mwasin ta Krais Jises.
PHM 1:10 Eme ma, jo anya kasehek tam ki buku doh: Jo aso-ok ou tikisi Onesimus. Iy badeh, i buku naduk ari handru. Iy asahan naduk badeh, i buku doh: Jo udu bolo asiu lulik, jo leheya iy ta budon handru ta Kindrei. Ta idoh le, iy asahan naduk handru.
PHM 1:11 Bwena mene iy bamekes ari gok mwasin ta aseben ou bwe. Arile na dah ja, iy ndrasahan mwasin labai, ta aseben talu ma la-uh.
PHM 1:12 Ya, eme jo kameh suni iy ewek hamon ewek hawem ja, ma hawe ndrinek kameh udu hawen ewek.
PHM 1:13 Jo mene amekes gok ta atiye sahou mwasin, ma iri atehei jo ili bolo asiu lulik. Eme ma, jo bwetenei kandriyen mwasin ta Onesimus ja amekes udu bolo asiu lulik hawek, ya jo abudon ta iy kudu hawek kudu gwek, ma iy i nyara ou winiyan aseben jo udu dah.
PHM 1:14 Arile, jo bamekes bala buku doh bwe. Jo badeh, bwalek ta amekes ari lakou i tan, buku ou baso-ok ta aliy bwe. Eme ma, jo bwalek ta indrek iy. Jo kameh suni iy ewek hawem. Jo bwalek ta indrek ou boto-on labai ta ruwani iy kudu hawek dah ta aseben jo bwe. Jo aso-ok ou amekes kandriyen doh, na budon ma tanan tam amwenen.
PHM 1:15 Sebwe katin ta Onesimus mene ruwani ou luluwen sese badeh, ta ou kameh winiyan andrei iy ewek hamon ja, ma iy kameh winiyan udu hawem luluwen labai.
PHM 1:16 Arile, nadah kameh iy winiyan bado hawem ma asahan buku bonyo-ou ja bwai. Iy badeh, ndrasakalawi kandriyen doh. Ya, jo abudon iy nadu tinek handru, jo ma hawe ndrinek aso-ok iy tinan labai. Ya, ou winiyan abudon iy i buku bonyo-ou tam ma nadu tinem i san ta Laban ale, ma ndrinem mara-ei kaso-ok iy labai, i buku le jo mene aso-ok iy handru.
PHM 1:17 Ya, i buku ou abudon jo kawas tam handru ta lahou ta Krais, ou andrei Onesimus kewek hamon, ma ou amekes mwasin ki tan, buku le jo mene ewek hawem, ma ou amekes eme tek.
PHM 1:18 Ma ale, buku ndra mwena ndra-au, iy ndramesekei madam ndrandra-i, ta lakou tam iy andrei, ma iy batehei saluwen bawek hamon bwe, mwasin ta ou atehei lakou badeh, keme la-uk.
PHM 1:19 Jo Pol, jo atorou la-ukei dah na le minek amwenen. Ou anuhun! Jo le amwenen kameh atehei bundruwe iri lakou tan ili hamon. Handru, tasah bundruwe lakou tek udu hawem badeh, i buku doh: Idoh badeh, koham le amwenen, tasah jo aseben ou asahan lau ta Kindrei.
PHM 1:20 Ya, idoh handru. Eme ma ta nyara Laban, jo aseken ou amekes lakou badeh, keme tek. Talu ma la-uh ndrasahan lau ta Krais, ya ta kandriyen le doh, ou bwidi ndrinek sekesek labai.
PHM 1:21 Jo atehei budon tek boto-on handru, ta ou kameh a-en hamon ta sahou tek. Eme ma jo atorou la-ukei dah ewek tam. Ma jo ale ndratanan kandriyen ou amekes kameh udu bwele-en labai ja ta kandriyen nane jo ndratiye tam ta amekes, ma kameh asahan mwasin labai mara-ei.
PHM 1:22 Ya, sahou tek randra ja. Jo atehei budon tek handru in ta Kindrei, iy kameh winiyan anuhun salom tado, ma jo kameh ano ta asiu lulik, ma jo ewek asahan hawe ado ja. Eme ma, jo aso-ok ou lowosaniy sese bosoh badu bolo asiu tam, ta jo winiyan manyah udu hawem.
PHM 1:23 Ya, Epapras badeh, udu bolo kou hawek kada-ah ale. Iy anya, bada-an tan mwasin ewek tam. Ya, aru ma la-uh ado bolo asiu lulik kada-ah badeh, ta atiye sahou mwasin ta Krais Jises.
PHM 1:24 Ma hawe oro lau ta amekes lahou hawek ale, buku Mak, Aristakus, Demas hawe Luk, oro badeh, anya bada-an toro mwasin ewek tam ale.
PHM 1:25 Jo aso-ok tikisiy ma sekesek ta Laban Jises Krais badeh, kudu hawe malawi ado mari.
HEB 1:1 Bwena mene Kindrei asehek sahou ili ta tubu taha iri san solo-an, ma i san solo-an labai ili tiri propet.
HEB 1:2 Arile udu bolo len tataha hamon kada-ah, Kindrei asehek sahou eme tataha i san ta nadun ari le mwan. Kindrei leheyani nadun doh ta akohok iri lakou marakon. Na nadun le, iy bwidi lakou marakon asahan.
HEB 1:3 Nadun doh leheyani lomada sun tinan ta taman Kindrei, ma lomadan tinan labai eme tataha, ma konen mara-ei i buku le Kindrei amwenen. Sahou tan nyamun labai, ma tawi iri lakou marakon udu munyak ma kandrah. Iy ndrabwidi gok tan ndrano ta talou iri mwan ma badih ado ta kandriyen ndra-in, ame ta kandriyen mwasin. Ano iy ili manyah udu kandrah mine Kindrei salin, iy boto-on labai.
HEB 1:4 Iy udu bwele-en ja tiri angelo, i buku le Kindrei tondrohon nyaran udu bwele-en labai ja ta nyara iri.
HEB 1:5 Bwena mene Kindrei tiye i ta nadun i buku doh, “Ou naduk handru, Na dah jo ndrasahan tamam kabwe.” Kindrei basehek bala toro angelo tan bala buku doh bwe. Arile iy asehek nadun: “Jo kameh tamam, ma ou kameh naduk.”
HEB 1:6 Na len Kindrei anya katiye nadun ari le keme andri kon munyak, iy eme asehek: “Iri angelo ta Kindrei katehei bwili ndru-u iri ki andri kili tan.”
HEB 1:7 Iri angelo tan badeh, iy batehei budon tan mara-ei bala tiri bwe, i buku le buk ndrabun ndrasehek: “Kindrei bwidi iri angelo tan asahan i buku siyer laleyah, ma iri lau ta amekes lahou tan anya i buku jih nyarahan labai.”
HEB 1:8 Arile iy asehek ta nadun: “Tondrok tam, O Kindrei, ta udu le buku doh, winiyan bandra-i bwe! Ou tondrokei iri lau tam kado le tiri kandriyen mwasin.
HEB 1:9 Ou aso-ok kandriyen mwasin tinan labai, ou bwalem iri kandriyen ndra-in. Eme ma Kindrei tam amwenen ndranyahani ou ndrala loken labai, bwele-e oro lau tam mwasin. Ma iy mene solowei ndrelekei ta sekesek ndrawek bwele-em.”
HEB 1:10 Iy asehek ta nadun ale: “O Laban, ndra bwena mene ou bwidi kon munyak, ma, na minem amwenen ou bwidi kandrah ja.
HEB 1:11 Uru ma la-uh kameh amai laleyah. Arile, ou le ari kameh are le buku doh. Uru ma la-uh kameh i buku ra-ei kolau ili malen, ano atarah.
HEB 1:12 Ou kameh lukumwi uru i buku ou alokom kolau malen, ano ou atehei kolau ha-un ili turu, ma uru asahan randrah ja. Arile ou kameh areu le buku doh, ma jaha tam kameh udu luluwen labai.”
HEB 1:13 Kindrei winiyan basehek bala ta ari angelo tan bwe: “Ou ame manyah ado loboho minek salin, winiya jo le baratehei iri lau ta amekes budon ndra-in i tam barado bahandra katim.” Kindrei asehek sahou doh ili ta nadun amwenen.
HEB 1:14 Iri angelo badeh, malawi iri le, iri ta amekes gok ta Kindrei. Kindrei tiye iri ala ta aseben lau, ta akohok iri kame hamon ja.
HEB 2:1 Taha badeh, kanuhun kamwenen labai kili ta sahou handru, taha nane ndranuhun, ma taha samani sahou batanau doh labai.
HEB 2:2 Bwena mene Kindrei edeu sahou i ta tubu taha iri, eme boho iri angelo. Sahou batanau eme asahan handru ta lau ka-en hamon ta aliy. Are lau iy ba-en hamon ta aliy, o, banuhun bwe, iy kameh akohok maha-an ta kandriyen nane iy amekes.
HEB 2:3 Buku taha teleya lakou laba tinan ta akohok taha, taha katobwak barala buku sah handru? Laban ndrasehek nyala seben doh ma bwena ndrame tataha, eme iri lau nane anuhun sahou tan, ame asehek tataha ja, “Sahou doh ndra handru le.”
HEB 2:4 Kindrei ale eme leheya sahou tan badeh, boto-on na san ta amekes iri kalem ma iri lahou tinan. Ma iy ale andromwei ndramas ta Malawin Ndrabun ili tiri lau na le budon tan.
HEB 2:5 Taha kasehek ma katehei budon tataha kili ta munyak ha-un, Kindrei kameh amekes hamon. Iy batehei bala bahandra iri angelo tan bwe.
HEB 2:6 Arile taha ndratanan, iy kameh atehei taha mwan ma badih ta atondrok lakou marakon doh. In bolo buk ndrabun ndramak ari ndratiye: “Ahi saba lakou tam handru, ou atehei budon tam tinan labai eme tahi? Ya, nadu ahi saba lakou, eme ou atondrok iri ja?
HEB 2:7 Kindrei, ou bwidi ahi, ma ou atehei nyara ahi udu bahandra nyara iri angelo tam ta luluwen bwe. Arile na dah, ou ndramasiye ahi, ma tutuni ahi ala are bahandra lomada nyaram.
HEB 2:8 Ou atehei ahi are bwele-e iri lakou marakon ou ndrabwidiy. Ano ja ou atehei iri lakou marakon eme bahandra tondrok tahi.” Udu bolo iri sahou doh, Kindrei tiye, taha mwan ma badih katondrok iri lakou marakon doh. Taha ndratanan, iy asehek nyala iri lakou marakon nane doh ndrame bahandra tondrok tataha, eme ma ari lakou winiyan bare laleyah bwe. Arile, na len dah, taha banyolom ari tataha amwenen batondrok iri lakou marakon doh bwe.
HEB 2:9 Arile taha ndranyolom Jises, iy akohok boto-on tan. Bwena mene iy udu bahandra tondrok tiri angelo luluwen bwe, iy imek ta akohok kon ta lau marakon, ma tikisiy ta Kindrei kameh winiyan sebenei iri lau marakon. Jises bwese maha-an tataha tinan labai ma iy imek. Arile na dah, Kindrei ndrasuruni iy, ma ndratehei lomadan nyaran ndra tinan labai udu bwele-e iri lakou marakon.
HEB 2:10 Kindrei badeh, iy kati iri lakou marakon, tasah iy bwidi iri lakou marakon. Ma iy aso-ok ta akohok nadun iri kala hawen kakohok lomadan mwasin. Eme iy atehei budon in ta nadun ta kamekes iri gok ta akohok iri lau mwan ma badih kame hamon ja, iy eme atehei Jises eme akohok sisi-in tinan labai. Ta sisi-in doh le, ma iy atehei Jises udu bwena ta aseben iri lau mwan ma badih. Kindrei amekes iri kandriyen marakon doh amwenen le ai.
HEB 2:11 Taha tanan, Jises amekes iri lau mwan ma badih asahan lau ta Kindrei, ma iri lau nane iy ndrabwidi, iri a ndrabun. Iri marakon doh badeh, tama oro ari le, ma Jises eme aloh oro, nadu tinen, ma bwilin bama ta aloh oro bwe.
HEB 2:12 Taha ndratanan, iri sahou doh handru, tasah buk ndrabun mene ndrasehek: “Jo kameh tiye ta nadu tine oro ta lakou ou ndrabwidiy, jo kameh iyah wari ta atudun nyaram udu bolo tukum toro.”
HEB 2:13 Eme iy tiye ja: “Jo kameh atehei budon tek in ta kindrei.” Iy asehek i buku doh ale: “Idah jo hawe oro nah nane Kindrei atehei oro ndrame tek.”
HEB 2:14 Oro nah nane Jises asehek doh, oro lau mwan ma badih. Eme Jises asahan ndramak awas ma konen i buku le oro, iy kameh winiyan imek, ma iri kandriyen doh kameh winiyan sulumwi boto-on ta balik nane, amekes iri lau amak.
HEB 2:15 Iri mwan ma badih, iri nane anoh ta amak. Na len marakon iri ado kon munyak, nohonoh tiri doh ta amekes iri, buku iri ado bolo kowah lulik ta balik. Arile Jises imek ta talou iri ado bolo kowah lulik ame len.
HEB 2:16 Handru labai, Jises mene bamekes gok doh ta aseben iri angelo bwe, iy amekes gok doh ta aseben lundriye Abraham iri.
HEB 2:17 Kindrei ndrabwidi iy ndrasahan i buku le nadu tinen oro amwenen, ta iy kameh asahan tinan tiri pris toro. Iy asahan tinan tiri pris ta tikisi oro, ma iy in hamon tiri sahou marakon ta Kindrei ma iy amekes gok tan. Gok doh, ta akunoh ma ta mani kandriyen ndra-in ta lau marakon ano.
HEB 2:18 Iri lakou marakon doh ndrasahan tan, iy le ari eme badeh, akohok sisi-in ta aliy. Eme badeh, ma iy winiyan sebenei iri lau marakon, i buku lakou ndra-in anya kawendreya iri.
HEB 3:1 Ado nadu tine i san ta Jises, Kindrei udu kandrah kodo-oh iy aloh ado ale. Ado kabudon kamwenen kili le ta Jises, Kindrei tiye iy eme ta asahan aposel ma tinan tiri pris. Taha ale atehei budon in tan, ma asehek nyaran ili ta lau marakon.
HEB 3:2 Kindrei ndratehei gok doh ndrala tan, ma iy in hamon ta sahou handru ta Kindrei ta iri kandriyen i buku le ta Moses bwena mene amekes udu asiu ta Kindrei.
HEB 3:3 Moses batah asiu doh bwe, iy amwenen i buku asiu doh. Arile to atudun nyara ndramak ta atah asiu badeh, udu bwele-en labai ta asiu le amwenen. Eme ma Kindrei atehei nyara Jises i tinan labai ja ta nyara Moses.
HEB 3:4 Iri asiu marakon kede-eh lau atah. Arile Kindrei le ari bwidi iri lakou marakon.
HEB 3:5 Moses badeh, buku ndramak ta amekes lahou ta Kindrei, iy in hamon handru ta sahou ta Kindrei, ma iy amekes gok in asiu tan. Gok tan ta tiye iri lakou Kindrei asehek ta aliy kameh asahan hamon.
HEB 3:6 Arile Krais, iy Nadu Kindrei mwasin labai. Iy atondrok asiu ta Kindrei mara-ei. Taha mari badeh, asiu ta Kindrei, buku taha sanoh ta atehei budon tataha boto-on in tan, ma taha sawoyah ta atondrok iy. Badeh, taha lau tan handru.
HEB 3:7 Malawin Ndrabun asehek boho Kindrei i buku doh: “Buku aha anuhun bohok na dah,
HEB 3:8 aha satunuhun ja ai. Aha sala buku tubu aha iri Isra-el mene tebelese hawek, udu bolo len bwena jo none iri udu kon lomale an.
HEB 3:9 Iri ndranyolom boto-on handru ta gok marakon jo amekes udu bolo jaha ma hanoh, arile iri tunuhun ma none jo ja.
HEB 3:10 Eme ma bwidi jo ibolosen tinan labai ili tiri lau nane doh, ma jo asehek tiri, ‘Aha ba-en hamon tek bwe. Ma len marakon aha bwale aha an hamon ta tanan tek mwasin.’
HEB 3:11 Eme ma ndrinek ibolosen ma jo tandrakan iri, ‘Aha winiyan bala bolo kon tek ta amunyau bwe.’”
HEB 3:12 Aha nadu tine, aha katondrok aha kamwenen, kora-on nadu tine taha ari udu ndrokowa taha, budon ndra-in udu ndrinen, ma iy kamani budon tan mwasin, ma iy katubuni konan kili ta Kindrei, iy le ari kohan handru.
HEB 3:13 Na len dah Kindrei aloh “Na dah” kahis le. Iy isan len eme tataha ta anuhun sahou tan. Eme ma ta len marakon, taha kadeu sahou mwasin kili ta nadu tine taha mwan ma badih, ta amekes budon tiri kabadok. Tasah, kora-on taha ari ka-en hamon ta kandriyen ndra-in ta wasai, ma tebelese hawe Kindrei.
HEB 3:14 Ma bwena mene to atehei budon tato in ta Krais. Eme na dah, to katehei iri budon tato mari kihis handru kudu winiya le to baramak. Buku to amekes ili buku doh, idah kameh to akohok lomada Krais, ma to asahan kawas tan handru.
HEB 3:15 Buk ndrabun nane asehek: “Buku aha anuhun bohok na dah, aha satunuhun bohok ja ai. Aha sala buku tubu aha iri bwena mene tebelese ma banuhun sahou tek bwe.”
HEB 3:16 Lau heh bwena mene anuhun boho Kindrei, eme iri tebelese ma banuhun bohon bwe? Idoh iri lau mwan ma badih marakon mene Moses andrei iri are Ijip ame len. Iri le adeh amekes iri kandriyen doh.
HEB 3:17 Kindrei ibolosen hawe lau heh mene udu bolo jaha ma hanoh (40)? Iy ibolosen ili tiri lau mwan ma badih marakon nane amekes kandriyen ndra-in are kon lomale an, ma iri amak.
HEB 3:18 Kindrei mene tandrakan ta lau rayah winiyan bala bolo kon ta amunyau tan bwe. Ya, iy tandrakan lau heh handru? Iri le lau mwan ma badih marakon mene banuhun sahou tan bwe.
HEB 3:19 Taha ndranyolom, iri mene bala bolo kon ta amunyau doh bwe. Tasah, iri batehei budon tiri mara-ei bala ta Kindrei bwe.
HEB 4:1 Tandrakan ta Kindrei ta atiye taha ala bolo kon ta amunyau udu aliy kahis. Eme ma taha kabudon kamwenen, kora-on Kindrei kanyolom ari tataha, iy winiyan bala bolo kon ta amunyau doh bwe.
HEB 4:2 Taha ndranuhun iri sahou mwasin, i buku le bwena mene iri Isra-el anuhun. Iri anuhun, arile baseben iri bwe, tasah iri batehei budon tiri mara-ei bala ta sahou nane iri anuhun bwe.
HEB 4:3 Idah, are lau iri atehei budon tiri mara-ei ndrala ta Kindrei, idah kameh iri winiyan ala bolo kon tan ta amunyau. Idoh mene Kindrei abudon ta lakou nane doh ma iy asehek: “Eme ndrinek ibolosen ma jo asehek, ‘Jo ndratandrakan loken handru, iri winiyan bala bolo kon tek ta amunyau doh bwe.’” Handru, Kindrei ndrabwidi gok tan ta amekes iri lakou marakon ndrano ndra bwena, arile iy tiye iri sahou doh, tasah iri lau batehei budon tiri bala tan bwe, eme ma iri winiyan bala bolo kon tan ta amunyau bwe.
HEB 4:4 Udu bolo buk ndrabun asehek nyala len ma ndro taloh i buku doh: “Udu bada len ma ndro taloh doh Kindrei amunyau, tasah iy ndrabwidi gok tan marakon ndrano.”
HEB 4:5 Buku sahou le nane doh iy asehek ja: “Iri winiyan bala bolo kon tek ta amunyau doh bwe.”
HEB 4:6 Idoh ta leheya taha. Iri lau ma bwena mene anuhun sahou mwasin, arile iri bandrei amunyau doh bwe, tasah iri batehei budon tiri bala tan bwe. Arile, na dah, lau winiyan akohok amunyau doh kahis.
HEB 4:7 Iri winiyan akohok, tasah Kindrei ndratehei len tan ari ja, ta taha mwan ma badih winiyan ala bolo amunyau tan. Kindrei luhi nyara len doh “Na dah” ja. Bwena mene Kindrei tiye iri Isra-el, eme ma Debit torowenei ili bolo buk ndrabun: “Buku aha anuhun bohok na dah, aha satunuhun bohok ja ai.”
HEB 4:8 Buku bwena mene Josuwa katehei amunyau kili tiri ta udu le buku doh, idah kameh Kindrei winiyan batiye ta ari len hamon ja bwe.
HEB 4:9 Taha lau ta Kindrei ndratanan, len ta Kindrei ta amunyau udu kede-eh kahis. Amunyau doh i buku le Kindrei amunyau udu bada len ma ndro taloh.
HEB 4:10 Taha ndratanan, are lau anya ki bolo amunyau ta Kindrei, badeh, iy kamunyau ta gok tan amwenen o. Idoh i buku le Kindrei bwena mene amunyau ta gok tan.
HEB 4:11 Taha kabadok ta akohok amunyau doh. Kora-on ari mwan o badih in hamon ta kandriyen ta tebelese boho Kindrei, i buku le iri Isra-el bwena mene amekes, ma iri taku.
HEB 4:12 Sahou ta Kindrei doh badeh, kohan udu aliy, iy amekes gok boto-on labai. Iy madan labai ja ta samen ari, madan la-uh iri aloh bainat. Sahou doh iy winiyan orowei ili bolo oda ndramak amai iu ili alih. Iy winiyan seleyani kohan uru malawin. Ma iy seleyani bolo ndruwin ma bolo bwisi bar ale. Iy ndraseleyani mwasin ma ndra-in tiri budon ma iri so-ok ta ndrine taha marakon ere le lewan.
HEB 4:13 Iri lakou marakon Kindrei mesekei, ari winiyan bamai ta madan bwe. Iri lakou marakon ere le lewan, ma udu kon lewan labai ta madan. Ma iy le ari kameh winiyan anyolom iri kandriyen taha amekes, ma taha kanyowonya marakon ki tan.
HEB 4:14 Tinan tiri pris tataha badeh, in aliy. Nyaran Jises, iy Nadu Kindrei. Iy ndra-au ndrala kandrah hawen. Eme ma taha katawi iri budon marakon nane taha ndrasehek ndrala tiri lau badeh, kihis mara-ei.
HEB 4:15 Tasah, nyamu taha amwenen winiyan batisih iri kandriyen ndra-in iu bwe. Arile tinan tiri pris tataha amwenen doh, iy le ari winiyan tikisi taha. Tasah, iri maha-an asahan tataha, badeh, mene ndrasahan tan ta none iy ale. Arile iy bamekes ari kandriyen ndra-in bwe.
HEB 4:16 Taha sanoh ta ala mirihik ta koyeu ta Kindrei, iy ndrinen mwasin ma iy ta tikisiy. Iy winiyan aseben taha, buku maha-an tataha tinan labai, ndrinen mwasin ma tikisiy tan kameh winiyan sebenei taha.
HEB 5:1 Kandriyen ta adeu ndramak asahan tinan tiri pris i buku doh: Kindrei le badeh, akohok ndramak badu ndrokowa iri lau, ma atehei iy ta aseben iri lau ta ndrokowa lau hawe Kindrei. Iy i saluwe iri lau mwan ma badih, ma iy edeu ndramas i ta Kindrei, ma edeu salom ta amekes kandriyen ndra-in tiri iu.
HEB 5:2 Iy tanan, iy nyamun bwe, ma iy winiyan bamekes iri lakou solo-an bwe. Eme ma iy amekes amunum le ili tiri lau tana iri lakou bwe, ma ta iri lau ndramani san mwasin ta Kindrei.
HEB 5:3 Ma iy ale ta amekes iri salom ta talou kandriyen ndra-in tan amwenen, ma hawe tiri lau mwan ma badih, tasah iy nyamun bwe, ma iy ta amekes kandriyen ndra-in ale.
HEB 5:4 Ndramak asahan tinan tiri pris, nyaran ndra tinan kabwe, ma ari ndramak winiyan bakohok gok doh na so-ok tan amwenen bwe. Kindrei kameh aloh iy bwena, ano iy barakohok gok nane doh, i buku le mwena mene Kindrei aloh Aron.
HEB 5:5 Ma Krais ale i buku aliy. Iy batudun nyaran ta asahan tinan tiri pris bwe. Kindrei le atehei iy ili aliy ta amekes iri gok doh. Kindrei eme tiye i tan: “Ou naduk handru, Na dah jo ndrasahan tamam kabwe.”
HEB 5:6 Ndrado bolo buk ndrabun sese kede-eh Kindrei tiye i buku doh: “Ou kameh asahan pris ta udu le buku doh, in hamon ta gok ta pris ari mene nyaran Melkisedek.”
HEB 5:7 Len ta Jises mwena mene iy edek udu ndra kon munyak, iy amekes iri salom ma iy asolom ili ta Kindrei. Iy tanan idah kameh Kindrei winiyan aseben iy ta iy winiyan bamak bwe. Eme ma iy asolom ma eden boto-on labai ili tan. Iy anuhun ndrelen ta nadun, tasah iy atehei iy mara-ei iu ili andri labai.
HEB 5:8 Jises badeh, Nadu Kindrei, arile iy bwese isi tinan labai. Ta san le doh, ma iy i tanan kandriyen handru ta in hamon ta sahou ta taman.
HEB 5:9 Ma idoh bwidi iy asahan ndramak handru ta in hamon ta sahou ta Kindrei. Eme ma iy asahan kati kandriyen handru ta aseben ma ta akohok are lau iy in hamon ta sahou tan, ta iri kameh are le buku doh.
HEB 5:10 Eme ma Kindrei atehei iy asahan tinan tiri pris, ma iy asehek i buku doh, “Ou kameh asahan tinan tiri pris in hamon ta gok ta pris ari mene nyaran Melkisedek.”
HEB 5:11 Sahou solo-an labai ta nyala lakou dah, arile boto-on labai ja ta leheya aha, tasah aha winiyan bakohok bolo sahou dah suwi bwe.
HEB 5:12 Aha akohok tanan badeh, luluwen labai, eme ma Kindrei aso-ok aha kaleheya iri rayah ja ta sahou tan. Arile aha winiyan bwe, aha aso-ok ari ndramak kudu ndra hawe aha kaleheya aha ta sahou handru ta Kindrei mara-ei kili hamon ja. Akohok kon ta nyamon boto-on, aha aso-ok ta a-un sur kahis.
HEB 5:13 Are lau ere ndra ta sur badeh, iy ma nyandren kahis. Eme ma iy winiyan baseleyani iri kandriyen mwasin ma ndra-in bwe.
HEB 5:14 Nyamon boto-on badeh, tiri lau ndra tinan ndra-en. Iri lau doh badeh, iri ndranone ma iri ndratanan mwasin labai ta seleya iri kandriyen mwasin ma ndra-in, iri ndratanan ma budon tiri mara-ei ndraleu.
HEB 6:1 Ta idoh, taha sasehek ja ta iri leheya mwasin taha ndrakohok ma bwena mene ta nyala Krais. Arile, na dah taha kala ta leheya tiri lau-en le ai. Taha sala hamon ja tiri lakou mene taha ndrakohok tanan tiri. Iri lakou doh: ta mani kandriyen ndra-in ili san ta imek; ma ta atehei budon in ta Kindrei;
HEB 6:2 ta leheya san ta anyu; ma ta adeu mine ndramak ili bwele-en; ta amak ame awas ja ta imek; ma len ta sahou winiyan bano bwe. Iri lakou marakon doh mwasin, ta lau kakohok tanan ta aliy op. Arile, tanan doh i buku ndru ta asiu taha ahiy bwena udu aliy. Na idah ja, taha atah asiu handru ili bwele-e iri ndru nane udu aliy bwena, eme ma taha kala le ta tanan tiri lau-en ai. Taha sala hamon ja.
HEB 6:3 Taha kala le bwena. Taha winiyan, i buku Kindrei aso-ok.
HEB 6:4 Iri lau mwan ma badih rayah mene ndrandrei tanan handru ta sahou ta Jises Krais. Eme ma iri ndratehei Jises le ari badeh, udu budon tiri, ma iri ndranone ndramas ta Malawin Ndrabun badu kandrah.
HEB 6:5 Iri ndratanan sahou ta Kindrei mwasin ma boto-on labai, ma iri ndratona ta boto-on ta Kindrei kameh asahan tiri mwan ma badih.
HEB 6:6 Buku oro taku, ma atehei kona oro ili ta Kindrei, ari madasan ta akohok oro ame hamon ame len ta iri kandriyen ndra-in ja bwe. Ta kandriyen toro le doh, oro tatahi Nadu Kindrei ja ili bada kei tondreh, ma oro abolei iy udu mada iri lau marakon.
HEB 6:7 Ur undruk eme bwele-e munyak ma edeu gwa i ta munyak, ma munyak doh ato-ou nyamon mwasin ta aseben iri lau nane atah bilin ili aliy. Eme ma munyak akohok nyosowan mwasin ta Kindrei.
HEB 6:8 Arile, i buku bada malou bobodon ma bwidiu ndra-in ateh, idoh leheya munyak ndra-in. Mirihik kameh Kindrei asehek sahou boto-on ili ta munyak, ano, ma jih kameh sulumwi marakon andrakak ano iu.
HEB 6:9 Aha kawas tek handru, ahi asehek sahou boto-on dah ewek taha. Arile, ahi ndratanan aha kameh winiyan bakohok ndra-in bwe. Tasah, Kindrei aseben aha ma iy andrei aha ame hamon.
HEB 6:10 Aha tanan, Kindrei mwasin labai, iy ndra-in bwe. Iy kameh winiyan bamani gok aha amekes bwe. Aha suri aha ta aseben iri lau mwan ma badih tan, ma aha bamunyau se bwe. Idoh leheya, aha aso-ok Kindrei labai, eme ma iy winiyan bamani kandriyen doh bwe.
HEB 6:11 Budon tahi tinan labai ta aso-ok aha marakon kamekes gok boto-on ki buku le doh, winiya le len hamon. Buku aha amekes iri lakou i buku doh, saba lakou aha nane abe-en, kameh asahan handru.
HEB 6:12 Ahi baso-ok aha asahan gwaman bwe, arile ahi aso-ok aha ka buku le iri lau atehei budon tiri in tan, ma atondrok iy. Iy are lau iy amekes i buku doh, iy kameh akohok lakou Kindrei ndratandrakan ta aliy.
HEB 6:13 Bwena mene Kindrei tandrakan, iy anya kedeu lakou kili ta Abraham. Iy eme amekes sahou handru in hamon ta tandrakan tan. Iy tandrakan ta nyaran amwenen, tasah nyara ari kindrei ja bare bwele-e nyaran ja bwe.
HEB 6:14 Iy eme tandrakan Abraham i buku doh: “Jo kameh nyosowani ou, ma amekes lundriyem oro kameh asahan nyaran bwe.”
HEB 6:15 Abraham tondrokei udu le, ano iy andrei iri lakou nane Kindrei tandrakan ta edeu ili tan.
HEB 6:16 Buku ari ndramak asehek sahou kili handru, iy kameh aloh nyara ari tubun oro lau-en. Sahou tandrakan tan nane winiyan bwidi sahou tan abadok, ma iri lau winiyan basehek ja bwe.
HEB 6:17 Bwena mene Kindrei amekes tandrakan ta iy kameh amekes mwasin eme tataha nadu tubu Abraham. Iy eme leheyani taha amwenen labai, ta iy winiyan batubuni budon tan bwe, eme ma iy tandrakan ili loken handru labai ta amekes sahou tan abadok ma ili handru.
HEB 6:18 Sahou ma tandrakan, lakou ma la-uh doh winiyan batubuniy bwe, ma Kindrei ale winiyan bawendreya bwe. Ya, lakou ma la-uh doh bwidi ndrine taha abadok ta sakaliye ala hawe Kindrei ta aton are bahandra tondrok tan. Eme ma taha katawiy kihis kudu budon tataha, iri lakou nane iy ndratandrakan ta edeu eme tataha.
HEB 6:19 Taha ndratanan, iri lakou nane taha atondrok doh, handru, i buku le hanai ta koha taha. Hanai o sahou tandrakan ta ateu taha ahis hawe Kindrei, i buku le bwena mene tinan tiri pris le ili kona kolau laba tinan, iri talahaniy udu bolo asiu tinan ta Kindrei, iu ili alih handru bolo asiu ndrok ndrabun ndrabun labai ta mada Kindrei.
HEB 6:20 Ta akohok kon tataha, Jises ndrala mwena tataha ndrala bolo asiu ndrok doh. Eme ma iy ndrasahan tinan tiri pris ta udu le buku doh, in hamon ta gok ta pris ari mene nyaran Melkisedek.
HEB 7:1 Melkisedek doh iy kabin badu Salem, ma iy ale badeh, pris ta Kindrei in loken labai. Abraham idi oro kabin rayah, eme ma bahun ano, iy eme edek anya keme hamon keme kon, Melkisedek edek eme ndruni iy in san, eme ma iy nyosowani Abraham.
HEB 7:2 Eme ma, Abraham apwai iri lakou nane iy akohok ta bahun i ronoh, ronoh, ano iy edeu ari, ari badu bolo ronoh doh i ta Melkisedek. (Moson ta nyara Melkisedek badeh, “Kabin mwasin labai.” Iri aloh iy ale “Kabin badu Salem.” Moson ta nyaran doh, “Kabin ta mondrei.”)
HEB 7:3 Melkisedek iy ari taman ma tinen bwe, iy ari tubun bwe ale, ari len ta tinen edeu iy bwe, o ari len ta iy imek bwe le. Iy ari saren bwe. Eme ma gok tan ta pris kameh ta udu le buku doh, i buku Nadu Kindrei.
HEB 7:4 Taha kanyolom Melkisedek se, nyaran kabin labai. Nyaran ja udu bwele-en ta tubu taha Abraham. Tasah, tubu taha Abraham ndrapwai iri lakou tan ta bahun i ronoh, ronoh, ano iy edeu ari, ari badu bolo ronoh doh ndrala ta Melkisedek.
HEB 7:5 Lundriye Libai iri le badeh, winiyan amekes iri gok ta pris. Kandriyen malen ta Moses asehek i buku doh, lundriye Libai iri badeh, kakohok ari, ari badu bolo ronoh ta lakou tiri lau badu Isra-el. Handru, iri Libai badu hawe iri Isra-el, ma iri mari badeh lundriye Abraham. Arile Kindrei anya, iri Libai kede-eh kakohok lakou nane ta nadu tine iri rayah ja.
HEB 7:6 Melkisedek badeh, badu boho kamen ta Libai iri bwe. Arile iy ndrakohok lakou rayah ta Abraham. Eme Melkisedek nyosowani Abraham, iy ndramak nane tandrakan ta Kindrei udu bwele-en.
HEB 7:7 Taha ndratanan ndramwenen, i buku ndramak boto-on ta edeu nyosowan ili ta ndramak ari ja, iy doh iy kabin. Ndramak nane akohok nyosowan, iy doh udu bahandran ja.
HEB 7:8 Iri Libai badeh, akohok lakou ranah tiri Isra-el, arile udu, iri Libai amak. Arile Melkisedek doh iy akohok lakou, arile iy bamak bwe. Iy udu le buku doh, i buku le buk ndrabun asehek.
HEB 7:9 Taha winiyan asehek i buku doh: Lundriye Libai iri adeu lakou ili ta Melkisedek in bwele-e tubu iri Abraham.
HEB 7:10 Libai basahan bwe le badeh, Melkisedek ndruni Abraham udu san, arile iy udu ndra bolo oda tubun Abraham kahis, udu bada len Abraham edeu iri lakou rayah ili ta Melkisedek. Eme ma idoh leheya taha ta Melkisedek badeh, pris randrah labai ja, ma iy udu bwele-en labai ja tiri pris badu boho kamen ta Libai.
HEB 7:11 Mwena mene iri lau mwan ma badih badu Isra-el akohok kandriyen malen ta Moses. Kandriyen malen nane asehek i buku doh: Iri lau badu boho kamen ta Libai le badeh, kamekes gok ta pris. Arile, i buku gok tiri pris badu boho kamen ta Libai winiyan bwidi iri lau mwan ma badih asahan mwasin labai, i buku sah handru Kindrei asehek ta pris ari ja kameh asahan hamon? I buku sah handru pris doh kameh i buku le Melkisedek? I buku sah iy winiyan bala buku Aron bwe?
HEB 7:12 Arile kandriyen malen ta Moses nane doh winiyan basebenei iri mwan ma badih asahan mwasin ta budon ta Kindrei bwe. Eme ma Kindrei atehei pris ari ja, iy i randrah labai, ta akohok kon ta pris bwena. I buku Kindrei akohok pris ari ja, kandriyen malen ta Moses nane doh ale kameh i randrah labai ja.
HEB 7:13 Iy ndramak nane Kindrei asehek iy kameh asahan pris, badeh, badu boho kamen ari ja. Oro ari badu boho kamen nane doh bamekes se gok ta mada koto-ok bwena i buku pris bwe.
HEB 7:14 Taha ndratanan ai, Laban tataha badeh, iy asahan boho kamen ta Juda. Eme Moses mene basehek se sare boho kamen nane doh kameh iri asahan pris bo-oh.
HEB 7:15 Handru, iri pris badu boho kamen ta Libai winiyan basebenei mwan ma badih asahan mwasin ta mada Kindrei bwe. Kati sahou dah aleu mara-ei labai, buku taha abudon ta pris ari nane doh kameh asahan i buku le Melkisedek.
HEB 7:16 Iri Libai asahan pris, tasah kandriyen tiri malen asehek i buku aliy. Arile, ndramak asahan pris i buku le Melkisedek, nyamu kohan badeh, boto-on labai udu le buku doh, eme bwidi iy asahan pris.
HEB 7:17 Kindrei asehek i tan i buku doh: “Ou kameh asahan pris ta udu le buku doh, in hamon ta gok ta pris ari mene nyaran Melkisedek.”
HEB 7:18 Sahou dah leheya taha i buku doh: Kindrei ndrakahei kandriyen malen ta Moses bwena mene ndra-au, tasah kandriyen malen doh winiyan basebenei taha bwe.
HEB 7:19 Iy babwidi ari lakou basahan bala mwasin bwe. Eme ma Kindrei sihi madasan rasan ja, idoh udu mwasin ja ta kandriyen malen. Taha atondrok madasan doh, eme ta madasan le doh, taha kameh winiyan ala mirihik ta Kindrei.
HEB 7:20 Na len Kindrei atehei ndramak nane asahan pris i buku le Melkisedek, iy batehei iy bala laleyah bwe. Iy asehek sahou badu loken handru ano iy atehei iy ili aliy. Iri pris bwena bala buku aliy bwe.
HEB 7:21 Eme Kindrei le tandrakan, ano iy atehei Jises asahan pris. Udu bolo buk ndrabun ta Kindrei asehek i buku doh: “Laban ndratandrakan, ‘Ou kameh asahan pris ta udu le buku doh,’ eme iy winiyan batubuni budon tan ja bwe.”
HEB 7:22 Tasah ta idoh, taha winiyan atanan, sahou randra le Jises ndratawiy ndrahis, idoh mwasin labai. Iy udu bwele-en ja ta sahou randra le ta Moses bwena mene. Tasah, Jises amwenen kameh atondrok sahou randra le ha-un nane doh.
HEB 7:23 Mwena mene iri lau solo-an asahan pris, tasah iri amak, eme ma pris rayah ja akohok kon tiri nane ndramak.
HEB 7:24 Arile Jises iy ta udu le buku doh, eme gok tan i buku pris, ari ndramak ja winiyan bakohok ndrahunen bwe.
HEB 7:25 Eme ma, are lau iri ndrala mirihik ta Kindrei badeh, an le bwele-e boto-on ta nyara Jises, iy winiyan sebenei koha iri ta udu le buku doh. Tasah kohan badeh, ta udu le buku doh, ma bolo len mari iy asolom i ta Kindrei ta aseben iri.
HEB 7:26 Jises doh, iy tinan tiri pris. Iy le ari winiyan sebenei taha. Iy ndrabun labai; iy ari budon ndra-in bwe; ma iy ndra nyikilikin labai ta mada Kindrei. Eme Kindrei atehei iy udu len labai ja tiri lau ta amekes iri kandriyen ndra-in. Ma iy andrei iy iu ili loken ili kandrah, ma atehei nyaran ndra tinan labai.
HEB 7:27 Len ari buku ari, gok tiri pris rayah ta adi iri lakou buku bulumakau i ta salom. Ma bwena badeh, iri amekes salom ta ruwani kandriyen ndra-in tiri amwenen iu. Ano ja, iri amekes salom ta ruwani kandriyen ndra-in tiri lau mwan ma iri badih marakon. Arile Jises bamekes bala buku iri amekes doh bwe. Iy amekes salom badeh, san rasan le, iy atehei kohan le amwenen ili ta Kindrei.
HEB 7:28 Kandriyen malen ta Moses ta akohok ndramak asahan tinan tiri pris, iri akohok ndramak nyamun bwe, ma iy ta amekes kandriyen ndra-in. Arile sahou ma tandrakan ta Kindrei badeh, asahan hamon labai ta kandriyen malen ta Moses. Eme ma sahou nane doh, atehei nadun asahan tinan tiri pris handru. Iri gok mari Kindrei aso-ok iy kamekes, iy bwidi marakon ndrano, ma ndra mwasin le ai.
HEB 8:1 Eme ta kati sahou nane dah, taha ndrasehek i buku doh: Tinan tiri pris tataha udu aliy, eme iy ndrala ndramanyah udu loboho limen salin ta koyeu ta kabin badu kandrah.
HEB 8:2 Iy amekes gok i buku tinan tiri pris udu bolo asiu ndrok ta Kindrei udu kandrah, asiu handru ta Kindrei. Asiu doh, iri lau batutuniy bwe, Laban le ari tutuniy.
HEB 8:3 Iri tinan tiri pris marakon badeh, gok tiri ta atiye ndramas, ma ta adi iri lakou buku bulumakau i ta salom ili ta Kindrei. Eme ma Jises kamekes iri lakou doh ale.
HEB 8:4 Buku iy kudu kon munyak dah, iy winiyan basahan pris bwe. Tasah iri pris ado aliy bwena, iri ndradeu ndramas solo-an labai ndrala ta Kindrei, i buku le kandriyen malen ndrasehek.
HEB 8:5 Gok tiri pris mene iri amekes in hamon ta koroha malawin le; lakou handru udu kandrah. Idoh i buku le bwena mene Moses alokou ta atah asiu balei le badeh, Kindrei batanau iy i buku doh: “Ou an hamon le ta koroha malawi tarou mene jo leheya i tam udu bwele-e mandrei.”
HEB 8:6 Arile idah, Jises ndrateu gok i buku pris udu bwele-en labai tiri rayah ja. Tasah, iy ndrala buku ndramak ta ere le alih ta sahou randra le ha-un, nane Kindrei amekes hawe iri lau. Sahou randra le ha-un ja doh ere bwele-en labai ja ta sahou randra le bwena mene Kindrei edeu i ta Moses. Tasah, iri lakou mwasin asahan ta sahou tandrakan ha-un badeh, udu bwele-en labai ja tiri lakou mene asahan ta sahou tandrakan malen.
HEB 8:7 I buku sahou randra le mwena kudu mwasin, idah nane Kindrei winiyan bamekes ari ja bwe.
HEB 8:8 Arile Kindrei ndrasilahei ndra-in tiri lau tan amwenen, eme ma iy asehek: “Jo Laban asehek, len eme kameh, jo amekes sahou randra le ha-un hawe iri lau badu Isra-el ma iri Juda.
HEB 8:9 Idah kameh winiyan bala buku sahou randra le mene jo amekes hawe tubu iri mwena mene bwe. Eme jo tawi mine iri, ma sirini iri ado bolo kon Ijip ame len, arile iri ba-en hamon ta sahou randra le jo mene asehek hawe iri bwe, eme ma jo winiyan banuhun iri ja bwai.
HEB 8:10 Jo Laban, jo kameh asehek sahou randra le dah hawe iri lau badu Isra-el na len eme: Jo kameh atehei kandriyen tek ili bolo budon tiri, ano kameh jo torowenei iri sahou tek udu bwele-e ade iri. Jo kameh asahan Kindrei tiri, eme iri kameh asahan iri lau mwan ma badih tek.
HEB 8:11 Udu bolo len doh kameh ari ndramak winiyan baleheya ari nadu tinen bwe, o ari ndramak winiyan basehek sahou hawe lowan bwe, anya, ‘Aha katanan Laban.’ Tasah, bolo len doh kameh lau marakon atanan jo, udu ndra bada iri nadu bwisik ili ano tiri lau alon.
HEB 8:12 Jo kameh mani kandriyen ndra-in tiri, ma jo winiyan babudon kandriyen ndra-in tiri ja bwe.”
HEB 8:13 Kindrei tiye ta sahou randra le “ha-un.” Eme ma, ta sahou doh, iy bwidi sahou randra le ari mene, eme ndra malen. Ma lakou asahan malen ma amu-uk, kameh udu sese, ano ma iu mara-ei.
HEB 9:1 Sahou randra le ma bwena mene badeh, iri kandriyen ta atudun nyaran udu aliy, eme ma iri bwidi ndrahune lau ta atudun nyaran, na mine iri amwenen.
HEB 9:2 Iri tutuni asiu balei i loken, iri apwai bolon ili la-uh na kolau tinan. No-on ranah ili manan doh iri aloh kon ndrabun. Udu bolon badeh, lakou ari ta ndrahune sun ere aliy, ma sau hawe jabi ramen ta adeu salom i ta Kindrei.
HEB 9:3 Bolon udu alih hamon ta kolau tinan nane doh iri aloh ndrok ndrabun ndrabun labai ta mada Kindrei.
HEB 9:4 Udu bolo asiu hamon nane doh iri atehei mada koto-ok ta asun lakou manahu buburen, hawe bwisi sahou randra le iri bwidiy na kei, ano iri tubuluhiy na bek nyikilikin. Udu bolo bwisi sahou randra le doh badeh, sabok iri amekes na bek nyikilikin udu aliy, ma bolo sabok doh, nyamon iri aloh mana udu bolon. Bolo bwisi sahou randra le doh ale kandro ta Aron nyabun ma sisinen ateh ja ere aliy, hawe bek malahan ma lusi, Kindrei torowenei sahou randra le ta batanau ma ronoh udu aliy.
HEB 9:5 Udu bwele-e bwisi lakou nane doh, iri bwidi lakou la-uh, kone uru buku angelo. Uru doh leheya lomada Kindrei i buku iy udu bwele-e bwisi lakou doh. Udu bahandra koroha bani uru, kon ta leheya tikisiy ta Kindrei udu aliy. Kon doh ta toboroya ndra ta mani kandriyen ndra-in tiri lau iu. Arile, na dah, jo winiyan basihidi kati iri sahou marakon doh bwai.
HEB 9:6 Iri bwidi lakou marakon udu ndrahune iri ano. Len marakon, iri pris ala bolo asiu ranah ili manan, iri aloh kon ndrabun, ta amekes gok ta atudun Kindrei.
HEB 9:7 Arile, tinan tiri pris le winiyan ili bolo asiu ndrok ndrabun ndrabun labai nane doh. Buku iy babwese ndraye bulumakau o sipsip bwe, iy winiyan bala bolo asiu ndrabun doh bwe. Iy ili bolon san rasan le ta bolo jaha ari, ma ndra udu minen ta salom tan amwenen, ma ta salom tiri lau nane amekes kandriyen ndra-in, arile iri bala tanan ta idoh kandriyen ndra-in bwe.
HEB 9:8 Ta kandriyen doh, eme ma Malawin Ndrabun leheya taha i buku doh: Buku asiu balei bwena mene ales kahis, ma amekes gok udu aliy kahis le, san nane ta ala mada Kindrei ta ala bolo asiu ndrabun handru doh badeh, basak bwe le.
HEB 9:9 Lakou mene asahan bolo asiu ndrok ndrabun ndrabun labai, idoh leheya sahou sokek, na idah eme tataha. Udu bolo asiu ta Kindrei doh, iri pris adeu iri ndramas solo-an ili ta Kindrei, ma iri ale adeu salom solo-an ili tan. Arile, iri lakou doh winiyan babwidi ndrine iri o budon tiri lau ta atudun Kindrei bwe. Eme ma iri winiyan baruwani maha-an mene iri atona ta iri kandriyen ndra-in iri amekes bwena bwe.
HEB 9:10 Tasah iri ndramas ma salom solo-an doh, ta nyamon, ta gwa ta a-un, ma iri lakou solo-an ta anyu. Iri kandriyen doh ta bada lau le, ta iri ka-en hamon ta aliy, winiya le len ta Kindrei kameh baramekes iri lakou marakon amwenen ma i ha-un ja.
HEB 9:11 Arile Krais ndrame ndrasahan tinan tiri pris ta iri lakou mwasin nane ndrame tataha. Iy ili bolo asiu balei handru ta Kindrei udu kandrah. Asiu balei doh ja, mwasin labai ta asiu balei tiri mwena. Asiu balei badu kandrah nane doh, iri lau bamekes na mine iri bwe, tasah iy badu kon munyak dah bwe.
HEB 9:12 Iy ili bolon alih nane ndrabun ndrabun labai en, iy bakohok ndraye ari me ma bulumakau ta adeu salom i ta Kindrei, bwe. Iy amekes salom badeh, san rasan le, iy atehei kohan ma ndrayen amwenen ili ta Kindrei. Kohan ma ndrayen doh winiyan bano bwe, eme ma, iy winiyan sebenei taha ta udu le buku doh.
HEB 9:13 Ndraye iri me ma bulumakau mwan, ma hawe koloweh ta nadu bulumakau badih nane iri ndrasulumwiy ndrandrakak, iri ame toboroya koloweh hawe ndra doh ili bwele-e iri lau nane basikine ndraka-an tiri ba-au bwe. Iri amekes i buku doh ta bada iri le kameh asahan ndrabun, ma ari ndraka-an bwe.
HEB 9:14 Arile, ndraye Krais doh udu bwele-en labai ja, ta ndraye me ma bulumakau. Iy atehei kohan mara-ei amwenen ili ta Kindrei i nyara salom. Eme ma ndrayen doh basikine ndraka-an ta bada taha le bwe, iy sikine taha mara-ei handru, ma ndrine taha batona maha-an ja ta iri ndra-in mwena mene taha amekes, bwe. Ma iy tolowei iri kandriyen solo-an, taha amekes laleyah, ari kohan handru amwenen bwe. Eme ma taha katawiy kihis gok ta Kindrei doh, kohan handru udu aliy. Tasah, Krais ari ndra-in bare tan bwe. Bwe labai. Ma na boto-on ta Malawin Mwasin, iy amekes gok doh kameh ta udu le buku doh.
HEB 9:15 Ta katin le doh, Jises ere le alih ta amekes sahou randra le ha-un doh abadok. Iy ndramak ta akunoh taha lau ame hamon ja, ma tolowei iri ndra-in marakon iri mene amekes mwena udu ndra bada sahou randra le ma bwena mene udu aliy kahis. Iy amekes tiri le lau nane Kindrei aloh iri, ta iri winiyan an hamon tan, ma ta iri winiyan akohok kohan doh mwena mene Kindrei tiye ta edeu ili ta nadun iri, ma ta iri kameh are mwasin ta udu le buku doh.
HEB 9:16 Buku ari ndramak iy tanan iy kameh imek, ma iy tiye ta are lau le winiyan akohok iri lokowan, iy luhi o torowenei nyara iri ma saba lakou handru iri akohok. Idoh i buku sahou randra le. Udu hamon ja, buku nadun anya ki-in hamon ta sahou randra le, ta akohok iri lakou ta taman, iri lau badeh katana iri mwena ta taman ndramak. Ano iy barakohok.
HEB 9:17 Tasah, sahou randra le taman asehek doh, iy udu ndra loken iy bamak bwe le, idoh sahou handru, arile lau ba-en hamon ta aliy bwe le. Udu winiya ndramak imek labai, iri bara-en hamon ta aliy ai.
HEB 9:18 Eme ta idoh le, kandriyen malen ta Moses mwena mene iri adai me o bulumakau, ano asolou ndrayen ta amekes sahou randra le tiri kabadok.
HEB 9:19 Moses asehek iri sahou batanau, ma kandriyen malen ili tiri lau, ano iy andrei ndraye nadu bulumakau ma me, hawe gwa, ma lami sipsip saraman bawei i bada andra kei ari iri aloh hisop. Iy eme tahiy ili bolo ndra, ano iy toboroya ili bwele-e buk ndrabun ta kandriyen malen, ma ili bwele-e iri lau.
HEB 9:20 Iy asehek i buku doh, “Ndra dah ta sahou tandrakan randra le ta Kindrei, iy batanau ta aha ka-en hamon ta aliy.”
HEB 9:21 I buku le ma mwena mene, Moses toboroya ndra ili bwele-e asiu balei ta Kindrei, ma ili bwele-e iri lakou marakon nane iri akohok ta atudun nyara Kindrei na aliy.
HEB 9:22 Lakou marakon doh handru. Udu bahandra kandriyen malen tiri bwena, mirihik iri lakou marakon badeh, ndra le sikine iri. Eme ma kandriyen ndra-in tataha kameh Kindrei maniy. Buku ndraye iri bulumakau o me bamou bwe, Kindrei winiyan batalou kandriyen ndra-in tiri lau iu bwe.
HEB 9:23 Iri lakou marakon udu bolo asiu balei ta Kindrei, idoh malawi le iri lakou marakon in kandrah, ma taha tanan, ndraye bulumakau ma me le sikine iri lakou doh. Arile iri lakou badu kandrah ja sakalawi iri lakou marakon badu munyak. Eme ma, kandriyen ta sikine lakou badu kandrah, udu bwele-en labai ja ta kon munyak.
HEB 9:24 Krais bala bolo asiu ndrabun nane lau atah na mine iri amwenen bwe, idoh malawi le asiu ndrabun handru ta Kindrei udu kandrah. Iy iu ili bolo kandrah amwenen. Iy ndrala mirihik hawe Kindrei, iy asehek taha i tan ma iy amekes gok ta aseben taha ale.
HEB 9:25 Tinan tiri pris ili bolo asiu ndrok ndrabun ndrabun labai ta bolo jaha marakon. Iy bakohok ndrayen amwenen bwe, iy ili hawe ndraye iri me o bulumakau. Pris doh edeu lakou san solo-an labai, arile Krais iu ili kandrah, ta iy amwenen ili bolon ta nyara salom san rasan le, iy bala buku iri pris ala san solo-an bwe.
HEB 9:26 Buku iy amekes san solo-an, idah kameh iy kabwese maha-an san solo-an labai, udu ndra bada len Kindrei amekes kon munyak asahan eme ano dah. Arile, na dah taha ndratanan, Krais ndrame kon munyak san rasan le ta edeu iy le amwenen ili ta Kindrei i nyara salom ta talou iri kandriyen ndra-in tataha iu.
HEB 9:27 Lau marakon kameh amak san rasan le, ano kameh iri asahan ta len ta sahou.
HEB 9:28 I buku le Krais amwenen atehei iy san rasan le i nyara salom ili ta Kindrei ta talou iri kandriyen ndra-in ta lau solo-an. Hamon kameh iy eme kon munyak ja. Arile, iy eme ta bwese ndra-in tataha ja bwe. Iy eme doh ta aseben ma ta akohok iri lau nane atondrok iy, ame hamon hawen.
HEB 10:1 Kandriyen malen ta Moses doh malawi le iri lakou mwasin hamon kameh eme. Arile, kandriyen malen nane doh malawin bala mwasin bwe. Tasah, kandriyen malen batanau i buku doh: Iri pris badeh, kamekes salom ki buku le ta jaha mari. Arile, are lau iri anya kame mirihik ta Kindrei ta san ta salom, salom nane doh winiyan babwidi iri lau ame asahan mwasin ta budon tan ta jaha mari, bwe.
HEB 10:2 Buku kandriyen malen winiyan bwidi iri lau asahan mwasin handru, badeh iri pris samekes salom ja ai. Buku Kindrei ndratolowei kandriyen ndra-in tiri lau nane ame bolo asiu tan, ma na salom rasan le iy bwidi iri ndra bele, iri kameh winiyan batona maha-an tiri kandriyen ndra-in udu ndrine iri ja bwe.
HEB 10:3 Arile, salom asahan doh ta iri lau marakon kanyolom ma kabudon kandriyen ndra-in iri amekes udu bolo jaha ari ari.
HEB 10:4 Tasah, ndraye bulumakau hawe ndraye me winiyan basikine iri kandriyen ndra-in ba-au bwe.
HEB 10:5 Eme ma Krais eme bolo kon munyak, iy asehek i buku doh i ta Kindrei: “Ou baso-ok kandriyen ta asun lakou ta salom, hawe adeu ndramas ta salom bwe, arile ou ndrabwidi badak ndrame awas.
HEB 10:6 Ou badeh, basekesek ta asun iri bulumakau hawe me ma buruwen ili bwele-e mada koto-ok i nyara salom ta sikine iri kandriyen ndra-in iu bwe.
HEB 10:7 Ya, jo asehek i buku doh, ‘Kindrei tek, jo asah kada-ah ta amekes iri gok ou aso-ok jo kamekes, i buku le iri ndratorowenei amwenen ndra-en bolo buk ndrabun.’”
HEB 10:8 Ma bwena iy asehek i buku doh, “Ou baso-ok kandriyen ta asun lakou ta salom, hawe adeu ndramas ta salom bwe. Ma ou ale basekesek ta asun iri bulumakau ma buruwen ili bwele-e mada koto-ok i nyara salom ta sikine iri kandriyen ndra-in iu bwe.” Handru, kandriyen malen asehek ta iri kamekes iri salom ki buku doh, arile Kindrei basekesek ta iri lakou doh bwe.
HEB 10:9 Eme Krais asehek ja, “Jo asah kada-ah ta amekes iri gok ou aso-ok jo kamekes.” Eme ma Kindrei andrei iri kandriyen ta asun lakou i buku iri salom malen iu, eme iy atehei Krais akohok kon tiri i nyara salom.
HEB 10:10 Taha ndrasahan ndra buku iri lau ndrabun, tasah Krais anuhun Kindrei, ma iy atehei badan amwenen i nyara salom san rasan le ma kabwe.
HEB 10:11 Iri pris amekes gok tiri len marakon, iri tawi kandriyen ta asun lakou i buku salom badeh, kahis. Arile iri salom doh winiyan basikine iri kandriyen ndra-in tataha ba-au bwe.
HEB 10:12 Arile Krais badeh, atehei iy i nyara salom ili ta iri kandriyen ndra-in, eme ma gok tan i buku pris asahan mwasin labai ta udu le buku doh. Ano iy iu ili manyah udu loboho mine Kindrei salin.
HEB 10:13 Eme iy kameh udu doh udu gwek winiya le Kindrei baratehei iri lau ta ato-ou kaliu hawen ala ado bahandra katin.
HEB 10:14 Ta salom tan ari le, iri lau Kindrei aloh iri ndra tan, iy eme ndrasikinei kandriyen ndra-in tiri marakon ndra-au, ma iy ndrabwidi iri ndrasahan mwasin labai ta are le buku doh.
HEB 10:15 Malawin Ndrabun ale asehek tataha ta nyala iri lakou dah. Iy asehek ma mwena i buku doh:
HEB 10:16 “Jo Laban, jo kameh asehek sahou randra le dah hawe iri na len eme: Jo kameh atehei kandriyen tek ili bolo budon tiri, ano kameh jo torowenei iri sahou tek udu bwele-e ade iri.”
HEB 10:17 Malawin Ndrabun tiye ja: “Jo kameh mani ndra-in tiri, ma jo winiyan babudon kandriyen ndra-in tiri ja bwe.”
HEB 10:18 Kindrei ndramani iri kandriyen ndra-in tataha mari, eme ma taha winiyan bamekes gok ta salom ta talou kandriyen ndra-in ja bwe.
HEB 10:19 Ado nadu tine, ndraye Jises le badeh, ndrasikinei iri kandriyen ndra-in tataha ndrano ndra-au, eme ma taha sanoh ta ala bolo asiu ndrok ndrabun, ndrabun labai ta Kindrei.
HEB 10:20 Iy ndrasihi madasan ha-un ndrame tataha, san doh Jises amwenen, iy mene asahan eme awas. Eme san ha-un doh kameh winiyan andrei taha ala asos kona kolau laba tinan nane udu madasan. Kolau nane doh leheya i buku oda Jises amwenen.
HEB 10:21 Tinan labai tiri pris tataha udu aliy ta atondrok asiu ta Kindrei.
HEB 10:22 Ta iri lakou doh le, taha ale kame mirihik ta Kindrei hawe ndrine taha kirek tiri budon mwasin. Taha katawi ndrine taha kudu mwasin, tasah ndraye Jises badeh, ndrasikinei lomondra ma iri kandriyen ndra-in tataha ndrano ndra-au, ma Kindrei ndrasikine bada taha na gwa tan lewen.
HEB 10:23 Taha ndrasehek iri budon tataha ndrame len, eme ma taha atondrok iri lakou mwasin nane Kindrei anya kedeu keme tataha. Taha katawi kihis iri lakou doh, ma taha sanoh ta aliy. Tasah, taha ndratanan, lakou marakon Kindrei ndratandrakan ta amekes o edeu, idah kameh, iy bwidiy handru.
HEB 10:24 Taha ale kabudon iri lau mwan ma badih rayah ta Kindrei, ma taha kasilah san mwasin ta aseben iri ta aso-ok iri rayah ja, ma ta amekes kandriyen mwasin ili tiri lau.
HEB 10:25 Taha samani kandriyen tataha ta atukum taha marakon a le se, ta atudun Kindrei. Taha sala buku iri lau rayah ndramekes, arile taha kabadok ta amekes ndrine iri lau ta Kindrei kudu mwasin. Tasah, taha ndratanan ta len ta Laban anya keme hamon ja badeh, ndrame mirihik.
HEB 10:26 Buku taha ndratanan sahou handru ta Krais, arile udu ja, budon tataha boto-on labai anya kili hamon tiri kandriyen ndra-in, taha winiyan bamekes ari salom ta sikine iri kandriyen ndra-in iu ja bwe.
HEB 10:27 Are lau iri ala hamon ja ta kandriyen ndra-in, iri ari madasan ta atobwak ja bwe, iri le kameh anoh ndra-in labai ta atondrok len ta sahou ta Kindrei. Tasah, iy ibolosen, ma losen tan doh kameh i buku jih anya nyarahan labai udu le buku doh ta asun iri lau anya kamekes bahun hawen.
HEB 10:28 Buku uru lau la-uh, o, taloh ndranyolom ari ndramak, iy amekes lakou handru, ma iy ba-en hamon ta kandriyen malen ta Moses mene batanau bwe, iy ndramak nane doh, iri winiyan batikisi iy bwe, iri adi iy imek iu.
HEB 10:29 Ya, taha winiyan atanan handru, are mwan o badih atehei konan i ta Nadu Kindrei, iy kameh akohok maha-an tinan labai. Tasah, ndraye sahou randra le ta Krais mene bwidi ndramak doh asahan ndrabun. Arile, iy ndramak nane doh ja amekes ndraye sahou randra le i buku ari lakou ndra-in laleyah. Ma iy ale amekes kandriyen ndra-in handru, ili ta Malawin Mwasin ta Kindrei, iy nane tikisi taha.
HEB 10:30 Taha ndratanan Kindrei tataha, iy ndrasehek i buku doh: “Jo kameh atehei maha-an ili tiri, ma jo konohei saba kandriyen nane iri amekes.” Buk ndrabun ndrasehek ale: “Laban kameh atehei iri lau tan amwenen ala ta mada sahou.”
HEB 10:31 Taha kanoh Kindrei, iy boto-on labai ma kohan ta ere le buku doh. Kora-on iy kandruni kati ndra-in tataha, ta adeu taha ala ta mada sahou.
HEB 10:32 Aha kabudon kili hamon ta len bwena mene ja, len mwena mene aha ndrakohok sun ta Kindrei, ma aha ndratanan, idoh sahou mwasin ta Krais. Na bolo len doh, iri lau ta ato-ou kaliu i ta Kindrei badeh, adeu maha-an solo-an i ta budon taha, ma aha bwese sisi-in solo-an. Arile aha ales boto-on.
HEB 10:33 Len rayah mene iri atehei aha ales are alih tiri lau, ma iri lohani aha, ma iri adeu maha-an ewek taha. Ma len rayah ja, aha ales are kona iri lau, ta aseben iri ta bwese maha-an hawe iri, buku le mwena mene aha bwese.
HEB 10:34 Aha amekes mwasin ili tiri lau ado bolo asiu lulik. Ma iri lau rayah akohok lokowa aha laleyah iu, arile aha babolosen ta aliy bwe, aha sekesek. Aha amekes i buku doh, tasah aha ndratanan lakou taha mwasin udu aliy. Iri lakou doh udu bwele-en labai ja tiri lakou badu munyak, ma iri kameh winiyan bandra-i bwe ta udu le buku doh.
HEB 10:35 Aha sanoh! Buku aha ales boto-on are le ta budon taha, idah kameh aha winiyan akohok sihine aha tinan labai.
HEB 10:36 Aha sawoyah ta atondrok. Buku aha amekes i buku doh, aha kameh winiyan bwidi iri gok Kindrei aso-ok. Ano ma aha kameh akohok iri saba lakou iy ndratandrakan ta edeu ewek taha.
HEB 10:37 Buku le buk ndrabun ndrasehek: “Mirihik ai, are lau kameh eme, iy kameh eme hamon handru! Winiya bala luwen bwe.
HEB 10:38 Arile, iri lau mwan ma badih tek mwasin, iri atehei budon tiri in tek, eme ma koha iri kameh ta ere le buku doh. Ma buku iri tubuni kona iri eme tek, o, iri batehei budon tiri bame tek ja bwe, ndrinek kameh winiyan basekesek tiri bwe.”
HEB 10:39 Ya, taha bala buku iri lau rayah ale ndratobwak ndra-au, ma ndra-au kede-eh, bwe. Arile, taha a buku le iri lau atehei budon tiri in ta Kindrei, idah kameh taha winiyan bamak bwe, ma taha kameh ta are le buku doh.
HEB 11:1 Kandriyen ta atehei budon ili le ta Kindrei i buku doh: Iri lakou nane taha atondrok Kindrei anya kedeu keme tataha, taha katawiy kihis kudu ndrine taha. Ndrine taha ndratanan, iri lakou marakon nane doh udu aliy handru, arile mada taha amwenen banyolom bwe.
HEB 11:2 Budon ta tubu taha iri handru in le ta Kindrei, eme ma bwidi iy sekesek tinan labai.
HEB 11:3 Taha atehei budon tataha in ta Kindrei, eme ma taha ndratanan, Kindrei badeh, bwidi kandrah hawe munyak, na sahou batanau tan le amwenen. Lakou mari taha ndranyolom, Kindrei amekes na lakou taha winiyan banyolom na mada taha bwe.
HEB 11:4 Ebol atehei iri budon tan mara-ei ili le ta Kindrei, eme iy edeu salom ili tan. Kindrei aso-ok salom ta Ebol labai, iy baso-ok salom ta Ken bwe. Ebol ndramak ai, arile budon tan tinan labai udu ta Kindrei, eme ma Kindrei aloh iy ndramak mwasin labai ta madan, ma iy aso-ok ndramas tan ale. Kandriyen ta budon ta Ebol le doh, leheya taha ta atehei budon tataha ili le ta Kindrei.
HEB 11:5 Inok atehei iri budon tan mara-ei ili le ta Kindrei le ari, eme bwidi iy bamak bwe. Iy udu ndra loken badeh, iy bwidi Kindrei sekesek, eme ma Kindrei andrei iy ma buruwen iu ili hawen ili kandrah. Ta idoh le, iri lau badu kon munyak banyolom sese badan bwe.
HEB 11:6 Ari ndramak winiyan babwidi Kindrei basekesek bwe, i buku iy batehei iri budon tan mara-ei handru bala tan bwe. Buku are lau anya kili hawe Kindrei badeh, iy katehei budon mara-ei kili tan, tasah iy Kindrei handru udu aliy, ma iy edeu ndramas ili tiri lau asilah iy handru.
HEB 11:7 Nowa atehei iri budon tan mara-ei ili le ta Kindrei, eme iy i tanan iri saba lakou iy banyolom bwena bwe kameh asahan hamon. Iy anuhun boho Kindrei, iy eme bwidi ndron ra-ei ta aseben iy, udun hawe nadun oro mara-ei ala bolon. Ta budon tan i ta Kindrei le badeh, iy atehei iri lau marakon badu kon munyak ala ta mada sahou, ma Kindrei aloh iy lau mwasin labai ta madan, tasah ta kandriyen tiri budon tan mara-ei ili le Kindrei.
HEB 11:8 Abraham atehei budon tan handru in ta Kindrei, eme ma bwidi iy anuhun boho Kindrei aloh iy ta ili kon ari nane doh, Kindrei ndratandrakan ta edeu ili tan. Iy ruwani kon tan amwenen, iy bala tanan saba kon handru kameh iy ili aliy bwe.
HEB 11:9 Abraham atehei iri budon tan mara-ei handru, eme ma iy manyah i buku ndramak badu kon leheleh udu bolo kon ta tandrakan nane doh. Ndrahunen badeh, udu bolo balei, i buku le Aisik uru Jekop. Uru akohok tandrakan ta Kindrei i buku le Abraham le mene akohok.
HEB 11:10 Abraham amekes i buku doh, tasah iy atondrok kon tinan labai nane doh, Kindrei le abudon, ma iy ndratahiy na iri lakou boto-on labai, ma winiyan bandra-i bwe.
HEB 11:11 Abraham ndrasahan alon kabwe, ma Sara ale winiyan bato-ou nah bwe, arile Abraham atehei budon tan mara-ei handru udu ta Kindrei le ari, iy ta amekes iri lakou marakon badeh, in hamon le tiri tandrakan tan mwena. Eme ma Sara tuwi nadun mwan.
HEB 11:12 Handru, Abraham ndrasahan alon ai, ma iy ari nadun bwe. Ma iy ale mirihik ta imek, arile lundriyen iri badeh, ndrasahan solo-an labai, i buku le iri ndrau anya udu kandrah, ma i buku le on udu bada babi, ari ndramak winiyan bandromwei bwe.
HEB 11:13 Iri lau marakon nane atehei budon tiri in ta Kindrei winiya le len iri amak. Iri mene are ndra kon munyak, arile iri bandrei saba lakou nane Kindrei tandrakan ta edeu i tiri bwe. Iri sekesek labai ili tiri lakou nane udu ndra len, eme iri asehek sahou randra le i buku doh, “Ahi badu dah bwe, ahi badu kon leheleh labai, ahi ame kon munyak dah ta manyah le.”
HEB 11:14 Buku taha anuhun iri lau asehek sahou i buku doh, taha ndratanan ai, iri lau kede-eh asilah munyak tiri handru.
HEB 11:15 Buku iri abudon ta munyak tiri are aliy bwena, iri badeh, winiyan ala hamon a munyak tiri ja.
HEB 11:16 Arile, koha iri ndrapwe ta ala kon mwasin labai ja udu kandrah. Ta idoh le, Kindrei bwilin bama ta iri aloh iy Kindrei tiri bwe. Tasah, iy ndranyuri kon tinan labai ta iri ala ado aliy.
HEB 11:17 Abraham atehei budon tan mara-ei handru in le ta Kindrei, kabatana Kindrei mene none iy. Kindrei mene tiye Abraham, ta iy katehei nadun Aisik ki nyara salom, eme ma Abraham anya kedeu nadun ari le nane doh ki nyara salom kili ta Kindrei. Handru, Kindrei mene ndratandrakan iy i buku doh, “Lundriyem oro hamon kameh asahan solo-an labai, in hamon ta san ta nadum Aisik amwenen.” I buku iy kidi Aisik, ano iy katehei iy ki buku salom kili ta Kindrei, badeh, iy ndrasani san ta lundriyen oro ta asola ndra-au. Arile, bwe, Abraham badeh atehei budon tan abadok labai in ta Kindrei, eme ma iy anya kedeu Aisik ki nyara salom kili ta Kindrei.
HEB 11:19 Abraham tanan, idah kameh Kindrei winiyan mete-ei Aisik imek, winiyan amak ja. Taha kasehek kundruh kili buku doh: Abraham ndrandrei nadun Aisik imek udu bolo lek ndrame loken ja.
HEB 11:20 Aisik atehei budon tan mara-ei handru in ta Kindrei. Iy ndrala alon labai, iy eme tiye Kindrei ta nyosowani Jekop uru Iso. Ta nyosowan doh, iy asehek ta lakou kameh asahan turu hamon.
HEB 11:21 Jekop atehei budon tan handru in ta Kindrei. Mirihik Jekop anya kimek, iy atehei nyosowan i ta nadu Josep uru ma la-uh, ano iy baramak hamon. Iy tawi iy ales na kandro tan, ma iy atudun nyara Kindrei.
HEB 11:22 Josep atehei budon tan mara-ei handru in ta Kindrei. Mirihik ta iy anya kimek badeh, iy asehek ta hamon kameh iri lau badu Isra-el kameh ruwani Ijip, ma iri au. Ma iy tiye iri ta bwese ndruwin ale ki hawe iri kahiy kili kon Kenan.
HEB 11:23 Tama Moses uru tinen atehei budon turu udu ta Kindrei, eme tine Moses atehei iy, uru ame anyolom iy nadu mwasin ndra-au ai. Eme ma uru ame tone iy amai winiya bun taloh, tasah uru banoh ta uru ba-en hamon ta batanau ta kabin badu Ijip bwe.
HEB 11:24 Moses asahan i lau-en, iy atehei budon tan in ta Kindrei, iy baso-ok ta iri lau aloh iy kadok ta boho kamen ta kabin badu Ijip, bwe.
HEB 11:25 Iy atehei budon tan boto-on labai ta bwese maha-an hawe iri lau ta Kindrei. Iy bwalen ta in hamon tiri kandriyen ndra-in ta sekesek, ta winiyan bado luwen bwe.
HEB 11:26 Moses atehei budon tan i buku doh: Buku iy andrei bwilima ta nyara Mesaya, idoh le kameh udu bwele-en labai ja ta sowa iri lakou marakon badu Ijip. Tasah, iy abudon boto-on labai ta sihinen mwasin kameh Kindrei edeu, eme iy anya kales boto-on kudu le buku doh.
HEB 11:27 Moses atehei budon tan handru in ta Kindrei, iy eme ruwani Ijip, ma iu ili kon rakon ja. Kabin badu Ijip ibolosen i tan, arile iy banoh iy kabin doh bwe. Iy atehei budon tan in ta Kindrei nane doh, i buku iy anyolom iy amwenen, arile taha lau winiyan banyolom iy na mada taha bwe. Eme ma iy ales boto-on labai ta iri none marakon nane Kindrei edeu iy tan.
HEB 11:28 Moses ale atehei budon tan boto-on labai in ta Kindrei, ta iy kameh aseben iri lau tan badu Isra-el. Eme ma iy tiye iri Isra-el ta adi sipsip ta nyamon ta Pasoba, ma katah ndraye sipsip kili mada kou ta asiu tiri. Eme ma angelo ta idi lau amak kameh winiyan badi nadu iri kadok bwe, ma iy kameh winiyan bame mirihik ta asiu tiri Isra-el nane ndra udu aliy bwe.
HEB 11:29 Budon tiri Isra-el handru in ta Kindrei, eme ma bwidi iri adek are gwa ndras aloh Retsi are bilisiu ala bilisiu i buku iri adek are kon soboren. Arile iri lau badu Ijip an hamon tiri Isra-el ame anya kamekes bahun kili tiri, arile iri marakon atuh ma iri amak.
HEB 11:30 Iri Isra-el atehei budon tiri boto-on handru in ta Kindrei, eme iri asar ala ame awudi kowah tinan badu Jeriko, iri amekes na bek. Iri adek ala ame awudi kowah tinan nane doh winiya len ma ndro taloh. Eme ma kowah doh atohou ili andri.
HEB 11:31 Rahap, iy badih ari ta bada belei, arile iy atehei budon tan boto-on handru in ta Kindrei, iy eme aseben uru lau la-uh badu Isra-el mene ala anya kanyolom saba lakou handru udu bolo kon Jeriko. Eme ma iy bamak bwe, bala buku iri lau nane banuhun boho Kindrei bwe.
HEB 11:32 Ya, saba lakou ja kameh jo kasehek? Len winiyan bwai, jo kameh winiyan basehek nyala Gidiyon, Barak, Samson, Jepta, Debit, Samuwel ma hawe iri propet bwai.
HEB 11:33 Oro lau doh atehei budon toro handru in ta Kindrei. Eme ma, oro banoh ta ari bahun bwe, oro adi iri lau solo-an tiri kabin rayah ja amak, oro ale andrei lakou nane Kindrei tandrakan ta edeu i toro. Oro ale ndremenya Kindrei ta atondrok oro, eme ma oro tawi boho iri layon ta winiyan baimon oro bwe.
HEB 11:34 Jih anya laba tinan ma nyarahan labai, eme iri akahei oro ala bolo jih, arile jih basulumwi oro bwe. Iri lau anya kadi oro na bainat, arile oro atobwak au laleyah. Oro nyamu oro bwe, arile udu hamon ja, nyamu oro asahan, ya oro ame asahan boto-on labai ta bahun. Eme ma oro tikahei iri lau ta bahun badu kon rakon ja au.
HEB 11:35 Oro badih rayah badeh, atehei budon toro handru in ta Kindrei, eme ma lowa oro badih nane ndramak, amak ame awas ja. Oro lau rayah mene ala bolo asiu lulik, ma iri lau ta amekes bahun badeh, bwidi bada oro mara-ei andra-i labai, amekes ili ili winiya le oro amak. Tasah, iri lau ta amekes bahun ndratiye toro, buku oro katubuni kona oro kili ta Kindrei, iri kameh winiyan tolowei oro au laleyah. Arile, oro bwale oro ta adeu kona oro i ta Kindrei, eme ma oro aso-ok ta are ndra bolo asiu lulik, winiya le oro amak. Oro abudon anya, oro kameh amak are bolo lek toro ame awas ja, ma oro kameh akohok koha oro mwasin labai ja.
HEB 11:36 Oro rayah ja, iri bobose oro, ma a-um oro na malou sakabuk i bek. Ma oro rayah ja, iri bawei oro na sen, ano atehei oro ala bolo asiu lulik.
HEB 11:37 Oro rayah ja, iri orowei oro na bek ma oro amak. Iri mwetehei oro rayah, iri aso-ei oro rayah na no-o samen madan. Oro rayah badeh, oro adek ala ame, ari asumwe oro bwe, toro lakou bwe. Oro taliye ku-i sipsip ma ku-i me ndra-in i kalawi oro. Iri lau batondrok oro bala mwasin bwe, iri atehei maha-an ma sisi-in ili le toro.
HEB 11:38 Eme ma, oro adek laleyah ala aton ado kon ari lau bado aliy bwe. Asumwe oro udu bolo mandrei solo-an labai, ma oro ado lek udu bolo mandrei ndra bek le, ma oro ado bolo lek laba tinan udu bolo munyak. Ya, oro lau doh mwasin labai ja ta mada Kindrei, ma iri lau badu kon munyak, iri winiyan bala buku oro lau nane atehei budon toro mara-ei in tan bwe.
HEB 11:39 Iri lau mwan ma iri badih marakon doh atehei budon tiri handru in ta Kindrei! Eme ma, iy anya, nyara iri badeh, mwasin handru ta madan. Iri bwena mene ado kon munyak, arile iri bakohok iri lakou mwasin i buku Kindrei tandrakan ta edeu ili tiri, bwe.
HEB 11:40 Tasah, mwena mene Kindrei lowosani lakou ari doh mwasin labai tataha marakon. Eme iy bwalen ta iri lau mwan ma iri badih mwena doh kasahan mwasin kare mwena tataha. Iy aso-ok taha badeh, kasahan mwasin labai hawe iri, ma taha marakon ka le se kakohok lakou nane iy ndralowosaniy tataha.
HEB 12:1 Iri lau mwan hawe iri badih bwena mene awudi taha are le alih i buku asi kandrah, eme iri leheya taha ta kandriyen ta budon tataha kili ta Kindrei. Eme ma taha kamani iri lakou ale tawi taha winiyan basakaliye boto-on bwe, ma taha karuwani iri kandriyen ndra-in marakon ale tawi taha ihis. Eme ma, taha kamekes ndrine taha kabadok ta sakaliye ta akohok lakou mwasin doh, Kindrei ndraleheyani taha sakaliye ta aliy.
HEB 12:2 Taha katehei mada taha kili le ta Jises, i buku le ndramak sakaliye ta nyorei, madan badeh, anyolom ili le bwena tan. Iy le ari kati budon tataha ma bwena, ma hamon kameh iy bwidi kundruh ta iri budon tataha marakon ano, ma udu mwasin labai ja. Iy ndrabwese-ei bwilima ta iri tatahi iy ili bada kei tondreh, arile iy babudon ta aliy bwe, tasah iy tanan hamon kameh iy udu ta sekesek ta iri lakou marakon iy ndrabwidiy. Na idah iy ndramanyah udu bada koyeu loboho mine Kindrei salin.
HEB 12:3 Taha katehei iri budon tataha marakon kili le ta Jises. Iy ales boto-on labai ta iri lau atehei kona iri i tan ta kandriyen ndra-in tiri. Eme ma, taha sawoyah ta asehek sahou ma taha satobwak.
HEB 12:4 Handru, aha amekes bahun ta kandriyen ndra-in iu, arile bahun aha amekes badeh, ndraye aha bamou bwe, ma aha bamak bala buku Krais imek bwe.
HEB 12:5 Buku sah? Sebwe aha ndramani sahou udu bolo buk ndrabun asehek, Kindrei badeh, aloh taha nadun amwenen: “Naduk, buku Laban amekes ari kandriyen ewek tam ta leheya ou, ou sabudon anya, idoh lakou ndra-in. Buku iy edeu maha-an ewek tam ta amekes ou amwenen, ya ndrinem sandra-i sala ta iri maha-an doh.
HEB 12:6 Tasah, ou ndratanam, buku Laban aso-ok ari ndramak, eme kameh iy aseben ta leheya iri kandriyen mwasin i tan. Buku iy andrei ndramak doh i nadun amwenen, iy kameh a-um iy, ta leheya ma batanau iy ta asahan ndramak mwasin.”
HEB 12:7 Handru, Kindrei badeh, aso-ok iri lakou ndra-in doh kasahan tataha, ta amekes taha kamwenen ma taha kado le. Tasah iy amekes kandriyen doh eme tataha i buku ndramak amekes ili ta nadun amwenen. Tama taha iri mwasin, len marakon badeh, iri batanau taha ta iri kandriyen ma lakou mwasin.
HEB 12:8 Kindrei batanau nadun iri marakon, eme buku iy babatanau aha bwe eh, idah aha ndratanan ai, aha badeh, nadun handru bwe. Aha i buku iri nah laleyah badu san.
HEB 12:9 Tama taha iri badu kon munyak, iri batanau taha, eme taha beleben iri kahis. Mwasin ja ta taha mari kala le bahandra tondrok ta tama taha badu kandrah, eme ma koha taha kameh ta udu le buku doh.
HEB 12:10 Tama taha badu kon munyak dah, iri batanau taha sese luluwen bwe, iri amekes i buku iri abudon mwasin. Arile Kindrei batanau taha ta iri kandriyen mwasin ta aseben taha handru, tasah iy aso-ok taha kala ndrabun ki buku le iy.
HEB 12:11 Len ta adeu maha-an eme tataha ta batanau taha, taha basekesek bwe. Ndrine taha atona maha-an labai. Arile, len ta batanau taha marakon ndrano, taha kameh amekes kandriyen mwasin handru ta mada Kindrei, ma ndrine taha kameh udu mwasin.
HEB 12:12 Na idah aha kales kamwenen! Kati aha satotoreh ja!
HEB 12:13 Eme, “Aha kadek san monen.” Ya, i buku ari ndramak iy badek bamwenen bwe, iy kameh edek amwenen ja.
HEB 12:14 Aha marakon kanone ka-en hamon ta kandriyen ta lau marakon kamanyah kare le se. Ma aha kabadok ta an hamon ta kandriyen mwasin ta are mada Kindrei. Buku aha bamekes bwe eh, aha kameh winiyan banyolom Laban bwe.
HEB 12:15 Aha katondrok aha kamwenen, kora-on aha katehei kona aha kili ta tikisiy ta Kindrei mene edeu eme tataha. Tasah, kora-on ari mwan, o, ari badih kamekes kandriyen ndra-in kili buku doh, ma katehei maha-an kewek taha, ma aha kamekes kandriyen ndra-in kili ta budon ta Kindrei. Iri mwan, o iri badih doh, i buku ra-ei kei ato-ou salin nyakadan, ma iy kameh kabwidi kandriyen tiri lau ta Kindrei solo-an labai kandra-i.
HEB 12:16 Mada aha kaleu ta ndramak iy in hamon ta kandriyen ta karei. Kora-on ari ndramak katehei konan kili ta Kindrei, i buku le Iso mene, iy anya kisih nyamon san rasan le, eme iy atehei iri lakou marakon mwasin ta iy winiyan akohok i buku iy kadok, ta iu laleyah.
HEB 12:17 Aha tanan, udu ja iy anya kakohok iri lakou doh kili hamon. Arile taman anya, winiyan bwai. Iso eden san solo-an labai ta akohok nyosowan kili hamon, arile iy ari madasan ja ta amekes ja bwai.
HEB 12:18 Len ta taha ame hawe Kindrei, lakou asahan tataha bala buku asahan tiri lau badu Isra-el bwe, iri mene ala mirihik ta mandrei aloh Sainai. Iri ame ado mirihik ta mandrei doh, iri winiyan anuhun ma atona iri lakou mari doh handru. Eme ma iri anyolom jih taladan ili loken, ma lulik hutu-un tinan labai, ma jor atohou a tinan.
HEB 12:19 Eme ma iri lau marakon badu Isra-el anuhun boho Kindrei badeh, i buku ndrah eden tinan labai, eme bwidi iri anoh labai. Eme ma iri asehek ili ta Moses i buku doh, “Ahi bwale ahi ta anuhun boho ndramak doh ja.”
HEB 12:20 Iri anoh labai, tasah Kindrei mene asehek ili tiri i buku doh, “Buku ari ndramak o me le anya kili bwele-e mandrei kodo-oh, aha kandrei bek, korowei iy kimek ki-iu.”
HEB 12:21 Eme bwidi iri marakon anoh labai ta lakou nane iri anyolom, eme Moses ale asehek, i buku doh, “Jo inoh labai eme bwidi jo totoreh.”
HEB 12:22 Arile, aha bala basahan ta lakou i buku doh bwe le. Aha ndrame ndrasos mandrei ta Sayon, eme aha ala kon tinan ta Kindrei kameh udu le buku doh, kon tinan Jerusalem udu bolo kandrah. Aha ndrame ndrasahan hawe iri angelo ma nyaran bwe, ame atukum ta sekesek.
HEB 12:23 Idah aha ndruni iri nah Kindrei aso-ok iri tinan labai, nyara iri iy ndratorowenei udu bolo buk tan udu kandrah. Eme aha ndrasilahei Kindrei amwenen, iy atehei lau marakon are ta mada sahou. Ma malawi iri lau ale mwena mene ndramak, Kindrei aloh iri lau mwasin, ma iri ndrasahan mwasin labai ta madan.
HEB 12:24 Eme aha ndrasilahei Jises ale, iy le ari adeh amekes sahou randra le ha-un ta Kindrei hawe taha. Eme ma ndrayen le bwidi sahou randra le abadok. Ndrayen doh udu bwele-en labai ja ta ndraye Ebol, tasah ndraye Ebol leheya i buku doh: Ndramak ari kameh kakonohei ndra-in doh. Arile, ndraye Jises bwe. Ndrayen amou ta akunoh iri kandriyen ndra-in tataha mari iu.
HEB 12:25 Bale aha ki-in taha, kora-on aha katunuhun, ma aha ba-en hamon ta boho Kindrei bwe. Tasah, ma bwena mene Kindrei ere bwele-e mandrei Sainai asehek sahou boto-on ili tiri lau badu Isra-el are kabede mandrei doh, arile iri tebelese bohon. Eme ma, na bolo len bwena mene doh, iri winiyan batobwak ma bateleyani ndramas ta kandriyen ndra-in tiri bwe. Na idah, Kindrei udu kandrah, ma iy asehek sahou boto-on labai ja eme tataha. Buku taha atehei kona taha i tan, taha winiyan batobwak ma bateleyani ndramas ta kandriyen ndra-in nane doh bwe, handru en.
HEB 12:26 Kindrei asehek sahou ma bwena badeh, kurutuwe bohon le bwidi kon munyak doh totoreh. Arile, na dah, iy ndratandrakan, “Jo kameh nyokoda kon munyak san rasan ja; kon munyak le bwe, jo kameh nyokoda kon munyak ma hawe kandrah ale.”
HEB 12:27 Sahou doh, “san rasan ja” iy leheya taha i buku doh: Iri lakou bwena Kindrei mene amekes buku kandrah hawe munyak, na idah iy nyokoda, iri lakou ale doh kameh ano, ma winiyan bado ja bwe. Arile iri lakou iy bandrokonya bwe, badeh iri lakou handru badu kandrah, kameh ta are le buku doh, winiyan ba-au bwe.
HEB 12:28 Ya, taha kadeu wurah kili ta Kindrei, tasah taha ndrasahan iri lau ta are bahandra tondrok ari, badeh, winiyan bandrokonya ma babwidiy bandra-i bwe. Taha badeh katudun nyaran ki-in hamon ta kandriyen iy amwenen aso-ok; taha kanoh ma kabeleben iy,
HEB 12:29 tasah, “Kindrei tataha badeh, iy i buku jih ta asun lakou ano iu.”
HEB 13:1 Taha samani kandriyen ta aso-ok nadu tine taha iri rayah ja i san ta nyara Jises.
HEB 13:2 Aha samaniy ta asumon iri lau badu kon leheleh ame bolo kon tam. Aha ndratanan, bwena mene iri lau rayah amekes i buku aliy, ma iri andrei iri angelo rayah ala asiu hawe iri, ma tondrokei iri. Arile, iri bala tanan ta angelo eme bwe, iri anya ndra ndramak awas le ai.
HEB 13:3 Aha kabudon iri lau ta Kindrei rayah ado bolo asiu lulik. Aha kabudon iri, i buku aha ado bolo asiu lulik hawe iri ale. Aha kabudon iri lau ado ta maha-an solo-an, aha katehei aha i buku aha bwese maha-an hawe iri ale.
HEB 13:4 Tasou badeh, lakou ari mwasin handru. Eme ma kandriyen aha amekes ta tasou, badeh, kudu mwasin labai ta mada Kindrei. Kora-on aha amekes ndra-in ili ta budon ta Kindrei. Tasah, aha ndratanan, hamon kameh Kindrei edeu ndramas ndra-in ili tiri lau mwan ma badih amekes kandriyen ta karei, ma iri lau amekes laleyah ta bolo tasou tiri.
HEB 13:5 Mada taha salikis ta luk. Iri saba lakou nane taha ndrakohok ma tataha udu aliy badeh, ndra winiyan ai. Kindrei ndratandrakan, “Jo winiyan bamani aha bwe-en, ma jo winiyan bakahei aha bwe.”
HEB 13:6 Eme ma, taha winiyan amekes budon tataha abadok, ma amekes i buku le ta sahou udu bolo buk ndrabun asehek, “Laban kede-eh iy aseben jo. Jo winiyan banoh bwe. Iri lau kameh winiyan bamekes kandriyen ndra-in bame tek bwe, ma iri winiyan babwidi jo bamani seben ta Kindrei bwe.”
HEB 13:7 Aha samani iri lau ta Kindrei nane a-en mwena taha, iri mene leheya aha ta sahou ta Kindrei. Aha kabudon saba kandriyen asahan ta manyah ma tekedek tiri, ma aha katehei budon taha ki buku le iri.
HEB 13:8 Kandriyen ta Jises Krais badeh, bala randrah bwe, iy i buku le bwena mene, iy i buku le na dah, ma iy ta udu le buku doh.
HEB 13:9 Eme ma aha satehei aha sala bolo iri sahou solo-an, eme ta ariu budon taha, ma aha mani san mwasin ta Kindrei. Kindrei amekes kandriyen mwasin labai eme tataha, ma idoh amekes taha abadok ta a-en hamon tan. Buku taha a-en hamon ta iri batanau ta beleben nyamon solo-an labai, idoh baseben taha ta a-en hamon ta Kindrei bwe. Tasah kandriyen doh, baseben iri lau bwena mene ba-en hamon ta aliy bwe le.
HEB 13:10 Jises Krais badeh, salom tataha. Eme ma iri pris a-en hamon ta batanau ta Moses ma iri amekes salom tiri kahis le, iri winiyan bakohok seben mwasin ta salom tataha nane doh bwe.
HEB 13:11 Tinan tiri pris amekes gok udu bolo asiu balei ta Kindrei, iy andrei ndraye sipsip ma bulumakau, eme iy tiyani ndra nane doh ili bolo asiu ndrok ndrabun ndrabun labai ta amekes salom ta talou kandriyen ndra-in tiri iu. Arile, sali iri sipsip ma bulumakau nane doh badeh, iri sulumwiy andrakak iu udu ndra manan, bado bolo kon bwe.
HEB 13:12 Jises ale akohok sisi-in tinan labai udu manan loboho madasan ta kon tinan, bado bolo kon amwenen bwe. Iy amekes i buku doh, ta amekes iri lau marakon asahan ndrabun, ma ndrayen amou ta akunoh taha ame hamon ja.
HEB 13:13 Eme ma taha karuwani iri lau rayah nane anya ka-en hamon ta kandriyen ta salom tiri Juwis. Taha kamani iri, ma kame hawe Jises Krais. Idoh i buku taha ala are manan ale, ma taha kabwese bwilima i buku le iy bwese.
HEB 13:14 Udu bwele-e kon munyak dah, taha ari kon tinan ta udu le buku doh bwe, arile taha atondrok kon tinan ari doh kameh asahan hamon.
HEB 13:15 Eme ma taha kasekesek ta Kindrei ta nyara Jises, ma taha kadeu sekesek doh kili tan kudu le buku doh, i nyara salom tataha. Salom nane tataha amekes dah, i buku sahou ta atudun nyaran, ma ta leheya kandriyen tan mwasin kili tiri lau mari.
HEB 13:16 Aha samaniy ta amekes iri kandriyen mwasin ili tiri lau mwan hawe iri badih. Buku iri rayah, tiri lakou bwe, aha kaseben iri. Kindrei aso-ok iri kandriyen doh, tasah kandriyen doh ale asahan salom mwasin labai ta madan.
HEB 13:17 Aha kanuhun boho iri lau ta Kindrei nane a-en bwena taha, aha ka-en hamon ta saba lakou iri aso-ok aha kamekes. Tasah, iri atondrok aha, ano iri kameh asehek ili ta Kindrei ta tondrok tiri i buku sah. Eme ma aha kanuhun sahou tiri. Buku aha amekes i buku doh, iri kameh winiyan sekesek ta ateu gok tiri, ma iri winiyan batona maha-an ta aliy bwe. Ya, buku iri basekesek ta atondrok aha bwe, idoh kameh winiyan basebenei aha bamwenen bwe.
HEB 13:18 Aha kasolom kili ta Kindrei ma kandremenya iy ta aseben ahi. Ahi ndratona ndrine ahi ere mwasin labai ta madan. Eme ahi anya kadek kamwenen bolo len marakon.
HEB 13:19 Jo aso-ok aha kasolom kili ta Kindrei, ta iy kaseben jo, eme ma, jo kameh winiyan ewek hamon suwi ta anyolom aha ja.
HEB 13:20 Kindrei mene mete-ei Laban tataha Jises. Eme ma iy asahan ndramak mwasin labai ta atondrok taha mwan ma badih buku sipsip. Tasah, ta ndrayen mene amou, eme iy tutuniy ma bwidi sahou randra le doh abadok ta ere le buku doh. Kindrei badeh, kati manyah mwasin tataha. Eme ma, jo aso-ok iy katehei iri kandriyen mwasin mari doh kewek taha, ta aha ka-en hamon ta tanan tan. Ma jo aso-ok, iy kaleheya kandriyen mari kasahan bolo taha, buku iy amwenen aso-ok. Kandriyen doh asahan ta Jises Krais, iy amwenen aseben taha ta amekes. Taha katudun ma kamasiye nyaran kudu le buku doh. Handru!
HEB 13:22 Aha nadu kawas tek. Jo aso-ok aha kanuhun kamwenen ta iri sahou jo ndratorowenei ndrawek taha ta amekes budon taha kabadok. Tasah la-ukei nane jo atorou ndrawek taha se lawe-en bwe.
HEB 13:23 Jo anya kasehek tado i buku doh: Iri ndrandrei nadu tine taha Timoti ndrame manan ta asiu lulik. Buku iy asahan hawek suwi, idah kameh aru ma la-uh kameh awek ta anyolom aha.
HEB 13:24 Aha katiye sekesek taru ma la-uh kili tiri lau ta Kindrei a-en mwena taha, ma hawe iri lau mwan ma badih marakon ta Kindrei. Iri lau badu kon munyak tinan Itali tiye sekesek tiri ewek taha ale.
HEB 13:25 Tikisiy ma iri kandriyen mwasin mari kudu hawe aha lau marakon ta Kindrei.
JAM 1:1 Jo Jemis, jo ndramak ta lahou ta Kindrei hawe Laban Jises Krais. Jo atorou la-ukei dah ma edeu sekesek tek ewek taha mwan ma badih mari badu boho kamen ma ronoh la-uh badu Isra-el aseker areu bolo kon munyak mara-ei nane dah.
JAM 1:2 Ya, ado nadu tine, buku iri none ndra-in solo-an asahan tado, mwasin ta ado kasekesek le.
JAM 1:3 Ado ndratana ado, buku iri none ndra-in solo-an doh asahan tado, badeh, kandriyen ta none ndrine ado, ta atadau aha ta ales boto-on ta budon, ma a-en hamon ta sahou handru ta Kindrei.
JAM 1:4 Buku none ado atehei budon handru in ta Kindrei, ma ado a-en hamon ta sahou handru, idoh kameh winiyan sebenei ado ta ales boto-on, ta iri lakou anya kasahan tado. Eme ma, ado kameh asahan lau handru ta Kindrei, ma winiyan barah ta lakou mwasin tan bwe.
JAM 1:5 Buku none rayah lau areu rewa ado, aso ta budon mwasin, oro badeh, kasolom ki ta Kindrei, ya Kindrei winiyan sebenei oro. Tasah, Kindrei ale edeu lakou solo-an eme tataha lau, hawe iy winiyan edeu budon mwasin ewek taha, ya iy winiyan babolosen bala tare lau nane ndremenya iy ta budon mwasin bwe.
JAM 1:6 Arile, ndramak ale ndremenya Kindrei doh, iy katehei budon tan handru, ma iy sabudon solo-an, ya iy kasolom ki ta Kindrei. Iy samaniy, ya iy satehei budon buku doh, “Kindrei kameh atehei lakou doh eme tek deh bwe?” Tasah, ndramak iy edek na budon la-uh, iy badeh, buku none mada bayau ale jor oloh, ma atohou ili eme.
JAM 1:7 Ndramak buku doh satehei budon anya Kindrei kameh atehei ari lakou i tan, winiyan bwe.
JAM 1:8 Budon ta ndramak doh bameles ba-en rasi bwe, ya iy badek ta budon ari le bwe.
JAM 1:9 Iri lau mwan ma badih ta Kindrei, buku iri, tiri lakou bwe, iri badeh, kasekesek, tasah udu budon ta Kindrei badeh, nyara iri tinan labai.
JAM 1:10 Arile, iri lau nadu batun, iri badeh, sasekesek le ta aliy. Iri kasekesek ale, buku Kindrei karuwani iri lakou mari nane, iri tawiy udu mine iri ki-iu mara-ei. Tasah, iri kameh amak buku kanyeu awa-is na beyeh; luk nane doh winiyan basebenei oro na bolo len doh bwe.
JAM 1:11 Ya, taha tanan, an anya eme loken badeh, nyarahan labai, ma sulumwi bwidiu asara mara-ei. Buwa bwidiu mari badeh, iroh ili andri, ma kone iri iu mara-ei. Idoh i buku le, iri mwan ma badih tiri lakou solo-an labai, iri kameh amak, udu ndra bada gok solo-an solo-an nane iri amekes.
JAM 1:12 Kindrei kameh winiyan nyosowani ou are lau, buku ou ales boto-on handru ta bwese iri maha-an. Ma iy kameh edeu kohan handru i ndramas i tiri ta udu le buku doh. Kindrei badeh, ndratandrakan ndrala tare lau nane atehei budon tiri mara-ei in tan ma aseken iy labai.
JAM 1:13 Ya, aha kanuhun! Buku lakou kanone kasore ndrine ari mwan o badih ta ariu iri ala ta amekes kandriyen ndra-in, iri sasehek anya, “Kindrei badeh, anya kanone jo ta amekes kandriyen ndra-in doh.” Arile bwe, idoh badeh, sahou wendreya. Kandriyen ndra-in badeh, winiyan baruwi Kindrei bwe, ma Kindrei badeh, winiya banone ta ariu ari mwan o badih ta amekes kandriyen ndra-in bwe.
JAM 1:14 Arile, ndrine taha mari ari ari badeh, atadau ma ariu taha. So-ok tataha ndra-in amwenen nane doh badeh, indrek taha ma wendreya taha ta amekes kandriyen ma lomondra ndra-in.
JAM 1:15 Ya nadah, jo anya kasehek sahou sokek ari i buku doh: Kandriyen ta ndrine taha towodau badeh, i buku badih atehei nah udu ndrinen eme len. Nyara badih doh badeh, “Kandriyen ta ndrine ndramak towodau.” Ya, nyara nah doh badeh, “Kandriyen ndra-in.” Na len kandriyen ndra-in asahan i tinan, iy badeh, leheya kandriyen ndra-in asahan, iri aloh imek.
JAM 1:16 Ado mwan ma badih ta Kindrei badu hawek handru, kora-on ado katawi iri kandriyen ta wasai badeh, kawendreyani ado.
JAM 1:17 Iri lakou hawe ndramas mwasin labai mari badeh, marakon badu kandrah eme andri. Ya, tama taha Kindrei badeh, mesekei lomadan marakon badu kandrah, iy le amwenen badeh, suni iri lakou marakon mwasin doh eme andri tataha. Iy badeh, mwasin labai ma iy batobolowe kandriyen tan bala bame bwe, buku ari lakou, an bwidi malawi iri asahan, an anya ya tobolowe malawi iri lakou a lawe ano a mo-on ja. Arile Kindrei badeh, batobolowe iy bala bame bwe, iy ta udu le buku doh.
JAM 1:18 Na budon tan le amwenen, iy bwidi taha asahan nadun na sahou tan handru, ma iy asahan tama taha. Handru, iy atehei sahou tan eme tataha, eme ma taha atehei budon tataha mara-ei in le tan. Iy amekes i buku doh, ta taha kare bwele-e lakou marakon iy ndramesekei.
JAM 1:19 Ya aha badeh, kabudon kamwenen! Aha nadu tine mwan ma badih tek handru, aha katehei ndranye aha suwi ta anuhun sahou. Arile, aha sabobo-ap ta amekes sahou. Ma ndrine aha ale satowodau ta losen suwi.
JAM 1:20 Tasah, kandriyen ta losen udu bolo ndrine taha mwan ma badih badeh, bamesekei kandriyen mwasin Kindrei aso-ok bwe.
JAM 1:21 Eme ma, aha badeh, karuwani iri kandriyen ndra-in ta karei ma lomondra ndra-in nadah asahan solo-an labai udu bolo ndrine iri mwan ma badih. Ma aha katehei aha ka-au ka andri mara-ei ta akohok sahou nane Kindrei ndratahiy udu bolo ndrine aha. Sahou le doh badeh, winiyan andrei malawi aha mara-ei eme hamon ja.
JAM 1:22 Jo asehek sahou boto-on ewek taha badeh, i buku doh: Kora-on aha anuhun sahou doh laleyah. Aha badeh, ka-en hamon ta aliy ale. Buku bwe eh, badeh, aha ndrawendreyani aha le ai.
JAM 1:23 Tasah, are mwan o badih iy anuhun sahou ta Kindrei doh, ya iy ba-en hamon ta aliy bwe, iy badeh, i buku ndramak anyolom madan amwenen udu bolo torowe.
JAM 1:24 Iy anyolom madan amwenen mara-ei, arile iy ili hamon ja amekes lakou i le buku iy amekes bwena ndra-au, ya se luwen bwe, iy badeh, ndramani kone madan nane udu bolo torowe ja ai.
JAM 1:25 Arile, sahou ta Kindrei udu bolo tarou malen ma hawe sahou mwasin badeh, amekes gok ta atokos kandriyen ndra-in iu, ma bwidi taha ado mwasin. Batanau doh badeh, amwenen mara-ei. Buku taha mwan o badih anyolom batanau doh amwenen ma a-en hamon ta sahou tan handru, ma Kindrei kameh winiyan amekes iri gok mara-ei tiri mwan o badih nane asahan mwasin labai. Ma iri mwan ma badih buku doh badeh, iri winiyan banuhun sahou laleyah doh bwe, ma maniy suwi labai.
JAM 1:26 Buku none ari mwan o badih iy anya, iy lau ta Kindrei ma iy atudun iy handru, arile iri batondrok boho iri bamwenen bwe, iri ndrawendreyani iri amwenen, ya eme ma budon hawe salom tiri doh badeh, ari moson ta aliy bwe.
JAM 1:27 Tasah, kandriyen ta lau ta Kindrei badeh, amwenen mara-ei, ma ari lomondra ndra-in bado budon ta tama taha Kindrei bwe, i buku doh: Taha badeh, kabudon ma katondrok iri nah, tama iri ma tine iri ndramak, ma hawe iri badih, udu iri ndramak, ma kaseben iri ta bwese maha-an tiri. Ya, lakou ari ale i buku doh, taha badeh, kantondrok tekedek tataha kamwenen, idah kameh kandriyen badu kon munyak winiyan baruwi taha bala bolo ndraka-an bwe.
JAM 2:1 Aha nadu tine mwan ma badih tek amwenen, aha ndratehei budon taha ndra-en ta tinan tataha Laban Jises Krais. Iy Laban ta lakou mwasin mara-ei badu kandrah. Eme ma, kora-on aha kabo gok ta amekes kandriyen mwasin ili le tiri lau nyara iri tinan, ma aha atehei kona aha ili tiri mwan ma badih nyara iri bwe. Aha badeh, kamekes kandriyen mwasin randra le kili tiri mari.
JAM 2:2 Buku none ari ndramak asini awin moroyan, ya iy anyuhi kandro minen ari i bolo bek nyikilikin iri amekes na bek, ewek bolo asiu ta ndrahu tukum taha, ma hawe ndramak ari, awin tan ndraka-an, ewek bolon ale.
JAM 2:3 Ya, aha kameh amekes mwasin i ta ndramak nane awin tan moroyan ma bek nyikilikin udu kandro minen kameh anya, “Ou ame manyah ado bada bwabwai mwasin dah.” Arile, aha kameh tiye i ta ndramak nane awin tan ndraka-an, anya, “Ou ala ales an kabwek kodo-on op, bwe ou ame manyah an bada kamus mirihik ta katik kada-ah.”
JAM 2:4 Buku aha amekes kandriyen i buku doh ta bokoro-ei i ndramak nane tan ari lakou bwe, badeh, aha ndrabwidi kandriyen ndra-in kabwe. Idoh i buku aha ndralebelei iri lau ta Kindrei rayah na budon ndra-in taha. Aha badeh, babudon anya iri ale buku aha, ma aha amekes kandriyen mwasin i buku doh i tiri, bwe. Aha le amwenen badeh, aleben aha ta anuhun sahou tiri, ma idoh badeh, bamwenen bwe.
JAM 2:5 Aha nadu tine mwan ma badih, aha kanuhun. Kindrei badeh, ndralebelei iri lau, tiri lakou bwe badu kon munyak badeh, ta iri kameh are mwasin labai ta budon handru in ta Kindrei. I buku le Kindrei bwena mene ndratandrakan i buku doh, iri mwan ma badih doh atehei budon tiri in tan handru ma aseken iy labai, iy kameh bwidi iri asahan lau tan, ma iy atondrok iri.
JAM 2:6 Arile, aha badeh, atehei bwilima ili tiri lau nane, tiri lakou bwe. Aha kabudon doh kamwenen. Are lau handru bokoro-ei aha ma atehei maha-an ewek la-u aha ma aluwi aha ala ta mada sahou? Iri le nadu batun badeh, amekes iri lakou doh.
JAM 2:7 Ya, Kindrei ale badeh, ndratehei nyara Krais mwasin labai ndra-en la-u aha. Arile, are lau handru bobose nyara Krais? Iri nadu batun, iri ateu luk solo-an udu mine iri.
JAM 2:8 Buku aha a-en hamon ta batanau ari le mwasin nane Kindrei atehei eme tataha anya, “Ou aseken iri lau ari ari badu hawem, i le buku ou aso-ok ou le,” idoh mwasin. Jo ari sahou ta aliy bwai.
JAM 2:9 Arile, buku aha apwai iri lau ta Kindrei a rabuk doh, rabuk doh, eme ma aha atondrok iri mwan ma badih nane tiri luk solo-an ai, ya aha atehei kona aha ja ili tiri lau nane tiri lakou bwe, badeh, aha ndrabwidi kandriyen ndra-in kabwe, ma aha ale badeh, ndrabokoro-ei batanau ta Kindrei.
JAM 2:10 Ya, sahou dah handru. Tasah, buku ari ndramak anya, iy in hamon ta sahou batanau mara-ei, arile iy bokoro-ei sahou batanau ari le udu bolo oro sahou batanau ta Kindrei mara-ei, Kindrei anya iy badeh, ndrabokoro-ei batanau mari ndrandra-i kabwe.
JAM 2:11 Taha ndratanan, Kindrei badeh, asehek anya, “Aha tasou badeh, samekes kandriyen ta karei.” Ma iy ale asehek anya, “Ou sadai ndramak samak.” Ya, i buku ou bamekes kandriyen ndra-in ta karei bwe, arile ou adai ndramak ari imek, ou amwenen badeh, asahan ndramak ari ndra-in labai ta bokoro-ei batanau ta Kindrei.
JAM 2:12 Ya, aha kasehek sahou mwasin, ma ka-en hamon ta kandriyen mwasin, tasah Kindrei kameh edeu lau mari ala ta mada sahou, buku le iy mene ndrabatanau taha bwena i buku doh, “Aha badeh, kaso-ok iri mwan ma badih rayah ja, i buku ou aso-ok ou le amwenen.”
JAM 2:13 Tasah, i buku ari mwan o badih, iy batikisi iri lau rayah ja bwe, udu bada len Kindrei atehei iy ere ta mada sahou, idah kameh Kindrei winiyan batikisi iy bwe le. Arile, are mwan o badih, iy abudon iri mwan ma badih rayah ja, ma amekes kandriyen mwasin ili tiri, iy amwenen kameh winiyan eme len ta mada sahou. Tasah, kandriyen ta tikisiy badeh, udu bwele-en labai ja, ta kandriyen ta adeu maha-an i la-u ndramak.
JAM 2:14 Aha nadu tine mwan ma badih ta Kindrei, buku ari taha anya, “Jo atehei budon tek mara-ei badeh, in le ta Jises Krais,” arile iy badeh, bamekes kandriyen mwasin ma ba-en hamon ta budon handru bwe, eme budon handru ta i ndramak doh badeh, ari moson bwe. Sebwe iri budon handru buku doh badeh, winiyan basebenei ndramak ales udu mada sahou ta Kindrei hamon kameh eme bwe.
JAM 2:15 Buku ari lau ta Kindrei, iy badu hawe ado, iy tan ari kalawin ma nan nyamon bwe,
JAM 2:16 ya ari badu bolo ado badeh, tiye i tan i buku doh, “Kindrei kanyosowani ou ma iy kudu hawem! Ou satikisiy labai, ndrinem kudu le kudu, Kindrei winiyan sebenei ou, iy winiyan silahei tam kolau mwasin ma nam nyamon mwasin.” Ya, sahou laleyah doh kameh baraseben oro barala buku sah handru bah?
JAM 2:17 Kandriyen ta budon handru tataha badeh, buku le aliy ale. Buku budon taha handru baluwi budon taha ta amekes kandriyen mwasin ma aseben iri mwan ma badih rayah ja bwe, ya budon taha handru badeh, kameh ari moson bwe, i lakou laleyah. Ya, buku taha bamekes gok mwasin ta aseben ndramak ari ja bwe, budon tataha badeh, ari katin bwe.
JAM 2:18 I buku ari ndramak anya, “Lau rayah badeh, tawi ihis budon handru, arile lau rayah ja badeh, amekes kandriyen mwasin. Sebwe budon ma la-uh doh i le randra.” Jo kasehek ki buku doh, “Buku none ou atehei budon tam boto-on i ta Kindrei, arile ou tanam ta amekes kandriyen mwasin bwe, ki buku sah handru jo ki tanan kandriyen ta budon tam in ta Kindrei nane? Arile, jo anya kamekes kandriyen mwasin ale, ya kandriyen mwasin doh kameh leheyani budon tek boto-on in ta Kindrei nane.”
JAM 2:19 Buku none ou badeh, atehei budon tam anya, Kindrei badeh, ari le. Mwasin. Arile, badeh, lakou laleyah. Tasah, iri malawin ndra-in abudon buku aliy ale, ya iri anoh ma totoreh, tasah Kindrei kameh atehei iri ala ta mada sahou, ma iri kameh ala bolo jih. Ya budon tiri le nane winiyan bamesekei iri asahan mwasin ta mada Kindrei bwe.
JAM 2:20 Ou lolo-ou ndramak, buku ou atehei budon tam le in ta Kindrei, ya ou bamekes kandriyen mwasin Kindrei aso-ok ja bwe, budon tam badeh, ari moson bwe. Sebwe ou anya atanam le ta kati sahou dah nadeh? Mwasin ta ou anuhun sahou badu bolo buk ndrabun asehek i buku doh:
JAM 2:21 Bwena mene tubu taha Abraham atehei nadun Aisik i bwele-e mada koto-ok anya ki nyara salom ki ta Kindrei. Eme ma, udu kabatana doh badeh, Kindrei anyolom lahou tan, ma iy aloh Abraham ndramak mwasin labai ta madan.
JAM 2:22 Aha kanyolom kamwenen. Budon hawe kandriyen ta Abraham badeh, asahan ari le. Budon tan mara-ei badeh, asahan eme lewan, in hamon le tiri kandriyen mwasin iy amekes.
JAM 2:23 Buk ndrabun badeh, asehek i buku doh, “Abraham atehei budon tan handru in ta Kindrei, eme ma Kindrei aloh iy ndramak mwasin mara-ei ta madan.” Ya Kindrei ale aloh Abraham badeh, i buku, “Kawas tan handru.” Ya, kati sahou “atehei budon tan mara-ei in ta Kindrei” doh badeh, asahan eme lewan ta kandriyen nane Abraham amekes i ta nadun Aisik.
JAM 2:24 Ya idah aha ndratana aha, Kindrei basehek anya ndramak kameh asahan mwasin na budon tan le bwe, iy badeh, aso-ok budon tam hawe kandriyen ta gok tam ale kudu mwasin ta madan.
JAM 2:25 Buku Rahap badeh, badih ta madasarah, iy tone uru lau ma la-uh mene Josuwa suni uru ala ta anyolom bolo kon Jeriko, ya Rahap leheyani uru a hamon a san ari ja. Ya idoh le, iy asahan mwasin na kandriyen tan ta tone uru lau ma la-uh nane doh. Ya Kindrei bwetenei kandriyen ta Rahap nane, ma iy aloh iy badih mwasin ta madan.
JAM 2:26 Taha ndratanan, buku malawi taha ruwani bada taha mwan o badih, badeh basa taha le kameh erah udu api. Buku le, are mwan o badih atehei budon laleyah, ya budon tan doh bamekes ari kandriyen mwasin bwe, budon ta iy mwan o badih doh badeh, ndrasahan i buku bada kei, kohan aliy bwe.
JAM 3:1 Aha nadu tine mwan ma badih, aha mari sasahan ndramak ta bwena ta leheya iri mwan ma badih ta kandriyen Kindrei aso-ok. Tasah, udu bolo len ta Kindrei aleben kandriyen tiri mwan ma badih mari, iy ale kameh seleya amwenen labai iri gok tataha lau nane ta areu bwena ta leheya iri mwan ma badih mari.
JAM 3:2 Na len ari, ari taha badeh, abudon ta amekes kandriyen ndra-in, ma taha atalei. Arile, kandriyen doh badeh, asahan tataha mari. Buku ari mwan o badih basehek rayah sahou ndra-in bwe, iy badeh, lau mwasin handru, ya iy winiyan tondrokei badan ma kandriyen tan mara-ei.
JAM 3:3 Taha badeh, adeu hayen ranah i tondreh in boho hos, ta amekes iy ki-in hamon ta budon tataha ta adek. Taha badeh, atondrok boho iri, ya ta kandriyen doh le badeh, taha atondrok bada hos doh mara-ei ta iy in hamon le ta budon tataha.
JAM 3:4 Aha kabudon ale ta ndron lahek tinan atas bolo ndras. Ndron laba tinan, ya jor laba tinan atohou badeh, tubuluhi iy amai iu ili bolo ndras. Ya kulik tan badeh bos nadu bwisik labai. Arile, buku ndramak ta ateu kulik anya kili adai o sam, iy badeh, awoha le ili loboho heh iy anya ndron katas kili aliy.
JAM 3:5 Idoh i buku kalime taha, iy badeh lakou ari nadu bwisik badu bada taha, arile iy badeh, nyaladan labai ta amekes lakou mara-ei andra-i, ma ta atudun iy ale. Taha tanan, buku nadu katala jih sese le badeh, winiyan sulumwi lokei ma buruwen andrakak ano iu.
JAM 3:6 Kalime taha badeh i buku jih, iy nadu bwisik ereu bolo boho taha. Arile, iy badeh, ta amekes kandriyen ndra-in solo-an asahan tataha, ya iy badeh, winiyan tubuni bada taha mara-ei amekes kandriyen ndra-in labai, i buku jih nyarahan ta asun iri lakou. Jih doh badeh, buku le jih ta Kindrei, winiyan bamak bwe, ta asun lau na len hamon.
JAM 3:7 Ya, iri mwan ma badih badeh, andrei ma nyohonei iri lakou mari badu munyak dah, buku iri bwisir badu lokei, iri sirih, mwak, hawe iri lakou badu bolo ndras. Eme ma iri tondrokei iri lakou mari doh, ma mesekei iri anuhun sahou, ma a-en hamon ta budon tiri.
JAM 3:8 Arile, are mwan o badih iy badeh, winiyan batondrokei bohon amwenen bwe. Len mara-ei boho taha badeh akeh sahou ndra-in solo-an labai, ma sahou doh badeh, i buku le lakou ndra-in nyakadan ta adai lau amak. Lakou doh badeh, idih udu boho taha.
JAM 3:9 Taha atudun ma adeu wurah i ta Laban hawe tama taha Kindrei badeh, na boho taha. Ma na boho taha le amwenen badeh, taha aten iri lau. Taha amekes kandriyen ndra-in buku doh, arile Kindrei badeh, mesekei kone taha mari asahan i buku le iy amwenen.
JAM 3:10 Sahou ta atudun nyara Kindrei ma aten badeh, udu boho taha amwenen eme len. Aha nadu tine mwan ma badih, kandriyen doh ndra-in mara-ei, taha samekes.
JAM 3:11 Aha kabudon kamwenen. Gwa lakon hawe gwa ndras, uru winiyan ado mada munu kaloh ari le ame len, deh bwe?
JAM 3:12 Bwe, gwa lakon hawe gwa ndras, uru mala-uh winiyan bado munu lek ari le ame len bwe. Ya, aha nadu tine mwan ma badih, jo anya kandremenya aha, kei ra-ei iri aloh pik, winiya ato-ou olip deh? Bwe.
JAM 3:13 Buku rayah mwan o badih areu ndrokowa aha, budon ma tanan mwasin udu tiri, ya tekedek tiri badeh kasahan mwasin, ma iri winiyan bamekes lakou laleyah ma batudun nyara iri bwe. Ma iri mwan ma badih rayah ja kameh winiyan anyolom kandriyen mwasin iri amekes.
JAM 3:14 Arile, buku aha abudon ta totowa budon ndra-in taha ili tiri mwan ma badih rayah ja, ya len mara-ei aha abo gok ta a-en hamon ta san ndra-in ta atudun nyara aha amwenen ta udu bwele-e iri rayah ja, aha ta wendreya ma kandriyen taha badeh, bokoro-ei sahou handru ta Laban. Aha samekes kandriyen doh ndri-iy.
JAM 3:15 Iri budon hawe tanan doh badeh, bado kandrah bame andri bwe. Iri lakou doh badeh, badu kon munyak le amwenen. Iri asahan ta ndrine taha ndra-in bwena, ma balik in bwena ta aliy.
JAM 3:16 Aha kanuhun! Are lau ale ta lomondra ndra-in ma ta ndrakok udu tiri, iri lau doh badeh, ta amekes lakou laleyah ma ta amekes kandriyen ndra-in.
JAM 3:17 Arile, iri tanan ma lakou mara-ei mwasin taha akohok badeh, udu kandrah eme leheya taha kamekes kandriyen mwasin ki buku doh: Taha kasahan ha-un, ma taha kamekes mwasin ki ta nadu tine taha iri rayah ja, taha kanuhun sahou tiri mwan ma badih rayah ja, taha katikisiy lau rayah ja, taha kamekes mwasin ki tiri, ma taha badeh, sawasai.
JAM 3:18 Iri mwan ma badih aso-ok labai ta ado hawe iri lau rayah ja badeh, iri doh badeh, ka-en hamon ta kandriyen mwasin labai, ma idoh ale, aseben ndrine iri lau rayah ja udu le udu. Buku taha amekes iri kandriyen i buku doh, idoh i buku ndramak atah buwa kei ili bolo bilin tan; udu hamon ja badeh, ato-ou salin solo-an ma asahan mwasin mara-ei.
JAM 4:1 Saba lakou handru ale amekes bahun hawe losen udu bolo ndrokowa aha? Sebwe iri kandriyen ta ndrine aha ato-ou ta losen suwi, badeh, udu bolo oda aha, ma amekes bahun hawe budon ma tanan mwasin ta atondrok bada aha mara-ei.
JAM 4:2 Aha aso-ok lakou solo-an labai, arile aha bakuhi ari bwe, eme ma aha adai iri lau amak, arile aha bandrei saba lakou tiri nane aha aso-ok bwe. Mada aha alikis iri lakou ma aha ada aha le amwenen. Arile, aha bandrei bwe, tasah aha bandremenya Kindrei ta aliy bwe.
JAM 4:3 Buku aha asolom i ta Kindrei ta lakou aha aso-ok, ya aha bakuhiy bwe, tasah budon taha bamwenen bwe. Ya, aha asolom laleyah i ta Kindrei ta akohok lakou nane ta aseben ndrine aha, ma ta amekes aha kasekesek.
JAM 4:4 Aha badeh, ndraruwani Kindrei, i buku le badih ndraruwani udun, ya iy ndrasahan badih ta madasarah. Buku ari mwan o badih, iy aso-ok kandriyen badu kon munyak labai, iy lau le doh kameh baseken Kindrei bwe. Sebwe, aha tana aha bwe nadeh? Jo katiye taha ja, buku none ari ndramak anya kasahan kawas ta kandriyen badu kon munyak, iy ndrasahan lau ta bahun i ta Kindrei.
JAM 4:5 Buk ndrabun ndratiye, i buku doh, “Malawin mwasin nane Kindrei atehei udu bolo taha, len mari iy aso-ok taha ka-en bahandran amwenen.” Aha anya, sahou dah, sahou laleyah nadeh?
JAM 4:6 Arile, Kindrei badeh, tikisi taha tinan labai. Eme ma buk ndrabun tiye i buku doh, “Kindrei badeh, bwalen iri lau ta atudun nyara iri amwenen i loken, arile iy badeh, tikisiy, ya iy amekes mwasin i tiri lau ale atehei nyara ma so-ok tiri i andri mara-ei.”
JAM 4:7 Eme ma, aha badeh, katehei aha amwenen ka-au kala andri mara-ei kala kado bahandra Kindrei. Aha kales boto-on ma karuwani iri kandriyen ndra-in badu munyak, balik nane amekes kede-eh, ma iy kameh ruwani aha, ma iy atobwak iu.
JAM 4:8 Aha badeh, kala mirihik handru ta Kindrei, ya iy kameh eme mirihik handru taha. Aha lau mwan ma badih ta lomondra ndra-in ma ta karei, kandriyen taha badeh, kasahan mwasin i buku ndramak sikine minen asahan ha-un ja. Buku budon taha i lundra, baden eh, aha karuwani budon ndra-in nane udu ndrine aha badeh, ki-iu ai.
JAM 4:9 Buku aha ame mirihik ta Kindrei badeh, ndrine aha katikisiy, ma aha kaden handru ta kandriyen ndra-in nane aha ndramesekei. Aha are lau mwan ma badih ehe-en na idah, aha katubuni ehe-en kasahan ki ndrelen ja, ya sekesek ja badeh, kili ta tikisiy.
JAM 4:10 Ta mada Kindrei badeh, aha katehei aha ka-au kala andri mara-ei. Buku aha amekes i buku doh, iy kameh mani ndra-in taha, ma suruni aha au ala loken mara-ei labai.
JAM 4:11 Aha nadu tine mwan ma badih ta Kindrei, aha badeh, saluhe iri lau ta Kindrei. Are mwan o badih, iy aluhe o asehek nadu tinen iri rayah ja, iy badeh, aluhe batanau amwenen. I buku aha orou sahou i ta batanau, ou badeh, bado bahandra batanau ja bwe, tasah ou ndrasahan buku ndramak ta anuhun sahou, ma ou asehek i bada batanau amwenen.
JAM 4:12 Kindrei le adeh, atehei kandriyen malen i mine Moses, ya iy le ari badeh, ndramak ta anuhun sahou tataha. Ya iy winiyan sebenei taha, ma iy winiyan idi ndramak imek. Ya aha anya, aha sah bah? Ya aha orou sahou i bada lau rayah ja?
JAM 4:13 Aha kanuhun! Jo anya kasehek nyala aha lau ale asehek i buku doh, “Sebwe na idah deh, na bi-i, jo kameh ili kon tinan, ya jo kameh amekes ari lahou tek winiya jaha ari. Ta lahou tek doh kameh taha winiyan akohok luk solo-an labai ta aliy.”
JAM 4:14 Aha badeh, amekes iri sahou doh, arile aha badeh, bala tanan ta saba lakou handru kameh asahan na bi-i bwe. Koha taha badeh, i buku kasu-er, asahan, ano nawin bwe, iy ndra-au ja.
JAM 4:15 Sebwe mwasin ta aha kasehek ki buku doh, “I buku Laban aso-ok, ahi kameh ado awas, ma ahi kameh winiyan amekes iri lakou nane ahi abudon ta amekes.”
JAM 4:16 Arile, aha bwese nyara aha i loken labai, ya aha arah ta leheya iri lakou aha amekes. Ma aha asehek anya, “Ahi le ai.” Kandriyen buku doh badeh, ndra-in labai.
JAM 4:17 Aha kabudon kamwenen, buku aha ndratanan ta kandriyen mwasin aha anya kamekes, arile aha bamekes bwe, badeh, aha ndrabwidi kandriyen ndra-in kabwe.
JAM 5:1 Ya idah jo anya kasehek taha lau nadu batun. Aha kabudon kamwenen ta iri maha-an laba tinan kameh asahan taha hamon, ya aha kaden ma kanyar aha.
JAM 5:2 Iri sanuw taha mara-ei ndrabola, ma ndranyem ndrani kolau taha mara-ei ndrano ndra-au.
JAM 5:3 Bek nyikilikin hawe silba taha badeh, ndrandra-i, ma oro kameh leheyani ndra-in taha eme lewan, ma ani oda aha i buku jih. Saba lakou aha ndratondrokei ma ndratukumwiy kameh ano na len hamon.
JAM 5:4 Aha kanuhun kamwenen! Iri lau ta asoh nyamon badu bolo bilin taha badeh, aha ndrawendreyani iri, ya aha tawi luk tiri ranah nane ta sihine iri, ya sihine iri ranah nane aha tawiy, badeh, aloh i ta Kindrei ta konohei kandriyen ndra-in taha. Ya ndrelen tiri lau ta gok nane ndrasahan ndranye Laban, iy boto-on labai.
JAM 5:5 Len mari aha areu kon munyak, aha akohok iri lakou solo-an mwasin mwasin labai ma aha sekesek ta aliy. Ya aha aimon nyamon tinan, ma bwidi aha apar. Idoh, buku none lau ale anyohan bou apar, ano kameh iri adai iy ta aimon. Idoh i buku le len ta Kindrei ndrame mirihik ta anuhun sahou. Kora-on iy kidi aha ale.
JAM 5:6 Aha badeh, atehei iri lau mwasin ala ta mada sahou, ano aha adai iri amak. Ya iri bateleya mine aha bwe, ma iri bamekes bahun bawek taha ja bwe.
JAM 5:7 Eme ma aha nadu tine mwan ma badih ta Kindrei, aha katehei ndrine aha handru kili ta Laban, ya aha kabwese iri maha-an, ma kabe-en iy ta eme hamon. Aha tana aha, ndramak tan bilin ereu aliy, iy kameh abe-en nyamon mwasin asahan aliy. Iy kameh atehei ndrinen handru, ya iy ereu le abe-en ur hawe an, uru amekes gok turu. Hamon ta aliy, iy barala barakohok sali nyamon tan ai.
JAM 5:8 Aha ale, ndrine aha kudu mwasin, ma kado le katondrok ta bwese iri maha-an anya asahan taha, tasah len ta Laban ta eme hamon badeh, ndrame mirihik.
JAM 5:9 Aha nadu tine mwan ma badih ta Kindrei, aha sanunu-uh ma satebelese hawe nadu tine aha iri rayah ja. Kindrei kameh asahan buku ndramak ta anuhun sahou, ma iy kameh atehei aha ala ta mada sahou. Tasah, iy badeh, ales udu le madasan taha!
JAM 5:10 Aha nadu tine, aha kabudon oro propet bwena mene, oro mene atiye sahou ta nyara Laban. Kandriyen tiri badeh, mwasin labai ta aseben taha. Iri lau ta kaliu badeh, banuhun sahou toro bwe, ma iri amekes kandriyen ndra-in i toro propet doh. Arile, oro atehei ndrine oro udu mwasin ta bwese iri maha-an. Aha badeh, kandrei kandriyen toro doh, ma ka-en hamon ta aliy.
JAM 5:11 Taha badeh, asehek i buku doh, “Iri lau badeh, atehei ndrine iri ta bwese iri maha-an, iri sekesek ma ado mwasin. Tasah, iri badeh, banoh ta a-en hamon ma batebelese sahou ta Laban bwe. Iri a-en le hamon ta sahou tan handru.” Aha mara-ei badeh, ndranuhun ma ndratanan kundruh ta Jop. Iy ale atehei ndrinen, ma bwese iri maha-an marakon asahan tan. Ma aha tanan, udu hamon badeh, Laban amekes mwasin i tan ja. Laban badeh, irek ta tikisiy eme ma, iy badai taha mwan ma badih badu kon munyak bwe.
JAM 5:12 Aha nadu tine mwan ma badih ta Kindrei, lakou ari laba tinan labai, jo anya kasehek taha ma aha kamekes badeh, i buku doh: Buku none aha anya katandrakan badeh, aha saloh ma sanyek sala kandrah o kon munyak, o saba lakou ja, ta amekes sahou tam kabadok handru, ta iri lau katehei budon tiri kili le ta aliy. Buku aha anya, “Handru,” badeh, “Handru” le ka-i ai. Ya, buku aha anya, “Bwe,” badeh, “Bwe” le ka-i ai. Kora-on aha kasehek sahou “Handru” kili bolo sahou wasai, ya idah kameh, Kindrei edeu maha-an laba tinan labai ewek la-u aha.
JAM 5:13 Buku ndramak ari tado bwese maha-an, mwasin ta iy kasolom kili ta Kindrei. Buku ndrine iy ari badeh, sekesek, mwasin ta iy kiyah wari ta atudun nyara Kindrei.
JAM 5:14 Buku ari tado ibo sik, mwasin ta iy kaluhi oro lau an bwena ta lau ta Kindrei kame hawen. Ya, ta nyara Laban, oro kasolou ndrelekei ki badan, ma oro kasolom ki ta Kindrei, kamesekei ndramak nane kasahan kamwenen ja.
JAM 5:15 Buku aha asolom, ma atehei budon taha in ta Kindrei handru, badeh kameh, winiyan bwidi ndramak amwenen ja. Ya, buku none iy ndrataku ta kandriyen ndra-in, Laban winiyan mani kandriyen ndra-in tan doh.
JAM 5:16 Eme ma, aha ari ari badeh, kasehek nyala kandriyen ndra-in taha nane ki tiri lau ta Kindrei ra-on ja. Ya aha kasolom kili ta Kindrei ta iy kamesekei aha kasahan kamwenen ja. Tasah, buku are mwan o badih, iy mwasin mara-ei ta mada Kindrei, ya salom tan nyamun labai, badeh kameh winiyan sebenei lau solo-an labai asahan mwasin.
JAM 5:17 Alaija badeh, i buku le taha dah. Iy asolom boto-on labai, ta Kindrei satehei ur same andri, eme ma ur bame andri bwele-e munyak bwe, winiya jaha taloh hawe bun onoh.
JAM 5:18 Udu hamon ta aliy ja badeh, iy asolom i ta Kindrei ja, ya kandrah atehei ur eme andri, ya iri nyamon ateh ja ereu bolo bilin i buku le bwena.
JAM 5:19 Aha nadu tine mwan ma badih ta Kindrei, buku ari taha iy ndraruwani sahou handru ta Kindrei, ya iy ndrataku ndrala bolo iri kandriyen ndra-in, ya ari tataha badeh, kandrei iy keme hamon ja, nadu tine taha nane doh badeh, amekes kandriyen mwasin labai mara-ei ta akohok iy eme hamon ja.
JAM 5:20 Aha katehei sahou dah kamwenen kudu budon taha: Buku ado ari ala hawe ndramak nane ta amekes kandriyen ndra-in, ma sebenei iy, ya iy ruwani kandriyen ndra-in tan mara-ei, ma iy eme hamon ta san mwasin ta Kindrei, mwasin handru. Tasah, nadu tine to nane doh ndrakuhi malawin mara-ei ndrame hamon, ya iy kameh winiyan bamak bwe. Ta kandriyen tan doh le, Kindrei kameh mani kandriyen ndra-in tan mara-ei iu.
1PE 1:1 Jo Pita, jo aposel ta Jises Krais, jo atorou la-ukei dah ewek taha lau mwan hawe badih handru ta Kindrei. Aha ndraseker i buku iri lau ta ateheh areu bolo kon munyak tinan tiri Pontus, Galesiya, Kapadosiya, Esiya, ma hawe Bitiniya.
1PE 1:2 Ma mwena handru badeh, Kindrei tama taha, iy ndratanan aha, ma iy ndramesekei aha ndrasahan iri lau tan handru. Malawin Ndrabun ndrasebenei aha ta adeu koha aha mari i ta Kindrei, ma bwidi aha ndrasahan randrah labai ja. Ya aha winiyan an hamon ta sahou handru ta Jises Krais. Ya iy kameh winiyan sikine kandriyen ndra-in taha na ndraye Jises mene amou udu bada kei tondreh. Jo aso-ok Kindrei badeh, kabwidi ndrine aha kamwenen ma kudu le kudu mara-ei.
1PE 1:3 Taha badeh, katudun nyara Kindrei, iy badeh, tama tinan tataha Jises Krais. Iy badeh, tikisi taha tinan labai, ma iy sebenei taha i buku doh: Iy badeh, mene mete-ei Jises Krais amak eme awas ja. Eme ma, na san le doh, taha are awas kahis ta atondrok Kindrei ta akohok taha ta ala ado hawen.
1PE 1:4 Eme ma taha atondrok Kindrei ta akohok taha ta ala kandrah hawen, ma akohok manyah mwasin handru. Manyah nane doh badeh, bala buku lakou badu kon munyak kameh abola o andra-i iu laleyah, bwe. Iy kameh udu kandrah, ta udu le buku don ai.
1PE 1:5 Na boto-on tan le, Kindrei badeh, atondrok aha ta maha-an hawe none anya kasahan. Tasah, aha badeh, atehei budon taha mara-ei in tan, ma iy atondrok aha na bolo len mara-ei. Tasah, iy anya kakohok aha mara-ei kala kado hawen, ma iy kameh amekes iri lakou mari doh, ewek taha, ta Jises kameh eme hamon ja.
1PE 1:6 Ya, aha badeh, abudon ta lakou doh kameh asahan, ma aha winiyan sekesek labai ta aliy. Handru, na idah badeh, len lawe-en bwe, Kindrei atehei iri maha-an mara-ei doh ewek taha. Arile, aha satehei budon taha sala ta aliy. Kora-on aha karuwani sekesek mwasin nane doh.
1PE 1:7 Iri maha-an doh badeh, ta none iri budon taha le. Idoh i buku none le bek nyikilikin iri aloh gol; gol doh badeh, lakou ari mwasin labai. Arile, iri asun na jih ta none gol handru deh, bwe. Ma iri budon tataha badeh, sakalawi gol nane ja. Tasah, gol kameh andra-i. Handru, budon tataha badeh, buku none gol nane, arile Kindrei badeh, baso-ok gol nane bwe. Tasah, gol badeh, lakou badu kon munyak, ma gol kameh andra-i. Arile, Kindrei aso-ok budon taha boto-on ki-in tan. Eme ma, iy ndraruwani minen sese ta la-u taha, ma iri maha-an solo-an ndrasahan taha. Idoh, ta none aha le, buku aha an hamon ta Krais deh bwe. Na len Jises eme hamon, iri lau mari badu kon munyak kameh anyolom iy. Ma, i buku none aha ndratehei budon taha boto-on in tan, iy kameh kuhi aha ala bolo nyosowan mwasin. Ma iy kameh sekesek taha handru, ma bwese-ei nyara aha ili loken handru.
1PE 1:8 Handru, aha mara-ei badeh, batou Jises bwe le, arile aha aso-ok iy labai, eme ma na idah, aha batou iy bwe le, arile aha atehei ndrine aha ma budon taha mara-ei, ma sekesek taha laba tinan labai in tan. Sekesek doh badeh, sakalawi iri sekesek mari badu kon munyak mara-ei, ya taha winiyan basehek na boho taha bwe-en!
1PE 1:9 Tasah handru aha sekesek? Aha badeh, atehei budon taha boto-on labai i ta Kindrei, eme ma, kati budon taha doh anya kasahan keme lewan. I buku doh: Kindrei andrei aha ndrame hamon, buku none le iy mene ndratandrakan bwena.
1PE 1:10 Iri propet mene ndrasehek nyala iri kandriyen ta tikisiy nane ndrasahan taha. Iri badeh, takaleh ta atanan kati sahou ta Kindrei i buku doh: Tasah, iy anya kakohok taha kame hamon ja.
1PE 1:11 Malawin Mwasin ta Krais badeh, udu bolo iri propet, ma Malawin Mwasin asehek sahou i boho iri, ta iri sisi-in solo-an labai kameh Krais bwese, ma ta iy kameh akohok nyaran tinan ale. Iri propet badeh, abo gok boto-on ma ndremenya i buku doh, “Saba len handru iy ndramak ta akohok taha, kameh eme hamon?” Ma, “Saba lakou handru kameh asahan na bolo len doh?”
1PE 1:12 Arile, Kindrei leheyani iri propet, ta sahou oro asehek na boho oro, idoh winiyan basahan na len iri ado kon munyak dah, ma lakou nane doh kameh aseben iri bwe. Iy tiye toro ta saba lakou kameh asahan na bolo len hamon tiri mwan ma badih basahan kon munyak bwe le. Iri propet badeh, asehek sahou ta nyala iri lakou kameh asahan nadah, aha ndranuhun sahou mwasin badu boho iri lau mene ndrame ndrasehek taha ta aliy. Malawin Ndrabun ta Kindrei badeh, udu kandrah eme andri kon munyak, ma i la-u iri lau tan, ma iri ame atiye sahou mwasin doh kewek taha. Iri angelo badu kandrah ale, aso-ok labai ta akohok tanan ta kati sahou mwasin ta Krais.
1PE 1:13 Ya, budon taha kaleu kudu mwasin, ma aha kabudon tekedek taha kamwenen. Ya, aha katehei budon taha ki ta Kindrei ta abe-en iy, ta amekes iri lakou mwasin nane iy anya kedeu kewek taha. Idoh kameh asahan na len iri lau mari badu kon munyak anyolom Jises Krais eme hamon ja.
1PE 1:14 Aha kasahan ndramak ta anuhun sahou, tasah aha ndrasahan buku nadu Kindrei. Bwena mene aha budon mwasin bwe, ma aha an hamon ta budon ndra-in. Arile, na dah, aha sa-en hamon ta budon hawe kandriyen ndra-in taha bwena mene ja ai.
1PE 1:15 Arile, na idah, Kindrei ndraluhi aha, ma aha ndrasahan ndrala buku none nadun handru. Iy badeh, ndrabun, ma iy ari lomondra ndra-in bwe. Aha ndrasahan nadun, eme ma manyah taha kudu ndrabun, ma aha kamekes kandriyen mwasin buku le iy amwenen.
1PE 1:16 Sahou ta Kindrei tiye bwena i buku doh, “Manyah taha kudu ndrabun, ma aha ka-en hamon ta kandriyen mwasin. Tasah, jo Kindrei, jo badeh, ndrabun labai.”
1PE 1:17 Taha aloh Kindrei badeh, tama taha, buku taha asolom i tan. Iy badeh, ndramak ta ereu bwena ta anuhun sahou, ma iy kameh edeu sihine taha lau mari, amwenen le ta gok nane taha amekes. Ma iy badeh, babudon ou saba lau handru, ma iy kameh winiyan batobolowe budon tan bala bame, bwe. Iy badeh, anuhun sahou tataha mari na kati budon tan ari le. Budon tan badeh, mwasin labai. Eme ma, len mari taha areu kon munyak dah, taha kabeleben Kindrei kamwenen handru.
1PE 1:18 Ehe, aha katondrok aha kamwenen, ma ka-en hamon ta kandriyen mwasin. Tasah, bwena mene aha a-en hamon ta iri kandriyen ndra-in, aha mene akohok ta tubu aha iri, arile na dah, aha ndratana aha, Kindrei ndrakonohei ma ndrakuhi aha ndrame len ta kandriyen badu bwena. Iy bakonohei aha bame hamon na bek nyikilikin hawe silba bwe. Iri lakou doh, lau badu kon munyak abudon tinan labai. Arile, gol hawe silba badeh, lakou badu kon munyak le. Hamon kameh iri amai au laleyah.
1PE 1:19 Kindrei badeh, konohei taha na ndraye Jises Krais amwenen, ya ndrayen doh, luk winiyan bakonohei na aliy bwe. Krais badeh, buku none ari sipsip, iy ari lakou ndraka-an badan bwe-en.
1PE 1:20 Bwena mene Kindrei babwidi kon munyak dah bwe le badeh, iy ndranyowonyani Jises Krais ta amekes gok ta akunoh taha ame hamon. Ya, na len dah, Kindrei ndraleheyani iy ndrame lewan udu kala iy mene imek ereu bada kei tondreh ereu mada lau mari. Iy imek ta aseben taha lau mara-ei badu munyak.
1PE 1:21 Na Jises le badeh, aha atehei budon taha in ta Kindrei. Iy mene ndramete-ei Jises udu bolo lek ta imek ndrame awas ja, ma iy ndratehei nyosowan ndrabun ndrala la-un. Eme ma, aha atehei budon taha boto-on in ta Kindrei, ma aha abe-en iy ta eme akohok aha ala hawen. Ma aha kameh akohok kohan mwasin ma manyah mwasin hawe Krais.
1PE 1:22 Ya na idah, aha ndranuhun sahou handru nyala Krais, ma iy ndramani iri kandriyen ndra-in taha mari, ma aha ndrasahan lau ha-un. Ma iy ndramesekei aha ndraso-ok ndramak ari ja ta Kindrei. Aha badeh, kaso-ok ndramak ari ja na budon hawe ndrine aha handru na len mari.
1PE 1:23 Kindrei ndratehei kohan mwasin ndrawek la-u aha. Ma aha ndrasahan randrah ja, buku none le buwa kei ha-un ateh ereu bolo bilin. Arile, aha basahan na buwa kei badu kon munyak dah bwe. Buwa kei badu munyak dah kameh, imek ma amai iu. Aha asahan na buwa kei Kindrei le mesekei, ma iy kameh ereu le buku doh. Buwa kei doh badeh, sahou ta Kindrei. Sahou doh atehei kohan mwasin i la-u iri lau tan, ma iy winiyan bano bwe.
1PE 1:24 Sahou udu bolo buk ndrabun tiye i buku doh: “Taha lau mari winiyan ba-en kon munyak dah luwen bwe. Taha kameh amak buku none le bwidiu. Ya nyara taha tinan kameh taku buku none le buwa bwidiu iroh le eme andri,
1PE 1:25 arile sahou ta Laban kameh ereu le buku doh.” Sahou doh badeh, iri ndrasehek ndrawek taha nane.
1PE 2:1 Aha ndrasahan ha-un ja na ndraye Jises Krais, eme ma aha karuwani iri kandriyen ndra-in. Aha sawasai, ma aha samekes kandriyen ndra-in sala ta ndramak ari ja. Mada aha salikis lakou ta ndramak ari ja, ma aha sasehek ndramak ari ja. Aha karuwani kandriyen ndra-in mari doh ki-iu.
1PE 2:2 Taha tana taha ta iri nah nadu bwisik badeh, anya ka-un le sur ta tine iri. Aha ka buku none le iri nah bwisik aso-ok sahou mwasin ta Kindrei, ta aseben aha ta ateh na len mari. Ya sahou tan doh bamalin ba-en bolo sahou ta wasai badu munyak dah bwe, sahou doh kameh mesekei aha ado mwasin hawen.
1PE 2:3 Ma, aha ka-en hamon ta kandriyen nane doh, tasah aha ndratanan, Kindrei badeh, mwasin labai en. Aha aso-ok iy buku none le iri lau aso-ok nyamon nyaman.
1PE 2:4 Aha kame hawe Laban. Iy badeh, buku none bek kohan in aliy, eme ma Kindrei anya kakohok bek nane ta atah asiu na aliy. Iri lau badu kon munyak anya iy lakou ndra-in, ya iri bwale iri iy. Arile, Kindrei ndranyowonyani iy kabwe, ya iy anya iy mwasin mara-ei.
1PE 2:5 Aha ale buku none iri bek koha iri in aliy, ma, na boto-on ta Malawin Ndrabun, iy anya kamekes aha kasahan asiu ndrabun tan handru. Ma aha kameh asahan iri pris ndrabun handru ta Kindrei, ma, na nyara Jises Krais aha winiyan adeu koha aha i ta Kindrei buku none ari lakou ta asun i nyara salom iy aso-ok handru.
1PE 2:6 Buk ndrabun tiye i buku doh: “Aha kanuhun, jo ndranyowonyani bek ari kabwe, ta asahan ndru ta kabede asiu ta ateu asiu kudu boto-on. Bek doh badeh, iy mwasin ya iy boto-on labai. Idah jo atehei iy ereu mandrei Sayon. Ya are lau atehei budon tan handru in tan kameh iy winiyan bani bwilima bwe.”
1PE 2:7 Ya sahou nane dah ewek taha lau atehei budon taha i ta Laban, badeh, buku none bek mwasin labai en. Arile, sahou ari ja i tiri lau ale batehei budon tiri bala tan bwe, i buku doh: “Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek.”
1PE 2:8 Ya buk ndrabun asehek ja, “Bek doh kameh tono-ei kati iri lau, ma iy kameh amekes lau taku ereu san.” Iri taku, tasah iri batehei budon tiri bala ta sahou tan bwe. Lakou doh asahan tiri, tasah bwena mene Kindrei ndratehei budon tan ta iy kameh amekes i buku doh.
1PE 2:9 Arile, Kindrei ndranyowonyani aha kabwe, ya aha ndrasahan pris handru ta kabin badu loken. Ma aha ndrasahan lau tan amwenen, ma iy ndramesekei aha ndrasahan ndrabun handru. Kindrei ndranyowonyani aha, ta aha kanyowonya ma kasehek kandriyen mwasin tan, iy mene ndramekes ndrawek taha, tasah iy ndraluhi aha ndrareu bolo lulik ndrame bolo kon tan, lomadan labai.
1PE 2:10 Bwena aha nyara aha bwe, arile idah aha ndrasahan lau handru ta Kindrei. Bwena mene aha ba-en baha tondrok ma tikisiy tan bwe, arile idah aha ndrame bahandra tondrok ma tikisiy tan.
1PE 2:11 Aha kawas tek, jo asehek sahou dah ewek taha, buku none aha areu kon munyak, kon taha bwe. Aha lau ta teteheh le, eme ma aha satehei kandriyen ta budon ma ndrine aha ndra-in sa-en bwena taha, ndri-iy. Tasah, kandriyen ndra-in ta budon ma ndrine aha badeh, kameh amekes bahun hawe malawi aha mwasin.
1PE 2:12 Buku none iri lau tana iri Kindrei bwe, orou sahou ewek la-u aha, ma anya, “Aha lau ndra-in,” mwasin, iri baranyolom kandriyen taha mwasin aha amekes. Ma hamon kameh, iri barasehek anya, “Ehe, ahi badeh amekes budon ndra-in; arile, iri lau ta Kindrei doh badeh, amekes kandriyen mwasin.” Eme ma iri kameh adeu wurah i ta Kindrei, ta kandriyen mwasin taha nane, na len Kindrei eme hamon ta anuhun sahou tataha.
1PE 2:13 Aha kabudon sahou ta Kindrei, ma aha kanuhun sahou tiri lau ta atondrok kon. Kabin ere bwena ale aha kanuhun sahou tan ale.
1PE 2:14 Aha kare hamon ta sahou tiri lau an bwena ta kon rakon rakon. Kabin atehei oro an bwena ta adeu lau a ta sahou, ma adeu maha-an i tiri, buku none iri amekes kandriyen ndra-in. Ma iy ale kameh bwese nyara iri lau amekes mwasin i loken.
1PE 2:15 Ya, aha kamekes kandriyen buku doh, tasah Kindrei aso-ok aha kamekes kandriyen mwasin. Ma, na kandriyen mwasin taha nane, aha kameh leheya iri lau tana iri Kindrei bwe, ma ba-en hamon ta sahou tan bwe. Iri amekes wasai ma orou sahou laleyah ewek la-u aha. Iri kameh bwili iri ama, ma iri winiyan basehek sahou ja bwe.
1PE 2:16 Kindrei ndrasihinei aha, ma aha ba-en bahandra ari kandriyen ndra-in badu munyak dah ja bwe. Eme ma aha satehei budon buku none ari ndramak ereu laleyah, ma aha amekes kandriyen ndra-in, ndri-iy. Kindrei konohei aha ndrame hamon, ma aha tan amwenen. Eme ma aha ka-en hamon ta budon tan, ma kamekes gok tan amwenen. Iy baso-ok aha ala hamon ta kandriyen ndra-in ja bwe.
1PE 2:17 Aha kabeleben iri lau mari, ma aha kaso-ok iri lau atehei budon tiri handru in ta Kindrei. Aha kanoh Kindrei, ma kabeleben iri kabin badu kon munyak ale.
1PE 2:18 Aha bonyo-ou ma lau ta gok, aha ka-en bahandra iri lau an bwena ta atondrok aha, ma aha kanuhun sahou ma kanoh iri. Aha kamekes ki buku doh ki tiri, buku none iri amekes mwasin ewek taha, o, iri amekes ndra-in, ma a-um aha ale.
1PE 2:19 Buku none aha akohok maha-an ta kandriyen mwasin aha amekes, arile aha bwese-ei maha-an nane doh, mwasin. Tasah, aha atehei budon ta aha a-en hamon ta seken ta Kindrei le. Eme ma iy kameh nyosowani aha na nyosowan mwasin.
1PE 2:20 Arile, buku none aha banuhun sahou tiri lau an bwena taha bwe, ma aha abo gok na budon taha amwenen, ya buku none iri ka-um aha, ki buku sah handru? Buku none aha bamekes bahun bala hamon tiri bwe, buku sah? Kindrei kameh sekesek ta kandriyen taha nane, deh bwe? Sebwe, bwe nadeh! Aha kameh bwese maha-an ta kandriyen ndra-in taha amwenen, arile buku none aha amekes kandriyen mwasin buku Kindrei aso-ok, ya iri a-um aha, ma aha akohok maha-an ta aliy, badeh mwasin. Kindrei aso-ok kandriyen nane aha a-en hamon ta aliy.
1PE 2:21 Ta kandriyen doh, Kindrei ndraluhi aha, tasah Krais mene ndrabwese-ei maha-an hawe sisi-in tinan labai ta aseben aha, eme ma iy ndraleheyani san ndrame tataha, ya taha ka-en hamon ta mweleke katin.
1PE 2:22 “Iy bamekes ari kandriyen ndra-in hawe ari sahou wasai basahan bohon, bwe.”
1PE 2:23 Iri aluhe iy, arile iy basumon ta luhe tiri bwe. Iy akohok sisi-in, arile iy bamekes ari lakou ndra-in bala hamon bala tiri lau, bwe. Iy atehei iy i le mine Kindrei, ndramak mwasin labai ta anuhun sahou tataha mari.
1PE 2:24 Krais mene ndrabwese-ei kandriyen ndra-in tataha mari ere bolo odan, kala iy mene sukik udu bada kei tondreh. Iy mesekei kandriyen doh ta sikinei taha ta kandriyen ndra-in tataha, ma mesekei taha asahan lau ha-un ja. Ma taha kamekes kandriyen buku Kindrei le aso-ok, tasah Krais ndramak ta kandriyen ndra-in tataha, ma mesekei taha ndrasahan ndramwenen ja.
1PE 2:25 Aha mene ndranyon buku none sipsip, ari ndramak ta tondrok iri bwe. Arile na dah, aha ndrame hamon hawe ndramak ta tondrok, ya iy kameh tondrokei malawi aha ma koha aha udu mwasin handru.
1PE 3:1 Buku none le iri lau ta gok nane anuhun sahou tiri lau an bwena tiri, aha badih ndratasou, aha ka-en bahandra udu aha iri, ma aha kanuhun sahou tiri. Tasah, udu aha iri rayah badeh, ba-en hamon ta sahou ta Kindrei bwe. Mwasin, iri baranyolom aha udu iri badeh, bamekes sahou ta aliu budon tiri bwe. Iri anyolom aha amekes kandriyen mwasin le. Idoh kameh mesekei iri atehei budon tiri i ta sahou ta Kindrei, ma bwidi iri tubuni ndrine iri, ma iri ame an hamon ta Krais.
1PE 3:2 Ma, iri kameh anyolom aha udu iri badeh, abudon ma alelek udu aha iri handru, ma aha amekes kandriyen ma budon mwasin. Ma, na kandriyen taha le iri anyolom, iri kameh atana iri sahou ta Kindrei, handru. Eme ma iri kameh tubuni ndrine iri, ma ame an hamon ta Krais.
1PE 3:3 Aha sanyosowaniy le bada aha badu manan, kandriyen buku aha tapwiu batu aha, hawe aha adeu iri nyasou ere bada aha, buku none lakou lomadan labai, ma hawe iri kolau sowa iri tinan labai.
1PE 3:4 Mwasin ta aha kanyosowani bolo oda aha na iri nyasou winiyan bandra-i bwe. Iri nyasou doh badeh, kandriyen ta ndrine aha udu mwasin, ma ade aha bare len tiri lakou solo-an asahan, bwe. Iri kandriyen doh badeh, mwasin labai ja ereu mada Kindrei.
1PE 3:5 Iri badih handru bwena badeh, iri atehei budon tiri i ta Kindrei. Eme ma iri anyasou iri, ma kone iri asahan mwasin, na kandriyen mwasin nane doh. Ma tekedek tiri badeh, udu mwasin bahandra udu iri, ma iri alelek udu iri handru.
1PE 3:6 Buku none Sara, iy anuhun sahou ta Abraham, ya iy aloh Abraham, “Ou Laban tek.” Ya na dah, aha nadun ale, buku none aha amekes kandriyen mwasin i buku le iy. Ma aha winiyan banoh ta udu aha bwe, buku none iri anya ka-um aha ta kandriyen mwasin taha.
1PE 3:7 Buku none aha lau tasou ale, aha kakohok budon mwasin, ya aha kamanyah kamwenen hawe udu aha iri. Aha kalelek iri badih ale, tasah bada iri badih badeh, boto-on handru bwe. Idoh le aha kamekes kandriyen mwasin ki tiri. Iri badih ale kameh akohok koha iri ma nyosowa Kindrei mwasin hamon hawe aha mwan. Eme ma, buku none aha an hamon ta sahou dah, ari lakou winiyan basokei salom taha bwe, buku none aha asolom i ta Kindrei.
1PE 3:8 Sahou tek anya kano kere dan ai. Arile, aha badeh, ndrokowa aha ma manyah taha kudu mwasin. Aha kaso-ok ndramak ari ja, buku none nadu tinem amwenen. Aha katikisi ndramak ari ja, ma aha karuwani iri kandriyen ta bar ndra-in.
1PE 3:9 Buku none iri lau amekes ndra-in ewek taha, aha samekes ndra-in sala hamon sala tiri. Ma buku none iri aluhe aha, aha saluhe sala hamon, arile aha kasolom ki ta Kindrei, ta iy kanyosowani iri. Tasah, Kindrei mene ndraluhi aha, ma iy ndratandrakan ta edeu nyosowan mwasin ewek la-u aha.
1PE 3:10 Taha ndratana taha, buk ndrabun asehek i buku doh, “Are lau aso-ok kohan mwasin hamon, hawe manyah tan kudu mwasin, iy badeh, saluhe hawe iy sawasai, ndri-iy labai.
1PE 3:11 Iy kedeu konan ki ta kandriyen ndra-in, ma iy kere hamon ta kandriyen mwasin, hawe iy kabadok ta amekes manyah tiri lau rayah ja kudu mwasin, ma iy kabadok handru ta amekes kandriyen mwasin le.
1PE 3:12 Tasah, Laban anyolom ma atondrok iri lau kandriyen tiri mwasin, ma iy anuhun salom tiri. Arile, Laban bwalen ma iy ibolosen i tiri lau amekes kandriyen ndra-in, ma iy winiyan baseben iri bwe.”
1PE 3:13 Buku none aha abo gok boto-on ta amekes kandriyen mwasin, are lau baramekes kandriyen ndra-in barawek taha kameh?
1PE 3:14 Arile, buku none aha akohok maha-an ma sisi-in ta kandriyen mwasin aha amekes, mwasin, aha kasekesek le kado. “Aha sanoh ta ari ndramak, ma aha sabudon sandra-i ndri-iy labai.”
1PE 3:15 Aha kabudon le Krais, ma aha kalelek iy, tasah iy badeh, Laban tataha handru. Ma len mari, aha kalokou aha ta asumon are lau, buku none iy ndremenya, saba kati kandriyen mwasin ereu taha, ma aha atondrok ta aliy. Aha kasumon kamunum, ma aha kalelek iri ale.
1PE 3:16 Arile, aha kasumon sahou tiri kamunum, idoh kandriyen mwasin. Ma budon taha kudu mwasin ale. Ya, buku none iri aluhe, ma adeu bwilima ewek taha, tasah aha amekes kandriyen mwasin ta nyara Krais, hamon kameh iri lau nane amekes ndra-in ewek taha, bwili iri kameh ama.
1PE 3:17 Ya, buku none Kindrei aso-ok ta taha kakohok maha-an ta kandriyen mwasin taha amekes, idoh lakou mwasin. Arile, buku none taha akohok maha-an ta kandriyen ndra-in taha amekes, idoh lakou ndra-in labai.
1PE 3:18 Aha abudon Krais ale. Kandriyen tan mwasin handru, arile iy akohok andra-i ale. Ma iy badeh, ndramak, san rasan le ta kandriyen ndra-in tataha. Iy bamekes ari kandriyen ndra-in bwe, arile iy ili i buku saluwe taha ta kandriyen ndra-in tataha. Eme ma, iy anya kakohok taha kala hawe Kindrei. Iri adai iy, odan buku none taha dah, arile iy amak eme awas ja na Malawin Mwasin.
1PE 3:19 Iy ndrasahan Malawin Mwasin, ma iy ili kon tiri su-u, ma iy atiye sahou i tiri su-u ereu bolo kou doh. Ma iy asehek i buku doh, “Jo ndrasakalawi lakou mari, iri mene anya kamekes kaliu keme tek.”
1PE 3:20 Iri su-u doh badeh, malawi iri lau ndra-in bwena mene iri banuhun sahou ta Kindrei bwe, kala Nowa mene amekes ndron tinan. Iri lau solo-an bala bolo ndron bwe, oro lau ma ndru la-uh le, ala bolo ndron nane doh. Oro bamak bwe, tasah gwa eme sebenei oro, bwese-ei ndron, ma ndron telebek. Arile, iri lau mari mene areu manan, amak an bolo wadah tinan.
1PE 3:21 Gwa doh badeh, i buku le gwa mene iri alomwa aha lau a bolon. Tasah, Kindrei ndrandrei aha ndrame hamon na gwa ta alomwa. Arile, gwa ta alomwa doh, ta sikine badam ndraka-an bwe, idoh ta leheya i tiri lau mari, buku none aha aso-ok Krais, ma aha anya ka-en hamon ta kandriyen tan mwasin. Ya, ta akohok aha ame hawe Kindrei handru badeh, iy ndramete-ei Jises ndrareu bolo lek ndrame loken.
1PE 3:22 Ya idah Krais ndrala loken ndrala bolo kandrah, iy ere loboho lim salin ta Kindrei. Ma Kindrei ndratehei nyaran ndra tinan, ma atehei boto-on i tan, ta iy atondrok iri angelo hawe iri lakou boto-on handru badu kandrah ma munyak. Iri lakou mari ja badeh, ereu bahandran ale.
1PE 4:1 Krais mene ndrabwese-ei maha-an tinan labai, ta aseben taha, eme ma aha ale kalokou aha ta bwese maha-an buku asahan taha. Aha katawi budon taha ki buku le Krais. Aha sanoh ta bwese maha-an, ndri-iy, tasah ndramak ndrabwese-ei maha-an, iy ndraruwaniy, ma iy kameh bwalen amekes kandriyen ndra-in ja.
1PE 4:2 Eme ma, na idah, ma i bwena, kala aha areu kon munyak dah kahis le, badeh, aha katehei budon ma bada aha mari kili bahandra tondrok ta Kindrei. Ya, aha sa-en hamon ta budon taha badu kon munyak ja ai.
1PE 4:3 Jaha solo-an labai aha amekes kandriyen buku iri lau badu leheleh amekes: Aha amekes karei, ma a-en hamon ta budon ndra-in taha. Ma aha manyah luluwen lawe-en labai, amekes nyamon tinan, ma aha a-un gwa boto-on ma amekes aha abo lolo-ou. Ma aha amekes kandriyen ndra-in solo-an labai. Ma aha asolom i tiri lakou laleyah, buku none sukumada kei, ma malawi nyam. Iri lakou doh, aha an hamon ta aliy luluwen lawe-en labai, arile na dah, bwili aha ama handru ta aliy, tasah bwena aha amekes i buku none Kindrei taha handru.
1PE 4:4 Ya idah iri lau badu leheleh mani iri atur ta aha bamekes kandriyen ndra-in buku le iri ja bwe, ma iri asehek sahou ma amekes kandriyen ndra-in solo-an ewek taha.
1PE 4:5 Arile, hamon kameh iri ales areu mada sahou hawe Kindrei, ya iri kameh asehek nyala iri lakou mari mene iri amekes i tan. Iy ndralokou iy kabwe ta anuhun sahou nyala kandriyen tataha lau koha taha kahis le, hawe iri lau ndramak ale.
1PE 4:6 Ehe, hamon kameh Kindrei atehei lau mari ala ta mada sahou. Eme ma sahou nyala Kindrei ndrasahan ndranye iri lau ndramak ale. Handru, taha lau mari badu munyak kameh amak, tasah Kindrei mene ndratiye, are lau amekes kandriyen ndra-in, iy kameh imek. Eme ma oda taha lau mari badu munyak kameh imek. Arile, sahou mwasin ta Krais ndrasahan tiri lau mwan ma badih nane, ta malawi iri kameh udu mwasin ma udu le buku doh, buku Kindrei ale ta udu le buku doh.
1PE 4:7 Len ta kon munyak ta ano ndrame mirihik labai, eme ma aha kabudon kamwenen, ma mada aha kaleu, ya aha katondrok iri kandriyen taha kamwenen. Idoh kameh aha winiyan asolom amwenen.
1PE 4:8 Bwele-e lakou mari badu munyak, aha katehei kandriyen ta aso-ok ndramak ari ja ta Kindrei kereu bwena. Tasah, kandriyen ta aso-ok ndramak ari ja badeh, tubuluhiy ma sakalawi kandriyen ndra-in mari, ma mesekei aha mani kandriyen ndra-in tiri.
1PE 4:9 Ya, buku none iri lau ra-on ja ta Kindrei ame areu hawe aha, mwasin, aha katondrok iri kamwenen. Ndrine aha sandra-i ta amekes kandriyen mwasin i tiri.
1PE 4:10 Aha ari, ari, ndrakohok ndramas na Malawin Ndrabun ta Kindrei. Eme ma, aha kamekes gok na ndramas nane, ta aseben lau ari ja ta Kindrei. Tasah, aha badeh, ndrasahan lau ta atondrok iri ndramas ari ari ta Kindrei nane.
1PE 4:11 Buku none ari ndramak ndrakohok ndramas ta Kindrei ta tiye sahou i ta lau, iy badeh, kasehek sahou ki ta lau, bwilin sama ndri-iy, tasah iy badeh, asehek buku le boho Kindrei. Buku none ari ndramak ibo gok ta aseben ndramak ari ja, mwasin, iy kibo gok ma boto-on na boto-on ta Kindrei ndratehei ndra tan. Buku none aha amekes i buku doh, iri lau kameh anyolom iri kandriyen mwasin asahan, ma iri kameh adeu nyaran tinan i ta Kindrei ta lakou mari Krais ndramesekei. Ma iy kameh akohok nyaran tinan, ma iy kameh atondrok lakou mari ereu le buku doh. Handru.
1PE 4:12 Aha kawas tek, na idah aha akohok iri maha-an, ma iri lakou solo-an asahan taha, ta none taha ta budon taha. Mani aha satur, ndri-iy. Ma aha sasehek anya, “Aden! Idah saba lakou handru? Sebwe iri lau ra-on ja ta Kindrei bakohok iri maha-an buku none ahi dah bwe, nadeh?”
1PE 4:13 Arile, aha kasekesek, tasah aha bwese iri maha-an buku none le Krais mene bwese. Ya, buku none iy eme hamon, ma nyaran i tinan, ma lomadan asahan eme lewan, aha kameh sekesek labai.
1PE 4:14 Aha kasekesek buku none iri lau asehek sahou ma aluhe aha. Tasah, aha badeh, an hamon ta Krais. Ma moson ta aliy i buku doh: Malawin Ndrabun ta Kindrei badeh, nyaran tinan, ya iy boto-on labai, ma iy ereu la-u aha handru.
1PE 4:15 Buku none aha ari akohok maha-an ta nyara Kindrei, mwasin, arile maha-an doh sasahan ta ou adai ndramak deh, ou lau ta bahana deh, ou ta amekes kandriyen ndra-in ra-on ja deh, ou ta bolowa gok ta ndramak ari ja.
1PE 4:16 Arile, buku none ou akohok maha-an, tasah iri aloh ou Kristen, ou bwilim sama, ndri-iy, ou adeu le wurah ki ta Kindrei, tasah ou bwese-ei nyara Krais.
1PE 4:17 Ya, aha mari kasekesek ki ta Kindrei, buku none iri lau badu kon munyak amekes ndra-in, ma adeu sisi-in ewek taha. Tasah, len ta Kindrei ta anuhun sahou ndrame ai, ya buku none Kindrei anuhun sahou tiri lau tan mwasin bwena, Kindrei kameh amekes saba lakou handru ili tiri lau ale banuhun sahou mwasin ta Krais bwe? Iy kameh anuhun sahou tiri ano, iri kameh ala bolo jih.
1PE 4:18 Ya, buku none buk ndrabun ndratiye, “Buku are lau mwan deh badih atehei budon tiri i ta Kindrei, bwese-ei iri maha-an, arile iri sakalawi mada sahou ta Kindrei na kandriyen tiri mwasin sese le, saba lakou handru kameh asahan tiri lau ale atehei kona iri i ta Kindrei, ya iri amekes kandriyen ndra-in? Iri kameh ala le bolo jih kabwai.”
1PE 4:19 Mwasin, buku none Kindrei aso-ok lau ra-on ta akohok sisi-in, iri kameh abo sah handru? Iri kabo gok kareu le buku doh, ta amekes kandriyen mwasin, ma kadeu koha iri ki mine Kindrei. Tasah Kindrei badeh, mesekei taha, ma na len mari, iy atondrok taha i mwasin handru. Eme ma, iy kameh aseben taha ta bwese iri maha-an ma sisi-in, ma iy anya kakohok taha kala hamon hawen.
1PE 5:1 Sahou tek dah badeh, ewek taha lau an bwena tiri lau ta Kindrei. Jo ale badeh, lau ta in bwena ta lau ta Kindrei ale. Ya, na madak amwenen jo atou Krais bwese-ei maha-an tinan labai. Taha mari kameh akohok lakou lomadan mwasin labai, Kindrei kameh edeu eme tataha, na len Krais kameh eme hamon ja. Eme ma, jo anya kasehek sahou boto-on kewek taha lau an bwena tiri lau ta Kindrei buku doh:
1PE 5:2 Aha katondrok iri lau ta Kindrei kamwenen. Iri asahan buku none sipsip ereu mine aha, ma iri an hamon ta sahou taha. Eme ma aha kasekesek ta amekes gok doh buku none le Kindrei aso-ok aha ta amekes. Aha sa-en hamon ta budon ta ndramak ari ja, ya aha sabo gok ta akohok le luk, ndri-iy. Aha katehei budon ta amekes gok ta Kindrei handru.
1PE 5:3 Aha samekes kandriyen buku none aha an bwena tiri bonyo-ou, ma lau ndrahu so-ok, ya aha banuhun sahou tiri lau nane Kindrei ndratehei iri ndrawek bahandra aha ta atondrok bwe. Arile, aha kamekes le iri kandriyen mwasin, ma aha kasahan buku none iri lau an bwena ta leheya san mwasin ili tiri lau.
1PE 5:4 Buku none aha amekes kandriyen doh bolo len mari, ya ndramak tinan handru ta atondrok sipsip asahan, aha kameh akohok ndramasi aha mwasin labai, i buku none le iri lau abo nyorei ta sakaliye, akohok ndramasi iri, buku none iri sakalawi iri lau mari, ma ano bwena. Ndramasi iri lau ta sakaliye doh kameh andra-i, ma amai iu, arile ndramasi aha doh badeh, winiyan bandra-i bwe-en.
1PE 5:5 Eme ma aha loweu, aha kanuhun sahou tiri lau-en, ma ka-en hamon ta aliy. Aha sala ta bar ndra-in, ndri-iy. Aha mari kamekes kandriyen ta adeu ndrine aha ma so-ok taha ki andri bahandra so-ok ta nadu tine aha ari ja. Tasah, aha ndratana aha in bolo buk ndrabun asehek i buku doh, “Kindrei badeh, bwalen iri lau ta atudun nyara iri amwenen i loken, arile iy badeh, tikisiy, ya iy amekes mwasin i tiri lau ale atehei nyara iri, ma so-ok tiri i andri mara-ei.”
1PE 5:6 Eme ma, aha samekes bar ndra-in sala ta Kindrei, ndri-iy labai. Aha katehei ndrine aha ma so-ok taha mari ki andri ki bahandra Kindrei. Tasah, iy badeh, boto-on labai, ma iy winiyan tondrokei aha. Eme ma, na len tan le ereu budon tan, iy barabwese-ei aha barame loken.
1PE 5:7 Kindrei badeh, abudon ma aso-ok aha, ma iy atondrok aha ale. Eme ma, aha katehei maha-an taha mari kili le minen, ya iy winiyan mesekei lakou mari asahan amwenen ja.
1PE 5:8 Aha kalokou aha ma mada aha kaleu, tasah balik ale ta amekes bahun eme tataha badeh, edek ili eme ta takaleh iri lau mwan ma badih, ta amekes ndra-in ki tiri. Iy badeh, ndra-in labai, buku none ari layon. Iy anyur boto-on labai, ta nohowa iri bwisir tan, ma iri anoh, ya iri sakaliye. Ma iy kameh atikah iri, ma adai iri ta aimon. Balik ale anya kamekes kandriyen buku doh kewek taha.
1PE 5:9 Arile, aha kales boto-on, ma aha katehei budon taha kabadok ki-in ta Kindrei, ya aha sanuhun sahou ta balik, ndri-iy, tasah aha tana aha iri lau ra-on ja ta Kindrei areu kon munyak dah badeh, bwese maha-an, buku none aha ale.
1PE 5:10 Kindrei badeh, kati iri kandriyen mwasin mari, iy amekes ewek taha. Iy ndraluhi aha ndrame hawe Krais, ta akohok lomadan, ma nyosowan mwasin ta ere le buku doh. Eme ma, mwasin ta aha kakohok maha-an ma sisi-in sese le, hamon kameh Kindrei mesekei aha asahan amwenen ja, na malawi aha. Ma iy kameh mesekei budon taha kameh asahan i tan, ma aha kameh akohok boto-on ta sakalawi iri maha-an ma sisi-in nane aha akohok.
1PE 5:11 Kindrei le badeh, boto-on labai, ma boto-on tan ta atondrok doh kameh, ereu le buku doh len mari. Handru.
1PE 5:12 Sailas badeh, iy nadu tine ari ai. Iy badeh, aseben jo ta atorou sahou tek in bolo la-ukei mo-on dah. Eme ma jo atehei ewek taha. In bolo la ukei dah, jo anya kaliu budon taha keme loken, ma jo asehek sahou handru ewek taha. Sahou jo atorou, hawe budon aha tawiy badeh, asahan ta tikisiy ta Kindrei nane, ma hawe kandriyen mwasin, iy amekes ewek taha. Eme ma, aha kales boto-on ta aliy.
1PE 5:13 Iri lau ra-on ta Kindrei areu kon Babilon dah. Idoh iri lau ale Kindrei ndranyowonyani iri hawe aha, iri anya, len mwasin ewek taha. Ma Mak i buku none naduk handru, iy ale, iy anya, len mwasin ewek taha ale.
1PE 5:14 Aha mari kateu lim kereu ndrokowa aha, ma aha katehei sekesek ki tiri lau ra-on ja ta Kindrei areu badeh. Aha kaleheya ki tiri buku none aha aseken iri handru, ma aha atehei ndrine aha i tiri handru. Jo aso-ok aha lau mari an hamon ta Krais, ndrine aha ma budon taha kudu mwasin.
2PE 1:1 La-ukei dah, jo Saimon Pita amwenen atorou ewek tado. Jo badeh, lohowan ma aposel, batun ari, Kindrei suni jo ta atiye sahou ta Jises Krais ili tiri lau tan. Jo atorou la-ukei dah, ewek tado lau mari ta budon handru i ta Jises Krais ado badeh. Tasah, Jises Krais badeh, iy ale Kindrei tataha ma hawe iy ndramak ta aseben taha. Iy abudon ta amekes taha badeh, kakohok budon mwasin handru i randra le, eme ma iy amekes ado asahan lau ta budon handru i le buku aso.
2PE 1:2 Eme udu bolo salom tek, ili ta Kindrei badeh, jo aseken iy katikisi aha, ma iy katehei tanan mwasin kewek taha, ta atanan kandriyen mwasin ta ado le, kidih kudu ndrine aha, i san ta tanan ta Kindrei uru Laban tataha, Jises.
2PE 1:3 Jises Krais badeh, Kindrei tataha. Eme iy aloh taha, ta taha ka-en hamon ta kandriyen tan, ma taha kadih na lomadan. Eme ma, taha atanan iy, ta iy badeh, mwasin labai. Handru, na boto-on tan le, iy edeu iri lakou mari ndrame tataha, ta taha winiyan manyah ado mwasin, ma taha winiyan amekes iri kandriyen iy aso-ok.
2PE 1:4 Eme lakou bwena mene iy tandrakan ta aseben taha badeh, iy ndramesekei ndrano na boto-on ma na mwasin tan. Iy amekes iri lakou doh eme tataha, ta taha kakohok kohan mwasin, ma kandriyen tataha badeh, kudu mwasin ta madan, ya taha samekes kandriyen ndra-in ta bada taha ja ai, sala buku none oro lau ala batehei budon toro handru ba-en ta Krais bwe kede-eh. Oro badeh, ndrabola ta kandriyen ndra-in, tasah budon toro ndra-in badeh, ndrasolo-ei oro labai ta amekes kandriyen ndra-in le.
2PE 1:5 Eme ta katin le doh, ado kanone boto-on ta amekes kandriyen tado ki mwasin i bwele-e budon handru tado, ma hawe i bwele-e kandriyen mwasin tado badeh, ado kanone boto-on tado ta takaleh ma akohok tanan mwasin ta Kindrei.
2PE 1:6 Ma hawe i bwele-e ado takaleh ma akohok tanan mwasin ta Kindrei badeh, ado kanone boto-on ta atondrok budon tado kudu mwasin; ma hawe i bwele-e ado atondrok budon tado kudu mwasin badeh, ado kanone boto-on tado ta saruwani mine ado, arile ado kales kado le ta bolo maha-an. Ya, i bwele-e kandriyen ta ado le tado badeh, kanone boto-on tado ta amekes bolo manyah tado i buku lau handru ta Kindrei.
2PE 1:7 Ma hawe i bwele-e kandriyen ta bolo manyah tado i buku lau handru ta Kindrei badeh, ado kanone boto-on tado ta amekes kandriyen ta tikisiy kudu ndrine ado, ki tiri lau ari ari, ma hawe i bwele-e kandriyen ta tikisiy kudu ndrine ado ki tiri lau ari ari badeh, ado kanone boto-on ta amekes kandriyen ta aseken iri lau mari.
2PE 1:8 Eme, i buku none ado amekes iri lakou doh ili ili, idah kameh ado atana ado handru amwenen ta Jises Krais badeh, iy Laban tataha. Eme, lahou tan ado amekes kameh winiyan bamak laleyah bwe, arile kandriyen ta bolo manyah tado kameh asahan lakou ari mwasin.
2PE 1:9 Ya, i buku none are lau oro kandriyen doh bare toro bwe, oro badeh, i buku none ari ndramak madan bwe, ma oro ndramani Kindrei mene ndrasikinei karei ma lomondra ndra-in toro ndra-au.
2PE 1:10 Eme ya ado nadu tine badu hawek ta budon handru, ado badeh, sala buku oro doh. Arile, ado tanan Jises tiye ado badeh, badu hawen. Eme ma, ado katawi tanan doh kihis, ma kaleheya udu bolo ado keme lewan. Ya eme, i buku none ado amekes iri lakou doh, idah kameh ado winiyan bataku bwe.
2PE 1:11 Ma hawe ado kameh, Laban Jises Krais, ndramak ta aseben taha kameh sekesek tado laba tinan labai udu baha tondrok tan, udu le buku doh.
2PE 1:12 Eme jo kameh asehek i tado udu le buku doh ta nyala lakou doh, buku ado ndratana ado ta aliy, ma ado badeh, kandro ado ndrahas ta budon handru.
2PE 1:13 Jo abudon, mwasin ta jo udu ndra loke kahis le kada-ah, ta amekes budon tado badeh, samani sahou handru.
2PE 1:14 Tasah, Laban tataha Jises Krais ndratiye ndraleu ndrame tek buku luwen bwe, kameh jo ruwani ado.
2PE 1:15 Eme ya jo anya kanone boto-on ta katiye tado badeh, bale ado samani oro lakou doh, ya eme ado katehei kudu budon tado i buku none jo kimek.
2PE 1:16 Eme aso aposel mene ndrasehek taha, ma aha ndratanan boto-on ta Laban tataha Jises Krais. Ma aso asehek taha ale, ta iy kameh eme hamon eme kon munyak ja. Arile, aso badeh basehek kundruh laleyah ba-en hamon ta lau abudon, ma aso asehek taha ta nyala boto-on ta Jises Krais, bwe. Na mada aso amwenen, aso anyolom iy andrei lomada Kindrei, ma iy asahan tinan. Eme ma aso asehek nyala aha ta iri lakou mara-ei nane doh.
2PE 1:17 Na bolo iri len mara-ei doh ale, tama taha Kindrei badeh, atudun ma suri Laban tataha Jises Krais iu ili loken mara-ei, ma iy atehei lomadan mwasin labai doh i tan, ma iy asahan i randrah labai. Aso badeh, areu aliy anyolom iy. Ma Kindrei badeh, udu bolo kandrah ma lomadan, asehek i buku doh: “Iy ndramak badeh, naduk. Jo aso-ok iy labai. Jo badeh, sekesek tinan labai tan.”
2PE 1:18 Aso anuhun doh na ndranye aso amwenen, udu kandrah aloh eme, kabatana aso ado hawen ado mandrei turuwen.
2PE 1:19 Eme sahou doh, to mene ndranuhun badeh, amekes sahou tiri propet abadok, ma ndrasahan handru ai. Idoh badeh mwasin, ya taha katehei taha ka ta aliy, i buku none ado kandrei sun kanya ta lomada kati ado udu kon lulik, winiya le an barame loke. Eme taha kabudon kudu ta sahou tiri propet doh, winiya le Jises Krais barame andri. Ano kameh, budon tataha baraleu ta lakou mari, i buku none ndramak andrei sun anya ta lomada katin winiya le ndrau ta boho len barame loke.
2PE 1:20 Ano udu bwele-en ta lakou mari doh, ado katanan kudu mwasin ta sahou iri propet atorou, badeh, na budon toro laleyah, bwe. Eme ma, taha ale sa-en hamon ta budon tataha amwenen, buku none taha katiye kati sahou ta ari propet udu bolo buk ndrabun.
2PE 1:21 Tasah, oro propet batorou ari sahou buku ari ndramak awas asehek bwe. Arile, oro atorou sahou doh na tanan ta Malawin Ndrabun aseben oro.
2PE 2:1 Arile idah kameh, i buku le bwena mene ndra-au, iri propet ta wasai mene are ndrokowa iri Isra-el kameh, iri lau ta leheya tanan ta wasai asahan ndrokowa ado i buku le aliy. Iri lau ta leheya tanan ta wasai doh kameh leheya ado na tanan handru bwe, ya idah kameh, ado winiyan baseleyaniy bwe. Iri kameh sekere-ei lau a len ta Kindrei i buku ndramak atehei budon tan handru i ta aliy. Ma idah kameh, iri bisini lahou ta Jises Krais, ndramak handru ta akunoh iri ta karei ma lomondra ndra-in. Ya eme, na boho iri le doh, kameh tiyani ndra-in atok tiri, ma idah kameh, se nawin bwe iri akohok andra-i labai.
2PE 2:2 Iri lau solo-an labai kameh a-en hamon ta kandriyen ta karei ma lomondra ndra-in tiri, ma bwidi iri lau rayah ja amekes sahou wasai ili bolo sahou handru.
2PE 2:3 Ma iri lau ta leheya tanan ta wasai badeh, ta ndrakok, ya iri kameh wendreya ado ta kadeu luk i tiri ta oro leheya ado. Iri kameh asehek kundruh ta wasai na budon tiri le. Eme ndra bwena bwena ndra-au, Kindrei ndrasani len ta kadeu iri ka ta sahou, ma idah kameh, maha-an tiri ta lakou iri mesekei atondrok iri.
2PE 2:4 Ado tanan buku Kindrei kameh edeu maha-an i tiri lau ta leheya tanan ta wasai, i buku none iy mene ndramekes ndra tiri lau rayah mene ndra-au. Bwena mene, iri angelo rayah amekes kandriyen ndra-in, ma Kindrei bamukuni iri bado bwe. Iy bokoro-ei iri i buku doh: Iy sawei mine iri ma kati iri, ma akahei iri ala ado bolo lek ta jih, ma iri ado bolo lulik laba tinan labai. Na idah iri ado aliy kodo-oh atondrok le len, ta Kindrei kameh edeu iri a ta sahou.
2PE 2:5 Bwena mene ale, kabatana Nowa badeh, iri mwan ma badih atehei kona iri i ta Kindrei. Eme ma iy tolomwani kon munyak atuh, ma idi iri lau mara-ei amak. Arile, iy badi Nowa bwe, iy ndramak ta atiye kandriyen mwasin. Kindrei sebenei Nowa, ma hawe oro lau ma ndro taloh ja, oro le doh badeh, bamak bwai.
2PE 2:6 I buku le, Kindrei mene sulumwi kon tinan Sodom hawe Gomora ako-oh iu. Iy amekes doh badeh, ta taha katanan ta aliy, idah kameh, iy amekes i le buku aliy i toro are lau banuhun batanau tan bwe.
2PE 2:7 Arile, Lot badeh, ndramak mwasin labai ta mada Kindrei, eme Kindrei sebenei iy. Lot anyolom kandriyen ta karei iri mwan le amekes iri, bwilin ama, ma bolo odan eden ta aliy hawe iy liliy. Iri amekes ndra-in labai, ta mada lau mari anyolom badeh, bamwenen ta mada Kindrei bwe.
2PE 2:8 Eme Lot, ndramak ta amekes lakou mwasin ta mada Kindrei, udu bolo ndrokowa iri anyolom kandriyen ndra-in ta bwilima iri amekes bamwenen bwe. Ma iy anuhun ale badeh, iri ba-en hamon ta batanau ta Kindrei bwe. Eme ma mesekei ndrinen amaha labai ma tikisiy.
2PE 2:9 Ya, i buku idoh handru eh, badeh, Kindrei tanan labai ta aseben iri lau ta amekes kandriyen mwasin ado ta bolo iri maha-an. Ma iy ale tanan labai ta tawi iri lau ta amekes kandriyen ndra-in ado abe-en len ta sahou, ma iy kameh edeu maha-an i la-u iri. Maha-an hawe isi i tiri badeh, kameh udu la-u iri udu le gwek ai, ta abe-en le len ta mada sahou ta Kindrei barasahan.
2PE 2:10 Ya idoh kameh, asahan i handru i toro lau heh amekes kandriyen ta karei ta amadin bada oro, ma tebelese sahou i tiri lau ta atondrok oro. Iri lau ta leheya tanan ta wasai badeh, winiyan banoh, ma iri winiyan banuhun ari ndramak, ma babwerei ta aluhe iri lakou badu kandrah, bwe.
2PE 2:11 Arile, iri angelo badu kandrah winiyan bamekes kandriyen doh bwe. Iri angelo badeh, boto-on tiri sakalawi boto-on ta lau awas, ma iri winiyan amekes lahou boto-on labai sakalawi boto-on tiri lau ta leheya tanan ta wasai, arile i buku iri are mada Laban badeh, iri winiyan borowei sahou ta luhe ndra-in bala tiri bwe le.
2PE 2:12 Arile, iri lau ta leheya tanan ta wasai doh badeh, i buku iri lakou bondriliu. Iri balomondra bale iri bwe, ma iri amekes lakou le ta bada iri aseken ta aliy. Ya iri katin haka doh badeh, kadai iri ta nyamon. Eme ya iri lau ta leheya tanan ta wasai badeh, i buku le iri. Iri balomondra bale iri ta bolo sehek sahou tiri ta bobose ta lakou iri bala tanan bolon i buku sah, bwe. Ya eme ta kandriyen ndra-in iri amekes doh kameh, iri akohok maha-an ma iri kameh amak ta aliy.
2PE 2:13 Idah kameh, iri bwese maha-an hawe isi ta aliy, i saluwe kandriyen ndra-in iri amekes i bada iri lau. Tasah, iri abudon lakou doh ta nyorei le ta amekes bada iri sekesek na ben ma hawe na len badeh, ndra mwasin le. Eme ya, ta kandriyen ndra-in doh badeh, iri amekes bwilima i tado ma iri amekes nyara ado andra-i. Ma iri ndrala labai ta amekes kandriyen ndra-in ta amekes bada iri kasekesek na len iri aimon nyamon hawe ado. Ma udu ndra bolo len ta nyamon le kameh, iri amekes sahou nyaman nyaman ta asan bale ado, anya kandriyen doh mwasin le ta mada Kindrei.
2PE 2:14 Arile, mada iri badeh, ndra ta karei le, ma oro badeh, abuyeh iri badih tasou ta amadin iri, eme iri winiyan baruwaniy ta amekes bwe. Ya, i buku iri anyolom are lau bales handru ta budon tan i ta Kindrei bwe, idah kameh iri asehek sahou nyaman ta atamas oro ka-en hamon tiri. Eme i san le doh kameh, iri amekes oro asahan lau tiri. Ma iri ale badeh, leheya iri le ta tanan mwasin labai ta aliu luk hawe lakou badu mine iri lau. Eme iri lau ta leheya tanan ta wasai doh badeh, Kindrei ndratandrakan ta iri kameh winiyan basahan ari ndramak awas bwe, oro ta amak le au.
2PE 2:15 Iri ndraruwani san mwasin, ya iri ndra-en hamon ta san ta Balam nadu Be-or. Iy badeh, tanan kandriyen ta aseken labai ta iri lau kanyohan iy luk, buku iy kamekes kandriyen ndra-in ta aseben iri; arile iy anya ndra mwasin le, iy amekes ili le ai.
2PE 2:16 Eme Kindrei mesekei donki tan asehek sahou i buku ndramak awas, ta kandriyen ndra-in nane iy samekes. Ya, eme donki nane dah, tiye i tan ma sani budon ta propet doh, samekes kandriyen ta lolo-ou doh ja ai.
2PE 2:17 Iri lau ta leheya tanan ta wasai badeh, i buku gwa udu bolo lek, ya lau anya kala ka-us, arile iri ala badeh, gwa ndramar. Iri ale i buku kon abakak, ya siyer atohou boto-on labai aluhi iu, ya ur bandruk bame andri ta lau bwe. Ya eme ta kandriyen ndra-in tiri doh badeh, Kindrei ndralowosani kon rakon doh lulik labai ndrado le ta iri kameh alih aliy.
2PE 2:18 Eme iri badeh, amou gwa ta atudun iri le ma asehek sahou mwasin mwasin ta nyala tanan ta wasai. Arile, sahou tiri badeh, nyaman nyaman ta aliu iri mwan ma hawe iri badih kasahan lau tiri. Ma iri badeh, tiye i toro anya, “I buku none ado anya kamekes kandriyen ta amekes bada ado kasekesek badeh, mwasin ta ado kamekes kili le ai.” Iri amekes kandriyen doh badeh, i toro lau nane baruwaniy ta amekes iri kandriyen ndra-in barame len ai.
2PE 2:19 Iri tandrakan ta oro kameh ado mwasin ta lakou mari, arile iri amwenen badeh, ado bonyo-ou na len mari ta kandriyen ta bada iri ta bwilima. Eme ya sahou badeh, tiye handru, ta lau a bonyo-ou ta lakou iri amekes badeh, kameh are bahandra tondrok ta lakou doh.
2PE 2:20 Eme ta sihide iri lau ta leheya tanan ta wasai asah i buku doh: Iri mene tana iri Laban Jises Krais mwasin labai, ndramak ta aseben taha, ma na tanan doh le, iri bamekes kandriyen ta bwilima ja bwe. Arile, udu ja badeh, iri a hamon ja amekes kandriyen bwena ta bwilima doh ja, ma kandriyen doh atondrok iri ai. Ano, udu ja, iri ala labai ta kandriyen ndra-in ta bwilima ma sakalawiy bwena mene iri amekes ja.
2PE 2:21 Ya, ki buku none iri mene bala tanan san ta kandriyen mwasin ta Kindrei bwe, idah kameh maha-an udu le udu. Arile, i buku none iri ndratanan kandriyen mwasin ta Kindrei, ma ndranyiminyem mwasin ta aliy, kabatana iri lau tan mene atiye sahou ta batanau i tiri, ya ano udu, iri tobolowe kona iri i tan ja, idah kameh, iri bwese maha-an ma isi tinan labai, Kindrei kameh edeu i la-u iri.
2PE 2:22 Eme, ya iri lau ta leheya kandriyen ta wasai doh badeh, i buku sahou sokek ma la-uh dah: “Taha badeh, tana taha, mwi amok, ano iy ili ini amok tan ja.” “Ma taha tanan ale, i buku none bou ndranyuwi iy, arile iy kameh ili hamon ili ta bolo nyahun tan ja.”
2PE 3:1 Ado kawas tek ta budon handru, idah la-ukei tek ramen ja ai; badu hawe ramen mene jo atorou ndrawek tado. Udu bolo la-ukei ma lumen doh, jo anya katiye tado ja ta bale ado samani kandriyen mwasin ta bolo tekedek tado.
2PE 3:2 Jo badeh, aseken ado samani sahou mene iri propet ndrabun ta tiye sahou badu boho Kindrei asehek i tado bwena mene ta nyala lakou kameh asahan na len hamon. Ma hawe bale ado ale samani sahou batanau mene toro aposel ta Laban Jises Krais, ndramak ta aseben taha, mene suni iri awek tiye ndrawek tado.
2PE 3:3 Arile, ma laba tinan badeh, bale ado samani lakou dah: Na len eme kameh iri lau rayah ta amekes kandriyen ndra-in kameh asahan, ma iri a-en hamon ta amekes bada iri. Iri lau doh badeh, ta bobose.
2PE 3:4 Ma idah kameh iri bobose ado anya, “Abo, iy ndramak mene tandrakan ta iy keme, ndraheh bah? Udu ndra kabatana tubu ahi iri bwena ndramak, arile iri bamak bwe, eme eme taku dah, lakou mari i le buku aliy kede-eh. Ma udu ndra kabatana munyak mene asahan badeh, lakou mari i le buku aliy. Ari lakou basahan se bwe.”
2PE 3:5 Arile, iri asehek doh badeh, ta laleyah le. Iri badeh, bale iri ndramaniy ta lakou badeh, ndratobolowe ja. Bwena mene kabatana Kindrei amekes kandrah, ma munyak asahan bolo gwa eme loke, ma hawe apwai gwa badu loke i len ta gwa badu andri badeh, iy tiye le na bohon, ya lakou mari doh asahan.
2PE 3:6 Ano, udu hamon ja, munyak mene atuh na gwa le doh, ma munyak andra-i, eme ma, bolo kon mari bala buku bwena mene ja, bwe.
2PE 3:7 Handru, na bohon le iri lakou marakon bwena doh ndrasahan. Ya na dah ale, munyak ma kandrah abe-en le len ta sahou tinan asahan. Ano Kindrei kameh asun munyak ma kandrah ma iri lau nane atehei kona iri i tan.
2PE 3:8 Arile, ado nadu tine badu hawek ta budon handru, bale ado samani lakou ari doh: Ta mada Laban badeh, len ari i buku none jaha ma rawa (1,000), ya jaha ma rawa badeh, i buku none len ari.
2PE 3:9 Eme ya Laban badeh, bamunum ta budon tan nane iy tandrakan ta amekes bwe. Bala buku none bale taha lau ala lomondra ta aliy anya amunum kede-eh bwe. Arile, iy badeh, udu le atondrok taha, tasah iy badeh, aseken taha mari katubuni ndrine taha ta kandriyen ndra-in, ya taha sala bolo jih.
2PE 3:10 Arile, len ta Laban ta eme hamon ja kameh i le mani tur, i buku le lau ta bahana. Ma idah kameh Laban mesekei lakou mari badu bolo kandrah kameh atohou i buku kurutuwe lakou atohou. Ya lakou mari badu bolo munyak kameh ako-oh na jih ma lakou mari badu bwele-e munyak kameh amai iu laleyah.
2PE 3:11 Ya, ki buku none lakou mari kameh kandra-i ki le buku doh, idah kameh, ado barala buku sah bah? Ado badeh, manyah ma kandriyen tado kudu mwasin ki buku lau ta Kindrei handru,
2PE 3:12 na len ado anyolom bohon ilih mwena ta len ta Kindrei, ma ado ale kabadok ta amekes lahou tan, kamekes len doh keme suwi. Ya na len doh kameh iri lakou mari badu bolo kandrah hawe lakou mari ales, udu bwele-e munyak kameh asekeu iu laleyah na jih.
2PE 3:13 Arile, iy bamani tandrakan tan bwe, ta taha badeh, anyolom bohon ili mwena ta kandrah ha-un hawe munyak ha-un kameh asahan. Idoh badeh, kon ta lau le amekes kandriyen mwasin ta mada Kindrei.
2PE 3:14 Ya eme ado kawas tek ta budon handru, i buku none ado anyolom bohon ili mwena eh, badeh ado katadau ado kabadok ta asahan mwasin labai handru ta mada lau kasehek ado, ma ado kado le ta bolo manyah mwasin hawe Kindrei.
2PE 3:15 Ado badeh, samani Laban, iy badeh, babotatahan bwe, iy udu le abe-en taha lau marakon. Iy abe-en taha lau mari, tasah iy anya kasebenei iri lau are bolo kandriyen ndra-in ta karei ma lomondra ndra-in tiri. I buku none ado ndranuhun nadu tine to Pol mene atorou i tado na tanan ta Kindrei edeu i tan.
2PE 3:16 Iy atorou i randra le udu bolo la-ukei tan mari asehek ta nyala iri lakou doh. Ya udu bolo la-ukei tan mari doh, tanan rayah badeh, boto-on labai ta atanan. Eme ya iri lau ta leheya tanan ta wasai badeh, tana iri handru ta sahou handru ta Kindrei bwe. Ma budon tiri badeh, bado rasi bwe. Ya eme iri akohok sahou ta Pol ja badeh, iri tobolowe i randrah ja, i nyara tiri amwenen, ma leheya iri lau na aliy. Ma iri ale amekes i buku le aliy ta sahou ta Kindrei rayah ja udu bolo tarou tan. Ya eme udu hamon kameh, Laban aleben kandriyen tiri ano, ma iy kameh akeh iri ala bolo jih.
2PE 3:17 Eme ya ado kawas tek ta budon handru, ado mene ndratanan eh, ya eme ado badeh, katondrok ado kudu mwasin. Eme ya iri lau ta tabelese ta batanau ta Kindrei doh, saluwi ado same len, ya sataku ta budon handru tado, i ta Kindrei ma ta sahou handru tan.
2PE 3:18 Arile, ado badeh, kandriyen ta tikisiy kudu tado badeh, kasahan ki tinan ma hawe kandriyen ta atanan Laban tataha Jises Krais, ndramak ta aseben taha, kudu tado ki tinan ale. Ya eme taha kasore nyaran ma katudun iy na len dah ma hawe na len eme, kudu le buku doh! Handru.
1JO 1:1 Aso badeh, ta atorou la-ukei ewek taha, ta nyala sahou kohan handru in aliy. Sahou dah badeh, asahan bwena labai, ya aso ndranuhun, ma aso ndranyolom na mada aso amwenen. Ma aso ndratona na mine aso ale.
1JO 1:2 Sahou dah asahan eme lewan, ya aso anyolom na mada aso, ma aso asehek nyala aliy. Ya aso tiye ewek taha dah, ta nyala kohan handru winiyan bano bwe. Ma bwena iy in hawe tama taha Kindrei, ya idah iy ndrasahan ndrame lewan, ma aso atou iy na mada aso amwenen.
1JO 1:3 Eme ma aso asehek ewek taha, ta lakou mari aso ndranyolom, ma ndranuhun, ma aha kameh winiyan atudun Kindrei hawe ahi, ma tukum tataha kameh udu hawe tama taha Kindrei uru nadun Jises Krais.
1JO 1:4 Aso atorou sahou dah ta nyala aha, tasah sahou bwidi ahi sekesek tinan labai.
1JO 1:5 Aso ndranuhun nadu Kindrei Jises Krais asehek sahou dah, ya aso asehek nyala aha i buku doh: Kindrei badeh, iy lomadan labai, lulik winiyan basahan tan o badan bwe.
1JO 1:6 Buku taha ari ari anya, “Ndrinek udu mwasin hawe Kindrei, ma jo edek hawen handru,” arile, iy edek bolo lulik kahis le, iy badeh wasai, ma iy ba-en hamon ta sahou handru bwe.
1JO 1:7 Arile, buku taha adek bolo lomada sun, i buku le iy, taha badeh, katukum ma ndrine taha kamwenen ta nadu tine taha iri rayah ja, ma ndraye Nadu Kindrei, Jises Krais kameh sikinei kandriyen ndra-in tataha mara-ei iu.
1JO 1:8 Buku taha anya, “Jo bamekes ari kandriyen ndra-in bwe,” taha badeh, ndrawendreyani ndrine taha le amwenen, ya sahou handru ta Kindrei badeh, ba-en ndrine taha bwe.
1JO 1:9 Arile, buku taha nyowonya kandriyen ndra-in tataha eme lewan, Kindrei kameh winiyan bamani taha bwe. Tasah, iy bwidi lakou buku iy ndrasehek, ma iy winiyan mesekei kandriyen mwasin. Eme ma, iy kameh mani kandriyen ndra-in tataha mari iu, ma bwidi taha asahan ha-un mara-ei ja.
1JO 1:10 Buku taha anya, “Jo bamekes ari kandriyen ndra-in bwe,” sebwe na sahou tan doh, taha aloh Kindrei ndramak ari ta wasai. Tasah, Kindrei mene ndratiye i buku doh: Taha mari badeh, amekes kandriyen ndra-in. Buku taha asehek i buku doh, sahou tan handru badeh, ba-en ndrine taha bwai.
1JO 2:1 Aha naduk, jo atorou la-ukei ramen dah ewek taha, ta aha samekes kandriyen ndra-in. Arile, buku are lau ndramesekei kandriyen ndra-in badeh, Kindrei winiyan mani kandriyen ndra-in tan nane iu, tasah seben tataha badeh, in aliy, nyaran Jises Krais. Iy ari kandriyen ndra-in badan bwe. Ma iy badeh, in hawe tama taha Kindrei, ma iy asehek sahou i tan, ta iy karuwani iri kandriyen ndra-in tataha mari nane ki-iu.
1JO 2:2 Ya, Krais le badeh, i nyara salom ta sikine ma mani kandriyen ndra-in tataha mari iu. Iy amekes lahou doh badeh, ta aseben taha le bwe, iy amekes ta aseben lau mara-ei badu kon munyak.
1JO 2:3 Taha tanan lakou dah: Buku taha a-en hamon tiri batanau tan, taha ndrame ndratanan iy ai.
1JO 2:4 Buku ari ndramak asehek anya, “Jo ta Kindrei handru ma jo tanan iy,” arile, iy ba-en hamon tiri sahou, nane Kindrei edeu eme tataha ta a-en hamon ta aliy bwai, sebwe iy ndramak doh ta wendreya. Ma sahou ta Kindrei handru badeh, bado ndrinen bwe.
1JO 2:5 Arile, buku are lau in hamon ta sahou ta Kindrei handru, iy badeh, leheya so-ok ta Kindrei udu bolo kandriyen tan eme lewan. Ta san le doh, taha atanan buku taha a-en hamon ta Kindrei handru.
1JO 2:6 Ya, buku are lau anya, “Jo ta Kindrei” o “Kindrei udu hawek,” tekedek ma hawe kandriyen tan mara-ei badeh, ki buku le ta Jises.
1JO 2:7 Wurah lomada aha kawas tek, jo batorou batanau ha-un bawek taha bwe, batanau malen le mene, kabatana aha asahan lau ta Kindrei. Sahou batanau malen doh badeh, aha ndranuhun ndra bwena labai.
1JO 2:8 Arile, jo badeh, atorou batanau ha-un ewek taha; ma aha anyolom moson ta aliy badeh, udu tan ma aha ale, tasah lulik anya ki-iu ai, ya lomada sun handru ndranya.
1JO 2:9 Buku ari ndramak anya, iy badu lomada sun, arile iy badeh, baso-ok iri lau ta Kindrei rayah ja bwe, ya iy ndramak doh badeh, udu ndra bolo lulik kahis.
1JO 2:10 Are lau mwan o badih, iy aso-ok nadu tinen iri rayah ja, iy doh badeh, udu bolo lomada sun, ma ari lakou ja winiyan batawi iy ta amekes are lau taku ja bwai.
1JO 2:11 Arile, are lau mwan o badih, buku iy baso-ok nadu tinen iri rayah ja bwe, iy badeh, edek ili eme udu ndra bolo lulik kahis; iy bala tanan, ta iy ilih heh bwe, tasah lulik badeh, ndrabwidi madan ndralik.
1JO 2:12 Ado naduk, jo atorou la-ukei dah ewek tado, tasah Kindrei badeh ndramani kandriyen ndra-in taha ndra-au na gok ta Krais mene ndramesekei.
1JO 2:13 Ado tama, jo atorou la-ukei dah ewek tado, tasah aha tanan Jises Krais, iy ndra bwena labai. Ado lau loweu, jo atorou la-ukei ewek tado, tasah aha ndrales boto-on ndrareu hawe Kindrei, ma aha ndrasakalawi balik. Ado nah nadu bwisik, jo atorou la-ukei ewek tado, tasah ado ndratanan tama taha Kindrei.
1JO 2:14 Ado tama, jo atorou la-ukei ewek tado, tasah ado ndratanan iy badeh, ndrasahan bwena labai. Ado lau loweu, jo atorou la-ukei ewek tado, tasah aha badeh boto-on, ma sahou ta Kindrei badeh, ereu bolo aha, ma aha ndrasakalawi balik.
1JO 2:15 Mada aha salikis kandriyen ta kon munyak, ma hawe iri lakou mari badu kon munyak. Buku ari ndramak, iy aso-ok kandriyen ma lakou badu munyak tinan labai, iy badeh, baso-ok lakou Kindrei aso-ok, bwe.
1JO 2:16 Taha tana taha iri kandriyen ta lau badu munyak badeh, buku none: Ade iri a len, ma mada iri alikis, hawe kandriyen ta bar ndra-in anya, “Jo le ai, jo le ai.” Kandriyen mari doh badeh, bareu ta Kindrei bame bwe. Iri kandriyen doh badeh, badu kon munyak le.
1JO 2:17 Ya kon munyak dah, ma lakou mari ale lau aso-ok, anya kamai ki-iu ai. Arile, are lau amekes kandriyen Kindrei aso-ok, kameh ereu le buku doh.
1JO 2:18 Wurah lomada ado naduk ta nyara Krais, len ta munyak dah ta udu badeh, ndrame mirihik labai ta ano ai. Buku none aha ndranuhun, lau ta kaliu hawe Krais kameh asahan. Ya, idah, iri lau solo-an ta kaliu hawe Krais ndrasahan ai. Eme ma taha ndratana taha, len ta munyak ta ano badeh, ndrame mirihik ai.
1JO 2:19 Bwena iri lau doh badu hawe taha, ya idah iri ndraruwani taha. Idoh ndraleheyaniy, iri lau doh badu hawe taha bwe. Ki buku none iri lau tataha handru eh, iri kameh winiyan baruwani taha bwe. Arile, iri ndraruwani taha, ya aha ndratanan, iri lau doh badeh, badu hawe taha bwe.
1JO 2:20 Arile, Krais ndrasolowei Malawin Ndrabun ndrawek la-u aha, ma aha mari ndratanan sahou handru.
1JO 2:21 Jo batorou bawek taha bwe, tasah aha bala tanan ta sahou handru bwe, arile tasah, aha ndratanan iy, ma wasai winiyan basahan sahou handru bwe.
1JO 2:22 Are lau iri ta wasai? Iri lau le nane ale bisini anya Jises badeh, Mesaya bwe. Iri lau buku doh badeh, iri ta wasai, iri batehei Kindrei uru nadun Jises Krais badeh, bado ndrine iri bwe. Eme ma iri asahan lau ta kaliu hawe Krais.
1JO 2:23 Are lau ale, atehei konan i ta Nadu Kindrei, badeh, ili ta taman Kindrei ale. Are lau ale, atehei ndrinen handru, in ta Nadu Kindrei, badeh, kameh in ta taman ale.
1JO 2:24 Aha kanyolom ma kabudon saba lakou mene, aha anuhun udu ndra bada katin, udu ndrine aha kahis deh bwe. Buku udu aliy eh, aha ale badeh, ado hawe Jises Krais uru taman Kindrei.
1JO 2:25 Ma, iy ndratandrakan ta edeu kohan handru eme tataha, kameh ta udu le buku doh.
1JO 2:26 Jo atorou iri sahou dah ewek taha, ta asehek nyala aha, ta mada aha kaleu, kora-on iri lau ta wasai kawendreyani aha.
1JO 2:27 Arile, aha badeh, barah ta tanan bwe. Aha ndrakohok Malawin Ndrabun ta Krais, eme ma iy doh leheya aha ta lakou mari ta Kindrei. Ya sahou tan doh handru, iy bawasai bwe. Eme ma aha katawi Krais kihis, buku none le Malawin Ndrabun ndraleheya aha.
1JO 2:28 Ya, aha naduk ta Kindrei, aha katehei budon taha kihis ki-in ta Krais, ma aha ka-en hamon tan. Tasah, buku iy eme hamon eme kon munyak dah ja, kora-on bwili aha sama ta kandriyen mene aha ndramesekei, ma aha anoh ta anyolom iy. Aha kasekesek ta an hamon tan, ma aha kameh sekesek ta anyolom iy.
1JO 2:29 Aha ndratanan, Krais badeh, mwasin handru. Iy ari kandriyen ndra-in badan bwe-en. Ya, buku aha atou iri mwan ma badih rayah amekes kandriyen mwasin, aha ndratanan, iri badeh, nadu Kindrei ale.
1JO 3:1 Aha katou, tama taha Kindrei badeh, tikisiy ma aso-ok taha labai, eme ma iy aloh taha nadun handru. Ehe, idoh handru! Taha nadu Kindrei handru. Iri lau badu munyak ale amekes kandriyen ndra-in, ya iri batehei budon ba-en hamon ta kandriyen mwasin ta Kindrei bwe. Eme ma iri tana iri Kindrei bwe, ma ta kati budon doh iri tana iri, buku taha ndrasahan nadu Kindrei, ma taha a-en hamon ta kandriyen tan mwasin.
1JO 3:2 Wurah lomada aha kawas tek, idah taha ndrasahan nadu Kindrei amwenen, arile hamon ta aliy kameh taha a buku sah? Taha tana taha bwe le, arile taha ndratanan, Jises kameh eme hamon, ya taha kameh asahan buku le iy amwenen, tasah taha kameh anyolom iy na mada taha amwenen.
1JO 3:3 Eme ma iri lau mwan ma badih ale atondrok Krais ta eme hamon ja, iri badeh, winiyan bala bolo ndraka-an ja bwe, tasah iri atondrok bada iri ma budon tiri udu mwasin, buku le kandriyen ta Krais.
1JO 3:4 Iri lau ale amekes kandriyen ndra-in, iri badeh, ba-en hamon ta batanau malen ta Moses bwe. Tasah, kandriyen ndra-in badeh, ba-en hamon ta sahou batanau bwe.
1JO 3:5 Aha ndratanan, Krais eme kon munyak dah badeh, ta sikine kandriyen ma lomondra ndra-in tataha marakon iu. Ya, Jises ndrasikine taha, arile iy badeh, ari kandriyen ndra-in bwe.
1JO 3:6 Ndramak in hamon ta Krais badeh, iy winiyan bamekes kandriyen ndra-in buku bwena mene ja bwe. Buku ari ndramak amekes kandriyen ndra-in kahis le, iy badeh, banyolom Krais bwe, ma iy tanan Krais bwe ale.
1JO 3:7 Wurah lomada aha naduk, mada aha kaleu tiri lau sawendreyani aha. Are ndramak, iy amekes kandriyen mwasin, iy badeh, mwasin mara-ei ta mada Kindrei, buku Krais badeh, kandriyen tan mwasin, ma iy ale mwasin mara-ei en.
1JO 3:8 Bwena handru, kala Kindrei mene mesekei kon munyak dah, tama balik Satan badeh, mesekei kandriyen, ma lomondra ndra-in. Eme adeh, lau mwan ma badih badu munyak ame amekes kandriyen ma lomondra ndra-in. Are lau amekes kandriyen ma lomondra ndra-in kahis le, iy badeh, ereu ndra hawe balik kahis le. Ta idoh le adeh, Nadu Kindrei eme kon munyak dah ta atikah, ma ta adai kandriyen ma lomondra ndra-in ta tama balik Satan nane ki-iu.
1JO 3:9 Buku none are lau asahan nadu Kindrei, iy kameh bamekes kandriyen ndra-in ja bwe. Tasah, Kindrei ndrasahan taman, ma koha kandriyen mwasin udu la-un, ma iy kameh winiya ba-en hamon ta kandriyen ndra-in tan bwena bwe.
1JO 3:10 Buku none aha anya katana aha, are lau handru nadu Kindrei, ma are lau handru badu hawe tama balik Satan, san in aliy: Iri lau mwan ma badih ale bamekes kandriyen mwasin bwe, ma iri batehei ndrine iri mwasin bala ta nadu tine iri ari ja, ta Krais bwe, badeh, iri nadu Kindrei bwe.
1JO 3:11 Bwena handru kala aha mene anuhun sahou mwasin dah, ma aha atehei budon taha i aliy, aha anuhun sahou i buku doh: Taha kaso-ok nadu tine taha ari ja.
1JO 3:12 Eme ma aha sa-en hamon ta kandriyen ta Ken mene mesekei, ndri-iy. Iy badeh, in hamon ta tama balik Satan, ya iy idi nadu tinen Ebol imek. Tasah handru, iy idi nadu tinen? I buku doh: Iy badeh, kandriyen tan ndra-in, ma Kindrei atehei konan i tan, arile kandriyen ta nadu tinen badeh, mwasin, ya Kindrei aso-ok labai. Eme ma, Ken ibolosen, ma iy idi nadu tinen imek.
1JO 3:13 Eme ma, aha nadu tine, mani aha satur, ma aha samaliye ndri-iy, buku none iri lau ndra-in badu munyak amekes ndra-in, ma bahun ewek taha.
1JO 3:14 Taha badeh, ndrakohok kandriyen ta aso-ok handru nadu tine taha ari ja. Ma, na le kandriyen doh, taha ndratana taha, buku none taha ndraruwani iri kandriyen ndra-in ta adai taha amak. Ma taha ndrareu hamon ta kandriyen ta akohok kohan mwasin. Ndramak ale baso-ok nadu tinen ari ja bwe badeh, iy ereu ndra bolo kandriyen ta imek kahis le.
1JO 3:15 Ndramak ndrinen ndra-in deh, iy bwalen nadu tinen ari ja, iy badeh, idih ta kandriyen ndra-in, buku none le iy ndradai nadu tinen ari ja ndramak. Ya aha ndratana aha, are lau ndradai nadu tinen ari ndramak badeh, iy winiyan bakohok koha Kindrei mwasin ta ereu la-un ereu le buku doh bwe.
1JO 3:16 Jises ruwani kohan ta aseben taha, ya na kandriyen iy amekes, taha ndratana taha, kandriyen ta tikisiy ma aso-ok ndramak ari ja. Eme ma taha ale kalokou taha ta adeu koha taha ta aseben ndramak ari ja.
1JO 3:17 Arile, buku none are lau tan lakou badu kon munyak solo-an in aliy, ya iy atou nadu tinen ari ja tan lakou bwe, ma manyah tan udu ndra-in, ya iy batehei budon ta aseben nadu tinen ari nane ja bwe, iy sasehek anya, “Jo aso-ok Kindrei handru.” Iy badeh, lau ta wasai handru. Tasah, tikisiy ma so-ok ta Kindrei bareu ndrinen bwe.
1JO 3:18 Aha naduk ta nyara Kindrei, aha sasehek anya, “Jo aso-ok iri nadu tine ari ja ta Kindrei.” Ma aha abudon anya, idoh le winiyan ai. Bwe, taha kadeu iri lakou ta aseben manyah tiri kudu mwasin ale. Ma na le kandriyen doh, taha winiyan leheya i tiri i buku none taha aso-ok iri handru.
1JO 3:19 Buku taha amekes kandriyen ta tikisiy o, aso-ok nadu tine taha ari ja, taha winiyan atana taha, buku none taha an hamon ta sahou handru ta Kindrei. Len ra-on taha amalin sese. Arile, budon ta Kindrei badeh, sakalawi budon tataha. Iy badeh tinan, ma iy tanan lakou mari. Eme ya, in bolo budon tataha, buku taha atona, buku taha ba-en hamon ta sahou handru ta Kindrei bwe, ndri-iy. Ndrine taha hawe budon tataha kudu mwasin ta ales areu mada sahou ta Kindrei. Iy winiyan batehei taha bala mada sahou ta a-en hamon ta sahou wasai bwe. Iy badeh kameh tiye tataha i buku doh, taha badeh, a-en hamon ta sahou tan handru.
1JO 3:21 Aha kawas tek ta nyara Kindrei, buku none budon taha aleu, ma ereu mwasin, aha winiyan akohok boto-on ta ales areu mada Kindrei.
1JO 3:22 Taha winiyan akohok iri lakou ereu tan eme, buku taha ndremenya iy, tasah taha badeh, anuhun sahou batanau tan, ma amekes iri kandriyen ta amekes iy kasekesek.
1JO 3:23 Iy batanau taha i buku doh: Taha katehei budon tataha handru ki-in ta nyara nadun Jises Krais, ma taha kaso-ok ndramak ari ja buku none iy ndrabatanau taha.
1JO 3:24 Iri lau ale anuhun sahou batanau tan, iri an hawen, ma iy in hawe iri. I buku sah handru taha winiyan atana taha, buku none sahou doh handru? Kindrei ndratehei Malawin Ndrabun ndrame la-u taha, ma Malawin Ndrabun doh leheya taha, buku none Kindrei in hawe taha.
1JO 4:1 Wurah lomada aha kawas tek ta Kindrei, iri propet solo-an ta wasai ndradek bolo kon munyak, aha satehei budon taha boto-on sala ta sahou tiri mari aha anuhun, ndri-iy labai. Lau solo-an kameh anya, “Kindrei atehei sahou tan eme tek ta asehek ewek taha.” Arile, aha kanyolom ma kanuhun sahou kamwenen, kora-on sahou doh ta Kindrei bwe, ya iy sawendreyani aha.
1JO 4:2 Aha winiyan atana aha buku none idoh Malawin Ndrabun handru: Buku none iri lau anya, “Jises Krais mene eme kon munyak dah, ma iy asahan awas buku le taha lau dah.” Iri lau doh, Malawin Ndrabun ereu la-u iri, ma iri asehek sahou handru.
1JO 4:3 Arile, buku none are mwan o badih basehek sahou nane doh ta nyala Jises bwe, iy badeh, Malawin Ndrabun bareu la-un bwe. Idoh malawin ndra-in ale nane aha ndranuhun iy kameh eme. Iy ale ta amekes kaliu hawe Krais, ma na len dah badeh, iy edek bolo kon munyak ai.
1JO 4:4 Aha naduk ta Kindrei, Kindrei le tondrokei koha aha, eme ma aha ndrasakalawi iri lau mwan ma badih ta asehek sahou wasai, tasah Malawin Ndrabun badeh, ereu hawe aha. Iy badeh sakalawi malawi lakou ndra-in ereu hawe iri lau ta wasai badu kon munyak dah.
1JO 4:5 Iri lau doh badeh, iri badu kon munyak. Ya kandriyen tiri ale badu kon munyak. Ya iri lau badu kon munyak le an hamon ta sahou tiri.
1JO 4:6 Arile, taha lau ta Kindrei, ma are lau tanan iy handru anuhun sahou tataha. Are lau ta Kindrei bwe, banuhun sahou tataha bwe. Eme ma, na san doh, taha winiyan atanan ndrokowa Malawin Ndrabun ta asehek sahou handru, ma malawi balik ta asehek sahou wasai.
1JO 4:7 Wurah lomada aha kawas tek ta Kindrei, taha kaso-ok nadu tine taha ari ja, tasah kandriyen ta aso-ok nadu tine taha ari ja badeh, ta Kindrei. Ya ndramak aso-ok nadu tinen ari ja, iy badeh, nadu Kindrei, ma iy tanan Kindrei handru.
1JO 4:8 Kindrei badeh, kati budon ta aso-ok ndramak ari ja. Ya buku none ndramak baso-ok nadu tinen ari ja bwe, iy badeh, tanan Kindrei bwe, tasah Kindrei badeh, aso-ok ndramak ari ja.
1JO 4:9 Kindrei badeh, nadun ari le, ya iy atehei iy eme kon munyak, ta aseben taha ta akohok kohan mwasin handru. Ta kandriyen doh, Kindrei leheya taha, buku none iy aso-ok taha handru.
1JO 4:10 Kati kandriyen ta aso-ok ndramak ari ja i buku doh: Taha baso-ok Kindrei bwena bwe, arile iy aso-ok taha badeh, bwena labai, ma iy atehei nadun eme buku san ta sikine kandriyen ndra-in tataha iu.
1JO 4:11 Aha kawas tek ta Kindrei, buku none idoh san Kindrei amekes ta aso-ok taha, taha ale kaso-ok ndramak ari ja.
1JO 4:12 Ari ndramak batou Kindrei bwe le, arile buku none taha aso-ok ndramak ari ja, Kindrei ereu hawe taha, ma so-ok tan kameh asahan eme lewan in bolo kandriyen tataha ta aso-ok ndramak ari ja, i buku le Kindrei aso-ok taha.
1JO 4:13 I buku sah handru taha kameh atana taha, buku taha an hawe Kindrei? Ya Kindrei in hawe taha? Taha atana taha, tasah iy ndratehei Malawin Ndrabun ndrame la-u taha.
1JO 4:14 Tama taha ndratehei nadun ndrame ta akohok taha lau mari badu munyak. Ahi aposel ndratou lakou doh kabwe. Ma ahi asehek nyala aliy i ta ndramak ari ja.
1JO 4:15 Buku none ari ndramak asehek anya, “Jises badeh, iy Nadu Kindrei handru,” iy lau doh ereu hawe Kindrei, ma Kindrei ereu hawen ale.
1JO 4:16 Eme ya, taha ndratana taha, ma taha atehei budon boto-on in ta tikisiy hawe seken ta Kindrei eme tataha. Kindrei badeh, kati lahou handru ta aso-ok lau mari, ya buku none are lau aso-ok nadu tinen ari ja, iy kameh ereu hawe Kindrei, ma Kindrei ereu hawen.
1JO 4:17 Kati iri kandriyen mwasin ta aso-ok nadu tine taha ari ja badeh, asahan eme lewan ereu bolo kandriyen taha i buku doh: Taha areu kon munyak, ma taha amekes iri kandriyen buku le Krais amekes, eme ma taha sanoh ta len ta Kindrei ta adeu lau mari ala ta mada sahou.
1JO 4:18 Ndramak aso-ok Kindrei handru badeh, iy winiyan banoh bwe. Buku none kandriyen ta aso-ok ndramak ari ja ndrasahan boto-on bolo kandriyen tan, iy winiyan banoh bwe. Kati budon ta anoh badeh, i buku doh: Ndramak abudon buku none Kindrei kameh edeu maha-an tinan labai i bwele-en ta kandriyen ndra-in iy mene ndramesekei. Ya, buku none are lau inoh Kindrei, iy badeh, batehei budon boto-on ma baso-ok Kindrei handru bwe.
1JO 4:19 Taha aso-ok ndramak ari ja, tasah Kindrei ndraso-ok taha bwena labai.
1JO 4:20 Buku none are ndramak anya, iy aso-ok Kindrei handru, arile iy baso-ok nadu tinen ari ja bwe, ndramak doh badeh, iy lau ta wasai. Tasah, buku none iy baso-ok nadu tinen ari ja bwe, iy atou na le madan, ki buku sah handru iy kaso-ok Kindrei, ale iy batou na madan bwe.
1JO 4:21 Sahou batanau Krais mene ndrasehek i buku doh: Are lau aso-ok Kindrei, iy kaso-ok nadu tinen ale.
1JO 5:1 Are lau atehei budon boto-on buku Jises badeh, Mesaya, iy badeh nadu Kindrei ari ai; ya are lau aso-ok taman, badeh, iy aso-ok nadun ale.
1JO 5:2 Buku taha aso-ok Kindrei handru, ma a-en hamon ta sahou batanau tan, mwasin; na san le doh, taha winiyan atanan buku taha aso-ok iri nadu Kindrei handru.
1JO 5:3 Seken tataha ta Kindrei badeh, moson ta aliy i buku, taha anuhun ma a-en hamon ta sahou batanau tan. Ya sahou batanau tan badeh, boto-on bwe, ta taha a-en hamon ta aliy.
1JO 5:4 Tasah, iri nadu Kindrei mari badeh, winiyan sakalawi kandriyen badu kon munyak dah. Ya san aha ndrasakalawi kon munyak dah i buku doh: Aha atehei budon taha boto-on in ta Kindrei, ma aha ndrasakalawi bahun ta balik, ma kandriyen badu kon munyak.
1JO 5:5 Are lau winiyan sakalawi kandriyen badu kon munyak? Ndramak le atehei budon tan handru in ta Jises, badeh, iy Nadu Kindrei handru.
1JO 5:6 Jises Krais badeh, eme leheya taha, buku iy badeh, Nadu Kindrei. Iy leheya taha, kabatana Jon mene alomwa iy na gwa, ya Malawin Ndrabun ereu loken eme andri, buku none ari ban. Ma kala iy mene imek ereu ta kei tondreh badeh, ma ndrayen amou. Iy bame na gwa ta alomwa le bwe, arile, iy eme leheya taha na gwa hawe ndra, ma iy are lau handru. Malawin Ndrabun badeh asehek, tasah iy doh ta kati sahou handru.
1JO 5:7 Ya, oro lakou ma taloh badeh, asehek le nyala Jises eme lewan:
1JO 5:8 Malawin Ndrabun, gwa hawe ndra: Oro lakou ma taloh doh, asehek sahou nyala Krais badeh, randra le.
1JO 5:9 Buku, taha badeh, atehei budon tataha mara-ei in tiri lau asehek, arile, sehek ta Kindrei ja badeh, udu bwele-en mara-ei, tasah sahou ta Kindrei amwenen, iy asehek ta nyala nadun Jises.
1JO 5:10 Buku are lau, iy atehei budon tan handru in ta Nadu Kindrei, iy ndramak doh, sahou handru ta Kindrei doh badeh, udu ndrinen. Are lau, iy batehei budon tan handru ba-en ta Kindrei bwe, iy ta tebelese, ma aloh Kindrei ta wasai, tasah iy batehei budon tan ba-en ta sahou, Kindrei asehek ta nyala nadun bwe.
1JO 5:11 Ya sahou handru Kindrei asehek i buku doh: Iy ndramesekei san ta taha ta akohok kohan mwasin ta udu le buku doh. Ya san ta akohok kohan mwasin ta udu le buku doh badeh, asahan ta gok, nadun mene ndramesekei ereu ta kei tondreh.
1JO 5:12 Are lau ihis hawe Nadu Kindrei, iy ndrakohok kohan mwasin ale winiyan bano bwe. Arile, are lau bahis hawe Nadu Kindrei bwe, iy winiyan bakohok kohan mwasin ta ereu le buku doh, bwe.
1JO 5:13 Jo atorou ewek taha, ta aha katanan, buku aha ndrakohok kohan mwasin winiyan bano bwe. Ou are lau ale atehei budon tam handru in ta Nadu Kindrei en.
1JO 5:14 Buku taha asolom i ta Kindrei, budon tataha winiyan abadok, tasah taha tanan, buku taha asolom ta ari lakou, ya buku Kindrei aso-ok ta taha kakohok, iy winiyan anuhun salom tataha.
1JO 5:15 Kindrei badeh, anuhun lakou mari taha asolom, ma ndremenya iy ta aliy. Eme ya, buku taha tanan sahou doh handru, taha tanan ale buku taha ndrandrei lakou doh kabwe.
1JO 5:16 Buku aha atou nadu tine aha ari taku ta kandriyen ndra-in, ya buku aha atou kandriyen ndra-in tan doh winiyan badai iy bamak bwe, mwasin, aha kasolom ki ta Kindrei, iy winiyan atehei kohan mwasin i tan. Sahou doh i la-u iri lau ale kandriyen ndra-in tiri batehei iri bala san ta imek bwe-en. Arile, kandriyen ndra-in ra-on badeh, ales i san ta imek. Ya jo basehek anya, aha kasolom ki ta Kindrei ta nyala aliy, bwe.
1JO 5:17 Handru, kandriyen mari ale bamwenen bwe badeh, kandriyen ndra-in. Arile, kandriyen ndra-in ra-on badeh, batehei ndramak bala san ta imek bwe.
1JO 5:18 Taha tanan, are lau ndrasahan nadu Kindrei, iy kameh winiyan bamekes kandriyen ndra-in bala ja bwe. Tasah, Nadu Kindrei Jises badeh, atondrok iy, ma tama balik Satan winiyan bamekes ndra-in bala tan bwe.
1JO 5:19 Taha tanan, buku taha ta Kindrei, ma Kindrei atondrok taha, arile kon munyak mari dah badeh, ereu bahandra tondrok ta tama balik Satan.
1JO 5:20 Taha tanan, buku Nadu Kindrei ndrame, ma iy ndratehei budon mwasin ndrame tataha, eme ma taha ndratanan Kindrei badeh, handru. Taha ndrahas handru hawe Kindrei uru Nadun Jises Krais. Jises badeh, Kindrei handru ma iy kati kohan ta ereu le buku doh na len mari.
1JO 5:21 Aha naduk ta Kindrei, aha katondrok aha kamwenen tiri lakou ta wasai ale anya kasahan kindrei taha.
2JO 1:1 Jo Jon, jo udu bwena ta lau ta Kindrei, jo atorou la-ukei dah, ewek ta ou badih nane Kindrei ndratehei kalem ndrawek tam, ma hawe nadum oro. Jo badeh, aso-ok ado labai! Jo le bwe, arile, hawe iri lau solo-an labai tana iri sahou handru.
2JO 1:2 Tasah, sahou handru in ndrine taha, ma iy kameh udu hawe taha, ta ere le buku doh.
2JO 1:3 Tikisiy ma hawe mondrei ta tama taha Kindrei uru Jises Krais, tama nah, kameh udu hawe taha, udu bolo sahou handru ma aso-ok.
2JO 1:4 Jo sekesek handru ta anuhun buku nadum oro ra-on ndra-en hamon ta sahou handru, buku tama taha ndrabatanau taha, ta a-en hamon ta sahou tan.
2JO 1:5 Arile, ou badih badeh, jo anya kasehek tam i buku doh: Taha badeh, kaso-ok nadu tine taha iri rayah ja, ma kaseben iri. Jo badeh, badeu batanau ha-un bawek taha ja bwe; batanau ari le mene badeh, taha ndrakohok bwena.
2JO 1:6 Kandriyen ta aso-ok ndramak ari ja i buku doh: Taha ka-en hamon ta batanau ta Kindrei. Batanau doh badeh, taha ndranuhun bwena. Ya taha ka-en hamon ta kandriyen ta aso-ok ndramak ari ja.
2JO 1:7 Aha kanuhun, iri lau ta wasai solo-an labai ndradek ndrame bolo kon munyak. Iri lau ta wasai doh anya, Jises Krais badeh, basahan bala buku bada ndramak awas bwe. Arile, iri badeh, ta wasai ma ta ariu kaliu hawe Krais.
2JO 1:8 Ya, mada aha badeh, kaleu ta aha saruwani budon taha ta lakou nane aha awoyah ta aliy. Aha kales boto-on, ma hamon kameh, aha akohok ndramas laba tinan labai ta aliy.
2JO 1:9 Buku none ari ndramak batawi sahou ta Jises Krais bwe, ya iy sandroh i ta sahou ari ja, idoh badeh, Kindrei ba-en hawen bwe. Arile, buku none are lau tawi sahou ta Jises ihis boto-on udu ndrinen, idoh kameh tama taha uru nadun Jises badeh, an hawen.
2JO 1:10 Buku ari ndramak eme hawe aha, ya iy basehek sahou mwasin, bala buku Jises asehek bwe, ado badeh, sasumon iy, ma sakohok iy sawek asiu hawe ado.
2JO 1:11 Buku are lau asumon iy ma asehek sahou hawen, iy badeh, aseben iy ta amekes gok tan ndra-in doh.
2JO 1:12 Jo winiyan atorou sahou lawe-en ewek taha, arile jo bwalek edeu i bolo la-ukei dah. Tasah, jo atehei budon tek boto-on ta ewek atou aha, ya taha barasehek nyala taha. Ma taha kasekesek ta ado le se.
2JO 1:13 Nadu tinem badih nane Kindrei ndratehei kalem ndrala tan, hawe nadun oro badeh, anya bada-an toro mwasin ewek tam.
3JO 1:1 Jo Jon, jo udu bwena, ta atondrok lau ta Kindrei. Gayus, jo atorou la-ukei dah ewek tam. Ou nadu tinek handru. Jo aseken ou.
3JO 1:2 Wurah lomadam kawas tek mwasin, jo asolom i ta Kindrei ta iri lakou mari ou amekes badeh, kasahan kamwenen, ma hawe malawim kameh edek mwasin.
3JO 1:3 Bwena mene oro lau rayah ta Kindrei ame asahan badak, ma oro asehek i buku doh, “Gayus badeh, atehei budon tan mara-ei in ta sahou handru, ma in hamon ta sahou handru na len mari.” Jo anuhun doh badeh, ma bwidi jo sekesek tinan labai.
3JO 1:4 Jo anuhun buku none ado naduk an hamon ta sahou handru, ya jo sekesek ya sekesek tek badeh, sakalawi budon tek mari.
3JO 1:5 Wurah lomadam, kawas tek, ou badeh, amekes gok mwasin labai ta aseben iri nadu tine taha rayah na len iri adek san ma atiye sahou ta Laban. Ou tanam iri bamwenen bwe, arile ou amekes mwasin ili tiri.
3JO 1:6 Iri nadu tine taha doh, asehek tiri lau ta Kindrei badu dah, i buku doh: “Gayus badeh, aso-ok iri, ma iy edeu seben laba tinan labai ili tiri.” Ya, buku none iri anya kadek ja, jo aso-ok ou aseben iri adek rakon ala rakon, ta amekes lahou ta Laban. Ou aseben iri badeh, in hamon ta budon ta Kindrei.
3JO 1:7 Ta nyaran le badeh, iri ala bolo kon rakon a rakon atiye sahou mwasin ta Krais. Arile, iri badeh, baso-ok ta akohok seben badu mine iri lau nane tana iri Kindrei bwe.
3JO 1:8 Eme ma, taha lau ta Kindrei badeh, kaseben iri lau buku doh. Na kandriyen le doh, taha marakon kameh amekes gok i se ta atiye sahou handru ta Kindrei.
3JO 1:9 Jo badeh, ndratorowenei la-ukei ramen, ndrawek taha lau ta Kindrei are badeh, ta aha katondrok iri lau rayah kameh awek ta amekes lahou ta Kindrei. Arile, Diyotrepis badeh, anya kasahan ki tinan ta atondrok iri lau ta Kindrei. Eme ma, iy ba-en hamon ta sahou nane ahi atorou ewek taha bwe.
3JO 1:10 Buku jo ewek asahan hawe ado, jo kameh asehek iri kandriyen iy amekes. Iy asehek iri sahou ndra-in eme la-u aso, ya iy bamekes idoh le bwe. Iy ale bakohok nadu tine taha iri bala asiu tan bwe. Ya, buku none iri lau ra-on ja anya kakohok iri kala asiu hawe iri, iy sosokok iri, ya iy sobolon iri satukum hawe iri lau ta Kindrei.
3JO 1:11 Kawas tek mwasin, wurah lomadam. Ou sa-en hamon ta kandriyen ndra-in nane iy amekes, ou a-en le hamon ta kandriyen mwasin. Are lau amekes kandriyen mwasin, iy badeh, ta Kindrei handru. Arile, are lau amekes kandriyen ndra-in, iy badeh, tanan Kindrei bwe.
3JO 1:12 Lau mari tanan Demitiriyus, ma iri asehek nyala kandriyen mwasin tan hawe sahou handru ta Kindrei iy asehek. Aso ale asehek nyala kandriyen tan, aha ndratanan, buku sahou taso badeh, handru.
3JO 1:13 Jo winiyan atorou sahou solo-an ja, arile jo bwalek ta atorou i bolo la-ukei dah.
3JO 1:14 Ndra mirihik ta jo kameh ewek atou ou, ma talu barasehek nyala aliy. Tikisiy hawe mondrei ta Kindrei udu hawem. Oro kawas tato badu dah badeh, suni sekesek toro ewek tam. Ou tiye sekesek tek, kili toro kawas tato mari are badeh.
JUD 1:1 Jo Jut, jo atorou la-ukei dah. Jo amekes lahou ta Jises Krais. Jo badeh, nadu tine Jemis. Jo atorou la-ukei dah ewek taha lau ta Kindrei, iy ndratehei kalem ndrawek taha ta asahan lau tan. Kindrei badeh, aso-ok aha labai, ma iy atondrok aha udu bolo iri maha-an solo-an, tasah Jises Krais atondrok aha.
JUD 1:2 Jo asolom i ta Kindrei, iy kanyosowani aha na kandriyen mwasin winiyan aseben aha. Ndrine aha kudu le kudu, ma iy kasuri ndrine aha, ta aso-ok nadu tine aha ari ja.
JUD 1:3 Wurah lomada ado kawas tek, jo ndrabwetenei ta atorou la-ukei ewek, ta tiye nyala aha ta gok, Kindrei mene amekes ta akohok taha mari. Arile, nadah ja badeh, jo abudon ta atorou sahou randra ja ewek taha i buku doh: Aha kabadok ta aseben ma atondrok iri budon handru, Kindrei mene ndratehei ndrame tataha lau tan. San rasan le, Kindrei mene atehei budon doh, eme tataha mwan ma badih tan.
JUD 1:4 Lau rayah badu lulik badeh, ndratobwak ndrame bolo taha lau ta Kindrei, taha tanan iri bwe. Iri propet bwena mene atorou nyala iri lau doh kameh ales are ta mada sahou ta Kindrei ta ndra-in tiri. Iri badeh, tebelese ma tubuni tikisiy ta Kindrei i buku kandriyen ta karei. Iri ale badeh, baso-ok Jises Krais, Laban tataha ari le doh bala buku tinan tiri bwe.
JUD 1:5 Aha ndratanan ta iri lakou marakon doh, arile jo anya kasehek taha ja, ta Laban mene andrei iri lau tan are Ijip ame len, arile udu hamon ja badeh, iy idi iri mwan ma badih nane batehei budon tiri ba-en tan bwe.
JUD 1:6 Ya ado kabudon iri angelo mene, iri bwale iri ateu gok mwasin Kindrei edeu i tiri, ya iri ndraruwani kon mwasin tiri. Eme ya Kindrei ndrasawei iri na sen ta ere le buku doh, ya iy ndratehei iri ndrala bolo kou lulik ere le buku doh, ta atondrok le len laba tinan ta sahou asahan.
JUD 1:7 Bwena mene iri lau badu Sodom hawe Gomora ma oro kon mirihik turu, oro mesekei kandriyen buku le oro angelo nane, oro an hamon ta kandriyen ndra-in, ya oro amekes kandriyen ta karei ndra-in labai, ya Kindrei atehei jih eme andri sulumwi kon tiri. Iri lakou doh asahan bwena, ya taha kabudon, ma taha sa-en hamon ta kandriyen ndra-in tiri doh. Iri ale kameh ala bolo jih doh ta winiyan bamak bwai.
JUD 1:8 Eme ya, iri lau ale anya kabolowa ado, iri an hamon le ta kandriyen nane. Ameh tiri mesekei, ma iri amekes kandriyen ndra-in laleyah ta amekes bada iri amwenen andra-i. Ma iri bwale iri a-en bahandra tondrok ta Kindrei, ma iri asehek sahou ndra-in i bada iri angelo tan ja.
JUD 1:9 Arile, angelo Maikel badeh, andres ta bada kei ta Moses hawe balik. Are handru kameh, akohok bada kei ta Moses? Iy badeh, basehek ari sahou ndra-in ta edeu balik i ta sahou bwe, arile iy anya, “Laban kameh edeu maha-an ewek la-um!”
JUD 1:10 Arile, iri lau doh banoh bwe ta asehek sahou ndra-in ta lakou mara-ei nane iri tanan katin bwe, iri badeh, buku none katin haka budon bwe, iri ba-en hamon ta ari budon ta tekedek bwe. Kandriyen tiri doh badeh, amekes ndra-in i tiri le.
JUD 1:11 Mada iri katou! Tasah, sisi-in tinan labai kameh i bwele-e iri! Iri badeh, a-en hamon le ta kandriyen ta Ken, iri amekes kandriyen i buku le Balam mene amekes ta akohok le luk ta lau, ma aseben iri ta amekes kandriyen ndra-in. Iri ale, amekes bahun hawe Kindrei i buku le Kora mene amekes. Tasah, ta lakou mari doh kameh, oro mari kameh amak ano au.
JUD 1:12 Len mari ado atukum, ya amekes kandriyen ta leheya buku, ndrine ado udu mwasin, ya ado sekesek, hawe ado aso-ok iri mwan ma badih ta Kindrei. Arile, iri lau ta tebelese nane doh banoh ma bwili iri bama bwe, iri abudon le iri amwenen, i buku ndramak ndra-in ta atondrok sipsip abudon iy le amwenen. Iri badeh, buku jor oloh asi kandrah iu, ta ur winiyan bandruk bame andri bwe. Iri ale badeh, a buku kei ari la-un bwe, iri sudiy ma kandron, iy asara ma winiyan bato-ou salin bwe.
JUD 1:13 Iri lau ta karei doh badeh, bwilima tiri buku le goi laba tinan atohou ma tebeya sisoh eme le babi. Iri ale, buku ndrau udu kandrah edek ili eme, ba-en hamon ta san tan amwenen bwe. Iri lau doh badeh, Kindrei ndralowosani kon lulik labai, ta iri kameh ala are aliy ta udu le buku doh.
JUD 1:14 Inok badeh, tinen edeu iy jaha sabe hamon labai ta Adam. Eme ya Inok asehek sahou propet ta nyala iri lau solo-an nane bolowa sahou ta Kindrei, i buku doh, “Aha kanyolom! Laban eme kameh, hawe iri angelo tan solo-an labai, taha winiyan bandromwei bwe.
JUD 1:15 Iy eme ta edeu lau marakon ala ta mada sahou. Iy kameh edeu maha-an ma sisi-in ndra-in labai i tiri lau nane are ndra bolo lulik, ta kandriyen ndra-in iri amekes. Laban kameh edeu maha-an ma sisi-in ndra-in ale, i la-u iri lau ta amekes kandriyen ta karei, ma iri asehek sahou bamwenen bwe i ta Kindrei.”
JUD 1:16 Iri lau doh bolowa sahou ta Kindrei badeh, ma iri lau nane ta nunu-uh ma ta asehek lau laleyah. Iri a-en hamon le ta budon tiri ma so-ok ta bada iri amwenen. Iri badeh, asehek sahou laleyah, ta atudun nyara iri. Iri sosokok iri mwan ma badih ta bolowa lakou tiri buku luk.
JUD 1:17 Arile, ado nadu tine handru, ado kabudon mene iri aposel ta Laban tataha Jises Krais asehek bwena.
JUD 1:18 Oro asehek nyala ado i buku doh, “Len hamon eme kameh, iri lau ta bobose kameh asahan, ya iri kameh adeu kona iri i ta Kindrei. Ya iri kameh an hamon ta budon tiri ma so-ok ta bada iri amwenen.”
JUD 1:19 Iri lau doh baden adeh, apwai ndrokowa aha ere aliy, iri badeh, an hamon ta budon ma tanan ta le lau badu kon munyak, ya Malawin Mwasin badeh, bado hawe iri bwe.
JUD 1:20 Arile, aha nadu tine handru, jo aso-ok aha katehei budon ma hawe ndrine aha kabadok ki-in ta Kindrei. Na bolo len mari aha kasolom kili le ta Kindrei i san ta Malawin Ndrabun.
JUD 1:21 Kindrei aseken aha handru, ya aha katehei aha kado ndra mirihik ta so-ok tan, buku aha abe-en ta tikisiy ta Laban tataha Jises Krais atiye kohan handru ta udu le buku doh ewek taha.
JUD 1:22 Aha katikisiy ma kaseben iri mwan ma badih nane budon tiri la-uh.
JUD 1:23 Lau rayah ta bolowa sahou ta Kindrei ndra-au laleyah badeh, mesekei budon tiri lau rayah taku. Eme ma, jo aso-ok aha kanone ta ariu budon hawe ndrine iri keme hamon ta sahou handru, i buku aha aruwi kei suwi suwi udu bolo jih eme len ma sandrakak. Aha kamekes kandriyen ta tikisiy kili tiri mwan ma badih nane a-en hamon ta kandriyen badu lulik. Iri amekes iri lakou doh, i buku awin ndra ndraka-an mara-ei. Aha kare ndra len tiri kandriyen doh, ma aha sa-en hamon ta aliy.
JUD 1:24 Kindrei badeh, winiyan tondrokei aha ado mwasin, ma aha winiyan bataku ta kandriyen ndra-in bwe. Iy winiyan andrei aha ala bolo lomadan ma ado kon tan mwasin. Eme ma, iri lau kameh winiyan basehek kandriyen taha bwe, aha kameh are ta sekesek le ai.
JUD 1:25 Jo anya kasehek taha, Kindrei ari le doh badeh, udu kandrah. Iy le adeh, andrei taha ame hamon ta gok mari, Laban tataha Jises Krais ndramesekei. Ya, taha badeh, katudun nyaran. Iy kasahan kabin ari le, boto-on mari udu le tan, iy atondrok ma udu bwele-en labai tiri lakou marakon. Bwena mene, iy udu le buku doh. Nadah badeh, iy udu aliy. Hamon ale kameh iy ta udu le buku don ai. Handru.
REV 1:1 Sahou ale jo atorou dah badeh, mene bame lewan bwe, arile Jises Krais le amwenen bwidiy asahan eme lewan. Kindrei le amwenen edeu i ta nadun Jises Krais, ta iy kaleheya taha lohowan tan, ta se luwen bwe, iri lakou mara-ei doh kameh asahan. Eme, Jises amekes sahou dah i san ta ameh, iy eme suni angelo hawe sahou tan eme tek, Jon, jo lohowan tan, ma iy asehek kati ameh mara-ei doh.
REV 1:2 Eme ma jo torowenei iri sahou mara-ei ta Kindrei ma ta Jises Krais, ma iri lakou mara-ei nane jo anuhun ma anyolom.
REV 1:3 Are lau anyolom sahou ta propet ta Kindrei dah, ta lakou anya kasahan hamon iri winiyan sekesek. Ma are lau ta Kindrei anuhun ma in hamon ta aliy, iri kameh winiyan sekesek handru. Tasah, len ndrasahan ndrame mirihik labai ta Kindrei kameh amekes iri lakou doh, iy mene ndratiye ta aliy.
REV 1:4 Jo Jon, jo atorou sahou dah ewek taha mwan ma badih ta Kindrei badu kon ma ndro taloh udu bada kon tinan Esiya. Jo anya kedeu bada-an mwasin kewek taha ta nyara Kindrei. Na len dah iy udu hawe taha kada-ah, bwena, bwena iy udu aliy ale, ma hamon kameh iy eme hawe taha. Ma jo anya kedeu bada-an mwasin kewek taha ale ta nyara malawin mwasin ma ndro taloh, na len mara-ei oro manyah ado mirihik ta koyeu ta Kindrei. Ma jo anya kedeu bada-an kewek taha ale in ta nyara Jises Krais, iy ta atiye iri sahou marakon ta Kindrei. Iy le ari badeh, amak udu bolo lek tan eme awas ja ma mwena handru ta lau mara-ei. Ma iy asahan tinan ja tiri kabin marakon ado kon munyak. Tikisiy ma manyah mwasin ta Kindrei uru nadun Jises hawe Malawin Ndrabun badeh, kudu hawe aha. Jises Krais badeh, aso-ok taha mwan ma badih tinan labai, ma ta ndrayen amou udu bada kei tondreh eme andri, ma ndrasikinei kandriyen ndra-in tataha mara-ei ndra-au.
REV 1:6 Ma iy bwidi taha asahan lau tan ma pris ta bolo tondrok tan, ma taha ale asahan lohowan ta Kindrei, iy tama Jises. Aha mwan ma badih mara-ei badeh, katudun nyaran ki tinan kili loken mara-ei, ma iy kameh katondrok lakou mara-ei na boto-on tan ta udu le buku don ai. Handru!
REV 1:7 Aha kanuhun! Jo atou iy anya keme badeh, udu bolo asi kandrah, ma iri mwan ma badih mara-ei kameh anyolom iy na mada iri amwenen, ma hawe iri mwan ma badih mara-ei badu Isra-el bwena mene orowei kabede Jises Krais na nyah ma tatahi iy i bada kei tondreh. Iri lau doh kameh anyolom iy ale. Iri lau mwan ma badih mara-ei badu kon munyak kameh abudon solo-an labai ta aliy, ma iri kameh a-um ade iri amwenen, ma aden i ndra-in labai. Ma, iri lakou mara-ei doh kameh asahan. Handru.
REV 1:8 Laban Kindrei, boto-on mara-ei udu tan, iy asehek i buku doh: “Jo ma mwena handru, ma jo in ndrobek mara-ei.” Na len dah iy udu hawe taha kada-ah, bwena handru labai iy udu aliy ale, ma hamon kameh iy eme hawe taha.
REV 1:9 Jo Jon, jo nadu tine aha lau ta Jises. Jo badu hawe aha ta bwese maha-an ma akohok sisi-in, jo udu bilisiu ta Kindrei hawe aha. Ma taha mara-ei ales are le se atadau taha ta bwese maha-an. Jo mene atiye sahou ta Kindrei, ma jo asehek ta jo amwenen badeh, atehei budon tek mara-ei in ta sahou handru ta nyala Jises. Eme ma iri lau tinan badu Rom badeh, tikahei jo, ma atehei jo ili bolo kou udu busu ari, iri aloh Patmos.
REV 1:10 Na len ta Laban amwenen badeh, Malawin Ndrabun asahan eme bwele-ek ma tubuluhi jo, ma udu konak badeh, jo anuhun boho ndramak ari aloh boto-on labai i buku lau oloh ndrah.
REV 1:11 Ma iy asehek i buku doh, “Lakou mara-ei, ou anyolom, ou torowenei kili bolo buk, ano ou atehei kili tiri mwan ma badih ado kon ma ndro taloh udu bolo Esiya. Ou atehei ari, ari kili tiri kon mara-ei doh: Epesus, Semena, Pegamum, Tayataira, Sadis, Piladelpiya ma Leyodisiya.”
REV 1:12 Eme, jo tubuni jo ta anya kanyolom ndramak nane asehek sahou eme tek doh. Jo tubuni madak, ma jo anyolom ndru-u sun ma ndro taloh ales, ndru-u sun doh iri amekes na bek nyikilikin.
REV 1:13 Ma jo atou ndramak ari, ya konen badeh, “I buku le Nadu Ndramak Awas.” Iy ales udu ndrokowa ndru-u sun ma ndro taloh nane doh, ma iy asini awin belen mara-ei ili isos ndra bada katin andri, ma iy bawei balaban ari amekes na bek nyikilikin labai udu batalan.
REV 1:14 Lami batun belen mara-ei, i buku asi kandrah, ma madan anya i buku jih.
REV 1:15 Katin badeh, nyikilikin labai buku bek bras iri asun na jih taladan, ano nyasei i nyimirin mara-ei, ma nyaro bohon i buku nyaro goi laba tinan atohou.
REV 1:16 Iy tawi ndrau ma ndro taloh badeh, udu minen salin, ma hawe raho samen iri aloh bainat, madan mala-uh badeh, lahen bwe, lahen bwe, udu bohon eme len. Ma madan anya labai i buku le an udu alih amwenen.
REV 1:17 Jo anyolom le iy badeh, ma jo taku ili bada katin, jo ndramak ndra buku bada kei. Iy atehei minen salin eme bwele-ek ma iy asehek sahou eme tek i buku doh, “Ou sanoh! Jo ma bwena labai, ma jo ndrobek handru!
REV 1:18 Jo badeh, ta ere le buku don ai! Jo mene imek, arile nadah jo ndrame awas ja ta ere le buku doh, winiya bamak ja bwai. Eme ma jo le ari badeh, boto-on tek winiyan mete-ei iri mwan ma badih ndramak bwena kameh ame awas ja.
REV 1:19 Abo, ou atorou iri sahou ta lakou ou ndranyolom, ma ta iri lakou nane udu kada-ah, ma ta iri lakou kameh asahan hamon tiri lakou doh.
REV 1:20 Ou ndranyolom ndrau ma ndro taloh udu minek salin ma hawe ndru-u sun ma ndro taloh ai. Idoh i buku sahou sokek le, arile moson ta aliy i buku doh: Ndrau ma ndro taloh doh i buku iri angelo atondrok lau ta Kindrei badu kon ma ndro taloh. Ya, ndru-u sun ma ndro taloh doh, i buku iri mwan ma badih ta Kindrei badu kon ma ndro taloh doh amwenen.”
REV 2:1 Iy ndramak nane dah asehek eme tek i buku doh, “Ou atorou rayah sahou kili ta angelo ere bwena tiri lau ta Kindrei are kon Epesus. Sahou i buku doh: ‘Jo badeh, tawi oro ndrau ma ndro taloh udu minek salin, ma jo edek bolo ndrokowa ndru-u oro sun ma ndro taloh iri amekes na bek nyikilikin. Jo le amwenen badeh suni sahou dah ewek tam:
REV 2:2 Jo badeh, ndratanan mara-ei ndrano ta iri kandriyen mara-ei nane aha lau ta Kindrei badu Epesus amekes, ma ta sa-ar ta gok taha mara-ei ano. Jo tanan, aha badeh, ales boto-on labai tiri maha-an asahan taha, ma aha bwale aha iri lau ndra-in. Iri badeh, tiye aha i buku doh, “Ahi aposel ale.” Arile, iri aposel bwe. Ma aha ndraseleyani sahou tiri, ma aha ndrasilahei kati kandriyen mara-ei iri amekes. Eme ma, aha ndratanan ai, iri lau ta wendreya le.
REV 2:3 Aha badeh, ndra-en hamon tek, ma aha ndratawi nyarak ndrahis mara-ei. Eme ma iri lau badeh, amekes ndra-in ewek taha. Arile, aha badeh, ales boto-on labai, ma bwese iri maha-an mari doh, ma jo tanan aha bawoyah ta aliy bwe.
REV 2:4 ‘Arile, jo tek sahou udu taha i buku doh: Ma bwena handru mene aha atehei budon taha badeh, eme le tek, ma aha aso-ok jo labai, arile nadah ja badeh, aha baso-ok jo bala buku bwena mene aha amekes ja bwe.
REV 2:5 Ya, ma bwena mene aha amekes kandriyen mwasin labai, arile nadah ja aha ndraruwaniy. Ya, aha kabudon kili hamon ja ta kandriyen, mene aha atehei budon taha mara-ei eme le tek, ma aha aso-ok jo labai. Aha katubuni ndrine aha ja, ma ka-en hamon tek buku bwena mene ja. Buku bwe-eh, jo kameh asahan hawe aha ma andrei ndru-u sun taha iu.
REV 2:6 Handru labai, aha amekes kandriyen ari mwasin labai. Aha badeh, bwale aha kandriyen tiri lau ta Nikolas. Jo ale bwalek kandriyen iri amekes.
REV 2:7 ‘Ya, buku ndranye aha udu aliy, aha kanuhun saba lakou handru Malawin Mwasin asehek ili tiri lau ta Kindrei! Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri bwe, jo kameh tiye buku doh, iri kameh winiyan akohok nyamon badu ta kei nane edeu kohan mwasin ili tiri mwan ma badih. Kei doh badeh, udu bolo bilin ta Kindrei udu bolo kandrah.’”
REV 2:8 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Semena. Sahou i buku doh: ‘Jo ndra bwena, bwena labai, ma jo ndrobek handru. Jo mene imek, arile jo amak eme awas ja, ma jo udu kada-ah. Jo amwenen asehek sahou ewek taha dah:
REV 2:9 Jo tanan iri maha-an ma isi badeh, ndrasahan taha, ma jo ndratanan, aha ari lakou bwe, aha badeh, ndra buku iri lau laleyah. Arile, lakou taha mari badeh, solo-an labai udu hawek. Ma jo ale tanan sahou nane iri lau rayah sondrokonya aha badeh, badu boho iri Juwis amwenen. Iri lau nane doh anya, “Ahi badeh, lau ta Kindrei handru, tasah ahi badu Juwis.” Arile bwe, iri badeh, lau ta Satan.
REV 2:10 Hamon kameh, aha akohok sisi-in ma bwese maha-an, arile aha sanoh ta aliy. Aha kanuhun! Balik kameh atehei iri mwan ma badih rayah badu bolo aha ala bolo kou, ta none budon taha. Ma aha kameh akohok sisi-in ma bwese maha-an ili winiya le len ma ronoh. Arile, aha saruwani budon taha handru udu tek. Aha katawiy kihis budon taha handru kili, winiya le len iri adai ou amak. Ma idah kameh jo edeu taha kohan handru ta udu le buku doh, i nyara ndramas taha.
REV 2:11 Ya, buku ndranyem udu aliy, abo, ou anuhun saba lakou handru, Malawin Mwasin asehek ili tiri lau ta Kindrei! Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri kameh winiyan bakohok sisi-in ta imek ari hamon ja bwe.’”
REV 2:12 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Pegamum. Sahou i buku doh: ‘Jo tawi samen raho lawe-en, madan ma la-uh, ma madan, madan labai, ma jo suni sahou dah ewek taha.
REV 2:13 Jo tanan, iri lakou ndra-in asahan kon nane aha are aliy badeh. Satan badeh, ndratondrokei iri mwan ma badih rayah badu loboho badeh, ma iy udu koyeu tan ma ndrasahan kabin handru! Bwena mene, iy ndramak Antipas badeh, iy ndramak ari ta atiye sahou tek, iy udu hawe aha, ma iy in hamon handru tiri sahou tek. Eme ma, iri lau badu loboho badeh, adai iy imek udu kon tiri lau ta Satan are aliy. Na len dah, aha baruwani budon taha udu tek bwe le. Aha badeh, a-en hamon tek kahis, ma aha batone budon doh bwe le.
REV 2:14 ‘Ya, aha mwasin handru, arile jo tek sahou rayah udu taha: Iri lau rayah are bolo aha kede-eh badeh, a-en hamon ta leheya ta Balam, iy mene leheya Balak, san ta ariu iri lau badu Isra-el ta taku ala bolo kandriyen ndra-in. Eme ma, Balak andrekei iri mwan ma badih rayah badu Isra-el ta aimon nyamon nane iri asalom ili ta nyara kindrei ta wasai, iri amekes na sukumada kei, ma iri amekes kandriyen ndra-in ta karei.
REV 2:15 I buku le aliy ai, lau rayah are bolo aha kede-eh badeh, a-en hamon ta sahou tiri lau ta Nikolas.
REV 2:16 Eme nadah badeh, aha katehei kona aha kili tiri sahou hawe kandriyen ndra-in tiri lau ta Balam hawe Nikolas. Buku aha bamekes bwe-eh, mirihik ai, jo kameh ewek amekes bahun hawe aha lau nane a-en hamon ta sahou tiri lau ta Nikolas, na samen madan, madan labai kameh udu bohok eme len.
REV 2:17 ‘Buku ndranye aha udu aliy, jo aso-ok aha kanuhun saba lakou handru Malawin Mwasin asehek ili tiri lau ta Kindrei. Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, jo kameh edeu niri mana, amai labai udu kon tek. Ma jo ale kameh edeu bek belen mara-ei i tiri ari, ari. Ma udu bwele-e bek doh, jo kameh torowenei nyaran ha-un udu aliy. Ma ari ndramak ja winiyan bala tanan ta kati nyaran doh bwe. Are lau, iy nane akohok bek doh, iy le kameh winiyan i tanan moson ta aliy ai.’”
REV 2:18 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Tayataira. Sahou i buku doh: ‘Jo Nadu Kindrei, madak badeh, anya i buku jih nyarahan labai. Ma bada katik badeh, buku bras nyikilikin ma nyikadin labai. Eme ma, jo amwenen asehek sahou dah ewek taha lau batun ta nyala aliy:
REV 2:19 Jo ndratanan ta kandriyen marakon aha amekes. Jo tanan ale, ta aha badeh, aso-ok labai iri lau rayah ja. Ma aha ale atehei budon taha mara-ei eme le tek. Ma aha amekes gok ale ta aseben iri mwan ma badih rayah ja. Na len marakon, maha-an anya kasahan, arile aha ales boto-on ma atadau aha tiri lakou doh. Nadah, kandriyen solo-an aha amekes badeh, mwasin labai ja tiri kandriyen mene aha amekes ma bwena, kabatana aha asahan lau ta Kindrei.
REV 2:20 ‘Ya, lakou mara-ei aha amekes badeh, mwasin. Arile, jo basekesek ta lakou ari aha amekes bwe. Aha badeh, andrei Jesebel ewek udu hawe aha, iy badih doh, leheya kandriyen rayah ndra-in i taha mwan ma badih ta amekes gok tek. Ya, iy badeh, ndrawendreyani iri, ma iy anya iy le badeh, propet. Arile, iy ibo gok ta leheya iri mwan ma badih tek ta a-en hamon ta kandriyen ta karei ma aimon nyamon nane iri adeu i ta salom ta kindrei ta wasai iri amekes na sukumada kei.
REV 2:21 Jo ndratehei len ndrala tan, tasah jo aso-ok iy katubuni ndrinen ta iri kandriyen ta karei iy amekes. Arile, iy baso-ok bwe.
REV 2:22 Ya, aha kanuhun! Jo kameh edeu sisi-in hawe sik ndra-in laba tinan i ta badih doh. Ma hawe iri mwan ma badih nane a-en hamon tan amekes kandriyen ndra-in i le buku iy, buku iri batubuni ndrine iri bwe, ma batehei kona iri bala tiri lakou doh bwe-eh, idah kameh jo edeu sisi-in ma maha-an laba tinan labai ili tiri.
REV 2:23 Ma jo ale kameh idi nadu i badih nane mara-ei amak au. Eme ma iri mwan ma badih ta Kindrei kameh winiyan atanan buku, jo badeh, anyolom ma aleben amwenen labai iri lakou udu budon ma ndrine iri mwan ma badih mari. Ma jo kameh edeu ndramas ndra-in labai ewek taha ari ari, i bundruwe le iri kandriyen nane aha amekes.
REV 2:24 ‘Arile, nadah badeh, jo anya kasehek kewek taha ado Tayataira, aha badeh, ba-en hamon ta sahou ta Jesebel bwe, ma aha ale bakohok ari tanan ta kandriyen nane iri aloh, “Udu bolo kandriyen handru ta Satan.” Na aha le badeh, jo anya kasehek ki buku doh: Jo kameh winiya badeu ari sahou batanau ta aha ka-en hamon ta aliy ja bwai. Lakou ari le doh badeh, kabwai.
REV 2:25 Iri lakou marakon ale aha atehei budon taha, ma a-en hamon ta aliy badeh, aha katawiy kihis mara-ei, kili winiya le len ta jo kameh eme hamon eme kon munyak ja.
REV 2:26 ‘Ya, buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, ma iri ale ta amekes lahou na so-ok tek winiya le gok tek ano; jo kameh edeu boto-on ili tiri, ma iri kameh asahan tinan are bwele-en labai ja tiri mwan ma badih badu kon munyak tinan mara-ei.
REV 2:27 I buku le buk ndrabun ndrasehek, “Iy kameh tawi balekei hayen ari udu minen ta atondrok iri mwan ma badih boto-on handru, ma tabasi marakon ili le bwisik, bwisik i buku ndramak tabasi kun iri amekes na ndren.” Jo amwenen kameh edeu gok doh i tiri. Idoh, i buku le gok mene tama edeu eme tek, ta atondrok iri mwan ma badih marakon.
REV 2:28 Ma jo kameh edeu ndrau ta boho len i tiri.
REV 2:29 Ya, buku ndranyem udu aliy, jo aso-ok ou anuhun iri saba lakou handru, Malawin Mwasin asehek ili tiri lau ta Kindrei.’”
REV 3:1 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Sadis. Sahou kili buku doh: ‘Jo le ari badeh, atondrok oro Malawin Mwasin ta Kindrei ma ndro taloh, ma hawe iri mwan ma badih ta Kindrei, buku ndrau, badu kon ma ndro taloh. Jo badeh, ndratanan iri kandriyen marakon aha amekes. Iri lau rayah badeh, asehek nyala aha anya, “Iri mwan ma badih ta Kindrei badu Sadis, a-en hamon ta kandriyen mwasin, ma iri a-en hamon handru ta Jises Krais.” Arile, bwe. Aha badeh, ndra buku ndramak imek. Aha ale bamekes gok badeh, bame tek bwe.
REV 3:2 Aha kasuri aha ja, ma aha kabudon kamwenen op! Saba kandriyen tek ale aha a-en hamon ta aliy badeh, jo aso-ok aha katawiy kihis, kandriyen doh anya kimek ai! Tasah, iri lakou mara-ei aha amekes kede-eh badeh, rayah bamwenen ta mada Kindrei tek ja bwai.
REV 3:3 Aha kabudon kili hamon ja ta len ma mwena mene aha anuhun sahou tek mwasin, ma aha atehei budon handru taha in aliy. Eme nadah, aha katubuni ndrine aha ma ka-en hamon ta sahou handru ma bwena mene ja. Buku bwe-eh, jo kameh ewek hawe aha i buku ndramak ta bahana, ma aha kameh winiyan bala tanan ta len, jo kameh ewek bwe, ma jo kameh edeu ndramas ndra-in labai ewek taha ale.
REV 3:4 ‘Arile, iri lau mwan ma badih ta Kindrei taha rayah badu kon Sadis badeh, bamekes kandriyen ndra-in bwe. Iri lau doh kameh adek hawek, ma asini awin belen mara-ei, tasah kandriyen tiri mwasin mara-ei.
REV 3:5 Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, jo kameh edeu awin belen ili tiri, ma jo kameh winiyan basokosowei nyara iri udu bolo buk tiri ta akohok kohan handru ta Kindrei ba-au bwe, arile jo kameh asehek nyala tama hawe oro angelo tan i buku doh: “Iri lau mwan ma badih dah badeh, iri lau tek handru ma iri a-en hamon ta sahou tek.”
REV 3:6 Are mwan o badih ndranyen udu aliy, jo aso-ok iy kanuhun saba lakou handru, Malawin Mwasin asehek ili tiri lau ta Kindrei.’”
REV 3:7 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Piladelpiya. Sahou kili buku doh: ‘Idah sahou tek amwenen. Jo badeh, ndrabun labai, ma jo kati iri kandriyen handru mari. Jo badeh, boto-on labai udu bolo tondrok ta kabin Debit. Buku jo sihi kou, ari ndramak winiyan basulu-iy ja bwe. Ya, buku jo sulu-i kou, ari ndramak, winiyan basihiy ja bwe.
REV 3:8 Jo ndratanan ta kandriyen marakon aha amekes. Nyamu aha kede-eh boto-on sese udu aliy, ma aha a-en hamon tiri sahou tek, ma aha ale babisini nyarak bwe. Eme ma aha ndranyolom ai! Jo badeh, amekes san ta aha winiyan atiye iri sahou tek. Ma ari mwan o badih ja kameh winiyan baturuki aha ta amekes lakou dah, bwe-en.
REV 3:9 Aha ndratanan iri lau ta balik kede-eh. Iri badeh, ado bolo asiu ta atukum tiri Juwis. Iri anya, Kindrei ndratehei kalem ndrala tiri, ta iri asahan lau tan, tasah iri badu Isra-el. Arile, iri bwai. Satan ndraruwi budon tiri, ma iri ndrala hawen. Aha kanuhun! Hamon kameh jo tiye iri ta awek hawe aha, ta atehei bwili ndru-u iri i andri udu mirihik ta kati aha, ma iri kameh atanan ta jo aso-ok aha labai.
REV 3:10 Aha badeh, a-en hamon ta sahou tek, ma aha ales boto-on labai tiri maha-an marakon. Eme ma, jo kameh atondrok aha ta iri lakou anya kasahan ta none iri mwan ma badih badu kon munyak mara-ei, idoh kameh winiya bandruni aha bwe.
REV 3:11 Ndrame mirihik ai, ta jo kameh eme hamon eme kon munyak dah ja. Eme ma iri budon tek mara-ei aha ndratawiy, badeh, aha katawiy kihis. Kora-on iri lau rayah kawendreyani aha ma aha kamani iri ndramas nane, jo anya kedeu kili tiri mwan ma badih nane a-en hamon tek handru.
REV 3:12 ‘Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh kameh jo tutuni iri i buku ndru eh ta ateu asiu tinan ta Kindrei tek, ma iri kameh winiya bala manan ja bwe. Jo kameh torowenei nyara Kindrei tek udu bada iri, ma jo kameh torowenei nyara kon tinan ta Kindrei tek, Jerusalem ha-un doh udu mine Kindrei tek udu kandrah eme andri. Ma nyarak ari ha-un ja, jo kameh torowenei ili bada iri ale.
REV 3:13 Ya, buku are lau ndranyen udu aliy, jo aso-ok iy kanuhun saba lakou handru, Malawin Mwasin asehek ili tiri lau ta Kindrei.’”
REV 3:14 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Leyodisiya. Sahou kili buku doh: ‘Iri sahou dah, tek amwenen. Jo badeh, kati iri sahou handru, ma jo badeh, ta atiye le sahou handru. Jo badeh, kati iri lakou mara-ei Kindrei ndrabwidiy. Eme ma jo suni sahou dah ewek taha.
REV 3:15 Jo tanan lakou mara-ei aha amekes. Jo ale tanan aha nyarahan o nyala-an. Jo badeh, aso-ok aha kado buku nyala-an o nyarahan le ka-i ai.
REV 3:16 Arile, bwe. Aha badeh, nyarahan sese le. Eme ma jo anya kamwitini aha ado bohok kame len.
REV 3:17 Tasah, aha badeh, asehek i buku doh, “Luk tahi badeh, solo-an labai, ma lakou rayah ja badeh, tahi mara-ei udu aliy. Ahi bandriliu ta ari lakou ja bwai.” Arile, bwe. Aha badeh, bateu lakou ta Kindrei handru nane ta aseben aha ja bwai. Eme ma manyah taha udu ndra-in mara-ei, winiya le iri lau baratikisi aha. Aha badeh, ndra buku iri lau, tiri ari lakou bwe, ma aha ndra buku iri lau, mada iri ndrakaseu, ma aha ndra buku iri lau, iri ari awin ta tubuloh bada iri bwe. Ma aha le amwenen kede-eh winiya bala tanan, aha are buku sah handru ta budon ta Kindrei!
REV 3:18 Eme ma, jo anya kedeu sahou dah kewek taha. Aha mara-ei badeh, kame le hawek kasih bek nyikilikin tek. Jih badeh, ndrasulumwi lakou marakon udu bwele-en ndra-au, ma bwidiy ndra nyikilikin mara-ei. Ma aha kameh asahan nadu batun. Ya, aha kame kasih taha kolau belen ta tubuloh bada aha, ma iri mwan ma badih winiyan banyolom bada aha ndrakane ja bwe. Ma mwasin ale, ta aha kame hawek kasih rayah ndrelekei tek, ta adeu i mada aha, ta aha kanyolom kon ja. Ma aha winiyan atanan, buku aha badeh, bateu lakou handru ta Kindrei bwe. Ma aha kameh winiyan anyolom aha are buku sah handru.
REV 3:19 Jo ibolosen i tiri lau, ma asehek nyala kandriyen iri amekes, tasah jo badeh, aso-ok iri labai. Eme ma, aha katubuni ndrine aha, ma katehei budon taha kirih ta a-en hamon ta Kindrei.
REV 3:20 ‘Aha ndranyolom jo! Jo ales udu kona kou, ma jo alim kou. Buku are lau, iy anuhun bohok, ma iy sihi kou, jo kameh ili bolo asiu hawen, ma aimon nyamon hawen, ma iy aimon nyamon hawek.
REV 3:21 Ya, buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh, jo kameh tiye iri kame hawek ma katondrok iri lakou marakon hawek, i buku tama aso-ok jo kamanyah kudu hawen ta atondrok lakou marakon.
REV 3:22 I buku ndranye aha udu aliy, jo aso-ok aha kanuhun saba lakou handru, Malawin Mwasin asehek ili tiri lau ta Kindrei.’”
REV 4:1 Ameh ranah nane dah ano badeh, ari ja asahan i buku doh: Jo anyolom kou ari asak udu kandrah. Iy ndramak doh mene jo anuhun bohon bwena, nyaro bohon asehek sahou eme tek, i buku iri lau oloh ndrah, iy asehek i buku doh, “Ou ame loken dah, jo kameh leheya ou tiri lakou mara-ei kameh asahan hamon.”
REV 4:2 Ma se nawin bwe, Malawin Ndrabun eme bwele-ek, ma jo anyolom koyeu ari ta kabin udu kandrah, ma ndramak ari manyah udu aliy.
REV 4:3 Ma mada iy ndramak doh anya, lomadan solo-an labai lomotani kon mara-ei i buku bek ari iri aloh jaspa, ma bek ari ja saraman iri aloh koniliyen, nyikadin labai, buku an anya ili bwele-en. Ma beteke nyabwiu awudi koyeu tan, ma jo anyolom idoh anya buku bek ari nyorowan iri aloh emeral.
REV 4:4 Ma jo ale anyolom koyeu ma lunoh hahuw (24) awudi koyeu ta kabin nane doh, ma oro batun ma lunoh hahuw (24) badeh, manyah ado bada koyeu doh. Iri asini awin lawe-en belen mara-ei, ma barak tiri badeh, bek nyikilikin i buku barak tiri kabin adeu udu batu iri.
REV 4:5 Ya, udu bada koyeu ta kabin doh, jo anyolom kalik takamek ili eme, ma jo anuhun nyaro lakou tinan labai asahan, ma kuruh atohou i le rasan. Ma udu bwena ta koyeu ta kabin doh, jo anyolom sun ma ndro taloh anya udu aliy. Oro sun ma ndro taloh doh leheya i buku Malawin Mwasin ta Kindrei.
REV 4:6 Udu mirihik ta koyeu ta kabin badeh, lakou ari udu aliy i buku ndras laba tinan, i buku torowe lewen labai. Koyeu tan udu alih ta lakou mara-ei. Ma jo atou lakou ma mulin ma hahuw koha oro udu aliy. Oro ales ma awudi koyeu ta kabin doh. Ma mada oro badeh, solo-an labai tubuluhi mada oro ma kona oro mara-ei.
REV 4:7 Lakou ma mulin ma mwena kone madan badeh, i buku layon. Iy ari ja, kone madan i buku bulumakau mwan. Iy ari ja, madan udu aliy, konen i buku batu ndramak awas. Ma iy ari ja badeh, konen i buku manyuwe, lu-u balen alawe ma iy atah loken.
REV 4:8 Oro lakou ma mulin ma hahuw doh, iy ari, ari badeh, banin ma onoh, ma mada oro solo-an labai tubuluhi bada oro mara-ei, udu bwele-en ma udu bahandra bani oro ale. Na len ma ben mara-ei badeh, oro bamunyau se ta ayah wari bwai. Oro badeh, ayah wari ma asehek sahou i buku doh: “Laban Kindrei, iy tawi iri boto-on mara-ei. Iy ndrabun, iy ndrabun, iy ndrabun labai. Ndra bwena bwena iy udu aliy, Nadah badeh, iy udu aliy ale. Ma iy kameh eme hamon ja.” Oro badeh, bamunyau ta aloh sahou doh bwe.
REV 4:9 Oro lakou ma mulin ma hahuw nane doh, ayah wari ta sekesek i ta Kindrei manyah udu bada koyeu ta kabin, iy winiyan bamak bwe, ta udu le buku don ai. Ma na bolo len mara-ei oro lakou ma mulin ma hahuw nane doh atudun nyaran, ma adeu wurah i tan. Len ari buku ari oro lakou ma mulin badeh, amekes le ai.
REV 4:10 Ya, oro lakou ma mulin amekes, ma oro batun ma lunoh hahuw (24) badeh, atehei bwili ndru-u oro i andri udu mada Kindrei, iy manyah udu bada koyeu ta kabin. Ma oro atudun Kindrei, iy ta udu le buku doh. Ma oro ale akahei barak toro nane bek nyikilikin ili taku udu mirihik ta koyeu ta kabin, ma oro anya:
REV 4:11 “Laban, ou Kindrei tahi. Ou mwasin labai ma ou are loken, loken labai, ta iri mwan ma badih kasekesek ou, ma katudun nyaram, ma kado bahandra boto-on tam le ari. Tasah, ou amekes lakou marakon. Na budon tam le amwenen, ou bwidi iri, eme nadah, iri lakou marakon doh udu kede-eh.”
REV 5:1 Udu bolo ameh tek doh badeh, jo anyolom iy ndramak nane manyah udu bada koyeu ta kabin badeh, tawi buk ari udu minen salin, iri ndralukumwiy. Iri torowenei sahou udu bolon ma konan ale, ma Kindrei atehei tobwe ma ndro taloh udu aliy ma ari ndramak winiyan basihiy bwe.
REV 5:2 Ano ja, jo anyolom angelo ari boto-on labai eme, ma iy aloh i buku doh, “Are lau mwasin handru, kameh winiyan sudi tobwe doh iu, ma sihi buk asak? Ari ndramak udu kede-eh, deh bwe?”
REV 5:3 Angelo asehek i buku doh ano le badeh, ma iri lau mara-ei atalan ta asilah ari ndramak. Iri asilah bolo kandrah ma bwele-e munyak, ma udu bahandra munyak, kon tiri lau ndramak ndrasu-u, arile iri basilahei ari ndramak ja bwai, ya ari ndramak winiyan banyolom bolon bwe le.
REV 5:4 Jo anyolom badeh, iri bandruni ari ndramak mwasin labai ta iy winiyan sihi buk doh ma anyolom bolon ja bwai. Eme ma bwidi jo eden.
REV 5:5 Jo eden le ai. Ano batun ari badu bolo oro lunoh hahuw (24) nane eme asehek sahou eme tek i buku doh, “Ou saden! Ou atou! Ndramak ari kede-eh i buku layon, iy badu boho kamen tiri Juda, ma iy ale badu boho kamen ta tubun Debit. Iy i buku sisine kei asahan ta kandro kei iri mwetehei mwena. Iy idi balik uru kandriyen ndra-in. Eme ma iy winiyan sudi tobwe ma sihi buk doh asak.”
REV 5:6 Ano badeh, jo anyolom ndramak ari, iy ales i buku Nadu Sipsip ta Kindrei. Nyolom tan i buku iri lau ndradai iy ndramak, arile iy amak eme awas ja. Iy ales udu le alih ta ka-u koyeu ta kabin, ma oro lakou ma mulin ma hahuw hawe iri batun. Kasoh tan ma ndro taloh hawe madan ma ndro taloh. Madan doh badeh, leheya i buku Malawin Mwasin ta Kindrei ma ndro taloh. Kindrei ndrasuni iri ndrala bolo kon munyak mara-ei ta amekes lahou tan.
REV 5:7 Nadu Sipsip doh eme, ili andrei buk udu mine Kindrei salin, iy nane manyah udu bada koyeu ta kabin.
REV 5:8 Iy ili andrei buk, ano oro lakou ma mulin ma hahuw, hawe oro batun ma lunoh hahuw (24) atehei bwili ndru-u oro i andri udu mirihik ta Nadu Sipsip ta Kindrei. Oro batun ari, ari badeh, tawi ndran iri aloh hap, udu mine oro hawe bwekei raben bek nyikilikin. Ma eh manahu buburen irek udu bolo bwekei doh, ma tuhi bwekei mara-ei. Idoh leheya buku salom ta lau mwan ma badih ta Kindrei marakon.
REV 5:9 Iri ame ayah wari ari ha-un i buku doh: “Ou mwasin handru ta andrei buk doh, ma sudi tobwe marakon nane iu. Tasah, iri mene adai ou amak, ma na ndrayem amwenen, ou ndrakonohei iri mwan ma badih ndrame hamon, ta Kindrei. Ya, ou badeh, ndrakonohei iri mwan ma badih ndrame hamon ja. Iri lau doh badu boho kamen mari, ma boho kon rakon rakon badu kon munyak mari, ma iri lau bada iri randrah, randrah, ma badu kon munyak tinan mara-ei. Eme ma, nadah badeh, iri mara-ei ta Kindrei le ari kabwe.
REV 5:10 Ou badeh, ndrabwidi iri ndrasahan pris ta amekes lahou ta Kindrei tataha, ma iy asahan kabin tiri. Ma iri kameh atondrok iri lau mwan ma badih mara-ei badu kon munyak.”
REV 5:11 Ano badeh, jo anyolom, ma anuhun boho iri angelo solo-an labai, kane iri buku ralou (10,000), tulou (30,000), ndru tulou (70,000) kane iri ili le ai, i buku nyaran bwe (100,000,000). Iri mara-ei doh, hawe oro lakou ma mulin ma hahuw, ma hawe oro batun mara-ei badeh, ales ma awudi koyeu ta kabin.
REV 5:12 Iri badeh, ayah wari boto-on labai, ma boho iri iu ili loken mara-ei i buku doh: “Iy ndramak kede-eh badeh, Nadu Sipsip ta Kindrei, iri lau mene adai iy imek. Iy winiyan ta akohok nyaran i tinan, iri lakou mwasin ma tanan mwasin, ma hawe boto-on mara-ei. Iy winiyan handru, lau mara-ei katudun nyaran. Kadeu sekesek ma wurah kili le tan.”
REV 5:13 Ano badeh, jo anyolom iri lakou mara-ei ma mulin udu kandrah, udu bwele-e munyak, udu bahandra munyak, udu ndrahune iri lau ndramak ndrasu-u, ma udu bwele-e ndras. Iri lakou mara-ei doh badeh, jo anuhun iri ayah wari i buku doh: “Kindrei manyah udu bada koyeu ta kabin, ma hawe Nadu Sipsip tan. Uru winiyan akohok wurah, ma nyara uru i tinan mara-ei. Ma sekesek hawe boto-on mari ta ere le buku doh winiyan bano bwe!”
REV 5:14 Udu bada len, iri amekes i buku doh, eme ma oro lakou ma mulin ma hahuw anya, “Idoh handru.” Ma iri batun mara-ei atehei bwili ndru-u iri i andri ma atudun Kindrei hawe Nadu Sipsip tan.
REV 6:1 Ano badeh, jo anyolom Nadu Sipsip ta Kindrei tawi buk udu minen, tobwe ndratobo-ei mara-ei. Jo anyolom iy asoh tobwe ari udu bwele-en iu, ma jo anuhun boho lakou ari ma mulin udu bolo oro ma hahuw nane asehek sahou, ma nyaro bohon badeh, i buku kuruh atohou. Iy asehek i buku doh, “Ou ame!”
REV 6:2 Jo anyolom ja, ma jo atou hos belen ari eme! Ma ndramak ari manyah udu bwele-en, tawi beteleu udu minen. Iri atehei barak ari ta kabin udu batun, tasah iy winiyan ili bolo bahun, arile iri winiyan badai iy bamak bwe. Iy ili anya kamekes bahun hawe iri lau mwan ma badih ado kon munyak. Iy ili badeh, anya kidi iri marakon kano ka-au.
REV 6:3 Ano ja, jo anyolom Nadu Sipsip ta Kindrei asoh tobwe ari iu ja, eme ma jo anuhun boho lakou ari ma mulin badu bolo oro ma hahuw nane anya. “Ou ame!”
REV 6:4 Ma jo anyolom hos ari ja, badan saraman asahan! Iri atehei boto-on i ta ndramak manyah udu bwele-en. Iy winiyan tolowei manyah mwasin tiri mwan ma badih badu kon munyak. Ma iy ale winiyan amekes bahun laba tinan asahan. Ma iy winiyan idi iri mwan ma badih amak ano au. Eme ma iri atehei laba samen gwak ari iri aloh bainat, i tan ta amekes gok doh.
REV 6:5 Idoh ano, jo anyolom Nadu Sipsip ta Kindrei asoh tobwe ari ja nane tobo-ei buk doh iu, idoh ili asahan taloh ai. Eme ma, jo anuhun boho lakou ari ma mulin udu bolo oro ma hahuw nane anya, “Ou ame!” Ma jo anyolom hos ari ja badan bokodon eme asahan! Ma ndramak ari manyah udu bwele-en badeh, tawi sikel ari udu minen.
REV 6:6 Ma jo anuhun lakou buku boho ari ndramak udu ndrokowa oro lakou ma mulin ma hahuw nane. Iy tiye i buku doh, “Ou ala leheya iri gok tam, ma iri lau kameh niri nyamon bwe. Eme ma ndramas nane iri lau akohok ta len ari, idoh kameh winiyan ta sihinei nadu kun wit ari o nadu kun bali ma taloh le kabwe. Arile, aha salobwai kei olip ma waen mara-ei sa-au, eme ma ndrelekei ta olip hawe waen kameh udu luluwen kahis.”
REV 6:7 Ano, Nadu Sipsip ta Kindrei asoh tobwe ari ja nane tobo-ei buk iu, idoh ili asahan hahuw ai. Eme ma jo anuhun boho lakou ari ma mulin badu hawe oro ma hahuw nane, asehek i buku doh, “Ou ame!”
REV 6:8 Jo anyolom ja, ma jo atou hos ari badan nyokowan. Ya ndramak ari manyah udu bwele-en, nyaran Imek. Ano hos ari udu mirihik tan eme ja, ma ndramak ari manyah udu bwele-en badeh, nyaran Jih, o, Ndrahune Iri Lau Ndrasu-u. Iri atehei boto-on i turu ta tukumwi iri mwan ma badih badu kon munyak ranah ma buruwen ala le se ta adai iri. Uru adai iri mwan ma badih ma lunoh limeh (25) badu bolo rinek (100) rakum rakum badu bolo kon munyak. Iri amekes doh badeh, na samen gwak raho, iri aloh bainat, ma son hawe iri sik solo-an ta adai lau amak, ma iri lakou bondriliu badu kon munyak ta adai lau solo-an ano au.
REV 6:9 Ano ja badeh, jo anyolom Nadu Sipsip ta Kindrei asoh tobwe ari ja iu, idoh i buku limeh ai, nane tobo-ei buk. Eme ma jo atou malawi iri lau mwasin rayah ndramak bwena ndra-au badeh, are bahandra mada koto-ok ta Kindrei. Malawi iri mwan ma badih doh, iri mwena mene ateu sahou ta Kindrei boto-on labai, ma atiye sahou ta budon handru doh, eme ma iri lau adai iri amak.
REV 6:10 Malawi iri lau mara-ei nane doh, aloh boto-on labai ma ndremenya tiri i buku doh, “Laban, kabin ta lakou mara-ei. Ou ndrabun handru, ma iri kandriyen mara-ei ou amekes kede-eh, ndra handru le ai! Len sabe handru kameh ou anuhun sahou tiri mwan ma badih badu kon munyak, ma ou adeu bundruwe ndraye ahi ili tiri?”
REV 6:11 Ano, Laban tiye, ma iri rayah atehei awin lawe-en belen ili tiri malawi iri lau nane ari, ari ma iri tiye tiri i buku doh, “Aha kamunyau, ma katondrok sese op. Iri kameh adai iri lau taha rayah ala mene amekes gok hawe aha, ma hawe iri nadu tine aha rayah ta Kindrei, i buku le iri mene adai aha amak. Kindrei badeh, ndrandromwei kane lau sabe handru kameh amak, ano badeh, iy baramekes lakou ta bundruwe ndraye aha ai.”
REV 6:12 Idoh ano le badeh, jo anyolom Nadu Sipsip ta Kindrei asoh tobwe ari ja nane tobo-ei buk iu. Idoh ili asahan i buku onoh ai. Iy amekes i buku doh, ma jo atou ma atona ndroi tinan labai asahan kon munyak. Ma mada an ilik, ma asahan i bokodon mara-ei, i buku kolau bokodon, ma mada bun ale asaram, ma asahan i saraman i buku ndra.
REV 6:13 Ma iri ndrau mara-ei badu kandrah badeh, taku eme andri kon munyak, i buku buwa kei pik mamakahis, jor laba tinan asahan eme rohoyani ili le bahan.
REV 6:14 Kandrah ale badeh, amai laleyah, i buku ndrou boholahak iri lukumwiy. Ndroi asahan laba tinan, ma iri mandrei hawe busu mara-ei sosokok au ala rasi ja.
REV 6:15 Ano ja, jo anyolom iri kabin badu kon munyak mara-ei, hawe iri lau nyara iri tinan, iri kabin ta bwena tiri lau ta bahun, iri nadu batun, iri lau boto-on, iri lau ta amekes gok ta lau rayah buku bonyo-ou, ma iri lau are laleyah. Iri lau mara-ei doh badeh, tone iri ala bolo ndraban, ma mada munu bek udu bolo mandrei.
REV 6:16 Iri aloh ili tiri mandrei ma bek mara-ei i buku doh, “Aha katohou kame andri bwele-e ahi, ma katubuluhi ahi kamai ta mada Kindrei, iy manyah udu bada koyeu ta kabin, ma ta losen ta Nadu Sipsip!
REV 6:17 Tasah, len laba tinan ma losen turu anya kamekes keme tataha ta bundruwe lakou taha amekes badeh, ndrasahan nane dah. Eme ma ari mwan o badih winiyan bales ta losen doh ja bwe!”
REV 7:1 Iri lakou marakon doh ano iu, eme badeh, jo anyolom oro angelo ma hahuw ales are kabede kon munyak ma hahuw: Rai, Tolau, Kum, ma Jaha, ma oro tawi siyer ma hahuw udu bwele-e munyak doh ihis mara-ei, ma jor kameh winiyan boloh munyak hawe ndras, o ra-ei kei bwe.
REV 7:2 Ano jo atou angelo ari ja edek udu loboho Rai eme loken. Ma iy tawi kalem ta Kindrei ma mulin, ma iy aloh boto-on labai ili toro angelo ma hahuw nane, Kindrei ndratehei boto-on ndra toro ta oro kabokoro-ei munyak ma ndras mara-ei.
REV 7:3 Angelo nane aloh ili toro i buku doh, “Ado kareu op, ado sabotatahan ta bokoro-ei kon munyak ma ndras ma hawe kei mara-ei iu. Ahi badeh, anya kadeu kalem ta Kindrei tataha kili bwili iri lau ta amekes gok tan op. Ano badeh, ado barabokoro-ei lakou mara-ei bara-au ai.”
REV 7:4 Angelo ari nane asehek sahou ano, eme ma iri atalan ma adeu kalem ili tiri mwan ma badih. Ano jo anuhun iri aloh kane iri mwan ma badih, iri sabe handru akohok kalem ta Kindrei. Iri atehei kalem ili tiri 144,000 mwan ma badih, badu bolo iri lau mara-ei badu Isra-el.
REV 7:5 Eme ma, iri mwan ma badih ma ralou luwa (12,000) badu boho kamen ta Juda, iri akohok kalem, ya ralou luwa (12,000) ja badu boho kamen ta Ruben, ma ralou luwa (12,000) ja badu boho kamen ta Gat,
REV 7:6 ma mwan ma badih ma ralou luwa (12,000) ja badu boho kamen ta Asa, iri ralou luwa (12,000) ja badu boho kamen ta Naptali, iri ralou luwa (12,000) badu boho kamen ta Manase,
REV 7:7 ma iri mwan ma badih ma ralou luwa (12,000) ja badu boho kamen ta Simiyon. Ya iri ralou luwa (12,000) badu boho kamen ta Libai, iri ralou luwa (12,000) badu boho kamen ta Isakar,
REV 7:8 ya iri ralou luwa (12,000) badu boho kamen ta Sebulun, iri ralou luwa (12,000) badu boho kamen ta Josep, ma iri ralou luwa (12,000) badu boho kamen ta Benjamin. Iri lau mwan ma badih mara-ei doh badeh, akohok kalem ta Kindrei.
REV 7:9 Iri lakou mara-ei asahan madak nane doh amai iu, ano jo anyolom iri mwan ma badih, solo-an labai atukum are le se, ma ari mwan o badih winiyan bandromwei kane iri bwe. Iri lau doh badu kon munyak tinan mara-ei, ma iri badu boho kamen mari, ma bada iri badeh, randrah, randrah, ma iri badu boho kon rakon rakon badu munyak mara-ei. Iri lau mari doh badeh, ales are bwena ta koyeu ta kabin, ma mirihik ta Nadu Sipsip ta Kindrei. Iri nyosowani iri na awin lawe-en belen mara-ei, ma iri tawi la-u badou udu mine iri.
REV 7:10 Iri mara-ei atehei boho iri i le se ma aloh i buku doh: “Ahi mara-ei atudun nyara Kindrei tataha, iy manyah udu bada koyeu ta kabin, hawe Nadu Sipsip tan. Uru mala-uh badeh, andrei taha ndrame hamon, ma taha ado mwasin labai mara-ei!”
REV 7:11 Iri angelo mara-ei ales awudi koyeu ta kabin, ma iri batun hawe oro lakou ma mulin ma hahuw. Iri mara-ei atehei bwili ndru-u iri i andri udu mirihik ta koyeu ta kabin ma atudun Kindrei i loken mara-ei.
REV 7:12 Ma iri mara-ei tiye i buku doh: “Handru labai! Taha mara-ei sekesek labai ta Kindrei tataha, nyaran laba tinan labai! Budon marakon mwasin udu tan le ari, ma taha kadeu wurah kili tan, ma katudun nyaran kili loken mara-ei. Iy nyamun labai! Iri boto-on mara-ei udu tan! Iri lakou marakon nane doh badeh, tan le ari ta udu le buku doh! Handru labai!”
REV 7:13 Ano, ndramak batun ari eme ndremenya jo i buku doh, “Ou tanam iri lau marakon asini awin belen kede-eh, ma iri badu loboho heh handru?”
REV 7:14 Jo eme tiye i tan i buku doh, “Ndramak tinan tek, ou amwenen badeh, tanam iri, jo bwe.” Ma iy asehek eme tek i buku doh, “Iri lau mwan ma badih mara-ei kede-eh mene ado bolo maha-an hawe sisi-in ame len, ma iri amak udu mine iri lau ndra-in ta bahun. Iri badeh, atehei iri budon tiri mara-ei in ta Jises le ari, ma iri akohok boto-on ta ndraye Nadu Sipsip ta amekes bahun hawe kandriyen ndra-in. Idoh i buku iri sikine awin tiri na ndrayen, ma asahan belen mara-ei.
REV 7:15 Eme ma, iri mara-ei adeh, ales are mwena ta koyeu ta Kindrei kede-eh, ma atudun iy na ben ma len marakon udu bolo asiu tan tinan. Kindrei manyah udu bada koyeu tan, ma iy atondrok iri marakon ta udu le buku doh.
REV 7:16 Eme ma iri marakon kameh winiyan bameson ma bale iri winiyan bamar ta gwa ja bwai. Ma an kameh winiyan basulumwi bada iri ja bwai. Iri kameh ado mwasin labai mara-ei!
REV 7:17 Tasah Nadu Sipsip ta Kindrei badeh, ales udu le alih ta ka-u koyeu ta kabin, ma iy kameh atondrok iri marakon. Iy kameh sirini iri ala mana munu kaloh, gwa asahan aliy eme len, ma iri kameh a-un gwa kohan handru udu loboho doh. Ma Kindrei kameh owei wa-i mada iri mara-ei iu, ma iri kameh winiyan baden ja bwai.”
REV 8:1 Nadu Sipsip sudi tobwe ma ndro taloh nane tobo-ei buk mara-ei iu le badeh, kandrah mundrindriyou kakan luluwen sese buku awa ranah.
REV 8:2 Ano le badeh, jo anyolom oro angelo ma ndro taloh ales are mada Kindrei, ma iy atehei ndrah ma ndro taloh ili mine oro.
REV 8:3 Angelo ari ja, tawi bwekei raben nyikilikin labai udu minen, iy eme ales udu mirihik ta mada koto-ok. Iri atehei eh manahu buburen solo-an labai ili bolo bwekei tan ta adeu ili hawe salom tiri lau ta Kindrei mara-ei, ma atehei i ta salom ili bwele-e mada koto-ok nyikilikin nane ales udu mwena ta koyeu ta Kindrei.
REV 8:4 Kasu-er ta eh manahu buburen nane ma hawe salom tiri mwan ma badih ta Kindrei mara-ei ruwani mine angelo nane, ma ales amwenen iu ili loken mada Kindrei.
REV 8:5 Ano angelo andrei bwekei nane kasu-er ta eh manahu buburen udu aliy, ma iy andrei jih badu mada koto-ok, anyuhi ili bolo bwekei, ano iy akahei ili andri bwele-e kon munyak. Iy akahei ano le badeh, kuruh atohou, ma nyaro boho iri lakou marakon asahan, ma kalik takamek ili eme, ma ndroi asahan kon munyak.
REV 8:6 Ano oro angelo ma ndro taloh nane tawi ndrah ma ndro taloh udu mine oro ta anya koloh ai.
REV 8:7 Angelo ari ma mwena nane doh aluhi ndrah tan, eme ma gwa, bek hawe jih tubuniy hawe ndra, ma iy akahei iu ili andri bwele-e kon munyak. Jih nane doh badeh, anya ili sulumwi kon munyak ranah ma buruwen ano iu. Idoh, buku none apou kon munyak mara-ei i taloh, badeh, ranah badu bolo taloh doh andrakak ano iu. Ma hawe iri kei mara-ei nane badu loboho doh badeh, andrakak ano iu, hawe iri bwidiu nyorowan mwasin nane ateh udu loboho doh.
REV 8:8 Iy angelo ma mwena nane doh ano, iy ari ja udu hamon tan eme len oloh ndrah tan ja. Eme ma lakou ari i buku mandrei laba tinan anya buku jih ma atohou ales iu ili bolo ndras. Eme ma, buku ndras mara-ei apou i taloh, ndras ranah ma buruwen asahan i ndra.
REV 8:9 Eme ma iri lakou mara-ei nane koha iri udu aliy, udu bolo ndras doh, mara-ei amak, ma hawe iri ndron mara-ei nane atas bolo ndras doh, andrakak ma mara-ei atuh ano labai.
REV 8:10 Iy angelo doh ano le badeh, iy ari in hamon tan eme len ja oloh ndrah tan. Idoh ili asahan taloh ai. Eme ma ndrau laba tinan lomadan anya tinan labai buku sun udu kandrah badeh, taku eme andri bwele-e gwa lakon ma gwa kaloh ranah ma buruwen. Nyara ndrau laba tinan nane doh badeh, iri aloh “Lakou Nyakadan.” Ya, i buku gwa doh ma tonoh (30) are bwele-e munyak mari, ronoh badeh, akohok andra-i. Gwa lakon ma gwa kaloh ranah ma buruwen doh badeh, asahan nyakadan, ma iri lau solo-an a-un gwa doh, ma nyekedei iri, ma iri mara-ei amak, tasah gwa mara-ei doh ndra nyakadan le ai.
REV 8:12 Iy nane doh ano le badeh, iy ari eme len oloh ndrah tan ja. Idoh ili asahan hahuw ai. Eme ma bwidi mada an, ma mada bun ma hawe mada ndrau andra-i; eme ma bwidi lomada oro banya bamwenen bwe; eme ma awa hahuw ta bolo len ma awa hahuw ta bolo ben badeh, asahan lulik le ai.
REV 8:13 Idoh ano le badeh, jo anyolom laba manyuwe ari atah bolo kandrah, ma jo anuhun iy eden i buku doh, “Tikisiy, tikisiy, tikisiy tinan labai tiri lau mara-ei are kon munyak. Oro angelo ma taloh anya koloh ndrah toro ja. Ma idah kameh sisi-in laba tinan ma ndra-in labai kameh asahan tiri mwan ma badih mara-ei are kon munyak.”
REV 9:1 Ano angelo ari eme ja oloh ndrah tan. Idoh ili asahan limeh ai. Ma jo anyolom lakou i buku ndrau laba tinan ndrataku ndrame andri bwele-e kon munyak. Ma iri atehei lakou ari ta aseh kou ili ta ndrau doh ta aseh kou ta munu lek nane doh lawe-en, lawe-en labai iu ili ndraban, winiyan basilahei katin andri bwe.
REV 9:2 Eme ma iy sihi kou ta lek nane doh, ma kasu-er asahan mana munu lek nane dah eme len i buku kasu-er ta jih laba tinan. Ma kasu-er udu mana munu lek nane doh eme loken, ili tubuluhi mada an, ma jor abakak eme bwidi kon munyak mara-ei asahan lulik.
REV 9:3 Eme ma iri lakou i buku sabaye atah are bolo kasu-er nane doh ame andri ame kon munyak. Ma nyamu iri i buku le nyamu sabiyep badu kon munyak.
REV 9:4 Ma iri badu kandrah tiye tiri i buku doh, “Aha sabwidi iri bwidiu sa ndra-i o, ma kei hawe iri lakou rayah ale ateh udu bwele-e munyak, idoh badeh, ndri-iy labai. Gok taha handru badeh, ta sokoso-ou iri mwan ma badih nane, kalem ta Kindrei bado bwili iri bwe.
REV 9:5 Aha badeh, kadeu le sisi-in kili tiri, winiya bun ma limeh, arile aha sadi iri samak.” Ma hawe iri lakou nane doh atoh iri lau, ma lihi iri sisi-in tinan labai i buku sabiyep atoh lau, ma amekes sisi-in laba tinan labai ili tiri.
REV 9:6 Udu bolo bun ma limeh nane doh badeh, iri kameh asilah imek, arile iri winiyan basilahei iy bwe, iri aso-ok ta amak, arile imek badeh, atobwak le tiri.
REV 9:7 Iri sabaye badeh, kone iri i buku hos, iri lokowani iri ado le ta anya kamekes bahun; udu bwele-e batu iri, iri atehei lakou buku barak bek nyikilikin, ma mada iri badeh, i buku mada iri lau.
REV 9:8 Ma lami batu iri badeh, i buku lami batu iri badih, ma lihi iri badeh, i buku lihi iri layon.
REV 9:9 Iri tubuluhi batala iri na awin iri amekes na kapa o hayen, ma kurutuwe bani iri badeh, i buku nyaro iri hos ariu karis ili ta bahun.
REV 9:10 Kiwi iri badeh, udu aliy, i buku kiwi sabiyep ta atoh lau, ma boto-on tiri badeh, udu kiwi iri ta amekes sisi-in ili bada iri lau ta udu le buku doh, winiya bun ma limeh ano.
REV 9:11 Kabin tiri udu aliy ta atondrok iri badeh, angelo ari udu mwena ta mana munu lek nane doh. Ili boho iri Hiburu badeh, iri aloh nyaran Abadon. Ya boho iri Grik badeh, iri aloh iy Apoliyon. Moson ta aliy i buku, “Ndramak ta bokoro-ei iri lakou mara-ei ano iu.”
REV 9:12 Maha-an mara-ei laba tinan ma mwena doh badeh, ndrano ai. Arile, aha kanuhun kamwenen! Maha-an ma la-uh laba tinan badeh, kahis le, idah kameh asahan hamon.
REV 9:13 Maha-an doh ano badeh, eme angelo ari ja eme len oloh ndrah tan. Idoh asahan ili onoh ai. Eme ma jo anuhun boho ndramak ari udu bolo ndrokowa kasoh ma hahuw nane ales udu ka-u mada koto-ok nyikilikin labai udu mada Kindrei.
REV 9:14 Boho ndramak nane asehek sahou ili ta angelo nane tawi ndrah tan i buku doh, “Ou tolowei oro angelo ma hahuw badeh, are bolo asiu lulik udu bolo gwa tinan Yupretis, kame manan ma ka-au laleyah.”
REV 9:15 Oro angelo doh badeh, ndralowosani oro ndra bwena ado le ai, ta atondrok le jaha, bun, len, ma awa amwenen ta amekes gok nane doh. Iy eme tolowei oro angelo ma hahuw nane ame len, oro kameh tukumwi lau mwan ma badih mara-ei badu kon munyak ki tulukum, ano adai iri rakum ma buruwen ano au.
REV 9:16 Iri ame tiye tek ta kane iri lau nane manyah ado bwele-e iri hos ta amekes bahun, i buku 200 miliyon (200,000,000), solo-an labai, ou winiyan bandromwei bwe.
REV 9:17 Ma udu bolo ameh tek doh badeh, jo anyolom iri hos ma iri lau manyah ado bwele-e iri. Iri tubuluhi batala iri na awin iri amekes na kapa hawe hayen, ma tariye awin tiri doh badeh, saraman mara-ei, nyarawin mara-ei, ma nyokowan mara-ei i buku solpa. Batu iri hos marakon doh badeh, i buku batu iri layon, ma jo anyolom jih ma kasu-er hawe solpa andrakak ma atas udu boho iri eme len.
REV 9:18 Eme ma bwidi lau badu kon munyak ranah ma buruwen amak na lakou nane doh udu boho iri hos eme len. Idoh, buku iri lau ma tuluwi (3,000) are aliy, jih ma kasu-er hawe solpa andrakak badeh, bwidi iri lau ma rawa (1,000) amak ano au.
REV 9:19 Boto-on tiri hos mara-ei nane doh badeh, udu boho iri ma kiwi iri. Kiwi iri badeh, i buku mwak, batun udu aliy ta atoh iri lau ma amekes sisi-in i bada iri.
REV 9:20 Iri lau mwan ma badih rayah ma buruwen bamak ta lakou ndra-in nane bwe, iri ale badeh, batubuni ndrine iri bwe, ma batehei kona iri bala tiri lakou, iri nane amekes na mine iri amwenen bwe le. Ya, iri ale baruwani kandriyen ta atudun malawin ndra-in bwe, ma hawe iri kindrei ta wasai, iri amekes na bek nyikilikin, ma silba hawe bras, ma bek hawe kei. Iri lakou marakon doh badeh, winiyan banuhun sahou bwe, iri banyolom kon bwe, ma iri winiyan badek bwe.
REV 9:21 Iri lau mwan ma badih doh badeh, mene adi iri mwan ma badih rayah, ma iri amekes nyam balahak, ma iri a-en hamon tiri kandriyen ta karei, ma bahana lakou tiri lau laleyah, arile iri batubuni ndrine iri, ma batehei kona iri bala tiri kandriyen mara-ei nane doh bwe.
REV 10:1 Lakou ndra-in nane doh ano iu, ano jo anyolom angelo ari, boto-on labai udu bolo kandrah eme andri. Iri nyosowani iy na asi kandrah hawe beteke nyabwiu awudi batun udu le alih; madan badeh, i buku le an, ya katin ja badeh, i buku ndru laba tinan amekes na jih.
REV 10:2 Iy tawi buk ari nadu bwisik asak le udu minen. Ya, iy nyahani katin salin udu bwele-e ndras, ya katin kamweu badeh, udu bwele-e kon munyak.
REV 10:3 Iy nyahani katin mala-uh ano badeh, iy ataba bohon i tinan mara-ei, ma nyaro bohon badeh, i buku layon anyur. Iy aloh ano le badeh, nyaro kuruh ma ndro taloh atohou ili le rasan.
REV 10:4 Nyaro kuruh ma ndro taloh nane atohou ili le rasan ano le badeh, jo eme anya katorou sahou toro nane amekes. Arile, jo anuhun boho ndramak ari udu bolo kandrah asehek sahou eme tek ja i buku doh, “Ou satorou sahou toro kuruh ma ndro taloh nane atohou ili le rasan doh. Ou tawiy kihis kudu budon tam le ka-iy.”
REV 10:5 Udu hamon toro lakou nane ano badeh, jo anyolom iy angelo nane nyahani katin raka udu bwele-e ndras ma raka udu bwelee munyak badeh, suri minen salin nyowonya amwenen iu ili kandrah.
REV 10:6 Ma iy asehek sahou tandrakan handru iu ili loken labai ta nyara Kindrei, iy winiyan bamak bwe, iy kameh ta udu le buku doh, iy bwidi kandrah, ma iri lakou mara-ei udu aliy, munyak ma lakou mara-ei udu bwele-en, ndras ma lakou mara-ei udu aliy. Iy angelo nane asehek i buku doh, “Len anya kano ai. Kindrei kameh winiyan babe-en ja bwai!”
REV 10:7 Arile, iy angelo ndro taloh doh ili oloh ndrah tan, ma nyaro ndrah tan asahan, ma, na le liliy, iri lakou mara-ei nane Kindrei anya kamekes i san ta gok ta nadun, mara-ei kameh ano. Iri tanan mene ta gok ta Jises kameh amekes bame lewan bwe, tasah bwena mene Kindrei badeh, tone udu tiri lau mwan ma badih. Arile, udu hamon ja badeh, iy nyowaniy, ma iy atehei ili mine iri lohowan tan, iri badeh, propet tan ta asehek ili tiri lau mara-ei.
REV 10:8 Ano ja boho ndramak nane jo anuhun udu bolo kandrah, iy badeh, asehek sahou eme tek ja i buku doh, “Ou ala andrei buk ndrasihiy le udu mine iy angelo nane ales udu bwele-e ndras ma munyak.”
REV 10:9 Jo eme edek amwenen ili hawe iy angelo nane, ma jo ndremenya iy katehei nadu buk nane doh keme minek. Iy eme tiye tek i buku doh, “Idoh, ou andrei, ma ou aniy; idah kameh, i titi-in udu bolo ndrinem, arile simidin udu bohom kameh, nyaman labai i buku gwa ta bwirik.”
REV 10:10 Jo eme andrei nadu buk nane udu minen, jo atehei ili bohok, ma jo aimon, ma simidin badeh, nyaman labai i buku gwa ta bwirik udu bohok. Arile, udu hamon ta jo sakalamiy, titi-in ta aliy ja badeh, udu bolo ndrinek.
REV 10:11 Ano iri ado kandrah tiye sahou eme tek i buku doh, “Ou ala asehek sahou ta Kindrei dah ja, ta iri lakou mara-ei kameh asahan tiri lau, bada iri randrah, randrah, ma tiri lau badu kon munyak tinan mara-ei, ma tiri lau asehek boho kon rakon rakon badu kon mari, ma tiri kabin ale.”
REV 11:1 Udu hamon ta lakou nane doh ano, ndramak ari atehei lakou i buku kandro ari eme tek. Kone kandro doh i buku kei ta tumundroh iri lakou na aliy. Ma iy tiye eme tek i buku doh, “Ou suri ou, ma ou ala tomondrohei lawe-en ta asiu ndrabun ta Kindrei, ma mada koto-ok tan. Ma ou andromwei kane iri lau mwan ma badih, ma iri sabe handru asolom ala aliy.
REV 11:2 Arile, ou satomondrohei lawe-en ta kowah udu manan nane awudi asiu ndrabun ta Kindrei. Idoh badeh, ndri-iy ai, ou ruwaniy kere gwek. Tasah, bolo kowah badeh, tiri lau badu Isra-el bwe, ma iri kameh amekes bahun ta akohok kon tinan ndrabun mara-ei, ma iri kameh atondrok ili winiya bun ma hanoh la-uh (42) ano.
REV 11:3 Ma jo kameh edeu boto-on i ta lau tek la-uh ta atiye sahou propet tek i tiri lau. Uru kameh asini awin ta tikisiy; ma uru kameh atiye sahou tek udu bolo iri len ma rawa lunek ndro hanoh (1,260) mara-ei doh.”
REV 11:4 Uru lau tek ma la-uh doh kameh, i buku kei olip ma lu-ei, ma ndru-u sun ma la-uh ales udu bwena ta mada Laban atondrok kon munyak mara-ei.
REV 11:5 Buku iy are lau anya kanone ta idi uru badeh, jih kameh udu boho uru eme len, ma sulumwi are lau nane anya kamekes bahun kili turu. Ya, idoh handru, buku are lau anya kamekes ndra-in kili turu badeh, ta kandriyen doh le kameh iri amak le kabwe.
REV 11:6 Uru lau ma la-uh nane doh badeh, Kindrei atehei boto-on tan i turu, ta turuki kandrah, ta ur winiyan bandruk na bolo len mara-ei nane, uru atiye sahou ta Kindrei bwe. Kindrei atehei boto-on i turu ale, ta tobolowe gwa asahan ndra, ma bokoro-ei iri lau marakon badu kon munyak ta iri lakou solo-an ndra-in. Len mara-ei, buku uru anya kamekes lakou doh, uru winiyan amekes le ai.
REV 11:7 Buku uru bwidi gok ta atiye sahou ta Kindrei mara-ei ano badeh, nyabwe lakou ari kameh udu mada munu lek nane lawe-en labai, ari katin bwe, badeh kameh ruwani lek doh edek eme len. Buku iy eme len badeh, iy kameh amekes bahun hawe uru lau nane, ma iy kameh idi uru ma la-uh amak.
REV 11:8 Bada kei turu lau ma la-uh doh kameh i tondreh in san tinan ta kon tinan, taha asehek sahou sokek ma taha aloh nyara kon doh, Sodom ma Ijip, kon doh mene iri adi Laban turu udu aliy.
REV 11:9 Iri lau bada iri randrah, randrah, ma iri boho kamen mara-ei, ma iri boho kon mari, ma iri lau badu kon munyak tinan mara-ei kameh anyolom bada kei ma la-uh doh kameh winiya len taloh ranah, ma iri lau doh kameh bwale iri anya iri lau badu kon tinan nane doh sahi uru sala lek, bada kei turu kudu mada iri lau kanyolom.
REV 11:10 Eme ma, iri lau badu kon munyak mara-ei kameh sekesek labai, tasah ta imek turu lau ma la-uh nane doh. Iri kameh amekes nyamon laba tinan, ma iri adi mana, ma iri adeu ndramas ili ta kawas tiri le amwenen, tasah uru propet ma la-uh doh badeh, amekes maha-an ma sisi-in ndra-in labai ili tiri lau mara-ei badu kon munyak.
REV 11:11 Udu hamon ta len taloh ranah nane doh ano badeh, Kindrei aluhi kohan ili turu, ma uru suri uru ales; ma iri lau anyolom uru, ma mani iri mara-ei atur, ma iri anoh andra-i labai.
REV 11:12 Ano badeh, uru anuhun boho ndramak ari, udu kandrah, aloh boto-on labai ili turu i buku doh, “Ah kame loken dah.” Eme ma iri lau nane amekes bahun hawe uru, anyolom uru au ala bolo asi jor, ma amwenen au ala bolo kandrah.
REV 11:13 Se nawin bwe ja, na le liliy, ndroi laba tinan mara-ei labai asahan, ma kon tinan ranah ma buruwen atohou iu. Idoh i buku apou kon tinan doh i ronoh, ya ranah ma buruwen atohou iu, ma iri lau ma ndru tuluwi (7,000) amak. Eme ma iri lau mwan ma badih nane arah ado badeh, anyolom ma bwidi iri anoh mara-ei, ma iri nyowonya iri kandriyen ndra-in tiri, ma tubuni ndrine iri, eme ma iri atudun nyara Kindrei, iy udu kandrah.
REV 11:14 Len ta sisi-in mala-uh nane ndrameres ndra-au ai; arile mada aha kere loken! Mirihik ai, len ta sisi-in kameh asahan ja.
REV 11:15 Ya, angelo ndro taloh doh badeh, badu hawe oro ma onoh nane eme len oloh ndrah tan, eme ma boho iri lau rayah asehek sahou boto-on labai udu kandrah i buku doh, “Laban tataha Kindrei hawe Mesaya tan, uru mala-uh ndrasahan kabin ta kon munyak mara-ei, ma iy kameh atondrok udu le buku doh!”
REV 11:16 Eme ma oro batun ma lunoh hahuw (24) nane manyah are bada koyeu tiri kabin mirihik ta mada Kindrei, badeh, atehei bwili iri i andri bada munyak, ma oro atudun nyara Kindrei.
REV 11:17 Eme ma oro anya, “Aso adeu wurah ewek tam, Laban, Ou Kindrei, iri boto-on mara-ei udu minem. Na nane dah ou are aliy, ma ndra bwena mene ou are aliy ale. Ou ndrandrei iri boto-on tam mara-ei, ma ou asahan kabin ta atondrok kon mara-ei ai. Eme ma ahi adeu wurah ewek tam.
REV 11:18 Eme ma iri lau mwan ma badih nane tana iri Kindrei bwe badeh, abo losen labai, arile len ta losen tam badeh, ndrasahan. Len doh kameh ou ariu iri mwan ma badih mene ndramak ame ta mada sahou. Len doh badeh, ta adeu ndramas mwasin ili tiri lau ta amekes lahou tam badeh, ndrasahan; iri a buku iri propet tam, ma iri mwan ma badih ou aloh iri badeh, lau tam, ma iri mwan ma badih nyara iri tinan ma iri mwan ma badih nyara iri bwe, iri badeh, atudun nyaram, ma iri anuhun sahou tam ma a-en hamon ta aliy. Ma len ale ndrasahan ta ou kameh bokoro-ei iri mwan ma badih mene amekes bahun ma adi iri lau mwan ma badih mwasin mene are kon munyak.”
REV 11:19 Sahou ano le badeh, asiu ta Kindrei ndrabun udu kandrah badeh, asak, ma bwisi sahou randra le ta Kindrei badeh, udu le lewan bolo asiu ndrabun tan. Ma kuruh atohou, kalik takamek ili eme, ma nyaron asahan tinan labai, ma kon munyak totoreh, ma mada ur asahan i buku bek, ma indruk iroh eme andri bwele-e kon munyak.
REV 12:1 Ano badeh, jo anyolom lakou randrah labai asahan bolo kandrah, ma bohok asak ta aliy. Jo anyolom badih ari udu aliy, ma iy asini an i nyara awin tan, ma bun udu bahandra katin, ma ndrau ma ronoh la-uh badu kandrah i nyara barak udu batun.
REV 12:2 Nadun ere tan, ma sisi-in ta iy anya kedeu nah badeh, asahan tan. Ma sisi-in doh badeh, ndra-in labai, eme ma iy anyar iy ta anya kedeu nadun.
REV 12:3 Ano badeh, jo anyolom kalem ari ja asahan bolo kandrah ale. Lakou doh, i buku mwak laba tinan banin ere aliy. Badan saraman mara-ei, ma batun ma ndro taloh, ma kasoh ma ronoh udu batun, ma hawe barak ma ndro taloh ta kabin udu batun ari ari.
REV 12:4 Kiwin badeh, asiri ndrau ranah ma buruwen badu kandrah, ma akahei mari iu ili andri kon munyak. Ya, ndrau ma lubuk le badeh, erah udu kandrah ai. Mwak laba tinan nane banin ere aliy badeh, ales ere batala iy badih nane, atondrok ta anya kaimon nadu i badih nane doh, buku iy atehei iy eme le len.
REV 12:5 Eme ma iy badih nane dah atehei nadun mwan eme len, ma hamon kameh, iy ta atondrok iri lau mwan ma badih mara-ei badu kon munyak, ma tondrok tan kameh boto-on labai. Ya, iy akahei nadun eme len le badeh, iri angelo ame bwese-ei iy nah nane ma mwasin amwenen iu ili bada koyeu hawe Kindrei.
REV 12:6 Eme ma iy badih nane dah atobwak iu ili lokei, loboho kon lomale an lau bado aliy bwe. Loboho doh badeh, Kindrei ndralowosaniy le, ta iy badih doh kameh ili udu aliy. Ma iri kameh atondrok iy, ma adeu nan nyamon ili ili winiya le len ma rawa lunek ndro hanoh (1,260) ano.
REV 12:7 Ano, bahun laba tinan atohou udu kandrah, ya Maikel hawe oro angelo tan amekes bahun hawe mwak laba tinan banin ere aliy, ma mwak hawe iri angelo tan amekes bahun ili hamon ili toro ale.
REV 12:8 Arile, mwak laba tinan nane banin ere aliy hawe oro angelo tan badeh, bala winiyan bwai, eme ma iy hawe oro angelo tan badeh, winiyan bado kandrah ja bwai.
REV 12:9 Eme ma oro angelo ta Kindrei akahei iy mwak laba tinan banin ere aliy hawe oro angelo tan, ame andri kon munyak. Iy mwak laba tinan banin ere aliy doh badeh, ndra bwena labai, ma nyaran badeh, “Balik” o “Satan” Ma iy ndramak ta wendreya iri lau mwan ma badih mara-ei badu kon munyak. Oro akahei iy hawe oro angelo tan ame andri kon munyak.
REV 12:10 Ano badeh, jo anuhun boho ndramak ari badu kandrah asehek sahou boto-on labai anya, “Nadah, Kindrei tataha badeh, ndrandrei taha ndrame hamon. Iri mwan ma badih mara-ei badeh, ndranyolom boto-on tan, ma iy ndrasahan kabin. Ma Krais badeh, akohok nyaran ta atondrok iri mwan ma badih mara-ei. Tasah, balik badeh, iy ndramak ta ili hawe Kindrei na len ma na ben mara-ei ta orou sahou i bada iri lau ta Kindrei, ta lakou iri amekes. Iri angelo ndrakahei iy udu kandrah ndrame andri kon munyak.
REV 12:11 Iri mwan ma badih ta Kindrei tataha badeh, ndrame len laleyah ta mada iri sahou ndra-in nane balik tiyaniy ili mine Kindrei ta iri kandriyen mara-ei iri amekes. Tasah Jises badeh, imek udu bada kei tondreh, ma ndrayen amou tubuluhi kandriyen ndra-in tiri mwan ma badih nane atehei budon tiri mara-ei in tan. Eme ma, ta idoh le badeh, iri mara-ei ndrasakalawi balik. Ma iri ale atiye sahou tan mwasin, ma ta kandriyen nane doh, iri ndrasakalawi kandriyen ndra-in tan. Iri batehei budon tiri ba-en ta manyah tiri badu munyak bwe. Iri badeh, alelei ili le mine iri lau nane a-en hamon ta balik adai iri amak.
REV 12:12 Ya, iri angelo badeh, ndratikahei balik udu kandrah ndra-au. Eme ma aha marakon ala are kandrah, aha kasekesek labai kare aliy ai! Arile kon munyak ma hawe iri lau mwan ma badih marakon are aliy, bale aha ki-in taha! Balik badeh, ndrawek andri kon munyak hawe aha ma iy ibo losen tinan labai! Iy tanan, len tan badeh, ndrame mirihik labai, ma Kindrei kameh tobohei iy ta iri lakou mara-ei iy amekes.”
REV 12:13 Mwak laba tinan banin ere aliy, ndratanan buku iri badeh, ndrakahei iy udu kandrah ndrame andri kon munyak, eme ma iy eme in hamon ta iy badih mene tuwi nadun mwan.
REV 12:14 Arile, iri angelo atehei bani manyuwe ma la-uh i ta iy badih nane doh, ta iy winiyan atah iu ili lokei bolo kon lomale an, lau bare aliy bwe. Loboho doh badeh, Kindrei ndralokowaniy le. Eme ma iy winiyan udu len labai ta mwak laba tinan banin ere aliy. Ma iri angelo ale kameh winiyan atondrok iy ta nyamon udu loboho doh, winiya jaha taloh ranah.
REV 12:15 Eme ma mwak laba tinan banin ere aliy badeh amuri gwa udu bohon eme len. Gwa udu bohon eme len doh badeh, asahan i buku wadah arorou in hamon ta iy badih nane doh. Mwak laba tinan banin ere aliy anya, gwa arorou in hamon tan doh kameh winiyan teheyani iy badih doh amai iu mara-ei.
REV 12:16 Arile bwe. Munyak badeh, sebenei iy badih doh. Munyak sihi bohon asak, ma iy anyuwi gwa mara-ei nane amou udu boho mwak laba tinan banin ere aliy eme len, mara-ei ano iu ili ndrinen.
REV 12:17 Eme ma mwak laba tinan banin ere aliy badeh, ndrinen ibolosen i ta iy badih nane doh, ma iy eme anya kamekes bahun hawe nadun iri rayah ja. Idoh, iri lau mwan ma badih nane iri anuhun ma a-en hamon ta sahou ta Kindrei, ma iri atiye sahou mwasin ta Jises ma a-en hamon tan. Eme ma mwak laba tinan banin ere aliy nane dah, ili ales in babi.
REV 13:1 Ano ja, jo anyolom nyabwe ndras ari apek udu bolo ndas eme loken. Kasoh tan ma ronoh, ma batun ma ndro taloh. Kasoh ma ronoh udu batun doh badeh, barak tiri kabin ma ronoh badeh, udu toro kasoh doh. Ya, batun ma ndro taloh doh badeh, nyara lakou rayah ere aliy. Ya, kati nyara iri lakou doh badeh, nyowonya iri sondrokonya mari ili bada Kindrei.
REV 13:2 Jo anyolom nyabwe ndras nane doh, konen i buku ari lepat. Katin badeh, i buku kati lakou ari iri aloh be, ya bohon ja badeh, laba tinan i buku boho layon. Ya, mwak laba tinan banin ere aliy badeh, edeu boto-on ili tan. Iy atehei iy asahan kabin i buku le iy ta manyah in bada koyeu tan amwenen.
REV 13:3 Ma jo anyolom batu nyabwe ndras ari i buku baka ndrana udu aliy bwena, iy mene ndra-in ta adai iy imek, arile ndramon ja. Boho iri mwan ma badih mara-ei badu kon munyak asak ta aliy, ma bwidi iri a-en hamon ta nyabwe ndras nane udu bolo ndras apek eme loken.
REV 13:4 Iri mwan ma badih mara-ei badeh, atudun mwak laba tinan nane banin ere aliy, tasah iy ndranyumusi boto-on tan ndrala ta nyabwe ndras nane. Iri ale atudun iy, ma iri tiye i buku doh, “Are lau handru i buku nyabwe ndras doh? Are handru winiyan amekes bahun hawen?”
REV 13:5 Eme Kindrei alelei ili le minen ta arah bohon laleyah ta atudun iy le, ma ta bobose Kindrei. Ma Kindrei atehei boto-on tan ere gwek ta amekes iri kandriyen doh winiya bun ma hanoh la-uh (42).
REV 13:6 Eme ma, iy arah bohon ta bobose Kindrei, iy sondrokonya Kindrei ma kon tan, ma hawe iri lau ta Kindrei ado kandrah.
REV 13:7 Eme ma Kindrei alelei ili le tan ta amekes bahun hawe iri mwan ma badih nane a-en hamon ta sahou ta Kindrei, ma adi iri amak ma ta atondrok kon tiri. Ma iy akohok boto-on ta asahan kabin ta boho kamen mara-ei are kon munyak, ma iri lau bada iri randrah, randrah, ma iri boho kon rakon rakon badu kon munyak, ma iri lau badu kon munyak tinan mara-ei.
REV 13:8 Iri lau mara-ei badu kon munyak ale, nyara iri bado bolo buk ta Kindrei bwe, udu ndra bada len Kindrei mene amekes kon munyak, iri mara-ei doh kameh winiyan bakohok kohan handru bwe, arile iri kameh atudun nyara nyabwe ndras nane. Buk doh badeh, buk ta ndramak konen i buku Nadu Sipsip ta Kindrei, bwena mene iri lau adai iy imek.
REV 13:9 Iri lau mwan ma badih mara-ei nane anuhun sahou dah, iri kabudon kamwenen, ma iri ka-en hamon ta aliy. Iri lau nane Kindrei ndraluhi nyara iri ta ala bolo asiu lulik, iri doh kameh ta ala le ai. Ya, iri lau heh nane Kindrei ndraluhi nyara iri ta amak na samen, iri doh kameh ta amak le ai. Udu ndra bada len, kandriyen dah asahan, iri lau badu hawe Kindrei badeh, kales boto-on ma katawi budon tiri mara-ei handru kihis.
REV 13:11 Udu hamon ta nyabwe ndras amai ta madak, jo anyolom nyabwe munyak ari ja abusuk bolo ndren ma atas eme loken. Jo anyolom kasoh ma la-uh udu batun, ya kone nadu kasoh ma la-uh udu batun doh badeh, i buku ta nadu sipsip. Arile, nyaro sahou tan badeh, tinan labai i buku le ta mwak laba tinan nane banin ere aliy.
REV 13:12 Iy ndrandrei boto-on mara-ei ta nyabwe ndras nane eme bwena, iy andrei doh ta amekes iri gok tan udu madan. Iy amekes gok boto-on labai ta ariu iri mwan ma badih are kon munyak, katudun nyabwe ndras eme bwena nane. Iy mene baka ndrana ndra-in ta adai iy imek, arile ndramon ja.
REV 13:13 Iy nyabwe munyak nane dah amekes iri kalem ma lahou tinan; kalem ari badeh, iy amekes i buku doh: Buku iri mwan ma badih anyolom iy badeh, iy kameh bwidi jih udu kandrah eme andri kon munyak.
REV 13:14 Nyabwe ndras badeh, udu aliy, ya Kindrei badeh, alelei nyabwe munyak nane doh kamekes kalem udu mada nyabwe ndras. Ma ta kandriyen nane iy ndrawendreyani iri mwan ma badih badu kon munyak. Eme ma iy tiye iri lau i buku doh: “Aha badeh, kasihidi ari sukumada kei, konen ki buku nyabwe ndras kede-eh, ta aha katudun nyaran. Iy nyabwe ndras doh ale mene samen ari sese le kidi iy kimek, arile badi iy bamak bwe, iy udu kede-eh kahis.”
REV 13:15 Eme ma Kindrei alelei iy, ma iy atehei kohan i ta sukumada kei doh, ma iy asehek sahou. Buku iri lau rayah batudun, ma batehei bwili ndru-u iri bala andri ta sukumada kei nane doh bwe, iy kameh tiye iri lau rayah ja ta adi iri mara-ei amak ano au.
REV 13:16 Eme ma nyabwe munyak nane dah tiye iri lau tan rayah ta kadeu ari kalem kili mine iri salin o kudu bwili iri lau mara-ei badu kon munyak: iri lau laleyah, iri lau nyara iri tinan, iri lau nadu batun, ma iri lau tiri lakou bwe, iri lau bonyo-ou, ma hawe iri lau ndrame len ta kandriyen ta bonyo-ou ma are laleyah.
REV 13:17 Eme ma, buku are mwan o badih, kalem ta nyara nyabwe munyak doh bwe, iy kameh winiyan basih lakou tiri lau rayah ja bwe, ma iri amwenen winiyan basih lakou tiri bwe le. Ya kalem doh badeh, nyara nyabwe munyak, o kane nyaran.
REV 13:18 Taha kabudon kamwenen ta lakou doh. Lau mwan ma badih, tanan tiri udu aliy, iri kondrek kane nyara nyabwe munyak kamwenen labai. Idoh badeh, kane lakou ta ndramak ari labai, ma kane lakou ta iy ndramak doh badeh, asahan buku ndro hanek ndro hanoh onoh (666).
REV 14:1 Ano badeh, jo anyolom ili kandrah ja, ma jo anyolom Nadu Sipsip ta Kindrei, iy ales udu bwele-e mandrei ta Sayon, hawe iri mwan ma badih kane iri 144,000 ales are hawen. Ma nyara i Nadu Sipsip doh, ma nyara taman badeh, torowenei udu bwili iri.
REV 14:2 Ma jo anuhun nyaro sahou ari doh mwasin labai udu kandrah eme i buku nyaro goi laba tinan, ma buku kuruh atohou. Jo anuhun nyaro lakou doh, i buku iri lau adi ndran solo-an doh, iri aloh hap.
REV 14:3 Iri 144,000 mwan ma badih doh badeh, ales ma ayah wari ari ha-un, iri badeh, are mirihik ta koyeu ta Kindrei manyah udu aliy, hawe oro lakou ma mulin ma hahuw, ma mirihik ale toro batun ma lunoh hahuw (24). Kindrei ndrandrei iri lau mara-ei doh ndrame hamon. Iri mene badu bolo iri lau badu kon munyak mara-ei. Eme ma oro le 144,000 mwan ma badih doh badeh, kameh winiyan ta atanan moso kati wari nane oro ayah doh. Ari mwan o badih udu kede-eh ja kameh winiyan ta akohok tanan ta kati moso wari doh ja bwe.
REV 14:4 Sahou sokek ari badeh, asahan i buku doh: Iri badeh, a buku iri lau mwan, iri bamadin sese hawe iri badih, ma bamekes karei hawe iri, bwe. Iri ma buruwen kahis. Ma iri kon mara-ei nane, Nadu Sipsip anya kili aliy, san nane doh le badeh, iri lau a-en hamon tan. Kindrei mene ndrakonohei iri are bolo iri lau mara-ei badu kon munyak, iri ma bwena handru, Kindrei mene konohei iri. Ma iri badeh, asahan lau tan hawe lau ta ndramak ari, konen i buku Nadu Sipsip.
REV 14:5 Iri mara-ei badeh, bamekes ari sahou wendreya o ari kandriyen ndra-in ta karei bwe.
REV 14:6 Udu hamon ta lakou doh ano badeh, jo anyolom angelo ari atah ili bolo kandrah. Gok tan badeh, ta atiye sahou mwasin kameh ta udu le buku doh, ili tiri mwan ma badih mara-ei are kon munyak. Iy asehek ili tiri mwan ma badih badu kon munyak tinan mara-ei, tiri boho kamen mari, tiri boho kon rakon rakon badu kon munyak mari, ma ili tiri mwan ma badih bada iri randrah ja.
REV 14:7 Iy badeh, aloh boto-on labai i buku doh, “Len badeh, ndrasahan ta Kindrei aleben iri mwan ma badih mara-ei are ta mada sahou. Eme ma aha kanoh iy, ma aha katudun nyaran. Aha mara-ei badeh, katehei bwili ndru-u aha kili andri ki ta Kindrei, iy le badeh, bwidi kandrah ma munyak, hawe ndras ma mana munu iri gwa mara-ei.”
REV 14:8 Ano angelo ari ja in hamon ta iy ma mwena nane eme. Iy angelo nane dah, anya, “Kon tinan Babilon mene tutuni nyaran i loken labai, badeh, ndratohou ndra-au ai! Iri mwan ma badih mara-ei mene ado bolo kon Babilon badeh, iri mene ariu budon tiri mwan ma badih rayah ado bolo kon munyak mara-ei. Eme ma iri atehei bwili ndru-u iri i andri ili ta kindrei ta wendreya tiri amekes na kei, ma adeu kona iri ili ta Kindrei handru. Iri mwan ma badih mara-ei nane are Babilon badeh, i buku badih iy tawi bwesam udu minen irek na waen, ma iy aruwi budon tiri lau mara-ei, eme ma iri anyuwiy, ma iri abo lolo-ou, ma iri amekes kandriyen ndra-in ta karei hawen.”
REV 14:9 Ano, angelo ari ja in hamon turu eme ale. Iy aloh boto-on labai i buku doh, “Are mwan o badih handru atehei bwili ndru-u iri ili andri i ta nyabwe munyak hawe malawin, ma iri akohok kalem udu mine iri, o bwili iri?
REV 14:10 Iri kameh a-un waen udu bwesam ari. Waen doh kameh leheya iri lakou ndra-in labai, Kindrei kameh amekes ili tiri mwan ma badih, ta kandriyen ndra-in nane iri a-en hamon ta aliy. Tasah, iy ibolosen tinan labai ili tiri. Eme ma iri kameh akohok sisi-in ndra-in labai ta nyaraha jih anya ta bek solpa. Ma iri angelo ta Kindrei hawe Nadu Sipsip tan, kameh anyolom iri mwan ma badih akohok sisi-in tinan labai doh.
REV 14:11 Ma kasu-er asahan ta jih nane edeu sisi-in ili tiri, kameh ili loken ta udu le buku don ai. Iri lau mwan ma badih doh nane atehei bwili ndru-u iri ili andri i ta nyabwe munyak hawe malawin, ma akohok kalem ta nyaran, jih kameh edeu sisi-in ili tiri. Ben, len iri winiyan bamunyau bwe, jih doh badeh, winiyan bamak bwe, kameh anya ta udu le buku don ai, ma iri mwan ma badih doh kameh winiyan bado mwasin ja bwai.”
REV 14:12 Udu bada len ta lakou nane doh asahan, ya iri lau ta Kindrei nane, a-en hamon ta batanau tan, ma tawi ihis budon tiri in ta Jises, iri badeh, katadau ndruwi iri ta bwese iri maha-an mara-ei doh.
REV 14:13 Ma jo anuhun boho ndramak ari udu kandrah asehek sahou i buku doh, “Ou atorou sahou ki buku doh: Iri mwan ma badih atehei budon tiri mara-ei in ta Laban, ma iri ndramak ta aliy, nadah, ma na len eme kahis, iri badeh, kasekesek!” Malawin Ndrabun ale asehek, “Ya, iri kameh ruwani lahou boto-on tiri, iri mene amekes, ma iri amunyau ta aliy. Iri bame dah laleyah bwe. Kandriyen mwasin mene iri amekes, idoh kameh ili hawe iri ale ili kandrah.”
REV 14:14 Oro asehek sahou ano le badeh, jo anyolom asi kandrah rasi belen mara-ei, ma ndramak ari manyah udu aliy, konen badeh, “I buku le Nadu Ndramak Awas.” Barak ari bek nyikilikin badeh, udu batun, ma iy tawi samen gwak raho, madan labai udu minen.
REV 14:15 Ano, angelo ari ja badeh, atah udu bolo asiu tinan ta Kindrei eme len. Iy aloh boto-on labai ili ta ndramak nane manyah udu bwele-e asi kandrah i buku doh, “Ou sani iri nyamon marakon na samen tam! Iri nyamon marakon badu munyak badeh, ndruniy mara-ei! Eme ma, len dah badeh, len mwasin ta akohok iri nyamon marakon doh.”
REV 14:16 Ano le badeh, iy ndramak nane manyah udu bolo asi kandrah, andrei samen tan, iy akahei eme andri kon munyak, ma sani iri nyamon mara-ei nane uni badu kon munyak.
REV 14:17 Jo anyolom angelo ari ja atah udu bolo asiu tinan ta Kindrei udu kandrah eme len. Iy tawi samen gwak raho madan labai ale udu minen.
REV 14:18 Ya, jo anyolom angelo ari ja, iy boto-on labai ta atondrok jih. Iy badeh, atah udu loboho mada koto-ok eme len. Iy asehek sahou, bohon ili loken mara-ei, ili ta angelo ari nane tawi samen gwak madan, madan labai udu minen i buku doh, “Ou andrei samen tam madan labai badeh, ma ou sani kandro iri waen mara-ei badu munyak, ma ou tukumwiy marakon kili le se, tasah nyamon marakon badeh, ndruniy mara-ei!”
REV 14:19 Eme ma, iy angelo nane dah akahei samen gwak tan eme andri kon munyak, ma sani kandro iri waen mara-ei, ano iy tukumwiy marakon ili le se. Ano iy akahei nyamon marakon ili le bolo kun bek laba tinan ta atisih waen mara-ei kabwesek. Idoh badeh, leheya buku lakou ndra-in mara-ei doh badeh, Kindrei kameh amekes ili tiri lau marakon badu kon munyak, tasah ndrinen badeh, ibolosen labai tiri.
REV 14:20 Iri waen badeh, ili bolo kun bek laba tinan udu manan kesehe kon tinan ta atisih iri. Eme ma ndraye waen amou kabede kun bek eme len, atas ili winiya kilomita ma tonek (300), ma eme loken lawe-en badeh, winiya le hayen iri atehei udu boho iri hos.
REV 15:1 Udu ja badeh, jo anyolom lakou ari laba tinan labai asahan bolo kandrah, ma jo abudon solo-an labai ta aliy. Jo badeh, anyolom oro angelo ma ndro taloh, tawi lakou ma ndro taloh ndra-in labai doh udu mine oro ta amekes maha-an laba tinan ili tiri mwan ma badih. Hamon ta lakou doh ano, ari winiyan basahan ja bwai. Idoh ndrano mara-ei ai. Tasah, ta oro lakou ma ndro taloh ndra-in nane doh badeh, losen ta Kindrei kameh ano mara-ei, ma iy kameh winiyan bamekes bundruwe aliy ja bwai.
REV 15:2 Jo ale anyolom lakou ari buku ndras laba tinan, iri amekes na torowe, ma iri tubuniy hawe jih. Iri lau mene abadok sakalawi nyabwe munyak mene hawe malawin, ma sakalawi boto-on ta kane nyara ndramak nane ale, iri badeh, ales amwenen are kesehe ndras i buku torowe. Kindrei atehei iri ndran, iri aloh hap badeh, ndrala toro, ma oro tawiy udu mine oro.
REV 15:3 Iri badeh, ayah wari ta Moses, lohowan ta Kindrei torowenei, ma wari wariye Nadu Sipsip ta Kindrei, i buku doh, “Laban, ou Kindrei, ou tawi iri boto-on mara-ei. Iri gok mara-ei ou amekes, iri laba tinan labai, ma ahi ale anyolom, ma ahi abudon solo-an labai! Ou badeh, kabin ta boho kamen tiri mwan ma badih mara-ei, ma kandriyen tam badeh, amwenen mara-ei, ma handru labai!
REV 15:4 Laban, ou le ari, ou ndrabun labai. Eme ma are lau handru, kameh winiyan banoh ou bwe? Are lau handru kameh winiyan batudun nyaram bwe? Iri lau mara-ei badu kon munyak kameh ame atehei bwili ndru-u iri i andri ewek tam. Tasah, kandriyen tam mwasin badeh, ndrasahan ndrame lewan.”
REV 15:5 Udu hamon ta wari ano badeh, jo anyolom asiu tinan ta Kindrei udu kandrah badeh, asak. Asiu doh buku asiu balei ndrabun mene Kindrei atah ta leheya kandriyen ma sahou handru tan.
REV 15:6 Ma jo anyolom oro angelo ma ndro taloh nane, tawi lakou ndra-in ma ndro taloh udu mine oro ta adeu maha-an ili tiri lau marakon, oro badeh, atah ado bolo asiu ndrabun ta Kindrei ame manan. Oro mara-ei badeh, asini awin moroyan, ma se ndraka-an aliy bwe. Ma oro ale bawei balaban udu batala oro, kone balaban doh badeh i buku bek nyikilikin.
REV 15:7 Ya, lakou ari ma mulin badu bolo oro ma hahuw badeh, eme atehei bwekei bek nyikilikin ma ndro toloben ili mine oro angelo ma ndro taloh. Ma hawe lakou udu bolo iri bwekei nane, leheya losen ta Kindrei ili tiri lau marakon badu kon munyak, iri lakou doh badeh, irek udu bolo oro bwekei bek nyikilikin ma ndro taloh nane doh. Ndrinesen doh badeh, ta Kindrei, iy winiyan bamak bwe, iy ta ere le buku don ai.
REV 15:8 Kasu boto-on ma lomada Kindrei badeh, tubuluhi bolo asiu tinan ta Kindrei nane doh. Ma ari ndramak winiyan bala bolo asiu ndrabun doh bwe. Iri lau marakon badeh, atondrok le oro angelo ma ndro taloh nane doh, kabwidi gok toro lakou ndra-in ma ndro taloh nane doh, mara-ei kano labai.
REV 16:1 Ano badeh, jo anuhun boho ndramak ari asehek sahou boto-on labai udu bolo asiu tinan ta Kindrei ili toro angelo ma ndro taloh i buku doh, “Ado kala kasolowei bwekei ma ndro taloh losen ta Kindrei udu bolon kodo-oh ki-iu kili andri bwele-e kon munyak!”
REV 16:2 Iy asehek sahou ano le badeh, jo anyolom angelo ari atah ili solowei bwekei tan amou ili bwele-e kon munyak. Eme ma se nawin bwe, soso-ou ma hawe sisi-in ndra-in mara-ei badeh, asahan bada iri mwan ma badih, iri nane kalem ta nyabwe munyak udu bada iri ma iri atudun malawin iri bwidiy na sukumada kei.
REV 16:3 Ano, angelo ari ja ili solowei bwekei tan amou ili bwele-e ndras. Eme ma gwa ndras asahan i buku ndraye ndramak imek, eme ma iri lakou mara-ei, bwisik ma tinan, are bolo ndras, mara-ei amak.
REV 16:4 Uru angelo la-uh ndrano ai, iy ari eme len ja solowei bwekei tan amou ili bwele-e gwa lakon ma kaloh mara-ei. Bwekei doh asahan ili taloh ai. Eme ma gwa mara-ei asahan ndra.
REV 16:5 Eme ma jo anuhun boho angelo atondrok gwa mara-ei nane asehek i buku doh, “Ou ndrabun labai. Ta sahou tam, ou anuhun sahou tiri lau ndra-in amwenen labai. Tasah, nadah ou are aliy, ma ndra bwena mene ou are aliy ale.
REV 16:6 Iri mwan ma badih mene ale adai ma bwidi ndraye iri lau ma hawe iri propet tam amou. Eme ma ou atehei ndraye iri lau badeh, ili wa-i iri. Eme ma iri akohok bundruwe ndra-in tiri amwenen.”
REV 16:7 Ano ja badeh, jo anuhun ndramak ari udu loboho mada koto-ok, asumon boho angelo nane i buku doh, “Ya, ou Laban handru, ou Kindrei, boto-on marakon udu tam. Ou badeh, aleben iri mwan ma badih are ta mada sahou, iri sahou tam badeh, ndra handru le, ma amwenen mara-ei.”
REV 16:8 Ano badeh, angelo ari ja eme len ili solowei bwekei tan amou amwenen ili bwele-e an, ma jih taladan eme loken, ma sulumwi bada iri mwan ma badih. Ya bwekei doh ili asahan hahuw ai.
REV 16:9 Jih ta an nane doh badeh, nyarahan labai ma sulumwi bada iri mara-ei atabuk, eme ma bwidi iri abolosen, ma iri aten nyara Kindrei. Tasah, Kindrei badeh, amekes iri lakou mara-ei nane doh. Eme ma iri bwale iri ta tobolowe ndrine iri, ma ta a-en hamon ta sahou handru, ta atudun nyara Kindrei.
REV 16:10 Ya, iy angelo ari ja eme ili solowei bwekei tan amwenen ili bwele-e koyeu ta nyabwe munyak. Ya bwekei doh ili asahan limeh ai. Eme ma lulik asahan tubuluhi tondrok ta nyabwe munyak. Eme ma bwidi iri lau atohei kalime iri, ta sisi-in tiri nane doh.
REV 16:11 Iri abudon ta sisi-in hawe soso-ou tiri, eme ma bwidi iri aten nyara Kindrei badu kandrah. Arile, iri badeh, batubuni ndrine iri ma batehei kona iri bala tiri kandriyen ndra-in nane iri amekes bwe.
REV 16:12 Iy angelo ari ja badeh, ili solowei bwekei tan amou amwenen ili bwele-e gwa tinan Yupretis. Ya bwekei doh ili asahan onoh ai. Eme ma gwa Yupretis asamar mara-ei, ta adik san tiri kabin badu loboho rai mara-ei kameh ame.
REV 16:13 Ano ja, jo anyolom oro malawin ndra-in ma taloh, kotowa oro i buku basen. Oro ado boho mwak laba tinan banin ere aliy sandroh ame len, ma udu boho nyabwe munyak, ma udu boho propet ta wendreya ale.
REV 16:14 Oro basen ma taloh doh badeh, malawi oro ndra-in labai, ta amekes iri kalem solo-an hawe lahou tinan. Oro ma taloh badeh, ala hawe iri kabin marakon tiri mwan ma badih badu kon munyak. Iri anya katukum iri kala le se kamekes bahun kameh udu bada len laba tinan ta Kindrei, boto-on mara-ei udu tan.
REV 16:15 “Aha ari ari kanuhun! Jo Jises, jo kameh ewek i buku ndramak ta bahana! Eme buku are mwan o badih, iy atehei ndrokei amwenen na bolo len mara-ei, ma lowosani kolau tan kudu mirihik tan, iy kameh winiyan badek ndrakane mada iri lau, ma iri lau winiyan banyolom badan bwe. Iy lau doh badeh, kasekesek.”
REV 16:16 Eme ma, malawi oro balik ma taloh nane badeh, ame tukumwi iri kabin mara-ei ala le loboho doh, i boho Hiburu badeh, iri aloh Amagedon.
REV 16:17 Ano, iy angelo in ndrobek toro mara-ei badeh, ili solowei bwekei tan amou ili bolo kandrah. Ya bwekei doh ili asahan ndro taloh ai. Eme ma ndramak ari ales mirihik ta mada koto-ok udu bolo asiu tinan ta Kindrei, iy asehek sahou i buku doh, “Lakou marakon badeh, ndrano ai.”
REV 16:18 Bolo len doh badeh, kalik takamek ili eme, ma kuruh atohou, kurutuwen laba tinan labai, ndroi asahan, iy nyokoda kon ma kon munyak mara-ei totoreh andra-i mara-ei. Ndroi ari le doh badeh, i randrah labai, bala buku iri ndroi rayah ale Kindrei amekes kala iy bwidi iri lau manyah bwele-e munyak eme taku dah, bwe. Iy ndroi le doh badeh, iy ndra-in, ndra-in labai udu bolo iri ndroi mara-ei!
REV 16:19 Kon tinan nane iri aloh Babilon, badeh asak asahan i tolokon, ya kon tinan badu kon munyak tinan mara-ei, badeh, irou i andri ma ano iu. Ya, Kindrei badeh, bamani kandriyen ndra-in mara-ei tiri mwan ma badih badu kon tinan Babilon amekes bwe. Eme ma bwidi ndrinen ibolosen labai, ma iy a-um iri na lakou doh. Ya, iy bokoro-ei iri badeh, eme ma iri asahan i buku iri lau a-un waen solo-an labai, ma iri abo sik i ndra-in mara-ei.
REV 16:20 Ya, ndroi laba tinan nane asahan badeh, ndratolomwani iri busu mara-ei udu bolo ndras laba tinan, badeh ndratuh ndra-au ndrala baha ndras. Ma iri mandrei mari ale arou ame le andri, ma atohou iu laleyah, ari madan bwe.
REV 16:21 Ma ur laba tinan undruk eme andri i buku bek. Maha-an ta mada ur ari ari doh badeh, i buku kilo ma lomonoh (50). Ur doh badeh, i buku bek, undruk udu bolo kandrah eme andri ili bwele-e iri mwan ma badih badu loboho kon munyak mara-ei, ma bokoro-ei iri andra-i labai. Eme ma, iri aten nyara Kindrei ta ur i buku bek nane bokoro-ei iri.
REV 17:1 Ya, oro lakou nane doh ano badeh, angelo ari badu hawe oro ma ndro taloh nane tawi bwekei, eme asehek tek i buku doh, “Ou ame. Iy badih tinan ta karei manyah udu bwele-e gwa laba tinan kodo-oh, iy kameh akohok bundruwe iri kandriyen ndra-in tan marakon nadah. Jo anya kaleheya ou ta idoh le, ma saba maha-an handru kameh, iy akohok.
REV 17:2 Iri kabin badu kon munyak mara-ei badeh, amekes kandriyen solo-an ta karei hawe i badih doh. Iri mwan ma badih mara-ei badu kon munyak ale amekes kandriyen doh hawen, ma iri asahan lolo-ou, i buku iri lau a-un gwa boto-on.”
REV 17:3 Malawin Ndrabun ta Kindrei eme la-uk, ma angelo doh bwese-ei jo ma mwasin amwenen iu ili kon lomale an. Jo udu loboho doh badeh, jo anyolom badih ari, iy manyah udu bwele-e nyabwe munyak ari badan saraman mara-ei. Nyabwe munyak doh badeh, nyara iri lakou solo-an labai irek udu badan, ma nyara iri lakou doh badeh, i buku, iri sahou bobose, iri sahou sondrokonya, ma iri sahou ta aluhe Kindrei. Nyabwe munyak ale doh badeh, batun ma ndro taloh, ma hawe kasoh ma ronoh udu batun.
REV 17:4 Ya, jo atou iy badih doh badeh, nyosowani iy na awin saraman ma lu-ei, ma iri nyasou nyikilikin solo-an labai tubuluhi iy, ma iri bek nyikilikin, hawe iri buwandralou sowa iri tinan labai. Ya, iy tawi raben bwesam nyikilikin labai udu minen. Ya, waen badeh, irek udu bolo bwesam nyikilikin doh, leheya iri kandriyen ndra-in solo-an abola labai ta budon ta Kindrei, ma hawe iri kandriyen mara-ei ta karei, i badih doh amekes.
REV 17:5 Iri ndratorowenei nyaran udu bwilin, nyaran doh i buku sahou sokek, moson ta aliy mene aton. Ya, moson ta nyaran amwenen badeh, i buku doh,
REV 17:6 Iy badih doh mene idi iri mwan ma badih ta Kindrei, ma iri lau atehei budon tiri handru in ta Jises, ma iri atiye sahou tan. Ma jo anyolom i badih doh a-un ndraye iri, ma bwidi batun ibo lolo-ou, i buku ari badih iy a-un gwa boto-on solo-an labai, ma bwidi iy ibo lolo-ou. Jo anyolom lakou doh, manik atur, ma jo abudon solo-an labai.
REV 17:7 Ano angelo asehek sahou eme tek i buku doh, “Manim atur tasah handru? Jo anya kasehek tam ta nyala iy badih kede-eh ma nyala nyabwe munyak. Iy badih nane doh manyah in bwele-e nyabwe munyak, ma nyabwe munyak nane, batun ma ndro taloh ma kasoh ma ronoh udu batun. Uru lakou ma la-uh doh kameh leheya malawi iri lakou rayah, ya moso iri lakou doh badeh, aton mara-ei, arile nadah kameh jo leheyaniy mara-ei ewek tam.
REV 17:8 Nyabwe munyak nane ou ndranyolom eh, bwena mene iy ere aliy, arile nadah badeh, iy bare aliy ja bwai. Arile, iy kameh udu mana munu lek lawe-en labai, ari katin bwe, eme len, ma iy kameh ili akohok andra-i labai ma amai mara-ei. Iri lau mwan ma badih badu kon munyak nane nyara iri bado bolo buk ta Kindrei bwe, udu ndra bada len mene Kindrei bamekes kon munyak bwe le en, iri winiyan bakohok kohan handru bwe, arile iri doh kameh anyolom nyabwe munyak, ma mani iri kameh atur. Tasah, bwena mene iy ere aliy, ma na len dah ja iy bare aliy bwe, arile iy kameh barasahan na len hamon.
REV 17:9 “Buku are mwan o badih, iy budon mwasin, iri winiyan atanan iri lakou doh. Batun ma ndro taloh doh badeh, i buku mandrei ma ndro taloh, ta iy badih doh manyah udu bwele-e oro.
REV 17:10 Batun ma ndro taloh doh ale badeh, i buku oro kabin ma ndro taloh. Arile, oro limeh badeh, ndrataku, ya, uru la-uh ja badeh, ari udu kabin kahis ai, ya ari ja badeh, basahan kabin bwe le. Ya, hamon kameh iy asahan kabin, arile iy kameh winiyan bado luluwen bwe.
REV 17:11 Ya, nyabwe munyak doh mene udu aliy, arile nadah ja badeh, iy bado kede-eh ja bwai, iy kameh asahan, buku kabin ma ndru la-uh. Iy badu le hawe oro kabin ma ndro taloh nane bwena, arile iy kameh amai iu mara-ei.
REV 17:12 “Ya, ou ndranyolom kasoh ma ronoh udu batu nyabwe munyak nane ai. Idoh i buku oro kabin ma ronoh. Oro doh badeh, basahan buku kabin bwe le. Arile, oro kameh akohok boto-on ta atondrok kon hawe nyabwe munyak. Ma oro kameh asahan kabin bado sese luluwen bwe, i buku awa ari le.
REV 17:13 Oro kabin ale doh badeh, budon toro randra le. Nyara oro badeh, ndra tinan ma oro boto-on labai, ya oro kameh adeu ili ta nyabwe munyak.
REV 17:14 Oro kameh amekes bahun hawe Nadu Sipsip ta Kindrei. Arile, Nadu Sipsip ta Kindrei kameh kimidi iri mara-ei ano. Iy badeh, Laban tiri Laban ma kabin tiri kabin mara-ei. Ma iri mwan ma badih are hawen, iri lau doh badeh, iri mene anuhun sahou mwasin, ma iri lau iy mene edeu kalem i tiri, ma iri a-en hamon ta sahou tan, iri mwan ma badih marakon doh, hawe Nadu Sipsip ta Kindrei kameh adai iri lau marakon nane amekes bahun hawen ano mara-ei.”
REV 17:15 Udu ja badeh, angelo asehek eme tek i buku doh, “Ou ndratou iri gwa nane iy badih tinan ta karei manyah udu bwele-e iri. Idoh badeh, leheya iri mwan ma badih bada iri randrah ja, ma iri lau solo-an solo-an atukum are aliy, ma iri lau badu kon munyak tinan mara-ei, ma iri boho kon rakon rakon badu kon munyak mari.
REV 17:16 Ya, ou ndratou kasoh ma ronoh doh, oro marakon doh hawe nyabwe munyak kameh amekes bahun i ta badih laba tinan ta karei. Ya, oro kameh bokoro-ei iy ma andrei iri lakou solo-an tan, ma tarani awin udu badan mari iu. Ma oro kameh ani odan, ma sulumwi iy mara-ei i jih andrakak iu.
REV 17:17 Iri lakou doh kameh asahan, tasah Kindrei le amwenen badeh, edeu iri budon doh ili tiri kabin, ta amekes iri lakou marakon doh kasahan, in hamon ta iri lakou iy ndrasehek ta aliy. Ya, budon tiri mari kameh randra le, ma boto-on nane iri akohok ta asahan kabin, iri kameh atehei marakon doh ili ta nyabwe munyak. Iri kameh amekes ili le buku don ai, ili, ili winiya le len ta lakou mari nane Kindrei ndrasehek ta aliy asahan.
REV 17:18 Ma iy badih nane ou ndratou, badeh, i buku kon laba tinan iy udu bwele-en tiri kabin mara-ei badu kon munyak.”
REV 18:1 Udu hamon ta lakou mara-ei nane doh ano, jo anyolom angelo ari ja atah udu kandrah eme andri. Iy badeh, boto-on labai, ma lomada nyosowan badeh, lomotani kon munyak mara-ei anya.
REV 18:2 Ma iy asehek sahou boto-on labai i buku doh, “Kon tinan Babilon mene udu bwele-en labai, arile nadah iy ndratohou ndra andri mara-ei! Nadah badeh, iy ndrala ndrahune iri malawin ndra-in ta balik are aliy. Iri malawin ndra-in ma hawe iri sirih ta aimon lakou bolo-an, ma hawe iri sirih ndra-in mara-ei, are loboho doh ale.
REV 18:3 Tasah, lau mwan ma badih badu kon munyak tinan mara-ei mene atudun iri kindrei, iri amekes na sukumada kei badeh, ndramekes kandriyen ta karei solo-an labai hawen. Idoh i buku iri ale badeh, ndranyuwi waen tan boto-on labai ta lolo-ou. Ma iri kabin badu kon munyak mara-ei amekes karei hawen ale. Ma hawe iri lau nadu batun ta amekes ba-en ma ta sisih badu kon munyak mara-ei badeh, akohok luk tinan labai ta iri kandriyen tan solo-an ndra-in, ma bwilin winiyan bama ta aliy bwe.”
REV 18:4 Ano ja, jo anuhun boho ndramak ari asehek sahou udu bolo kandrah i buku doh, “Aha lau tek, aha kame len ta iy badih badeh! Idah kameh aha winiyan bala bolo maha-a kandriyen ndra-in tan bwe; eme ma aha ale winiyan bakohok bundruwe iri ndra-in tan bwe!
REV 18:5 Suhuye iri kandriyen ndra-in tan mara-ei badeh, ili isos kandrah, eme ma Kindrei bwetenei iri kandriyen ndra-in mara-ei ta kon doh.
REV 18:6 Aha badeh, kabwetenei iri kandriyen mara-ei iy badih ta karei amekes ili tiri rayah nane op, ano aha baramekes barala tan ai. Iy badeh, amekes kandriyen rayah ja ili le bwele-e bwena, ma bwidiy ili solo-an labai. Eme ma aha kamekes kili tan ma sola, ki-in hamon le tiri kandriyen mara-ei, iy nane amekes. Iy badeh, ale tubuni gwa lolo-ou i bolo bwesam. Ya, aha ale katubuni gwa lolo-ou kili ndra-in labai ja ma solo-an kili tan.
REV 18:7 Iy ale badeh, atudun nyaran amwenen, ma amekes kandriyen solo-an ndra-in ta karei, ma hawe iri kandriyen ndra-in rayah ja. Eme ma aha kadeu sisi-in ma solo-an kili badan, kili, kili winiya le iri kandriyen ndra-in iy nane amekes. Iy badeh, asehek iy i buku doh, ‘Jo badeh, ere mwilis, jo manyah udu bada koyeu ta mwilis. Jo bala buku badih udun imek ma iy ere laleyah bwe. Iri maha-an kameh winiyan basahan tek bwe, ma jo kameh winiyan baden ja bwai.’
REV 18:8 Ta budon doh le, bolo len ari le kameh, iri lakou marakon ndra-in doh kameh asahan tan. Sik solo-an kameh asahan, ma lau solo-an kameh aden, son kameh asahan i tinan mara-ei. Ma jih kameh sulumwi Babilon andrakak mara-ei iu. Laban Kindrei boto-on labai, ma iy kameh edeu bundruwe iri kandriyen ndra-in tan.
REV 18:9 “Iri kabin mara-ei badu kon munyak badeh, mene atudun kindrei ta wasai iri amekes na sukumada kei, ma amekes kandriyen solo-an ndra-in ta karei hawen. Eme ma iri kabin mara-ei doh kameh anyolom kasu-er ta jih nane asun iy, iri kameh alim ade iri, aden, ma tikisiy le ai.
REV 18:10 Iri kameh anoh labai, tasah sisi-in ndra-in nane bokoro-ei Babilon doh kameh asahan tiri. Eme ma iri badeh, ales are ndra len labai, ma aden ma asehek i buku doh, “‘Lakou ta tikisiy, Babilon, iri lau katikisiy ou labai, tasah sisi-in tinan labai kameh ewek bwele-em! Ou kon laba tinan labai, ma ou kon boto-on labai! Udu bolo awa ari le, bundruwe kandriyen ndra-in tam badeh, ndrasos hawem!’
REV 18:11 “Iri nadu batun solo-an ta amekes ba-en ma ta sisih badu kon munyak mara-ei kameh, abudon ta kon le doh, ma iri kameh aden ndranyen ma tikisi iy. Tasah, lau kameh winiyan basih lokowa iri ja bwai.
REV 18:12 Iri sanuw buku bek nyikilikin, silba, bek man nyikilikin hawe iri bek rayah sowa iri badeh, tinan labai, ma iri kolau belen mwasin labai, iri kolau saraman tariyen solo-an hawe iri kolau sosowan. Ma iri kei tiri solo-an manahun buburen mwasin labai, ma iri lakou rayah ja iri amekes na kasoh tiri elepen, ma lakou rayah ja, sowan laba tinan labai iri mwan ma badih amekes na kei. Iri bras ma hayen, iri bek tariyen mwasin labai; idoh iri lau kameh winiyan basih ja bwai.
REV 18:13 Ma sanuw rayah ja i buku sinamon, lei ta aimon, eh ma ndrelekei ta amekes suluw manahu buburen mwasin ma ta anyas i bada lau. Waen hawe ndrelekei, ndrom plaua ma wit, bulumakau ma sipsip, iri hos ma hawe karis tiri, iri lau bonyo-ou hawe lau awas rayah ja. Iri lakou tiri mara-ei doh badeh, iri lau kameh winiyan basih ja bwai.
REV 18:14 Ya, iri nadu batun nane amekes lakou ta sisih, kameh asehek i tan i buku doh, ‘Iri lakou mara-ei nane sowa iri tinan labai, ou ndrasakalamiy hawe nyasou tam mwasin, iri lakou marakon doh badeh, ndramani madan. Iri mwan ma badih kameh winiyan banyolom iri lakou doh bado badam ja bwai.’
REV 18:15 “Ya, iri lau nadu batun ta amekes ba-en ma ta sisih nane amekes iri lakou doh, ma akohok luk solo-an badu kon tinan doh, iri badeh, anoh labai, tasah sisi-in hawe ndra-in ta kon laba tinan doh kameh akohok iri. Eme ma iri badeh, bales bare mirihik tan bwai. Iri kameh aden ma tikisi iy.
REV 18:16 Iri kameh aden i buku doh, “‘Ahi tikisiy, ahi tikisiy tinan labai, ta kon tinan doh! Tasah sisi-in tinan labai ndrame ndrala la-un. Iy mene anyasou na awin belen hawe kolau saraman tariyen solo-an labai udu aliy, ma iy nyosowani badan mara-ei na bek nyikilikin, bek rayah hawe man sowa iri tinan labai.
REV 18:17 Ma sese luwen bwe, buku bolo awa ari le badeh, iri luk ma nyasou mari ndrandrakak ndrano ndra-au.’ “Ma hawe iri lau tinan ta atondrok iri ndron mara-ei udu bolo ndras, ma iri lau ta sandroh ala ndron are kon rakon ala rakon, ma hawe iri lau nadu batun badu bolo ndras, iri mara-ei doh kameh ales are len labai ta kon tinan Babilon.
REV 18:18 Ya, iri anyolom kasu-er ta jih nane asun iy, iri kameh anyar i buku doh, ‘Ari kon tinan udu kede-eh ja, i buku kon tinan Babilon doh, o bwai?’
REV 18:19 Iri kameh atah koloweh ili batu iri, iri aden, ma iri tikisiy tinan labai. Eme ma iri asehek i buku doh, “‘Ahi tikisiy, ahi tikisiy tinan labai, ta kon tinan doh! Tasah sisi-in tinan labai ndrame ndrala la-un. Tama iri ndron mara-ei ale atas bolo ndras asahan iri nadu batun ta luk, badeh, na le kon tinan nane doh. Ahi tikisiy tinan labai! Tasah, udu bolo awa ari le badeh, iy ndratohou mara-ei ndrano ndra-au!
REV 18:20 Aha lau marakon badu kandrah, hawe iri mwan ma badih ta Kindrei, ma iri aposel hawe iri propet, aha marakon badeh, kasekesek ta lakou nane asahan ta kon tinan doh. Tasah, Kindrei badeh, ndralebelei bundruwe iri lakou tan ndrala. Ma ta kandriyen tan doh, iy edeu bundruwe kandriyen ndra-in mene kon tinan nane doh amekes ewek taha.’”
REV 18:21 Sahou mara-ei ano le badeh, jo anyolom angelo ari boto-on labai, iy andrei bek ari laba tinan, i buku bek laba tinan ta atisih wit. Iy tutuni bek nane doh i loken, ma iy akahei iu ili andri atuh i bolo ndras. Ma iy anya, “Ta kandriyen doh le badeh, iri kameh andrei kon tinan Babilon, ma akahei boto-on labai ili andri, eme ma iri lau kameh winiyan banyolom iy ja bwai.
REV 18:22 Eme ma nyaro iri ndran iri aloh hap, ma nyaro iri ndran bala-eu, ma hawe iri ndran rayah ja hawe ndrah, iri lau kameh winiyan banuhun oro bado hawem ja bwai. Iri lau ale tana iri ta amekes lakou na kei, o hayen, o bek nyikilikin, o lakou mwasin ja, iri lau ta tanan doh winiyan bare hawem ja bwai. Ma nyaro bek laba tinan ta atisih wit, iri lau kameh winiyan banuhun iy bado hawem ja bwai.
REV 18:23 Lomada sun kameh winiyan banya lomadam ja bwai. Sohowa loweu ma bihin anya katasou, iri kameh winiyan banuhun bado bolo kon tinan Babilon ja bwai. Bwena mene iri nadu batun tam ta amekes ba-en ma ta sisih badeh, lahou tiri udu aliy, ma nyara iri badeh, tinan labai ere bolo kon munyak. Ma ou badeh, wendreyani iri mwan ma badih na kandriyen tam ta balahak ma ta lakou solo-an ndra-in, ou a-en hamon ta aliy, ma idoh mene ariu ndrine iri ta a-en hamon tiri kandriyen ndra-in ou amekes.
REV 18:24 Ma Kindrei anyolom kon tinan Babilon doh badeh, maha-an ndra-in labai ta adai iri propet, hawe iri mwan ma badih tan badeh, udu aliy. Ma iri mwan ma badih mara-ei badu kon munyak, ala iri lau ndra-in mene, ndradai iri ndramak badeh, bundruwe iri lakou marakon doh ale udu kon tinan Babilon le.”
REV 19:1 Udu hamon ta lakou nane doh ano, jo anuhun nyaro lakou doh, i buku iri lau solo-an labai asehek sahou boto-on udu bolo kandrah. Boho iri i tinan labai ma iri aloh i buku doh, “Haleluyah! Tasah, Laban Kindrei tataha iy le ari mene andrei taha ame hamon. Nyaran badeh, laba tinan ma iy boto-on labai.
REV 19:2 Ta mada sahou, Kindrei badeh, aleben ma anuhun iri mwan ma badih ta kandriyen tiri handru ma amwenen mara-ei. Iy badih tinan ta karei doh mene, bokoro-ei iri mwan ma badih badu kon munyak, ta kandriyen ta mani Kindrei handru, ma ala atudun iri kindrei ta wasai. Eme ma Kindrei edeu bundruwe iri kandriyen ili hamon i tan. Iy badih doh mene idi iri lohowan ta Kindrei, eme ma Kindrei edeu bundruwe iri lakou doh ili hamon i tan ja.”
REV 19:3 Ano ja, boho iri i tinan labai ma iri aloh i buku doh, “Haleluyah! Tasah, kasu-er ta jih nane sulumwi kon tinan Babilon, idoh ili loken i kandrah, ma ta udu le buku don ai!”
REV 19:4 Ya, oro batun ma lunoh hahuw (24) hawe oro lakou ma mulin ma hahuw badeh, atehei bwili ndru-u oro i andri ma oro atudun Kindrei, iy manyah udu bada koyeu ta kabin. Iri marakon asehek i le rasan i buku doh, “Handru labai! Haleluyah! Taha badeh, katudun Kindrei le ari!”
REV 19:5 Ano, nyaro boho ndramak ari udu loboho bada koyeu ta Kindrei asehek i buku doh, “Aha lohowan ta Kindrei, aha katudun iy, aha hawe iri mwan ma badih nyara iri tinan, ma aha lau nyara aha bwe, ma aha anoh iy. Aha mari badeh, katudun nyara Kindrei le ari!”
REV 19:6 Ano ja, jo anuhun nyaro boho iri lau solo-an labai asehek sahou, i buku nyaro goi laba tinan ma kuruh atohou. Jo anuhun iri asehek sahou i buku doh, “Haleluyah! Iy Laban Kindrei tataha, boto-on marakon udu tan! Nadah iy udu kabin ta atondrok taha handru!
REV 19:7 Nadah badeh, ndrine taha kudu mwasin ma taha kasekesek, ma katudun nyaran! Tasah, len ta tasou ta Nadu Sipsip badeh, ndrasahan. Ya, badih tan badeh, ndranyosowani iy.
REV 19:8 Kindrei atehei awin belen ra-ei i tan, awin doh mwasin handru en, nyikadin labai, ma ha-un mara-ei, iy asiniy ili badan.” Awin belen mwasin doh, i buku kandriyen mwasin, iri lau ta Kindrei amekes.
REV 19:9 Ano angelo eme asehek tek i buku doh, “Ou torowenei ki buku doh: Are lau, iri aloh iri ta ala ta nyamon tinan ta tasou ta Nadu Sipsip, nyosowa Kindrei udu la-u iri ma iri mara-ei badeh, kasekesek!” Angelo eme asehek ja, “Iri sahou dah badeh, sahou handru ta Kindrei.”
REV 19:10 Eme ma jo atehei bwili ndru-uk i andri udu mirihik ta kati angelo, ta anya katudun iy, arile angelo anya, “Ndri-iy, ou samekes! Jo badeh, ta amekes gok ta Kindrei hawem, ma jo ale badu hawe nadu tinem oro, oro ala atehei budon toro ki-in ta sahou handru ta Jises asehek. Ou atehei bwili ndru-um ki andri ma ou atudun Kindrei le ari kabwai. Ya taha tanan sahou mara-ei iy asehek, idoh le badeh, suri ndrine iri lau mara-ei ta asehek iri sahou propet.”
REV 19:11 Ano ja badeh, jo anyolom kandrah asak, ma hos belen udu aliy. Ya, nyara ndramak manyah udu bwele-e hos doh badeh, i buku, “Ndramak atondrok gok tan mara-ei udu mwasin” ma “Ndramak amekes kandriyen mara-ei badeh, ndra handru ma mwasin le ai.” Na len iy aleben ma anuhun sahou tiri mwan ma badih, ma iy ale alokou ta amekes bahun, iy badeh, in hamon le tiri kandriyen mwasin iy amekes.
REV 19:12 Madan badeh, anya i buku jih, ma barak tiri kabin solo-an labai badeh, udu batun. Bwilin badeh, iri torowenei nyara lakou ari udu aliy. Iri mwan ma badih badeh, bala tana iri ta moso nyara lakou doh bwe. Iy le ari amwenen badeh, tanan ai.
REV 19:13 Iy asini awin ari doh, iri lomwaniy na le ndra. Ma iri aloh nyaran badeh, “Sahou ta Kindrei.”
REV 19:14 Iri lau ta bahun mara-ei badu kandrah badeh, manyah ado bwele-e hos belen, ma sakaliye a-en hamon tan. Iri mara-ei badeh, asini awin ndra belen le, se ndraka-an aliy bwe.
REV 19:15 Samen gwak raho doh lawe-en, ma madan labai, iri aloh bainat, badeh, udu boho ndramak nane atas eme len. Samen gwak le doh kameh amondroh bale iri mwan ma badih badu kon munyak tinan mara-ei. “Iy kameh tawi balekei hayen ari udu minen ta atondrok iri mwan ma badih boto-on handru.” Ma iy kameh atisih waen na katin udu bolo kun laba tinan. Idoh leheya losen ndra-in labai ta Kindrei, iy boto-on labai.
REV 19:16 Udu bada awin tan lawe-en, ma bada ndrubulon badeh, iri torowenei nyara lakou ari udu aliy i buku doh,
REV 19:17 Ano ja badeh, jo anyolom angelo ari ales udu bwele-e an. Iy aloh boto-on labai ili tiri sirih mara-ei atah ado bolo asi kandrah, i buku doh, “Aha katukumwi aha mara-ei ka le se, ta nyamon laba tinan ta Kindrei!
REV 19:18 Aha kameh aimon oda iri kabin mene ndramak, oda iri lau batun ta bahun, oda iri lau boto-on labai ta bahun, oda iri hos, ma oda iri lau nane manyah ado bwele-e iri hos. Aha kameh aimon oda iri lau mara-ei; oda iri lau bonyo-ou, ma oda iri lau ado laleyah, ma oda iri lau nadu batun ma hawe iri lau nyara iri bwe.”
REV 19:19 Ano ja, jo anyolom nyabwe munyak hawe iri kabin badu kon munyak, ma iri lau tiri mara-ei ta bahun atukum ala le se ta amekes bahun hawe i ndramak nane sakaliye hos hawe iri lau tan ta bahun.
REV 19:20 Arile, iy ndramak doh tawi nyabwe munyak doh, ma atehei iy udu bolo asiu lulik hawe propet ta wendreya. Iy propet ta wendreya doh mene, amekes iri kalem solo-an ma lahou tinan labai udu mada nyabwe munyak, ma hawe malawin. Ma, na iri kalem solo-an ma lahou tinan doh, iy wendreyani iri lau mene ndrandrei kalem ta nyabwe munyak, hawe atudun malawin. Nyabwe munyak ma hawe propet ta wendreya doh badeh, iri akahei uru ma mulin au ala andri bolo lek ta jih anya na bek solpa, asun uru.
REV 19:21 Iy ndramak nane manyah udu bwele-e hos tan badeh, mwetehei iri lau ta bahun turu mara-ei ano na samen madan labai, iri aloh bainat nane udu bohon eme len. Ma iri sirih mara-ei ame ani oda iri lau nane doh ano mara-ei, ma ndrine iri irek.
REV 20:1 Udu le badeh, jo anyolom angelo ari atah udu kandrah eme andri kon munyak, iy tawi lakou ta aseh kou ta mada munu lek lawe-en labai, ari katin bwe, hawe sen maha-an labai udu minen ale.
REV 20:2 Iy ili badeh, tawi mwak laba tinan banin ere aliy, mwak doh badeh, ndra bwena labai, iy balik o Satan, iy ta edeu lau solo-an labai ala ta mada sahou. Angelo eme badeh, bawei iy na sen nane maha-an labai udu minen. Sen maha-an labai doh kameh udu gwek winiya le jaha ma rawa (1,000) ano.
REV 20:3 Angelo eme akahei iy iu ili andri bolo lek nane lawe-en labai, ari katin bwe, ano iy sulu-i kou tan ihis mara-ei, eme ma iy kameh winiyan bawendreya iri mwan ma badih badu kon munyak ja bwai. Iy kameh udu gwek winiya le jaha ma rawa (1,000) ano. Hamon ta jaha ma rawa ano badeh, idah kameh tolowei iy eme udu len sese, ta edek bolo kon munyak ili eme op.
REV 20:4 Ano ja, jo anyolom koyeu rayah buku tiri kabin, ma iri lau manyah ado aliy. Kindrei ndratehei gok ili tiri ta tunuhun sahou tiri lau. Jo ale anyolom malawi iri lau ndramak bwena. Iri lau mene ndrasani bale iri ma ndradai iri ndramak, tasah iri atiye sahou handru ta Jises mene asehek, ma hawe sahou ta Kindrei. Iri badeh, batehei bwili ndru-u iri bala andri bwe, ma batudun nyabwe munyak hawe malawin bwe. Iri ale bakohok kalem bado bwili iri ma mine iri bwe. Eme ma koha iri mwasin asahan eme hamon ja, ma iri asahan i buku iri kabin ta atondrok kon hawe Krais, udu gwek winiya le jaha ma rawa (1,000) ano.
REV 20:5 (Iri lau rayah ndramak bwena badeh, bakohok koha iri na len doh bwe. Iri kameh atondrok ili winiya jaha ma rawa ano.) Len dah badeh, kameh asahan buku len ta lau amak ame awas ta imek ma bwena.
REV 20:6 Sekesek handru ki tiri lau nane amak ame awas ma bwena! Kandriyen tiri ndra mwasin le. Tasah, iri lau doh ta Kindrei. Imek hamon doh kameh, ari nyamun ta atisih iri lau doh ja bwai. Iri kameh asahan buku iri pris ta Kindrei hawe Krais. Ma iri kameh asahan kabin hawe Krais ta bolo jaha ma rawa (1,000) doh.
REV 20:7 Udu hamon ta jaha ma rawa (1,000) doh ano, iri kameh sihi kou ta mana munu lek nane lawe-en labai, ari katin bwe doh kameh asak. Ma Satan kameh ano ta udu bolo asiu lulik eme len.
REV 20:8 Iy kameh eme len ta wendreya iri lau marakon atalan laleyah ado bolo kon munyak mara-ei. Iri lau badu kon Gok ma Magok. Satan kameh tukumwi iri marakon doh ala le se ta amekes bahun. Kane iri mara-ei ili le se badeh, i buku on mamarin badu bada babi, winiyan bandromwei bwe.
REV 20:9 Iri kameh, adek ala bolo kon munyak mara-ei, ma iri atehei kenyer ta ndrahune iri lau ta Kindrei hawe kon tinan iy aso-ok labai. Arile, jih udu kandrah anya eme andri badeh, sulumwi iri amak ano au.
REV 20:10 Balik badeh, ndrawendreyani iri mwan ma badih doh, eme ma Kindrei akahei iy ma buruwen ales amwenen ili bolo lek laba tinan, ta jih nyarahan labai anya udu ta bek solpa. Nyabwe munyak uru propet ta wendreya badeh, are aliy bwena; eme oro ma taloh kameh akohok sisi-in, ben, len, ben, len ta udu le buku don ai.
REV 20:11 Ano ja, jo anyolom koyeu laba tinan belen ta kabin, ma ndramak ari manyah udu bada koyeu doh. Ma kon munyak hawe kandrah badeh, sakaliye iu ta madan, uru bado ndrahune uru bwena nane ja bwe.
REV 20:12 Ma jo ale anyolom iri lau ndramak bwena on! Iri lau nadu batun, iri lau laleyah tiri lakou bwe, iri lau marakon doh badeh, ales are bwena ta koyeu ta kabin. Iy ndramak manyah udu bada koyeu badeh, tiye iri angelo kasihi iri buk mara-ei. Iri sihi buk ari ale, buk doh badeh, nyara iri mwan ma badih kameh winiyan akohok kohan handru ado hawe Kindrei. Kindrei badeh, anyolom bolo iri buk ma aleben kandriyen marakon tiri lau ndramak, mene amekes.
REV 20:13 Ano, jo anyolom iri lau mene amak bwena badeh, ado bolo ndras hawe iri lau badu kon ta lau mene ndramak ndrasu-u are aliy, iri ari ari ala ales are madan. Ma iri akohok maha-an badeh, in hamon le ta kandriyen, iri amekes.
REV 20:14 Ano, iy ndramak nane manyah udu bada koyeu ta kabin badeh, eme akahei imek hawe kon ta ndrahune lau amak are aliy badeh, ala bolo lek ta jih. Lek ta jih doh badeh, ta imek hamon ja ai.
REV 20:15 Buku are lau nyaran bado bolo buk ta lau winiyan akohok kohan handru doh bwe, Kindrei kameh tiye iri angelo tan, akahei iy ales amwenen iu ili bolo lek laba tinan ta jih.
REV 21:1 Udu hamon ta lakou doh ano badeh, jo anyolom kandrah ma kon munyak ha-un asahan. Kandrah hawe kon munyak malen badeh, amai ndra-au laleyah. Ma gwa ndras ale bado ja bwe.
REV 21:2 Ma jo ale anyolom kon tinan Jerusalem ha-un ndrabun labai asahan. Jo anyolom kon tinan doh udu hawe Kindrei, udu bolo kandrah eme andri, i buku badih ndralokowani iy, ma ndranyosowani iy ta anya kili bahandra mwan tan.
REV 21:3 Jo ale anuhun boho ndramak ari udu bada koyeu ta Kindrei asehek sahou boto-on labai i buku doh, “Nadah, ndrahu manyah ta Kindrei udu hawe lau mwan ma badih! Iy kameh manyah udu hawe iri, ma iri kameh asahan lau tan. Kindrei le amwenen kameh udu hawe iri, ma iy kameh asahan Kindrei tiri.
REV 21:4 Iy kameh owei wa-i mada iri mara-ei iu. Iri mwan ma badih kameh winiyan bamak ja bwai, iri kameh winiyan batikisiy ma baden, o babwese iri maha-an ma sisi-in ja bwai. Iri lakou malen bwena badeh, ndrano mara-ei.”
REV 21:5 Ano ja, iy ndramak nane manyah udu bada koyeu ta kabin tiye i buku doh, “Nadah kameh jo bwidi iri lakou mara-ei asahan ha-un ja.” Iy tiye ale i buku doh, “Ou torowenei sahou doh kili bolo buk. Tasah, sahou doh handru mara-ei, ma iri mwan ma badih winiyan atehei budon tiri handru in hamon ta aliy.”
REV 21:6 Ma iy tiye eme tek, “Iri lakou marakon nane jo anya kamekes badeh, ndrano ai! Jo ma mwena handru, ma jo in ndrobek mara-ei, jo ale badeh, kati iri lakou marakon, ma jo in ndrobek handru ta amekes iri gok mara-ei ano. Buku are lau, balen amar ta gwa, jo kameh edeu gwa i wa-in badu kaloh ta adeu kohan handru winiyan bano bwe, ya iy kameh winiyan bakeh ari luk ta asih gwa doh bwe.
REV 21:7 Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh kameh akohok lakou mara-ei doh badu minek amwenen. Jo kameh asahan Kindrei tiri, ma iri asahan naduk.
REV 21:8 Arile, iri lau nane anoh, ma atobwak ala hamon, ma iri lau batehei budon tiri bala ta Kindrei bwe, ma iri lau amekes kandriyen ndra-in solo-an labai, ma iri lau adai lau rayah amak, iri lau ta amekes kandriyen ta karei, iri lau balahak udu tiri ta bekebek lau amak, iri lau ta atehei bwili ndruu iri i andri i ta sukumada kei, iri lau ta amekes sahou wendreya, ya kon tiri lau mara-ei doh badeh, bolo lek ta jih nyarahan, anya udu ta bek solpa. Imek ari hamon ja dah badeh, ma kabwai.”
REV 21:9 Ano, angelo ari badu hawe oro ma ndro taloh mene, tawi bwekei ma ndro taloh irek na losen ta Kindrei udu aliy, eme hawek asehek i buku doh, “Ou ame ma jo kaleheya ou ta udu Nadu Sipsip, iy badih doh kameh i tasou i tan.”
REV 21:10 Malawin Ndrabun eme bwele-ek, ma angelo bwese-ei jo ma mwasin iu ili bwele-e mandrei ari doh loken labai. Ma iy leheyani jo ta Jerusalem ha-un, kon laba tinan ma ndrabun labai, ta Kindrei udu bolo kandrah eme andri.
REV 21:11 Nyikadi lomada Kindrei badeh, anya ili bwele-e kon tinan nane doh. Lomadan badeh, i randrah labai, i buku bek mwasin, sowan tinan labai. Lomadan i buku bek ari iri aloh jaspa, lewen mara-ei i buku torowe, ou winiyan anyolom udu bilisiu tabasi bilisiu.
REV 21:12 Kon tinan doh badeh, kowah awudiy mara-ei, ma ili loken labai. Ma kou tan ma ronoh la-uh, ya oro angelo ma ronoh la-uh badeh, atondrok oro kou doh. Udu bwele-e oro kou ma ronoh la-uh doh badeh, iri torowenei nyara boho kamen ma ronoh la-uh tiri lau badu Isra-el udu aliy.
REV 21:13 Kowah doh badeh, iri atehei kou taloh, taloh udu kabowen ma hahuw. Iri atehei taloh ili loboho rai, taloh udu loboho kum, taloh udu loboho tolau, ma taloh ja udu loboho jaha.
REV 21:14 Kabowe kon tinan nane doh, bilisiu ma bilisiu iri atudun i bwele-e bek laba tinan. Ya udu bada oro bek nane doh iri torowenei nyara oro aposel ma ronoh la-uh ta Nadu Sipsip ta Kindrei udu aliy.
REV 21:15 Iy angelo nane asehek sahou eme tek badeh, tawi bala kei ari nyikilikin labai, udu minen ta tumundroh tinan ta kon tinan doh, ma kou hawe kowah awudi kon tinan nane doh.
REV 21:16 Kon tinan nane doh, kabowen ma hahuw badeh, i le randra. Lawe-en ma tinan tan mara-ei badeh, ili le randra ale. Angelo tomondrohei na bala kei tan ta tumundroh lakou, ma lawe ta kon tinan amwenen i buku luwa lunek (2,200) kilomita mara-ei. Kabowen ma hahuw hawe bwele-en ta loboho loken badeh, ili le randra.
REV 21:17 Angelo ale tomondrohei kowah mara-ei asahan buku ndro hanoh limeh (65) mita lawe-en ta iu ili loken. Tumundroh doh badeh, in hamon tiri lau ale tumundroh lakou. Angelo tumundroh kowah badeh, in hamon ta san ari le nane doh.
REV 21:18 Kowah ta kon tinan nane doh, iri amekes na bek jaspa, ya kon tinan mara-ei, iri amekes na bek nyikilikin, lewen mara-ei i buku torowe.
REV 21:19 Mwe-e ndru ta kon tinan doh badeh, ma ronoh la-uh, ma Kindrei nyosowani mwe-e ndru ari ari doh na iri bek, randrah, randrah sowa iri laba tinan labai. Mwe-e ndru ma bwena badeh, iy nyosowaniy na bek jaspa, ano bek sapaya iy nyosowani mwe-e ndru la-uh na aliy, bek aget iy nyosowani mwe-e ndru taloh na aliy, ano bek emeral iy nyosowani mwe-e ndru hahuw na aliy.
REV 21:20 Bek sadonikis badeh, sowan laba tinan labai, iy nyosowani mwe-e ndru limeh na aliy. Tariyen badeh, saraman hawe belen. Ano bek ari ja, koniliyen tariyen saraman, iy nyosowani mwe-e ndru onoh na aliy, iy atehei bek krisolait tariyen nyokowan udu bada mwe-e ndru ndro taloh, bek beril tariyen nyorowan, iy nyosowani mwe-e ndru ndru la-uh na aliy. Ano iy atehei bek topas, tariyen nyokowan udu bada mwe-e ndru ndro ari. Iy atehei bek krisopres udu bada mwe-e ndru ronoh. Bek hayasin badeh, iy atehei udu bada mwe-e ndru ronoh ari. Ano badeh, iy nyosowani mwe-e ndru ronoh la-uh na bek ametis, tariyen saraman.
REV 21:21 Ya, madasan ma ronoh la-uh badeh, Kindrei amekes na bek man ma ronoh la-uh. Kou ari, ari, iy amekes na laba bek man ari, ari. San mara-ei badu bolo kon tinan doh badeh, iy amekes na bek nyikilikin, lewen mara-ei i buku torowe.
REV 21:22 Jo badeh, banyolom asiu tinan ta Kindrei bado bolo kon tinan doh bwe, tasah Kindrei badeh, iy boto-on labai, hawe Nadu Sipsip tan, uru ma la-uh badeh, i buku asiu tinan tan.
REV 21:23 Udu bolo kon tinan nane doh, an ma bun badeh, banya bwe, tasah lomada Kindrei le ari anya ili bwele-en. Ya, Nadu Sipsip badeh, anya i nyara sun ta aliy.
REV 21:24 Iri lau marakon badu kon munyak tinan kameh adek ta lomada sun doh, ma iri kabin mara-ei badu kon munyak kameh, atiye iri nyasou tiri mari mwasin eme le ta lomada sun doh.
REV 21:25 Kou mari ta kon tinan doh kameh asak ta udu le buku doh, winiyan bahis bwe, tasah ben kameh winiyan basahan ja bwe.
REV 21:26 Iri nyasou hawe luk tiri lau badu kon munyak tinan mara-ei kameh, iri tiyaniy ili le bolo kon tinan nane doh.
REV 21:27 Arile, iri lakou ndraka-an, hawe iri lau ta amekes kandriyen ndra-in, iri lau ta karei, ma iri lau ta amekes sahou wasai, iri mara-ei doh kameh winiyan bala bolo kon tinan doh bwe. Iri lau le nyara iri udu bolo buk ta Nadu Sipsip, iri le lau doh kameh akohok kohan handru ma winiyan ala bolo kon tinan don ai.
REV 22:1 Angelo nane leheya jo ale ta gwa ari doh, kohan handru udu aliy, ta adeu ili wa-i iri lau. Lewen mara-ei, i buku torowe. Bare gwa doh badeh, udu loboho bada koyeu ta Kindrei uru Nadu Sipsip tan, arorou eme len.
REV 22:2 Ma gwa doh badeh, arorou amwenen lawe-e le bolo san ta kon tinan nane doh. Udu kapa gwa bilisiu ma bilisiu badeh, iri kei ta adeu kohan handru ili tiri lau, ateh udu aliy. Iri kei doh, ato-ou sali iri badeh, san ma ronoh la-uh udu bolo jaha ari, ma san rasan ta bolo bun ari, ari. La-u iri badeh, ta amekes iri mwan ma badih badu kon munyak tinan mara-ei amwenen.
REV 22:3 Ya, iri lakou marakon Kindrei anya kakeh ki-iu, kameh winiyan bado bolo kon tinan doh ja bwai. Kindrei kameh akahei marakon iu. Kindrei hawe Nadu Sipsip tan kameh ado bolo kon tinan doh, ma atondrok iri mwan ma badih nane are aliy. Ma iri lohowan ta Kindrei kameh, amekes lahou tan ma atudun iy are aliy.
REV 22:4 Ma iri winiyan anyolom madan, ma iy kameh torowenei nyaran udu bwili iri.
REV 22:5 Ben kameh winiyan basahan ja bwai, ma iri kameh winiyan batelem sun ta lomada iri o lomada an anya na len ja bwai, tasah Laban Kindrei le ari kameh asahan sun ta lomada iri, ma iri kameh asahan kabin ta atondrok lakou marakon hawe Kindrei ta ere le buku don ai.
REV 22:6 Ano angelo asehek eme tek ja i buku doh, “Iri sahou marakon ou ndranuhun ma ndratou ta iri lakou doh badeh, ndra handru le ai, ma iri kameh asahan. Ma iri mwan ma badih kameh winiyan atehei budon tiri handru in ta aliy. Ma Laban Kindrei badeh, ta atadau malawin mwasin tiri propet, ta atiye sahou tan. Ya, iy don adeh, ndrasuni angelo tan ari eme leheya iri lohowan tan ta saba lakou kameh mirihik asahan.”
REV 22:7 Jises anya, “Aha kanuhun! Se nawin bwe kameh, jo asahan hawe aha. Buku are mwan o badih, iy in hamon handru ta sahou propet ta Kindrei udu bolo buk dah, badeh, nyosowan ta Kindrei udu la-un ma iy winiyan sekesek handru!”
REV 22:8 Jo Jon, jo amwenen anuhun ma anyolom iri lakou marakon doh. Jo anuhun iri lakou doh ano le badeh, jo eme atehei bwili ndru-uk i andri ili ta angelo nane leheya iri lakou eme tek, ma jo anya katudun iy.
REV 22:9 Arile, iy anya, “Ndri-iy, ou samekes! Jo Kindrei bwe! Jo ale amekes gok i buku le ou, ma hawe nadu tinem oro, iri propet, ma hawe iri lau anuhun sahou badu bolo buk dah ma a-en hamon ta aliy. Aha marakon katudun Kindrei le ari!”
REV 22:10 Ma iy asehek eme tek ja i buku doh, “Ou satone iri sahou ta Kindrei badu bolo buk dah, tasah len ndrame mirihik ai, ta iri lakou marakon doh, kameh asahan.
REV 22:11 Eme ma, buku are mwan o badih ale ta amekes kandriyen ndra-in, iri badeh, kamekes kili le ai, ma buku are ale ta amekes kandriyen abola labai, mwasin ta iy saruwaniy, iy kamekes kili le. Ya, buku iri mwan ma badih ta amekes kandriyen mwasin labai, iri kamekes kili le ai. Ya, iri mwan ma badih, Kindrei ndratehei kalem ndrala tiri ta ado ndrabun, iri badeh, saruwaniy, iri kabadok.”
REV 22:12 Eme Jises anya, “Aha marakon kanuhun! Jo kameh asahan nawin bwe. Jo kameh andrei iri ndramas ewek, ta adeu ewek taha mwan ma badih. Jo kameh edeu saluwe ndramas ili tiri mwan ma badih ari, ari ta bundruwe kandriyen iri mene amekes.
REV 22:13 Jo le ari badeh, asahan mwena handru, ta iri lakou marakon, jo kameh udu le kahis, buku iri lakou marakon ano. Ya, jo ma bwena handru, ma jo in ndrobek mara-ei. Jo ale badeh, kati iri lakou marakon ta asahan, ma jo in hamon ndrobek badeh, ta amekes gok mara-ei ano.
REV 22:14 “Iri mwan ma badih ale sikine awin tiri asahan belen mara-ei, badeh, nyosowan ta Kindrei udu la-u iri, ma iri winiyan sekesek handru, ma iri kameh winiyan aimon buwa kei, badu ta kei kohan handru udu aliy, ma iri ale winiyan adek ala madasan ta ili bolo kon tinan.
REV 22:15 Arile, iri lau ta amekes kandriyen ndra-in labai i buku iri mwi amekes, iri ta amekes balahak, iri ta amekes karei, iri ta adai lau amak, iri ta atehei bwili ndru-u iri i andri ili ta kindrei ta wendreya, ma iri mwan ma badih ale aso-ok kandriyen ta wasai, ma a-en hamon ta aliy; iri lau marakon doh kameh are ndra manan ta kon tinan nane, iri winiyan bala bolo kon tinan ta Kindrei doh bwe.
REV 22:16 “Jo Jises, jo mene tiye angelo tek amwenen ewek bolo aha ta asehek nyala iri lakou marakon doh i taha lau ta Kindrei. Jo badeh, i buku nyabun asahan boho kamen ta Debit. Ya, lomadak badeh, anya i buku lomada ndrau ta boho len.”
REV 22:17 Malawin Ndrabun hawe udu Nadu Sipsip anya, “Ou ame.” Eme ma iri lau marakon anuhun boho uru, iri ale kasehek sahou anya, “Ou ame.” Buku ou are mwan o badih, balem amar ta gwa kohan handru udu aliy, ou ame akohok wa-im gwa ta edeu kohan handru, na so-ok tam, i buku ndramas Kindrei edeu laleyah.
REV 22:18 Jo Jon, jo batanau aha mwan ma badih marakon, anuhun sahou propet ta Kindrei udu bolo buk dah. I buku ou are mwan o badih, amekes sahou na le budon tam amwenen ili bolo iri sahou dah, ya iri lakou ndra-in handru nane, Kindrei asehek ta aliy udu bolo buk dah, Kindrei kameh edeu ili bwele-e iri mwan o badih nane amekes sahou ta balen le amwenen.
REV 22:19 Ma, i buku are ale bahana sahou propet badu bolo buk dah iu, Kindrei ale, kameh andrei iri lakou mwasin nane, iy ndraleheyaniy ndrala tan, badu ta buwa kei kohan handru udu aliy, badu kon tinan ndrabun labai, ma iri asehek badu bolo buk dah, marakon doh kameh iu.
REV 22:20 Iy lau doh asehek sahou ta nyala iri lakou marakon nane anya, “Ehe, jo kameh ewek, nawin bwe!” Handru! Laban Jises, ou ame!
REV 22:21 Tikisiy ta Laban Jises kudu hawe aha lau marakon ta Kindrei, kudu le buku don ai. Handru.
