﻿ลืลาว.
101.
โอ พะจาว, อาึ ฆวต เชีย นึง ไลลวง รพาวม ฮรัก ตอน ฮมัน ยุฮ เปอะ ไม่ ไลลวง กัน รเตีฮ ซืไซ ยุฮ เปอะ. อาึ ซ ทไว รซอม เชีย ละ เปอะ. 
อาึ ซ เพรียง ติ แตะ ละ ซ เกือฮ ป ยุฮ ป อัฮ แตะ แปน ป ปุก ป ลอก. เญือม เมอ ซ ฮอยจ เปอะ เคะ อาึ อื? อาึ ซ อาวต นึง เญือะ โกะ แตะ ไม่ จีวิต ซง่ะ ซงอม แตะ. 
อาึ ซ อาึง โตว โอเอีฮ ฆอก ไล ซองนา ซองตา แตะ ติ เจือ เนอึม. อาึ เกละยุ กัน ยุฮ ปุย ป แพก ฮา คระ ยุฮ พะจาว. อาึ ญอม โตว รไม่ รม่าึก ไม่ กัน ตอก เซ เฟือฮ เอิน. 
อาึ ซ เกือฮ ติ แตะ ซไง ฮา กัน บ่วก กัน โจวง. ซ เกือฮ โตว ติ แตะ เกว ไม่ กัน ฆอก กัน เบร. 
ดัฮ ไก ป บระ บรุ เพือ ปุ ย่วง แตะ ละ ซ เกือฮ อื ไลจ เจอ อาึ ซ ยุฮ โรฮ ไลจ ไม่ ปุย เซ. โม ป อวต ลอน ติ แตะ ไม่ ป เกียฮ ฮุน อาึ ซ ญอม โตว เกือฮ อาวต ไม่ แตะ. 
โม ป เนอึม รพาวม นึง เมือง อาวต เตอะ อาึ ซ ยวก เกอะ เกือฮ อาวต นึง เญือะ โกะ แตะ. ปุย ดัฮ ซืไซ นึง กัน ยุฮ แตะ อาึ ซ เกือฮ โฮลฮ ยุฮ กัน ละ แตะ. 
โม ป จุ ปุย ไลจ อาึ ซ เกือฮ โตว อาวต นึง เญือะ แตะ. โม ป ไล โกะ ไล เอียง ซ เกือฮ โตว อาวต ไม่ แตะ ติ ตื เนอึม. 
อาึ ซ ยุฮ ไลจ ไม่ โม ป ฆอก ป เบร นึง เมือง แตะ โครยญ ซเง่ะ. อาึ ซ โครฮ ปุยไฮะ ปุยฮอน โอก ฮา เวียง ยุฮ พะจาว เตือง โอยจ อื. 
