GEN 1:1 सुरूवात म परमेश्वर न स्वर्ग अऊर धरती ख बनायो।
GEN 1:2 अऊर धरती बिना आकार कि होती, अऊर धरती पर कुछ भी नहीं होतो, अऊर गहरो पानी को ऊपर अन्धियारो होतो; अऊर परमेश्वर की आत्मा पानी को ऊपर मण्डरावत होतो।
GEN 1:3 जब परमेश्वर न आज्ञा दियो, “उजाड़ो हो” अऊर उजाड़ो भय गयो।
GEN 1:4 अऊर परमेश्वर न उजाड़ो ख देख्यो, अऊर ऊ जान गयो कि यो अच्छो हय। तब परमेश्वर न उजाड़ो ख अन्धारो सी अलग कर दियो।
GEN 1:5 तब परमेश्वर न उजाड़ो को नाम “दिन” अऊर अन्धारो को नाम “रात” रख्यो। तब शाम भयी अऊर तब सुबेरे भयी। तब यो पहिलो दिन भय गयो।
GEN 1:6 तब परमेश्वर न कह्यो, “पानी को बीच एक असो अन्तर हो कि पानी दोय भाग होय जाये।”
GEN 1:7 तब परमेश्वर न एक अन्तर कर क् ओको खल्लो को पानी अऊर ओको ऊपर को पानी ख अलग अलग करयो; अऊर वसोच भय गयो।
GEN 1:8 अऊर परमेश्वर न ऊ अन्तर ख “आसमान” कह्यो। फिर शाम भयी तब सुबेरे भयी। यो तरह दूसरों दिन भय गयो।
GEN 1:9 तब परमेश्वर न आज्ञा दियो, “आसमान को खल्लो को पानी एक जागा म जमा हो जाये अऊर सूखी जमीन दिखायी दे” अऊर वसोच भय गयो।
GEN 1:10 परमेश्वर न सूखी जमीन को नाम “धरती” रख्यो अऊर जो पानी जमा भयो होतो, ओख “समुन्दर” नाम दियो। अऊर परमेश्वर न देख्यो कि यो अच्छो हय।
GEN 1:11 तब परमेश्वर न कह्यो, “धरती सी हरी घास, अऊर बीज वालो छोटो छोटो झाड़, अऊर फर वालो झाड़ भी जिन्को बीज उन्कोच म एक एक की जाति को अनुसार हंय, अऊर धरती पर उगें,” अऊर वसोच भय गयो।
GEN 1:12 यो तरह धरती सी हरी घास, अऊर छोटो छोटो झाड़ जिन्म अपनी अपनी जाति को अनुसार बीज होवय हय, अऊर फर वालो झाड़ जिन्को बीज एक एक की जाति को अनुसार उन्कोच म होवय हंय ऊ उगें: अऊर परमेश्वर न देख्यो कि यो अच्छो हय।
GEN 1:13 फिर शाम भयी फिर सुबेरे भयी। यो तरह तीसरो दिन भय गयो।
GEN 1:14 तब परमेश्वर न आज्ञा दियो, “रात ख दिन सी अलग करन लायी आसमान को अन्तर म ज्योतियां हो; अऊर हि चिन्हों, अऊर ठहरायो हुयो समयों अऊर दिनों, अऊर सालों को चिन्ह हो;
GEN 1:15 अऊर हि धरती ख उजाड़ो देन लायी आसमान म चमकेंन” अऊर वसोच भयो।
GEN 1:16 तब परमेश्वर न दोय बड़ो उजाड़ो बनायो; सूरज न दिन पर शासन करन लायी अऊर चन्दा न रात पर शासन करन लायी; अऊर उन्न तारागन भी बनायो।
GEN 1:17 परमेश्वर न उन्ख आसमान को अन्तर म येकोलायी रख्यो कि हि धरती पर उजाड़ो दे,
GEN 1:18 दिन अऊर रात पर शासन करन लायी, अऊर अन्धारो सी उजाड़ो ख अलग करन लायी। अऊर जो कुछ परमेश्वर न देख्यो कि हि अच्छो हंय।
GEN 1:19 तब शाम भयी अऊर सुबेरे भयी। यो तरह चौथो दिन भय गयो।
GEN 1:20 तब परमेश्वर न आज्ञा दियो, “पानी जीन्दो प्रानियों सी भरयो रहे, अऊर पक्षी धरती को ऊपर आसमान को ऊपर उड़े, हवा ख पक्षियों सी भरन दे।”
GEN 1:21 येकोलायी परमेश्वर न जाति जाति को बड़ो बड़ो पानी को जीव जन्तुवों, अऊर उन सब जीन्दो प्रानियों की भी रचना करी जो चलतो फिरतो हंय जिन सी पानी बहुतच भर गयो, अऊर एक एक जाति को उड़न वालो पक्षियों की भी रचना करी : अऊर परमेश्वर न देख्यो कि यो अच्छो हंय।
GEN 1:22 अऊर परमेश्वर न उन्ख यो कह्य क आशीर्वाद दियो, “फलो फूलो, अऊर समुन्दर को पानी म भर जावो, अऊर उन्न पक्षियों ख संख्या म बढ़न लायी कह्यो।”
GEN 1:23 तब शाम भयी अऊर सुबेरे भय गयी। यो तरह पाचवों दिन भय गयो।
GEN 1:24 तब परमेश्वर न आज्ञा दियो, “धरती म सी एक एक जाति को जीन्दो प्रानी, यानेकि घरेलू जनावर, अऊर रेंगन वालो जन्तु, अऊर धरती को जंगली जनावर, जाति जाति को अनुसार पैदा हो,” अऊर वसोच भय गयो।
GEN 1:25 यो तरह परमेश्वर न धरती को जाति जाति को जंगली जनावरों ख, अऊर जाति जाति को पालतु जनावरों ख, अऊर जाति जाति को जमीन पर सब रेंगन वालो जन्तुवों ख बनायो : अऊर परमेश्वर न देख्यो कि यो अच्छो हय।
GEN 1:26 तब परमेश्वर न कह्यो, “हम आदमी ख अपनो स्वरूप को अनुसार अपनी समानता म बनायो; अऊर हि समुन्दर की मच्छी, अऊर पालतु जनावरों, अऊर पूरी धरती पर, अऊर सब रेंगन वालो जन्तुवों पर जो धरती पर रेंगय हंय, उन बड़ो छोटो पर अधिकार रखे।”
GEN 1:27 तब परमेश्वर न आदमी ख अपनो स्वरूप को अनुसार पैदा करयो, अऊर अपनोच स्वरूप को अनुसार परमेश्वर न ओख पैदा करयो; अऊर नर अऊर नारी कर क् ओन आदमियों की रचना करी।
GEN 1:28 अऊर परमेश्वर न उन्ख आशीर्वाद दियो, अऊर उन्को सी कह्यो, “फूलो फलो, अऊर धरती म भर जावो, अऊर ओख अपनो बस म कर लेवो; अऊर समुन्दर की मच्छी, तथा आसमान की पक्षियों, अऊर धरती पर रेंगन वालो सब जन्तुवों पर अधिकार रखो।”
GEN 1:29 तब परमेश्वर न उन्को सी कह्यो, “सुनो, जितनो बीज वालो छोटो छोटो झाड़ पूरी धरती को ऊपर हंय अऊर जितनो झाड़ म बीज वालो फर होवय हंय, हि सब मय न तुम ख दियो हंय; हि तुम्हरो खान लायी आय।
GEN 1:30 अऊर जितनो धरती को जनावर, अऊर आसमान को पक्षी, अऊर धरती पर रेंगन वालो जन्तु हंय, जिन्म जीवन को जीव हय, उन सब ख खान लायी मय न सब हरो हरो छोटो झाड़ दियो हंय,” अऊर वसोच भय गयो।
GEN 1:31 तब परमेश्वर न जो कुछ बनायो होतो सब ख देख्यो, त का देख्यो, कि ऊ बहुतच अच्छो हय। तथा शाम भयी फिर सुबेरे भयी। यो तरह छठवो दिन भय गयो।
GEN 2:1 यो तरह आसमान अऊर धरती अऊर जो कुछ उन्म हय, इन सब की रचना पूरी भयी।
GEN 2:2 अऊर परमेश्वर न अपनो काम जेक ऊ करत होतो सातवों दिन ओन खतम करयो, अऊर ओन अपनो करयो हुयो पूरो काम सी सातवों दिन आराम करयो।
GEN 2:3 अऊर परमेश्वर न सातवों दिन ख आशीर्वाद दियो अऊर पवित्र ठहरायो; कहालीकि ओको म ओन जगत की रचना कर क् अपनो पूरो काम सी आराम करयो होतो।
GEN 2:4 आसमान अऊर धरती की उत्पत्ति को वर्नन यो हय कि जब हि पैदा भयो मतलब जो दिन यहोवा परमेश्वर न धरती अऊर आसमान ख बनायो :
GEN 2:5 पर ऊ समय धरती पर कोयी पौधा नहीं होतो अऊर नहीं जमीन की कोयी बीज अंकुरित भयी होती; कहालीकि प्रभु परमेश्वर न धरती पर पानी नहीं बरसायो होतो, अऊर जमीन पर खेती करन लायी आदमी भी नहीं होतो।
GEN 2:6 ओस धरती सी ऊपर उठत होतो, जेको सी पूरी जमीन सिंची जात होती।
GEN 2:7 तब प्रभु परमेश्वर न जमीन सी माटी निकाली अऊर ओको म सी आदमी ख बनायो; अऊर ओन अपनी नासिका सी जीवन की श्वास फूक्यो अऊर आदमी एक जीन्दो प्रानी बन गयो।
GEN 2:8 अऊर प्रभु परमेश्वर न पूर्व दिशा म अदन म एक बगीचा लगायो, अऊर उत ओन ऊ आदमी ख रख्यो जो ओन बनायो होतो।
GEN 2:9 अऊर यहोवा परमेश्वर न जमीन सी सब तरह को झाड़, जो देखनो म सुन्दर अऊर जिन्को फर खानो म अच्छो हंय, जमीन सी जगायो, अऊर बगीचा को बीच म जीवन को झाड़ ख अऊर भलो या बुरो ज्ञान को झाड़ ख भी लगायो।
GEN 2:10 ऊ बगीचा ख सींचन लायी एक महा नदी अदन सी निकली अऊर उत सी बह क चार नदियों म बट गयी।
GEN 2:11 पहिली नदी को नाम पीशोन हय; या वाच नदी आय जो हवीला देश को चारों तरफ बह हय, जित सोनो मिलय हय।
GEN 2:12 ऊ देश को सोनो शुद्ध होवय हय; उत मोती अऊर सुलैमानी गोटा भी मिलय हंय।
GEN 2:13 दूसरी नदी को नाम गीहोन हय; या वाच नदी आय जो कूश देश को चारों तरफ बह हय।
GEN 2:14 अऊर तीसरी नदी को नाम हिद्देकेल हय; या वाच आय जो अश्शूर देश की पूर्व दिशा म बहय हय। अऊर चौथी नदी को नाम फरात हय।
GEN 2:15 तब प्रभु परमेश्वर न आदमी ख ले क अदन को बगीचा म रख दियो, कि ऊ ओको म काम करे अऊर ओकी रक्षा करे।
GEN 2:16 अऊर प्रभु परमेश्वर न आदमी ख आज्ञा दी, “तुम बगीचा को सब झाड़ को फर बिना झीझक खाय सकय हय;
GEN 2:17 पर भलो या बुरो को ज्ञान को जो झाड़ हय, ओको फर तुम कभी मत खाजो : कहालीकि जो दिन तुम ओको फर खावो उच दिन जरूर मर जाजो।”
GEN 2:18 तब प्रभु परमेश्वर न कह्यो, “आदमी को अकेलो रहनो अच्छो नहीं; मय ओकी मदद लायी एक असो संगी बनाऊं जो ओको सी मेल खाये।”
GEN 2:19 येकोलायी प्रभु परमेश्वर जमीन सी कुछ माटी ली अऊर पूरो जनावरों अऊर आसमान को सब पक्षियों ख रच क आदमी को जवर आयो कि ऊ उन्को का का नाम रखेंन; अऊर जो जो जीन्दो प्रानी को जो जो नाम आदम न रख्यो उच ओको नाम होयेंन।
GEN 2:20 त ऊ आदमी न सब जाति को पालतु जनावरों, अऊर आसमान को पक्षियों, अऊर सब जाति को जंगली जनावरों को नाम रख्यो; पर आदमी लायी कोयी असो मदद करन लायी नहीं मिल्यो जो ओको सी मेल खाय सके।
GEN 2:21 तब प्रभु परमेश्वर न आदम ख गहरी नींद म डाल दियो, अऊर जब ऊ सोय गयो, ओन आदम की एक फसली निकाली अऊर मांस ख भर दियो।
GEN 2:22 अऊर प्रभु परमेश्वर न ऊ फसली ख जो ओन आदमी म सी निकाली होती, ओन एक बाई बनायी; अऊर ओख आदम को जवर लायो।
GEN 2:23 तब ऊ आदम न कह्यो, “अब यो मोरी हड्डियों म की हड्डी अऊर मोरो मांस म को मांस हय; येकोलायी येको नाम ‘बाई’ होयेंन, कहालीकि ओख आदम म सी बाहेर निकाली गयी हय।”
GEN 2:24 योच वजह हय कि आदमी अपनो माय बाप ख छोड़ क अपनी पत्नी सी मिल्यो रहेंन, अऊर हि एक जुट बन्यो रहेंन।
GEN 2:25 आदम अऊर ओकी पत्नी दोयी नंगा होतो, पर हि लज्जित नहीं होतो।
GEN 3:1 उन सब जंगली प्रानियों म जिन्ख प्रभु परमेश्वर न बनायो होतो, उन सब म सांप चालाक होतो। ओन बाई सी कह्यो, “का सचमुच परमेश्वर न कह्यो हय, तुम यो बगीचा को कोयी झाड़ को फर नहीं खावो?”
GEN 3:2 बाई न सांप ख उत्तर दियो, “हम यो बगीचा को झाड़ को फर खाय सकजे हंय;”
GEN 3:3 पर परमेश्वर न हमरो सी कह्यो, “बगीचा को बीच म लग्यो हुयो झाड़ को फर मत खावो, अऊर नहीं ओख छूवो, नहीं त तुम मर जावो।”
GEN 3:4 तब सांप न बाई सी कह्यो, “यो सच नोहोय; तुम कभी नहीं मरो!
GEN 3:5 बल्की परमेश्वर खुद जानय हय कि जो दिन तुम ओको फर खावो उच दिन तुम्हरी आंखी खुल जायेंन, अऊर तुम भलो बुरो को ज्ञान पा क परमेश्वर को जसो बन जावो।”
GEN 3:6 जब बाई न देख्यो कि झाड़ कितनो सुन्दर होतो अऊर ओको फर खानो म कितनो अच्छो होयेंन, अऊर ओन सोच्यो कि बुद्धिमान बनन लायी यो कितनो लायक होयेंन। येकोलायी ओन कुछ फर ले लियो अऊर खाय लियो अऊर अपनो पति ख भी दियो, अऊर ओन ओख भी खायो।
GEN 3:7 तब उन दोयी की आंखी खुल गयी, अऊर उन्ख मालूम भयो कि हि नंगा हय; येकोलायी उन्न अंजीर को पत्ता ख एक संग सिल दियो अऊर खुद ख झाक लियो।
GEN 3:8 जब शाम ख उन्न प्रभु परमेश्वर ख बगीचा म घुमतो हुयो सुन्यो, तब आदमी अऊर ओकी पत्नी बगीचा को झाड़ को बीच म प्रभु परमेश्वर सी लूक गयो।
GEN 3:9 पर प्रभु परमेश्वर न आदम ख पुकारयो, “तुम कित हय?”
GEN 3:10 ओन उत्तर दियो, “मय न तुम ख बगीचा म घुमतो हुयो सुन्यो; मय डर गयो, अऊर तोरो सी लूक गयो, कहालीकि मय नंगा होतो।”
GEN 3:11 प्रभु परमेश्वर न पुच्छ्यो, “कौन न तोरो सी कह्यो कि तय नंगा हय? का तय न ऊ झाड़ को फर खायो हय, जेक मय न खान लायी नहीं कह्यो होतो?”
GEN 3:12 आदम न उत्तर दियो, “जो बाई तुम न मोरो संग रहन लायी दियो हय, ओन ऊ झाड़ को फर मोख दियो, अऊर मय न खाय लियो।”
GEN 3:13 प्रभु परमेश्वर न बाई सी पुच्छ्यो, “यो तुम न असो कहाली करयो?” बाई न उत्तर दियो, “सांप न मोख बहकाय दियो अऊर मय न फर खाय लियो।”
GEN 3:14 तब प्रभु परमेश्वर न सांप सी कह्यो, “तुम न जो यो करयो हय येकोलायी तुम सब पालतु जनावरों अऊर सब जंगली जनावरों सी ज्यादा श्रापित हय; अब सी तुम पेट को बल चलजो, अऊर जब तक जीन्दो रहो तब तक तुम्ख धूल चाटनो पड़ेंन
GEN 3:15 अऊर मय तोरो अऊर बाई को बीच म, अऊर तोरो वंश अऊर येको वंश को बीच म घृना पैदा करूं; अऊर ओको वंश तुम्हरी मुंड ख कुचल देयेंन, अऊर तुम ओकी एड़ी ख डसो।”
GEN 3:16 प्रभु परमेश्वर न बाई सी कह्यो, “मय तोरी पीड़ा अऊर तोरो गर्भवती होन को दु:ख ख बहुत बढ़ाऊं; अऊर तय पीड़ित होय क बच्चा पैदा करजो; अऊर तोरी इच्छाये तोरो पति को तरफ होयेंन, अऊर ऊ तोरो पर शासन करेंन।”
GEN 3:17 प्रभु परमेश्वर न आदम सी कह्यो, “तय न अपनी पत्नी की बात सुनी, अऊर ऊ झाड़ को फर खायो जेको बारे म मय न तोख आज्ञा दी होती कि तय ओको फर नहीं खाजो, ओख तय न खायो हय येकोलायी जमीन तोरो वजह श्रापित हय। तय ओकी फसल खान लायी तोख जीवन भर कठोर परिश्रम करनो पड़ेंन।
GEN 3:18 अऊर ऊ तोरो लायी काटा अऊर ऊंटकटारे उगायेंन, अऊर तोख जंगली पौधा ख खानो पड़ेंन।
GEN 3:19 अऊर अपनो मस्तक को पसीना की रोटी खायो करजो, अऊर आखरी म माटी म मिल जाजो कहालीकि तय ओकोच म सी निकाल्यो गयो हय; तय माटी त आय अऊर माटी मच फिर मिल जाजो।”
GEN 3:20 आदम न अपनी पत्नी को नाम हवा रख्यो; कहालीकि वा पूरो आदमियों की माय बनी।
GEN 3:21 अऊर प्रभु परमेश्वर न आदम अऊर ओकी पत्नी लायी जनावरों की खाल सी कपड़ा बनायो, अऊर ओन ओख कपड़ा पहिनायो।
GEN 3:22 तब प्रभु परमेश्वर न कह्यो, “अब हि आदमी भलो अऊर बुरो ख जान क हम म सी एक को जसो भय गयो हंय, अब कहीं असो नहीं होय कि ऊ हाथ बढ़ाय क जीवन को झाड़ को फर तोड़ ले, अऊर ओख खाय क अमर होय जाये।”
GEN 3:23 येकोलायी प्रभु परमेश्वर न आदमी ख अदन को बगीचा म सी निकाल दियो कि ऊ वा जमीन पर खेती करे, जेको म सी आदमी ख बनायो गयो होतो।
GEN 3:24 ओन आदम ख निकाल दियो, ओन जीवन को झाड़ को तरफ जान वालो रस्ता की देखभाल करन लायी अदन को बगीचा की पूर्व दिशा म करूबों अऊर जीन्दो प्रानियों अऊर एक धधकती तलवार ख नियुक्त करयो।
GEN 4:1 जब आदम अपनी पत्नी हवा को जवर गयो तब वा गर्भवती भयी तब ओन कैन ख जनम दियो अऊर कह्यो, “प्रभु की मदत सी मय न एक बेटा पा लियो हय।”
GEN 4:2 तब बाद म हवा न अऊर एक बेटा, हाबिल ख जनम दियो। तब हाबिल मेंढावों को चरवाहा बन गयो, लेकिन कैन खेती करन वालो किसान होतो।
GEN 4:3 कुछ दिनों बाद कैन अपनी फसल ले क आयो अऊर ओख प्रभु ख भेंट को रूप म दियो।
GEN 4:4 तब हाबिल न अपनी शेरी अऊर मेंढी म सी कुछ एक ख जो पैदा हुयो पहिलो मेंढी को बच्चा चर्बी युक्त भेंट चढ़ायी; तब प्रभु न हाबिल अऊर ओकी भेंट सी प्रसन्न भयो,
GEN 4:5 लेकिन ओन कैन अऊर ओकी भेंट ख अस्वीकार कर दियो। येकोलायी कैन बहुत गुस्सा भयो, अऊर ओको मुंह पर उदासी छाय गयी।
GEN 4:6 तब प्रभु न कैन सी कह्यो, “तय कहाली गुस्सा होय रह्यो हय? अऊर तोरो मुंह पर उदासी कहाली छायी हुयी हय?”
GEN 4:7 यदि तय न सही काम करयो रह्यतो, त का म तोख ग्रहन नहीं करतो; किन्तु यदि तय भलायी नहीं करजो त देख; तोरो दरवाजा पर पाप खड़ो हय, अऊर यो तोरो पर शासन करनो चाहवय हय, लेकिन तोख येख दूर करनो पड़ेंन।
GEN 4:8 तब कैन न हाबिल सी कह्यो, “आवो हम खेत ख निकलजे हंय।” जब हि खेत को बाहेर होतो, त कैन न अपनो भाऊ हाबिल पर चढ़ क ओख मार डाल्यो।
GEN 4:9 प्रभु न कैन सी कह्यो, “तोरो भाऊ हाबिल कित हय?” ओन उत्तर दियो, “मोख नहीं मालूम। त कैन न कह्यो का मय अपनो भाऊ को रखवाली करन वालो आय?”
GEN 4:10 तब प्रभु न कह्यो, “तय न यो भयानक काम कहाली करयो हय? तोरो भाऊ को खून जमीन सी मोख बुलाय रह्यो हय।
GEN 4:11 अब तय वा जमीन को तरफ सी श्रापित हय, जेन तोरो भाऊ को खून तोरो हाथ सी स्वीकार करन लायी अपनो मुंह खोल्यो हंय।
GEN 4:12 जब तय जमीन पर खेती करन की कोशिश करजो, त माटी तोरो लायी कुछ पैदा नहीं करेंन; अऊर तय धरती पर बेघर होय जाजो अऊर भटकन वालो होयजो।”
GEN 4:13 अऊर कैन न परमेश्वर सी कह्यो, “यो सजा मोरो लायी सहन करनो बहुत कठिन हय।
GEN 4:14 देख, तय न अज मोख जमीन सी हटाय दियो हंय, अऊर मय तोरी नजर की आड़ म रहूं, अऊर धरती पर एक बेघर होय जाऊं अऊर भटकूं, अऊर जो कोयी मोख मिलेंन ऊ मोख मार डालेंन।”
GEN 4:15 परमेश्वर न कैन सी कह्यो, “असो नहीं होयेंन। जो कोयी कैन ख मार डालेंन ओको सी सात गुना बदला ले लियो जायेंन।” येकोलायी प्रभु न कैन पर एक चिन्ह डाल दियो कि ओख पान वालो कोयी भी ओकी हत्या नहीं करे।
GEN 4:16 तब कैन प्रभु की उपस्थिति सी दूर चली गयो अऊर “नोद” नाम को देश म रहन लग्यो, जो कि अदन की पूर्व दिशा म हय।
GEN 4:17 जब कैन अपनी पत्नी को जवर गयो तब वा गर्भवती भयी, अऊर ओन हनोक ख जनम दियो; तब कैन न एक नगर बसायो अऊर ऊ नगर को नाम अपनो बेटा को नाम पर हनोक रख्यो।
GEN 4:18 हनोक सी ईराद पैदा भयो, अऊर ईराद सी महूयाएल, अऊर महूयाएल सी मतूशाएल, अऊर मतूशाएल सी लेमेक पैदा भयो।
GEN 4:19 लेमेक की दोय पत्नी होती। एक को नाम आदा अऊर दूसरी को नाम सिल्ला होतो।
GEN 4:20 आदा न याबाल ख जनम दियो। याबाल उन लोगों को बुजूर्ग बन्यो जो तम्बुवों म रहत होतो अऊर जनावर पालत होतो।
GEN 4:21 अऊर ओको भाऊ को नाम यूबाल होतो। ऊ वीणा अऊर बांसुरी बजावन वालो को पूर्वज होतो।
GEN 4:22 अऊर सिल्ला न तूबल अऊर कैन ख जनम दियो, ऊ पीतर अऊर लोहा को सब धार वालो हथियार बनान वालो पहिलो धातुकार होतो। तूबल कैन की बहिन नामा होती।
GEN 4:23 अऊर लेमेक न अपनी पत्नियों सी कह्यो, “हे आदा अऊर हे सिल्ला मोरी बात सुनो; हे लेमेक की पत्नियों, मोरी बात पर ध्यान देवो : जो आदमी न मोख घायल करयो, अऊर जो जवान न मोख चोट पहुंचायी, ओख मय न मार डाल्यो हय।
GEN 4:24 अगर कैन को बदला सात गुना लियो जायेंन, त लेमेक को सतहत्तर गुना लियो जायेंन।”
GEN 4:25 अऊर आदम अपनी पत्नी को जवर फिर गयो; अऊर ओन एक बेटा ख जनम दियो अऊर ओको नाम यो कह्य क शेत रख्यो कि : “परमेश्वर न मोरो लायी हाबिल को बदला, जेक कैन न मार डाल्यो होतो, येकोलायी परमेश्वर न हाबिल की जागा पर यो दूसरो बच्चा प्रदान करयो हय।”
GEN 4:26 अऊर शेत ख भी एक टुरा पैदा भयो अऊर ओन ओको नाम एनोश रख्यो; ऊ समय सी लोग प्रभु को नाम सी आराधना करन लग्यो।
GEN 5:1 आदम की वंशावली को विवरन यो तरह हय। जब परमेश्वर न आदम ख बनायो त ओन उन्ख अपनो जसो बनायो।
GEN 5:2 ओन उन्ख नर अऊर नारी बनायो, जब हि दोयी बनायो गयो, तब ओन ओको नाम आदम रख्यो अऊर उन्ख आशीर्वाद दियो।
GEN 5:3 जब आदम एक सौ तीस साल को भयो, तब ओको सी ओको जसो एक टुरा पैदा भयो जो ओको समान होतो, अऊर ओन ओको नाम शेत रख्यो।
GEN 5:4 अऊर शेत को जनम को बाद आदम आठ सौ साल तक जीन्दो रह्यो, अऊर ओख अऊर भी टुरा टुरी पैदा भयो।
GEN 5:5 यो तरह आदम कुल नव सौ तीस साल जीन्दो रह्यो, तब बाद म ओकी मृत्यु भय गयी।
GEN 5:6 जब शेत एक सौ पाच साल को भयो, तब ओको सी एनोश पैदा भयो।
GEN 5:7 एनोश को जनम को बाद शेत आठ सौ सात साल तक जीन्दो रह्यो, अऊर ओख अऊर भी टुरा टुरी पैदा भयी।
GEN 5:8 यो तरह शेत कुल नव सौ बारा साल जीन्दो रह्यो; ओको बाद ओकी मृत्यु भय गयी।
GEN 5:9 जब एनोश नब्बे साल को भयो, तब ओन केनान ख पैदा करयो।
GEN 5:10 केनान को जनम को बाद एनोश आठ सौ पन्द्रा साल तक जीन्दो रह्यो, अऊर ओख अऊर भी टुरा टुरी पैदा भयी
GEN 5:11 यो तरह एनोश कुल नव सौ पाच साल जीन्दो रह्यो; ओको बाद ओकी मृत्यु भय गयी।
GEN 5:12 जब केनान सत्तर साल को भयो, तब ओन महल्लेल ख पैदा करयो।
GEN 5:13 महल्लेल को जनम को बाद केनान आठ सौ चालीस साल तक जीन्दो रह्यो, अऊर ओख अऊर भी टुरा टुरी पैदा भयी।
GEN 5:14 यो तरह केनान कुल नव सौ दस साल जीन्दो रह्यो; ओको बाद ओकी मृत्यु भय गयी।
GEN 5:15 जब महल्लेल पैसठ साल को भयो, तब ओन येरेद ख पैदा करयो।
GEN 5:16 येरेद को जनम को बाद महल्लेल आठ सौ तीस साल तक जीन्दो रह्यो, अऊर ओख अऊर भी टुरा टुरी भयी।
GEN 5:17 यो तरह महल्लेल कुल आठ सौ पंचानबे साल जीन्दो रह्यो; ओको बाद ओकी मृत्यु भय गयी।
GEN 5:18 जब येरेद एक सौ बाहसठ साल को भयो, तब ओन हनोक ख पैदा करयो।
GEN 5:19 हनोक को जनम को बाद येरेद आठ सौ साल तक जीन्दो रह्यो, अऊर ओख अऊर भी टुरा टुरी भयी।
GEN 5:20 यो तरह येरेद कुल नव सौ बाहसठ साल जीन्दो रह्यो; ओको बाद ओकी मृत्यु भय गयी।
GEN 5:21 जब हनोक पैसठ साल को भयो, तब ओन मतूशेलह ख पैदा करयो।
GEN 5:22 मतूशेलह को जनम को बाद हनोक तीन सौ साल तक परमेश्वर को संग संग चलतो रह्यो, अऊर ओख अऊर भी टुरा टुरी भयी।
GEN 5:23 यो तरह हनोक कुल तीन सौ पैसठ साल जीन्दो रह्यो।
GEN 5:24 हनोक परमेश्वर को संग संग चलत होतो; तब ऊ गायब भय गयो, कहालीकि परमेश्वर न ओख उठाय लियो।
GEN 5:25 जब मतूशेलह एक सौ सत्तासी साल को भयो, तब ओको सी लेमेक ख पैदा करयो।
GEN 5:26 लेमेक को जनम को बाद मतूशेलह सात सौ बयासी साल तक जीन्दो रह्यो, अऊर ओख अऊर भी टुरा टुरी भयी।
GEN 5:27 यो तरह मतूशेलह कुल नव सौ उनसत्तर साल जीन्दो रह्यो; ओको बाद ओकी मृत्यु भय गयी।
GEN 5:28 जब लेमेक एक सौ बयासी साल को भयो, तब ओन एक बच्चा पैदा करयो।
GEN 5:29 अऊर ओन ओको नाम नूह रख्यो, अऊर कह्यो, “जो जमीन ख प्रभु न श्राप दियो हय, ओको बारे म यो लड़का हमरो कार्य करतो समय हमरो कठिन कामों म जो हम करजे हंय, यो हम्ख आराम देयेंन।”
GEN 5:30 नूह को जनम को बाद लेमेक पाच सौ पंचानबे साल तक जीन्दो रह्यो, अऊर ओख अऊर भी टुरा टुरी भयी।
GEN 5:31 यो तरह लेमेक कुल सात सौ सतहत्तर साल जीन्दो रह्यो; ओको बाद ओकी मृत्यु भय गयी।
GEN 5:32 अऊर जब नूह पाच सौ साल को भयो, तब ओन शेम, हाम अऊर येपेत ख पैदा करयो।
GEN 6:1 जब आदमी जमीन पर बहुत बढ़न लग्यो, तब उन्ख बेटियां पैदा होन लगी,
GEN 6:2 तब परमेश्वर को बेटावों न आदमी की बेटियों ख देख्यो, कि हि सुन्दर हंय, अऊर उन्न जेक जेक चाह्यो ओन बिहाव कर लियो।
GEN 6:3 तब परमेश्वर न कह्यो, “मोरी आत्मा आदमी म हमेशा निवास नहीं करेंन, कहालीकि आदमी भी शरीरच आय; ओकी उमर एक सौ बीस साल की होयेंन।”
GEN 6:4 उन दिनो म धरती पर दानव रहत होतो; अऊर येको बाद जब परमेश्वर को बेटा अऊर आदमी की बेटियों को जवर गयो तब उन्को द्वारा जो बेटा पैदा भयो हि प्राचीनकाल को शक्तिशाली अऊर प्रसिद्ध वीर होतो।
GEN 6:5 परमेश्वर न देख्यो कि आदमियों की बुरायी धरती पर बढ़ गयी हय, अऊर उन्को मन को बिचार म जो कुछ पैदा होवय हय ऊ हर समय बुरायी लायीच होवय हंय।
GEN 6:6 यो बात सी प्रभु ख दु:ख भयो कि ओन धरती पर आदमी ख बनायो, अऊर ओको मन ख बहुत ठेस पहुंची।
GEN 6:7 तब परमेश्वर न कह्यो, “मय आदमी ख जेकी मय न सृष्टि करी हय धरती को ऊपर सी मिटाय देऊं; का आदमी, का, जनावर, का रेंगन वालो जन्तु, का आसमान को पक्षी, सब ख मिटाय देऊं, कहालीकि मोख यो बात को दु:ख हय कि मय न उन्ख बनायो।”
GEN 6:8 पर परमेश्वर को अनुग्रह की नजर नूह पर बनी रही।
GEN 6:9 नूह की वंशावली यो हय। नूह सच्चो पुरुष अऊर अपनो समय को लोगों म खरो होतो; अऊर नूह परमेश्वर कोच संग संग चलतो रह्यो।
GEN 6:10 अऊर नूह सी शेम, हाम, अऊर येपेत नाम को तीन बेटा पैदा भयो।
GEN 6:11 ऊ समय परमेश्वर की नजर म धरती भ्रष्ट होय गयी होती, अऊर धरती हिंसा सी भर गयी होती
GEN 6:12 अऊर परमेश्वर न धरती ख देख्यो कि वा भ्रष्ट भय गयी हय; कहालीकि पूरो प्रानियों न धरती पर अपनो चाल चलन भ्रष्ट कर लियो होतो।
GEN 6:13 तब परमेश्वर न नूह सी कह्यो, “मय न पूरो प्रानियों को अन्त करन को निश्चय करयो हय; उन्को वजह धरती हिंसा सी भर गयी हय, येकोलायी मय उन्ख धरती समेत नाश कर डालूं।
GEN 6:14 येकोलायी तय गोपेर झाड़ की लकड़ी को एक जहाज बनाय ले, ओको म कमरा बनायजो, अऊर अन्दर बाहेर ओको पर राल लगायजो।
GEN 6:15 यो रीति सी तय जहाज बनायजो: अऊर जहाज की लम्बाई चार सौ पचास फीट, पछात्तर फीट चौड़ो, अऊर ऊचो पैतालीस फीट रखजो।
GEN 6:16 जहाज म एक खिड़की बनायजो, अऊर ओको अठरा इंच ऊपर छत बनायजो, अऊर जहाज म एक तरफ दरवाजा रखजो; अऊर जहाज म पहिलो, दूसरो, तीसरो खण्ड बनायजो।
GEN 6:17 अऊर मय आसमान को खल्लो उन पूरी प्रानियों ख, जेको म जीवन की श्वास हय, नाश करन लायी धरती पर जल प्रलय करूं; अऊर धरती को पूरो प्रानी मर जायेंन।
GEN 6:18 पर मय तोरो संग एक वाचा बान्धू हय; येकोलायी तय अपनी पत्नी, अपनो बेटां, अऊर बहुवों समेत जहाज म प्रवेश करजो।
GEN 6:19 अऊर पूरी जाति को जीन्दो प्रानियों म सी दोय दोय, नर अऊर मादा, अपनो संग जहाज म ले जाजो जेको सी हि तोरो संग जीन्दो रहे।
GEN 6:20 हर एक जाति को पक्षियों, जनावरों, जमीन पर रेंगन वालो जन्तुवों म सी दोय दोय तोरो जवर आयेंन कि तय उन्ख जीन्दो रखजो।
GEN 6:21 हर एक तरह को भोजन जो खायो जायेंन, उन्ख तय ले क अपनो जवर जमा कर लेजो; जो तोरो अऊर उन्को भोजन लायी होयेंन।”
GEN 6:22 नूह न असोच करयो, ओन परमेश्वर की आज्ञा को अनुसार सब कुछ करयो।
GEN 7:1 परमेश्वर न नूह सी कह्यो, “तय अपनो पूरो परिवार सहित जहाज म जावो; कहालीकि मय न यो समय को लोगों म सी केवल तोख अपनी नजर म सच्चो पायो हय।
GEN 7:2 तय सब जाति को शुद्ध जनावरों म सी नर अऊर मादा को सात जोड़ा अऊर अशुद्ध जनावरों म सी नर मादा को एक एक जोड़ा लेजो।
GEN 7:3 अऊर आसमान को पक्षियों म सी नर अऊर मादा को सात सात जोड़ा लेजो, जेको सी पूरी धरती पर उन्की जाति जीन्दी रहे।
GEN 7:4 कहालीकि अब सी सात दिन को बाद चालीस दिन अऊर चालीस रात तक धरती पर पानी बरसातो रहूं; अऊर उन सब प्रानियों ख जमीन को ऊपर सी मिटाय देऊं, जिन्ख मय न बनायो होतो।”
GEN 7:5 नूह न परमेश्वर की आज्ञा को अनुसार सब कुछ करयो।
GEN 7:6 जब धरती पर जल प्रलय भयो, तब नूह की उमर छय सौ साल की होती।
GEN 7:7 नूह जल प्रलय सी बचन लायी अपनी पत्नी, बेटां, अऊर बहुवों को संग जहाज म गयो।
GEN 7:8 शुद्ध अऊर अशुद्ध, दोयी तरह को जनावरों म सी, अऊर रेंगन वालो पूरो जन्तुवों म सी भी,
GEN 7:9 दोय दोय, यानेकि नर अऊर मादा, नूह को संग जहाज म गयो, जसो परमेश्वर न नूह ख आज्ञा दी होती।
GEN 7:10 सात दिन को बाद धरती पर प्रलय को पानी बरसन लग्यो।
GEN 7:11 जो साल नूह छय सौ साल को भयो, ओको दूसरों महीना को सत्राहवों दिन आयो; उच दिन बड़ो गहरो समुन्दर को सब झरना फूट पड़्यो, अऊर आसमान को पूरो पानी की रस्ता खुल गयी।
GEN 7:12 चालीस दिन अऊर चालीस रात तक धरती पर बारीश होती रही।
GEN 7:13 ठीक उच दिन नूह न अपनी पत्नी अऊर बेटा शेम, हाम, अऊर येपेत नाम को बेटा, अऊर तीनो बहुवों को संग जहाज म सिरयो।
GEN 7:14 अऊर उन्को संग हर एक जाति को जंगली जनावर, पालतु जनावर, अऊर धरती पर रेंगन वालो जन्तु अऊर जाति जाति को उड़न वालो पक्षी, जहाज म गयो।
GEN 7:15 हर एक प्रानियों म सी दोय दोय प्रानी जिन्म जीवन की श्वास होती, हि नूह को संग जहाज म गयो।
GEN 7:16 हर एक प्रानियों को नर अऊर मादा जहाज म गयो, जसो परमेश्वर न आज्ञा दियो होतो। तब परमेश्वर न नूह को जहाज को दरवाजा बन्द कर दियो।
GEN 7:17 धरती पर चालीस दिन तक जल प्रलय होतो रह्यो; अऊर पानी बहुत बड़तो गयो, जेको सी जहाज ऊपर उठन लग्यो; अऊर ऊ धरती पर सी ऊचो उठ गयो।
GEN 7:18 पानी बढ़तो बढ़तो धरती पर बहुतच बढ़ गयो, अऊर जहाज पानी को ऊपर ऊपर तैरन लग्यो।
GEN 7:19 पानी बढ़ क धरती पर इतनो बढ़ गयो, कि आसमान को खल्लो की पूरी ऊची ऊची पहाड़ी भी ओको म डुब गयी।
GEN 7:20 पानी पच्चीस फीट अऊर ऊपर बढ़ गयो। अऊर पहाड़ी भी डुब गयी।
GEN 7:21 अऊर का पक्षी, का घरेलू जनावर, का जंगली जनावर, अऊर धरती पर सब चलन वालो प्रानी, अऊर जितनो जीव जन्तु, यानेकि धरती को हर एक आदमी मर गयो।
GEN 7:22 जो जो जमीन पर होतो, जितनो को शरीर म जीवन की श्वास होती, सब मर गयो।
GEN 7:23 परमेश्वर न जमीन पर रहन वालो हर एक जीन्दो प्रानी ख, आदमी अऊर जनावर ख, रेंगन वालो जन्तुवों ख, अऊर आसमान को पक्षियों ख मिटाय डाल्यो; केवल नूह अऊर जितनो ओको संग जहाज म होतो, हिच बच गयो।
GEN 7:24 अऊर पानी धरती पर एक सौ पचास दिन तक बन्यो रह्यो।
GEN 8:1 पर परमेश्वर न नूह अऊर जितनो जंगली जनावर अऊर पालतु जनावरों की सुधि ली, जो जहाज म ओको संग होतो, अऊर परमेश्वर न धरती पर हवा चलायी, अऊर पानी घटन लग्यो;
GEN 8:2 अऊर गहरो समुन्दर को झरना अऊर आसमान को झरोका बन्द होय गयो; अऊर ओको सी जो बारीश होत होती, वा भी रुक गयी;
GEN 8:3 अऊर एक सौ पचास दिन को बाद पानी धरती पर सी लगातार घटन लग्यो।
GEN 8:4 अऊर जहाज सातवों महीना को सत्राहवों दिन अरारात नाम की पहाड़ी पर टिक गयो।
GEN 8:5 अऊर पानी दसवों महीना तक घटतो चली गयो, अऊर दसवों महीना को पहिलो दिन पहाड़ी की सेंडी दिखायी दी।
GEN 8:6 तब असो भयो कि चालीस दिन को बाद नूह न अपनो बनायो हुयो जहाज की खिड़की ख खोल क,
GEN 8:7 ओन एक कौवा उड़ाय दियो : अऊर जब तक पानी धरती पर सी सूख नहीं गयो, तब तक कौवा इत उत उड़तो रह्यो।
GEN 8:8 तब नूह न अपनो जवर सी एक कबूत्तरी ख भी उड़ाय दियो कि देखबो कि पानी धरती पर सी घट गयो कि नहीं।
GEN 8:9 ऊ कबूत्तरी ख अपनो पाय टेकन लायी आधार नहीं मिल्यो, त कबूत्तरी नूह को जवर जहाज म वापस चली गयो: कहालीकि पूरी धरती को ऊपर पानीच पानी छायो होतो तब नूह न हाथ बढ़ाय क ओख अपनो जवर जहाज म ले लियो।
GEN 8:10 तब ऊ अऊर सात दिन तक रुक्यो रह्यो, अऊर ओन उच कबूत्तरी ख जहाज म सी फिर सी उड़ाय दियो।
GEN 8:11 अऊर कबूत्तरी शाम को समय ओको जवर आय गयो, त ओन यो देख्यो कि ओकी चोच म जैतून को एक नयो पत्ता हय; येको सी नूह न जान लियो कि पानी धरती पर सी घट गयो हय।
GEN 8:12 तब नूह न सात दिन अऊर रुक क उच कबूत्तरी ख उड़ाय दियो; किन्तु ऊ ओको जवर फिर वापस नहीं आयी।
GEN 8:13 जो साल नूह छय सौ एक साल को भयो, ओको पहिलो महीना को पहिलो दिन धरती को पानी सूख गयो। तब नूह न जहाज की छत खोल क चारयी तरफ देख्यो कि जमीन सूख रही हय।
GEN 8:14 अऊर दूसरों महीना को सत्ताईसवों दिन देख्यो कि धरती पूरी तरह सूख गयी।
GEN 8:15 तब परमेश्वर न नूह सी कह्यो,
GEN 8:16 “तय अपनी पत्नी, बेटा अऊर बहुवों को संग जहाज म सी बाहेर निकल आव।
GEN 8:17 तोरो संग जो जीन्दो प्रानी, यानेकि जनावरों, पक्षियों, अऊर धरती पर रेंगन वालो जन्तु हंय, उन्ख भी तय जहाज सी बाहेर निकाल ले जेको सी हि धरती पर झुण्ड को झुण्ड पैदा करे; अऊर हि बहुत जादा ताकतवर हो, अऊर धरती पर फैल जाये।”
GEN 8:18 तब नूह अपनी पत्नी, बेटा, अऊर बहुवों को संग जहाज सी बाहेर निकल आयो :
GEN 8:19 अऊर सब जनावर, रेंगन वालो जन्तु, अऊर पक्षी अऊर धरती को पूरो जीवजन्तु अपनी जाति जाति को अनुसार जहाज म सी बाहेर निकल आयो।
GEN 8:20 तब नूह न प्रभु लायी एक वेदी बनायी; अऊर सब शुद्ध जनावरों अऊर सब शुद्ध पक्षियों म सी कुछ ख चुन्यो अऊर वेदी पर उन्की होमबलि चढ़ायो।
GEN 8:21 जब प्रभु ख होमबलि की सुखदायक सुगन्ध मिली तब प्रभु न अपनो दिल म कह्यो, “अब मय आदमी को वजह जमीन ख फिर कभी श्राप नहीं देऊं, बचपन सीच आदमी को मन को बिचार बुरायी लायी होवय हय; जसो मय न अभी करयो हय, वसो उन्ख फिर कभी नहीं मारूं।
GEN 8:22 अब सी जब तक धरती बनी रहेंन, तब तक बोवन अऊर काटन को समय, ठंडी अऊर गर्मी, गर्मी अऊर ठंडी, दिन अऊर रात, को होनो खतम नहीं होयेंन।”
GEN 9:1 तब परमेश्वर न नूह अऊर ओको बेटा ख आशीष दी अऊर ओन कह्यो, “फूलो फलो, अऊर बढ़ो, अऊर धरती म भर जावो।
GEN 9:2 तुम्हरो डर अऊर अधिकार सी धरती को सब जनावरों, अऊर आसमान को सब पक्षियों, अऊर जमीन पर को सब रेंगन वालो जन्तुवों, अऊर समुन्दर की सब मच्छी पर बन्यो रहेंन हि सब तुम्हरो वश म कर दियो जावय हंय।
GEN 9:3 सब चलन वालो जीवजन्तु तुम्हरो जेवन होयेंन; जसो मय न तुम्ख हरो पौधा दियो होतो, वसोच अब सब कुछ देऊ हय।
GEN 9:4 पर, तुम मांस ख ओको जीव मतलब खून को संग मत खाजो।
GEN 9:5 कहालीकि मय जरूर तुम्हरो खून अऊर जीव को बदला लेऊं: अऊर मय हर एक जनावर सी, अऊर हर एक आदमी सी ओको बदला लेऊं; अऊर मय हर एक आदमी सी ओको भाऊ बहिनों को खून को बदला लेऊं।
GEN 9:6 जो कोयी आदमी को खून बहायेंन ओको भी खून आदमी द्वारा बहायो जायेंन; कहालीकि परमेश्वर न आदमी ख अपनो जसो बनायो हय।
GEN 9:7 “अऊर तुम फलो फूलो अऊर धरती पर बहुतायत सी सन्तान पैदा कर क् ओको म भर जावो।”
GEN 9:8 तब परमेश्वर न नूह अऊर ओको बेटों सी कह्यो,
GEN 9:9 “सुनो, मय तुम्हरो संग अऊर तुम्हरो वंशजों को संग अपनी वाचा बान्ध रह्यो हय;
GEN 9:10 अऊर जब जीन्दो प्रानियों सी भी जो तुम्हरो संग हंय, का पक्षी का पालतु जनावर, का धरती को सब जंगली जनावर, धरती को जितनो जीवजन्तु जहाज सी निकल्यो हंय।
GEN 9:11 अऊर मय तुम्हरो संग अपनी यो वाचा बान्धू हय कि सब प्रानी फिर जल प्रलय सी नाश नहीं होयेंन अऊर धरती को नाश करन लायी फिर कभी जल प्रलय नहीं होयेंन।”
GEN 9:12 तब परमेश्वर न कह्यो, “जो वाचा मय न तुम्हरो संग, अऊर जितनो जीन्दो प्रानी तुम्हरो संग हय उन सब को संग भी युग युग की पीढ़ियों लायी बान्धू हय; ओको यो चिन्ह हय :
GEN 9:13 कि मय न बादर म अपनो धनुष रख्यो हय, ऊ मोरो अऊर धरती को बीच म वाचा को चिन्ह होयेंन।
GEN 9:14 अऊर जब मय धरती पर बादर फैलाऊं तब बादर म धनुष दिखायी देयेंन।
GEN 9:15 तब मोरी जो वाचा तुम्हरो अऊर पूरो जीन्दो प्रानियों को संग बंधी हय; ओख मय याद करूं, तब असो जल प्रलय फिर नहीं होयेंन जेको सी सब प्रानी को नाश होय जाये।
GEN 9:16 बादर म जो धनुष होयेंन मय ओख देख क यो हमेशा की वाचा याद करूं, जो परमेश्वर को अऊर धरती पर को पूरो जीन्दो प्रानियों को बीच बंधी हय।”
GEN 9:17 तब परमेश्वर न नूह सी कह्यो, “जो वाचा मय न धरती भर को पूरो प्रानियों को संग बान्धी हय, ओको चिन्ह योच आय।”
GEN 9:18 नूह को जो बेटा जहाज म सी निकल्यो, ऊ शेम, हाम अऊर येपेत होतो; अऊर हाम कनान को बाप भयो।
GEN 9:19 नूह को तीन बेटा हिच हंय, अऊर इन्को वंश पूरी धरती पर फैल गयो।
GEN 9:20 नूह जो एक किसान होतो, जो अंगूर की बाड़ी लगावन वालो पहिलो आदमी भयो।
GEN 9:21 अऊर ऊ अंगूर को रस पी क मतवालो भयो; अऊर अपनो तम्बू को अन्दर नंगा भय गयो।
GEN 9:22 तब कनान को बाप हाम न, अपनो बाप ख नंगा देख्यो, अऊर बाहेर आय क अपनो दोयी भाऊ ख बताय दियो।
GEN 9:23 तब शेम अऊर येपेत दोयी न एक चादर ली, अऊर ओख अपनो बख्खा पर रख्यो अऊर पीछु को तरफ उलटो चल क अन्दर गयो अऊर उन्न अपनो बाप को शरीर ख झाक दियो अऊर हि अपनो मुंह पीछु करयो हुयो होतो, येकोलायी उन्न अपनो बाप ख नंगा नहीं देख्यो।
GEN 9:24 जब नूह को नशा उतर गयो, तब ओन जान लियो कि ओको छोटो बेटा न ओको संग का करयो हय।
GEN 9:25 येकोलायी नूह न कह्यो, “कनान श्रापित हो : ऊ अपनो भाऊवों को दासों को दास हो।”
GEN 9:26 नूह न फिर कह्यो, “शेम को प्रभु परमेश्वर धन्य हय, अऊर कनान शेम को दास हो।
GEN 9:27 परमेश्वर येपेत को वंश ख फैलाये; अऊर ऊ शेम को तम्बूवों म निवास करे, अऊर कनान येपेत को दास हो।”
GEN 9:28 जल प्रलय को बाद नूह तीन सौ पचास साल जीन्दो रह्यो।
GEN 9:29 यो तरह नूह की कुल उमर नव सौ पचास साल की भयी; ओको बाद ऊ मर गयो।
GEN 10:1 नूह को बेटां शेम, हाम अऊर येपेत होतो; उन्को बेटा जल प्रलय को बाद पैदा भयो: उन्की वंशावली या आय।
GEN 10:2 येपेत को बेटां : गोमेर, मागोग, मादै, यावान, तूबल, मेशेक अऊर तीरास भयो।
GEN 10:3 अऊर गोमेर को बेटां : अश्कनज, रीपत अऊर तोगर्मा भयो।
GEN 10:4 अऊर यावान को वंश म एलीशा अऊर तर्शीश, कित्ती, अऊर दोदानी लोग भयो।
GEN 10:5 इन्को वंश दूसरी जातियों को द्वीपों को देशों म असो बट गयो कि हि दूसरी दूसरी भाषावों, कुलों, अऊर जातियों को अनुसार अलग अलग भय गयो।
GEN 10:6 तब हाम को बेटां : कूश, मिस्र, पूत अऊर कनान भयो।
GEN 10:7 अऊर कूश को बेटां सबा, हवीला, सबता, रामा, अऊर सब्तका भयो। अऊर रामा को बेटा शबा अऊर ददान भयो।
GEN 10:8 कूश को वंश म निम्रोद भी भयो; जो धरती पर पहिलो महा शक्तिशाली विजेता होतो।
GEN 10:9 ऊ प्रभु की नजर म महान शिकारी होतो, येकोलायी ओको बारे म यो कहावत प्रसिद्ध हय; “प्रभु की नजर म निम्रोद को जसो महान शिकारी।”
GEN 10:10 ओको राज्य की सुरूवात शिनार देश म बेबीलोन, एरेख, अक्कद, अऊर कलने सी भयो।
GEN 10:11 निम्रोद ऊ देश सी निकल क अश्शूर ख गयो, अऊर नीनवे, रहोबोतीर अऊर कालह नाम को नगरों ख बसायो।
GEN 10:12 ओन रेसेन नगर ख भी बसायो जो नीनवे अऊर कालह को बीच म हय; ऊ महानगर हय।
GEN 10:13 मिस्र को वंश म लूदी, अनामी, लहाबी, नप्तूही,
GEN 10:14 अऊर पत्रुसी, कसलूही, अऊर कप्तोरी लोग भयो, कसलूहियों म सी त पलिश्ती लोग निकल्यो।
GEN 10:15 कनान को वंश म ओको बड़ो बेटा सीदोन, तब हित्त,
GEN 10:16 यबूसी, एमोरी, गिर्गाशी,
GEN 10:17 हिव्वी, अर्की, शीनी,
GEN 10:18 अर्वदी, समारी, अऊर हमाती लोग भी भयो; तब कनानियों को कुल भी फैल गयो।
GEN 10:19 अऊर कनानियों की सीमा सीदोन सी ले क गरार की रस्ता सी होय क अज्जा तक अऊर तब सदोम, अमोरा, अदमा अऊर सबोयीम की रस्ता सी होय क लाशा तक भयो।
GEN 10:20 हाम को वंश म हिच भयो; अऊर हि दूसरो दूसरो कुलों, भाषावों, देशों, अऊर जातियों को अनुसार अलग अलग भय गयो।
GEN 10:21 तब शेम, जो सब एबेर वंशियों को मूल पुरुष भयो, अऊर जो येपेत को भाऊ होतो, ओको भी बेटा पैदा भयो।
GEN 10:22 शेम को बेटां : एलाम, अश्शूर, अर्पक्षद, लूद अऊर अराम भयो
GEN 10:23 अराम को बेटां : ऊस, हूल, गेतेर अऊर मश भयो।
GEN 10:24 अऊर अर्पक्षद न शेलह ख, अऊर शेलह न एबेर ख जनम दियो।
GEN 10:25 अऊर एबेर को दोय बेटां पैदा भयो, एक को नाम पेलेग यो वजह रख्यो गयो कि ओको दिनों म धरती बट गयी, अऊर ओको भाऊ को नाम योक्तान होतो।
GEN 10:26 अऊर योक्तान न अल्मोदाद, शेलेप, हसर्मावेत, येरह,
GEN 10:27 हदोराम, ऊजाल, दिक्ला,
GEN 10:28 ओबाल, अबीमाएल, शबा
GEN 10:29 ओपीर, हवीला, अऊर योबाब ख जनम दियो : हिच सब योक्तान को बेटां भयो।
GEN 10:30 इन्को रहन की जागा मेशा सी ले क सपारा, जो पूर्व दिशा म एक पहाड़ी प्रदेश हय, ओकी रस्ता तक भयो।
GEN 10:31 शेम को बेटां हिच भयो; अऊर हि दूसरो दूसरो कुलों, भाषावों देशों अऊर जातियों को अनुसार अलग अलग भय गयो।
GEN 10:32 नूह को बेटा को घरानों हिच आय : अऊर उन्की जातियों को अनुसार उन्की वंशावली हिच हंय; अऊर जल प्रलय को बाद धरती भर की जातियां इन्कोच म सी होय क बट गयी।
GEN 11:1 पूरी धरती पर एकच भाषा, अऊर सब जातियां एकच बोली बोलत होती।
GEN 11:2 ऊ समय लोग पूर्व दिशा को तरफ चलतो समय उन्ख शिनार देश म एक मैदान मिल्यो, अऊर हि ऊ मैदान म बस गयो।
GEN 11:3 तब उन्न आपस म कहन लग्यो, “आवो, हम ईटा बनाय बनाय क भली भाति आगी म पकायबो।” अऊर उन्न गोटा की जागा पर ईटा सी, अऊर चूना की जागा पर माटी को गारा सी काम लियो।
GEN 11:4 तब उन्न कह्यो, “आवो, हम एक नगर अऊर एक मीनार बनायबो, जेकी सेंडी आसमान ख छुय ले, यो तरह सी हम अपनो नाम करबो, असो नहीं होय कि हम्ख पूरी धरती पर फैलनो पड़े।”
GEN 11:5 जब लोग नगर अऊर गुम्मट बनाय रह्यो होतो; तब उन्ख देखन लायी परमेश्वर उतर आयो।
GEN 11:6 तब प्रभु न कह्यो, “मय का देखू हय, कि सब एकच जाती को लोग हंय, अऊर इन सब की भाषा भी एकच हय, अऊर उन्न असोच काम सुरूवात करयो; अऊर अब जो कुछ हि करन की कोशिश करेंन, ओको म सी कुछ भी उन्को लायी असम्भव नहीं होयेंन।
GEN 11:7 येकोलायी आवो, हम उतर क उन्की भाषा म बड़ी गड़बड़ी डालबो, कि हि एक दूसरो की बोली ख नहीं समझ सके।”
GEN 11:8 यो तरह परमेश्वर न उन्ख उत सी पूरी धरती को ऊपर फैलाय दियो; अऊर उन्न ऊ नगर ख बनानो छोड़ दियो।
GEN 11:9 यो वजह ऊ नगर को नाम बेबीलोन पड़्यो; कहालीकि पूरी धरती की भाषा म जो गड़बड़ी हय, प्रभु न उतच डाली, अऊर उतच सी प्रभु न आदमियों ख पूरी धरती को ऊपर फैलाय दियो।
GEN 11:10 शेम की वंशावली यो आय। जल प्रलय को दोय साल बाद जब शेम एक सौ साल को भयो, तब ओन अर्पक्षद ख जनम दियो।
GEN 11:11 अऊर अर्पक्षद न जनम को बाद शेम पाच सौ साल जीन्दो रह्यो; अऊर ओको अऊर भी बेटा बेटियां पैदा भयो।
GEN 11:12 जब अर्पक्षद पैतीस साल को भयो, तब ओन शेलह ख जनम दियो।
GEN 11:13 अऊर शेलह को जनम को बाद अर्पक्षद चार सौ तीन साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:14 जब शेलह तीस साल को भयो, तब ओको द्वारा एबेर को जनम भयो।
GEN 11:15 अऊर एबेर को जनम को बाद शेलह चार सौ तीन साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:16 जब एबेर चौंतीस साल को भयो, तब ओको द्वारा पेलेग को जनम भयो।
GEN 11:17 अऊर पेलेग को जनम को बाद एबेर चार सौ तीस साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:18 जब पेलेग तीस साल को भयो, तब ओको द्वारा रऊ को जनम भयो।
GEN 11:19 अऊर रऊ को जनम को बाद पेलेग दोय सौ नव साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:20 जब रऊ बत्तीस साल को भयो, तब ओको द्वारा सरूग को जनम भयो।
GEN 11:21 अऊर सरूग को जनम को बाद रऊ दोय सौ सात साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:22 जब सरूग तीस साल को भयो, तब ओको द्वारा नाहोर को जनम भयो।
GEN 11:23 अऊर नाहोर को जनम को बाद सरूग दोय सौ साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:24 जब नाहोर उनतीस साल को भयो, तब ओको द्वारा तेरह को जनम भयो।
GEN 11:25 अऊर तेरह को जनम को बाद नाहोर एक सौ उन्नीस साल अऊर जीन्दो रह्यो, अऊर ओको अऊर भी बेटा बेटियां पैदा भयो।
GEN 11:26 जब तक तेरह सत्तर साल को भयो, तब तक ओको द्वारा अब्राम, नाहोर, अऊर हारान पैदा भयो।
GEN 11:27 तेरह की वंशावली यो आय : तेरह न अब्राम, नाहोर अऊर हारान ख जनम दियो; अऊर हारान न लूत ख जनम दियो।
GEN 11:28 अऊर हारान की मृत्यु ओको बाप तेरह को जीवन काल मच कसदी जाति को ऊर नाम को नगर म भयी, जो ओकी जन्मभूमि होती।
GEN 11:29 अब्राम अऊर नाहोर न बिहाव करयो। अब्राम की पत्नी को नाम सारै, अऊर नाहोर की पत्नी को नाम मिल्का होतो। मिल्का हारान की बेटी होती, अऊर हारान मिल्का अऊर यिस्का इन दोयी को बाप होतो।
GEN 11:30 सारै त बांझ होती; अऊर ओकी कोयी सन्तान नहीं होती।
GEN 11:31 अऊर तेरह न अपनो बेटा अब्राम, अऊर अपनो नाती लूत, जो हारान को बेटा होतो, अऊर अपनी बहू सारै, जो ओको बेटा अब्राम की पत्नी होती, इन पूरो ख ले क कसदी जाति को ऊर नगर सी निकल क कनान देश को तरफ चल पड़्यो; पर हारान नाम को देश म पहुंच क उतच रहन लग्यो।
GEN 11:32 जब तेरह दोय सौ पाच साल को भयो, तब ऊ हारान देश म मर गयो।
GEN 12:1 प्रभु न अब्राम सी कह्यो, “तय अपनो देश, अऊर अपनी जन्मभूमि, अऊर अपनो बाप को घर ख छोड़ क ऊ देश म चली जा, जो मय तोख दिखाऊं।
GEN 12:2 अऊर मय तोरो सी एक बड़ो राष्ट्र पैदा करूं, अऊर मय तोख आशीष देऊं, अऊर तोरो नाम महान बनाऊं, ताकि तय आदमी की जाति लायी आशीष को वजह बन जाजो।
GEN 12:3 “जो तोख आशीर्वाद देन, उन्ख मय आशीष देऊं, पर जो तोख श्राप देन, ओख मय श्राप देऊं; अऊर धरती को पूरो कुटुम्ब तोरो द्वारा मोरो सी आशीष पायेंन।”
GEN 12:4 परमेश्वर की आज्ञा को अनुसार अब्राम चली गयो; अऊर लूत भी ओको संग चली गयो; अऊर अब्राम हारान देश सी निकल्यो ऊ समय अब्राम पचहत्तर साल को होतो।
GEN 12:5 यो तरह अब्राम अपनी पत्नी सारै, अऊर अपनो भतीजा लूत ख, अऊर जो धन उन्न जमा करयो होतो, अऊर जो उन्न हारान देश म दास दासियों ख हासिल करयो होतो, इन सब ख ले क कनान देश म जान लायी निकल गयो, अऊर हि कनान देश म पहुंच्यो।
GEN 12:6 ऊ देश को बीच सी जातो हुयो अब्राम शेकेम नाम की जागा पर पहुंच्यो, जित मोरे को पवित्र झाड़ हय। ऊ समय कनानी जाति ऊ देश म रहत होती।
GEN 12:7 तब परमेश्वर न अब्राम ख दर्शन दे क कह्यो, “यो देश मय तोरो वंश ख देऊं।” अऊर अब्राम उत प्रभु लायी, जेन ओख दर्शन दियो होतो, उत ओको लायी ओन एक वेदी बनायी।
GEN 12:8 तब उत सी आगु बढ़ क, अब्राम ऊ पहाड़ी पर आयो, जो बेतेल नगर की पूर्व दिशा को तरफ हय; अऊर अपनो तम्बू ऊ जागा म खड़ो करयो जेको पश्चिम को तरफ बेतेल, अऊर पूर्व को तरफ ऐ नगर होतो, उत अब्राम न प्रभु लायी एक वेदी बनायी : अऊर प्रभु सी आराधना करी।
GEN 12:9 तब अब्राम कनान देश को दक्षिन भाग को तरफ, एक जागा सी दूसरी जागा पर चली गयो।
GEN 12:10 लेकिन कनान म एक अकाल पड़्यो: येकोलायी अब्राम मिस्र देश ख चली गयो कि उत परदेशी जसो रहे, कहालीकि देश म भयानक अकाल पड़्यो होतो।
GEN 12:11 तब असो भयो कि हि मिस्र देश को जवर पहुंच क, अब्राम न अपनी पत्नी सारै सी कह्यो, “सुनो, मोख मालूम हय, कि तय एक सुन्दर बाई हय।
GEN 12:12 अऊर जब मिस्र को रहन वालो तोख देखेंन, तब कहेंन, ‘या ओकी पत्नी आय,’ येकोलायी हि मोख त मार डालेंन, पर तोख जीन्दो रहन देयेंन।
GEN 12:13 येकोलायी तय यो कह्यजो कि, ‘मय ओकी बहिन आय,’ जेको सी तोरो वजह मोरो कल्यान हो अऊर मोरो जीव तोरो वजह बचेंन।”
GEN 12:14 तब असो भयो कि जब अब्राम मिस्र देश म आयो, तब उत को रहन वालो न ओकी पत्नी ख देख्यो कि या त बड़ी सुन्दर हय।
GEN 12:15 अऊर मिस्र को राजा फिरौन को अधिकारियों न ओख देख क फिरौन को आगु ओकी प्रशंसा करी : येकोलायी सारै ख फिरौन को महल म पहुंचायी गयी।
GEN 12:16 अऊर फिरौन न ओको वजह अब्राम को संग अच्छो बरताव करयो; अऊर अब्राम ख शेरी मेंढी, गाय बईल, दास दासी, गधा गधी, अऊर ऊंट मिल्यो।
GEN 12:17 तब प्रभु न फिरौन अऊर ओको महल को लोगों पर, अब्राम की पत्नी सारै को वजह भयानक रोग तकलीफ लगायी।
GEN 12:18 तब फिरौन न अब्राम ख बुलाय क कह्यो, “तय न मोरो संग यो का करयो? तय न मोख कहाली नहीं बतायो कि वा तोरी पत्नी आय?
GEN 12:19 तय न कहाली कह्यो कि वा तोरी बहिन आय? मय न येकोलायी ओख अपनी पत्नी बनाय लियो होतो; पर अब अपनी पत्नी ख ले क इत सी चली जा।”
GEN 12:20 अऊर फिरौन न अपनो अधिकारियों ख ओको बारे म आज्ञा दियो अऊर उन लोगों न अब्राम ख अऊर अब्राम की पत्नी ख, सब सम्पत्ति को संग जो ओको होतो, ओख बिदा कर दियो।
GEN 13:1 तब अब्राम अपनी पत्नी, अऊर अपनी पूरी सम्पत्ति ले क, अऊर लूत ख भी संग लियो, अऊर मिस्र देश ख छोड़ क कनान को दक्षिन देश म आयो।
GEN 13:2 अब्राम अपनी शेरी मेंढी, गाय बईल, अऊर सोनो चांदी को वजह बहुत धनी होतो।
GEN 13:3 तब अब्राम दक्षिन देश सी चल क, बेतेल नगर को जवर उच जागा पर पहुंच्यो, जित पहिले ओन अपनो तम्बू खड़ो करयो होतो, जो बेतेल अऊर ऐ नगर को बीच म हय।
GEN 13:4 यो जागा ऊ वेदी को हय, जेक अब्राम पहिले सीच बनायो होतो, अऊर उत अब्राम न फिर प्रभु सी आराधना करी।
GEN 13:5 लूत को जवर भी, जो अब्राम को संग चलत होतो, ओको जवर भी शेरी मेंढी, गाय बईल अऊर तम्बू होतो।
GEN 13:6 येकोलायी ऊ देश म उन दोयी लायी उचित जागा नहीं होती कि हि एक संग रह्य सके, कहालीकि उन्को जवर बहुत सारो जनावर होतो, कि हि एक संग नहीं रह्य सकत होतो।
GEN 13:7 तब अब्राम को जनावरों की देखभाल करन वालो अऊर लूत को जनावरों की देखभाल करन वालो को बीच म झगड़ा शुरू भय गयो। ऊ समय कनानी, अऊर परिज्जी लोग, ऊ देश म रहत होतो।
GEN 13:8 तब अब्राम लूत सी कहन लग्यो, “मोरो अऊर तोरो जनावरों की देखभाल करन वालो को बीच झगड़ा होनो नहीं पाये; कहालीकि हम लोग रिश्तेदार हंय।
GEN 13:9 का पूरो देश तोरो आगु नहीं? येकोलायी मोरो सी अलग होय जा; यदि तय बायो तरफ जाजो त मय दायो तरफ जाऊं; अऊर यदि तय दायो तरफ जाजो, त मय बायो तरफ जाऊं।”
GEN 13:10 तब लूत न अपनी आंखी ऊपर उठाय क आगु देख्यो, कि सोअर की दिशा म यरदन नदी को जवर वालो पूरो घाट अऊर प्रभु को बगीचा, अऊर मिस्र देश की जमीन को जसो पानी सी पूरी सिंची हुयी होती। यो प्रभु को द्वारा करयो गयो सदोम अऊर अमोरा को नाश को पहिले की बात आय।
GEN 13:11 येकोलायी लूत अपनो लायी यरदन की पूरो घाट ख चुन क पूर्व दिशा को तरफ चली गयो, यो तरह हि एक दूसरो सी अलग भय गयो।
GEN 13:12 अब्राम त कनान देश म रह्यो, पर लूत ऊ घाट को नगरों म रहन लग्यो; अऊर अपनो तम्बू सदोम नगर को जवर खड़ो करयो।
GEN 13:13 सदोम नगर को लोग प्रभु की नजर म बड़ो दुष्ट अऊर पापी होतो।
GEN 13:14 जब लूत अब्राम सी अलग भय गयो तब ओको बाद प्रभु न अब्राम सी कह्यो, “अपनी आंखी ऊपर उठाव अऊर जो जागा पर तय हय उत सी उत्तर दक्षिन, पूर्व पश्चिम, इन चारयी तरफ नजर कर।
GEN 13:15 कहालीकि जितनी जमीन तोख दिखायी देवय हय, उन सब ख मय तोख अऊर तोरो वंश ख हमेशा हमेशा लायी देऊं।
GEN 13:16 अऊर मय तोरो वंश ख धरती की धूल को कन को जसो बहुत बढ़ाऊं, कि उन्की गिनती करनो बहुत मुश्किल होयेंन, यदि कोयी धरती की धूल को कन ख गिन सकेंन त उच तोरो वंश ख भी गिन सकेंन।
GEN 13:17 उठ, यो देश की लम्बाई अऊर चौड़ाई म चल फिर; कहालीकि मय यो सब तोख देन जाय रह्यो हय।”
GEN 13:18 येको बाद अब्राम न अपनो तम्बू निकाल क, मम्रे को पवित्र झाड़ को जवर जो हेब्रोन म होतो, जाय क रहन लग्यो, अऊर उत भी ओन परमेश्वर की एक वेदी बनायी।
GEN 14:1 शिनार को राजा अम्रापेल, अऊर एल्लासार को राजा अर्योक, अऊर एलाम को राजा कदोर्लाओमेर, अऊर गोयीम को राजा तिदाल को दिनों म असो भयो,
GEN 14:2 कि उन्न सदोम को राजा बेरा, अऊर अमोरा को राजा बिर्शा, अऊर अदमा को राजा शिनाब, अऊर सबोयीम को राजा शेमेबेर, अऊर बेला जो सोअर भी कहलावय हय, इन राजावों को खिलाफ युद्ध करयो।
GEN 14:3 इन पाचों राजा न सिद्दीम नाम को घाट म, जो खारे नदी को जवर हय, हि सब जमा भयो।
GEN 14:4 अऊर हि बारा साल तक त कदोर्लाओमेर को अधिन रह्यो; पर तेरहवों साल म ओको खिलाफ विद्रोह कर दियो।
GEN 14:5 चौदावों साल म कदोर्लाओमेर, अऊर ओको संगी राजा चढ़ आयो, अऊर अशतरोत्कनम म रपाई जाति ख, अऊर हाम म जूजी जाति ख, अऊर शावे-किर्यातैम एमी जाती ख,
GEN 14:6 अऊर सेईर नाम की पहाड़ी म होरी जाति ख, हराय क ऊ एल्पारान तक जो जंगल को जवर हय, उत तक पहुंच गयो।
GEN 14:7 उत सी हि लौट क एन्मिशपात ख आयो, जो कादेश भी कहलावय हय, अऊर अमालेकी जाति को पूरो देश ख, अऊर हसासोन्तामार म रहन वाली एमोरी जाति ख भी हराय दियो।
GEN 14:8 तब सदोम, अमोरा, अदमा, सबोयीम, अऊर बेला, जो सोअर भी कहलावय हय, इन्को राजा निकल्यो, अऊर सिद्दीम नाम को घाट म, उन्को संग युद्ध लायी फैसला करयो :
GEN 14:9 यानेकि एलाम को राजा कदोर्लाओमेर, गोयीम को राजा तिदाल, शिनार को राजा अम्रापेल, अऊर एल्लासार को राजा अर्योक, इन चारयी को खिलाफ उन पाचों न युद्ध को बारे म फैसला करयो।
GEN 14:10 सिद्दीम नाम को घाट म डामर को बहुत सारो गड्डा होतो; जब सदोम अऊर अमोरा को राजा भग्यो तब उन्की सेना को बहुत सारो सिपाही उन्म गिर गयो, अऊर जो बच्यो हि पहाड़ी पर भग गयो।
GEN 14:11 तब उन्को दुश्मनों न सदोम अऊर अमोरा को पूरो सम्पत्ति अऊर भोजन की पूरी चीज ख लूट क चली गयो।
GEN 14:12 अऊर अब्राम को भतीजा लूत, जो सदोम म रहत होतो; अऊर ओकी सम्पत्ति सहित ले क हि चली गयो।
GEN 14:13 तब एक आदमी जो भग क बच निकल्यो होतो ओन जाय क इब्री अब्राम ख यो समाचार दियो; अब्राम त एमोरी मम्रे, जो एशकोल अऊर आनेर को भाऊ होतो, ओको पवित्र झाड़ को बीच म रहत होतो; अऊर हि लोग अब्राम को संग वाचा बान्ध्यो हुयो होतो।
GEN 14:14 जब अब्राम न यो सुन्यो कि ओको भतीजा बन्दी बनाय लियो गयो हय, तब अब्राम न अपनो तीन सौ अठरा युद्ध विद्या म अनुभवी, सेवकों ख ले क जो ओको कुटुम्ब म पैदा भयो होतो, अऊर हथियार ले क दान नगर तक उन्को पीछा करयो।
GEN 14:15 अऊर अब्राम न रात म अपनो सेवकों ख अलग अलग दलों म बाट दियो, अऊर अपनो सेवकों को संग दुश्मन पर हमला कर क् उन्ख मार डाल्यो अऊर होबा तक, जो दमिश्क नगर को उत्तर को तरफ हय, उत तक उन्को पीछा करयो।
GEN 14:16 ओको बाद ऊ पूरी सम्पत्ति अऊर अपनो भतीजा लूत, ख अऊर ओकी सम्पत्ति सहित अऊर बाईयों ख, अऊर सब बन्दियों ख, छुड़ाय क वापस ले आयो।
GEN 14:17 जब ऊ कदोर्लाओमेर अऊर ओको संगी राजावों ख जीत क लौट आवत होतो तब सदोम को राजा शावे नाम को घाट म, जो राजा को घाट भी कह्यो जावय हय, ओको सी भेंट करन लायी आयो।
GEN 14:18 तब शालेम को राजा मलिकिसिदक, जो परमप्रधान परमेश्वर को याजक होतो, ऊ रोटी अऊर अंगूर को रस ले आयो।
GEN 14:19 अऊर ओन अब्राम ख यो आशीर्वाद दियो, “परमप्रधान परमेश्वर को तरफ सी, जो आसमान अऊर धरती को अधिकारी हय, तय धन्य हो।
GEN 14:20 अऊर धन्य हय परमप्रधान परमेश्वर, जेन तोरो दुश्मनों ख तोरो वश म कर दियो।” तब अब्राम न ओख हर एक चिज को दसवा अंश भेंट करयो।
GEN 14:21 तब सदोम को राजा न अब्राम सी कह्यो, “आदमी ख त मोख दे, अऊर सम्पत्ति ख अपनो जवर रख।”
GEN 14:22 अब्राम न सदोम को राजा ख उत्तर दियो, “परमप्रधान प्रभु परमेश्वर, जो आसमान अऊर धरती को अधिकारी हय,
GEN 14:23 ओकी मय यो कसम खाऊ हय, कि जो कुछ तोरो हय ओको म सी मय सूत नहीं लेऊं, अऊर नहीं जूती को बन्धन, अऊर कोयी चिज नहीं लेऊं; कि तय असो नहीं कहनो पाये, कि अब्राम मोरो वजह धनी भयो।
GEN 14:24 पर जो कुछ इन जवानों न खाय लियो हय अऊर उन्को भाग, जो मोरो संग गयो होतो मतलब आनेर, एशकोल, अऊर मम्रे, मय नहीं लौटाऊं, हि त अपनो अपनो भाग रख ले।”
GEN 15:1 इन बातों को बाद प्रभु को यो वचन दर्शन म अब्राम को जवर पहुंच्यो : “हे अब्राम, मत डर; मय तोरी ढाल अऊर बड़ो प्रतिफल आय।”
GEN 15:2 अब्राम न कह्यो, “हे प्रभु यहोवा, मोरी त कोयी सन्तान नहाय, अऊर मोरो घर को वारिस यो दमिश्कवासी एलीएजेर होयेंन, बल्की तय मोख का देजो?”
GEN 15:3 अऊर अब्राम न कह्यो, “मोख त तय न सन्तान नहीं दियो, अऊर का देखू हय, कि मोरो घर म पैदा भयो एक जन मोरो वारिस होयेंन।”
GEN 15:4 तब प्रभु को यो वचन ओको जवर पहुंच्यो, “यो तोरो वारिस नहीं होयेंन, तोरो जो खुद को बेटा होयेंन, उच तोरो वारिस होयेंन।”
GEN 15:5 अऊर प्रभु न अब्राम ख बाहेर लिजाय क कह्यो, “आसमान को तरफ नजर कर क् तारा ख, तय गिन सकय हय?” तब प्रभु न अब्राम सी कह्यो, “तोरो वंश असोच होयेंन।”
GEN 15:6 अब्राम न परमेश्वर पर विश्वास करयो; अऊर परमेश्वर न अब्राम को यो विश्वास ख उन्की सच्चायी मान्यो।
GEN 15:7 अऊर परमेश्वर न अब्राम सी कह्यो, “मय उच परमेश्वर आय, जो तोख कसदियों को ऊर नगर सी बाहेर ले आयो, कि तोख यो देश को अधिकार देऊं।”
GEN 15:8 अब्राम न कह्यो, “हे परमेश्वर यहोवा, मय कसो जानु कि यो देश पर मोरो अधिकार होयेंन?”
GEN 15:9 परमेश्वर न अब्राम सी कह्यो, “मोरो लायी तीन तीन साल की एक गाय, अऊर एक शेरी, अऊर एक मेंढा, अऊर एक पण्डुक, अऊर एक कबूत्तर को बच्चा भी लाजो।”
GEN 15:10 अऊर इन पूरो ख ले क, अब्राम न बीच सी दोय टुकड़ा कर दियो अऊर टुकड़ा ख आमने सामने रख्यो पर चिड़ियां को ओन टुकड़ा नहीं करयो।
GEN 15:11 जब शिकारी पक्षी उन टुकड़ा पर झपट्यो, तब अब्राम न उन्ख उड़ाय दियो।
GEN 15:12 जब सूरज डुबन लग्यो, तब अब्राम ख गहरी नींद आय गयी; अऊर देखो, बहुत जादा डर अऊर अन्धकार ओको ऊपर आय गयो।
GEN 15:13 तब प्रभु न अब्राम सी कह्यो, “यो अच्छो सी जान ले कि तोरो वंश परायो देश म परदेशी होय क रहेंन, अऊर ऊ देश को लोगों को दास होय जायेंन; अऊर हि उन्ख चार सौ साल तक दु:ख देयेंन।
GEN 15:14 तब जो देश को हि दास होयेंन ओख मय दण्ड देऊं : अऊर ओको बाद हि बड़ो धन उत सी ले क निकल आयेंन।
GEN 15:15 तय त अपनो मरयो हुयो पूर्वजों को जवर जाजो; अऊर तोख पूरो बुढ़ापा म माटी दी जायेंन।
GEN 15:16 पर हि चौथी पीढ़ी म इत फिर आयेंन : कहालीकि अब तक एमोरी जाति को अधर्म पूरो नहीं भयो हंय।”
GEN 15:17 अऊर असो भयो कि जब सूरज डुब गयो अऊर घोर अन्धारो छाय गयो, तब एक आग भट्टी जेको म सी धुवा निकलत होतो अऊर एक जरती हुयी मशाल दिखायी दी जो उन टुकड़ा को बीच म सी होय क निकल गयी।
GEN 15:18 उच दिन परमेश्वर न अब्राम को संग यो वाचा बान्धी, “मिस्र की महा नदी सी ले क फरात नाम की बड़ी नदी तक जितनो देश हय,
GEN 15:19 मतलब केनियों, कनिज्जियों, कदमोनियों,
GEN 15:20 हित्तियों, परिज्जियों, रपाइयों
GEN 15:21 एमोरियों, कनानियों, गिर्गाशियों अऊर यबूसियों को देश, मय न तोरो वंश ख दियो हय।”
GEN 16:1 अब्राम की पत्नी सारै की कोयी सन्तान नहीं होती : अऊर ओको जवर हागार नाम की एक मिस्री दासी होती।
GEN 16:2 सारै न अब्राहम सी कह्यो, “देख, प्रभु न त मोरी कोख बन्द कर रखी हय येकोलायी मय तोरो सी बिनती करू हय कि तय मोरी दासी को जवर जा; सम्भव हय कि मोरो घर ओको द्वारा बस जाये।” सारा की यो बात अब्राम न मान ली।
GEN 16:3 येकोलायी जब अब्राम ख कनान देश म रह्यतो हुयो दस साल बीत गयो तब ओकी पत्नी सारै न अपनी मिस्री दासी हागार ख ले क अपनो पति अब्राम ख दियो, कि वा ओकी पत्नी हो।
GEN 16:4 तब अब्राम हागार को जवर गयो, अऊर वा गर्भवती भयी; जब हागार न जान्यो कि मय गर्भवती हय, तब वा अपनी स्वामिनी ख अपनी नजर म तुच्छ समझन लगी।
GEN 16:5 तब सारै न अब्राम सी कह्यो, “जो चोट मोख लगी हय ओको वजह तुम हो। मय न त अपनी दासी ख तोरी पत्नी कर दियो; पर जब ओन जान्यो कि वा गर्भवती हय, तब वा मोख तुच्छ समझन लगी, येकोलायी परमेश्वर मोरो अऊर तोरो बीच म न्याय करे।”
GEN 16:6 अब्राम न सारै सी कह्यो, “देख तोरी दासी तोरो बस म हय; जसो तोख अच्छो लगे वसोच ओको संग कर।” तब सारै हागार ख दु:ख देन लगी अऊर वा ओको आगु सी भग गयी।
GEN 16:7 तब परमेश्वर को दूत न हागार ख जंगल म शूर की रस्ता पर पानी को एक झरना को जवर पा क कह्यो,
GEN 16:8 “हे सारै की दासी हागार, तय कित सी आवय अऊर कित ख जावय हय?” ओन कह्यो, “मय अपनी स्वामिनी सारै को आगु सी भग क आयी हय।”
GEN 16:9 परमेश्वर को दूत न ओको सी कह्यो, “अपनी स्वामिनी को जवर लौट जा अऊर ओको बस म रह्य।”
GEN 16:10 अऊर परमेश्वर को दूत न ओको सी कह्यो, “मय तोरो वंश ख बहुत बढ़ाऊं, यहां तक कि बहुतायत को वजह ओकी गिनती नहीं होय सकेंन।”
GEN 16:11 अऊर परमेश्वर को दूत न ओको सी कह्यो, “देख तय गर्भवती हय, अऊर बेटा पैदा करजो; तय ओको नाम इश्माएल रखजो; कहालीकि परमेश्वर न तोरो दु:ख को हाल सुन लियो हय।
GEN 16:12 अऊर तोरो बेटा जंगली गधा को आगु, होयेंन, ओको हाथ सब को विरोध म उठेंन, अऊर सब को हाथ ओको विरोध म उठेंन; अऊर ऊ अपनो सब भाऊ-बन्धुवों को विरोध म निवास करेंन।”
GEN 16:13 तब हागार न परमेश्वर को नाम जेन ओको सी बाते करी होती, “ओको नाम देखन वालो परमेश्वर रख्यो” कहालीकि वा कहत होती, “का मय न सचमुच परमेश्वर ख देख्यो अऊर ओख देखन को बाद भी जीन्दी रही?”
GEN 16:14 यो वजह ऊ कुंवा को नाम जीन्दो आदमी को कुंवा जो मोख देखय नाम पड़्यो; ऊ त कादेश अऊर बेरेद को बीच म हंय।
GEN 16:15 हागार ख अब्राम को द्वारा एक बेटा भयो; अऊर अब्राम न अपनो बेटा को नाम, जेक हागार न जनम दियो होतो, इश्माएल रख्यो।
GEN 16:16 जब हागार न अब्राम को द्वारा इश्माएल ख जनम दियो ऊ समय अब्राम छियासी साल को होतो।
GEN 17:1 जब अब्राम निन्यानवे साल को भय गयो, तब प्रभु न ओख दर्शन दे क कह्यो, “मय सर्वशक्तिमान परमेश्वर आय; मोरी उपस्थिति म रह्य क निर्दोष आचरन करन की कोशिश कर।
GEN 17:2 मय तोरो संग वाचा बान्धूं, अऊर तोरो वंश ख बहुत जादा बढ़ाऊं।”
GEN 17:3 तब अब्राम मुंह को बल गिरयो : अऊर परमेश्वर ओको सी यो बाते करतो गयो,
GEN 17:4 “देख, मोरी वाचा तोरो संग बंधी रहेंन, येकोलायी तय कुछ राष्ट्रों को बुजूर्ग बनजो।
GEN 17:5 येकोलायी अब सी तोरो नाम अब्राम नहीं रहेंन पर तोरो नाम अब्राहम होयेंन; कहालीकि मय न तोख कुछ राष्ट्रों को बुजूर्ग बनायो हय।
GEN 17:6 मय तोख बहुत जादा वंशज देऊं, अऊर ओको म सी कुछ राजा होयेंन। अऊर तोरो जवर इतनो वंशज होयेंन कि हि राष्ट्र बन जायेंन।
GEN 17:7 “अऊर मय तोरो संग, अऊर तोरो बाद तोरो वंश की पीढ़ी को संग हमेशा लायी अपनो विधान स्थापित करू हय कि मय तोरो अऊर तोरो बाद तोरो वंश को परमेश्वर रहूं।
GEN 17:8 अऊर मय तोख, अऊर तोरो बाद तोरो वंश ख भी, यो पूरो कनान देश, जेको म तय परदेशी होय क रह्य हय, यो रीति सी देऊं कि वा हमेशा हमेशा उन्की अपनी जमीन रहेंन, अऊर मय उन्को परमेश्वर रहूं।”
GEN 17:9 तब परमेश्वर न अब्राहम सी कह्यो, “तय भी मोरो संग बान्धी हुयी वाचा को पालन करजो; तय अऊर तोरो बाद तोरो वंश भी अपनी अपनी पीढ़ी म ओको पालन करे।
GEN 17:10 मोरो संग बान्धी हुयी वाचा, जेको पालन तोख अऊर तोरो बाद तोरो वंश ख करनो पड़ेंन, ऊ यो आय : तुम म सी एक एक आदमी को खतना हो।
GEN 17:11 तुम अपनो अपनो बच्चा को खतना कराय लेवो : जो वाचा मोरो अऊर तुम्हरो बीच म हय, ओको योच चिन्ह होयेंन।
GEN 17:12 तुम्हरो हर एक बच्चा को खतना ओको जनम को आठवों दिन करयो जाये, हर एक पीढ़ी को आदमी को खतना होनो चाहिये, चाहे ऊ तुम्हरो घर म पैदा भयो दास हो, या विदेशियों सी धन दे क खरीद्यो गयो हो, जो तोरो वंश को नोहोय।
GEN 17:13 जो तोरो घर म पैदा भयो दास हय, अऊर जो धन दे क खरीद्यो गयो हय, इन दोयी को खतना करयो जाये। यो तरह मोरी वाचा जेको चिन्ह तुम्हरो शरीर पर होयेंन, अऊर यो वाचा हमेशा हमेशा बनी रहेंन।
GEN 17:14 जो आदमी खतनारहित रहे, मतलब जेको बच्चा को खतना नहीं करयो गयो हय, उच अपनो लोगों म सी नाश करयो जाये, कहालीकि ओन मोरो संग बान्धी हुयी वाचा ख तोड़ दियो।”
GEN 17:15 तब परमेश्वर न अब्राहम सी कह्यो, “तोरी जो पत्नी सारै हय, ओख तय अब सारै मत कहजो, ओको नाम सारा होयेंन।
GEN 17:16 मय ओख आशीष देऊं, अऊर तोख ओको द्वारा एक बेटा देऊं; अऊर मय ओख असी आशीष देऊं, कि वा जाति जाति की माय बनेंन; अऊर ओको वंश म राज्य राज्य को राजा पैदा होयेंन।”
GEN 17:17 तब अब्राहम मुंह को बल गिर पड़्यो अऊर हस्यो, अऊर मन मच कहन लग्यो, “का सौ साल को होनो पर भी सन्तान होय सकय हय? अऊर का नब्बे साल की सारा गर्भवती होय सकय हय?”
GEN 17:18 अऊर अब्राहम न परमेश्वर सी कह्यो, “इश्माएल तोरी नजर म बन्यो रहे, योच बहुत हय।”
GEN 17:19 तब परमेश्वर न कह्यो, “निश्चय तोरी पत्नी सारा ख तोरो सी एक बेटा पैदा होयेंन; अऊर तय ओको नाम इसहाक रखजो; अऊर मय ओको संग असी वाचा बान्धूं जो ओको बाद ओको वंश लायी हमेशा हमेशा की वाचा होयेंन।
GEN 17:20 इश्माएल को बारे म भी मय न तोरी सुनी हय; मय ओख भी आशीष देऊं, अऊर ओख कुछ बच्चा अऊर कुछ वंशज देऊं; अऊर ऊ बारा राजकुमारों को बाप होयेंन, अऊर मय ओको वंशजों को एक महान राष्ट्र बनाऊं।
GEN 17:21 पर मय अपनी वाचा इसहाक को संगच बान्धूं जो सारा सी अगलो साल को योच ठहरायो हुयो समय म पैदा होयेंन।”
GEN 17:22 तब परमेश्वर न अब्राहम सी बाते करनो बन्द करी अऊर ओको जवर सी ऊपर चढ़ गयो।
GEN 17:23 तब अब्राहम न अपनो बेटा इश्माएल ख लियो अऊर, अपनो घर म पैदा भयो दासों, अऊर जितनो ओको रुपया सी खरीद्यो गयो दासों सहित, मतलब ओको घर म जितनो आदमी होतो, उन पूरो ख ले क उच दिन परमेश्वर को वचन को अनुसार उन्को खतना करयो।
GEN 17:24 जब अब्राहम को खतना करयो गयो तब ऊ निन्यानवे साल को होतो
GEN 17:25 अऊर जब अब्राहम को बेटा इश्माएल को खतना करयो गयो तब ऊ तेरह साल को होतो।
GEN 17:26 अब्राहम अऊर ओको बेटा इश्माएल दोयी को खतना एकच दिन भयो।
GEN 17:27 अऊर अब्राहम को घर म जितनो आदमी अऊर दास होतो जो घर म पैदा भयो होतो, अऊर जो विदेशियों सी खरीद्यो गयो होतो, सब को खतना ओकोच हाथ सी भयो।
GEN 18:1 अब्राहम मम्रे को पवित्र झाड़ों को बीच कड़ी तपन को समय तम्बू को दरवाजा पर बैठ्यो हुयो होतो, तब परमेश्वर न ओख दर्शन दियो :
GEN 18:2 अब्राहम न आंखी ऊपर उठाय क देख्यो कि ओको आगु तीन आदमी खड़ो हंय। जब अब्राहम न उन्ख देख्यो तब ऊ उन्को सी भेंट करन लायी तम्बू को दरवाजा सी दौड़ क आयो, अऊर जमीन पर झुक क उन्ख नमस्कार करयो,
GEN 18:3 अऊर अब्राहम न कह्यो, “हे प्रभु, यदि मोरो पर तोरी अनुग्रह की नजर हय त मय बिनती करू हय, कि अपनो दास को जवर सी चली मत जाजो।
GEN 18:4 मय थोड़ो सो पानी लाऊ हय अऊर तय अपनो पाय धोय क यो झाड़ को खल्लो आराम कर।
GEN 18:5 तब मय एक टुकड़ा रोटी ले आऊं, अऊर तय ओख खाय क अपनो जीव ख सन्तुष्ट कर; तब ओको बाद तय आगु चली जाजो, कहालीकि तय अपनो दास को जवर आयो हंय।” उन्न कह्यो, “जसो तय कह्य हय वसोच कर।”
GEN 18:6 तब अब्राहम जल्दी सी तम्बू म सारा को जवर गयो अऊर कह्यो, “जल्दीच दस किलो मैदा ले क ओख सान अऊर ओकी रोटी बनाय लेवो।”
GEN 18:7 तब अब्राहम गाय बईल को झुण्ड म दौड़्यो, अऊर एक कवलो अऊर अच्छो बछड़ा ले क अपनो दास ख दियो, अऊर ओन जल्दी सी ओख पकायो।
GEN 18:8 तब अब्राहम न दूध, अऊर दही, अऊर बछड़ा को पकायो हुयो मांस, आदमियों को आगु परोस दियो; तब तक हि जेवन करतो रह्यो, अऊर अब्राहम उन्को जवर झाड़ को खल्लो खड़ो रह्यो।
GEN 18:9 उन्न अब्राहम सी पुच्छ्यो, “तोरी पत्नी सारा कित हय?” अब्राहम न उत्तर दियो, “वा त तम्बू म हंय।”
GEN 18:10 उन्म सी एक न कह्यो, “मय अब सी नव महीना बाद वापस आऊं, अऊर तोरी पत्नी सारा ख एक बेटा पैदा होयेंन।” सारा जो अब्राहम को पीछू खड़ी होती, तम्बू को दरवाजा सी उन्की बातचीत सुन रही होती।
GEN 18:11 अब्राहम अऊर सारा बहुत बूढ्ढा भय गयो होतो, अऊर सारा को मासिक धर्म बन्द भय गयो होतो।
GEN 18:12 येकोलायी सारा अपनो मन म हस क बोली, “मय बूढ्ढी होय गयी हय, अऊर मोरो पति भी बूढ्ढा हय, का येको बाद भी मोख सहवास को आनन्द हासिल होयेंन?”
GEN 18:13 जब यहोवा न अब्राहम सी कह्यो, “सारा यो कह्य क कहाली हसी, का मय बूढ्ढी होय जाऊं तब भी का एक बेटा ख जनम देऊं?
GEN 18:14 का यहोवा लायी कोयी काम कठिन हय? जसो कि मय न कह्यो, अब सी नव महीना बाद फिर मय तोरो जवर आऊं, अऊर सारा ख एक बेटा होयेंन।”
GEN 18:15 तब सारा डर को मारे यो कह्य क मुकर गयी, “मय नहीं हसी।” यहोवा न कह्यो, “नहीं, तय जरूर हसी होती।”
GEN 18:16 तब हि आदमी वहां सी चली गयो, उत सी हि सदोम को तरफ देख सकत होतो; अऊर अब्राहम उन्को संग उन्ख उन्की रस्ता पर भेजन लायी संग गयो।
GEN 18:17 अऊर यहोवा न अपनो आप सी कह्यो, “मय अब्राहम सी नहीं छुपाऊं कि मय का करन जाय रह्यो हय?
GEN 18:18 अब्राहम सी त निश्चय एक महान अऊर शक्तिशाली राष्ट्र बनेंन, अऊर धरती को पूरो राष्ट्र ओको द्वारा मोरो सी आशीष पायेंन।
GEN 18:19 कहालीकि मय जानु हय, कि ऊ अपनो बेटां अऊर वंशजों ख जो ओको पीछू रह्य जायेंन, आज्ञा देयेंन कि हि परमेश्वर की रस्ता म चलतो रहे, अऊर जो सच्चो अऊर न्याय पूर्ण करतो रहे, ताकि जो कुछ परमेश्वर न अब्राहम को बारे म कह्यो हय ओख पूरो करे।”
GEN 18:20 तब परमेश्वर न कह्यो, “सदोम अऊर अमोरा नगर को खिलाफ भयानक आरोप हंय, अऊर उन्को पाप बहुत भारी होय गयो हय;
GEN 18:21 येकोलायी मय उतर क देखूं, कि ओको जसो भयानक आरोप मोरो कान तक पहुंच्यो हय, उन्न ठीक वसोच काम करयो हय कि नहीं; अऊर नहीं करयो होना त मय ओख जान लेऊं।”
GEN 18:22 तब हि आदमी उत सी मुड़ क सदोम को तरफ जान लग्यो; पर अब्राहम परमेश्वर को आगु खड़ो रह्य गयो।
GEN 18:23 तब अब्राहम न परमेश्वर को जवर आय क कह्यो, “का तय सचमुच दुष्ट को संग निर्दोष ख भी नाश करजो?
GEN 18:24 अगर ऊ नगर म पचास निर्दोष लोग हंय, त का तय सचमुच पूरो नगर ख नाश कर देजो, अऊर पचास निर्दोष को वजह ओख माफ नहीं करजो, जो ओको म हंय?
GEN 18:25 यो तरह को काम करनो तोरो सी दूर रहे कि दुष्ट को संग निर्दोष ख भी मार डाले अऊर निर्दोष अऊर दुष्ट दोयी की एकच दशा हो। यो तोरो सी दूर रहे। का पूरी धरती को न्यायी न्याय नहीं करेंन?”
GEN 18:26 परमेश्वर न कह्यो, “यदि मोख सदोम नगर म पचास निर्दोष लोग मिले, त उन्को वजह मय पूरो नगर ख छोड़ देऊं।”
GEN 18:27 तब अब्राहम न कह्यो, “हे परमेश्वर, सुन मय त माटी अऊर राख आय; तब भी मय न इतनी हिम्मत करी कि तोरो सी बाते करूं।
GEN 18:28 लेकिन शायद उन पचास निर्दोष म पाच कम होय जाये; त का तय पाच को कम होय जानो को वजह ऊ पूरो नगर को नाश कर देजो?” परमेश्वर न उत्तर दियो, “यदि मय पैतालीस निर्दोष लोग भी मिलेंन, तब मय नगर ख नाश नहीं करूं।”
GEN 18:29 अब्राहम न फिर कह्यो, “शायद उत चालीस मिले।” तब परमेश्वर न उत्तर दियो, “अगर चालीस हंय त मय ओख नाश नहीं करूं।”
GEN 18:30 अब्राहम न फिर सी कह्यो, “हे परमेश्वर गुस्सा मत हो, त मय फिर सी कहू हय, यदि केवल उत तीस हंय, त का होयेंन।” परमेश्वर न उत्तर दियो; “यदि मोख उत तीस भी मिलेंन, तब भी मय असो नहीं करूं।”
GEN 18:31 तब अब्राहम न कह्यो, “हे परमेश्वर, सुन, मय न इतनी हिम्मत त करी हय कि तोरो सी बात करूं : मान ले कि ओको म बीस निर्दोष मिले।” परमेश्वर न कह्यो, “अगर मय बीस ख पाऊ हय त मय नगर ख नाश नहीं करूं।”
GEN 18:32 अब्राहम न कह्यो, “हे परमेश्वर, गुस्सा मत हो, अऊर मय केवल एकच बार अऊर कहूं : यदि केवल दस मिले त का होयेंन।” परमेश्वर न उत्तर दियो, “अगर दस हंय त मय ओख नाश नहीं करूं।”
GEN 18:33 अब्राहम को संग बोलन को बाद, परमेश्वर चली गयो अऊर अब्राहम अपनो घर ख लौट गयो।
GEN 19:1 शाम को समय जब दोय स्वर्गदूत सदोम नगर म आयो; त लूत सदोम नगर की फाटक को जवर बैठ्यो होतो। त लूत स्वर्गदूत ख देख क उन्को सी मुलाखात करन लायी उठ्यो, अऊर मुंह को बल झुक क नमस्कार कर क् कह्यो,
GEN 19:2 “हे मोरो प्रभुवों, मय तुम्हरो सी बिनती करू हय, तुम अपनो दास को घर म पधारो, अऊर अपनो पाय धोवो, अऊर रात इतच बिताबो, अऊर सुबेरे उठ क अपनी रस्ता पर जावो।” लेकिन उन्न उत्तर दियो, “नहीं, हम इतच नगर को चौक म रात बितायबो।”
GEN 19:3 अऊर लूत न स्वर्गदूतों सी बहुत बिनती कर क् उन्ख मनायो; येकोलायी हि ओको संग चल क ओको घर म आयो; अऊर ओन स्वर्गदूतों लायी अपनो दासों ख कुछ रोटी सेकन अऊर जेवन तैयार करन की आज्ञा दियो, जब पूरो जेवन तैयार भय गयो, त उन्न खाय लियो।
GEN 19:4 उन्को सोय जान को पहिले, सदोम नगर को आदमियों न, जवानों सी ले क बूढ्ढा तक, बल्की चारयी तरफ को सब लोगों न आय क ऊ घर ख घेर लियो;
GEN 19:5 अऊर लूत ख पुकार क कहन लग्यो, “जो आदमी अज रात ख तोरो जवर आयो हंय हि कित हंय? उन्ख हमरो जवर बाहेर ले आव, कि हम उन्को संग संभोग करे।”
GEN 19:6 तब लूत दरवाजा सी निकल क उन्को जवर आयो, अऊर दरवाजा ख अपनो पीछू बन्द कर क् उन्को सी कह्यो,
GEN 19:7 “हे मोरो भाऊवों, मय तुम्हरो सी बिनती करू हय, असी बुरी बात मत करो।
GEN 19:8 देखो, मोरी दोय बेटियां हंय जो अब तक कुंवारी हंय, मोख उन्ख तुम्हरो जवर लावन देवो, अऊर तुम जसो चाहवय हय वसोच उन्को संग व्यवहार करो : लेकिन इन लोगों लायी कुछ भी मत करो; हि मोरो घर म मिजवान हय, अऊर मोख इन की मदत करनो हंय।”
GEN 19:9 उन्न कह्यो, “हट जा!” तब हि कहन लग्यो, “तय एक परदेशी होय क यहां रहन लायी आयो पर अब तय सच्चो भी बन बैठ्यो हय; येकोलायी अब हम उन्को सी भी जादा तोरो संग बुरो व्यवहार करबो।” अऊर उन्न लूत ख पीछू ढकल दियो अऊर दरवाजा तोड़न लायी जवर आयो।
GEN 19:10 तब उन दूतों न हाथ बढ़ाय क लूत ख अपनो जवर घर म खीच लियो, अऊर दरवाजा ख बन्द कर दियो।
GEN 19:11 अऊर उन्न का छोटो, का बड़ो, सब आदमियों ख जो घर को दरवाजा पर होतो अन्धा कर दियो, तब हि दरवाजा ख ढूंढतो ढूंढतो थक गयो।
GEN 19:12 तब दोय दूत न लूत सी कह्यो, “अगर तोरो यहां कोयी अऊर हय? बेटा, बेटियां, जवायी, या नगर म रहन वालो कोयी दूसरो रिश्तेदार, त उन पूरो ख ले क यो जागा सी निकल जा।
GEN 19:13 कहालीकि हम यो जागा ख नाश करन जाय रह्यो हंय। येकोलायी कि परमेश्वर न इन लोगों को खिलाफ भयानक आरोपों ख सुन्यो हय अऊर हम्ख सदोम ख नाश करन लायी भेज्यो हय।”
GEN 19:14 तब लूत घर सी निकल क अपनो जवायियों को जवर गयो, जो ओकी बेटियां सी बिहाव करन वालो होतो, त लूत न उन्को सी कह्यो, “उठो, अऊर यो जागा सी निकल चलो; कहालीकि परमेश्वर यो नगर ख नाश करन वालो हय।” पर लूत को जवायियों न समझ्यो कि ऊ उन्को सी मजाक कर रह्यो हय।
GEN 19:15 जब सुबेरे भयी तब स्वर्गदूतों न लूत सी जल्दी करन ख कह्यो अऊर बोल्यो, “उठो, अऊर अपनी पत्नी अऊर दोयी बेटियां ख जो यहां हंय इन्क ले क बाहेर निकल जावो : नहीं त तुम भी यो नगर को अधर्म को दण्ड म भस्म होय जावो।”
GEN 19:16 पर ऊ देर करतो रह्यो, तब स्वर्गदूत न ओको अऊर ओकी पत्नी, अऊर दोयी बेटियों को हाथ पकड़ क उन्ख नगर सी बाहेर लिजायो : कहालीकि परमेश्वर की दया लूत पर होती।
GEN 19:17 तब स्वर्गदूतों न उन्ख नगर को बाहेर निकाल क, उन्को सी कह्यो, “अपनो जीवन लायी भगो! अऊर पीछू मुड़ क मत देखो, अऊर घाटी म मत रुको। पहाड़ियों पर भगो, नहीं त तुम भी भस्म होय जावो।”
GEN 19:18 लूत न उन्को सी कह्यो, “हे प्रभु, कृपया असो मत कर!
GEN 19:19 देख, तोरो दास पर तोरी अनुग्रह की नजर भयी हय, अऊर तय न येको म बड़ी कृपा दिखायी, कि मोरो जीव ख बचायो हय; पर मय पहाड़ी पर भग नहीं सकू, कहीं असो नहीं होय, कि कोयी दुर्घटना मोरो संग होय जाये, अऊर मय मर जाऊं।
GEN 19:20 देख, ऊ नगर असो जवर हय कि मय उत भग सकू हय, अऊर ऊ छोटो भी हय। मोख उतच भग जान दे, का ऊ नगर छोटो नहाय? अऊर मोरो जीव बच जायेंन।”
GEN 19:21 स्वर्गदूत न लूत सी कह्यो, “देख, मय न यो बारे म भी तोरी बिनती स्वीकार करी हय, कि जो नगर की चर्चा तय न करी हय, ओख मय नाश नहीं करूं।
GEN 19:22 फुर्ती सी उत भग जा; कहालीकि जब तक तय उत नहीं पहुंच जाजो तब तक मय कुछ नहीं कर सकूं।” योच वजह ऊ नगर को नाम सोअर पड़्यो।
GEN 19:23 जब लूत सोअर नगर को जवर पहुंच्यो, तब धरती पर सूरज उदय भयो।
GEN 19:24 तब परमेश्वर न अपनो तरफ सी सदोम अऊर अमोरा पर आसमान सी गन्धक अऊर आगी बरसायी;
GEN 19:25 अऊर ओन उन नगरों अऊर पूरी घाटी ख, अऊर नगरों को सब निवासियों ख, अऊर जमीन की पूरी उपज समेत नाश कर दियो।
GEN 19:26 लूत की पत्नी जो ओको पीछू होती, ओन पीछू मुड़ क देख्यो, अऊर वा नमक को खम्बा बन गयी।
GEN 19:27 अब्राहम सुबेरे उठ क ऊ जागा पर गयो, जित ऊ पहिले परमेश्वर को जवर खड़ो होतो;
GEN 19:28 ओन सदोम, अमोरा, अऊर ऊ घाटी को पूरो देश को तरफ नजर करी अऊर देख्यो कि धधकती हुयी भट्टी को जसो धुवा जमीन सी निकल क ऊपर जाय रह्यो हय।
GEN 19:29 अऊर असो भयो कि जब परमेश्वर न ऊ घाटी को नगरों ख नाश करयो, तब ओख अब्राहम की याद आयी, जब ओन उन नगरों ख उलट पुलट कर दियो, जित लूत रहत होतो, तब विनाश को बीच म सी लूत ख ऊ घटना सी बचाय लियो।
GEN 19:30 लूत न सोअर नगर ख छोड़ दियो, अऊर पहाड़ी पर अपनी दोयी बेटी को संग रहन लग्यो; कहालीकि ऊ सोअर म रहन सी डरत होतो; येकोलायी लूत अऊर ओकी दोयी बेटी पहाड़ी पर एक गुफा म रहन लग्यो।
GEN 19:31 तब बड़ी बेटी न अपनी छोटी बहिन सी कह्यो, “हमरो बाप बूढ्ढा हय, अऊर हमरो सी बिहाव करन लायी पूरी धरती भर म कोयी असो आदमी नहाय जो जगत की रीति रिवाज को अनुसार हमरो जवर आये अऊर हम सन्तान पैदा कर सके।
GEN 19:32 येकोलायी आव, हम अपनो बाप ख अंगूर रस पिलाय क, ओको संग सोयबो, जेको सी कि हम अपनो बाप को वंश ख बचायो रखबो।”
GEN 19:33 दोयी बेटी न ऊ रात अपनो बाप ख अंगूर रस पिलायो, अऊर तब बड़ी बेटी जाय क अपनो बाप को संग सोय गयी; पर ओको बाप ख पता नहीं चल्यो, कि वा कब आय क सोयी, अऊर कब उठ क चली गयी।
GEN 19:34 दूसरो दिन बड़ी बेटी न अपनी छोटी बहिन सी कह्यो, “देख, मय कल रात बाप को संग सोयी होती; येकोलायी अज भी रात ख अपनो बाप ख अंगूर रस पिलायबो; तब तय जाय क ओको संग सोय जाजो, कि हम अपनो बाप को द्वारा वंश पैदा करबो।”
GEN 19:35 येकोलायी ऊ रात उन्न अपनो बाप ख अंगूर रस पिलायो, अऊर छोटी बेटी जाय क ओको संग सोय गयी; पर ओको बाप ख पता नहीं चल्यो, कि वा कब आय क सोयी, अऊर कब उठ क चली गयी।
GEN 19:36 यो तरह लूत की दोयी बेटी अपनो बाप सी गर्भवती भयी।
GEN 19:37 बड़ी बेटी ख एक बेटा पैदा भयो, ओन ओको नाम मोआब रख्यो; ऊ अज तक मोआबी जाति को पूर्वज मान्यो जावय हय।
GEN 19:38 अऊर छोटी बेटी ख भी एक बेटा पैदा भयो, ओन ओको नाम बेनम्मी रख्यो; ऊ अज तक अम्मोनी जाति को पूर्वज मान्यो जावय हय।
GEN 20:1 तब अब्राहम उत सी निकल क कनान को दक्षिन देश म आय क कादेश अऊर शूर को बीच म ठहरयो, अऊर गरार नगर म रहन लग्यो।
GEN 20:2 अऊर अब्राहम न अपनी पत्नी सारा को बारे म कहन लग्यो, “वा मोरी बहिन आय,” येकोलायी गरार नगर को राजा अबीमेलेक न दूत भेज क सारा ख अपनो पास बुलाय लियो।
GEN 20:3 पर रात ख परमेश्वर न सपनो म अबीमेलेक को जवर आय क कह्यो, “सुन, जो बाई ख तय न रख लियो हय, ओको वजह तय मर जाजो, कहालीकि वा सुहागिन हय।”
GEN 20:4 पर अबीमेलेक अब तक सारा को जवर नहीं गयो होतो; येकोलायी ओन कह्यो, “हे परमेश्वर, मय निर्दोष हय? का तय मोख अऊर मोरो लोगों ख भी नाश कर देजो?
GEN 20:5 का अब्राहम न खुद मोरो सी नहीं कह्यो होतो, ‘वा मोरी बहिन आय?’ अऊर वा बाई न भी खुद कह्यो होतो, ‘कि यो मोरो भाऊ आय,’ मय न त अपनो मन की खराई अऊर अपनो व्यवहार की सच्चायी सी यो काम करयो हय।”
GEN 20:6 परमेश्वर न ओको सी सपनो म कह्यो, “हव, मय भी जानु हय कि तय न अपनो मन की खराई सी यो काम करयो हय अऊर मय न तोख रोक क भी रख्यो कि तय मोरो खिलाफ पाप मत करे; योच वजह मय न तोख ओख छूवन नहीं दियो।
GEN 20:7 येकोलायी तय वा बाई ख ओको पति ख वापस दे दे; कहालीकि ऊ एक भविष्यवक्ता आय, अऊर ऊ तोरो लायी प्रार्थना करेंन, ताकि तय जीन्दो रह्यजो, अगर तय ओख वापस नहीं देवय हंय, त मय तोख चेतावनी देऊ हय कि तय अऊर तोरो नगर को पूरो लोग मर जायेंन।”
GEN 20:8 दूसरो दिन अबीमेलेक न सुबेरे जल्दी उठ क अपनो सब अधिकारियों ख बुलाय क यो सब बाते बतायी; अऊर हि लोग बहुत डर गयो।
GEN 20:9 तब अबीमेलेक अब्राहम ख बुलाय क कह्यो, “तय न हमरो संग यो का करयो हय? अऊर मय न तोरो का बिगाड़्यो होतो कि तय न मोरो अऊर मोरो राज्य को ऊपर असो बड़ो पाप डाल दियो हय? तय न मोरो संग जो व्यवहार करयो हय ऊ तोख नहीं करनो होतो।”
GEN 20:10 तब अबीमेलेक न अब्राहम सी पुच्छ्यो, “तय न का समझ क असो काम करयो?”
GEN 20:11 अब्राहम न कह्यो, “मय न यो सोच्यो होतो कि यो जागा म परमेश्वर को कुछ भी डर नहीं होयेंन; येकोलायी हि लोग मोख मोरी पत्नी को वजह मार डालेंन।
GEN 20:12 वा वास्तव म सचमुच मोरी बहिन आय, वा मोरो बाप की बेटी त आय, लेकिन मोरी माय की नहीं, तब वा मोरी पत्नी होय गयी।
GEN 20:13 अऊर असो भयो कि जब परमेश्वर न मोख अपनो बाप को घर छोड़ क निकलन कि आज्ञा दी, तब मय न ओको सी कह्यो, ‘इतनी कृपा तोख मोरो पर करनो होना कि हम दोयी जित जित जाबो उत उत तय मोरो बारे म कह्यजो कि यो मोरो भाऊ आय।’”
GEN 20:14 अब अबीमेलेक न शेरी मेंढी, गाय बईल, अऊर दास दासी अब्राहम ख भेंट दे दियो, अऊर ओकी पत्नी सारा भी ओख वापस कर दियो।
GEN 20:15 अऊर अबीमेलेक न कह्यो, “देख, मोरो देश तोरो आगु हय; जो जागा तोरी नजर म अच्छी लगे, उत तय रह्य सकय हय।”
GEN 20:16 अऊर सारा सी अबीमेलेक न कह्यो, “देख, मय न तोरो भाऊ ख एक हजार चांदी को सिक्का दियो हंय। जो लोग तोरो संग हंय, उन सब लोगों की नजर म तय निर्दोष हंय; अऊर सब लोगों ख पता चल जायेंन कि तय न कोयी गलत काम नहीं करयो हय।”
GEN 20:17 तब अब्राहम न परमेश्वर सी प्रार्थना करी, अऊर परमेश्वर न अबीमेलेक, अऊर ओकी पत्नी अऊर दासियों ख चंगो करयो, अऊर हि फिर सी सन्तान पैदा करन लगी।
GEN 20:18 कहालीकि परमेश्वर न अब्राहम की पत्नी सारा को वजह अबीमेलेक को घर की सब बाईयों की कोखों ख पूरी रीति सी बन्द कर दियो होतो।
GEN 21:1 परमेश्वर न सारा ख आशीर्वाद दियो, जसो ओन वादा करयो होतो।
GEN 21:2 अऊर सारा अब्राहम सी गर्भवती भयी; अऊर जब ऊ बूढ्ढा भय गयो त अब्राहम ख एक बेटा पैदा भयो। बेटा ठहरायो समय पर पैदा भयो होतो जब परमेश्वर न कह्यो होतो कि ऊ पैदा होयेंन।
GEN 21:3 अब्राहम न अपनो ऊ बेटा को नाम जो सारा सी पैदा भयो होतो इसहाक रख्यो।
GEN 21:4 अऊर जब इसहाक आठ दिन को भयो, तब अब्राहम न ओको खतना करयो, जसो परमेश्वर न आज्ञा दियो होतो।
GEN 21:5 अपनो बेटा इसहाक को जनम को समय अब्राहम सौ साल को होतो।
GEN 21:6 अऊर सारा न कह्यो, “परमेश्वर न मोख खुशी अऊर हसी दी हंय; येकोलायी जो कोयी येको बारे म सुनय हय ऊ मोरो संग हसेंन।”
GEN 21:7 तब ओन कह्यो, “अब्राहम सी कौन कह्यो होना, कि सारा बच्चां ख दूध पिलायेंन? तब भी मय न अब्राहम ख ओको बुढ़ापा म बेटा ख जनम दियो।”
GEN 21:8 अऊर ऊ बच्चा बड़ो भयो, अऊर ओको दूध छुड़ायो गयो; जो दिन इसहाक को दूध छुड़ायो गयो, ऊ दिन अब्राहम न एक बहुत अच्छो जेवन दियो।
GEN 21:9 एक दिन सारा न मिस्री हाजिरा को बेटा ख, जेक हाजिरा न अब्राहम सी पैदा करयो होतो, सारा न अपनो बेटा इसहाक को संग खेलतो देख्यो।
GEN 21:10 यो वजह सारा न अब्राहम सी कह्यो, “या दासी ख बेटा सहित निकाल दे : कहालीकि या दासी को बेटा मोरो बेटा इसहाक को संग उत्तराधिकारी नहीं बनेंन।”
GEN 21:11 अपनो बेटा इश्माएल को सम्बन्ध म असी बात अब्राहम ख बहुत बुरी लगी।
GEN 21:12 तब परमेश्वर न अब्राहम सी कह्यो, “तय बच्चा अऊर अपनी दासी को वजह बुरो मत मान; जो बात सारा तोरो सी कह्य हय, ओख सुन, कहालीकि इसहाक द्वारा तोरो वंशजों म तोरो नाम बन्यो रहेंन।
GEN 21:13 मय दासी को बेटा सी एक राष्ट्र पैदा करूं; कहालीकि ऊ तोरी सन्तान हय।”
GEN 21:14 येकोलायी अब्राहम न सुबेरे जल्दी उठ क रोटी अऊर पानी सी भरी चमड़ा की झोली भी हाजिरा ख दी, अऊर ओख हाजिरा को बख्खा पर रख दियो, अऊर बच्चा सहित ओख बिदा कर दियो, हाजिरा चली गयी, अऊर बेर्शेबा को जंगल म भटकन लगी।
GEN 21:15 जब झोली को पानी खतम होय गयो, तब ओन बच्चा ख एक झाड़ी को खल्लो छोड़ दियो।
GEN 21:16 अऊर लगभग सौ मीटर दूर जाय क बैठ गयी; ओन खुद सी कह्यो, “मय अपनो बच्चा ख मरतो हुयो नहीं देख सकू।” जब वा ओको आगु दूर बैठी तब बच्चा जोर जोर सी रोवन लग्यो।
GEN 21:17 परमेश्वर न बच्चा की रोवन की आवाज सुनी; अऊर परमेश्वर को दूत न स्वर्ग सी हाजिरा ख पुकारयो अऊर ओको सी कह्यो, “हे हाजिरा, तोख का भयो हय? मत डर, कहालीकि जित तोरो बच्चा पड़्यो हय उत सी परमेश्वर न ओकी आवाज सुनी हय।
GEN 21:18 उठ, अऊर अपनो बच्चा ख उठाव अऊर ओख अपनो हाथों म सावधानी सी सम्भाल; कहालीकि मय ओको वंशजों म सी एक महान राष्ट्र बनाऊं।”
GEN 21:19 तब परमेश्वर न ओकी आंखी खोल दी, अऊर ओख एक कुंवा दिखायी दियो; तब वा ओको जवर गयी, अऊर झोली म पानी भर क बच्चा ख पिलायी।
GEN 21:20 अऊर परमेश्वर बच्चा को जवर होतो; अऊर जब ऊ बड़ो होतो गयो, तब ऊ सुनसान जागा म रह्यतो रह्यतो धनुर्धारी बन गयो।
GEN 21:21 ऊ पारान नाम को जंगल म रहत होतो; अऊर ओकी माय न ओको लायी मिस्र देश सी एक लड़की मंगवायी।
GEN 21:22 उन दिनों म असो भयो कि अबीमेलेक अपनो सेनापति पीकोल ख संग ले क अब्राहम सी कहन लग्यो, “जो कुछ तय करय हय ऊ काम म परमेश्वर तोरो संग रह्य हय।
GEN 21:23 येकोलायी अब मोरो सी इत यो बारे म परमेश्वर की कसम खा कि तय न मोरो सी, अऊर न मोरी सन्तान सी अऊर न मोरो वंश सी छल कपट करजो, पर जसो मय न तोरो संग प्रेम को व्यवहार करयो हय, वसोच तय मोरो पर अऊर यो देश को संग जित तय रह्य हंय, वसोच व्यवहार करजो।”
GEN 21:24 अब्राहम न कह्यो, “मय कसम खाऊ हय।”
GEN 21:25 पर जब अब्राहम न अपनो एक कुंवा को बारे म अबीमेलेक सी शिकायत करी, जेको पर अबीमेलेक को दासों न कब्जा कर लियो होतो।
GEN 21:26 तब अबीमेलेक न कह्यो, “मय नहीं जानु कि कौन यो काम करयो हय; अऊर तय न भी मोख नहीं बतायो, अऊर मय न अज तक येको बारे म सुन्यो भी नहीं होतो।”
GEN 21:27 तब अब्राहम न शेरी मेंढी, अऊर गाय बईल अबीमेलेक ख भेंट दियो; अऊर उन दिनों न आपस म वाचा बान्धी।
GEN 21:28 अब्राहम न मेंढी को सात बच्चा ख झुण्ड सी अलग रख्यो।
GEN 21:29 तब अबीमेलेक न अब्राहम सी पुच्छ्यो, “इन सात मेंढी को बच्चा ख, जिन्ख तय न अलग रख्यो हय, का मतलब हय?”
GEN 21:30 अब्राहम न उत्तर दियो, “तय मोरो हाथ सी इन सात मेंढी को बच्चा ख स्वीकार करजो कि तय मोरो गवाह बनजो कि मय नच यो कुंवा खुदवायो होतो।”
GEN 21:31 उत उन दोयी न कसम खायी, येकोलायी ऊ जागा को नाम बेर्शेबा पड़्यो।
GEN 21:32 जब उन्न बेर्शेबा म यो वाचा बान्धी, तब अबीमेलेक अऊर ओको सेनापति पीकोल, उठ क पलिश्तियों को देश म लौट गयो।
GEN 21:33 तब अब्राहम न बेर्शेबा म झाऊ को एक झाड़ लगायो, अऊर परमेश्वर की आराधना करी।
GEN 21:34 अऊर अब्राहम लम्बो समय तक पलिश्तियों को देश म रह्यो।
GEN 22:1 इन बातों को बाद असो भयो कि परमेश्वर न अब्राहम सी यो कह्य क ओकी परीक्षा ली, “हे अब्राहम!” ओन कह्यो, “का आज्ञा हय।”
GEN 22:2 परमेश्वर न कह्यो, “अपनो बेटा ख यानेकि अपनो एकलौतो बेटा इसहाक ख, जेको सी तय प्रेम रखय हय, तय ओख ले क मोरिय्याह देश म चली जा, अऊर उत ओख एक पहाड़ी को ऊपर जो मय तोख बताऊं, तय अपनो बेटा ख होमबलि म चढ़ाजो।”
GEN 22:3 अगलो दिन की सुबेरे अब्राहम न होमबलि लायी कुछ लकड़ी काटी, अऊर अपनो गधा पर कस दी, अऊर इसहाक अऊर दोय सेवकों ख अपनो संग ले गयो। तब उन्न ऊ जागा लायी सुरूवात करी, जेको बारे म परमेश्वर न उन्ख बतायो होतो।
GEN 22:4 तीसरो दिन अब्राहम न आंखी उठाय क ऊ जागा ख दूर सी देख्यो।
GEN 22:5 अऊर अब्राहम न अपनो सेवकों सी कह्यो, “तुम इतच गधा को जवर रुक्यो रहो; मय अऊर इसहाक आगु जाय क आराधना करबो, तब तुम्हरो जवर वापस आबो।”
GEN 22:6 तब अब्राहम न अपनो बेटा इसहाक ख होमबलि की लकड़ी चढ़ान लायी कह्यो, अऊर अपनो हाथ म आगी अऊर छुरी लियो; अऊर हि दोयी एक संग चल्यो।
GEN 22:7 इसहाक न अपनो बाप अब्राहम सी कह्यो, “हे मोरो बाप,” अब्राहम न कह्यो, “हे मोरो बेटा, का बात हय?” इसहाक न कह्यो, “देख, आगी अऊर लकड़ी त हंय; पर होमबलि लायी मेंढी को बच्चा कित हय?”
GEN 22:8 अब्राहम न उत्तर दियो, “हे मोरो बेटा, परमेश्वर खुद होमबलि लायी मेम्ना को इंतजाम करेंन।” अऊर हि दोयी संग संग आगु चलतो गयो।
GEN 22:9 जब हि ऊ जागा पर पहुंच्यो, जेको बारे म परमेश्वर न अब्राहम सी कह्यो होतो; तब उत अब्राहम न वेदी बनाय क लकड़ी ख बिन बिन क रख्यो, अऊर अपनो बेटा इसहाक ख बान्ध क वेदी पर रखी लकड़ियों को ऊपर रख दियो।
GEN 22:10 तब अब्राहम न अपनो बेटा ख बलि करन लायी हाथ बढ़ाय क छुरी उठायो।
GEN 22:11 तब यहोवा को दूत न स्वर्ग सी ओख पुकार क कह्यो, “हे अब्राहम, हे अब्राहम!” ओन उत्तर दियो, “का आज्ञा हय।”
GEN 22:12 दूत न कह्यो, “ऊ बच्चा को तरफ अपनो हाथ मत बढ़ा अऊर ओख कुछ हानि मत पहुंचाव, अब मय जान गयो हय कि तय परमेश्वर को सम्मान करय हय अऊर ओको पालन करय हय, कहालीकि तय न अपनो एकलौतो बेटा ख नहीं रख छोड़्यो हय।”
GEN 22:13 तब अब्राहम न अपनी आंखी ऊपर ऊठायी, तब देख्यो, कि ओको पीछू एक मेंढा हय, ऊ अपनो सींगो सी एक झाड़ी म फस्यो हुयो हय; तब अब्राहम गयो, अऊर ऊ मेंढा ख पकड़्यो अऊर अपनो बेटा की जागा पर ओकी होमबलि कर क् चढ़ायो।
GEN 22:14 अब्राहम न ऊ जागा को नाम “यहोवा इंतजाम करय हय, रख्यो।” येकोलायी अज तक लोग यो भी कह्य हंय, “यहोवा की पहाड़ी पर इंतजाम करयो जायेंन।”
GEN 22:15 तब यहोवा को दूत न दूसरी बार स्वर्ग सी अब्राहम ख पुकार क कह्यो,
GEN 22:16 “यहोवा अपनीच कसम खाय क कह्य हय, कि तय न यो काम करयो हय; कहालीकि तय न मोरो लायी अपनो बेटा, यानेकि अपनो एकलौतो बेटा ख भी नहीं रख छोड़्यो;
GEN 22:17 यो वजह मय जरूर तोख आशीष देऊं, अऊर तोरो वंश ख आसमान को तारों, अऊर समुन्दर किनार को बहुत रेतु को जसो अनगिनत करूं, अऊर तोरो वंश अपनो दुश्मनों को नगरों को अधिकारी होयेंन;
GEN 22:18 अऊर धरती को पूरो राष्ट्र तोरो वंश को द्वारा मोरो सी आशीष हासिल करेंन : कहालीकि तय न मोरी आज्ञा सुन क ओको पालन करयो।”
GEN 22:19 येको बाद अब्राहम अपनो सेवकों को जवर वापस आयो, अऊर हि सब उठ क ओको संग बेर्शेबा गयो, अऊर अब्राहम बेर्शेबा म रहन लग्यो।
GEN 22:20 कुछ समय को बाद, अब्राहम ख यो बतायो गयो, “मिल्का भी माय बन गयी हय; ओन तोरो भाऊ नाहोर लायी आठ बेटा ख जनम दियो हय।”
GEN 22:21 बड़ो बेटा ऊस, अऊर ऊस को भाऊ बूज, अऊर कमूएल, जो आराम को बाप भयो।
GEN 22:22 तब केसेद, हजो, पिल्दाश, यिद्लाप, अऊर बतूएल।
GEN 22:23 इन आठ बेटां ख मिल्का न अब्राहम को भाऊ नाहोर को द्वारा जनम दियो। अऊर बतूएल सी रिबका पैदा भयी।
GEN 22:24 तब नाहोर की रूमा नाम की एक रखैल भी होती; जेको सी तेबह, गहम, तहश, अऊर माका, पैदा भयो।
GEN 23:1 सारा एक सौ सत्ताईस साल की भयी;
GEN 23:2 तब सारा की मृत्यु किर्यतर्बा यानेकि हेब्रोन नगर म भयी। जो कनान देश म हय। तब अब्राहम न सारा की मृत्यु लायी शोक मनायो।
GEN 23:3 तब अब्राहम न अपनी पत्नी को शव को जवर सी उठ क हित्तियों सी कह्यो;
GEN 23:4 “मय त तुम्हरो बीच एक परदेशी अऊर अजनबी हय; मोख मरघट लायी अपनो इत जमीन देवो ताकि मय अपनी पत्नी को शव ख गाड़ सकूं।”
GEN 23:5 हित्तियों को सन्तानों न अब्राहम सी कह्यो,
GEN 23:6 “श्रीमान, तय हमरी बात सुन। तय हमरो बीच म बड़ो प्रधान हंय। तय जित चाहवय अपनी पत्नी ख हमरो अच्छो कब्र म गाड़ सकय हंय। हम म सी कोयी भी तोख अपनी पत्नी ख गाड़न लायी अपनो कब्र देन सी मना नहीं करेंन।”
GEN 23:7 तब अब्राहम उठ्यो अऊर ऊ देश को लोगों ख यानेकि हित्तियों ख झुक क नमस्कार करयो,
GEN 23:8 अऊर अब्राहम न उन्को सी कह्यो, “यदि तुम चाहवय हंय कि मय अपनी पत्नी ख माटी देऊं, तब मोरी एक बात अऊर मान लेवो अऊर तुम सोहर को बेटा एप्रोन सी मोरो लायी बिनती करो,
GEN 23:9 ताकि ऊ मकपेला की गुफा ख, जो ओकी जमीन की सीमा पर हय; ओको पूरो दाम ले क मोख बेच दे, ताकि ऊ तुम्हरो बीच म हमरो लायी एक मरघट की जागा हो।”
GEN 23:10 एप्रोन त हित्तियों को बीच उत बैठ्यो हुयो होतो, येकोलायी जितनो हित्ति ओको नगर को फाटक सी होय क अन्दर जात होतो, उन पूरो को आगु एप्रोन न अब्राहम सी कह्यो,
GEN 23:11 “हे मोरो स्वामी; मोरी बात सुनो; मय तोख ऊ गुफा जमीन सहित मोरो लोगों को आगु दे रह्यो हय; तय येको म अपनी पत्नी ख गाड़ दे।”
GEN 23:12 तब अब्राहम न फिर सी हित्तियों को आगु झुक क नमस्कार करयो।
GEN 23:13 अऊर ऊ उन्को सुनतो हुयो एप्रोन सी कह्यो, “यदि तय असो चाहे, त मोरी सुन ऊ जमीन को जो दाम हो, ऊ मय देनो चाहऊ हय; ओख मोरो सी ले ले, तब मय अपनी पत्नी को शव ख उत गाड़ सकूं।”
GEN 23:14 एप्रोन न अब्राहम ख यो उत्तर दियो,
GEN 23:15 “हे मोरो स्वामी, मोरी बात सुन; ऊ जमीन को दाम त चार सौ चांदी को सिक्का हय; पर ऊ मोरो अऊर तोरो बीच म का हय? तय अपनी पत्नी ख गाड़ दे।”
GEN 23:16 अब्राहम न एप्रोन की बात मान क ओख उतनो रूप्या की चांदी तौल क दे दियो, जितनो ओन हित्तियों को सुनतो म कह्यो होतो : चार सौ चांदी को सिक्का जो ऊ समय व्यापारियों को बीच म चलत होतो।
GEN 23:17 येकोलायी एप्रोन को ऊ जमीन अऊर गुफा, जो मकपेला म मम्रे को जवर होतो, अऊर जमीन को पूरो झाड़ जो ओको म अऊर ओको चारयी तरफ सीमा को अन्दर होतो,
GEN 23:18 सब अब्राहम ख दे दियो, जितनो हित्तियों नगर की फाटक पर जमा भयो होतो, उन पूरो को आगु वा सम्पत्ति अब्राहम को अधिकार म पक्की रीति सी आय गयी।
GEN 23:19 ओको बाद अब्राहम न अपनी पत्नी सारा ख मकपेला को जमीन की गुफा म गाड़ दियो, जो कनान देश को मम्रे मतलब हेब्रोन नगर म होतो।
GEN 23:20 यो तरह हित्तियों को द्वारा ऊ जमीन अऊर ओको म की गुफा मरघट को रूप म अब्राहम को अधिकार म दे दी गयी।
GEN 24:1 अब्राहम अब बहुत बूढ्ढा भय गयो होतो, अऊर ओकी उमर बहुत होती अऊर यहोवा न ओख हर काम म आशीर्वाद दियो होतो।
GEN 24:2 एक दिन अब्राहम न अपनो घर को सब सी बूढ्ढा अऊर अपनी सम्पत्ति की देखभाल करन वालो सेवक सी कह्यो, “अपनो हाथ मोरी जांघ पर रख;
GEN 24:3 मय तोख स्वर्ग अऊर धरती को परमेश्वर यहोवा की कसम खिलाऊ हय कि तय मोरो बेटा लायी कनानी जाति की टुरियों म सी, जिन्को बीच हम रह्य रह्यो हय, मोरो बेटा को बिहाव नहीं करावो।
GEN 24:4 पर तय मोरो देश म मोरो रिश्तेदारों म सी मोरो बेटा इसहाक लायी पत्नी लावो।”
GEN 24:5 ऊ सेवक न अब्राहम सी कह्यो, “ऊ स्थिति म मय का करूं, जब वा बाई यो देश म आनोच नहीं चाहे; का मय तोरो बेटा ख ऊ देश म ले जाऊं, जित सी तय आयो हंय?”
GEN 24:6 तब अब्राहम न कह्यो, “सावधान, तय मोरो बेटा ख उत कभी नहीं ले जाजो।”
GEN 24:7 यहोवा, जो स्वर्ग को परमेश्वर हंय, जो मोख मोरो बाप को परिवार अऊर मोरी जन्मभूमि सी लायो हय अऊर जिन्न कसम खाय क मोरो सी यो वादा करयो, “मय यो देश तोरो वंश ख देऊं; उच स्वर्गदूत ख तोरो आगु आगु भेजेंन, अऊर तय मोरो बेटा लायी उत सी एक बाई ले आये।
GEN 24:8 अगर बाई तोरो संग आन लायी मना करे, तब तय मोरी यो कसम सी छूट जाजो; लेकिन ध्यान रखजो कि तय मोरो बेटा ख वापस उत मत ले जाजो।”
GEN 24:9 येकोलायी ऊ सेवक न अपनो स्वामी अब्राहम की जांघ पर अपनो हाथ रख क अब्राहम सी यो बारे म कसम खायी।
GEN 24:10 तब ऊ सेवक न अपनो स्वामी को ऊंट को झुण्ड म सी दस ऊंटों ख लियो अऊर उन पर अपनो स्वामी को तरफ सी अलग अलग उपहार पकड़्यो अऊर नाहोर को नगर ख चली गयो जो उत्तरी मेशोपोटामियां देश म होतो।
GEN 24:11 नगर को जवर पहुंच क ओन ऊंटों ख कुंवा को जवर बैठाय दियो; यो शाम को समय होतो। योच समय बाईयां पानी भरन बाहेर आयो करत होती।
GEN 24:12 तब सेवक न प्रार्थना करी, “यहोवा, मोरो स्वामी अब्राहम को परमेश्वर, अज मोरो काम ख सफल कर, अऊर मोरो स्वामी अब्राहम पर दया कर।
GEN 24:13 तय देख रह्यो हय कि मय यो पानी को कुंवा को जवर खड़ो हय, अऊर यो नगर को निवासियों की टुरियां पानी भरन लायी निकल क आय रही हंय।
GEN 24:14 तय कुछ असो कर कि जो टुरी सी मय यो कहूं, ‘अपनो घड़ा झुकाय क कृपया मोख पानी पिलाय दे,’ अऊर वा टुरी कहे, ‘तय पानी पी ले, अऊर फिर मय तोरो ऊंटों ख भी पानी पिलाय देऊं,’ या वाच टुरी हो जेक तय न अपनो सेवक इसहाक लायी चुन्यो हय; येको द्वारा मोख यो विश्वास होय जायेंन कि तय न मोरो स्वामी पर अपनी दया दिखायी हय।”
GEN 24:15 अऊर असो भयो कि जब प्रार्थना करच रह्यो होतो, तबच रिबका नगर को बाहेर अपनो बख्खा पर घड़ा ले क पानी भरन आयी। वा मिल्का को बेटा बतूएल की टुरी होती अऊर मिल्का अब्राहम को भाऊ नाहोर की पत्नी होती।
GEN 24:16 रिबका बहुत सुन्दर होती, वा कुंवारी होती; अब तक कोयी आदमी सी ओको बिहाव नहीं भयो होतो। वा खल्लो कुंवा म उतरी, अऊर अपनो घड़ा पानी सी भरी अऊर तब ऊपर आय गयी।
GEN 24:17 सेवक दौड़ क ओको जवर आयो, अऊर ओको सी कह्यो, “कृपया अपनो घड़ा सी मोख थोड़ो पानी पिलाय देवो।”
GEN 24:18 रिबका न कह्यो, “हे मोरो स्वामी लेवो, पी लेवो,” अऊर ओन तुरतच घड़ा ख खल्लो कर क् ओख पानी पिलायो।
GEN 24:19 जब रिबका न सेवक ख पानी दियो, तब ओन ओको सी कह्यो, “मय तोरो ऊंटों लायी भी पानी ले क आऊ हय, जब तक हि पूरो सन्तुष्ट नहीं होय जाये।”
GEN 24:20 ओन जल्दी सी घड़ा को पानी जनावरों की डोंगी म खाली कर दियो, फिर वापस कुंवा पर अऊर पानी भरन गयी; अऊर ओको पूरो ऊंटों लायी उन्को लायक पानी ले आयी।
GEN 24:21 जब यो सब होय रह्यो होतो, तब सेवक ध्यान सी रिबका ख देख रह्यो होतो अऊर सोच रह्यो होतो कि यहोवा न मोरी यात्रा ख सफल करयो हय या नहीं।
GEN 24:22 जब ऊंटों न पानी पी लियो, तब सेवक न अरधो तोला की सोनो कि एक नथ निकाल क ओख दियो, अऊर दस तोला सोनो को कंगन ओको हाथों म पहिनाय दियो;
GEN 24:23 अऊर रिबका ख दे क ओको सी पुच्छ्यो, “कृपया, मोख बता, तय कौन्की बेटी आय? का तोरो बाप को घर म हमरो रूकन लायी जागा हय?”
GEN 24:24 रिबका न उत्तर दियो, “मय त नाहोर तथा मिल्का को बेटा बतूएल की बेटी आय।”
GEN 24:25 अऊर ओन यो भी कह्यो, “हमरो इत घास अऊर चारा बहुत हय, अऊर रूकन लायी जागा भी हय।”
GEN 24:26 तब ऊ सेवक न झुक क अऊर यो कह्य क यहोवा की आराधना करी,
GEN 24:27 “धन्य हय यहोवा, मोरो स्वामी अब्राहम को परमेश्वर, जिन्न मोरो स्वामी को प्रति अपनो प्रेम अऊर करुना ख नहीं हटायो : यहोवा मोख सही जागा पर लायो जो मोरो स्वामी को रिश्तेदारों कोच घर हय।”
GEN 24:28 तब रिबका दौड़ क घर गयी अऊर अपनी माय को घर को लोगों ख सब बाते बतायी।
GEN 24:29 रिबका को भाऊ लाबान दौड़ क कुंवा को जवर गयो, जित अब्राहम को सेवक होतो।
GEN 24:30 जब लाबान न नथ अऊर अपनी बहिन रिबका को हाथों म कंगन देख्यो अऊर जो बात सेवक न कही होती, ओख सुन्यो, तब लाबान ऊ सेवक को जवर गयो, अऊर देख्यो कि ऊ सेवक कुंवा को जवर ऊंटों को बाजू म खड़ो हय।
GEN 24:31 लाबान न सेवक सी कह्यो, “हे यहोवा को तरफ सी धन्य आदमी अन्दर आव तय कहाली बाहेर खड़ो हय? मय न तोरो लायी, घर अऊर तोरो ऊंटों लायी भी जागा तैयार करी हय।”
GEN 24:32 अब्राहम को सेवक लाबान को संग घर म गयो; तब लाबान न ऊंटों पर सी सामान उतारयो, अऊर ऊंटों लायी पैरा अऊर चारा लायो; तब ओन सेवक अऊर ओको लोगों को पाय धोवन लायी पानी दियो।
GEN 24:33 तब सेवक ख जेवन दियो, पर ओन कह्यो, “मय तब तक जेवन नहीं करूं, जब तक कि मय अपनी बात नहीं सुनाय देऊं।” लाबान न कह्यो, “ठीक हय, बताय दे।”
GEN 24:34 “तब ओन कह्यो, मय अब्राहम को सेवक आय।”
GEN 24:35 यहोवा न मोरो स्वामी ख बहुत आशीष दी हंय, जेको सी ऊ धनवान भय गयो हंय; यहोवा न उन्ख बहुत शेरी-मेंढी, गाय-बईल, सोनो-चांदी, सेवक-सेविका, तथा ऊंट अऊर गधा दियो हंय।
GEN 24:36 अऊर मोरो स्वामी की पत्नी सारा ख बुढ़ापा म एक बेटा पैदा भयो, अऊर ऊ बेटा ख अब्राहम न अपनो सब कुछ दे दियो हय।
GEN 24:37 अऊर मोरो स्वामी न मोख कसम खिलायी हय। कि तय मोरो बेटा लायी कनानियों की टुरियों म सी जिन्को देश म मय रहू हय, कोयी पत्नी नहीं ले आऊं।
GEN 24:38 पर तय मोरो बाप को परिवार, मोरो अपनो वंश म जाजो, अऊर मोरो बेटा लायी एक पत्नी लाजो।
GEN 24:39 तब मय न अपनो स्वामी सी पुच्छ्यो, यदि वा बाई मोरो संग आनो नहीं चाहेंन तब का?
GEN 24:40 “मोरो स्वामी न कह्यो, ‘यहोवा, जेकी मय न हमेशा आज्ञा मानी हय, ऊ अपनो स्वर्गदूत ख तोरो संग भेजेंन अऊर तोरी यात्रा ख सफल करेंन, ताकि तय मोरो बेटा लायी मोरो अपनो वंश अऊर मोरो बाप को परिवार सी एक पत्नी लाय सकजो।
GEN 24:41 तय मोरी या कसम सी तबच छूट पायजो, जब तय मोरो वंश को लोगों को जवर जाजो, अऊर यदि हि वा बाई ख तोरो संग भेजन लायी मना करे तब तय मोरी कसम सी छूट जाजो।’
GEN 24:42 “येकोलायी मय अज जब कुंवा को जवर पहुंच्यो, त मय न यो प्रार्थना करी, ‘यहोवा, मोरो स्वामी अब्राहम को परमेश्वर, मय जो लक्ष सी इत आयो हय, ऊ काम पूरो होय जाये;
GEN 24:43 त देख, मय यो कुंवा को किनारे खड़ो हय; यदि कोयी बाई निकल क पानी भरन आवय हय, अऊर मय ओको सी कहूं, “अपनो घड़ा म सी मोख थोड़ो पानी दे,”
GEN 24:44 अऊर यदि वा मोरो सी कहे, “पी ले, अऊर मय तोरो ऊंटों लायी भी पानी ले क आऊ हय,” त वा वाच बाई हो, जेक परमेश्वर न मोरो स्वामी को बेटा लायी चुन्यो हय।’
GEN 24:45 येको पहिले कि मय अपनो मन म यो प्रार्थना खतम करतो, त रिबका अपनो कन्धा पर घड़ा धर क निकल आयी; तब वा खल्लो कुंवा को जवर जाय क पानी भरन लगी, अऊर मय न ओको सी कह्यो, ‘कृपया मोख पानी पिलाय दे।’
GEN 24:46 तब ओन तुरतच अपनो कन्धा पर सी घड़ा ख झुकाय क कह्यो, ‘ले, पी ले, अऊर तब मय तोरो ऊंटों ख भी पानी पिलाय देऊं,’ तब मय न पानी पियो, अऊर ओन ऊंटों ख भी पानी पिलाय दियो।
GEN 24:47 तब मय न ओको सी पुच्छ्यो, ‘तय कौन्की टुरी आय?’ ओन कह्यो, ‘मय बतूएल की टुरी आय, जो नाहोर तथा मिल्का को बेटा आय,’ तब मय न ओकी नाक म नथ, अऊर ओको हाथों म कंगन पहिनाय दियो।
GEN 24:48 तब मय न झुक क यहोवा की आराधना करी, मय न अपनो स्वामी अब्राहम को परमेश्वर यहोवा की महिमा करी, कहालीकि ओन मोख सही रस्ता म अगुवायी करी, ताकि मय अपनो स्वामी को टुरा लायी रिश्तेदार की टुरी ख ले जाऊं।
GEN 24:49 येकोलायी अब, यदि तुम मोरो स्वामी को प्रति दया अऊर सच्चायी दिखानो चाहवय हय, त मोख बतावो; अऊर यदि नहीं चाहवय हय, तब भी मोरो सी कह्य देवो; ताकि मय जान सकूं कि मोख का करनो हय।”
GEN 24:50 यो सब सुन क लाबान अऊर बतूएल न उत्तर दियो, “यो बात यहोवा को तरफ सी भयी हय; येकोलायी हम लोग तोरो सी भलो या बुरो कुछ नहीं कह्य सकजे।
GEN 24:51 देख, रिबका तोरो आगु हय; येख अपनो संग ले जा, ताकि वा तोरो स्वामी को बेटा की पत्नी होय जाये, जसो की यहोवा न निर्देश दियो हय।”
GEN 24:52 उन्की बात सुन क, अब्राहम को सेवक न जमीन पर झुक क यहोवा ख बड़ायी करी।
GEN 24:53 तब सेवक न सोनो अऊर चांदी को जेवर, अऊर कपड़ा निकाल क रिबका ख दियो; ओन रिबका को भाऊ अऊर ओकी माय ख भी बहुत अनमोल चिजे दी।
GEN 24:54 तब ओन अऊर ओको संग को लोगों न खायो पीयो अऊर उत रात बितायी। अगलो दिन सुबेरे जब हि सोय क उठ्यो त सेवक न कह्यो, “मोख अपनो स्वामी को जवर वापस जान लायी बिदा करो।”
GEN 24:55 पर रिबका को भाऊ अऊर ओकी माय न कह्यो, “टुरी ख हमरो संग कुछ दिन मतलब कम सी कम दस दिन रहन देवो; तब ओख ले जावो।”
GEN 24:56 पर सेवक न उन्को सी कह्यो, “मोख मत रोको; कहालीकि परमेश्वर न मोरी यो यात्रा ख सफल करयो हय; मोख अपनो स्वामी को जवर वापस जान लायी बिदा करो।”
GEN 24:57 तब उन्न कह्यो, “हम रिबका ख बुलाय क येको बारे म ओको सी पूछबो।”
GEN 24:58 तब उन्न रिबका ख बुलाय क ओको सी पुच्छ्यो, “का तय यो आदमी को संग जाजो?” ओन कह्यो, “हव, मय जाऊं।”
GEN 24:59 येकोलायी उन्न अपनी बहन रिबका ख ओकी दासी अऊर अब्राहम को सेवक अऊर ओको लोगों को संग बिदा करयो।
GEN 24:60 अऊर उन्न रिबका ख आशीर्वाद दे क कह्यो, “हे हमरी बहिन, तय हजारों लाखों की आदिमाता हो, अऊर तोरो वंश अपनो दुश्मनों को नगरों पर अधिकार हो।”
GEN 24:61 तब रिबका अपनी सहेलियों समेत चली; अऊर ऊंट पर चढ़ क ऊ आदमी को संग गयी। यो तरह ऊ सेवक रिबका ख संग ले क चल्यो गयो।
GEN 24:62 इसहाक जो कनान को दक्षिन देश म रहत होतो, लहैरोई नाम को कुंवा को जवर सी निर्जन प्रदेश म आवत होतो।
GEN 24:63 शाम को समय ऊ मैदान म ध्यान करन लायी निकल्यो होतो; अऊर ओन आंखी ऊपर उठायी त देख्यो, कि ऊंट चल क आय रह्यो हंय।
GEN 24:64 रिबका न भी आंखी उठाय क इसहाक ख देख्यो, अऊर अपनो ऊंट पर सी उतर पड़ी।
GEN 24:65 तब ओन सेवक सी पुच्छ्यो, “ऊ आदमी कौन आय जो हम सी मुलाखात करन लायी मैदान सी आय रह्यो हय?” सेवक न कह्यो, “ऊ त मोरो स्वामी आय।” तब रिबका न घूंघट सी अपनो मुंह ख झाक लियो।
GEN 24:66 सेवक न इसहाक सी अपनो संग हुयी घटना को वर्नन करयो।
GEN 24:67 तब इसहाक रिबका ख अपनी माय सारा को तम्बू म लायो, जेको म ओकी माय रहत होती, अऊर ओको संग बिहाव कर क् ओको सी प्रेम करयो। यो तरह इसहाक ख माय को मरन को बाद शान्ति मिली।
GEN 25:1 तब अब्राहम न एक अऊर बाई सी बिहाव करयो जेको नाम कतूरा होतो।
GEN 25:2 ओन जिम्रान, योक्षान, मदना, मिद्यान, यिशबाक, अऊर शूह पैदा भयो।
GEN 25:3 योक्षान सी शबा अऊर ददान पैदा भयो; अऊर ददान को वंश म अश्शूरी, लतूशी, अऊर लुम्मी लोग भयो।
GEN 25:4 मिद्यान को बेटा एपा, एपेर, हनोक, अबीदा, अऊर एल्दा भयो, हि सब कतूरा की सन्तान भयो।
GEN 25:5 इसहाक ख त अब्राहम न अपनो सब कुछ दियो
GEN 25:6 पर अपनी रखेलियों सी पैदा भयो बेटा ख केवल उपहार दे क अपनो जीतो जी अपनो बेटा इसहाक को जवर सी पूर्व देश म भेज दियो।
GEN 25:7 तब अब्राहम की पूरी उमर एक सौ पचहत्तर साल की भयी
GEN 25:8 अब्राहम की लम्बी उमर म पूरो बुढ़ापा की स्थिति तक जीव छूट गयो; अऊर ऊ अपनो मरयो हुयो पूर्वजों म जाय क मिल्यो।
GEN 25:9 ओको बेटा इसहाक अऊर इश्माएल न, ओख मम्रे की पूर्व दिशा म मकपेला को गुफा म माटी दी, जो हित्ती सोहर को बेटा एप्रोन की जमीन म होती;
GEN 25:10 या वाच जमीन आय, जेक अब्राहम न हित्तियों सी मोल ले लियो होतो; ओको म अब्राहम, अऊर ओकी पत्नी सारा, दोयी ख माटी दी गयी।
GEN 25:11 अब्राहम को मरन को बाद परमेश्वर न ओको बेटा इसहाक ख आशीष दी, जो लहैरोई नाम को कुंवा को जवर रहत होतो।
GEN 25:12 अब्राहम को बेटा इश्माएल जो सारा की मिस्री दासी हाजिरा सी पैदा भयो होतो, ओकी वंशावली यो तरह हय।
GEN 25:13 इश्माएल को बेटावों को नाम यो तरह हय : इश्माएल को बड़ो बेटा नबायोत, फिर केदार, अद्बेल, मिबसाम,
GEN 25:14 मिश्मा, दूमा, मस्सा,
GEN 25:15 हदद, तेमा, यतूर, नापीश, अऊर केदमा।
GEN 25:16 इश्माएल को बेटा हिच भयो, अऊर इन्कोच नामो को अनुसार इन्को गांवो, अऊर छावनियों को नाम भी पड़्यो; अऊर हिच बारा अपनो अपनो कुल को प्रधान भयो।
GEN 25:17 इश्माएल की पूरी उमर एक सौ सैंतीस साल को हुयो; तब ऊ मर गयो, अऊर ऊ अपनो मरयो हुयो पूर्वजों म जाय क मिल्यो।
GEN 25:18 अऊर ओको वंश हवीला सी शूर तक, जो मिस्र देश को पूर्व म अश्शूर की रस्ता म हंय, बस गयो; अऊर उन्को भाग उन्को सब भाऊ-बन्धुवों को जवर पड़्यो।
GEN 25:19 अब्राहम को टुरा इसहाक की वंशावली यो आय : अब्राहम सी इसहाक पैदा भयो;
GEN 25:20 अऊर इसहाक न चालीस साल को होय क रिबका सी, जो पद्दनराम को वासी, बतूएल की टुरी अऊर अरामी लाबान की बहिन होती, बिहाव कर लियो।
GEN 25:21 इसहाक की पत्नी रिबका बांझ होती, येकोलायी ओन रिबका लायी परमेश्वर सी बिनती करी; अऊर परमेश्वर न ओकी प्रार्थना सुनी, यो तरह ओकी पत्नी गर्भवती भयी।
GEN 25:22 ओको गर्भ म बच्चा आपस म लिपट क एक दूसरो ख मारन लग्यो। तब रिबका न कह्यो, “मोरी जो असीच दशा रहेंन त मय कसी जीन्दी रहूं?” अऊर वा यहोवा की इच्छा पूछन ख गयी।
GEN 25:23 तब परमेश्वर न रिबका सी कह्यो, “तोरो गर्भ म दोय जातियां हंय, अऊर तोरी कोख सी निकल क दोय राज्य को लोग अलग अलग होयेंन, अऊर एक राज्य को लोग दूसरो सी शक्तिशाली होयेंन, अऊर बड़ो बेटा छोटो की सेवा करेंन।”
GEN 25:24 जब रिबका को जनम देन को समय आयो, तब मालूम भयो कि रिबका को गर्भ म जुड़वा बच्चा हंय।
GEN 25:25 पहिलो जो बच्चा पैदा भयो ऊ लाल निकल्यो, अऊर ओको पूरो शरीर बालों सी भरयो होतो; येकोलायी ओको नाम एसाव रख्यो गयो।
GEN 25:26 तब ओको पीछू ओको भाऊ अपनो हाथ सी एसाव की एड़ी पकड़्यो हुयो पैदा भयो; अऊर ओको नाम याकूब रख्यो गयो। जब रिबका न उन्ख जनम दियो तब इसहाक साठ साल को होतो।
GEN 25:27 तब हि टुरा बढ़न लग्यो, अऊर एसाव त जंगल म रहन वालो चतुर शिकारी होय गयो, पर याकूब सीधो आदमी होतो अऊर तम्बुवों म रहत होतो।
GEN 25:28 इसहाक एसाव द्वारा लायो शिकार को मांस खातो रहत होतो, येकोलायी ऊ ओको सी प्रेम रखत होतो; पर रिबका याकूब सी प्रेम रखत होती।
GEN 25:29 एक दिन याकूब जेवन लायी कुछ दार पकात होतो; अऊर एसाव जंगल सी थक्यो हुयो आयो।
GEN 25:30 तब एसाव न याकूब सी कह्यो, “ऊ जो लाल चीज हय, उच लाल चीज म सी मोख कुछ खिल्ला, कहालीकि मय थक्यो हय।” योच वजह ओको नाम एदोम भी पड़्यो।
GEN 25:31 याकूब न कह्यो, “अपनो बड़ो होन को अधिकार अज मोरो हाथ बेच दे।”
GEN 25:32 एसाव न कह्यो, “देख, मय त अभी मरन पर हय : येकोलायी यो अधिकार सी मोरो का भलो होयेंन?”
GEN 25:33 याकूब न कह्यो, “मोरो सी अभी कसम खा,” येकोलायी एसाव न ओको सी कसम खायी, अऊर अपनो बड़ो होन को अधिकार याकूब को हाथ बेच डाल्यो
GEN 25:34 तब याकूब न एसाव ख रोटी अऊर पकायी हुयी मसूर की दार दी; अऊर ओन खायो पियो, अऊर उठ क चली गयो। यो तरह एसाव न अपनो बड़ो होन को अधिकार ख बेकार जान्यो।
GEN 26:1 ऊ देश म अकाल पड़्यो, यो ऊ पहिलो अकाल सी अलग होतो जो अब्राहम को दिनों म पड़्यो होतो। येकोलायी इसहाक पलिश्ती जाति को राजा अबीमेलेक को जवर गरार नगर गयो।
GEN 26:2 परमेश्वर न इसहाक ख दर्शन दे क कह्यो, “मिस्र देश मत जा; जो देश को बारे म मय तोरो सी कहूं, ओको म रह्य।
GEN 26:3 तय उच देश म रह्य, अऊर मय तोरो संग रहूं, अऊर तोख आशीष देऊं; मय तोख, अऊर तोरो वंश ख यो सब देश प्रदान करूं; जो कसम मय न तोरो बाप अब्राहम सी खायी होती, ओख मय पूरी करूं।
GEN 26:4 अऊर मय तोरो वंश ख आसमान को तारों को जसो करूं; अऊर मय तोरो वंश ख यो सब देश देऊं, अऊर धरती की पूरी जातियां तोरो वंश को वजह अपनो आप ख धन्य मानेंन।
GEN 26:5 कहालीकि अब्राहम न मोरी बात मानी, अऊर जो मय न ओख सौंप्यो होतो ओख अऊर मोरी आज्ञावों, विधियों अऊर व्यवस्था को पालन करयो।”
GEN 26:6 येकोलायी इसहाक गरार नगर म रह्य गयो।
GEN 26:7 जब ऊ जागा को लोगों न ओकी पत्नी रिबका को बारे म पुच्छ्यो, तब इसहाक न यो सोच क कि यदि मय ओख अपनी पत्नी कहूं, त इत को लोग रिबका को वजह जो बहुत सुन्दर हय, मोख मार डालेंन, इसहाक न उत्तर दियो, “वा त मोरी बहिन आय।”
GEN 26:8 जब इसहाक ख उत रह्यतो हुयो बहुत समय बीत गयो, तब एक दिन पलिश्तियों को राजा अबीमेलेक न खिड़की म सी झांक क देख्यो कि इसहाक अपनी पत्नी रिबका को संग प्रेम कर रह्यो हय।
GEN 26:9 तब अबीमेलेक न इसहाक ख बुलाय क कह्यो, “वा बाई त निश्चय तोरी पत्नी हय; तब तय न कहाली ओख अपनी बहिन कह्यो?” तब इसहाक न उत्तर दियो, “मय न सोच्यो होतो, कि असो नहीं हो कि मोख ओको वजह अपनी जान खोनो पड़े।”
GEN 26:10 अबीमेलेक न कह्यो, “तय न हमरो सी यो का करयो? असो त मोरी प्रजा को कोयी भी आदमी तोरी पत्नी को संग सोय सकत होतो, अऊर तय हम्ख पाप म फसातो।”
GEN 26:11 येकोलायी अबीमेलेक न अपनी पूरी प्रजा ख आज्ञा दी, “जो कोयी ऊ आदमी ख यां वा बाई ख छुयेंन, ऊ निश्चय मार दियो जायेंन।”
GEN 26:12 तब इसहाक न ऊ देश म जमीन पर अनाज बोयो, अऊर उच साल म सौ गुना फसल हासिल करी; अऊर परमेश्वर न ओख आशीष दी।
GEN 26:13 अऊर ऊ धनी भय गयो, ओकी उन्नति होती गयी, अऊर ऊ बहुत धनवान आदमी भय गयो।
GEN 26:14 जब ओको शेरी-मेंढी, गाय-बईल, अऊर दास-दासियां भयी, तब पलिश्ती ओको सी जलन करन लग्यो।
GEN 26:15 जिन कुंवा ख इसहाक को बाप अब्राहम को दासों न अब्राहम को जीतो जी खोद्यो होतो, उन्ख पलिश्ती जाति को लोग न माटी सी बुझाय क बन्द कर दियो।
GEN 26:16 तब अबीमेलेक न इसहाक सी कह्यो, “हमरो जवर सी चली जा; कहालीकि तय हमरो सी बहुत सामर्थी भय गयो हय।”
GEN 26:17 येकोलायी इसहाक उत सी चली गयो, अऊर गरार नगर की घाटी म अपनो तम्बू खड़ो कर क् रहन लग्यो।
GEN 26:18 तब जो कुंवा ओको बाप अब्राहम को दिनों म खोद्यो गयो होतो, अऊर अब्राहम को मरन को बाद पलिश्तियों न कुंवा ख बुझाय दियो होतो, तब इसहाक न हि कुंवा ख फिर सी खुदवायो; अऊर उन्को उच नाम रख्यो, जो ओको बाप न रख्यो होतो।
GEN 26:19 तब इसहाक को दासों जो घाटी म कुंवा खोदतो खोदतो एक झरना मिल्यो।
GEN 26:20 तब गरार को चरवाहों न इसहाक को चरवाहों सी झगड़ा करयो, अऊर कह्यो, “यो पानी हमरो आय।” येकोलायी इसहाक न ऊ कुंवा को नाम एसेक रख्यो; कहालीकि हि इसहाक सी झगड़ा करत होतो।
GEN 26:21 तब इसहाक को दासों न दूसरो कुंवा खोद्यो; अऊर उन्न ओको लायी भी झगड़ा करयो, येकोलायी इसहाक न उन्ख सित्ना को नाम दियो।
GEN 26:22 तब इसहाक न उत सी निकल क एक अऊर कुंवा खुदवायो; अऊर ओको लायी उन्न झगड़ा नहीं करयो; येकोलायी इसहाक न ओको नाम यो कह्य क स्वतंत्रता रख्यो। इसहाक न कह्यो, “अब त परमेश्वर न हमरो लायी बहुत जागा दियो हय, अऊर हम यो देश म सफल होयबो।”
GEN 26:23 उत सी ऊ बेर्शेबा ख गयो।
GEN 26:24 अऊर उच दिन परमेश्वर न रात ख ओख दर्शन दे क कह्यो, “मय तोरो बाप अब्राहम को परमेश्वर आय; मत डर, कहालीकि मय तोरो संग हय, अऊर अपनो दास अब्राहम को वजह तोख आशीष देऊं, अऊर तोरो वंश बढ़ाऊं।”
GEN 26:25 तब इसहाक न वहां एक वेदी बनायी, अऊर परमेश्वर सी आराधना करी, अऊर अपनो तम्बू वहांच खड़ो करयो; अऊर वहां इसहाक को दासों न एक कुंवा खोद्यो।
GEN 26:26 तब अबीमेलेक अपनो सलाहकार अहुज्जत, अऊर सेनापति पीकोल ख संग ले क, गरार नगर सी इसहाक को जवर गयो।
GEN 26:27 इसहाक न उन्को सी कह्यो, “तुम न मोरो सी दुश्मनी कर क् अपनो बीच सी निकाल दियो होतो, अब मोरो जवर कहाली आयो हय?”
GEN 26:28 उन्न कह्यो, “हम्न त साफ देख्यो हय, कि यहोवा तोरो संग रह्य हय; येकोलायी हम्न सोच्यो, कि तय त यहोवा को तरफ सी धन्य हय, येकोलायी हमरो अऊर तोरो बीच म कसम खायी जाये, अऊर हम तोरो सी यो चाहजे हय कि तय वादा करे;
GEN 26:29 कि जसो हम्न तोख नहीं छूयो, अऊर तोरो संग केवल भलायीच करी हय, अऊर तोख शान्ति सी बिदा करयो, ओको अनुसार तय भी हम सी कोयी बुरो व्यवहार मत करजो अब तुम परमेश्वर की आशीष पायो हुयो आदमी हय।”
GEN 26:30 तब इसहाक न उन्को लायी विशेष भोजन तैयार करयो, अऊर उन्न खायो पियो।
GEN 26:31 तब हि भुन्सारे जल्दी उठ क आपस म कसम खायी; तब इसहाक न उन्ख बिदा करयो, अऊर हि खुशी सी ओको जवर सी चली गयो।
GEN 26:32 उच दिन इसहाक को दासों न आय क अपनो ऊ खोद्यो हुयो कुंवा को बारे म इसहाक ख बतायो, “हम्ख पानी को एक सोता मिल गयो हय।”
GEN 26:33 तब इसहाक न कुंवा को नाम शिबा रख्यो; योच वजह अज तक ऊ नगर को नाम बेर्शेबा पड़्यो हय।
GEN 26:34 जब एसाव चालीस साल को भयो, तब ओन हित्ती जाति की दोय टुरियों सी बिहाव करयो, यहूदीत अऊर बासमत, यहूदीत को बाप को नाम बेरी अऊर बासमत को बाप को नाम एलोन होतो;
GEN 26:35 अऊर उन्को वजह इसहाक अऊर रिबका को मन ख ठेस पहुंची।
GEN 27:1 जब इसहाक बूढ्ढा भय गयो, अऊर ओकी आंखी असी धुंधली पड़ गयी कि ऊ देख नहीं सकत होतो, तब ओन अपनो बड़ो बेटा एसाव ख बुलाय क कह्यो, “हे मोरो बेटा!” “एसाव न उत्तर दियो, का बात हय।”
GEN 27:2 इसहाक न कह्यो, “सुन, मय त बूढ्ढा भय गयो हय, अऊर मय नहीं जानु हय कि मोरो मरन को दिन कब आयेंन
GEN 27:3 येकोलायी अब तय अपनो धनुष बान ले क जंगल म जा, अऊर मोरो लायी शिकार कर क् लाव
GEN 27:4 ओको बाद तय मोरी इच्छा को अनुसार स्वादिष्ट खाना बनाय क मोरो जवर ले आजो, कि मय ओख खाय क मरन सी पहिले तोख जी भर क आशीर्वाद देऊं।”
GEN 27:5 तब एसाव शिकार करन ख जंगल म गयो। जब इसहाक एसाव सी यो बात कह्य रह्यो होतो, तब रिबका भी सुन रही होती।
GEN 27:6 येकोलायी रिबका न अपनो बेटा याकूब सी कह्यो, “सुन, मय न तोरो बाप ख तोरो भाऊ एसाव सी यो कहतो सुन्यो हय,
GEN 27:7 ‘तय मोरो लायी शिकार कर क् ओको स्वादिष्ट खाना बनाव, कि मय ओख खाय क तोख परमेश्वर को आगु मरन सी पहिले आशीर्वाद देऊं।’
GEN 27:8 येकोलायी अब, रिबका न कह्यो हे मोरो बेटा, मोरी सुन, जसी मय तोरो सी कहू हय, वसोच कर,
GEN 27:9 तय शेरियों को जवर जाय क शेरी को दोय अच्छो अच्छो बच्चा ले आव; अऊर मय तोरो बाप लायी ओकी इच्छा को अनुसार उन्को मांस को स्वादिष्ट खाना बनाऊं।
GEN 27:10 तब तय ओख अपनो बाप को जवर ले जाजो, कि ऊ ओख खाय क मरन सी पहिले तोख आशीर्वाद दे।”
GEN 27:11 याकूब न अपनी माय रिबका सी कह्यो, “सुन, मोरो भाऊ एसाव को शरीर म बहुत बाल हय, लेकिन मोरो शरीर म नहाय।
GEN 27:12 कभी मोरो बाप मोख छुयेंन, तब मय ओकी नजर म धोका देन वालो ठहरूं; अऊर आशीष को बदला अपनो ऊपर श्राप लाऊं।”
GEN 27:13 ओकी माय न ओको सी कह्यो, “हे मोरो बेटा, श्राप तोरो पर नहीं मोरोच पर आयेंन, तय केवल मोरी सुन, अऊर जाय क शेरी को बच्चां मोरो जवर ले आव।”
GEN 27:14 तब याकूब जाय क शेरी को बच्चां अपनी माय को जवर ले आयो, अऊर ओकी माय न ओको बाप की इच्छा को अनुसार स्वादिष्ट खाना बनाय दियो।
GEN 27:15 तब रिबका न अपनो बड़ो बेटा एसाव को सब सी अच्छो कपड़ा, जो ओको जवर घर म होतो, उन्ख ले क अपनो छोटो बेटा याकूब ख पहिनाय दियो;
GEN 27:16 अऊर ओन शेरियों को बच्चा को चमड़ा ख ओको हाथों पर अऊर गर्दन पर लपेट दियो।
GEN 27:17 अऊर ऊ स्वादिष्ट खाना अऊर अपनी बनायी हुयी रोटी भी अपनो बेटा याकूब को हाथ म दे दी।
GEN 27:18 तब याकूब अपनो बाप को जवर गयो, अऊर कह्यो, “हे मोरो बाप,” इसहाक न कह्यो, “का बात हय? मोरो बेटा, तय कौन आय?”
GEN 27:19 याकूब न अपनो बाप सी कह्यो, “मय तोरो बड़ो बेटा एसाव आय। मय न तोरी आज्ञा को अनुसार करयो हय; येकोलायी उठ अऊर बैठ क मोरो शिकार को मांस म सी खा ले, ताकि तय मोख दिल सी आशीर्वाद दे सके।”
GEN 27:20 इसहाक न अपनो बेटा सी कह्यो, “हे मोरो बेटा, का वजह हय कि शिकार तोख इतनो जल्दी मिल गयो?” याकूब न यो उत्तर दियो, “तोरो परमेश्वर यहोवा न ओख मोरो आगु कर दियो होतो।”
GEN 27:21 तब इसहाक न याकूब सी कह्यो, “हे मोरो बेटा, जवर आव, मय तोख छुय क जान सकू कि तय सचमुच मोरो बेटा एसाव आय का नहीं।”
GEN 27:22 तब याकूब अपनो बाप इसहाक को जवर गयो, अऊर इसहाक न ओख छुय क कह्यो, “तोरी आवाज त याकूब को जसी हय, पर तोरो हाथ त एसाव को हाथ जसो लगय हंय।”
GEN 27:23 यो तरह इसहाक न ओख नहीं पहिचान्यो, कहालीकि ओको हाथ ओको भाऊ एसाव को जसो बाल वालो होतो; येकोलायी इसहाक न ओख आशीर्वाद दियो।
GEN 27:24 अऊर इसहाक न पुच्छ्यो, “का तय सचमुच मोरो बेटा एसाव आय?” याकूब न कह्यो, “हव, मय आय।”
GEN 27:25 तब इसहाक न कह्यो, “खाना ख मोरो जवर ले आव, कि मय अपनो बेटा को शिकार को मांस म सी खाय क, तोख दिल सी आशीर्वाद देऊ।” तब याकूब न अपनो बाप को जवर खाना लायो, अऊर ओन खायो; अऊर ऊ अंगूरीरस रस भी लायो, अऊर ओन पियो।
GEN 27:26 तब ओको बाप इसहाक न ओको सी कह्यो, “हे मोरो बेटा, जवर आय क मोख चुम्मा दे।”
GEN 27:27 ओन जवर जाय क इसहाक ख चुम्मा दियो; अऊर इसहाक न ओको कपड़ा की सुगन्ध सूंघ क ओख यो आशीर्वाद दियो, “देख, मोरो बेटा की सुगन्ध ऊ खेत को जसो हय जेक परमेश्वर न आशीर्वाद दियो हय;
GEN 27:28 परमेश्वर तोख आसमान सी ओस, अऊर जमीन की अच्छी सी अच्छी उपज, अऊर बहुत सो अनाज अऊर नयो अंगूरीरस रस देन।
GEN 27:29 राज्य राज्य को लोग तोरी सेवा करेंन, अऊर हर एक जाती को लोग तोरो आगु झुकेंन। तय अपनो रिश्तेदारों को ऊपर शासन कर सकय हय, अऊर तोरी माय को बेटा तोरो आगु झुकेंन। जो तोख श्राप देन ऊ खुदच श्रापित होयेंन, अऊर जो तोख आशीर्वाद देन ऊ खुद आशीष पायेंन।”
GEN 27:30 जसोच इसहाक न याकूब ख आशीर्वाद देनो खतम करयो, अऊर जसोच याकूब अपनो बाप इसहाक को जवर सी बाहेर निकल्यो, कि ओको भाऊ एसाव शिकार ले क आयो।
GEN 27:31 तब एसाव भी स्वादिष्ट खाना बनाय क अपनो बाप को जवर ले आयो, अऊर ओन कह्यो, “हे मोरो बाप, उठ क अपनो बेटा को शिकार को मांस खा, ताकि तय मोख दिल सी आशीर्वाद दे।”
GEN 27:32 ओको बाप इसहाक न पुच्छ्यो, “तय कौन आय?” एसाव न कह्यो, “मय तोरो बड़ो बेटा एसाव आय।”
GEN 27:33 तब इसहाक पूरो तरह सी थरथर कांपन लग्यो, अऊर ओन पुच्छ्यो, “ऊ कौन होतो जो शिकार कर क् मोरो जवर ले आयो होतो, अऊर मय न तोरो आवन सी पहिले सब म सी कुछ कुछ खाय लियो अऊर ओख आशीर्वाद दियो? अब उच आशीर्वाद हमेशा ओको पर बन्यो रहेंन।”
GEN 27:34 जब एसाव न अपनो बाप इसहाक की यो बाते सुनी, तब ऊ जोर सी चिल्लायो अऊर फूट फूट क रोवन लग्यो अऊर अपनो बाप सी कह्यो, “हे मोरो बाप, मोख भी अपनो आशीर्वाद दे!”
GEN 27:35 इसहाक न उत्तर दियो, “तोरो भाऊ आयो अऊर मोख धोका दियो, अऊर ऊ तोरो आशीर्वाद छीन क चली गयो।”
GEN 27:36 एसाव न कह्यो, “ओको नाम याकूब ठीकच रख्यो गयो होतो। ओन मोख दोय बार धोका दियो हय। पहिले त ओन मोरो बड़ो बेटा होन को अधिकार ले लियो; अऊर अब मोरो आशीर्वाद भी छीन लियो हय।” तब एसाव न कह्यो, “का तय न मोरो लायी कोयी आशीर्वाद नहीं बचाय क रख्यो?”
GEN 27:37 इसहाक न एसाव ख उत्तर दे क कह्यो, “सुन, मय न ओख तोरो स्वामी बनाय दियो हय, अऊर ओको सब रिश्तेदारों ख ओको दास बनाय क ओख सौंप दियो हय, अऊर मय न अनाज अऊर अंगूर को रस दे क ओख भरपूर आशीष दियो हय। येकोलायी अब, हे मोरो बेटा, मय तोरो लायी का करूं?”
GEN 27:38 एसाव न अपनो बाप सी कह्यो, “हे मोरो बाप, का तोरो मन म केवल एकच आशीर्वाद हय? हे मोरो बाप, मोख भी आशीर्वाद दे।” यो कह्य क एसाव फूट फूट क रोवन लग्यो।
GEN 27:39 तब ओको बाप इसहाक न ओको सी कह्यो, “सुन, तोरो निवास उपजाऊ जमीन सी दूर हो, अऊर ऊपर सी आसमान की ओस ओको पर नहीं पड़े।
GEN 27:40 तय अपनी तलवार को दम सी जीन्दो रह्यजो, अऊर तय अपनो भाऊ को दास त बनजो; पर जब तय आजादी लायी लड़जो, तब तय अपनो ऊपर पड़्यो ओको गुलामी को जूआ ख तोड़ फेकजो।”
GEN 27:41 एसाव याकूब सी नफरत करत होतो, कहालीकि ओको बाप न याकूब ख आशीर्वाद दियो होतो; अऊर एसाव न सोच्यो, “मोरो बाप की मृत्यु को शोक मनान को दिन जवर हय, तब मय अपनो भाऊ याकूब ख मार डालूं।”
GEN 27:42 जब रिबका ख ओको बड़ो बेटा एसाव की यो बात बतायी गयी, तब ओन अपनो छोटो बेटा याकूब ख बुलाय क कह्यो, “सुन, तोरो भाऊ एसाव तोख मारन लायी अपनो मन म धीरज रख्यो हुयो हय।
GEN 27:43 येकोलायी अब, हे मोरो बेटा, मोरी सुन, अऊर हारान नगर ख मोरो भाऊ लाबान को जवर भग जा;
GEN 27:44 अऊर थोड़ो दिन तक, यानेकि जब तक तोरो भाऊ को गुस्सा शान्त नहीं होय जाय, तब तक ओकोच जवर रह्यजो।
GEN 27:45 फिर जब तोरो भाऊ को गुस्सा तोरो पर सी शान्त होय जायेंन, अऊर जो काम तय न ओको संग करयो हय ओख ऊ भूल जायेंन; तब मय दास भेज क तोख वहां सी बुलाय लेऊं। तब असो कहाली हो कि एकच दिन म मोख तुम दोयी बेटावों सी वंचित होनो पड़े?”
GEN 27:46 तब रिबका न इसहाक सी कह्यो, “मय हित्ति जाति की बहुवों को वजह अपनो जीव सी ऊब गयी हय; यदि याकूब भी इन बहुवों को जसो यो देश की कोयी हित्ती जाति की टुरी सी बिहाव कर लेन, त मोख अपनो जीव सी का लाभ मय मर जाऊं?”
GEN 28:1 तब इसहाक न याकूब ख बुलाय क आशीर्वाद दियो, अऊर आज्ञा दी, “तय कोयी कनानी टुरी सी बिहाव मत कर लेजो।
GEN 28:2 उठ अऊर पद्दनराम म अपनो नाना बतूएल को घर जाय क, वहां अपनो मामा लाबान की एक टुरी सी बिहाव कर लेजो।
GEN 28:3 सर्वशक्तिमान परमेश्वर तोख आशीष दे, अऊर तोख कुछ बच्चा दे क बढ़ाये, ताकि तय कुछ राष्ट्रों को बाप बन जाये।
GEN 28:4 ऊ तोख अऊर तोरो वंश ख भी अब्राहम की जसी आशीष दे, कि तय यो देश जेको म तय परदेशी होय क रह्य हय, अऊर जेक परमेश्वर न अब्राहम ख दियो होतो, ओको अधिकार होय जाये।”
GEN 28:5 यो तरह इसहाक न याकूब ख बिदा करयो, अऊर ऊ पद्दनराम ख अरामी बतूएल को बेटा लाबान को जवर चली गयो, जो याकूब अऊर एसाव की माय रिबका को भाऊ होतो।
GEN 28:6 जब एसाव ख पता चल्यो कि इसहाक न याकूब ख आशीर्वाद दे क पद्दनराम क्षेत्र भेज दियो, कि ऊ वहां सी पत्नी लाये, अऊर ओख आशीर्वाद देन को समय यो आज्ञा भी दी, “तय कोयी कनानी टुरी सी बिहाव मत कर लेजो,”
GEN 28:7 अऊर याकूब अपनो माय बाप की आज्ञा मान क पद्दनराम ख चली गयो।
GEN 28:8 तब एसाव यो सब देख क् अऊर यो भी सोच क कि कनानी टुरियां मोरो बाप इसहाक ख बुरी लगय हंय,
GEN 28:9 येकोलायी ऊ अब्राहम को बेटा इश्माएल को जवर गयो, अऊर एश्माएल की टुरी महलत ख, जो नबायोत की बहिन होती, ओको सी बिहाव कर क् अपनी पत्नियों म मिलाय लियो।
GEN 28:10 याकूब बेर्शेबा सी निकल क हारान नगर को तरफ चल्यो।
GEN 28:11 अऊर ओन कोयी एक जागा म पहुंच क रात उतच बितावन को बिचार करयो, कहालीकि सूरज डुब गयो होतो; येकोलायी ओन ऊ जागा म गिरयो गोटा म सी एक गोटा ले क ओख अपनी मुंड को खल्लो रख्यो, अऊर ऊ उच जागा पर सोय गयो।
GEN 28:12 तब याकूब न सपनो म देख्यो, कि एक सीढ़ी धरती पर खड़ी हय, अऊर ओको सिरा स्वर्ग तक पहुंच्यो हय; अऊर परमेश्वर को दूत ओको पर सी चढ़य अऊर उतरय हंय।
GEN 28:13 अऊर यहोवा ओको ऊपर खड़ो होय क कह्य हय, “मय यहोवा, तोरो दादा अब्राहम को परमेश्वर, अऊर इसहाक को भी परमेश्वर आय; जो जमीन पर तय सोयो हय, ओख मय तोख अऊर तोरो वंश ख देऊं।
GEN 28:14 अऊर तोरो वंश जमीन की धूल को कन को जसो बहुत सारो होयेंन, अऊर पश्चिम, पूर्व, उत्तर, दक्षिन, चारयी तरफ फैलतो जायेंन : अऊर तोरो अऊर तोरो वंश को द्वारा धरती को पूरो वंशज आशीष पायेंन।
GEN 28:15 अऊर सुन, मय तोरो संग रहूं, अऊर जित कहीं तय जाजो उत तोरी रक्षा करूं, अऊर तोख यो देश म वापस ले आऊं: जो बात मय न तोरो सी कहीं हंय, जब तक उन्ख पूरी नहीं कर लेऊं तब तक तोख नहीं छोडूं।”
GEN 28:16 तब याकूब नींद सी जग गयो, अऊर कहन लग्यो, “निश्चय यो जागा म यहोवा हय; अऊर मय यो बात ख नहीं जानत होतो।”
GEN 28:17 अऊर ओन डर को मारे कह्यो, “या जागा कितनी भयानक हय! यो त परमेश्वर को भवन को अलावा अऊर कुछ नहीं होय सकय; नहीं त यो स्वर्ग म खुलन वालो फाटकच होना।”
GEN 28:18 सुबेरे याकूब उठ्यो, अऊर ओन अपनो मुंड को खल्लो रख्यो हुयो गोटा ख उठायो, अऊर ओख खम्बा को जसो खड़ो करयो, अऊर ओको बाद ओकी मुंड पर तेल डाल दियो।
GEN 28:19 अऊर ओन ऊ जागा को नाम बेतेल रख्यो; पर ऊ नगर को नाम पहिले लूज होतो।
GEN 28:20 तब याकूब न परमेश्वर सी एक कसम मांगी, “यदि तय मोरो संग रह्य क यो यात्रा म मोरी रक्षा करजो, अऊर मोख खान लायी रोटी, अऊर पहिन न लायी कपड़ा दे,
GEN 28:21 कि मय अपनो बाप को घर म अच्छी तरह सी लौट आऊं; त तय यहोवा च मोरो परमेश्वर होयजो।
GEN 28:22 खम्भा अऊर यो गोटा जेको मय न खम्बा खड़ो करयो हय, यो परमेश्वर को भवन बनेंन, अऊर जो कुछ तय मोख देजो ओकोच दसवा हिस्सा मय जरूरच तोख दियो करूं।”
GEN 29:1 याकूब न अपनी रस्ता पकड़ी, अऊर पूर्व को निवासियों को देश म आयो।
GEN 29:2 ओन नजर कर क् देख्यो कि मैदान म एक कुंवा हय, अऊर ओको जवर शेरी मेंढियों को तीन झुण्ड बैठ्यो हुयो हंय; कहालीकि जो गोटा ऊ कुंवा को ऊपर रहत होतो, जेको म सी झुण्डों ख पानी पिलायो जात होतो, ऊ भारी होतो।
GEN 29:3 अऊर जब सब झुण्ड वहां जमा होय जावय तब चरावन वालो ऊ गोटा ख कुंवा को ऊपर सी गंडलाय क शेरी मेंढियों ख पानी पिलात होतो, अऊर फिर गोटा ख कुंवा को ऊपर जसो को वसो रख देत होतो।
GEN 29:4 तब याकूब न चरावन वालो सी पुच्छ्यो, “हे मोरो भाऊवों, तुम कित सी आयो हय?” उन्न कह्यो, “हम हारान नगर सी आयो हंय।”
GEN 29:5 तब याकूब न उन्को सी पुच्छ्यो, “का तुम नाहोर को नाती लाबान ख जानय हय?” उन्न कह्यो, “हव, हम ओख जानजे हंय।”
GEN 29:6 तब ओन उन्को सी पुच्छ्यो, “का ऊ खुश हय?” उन्न कह्यो, “हव, ऊ खुश हय अऊर तब, ओकी बेटी राहेल शेरी मेंढियों ख धर क चली आवय हय।”
GEN 29:7 याकूब न कह्यो, “देखो, अभी त दिन बहुत हय, जनावरों को जमा होन को समय नहीं आयो हय; येकोलायी शेरी मेंढियों ख पानी पिलाय क फिर सी लिजाय क चरावों।”
GEN 29:8 उन्न कह्यो, “हम अभी असो नहीं कर सकजे; जब सब झुण्ड जमा होवय हंय तब गोटा कुंवा को ऊपर सी गंडलायो जावय हय, अऊर तब हम शेरी मेंढियों ख पानी पिलाजे हंय।”
GEN 29:9 उन्की यो बात चीत होतच रह्य कि राहेल, जो जनावर चरायो करत होती, अपनो बाप की शेरी मेंढियों ख धर क आय गयी।
GEN 29:10 याकूब न अपनो मामा अऊर लाबान की बेटी राहेल ख, अऊर ओकी शेरी मेंढियों ख देख्यो त जवर जाय क कुंवा को ऊपर सी गोटा ख गंडलायो अऊर अपनो मामा लाबान की शेरी मेंढियों ख पानी पिलायो।
GEN 29:11 तब याकूब न राहेल को चुम्यो, अऊर जोर जोर सी रोयो।
GEN 29:12 अऊर याकूब न राहेल ख बताय दियो, कि मय तोरो फुफ भाऊ आय, मतलब रिबका को टुरा आय। तब राहेल दौड़ क अपनो बाप सी कह्य दियो।
GEN 29:13 अपनो भास्या याकूब को समाचार पातोच लाबान ओको सी मिलन ख दौड़्यो, अऊर ओख गलो लगाय क चुम्यो, तब अपनो घर ले आयो। याकूब न लाबान ख अपनो सब लेखा सुनायो।
GEN 29:14 तब लाबान न याकूब सी कह्यो, “तय त सचमुच मोरी हड्डी अऊर मांस हय।” अऊर याकूब एक महीना भर ओको संग रह्यो।
GEN 29:15 तब लाबान न याकूब सी कह्यो, “कुटुम्बी होन को वजह तोरो सी फुकट म सेवा करवानो मोरो लायी उचित नहाय; येकोलायी मोख बताव कि मय तोख सेवा को बदला म का देऊं?”
GEN 29:16 लाबान की दोय बेटियां होती, जिन्म सी बड़ी को नाम लिआ अऊर छोटी को राहेल होतो।
GEN 29:17 लिआ की आंखी धुन्धरी होती, पर राहेल बहुत अच्छी अऊर सुन्दर होती।
GEN 29:18 येकोलायी याकूब न, जो राहेल सी प्रेम करत होतो, ओन कह्यो, “मय तोरी छोटी बेटी राहेल लायी सात साल तोरी सेवा करूं।”
GEN 29:19 लाबान न कह्यो, “ओख परायो आदमी ख देन सी अच्छो तोख देनो अच्छो होयेंन; येकोलायी मोरो जवर रह्य।”
GEN 29:20 तब याकूब न राहेल लायी सात साल सेवा करी; अऊर हि ओख राहेल को प्रेम को वजह थोड़ोच दिनों को बराबर जान पड़्यो।
GEN 29:21 तब याकूब न लाबान सी कह्यो, “मोरी पत्नी मोख दे, अऊर मय ओको जवर जाऊं, कहालीकि मोरो समय पूरो भय गयो हय।”
GEN 29:22 तब लाबान न ऊ जागा को सब आदमियों ख बुलाय क जमा करयो, अऊर बिहाव को खाना दियो।
GEN 29:23 शाम को समय ऊ अपनी बेटी लिआ ख याकूब को जवर ले गयो, अऊर याकूब ओको जवर गयो।
GEN 29:24 लाबान न अपनी बेटी लिआ ख अपनी दासी जिल्पा दी कि वा ओकी सेवा करे।
GEN 29:25 सुबेरे ख मालूम भयो कि या त लिआ आय, येकोलायी ओन लाबान सी कह्यो, “यो तय न मोरो संग का करयो हय? मय न तोरो संग रह्य क जो तोरी सेवा करी, त का राहेल लायी नहीं करी? फिर तय न मोरो सी असो कहाली धोखा करयो हय?”
GEN 29:26 लाबान न कह्यो, “हमरो यहां असी रीति नहाय कि बड़ी बेटी सी पहिले दूसरी को बिहाव कर दे।
GEN 29:27 येको हप्ता त पूरो कर; तब दूसरी भी तोख ऊ सेवा लायी मिलेंन जो तय मोरो संग रह्य क अऊर सात साल तक करजो।”
GEN 29:28 याकूब न असोच करयो, अऊर लिआ को हप्ता ख पूरो करयो; तब लाबान न ओख अपनी बेटी राहेल भी दी कि वा ओकी पत्नी हो।
GEN 29:29 लाबान न अपनी बेटी राहेल की दासी होन लायी अपनी दासी बिल्हा ख दियो।
GEN 29:30 तब याकूब राहेल को जवर भी गयो, पर ओन लिआ सी जादा राहेल सी प्रेम करयो; ओन सात साल अऊर लाबान की सेवा करी।
GEN 29:31 जब यहोवा न देख्यो, कि लिआ सी नफरत करी जावय हय, तब ओन ओख गर्भवती बनायो, पर राहेल बांझ रही।
GEN 29:32 तब लिआ गर्भवती भयी अऊर ओको एक टुरा पैदा भयो, अऊर ओन यो कह्य क ओको नाम रूबेन रख्यो, “यहोवा न मोरो दु:ख पर नजर करी हय, अब मोरो पति मोरो सी प्रेम रखेंन।”
GEN 29:33 तब वा गर्भवती भयी अऊर ओको एक टुरा पैदा भयो; तब ओन यो कह्यो, “यो सुन क कि मोरो सी नफरत करी गयी हय, यहोवा न मोख यो टुरा भी दियो।” येकोलायी ओन ओको नाम शिमोन रख्यो।
GEN 29:34 तब वा गर्भवती भयी अऊर ओको एक टुरा पैदा भयो; अऊर ओन कह्यो, “अब त मोरो पति मोरो सी मिल जायेंन, कहालीकि ओको सी मोरो तीन टुरा पैदा भयो।” येकोलायी ओको नाम लेवी रख्यो गयो।
GEN 29:35 अऊर तब वा गर्भवती भयी अऊर ओको एक अऊर टुरा पैदा भयो; अऊर ओन कह्यो, “अब त मय यहोवा को धन्यवाद करूं।” येकोलायी ओन ओको नाम यहूदा रख्यो; तब ओकी कोख बन्द होय गयी।
GEN 30:1 जब राहेल न देख्यो कि याकूब लायी मोरो सी कोयी सन्तान नहीं होवय, तब वा अपनी बहिन सी नफरत करन लगी अऊर याकूब सी कह्यो, “मोख भी सन्तान दे, नहीं त मर जाऊं।”
GEN 30:2 तब याकूब न राहेल सी जलन सी कह्यो, “का मय परमेश्वर आय? तोरी कोख त ओनच बन्द कर रखी हय।”
GEN 30:3 राहेल न कह्यो, “देखो, मोरी दासी बिल्हा हय; ओकोच जवर जा, ताकि वा मोरो लायी बच्चा पैदा कर सके, अऊर ओको द्वारा मोरो भी घर बसेंन।”
GEN 30:4 तब राहेल न अपनी दासी याकूब ख दी कि वा ओकी पत्नी हो; अऊर याकूब ओको जवर गयो।
GEN 30:5 अऊर बिल्हा गर्भवती भयी अऊर याकूब सी ओको एक टुरा पैदा भयो।
GEN 30:6 तब राहेल न कह्यो, “परमेश्वर न मोरो न्याय चुकायो अऊर मोरी सुन क मोख एक बेटा दियो।” येकोलायी ओन ओको नाम दान रख्यो।
GEN 30:7 राहेल की दासी बिल्हा फिर गर्भवती भयी अऊर याकूब सी एक टुरा अऊर पैदा भयो।
GEN 30:8 तब राहेल न कह्यो, “मय न अपनी बहिन को संग बड़ी ताकत सी लड़ाई लड़ी हय, लेकिन मय जीत गयी हय।” येकोलायी ओन ओको नाम नप्ताली रख्यो।
GEN 30:9 जब लिआ न देख्यो कि ओकी सन्तान होनो बन्द होय गयो हय, तब ओन अपनी दासी जिल्पा ख ले क याकूब की पत्नी होन लायी दे दी।
GEN 30:10 अऊर लिआ की दासी जिल्पा ख भी याकूब सी एक टुरा पैदा भयो।
GEN 30:11 तब लिआ न कह्यो, “अहो भाग्य!” येकोलायी ओन ओको नाम गाद रख्यो।
GEN 30:12 तब लिआ की दासी जिल्पा ख याकूब सी अऊर एक टुरा पैदा भयो।
GEN 30:13 तब लिआ न कह्यो, “मय धन्य हय; निश्चय बाईयों मोख धन्य कहेंन।” येकोलायी ओन ओको नाम आशेर रख्यो।
GEN 30:14 गहूं काटन को दिनों म रूबेन ख मैदान म दूदा फर मिल्यो, अऊर ऊ उन्ख अपनी माय लिआ को जवर ले गयो। तब राहेल न लिआ सी कह्यो, “अपनो बेटा को दूदा फर म सी कुछ मोख दे।”
GEN 30:15 लिआ न ओको सी कह्यो, “तय न जो मोरो पति ख ले लियो हय का या छोटी सी बात हय? अब का तय मोरो बेटा को दूदा फर भी लेनो चाहवय हय?” राहेल न कह्यो, “अच्छा, तोरो बेटा को दूदा फरों को बदला ऊ अज रात ख तोरो संग सोयेंन।”
GEN 30:16 शाम ख जब याकूब मैदान सी आय रह्यो होतो, तब लिआ ओको सी मिल न ख निकली, अऊर कह्यो, “तोख मोरोच जवर आनो होना, कहालीकि मय न अपनो बेटा को दूदा फर देख क तोख सचमुच ले लियो।” तब याकूब ऊ रात ख ओकोच संग सोयो।
GEN 30:17 तब परमेश्वर न लिआ की सुनी, अऊर वा गर्भवती भयी अऊर याकूब सी ओको पाचवों टुरा पैदा भयो।
GEN 30:18 तब लिआ न कह्यो, “मय न जो अपनो पति ख दासी दी, येकोलायी परमेश्वर न मोख मोरी मजूरी दी हय।” येकोलायी ओन ओको नाम इस्साकार रख्यो।
GEN 30:19 लिआ : फिर गर्भवती भयी अऊर याकूब सी ओको छठवो टुरा पैदा भयो।
GEN 30:20 तब लिआ न कह्यो, “परमेश्वर न मोख अच्छो दान दियो हय; अब की बार मोरो पति मोरो संग बन्यो रहेंन, कहालीकि मोरो ओको सी छय टुरा पैदा भय गयो हंय।” येकोलायी ओन ओको नाम जबूलून रख्यो।
GEN 30:21 येको बाद ओकी एक टुरी भी भयी, अऊर ओन ओको नाम दीना रख्यो।
GEN 30:22 परमेश्वर न राहेल की भी सुधि ली, अऊर ओकी प्रार्थना सुन क ओकी कोख खोली।
GEN 30:23 येकोलायी वा गर्भवती भयी अऊर ओन एक टुरा ख जनम दियो, तब ओन कह्यो, “परमेश्वर न मोरी नामधरायी ख दूर कर दियो हय।”
GEN 30:24 येकोलायी ओन यो कह्य क ओको नाम यूसुफ रख्यो, “परमेश्वर मोख एक बेटा अऊर देयेंन।”
GEN 30:25 जब राहेल सी यूसुफ पैदा भयो, तब याकूब न लाबान सी कह्यो, “मोख बिदा कर कि मय अपनो देश अऊर घर ख वापस जाऊं।
GEN 30:26 मोख मोरी पत्नियां अऊर मोरो बच्चा, दे जिन्को लायी मय न तोरी सेवा करी हय, कि मय उन्ख ले क चली जाऊं; तय जो जानय हय कि मय न तोरी कसी सेवा करी हय।”
GEN 30:27 लाबान न ओको सी कह्यो, “यदि तोरी नजर म मय न अनुग्रह पायो हय, त इतच रह्य जा; कहालीकि मय न अनुभव सी जान लियो हय कि परमेश्वर न तोरो वजह सी मोख आशीष दी हय।”
GEN 30:28 तब याकूब न कह्यो, “तय ठीक बता कि मय तोख का देऊं, अऊर मय जरूर ओख देऊं।”
GEN 30:29 याकूब न ओको सी कह्यो, “तय जानय हय कि मय न तोरी कसी सेवा करी, अऊर तोरो जनावर मोरो जवर कसो तरह सी रह्यो।
GEN 30:30 मोरो आन सी पहिले हि कितनो होतो, अऊर अब कितनो भय गयो हंय; अऊर यहोवा न मोरो आनो पर तोख आशीष दी हय। पर मय अपनो घर को काम अब कब करन पाऊं?”
GEN 30:31 लाबान न फिर कह्यो, “मय तोख का देऊं?” याकूब न कह्यो, “तय मोख कुछ मत दे; यदि तय मोरो लायी एक काम करजो, त मय फिर तोरी शेरी मेंढियों ख चराऊं, अऊर उन्की रक्षा करूं।
GEN 30:32 मय अज तोरी सब शेरी मेंढियों को बीच म सी होय क निकलूं, अऊर जो शेरी या मेंढी धब्बा वाली अऊर चितबहाड़ी हो, अऊर जो मेंढी कारी हो, अऊर जो शेरी धब्बा वाली अऊर चितबहाड़ी हो, उन्ख मय अलग कर क् रखूं; अऊर याच मोरी मजूरी ठहरेंन।
GEN 30:33 अऊर जब आगु ख मोरी मजूरी की चर्चा तोरो आगु चले, तब ऊ दिन सच्चायी मोरो बदला तोख उत्तर देयेंन; मतलब शेरियों म सी जो कोयी बिना धब्बा वाली अऊर न चितबहाड़ी हो, अऊर मेंढी म सी जो कोयी कारी नहीं हो, यदि मोरो जवर निकले त चोरी की ठहरेंन।”
GEN 30:34 तब लाबान न कह्यो, “तोरो कहन को अनुसार हो।”
GEN 30:35 तब लाबान न उच दिन सब धारी वालो अऊर धब्बा वालो बकरों, अऊर सब धब्बा वाली चितबहाड़ी शेरियों ख, मतलब जेको पर सफेद धब्बा होतो, उन्ख अऊर सब कारी मेंढियों ख भी अलग कर क् अपनो बेटावों को हाथ सौंप दियो;
GEN 30:36 अऊर ओन अपनो अऊर याकूब को बीच म तीन दिन की रस्ता को अन्तर ठहरायो; अऊर याकूब लाबान की शेरी मेंढियों ख चरान लग्यो।
GEN 30:37 तब याकूब न चिनार, अऊर बादाम, अऊर अर्मोन को झाड़ों की हरी हरी डगालियां ले क, उन्को छिलटा कहीं छील क, उन्ख धारीदार बनाय दियो, अऊर उन छड़ियों की सफेदी दिखायी देन लगी।
GEN 30:38 तब छीली हुयी छड़ियों ख शेरी मेंढियों को आगु उन्को पानी पीवन को डोंगी म खड़ी करयो; अऊर जब हि पानी पीवन लायी आयी तब हि गाभन भय गयी।
GEN 30:39 छड़ियों को आगु गाभन होय क, शेरी मेंढी धारी वालो, धब्बा वालो अऊर चितबहाड़ी बच्चा जनी।
GEN 30:40 तब याकूब न मेंढियों को बच्चा ख अलग अलग करयो, अऊर लाबान की शेरी मेंढियों को मुंह ख धब्बा वालो अऊर सब कारो बच्चा को तरफ कर दियो; अऊर अपनो झुण्डों ख उन्को सी अलग रख्यो, अऊर लाबान की शेरी मेंढियों सी मिलन नहीं दियो।
GEN 30:41 अऊर जब जब ताकतवर शेरी मेंढी गाभन होत रह्य, तब तब याकूब उन छड़ियों ख उन्को आगु घड़ा म रख देत रह्य; जेकोसी हि ऊ छड़ियों ख देखतो हुयो गाभन होत रह्य।
GEN 30:42 पर जब कमजोर शेरी मेंढी गाभन होत रही, तब ऊ छड़ियों ख उन्को आगु नहीं रखत रह्य। येको सी कमजोर कमजोर शेरी मेंढी लाबान की भयी, अऊर ताकतवर शेरी मेंढी याकूब की भयी।
GEN 30:43 यो तरह याकूब बहुत धनी भय गयो, अऊर ओको बहुत सो शेरी मेंढी, दासियां अऊर दास, अऊर ऊंट अऊर गधा भय गयो।
GEN 31:1 तब लाबान को टुरावों कि या बाते याकूब को सुननो म आयी, “याकूब न हमरो बाप को सब कुछ छीन लियो हय, अऊर हमरो बाप को धन को वजह ओकी या प्रतिष्ठा हय।”
GEN 31:2 अऊर याकूब न लाबान को मुंह पर नजर करी अऊर देख लियो कि ऊ ओको प्रति पहिले को जसो नहीं रह्यो।
GEN 31:3 तब यहोवा न याकूब सी कह्यो, “अपनो पूर्वजों को देश अऊर अपनी जन्मभूमि पर वापस चली जा, अऊर मय तोरो संग रहूं।”
GEN 31:4 तब याकूब न राहेल अऊर लिआ : ख मैदान म अपनी शेरी मेंढियों को जवर बुलाय क कह्यो,
GEN 31:5 “तुम्हरो बाप को मुंह सी मय जान लेऊ हय कि ऊ मोख पहिले को जसो अब नहीं देखय; पर मोरो बाप को परमेश्वर मोरो संग हय।
GEN 31:6 तुम भी जानय हय कि मय न तुम्हरो बाप की सेवा पूरी शक्ति सी करी हय।
GEN 31:7 तब भी तुम्हरो बाप न मोरो सी छल कर क् मोरी मजूरी ख दस बार बदल दियो; पर परमेश्वर न ओख मोरो कुछ बुरो करन नहीं दियो।
GEN 31:8 जब ओन कह्यो, ‘धब्बा वालो बच्चा तोरी मजूरी ठहरेंन,’ तब सब शेरी मेंढी धब्बा वालो बच्चाच जनन लगी; अऊर जब ओन कह्यो, ‘धारी वालो बच्चा तोरी मजूरी ठहरेंन,’ तब सब शेरी मेंढी धारी वालो बच्चा जनन लगी।
GEN 31:9 यो रीति सी परमेश्वर न तुम्हरो बाप को जनावर ले क मोख दे दियो।
GEN 31:10 “शेरी मेंढियों को गाभन होन को समय मय न सपनो म यो देख्यो कि जो बकरा शेरियों पर चढ़ रह्यो हंय, हि धारी वालो, धब्बा वालो, अऊर चितबहाड़्या।
GEN 31:11 तब परमेश्वर को दूत न सपनो म मोरो सी कह्यो, ‘हे याकूब,’ मय न कह्यो, ‘का आज्ञा हय।’
GEN 31:12 ओन कह्यो, ‘आंखी उठाय क उन सब बकरा ख देख जो शेरियों पर चढ़ रह्यो हंय, कि हि धारी वालो, धब्बा वालो, अऊर चितबहाड़्या हंय; कहालीकि जो कुछ लाबान तोरो सी कह्य हय, ऊ मय न देख्यो हय।
GEN 31:13 मय ऊ बेतेल को परमेश्वर आय, जित तय न एक गोटा को खम्बा पर तेल डाल्यो होतो, अऊर मोरी मन्नत मानी होती। अब चल, यो देश सी निकल क अपनी जन्मभूमि पर वापस चली जा।’”
GEN 31:14 तब राहेल अऊर लिआ : न याकूब सी कह्यो, “का हमरो बाप को घर म अब भी हमरो लायी कुछ हिस्सा या जायजाद बची हय?
GEN 31:15 का हमरो बाप न हम्ख परायो नहीं समझ्यो? देख, ओन हम्ख त बेच डाल्यो, अऊर जो रुपया हम्ख हासिल भयो होतो ओख खुद खाय गयो हय।
GEN 31:16 येकोलायी परमेश्वर न हमरो बाप को जितनो धन ले लियो हय, ऊ हमरो अऊर हमरो टुरावों को आय; अब जो कुछ परमेश्वर न तोरो सी कह्यो हय, उच कर।”
GEN 31:17 तब याकूब न अपनो टुरावों अऊर पत्नियों ख ऊंटों पर बैठायो;
GEN 31:18 अऊर जितनो जनावरों ख ऊ पद्दनराम की सीमा म जमा कर क् धनवान भय गयो होतो, सब ख कनान देश म अपनो बाप इसहाक को जवर जान को बिचार सी, संग ले गयो।
GEN 31:19 लाबान अपनी मेंढियों को ऊन काटन गयो होतो, जब ऊ बाहेर गयो तब राहेल घर म घुसी अऊर अपनो बाप को गृहदेवतावों ख चुराय ख ले गयी।
GEN 31:20 तब याकूब लाबान अरामी वंशीय को जवर सी चोरी सी चली गयो, तब लाबान ख याकूब न नहीं बतायो कि मय भगन वालो हय।
GEN 31:21 याकूब न अपनो परिवार अऊर सब कुछ ले क भग्यो, अऊर फरात नदी को पार उतर क अपनो मुंह गिलाद को तरफ करयो अऊर पहाड़ी देश को तरफ चल पड़्यो।
GEN 31:22 तीसरो दिन लाबान ख समाचार मिल्यो कि याकूब भग गयो हय।
GEN 31:23 येकोलायी लाबान न अपनो भाऊवों ख संग ले क ओको सात दिन तक पीछा करयो, अऊर गिलाद को पहाड़ी देश म याकूब को संग जाय क मिल गयो।
GEN 31:24 पर परमेश्वर न रात को सपनो म अरामी लाबान को जवर आय क कह्यो, “सावधान रह्य, तय याकूब सी भलो बुरो मत कह्यजो।”
GEN 31:25 तब याकूब अपनो तम्बू गिलाद नाम की पहाड़ी देश म खड़ो कर क् होतो; अऊर लाबान न भी अपनो भाऊवों को संग अपनो तम्बू उच पहाड़ी देश म खड़ो करयो।
GEN 31:26 तब लाबान याकूब सी कहन लग्यो, “तय न यो का करयो कि मोरो जवर सी चोरी सी चल्यो आयो, अऊर मोरी टुरियों ख असो ले क आयो, मानो तलवार की ताकत सी बन्दी बनायी गयी हो?
GEN 31:27 तय कहाली चुपचाप सी भग क आयो, अऊर मोरो सी बिना कुछ कह्यो मोरो जवर सी चोरी सी चल्यो आयो; नहीं त मय तोख आनन्द को संग डफली अऊर वीणा बजवात, अऊर गीत गवातो बिदा करतो?
GEN 31:28 तय न त मोख अपनो टुरा अऊर टुरियों को भी चुम्मा तक नहीं लेन दियो? तय न मूर्खता को काम करयो हय।
GEN 31:29 तुम लोगों की हानि करन की शक्ति मोरो हाथ म त हय; पर तुम्हरो बाप को परमेश्वर न मोरो सी बीती हुयी रात म कह्यो, ‘सावधान रह्य, याकूब सी न त भलो कह्यजो न बुरो।’
GEN 31:30 मोख पता हय कि, अब तय अपनो बाप को घर म बड़ो उत्सुक सी चल्यो आयो हय, पर तय न मोरो घर को देवतावों ख कहाली चोर ख लायो?”
GEN 31:31 याकूब न लाबान ख उत्तर दियो, “मय यो सोच क डर गयो होतो कि कही तय अपनी टुरियों ख मोरो सी छीन न ले।
GEN 31:32 जो कोयी जवर तोरो अपनो देवतावों की मूर्ति मिलेंन, ऊ जीन्दो नहीं बचेंन। मोरो जवर तोरो जो कुछ निकले, ओख भाऊ बन्धुवों को आगु पहिचान क ले ले।” कहालीकि याकूब नहीं जानत होतो कि राहेल घर को देवतावों की मूर्तियां चोर क आयी हय।
GEN 31:33 यो सुन क लाबान याकूब को तम्बू म गयो; ओको बाद ऊ लिआ को तम्बू म गयो, अऊर तब ऊ दोयी दासियों को तम्बूवों म गयो; पर ओख मूर्तियां नहीं मिली। ओको बाद ऊ लिआ को तम्बू सी बाहेर निकल्यो अऊर राहेल को तम्बू म आयो।
GEN 31:34 राहेल त घर को देवतावों की मूर्तियां ख ऊंट को ऊपर को कपड़ा म लूकाय क उन्को पर बैठी होती। लाबान न ओको पूरो तम्बू म ढूंढ्यो पर उन्ख नहीं पायो।
GEN 31:35 राहेल न अपनो बाप सी कह्यो, “हे मोरो प्रभु; येको सी गुस्सा मत हो कि मय तोरो आगु नहीं उठी; कहालीकि मय मासिक धर्म सी हय।” यो तरह लाबान न ढूंढ्यो पर ओख घर को देवतावों की मूर्तियां नहीं मिली।
GEN 31:36 तब याकूब गुस्सा म आय क लाबान सी झगड़ा करन लग्यो, अऊर कह्यो, “मोरो का अपराध हय? मोरो का पाप हय कि तय न इतनो गुस्सा म आय क मोरो पीछा करयो हय?
GEN 31:37 तय न जो मोरो पूरो सामान की तलाशी ली, त तोख अपनो घर को पूरो सामान म सी का मिल्यो? कुछ मिल्यो होना त ओख इत अपनो अऊर मोरो भाऊवों को आगु रख दे, अऊर हि हम दोयी को बीच न्याय करे।
GEN 31:38 इन बीस सालों तक मय तोरो जवर रह्यो; इन म न त तोरी शेरी मेंढियों को गर्भ गिरयो, अऊर न तोरो मेंढा को मांस मय न कभी खायो।
GEN 31:39 जो मेंढियों ख जंगली जनावर मार डालत रह्य ओख मय तोरो जवर नहीं लात रह्य, अऊर मय खुद ऊ हानि को पूर्ति करत होतो; मेंढियों की चोरी चाहे रात ख हो, या दिन ख, तय मोरो सीच ओकी पूरी पूर्ति करवात होतो।
GEN 31:40 मोरी त असी दशा होती कि दिन की तपन अऊर रात की ठंडी सी मय मरयो जात होतो; अऊर मोरी नींद मोरी आंखी सी भग जात रह्य।
GEN 31:41 मय बीस साल तक तोरो घर म रह्यो; चौदा साल त मय न तोरी दोयी टुरियों लायी, अऊर छय साल तोरी शेरी मेंढियों लायी सेवा करी; अऊर तय न मोरी मजूरी ख दस बार बदल डाल्यो।
GEN 31:42 मोरो बाप को परमेश्वर, मतलब अब्राहम को परमेश्वर, जेको डर इसहाक भी मानय हय, यदि मोरो पक्ष म नहीं होतो त तय जरूरच मोख खाली हाथ बिदा कर देतो। मोरो दु:ख अऊर मोरो हाथों को परिश्रम ख देख क परमेश्वर न बीती हुयी रात म तोख डाट्यो।”
GEN 31:43 लाबान न याकूब सी कह्यो, “हि टुरियां त मोरोच आय, अऊर हि बच्चा भी मोरोच आय, अऊर हि शेरी मेंढियां भी मोरीच आय, अऊर जो कुछ तोख दिखय हय ऊ सब मोरोच आय। पर अब मय अपनी इन टुरियों, अऊर इन्की सन्तान सी का कर सकू हय?
GEN 31:44 अब आव, मय अऊर तय हम दोयी आपस म वाचा करबो, अऊर ऊ वाचा मोरो अऊर तोरो बीच याद रहन लायी हम गोटा को एक खम्भा बनायबो।”
GEN 31:45 तब याकूब न एक गोटा ले क ओको खम्भा खड़ो करयो।
GEN 31:46 तब याकूब न अपनो भाऊ बन्धुवों सी कह्यो, “गोटा जमा करो,” यो सुन क उन्न गोटा जमा कर क् एक ढेर लगायो, अऊर उच ढेर को जवर उन्न जेवन करयो।
GEN 31:47 ऊ ढेर को नाम लाबान न त यज्रसहादुथा रख्यो, पर याकूब न गिलियाद रख्यो।
GEN 31:48 लाबान न कह्यो, “यो ढेर अज सी मोरो अऊर तोरो बीच साक्षी रहेंन।” यो वजह ओको नाम गिलियाद रख्यो गयो,
GEN 31:49 तब लाबान न कह्यो, “जब हम एक दूसरो सी अलग रह्यो तब यहोवा मोरी अऊर तोरी देखभाल करतो रह्यो, येकोलायी ऊ जागा को नाम मिज़पा भी रहेंन।”
GEN 31:50 तब लाबान न कह्यो, “यदि तय मोरी टुरियों ख दु:ख दे, या उन्को अलावा अऊर दूसरी बाईयां सी बिहाव कर ले, त हमरो संग कोयी आदमी त नहीं रहेंन; पर देख, मोरो तोरो बीच म परमेश्वर साक्षी रहेंन।”
GEN 31:51 तब लाबान न याकूब सी कह्यो, “यो ढेर ख देख अऊर यो खम्भा ख भी देख, जिन्ख मय न अपनो अऊर तोरो बीच म खड़ो करयो हय।
GEN 31:52 यो ढेर अऊर यो खम्भा दोयी या बात को गवाह रहे कि यो ढेर ख पार कर क् तोरो जवर हानि करन को बिचार सी मय नहीं आऊं, अऊर तय यो ढेर अऊर खम्भा ख पार कर क् मोरो जवर नहीं आजो।
GEN 31:53 अब्राहम अऊर नाहोर अऊर उन्को बाप; इन तीनो को जो परमेश्वर हय, उच हम दोयी को बीच न्याय करे।” तब याकूब न ओकी कसम खायी जेको डर ओको बाप इसहाक मानत होतो;
GEN 31:54 अऊर याकूब न ऊ पहाड़ी पर जनावर की बलि चढ़ायी, अऊर अपनो भाऊ बन्धुवों ख जेवन करन लायी बुलायो; तब उन्न जेवन कर क् पहाड़ी पर रात बितायी।
GEN 31:55 दूसरो दिन भुन्सारे ख लाबान उठ्यो, अऊर अपनो नातियों को चुम्मा ले क टुरियों ख अलबिदा बोल क उन्ख आशीर्वाद दियो, अऊर अपनो घर ख चली गयो।
GEN 32:1 याकूब न भी अपनी रस्ता लियो अऊर परमेश्वर को दूत ओख आय मिल्यो
GEN 32:2 ओख देखतोच याकूब न कह्यो, “यो त परमेश्वर को दल हय।” येकोलायी ओन ऊ जागा को नाम महनैम रख्यो।
GEN 32:3 तब याकूब न सेईर देश म, यानेकि एदोम देश म, अपनो भाऊ एसाव को जवर अपनो आगु खबरी ख भेज दियो,
GEN 32:4 अऊर याकूब न खबर भेजन वालो ख या आज्ञा दी, “मोरो प्रभु एसाव सी यो कह्यजो : तोरो दास याकूब तोरो सी यो कह्य हय कि मय लाबान को यहां परदेशी होय क अब तक रह्यो;
GEN 32:5 अऊर मोरो जवर गाय बईल, गधा, शेरी मेंढी, अऊर दास दासियां हंय : अऊर मय न अपनो प्रभु को जवर येकोलायी सन्देश भेज्यो हय कि तोरो अनुग्रह कि नजर मोरो पर हो।”
GEN 32:6 हि दूत याकूब को जवर वापस आय क कहन लग्यो, “हम तोरो भाऊ एसाव को जवर गयो होतो, अऊर ऊ भी तोरो सी मुलाखात करन ख चार सौ आदमी को संग चल्यो आय रह्यो हय।”
GEN 32:7 तब याकूब बहुत डर गयो, अऊर मुसीबत म पड़्यो; अऊर यो सोच क अपनो संगियों को, अऊर शेरी मेंढियों को, गाय बईल को, अऊर ऊंटों ख भी अलग कर क दोय दल बनायो,
GEN 32:8 कि यदि एसाव आय क पहिलो दल ख मारन लगे, त दूसरो दल भग क बच जायेंन।
GEN 32:9 तब याकूब न परमेश्वर सी कह्यो, “हे मोरो दादा अब्राहम को परमेश्वर, हे मोरो बाप इसहाक को परमेश्वर, तय न त मोरो सी कह्यो होतो कि अपनो देश अऊर जन्मभूमि म लौट जा, अऊर मय तोरी भलायी करूं :
GEN 32:10 तय न जो जो काम अपनी करुना अऊर सच्चायी सी अपनो दास को संग करयो हंय, कि मय जो अपनी छड़ीच ले क या यरदन नदी को पार उतर आयो, अऊर अब मोरो दोय दल होय गयो हंय; तोरो असो असो कामों म सी मय एक को भी लायक त नहाय।
GEN 32:11 मोरी बिनती सुन क मोख मोरो भाऊ एसाव को हाथ सी बचा : मय त ओको सी डरू हय, कही असो नहीं होय कि ऊ आय क मोख अऊर माय को संग टुरावों ख भी मार डाले।
GEN 32:12 तय न त कह्यो हय कि मय निश्चय तोरी भलायी करूं, अऊर तोरो वंश ख समुन्दर की रेतु को कन को जसो बहुत करूं, जो बहुतायत को मारे गिन्यो नहीं जाय सकय।”
GEN 32:13 याकूब न ऊ दिन रात उतच बितायी; अऊर जो कुछ ओको जवर होतो ओको म सी अपनो भाऊ एसाव की भेंट लायी छांट छांट क निकाल्यो;
GEN 32:14 यानेकि दोय सौ मादा शेरियां, अऊर बीस नर बकरा, अऊर दोय सौ मादा मेंढी, अऊर बीस नर मेंढा,
GEN 32:15 अऊर बच्चा समेत दूध देन वाली तीस मादा ऊंट, अऊर चालीस गाय, दस बईल, अऊर बीस मादा गधी अऊर उन्को दस बच्चा।
GEN 32:16 इन्क याकूब न झुण्ड झुण्ड म कर क्, अपनो दासों ख सौंप क उन्को सी कह्यो, “मोरो आगु बढ़ जावो; अऊर झुण्डों को बीच बीच म दूरी रखो।”
GEN 32:17 तब याकूब न अगलो झुण्ड को रख वालो ख या आज्ञा दी, “जब मोरो भाऊ एसाव तोख मिले, अऊर पूछन लगे, ‘तय कोन्को दास आय, अऊर कित जावय हय, अऊर हि जो तोरो आगु आगु हंय, हि कोन्को जनावर आय?’
GEN 32:18 तब कह्यजो, ‘यो तोरो दास याकूब को जनावर हंय। हे मोरो प्रभु एसाव, हि भेंट देन लायी तोरो जवर भेज्यो गयो हंय, अऊर तोरो दास खुदच हमरो पीछू पीछू आय रह्यो हय।’”
GEN 32:19 अऊर याकूब न दूसरो अऊर तीसरो रख वालो ख भी, बल्की उन पूरो ख जो झुण्डों को पीछू पीछू होतो असीच आज्ञा दी कि जब एसाव तुम ख मिले तब योच तरह ओको सी कहो।
GEN 32:20 अऊर यो भी कहो, “तोरो दास याकूब हमरो पीछू पीछू आय रह्यो हय।” कहालीकि ओन यो सोच्यो कि या भेंट जो मोरो आगु आगु जावय हय, येको द्वारा मय एसाव को गुस्सा ख शान्त कर क् तब ओको दर्शन करूं; होय सकय हय कि ऊ मोरो सी खुश होय जाये।
GEN 32:21 येकोलायी ओन झुण्ड कि भेंट याकूब सी पहिलेच भेज दी, अऊर ऊ खुद ऊ रात ख छावनी म रह्यो।
GEN 32:22 उच रात ख याकूब उठ्यो अऊर अपनी दोयी पत्नियों, दोयी दासियों अऊर ग्यारा टुरावों ख संग ले क घाट सी यब्बोक नदी को ओन पार उतर गयो।
GEN 32:23 याकूब न उन्ख नदी को ऊ पार उतार दियो, अऊर जो कुछ याकूब को जवर होतो सब कुछ उतार दियो।
GEN 32:24 अऊर याकूब खुद अकेलो रह्य गयो; तब कोयी आदमी आय क भुन्सारो तक याकूब सी कुश्ती करतो रह्यो।
GEN 32:25 जब ऊ आदमी न देख्यो कि मय याकूब ख हराय नहीं सकू, तब ओन याकूब को जांघ की नस ख छूयो, तब ऊ समय याकूब को जांघ की नस अपनी जागा सी हट गयी।
GEN 32:26 तब ऊ आदमी न कह्यो, “मोख जान दे, कहालीकि सुबेरे होन वाली हय,” याकूब न कह्यो, “जब तक तय मोख आशीर्वाद नहीं देजो, तब तक मय तोख जान नहीं देऊं।”
GEN 32:27 अऊर ओन याकूब सी पुच्छ्यो, “तोरो नाम का हय?” ओन कह्यो, “याकूब।”
GEN 32:28 ओन कह्यो, “तोरो नाम अब याकूब नहाय, पर इस्राएल होयेंन, कहालीकि परमेश्वर सी अऊर आदमियों सी भी युद्ध कर क् तय न विजय हासिल करी हय।”
GEN 32:29 याकूब न कह्यो, “मय बिनती करू हय, मोख अपनो नाम बता।” ओन कह्यो, “तय मोरो नाम कहाली पूछय हय?” तब ओन याकूब ख उतच आशीर्वाद दियो।
GEN 32:30 तब याकूब न ऊ जागा को नाम पनीएल रख्यो; कहालीकि ओन कह्यो, “मय न परमेश्वर ख आमने सामने देखनो पर भी मय जीन्दो रह्यो।”
GEN 32:31 जब याकूब पनीएल सी जान लग्यो त सूरज निकल गयो, अऊर याकूब की जांघ की नस सुजन को वजह लंगड़ावत होतो।
GEN 32:32 इस्राएली जाति को लोग अज तक जनावरों को जांघ की नस ख जो जांघ को जोड़ो पर होवय हय, ओख नहीं खावय; कहालीकि ऊ आदमी न याकूब की जांघ म जांघ की नस को छूयो होतो।
GEN 33:1 याकूब न आंखी उठाय क यो देख्यो कि एसाव चार सौ आदमी ख संग लियो हुयो आय रह्यो हय। तब ओन बच्चा ख अलग अलग बाट क लिआ : राहेल अऊर दोयी दासियों ख उन्को बच्चा सौंप दियो।
GEN 33:2 अऊर ओन सब सी आगु दोयी दासियों अऊर उन्को बच्चा ख, उन्को पीछू लिआ ख ओको बच्चा को संग, अऊर सब सी पीछू राहेल अऊर यूसुफ ख खड़ो करयो,
GEN 33:3 अऊर याकूब खुद उन सब को आगु आगु गयो जब तक ऊ अपनो भाऊ को जवर नहीं पहुंच गयो, तब तक ऊ जमीन पर झुक क सात बात ओख दण्डवत करतो रह्यो।
GEN 33:4 तब एसाव ओको सी भेंट करन ख दौड़्यो, अऊर ओन याकूब ख दिल सी लगाय क, ओख गरो लगायो अऊर चुम्मा लियो; तब एसाव अऊर याकूब रोवन लग्यो।
GEN 33:5 तब एसाव न आंखी उठाय क बाईयों अऊर बच्चा ख देख्यो, अऊर याकूब सी पुच्छ्यो, “हि जो तोरो संग हंय हि कौन आय?” याकूब न कह्यो, “हि तोरो दास को बच्चा आय, जिन्ख परमेश्वर न अनुग्रह कर क् मोख दियो हय।”
GEN 33:6 तब दासियां अऊर उन्को बच्चा जवर आय क झुक क एसाव ख दण्डवत करयो;
GEN 33:7 योच तरह लिआ अऊर ओको बच्चा जवर आयो अऊर उन्न झुक क एसाव ख दण्डवत करयो; आखरी म यूसुफ अऊर राहेल न भी जवर आय क दण्डवत करयो।
GEN 33:8 तब एसाव न पुच्छ्यो, “तोरो यो बड़ो झुण्ड मोख मिल्यो, येको का मतलब हय?” याकूब न कह्यो, “हि तुम्ख मोरी भेंट हंय जेको सी तुम मोख स्वीकार कर सको।”
GEN 33:9 एसाव न कह्यो, “हे मोरो भाऊ, मोरो जवर त बहुत हय; जो कुछ तोरो हय ऊ तोरोच रहे।”
GEN 33:10 याकूब न कह्यो, “नहीं नहीं, यदि तोरो अनुग्रह मोरो पर हो, त मोरी भेंट ग्रहन कर; कहालीकि मय न तोरो दर्शन पा क, मानो परमेश्वर को दर्शन पायो हय, अऊर तय मोरो सी प्रसन्न भयो हय।
GEN 33:11 येकोलायी यो भेंट जो तोख भेजी गयी हय, ओख ग्रहन कर; कहालीकि परमेश्वर न मोरो पर अनुग्रह करयो हय, अऊर मोरो जवर बहुत हय।” जब याकूब न ओको सी बहुत आग्रह करयो, तब एसाव न भेंट ख ग्रहन करयो।
GEN 33:12 तब एसाव न कह्यो, “आव, हम अपनी रस्ता पर आगु चलबो; अऊर मय तोरो आगु आगु चलूं।”
GEN 33:13 याकूब न कह्यो, “हे मोरो स्वामी, तय त जानय हय कि मोरो बच्चा कमजोर हंय, मोरो संग दूध देन वाली शेरी मेंढियां अऊर गाय हंय; जिन्की देखभाल मोख करनो पड़य हय, यदि मय इन्क एक दिन भी ज्यादा दूर चलन लायी विवश करू हय, त सब को सब मर जायेंन।
GEN 33:14 येकोलायी मोरो स्वामी अपनो दास को आगु बढ़ जाये, अऊर मय इन जनावरों की गति को अनुसार जो मोरो आगु हंय, अऊर बच्चां की गति को अनुसार धीरू धीरू आगु चल क सेईर नगर म अपनो स्वामी को जवर पहुंचूं।”
GEN 33:15 एसाव न कह्यो, “त मय अपनो संगियों म सी कुछ ख तोरो संग छोड़ जाऊं।” तब याकूब न कह्यो, “येकी का जरूरत हय? इतनोच बहुत हय कि मोरो स्वामी की अनुग्रह की नजर मोरो पर बनी रहे।”
GEN 33:16 तब एसाव उच दिन सेईर नगर चली गयो।
GEN 33:17 पर याकूब उत सी निकल क सुक्कोत नगर ख गयो, अऊर उत अपनो लायी एक घर, अऊर जनावरों लायी कोठा बनायो। योच वजह ऊ जागा को नाम सुक्कोत पड़्यो।
GEN 33:18 याकूब पद्दनराम प्रदेश सी निकल क, कनान देश को शकेम नगर को जवर अच्छो सी पहुंच क ओन नगर को जवर तम्बू खड़ो करयो।
GEN 33:19 अऊर जो जमीन पर याकूब न तम्बू खड़ो करयो, ओख ओन शकेम को बाप हमोर को टुरावों को हाथ सी एक सौ चांदी को सिक्का म लेय लियो।
GEN 33:20 उत याकूब न एक वेदी बनाय क ओको नाम एल-एलोहे-इस्राएल रख्यो।
GEN 34:1 एक दिन लिआ की टुरी दीना, जो याकूब सी पैदा भयी होती, वा कनान देश की टुरियों सी भेंट करन ख गयी।
GEN 34:2 तब ऊ देश को प्रधान हमोर होतो हमोर को टुरा को नाम शकेम होतो ऊ हिव्वी जाति को होतो, शकेम न दीना ख पकड़ लियो अऊर अपनो संग शारीरिक सम्बन्ध बनाय क ओख भ्रष्ट कर डाल्यो।
GEN 34:3 तब शकेम को मन याकूब की टुरी दीना सी लग गयो, अऊर ओन दीना सी प्रेम की बाते करी, अऊर ओको सी प्रेम करन लग्यो।
GEN 34:4 तब शकेम न अपनो बाप हमोर सी कह्यो, “मोख या टुरी ख मोरी पत्नी को रूप म दिलाय दे।”
GEN 34:5 अऊर याकूब न सुन्यो कि शकेम न मोरी टुरी दीना ख अशुद्ध कर डाल्यो हय; पर याकूब को टुरा ऊ समय जनावरों को संग मैदान म होतो, येकोलायी याकूब उन्को आनो तक चुप रह्यो।
GEN 34:6 तब शकेम को बाप हमोर निकल क याकूब सी बातचीत करन लायी ओको जवर गयो।
GEN 34:7 तब याकूब को टुरावों न दीना को बारे म असो सुन्यो त मैदान सी बहुत उदास अऊर गुस्सा सी आयो; कहालीकि शकेम न याकूब की टुरी को संग सोय क इस्राएली समाज म मुर्खतापूर्न काम करयो होतो, असो करनो बहुत गलत होतो
GEN 34:8 हमोर न उन सब सी कह्यो, “मोरो टुरा शकेम तुम्हरी टुरी सी बहुत प्रेम करन लग्यो हय, कृपया अपनी टुरी ख पत्नी को रूप म शकेम ख प्रदान कर देवो।
GEN 34:9 अऊर हम लोगों सी बिहाव को सम्बन्ध बान्धो; अपनी बेटियां हम्ख देवो, अऊर हमरी बेटियां तुम लेवो।
GEN 34:10 तब तुम हमरो संग यो देश म रह्य सको; यो देश को दरवाजा तुम्हरो लायी खुल जायेंन, यहां रहो अऊर व्यापार करो, अऊर धन सम्पत्ति कमाय लेवो।”
GEN 34:11 शकेम न भी दीना को बाप अऊर भाऊवों सी कह्यो, “यदि मोरो पर तुम लोगों की अनुग्रह की नजर हो, त जो कुछ तुम मोरो सी कहो, ऊ मय तुम्ख देऊं।
GEN 34:12 तुम मोरो सी कितनो भी ज्यादा दाम अऊर भेंट मांगो, उतनो मय तुम्ख तुम्हरो वचन को अनुसार देऊं; पर तुम केवल मोख अपनी टुरी पत्नी को रूप म प्रदान कर देवो।”
GEN 34:13 तब यो सोच क कि शकेम न हमरी बहिन दीना ख अशुद्ध करयो हय, याकूब को टुरावों न शकेम अऊर ओको बाप हमोर ख छल को संग यो उत्तर दियो,
GEN 34:14 हि बोल्यो “हम असो काम नहीं कर सकजे कि कोयी बिना खतना वालो आदमी ख हम अपनी बहिन देबो, कहालीकि येको सी हमरो अपमान होयेंन।
GEN 34:15 हम केवल यो शर्त पर तुम्हरी बात मान सकजे हंय कि हमरो जसो तुम्हरी जाति को हर एक आदमी को खतना करयो जाये।
GEN 34:16 तब हम अपनी बेटियां तुम लोगों ख देबो, अऊर तुम्हरी बेटियां हम अपनाय लेबो, अऊर तुम्हरो संग बस्यो भी रह्यबोंन, अऊर हम दोयी एकच जाति को आदमी बन जाबो।
GEN 34:17 पर यदि तुम हमरी बात नहीं मानो अऊर खतना नहीं करो, त हम अपनी टुरी ख ले क इत सी चली जाबो।”
GEN 34:18 उन्की यो बात पर हमोर अऊर ओको टुरा शकेम खुश भयो।
GEN 34:19 अऊर युवक शकेम न ओकी मांग ख पूरो करनो म देर नहीं करयो, कहालीकि ऊ याकूब की टुरी ख बहुत चाहत होतो। ऊ अपनो बाप को पूरो परिवार म बहुत ज्यादा महत्वपूर्न आदमी होतो।
GEN 34:20 येकोलायी हमोर अऊर ओको टुरा शकेम अपनो नगर को फाटक को जवर जाय क नगर म रहन वालो ख यो समझान लग्यो,
GEN 34:21 “हि आदमी हमरो संग मिलझुल क रहनो चाहवय हंय, येकोलायी उन्ख यो देश म रह्य क लेन देन करन देवो; देखो, यो देश की जमीन उन्को लायी भी बहुत हय; तब हम लोग उन्की टुरियों सी भी बिहाव कर लेबो, अऊर अपनी टुरियों ख भी उन्ख दियो करबो।
GEN 34:22 हि लोग केवल यो बात पर हमरो संग रहन लायी अऊर एकच जाति को लोग होय जान लायी राजी हंय कि उन्को जसो हमरो सब आदमियों को भी खतना करयो जाये।
GEN 34:23 तब उन्की शेरी मेंढियां, अऊर गाय बईल अऊर उन्को पूरो जनावर अऊर धन सम्पत्ति हमरी नहीं होय जायेंन? इतनोच करे कि हम लोग उन्की बात मान ले, त हि हमरो संग रहेंन।”
GEN 34:24 येकोलायी जितनो ऊ नगर की फाटक सी निकलत होतो, उन पूरो न हमोर की अऊर ओको टुरा शकेम की बात मानी; अऊर हर एक आदमी को खतना करयो गयो, जितनो ऊ नगर की फाटक सी निकलत होतो।
GEN 34:25 तीसरो दिन, जब खतना करयो वालो लोग दु:ख म पड़्यो होतो, तब असो भयो कि शिमोन अऊर लेवी नाम को याकूब को दोय टुरावों न, जो दीना को भाऊ होतो, अपनी अपनी तलवार धर क ऊ नगर म बेधड़क घुस क सब आदमियों ख मार डाल्यो।
GEN 34:26 हमोर अऊर ओको टुरा शकेम ख उन्न तलवार सी मार डाल्यो, अऊर दीना ख शकेम को घर सी निकाल क लिजायो।
GEN 34:27 याकूब को दूसरो टुरावों न मार डालन पर भी उन्न नगर ख येकोलायी लूट लियो कि ऊ नगर म उन्की बहिन अशुद्ध करी गयी होती।
GEN 34:28 उन्न शेरी मेंढी गाय बईल, गधा, अऊर नगर अऊर मैदान म जितनो धन होतो लूट लियो।
GEN 34:29 उन सब ख, अऊर उन्को बाल बच्चा, अऊर उन्की बाईयों ख भी लिजायो, अऊर घर घर म जो कुछ होतो उन्ख भी उन्न लूट लियो।
GEN 34:30 तब याकूब न शिमोन अऊर लेवी सी कह्यो, “तुम न जो यो देश को निवासी म कनानियों अऊर परिज्जी जाति को मन म मोरो खिलाफ नफरत पैदा करायी हय, येको सी तुम न मोख संकट म डाल्यो हय, कहालीकि मोरो संग त थोड़ो सोच लोग हंय; येकोलायी अब हि जमा होय क मोरो पर हमला करेंन, अऊर मोख मार डालेंन, त मय अपनो घराना सहीत नाश होय जाऊं।”
GEN 34:31 उन्न कह्यो, “का ऊ हमरी बहिन को संग वेश्या को जसो बर्ताव करे?”
GEN 35:1 तब परमेश्वर न याकूब सी कह्यो, “इत सी निकल क बेतेल नगर ख जा, अऊर उतच रह्यजो; अऊर उत परमेश्वर लायी वेदी बना, जेन तोख ऊ समय दर्शन दियो जब तय अपनो भाऊ एसाव को डर सी भगत होतो।”
GEN 35:2 तब याकूब न अपनो घराना सी, अऊर उन सब सी भी कह्यो जो ओको संग होतो, “तुम्हरो बीच म जो परायो देवता हंय, उन्ख निकाल फेको; अऊर अपनो अपनो ख शुद्ध करो, अऊर अपनो कपड़ा बदल डालो;
GEN 35:3 अऊर आवो, हम इत सी निकल क बेतेल नगर ख जाबो; उत मय परमेश्वर लायी एक वेदी बनाऊं, जेन संकट को दिन म मोरी सुन ली, अऊर जो रस्ता सी मय चलत होतो, ओको म मोरो संग रह्यो।”
GEN 35:4 जितनो दूसरो देवतावों की मूर्तियां उन्को जवर होती, अऊर जितनो कुण्डल उन्को कानो म होतो, उन पूरो ख उन्न याकूब ख दे दियो; अऊर याकूब न उन्ख शकेम नगर को जवर बांझ झाड़ को खल्लो गाड़ दियो।
GEN 35:5 तब याकूब अऊर ओको टुरावों न प्रस्थान करयो; तब उन्को चारयी तरफ को नगर निवासियों को मन म परमेश्वर को असो डर समाय गयो कि उन्न याकूब को टुरावों को पीछा नहीं करयो।
GEN 35:6 याकूब उन पूरो को संग जो ओको संग होतो, कनान देश को लूज नगर म आयो। ऊ नगर बेतेल भी कहलावय हय।
GEN 35:7 उत याकूब न एक वेदी बनायी, अऊर ऊ जागा को नाम एलबेतेल रख्यो; कहालीकि जब ऊ अपनो भाऊ को डर सी भग्यो जात होतो तब परमेश्वर न खुद ख ओको पर उतच प्रगट करयो होतो।
GEN 35:8 अऊर रिबका की दूध पिलान वाली दाई दबोरा मर गयी, अऊर बेतेल नगर को बांझ झाड़ को खल्लो को भाग म ओख माटी दी गयी, अऊर ऊ बांझ झाड़ को नाम अल्लोनबक्कूत रख्यो गयो।
GEN 35:9 तब याकूब को पद्दनराम सी आन को बाद परमेश्वर न दूसरी बार ओख दर्शन दे क आशीष दी।
GEN 35:10 अऊर परमेश्वर न ओको सी कह्यो, “अब तक तोरो नाम याकूब रह्यो हय, पर आगु ख तोरो नाम याकूब नहीं रहेंन, पर तय इस्राएल कहलायजो।” यो तरह परमेश्वर न याकूब को नाम इस्राएल रख्यो।
GEN 35:11 तब परमेश्वर न ओको सी कह्यो, “मय सर्वशक्तिमान ईश्वर आय। तय फूल फल अऊर बढ़े; अऊर तोरो सी एक जाति अऊर जातियों की मण्डली भी पैदा होयेंन, अऊर तोरो वंश म राजा पैदा होयेंन।
GEN 35:12 अऊर जो देश मय न अब्राहम अऊर इसहाक ख दियो हय, उच देश तोख देऊ हय, अऊर तोरो पीछू तोरो वंश ख भी देऊं।”
GEN 35:13 तब परमेश्वर ऊ जागा म, जित ओन याकूब सी बाते करी, ओको जवर सी ऊपर चढ़ गयो।
GEN 35:14 अऊर जो जागा म परमेश्वर न याकूब सी बाते करी, उत याकूब न गोटा को एक खम्भा खड़ो करयो, अऊर ओको पर अंगूर रस अऊर जैतून को तेल डाल दियो।
GEN 35:15 जित परमेश्वर न याकूब सी बाते करी, ऊ जागा को नाम ओन बेतेल रख्यो।
GEN 35:16 तब याकूब अऊर ओको परिवार बेतेल नगर सी जान लग्यो। अऊर एप्राता नगर थोड़ोच दूर रह्य गयो होतो कि राहेल ख बच्चा पैदा होन की बड़ी पीड़ा उठन लगी।
GEN 35:17 जब ओख बड़ी बड़ी पीड़ा उठत होती तब सुईन न ओको सी कह्यो, “मत डर; अब की भी बार तोख टुराच होयेंन।”
GEN 35:18 तब असो भयो कि वा मर गयी, अऊर जीव निकलतो निकलतो ओन ऊ टुरा को नाम बेनोनी रख्यो; पर ओको बाप न ओको नाम बिन्यामीन रख्यो।
GEN 35:19 राहेल त मर गयी, अऊर एप्राता मतलब बैतलहम की रस्ता म ओख माटी दी गयी।
GEN 35:20 याकूब न ओकी कब्र पर एक खम्भा खड़ो करयो : राहेल की कब्र को ऊ खम्भा अज तक खड़ो अऊर बन्यो हय।
GEN 35:21 तब इस्राएल आगु बड़तो गयो, अऊर एदेर नाम की मीनार को आगु बढ़ क अपनो तम्बू खड़ो करयो।
GEN 35:22 जब इस्राएल ऊ देश म बस्यो होतो, तब एक दिन असो भयो कि रूबेन न जाय क अपनो बाप की रखैल बिल्हा को संग कुकर्म करयो; अऊर या बात इस्राएल ख मालूम भय गयी। याकूब को बारा टुरा भयो।
GEN 35:23 उन म सी लिआ : को टुरा हि होतो; रूबेन याकूब को बड़ो टुरा शिमोन, लेवी, यहूदा, इस्साकार, अऊर जबूलून।
GEN 35:24 अऊर राहेल को टुरा हि होतो; मतलब यूसुफ अऊर बिन्यामीन।
GEN 35:25 अऊर राहेल की दासी बिल्हा को टुरा हि होतो; मतलब दान अऊर नप्ताली।
GEN 35:26 अऊर लिआ : की दासी जिल्पा को टुरा हि होतो : मतलब गाद, अऊर आशेर। याकूब को हिच टुरा भयो, जो ओको सी पद्दनराम क्षेत्र म पैदा भयो।
GEN 35:27 याकूब मम्रे म, जो किर्यतर्बा मतलब हेब्रोन हय, जित अब्राहम अऊर इसहाक परदेशी होय क रह्यो होतो, अपनो बाप इसहाक को जवर आयो।
GEN 35:28 इसहाक की उमर एक सौ अस्सी साल की भयी।
GEN 35:29 अऊर इसहाक को जीव छूट गयो अऊर ऊ मर गयो, अऊर ऊ बूढ्ढा अऊर पूरी उमर को होय क अपनो लोगों म जाय मिल्यो; अऊर ओको टुरा एसाव अऊर याकूब न ओख माटी दी।
GEN 36:1 एसाव जो एदोम भी कहलावय हय, ओकी यो वंशावली हय।
GEN 36:2 एसाव न त कनान देश की टुरियां सी बिहाव कर लियो; मतलब हित्ती एलोन की टुरी आदा ख, अऊर ओहोलीबामा ख जो अना की टुरी अऊर हिव्वी सिबोन की नातिन होती।
GEN 36:3 तब ओन इश्माएल की टुरी बासमत ख भी, जो नबायोत की बहिन होती, बिहाव कर लियो।
GEN 36:4 आदा न एसाव को द्वारा एलीपज ख, अऊर बासमत न रूएल ख जनम दियो।
GEN 36:5 अऊर ओहोलीबामा न यूश, अऊर यालाम, अऊर कोरह ख पैदा करयो। एसाव को हिच टुरा कनान देश म पैदा भयो।
GEN 36:6 तब एसाव अपनी पत्नियों अऊर टुरा टुरियों, अऊर घर को सब प्रानियों, अपनी शेरी मेंढियों, गाय बईल अऊर सब जनावरों, निदान अपनी पूरी जायजाद ख, जो ओन कनान देश म हासिल करी होती, ले क अपनो भाऊ याकूब को जवर सी दूसरो देश ख चली गयो।
GEN 36:7 कहालीकि उन्की जायजाद इतनी भय गयी होती कि हि जमा नहीं रह्य सक्यो; अऊर जनावरों को बहुत होनो को वजह ऊ देश म, जित हि परदेशी होय क रहत होतो, हि उत समाय नहीं सक्यो।
GEN 36:8 एसाव जो एदोम भी कहलावय हय, सेईर नाम की पहाड़ी देश म रहन लग्यो।
GEN 36:9 सेईर नाम की पहाड़ी देश म रहन वालो एदोमियों को मूल आदमी एसाव की वंशावली या आय।
GEN 36:10 एसाव को टुरावों को नाम यो हंय; मतलब एसाव की पत्नी आदा को टुरा एलीपज, अऊर वाच एसाव की पत्नी बासमत को टुरा रूएल।
GEN 36:11 एलीपज को हि टुरा भयो; मतलब तेमान, ओमार, सपो, गाताम, अऊर कनज।
GEN 36:12 एसाव को टुरा एलीपज की तिम्रा नाम की एक रखैल होती, जेन एलीपज को द्वारा अमालेक ख जनम दियो : एसाव की पत्नी आदा को वंश म हिच भयो।
GEN 36:13 रूएल को हि टुरा भयो; मतलब नहत, जेरह, शम्मा, अऊर मिज्जा : एसाव की पत्नी बासमत को वंश म हिच भयो।
GEN 36:14 ओहोलीबामा जो एसाव की पत्नी अऊर सिबोन की नातिन अऊर अना की टुरी होती, ओको हि टुरा भयो : मतलब ओन एसाव को द्वारा यूश, यालाम अऊर कोरह ख जनम दियो।
GEN 36:15 हि एसाव को वंशजों को मुखिया भयो : मतलब एसाव को बड़ो टुरा एलीपज को वंश म सी तेमान, ओमार, सपो, कनज मुखिया,
GEN 36:16 कोरह, गाताम, अमालेक मुखिया : एलीपज को वंश म सी, एदोम देश म हिच मुखिया भयो : अऊर हिच आदा को वंश म भयो।
GEN 36:17 एसाव को टुरा रूएल को वंश म हि भयो; मतलब नहत, जेरह, शम्मा, मिज्जा : रूएल को वंश म सी, एदोम देश म सी हि मुखिया भयो; अऊर हिच एसाव की पत्नी बासमत को वंश म भयो।
GEN 36:18 एसाव की पत्नी ओहोलीबामा को वंश म हि भयो; मतलब यूश, यालाम, कोरह, अऊर अना की टुरी ओहोलीबामा जो एसाव की पत्नी होती ओको वंश म हिच मुखिया भयो।
GEN 36:19 एसाव जो एदोम भी कहलावय हय, ओको वंश हिच आय, अऊर उन्को मुखिया भी हिच भयो।
GEN 36:20 सेईर जो होरी नाम की जाति को होतो, ओको हि टुरा एदोम देश म पहिले सी रहत होतो : लोतान, शोबाल, सिबोन, अना,
GEN 36:21 दीशोन, एसेर, अऊर दीशोन : एदोम देश म सेईर को हिच होरी जाति को मुखिया भयो।
GEN 36:22 लोतान को टुरा, होरी अऊर हेमाम भयो; अऊर लोतान की बहिन तिम्रा होती।
GEN 36:23 शोबाल को हि टुरा भयो : आल्वान, मानहत, एबाल, शपो, अऊर ओनाम।
GEN 36:24 सिदोन को हि टुरा भयो : अय्या, अऊर अना; या वाच अना आय जेक जंगल म अपनो बाप सिबोन को गधा ख चरावत चरावत गरम पानी को झरना मिल्यो होतो।
GEN 36:25 अना को दीशोन नाम को टुरा भयो, अऊर वाच अना ख ओहोलीबामा नाम की टुरी भयी।
GEN 36:26 दीशोन को हि टुरा भयो : हेमदान, एश्बान, यित्रान, अऊर करान।
GEN 36:27 एसेर को हि टुरा भयो : बिल्हान, जाबान, अऊर अकान।
GEN 36:28 दीशोन को हि टुरा भयो : ऊस, अऊर अरान।
GEN 36:29 होरी जाति को मुखिया हि भयो : लोतान, शोबाल, सिबोन, अऊर अना मुखिया,
GEN 36:30 दीशोन, एसेर, दीशोन; सेईर देश म होरी जाति को हिच मुखिया भयो।
GEN 36:31 तब जब इस्राएलियों पर कोयी राजा न राज्य नहीं करयो होतो, तब भी एदोम को देश म हि राजा भयो;
GEN 36:32 बोर को टुरा बेला न एदोम म राज्य करयो, अऊर ओकी राजधानी को नाम दिन्हाबा हय।
GEN 36:33 बेला को मरनो पर, बोस्रा नगर को रहन वालो जेरह को टुरा योबाब ओकी जागा पर राजा भयो।
GEN 36:34 योबाब को मरनो पर तेमानी जाति को देश को निवासी हूशाम ओकी जागा पर राजा भयो।
GEN 36:35 तब हूशाम को मरनो पर बदद को टुरा हदद ओकी जागा पर राजा भयो : यो उच आय जेन मिद्दानी जाति ख मोआब को देश म मार लियो, अऊर ओकी राजधानी को नाम अबीत हय।
GEN 36:36 हदद को मरनो पर मस्रेका नगर को निवासी सम्ला ओकी जागा पर राजा भयो।
GEN 36:37 तब सम्ला को मरनो पर शाऊल जो महा नदी को तट वालो रहोबोत नगर को होतो ऊ ओकी जागा पर राजा भयो।
GEN 36:38 शाऊल को मरनो पर अकबोर को टुरा बाल्हानान ओकी जागा पर राजा भयो।
GEN 36:39 अकबोर को टुरा बाल्हानान को मरनो पर हदर ओकी जागा पर राजा भयो : अऊर ओकी राजधानी को नाम पाऊ हय; अऊर ओकी पत्नी को नाम महेतबेल हय, जो मेजाहब की नातिन अऊर मत्रेद की टुरी होती।
GEN 36:40 एसाव को वंशजों को मुखिया को कुलों अऊर जागा को अनुसार उन्को नाम हि आय : तिम्रा, अल्बा, यतेत मुखिया,
GEN 36:41 ओहोलीबामा, एला, पीनोन मुखिया,
GEN 36:42 कनज, तेमान, मिबसार मुखिया,
GEN 36:43 मग्दीएल, ईराम : एदोम वंशियों न जो देश अपनो कर लियो होतो, ओकी निवास की जागा म उन्को हिच मुखिया भयो; एदोम जाति को मूल आदमी एसाव हय।
GEN 37:1 याकूब त कनान देश म रहत होतो, जित ओको बाप परदेशी होय क रहत होतो।
GEN 37:2 याकूब को वंश को वृत्तान्त यो हय। यूसुफ सत्रा साल को होय क अपनो भाऊवों को संग शेरी मेंढी ख चरावत होतो; अऊर ऊ लड़का अपनो बाप की पत्नी बिल्हा अऊर जिल्पा को टुरावों को संग रह्यो करत होतो; अऊर उन्की बुरायियों को समाचार अपनो बाप को जवर बतायो करत होतो।
GEN 37:3 याकूब अपनो सब टुरावों सी बढ़ क् यूसुफ सी प्रेम रखत होतो, कहालीकि ऊ ओको बूढ़ापा को टुरा होतो : अऊर ओन ओको लायी एक रंगबिरंगी कपड़ा बनवायो।
GEN 37:4 पर जब ओको भाऊवों न देख्यो कि हमरो बाप हम सब भाऊवों सी जादा ओको सीच प्रेम रखय हय, तब हि ओको सी घृना करन लग्यो अऊर ओको संग ठीक सी बात भी नहीं करत होतो।
GEN 37:5 यूसुफ न एक सपनो देख्यो, अऊर अपनो भाऊवों सी ओको बारे म बतायो; तब हि ओको सी अऊर भी जादा घृना करन लग्यो।
GEN 37:6 यूसुफ न उन्को सी कह्यो, “जो सपनो मय न देख्यो हय, ओख सुनो :
GEN 37:7 हम लोग खेत म गहूं को बोझा बान्ध रह्यो हय, अऊर यो देख्यो कि अचानक मोरो बोझा उठ क सीधो खड़ो भय गयो; तब तुम्हरो बोझा न मोरो बोझा ख चारयी तरफ सी घेर लियो अऊर ओख दण्डवत करयो।”
GEN 37:8 तब यूसुफ को भाऊवों न यूसुफ सी कह्यो, “का सचमुच तय हमरो ऊपर राज्य करजो? या का सचमुच तय हम पर प्रभुता करजो?” येकोलायी हि ओको सपनो अऊर ओकी बातों को वजह ओको सी अऊर भी जादा घृना करन लग्यो।
GEN 37:9 तब यूसुफ न अऊर एक सपनो देख्यो, अऊर अपनो भाऊवों ख सपनो को बारे म बतायो, “सुनो, मय न एक अऊर सपनो देख्यो हय, कि सूरज अऊर चन्दा अऊर ग्यारा तारा मोख दण्डवत कर रह्यो हय।”
GEN 37:10 यो सपनो ओन अपनो बाप अऊर अपनो भाऊवों ख बतायो तब ओको बाप न ओख चिल्लाय क कह्यो, “यो कसो सपनो आय जो तय न देख्यो हय? का सचमुच मय अऊर तोरी माय अऊर तोरो भाऊ सब जाय क तोरो आगु जमीन पर गिर क दण्डवत करबो?”
GEN 37:11 ओको भाऊ ओको सी घृना करत होतो; पर ओको बाप न ओको ऊ बातों ख याद रख्यो।
GEN 37:12 ओको भाऊ अपनो बाप की शेरी मेंढी ख चरान लायी शकेम नगर ख गयो।
GEN 37:13 तब याकूब न यूसुफ सी कह्यो, “तोरो भाऊ शकेम मच शेरी मेंढी चराय रह्यो होना। येकोलायी जा, मय तोख उन्को जवर भेजू हय।” ओन उन्को सी कह्यो, “जो आज्ञा मय हाजिर हय।”
GEN 37:14 ओन ओको सी कह्यो, “जा, अपनो भाऊवों अऊर शेरी मेंढियों को हाल देख क आव कि हि अच्छो सी त हय, तब मोरो जवर समाचार ले आव।” तब ओन ओख हेब्रोन की घाटी म बिदा कर दियो, अऊर यूसुफ शकेम म आयो।
GEN 37:15 अऊर एक आदमी न ओख मैदान म इत उत भटकतो हुयो देख क ओको सी पुच्छ्यो, “तय का ढूंढय हय?”
GEN 37:16 ओन कह्यो, “मय अपनो भाऊवों ख ढूंढु हय। कृपया मोख बता कि हि शेरी मेंढियों ख कित चराय रह्यो हंय?”
GEN 37:17 ऊ आदमी न कह्यो, “हि इत सी चली गयो हय; अऊर मय न उन्ख यो कहतो सुन्यो, ‘आवो, हम दोतान नगर ख चलबो’।” येकोलायी यूसुफ अपनो भाऊवों को पीछू चल्यो, अऊर उन्ख दोतान नगर म पायो।
GEN 37:18 ओको भाऊवों न ओख दूर सी आतो हुयो देख्यो, त ओको जवर आन कोच पहिले ओख मार डालन की साजीश रची।
GEN 37:19 अऊर हि आपस म कहन लग्यो, “देखो, ऊ सपनो देखन वालो आय रह्यो हय।
GEN 37:20 येकोलायी आवो, हम ओख मार क कोयी गड्डा म डाल देबो; अऊर यो कह्य देबो कि कोयी जंगली जनावर ओख खाय गयो। तब हम देखबोंन कि ओको सपनो भविष्य म कसो पूरो होवय हंय।”
GEN 37:21 यो सुन क रूबेन न यूसुफ ख उन्को हाथ सी बचान को बिचार सी कह्यो, “हम ओख जान सी त नहीं मारबो।”
GEN 37:22 तब रूबेन न उन्को सी कह्यो, “खून मत बहावों, ओख जंगल को यो गड्डा म डाल देवो, अऊर ओको पर हाथ मत उठावों।” रूबेन ओख उन्को हाथ सी छुड़ाय क बाप को जवर फिर पहुंचानो चाहत होतो।
GEN 37:23 येकोलायी असो भयो कि जब यूसुफ अपनो भाऊवों को जवर पहुंच्यो तब उन्न ओको रंगबिरंगी को कपड़ा देख्यो, जेक ओन पहिन्यो होतो, उन्न उतार लियो;
GEN 37:24 अऊर यूसुफ ख उठाय क गड्डा म डाल दियो। ऊ गड्डा सुख्यो होतो अऊर ओको म कुछ भी पानी नहीं होतो।
GEN 37:25 तब हि रोटी खान ख बैठ गयो; अऊर आंखी उठाय क यो देख्यो कि इश्माएलियों को एक दल ऊंटों पर सुगन्ध की चिज, बलसान, अऊर गन्धरस टंगाय क, गिलाद सी मिस्र देश ख जाय रह्यो होतो।
GEN 37:26 तब यहूदा न अपनो भाऊवों सी कह्यो, “अपनो भाऊ ख मार डालनो सी अऊर ओको खून लुकानो सी का फायदा होयेंन?
GEN 37:27 आवो, हम ओख इश्माएलियों को हाथ बेच देबो, अऊर अपनो हाथ ओको पर नहीं उठाबो; कहालीकि ऊ हमरो भाऊ अऊर हमारीच हड्डी अऊर मास आय।” अऊर ओको भाऊवों न ओकी बात मान ली।
GEN 37:28 तब मिद्यानी व्यापारी उत सी होय क उन्को जवर पहुंच्यो। तब यूसुफ को भाऊवों न ओख ऊ गड्डा म सी खीच क् बाहेर निकाल्यो, अऊर इश्माएलियों को हाथ चांदी को बीस सिक्का म बेच दियो; अऊर हि यूसुफ ख मिस्र देश ले गयो।
GEN 37:29 जब रूबेन गड्डा को तरफ गयो अऊर यो देख्यो कि यूसुफ गड्डा म नहाय; येकोलायी ओन अपनो कपड़ा फाड़्यो,
GEN 37:30 अऊर अपनो भाऊवों को जवर जाय क कहन लग्यो, “लड़का त गड्डा म नहाय; अब मय कित जाऊं?”
GEN 37:31 तब उन्न यूसुफ को कपड़ा लियो, अऊर एक बकरा ख मार क् ओको खून म ओख डुबाय दियो।
GEN 37:32 अऊर उन्न ऊ रंगबिरंगी कपड़ा ख अपनो बाप को जवर यो कह्य क भेज दियो, “यो हम्ख मिल्यो हय, तय देख क पहिचान ले कि यो तोरो टुरा को कपड़ा आय या नोहोय।”
GEN 37:33 ओन ओख पहिचान लियो अऊर कह्यो, “हव, यो मोरोच टुरा को कपड़ा आय; कोयी दुष्ट जनावर न ओख खाय लियो हय; सही मच यूसुफ ख तुकड़ा तुकड़ा कर दियो गयो हय।”
GEN 37:34 तब याकूब न अपनो कपड़ा फाड़्यो अऊर कमर म टाट को कपड़ा गुन्ड क, अऊर अपनो टुरा लायी बहुत दिनों तक दु:ख मनातो रह्यो।
GEN 37:35 ओको सब टुरा टुरियों न ओख शान्ति देन की बहुत कोशिश करी; पर ओख शान्ति नहीं मिली; अऊर ऊ योच कहतो रह्यो, “मय त दु:ख करतो हुयो अपनो टुरा को जवर मरयो हुयो कि दुनिया म उतर जाऊं।” यो तरह ओको बाप ओको लायी रोतोच रह्यो।
GEN 37:36 तब येको बाद मिद्यानियों न यूसुफ ख मिस्र म लिजाय क पोतीपर नाम को फिरौन को एक हाकिम अऊर अंगरक्षकों को प्रधान को बेच डाल्यो।
GEN 38:1 उन दिनों म असो भयो कि यहूदा अपनो भाऊवों को जवर सी चली गयो, अऊर हीरा नाम को एक अदुल्लाम नगर को एक निवासी को जवर रहन लग्यो।
GEN 38:2 उत यहूदा न शूआ नाम को एक कनानी आदमी की टुरी ख देख्यो; अऊर ओको सी बिहाव कर क् ओको जवर गयो।
GEN 38:3 वा गर्भवती भयी, अऊर ओको एक टुरा पैदा भयो; अऊर यहूदा न ओको नाम एर रख्यो।
GEN 38:4 वा फिर गर्भवती भयी, अऊर ओको एक टुरा अऊर पैदा भयो, अऊर ओको नाम ओनान रख्यो गयो।
GEN 38:5 तब ओख अऊर एक टुरा पैदा भयो, अऊर ओको नाम शेला रख्यो गयो; अऊर जो समय येको जनम भयो ऊ समय यहूदा कजीब नगर म रहत होतो।
GEN 38:6 अऊर यहूदा न तामार नाम की एक लड़की सी अपनो बड़ो टुरा एर को बिहाव कर दियो।
GEN 38:7 पर यहूदा को ऊ बड़ो टुरा एर यहोवा की नजर म बुरो होतो, येकोलायी यहोवा न ओख मार डाल्यो।
GEN 38:8 तब यहूदा न ओनान सी कह्यो, “तय अपनी भाभी को जवर जा, अऊर ओको संग देऊर को धर्म पूरो कर क् अपनो भाऊ लायी सन्तान पैदा कर।”
GEN 38:9 ओनान जानत होतो कि सन्तान मोरी नहीं होयेंन; येकोलायी असो भयो कि जब ऊ अपनी भाभी को जवर गयो, तब ओन जमीन पर वीर्य गिराय क नाश करयो, जेको सी असो नहीं होय कि ओको भाऊ को नाम सी वंश चले।
GEN 38:10 यो काम जो ओन करयो परमेश्वर की नजर म बुरो होतो; अऊर परमेश्वर न ओख मार डाल्यो।
GEN 38:11 तब यहूदा न यो डर को मारे कि कही असो नहीं होय कि अपनो भाऊवों को जसो शेला भी मरे, अपनी बहू तामार सी कह्यो, “जब तक मोरो टुरा शेला जवान नहीं होय जाये तब तक अपनो बाप को घर म विधवाच बैठी रह्य।” येकोलायी तामार अपनो बाप को घर म जाय क रहन लगी।
GEN 38:12 बहुत समय को बीतन पर यहूदा की पत्नी जो शूआ की टुरी होती, वा मर गयी; तब यहूदा दु:ख को दिन बितन पर अपनो संगी हीरा अदुल्लामवासी सहीत अपनी शेरी मेंढियों को ऊन कतरन वालो को जवर तिम्नाथ नगर ख गयो।
GEN 38:13 अऊर तामार ख यो समाचार मिल्यो, “तोरो ससरो अपनी शेरी मेंढियों को ऊन काटन लायी तिम्नाथ नगर ख जाय रह्यो हय।”
GEN 38:14 तब ओन यो सोच क कि शेला जवान त होय गयो पर मय ओकी पत्नी नहीं होय सकी; अपनो विधवापन को कपड़ा उतारयो अऊर घूंघट डाल क अपनो ख झाक लियो, अऊर एनैम नगर की फाटक को जवर, जो तिम्नाथ की रस्ता म हय, वहां जाय बैठी।
GEN 38:15 जब यहूदा न ओख देख्यो, त ओख ओन वेश्या समझ्यो; कहालीकि ओन अपनो मुंह झाक्यो हुयो होतो।
GEN 38:16 ऊ रस्ता सी ओको तरफ मुड़्यो, अऊर ओको सी कहन लग्यो, “मोख अपनो जवर आन दे,” कहालीकि ओख यो मालूम नहीं होतो कि वा ओकी बहू आय। ओन कह्यो, “यदि मय तोख अपनो जवर आन देऊ, त तय मोख का देजो?”
GEN 38:17 ओन कह्यो, “मय अपनी शेरियों म सी शेरी को बच्चा तोरो जवर भेज देऊं।” तब ओन कह्यो, “तब तक का तय मोरो जवर कुछ चीज रख दे?”
GEN 38:18 यहूदा न पुच्छ्यो, “मय तोरो जवर का चिज रख देऊ?” तामार न कह्यो, “अपनी मुहर, अऊर बाजूबन्द, अऊर अपनो हाथ को डन्डा।” तब यहूदा न ओख सब चीज दे दी, अऊर ओको जवर गयो, अऊर वा ओको सी गर्भवती भयी।
GEN 38:19 तब वा उठ क चली गयी, अऊर अपनो घूंघट उतार क् अपनो विधवापन को कपड़ा फिर पहिन्यो।
GEN 38:20 तब यहूदा न शेरी को एक बच्चा अपनो संगी ऊ अदुल्लामवासी को हाथ भेज दियो कि जो चिज रखी हुयी चिज वा बाई को हाथ सी छुड़ाय क ले आये; पर वा बाई ओख नहीं मिली।
GEN 38:21 तब हीरा न उत को लोगों सी पुच्छ्यो, “वा वेश्या जो एनैम म रस्ता को एक तरफ बैठी होती, कित हय?” उन्न कह्यो, “यहां त कोयी वेश्या नहीं होती।”
GEN 38:22 येकोलायी ओन यहूदा को जवर जाय क कह्यो, “मोख वा नहीं मिली; अऊर ऊ जागा को लोगों न कह्यो, यहां त कोयी वेश्या नहीं होती।”
GEN 38:23 तब यहूदा न कह्यो, “अच्छा, वा निशानी कि चिज ओकोच जवर रहन दे, नहीं त हम लोग बेकार गिन्यो जाबो; देख, मय न शेरी को यो बच्चा भेज दियो होतो, पर वा तोख नहीं मिली।”
GEN 38:24 लगभग तीन महिना को बाद यहूदा ख यो समाचार मिल्यो, “तोरी बहू तामार न व्यभिचार करयो हय; अऊर वा व्यभिचार सी गर्भवती भी भय गयी हय।” तब यहूदा न कह्यो, “ओख बाहेर ले क जावो कि ओख जलायो जाये।”
GEN 38:25 जब लोग ओख बाहेर निकाल रह्यो होतो तब ओन अपनो ससरो को जवर यो सन्देश भेज्यो, “जो आदमी की या चिजे हय, ओकोच सी मय गर्भवती भयी,” तब ओन यो कह्यो, “पहिचानो त सही कि यो मुहर, अऊर बाजूबन्द, अऊर डन्डा कोन्को आय।”
GEN 38:26 यहूदा न उन्ख पहिचान क कह्यो, “ऊ त मोरो सी कम दोषी हय; कहालीकि मय न ओको अपनो टुरा शेला सी बिहाव नहीं करयो।” अऊर ओन ओको सी फिर कभी सहवास नहीं करयो।
GEN 38:27 जब ओको बच्चा पैदा करन को समय आयो, तब यो जान पड़्यो कि ओको गर्भ म जुड़वा बच्चा हय।
GEN 38:28 अऊर जब वा बच्चा पैदा करन लगी तब एक बच्चा को हाथ बाहेर आयो, अऊर सुईन न लाल सूत ले क ओको हाथ म यो कहतो हुयो बान्ध दियो, “पहिले योच पैदा भयो।”
GEN 38:29 जब बच्चा न अपनो हाथ अन्दर कर लियो, तब ओको भाऊ पैदा भयो। तब वा सुईन न कह्यो, “तय कहाली खुदच निकलन की रस्ता बनाय लियो?” येकोलायी ओको नाम पेरेस रख्यो गयो।
GEN 38:30 पीछू ओको भाऊ जेको हाथ म लाल सूत बन्ध्यो होतो ऊ पैदा भयो, अऊर ओको नाम जेरह रख्यो गयो।
GEN 39:1 जब यूसुफ मिस्र देश म पहुंचायो गयो, तब पोतीपर नाम को एक मिस्री न जो फिरौन को हाकिम अऊर अंगरक्षकों को प्रधान होतो, ओख इश्माएलियों को हाथ सी, जो ओख उत ले गयो होतो, लेय लियो।
GEN 39:2 यूसुफ अपनो मिस्री स्वामी को घर म रहत होतो, अऊर यहोवा ओको संग होतो येकोलायी ऊ भाग्यवान आदमी भय गयो,
GEN 39:3 अऊर यूसुफ को स्वामी न देख्यो कि यहोवा ओको संग रह्य हय, अऊर जो काम ऊ करय हय ओख यहोवा ओको हाथ सी सफल कर देवय हय।
GEN 39:4 तब पोतीपर की अनुग्रह की नजर ओको पर भयी, अऊर यूसुफ ओकी सेवा म लगन लायी चुन्यो गयो; तब ओन ओख अपनो घर को अधिकारी बनान लायी अपनो सब कुछ यूसुफ को हाथ म सौंफ दियो।
GEN 39:5 सब सी ओन ओख अपनो घर को अऊर अपनी पूरी जायजाद को अधिकारी बनायो, तब सी यहोवा यूसुफ को वजह ऊ मिस्री को घर पर आशीष देन लग्यो; अऊर का घर म, का खेत म, ओको जो कुछ होतो सब पर यहोवा की आशीष होन लगी।
GEN 39:6 येकोलायी ओन अपनो सब कुछ यूसुफ को हाथ म यहां तक कि अपनो खान की रोटी ख छोड़, ऊ अपनी जायजाद को हाल कुछ नहीं जानत होतो। यूसुफ सुन्दर अऊर रूपवान होतो।
GEN 39:7 इन बातों को बाद असो भयो कि ओको स्वामी की पत्नी न यूसुफ को तरफ देख्यो अऊर कह्यो, “मोरो संग सो।”
GEN 39:8 पर ओन मना करतो हुयो अपनो स्वामी की पत्नी सी कह्यो, “सुन, जो कुछ यो घर म हय मोरो हाथ म हय; ओख मोरो स्वामी कुछ नहीं जानय, अऊर ओन अपनो सब कुछ मोरो हाथ म सौंप दियो हय।
GEN 39:9 यो घर म मोरो सी बड़ो कोयी नहीं, अऊर ओन तोख छोड़, जो ओकी पत्नी आय, मोरो सी कुछ नहीं रख छोड़्यो, येकोलायी भला, मय असो बड़ो पाप कर क् परमेश्वर को अपराधी कहाली बनू?”
GEN 39:10 अऊर असो भयो कि वा हर दिन यूसुफ सी बात करती रही, पर ओन ओकी नहीं मानी कि ओको जवर सोये या ओको संग रहे।
GEN 39:11 एक दिन का भयो कि यूसुफ अपनो काम काज करन लायी घर म गयो, अऊर घर को सेवकों म सी कोयी भी घर को अन्दर नहीं होतो।
GEN 39:12 तब वा बाई न ओको कपड़ा पकड़ क कह्यो, “मोरो संग सो,” पर ऊ अपनो कपड़ा ओको हाथ म छोड़ क भग्यो अऊर बाहेर निकल गयो।
GEN 39:13 यो देख क कि यूसुफ अपनो कपड़ा मोरो हाथ म छोड़ क बाहेर भग गयो,
GEN 39:14 तब वा बाई न अपनो घर को सेवकों ख बुलाय क कह्यो, “देखो, ऊ एक इब्री आदमी ख मोरो स्वामी मोरो अपमान करन लायी मोरो जवर लायो हय। ऊ त मोरो संग सोवन को मतलब सी मोरो जवर अन्दर आयो होतो, अऊर मय ऊची आवाज सी चिल्लाय उठी;
GEN 39:15 अऊर मोरो चिल्लावन को वजह सी ऊ अपनो कपड़ा मोरो जवर छोड़ क भग्यो, अऊर बाहेर निकल गयो।”
GEN 39:16 अऊर वा ओको कपड़ा अपनो स्वामी को घर आवत तक अपनो जवर रखी रही।
GEN 39:17 तब ओन अपनो स्वामी सी यो तरह की बाते कही, “ऊ इब्री दास जेक तय मोरो जवर ले आयो हय, ऊ मोरो अपमान करन लायी मोरो जवर आयो होतो;
GEN 39:18 अऊर जब मय ऊची आवाज सी चिल्लाय उठी, तब ऊ अपनो कपड़ा छोड़ क बाहेर भग गयो।”
GEN 39:19 अपनी पत्नी की हि बाते सुन क कि तोरो दास न मोरो संग असो असो काम करयो, यूसुफ को स्वामी को गुस्सा भड़क्यो।
GEN 39:20 अऊर यूसुफ को स्वामी न ओख पकड़ क जेलखाना म, डलवाय दियो; जित राजा को कैदी बन्द होतो, तब यूसुफ भी ऊ जेलखाना म रह्यो।
GEN 39:21 पर परमेश्वर यूसुफ को संग संग रह्यो अऊर ओको पर दया करी, अऊर जेलखाना को दरोगा की अनुग्रह की नजर ओको पर भयी।
GEN 39:22 येकोलायी जेलखाना को दरोगा न उन सब बन्दियों ख, जो जेलखाना म होतो, यूसुफ को हाथ म सौंप दियो; अऊर जो जो काम हि वहां करत होतो, ऊ काम ओकीच आज्ञा सी होत रह्य।
GEN 39:23 यूसुफ को वश म जो कुछ होतो ओको म सी जेलखाना को दरोगा ख कोयी भी चिज देखनी नहीं पड़त होती; कहालीकि यहोवा यूसुफ को संग होतो; अऊर जो कुछ ऊ करत होतो, यहोवा ओख ओको म सफल बनावत होतो।
GEN 40:1 इन बातों को बाद असो भयो, कि मिस्र देश को राजा को पिलान वालो अऊर जेवन बनान वालो न अपनो स्वामी को खिलाफ कुछ अपराध करयो।
GEN 40:2 तब फिरौन न अपनो उन दोयी हाकिमों, मतलब पिलान वालो को प्रधान अऊर जेवन बनान वालो को प्रधान, दोयी पर गुस्सा होय क
GEN 40:3 उन्ख कैद कराय क् अंगरक्षकों को प्रधान को घर को जेलखाना म, जित यूसुफ बन्दी होतो, उन्ख उत डलवाय दियो।
GEN 40:4 तब अंगरक्षकों को प्रधान न उन्ख यूसुफ को हाथ सौंप्यो, अऊर ऊ उन्की सेवा करन लग्यो; तब हि कुछ दिन तक जेलखाना म रह्यो।
GEN 40:5 मिस्र को राजा फिरौन को पिलान वालो अऊर जेवन बनान वालो, जेलखाना म बन्द होतो, उन दोयी न एकच रात म, अपनो सपनो देख्यो अऊर दोयी को सपनो को विशेष अर्थ अलग अलग होतो।
GEN 40:6 सुबेरे जब यूसुफ उन्को जवर अन्दर गयो, तब उन पर ओन नजर डाली त ओन देख्यो कि हि उदास हंय।
GEN 40:7 येकोलायी ओन फिरौन को उन हाकिमों सी, जो ओको संग ओको स्वामी को घर को जेलखाना म होतो, पुच्छ्यो, “अज तुम्हरो मुंह कहाली उदास हंय?”
GEN 40:8 उन्न यूसुफ सी कह्यो, “हम दोयी न सपनो देख्यो हय, अऊर उन्को सपनो को अर्थ बतावन वालो कोयी भी नहाय।” यूसुफ न उन्को सी कह्यो, “का सपनो को अर्थ बतानो केवल परमेश्वर को काम नहाय? मोख अपनो अपनो सपनो बतावो।”
GEN 40:9 तब पिलान वालो को प्रधान अपनो सपनो यूसुफ ख बतावन लग्यो: “सपनो म देख्यो कि मोरो आगु एक अंगूर को गुच्छा हय।
GEN 40:10 अऊर वा अंगूर की बेला म तीन डगालियां हय; अऊर असो लगय हय कि ओको म कलियां लगी हंय, अऊर हि फूलीं अऊर ओको गुच्छा म अंगूर लग क पक गयी हय।
GEN 40:11 फिरौन को कटोरा मोरो हाथ म होतो; अऊर मय न उन अंगूरो ख ले क फिरौन को कटोरा म पिरयो, अऊर कटोरा ख फिरौन को हाथ म दियो।”
GEN 40:12 तब यूसुफ न ओको सी कह्यो, “यो तोरो सपनो को अर्थ आय : तीन डगालियों को अर्थ तीन दिन हंय;
GEN 40:13 येकोलायी अब सी तीन दिन को अन्दर फिरौन तोरो सिर ऊचो करेंन, अऊर फिर सी तोरो पद पर तोख नियुक्त करेंन, अऊर तय पहिले को जसो फिरौन को पिलान वालो बन क ओको कटोरा ओको हाथ म फिर सी दियो करजो।
GEN 40:14 फिर जब तोरो भलो होय जाये तब मोख याद करजो, अऊर मोरो पर दया कर क् फिरौन सी मोरी चर्चा करजो, अऊर यो जेलखाना सी मोख छुड़ाय देजो।
GEN 40:15 कहालीकि सचमुच इब्रानियों को देश सी मोख चोर क लायो गयो हय; अऊर यहां भी मय न कोयी असो काम नहीं करयो, जेको वजह मय यो जेलखाना म डाल्यो जाऊं।”
GEN 40:16 यो देख क कि ओको सपनो को अर्थ अच्छो हय, तब जेवन बनान वालो को प्रधान न यूसुफ सी कह्यो, “मय न भी सपनो देख्यो हय, ऊ यो आय : मय न देख्यो कि मोरी मुंड पर सफेद रोटी की तीन टोपलियां हंय;
GEN 40:17 अऊर ऊपर की टोपली म फिरौन लायी सब तरह की पकी पकायी चिजे हंय; अऊर पक्षी मोरी मुंड पर की टोपली म सी उन चिजे ख खाय रही हंय।”
GEN 40:18 यूसुफ न कह्यो, “तोरो सपनो को अर्थ यो हय : हि तीन टोपलियों को अर्थ तीन दिन हय।
GEN 40:19 अब सी तीन दिन को अन्दर फिरौन तोरी मुंड कटवाय क तोख एक खम्भा पर टंगाय देयेंन, अऊर पक्षी तोरो मांस ख तिड़ तिड़ क खायेंन।”
GEN 40:20 तीसरो दिन फिरौन को जनम दिन होतो, ओन अपनो सब कर्मचारियों ख जेवन दियो, अऊर उन्म सी पिलान वालो को प्रधान अऊर जेवन बनान वालो को प्रधान हि दोयी ख जेलखाना म सी निकलवायो।
GEN 40:21 पिलान वालो को प्रधान ख त पिलान वालो को पद पर फिर सी नियुक्त करयो, अऊर ऊ फिरौन को हाथ म कटोरा देन लग्यो।
GEN 40:22 पर जेवन बनान वालो को प्रधान ख ओन टंगाय दियो, जसो कि यूसुफ न ओको सपनो को अर्थ ओन कह्यो होतो।
GEN 40:23 तब भी पिलान वालो को प्रधान न यूसुफ ख याद नहीं रख्यो; पर ओख भूल गयो।
GEN 41:1 पूरो दोय साल बीतन पर फिरौन न यो सपनो देख्यो कि ऊ नील नदी को किनारे खड़ो हय।
GEN 41:2 अऊर वा नील नदी म सी सात सुन्दर अऊर मोटी मोटी गाय निकल क नदी किनारे घास चरन लगी।
GEN 41:3 अऊर, ओन देख्यो कि उन्को पीछू अऊर सात गाय, जो बदसुरत अऊर कमजोर हंय, नील नदी सी निकली, अऊर दूसरी गायों को जवर नील नदी को किनार पर जाय क खड़ी भयी।
GEN 41:4 तब हि बदसूरत अऊर कमजोर गाये उन सात सुन्दर अऊर मोटी मोटी गायों ख खाय गयी। तब फिरौन जग गयो।
GEN 41:5 अऊर ऊ फिर सोय गयो अऊर दूसरो सपनो देख्यो कि डंठल म सी सात मोटी अऊर अच्छी अच्छी बालें निकली।
GEN 41:6 अऊर, देख्यो कि पूर्व की हवा सी सात लोम्ब पतली अऊर मुरझायी हुयी निकली।
GEN 41:7 अऊर इन पतली लोम्ब न उन सातों मोटी अऊर अनाज सी भरी हुयी लोम्ब ख खाय लियो। तब फिरौन जाग्यो, अऊर ओख मालूम भयो कि यो सपनोच होतो।
GEN 41:8 सुबेरे फिरौन को मन चिन्तित भयो अऊर ओन मिस्र को सब तान्त्रिकों अऊर जानकार लोगों ख बुलावा भेज्यो; अऊर उन्ख अपनो सपनो बतायो; पर उन्म सी कोयी भी ओको अर्थ नहीं बताय सक्यो।
GEN 41:9 तब पिलान वालो को प्रधान न फिरौन सी कह्यो, “मोरो अपराध अज मोख याद आयो।
GEN 41:10 जब फिरौन अपनो दासों सी गुस्सा भयो होतो, तब मोख अऊर जेवन बनान वालो को प्रधान ख कैद कराय क् अंगरक्षकों को प्रधान को घर को जेलखाना म डाल दियो होतो;
GEN 41:11 तब हम दोयी न एकच रात म सपनो देख्यो अऊर ऊ सपनो को अर्थ अलग अलग होतो।
GEN 41:12 वहां हमरो संग एक इब्री जवान होतो, जो अंगरक्षकों को प्रधान को दास होतो; तब हम न ओख अपनो अपनो सपनो बतायो अऊर ओन हमरो सपनो को अर्थ हम्ख बतायो, हम म सी एक एक को सपनो को अर्थ ओन बताय दियो।
GEN 41:13 अऊर जसो जसो अर्थ ओन बतायो होतो, वसोच भयो भी, यानेकि मोख त मोरो पद फिर मिल्यो, पर ऊ फासी पर लटकायो गयो।”
GEN 41:14 तब फिरौन न यूसुफ ख बुलायो; अऊर ऊ तुरतच जेलखाना सी बाहेर निकाल्यो गयो, अऊर बाल बनाय क अऊर कपड़ा बदल क फिरौन को आगु आयो।
GEN 41:15 फिरौन न यूसुफ सी कह्यो, “मय न एक सपनो देख्यो हय, अऊर ओको अर्थ बतावन वालो कोयी भी नहाय; अऊर मय न तोरो बारे म सुन्यो हय कि तय सपनो सुनतोच ओको अर्थ बताय देवय हय।”
GEN 41:16 यूसुफ न फिरौन सी कह्यो, “मय त कुछ भी नहीं जानु हय, पर परमेश्वरच फिरौन लायी शुभ वचन देयेंन।”
GEN 41:17 तब फिरौन यूसुफ सी कहन लग्यो, “मय न अपनो सपनो म देख्यो कि मय नील नदी को किनारे खड़ो हय।
GEN 41:18 फिर देख्यो, कि नील नदी म सी सात मोटी अऊर सुन्दर सुन्दर गाय निकल क घास चरन लगी।
GEN 41:19 तब अऊर देख्यो, कि उन्को पीछू सात अऊर गाय निकली, जो पतली अऊर बहुत छोटी अऊर कमजोर हंय; मय न पूरो मिस्र देश म असी बदसूरत गाय कभी नहीं देख्यो।
GEN 41:20 इन कमजोर अऊर बदसूरत गायों न उन पहिली सातों मोटी मोटी गायों ख खाय लियो;
GEN 41:21 अऊर जब हि उन्ख खाय गयी तब यो मालूम नहीं होत रह्य कि हि उन्ख खाय गयी हंय, कहालीकि हि पहिले को जसो जसी की वसी बदसूरत रही। तब मय जग गयो।
GEN 41:22 तब मय न दूसरो सपनो देख्यो, कि एकच डंठल म सात अच्छी अच्छी अऊर अनाज सी भरी हुयी लोम्ब निकली।
GEN 41:23 तब देखू हय, कि उन्को पीछू अऊर सात मुरझायी, पतली, अऊर पूर्व की हवा सी सुखी हुयी लोम्ब निकली।
GEN 41:24 अऊर इन पतली लोम्ब न उन सात अच्छी अच्छी लोम्ब ख खाय लियो। येख मय न तान्त्रिकों ख बतायो, पर येको अर्थ बतावन वालो कोयी नहीं मिल्यो।”
GEN 41:25 तब यूसुफ न फिरौन सी कह्यो, “तोरो सपनो का एकच हय, परमेश्वर जो काम करनो चाहवय हय, ओख ओन फिरौन पर दरसायो हय।
GEN 41:26 हि सात अच्छी अच्छी गाय सात साल हंय; अऊर हि सात अच्छी अच्छी लोम्ब भी सात साल हंय; यो तरह सी सपनो एकच आय।
GEN 41:27 तब उन्को पीछू जो कमजोर अऊर गरीब गाय निकली, अऊर जो सात सुखी अऊर पूर्व की हवा सी मुरझायी हुयी लोम्ब निकाली, हि अकाल को सात साल होयेंन।
GEN 41:28 या वाच बात आय जो मय फिरौन सी कह्य चुक्यो हय कि परमेश्वर जो काम करनो चाहवय हय, ओख ओन फिरौन ख दिखायो हय।
GEN 41:29 सुन, असो सात साल आयेंन जब पूरो मिस्र देश म बहुत तरह सी अनाज पैदा होयेंन।
GEN 41:30 उन्को बाद सात साल अकाल को आयेंन, अऊर पूरो मिस्र देश म लोग हि पूरी उपज ख भूल जायेंन; अऊर अकाल सी देश को नाश होयेंन।
GEN 41:31 अऊर अकाल इतनो भयानक होयेंन कि अच्छी फसल अऊर उपज कोयी ख याद तक नहीं रहेंन।
GEN 41:32 अऊर फिरौन न जो यो सपनो दोय बार देख्यो हय येको भेद योच आय कि यो बात परमेश्वर को तरफ सी नियुक्त होय गयी हय, अऊर परमेश्वर येख जल्दीच पूरो करेंन।
GEN 41:33 “येकोलायी अब फिरौन कोयी समझदार अऊर बुद्धिमान आदमी ख ढूंढ क ओख मिस्र देश पर प्रधान मन्त्री ठहरायो।
GEN 41:34 अऊर फिरौन पूरो मिस्र देश म अधिकारियों ख ठहराये, अऊर सात साल जो अच्छी फसल अऊर उपज को हंय ऊ समय जमीन की उपज को पाचवों भाग लियो करे।
GEN 41:35 अऊर तब अच्छी फसल को सात सालों म सब तरह की खान की चिज जमा करे, अऊर नगर नगर म जेवन लायी अनाज को भण्डार घर खोले अऊर अनाज की रक्षा करे।
GEN 41:36 या जेवन की चिज अकाल को उन सात सालों लायी हंय, जो मिस्र देश म आयेंन, देश को जेवन लायी रखी हय, जेको सी देश को ऊ अकाल सी सत्यानाश नहीं हो जाये।”
GEN 41:37 यो बात फिरौन अऊर ओको पूरो अधिकारियों ख अच्छी लगी।
GEN 41:38 येकोलायी फिरौन न अपनो अधिकारियों सी कह्यो, “का हम ख असो आदमी मिल सकय हय, जसो यो हय अऊर जेको म परमेश्वर की आत्मा रह्य हय।”
GEN 41:39 तब फिरौन न यूसुफ सी कह्यो, “परमेश्वर न जो तोख इतनो ज्ञान दियो हय कि तोरो जसो कोयी समझदार अऊर बुद्धिमान नहीं;
GEN 41:40 यो वजह तय मोरो घर को अधिकारी होयजो, अऊर तोरी आज्ञा को अनुसार मोरी पूरी प्रजा चलेंन, केवल राजगद्दी को बारे म मय तोरो सी बड़ो रहूं।”
GEN 41:41 तब फिरौन न यूसुफ सी कह्यो, “सुन, मय तोख मिस्र को पूरो देश को ऊपर अधिकारी ठहराय देऊ हय।”
GEN 41:42 तब फिरौन न अपनो हाथ सी अंगूठी निकाल क यूसुफ को हाथ म पहिनाय दी; अऊर यूसुफ ख बढ़िया मलमल को कपड़ा पहिनाय दियो, अऊर ओको गलो म सोनो की चैन डाल दी;
GEN 41:43 अऊर ओख अपनो दूसरो रथ पर चढ़ायो; अऊर लोग ओको आगु आगु यो प्रचार करतो चल्यो कि घुटना टेक क दण्डवत करो, अऊर ओन यूसुफ ख मिस्र को पूरो देश को ऊपर प्रधान मन्त्री ठहराय दियो।
GEN 41:44 तब फिरौन न यूसुफ सी कह्यो, “फिरौन त मय आय; पर मिस्र देश म कोयी भी तोरी आज्ञा को बिना हाथ पाय नहीं हिलायेंन।”
GEN 41:45 तब फिरौन न यूसुफ को नाम सापनत्पानेह रख्यो; अऊर ओन नगर को याजक पोतीपेरा की बेटी आसनत सी ओको बिहाव कराय दियो। अऊर यूसुफ पूरो मिस्र देश को अधिकारी भय गयो।
GEN 41:46 जब यूसुफ मिस्र को राजा फिरौन को जवर खड़ो भयो, तब ऊ तीस साल को होतो। ऊ फिरौन को जवर सी निकल क पूरो मिस्र देश म दौरा करन लग्यो।
GEN 41:47 पहिले को सात सालों म जमीन बहुत तरह सी अनाज पैदा करती रही,
GEN 41:48 अऊर यूसुफ उन सातों सालों म सब तरह की जेवन की चिजे, जो मिस्र देश म होत रह्य, उन्ख जमा कर क् नगरों म रखतो गयो; अऊर हर एक नगर को चारयी तरफ को खेतों की जेवन की चिजे ख ऊ उच नगर म जमा करतो गयो।
GEN 41:49 यो तरह यूसुफ न अनाज ख समुन्दर की रेतु को जसो बहुत अच्छो सी एक एक कर क् गिन क रख्यो, तब वहां इतनी फसल भय गयी कि यूसुफ न ओख गिननोच छोड़ दियो।
GEN 41:50 अकाल को पहिलो साल को आनो सी पहिले यूसुफ को दोय टुरा पैदा भयो, ओन नगर को याजक पोतीपेरा की बेटी आसनत न उन्ख जनम दियो।
GEN 41:51 यूसुफ न अपनो बड़ो टुरा को नाम यो कह्य क मनश्शे रख्यो, कि “परमेश्वर न मोरो सी मोरी पूरी परेशानी, अऊर मोरो बाप को पूरो घराना भुलाय दियो हय।”
GEN 41:52 दूसरो को नाम ओन यो कह्य क एप्रैम रख्यो, कि “परमेश्वर न मोख ऊ देश म फलवन्त करयो जित मोख दु:ख भोगनो पड़्यो होतो।”
GEN 41:53 मिस्र देश को अच्छी फसल पकन को सात साल खतम होय गयो;
GEN 41:54 अऊर यूसुफ को कहन को अनुसार सात सालों लायी अकाल शुरू भय गयो। सब देशों म अकाल पड़न लग्यो, पर मिस्र देश म अनाज होतो।
GEN 41:55 जब मिस्र को पूरो देश भूखो मरन लग्यो; तब प्रजा फिरौन सी चिल्लाय चिल्लाय क खाना मांगन लग्यो; अऊर ऊ सब मिस्रियों सी कहत रह्य, “यूसुफ को जवर जावो; अऊर जो कुछ ऊ तुम सी कहेंन, उच करो।”
GEN 41:56 जब अकाल पूरी धरती पर फैल गयो, अऊर मिस्र देश म अकाल को रूप भयंकर भय गयो, तब यूसुफ सब भण्डार घर ख खोल क मिस्रियों ख अनाज बेचन लग्यो।
GEN 41:57 येकोलायी पूरी धरती को लोग मिस्र देश म अनाज लेन लायी यूसुफ को जवर आन लग्यो, कहालीकि पूरी धरती पर भयंकर अकाल होतो।
GEN 42:1 जब याकूब न सुन्यो कि मिस्र म अनाज हय, तब ओन अपनो बेटावों सी कह्यो, “तुम एक दूसरो को मुंह कहाली देख रह्यो हय।”
GEN 42:2 तब ओन कह्यो, “मय न सुन्यो हय कि मिस्र म अनाज हय; येकोलायी तुम लोग वहां जाय क हमरो लायी अनाज ले क आवो, जेको सी हम मरबो नहीं, बल्की जीन्दो रह्यबोंन।”
GEN 42:3 तब यूसुफ को दस भाऊ अनाज लेन लायी मिस्र देश ख गयो।
GEN 42:4 पर यूसुफ को भाऊ बिन्यामीन ख याकूब न यो सोच क भाऊवों को संग नहीं भेज्यो कि कही असो नहीं होय कि ओको पर कोयी संकट आय पड़े।
GEN 42:5 यो तरह जो लोग अनाज लेन आयो उन्को संग याकूब को बेटा भी आयो; कहालीकि कनान देश म भी भारी अकाल होतो।
GEN 42:6 यूसुफ त मिस्र देश को प्रधान मन्त्री होतो, अऊर ऊ देश को सब लोगों ख उच अनाज बेचत रह्य; येकोलायी जब यूसुफ को भाऊ आयो तब जमीन को तरफ मुंड झुकाय क ओख दण्डवत करयो।
GEN 42:7 उन्ख देख क यूसुफ न पहिचान त लियो, पर उन्को आगु भोलो बन क् मजबूती को संग उन्को सी पुच्छ्यो, “तुम कित सी आयो हय?” उन्न कह्यो, “हम कनान देश सी अनाज लेन लायी आयो हंय।”
GEN 42:8 यूसुफ न अपनो भाऊवों ख पहिचान लियो, पर उन्न ओख नहीं पहिचान्यो।
GEN 42:9 तब यूसुफ अपनो उन सपनो ख याद कर क् जो ओन ओको बारे म देख्यो होतो, उन्को सी कहन लग्यो, “तुम लोग भेद जानन लायी आयो हय; यो मिस्र देश की दुर्दशा को।”
GEN 42:10 उन्न ओको सी कह्यो, “नहीं, नहीं, स्वामी, तोरो दास जेवन की चिज ख लेन लायी आयो हंय।
GEN 42:11 हम सब एकच बाप को बेटा आय, हम सीधो आदमी हंय; तोरो दास भेद जानन वालो नोहोय।”
GEN 42:12 यूसुफ न उन्को सी कह्यो, “नहीं, नहीं, तुम यो देश की दुर्दशा देखन लायीच आयो हय।”
GEN 42:13 उन्न कह्यो, “हम तोरो दास बारा भाऊ हंय, अऊर कनान देश को हम एकच आदमी को बेटा आय, अऊर छोटो भाऊ यो समय हमरो बाप को जवर हय, अऊर एक भाऊ मर गयो हय।”
GEN 42:14 तब यूसुफ न उन्को सी कह्यो, “मय न तुम सी कह्य दियो कि तुम भेद जानन वालो आय;
GEN 42:15 तब योच रीति सी तुम्हरी जांच करी जायेंन, फिरौन की जीवन की कसम, जब तक तुम्हरो छोटो भाऊ इत नहीं आय जाये तब तक तुम इत सी नहीं निकल पावों।
GEN 42:16 येकोलायी अपनो म सी एक ख भेज देवो कि ऊ तुम्हरो भाऊ ख ले आये, अऊर तुम लोग हमरी देख भाल म रहो; यो तरह तुम्हरी बाते जाची जायेंन कि तुम म सच्चायी हय का नहाय। यदि सच्चो नहीं निकल्यो तब त फिरौन को जीवन की कसम तुम सही मच भेद जानन वालो समझ्यो जावो।”
GEN 42:17 तब यूसुफ न उन्ख तीन दिन तक जेलखाना म रख्यो।
GEN 42:18 तीसरो दिन यूसुफ न उन्को सी कह्यो, “एक काम करो तब जीन्दो रहो; कहालीकि मय परमेश्वर को डर मानु हय;
GEN 42:19 यदि तुम सीधो आदमी हय, त तुम सब भाऊवों म सी एक जन यो जेलखाना म बन्दी रहे; अऊर तुम अपनो घर वालो की भूख मिटान लायी अनाज ले जावो,
GEN 42:20 अऊर अपनो छोटो भाऊ ख मोरो जवर ले आवो; यो तरह तुम्हरी बाते सच्ची ठहरेंन, अऊर तुम मार डाल्यो नहीं जावो।” तब उन्न वसोच करयो।
GEN 42:21 उन्न आपस म कह्यो, “कोयी सक नहाय कि हम अपनो भाऊ को बारे म दोषी हंय, कहालीकि जब ओन हम सी गिड़गिड़ाय क बिनती करी, तब भी हम न यो देख क कि ओको जीवन कसो संकट म पड़्यो हय, तब भी हम न ओकी नहीं सुनी; योच वजह हम भी अब यो संकट म पड़्यो हंय।”
GEN 42:22 रूबेन न ओको सी कह्यो, “का मय न तुम सी नहीं कह्यो होतो कि टुरा को अपराधी मत बनो? पर तुम न नहीं सुन्यो। देखो, अब ओको खून को बदला लियो जाय रह्यो हय।”
GEN 42:23 यूसुफ की अऊर उन्की बातचीत एक दोय भाषियों को द्वारा होत रह्य; येको सी उन्ख मालूम नहीं भयो कि ऊ उन्की बोली समझय हय।
GEN 42:24 तब यूसुफ उन्को जवर सी हट क रोवन लग्यो; तब अऊर उन्को जवर लौट क उन्को सी बातचीत कर क् उन्म सी शिमोन ख निकाल्यो अऊर उन्को आगु ओख बन्दी बनाय लियो।
GEN 42:25 तब यूसुफ न आज्ञा दी कि उन्को बोरा अनाज सी भरो अऊर एक एक जन को बोरा म ओको रुपया ख भी रख देवो, तब उन्ख रस्ता लायी भी जेवन की चिजे भी देवो। तब उन्को संग असोच करयो गयो।
GEN 42:26 तब हि अपनो अनाज को बोरा अपनो गधा पर लाद क उत सी चली गयो।
GEN 42:27 सराय म जब एक न अपनो गधा ख चारा देन लायी अपनो बोरा खोल्यो, तब ओको रुपया बोरा को ऊपर रख्यो हुयो देख्यो।
GEN 42:28 तब ओन अपनो भाऊवों सी कह्यो, “मोरो रुपया त लौटाय दियो गयो हय; देखो, ऊ मोरो बोरा म हय,” तब उन्को जीव म जीव नहीं रह्यो, अऊर हि एक दूसरो को तरफ डर सी देखन लग्यो, अऊर बोल्यो, “परमेश्वर न यो हम सी का करयो हय।”
GEN 42:29 तब हि कनान देश म अपनो बाप याकूब को जवर आयो, अऊर अपनी पूरी बात ओख यो तरह सुनायो :
GEN 42:30 “जो आदमी मिस्र देश को स्वामी हय, ओन हम सी मजबूती को संग बाते करी, अऊर हम ख ओन ऊ देश को भेद जानन वालो कह्यो।
GEN 42:31 तब हम न ओको सी कह्यो, ‘हम सीधो लोग हंय, भेद जानन वालो नहीं।
GEN 42:32 हम बारा भाऊ एकच बाप को बेटा आय; एक त मर गयो, पर छोटो भाऊ कनान देश म बाप को जवर हय।’
GEN 42:33 तब ऊ आदमी न, जो ऊ देश को स्वामी हय, हम सी कह्यो, ‘येको सी मालूम होय जायेंन कि तुम सीधो आदमी हय; तुम अपनो म सी एक ख मोरो जवर छोड़ क अपनो घर वालो की भूख मिटान लायी कुछ ले क जावो,
GEN 42:34 अऊर अपनो छोटो भाऊ ख मोरो जवर ले क आवो। तब मोख विश्वास होय जायेंन कि तुम भेद जानन वालो नोहोय, पर सीधो लोग आय। तब मय तुम्हरो भाऊ ख तुम्ख सौंप देऊं, अऊर तुम यो देश म लेन देन भी कर सको’।”
GEN 42:35 यो बताय क हि अपनो अपनो बोरा सी अनाज निकालन लग्यो, तब देख्यो कि एक एक जन को रुपया की झोली ओकोच बोरा म रखी हय। तब रुपया की झोलियों ख देख क हि अऊर उन्को बाप बहुत डर गयो।
GEN 42:36 तब उन्को बाप याकूब न उन्को सी कह्यो, “मोख तुम न बिना सन्तान को कर दियो, देखो, यूसुफ नहीं रह्यो, अऊर शिमोन भी नहीं आयो, अऊर तुम बिन्यामीन ख भी लि जानो चाहवय हय। यो सब विपत्तियां मोरो ऊपर आय पड़ी हंय।”
GEN 42:37 रूबेन न अपनो बाप सी कह्यो, “यदि मय ओख तोरो जवर नहीं लाऊ, त मोरो दोयी टुरावों ख मार डालजो; तय ओख मोरो हाथ म सौंप दे, मय ओख तोरो जवर फिर लाय देऊं।”
GEN 42:38 याकूब न कह्यो, “मोरो बेटा तुम्हरो संग नहीं जायेंन; कहालीकि ओको भाऊ मर गयो हय अऊर ऊ अब अकेलो रह्य गयो हय : येकोलायी जो रस्ता सी तुम जावो, ओको म यदि ओको पर कोयी विपत्ति आय गयी, तब त तुम्हरो वजह मय यो बुढ़ापा को दिन म दु:ख को संग अधोलोक म उतर जाऊं।”
GEN 43:1 कनान देश म अकाल अऊर भी भयंकर होतो गयो।
GEN 43:2 जब हि अनाज मिस्र सी ले आयो होतो, खतम होय गयो तब उन्को बाप याकूब न उन्को सी कह्यो, “मिस्र देश ख फिर जावो, अऊर हमरो लायी कुछ अऊर जेवन की चिज ले क लावो।”
GEN 43:3 तब यहूदा न अपनो बाप याकूब सी कह्यो, “ऊ आदमी न हम ख चेतावनी दे क कह्यो, ‘यदि तुम्हरो भाऊ तुम्हरो संग नहीं आयेंन, त तुम मोरो जवर मत आवो।’
GEN 43:4 येकोलायी यदि तय हमरो भाऊ ख हमरो संग भेजय, तब हम जाय क तोरो लायी जेवन की चिज ख ले क आबो,
GEN 43:5 पर यदि तय ओख नहीं भेजय, त हम नहीं जाबो, कहालीकि ऊ आदमी न हम सी कह्यो, ‘यदि तुम्हरो भाऊ तुम्हरो संग नहीं आयेंन, त तुम मोरो जवर मत आवो’।”
GEN 43:6 तब याकूब न कह्यो, “तुम न ऊ आदमी ख यो कहाली बतायो कि हमरो एक अऊर भाऊ हय, कहाली मोरो सी बुरो बर्ताव करयो?”
GEN 43:7 उन्न कह्यो, “जब ऊ आदमी न हमरी अऊर हमरो रिश्तेदारों की हालत को बारे म यो रीति सी पुच्छ्यो, ‘कि का तुम्हरो बाप अभी तक जीन्दो हय? का तुम्हरो कोयी अऊर भाऊ भी हय?’ तब हम न हि सवाल को अनुसार ओको सी बात करयो। तब हम का जानत होतो कि ऊ हम सी कहेंन, कि अपनो भाऊ ख इत ले आवो।”
GEN 43:8 तब यहूदा न अपनो बाप याकूब सी कह्यो, “ऊ लड़का ख मोरो संग भेज दे कि हम चले जाये; येको सी हम अऊर तय, अऊर हमरो बाल बच्चा मरनो नहीं पायेंन, अऊर जीन्दो रहेंन।
GEN 43:9 मय ओकी सुरक्षा की जवाब दारी लेऊ हय; मोरोच हाथ सी तय ओख वापस लेजो। यदि मय ओख तोरो जवर पहुंचाय क आगु खड़ो नहीं कर देऊ, तब त मय हमेशा लायी तोरो अपराधी ठहरूं।
GEN 43:10 यदि हम लोग वहां इंतजार नहीं करतो, त अब तक दूसरी बार वापस आतो।”
GEN 43:11 तब उन्को बाप याकूब न उन्को सी कह्यो, “यदि सचमुच असीच बात हय त यो करो, यो देश की अच्छी अच्छी चिज म सी कुछ कुछ अपनो बोरा म ऊ आदमी लायी भेंट ले जावो : जसो थोड़ो सो बलसान, शहेद, मसाला, गन्धरस, पिस्ता, अऊर बादाम।
GEN 43:12 तब अपनो अपनो संग दोय गुना रुपया ले जावो; अऊर जो रुपया तुम्हरो बोरा को ऊपर रख क लौटाय दियो गयो होतो, ओख भी धर क जावो; शायद यो भूल सी भयो हो।
GEN 43:13 अपनो भाऊ ख भी संग ले क ऊ आदमी को जवर फिर जावो,
GEN 43:14 अऊर सर्वशक्तिमान परमेश्वर ऊ आदमी ख तुम पर दयालु करेंन, जेको सी ऊ तुम्हरो दूसरो भाऊ ख अऊर बिन्यामीन ख भी आन देन; अऊर यदि बिन सन्तान ख बिछड़नोच हय, त असोच होन दे।”
GEN 43:15 तब उन भाऊवों न ऊ भेंट, अऊर दोय गुना रुपया, अऊर बिन्यामीन ख भी संग म धरयो, अऊर चलन लग्यो, अऊर मिस्र देश म पहुंच क यूसुफ को आगु खड़ो भयो।
GEN 43:16 उन्को संग बिन्यामीन ख देख क यूसुफ न अपनो घर को अधिकारी सी कह्यो, “हि आदमियों ख घर म पहुंचाय देवो, अऊर जनावर मार क जेवन तैयार करो; कहालीकि हि लोग दोपहर ख मोरो संग जेवन करेंन।”
GEN 43:17 तब ऊ अधिकारी आदमी यूसुफ को कहन को अनुसार उन आदमियों ख यूसुफ को घर म ले गयो।
GEN 43:18 जब हि यूसुफ को घर ख पहुंचायो गयो तब हि आपस म डर क कहन लग्यो, “जो रुपया पहिली बार हमरो बोरा म वापस कर दियो गयो होतो, ओकोच वजह हम अन्दर पहुंचायो गयो हंय; जेको सी कि ऊ आदमी हम पर टूट पड़्यो, अऊर हम्ख वश म कर क् अपनो दास बनायो, अऊर हमरो गधा ख भी छीन ले।”
GEN 43:19 तब हि यूसुफ को घर को अधिकारी को जवर जाय क घर को दरवाजा पर ओको सी कहन लग्यो,
GEN 43:20 “हे हमरो स्वामी, जब हम पहिली बार अनाज मोल लेन ख आयो होतो,
GEN 43:21 तब हम घर ख जातो समय सराय म पहुंच क अपनो बोरा ख खोल्यो, त देख्यो कि एक एक जन को पूरो पूरो रुपया ओको बोरा म ऊपर रख्यो हय; येकोलायी हम ऊ रुपया ख फिर अपनो संग लायो हंय,
GEN 43:22 अऊर दूसरो रुपया भी खान की चिज लेन लायी लायो हंय; हम नहीं जानजे कि हमरो रुपया हमरो बोरा म कौन रख दियो होतो।”
GEN 43:23 ओन कह्यो, “चिन्ता मत करो, मत डरो! तुम्हरो परमेश्वर, जो तुम्हरो बाप को भी परमेश्वर हय, ओनच तुम ख तुम्हरो बोरा म धन दियो होना, तुम्हरो रुपया त मोख मिल गयो होतो।” तब ओन शिमोन ख निकाल क ओको संग कर दियो।
GEN 43:24 तब ऊ अधिकारी न उन भाऊवों ख यूसुफ को घर म लिजाय क पानी दियो, तब उन्न अपनो पाय ख धोयो; तब ओन उन्को गधा लायी चारा भी दियो।
GEN 43:25 तब यो सुन क कि अज हम्ख इतच जेवन करनो पड़ेंन, तब उन्न यूसुफ को आन को समय तक मतलब दोपहर तक, ऊ भेंट ख तैयार कर क् रख्यो।
GEN 43:26 जब यूसुफ घर आयो तब हि ऊ भेंट ख, जो ओको हाथ म होती, ओको आगु घर म लिजायो अऊर जमीन पर गिर क ओख दण्डवत करयो।
GEN 43:27 यूसुफ न उन्ख सब ठीक ठाक त हय असो पुच्छ्यो अऊर कह्यो, “का तुम्हरो ऊ बूढ्ढा बाप, जेकी तुम न चर्चा करी होती, ऊ ठीक हय? का ऊ अभी तक जीन्दो हय?”
GEN 43:28 उन्न कह्यो, “हव, तोरो दास अऊर हमरो बाप ठीक हय अऊर अब तक जीन्दो भी हय।” तब उन्न मुंड झुकाय क फिर दण्डवत करयो।
GEN 43:29 तब यूसुफ न आंखी ऊपर उठाय क अऊर अपनो सगो भाऊ बिन्यामीन ख देख क पुच्छ्यो, “का तुम्हरो ऊ छोटो भाऊ, जेकी चर्चा तुम न मोरो सी करी होती योच आय?” तब ओन कह्यो, “हे मोरो बेटा, परमेश्वर तोरो पर अनुग्रह करे।”
GEN 43:30 यूसुफ जल्दी सी उठ्यो; कहालीकि अपनो छोटो भाऊ को वजह ओको मन भर आयो होतो, ओन अकेलो म आसू बहान लायी जागा ढूंढ़ी अऊर ऊ अपनी कोठरी म आयो, अऊर वहां रोय पड़्यो।
GEN 43:31 तब अपनो मुंह धोय क निकल्यो, अऊर अपनो ख चुपचाप कर क् कह्यो, “जेवन परोसो।”
GEN 43:32 तब उन्न ओको लायी अलग अऊर भाऊवों लायी भी अलग, अऊर जो मिस्री ओको संग खात रह्य उन्को लायी भी अलग जेवन परोस्यो; येकोलायी कि मिस्री इब्रियों को संग जेवन नहीं कर सकय, नहीं त मिस्री लोग असो करनो बुरो समझत होतो।
GEN 43:33 अऊर यूसुफ को भाऊ ओको आगु बड़ो बड़ो पहिले अऊर छोटो छोटो पीछू, उन्ख अपनी अपनी उमर को अनुसार, कर्म सी बैठायो गयो; यो देख क हि हैरान होय क एक दूसरो को तरफ देखन लग्यो।
GEN 43:34 तब यूसुफ अपनो आगु सी जेवन की चिजे उठाय उठाय क उन्को जवर भेजन लग्यो, अऊर बिन्यामीन ख अपनो भाऊवों सी पाच गुना जादा जेवन की चिजे मिली। यो तरह उन्न यूसुफ को संग खुशी मनायो।
GEN 44:1 तब यूसुफ न अपनो घर को अधिकारी ख आज्ञा दी, “इन आदमियों को बोरा म जितनी जेवन की चिजे समाय सकेंन उतनी भर दे, अऊर एक एक जन को रुपया ख ओको बोरा को मुंह पर रख दे।
GEN 44:2 अऊर मोरो चांदी को कटोरा सब सी छोटो भाऊ को बोरा को मुंह पर ओको अनाज को रुपया को संग रख दे।” यूसुफ की यो आज्ञा को अनुसार ओन वसोच करयो।
GEN 44:3 सुबेरे होतोच हि आदमी अपनो गधा सहित बिदा करयो गयो
GEN 44:4 हि नगर सी निकल्योच होतो अऊर दूर नहीं गयो होतो कि यूसुफ न अपनो घर को अधिकारी सी कह्यो, “उन आदमियों को पीछा कर, अऊर उन्ख मिल क उन्को सी कह्य, ‘तुम न भलायी को बदला बुरायी कहाली करी? तुम न मोरो स्वामी को चांदी को कटोरा कहाली चुरायो?
GEN 44:5 का यो ऊ चांदी को कटोरा नोहोय जेको म मोरो स्वामी पीवय हय, अऊर जेको सी ऊ लूकी बातों ख भी करय हय? तुम न यो जो करयो ऊ बुरो करयो’।”
GEN 44:6 तब अधिकारी न उन्ख जाय क पकड़्यो, अऊर असीच बाते उन्को सी कही।
GEN 44:7 उन्न अधिकारी सी कह्यो, “हे हमरो स्वामी, तय असी बाते कहाली कह्य रह्यो हय? हम कसम खाजे हय कि हम न असो काम करयो हय कि तोरो दासों सी दूर रहे।
GEN 44:8 देख, जो रुपया हमरो बोरा को मुंह को ऊपर निकल्यो होतो, जब हम न ओख कनान देश सी लाय क तोख वापस कर दियो, तब कहाली, हम तोरो स्वामी को घर म सी कोयी चांदी या सोनो की चिज कसो चुराय सकजे हंय?
GEN 44:9 हे स्वामी, तोरो दासों म सी जो कोयी को जवर ऊ निकले, त ऊ मार डाल्यो जाये, अऊर हम भी ऊ स्वामी को दास होय जाबो।”
GEN 44:10 घर को अधिकारी न कह्यो, “तुम्हरोच कहनो सही हय, जेको जवर कटोरा निकले ऊ मोरो दास होयेंन, अऊर तुम लोग निर्दोष ठहरो।”
GEN 44:11 यो बात पर हर एक आदमी अपनो अपनो बोरा ख जमीन पर जल्दी रख क उन्ख खोलन लग्यो।
GEN 44:12 तब यूसुफ को घर को अधिकारी ढूंढन लग्यो, अऊर बड़ो भाऊ को बोरा सी ले क छोटो भाऊ को बोरा तक ढूंढ्यो; अऊर कटोरा बिन्यामीन को बोरा म मिल्यो।
GEN 44:13 तब भाऊवों न अपनो अपनो दु:ख म कपड़ा फाड़्यो, अऊर अपनो अपनो गधा पर सामान रख क नगर ख लौट गयो।
GEN 44:14 जब यहूदा अऊर ओको भाऊ यूसुफ को घर पर पहुंच्यो, त यूसुफ वहांच होतो, तब हि ओको आगु जमीन पर गिरयो।
GEN 44:15 यूसुफ न उन्को सी कह्यो, “तुम लोगों न यो कसो काम करयो हय? का तुम नहीं जानत होतो, कि मोरो जसो आदमी लूकी हुयी बातों ख भी कर सकय हय?”
GEN 44:16 यहूदा न कह्यो, “हम लोग अपनो स्वामी सी का कह्यबो? हम का कह्य क अपनो ख निर्दोष ठहराबो? परमेश्वर न तोरो दासों को अधर्म ख पकड़ लियो हय। हम, अऊर जेको जवर कटोरा निकल्यो ऊ भी, हम सब को सब अपनो स्वामी को दासच हंय।”
GEN 44:17 “यूसुफ न कह्यो असो काम मोरो सी दूरच रहे, जेको जवर कटोरा निकल्यो हय उच मोरो दास होयेंन; अऊर तुम लोग अपनो बाप को जवर अच्छो सी चली जावो।”
GEN 44:18 तब यहूदा ओको जवर जाय क कहन लग्यो, “हे मोरो स्वामी, तोरो दास ख अपनो स्वामी सी एक बात कहन की आज्ञा हय, अऊर तोरो गुस्सा तोरो दास पर नहीं हो; कहालीकि तय त फिरौन राजा को जसो हय।
GEN 44:19 मोरो स्वामी न अपनो दासों सी पुच्छ्यो होतो, ‘का तुम्हरो बाप अऊर कोयी दूसरो भी भाऊ हय?’
GEN 44:20 अऊर हम न अपनो स्वामी सी कह्यो, ‘हव, हमरो बूढ्ढा बाप हय, अऊर ओको बुढ़ापा को सहारा एक छोटो सो बच्चा भी हय, पर ओको भाऊ मर गयो हय, येकोलायी ऊ अब अपनी माय को अकेलोच बच्चा रह्य गयो हय, अऊर ओको बाप ओको सी प्रेम रखय हय।’
GEN 44:21 तब तय न अपनो दासों सी कह्यो होतो, ‘ओख मोरो जवर ले आवो, जेको सी मय ओख देख सकू।’
GEN 44:22 तब हम न अपनो स्वामी सी कह्यो होतो, ‘ऊ टुरा अपनो बाप ख नहीं छोड़ सकय; नहीं त ओको बाप मर जायेंन।’
GEN 44:23 अऊर तय न अपनो दासों सी कह्यो, ‘यदि तुम्हरो छोटो भाऊ तुम्हरो संग नहीं आये, त तुम मोरो जवर कभी नहीं आनो पावों।’
GEN 44:24 “येकोलायी जब हम अपनो बाप अऊर तोरो दास को जवर गयो, तब हम न ओको सी अपनो स्वामी की बाते कही।
GEN 44:25 तब हमरो बाप न कह्यो, ‘फिर जाय क हमरो लायी थोड़ी सी खान की चिज लेय क लावो।’
GEN 44:26 हम न कह्यो, ‘हम नहीं जाय सकजे, हव, यदि हमरो छोटो भाऊ हमरो संग रहे, तब हम जाबो; यदि हमरो छोटो भाऊ हमरो संग नहीं रहेंन, त हम ऊ आदमी को जवर नहीं जाय सकजे।’
GEN 44:27 तब तोरो दास अऊर हमरो बाप न हम सी कह्यो, ‘तुम त जानय हय कि मोरी बाई राहेल सी दोय टुरा पैदा भयो।
GEN 44:28 अऊर उन म सी एक त मोख छोड़ क चली गयो, अऊर मय न निश्चय कर लियो कि ऊ कोयी जनावर को वजह टुकड़ा टुकड़ा कर दियो गयो होना, अऊर तब सी मय ओको मुंह भी नहीं देख सक्यो।
GEN 44:29 यदि तुम येख भी मोरी आंखी को आगु सी ले जावो, अऊर कोयी संकट येको पर पड़े, त तुम्हरो वजह म यो बुढ़ापा को समय म दु:ख को संग अधोलोक म उतर जाऊं।’
GEN 44:30 “येकोलायी जब मय अपनो बाप अऊर तोरो दास को जवर पहुंचू अऊर यो लड़का संग म नहीं रहेंन, त ओको जीव त येकोच पर अटक्यो रहेंन,
GEN 44:31 तब ऊ देखेंन कि लड़का नहाय त ऊ तुरतच मर जायेंन। तब तोरो दासों को वजह तोरो दास अऊर हमरो बाप, जो बुढ़ापा को समय म, दु:ख को संग अधोलोक म उतर जायेंन।
GEN 44:32 मय तोरो दास अपनो बाप को इत यो कह्य क् लड़का लायी अपनो जीवन गिरवी रख्यो हय, यदि मय येख तोरो जवर नहीं पहुंचाय देऊ, त मय हमेशा लायी तोरो अपराधी ठहरूं।
GEN 44:33 येकोलायी अब तोरो दास यो लड़का को बदला अपनो स्वामी को दास होय क रहन की आज्ञा पाये, अऊर यो लड़का ख अपनो भाऊवों को संग जान दियो जाये।
GEN 44:34 यदि लड़का मोरो संग नहीं हो त मय कसो अपनो बाप को जवर जाय सकूं; कही असो नहीं होय कि मोरो बाप पर जो दु:ख पड़ेंन ओख मोख देखनो पड़े।”
GEN 45:1 तब यूसुफ उन सब को आगु जो ओको जवर जवर खड़ो होतो, अपनो ख अऊर रोख नहीं सक्यो; अऊर पुकार क कह्यो, “मोरो जवर जवर सी सब लोगों ख बाहेर क देवो।” भाऊवों को आगु अपनो ख प्रगट करन को समय यूसुफ को संग अऊर कोयी नहीं रह्यो।
GEN 45:2 तब ऊ ऊची आवाज सी रोवन लग्यो; अऊर मिस्रियों न सुन्यो, अऊर फिरौन को घर को लोगों ख भी येको समाचार मिल्यो।
GEN 45:3 तब यूसुफ अपनो भाऊवों सी कहन लग्यो, “मय यूसुफ आय, का मोरो बाप अभी तक जीन्दो हय?” येको उत्तर ओको भाऊ नहीं दे सक्यो; कहालीकि हि ओको आगु घबराय गयो होतो।
GEN 45:4 तब यूसुफ न अपनो भाऊवों सी कह्यो, “मोरो जवर आवो।” यो सुन क हि जवर गयो। तब ओन कह्यो, “मय तुम्हरो भाऊ यूसुफ आय, जेक तुम न मिस्र देश सी आन वालो व्यापारी को हाथ बेच डाल्यो होतो।
GEN 45:5 अब तुम लोग मत पछतावो, अऊर तुम न जो मोख इत बेच डाल्यो, येको सी उदास मत होवो; कहालीकि परमेश्वर न तुम्हरो जीवो ख बचान लायी मोख तुम्हरो आगु भेज दियो हय।
GEN 45:6 कहालीकि अब दोय साल सी यो देश म अकाल हय; अऊर अब पाच साल अऊर असोच होयेंन कि उन्म त नहीं नांगर चलेंन अऊर नहीं अनाज काट्यो जायेंन।
GEN 45:7 येकोलायी परमेश्वर न मोख तुम्हरो आगु येकोच लायी भेज्यो कि तुम धरती पर जीन्दो रहो, अऊर तुम्हरो जीवो को बचनो सी तुम्हरो वंश बढ़े।
GEN 45:8 यो रीति सी अब मोख यहां पर भेजन वालो तुम नहीं, परमेश्वरच ठहरयो; अऊर ओनच मोख फिरौन को बाप, अऊर ओको पूरो घर को स्वामी, अऊर पूरो मिस्र देश को अधिकारी भी ठहराय दियो हय।
GEN 45:9 “तब जल्दी मोरो बाप को जवर जाय क कहो, ‘तोरो बेटा यूसुफ यो कह्य हय कि परमेश्वर न मोख पूरो मिस्र को स्वामी ठहरायो हय; येकोलायी तय मोरो जवर बिना रुक्यो चल्यो आव।
GEN 45:10 तोरो निवास गोशेन देश म होयेंन, अऊर तय अपनो बेटा, नाती, शेरी मेंढी, गाय बईल, अऊर अपनो सब कुछ धर क मोरो जवर रह्यजो।
GEN 45:11 अऊर अकाल को जो पाच साल अऊर होयेंन, उन्म मय उतच तोरो पालन पोषन करूं; असो नहीं होय कि तय अऊर तोरो घराना, बल्की जितनो तोरो जनावर हंय, हि भूखो मरे।’”
GEN 45:12 अऊर तुम अपनी आंखी सी देखय हय, “अऊर मोरो भाऊ बिन्यामीन भी अपनी आंखी सी देखय हय कि जो हम सी बाते कर रह्यो हय ऊ यूसुफ आय।
GEN 45:13 तुम मोरो सब वैभव को, जो मिस्र म हय अऊर जो कुछ तुम न देख्यो हय, ऊ बात को मोरो बाप सी वर्नन करजो; अऊर तुरतच मोरो बाप ख इत ले आजो।”
GEN 45:14 तब ऊ अपनो भाऊ बिन्यामीन को गरो सी लिपट क रोयो; अऊर बिन्यामीन भी ओको गरो सी लिपट क रोयो।
GEN 45:15 ऊ अपनो सब भाऊवों ख चुम्मा ले क रोयो, अऊर येको बाद ओको भाऊ ओको सी बाते करन लग्यो।
GEN 45:16 यो बात को समाचार, कि यूसुफ को भाऊ आयो हंय, फिरौन को भवन तक पहुंच गयो, अऊर येको सी फिरौन अऊर ओको कर्मचारी प्रसन्न भयो।
GEN 45:17 येकोलायी फिरौन न यूसुफ सी कह्यो, “अपनो भाऊवों सी कह्य कि एक काम करो : अपनो जनावरों पर अनाज रख क कनान देश म चली जावो।
GEN 45:18 अऊर अपनो बाप अऊर अपनो अपनो घर को लोगों ख ले क मोरो जवर आवो; अऊर मिस्र देश म जो कुछ अच्छो सो अच्छो हय ऊ मय तुम्ख देऊं, अऊर तुम्ख देश को अच्छो सी अच्छो चिज खान ख मिलेंन।
GEN 45:19 अऊर तोख आज्ञा मिली हय, ‘तुम एक काम करो कि मिस्र देश सी अपनो बाल बच्चां अऊर बाईयों लायी गाड़ियां ले जावो, अऊर अपनो बाप ख ले आवो।
GEN 45:20 अऊर अपनो सामान की चिन्ता नहीं करे कहालीकि पूरो मिस्र देश म जो कुछ अच्छो सी अच्छो हय ऊ तुम्हरो हय’।”
GEN 45:21 याकूब को टुरावों न वसोच करयो; अऊर यूसुफ न फिरौन की आज्ञा को अनुसार उन्ख गाड़ियां दी, अऊर रस्ता लायी जेवन को सामान भी दियो।
GEN 45:22 उन्म सी एक एक जन ख ओन एक एक जोड़ा कपड़ा भी दियो; अऊर बिन्यामीन ख तीन सौ चांदी को सिक्का को संग पाच जोड़ी कपड़ा भी दियो।
GEN 45:23 अपनो बाप को जवर ओन जो भेज्यो ऊ यो आय, मिस्र की अच्छी चिजों सी भरयो हुयो दस गधा, अऊर अनाज रोटी अऊर ओको बाप की रस्ता लायी जेवन की चिज सी भरी हुयी दस गधी।
GEN 45:24 तब ओन अपनो भाऊवों ख बिदा करयो, अऊर हि चली गयो; अऊर ओन उन्को सी कह्यो, “रस्ता म कही झगड़ा मत करो।”
GEN 45:25 मिस्र सी आय क हि कनान देश म अपनो बाप याकूब को जवर पहुंच्यो।
GEN 45:26 अऊर ओको सी यो कह्यो, “यूसुफ अब तक जीन्दो हय, अऊर पूरो मिस्र देश पर शासन उच करय हय।” पर ओन उन्की बातों पर विश्वास नहीं करयो अऊर दंग भय गयो।
GEN 45:27 तब उन्न अपनो बाप याकूब सी यूसुफ की पूरी बाते, जो ओन उन्को सी कही होती उन्न ओको सी कह्य दी। जब ओन उन गाड़ियों ख देख्यो, जो यूसुफ न ओख लेन लायी भेजी होती, तब ओको जीव म जीव आयो।
GEN 45:28 अऊर याकूब न कह्यो, “बस, मोरो बेटा यूसुफ अभी तक जीन्दो हय; मय अपनो जीव निकलन को पहिले जाय क ओख देखूं।”
GEN 46:1 तब याकूब अपनो सब कुछ ले क बेर्शेबा ख गयो, अऊर उत अपनो बाप इसहाक को परमेश्वर ख बलिदान चढ़ायो।
GEN 46:2 तब परमेश्वर न याकूब सी रात ख दर्शन म कह्यो, “हे याकूब, हे याकूब।” ओन कह्यो, “का आज्ञा हय।”
GEN 46:3 परमेश्वर न कह्यो, “मय परमेश्वर आय, तोरो बाप को परमेश्वर; तय मिस्र म जान सी मत डर; कहालीकि मय तोरो सी उत एक बड़ी जाति बनाऊं।
GEN 46:4 मय तोरो संग संग मिस्र ख चलू हय, अऊर मय तोख उत सी फिर सी वापस ले आऊं; अऊर यूसुफ अपनो हाथ सी तोरी आंखी ख बन्द करेंन।”
GEN 46:5 तब याकूब बेर्शेबा सी चल्यो; अऊर याकूब को टुरा अपनो बाप याकूब अऊर अपनो टुरावों न, अऊर बाईयों ख उन गाड़ियों पर बैठायो, जो फिरौन न उन्ख लिजान लायी भेजी होती।
GEN 46:6 हि अपनी शेरी मेंढी गाय बईल, अऊर कनान देश म अपनो जमा करयो हुयो पूरो धन ख ले क मिस्र म आयो;
GEN 46:7 अऊर याकूब अपनो टुरा टुरियां, नाती नातिन, यानेकि अपनो पूरो वंश ख अपनो संग मिस्र देश म ले आयो।
GEN 46:8 याकूब को संग जो इस्राएली, यानेकि याकूब को टुरा, नाती पहिले, मिस्र देश म आयो, उन्को नाम यो हंय : याकूब को बड़ो टुरा रूबेन होतो;
GEN 46:9 अऊर रूबेन को टुरा हनोक, पल्लू, हेस्रोन अऊर कर्म्मी होतो।
GEN 46:10 शिमोन को टुरा यमूएल यामीन, ओहद, याकीन, सोहर, अऊर एक कनानी बाई सी जनम्यो हुयो शाऊल भी होतो।
GEN 46:11 लेवी को टुरा गेर्शोन, कहात, अऊर मरारी होतो।
GEN 46:12 यहूदा को टुरा एर, ओनान, शेला, पेरेस, अऊर जेरह नाम को टुरा भयो त होतो पर एर अऊर ओनान कनान देश म मर गयो होतो; अऊर पेरेस को टुरा हेस्रोन अऊर हामूल होतो।
GEN 46:13 इस्साकार को टुरा तोला, पुब्बा, योब, अऊर शिम्रोन होतो।
GEN 46:14 जबूलून को टुरा सेरेद एलोन, अऊर यहलेल होतो।
GEN 46:15 लिआ : को टुरा जो याकूब सी पद्दनराम म पैदा भयो होतो, उन्को बेटा अऊर नाती हिच होतो, अऊर इन्को सी जादा ओन ओको संग एक बेटी दीना ख भी जनम दियो। यहां तक त याकूब को सब वंश वालो तैंतीस लोग भयो।
GEN 46:16 तब गाद को टुरा सिय्योन, हाग्गी, शूनी, एसबोन, एरी, अरोदी, अऊर अरेली होतो।
GEN 46:17 आशेर को टुरा यिम्ना, यिश्वा, यिस्वी, अऊर उन्की बहिन सेरह होती; अऊर बरीआ को टुरा हेबेर अऊर मल्कीएल होतो।
GEN 46:18 जिल्पा, जेक लाबान न अपनी बेटी लिआ : ख दी होती, ओको बेटा अऊर नाती पहिले हिच होतो; अऊर ओको द्वारा याकूब को सोला लोग पैदा भयो।
GEN 46:19 तब याकूब की पत्नी राहेल को टुरा यूसुफ अऊर बिन्यामीन होतो।
GEN 46:20 अऊर मिस्र देश म ओन को याजक पोतीपेरा की बेटी आसनत सी यूसुफ को यो बेटा पैदा भयो, यानेकि मनश्शे अऊर एप्रैम।
GEN 46:21 अऊर बिन्यामीन को टुरा बेला, बेकेर, अश्बेल, गेरा, नामान, एही, रोश, मुप्पीम, हुप्पीम अऊर आर्द होतो।
GEN 46:22 राहेल को टुरा जो याकूब सी पैदा भयो ओको योच टुरा होतो; ओको यो सब बेटा अऊर नाती चौदा लोग भयो।
GEN 46:23 तब दान को टुरा हूशीम होतो।
GEN 46:24 नप्ताली को टुरा यहसेल, गूनी, सेसेर, अऊर शिल्लेम होतो।
GEN 46:25 बिल्हा दासी, जेक लाबान न अपनी बेटी राहेल ख दियो, ओको बेटा अऊर नाती हिच आय; ओको द्वारा याकूब को वंश म सात लोग भयो।
GEN 46:26 याकूब को वंश को पूरो लोग जो उन्को संग मिस्र म आयो होतो, याकूब की बहुवों ख छोड़ क सब मिल क छियासठ लोग होतो।
GEN 46:27 अऊर यूसुफ को बेटा, जो मिस्र म ओको सी पैदा भयो, हि दोय लोग होतो; यो तरह याकूब को घरानो को जो लोग मिस्र म आयो हि सब मिल क सत्तर भयो।
GEN 46:28 तब याकूब न यहूदा ख अपनो आगु यूसुफ को जवर भेज दियो कि ऊ ओख गोशेन की रस्ता दिखाये; अऊर हि गोशेन देश म आयो।
GEN 46:29 तब यूसुफ अपनो रथ जुतवाय क अपनो बाप याकूब सी भेंट करन लायी गोशेन देश ख गयो, अऊर याकूब सी भेंट कर क् ओको गलो सी लपट्यो, अऊर बहुत देर तक याकूब को गलो सी लपट्यो हुयो रोतो रह्यो।
GEN 46:30 तब याकूब न यूसुफ सी कह्यो, “मय अब मरनो सी भी प्रसन्न हय, कहालीकि तोख जीन्दो पायो अऊर तोरो मुंह देख लियो।”
GEN 46:31 तब यूसुफ न अपनो भाऊवों सी अऊर अपनो बाप को घरानो सी कह्यो, “मय जाय क फिरौन ख यो कह्य क समाचार देऊं, ‘मोरो भाऊ अऊर मोरो बाप को पूरो घरानो को लोग, जो कनान देश म रहत होतो, हि मोरो जवर आय गयो हंय;
GEN 46:32 अऊर हि लोग चरवाहे हंय, कहालीकि हि जनावरों ख पालतो आयो हंय; येकोलायी हि अपनी शेरी मेंढी, गाय बईल, अऊर जो कुछ उन्को हय, सब ले आयो हंय।’
GEN 46:33 जब फिरौन तुम ख बुलाय क पूछे, ‘तुम्हरो धन्दा का हय?’
GEN 46:34 तब यो कह्यजो, ‘तोरो दास बचपन सी ले क अज तक जनावरों ख पालतो आयो हंय, बल्की हमरो पूर्वज भी असोच करत होतो।’ येको सी तुम गोशेन देश म रहनो पावों; कहालीकि सब चरवाहों सी मिस्री लोग घृना करय हंय।”
GEN 47:1 तब यूसुफ न फिरौन को जवर जाय क यो समाचार दियो, “मोरो बाप अऊर मोरो भाऊ, अऊर उन्की शेरी मेंढियां, गाय बईल अऊर जो कुछ उन्को हय, सब कनान देश सी आय गयो हय; अऊर अभी त हि गोशेन देश म हंय।”
GEN 47:2 तब यूसुफ अपनो भाऊवों म सी पाच जन ख ले क फिरौन को आगु खड़ो कर दियो।
GEN 47:3 फिरौन न यूसुफ को भाऊवों सी पुच्छ्यो, “तुम्हरो काम का हय?” उन्न फिरौन सी कह्यो, “तोरो दास चरवाहे हंय, अऊर हमरो पूर्वजों भी असोच रह्यो।”
GEN 47:4 तब उन्न फिरौन सी कह्यो, “हम यो देश म परदेशी को भाति रहन लायी आयो हंय; कहालीकि कनान देश म भारी अकाल होन को वजह तोरो दासों की शेरी मेंढियों लायी चारा नहीं रह्यो; येकोलायी अपनो दासों ख गोशेन देश म रहन की आज्ञा दे।”
GEN 47:5 तब फिरौन न यूसुफ सी कह्यो, “तोरो बाप अऊर तोरो भाऊ तोरो जवर आय गयो हंय,
GEN 47:6 अऊर मिस्र देश तोरो आगु पड़्यो हय; यो देश को जो सब सी अच्छो भाग हो, ओको म अपनो बाप अऊर भाऊवों ख बसाय दे, मतलब हि गोशेन देश मच रहे; अऊर यदि तय जानय हय, कि उन्म कोयी मेहनती आदमी हंय, त उन्ख मोरो जनावरों को अधिकारी ठहराय दे।”
GEN 47:7 तब यूसुफ न अपनो बाप याकूब ख लाय क फिरौन को जवर खड़ो करयो; अऊर याकूब न फिरौन ख आशीर्वाद दियो।
GEN 47:8 तब फिरौन न याकूब सी पुच्छ्यो, “तोरी उमर कितनो साल की भयी हय?”
GEN 47:9 याकूब न फिरौन सी कह्यो, “मय एक सौ तीस साल परदेशी होय क अपनो जीवन बिताय चुक्यो हय; मोरो जीवन को दिन थोड़ो अऊर दु:ख सी भरयो हुयो भी होतो, अऊर मोरो पूर्वजों परदेशी होय क जितनो दिन तक जीन्दो रह्यो उतनो दिन को मय अभी नहीं भयो।”
GEN 47:10 अऊर याकूब फिरौन ख आशीर्वाद दे क ओको जवर सी चली गयो।
GEN 47:11 तब यूसुफ न अपनो बाप अऊर भाऊवों ख बसाय दियो, अऊर फिरौन कि आज्ञा को अनुसार मिस्र देश को अच्छो सी अच्छो भाग म, मतलब रामसेस नाम को प्रदेश म, जमीन दे क उन्ख सौंप दियो।
GEN 47:12 अऊर यूसुफ अपनो बाप को, अऊर अपनो भाऊवों को, अऊर बाप को पूरो घराना को, एक एक को बाल बच्चां की गिनती को अनुसार, भोजन दिलाय दिलाय क उन्को पालन पोषन करन लग्यो।
GEN 47:13 ऊ पूरो देश म खान लायी कुछ नहीं रह्यो; कहालीकि अकाल बहुत भारी होतो, अऊर अकाल को वजह मिस्र अऊर कनान दोयी देश भूख को वजह तरस गयो
GEN 47:14 अऊर जितनो रुपया मिस्र अऊर कनान देश म होतो, सब ख यूसुफ ऊ अनाज को बदला, जो उन्को निवासी लेत होतो, उन्ख जमा कर क् फिरौन को भवन म पहुंचाय दियो।
GEN 47:15 जब मिस्र अऊर कनान देश को रुपया खतम भय गयो, तब सब मिस्री यूसुफ को जवर आय क कहन लग्यो, “हम ख खान की चिज दे; का हम रुपया को नहीं रहनो सी तोरो रहतो हुयो मर जाये?”
GEN 47:16 यूसुफ न कह्यो, “यदि रुपया नहाय त अपनो जनावर दे दो, अऊर मय उन्को बदला म तुम्ख खान ख देऊं।”
GEN 47:17 तब हि अपनो जनावर यूसुफ को जवर ले आयो; अऊर यूसुफ उन्ख घोड़ा, शेरी मेंढियां, गाय बईलों अऊर गधा को बदला खान ख देन लग्यो : ऊ साल म ऊ सब जाति को जनावरों को बदला जेवन दे क उन्को पालन पोषन करतो रह्यो।
GEN 47:18 ऊ साल त असोच कट गयो; तब अगले साल म उन्न यूसुफ को जवर आय क कह्यो, “हम अपनो प्रभु सी यो बात छुपाय क नहीं रखबोंन कि हमरो रुपया खतम होय गयो हय, अऊर हमरो हर तरह को जनावर हमरो प्रभु को भय गयो हंय; येकोलायी अब हमरो प्रभु को आगु हमरो शरीर अऊर जमीन छोड़ क कुछ भी नहीं रह्यो।
GEN 47:19 हम तोरो देखतो म कहाली मरबो, अऊर हमरी जमीन कहाली उजड़ जायेंन? हम्ख अऊर हमरी जमीन ख जेवन की चिज को बदला लेय ले, कि हम अपनी जमीन सहीत फिरौन को दास हो : अऊर हम्ख बीज दे कि हम मरनो नहीं पाये, अऊर जीन्दो रहे, अऊर जमीन नहीं उजड़े।”
GEN 47:20 तब यूसुफ न मिस्र की पूरी जमीन ख फिरौन लायी लेय लियो; कहालीकि ऊ भयंकर अकाल को पड़नो सी मिस्रियों ख अपनो अपनो खेत बेच डालनो पड़्यो। यो तरह पूरी जमीन फिरौन की भय गयी;
GEN 47:21 अऊर एक कोना सी ले क दूसरो कोना तक पूरो मिस्र देश म जो प्रजा रहत होती, ओख यूसुफ न नगरों म लाय क बसाय दियो।
GEN 47:22 पर याजकों की जमीन ओन लेय नहीं ली; कहालीकि याजकों लायी फिरौन को तरफ सी लगातार भोजन को बन्दोबस्त होतो, अऊर लगातार जो भोजन फिरौन उन्ख देत होतो उच हि खात होतो, यो वजह उन्ख अपनी जमीन बेचनी नहीं पड़ी।
GEN 47:23 तब यूसुफ न प्रजा को लोगों सी कह्यो, “सुनो, मय न अज को दिन तुम ख अऊर तुम्हरी जमीन ख भी फिरौन लायी लेय लियो हय; देखो, तुम्हरो लायी इत बीज हय, येख जमीन म बोवो।
GEN 47:24 अऊर जो कुछ जमीन सी होयेंन ओको पाचवों अंश फिरौन ख देवो, बाकी चार अंश तुम्हरो रहेंन कि तुम ओख अपनो खेतो म बोवो, अऊर अपनो अपनो बाल बच्चां अऊर घर को दूसरो लोगों सहित खायो करो।”
GEN 47:25 उन्न कह्यो, “तय न हम्ख बचाय लियो हय; हमरो प्रभु की अनुग्रह की नजर हम पर बनी रहे, अऊर हम फिरौन को दास होय क रहबोंन।”
GEN 47:26 यो तरह यूसुफ न मिस्र की जमीन को बारे म असो नियम ठहरायो हय, जो अज को दिन तक चल्यो आवय हय कि पाचवों अंश फिरौन ख मिल्यो करे; केवल याजकों कीच जमीन फिरौन की नहीं भयी।
GEN 47:27 इस्राएली मिस्र को गोशेन प्रदेश म रहन लग्यो; अऊर उत की जमीन उन्को बस म होती; अऊर हि बहुतायत सी बढ़्यो अऊर उन्को कुछ बच्चा भयो।
GEN 47:28 मिस्र देश म याकूब सत्रा साल जीन्दो रह्यो : यो तरह याकूब की पूरी उमर एक सौ सैंतालीस साल की भयी।
GEN 47:29 जब इस्राएल को मरन को दिन जवर आयो, तब ओन अपनो टुरा यूसुफ ख बुलाय क कह्यो, “यदि तोरो अनुग्रह मोरो पर हो, त अपनो हाथ मोरी जांघ पर रख क कसम खा कि तय मोरो संग कृपा अऊर सच्चायी को यो काम करजो कि मोख मिस्र देश म माटी नहीं देजो।
GEN 47:30 जब मय अपनो बापदादों को संग सोय जाऊं, तब तय मोख मिस्र देश सी लिजाय क उन्कोच कब्रस्थान म रखजो।” तब यूसुफ न कह्यो, “मय तोरो वचन को अनुसार करूं।”
GEN 47:31 तब याकूब न कह्यो, “मोरो सी कसम खा।” तब यूसुफ न ओको सी कसम खायी। तब याकूब न खटिया को मुन्डेसो को तरफ मुंड झुकाय क प्रार्थना करी।
GEN 48:1 इन बातों को बाद कोयी न यूसुफ सी कह्यो, “सुन तोरो बाप बीमार हय।” तब यूसुफ मनश्शे अऊर एप्रैम नाम को दोयी टुरावों ख संग ले क याकूब को जवर गयो।
GEN 48:2 कोयी न याकूब ख बताय दियो, “तोरो टुरा यूसुफ तोरो जवर आय रह्यो हय,” तब याकूब अपनो ख सम्भाल क खटिया पर बैठ गयो
GEN 48:3 अऊर याकूब न यूसुफ सी कह्यो, “सर्वशक्तिमान परमेश्वर न कनान देश को लूज नगर को जवर मोख दर्शन दे क आशीष दी,
GEN 48:4 अऊर कह्यो, ‘सुन, मय तोख फलवन्त कर क् बढ़ाऊं, अऊर तोख राज्य राज्य की मण्डली को मूल बनाऊं, अऊर तोरो बाद तोरो वंश ख यो देश देऊं, जेको सी कि ऊ हमेशा तक उन्की निजी जमीन बनी रहे।’”
GEN 48:5 अऊर अब तोरो दोयी टुरा, “जो मिस्र म मोरो आन को पहिले पैदा भयो हंय, हि मोरोच ठहरेंन; मतलब जो रीति सी रूबेन अऊर शिमोन मोरो हंय, उच रीति सी एप्रैम अऊर मनश्शे भी मोरो ठहरेंन।
GEN 48:6 अऊर उन्को बाद तोरी जो सन्तान पैदा होयेंन ऊ तोरी त ठहरेंन; पर बंटवारा को समय हि अपनो भाऊवों कोच वंश म गिन्यो जायेंन।
GEN 48:7 जब मय पद्दान सी आय रह्यो होतो, तब एप्राता नगर पहुंचन सी थोड़ोच दूर पहिले राहेल कनान देश म, रस्ता म, मोरो आगु मर गयी; अऊर मय न ओख उतच, मतलब एप्राता नगर जो बैतलहम भी कहलावय हय, उच रस्ता म माटी दी।”
GEN 48:8 तब याकूब न यूसुफ को टुरावों ख देख्यो, तब पुच्छ्यो, “हि टुरा कौन आय?”
GEN 48:9 यूसुफ न अपनो बाप सी कह्यो, “हि मोरो टुरा आय, जो परमेश्वर न मोख इत दियो हंय।” याकूब न कह्यो, “उन्ख मोरो जवर ले आव कि मय उन्ख आशीर्वाद देऊं।”
GEN 48:10 याकूब की आंखी बुढ़ापा को वजह धुन्धरी भय गयी होती, यहां तक कि ओख कम दिखायी देत होतो। तब यूसुफ अपनो टुरावों ख याकूब को जवर लिजायो; अऊर ओन उन्ख चुम क गरो लगाय लियो।
GEN 48:11 तब याकूब न यूसुफ सी कह्यो, “मय न सोच्यो तो नहीं कि मय तोरो मुख फिर सी देखनो पाऊं : पर देख, परमेश्वर न मोख तोरो वंश भी दिखायो हय।”
GEN 48:12 यूसुफ न उन्ख अपनो बाप को घुटना को बीच सी हटायो अऊर जमीन को तरफ मुंड झुकाय क दण्डवत करयो।
GEN 48:13 तब यूसुफ न उन दिनों ख ले क, मतलब एप्रैम ख अपनो दायो हाथ सी कि ऊ याकूब को बायो हाथ पड़े, अऊर मनश्शे ख अपनो बायो हाथ सी कि ऊ याकूब को दायो हाथ पड़े, उन्ख ओको जवर लिजायो।
GEN 48:14 तब याकूब न अपनो दायो हाथ बढ़ाय क एप्रैम की मुंड पर जो छोटो होतो, अऊर अपनो बायो हाथ बढ़ाय क मनश्शे की मुंड पर रख दियो; ओन जान बुझ क असो करयो नहीं त बड़ो मनश्शेच होतो।
GEN 48:15 तब ओन यूसुफ ख आशीर्वाद दे क कह्यो, “परमेश्वर जेकी उपस्थिति म रह्य क मोरो बापदादा अब्राहम अऊर इसहाक चल्यो, उच परमेश्वर मोरो जनम सी ले क अज को दिन तक मोरो देखभाल करन वालो बन्यो हय;
GEN 48:16 अऊर उच स्वर्गदूत मोख पूरी बुरायी सी छुड़ातो आयो हय, उच अब इन टुरावों ख आशीष दे; अऊर हि मोरो अऊर मोरो बापदादा अब्राहम अऊर इसहाक को कहलाये; अऊर धरती म बहुतायत सी बढ़े।”
GEN 48:17 जब यूसुफ न देख्यो कि मोरो बाप न अपनो दायो हाथ एप्रैम की मुंड पर रख्यो हय, तब या बात यूसुफ ख बुरी लगी; येकोलायी ओन अपनो बाप को हाथ यो बिचार सी पकड़ लियो कि एप्रैम की मुंड पर सी उठाय क मनश्शे की मुंड पर रख दे।
GEN 48:18 अऊर यूसुफ न अपनो बाप सी कह्यो, “हे बाप, असो नहीं; कहालीकि बड़ो योच आय; अपनो दायो हाथ येकी मुंड पर रख।”
GEN 48:19 ओको बाप न कह्यो, “नहीं; सुन, हे मोरो टुरा, मय या बात ख अच्छो सी जानु हय : अऊर येको सी भी आदमियों की एक मण्डली पैदा होयेंन, अऊर ऊ भी महान होय जायेंन, तब भी येको छोटो भाऊ येको सी बहुत ज्यादा महान होय जायेंन, अऊर ओको वंश सी बहुत सी जातियां निकलेंन।”
GEN 48:20 तब ओको बाप न उच दिन यो कह्य क उन्ख आशीर्वाद दियो, “इस्राएली लोग तोरो नाम ले ले क असो आशीर्वाद दियो करेंन, ‘परमेश्वर तोख एप्रैम अऊर मनश्शे को जसो बना दे,’” अऊर ओन मनश्शे सी पहिले एप्रैम को नाम लियो।
GEN 48:21 तब याकूब न यूसुफ सी कह्यो, “देख, मय त मरन पर हय : पर परमेश्वर तुम लोगों को संग रहेंन, अऊर तुम ख तुम्हरो पूर्वजों को देश म फिर पहुंचाय देयेंन।
GEN 48:22 अऊर मय तोख तोरो भाऊवों सी ज्यादा जमीन को एक भाग देऊ हय, जेक मय न एमोरी जाति को हाथ सी अपनी तलवार अऊर धनुष की ताकत सी ले लियो हय।”
GEN 49:1 तब याकूब न अपनो टुरावों ख यो कह्य क बुलायो, “जमा होय जावो, मय तुम ख बताऊं कि आखरी को दिनों म तुम पर का का बीतेंन।
GEN 49:2 “हे याकूब को टुरावों, जमा होय क सुनो, अपनो बाप याकूब को तरफ कान लगावो।
GEN 49:3 “हे रूबेन, तय मोरो पहिलो अऊर बड़ो टुरा आय, अऊर मोरो आदमी होन को नाते पहिलो सबूत तयच आय; तय मोरो पूरो टुरावों सी बड़ो अभिमानी अऊर ताकतवर तयच हय।
GEN 49:4 तय एक भयंकर बाढ़ की लहर को जसो प्रचण्ड हय, येकोलायी तय मोरो पूरो टुरावों सी ज्यादा महत्व को नहीं होय सकजो; कहालीकि तय मोरी पत्नी को संग सोयो, अऊर तय न अपनो बाप को बिस्तर ख अशुद्ध करयो।
GEN 49:5 “शिमोन अऊर लेवी भाऊ हंय, हि अपनी तलवार हिंसा करन लायी इस्तेमाल करय हंय।
GEN 49:6 हे मोरो जीव, उन्की गुप्त बैठक म मत पड़, हे मोरी महिमा, उन्की सभा म मत मिल; कहालीकि उन्न गुस्सा म आदमियों ख मार डाल्यो हय, अऊर अपनीच इच्छा पर चल क बईलों ख लंगड़ा बनावय हंय।
GEN 49:7 धिक्कार हय उन्को गुस्सा पर, कहालीकि ऊ भयंकर हय; अऊर उन्को गुस्सा ख, जो निर्दयी होतो; मय उन्ख याकूब को देश म अलग अलग अऊर इस्राएल म तितर बितर कर देऊं।
GEN 49:8 “हे यहूदा, तोरो भाऊ तोरो धन्यवाद करेंन, तोरो हाथ तोरो दुश्मनों की गर्दन पर पड़ेंन; तोरो बाप को टुरा तोख दण्डवत करेंन।
GEN 49:9 यहूदा सिंह को बच्चा हय। हे मोरो टुरा, तय शिकार कर क् गुफा म गयो हय; ऊ सिंह जसो, सिंहनी को जसो झुक क बैठ्यो हय; तब कौन ओख छेड़ क उठाय सकय हय।
GEN 49:10 जब तक शीलो नहीं आये तब तक राजदण्ड यहूदा सी नहीं छूटेंन, अऊर न ओको वंश सी व्यवस्था देन वालो अलग होयेंन; अऊर राज्य राज्य को लोग ओकी आज्ञा को पालन करेंन।
GEN 49:11 ऊ अपनो जवान गधा ख अंगूर की बेला म, अऊर अपनी गधी को बच्चा ख सब सी अच्छी अंगूर की बेला म बान्ध्यो करेंन; ओन अपनो कपड़ा अंगूर को रस म, अऊर अपनो पहिनन वालो कपड़ा अंगूरीरस रस म धोवय हय।
GEN 49:12 ओकी आंखी अंगूर को रस पीवन सी लाल होती, अऊर ओको दात दूध सी ज्यादा सफेद हय।
GEN 49:13 “जबूलून समुन्दर को किनार पर निवास करेंन, ऊ जहाजों लायी बन्दरगाह को काम देयेंन, अऊर ओको राज्य की सीमा सीदोन देश तक पहुंचेंन।
GEN 49:14 “इस्साकार एक ताकतवर गधा हय, जो जनावरों को झुण्ड को बीच म सोयो रह्य हय।
GEN 49:15 ओन एक आराम की जागा देख क, कि अच्छी हय, अऊर एक देश, कि मनोहर हय, अपनो बख्खा ख बोझ उठावन लायी झुकायो, अऊर बेगारी म दास को जसो काम करन लग्यो।
GEN 49:16 “दान इस्राएल को एक गोत्र होय क अपनो जाति भाऊवों को न्याय करेंन।
GEN 49:17 दान रस्ता म को एक सांप, अऊर सड़क को किनार को एक नाग होयेंन, जो घोड़ा की एड़ी ख डंसय हय, जेको सी ओको सवार पछाड़ खाय क पीछू को तरफ गिर जावय हय।
GEN 49:18 “हे परमेश्वर, मय तोरो सीच उद्धार पावन की बाट देखत आयो हय।
GEN 49:19 “गाद पर एक डाकुवों को दल आक्रमन त करेंन; पर ऊ पीछू सी उन पर आक्रमन करेंन।
GEN 49:20 “आशेर सी जो अनाज पैदा होयेंन ऊ उत्तम होयेंन, अऊर ऊ राजा को लायक स्वादिष्ट जेवन दियो करेंन।
GEN 49:21 “नप्ताली एक छूटी हुयी हरिन की जसी हय वा सुन्दर बाते बोलय हय।
GEN 49:22 “यूसुफ फलवन्त डगाली की एक बेला आय, वा झरना को जवर लगी हुयी फलवन्त डगाली की एक बेला आय; ओकी डगालियां दीवार पर सी चढ़ क फैल जावय हंय।
GEN 49:23 धनुर्धारियों न ओको पर भयंकर आक्रमन करयो, अऊर ओको पर बान छोड्यो, अऊर ओख बहुत ज्यादा सतायो।
GEN 49:24 तब भी ओको धनुष स्थिर रह्यो, अऊर ओकी भुजा अऊर हाथ याकूब को उच शक्तिमान परमेश्वर को हाथों को द्वारा फुर्तीलो भयो, जेको जवर ऊ चरवाहा आयेंन, जो इस्राएल नगर की चट्टान भी ठहरेंन।
GEN 49:25 यो तोरो बाप को ऊ परमेश्वर को नाम आय, जो तोरी मदत करेंन, ऊ सर्वशक्तिमान को जो तोख ऊपर सी आसमान म की आशीषें, अऊर खल्लो सी गहिरो पानी म की आशीषें, अऊर स्तनों अऊर गर्भ की आशीषें देयेंन।
GEN 49:26 तोरो बाप को आशीर्वाद, मोरो पूर्वजों को आशीर्वादों सी ज्यादा बढ़ गयो हंय अऊर सनातन पहाड़ियों की मनचाही चिजों को जसो बन्यो रहेंन : हि यूसुफ की मुंड पर, जो अपनो भाऊवों सी अलग करयो गयो होतो, ओकोच मुंड को मुकुट पर फूले फलेंन।
GEN 49:27 “बिन्यामीन बहुत खूंखार भेड़िया हय, सुबेरे त ऊ शिकार ख फाड़य, अऊर शाम ख लूट को माल बाटय हय।”
GEN 49:28 इस्राएल को बारा गोत्र हिच आय : अऊर उन्को बाप न जो जो वचन सी उन्ख आशीर्वाद दियो, ऊ हिच आय; एक एक ख ओको लायक आशीर्वाद को अनुसार ओन आशीर्वाद दियो।
GEN 49:29 तब ओन यो कह्य क उन्ख आज्ञा दी, “मय अपनो लोगों को संग मिलन पर हय : येकोलायी मोख हित्ती जाति एप्रोन की जमीन वाली गुफा म मोरो बापदादों को संग माटी देजो
GEN 49:30 अऊर उच गुफा म जो कनान देश म मम्रे को आगु वाली मकपेला की जमीन म हय; ऊ जमीन ख अब्राहम न हित्ती जाति एप्रोन को हाथ सी येकोच लायी लेय लियो होतो कि ऊ कब्रस्थान लायी ओकी निजी जमीन हो।
GEN 49:31 उत अब्राहम अऊर ओकी पत्नी सारा ख माटी दी गयी होती, अऊर उतच इसहाक अऊर ओकी पत्नी रिबका ख भी माटी दी गयी होती; अऊर उतच मय न लिआ : ख भी माटी दी।
GEN 49:32 ऊ जमीन अऊर ओको म की गुफा हित्तियों को हाथ सी ले ली होती।”
GEN 49:33 याकूब जब अपनो टुरावों ख यो आज्ञा दे चुक्यो, तब अपनो पाय खटिया पर जमा कर क् जीव छोड़्यो, अऊर अपनो लोगों म जाय मिल्यो।
GEN 50:1 तब यूसुफ अपनो बाप को मुंह पर गिर क रोयो अऊर अपनो बाप ख चुम्यो।
GEN 50:2 अऊर यूसुफ न उन बैद्यों ख, जो ओको सेवक होतो, आज्ञा दी कि ओको बाप को शव म सुगन्ध की चिज भरे। तब बैद्यों न याकूब को शव म सुगन्ध की चिज भर दियो।
GEN 50:3 अऊर ओको चालीस दिन पूरो भयो, कहालीकि जिन्को शव म सुगन्ध की चिज भरी जावय हंय, उन्ख इतनोच दिन पूरो लगय हंय : अऊर मिस्री लोग ओको लायी सत्तर दिन तक शोक मनातो रह्यो।
GEN 50:4 जब ओको शोक को दिन बीत गयो, तब यूसुफ फिरौन को घराना सी कहन लग्यो, “यदि तुम्हरी अनुग्रह की नजर मोरो पर हो त मोरो सन्देश फिरौन ख सुनावो,
GEN 50:5 मोरो बाप न यो कह्य क, मोख यो कसम खिलायी, ‘देख मय मरन पर हय,’ ‘जो कब्र मय न अपनो लायी कनान देश म खुदवायी हय ओकोच म मोख तय माटी देजो।’ येकोलायी अब मोख उत जाय क अपनो बाप ख माटी देन की आज्ञा दे, ओको बादच म लौट आऊं।”
GEN 50:6 तब फिरौन न कह्यो, “जाय क अपनो बाप की खिलायी हुयी कसम को अनुसार ओख माटी दे।”
GEN 50:7 येकोलायी यूसुफ अपनो बाप ख माटी देन लायी चली गयो, अऊर फिरौन को सब काम करन वालो अऊर ओको भवन को मुखिया अऊर मिस्र देश को सब मुखिया ओको संग चल्यो,
GEN 50:8 अऊर यूसुफ को घर को सब लोग अऊर ओको भाऊ अऊर ओको बाप को घर को सब लोग भी संग गयो; पर हि अपनो बाल बच्चां, शेरी मेंढियों, अऊर गाय बईल ख गोशेन प्रदेश म छोड़ गयो।
GEN 50:9 अऊर यूसुफ को संग रथ अऊर घुड़सवार भी गयो, यो तरह शव यात्रा म भीड़ बहुत भारी भय गयी।
GEN 50:10 जब हि आताद को खरियान तक, जो यरदन नदी को पार हय, उत पहुंच्यो, तब उत बहुत शोक मनायो; अऊर यूसुफ न अपनो बाप लायी सात दिन तक शोक करयो।
GEN 50:11 आताद को खरियान म को शोक ख देख क ऊ नगर को निवासी कनानियों न कह्यो, “यो त मिस्रियों को कोयी भारी शोक होना।” योच वजह ऊ जागा को नाम आबेलमिस्रैम पड़्यो, अऊर ऊ यरदन को पार हय।
GEN 50:12 याकूब को टुरावों न ठीक उच काम करयो, जसो ओन उन्ख आज्ञा दी होती
GEN 50:13 अऊर उन्न याकूब ख कनान देश म ले जाय क मकपेला की ऊ जमीन वाली गुफा म, जो मम्रे को आगु हय, उत माटी दी; जेक अब्राहम न हित्ती एप्रोन को हाथ सी येकोलायी लेय लियो होतो कि ऊ कब्रस्थान लायी ओकी निजी जमीन हो।
GEN 50:14 अपनो बाप ख माटी दे क यूसुफ अपनो भाऊवों अऊर उन सब को संग, जो ओको बाप ख माटी देन लायी ओको संग गयो होतो, उन सब को संग मिस्र लौट आयो।
GEN 50:15 जब यूसुफ को भाऊवों न देख्यो कि हमरो बाप मर गयो हय, तब कहन लग्यो, “अब शायद यूसुफ हमरो सी नफरत करे, अऊर जितनी बुरायी हम न ओको सी करी होती सब को बदला हम सी लेयेंन?”
GEN 50:16 येकोलायी उन्न यूसुफ को जवर एक सन्देश भेज्यो, “तोरो बाप न मरनो सी पहिले हम्ख यो आज्ञा दी होती
GEN 50:17 ‘तुम लोग यूसुफ सी यो तरह कहो, कि हम बिनती करजे हंय कि तय अपनो भाऊवों को अपराध अऊर पाप ख माफ कर; हम न तोरो सी बुरायी करी होती, पर अब अपनो बाप को परमेश्वर को दासों को अपराध माफ कर’।” उन्की या बाते सुन क यूसुफ रोय पड़्यो।
GEN 50:18 अऊर ओको भाऊ खुद भी जाय क ओको आगु गिर पड़्यो, अऊर कह्यो, “देख, हम तोरो दास हंय।”
GEN 50:19 यूसुफ न उन्को सी कह्यो, “मत डरो, का मय परमेश्वर की जागा पर हय?
GEN 50:20 हालांकि तुम लोगों न मोरो लायी बुरायी को बिचार करयो होतो; पर परमेश्वर न उच बात म भलायी को बिचार करयो, जेको सी ऊ असो करे, जसो अज को दिन प्रगट हय, कि बहुत सो लोगों को जीव बच्यो हंय।
GEN 50:21 येकोलायी अब मत डरो; मय तुम्हरो अऊर तुम्हरो बाल बच्चां को पालन पोषन करतो रहूं।” यो तरह यूसुफ न उन्ख समझाय-बुझाय क शान्ति दी।
GEN 50:22 यूसुफ अपनो बाप को घराना सहीत मिस्र देश म निवास करतो रह्यो, अऊर यूसुफ एक सौ दस साल जीन्दो रह्यो।
GEN 50:23 अऊर यूसुफ न एप्रैम की सन्तान ख तीसरी पीढ़ी तक देख्यो; अऊर मनश्शे को नाती, जो माकीर को टुरा होतो, हि पैदा भयो अऊर यूसुफ न उन्ख गोदी म लियो।
GEN 50:24 यूसुफ न अपनो भाऊवों सी कह्यो, “मय त मरन पर हय; पर परमेश्वर जरूरच तुम्हरी चिन्ता करेंन, अऊर तुम्ख यो देश सी निकाल क ऊ देश म पहुंचाय देयेंन, जेक देन की ओन अब्राहम, इसहाक, अऊर याकूब सी कसम खायी होती।”
GEN 50:25 तब यूसुफ न अपनो लोगों सी एक प्रतिज्ञा करन ख कह्यो। यूसुफ न कह्यो, “मोरो सी प्रतिज्ञा करो कि जब परमेश्वर तुम लोगों ख नयो देश म लिजायेंन तब तुम भी मोरी अस्थियां अपनो संग लिजावों।”
GEN 50:26 यो तरह यूसुफ एक सौ दस साल को होय क मर गयो; अऊर ओको शव म सुगन्ध की चिज भरी गयी, अऊर ऊ शव मिस्र देश म एक सन्दूक म रख्यो गयो।
EXO 1:1 इस्राएल मतलब याकूब को टुरावों को नाम, जो अपनो बाप को संग अपनो घरानो समेत मिस्र देश म आयो होतो, यो आय :
EXO 1:2 रूबेन, शिमोन, लेवी, यहूदा,
EXO 1:3 इस्साकार, जबूलून, बिन्यामीन,
EXO 1:4 दान, नप्ताली, गाद अऊर आशेर।
EXO 1:5 अऊर यूसुफ त मिस्र देश म पहिलेच आयो होतो। याकूब को अपनो वंश म जो पैदा हुयो हि सब सत्तर लोग होतो।
EXO 1:6 ओको बाद यूसुफ अऊर ओको सब भाऊ अऊर ओकी पीढ़ी को सब लोग मर गयो।
EXO 1:7 पर इस्राएल लोगों की सन्तान फूलन-फलन लगी; अऊर हि लोग बहुतच सामर्थी बनतो गयो, अऊर उन्की संख्या बढ़ती गयी कि पूरो देश उन्को सी भर गयो।
EXO 1:8 मिस्र देश म एक नयो राजा बन्यो जो यूसुफ ख नहीं जानत होतो।
EXO 1:9 ओन अपनी प्रजा सी कह्यो, “देखो, इस्राएली लोग हम सी गिनती अऊर ताकत म बहुत बढ़ गयो हंय।
EXO 1:10 येकोलायी आवो, हम उन्को संग चालाकी सी व्यवहार करबोंन, कहीं असो नहीं होय कि जब हि बहुत बढ़ जायेंन अऊर यदि लड़ाई को समय आय पड़्यो, त हमरो दुश्मनों सी मिल क हमरो विरोध म लड़ क देश सी भग जायें।”
EXO 1:11 येकोलायी उन्न इस्राएलियों पर कठिन काम करन वालो अधिकारियों ख नियुक्त करयो कि हि उन पर भारी बोझा डाल क उन्ख दु:ख दियो करे; अऊर उन्न फिरौन लायी पितोम अऊर रामसेस नाम को भण्डार घर वालो नगरों ख बनायो।
EXO 1:12 पर जितनो अधिक उन्ख दु:ख देतो गयो, उतनोच अधिक बढ़तो अऊर फैलतो गयो; येकोलायी मिस्र को लोग इस्राएलियों सी बहुतच डर गयो अऊर घृना करन लग्यो।
EXO 1:13 तब भी मिस्रियों न इस्राएलियों लोगों सी कठोर मेहनत करवायो,
EXO 1:14 अऊर उन्को जीवन ख गारा, ईटा अऊर खेती को अलग अलग को काम की कठिन सेवा सी जीनो मुश्किल कर डाल्यो; जो कोयी काम म हि उन्को सी सेवा करावत होतो ओको म हि कठोरता को व्यवहार करत होतो।
EXO 1:15 इस्राएली बाईयों ख मदत करन वाली शिप्रा अऊर पूआ नाम की दोय इब्री मतलब इस्राएली सुईन ख मिस्र देश को राजा न आज्ञा दियो,
EXO 1:16 “जब तुम इब्री बाईयों को बारतपन करवातो समय ध्यान सी देखो कि टुरा आय, त ओख मार डालजो, अऊर टुरी हय त ओख जीन्दी रहन देजो।”
EXO 1:17 पर हि सुईन परमेश्वर को डर मानत होती, येकोलायी मिस्र को राजा की आज्ञा नहीं मान क टुरावों ख भी जीन्दो छोड़ देत होती।
EXO 1:18 तब मिस्र देश को राजा न सुईन ख बुलाय क पुच्छ्यो, “तुम जो टुरावों ख जीन्दो छोड़ देवय हय, त असो कहाली करय हय?”
EXO 1:19 सुईन न फिरौन ख उत्तर दियो, “इब्री बाईयां मिस्र देश की बाईयों की जसी नहाय; हि असी फुरतीली हंय कि सुईन को पहुंचन को पहिलेच उन्ख बच्चा पैदा होय जावय हय।”
EXO 1:20 येकोलायी परमेश्वर न सुईन को संग भलायी करी; अऊर हि इस्राएली बढ़ कर बहुत शक्तिशाली भय गयो।
EXO 1:21 सुईन परमेश्वर को डर मानत होती, येकोलायी परमेश्वर न उन्ख अपनो परिवार दियो। अऊर इस्राएली लगातार बढ़तो अऊर ताकवर बनतो गयो।
EXO 1:22 तब फिरौन न अपनो पूरी प्रजा ख यो आज्ञा दी, “जब इब्रियों को जितनो टुरा पैदा होयेंन उन्ख तुम नील नदी म फेंक देजो, अऊर सब टुरियों ख जीन्दो रहन देजो।”
EXO 2:1 लेवी को घरानो को एक आदमी न एक लेवी वंश की बाई सी बिहाव कर लियो।
EXO 2:2 वा बाई गर्भवती भयी अऊर ओको एक बेटा पैदा भयो; अऊर यो देख क कि यो बच्चा सुन्दर हय, ओन ओख तीन महीना तक लूकाय क रख्यो।
EXO 2:3 जब वा ओख अऊर लूकाय नहीं सकी तब ओको लायी सरकंडों की एक टोकनी ले क ओको पर डामर को लेप लगायी, अऊर ओको म बच्चा ख रख क नील नदी को किनार पर लम्बी घास को बीच म रख दी।
EXO 2:4 ऊ बच्चा की बहिन यो देखन लायी कुछ दूर खड़ी होती कि ओको संग का होवय हय।
EXO 2:5 तब फिरौन की बेटी आंग धोवन लायी नदी को किनार पर आयी। ओकी दासियां नील नदी को किनार पर घुमत होती। अचानक फिरौन की बेटी न ऊचो घास म टोकनी ख देख क अपनी सेविका ख ओख लावन लायी भेज्यो।
EXO 2:6 जब ओन ओख खोल्यो त देख्यो कि एक बच्चा हय, जो रोय रह्य हय, तब ओको पर दया आयी अऊर ओन कह्यो, “यो त कोयी इब्रियों को बच्चा आय।”
EXO 2:7 तब बच्चा की बहिन न फिरौन की बेटी सी कह्यो, “का मय जा क इब्री बाईयों म सी कोयी बाई ख बुलाय क ले आऊं, जो तोरो लायी बच्चा ख दूध पिलायो करेंन?”
EXO 2:8 फिरौन की बेटी न कह्यो, “जावो।” तब टुरी जाय क बच्चा की माय ख बुलाय क आयी।
EXO 2:9 फिरौन की बेटी न ओको सी कह्यो, “तय यो बच्चा ख लिजाय क मोरो लायी दूध पिलायो कर, अऊर मय तोख मजूरी देऊं।” तब वा बाई बच्चा ख लिजाय क दूध पिलान लगी।
EXO 2:10 जब बच्चा थोड़ो बड़ो भयो तब कुछ समय को बाद ओख फिरौन राजा की बेटी को जवर ले गयी, अऊर ओन बच्चा ख अपनो टुरा मान लियो; अऊर ओन यो कह्य क ओको नाम मूसा रख्यो, “मय न येख पानी सी निकाल्यो होतो।”
EXO 2:11 जब मूसा बड़ो भयो, तब उन दिनों म ऊ बाहेर अपनो भाऊ-बन्धुवों को जवर जाय क उन्को दु:खों पर नजर रखन लग्यो; तब ओन देख्यो कि एक मिस्री आदमी ओको एक इब्री भाऊ ख मार रह्यो हय।
EXO 2:12 ओन इत उत देख्यो कि कोयी नहाय, त ऊ मिस्री आदमी ख मार डाल्यो अऊर रेतु म लूकाय दियो।
EXO 2:13 दूसरो दिन बाहेर दोय इब्री आदमी आपस म लड़ाई कर रह्यो हंय। मूसा न देख्यो कि ओको म एक गलत हय, त मूसा न ओख बोल्यो “तय अपनो संगी ख कहाली मारय हय?”
EXO 2:14 ओन कह्यो, “कौन न तोख हम लोगों पर शासक अऊर न्याय करन वालो ठहरायो? का तुम मोख मारन आयो हंय, जसो तुम न मिस्री आदमी ख मार डाल्यो होतो?” तब मूसा यो सोच क डर गयो, कि “निश्चय ऊ बात खुल गयी हय जो मय न करयो होतो।”
EXO 2:15 जब फिरौन न यो बात सुन्यो कि मूसा न यो का करयो तब ओख मारन लायी देखन लग्यो। पर मूसा फिरौन सी दूर भग गयो, अऊर मिद्यान देश म जाय क रहन लग्यो; अऊर ऊ उत एक कुंवा को जवर बैठ गयो।
EXO 2:16 मिद्यान देश को याजक की सात बेटियां होती; अऊर हि कुंवा पर अपनो बाप की शेरी-मेंढी लायी डोगी म पानी भरन आयी होती।
EXO 2:17 तब कुछ चरवाहे आय क उन्ख हटान लग्यो; तब मूसा उठ्यो उन्न याजक की टुरियों की मदत करी अऊर शेरी-मेंढी ख पानी पिलायो।
EXO 2:18 जब वा अपनो बाप रूएल को जवर वापस गयी, तब ओको बाप न उन्ख पुच्छ्यो, “का वजह हय कि अज तुम इतनो जल्दी वापस आय गयी।”
EXO 2:19 उन्न कह्यो, “एक मिस्री आदमी न हम ख चरवाहों सी बचायो, अऊर हमरो लायी बहुत पानी भर क् शेरी-मेंढी ख पानी पिलायो।”
EXO 2:20 तब ओन अपनी बेटियों सी कह्यो, “ऊ आदमी कित हय? तुम ओख कहाली छोड़ आयी हय? ओख बुलाय क लावो कि ऊ हमरो संग जेवन करेंन।”
EXO 2:21 अऊर मूसा उन्को संग रहन लायी तैयार भय गयो। ओन अपनी बेटी सिप्पोरा को बिहाव मूसा को संग कर दियो।
EXO 2:22 ओन एक टुरा ख जनम दियो, तब मूसा न यो कह्यो, “मय यो देश म परदेशी हय,” येकोलायी ओको नाम गेर्शोम रख्यो।
EXO 2:23 बहुत साल को बाद मिस्र देश को राजा मर गयो। इस्राएली लोगों ख गुलामी म कठिन काम करनो पड़त होतो। अऊर हि मदत लायी चिल्लावत होतो, अऊर उन्की दोहायी जो कठिन काम को वजह हुयी ऊ परमेश्वर तक पहुंची।
EXO 2:24 परमेश्वर न उन्को दु:ख ख सुन्यो अऊर अपनो वाचा ख, जो ओन अब्राहम, इसहाक, अऊर याकूब को संग बान्धी होती, याद करयो।
EXO 2:25 अऊर परमेश्वर न इस्राएलियों की दुर्दशा पर नजर कर क् उन पर मन लगायो।
EXO 3:1 एक दिन मूसा अपनो ससरो यित्रो, मिद्यान देश को याजक, की मेंढी-शेरी ख चरावत होतो; अऊर ऊ उन्ख सुनसान जागा की पश्चिम दिशा म अऊर परमेश्वर को होरेब पहाड़ी को जवर ले गयो।
EXO 3:2 अऊर परमेश्वर को दूत न एक काटा की झाड़ी को बीच आगी की लौ म ओख दर्शन दियो; अऊर मूसा न नजर उठाय क देख्यो कि झाड़ी जल त रही हय, पर जल क भस्म नहीं होय रही हय।
EXO 3:3 तब मूसा न सोच्यो, “मय उत जाय क यो बड़ो आश्चर्य ख देखूं कि वा झाड़ी कहाली नहीं जल रही हय।”
EXO 3:4 जब परमेश्वर न देख्यो कि मूसा झाड़ी ख देखन लायी जवर आय रह्य हय, तब परमेश्वर न झाड़ी को बीच सी ओख बुलायो, अऊर कह्यो, “हे मूसा, हे मूसा!” मूसा न उत्तर दियो, “हव मय इत हय।”
EXO 3:5 परमेश्वर न कह्यो, “जवर मत आव; अऊर अपनो पाय सी चप्पल ख उतार दे, कहालीकि जो जागा पर तय खड़ो हय ऊ पवित्र जमीन हय।”
EXO 3:6 “मय तुम्हरो पूर्वजों अब्राहम, इसहाक, अऊर याकूब को परमेश्वर आय।” तब मूसा न अपनो मुंह झाक लियो; कहालीकि ऊ परमेश्वर की तरफ देखन सी डर गयो।
EXO 3:7 तब परमेश्वर न कह्यो, “मय न अपनी प्रजा को लोग जो मिस्र देश म हय, उन्को दु:ख देख्यो हय; अऊर उन्की जो चिल्लाहट कठिन मेहनत करावन वालो को वजह होवय हय। उन्ख भी सुन्यो हय, अऊर मय उन्को दु:ख ख जानु हय।
EXO 3:8 येकोलायी अब मय उतर आयो हय कि उन्ख मिस्रियों को वश सी छुड़ाऊं, अऊर ऊ देश सी निकाल क एक अच्छो अऊर बड़ो देश म, जित दूध अऊर शहेद की धाराये बहय हंय, मतलब कनानी, हित्ती, एमोरी, परिज्जी, हिब्बी, अऊर यबूसी जाति को लोगों को जागा म पहुंचाऊं।
EXO 3:9 येकोलायी अब सुन, इस्राएलियों की चिल्लाहट मोख सुनायी पड़ी हय, मय न ओको अत्याचार ख भी देख्यो हय, जो मिस्र देश को निवासी उन पर कर रह्यो हंय।
EXO 3:10 अब तय जा, मय तोख फिरौन राजा को जवर भेज रह्यो हय कि तय मोरी इस्राएली प्रजा ख मिस्र देश सी निकाल लाये।”
EXO 3:11 पर मूसा न परमेश्वर सी कह्यो, “मय कौन आय जो फिरौन राजा को जवर जाऊ, अऊर इस्राएलियों ख मिस्र देश सी बाहेर निकाल लाऊं?”
EXO 3:12 परमेश्वर न कह्यो, “निश्चय मय तोरो संग रहूं; अऊर यो बात को कि तोरो भेजन वालो मय आय, तोरो लायी यो चिन्ह होयेंन कि जब तय उन लोगों ख मिस्र देश सी निकाल लावो, तब तुम योच पहाड़ी पर मोरी आराधना करो।”
EXO 3:13 मूसा न परमेश्वर सी कह्यो, “जब मय इस्राएलियों को जवर जाय क उन्को सी कहू, ‘तुम्हरो पूर्वजों को परमेश्वर न मोख तुम्हरो जवर भेज्यो हय,’ अऊर हि मोरो सी पुछेंन, ‘ओको का नाम हय?’ तब मय उन्ख का बताऊं?”
EXO 3:14 परमेश्वर न मूसा सी कह्यो, “मय जो आय सो आय।” तब ओन कह्यो, “तय इस्राएलियों सी यो कह्यजो, ‘जेको नाम मय आय हय ओन मोख तुम्हरो जवर भेज्यो हय’।”
EXO 3:15 तब परमेश्वर न मूसा सी यो भी कह्यो, “तय इस्राएलियों सी यो कह्यजो, ‘तुम्हरो पूर्वजों को परमेश्वर, अब्राहम को, इसहाक को अऊर, याकूब को परमेश्वर, यहोवा, ओन मोख ख तुम्हरो जवर भेज्यो हय। देख, हमेशा मोरो नाम योच रहेंन, अऊर योच नाम सी मोख पीढ़ी सी पीढ़ी तक याद करयो जायेंन।’
EXO 3:16 येकोलायी अब जा इस्राएली बुजूर्गों ख जमा कर, अऊर उन्को सी बोल, ‘तुम्हरो पूर्वजों को परमेश्वर, अब्राहम, इसहाक, अऊर याकूब को परमेश्वर, यहोवा न मोख दर्शन दे क यो कह्यो हय। मय न तुम्हरी सुधि ली हय। जो बर्ताव मिस्र देश म तुम्हरो संग करयो जाय रह्यो हय ओको पर भी चित्त लगायो हय।
EXO 3:17 अऊर मय न ठान लियो हय कि तुम ख मिस्र देश को दु:खों सी बाहेर निकालूं अऊर कनानी, हित्ती, एमोरी, परिज्जी, हिब्बी, अऊर यबूसी लोगों को देश म पहुंचाऊं, जो असो देश आय कि जेको म दूध अऊर शहेद की धारायें बहय हंय।’
EXO 3:18 तब हि तोरी सुनेंन; अऊर तय इस्राएली बुजूर्गों ख संग ले क मिस्र देश को राजा को जवर जा अऊर ओको सी कह्यजो, ‘इब्रियों को परमेश्वर, यहोवा हम पर प्रगट भयो हय; येकोलायी अब हम ख तीन दिन की यात्रा पर सुनसान जागा म जान दे कि अपनो परमेश्वर लायी बलि दान चढ़ाये।’
EXO 3:19 मय जानु हय कि मिस्र देश को राजा तुम्ख तब तक जान नहीं देयेंन, जब तक कि एक ताकतवर हाथ ओख मजबूर नहीं करय।
EXO 3:20 तब मय अपनो हाथ बढ़ाय क सामर्थ को काम मिस्र देश को बीच करूं अऊर चमत्कार को कामों सी ऊ देश पर मुसीबत डालूं; तब ऊ तुम ख जान देयेंन।
EXO 3:21 तब मय मिस्रियों सी अपनी यो प्रजा पर अनुग्रह कराऊं; अऊर जब तुम निकलो तब हि तुम्ख खाली हाथ नहीं जान देयेंन।
EXO 3:22 बल्की हर एक बाई अपनी पड़ोसिन, अऊर उन्को घर म रहन वाली सी सोनो-चांदी को जेवर अऊर कपड़ा मांग क टुरावों अऊर टुरियों ख पहिनाजो; या तरह तुम मिस्रियों ख लूटो।”
EXO 4:1 तब मूसा न उत्तर दियो, “अगर हि मोरो विश्वास नहीं करेंन अऊर नहीं मोरी सुनेंन, बल्की कहेंन, ‘परमेश्वर न तोख ख दर्शन नहीं दियो’।”
EXO 4:2 परमेश्वर न ओको सी कह्यो, “तोरो हाथ म का हय?” ऊ बोल्यो, “लाठी।”
EXO 4:3 परमेश्वर न कह्यो, “ओख जमीन पर डाल दे।” जब ओन ओख जमीन पर डाल्यो तब वा सांप बन गयी, अऊर मूसा ओको आगु सी भग्यो।
EXO 4:4 तब परमेश्वर न मूसा सी कह्यो, “हाथ बढ़ाय क ओकी पूछ पकड़ ले, जब ओन हाथ बढ़ाय क ओख पकड़्यो तब वा ओको हाथ म फिर लाठी बन गयी।
EXO 4:5 ताकी हि लोग विश्वास करे कि तुम्हरो पूर्वजों को परमेश्वर मतलब अब्राहम को परमेश्वर, इसहाक को परमेश्वर, अऊर याकूब को परमेश्वर, परमेश्वर न तोख दर्शन दियो हय।”
EXO 4:6 परमेश्वर न मूसा ख फिर सी कह्यो, “अपनो हाथ पहिन्यो कपड़ा को अन्दर छाती पर रख।” मूसा न आज्ञा मानी अऊर कपड़ा को अन्दर छाती पर अपनो हाथ रख क झाक लियो; फिर जब ओन हाथ बाहेर निकाल्यो तब ओको हाथ बरफ को समान कोढ़ जसो सफेद भय गयो।
EXO 4:7 तब परमेश्वर न कह्यो, “अब फिर सी अपनो हाथ छाती पर रख।” ओन अपनो हाथ छाती पर रख क झाक लियो; अऊर जब ओन ओख छाती पर सी निकाल्यो तब का देखय हय कि ऊ फिर पूरो शरीर को जसो अच्छो भय गयो।
EXO 4:8 तब परमेश्वर न कह्यो, “यदि हि तोरी बात पर विश्वास नहीं करेंन, अऊर पहिले चिन्ह ख नहीं मानेंन, त दूसरो चिन्ह पर विश्वास करेंन।
EXO 4:9 अऊर यदि हि इन दोयी चिन्हों पर विश्वास नहीं करेंन अऊर तोरी बात ख नहीं मानेंन, तब तय नील नदी सी कुछ पानी ले क सूखी जमीन पर डालजो; अऊर जो पानी तय नदी सी निकालजो ऊ सूखी जमीन पर खून बन जायेंन।”
EXO 4:10 मूसा न परमेश्वर सी कह्यो, “हे मोरो प्रभु, मय बोलनो म अच्छो बोलकार नहाय, नहीं पहिले होतो, अऊर नहीं जब सी तय अपनो दास सी बाते करन लग्यो; मय त मुंह अऊर जीबली सी लड़खड़ाऊ हय।”
EXO 4:11 परमेश्वर न ओको सी कह्यो, “आदमी को मुंह कौन न बनायो हय? अऊर आदमी ख मुक्का, यां बहिरा, यां देखन वालो, यां अन्धा, मोख छोड़ क कौन बनावय हय? का मय ऊ यहोवा नहीं।
EXO 4:12 अब जा, तोरो बोलतो समय मय तोरी मदत करूं, अऊर तोख का कहनो हय सिखातो जाऊं।”
EXO 4:13 पर मूसा न कह्यो, “हे मोरो परमेश्वर, कृपया तय कोयी दूसरो ख भेज।”
EXO 4:14 तब परमेश्वर को गुस्सा मूसा पर भड़क्यो अऊर ओन कह्यो, “का तोरो भाऊ ख नहीं जानय, जो लेवीय वंश को हारून आय? मय जानु हय कि ऊ अच्छो सी बोल सकय हय, देख, ऊ तोरो सी मिलन आय रह्यो हय; अऊर तोख देख क खुश होयेंन।
EXO 4:15 येकोलायी तय ओको सी बाते करजो; अऊर ओख बतावो कि का करनो हय मय ओख अऊर ओख बोलन म मदत करूं, अऊर तुम दोयी ख का करनो हय यो सिखाऊं।
EXO 4:16 हारून तोरो तरफ सी लोगों सी बाते करेंन; ऊ तोरो लायी मुंह की वानी अऊर तय ओको लायी परमेश्वर जसो ठहरेंन।
EXO 4:17 अऊर तय यो लाठी ख अपनो संग म लिजाव, अऊर येको सी इन चिन्ह चमत्कार ख दिखाजो।”
EXO 4:18 तब मूसा अपनो ससरो यित्रो को जवर वापस गयो अऊर ओको सी कह्यो, “मोख बिदा कर कि मय मिस्र देश म रहन वालो अपनो भाऊवों को जवर जाय क देखू कि अब तक जीन्दो हय का नहाय।” यित्रो न मूसा सी कह्यो, “तय शान्ति सी जा।”
EXO 4:19 अऊर परमेश्वर न मिद्यान देश म मूसा सी कह्यो, “मिस्र देश वापस जा; कहालीकि जो आदमी तोरो जीव को प्यासो होतो, हि सब मर गयो हंय।”
EXO 4:20 तब मूसा न अपनी पत्नी अऊर अपनो बेटों ख गधा पर बैठाय क मिस्र देश को तरफ परमेश्वर न दी हुयी लाठी ख हाथ म लियो हुयो वापस लौट्यो।
EXO 4:21 तब परमेश्वर न मूसा सी कह्यो, “जब तय मिस्र देश म पहुंचो तब ध्यान रखजो कि जो चमत्कार मय न तोरो वश म करयो हंय उन सब ख फिरौन ख दिखाजो; पर मय ओको मन ख कठोर करूं, अऊर ऊ मोरो लोगों ख नहीं जान देयेंन।
EXO 4:22 अऊर तय फिरौन सी कह्यजो, परमेश्वर यो कह्य हय, कि इस्राएल मोरो पहिलो टुरा आय,
EXO 4:23 अऊर मय तोरो सी कहूं हय कि मोरो टुरा ख जान दे। मोरी आराधना कर सके; अऊर तय न अब तक ओको नहीं जान दियो, त मय तोरो पहिलो टुरा ख मारूं।”
EXO 4:24 मिस्र को रस्ता पर एक जागा म परमेश्वर मूसा को जवर आयो कि ओख मार डालनो चाहयो।
EXO 4:25 तब सिप्पोरा न एक धार वालो गोटा ले क अपनो टुरा को खतना करयो अऊर चमड़ी ख काट क, मूसा को पाय पर डाल दियो अऊर कह्यो, “निश्चय तय मोरो लायी खून बहान वालो मोरो पति आय।”
EXO 4:26 येकोलायी परमेश्वर न मूसा ख छोड़ दियो। जब सिप्पोरा न खतना को समय कह्यो होतो, “तय खून बहानो वालो मोरो पति आय।”
EXO 4:27 तब परमेश्वर न हारून सी कह्यो, “मूसा सी मिलन लायी जंगल म जा।” ऊ गयो। अऊर पवित्र पहाड़ी पर मूसा सी मिल्यो अऊर हारून न मूसा ख चुम्बन लियो।
EXO 4:28 तब मूसा न हारून ख ऊ सब बतायो जो परमेश्वर न ओख मिस्र सी लौटतो समय कह्यो होतो; अऊर उन चिन्ह को बारे म भी बतायो जेक परमेश्वर न मूसा ख करन की आज्ञा दी होती।
EXO 4:29 तब मूसा अऊर हारून मिस्र ख गयो अऊर इस्राएलियों को सब बुजूर्गों ख जमा करयो।
EXO 4:30 जो बाते परमेश्वर न मूसा सी कह्यो होतो, ऊ सब हारून न उन्ख सुनायी, अऊर लोगों को आखी को आगु सब चिन्ह भी दिखाये।
EXO 4:31 अऊर उन्न न उन्को विश्वास करयो; अऊर यो सुन क कि परमेश्वर न इस्राएलियों की सुधि ली अऊर उन्को दु:खो पर नजर करी हय, उन्न अपनो मुंड झुकाय क आराधना करयो।
EXO 5:1 तब मूसा अऊर हारून फिरौन को जवर गयो अऊर कह्यो, “इस्राएलियों को परमेश्वर यहोवा यो कह्य हय : ‘मोरी प्रजा ख जान दे, कि हि जंगल म मोरो सम्मान म त्यौहार मनाय सके’।”
EXO 5:2 फिरौन न कह्यो, “परमेश्वर कौन आय कि मय ओको बात सुन क इस्राएलियों ख जान देऊं? मय परमेश्वर ख नहीं जानु हय, अऊर मय इस्राएलियों ख नहीं जान देऊं।”
EXO 5:3 मूसा अऊर हारून न कह्यो, “इब्रियों को परमेश्वर न खुद हम सी मिल्यो हय; येकोलायी हम्ख जंगल म तीन दिन को रस्ता पर जान दे, कि अपनो परमेश्वर यहोवा लायी बलिदान चढ़ाबों, असो न हो कि ऊ हम्ख महामारी यां तलवार सी नाश करे।”
EXO 5:4 मिस्र देश को राजा न मूसा अऊर हारून सी कह्यो, तुम लोगों ख उन्को काम सी दूर कहाली करनो चाहवय हय? तुम सब जावो अपनो-अपनो मेहनत को काम करो।
EXO 5:5 अऊर फिरौन न कह्यो, “सुनो, यो देश म हि लोग मिस्र की जनता सी बहुत बढ़ गयो हंय, अब तुम उन्ख भारी काम सी आराम दिलानो चाहवय हय!”
EXO 5:6 फिरौन राजा न उच दिन उन इस्राएली लोगों पर कठिन काम करावन वालो ख अऊर उन्को मुखिया ख यो आदेश दियो,
EXO 5:7 “तुम जो अब तक ईटा बनान लायी लोगों ख भूसा दियो करत होतो, ऊ आगु ख मत देजो; हि खुदच जाय क अपनो लायी भूसा जमा करेंन।
EXO 5:8 जितनी ईटा अब तक उन्ख बनानो पड़त होती उतनोच आगु ख भी उन्को सी बनवाजो, ईटा की गिनती कुछ भी कम मत करजो; कहालीकि हि आलसी भय गयो हंय, योच वजह सी हि मोख चिल्लाय क कहतो रह्य हय। हम्ख जान दे परमेश्वर को जवर बलिदान चढ़ान लायी।
EXO 5:9 उन लोगों सी अऊर भी कठिन काम करवाजो जेको सी हि ओको म झुटो रहेंन अऊर मूसा अऊर हारून की झूठी बातों पर ध्यान नहीं देयेंन।”
EXO 5:10 तब लोगों सी मेहनत करवावन वालो न अऊर इस्राएली मतलब इब्री मुखिया न बाहेर जाय क इस्राएलियों सी कह्यो, “फिरौन राजा असो कह्य हय, अब मय तुम्ख ईटा बनान लायी अऊर भूसा नहीं देऊं।
EXO 5:11 तुम खुदच जावो, अऊर जित कहीं तुम्ख भूसा मिलेंन, उत सी जमा कर क् लावो; पर तुम्हरो काम म कुछ भी कमी नहीं आनो होना।”
EXO 5:12 येकोलायी हि लोग भूसा को बदला खूटी ख ढ़ूंढ़न म पूरो मिस्र देश म फैल गयो।
EXO 5:13 मेहनत करावन वालो उन्को सी जल्दी काम करन लायी कहत होतो, जसो तुम भूसा रहन पर करत होतो उच तरह अपनो हर दिन को काम अब भी पूरो करो।
EXO 5:14 अऊर इस्राएलियों म सी जिन मुखियावों ख फिरौन को मेहनत करावन वालो न उन्को अधिकारी ठहरायो होतो, उन्न मार खायी अऊर उन्को सी पुच्छ्यो गयो, “जसो तुम अब तक करत होतो, वसो निश्चित गिनती म ईटा बनावन लायी कल अऊर अज तुम न अपनो काम कहाली नहीं करयो?”
EXO 5:15 तब इस्राएलियों को मुखिया न फिरौन राजा को जवर जाय क दोहायी दी, “तय अपनो दासों सी असो बर्ताव कहाली करय हय?
EXO 5:16 तुम हम्ख कोयी भूसा देवय नहाय, तब भी हम सी कहतो रह्य हंय, ‘ईटा बनावो,’ अऊर अब हम्ख मार रह्यो हय; पर दोष तोरोच लोगों को हय।”
EXO 5:17 फिरौन राजा न उत्तर दियो, “तुम आलसी हो, आलसी; योच वजह कह्य हय कि हम्ख परमेश्वर लायी बलिदान करन ख जान दे।
EXO 5:18 अब जावो अऊर अपनो काम करो; अऊर तुम्ख भूसा नहीं दियो जायेंन, तब भी तुम्ख ईटा की गिनती पूरी करनो पड़ेंन।”
EXO 5:19 जब इस्राएलियों को मुखिया न यो बात सुन्यो कि उन्की ईटों की गिनती कम नहीं होयेंन, अऊर हर दिन उतनोच काम पूरो करनो पड़ेंन जितनो पहिले करत होतो, तब हि जान गयो कि उन्को संकट को दिन आय गयो हंय।
EXO 5:20 जब हि फिरौन राजा को जवर सी बाहेर निकल रह्यो होतो, तब मूसा अऊर हारून उन्को सी मिल्यो जो उत उन्को लायी रूक्यो होतो,
EXO 5:21 अऊर उन्न मूसा अऊर हारून सी कह्यो, “परमेश्वर तुम पर नजर कर क् न्याय करे, कहालीकि तुम न हम ख फिरौन राजा अऊर ओको कर्मचारियों की नजर म दोषी ठहराय क हम्ख मार डालन लायी उन्को हाथ म तलवार दे दियो हय।”
EXO 5:22 तब मूसा न परमेश्वर को जवर वापस आय क कह्यो, “हे प्रभु, तय न यो प्रजा को संग बुरो व्यवहार कहाली करयो? तय न मोख इत कहाली भेज्यो?
EXO 5:23 जब सी मय तोरो नाम सी फिरौन को जवर बाते करन लायी गयो, तब सी ओन यो प्रजा को संग बुरो व्यवहार करयो, अऊर तय न अपनो लोगों की कुछ भी मदत नहीं करयो।”
EXO 6:1 तब परमेश्वर न मूसा सी कह्यो, “अब तय देखजो कि मय फिरौन राजा सी का करूं, अब तय ओख देखजो, ऊ मोरी महान शक्ति को वजह, अपनो देश सी निकाल देयेंन।”
EXO 6:2 परमेश्वर न मूसा सी कह्यो, “मय यहोवा आय।
EXO 6:3 मय सर्वशक्तिमान परमेश्वर को नाम सी अब्राहम, इसहाक, अऊर याकूब ख दर्शन देत होतो, पर परमेश्वर को नाम सी कभी अपनो आप ख उन पर प्रगट नहीं करयो।
EXO 6:4 अऊर मय न उन्को संग अपनी वाचा करयो, कि मय उन्ख कनान देश देऊं, जेको म हि परदेशी होय क रहत होतो, ओख उन्ख दे देऊ।
EXO 6:5 इस्राएलियों जिन्ख मिस्री लोग गुलाम बनाय क रख्यो होतो, उन्को चिल्लानो भी सुन क मय न अपनी वाचा ख याद करयो हय।
EXO 6:6 येकोलायी तय इस्राएलियों सी कह्यजो, ‘मय परमेश्वर आय, अऊर तुम ख मिस्रियों को बोझां सी निकालू, अऊर उन्की गुलामी सी छुड़ाऊं, अऊर अपनो हाथ बढ़ाय क तुम्हरी रक्षा करूं,
EXO 6:7 अऊर मय तुम ख अपनी प्रजा बनान लायी अपनाय लेऊं, अऊर मय तुम्हरो परमेश्वर ठहरूं; अऊर तुम जान लेवो कि मय तुम्हरो परमेश्वर यहोवा आय जो तुम्ख मिस्रियों को दबाव अऊर बोझ सी निकाल ले आयो,
EXO 6:8 अऊर जो देश ख हाथ उठाय क देन की कसम मय न अब्राहम, इसहाक, अऊर याकूब सी खायी होती। ओको म मय तुम्ख पहुंचाय क ओख तुम्हरो अधिकार म कर देऊं। मय परमेश्वर आय’।”
EXO 6:9 मूसा न इस्राएलियों ख यो बाते सुनायी, पर उन्न मन की बेचैनी अऊर गुलामी को वजह उन्की बाते नहीं सुन्यो।
EXO 6:10 तब परमेश्वर न मूसा सी कह्यो,
EXO 6:11 “जावो अऊर मिस्र देश को राजा फिरौन सी कहजो इस्राएलियों ख ओको देश सी बाहेर जान दे।”
EXO 6:12 पर मूसा न परमेश्वर सी कह्यो, “देख, इस्राएलियों न मोरी बात नहीं सुन्यो; तब फिरौन मोरी कसी बात सुनेंन? मय त बोलनो म लड़खड़ाऊ हय।”
EXO 6:13 तब परमेश्वर न मूसा अऊर हारून ख आदेश दियो कि इस्राएलियों अऊर मिस्र देश को फिरौन राजा सी कहो, हि इस्राएली लोग मिस्र देश सी बाहेर निकाल ले जाये।
EXO 6:14 उन्को पूर्वजों को घराना को मुख्य आदमियों को नाम यो आय : इस्राएल को बड़ो बेटा रूबेन को टुरा: हनोक, पल्लू, हेस्रोन अऊर कर्मी; इन्को म सी रूबेन को वंश निकल्यो।
EXO 6:15 शिमोन को छय टुरा होतो : यमूएल, यामीन, ओहद याकीन अऊर सोहर अऊर एक कनानी बाई को टुरा शाऊल होतो; इन्को सी शिमोन को वंश निकल्यो।
EXO 6:16 लेवी को तीन टुरा होतो : उन्की वंशावली को नाम यो आय : गेर्शोन, कहात अऊर मरारी; अऊर लेवी की पूरी उमर एक सौ सैतीस साल की हुयी।
EXO 6:17 गेर्शोन को वंश अनुसार गेर्शोन को दोय टुरा होतो : लिबनी अऊर शिमी।
EXO 6:18 कहात को चार टुरा होतो : अम्राम, यिसहार, हेब्रोन अऊर उज्जीएल। कहात की उमर एक सौ तैतीस साल की भयी।
EXO 6:19 मरारी को दोय टुरा होतो : महली अऊर मूशी। लेवियों पीढ़ी जिन्कोसी उन्की वंशावली चली यो आय।
EXO 6:20 अम्राम न अपनी फूफू योकेबेद सी बिहाव करयो अऊर ओको सी हारून अऊर मूसा पैदा भयो; अऊर अम्राम की पूरी उमर एक सौ सैतीस साल की भयी।
EXO 6:21 यिसहार को तीन टुरा होतो : कोरह, नेपेग अऊर जिक्री।
EXO 6:22 उज्जीएल को तीन टुरा होतो : मीशाएल, एलसाफन अऊर सित्री।
EXO 6:23 हारून न अम्मीनादाब की टुरी अऊर नहशोन कि बहिन एलीशेबा सी बिहाव करयो; अऊर ओको सी नादाब, अबीहू, एलाजार अऊर ईतामार पैदा भयो।
EXO 6:24 कोरह को तीन टुरा होतो : अस्सीर, एलकाना अऊर अबीआसाप; अऊर इन्को सी कोरह को वंश निकल्यो।
EXO 6:25 हारून को टुरा एलाजार न पूतीएल की टुरी सी बिहाव करयो; अऊर ओको सी पीनहास पैदा भयो। इन्को सी उन्को वंश चल्यो। लेवियों को पूर्वजों को घरानों को मुख्य आदमी हिच आय।
EXO 6:26 हारून अऊर मूसा योच आय जिन्ख परमेश्वर न आज्ञा दी: “इस्राएलियों ख दल बनाय क मिस्र देश सी बाहेर निकाल लावो।”
EXO 6:27 यो उच मूसा अऊर हारून हंय जिन्न मिस्र देश को राजा फिरौन सी कह्यो कि हम इस्राएलियों ख मिस्र देश सी निकाल ले जाबो।
EXO 6:28 जो दिन परमेश्वर न मूसा सी मिस्र देश म बाते करी,
EXO 6:29 ओन मूसा ख बतायो, “मय यहोवा आय; जो कुछ मय तोरो सी कहूं ऊ सब बात मिस्र देश को फिरौन राजा सी कह्यजो।”
EXO 6:30 पर मूसा न परमेश्वर ख उत्तर दियो, “मय अच्छो तरह बोल नहीं सकू; अऊर फिरौन राजा मोरी बात कसी सुनेंन?”
EXO 7:1 परमेश्वर न मूसा सी कह्यो, “अब देख, मय तोख फिरौन राजा को जसो परमेश्वर ठहराऊ हय; अऊर तोरो भाऊ हारून तोरो भविष्यवक्ता ठहरेंन।
EXO 7:2 जो जो बात मय तुम्ख बताऊं, ऊ सब बात तुम हारून सी कह्यजो, अऊर हारून ऊ सब फिरौन राजा सी कहेंन, तब फिरौन राजा इस्राएलियों ख अपनो देश सी जान देयेंन।
EXO 7:3 पर मय फिरौन राजा को मन ख कठोर कर देऊं, अऊर अपनो बहुत सी चिन्ह चमत्कार मिस्र देश म दिखाऊं।
EXO 7:4 फिरौन राजा तुम्हरी नहीं सुनेंन; अऊर मय मिस्र देश पर अपनो हाथ उठाय क मिस्रियों ख भारी सजा दे क अपनी सेना मतलब अपनी इस्राएली प्रजा ख मिस्र देश सी निकालूं।
EXO 7:5 अऊर जब मय मिस्र देश पर हाथ बढ़ाय क इस्राएलियों ख उन्को बीच सी निकालूं, तब मिस्री जान लेयेंन कि मय यहोवा आय।”
EXO 7:6 मूसा अऊर हारून न परमेश्वर की आज्ञा को अनुसार करयो।
EXO 7:7 जब हि फिरौन राजा सी बात करन लग्यो तब मूसा अस्सी साल, अऊर हारून तिरासी साल को होतो।
EXO 7:8 तब परमेश्वर न मूसा अऊर हारून सी असो कह्यो,
EXO 7:9 “जब फिरौन राजा तुम सी कह्यो, ‘अपनो प्रमान को कोयी चमत्कार दिखान ख कहेंन,’ तब तय हारून सी कह्यजो, ‘अपनो लाठी ले क फिरौन राजा को आगु डाल दे कि हि सांप बन जायेंन’।”
EXO 7:10 तब मूसा अऊर हारून न फिरौन राजा को जवर जाय क परमेश्वर की आज्ञा को अनुसार करयो; अऊर जब हारून न अपनी लाठी फिरौन अऊर ओको कर्मचारियों को आगु डाल दी, तब ऊ सांप बन गयो।
EXO 7:11 तब फिरौन राजा न पण्डितों अऊर जादू टोना करन वालो ख बुलायो; अऊर मिस्र देश को जादूगरों न आय क अपनो तंत्र-मंत्र सी वसोच काम करयो।
EXO 7:12 उन्न अपनी अपनी लाठी जमीन पर फेंक्यो त, वा भी सांप बन गयी। पर हारून की लाठी न उन सब की लाठीयों ख गिटक लियो।
EXO 7:13 पर फिरौन राजा को मन अऊर हठीलो भय गयो, अऊर जसो परमेश्वर को वचन को अनुसार ओन मूसा अऊर हारून की बातों ख नहीं मान्यो।
EXO 7:14 तब परमेश्वर न मूसा सी कह्यो, “फिरौन राजा को मन बहुत कठोर होय गयो हय अऊर ऊ मोरो लोगों ख जान नहीं देयेंन।
EXO 7:15 येकोलायी सुबेरे फिरौन जब नदी को जवर आयेंन, तब तय ओको जवर जावो, तय नील नदी को किनार पर रस्ता देखजो जो लाठी सांप बन गयी होती, ओख अपनो हाथ म लेजो।
EXO 7:16 अऊर राजा सी यो तरह कह्यजो, ‘इब्रियों मतलब इस्राएल को परमेश्वर यहोवा न मोख यो कहन लायी तोरो जवर भेज्यो हय कि मोरी प्रजा को लोगों ख जान देवो, जेकोसी हि सुनसान जागा म मोरी आराधना करेंन; अऊर अब तक तय न परमेश्वर की बातों ख नहीं मान्यो।
EXO 7:17 परमेश्वर यो कह्य हय, येकोसी तय जान लेजो कि मयच परमेश्वर आय; मय अपनो हाथ की लाठी सी नील नदी को पानी पर मारूं, अऊर नील नदी को पानी खून म बन जायेंन,
EXO 7:18 नील नदी की मच्छियां मर जायेंन, अऊर नदी म सी बास आन लगेन, अऊर मिस्री को लोग नील नदी सी पानी नहीं पी सकेंन’।”
EXO 7:19 तब परमेश्वर न मूसा सी कह्यो, “हारून सी कह्यजो कि हि अपनी लाठी ले क मिस्र देश म जितनो पानी हय, मतलब ओकी नदियां, नहर झील, अऊर तलाव, सब को ऊपर अपनो हाथ बढ़ा कि उन्को पानी खून बन जाये; अऊर पूरो मिस्र देश म लकड़ी, गोटा अऊर कटोरा को पानी खून म बन जायेंन।”
EXO 7:20 तब मूसा अऊर हारून न परमेश्वर की आदेश को अनुसार करयो, मतलब ओन लाठी ख उठाय क फिरौन राजा अऊर ओको कर्मचारियों को देखतो हुयो, नील नदी को पानी पर मारयो, अऊर नदी को सब पानी खून बन गयो।
EXO 7:21 नील नदी की मच्छियां मर गयी; अऊर नदी सी बास आन लग्यो, अऊर मिस्र देश को लोग नदी को पानी नहीं पी सक्यो; अऊर पूरो मिस्र देश म खूनच खून भय गयो।
EXO 7:22 तब मिस्र देश को जादूगरों न भी अपनो तंत्र-मंत्रों सी वसोच करयो; तब भी फिरौन राजा को मन कठोर भय गयो, अऊर परमेश्वर को कहन को अनुसार ओन मूसा अऊर हारून की बात नहीं मानी।
EXO 7:23 फिरौन राजा न यो पर भी ध्यान नहीं दियो, अऊर घर म चल्यो गयो।
EXO 7:24 मिस्री लोग पानी पीवन लायी नील नदी को इत उत गड्डा खोदन लग्यो, कहालीकि हि नदी को पानी नहीं पी सकत होतो।
EXO 7:25 जब परमेश्वर न नील नदी ख मार क् पानी को खून बनाये सात दिन बीत चुक्यो होतो।
EXO 8:1 तब परमेश्वर न मूसा सी कह्यो, “फिरौन राजा को जवर जावो अऊर बोल, ‘परमेश्वर तोरो सी असो कह्य हय : मोरो लोगों ख जान दे कि हि मोरी आराधना कर सकय।
EXO 8:2 पर यदि उन्ख जान नहीं देजो त सुन, मय मेंढकों ख भेज क तोरो पूरो देश ख हानि पहुंचान वालो हय।
EXO 8:3 अऊर नील नदी मेंढकों सी भर जायेंन, मेंढका नदी म सी निकल क तुम्हरो घरों म, तुम्हरो बिस्तर पर, तुम्हरो सेवकों को घरों म अऊर पूरी प्रजा को घरों म भी भर जायेंन यहां तक कि तुम्हरो तन्दूरों म यां तुम्हरो आटा गूथन को बर्तन म भी भर जायेंन;
EXO 8:4 तोरो अऊर तोरी प्रजा अऊर तोरो कर्मचारियों, सब को शरीर पर मेंढका चढ़ जायेंन’।”
EXO 8:5 तब परमेश्वर न मूसा सी कह्यो, “हारून सी कह्यजो कि नदियों, नहरों, अऊर झीलों को ऊपर लाठी को संग अपनो हाथ बढ़ा कि मेंढकों पूरो मिस्र देश पर चढ़ जाये।”
EXO 8:6 तब हारून न मिस्र देश को झीलों पर हाथ बढ़ायो; अऊर मेंढकों न बाहेर निकल क पूरो मिस्र देश ख झाक दियो।
EXO 8:7 अब जादूगर न भी अपनो तंत्र-मंत्रों सी वसोच मिस्र देश पर मेंढकों ख ले आये।
EXO 8:8 फिरौन न मूसा अऊर हारून ख बुलाय क कह्यो, “अपनो परमेश्वर सी बिनती कर कि इन मेंढकों ख मोरो सी अऊर मोरी प्रजा सी दूर कर दे; अऊर मय इस्राएली लोगों ख जान देऊं। जेको सी हि परमेश्वर लायी बलिदान कर सकय।”
EXO 8:9 मूसा न फिरौन राजा ख उत्तर दियो, “तय मोख आदेश दे कि अब मय तोरो, अऊर तोरो कर्मचारियों, अऊर तोरो लोगों लायी, कब बिनती करूं, कि परमेश्वर तोरो जवर सी अऊर तोरो घरों सी मेंढकों ख दूर करे, अऊर हि केवल नील नदी मच रहे।”
EXO 8:10 फिरौन राजा न उत्तर दियो, “कल मोरो लायी प्रार्थना करो।” मूसा न कह्यो, “जसो तय कह्य हंय, वसोच होयेंन, जेकोसी तोख समझ आय जायेंन कि हमरो परमेश्वर को समान कोयी दूसरो नहाय।
EXO 8:11 अऊर मेंढका तोरो जवर सी तोरो घरों म सी अऊर तोरो कर्मचारियों अऊर तुम्हरी प्रजा को जवर सी दूर कर दियो जायेंन अऊर केवल नील नदी म रहेंन।”
EXO 8:12 तब मूसा अऊर हारून फिरौन राजा को जवर सी बाहेर चल्यो गयो; मूसा न मेंढकों को जान को बारे म परमेश्वर सी बिनती करी। जो राजा पर लायो होतो,
EXO 8:13 परमेश्वर न मूसा को कहन को अनुसार करयो; अऊर मेंढका घरों, आंगनों, गावों अऊर खेतों को सब मेंढका मर गयो।
EXO 8:14 तब लोगों न मरयो हुयो मेंढका ख एक तरफ जमा करयो, अऊर पूरो देश दुर्गन्ध सी भर गयो।
EXO 8:15 जब फिरौन राजा न देख्यो कि मेंढका सब मर गयो अऊर परेशानी सब दूर भय गयी, ओन अपनो मन फिर सी कठोर कर क् मूसा अऊर हारून की बात नहीं सुनी, जसो परमेश्वर न कह्यो होतो।
EXO 8:16 तब परमेश्वर न मूसा सी कह्यो, “हारून ख आज्ञा दे, ‘तय अपनो लाठी उठाय क जमीन की धूल पर मार, जेकोसी पूरो मिस्र देश म धूल मच्छर बन जाये’।”
EXO 8:17 अऊर उन्न वसोच करयो; मतलब हारून न अपनो हाथ बढ़ाय क् लाठी ले क जमीन की धूल पर मारयो, तब मच्छरो न आदमी अऊर पशु दोयी ख पिसवा भय गयो, पूरो मिस्र देश म जमीन की धूल पिसवा बन गयो।
EXO 8:18 जादूगरों न अपनो तंत्र-मंत्रों को द्वारा पिसवा ख लावन की कोशिश करी; पर नहीं कर पायो। यो तरह आदमी अऊर जनावरों दोयी पर मच्छर बन्यो रह्यो।
EXO 8:19 तब जादूगरों न फिरौन राजा सी कह्यो, “यो परमेश्वर को काम आय।” पर फिरौन राजा को मन कठोर भय गयो, ओन मूसा अऊर हारून की बात नहीं सुनी। जसो परमेश्वर न कह्यो होतो।
EXO 8:20 तब परमेश्वर न मूसा सी कह्यो, “कल सुबेरे जल्दी उठ कर फिरौन राजा को जवर जावो जब ऊ नील नदी की तरफ जाये, तब ओको सी कह्यजो, ‘परमेश्वर तोरो सी यो कह्य हय : मोरो लोगों ख जान दे कि हि मोरी आराधना करेंन।
EXO 8:21 यदि तय मोरो लोगों ख नहीं जान देजो त सुन, मय तोरो पर अऊर तोरो कर्मचारियों अऊर तोरो प्रजा पर, अऊर तोरो घरों म झुण्ड को झुण्ड माखी भेजूं, अऊर मिस्रियों को घर अऊर उन्को रहन को जागा भी माखियों सी भर जायेंन।
EXO 8:22 पर ऊ दिन मय गोशेन देश ख जेको म मोरी प्रजा रह्य हय अलग करूं, अऊर ओख म माखियों को झुण्ड नहीं होयेंन; जेकोसी तय जान ले कि पूरी धरती पर मयच परमेश्वर आय।
EXO 8:23 मय अपनो लोगों अऊर तोरी प्रजा को बीच अन्तर करूं। यो चिन्ह चमत्कार कल प्रगट होयेंन’।”
EXO 8:24 अऊर परमेश्वर न वसोच करयो, फिरौन राजा को महल अऊर ओको कर्मचारियों को घरों म, अऊर पूरो मिस्र देश म माखियों सी झुण्ड को झुण्ड भर गयो, पूरो मिस्र देश माखियों को वजह नुकसान भय गयो।
EXO 8:25 तब फिरौन राजा न मूसा हारून ख बुलाय क कह्यो, “तुम जावो अऊर अपनो परमेश्वर लायी योच देश म बलिदान चढ़ावो।”
EXO 8:26 मूसा न कह्यो, “असो करनो उचित नहीं होयेंन; कहालीकि हम अपनो परमेश्वर यहोवा लायी असी मिस्रियों को जनावर बलिदान करबोंन; जेक मिस्र को लोग घृणित समझय हय। मिस्रियों को देखतो असी बलिदान करबोंन त का हि हम पर गोटा नहीं मारेंन?
EXO 8:27 हम सुनसान जागा म तीन दिन को रस्ता पर जाय क अपनो परमेश्वर यहोवा लायी जसो ऊ हम सी कहेंन वसोच बलिदान चढ़ाबों।”
EXO 8:28 फिरौन न कह्यो, “मय तुम ख जान देऊं कि तुम अपनो परमेश्वर यहोवा लायी सुनसान जागा म बलिदान चढ़ावो; पर बहुत दूर मत जावो, अऊर तुम मोरो लायी प्रार्थना करो।”
EXO 8:29 मूसा न उत्तर दियो, “सुन, मय तोरो जवर सी बाहेर जाय रह्यो हय। मय परमेश्वर सी प्रार्थना करूं कि माखियों को झुण्ड तोरो, कर्मचारियों, अऊर प्रजा को जवर सी कल दूर हो; पर फिरौन फिर कपट सी हम्ख परमेश्वर लायी बलिदान करन ख जान देन लायी मना नहीं करे।”
EXO 8:30 मूसा फिरौन राजा को जवर सी निकल्यो अऊर परमेश्वर सी प्रार्थना करी।
EXO 8:31 अऊर परमेश्वर न मूसा को कहन को अनुसार माखियों को झुण्डों ख फिरौन, अऊर ओको कर्मचारियों, अऊर ओकी प्रजा सी दूर करयो; अऊर एक भी मक्खी नहीं रही।
EXO 8:32 पर फिरौन राजा न यो बार भी अपनो मन कठोर कर लियो, अऊर फिर ओन लोगों ख जान नहीं दियो।
EXO 9:1 तब परमेश्वर न मूसा सी कह्यो, “फिरौन राजा को जवर जाय क कह्य, ‘इब्रियों को परमेश्वर यहोवा न यो कह्य हय कि, मोरी प्रजा ख यहां सी जान देवो कि हि मोरी आराधना करेंन।
EXO 9:2 यदि तय उन्ख नहीं जान देजो अऊर उन्ख अब भी पकड़्यो रखजो,
EXO 9:3 त देख, तोरो जो घोड़ा, गधा, ऊंट, गाय-बईल, मेंढी-शेरी, अऊर जो जनावर मैदान म हंय, उन पर परमेश्वर को हाथ असो पड़ेंन कि एक भयानक महामारी फैलेंन।
EXO 9:4 पर परमेश्वर इस्राएलियों को जनावर अऊर मिस्रियों को जनावर को बीच असो अन्तर कर देयेंन अऊर कोयी भी जनावर इस्राएलियों को नहीं मरेंन’।”
EXO 9:5 तब परमेश्वर न एक समय ठहरायो, अऊर कह्यो, “मय यो काम कल मिस्र देश म करूं।”
EXO 9:6 दूसरो दिन परमेश्वर न असोच करयो; अऊर मिस्र देश को पूरो जनावर मर गयो, पर इस्राएलियों को एक भी जनावर नहीं मरयो।
EXO 9:7 अऊर फिरौन राजा न लोगों ख देखन भेज्यो, पर इस्राएलियों को एक भी जनावर नहीं मरयो होतो। तब भी फिरौन राजा को मन कठोर भय गयो, अऊर ओन इस्राएलियों ख जान नहीं दियो।
EXO 9:8 फिर परमेश्वर न मूसा अऊर हारून सी कह्यो, “तुम भट्ठी सी मुट्टी भर राख लेवो, अऊर मूसा ओख फिरौन राजा को आगु राखड़ ख आसमान को तरफ उड़ाय देयेंन।
EXO 9:9 तब राख धूल बन क पूरो मिस्र देश म आदमियों अऊर जनावर पर फोड़ा बन जायेंन।”
EXO 9:10 येकोलायी उन्न भट्ठी म की मुट्ठी भर राख उठायी, अऊर हि फिरौन को आगु खड़ो भयो, अऊर मूसा न हवा म आसमान को तरफ राखड़ उड़ाय दियो, अऊर वहां आदमियों अऊर जनावर पर फफोंला अऊर फोड़ा बन गयो।
EXO 9:11 येकोलायी उन जादूगर फोड़ा को वजह मूसा को आगु खड़ो नहीं भय सक्यो। कहालीकि पूरो मिस्रियों अऊर जादूगरों को शरीर पर भी फोड़ा भय गयो होतो।
EXO 9:12 पर परमेश्वर न फिरौन को मन ख कठोर कर दियो, जसो परमेश्वर न मूसा सी कह्यो होतो, ओन उन्की नहीं सुनी।
EXO 9:13 तब परमेश्वर न मूसा सी कह्यो, “कल सुबेरे उठ क फिरौन राजा को जवर जाय क यो कह्यजो की, ‘इब्रियों को परमेश्वर यहोवा यो कह्य हय : मोरो लोगों ख जान देवो कि हि मोरी आराधना कर सके।
EXO 9:14 कहालीकि अब की बार मय तोरो पर, अऊर तोरो कर्मचारियों पर अऊर तोरी प्रजा पर विपत्तियां डालूं, जेकोसी तय जान लेजो की पूरो धरती पर मोरो जसो दूसरो कोयी भी नहाय।
EXO 9:15 मय न त अभी हाथ बढ़ाय क तोख अऊर तोरी प्रजा ख महामारियों सी मारयो होतो, अऊर धरती पर सी तोरो सत्यानाश भय गयो होतो।
EXO 9:16 पर मय न सचमुच तोख योच उद्देश सी येकोलायी जीन्दो रख्यो हय कि मय तोख अपनी सामर्थ दिखाऊं, अऊर मोरो नाम पूरी धरती म प्रसिद्ध हो जाये।
EXO 9:17 फिर तुम अब भी मोरी प्रजा को सामने अपनो आप ख बड़ो समझय हय, अऊर उन्ख जान नहीं देवय हय?
EXO 9:18 सुन, कल मय योच समय असो भारी गारगोटियों की भयंकर बारीश बरसाऊं; जसो मिस्र देश की स्थापना को दिन सी अब तक नहीं भयी हय।
EXO 9:19 येकोलायी अब लोगों ख भेज क अपनो सब जनावर ख अऊर तोरो जवर खुलो मैदानी क्षेत्र म हय, सब ख सुरक्षित जागा पर लिजाय क रख्यो जाये; नहीं त जितनो आदमी यां जनावर मैदान म असुरक्षित रह्य गयो हय, उन्ख घरों म नहीं जमा करयो जाये, नहीं त उन पर गारगोटी गिरेंन, अऊर हि मर जायेंन’।”
EXO 9:20 येकोलायी फिरौन को कुछ कर्मचारियों म सी जो लोग परमेश्वर को वचन को डर मानत होतो, उन्न अपनो अपनो सेवकों अऊर जनावर ख आसरा लेन लायी घरों को अन्दर ले आये।
EXO 9:21 पर जिन्न परमेश्वर को वचन पर ध्यान नहीं लगायो उन्न अपनो सेवक अऊर जनावर ख मैदान मच रहन दियो।
EXO 9:22 तब परमेश्वर न मूसा सी कह्यो, “अपनो हाथ आसमान की तरफ बढ़ा कि पूरो मिस्र देश को आदमियों, जनावरों, अऊर खेतो की पूरी हरियाली फसल पर गारगोटी गिरें।”
EXO 9:23 तब मूसा न अपनी लाठी आसमान को तरफ उठायो, अऊर परमेश्वर की सामर्थ सी बादर गर्जन लग्यो अऊर गारगोटी गिरन लगी अऊर बीजली भी धरती पर चमकन लगी। यो तरह परमेश्वर न मिस्र देश पर गारगोटी की बारीश करी।
EXO 9:24 जो गारगोटी को संग बीजली भी गिरत होती, मिस्र देश म असी गारगोटी की बारीश पहिले कभी नहीं गीरी होती।
EXO 9:25 गारगोटी न पूरो मिस्र देश को आदमियों अऊर जनावरों ख जो मैदान म होतो, नाश कर दियो। गारगोटी सी खेत की पूरी फसल नाश भय गयी, अऊर मैदान को सब झाड़ भी टूट गयो।
EXO 9:26 केवल गोशेन प्रदेश म, जित इस्राएली रहत होतो गारगोटी की बारीश नहीं भयी।
EXO 9:27 तब फिरौन राजा न मूसा अऊर हारून ख बुलायो, अऊर फिरौन न उन्को सी कह्यो, “मय न यो बार पाप करयो हय; परमेश्वर सच्चो हय, मय अऊर मोरी प्रजा झूठी हय।
EXO 9:28 परमेश्वर सी प्रार्थना करो। बादर को गर्जनों अऊर गारगोटी को बरसनो त बहुत भय गयो; अब तुम परमेश्वर सी बिनती करो; तब मय तुम लोगों ख जान देऊं, तुम लोगों ख यहां नहीं रोकूं।”
EXO 9:29 मूसा न फिरौन सी कह्यो, “जसोच मय नगर सी बाहेर जाऊं परमेश्वर की तरफ अपनो हाथ फैलाऊं, तब बादर को गर्जनों बन्द होय जायेंन अऊर गारगोटी फिर नहीं गिरेंन, जेको सी तय जान जाजो कि धरती परमेश्वर कीच आय।
EXO 9:30 तब भी मय जानु हय कि नहीं त तय अऊर नहीं तोरो कर्मचारी यहोवा परमेश्वर को डर नहीं मानय।”
EXO 9:31 सन अऊर अलसी की फसल बरबाद भय गयी, कहालीकि जौ की लोंब निकल गयी होती अऊर सन म कली अऊर फूल लग्यो होतो।
EXO 9:32 पर कोयी भी गहूं अऊर कठिया गहूं नाश नहीं भयो, कहालीकि ऊ बाद म पकय हय।
EXO 9:33 जब मूसा फिरौन राजा को जवर सी नगर को बाहेर निकल गयो अऊर परमेश्वर की तरफ अपनो हाथ फैलाय क प्रार्थना करयो, अऊर तुरतच बादर को गर्जनों अऊर गारगोटी को गिरनो बन्द भयो, फिर धरती पर बारीश नहीं भयी।
EXO 9:34 जब फिरौन राजा न देख्यो कि बारीश अऊर गारगोटी अऊर बादर को गर्जनों बन्द होय गयो, तब ओन फिर सी पाप करयो। ओन अऊर ओको सेवकों न अपनो मन कठोर कर लियो।
EXO 9:35 फिरौन राजा को मन कठोर होतो गयो, अऊर ओन इस्राएलियों ख जान नहीं दियो, जसो कि परमेश्वर न मूसा को द्वारा कह्यो होतो।
EXO 10:1 तब परमेश्वर न मूसा सी कह्यो, “फिरौन राजा को जवर जावो; कहालीकि मय नच ओको अऊर ओको कर्मचारियों को मन कठोर कर दियो हय कि उन्को बीच म अपनो चिन्ह चमत्कार ख दिखाऊं;
EXO 10:2 अऊर तुम अपनो बेटों अऊर नातियों सी येको वर्णन करो कि परमेश्वर न मिस्रवासियों ख कसो ठट्ठा म उड़ायो अपनो का का चिन्ह चमत्कार उन्को बीच म प्रगट करयो हय; जेकोसी तुम यो जान लेवो कि मय परमेश्वर आय।”
EXO 10:3 मूसा अऊर हारून फिरौन को जवर जाय क कह्यो, “इब्रियों को परमेश्वर यहोवा तोरो सी असो कह्य हय, ‘तय कब तक मोरो आगु नम्र होन सी संकोच करतो रहजो? मोरो लोगों ख जान नहीं दे, कि हि मोरी आराधना कर सके।
EXO 10:4 यदि तय मोरी लोगों ख जान नहीं देजो त, कल मय तोरो देश पर फाफावों ख ले आऊं,
EXO 10:5 अऊर फाफावों पूरो जमीन ख असो झाक लेयेंन कि वा कोयी ख दिखायी नहीं पड़ेंन; अऊर जो कुछ गारगोटी सी बच गयो हय ओख हि खाय जायेंन, अऊर तुम्हरो जितनो मैदान म लग्यो हय उन्को भी हि चट कर देयेंन,
EXO 10:6 अऊर हि तोरो अऊर तोरो पूरो कर्मचारियों, यहां तक कि पूरो मिस्रियों को घरों म भर जायेंन; इतनो फाफावों ख तोरो बाप दादों न यां उन्को पूर्वजों न जब सी धरती पर जनम्यो तब सी अज तक कभी नहीं देख्यो।’” तब मूसा मुड़ क फिरौन को जवर सी बाहेर चली गयो।
EXO 10:7 तब फिरौन राजा को कर्मचारियों न फिरौन सी कह्यो, “ऊ आदमी कब तक हमरो लायी मुसीबत बन्यो रहेंन? इस्राएलियों ख जान दे कि हि अपनो परमेश्वर यहोवा की आराधना कर सकय। का तय अब भी नहीं जानय कि पूरो मिस्र देश नाश भय गयो हय?”
EXO 10:8 मूसा अऊर हारून फिरौन राजा को जवर वापस लायो गयो। अऊर फिरौन राजा न उन्को सी कह्यो, “चली जावो, अपनो परमेश्वर यहोवा की आराधना करो; पर जो जान वालो हय, हि लोग कौन-कौन आय?”
EXO 10:9 मूसा न उत्तर दियो, “हम त पूरो बेटा-बेटियां, मेंढी-शेरियां, गाय-बईलों समेत बल्कि बच्चा सी बूढ्ढा तक सब जाबोन, कहालीकि हम्ख परमेश्वर लायी त्यौहार मनानो हय।”
EXO 10:10 फिरौन राजा न यो तरह उन्को सी कह्यो, “परमेश्वर तुम्हरो संग रहे यदि मय तुम्ख बच्चां समेत जान देऊ हय; त देखो, तुम्हरो मन म बुरायी हय।
EXO 10:11 नहीं! असो नहीं होय सकेंन; तुम आदमीच जावो अऊर परमेश्वर की आराधना करो। तुम असोच त चाहत होतो।” मूसा अऊर हारून ख फिरौन को आगु सी निकाल दियो गयो।
EXO 10:12 तब परमेश्वर न मूसा सी कह्यो, “मिस्र देश को तरफ अपनो हाथ उठाय क कि फाफावों को झुण्ड मिस्र देश पर चढ़ क् जमीन को जितनो अनाज आदि गारगोटी सी बच्यो हय सब खाय जाये।”
EXO 10:13 जब मूसा न मिस्र देश की तरफ अपनी लाठी उठायी, तब परमेश्वर न पूरो मिस्र देश पर पूरो दिन अऊर रात पूर्व दिशा की हवा चलायी; अऊर जब भुन्सारे भयी तब ऊ हवा को संग फाफावों को झुण्ड भी आयो।
EXO 10:14 अऊर फाफावों न चढ़ क पूरो मिस्र देश म फैल गयो। उन्को झुण्ड बहुत बड़ो होतो, उन सी पहले असो फाफा नहीं आयो होतो, अऊर नहीं उन्को बाद असी कभी आयेंन।
EXO 10:15 हि त फाफावों न जमीन ख असो झाक दियो, कि पूरो देश म अन्धारो छाय गयो। उन्न देश को पूरो पौधों ख, अऊर झाड़ को फरों ख, उन्को पूरो अनाज जो कुछ गारगोटी की बारीश सी बच्यो होतो, सब ख खाय लियो; पूरो मिस्र देश म कोयी भी हरी चिज नहीं बची, अऊर मैदान को पौधा अऊर झाड़ नहीं।
EXO 10:16 तब फिरौन न तुरतच मूसा अऊर हारून ख बुलाय क अऊर उन्को सी कह्यो, “मय न तुम्हरो परमेश्वर यहोवा को अऊर तुम्हरो भी खिलाफ पाप करयो हय।
EXO 10:17 अब मोरो पाप ख एक बार अऊर माफ करो, अऊर अपनो परमेश्वर यहोवा सी बिनती करो कि ऊ मोरो ऊपर सी मृत्यु दण्ड ख दूर करे।”
EXO 10:18 मूसा फिरौन राजा को जवर सी बाहेर चल्यो गयो अऊर परमेश्वर सी प्रार्थना करी।
EXO 10:19 तब परमेश्वर न पूर्व को हवा ख बदल क बहुत भयानक पश्चिम हवा बहायो अऊर फाफावों ख उड़ाय क लाल समुन्दर म डाल दियो, अऊर मिस्र देश को कोयी जागा म एक भी फाफा नहीं रह्यो।
EXO 10:20 पर परमेश्वर न फिरौन राजा ख कठोर बनाय दियो, अऊर ओन इस्राएलियों ख जान नहीं दियो।
EXO 10:21 तब परमेश्वर न मूसा सी कह्यो, “अपनो हाथ आसमान की तरफ उठा कि मिस्र देश पर असो अन्धारो छाय जाये, कि टटोल्यो जाय सके।”
EXO 10:22 तब मूसा न अपनो हाथ आसमान की तरफ बढ़ायो, अऊर पूरो मिस्र देश पर तीन दिन तक घोर अन्धारो छायो रह्यो।
EXO 10:23 मिस्र निवासी तीन दिन तक कोयी ख नहीं देख सक्यो, अऊर नहीं कोयी अपनी जागा सी उठ्यो; पर पूरो इस्राएलियों को घरों म उजाड़ो होतो।
EXO 10:24 तब फिरौन राजा न मूसा ख बुलाय क कह्यो, “तुम जावो, अऊर परमेश्वर की आराधना करो; अपनो संग बच्चा ख भी ले जावो; केवल अपनी शेरी-मेंढियों अऊर गाय-बईल ख छोड़ जावो।”
EXO 10:25 मूसा न कह्यो, “तोख हमरो हाथ म मेलबलि अऊर होमबलि को जनावर भी देनो पड़ेंन, जिन्ख हम अपनो परमेश्वर यहोवा लायी बलिदान चढ़ायबो।
EXO 10:26 येकोलायी हमरो जनावर भी हमरो संग जायेंन, उन्की एक खुरी भी नहीं रह्य जायेंन, हम अपनो परमेश्वर की आराधना लायी उन्ख अपनो संग ले जाबोंन, जब तक हम उत नहीं पहुंच जाय, तब तक नहीं जानजे कि हम अपनो परमेश्वर की आराधना कसो करबोंन।”
EXO 10:27 पर परमेश्वर न फिरौन राजा को मन कठोर कर दियो, अऊर ऊ उन्ख जान नहीं दियो।
EXO 10:28 तब फिरौन राजा न मूसा सी कह्यो, “मोरो आगु सी निकल जा; अऊर सावधान रह्य; मोख अपनो मुंह फिर मत दिखाजो; कहालीकि जो दिन तय मोख मुंह दिखाजो, ओन दिन तय मारयो जाजो।”
EXO 10:29 तब मूसा न फिरौन राजा सी कह्यो, “तय न ठीक कह्यो हय; मय तोरो मुंह ख फिर कभी नहीं देखूं।”
EXO 11:1 तब परमेश्वर न मूसा सी कह्यो, “मय एक अऊर विपत्ति फिरौन राजा अऊर मिस्र पर लाऊं, ओको बाद तुम लोगों ख इत सी जान देयेंन; अऊर जब ऊ जान देयेंन तब तुम सब ख जरूरच निकाल देयेंन।
EXO 11:2 अब तय मोरो इस्राएली लोगों मोरी या आज्ञा सुनाव कि हर एक आदमी अऊर बाई अपनो पड़ोसिन सी सोनो-चांदी को जेवर मांग ले।”
EXO 11:3 तब परमेश्वर न मिस्रियों पर दया करी। येको अलावा मूसा मिस्र देश म फिरौन राजा को कर्मचारियों अऊर साधारन लोगों की नजर म अति महान होतो।
EXO 11:4 तब मूसा न फिरौन सी कह्यो, “परमेश्वर यो कह्य हय, मय अरधी रात को लगभग मय मिस्र देश को बीच म सी होय क चलूं।
EXO 11:5 तब मिस्र म सिंहासन पर विराजन वालो फिरौन सी ले क चक्की पीसन वाली दासी तक को बड़ो टुरा; अऊर जनावर तक को सब पहिलौठा मर जायेंन।
EXO 11:6 अऊर पूरो मिस्र देश म बड़ो हाहाकार मचेंन, यहां तक कि ओको जसो नहीं त कभी भयो अऊर नहीं होयेंन।
EXO 11:7 पर इस्राएलियों को खिलाफ, का आदमी का जनावर, कोयी पर कोयी कुत्ता भी नहीं भूकेंन; जेकोसी तुम जान लेवो कि मिस्रियों अऊर इस्राएलियों म मय परमेश्वर भेद करू हय।
EXO 11:8 तब तोरो यो सब कर्मचारी मोरो जवर आय क प्रणाम कर क् यो कहेंन, ‘अपनो सब लोगों समेत निकल जावो।’ अऊर ओको बाद मय भी निकल जाऊं।” यो कह्य क मूसा बड़ो गुस्सा सी फिरौन को जवर सी निकल गयो।
EXO 11:9 परमेश्वर न मूसा सी कह्य दियो होतो, “फिरौन तुम्हरी बाते नहीं सुनेंन; कहालीकि मय मिस्र देश म बहुत सो चमत्कार करूं।”
EXO 11:10 मूसा अऊर हारून न फिरौन राजा को आगु यो सब चमत्कार करयो; पर परमेश्वर न फिरौन को दिल ख अऊर कठोर कर दियो, येकोलायी ओन इस्राएलियों ख अपनो देश सी जान नहीं दियो।
EXO 12:1 तब परमेश्वर न मिस्र देश म मूसा अऊर हारून सी कह्यो,
EXO 12:2 “यो महीना तुम लोगों लायी सुरूवात को साल को पहिलो महीना ठहरे।
EXO 12:3 इस्राएल की पूरी मण्डली सी यो कहो की; यो महीना को दसवों दिन ख तुम अपनो पूर्वजों को घराना को अनुसार, एक एक मेम्ना ले रखो;
EXO 12:4 अऊर यदि कोयी को घराना म एक मेम्ना ख खान लायी आदमी कम हो, त ऊ अपनो सब सी जवर रहन वालो पड़ोसी को संग प्रानियों की गिनती को अनुसार एक मेम्ना ले रखो; अऊर तुम हर एक को खान को अनुसार मेम्नों को हिसाब करजो।
EXO 12:5 तुम्हरो मेम्ना निर्दोष अऊर एक साल को नर हो, अऊर ओख चाहे मेंढी म सी लेना चाहे शेरी म सी।
EXO 12:6 अऊर यो महीना को चौदा दिन तक ओको ध्यान रखजो, अऊर ओख शाम ख इस्राएल की पूरी मण्डली को लोग ओख बलिदान करे।
EXO 12:7 तब हि ओको खून म सी कुछ ले क जिन घरों म मेम्ना ख खाबोंन उन्को द्वार को दोयी बाजू अऊर चौखट को ऊपर लगाये।
EXO 12:8 अऊर हि ओको मांस ख उच रात आगी म भूज क अखमीरी रोटी अऊर कड़ू साग भाजी को संग म खाये।
EXO 12:9 मेम्ना को मांस ख कच्चो यां पानी म उबाल क मत खाना, बल्की मुंड, पाय, अऊर अतड़िया सहित ओख आगी म भूज क खाजो।
EXO 12:10 अऊर ओको म सी कुछ भी सुबेरे तक मत रहन देजो अऊर यदि कुछ सुबेरे तक रह्य भी जाये, त ओख आगी म जलाय देजो।
EXO 12:11 अऊर ओकी खान की या विधि आय, अपनी कमर बान्ध क, पाय म जूता पहिन्यो, अऊर हाथ म लाठी पकड़्यो हुयो ओख फुर्ती सी खाना; ऊ त परमेश्वर को त्यौहार आय।
EXO 12:12 कहालीकि मय यो रात ख मिस्र देश को बीच म होय क जाऊं, अऊर उत का आदमी अऊर का जनावरों को हरेक नर पहिलौठा ख मारूं; अऊर मिस्र को पूरो देवतावों ख भी सजा देऊं; मय परमेश्वर आय।
EXO 12:13 अऊर जिन घरों म तुम रह्य हय, उन पर लगायो खून तुम्हरो लायी एक चिन्ह ठहरेंन; मतलब मय ऊ खून को चिन्ह ख देख क तुम ख छोड़ देऊं, अऊर जब मय मिस्र देश को लोगों ख मारूं, तब ऊ महामारी तुम पर नहीं आयेंन अऊर तुम नाश नहीं होयेंन।
EXO 12:14 अऊर ऊ दिन तुम ख याद दिलान वालो ठहरेंन, अऊर तुम ओख परमेश्वर लायी त्यौहार कर क् मनाना; ऊ दिन तुम्हरो पीढ़ियों म हमेशा की विधि जान क मान्यो जाये।”
EXO 12:15 परमेश्वर न कह्यो, “सात दिन तक अखमीरी रोटी खायो जाये, तुम पहिलो च दिन अपनो-अपनो घर सी खमीर दूर करजो, कहालीकि जो आदमी पहिले दिन सी ले क सातवों दिन तक कोयी खमीर को चीज खाये, ऊ इस्राएलियों को बीच सी बाहेर निकाल दियो जायेंन।
EXO 12:16 तुम पवित्र सभा पहिले दिन अऊर सातवों दिन करजो; उन दोयी दिनों म कोयी भी काम नहीं करयो जाये; पर जेवन लायी खाना पकाय सकय हय।
EXO 12:17 येकोलायी तुम बिना खमीर की रोटी को त्यौहार मानना, कहालीकि उच दिन मानो मय न तुम ख मिस्र देश सी बाहेर निकाल्यो हय; यो वजह ऊ दिन तुम्हरो पीढ़ियों म हमेशा की विधि जान क मान्यो जाये।
EXO 12:18 पहिलो महिना को चौदावों दिन की शाम सी ले क इक्कीसवो दिन की शाम तक तुम अखमीरी रोटी खायो करजो।
EXO 12:19 सात दिन तक तुम्हरो घरों म कुछ भी खमीर नहीं रहनो पाये; बल्की जो कोयी कोयी खमीरी चिज ख खाये, चाहे ऊ देशी हो यां परदेशी, ऊ प्रानी इस्राएलियों की सभा सी निकाल दियो जायेंन।
EXO 12:20 तुम कोयी भी खमीर को चीज मत खाजो; तुम अपनो घर म बिना खमीर की रोटी खायो करजो।”
EXO 12:21 तब मूसा न इस्राएलियों को सब बुजूर्गों ख बुलाय क कह्यो, “तुम अपनो अपनो परिवार को अनुसार एक एक मेम्ना अलग कर रखो, अऊर फसह त्यौहार पशु बलि करजो।
EXO 12:22 अऊर ओको खून जो कोहपर म होयेंन ओको म जूफा नाम की झाड़ी सी बन्यो एक गुच्छा डुबाय क उच कोहपर म को खून सी दरवाजा को चौखट पर दोयी बाजुवों पर लगावो; अऊर सबेरे होनो तक तुम म सी कोयी भी घर सी बाहेर नहीं निकले।
EXO 12:23 जब परमेश्वर मिस्रियों ख मारन लायी मिस्र देश सी होय क जायेंन; येकोलायी जित जित ऊ चौखट को ऊपर अऊर दोयी बाजू ऊ खून देखेंन, ऊ दरवाजा ख छोड़ देयेंन, अऊर नाश करन वालो ख तुम्हरो घरों म मारन लायी नहीं जान देयेंन।
EXO 12:24 फिर तुम या विधि ख अपनो अऊर अपनो वंश को लायी हमेशा को नियम जान क मानतो जावो।
EXO 12:25 जब तुम ऊ देश म पहुंचो जेक परमेश्वर न तुम्ख देन को वादा करयो होतो, तुम उत सिरजो, त तुम यो विधि ख मानजो।
EXO 12:26 अऊर जब तुम्हरो बच्चां तुम सी पूछेंन, ‘या विधि को का मतलब हय?’
EXO 12:27 तब तुम उन्को यो उत्तर देजो, ‘परमेश्वर को यो फसह को बलिदान आय, जो मिस्रियों को मारन को समय मिस्र म रहन वालो हम इस्राएलियों को घरों ख बचायो, योच वजह ओको फसह को यो बलिदान करयो जावय हय।’” तब लोगों न मुंड झुकाय क आराधना करी।
EXO 12:28 तब इस्राएलियों न जाय क असोच करयो, जो आज्ञा परमेश्वर न मूसा अऊर हारून ख दी होती, ओको अनुसार उन्न करयो।
EXO 12:29 आधी रात ख परमेश्वर न मिस्र देश म राजगद्दी पर बैठन वालो फिरौन सी ले क बन्दी गृह म पड़्यो हुयो कैदी को बच्चा तक, अऊर सब को पहिलौठा को बल्की जनावर को सब पहिलौठों ख, मार डाल्यो।
EXO 12:30 अऊर फिरौन राजा अऊर ओको सब कर्मचारी, अऊर सब मिस्र निवासी ऊ रात म उठ्यो; अऊर पूरो देश म बड़ो रोवनो अऊर चिल्लानो मच्यो, कहालीकि एक भी घर असो नहीं होतो जेको म कोयी मरयो नहीं होतो।
EXO 12:31 तब फिरौन न रात खच मूसा अऊर हारून ख बुलायो अऊर उन्को सी कह्यो। “तुम उठो, अऊर इस्राएलियों संग मोरो लोगों को बीच सी निकल जावो; जसो तुम न कह्यो होतो अऊर अपनो परमेश्वर की आराधना करो।
EXO 12:32 जसो तुम न कह्यो होतो, अपनी मेंढी-शेरियों, गाय-बईलों ख संग ले जावो; अऊर मोख आशीर्वाद दे जावो।”
EXO 12:33 मिस्री जो कहत होतो, हम त सब मर मिट्यो हय, उन्न इस्राएली लोगों पर दबाव डाल क कह्यो, “देश सी जल्दी नकल जावो, नहीं त हम सब मर जाबोन।”
EXO 12:34 तब उन्न अपनो सन्यो हुयो आटा ख बिना खमीर मिलाये, बर्तन सहित कपड़ा म बान्ध क अपनो कन्धों पर उठाय क जान लग्यो।
EXO 12:35 इस्राएलियों न जसो मूसा न कह्यो होतो वसोच कह्यो, अऊर मिस्रियों सी सोना-चांदी को जेवर अऊर कपड़ा मांग लियो;
EXO 12:36 परमेश्वर न मिस्रियों लोगों पर दया करयो उन्न जो जो मांग्यो ऊ सब उन्ख दियो। यो तरह इस्राएलियों न पूरो मिस्रियों ख लूट लियो।
EXO 12:37 तब इस्राएलियों लोग रामसेस नगर सी सुक्कोत नगर की तरफ चले, बाईयों अऊर बाल बच्चां ख छोड़ क् हि लगभग छय लाख पैदल चलन वालो आदमी होतो।
EXO 12:38 उन्को संग एक दूसरो गैर-इस्राएली लोग भी गयो, अऊर मेंढी-शेरी, गाय-बईल, अऊर भी बड़ो झुण्ड उन्को संग गयो।
EXO 12:39 अऊर जो सान्यो आटा हि मिस्र देश सी संग ले गयो होतो ओकी उन्न बिना खमीर कीच रोटियां बनायी; कहालीकि हि मिस्र देश सी निकाल्यो गयो होतो। हि नहीं त कुछ समय लायी उत ठहर सक्यो अऊर नहीं अपनी यात्रा लायी जेवन बना सके।
EXO 12:40 मिस्र देश म रह्यतो इस्राएलियों लोगों ख चार सौ तीस साल तक रह्यो होतो।
EXO 12:41 अऊर उन चार सौ तीस साल को बीतन पर, ठीक उच दिन, परमेश्वर की लोगों की पूरी सेना मिस्र देश सी निकल गयी।
EXO 12:42 परमेश्वर इस्राएलियों ख मिस्र देश सी निकाल लायो, यो तरह वा रात ओको निमित्त मानन को लायक हय; या परमेश्वर की वाच रात आय जेको पीढ़ी सी पीढ़ी म माननो इस्राएलियों को लायी जरूरी हय।
EXO 12:43 तब परमेश्वर न मूसा अऊर हारून सी कह्यो, “त्यौहार की विधि या आय : कोयी परदेशी ओको म सी नहीं खाये;
EXO 12:44 पर जो कोयी ख रुपया दे क लियो हुयो दास होना, अऊर ओको खतना करयो होना, त ऊ ओको म सी खाय सकेंन।
EXO 12:45 पर परदेशी अऊर मजूर ओको म सी मत खावो।
EXO 12:46 ओको जेवन एकच घर म हो; मतलब तुम ओको मांस म सी कुछ घर सी बाहेर मत ले जावो; अऊर बलि प्रानी की कोयी हड्डी नहीं तोड़ो।
EXO 12:47 पूरी इस्राएल मण्डली यो त्यौहार ख मनायेंन।
EXO 12:48 अऊर यदि कोयी परदेशी तुम लोगों को संग रह्य क परमेश्वर लायी त्यौहार मनानो चाहेंन, त ऊ अपनो परिवार को सब आदमी को खतना करायो जाय, तब हि धार्मिक विधि म भाग ले क त्यौहार ख मना सकेंन; अऊर हि ऊ देश को निवासी ठहरेंन। पर कोयी खतनारहित आदमी ओको म सी नहीं खाय सकेंन।
EXO 12:49 ओको नियम देशी अऊर तुम्हरो बीच म रहन वालो परदेशी दोयी लायी एकच आय।”
EXO 12:50 यो आज्ञा जो परमेश्वर न मूसा अऊर हारून ख दी ओको अनुसार पूरो इस्राएलियों न करयो।
EXO 12:51 अऊर ठीक उच दिन परमेश्वर न इस्राएलियों ख मिस्र देश सी पूरो इस्राएलियों ख निकाल लायो।
EXO 13:1 तब परमेश्वर न मूसा सी कह्यो,
EXO 13:2 “का आदमी को का जनावर को, हर एक नर इस्राएलियों म जितनो अपनी माय सी पहिलो जनम्यो हय, उन्ख मोरो लायी पवित्र माननो; ऊ मोरोच आय।”
EXO 13:3 तब मूसा न लोगों सी कह्यो, “यो दिन ख याद रखो, जेको म तुम लोग मिस्र देश की गुलामी सी निकल आये हो; परमेश्वर न तुम ख उत सी अपनो हाथ को बल सी निकाल लायो हय; येकोलायी यो दिन खमीर सी बनी रोटी नहीं खायी जाये।
EXO 13:4 आबीब को महीना म अज कोच दिन तुम निकल्यो हय।
EXO 13:5 येकोलायी जब परमेश्वर तुम ख कनानी, हित्ती, एमोरी, हिब्बी, अऊर यबूसी लोगों को देश म पहुंचायेंन, जेक देन की ओन तुम्हरो पूर्वजों सी कसम खायी होती, अऊर जेक म दूध अऊर शहेद को धारा बहय हंय, तब तुम योच महीना म त्यौहार मनावो।
EXO 13:6 सात दिन तक बिना खमीर की रोटी खायो करजो, अऊर सातवों दिन परमेश्वर लायी त्यौहार मनावो।
EXO 13:7 इन सातों दिनों म बिना खमीर की रोटीच खायी जाये, अखमीरी रोटी तुम्हरो बीच नहीं दिखायी दे अऊर नहीं तुम्हरो पूरो देश म कहीं तुम्हरो जवर खमीर दिखायी दे।
EXO 13:8 अऊर उच दिन तुम अपनो अपनो टुरावों ख यो कह्य क् समझाय देना कि यो हम उच काम को वजह करय हंय, जो परमेश्वर न हम्ख मिस्र देश सी निकाल आवन को समय हमरो लायी करयो होतो।
EXO 13:9 तब यो तोरो लायी तोरो हाथ म एक चिन्ह होयेंन, अऊर तोरी आंखी को आगु याद करन वाली चीज ठहरे; जेको सी परमेश्वर की व्यवस्था तोरो मुंह पर रहे, कहालीकि परमेश्वर न तुम्ख अपनो ताकतवर हाथ सी मिस्र देश सी निकाल्यो हय।
EXO 13:10 यो वजह तुम या विधि ख हर साल सही समय पर करत रह्यजो।
EXO 13:11 “फिर जब परमेश्वर वा कसम को अनुसार, जो ओन तुम्हरो पूर्वजों सी अऊर तुम सी भी खायी हय, तुम्ख कनानियों को देश म पहुंचाय क ओख तुम्ख दे देयेंन,
EXO 13:12 तब तुम म सी जितनो नर अपनी अपनी माय को पहिलो जनम्यो आय उन्को, अऊर तुम्हरो जनावरों म जो असो आय उन्ख भी परमेश्वर लायी अर्पन करजो; सब नर बच्चां त परमेश्वर को आय।
EXO 13:13 अऊर गधा को हर एक पहिलौठा को बदले मेम्ना दे क ओख छुड़ाय लेना, अऊर यदि तुम ओख छुड़ानो नहीं चाहवय त ओको गर्दन तोड़ देना। पर अपनो सब पहिलौठा टुरावों ख बदला दे क छुड़ाय लेना।
EXO 13:14 अऊर आगु को दिनों म जब तुम्हरो टुरा तुम सी पूछेंन, ‘यो का हय?’ त उन सी कह्यजो, ‘परमेश्वर न हम लोगों ख मिस्र की गुलामी सी बाहेर अपनो ताकतवर हाथ को बल सी निकाल लायो हय।
EXO 13:15 उच समय जब फिरौन राजा न कठोर होय क हम्ख निकलन नहीं दे रह्यो होतो, तब परमेश्वर न मिस्र देश म आदमी सी ले कर जनावर तक सब को पहिलौठा ख मार डाल्यो। येकोलायी हम हर एक जनावर नर पहिलौठा परमेश्वर ख चढ़ाजे हय, पर अपनो सब पहिलौठे टुरावों ख हम बदला दे क छुड़ाय लेजे हय।’
EXO 13:16 यो तुम्हरो याद लायी हाथ पर बन्ध्यो एक चिन्ह जसो अऊर तोरी दोयी आंखी को बीच टिका जसो ठहरे; कहालीकि परमेश्वर न हम लोगों ख मिस्र देश सी अपनो ताकतवर हाथों को बल सी निकाल लायो हय।”
EXO 13:17 जब फिरौन राजा न लोगों ख जान की आज्ञा दे दी, परमेश्वर उन्ख पलिश्ती देश म होय क जो रस्ता जावय हय ऊ छोटो होतो; तब भी परमेश्वर न यो सोच्यो कि उन्ख ऊ रस्ता सी नहीं ले गयो कि कहीं असो नहीं होय कि जब हि लोग लड़ाई देखे तब पछताय क मिस्र देश वापस लौट जाय।
EXO 13:18 येकोलायी परमेश्वर उन्ख घुमाय-फिराय क लाल समुन्दर को सुनसान रस्ता सी ले गयो। अऊर इस्राएली लोग अस्त्र-शस्त्र बान्ध्यो हुयो मिस्र सी निकल गयो।
EXO 13:19 अऊर मूसा यूसुफ की हड्डियों ख संग म ले गयो; कहालीकि यूसुफ न इस्राएलियों सी यो कह्य क् कसम ली होती, “जब परमेश्वर तोरी सुधि ले, तब अपनो संग मोरी हड्डियों ख इत सी जरूर ले जाजो।”
EXO 13:20 फिर उन्न सुक्कोत नगर सी आगु बढ़ क् सुनसान जागा पर एताम म डेरा डाल्यो।
EXO 13:21 अऊर परमेश्वर उन्ख दिन म रस्ता दिखान लायी बादर को खम्बा म, अऊर रात ख उजाड़ो देन लायी आगी को खम्बा म होय क उन्को आगु आगु चलत होतो, जेकोसी हि रात-दिन चल सके।
EXO 13:22 ओन नहीं त बादर को खम्बा ख दिन म अऊर नहीं आगी को खम्बा ख रात म लोगों को आगु सी हटायो।
EXO 14:1 तब परमेश्वर न मूसा सी कह्यो,
EXO 14:2 “इस्राएलियों ख कहो कि हि पीछू लौट क मिगदोल नगर अऊर समुन्दर को बीच, पीहाहीरोत नगर को आगु, बालसपोन को सामने अपनो डेरा डाल, अऊर तुम लाल समुन्दर को किनार पर पड़ाव डालनो।
EXO 14:3 तब फिरौन राजा इस्राएलियों को बारे म सोचेंन, ‘हि अनजान देश म भटक क घबराय गयो हय। सुनसान जागा न उन्ख बन्दी बनाय लियो हय।’
EXO 14:4 तब मय फिरौन राजा को मन ख कठोर कर देऊं, अऊर ऊ उन्को पीछा करेंन। तब फिरौन राजा अऊर ओकी पूरी सेना को द्वारा मोरी महिमा होयेंन; अऊर मिस्र लोग जान लेयेंन कि मयच परमेश्वर आय।” अऊर उन्न वसोच करयो।
EXO 14:5 जब मिस्र देश को फिरौन राजा ख यो समाचार मिल्यो कि हि लोग भग गयो, तब फिरौन राजा अऊर ओको कर्मचारियों को मन उन्को खिलाफ बदल गयो, अऊर हि कहन लग्यो, “हम न यो का का करयो कि इस्राएलियों को गुलामी सी मुक्त कर क् जान दियो!”
EXO 14:6 तब राजा न अपनो रथ तैयार करयो अऊर अपनी सेना ख संग लियो।
EXO 14:7 ओन छय सौ अच्छो सी अच्छो रथ बल्की मिस्र को सब रथ उन्को अधिकारियों संग रख्यो।
EXO 14:8 अऊर परमेश्वर न मिस्र देश को राजा फिरौन को मन ख कठोर कर दियो। येकोलायी ओन इस्राएलियों को पीछा करयो; पर इस्राएली जो हिम्मत को संग बढ़तो जाय रह्यो होतो।
EXO 14:9 पर फिरौन राजा को सब घोड़ा, रथों, अऊर घुड़सवारों संग मिस्र की सेना उन्को पीछा करतो हुयो उन्को जवर लाल समुन्दर को किनार पर जित डेरा डाल्यो होतो जाय पहुंची, जो पीहाहीरोत को जवर, बालसपोन को आगु होती।
EXO 14:10 जब फिरौन राजा जवर आयो, तब इस्राएलियों न आंखी उठाय क का देख्यो कि मिस्री हमरो पीछा करतो आय रह्यो हय; तब इस्राएली बहुत डर गयो, अऊर चिल्लाय क परमेश्वर सी मदत की दोहायी मांगी;
EXO 14:11 अऊर हि मूसा सी कहन लग्यो, “का मिस्र देश म कब्र नहीं होती जो तय हम ख मरन लायी जंगल म ले आयो हय? तय न हम्ख मिस्र देश सी निकाल क हमरो संग यो का करयो?
EXO 14:12 का हम तोरो सी मिस्र देश म योच बात नहीं कहत रह्यो कि हम्ख रहन देवो कि हम मिस्रियों की गुलामी करतो? हमरो लायी जंगल म मरन को बदला मिस्रियों की गुलामी करनो अच्छो होतो।”
EXO 14:13 मूसा न लोगों सी कह्यो, “डरो मत, खड़ो खड़ो ऊ उद्धार को काम देखो, जो परमेश्वर अज तुम्हरो लायी करेंन; कहालीकि जिन मिस्रियों ख तुम अज देखय हय, उन्ख फिर कभी नहीं देख सकोंन।
EXO 14:14 परमेश्वर तुम्हरो लायी लड़ेंन, येकोलायी तुम चुप रहो।”
EXO 14:15 तब परमेश्वर न मूसा सी कह्यो, “तय कहाली पुकार रह्यो हय मदत लायी? इस्राएलियों ख कहो हि आगु बढ़े।
EXO 14:16 अऊर तय अपनी लाठी उठाय क अपनो हाथ समुन्दर को ऊपर बढ़ा, अऊर पानी दोय हिस्सा म होय जायेंन; जेकोसी इस्राएली समुन्दर को बीच सी सूखी जागा पर जा सकेंन।
EXO 14:17 अऊर सुन, मय खुद मिस्रियों को मन ख कठोर कर देऊं, जेकोसी हि इस्राएलियों को पीछा करतो हुयो समुन्दर को बीच म जायेंन। तब फिरौन राजा अऊर ओकी पूरी सेना, अऊर रथों अऊर घुड़सवारों को विनाश सी मोरी महिमा दिखेंन।
EXO 14:18 जब फिरौन राजा, अऊर ओको रथों, अऊर घुड़सवारों ख हराऊं तब मोरी महिमा होयेंन, अऊर मिस्री जान लेयेंन कि मय परमेश्वर आय।”
EXO 14:19 तब परमेश्वर को दूत जो इस्राएली सेना को आगु चलत होतो उन्को पीछु भय गयो; अऊर बादर को खम्बा भी आगु सी हट क उन्को पीछू भय गयो।
EXO 14:20 असो तरह ऊ मिस्रियों की सेना अऊर इस्राएलियों की सेना को बीच म आय गयो; अऊर बादर अऊर अन्धारो त होतो, तब भी रात ख उन्ख उजाड़ो मिलतो रह्यो पर मिस्रियों ख अन्धारो; पर ऊ रात मिस्री उन्ख पकड़न लायी जवर नहीं आय सक्यो।
EXO 14:21 तब मूसा न अपनो हाथ लाल समुन्दर को ऊपर बढ़ायो; अऊर परमेश्वर न रात भर भारी पूर्व सी हवा चलायी, अऊर समुन्दर को पानी दोय हिस्सा म बट गयो, जेकोसी ओको बीच सूखी जमीन भय गयी।
EXO 14:22 तब इस्राएली समुन्दर को बीच सूखी जमीन पर सी चल क गयो, अऊर पानी उन्की दायो अऊर बायो तरफ पानी की दीवार बन क खड़ो होतो।
EXO 14:23 तब मिस्रियों न उन्को पीछा करयो। फिरौन राजा को सब रथ, घोड़ा, अऊर सवार उन्को पीछा करतो हुयो समुन्दर को बीच म चली गयो।
EXO 14:24 अऊर रात को आखरी पहर म परमेश्वर न बादर अऊर आगी को खम्बा म सी मिस्रियों की सेना पर नजर रख क उन्ख घबराय दियो।
EXO 14:25 अऊर ओन उन्को रथों को चक्का ख निकाल डाल्यो, जेकोसी उन्को चलनो मुश्किल भय गयो। तब मिस्री आपस म कहन लग्यो, “आवो, हम इस्राएलियों को जवर सी भाग जाये; कहालीकि परमेश्वर उन्की तरफ सी मिस्रियों को खिलाफ युद्ध कर रह्यो हय।”
EXO 14:26 फिर परमेश्वर न मूसा सी कह्यो, “अपनो हाथ समुन्दर को ऊपर बढ़ा कि पानी मिस्रियों, अऊर उन्को रथों, अऊर सवारों पर फिर बहन लग्यो।”
EXO 14:27 तब मूसा न अपनो हाथ समुन्दर को ऊपर बढ़ायो, अऊर सुबेरे होतोच का भयो कि समुन्दर फिर पहिलो को जसो होन लग्यो; अऊर मिस्री भगन लग्यो, पर परमेश्वर न उन्ख समुन्दर को बीच म डुबाय दियो।
EXO 14:28 अऊर पानी को पलटनो सी, जितनो रथ अऊर घुड़सवार इस्राएलियों को पीछु समुन्दर म आयो होतो, हि सब बल्की फिरौन राजा की पूरी सेना ओको म डुब गयी, अऊर ओको म सी एक भी नहीं बच्यो।
EXO 14:29 पर इस्राएली समुन्दर को बीच सूखी जमीन पर चल क समुन्दर पार होय गयो, अऊर पानी उन्को दायो अऊर बायो तरफ दीवार बन क खड़ो होतो।
EXO 14:30 असो तरह परमेश्वर न ऊ दिन इस्राएलियों ख मिस्रियों सी बचायो; अऊर इस्राएलियों न मिस्रियों ख समुन्दर को किनार पर मरयो पड़्यो हुयो देख्यो।
EXO 14:31 जब इस्राएलियों न मिस्र को निवासियों को खिलाफ करयो गयो परमेश्वर महान भुजबल को कार्य ख दिखायो, तब हि परमेश्वर को डरन लग्यो। उन्न परमेश्वर अऊर ओको दास मूसा पर विश्वास करयो।
EXO 15:1 तब मूसा अऊर इस्राएलियों न परमेश्वर को या गाना गायो। उन्न कह्यो, “मय परमेश्वर को गाना गाऊं, कहालीकि ओन महान काम करयो हय;” घोड़ा समेत सवारों ख ओन समुन्दर म फेंक दियो हय।
EXO 15:2 परमेश्वर मोरी शक्ति अऊर सामर्थ हय अऊर भजन को विषय हय, अऊर उच मोरो उद्धार भी ठहरयो हय; मोरो परमेश्वर उच आय, मय ओकीच स्तुति करूं, मोरो पूर्वजों को परमेश्वर उच आय, मय ओको गुन गान करूं।
EXO 15:3 परमेश्वर महान योद्धा हय; ओको नाम परमेश्वर आय।
EXO 15:4 ओन फिरौन राजा को रथों अऊर सेना ख ओन समुन्दर म फेंक दियो; अऊर ओको अच्छो सी अच्छो रथों अऊर अधिकारियों ख लाल समुन्दर म डुबाय दियो।
EXO 15:5 गहरो पानी न उन्ख झाक लियो; हि गोटा को जसो गहरो जागावों म डुब गयो।
EXO 15:6 हे परमेश्वर, तोरो दायो हाथ महाप्रतापी भयो; हे परमेश्वर, तोरो दायो हाथ दुश्मन ख चकनाचूर कर देवय हय।
EXO 15:7 तय अपनो विरोधियों ख अपनो महा प्रताप सी गिराय देवय हंय; तय अपनो गुस्सा भड़कावय, अऊर हि भूसा को समान राखड़ होय जावय हंय;
EXO 15:8 तोरो नथनों की श्वास सी समुन्दर को पानी जमा भय गयो, पानी ढेर बन क दिवार जसो ऊचो खड़ो भय गयो; समुन्दर को बीच म गहरो पानी जम गयो।
EXO 15:9 दुश्मन न कह्यो, मय पीछा करूं अऊर पकड़ूं, अऊर लूट को माल ख बाट लेऊं, उन सी मोरो जी भर जायेंन। मय अपनी तलवार निकालूं अऊर अपनो हाथ सी उन्ख नाश कर डालूं।
EXO 15:10 तय न अपनो श्वास सी हवा चलायो, तब समुन्दर न मिस्रियों ख झाक लियो; हि लोहा को जसो गहरो भयानक पानी म डुब गयो।
EXO 15:11 हे परमेश्वर, देवतावों म तोरो बराबर कौन हय? तय त पवित्रता को वजह महान सामर्थी, अऊर अपनी स्तुति करन वालो को डर को योग्य, अऊर आश्चर्यकर्म को करन वालो हय।
EXO 15:12 तय न अपनो दायो हाथ बढ़ायो, अऊर धरती न उन दुस्मन ख गिटक लियो हय।
EXO 15:13 अपनी सामर्थ सी तय न करुना अपनो छुड़ायो हुयो लोगों ख चलायो हय, अपनो सामर्थ सी उन्ख अपनो पवित्र निवास म लिजाय रह्यो हय।
EXO 15:14 देश देश को लोग सुन क काप उठेंन; पलिश्ती देश को निवासियों को डर को जसो होन लग्यो।
EXO 15:15 तब एदोम को मुखिया डर जायेंन; मोआब को पहलवान थरथरायेंन; सब कनान निवासियों को हिम्मत हार जायेंन।
EXO 15:16 तोरो सामर्थ ख देख क हि लोग घबराय जायेंन; जब तक, हे परमेश्वर तोरी प्रजा को लोग जिन्ख तय न मोल लियो हय पार नहीं निकल जाये। तुम्हरो लोगों ख कुछ नहीं करतो हुयो हि एकच जागा गोटा को समान खड़ो रह जायेंन।
EXO 15:17 हे परमेश्वर, तय अपनो ऊ पहाड़ी पर, अपनो ऊ जागा पर, जेक तय न अपनो निवास जागा लायी बनायो हय, उन्ख पहुंचायेंन। उच पवित्र जागा पर, हे प्रभु, जेक तय न अपनो हाथों सी बनायो हय।
EXO 15:18 परमेश्वर हमेशा हमेशा राज्य करेंन।
EXO 15:19 यो गाना गान को वजह या हय, कि फिरौन राजा को घोड़ा, रथों अऊर सवारों सहित समुन्दर को बीच म चल्यो गयो, अऊर परमेश्वर उन्को ऊपर समुन्दर को पानी वापस ले आयो; पर इस्राएली समुन्दर को बीच सूखी जमीन पर चल क पार भय गयो।
EXO 15:20 तब हारून की बहिन मरियम न जो भविष्यवक्ता होती, डफली लियो; अऊर सब बाई डफली लियो नाचतो अऊर गातो हुयो ओको पीछु भय गयी।
EXO 15:21 अऊर मरियम उन्को संग या गाना गात होती, “परमेश्वर को गाना गावो, कहालीकि ऊ महान काम करयो हय;” घोड़ा सहित सवारों ख ओन समुन्दर म फेंक दियो हय।
EXO 15:22 तब मूसा इस्राएलियों ख लाल समुन्दर सी आगु ले गयो, अऊर हि शूर नाम सुनसान जंगल म गयो; अऊर सुनसान जागा म तीन दिन तक जातो रह्यो, पर उन्ख पानी नहीं मिल्यो।
EXO 15:23 जब हि मारा नाम को एक जागा पर पहुंच्यो, उत को पानी कड़ु होतो, ओख हि नहीं पी सक्यो; या वजह ऊ जागा को नाम मारा पड़्यो।
EXO 15:24 तब हि यो कह्य क मूसा को खिलाफ बड़ बड़ान लग्यो, “हम का पीबों?”
EXO 15:25 तब मूसा न परमेश्वर ख पुकारयो, अऊर परमेश्वर न ओख एक पौधा बतायो, जेक ओन पानी म डाल्यो, त ऊ पानी मीठो भय गयो। परमेश्वर न उन्को लायी एक विधि अऊर नियम बनायो, अऊर उन्की विश्वास की परीक्षा करी,
EXO 15:26 अऊर कह्यो, “यदि तय अपनो परमेश्वर यहोवा को वचन तन मन सी सुनो, अऊर जो ओकी नजर म ठीक हय उच करो, अऊर ओकी आज्ञावों पर कान लगावो, अऊर ओकी सब विधियों ख मानो, त जितनो रोग मय न मिस्रियों पर भेज्यो हंय उन्म सी एक भी तोरो पर नहीं भेजूं; कहालीकि मय तुम्हरो चंगो करन वालो परमेश्वर आय।”
EXO 15:27 तब इस्राएली एलीम नाम जागा म आये, जित पानी को बारा झरना अऊर सत्तर खजूर को झाड़ होतो; उत उन्न पानी को जवर डेरा डाल्यो।
EXO 16:1 तब इस्राएलियों की पूरी मण्डली एलीम सी निकल क, सीन नाम को जंगल म पहुंच्यो, जो एलीम अऊर सीनै पहाड़ी को बीच म हय, मिस्र देश सी निकल्यो हुयो दोय महीना पन्द्रह दिन हो चुक्यो।
EXO 16:2 सुनसान जागा म इस्राएलियों की पूरी मण्डली मूसा अऊर हारून को विरोध म बड़ बड़ान लग्यो।
EXO 16:3 अऊर इस्राएली उन्को सी कहन लग्यो, “जब हम मिस्र देश म मांस अऊर बहुत सी हान्डियों को जवर बैठ क पेट भर जेवन करत होतो, तब हम परमेश्वर को हाथ सी मार डाल्यो भी जातो त सही होतो; पर तुम हम ख या जागा म पूरो लोगों ख भूख सी मार डालन लायी मिस्र देश सी हम्ख निकाल लायो हय।”
EXO 16:4 तब परमेश्वर न मूसा सी कह्यो, “देखो, मय तुम लोगों लायी स्वर्ग सी जेवन लायी भोजन बरसाऊं; अऊर यो लोग दिन भर पूरेंन इतनोच बाहेर जाय क हर दिन को भोजन जमा करेंन, मय इन्क जाचूं कि यो मोरो बतायो अनुसार वसोच करय का नहीं।
EXO 16:5 अऊर असो होयेंन कि छठवो दिन ऊ भोजन पहिलो दिनों सी दोय गुना होयेंन, छठवो दिन ख दोय दिन पूरेंन इतनो तैयार करो।”
EXO 16:6 येकोलायी मूसा अऊर हारून न पूरो इस्राएलियों सी कह्यो, “शाम ख तुम जान लेवो कि जो तुम ख मिस्र देश सी निकाल लायो हय ऊ योच परमेश्वर आय,
EXO 16:7 अऊर सुबेरे तुम्ख ओको महिमा को तेज दिखेंन, कहालीकि तुम जो परमेश्वर पर बुड़बुड़ावय हय ओख ऊ सुनय हय। अऊर हम का हंय कि तुम हम पर बुड़बुड़ावय हय।”
EXO 16:8 फिर मूसा न कह्यो, “या तब होयेंन जब परमेश्वर शाम ख तुम्ख खान लायी मांस अऊर सुबेरे पेट भर रोटी देयेंन; कहालीकि तुम जो ओको पर बुड़बुड़ावय हय ओख ऊ सुनय हय। अऊर हम का हंय? तुम्हरो बुड़बुड़ानो हम पर नहीं परमेश्वरच पर होवय हय।”
EXO 16:9 फिर मूसा न हारून सी कह्यो, “इस्राएलियों की पूरी मण्डली ख आज्ञा दे कि परमेश्वर को जवर आये, कहालीकि ओन उन्को बुड़बुड़ानो सुन्यो हय।”
EXO 16:10 जब हारून इस्राएलियों की पूरी मण्डली सी बात कर रह्यो होतो, कि अचानक उन्न सुनसान जागा की तरफ नजर कर क् देख्यो, अऊर उन्ख परमेश्वर को तेज बादर म दिखायी दियो।
EXO 16:11 तब परमेश्वर न मूसा सी कह्यो,
EXO 16:12 “इस्राएलियों को बुड़बुड़ानो मय न सुन्यो हय; उन्को सी कह्य दे कि हर शाम ख तुम्ख मांस अऊर सुबेरे पेट भर रोटी सी तृप्त होय जावो; अऊर तुम जान जाजो कि मयच तुम्हरो परमेश्वर आय।”
EXO 16:13 तब असो भयो कि शाम ख लावा पक्षी आय क पूरी छावनी पर बैठ गयी; अऊर सुबेरे छावनी को चारयी तरफ ओस गिरी।
EXO 16:14 अऊर जब ओस सूख गयी त हि का देखय हंय कि सुनसान जागा पर छोटो छोटो जमी ओस को जसो छोटो कन दिखायी दियो।
EXO 16:15 यो देख क इस्राएली लोग, जो न जानत होतो कि या का चीज आय, कहालीकि हि नहीं जानत होतो कि ऊ का आय। तब मूसा न उन्को सी कह्यो, “या उच जेवन आय जेक परमेश्वर तुम्ख खान लायी देवय हय।
EXO 16:16 जो आज्ञा परमेश्वर न दियो हय वा या आय : तुम ओको म सी अपनी जरूरत को अनुसार खान लायी जमा करजो, मतलब तम्बू म रहन वालो अपनो अपनो लोगों की गिनती को अनुसार, हर एक आदमी को पीछु एक एक ओमेर जमा करजो; जेको तम्बू म जितनो हो ऊ उन्कोच लायी जमा करे।”
EXO 16:17 अऊर इस्राएलियों न वसोच करयो; अऊर कोयी न अधिक, अऊर कोयी न थोड़ो जमा करयो।
EXO 16:18 जब उन्न ओको पायली सी नाप्यो, तब जिन्को जवर जरूरत सी जादा होतो ओको जवर अधिक नहीं, अऊर जिन्को जवर थोड़ो होतो उन्को जवर कुछ कम नहीं निकल्यो; कहालीकि हर एक न अपनो जेवन अनुसार जमा करयो होतो।
EXO 16:19 फिर मूसा न उन्को सी कह्यो, “कोयी भी येको म सी कल सबेरे लायी बचाय क मत रखो।”
EXO 16:20 पर कुछ लोगों न मूसा की बात नहीं मानी; अऊर ओको म सी कुछ बाकी सुबेरे लायी बचायो, त ओख म कीड़ा पड़ गयो अऊर ऊ बास करन लग्यो; तब मूसा उन लोगों पर गुस्सा भयो
EXO 16:21 हि हर दिन सुबेरे अपनी जरूरत को अनुसार जेवन लायी मन्ना जमा करत होतो, अऊर जब सूर्य की कड़ी तपन होनो पर ऊ पिघल जात होती।
EXO 16:22 फिर असो भयो कि छठवो दिन उन्न दोय गुना, मतलब हर आदमी को पीछु दोय दोय पायली मन्ना जमा कर लियो, तब इस्राएली मण्डली को सब मुखिया न आय क मूसा ख बतायो।
EXO 16:23 तब मूसा न उन्को सी कह्यो, “या वा बात आय जो परमेश्वर न असो कह्यो कि, कहालीकि कल परम आराम, मतलब परमेश्वर लायी पवित्रता को आराम दिन हय, अज तुम्ख जितनो पकानो हय, उतनो पकावों, जितनो उबालनो हय उतनो उबालो, अऊर येको म सी जितनो बचेंन ओख सबेरे लायी रखो।”
EXO 16:24 जब उन्न मूसा की आज्ञा को अनुसार सुबेरे तक रख्यो, तब नहीं त ऊ बासो भयो, अऊर नहीं ओको म कीड़ा भयो।
EXO 16:25 तब मूसा न कह्यो, “अज परमेश्वर को आराम दिन हय; येकोलायी तुम उच खावो, अज मन्ना मैदान म नहीं मिलेंन।
EXO 16:26 छय दिन त तुम ओख जमा करजो; पर सातवों दिन आराम को दिन हय, ओको म ऊ नहीं मिलेंन।”
EXO 16:27 तब भी लोगों म सी कोयी कोयी सातवों दिन भी जमा करन बाहेर गयो, पर उन्को कुछ नहीं मिल्यो।
EXO 16:28 तब परमेश्वर न मूसा सी कह्यो, “तुम लोग मोरी आज्ञावों अऊर नियमों ख कब तक नहीं मानो?
EXO 16:29 परमेश्वर न जो तुम ख आराम को दिन दियो हय, योच वजह ऊ छठवो दिन ख दोय दिन को जेवन तुम्ख देवय हय; येकोलायी तुम अपनो अपनो जागा पर बैठे रहना, सातवों दिन कोयी अपनो जागा सी बाहेर नहीं जावो।”
EXO 16:30 येकोलायी लोगों न सातवों दिन आराम करयो।
EXO 16:31 इस्राएल लोगों न उच चीज को नाम मन्ना रख्यो, समार को दाना जसो सफेद होतो। अऊर ओको स्वाद शहेद सी बन्यो पुवा को जसो होतो।
EXO 16:32 फिर मूसा न कह्यो, “परमेश्वर न आज्ञा दियो कि ऊ यो आय कि येख म सी ओमेर भर ‘मन्ना’ अपनो वंश की पीढ़ी पीढ़ी लायी रख छोड़ो, जेकोसी हि जान कि परमेश्वर हम्ख मिस्र देश सी निकाल क सुनसान जागा म कसी रोटी खिलावत होतो।”
EXO 16:33 तब मूसा न हारून सी कह्यो, “एक बर्तन ले क ओख म ओमेर भर मन्ना ले क ओख परमेश्वर को आगु रख देवो कि ऊ तुम्हरो पीढ़ियों लायी रख्यो रहें।”
EXO 16:34 जसो आज्ञा परमेश्वर न मूसा ख दियो होती, ओको को अनुसार हारून न बर्तन ख साक्षी को सन्दूक को आगु रख दियो कि ऊ उत रख्यो रहो।
EXO 16:35 इस्राएलियों लोग जब ऊ देश म नहीं पहुंच्यो तब तक, मतलब लोगों न चालीस साल तक मन्ना खातो रह्यो; हि जब तक कनान देश की सीमा पर नहीं पहुंच्यो तब तक मन्ना खात रह्यो।
EXO 16:36 एक ओमेर मतलब पायली त एपा को दसवा हिस्सा आय।
EXO 17:1 फिर इस्राएलियों की पूरी मण्डली सीन नाम को सुनसान जागा सी निकली, अऊर जागा जागा म डेरा डालतो हुयो आगु बढ़ी अऊर परमेश्वर को आज्ञा सी सब रपीदीम की जागा म अपनो डेरा डाल्यो; उत उन लोगों लायी पीवन को पानी नहीं होतो।
EXO 17:2 येकोलायी हि मूसा सी वाद विवाद करन लग्यो, “हम्ख पीवन लायी पानी देवो।” मूसा न उन्को सी कह्यो, “तुम लोग मोरो सी कहाली वाद विवाद करय हय? अऊर परमेश्वर की परीक्षा कहाली करय हय?”
EXO 17:3 फिर उत लोगों ख पानी कि बहुत प्यास लगी, तब हि या कह्य क मूसा पर कुड़कुड़ान लग्यो, “तय हम्ख बाल-बच्चां अऊर जनावरों समेत प्यासो मार डालन लायी मिस्र देश सी कहाली लायो हय?”
EXO 17:4 तब मूसा न परमेश्वर सी बिनती करी, अऊर कह्यो, “इन लोगों को संग का करूं? हि सब मोर पर गोटा सी मारन लायी तैयार हंय।”
EXO 17:5 परमेश्वर न मूसा सी कह्यो, “इस्राएलियों को बुजूर्ग मुखिया म सी कुछ ख अपनो संग ले क लोगों को आगु आगु बढ़, तय अपनो हाथ म उच लाठी ख ले क जाजो जेकोसी तय न नील नदी पर मारयो होतो।
EXO 17:6 मय तोरो आगु चल क होरेब पहाड़ी की एक चट्टान पर खड़ो रहूं; अऊर तय उच चट्टान पर लाठी मारजो, तब ओको म सी पानी निकलेंन, जेकोसी लोग पानी पी सकेंन।” तब मूसा न इस्राएल को मुखिया लोगों को आगु वसोच करयो।
EXO 17:7 अऊर मूसा न ऊ जागा को नाम मस्सा अऊर मरीबा रख्यो, कहालीकि इस्राएलियों न उत मूसा सी वाद विवाद करयो होतो, अऊर परमेश्वर की परीक्षा करी कि “का परमेश्वर हमरो बिच हय यां नहीं?”
EXO 17:8 तब अमालेकी जाति को लोग आय क रपीदीम जागा म इस्राएलियों सी लड़न लग्यो।
EXO 17:9 तब मूसा न यहोशू सी कह्यो, “हमरो लायी कुछ आदमियों ख चुन ले कि बाहेर जाय क अमालेकियों सी लड़े; अऊर मय कल परमेश्वर की लाठी हाथ म पकड़ क पहाड़ी की सेंडी पर खड़ो रहूं।”
EXO 17:10 मूसा की या आज्ञा को अनुसार यहोशू अमालेकियों सी लड़न गयो; अऊर मूसा, हारून, अऊर हूर पहाड़ी की सेंडी पर चढ़ गयो।
EXO 17:11 जब तक मूसा अपनो हाथ उठायो रहत होतो तब तक त इस्राएल को लोग लड़ाई जीतत होतो; पर जब जब ऊ ओख नीचो करतो तब तब अमालेक जीतत होतो।
EXO 17:12 पर जब मूसा को हाथ थक गयो, तब उन्न एक गोटा ले क मूसा को नीचे रख दियो, अऊर ऊ ओख पर बैठ गयो, अऊर हारून अऊर हूर उन्को हाथ सम्भालतो रह्यो; एक दायो बाजू अऊर दूसरो बायो बाजू अऊर ओको हाथ सूरज डुबन तक उठ्यो रह्यो।
EXO 17:13 अऊर यहोशू न अपनो तलवार को दम सी अमालेकी जाति ख हराय दियो।
EXO 17:14 तब परमेश्वर न मूसा सी कह्यो, “लड़ाई म जीत की बात यादगार लायी किताब म लिख लेवो अऊर यहोशू ख बताय देवो कि मय आसमान को नीचो सी अमालेक को यादगार चिन्ह पूरो रीति सी मिटाय डालूं।”
EXO 17:15 तब मूसा न एक वेदी बनाय क ओको नाम “यहोवा निस्सी रख्यो;”
EXO 17:16 मूसा न कह्यो, “परमेश्वर न कसम खायी हय, कि परमेश्वर अमालेकियों सी पीढ़ियों तक लड़ाई करतो रहेंन।”
EXO 18:1 जब मूसा को ससरो यित्रो जो मिद्यान देश को याजक न उन कामों को बारे म सुन्यो जो परमेश्वर न मूसा अऊर अपनो इस्राएल को लोगों लायी कसो इस्राएलियों ख मिस्र देश सी बाहेर निकाल्यो,
EXO 18:2 तब मूसा को ससरो यित्रो अऊर मूसा की पत्नी सिप्पोरा ख, पहिलेच ओको मायको भेज दियो होतो,
EXO 18:3 अऊर ओको दोयी टुरा ख भी संग लायो; इन म सी एक टुरा को नाम यो कह्य क गेर्शोम रख्यो होतो, “मय दूसरो देश म परदेशी हय।”
EXO 18:4 अऊर दूसरो को नाम एलीएजेर रख्यो, “मोरो बाप को परमेश्वर न मोरी मदत कर क् मोख मिस्र को फिरौन राजा की तलवार सी बचायो।”
EXO 18:5 मूसा को ससरो यित्रो, मूसा की पत्नी अऊर ओको दोय टुरा ख, संग ले क मूसा को जवर सुनसान जागा म गयो, जित परमेश्वर को पहाड़ी को जवर ओको डेरा होतो।
EXO 18:6 अऊर ओन मूसा को जवर अपनी बात भेजी, “मय तोरो ससरो यित्रो आय, अऊर दोयी टुरावों सहित तोरी पत्नी ख तोरो जवर लाय रह्यो हय।”
EXO 18:7 येकोलायी तब मूसा अपनो ससरो सी मुलाखात करन लायी निकल्यो, अऊर ओख झुक क सत्कार करयो अऊर चुम्यो; अऊर हि एक दूसरो को कुशल मंगल पूछतो हुयो डेरा पर आय गयो।
EXO 18:8 मूसा न अपनो ससरो यित्रो ख हर उन सब कार्य को वर्णन सुनायो जो परमेश्वर न इस्राएलियों की मदत लायी फिरौन अऊर मिस्रियों को संग जो करयो होतो, अऊर इस्राएलियों न यात्रा म जो कष्ट उठायो ओको सी परमेश्वर उन्ख कसो छुड़ायो हय।
EXO 18:9 तब यित्रो न वा पूरी भलायी को वजह जो परमेश्वर न इस्राएलियों को संग करी होतो, की उन्ख मिस्रियों को हाथ सी छुड़ायो होतो, खुश होय क कह्यो,
EXO 18:10 यित्रो न कह्यो “धन्य हय परमेश्वर, जेन तुम ख फिरौन अऊर मिस्रियों को वश सी छुड़ायो, जेन तुम लोगों ख गुलामी सी मिस्रियों को हाथ सी छुड़ायो हय।
EXO 18:11 अब मय न जान लियो हय कि यहोवा सब देवतावों सी बड़ो हय; बल्की ओको बारे म भी जेकोसी उन्न इस्राएलियों को संग अहंकारपूर्न व्यवहार करयो होतो।”
EXO 18:12 तब मूसा को ससरो यित्रो न परमेश्वर लायी होमबलि अऊर मेलबलि चढ़ाये, अऊर हारून इस्राएलियों को सब बुजूर्ग समेत मूसा को ससरो यित्रो को संग परमेश्वर को आगु जेवन करन ख आयो।
EXO 18:13 दूसरो दिन मूसा लोगों को न्याय करन ख बैठ्यो, अऊर सबेरे सी शाम तक लोग मूसा को आस पास खड़े रह्यो।
EXO 18:14 जब मूसा को ससरो न उन लोगों को न्याय करतो देख्यो तब उन्को सी पुच्छ्यो “यो का काम हय जो तुम लोगों लायी करय हय? का वजह हय कि तुम अकेलो बैठ्यो रह्य हय, अऊर लोग सबेरे सी शाम तक तोरो आस पास खड़ो रह्य हंय?”
EXO 18:15 मूसा न अपनो ससरो सी कह्यो, “येको वजह यो हय कि लोग मोरो जवर परमेश्वर की इच्छा सिखन आवय हंय।
EXO 18:16 जब जब उन्को कोयी वाद विवाद होवय हय तब तब हि मोरो जवर आवय हंय, अऊर मय उन्को बिच न्याय करू हय, अऊर परमेश्वर की विधि अऊर व्यवस्था उन्ख समझाऊ हय।”
EXO 18:17 मूसा को ससरो न ओको सी कह्यो, “जो काम तय करय हय, ऊ ठीक नहाय।
EXO 18:18 येकोसी तय का, बल्की हि लोग भी जो तोरो संग हंय निश्चय थक जायेंन, कहालीकि यो काम तोरो लायी बहुत भारी हय; तय येख अकेलो नहीं कर सकय।
EXO 18:19 येकोलायी अब मोरी सुन ले, मय तोख सम्मति देऊ हय, परमेश्वर तोरो संग रहेंन! तय इन लोगों लायी परमेश्वर को सामने जायो कर, अऊर इन्को मुकद्दमा ख परमेश्वर को जवर तय पहुंचाय दियो कर।
EXO 18:20 इन्क विधि अऊर व्यवस्था प्रगट कर क्, जो रस्ता पर इन्क चलनो, अऊर जो जो काम इन ख करनो हय, ऊ इन ख बता दियो कर।
EXO 18:21 फिर तय इन सब इस्राएली लोगों म सी असो आदमियों ख चुन ले, जो गुनी अऊर परमेश्वर को डर मानन वालो, सच्चो, अऊर अन्याय को लाभ सी घृना करन वालो होना; अऊर इन ख हजार-हजार, सौ-सौ, पचास-पचास, अऊर दस-दस लोगों पर मुखिया बनाय दे।
EXO 18:22 अऊर हि सब समय इन लोगों को न्याय करतो रहे; अऊर सब बड़ो बड़ो मुकद्दमा ख त तोरो जवर लायो करे; तब तोरो बोझ हल्को होयेंन, कहालीकि यो बोझ ख हि भी तोरो संग उठायेंन।
EXO 18:23 यदि तय यो उपाय करजो, अऊर परमेश्वर तोख असी आज्ञा दे, त तय ठहर सकजो, अऊर हि सब लोग अपनो जागा म शान्ति सी पहुंच सकेंन।”
EXO 18:24 अपनो ससरो की या बात मान क मूसा न ओको सब वचनों को अनुसार करयो।
EXO 18:25 मूसा न सब इस्राएल म सी बुद्धि मान आदमियों ख चुन क उन्ख हजार-हजार, सौ-सौ, पचास-पचास, दस-दस लोगों को ऊपर मुखिया ठहरायो।
EXO 18:26 अऊर हि सब लोगों को न्याय करन लग्यो; जो विवाद कठिन होतो ओख हि मूसा को जवर लावत होतो, अऊर सब छोटो विवाद को न्याय हि खुदच करत होतो।
EXO 18:27 तब मूसा न अपनो ससरो ख बिदा करयो, अऊर ऊ अपनो देश वापस जान लग्यो।
EXO 19:1 इस्राएली लोग मिस्र देश सी निकलनो को तीन महीना को बाद सीनै को सुनसान जागा म आयो।
EXO 19:2 अऊर जब हि रपीदीम सी निकल क सीनै को सुनसान जागा म आये, तब उतच होरेब मतलब सीनै पहाड़ी को तरफ इस्राएलियों न डेरा डाल्यो।
EXO 19:3 अऊर तब मूसा पहाड़ी पर परमेश्वर सी मिलन चढ़ गयो, अऊर उत सी परमेश्वर न ओख बोल्यो, “याकूब को घरानों सी असो कहो, अऊर इस्राएलियों लोगों ख मोरो यो वचन सुना,
EXO 19:4 ‘तुम लोगों न देख्यो हय कि मय न मिस्रियों सी का का करयो; जसो गरूड़ पक्षी को पंखा पर चढ़ाय क अपनो जवर लायो।
EXO 19:5 येकोलायी अब यदि तुम मोरी आज्ञा मानजो, अऊर मोरी वाचा को पालन करजो, त सब लोगों म सी तुमच मोरो निजी धन ठहरेंन; पूरो धरती त मोरीच आय।
EXO 19:6 अऊर तुम मोरी नजर म याजकों को राज्य अऊर पवित्र राष्ट्र ठहरेंन।’ मूसा जो बात तोख इस्राएलियों सी कहनो हंय हि योच आय।”
EXO 19:7 तब मूसा न आय क इस्राएली लोगों को बुजूर्गों ख बुलायो, अऊर या सब बात, जेक कहन की आज्ञा परमेश्वर न ओख दियो होतो, उन्को समझाय दियो।
EXO 19:8 अऊर सब लोग एक संग उत्तर दियो, “जो कुछ परमेश्वर न कह्यो हय ऊ सब हम करबोंन।” लोगों की या बात मूसा न परमेश्वर ख सुनायी।
EXO 19:9 तब परमेश्वर न मूसा सी कह्यो, “सुन, मय कारो बादर अन्धारो म सी होय क तोरो जवर आऊ हय, येकोलायी कि जब मय तोरो सी बात करूं तब हि लोग सुने, अऊर हमेशा तोरो पर विश्वास करे।” अऊर मूसा न परमेश्वर सी लोगों की बात बतायी।
EXO 19:10 तब परमेश्वर न मूसा सी कह्यो, “लोगों को जवर जावो अऊर उन्ख अज अऊर कल पवित्र करजो, अऊर हि अपनो कपड़ा धोय ले,
EXO 19:11 अऊर हि तीसरो दिन तक तैयार होय जाये; कहालीकि तीसरो दिन परमेश्वर सब लोगों को आखी को देखतो सीनै पहाड़ी पर उतरेंन।
EXO 19:12 अऊर तय लोगों लायी चारयी तरफ एक सीमा रेसा खीच देजो, अऊर उन्को सी कह्यजो, ‘तुम सावधान रहजो कि पहाड़ी पर न चढ़जो अऊर ओकी सीमा ख भी नहीं छूयजो; अऊर जो कोयी पहाड़ी ख छूयेंन ऊ निश्चय मार डाल्यो जायेंन।
EXO 19:13 ओख कोयी हाथ सी नहीं छुये; जो छूयेंन ओख गोटा सी मारयो जायेंन, या ओख तीरों सी छेद्यो जायेंन; चाहे जनावर होय चाहे आदमी, ऊ जीन्दो नहीं बचेंन।’ जब मेंढा को सींग को नरसिंगा वालो शब्द तक सुनायी दे, तब लोग पहाड़ी पर चढ़ेंन।”
EXO 19:14 तब मूसा पहाड़ी सी उतर क लोगों को जवर आय क उन्ख पवित्र करयो, अऊर लोगों न अपनो कपड़ा धोयो।
EXO 19:15 अऊर मूसा न लोगों सी कह्यो, “तीसरो दिन तक तैयार होय जावो, आदमियों न बाईयों सी सहवास नहीं करे।”
EXO 19:16 जब तीसरो दिन आयो तब सुबेरे होतोच बादर गर्जन अऊर बिजली चमकन लग्यो, अऊर पहाड़ी पर कारो ढ़ग छाय गयो, फिर तुरही को बड़ो भारी आवाज भयो, अऊर डेरा म जितनो लोग होतो सब डर गयो।
EXO 19:17 तब मूसा लोगों ख परमेश्वर सी मिलान लायी डेरा सी निकाल लायो, अऊर हि पहाड़ी को नीचे खड़ो भय गयो।
EXO 19:18 अऊर परमेश्वर जो आगी म होय क सीनै पहाड़ी पर उतरो होतो, या वजह पूरो पहाड़ी धुवा सी भर गयो; अऊर ओको धुवा भट्टा जसो उठ रह्यो होतो, अऊर पूरो पहाड़ी बहुत काप रह्यो होतो।
EXO 19:19 फिर जब नरसिंगा को आवाज तेज बढ़तो, गयो, तब मूसा बोल्यो, अऊर परमेश्वर न बादर गर्जन की आवाज जसो ओको उत्तर दियो।
EXO 19:20 अऊर परमेश्वर सीनै पहाड़ी की सेंडी पर सी खल्लो उतरयो; अऊर मूसा ख पहाड़ी की सेंडी पर बुलायो, अऊर मूसा ऊपर गयो।
EXO 19:21 तब परमेश्वर न मूसा सी कह्यो, “नीचे उतर क् लोगों ख चेतावनी दे, कहीं असो नहीं हय कि हि बाड़ा तोड़ क परमेश्वर को जवर देखन ख घुसयो, अऊर उन्म सी बहुत सो नाश होय जायेंन।
EXO 19:22 अऊर याजक जो परमेश्वर को जवर आन वालो हंय हि भी अपनो आप ख पवित्र करेंन, कहीं असो नहीं होय कि मय उन ख सजा दे देऊ।”
EXO 19:23 मूसा न परमेश्वर सी कह्यो, “हि लोग सीनै पहाड़ी पर नहीं चढ़ सकय; तुम न त खुद हम ख यो कह्य क चितायो कि पहाड़ी को चारयी तरफ बाड़ा बान्ध क ओख पवित्र रखो।”
EXO 19:24 परमेश्वर न मूसा सी कह्यो, “तय जा, अऊर हारून ख ले आव। पर याजक अऊर साधारन लोग परमेश्वर को बाड़ा तोड़न चढ़ क आये, असो नहीं होय कि मय उन ख सजा देऊं।”
EXO 19:25 या बात मूसा पहाड़ी सी उतर क् लोगों ख सुनायी।
EXO 20:1 तब परमेश्वर न यो सब वचन कह्यो :
EXO 20:2 “मय तोरो परमेश्वर यहोवा आय, जो तोख मिस्र देश की, गुलामी सी बाहेर निकाल्यो हय।
EXO 20:3 “तुम मोख छोड़ क कोयी दूसरो ख ईश्वर कर क् नहीं मानजो।
EXO 20:4 “तय अपनो लायी कोयी मूर्ति नहीं बनावो, न कोयी की मूर्ती बनावो, जो आसमान म, यां धरती पर, या धरती को खल्लो पानी म हय।
EXO 20:5 तय उन्को दण्डवत नहीं करजो, अऊर नहीं उन्की उपासना करजो; कहालीकि मय तोरो परमेश्वर यहोवा जलन रखन वालो परमेश्वर आय, अऊर जो मोरो सी दुश्मनी रखय हंय, उन्को टुरा, नाती, अऊर पन्ती ख भी पीढ़ी को अधर्म को दण्ड देऊ हय,
EXO 20:6 अऊर जो मोरो सी प्रेम रखय अऊर मोरी आज्ञावों ख मानय हंय, उन हजार पीढ़ियों पर दया करू हय।
EXO 20:7 “तय अपनो परमेश्वर को नाम व्यर्थ नहीं लेजो; कहालीकि जो परमेश्वर को नाम बिन काम को लेवय ऊ ओख निर्दोष नहीं ठहरायेंन।
EXO 20:8 “तुम आराम दिन ख पवित्र मानन लायी याद रखजो।
EXO 20:9 छय दिन त तुम मेहनत करजो, अपनो सब काम-काज करजो,
EXO 20:10 पर सातवों दिन तोरो परमेश्वर लायी आराम दिन हय। उन्म नहीं त तुम कोयी भी काम-काज करजो, अऊर नहीं तोरो टुरा-टुरी, सेवक-सेविका, जनावर, अऊर कोयी परदेशी जो तोरो फाटकों को अन्दर रहन वालो हो।
EXO 20:11 कहालीकि छय, दिन म परमेश्वर न आसमान, अऊर धरती, अऊर समुन्दर, अऊर जो कुछ उन्म हंय, सब ख बनायो, अऊर सातवों दिन आराम करयो; या वजह परमेश्वर न आराम दिन ख आशीष दियो अऊर पवित्र ठहरायो।
EXO 20:12 “तुम अपनो माय-बाप को आदर करजो, जेकोसी जो देश तोरो परमेश्वर तोख देवय हय ओख म तुम बहुत दिन तक रहनो पाये।
EXO 20:13 “तय खून नहीं करजो।
EXO 20:14 “तुम व्यभिचार नहीं करजो।
EXO 20:15 “तुम चोरी नहीं करजो।
EXO 20:16 “तुम कोयी को खिलाफ झूठी गवाही नहीं देजो।
EXO 20:17 “तुम कोयी को घर को लालच नहीं करजो; नहीं त कोयी की बाई को लालच करजो, अऊर नहीं कोयी को दास-दासी यां बईल-गधा को, नहीं कोयी की कोयी चीज को लालच करजो।”
EXO 20:18 सब लोग गर्जन अऊर बिजली अऊर तुरही को आवाज सुनय, अऊर धुवा उठतो हुयो पहाड़ी ख देखतो रह्यो, तब डर क कापतो हुयो दूर खड़ो होय गयो;
EXO 20:19 अऊर हि मूसा सी कहन लग्यो, “तयच हम सी बात कर, हम तोरो सी सुनबों; पर परमेश्वर ख हम सी बात मत करन दे, असो नहीं हो कि हम मर जाबोंन।”
EXO 20:20 मूसा न लोगों सी कह्यो, “डरो मत; कहालीकि परमेश्वर येकोलायी आयो हय कि तुम्हरी परीक्षा करे, अऊर ओको डर तुम्हरो मन म बन्यो रहें कि तुम पाप नहीं करो।”
EXO 20:21 पर हि लोग दूरच खड़ो रह्यो पर मूसा घोर अन्धकार को जवर गयो जित परमेश्वर होतो।
EXO 20:22 तब परमेश्वर न मूसा सी कह्यो, “तुम इस्राएलियों ख यो वचन सुनाव, तुम न खुदच देख्यो हय कि मय न स्वर्ग सी तुम सी बाते करी हंय।
EXO 20:23 तुम मोरो अलावा कोयी ख सामिल मत करजो, मतलब अपनो लायी चांदी अऊर सोना सी देवतावों की मूर्तियां ख मत बनाजो।
EXO 20:24 मोरो लायी माटी की एक वेदी बनाजो, अऊर अपनी मेंढी-शेरी अऊर गाय-बईलों को होमबलि अऊर मेलबलि ख ओको पर चढ़ाजो; जहां जहां मय अपनो नाम को याद कराऊं वहां वहां मय आय क तुम्ख आशीष देऊं।
EXO 20:25 अऊर यदि तुम मोरो लायी गोटा सी वेदी बनाजो, गोटा म अवजार सी छेदायी कर क् नहीं बनावो; कहालीकि तुम न ओख पर हथियार लगानो सी अशुद्ध होय जायेंन।
EXO 20:26 अऊर मोरी वेदी पर सीढ़ी लगाय क मत चढ़जो, कुछ असो नहीं हो कि तोरो शरीर को नंगोपन ओको पर दिख पड़ेंन।”
EXO 21:1 “फिर जो नियम तोख उन्को समझानो हंय हि यो आय,
EXO 21:2 जब तुम कोयी इब्री दास लेय ले, तब ऊ छय साल तक सेवा करतो रहेंन, पर सातवों साल बिना कीमत चुकाये स्वतंत्र होय क जाय सकेंन।
EXO 21:3 यदि ऊ बिना शादी को आयो हय, त ऊ बिना शादी कोच चली जाये; अऊर पत्नी संग आयो हय, त पत्नी को संग चली जाये।
EXO 21:4 यदि ओको मालिक न ओको लायी पत्नी बनाय दियो हय, अऊर ओको सी ओको संतान भयी हय, त ओकी पत्नी अऊर बच्चा ओको स्वामी कोच रहेंन, अऊर ऊ अकेलो जाय सकेंन।
EXO 21:5 पर यदि ऊ दास दृढ़ता सी कहेंन, ‘मय अपनो स्वामी, अऊर अपनी पत्नी, अऊर बच्चा सी प्रेम रखू हय, येकोलायी मय स्वतंत्र होय क नहीं जाऊं;’
EXO 21:6 त ओको मालिक ओख न्याय करन वालो को आगु लिजाय क; फिर ओख दरवाजा को चौखट जवर लिजाय क बारीक सुजा सी ओको कान छेदेंन; तब ऊ अपनो मालिक की हमेशा सेवा करेंन।”
EXO 21:7 “यदि कोयी अपनी टुरी ख दासी होन लायी बेच डाले, त ऊ दासी होन को वजह आदमी-दासों को जसो स्वतंत्र होय क बाहेर नहीं जाय सकेंन।
EXO 21:8 यदि वा अपनो मालिक ओख अपनी पत्नी बनाये, अऊर फिर ओख सी खुश नहीं रह्य, त वापस ओको बाप ख दाम सी छुड़ायी जान दे; पर ओको विश्वास घात करन को बाद ओख विदेशी लोगों को हाथ बेचन को ओको अधिकार नहीं रहेंन।
EXO 21:9 यदि ओन अपनो बेटा लायी चुन्यो हय, त बेटी जसो व्यवहार करो।
EXO 21:10 यदि ऊ दूसरी सी बिहाव कर ले, तब ऊ पहिली पत्नी ख खाना, कपड़ा, की कमी नहीं होन दे, अऊर कोयी सुख सी दूर नहीं रखे।
EXO 21:11 अऊर यदि ऊ इन तीन बातों म कमी करेंन, त वा बाई बिना दाम चुकायो स्वतंत्र होय जायेंन।”
EXO 21:12 “जो कोयी आदमी ख असो मारयो कि ऊ मर जाये, त ऊ भी निश्चय ओख मार डाल्यो जाये।
EXO 21:13 यदि ओकी मारन की मंसा नहीं होती पर अचानक सी परमेश्वर की इच्छा सी ऊ ओको हाथ सी मर गयो, त असो मारन वालो को भगन लायी मय एक जागा ठहराऊं जित ऊ भग जाये।
EXO 21:14 पर यदि कोयी जान बूझ क कोयी ख छल सी मार डाले, त ओको मार डालन लायी मोरी वेदी को जवर सी भी अलग ले जाजो।”
EXO 21:15 “जो अपनो माय-बाप ख मारय हय, ओख निश्चय मार डाल्यो जायेंन।”
EXO 21:16 “जो कोयी आदमी ख अपहरन करय, ओख बिकय यां ओको जवर मिलय त ऊ भी निश्चय मार डाल्यो जाये।”
EXO 21:17 “जो कोयी अपनो माय-बाप ख श्राप दे ऊ भी निश्चय मार डाल्यो जायेंन।”
EXO 21:18 “यदि आदमी झगड़य हय, अऊर एक दूसरो ख गोटा या घूसा सी असो मारे कि ऊ मरयो नहीं पर बीस्तर पर पड़्यो रहो,
EXO 21:19 त जब उठ क फिर लाठी को सहारा चलन फिरन लगेंन, तब ऊ मारन वालो निर्दोष ठहरेंन; उच दशा म ऊ ओको पड़्यो रहन को समय की हानि भर दे, अऊर ओख ठीक भी कराय देंन।”
EXO 21:20 “यदि कोयी अपनो दास यां दासी ख लाठी सी असो मारयो कि ऊ ओको मारन सी मर जाये, तब ओख निश्चय सजा दियो जाये।
EXO 21:21 पर यदि ऊ एक दोय दिन जीन्दो रहेंन, त ओको स्वामी ख सजा नहीं दियो जाये; कहालीकि ऊ दास ओको धन हय।
EXO 21:22 “यदि कोयी आदमी मार पीट करतो समय ओको धक्का कोयी गर्भवती बाई ख लगन सी ओको गर्भ गिर जाये, पर अऊर कुछ नुकसान नहीं होय, त मारन वालो सी ऊ बाई को पति जो भी मांग करय उतनो दण्ड की रकम दियो जाये जितनो पन्च निश्चित करेंन।
EXO 21:23 पर यदि मार-पीट म कुछ हानि पहुंच्यो, त जीव को बदला जीव देनो पड़ेंन,
EXO 21:24 अऊर तुम आंखी को बदला आंखी को, अऊर दात को बदला दात को, अऊर हाथ को बदला हाथ, अऊर पाय को बदला पाय लेवो,
EXO 21:25 अऊर दाग को बदला दाग, अऊर घाव को बदला घाव, अऊर मार को बदला मार की सजा आय।”
EXO 21:26 “जब कोयी अपनो दास यां दासी की आंखी पर असो मारयो कि फूट जाये, त ऊ ओकी आंखी को बदला ओख स्वतंत्र कर क् जान देजो।
EXO 21:27 अऊर यदि ऊ अपनो दास या दासी ख मार क् ओको दात तोड़ डालेंन, त ऊ ओको दात को बदला ओख स्वतंत्र कर क् जान देयेंन।”
EXO 21:28 “यदि बईल कोयी आदमी यां बाई ख असो सींग मारे कि ऊ मर जाये, त ऊ बईल निश्चय गोटा सी मार डाल्यो जाये, अऊर ओको मांस खायो नहीं जाये; पर बईल को मालिक निर्दोष ठहरेंन।
EXO 21:29 पर यदि बईल कि पहिलो सीच सींग मारन की आदत पड़्यो हय, अऊर ओको मालिक न पहिलो सी बतावन को बाद भी ओख नहीं बान्ध्यो हय, अऊर ऊ कोयी आदमी यां बाई ख मार डालय, तब त बईल ख गोटा सी मार डाल्यो जाये, अऊर ओको मालिक भी मारयो डाल्यो जाये।”
EXO 21:30 पर बदला म धन दे क बईल को मालिक ख छोड़ सकय हय। ओख उतनोच धन देनो पड़ेंन। जितनो जान की छुड़ौती लायी ठहरायो जायेंन।
EXO 21:31 यदि चाहे बईल न कोयी टुरा यां टुरी ख मारयो हय, तब भी येको नियम को अनुसार ओको मालिक को संग व्यवहार करयो जाये।
EXO 21:32 यदि बईल न कोयी दास यां दासी ख सींग मारयो हय, त बईल को मालिक ऊ दास को मालिक ख चांदी को तीस सिक्का दे, अऊर बईल ख गोटा मार कर मार डालो।
EXO 21:33 “यदि कोयी आदमी न गड्डा खोल क या खोद क ओख नहीं झाक्यो, अऊर ओख म कोयी को बईल यां गधा गिर जाये,
EXO 21:34 त जेको ऊ गड्डा आय ऊ ओको नुकसान ख भर दे; ऊ जनावर को मालिक ख ओको कीमत भर देंन, अऊर मरयो हुयो जनावर गड्डा वालो को होयेंन।”
EXO 21:35 यदि कोयी को बईल कोयी दूसरों को बईल ख असो मारे कि ऊ मर जाये, त हि दोयी आदमी जीन्दो बईल ख बेच क ओकी कीमत आपस म अरधो अरधो बाट ले; अऊर मरयो हुयो पशु को शव ख भी वसोच बाट ले।
EXO 21:36 यदि यो मालूम पड़े कि ऊ बईल की पहिलो सी सींग मारन की आदत होती, पर ओको मालिक न ओख बान्ध क् नहीं रख्यो, त निश्चय ऊ बईल को बदला बईल भर दे, पर मरयो शव ओकोच ठहरेंन।
EXO 22:1 “यदि कोयी आदमी गाय-बईल, यां मेंढी-शेरी चुराय क काटय यां बिकय, त ऊ गाय-बईल को बदला पाच गाय-बईल, अऊर मेंढी-शेरी को बदला चार मेंढी-शेरी भरनो पड़ेंन।
EXO 22:2 यदि चोर चोरी करतो पकड़ायो, अऊर ओख पर असी मार पड़ी कि ऊ मर जाये, त ओको खून को दोष नहीं लगे।
EXO 22:3 यदि सूरज निकल्यो, त ओको खून को दोष लगेन; जरूर हय कि ऊ नुकसान ख भर दे, अऊर यदि ओको जवर कुछ नहाय हय, त ऊ यो चोरी को वजह बेच दियो जाये।
EXO 22:4 यदि चोरयो हुयो बईल, यां गधा, यां मेंढी, यां शेरी ओको हाथ म जीन्दो मिल्यो, त ऊ ओको दोय गुना भर दे।”
EXO 22:5 “यदि कोयी अपनो पशु सी कोयी को खेत यां अंगूर की बाड़ी चराये, मतलब अपनो पशु ख असो छोड़ दे कि ऊ दूसरो को खेत ख चराय ले, त ऊ अपनो खेत की अऊर अपनी अंगूर की बाड़ी की अच्छी सी अच्छी फसल म सी ओको नुकसान ख भर दे।”
EXO 22:6 “यदि कोयी आगी जलाये, अऊर वहां काटा म लग जायेंन, अऊर फूलों को ढेर यां अनाज यां खड़ो खेत जर जायेंन, त जेन आगी जलायी होना ऊ नुकसान ख जरूर भर दे।”
EXO 22:7 “यदि कोयी दूसरो को जवर रुपया यां सामान की धरोहर रख दे, अऊर ऊ ओको घर सी चोरी जायेंन, त यदि चोर पकड़्यो जाये त दो गुना भर देनो पड़ेंन।
EXO 22:8 यदि चोर नहीं पकड़्यो जाये, त घर को मालिक ख परमेश्वर को जवर लायो जाये कि निश्चय होय जाये कि ओन अपनो भाऊ-बन्धु की सम्पत्ति पर हाथ लगायो हय यां नहीं।”
EXO 22:9 “चाहे बईल, चाहे गधा, चाहे मेंढी यां शेरी, चाहे कपड़ा, कोयी तरह की असी घुमी हुयी चीज को बारे म दोष कहाली नहीं लगायो जाये, जेख दोय जन अपनी अपनी कह्य हय, त दोयी को मुकद्दमा परमेश्वर को जवर आये; अऊर जेख परमेश्वर दोषी ठहराये ऊ दूसरो ख दोय गुना भर दे।”
EXO 22:10 “यदि कोयी पड़ोसी ख गधा, यां बईल यां मेंढी-शेरी यां कोयी अऊर पशु रखन लायी सौंपेंन, अऊर कोयी को बिना देखेंन ऊ मर जायेंन, यां चोट खाये, यां भगाय दियो जायेंन,”
EXO 22:11 त उन दोयी को बिच परमेश्वर की कसम खिलायी जाय, मय न येकी सम्पत्ति पर हाथ नहीं लगायो; तब सम्पत्ति को मालिक येख सच मानेंन, अऊर दूसरो ख कुछ भी भर देनो नहीं पड़ेंन।
EXO 22:12 यदि ऊ सचमुच ओको यहां सी चोरयो गयो होना, त ऊ ओको मालिक ख भर दे।
EXO 22:13 अऊर यदि ऊ जनावर ख जंगली जनावर न चिर डाल्यो, त ऊ चिरयो हुयो ख सबूत लानो पड़ेंन, तब ओख कुछ भी भर नहीं देनो पड़ेंन।
EXO 22:14 “फिर यदि कोयी अपनो काम निकालन लायी दूसरो सी जनावर मांग लाये, अऊर ओको मालिक को गैरहाजिर म जनावर घायल होय यां मर जाये, त ऊ निश्चय ओको नुकसान भर दे।
EXO 22:15 यदि ऊ समय ओको मालिक संग म हय, त दूसरो ख ओको नुकसान भरनो नहीं पड़ेंन; अऊर यदि किरायो को हय त ओको नुकसान ओको किरायो म आय गयी।”
EXO 22:16 “यदि कोयी आदमी कोयी कुंवारी टुरी ख, जेको बिहाव की बात नहीं लगी हय, फुसलाय क ओको संग कुकर्म करेंन, त ऊ निश्चय ओकी मोल दे क ओको सी बिहाव कर ले।
EXO 22:17 पर यदि ओको बाप ओख देनो सी मना करेंन, त कुकर्म करन वालो टुरियों को कीमत रीति को अनुसार रुपया भर दे।
EXO 22:18 “तय जादू-टोना करन वाली बाई ख जीन्दो मत रहन देजो।
EXO 22:19 “जो कोयी जनावर सी कुकर्म करे ऊ निश्चय मार डाल्यो जाय।
EXO 22:20 “जो कोयी परमेश्वर ख छोड़ क अऊर कोयी अऊर देवता लायी बलि चढ़ाये ओको सत्यानाश करयो जाये।
EXO 22:21 “तुम कोयी परदेशी ख मत सताजो अऊर नहीं ओको पर अन्याय करजो, कहालीकि मिस्र देश म तुम भी परदेशी होतो।
EXO 22:22 कोयी विधवा यां अनाथ बच्चा ख दु:ख मत देजो।
EXO 22:23 यदि तुम असो ख कोयी तरह को दु:ख देवो अऊर हि मोरो सी मदत लायी रोवय, त मय निश्चय उन्की दोहाई सुनूं;
EXO 22:24 तब मोरो गुस्सा भड़केंन, त मय तुम ख तलवार सी मार डालूं, अऊर तुम्हरी पत्नी विधवा अऊर तुम्हरो बच्चा अनाथ होय जायेंन।
EXO 22:25 “यदि तय मोरो लोगों म सी कोयी गरीब आदमी ख जो तोरो संग रह्य हय पैसा उधार देजो त ओको सी साहुकार को जसो ब्याज नहीं लेजो।
EXO 22:26 यदि तय कभी अपनो भाऊ-बन्धु को कपड़ा ख गिरवी रख क रख भी ले, त सूरज को डुबन तक ओख लौटाय देजो;
EXO 22:27 कहालीकि ऊ ओको एकच चादर हय, ओको शरीर को उच एकच कपड़ा होयेंन, फिर ऊ कसो ओढ़ क सोयेंन? अऊर जब ऊ मोरी दोहाई देयेंन तब मय ओकी सुनूं, कहालीकि मय करुनामय आय।
EXO 22:28 “परमेश्वर ख दोष मत देजो, अऊर नहीं अपनो लोगों को मुखिया ख श्राप मत देजो।
EXO 22:29 “अपनो खेती की फसल अऊर फर को रस म सी मोख देन म देर मत करजो। अपनो टुरावों म सी पहिलौठा ख मोख देजो।
EXO 22:30 वसोच अपनी गाय अऊर मेंढी-शेरी को पहिलौठा भी देजो; सात दिन तक त बच्चा अपनी माय को संग रहेंन, अऊर आठवों दिन तय ओख मोख ख दे देजो।
EXO 22:31 “तुम मोरो लायी पवित्र लोग बनजो; यो वजह जो पशु मैदान म चिरयो हुयो पड़्यो मिलेंन ओको मांस मत खाजो, ओख कुत्ता को आगु फेंक देजो।
EXO 23:1 “झूठी बात मत फैलावो। अऊर झूठी गवाही दे क अन्यायी लोगों को साथ मत देजो।
EXO 23:2 बुरायी करन लायी बहुतों को पीछू मत पड़जो; अऊर न उन्को पीछू फिर क् मुकद्दमा म न्याय बिगाड़न लायी गवाही देजो;
EXO 23:3 अऊर गरीब को मुकद्दमा म ओको भी पक्ष मत लेजो।
EXO 23:4 “फिर यदि तोरो दुश्मन को बईल यां गधा भटकतो हुयो तोख मिलेंन, त ओख ओको जवर जरूर वापस ले आजो।
EXO 23:5 फिर यदि तय अपनो दुश्मन को गधा ख बोझ को मारे दब्यो हुयो देखो, तब भी जरूर मालिक की मदत कर क् ओख छुड़ाय लेजो करजो।
EXO 23:6 “तोरो लोगों म सी जो गरीब हय ओको मुकद्दमा म न्याय मत बिगाड़जो
EXO 23:7 झूठो मुकद्दमा सी दूर रहजो, अऊर निर्दोष अऊर सच्चो ख घात मत करजो, कहालीकि मय बुरो ख निर्दोष नहीं ठहराऊं,
EXO 23:8 तय घुस नहीं लेजो, कहालीकि घुस आदमी ख सच सी अन्धो कर देवय अऊर सच्चो की न्याय बिगाड़ देवय हय।
EXO 23:9 “परदेशी पर जुलूम मत करजो; तुम त परदेशी को मन की बात जानय हय, कहालीकि तुम भी मिस्र देश म परदेशी होतो।
EXO 23:10 “छय साल तक अपनी जमीन म बीज बोवो अऊर ओकी फसल जमा करजो;
EXO 23:11 पर सातवों साल म ओख खाली रहन देजो अऊर वसोच छोड़ देजो, त गरीब लोग अऊर जो कुछ उन्को सी भी बच जायेंन त जंगली जनावर ख खान को काम म आये। अपनी अंगूर अऊर जैतून की बाड़ी सी भी असोच करजो।
EXO 23:12 छय दिन तक अपनो काम काज करजो, अऊर सातवों दिन आराम करजो ताकि तोरो बईल अऊर गधा सुस्तायेंन, अऊर तोरी सेविका को टुरा अऊर परदेशी ख भी आराम मिल सकेंन।
EXO 23:13 जो कुछ मय न तुम सी कह्यो हय ओको पालन करजो; अऊर अन्य देवतावों की नाम की चर्चा भी मत करजो, बल्की हि तुम्हरो मुंह सी सुनायी भी नहीं दे।
EXO 23:14 “हर साल तीन बार मोरो लायी त्यौहार मानजो।
EXO 23:15 पहिलो पवित्र त्यौहार अखमीरी रोटी को त्यौहार मनायजो; ओको म मोरी आज्ञा को अनुसार अबीब महीना को नियत समय पर सात दिन तक अखमीरी रोटी खायो करनो, कहालीकि ओको महीना म तुम लोग मिस्र देश सी निकल आये होतो। मोख कोयी खाली हाथ अपनो मुंह नहीं दिखाये।
EXO 23:16 जब तोरी बोयी हुयी खेत की पहिली फसल तैयार होना, तब कटनी को त्यौहार मनायजो। साल को आखरी म जब तय मेहनत की फसल जमा कर क् ढेर लगायजो, तब जमा करन को त्यौहार मनायजो।
EXO 23:17 हर साल तीनों बार तोरो सब लोग प्रभु परमेश्वर ख अपनो मुंह दिखाये।
EXO 23:18 “मोरो जनावर को बलिदान को खून खमीरी रोटी को संग नहीं चढ़ाजो, अऊर नहीं मोरो त्यौहार को उत्तम बलिदान म सी कुछ सुबेरे तक रहन देजो।
EXO 23:19 अपनो जमीन की पहिली फसल को पहिलो हिस्सा अपनो परमेश्वर यहोवा को भवन म ले आजो। शेरी को बच्चा ओकी माय को दूध म नहीं पकाजो।
EXO 23:20 “सुन, मय एक दूत तोरो आगु आगु भेजूं जो रस्ता म तोरी रक्षा करेंन, अऊर जो जागा ख मय न तैयार करयो हय उत तोख पहुंचायेंन।
EXO 23:21 ओको आगु सावधान रहजो, अऊर ओकी मानजो, ओको विरोध मत करजो, कहालीकि ऊ तोरो अपराध माफ नहीं करेंन; येकोलायी कि मोरो नाम ओको म हय।
EXO 23:22 यदि तय सचमुच मोरी आज्ञा मानेंन अऊर जो कुछ मय कहूं ऊ करय, त मय तोरो दुश्मनों को दुश्मन अऊर तोरो बैरियों को बैरी बनूं।
EXO 23:23 जब मोरो दूत आगु चल क तोख एमोरी, हित्ती, परिज्जी, कनानी, हिब्बी, अऊर यबूसी लोगों को यहां पहुंचायेंन, अऊर मय उन्ख सत्यानाश कर डालूं।
EXO 23:24 उन्को देवतावों ख दण्डवत मत करजो, अऊर नहीं उन्की आराधना करजो, अऊर नहीं उन्को सी काम करजो, बल्की उन मूर्तियों को पूरी रीति सी सत्यानाश कर डालजो, अऊर उन लोगों को खम्बा को तुकड़ा तुकड़ा कर देजो।
EXO 23:25 तय अपनो परमेश्वर यहोवा की आराधना करजो, तब ऊ तोरो भोजन अऊर पानी पर आशीष देयेंन, अऊर तोरो बीच म सी रोग दूर करेंन।
EXO 23:26 तोरो देश म नहीं त कोयी को गर्भ गिरेंन अऊर नहीं कोयी बांझ रहेंन; अऊर तोरी उमर को दिन मय पूरो करूं।
EXO 23:27 जितनो लोगों को बीच तय जाजो उन सब को मन म मय अपनो डर पहिले सी असो समाय देऊं कि उन्ख परेशान कर देऊं, अऊर मय तोख सब दुश्मन ख वापस जान लायी विवश कर देऊं।
EXO 23:28 अऊर मय तोरो सी पहिले गंदनल ख भेजूं जो हिब्बी, कनानी, अऊर हित्ती लोगों ख तोरो आगु सी भगाय क दूर कर देयेंन।
EXO 23:29 मय उन्ख तोरो आगु सी एकच साल म नहीं निकालूं, असो नहीं होय कि देश उजाड़ होय जाये, अऊर जंगली जनावर बढ़ क तोरी हानि करेंन।
EXO 23:30 जब तक तय बढ़ क देश पर अपनो अधिकार नहीं कर ले तब तक मय उन्ख तोरो आगु सी थोड़ो थोड़ो कर क् निकालतो रहूं।
EXO 23:31 मय तोरी सीमा लाल समुन्दर सी ले क पलिश्तियों को समुन्दर तक अऊर जंगल सी ले क फरात नदी तक को देश ख तोरो वश म कर देऊं; मय ऊ देश को निवासियों ख भी तोरो वश म कर देऊं, अऊर तय उन्ख अपनो जवर सी निकाल देयेंन।
EXO 23:32 तय नहीं त उन्को सी वाचा बान्धजो अऊर नहीं उन्को देवतावों सी।
EXO 23:33 हि तोरो देश म नहीं रहनो पाये, असो नहीं होय कि हि तोरो सी मोरो खिलाफ पाप करायेंन; यदि तय उन्को देवतावों की आराधना करे त यो तोरो लायी फन्दा बनेंन।”
EXO 24:1 परमेश्वर न मूसा सी कह्यो, “तय हारून, नादाब, अबीहू, अऊर इस्राएलियों को सत्तर बुजूर्गों को संग परमेश्वर को जवर ऊपर आय क दूर सी आराधना करजो।
EXO 24:2 केवल मूसा परमेश्वर को जवर आयेंन, पर हि जवर नहीं आये, अऊर दूसरो लोग तोरो संग ऊपर नहीं आये।”
EXO 24:3 मूसा न लोगों को जवर जाय क परमेश्वर की पूरी बात अऊर नियम सुना दियो। तब सब लोग एक आवाज म बोल्यो, “जितनो बात परमेश्वर न कह्यो हंय उन सब बात ख हम मानबों।”
EXO 24:4 तब मूसा न परमेश्वर को सब वचन लिख दियो; अऊर बहुत सुबेरे उठ क पहाड़ी को खल्लो एक वेदी अऊर इस्राएल को बारा कुल को अनुसार बारा खम्बा भी बनायो।
EXO 24:5 तब ओन इस्राएली जवानों ख भेज्यो, जिन्न परमेश्वर लायी होमबलि अऊर जनावर की मेलबलि चढ़ायी।
EXO 24:6 अऊर मूसा न अरधो खून ले क कटोरा म रख्यो, अऊर अरधो वेदी पर छिड़क दियो।
EXO 24:7 तब वाचा की किताब ख ले क लोगों ख पढ़ क सुनायो; ओख सुन क उन्न कह्यो, “जो कुछ परमेश्वर न कह्यो हय ऊ सब ख हम करबो, अऊर ओकी आज्ञा मानबो।”
EXO 24:8 तब मूसा न खून ले क लोगों पर छिड़क्यो, अऊर उन सी कह्यो, “देखो, यो ऊ वाचा को खून आय, जेख परमेश्वर न इन सब वचनों पर तुम्हरो संग बान्धी हय।”
EXO 24:9 तब मूसा, हारून, नादाब, अबीहू अऊर इस्राएलियों को सत्तर बुजूर्ग लोग ऊपर पहाड़ी पर चढ़ गयो,
EXO 24:10 अऊर इस्राएल को परमेश्वर को दर्शन करयो; अऊर ओको पाय को खल्लो नीलमनि को चौरंग को जसो कुछ होतो, जो आसमान को समान साफ होतो।
EXO 24:11 अऊर ओन इस्राएलियों को मुखियावों पर हाथ नहीं बढ़ायो; तब उन्न परमेश्वर को दर्शन करयो, अऊर खायो पीयो।
EXO 24:12 तब परमेश्वर न मूसा सी कह्यो, “पहाड़ी पर मोरो जवर चढ़ आव, अऊर वहां मोरी बाट देखजो; अऊर मय तोख गोटा की पट्टियां, अऊर अपनी लिखी हुयी व्यवस्था अऊर आज्ञा देऊं कि तय उन्ख सिखाजो।”
EXO 24:13 तब मूसा यहोशू नाम को अपनो सेवक को संग परमेश्वर की पहाड़ी पर चढ़ गयो।
EXO 24:14 अऊर बुजूर्गों सी यो कह्यो गयो, “जब तक हम तुम्हरो जवर फिर नहीं आबो तब तक तुम यहांच हमरी बाट देखत रहो; अऊर सुनो, हारून अऊर हूर तुम्हरो संग हंय; यदि कोयी को मुकद्दमा हय त उन्कोच जवर जाये।”
EXO 24:15 तब मूसा पहाड़ी पर चढ़ गयो, अऊर बादर न पहाड़ी ख छाय लियो।
EXO 24:16 तब परमेश्वर को तेज न सीनै पहाड़ी पर निवास करयो, अऊर ऊ बादर ओको पर छय दिन तक पहाड़ी पर छायो रह्यो; अऊर सातवों दिन ओन मूसा ख बादर को बीच म सी बुलायो।
EXO 24:17 इस्राएलियों की नजर म परमेश्वर को तेज पहाड़ी की सेंडी पर भस्म करनवाली आगी को समान दिखायी देत होतो।
EXO 24:18 तब मूसा बादर को बीच जाय क पहाड़ी पर चढ़ गयो। अऊर पहाड़ी पर चालीस दिन अऊर चालीस रात रह्यो।
EXO 25:1 परमेश्वर न मूसा सी कह्यो,
EXO 25:2 “इस्राएलियों सी यो कहजो कि मोरो लायी भेंट लाये; जितनो अपनी इच्छा सी देनो चाहेंन उन सभी सी मोरी भेंट लेजो।
EXO 25:3 अऊर जिन चिजों की भेंट उन्को सी लेनो हय हि यो आय; मतलब सोना, चांदी अऊर पीतल,
EXO 25:4 नीलो, जामुनी अऊर लाल रंग को कपड़ा, पतलो सूत सी बुन्यो कपड़ा, शेरी को बाल,
EXO 25:5 लाल रंग सी रंगी हुयो मेंढी की खाल, सुईसों की खाल, बबूल की लकड़ी,
EXO 25:6 दीया लायी तेल, अभिषेक को तेल लायी अऊर सुगन्धित धूप लायी सुगन्ध मसाला,
EXO 25:7 एपोद पोशाक अऊर ओको ऊपर पहिनन वालो चपरास लायी सुलैमानी गोटा, अऊर जड़न लायी मनि।
EXO 25:8 अऊर हि मोरो लायी एक पवित्र जागा बनाये कि मय उन्को बीच निवास करूं।
EXO 25:9 जो कुछ मय तोख दिखाऊ हय, मतलब रहन की जागा अऊर ओको सब सामान को नमुना, ओकोच अनुसार तुम लोग ओख बनावो।”
EXO 25:10 बबूल की लकड़ी को एक सन्दूक बनायो जाये; ओकी लम्बायी ढायी हाथ, अऊर चौड़ायी अऊर ऊंचायी देड़ देड़ हाथ की होना।
EXO 25:11 अऊर ओख शुद्ध सोनो सी अन्दर अऊर बाहेर मढ़वाजो, अऊर सन्दूक को ऊपर चारयी तरफ सोनो की किनार बनायजो।
EXO 25:12 अऊर सोनो को चार कड़ा साचा सी ढाल क बनायजो ओको चारयी पाय पर, एक तरफ दोय कड़ा अऊर दूसरो तरफ दोय कड़ा लगाजो।
EXO 25:13 फिर बबूल की लकड़ी को डन्डा बनवाजो, अऊर उन्ख भी सोनो सी मढ़ो।
EXO 25:14 अऊर डन्डा ख सन्दूक को दोयी तरफ को कड़ा म डालजो, जेकोसी उन्को सहारा सी सन्दूक ख उठायो जाये सके।
EXO 25:15 हि डन्डा सन्दूक को कड़ा म लग्यो रहेंन; अऊर ओको सी अलग नहीं करयो जाये।
EXO 25:16 अऊर जो गवाही चिट्ठी मय तोख देऊं ओख उच सन्दूक म रखजो।
EXO 25:17 “फिर शुद्ध सोनो को एक पश्चाताप को ढक्कन बनवाजो; ओकी लम्बायी ढायी हाथ, अऊर चौड़ायी देड़ हाथ की होना।
EXO 25:18 अऊर सोना ढाल क दोय करूब बनाय क पश्चाताप को ढक्कन को दोयी कोना पर लगवाजो।
EXO 25:19 एक करूब एक कोना पर अऊर दूसरो करूब दूसरो कोना पर लगवाजो; करूबों ख दया आसन को ढक्कन ख एकच तुकड़ा सी बनाय क ओको दोयी कोना पर लगवायजो।
EXO 25:20 उन करूबों को पंखा ऊपर सी असो फैल्यो हुयो बने कि पश्चाताप को ढक्कन उन सी ढक्यो रहे, अऊर उन्को मुख आमने-सामने अऊर दया आसन को ढक्कन को तरफ रहे।
EXO 25:21 अऊर पश्चाताप को ढक्कन ख सन्दूक को ऊपर लगवाजो; अऊर जो गवाही चिट्ठी मय तोख देऊं ओख सन्दूक को अन्दर रखजो।
EXO 25:22 मय वहां रह्य क तोरो सी मिलतो रहूं; अऊर इस्राएलियों लायी जितनी आज्ञाये मोख ख तोख देनो होय, उन सभी को बारे म पश्चाताप को ढक्कन को ऊपर सी अऊर उन करूबों को बीच म सी, जो गवाही चिट्ठी को सन्दूक पर होना, तोरो सी बात-चित करतो रहूं।”
EXO 25:23 “फिर बबूल की लकड़ी की एक टेबल बनायजो; ओकी लम्बायी दोय हाथ, चौड़ायी एक हाथ, अऊर ऊंचायी देड़ हाथ की होना।
EXO 25:24 ओख शुद्ध सोनो सी मढ़ायजो, अऊर ओको चारयी तरफ सोनो की एक किनार बनायजो
EXO 25:25 अऊर ओको चारयी तरफ चार बोट चौड़ी चौखट बनायजो, अऊर यो चौखट को चारयी तरफ सोनो की एक किनार बनायजो।
EXO 25:26 अऊर सोनो को चार कड़ा बनवाय क टेबल को उन चारयी कोना म लगायजो जो ओको चारयी पाय म होयेंन।
EXO 25:27 हि कड़ा चौखट को जवरच होना, अऊर जेकोसी टेबल डन्डा को सहारा सी उठायो जाय सके।
EXO 25:28 बबूल की लकड़ी को डन्डा बनाय क सोनो सी मढ़वाजो, टेबल उन्को सीच उठायो जाये।
EXO 25:29 अऊर ओको परात अऊर धूपदान, अऊर मग्गा अऊर कुड़ावन को कटोरा, सब शुद्ध सोनो को बनायजो।
EXO 25:30 अऊर टेबल पर मोरो आगु भेंट की रोटी हमेशा रखजो।”
EXO 25:31 “फिर शुद्ध सोना को एक दीया बनायजो। सोनो ढाल क ऊ दीया पाया अऊर डन्डी सहित बनायो जाये; ओकी पंखुड़ी, गाठ, अऊर फूल, एकच तुकड़ा की बनी होना;
EXO 25:32 अऊर ओको किनार सी छय डन्डी निकली हो, तीन त दीवट को एक तरफ सी अऊर तीन ओको दूसरी तरफ सी निकली हुयी हो;
EXO 25:33 हर एक डगाली म बादाम को फूल को जसो तीन तीन पुष्पकोष, एक एक गांठ, अऊर एक एक फूल हो; दीया सी निकली हुयी छय डगालियों को योच आकार अऊर रूप हो;
EXO 25:34 अऊर खड़ो दीवट की डन्डी म बादाम को फूल को समान चार कटोरी अपनी पंकुड़ी फूल समेत हो;
EXO 25:35 अऊर दीया सी निकली हुयी छय डगालियों म सी एक बाजू तीन अऊर दूसरो बाजू तीन असो डन्डी हो, हि दीवट समेत एकच तुकड़ों को बन्यो हुयो हो।
EXO 25:36 उन्की पंकुड़ी अऊर डगाली सब दीया समेत एकच तुकड़ों की शुद्ध सोनो सी बनी हो।
EXO 25:37 अऊर सात दीया बनवाजो, अऊर दीया जलाय क दीवट पर रखजो कि उजाड़ो आगु दिखेंन।
EXO 25:38 अऊर ओको चिमटा अऊर गुलदान सब शुद्ध सोनो को हो।
EXO 25:39 ऊ सब पूरो सामान लगभग पैतीस किलो शुद्ध सोनो सी बनें।
EXO 25:40 अऊर ध्यान सी इन सब चीजो ख जसो बतायो हय वसोच बनायजो, जो तोख या पहाड़ी पर दिखायो होतो।”
EXO 26:1 परमेश्वर न मूसा सी कह्यो, फिर निवास जागा लायी दस परदा बनायजो; इन्को पतलो धागा को बिन्यो हुयो नीलो, जामुनी अऊर लाल रंग को कपड़ा को बुन्यो हुयो करूबों को चित्र संग बनायजो।
EXO 26:2 हर एक परदा की लम्बायी अट्ठावीस फीट अऊर चौड़ायी चार फीट की हो, सब परदा एकच नाप को हो।
EXO 26:3 पाच परदा एक दूसरो सी जोड़्यो हुयो हो; अऊर फिर जो पाच परदा रहेंन हि भी एक दूसरो सी जुड़्यो हुयो हो।
EXO 26:4 अऊर जित या दोयी परदा जोड़्यो जाये उत को दोयी कोना पर नीलो नीलो फन्दा लगायजो।
EXO 26:5 दोयी कोना म पचास पचास फन्दा असो लगवायजो कि हि आमने-सामने हो।
EXO 26:6 अऊर सोनो को पचास गोल कड़ी बनायजो; अऊर जोड़्यो हुयो परदा ख इन कड़ी सी जोड़ देजो जेकोसी पूरो निवास जागा एक बन जाये।
EXO 26:7 “फिर निवास को ऊपर तम्बू लायी बकरा को बाल को ग्यारा परदा बनवाजो।
EXO 26:8 हर एक परदा की लम्बायी तीस हाथ अऊर चौड़ायी चार हाथ हो, असो ग्यारा परदा एकच नाप को हो।
EXO 26:9 अऊर पाच परदा को एक जोड़ अऊर फिर छय परदा को दूसरो जोड़ अलग जोड़जो, अऊर छठवो परदा ख तम्बू को आगु मोड़ क डबल कर क् लटकाय देजो।
EXO 26:10 अऊर तय पचास कड़ी उच परदा को कोना म अऊर पचास कड़ी दूसरी तरफ को परदा को कोना म जो बाहेर सी मिलाय क बनवायजो।
EXO 26:11 अऊर पीतल को पचास कड़ा बनाजो, अऊर कड़ा ख फन्दा म लगाय क तम्बू ख असो जोड़जो कि ऊ मिल क एक होय जाये।
EXO 26:12 अऊर तम्बू को परदा को लटक्यो हुयो हिस्सा, यानेकि जो अरधो बच्यो रहेंन, ऊ निवास-जागा की पिछली तरफ लटक्यो रहेंन।
EXO 26:13 अऊर तम्बू को परदा की लम्बायी म सी हाथ भर इत, अऊर हाथ भर उत निवास-जागा को ढकन लायी ओको दोयी तरफ लटक्यो हुयो रहो।
EXO 26:14 फिर तम्बू लायी लाल रंग सी रंगी हुयो मेंढी की खाल को एक ओढ़नो अऊर ओको ऊपर सुइसों की खाल को भी एक ओढ़नो बनायजो।”
EXO 26:15 “फिर निवास-जागा ख खड़ो करन लायी बबूल की लकड़ी को चौखट बनायजो।
EXO 26:16 हर एक तक्ता की लम्बायी दस हाथ अऊर चौड़ायी देढ़ हाथ की हो।
EXO 26:17 हर एक तक्ता म एक दूसरो सी जोड़ी हुयी दोय दोय खाचा हो; निवास-जागा को सब तक्ता ख येको भाति सी बनवायजो।
EXO 26:18 निवास-जागा लायी जो तक्ता तय बनवायजो उन्म सी बीस तक्ता त दक्षिन की तरफ लायी हो;
EXO 26:19 अऊर बीस तक्तां को नीचो चांदी की चालीस आधार-तक्ता बनाजो, मतलब एक एक तक्तां को नीचो ओको खाचा लायी दोय दोय आधार-तक्ता बनवाजो।
EXO 26:20 निवास को दूसरी तरफ, मतलब उत्तर की तरफ लायी बीस तक्तां बनवायजो;
EXO 26:21 अऊर उन्को लायी चांदी की चालीस आधार-तक्ता बनवायजो, मतलब एक एक तक्तां को नीचो दोय दोय हो।”
EXO 26:22 निवास को पीछू तरफ, मतलब पश्चिम की तरफ लायी छय तक्तां बनवायजो।
EXO 26:23 अऊर पिछलो हिस्सा म निवास को कोना लायी दोय तक्तां बनवायजो;
EXO 26:24 अऊर या नीचो सी दोय दोय हिस्सा को हो, अऊर दोयी हिस्सा ऊपर को कोना तक एक एक कड़ा म मिलाये जाये; दोयी तक्तां को योच रूप हो; या दोयी कोनो लायी आय।
EXO 26:25 अऊर आठ तक्ता हो, अऊर उन्की चांदी की आधार-तक्ता हो, मतलब एक एक तक्ता को नीचो दोय दोय हो।
EXO 26:26 “तब बबूल की लकड़ी को डन्डा बनायजो, मतलब निवास को एक तरफ को तक्तां लायी पाच,
EXO 26:27 अऊर निवास को दूसरी तरफ को तक्तां लायी पाच डन्डा अऊर निवास को जो भाग पश्चिम की तरफ पीछू भाग म होयेंन, ओको लायी पाच बेंड़े बनायजो।”
EXO 26:28 बीच वालो डन्डा जो तक्तां को बीच म होयेंन ऊ तम्बू को एक कोना सी दूसरो कोना तक जायेंन।
EXO 26:29 तक्तां ख सोनो सी मढ़वाजो, अऊर उन्को कड़ां जो डन्डा को सहारा को काम देयेंन उन्ख भी सोनो सी बनवाजो, अऊर बेंड़ा ख भी सोनो सी मढ़वायजो।
EXO 26:30 अऊर निवास की जागा ख असो रीति सी खड़ो करजो जसो पहाड़ी पर तोख दिखायो गयो हय।
EXO 26:31 “तब नीलो, जामुनी अऊर लाल रंग को पतलो धागा सी बुन्यो हुयो कपड़ा को एक बीच वालो परदा बनायजो; ओको पर करूबों को चित्र बुन क बनायजो।”
EXO 26:32 अऊर ओख सोनो सी मढ़यो हुयो बबूल को चार खम्बां पर लटकायजो, इन्की खूटी सोनो की हो, अऊर या चांदी की चार आधार-तक्ता पर लगी हुयो, सोनो को छल्ला म फस्यो होन ख होना।
EXO 26:33 अऊर बीच वालो परदा ख खूटी को नीचो लटकाय क, ओकी आड़ म साक्षी पत्र को सन्दूक अन्दर ले जानो, यो तरह ऊ बीच वालो परदा तुम्हरो लायी पवित्र जागा ख परम पवित्र जागा सी अलग करयो रहेंन।
EXO 26:34 फिर परम पवित्र जागा म गवाही चिट्ठी को सन्दूक को ऊपर पश्चाताप को ढक्कन ख रखजो।
EXO 26:35 अऊर ऊ परदा को बाहेर निवास को उत्तर को तरफ मेज रखजो; अऊर ओको दक्षिन तरफ मेज को आगु दीवट ख रखजो।
EXO 26:36 फिर तम्बू को द्वार लायी नीलो, जामुनी अऊर लाल रंग को अऊर पतलो धागा सी बुन्यो हुयो एक परदा बनवायजो।
EXO 26:37 अऊर यो परदा लायी बबूल को पाच खम्बा बनायजो, अऊर उन्ख सोनो सी मढ़वाना; उन्को कड़ां सोनो की हो, अऊर उन्को लायी पीतल की पाच तक्ता ढलवाय क बनायजो।
EXO 27:1 परमेश्वर न मूसा सी कह्यो, “तब वेदी ख बबूल की लकड़ी सी, पाच हाथ लम्बी अऊर पाच हाथ चौड़ी बनायजो; वेदी चौकोन हो, अऊर ओकी ऊंचायी तीन हाथ की हो।
EXO 27:2 अऊर ओको चारयी कोनो पर चार सींग बनायजो; हि ओको सहित एकच तुकड़ा को हो, अऊर ओख पीतल सी मढ़वायजो।
EXO 27:3 अऊर ओकी राख उठान को सुपड़ी, अऊर पावड़ा, अऊर कटोरा, अऊर दोय दाती पावड़ा, अऊर आगी सामान बनायजो; ओको सब सामान पीतल को होना।
EXO 27:4 ओको लायी पीतल की एक जाली बनायजो; अऊर ओको चारयी कोनो पर पीतल को चार कड़ा लगवायजो।
EXO 27:5 अऊर वा जाली ख वेदी को चारयी तरफ की मेज को नीचो असो लगवायजो कि ऊ वेदी की ऊचायी को बीच तक पहुंच्यो।
EXO 27:6 अऊर वेदी लायी बबूल की लकड़ी को डन्डा बनायजो, अऊर उन्ख पीतल सी मढ़वाजो।
EXO 27:7 अऊर डन्डा ख कड़ों म असो डाले कि जब वेदी उठायी जाये तब हि ओको दोयी किनार पर रह्य सके।
EXO 27:8 वेदी ख तक्तों सी खोखली बनवायजो; जसी ऊ पहाड़ी पर तोख दिखायो होतो वसोच बनवाजो।”
EXO 27:9 “फिर निवास को आंगन ख बनायजो। ओको दक्षिन की तरफ लायी पतलो धागा बिन्यो हुयो कपड़ा को परदा हो, ओकी लम्बायी सौव हाथ की होय; एक किनार पर इतनोच हो।
EXO 27:10 अऊर उन्को लायी बीस खम्बा बनेंन, अऊर इन्को लायी पीतल की बीस तक्ता होना, अऊर खम्बा को कुन्दा अऊर उन्की पट्टियां चांदी की होना।
EXO 27:11 अऊर उच तरह आंगन को उत्तर की तरफ की लम्बायी म भी सौ हाथ लम्बो परदा होना, अऊर उन्को लायी भी बीस खम्बा अऊर इन्को लायी भी पीतल को बीस खाना होना; अऊर उन खम्बों को कुन्दा अऊर पट्टियां चांदी की होना।
EXO 27:12 फिर आंगन की चौड़ायी म पश्चिम की तरफ पचास हाथ को परदा हो, उन्को लायी खम्बा दस अऊर खानो भी दस हय।
EXO 27:13 पूर्व की तरफ आंगन की चौड़ायी पचास हाथ की होना।
EXO 27:14 आंगन को फाटक की एक तरफ पन्द्रा हाथ को परदा हय, अऊर उन्को लायी खम्बा तीन अऊर खाना तीन होना;
EXO 27:15 अऊर दूसरी तरफ भी पन्द्रा हाथ को परदा हो, उन्को लायी भी खम्बा तीन अऊर खाना तीन होना।
EXO 27:16 आंगन को फाटक लायी एक परदा बनायजो, जो नीलो, जामुनी अऊर लाल रंग को कपड़ा अऊर पतलो बुन्यो हुयो सूती कपड़ा सी बन्यो होयेंन, ओको लायी खम्बा चार अऊर खाना भी चार होना।
EXO 27:17 आंगन को चारयी तरफ को सब खम्बां चांदी की पट्टियां सी जुड़्यो हुयो हो, उन्को कुन्दा चांदी को अऊर खाना पीतल को हो।
EXO 27:18 आंगन की लम्बायी सौ हाथ की अऊर ओकी चौड़ायी सब जागा पचास हाथ की हो, ओको परदा की ऊचायी पाच हाथ की हो, तब ऊ पतलो बुन्यो हुयो सूती कपड़ा सी बन्यो हो, खम्बों को खाना पीतल को होना।
EXO 27:19 निवास जागा को अलग अलग तरह को बर्तन अऊर सब सामान अऊर ओको सब खूटा अऊर आंगन को भी सब खूटा पीतल को हो।
EXO 27:20 “तब तय इस्राएलियों ख आज्ञा देजो, कि मोरो जवर दीया लायी पीस क निकाल्यो हुयो जैतून को शुद्ध तेल ले आजो, जेकोसी दीया हमेशा जलतो रहेंन।
EXO 27:21 परमेश्वर को उपस्थिति को तम्बू म, उच बीच वालो परदा सी बाहेर जो साक्षी चिट्ठी को आगु होयेंन, हारून अऊर ओको टुरा दीया शाम सी सुबेरे तक परमेश्वर को आगु सजाय क रखो। या विधि इस्राएलियों की पीढ़ियों लायी हमेशा बन्यो रहेंन।”
EXO 28:1 “तब तय इस्राएलियों म सी अपनो भाऊ हारून, अऊर नादाब, अबीहू, एलीआजार अऊर ईतामार नाम को ओको टुरावों ख अपनो जवर ले आजो कि हि मोरो लायी याजक को काम करेंन।
EXO 28:2 अऊर तय अपनो भाऊ हारून लायी वैभव अऊर शोभा को लायी पवित्र कपड़ा बनाजो।
EXO 28:3 अऊर जितनो बुद्धि वालो कारागिर हय, जिन्ख मय न बुद्धि देन वाली आत्मा सी परिपूर्न करयो हय, उन्को तय हारून को कपड़ा बनान की आज्ञा दे कि ऊ मोरो लायी याजक को काम करन लायी पवित्र बनो।
EXO 28:4 जो कपड़ा उन्ख बनानो होयेंन हि यो हंय, मतलब सीनाबन्द, अऊर एपोद पोशाक, अऊर बागा, चारखाने को अंगरखा, फेटा अऊर कमर पट्टा; योच पवित्र कपड़ा तोरो भाऊ हारून अऊर ओको टुरावों लायी बनाये जाये कि हि मोरो लायी याजक को काम करेंन।
EXO 28:5 अऊर हि सोनो अऊर नीलो अऊर जामुनी अऊर लाल रंग को अऊर पतलो धागा सी बुन्यो हुयो कपड़ा ले।
EXO 28:6 “हि एपोद ख सोनो अऊर नीलो, जामुनी अऊर लाल रंग को कपड़ा को अऊर पतलो धागा सी बिन्यो हुयो कपड़ा बनाये, जो कि निपुनता सी बुनायी को काम करन वालो को हाथ को काम हो।
EXO 28:7 ऊ यो तरह सी जोड़्यो जाये कि ओको दोयी कन्धों को कोना आपस म मिल्यो रहेंन।
EXO 28:8 अऊर एपोद पर जो ओख पर निपुनता सी बुन्यो हुयो कमर पट्टा होयेंन, ओकी बनावट ओकोच समान हो, अऊर हि दोयी बिना जोड़ को हो, अऊर सोनो अऊर नीलो, जामुनी अऊर लाल रंग वालो अऊर पतलो धागा सी बुन्यो हुयो कपड़ा को हो।
EXO 28:9 फिर दोय सुलैमानी मनि ले क उन पर इस्राएल लोगों को टुरावों को नाम खुदवायजो।
EXO 28:10 उन्को नामों म सी छय एक मनि पर अऊर शेष छय नाम दूसरो मनि पर, इस्राएल को टुरावों की जनम को अनुसार खुदवायजो।
EXO 28:11 मनि खोदन वालो को काम को समान जसो छापा खोद्यो जावय हय, वसोच उन दोय मनियों पर इस्राएल लोगों को टुरावों को नाम मनि पर खुदवायजो; अऊर उन्को सोनो को खाना म जड़वाय देजो।
EXO 28:12 अऊर दोयी मनियों ख एपोद को कन्धों पर लगायजो, हि इस्राएलियों को याद दिलावन वाली मनि ठहरेंन; मतलब हारून उन्को नाम परमेश्वर को आगु अपनो दोयी कन्धों पर याद लायी लगायो रखेंन।
EXO 28:13 “तब सोनो को खाना बनायजो,
EXO 28:14 अऊर डोरियों को समान गूथ्यो हुयो दोय संकली शुद्ध सोनो को बनायजो; अऊर गूथ्यो हुयो संकलियों ख उन खाना म फसाय देजो।
EXO 28:15 “तब न्याय की चपरास ख भी बुनायी को काम को बनायजो, एपोद को समान सोनो, अऊर नीलो, जामुनी अऊर लाल रंग को अऊर पतलो धागा सी बिन्यो हुयो कपड़ा की ओख बनायजो।
EXO 28:16 ऊ चौकोन अऊर डबल हो, अऊर ओकी लम्बायी अऊर चौड़ायी एक एक बिल्लस की हो।
EXO 28:17 अऊर ओको म चार लायीन मनि जोड़जो। पहिली लायीन म त माणिक्य, पुखराज अऊर लालड़ी हो;
EXO 28:18 दूसरी लायीन म मरकत, नीलमनि अऊर हीरा :
EXO 28:19 तीसरी लायीन म लशम, सूर्यकान्त अऊर नीलम;
EXO 28:20 अऊर चौथी लायीन म फीरोज़ा, सुलैमानी मनि अऊर यशब हो; यो सब सोनो को खाना म जड़्यो जाये।
EXO 28:21 अऊर इस्राएल लोग को टुरावों को जितनो नाम हंय उतनो मनि हो, मतलब ओको नामों की गिनती को अनुसार बारा नाम खुदें, बारा वंशों म सी एक एक को नाम एक एक मनि पर असो खुद्यो जसो छाप खोद्यो जावय हय।
EXO 28:22 तब चपरास पर डोरियों को समान गूंथ्यो हुयो शुद्ध सोनो की संकली लगायजो;
EXO 28:23 अऊर चपरास म सोनो की दोय कड़ियां लगवायजो, अऊर दोयी कड़ियों ख चपरास को दोयी कोनो पर लगवायजो।
EXO 28:24 अऊर सोनो को दोयी गूंथ्यो संकली ख उन दोयी कड़ियों म जो चपरास को कोनो पर होयेंन लगवायजो;
EXO 28:25 अऊर गूंथ्यो हुयो दोयी संकली को दोयी बाकी कोनो ख दोयी खानों म जड़वाय क एपोद को दोयी कन्धों को बन्धनों पर ओको आगु लगवायजो।
EXO 28:26 तब सोनो की दोय अऊर कड़ियां बनाय क चपरास को दोयी कोनो पर, ओकी उच कोना पर जो एपोद को अन्दर की तरफ होयेंन लगायजो।
EXO 28:27 तब उन्को सिवाय सोनो की दोय अऊर कड़ियां बनाय क एपोद को दोयी कन्धों को बन्धनों पर, नीचो सी ओको आगु अऊर ओको जोड़ को जवर एपोद को अच्छो सी बन्यो हुयो पट्टे को ऊपर लगवायजो।
EXO 28:28 अऊर चपरास अपनी कड़ियों को द्वारा एपोद की कड़ियों म नीलो फीते सी बान्धी जाये या रीति ऊ एपोद को काढ़यो हुयो अच्छो सी बिन्यो हुयो पट्टे झूलतो रहेंन, अऊर चपरास एपोद पर सी अलग नहीं होन पाये।
EXO 28:29 जब जब हारून पवित्र जागा म सिरयो करेंन, तब तब ऊ न्याय की चपरास पर अपनो दिल को ऊपर इस्राएलियों को नामों ख लगाये रहेंन, जेकोसी परमेश्वर को आगु उन्को याद हमेशा रहेंन।
EXO 28:30 अऊर तय न्याय की चपरास म ऊरीम अऊर तुम्मीम ख रखजो, अऊर जब जब हारून परमेश्वर को आगु आये, तब तब हि ओको दिल को ऊपर हो, यो तरह हारून इस्राएलियों लोगों लायी परमेश्वर को न्याय ख अपनो दिल को ऊपर हमेशा लगाये रहेंन।
EXO 28:31 “तब एपोद को पोशाक ख पूरो नीलो रंग को बनायजो।
EXO 28:32 ओकी बनावट असी हो कि ओको बीच म मुंड डालन लायी छेद हो अऊर ओको चारयी तरफ कपड़ा की कालर को जसी गोट बनायजो मतलब पोशाक को ऊ भाग फटनो नहीं पाये।
EXO 28:33 ओको खल्लो को घेरा म चारयी तरफ नीलो, जामुनी अऊर लाल रंग को कपड़ा को अनार जसो गोल बनायजो, अऊर ओको बीच चारयी तरफ सोनो को घन्टी लगवाना,
EXO 28:34 मतलब एक सोनो को घन्टी अऊर एक अनार, लगातार योच रीति सी पोशाक को खल्लो वालो घेरा म चारयी तरफ असोच होना।
EXO 28:35 अऊर हारून उच पोशाक ख याजक को काम करतो समय पहिने, कि जब जब ऊ पवित्र जागा को अन्दर परमेश्वर को आगु जायेंन यां बाहेर निकलेंन, तब तब ओको आवाज सुनायी दे, नहीं त ऊ मर जायेंन।
EXO 28:36 “शुद्ध सोनो की एक पट्टी बनाना, अऊर जसो मुहर म अक्षर खोद्यो जावय हय वसोच ओको पर ‘परमेश्वर लायी पवित्र अक्षर खोद्यो जाये।’
EXO 28:37 अऊर ओख नीलो फीते सी बान्धजो; अऊर ऊ फेटा को आगु को भाग पर रहेंन।
EXO 28:38 ऊ हारून को मस्तक पर रहेंन, येकोलायी कि इस्राएली जो कुछ पवित्र ठहराये, मतलब जितनो पवित्र चीजो भेंट म चढ़ायो उन पवित्र चीजो को दोष हारून उठाये रहेंन, अऊर ऊ हमेशा ओको मस्तक पर रहेंन, जेकोसी परमेश्वर उन्को सी खुश रहेंन।
EXO 28:39 “अंगरखा ख महीन सूती को कपड़ा चारखाना वालो बनायजो, अऊर एक फेटा भी महीन सूती कपड़ा को बनायजो, अऊर रस्सी जसो बन्यो हुयो एक कमर बन्द भी बनायजो।
EXO 28:40 “तय हारून को टुरावों लायी भी कपड़ा अऊर कमर बन्द अऊर टोपियां बनायजो; यो कपड़ा भी वैभव अऊर शोभा लायी बनेंन।
EXO 28:41 अपनो भाऊ हारून अऊर ओको टुरावों ख योच सब कपड़ा पहिनाय क उन्को अभिषेक अऊर संस्कार करजो, अऊर उन्ख पवित्र करजो कि हि मोरो लायी याजक को काम करेंन।
EXO 28:42 अऊर उन्को लायी सन को कपड़ा की चड्डी बनाजो जिन्कोसी उन्को शरीर झक्यो रहेंन, हि कमर सी जांघ तक लम्बी हो;
EXO 28:43 अऊर जब जब हारून यां ओको टुरा मिलाप वालो तम्बू म सिरेंन, यां पवित्र जागा म याजक को काम करन को वेदी को जवर जाये, तब तब हि चड्डी ख पहिने रहेंन, नहीं त हि दोषी ठहरेंन अऊर मर जाये। यो हारून लायी अऊर ओको बाद ओको वंश लायी भी हमेशा कि विधि ठहरे।
EXO 29:1 “उन्ख पवित्र करन ख जो काम तोख उन को संग करनो हय कि हि मोरो लायी याजक को काम करेंन, ऊ यो हय: एक निर्दोष बछड़ा अऊर दोय निर्दोष मेंढी लेजो,
EXO 29:2 अऊर अखमीरी रोटी, अऊर तेल सी सन्यो हुयो मैदा को अखमीरी सुवारी, अऊर तेल सी चुपड़ी हुयी अखमीरी पपड़ियां भी लेजो। यो सब गहूं को मैदा को बनायजो।
EXO 29:3 इन्को एक टोकनी म रख क उच टोकनी ख ओको बछड़ा अऊर उन दोयी मेंढी सहित जवर लायजो।
EXO 29:4 तब हारून अऊर ओको टुरावों ख मिलाप वालो तम्बू को फाटक को जवर सी लिजाय क पानी सी धुलायजो।
EXO 29:5 तब उन कपड़ा ख ले क हारून ख अंगरखा अऊर एपोद को पोशाक पहिनाजो, अऊर एपोद अऊर चपरास बान्धनो, अऊर एपोद को बनायो हुयो पट्टा भी बांधजो;
EXO 29:6 अऊर ओको मुंड पर फेटा रखजो, अऊर फेटा पर पवित्र मुकुट ख रखजो।
EXO 29:7 तब पवित्र तेल ले क ओको मुंड पर डाल क ओको अभिषेक करजो।
EXO 29:8 तब ओको टुरावों ख जवर लिजाय क उन्को अंगरखा पहिनाजो,
EXO 29:9 अऊर उन्को मतलब हारून अऊर ओको टुरावों को कमर बान्धजो अऊर उन्को मुंड पर टोपियां रखजो; जेकोसी याजक को पद पर हमेशा उन्को अधिकार रहेंन। यो तरह हारून अऊर ओको टुरावों को संस्कार करजो।
EXO 29:10 “तब बछड़ा ख परमेश्वर की उपस्थिति को तम्बू को आगु ले आजो। हारून अऊर ओको टुरा, बछड़ा की मुंड पर अपनो अपनो हाथ रखे,
EXO 29:11 तब ऊ बछड़ा ख परमेश्वर को आगु मिलाप वालो तम्बू की फाटक पर बलिदान करजो,
EXO 29:12 अऊर बछड़ा को खून म सी कुछ ले क अपनो बोट सी वेदी को सींगो पर लगाजो, अऊर शेष सब खून ख वेदी को पाये पर कुड़ाय देजो,
EXO 29:13 अऊर जेको चरबी सी अंतड़ियां झकी रह्य हंय, अऊर जो झिल्ली कलेजे को ऊपर होवय हय, उन्को अऊर दोयी गुर्दो ख उन्को ऊपर चरबी सहित लेकर सब ख वेदी पर जलाजो।
EXO 29:14 पर बछड़ा को मांस, अऊर खाल, अऊर गोबर, छावनी सी बाहेर आगी म जलाय देजो; कहालीकि यो पापबलि होयेंन।
EXO 29:15 “फिर एक मेंढा लेजो, अऊर हारून अऊर ओको टुरा ओकी मुंड पर अपनो अपनो हाथ रखे,
EXO 29:16 तब उच मेंढी ख बलि करजो, अऊर ओको खून ले क वेदी पर चारयी तरफ छिड़क देजो।
EXO 29:17 तब ऊ मेंढा ख तुकड़ा तुकड़ा काटजो, अऊर ओकी अंतड़ियां अऊर पाय ख धोय क ओको तुकड़ा मुंड को संग म रखजो,
EXO 29:18 अऊर पूरो मेंढा ख वेदी पर जलाजो; ऊ त परमेश्वर लायी होमबलि होयेंन; ऊ सुखदायक सुगन्ध अऊर परमेश्वर लायी हवन होयेंन।
EXO 29:19 “फिर दूसरो मेंढा ख लेजो; अऊर हारून अऊर ओको टुरा ओकी मुंड पर अपनो अपनो हाथ रखे,
EXO 29:20 तब ऊ मेंढा ख बलि करजो, अऊर ओको खून म सी कुछ ले क हारून अऊर ओको टुरावों को दायो कान को कोना पर, अऊर उन्को दायो हाथ अऊर दायो पाय को अंगुठा पर लगाजो, अऊर खून ख वेदी पर चारयी तरफ छिड़क देजो।
EXO 29:21 फिर वेदी पर को खून अऊर अभिषेक को तेल, इन्को दोयी म सी थोड़ो थोड़ो ले क हारून अऊर ओको कपड़ा पर, अऊर ओको टुरावों अऊर उन्को कपड़ा पर भी छिड़क देजो; तब ऊ अपनो कपड़ा सहित, अऊर ओको टुरा भी अपनो अपनो कपड़ा सहित पवित्र होय जायेंन।
EXO 29:22 तय उच मेंढी को चरबी लेजो, अऊर मोटी पूछ को अऊर जेको चरबी सी अतड़ियां झकी रह्य हंय ओको, अऊर कलेजा पर की झिल्ली ख, अऊर चरबी सहित दोयी गुर्दां ख, अऊर दायो जांघ लेजो, कहालीकि यो पुरोहित को अभिषेक बलि को मेंढा हय।
EXO 29:23 अऊर अखमीरी रोटी की टोकनी जो परमेश्वर को आगु रखी होना ओख म सी भी एक रोटी, अऊर तेल सी सान्यो हुयो मैदा को एक सुवारी, अऊर एक पपड़ी लेजो,
EXO 29:24 इन सब ख हारून अऊर ओको टुरावों को हाथों म रख क हिलाये जान की भेंट ठहराय क् परमेश्वर को आगु हिलायो जाये।
EXO 29:25 तब उन चीजो ख उन्को हाथों सी ले क होमबलि की वेदी पर जलाय देजो, जेकोसी ऊ परमेश्वर को आगु सुखदायक सुगन्ध ठहरे; ऊ परमेश्वर लायी हवन होयेंन।
EXO 29:26 “फिर हारून को संस्कार को जो मेंढा होना ओकी छाती ख ले क हिलायी जान की भेंट लायी परमेश्वर को आगु लहराजो; अऊर ऊ तोरो भाग ठहरेंन।
EXO 29:27 हारून अऊर ओको टुरावों को संस्कार को मेंढा होना ओको म सी हिलाये जान वाली भेंट वाली छाती जो हिलायी जायेंन, अऊर उठायी जान की भेंट वाली जांघ जो उठायी जायेंन, इन दोयी ख पवित्र ठहराजो।
EXO 29:28 अऊर यो हमेशा की विधि की रीति पर इस्राएलियों को तरफ सी हारून अऊर ओको टुरावों को भाग रहेंन, कहालीकि यो उठाये जान की भेंट ठहरी हंय; अऊर यो इस्राएलियों को तरफ सी उन्को मेलबलि म सी परमेश्वर लायी उठाये जान की भेंट होयेंन।
EXO 29:29 “हारून को जो पवित्र कपड़ा रहेंन ऊ ओको बाद ओको टुरा अऊर नाती ख मिलतो रहे, जेको सी उन्खच दे क उन्को अभिषेक अऊर नियुक्त करयो जायेंन।
EXO 29:30 ओको टुरावों म सी जो ओको जागा पर याजक होयेंन, ऊ जब पवित्र जागा म सेवा काम करन लायी मिलाप वालो तम्बू म पहले आये, तब उन कपड़ा ख सात दिन तक पहिने रहेंन।
EXO 29:31 “फिर याजक को अभिषेक-बलि को जो मेंढी होयेंन ओख लेकर ओको मांस कोयी पवित्र जागा म पकाजो;
EXO 29:32 तब हारून अपनो टुरावों सहित उच मेंढी को मांस अऊर टोकनी की रोटी, दोयी ख मिलाप वालो तम्बू को फाटक पर खाये।
EXO 29:33 जिन चिजों सी उन्को अभिषेक अऊर उन्ख पवित्र करन लायी प्रायश्चित करयो जायेंन उन्को त हि खाये, पर दूसरो वंश को कोयी उन्ख नहीं खान पाये, कहालीकि हि पवित्र होयेंन।
EXO 29:34 यदि अभिषेक वालो मांस यां रोटी म सी कुछ सुबेरे तक बच्यो रहेंन, त उच बच्यो हुयो ख आगी म जलाजो, ऊ खायो नहीं जाये; कहालीकि ऊ पवित्र होयेंन।
EXO 29:35 “मय न तोख जो जो आज्ञा दियो हय; उन सब को अनुसार तय हारून अऊर ओको टुरावों सी करनो; अऊर सात दिन तक उन्को संस्कार विधि करतो रहजो,
EXO 29:36 मतलब पापबलि को एक बछड़ा प्रायश्चित लायी हर दिन चढ़ाजो। वेदी ख भी प्रायश्चित करन को समय‍ शुद्ध करजो, अऊर ओख पवित्र करन लायी ओको संस्कार करजो।
EXO 29:37 सात दिन तक वेदी लायी प्रायश्चित कर क् ओख शुद्ध अऊर पवित्र करजो, अऊर वेदी परम पवित्र ठहरेंन; अऊर जो कुछ ओको सी छूय जायेंन ऊ भी पवित्र होय जायेंन।
EXO 29:38 “जो तोख वेदी पर हमेशा चढ़ानो होयेंन ऊ यो आय : हर दिन एक एक साल को दोय मेंढी को बच्चा चढ़ाजो।
EXO 29:39 एक मेंढी को बच्चां ख त सुबेरे को समय, अऊर दूसरो मेंढी को बच्चां ख शाम को समय चढ़ाजो;
EXO 29:40 अऊर पहिलो मेंढी को बच्चां को संग दोय लिटर को तेल सी उसन्यो हुयो एक किलो मैदा, अऊर बली लायी अंगूर को रस चढ़ाजो।
EXO 29:41 अऊर दूसरो मेंढी को बच्चां ख शाम को समय चढ़ाजो, अऊर ओको संग सुबेरे की रीति अनुसार अनाज बलि अऊर अर्घ दोयी देजो, जेको सी ऊ सुखदायक सुगन्ध अऊर परमेश्वर लायी हवन ठहरे।
EXO 29:42 तुम्हरो पीढ़ी सी पीढ़ी म परमेश्वर को आगु मिलाप वालो तम्बू को फाटक पर हमेशा असोच होमबलि होतो रहे; यो ऊ जागा आय जेको म मय तुम लोगों सी येकोलायी मिल्यो करूं कि तोरो सी बाते करू।
EXO 29:43 मय इस्राएली लोगों सी उतच मिल्यो करूं अऊर ऊ तम्बू मोरो तेज सी पवित्र करयो जायेंन;
EXO 29:44 अऊर मय मिलाप वालो तम्बू अऊर वेदी ख पवित्र करूं, अऊर हारून अऊर ओको टुरावों ख भी पवित्र करूं कि हि मोरो लायी याजक को काम करेंन।
EXO 29:45 अऊर मय इस्राएलियों लोगों को बीच निवास करूं, अऊर उन्को परमेश्वर ठहरूं।
EXO 29:46 तब हि जान लेयेंन कि मय यहोवा उन्को परमेश्वर आय, जो उन्को मिस्र देश सी येकोलायी निकाल ले आयो कि उन्को बीच निवास करूं; मयच उन्को परमेश्वर यहोवा आय।
EXO 30:1 “फिर धूप जलान लायी बबूल की लकड़ी की वेदी बनाजो।
EXO 30:2 ओकी लम्बायी एक हाथ अऊर चौड़ायी एक हाथ की हय, ऊ चौकोन हो, अऊर ओकी ऊंचायी दोय हाथ की हो, अऊर ओको सींग ओको तुकड़ा सी बनायो जाये।
EXO 30:3 अऊर वेदी को ऊपर वालो पल्ला अऊर चारयी तरफ को बाजुवों ख अऊर सींग ख शुद्ध सोनो सी मढ़वाजो, अऊर इन्को चारयी तरफ सोनो की एक किनार बनाजो।
EXO 30:4 अऊर येको किनार को नीचो येको आमने-सामने को दोयी पल्ला पर सोनो को दोय दोय कड़ा बनाय क येको दोयी तरफ लगाजो, हि कड़ा डन्डो को सहारा उठान को काम देयेंन।
EXO 30:5 डन्डो ख बबूल की लकड़ी को बनाय क उन्ख सोनो सी मढ़वाजो।
EXO 30:6 अऊर तय ओको उच परदा को आगु रखजो जो गवाही चिट्ठी को सन्दूक को आगु हय, मतलब पश्चाताप वालो ढकन को आगु जो गवाही चिट्ठी को ऊपर हय, वहांच मय तोरो सी मिल्यो करूं।
EXO 30:7 अऊर ओको वेदी पर हारून सुगन्धित धूप जलायो करेंन; हर दिन सुबेरे ख जब ऊ दीया ख ठीक करेंन तब ऊ धूप जलाये,
EXO 30:8 अऊर शाम को समय जब हारून दीयां ख जलाये तब धूप जलायो करेंन, या धूप परमेश्वर को आगु तुम्हरो पीढ़ी पीढ़ी म हमेशा जलायो जाये।
EXO 30:9 वा वेदी पर तुम कोयी दूसरो तरह को धूप नहीं जलाजो, अऊर नहीं ओको पर होमबलि अऊर नहीं अन्नबलि चढ़ाजो; अऊर नहीं उच पर अर्घ देजो।
EXO 30:10 हारून साल म एक बार येको सींगो पर प्रायश्चित करेंन; अऊर तुम्हरी पीढ़ी पीढ़ी म साल म एक बार प्रायश्चित को पापबलि को खून सी येको पर प्रायश्चित करयो जाये; यो परमेश्वर लायी परम पवित्र हय।”
EXO 30:11 तब परमेश्वर न मूसा सी कह्यो,
EXO 30:12 “जब तय इस्राएलियों लोगों की गिनती लेन लग्यो, तब गिनती को समय जेकी गिनती हुयी हो हि अपनो अपनो जीव लायी परमेश्वर ख प्रायश्चित को शुल्क दे, जेकोसी जब तय उन्की गिनती कर रह्यो हय उच समय कोयी भयानक विपत्ति उन पर नहीं आय पड़ेंन।
EXO 30:13 जितनो लोग गिन्यो जाये हि पवित्र जागा को शेकेल को अनुसार चांदी अरधो शेकेल दे यो शेकेल बीस गेरा को होवय हय, परमेश्वर की भेंट अरधो शेकेल हो।
EXO 30:14 बीस साल को यां ओको सी अधिक अवस्था को जितनो गिन्यो जाये उन्म सी हर एक जन परमेश्वर ख भेंट दे।
EXO 30:15 जब तुम्हरो जीव को पश्चाताप को निमित्त परमेश्वर कि भेंट अर्पित की जाये, तब धनी लोग अरधो शेकेल सी अधिक नहीं देयेंन; अऊर नहीं गरीब लोग ओख सी कम देयेंन।
EXO 30:16 अऊर तय इस्राएलियों सी प्रायश्चित को हिस्सा ले क मिलाप वालो तम्बू को काम म लगाजो; जेकोसी ऊ परमेश्वर को आगु इस्राएलियों को याद गार चिन्ह ठहरे, अऊर उन्को जीव को प्रायश्चित भी हो।”
EXO 30:17 परमेश्वर न मूसा सी कह्यो,
EXO 30:18 “धोन लायी पीतल को एक गंगार बनाजो, अऊर ओको पाया भी पीतल को बनाजो। ओको मिलाप वालो तम्बू अऊर वेदी को बीच म रख क उन्म म पानी भर देजो;
EXO 30:19 अऊर ओको म हारून अऊर ओको टुरा अपनो अपनो हाथ पाय धोयो करेंन।
EXO 30:20 जब जब हि मिलाप वालो तम्बू म सिरेंन तब तब हि हाथ पाय पानी सी धोये, नहीं त मर जायेंन; अऊर जब जब हि वेदी को जवर सेवा करन वेदी को जवर आये, मतलब परमेश्वर लायी हवन जलावन ख आये तब तब हि हाथ पाय धोये, असो नहीं होय कि मर जाये।
EXO 30:21 यो हारून अऊर ओको पीढ़ी पीढ़ी को वंश लायी हमेशा की विधि ठहरे।”
EXO 30:22 तब परमेश्वर न मूसा सी कह्यो,
EXO 30:23 “तय उत्तम सी उत्तम सुगन्धित मसाला लावो, मतलब पवित्र जागा को शेकेल को अनुसार पाच सौ शेकेल अपनो आप निकल्यो हुयो गन्धरस, अऊर ओको अरधो, मतलब ढायी सौ शेकेल सुगन्धित कलमी, अऊर ढायी सौ शेकेल सुगन्धित लुभान,
EXO 30:24 पवित्र जागा को अनुसार छय किलो तेजपान, अऊर चार लिटर जैतून को तेल लेजो
EXO 30:25 उन्को सी अभिषेक को पवित्र तेल, मतलब सुगन्ध की रीति सी तैयार करयो हुयो सुगन्धित तेल बनायजो; यो अभिषेक को पवित्र तेल ठहरे।
EXO 30:26 अऊर ओको सी मिलाप वालो तम्बू को, अऊर गवाही चिट्ठी को सन्दूक पर यो तेल ख डालेंन,
EXO 30:27 अऊर पूरो सामान सहित मेज को, अऊर सामान सहित दीया को, अऊर धूप वेदी को
EXO 30:28 अऊर पूरो सामान सहित होमबलि वेदी को, अऊर पाये सहित गंगार को सजायजो,
EXO 30:29 अऊर उन्ख पवित्र करजो, जेकोसी हि परम पवित्र ठहरेंन; अऊर जो कुछ उन्को सी छुय जायेंन ऊ पवित्र होय जायेंन।
EXO 30:30 तय हारून को ओको टुरावों को संग नियुक्त करजो, अऊर यो तरह उन्ख मोरो लायी याजक को काम करन लायी पवित्र करजो।
EXO 30:31 अऊर इस्राएलियों लोगों ख मोरी यो आज्ञा सुनाजो, ‘यो तेल तुम्हरो पीढ़ी पीढ़ी म मोरो लायी पवित्र करयो हुयो तेल होयेंन।
EXO 30:32 यो कोयी आदमी को शरीर पर नहीं डालो जाये, अऊर मिलावट म ओको समान अऊर कुछ नहीं बनाजो; यो पवित्र हय, यो तुम्हरो लायी भी पवित्र होयेंन।
EXO 30:33 जो कोयी येको समान कुछ बनाये, यां जो कोयी येको म सी कुछ पराये कुल वालो पर लगाये, ऊ अपनो लोगों म नहीं गिन्यो जाये’।”
EXO 30:34 फिर परमेश्वर न मूसा सी कह्यो, “बोल, नखी अऊर कुन्दरू, यो सुगन्ध द्रव्य शुद्ध लुभान सहित ले लेजो, हि सब बराबर तौल की मात्रा हो,
EXO 30:35 अऊर इन्को धूप मतलब नमक मिलाय क सुगन्ध की रीति को अनुसार शुद्ध अऊर पवित्र सुगन्धित मसाला सी बनायजो।
EXO 30:36 फिर ओको म सी कुछ पीस क बारीक क डालजो, तब ओको म सी कुछ मिलाप वालो तम्बू म साक्षी पत्र को आगु, जित पर मय तोरो सी मिल्यो करूं, रखजो; ऊ तुम्हरो लायी परम पवित्र होयेंन।
EXO 30:37 जो धूप तय बनायजो, मिलावट म ओको समान तुम लोग अपनो लायी अऊर कुछ नहीं बनायजो; ऊ तुम्हरो आगु परमेश्वर लायी पवित्र होयेंन।
EXO 30:38 जो कोयी सूंघन लायी ओको समान कुछ बनाये ऊ अपनो लोगों म न गिन्यो जाये।”
EXO 31:1 तब परमेश्वर न मूसा सी कह्यो,
EXO 31:2 “सुन, मय ऊरी को टुरा बसलेल को, जो हूर को पोता अऊर यहूदा को वंश को हय, नाम ले कर बुलावय हय।
EXO 31:3 अऊर मय ओको परमेश्वर की आत्मा सी जो बुद्धि, हुनर, ज्ञान, अऊर सब तरह को काम की समझ देनो वालो आत्मा हय, परिपूर्ण करय हय,
EXO 31:4 जेकोसी ऊ कारीगरी को काम बुद्धि सी निकाल क जिन्ख ऊ सोनो, चांदी, अऊर पीतल को बर्तन पर बनाय सकेंन,
EXO 31:5 अऊर जड़न लायी मनि काट सके, अऊर लकड़ी पर नकाशी काम भी कर सकेंन।
EXO 31:6 अऊर सुन, मय दान को वंश वालो अहीसामाक को टुरा ओहोलीआब ख ओको संग कर देवय हय; बल्की जितनो बुद्धि मान हय उन सब को दिल म मय बुद्धि देवय हय, जेकोसी जितनो चीजो की आज्ञा मय न तोख दियो हय उन सब ख हि बनाये;
EXO 31:7 मतलब मिलाप वालो तम्बू, अऊर साक्षी पत्र को सन्दूक अऊर उच पर को प्रायश्चित वालो ढकन अऊर तम्बू को पूरो सामान,
EXO 31:8 अऊर सामान सहित मेज, अऊर पूरो सामान सहित शुद्ध सोनो को दीया, अऊर धूप जलान की वेदी,
EXO 31:9 अऊर पूरो सामान सहित होमबलि वेदी, अऊर पाये सहित गंगार,
EXO 31:10 अऊर बुन्यो हुयो धागा को कपड़ा, अऊर याजक हारून को याजक वालो काम को पवित्र कपड़ा, अऊर ओको टुरावों को कपड़ा, जिन्ख हि याजक को कार्य करतो समय पहिनेंन,
EXO 31:11 अऊर अभिषेक को तेल, अऊर पवित्र जागा लायी सुगन्धित धूप, इन सब ख हि उन सब आज्ञावों को अनुसार बनाये जो मय न तोरो दियो हंय।”
EXO 31:12 फिर परमेश्वर न मूसा सी कह्यो,
EXO 31:13 “तय इस्राएलियों लोग सी यो भी कहजो, ‘निश्चय तुम मोरो आराम दिनों ख मनाजो, कहालीकि तुम्हरो पीढ़ी पीढ़ी म मोरो अऊर तुम लोगों को बीच यो एक चिन्ह ठहरो हय, जेकोसी तय यो बात जान रख्यो कि परमेश्वर हमरो पवित्र कर्ता हय।
EXO 31:14 यो तरह तय आराम दिन ख मनाजो, कहालीकि ऊ तुम्हरो लायी पवित्र ठहरो हय; जो ओको अपवित्र करेंन ऊ निश्चय मार डाल्यो जाये : जो कोयी उच दिन म कुछ काम काज करेंन ऊ अपनो लोगों को बीच सी निकाल दियो जायेंन।
EXO 31:15 छय दिन त काम-काज करयो जाये, पर सातवों दिन परम पवित्र को दिन अऊर परमेश्वर लायी पवित्र हय; येकोलायी जो कोयी आराम को दिन म कुछ काम-काज करेंन ऊ निश्चय मार डाल्यो जाये।
EXO 31:16 येकोलायी इस्राएली आराम दिन ख मानो करेंन, बल्की पीढ़ी पीढ़ी म ओको हमेशा की वाचा को बारे जान क मानो करेंन।
EXO 31:17 ऊ मोरो अऊर इस्राएलियों को बीच हमेशा एक चिन्ह रहेंन, कहालीकि छय दिन म परमेश्वर न आसमान अऊर धरती ख बनायो, अऊर सातवों दिन आराम कर क् अपनो जीव ख शान्त करयो’।”
EXO 31:18 जब परमेश्वर मूसा सी सीनै पहाड़ी पर असी बात कर चुक्यो, तब ओन ओको अपनी बोट सी लिखी हुयो गवाही चिट्ठी देन वालो गोटा की दोयी पट्टियां दियो।
EXO 32:1 जब लोगों न देख्यो कि मूसा ख पहाड़ी सी उतरन म बहुत देर होय रह्यो हय, तब हि हारून को जवर जमा होय क कहन लग्यो, “अब हमरो लायी भगवान बनो, जो हमरो आगु आगु चलेंन; कहालीकि उच आदमी मूसा ख जो हम्ख मिस्र देश सी निकाल ले आयो हय, हम नहीं जानय कि का भयो?”
EXO 32:2 हारून न उन्को सी कह्यो, “तुम्हरो पत्नियों अऊर टुरा टुरियों को कानों म सोनो की जो बालियां हंय उन्ख उतारो, अऊर मोरो जवर ले आवो।”
EXO 32:3 तब तब लोगों न उन्को कानों सी सोनो की बालियां ख उतारयो, अऊर हारून को जवर ले आये।
EXO 32:4 हारून न उन्को हाथ सी लियो, अऊर एक बछड़ा की मूर्ति ढाल क बनायो, ओन ओको साचा म ढाल्यो। तब लोग कहन लग्यो, “हे इस्राएल समाज, यो हय तोरो ईश्वर जो तोख मिस्र देश सी निकाल लायो हय, ऊ योच आय।”
EXO 32:5 यो देख क् हारून न ओको आगु एक वेदी बनायी; अऊर या प्रचार करयो, “कल परमेश्वर लायी त्यौहार होयेंन।”
EXO 32:6 अऊर दूसरो दिन लोगों न सुबेरे ख उठ क होमबलि चढ़ाये, अऊर मेलबलि ले आये; तब बैठ क खाये पीये, अऊर उठ क मौज मस्ती करन लग्यो।
EXO 32:7 तब परमेश्वर न मूसा सी कह्यो, “नीचो उतर जा, कहालीकि तोरी प्रजा को लोग, जिन्ख तय मिस्र देश सी निकाल लायो हय, हि भ्रष्ट होय गयो हंय;
EXO 32:8 अऊर जेको रस्ता पर चलन की आज्ञा मय न उन्को दियो होती ओको तुरतच छोड़ क उन्न एक बछड़ा की मूर्ती बनाय लियो, तब ओख दण्डवत करयो, अऊर ओको लायी बलिदान भी चढ़ायो, अऊर यो कह्यो, ‘हे इस्राएलियों समाज, तुम्हरो ईश्वर जो तुम्ख मिस्र देश सी छुड़ाय ले आयो हय ऊ योच आय’।”
EXO 32:9 तब परमेश्वर न मूसा सी कह्यो, “मय न इन लोगों ख देख्यो हय, अऊर सुन, हि हठीलो हंय।
EXO 32:10 अब मोख मत रोख, मोरो कोप उन पर भड़क उठ्यो हय जेकोसी मय उन्ख भस्म करूं; पर तोरो सी एक बड़ो राष्ट्र बनाऊं।”
EXO 32:11 तब मूसा अपनो परमेश्वर यहोवा ख यो कह्य क् बिनती करन लग्यो, “हे परमेश्वर, तोरो कोप अपनी प्रजा पर कहाली भड़क्यो हय जेख तय बड़ी सामर्थ अऊर बलवन्त हाथ को द्वारा मिस्र देश सी निकाल लायो हय?
EXO 32:12 मिस्र देश को लोग यो कहाली कहनो पाये, ‘ऊ उन्को बुरो अभिप्राय सी मतलब पहाड़ी म घात कर क् जमीन पर सी मिटाय डालन की मनसा सी निकाल ले गयो?’ तय भड़क्यो हुयो गुस्सा ख शान्त कर, अऊर अपनो लोगों की हानि को बिचार ख छोड़ दे।
EXO 32:13 अपनो सेवक अब्राहम, इसहाक, अऊर याकूब ख याद कर जिन्कोसी तय न अपनीच कसम खाय क कह्यो होतो, ‘मय तुम्हरो वंश ख आसमान को तारा को समान बहुत करूं, अऊर यो पूरो देश जिन्की मय न बात की हय तुम्हरो वंश ख देऊं कि हि ओको अधिकारी हमेशा बन्यो रहेंन’।”
EXO 32:14 तब अपनो लोगों की जो हानि परमेश्वर करन वालो होतो ओको बिचार ओन छोड़ दियो।
EXO 32:15 तब मूसा मुड क साक्षी की दोयी तक्तां ख हाथ म लियो हुयो पहाड़ी सी उतर गयो। उन तक्तां को इत अऊर उत दोयी तरफ लिख्यो हुयो होतो,
EXO 32:16 अऊर हि पट्टियां परमेश्वर कि बनायी हुयी होती, अऊर उन पर जो खोद क लिख्यो हुयो होतो ऊ परमेश्वर को लिख्यो हुयो होतो।
EXO 32:17 जब यहोशू ख लोगों क् शोर को आवाज सुनायी पड़्यो, तब ओन मूसा सी कह्यो, “छावनी म युद्ध को आवाज सुनायी दे रह्यो हय।”
EXO 32:18 मूसा न कह्यो, “यो जो आवाज हय ऊ नहीं त जितन वालो को आय, अऊर नहीं हारन वालो को आय; मोख त गीत को आवाज सुनायी पड़य हय।”
EXO 32:19 छावनी को जवर आतोच मूसा ख ऊ बछड़ा अऊर नाचनो दिखायी पड़्यो, तब मूसा को गुस्सा भड़क उठ्यो, अऊर ओन पट्टियों ख अपनो हाथ सी पहाड़ी को खल्लो पटक क तुकड़ा तुकड़ा कर दियो।
EXO 32:20 तब ओन उन्को बनाये हुयो बछड़ा ख ले कर आगी म डाल क् जलाय दियो। अऊर पीस क चूर चूर क डाल्यो हय, अऊर पानी म डाल दियो, अऊर इस्राएली लोग ख पिलायो।
EXO 32:21 तब मूसा हारून सी कहन लग्यो, “इन लोगों न तोरो संग का करयो कि तय न उन्ख इतनो बड़ो घोर पाप म फसायो?”
EXO 32:22 हारून न उत्तर दियो, “हे स्वामी तोरो गुस्सा नहीं भड़के; तय त इन लोगों ख जानयच हय कि हि बुरायी म मन लगाये रह्य हंय।”
EXO 32:23 अऊर उन्न मोरो सी कह्यो, हमरो लायी देवता बनाव जो हमरो आगु आगु चले; कहालीकि ऊ आदमी मूसा ख, जो हम्ख मिस्र देश सी छुड़ाय लायो हय, हम नहीं जानजे कि का भयो?
EXO 32:24 तब मय न उन्को सी कह्यो, “जेको जेको जवर सोनो को जेवर होना, हि उन ख उतार लाये; अऊर जब उन्न मोरो ख ऊ दियो, मय न उन्ख आगी म डाल दियो, तब यो बछड़ा बन गयो।”
EXO 32:25 जब मूसा देख्यो कि लोग हारून न लोगों ख नियंत्रन सी बाहेर कर दियो अऊर अपनो दुश्मनों को आगु खुद ख हसी मजाक को पात्र बन गयो।
EXO 32:26 उन्ख अनियंत्रित देख क मूसा न छावनी की फाटक पर खड़ो होय क कह्यो, “जो कोयी परमेश्वर को तरफ को हय ऊ मोरो जवर आये;” तब पूरो लेवीय वंश को ओको जवर जमा भय गयो।
EXO 32:27 मूसा न उन्को सी कह्यो, “इस्राएल को परमेश्वर यहोवा यो कह्य हय कि अपनी अपनी कमर म तलवार बान्ध क छावनी को एक तम्बू सी दूसरो तम्बू पर जाय क भाऊवों, संगियों, अऊर पड़ोसियों ख मार डालो।”
EXO 32:28 मूसा को या वचन को अनुसार लेवियों न करयो; अऊर ऊ दिन तीन हजार को लगभग लोग मारयो गयो।
EXO 32:29 तब मूसा न कह्यो, “अज को दिन परमेश्वर लायी अपनो याजक पद को अभिषेक करो, बल्की अपनो अपनो टुरावों अऊर भाऊवों को खिलाफ होय क असो करयो जेको सी ऊ अज तुम्ख आशीष दे।”
EXO 32:30 दूसरो दिन मूसा न लोगों सी कह्यो, “तय न बड़ोच पाप करयो हय। अब मय परमेश्वर को जवर ऊपर जाऊं; सम्भव हय कि मय तुम्हरो पाप को प्रायश्चित कर सकू।”
EXO 32:31 तब मूसा परमेश्वर को जवर जाय क कहन लग्यो, “हाय, हाय, उन लोगों न सोनो को देवता बनाय क बड़ोच घोर पाप करयो हय।
EXO 32:32 अब तय उन्को पाप माफ कर नहीं त अपनी लिख्यो हुयी किताब म सी मोरो नाम ख काट दे।”
EXO 32:33 परमेश्वर न मूसा सी कह्यो, “जिन्कोसी मोरो खिलाफ पाप करयो हय उच नाम को मय अपनी किताब म सी काट देऊं।
EXO 32:34 अब तुम जाय क उन लोगों ख ऊ जागा म ले चल जेकी चर्चा मय न तोरो सी करी होती; देख, मोरो स्वर्गदूत तोरो आगु आगु चलेंन। पर जो दिन मय सजा देन लगूं ऊ दिन उन्ख यो पाप को भी सजा देऊं।”
EXO 32:35 परमेश्वर न उन लोगों पर विपत्ति डाली, कहालीकि हारून को बनायो हुयो बछड़ा ख उन्नच बनायो होतो।
EXO 33:1 तब परमेश्वर न मूसा सी कह्यो, “तय उन लोगों ख जिन्ख मिस्र देश सी छुड़ाय क लायो हय संग ले क ऊ देश ख जा, जेको बारे मय न अब्राहम, इसहाक, अऊर याकूब सी कसम खाय क कह्यो होतो कि मय ओख तोरो वंश ख देऊं।
EXO 33:2 अऊर मय तोरो आगु आगु एक दूत ख भेजूं, अऊर कनानी, एमोरी, हित्ती, परिज्जी, हिब्बी अऊर यबूसी ख निकाल देऊं।
EXO 33:3 तुम लोग ऊ देश ख जावो जेको म दूध अऊर शहेद की धारा बहय हय; पर तुम जिद्दी हो, यो वजह मय तुम्हरो बीच म होय क नहीं चलूं, असो नहीं हो कि मय रस्ता म तुम्हरो अन्त कर डालूं।”
EXO 33:4 यो बुरो समाचार सुन क हि लोग विलाप करन लगे; अऊर कोयी अपनो जेवर पहिने हुयो नहीं रह्यो।
EXO 33:5 कहालीकि परमेश्वर न मूसा सी कह्यो दियो होतो, “इस्राएली लोगों ख मोरो यो वचन सुना, ‘तुम लोग त जिद्दी हय; यदि मय पल भर लायी तुम्हरो बीच होय क चलू, त तुम्हरो अन्त कर डालूं। येकोलायी अब अपनो अपनो जेवर अपनो आंग सी उतार देवो कि मय जान सकू कि तुम्हरो संग का करनो चाहिये’।”
EXO 33:6 येकोलायी इस्राएली होरेब पहाड़ी सी ले क आगु तक अपनो जेवर उतारयो रह्यो।
EXO 33:7 मूसा तम्बू ख डेरा सी बाहेर, ओको सी कुछ दूरी पर खड़ो करत होतो। ऊ ओख मिलाप वालो तम्बू कहत होतो। प्रभु को खोजी मिलाप वालो तम्बू ख जो डेरा को बाहेर होतो, जात होतो।
EXO 33:8 जब जब मूसा तम्बू को जवर जावय हय, तब तब सब लोग उठ क अपनो अपनो डेरा को फाटक पर खड़ो होय जावय, अऊर जब तक मूसा ऊ तम्बू म सिरत नहीं होतो तब तक ओकी तरफ ताकतो रहत होतो।
EXO 33:9 जब मूसा ऊ तम्बू म सिरयो करत होतो, जब बादर को खम्बा उतर क तम्बू को फाटक पर ठहर जावय होतो, अऊर परमेश्वर मूसा सी बाते करत होतो।
EXO 33:10 अऊर सब लोग जब बादर को खम्बा ख तम्बू को फाटक पर खड़ो देखतो होतो, तब उठ क अपनो अपनो डेरा को फाटक पर सी दण्डवत करत होतो।
EXO 33:11 अऊर परमेश्वर मूसा सी यो तरह आमने-सामने बाते करत होतो, जेको तरह कोयी अपनो भाऊ बहिन सी बाते करो। अऊर मूसा त डेरा म लौट आवत होतो, पर यहोशू नाम को एक जवान, जो नून को टुरा अऊर मूसा को सेवक होतो, ऊ तम्बू म सी नहीं निकलत होतो।
EXO 33:12 मूसा न परमेश्वर सी कह्यो, “देख, तय मोरो सी कह्य हय, इन लोगों ख ले जा; पर तय न मोख नहीं बतायो कि तय मोरो संग कौन ख भेजजो। तय न कह्यो, मय तोख नाम सी जानु हय। अऊर तोरो पर मोरी अनुग्रह की नजर हय।
EXO 33:13 अऊर अब यदि मोरो पर तोरो अनुग्रह की नजर होना, त मोख अपनो मार्ग समझाय दे, जेकोसी जब मय तोरो ज्ञान पाऊं तब तोरो अनुग्रह की नजर मोरो पर बनी रहेंन। फिर यो भी ध्यान रख कि या लोग तोरी प्रजा आय।”
EXO 33:14 परमेश्वर न कह्यो, “मय खुद तोरो संग चलूं अऊर तोरो ख आराम देऊं।”
EXO 33:15 मूसा न ओको सी कह्यो, “यदि तय खुद नहीं चलजो, त हम्ख यहां सी आगु मत ले जा।
EXO 33:16 यो कसो जान्यो जायेंन कि तोरी अनुग्रह की नजर मोरो पर अऊर अपनी प्रजा पर हय? का येकोसी नहीं कि तय हमरो संग संग चले, जेकोसी मय अऊर तोरी प्रजा को लोग धरती पर को सब लोगों सी अलग ठहरेंन?”
EXO 33:17 परमेश्वर न मूसा सी कह्यो, “मय यो काम भी, जेकी चर्चा तय न करी हय, मय करूं; कहालीकि मोरो अनुग्रह की नजर तोरो पर हय, अऊर तोरो नाम मोरो मन म बस्यो हय।”
EXO 33:18 मूसा न कह्यो, “मोख अपनो महिमा को तेज दिखाय दे।”
EXO 33:19 ओन कह्यो, “मय तोरो जवर होय क चलतो हुयो तोख अपनी पूरी भलायी दिखाऊं, अऊर तोरो जवर परमेश्वर को नाम को प्रचार करूं; अऊर जेको पर मय अनुग्रह करनो चाहूं ओकोच पर दया करूं।”
EXO 33:20 तब ओन कह्यो, “तय मोरो मुख को दर्शन नहीं कर सकय; कहालीकि आदमी मोरो मुख को दर्शन कर क् जीन्दो नहीं रह्य सकय।”
EXO 33:21 तब परमेश्वर न कह्यो, “सुन, मोरो जवर एक जागा हय, यहां तय ऊ चट्टान पर खड़ो हो;
EXO 33:22 अऊर जब तक मोरी महिमा को तेज तोरो आगु चलतो रहेंन, तब तक मय तोख चट्टान की फट म रखूं अऊर जब तक मय तोरो आगु सी होय क नहीं निकल जाऊं तब तक अपनो हाथ सी तोख झाक्यो रहूं;
EXO 33:23 फिर मय अपनो हाथ उठाय लेऊं, तब तय मोरी पीठ ख देखजो; पर मोरो मुख नहीं दिखायी देयेंन।”
EXO 34:1 फिर परमेश्वर न मूसा सी कह्यो, “पहिली पट्टियों को जसो गोटा की दोय अऊर पट्टियों खोद ख ले; तब जो वचन उन पहिली पट्टियों पर लिख्यो होतो, जिन्ख तय न तोड़ डाल्यो, हिच वचन मय उन पट्टियों पर भी लिखूं।
EXO 34:2 सुबेरे तैयार रहजो, अऊर सुबेरे ख सीनै पहाड़ी पर चढ़ क ओकी सेंडी पर मोरो आगु खड़ो होनो।
EXO 34:3 तोरो संग कोयी नहीं चढ़ पाये, बल्की पहाड़ी भर कोयी आदमी कहीं दिखायी नहीं दे; अऊर नहीं शेरी मेंढी अऊर गाय बईल भी पहाड़ी को आगु चरन पायेंन।”
EXO 34:4 तब मूसा न पहली पट्टियों को समान दोय अऊर पट्टियों खोदी; अऊर सुबेरे उठ क अपनो हाथ म गोटा की हि दोयी पट्टियों ले क परमेश्वर की आज्ञा को अनुसार सीनै पहाड़ी पर चढ़ गयो।
EXO 34:5 तब परमेश्वर न बादर म उतर क ओको संग उत खड़ो होय क परमेश्वर न अपनो नाम को बल्की यहोवा को नाम को प्रचार करयो।
EXO 34:6 परमेश्वर ओको आगु सी निकल्यो अऊर ओन प्रचार करयो, “परमेश्वर! परमेश्वर! ऊ दयालु अऊर अनुग्रहकारी, विलम्ब-क्रोधी, अऊर धीरजवन्त, सच्चो परमेश्वर हय।
EXO 34:7 हजारों पीढ़ियों पर करुना करन वालो, अधर्म, अपराध अऊर पाप ख माफ करन वालो हय, पर ऊ दोषी ख कोयी तरह निर्दोष नहीं ठहरायेंन; ऊ पूर्वजों को अधर्म की सजा तीसरी अऊर चौथी पीढ़ी तक सन्तान अऊर आवन वाली सन्तान ख देतो रहू हय।”
EXO 34:8 तब मूसा न तुरतच धरती को तरफ झुक क प्रभु ख दण्डवत करयो।
EXO 34:9 अऊर मूसा न कह्यो, “हे स्वामी, यदि मय न तोरी अनुग्रह की नजर हासिल करी हय, त मय बिनती करू हय, स्वामी, यदि हठीलो लोग हय, त भी तय हमरो बीच म होय क चल। हमरो अधर्म ख, हमरो पाप ख माफ कर अऊर हम्ख अपनी निज सम्पत्ति बनाव।”
EXO 34:10 ओन कह्यो, “देख, मय एक वाचा बान्धू हय। मय तोरो सब लोगों को आगु मय असो आश्चर्यपूर्ण कर्म करूं, जो पूरी धरती पर, पूरो राष्ट्रों म कभी नहीं करयो गयो। जिन लोगों को बीच म तय हय, हि सब परमेश्वर को कार्य ख देखेंन; ऊ आतंकमय कार्य हय, जेख मय तोरो लायी करूं।
EXO 34:11 जो आज्ञा मय तुम्ख देऊ हय, ओको पालन करजो। देख, मय तोरो आगु सी एमोरी, कनानी, हित्ती, परिज्जी, हिव्वी, अऊर यबूसी जातियों ख निकाल देऊं।
EXO 34:12 येकोलायी सावधान रहजो कि जो देश म तय जान वालो हय ओको निवासियों सी वाचा मत बान्धजो; कहीं असो नहीं होय कि ऊ तोरो लायी फन्दा बन जाये।
EXO 34:13 बल्की उन्की वेदियों ख गिराय देजो, उन्की खम्भा ख तोड़ डालजो, अऊर उन्की अशेरा नाम की मूर्तियों ख तोड़ डालजो;
EXO 34:14 कहालीकि तुम्ख कोयी दूसरो ख ईश्वर कर क् दण्डवत करन की आज्ञा नहाय, कहालीकि परमेश्वर जिन्को नाम जलनशील हय, जर क उठन वालो परमेश्वर आय,
EXO 34:15 असो न होय कि तय ऊ देश को निवासियों सी बातचीत करे। असो नहीं हो कि जब हि अपनो देवतावों को व्यभिचार करेंन, अऊर वेश्या को जसो बर्ताव करेंन, अपनो देवतावों ख बलि चढ़ाये अऊर कोयी तोख नेवता देवय तब तय ओकी बली को मांस खाये।
EXO 34:16 अऊर तय उन्की टुरियों ख अपनो टुरावों लायी लाये, जो मोरो टुरा को प्रति विश्वासघात होयेंन अऊर उन्को मूर्ती पूजक देवतावों की पूजा करन लायी प्रेरित करेंन।
EXO 34:17 “तय देवतावों की मूर्तियां ढाल क मत बनायजो।
EXO 34:18 “अखमीरी रोटी को त्यौहार मनाजो। ओको म मोरी आज्ञा को अनुसार आबीब को महीना को उचित समय पर सात दिन तक अखमीरी रोटी खायो करजो; कहालीकि तय मिस्र देश सी आबीब को महीने म निकल क आयो।”
EXO 34:19 हर एक पहिलौठा मोरो आय; अऊर का बछड़ा, का मेम्ना, तोरो जनावरों म सी जो नर पहिलौठा होना हि सब मोरोच आय।
EXO 34:20 गधी को पहिलौठा को बदला मेम्ना दे क ओख छुड़ायजो, यदि तय ओख छुड़ावनो नहीं चाहवय त ओकी गर्दन तोड़ देजो। पर अपनो सब पहिलौठा टुरावों ख बदला दे क छुड़ायजो। मोख कोयी खाली हाथ अपनो मुंह मत दिखाये।
EXO 34:21 “छय दिन त मेहनत करजो, पर सातवों दिन आराम करजो; बल्की नांगर जोतन अऊर फसल काटतो समय म भी आराम करजो।
EXO 34:22 अऊर हप्ता को त्यौहार मनायजो जो पहिली गहूं की फसल को त्यौहार कहलावय हय, अऊर साल को आखरी म जमा करन को भी त्यौहार मनायजो।
EXO 34:23 साल म तीन बार तोरो सब आदमी इस्राएल को परमेश्वर प्रभु यहोवा ख अपनो मुंह दिखाये।
EXO 34:24 कहालीकि मय दूसरो राष्ट्रों ख तोरो आगु सी निकाल क तोरी सीमावों ख बढ़ाऊं; अऊर जब तय अपनो परमेश्वर यहोवा ख अपनो मुंह दिखावन लायी साल म तीन बार आयो करजो, तब कोयी तोरी जमीन को लालच नहीं करेंन।
EXO 34:25 “मोरो बलिदान को खून ख खमीर सहित मत चढ़ायजो, अऊर नहीं फसह को त्यौहार को बलिदान म सी कुछ सुबेरे तक रहन देजो।
EXO 34:26 अपनी जमीन की पहिली फसल को पहिलो हिस्सा अपनो परमेश्वर यहोवा को भवन म ले आजो। शेरी को बच्चा ख ओकी माय को दूध म मत पकायजो।”
EXO 34:27 तब परमेश्वर न मूसा सी कह्यो, “यो वचन लिख ले; कहालीकि योच वचनों को अनुसार मय न तोरो अऊर इस्राएल को संग वाचा बान्धी हय।”
EXO 34:28 मूसा वहां परमेश्वर को संग चालीस दिन अऊर रात; अऊर तब तक नहीं त ओन रोटी खायी अऊर नहीं पानी पीयो। अऊर ओन उन पट्टियों पर वाचा को वचन मतलब दस आज्ञाये लिख दियो।
EXO 34:29 जब मूसा गवाही की दोयी पट्टियां हाथ म लियो हुयो सीनै पहाड़ी सी उतर रह्यो होतो तब परमेश्वर को संग बाते करन को वजह ओको चेहरा चमकत होतो, पर ऊ यो नहीं जानत होतो कि ओको चेहरा चमक रह्यो हंय।
EXO 34:30 जब हारून अऊर सब इस्राएली लोगों न मूसा ख देख्यो कि ओको चेहरा चमक रह्यो होतो, तब हि ओको जवर जान सी डर गयो।
EXO 34:31 तब मूसा न उन्ख बुलायो; अऊर हारून मण्डली को पूरो मुखियावों सहित ओको जवर आयो, अऊर मूसा उन्को सी बाते करन लग्यो।
EXO 34:32 येको बाद सब इस्राएली लोग जवर आयो, अऊर जितनी आज्ञाये परमेश्वर न सीनै पहाड़ी पर ओको संग बात करतो समय दी होती, हि सब ओन उन्ख बतायी।
EXO 34:33 जब तक मूसा उन्को सी बात नहीं कर चुक्यो तब तक अपनो मुंह पर गमछा झाक्यो रह्यो;
EXO 34:34 पर जब जब मूसा अन्दर परमेश्वर सी बात करन ख ओको आगु जात होतो, तब तब ऊ ऊ गमछा ख उतारयो हुयो रहत होतो; फिर बाहेर आय क जो जो आज्ञा ओख मिलत होती ओख इस्राएलियों ख कह्य देत होतो।
EXO 34:35 इस्राएली लोग मूसा को चेहरा देखत होतो कि ओको सी चमक निकलत होती; अऊर जब तक ऊ परमेश्वर सी बात करन ख अन्दर नहीं जात होतो तब तक ऊ ऊ गमछा ख डाल्यो रहत होतो।
EXO 35:1 मूसा न इस्राएलियों की पूरी मण्डली ख जमा कर क् उन्को सी कह्यो, “जिन कामों ख करन की आज्ञा परमेश्वर न दियो हय हि या हंय।
EXO 35:2 छय दिन त काम-काज करयो जाये, पर सातवों दिन तुम्हरो लायी पवित्र अऊर परमेश्वर लायी परम आराम को दिन ठहरे; ओको म जो कोयी काम काज करेंन ऊ मार डाल्यो जाये;
EXO 35:3 बल्की आराम को दिन तुम अपनो अपनो घरों म आगी तक मत जलाजो।”
EXO 35:4 फिर मूसा न इस्राएलियों की सारी मण्डली सी कह्यो, “जो बात की आज्ञा परमेश्वर न दी हय वा या आय।
EXO 35:5 तुम्हरो जवर सी परमेश्वर लायी भेंट लियो जाये, मतलब जितनो अपनी इच्छा सी देजो चाहेंन हि परमेश्वर की भेंट कर क् या चिजे ले आये; मतलब सोनो, चांदी, पीतल;
EXO 35:6 नीलो, जामुनी अऊर लाल रंग को कपड़ा, पतलो सूत सी बुन्यो हुयो कपड़ा;‍ शेरी को बाल,
EXO 35:7 लाल रंग सी रंगी हुयी मेंढा की खाल, सुइसों की खाल; बबूल की लकड़ी,
EXO 35:8 उजाड़ो देन लायी तेल, अभिषेक को तेल अऊर धूप लायी सुगन्धित मसाले,
EXO 35:9 तब एपोद अऊर चपरास लायी सुलैमानी गोटा अऊर जड़न लायी मनि।
EXO 35:10 “जो बुद्धिमान कारागिर व्यक्ति तुम्हरो बीच म हंय, हि आये अऊर प्रभु की आज्ञा अनुसार या चिजें बनाये, रहन की जागा।
EXO 35:11 यानेकि तम्बू, अऊर झाकन समेत निवास, अऊर ओकी आकड़ा, छड़, बेंड़ा, खम्बा अऊर तक्ता;
EXO 35:12 तब डन्डो सहित सन्दूक, अऊर प्रायश्चित को ढक्कन, अऊर बीच वालो परदा;
EXO 35:13 डन्डो अऊर सब सामान समेत मेज, अऊर भेंट की रोटियां;
EXO 35:14 सामान अऊर दीपकों समेत उजाड़ो देन वालो दीया, अऊर उजाड़ो देन लायी तेल;
EXO 35:15 डन्डों समेत धूपवेदी, अभिषेक को तेल, सुगन्धित धूप, अऊर निवास को फाटक को परदा;
EXO 35:16 पीतल की जाली, डन्डो आदि पूरो सामान सहित होमबलि वेदी, पाय सहित गंगार;
EXO 35:17 खम्बा अऊर उन्को तक्ता सहित आंगन को परदा, अऊर आंगन को फाटक को परदा;
EXO 35:18 निवास अऊर आंगन दोयी को खूटा, अऊर रस्सियां;
EXO 35:19 पवित्र जागा म सेवा काम करतो समय पहिनन को बुन्यो हुयो कपड़ा, अऊर याजक को काम करन लायी हारून याजक को पवित्र कपड़ा, अऊर ओको टुरावों को कपड़ा।”
EXO 35:20 तब इस्राएलियों की पूरी मण्डली मूसा को आगु सी लौट गयी।
EXO 35:21 अऊर जितनो ख उत्साह भयो अऊर जितनो को मन म असी इच्छा पैदा भयी होती, हि मिलाप वालो तम्बू को काम करन अऊर ओकी पूरी सेवा अऊर पवित्र कपड़ा ख बनावन लायी परमेश्वर की भेंट लावन लग्यो,
EXO 35:22 का बाई, का आदमी, जितनो को मन म असी इच्छा पैदा भयी होती हि सब नथनी, अंगुठी, कान की बाली अऊर गरो को हार अऊर सब तरह को सोनो को जेवर लावन लग्यो, जो जो आदमी परमेश्वर ख भेंट चढ़ानो चाहत होतो ओन सोनो लायो।
EXO 35:23 अऊर जो जो आदमी को जवर नीलो, जामुनी यां लाल रंग को कपड़ा, यां पतलो सूत सी बुन्यो हुयो कपड़ा, यां शेरी को बाल, यां लाल रंग सी रंगी हुयी मेंढा की खाल, यां सुइसों की खाल होती हि उन्ख ले आयो।
EXO 35:24 फिर जितनो चांदी, यां पीतल की भेंट को देन वालो होतो हि परमेश्वर लायी वसीच भेंट ले आये; अऊर जेको जेको जवर उपयोग म आवन वालो बबूल की लकड़ी होती हि ओख ले आये।
EXO 35:25 अऊर जितनी बाईयों को दिल म बुद्धि की कला होती हि अपनो हाथ सी सूत कात कात क नीलो, जामुनी अऊर लाल रंग को, पतलो सूत कात क ले आयी।
EXO 35:26 जितनी बाईयों को मन म असी बुद्धि की कला होती उन्न शेरी को बाल भी बुन्यो।
EXO 35:27 अऊर मुखिया लोग एपोद अऊर चपरास लायी सुलैमानी मनि, अऊर जड़न लायी मनि,
EXO 35:28 अऊर प्रकाश देन अऊर अभिषेक अऊर धूप को लायी सुगन्धित मसाले अऊर तेल लायो।
EXO 35:29 जो जो चिज ख बनावन की आज्ञा परमेश्वर न मूसा को द्वारा दी होती ओको लायी जो कुछ जरूरी होतो, ओख हि सब आदमी अऊर बाईयों ले आयी, जिन्को दिल म असी इच्छा पैदा भयी होती। यो तरह इस्राएली परमेश्वर लायी अपनीच इच्छा सी भेंट ले आयो।
EXO 35:30 तब मूसा न इस्राएली लोगों सी कह्यो, “सुनो, परमेश्वर न यहूदा को वंश वालो बसलेल ख, जो ऊरी को टुरा अऊर हूर को नाती हय, नाम ले क बुलायो हय;
EXO 35:31 अऊर ओन ओख परमेश्वर को आत्मा सी असो परिपूर्न करयो हय कि सब तरह की कला लायी ओख असी बुद्धि, समझ, अऊर ज्ञान मिल्यो हय
EXO 35:32 कि ऊ कला की योजना निकाल क सोनो, चांदी अऊर पीतल म,
EXO 35:33 अऊर जड़न लायी मनि काटन म अऊर लकड़ी पर नक्कासी करन म, बल्की बुद्धी सी सब तरह की निकाली हुयी कला म काम कर सके।
EXO 35:34 फिर परमेश्वर न ओको मन म अऊर दान वंश को अहीसामाक को टुरा ओहोलीआब को मन म भी शिक्षा देन की शक्ति दी हय।
EXO 35:35 इन दोयी को दिल ख परमेश्वर न असी बुद्धि सी परिपूर्न करयो हय कि हि कुशल कला अऊर गढ़न वालो अऊर नीलो, जामुनी अऊर लाल रंग को कपड़ा, अऊर पतलो सूत को कपड़ा म काढ़न अऊर बुनन वालो होना, बल्की सब तरह की बनावट म, अऊर बुद्धि सी काम निकालन म सब तरह को काम करे।
EXO 36:1 “बसलेल अऊर ओहोलीआब अऊर सब बुद्धिमान जिन्ख परमेश्वर न असी बुद्धि अऊर समझ दियो हो कि हि परमेश्वर की पूरी आज्ञावों को अनुसार पवित्र जागा की सेवा लायी सब तरह को काम करनो जानय हय, हि सब यो काम करेंन।”
EXO 36:2 तब मूसा न बसलेल अऊर ओहोलीआब अऊर सब बुद्धिमानों ख जिन्को दिल म परमेश्वर न बुद्धि को प्रकाश दियो होतो, मतलब जेख जेख जवर आय क काम करन को उत्साह भयो होतो उन सब ख बुलायो;
EXO 36:3 अऊर इस्राएली जो जो भेंट पवित्र जागा की सेवा को काम अऊर ओख बनावन लायी ले आयो होतो, उन्ख उन आदमियों न मूसा को हाथ सी ले लियो। तब भी लोग हर सुबेरे ओको जवर भेंट अपनी इच्छा सी लावतो रहो;
EXO 36:4 अऊर जितनो बुद्धिमान पवित्र जागा को काम करत होतो हि सब अपनो अपनो काम छोड़ क मूसा को जवर आये,
EXO 36:5 अऊर मूसा सी कहन लग्यो, “जो काम ख करन की आज्ञा परमेश्वर न दियो हय ओको लायी जितनो होनो ओको सी जादा हि ले आयो हंय।”
EXO 36:6 तब मूसा न पूरी छावनी म या आज्ञा को प्रचार करवायो, “का आदमी, का बाई, कोयी पवित्र जागा लायी अऊर भेंट नहीं लाये।” यो तरह लोग अऊर भेंट लावन सी रोक्यो गयो;
EXO 36:7 कहालीकि सब काम बनावन लायी जितनो सामान जरूरत होतो, ओको सी जादा बनावन वालो को जवर आय चुक्यो होतो।
EXO 36:8 काम करन वालो जितनो कुशल कारीगर होतो उन्न निवास लायी यां परदा पतलो सूत सी बुन्यो हुयो नीलो, जामुनी अऊर लाल रंग को कपड़ा को दस परदा ख बुनायी करयो हुयो करूबों सहित बनायो।
EXO 36:9 हर एक परदा की लम्बायी अट्ठावीस हाथ अऊर चौड़ायी चार हाथ की होना; सब परदा एकच नाप को बने।
EXO 36:10 ओन पाच परदा एक दूसरो सी जोड़ दियो, अऊर फिर दूसरो पाच परदा भी एक दूसरो सी जोड़ दियो।
EXO 36:11 अऊर जहां यो परदा जोड़्यो गयो वहां की दोयी कोनो पर ओन नीलो नीलो फन्दा लगाये।
EXO 36:12 ओन दोयी कोना म पचास पचास फन्दा यो तरह लगाये कि हि एक दूसरो को आगु रहे।
EXO 36:13 अऊर ओन सोनो को पचास आकड़ा बनाये, अऊर उन्को द्वारा परदा ख एक दूसरो सी असो जोड़्यो कि निवास मिल क एकच भय गयो।
EXO 36:14 तब निवास जागा को ऊपर को तम्बू लायी ओन शेरी को बाल को ग्यारा परदा बनाये।
EXO 36:15 एक एक परदा की लम्बाई तीस हाथ अऊर चौड़ाई चार हाथ की भयी; अऊर ग्यारा परदा भी एकच नाप को होतो।
EXO 36:16 इन म सी ओन पाच परदा अलग अऊर छय परदा अलग जोड़ दियो।
EXO 36:17 अऊर जहां दोयी जोड़्यो गयो वहां को कोना म ओन पचास पचास फन्दा लगाये।
EXO 36:18 अऊर ओन तम्बू को जोड़न लायी पीतल को पचास आकड़ा भी बनाये जेकोसी ऊ एक होय जाये।
EXO 36:19 अऊर ओन तम्बू लायी लाल रंग सी रंगी हुयी मेंढा की खालों को एक ओढ़ना अऊर ओको ऊपर लायी सुइसों की खालों को भी एक ओढ़ना बनायो।
EXO 36:20 तब ओन निवास लायी बबूल की लकड़ी को तक्ता ख खड़ो रहन लायी बनायो।
EXO 36:21 हर एक तक्ता की लम्बायी दस हाथ अऊर चौड़ायी देड़ हाथ की भयी।
EXO 36:22 हर एक तक्ता म एक दूसरो सी जोड़ी हुयी दोय दोय खाचा बन्यो, निवास को सब तक्ता ख ओन एक जसो बनायो।
EXO 36:23 ओन निवास लायी तक्ता ख बनायो कि दक्षिन को तरफ बीस तक्ता;
EXO 36:24 अऊर इन बीसों तक्ता को खल्लो चांदी की चालीस पाया, मतलब एक एक तक्ता को खल्लो ओकी दोय खाचा लायी ओन दोय कुर्चियां बनायी।
EXO 36:25 अऊर निवास की दूसरो तरफ, मतलब उत्तर को तरफ लायी भी ओन बीस तक्ता बनाये;
EXO 36:26 अऊर इन्को लायी भी ओन चांदी की चालीस पाया, मतलब एक एक तक्ता को खल्लो दोय दोय पाया बनायी।
EXO 36:27 अऊर निवास को पीछु को तरफ, मतलब पश्चिम को तरफ को लायी ओन छय तक्ता बनायो;
EXO 36:28 अऊर पिछलो हिस्सा म निवास को कोना लायी ओन दोय तक्ता बनायो।
EXO 36:29 हि खल्लो सी दोय दोय हिस्सा को बने, अऊर दोयी हिस्सा ऊपर को कोना तक एक एक कड़ा म मिलाये गयो; ओन उन दोयी तक्ता को आकार असोच बनायो
EXO 36:30 यो तरह आठ तक्ता भयो, अऊर उन्की चांदी की सोला पाया भयी; मतलब हर एक तक्ता को खल्लो दोय दोय पाया भयी।
EXO 36:31 तब ओन बबूल की लकड़ी की बेंड़े बनायो, मतलब निवास को एक तरफ को तक्ता लायी पाच बेंड़ा,
EXO 36:32 अऊर निवास को दूसरो तरफ को तक्ता लायी पाच बेंड़ा, अऊर निवास को जो किनार पश्चिम को तरफ पिछलो हिस्सा म होतो ओको लायी भी पाच बेंड़ा बनायो।
EXO 36:33 अऊर ओन बीच वालो बेंड़ा ख तक्ता को बीच म तम्बू को एक कोना सी दूसरो कोना तक पहुंचन लायी बनायो।
EXO 36:34 अऊर तक्ता ख ओन सोनो सी मढ़यो, अऊर बेंड़ों ख जो घर को काम देन वालो कड़ा ख सोनो को बनायो, अऊर बेंड़ा ख भी सोनो सी मढ़यो।
EXO 36:35 फिर ओन नीलो, जामुनी अऊर लाल रंग को कपड़ा को, अऊर पतलो सूत सी बुन्यो हुयो कपड़ा को बीच वालो परदा बनायो; ऊ बुनायी को काम करयो हुयो करूबों को संग बनायो।
EXO 36:36 ओन ओको लायी बबूल को चार खम्बा बनायो, अऊर उन्को सोनो सी मढ़यो; उन्की घुंड़ियां सोनो की बनायी, अऊर ओन उन्को लायी चांदी को चार पाया बनायो।
EXO 36:37 ओन तम्बू को दरवाजा लायी भी नीलो, जामुनी अऊर लाल रंग को कपड़ा को, अऊर पतलो सूत बुन्यो हुयो कपड़ा सी बुनायी को काम करयो हुयो परदा बनायो;
EXO 36:38 अऊर ओन घुंड़ियों सहित ओको पाच खम्बा भी बनाये, अऊर उन्को कोनो अऊर जोड़न की पट्टियों ख सोनो सी मढ़यो, अऊर उन्को पाच पाया पीतल को बनायो।
EXO 37:1 तब बसलेल न बबूल की लकड़ी को सन्दूक बनायो; ओकी लम्बायी ढायी हाथ, चौड़ायी डेढ़ हाथ, अऊर ऊंचायी डेढ़ हाथ की होती,
EXO 37:2 ओन ओख अन्दर बाहेर शुद्ध सोनो सी मढ़यो, अऊर ओको चारयी तरफ सोनो की किनार बनायी।
EXO 37:3 अऊर ओको चारयी पाय पर लगान लायी ओन सोनो को चार कड़ा डाल्यो, दोय कड़ा एक तरफ अऊर दोय कड़ा दूसरो तरफ लग्यो।
EXO 37:4 तब ओन बबूल को डन्डा बनाये, अऊर उन्ख सोनो सी मढ़यो,
EXO 37:5 अऊर उन्को सन्दूक को दोयी तरफ को कड़ों म डाल्यो कि उन्को बल सन्दूक उठायो जाये।
EXO 37:6 तब ओन शुद्ध सोनो को प्रायश्चित वालो ढक्कन ख बनायो; ओकी लम्बायी ढायी हाथ अऊर चौड़ायी देढ़ हाथ की होती।
EXO 37:7 अऊर ओन सोनो ढाल क दोय करूब प्रायश्चित को ढक्कन को दोयी कोनो को ऊपर बनाये;
EXO 37:8 एक करूब एक कोना पर, अऊर दूसरो करूब दूसरो कोना पर बनाव; ओन उन्ख प्रायश्चित को ढक्कन को संग एकच तुकड़ा को दोयी कोनो पर बनायो।
EXO 37:9 अऊर करूबों को पंख ऊपर सी फैलायो हुयो बनाव, अऊर उन पंखा सी प्रायश्चित को ढकना झक्यो हुयो बनाव, अऊर उन्को मुख आमने-सामने अऊर प्रायश्चित को ढक्कन को तरफ करयो हुयो बनाव।
EXO 37:10 तब ओन बबूल की लकड़ी की मेज ख बनायो; ओकी लम्बायी दोय हाथ, चौड़ायी एक हाथ, अऊर ऊचायी देढ़ हाथ की होती;
EXO 37:11 अऊर ओन ओख शुद्ध सोनो सी मढ़यो, अऊर ओको म चारयी तरफ सोनो की एक किनार बनायी;
EXO 37:12 अऊर ओन ओको लायी चार बोट चौड़ी एक चौखट बनायी, अऊर या चौखट लायी चारयी तरफ सोनो की एक किनार बनायी।
EXO 37:13 ओन मेज लायी सोनो को चार कड़ा ढाल क उन चारयी कोनो म लगायो, जो ओको चारयी पाय पर होतो।
EXO 37:14 हि कड़ां चौखट को जवर मेज ख उठावन लायी डन्डो ख सहारा देन लायी बनायो।
EXO 37:15 ओन मेज ख उठावन लायी डन्डा ख बबूल की लकड़ी को बनायो अऊर सोनो सी मढ़यो।
EXO 37:16 अऊर ओन मेज पर को सामान मतलब परात, धूपदान, कटोरा, अऊर पीवन को बर्तन सब शुद्ध सोनो को बनाये।
EXO 37:17 तब ओन शुद्ध सोनो को एक दीया बनायो; ओको डगाली, गाठ, पंकुड़ी अऊर फूल सब एकच तुकड़ा को बन्यो।
EXO 37:18 अऊर दीया सी निकली हुयी छय डगालियां बनी; तीन डगालियां ओको एक तरफ सी अऊर तीन डगालियां ओको दूसरी तरफ सी निकली हुयी बन्यो।
EXO 37:19 छय डगाली म सी हर एक सजावटी फूल होत होतो, जो कलियां अऊर पंकुड़ियां को संग बादाम को फूलों को तरह होत होतो।
EXO 37:20 अऊर दीया की डन्डी म बादाम को फूल को जसो अपनी अपनी कलियां अऊर फूल सहित चार पंकुड़ी बनाये।
EXO 37:21 अऊर दीया सी निकली हुयी छय डगालियां म सी दोय दोय डगालियां को नीचो एक एक कलियां दीया को संग एकच तुकड़ा की बनाये।
EXO 37:22 कली अऊर डगालियां सब दीया को संग एकच तुकड़ा की बने; शुद्ध सोनो ढाल क पूरो दीया एकच तुकड़ा को बन्यो।
EXO 37:23 अऊर ओन दीया को सातों दीया बनाये, अऊर चिमटे अऊर थारी सब शुद्ध सोनो को बनाये।
EXO 37:24 ओन पूरो सामान सहित दीवट अऊर ओको सब कटोरा लगभग चौतीस किलो शुद्ध सोनो को बनायो।
EXO 37:25 तब ओन बबूल की लकड़ी की धूप वेदी भी बनायी; ओकी लम्बायी एक हाथ अऊर चौड़ायी एक हाथ की होती; वा चौकोन बने, अऊर ओकी ऊचायी दोय हाथ की होती; अऊर ओको सींग ओको संग एकच तुकड़ा को बन्यो होतो।
EXO 37:26 ऊपर वालो पल्लां, अऊर चारयी तरफ को बाजुवों अऊर सींगो सहित ओन उच वेदी ख शुद्ध सोनो सी मढ़यो; अऊर ओको चारयी तरफ सोनो की एक किनार बनायी,
EXO 37:27 अऊर ऊ किनार को खल्लो ओको दोयी पल्लां पर ओन सोनो को दोय कड़ा बनायो, जो ओख उठावन को डन्डा ख सहारा को काम दे।
EXO 37:28 अऊर डन्डा ख ओन बबूल की लकड़ी को बनायो अऊर सोनो सी मढ़यो।
EXO 37:29 ओन अभिषेक को पवित्र तेल अऊर सुगन्धित द्रव्य को धूप सुगन्ध को रीति को अनुसार बनायो।
EXO 38:1 तब ओन बबूल की लकड़ी की होमबलि वेदी भी बनायी; ओकी लम्बायी पाच हाथ अऊर चौड़ायी पाच हाथ की होती; यो तरह सी ऊ चौकोन बनी, अऊर ऊचायी तीन हाथ की होती।
EXO 38:2 ओन ओको चारयी कोनो पर ओको चार सींग बनाये, हि ओको संग बिना जोड़ क् बन्यो; अऊर ओन ओख ख पीतल सी मढ़यो।
EXO 38:3 अऊर ओन वेदी को पूरो सामान, यानेकि ओकी हान्डियों, फावडां, कटोरा, काटे अऊर आगी कटोराच सब पीतल सी बनाये।
EXO 38:4 ओन वेदी लायी पेटी को नीचो, एक पीतल की जाली एक असी एक जाली बनायी, ऊ नीचो सी वेदी की ऊचायी को बीच तक पहुंची।
EXO 38:5 ओन पीतल की जाली को चारयी कोनो लायी चार कड़ा ढाल्यो, जो डन्डों को खाना को काम दे।
EXO 38:6 तब ओन डन्डों ख बबूल की लकड़ी को बनायो अऊर पीतल सी मढ़यो।
EXO 38:7 तब ओन डन्डों ख वेदी को किनारो को कड़ों म वेदी क् उठान लायी डाल दियो। वेदी ख ओन तक्ता सी खोखली बनायो।
EXO 38:8 ओन गंगार अऊर ओको पाया दोयी पीतल को बनाये, यो मिलाप वालो तम्बू को फाटक पर सेवा करन वालो बाईयों को आरसा को पीतल सी बनाये गयो।
EXO 38:9 तब ओन आंगन बनायो; अऊर दक्षिन की तरफ लायी आंगन को परदा पतलो सूत सी बुन्यो हुयो कपड़ा को होतो, अऊर सब मिलाय क सौ हाथ लम्बो होतो;
EXO 38:10 उन्को लायी बीस खम्बा, अऊर पीतल को बीस पाया बन्यो; अऊर खम्बा की घुंड़ियां अऊर जोड़न की पट्टियां चांदी की बनी।
EXO 38:11 अऊर उत्तर की तरफ लायी भी सौ हाथ लम्बो परदा बन्यो; अऊर उन्को लायी बीस खम्बा अऊर पीतल को बीस पाया बन्यो, अऊर खम्बां की घुंड़ियां अऊर जोड़न की पट्टियां चांदी को बनी होती।
EXO 38:12 अऊर पश्चिम की तरफ परदा साढ़े बावीस मीटर लम्बो होतो; उन्को लायी दस खम्बा अऊर दस उन्को पाया होतो, अऊर खम्बां की घुन्डियां अऊर जोड़न वाली पट्टियां चांदी की होती।
EXO 38:13 अऊर पूर्व हिस्सा म आगु को तरफ को परदा पचास लम्बो होतो।
EXO 38:14 आंगन को फाटक को एक तरफ लायी पन्द्रा हाथ को परदा बन्यो; अऊर उन्को लायी तीन खम्बा अऊर तीन पाया होतो।
EXO 38:15 अऊर आंगन को फाटक को दूसरी तरफ भी वसोच बन्यो होतो; अऊर आंगन को दरवाजा को इत अऊर उत पन्द्रा पन्द्रा हाथ को परदा बन्यो होतो; अऊर उन्को लायी तीन तीन खम्बा, अऊर तीन तीन पाया भी होतो।
EXO 38:16 आंगन को चारयी तरफ सब परदा पतलो बुन्यो हुयो सूती कपड़ा को होतो।
EXO 38:17 अऊर खम्बां को पाया पीतल को अऊर घुन्डियां अऊर पट्टियां चांदी को बन्यो होतो, अऊर उन्को ऊपर को कोना चांदी सी मढ़यो हुयो होतो, अऊर आंगन को सब खम्बां चांदी की पट्टियां सी जुड़ गयो।
EXO 38:18 आंगन को फाटक को परदा पर बुनायी करी गयी होती, अऊर ऊ नीलो, जामुनी तब लाल रंग को कपड़ा को; पतलो बुन्यो हुयो सूती कपड़ा को होतो; अऊर ओकी ऊचायी आंगन को बराबर को चौड़ायी को समान पाच हाथ की बन्यो।
EXO 38:19 अऊर उन्को लायी चार खम्बां, अऊर खम्बों की चारयी पाया पीतल को बन्यो, उन्की घुन्डियां चांदी की बन्यो, अऊर उन्को कोना चांदी सी मढ़यो गयो होतो, अऊर उन्की पट्टियां चांदी को बन्यो होती।
EXO 38:20 निवास जागा तब आंगन को चारयी तरफ को सब खूटा पीतल को बन्यो होतो।
EXO 38:21 निवास जागा मतलब गवाही चिट्ठी को तम्बू को सामान जो लेवियों को सेवा लायी बन्यो होतो, अऊर जेकी गिनती मूसा को आज्ञा को अनुसार हारून याजक को टुरा ईतामार को द्वारा हुयी होती, ओको वर्नन यो हय।
EXO 38:22 जेको जेको चिज को बनान की आज्ञा परमेश्वर न मूसा ख दियो होती ओख ख बसलेल न बनायो, ऊ ऊरी को टुरा, हूर को नाती अऊर यहूदा को वंश को होतो।
EXO 38:23 अऊर ओको संग दान वंश वालो, अहीसामाक को टुरा, ओहोलीआब होतो, जो नक्कासी करन अऊर गढ़न वालो अऊर नीलो, जामुनी अऊर लाल रंग को पतलो धागा सी बुन्यो हुयो कपड़ा म बुनायी करन वालो निपुन कारीगर होतो।
EXO 38:24 पवित्र जागा को पूरो काम म जो भेंट को सोनो लग्यो ऊ पवित्र जागा को शेकेल को हिसाब सी एक हजार दोय किलो होतो।
EXO 38:25 अऊर मण्डली को गिन्यो हुयो लोगों की भेंट की चांदी पवित्र जागा को शेकेल को हिसाब सी सौ किक्कार अऊर सतरा सौ पचहत्तर शेकेल होती।
EXO 38:26 मतलब जितनो बीस साल अऊर ओख सी जादा उमर को होतो, जो गिनती म छय लाख तीन हजार पाच सौ पचास आदमी होतो, उन सी एक बेका हर आदमी ख मतलब पवित्र जागा को शेकेल को अनुसार अरधो शेकेल मिल्यो।
EXO 38:27 अऊर ऊ सौ किक्कार चांदी पवित्र जागा अऊर बीच वालो परदा दोयी को पाया को ढालन म लग गयो; सौ किक्कार सी सौ पाया बन्यो, हर एक पाया एक किक्कार को बन्यो।
EXO 38:28 अऊर शेष एक हजार सात सौ पछत्तर शेकेल सी ओन खम्बों की घुन्डियां बनायी अऊर खम्बों को ऊपर को भाग मढ़यो, अऊर उन्की पट्टियां भी बनायी।
EXO 38:29 अऊर भेंट को पीतल सत्तर किक्कार अऊर दोय हजार चार सौ शेकेल होतो
EXO 38:30 ओको सी मिलाप वालो तम्बू को फाटक को पाया अऊर पीतल की वेदी, ओकी पीतल की जाली, अऊर वेदी को पूरो सामान;
EXO 38:31 अऊर आंगन को चारयी तरफ को पाया, अऊर ओको फाटक को पाया, अऊर निवास, अऊर आंगन को चारयी तरफ को खूटा भी बनाये गयो।
EXO 39:1 तब उन्न नीलो, जामुनी अऊर लाल रंग को सूत सी पवित्र वेदी की सेवा करन वालों याजकों लायी पहिनन लायी कपड़ा बनाये, अऊर हारून लायी भी पवित्र कपड़ा बनाये; जो तरह परमेश्वर न मूसा ख आज्ञा दी होतो।
EXO 39:2 ओन एपोद पोशाक ख सोनो सी, पतलो सूत सी बुन्यो हुयो नीलो, जामुनी अऊर लाल रंग को कपड़ा सी बनायो।
EXO 39:3 अऊर उन्न सोनो ख पीट क पतली पत्तियां बनायी अऊर उन्म सी तार काट्यो। बाद म उन तार बनायो अऊर कुशल कारीगरों को द्वारा पतलो सूत सी बुन्यो हुयो नीलो, जामुनी अऊर लाल रंग को कपड़ा पर बनावट सी मिलाय दियो।
EXO 39:4 उन्न एपोद लायी ओको दोयी कोनो पर जुड़्यो हुयो दोय कन्धा बनाये।
EXO 39:5 अऊर ओख कसन लायी जो बारीक बुन्यो हुयो पट्टा ओको पर बन्यो, ऊ ओको संग बिना जोड़ को होतो, अऊर ओकीच बनावट को अनुसार, मतलब सोनो अऊर नीलो, जामुनी अऊर लाल रंग को कपड़ा को, अऊर स्वर्ण को कपड़ा को बन्यो; जसो परमेश्वर न मूसा ख आज्ञा दी होती।
EXO 39:6 अऊर उन्न सुलैमानी गोटा काट क सोनो की खांचों म जोड़्यो गयो, यो गोटा इस्राएल को बारा टुरावों को नामों को अनुसार मुहर को समान खोद्यो गयो होतो।
EXO 39:7 अऊर ओन उन्ख एपोद पोशाक को कन्धावों पर लगाय दियो, जेकोसी इस्राएलियों लायी याद करान वालो मनि ठहरे; जो तरह परमेश्वर न मूसा ख आज्ञा दी होती।
EXO 39:8 ओन सीनाबन्द ख एपोद को समान सोनो की, अऊर नीलो, जामुनी रंग को कपड़ा सी बनायो, अऊर बन्यो हुयो सन को कपड़ा म कलात्मक ढंग सी सीनाबन्द बनायो।
EXO 39:9 सीनाबन्द चार च कोना बराबर बन्यो होतो; डबल मोड़्यो हुयो, अऊर ऊ डबल होय क नव इंच अऊर नव इंच चौड़ो बन्यो।
EXO 39:10 अऊर उन्न ओको पर चार लायीन म मनि लगायो। पहली लायीन म एक माणिक्य; एक पुखराज, अऊर लालड़ी लगायो गयो;
EXO 39:11 अऊर दूसरी लायीन म मरकत, नीलमनि, अऊर हीरा की होती;
EXO 39:12 अऊर तीसरी लायीन म लशम, सूर्यकान्त, अऊर नीलम;
EXO 39:13 अऊर चौथी लायीन म लशम, सुलैमानी मनि, अऊर यशब जड़े; यो सब अलग अलग सोनो को जड़्यो गयो।
EXO 39:14 अऊर यो मनि इस्राएल को टुरावों को नामो को अनुसार बारा होतो; एक एक मनि पर एक एक कुल को नाम छाप को समान खोद्यो हुयो होतो।
EXO 39:15 अऊर उन्न सीनाबन्द कवच पर डोरियां को समान गूथ्यो हुयो शुद्ध सोनो की संकली बनाय क लगायी;
EXO 39:16 तब उन्न सोनो को दोय खाना, अऊर सोनो की दोय कड़ियां बनाय क दोयी कड़ियों ख सीनाबन्द कवच को दोयी कोनो पर जोड़ दियो;
EXO 39:17 तब उन्न सोनो की दोयी गूथी हुयी संकली ख सीनाबन्द कवच को कोनो पर की दोयी कड़ियों म लगायो।
EXO 39:18 अऊर गूथी हुयी दोयी संकलीयों को दोयी बाकी कोनो ख उन्न दोयी खांचों म लगायो, एपोद को आगु दोयी कन्धों को बन्धनो पर लगायो।
EXO 39:19 तब उन्न सोनो की अऊर दोय कड़ियां बनायो अऊर उन्ख एपोद पोशाक को बाजू को अन्दर किनार पर, एपोद को खल्लो कोनो पर जोड़ दियो।
EXO 39:20 अऊर उन्न सोनो की दोय अऊर कड़ियां भी बनाय क एपोद को दोयी कन्धों को खल्लो भाग को जोड़ पर, एपोद पोशाक को पतलो बुन्यो हुयो पट्टा को ऊपर जोड़ दियो।
EXO 39:21 तब उन्न सीनाबन्द कवच ख ओकी कड़ियों को द्वारा एपोद की कड़ियों म नीलो पट्टा सी असो बान्ध्यो कि ऊ एपोद को लगायो हुयो पट्टा को ऊपर रहेंन, अऊर चपरास एपोद सी अलग नहीं हो सकेंन; जसो परमेश्वर न मूसा ख आज्ञा दी होती।
EXO 39:22 ओन एपोद लायी सम्पूर्न नीलो रंग को एक अंगरखा बुन क बनायो।
EXO 39:23 अंगरखा को बीचो बीच एक छेद होतो, यो छेद को चारयी तरफ कपड़ा की गोट लग्यो होतो जेकोसी ऊ फट नहीं सकेंन।
EXO 39:24 उन्न अंगरखा को खल्लो वालो घेरा म पतलो सूत सी बुन्यो हुयो नीलो, जामुनी अऊर लाल रंग को कपड़ा को अनार जसो गोल बनाये।
EXO 39:25 उन्न शुद्ध सोनो की घुंगरू भी बनाय क अंगरखा को नीचो वालो घेरा को चारयी तरफ अनारों को बीचो बीच लगायी;
EXO 39:26 मतलब झगली को खल्लो वालो घेरा को चारयी तरफ एक सोनो की घन्टी, अऊर एक अनार, फिर एक सोनो की घन्टी, अऊर एक अनार लगायो गयो कि उन्ख पहिन्यो हुयो सेवा कार्य करे; जसो परमेश्वर न मूसा ख आज्ञा दी होती।
EXO 39:27 उन्न हारून अऊर ओको टुरावों लायी यो पोशाकें बनायी: महीन सूती कपड़ा को कुरता, फेटा अऊर टोपियां पतलो सूत सी बुन्यो हुयो कपड़ा को जांघियां,
EXO 39:28 पतलो बुन्यो हुयो कपड़ा को फेटा, सुन्दर टोपियां, अऊर जांघियां बनायी,
EXO 39:29 अऊर पतलो सूत सी बुन्यो हुयो नीलो, जामुनी फिर लाल रंग को कपड़ा को कमर पट्टा, जो पर सूई सी बुनायी करयो गयो होतो, जसी परमेश्वर न मूसा ख आज्ञा दी होती।
EXO 39:30 तब उन्न पवित्र मुकुट की पट्टी शुद्ध सोनो की बनायी; अऊर जसो मुहर म वसोच उन्म यो अक्षर खोद्यो गयो, मतलब “परमेश्वर लायी पवित्र।”
EXO 39:31 उन्न ओको फेटा को आगु नीलो रंग की रस्सी संग बान्ध दियो, ठीक जसो “परमेश्वर न मूसा ख आज्ञा दी होती।”
EXO 39:32 यो तरह मिलाप वालो तम्बू को निवास को सब काम पूरो भयो, अऊर जो काम की आज्ञा परमेश्वर न मूसा ख दी होती, इस्राएलियों न ओको अनुसार करयो।
EXO 39:33 अऊर हि निवास को तम्बू अऊर ओकी सब चिजों सहित मूसा को जवर ले आये : मतलब हंसिया, चौखट, सलाखें, खम्बा अऊर तम्बू तक ले आये;
EXO 39:34 अऊर लाल रंग सी रंगी हुयी मेंढा की खाल को ओढ़ना, अऊर सूइसों की खाल को ओढ़ना, अऊर बीच को परदा;
EXO 39:35 गवाही-चिट्ठी को सन्दूक अऊर ओको खम्बा, अऊर पश्चाताप को ढक्कन;
EXO 39:36 मेज अऊर ओकी सब चिजे अऊर भेंट की रोटी;
EXO 39:37 शुद्ध सोनो की दीवट, अऊर ओको संग ओकी सजावट को दीया, अऊर ओकी सब चिजे फिर दीया जलावन लायी तेल;
EXO 39:38 सोनो की वेदी, अऊर अभिषेक को तेल; सुगन्धित धूप अऊर तम्बू को दरवाजा को परदा;
EXO 39:39 पीतल की वेदी अऊर ओकी पीतल की जाली, ओकी सब चिजों सहित खम्बा; गंगार अऊर ओको पाये;
EXO 39:40 खम्बों अऊर पाया समेत आंगन को परदा, अऊर आंगन को फाटक को परदा, अऊर डोरियां, अऊर खूटा, अऊर मिलाप वालो तम्बू को निवास को सेवा को पूरो सामान;
EXO 39:41 पवित्र जागा म सेवा करतो समय पहिन्यो हुयो कपड़ा, अऊर याजकीय सेवा काम करन लायी हारून याजक को पवित्र कपड़ा अऊर ओको टुरावों को कपड़ा।
EXO 39:42 जसी परमेश्वर न मूसा ख आज्ञा दी होती ओको अनुसार इस्राएलियों न सब काम करयो।
EXO 39:43 तब मूसा न पूरो काम ख जांच क देख्यो कि उन्न वसोच करयो होतो जसो परमेश्वर न आज्ञा दी होती। अऊर मूसा न उन्ख आशीर्वाद दियो।
EXO 40:1 तब परमेश्वर न मूसा सी कह्यो,
EXO 40:2 “पहिलो महीना को पहिलो दिन ख तय मिलाप वालो तम्बू को निवास ख खड़ो कर देजो।
EXO 40:3 अऊर ओको म गवाही चिट्ठी को सन्दूक ख रख क बीच वालो परदा की आड़ म कर देजो।
EXO 40:4 अऊर मेज ख अन्दर लिजाय क जो कुछ ओको पर सजानो हय ओख सजाय देजो; तब दीवट ख अन्दर लिजाय क ओको दीयावों ख जलाय देजो।
EXO 40:5 अऊर गवाही चिट्ठी को सन्दूक को आगु सोनो की वेदी ख, जो धूप लायी हय ओख रखजो, अऊर निवास को दरवाजा को परदा ख लगाय देजो।
EXO 40:6 अऊर तय मिलाप वालो तम्बू को निवास को फाटक को आगु होमबलि वेदी ख रखजो।
EXO 40:7 अऊर मिलाप वालो तम्बू फिर वेदी को बीच गंगार ख रख क् उन्म पानी भर देजो।
EXO 40:8 अऊर तय चारयी तरफ आंगन बाड़ा बान्ध क आंगन को फाटक पर परदा लटकाय देजो।
EXO 40:9 तब तय अभिषेक को तेल ले क निवास जागा अऊर जो कुछ ओको म हय, सब को अभिषेक करजो अऊर ओख अऊर ओकी पूरी चिजे ख पवित्र करजो; तब वा पवित्र होय जायेंन।
EXO 40:10 अऊर तय होमबलि वेदी अऊर ओकी सब चिजे ख अभिषेक कर क् वेदी ख अर्पन करजो; तब वेदी परम पवित्र होय जायेंन।
EXO 40:11 अऊर तय पाय समेत गंगार ख भी अभिषेक कर क् ओख पवित्र करजो।
EXO 40:12 तब तय हारून अऊर ओको टुरावों ख मिलाप वालो तम्बू को फाटक पर लिजाय क पानी सी नहलाजो,
EXO 40:13 अऊर तय हारून ख पवित्र कपड़ा पहिनाजो, अऊर ओको अभिषेक कर क् ओख अर्पन करजो, ताकि ऊ मोरो लायी याजक होय क मोरी सेवा काम करेंन।
EXO 40:14 अऊर तय ओको टुरावों ख भी लायजो अऊर उन्ख कुरता पहिनाजो।
EXO 40:15 अऊर तय उन्को वसोच संस्कार करजो जसो उन्को बाप को संस्कार करयो होतो, कि हि मोरो लायी याजकीय सेवा काम कर सके; अऊर उन्को अभिषेक उन्की पीढ़ी सी पीढ़ी लायी हमेशा लायी याजक बन्यो रहेंन।”
EXO 40:16 मूसा न असोच करयो, जो आज्ञा परमेश्वर न उन्ख दी होती, ओको अनुसार उन्न सब काम करयो।
EXO 40:17 अऊर दूसरो साल को पहिलो महीना को पहिलो दिन को निवास ख खड़ो करयो गयो।
EXO 40:18 मूसा न निवास ख खड़ो करयो, तब पाया पर तक्ता रख क उन्म बेंड़ा डाल्यो, अऊर ओको खम्बों ख खड़ो करयो;
EXO 40:19 अऊर ओन निवास को ऊपर तम्बू ख फैलायो, अऊर तम्बू को ऊपर ओन ओढ़ना ख लगायो; जो तरह परमेश्वर न मूसा ख आज्ञा दी होतो।
EXO 40:20 अऊर ओन गवाही चिट्ठी ख ले क सन्दूक म रख्यो, अऊर सन्दूक म डन्डा ख लगाय क ओको ऊपर प्रायश्चित को ढक्कन ख सन्दूक को ऊपर रख दियो;
EXO 40:21 अऊर मूसा न सन्दूक ख पवित्र जागा म रखवायो, अऊर बीच वालो परदा ख लटकाय दियो अऊर गवाही चिट्ठी ख सन्दूक ख अन्दर परदा की आड़ म करयो; जसो परमेश्वर न मूसा ख आज्ञा दी होतो।
EXO 40:22 तब मूसा न मिलाप वालो तम्बू म निवास को उत्तर दिशा म बीच को परदा को बाहेर मेज लगवायो,
EXO 40:23 उन्न ओको पर परमेश्वर को जवर रोटी सजाय क रखी; जसी परमेश्वर न मूसा ख आज्ञा दी होतो।
EXO 40:24 अऊर मूसा न मिलाप वालो तम्बू म मेज को आगु निवास को दक्षिन दिशा म दीवट ख रख दियो,
EXO 40:25 अऊर ओन दीयावों ख परमेश्वर को आगु जलाय दियो; जो तरह परमेश्वर न मूसा ख आज्ञा दी होतो।
EXO 40:26 तब मूसा न मिलाप वालो तम्बू को अन्दर बीच को परदा को आगु सोनो की वेदी ख रख्यो,
EXO 40:27 अऊर ओन ओको पर सुगन्धित धूप जलायो; जो तरह परमेश्वर न मूसा ख आज्ञा दी होती।
EXO 40:28 अऊर ओन निवास को दरवाजा पर परदा ख लगायो।
EXO 40:29 अऊर मिलाप वालो तम्बू को निवास को दरवाजा पर होमबलि वेदी ख रख क ओको पर होमबलि अऊर अन्नबलि ख चढ़ायो; जो तरह परमेश्वर न मूसा ख आज्ञा दी होती।
EXO 40:30 अऊर मूसा न मिलाप वालो तम्बू अऊर वेदी को बीच म गंगार ख रख क ओको म धोवन लायी पानी भर दियो,
EXO 40:31 अऊर मूसा अऊर हारून अऊर ओको टुरावों न ओको म अपनो अपनो हाथ पाय धोवत होतो;
EXO 40:32 अऊर जब जब हि मिलाप वालो तम्बू म यां वेदी को जवर जात होतो तब तब हि हाथ पाय धोय क जात होतो; जो तरह परमेश्वर न मूसा ख आज्ञा दी होती।
EXO 40:33 अऊर मूसा न मिलाप वालो तम्बू अऊर वेदी को चारयी तरफ आंगन ख घेरा लगाय क अऊर आंगन को फाटक पर परदा लटकाय दियो। येकोलायी ओन पूरो काम खतम कर दियो।
EXO 40:34 तब बादर मिलाप वालो तम्बू पर छाय गयो, अऊर परमेश्वर को तेज निवास-जागा म भर गयो।
EXO 40:35 अऊर बादर मिलाप वालो तम्बू पर रूक गयो, अऊर परमेश्वर को तेज निवास-जागा म भर गयो, यो वजह मूसा ओको म सिर नहीं सक्यो।
EXO 40:36 अऊर उन्की पूरी यात्रा म जब जब ऊ बादर मिलाप वालो तम्बू को ऊपर सी उठ जात होतो, तब तब इस्राएली आगु सी निकल जात होतो;
EXO 40:37 पर यदि बादर नहीं उठत होतो, त हि ऊ दिन तक निकलत नहीं होतो जब तक बादर वहां सी उठत नहीं होतो।
EXO 40:38 कहालीकि उन्की पूरी यात्रा म परमेश्वर दिन म मिलाप वालो तम्बू पर रूक्यो रहत होतो, अऊर रात म इस्राएली लोगों ख ओको म आगी दिखायी देत होती।
LEV 1:1 परमेश्वर न मूसा ख बुलाय क मिलाप वालो तम्बू म सी ओको सी कह्यो,
LEV 1:2 इस्राएलियों सी कह्य कि तुम म सी यदि कोयी आदमी परमेश्वर को लायी पशु को चढ़ावा चढ़ाये, त ओको बलिपशु पालतु जनावर यां मेंढा-शेरियों को झुण्ड म सी एक को हो।
LEV 1:3 “यदि ऊ गाय-बईलों म सी होमबलि करे, त निर्दोष नर मिलाप वालो तम्बू को द्वार पर चढ़ाये कि परमेश्वर ओख स्विकार करे।
LEV 1:4 ऊ अपनो हाथ होमबलिपशु को मुंड पर रखे, अऊर ऊ ओको लायी प्रायश्चित कर क् स्विकार करे।
LEV 1:5 तब ऊ बछड़ा ख परमेश्वर को आगु बलि करे; अऊर हारून को टुरा जो याजक हंय हि खून ख वेदी को जवर लिजाय क ऊ वेदी को चारयी तरफ छिड़के जो मिलाप वालो तम्बू को फाटक पर हय।”
LEV 1:6 फिर ऊ होमबलिपशु की खाल निकाल क ऊ पशु ख तुकड़ा-तुकड़ा करे;
LEV 1:7 तब हारून याजक को टुरा वेदी पर आगी रखे, अऊर आगी पर लकड़ी सजाय क रखे;
LEV 1:8 अऊर हारून को टुरा जो याजक हय हि मुंड अऊर चरबी समेत पशु को टुकड़ा ख ऊ लकड़ी पर जो वेदी की आगी पर होना सजाय क रखे;
LEV 1:9 अऊर ऊ ओकी आंतड़ियों अऊर पाय ख पानी सी धोये। तब याजक सब ख वेदी पर जलाये कि ऊ होमबलि परमेश्वर को लायी सुखदायक सुगन्ध वालो बलिदान ठहरे।
LEV 1:10 यदि ऊ झुण्ड म सी मेंढी यां शेरियों की होमबलि चढ़ाये त पूरो तरह सी स्वस्थ नर जनावर ख चढ़ाये;
LEV 1:11 अऊर ऊ ओख परमेश्वर को आगु वेदी को उत्तर को तरफ बलि करे; अऊर हारून को टुरा जो याजक हंय हि ओको खून ख वेदी को चारयी तरफ छिड़के।
LEV 1:12 अऊर ऊ ओख तुकड़ा-तुकड़ा करे, अऊर मुंड अऊर चरबी ख अलग करे, अऊर याजक इन सब ख ऊ लकड़ी पर सजाय क रखे जो वेदी की आगी पर होना;
LEV 1:13 अऊर ऊ ओकी आंतड़ियों अऊर पाय ख पानी सी धोये। अऊर याजक सब ख जवर लिजाय क वेदी पर जलाये कि ऊ होमबलि अऊर यहोवा को लायी सुखदायक सुगन्ध वालो बलिदान ठहरे।
LEV 1:14 यदि ऊ परमेश्वर को लायी पक्षियों की होमबलि चढ़ाये, त पण्डुकों यां कबूतरों को चढ़ावा चढ़ाये।
LEV 1:15 याजक ओख वेदी को जवर लिजाय क ओको गलो मुरकट क मुंड ख धड़ सी अलग करे, अऊर वेदी पर जलाये; अऊर ओको पूरो खून ऊ वेदी को बाजू म गिरायो जाये;
LEV 1:16 अऊर ऊ ओकी गल-थैली ख पंखों क वेदी को पूर्व को तरफ राख डालन को जागा पर फेंक दे;
LEV 1:17 अऊर ऊ ओख पंखा को बीच सी फाड़े, पर अलग-अलग नहीं करे। तब याजक ओख वेदी पर ऊ लकड़ी को ऊपर रख क जो आगी पर होना जलाये कि ऊ होमबलि अऊर परमेश्वर को लायी सुखदायक सुगन्ध वालो बलिदान ठहरे।
LEV 2:1 अब कोयी परमेश्वर लायी अनाज की भेंट को चढ़ावा चढ़ानो चाहे, त ऊ मैदा‍ चढ़ाये; अऊर ओको ऊपर तेल डाल क ओको ऊपर लुभान रखे;
LEV 2:2 अऊर ऊ ओख हारून को टुरा को जवर जो याजक हंय लाये। अऊर अनाज की भेंट को तेल मिल्यो हुयो मैदा म सी यो तरह अपनी मुट्ठी भर क निकाले कि लुभान ओको म आय जाये; अऊर याजक उन्ख याद दिलावन वालो हिस्सा लायी वेदी पर जलाये कि यो परमेश्वर लायी सुखदायक सुगन्धित भेंट ठहरे।
LEV 2:3 अऊर अनाज की भेंट म सी जो बच्यो रहे ऊ हारून अऊर ओको टुरावों को ठहरे; यो परमेश्वर की भेंटों म सी परमपवित्र हिस्सा होयेंन।
LEV 2:4 “जब तय अनाज की भेंट लायी चुलो म पकायो हुयो चढ़ावा चढ़ाये, त ऊ तेल सी सान्यो हुयो अखमीरी मैदा कि रोटियां यां तेल लगायी हुयी रोटियों को होना।”
LEV 2:5 अऊर यदि तोरो चढ़ावा तवा पर पकायो हुयो अनाज की भेंट होना, त ऊ तेल सी सान्यो हुयो अखमीरी मैदा को होना;
LEV 2:6 ओख तुकड़ा तुकड़ा कर क् ओको पर तेल डालजो, तब ऊ अनाज की भेंट होय जायेंन।
LEV 2:7 अऊर यदि तोरो चढ़ावा कढ़ाही म तल्यो हुयो अनाज की भेंट होना, त ऊ मैदा सी तेल म बनायो जाय।
LEV 2:8 अऊर जो अनाज की भेंट इन चिजों म सी कोयी को बन्यो होना ओख परमेश्वर को जवर लि जावो; अऊर जब ऊ याजक को जवर लायो जाय, तब याजक ओख वेदी को जवर लि जाये।
LEV 2:9 अऊर याजक अनाज की भेंट म सी याद दिलावन वालो हिस्सा निकाल क वेदी पर जलाये कि ऊ परमेश्वर को लायी सुखदायक सुगन्ध वालो अग्नि भेंट ठहरे;
LEV 2:10 अऊर अनाज की भेंट म सी जो बच्यो रहे ऊ हारून अऊर ओको टुरावों को ठहरे; ऊ परमेश्वर को अग्नि भेंटों म परमपवित्र हिस्सा होयेंन।
LEV 2:11 “कोयी अनाज की भेंट जेक तुम परमेश्वर को लायी चढ़ावो, खमीर मिलाय क बनायो नहीं जाय; तुम कभी वेदी म परमेश्वर लायी खमीर अऊर शहेद मत जलावो।”
LEV 2:12 तुम इन ख पहली फसल को चढ़ावा कर क् परमेश्वर लायी चढ़ावो, पर हि सुखदायक सुगन्ध लायी वेदी पर चढ़ायो नहीं जाय।
LEV 2:13 फिर अपनो सब अनाज की भेंटों ख नमकीन बनावो; अऊर अपनो कोयी अनाज की भेंट अपनो परमेश्वर को संग बन्धी हुयी वाचा को नमक सी रहित होनो नहीं देजो; अपनो सब चढ़ावा को संग नमक भी चढ़ावो।
LEV 2:14 “यदि तय परमेश्वर को लायी पहली फसल को अनाज की भेंट चढ़ाये, त अपनी पहली फसल को अनाज की भेंट को लायी आगी म भुजी हुयी हरी-हरी लोम्ब, मतलब हरी-हरी लोम्बा को दाना ख कुस कर क् निकाल लेजो, तब अनाज ख चढ़ावो।
LEV 2:15 अऊर ओको म तेल डालजो, अऊर ओको पर लुभान रखजो; तब ऊ अनाज की भेंट होय जायेंन।
LEV 2:16 अऊर याजक छिलका निकाल्यो हुयो अनाज ख, अऊर तेल ख, अऊर पूरो लुभान ख याद दिलावन वालो हिस्सा कर क् ख जलाय दे; ऊ परमेश्वर लायी वेदी की अग्नि ठहरे।
LEV 3:1 “यदि ओको चढ़ावा मेल-मिलाप बलिदान को होना, अऊर यदि पालतु जनावर म सी कोयी ख चढ़ाये, चाहे ऊ पशु नर यां मादा, जो पूर्ण स्वस्थ होना ओखच ऊ परमेश्वर को आगु चढ़ाये।
LEV 3:2 अऊर ऊ अपनो हाथ अपनो चढ़ावा को पशु को मुंड पर रखे अऊर ओख मिलाप वालो तम्बू को फाटक पर बलि करे; अऊर हारून को टुरा जो याजक हंय हि ओको खून ख वेदी को चारयी तरफ छिड़के।
LEV 3:3 अऊर ऊ मेल-मिलाप बलिदान म सी परमेश्वर लायी वेदी की आगी अर्पण करे, मतलब जो चर्बी सी अतड़ियां झकी रह्य हय, अऊर जो चरबी ओको म लिपटी रह्य हय वा भी,
LEV 3:4 अऊर दोयी गुड़दा अऊर उन्को ऊपर की चरबी जो कमर को जवर रह्य हय, अऊर गुड़दा समेत कलेजा को ऊपर की झिल्ली, इन सब ख ऊ अलग करे।
LEV 3:5 तब हारून को टुरा इन ख वेदी पर ऊ होमबलि को ऊपर जलाये, जो उन लकड़ियों पर होना जो आगी को ऊपर हय कि यो परमेश्वर लायी सुखदायक सुगन्ध वालो भेंट ठहरे।
LEV 3:6 “यदि परमेश्वर को मेल-मिलाप बलिदान लायी ओको चढ़ावा पालतु मेंढी-शेरियों को झुण्ड म सी होना, त चाहे ऊ नर होना यां मादा, पर जो पूर्ण स्वस्थ होना ओखच ऊ चढ़ाये।
LEV 3:7 यदि ऊ मेंढी को बच्चा चढ़ावय हय, त ओख परमेश्वर को सामने चढ़ाये,
LEV 3:8 अऊर ऊ अपनो चढ़ावा को पशु को मुंड पर हाथ रखे अऊर ओख मिलाप वालो तम्बू को सामने बलि करे; अऊर हारून को टुरा ओको खून ख वेदी को चारयी छिड़के।
LEV 3:9 तब मेल-मिलाप बलिदान म सी चरबी ख परमेश्वर लायी भेंट करे, मतलब ओकी चरबी भरी पूछ ख ऊ रीढ़ को जवर सी अलग करे, अऊर जो चरबी सी अतड़ियां झकी रह्य हंय, अऊर जो चरबी उन म लिपटी रह्य हय,
LEV 3:10 अऊर दोयी गुड़दा, अऊर जो चरबी ओको ऊपर कमर को जवर रह्य हय, अऊर गुड़दावो समेत कलेजा को ऊपर की झिल्ली, इन सब ख अलग करे।
LEV 3:11 अऊर याजक उन्ख वेदी पर जलाये; यो परमेश्वर लायी हव्यरूपी भोजन ठहरे।
LEV 3:12 “यदि ऊ शेरी चढ़ाये, त ओख परमेश्वर को सामने चढ़ाये।
LEV 3:13 अऊर ऊ अपनो हाथ ओको मुंड पर रखे, अऊर ओख मिलाप वालो तम्बू को आगु बलि करे; अऊर हारून को टुरा ओको खून ख वेदी को चारयी तरफ छिड़के।
LEV 3:14 तब ऊ ओको म सी अपनो चढ़ावा परमेश्वर लायी भेंट कर क् चढ़ाये, मतलब जो चरबी सी अतड़ियां झकी रह्य हय, अऊर जो चरबी उन म लिपटी रह्य हय ऊ भी,
LEV 3:15 अऊर दोयी गुड़दा अऊर जो चरबी ओको ऊपर कमर को जवर रह्य हय, अऊर गुड़दावो समेत कलेजा को ऊपर की झिल्ली, इन सब ख अलग करे।
LEV 3:16 अऊर याजक इन ख वेदी पर जलाये; यो हव्यरूपी भोजन हय जो सुखदायक सुगन्ध लायी होवय हय; कहालीकि पूरी चरबी परमेश्वर की आय।
LEV 3:17 यो तुम्हरो निवासों म तुम्हरी पीढ़ी सी पीढ़ी तक लायी हमेशा की विधि ठहरेंन कि तुम चरबी अऊर खून कभी नहीं खावो।”
LEV 4:1 फिर परमेश्वर न मूसा सी कह्यो,
LEV 4:2 इस्राएलियों सी यो कह्य कि यदि कोयी आदमी उन कामों म सी जिन्ख परमेश्वर न मना करयो हय, उन म सी एक कोयी काम ख भूल सी कर क् पापी होय जाये;
LEV 4:3 अऊर यदि अभिषिक्त याजक असो पाप करय हय, त प्रजा दोषी ठहरय हय, त अपनो पाप को वजह एक जवान बईल परमेश्वर ख पापबलि कर क् चढ़ाये।
LEV 4:4 ऊ बईल ख मिलाप वालो तम्बू को फाटक पर परमेश्वर को सामने लिजाय क ओको मुंड पर हाथ रख क परमेश्वर को सामने बलि करे।
LEV 4:5 अऊर अभिषिक्त याजक बईल को खून म सी कुछ ले क मिलाप वालो तम्बू म लिजाये;
LEV 4:6 अऊर याजक अपनो बोट खून म डुबाय क अऊर ओको म सी कुछ अंश ले क पवित्र जागा को बीच वालो परदा को सामने परमेश्वर को सामने सात बार छिड़के।
LEV 4:7 अऊर याजक ऊ खून म सी कुछ अंश सुगन्धित धूप की वेदी को सींगो पर जो मिलाप वालो तम्बू म हय परमेश्वर को सामने लाये; फिर बईल को सब खून ख होमबलि की वेदी जो मिलाप वालो तम्बू को फाटक हय कुड़ाय दे।
LEV 4:8 फिर ऊ पापबलि को बईल की सब चरबी ख ओको सी अलग करे, मतलब जो चरबी सी अतड़ियां झकी रह्य हय, अऊर जितनी चरबी ओको म लिपटी रह्य हय,
LEV 4:9 अऊर दोयी गुड़दा अऊर उन्को ऊपर की चरबी जो कमर को जवर रह्य हय, अऊर गुड़दा समेत कलेजा को ऊपर झिल्ली, इन सब ख ऊ असो अलग करे,
LEV 4:10 अऊर मेल-मिलाप बलिदान वालो चढ़ावा को जनावर सी अलग करयो जावय हय, अऊर याजक उन्ख होमबलि की वेदी पर जलायेंन।
LEV 4:11 पर ऊ बईल की खाल, पाय, मुंड, अतड़ियां, गोबर,
LEV 4:12 बईल को पूरो बच्यो हिस्सा ख छावनी सी बाहेर शुद्ध जागा म, जहां राख डाली जावय हय, अऊर ओख लकड़ी पर रख क जलाय दे; जहां राख डाली जावय हय वहांच ओख जलायो जाय।
LEV 4:13 यदि इस्राएल की पूरी मण्डली अज्ञानता को वजह पाप करे अऊर वा बात मण्डली की आंखी सी लूकी होना, अऊर परमेश्वर न पाप नहीं करन को आदेश दियो हय, यदि असो होवय हय त ऊ दोषी ठहरेंन;
LEV 4:14 त जब ओको करयो हुयो पाप प्रगट होय जाये तब मण्डली एक बईल ख पापबलि कर क् चढ़ाये। ऊ ओख मिलाप वालो तम्बू को सामने लि जाय,
LEV 4:15 अऊर मण्डली को बुजूर्ग लोग अपनो अपनो हाथों ख परमेश्वर को सामने बईल को मुंड पर रखे, अऊर ऊ बईल परमेश्वर को सामने बलि करयो जाय।
LEV 4:16 तब अभिषिक्त याजक बईल को खून म सी कुछ मिलाप वालो तम्बू म लि जाय;
LEV 4:17 अऊर याजक अपनो बोट खून म डुबाय क ओख बीच वालो परदा को सामने सात बार परमेश्वर को सामने छिड़के।
LEV 4:18 अऊर उच खून म सी वेदी को सींगो पर जो परमेश्वर को सामने मिलाप वालो तम्बू म हय लगाये; अऊर बच्यो हुयो सब खून होमबलि की वेदी की पाया पर जो मिलाप वालो तम्बू को फाटक पर हय कुड़ाय दे।
LEV 4:19 अऊर ऊ बईल की सब चरबी निकाल क वेदी पर जलाये।
LEV 4:20 जसो पापबलि को बईल सी करयो होतो वसोच येको सी भी करे; यो तरह याजक इस्राएलियों को पापों ख झाके, तब ओको ऊ पाप माफ करयो जायेंन।
LEV 4:21 अऊर ऊ बईल ख छावनी सी बाहेर लिजाय क उच तरह जलाये जसो पहिलो बईल ख जलायो होतो; वसोच यो मण्डली लायी पापबलि ठहरेंन।
LEV 4:22 जब कोयी मुखिया पाप कर क्, मतलब अपनो परमेश्वर यहोवा की कोयी आज्ञा को खिलाफ भूल सी कुछ कर क् दोषी होय जाये,
LEV 4:23 अऊर ओको पाप ओको पर प्रगट होय जाये। त ऊ एक निर्दोष बकरा बलिदान करन लायी ले जाय;
LEV 4:24 अऊर बकरा को मुंड पर अपनो हाथ रखे, अऊर बकरा ख वा जागा पर बलि करे जहां होमबलिपशु परमेश्वर को सामने बलि करयो जावय हय; यो पापबलि ठहरेंन।
LEV 4:25 तब याजक अपनो बोट सी पापबलिपशु को खून म सी कुछ ले क होमबलि की वेदी को सींगो पर लगाये, अऊर ओको खून होमबलि की वेदी की पाया पर कुड़ाय दे।
LEV 4:26 अऊर ऊ ओकी पूरी चरबी ख मेल-मिलाप बलिदान पशु की चरबी को जसो वेदी पर जलाये; अऊर याजक ओको पाप ख झाके, तब ऊ माफ करयो जायेंन।
LEV 4:27 यदि साधारन लोगों म सी कोयी अज्ञानता सी पाप करे, उन कामों म सी कोयी काम ख करय हय जिन्ख परमेश्वर न मना करयो हय, त ऊ दोषी ठहरेंन,
LEV 4:28 त ऊ पाप को वजह एक निर्दोष शेरी को बच्चा बलिदान लायी ले जाय।
LEV 4:29 अऊर ऊ अपनो हाथ पापबलिपशु को मुंड पर रखे, अऊर होमबलि को जागा पर पापबलिपशु को बलिदान करे।
LEV 4:30 अऊर याजक ओको खून म सी अपनो बोट सी कुछ ले क होमबलि की वेदी को सींगो पर लगाये, अऊर ओको सब खून ख उच वेदी की पाया पर कुड़ाय दे।
LEV 4:31 अऊर ऊ ओकी सब चरबी ख मेल-मिलाप बलिदान पशु की चरबी को जसो अलग करे, तब याजक ओख वेदी पर परमेश्वर लायी सुखदायक सुगन्ध लायी जलाये; अऊर यो तरह याजक ओको पाप झाके, तब ओख माफी मिलेंन।
LEV 4:32 यदि ऊ पापबलि लायी एक मेंढी को बच्चा लावय, त ऊ निर्दोष मादा होनो चाहिये,
LEV 4:33 अऊर ऊ अपनो हाथ पापबलिपशु को मुंड पर रखे, अऊर ओख पापबलि लायी उतच बलिदान करे जहां होमबलिपशु बलि करयो जावय हय।
LEV 4:34 तब याजक अपनो बोट सी पापबलि को खून म सी कुछ ले क होमबलि की वेदी को सींगो पर लगाये, अऊर ओको सब खून ख वेदी की पाया पर कुड़ाय दे।
LEV 4:35 अऊर ऊ ओकी सब चरबी ख मेल-मिलाप बलिदान वालो मेंढी को बच्चा की चरबी को जसो अलग करे, अऊर याजक ओख वेदी पर परमेश्वर को हवनों को ऊपर जलाये; अऊर यो तरह याजक ओको पाप ख झाके, तब ऊ माफ करयो जायेंन।
LEV 5:1 यदि कोयी गवाह होय क असो पाप करे की कसम खिलाय क पूछन पर भी कि का तय न यो सुन्यो यां जानय हय, अऊर वा बात प्रगट नहीं करय, त ओख अपनो दोष को बोझ उठानो पड़ेंन।
LEV 5:2 यां यदि कोयी दूसरी चिज ख अज्ञानता सी छुय लेवय, त चाहे ऊ अशुद्ध जंगली पशु की, यां अशुद्ध घरेलू पशु की, यां अशुद्ध रेंगन वालो जीव-जन्तु की लोथ होना, त ऊ अशुद्ध होय क दोषी ठहरेंन।
LEV 5:3 यां कोयी आदमी कोयी अशुद्ध चिज ख अज्ञानता सी छुय लेवय, चाहे ऊ अशुद्ध चिज कोयी भी तरह की होना जेको सी लोग अशुद्ध होय जावय हय, त जब ऊ वा बात ख जान लेयेंन तब ऊ दोषी ठहरेंन।
LEV 5:4 यदि कोयी बुरो यां भलो करन ख बिना सोचे समझे कसम खाये, यां कोयी तरह की बात ऊ बिना सोच-बिचार कसम खाय क कहे, त असी बात म ऊ दोषी ऊ समय ठहरेंन जब ओख मालूम होय जायेंन।
LEV 5:5 अऊर जब ऊ इन बातों म सी कोयी भी बात म दोषी हो, तब जो बारे म ओन पाप करयो होना ऊ ओख मान ले,
LEV 5:6 अऊर ऊ परमेश्वर को सामने अपनो दोषबलि लाये, मतलब ऊ पापबलि को लायी ऊ झुण्ड म सी एक मेंढा यां शेरी पापबलि करन लायी लाये; तब याजक ऊ पाप को बारे म ओको लायी पश्चाताप करे।
LEV 5:7 “पर यदि ओख मेंढा यां शेरी देन की सामर्थ नहीं होना, त अपनो पाप को वजह दोय पण्डुक यां कबूत्तर को दोय बच्चा दोषबलि चढ़ावन लायी परमेश्वर को जवर लाये, उन म सी एक त पापबलि लायी अऊर दूसरो होमबलि लायी।
LEV 5:8 ऊ उन्ख याजक को जवर लाये, अऊर याजक पापबलि वालो ख पहिले चढ़ाये, अऊर ओको मुंड गलो सी मुरकट डाले, पर अलग नहीं करे,
LEV 5:9 अऊर ऊ पापबलिपशु को खून म सी कुछ वेदी को बाजू म छिड़के, अऊर जो खून बच्यो रहे ऊ वेदी को आधार पर गिरायो जाय; ऊ पापबलि ठहरेंन।
LEV 5:10 तब दूसरो पक्षी ख वा विधि को अनुसार होमबलि करे, अऊर याजक ओको पाप ख झाके, तब ऊ माफ करयो जायेंन।
LEV 5:11 “तब यदि ऊ दोय पण्डुक यां कबूत्तर को दोय बच्चा भी नहीं दे सके, त ऊ अपनो पाप को वजह अपनो चढ़ावा एपा को दशवों हिस्सा मैदा पापबलि कर क् लाये; ओको पर नहीं त ऊ जैतून को तेल डाले, अऊर नहीं लुभान रखे, कहालीकि ऊ पापबलि होयेंन।
LEV 5:12 ऊ ओख याजक को जवर ले जाय, अऊर याजक ओको म सी अपनी मुट्ठी भर याद दिलावन वालो हिस्सा जान क वेदी पर परमेश्वर को वेदी को ऊपर जलाये; ऊ पापबलि ठहरेंन।
LEV 5:13 अऊर इन बातों म सी कोयी भी बात को बारे म जो कोयी पाप करे, याजक ओको पाप ख झाके, तब ओको ऊ पाप माफ करयो जायेंन। तब अन्नबलि को जसो बच्यो हिस्सा याजक को होयेंन।”
LEV 5:14 फिर परमेश्वर न मूसा सी कह्यो,
LEV 5:15 “यदि कोयी परमेश्वर की पवित्र करी हुयी चिजों को बारे म भूल सी विश्वासघात करे अऊर पापी ठहरे, त ऊ परमेश्वर को जवर एक निर्दोष मेंढा दोषबलि लायी लाये; ओको दाम पवित्र जागा को शेकेल को अनुसार उतनोच शेकेल चांदी को हो जितनो याजक ठहरायेंन।
LEV 5:16 अऊर जो पवित्र चिज को बारे म ओन पाप करयो होना, ओको म ऊ पाचवों हिस्सा अऊर बढ़ाय क याजक ख दे; अऊर याजक दोषबलि को मेंढा चढ़ाय क ओको पाप ख झाके, तब ओको पाप माफ करयो जायेंन।
LEV 5:17 “यदि कोयी असो पाप करे, कि उन कामों म सी जिन्ख परमेश्वर न मना करयो हय कोयी काम ख करे, त चाहे ऊ ओको अनजानो म भयो होना, त भी ऊ दोषी ठहरेंन, अऊर ओख अपनो बुरायी को बोझ उठानो पड़ेंन।
LEV 5:18 येकोलायी ऊ एक निर्दोष मेंढा दोषबलि कर क् याजक को जवर लाये, ऊ उतनो दाम को होना जितनो याजक ठहराये, अऊर याजक ओको लायी ओकी वा भूल को जो ओन अनजानो म करयो हुयो पाप ख झाके, अऊर ऊ माफ करयो जायेंन।
LEV 5:19 यो दोषबलि ठहरे; कहालीकि बिना शक परमेश्वर को सामने दोषी ठहरेंन।”
LEV 6:1 फिर परमेश्वर न मूसा सी कह्यो,
LEV 6:2 “यदि कोयी परमेश्वर को विश्वासघात कर क् पापी ठहरे, जसो कि जायजाद, यां लेन देन यां लूट को बारे म अपनो भाऊ सी छल करे, यां ओको पर अत्याचार करे,
LEV 6:3 यां पड़ी हुयी चिज ख पा क ओको बारे म झूठ बोले अऊर झूठी कसम भी खाये; असी कोयी भी बात कहाली नहीं हो जेक कर क् आदमी पापी ठहरय हय,
LEV 6:4 त जब ऊ असो काम कर क् दोषी होय जाये, तब जो भी चिज ओन लूट, यां अत्याचार कर क्, यां जायजाद, यां पड़ी हुयी पायी होना;
LEV 6:5 चाहे कोयी चिज कहाली नहीं हो जेको बारे म ओन झूठी कसम खायी होना; त ऊ ओख पूरो-पूरो लौटाय दे, अऊर पाचवों हिस्सा भी बढ़ाय क भर दे, जो दिन यो मालूम होय कि ऊ दोषी हय, उच दिन ऊ चिज ख ओको लौटाय दे।
LEV 6:6 अऊर ऊ परमेश्वर को सामने अपनो दोषबलि भी लाये, मतलब एक निर्दोष मेंढा दोषबलि लायी याजक को जवर लाये, ऊ उतनोच दाम को होना जितनो याजक ठहराये।
LEV 6:7 यो तरह याजक ओको लायी परमेश्वर को सामने पाप ख झाके, अऊर जो काम ख कर क् ऊ दोषी भय गयो हय ओकी माफी ओख मिलेंन।”
LEV 6:8 फिर परमेश्वर न मूसा सी कह्यो,
LEV 6:9 “हारून अऊर ओको टुरावों ख आज्ञा दे क यो कह्य कि होमबलि की व्यवस्था या हय: होमबलि अग्निकुन्ड को ऊपर रात भर रख क सुबेरे तक वेदी पर पड़ी रहे, अऊर वेदी की आगी वेदी पर जरती रहे।
LEV 6:10 अऊर याजक अपनो सन को कपड़ा अऊर अपनो तन पर सन की जांघियां पहिन क होमबलि की राख, जो आगी को भस्म करन सी वेदी पर रह्य जाये, ओख उठाय क ओख वेदी को बाजू म रखे।
LEV 6:11 तब ऊ अपनो यो कपड़ा उतार क दूसरो कपड़ा पहिन क राख ख छावनी सी बाहेर कोयी शुद्ध जागा पर लिजाये।
LEV 6:12 वेदी पर आगी जरती रहे, अऊर कभी बुझन मत देवो; अऊर याजक हर दिन सुबेरे ओको पर लकड़ियां जलाय क होमबलि को टुकड़ा ख ओको पर सजाय क रख दे, अऊर ओको ऊपर मेल-मिलाप बलिदान पशु की चरबी ख जलायो करे।
LEV 6:13 वेदी पर आगी लगातार जरती रहे; अऊर वा कभी बुझनो नहीं पाये।
LEV 6:14 “अनाज भेंट चढ़ावन की व्यवस्था यो तरह हय: हारून को टुरा ओख वेदी को आगु परमेश्वर को सामने लाये।
LEV 6:15 अऊर ऊ अनाज भेंट चढ़ावन को तेल मिल्यो हुयो मैदा म सी मुट्ठी भर अऊर ओको पर को सब लुभान उठाय क अनाज भेंट की याद म यो हिस्सा ख परमेश्वर को सामने सुखदायक सुगन्ध लायी वेदी पर जलाये।
LEV 6:16 अऊर ओको म सी जो बच्यो रह्य जाये ओख हारून अऊर ओको टुरा खाये; ऊ बिना खमीर पवित्र जागा म खायो जाये, मतलब हि मिलाप वालो तम्बू को आंगन म ओख खाये।
LEV 6:17 ऊ खमीर को संग पकायो नहीं जाये; कहालीकि मय न अपनो अन्नबलि म सी ओख दियो हय; येकोलायी जसो पापबलि अऊर दोषबलि अती पवित्र हय वसोच ऊ भी हय।
LEV 6:18 तुम्हरी पीढ़ी-पीढ़ी म हारून को वंश को सब आदमी ओको म सी खाय सकय हंय, परमेश्वर को भेंटों म सी यो ओको हिस्सा हमेशा बन्यो रहेंन; जो कोयी उन भेंटों ख छुवय ऊ पवित्र ठहरेंन।”
LEV 6:19 फिर परमेश्वर न मूसा सी कह्यो,
LEV 6:20 “ जो दिन हारून को अभिषेक होयेंन ऊ दिन ऊ अपनो टुरा को संग परमेश्वर ख यो चढ़ावा चढ़ाये; मतलब एपा को दसवों हिस्सा मैदा रोज अन्नबलि म चढ़ाये, ओको म सी अरधो सुबेरे अऊर अरधो शाम को समय चढ़ाये।
LEV 6:21 ऊ तवा पर तेल को संग पकायो जाय; जब ऊ तेल सी तल क होय जाये तब ओख लायजो, यो अन्नबलि को पक्यो हुयो तुकड़ा परमेश्वर को सुखदायक सुगन्ध लायी चढ़ायजो।
LEV 6:22 हारून को टुरावों म सी जो ऊ याजकपद पर अभिषिक्त होयेंन, ऊ भी उच तरह को चढ़ावा चढ़ायो करे; या विधि हमेशा लायी हय, कि परमेश्वर को सामने ऊ पूरो चढ़ावा जलायो जाये।
LEV 6:23 याजक को पूरो अन्नबलि भी जलायो जाये; ऊ कभी नहीं खायो जाय।”
LEV 6:24 फिर परमेश्वर न मूसा सी कह्यो,
LEV 6:25 “हारून अऊर ओको टुरावों सी यो कह्य कि पापबलि की व्यवस्था या हय: जो जागा म होमबलिपशु मारयो जावय हय ओकोच म पापबलिपशु भी परमेश्वर को सामने बलि करयो जाय; ऊ परमपवित्र हय।”
LEV 6:26 जो याजक पापबलि चढ़ाये ऊ ओख खाये; ऊ पवित्र जागा म, मतलब मिलाप वालो तम्बू को आंगन म खायो जाय।
LEV 6:27 जो कोयी ओको मांस ख छुयेंन, ऊ पवित्र होय जायेंन। यदि ओको खून को छीटा कपड़ा पर पड़ेंन त ऊ कपड़ा ख जेक पर छीटा पड़ गयो हय, ओख पवित्र जागा म धोय लेजो।
LEV 6:28 जो माटी को बर्तन म ऊ पकायो जायेंन, त ऊ बर्तन ख तोड़ देजो, पर यदि ऊ पीतल को बर्तन म पकायो गयो हय, त ऊ मांज्यो अऊर पानी सी धोयो जाय।
LEV 6:29 याजक म सी सब आदमी ओख खाय सकय हंय; ऊ परमपवित्र चिज आय।
LEV 6:30 पर जो पापबलिपशु को खून म सी कुछ भी खून मिलाप वालो तम्बू को अन्दर पवित्र जागा म पश्चाताप करन लायी पहुंचायो जाय ओको मांस कभी नहीं खायो जाय; ऊ आगी म जलाय दियो जाये।
LEV 7:1 फिर दोषबलि की व्यवस्था या हय, ऊ अती पवित्र हय।
LEV 7:2 जो जागा पर होमबलिपशु की बलि करय हय उच जागा पर दोषबलिपशु भी बलि करे, अऊर ओको खून ख याजक वेदी पर चारयी तरफ छिड़के।
LEV 7:3 ओकी पूरी चरबी ख चढ़ाये, मतलब ओकी मोटी पूछ ख, अऊर जो चरबी सी अतड़ियां झकी रह्य हय,
LEV 7:4 अऊर दोयी गुड़दा अऊर जो चरबी ओको ऊपर अऊर कमर को जवर रह्य हय, अऊर गुड़दावों समेत कलेजा को ऊपर की झिल्ली; इन सब ख ऊ अलग करे;
LEV 7:5 अऊर याजक इन ख वेदी पर परमेश्वर लायी आगी म जलाये; तब ऊ दोषबलि होयेंन।
LEV 7:6 याजकों म को सब आदमी ओको म सी खाय सकय हय; ऊ कोयी पवित्र जागा म खायो जाये; कहालीकि ऊ परमपवित्र हय।
LEV 7:7 जसो पापबलि हय वसोच दोषबलि भी हय, उन दोयी की एकच व्यवस्था हय; जो याजक उन बलियों ख चढ़ाय क पाप ख झाके उच उन चिजों ख ले ले।
LEV 7:8 अऊर जो याजक कोयी लायी होमबलि ख चढ़ाये ऊ होमबलिपशु की खाल ख उच याजक ले ले।
LEV 7:9 अऊर भट्टी म, यां कढ़ाई म, यां तवा पर पक्यो हुयो सब अनाज की भेंट उच याजक को होयेंन जो उन्ख चढ़ावय हय।
LEV 7:10 अऊर सब अनाज की भेंट, जो चाहे तेल सी सान्यो हुयो होना यां सुख्यो होना, हि हारून को सब टुरावों ख एक जसो मिले।
LEV 7:11 मेल-मिलाप बलि की, जेख कोयी परमेश्वर लायी चढ़ाये त व्यवस्था या आय।
LEV 7:12 यदि ऊ ओख धन्यवाद लायी चढ़ाये, त धन्यवाद बलि को संग तेल सी सान्यो हुयो अखमीरी पतली रोटी, अऊर तेल लगायी हुयी मोटी रोटियां, अऊर तेल सी सान्यो हुयो मैदा की सुवारी तेल सी तल क चढ़ाये।
LEV 7:13 अऊर ऊ अपनो धन्यवाद वालो मेल-मिलाप बलि को संग खमीरी रोटियां, भी चढ़ाये।
LEV 7:14 अऊर एक एक चढ़ावा म सी ऊ एक एक रोटी परमेश्वर ख भेंट कर क् चढ़ाये; ऊ मेल-मिलाप बलि को खून को छिड़कन वालो याजक को होयेंन।
LEV 7:15 अऊर ऊ धन्यवाद वालो मेल-मिलाप बलि को मांस बलिदान चढ़ावन को दिनच खायो जाय; ओको म सी कुछ भी सुबेरे तक बच्यो नहीं रह जाये।
LEV 7:16 पर यदि ओको बलिदान को चढ़ावा मन्नत यां खुद की इच्छा को हो, त ऊ बलिदान ख जो दिन ऊ चढ़ायो जाय उच दिन ऊ खायो जाय, अऊर ओको म सी जो बच्यो रह जाये ऊ दूसरो दिन भी खायो जाय।
LEV 7:17 पर जो कुछ बलिदान को मांस म सी तीसरो दिन तक बच जाये त ओख आगी म जलाय दियो जाय।
LEV 7:18 अऊर ऊ मेल-मिलाप बलि को मांस म सी यदि कुछ भी तीसरो दिन खायो जाय, त ऊ स्विकार नहीं करयो जायेंन, अऊर नहीं ओको हित म गिन्यो जायेंन; लेकिन येख अशुद्ध मान्यो जायेंन, अऊर जो येख खायेंन, ओको परिनाम ओख भुगतनो पड़ेंन।
LEV 7:19 “फिर जो मांस अशुद्ध चिज सी छुय जाये ऊ नहीं खायो जाय; ओख आगी म जलाय दियो जायेंन।” फिर जितनो मांस शुद्ध होना ओख खाये,
LEV 7:20 पर जो अशुद्ध होय क परमेश्वर को मेलबलि को मांस म सी कुछ खाये ऊ अपनो लोगों म सी नाश करयो जायेंन।
LEV 7:21 “अऊर यदि कोयी अशुद्ध चिज ख छुय क परमेश्वर को मेल-मिलाप बलि पशु को मांस म सी खाये, त ऊ भी अपनो लोगों म सी नाश करयो जायेंन, चाहे ऊ आदमी की कोयी अशुद्ध चिज यां अशुद्ध पशु यां कोयी भी अशुद्ध अऊर घृणित चिज हो।”
LEV 7:22 फिर परमेश्वर न मूसा सी कह्यो,
LEV 7:23 “इस्राएलियों सी यो तरह कह्य: तुम लोग नहीं त बईल की कुछ चरबी खावो अऊर नहीं मेंढा यां शेरी की।
LEV 7:24 अऊर जो पशु खुद मर जाये, अऊर जो दूसरो पशु सी फाड़्यो जाये, ओकी चरबी दूसरो काम म लावो, पर ओख खावो मत।
LEV 7:25 जो कोयी असो पशु की चरबी खायेंन जेको म सी लोग कुछ परमेश्वर लायी बलिदान कर क् चढ़ायो करय हय ओख खान वालो ख अपनो लोगों म सी नाश करयो जायेंन।
LEV 7:26 तुम अपनो घर म कोयी अलग को खून, चाहे पक्षी को चाहे पशु को खून हो, मत खावो।
LEV 7:27 हर एक प्रानी जो कोयी को खून खायेंन ऊ अपनो लोगों म सी बाहेर करयो जायेंन।”
LEV 7:28 फिर परमेश्वर न मूसा सी कह्यो,
LEV 7:29 “इस्राएलियों सी यो तरह कह्य: जो परमेश्वर लायी मेल-मिलाप बलि चढ़ाये ऊ उच मेल-मिलाप बलि म सी परमेश्वर को जवर भेंट लाये;
LEV 7:30 ऊ अपनोच हाथों सी परमेश्वर को बलि ख, मतलब छाती समेत चरबी ख लाये कि छाती हिलावन की भेंट कर क् परमेश्वर को सामने हिलायी जाये।”
LEV 7:31 अऊर याजक चरबी ख त वेदी पर जलायेंन, पर छाती हारून अऊर ओको टुरावों की होयेंन।
LEV 7:32 फिर तुम अपनो मेल-मिलाप बलियों म सी दायो जांघ ख भी चढ़ावा को रूप म याजक ख देजो।
LEV 7:33 हारून को टुरावों म सी मेल-मिलाप बलि को खून अऊर चरबी ख चढ़ाये दायो जांघ ओकोच हिस्सा होयेंन।
LEV 7:34 कहालीकि इस्राएलियों को मेल-मिलाप बलियों म सी हिलावन की भेंट की छाती अऊर उठावन की भेंट की जांघ ख ले क मय न याजक हारून अऊर ओको टुरावों ख दियो हय, कि यो हमेशा इस्राएलियों की तरफ सी उन्को हक बन्यो रहे।
LEV 7:35 “जो दिन हारून अऊर ओको टुरा परमेश्वर को सामने याजक पद लायी लायो गयो, उच दिन परमेश्वर को बलिदानों म सी उन्को योच अभिषिक्त हिस्सा ठहरायो गयो;
LEV 7:36 मतलब जो दिन परमेश्वर न उन्को अभिषेक करयो उच दिन ओन आज्ञा दी कि उन्ख इस्राएलियों को तरफ सी यो हिस्सा हमेशा मिलतो रहे; उन्की पीढ़ी-पीढ़ी लायी उन्को योच हक ठहरायो गयो।”
LEV 7:37 होमबलि, अन्नबलि, पापबलि, दोषबलि, याजकों को संस्कार बलि, अऊर मेल-मिलाप बलि की व्यवस्था याच आय;
LEV 7:38 जब परमेश्वर न सीनै पहाड़ी को जवर को बंजर जागा म मूसा ख आज्ञा दी कि इस्राएली मोरो लायी का-का चढ़ावा चढ़ाये, तब ओन उन्ख याच व्यवस्था दी होती।
LEV 8:1 फिर परमेश्वर न मूसा सी कह्यो,
LEV 8:2 “तय हारून अऊर ओको टुरावों को कपड़ावों, अऊर अभिषेक को तेल, अऊर पापबलि को बईल, अऊर दोयी मेंढावों, अऊर अखमीरी रोटी की टोकनी ख,
LEV 8:3 मिलाप वालो तम्बू को फाटक पर ले आव, अऊर वहांच पूरी मण्डली ख जमा कर।”
LEV 8:4 परमेश्वर की या आज्ञा को अनुसार मूसा न करयो; अऊर मण्डली मिलाप वालो तम्बू को फाटक पर जमा भयी।
LEV 8:5 तब मूसा न मण्डली सी कह्यो, “जो काम करन की आज्ञा परमेश्वर न दी हय वा या आय।”
LEV 8:6 फिर मूसा न हारून अऊर ओको टुरावों ख जवर लाय क पानी सी नहलायो।
LEV 8:7 तब ओन हारून ख कुरता पहिनायो, अऊर कुरता ख कमर पट्टा सी कस दियो। ओख अंगरखा पहिनायो। अऊर एपोद डाल्यो, अऊर कलात्मक ढंग सी बुन्यो हुयो एपोद को पट्टा सी ओख बान्ध क कस दियो।
LEV 8:8 अऊर ओन चपरास लगाय क सिनाबन्ध म ऊरीम अऊर तुम्मीम रख दियो।
LEV 8:9 तब ओन ओको मुंड पर फेटा बान्ध क फेटा को आगु सोना की पट्टी ख मतलब पवित्र मुकुट ख लगायो, जो तरह परमेश्वर न मूसा ख आज्ञा दी होती।
LEV 8:10 तब मूसा न अभिषेक को तेल ले क निवास को अऊर जो कुछ ओको म होतो उन सब को भी अभिषेक कर क् उन्ख पवित्र करयो।
LEV 8:11 अऊर ऊ तेल म सी कुछ ओन वेदी पर सात बार छिड़क्यो, अऊर पूरो सामान सहित वेदी को अऊर पाया समेत गंगार को अभिषेक कर क् उन्ख पवित्र करयो।
LEV 8:12 अऊर ओन अभिषेक को तेल म सी कुछ हारून को मुंड पर डाल क ओको अभिषेक कर क् ओख पवित्र करयो।
LEV 8:13 तब मूसा न हारून को टुरावों ख जवर लाय क, अंगरखा पहिनाय क, अऊर कमर पट्टा बान्ध क उन्को मुंड पर टोपी रख दियो, जो तरह परमेश्वर न मूसा ख आज्ञा दी होती।
LEV 8:14 तब ऊ पापबलि को बईल ख जवर लाय क; अऊर हारून अऊर ओको टुरावों न अपनो अपनो हाथ पापबलि को बईल को मुंड पर रखे।
LEV 8:15 तब मूसा न ओख बलि करयो, अऊर मूसा न खून ले क बोट सी वेदी को चारयी सींगो पर लगाय क पवित्र करयो, अऊर खून ख वेदी को पाया पर कुड़ाय दियो, अऊर ओको पाप झाके अऊर ओख पवित्र करयो।
LEV 8:16 अऊर मूसा न अतड़ियां पर की चरबी, अऊर कलेजा पर की झिल्ली, अऊर चरबी समेत दोयी गुड़दावो ख ले क वेदी पर जलायो।
LEV 8:17 पर बईल म सी जो कुछ बच्यो रह्य गयो ओख, मतलब गोबर समेत ओकी खाल, मांस अऊर मांस ख छावनी सी बाहेर आगी म जलायो, जो तरह परमेश्वर न मूसा ख आज्ञा दी होती।
LEV 8:18 तब मूसा न होमबलि लायी मेंढा ख लायो, हारून अऊर ओको टुरावों न ऊ मेंढा को मुंड पर अपनो हाथ रखे।
LEV 8:19 मूसा न ओख बलि करयो, अऊर येको खून ख वेदी को चारयी तरफ छिड़क दियो।
LEV 8:20 उन्न यो मेंढा को तुकड़ा तुकड़ा करयो अऊर मूसा न ओको मुंड, ओको टुकड़ावों अऊर चरबी ख जलाय दियो।
LEV 8:21 मूसा न अतड़ियां अऊर पाय ख पानी सी धोय क पूरो मेंढा ख वेदी पर जलायो; अऊर ऊ सुखदायक सुगन्ध देन लायी होमबलि अऊर परमेश्वर लायी बलिदान भय गयो, जो तरह परमेश्वर न मूसा ख आज्ञा दी होती।
LEV 8:22 तब मूसा न दूसरो मेंढा ख जो अभिषेक को मेंढा होतो जवर लायो, अऊर हारून अऊर ओको टुरावों न अपनो अपनो हाथ मेंढा को मुंड पर रख्यो।
LEV 8:23 तब ऊ बलि करयो गयो, अऊर मूसा न ओको खून म सी कुछ ले क हारून को दायो कान को कोना पर अऊर ओको दायो हाथ अऊर दायो पाय को अंगूठा पर लगायो।
LEV 8:24 अऊर ऊ हारून को टुरावों ख जवर ले गयो, अऊर खून म सी एक-एक को दायो कान को कोना पर अऊर दायो हाथ अऊर दायो पाय को अंगूठा पर लगायो; अऊर मूसा न खून ख वेदी पर चारयी तरफ छिड़क्यो।
LEV 8:25 अऊर ओन चरबी, अऊर चरबीदार पूछ, अऊर अतड़ियों पर की सब चरबी, अऊर कलेजा पर की झिल्ली समेत दोयी गुड़दा, अऊर दियो जांघ, हि सब ले क अलग रखे।
LEV 8:26 अऊर अखमीरी रोटी की टोकनी जो परमेश्वर को आगु रखी गयी होती ओको म सी एक अखमीरी रोटी, अऊर तेल सी सान्यो हुयो मैदा को एक सुवारी, अऊर एक सुवारी ले क अऊर चरबी दायो जांघ पर रख दियो।
LEV 8:27 अऊर या सब चिजे हारून अऊर ओको टुरावों को हाथों पर रख दी गयी, इन्ख परमेश्वर ख चढ़ावन की भेंट मान क परमेश्वर को आगु हिलायी गयी।
LEV 8:28 तब मूसा न उन्ख फिर उन्को हाथों पर सी ले क उन्ख वेदी पर जलायो, यो सुखदायक सुगन्ध देन लायी अभिषेक की भेंट अऊर परमेश्वर लायी अग्निबलि होती।
LEV 8:29 तब मूसा न छाती ख ले क हिलावन की भेंट को रूप म परमेश्वर को सामने हिलायो। अभिषेक को मेंढा म सी मूसा को हिस्सा होतो; जसो परमेश्वर न मूसा ख आज्ञा दी होती।
LEV 8:30 तब मूसा न अभिषेक को तेल अऊर वेदी पर को खून, दोयी म सी कुछ ले क हारून अऊर ओको कपड़ा पर, अऊर ओको टुरावों अऊर उन्को कपड़ा पर भी छिड़क्यो; अऊर ओन कपड़ा समेत हारून ख भी पवित्र करयो।
LEV 8:31 तब मूसा न हारून अऊर ओको टुरावों सी कह्यो, “मांस ख मिलाप वालो तम्बू को फाटक पर पकावों, अऊर वा रोटी ख जो अभिषेक की टोकनी म हय उतच खावो, जसो मय न आज्ञा दी हय कि हारून अऊर ओको टुरा ओख खाये।
LEV 8:32 अऊर मांस अऊर रोटी म सी जो बच्यो हुयो ख आगी म जलाय देवो।
LEV 8:33 अऊर जब तक तुम्हरो अभिषेक को दिन पूरो नहीं होय जाये तब तक, मतलब सात दिन तक मिलाप वालो तम्बू को फाटक को बाहेर मत जाजो, कहालीकि ऊ सात दिन तक तुम्हरो अभिषेक करतो रहेंन।
LEV 8:34 जो तरह अज करयो गयो हय वसोच करन की आज्ञा परमेश्वर न दी हय, जेको सी तुम्हरो पाप झाक्यो जायेंन।
LEV 8:35 येकोलायी तुम मिलाप वालो तम्बू को फाटक पर सात दिन अऊर सात रात ठहरे रहजो, ताकि तुम मर नहीं जावो; कहालीकि असीच आज्ञा मोख दी गयी हय।”
LEV 8:36 तब परमेश्वर की याच सब निर्देश आज्ञावों को अनुसार जो ओन मूसा सी दी होती हारून अऊर ओको टुरावों न करयो।
LEV 9:1 आठवों दिन मूसा न हारून अऊर ओको टुरावों ख अऊर इस्राएली बुजूर्गों ख बुलाय क कह्यो।
LEV 9:2 “पापबलि लायी एक निर्दोष बछड़ा, अऊर होमबलि लायी एक निर्दोष मेंढा लाय क परमेश्वर को सामने भेंट चढ़ाव।
LEV 9:3 अऊर इस्राएलियों सी यो कह्य, ‘तुम पापबलि लायी एक बकरा, अऊर होमबलि लायी एक बछड़ा अऊर एक मेंढी को बच्चा लावो, जो एक साल को हो अऊर पूर्ण स्वस्थ हो,’
LEV 9:4 अऊर मेल-मिलाप बलि लायी परमेश्वर को सामने चढ़ावन लायी एक बईल अऊर एक मेंढा, अऊर तेल सी सान्यो हुयो मैदा को एक अनाज भेंट भी लावो; कहालीकि अज परमेश्वर तुम्ख दर्शन देयेंन।”
LEV 9:5 अऊर जो-जो चिज की आज्ञा मूसा न दी उन सब ख हि मिलाप वालो तम्बू को आगु लाये; अऊर पूरी मण्डली जवर जाय क परमेश्वर को सामने खड़ी भयी।
LEV 9:6 तब मूसा न कह्यो, “यो ऊ काम आय जेक करन लायी परमेश्वर न आज्ञा दी हय कि तुम ओख करो; अऊर परमेश्वर की महिमा तुम ख दिखायी पड़ेंन।”
LEV 9:7 तब मूसा न हारून सी कह्यो, “परमेश्वर की आज्ञा को अनुसार वेदी को जवर जाय क अपनो पापबलि अऊर होमबलि ख चढ़ाय क अपनो अऊर सब जनता को पाप ख झाके करो अऊर जनता को चढ़ावा ख भी चढ़ाय क ओको पाप ख झाके।”
LEV 9:8 येकोलायी हारून न वेदी को जवर जाय क अपनो पापबलि को बछड़ा ख बलिदान करयो।
LEV 9:9 अऊर हारून को टुरा खून ख ओको जवर ले गयो, तब ओन अपनो बोट ख खून म डुबाय क वेदी को सींगो पर खून ख लगायो, अऊर बच्यो खून ख वेदी को पाया पर कुड़ाय दियो;
LEV 9:10 अऊर पापबलि म की चरबी अऊर गुड़दा अऊर कलेजा पर की झिल्ली ख ओन वेदी पर जलायो, जसो परमेश्वर न मूसा ख आज्ञा दी होती।
LEV 9:11 अऊर मांस अऊर खाल ख ओन छावनी सी बाहेर आगी म जलायो।
LEV 9:12 तब होमबलिपशु ख भेंट चढ़ायो; अऊर हारून को टुरावों न खून ख ओको हाथ म दियो, अऊर ओन ओख वेदी पर चारयी तरफ छिड़क दियो।
LEV 9:13 तब उन्न होमबलिपशु को तुकड़ा अऊर मुंड सहित ओको हाथ म दियो अऊर ओन ओख वेदी पर जलाय दियो।
LEV 9:14 अऊर ओन अतड़ियों अऊर पाय ख धोय क वेदी पर होमबलि को ऊपर जलायो।
LEV 9:15 तब हारून न लोगों को चढ़ावा ख आगु लाय क अऊर ऊ पापबलि को बकरा जो लोगों लायी होतो ले क ओकी बलि चढ़ायो, अऊर पहिले को जसो ओख भी पापबलि कर क् चढ़ायो।
LEV 9:16 अऊर ओन होमबलि ख भी जवर लिजाय क विधि को अनुसार चढ़ायो।
LEV 9:17 अऊर अनाज भेंट ख भी जवर लिजाय क ओको म सी मुट्ठी भर वेदी पर जलायो, यो सुबेरे को होमबलि को सहित चढ़ायो गयो।
LEV 9:18 बईल अऊर मेंढा, मतलब जो मेल-मिलाप बलि पशु, जनता लायी होतो हि भी बलि करयो गयो; अऊर हारून को टुरावों न खून ख उन्को हाथ म दियो,अऊर ओन ओख वेदी पर चारयी तरफ छिड़क दियो;
LEV 9:19 अऊर उन्न बईल की चरबी ख, अऊर मेंढा म सी चरबीदार पूछ ख, अऊर जो चरबी सी अंतड़ियां झकी रह्य हय ओख, अऊर गुड़दावो सहित कलेजा पर की झिल्ली ख भी ओको हाथ म दियो;
LEV 9:20 अऊर उन्न चरबी ख जनावरों की छातियों पर रख्यो; अऊर ओन वा चरबी वेदी पर जलायी,
LEV 9:21 पर छातियों अऊर दायो जांघ ख हारून न मूसा की आज्ञा को अनुसार हिलावन की भेंट लायी परमेश्वर को सामने हिलायो।
LEV 9:22 तब हारून न लोगों को तरफ हाथ बढ़ाय क उन्ख आशीर्वाद दियो; अऊर पापबलि, होमबलि, अऊर मेल-मिलाप बलियों ख चढ़ाय क ऊ खल्लो उतर गयो।
LEV 9:23 तब मूसा अऊर हारून मिलाप वालो तम्बू म गयो, अऊर बाहेर निकल क लोगों ख आशीर्वाद दियो; तब परमेश्वर को महिमा पूरी जनता ख दिखायी दियो।
LEV 9:24 अऊर परमेश्वर को सामने सी आगी निकली अऊर चरबी सहित होमबलि ख वेदी पर भस्म कर दियो; येख देख क जनता न जय जयकार को नारा लगायो अऊर अपनो अपनो मुंह को बल गिर क दण्डवत प्रनाम करयो।
LEV 10:1 तब नादाब अऊर अबीहू नाम को हारून को दोय टुरावों न अपनो अपनो धूपदान लियो, अऊर उन म आगी भरी, अऊर ओको म धूप डाल क वा ऊपरी आगी ख जेकी आज्ञा परमेश्वर न नहीं दी होती परमेश्वर को सामने चढ़ायो।
LEV 10:2 तब परमेश्वर को सामने सी आगी निकली, अऊर उन दोयी ख भस्म कर दियो, अऊर हि परमेश्वर को सामने मर गयो।
LEV 10:3 तब मूसा न हारून सी कह्यो, “या वाच बात आय जेक परमेश्वर न कह्यो होतो कि जो मोरो जवर आयेंन, जरूरी हय कि ऊ मोख पवित्र जाने, अऊर पूरी जनता को सामने मोरी महिमा करे।” पर हारून चुप रह्यो।
LEV 10:4 तब मूसा न मीशाएल अऊर एलसाफान ख जो हारून को काका उज्जीएल को टुरा होतो बुलाय क कह्यो, “जवर आवो, अऊर अपनो भतीजों ख पवित्र जागा को सामने सी उठ क छावनी को बाहेर ले जावो।”
LEV 10:5 मूसा की या आज्ञा को अनुसार हि जवर जाय क उन्ख अंगरखा सहित उठाय क छावनी को बाहेर गयो।
LEV 10:6 तब मूसा न हारून सी अऊर ओको टुरा एलीआजार अऊर ईतामार सी कह्यो, “तुम लोग अपनो मुंड को बाल मत बिखरावो, अऊर नहीं अपनो कपड़ावों ख फाड़ो, असो नहीं होय कि तुम भी मर जावो, अऊर पूरी मण्डली पर ओको गुस्सा भड़क उठेंन; पर ऊ इस्राएल को पूरो घराना को लोग जो तुम्हरो भाऊबन्धु हंय परमेश्वर की आगी सी जर गयो ओको पर विलाप करे।
LEV 10:7 अऊर तुम लोग मिलाप वालो तम्बू को फाटक को बाहेर मत जाजो, असो नहीं होय कि तुम मर जावो; कहालीकि परमेश्वर को अभिषेक को तेल तुम पर लग्यो हुयो हय।” मूसा को यो वचन को अनुसार उन्न करयो।
LEV 10:8 तब परमेश्वर न हारून सी कह्यो,
LEV 10:9 “जब जब तय यां तोरो टुरा मिलाप वालो तम्बू म आये तब तब तुम म सी कोयी अंगूरीरस यां दारू मत पीवो; कहीं असो नहीं हो कि तुम मर जावो; तुम्हरी पीढ़ी पीढ़ी म या विधि चलती रहे,
LEV 10:10 जेकोसी तुम पवित्र अऊर अपवित्र म, अऊर शुद्ध अऊर अशुद्ध म अन्तर कर सको,
LEV 10:11 अऊर इस्राएलियों ख उन सब विधियों ख सिखाय सको जेक परमेश्वर न मूसा को द्वारा उन्ख बताय दियो हय।”
LEV 10:12 फिर मूसा न हारून सी अऊर ओको टुरा भयो दोयी टुरा ईतामार अऊर एलीआजार सी भी कह्यो, “परमेश्वर को भेंट म सी जो अनाज बलि बच्यो हय ओख ले क वेदी को जवर बिना खमीर को खावो, कहालीकि ऊ परमपवित्र हय;
LEV 10:13 अऊर तुम ओख कोयी पवित्र जागा म खावो, ऊ परमेश्वर को भेंट म सी तोरो अऊर तोरो टुरावों को हक हय; कहालीकि मय न असीच आज्ञा पायी हय।
LEV 10:14 पर हिलायी हुयी भेंट की छाती अऊर उठायी हुयी भेंट की जांघ ख तुम लोग, मतलब तय अऊर तोरो बेटा-बेटियां सब कोयी शुद्ध जागा म खावो; कहालीकि हि इस्राएलियों को मेल-मिलाप बलियों म सी तोख अऊर तोरो टुरावों को हक ठहराय दियो गयो हय।
LEV 10:15 चर्बी को अग्निबलियों समेत जो उठायी हुयी जांघ अऊर हिलायी हुयी छाती परमेश्वर को सामने हिलावन लायी आयो करेंन, यो हिस्सा परमेश्वर की आज्ञा को अनुसार हमेशा की विधि की व्यवस्था सी तोरो अऊर तोरो बच्चां लायी हय।”
LEV 10:16 फिर मूसा न पापबलि को बकरा की जांच-पड़ताल करी, त का पायो कि ऊ जलायो गयो हय, येकोलायी एलीआजार अऊर ईतामार जो हारून को टुरा बच्यो होतो उन्कोसी ऊ गुस्सा म आय क कहन लग्यो,
LEV 10:17 “पापबलि जो परमपवित्र हय अऊर जेक परमेश्वर न तुम्ख येकोलायी दियो हय कि तुम मण्डली को पाप को बोझ अपनो ऊपर उठाय क ओको लायी परमेश्वर को सामने पश्चाताप करो, तुम न ओको मांस पवित्र जागा म कहाली नहीं खायो?
LEV 10:18 देखो, ओको खून भी पवित्र जागा को अन्दर म नहीं लायो गयो होतो, तुम्ख ओख पवित्र जागा म खानो होतो; जसो मय न आज्ञा दियो होतो।”
LEV 10:19 येको उत्तर हारून न मूसा ख यो तरह सी दियो, “देख, अजच उन्न अपनो पापबलि अऊर होमबलि ख परमेश्वर को सामने चढ़ायो; फिर भी मोरो पर असी विपत्तियां आय पड़ी हय! येकोलायी यदि मय अज पापबलि को मांस खातो त का या बात परमेश्वर को सामने अच्छी होती?”
LEV 10:20 जब मूसा न यो सुन्यो तब ओख अच्छो लग्यो।
LEV 11:1 फिर परमेश्वर न मूसा अऊर हारून सी कह्यो,
LEV 11:2 “इस्राएलियों सी कहो: जितनो पशु धरती पर हय उन सब म सी तुम इन जीवधारियों को मांस खाय सकय हय।”
LEV 11:3 पशुवों म सी जितनो चिरयो यां फट्यो खुरी को होवय हय अऊर कवरी करय हय, उन्ख खाय सकय हय।
LEV 11:4 पर कवरी करन वालो यां फटी खुरी वालो को अलावा इन जनावरों ख मत खावो, मतलब ऊंट, जो कवरी त करय हय पर चिरयो खुरी को नहीं होवय हय, येकोलायी ऊ तुम्हरो लायी अशुद्ध ठहरयो हय।
LEV 11:5 अऊर चट्टानी बिज्जू, जो कवरी त करय हय पर चिरयो खुरी को नहीं होवय, ऊ भी तुम्हरो लायी अशुद्ध होवय हय।
LEV 11:6 अऊर ससा, जो कवरी त करय हय पर चिरयो खुरी को नहीं होवय, येकोलायी ऊ भी तुम्हरो लायी अशुद्ध हय।
LEV 11:7 अऊर डुक्कर, जो चिरयो मतलब फटी खुरी को होवय त हय पर कवरी नहीं करय, येकोलायी ऊ भी तुम्हरो लायी अशुद्ध हय।
LEV 11:8 इन को मांस म सी कुछ मत खावो, अऊर इन्को लोथ ख छूवो भी मत; यो त तुम्हरो लायी अशुद्ध हय।
LEV 11:9 “फिर जितनो जलजन्तु हय उन म सी तुम इन ख खाय सकय हय, मतलब समुन्दर यां नदियों को जलजन्तुवों म सी जितनो को पंखा अऊर खिपला होवय हय उन्ख खाय सकय हय।”
LEV 11:10 अऊर जलचरी प्रानियों म सी जितनो जीवधारी बिना पंखा अऊर खिपला वालो जीव-जन्तु समुन्दर यां नदियों म रह्य हय हि सब तुम्हरो लायी अशुद्ध हय।
LEV 11:11 हि तुम्हरो लायी घृणित ठहरे; तुम उन्को मांस म सी कुछ मत खावो, अऊर उन की लोथों ख अशुद्ध जानो।
LEV 11:12 पानी म जो कोयी जन्तु को पंखा अऊर खिपला नहीं होवय ऊ तुम्हरो लायी अशुद्ध हय।
LEV 11:13 फिर पक्षियों म सी इन ख अशुद्ध जानो, हि अशुद्ध होन को वजह नहीं खानो चाहिये, गरूड़, दाढ़ी वालो गिधाड़, कारो चमगादड़,
LEV 11:14 लाल घार, अऊर कारी गिधाड़,
LEV 11:15 अऊर अलग अलग तरह को कौवा,
LEV 11:16 शुतुरमुर्ग, रात शिकरा, पानकोबंड़ी, अऊर अलग अलग तरह को शिकारी पक्षी,
LEV 11:17 पिंजल्ला, बगला, बड़ो घुबड़,
LEV 11:18 राजहंस, पानकोंबड़ी, गिधाड़,
LEV 11:19 सारस, सब तरह को बगला, टिटिहरी अऊर चमगादड़।
LEV 11:20 “जितनो पंखा वालो कीड़ा चार पाय को बल चलय हय हि सब तुम्हरो लायी अशुद्ध हय।”
LEV 11:21 पर रेंगन वालो अऊर पंखा वालो कीड़ा जो चार पाय को बल चलय हय, अऊर जिन्को पाय को ऊपर एक मुड़ी हुयी टांग होवय हय, जेको बल पर हि जमीन पर कूदय हय, उन्ख तुम खाय सकय हय।
LEV 11:22 तुम इन म सी खाय सकय हय सब तरह की टिड्डियां, भौरा, झींगुर अऊर सब तरह को टिड्डे।
LEV 11:23 पर अऊर सब रेंगन वालो पंखा वालो कीड़ा जो चार पाय वालो होवय हय हि तुम्हरो लायी अशुद्ध हय।
LEV 11:24 इन्को वजह तुम अशुद्ध ठहरो; जो कोयी सी इन की लोथ छुय जाये ऊ शाम तक अशुद्ध ठहरे।
LEV 11:25 अऊर जो कोयी इन्की लोथ म सी कुछ भी उठायेंन ऊ अपनो कपड़ा धोयेंन अऊर शाम तक अशुद्ध रहेंन।
LEV 11:26 फिर जितनो पशु चिरयो खुरी को होवय त हय पर पूरो तरह सी दोय हिस्सा म नहाय अऊर कवरी भी नहीं करय, हि तुम्हरो लायी अशुद्ध हंय; जो कोयी इन ख छुय लेयेंन ऊ अशुद्ध होय जायेंन।
LEV 11:27 अऊर चार पाय को बल चलन वालो पशु म सी जितनो पंजा को बल चलय हय हि सब तुम्हरो लायी अशुद्ध हय; जो कोयी उन्की लोथ छुय लेयेंन ऊ शाम तक अशुद्ध रहेंन।
LEV 11:28 अऊर जो कोयी उन्की लोथ उठायेंन ऊ अपनो कपड़ा धोये अऊर शाम तक अशुद्ध रहे; कहालीकि हि तुम्हरो लायी अशुद्ध हय।
LEV 11:29 जो धरती पर रेंगय हय उन म सी हि रेंगन वालो जन्तुवों तुम्हरो लायी अशुद्ध हय, मतलब मुंगुश, मुसा, अऊर अलग अलग तरह की बड़ी इजगुर,
LEV 11:30 अऊर इजगुर, मगर, सांपसिरोली, घोरपड़ अऊर डोकेला।
LEV 11:31 सब रेंगन वालो जन्तुवों म सीच तुम्हरो लायी अशुद्ध हय; जो कोयी इन्की लोथ ख छुयेंन त ऊ शाम तक अशुद्ध रहेंन।
LEV 11:32 अऊर इन म सी कोयी की लोथ जो कोयी चिज पर गिर जाये ऊ भी अशुद्ध ठहरे, चाहे ऊ लकड़ी को बर्तन होना, चाहे कपड़ा, चाहे खाल, चाहे बोरा, यां कोयी काम को कैसो भी बर्तन कहाली नहीं होना; ऊ पानी म डाल्यो जाये, अऊर शाम तक अशुद्ध रहेंन, येको बाद यो चिज शुद्ध मानी जायेंन।
LEV 11:33 यदि कोयी माटी को बर्तन म जन्तुवों को लोथ म सी कुछ गिर जाये, त ऊ बर्तन म जो कुछ भी होना ऊ अशुद्ध मान्यो जायेंन, तुम ऊ बर्तन ख तोड़ देवो।
LEV 11:34 यदि यो बर्तन को पानी कोयी भी खान की चिज पर गिर जाये, ऊ अशुद्ध होय जायेंन अऊर यदि असो बर्तन म पिवन लायी कुछ होना त ऊ भी अशुद्ध होय जायेंन।
LEV 11:35 अऊर यदि इन की लोथ म सी कुछ हिस्सा भट्टी यां चुलो पर गिर जाये त ऊ भी अशुद्ध होयेंन, अऊर ओख तोड़ दियो जाये; कहालीकि ऊ अशुद्ध हय, ऊ तुम्हरो लायी भी अशुद्ध होयेंन।
LEV 11:36 पर सोता यां तलाव जेको म पानी जमा होवय हय ऊ त शुद्धच रहे; पर जो कोयी इन की लोथ ख छुयेंन ऊ अशुद्ध ठहरेंन।
LEV 11:37 अऊर यदि इन की लोथ को कुछ हिस्सा बोयो जान वालो बीज पर गिर जाये, त ऊ बीज शुद्ध मान्यो जायेंन।
LEV 11:38 पर यदि बीज पर पानी डाल्यो गयो होना अऊर ऊ लोथ म सी कुछ हिस्सा ओको पर गिर जाये, त ऊ तुम्हरो लायी अशुद्ध ठहरेंन।
LEV 11:39 “फिर जिन पशुवों ख खान की आज्ञा तुम ख दी गयी हय यदि उन म सी कोयी पशु मर जाये, त जो कोयी उन्की लोथ ख छुयेंन ऊ शाम तक अशुद्ध रहेंन।”
LEV 11:40 अऊर ओकी लोथ म सी जो कोयी कुछ खाये ऊ अपनो कपड़ा धोये अऊर शाम तक अशुद्ध रहे; अऊर जो कोयी ओकी लोथ ख उठाये ऊ भी अपनो कपड़ा धोये अऊर शाम तक अशुद्ध रहे।
LEV 11:41 सब तरह को धरती पर रेंगन वालो जीव-जन्तु अशुद्ध हय; हि खायो नहीं जाये।
LEV 11:42 धरती पर सब रेंगन वालो जन्तुवों म सी जितनो पेट यां चार पाय को बल चलय हय, यां बहुत जादा पाय वालो होवय हय, उन्ख तुम मत खावो; कहालीकि हि अशुद्ध हय।
LEV 11:43 तुम अपनो आप ख रेंगन वालो जन्तुवों को द्वारा घृणित मत बनावो; अऊर नहीं उन्को द्वारा अपनो आप ख अशुद्ध कर क् अपवित्र होय जावो।
LEV 11:44 कहालीकि मय तुम्हरो परमेश्वर यहोवा आय; येकोलायी अपनो आप ख शुद्ध कर क् पवित्र बन्यो रहो, कहालीकि मय पवित्र हय। येकोलायी तुम कोयी तरह को रेंगन वालो जन्तुवों को द्वारा जो धरती पर चलय हय अपनो आप ख अशुद्ध मत करो।
LEV 11:45 “कहालीकि मय ऊ परमेश्वर आय जो तुम्ख मिस्र देश सी येकोलायी निकाल लायो हय कि तुम्हरो परमेश्वर ठहरू; येकोलायी तुम पवित्र बनो, कहालीकि मय पवित्र हय।”
LEV 11:46 पशुवों, पक्षियों, अऊर हर एक जनावरों, जो पानी म अऊर जमीन पर रेंगय हय उन्को लायी याच व्यवस्था हय,
LEV 11:47 जेकोसी शुद्ध अऊर अशुद्ध अऊर खान की यां नहीं खान की चिजों म भेद करयो जाय सके।
LEV 12:1 फिर परमेश्वर न मूसा सी कह्यो,
LEV 12:2 इस्राएलियों सी कहो: जो बाई गर्भवती होय क बच्चा ख जनम देवय हय त वा सात दिन तक अशुद्ध रहेंन; जसी वा मासिक धर्म को समय अशुद्ध रह्य हय।
LEV 12:3 अऊर आठवों दिन बच्चा को खतना करयो जाय।
LEV 12:4 फिर वा बाई अपनो शुद्ध करन वालो रक्तस्राव म तैतीस दिन रहे; अऊर जब तक ओको शुद्ध होय जान को दिन पूरो नहीं होय जाये तब तक वा नहीं त कोयी पवित्र चिज ख छुयेंन, अऊर नहीं पवित्र जागा म जाय।
LEV 12:5 यदि वा टुरी ख जनम देवय हय, त वा चौदा दिन तक अशुद्ध रहेंन, जसी वा मासिक धर्म म रह्य हय, वा अपनो शुद्धिकरन को रक्तस्राव म छैसठ दिन तक रहेंन।
LEV 12:6 जब ओको शुद्ध होय जान को दिन पूरो होय जाये, तब ओख टुरा होय यां टुरी होय, वा होमबलि को लायी एक साल को मेंढा को बच्चा, अऊर पापबलि को लायी कबूत्तर को एक बच्चा यां पण्डुक मिलाप वालो तम्बू को फाटक पर याजक को जवर लाये।
LEV 12:7 तब याजक ओख परमेश्वर को सामने भेंट चढ़ाय क ओको लायी पश्चाताप करे; अऊर वा अपनो रक्तस्राव सी शुद्ध होय जायेंन। जो बाई ख टुरा यां टुरी पैदा होय ओको लायी याच व्यवस्था हय।
LEV 12:8 “अऊर यदि ओको जवर मेंढा यां शेरी देन लायी धन नहीं होना, त दोय पण्डुक यां कबूत्तर को दोय बच्चा, एक होमबलि को लायी अऊर दूसरो पापबलि को लायी दे; अऊर याजक ओको लायी पश्चाताप करेंन, तब वा शुद्ध ठहरेंन।”
LEV 13:1 फिर परमेश्वर न मूसा अऊर हारून सी कह्यो,
LEV 13:2 जब कोयी आदमी को शरीर को चमड़ी म सूजन यां चट्ठा यां चमक दार दाग होना, अऊर येकोसी ओको चमड़ी म कोढ़ को लक्षन दिखायी दे, त ओख हारून याजक को जवर यां ओको टुरा जो याजक हय उन म सी कोयी को जवर ले जाय।
LEV 13:3 जब याजक ओको चमड़ी को चट्ठा ख देखे, अऊर यदि ऊ दाग को जागा को बाल सफेद होय गयो होना अऊर दाग चमड़ी सी गहरो दिखायी दे, त ऊ जान ले कि कोढ़ को रोग हय; अऊर याजक ऊ आदमी ख देख क ओख अशुद्ध ठहराये।
LEV 13:4 पर यदि ऊ दाग चमड़ी म सफेद त होना, पर चमड़ी सी गहरो नहीं दिखायी दे, अऊर वहां को बाल सफेद नहीं भयो होना, त याजक ओख सात दिन तक अलग कर क् रखे;
LEV 13:5 अऊर सातवों दिन तक याजक ओख देखे, अऊर यदि ऊ रोग वसो को वसो हय, अऊर ओको चमड़ी म नहीं फैल्यो हय, त याजक ओख अऊर भी सात दिन तक अलग कर क् रखे;
LEV 13:6 अऊर सातवों दिन याजक ओख फिर सी देखे, की रोग की चमक कम हय अऊर रोग चमड़ी पर नहीं फैल रह्यो हय, त याजक ओख शुद्ध ठहराये; यो केवल चट्ठा आय अऊर अपनो कपड़ा धोय क शुद्ध होय जाय।
LEV 13:7 पर यदि याजक की वा जांच करन को बाद जेको म ऊ शुद्ध ठहरायो गयो होतो, ऊ दाग ओकी चमड़ी पर बहुत फैल जाये, त ओख फिर सी याजक ख दिखायो जाय;
LEV 13:8 अऊर यदि याजक ख दिखायी दे कि दाग चमड़ी म फैल गयो हय, त ऊ ओख अशुद्ध ठहराये; कहालीकि ऊ कोढ़च आय।
LEV 13:9 यदि कोढ़ को रोग को जसो कोयी आदमी म हय, त ओख याजक को जवर लायो जाय।
LEV 13:10 अऊर याजक ओख जांचे, अऊर ओकी चमड़ी पर सफेद रंग की सूजन हय, अऊर ओको वजह बाल भी सफेद भय गयो हय, अऊर ऊ सूजन म बिना चमड़ी को मांस हय,
LEV 13:11 त याजक जानेंन कि ओको चमड़ी म पुरानो कोढ़ हय, येकोलायी ऊ ओख अशुद्ध ठहराये; अऊर ओख अलग नहीं रखेंन, कहालीकि ऊ अशुद्ध हय।
LEV 13:12 अऊर यदि कोढ़ चमड़ी म बहुत जादा फूट क, जहां तक याजक देखे रोगी को मुंड सी पाय तक पूरो शरीर म फैल्यो होना,
LEV 13:13 त याजक फिर सी जांचे, अऊर यदि कोढ़ ओको पूरो शरीर म फैल गयो हय, त याजक ओख शुद्ध ठहराये; अऊर ओको पूरो शरीर सफेद भय गयो हय त ऊ शुद्धच ठहरेंन।
LEV 13:14 पर ओको म बिना चमड़ी को मांस दिखायी दे, तब ऊ अशुद्ध हय।
LEV 13:15 अऊर याजक बिना चमड़ी को मांस देख क ओख अशुद्ध ठहराये; कहालीकि वसो बिना चमड़ी को मांस अशुद्धच होवय हय; अऊर ऊ कोढ़ को रोग आय।
LEV 13:16 पर यदि ऊ बिना चमड़ी को मांस फिर सी सफेद होय जाये, त ऊ आदमी याजक को जवर जाये,
LEV 13:17 अऊर याजक ओख जांचे, अऊर यदि ऊ दाग फिर सी सफेद भय गयो हय, त याजक रोगी ख शुद्ध ठहराये; ऊ शुद्ध हय।
LEV 13:18 फिर यदि कोयी की चमड़ी म फोड़ा हय जो अच्छो भय गयो हय,
LEV 13:19 अऊर फोड़ा को जागा म सफेद सूजन यां लाल जसो सफेद दाग होना, त ऊ याजक ख दिखाये;
LEV 13:20 अऊर याजक ऊ फोड़ा ख जांचे, यदि ओख लगे कि चमड़ी म फैल रह्यो हय अऊर ओको बाल भी सफेद भय गयो हय, तब याजक ऊ आदमी ख अशुद्ध ठहराये; यो कोढ़ को रोग आय जेकी सुरूवात फोड़ा सी भयी हय।
LEV 13:21 पर यदि याजक ओख जांचे कि ओको म सफेद बाल नहाय, अऊर चमड़ी म नहीं फैल रह्यो हय, अऊर ओकी चमक कम भय गयी हय, त याजक ऊ आदमी ख सात दिन तक अलग रखे।
LEV 13:22 अऊर यदि ऊ रोग ऊ समय तक चमड़ी म सचमुच फैल जाये, त याजक ऊ आदमी ख अशुद्ध ठहराये; कहालीकि ऊ कोढ़ को रोग आय।
LEV 13:23 पर यदि ऊ दाग नहीं फैलय अऊर अपनो जागा परच रह्य, त ऊ फोड़ा को दाग आय; तब याजक ऊ आदमी ख शुद्ध ठहराये।
LEV 13:24 फिर यदि कोयी की चमड़ी म जरयो हुयो घाव होना, अऊर ऊ जरयो हुयो घाव म बिना चमड़ी को लाल जसो दाग सफेद यां सफेदच होय जाये,
LEV 13:25 त याजक ओख जांचे, अऊर ऊ दाग म को बाल सफेद भय गयो होना अऊर ऊ चमड़ी सी गहरो दिखायी दे, त ऊ कोढ़ आय; जो ऊ जरयो हुयो घाव को दाग म सी फूट निकल्यो हय; त याजक ऊ आदमी ख अशुद्ध ठहराये; कहालीकि ओको म कोढ़ को रोग आय।
LEV 13:26 पर यदि याजक ओकी जांच करे कि दाग म सफेद बाल नहाय अऊर चमड़ी सी गहरो नहाय, अऊर ओकी चमक कम भय गयी हय, त ऊ ओख सात दिन तक अलग रखे,
LEV 13:27 अऊर याजक सातवों दिन ओख जांचे, अऊर यदि ऊ चमड़ी म फैल गयो हय, त याजक ऊ आदमी ख अशुद्ध ठहराये; कहालीकि ओख कोढ़ को रोग हय।
LEV 13:28 पर यदि ऊ दाग चमड़ी म नहीं फैल्यो हय अऊर अपनो जागा पर जसो को वसोच बन्यो हय, त ऊ जरन को वजह सूजयो हुयो हय, याजक ऊ आदमी ख शुद्ध ठहराये; कहालीकि ऊ दाग जरन को वजह हय।
LEV 13:29 “फिर यदि कोयी आदमी यां बाई को मुंड पर, यां आदमी को दाढ़ी म दाग होना,
LEV 13:30 त याजक ऊ रोग की जांच करे, अऊर यदि ऊ चमड़ी को अन्दर गहरो दिखायी दे, अऊर ओको म भूरो भूरो पतलो बाल होना, त याजक ऊ आदमी ख अशुद्ध ठहराये; यो मुंड यां दाढ़ी को कोढ़ यां खुजली आय।”
LEV 13:31 अऊर यदि याजक चर्मरोग को रोग ख जांचय कर क् देखय हय अऊर ओको म कारो बाल भी नहाय, त याजक चर्मरोग को रोगी ख सात दिन तक अलग रखे,
LEV 13:32 अऊर याजक सातवों दिन रोग की जांच करे, यदि चर्मरोग फैल्यो नहीं होना, अऊर ओको म भूरो भूरो बाल नहीं होना, अऊर चर्मरोग चमड़ी को अन्दर गहरी नहीं दिखायी देवय हय,
LEV 13:33 त ऊ आदमी दाढ़ी बनायेंन; पर ऊ चर्मरोग की जागा ख छोड़ देयेंन; अऊर याजक चर्मरोग वालो रोगी ख सात दिन तक अलग रखे।
LEV 13:34 याजक सातवों दिन चर्मरोग की जांच करे, यदि चर्मरोग चमड़ी पर फैली नहाय अऊर वा चमड़ी को अन्दर गहरी दिखायी नहीं देवय हय, त याजक ऊ आदमी ख शुद्ध ठहराये; अऊर ऊ अपनो कपड़ा धोय क शुद्ध ठहरे।
LEV 13:35 पर यदि ओको शुद्ध होन को बाद भी चर्मरोग चमड़ी म कुछ फैलय हय,
LEV 13:36 त याजक ओख जांचे अऊर यदि वा चर्मरोग चमड़ी म फैल गयी हय, त याजक भूरो बाल ख नहीं ढूंढे; कहालीकि ऊ आदमी अशुद्ध हय।
LEV 13:37 पर यदि ओकी नजर म चर्मरोग जसो को वसोच हय, अऊर ऊ जागा पर कारो बाल उग्यो हय, त चर्मरोग अच्छी भय गयी हय, अऊर ऊ आदमी शुद्ध हय; याजक ओख शुद्धच ठहराये।
LEV 13:38 फिर यदि कोयी आदमी यां बाई को चमड़ी म चमकदार सफेद दाग होना,
LEV 13:39 त याजक जांचे, यदि चमड़ी म हि दाग थोड़ो सफेद होना, त ऊ समझे कि यो दागच आय; त ऊ आदमी शुद्ध हय।
LEV 13:40 “फिर जेको मुंड को बाल झड़ गयो होना, त समझनो कि ऊ टक्कल हय पर शुद्ध हय।”
LEV 13:41 अऊर यदि कोयी आदमी को मुंड को सामने को अऊर कनपटी को बाल झड़ गयो हय, त ओको मस्तक टक्कल हय पर ऊ शुद्ध हय।
LEV 13:42 पर यदि टक्कल मुंड पर यां मस्तक पर लाल जसो सफेद दाग होना, त समझनो कि ऊ ओको टक्कल मुंड यां मस्तक पर निकल्यो हुयो कोढ़ आय।
LEV 13:43 येकोलायी याजक ओख जांचे, यदि ओको टक्कल मुंड यां टक्कल मस्तक पर चमड़ी को कोढ़ को समान लाल जसो सफेद हय,जसो चमड़ी को कोढ़ म होवय हय,
LEV 13:44 त ऊ आदमी कोढ़ को रोगी हय अऊर अशुद्ध हय; अऊर याजक ओख निश्चितच अशुद्ध ठहराये; कहालीकि ऊ रोग ओको मुंड पर भयो हय।
LEV 13:45 कोढ़ जसो रोग को रोगी फट्यो कपड़ा पहिने अऊर ओको मुंड को बाल बिखरयो रहे, अऊर खल्लो को ओंठ ख झाक क पुकारे, “अशुद्ध, अशुद्ध!”
LEV 13:46 जितनो दिन तक ओको म रोग रहेंन उतनो दिन तक ऊ अशुद्ध रहेंन; अऊर ऊ अशुद्धच हय येकोलायी ऊ अकेलो रहे, ओकी रहन की जागा छावनी को बाहेरच रहे।
LEV 13:47 फिर जो कपड़ा म कोढ़ को रोग जसो दाग होना, चाहे ऊ कपड़ा ऊन को हो यां सन को हो,
LEV 13:48 अऊर सन को सियो हुयो यां ऊन को बुन्यो हुयो कपड़ा को कोयी तुकड़ा पर यां चमड़ा यां चमड़ा सी बनी कोयी भी चिज म हो,
LEV 13:49 यदि दाग सियो हुयो कपड़ा म, यां उन को बुन्यो हुयो कपड़ा, यां चमड़ा म यां चमड़ा को तुकड़ा म बनी कोयी चिज म हरी यां लाल दिखायी दे, त समझनो की ऊ कोढ़ को रोग आय अऊर ओख याजक ख दिखायो जाये।
LEV 13:50 अऊर याजक दाग की जांच करे, अऊर दाग वाली चिज ख सात दिन अलग रखे।
LEV 13:51 त ओख सातवों दिन दाग की फिर सी जांच करे, यदि कपड़ा म, यां कपड़ा को बुन्यो हुयो हिस्सा म, यां चमड़ा कि बनी कोयी चिज म दाग फैल गयो हय, चाहे ऊ चमड़ा कोयी भी काम म आवत होना, ऊ हानी कर क् कोढ़ को लक्षन आय, ऊ अशुद्ध हय।
LEV 13:52 ऊ कपड़ा को बन्यो हुयो हिस्सा म रोग होना, चाहे ऊ ऊन को यां सन को, यां चमड़ा की चिज होना, ओख जलाय देयेंन, ऊ रोग हानी कर क् कोढ़ आय; ऊ चिज ख आगी म जलाय दियो जाय।
LEV 13:53 यदि याजक जांच कर क् देखे कि रोग कपड़ा को बन्यो हुयो हिस्सा म, यां चमड़ा की कोयी चिज म नहीं फैल्यो हय,
LEV 13:54 अऊर याजक वा दाग वालो चिज ख धोवन की आज्ञा दे, अऊर भी ओख सात दिन लायी अलग रखे।
LEV 13:55 अऊर धोवन को बाद याजक ऊ चिज की जांच करे, यदि दाग को रंग बदल्यो नहाय, अऊर दाग फैल्यो नहाय, त समझनो की वा चिज अशुद्ध हय; तुम ओख आगी म जलावो, चाहे दाग आगु को भाग म हो यां पीछु को भाग म।
LEV 13:56 पर यदि याजक जांच कर क् देखे कि धोवन को बाद दाग की चमक कम भय गयी हय, त याजक ऊ कपड़ा यां चमड़ा म सी फाड़ क निकाले;
LEV 13:57 अऊर यदि दाग कपड़ा म, यां कपड़ा को बन्यो हुयो हिस्सा म, यां चमड़ा की कोयी भी चिज म दिखायी देवय हय, त ऊ फिर सी फैल रह्यो हय; त तुम वा चिज ख आगी म जलाय देवो।
LEV 13:58 यदि ऊ उन को कपड़ा म होना, या चमड़ा की जो चिज होना ओको सी जब धोयी जायेंन अऊर दाग निकलती रहेंन, त वा दूसरी बार धोय क शुद्ध ठहरेंन।
LEV 13:59 त ऊन यां सन को कपड़ा म यां चमड़ा की बनी कोयी चिज म कोढ़ जसो दाग हय त ओख शुद्ध यां अशुद्ध ठहरान की याच व्यवस्था आय।
LEV 14:1 फिर परमेश्वर न मूसा सी कह्यो,
LEV 14:2 कोढ़ को रोगी ख शुद्ध ठहरान को नियम यो आय। कि ओख याजक को जवर लायो जाय;
LEV 14:3 अऊर याजक छावनी को बाहेर जाये, अऊर याजक ऊ कोढ़ी ख जांचे, अऊर यदि ओको कोढ़ को रोग ठीक भय गयो होना,
LEV 14:4 त याजक आज्ञा दे कि शुद्ध ठहरायो जान वालो लायी दोय जीन्दो शुद्ध पक्षी, देवदार की लकड़ी, जूफा को पौधा अऊर लाल रंग की दोरी लायो जाये;
LEV 14:5 अऊर याजक आज्ञा दे कि बहतो हुयो पानी को ऊपर माटी को बर्तन म एक पक्षी ख बलि करयो जाय।
LEV 14:6 तब ऊ दूसरो जीन्दो पक्षी ख देवदार की लकड़ी अऊर लाल रंग की दोरी अऊर जूफा को पौधा इन सब ख ले क एक संग ऊ पक्षी को खून म जो बहतो हुयो पानी को ऊपर बलि करयो गयो होतो डुबाय दे;
LEV 14:7 अऊर कोढ़ सी शुद्ध होन वालो आदमी को ऊपर सात बार छिड़क क ओख शुद्ध ठहराये, तब ऊ जीन्दो पक्षी ख खुलो मैदान म छोड़ दे।
LEV 14:8 अऊर शुद्ध होन वालो अपनो कपड़ा ख धोये, अऊर अपनो सब बाल मुंडवाय क पानी सी नहाय क शुद्ध होय जाय, अऊर ओको बाद छावनी म आय सकेंन, पर सात दिन तक अपनो तम्बू सी बाहेरच रहे।
LEV 14:9 अऊर सातवों दिन ऊ अपनो मुंड को बाल, दाढ़ी, भौंहों अऊर अपनो पूरो शरीर को बाल मुंडवाय ले; अऊर अपनो कपड़ा धोय ले, अऊर पानी सी नहाये, तब ऊ शुद्ध ठहरेंन।
LEV 14:10 “आठवों दिन ऊ दोय निर्दोष मेंढा को बच्चा, अऊर एक निर्दोष मेंढी, अऊर अन्नबलि लायी तेल मिल्यो हुयो पाच किलो मैदा अऊर अरधो लिटर तेल लाये।”
LEV 14:11 शुद्ध करन वालो याजक इन चिजों को संग शुद्ध होन वालो आदमी ख परमेश्वर को सामने मिलाप वालो तम्बू को द्वार पर खड़ो करे।
LEV 14:12 तब याजक एक मेंढा अऊर अरधो लिटर तेल अऊर दोषबलि ख ले क हिलावन की भेंट को रूप म परमेश्वर को जवर लाये।
LEV 14:13 अऊर ऊ मेंढा को बच्चा ख उच जागा म जहां ऊ पापबलि अऊर होमबलि पशुवों को बलिदान करयो जावय हय, उच पवित्र जागा म बलिदान करे; कहालीकि जसो पापबलि याजक को निजी हिस्सा हय वसोच दोषबलि भी ओकोच निजी हिस्सा ठहरेंन; ऊ परमपवित्र हय।
LEV 14:14 तब याजक दोषबलि को खून म सी कुछ अंश ले क शुद्ध होन वालो को दायो कान को टोक पर, अऊर ओको दायो हाथ अऊर दायो पाय को अंगूठा पर लगाये।
LEV 14:15 तब याजक जैतून को अरधो लिटर तेल म सी कुछ ले क अपनो बायो हाथ कि हतेली पर डाले,
LEV 14:16 अऊर अपनो बायो हाथ को हतेली को तेल म दायो हाथ को बोट डुबाय क परमेश्वर को सामने सात बार छिड़के।
LEV 14:17 अऊर जो ओकी हतेली पर तेल बच जाये याजक ओख शुद्ध होन वालो को दायो कान को टोक पर अऊर दायो हाथ अऊर दायो पाय को अंगूठा पर दोषबलि को लग्यो हुयो खून को ऊपर लगाये;
LEV 14:18 अऊर याजक अपनी हतेली पर को तेल ऊ शुद्ध होन वालो को मुंड पर डाले। अऊर याजक ओको लायी परमेश्वर को सामने प्रायश्चित करे।
LEV 14:19 याजक पापबलि ख भी चढ़ाय क ओको लायी जो अपनी अशुद्धता सी शुद्ध होन वालो होना प्रायश्चित करे; अऊर ओको बाद होमबलि पशु को बलिदान चढ़ाये :
LEV 14:20 अन्नबलि समेत वेदी पर भेंट चढ़ाये : अऊर याजक ओको लायी प्रायश्चित करे, तब ऊ शुद्ध ठहरेंन।
LEV 14:21 “पर यदि ऊ आदमी गरीब होना अऊर भेंट देन लायी ओको जवर धन नहाय, त अपनो प्रायश्चित लायी हिलावन की भेंट को रूप म दोषबलि लायी एक मेंढा को बच्चा, अऊर अन्नबलि लायी जैतून को तेल सी सन्यो हुयो लगभग पाच किलो मैदा, अऊर लगभग अरधो लिटर जैतून को तेल आये;
LEV 14:22 अऊर दोय पंडुक, यां कबूत्तर को दोय बच्चा लाये, जो ऊ लाय सकय हय लाये; एक पापबलि लायी अऊर दूसरो होमबलि लायी होय।
LEV 14:23 अऊर आठवों दिन ऊ आदमी शुद्ध होन लायी उन सब ख मिलाप वालो तम्बू को फाटक पर, परमेश्वर को आगु, याजक को जवर लाये;
LEV 14:24 तब याजक लगभग अरधो लिटर जैतून को तेल अऊर दोषबलि को मेंढा को बच्चा ख ले क हिलावन की भेंट लायी परमेश्वर को सामने लाये।
LEV 14:25 फिर दोषबलि मेंढा को बच्चा ख बलिदान करे; अऊर याजक ओको खून म सी कुछ ले क शुद्ध होन वालो आदमी को दायो कान को टोक पर, अऊर ओको दायो हाथ अऊर दायो पाय को अंगूठा पर लगाये।
LEV 14:26 अऊर याजक ऊ तेल म सी कुछ अपनो बायो हाथ की हतेली पर डाले,
LEV 14:27 अऊर दायो हाथ को बोट सी बायो हाथ को हतेली पर को तेल परमेश्वर को सामने सात बार छिड़के;
LEV 14:28 फिर याजक अपनो दायो हाथ पर को कुछ तेल शुद्ध होन वालो को दायो कान टोक पर, अऊर ओको दायो हाथ अऊर दायो पाय को अंगूठा पर, जहां दोषबलि को खून लगायो गयो होतो वहां लगाये।
LEV 14:29 याजक अपनी हतेली पर को बच्यो हुयो तेल ख शुद्ध होन वालो आदमी को मुंड पर लगाय दे अऊर याजक ऊ आदमी लायी परमेश्वर को सामने प्रायश्चित करे।
LEV 14:30 तब ऊ पण्डुकों यां कबूत्तरी को बच्चां म सी जो ऊ लाय सक्यो होना एक ख चढ़ाये,
LEV 14:31 ऊ पक्षी म सी एक पापबलि लायी अऊर दूसरो अन्नबलि समेत होमबलि लायी चढ़ाये; यो तरह याजक शुद्ध होन वालो लायी परमेश्वर को सामने प्रायश्चित करे।
LEV 14:32 जेख कोढ़ को रोग भयो होना, अऊर ओको जवर इतनो धन नहीं होना कि ऊ अपनो शुद्धिकरन लायी ऊ जरूरतों को सामान नहीं लाय सकय, त ओको लायी याच व्यवस्था आय।”
LEV 14:33 फिर परमेश्वर न मूसा अऊर हारून सी कह्यो,
LEV 14:34 “जब तुम लोग कनान देश म पहुंचो, जेक मय तुम्हरो अधिकार म दे रह्यो हय, ऊ समय यदि मय कोढ़ को रोगी ख तुम्हरो अधिकार को कोयी घर म दिखाऊं,
LEV 14:35 त ऊ घर को मालिक आय क याजक ख बताये, मोख असो दिखायी दे रह्यो हय कि मोरो घर म कोयी रोग हय।
LEV 14:36 तब याजक आज्ञा देयेंन कि जो घर म जांच करन ख मोरो जान सी पहिले ऊ घर ख खाली करो, कहीं असो नहीं होय कि जो कुछ ऊ घर म हय हि सब अशुद्ध ठहरे; अऊर तब ओको बाद याजक घर कि जांच करन अन्दर जाय।
LEV 14:37 तब याजक ऊ रोग की जांच करे; अऊर यदि ऊ रोग घर की दीवालों पर हरी हरी यां लाल लाल खोदी हुयी लकीरों को रूप म हय, अऊर हि लकीरें दीवाल म गहरी दिखय हय,
LEV 14:38 त याजक घर सी बाहेर फाटक पर जाय क ऊ घर ख सात दिन तक बन्द कर क् रखेंन।
LEV 14:39 अऊर सातवों दिन याजक फिर सी आय क देखेंन; अऊर यदि ऊ रोग घर की दीवालों पर फैल गयो हय,
LEV 14:40 त याजक आज्ञा दे की जिन गोटावों ख रोग हय उन्ख निकाल क नगर सी बाहेर अशुद्ध जागा म फेक दे;
LEV 14:41 अऊर ऊ घर को अन्दर चारयी तरफ खुरचवायेंन, अऊर ऊ खुरची हुयी माटी ख नगर सी बाहेर अशुद्ध जागा म डाल दे;
LEV 14:42 अऊर उन निकाल्यो गयो गोटावों को जागा म दूसरो गोटा लाय क लगाये, अऊर ऊ ताजो गारा सी जुड़ायी करे।
LEV 14:43 “यदि गोटावों ख निकलवानो, घर ख खुरचनो अऊर जुड़ायी अऊर लीपायी करन को बाद ऊ रोग फिर सी घर म फूट क निकलय हय,
LEV 14:44 त याजक आय क जांच करे; अऊर यदि ऊ रोग घर म फैल गयो हय, त ऊ जान ले कि घर म हानी कर क् कोढ़ आय; त ऊ घर अशुद्ध हय।
LEV 14:45 येकोलायी ऊ घर ख गिराय क गोटा, लकड़ी अऊर गारा समेत सब चिजों ख उठवाय क नगर सी बाहेर अशुद्ध जागा म फिंकवाय दे।
LEV 14:46 अगर येको अलावा यदि कोयी ऊ समय म ऊ घर म जाये, जो बन्द होतो, त ऊ आदमी शाम तक अशुद्ध रहेंन;
LEV 14:47 अऊर जो कोयी ऊ घर म सोयेंन ऊ अपनो कपड़ा धोयेंन; अऊर जो कोयी ऊ घर म जेवन करेंन ऊ भी अपनो कपड़ा ख धोयेंन।
LEV 14:48 “पर यदि याजक आय क देखे, कि घर कि लीपायी को बाद रोग घर म नहीं फैल्यो हय, त ऊ घर ख शुद्ध ठहराये; कहालीकि ऊ रोग दूर भय गयो हय।
LEV 14:49 तब याजक ऊ घर ख शुद्ध करन लायी दोय पक्षी, देवदार की लकड़ी, लाल रंग को कपड़ा अऊर जूफा लाये,
LEV 14:50 तब एक पक्षी बहतो हुयो पानी को ऊपर माटी को बर्तन म बलिदान करे,
LEV 14:51 फिर ऊ जीन्दो पक्षी को संग देवदार की लकड़ी, जूफा अऊर लाल रंग को कपड़ा ऊ बलिदान करयो हुयो पक्षी को खून, अऊर बहतो हुयो पानी म डुबाय क ऊ घर पर सात बार छिड़के।
LEV 14:52 यो तरह ऊ पक्षी को खून, बहतो हुयो पानी, जीन्दो पक्षी, देवदार की लकड़ी, जूफा अऊर लाल रंग को कपड़ा को संग ऊ घर ख शुद्ध करे।
LEV 14:53 तब ऊ जीन्दो पक्षी ख नगर सी बाहेर खुलो मैदान म छोड़ दे; योच रीति सी ऊ घर लायी प्रायश्चित करे, तब ऊ शुद्ध ठहरेंन।”
LEV 14:54 कोयी भी तरह को कोढ़ को रोग, अऊर दाग,
LEV 14:55 अऊर कपड़ा, अऊर घर को कोढ़,
LEV 14:56 सूजन, फोड़ा अऊर दाग को बारे म,
LEV 14:57 शुद्ध अऊर अशुद्ध ठहरान की शिक्षा देन की व्यवस्था याच आय। अऊर सब तरह को कोढ़ की याच व्यवस्था आय।
LEV 15:1 फिर परमेश्वर न मूसा अऊर हारून सी कह्यो,
LEV 15:2 “इस्राएली लोगों सी कहो, कि जो कोयी आदमी को शरीर सी धात बहय हय, त ओको धात अशुद्ध हय।
LEV 15:3 ऊ धात चाहे बहतो रहे, यां बहनो बन्द भी होय जाये, तब भी ओकी अशुद्धता बनी रहेंन।
LEV 15:4 धात बहन वालो आदमी जो बिस्तर पर आराम करय हय ऊ बिस्तर अशुद्ध होय जावय हय, अऊर हर एक चिज जेको पर ऊ बैठय हय ऊ भी अशुद्ध होय जावय हय।
LEV 15:5 अऊर जो कोयी ओको बिस्तर ख छुवय ऊ भी अपनो कपड़ा ख धोय क पानी सी नहाय ले, अऊर ऊ शाम तक अशुद्ध रहेंन।
LEV 15:6 अऊर जो चिज पर ऊ धात बहन वालो आदमी बैठय हय, ऊ चिज पर दूसरो कोयी आदमी बैठय हय त ऊ भी अपनो कपड़ा धोय क पानी सी नहाये, अऊर शाम तक अशुद्ध रहे।
LEV 15:7 अऊर धात बहन वालो आदमी को शरीर ख कोयी छुय ले त ऊ भी अपनो कपड़ा धोय क पानी सी नहाय क अऊर शाम तक अशुद्ध रहे।
LEV 15:8 यदि धात बहन वालो आदमी कोयी शुद्ध आदमी पर थूक देवय हय, त ऊ अपनो कपड़ा धोय क पानी सी नहाय क शाम तक अशुद्ध रहे।
LEV 15:9 अऊर जो वाहन पर ऊ बैठय हय त ऊ चिज अशुद्ध ठहरे।
LEV 15:10 यदि कोयी आदमी उन चिजों म सी कोयी ख भी छुय लेवय हय, जो धात बहन वालो आदमी को खल्लो की हय त ऊ शाम तक अशुद्ध रहेंन। अऊर जो कोयी आदमी ऊ चिज ख उठावय हय त ऊ अपनो कपड़ा ख धोय क पानी सी नहाय ले, अऊर शाम तक अशुद्ध रहे।
LEV 15:11 यदि धात बहन वालो आदमी बिना हाथ धोयो कोयी ख छुय लेवय त ऊ अपनो कपड़ा धोय क पानी सी नहाय क शाम तक अशुद्ध रहे।
LEV 15:12 अऊर धात बहन वालो आदमी कोयी माटी को बर्तन ख छुय लेवय हय त ओख तोड़ दियो जाये, अऊर यदि लकड़ी को बर्तन हय त उन सब बर्तन ख पानी सी धोयो जाय।
LEV 15:13 “जब धात बहन वालो आदमी अपनो धात सी शुद्ध होय जाये, तब ऊ अपनो शुद्ध होन लायी सात दिन गिन ले, अऊर ऊ दिन बीतन पर अपनो कपड़ा ख धोय क बहतो हुयो पानी सी नहाय ले; तब ऊ शुद्ध ठहरेंन।
LEV 15:14 अऊर आठवों दिन ऊ दोय पंडुक यां कबूत्तरी को दोय बच्चा लाय क मिलाप वालो तम्बू को फाटक पर परमेश्वर को सामने याजक ख दे।
LEV 15:15 तब याजक उन म सी एक पापबलि लायी, अऊर दूसरो होमबलि लायी भेंट चढ़ाये; अऊर याजक ओको लायी धात को वजह परमेश्वर को सामने प्रायश्चित करे।
LEV 15:16 “फिर यदि कोयी आदमी को वीर्यपात होय जावय हय, त ऊ अपनो पूरो शरीर ख पानी सी धोये, अऊर ऊ शाम तक अशुद्ध रहेंन।
LEV 15:17 अऊर जो कोयी कपड़ा पर यां चमड़ा पर ऊ वीर्य गिरय हय त ओख पानी सी धोयो जाये, अऊर शाम तक अशुद्ध रहेंन।
LEV 15:18 यदि कोयी आदमी कोयी बाई सी सहवास करय अऊर यो प्रक्रिया म ओको वीर्यपात भयो होना, त हि दोयी पानी सी नहाये, अऊर शाम तक अशुद्ध रहे।
LEV 15:19 “फिर जब कोयी बाई मासिक धर्म म रहे, त वा सात दिन तक अशुद्ध ठहरी रहे, अऊर जो कोयी ओख छुयेंन ऊ शाम तक अशुद्ध रहेंन।
LEV 15:20 अऊर वा अपनो मासिक धर्म म जो चिज पर वा सोवय हय यां बैठय हय, त ऊ सब चिज अशुद्ध ठहरेंन।
LEV 15:21 अऊर जो कोयी ओको बिस्तर ख छुयेंन ऊ अपनो कपड़ा धोय क पानी सी नहाये, अऊर शाम तक अशुद्ध रहे।
LEV 15:22 अऊर जो कोयी ऊ चिज ख छुय लेवय हय जेको पर वा बैठय हय त ऊ अपनो कपड़ा धोय क पानी सी नहाये, अऊर शाम तक अशुद्ध रहेंन।
LEV 15:23 चाहे यो ओको बिस्तर यां कोयी भी चिज होना जेको पर वा बैठय हय, यदि कोयी ओख छुय लेवय हय, त ऊ शाम तक अशुद्ध रहेंन।
LEV 15:24 यदि कोयी आदमी ओको संग हकिकत म सहवास कर लेवय हय अऊर वा बाई की मासिक धर्म अशुद्धता ओको पर आय जावय हय, त ऊ सात दिन तक अशुद्ध रहेंन, अऊर हर एक बिस्तर पर ऊ सोवय हय अशुद्ध ठहरेंन।
LEV 15:25 “यदि कोयी बाई ख खून बहनो ओको मासिक धर्म अशुद्धता को समय मच नहीं बल्की ओको अलावा भी जादा दिनों तक खून बहतो रहे, त वा मासिक धर्म अशुद्धता को जसी अशुद्ध रहेंन।
LEV 15:26 जो जो बिस्तर पर वा अपनो खून बहन को दिनों म सोवय हय, त वा मासिक धर्म को जसी अशुद्ध ठहरेंन; अऊर जो बिस्तर पर वा बैठेंन, हि भी ओको मासिक धर्म रहन को दिनों को जसो अशुद्ध ठहरेंन।
LEV 15:27 अऊर जो कोयी उन चिजों ख छुयेंन ऊ अशुद्ध ठहरेंन, येकोलायी ऊ अपनो कपड़ा धोय क पानी सी नहाये, अऊर शाम तक अशुद्ध रहेंन।
LEV 15:28 पर जब वा बाई अपनो मासिक धर्म सी शुद्ध होय जाये, तब सी वा सात दिन गिन ले, उन दिनों को बितन को बाद वा शुद्ध ठहरेंन।
LEV 15:29 फिर वा आठवों दिन दोय पंडुक यां कबूत्तर को दोय बच्चा लाय क मिलाप वालो तम्बू को फाटक पर याजक को जवर लाये।
LEV 15:30 तब याजक एक ख पापबलि अऊर दूसरों ख होमबलि लायी चढ़ाये; अऊर याजक ओको मासिक धर्म अशुद्धता को लायी परमेश्वर को सामने प्रायश्चित करे।
LEV 15:31 “यो तरह तुम इस्राएली समाज ख उन्की अशुद्धता सी अलग रखो, कहीं असो नहीं होय कि हि मोरो तम्बू ख जो उन्को बीच म हय, अशुद्ध करे अऊर अपनी अशुद्धता को वजह मर जाय।”
LEV 15:32 जेको धात बह रह्यो हय अऊर जो आदमी को वीर्यपात होन को वजह ऊ अशुद्ध होय जावय हय,
LEV 15:33 अऊर जो बाई मासिक धर्म अशुद्धता को वजह अस्वस्थ होना; पर चाहे आदमी होना यां बाई होना, जो कोयी ख धात रोग होना, अऊर जो आदमी अशुद्ध बाई सी सहवास करय हय, त इन सब लायी याच व्यवस्था आय।
LEV 16:1 जब हारून को दोय टुरा परमेश्वर को सामने जान को वजह मर गयो, ओको बाद परमेश्वर न मूसा सी बाते करी।
LEV 16:2 अऊर परमेश्वर न मूसा सी कह्यो, “अपनो भाऊ हारून सी कहो कि ऊ परदा को अन्दर परमपवित्र जागा म वाचा को सन्दूक को ऊपर को प्रायश्चित वालो ढक्कन को सामने, बीचवालो परदा को अन्दर, पवित्र जागा म हर समय सिरे, नहीं त मर जायेंन; कहालीकि मय प्रायश्चित वालो ढक्कन को ऊपर बादर म दिखायी देऊं।”
LEV 16:3 जब हारून पवित्र जागा म सिरे तब यो रीति सी सिरे, ऊ पापबलि लायी एक गोरा अऊर होमबलि लायी एक मेंढा ले क आये।
LEV 16:4 तब हारून सन को पवित्र कपड़ा पहिने, अऊर अपनो शरीर पर सन की जांघिया पहिने, अऊर सन को पट्टा बान्धे, अऊर सन को फेटा बान्धे, यो पवित्र कपड़ा आय, ऊ पानी सी नहान को बादच पहिने।
LEV 16:5 फिर ऊ इस्राएलियों की मण्डली को जवर सी पापबलि लायी दोय बकरा अऊर होमबलि लायी एक मेंढा लाये।
LEV 16:6 अऊर हारून ऊ पापबलि को गोरा ख चढ़ाय क अपनो अऊर अपनो परिवार लायी प्रायश्चित करे।
LEV 16:7 येको बाद ऊ दोयी बकरा ख ले क मिलाप वालो तम्बू को फाटक पर परमेश्वर को सामने खड़ो करे;
LEV 16:8 अऊर हारून दोयी बकरा पर चिट्ठियां डाले, एक चिट्ठी परमेश्वर लायी अऊर दूसरी अजाजेल लायी होयेंन।
LEV 16:9 अऊर जो बकरा पर परमेश्वर को नाम की चिट्ठी निकलेंन ओख हारून पापबलि लायी चढ़ाये;
LEV 16:10 पर जो बकरा पर अजाजेल लायी चिट्ठी निकलेंन ओख परमेश्वर को सामने जीन्दो खड़ो करयो जाये कि ओको पर प्रायश्चित करयो जाये, अऊर ओख अजाजेल लायी जंगल म छोड़ दियो जाये।
LEV 16:11 “हारून ऊ पापबलि को गोरा ख जो ओको लायी हय लाये, अऊर ओख बलिदान कर क् अपनो अऊर अपनो परिवार को पाप ख झाके।”
LEV 16:12 ऊ परमेश्वर को सामने वेदी पर जलतो हुयो कोयला सी भरयो हुयो धूपदान अऊर अपनी दोय मुट्ठी भर बारीक कूटी हुयी सुगन्धित धूप बीच वालो परदा को अन्दर लाये।
LEV 16:13 ऊ धूप ख परमेश्वर को आगु आगी म डाले, जेकोसी धूप को धुवा वाचा को सन्दूक पर गवाह चिट्ठी को ऊपर को प्रायश्चित को ढक्कन को ऊपर छाय जायेंन, नहीं त ऊ मर जायेंन;
LEV 16:14 तब ऊ बछड़ा खून म सी कुछ ले क पूर्व दिशा को तरफ प्रायश्चित को ढक्कन को ऊपर अपनो बोट सी छिड़क दे, अऊर फिर ऊ खून म सी कुछ बोट को द्वारा ऊ ढक्कन को सामने भी सात बार छिड़क दे।
LEV 16:15 फिर हारून ऊ पापबलि को बकरा ख जो साधारन लोगों लायी होयेंन बलिदान कर क् अऊर ओको खून ख बीच वालो परदा को अन्दर ले आये, अऊर जो तरह गोरा को खून सी ओन करयो होतो ठीक वसोच ऊ बकरा खून सी भी करे, मतलब ओख प्रायश्चित को ढक्कन को ऊपर अऊर ओको सामने छिड़क दे।
LEV 16:16 फिर ऊ पवित्र जागा लायी इस्राएली लोगों की अशुद्धता यां उन्को सब पापों को सम्बन्ध म करयो गयो अपराध को लायी प्रायश्चित पूरो करे अऊर यो तरह ऊ मिलाप वालो तम्बू को लायी भी करे, जो उन्की अशुद्धतावों को बीच उन्को संग रह्य हय।
LEV 16:17 जब हारून प्रायश्चित करन लायी पवित्र जागा म जाये, तब सी अपनो लायी अऊर घराना लायी अऊर इस्राएल की पूरी मण्डली लायी प्रायश्चित कर क् बाहेर निकलय तब तक कोयी भी मिलाप वालो तम्बू म नहीं रहे।
LEV 16:18 फिर ऊ निकल क ऊ वेदी को जवर जो परमेश्वर को सामने हय जाये अऊर ओको लायी प्रायश्चित करे, मतलब बछड़ा को अऊर बकरा को कुछ खून दोयी म सी कुछ ले क वा वेदी को चारयी कोना को सींगो पर लगाये।
LEV 16:19 अऊर ऊ खून म सी कुछ अपनो बोट सी सात बार ओको पर छिड़के। अऊर इस्राएली लोगों की अशुद्धता सी पवित्र करे।
LEV 16:20 “जब हारून पवित्र जागा, मिलाप वालो तम्बू अऊर वेदी लायी पाप झाकन को बाद, एक जीन्दो बकरा ख लाये।
LEV 16:21 अऊर हारून अपनो जीन्दो बकरा को मुंड पर अपनो दोयी हाथ रख क इस्राएली लोगों को पूरो बुरो कामों, अऊर उन्को सब अपराधों, मतलब ओको पूरो पापों ख स्वीकार करे, अऊर उन्ख बकरा को मुंड पर रख क ओख कोयी आदमी को हाथ जो यो काम लायी तैयार रहे निर्जन जमीन म भेज क छोड़ दे।
LEV 16:22 यो बकरा इन्को सब बुरो कामों को बोझ अपनो ऊपर उठाय क निर्जन जमीन म लिजायेंन; येकोलायी ऊ आदमी ऊ बकरा ख जंगल म छोड़ दे।
LEV 16:23 “तब हारून मिलाप वालो तम्बू म आयेंन, अऊर जो सन को कपड़ा ख पहिन्यो हुयो ओन पवित्र जागा म सिरतो समय पहिन्यो होतो ओख उतार क वहांच पर रख दे।
LEV 16:24 फिर ऊ कोयी पवित्र जागा म पानी सी नहाय क अपनो कपड़ा पहिन ले, अऊर बाहेर आय क अपनी अऊर अपनो लोगों की होमबलि ख चढ़ाय क अपनो लायी अऊर लोगों को पापों ख झाकेंन।
LEV 16:25 फिर ऊ पापबलि की चरबी ख वेदी पर आगी म जलाये।
LEV 16:26 अऊर जो आदमी अजाजेल लायी बकरा ख छोड़ क आयेंन, अऊर ऊ अपनो कपड़ा धोयेंन, अऊर पानी सी नहायेंन तब ऊ छावनी म सिरेंन।
LEV 16:27 अऊर पापबलि को गोरा अऊर बकरा भी जिन्को खून पवित्र जागा म पाप ख झाकन लायी लायो गयो होतो, उन्ख छावनी को बाहेर लायो जायेंन अऊर वहां उन्की खाल, मांस अऊर गोबर आगी म जलाय दियो जायेंन।
LEV 16:28 अऊर जो उन्ख जलायेंन ऊ अपनो कपड़ा धोये, अऊर पानी सी नहान को बाद ऊ छावनी म सिर सकेंन।
LEV 16:29 “तुम लोगों लायी या विधि हमेशा लायी होयेंन कि सातवों महिना को दसवों दिन तुम अपनो अपनो जीव ख दु:ख देवो, अऊर ऊ दिन कोयी, चाहे ऊ तुम्हरो निजी देश को होना यां विदेश को होना तुम्हरो बीच म रह्य हय, कोयी भी तरह को काम काज नहीं करेंन;
LEV 16:30 कहालीकि योच ऊ दिन आय जो दिन तुम्ख शुद्ध करन लायी पापों ख झाक्यो जायेंन; अऊर तुम परमेश्वर को सामने अपनो पूरो पापों सी शुद्ध ठहरो।
LEV 16:31 यो तुम्हरो लायी परम आराम को दिन ठहरे, अऊर तुम ऊ दिन उपवास करो अऊर कोयी तरह को काम-काज मत करो; याच हमेशा की विधि आय।
LEV 16:32 अऊर अपनो बाप की जागा पर याजक पद लायी जेको अभिषेक करयो जाये, ऊ याजक सन को पवित्र कपड़ा पहिन क पाप ख झाके,
LEV 16:33 उच याजक पवित्र जागा, मिलाप वालो तम्बू अऊर वेदी लायी प्रायश्चित करे; अऊर सब याजकों अऊर मण्डली को सब लोगों लायी भी प्रायश्चित करे।
LEV 16:34 अऊर तुम्हरो लायी हमेशा की या विधि होयेंन कि इस्राएली लोगों लायी ओको सब पापों को वजह हर साल एक बार प्रायश्चित करयो जाय।” मूसा न ठीक वसोच करयो, जसो परमेश्वर न आज्ञा दी होती हारून न करयो।
LEV 17:1 फिर परमेश्वर न मूसा सी कह्यो,
LEV 17:2 “हारून अऊर ओको टुरावों सी अऊर सब इस्राएलियों सी कहो कि परमेश्वर न या आज्ञा दी हय।”
LEV 17:3 यदि इस्राएल को घराना म सी कोयी भी आदमी जो कोयी मेंढा को बच्चा यां शेरी को बच्चा की हत्या, छावनी म यां छावनी को बाहेर करे,
LEV 17:4 अऊर ऊ येख मिलापवालो तम्बू को फाटक पर परमेश्वर को निवास को सामने भेंट चढ़ावन लायी नहीं ले जाय, त ऊ आदमी ख हत्या को दोष लगेन; अऊर ऊ आदमी न खून बहायो हय, त असो आदमी ख अपनो लोगों को बीच सी बाहेर निकाल्यो जायेंन।
LEV 17:5 या विधि को यो उद्देश हय कि इस्राएली लोग अपनी बलियों को बलिदान हि खुलो मैदान म करय हय, हि बलियों ख मिलापवालो तम्बू को फाटक पर याजक को जवर लाये, अऊर परमेश्वर को लायी मेल-मिलाप बलि को रूप म भेंट चढ़ाये;
LEV 17:6 अऊर याजक खून ख मिलापवालो तम्बू को द्वार पर परमेश्वर की वेदी को ऊपर छिड़के, अऊर चरबी ख ओको सुखदायक सुगन्ध लायी जलाये।
LEV 17:7 हि जो बकरा देवता को पूजक होय क व्यभिचार करय हय, हि फिर अपनो बलिपशुवों ख उन्को लायी बलिदान नहीं करे। तुम्हरी पीढ़ियों को लायी या हमेशा की विधि होयेंन।
LEV 17:8 “तय उन्कोसी यो कहजो कि इस्राएल को घरानो को लोगों म सी यां परदेशियों म सी कोयी आदमी जो उन्को बीच म रह्य हय, होमबलि यां मेल-मिलाप बलि चढ़ाये,
LEV 17:9 अऊर ओख मिलापवालो तम्बू को द्वार पर परमेश्वर को लायी भेंट चढ़ावन लायी नहीं लाये; त ऊ आदमी ख अपनो लोगों म सी मार डाल्यो जायेंन।”
LEV 17:10 “फिर इस्राएल को घराना म सी यां उन्को बीच म रहन वालो परदेशियों म सी कोयी आदमी कोयी तरह को खून खाये, मय ऊ खून खान वालो को विरुद्ध होय क ओख ओको लोगों को बीच म सी नाश कर डालूं।”
LEV 17:11 कहालीकि शरीर को जीव खून म रह्य हय; अऊर ओख मय न तुम लोगों ख वेदी पर चढ़ावन लायी दियो हय कि तुम्हरो जीवों को लायी पापों ख झाक्यो जाये; कहालीकि खून म जीव होन को वजह ओको सी पश्चाताप होवय हय।
LEV 17:12 येकोलायी मय इस्राएली लोगों सी कहू हय कि तुम म सी कोयी यां कोयी परदेशी जो तुम्हरो बीच म रह्य हय ऊ भी कभी खून नहीं खाये।,
LEV 17:13 “इस्राएलियों म सी यां उन्को बीच म रहन वालो परदेशियों म सी कोयी आदमी शिकार कर क् खान को लायक पशु यां पक्षी ख पकड़ेंन; त ऊ ओको खून ख जमीन म कुड़ाय क माटी सी झाक दे।”
LEV 17:14 कहालीकि सब प्रानियों को शरीर को जीवन खून म रह्य हय जो ओको जीव को संग एक हय; येकोलायी मय इस्राएलियों सी कहू हय कि कोयी प्रानी को खून ख तुम मत खावो, कहालीकि सब प्रानियों को जीव ओको खूनच आय; जो कोयी ओख खायेंन ओख नाश करयो जायेंन।
LEV 17:15 यदि कोयी आदमी, चाहे ऊ देशी यां परदेशी होना, हिंसक पशु द्वारा फाड़्यो गयो पशु यां स्वाभाविक मृत्यु सी मरयो हुयो पशु को मांस खायेंन त ऊ अपनो कपड़ा ख धोय क पानी सी नहाये, ऊ शाम तक अशुद्ध रहेंन; अऊर तब ऊ शुद्ध होयेंन।
LEV 17:16 “पर यदि ऊ कपड़ा ख नहीं धोवय अऊर पानी सी नहीं नहावय, त ओख अपनो पाप को बोझ खुद ख उठानो पड़ेंन।”
LEV 18:1 फिर परमेश्वर न मूसा सी कह्यो,
LEV 18:2 “इस्राएली लोगों सी कहो कि मय तुम्हरो परमेश्वर आय।”
LEV 18:3 तुम मिस्र देश को कामों को अनुसार व्यवहार मत करो, जहां तुम रहत होतो; अऊर नहीं कनान देश को कामों को, जहां मय तुम्ख लिजाय रह्यो हय; तुम उन्की विधियों को पालन भी मत करो।
LEV 18:4 तुम मोरो नियमों को पालन करो, अऊर मोरीच विधियों ख मानतो हुयो उन पर चलो। मय तुम्हरो परमेश्वर यहोवा आय।
LEV 18:5 येकोलायी तुम मोरो नियमों अऊर मोरी विधियों ख हमेशा मानो; जो आदमी या विधियों ख मानेंन ऊ इन्को वजह जीन्दो रहेंन। मय यहोवा आय।
LEV 18:6 “तुम म सी कोयी अपनी कुटुम्ब की बाई को तन उघाड़न लायी ओको जवर मत जावो। मय यहोवा आय।”
LEV 18:7 तय अपनी माय को तन उघाड़ क अपनो बाप को अपमान मत करो; वा तुम्हरी जनम देन वाली माय आय, येकोलायी तुम ओको तन मत उघाड़जो।
LEV 18:8 तय अपनी सौतेली माय सी सहवास मत करजो; यो तुम्हरो बाप को अपमान होयेंन।
LEV 18:9 तुम अपनी बहिन चाहे सगी होना चाहे सौतेली होना, चाहे ओको जनम घर म भयो होना यां दूसरों जागा म, ओको तन मत उघाड़जो।
LEV 18:10 अपनी नातिन, जो वा बेटा की बेटी होना यां बेटी की बेटी होना ओको तन मत उघाड़जो; कहालीकि ओको अपमान तुम्हरो अपमान हय।
LEV 18:11 तुम्हरी सौतेली बहिन जो तुम्हरो बाप सी पैदा भयी हय, वा तुम्हरी बहिनच आय, ओको तन मत उघाड़जो।
LEV 18:12 तुम अपनी फूफू को तन मत उघाड़जो; वा त तुम्हरो बाप को जवर की बहिन आय।
LEV 18:13 तुम अपनी मावसी को तन मत उघाड़ो; कहालीकि वा तुम्हरी माय की जवर की बहिन आय।
LEV 18:14 तय अपनो काका तन मत उघाड़जो, मतलब ओकी पत्नी को जवर मत जावो; वा त तुम्हरी काकी आय।
LEV 18:15 तय अपनी बहू को तन मत उघाड़जो; वा त तुम्हरो टुरा की पत्नी आय, ओको तन मत उघाड़जो।
LEV 18:16 तय अपनी भाभी को तन मत उघाड़जो; वा त तुम्हरो भाऊ कोच तन आय।
LEV 18:17 तय कोयी बाई अऊर ओकी बेटी दोयी को तन मत उघाड़जो, अऊर नहीं ओकी बेटा की बेटी को अऊर नहीं ओकी बेटी की बेटी को तन मत उघाड़जो, हि त जवर की कुटुम्बिनी आय; असो करनो महापाप हय।
LEV 18:18 तय अपनी पत्नी की बहिन ख अपनाय क सौतन मत बनायजो, अऊर ओकी बहिन को जीन्दी रहतो हुयो ओको तन मत उघाड़जो।
LEV 18:19 जब कोयी बाई मासिक धर्म को वजह अशुद्ध हय, तब तक ओको जवर ओको तन उघाड़न मत जाजो।
LEV 18:20 फिर अपनो पड़ोसी की पत्नी सी कुकर्म कर क् अपनो ख अशुद्ध मत करजो।
LEV 18:21 तय अपनी कोयी भी सन्तान ख मोलेक देवता ख होमबलि कर क् मत चढ़ायजो, अऊर अपनो परमेश्वर को नाम ख अपवित्र मत करजो; मय यहोवा आय।
LEV 18:22 तय बाई को संग सहवास को रीति सी आदमी को संग सहवास मत करजो; ऊ त घिनौना काम आय।
LEV 18:23 तुम कोयी पशु सी कुकर्म कर क् खुद ख अशुद्ध मत करो, अऊर नहीं कोयी बाई कुकर्म करन को उद्देश सी कोयी पशु को सामने जाये; यो त अनर्थ हय।
LEV 18:24 यो तरह को काम म सी कोयी भी काम कर क् अशुद्ध मत होय जाजो, कहालीकि जिन राज्य को लोगों ख मय तुम्हरो सामने सी निकालन पर हय हि यो तरह को काम कर क् अशुद्ध भय गयो हय।
LEV 18:25 अऊर ओको देश भी अशुद्ध भय गयो हय, यो वजह मय ओको पर ओको बुरो कामों की सजा देऊ हय, अऊर ऊ देश अपनो निवासियों ख निकाल देवय हय।
LEV 18:26 यो वजह तुम लोग मोरी विधियों अऊर नियमों ख हमेशा मानो, अऊर चाहे देशी होना यां तुम्हरो बीच म रहन वालो परदेशी होना, तुम म सी कोयी भी असो घृणित काम नहीं करेंन।
LEV 18:27 कहालीकि असो सब घृणित कामों ख ऊ देश को लोग जो तुम सी पहिले वहां रहत होतो हि करतो आयो हय, येकोसीच ऊ देश अशुद्ध भय गयो हय।
LEV 18:28 अब असो नहीं होय कि जो रीति सी जो राज्य को लोग तुम सी पहिले ऊ देश म रहत होतो ओख ओन निकाल दियो, उच रीति सी जब तुम ओख अशुद्ध करो, त ऊ तुम्ख भी निकाल देयेंन।
LEV 18:29 जितनो असो कोयी घृणित काम करेंन हि सब अपनो लोगों म सी नाश करयो जायेंन।
LEV 18:30 या आज्ञा जो मय न तुम्ख मानन लायी दी हय ओख तुम मानो, अऊर जो घृणित रीतियां तुम सी पहिले मानी जात होती उन्म सी कोयी रीति पर नहीं चलनो, अऊर नहीं उन को वजह अशुद्ध होय जावो। मय तुम्हरो परमेश्वर यहोवा आय।
LEV 19:1 फिर परमेश्वर न मूसा सी कह्यो,
LEV 19:2 इस्राएलियों की पूरी मण्डली सी कहो कि तुम पवित्र बन्यो रहो; कहालीकि मय तुम्हरो परमेश्वर यहोवा पवित्र हय।
LEV 19:3 तुम अपनी माय अऊर अपनो बाप को आदर करनो, अऊर मोरो आराम दिनों ख माननो : मय तुम्हरो परमेश्वर यहोवा आय।
LEV 19:4 तुम मूर्तियों को तरफ मत फिरो, अऊर धातु को देवतावों की मूर्तियां ढाल क मत बनावो; मय तुम्हरो परमेश्वर यहोवा आय।
LEV 19:5 जब तुम परमेश्वर लायी मेल-मिलाप बलि करो, तब असो बलिदान करो जेकोसी मय तुम सी खुश होय जाऊं।
LEV 19:6 जो दिन ओको मांस बलिदान करो उच दिन यां ओको दूसरो दिन ओख खायो जाये, पर तीसरो दिन तक बच जाये ओख आगी म जलाय दियो जाये।
LEV 19:7 यदि ओको म सी कुछ भी तीसरो दिन खायो जाये, त यो अशुद्ध ठहरेंन, अऊर स्वीकार नहीं करयो जायेंन,
LEV 19:8 अऊर ओख खानवालो परमेश्वर को पवित्र चिज ख अपवित्र ठहरावय हय, येकोलायी ओख अपनो बुरो काम को बोझ खुद ख उठानो पड़ेंन; अऊर ऊ व्यक्ति अपनो लोगों म सी नाश करयो जायेंन।
LEV 19:9 फिर जब तुम अपनी जमीन की फसल काटो तब अपनो खेत को कोना कोना तक मत काटो, अऊर काट्यो हुयो फसल की गिरी पड़ी लोम्बा ख मत चुनो।
LEV 19:10 अऊर अपनी अंगूर की बाड़ी को पूरो अंगूर मत तोड़जो, अऊर अपनी अंगूर की बाड़ी को झड़्यो हुयो अंगूरों ख जमा मत करजो; उन्ख गरीब अऊर परदेशी लोगों लायी छोड़ देजो; मय तुम्हरो परमेश्वर यहोवा आय।
LEV 19:11 “तुम चोरी नहीं करनो, अऊर नहीं एक दूसरो सी कपट करनो, अऊर नहीं झूठ बोलनो।
LEV 19:12 तुम मोरो नाम की झूठी कसम खाय क अपनो परमेश्वर को नाम कलंकित मत करो; मय परमेश्वर यहोवा आय।
LEV 19:13 “एक दूसरो पर अन्धेर नहीं करनो, अऊर नहीं एक दूसरो ख लूटनो। मजूर की मजूरी तोरो जवर पूरी रात सबेरे तक नहीं रहनो चाहिये।
LEV 19:14 बहिरा ख श्राप नहीं देनो, अऊर अन्धा को आगु ठेस की चिज नहीं रखनो; अऊर अपनो परमेश्वर की भय रखो; मय परमेश्वर यहोवा आय।
LEV 19:15 “न्याय करतो समय अन्याय नहीं करनो; अऊर नहीं गरीब को पक्ष लेनो अऊर नहीं बड़ो आदमी को मुंह देख क बिचार करनो; एक दूसरो को न्यायीपन सी न्याय करनो।
LEV 19:16 तुम अपनो लोगों को बीच म निन्दा करतो नहीं फिरनो, अऊर एक दूसरो को खून बहावन की युक्ति नहीं बनावो; मय परमेश्वर आय।
LEV 19:17 “अपनो मन म एक दूसरो को खिलाफ घृणा नहीं रखो; अपनो पड़ोसी ख जरूर डाटनो, नहीं त ओको पाप को बोझ तोख उठानो पड़ेंन।
LEV 19:18 बदला नहीं लेनो, अऊर अपनो लोगों सी दुस्मनी नहीं रखनो, पर एक दूसरो सी अपनो जसो प्रेम रखो; मय परमेश्वर आय।
LEV 19:19 “तुम मोरी विधियों ख हमेशा मानो। अपनो जनावरों ख दूसरो जाति को जनावरों सी गर्भधारन मत होन देवो; अपनो खेत म दोय तरह को बीज मत बोवो; अऊर दोय तरह सी बन्यो हुयो कपड़ा मत पहिनो।
LEV 19:20 “यदि कोयी आदमी असी बाई को संग जो दासी हय, जेकी मंगनी दूसरो आदमी सी भयी होना, अऊर जेक दाम दे क मुक्त नहीं करयो गयो होना; यदि ओको सी कोयी कुकर्म करे, त उन दोयी ख सजा त मिलेंन, पर हि दोयी मार डाल्यो नहीं जाये।
LEV 19:21 पर ऊ आदमी मिलापवालो तम्बू को फाटक पर एक मेंढा दोषबलि लायी लाये।
LEV 19:22 अऊर याजक ओको करयो हुयो पाप को वजह दोषबलि को मेंढा को द्वारा ओको लायी परमेश्वर को सामने प्रायश्चित करे; तब ओको करयो हुयो पाप माफ करयो जायेंन।
LEV 19:23 “फिर जब तुम कनान देश म पहुंच क कोयी तरह को खान लायी सब तरह को फर को झाड़ लगावो, त उन्को फर तुम्हरो लायी तीन साल तक खतनारहित रहेंन; येकोलायी उन म सी कुछ नहीं खायो जाये।
LEV 19:24 अऊर चौथो साल म उन्को सब फर परमेश्वर की स्तुति भेंट को रूप म पवित्र ठहरे।
LEV 19:25 तब पाचवों साल म तुम उन्को फर खाय सकय हय, येकोलायी कि हि तुम्ख बहुत फर दे सके; मय तुम्हरो परमेश्वर यहोवा आय।
LEV 19:26 “तुम खून लग्यो हुयो कुछ मांस मत खावो। अऊर जादू-टोना मत करो, अऊर शुभ यां अशुभ मुहुर्तों ख मत मानो।
LEV 19:27 तुम अपनो मुंड को बाल घेरा रख क मत काटो, अऊर नहीं अपनी दाढ़ी ख किनारा सी काटो।
LEV 19:28 कोयी की मृत्यु को वजह अपनो शरीर पर चिरा मत लगावो, अऊर नहीं गुदना गुदवानो; मय परमेश्वर आय।
LEV 19:29 “अपनी टुरी ख वेश्या बनाय क अपवित्र नहीं करनो, असो नहीं होय कि देश वेश्यागमन को वजह दुष्टता सी भर जाये।
LEV 19:30 मोरो आराम दिन ख मानो, अऊर मोरो पवित्र जागा को डर मानो; मय परमेश्वर आय।”
LEV 19:31 “सलाह देन वालो अऊर भूत-प्रेत साधन वालो को तरफ मत फिरो, असो की खोज कर क् उन्को वजह अशुद्ध मत होय जावो; मय तुम्हरो परमेश्वर यहोवा आय।
LEV 19:32 “बुजूर्ग आदमी को सामने उठ क खड़ो होनो, अऊर बुजूर्ग आदमी को आदर करो, अऊर अपनो परमेश्वर सी हमेशा डरो; मय परमेश्वर आय।
LEV 19:33 “यदि कोयी परदेशी तुम्हरो देश म तुम्हरो संग रहेंन, त ओको संग बुरो व्यवहार मत करो।
LEV 19:34 जो परदेशी तुम्हरो संग रह्य हय ऊ तुम्हरो लायी स्वदेशी को जसो हो, अऊर ओको सी अपनो जसो प्रेम रखो; कहालीकि तुम भी मिस्र देश म परदेशी होतो; मय तुम्हरो परमेश्वर यहोवा आय।
LEV 19:35 “तुम न्याय म, अऊर पाप म, अऊर तौल म, अऊर नाप म अन्याय मत करो।
LEV 19:36 अऊर सच्चो तराजू, न्याय को बट, सच्चो नाप, सच्चो लिटर तुम्हरो जवर ठीक ठीक रहे; मय तुम्हरो ऊ परमेश्वर यहोवा आय जो तुम ख मिस्र देश सी निकाल लायो हय।
LEV 19:37 येकोलायी तुम मोरी सब विधियों अऊर सब नियमों ख मानतो हुयो हमेशा पालन करो; मय परमेश्वर आय।”
LEV 20:1 फिर परमेश्वर न मूसा सी कह्यो,
LEV 20:2 “इस्राएलियों सी कहो कि इस्राएलियों म सी यां इस्राएलियों को बीच रहन वालो परदेशियों म सी, कोयी भी होना जो अपनी कोयी सन्तान मोलेक देवता ख बलिदान करेंन, ऊ जरूर मार डाल्यो जायेंन; अऊर ऊ देश को लोग ओको पर पथराव करेंन।
LEV 20:3 मय भी ऊ आदमी को खिलाफ होय क ओख ओको लोगों म सी यो वजह नाश करूं कि ओन अपनी सन्तान मोलेक देवता ख दे क मोरो पवित्र जागा ख अशुद्ध करयो हय, अऊर मोरो पवित्र नाम ख अपवित्र ठहरायो हय।
LEV 20:4 अऊर यदि कोयी अपनी सन्तान मोलेक देवता ख बलिदान करे, अऊर ऊ देश को लोग ओको बारे म अनदेखा करे अऊर ओख मार नहीं डालय,
LEV 20:5 तब मय खुद ऊ आदमी अऊर ओको घराना को खिलाफ होय क ओख अऊर जितनो मोलेक देवता को पीछू होय क मोरो संग व्यभिचार करेंन उन सब ख भी उन्को लोगों को बीच म सी नाश करूं।
LEV 20:6 “फिर जो आदमी तंत्र-मंत्र यां भूत-प्रेत साधन वालो को तरफ फिर क, अऊर उन्को पीछू होय क व्यभिचारी बनेंन, त मय ऊ आदमी को खिलाफ होय क ओख ओको लोगों को बीच म सी नाश कर देऊं।
LEV 20:7 येकोलायी तुम अपनो आप ख पवित्र करो; अऊर पवित्र बन्यो रहो; कहालीकि मय तुम्हरो परमेश्वर यहोवा आय।
LEV 20:8 अऊर तुम मोरी विधियों ख मानो, अऊर उन्को पालन भी करो; कहालीकि मय तुम्ख पवित्र करन वालो परमेश्वर यहोवा आय।”
LEV 20:9 जो कोयी भी अपनो बाप यां माय ख श्राप देयेंन ओख जरूर मार डाल्यो जाये; ओन अपनो बाप यां माय ख श्राप दियो हय, ओको खून ओकोच मुंड पर पड़ेंन।
LEV 20:10 यदि आदमी परायी बाई को संग व्यभिचार करय हय, जेन कोयी दूसरो की पत्नी सी व्यभिचार करयो हय, त ऊ व्यभिचारी अऊर व्यभिचारिनी दोयी ख जरूर मार डाल्यो जाये।
LEV 20:11 यदि कोयी अपनी सौतेली माय को संग सोवय हय, ऊ अपनो बाप कोच तन उघाड़न वालो ठहरेंन; येकोलायी हि दोयी ख जरूर मार डाल्यो जाये, उन दोयी को खून उन्कोच मुंड पर पड़ेंन।
LEV 20:12 यदि कोयी आदमी अपनी बहू को संग सोवय, त हि दोयी ख जरूर मार डाल्यो जाये; कहालीकि उन्न गलत काम करयो हय, उन दोयी को खून उन्कोच मुंड पर पड़ेंन।
LEV 20:13 यदि कोयी आदमी कोयी दूसरो आदमी को संग घिनौनो काम करय हय जसो कोयी बाई को संग, त उन्न घृणित काम करयो हय; यो वजह जरूर उन्ख मार डाल्यो जाये, उन्को खून उन्कोच मुंड पर पड़ेंन।
LEV 20:14 यदि कोयी आदमी अपनी पत्नी अऊर सासु दोयी को संग बिहाव करय हय, त यो महापाप हय; येकोलायी ऊ आदमी ख अऊर दोयी बाई ख आगी म जलाय दियो जायेंन, जेको सी तुम्हरो बीच म महापाप नहीं रहे।
LEV 20:15 फिर यदि कोयी आदमी पशु सी शारिरीक सम्बन्ध बनावय, त आदमी अऊर पशु दोयी ख जरूर मार डाल्यो जाये।
LEV 20:16 यदि कोयी बाई जनावर को जवर जाय क ओको संग शारिरीक सम्बन्ध बनायेंन, त तय वा बाई अऊर जनावर दोयी ख मार डालजो; हि जरूर मार डाल्यो जाये, उन्को खून उन्कोच मुंड पर पड़ेंन।
LEV 20:17 “यदि कोयी आदमी अपनी बहिन चाहे सगी हो यां सौतेली, ओको संग बिहाव कर क् बिना कपड़ा की देखे, अऊर ओकी बहिन भी ओख बिना कपड़ा को देखे, त या लज्जा की बात आय, हि दोयी ख अपनो लोगों को बीच म सी नाश करयो जाये; कहालीकि जेन अपनी बहिन की लज्जा ख उघाड़्यो हय ओख अपनो पाप को बोझ खुद ख उठानो पड़ेंन।”
LEV 20:18 फिर यदि कोयी आदमी कोयी मासिक धर्म बाई को संग सोय क ओकी लज्जा ख उघाड़य हय, त ऊ आदमी ओको मासिक धर्म को सोता ख उघाड़न वालो ठहरेंन, अऊर वा बाई अपनो मासिक धर्म को सोता ख उघाड़न वाली ठहरेंन; यो वजह हि दोयी ख अपनो लोगों को बीच म सी नाश करयो जाये।
LEV 20:19 अपनी मावसी यां फूफू की लज्जा नहीं उघाड़नो, कहालीकि जो ओख उघाड़ेंन ऊ अपनी जवर की कुटुम्बिनी ख नंगो करय हय; येकोलायी हि दोयी ख अपनो पाप को बोझ खुद ख उठानो पड़ेंन।
LEV 20:20 यदि कोयी आदमी अपनी काकी को संग सोयेंन, त ऊ अपनो काका की लज्जा उघाड़य हय; येकोलायी हि दोयी अपनो पाप को बोझ ख उठातो हुयो बिन सन्तान को मर जायेंन।
LEV 20:21 यदि कोयी अपनी भाभी को संग बिहाव करय हय, त यो घिनौनो काम आय; अऊर ऊ अपनो भाऊ की लज्जा उघाड़न वालो ठहरेंन, यो वजह हि दोयी बिना सन्तान को रह्य जायेंन।
LEV 20:22 “तुम मोरी सब विधियों अऊर सब नियमों को पालन करो; असो नहीं होय की ऊ देश जहां मय तुम्ख लिजाय रह्यो हय ऊ तुम्ख निकाल दे।
LEV 20:23 अऊर जो राज्य को लोगों ख मय तुम्हरो आगु सी निकालू हय उन्की रीति-रिवाज पर मत चलो; कहालीकि उन लोगों न जो यो सब कुकर्म करयो हय यो वजह मोख उन सी घृना भय गयी हय।
LEV 20:24 पर मय तुम लोगों सी कहू हय कि तुम उन्की जमीन को अधिकारी होय जावो, अऊर मय यो देश ख जेको म दूध अऊर शहेद की धारा बहय हय तुम्हरो अधिकार म कर देऊं; मय तुम्हरो परमेश्वर यहोवा आय जेन तुम ख दूसरों देश को लोगों सी अलग करयो हय।
LEV 20:25 येकोलायी तुम शुद्ध अऊर अशुद्ध पशुवों म, शुद्ध अऊर अशुद्ध पक्षियों म भेद करो; मय न जो पशु, पक्षी यां जमीन पर रेंगन वालो जीवजन्तु ख तुम्हरो लायी अशुद्ध ठहरायो हय, ओको द्वारा अपनो आप ख अशुद्ध मत बनावो।
LEV 20:26 तुम मोरो लायी पवित्र बन्यो रहो; कहालीकि मय परमेश्वर खुद पवित्र हय, अऊर मय न तुम ख अऊर संसार को लोगों सी येकोलायी अलग करयो हय कि तुम हमेशा मोरोच बन्यो रहो।
LEV 20:27 “यदि कोयी आदमी यां बाई सलाह देन वालो यां भूत-प्रेत की साधना करेंन, त ऊ जरूर मार डाल्यो जाये; असो पर पथराव करयो जाये, उन्को खून उन्कोच मुंड पर पड़ेंन।”
LEV 21:1 फिर परमेश्वर न मूसा सी कह्यो, “हारून को टुरा जो याजक हय उन्कोसी कहजो कि तुम्हरो लोगों म सी कोयी भी मरेंन, त ओको वजह तुम म सी कोयी अपनो ख अशुद्ध नहीं करे;
LEV 21:2 अपनो जवर को कुटुम्बियों, मतलब माय, बाप, टुरा, टुरी, यां भाऊ को लायी,
LEV 21:3 या अपनी कुंवारी बहिन जेको बिहाव नहीं भयो होना, जिन्को जवर को सम्बन्ध हय; जेको कोयी पति नहाय उन्को लायी अपनो ख अशुद्ध कर सकय हय।
LEV 21:4 पर याजक होन को वजह अपनो लोगों म मुखिया हय, येकोलायी ऊ अपनो आप ख असो अशुद्ध नहीं करे कि अपवित्र होय जाय।
LEV 21:5 “याजक अपनो मुंड को बाल नहीं मुंडाये, अऊर नहीं अपनी दाढ़ी मुंडाये, अऊर नहीं अपनो शरीर पर चिरा लगवाये।
LEV 21:6 हि अपनो परमेश्वर लायी पवित्र बन्यो रहे, अऊर अपनो परमेश्वर को नाम अपवित्र नहीं करे; कहालीकि हि प्रभु की भेंट ख जो उन्को परमेश्वर को भोजन आय, चढ़ायो करय हय; यो वजह हि पवित्र बन्यो रहेंन।
LEV 21:7 हि वेश्या यां भ्रष्ट बाई सी बिहाव नहीं करे, अऊर नहीं छोड़ी हुयी बाई सी बिहाव करे; कहालीकि याजक अपनो परमेश्वर लायी पवित्र होवय हय।
LEV 21:8 येकोलायी तय याजक ख पवित्र मानो, कहालीकि ऊ तुम्हरो परमेश्वर को भोजन चढ़ायो करय हय; येकोलायी ऊ तोरी नजर म पवित्र ठहरे; कहालीकि मय यहोवा, जो तुम्ख पवित्र करू हय, मय पवित्र हय।
LEV 21:9 अऊर याजक की टुरी वेश्या बन क अपनो आप ख अपवित्र करेंन, त वा अपनो बाप ख अपवित्र ठहरावय हय; ओख आगी म जलायो जाय।
LEV 21:10 “जो अपनो भाऊवों म महायाजक होना, जेको मुंड पर अभिषेक को तेल डाल्यो गयो होना, अऊर जेको पवित्र कपड़ा पहिनन लायी संस्कार करयो गयो होना ऊ अपनो मुंड को बाल बिखरन नहीं देयेंन, अऊर नहीं अपनो कपड़ा फाड़े;
LEV 21:11 अऊर नहीं कोयी लाश को जवर जाय, अऊर नहीं अपनो बाप यां माय को वजह अपनो ख अशुद्ध करे;
LEV 21:12 अऊर ऊ पवित्र जागा सी बाहेर नहीं जाये, अऊर नहीं अपनो परमेश्वर को पवित्र जागा ख अपवित्र ठहराये; कहालीकि ओको पर अपनो परमेश्वर को अभिषेक को तेल डाल्यो गयो हय; मय परमेश्वर आय।
LEV 21:13 अऊर ऊ कुंवारी बाई सीच बिहाव करे।
LEV 21:14 जो विधवा, यां छोड़ी हुयी, यां भ्रष्ट, यां वेश्या होना, असी बाई सी ऊ बिहाव नहीं करे, ऊ अपनोच लोगों को बीच म की कोयी कुंवारी टुरी सी बिहाव करे।
LEV 21:15 अऊर ऊ अपनी सन्तान ख अपनो लोगों म अपवित्र नहीं करे; कहालीकि मय ओको पवित्र करन वालो परमेश्वर आय।”
LEV 21:16 फिर परमेश्वर न मूसा सी कह्यो,
LEV 21:17 “हारून सी यो कहजो तोरो वंश म पीढ़ी सी पीढ़ी तक यदि कोयी म कोयी शारीरिक दोष होना, त ऊ अपनो परमेश्वर को भोजन चढ़ावन लायी जवर नहीं आयेंन।
LEV 21:18 कोयी आदमी जेको म शारीरिक दोष होना ऊ जवर नहीं आये, चाहे ऊ अन्धा होना, चाहे लंगड़ा, चाहे चपटी नाक वालो होना, चाहे ओख कुछ जादा अंग होना,
LEV 21:19 यां ओको पाय, यां हाथ विकलांग होना,
LEV 21:20 यां कुबड़ो, यां ठिंगनो होना, यां ऊ आदमी ख खुजली होना, यां ऊ नपुसक होना;
LEV 21:21 हारून याजक को वंश म सी जेको म शारीरिक दोष हय ऊ प्रभु लायी होमबलि चढ़ावन लायी जवर नहीं आये; जो दोषयुक्त हय ऊ कभी भी अपनो परमेश्वर को भोजन चढ़ावन लायी जवर नहीं आये।
LEV 21:22 ऊ अपनो परमेश्वर को पवित्र अऊर परमपवित्र दोयी तरह को भोजन खाये,
LEV 21:23 पर ओको दोष को वजह ऊ नहीं बीचवालो परदा को अन्दर आये अऊर नहीं वेदी को जवर, जेकोसी असो नहीं होय कि ऊ मोरो पवित्र जागा ख अपवित्र करे; कहालीकि मय उन्को पवित्र करन वालो परमेश्वर आय।”
LEV 21:24 येकोलायी मूसा न हारून अऊर ओको टुरावों ख अऊर सब इस्राएलियों ख या बाते कहीं।
LEV 22:1 फिर परमेश्वर न मूसा सी कह्यो,
LEV 22:2 “हारून अऊर ओको टुरावों ख कहो की इस्राएलियों की पवित्र करी हुयी चिजों सी जिन्ख हि मोरो लायी चढ़ावय हय अलग रहे, अऊर मोरो पवित्र नाम ख अपवित्र नहीं करे; मय परमेश्वर आय।
LEV 22:3 अऊर उन्कोसी कहो की तुम्हरी पूरी पीढ़ी म तुम्हरो पूरो वंश म सी जो कोयी अपनी अशुद्ध दशा म उन पवित्र चिजों को जवर जाये, जिन्ख इस्राएली लोग मोख चढ़ावय हय, त ऊ व्यक्ति ख मोरो सामने सी नाश करयो जायेंन; मय परमेश्वर आय।
LEV 22:4 “हारून को वंश को कोयी आदमी जो कोढ़ को रोग सी तकलीफ म हय, यां धात सी तकलीफ हय, ऊ आदमी जब तक शुद्ध नहीं होय जाये तब तक पवित्र करी हुयी चिजों म सी कुछ नहीं खाये। जो लाश को वजह अशुद्ध भयो होना, यां जेको वीर्यपात भयो होना, असो आदमी ख जो कोयी छुयेंन,
LEV 22:5 अऊर जो कोयी असो रेंगन वालो जीव-जन्तु ख छुयेंन जेकोसी लोग अशुद्ध होय सकय हय, यां कोयी असो आदमी ख छुयेंन जेको म कोयी तरह की अशुद्धता होना जो ओख भी लग सकय हय।
LEV 22:6 त ऊ व्यक्ति जो इन म सी कोयी ख छुयेंन त शाम तक अशुद्ध रहेंन, अऊर जब तक पानी सी नहाय नहीं लेवय तब तक पवित्र चिजों म सी कुछ नहीं खाये।
LEV 22:7 तब ऊ सूरज डुबन को बाद शुद्ध ठहरेंन; अऊर तब ऊ पवित्र चिजों म सी खाय सकेंन, कहालीकि ओको भोजन उच आय।
LEV 22:8 जो जनावर अपनो सी मरयो होना यां कोयी हिंसक जनावर सी फाड़्यो गयो होना ओख खाय क ऊ अपनो आप ख अशुद्ध नहीं करे; मय परमेश्वर आय।
LEV 22:9 “येकोलायी याजक लोग मोरो नियमों को पालन करे, असो नहीं होय कि हि उन्ख अपवित्र कर क् पाप को बोझ खुद उठाये, अऊर मर भी जाये; मय उन्को पवित्र करन वालो परमेश्वर आय।
LEV 22:10 “परायो कुल को व्यक्ति कोयी भी पवित्र चिज ख नहीं खानो चाहिये, चाहे ऊ याजक को परदेशी होना यां मजूर होना, तब भी ऊ कोयी पवित्र चिज ख नहीं खाये।”
LEV 22:11 यदि याजक कोयी व्यक्ति ख रुपया दे क खरीद लेवय, त ऊ व्यक्ति ओको म सी खाय सकय हय; अऊर जेको जनम याजक को घर म भयो होना हि भी ओको भोजन म सी खाय सकय हय।
LEV 22:12 यदि याजक की टुरी परायो कुल को कोयी आदमी सी बिहाव भयो होना, त वा भेंट करी हुयी पवित्र चिजों म सी नहीं खाये।
LEV 22:13 यदि याजक की टुरी विधवा या छोड़चिट्ठी भयो होना, अऊर वा जवानी म बिना सन्तान की अपनो बाप को घर आय जाये, त वा अपनो बाप को घर को भोजन म सी खाय सकय हय; पर परायो कुल को कोयी भी ओको म सी नहीं खाये।
LEV 22:14 “अऊर यदि कोयी आदमी कोयी पवित्र चिज म सी भूल सी खाय जाये, त ऊ ओको पाचवों हिस्सा ओको म बढ़ाय क पवित्र चिज याजक ख दे।
LEV 22:15 हि इस्राएलियों की पवित्र करी हुयी चिजों ख, जिन्ख हि परमेश्वर लायी चढ़ायो करय हय, उन्ख अपवित्र नहीं करे।
LEV 22:16 हि इस्राएली लोगों की पवित्र चिजों म सी खिलाय क उन्कोसी अपराध को दोष नहीं उठवाये; मय उन्को पवित्र करन वालो परमेश्वर आय।”
LEV 22:17 फिर परमेश्वर न मूसा सी कह्यो,
LEV 22:18 हारून अऊर ओको टुरावों सी अऊर इस्राएलियों सी यो कहो कि इस्राएल को घराना यां इस्राएलियों म रहन वालो परदेशियों म सी कोयी व्यक्ति मन्नत यां खुद की इच्छा सी बलि करन लायी परमेश्वर ख होमबलि चढ़ाये,
LEV 22:19 त अपनो स्विकार करन लायक ठहरन लायी पालतु जनावर यां मेंढा यां शेरियों म सी पूर्ण स्वस्थ नर चढ़ायो जाये।
LEV 22:20 जिन पशुवों म शारीरिक दोष होना ओख मत चढ़ावो; कहालीकि ऊ तुम्हरो लायी स्विकारयो नहीं जायेंन।
LEV 22:21 अऊर जो कोयी पालतु जनावर यां मेंढा यां शेरियों म सी खास चिज मन्नत करन लायी यां खुद की इच्छा सी परमेश्वर ख मेल-मिलाप बलि चढ़ाये, त स्विकार होन लायी जरूरी हय कि ऊ पूर्ण स्वस्थ होना, ओको म कोयी भी दोष नहीं होना।
LEV 22:22 जो अन्धो यां टूट्यो अंग वालो यां लुलो होना, यां ओको म फोड़ा-फुन्सी यां खुजली होना, असो ख परमेश्वर को लायी मत चढ़ावो, उन्ख परमेश्वर को लायी वेदी पर हवन लायी मत चढ़ावो।
LEV 22:23 जो कोयी पालतु जनावर यां मेंढा यां बकरा को कोयी अंग बड़ो या छोटो होना ओख खुद की इच्छा सी बलि लायी चढ़ाय सकय हय, पर मन्नत पूरी करन लायी ओख स्विकार नहीं करयो जायेंन।
LEV 22:24 जो जनावर को अण्डकोष दब्यो, कुचल्यो, टूट्यो यां कट गयो होना ओख परमेश्वर ख बलि लायी मत चढ़ावो, अऊर अपनो देश म भी असो काम मत करो।
LEV 22:25 विदेशी व्यक्ति सी ले क असो कोयी जनावर अपनो परमेश्वर को भोजन को रूप म मत चढ़ावो, ओको शरीर पर दोष हय, अऊर विकृत हय, येकोलायी हि तुम्हरो लायी स्विकारयो नहीं जायेंन।
LEV 22:26 फिर परमेश्वर न मूसा सी कह्यो,
LEV 22:27 “जब गोरा यां मेंढा या शेरी को बच्चा पैदा होयेंन, त ऊ सात दिन तक अपनी माय को संग रहेंन; फिर आठवों दिन को बाद ऊ परमेश्वर को भेंट लायी स्विकारन लायक ठहरेंन।
LEV 22:28 चाहे पालतु जनावर, चाहे मेंढी यां शेरी होना, ओख अऊर ओको बच्चा ख एकच दिन बलि मत करो।
LEV 22:29 अऊर जब तुम परमेश्वर लायी धन्यवाद को मेल-मिलाप बलि चढ़ावो, त ओख योच रीति सी करो जेकोसी ऊ स्विकार लायक ठहरेंन।
LEV 22:30 ऊ उच दिन खायो जाय, ओको म सी कुछ भी सबेरे तक नहीं रहनो चाहिये; मय परमेश्वर आय।
LEV 22:31 “येकोलायी तुम मोरी आज्ञावों ख मानो अऊर ओको पालन करो; मय परमेश्वर आय।”
LEV 22:32 अऊर मोरो पवित्र नाम ख अपवित्र मत करो, कहालीकि मय इस्राएलियों को बीच म जरूरच पवित्र मान्यो जाऊं; मय तुम्हरो पवित्र करन वालो परमेश्वर आय,
LEV 22:33 जो तुम्ख मिस्र देश सी निकाल लायो, जेकोसी तुम्हरो परमेश्वर बन्यो रहूं; मय परमेश्वर आय।
LEV 23:1 फिर परमेश्वर न मूसा सी कह्यो,
LEV 23:2 इस्राएलियों सी कहो कि परमेश्वर को त्यौहार तुम पवित्र सभा ख एकजूट करन लायी ठहरायो समय पर प्रचार करनो पड़ेंन, हि मोरो त्यौहार यो आय।
LEV 23:3 छय दिन काम-काज करयो जायेंन, पर सातवों दिन परमविश्राम को अऊर पवित्र सभा को दिन आय; ओको म कोयी तरह को काम-काज नहीं करयो जायेंन; ऊ तुम्हरो घरों म परमेश्वर को आराम दिन ठहरेंन।
LEV 23:4 “फिर परमेश्वर को त्यौहार जेको म सी एक एक को ठहरायो हुयो समय म तुम्ख पवित्र सभा करन लायी प्रचार करनो पड़ेंन हि यो आय।
LEV 23:5 पहिलो महिना को चौदावों दिन शाम को समय परमेश्वर को फसह को त्यौहार मनायो जाय।
LEV 23:6 अऊर उच महिना को पन्द्रावों दिन ख परमेश्वर को लायी अखमीरी रोटी को त्यौहार मनायो जाय; ओको म तुम सात दिन तक अखमीरी रोटी खायो करो।
LEV 23:7 ओको म पहिलो दिन तुम्हरी पवित्र सभा होयेंन; अऊर ऊ दिन मेहनत को कोयी काम मत करो।
LEV 23:8 पर सात दिन तक तुम परमेश्वर ख अग्निबलि चढ़ायो करो; अऊर सातवों दिन पवित्र सभा होयेंन; ऊ दिन कोयी मेहनत को काम मत करो।”
LEV 23:9 फिर परमेश्वर न मूसा सी कह्यो,
LEV 23:10 “इस्राएलियों सी कहो कि जब तुम ऊ देश म सिरो जेक परमेश्वर तुम्ख देवय हय अऊर ओको म की फसल काटो, तब अपनो अपनो पक्यो खेत की पहली फसल की एक पेंढी याजक को जवर लायो करो;
LEV 23:11 अऊर याजक ऊ पेंढी ख परमेश्वर को सामने हिलायेंन, कि ऊ तुम्हरो लायी स्विकारयो जायेंन; ऊ ओख आराम दिन को दूसरों दिन हिलायेंन।
LEV 23:12 अऊर जो दिन तुम पेंढी हिलावो उच दिन एक साल को निर्दोष मेंढी को बच्चा परमेश्वर लायी होमबलि चढ़ावो।
LEV 23:13 अऊर ओको संग अनाज भेंट एपा को दसवों अंश जैतून को तेल सी सान्यो हुयो मैदा होय, सुखदायक सुगन्ध लायी परमेश्वर को हवन को रूप म चढ़ायो जाय; अऊर ओको संग पेयबलि लायी दोय लिटर अंगूरीरस भी चढ़ायो जाय।
LEV 23:14 जब तक तुम नयी फसल को चढ़ावा अपनो परमेश्वर को जवर नहीं लावो, तब तक नयी फसल की रोटी यां भूज्यो दाना यां कच्चो दाना मत खावो; यो तुम्हरी पीढ़ी सी पीढ़ी म तुम्हरो घराना म हमेशा की विधि ठहरेंन।
LEV 23:15 “फिर ऊ आराम दिन को दूसरो दिन सी, मतलब जो दिन सी तुम हिलायी जान वाली भेंट की पेंढी ख लावो, ऊ दिन सी पूरो सात आराम दिन गिन लेवो;
LEV 23:16 सातवों आराम दिन को दूसरो दिन को बाद सी पचास दिन गिनो, अऊर पचासवों दिन परमेश्वर लायी नयो अन्नबलि चढ़ावो।
LEV 23:17 तुम अपनो घरों सी हिलावन की भेंट बलि को रूप म चढ़ावन लायी दोय किलो मैदा की दोय रोटियां लावो; जो परमेश्वर ख पहली फसल को रूप म चढ़ावन लायी खमीर को संग पकायी जाय।
LEV 23:18 अऊर वा रोटी को संग एक एक साल को सात पूर्ण स्वस्थ मेंढी को बच्चा, अऊर एक बछड़ा अऊर दोय मेढ़े चढ़ावो; हि अपनो अपनो अनाज भेंट अऊर पेयबलि समेत परमेश्वर लायी अग्निबलि को जसो चढ़ायो जाये, मतलब हि परमेश्वर लायी सुखदायक सुगन्ध देन वालो हवन ठहरे।
LEV 23:19 फिर पापबलि लायी एक बकरा, अऊर मेल-मिलाप बलि लायी एक एक साल को दोय मेंढी को बच्चा चढ़ावो।
LEV 23:20 तब याजक उन्ख पहली फसल की रोटी समेत परमेश्वर को सामने हिलावन की भेंट लायी हिलाये, अऊर इन रोटियों को संग हि दोयी मेंढी को बच्चा भी हिलायो जाये; हि परमेश्वर लायी पवित्र, अऊर याजक को भाग ठहरेंन।
LEV 23:21 अऊर उच दिन यो प्रचार करो कि अज हमरी एक पवित्र सभा होयेंन; अऊर मेहनत को कोयी काम मत करो; यो तुम्हरो पूरो घराना म तुम्हरी पीढ़ी पीढ़ी म हमेशा की विधि ठहरेंन।
LEV 23:22 “जब तुम अपनी जमीन की फसल काटो तब खेतों ख पूरो को पूरो मत काटो, अऊर नहीं फसल की कटायी को बाद गिरी हुयी लोम्बा जमा करो; ओख गरीब अऊर परदेशियों लायी छोड़ देवो; मय तुम्हरो परमेश्वर यहोवा आय।”
LEV 23:23 फिर परमेश्वर न मूसा सी कह्यो,
LEV 23:24 “इस्राएलियों सी कहो कि सातवों महिना को पहिलो दिन ख तुम्हरो लायी खास आराम को होना; ओको म याद दिलावन लायी नरसिंगा फूक्यो जाय, अऊर एक पवित्र सभा जमा हो।
LEV 23:25 ऊ दिन तुम मेहनत को कोयी काम मत करो, अऊर परमेश्वर लायी एक अग्निबलि चढ़ावो।”
LEV 23:26 फिर परमेश्वर न मूसा सी कह्यो,
LEV 23:27 उच सातवों महिना को दसवों दिन पश्चाताप को दिन मान्यो जाये; ऊ तुम्हरो पवित्र सभा को दिन होयेंन, अऊर ओको म तुम उपवास करो अऊर परमेश्वर लायी अग्निबलि चढ़ावो।
LEV 23:28 ऊ दिन तुम कोयी तरह को काम-काज मत करो; कहालीकि ऊ पश्चाताप को दिन चुन्यो गयो हय जेको म तुम्हरो परमेश्वर यहोवा को सामने तुम्हरो लायी पश्चाताप करयो जायेंन।
LEV 23:29 येकोलायी जो आदमी ऊ दिन खुद दु:ख नहीं सहेंन ऊ अपनो लोगों म सी नाश करयो जायेंन।
LEV 23:30 अऊर जो आदमी ऊ दिन कोयी तरह को काम-काज करेंन ऊ आदमी ख मय ओको लोगों को बीच म सी नाश कर डालूं।
LEV 23:31 तुम कोयी तरह को काम-काज मत करो; यो तुम्हरी पीढ़ी पीढ़ी म तुम्हरो घराना म हमेशा की विधि होयेंन।
LEV 23:32 ऊ दिन तुम्हरो लायी परमविश्राम को होयेंन, ओको म तुम खुद दु:ख देवो; अऊर ऊ महिना को नववों दिन की शाम सी ले क दूसरो दिन की शाम तक अपनो खास आराम दिन मान्यो करो।
LEV 23:33 फिर परमेश्वर न मूसा सी कह्यो,
LEV 23:34 “इस्राएलियों सी कहो कि उच सातवों महिना को पन्द्रावों दिन सी सात दिन तक परमेश्वर लायी खोपड़ियों को त्यौहार मनायो जाये।
LEV 23:35 पहिलो दिन पवित्र सभा होयेंन; ओको म मेहनत को कोयी काम मत करो।
LEV 23:36 “सातवों दिन परमेश्वर लायी अग्निबलि चढ़ायो करो, फिर आठवों दिन तुम्हरी पवित्र सभा होयेंन, अऊर परमेश्वर लायी हवन चढ़ावो; ऊ महासभा को दिन आय, अऊर ओको म मेहनत को कोयी काम मत करो।
LEV 23:37 परमेश्वर को ठहरायो त्यौहार योच आय, इन म तुम परमेश्वर ख बलिदान चढ़ावो, मतलब अग्निबलि, अन्नबलि, मेल-मिलाप बलि अऊर अंगूरीरस, हर एक अपनो अपनो नियुक्त समय पर चढ़ायो जाय अऊर पवित्र सभा को प्रचार करो।
LEV 23:38 इन सब सी जादा परमेश्वर को आराम दिनों ख मानो, अऊर अपनी भेंटों, अऊर मन्नतों, अऊर खुद की इच्छा सी बलियों ख परमेश्वर ख चढ़ायो करो।
LEV 23:39 “फिर सातवों महिना को पन्द्रावों दिन ख, जब तुम जमीन की फसल ख जमा कर लेवो, तब सात दिन तक परमेश्वर को त्यौहार मनावो; पहिलो अऊर आठवों दिन खास आराम को दिन होयेंन।
LEV 23:40 अऊर पहिलो दिन तुम अच्छो अच्छो झाड़ को फर, अऊर खजूर को डगालियां, अऊर घनो झाड़ो की डगालियां, अऊर नदी को किनार को मजनूं झाड़ की डगाली ले क अपनो परमेश्वर यहोवा को सामने सात दिन तक खुशी मनावो।
LEV 23:41 हर साल सात दिन तक परमेश्वर लायी यो त्यौहार मनावो; यो तुम्हरी पीढ़ी सी पीढ़ी म हमेशा की विधि ठहरेंन कि सातवों महिना म यो त्यौहार मनायो जाय।
LEV 23:42 सात दिन तक तुम खोपड़ियों म रह्यो करो, मतलब जितनो जनम सी इस्राएली हय हि सब को सब खोपड़ियों म रहेंन,
LEV 23:43 येकोलायी कि तुम्हरी पीढ़ी सी पीढ़ी को लोगों ख एहसास होय जाये, कि परमेश्वर न हम इस्राएलियों ख मिस्र देश सी निकाल लायो होतो; तब हम्ख खोपड़ियों म निवास करायो होतो; मय तुम्हरो परमेश्वर यहोवा आय।”
LEV 23:44 अऊर मूसा न इस्राएलियों ख परमेश्वर को त्यौहार को ठहरायो समय बतायो।
LEV 24:1 फिर परमेश्वर न मूसा सी कह्यो,
LEV 24:2 “इस्राएलियों ख या आज्ञा देवो कि मोरो जवर उजाड़ो देन लायी कुट क निकाल्यो हुयो जैतून को शुद्ध तेल लावो कि एक दीया हमेशा जलतो रहे।
LEV 24:3 हारून ओख, मिलापवालो तम्बू म, वाचा को सन्दूक को बीच वालो परदा को बाहेर, शाम सी ले क सबेरे तक परमेश्वर को सामने सजाय क रखे; यो तुम्हरी पीढ़ी सी पीढ़ी लायी हमेशा की विधि ठहरेंन।
LEV 24:4 हारून ऊ दीयावों ख शुद्ध सोनो को दीवट पर परमेश्वर को सामने हमेशा सजायो करे।
LEV 24:5 “तय मैदा ले क बारा रोटियां बनावो, हर एक रोटी दोय किलो मैदा की बनायी जाय।
LEV 24:6 तब उन्की दोय पंगत कर क्, एक एक पंगत म छय छय रोटियां, शुद्ध सोनो को मेज पर परमेश्वर को सामने रखो।
LEV 24:7 अऊर एक एक पंगत पर शुद्ध लुभान रखो कि वा रोटी याद दिलावन वाली चिज अऊर परमेश्वर लायी भेंट हो।
LEV 24:8 हर आराम दिन ख ऊ ओख हमेशा परमेश्वर को सामने एक को बाद एक रख्यो जाये, या हमेशा वाचा की रीति इस्राएलियों को तरफ सी होयेंन।
LEV 24:9 अऊर हि रोटियां हारून अऊर ओको टुरावों की होयेंन, अऊर हि ओख कोयी पवित्र जागा म खायेंन, कहालीकि वा परमेश्वर को भेंटों म सी हमेशा की विधि को अनुसार हारून लायी परमपवित्र हिस्सा ठहरी हय।”
LEV 24:10 उन दिनों म इस्राएली बाई को टुरा, जेको बाप मिस्री होतो, अऊर ऊ टुरा इस्राएलियों को बीच म चली गयो; अऊर ऊ इस्राएली बाई को टुरा अऊर एक इस्राएली आदमी छावनी को बीच म आपस म झगड़न लग्यो,
LEV 24:11 अऊर वा इस्राएली बाई को टुरा परमेश्वर को नाम की निन्दा कर क् श्राप देन लग्यो। यो सुन क ओख मूसा को जवर ले गयो। ओकी माय को नाम शलोमीत होतो, जो दान वंशीय दिब्री की टुरी होती।
LEV 24:12 उन्न ओख देखभाल म रख्यो, जेकोसी परमेश्वर को मन उन पर प्रगट होय सके ।
LEV 24:13 तब परमेश्वर न मूसा सी कह्यो,
LEV 24:14 तुम लोग ऊ श्राप देन वालो ख छावनी सी बाहेर लि जावो; अऊर जितनो लोगों न वा निन्दा सुनी होना हि सब अपनो अपनो हाथ ओको मुंड पर रखे, तब पूरी मण्डली को लोग ओको पर पथराव करेंन।
LEV 24:15 अऊर तय इस्राएलियों सी कहजो कि कोयी भी व्यक्ति अपनो परमेश्वर ख श्राप देयेंन ओख अपनो पाप को बोझ उठानो पड़ेंन।
LEV 24:16 परमेश्वर को नाम की निन्दा करन वालो निश्चितच मार डाल्यो जाय; पूरी मण्डली को लोग निश्चित ओको पर पथराव करे; चाहे देशी होना यां परदेशी होना, यदि कोयी परमेश्वर को नाम की निन्दा करेंन त ऊ मार डाल्यो जायेंन।
LEV 24:17 “फिर कोयी आदमी कोयी व्यक्ति ख जान सी मार डालेंन त ओख निश्चित मार डाल्यो जायेंन।
LEV 24:18 यदि कोयी व्यक्ति कोयी जनावर ख जान सी मार दे त ऊ येको नुकसान की भरपाई कर दे, जनावर को बदला जनावर दे।
LEV 24:19 “फिर यदि कोयी दूसरो ख घाव पहुंचायो हय, त जसो ओन करयो हय वसोच ओको संग भी करयो जाय,
LEV 24:20 मतलब तोड़-फोड़ करन को बदला तोड़-फोड़ करयो जाय, आंखी को बदला आंखी, दात को बदला दात, जसो दु:ख जेन कोयी ख दियो होना वसोच दु:ख ओख भी दियो जाय।
LEV 24:21 जनावर ख मार डालन वालो ओको बदला भर दे, पर आदमी ख मार डालन वालो ख जरूर मार डाल्यो जाय।
LEV 24:22 तुम्हरो नियम एकच हो, जसो देशी लायी वसोच परदेशी लायी भी हो; मय तुम्हरो परमेश्वर यहोवा आय।”
LEV 24:23 येको बाद मूसा न इस्राएलियों ख यो समझायो; तब उन्न ऊ श्राप देन वालो आदमी ख छावनी सी बाहेर लाय क ओको पर पथराव करयो। अऊर इस्राएलियों न वसोच करयो जसो परमेश्वर न मूसा ख आज्ञा दी होती।
LEV 25:1 फिर परमेश्वर न सीनै पहाड़ी पर मूसा सी कह्यो,
LEV 25:2 “इस्राएलियों सी कहो कि जब तुम ऊ देश म सिरो जो मय तुम्ख दे रह्यो हय, तब ऊ देश की जमीन भी परमेश्वर लायी आराम करेंन।
LEV 25:3 छय साल तक अपनो अपनो खेत म बीज बोयो करो, अऊर अंगूर की बाड़ी कटायी-छटायी कर क् ओकी फसल जमा करो;
LEV 25:4 पर सातवों साल जमीन ख परमेश्वर लायी आराम मिलेंन; तुम ऊ साल म अपनो खेत मत बोवो अऊर नहीं अपनो अंगूर की बाड़ी छाटो।
LEV 25:5 जो कुछ काट्यो हुयो खेत म अपनो आप सी उग्यो ओख मत काटो, अऊर बिना छाटी हुयी बेलावों को अंगूर मत तोड़ो; कहालीकि यो जमीन लायी परमविश्राम को साल होयेंन।
LEV 25:6 जमीन को आराम साल की फसल सी तुम्ख, अऊर तुम्हरो सेवक-सेविका ख, अऊर तुम्हरो संग रहन वालो मजूरों परदेशियों ख भी भोजन मिलेंन।
LEV 25:7 अऊर तुम्हरो पालतू जनावरों ख अऊर तुम्हरो देश को जंगली जनावरों ख भी जमीन की फसल सी भोजन मिलेंन।
LEV 25:8 “सात आराम साल मतलब सातगुना सात साल गिनो, सातों साल को समय उनपचास साल होयेंन।
LEV 25:9 तब सातवों महिना को दसवों दिन ख, मतलब पश्चाताप को दिन ख, जय जयकार को महाशब्द को नरसिंगा अपनो पूरो देश म सब जागावों पर फूको।
LEV 25:10 अऊर पचासवो साल ख पवित्र मानो, अऊर देश को पूरो निवासियों लायी छुटकारा को प्रचार करो; ऊ तुम्हरो लायी जुबली को साल कहलायेंन; अऊर तुम अपनो देश अऊर अपनो परिवार म लौट पावों।
LEV 25:11 तुम्हरो यहां ऊ पचासवो साल जुबली को साल कहलायेंन; ओको म तुम मत बोवो, अऊर जो अपनो आप उगेंन ओख भी मत काटो, अऊर बिन छाटी हुयी अंगूर को बेला को अंगूर भी मत तोड़ो।
LEV 25:12 कहालीकि ऊ जुबली को साल होयेंन; ऊ तुम्हरो लायी पवित्र साल होयेंन; जो खेतों की फसल होयेंन तुम ओखच खावो।
LEV 25:13 “यो जुबली को साल म हर आदमी ख अपनी अपनी निजी जमीन फिर सी हासिल होयेंन।
LEV 25:14 अऊर यदि तुम अपनो भाऊबन्धु ख कुछ बेचो यां अपनो भाऊबन्धु सी कुछ लेय लेवो, त तुम एक दूसरो ख ठगानो नहीं।
LEV 25:15 जुबली साल को बाद जितनो साल बित्यो हय उन्की गिनती को अनुसार दाम ठहराय क एक दूसरो सी लेय लेवो, अऊर बच्यो साल फसल को अनुसार ऊ तुम्ख बेचेंन।
LEV 25:16 यदि जादा साल बच्यो हय त दाम बढ़ावो, पर यदि कम साल बच्यो हय त दाम घटावो, कहालीकि साल फसल की संख्या जितनी होना उतनीच ऊ बेचेंन।
LEV 25:17 तुम एक दूसरो ख धोका मत देवो; अपनो परमेश्वर सी डरो; मय तुम्हरो परमेश्वर यहोवा आय।
LEV 25:18 “येकोलायी तुम मोरी विधियों ख मानो, मोरो नियमों को पालन करो; कहालीकि असो करनो सी तुम ऊ देश म निश्चिन्त निवास कर सको।
LEV 25:19 जमीन तुम्ख अपनी फसल देयेंन, अऊर तुम पेट-भर खाय क ऊ देश म निश्चिन्त बस्यो रहो।
LEV 25:20 “अऊर यदि तुम कहो कि सातवों साल म हम बीज नहीं बोयबो, अऊर फसल जमा नहीं करबो, तब हम का खाबो?
LEV 25:21 पर मय तुम्ख छठवो साल असी आशीष देऊं, कि जमीन की पुरानी फसल तीन साल तक पूरेंन।
LEV 25:22 जब तुम आठवों साल म बीज बोवो, तब पुरानी फसल म सीच खावो, अऊर नववों साल की फसल आवन तक पुरानी फसल ख खावो।
LEV 25:23 “जमीन हमेशा लायी बेची नहीं जाय, कहालीकि जमीन मोरी आय; अऊर ओको म तुम परदेशी अऊर बाहरी हय।”
LEV 25:24 पर तुम्ख अपनो हिस्सा को पूरो देश म की जमीन ख छुड़ावन को अधिकार हय।
LEV 25:25 “यदि तोरो कोयी जाति-भाऊ गरीब होना अऊर ऊ अपनी निजी जमीन म सी कुछ बेच डालय, त ओको कुटुम्बियों म सी जो जवर को होना ऊ आय क अपनो जाति-भाऊ को बेच्यो हुयो हिस्सा ख छुड़ाय ले।
LEV 25:26 यदि कोयी आदमी लायी कोयी छुड़ावन वालो नहीं होना, अऊर ओको जवर इतनो धन होना कि खुदच अपनो हिस्सा ख छुड़ाय सकेंन,
LEV 25:27 त ऊ ओको बिकन को समय सी गिनती करेंन जो साल ओन ओख बेच्यो होतो, ओख बच्यो साल को दाम चुकाय दे, तब ऊ अपनी निजी जमीन पर अधिकार होयेंन।
LEV 25:28 पर यदि ओको हाथ म अपनी जमीन फिर सी हासिल करन लायी धन नहीं होना, त वा जमीन लेन वालो को हाथ म जुबली को साल तक रहेंन; अऊर जुबली को साल म जमीन खुद मुक्त होय जायेंन अऊर बेचन वालो ख फिर सी हासिल होय जायेंन।
LEV 25:29 “फिर यदि कोयी आदमी शहरपनाह वालो नगर म अपनो घर बेचेंन, त ऊ बेचन को बाद एक साल को अन्दर छुड़ाय सकेंन, मतलब पूरो साल भर ऊ आदमी ख छुड़ावन को अधिकार रहेंन।”
LEV 25:30 पर यदि घर पूरो एक साल म छुड़ायो नहीं गयो, त शहरपनाह नगर को घर पीढ़ी सी पीढ़ी तक ऊ आदमी को अधिकार म होय जायेंन; जेन ओख लियो होतो ऊ जुबली को साल म भी नहीं छूटेंन।
LEV 25:31 पर बिना शहरपनाह को घर त देश को खेतों को जसो गिन्यो जायेंन; उन्को छुड़ानो भी होय सकेंन, अऊर हि जुबली को साल म भी छूट सकेंन।
LEV 25:32 फिर भी जिन नगरों म बन्यो घरों पर लेवियों को अधिकार हय, उन घरों ख लेवियों कोयी भी समय छुड़ाय सकय हय।
LEV 25:33 अऊर यदि कोयी लेवीय अपनो घर नहीं छुड़ाये, त ऊ बेच्यो हुयो घर जो ओको हिस्सा को नगर म होना जुबली को साल म छूट जायेंन; कहालीकि इस्राएलियों को बीच म लेवियों नगरों को घरों पर उन्कोच अधिकार हय।
LEV 25:34 पर उन्को नगरों को चारयी तरफ की चरायी की जमीन बेची नहीं जायेंन; कहालीकि उन पर लेवियों को अधिकार हय।
LEV 25:35 फिर यदि तोरो कोयी भाऊबन्धु गरीब होय जाये, अऊर ओकी दशा तोरो सामने तरस खान लायक होय जाये, त तय ओख सम्भाल लेजो; ऊ परदेशी यात्री को जसो तोरो संग रह्य सकेंन।
LEV 25:36 ओको सी ब्याज यां जादा फायदा मत लेजो; बल्की अपनो परमेश्वर को प्रति श्रद्धा-भाव रखजो; जेकोसी तोरो भाऊबन्धु तोरो संग जीवन बिताय सकेंन।
LEV 25:37 तय ओख ब्याज पर रुपया मत देजो, अऊर नहीं ओख भोजन चिज को फायदा कमावन को उद्देश सी देजो।
LEV 25:38 मय तुम्हरो परमेश्वर यहोवा आय; मय तुम्ख मिस्र देश सी येकोलायी निकाल लायो कि तुम्ख कनान देश देऊ अऊर तुम्हरो परमेश्वर होय जाऊ।
LEV 25:39 फिर यदि कोयी तोरो भाऊबन्धु तोरो सामने गरीब होय क अपनो आप ख तोरो हाथ म बेच डाले, त ओको सी सेवक को जसो काम मत कराजो।
LEV 25:40 ऊ तोरो संग मजूर यां यात्री को समान रहेंन, अऊर जुबली को साल तक तोरो संग रह्य क सेवा करतो रहे;
LEV 25:41 फिर ऊ अपनो बच्चावों को संग तोरो जवर सी निकल जाय, अऊर अपनो कुटुम्ब म अऊर अपनो पूर्वजों की सम्पत्ति फिर सी हासिल करेंन।
LEV 25:42 कहालीकि हि मोरोच सेवक आय, जिन्ख मय न मिस्र देश सी निकाल लायो हय; येकोलायी हि गुलाम को समान नहीं बेच्यो जाय।
LEV 25:43 उन पर कठोरता सी अधिकार मत करजो; अपनो परमेश्वर को भय मानजो।
LEV 25:44 यदि तुम्ख दास-दासियों की जरूरत हय त अपनो आस-पास की राज्यों म सी दास अऊर दासियों ख लेय लेजो।
LEV 25:45 जो यात्री लोग तुम्हरो बीच म रहेंन, उन म सी अऊर उन्को घराना म सी भी जो तुम्हरो आस-पास होना, अऊर जिन्को जनम तुम्हरो देश म भयो हय, उन म सी तुम दास-दासियों ख लेय लेवो; अऊर हि तुम्हरी जायजाद होयेंन।
LEV 25:46 तुम अपनो टुरावों ख भी जो तुम्हरो बाद होयेंन उन्को अधिकार म कर सको, अऊर हि उन्को हिस्सा ठहरेंन; उन म सी तुम हमेशा अपनो लायी दास लियो करो, पर तुम्हरो भाऊबन्धु जो इस्राएली होना उन पर अपनो अधिकार कठोरता सी मत जताजो।
LEV 25:47 “फिर यदि तोरो सामने परदेशी यां यात्री धनी होय जाये, अऊर ओको सामने तोरो भाऊ गरीब होय क अपनो आप ख तोरो सामने ऊ परदेशी यां यात्री को कुटुम्ब को कोयी सदस्य को हाथ म बेच डाले,
LEV 25:48 त ओको बेच्यो जान को बाद ऊ फिर छुड़ायो जाय सकय हय; ओको भाऊवों म सी कोयी ओख छुड़ाय सकय हय,
LEV 25:49 यां ओको काका, यां काका भाऊ, यां ओको कुल को कोयी भी जवर को कुटुम्बी ओख छुड़ाय सकय हय; यां यदि ऊ धनी होय जाये, त ऊ खुदच अपनो ख छुड़ाय सकय हय।”
LEV 25:50 ऊ अपनो लेन वालो को संग अपनो बेच्यो जान को साल सी जुबली को साल तक गिनती करे, अऊर ओको बेचन को दाम साल की गिनती को अनुसार होयेंन, मतलब ऊ दाम मजूरों को समय को समान ओको संग होयेंन।
LEV 25:51 यदि जुबली को साल को बहुत साल बाकी रह्य जाये, त जितनो रुपयों सी ऊ लियो गयो होना उन म सी ऊ अपनो छुड़ावन को दाम उतनो साल को अनुसार लौटाय देयेंन।
LEV 25:52 यदि जुबली को साल को थोड़ो साल बाकी रह्य गयो होना, तब भी ऊ अपनो मालिक को संग हिसाब कर क् अपनो छुड़ावन को दाम उतनोच साल को अनुसार लौटाय देयेंन।
LEV 25:53 ऊ अपनो मालिक को संग ऊ मजूर को समान रहे जेकी वार्षिक मजूरी ठहरायी जावय हय; अऊर ओको मालिक ओको पर तोरो सामने कठोरता सी अधिकार नहीं जतानो पाये।
LEV 25:54 अऊर यदि ऊ इन रीतियों सी छुड़ायो नहीं जाये, त ऊ जुबली को साल म अपनो बाल-बच्चां समेत छूट जायेंन।
LEV 25:55 कहालीकि इस्राएली मोरोच सेवक आय; हि मिस्र देश सी मोरोच निकाल्यो हुयो सेवक आय; मय तुम्हरो परमेश्वर यहोवा आय।
LEV 26:1 “तुम अपनो लायी मूर्ती मत बनावो, अऊर नहीं कोयी खोदी हुयी मूर्ती यां खम्बा अपनो लायी खड़ो मत करो, अऊर नहीं अपनो देश म दण्डवत करन लायी नक्काशीदार गोटा स्थापित करो; कहालीकि मय तुम्हरो परमेश्वर यहोवा आय।”
LEV 26:2 तुम मोरो आराम दिनों को पालन करो अऊर मोरो पवित्र जागा को आदर करो; मय परमेश्वर आय।
LEV 26:3 “यदि तुम मोरी विधियों पर चलो अऊर मोरी आज्ञावों ख मान क ओको पालन करो,
LEV 26:4 त मय तुम्हरो लायी समय समय पर बारीश बरसाऊं, जेकोसी खेत अपनी उपज उपजायेंन, अऊर जमीन को झाड़ अपनो अपनो फर दियो करेंन;
LEV 26:5 यहां तक कि तुम अंगूर तोड़न को समय भी दावनी करतो रहो, अऊर बोवन को समय भी अंगूर तोड़तो रहो, अऊर तुम भरपेट रोटी खावो, अऊर अपनो देश म निश्चिन्त होय क बस्यो रहो।
LEV 26:6 “अऊर मय तुम्हरो देश ख सुख चैन देऊं, अऊर तुम्ख कोयी नहीं डरायेंन; अऊर मय ऊ देश म हिंसक जनावरों ख नहीं रहन देऊं, अऊर नहीं तुम्हरो देश पर तलवार चलेंन।
LEV 26:7 अऊर तुम अपनो दुश्मनों ख मार भगावों। अऊर हि तुम्हरो सामने तलवार सी मारयो जायेंन।
LEV 26:8 तुम म सी पाच आदमी सौ ख अऊर सौ आदमी दस हजार ख खदेड़ेंन; अऊर तुम्हरो दुश्मन तलवार सी तुम्हरो सामने मारयो जायेंन;
LEV 26:9 अऊर मय तुम्हरो तरफ कृपादृष्टि रखूं अऊर तुम ख फलवन्त करूं अऊर बढ़ाऊं, अऊर तुम्हरो संग अपनी वाचा ख पूरी करूं।
LEV 26:10 अऊर तुम रख्यो हुयो अनाज ख खावो, अऊर नयो रहतो हुयो भी पुरानो ख निकालो।
LEV 26:11 अऊर मय तुम्हरो बीच म अपनो निवास-स्थान बनाऊं, अऊर मोरो जीव तुम सी घृना नहीं करेंन।
LEV 26:12 अऊर मय तुम्हरो बीच म चल्यो फिरयो करूं, अऊर तुम्हरो परमेश्वर बन्यो रहूं, अऊर तुम मोरो लोग बन्यो रहो।
LEV 26:13 मय त तुम्हरो ऊ परमेश्वर यहोवा आय, जो तुम ख मिस्र देश सी येकोलायी निकाल लायो कि तुम मिस्रियों को गुलाम नहीं बन्यो रहो; अऊर मय न तुम्हरो जूवा ख तोड़ डाल्यो हय, अऊर तुम्ख सीधो खड़ो कर क् चलायो हय।”
LEV 26:14 “यदि तुम मोरी नहीं सुनो, अऊर इन सब आज्ञावों ख नहीं मानो,
LEV 26:15 अऊर मोरी विधियों ख निकम्मा जानो, अऊर तुम्हरी आत्मा मोरो फैसला सी घृना करेंन, अऊर तुम मोरी सब आज्ञावों को पालन नहीं करो, बल्की मोरी वाचा ख तोड़ो,
LEV 26:16 त मय तुम सी यो व्यवहार करूं; मतलब मय तुम्ख बेचैन करूं, अऊर क्षयरोग अऊर बुखार सी पीड़ित करूं, अऊर इन्को वजह तुम्हरी आंखी धुंधली होय जायेंन, अऊर तुम्हरो मन जादा उदास होयेंन। अऊर तुम्हरो बीज बोवनो बेकार होयेंन, कहालीकि तुम्हरो दुस्मन उन्की उपज खाय जायेंन;
LEV 26:17 अऊर मय भी तुम्हरो खिलाफ होय जाऊं, अऊर तुम अपनो दुस्मन सी हार जावो; अऊर तुम्हरो दुस्मन तुम्हरो ऊपर अधिकार करेंन, अऊर जब कोयी तुम्हरो पीछा भी नहीं कर रह्यो होना तब भी तुम भगो।”
LEV 26:18 “अऊर यदि तुम इन बातों को होन पर भी मोरी नहीं सुनो, त मय तुम्हरो पापों को वजह तुम्ख सातगुना सजा देऊं,
LEV 26:19 अऊर मय तुम्हरो बल को घमण्ड तोड़ डालूं, अऊर तुम्हरो लायी आसमान ख लोहा को जसो अऊर जमीन ख पीतल को जसो कठोर बनाय देऊं,
LEV 26:20 अऊर तुम्हरी मेहनत बेकार जायेंन, कहालीकि तुम्हरी खेत उपज नहीं उपजायेंन, अऊर जमीन को झाड़ अपनो फर नहीं देयेंन।”
LEV 26:21 “यदि तुम मोरो खिलाफ चलतोच रहो, अऊर मोरो कहनो नहीं मानो, त मय तुम्हरो पापों को अनुसार तुम पर सातगुना अऊर भी संकट डालूं।”
LEV 26:22 अऊर मय तुम्हरो बीच म जंगली जनावर भेजूं, जो तुम्हरो बच्चां ख अऊर तुम्हरो घरेलू जनावरों ख नाश कर डालेंन, अऊर तुम्हरी गिनती घटायेंन, जेकोसी तुम्हरी सड़के सुनी पड़ जायेंन।
LEV 26:23 “फिर यदि तुम इन बातों पर भी मोरी ताड़ना सी नहीं सुधरो, अऊर मोरो खिलाफ चलतोच रहो,
LEV 26:24 त मय तुम्हरो खिलाफ चलू, अऊर तुम्हरो पापों को वजह मय खुदच तुम्ख सातगुना सजा देऊं।”
LEV 26:25 अऊर मय तुम पर एक असी तलवार चलाऊं, जो वाचा तोड़न को पूरो पूरो बदला लेयेंन; अऊर जब तुम नगरों म जाय क जमा होवो तब मय तुम्हरो बीच म मरी फैलाऊं, अऊर तुम अपनो दुस्मनो को हाथ म सौप दियो जावो।
LEV 26:26 जब मय तुम्हरो लायी अनाज को आधार ख दूर कर डालूं, तब दस बाईयां एकच तंदूर म पकाय क तौल तौल क देयेंन; तुम रोटियां त खावो पर तृप्त नहीं होवो।
LEV 26:27 “फिर यदि तुम येको बाद भी मोरी नहीं सुनो, अऊर मोरो खिलाफ चलतोच रहो,
LEV 26:28 त मय गुस्सा म भर क तुम्हरो खिलाफ चलू, अऊर तुम्हरो पापों को वजह तुम ख सातगुना सजा अऊर भी देऊं।”
LEV 26:29 अऊर तुम ख अपनो बेटावों अऊर बेटियां को मांस खानो पड़ेंन।
LEV 26:30 अऊर मय तुम्हरो पूजा की वेदियों ख गिराय देऊं, अऊर तुम्हरी सूर्य की मूर्तियों ख तोड़ डालूं, अऊर तुम्हरो लाशों ख तुम्हरी तोड़ी हुयी मूर्तियों पर फेक देऊं; अऊर मय तुम सी घृना करूं।
LEV 26:31 अऊर मय तुम्हरो नगरों ख उजाड़ देऊं, अऊर तुम्हरो पवित्र जागावों ख भी उजाड़ देऊं, अऊर तुम्हरो सुखदायक सुगन्ध स्विकार नहीं करूं।
LEV 26:32 अऊर मय तुम्हरो देश ख सुनो कर देऊं, अऊर तुम्हरो दुस्मन जो ओको म रह्य हय हि इन बातों वजह चकित होय जायेंन।
LEV 26:33 अऊर मय तुम्ख राज्य-राज्य को बीच तितर-बितर कर देऊं, अऊर तुम्हरो पीछू पीछू तलवार निकाल्यो रहूं; अऊर तुम्हरो देश सुनो अऊर तुम्हरो नगर उजाड़ होय जायेंन।
LEV 26:34 “तब जितनो दिन ऊ देश सुनो पड़्यो रहेंन अऊर तुम अपनो दुस्मनो को देश म रहो उतनो दिन ऊ अपनो आराम कालों ख मानतो रहेंन, तबच ऊ देश आराम पायेंन, मतलब अपनो आराम कालों ख मानतो रहेंन।
LEV 26:35 जितनो दिन ऊ देश सूनो पड़्यो रहेंन उतनो दिन ओख आराम मिलेंन, मतलब जो आराम ओख तुम्हरो वहां बस्यो रहन को समय तुम्हरो आराम कालों म नहीं मिल्यो होना ऊ ओख तब मिलेंन।
LEV 26:36 “अऊर तुम म सी जो बच्यो हुयो को दिल म जो तुम्हरो दुस्मनो को देश म होना उन्को दिलो म कायरता पैदा करूं; अऊर हि सुख्यो पत्ता को खड़कन को आवाज सीच भग जायेंन, अऊर हि असो भगेंन जसो कोयी तलवार सी बचन लायी भगय हय, उन्को पीछा करन वालो नहीं होनो पर भी हि गिर पड़ेंन।
LEV 26:37 जब कोयी पीछा करन वालो नहीं होना तब भी तलवार को डर सी लड़खड़ाय क एक दूसरो पर गिरतो जायेंन, अऊर तुम्ख अपनो दुस्मनो को सामने खड़ो रहन की तुम म कुछ भी शक्ति नहीं रहेंन।
LEV 26:38 तब तुम राज्य-राज्य को बीच पहुंच क नाश होय जावो, अऊर तुम्हरो दुस्मनो की जमीन तुम्ख खाय जायेंन।
LEV 26:39 अऊर तुम सी जो बच्यो रहेंन हि अपनो दुस्मनो को देश म अपनो पाप को वजह गल जायेंन; अऊर अपनो पुरखावों को बुरो कामों को वजह भी हि उन्कोच जसो गल जायेंन।
LEV 26:40 “पर यदि हि अपनो पितरों को बुरो काम ख मान लेयेंन, मतलब ऊ जो मोरो विश्वासघात करेंन, अऊर यो भी मान लेयेंन कि हम परमेश्वर को खिलाफ चल्यो होतो,
LEV 26:41 यो वजह ऊ हमरो खिलाफ होय क हम्ख दुस्मनो को देश म लायो हय। यदि ऊ समय उन्को खतनारहित दिल दब जायेंन अऊर हि ऊ समय अपनो बुरो काम की सजा ख स्विकार करेंन;
LEV 26:42 तब जो वाचा मय न याकूब को संग बान्धी होती ओख मय याद करूं, अऊर जो वाचा मय न इसहाक अऊर अब्राहम सी बान्धी होती ओख भी याद करूं, अऊर यो देश ख भी मय याद करूं।
LEV 26:43 पर ऊ देश उन्को निकल जानो सी सुनो पड़्यो रहेंन, अऊर उन्को बिना सुनो रह्य क भी आराम कालों ख मानतो रहेंन; अऊर हि लोग अपनो बुरो काम की सजा ख स्विकार करेंन, योच वजह सी उन्न मोरी आज्ञावों को उल्लंघन करयो होतो, अऊर उन्की आत्मावों ख मोरी विधियों सी घृना होती।
LEV 26:44 इतनो होनो पर भी हि अपनो दुस्मनो को देश म रहेंन तब मय उन्ख यो तरह नहीं छोड़ूं, अऊर नहीं उन्कोसी असी घृना करूं कि उन्को सत्यानाश कर डालूं अऊर अपनी वा वाचा ख तोड़ देऊ जो मय न उन्कोसी बान्धी होती; कहालीकि मय उन्को परमेश्वर यहोवा आय;
LEV 26:45 पर मय उन्की भलायी लायी उन्को पितरों सी बान्धी हुयी वाचा ख याद करूं; जिन्ख मय न दूसरो राज्यों को लोगों की आंखी को सामने मिस्र देश सी निकाल क लायो कि मय उन्को परमेश्वर ठहरू मय परमेश्वर आय।”
LEV 26:46 जो जो विधियां अऊर नियम अऊर व्यवस्था परमेश्वर न अपनो तरफ सी इस्राएलियों लायी सीनै पहाड़ी पर मूसा को द्वारा ठहरायी होती हि याच आय।
LEV 27:1 फिर परमेश्वर न मूसा सी कह्यो,
LEV 27:2 “इस्राएलियों सी यो कहो कि जब कोयी विशेष मन्नत मानेंन, त मन्नत करयो हुयो व्यक्ति तोरो ठहरायो जान को अनुसार परमेश्वर को होयेंन;
LEV 27:3 येकोलायी यदि ऊ बीस साल यां ओको सी जादा अऊर साठ साल सी कम को आदमी होना, त ओको लायी पवित्र जागा को शेकेल को अनुसार चांदी को पचास शेकेल को सिक्का ठहरेंन।
LEV 27:4 अऊर यदि वा बाई होना, त ओको लायी चांदी को तीस शेकेल ठहरेंन।
LEV 27:5 फिर यदि ओकी उमर पाच साल यां ओको सी जादा हय अऊर बीस साल सी कम की होना, त टुरा लायी बीस शेकेल, अऊर टुरी लायी दस शेकेल ठहरेंन।
LEV 27:6 यदि ओकी उमर एक महिना यां ओको सी जादा हय अऊर पाच साल सी कम की होना, त टुरा लायी पाच शेकेल, अऊर टुरी लायी तीन शेकेल ठहरेंन।
LEV 27:7 फिर यदि ओकी उमर साठ साल की यां ओको सी जादा होना, अऊर ऊ आदमी होना त ओको लायी पन्द्रा शेकेल, अऊर बाई होना त दस शेकेल ठहरे।
LEV 27:8 “पर यदि कोयी इतनो गरीब होना कि याजक को ठहरायो हुयो दाम नहीं दे सकय, त ओख याजक को सामने खड़ो करयो जाय, अऊर याजक ओकी धन ठहरायेंन, मतलब जितनो मन्नत मानन वालो सी होय सकय, याजक ओकोच अनुसार ठहरायेंन।”
LEV 27:9 “फिर जिन जनावरों म सी लोग परमेश्वर ख चढ़ावा चढ़ावय हंय, यदि असो म सी कोयी मन्नत करयो गयो होना, त जो जनावर कोयी परमेश्वर ख दे ऊ पवित्र ठहरेंन।
LEV 27:10 ऊ ओख कोयी तरह सी नहीं बदले, नहीं त बुरो को बदला अच्छो, अऊर नहीं अच्छो को बदला बुरो दे; अऊर यदि ऊ ऊ जनावर को बदला दूसरो जनावर दे, त ऊ अऊर ओको दूसरो जनावर दोयी पवित्र ठहरेंन।
LEV 27:11 अऊर जिन अशुद्ध जनावरों म लोग परमेश्वर लायी चढ़ावा नहीं चढ़ावय ओको म सी होना, त ऊ व्यक्ति ऊ जनावर ख याजक को सामने खड़ो कर दे,
LEV 27:12 तब याजक ओको दाम ठहरायेंन कि ऊ अच्छो हय यां बुरो; अऊर जितनो याजक ठहरायेंन ओको दाम उतनोच ठहरेंन।
LEV 27:13 पर यदि मन्नत मानन वालो ओख कोयी तरह सी छुड़ानो चाहेंन, त जो दाम याजक न ठहरायो होना ओको म ओको पाचवों हिस्सा अऊर बढ़ाय क दे।
LEV 27:14 “फिर यदि कोयी अपनो घर परमेश्वर लायी पवित्र ठहराय क मन्नत मानय, त याजक ओको दाम ठहरायेंन कि ऊ अच्छो घर हय यां बुरो; अऊर जितनो याजक ठहरायेंन ओको दाम उतनोच ठहरेंन।
LEV 27:15 अऊर यदि घर को पवित्र करन वालो ओख छुड़ानो चाहेंन, त जितनो रुपया याजक न ठहरायो होना ओको म ऊ व्यक्ति पाचवों हिस्सा अऊर बढ़ाय क दे, तब ऊ घर ओकोच रहेंन।
LEV 27:16 “फिर यदि कोयी अपनी निजी जमीन को कोयी हिस्सा परमेश्वर लायी पवित्र ठहरानो चाहेंन, त ओको दाम येकोच अनुसार ठहरेंन कि ओको म कितनो बीज लगेन; जितनो जमीन म होमेर भर जौ बोयो जायेंन उतनो को दाम पचास शेकेल ठहरेंन।
LEV 27:17 यदि ऊ अपनो खेत जुबली को साल म पवित्र ठहरायेंन, त ओको दाम तोरो ठहरान को अनुसार ठहरेंन;
LEV 27:18 अऊर यदि ऊ अपनो खेत जुबली को साल को बाद पवित्र ठहरायेंन, त जितनो साल दूसरो जुबली को साल को बाकी रहेंन उन्कोच अनुसार याजक ओको लायी रुपया को हिसाब करेंन, तब जितनो हिसाब म आयेंन उतनो याजक को ठहरायो हुयो सी कम कर दे।
LEV 27:19 अऊर यदि खेत को पवित्र ठहरान वालो ओख छुड़ानो चाहेंन, त जो दाम याजक न ठहरायो होना ओख म सी ऊ पाचवों हिस्सा अऊर बढ़ाय क देयेंन, तब खेत ओकोच होयेंन।
LEV 27:20 पर यदि ऊ खेत ख छुड़ानो नहीं चाहेंन, यां ओन ऊ खेत दूसरो ख बेच्यो होना, त खेत कभी नहीं छुड़ायो जायेंन;
LEV 27:21 पर जब ऊ खेत जुबली को साल म छुड़ायो जायेंन, तब पूरी रीति सी अर्पन करयो हुयो खेत को समान परमेश्वर लायी पवित्र ठहरेंन, मतलब ऊ याजक की निजी जमीन होय जायेंन।
LEV 27:22 “फिर यदि कोयी अपनो लियो हुयो खेत, जो ओकी निजी जमीन को हिस्सा नोहोय, ओख परमेश्वर लायी पवित्र ठहराये,
LEV 27:23 त याजक जुबली को साल तक को हिसाब कर क् ऊ आदमी लायी जितनो ठहरायो गयो हय उतनोच ऊ परमेश्वर लायी पवित्र जान क उच दिन दे दे।”
LEV 27:24 जुबली को साल म खेत ऊ व्यक्ति ख फिर सी ओख हासिल होय जायेंन, जेकोसी ओन लियो होतो, जेकी वा निजी जमीन होती ओकीच होय जायेंन।
LEV 27:25 जो जो चिज को दाम याजक ठहरायेंन ओको दाम पवित्र जागा को शेकेल को हिसाब सी ठहरेंन, शेकेल बीस गेरा को होयेंन।
LEV 27:26 “पर घरेलू जनावरों को पहिलौटा पर सिर्फ परमेश्वर को अधिकार हय, कोयी भी ओख पवित्र नहीं ठहराये; चाहे ऊ गोरा होना, चाहे ऊ मेंढा होना यां पालतु जनावर होना ओको पर परमेश्वर को अधिकार हय।
LEV 27:27 पर यदि ऊ अशुद्ध जनावर को हय, त ओख पवित्र ठहरान वालो ओख याजक को ठहरायो हुयो दाम को अनुसार ओको पाचवों हिस्सा अऊर बढ़ाय क छुड़ाय सकय हय; अऊर यदि ऊ जनावर छुड़ायो नहीं जाये, त याजक को ठहरायो हुयो दाम पर बेच दियो जायेंन।
LEV 27:28 “पर अपनी पूरी चिजों म सी जो कुछ कोयी परमेश्वर लायी भेंट करे, चाहे ऊ आदमी होना चाहे जनावर, चाहे ओकी निजी जमीन को खेत होना, असी कोयी भेंट करी हुयी चिज नहीं बेची जाये अऊर नहीं छुड़ायी जाये; जो कुछ भेंट करयो जाये ऊ परमेश्वर लायी परमपवित्र ठहरे।
LEV 27:29 आदमियों म सी जो कोयी मृत्य-दण्ड लायी भेंट करयो जाये, ऊ छुड़ायो नहीं जाये; जरूर ऊ मार डाल्यो जाये।
LEV 27:30 “फिर जमीन की फसल को पूरो दशमांश, चाहे ऊ जमीन को बीज होना चाहे झाड़ को फर, ऊ परमेश्वर कोच आय; ऊ परमेश्वर लायी पवित्र ठहरे।
LEV 27:31 यदि कोयी अपनो दशमांश म सी कुछ वापस लेनो चाहेंन, त पाचवों हिस्सा बढ़ाय क ओख छुड़ाये।
LEV 27:32 अऊर पालतु जनावर मेंढी-शेरियों को हर एक दसवों जनावर, जो चरवाहा की लाठी को खल्लो सी निकल जावय हय ऊ परमेश्वर लायी पवित्र ठहरे।
LEV 27:33 कोयी उन म अच्छो अऊर बुरो जनावर म भेद नहीं करे, अऊर नहीं उन्ख बदले; अऊर यदि कोयी ओख बदल भी लेवय हय, त ऊ अऊर ओको दूसरो जनावर दोयी पवित्र ठहरेंन; अऊर ऊ कभी छुड़ायो नहीं जाये।”
LEV 27:34 जो आज्ञाये परमेश्वर न इस्राएलियों लायी सीनै पहाड़ी पर मूसा ख दी होती हि याच आय।
JOS 1:1 परमेश्वर को सेवक मूसा को मरन को बाद परमेश्वर न ओको सेवक यहोशू सी कह्यो जो नून को टुरा होतो,
JOS 1:2 “मोरो सेवक मूसा मर गयो हय; येकोलायी अब तय उठ, तैयार हो, अऊर पूरी इस्राएली प्रजा समेत यरदन नदी को पार होय क ऊ देश म जा जेक मय इस्राएली लोगों ख दे रह्यो हय।
JOS 1:3 ऊ वचन को अनुसार जो मय न मूसा सी कह्यो, मतलब जो जो जागा पर तुम पाय रखो ऊ सब मय तुम्ख देऊं।
JOS 1:4 दक्षिन म जंगल सी उत्तर म लबानोन की पहाड़ियों तक, पूर्व म फरात महानदी अऊर हित्ती जाती को सब लोग देश सी पश्चिम म महासमुन्दर तक ठहरेंन।
JOS 1:5 तोरो जीवन भर कोयी तोरो सामने ठहर नहीं सकेंन; जसो मय मूसा को संग रह्यो वसोच तोरो संग भी रहूं; अऊर नहीं मय तोख धोखा देऊं, अऊर नहीं तोख छोड़ूं।
JOS 1:6 येकोलायी हिम्मत बान्ध क मजबूत होय जा; कहालीकि जो देश ख देन की कसम मय न इन लोगों को पूर्वजों सी खायी होती ओको अधिकारी तय इन ख करजो।
JOS 1:7 इतनो हो कि तय हिम्मत बान्ध अऊर बहुत मजबूत होय क जो व्यवस्था मोरो सेवक मूसा न तोख दियो हय उन सब को अनुसार करन म चौकसी करजो; अऊर ओको सी नहीं तय दायो मुड़जो अऊर नहीं बायो, तब जहां जहां तय जाजो वहां वहां तोरो काम सफल होयेंन।
JOS 1:8 व्यवस्था की या किताब को शब्द मोरो मुंह सी कभी नहीं अलग होनो पाये, येकोच म रात दिन ध्यान लगायो रहजो, येकोलायी कि जो कुछ ओको म लिख्यो हय ओको अनुसार करन की तय चौकसी करजो; कहालीकि असोच करन सी तोरो सब काम सफल होयेंन, अऊर तय प्रभावशाली होयजो।
JOS 1:9 का मय न तोख आज्ञा नहीं दी? हिम्मत बान्ध क मजबूत होय जा; डर मत, अऊर तोरो मन निराश नहीं हो; कहालीकि जहां जहां तय जाजो वहां वहां तोरो परमेश्वर यहोवा तोरो संग रहेंन।”
JOS 1:10 तब यहोशू न प्रजा को मुख्य लोगों ख या आज्ञा दी,
JOS 1:11 “छावनी म इत उत जाय क प्रजा को लोगों ख या आज्ञा देवो, कि अपनो अपनो लायी भोजन तैयार कर क् रखो; कहालीकि तीन दिन को अन्दर तुम ख यो यरदन नदी को पार उतर क ऊ देश ख अपनो अधिकार म लेन लायी जानो हय जेक तुम्हरो परमेश्वर यहोवा तुम्हरो अधिकार म दे रह्यो हय।”
JOS 1:12 फिर यहोशू न रूबेनियों, गादियों, अऊर मनश्शे को अरधो वंश को लोगों सी कह्यो,
JOS 1:13 “जो बात परमेश्वर को सेवक मूसा न तुम सी कही होती कि तुम्हरो परमेश्वर यहोवा तुम्ख आराम देवय हय, अऊर योच देश तुम्ख देयेंन, ओकी सुधि लेवो।
JOS 1:14 तुम्हरी पत्नियां, बाल-बच्चा, अऊर जनावर त यो देश म रहेंन जो मूसा न तुम्ख यरदन को येन पारच दियो, पर तुम जो योद्धा शस्त्र उठाय क अपनो भाऊवों को आगु आगु ओन पार उतर क चलो, अऊर उन्की मदत करो;
JOS 1:15 अऊर जब परमेश्वर उन्ख असो आराम देयेंन जसो ऊ तुम्ख दे चुक्यो हय, अऊर हि भी तुम्हरो परमेश्वर यहोवा को दियो हुयो देश को अधिकारी होय जायेंन; तब तुम अपनो अधिकार को देश म, जो परमेश्वर को सेवक मूसा न यरदन को येन पार पूर्व को तरफ तुम्ख दियो हय, लौट क येको अधिकारी होयेंन।”
JOS 1:16 तब उन्न यहोशू ख उत्तर दियो, “जो कुछ तय न हम्ख करन की आज्ञा दी हय ऊ हम करबोंन, अऊर जहां कहीं तय हम्ख भेजो वहां हम जाबोन।
JOS 1:17 जसो हम सब बातों म मूसा की मानत होतो वसोच तोरी भी मानबो, इतनो होय कि तोरो परमेश्वर यहोवा जसो मूसा को संग रहत होतो वसोच तोरो संग भी रहे।
JOS 1:18 कोयी भी कहाली नहीं होय जो तोरो खिलाफ विद्रोह करे, अऊर जितनी आज्ञाये तय देजो उन्ख नहीं मानय, त ऊ मार डाल्यो जायेंन। पर तय मजबूत अऊर हिम्मत बान्ध्यो रहे।”
JOS 2:1 तब नून को टुरा यहोशू न दोय भेदियों ख शित्तीम सी चुपचाप सी भेज दियो, अऊर ओन कह्यो, “जाय क ऊ देश अऊर यरीहो ख देखो।” तुरतच हि चली गयो, अऊर राहब नाम की कोयी वेश्या को घर म जाय क ठहर गयो।
JOS 2:2 तब कोयी न यरीहो नगर को राजा सी कह्यो, “अज की रात कुछ इस्राएली लोग हमरो देश को भेद लेन लायी यहां आयो हुयो हय।”
JOS 2:3 तब यरीहो नगर को राजा न राहब को जवर यो सन्देश भेज्यो, “जो आदमी तोरो यहां आयो हय उन्ख बाहेर लाव; कहालीकि हि पूरो देश को भेद लेन लायी आयो हंय।”
JOS 2:4 वा बाई न दोयी आदमियों ख लूकाय रख्यो; अऊर यो तरह कह्यो, “मोरो जवर कुछ आदमी आयो त होतो, पर मय नहीं जानु कि हि कहां को होतो;
JOS 2:5 अऊर जब अन्धारो भयो, अऊर नगर को फाटक बन्द होन लग्यो, तब हि निकल गयो; मोख मालूम नहीं कि हि कहां गयो; तुम फुर्ती कर क् उन्को पीछा करो त उन्ख जाय क पकड़ो।”
JOS 2:6 राहब न भेदियों ख घर की छत पर चढ़ाय क सन की लकड़ियों को खल्लो लूकाय दियो होतो जो ओन लकड़ी छत पर जमाय क रखी होती।
JOS 2:7 राजा को कर्मचारी यरदन को रस्ता सी उन्की खोज म घाट तक चली गयो; अऊर उन्ख खोजन वालो नगर को फाटक सी बाहेर निकलतोच फाटक बन्द कर दियो गयो।
JOS 2:8 भेदियों को सोवन सी पहले राहब छत पर उन्को जवर आयी
JOS 2:9 अऊर इन आदमियों सी कहन लगी, “मोख त निश्चय हय कि परमेश्वर न तुम लोगों ख यो देश दियो हय, अऊर तुम्हरो डर हम लोगों को मन म समायो हय, अऊर यो देश को सब निवासी तुम्हरो वजह घबराय रह्यो हय।
JOS 2:10 कहालीकि हम न सुन्यो हय कि परमेश्वर न तुम्हरो मिस्र देश सी निकलन को समय तुम्हरो सामने लाल समुन्दर को पानी सुखाय दियो। अऊर तुम लोगों न सीहोन अऊर ओग नाम को यरदन को पार रहन वालो एमोरियों को दोयी राजावों को नाश कर डाल्यो हय।
JOS 2:11 अऊर यो सुनतोच हमरो मन पिघल गयो, अऊर तुम्हरो वजह कोयी को जीव म जीव नहीं रह्यो; कहालीकि तुम्हरो परमेश्वर यहोवा ऊपर को आसमान को अऊर खल्लो की धरती को परमेश्वर आय।
JOS 2:12 अब मय न तुम पर दयापूर्ण व्यवहार करयो हय, येकोलायी मोरो सी परमेश्वर की कसम खावो कि तुम भी मोरो बाप को परिवार को संग दयापूर्ण व्यवहार करो, अऊर येको सच्चो चिन्ह मोख देवो।
JOS 2:13 तुम मोख वचन देवो कि तुम मोरो माय बाप, भाऊवों अऊर बहिनों ख, अऊर जो कुछ उन्को हय उन सब ख भी जीन्दो रहन देवो, अऊर हम सब को जीव मरन सी बचावो।”
JOS 2:14 तब उन आदमियों न ओको सी कह्यो, “यदि तय हमरी या बात कोयी पर प्रगट नहीं करे, त तुम्हरो जीव को बदला हमरो जीव जाये; अऊर परमेश्वर हम्ख यो देश देयेंन, तब हम तोरो संग कृपा अऊर सच्चायी सी बर्ताव करबो।”
JOS 2:15 तब राहब जेको घर नगर की दीवाल सी लग क बन्यो होतो, अऊर वा वहांच रहत होती, ओन भेदियों ख खिड़की सी रस्सा को सहारा सी उतार क नगर को बाहेर कर दियो।
JOS 2:16 अऊर ओन कह्यो, “पहाड़ी को तरफ चली जावो, असो नहीं होय कि खोजन वालो राजा को दूत तुम्ख पकड़ ले; येकोलायी जब तक तुम्हरो खोजन वालो वापस लौट क नहीं आवय तब तक, तीन दिन वहांच लूक्यो रहो, ओको बाद अपनो रस्ता लेवो।”
JOS 2:17 उन्न ओको सी कह्यो, “जो कसम तय न हम्ख खिलायी हय ओको बारे म हम त निर्दोष रहबोंन।
JOS 2:18 सुन, जब हम लोग यो देश म आयबो, तब जो खिड़की सी तय न हम्ख उतारयो हय ओको म योच लाल रंग की सूत की दोरी बान्ध देजो; अऊर अपनो माय बाप, भाऊवों, बल्की अपनो बाप को पूरो घराना ख योच घर म अपनो जवर जमा कर क् रखजो।
JOS 2:19 तब जो कोयी तोरो घर को दरवाजा सी बाहेर निकलेंन, ओको खून को दोष ओकोच मुंड पर पड़ेंन, अऊर हम निर्दोष ठहरबो : पर यदि तोरो संग घर म रहतो हुयो कोयी को हाथ कोयी पर पड़ेंन, त ओको खून को दोष हमरो मुंड पर पड़ेंन।
JOS 2:20 फिर यदि तय हमरी या बात कोयी पर प्रगट करे, त जो कसम तय न हम्ख खिलायी हय ओको सी हम निर्दोष ठहरबो।”
JOS 2:21 ओन कह्यो, “जसो तुम न कह्यो वसोच हो।” तब ओन उन्ख बिदा करयो, अऊर हि चली गयो; अऊर ओन लाल रंग की दोरी ख खिड़की म बान्ध दियो।
JOS 2:22 भेदी जाय क पहाड़ी पर पहुंच्यो, अऊर वहां खोजन वालो को लौटन तक, मतलब तीन दिन तक रह्यो; अऊर खोजन वालो उन्ख पूरो रस्ता म ढूंढतो रह्यो पर हि कहीं नहीं मिल्यो।
JOS 2:23 तब हि दोयी भेदी पहाड़ी सी उतरयो, अऊर नदी पार कर क् नून को टुरा यहोशू को जवर पहुंच्यो अऊर जो कुछ उन पर बीत्यो होतो ऊ बताय दियो।
JOS 2:24 अऊर उन्न यहोशू सी कह्यो, “परमेश्वर न ऊ पूरो देश हमरो हाथ म कर दियो हय; येको सिवाय ओको पूरो निवासी हमरो वजह घबराय रह्यो हय।”
JOS 3:1 यहोशू सुबेरे उठ्यो, अऊर सब इस्राएली लोगों ख ले क शित्तीम सी निकल क यरदन नदी को किनारे आयो; अऊर हि ओन पार जान सी पहले वहांच मुक्काम करयो।
JOS 3:2 अऊर तीन दिन को बाद सरदारों न छावनी को बीच जाय क
JOS 3:3 प्रजा को लोगों ख या आज्ञा दी, “जब तुम्ख अपनो परमेश्वर यहोवा को वाचा को सन्दूक अऊर ओख उठायो हुयो लेवी याजक ख भी देख लेवो, तब अपनी जागा सी निकल क ओको पीछू चलो,
JOS 3:4 पर ओको अऊर तुम्हरो बीच म दोय हजार हाथ को अन्तर रहे; तुम सन्दूक को जवर मत जाओ। ताकी तुम देख सको कि कौन्सो रस्ता सी तुम्ख चलनो हय, कहालीकि अब तक तुम यो रस्ता पर नहीं आयो होतो।”
JOS 3:5 फिर यहोशू न लोगों सी कह्यो, “तुम अपनो आप ख पवित्र करो; कहालीकि कल को दिन परमेश्वर तुम्हरो बीच म अद्भूत काम करेंन।”
JOS 3:6 तब यहोशू न याजकों सी कह्यो, “वाचा को सन्दूक उठाय क प्रजा को आगु आगु चलो।” तब हि वाचा को सन्दूक उठाय क आगु आगु चलन लग्यो।
JOS 3:7 तब परमेश्वर न यहोशू सी कह्यो, “अज को दिन सी मय इस्राएलियों को जवर तोरी प्रशंसा करनो सुरू करूं, तब हि जान लेयेंन कि जसो मय मूसा को संग रहत होतो वसोच मय तोरो संग भी हय।
JOS 3:8 अऊर तय वाचा को सन्दूक उठावन वालो याजकों ख या आज्ञा दे, ‘जब तुम यरदन नदी को किनार पहुंचो, तब यरदन नदी म खड़ो होय जावो।’”
JOS 3:9 तब यहोशू न इस्राएली लोगों सी कह्यो, “जवर आय क अपनो परमेश्वर यहोवा को वचन सुनो।”
JOS 3:10 अऊर यहोशू कहन लग्यो, “येकोसी तुम जान लेवो कि जीन्दो परमेश्वर तुम्हरो बीच म हय, अऊर ऊ तुम्हरो सामने सी कनानियों, हित्तियों, हिब्बियों परिज्जियों, गिर्गाशियों, एमोरियों, अऊर यबूसियों ख उन्को देश सी निकाल देयेंन।
JOS 3:11 देखो, पूरी धरती पर की परमेश्वर को वाचा को सन्दूक तुम्हरो आगु आगु यरदन म जानो परच हय।
JOS 3:12 येकोलायी अब तुम इस्राएल को गोत्रों म सी बारा आदमियों ख चुन लेवो, हि एक गोत्र म सी एक आदमी हो।
JOS 3:13 अऊर जो समय पूरी धरती को प्रभु यहोवा की वाचा को सन्दूक उठावन वालो याजक यरदन नदी को पानी म पाय रखेंन, ऊ समय यरदन नदी को बहतो हुयो पानी रूक जायेंन, अऊर ढेर होय क ठहर जायेंन।”
JOS 3:14 फसल को समय होतो नदी म बहुत बाढ़ होतो येकोलायी जब प्रजा को लोगों न अपनो तम्बुवों सी यरदन नदी पार जान लायी निकल्यो, अऊर याजक वाचा को सन्दूक उठायो हुयो प्रजा को आगु आगु चल्यो,
JOS 3:15 अऊर सन्दूक ख उठावन वालो यरदन नदी पर पहुंच्यो, अऊर सन्दूक को उठावन वालो याजकों को पाय यरदन नदी को पानी म डुब गयो यरदन नदी को पानी त कटनी को समय को सब दिन अपनो तट को ऊपर ऊपर बह्यो करय हय,
JOS 3:16 तब जो पानी ऊपर को तरफ सी बहत आवय हय ऊ बहुत दूर, मतलब आदाम नगर को जवर जो सारतान नगर को जवर रूक क एक ढेर भय गयो, अऊर दीवार जसो उठ्यो रह्यो, अऊर जो पानी अराबा को सागर जो मृत सागर भी कह्यो जावय हय, ओको तरफ बहत जात होतो, ऊ पूरो रीति सी सूख गयो; अऊर प्रजा को लोग यरीहो को सामने पार उतर गयो।
JOS 3:17 अऊर याजक यहोवा की वाचा को सन्दूक उठायो हुयो यरदन को बीचों बीच पहुंच क जागा पर स्थिर खड़ो रह्यो, अऊर सब इस्राएली जागाच जागा पार उतरतो रह्यो, आखरी म ऊ पूरी जाति को लोग यरदन नदी पार भय गयो।
JOS 4:1 जब हि पूरी जाति को लोग यरदन नदी को पार उतर गयो, तब परमेश्वर न यहोशू सी कह्यो,
JOS 4:2 “प्रजा म सी बारा आदमी, मतलब हर एक कुल सी एक आदमियों ख चुन क या आज्ञा दे,
JOS 4:3 ‘अऊर तुम यरदन को बीच म, जहां याजकों न पाय रख्यो होतो वहां सी बारा गोटा उठाय क अपनो संग ओन पार ले चलो, अऊर जहां अज की रात मुक्काम करो वहांच रख देवो।’”
JOS 4:4 तब यहोशू न उन बारा आदमियों ख, जिन्ख ओन इस्राएलियों को हर एक कुल म सी छांट क रख्यो होतो,
JOS 4:5 बुलाय क कह्यो, “तुम अपनो परमेश्वर यहोवा को सन्दूक को आगु यरदन को बीच म जाय क इस्राएलियों को कुलों की गिनती को अनुसार एक एक गोटा उठाय क अपनो अपनो कन्धा पर रखो,
JOS 4:6 जेकोसी यो उन लोगों को बीच चिन्ह ठहरे, अऊर आगु जब तुम्हरो टुरा यो पूछेंन, ‘इन गोटावों को का मतलब हय?’
JOS 4:7 तब तुम उन्ख यो उत्तर देवो, कि यरदन नदी को पानी परमेश्वर को वाचा को सन्दूक को सामने दोय भाग भय गयो होतो; कहालीकि जब ऊ यरदन नदी पार कर क् आय रह्यो होतो, तब यरदन नदी को पानी दोय भाग भय गयो होतो। येकोलायी हि गोटा इस्राएल ख हमेशा लायी याद दिलावन वालो ठहरेंन।”
JOS 4:8 यहोशू की या आज्ञा को अनुसार इस्राएली लोगों न करयो, जसो परमेश्वर न यहोशू सी कह्यो होतो वसोच उन्न इस्राएली कुलों की गिनती को अनुसार बारा गोटा यरदन नदी को बीच म सी उठाय क; ऊ जागा पर ले गयो जहां उन्न मुक्काम करयो होतो रख दियो।
JOS 4:9 अऊर यरदन नदी को बीच म, जहां याजक वाचा को सन्दूक ख उठायो हुयो अपनो पाय रख्यो होतो वहां यहोशू न बारा गोटा खड़ो करायो; हि अज भी वहां हय।
JOS 4:10 जिन कामों ख करन की आज्ञा परमेश्वर न यहोशू को द्वारा इस्राएली लोगों ख दी होती, जब तक हि पूरी नहीं होय जाय तब तक वाचा को सन्दूक उठाय क लिजान वालो याजक यरदन नदी को बीच म खड़ो रह्यो, असीच आज्ञा मूसा न यहोशू ख दियो होतो। तब लोगों न फुर्ती सी नदी पार कर लियो।
JOS 4:11 अऊर जब सब लोग ओन पार उतर चुक्यो, तब याजक अऊर परमेश्वर को सन्दूक भी उन्को देखतो पार भय गयो।
JOS 4:12 अऊर रूबेनी, गादी, अऊर मनश्शे को अरधो कुल को लोग मूसा को कहन को अनुसार बच्यो इस्राएली लोगों को आगु हथियार बान्ध्यो हुयो पार गयो;
JOS 4:13 हि चालीस हजार आदमी युद्ध को हथियार बान्ध्यो हुयो युद्ध करन लायी परमेश्वर को सामने पार उतर क यरीहो को मैदान म पहुंच्यो।
JOS 4:14 ऊ दिन परमेश्वर न सब इस्राएलियों को सामने यहोशू की महिमा बढ़ायी; अऊर जसो हि मूसा को भय मानत होतो वसोच यहोशू को भी भय ओको जीवन भर मानतो रहे।
JOS 4:15 तब परमेश्वर न यहोशू सी कह्यो,
JOS 4:16 “वाचा को सन्दूक उठावन वालो याजकों ख आज्ञा दे कि यरदन म सी निकल आये।”
JOS 4:17 त यहोशू न याजकों ख आज्ञा दियो, “यरदन म सी निकल आवो।”
JOS 4:18 अऊर जसोच परमेश्वर की वाचा को सन्दूक उठावन वालो याजक यरदन नदी को बीच म सी निकल आयो, अऊर उन्को पाय सूखी जमीन पर पड़्यो, वसोच यरदन नदी को पानी अपनो जागा पर लौट आयो, अऊर पहले को जसो किनारा को ऊपर फिर बहन लग्यो।
JOS 4:19 पहिलो महिना को दसवों दिन ख प्रजा को लोगों न यरदन म सी निकल क यरीहो की पूर्व सीमा पर गिलगाल म अपनो डेरा डाल्यो।
JOS 4:20 अऊर जो बारा गोटा यरदन नदी म सी निकाल्यो होतो, उन्ख यहोशू न गिलगाल म खड़ो करयो।
JOS 4:21 तब ओन इस्राएली लोगों सी कह्यो, “जब भविष्य म तुम्हरो बाल-बच्चा अपनो-अपनो बाप सी यो पूछेंन, ‘हि गोटावों को का मतलब हय?’
JOS 4:22 तब तुम उन्ख यो बतावो, ‘यो यरदन ख हम इस्राएलियों न सूखी जमीन पर चल क पार करयो होतो।’
JOS 4:23 कहालीकि जसो तुम्हरो परमेश्वर यहोवा न लाल समुन्दर ख हमरो पार होय जान तक हमरो सामने सी हटाय क सुखाय दियो होतो, वसोच ओन यरदन नदी को भी पानी तुम्हरो पार होय जान तक तुम्हरो सामने सी हटाय क सुखाय दियो;
JOS 4:24 येकोलायी धरती को सब देशों को लोग जान ले कि परमेश्वर को हाथ सामर्थवान हय; अऊर तुम हमेशा परमेश्वर यहोवा को भय मानतो रहो।”
JOS 5:1 जब यरदन को पश्चिम को तरफ रहन वालो एमोरियों को सब राजावों न, अऊर समुन्दर को जवर रहन वालो कनानियों को सब राजावों न यो सुन्यो, कि परमेश्वर न इस्राएलियों ख पार होन तक उन्को सामने सी यरदन को पानी हटाय क सुखाय दियो हय, तब इस्राएलियों को डर को मारे उन राजावों को मन घबराय गयो, अऊर उन म हिम्मत नहीं रही।
JOS 5:2 ऊ समय परमेश्वर न यहोशू सी कह्यो, “चकमक गोटा की छुरियां बनाय क दूसरी बार इस्राएली लोगों को खतना कराय दे।”
JOS 5:3 तब यहोशू न चकमक गोटा की छुरियां बनाय क खतना नाम की पहाड़ी पर इस्राएली लोगों को खतना करायो।
JOS 5:4 अऊर यहोशू न जो खतना करायो, येको कारण यो हय, कि जितनो लड़ाई को लायक आदमी मिस्र सी निकल्यो होतो हि सब मिस्र सी निकलन पर जंगल को रस्ता म मर गयो होतो।
JOS 5:5 जो आदमी मिस्र देश सी निकल्यो होतो उन सब को त खतना भय गयो होतो, पर जितनो उन्को मिस्र देश सी निकलन को बाद जंगल को रस्ता म पैदा भयो होतो उन म सी कोयी को खतना नहीं भयो होतो।
JOS 5:6 कहालीकि जब तक इस्राएली जाति को लोग, मतलब जितनो लोग लड़ाई को लायक मिस्र देश सी निकल्यो होतो उन्की मृत्यु नहीं भयी, तब तक हि चालीस साल तक जंगल म फिरतो रह्यो, कहालीकि उन्न परमेश्वर की नहीं मानी होती; येकोलायी परमेश्वर न कसम खाय क उन्को सी कह्यो होतो, कि जो देश मय न तुम्हरो पूर्वजों सी कसम खाय क तुम्ख देन ख कह्यो होतो, अऊर उन म दूध अऊर शहेद की धाराये बहय हय, ऊ देश मय तुम्ख नहीं दिखाऊं।
JOS 5:7 त उन लोगों को टुरा जिन्ख परमेश्वर न उन्को जागा पर पैदा करयो होतो, उन्को खतना यहोशू न करयो, कहालीकि रस्ता म उन्को खतना नहीं होन को वजह हि खतनारहित होतो।
JOS 5:8 अऊर जब हि पूरी जाति को लोगों को खतना भय गयो, तब हि चंगो होय जान तक अपनो अपनो जागा पर डेरा म रह्यो।
JOS 5:9 तब परमेश्वर न यहोशू सी कह्यो, “तुम्हरी निन्दा जो मिस्रियों म भयी हय ओख मय न अज दूर करी हय।” यो वजह ऊ जागा को नाम अज को दिन तक गिलगाल पड़्यो हय।
JOS 5:10 येकोलायी इस्राएली गिलगाल म डेरा डाल्यो हुयो होतो, अऊर उन्न यरीहो को जवर को मैदान म महिना को चौदावों दिन शाम को समय फसह त्यौहार मनायो।
JOS 5:11 अऊर फसह को दूसरो दिन हि ऊ देश को फसल म सी अखमीरी रोटी अऊर उच दिन सी भूज्यो हुयो दाना भी खान लग्यो।
JOS 5:12 अऊर ऊ देश की फसल खान को बाद मन्ना गिरनो बन्द भय गयो; ऊ दिन को बाद इस्राएली लोगों ख फिर कभी मन्ना नहीं मिल्यो, पर ऊ साल उन्न कनान देश की फसल म सी खायो।
JOS 5:13 जब यहोशू यरीहो को जवर होतो तब ओन आंखी ऊपर उठायी, अऊर का देख्यो, कि हाथ म नंगी तलवार लियो हुयो एक आदमी सामने खड़ो हय; अऊर यहोशू न ओको जवर जाय क पुच्छ्यो, “का तय हमरो पक्ष को आय, यां हमरो बैरियों को पक्ष को?”
JOS 5:14 तब ओन उत्तर दियो, “नहीं; बल्की मय परमेश्वर की सेना को प्रधान होय क अभी आयो हय।” तब यहोशू न जमीन पर झुक क दण्डवत करयो, अऊर ओको सी कह्यो, “अपनो दास लायी मोरो प्रभु की का आज्ञा हय?”
JOS 5:15 परमेश्वर की सेना को प्रधान न यहोशू सी कह्यो, “अपनी चप्पल पाय सी उतार डाल, कहालीकि जो जागा पर तय खड़ो हय ऊ पवित्र हय।” तब यहोशू न वसोच करयो।
JOS 6:1 इस्राएली लोगों को वजह यरीहो नगर को फाटक बन्द कर दियो गयो होतो, कोयी भी नगर को अन्दर नहीं आय सकत होतो अऊर नहीं कोयी बाहेर जाय सकत होतो।
JOS 6:2 फिर परमेश्वर न यहोशू सी कह्यो, “देख मय यरीहो नगर ख ओको राजा अऊर योद्धावों समेत तोरो वश म कर देऊ हय।
JOS 6:3 येकोलायी तुम म जितनो योद्धा हय नगर ख घेर ले, अऊर ऊ नगर को चारयी तरफ दिन म एक बार चक्कर लगाये। अऊर छय दिन तक असोच करतो रहो।
JOS 6:4 अऊर सात याजक मेंढा को सींगो सी बन्यो सात नरसिंगा ले क सन्दूक को आगु आगु चलेंन; फिर सातवों दिन तुम नगर को चारयी तरफ सात बार घूमो, अऊर याजक भी नरसिंगा फूकतो चलेंन।
JOS 6:5 अऊर जब हि मेंढा को सींगो को नरसिंगा देर तक फूकतो रहेंन, तब सब लोग नरसिंगा को आवाज सुनतोच बड़ो आवाज सी जय जयकार करेंन; तब नगर की दीवाल नीव गिर जायेंन, अऊर सब लोग अपनी आंखी को सामने सीधो चलतो जाये।”
JOS 6:6 येकोलायी नून को टुरा यहोशू न याजकों ख बुलाय क कह्यो, “वाचा को सन्दूक ख उठाय लेवो, अऊर सात याजक परमेश्वर को सन्दूक को आगु आगु मेंढा को सींगो को सात नरसिंगा ले क चलेंन।”
JOS 6:7 फिर ओन इस्राएली लोगों सी कह्यो, “आगु बढ़ क नगर को चारयी तरफ घुम क आवो; अऊर हथियार लियो हुयो आदमी परमेश्वर को सन्दूक को आगु आगु चले।”
JOS 6:8 अऊर जब यहोशू या बाते लोगों सी कह्य चुक्यो, त हि सात याजक जो परमेश्वर को सामने सात नरसिंगा लियो हुयो होतो नरसिंगा फूकतो हुयो चले, अऊर याजक परमेश्वर की वाचा को सन्दूक ख ले क उन्को पीछु पीछु चल्यो।
JOS 6:9 अऊर हथियार लियो हुयो आदमी नरसिंगा फूकन वालो याजकों को आगु आगु चले, अऊर पीछु वालो सन्दूक को पीछु पीछु चले, अऊर याजक नरसिंगा फूकतो हुयो चले।
JOS 6:10 अऊर यहोशू न लोगों ख आज्ञा दी, “जब तक मय तुम्ख जय जयकार करन की आज्ञा नहीं देऊ, तब तक जय जयकार मत करो, अऊर नहीं तुम्हरो कोयी आवाज सुनन म आये, अऊर नहीं कोयी बात तुम्हरो मुंह सी निकलनो चाहिये; जब मय तुम्ख आज्ञा देऊ तब जय जयकार करो।”
JOS 6:11 ओन परमेश्वर को सन्दूक ख एक बार नगर को चारयी तरफ घुमवायो; तब हि छावनी म आयो, अऊर रात वहां बितायी।
JOS 6:12 यहोशू सुबेरे उठ्यो, अऊर याजकों न परमेश्वर को सन्दूक उठाय लियो।
JOS 6:13 अऊर उन सात याजकों न मेंढा को सींगो को सात नरसिंगा ले क परमेश्वर को सन्दूक को आगु आगु लगातार फूकतो हुयो चल रह्यो होतो; अऊर उन को आगु हथियार लियो हुयो आदमी चल रह्यो होतो, अऊर पीछु वालो परमेश्वर को सन्दूक को पीछु चल रह्यो होतो, अऊर याजक नरसिंगा फूकतो चली गयो।
JOS 6:14 यो तरह हि दूसरो दिन भी एक बार नगर को चारयी तरफ घुम क छावनी म लौट आयो। अऊर योच तरह उन्न छय दिन तक करयो।
JOS 6:15 फिर सातवों दिन भुन्सारो ख उठ क उच रीति सी नगर ख चारयी तरफ सात बार घुम्यो; केवल उच दिन हि सात बार घुम्यो।
JOS 6:16 तब सातवों बार याजक नरसिंगा फूक रह्यो होतो, तब यहोशू न लोगों सी कह्यो, “जय जयकार करो; कहालीकि परमेश्वर न यो नगर तुम्ख दे दियो हय।
JOS 6:17 अऊर नगर अऊर जो कुछ चिज ओको म हय परमेश्वर ख बलि को रूप म अर्पन कर क् पूरो तरह सी नाश कर दियो जायेंन; केवल राहब वेश्या अऊर जितनो ओको घर म होतो हि जीन्दो छोड़्यो जायेंन, कहालीकि ओन हमरो भेज्यो हुयो दूतों ख लूकाय क रख्यो होतो।
JOS 6:18 अऊर तुम नाशवान चिजों सी सावधानी सी अपनो आप ख अलग रखो, असो नहीं होय की नाश होन वाली की चिज ठहराय क बाद म वाच नाश होन वाली चिज म सी कुछ ले लेवो, अऊर यो तरह इस्राएली छावनी ख भ्रष्ट कर क् ओख संकट म डाल देवो।
JOS 6:19 सब चांदी, सोना, अऊर जो बर्तन पीतल अऊर लोहा को हय, हि परमेश्वर लायी पवित्र हय, अऊर ओकोच भण्डार म रख्यो जाय।”
JOS 6:20 तब लोगों न जय जयकार करयो, अऊर याजक नरसिंगा फूकतो रह्यो। अऊर जब लोगों न नरसिंगा को आवाज सुन्यो त फिर बड़ी आवाज सी उन्न जय जयकार करयो, तब नगर की दीवाल गिर गयी, अऊर लोग सीधो ऊ नगर म घुस गयो, अऊर नगर पर अधिकार कर लियो।
JOS 6:21 ओको बाद उन्न नगर को सब बाई, आदमी, जवान, बुजूर्ग, बईल, मेंढी अऊर गधा ख अर्पन की चिज जान क तलवार सी मार डाल्यो।
JOS 6:22 तब यहोशू न उन दोयी आदमियों सी जो ऊ देश म भेद लेन गयो होतो कह्यो, “अपनी कसम को अनुसार वा वेश्या को घर म जाय क ओख अऊर जो ओको घर म होना उन्ख भी निकाल लावो।”
JOS 6:23 तब हि दोयी जवान भेदी अन्दर जाय क राहब ख, अऊर ओको माय-बाप, भाऊवों, अऊर सब ख जो ओको घर म रहत होतो, बल्की ओको सब कुटुम्बियों ख निकाल लायो, अऊर इस्राएल की छावनी को बाहेर बैठाय दियो।
JOS 6:24 तब उन्न नगर ख अऊर जो कुछ ओको म होतो, सब ख आगी लगाय क जलाय दियो; केवल चांदी, सोना, अऊर जो बर्तन पीतल अऊर लोहा को होतो, उन्ख उन्न परमेश्वर को भवन को भण्डार म रख दियो।
JOS 6:25 अऊर यहोशू न राहब वेश्या अऊर ओको बाप को घराना ख, बल्की ओको सब लोगों ख जीन्दो छोड़ दियो; अऊर अज तक ओको वंश इस्राएलियों को बीच म रह्य हय, कहालीकि जो दूत यहोशू न यरीहो नगर को भेद लेन भेज्यो होतो उन्ख ओन लूकाय क रख्यो होतो।
JOS 6:26 फिर उच समय यहोशू न इस्राएलियों को सामने कसम दी, अऊर कह्यो, “जो आदमी उठ क यो नगर यरीहो ख फिर सी बनायेंन ऊ परमेश्वर को तरफ सी श्रापित होयेंन। “जब ऊ ओको पायवा डालेंन तब ओको बड़ो टुरा मरेंन; अऊर जब ऊ ओको फाटक लगायेंन तब ओको छोटो टुरा मर जायेंन।”
JOS 6:27 अऊर परमेश्वर यहोशू को संग रह्यो; अऊर यहोशू की कीर्ति ऊ पूरो देश म फैल गयी।
JOS 7:1 पर इस्राएलियों न भेंट की चिज को बारे म विश्वासघात करयो; मतलब यहूदा वंश को आकान, जो जेरहवंशी जब्दी को नाती अऊर कर्मी को टुरा होतो, ओन भेंट की चिजों म सी कुछ ले लियो; यो कारन परमेश्वर को कोप इस्राएलियों पर भड़क उठ्यो।
JOS 7:2 यहोशू न यरीहो सी ऐ नाम को नगर को जवर, जो बेतावेन सी लग्यो हुयो बेतेल को पूर्व को तरफ हय, कुछ आदमियों ख यो कह्य क भेज्यो, “जाय क ऊ देश को भेद ले क आवो।” अऊर उन आदमियों न जाय क ऐ नगर को भेद लियो।
JOS 7:3 अऊर उन्न यहोशू को जवर लौट क कह्यो, “सब लोगों ख वहां जान की जरूरत नहाय, केवल दोय यां तीन हजार लोग जाय क ऐ नगर ख जीत सकय हय; सब लोगों ख वहां जान लायी तकलीफ देन की जरूरत नहाय, कहालीकि हि लोग थोड़ोच हंय।”
JOS 7:4 येकोलायी इस्राएलियों को लगभग तीन हजार आदमी वहां गयो; पर उन्ख ऐ नगर को निवासियों को सामने सी भगनो पड़्यो,
JOS 7:5 तब ऐ नगर को रहन वालो न उन म सी छत्तीस आदमी ख मार डाल्यो, अऊर अपनी फाटक सी शबारीम तक उन्को पीछा कर क् खदानों तक उन्ख मारतो गयो। तब लोगों को मन पिघल क थंडो पड़ गयो।
JOS 7:6 तब यहोशू न पराजय को दु:ख प्रगट करन लायी अपनो कपड़ा फाड़्यो, ऊ शाम होन तक परमेश्वर की सन्दूक को सामने जमीन पर मुंह को बल गिर क पड़्यो रह्यो; असोच इस्राएली बुजूर्गों न भी करयो अऊर उन्न दु:ख प्रगट करन लायी अपनो मुंड पर धूल डाली।
JOS 7:7 अऊर यहोशू न कह्यो, “हाय, प्रभु परमेश्वर, तय अपनी या प्रजा ख यरदन नदी को येन पार कहाली लायो? का हम्ख एमोरियों को वश म कर क् नाश करन लायी लायो हय? भलो होतो कि हम सन्तुष्ट कर क् यरदन नदी को ओन पार रह्य जातो!
JOS 7:8 हाय, प्रभु मय का कहूं, जब इस्राएलियों न अपनो दुस्मनों ख पीठ दिखायी हय!
JOS 7:9 कहालीकि कनानी जाति बल्की यो देश को सब रहन वालो यो सुन क हम्ख घेर लेयेंन, अऊर हमरो नाम निशान कर क् धरती पर सी मिटाय डालेंन; फिर तय अपनो बड़ो नाम को लायी का करजो?”
JOS 7:10 परमेश्वर न यहोशू सी कह्यो, “उठ, खड़ो होय जा, तय कहाली यो तरह मुंह को बल जमीन पर पड़्यो हय?
JOS 7:11 इस्राएलियों न पाप करयो हय; अऊर जो वाचा मय न उन सी अपनो संग बान्धी होती ओख उन्न तोड़ दियो हय, उन्न भेंट की चिजों म सी ले लियो, बल्की चोरी भी करी अऊर छल कर क् ओख अपनो सामान म रख दियो हय।”
JOS 7:12 येकोलायी इस्राएली अपनो दुस्मनों को सामने खड़ो नहीं रह्य सकय; हि अपनो दुस्मनों ख पीठ दिखावय हय, येकोलायी हि खुद भेंट की चिज बन गयो हय। अऊर यदि तुम अपनो बीच म सी भेंट की चिज को सत्यानाश नहीं कर डालो, तब तक मय तोरो संग नहीं रहूं।
JOS 7:13 उठ, प्रजा को लोगों ख पवित्र कर, उन्को सी कह्य, सुबेरे तक अपनो आप ख पवित्र कर क् रखो; कहालीकि इस्राएल को परमेश्वर यहोवा यो कह्य हय, “हे इस्राएल, तोरो बीच म भेंट की चिज हय; येकोलायी जब तक तय भेंट की चिज ख अपनो बीच म सी दूर नहीं करय तब तक तय अपनो दुस्मनों को सामने खड़ो नहीं रह सकजो।”
JOS 7:14 येकोलायी सुबेरे तुम हर एक कुल को अनुसार जवर खड़ो करयो जावो; अऊर जो कुल ख परमेश्वर पकड़ेंन हि एक एक कुल कर क् जवर आये; अऊर जो कुल ख परमेश्वर पकड़ेंन ऊ परिवार एक एक परिवार कर क् जवर आये; फिर जो परिवार ख परमेश्वर पकड़ेंन हि एक एक आदमी कर क् जवर आये।
JOS 7:15 तब जो आदमी भेंट की चिज रख्यो हुयो पकड़्यो जायेंन, ऊ अऊर जो कुछ ओको होना सब आगी म डाल क जलाय दियो जायेंन; कहालीकि ओन परमेश्वर की वाचा ख तोड़्यो हय, अऊर इस्राएल म अनुचित काम करयो हय।
JOS 7:16 यहोशू सुबेरे उठ क इस्राएलियों ख कुल कुल कर क् जवर लायो, अऊर यहूदा को कुल पकड़्यो गयो;
JOS 7:17 तब ओन यहूदा को परिवार ख जवर लायो, अऊर जेरहवंशियों को कुल पकड़्यो गयो; फिर जेरहवंशियों को परिवारों को एक एक आदमी ख जवर लायो, अऊर जब्दी पकड़्यो गयो;
JOS 7:18 तब ओन ओको परिवारों को एक एक आदमी ख जवर खड़ो करयो, अऊर यहूदा कुल को आकान, जो जेरहवंशी जब्दी को नाती अऊर कर्मी को टुरा होतो, पकड़्यो गयो।
JOS 7:19 तब यहोशू आकान सी कहन लग्यो, “हे मोरो बेटा, इस्राएल को परमेश्वर यहोवा को आदर कर, अऊर ओको आगु कबूल कर; अऊर जो कुछ तय न करयो हय ऊ मोख बताय दे, अऊर मोरो सी कुछ मत छुपाय।”
JOS 7:20 आकान न यहोशू ख उत्तर दियो, “सचमुच मय न इस्राएल को परमेश्वर यहोवा को खिलाफ पाप करयो हय, अऊर यो तरह मय न करयो हय,
JOS 7:21 कि जब मोख लूट म शिनार देश को एक सुन्दर अंगरखा, अऊर दोय किलो चांदी, अऊर अरधो किलो सोनो को एक ईटा देख्यो होतो, तब मय न उन्को लालच कर क् उन्ख रख लियो; हि मोरो डेरा को अन्दर जमीन म गड़्यो हय, अऊर सब को खल्लो चांदी हय।”
JOS 7:22 तब यहोशू न कुछ दूत भेज्यो, अऊर हि ऊ डेरा म दौड़ क गयो; अऊर का देख्यो कि हि चिजे ओको डेरा म गड़्यो हय, अऊर सब को खल्लो चांदी हय।
JOS 7:23 उन्ख उन्न डेरा म सी निकाल क यहोशू अऊर सब इस्राएलियों को जवर लाय क परमेश्वर को सामने रख दियो।
JOS 7:24 तब सब इस्राएलियों समेत यहोशू जेरहवंशी आकान ख, अऊर वा चांदी अऊर अंगरखा अऊर सोनो की ईटा ख, अऊर ओको बेटा बेटियां ख, अऊर ओको बईलों, गधा अऊर मेंढियों को झुण्ड ख, अऊर ओको डेरा ख, मतलब जो कुछ ओको होतो उन सब ख आकोर नाम की घाटी म ले गयो।
JOS 7:25 तब यहोशू न आकान सी कह्यो, “तय न हम्ख कहाली तकलीफ दियो हय? अज को दिन परमेश्वर तोखच तकलीफ देयेंन।” तब सब इस्राएलियों न ओको पर पथराव कर क् मार डाल्यो; अऊर उन्ख आगी म डाल क जलायो, अऊर उन्को ऊपर गोटा डाल दियो।
JOS 7:26 अऊर उन्न ओको ऊपर गोटा को बड़ो ढेर लगाय दियो जो अज भी वहां हय; तब परमेश्वर को भड़क्यो हुयो कोप शान्त भय गयो। यो तरह ऊ जागा को नाम अज तक आकोर की घाटी पड़्यो हय।
JOS 8:1 तब परमेश्वर न यहोशू सी कह्यो, “मत डर, निराश मत हो; उठ कमर बान्ध क सब योद्धावों ख संग म ले, अऊर ऐ नगर पर चढ़ायी कर; सुन, मय न ऐ नगर को राजा ख ओकी प्रजा अऊर ओको नगर अऊर जमीन समेत तोरो अधिकार म सौंप दियो हय।
JOS 8:2 अऊर जसो तय न यरीहो अऊर ओको राजा को संग करयो वसोच ऐ नगर को राजा को संग भी करजो; केवल ऐ नगर को जनावरों अऊर सब सामान ख अपनो लायी लूट सको; येकोलायी ऐ नगर को पीछु को तरफ अपनो लोग आक्रमन करन लायी बिठाय देजो।”
JOS 8:3 यहोशू न सब सैनिकों समेत ऐ नगर पर चढ़ायी करन की तैयारी करी; अऊर यहोशू न तीस हजार शूरवीर सैनिक चुन क रात मच भेज दियो।
JOS 8:4 अऊर उन्ख या आज्ञा दी, “सुनो, तुम ऊ नगर को पीछु को तरफ आक्रमन करन लायी बैठ्यो रहो; नगर सी बहुत दूर मत जावो, अऊर सब को सब तैयार रहो;
JOS 8:5 अऊर मय अपनो सब संगियों समेत ऊ नगर को जवर जाऊं। अऊर जब हि पहले जसो हमरो सामना करन लायी निकलेंन, तब हम उन्को आगु सी भगबोंन;
JOS 8:6 तब हि यो सोच क, कि हि पहले को जसो हमरो सामने सी भाग रह्यो हय, हमरो पीछा करेंन; यो तरह हम उन्को सामने सी भाग क उन्ख नगर सी दूर निकाल ले जायबो;
JOS 8:7 तब तुम अपनो लूकन की जागा सी निकलजो अऊर नगर पर अधिकार कर लेजो; कहालीकि तुम्हरो परमेश्वर यहोवा ऊ नगर ख तुम्हरो अधिकार म कर देयेंन।
JOS 8:8 अऊर जब तुम नगर ख अपनो अधिकार म कर लेवो तब ओको म आगी लगाय क फूक देजो, परमेश्वर की आज्ञा को अनुसारच काम करो; सुनो, मय न तुम्ख आज्ञा दी हय।”
JOS 8:9 तब यहोशू न उन्ख भेज दियो; हि लूकन की जागा पर चली गयो, हि ऐ नगर को पश्चिम दिशा म अऊर बेतेल को बीच म लूक क बैठ गयो; पर यहोशू वा रात ख अपनो लोगों को बीच टिक्यो रह्यो।
JOS 8:10 यहोशू सुबेरे उठ्यो, अऊर लोगों की गिनती ले क इस्राएली बुजूर्ग लोगों समेत सैनिकों को आगु आगु ऐ नगर को तरफ गयो।
JOS 8:11 अऊर ओको संग को सब सैनिक आगु बड़्यो, अऊर ऐ नगर को जवर पहुंच क ओको सामने उत्तर को तरफ डेरा डाल दियो, अऊर उन्को अऊर ऐ नगर को बीच म एक घाटी होती।
JOS 8:12 तब यहोशू न लगभग पाच हजार आदमी चुन क बेतेल अऊर ऐ नगर को बीच म नगर को पश्चिम को तरफ लूकाय क बैठाय दियो।
JOS 8:13 अऊर सब लोगों न नगर को उत्तर दिशा को तरफ की पूरी सेना ख अऊर पश्चिम दिशा को तरफ घात म लूक क बैठ्यो हुयो ख भी अपनो अपनो डेरा म कर दियो, तब यहोशू वाच रात घाटी म रह्यो।
JOS 8:14 जब ऐ नगर को राजा न यो देख्यो, तब हि फुर्ती कर क् सुबेरे उठ्यो, अऊर राजा अपनी पूरी प्रजा ख ले क इस्राएलियों को सामने उन्को सी लड़न लायी यरदन की घाटी को तरफ गयो; अऊर ऊ नहीं जानत होतो कि नगर को पीछु को भाग म लोग घात लगायो बैठ्यो हय।
JOS 8:15 तब यहोशू अऊर सब इस्राएली लोग उन्को सी हार मान क जंगल को रस्ता ले क भाग निकल्यो।
JOS 8:16 तब नगर को सब लोग इस्राएलियों को पीछा करन लायी बुलायो गयो; अऊर हि यहोशू को पीछा करतो हुयो नगर सी दूर निकल गयो।
JOS 8:17 अऊर नहीं ऐ नगर म अऊर नहीं बेतेल म एक भी आदमी नहीं रह्यो, जो इस्राएलियों को पीछा करन लायी नहीं गयो होना; अऊर उन्न नगर ख खुलो छोड़ क इस्राएलियों को पीछा करयो।
JOS 8:18 तब परमेश्वर न यहोशू सी कह्यो, “अपनो हाथ को भाला सी ऐ नगर को तरफ इशारा कर; कहालीकि मय ओख तोरो हाथ म दे देऊं।” अऊर यहोशू न अपनो हाथ को भाला सी ऐ नगर को तरफ इशारा करयो।
JOS 8:19 जसोच यहोशू न अपनो हाथ ऊपर उठायो लूक क बैठ्यो हुयो सैनिक तुरतच अपनो जागा सी उठ्यो, अऊर दौड़ क नगर म सिरयो अऊर ओख अपनो अधिकार म कर लियो; अऊर तुरतच ओको म आगी लगाय दियो।
JOS 8:20 जब ऐ नगर को लोगों न पीछु पलट क देख्यो, कि नगर को धूगां आसमान को तरफ उठ रह्यो हय; उन्ख आगु-पीछु भगन को मौका भी नहीं मिल्यो, कहालीकि जंगल को तरफ भगन वालो इस्राएलियों न लौट क अपनो पीछा करन वालो पर आक्रमन कर दियो।
JOS 8:21 जब यहोशू अऊर सब इस्राएलियों न देख्यो कि घातियों न नगर पर अधिकार कर लियो हय, अऊर ओको धूगां उठ रह्यो हय, तब घुम क ऐ नगर को आदमियों ख मारन लग्यो।
JOS 8:22 अऊर उन्को सामना करन लायी दूसरो नगर सी भी लोग निकल आयो; येकोलायी हि इस्राएलियों को बीच म पड़ गयो, कुछ इस्राएली त उन्को आगु, अऊर कुछ उन्को पीछु होतो; उन्न उन्ख यहां तक मारयो कि उन म सी नहीं त कोयी बच्यो अऊर नहीं भग सक्यो।
JOS 8:23 अऊर ऐ नगर को राजा ख हि जीन्दो पकड़ क यहोशू को जवर लायो।
JOS 8:24 जब इस्राएली ऐ नगर को सब निवासियों ख मैदान म, मतलब ऊ जंगल म जहां उन्न उन्को पीछा करयो होतो मार डाल्यो, जब ऐ नगर को हर एक निवासी तलवार सी मारयो गयो, तब सब इस्राएलियों न ऐ नगर ख लौट क बच्यो हुयो निवासियों ख तलवार सी मार डाल्यो।
JOS 8:25 ऊ ऐ नगर कि जनसंख्या बारा हजार होती, ऊ दिन बाई अऊर आदमी सब मारयो गयो।
JOS 8:26 जो हाथ सी यहोशू भाला उठायो हुयो होतो, ओख तब तक ओन खल्लो नहीं करयो जब तक ऐ नगर को निवासियों ख पूरी तरह नाश नहीं कर दियो गयो।
JOS 8:27 परमेश्वर की वा आज्ञा को अनुसार जो ओन यहोशू ख दी होती इस्राएलियों न पशु अऊर नगर को सब सामान अपनो लायी लूट लियो।
JOS 8:28 तब यहोशू न ऐ नगर म आगी लगाय दियो, अऊर ओख हमेशा लायी खंडहर बनाय दियो : ऊ अज तक उजाड़ पड़्यो हय।
JOS 8:29 अऊर ऐ नगर को राजा ख ओन शाम तक झाड़ पर लटकाय दियो; अऊर सूर्य डुबतो समय यहोशू की आज्ञा सी ओको शव झाड़ पर सी उतार क नगर की फाटक को सामने डाल दियो गयो, अऊर ओको पर गोटावों को बड़ो ढेर लगाय दियो, जो अज तक बन्यो हय।
JOS 8:30 तब यहोशू न इस्राएल को परमेश्वर यहोवा को लायी एबाल पहाड़ी पर एक वेदी बनवायी,
JOS 8:31 जसो परमेश्वर को सेवक मूसा न इस्राएलियों ख आज्ञा दी होती, अऊर जसी मूसा की व्यवस्था की किताब म लिख्यो हय, ओन असो गोटावों ख ले क एक वेदी बनायी जेको पर कोयी भी तरह को अवजार को उपयोग नहीं करयो गयो होतो। अऊर ओको पर उन्न परमेश्वर लायी होमबलि अऊर मेलबलि चढ़ायो।
JOS 8:32 उच जागा पर यहोशू न इस्राएलियों को सामने उन गोटावों को ऊपर मूसा की व्यवस्था, जो ओन लिखी होती, ओकी नकल करायी।
JOS 8:33 अऊर हि देशी परदेशी, पूरो इस्राएली अपनो बुजूर्ग लोगों, सरदारों, अऊर न्यायियों समेत परमेश्वर को वाचा को सन्दूक उठावन वालो लेवी याजकों को सामने इत उत खड़ो भयो, मतलब अरधो लोग गिरिज्जीम पहाड़ी को, अऊर अरधो लोग एबाल पहाड़ी को सामने खड़ो भयो, जसो कि परमेश्वर को दास मूसा न पहले सी आज्ञा दी होती कि इस्राएली प्रजा ख आशीर्वाद दियो जाये।
JOS 8:34 ओको बाद यहोशू न आशीष अऊर श्राप की व्यवस्था को पूरो वचन, जसो व्यवस्था की किताब म लिख्यो हय वसोच पढ़ क सुनाय दियो।
JOS 8:35 जितनी बातों की मूसा न आज्ञा दी होती, उन म सी कोयी असी बात नहीं रही जो यहोशू न इस्राएल की पूरी सभा, अऊर बाईयों, अऊर बाल-बच्चां, अऊर उन्को संग रहन वालो परदेशी लोगों को सामने भी पढ़ क नहीं सुनायी गयी होना।
JOS 9:1 यो सुन क हित्ती, एमोरी, कनानी, परिज्जी, हिब्बी, अऊर यबूसी, जितनो राजा यरदन को येन पार पहाड़ी देश म अऊर खल्लो को देश म, अऊर लबानोन को सामने महासागर को किनार पर रहत होतो,
JOS 9:2 हि एक मन होय क यहोशू अऊर इस्राएलियों सी लड़न लायी जमा भयो।
JOS 9:3 जब गिबोन को निवासियों न ऊ सब सुन्यो कि जो यहोशू न यरीहो अऊर ऐ नगर को संग का का करयो हय,
JOS 9:4 उन्न भी चालाकी करी, अपनी यात्रा राजदूतों को रूप म शुरू करी, उन्न अपनो गधा पर फट्यो पुरानो बोरा, अऊर पुरानी फटी जोड़ लगी हुयी अंगूरीरस की कुप्पी बान्ध लियो
JOS 9:5 अऊर अपनो पाय म पुरानी चप्पल, अऊर पुरानो कपड़ा पहिन्यो, अऊर अपनो जेवन लायी बुर्सी लगी हुयी सूखी रोटी ले ली।
JOS 9:6 तब हि गिलगाल की छावनी म यहोशू को जवर जाय क ओको सी अऊर इस्राएली लोगों सी कहन लग्यो, “हम दूर देश सी आयो हय; येकोलायी अब तुम हम सी वाचा बान्धो।”
JOS 9:7 इस्राएली लोगों न उन हिब्बियों सी कह्यो, “होय सकय हय कि तुम हमरो बीच म रहत होना; फिर हम तुम सी वाचा कसो बान्धबो?”
JOS 9:8 उन्न यहोशू सी कह्यो, “हम तोरो दास आय।” तब यहोशू न उन्को सी कह्यो, “तुम कौन आय? अऊर कहां सी आयो हय?”
JOS 9:9 तब उन्न ओको सी कह्यो, “हम तोरो दास तोरो परमेश्वर यहोवा को नाम सुन क बहुत दूर देश सी आयो हय; जो कार्य ओन मिस्र देश म करयो हय, ओको बारे म हम न सुन्यो हय,
JOS 9:10 अऊर जो कुछ ओन एमोरियों को दोयी राजावों को संग करयो जो यरदन को ओन पार पूर्व दिशा म रहत होतो, हेशबोन को राजा सीहोन, अऊर बाशान को राजा ओग जो अश्तारोत म होतो।
JOS 9:11 येकोलायी हमरो यहां को बुजूर्ग लोगों न अऊर हमरो देश को निवासियों न हम सी कह्यो, कि रस्ता लायी अपनो संग भोजन को सामान ले क उन्को सी मिलन जावो, अऊर उन्को सी कहो, कि हम तुम्हरो दास आय; येकोलायी अब तुम हम सी वादा करो।
JOS 9:12 जो दिन हम तुम्हरो जवर आवन लायी निकल्यो ऊ दिन त हम न अपनो अपनो घर सी या रोटी गरम अऊर ताजी धरी होती; पर अब देखो, या रोटी सुख गयी हय अऊर येको म बुर्सी लग गयी हय।
JOS 9:13 फिर या जो अंगूरीरस कि कुप्पी हम न भर लियो होतो, तब त नयी होती, पर देखो अब हि फट गयी हय; अऊर हमरो यो कपड़ा अऊर चप्पल बड़ी लम्बी यात्रा को वजह पुरानी भय गयी हय।”
JOS 9:14 तब उन इस्राएल को लोगों न परमेश्वर सी बिना पुच्छ्यो उन्को जेवन म सी कुछ स्विकार करयो।
JOS 9:15 तब यहोशू न उन्को संग मेल कर क् उन्को सी वाचा बान्धी कि तुम्ख जीन्दो छोड़बो; अऊर मण्डली को मुखियावों न उन सी कसम खायी।
JOS 9:16 उन्को संग वाचा बान्धन को तीन दिन बाद उन्ख यो सन्देश मिल्यो, कि हि हमरो पड़ोस को रहन वालो लोग आय, अऊर हमरोच बीच म बस्यो हंय।
JOS 9:17 तब इस्राएली लोग निकल क तीसरो दिन उन्को नगरों ख गिबोन, कपीरा, बेरोत, अऊर किर्यत्यारीम म पहुंच गयो,
JOS 9:18 पर इस्राएलियों न उन्ख नहीं मारयो, कहालीकि मण्डली को मुखियावों न उन्को संग इस्राएल को परमेश्वर यहोवा की कसम खायी होती। तब पूरी मण्डली को लोग मुखियावों को खिलाफ कुड़कुड़ावन लग्यो।
JOS 9:19 तब सब मुखियावों न पूरी मण्डली को लोगों सी कह्यो, “हम न उन सी इस्राएल को परमेश्वर यहोवा की कसम खायी हय, येकोलायी अब हम उन्ख छुय नहीं सकजे।
JOS 9:20 हम उन सी योच काम करबो कि वा कसम को अनुसार हम उन्ख जीन्दो छोड़ देबो, नहीं त हमरी खायी हुयी कसम को वजह हम पर परमेश्वर को गुस्सा भड़क उठेंन।”
JOS 9:21 फिर मुखियावों न उन्को सी कह्यो, “हि जीन्दो छोड़्यो जाय।” पर मुखियावों को यो वचन को अनुसार हि पूरी मण्डली लायी लकड़ी काटेंन अऊर पानी भरेंन।
JOS 9:22 फिर यहोशू न गिबोन नगर को निवासियों ख बुलाय क कह्यो, “तुम त हमरो बीच म रह्य हय, फिर तुम न हम्ख धोखा कहाली दियो हय, कि हम तुम सी बहुत दूर रहजे हय?
JOS 9:23 येकोलायी अब तुम श्रापित हय, अऊर तुम म सी हर कोयी परमेश्वर को दास, अऊर मोरो परमेश्वर को भवन लायी लकड़ी काटन वालो अऊर पानी भरन वालो बनेंन।”
JOS 9:24 उन्न यहोशू ख उत्तर दियो, “तोरो दासों ख यो जरूरच बतायो गयो होतो, कि तोरो परमेश्वर यहोवा न अपनो दास मूसा ख आज्ञा दी होती कि तुम्ख ऊ पूरो देश दे, अऊर ओको पूरो निवासियों को तुम्हरो सामने सी सर्वनाश करे; येकोलायी हम लोगों ख तुम्हरो वजह हम्ख अपनो जीव को डर लग्यो, येकोलायी हम न असो काम करयो।
JOS 9:25 अऊर अब हम तोरो अधिकार म हय, जसो काम तोख अच्छो लगय हय, वसोच व्यवहार हमरो संग कर।”
JOS 9:26 तब यहोशू न उन्को सी वसोच करयो, अऊर उन्ख इस्राएलियों को हाथ सी असो बचायो, कि हि उन्ख मार नहीं सके।
JOS 9:27 पर यहोशू न उच दिन गिबोन को लोगों ख इस्राएल की मण्डली लायी, अऊर जो जागा परमेश्वर चुन लेयेंन ओको म ओकी वेदी लायी, लकड़ी काटन वालो अऊर पानी भरन वालो चुन लियो, वहां हि अज तक हय।
JOS 10:1 जब यरूशलेम को राजा अदोनीसेदक न सुन्यो कि यहोशू न ऐ नगर ख जीत लियो, अऊर ओको सत्यानाश कर डाल्यो हय, अऊर जसो ओन यरीहो नगर अऊर ओको राजा को संग करयो वसोच ऐ नगर अऊर ओको राजा को संग भी करयो हय, अऊर यो भी सुन्यो कि गिबोन को निवासियों न इस्राएलियों सी मेल करयो, अऊर उन्को बीच म रहन लग्यो हंय,
JOS 10:2 तब हि बहुत डर गयो, कहालीकि गिबोन बड़ो नगर बल्की राजधानी को समान अऊर ऐ नगर सी बड़ो होतो, अऊर ओको सब निवासी शूरवीर होतो।
JOS 10:3 येकोलायी यरूशलेम को राजा अदोनीसेदक न हेब्रोन को राजा होहाम, यर्मूत को राजा पिराम, लाकीश को राजा यापी, अऊर एग्लोन को राजा दबीर को जवर यो सन्देश भेज्यो :
JOS 10:4 “मोरो जवर आय क गिबोन नगर ख हरावन म मोरी मदत करो; कहालीकि ओन यहोशू अऊर इस्राएलियों सी मेल कर लियो हय।”
JOS 10:5 येकोलायी यरूशलेम, हेब्रोन, यर्मूत, लाकीश, अऊर एग्लोन को पाचयी एमोरी राजावों न अपनी अपनी पूरी सेना जमा कर क् चढ़ायी कर दी, अऊर गिबोन नगर को सामने डेरा डाल क ओको सी युद्ध छेड़ दियो।
JOS 10:6 तब गिबोन नगर को निवासियों न गिलगाल की छावनी म यहोशू को जवर यो सन्देश भेज्यो, “अपनो दासों को मुंड पर सी अपनो हाथ मत हटावों; तुरतच हमरो जवर आय क हम्ख बचाय ले, अऊर हमरी मदत कर; कहालीकि पहाड़ी पर रहन वालो एमोरी जाति को राजा हमरो खिलाफ जमा भयो हय।”
JOS 10:7 तब यहोशू पूरी सेना अऊर शक्तिशाली योद्धावों ख संग ले क गिलगाल सी निकल गयो।
JOS 10:8 अऊर परमेश्वर न यहोशू सी कह्यो, “उन्को सी मत डर, कहालीकि मय न उन्ख तोरो हाथ म सौप दियो हय; उन म सी एक भी आदमी तोरो सामने खड़ो नहीं रह्य सकेंन।”
JOS 10:9 तब यहोशू रातोंरात गिलगाल सी जाय क एकाएक उन पर हमला कर दियो।
JOS 10:10 तब परमेश्वर न असो करयो कि हि इस्राएलियों सी घबराय गयो, अऊर इस्राएलियों न गिबोन नगर म उन्ख बुरी तरह मारयो, अऊर बेथोरोन को चढ़ाव पर उन्को पीछा कर क् अजेका अऊर मक्केदा नगर तक उन्ख मारतो गयो।
JOS 10:11 फिर जब एमोरी इस्राएलियों को सामने सी भग क बेथोरोन को उतार पर आयो, तब अजेका पहुंचन तक परमेश्वर न आसमान सी बड़ी बड़ी गारगोटी उन पर बरसायी, अऊर हि मर गयो; जो गारगोटी सी मर गयो होतो उन्की गिनती इस्राएलियों की तलवार सी मारयो हुयो सी जादा होती।
JOS 10:12 ऊ समय, मतलब जो दिन परमेश्वर न एमोरियों ख इस्राएलियों को हाथ म सौंप दियो, ऊ दिन यहोशू न परमेश्वर सी इस्राएलियों को देखतो यो तरह कह्यो, “हे सूर्य, तय गिबोन पर, अऊर हे चन्दा, तय अय्यालोन की घाटी को ऊपर रुक्यो रह्य।”
JOS 10:13 अऊर सूर्य ऊ समय तक रुक्यो रह्यो, अऊर चन्दा ऊ समय तक हट्यो नहीं, जब तक ऊ जाति को लोगों न अपनो दुस्मनो सी बदला नहीं लियो। का या बात याशार की किताब म नहीं लिखी हय कि सूर्य आसमान को बीचोंबीच रुक्यो रह्यो, अऊर लगभग पूरो दिन नहीं डुब्यो?
JOS 10:14 नहीं त ओको सी पहले असो दिन भयो अऊर नहीं ओको बाद, जेको म परमेश्वर न कोयी आदमी की सुनी होना; कहालीकि परमेश्वर त इस्राएल को तरफ सी लड़त होतो।
JOS 10:15 तब यहोशू पूरो इस्राएलियों समेत गिलगाल की छावनी ख लौट गयो।
JOS 10:16 हि पाचयी राजा भग क मक्केदा को जवर की गुफा म लूक गयो।
JOS 10:17 तब यहोशू ख यो सन्देश मिल्यो, “पाचयी राजा मक्केदा को जवर की गुफा म लूक्यो हुयो हम्ख मिल्यो हय।”
JOS 10:18 यहोशू न कह्यो, “गुफा को दरवाजा पर बड़ो बड़ो गोटा लुढ़काय क उन पर पहरा देन लायी कुछ आदमियों ख बैठाय देवो;
JOS 10:19 पर तुम मत ठहरो, अपनो दुस्मनों को पीछा कर क् उन म सी जो जो पीछु रह्य गयो हय उन्ख मार डालो, उन्ख अपनो अपनो नगर म सिरन को अवसर मत देवो; कहालीकि तुम्हरो परमेश्वर यहोवा न उन्ख तुम्हरो हाथ म सौप दियो हय।”
JOS 10:20 जब यहोशू अऊर इस्राएली सैनिकों न दुस्मनों ख मार डाल्यो, अऊर उन म सी जो बच गयो हि गढ़ वालो नगर म घुस गयो,
JOS 10:21 तब सब लोग मक्केदा की छावनी म यहोशू को जवर सुरक्षित लौट आयो; अऊर इस्राएलियों को खिलाफ कोयी न मुंह सी एक शब्द भी नहीं निकाल्यो।
JOS 10:22 तब यहोशू न आज्ञा दी, “गुफा को दरवाजा खोल क उन पाचयी राजावों ख निकाल क मोरो जवर लावो।”
JOS 10:23 उन्न असोच करयो, अऊर यरूशलेम, हेब्रोन, यर्मूत, लाकीश, अऊर एग्लोन को उन पाचयी राजावों ख गुफा म सी निकाल क ओको जवर ले गयो।
JOS 10:24 जब हि उन राजावों ख यहोशू को जवर लायो, तब यहोशू न इस्राएल को सब लोगों ख बुलाय क अपनी सेना को अधिकारियों सी कह्यो, “जवर आय क अपनो अपनो पाय इन राजावों की गर्दन पर रखो।” अऊर उन्न जवर जाय क अपनो अपनो पाय उन्की गर्दनों पर रख्यो।
JOS 10:25 तब यहोशू न अधिकारी सी कह्यो, “मत डरो, तुम्हरो मन कच्चो नहीं होय; हिम्मत बान्ध क मजबूत हो; कहालीकि परमेश्वर तुम्हरो सब दुस्मनों सी जिन्कोसी तुम लड़ाई करो असोच व्यवहार करेंन।”
JOS 10:26 येको बाद यहोशू न उन पाच राजावों ख मार डाल्यो, अऊर पाच झाड़ो पर लटकाय दियो। अऊर हि शाम तक उन झाड़ो पर लटक्यो रह्यो।
JOS 10:27 सूरज डुबतो समय यहोशू सी आज्ञा पा क लोगों न उन शवों ख उन झाड़ो पर सी उतार क उच गुफा म रख्यो जहां हि लूक्यो होतो डाल दियो, अऊर ऊ गुफा को द्वार पर बड़ो बड़ो गोटा रख दियो, हि अज तक वहांच रख्यो हय।
JOS 10:28 उच दिन यहोशू न मक्केदा नगर ख हराय दियो, अऊर नगर को राजा अऊर ऊ नगर को लोगों ख तलवार सी मार डाल्यो; अऊर जितनो प्रानी ऊ नगर म होतो उन म सी कोयी ख भी जीन्दो नहीं छोड़्यो; अऊर जसो यहोशू न यरीहो को राजा को संग करयो होतो वसोच मक्केदा को राजा को संग भी करयो।
JOS 10:29 तब यहोशू सब इस्राएलियों को संग मक्केदा सी जाय क लिब्ना नगर ख पहुंच्यो, अऊर लिब्ना नगर सी लड़्यो;
JOS 10:30 अऊर परमेश्वर न लिब्ना नगर अऊर ओको राजा ख भी इस्राएलियों को हाथ म सौप दियो; अऊर यहोशू न नगर ख अऊर ओको म को सब प्रानियों ख तलवार सी मार डाल्यो; अऊर ओको म सी कोयी ख भी जीन्दो नहीं छोड़्यो; अऊर ओको राजा सी वसोच करयो जसो ओन यरीहो को राजा को संग करयो होतो।
JOS 10:31 फिर यहोशू सब इस्राएलियों को संग लिब्ना नगर सी चल क लाकीश नगर ख गयो, अऊर डेरा डाल क ओको खिलाफ युद्ध करयो;
JOS 10:32 अऊर परमेश्वर न लाकीश नगर ख इस्राएल को हाथ म सौंप दियो, अऊर दूसरो दिन ओन ओख जीत लियो; अऊर जसो ओन लिब्ना को सब प्रानियों ख तलवार सी मारयो होतो वसोच ओन लाकीश नगर सी भी करयो।
JOS 10:33 तब गेजेर नगर को राजा होराम लाकीश नगर की मदत करन आयो; अऊर यहोशू न सेना समेत ओख भी मारयो ओन ओको एक भी व्यक्ति जीन्दो नहीं छोड़्यो।
JOS 10:34 फिर यहोशू सब इस्राएलियों समेत लाकीश नगर सी चल क एग्लोन नगर ख गयो; अऊर डेरा डाल क ओको खिलाफ युद्ध करन लग्यो;
JOS 10:35 अऊर उच दिन उन्न ओको पर अधिकार कर लियो, अऊर ओको म रहन वालो सब प्रानियों ख तलवार सी मार डाल्यो; अऊर उच दिन जसो ओन लाकीश नगर को सब प्रानियों को सत्यानाश कर डाल्यो होतो वसोच ओन एग्लोन नगर सी भी करयो।
JOS 10:36 फिर यहोशू सब इस्राएलियों समेत एग्लोन नगर सी चल क हेब्रोन नगर ख गयो, अऊर ओको सी भी युद्ध करयो;
JOS 10:37 अऊर उन्न ओको पर भी अधिकार कर लियो, ओन ओको राजा अऊर ओको म रहन वालो सब प्रानियों ख तलवार सी मार डाल्यो, जसो यहोशू न एग्लोन नगर सी करयो होतो वसोच ओन हेब्रोन म भी कोयी ख जीन्दो नहीं छोड़्यो; ओन नगर ख अऊर ओको म को सब प्रानियों ख नाश कर डाल्यो।
JOS 10:38 तब यहोशू सब इस्राएलियों को संग दबीर नगर ख गयो, अऊर ओको सी युद्ध करन लग्यो;
JOS 10:39 अऊर ओको राजा अऊर ओको सब गांवो पर अधिकार कर लियो; अऊर उन्न उन्ख तलवार सी मार डाल्यो, अऊर जितनो प्रानी उन म होतो सब को सत्यानाश कर डाल्यो; कोयी ख जीन्दो नहीं छोड़्यो, जसो यहोशू न हेब्रोन अऊर लिब्ना अऊर ओको राजा को संग करयो होतो वसोच ओन दबीर अऊर ओको राजा को संग भी करयो।
JOS 10:40 यो तरह यहोशू न ऊ पूरो देश ख, मतलब पहाड़ी देश, दक्षिन देश, खल्लो को देश, अऊर ढलान को देश ख, ओको सब राजावों समेत मार डाल्यो; अऊर इस्राएल को परमेश्वर यहोवा की आज्ञा को अनुसार कोयी ख जीन्दो नहीं छोड़्यो, बल्की जितनो प्रानी होतो सब को सत्यानाश कर डाल्यो।
JOS 10:41 अऊर यहोशू न दक्षिन को कादेशबर्ने नगर सी अज्जा नगर तक, अऊर गोशेन देश सी उत्तर को गिबोन नगर तक को लोगों ख मार डाल्यो।
JOS 10:42 इन सब राजावों ख ओको देशों समेत यहोशू न एकच समय म अधिकार कर लियो, कहालीकि इस्राएल को परमेश्वर यहोवा इस्राएलियों को तरफ सी लड़त होतो।
JOS 10:43 तब यहोशू सब इस्राएलियों को संग गिलगाल की छावनी म लौट आयो।
JOS 11:1 यो सुन क हासोर को राजा याबीन न मादोन नगर को राजा योबाब, अऊर शिम्रोन नगर अऊर अक्षाप नगर को राजा ख,
JOS 11:2 अऊर जो जो राजा उत्तर को तरफ पहाड़ी देश म, अऊर किन्नेरेत को दक्षिन को अराबा म, अऊर खल्लो को देश म, अऊर पश्चिम को तरफ दोर नगर को ऊंचो देश म रहत होतो, उन्ख,
JOS 11:3 अऊर पूर्व अऊर पश्चिम दोयी तरफ को रहन वालो कनानियों, अऊर एमोरियों, हित्तियों, परिज्जियों, अऊर पहाड़ी यबूसियों, अऊर मिस्पा देश म हेर्मोन पहाड़ी को खल्लो रहन वालो हिब्बियों ख सन्देश भेज्यो।
JOS 11:4 अऊर हि अपनी अपनी सेना समेत, जो समुन्दर को किनार की रेतु को कन को समान बहुत होतो, मिल क नगरों सी निकल आयो, अऊर उन्को संग बहुत सो घोड़ा अऊर रथ भी होतो।
JOS 11:5 तब हि सब राजा सम्मति कर क् जमा भयो, अऊर इस्राएलियों सी लड़न ख मेरोम नाम को तलाव को जवर आय क एक संग डेरा डाल्यो।
JOS 11:6 तब परमेश्वर न यहोशू सी कह्यो, “उन सी मत डरो, कहालीकि कल योच समय मय उन सब ख इस्राएलियों को हाथ म सौप क मरवाय डालूं; तब तय उन्को घोड़ा को घुटना की नस कटवायजो, अऊर उन्को रथ जलाय क भस्म कर देजो।”
JOS 11:7 अऊर यहोशू सब सैनिकों को संग मेरोम नाम को तलाव को जवर पहुंच क अचानक उन पर टूट पड़्यो।
JOS 11:8 अऊर परमेश्वर न उन्ख इस्राएलियों को हाथ म सौंप दियो, येकोलायी उन्न उन्ख मार डाल्यो, अऊर बड़ो नगर सीदोन अऊर मिस्रपोतमैम तक, अऊर पूर्व को तरफ मिस्पा को मैदान तक उन्को पीछा करयो; अऊर उन्ख मारयो, अऊर उन म सी कोयी ख जीन्दो नहीं छोड़्यो।
JOS 11:9 तब यहोशू न परमेश्वर की आज्ञा को अनुसार उन्को संग वसोच करयो, मतलब उन्को घोड़ा की घुटना की नस कटवायी, अऊर उन्को रथ आगी म जलाय क भस्म कर दियो।
JOS 11:10 ऊ समय यहोशू न हासोर नगर ख जो पहले उन सब राज्यो म मुख्य नगर होतो अधिकार कर लियो, अऊर ओको राजा ख तलवार सी मार डाल्यो।
JOS 11:11 अऊर जितनो प्रानी ओको म होतो उन सब ख उन्न तलवार सी मार क नाश कर दियो; अऊर कोयी प्रानी ख जीन्दो नहीं छोड़्यो, अऊर हासोर ख यहोशू न आगी लगाय क फुंकवाय दियो।
JOS 11:12 अऊर उन सब नगरों ख अऊर ओको सब राजावों समेत यहोशू न अधिकार कर लियो, अऊर परमेश्वर को सेवक मूसा की आज्ञा को अनुसार उन्ख तलवार सी मार क नाश कर दियो।
JOS 11:13 पर हासोर नगर ख छोड़ क, जेक यहोशू न जलाय दियो होतो, इस्राएलियों न अऊर कोयी नगर ख जो पहाड़ी पर बस्यो होतो नहीं जलायो।
JOS 11:14 अऊर उन नगरों को जनावर अऊर उन्की पूरी लूट की सम्पत्ति ख इस्राएलियों न अपनो जवर रख लियो; पर आदमियों ख उन्न तलवार सी मार डाल्यो, यहां तक उन्को सत्यानाश कर दियो कि एक भी प्रानी जीन्दो नहीं छोड़्यो गयो।
JOS 11:15 जो आज्ञा परमेश्वर न अपनो दास मूसा ख दी होती ओकोच अनुसार मूसा न यहोशू ख आज्ञा दी, अऊर ठीक वसोच यहोशू न भी करयो; जो जो आज्ञा परमेश्वर न मूसा ख दी होती उन म सी यहोशू न कोयी भी आज्ञा पूरी करयो बिना नहीं छोड़्यो।
JOS 11:16 तब यहोशू न ऊ पूरो देश ख, मतलब पहाड़ी देश, अऊर पूरो दक्षिन देश, अऊर गोशेन देश, अऊर खल्लो को जमीन देश, यरदन घाटी, अऊर इस्राएल को पहाड़ी देश, अऊर उन्को खल्लो वालो देश ख,
JOS 11:17 हालाक नाम की पहाड़ी सी ले क, जो सेईर की चढ़ायी पर हय, बालगाद नगर तक, जो लबानोन को मैदान म हेर्मोन पहाड़ी को खल्लो, जितनो देश हय जीत लियो अऊर उन देशों को पूरो राजावों ख पकड़ क मार डाल्यो।
JOS 11:18 उन सब राजावों सी लड़ाई करत करत यहोशू ख बहुत दिन लग गयो।
JOS 11:19 गिबोन को निवासी हिब्बियों ख छोड़ क अऊर कोयी नगर को लोगों न इस्राएलियों सी मेल-मिलाप नहीं करयो; अऊर सब नगरों ख उन्न युद्ध कर क् जीत लियो।
JOS 11:20 कहालीकि परमेश्वर की जो मनसा होती, कि अपनी वा आज्ञा को अनुसार जो ओन मूसा ख दी होती उन पर कुछ भी दया नहीं करे, बल्की सत्यानाश कर डाले, यो वजह ओन उन्को मन असो कठोर कर दियो, कि उन्न इस्राएलियों को सामना कर क् उन सी युद्ध करयो।
JOS 11:21 ऊ समय यहोशू न पहाड़ी देश म आय क हेब्रोन, दबीर, अनाब, यहूदा अऊर इस्राएल दोयी को पूरो पहाड़ी देश म रहन वालो अनाकियों ख नाश कर दियो; यहोशू न नगरों समेत उन्को सत्यानाश कर डाल्यो।
JOS 11:22 इस्राएलियों को देश म कोयी अनाकी व्यक्ति नहीं रह्य गयो; केवल अज्जा, गत, अऊर अशदोद नगर म कोयी कोयी रह्य गयो।
JOS 11:23 जसो परमेश्वर न मूसा सी कह्यो होतो, वसोच यहोशू न ऊ पूरो देश पर अधिकार कर लियो; अऊर ओख इस्राएल को गोत्रों अऊर कुलों को अनुसार बाट क उन्ख दे दियो। अऊर तब युद्ध को बाद देश ख शान्ति मिली।
JOS 12:1 यरदन नदी को ओन पार पूर्व दिशा को तरफ, मतलब अर्नोन घाटी सी ले क हेर्मोन पहाड़ी तक को देश, अऊर पूरो पूर्व अराबा को जिन राजावों ख इस्राएलियों न मार क उन्को देश ख अपनो अधिकार म कर लियो होतो हि यो आय :
JOS 12:2 एमोरियों को हेशबोन नगर को राजा सीहोन, जो अर्नोन घाटी को किनार को अरोएर नगर सी ले क, अऊर उच घाटी को बीच को नगर ख छोड़ क यब्बोक नदी तक, जो अम्मोनियों कि सीमा हय, अरधो गिलाद को बराबर होतो,
JOS 12:3 अऊर किन्नेरेत नाम को तलाव सी ले क बेत्यशीमोत सी होय क अराबा को तलाव तक; जो खारो तलाव भी कहलावय हय, पूर्व को तरफ को अराबा, अऊर दक्षिन को तरफ पिसगा को ढलान को खल्लो को देश पर शासन करत होतो।
JOS 12:4 फिर बच्यो हुयो रपाई जाती म सी बाशान देश को राजा ओग को देश होतो, जो अश्तारोत अऊर एद्रेई नगर म रह्यो करत होतो,
JOS 12:5 अऊर हेर्मोन पहाड़ी, सल्का, अऊर गशूरियों, अऊर माकियों की सीमा तक कुल बाशान देश म, अऊर हेशबोन को राजा सीहोन की सीमा तक अरधो गिलाद देश म भी शासन करत होतो।
JOS 12:6 इस्राएलियों अऊर परमेश्वर को दास मूसा न इन ख मार डाल्यो; अऊर परमेश्वर को सेवक मूसा न इन्को देश रूबेनियों अऊर गादियों अऊर मनश्शे को अरधो गोत्र को लोगों ख दे दियो।
JOS 12:7 यरदन नदी को पश्चिम को तरफ, लबानोन को मैदान म को बालगाद नगर सी ले क सेईर की चढ़ायी को हालाक पहाड़ी तक को देश को जिन राजावों ख यहोशू अऊर इस्राएलियों न मार क उन्को देश इस्राएलियों ख गोत्रों अऊर कुलों को अनुसार भाग कर क् दे दियो होतो हि यो आय :
JOS 12:8 हित्ती, एमोरी, कनानी, परिज्जी, हिब्बी, यबूसी जाती, जो पहाड़ी देश म, खल्लो को देश म, अराबा म, ढलान देश म, जंगल म, अऊर दक्षिन देश म रहत होती।
JOS 12:9 एक, यरीहो को राजा; एक, बेतेल को जवर ऐ नगर को राजा;
JOS 12:10 एक, यरूशलेम को राजा; एक, हेब्रोन को राजा;
JOS 12:11 एक, यर्मूत को राजा; एक, लाकीश को राजा;
JOS 12:12 एक, एग्लोन को राजा; एक, मेजेर को राजा;
JOS 12:13 एक, दबीर को राजा; एक, गेदेर को राजा;
JOS 12:14 एक, होर्मा को राजा; एक, अराद को राजा;
JOS 12:15 एक, लिब्ना को राजा; एक, अदुल्लाम को राजा;
JOS 12:16 एक, मक्केदा को राजा; एक, बेतेल को राजा;
JOS 12:17 एक, तप्पूह को राजा; एक, हेपेर को राजा;
JOS 12:18 एक, अपेक को राजा; एक, लश्शारोन को राजा;
JOS 12:19 एक, मादोन को राजा; एक, हासोर को राजा;
JOS 12:20 एक, शिम्रोन्मरोन को राजा; एक, अक्षाप को राजा;
JOS 12:21 एक, तानाक को राजा; एक, मगिद्दो को राजा;
JOS 12:22 एक, केदेश को राजा; एक, कर्मेल म को योकनाम को राजा;
JOS 12:23 एक, दोर नाम को ऊंचो देश म को दोर को राजा; एक, गिलगाल म को गोयीम को राजा;
JOS 12:24 अऊर एक, तिर्सा को राजा हय; यो तरह सब राजा येकतीस भयो।
JOS 13:1 यहोशू बूढ्ढा अऊर बहुत उमर को भय गयो होतो; अऊर परमेश्वर न ओको सी कह्यो, “तय बूढ्ढा अऊर बहुत उमर को भय गयो हय, अऊर बहुत देश रह्य गयो हंय, जो इस्राएल को अधिकार म अभी तक नहीं आयो।
JOS 13:2 यो देश रह्य गयो हय, पलिश्तियों को पूरो प्रान्त, अऊर पूरो गशूरी देश
JOS 13:3 मिस्र देश को आगु शीहोर नदी सी ले क उत्तर को तरफ एक्रोन नगर की सीमा तक जो कनानियों को भाग गिन्यो जावय हय; अऊर पलिश्तियों को पाचों सरदार, मतलब अज्जा, अशदोद, अशकलोन, गत, अऊर एक्रोन को लोग, अऊर दक्षिन को तरफ अव्वी जाती भी,
JOS 13:4 फिर अपेक नगर अऊर एमोरियों की सीमा तक कनानियों को पूरो देश, अऊर सीदोनियों को मारा नाम को देश,
JOS 13:5 फिर गवालियों को देश, अऊर पूर्व को तरफ हेर्मोन पहाड़ी को खल्लो को बालगाद नगर सी ले क हमात की घाटी तक पूरो लबानोन प्रदेश,
JOS 13:6 फिर लबानोन प्रदेश सी ले क मिस्रपोतमैम तक सीदोनियों को पहाड़ी देश को निवासी। इन ख मय इस्राएलियों को सामने सी निकाल देऊं; इतनो होय कि तय मोरी आज्ञा को अनुसार उन्को अधिकार इस्राएलियों को बीच म बाट दे।
JOS 13:7 येकोलायी तय अब यो देश ख नव गोत्रों अऊर मनश्शे को अरधो गोत्र ख उन्को हिस्सा होन लायी बाट दे।”
JOS 13:8 रूबेनियों अऊर गादियों ख त ऊ हिस्सा मिल चुक्यो होतो, जेक मूसा न उन्ख यरदन नदी को पूर्व को तरफ दियो होतो, कहालीकि परमेश्वर को सेवक न यो उन्खच दियो होतो,
JOS 13:9 मतलब अर्नोन नाम की घाटी को किनार को अरोएर नगर सी ले क, अऊर उच घाटी को बीच को नगर ख छोड़ क दीबोन नगर तक मेदबा को जवर को पूरो चौरस देश;
JOS 13:10 अऊर अम्मोनियों की सीमा तक हेशबोन म रहन वालो एमोरियों को राजा सीहोन को पूरो नगर;
JOS 13:11 अऊर गिलाद देश, अऊर गशूरियों अऊर माकावासियों की सीमा, अऊर पूरो हेर्मोन पहाड़ी, अऊर सल्का नगर तक पूरो बाशान प्रदेश,
JOS 13:12 फिर अश्तारोत अऊर एद्रेई नगर म रहन वालो ऊ ओग को पूरो राज्य जो रपाई जाती म सी अकेलो बच गयो होतो; कहालीकि इन ख मूसा न मार क उन्की प्रजा ख ऊ देश सी निकाल दियो होतो।
JOS 13:13 पर इस्राएलियों न गशूरियों अऊर माकियों ख उन्को देश सी नहीं निकाल्यो; येकोलायी गशूरी अऊर माकी जाती इस्राएलियों को बीच म अज तक रह्य हय।
JOS 13:14 अऊर लेवी को कुल ख मूसा न कोयी हिस्सा नहीं दियो; कहालीकि इस्राएल को परमेश्वर यहोवा को वचन को अनुसार ओकीच चढ़ायी हुयी होमबलि बलि की भेंट उन्को लायी हिस्सा ठहरी हय।
JOS 13:15 मूसा न जमीन को हिस्सा रूबेन को वंश ख उन्को परिवार ख बाट दियो होतो,
JOS 13:16 मतलब अर्नोन नाम की घाटी को किनार को अरोएर नगर सी ले क अऊर उच घाटी को बीच को नगर ख छोड़ क मेदबा को जवर को पूरो चौरस देश;
JOS 13:17 फिर चौरस देश म को हेशबोन अऊर ओको सब गांव; फिर दीबोन, बामोतबाल, बेतबाल्मोन,
JOS 13:18 यहसा, कदेमोत, मेपात,
JOS 13:19 किर्यातैम, सिबमा, अऊर घाटी म की पहाड़ी पर बस्यो हुयो सेरेथश्शहर,
JOS 13:20 बेतपोर, पिसगा पहाड़ी की ढलान अऊर बेत्यशीमोत,
JOS 13:21 मतलब चौरस देश म बस्यो हुयो हेशबोन म रहन वालो एमोरियों को ऊ राजा सीहोन को राज्य को पूरो नगर जिन्ख मूसा न मार लियो होतो। मूसा न एवी, रेकेम, सूर, हूर, अऊर रेबा नाम को मिद्दानी जाती को मुखियावों ख भी मार डाल्यो होतो जो सीहोन को ठहरायो हुयो शासक अऊर उच देश को निवासी होतो।
JOS 13:22 अऊर इस्राएलियों न उन्को अऊर मारयो हुयो व्यक्तियों को संग बोर को टुरा भविष्य बतावन वालो बिलाम ख भी तलवार सी मार डाल्यो।
JOS 13:23 अऊर रूबेनियों की सीमा यरदन नदी को किनार होतो। रूबेनियों को हिस्सा उन्को वंशों अऊर कुलों को अनुसार योच नगर अऊर गांव उन्को हिस्सा होतो।
JOS 13:24 फिर मूसा न गाद को वंशों ख भी कुलों को अनुसार उन्को हिस्सा कर क् बाट दियो।
JOS 13:25 तब यो ठहरयो, मतलब याजेर या गिलाद प्रदेश को पूरो नगर, अऊर रब्बा नगर को सामने को अरोएर नगर तक अम्मोनियों को अरधो देश,
JOS 13:26 अऊर हेशबोन नगर सी रामतमिस्पे अऊर बतोनीम् तक, अऊर महनैम सी दबीर की सीमा तक,
JOS 13:27 अऊर घाटी म बेथारम, बेतनिम्रा, सुक्कोत, अऊर सापोन अऊर हेशबोन नगर को राजा सीहोन को राज्य को बच्यो हुयो हिस्सा, अऊर किन्नेरेत नाम को तलाव को किनार तक, यरदन नदी को पूर्व को तरफ को ऊ देश जेकी सीमा यरदन हय।
JOS 13:28 गादी लोगों को हिस्सा उन्को कुलों को अनुसार नगरों अऊर गांवो समेत यहांच रूक गयो।
JOS 13:29 फिर मूसा न मनश्शे को अरधो कुलों ख भी उन्को निजी हिस्सा कर क् दियो; ऊ मनश्शे को अरधो कुल को निजी हिस्सा उन्को कुलों को अनुसार ठहरयो।
JOS 13:30 ऊ यो आय, मतलब महनैम सी ले क बाशान प्रदेश को राजा ओग को राज्य को पूरो देश, अऊर बाशान प्रदेश म बसी हुयी याईर की साठ बस्तियां,
JOS 13:31 अऊर गिलाद को अरधो हिस्सा, अऊर अश्तारोत, अऊर एद्रेई, जो बाशान म ओग को राज्य को नगर होतो, हि मनश्शे को टुरा माकीर को वंश को, मतलब माकीर को अरधो वंश को निजी हिस्सा कुलों को अनुसार बाट दियो गयो।
JOS 13:32 जो हिस्सा मूसा न मोआब को मैदान म यरीहो को जवर को यरदन नदी को पूर्व को तरफ बाट दियो हि योच आय।
JOS 13:33 पर लेवी को गोत्र ख मूसा न कोयी हिस्सा नहीं दियो; इस्राएल को परमेश्वर यहोवाच अपनो वचन को अनुसार उन्को हिस्सा ठहरयो।
JOS 14:1 जो जो हिस्सा इस्राएलियों ख कनान देश म मिल्यो, जिन्ख एलीआजार याजक, अऊर नून को टुरा यहोशू, अऊर इस्राएली गोत्र को पूर्वजों को घराना को मुख्य मुख्य आदमियों न उन्ख दियो हि यो आय।
JOS 14:2 जो आज्ञा परमेश्वर न मूसा को द्वारा साढ़े नव गोत्रों लायी दी होती, उन्को अनुसार उन्को हिस्सा चिट्ठी डाल क दियो गयो।
JOS 14:3 मूसा न त ढायी गोत्रों को हिस्सा यरदन को पार दियो होतो; पर लेवियों ख ओन उन्को संग कोयी हिस्सा नहीं दियो होतो।
JOS 14:4 यूसुफ को वंश को दोय गोत्र होतो, मतलब मनश्शे अऊर एप्रैम; अऊर ऊ देश म लेवियों ख कुछ हिस्सा नहीं दियो गयो, केवल रहन लायी नगर, अऊर जनावर अऊर धन रखन लायी चराइयां उन्ख दी गयी।
JOS 14:5 जो आज्ञा परमेश्वर न मूसा ख दी होती ओको अनुसार इस्राएलियों न करयो; अऊर उन्न देश ख बाट लियो।
JOS 14:6 तब यहूदी लोग यहोशू को जवर गिलगाल म आयो; अऊर कनजी यपुन्ने को टुरा कालेब न ओको सी कह्यो, “तय जानत होना कि परमेश्वर न कादेशबर्ने म परमेश्वर को सेवक मूसा सी मोरो अऊर तोरो बारे म का कह्यो होतो।
JOS 14:7 जब परमेश्वर को दास मूसा न मोख यो देश को भेद लेन लायी कादेशबर्ने सी भेज्यो होतो तब मय चालीस साल को होतो; अऊर मय सच्चो मन सी ओको जवर सन्देश ले क आयो।
JOS 14:8 अऊर मोरो संगी जो मोरो संग गयो होतो उन्न त प्रजा को लोगों को मन निराश कर दियो, पर मय न अपनो परमेश्वर यहोवा की पूरी रीति सी बात मानी।
JOS 14:9 तब ऊ दिन मूसा न कसम खाय क मोरो सी कह्यो, ‘तय न पूरी रीति सी मोरो परमेश्वर यहोवा की बातों को अनुसरन करयो हय, यो तरह बिना सक जो जमीन पर तय पाय रख्यो हय ऊ हमेशा लायी तोरो अऊर तोरो वंश को हिस्सा होयेंन।’
JOS 14:10 अऊर अब देख, जब परमेश्वर न मूसा सी यो वचन कह्यो होतो तब सी पैतालीस साल भय गयो हय, जिन म इस्राएली लोग जंगल म भटकतो रह्यो; उन म परमेश्वर न अपनो वादा को अनुसार मोख जीन्दो रख्यो हय; अऊर अब मय पच्यासी साल को हय।
JOS 14:11 जितनी शक्ति मूसा को भेजन को दिन मोरो म होती उतनी शक्ति अभी भी मोरो म हय; युद्ध करन, यां बाहेर आन-जान लायी जितनी शक्ति ऊ समय होती उतनीच शक्ति अभी भी मोरो म हय।
JOS 14:12 येकोलायी अब ऊ पहाड़ी देश मोख दे जेकी चर्चा परमेश्वर न ऊ दिन करी होती; तय न त ऊ दिन सुन्यो होना कि ओको म अनक वंशी रह्य हंय, अऊर बड़ो बड़ो गढ़ वालो नगर भी हय; यदि परमेश्वर मोरो संग रहे, त ओकी प्रतिज्ञा को अनुसार मय उन्ख उन्को देश सी निकाल देऊं।”
JOS 14:13 तब यहोशू न ओख आशीर्वाद दियो; अऊर हेब्रोन नगर यपुन्ने को टुरा कालेब ख हिस्सा दे दियो।
JOS 14:14 यो वजह हेब्रोन नगर कनजी यपुन्ने को टुरा कालेब को हिस्सा अज तक बन्यो हय, कहालीकि इस्राएल को परमेश्वर यहोवा को पूरी रीति सी अनुसरन करयो होतो।
JOS 14:15 पहले हेब्रोन नगर को नाम किर्यतर्बा होतो; ऊ अर्बा नाम को व्यक्ति अनाकियों म सब सी बड़ो आदमी होतो। अऊर युद्ध खतम होन को बाद ऊ देश ख शान्ति मिली।
JOS 15:1 यहूदा कुल को लोगों ख उन्को परिवारों की संख्या को अनुसार चिट्ठी डालन पर एदोम की सीमा मिली, जो दक्षिन को तरफ सीन को जंगल तक दक्षिन सीमा पर हय।
JOS 15:2 उन्को भाग की दक्षिनी सीमा मृत सागर को छोर सी सुरूवात भयी जो दक्षिन को तरफ बढ़य हय;
JOS 15:3 अऊर अक्रबीम नाम की चढ़ायी को दक्षिन को तरफ सी निकल क सीन होतो हुयो कादेशबर्ने को दक्षिन को तरफ पहुंच गयी, फिर हेस्रोन को जवर सी अद्दार ख पहुंच क कर्का को तरफ मुड़ गयी,
JOS 15:4 वहां सी अम्मोन होतो हुयो वा मिस्र को नाला पर निकली, अऊर वा सीमा को अन्त भूमध्यसागर भयो। यो यहूदा कुल की दक्षिनी सीमा होती।
JOS 15:5 फिर पूर्व दिशा की सीमा को किनार तक खारो तलाव हय, अऊर उत्तर दिशा की सीमा यरदन को किनार को जवर को तलाव की खाड़ी सी शुरू कर क्,
JOS 15:6 बेथोग्ला ख चढ़तो हुयो बेतराबा की उत्तर को तरफ होय क रूबेन को टुरा बोहन नाम की चट्टान तक चली गयी;
JOS 15:7 अऊर वाच सीमा आकोर नाम की घाटी सी दबीर को तरफ पहुंची, अऊर उत्तर दिशा होतो हुयो गिलगाल को तरफ मुड़ी जो घाटी को दक्षिन को तरफ को अदुम्मीम की चढ़ायी को सामने हय; वहां सी वा एनशेमेश नाम को झरना को जवर पहुंच क एनरोगेल घाटी पर निकली;
JOS 15:8 फिर वाच सीमा बेन-हिन्नोम घाटी सी होय क यबूस जो यरूशलेम कहलावय हय अऊर दक्षिन को तरफ सी चढ़ती हुयी वा पहाड़ी की ऊचायी पर पहुंची, जो पश्चिम को तरफ हिन्नोम की घाटी को सामने अऊर रपाईम की घाटी को उत्तर वालो आखरी छोर पर हय;
JOS 15:9 फिर वाच सीमा ऊ पहाड़ी की ऊचायी सी नेप्तोह नाम को झरना पर पहुंची, अऊर एप्रोन पहाड़ी को नगरों पर निकली; फिर वहां सी बाला ख जो किर्यत्यारीम भी कहलावय हय पहुंची;
JOS 15:10 फिर सीमा बाला सी पश्चिम को तरफ मुड़ क सेईर पहाड़ी तक पहुंची अऊर यारीम पहाड़ी जो कसालोन भी कहलावय हय ओको उत्तर दिशा को तरफ सी होय क बेतशेमेश पर उतर गयी, अऊर वहां सी तिम्ना पर निकली;
JOS 15:11 वहां सी वा सीमा एक्रोन को उत्तर दिशा को जवर सी होतो हुयो शिक्करोन गयी, अऊर बाला पहाड़ी होय क यब्नेल पर गयी; अऊर वा सीमा को अन्त महासमुन्दर पर भयो।
JOS 15:12 अऊर पश्चिम की सीमा महासमुन्दर को किनार ठहरी। यहूदा ख जो हिस्सा उन्को कुलों को अनुसार मिल्यो ओको चारयी तरफ की सीमा याच भयी।
JOS 15:13 अऊर यपुन्ने को टुरा कालेब ख यहोशू न परमेश्वर की आज्ञा को अनुसार यहूदियों को बीच म हिस्सा दियो, मतलब किर्यतर्बा जो हेब्रोन भी कहलावय हय ऊ अर्बा अनाक को बाप होतो।
JOS 15:14 अऊर कालेब न वहां सी शेशै, अहीमन, अऊर तल्मै नाम को, अनाक को तीनयी टुरावों ख निकाल दियो।
JOS 15:15 फिर कालेब न दबीर को निवासियों पर हमला करयो; दबीर को पुरानो नाम किर्यत्सेपेर होतो।
JOS 15:16 अऊर कालेब न कह्यो, “जो किर्यत्सेपेर ख हराय क ओख अपनो अधिन कर लेयेंन ओको सी मय अपनी टुरी अकसा को बिहाव कर देऊं।”
JOS 15:17 तब कालेब को भाऊ कनजी को टुरा ओत्नीएल न ऊ नगर पर अधिकार कर लियो; अऊर ओन ओको सी अपनी टुरी अकसा को बिहाव कर दियो।
JOS 15:18 जब वा ओत्नीएल को जवर आयी, तब ओन अकसा ख बाप सी कुछ जमीन मांगन ख कह्यो, वा कालेब को जवर गयी जब वा गधा पर सी खल्लो उतरी, तब कालेब न ओको सी पुच्छ्यो, “तय का चाहवय हय?”
JOS 15:19 वा बोली, “मोख आशीर्वाद दे; तय न मोख दक्षिन देश म की कुछ जमीन त दे दी हय, मोख पानी को सोता भी दे।” तब ओन ऊपर अऊर खल्लो को सोता दोयी ओख दे दियो।
JOS 15:20 यहूदियों को कुल को हिस्सा त उन्को कुलों को अनुसार योच ठहरयो।
JOS 15:21 यहूदा कुल को नगर दक्षिन देश म एदोम की सीमा को तरफ हि आय, कबसेल, एदेर, यागूर,
JOS 15:22 कीना, दीमोना, अदादा,
JOS 15:23 केदेश, हासोर, यित्नान,
JOS 15:24 जीप, तेलेम, बालोत,
JOS 15:25 हासोर्हदत्ता, करिय्योथेस्रोन, जो हासोर भी कहलावय हय,
JOS 15:26 अऊर अमाम, शमा, मोलादा,
JOS 15:27 हसर्गद्दा, हेशमोन, बेत्पालेत,
JOS 15:28 हसर्शूआल, बेर्शेबा, बिज्योत्या,
JOS 15:29 बाला, इय्यीम, एसेम,
JOS 15:30 एलतोलद, कसील, होर्मा,
JOS 15:31 सिकलग, मदमन्ना, सनसन्ना,
JOS 15:32 लबाओत, शिल्हीम, ऐन, अऊर रिम्मोन; गावों सहित सब नगरों की संख्या उनतीस हय।
JOS 15:33 खल्लो को देश म स्थित नगर : एशताओल, सोरा, अशना,
JOS 15:34 जानोह, एनगन्नीम, तप्पूह, एनाम,
JOS 15:35 यर्मूत, अदुल्लाम, सोको, अजेका,
JOS 15:36 शारैम, अदीतैम, गदेरा, अऊर गदेरोतैम; हि सब गांव सहित सब नगरों की संख्या चौदा हंय।
JOS 15:37 फिर सनान, हदाशा, मिगदलगाद,
JOS 15:38 दिलान, मिस्पे, योक्तेल,
JOS 15:39 लाकीश, बोस्कत, एग्लोन,
JOS 15:40 कब्बोन, लहमास, कितलीश,
JOS 15:41 गदेरोत, बेतदागोन, नामा, अऊर मक्केदा; हि गांव सहित सब नगरों की संख्या सोला हंय।
JOS 15:42 फिर लिब्ना, ऐतेर, आशान,
JOS 15:43 यिप्तह, अशाना, नसीब,
JOS 15:44 कीला, अकजीब, अऊर मारेशा; हि गांव सहित सब नगरों की संख्या नव हंय।
JOS 15:45 फिर नगरों अऊर गांवो सहित एक्रोन,
JOS 15:46 अऊर एक्रोन सी ले क महासमुन्दर तक, अपनो अपनो गांवो समेत जितनो नगर अशदोद को तरफ हंय।
JOS 15:47 फिर अपनो अपनो नगरों अऊर गांवो समेत अशदोद, अऊर अज्जा, बल्की मिस्र को नाला तक अऊर महासमुन्दर को किनार तक जितनो नगर हंय।
JOS 15:48 पहाड़ी देश म हि हय : शामीर, यत्तीर, सोको,
JOS 15:49 दन्ना, किर्यत्सन्ना जो दबीर भी कहलावय हय,
JOS 15:50 अनाब, एशतमो, आनीम,
JOS 15:51 गोशेन, होलोन, अऊर गीलो; हि गांवो सहित सब नगरों की संख्या ग्यारा हंय।
JOS 15:52 फिर अराब, दूमा, एशान,
JOS 15:53 यानीम, बेत्तप्पूह, अपेका,
JOS 15:54 हुमता, किर्यतर्बा जो हेब्रोन भी कहलावय हय, अऊर सीओर गांवो सहित सब नगरों की संख्या नव हंय।
JOS 15:55 फिर माओन, कर्मेल, जीप, यूता,
JOS 15:56 यिज्रेल, योकदाम, जानोह,
JOS 15:57 कैन, गिबा, अऊर तिम्ना; गांवो समेत सब नगरों की संख्या दस हंय।
JOS 15:58 फिर हलहूल, बेतसूर, गदोर,
JOS 15:59 मरात, बेतनोत, अऊर एलतकोन; हि गांवो समेत सब नगरों की संख्या छय हंय।
JOS 15:60 फिर किर्यतबाल जो किर्यत्यारीम भी कहलावय हय, अऊर रब्बा; हि गांव समेत दोय नगर हंय।
JOS 15:61 जंगल म हि नगर हंय : बेतराबा, मिद्दीन, सकाका;
JOS 15:62 निबशान, लवन नगर, अऊर एनगदी, हि गांवो समेत छय नगर हंय।
JOS 15:63 यरूशलेम को निवासी यबूसियों ख नहीं निकाल सक्यो; येकोलायी अज भी यबूसी यहूदियों को संग यरूशलेम म रह्य हंय।
JOS 16:1 फिर यूसुफ को वंशजों ख यरीहो नगर को जवर, यरदन नदी सी यरीहो को झरना को पूर्व म जंगल तक की सीमा दी गयी, ओकी सीमा यरीहो सी शुरू होय क ऊ पहाड़ी देश सी होतो हुयो, बेतेल नगर ख पहुंची;
JOS 16:2 वहां सी वा लूज सीमा तक पहुंची, अऊर अर्की जाति की सीमा सी होतो हुयो अतारोत सीमा पर जाय निकली;
JOS 16:3 अऊर पश्चिम को तरफ यपलेतियों जाति की सीमा सी उतर क फिर खल्लो की बेथोरोन की सीमा सी होय क गेजेर नाम की जागा पर पहुंची, अऊर महासमुन्दर पर खतम भयी।
JOS 16:4 तब मनश्शे अऊर एप्रैम नाम को यूसुफ को दोयी टुरावों की सन्तान न अपनो अपनो हिस्सा लियो।
JOS 16:5 एप्रैमियों की सीमा उन्को कुलों को अनुसार या होती; उन्को हिस्सा की सीमा पूर्व सी शुरू होय क अत्रोतद्दार सी होतो हुयो ऊपर वालो बेथोरोन तक पहुंची;
JOS 16:6 अऊर उत्तरी सीमा पश्चिम को तरफ को मिकमतात सी शुरू होय क पूर्व को तरफ मुड़ क तानतशीलो ख पहुंची, अऊर ओको जवर सी होतो हुयो यानोह तक गयी;
JOS 16:7 फिर यानोह सी वा अतारोत अऊर नारा ख उतरती हुयी यरीहो को जवर सी होय क यरदन नदी पर खतम भयी।
JOS 16:8 फिर वाच सीमा तप्पूह सी निकल क, अऊर पश्चिम को तरफ जाय क, काना को नाला सी होय क महासमुन्दर पर निकली। एप्रैमियों को कुल को हिस्सा उन्को कुलों को अनुसार योच ठहरयो।
JOS 16:9 अऊर मनश्शे कुल को हिस्सा को बीच म भी कुछ नगर अपनो अपनो गांवो समेत एप्रैमियों को लायी अलग करयो गयो।
JOS 16:10 पर जो कनानी गेजेर नगर म बस्यो होतो उन्ख एप्रैमियों न वहां सी नहीं निकाल्यो; येकोलायी हि कनानी जाति उन्को बीच म अज भी बस्यो हंय, अऊर बेकार म दास को जसो करय हंय।
JOS 17:1 फिर यूसुफ को बड़ो टुरा मनश्शे को कुल को हिस्सा चिट्ठी डाल क दियो गयो। मनश्शे को बड़ो टुरा, माकीर गिलाद को बाप योद्धा होतो, यो वजह ओको वंश ख गिलाद अऊर बाशान प्रदेश दियो गयो।
JOS 17:2 येकोलायी यो हिस्सा मनश्शे को दूसरो टुरावों लायी उन्को कुल अनुसार दियो गयो, अबीएजेर, हेलेक, अस्रीएल, शेकेम, हेपेर, अऊर शमीदा; जो अपनो अपनो कुलों को अनुसार यूसुफ को टुरा मनश्शे को परिवार को मुखिया होतो, उन्को अलग अलग वंशों लायी ठहरयो।
JOS 17:3 पर हेपेर जो गिलाद को टुरा, माकीर को नाती, अऊर मनश्शे को पन्ती होतो, ओको टुरा सलोफाद ख टुरा नहीं बल्की टुरीच भयी; अऊर उन्को नाम महला, नोआ, होग्ला, मिल्का, अऊर तिर्सा हंय।
JOS 17:4 तब हि टुरी एलीआजार याजक, नून को टुरा यहोशू, अऊर मुखियावों को जवर जाय क कहन लगी, “परमेश्वर न मूसा ख आज्ञा दी होती, कि ऊ हम्ख हमरो भाऊवों को बीच म हिस्सा दे।” त यहोशू न परमेश्वर की आज्ञा को अनुसार उन्ख उन्को काकावों को अधिकार को बीच म हिस्सा दियो।
JOS 17:5 तब मनश्शे ख, यरदन नदी को ओन पार गिलाद अऊर बाशान प्रदेश ख छोड़ क, दस हिस्सा अऊर मिल्यो :
JOS 17:6 कहालीकि मनश्शे को टुरावों को बीच म मनश्शे की टुरियों ख भी हिस्सा दियो गयो। अऊर गिलाद प्रदेश मनश्शे को बच्यो परिवार ख दियो गयो।
JOS 17:7 मनश्शे की सीमा आशेर सी ले क मिकमतात तक होती, जो शकेम को सामने हय; फिर वा सीमा दक्षिन को तरफ बढ़ क एनतप्पूह को निवासियों तक चली गयी।
JOS 17:8 तप्पूह की जमीन त मनश्शे ख मिली, पर तप्पूह नगर जो मनश्शे की सीमा पर बस्यो हय ऊ एप्रैमियों को ठहरयो।
JOS 17:9 फिर वहां सी वा सीमा काना को नाला तक उतर क ओको दक्षिन को तरफ तक पहुंच गयी; हि एप्रैम को नगर मनश्शे को नगरों को बीच म होतो; अऊर मनश्शे की सीमा ऊ नाला को उत्तर को तरफ सी जाय क महासमुन्दर पर निकली;
JOS 17:10 दक्षिन को तरफ को देश एप्रैम ख अऊर उत्तर को तरफ को देश मनश्शे ख मिल्यो, अऊर ओकी सीमा महासमुन्दर होती; अऊर उत्तर म आशेर ख अऊर पूर्व म इस्साकार ख जाय क मिली।
JOS 17:11 अऊर मनश्शे ख, इस्साकार अऊर आशेर अपनो नगर समेत बेतशान, यिबलाम, अऊर अपनो नगर समेत दोर को निवासी, अऊर अपनो नगर समेत एनदोर को निवासी, अऊर अपनो नगर समेत तानाक को निवासी, अऊर अपनो नगर समेत मगिद्दो को निवासी, हि तीनयी जो ऊंचो जागा पर बस्यो हंय मिल्यो।
JOS 17:12 पर मनश्शे को वंशज ऊ नगर को निवासियों ख नहीं निकाल सक्यो; येकोलायी हि कनानी ऊ देश म जबरदस्ती बस्योच रह्यो।
JOS 17:13 सब इस्राएली शक्तिशाली भय गयो, तब भी उन्न कनानियों ख नहीं निकाल्यो, पर हि उन्को सी काम करावन लग्यो।
JOS 17:14 यूसुफ की सन्तान यहोशू सी कहन लगी, “हम त गिनती म बहुत हंय, कहालीकि अब तक परमेश्वर हम्ख आशीषच देतो आयो हय, फिर तय न हमरो हिस्सा लायी चिट्ठी डाल क कहाली एकच हिस्सा दियो हय?”
JOS 17:15 यहोशू न उन सी कह्यो, “यदि तुम गिनती म बहुत हय, अऊर एप्रैम को पहाड़ी देश तुम्हरो लायी छोटो होना, जो परिज्जियों अऊर रपाइयों को देश जो जंगल हय ओको म जाय क झाड़ो ख काट डालो।”
JOS 17:16 यूसुफ की सन्तान न कह्यो, “ऊ पहाड़ी देश हमरो लायी छोटो हय; अऊर बेतशान अऊर ओको नगरों म रहन वालो अऊर यिज्रेल की घाटी म रहन वालो, जितनो कनानी लोग खल्लो को देश म रह्य हंय, उन सब को जवर लोहा को रथ हंय।”
JOS 17:17 फिर यहोशू न एप्रैम अऊर मनश्शे, मतलब यूसुफ पूरो घराना सी कह्यो, “हां, तुम लोग त गिनती म बहुत हय, अऊर तुम्हरी शक्ति भी बड़ी हय, येकोलायी तुम्ख केवल एकच हिस्सा नहीं मिलेंन;
JOS 17:18 पहाड़ी देश भी तुम्हरो होय जायेंन; कहालीकि ऊ जंगल त हय, पर ओको झाड़ काट डालो, तब ओको आजु-बाजू को देश भी तुम्हरो होय जायेंन; कहालीकि चाहे कनानी शक्तिशाली होना, अऊर उन्को जवर लोहा को रथ भी होना, तब भी तुम उन्ख वहां सी निकाल सको।”
JOS 18:1 फिर इस्राएलियों की पूरी मण्डली न शीलो नगर म जमा होय क वहां मिलाप वालो तम्बू ख खड़ो करयो; कहालीकि उन्को देश अधिकार म आय गयो होतो।
JOS 18:2 अऊर इस्राएल को सात कुल अब भी असो होतो, जिन्ख उन्को हिस्सा नहीं मिल्यो होतो।
JOS 18:3 तब यहोशू न इस्राएलियों सी कह्यो, “जो देश तुम्हरो पूर्वजों को परमेश्वर यहोवा न तुम्ख दियो हय, ओख अपनो अधिकार म करन म कब तक ढिलायी करतो रहो?
JOS 18:4 अब हर एक कुल म सी तीन आदमी चुन लेवो, मय उन्ख ऊ देश म भेजूं कि हि वहां जाय क ओकी जांच करे, अऊर जो जमीन हिस्सा उन्ख अपनो कुल को लायी होना, ओको बारे म लिख ले अऊर मोरो जवर वापस लौट आये।
JOS 18:5 अऊर हि देश ख सात हिस्सा म बाट ले, यहूदा कुल दक्षिन को तरफ अपनो हिस्सा म, अऊर यूसुफ को घराना को लोग उत्तर को तरफ अपनो हिस्सा म रहे।
JOS 18:6 अऊर तुम देश की पूरी जानकारी मोरो जवर लावो; अऊर मय यहां तुम्हरो लायी अपनो परमेश्वर यहोवा को सामने चिट्ठी डालूं।
JOS 18:7 अऊर लेवियों को तुम्हरो बीच म कोयी हिस्सा नहीं मिलेंन, कहालीकि परमेश्वर को दियो हुयो याजकपदच उन्को हिस्सा हय; अऊर गाद, रूबेन, अऊर मनश्शे को अरधो कुल को लोग यरदन को पूर्व दिशा को तरफ परमेश्वर को दास मूसा को दियो हुयो अपनो हिस्सा पा चुक्यो हय।”
JOS 18:8 तब हि चुन्यो गयो आदमी उठ क जान लायी तैयार भयो; अऊर जो ऊ देश को हाल लिखन जाय रह्यो होतो उन्ख यहोशू न या आज्ञा दी, “जाय क देश म घूमो फिरो, अऊर ओको हाल लिख क मोरो जवर लौट आवो; अऊर मय यहां शीलो म परमेश्वर को सामने तुम्हरो लायी चिट्ठी डालूं।”
JOS 18:9 तब हि आदमी चल दियो, अऊर ऊ पूरो देश म घूम्यो, अऊर ओको नगर को सात हिस्सा कर क् उन्को हाल किताब म लिख क शीलो की छावनी म यहोशू को जवर आयो।
JOS 18:10 तब यहोशू न शीलो म परमेश्वर को सामने उन्को लायी चिट्ठी डाली; अऊर वहां यहोशू न इस्राएलियों ख उन्को हिस्सा को अनुसार देश बाट दियो।
JOS 18:11 बिन्यामीन को कुल की चिट्ठी उन्को परिवार को अनुसार निकली, अऊर उन्को हिस्सा यहूदा कुल अऊर यूसुफ को कुलों को बीच म होतो।
JOS 18:12 अऊर उन्की उत्तर दिशा की सीमा यरदन नदी सी शुरू भयी, यरीहो की उत्तर को तरफ सी चढ़ती हुयी पश्चिम को तरफ पहाड़ी देश सी होय क बेतावेन को जंगल म निकली;
JOS 18:13 वहां सी सीमा लूज ख पहुंची जो बेतेल भी कहलावय हय, अऊर लूज को दक्षिन दिशा सी होतो हुयो खल्लो को बेथोरोन को दक्षिन तरफ की पहाड़ी को जवर अत्रोतद्दार पर उतर गयी।
JOS 18:14 फिर पश्चिमी सीमा मुड़ क बेथोरोन को सामने अऊर ओको दक्षिन को तरफ को पहाड़ी सी होतो हुयो किर्यतबाल नाम को यहूदा को एक नगर पर निकली जो किर्यत्यारीम भी कहलावय हय; पश्चिम की सीमा याच होती।
JOS 18:15 फिर दक्षिन को तरफ की सीमा पश्चिम सी शुरू होय क किर्यत्यारीम को छोर सी निकल क नेप्तोह को झरना पर पहुंची;
JOS 18:16 अऊर वा पहाड़ी को छोर पर उतरी, जो हिन्नोम को टुरा की घाटी को सामने अऊर रपाईम नाम की घाटी को उत्तर दिशा को तरफ हय; वहां सी सीमा हिन्नोम की घाटी म, मतलब यबूस को दक्षिन को तरफ सी होय क एनरोगेल झरना पर उतरी;
JOS 18:17 वहां सी वा सीमा उत्तर को तरफ मुड़ क एनशेमेश ख निकल क गलीलोत को तरफ गयी, जो अदुम्मीम की चढ़ायी को सामने हय, फिर वहां सी या रूबेन को टुरा बोहन को गोटा तक उतर गयी;
JOS 18:18 वहां सी वा सीमा उत्तर को तरफ जाय क अराबा को सामने की पहाड़ी को तरफ सी होतो हुयो यरदन नदी की घाटी म उतरी;
JOS 18:19 वहां सी वा सीमा बेथोग्ला को उत्तर को तरफ सी जाय क खारो समुन्दर को उत्तर तरफ को घाटी म यरदन को मुख पर निकली; या दक्षिन की सीमा होती।
JOS 18:20 अऊर पूर्व दिशा को तरफ की सीमा यरदन नदी होती। बिन्यामीनियों को हिस्सा, चारयी तरफ की सीमावों सहित, उन्को कुलों को अनुसार, याच होती।
JOS 18:21 बिन्यामीन कुल को परिवारों ख हि नगर मिल्यो, यरीहो, बेथोग्ला, एमेक्कसीस,
JOS 18:22 बेतराबा, समारैम, बेतेल,
JOS 18:23 अव्वीम, पारा, ओप्रा,
JOS 18:24 कपरम्मोनी, ओफनी अऊर गेबा; हि बारा नगर अऊर इन्को गांव मिल्यो।
JOS 18:25 फिर गिबोन, रामा, बेरोत,
JOS 18:26 मिस्पे, कपीरा, मोसा,
JOS 18:27 रेकेम, यिर्पेल, तरला,
JOS 18:28 सेला, एलेप, यबूस जो यरूशलेम भी कहलावय हय, गिबत अऊर किर्यत; हि चौदा नगर अऊर इन्को गांव मिल्यो। बिन्यामीनियों को हिस्सा उन्को कुलों को अनुसार योच होतो।
JOS 19:1 दूसरी चिट्ठी शिमोन को नाम पर, मतलब शिमोनियों को कुलों को अनुसार उन्को कुल को नाम पर निकली; अऊर उन्को हिस्सा यहूदा को अधिकार को बीच म होतो।
JOS 19:2 उन्को हिस्सा म हि नगर हय, बेर्शेबा, शेबा, मोलादा,
JOS 19:3 हसर्शआल, बाला, एसेम,
JOS 19:4 एलतोलद, बतूल होर्मा,
JOS 19:5 सिकलग, बेत्मर्काबोत, हसर्शूसा,
JOS 19:6 बेतलबाओत, शारूहेन; हि तेरा नगर अऊर इन्को गांव उन्ख मिल्यो।
JOS 19:7 फिर ऐन, रिम्मोन, ऐतेर, अऊर आशान, हि चार नगर गांव समेत;
JOS 19:8 अऊर बालत्बेर जो दक्षिन देश को रामा नगर भी कहलावय हय, वहां तक इन नगरों को चारयी तरफ को सब गांव भी उन्ख मिल्यो। शिमोनियों को कुल को हिस्सा उन्को कुलों को अनुसार यहांच ठहरयो।
JOS 19:9 शिमोनियों को हिस्सा त यहूदा को हिस्सा म सी दियो गयो; कहालीकि यहूदा कुल को हिस्सा उन्को लायी बहुत होतो, यो वजह शिमोनियों को हिस्सा यहूदा को हिस्सा को बीच म मिल्यो।
JOS 19:10 तीसरी चिट्ठी जबूलून को कुलों को अनुसार उन्को परिवारों को नाम पर निकली। अऊर उन्को हिस्सा की सीमा सारीद तक पहुंची;
JOS 19:11 अऊर उन्की सीमा पश्चिम म मरला सी होतो हुयो दब्बेशेत ख पहुंची, अऊर योकनाम को सामने को नाला तक पहुंच गयी;
JOS 19:12 फिर सारीद सी सीमा पूर्व को तरफ मुड़ क किसलोत्ताबोर की सीमा तक पहुंची, अऊर वहां सी बढ़त बढ़त दाबरत अऊर यापी तक चली गयी होती;
JOS 19:13 वहां सी सीमा पूर्व को तरफ आगु बढ़ क गथेपेर अऊर इत्कासीन ख गयी, अऊर वा रिम्मोन को तरफ बढ़ गयी जो नेआ दिशा तक फैल्यो हुयो हय;
JOS 19:14 वहां सी वा सीमा ओको उत्तर को तरफ सी मुड़ क हन्नातोन पर पहुंची; अऊर यिप्तहेल की घाटी म जाय क खतम भयी;
JOS 19:15 कत्तात, नहलाल, शिम्रोन, यिदला, अऊर बैतलहम; हि गांवो सहित नगरों की संख्या बारा होती।
JOS 19:16 जबूलून वंश को लोगों ख उन्को परिवारों को अनुसार अधिकार मिल्यो; अऊर ओको म अपनो अपनो गांवो समेत योच नगर आय।
JOS 19:17 चौथी चिट्ठी इस्साकारियों को कुलों को अनुसार उन्को परिवारों को नाम पर निकली।
JOS 19:18 अऊर उन्की सीमा यिज्रेल, कसुल्लोत, शूनेम,
JOS 19:19 हपारैम, शीओन, अनाहरत,
JOS 19:20 रब्बीत, किश्योन, एबेस,
JOS 19:21 रेमेत, एनगन्नीम, एनहद्दा, अऊर बेत्पस्सेस तक पहुंची।
JOS 19:22 फिर वा सीमा ताबोर, शहसूमा अऊर बेतशेमेश तक पहुंची, अऊर उन्की सीमा यरदन नदी पर खतम भयी; यो तरह गांवो समेत सोला नगर होतो।
JOS 19:23 कुलों को अनुसार इस्साकारियों वंश को हिस्सा नगरों अऊर गांवो समेत दियो गयो।
JOS 19:24 पाचवी चिट्ठी आशेर को वंश को परिवारों को नाम पर निकली।
JOS 19:25 उन्की सीमा म हेल्कत, हली, बेतेन, अक्षाप,
JOS 19:26 अल्लाम्मेलेक, अमाद, अऊर मिशाल होतो; अऊर ऊ पश्चिम को तरफ कर्मेल तक अऊर शीहोर्लिब्नात तक पहुंची;
JOS 19:27 फिर वा सीमा पूर्व दिशा को तरफ मुड़ क बेतदागोन ख गयी, अऊर जबूलून को हिस्सा तक, अऊर यिप्तहेल की घाटी सी उत्तर दिशा को तरफ सी होय क बेतेमेक अऊर नीएल तक पहुंची; अऊर उत्तर को तरफ जाय क काबूल पर निकली,
JOS 19:28 अऊर वा एब्रोन, रहोब, हम्मोन, अऊर काना सी होय क बड़ो सीदोन ख गयी;
JOS 19:29 वहां सी वा सीमा मुड़ क रामा सी होतो हुयो सोर नाम को गढ़ वालो नगर तक चली गयी; फिर सीमा होसा को तरफ मुड़ क अऊर अकजीब को जवर को देश सी होय क समुन्दर पर खतम भयी,
JOS 19:30 उम्मा, अपेक, अऊर रहोब भी होतो; यो तरह बावीस नगर अपनो गांवो समेत ओख मिल्यो।
JOS 19:31 कुलों को अनुसार आशेरियों को वंश को हिस्सा नगरों अऊर गांवो समेत यहांच मिल्यो।
JOS 19:32 छठवी चिट्ठी नप्ताली वंशों को अनुसार उन्को परिवारों को नाम पर निकली।
JOS 19:33 अऊर उन्की सीमा हेलेप सी, अऊर सानन्नीम को बांझ झाड़ सी, अदामीनेकेब अऊर यब्नेल सी होय क, अऊर लक्कूम ख जाय क यरदन पर खतम भयी;
JOS 19:34 वहां सी वा सीमा पश्चिम को तरफ मुड़ क अजनोत्ताबोर ख गयी, अऊर वहां सी हुक्कोक ख गयी, अऊर दक्षिन, अऊर जबूलून को हिस्सा तक, अऊर पश्चिम को तरफ आशेर को हिस्सा तक, अऊर पूर्व को तरफ यहूदा को हिस्सा को जवर की यरदन नदी पर निकली।
JOS 19:35 अऊर उन्को गढ़ वालो नगर यो आय, मतलब सिद्दीम, शेर, हम्मत, रक्कत, किन्नेरेत,
JOS 19:36 अदामा, रामा, हासोर,
JOS 19:37 केदेश, एद्रेई, एन्हासोर,
JOS 19:38 यिरोन, मिगदलेल, होरेम, बेतनात, अऊर बेतशेमेश; हि उन्नीस नगर गांवो समेत ओख मिल्यो।
JOS 19:39 कुलों को अनुसार नप्तालियों को वंश को हिस्सा नगरों अऊर गांवो समेत यहांच मिल्यो।
JOS 19:40 सातवी चिट्ठी कुलों को अनुसार दान को वंश को नाम पर निकली।
JOS 19:41 अऊर उन्को हिस्सा को सीमा म सोरा, एशताओल, ईरशेमेश,
JOS 19:42 शालब्बीन, अय्यालोन, यितला,
JOS 19:43 एलोन, तिम्ना, एक्रोन,
JOS 19:44 एलतके, गिब्बतोन, बालात
JOS 19:45 यहूद, बनेबराक, गत्रिम्मोन,
JOS 19:46 मेयर्कोन, अऊर रक्कोन, अऊर याफा को सामने की सीमा भी उन्की होती।
JOS 19:47 अऊर दानियों को हिस्सा येको सी जादा भय गयो, मतलब दान को लोगों न लेशेम पर चढ़ायी करी, अऊर उन्ख तलवार सी मार डाल्यो, अऊर ओख अपनो अधिकार म कर क् ओको म बस गयो, अऊर अपनो मुख्य आदमी को नाम पर लेशेम को नाम दान रख्यो।
JOS 19:48 कुलों को अनुसार दानियों को वंश को हिस्सा नगरों अऊर गांवो समेत यहांच मिल्यो।
JOS 19:49 जब देश को बाट्यो जानो सीमावों को अनुसार पूरो भय गयो, तब इस्राएलियों न नून को टुरा यहोशू ख भी अपनो बीच म एक हिस्सा दियो।
JOS 19:50 परमेश्वर को कहन को अनुसार उन्न ओख ओको मांग्यो हुयो नगर दियो, यो एप्रैम को पहाड़ी देश म को तिम्नत्सेरह हय; अऊर ऊ ऊ नगर ख फिर सी बसाय क ओको म रहन लग्यो।
JOS 19:51 जो जो हिस्सा एलीआजार याजक, अऊर नून को टुरा यहोशू, अऊर इस्राएलियों को वंश को घराना को पूर्वजों को मुख्य मुख्य आदमियों न शीलो म, मिलापवालो तम्बू को फाटक पर, परमेश्वर को सामने चिट्ठी डाल क बाट दियो हि योच आय। यो तरह उन्न देश बाटन को काम पूरो करयो।
JOS 20:1 फिर परमेश्वर न यहोशू सी कह्यो,
JOS 20:2 “इस्राएलियों सी यो कहो, ‘मय न मूसा को द्वारा तुम सी शरन नगर की जो चर्चा करी होती ओको अनुसार उन्ख ठहराय लेवो,
JOS 20:3 जेको सी जो कोयी भूल सी यां अनजानो म कोयी ख मार डाले, ऊ वहां सी भग क शरन ले सके; येकोलायी यो नगर खून को बदला लेन वालो सी बचन लायी तुम्हरो शरन नगर ठहरेंन।
JOS 20:4 ऊ कोयी भी शरन नगर म भग क जाये, अऊर ऊ नगर की फाटक पर खड़ो होय क उन बुजूर्गों ख अपनी हकिकत बताये; बुजूर्गों ओख अपनो नगर म ले जाये, अऊर ओख रहन लायी जागा दे, जेको म ऊ उन्को संग रहे।
JOS 20:5 अऊर खून को बदला लेन वालो ओको पीछा करतो हुयो आये, त बुजूर्गों यो जान क कि ओन अपनो पड़ोसी ख अनजानो म, ओन ओको सी बिना दुस्मनी रख्यो ओख मारयो, येकोलायी ऊ खूनी ख ओको हाथ म नहीं देयेंन।
JOS 20:6 अऊर जब तक ऊ मण्डली को सामने न्याय को लायी खड़ो नहीं होयेंन, अऊर जब तक उन दिनों को महायाजक नहीं मर जाये, तब तक ऊ उच नगर म रहेंन; ओको बाद ऊ खूनी अपनो नगर ख जहां सी ऊ भग क आयो होना अपनो घर म लौट जाये।’”
JOS 20:7 येकोलायी उन्न नप्ताली को पहाड़ी देश म गलील को केदेश नगर ख, अऊर एप्रैम को पहाड़ी देश म शकेम नगर ख, अऊर यहूदा को पहाड़ी देश म किर्यतर्बा नगर ख, जो हेब्रोन भी कहलावय हय शरन नगर ठहरायो।
JOS 20:8 अऊर यरीहो को जवर को यरदन को पूर्व दिशा को तरफ उन्न रूबेन को वंश को हिस्सा म बेसेर नगर ख, जो जंगल म चौरस जमीन पर बस्यो हुयो हय, अऊर गाद को वंश को हिस्सा म गिलाद को रामोत ख, अऊर मनश्शे को वंश को हिस्सा म बाशान को गोलान नगर ख ठहरायो।
JOS 20:9 पूरो इस्राएलियों लायी, अऊर उन्को बीच म रहन वालो परदेशियों लायी भी, जो नगर यो मनसा सी ठहरायो गयो कि जो कोयी कोयी प्रानी ख भूल सी मार डाले ऊ उन म सी कोयी भी नगर म भग जाये, अऊर जब तक न्याय लायी मण्डली को सामने खड़ो नहीं होयेंन, तब तक खून को बदला लेन वालो ओख मार नहीं पाये, हि हिच नगर आय।
JOS 21:1 तब लेवियों को पूर्वजों को परिवारों को मुख्य आदमी एलीआजार याजक, अऊर नून को टुरा यहोशू, अऊर इस्राएली वंश को पूर्वजों को परिवारों को मुख्य आदमियों को जवर आय क
JOS 21:2 कनान देश को शीलो नगर म कहन लग्यो, “परमेश्वर न मूसा को द्वारा हम्ख बसन लायी नगर, अऊर हमरो जनावरों ख चरावन लायी मैदान भी देन की आज्ञा दी होती।”
JOS 21:3 तब इस्राएलियों न परमेश्वर को कहन को अनुसार अपनो अपनो हिस्सा म सी लेवियों ख चराइयों समेत हि नगर दियो।
JOS 21:4 तब कहात जाति को कुलों को नाम पर चिट्ठी निकली। येकोलायी लेवियों म सी हारून याजक को वंश को यहूदा, शिमोन, अऊर बिन्यामीन को वंशों को हिस्सा म सी तेरा नगर मिल्यो।
JOS 21:5 बाकी कहात जातियों ख एप्रैम को वंश, दान को वंश, अऊर मनश्शे को अरधो वंश को हिस्सा म सी चिट्ठी डाल क दस नगर दियो गयो।
JOS 21:6 फिर गेर्शोनियों ख इस्साकार को वंश को परिवार, अऊर आशेर, अऊर नप्ताली को वंशों को हिस्सा म सी, अऊर मनश्शे को ऊ अरधो वंश को हिस्सा म सी भी जो बाशान प्रदेश म होतो चिट्ठी डाल क तेरा नगर दियो गयो।
JOS 21:7 वंशों को अनुसार मरारी वंश ख रूबेन, गाद, अऊर जबूलून को वंशों को हिस्सा म सी बारा नगर दियो गयो।
JOS 21:8 जो आज्ञा परमेश्वर न मूसा को द्वारा दी होती ओको अनुसार इस्राएलियों न लेवियों ख चारागाह जमीन समेत यो नगर चिट्ठी डाल क दियो।
JOS 21:9 उन्न यहूदियों अऊर शिमोनियों को वंशों को हिस्सा म सी यो नगर जिन को नाम लिख्यो हंय दियो;
JOS 21:10 हि नगर लेवीय कहाती वंशों म सी हारून को वंश लायी होतो; कहालीकि पहिली चिट्ठी उन्कोच नाम पर निकली होती।
JOS 21:11 मतलब उन्न उन्ख यहूदा को पहाड़ी देश म चारयी तरफ की चराइयों समेत किर्यतर्बा नगर दे दियो, जो अर्बा अनाक को बाप होतो जो हेब्रोन भी कहलावय हय।
JOS 21:12 पर ऊ नगर को खेत अऊर ओको गांव उन्न यपुन्ने को टुरा कालेब ख ओकी निजी जमीन कर क् दे दियो।
JOS 21:13 तब उन्न हारून याजक को वंश ख चराइयों समेत खूनी को शरन नगर हेब्रोन, अऊर अपनी अपनी चराइयों समेत लिब्ना,
JOS 21:14 यत्तीर, एश्तमो,
JOS 21:15 होलोन, दबीर,
JOS 21:16 ऐन, युत्ता अऊर बेतशेमेश दियो; यो तरह उन दिनों वंशों को हिस्सा म सी नव नगर दियो गयो।
JOS 21:17 अऊर बिन्यामीन को वंश को हिस्सा म सी अपनी अपनी चराइयों समेत हि चार नगर दियो गयो, मतलब गिबोन, गेबा,
JOS 21:18 अनातोत अऊर अल्मोन।
JOS 21:19 यो तरह हारूनवंशी याजकों ख तेरा नगर अऊर चराइयां मिली।
JOS 21:20 फिर बाकी कहाती को लेवी वंश को परिवारों ख एप्रैम को हिस्सा म सी कुछ नगर दियो गयो।
JOS 21:21 मतलब उन्ख चराइयों समेत एप्रैम को पहाड़ी देश म खूनी ख शरन लेन ख शकेम नगर दियो गयो, फिर अपनी चराइयों समेत गेजेर,
JOS 21:22 किबसैम, अऊर बेथोरोन; हि चार नगर दियो गयो।
JOS 21:23 अऊर दान को वंश को हिस्सा म सी अपनी अपनी चराइयों समेत, एलतके, गिब्बतोन,
JOS 21:24 अय्यालोन, अऊर गत्रिम्मोन; हि चार नगर दियो गयो।
JOS 21:25 अऊर मनश्शे को अरधो वंश को हिस्सा म सी अपनी अपनी चराइयों समेत तानाक अऊर गत्रिम्मोन; हि दोय नगर दियो गयो।
JOS 21:26 यो तरह बाकी कहातियों को वंश को सब नगर चराइयों समेत दस नगर होतो।
JOS 21:27 फिर लेवियों को वंशों म सी गेर्शोनियों ख मनश्शे को अरधो वंश को हिस्सा म सी अपनी अपनी चराइयों समेत खूनी को शरन नगर बाशान प्रदेश को गोलान अऊर बेशतरा; हि दोय नगर दियो गयो।
JOS 21:28 अऊर इस्साकार को वंश को हिस्सा म सी अपनी अपनी चराइयों समेत किश्योन, दाबरत,
JOS 21:29 यर्मूत, अऊर एनगन्नीम; हि चार नगर दियो गयो।
JOS 21:30 अऊर आशेर को वंश को हिस्सा म सी अपनी अपनी चराइयों समेत मिशाल, अब्दोन,
JOS 21:31 हेल्कात, अऊर रहोब; हि चार नगर दियो गयो।
JOS 21:32 अऊर नप्ताली को वंश को हिस्सा म सी अपनी अपनी चराइयों समेत खूनी को शरन नगर गलील प्रदेश को केदेश नगर, हम्मोतदोर, अऊर कर्तान; हि तीन नगर दियो गयो।
JOS 21:33 गेर्शोनियों को वंशों को अनुसार उन्को सब नगर अपनी अपनी चराइयों समेत तेरा होतो।
JOS 21:34 फिर बाकी लेवियों, मतलब मरारियों को वंशों ख जबूलून को वंश को हिस्सा म सी अपनी चराइयों समेत योकनाम, कर्ता,
JOS 21:35 दिम्ना, अऊर नहलाल; हि चार नगर दियो गयो।
JOS 21:36 अऊर रूबेन को वंश को हिस्सा म सी अपनी चराइयों समेत बेसेर, यहसा,
JOS 21:37 कदेमोत, अऊर मेपात; हि चार नगर दियो गयो।
JOS 21:38 अऊर गाद को वंश को हिस्सा म सी अपनी चराइयों समेत खूनी को शरन नगर गिलाद प्रदेश म को रामोत, महनैम,
JOS 21:39 हेशबोन, अऊर याजेर, यो सब मिलाय क चार नगर हंय, दियो गयो।
JOS 21:40 लेवियों को बाकी वंशों मतलब मरारियों को वंशों को अनुसार उन्ख बारा नगर चिट्ठी डाल क दियो गयो।
JOS 21:41 इस्राएलियों की निजी जमीन को बीच लेवियों को सब नगर अपनी चराइयों समेत अड़तालीस हय।
JOS 21:42 हि सब नगर अपनो चारयी तरफ की चराइयों को संग होती; इन सब नगरों की याच दशा होती।
JOS 21:43 यो तरह परमेश्वर न इस्राएलियों ख ऊ पूरो देश दियो, जेक ओन उन्को पूर्वजों सी कसम खाय क देन ख कह्यो होतो; अऊर हि ओको अधिकारी होय क ओको म बस गयो।
JOS 21:44 अऊर परमेश्वर न उन सब बातों को अनुसार, जो ओन उन्को पूर्वजों सी कसम खाय क कही होती, उन्ख चारयी तरफ सी आराम दियो; अऊर उन्को दुस्मनों म सी कोयी भी उन्को सामने टिक नहीं सक्यो; परमेश्वर न उन सब ख उन्को वश म कर दियो।
JOS 21:45 जितनी भलायी की बाते परमेश्वर न इस्राएल को घराना सी कही होती ओको म सी कोयी बात भी नहीं छूटी; सब की सब पूरी भयी।
JOS 22:1 ऊ समय यहोशू न रूबेनियों, गादियों, अऊर मनश्शे को अरधो वंश को लोगों ख बुलाय क कह्यो,
JOS 22:2 जो जो आज्ञा परमेश्वर को दास मूसा न तुम्ख दी होती हि सब तुम न मानी हय, अऊर जो जो आज्ञा मय न तुम्ख दी हंय उन सब ख भी तुम न मान्यो हय;
JOS 22:3 तुम न अपनो भाऊवों ख इतनो दिनों म अज तक नहीं छोड़्यो, पर अपनो परमेश्वर यहोवा की आज्ञा तुम न अच्छो सी पालन करयो।
JOS 22:4 अऊर अब तुम्हरो परमेश्वर यहोवा न तुम्हरो भाऊवों ख अपनो वचन को अनुसार आराम दियो हय; येकोलायी अब तुम लौट क अपनो डेरा ख, अऊर अपनी निजी भूमि म, जेक परमेश्वर को सेवक मूसा न यरदन को ओन पार तुम्ख दियो हय, चली जावो।
JOS 22:5 केवल या बात की पूरी चौकसी करो कि जो जो आज्ञा अऊर व्यवस्था परमेश्वर को सेवक मूसा न तुम्ख दी हय ओख मान क अपनो परमेश्वर यहोवा सी प्रेम रखो, ओको पूरो रस्ता पर चलो, ओकी आज्ञाये मानो, ओकी भक्ति म लवलीन रहो, अऊर अपनो पूरो मन अऊर पूरो जीव सी ओकी सेवा करो।
JOS 22:6 तब यहोशू न उन्ख आशीर्वाद दे क बिदा करयो अऊर हि अपनो अपनो डेरा ख चली गयो।
JOS 22:7 मनश्शे को अरधो वंश को लोगों ख मूसा न बाशान प्रदेश म हिस्सा दियो होतो; पर दूसरो अरधो वंश ख यहोशू न उन्को भाऊवों को बीच म यरदन को पश्चिम दिशा को तरफ हिस्सा दियो। उन्ख जब यहोशू न बिदा करयो कि हि अपनो डेरा ख चली जाये,
JOS 22:8 तब उन्ख भी आशीर्वाद दे क कह्यो, “बहुत सो जनावर, अऊर चांदी, सोनो, पीतल, लोहा, अऊर बहुत सो कपड़ा, अऊर बहुत धन सम्पत्ति ले क अपनो डेरा ख चली जावो; अऊर अपनो दुस्मनों की लूटी हुयी सम्पत्ति अपनो भाऊवों को संग बाट लेवो।”
JOS 22:9 तब रूबेनी, गादी, अऊर मनश्शे को अरधो वंश को लोग इस्राएलियों को जवर सी, मतलब कनान देश को शीलो नगर सी, अपनी गिलाद नाम की निजी जमीन म, जो मूसा को द्वारा दी गयी परमेश्वर की आज्ञा को अनुसार उन्की निजी जमीन भय गयी होती, लौट गयो।
JOS 22:10 जब रूबेनी, गादी, अऊर मनश्शे को अरधो वंश को लोग यरदन नदी को किनार पर स्थित गलीलोत नगर म पहुंच्यो जो कनान देश म हय, उन्न वहां एक बड़ी अऊर प्रभावशाली वेदी बनायी।
JOS 22:11 अऊर इस्राएलियों न सुन्यो कि, रूबेनियों, गादियों, अऊर मनश्शे को अरधो वंश को लोगों न कनान देश की सीमा पर यरदन नदी को ओन पार हमरो क्षेत्र को सामने गलीलोत म एक वेदी बनायी हय।
JOS 22:12 जब इस्राएल को लोगों न यो सुन्यो, तब इस्राएल की पूरी मण्डली उन सी लड़न लायी शीलो म जमा भयी।
JOS 22:13 तब इस्राएलियों न रूबेनियों, गादियों, अऊर मनश्शे को अरधो वंश को लोगों को जवर गिलाद देश म एलीआजार याजक को टुरा पीनहास ख,
JOS 22:14 अऊर ओको संग दस मुखियावों ख, मतलब इस्राएल को एक एक वंश म सी पूर्वजों को घराना म को एक एक मुखिया ख भेज्यो, अऊर हि इस्राएल को हजारों म अपनो अपनो पूर्वजों को घराना को मुख्य आदमी होतो।
JOS 22:15 हि गिलाद देश म रूबेनियों, गादियों, अऊर मनश्शे को अरधो वंश को लोगों जवर जाय क कहन लग्यो,
JOS 22:16 “परमेश्वर की पूरी मण्डली यो कह्य हय, ‘तुम न इस्राएल को परमेश्वर यहोवा को यो कसो विश्वासघात करयो; अज त तुम न एक वेदी बनाय लियो हय, येको म तुम न ओको पीछू चलनो छोड़ क ओको खिलाफ अज विद्रोह करयो हय?
JOS 22:17 सुनो, जो पोर नगर को अधर्म हमरो लायी कुछ कम होतो? ऊ अधर्म को वजह प्रभु की मण्डली को ऊपर महामारी आयी होती, हम अज भी ऊ अधर्म सी शुद्ध नहीं भयो हय; का वा तुम्हरी नजर म छोटी सी बात आय
JOS 22:18 कि अज तुम परमेश्वर ख त्याग क ओको पीछू चलनो छोड़ देवय हय? यदि तुम परमेश्वर सी फिर जावय हय, त कल ऊ इस्राएल की पूरी मण्डली सी गुस्सा होयेंन।
JOS 22:19 पर यदि तुम्हरी निजी भूमि अशुद्ध होना, त परमेश्वर की निजी भूमि म आय जावो जहां परमेश्वर को निवास रह्य हय, हम लोगों को बीच म अपनी अपनी निजी भूमि कर लेवो; पर हमरो परमेश्वर यहोवा की वेदी ख छोड़ क अऊर नहीं कोयी वेदी बनाय क परमेश्वर सी विद्रोह करो, अऊर नहीं हम सी।
JOS 22:20 देखो, जब जेरह को टुरा आकान न भेंट करी हुयी चिज को बारे म विश्वासघात करयो, तब परमेश्वर को कोप इस्राएल की पूरी मण्डली पर भड़क्यो? अऊर ऊ आदमी को अधर्म की सजा अकेलो ओखच नहीं मिली।’”
JOS 22:21 तब रूबेनियों, गादियों, अऊर मनश्शे को अरधो वंश को लोगों न इस्राएली मुखियावों ख यो उत्तर दियो,
JOS 22:22 “परमेश्वर जो एक ईश्वरों को परमेश्वर आय! ऊ परमेश्वर यहोवा ओख जानय हय, अऊर इस्राएली भी येख जान लेयेंन कि यदि परमेश्वर सी फिर क यां ओको विश्वासघात कर क् हम न यो काम करयो होना, त तय हम्ख जीन्दो मत छोड़,
JOS 22:23 यदि हम न वेदी ख येकोलायी बनायो होना कि परमेश्वर को पीछू चलनो छोड़ दे, यां येकोलायी कि ओको पर होमबलि, अन्नबलि, यां मेलबलि चढ़ाये, त परमेश्वर खुद येको हिसाब लेयेंन;
JOS 22:24 पर हम न योच बिचार अऊर मनसा सी यो करयो हय कि कहीं भविष्य म तुम्हरी सन्तान हमरी सन्तान सी यो नहीं कहन लगे, ‘तुम्ख इस्राएल को परमेश्वर यहोवा सी का काम?
JOS 22:25 कहालीकि हे रूबेनियों, हे गादियों, परमेश्वर न तुम्हरो अऊर हमरो बीच म यरदन ख सीमा बनाय दियो हय, येकोलायी परमेश्वर को संग तुम्हरो कोयी साझा नहाय।’ यो तरह तुम्हरी सन्तान अऊर हमरी सन्तान म सी परमेश्वर को डर खतम कर देयेंन।
JOS 22:26 येकोलायी हम न कह्यो, ‘आवो, हम अपनो लायी एक वेदी बनाय लेबो, वा होमबलि यां मेलबलि को लायी नहीं,
JOS 22:27 पर येकोलायी कि हमरो अऊर तुम्हरो, अऊर हमरो बाद हमरो अऊर तुम्हरो वंश को बीच म एक संकेत को रूप म काम दे; येकोलायी कि हम होमबलि, मेलबलि, अऊर बलिदान चढ़ाय क परमेश्वर को सामने ओकी उपासना करे; अऊर भविष्य म तुम्हरी सन्तान हमरी सन्तान सी यो नहीं कहनो पाये, कि परमेश्वर को संग तुम्हरो कोयी साझा नहाय।’
JOS 22:28 येकोलायी हम न कह्यो, ‘जब हि लोग भविष्य म हम सी यां हमरो वंश सी कभी कहन लगेंन, तब हम उन सी कहबोंन, कि परमेश्वर कि वेदी को नमुना पर बनी हुयी या वेदी ख देखो, जेक हमरो पूर्वजों न होमबलि यां मेलबलि को लायी नहीं बनायो; पर येकोलायी बनायो होतो कि हमरो अऊर तुम्हरो बीच म एक गवाह बनन लायी काम दे।’
JOS 22:29 या हम सी दूर रहे कि परमेश्वर सी फिर क अज ओको पीछू चलनो छोड़ देबो, अऊर अपनो परमेश्वर यहोवा की वा वेदी ख छोड़ क जो ओको निवास को सामने हय होमबलि, अऊर अन्नबलि यां मेलबलि, लायी दूसरी वेदी बनायबो।”
JOS 22:30 रूबेनियों, गादियों, अऊर मनश्शे को अरधो वंश को लोगों की इन बातों ख सुन्क पीनहास याजक अऊर ओको संग मण्डली को मुखिया, जो इस्राएल को मुख्य आदमी होतो, हि बहुत खुश भयो।
JOS 22:31 अऊर एलीआजार याजक को टुरा पीनहास न रूबेन, गाद, अऊर मनश्शे को लोगों सी कह्यो, “तुम न परमेश्वर को विश्वासघात नहीं करयो, येकोसी हम न यो जान लियो कि परमेश्वर हमरो बीच म हय : अऊर तुम लोगों न इस्राएलियों ख परमेश्वर को हाथों सी सजा होन सी बचाय लियो हय।”
JOS 22:32 तब एलीआजार को टुरा पीनहास मुखियावों समेत रूबेनियों अऊर गादियों को जवर सी गिलाद होतो हुयो कनान देश म इस्राएलियों को जवर लौट गयो : अऊर यो समाचार उन्ख सुनायो।
JOS 22:33 तब इस्राएल को लोग खुश भयो; अऊर परमेश्वर ख धन्य कह्यो, अऊर रूबेनियों अऊर गादियों सी लड़न अऊर उन्को रहन को देश उजाड़न लायी चढ़ायी करन की चर्चा फिर नहीं करी।
JOS 22:34 अऊर रूबेन अऊर गाद को लोगों न यो कह्य क, “या वेदी हमरो अऊर उन्को बीच म गवाह हय, कि यहोवाच परमेश्वर आय;” ऊ वेदी को नाम एद रख्यो।
JOS 23:1 बहुत दिन को बाद, जब परमेश्वर न इस्राएलियों ख उन्को आजु-बाजू को दुस्मनो सी आराम दियो, अऊर यहोशू बूढ्ढा अऊर बहुत उमर को भय गयो होतो,
JOS 23:2 तब यहोशू सब इस्राएलियों ख, अऊर बुजूर्गों, मुख्य आदमियों, न्यायियों, अऊर सरदारों ख बुलाय क कहन लग्यो, “मय त अब बूढ्ढा अऊर बहुत उमर को भय गयो हय;
JOS 23:3 अऊर जो तुम न देख्यो हय कि तुम्हरो परमेश्वर यहोवा न तुम्हरो वजह इन सब जातियों को संग का का करयो हय, कहालीकि जो तुम्हरो तरफ सी लड़तो आयो हय ऊ तुम्हरो परमेश्वर यहोवा आय।
JOS 23:4 देखो, मय न बची हुयी जातियों ख तुम्हरो वंश को हिस्सा बाट दियो हय; अऊर यरदन नदी सी ले क पश्चिम को तरफ को बड़ो समुन्दर तक रहन वाली उन सब जातियों ख भी असोच दियो हय, जिन्को मय न नाश कर डाल्यो हय।
JOS 23:5 अऊर तुम्हरो परमेश्वर यहोवा उन्ख तुम्हरो सामने सी उन्को देश सी निकाल देयेंन; अऊर तुम अपनो परमेश्वर यहोवा को वचन को अनुसार उन्को देश को अधिकारी होय जावो।
JOS 23:6 येकोलायी बहुत हिम्मत बान्ध क, जो कुछ मूसा की व्यवस्था की किताब म लिख्यो हय ओको पूरो करन म सावधान रहो, ओको सी नहीं त दायो मुड़ो अऊर नहीं बायो तरफ।
JOS 23:7 हि जो जातियां तुम्हरो बीच म रह्य गयी हंय इन्को बीच म मत जावो, अऊर नहीं इन्को देवतावों को नाम की चर्चा करो, अऊर नहीं इन्की कसम खिलावो, अऊर नहीं उन्ख दण्डवत करो,
JOS 23:8 पर जसो अज भी तुम अपनो परमेश्वर यहोवा की भक्ति म लवलीन रह्य हय, वसोच रह्यो करो।
JOS 23:9 परमेश्वर न तुम्हरो सामने सी बड़ी अऊर शक्तिशाली जातियों ख निकाल्यो हय; अऊर तुम्हरो सामने अज तक कोयी ठहर नहीं सक्यो।
JOS 23:10 तुम म सी एक आदमी हजार आदमियों भगाय सकय हय, कहालीकि तुम्हरो परमेश्वर यहोवा अपनो वचन को अनुसार तुम्हरो तरफ सी लड़य हय।
JOS 23:11 येकोलायी अपनो परमेश्वर यहोवा सी प्रेम रखन लायी सदा चौकस रहो।
JOS 23:12 कहालीकि यदि तुम कोयी रीति सी परमेश्वर सी फिर क इन जातियों को बाकी लोगों सी घुल-मिल जावो जो तुम्हरो बीच म बच्यो हुयो रह्य हंय, अऊर इन सी शादी बिहाव कर क् इन्को संग समधियाना रिस्ता जोड़ो,
JOS 23:13 त जरूर जान लेवो कि तुम्हरो परमेश्वर यहोवा इन जातियों ख तुम्हरो सामने सी नहीं निकालेंन; अऊर हि तुम्हरो लायी जाल अऊर फन्दा, अऊर तुम्हरो पीठ पर कोड़ा, अऊर तुम्हरी आंखी म काटा को जसो खतरनाक ठहरेंन, अऊर आखरी म तुम या अच्छी जमीन पर सी जो तुम्हरो परमेश्वर यहोवा न तुम्ख दियो हय नाश होय जावो।
JOS 23:14 “सुनो, मय त अब मृत्यु की गति पर जान वालो हय, अऊर तुम सब अपनो अपनो दिल अऊर मन म जानय हय, कि जितनी भलायी की बाते हमरो परमेश्वर यहोवा न हमरो बारे म कही हय उन्म सी एक भी पूरी हुयी बिना नहीं रही; हि सब की सब तुम पर घट गयी हंय, उन्म सी एक भी पूरी हुयी बिना नहीं रही।
JOS 23:15 त जसो तुम्हरो परमेश्वर यहोवा की कही हुयी सब भलायी की बाते तुम पर घटी हय; वसो परमेश्वर यहोवा विपत्ति की सब बाते भी तुम पर लगायेंन अऊर तुम्ख या अच्छी जमीन को ऊपर सी, जेक तुम्हरो परमेश्वर यहोवा न तुम्ख दियो हय, नाश कर डालेंन।
JOS 23:16 जब तुम ऊ वाचा की, जेक तुम्हरो परमेश्वर यहोवा न तुम्ख आज्ञा दी हय, उल्लंघन कर क् परायो देवतावों की उपासना अऊर उन्ख दण्डवत करन लगो, तब परमेश्वर को कोप तुम पर भड़केंन, अऊर तुम यो अच्छो देश म सी जेक ओन तुम्ख दियो हय तुरतच नाश होय जावो।”
JOS 24:1 यहोशू न इस्राएलियों को सब वंश को लोगों ख शकेम नगर म जमा करयो, अऊर इस्राएल को बुजूर्ग लोगों ख अऊर मुख्य आदमियों, अऊर न्यायियों, अऊर सरदारों ख बुलायो; अऊर हि परमेश्वर को सामने मौजूद भयो।
JOS 24:2 तब यहोशू न उन सब लोगों सी कह्यो, “इस्राएल को परमेश्वर यहोवा यो तरह कह्य हय, ‘प्राचिन काल म अब्राहम अऊर नाहोर को बाप तेरह पहले, तुम्हरो पूर्वज फरात नदी को ओन पार रहत होतो, हि दूसरो देवतावों की पूजा करत होतो।
JOS 24:3 अऊर मय न तुम्हरो पूर्वज अब्राहम ख फरात नदी को ओन पार सी लियो अऊर ओख पूरो कनान देश घुमायो, अऊर मय न ओको वंश बढ़ायो। अऊर ओख इसहाक ख दियो;
JOS 24:4 फिर मय न इसहाक ख याकूब अऊर एसाव दियो। अऊर एसाव ख मय न सेईर नाम की पहाड़ी देश दियो कि ऊ ओको अधिकारी होय सके, पर याकूब अऊर ओको टुरा मिस्र देश ख चली गयो।
JOS 24:5 फिर मय न मूसा अऊर हारून ख भेज क उन सब कामों को द्वारा जो मय न मिस्र देश म करयो, ऊ देश ख नाश कर दियो; अऊर ओको बाद वहां सी तुम्ख बाहेर निकाल लायो।
JOS 24:6 अऊर मय न तुम्हरो पूर्वजों ख मिस्र देश म सी निकाल लायो, अऊर तुम लाल समुन्दर पर पहुंच्यो; अऊर मिस्रियों न रथों अऊर घुड़सवारों ख ले क लाल समुन्दर तक तुम्हरो पीछा करयो।
JOS 24:7 अऊर जब तुम न यहोवा की दोहायी दी, अऊर मय न उन्को अऊर मिस्रियों को बीच अन्धियारो कर दियो, अऊर मय न उन पर समुन्दर ख बहाय क उन्ख डुबाय दियो; अऊर जो कुछ मय न मिस्र म करयो ओख तुम लोगों न अपनी आंखी सी देख्यो;’” “फिर तुम बहुत समय तक जंगल म रह्यो।”
JOS 24:8 तब मय तुम्ख उन एमोरी जाति को देश म लायो, जो यरदन नदी को पूर्व दिशा म बस्यो होतो; अऊर हि तुम सी युद्ध करयो, अऊर मय न उन्ख तुम्हरो हाथ म सौंप दियो, अऊर तुम उन्को देश को अधिकारी भय गयो, अऊर मय न एमोरी जाति ख तुम्हरो सामने नाश कर दियो।
JOS 24:9 फिर मोआब को राजा सिप्पोर को टुरा बालाक इस्राएल सी लड़न तैयार भयो; अऊर तुम्ख श्राप देन लायी बोर को टुरा बिलाम ख बुलावा भेज्यो,
JOS 24:10 पर मय न बिलाम की नहीं सुनी; ऊ तुम्ख आशीषच आशीष देतो गयो; यो तरह मय न तुम्ख ओको हाथ सी बचायो।
JOS 24:11 तब तुम यरदन नदी पार होय क यरीहो को जवर आयो, अऊर जब यरीहो को लोग, अऊर एमोरी, परिज्जी, कनानी, हित्ती, गिर्गाशी, हिब्बी, अऊर यबूसी तुम सी लड़्यो, तब मय न उन्ख तुम्हरो वश म कर दियो।
JOS 24:12 अऊर मय न तुम्हरो आगु बर्रों को आतंक भेज्यो, अऊर उन्न एमोरियों को दोयी राजावों ख तुम्हरो सामने सी निकाल दियो; देखो, या तुम्हरी तलवार यां धनुष को बल पर नहीं भयो।
JOS 24:13 फिर मय न तुम्ख असो देश दियो होतो, अऊर असो नगर भी दियो हय जिन्ख तुम न नहीं बसायो होतो, अऊर तुम ओको म निवास करय हय; अऊर जो अंगूर अऊर जैतून को बगीचा को फर तुम खावय हय उन्ख तुम न नहीं लगायो होतो।
JOS 24:14 यहोशू न कह्यो, “परमेश्वर को भय मान क ओकी सेवा खरायी अऊर सच्चायी सी करो; अऊर जिन देवतावों की सेवा तुम्हरो पूर्वज मेशोपोटामियां अऊर मिस्र म करत होतो, उन्ख दूर कर क् परमेश्वर की सेवा करो।
JOS 24:15 अऊर यदि परमेश्वर की सेवा करनो तुम्ख बुरो लगय हय, त अज चुन लेवो कि तुम कौन की सेवा करो, चाहे उन देवतावों की उन्की सेवा तुम्हरो पूर्वज मेशोपोटामियां म करत होतो, अऊर चाहे एमोरियों को देवतावों की सेवा करो जिन्को देश म तुम रह्य हय; पर मय त अपनो परिवार समेत परमेश्वरच की सेवा हमेशा करूं।”
JOS 24:16 तब लोगों न उत्तर दियो, “परमेश्वर ख त्याग क दूसरो देवतावों की सेवा करन को बिचार हम कभी नहीं करबो;
JOS 24:17 कहालीकि हमरो परमेश्वर यहोवा उच आय जो हम्ख अऊर हमरो पूर्वजों ख मिस्र देश सी निकाल लायो, अऊर हमरो देखतो देखतो बड़ो बड़ो आश्चर्यकर्म करयो, अऊर जो रस्ता पर अऊर जितनी जातियों को बीच म सी हम चलत आवत होतो ओन हमरी रक्षा करी;
JOS 24:18 अऊर हमरो सामने सी यो देश म रहन वाली एमोरी अऊर सब जातियों ख निकाल दियो हय; येकोलायी हम भी परमेश्वर की सेवा करबो, कहालीकि हमरो परमेश्वर उच आय।”
JOS 24:19 यहोशू न लोगों सी कह्यो, “तुम सी परमेश्वर की सेवा नहीं होय सकय; कहालीकि ऊ पवित्र परमेश्वर आय; ऊ जलन रखन वालो परमेश्वर आय; ऊ तुम्हरो अपराध अऊर पाप माफ नहीं करेंन।
JOS 24:20 यदि तुम परमेश्वर ख त्याग क परायो देवतावों की सेवा करन लगो, त ऊ तुम्हरो भलो करतो आयो हय तब भी ऊ मुड़ क तुम्हरी हानि करेंन, अऊर तुम्हरो अन्त भी कर डालेंन।”
JOS 24:21 लोगों न यहोशू सी कह्यो, “नहीं; हम परमेश्वरच की सेवा करबो।”
JOS 24:22 यहोशू न लोगों सी कह्यो, “तुम खुदच अपनो गवाह हय कि तुम न परमेश्वर की सेवा करन को निर्नय लियो हय।” उन्न कह्यो, “हां, हम गवाह हय।”
JOS 24:23 यहोशू न कह्यो, “अपनो बीच म सी परायो देवतावों ख दूर कर क् अपनो अपनो मन इस्राएल को परमेश्वर यहोवा को तरफ लगावो।”
JOS 24:24 लोगों न यहोशू सी कह्यो, “हम त अपनो परमेश्वर यहोवाच की सेवा करबो, अऊर ओकीच बात मानबो।”
JOS 24:25 तब यहोशू न उच दिन लोगों सी वाचा बन्धायी, अऊर शकेम म उन्को लायी विधि अऊर नियम ठहरायो।
JOS 24:26 या पूरी बाते यहोशू न परमेश्वर की व्यवस्था की किताब म लिख दियो; अऊर एक बड़ो गोटा चुन क वहां ऊ बांझ झाड़ को खल्लो खड़ो करयो, जो परमेश्वर को पवित्र जागा म होतो।
JOS 24:27 तब यहोशू न लोगों सी कह्यो, “सुनो, यो गोटा हम लोगों को गवाह रहेंन, कहालीकि जितनो वचन परमेश्वर न हम सी कह्यो हय उन्ख येन सुन्यो हय; येकोलायी यो तुम्हरो गवाह रहेंन, असो नहीं होय कि तुम अपनो परमेश्वर सी मुकर जावो।”
JOS 24:28 तब यहोशू न लोगों ख अपनो अपनो निजी हिस्सा म जान लायी बिदा करयो।
JOS 24:29 इन बातों को बाद परमेश्वर को सेवक, नून को टुरा यहोशू, एक सौ दस साल को होय क मर गयो।
JOS 24:30 अऊर ओको शव ख ओको जमीन हिस्सा तिम्नत्सेरह नगर म माटी दी गयी, जो एप्रैम को पहाड़ी देश म गाश नाम की पहाड़ी को उत्तर म हय।
JOS 24:31 यहोशू जब तक जीन्दो रह्यो, तब तक इस्राएली लोग परमेश्वर की उपासना करतो रह्यो, अऊर ओको मरन को बाद भी हि अगुवा को जीन्दो रहतो, जिन्न ऊ सब कुछ जो परमेश्वर न इस्राएलियों को लायी करयो होतो, देख क इस्राएल को लोग परमेश्वर की उपासना करतो रह्यो।
JOS 24:32 फिर यूसुफ की हड्डी जिन्ख इस्राएली लोग मिस्र सी लायो होतो हि शकेम नगर की जमीन को ऊ हिस्सा म गाड़ी गयी, जेक याकूब न शकेम नगर को पिता हमोर को टुरावों सी एक सौ चांदी को सिक्का म ले लियो होतो; येकोलायी ऊ यूसुफ की सन्तान को निजी हिस्सा भय गयो।
JOS 24:33 हारून को टुरा एलीआजार भी मर गयो; अऊर ओख एप्रैम को पहाड़ी देश को गिबा नगर म माटी दी गयी, जो ओको टुरा पीनहास ख दियो गयो होतो।
EST 1:1 क्षयर्ष नाम को राजा को दिनों म या बाते भयी : यो उच क्षयर्ष आय, जो एक सौ सत्ताईस देशों पर, मतलब भारत सी ले क कूश देश तक राज्य करत होतो।
EST 1:2 उच दिनों म राजा क्षयर्ष को शासन काल की राजधानी शूशन गढ़ म होती उत राजगद्दी पर बैठ क राज्य करत होतो।
EST 1:3 उत ओन अपनो शासन करन को तीसरो साल म अपनो सब हाकिमों अऊर काम करन वालो ख भेज दियो। फारस अऊर मादै देशों को सेनापति अऊर क्षेत्र क्षेत्र को प्रधान अऊर हाकिम ओको जवर आय गयो।
EST 1:4 ऊ उन्ख बहुत दिन बल्की छय महीना तक अपनो राज सी वैभव को धन अऊर अपनी महानता की अनमोल चिज दिखातो रह्यो।
EST 1:5 इन दिनों को बीतन पर राजा न छोटो बड़ो उन पूरो ख भी जो शूशन नाम को राजगढ़ म जमा भयो होतो, राजभवन को बगीचा को आंगन म सात दिन तक जेवन दियो।
EST 1:6 उत को परदा सफेद अऊर नीलो धागा को होतो, अऊर सन अऊर बैंजनी रंग की डोरियों सी चांदी को छल्ला म, संगमर्मर को खम्भा सी लग्यो हुयो होतो; अऊर उत की चौकियां सोनो चांदी की होती; अऊर लाल अऊर सफेद अऊर पीलो अऊर कालो संगमर्मर की बनी हुयी फर्श पर धरी हुयी होती।
EST 1:7 ऊ जेवन म राजा को लायक अंगूररस अऊर अलग अलग रूप को सोनो को बर्तनों म डाल क राजा की उदारता सी बहुतायत को संग पिलायो जात होतो।
EST 1:8 पीनो त नियम को अनुसार होत होतो, जेख जसो लगत होतो वसोच करत होतो; कहालीकि राजा न अपनो भवन को सब भण्डारियों ख आज्ञा दी होती, कि जो अतिथि जसो चाहे ओको संग वसोच बर्ताव करजो।
EST 1:9 रानी वशती न भी राजा क्षयर्ष को भवन म स्त्रियों ख भोज दियो।
EST 1:10 सातवों दिन, जब राजा को मन अंगूररस म चूर होतो, तब ओन महूमान, बिजता, हर्बोना, बिगता, अबगता, जेतेर अऊर कर्कस नाम को सातों किन्नर ख जो क्षयर्ष राजा को जवर सेवा करत होतो, आज्ञा दी,
EST 1:11 कि रानी वशती ख राजमुकुट धारन करयो हुयो राजा को जवर ले आवों; जेको सी देश देश को लोगों अऊर शासक पर ओकी सुन्दरता प्रगट हो जाये; कहालीकि वा देखनो म सुन्दर होती।
EST 1:12 किन्नरों को द्वारा राजा की या आज्ञा पा क रानी वशती न आनो सी मना करयो। या बात पर राजा बड़ो गुस्सा सी जलन लग्यो।
EST 1:13 तब राजा न समय समय को भेद जानन वालो पण्डितों सी पूछ्यो राजा त नीति अऊर न्याय को सब ज्ञानियों सी असोच करत होतो।
EST 1:14 ओको जवर कर्शन, शेतार, अदमाता, तर्शीश, मेरेस, मर्सना, अऊर ममूकान नाम को फारस अऊर मादै देश को सात प्रधान होतो, जो राजा को दर्शन करत होतो, अऊर राज्य म मुख्य मुख्य पदों पर नियुक्त करयो गयो होतो
EST 1:15 राजा न पूछ्यो, “रानी वशती न राजा क्षयर्ष की, किन्नरों द्वारा दिलायी हुयी आज्ञा को उल्लंघन करयो, त नीति को अनुसार ओको संग का करयो जाये?”
EST 1:16 तब ममूकान राजा न अऊर शासक की उपस्थिति म उत्तर दियो, “रानी वशती न जो अनुचित काम करयो हय, ऊ न केवल राजा सी पर सब शासक सी अऊर उन सब देशों को लोगों सी भी जो राजा क्षयर्ष को सब क्षेत्रों म रह्य हंय।
EST 1:17 कहालीकि रानी को यो काम की चर्चा सब स्त्रियों म होयेंन अऊर जब यो कह्यो जायेंन, ‘राजा क्षयर्ष न रानी वशती ख अपनो आगु लान की आज्ञा दी पर वा नहीं आयी,’ तब हि भी अपनो अपनो पति ख बेकार जानन लगेंन।
EST 1:18 अज को दिन फारसी अऊर मादी देश को हाकिमों की स्त्रियां जिन्न रानी की या बात सुनी हय, हि भी राजा को सब शासक सी असीच कहन लगेंन; यो तरह बहुत जलन अऊर गुस्सा पैदा होयेंन।
EST 1:19 यदि राजा ख स्वीकार हो, त या आज्ञा निकाले, अऊर फारसियों अऊर मादियों को कानून म लिखी भी जाये, जेको सी कभी बदल नहीं सके, कि रानी वशती राजा क्षयर्ष को जवर फिर कभी आनो न पाये, अऊर राजा पटरानी को पद कोयी दूसरो ख दे दे जो ओको सी अच्छी हो।
EST 1:20 तब जब राजा की या आज्ञा ओको पूरो राज्य म सुनायी जायेंन, तब सब पत्नियां अपनो अपनो पति को, आदर सम्मान करती रहेंन, चाहे ऊ गरीब हो या अमीर हो।”
EST 1:21 या बात राजा अऊर शासक ख पसंद आयी अऊर राजा न ममूकान की सलाह मान ली अऊर अपनो राज्य म,
EST 1:22 मतलब हर एक क्षेत्र को अक्षरों म अऊर हर एक जाति की भाषा म चिट्ठियां भेजी, कि सब आदमी अपनो अपनो घर म अधिकार चलाये, अऊर अपनी जाति की भाषा बोल्यो करे।
EST 2:1 इन बातों को बाद जब राजा क्षयर्ष को गुस्सा ठंडो पड़ गयो, तब ओन रानी वशती की, अऊर जो काम ओन करयो होतो, अऊर जो ओको बारे म आज्ञा निकली होती ओकी भी सुधि ली
EST 2:2 तब राजा को सेवक जो ओको सलाहकार होतो, कहन लग्यो, “राजा लायी सुन्दर नहीं त जवान कुवारी लड़कियां ढूंढ़ी जाये।
EST 2:3 अऊर राजा न अपनो राज्य को सब क्षेत्रों म लोगों ख येकोलायी नियुक्त करे कि हि सब सुन्दर जवान कुंवारियों ख शूशन गढ़ को रनवास म जमा करे अऊर स्त्रियों प्रबन्धक हेगे ख जो राजा को खोजा होतो सौंप दे; अऊर सिंगार की चिजे उन्ख दी जाये।
EST 2:4 तब उन्म सी जो कुंवारी लड़की राजा की नजर म अच्छी ठहरी, ओख रानी वशती की जागा पर पटरानी बनायी जाये।” या बात राजा ख पसंद आयी अऊर ओन असोच करयो।
EST 2:5 शूशन गढ़ म मोर्दकै नाम को एक यहूदी रहत होतो, जो कीश नाम को एक बिन्यामीनी को परनाती, शिमी को नाती, अऊर याईर को बेटा होतो।
EST 2:6 ऊ उन बन्दियों को संग यरूशलेम सी बन्धुआई म गयो होतो, जिन्ख बेबीलोन को राजा नबूकदनेस्सर, यहूदा को राजा यकोन्याह को संग बन्दी बना कर क् ले गयो होतो।
EST 2:7 ओन हदस्सा नाम की अपनी काका बहिन ख, जो एस्तेर भी कहलात होती, ओख पाल्यो पोस्यो होतो; कहालीकि ओको माय बाप कोयी नहीं होतो, अऊर वा लड़की सुन्दर अऊर रूपवती होती, अऊर जब ओको माय बाप मर गयो, तब मोर्दकै न ओख अपनी टुरी को रूप म पाल्यो।
EST 2:8 जब राजा की आज्ञा अऊर नियम सुनायो गयो, अऊर बहुत सी युवतियां, शूशन गढ़ म हेगे को अधिकार म जमा करी गयी, तब एस्तेर भी राजभवन म स्त्रियों को प्रबन्धक हेगे को अधिकार म सौंपी गयी।
EST 2:9 वा एस्तेर ओकी नजर म अच्छी लगी; अऊर ऊ ओको सी खुश भयो, तब ओन बिना विलम्ब ओख राजभवन म सी सिंगार करन की चिजे, अऊर ओको जेवन, अऊर ओको लायी चुनी हुयी सात सहेलियां भी दी, अऊर ओख अऊर ओकी सहेलियों ख रनवास म सब सी अच्छी रहन की जागा दी।
EST 2:10 एस्तेर न अपनो लोग नहीं बतायो होतो, न अपनो कुल, कहालीकि मोर्दकै न ओख आज्ञा दी होती कि ओख नहीं बताजो।
EST 2:11 मोर्दकै हर दिन रनवास को आंगन को आगु टहलत होतो ताकि एस्तेर को हाल चाल जान सके कि अऊर वा कसी हय?
EST 2:12 जब एक एक लड़की की पारी आयी, कि वा क्षयर्ष राजा को जवर जाये अऊर यो ऊ समय भयो जब ओको संग स्त्रियों लायी ठहरायो हुयो नियम को अनुसार बारा महिना तक व्यवहार करयो गयो होतो; मतलब उन्को सिंगार करन को दिन यो रीति सी बीत गयो, कि छय महिना तक गन्धरस को तेल लगायो जात होतो, अऊर छय महिना तक सुगन्ध की चिज, अऊर स्त्रियों ख शुद्ध करन को दूसरो सामान लगायो जात होतो।
EST 2:13 यो तरह सी वा लड़की जब राजा को जवर जात होती, तब जो कयी वा चाहत होती कि रनवास सी राजभवन म ले जाये, ऊ ओख दियो जात होतो।
EST 2:14 शाम ख त वा जात होती अऊर सुबेरे वा लौट क रनवास को दूसरो घर म जाय क रखेलियों को प्रबन्धक राजा को किन्नर शाशगज को अधिकार म होय जात होती, अऊर राजा को जवर फिर नहीं जात होती। यदि राजा ओको सी प्रसन्न होय जात होतो, तब ऊ नाम ले क बुलायी जात होती।
EST 2:15 जब मोर्दकै को काका अबीहैल की टुरी एस्तेर, जेख मोर्दकै न टुरी मान क रख्यो होतो, ओकी पारी आयी की राजा को जवर जाये, तब जो कुछ स्त्रियों को प्रबन्धक राजा को किन्नर अधिकारी हेगे न ओको लायी ठहरायो होतो, ओको सी ज्यादा ओन अऊर कुछ नहीं मांग्यो। जितनों न एस्तेर ख देख्यो, हि सब ओको सी प्रसन्न भयो।
EST 2:16 तब एस्तेर राजभवन म राजा क्षयर्ष को जवर ओको राज्य को सातवों साल को तेबेत नाम को दसवों महीना म पहुंचायी गयी।
EST 2:17 राजा न एस्तेर ख अऊर सब स्त्रियों सी ज्यादा प्रेम करयो, अऊर दूसरी सब कुंवारियों सी ज्यादा ओको अनुग्रह अऊर कृपा की दृष्टि ओकोच पर भयी, यो वजह ओन ओकी मुंड पर राजमुकुट रख्यो अऊर ओख वशती की जागा पर रानी बनायो।
EST 2:18 तब राजा न अपनो सब हाकिमों अऊर कर्मचारियों ख एक बड़ो भोज दियो, अऊर ओख एस्तेर को भोज कह्यो; अऊर क्षेत्रों म छुट्टी दिलायी, अऊर अपनी उदारता को लायक इनाम भी बाट्यो।
EST 2:19 अब तक राजा न मोर्दकै ख अपनी प्रशासकीय सेवा म नियुक्त करयो होतो।
EST 2:20 एस्तेर न अपनी जाति अऊर कुल को बारे म बतायो नहीं होतो, कहालीकि मोर्दकै न ओख असी आज्ञा दी होती कि न बताये; अऊर एस्तेर मोर्दकै की बात असी मानी जसी कि ओको इत अपनो पालन पोषन को समय मानत होती।
EST 2:21 उच दिनो म जब मोर्दकै राजा को राजभवन की फाटक पर बैठ्यो करत रह्य, तब राजा को किन्नर जो द्वारपाल भी होतो, उन्म सी बिकतान अऊर तेरेश नाम को दोय जन न राजा क्षयर्ष सी नाराज होय क ओख मारन की योजना बनायी।
EST 2:22 या बात मोर्दकै ख मालूम भयी, अऊर ओन एस्तेर रानी ख या बात बतायी, अऊर एस्तेर न मोर्दकै को नाम ले क राजा ख सावधान कर दी।
EST 2:23 तब जाच पड़ताल होन पर या बात सच निकली अऊर हि दोयी झाड़ पर लटकाय दियो गयो, अऊर यो वृत्तान्त राजा को आगु इतिहास की किताब म लिख लियो गयो।
EST 3:1 इन बातों को बाद राजा क्षयर्ष न अगागी हम्मदाता को टुरा हामान ख पंतप्रदान बनायो, अऊर ओख महत्व दे क ओको लायी ओको संगी हाकिमों को सिंहासनों सी ऊंचो सिंहासन ठहरायो।
EST 3:2 राजा को सब कर्मचारी जो राजभवन को फाटक म रह्यो करत होतो, हि हामान को आगु झुक क दण्डवत करत होतो कहालीकि राजा न ओको बारे म असीच आज्ञा दी होती; पर मोर्दकै न त झुकत होतो अऊर न ओख दण्डवत करत होतो
EST 3:3 तब राजा को कर्मचारी जो राजभवन म रह्यो करत होतो, उन्न मोर्दकै सी पूछ्यो, “तय राजा की आज्ञा को कहाली उल्लंघन करय हय?”
EST 3:4 जब हि ओको सी हर दिन असोच कहतो रह्यो, अऊर ओन उन्की एक नहीं मानी, तब उन्न यो देखन की इच्छा सी कि मोर्दकै की या बात चलेंन कि नहीं, हामान ख मोर्दकै न बताय दियो, होतो कि मय यहूदी आय।
EST 3:5 जब हामान न देख्यो कि मोर्दकै नहीं झुकय, अऊर न ओख दण्डवत करय हय, तब हामान बहुतच गुस्सा भयो।
EST 3:6 ओन केवल मोर्दकै पर हाथ उठानो अपनी मर्यादा सी कम जान्यो। कहालीकि उन्न हामान ख यो बताय दियो होतो कि मोर्दकै कौन्सी जाति को हय, येकोलायी हामान न क्षयर्ष को साम्राज्य म रहन वालो पूरो यहूदियों ख भी मोर्दकै की जाति जान क, नाश कर डालन की युक्ति निकाली।
EST 3:7 राजा क्षयर्ष को बारा साल को नीसान नाम को पहिलो महिना म, हामान न अदार नाम को बारा महीना तक को एक एक दिन अऊर एक एक महीना लायी “पूर” मतलब चिट्ठी अपनो आगु निकलवायी।
EST 3:8 तब हामान न राजा क्षयर्ष सी कह्यो, “तोरो राज्य को सब क्षेत्रों म रहन वालो देश देश को लोगों को बीच म अलग अलग बिखरयो हुयो लोग हय, जेको नियम अऊर सब लोगों को नियमों सी अलग हंय; अऊर हि राजा को कानून पर नहीं चलय, येकोलायी उन्ख रहन देनो राजा ख लाभ दायक नहाय।
EST 3:9 यदि राजा ख स्वीकार हय त उन्ख नाश करन की आज्ञा लिखी जाये, अऊर मय राजा को सेवकों को हाथ म राज भण्डार म पहुंचान लायी, दस हजार चांदी को सिक्का देऊं।”
EST 3:10 तब राजा न अपनी अंगूठी अपनो हाथ सी उतार क, अगागी हम्मदाता को टुरा हामान ख, जो यहूदियों को बैरी होतो दे दी;
EST 3:11 अऊर राजा न हामान सी कह्यो, “वा चांदी जो तोख दी गयी हय, अऊर हि लोग अऊर उन्को पैसा तोरो हाथ म हय, ताकि तय उन्को सी जसो मन कहे वसोच व्यवहार कर।”
EST 3:12 तब उच पहिलो महीना को तेरहवों दिन ख राजा को लेखक बुलायो गयो, अऊर हामान की आज्ञा को अनुसार राजा को सब अधिपतियों, अऊर सब क्षेत्रों को प्रधानों, अऊर देश देश को लोगों को हाकिमों लायी चिट्ठियां, एक एक क्षेत्र को अक्षरों म, अऊर एक एक देश को लोगों की भाषा म राजा क्षयर्ष को नाम सी लिखी गयी; अऊर उन्म राजा की अंगूठी की छाप लगायी गयी।
EST 3:13 राज्य को सब क्षेत्रों म यो आशय की चिट्ठियां हरकारों को द्वारा भेजी गयी कि एकच दिन म, मतलब अदार नाम को बारहवों महीना को तेरहवों दिन ख, का जवान का बूढ्ढा, का स्त्री, का बच्चा, सब यहूदी मार डाल्यो जाये, नाश करयो जाये अऊर उन्को सत्यानाश करयो जाये; अऊर उन्की धन सम्पत्ति लूट ली जाये।
EST 3:14 ऊ आज्ञा को लेख की नकलें सब क्षेत्रों म भेजी गयी अऊर बतायी गयी कि सब देशों को लोग ऊ दिन लायी तैयार होय जाये।
EST 3:15 या आज्ञा शूशन गढ़ म दी गयी, अऊर हरकारे राजा की आज्ञा सी तुरतच निकल गयो। राजा अऊर हामान त पीवन बैठ गयो, पर शूशन नगर म घबराहट फैल गयी।
EST 4:1 जब मोर्दकै न जान लियो कि का का करयो गयो हय तब मोर्दकै कपड़ा भाड़ क, टाट पहिन क, राख डाल क, नगर को बीच म जाय क ऊंचो अऊर दु:ख भरयो आवाज सी चिल्लान लग्यो;
EST 4:2 अऊर ऊ राजभवन की फाटक को आगु पहुंच्यो, पर टाट को कपड़ा पहिन्यो हुयो राजभवन की फाटक को अन्दर त कोयी ख जान की आज्ञा नहीं होती।
EST 4:3 एक एक क्षेत्र म, जित जित राजा की आज्ञा अऊर नियम पहुंच्यो, उत उत यहूदी बड़ो विलाप करन लग्यो अऊर उपवास अऊर रोनो पीटनो लग्यो; अऊर बहुत यहूदी टाट को कपड़ा पहिन क राख को ढेर पर बैठ्यो रह्यो।
EST 4:4 एस्तेर रानी की दासियां अऊर किन्नरों न जाय क ओख बताय दियो, तब रानी दु:ख सी भर गयी; अऊर मोर्दकै को जवर कपड़ा भेज क यो कह्यो कि टाट उतार क इन्क पहिन ले, पर मोर्दकै न उन्ख नहीं लियो।
EST 4:5 तब एस्तेर न राजा को किन्नरों म सी हताक ख जेक राजा न ओको जवर रहन ख ठहरायो होतो, बुलवाय क आज्ञा दी कि मोर्दकै को जवर जाय क मालूम कर ले कि का बात आय, अऊर येको का वजह हय।
EST 4:6 तब हताक नगर को ऊ चौक म, जो राजभवन को फाटक को आगु होतो, मोर्दकै को जवर गयो।
EST 4:7 मोर्दकै न ओख सब कयी बताय दियो कि मोरो ऊपर का का बीती हय, अऊर हामान न यहूदियों को नाश करन की अनुमति पान लायी राज भण्डार म कितनी चांदी भर देन को वचन दियो हय, यो भी ठीक ठीक बताय दियो।
EST 4:8 तब यहूदियों को विनाश करन की आज्ञा जो शूशन म दी गयी होती, ओकी एक नकल भी ओन हताक को हाथ म, एस्तेर ख दिखान लायी दी, अऊर ओख सब हाल बतावन लायी, अऊर या आज्ञा देन ख कह्यो, कि अन्दर राजा को जवर जाय क अपनो लोगों लायी गिड़गिड़ाय क बिनती करे।
EST 4:9 तब हताक न एस्तेर को जवर जाय क मोर्दकै की बाते कह्य क सुनायी।
EST 4:10 तब एस्तेर न हताक ख मोर्दकै सी यो कहन की आज्ञा दी,
EST 4:11 “राजा को सब कर्मचारियों, अऊर राजा को क्षेत्रों को सब लोगों ख भी मालूम हय, कि का आदमी अऊर का स्त्री, कोयी कहाली न हो, जो आज्ञा बिना पाये अन्दर आंगन म राजा को जवर जायेंन ओख मार डालन कीच आज्ञा हय; केवल जेको तरफ राजा सोनो को राजदण्ड बढ़ाये उच बचय हय। पर मय अब तीस दिन सी राजा को जवर नहीं बुलायी गयी हय।”
EST 4:12 एस्तेर की या बाते मोर्दकै ख सुनायी गयी।
EST 4:13 तब मोर्दकै न एस्तेर को जवर यो सन्देश भेज्यो, “तय मन मच यो बिचार मत कर कि मयच राजभवन म रहन को वजह अऊर सब यहूदियों म सी बची रहूं।
EST 4:14 यदि तय यो समय चुपचाप रह्यजो, त अऊर कोयी न कोयी उपाय सी यहूदियों ख मदत अऊर छुटकारा मिल जायेंन, पर तय अपनो बाप को घराना सहीत नाश होय जाजो। का जाने तोख असोच कठिन समय लायी राज पद मिल गयो हो।”
EST 4:15 तब एस्तेर न मोर्दकै को जवर यो सन्देश भेज्यो,
EST 4:16 “तय जाय क शूशन को सब यहूदियों ख जमा कर, अऊर तुम सब मिल क मोरो लायी उपवास करो, तीन दिन अऊर रात ख कयी मत खावो, अऊर न कयी पीवो। मय भी अपनी दासियां सहित उच रीति सी उपवास करूं; अऊर असीच दशा म मय नियम को विरुद्ध राजा को जवर अन्दर जाऊं; अऊर यदि नाश भय गयी त भय गयी।”
EST 4:17 तब मोर्दकै चली गयो अऊर एस्तेर की आज्ञा को अनुसारच ओन करयो।
EST 5:1 तीसरो दिन एस्तेर अपनो राजकीय कपड़ा पहिन क राजभवन को अन्दर आंगन म जाय क, राजभवन को आगु खड़ी भय गयी। राजा राजभवन म राजगद्दी पर भवन को दरवाजा को आगु विराजमान होतो;
EST 5:2 अऊर जब राजा न एस्तेर रानी ख आंगन म खड़ी हुयी देख्यो, तब ओन प्रसन्न होय क सोनो को राजदण्ड जो ओको हाथ म होतो ओको तरफ बढ़ायो। तब एस्तेर न जवर जाय क राजदण्ड को कोना ख छुयो।
EST 5:3 तब राजा न ओको सी पुच्छ्यो, “हे एस्तेर रानी, तोख का होना? तय का मांगय हय? मांग अऊर तोख आधो राज्य तक दियो जायेंन।”
EST 5:4 एस्तेर न कह्यो, “यदि राजा ख स्वीकार हय, त अज हामान ख संग ले क ऊ भोज म आये, जो मय न राजा लायी तैयार करयो हय।”
EST 5:5 तब राजा न आज्ञा दी, “हामान ख तुरतच ले आवो, कि एस्तेर को नेवता ग्रहन करयो जाये।” तब राजा अऊर हामान एस्तेर को तैयार करयो हुयो भोज म आयो।
EST 5:6 भोज को समय जब अंगूर रस पियो जात होतो, तब राजा न एस्तेर सी कह्यो, “तोरी का बिनती हय? ऊ पूरो करयो जायेंन। तय का मांगय हय? मांग, अऊर आधो राज्य तक तोख दियो जायेंन।”
EST 5:7 एस्तेर न उत्तर दियो, “मोरो निवेदन अऊर जो मय मांगू हय ऊ यो आय,
EST 5:8 यदि राजा मोरो पर प्रसन्न हय अऊर राजा उचित समझय हंय कि मोरी बिनती अऊर मांग ख पूरी करयो जाये त राजा अऊर हामान कल ऊ भोज म आये जेक मय उन्को लायी करूं, अऊर कल मय राजा को यो वचन को अनुसार करूं।”
EST 5:9 ऊ दिन हामान खुश अऊर मन म प्रसन्न होय क बाहेर गयो। पर जब ओन मोर्दकै ख राजभवन को फाटक म देख्यो, कि ऊ ओको आगु न त खड़ो भयो अऊर न हट्यो, तब ऊ मोर्दकै को विरुद्ध गुस्सा सी भर गयो।
EST 5:10 पर ओन अपनो ख रोक क अपनो घर गयो; अऊर अपनो संगियों अऊर अपनी पत्नी जेरेश ख बुलाय क लायो।
EST 5:11 तब हामान न उन्को सी अपनो धन को वैभव, अऊर अपनो बाल बच्चा की बढ़ती अऊर राजा न ओख कसो कसो बढ़ायो, अऊर दूसरो सब हाकिमों अऊर अपनो अऊर अपनो सब कर्मचारियों सी ऊंचो पद दियो होतो, इन सब को वर्नन करयो।
EST 5:12 हामान न यो भी कह्यो, “एस्तेर रानी न भी मोख छोड़ अऊर कोयी ख राजा को संग, अपनो करयो हुयो भोज म आनो नहीं दियो; अऊर कल लायी भी राजा को संग ओन मोख नेवता दियो हय।
EST 5:13 पर जब जब मोख ऊ यहूदी मोर्दकै राजभवन की फाटक म बैठ्यो हुयो दिखायी पड़य हय, तब तब यो सब मोरी नजर म बेकार लगय हय।”
EST 5:14 ओकी पत्नी जेरेश अऊर ओको सब संगियों न ओको सी कह्यो, “पचास हाथ ऊंचो फांसी को एक खम्भा बनायो जाये, अऊर सुबेरे राजा सी कहो कि ओको पर मोर्दकै लटकाय दियो जाये; तब राजा को संग खुशी सी भोज म जाजो।” या बात सी खुश होय क हामान न वसोच एक फांसी को खम्भा बनवायो।
EST 6:1 ऊ रात राजा ख नींद नहीं आयी, येकोलायी ओकी आज्ञा सी इतिहास की किताब लायी गयी, अऊर पढ़ क राजा ख सुनायी गयी।
EST 6:2 ओको म यो लिख्यो हुयो मिल्यो, कि जब राजा क्षयर्ष को हाकिम जो द्वारपाल भी होतो, उन्को म सी बिगताना अऊर तेरेश नाम को दोय जनों न ओको पर हाथ उठान की कोशिश करी होती ओख मोर्दकै न प्रगट करयो होतो।
EST 6:3 तब राजा न पूछ्यो, “येको बदला मोर्दकै को का सम्मान अऊर बड़ायी करी गयी?” राजा को जो सेवक ओकी सेवा म हाजिर होतो, उन्न ओख उत्तर दियो, “ओको लायी कयी भी नहीं करयो गयो।”
EST 6:4 राजा न पूछ्यो, “आंगन म कौन हय?” उच समय हामान राजा को भवन सी बाहेर आंगन म यो सोच क आयो होतो कि जो खम्भा ओन मोर्दकै लायी तैयार करायो होतो, ओको पर ओख लटकाय देन की चर्चा राजा सी करे।
EST 6:5 तब राजा को सेवकों न ओको सी कह्यो, “आंगन म त हामान खड़ो हय।” राजा न कह्यो, “ओख अन्दर बुलाय क लावो।”
EST 6:6 जब हामान अन्दर आयो, तब राजा न ओको सी पूछ्यो, “जो आदमी को सम्मान राजा करनो चाहवय हय त ओको लायी का करनो अच्छो होयेंन?” हामान न यो सोच क, कि मोरो सी ज्यादा राजा कौन्को सम्मान करनो चाहत होना,
EST 6:7 राजा ख उत्तर दियो, “जो आदमी को सम्मान राजा करनो चाहे,
EST 6:8 ओको लायी राजकीय कपड़ा लायो जाये, जो राजा पहिनय हय, अऊर एक घोड़ा भी, जेको पर राजा सवार होवय हय, अऊर ओकी मुंड पर जो राजकीय मुकुट धरयो जावय हय ऊ भी लायो जाये।
EST 6:9 फिर ऊ कपड़ा, अऊर ऊ घोड़ा राजा को कोयी बड़ो हाकिम ख सौंप्यो जाये, अऊर जेको सम्मान राजा करनो चाहवय हय, ओख ऊ कपड़ा पहिनायो जाये, अऊर ऊ घोड़ा पर सवार कर क् नगर को चौक म ओख फिरायो जाये; अऊर ओको आगु आगु यो प्रचार करयो जाये, ‘जेको सम्मान राजा करनो चाहवय हय, ओको संग असोच करयो जायेंन।’”
EST 6:10 राजा न हामान सी कह्यो, “फुर्ती कर क् अपनो कहन को अनुसार ऊ कपड़ा अऊर ऊ घोड़ा ख ले क, ऊ यहूदी मोर्दकै सी जो राजभवन की फाटक पर बैठ्यो करय हय, वसोच कर। जसो तय न कह्यो हय ओको म कयी भी कमी होनो नहीं पाये।”
EST 6:11 तब हामान न ऊ कपड़ा, अऊर ऊ घोड़ा ख ले क, मोर्दकै ख पहिनायो, अऊर ओख घोड़ा पर चढ़ाय क, नगर को चौक म यो तरह पुकारतो हुयो घुमायो, “जेको सम्मान राजा करनो चाहवय हय ओको संग असोच करयो जायेंन।”
EST 6:12 तब मोर्दकै त राजभवन की फाटक म लौट गयो पर हामान दु:ख करतो हुयो अऊर मुंड झाक क झट सी अपनो घर ख गयो।
EST 6:13 हामान न अपनी पत्नी जेरेश अऊर अपनो सब संगियों सी सब कयी जो ओको पर बीत्यो होतो वर्नन करयो। तब ओको बुद्धिमान संगियों अऊर ओकी पत्नी जेरेश न ओको सी कह्यो, “मोर्दकै जेक तय नीचा दिखानो चाहवय हय, यदि ऊ यहूदियों को वंश म को आय, त तय ओको पर प्रबल होनो नहीं पाजो ओको सी पूरी रीति सी नीचाच मिलेंन।”
EST 6:14 हि ओको सी बात करच रह्यो होतो कि राजा को किन्नर आय क हामान ख एस्तेर लायी भोज म फुर्ती सी बुलाय ले गयो।
EST 7:1 तब राजा अऊर हामान एस्तेर रानी को भोज म आय गयो
EST 7:2 राजा न दूसरो दिन अंगूर रस पीतो पीतो एस्तेर सी फिर पूछ्यो, “हे एस्तेर रानी! तोरी का बिनती हय? ऊ पूरो करयो जायेंन। तय का मांगय हय? मांग, अऊर आधो राज्य तक तोख दियो जायेंन।”
EST 7:3 एस्तेर रानी न उत्तर दियो, “हे राजा! यदि तय मोरो पर प्रसन्न हय, अऊर राजा ख यो स्वीकार हय, त मोरी बिनती सी मोख, अऊर मोरो मांगनो सी मोरो लोगों ख जीवन दान मिले।
EST 7:4 कहालीकि मय अऊर मोरी जाति को लोग बेच डाल्यो गयो हंय, अऊर हम सब घात अऊर नाश करयो जान वालो हंय। यदि हम केवल दास दासी होय जान लायी बेच डाल्यो जातो, त मय चुप रह्यती; चाहे वा दशा म विरोधी राजा की हानि भर नहीं सकतो।”
EST 7:5 तब राजा क्षयर्ष न एस्तेर रानी सी पूछ्यो, “ऊ कौन आय, अऊर कित हय, जेन असो करनो को निश्चय करयो हय?”
EST 7:6 एस्तेर न उत्तर दियो, “ऊ विरोधी अऊर दुश्मन योच दुष्ट हामान आय!” तब हामान राजा रानी को आगु भयभीत भय गयो।
EST 7:7 राजा गुस्सा सी भर क, अंगूर रस पीतो पीतो उठ क, राजभवन को बगीचा म निकल गयो; अऊर हामान यो देख क कि राजा न मोरी हानि ठान ली हय, एस्तेर रानी सी जीव की भीख मांगन ख खड़ो भयो।
EST 7:8 जब राजा राजभवन को बगीचा सी अंगूर रस पीवन की जागा पर लौट आयो तब यो देख्यो कि हामान वा खटिया पर हय जेको पर एस्तेर बैठी हय ओको पर हामान झुक्यो हुयो हय; अऊर राजा न कह्यो, “का यो मोरोच घर म मोरो आगु रानी ख जबरदस्ती करनो चाहवय हय?” राजा को मुंह सी यो वचन निकल्योच होतो, कि सेवकों न हामान को मुंह झाक दियो।
EST 7:9 तब राजा को आगु उपस्थित रहन वालो सेवक किन्नरों म सी हर्बोना नाम को एक न राजा सी कह्यो, “हामान को इत पचास हाथ ऊंचो फांसी को एक खम्भा खड़ो हय, जो ओन मोर्दकै लायी बनवायो हय, जेन राजा कि हित की बात कही होती।” राजा न कह्यो, “ओख ओको पर लटकाय देवो।”
EST 7:10 तब हामान उच खम्भा पर जो ओन मोर्दकै लायी तैयार करवायो होतो, ओख लटकाय दियो गयो। तब राजा को गुस्सा ठंडो पड़ गयो।
EST 8:1 उच दिन राजा क्षयर्ष न यहूदियों लायी विरोधी हामान को घरदार एस्तेर रानी ख दे दियो। मोर्दकै राजा को आगु आयो, कहालीकि एस्तेर न राजा ख बतायो होतो, कि ओको सी ओको का नाता होतो।
EST 8:2 तब राजा न अपनी वा अंगूठी जो ओन हामान सी ले ली होती, उतार क मोर्दकै ख दे दी। एस्तेर न मोर्दकै ख हामान को घरदार को अधिकारी चुन लियो।
EST 8:3 तब एस्तेर दूसरी बार राजा सी बोली; अऊर ओको पाय पर गिर क, आसू बहाय बहाय क ओको सी गिड़गिड़ाय क बिनती करी अगागी वंश को हामान द्वारा सोची गयी बुरायी यहूदियों को विरुद्ध रची गयी ओकी योजना रद्द करी जाये।
EST 8:4 तब राजा न एस्तेर को तरफ सोनो को राजदण्ड बढ़ायो तब एस्तेर उठ क राजा को आगु खड़ी भयी।
EST 8:5 अऊर कहन लगी, “यदि राजा ख स्वीकार हो अऊर ऊ मोरो सी प्रसन्न हय अऊर या बात ओख ठीक सी समझेंन, अऊर मय भी ओख अच्छी लगू हय, त जो चिट्ठियां हम्मदाता अगागी को बेटा हामान न राजा को सब क्षेत्रों को यहूदियों ख नाश करन की युक्ति कर क् लिखायी होती, चिट्ठी ख रद्द करन लायी लिख्यो जाये।
EST 8:6 कहालीकि मय अपनो लोगों पर पड़न वाली वा विपत्ति ख कौन्सी रीति सी देख सकूं? मय अपनो घरानों को विनाश ख कसी देख सकूं?”
EST 8:7 तब राजा क्षयर्ष न एस्तेर रानी सी अऊर मोर्दकै यहूदी सी कह्यो, “मय हामान को घरदार त एस्तेर ख दे चुक्यो हय, अऊर वा फासी को खम्भा पर लटकाय दियो गयो हय, येकोलायी कि ओन यहूदियों ख मारन की कोशिश कर रह्यो होतो।
EST 8:8 तब तुम अपनी समझ को अनुसार राजा को नाम सी यहूदियों को बारे म लिखो, अऊर राजा की अंगूठी की छाप भी लगावो; कहालीकि जो चिट्ठी राजा को नाम सी लिखी जाये, अऊर ओको पर ओकी अंगूठी की छाप लगायी जाये, ओख कोयी भी पलट नहीं सकय।”
EST 8:9 उच समय मतलब सीवान नाम को तीसरो महीना को तेईसवों दिन ख राजा को लेखक बुलवायो गयो, अऊर जो जो बात की आज्ञा मोर्दकै न उन्ख दी होती ओख यहूदियों अऊर अधिपतियों अऊर भारत सी ले क कूश देश तक, जो एक सौ सत्ताईस क्षेत्र हंय, उन पूरो को अधिपतियों अऊर हाकिमों ख एक एक देश को लोगों की भाषा म, अऊर यहूदियों ख उन्को अक्षरों अऊर भाषा म लिखी गयी।
EST 8:10 मोर्दकै न राजा क्षयर्ष को नाम सी चिट्ठियां लिखाय क, अऊर उन पर राजा की अंगूठी की छाप लगाय क, जल्दी चलन वालो सरकारी घोड़ा, खच्चरों, पर सवार होन वालो को हाथ भेज दियो।
EST 8:11 इन चिट्ठियों म सब नगरों को यहूदियों ख राजा को तरफ सी अनुमति दी गयी, कि हि जमा हो अऊर अपनो अपनो जीव बचान लायी तैयार होय क, क्षेत्र को लोग अन्याय कर क् उन्ख या उन्की पत्नियों अऊर बाल बच्चां ख दु:ख देनो चाहे, उन्ख मार डाले अऊर नाश कर दे, अऊर उन्की धन सम्पत्ति लूट ले।
EST 8:12 अऊर यो राजा क्षयर्ष को सब क्षेत्रों म एकच दिन म करयो जाये, मतलब अदार नाम को बारहवों महीना को तेरहवों दिन ख।
EST 8:13 यो आज्ञा की लेख की नकलें, हर एक क्षेत्रों म सब लोगों को जवर खुली हुयी भेजी जायेंन; ताकि यहूदी ऊ दिन अपनो दुश्मनों सी बदला लेन ख तैयार रहे।
EST 8:14 तब सवारी करन वालो घोड़ा पर सवार होय क, राजा की आज्ञा सी फुर्ती सी जल्दी चली गयो, अऊर या आज्ञा शूशन गढ़ की राजधानी म दी गयी होती।
EST 8:15 तब मोर्दकै नीलो अऊर सफेद रंग को राजकीय कपड़ा पहिन्यो अऊर मुंड पर सोनो को बड़ो मुकुट पहिन्यो हुयो अऊर उत्तम बैंजनी मलमल को चोंगा पहिन्यो हुयो, राजा को जवर सी निकल्यो, अऊर शूशन नगर को लोग खुशी को मारे जयजयकारों को संग ललकार उठ्यो।
EST 8:16 यहूदियों ख खुशी अऊर हर्ष भयो अऊर उन्को बड़ो सम्मान करयो।
EST 8:17 अऊर जो जो क्षेत्र, अऊर जो जो नगर म, जित कही राजा की आज्ञा अऊर नियम पहुंचे, उत उत यहूदियों ख खुशी अऊर आराम भयो, अऊर उन्न भोज कर क् ऊ दिन ख खुशी को दिन मान्यो। अऊर ऊ देश को लोगों म सी बहुत लोग यहूदी बन गयो, कहालीकि उन्को मन म यहूदियों को डर समाय गयो होतो।
EST 9:1 अदार नाम को बारहवों महीना को तेरहवों दिन ख, जो दिन राजा की आज्ञा अऊर नियम पूरो होन ख होतो, अऊर यहूदियों को दुश्मन उन्को पर प्रबल होन की आशा रखत होतो, पर येको विपरीत यहूदी अपनो बैरियों पर प्रबल भयो;
EST 9:2 ऊ दिन यहूदी लोग राजा क्षयर्ष को सब क्षेत्रों म अपनो अपनो नगर म जमा भयो, कि जो उन्की हानि करन की कोशिश करेंन, उन्को पर हाथ चलावों। कोयी उन्को सामना नहीं कर सक्यो, कहालीकि उन्को डर देश देश को सब लोगों को मन म समाय गयो होतो।
EST 9:3 अऊर क्षेत्रों को सब सरदारों अऊर अधिपतियों अऊर प्रधानों अऊर राजा को कर्मचारियों न यहूदियों की मदत करी, कहालीकि उन्को मन म मोर्दकै को डर समाय गयो होतो।
EST 9:4 मोर्दकै त राजा को यहां बहुत प्रभावशाली व्यक्ति होतो, अऊर ओकी कीर्ति सब क्षेत्रों म फैल गयी; बल्की ऊ आदमी मोर्दकै की महिमा बढ़ती चली गयी।
EST 9:5 तब यहूदियों न अपनो सब दुश्मनों ख तलवार सी मार क अऊर घात कर क् नाश कर डाल्यो, अऊर अपनो दुश्मनों सी अपनी इच्छा को अनुसार बर्ताव करयो।
EST 9:6 शूशन राजगढ़ म यहूदियों न पाच सौ आदमियों ख घात कर क् नाश करयो।
EST 9:7 उन्न पर्शन्दाता, दल्पोन, अस्पाता,
EST 9:8 पोराता, अदल्या, अरीदाता,
EST 9:9 पर्मशता, अरीसै, अरीदै अऊर वैजाता,
EST 9:10 मतलब हम्मदाता को टुरा यहूदियों को विरोधी हामान को दसो टुरावों ख घात करयो; पर उन्को धन ख नहीं लूट्यो।
EST 9:11 उच दिन शूशन राजगढ़ म घात करयो हुयो की गिनती राजा ख सुनायी गयी।
EST 9:12 तब राजा न एस्तेर रानी सी कह्यो, “यहूदियों न शूशन राजगढ़ मच पाच सौ आदमियों अऊर हामान को दसो टुरावों ख घात कर क् नाश करयो हय; तब राज्य को दूसरो क्षेत्रों म उन्न न जाने का का करयो होना! अब येको सी ज्यादा तोरो निवेदन का हय? ऊ भी पूरो करयो जायेंन। तय का मांगय हय? ऊ भी तोख दियो जायेंन।”
EST 9:13 एस्तेर न कह्यो, “यदि राजा ख स्वीकार हय त शूशन को यहूदियों ख अज को जसो कल भी करन की आज्ञा दी जाये, अऊर हामान को दसो टुरा फांसी को खम्भा पर लटकायो जाये।”
EST 9:14 राजा न कह्यो, “असोच करयो जाये;” या आज्ञा शूशन म दी गयी, अऊर हामान को दसो टुरा लटकायो गयो।
EST 9:15 शूशन को यहूदियों न अदार नाम को महीना को चौदावों दिन ख भी जमा होय क शूशन म तीन सौ आदमियों ख घात करयो, पर धन ख नहीं लूट्यो।
EST 9:16 राज्य को दूसरो क्षेत्रों को यहूदी जमा होय क अपनो अपनो जीव बचान लायी खड़ो भयो, अऊर अपनो बैरियों म सी पचहत्तर हजार आदमियों ख घात कर क् अपनो दुश्मनों सी आराम पायो; पर धन ख नहीं लूट्यो।
EST 9:17 यो काम उन्न अदार महीना को तेरहवों दिन ख करयो गयो, अऊर चौदावों दिन ख उन्न आराम कर क् भोज करयो अऊर आनन्द को दिन ठहरायो।
EST 9:18 पर शूशन नगर को यहूदी अदार नाम को महीना को तेरहवों दिन ख, अऊर उच महीना को चौदावों दिन ख जमा भयो, अऊर उच महिना को पन्द्रावों दिन ख उन्न खुशी को दिन ठहरायो।
EST 9:19 यो वजह देहाती यहूदी जो बिना नगर की दीवार की बस्तियों म रह्य हंय, हि अदार महीना को चौदावों दिन ख खुशी अऊर भोज अऊर छुट्टी अऊर आपस म भोजन की चिजे भेजन को दिन नियुक्त कर क् मनावय हंय।
EST 9:20 इन बातों को विवरन लिख क, मोर्दकै न राजा क्षयर्ष को सब क्षेत्रों म, का जवर का दूर रहन वालो पूरो यहूदियों को जवर चिट्ठियां भेजी,
EST 9:21 अऊर या आज्ञा दी, कि अदार महीना को चौदावों अऊर उच महीना को पन्द्रावों दिन ख हर साल को पर्व मनायो जाये।
EST 9:22 इन दिनो म यहूदियों न अपनो दुश्मनों सी आराम पायो, अऊर यो महीना जेको म दु:ख सुख सी, अऊर विलाप खुशी सी बदल गयो; अऊर यहूदियों ख चाहिये कि हि इन दिनो म सामूहिक भोज अऊर खुशी अऊर एक दूसरो को जवर भोजन की चिजे भेजन लायी अऊर गरीबों ख दान देन लायी माने।
EST 9:23 येकोलायी यहूदियों न जसो सुरूवात करयो होतो, अऊर जसो मोर्दकै न उन्ख लिख्यो, वसोच चालु रखन को निश्चय कर लियो।
EST 9:24 कहालीकि हम्मदाता अगागी को टुरा हामान जो सब यहूदियों को विरोधी होतो, ओन यहूदियों को नाश करन की कोशिश करी, अऊर उन्ख मिटाय डालन लायी अऊर नाश करन लायी “पूर” मतलब चिट्ठी निकाली होती।
EST 9:25 पर जब राजा न यो जान लियो, तब ओन आज्ञा दी अऊर लिखवायी करी जो दुष्ट व्यक्ति हामान न यहूदियों को विरुद्ध करयो होतो ऊ ओकोच मुंड पर पलट आयो, तब हामान अऊर ओको टुरा फांसी को खम्भा पर लटकायो गयो।
EST 9:26 यो वजह उन दिनो को नाम पूर शब्द सी पूरीम रख्यो गयो। या चिट्ठी की सब बातों को वजह, अऊर जो कयी उन्न यो विषय म देख्यो अऊर जो कयी उन पर बीत्यो होतो, ओको वजह भी
EST 9:27 यहूदियों न अपनो अपनो लायी अऊर अपनी सन्तान लायी, अऊर उन पूरो लायी भी जो उन्म मिल गयो होतो यो अटल प्रन ठहरायो, कि ऊ लेख को अनुसार हर साल ओको ठहरायो हुयो समय म हि यो दोय दिन मनायेंन;
EST 9:28 अऊर पीढ़ी पीढ़ी, कुल कुल, क्षेत्र क्षेत्र, नगर नगर म यो दिन याद करेंन अऊर मान्यो जायेंन, अऊर पूरीम नाम को दिन यहूदियों म कभी नहीं मिटेंन अऊर उन्की याद उन्को वंश म उन्की याद हमेशा सुरक्षित रहेंन।
EST 9:29 तब अबीहैल की बेटी एस्तेर रानी न, अऊर मोर्दकै यहूदी न पूरीम को बारे म या दूसरी चिट्ठी बड़ो अधिकार को संग लिखी।
EST 9:30 येकी नकलें मोर्दकै न क्षयर्ष को राज्य को एक सौ सत्ताईसों क्षेत्रों को सब यहूदियों को जवर शान्ति देन वाली अऊर सच्ची बातों को संग यो कामना करतो हुयो भेजी,
EST 9:31 कि पूरीम को उन दिनो को विशेष ठहरायो हुयो समयों म मोर्दकै यहूदी अऊर एस्तेर रानी को आज्ञा को अनुसार, अऊर जो यहूदियों न अपनो अऊर अपनी सन्तान लायी ठान लियो होतो, ओको अनुसार भी उपवास अऊर विलाप करयो जाये।
EST 9:32 पूरीम को विषय को यो नियम एस्तेर की आज्ञा सी स्थिर करयो गयो, अऊर उन्की चर्चा किताब म लिखी गयी।
EST 10:1 राजा क्षयर्ष न देश अऊर समुन्दर को जवर को टापू को क्षेत्र पर कर लगायो।
EST 10:2 ओको सामर्थ अऊर पराक्रम को कामों, अऊर मोर्दकै की ऊ बड़ायी को पूरो ब्योरा, जो राजा न ओकी करी होती, का ऊ मादै अऊर फारस को राजावों को इतिहास की किताब म नहीं लिख्यो हय?
EST 10:3 यहूदी मोर्दकै, क्षयर्ष राजा कोच खल्लो होतो, अऊर यहूदियों की नजर म बड़ो होतो, अऊर ओको सब भाऊ ओको सी खुश होतो, कहालीकि ऊ अपनो लोगों की भलायी की खोज म रहत होतो अऊर अपनो सब लोगों सी शान्ति की बाते बोलत होतो।
ECC 1:1 यरूशलेम को राजा, दाऊद को टुरा अऊर उपदेशक को वचन।
ECC 1:2 उपदेशक को यो वचन हय, “बेकारच बेकार, बेकारच बेकार! सब कयी बेकार हय।”
ECC 1:3 ऊ सब मेहनत सी जेख आदमी धरती पर करय हय, ओख का फायदा होवय हय?
ECC 1:4 एक पीढ़ी जावय हय, अऊर दूसरी पीढ़ी आवय हय, पर धरती जसी की वसी हमेशा रह्य हय।
ECC 1:5 सूरज उदय होय क डूब भी जावय हय, अऊर तेजी सी ऊ जागा ख चली जावय हय जित सी ऊ निकलय हय।
ECC 1:6 हवा दक्षिन को तरफ बहय हय, अऊर उत्तर दिशा को तरफ घुमती जावय हय; वा घुमती अऊर बहती रह्य हय, अऊर अपनी परिक्रमा म लौट आवय हय।
ECC 1:7 सब नदियां एकच जागा को तरफ बार बार बहय हय। हि सब समुन्दर म जाय क मिलय हय; पर फिर भी समुन्दर कभी नहीं भरय।
ECC 1:8 सब बाते थकावन वाली आय; आदमी येको वर्नन नहीं कर सकय; न त आंखी देखनो सी सन्तुष्ट होवय हंय, अऊर न कान सुननो सी भरय हंय।
ECC 1:9 जो कुछ भयो होतो, उच फिर होयेंन, अऊर जो कुछ बन चुक्यो हय उच फिर बनायो जायेंन; अऊर धरती पर कोयी बात नयी नहाय।
ECC 1:10 का असी कोयी बात हय जेको बारे म लोग कह्य सके कि देख या बात नयी हय? यो त हमरो सी पहिलो को समय सी होतो आय रह्यो हय।
ECC 1:11 पुरानी बातों की कुछ याद नहीं रही, अऊर होन वाली बातों की भी याद उन्को बाद आन वालों ख भी नहीं रहेंन।
ECC 1:12 मय उपदेशक यरूशलेम म इस्राएल को राजा होतो।
ECC 1:13 मय न अपनो मन लगायो कि जो कुछ धरती पर करयो जावय हय, ओको भेद बुद्धि सी सोच सोच क मालूम करू; यो बड़ो दु:ख को काम आय जो परमेश्वर न मनुष्यों को लायी ठहरायो हय कि हि ओको म लगेंन।
ECC 1:14 मय न उन सब कामों ख देख्यो जो धरती पर करयो जावय हंय; देखो, हि सब बेकार अऊर मानो हवा ख पकड़नो हय।
ECC 1:15 जो तेढ़ो हय ऊ सीधो नहीं होय सकय, अऊर जो हयच नहाय, ऊ गिन्यो नहीं जाय सकय।
ECC 1:16 मय न मन म कह्यो, “देख, जितनो यरूशलेम म मोरो सी पहिले होतो, उन सब सी मय न बहुत ज्यादा बुद्धि हासिल करी हय; अऊर मोख बहुत बुद्धि अऊर ज्ञान मिल गयो हय।”
ECC 1:17 मय न अपनो मन लगायो कि बुद्धि को भेद लेऊ अऊर पागलपन अऊर मूर्खता ख भी जान लेऊ। मोख जान पड़्यो कि यो भी हवा ख पकड़नो हय।
ECC 1:18 कहालीकि बहुत बुद्धि को संग बहुत दु:ख भी होवय हय, अऊर जो अपनो ज्ञान बढ़ावय हय ऊ अपनो दु:ख भी बढ़ावय हय।
ECC 2:1 मय न अपनो मन सी कह्यो, “चल, मय तोख खुशी को द्वारा जांचूं; कि खुशी का हय।” पर मय न यो भी देख्यो, कि यो भी बेकार हय।
ECC 2:2 मय न हसी को बारे म कह्यो, “यो त पागलपन आय,” अऊर खुशी को बारे म, “ओको सी का हासिल होवय हय?”
ECC 2:3 मय न मन म सोच्यो कि कसो तरह सी मोरी बुद्धि बनी रहे अऊर मय अपनो जीव ख अंगूरीरस पीवन सी कसो तरह बहलाऊ अऊर कसो मूर्खता ख थाम्यो रहूं, जब तक मालूम नहीं करू कि ऊ अच्छो काम कौन्सो हय जेख आदमी जीवन भर करतो रहे।
ECC 2:4 मय न बड़ो बड़ो काम करयो; मय न अपनो लायी घर बनायो अऊर अपनो लायी अंगूर की बाड़ी लगायी;
ECC 2:5 मय न अपनो लायी बाड़ियां अऊर बगीचा लगाय लियो, अऊर ओको म अलग अलग को फर वालो झाड़ लगायो।
ECC 2:6 मय न अपनो लायी तलाव खुदवाय लियो कि उन सी जंगल सींच्यो जाये जेको म पौधा लगायो जात होतो।
ECC 2:7 मय न दास अऊर दासियां खरीद लियो, जिन्को मोरो घर मच सन्तान पैदा भयी; अऊर जितनो मोरो सी पहिले यरूशलेम म होतो उन सी कहीं जादा गाय-बईल अऊर मेंढी-शेरियां को मय मालिक भय गयो।
ECC 2:8 मय न चांदी अऊर सोनो अऊर राजावों अऊर देशों को किमती चिजे ख भी जमा करयो; मय न अपनो लायी गायकों अऊर गायिकावों ख रख्यो, आदमियों को दिल बहलावन वाली रखेलियां भी होती।
ECC 2:9 यो तरह मय अपनो सी पहिलो को सब यरूशलेम वासियों सी ज्यादा महान अऊर धनवान भय गयो; तब भी मोरी बुद्धि न मोरो साथ नहीं छोड़्यो।
ECC 2:10 अऊर जितनी चिजे ख देखन की मय न इच्छा करी, उन सब ख देखन सी मय नहीं रुक्यो; मय न अपनो मन कोयी तरह की खुशी भोगन सी नहीं रोक्यो कहालीकि मोरो मन मोरो सब मेहनत को वजह खुश भयो; अऊर मोरो सब मेहनत सी मोख योच इनाम मिल्यो।
ECC 2:11 तब मय न फिर सी अपनो हाथों को कामों ख, अऊर अपनो सब मेहनत ख देख्यो, त का देख्यो कि सब कुछ बेकार अऊर हवा ख पकड़नो जसो हय, अऊर धरती पर आदमी को काम अऊर मेहनत सी कुछ फायदा नहाय।
ECC 2:12 फिर मय न अपनो मन ख मोड़्यो कि बुद्धि अऊर पागलपन अऊर मूर्खता को काम ख देखू; कहालीकि जो आदमी राजा को पीछु आयेंन, ऊ का करेंन? केवल उच जो होतो चल्यो आयो हय।
ECC 2:13 तब मय न देख्यो कि उजाड़ो अन्धारो सी जितनो अच्छो हय, उतनो बुद्धि भी मूर्खता सी अच्छी हय।
ECC 2:14 जो बुद्धिमान हय, ओको मुंड म आंखी रह्य हय, पर मूर्ख अन्धारो म चलय हय; तब भी मय न जान लियो कि दोयी की दशा एक जसी होवय हय।
ECC 2:15 तब मय न मन म कह्यो, “जसी मूर्ख की दशा होयेंन, वसी मोरी भी होयेंन; फिर मय कहाली बुद्धिमान भयो?” अऊर मय न मन म कह्यो कि यो भी बेकारच हय।
ECC 2:16 कहालीकि नहीं त बुद्धिमान को अऊर नहीं मूर्ख की याद हमेशा बनी रहेंन, पर भविष्य म सब कुछ भुलाय दियो जायेंन। बुद्धिमान कसो मूर्ख को जसो मरय हय!
ECC 2:17 येकोलायी मय न अपनो जीवन सी घृना करी, कहालीकि जो काम धरती पर करयो जावय हय मोख बुरो मालूम पड़्यो; कहालीकि सब कुछ बेकार अऊर हवा ख पकड़नो हय।
ECC 2:18 मय न अपनो पूरो मेहनत को फर सी जेख मय न धरती पर करयो होतो नफरत करयो, कहालीकि जरूरी हय कि मय ओको फर ऊ मनुष्य को लायी छोड़ जाऊं जो मोरो बाद आयेंन।
ECC 2:19 यो कौन जानय हय कि ऊ आदमी बुद्धिमान भय गयो या मूर्ख? तब भी धरती पर जितनी मेहनत मय न करयो, अऊर ओको लायी बुद्धि इस्तेमाल करी कि ऊ सब को उच अधिकारी होयेंन। यो भी बेकारच हय ।
ECC 2:20 तब मय अपनो मन म ऊ पूरो मेहनत को बारे म जो मय न धरती पर करयो होतो निराश भयो,
ECC 2:21 कहालीकि असो मनुष्य भी हय, जेको काम मेहनत अऊर बुद्धि अऊर ज्ञान सी होवय हय अऊर सफल भी होवय हय, तब भी ओख असो आदमी लायी छोड़ जानो पड़य हय, जेन ओको म कुछ भी मेहनत नहीं करयो होना। यो भी बेकार अऊर बहुतच बुरो हय।
ECC 2:22 आदमी जो धरती पर मन लगाय लगाय क मेहनत करय हय ओको सी ओख का फायदा होवय हय?
ECC 2:23 ओको त सब दिन त दु:खों सी भरयो रह्य हंय, अऊर ओको काम रुकावट को संग होवय हय; रात ख भी ओको मन चैन नहीं लेवय। यो भी बेकारच हय।
ECC 2:24 मनुष्य को लायी खान-पीवन अऊर मेहनत करतो हुयो अपनो जीवन ख सुखी रखन को सिवाय अऊर कुछ भी अच्छो नहाय। मय न देख्यो कि यो भी परमेश्वर को तरफ सी मिलय हय;
ECC 2:25 कहालीकि ओको बिना कौन खाय-पी क आनन्द मनाय सकय हय?
ECC 2:26 जो आदमी परमेश्वर की नजर म अच्छो हय, ओख ऊ बुद्धि अऊर ज्ञान अऊर आनन्द देवय हय; पर पापी ख ऊ दु:ख भरयो कामच देवय हय कि ऊ ओख देन लायी जमा कर क् ढेर लगाये जो परमेश्वर की नजर म अच्छो हो। यो भी बेकार अऊर हवा ख पकड़नो हय ।
ECC 3:1 हर एक बात को एक अवसर अऊर हर काम को, जो धरती पर होवय हय, एक समय हय।
ECC 3:2 जनम को समय, अऊर मरन को समय; अऊर बोयो हुयो ख उखाड़न को भी समय हय;
ECC 3:3 मारन को समय, अऊर चंगो करन को भी समय; गिराय देन को समय, अऊर बनावन को भी समय हय;
ECC 3:4 रोवन को समय, अऊर हंसन को भी समय; शोक करन को समय, अऊर नाचन को भी समय हय;
ECC 3:5 गोटा फेकन को समय, अऊर गोटा जमा करन को भी समय ; गलो लगावन को समय, अऊर गलो लगावन सी रूकन को भी समय हय;
ECC 3:6 ढूंढन को समय, अऊर खोय देन को भी समय; बचाय रखन को समय, अऊर फेक देन को भी समय हय;
ECC 3:7 फाड़न को समय, अऊर सीवन को भी समय; चुप रहन को समय, अऊर बोलन को भी समय हय;
ECC 3:8 प्रेम करन को समय, अऊर दुश्मनी करन को भी समय; लड़ायी करन को समय, अऊर मिलन को भी समय हय।
ECC 3:9 काम करन वालो ख अपनी मेहनत सी का फायदा होवय हय?
ECC 3:10 मय न देख्यो हय कि परमेश्वर न मानव जाति पर कितनो बोझ डाल्यो हय।
ECC 3:11 उन्न हर एक चिज ख ओको लायी सही समय मच बनायो हय; उन्न आदमी को दिल म अनन्त काल को ज्ञान की क्षमता दी, तब भी आदमी नहीं समझ पावय कि परमेश्वर न शुरू सी आखरी तक का करयो हय।
ECC 3:12 मय न जान लियो हय कि मनुष्यों को लायी खुशी मनावय अऊर जीवन भर भलायी करन को सिवाय, अऊर कुछ भी अच्छो नहाय;
ECC 3:13 अऊर यो भी परमेश्वर को दान आय कि मनुष्य खाये-पीये अऊर अपनो सब मेहनत म सुखी रहे।
ECC 3:14 मय जानु हय कि जो कुछ परमेश्वर करय हय ऊ हमेशा स्थिर रहेंन; नहीं त ओको म कुछ बढ़ायो अऊर नहीं कुछ घटायो जाय सकय हय; परमेश्वर असो येकोलायी करय हय कि लोग ओको डर माने।
ECC 3:15 जो कुछ भयो ऊ येकोसी पहिले भी होय चुक्यो हय; जो होन वालो हय, ऊ भय भी गयो हय; अऊर परमेश्वर बीती हुयी बातों ख फिर सी कह्य हय।
ECC 3:16 फिर मय न धरती पर का देख्यो कि न्याय की जागा म अन्याय होवय हय, अऊर अच्छायी की जागा म भी बुरो काम होवय हय।
ECC 3:17 मय न मन म कह्यो, “परमेश्वर न्यायी अऊर दुष्ट दोयी को न्याय करेंन,” कहालीकि ओको यहां एक एक विषय अऊर एक एक काम को समय हय।
ECC 3:18 मय न मन म कह्यो, “यो येकोलायी होवय हय कि परमेश्वर मनुष्यों ख जांचे कि हि देख सके कि हि जनावर जसो हय।”
ECC 3:19 कहालीकि जसी मनुष्यों की वसी जनावरों की भी दशा होवय हय; दोयी की वाच दशा होवय हय, जसो एक मरय वसोच दूसरो भी मरय हय। सब की स्वास एक जसी हय, अऊर मनुष्य जनावर सी कुछ बढ़ क नहाय; सब कुछ बेकारच हय।
ECC 3:20 सब एक जागा म जावय हंय; सब माटी सी बन्यो हंय, अऊर सब माटी म मिल जावय हंय।
ECC 3:21 का आदमियों को जीव ऊपर को तरफ चढ़य हय अऊर जनावरों को जीव खल्लो को तरफ जाय क माटी म मिल जावय हय? यो कौन जानय हय?
ECC 3:22 अत: मय न यो देख्यो कि येको सी जादा कुछ अच्छो नहाय कि मनुष्य अपनो कामों म खुश रहे कहालीकि ओको हिस्सा योच आय; कौन ओको पीछू होन वाली बातों ख वापस लाय क दिखाय सकय हय?
ECC 4:1 तब मय न ऊ सब अत्याचार देख्यो जो जगत म होवय हय। अऊर का देख्यो, कि अत्याचार सहन वालो को आंसू बह्य रह्यो हंय, अऊर उन्ख कोयी शान्ति देन वालो नहीं! अत्याचार करन वालो को हाथ म शक्ति होती, पर उन्ख कोयी शान्ति देन वालो नहीं होतो।
ECC 4:2 अऊर मय न घोषना करी हय, कि जो पहिले मर चुक्यो हय, हि उन जीवतों सी ज्यादा खुश हय।
ECC 4:3 पर मरयो हुयो अऊर जीन्दो आदमियों सी महान हय ऊ आदमी जेको जनम नहीं भयो हय, जेन धरती पर करयो जान वालो दुष्कर्मों ख नहीं देख्यो हय।
ECC 4:4 तब मय न सब मेहनत को काम अऊर सब सफल कामों ख देख्यो जो लोग अपनो पड़ोसी सी जलन को वजह करय हंय। यो भी बेकार हय या मानो हवा ख पकड़नो जसो हय।
ECC 4:5 मूर्ख हाथ पर हाथ रख क बैठ्यो रह्य हय, अऊर मानो अपनो आप ख बर्बाद करय हय।
ECC 4:6 मुट्ठी भर मन को चैन, दोय मुट्ठी मेहनत सी बड़ो हय, जो मानो हवा ख पकड़नो हय।
ECC 4:7 तब मय न धरती पर या भी बेकार बात देखी।
ECC 4:8 कोयी अकेलो रह्य हय अऊर ओको कोयी नहाय; न ओको टुरा हय, न भाऊ हय तब भी ओको परिश्रम को अन्त नहीं होवय; न ओकी आंखी धन सी सन्तुष्ट होवय हंय; अऊर न ऊ कह्य हय, मय कोन्को लायी मेहनत करतो अऊर अपनो जीवन ख सुख शान्ति सी दूर रखू हय? यो भी बेकार अऊर दु:ख भरयो काम हय।
ECC 4:9 एक सी दोय अच्छो हंय, कहालीकि उन्को मेहनत को अच्छो फर मिलय हय।
ECC 4:10 यदि उन्को म सी एक गिरेंन, त दूसरो ओख उठायेंन; पर हाय ओको पर जो अकेलो होय क गिरेंन अऊर ओको कोयी उठान वालो नहाय।
ECC 4:11 यदि दोय जन एक संग सोयेंन त हि गरम रहेंन, पर कोयी अकेलो कसो गरम होय सकय हय?
ECC 4:12 यदि कोयी अकेलो पर भारी होवय हय त हय, पर दोय ओको सामना कर सकेंन। जो दोरी तीन धागा सी बटी हो वा जल्दी नहीं टूटय।
ECC 4:13 बुद्धिमान जवान गरीब होन पर भी असो बूढ्ढा अऊर मूर्ख राजा सी ज्यादा अच्छो हय जो सलाह नहीं मानय,
ECC 4:14 होय सकय हय कि ऊ ओको राज्य म गरीब पैदा भयो हो या होय सकय हय कि ऊ जैलखाना सी निकल क राजा भयो होना।
ECC 4:15 मय न धरती पर घुमतो हुयो पूरो जीन्दो लोगों ख ऊ दूसरो जवान को तरफ जातो हुयो देख्यो, जो पहिले वालों की जागा लेयेंन।
ECC 4:16 हि सब लोग अनगिनत होतो जिन्को पर ऊ प्रधान भयो होतो। तब भी भविष्य म होन वालो लोग ओको वजह खुश नहीं होयेंन। नि:सन्देह यो भी बेकार हय, अऊर मानो हवा ख पकड़नो हय।
ECC 5:1 जब तय परमेश्वर को भवन म जाये, तब सावधानी सी चलजो; सुनन लायी जवर जाजो मूर्खों को बलिदान चढ़ानो सी अच्छो हय; कहालीकि हि नहीं जानय कि बुरो करय हंय।
ECC 5:2 बाते करन लायी उतावली मत करजो, अऊर न अपनो मन सी कोयी बात उतावली म परमेश्वर को आगु निकालजो, कहालीकि परमेश्वर स्वर्ग म हय अऊर तय धरती पर हय; येकोलायी तोरो वचन थोड़ोच हो।
ECC 5:3 कहालीकि जसो काम की अधिकता को वजह सपनो देख्यो जावय हय, वसोच बहुत सी बातों को बोलन वालो मूर्ख ठह्यरय हय।
ECC 5:4 जब तय परमेश्वर लायी मन्नत मानजो, तब ओको पूरो करनो म देरी मत करजो; कहालीकि ऊ मूर्खों सी प्रसन्न नहीं होवय। जो मन्नत तय न मानी हय ओख पूरी करजो।
ECC 5:5 मन्नत मान क पूरी नहीं करनो सी मन्नत को नहीं माननोच अच्छो हय।
ECC 5:6 कोयी वचन कह्य क अपनो ख पाप म न फसाजो, अऊर न ईश्वर को दूत को आगु कह्यजो कि यो भूल सी भयो; परमेश्वर कहाली तोरी आवाज सुन क अप्रसन्न हो, अऊर तोरो हाथ को कार्यों ख नाश करे?
ECC 5:7 कहालीकि सपनो की अधिकता सी बेकार बातों की बढ़ायी होवय हय : पर तय परमेश्वर को डर मानजो।
ECC 5:8 यदि तय कोयी प्रदेश म गरीबों पर अत्याचार अऊर न्याय अऊर धर्म ख बिगड़तो देखजो, त येको सी चकित मत होजो; कहालीकि एक अधिकारी सी बड़ो दूसरो रह्य हय जेख इन बातों की सुधि रह्य हय, अऊर उन्को सी भी ज्यादा बड़ो रह्य हय।
ECC 5:9 जमीन की उपज सब लायी हय, बल्की खेती सी राजा को भी काम निकलय हय।
ECC 5:10 जो रुपया सी प्रेम रखय हय ऊ रुपया सी कभी सन्तुष्ट नहीं होयेंन; अऊर न जो बहुत धन सी प्रेम रखय हय, लाभ सी : यो भी बेकार हय।
ECC 5:11 जब सम्पत्ति बढ़य हय, त ओको खान वालो भी बढ़य हय, तब ओको स्वामी ख येख छोड़ अऊर का लाभ होवय हय कि वा सम्पत्ति ख अपनी आंखी सी देखे?
ECC 5:12 परिश्रम करन वालो चाहे थोड़ो खाये या बहुत, तब भी ओकी नींद सुख चैन सी होवय हय; पर धनी को धन बढ़न को वजह ओख नींद नहीं आवय।
ECC 5:13 मय न धरती पर एक बड़ी बुरी बला देखी हय, मतलब ऊ धन जेख ओको मालिक न अपनोच नुकसान लायी रख्यो होना,
ECC 5:14 अऊर ऊ कोयी बुरो काम म उड़ जावय हय, अऊर यदि ओको घर म टुरा पैदा होवय हय त ओको हाथ म कयी भी नहीं बचय।
ECC 5:15 जसो ऊ अपनी माय को पेट सी निकल्यो वसोच नंगा लौट जायेंन; जसो आयो होतो, अऊर अपनो हाथ म अपनो मेहनत को फल नहीं लिजाय सकेंन।
ECC 5:16 या भी एक बड़ी बला हय कि जसो ऊ आयो, ठीक वसोच ऊ जायेंन; ओख ऊ बेकार मेहनत सी अऊर का लाभ हय?
ECC 5:17 केवल येको कि ओन जीवन भर बेचैनी सी जेवन करयो, अऊर बहुतच दु:खित अऊर रोगी रह्यो अऊर गुस्सा भी करतो रह्यो?
ECC 5:18 सुन, जो भली बात मय न देखी हय, बल्की जो उचित हय, ऊ यो कि आदमी खाये अऊर पीये अऊर अपनी मेहनत सी जो ऊ धरती पर करय हय, अपनी पूरी उमर भर जो परमेश्वर न ओख दियो हय, सुखी रहे; कहालीकि ओको भाग योच हय।
ECC 5:19 बल्की हर एक आदमी जेख परमेश्वर न धन सम्पत्ति दी होना, अऊर उन्को सी आनन्द भोगन अऊर ओको म सी अपनो भाग लेन अऊर मेहनत करतो हुयो आनन्द करन की शक्ति भी दी हय : यो परमेश्वर को वरदान हय।
ECC 5:20 आदमी अपनो पूरो जीवन ख हमेशा लायी याद नहीं रखेंन, कहालीकि परमेश्वर ऊ आदमी ख उन कामों मच लगायो रखय हय, जिन कामों ख करनो म ऊ आदमी इच्छा रखय हय।
ECC 6:1 एक बुरायी जो मय न धरती पर देखी हय, वा आदमियों ख बहुत भारी लगय हय :
ECC 6:2 कोयी आदमी ख परमेश्वर धन सम्पत्ति अऊर प्रतिष्ठा यहां तक देवय हय कि जो कुछ ओको मन चाहवय हय ओख ओकी कुछ भी घटी नहीं होवय, तब भी परमेश्वर ओख ओको म सी खान नहीं देवय, कोयी दूसरोच ओख खावय हय; यो बेकार अऊर भयानक दु:ख हय।
ECC 6:3 यदि कोयी आदमी को सौ टुरा हो, अऊर ऊ बहुत साल जीन्दो रहे अऊर ओकी उमर बढ़ जाये, पर न ओको जीव प्रसन्न रहे अऊर न ओकी आखरी क्रिया करी जाये, त मय कहूं हय कि असो आदमी सी अधूरो समय को पैदा हुयो वालो बच्चा अच्छो हय।
ECC 6:4 कहालीकि ऊ बेकारच आयो अऊर अन्धारो म चली गयो, अऊर ओको नाम भी अन्धारो म लूक गयो;
ECC 6:5 अऊर न सूरज ख देख्यो, अऊर न कोयी चिज ख जाननो पायो; तब भी येख ऊ आदमी सी ज्यादा चैन मिल्यो।
ECC 6:6 हव, चाहे ऊ दोय हजार साल जीन्दो रहे, अऊर कुछ सुख भोगनो न पाये, त ओख का? का सब को सब एकच जागा नहीं जावय?
ECC 6:7 आदमी को पूरो परिश्रम ओको पेट लायी होवय हय तब भी ओको मन नहीं भरय।
ECC 6:8 जो बुद्धिमान हय ऊ मूर्ख सी कौन्सी बात म बढ़ क हय? अऊर कंगाल जो यो जानय हय कि यो जीवन म कसो तरह सी चलनो चाहिये, ऊ भी ओको सी कौन्सी बात म बढ़ क हय?
ECC 6:9 आंखी सी देख लेनो मन की इच्छा सी अच्छो हय; यो भी बेकार अऊर मानो हवा ख पकड़नो हय।
ECC 6:10 जो कुछ भी आदमी होना, ओख ओको नाम शुरू मच दियो गयो होतो : अऊर आदमी को बारे म यो प्रगट कर दियो गयो होतो, कि आदमी केवल माटीच आय। अऊर ऊ अपनो सी ताकतवर व्यक्ति सी लड़ नहीं सकय।
ECC 6:11 बहुत सी असी बाते हय जिन्को वजह जीवन अऊर भी बेकार होवय हय त फिर आदमी ख का लाभ?
ECC 6:12 कहालीकि आदमी अपनो क्षणिक जीवन परछायी को जसो बितावय हय कौन जानय हय कि ओको लायी अच्छो का हय? कहालीकि आदमी ख कौन बताय सकय हय कि ओको बाद दुनिया म का होयेंन?
ECC 7:1 अच्छो नाम की सुगन्ध अनमोल अत्तर सी अच्छो हय अऊर मृत्यु को दिन जनम को दिन सी अच्छो हय।
ECC 7:2 भोज को त्यौहार म शामिल होन की अपेक्षा, शोक सी पीड़ित परिवार म जानो अच्छो हय; कहालीकि मरनोच सब आदमियों को अन्त हय। अऊर जो जीन्दो हय ऊ मन लगाय क येको पर सोचेंन।
ECC 7:3 हसी सी दु:ख उत्तम हय, कहालीकि मुंह पर को शोक सी मन सुधरह्य हय।
ECC 7:4 बुद्धिमानों को मन शोक करन वालों को घर को तरफ लग्यो रह्य हय पर मूर्खों को मन आनन्द करन वालों को घर लग्यो रह्य हय।
ECC 7:5 मूर्खों को गीत सुनन सी बुद्धिमान की फटकार सुननो उत्तम हय।
ECC 7:6 कहालीकि मूर्खों की हसी वसीच होवय हय जसी हांडी को खल्लो जरती लकड़ी की चरचराहट जसी; यो भी बेकार हय।
ECC 7:7 निश्चय अत्याचार की कमायी सी बुद्धिमान मूर्ख बन जावय हय; अऊर रीश्वत सी बुद्धि नाश होय जावय हय।
ECC 7:8 कोयी काम की सुरूवात सी ओको अन्त उत्तम हय; अहंकारी आदमी की अपेक्षा धीरज रखन वालो आदमी उत्तम हय।
ECC 7:9 अपनो मन म उतावली सी गुस्सा मत हो, कहालीकि गुस्सा मूर्खों कोच दिल म रह्य हय।
ECC 7:10 यो मत कह्यजो, “कि अज सी बीत्यो हुयो कल उत्तम होतो?” कहालीकि यो बारे म तुम्हरो असो कह्यनो, बुद्धि द्वारा नहाय।
ECC 7:11 बुद्धि धन सम्पत्ति समान उत्तम हय, जीन्दो लोगों लायी बुद्धि लाभदायक हय।
ECC 7:12 कहालीकि बुद्धि को आड़ धन को आड़ को जसो हय; पर ज्ञान सी यो लाभ हय कि ऊ अपनो रखन वालो को जीवन सुरक्षित रखय हय।
ECC 7:13 परमेश्वर को काम पर नजर कर; जो चिज ख ओन टेढ़ो बनायो हय ओख कौन सीधो कर सकय हय?
ECC 7:14 सुख को दिनों म आनन्द मनावो, अऊर दु:ख को दिनों म बिचार करो; कहालीकि परमेश्वर न सुख अऊर दु:ख दोयी ख बनायो हय, ताकि आदमी यो बात को भेद नहीं पा सके कि ओको बाद का होन वालो हय।
ECC 7:15 मय न अपनो बेकार जीवन म यो सब कुछ देख्यो हय; कोयी न्यायी अपनो न्याय को काम करतो हुयो नाश होय जावय हय, अऊर दुष्ट बुरायी करतो हुयो लम्बी उमर हासिल करय हय।
ECC 7:16 अपनो ख बहुत न्यायी मत बना, अऊर न अपनो ख ज्यादा बुद्धिमान बना; तय कहाली अपनोच नाश को वजह होजो?
ECC 7:17 अत्यन्त दुष्ट भी मत बन, अऊर न मूर्ख बन; तय कहाली अपनो समय सी पहिले मरजो?
ECC 7:18 यो अच्छो हय कि तय या बात ख पकड़्यो रह्य; अऊर न वा बात पर सी भी हाथ न उठाजो; कहालीकि जो परमेश्वर को भय मानय हय ऊ इन सब कठिनायियों सी पार होय जायेंन।
ECC 7:19 बुद्धि सीच बुद्धिमान व्यक्ति ख नगर को दस शासकों सी ज्यादा ताकत हासिल होवय हय।
ECC 7:20 निश्चयच धरती पर कोयी असो धार्मिक व्यक्ति नहाय जो सदा भलायीच करय हय, अऊर कभी पाप नहीं करय।
ECC 7:21 जो बाते आदमी कह्य हय, उन सब बातों पर कान मत लगावो, असो नहीं हो कि तुम सुनो कि तुम्हरो दास तुम्हरी निन्दा करत होतो।
ECC 7:22 तुम्हरो दिल जानय हय कि खुद तुम न भी बहुत बार दूसरो लोगों की निन्दा करी हंय।
ECC 7:23 यो सब मय न बुद्धि सी परख्यो हय; मय न कह्यो, “मय बुद्धिमान होय जाऊं,” लेकिन बुद्धि मोरो सी दूरच रही।
ECC 7:24 ऊ जो दूर अऊर बहुत ज्यादा गहरो हय, ओको भेद कौन पा सकय हय?
ECC 7:25 मय न अपनो मन लगायो कि बुद्धि को बारे म जान लेऊ; कि खोज निकालूं अऊर ओको भेद जानु, कि मूर्खता अधर्म हय, अऊर मूर्खता पागलपन हय ख जानु।
ECC 7:26 मय न मृत्यु सी भी ज्यादा दु:खदायी एक चिज पायी, मतलब वा स्त्री जेको मन फन्दा अऊर जाल हय अऊर जेको हाथ हथकड़ियां हय जो आदमी सी परमेश्वर प्रसन्न हय उच ओको सी बचेंन, पर पापी ओको शिकार होयेंन।
ECC 7:27 देख, उपदेशक कह्य हय, मय न ज्ञान लायी अलग अलग बाते मिलाय क जाची, अऊर या बात निकाली,
ECC 7:28 जेख मोरो मन अब तक ढूंढ़ रह्यो हय, पर नहीं पायो। हजार आदमी म सी मय न एक आदमी ख पायो, पर उन्म मोख एक भी स्त्री नहीं मिली।
ECC 7:29 देखो, मय न केवल या बात पायी हय कि परमेश्वर न आदमी ख सीधो बनायो, पर उन्न बहुत सी योजना निकाली हंय।
ECC 8:1 बुद्धिमान आदमी को जसो कौन हय? अऊर कोयी बात को अर्थ कौन लगाय सकय हय? आदमी की बुद्धि को वजह ओको मुंह चमकय, अऊर ओको चेहरा को दु:ख दूर होय जावय हय।
ECC 8:2 मय तोख सलाह देऊ हय कि परमेश्वर को आगु ली गयी कसम को वजह राजा की आज्ञा को पालन कर।
ECC 8:3 राजा को आगु सी उतावली को संग मत लौटजो अऊर न बुरी बात पर खड़ो रह्यजो, कहालीकि ऊ जो कुछ चाहवय हय ऊ करय हय।
ECC 8:4 कहालीकि राजा को वचन म त सामर्थ रह्य हय, अऊर कौन ओको सी कह्य सकय हय कि तय का करय हय?
ECC 8:5 यदि राजा की आज्ञा को पालन करय हय, त ऊ सुरक्षित रहेंन, पर बुद्धिमान व्यक्ति असो करन को ऊ सही समय जानय हय अऊर ऊ यो भी जानय हय कि या बात कब करनो चाहिये।
ECC 8:6 हर एक बात को ठह्यरायो हुयो समय अऊर ओको ठहरायी हुयी काम की विधि होवय हय, नहीं त आदमी को दु:ख ओको लायी बहुत भारी होवय हय।
ECC 8:7 ऊ नहीं जानय कि का होन वालो हय, अऊर कब होयेंन? यो ओख कौन बताय सकय हय?
ECC 8:8 असो कोयी आदमी नहाय जेको वश जीव पर चले कि ऊ ओख निकलतो समय रोख ले, अऊर न कोयी मृत्यु को दिन पर अधिकारी होवय हय; अऊर न ओख लड़ायी सी छुट्टी मिल सकय हय, अऊर न दुष्ट लोग अपनी दुष्टता को वजह बच सकय हंय।
ECC 8:9 जितनो काम धरती पर करयो जावय हय उन सब ख ध्यान सी देखनो म यो सब कुछ मय न देख्यो, अऊर यो भी देख्यो कि एक आदमी दूसरो आदमी पर अधिकारी होय क अपनो ऊपर हानि लावय हय
ECC 8:10 तब मय न दुष्टों ख कबर म गाड़्यो जातो हुयो देख्यो; हि पवित्र जागा म आत जात होतो। नगर म जित उन्न हर तरह को दुष्कर्म करयो होतो, उन्की प्रशंसा करी जात होती। यो भी बेकार हय ।
ECC 8:11 बुरो काम की दण्ड की आज्ञा फुर्ती सी नहीं दी जावय; यो वजह आदमियों को मन बुरो काम करन की इच्छा सी भरयो रह्य हय।
ECC 8:12 चाहे पापी सौ बार पाप करे अऊर अपनो दिन भी बढ़ाये, तब भी मोख निश्चय हय कि जो परमेश्वर सी डरय हंय अऊर ओख अपनो सम्मुख जान क डर सी चलय हय, उन्को भलाच होयेंन;
ECC 8:13 पर दुष्ट को भला नहीं होन को, अऊर न ऊ छाया को जसो अपनी उमर लम्बी कर सकेंन, कहालीकि ऊ परमेश्वर को डर नहीं मानय।
ECC 8:14 एक बेकार बात धरती पर होवय हय, मतलब असो न्यायी हंय जिन्की वसी दशा होवय हय जो दुष्टों की होनी चाहिये, अऊर असो दुष्ट हय जिन्की वसी दशा होवय हय जो न्यायियों की होनी चाहिये। मय न कह्यो की यो भी बेकारच हय।
ECC 8:15 येकोलायी मय लोगों ख सलाह देऊ हय, आनन्द मनावो, धरती पर आदमी लायी खान पीन अऊर आनन्द मनान को सिवाय अऊर कुछ भी अच्छो नहाय। जो उमर परमेश्वर न ओख या धरती पर प्रधान करी हय, ओको परिश्रम म ओको संग बन्यो रहेंन।
ECC 8:16 जब मय न बुद्धि हासिल करन लायी अऊर सब काम देखन लायी जो धरती पर करयो जावय हय अपनो मन लगायो, कि कसो आदमी रात दिन जागतो रह्य हंय;
ECC 8:17 तब मोख अनुभव भयो कि परमेश्वर को पूरो काम जो सूरज को खल्लो या धरती पर होवय हय, चाहे आदमी ओको भेद जानन लायी कितनोच परिश्रम का न करे, ऊ ओको पता नहीं लगाय सकय। यदि कोयी बुद्धिमान आदमी ओख जानन को दावा करे, त भी ऊ ओको पता नहीं लगाय सकय।
ECC 9:1 यो सब कुछ मय न मन लगाय क गम्भीर होय क बिचार करयो इन सब बातों को भेद पाऊं, कि कसो तरह न्यायी अऊर बुद्धिमान लोग अऊर उन्को काम परमेश्वर को हाथ म हय; आदमी को आगु सब तरह की बातें हंय पर ऊ नहीं जानय कि ऊ प्रेम आय या दुश्मनी।
ECC 9:2 सब बाते सभी लायी एक जसी होवय हय, न्यायी हो या दुष्ट, भलो, शुद्ध या अशुद्ध, बली करन वालो अऊर बली नहीं करन वालो, सभी की दशा एक जसीच होयेंन। जसो भलो आदमी की दशा, वसीच पापी की भी दशा; जसो कसम खान वालो की दशा; वसीच ओकी जो कसम खानो सी डरय हय।
ECC 9:3 जो कयी सूरज को खल्लो करयो जावय हय ओको म या एक बुरी बात देखी कि सब लोगों की एक जसी दशा होवय; अऊर आदमियों को मनो म बुरायी भरी हुयी हय, अऊर जब तक हि जीन्दो रह्य हय उन्को मन म पागलपन भरयो रह्य हय, अऊर ओको बाद हि मरयो हुयो म जाय मिलय हंय।
ECC 9:4 जब तक आदमी जीन्दो रह्य हय, ओको दिल म आशा को दीया चमकतो रह्य हय, कहालीकि जीन्दो कुत्ता मरयो हुयो सिंह सी बढ़ क हय।
ECC 9:5 कहालीकि जो जीन्दो हंय हि जानय हंय कि उन्ख एक दिन मरनोच पड़ेंन, पर जो मर गयो हय, हि का जानय हय? उन्ख प्रतिफल मिल गयो हय, कहालीकि उन्की याद मिट गयी हय।
ECC 9:6 उन्को प्रेम अऊर उन्की नफरत अऊर उन्की दुश्मनी नाश भय गयी हय, अऊर अब जो कयी धरती पर करयो जावय हय ओको म हमेशा लायी उन्को अऊर कोयी भाग नहीं होयेंन।
ECC 9:7 अपनी रस्ता पर चली जा, अपनी रोटी आनन्द सी खायो कर, अऊर मन म सुख मान क अपनो अंगूरीरस पीयो कर; कहालीकि परमेश्वर तोरो कामों सी प्रसन्न भय गयो हय।
ECC 9:8 तोरो कपड़ा हमेशा साफ रहे, अऊर तोरी मुंड पर हमेशा तेल लग्यो रहे।
ECC 9:9 अपनो बेकार जीवन को पूरो दिन जो ओन धरती पर तोरो लायी ठह्यरायो हय, अपनी प्यारी पत्नी को संग म बिताजो, कहालीकि तोरो जीवन अऊर तोरो परिश्रम म जो तय धरती पर करय हय तोरो योच भाग हय।
ECC 9:10 जो काम तोख मिले ओख अपनी पूरी शक्ति सी करजो, कहालीकि अधोलोक म जहां अपनो मरन को बाद तय जान वालो हय, न काम हय, न बिचार अऊर वहां न ज्ञान हय अऊर न बुद्धि।
ECC 9:11 तब मय न धरती पर देख्यो कि न त दौड़ म तेज दौड़न वालो अऊर न ताकतवर योद्धा लड़ायी जीतय; बुद्धिमान आदमी ख जेवन नहीं मिलय, अऊर न समझदारों ख धन सम्पत्ति, विद्वानों पर कोयी कृपा नहीं करय; हि सब समय अऊर संयोग को वश म हय।
ECC 9:12 कहालीकि आदमी अपनो समय नहीं जानय। जसी मच्छियां दु:खदायी जार म अऊर चिड़ियां फन्दा म फसय हंय, वसोच आदमी दु:खदायी समय म जो उन्को पर अचानक आय पड़य हय, फस जावय हय।
ECC 9:13 मय न धरती पर यो तरह की बुद्धि की बात भी देखी हय, जो मोख बड़ी महत्व की लगी।
ECC 9:14 एक छोटो सो नगर होतो, जेको म थोड़ोच लोग होतो, अऊर कोयी बड़ो राजा न ओको पर चढ़ायी कर क् ओख घेर लियो, अऊर ओको खिलाफ बड़ी घेराबन्दी कर दी।
ECC 9:15 पर ओको म तक गरीब बुद्धिमान आदमी पायो गयो, अऊर ओन ऊ नगर ख अपनी बुद्धि को द्वारा बचायो। तब भी कोयी न ऊ गरीब आदमी ख याद नहीं रख्यो।
ECC 9:16 तब मय न कह्यो, “अगर गरीब की बुद्धि एकदम बेकार समझी जावय हय अऊर ओको वचन कोयी नहीं सुनय तब भी ताकत सी बुद्धि अच्छी हय।”
ECC 9:17 मूर्खों को बीच राजा ख चिल्लाय क कह्यनो सी अकेलो म बुद्धिमान की बाते सुन लेनो कही ज्यादा अच्छो हय।
ECC 9:18 लड़ायी को हथियारों सी बुद्धि अच्छी हय, पर एक पापी बहुत सी भलायी को नाश करय हय।
ECC 10:1 मरी हुयी माखी को वजह अत्तर को सड़नो अऊर बास आवन लगय हय; अऊर थोड़ी सी मूर्खता बुद्धि अऊर मान सम्मान ख घटाय देवय हय।
ECC 10:2 बुद्धिमान को मन उचित बात को तरफ रह्य हय पर मूर्ख को मन ओको खिलाफ रह्य हय।
ECC 10:3 जब मूर्ख रस्ता पर चलतो हुयो जावय हय, तब ओको चलनो सीच ओकी मूर्खता दिख जावय हय, जेको सी हर व्यक्ति देख लेवय हय, कि ऊ मूर्ख हय।
ECC 10:4 यदि शासक को गुस्सा तोरो पर भड़के, त अपनी जागा मत छोड़जो, कहालीकि धीरज धरनो सी बड़ो बड़ो अपराध रुकय हय।
ECC 10:5 एक बुरायी हय जो मय न धरती पर देखी, या बुरायी शासक की भूल सी होवय हय :
ECC 10:6 मतलब मूर्ख बड़ी मान सम्मान की जागा म ठह्यरायो जावय हंय, अऊर धनवान लोग खल्लो बैठय हय।
ECC 10:7 मय न गुलामों ख घोड़ा पर जातो देख्यो हय, जब की शासक गुलामों को तरह पैदल चल रह्यो होतो।
ECC 10:8 जो दूसरो लायी गड्डा खोदय हय ऊ खुद ओको म गिरेंन अऊर जो दीवार तोड़य ओख सांप डसेन।
ECC 10:9 जो गोटा फोड़ेंन, ऊ गोटा सीच घायल होयेंन, अऊर जो लकड़ी काटेंन, ओख लकड़ी सीच डर रहेंन।
ECC 10:10 यदि टंगिया बोथड़ हो अऊर आदमी ओकी धार ख पैनी नहीं करेंन, त ओख उपयोग करनो म ज्यादा ताकत लगानो पड़ेंन; पर सफल होन लायी बुद्धि सी लाभ होवय हय।
ECC 10:11 यदि मंत्र सी पहिले सांप डसेन, त मंत्र पढ़न वालो ख कुछ भी लाभ नहीं।
ECC 10:12 बुद्धिमान को शब्द को वजह अनुग्रह होवय हय, पर मूर्ख अपनो शब्द को द्वारा नाश होवय हय।
ECC 10:13 मूर्ख को मुंह सी निकल्यो शब्द सुरूवात सी आखरी तक मूर्खता सी पूरो होवय हय, ओकी बात को अन्त दुष्टतापूर्ण पागलपन होवय हय।
ECC 10:14 मूर्ख आदमी बहुत बाते बढ़ाय क बोलय हय, तब भी कोयी आदमी नहीं जानय कि का होयेंन, अऊर कौन बताय सकय हय कि ओको बाद का होन वालो हय?
ECC 10:15 मूर्ख को परिश्रम ओख थकावय हय, इतनो कि ओख वापसी लायी नगर की रस्ता भी नहीं जानय हय।
ECC 10:16 हे देश, तोरो पर हाय जब तोरो राजा बिना अनुभव वालो सेवक आय अऊर तोरो शासक प्रात:काल भोज करय हंय!
ECC 10:17 हे देश, तय धन्य हय जब तोरो राजा अच्छो वंशज सी हय, अऊर तोरो शासक समय पर भोज करय हंय, अऊर ऊ भी मतवालो होन ख नहीं, बल्की ताकत हासिल करन लायी!
ECC 10:18 आलस को वजह छत गिर जावय हय, अऊर सुस्ती सी घर चुनो लगय हय।
ECC 10:19 भोज हसी खुशी लायी करयो जावय हय, अऊर अंगूरीरस सी जीवन ख आनन्द मिलय हय; अऊर रुपया सी सब कुछ हासिल होवय हय।
ECC 10:20 अपनो मन म भी राजा की निन्दा मत करो, अऊर न अपनी आराम की जागा म रईसों की बुरायी करो। आसमान को पक्षी तोरो शब्द लिजायेंन, अऊर कोयी उड़न वालो जीव जन्तु खबर कर देयेंन।
ECC 11:1 अपनी रोटी पानी को ऊपर डाल दे, कहालीकि बहुत दिन को बाद तय ओख फिर पाजो।
ECC 11:2 सात बल्की आठ जनों ख भी भाग दे, कहालीकि तय नहीं जानय कि धरती पर का विपत्ति आय पड़ेंन।
ECC 11:3 यदि बादर पानी सी भरयो हय, तब ऊ खुद जमीन पर बरसेंन, अऊर झाड़ चाहे दक्षिन को तरफ गिरे या उत्तर को तरफ, तब भी जो जागा पर झाड़ गिरेंन, ऊ वहांच पड़्यो रहेंन
ECC 11:4 जो वायु ख ताकतो रहेंन ऊ बीज बोवनो नहीं पायेंन, अऊर जो बादर ख देखतो रहेंन ऊ फसल काट नहीं पायेंन।
ECC 11:5 जसो तय हवा चलन की रस्ता नहीं जानय अऊर कसो तरह सी गर्भवती को पेट म बच्चा बढ़य हंय, वसोच तय परमेश्वर को काम नहीं जानय जो सब कुछ करय हय।
ECC 11:6 पहेट ख अपनो बीज बोव, अऊर शाम ख भी अपनो हाथ मत रोक; कहालीकि तय नहीं जानय कि कौन सफल होयेंन, यो काम म या ऊ काम म, या दोयी को दोयी अच्छो निकलेंन।
ECC 11:7 उजारो बहुत प्रिय होवय हय, अऊर तपन ख देखन सी आंखी ख सुख पहुंचय हय।
ECC 11:8 यदि आदमी बहुत साल तक जीन्दो रहे, त ओख लगय हय कि ऊ अपनी उमर को सब सालो म जीवन को आनन्द ले; पर ऊ याद रखे कि अन्धारो को दिन भी कम नहीं होयेंन। जो कयी होवय हय ऊ बेकार हय।
ECC 11:9 हे जवान,अपनी जवानी म आनन्द कर, अऊर अपनी जवानी को दिनों म मगन रह; अपनी मनमानी कर अऊर अपनी आंखी की नजर को जसो चल। पर यो जान रख कि इन सब बातों को बारे म परमेश्वर तोरो न्याय करेंन।
ECC 11:10 अपनो मन सी परेशानी अऊर शरीर सी दु:ख दूर कर, कहालीकि लड़कपन अऊर जवानी दोयी बेकार हंय।
ECC 12:1 अपनी जवानी को दिनों म अपनो सृजनहार ख याद रख, येको सी पहिले कि विपत्ति को दिन अऊर हि साल आये, जिन्म तय कह्यजो कि मोख इन दिनों म आनन्द नहीं मिलय।
ECC 12:2 येको सी पहिले कि सूरज अऊर प्रकाश अऊर चन्दा अऊर तारा अन्धकारमय होय जाये, अऊर पानी आन को बाद बादर फिर घिर जाये;
ECC 12:3 ऊ समय घर को सब रक्षा करन वालो कापेंन, अऊर ताकतवर झुक जायेंन, संख्या म कम होन को वजह दांत जेवन चबानो छोड़ देयेंन। खिड़की सी झाकन वाली आंखी धुंधली पड़ जायेंन।
ECC 12:4 अऊर सड़क की आवाज तुम्हरो कान ख सुनायी नहीं देयेंन, अऊर चक्की की आवाज धीरू होय जायेंन, अऊर पहेट ख चिड़िया को चिवचिव की आवाज सी एक उठ जायेंन, अऊर सब गावन वाली की आवाज धीरू होय जायेंन।
ECC 12:5 फिर जो ऊंचो हो ओको सी डर लगेंन, अऊर रस्ता म डरावनी चिजे सी डरजो; अऊर बदाम को झाड़ फूलेंन, अऊर फाफा भी रेंग क चलन लगेंन, अऊर भूक बढ़ावन वालो फर फिर काम नहीं देयेंन; कहालीकि आदमी अपनो सदा को घर ख जायेंन, अऊर रोवन पीटन वालो सड़क सड़क फिरेंन।
ECC 12:6 ऊ समय चांदी को तार दोय टुकड़ा होय जायेंन अऊर सोनो को कटोरा टूटेंन, अऊर झरना को जवर घड़ा फूटेंन, अऊर कुंवा को जवर गिरनी टूट जायेंन,
ECC 12:7 तब माटी जसी की वसी माटी म मिल जायेंन, अऊर आत्मा परमेश्वर जवर लौट जायेंन, जेन ओख प्रदान करयो होतो।
ECC 12:8 उपदेशक कह्य हय, सब बेकारच बेकार हय; सब कयी बेकार हय।
ECC 12:9 उपदेशक जो बुद्धिमान होतो, ऊ प्रजा ख ज्ञान भी सिखावत रह्यो, अऊर ध्यान लगाय क अऊर जांच परख कर क् बहुत सो नीतिवचन क्रम सी रखत होतो।
ECC 12:10 उपदेशक न मन भावन वालो शब्द ढूंढ्यो अऊर सच्चायी की शिक्षा देन वालो शब्द लिख्यो।
ECC 12:11 बुद्धिमान लोगों को शब्द धार दार होवय हय, अऊर सभावों को मुखियां को द्वारा दियो गयो शब्द, मजबूती सी ठोकी गयी खूंटियों को जसो हंय, कहालीकि इन्को दाता एकच चरवाहा आय।
ECC 12:12 हे मोरो टुरा, इन्को अलावा दूसरी शिक्षावों को बारे म सावधानी रख। बहुत सी किताबों ख लिख क रखन को कोयी अन्त नहाय, अऊर किताबों ख ज्यादा पढ़नो भी शरीर ख थकाय देवय हय।
ECC 12:13 सब कुछ सुन्यो गयो; अन्त की बात या आय कि परमेश्वर को डर मान अऊर ओकी आज्ञावों को पालन कर; कहालीकि आदमी को पूरो कर्तव्य योच आय।
ECC 12:14 कहालीकि परमेश्वर सब कामों अऊर सब गुप्त बातों को, चाहे हि भली हो या बुरी, न्याय करेंन।
EZE 1:1 कहालीकि तीसवों साल को चौथो महीना को पाचवों दिन, मय बन्दियों को बीच कबार नदी को किनार पर होतो, तब स्वर्ग खुल गयो, अऊर मय न परमेश्वर को दर्शन पायो।
EZE 1:2 यहोयाकीन राजा की बन्धुवायी को पाचवों साल को चौथो महीना को पाचवों दिन ख, कसदियों को देश म कबार नदी को किनार पर,
EZE 1:3 परमेश्वर को वचन बूजी को टुरा यहेजकेल याजक को जवर पहुंच्यो; अऊर परमेश्वर की सामर्थ ओको पर वहांच प्रगट भयी।
EZE 1:4 जब मय देखन लग्यो, त का देखू हय कि उत्तर दिशा सी बड़ो बादर, अऊर लहराती हुयी आगी सहित बड़ी आन्धी आय रह्यी हय, अऊर घटा को चारयी तरफ प्रकाश अऊर आगी को बीचों-बीच सी चमकतो हुयो पीतल को जसो कुछ दिखायी देवय हय।
EZE 1:5 अऊर ओको बीच सी चार जीवधारी प्रानियों को जसो कुछ दिखायी दे रह्यो होतो। उन्को रूप आदमियों को जसो होतो,
EZE 1:6 पर उन्म सी हर एक को चार चार मुख अऊर चार चार पंख होतो।
EZE 1:7 उन्को पाय सीधो होतो, अऊर उन्को पाय को तलवा बछड़ा को खुरी को जसो होतो; अऊर हि चमकायो हुयो पीतल को जसो चमकत होतो।
EZE 1:8 उन्को चारयी तरफ पंखा को खल्लो आदमी को जसो हाथ होतो। उन चारयी को मुख अऊर पंख यो तरह होतो :
EZE 1:9 उन्को पंख एक दूसरो सी परस्पर जुड़्यो हुयो होतो; हि अपनो अपनो सामने सीधोच चलत होतो हि मुड़त नहीं होतो।
EZE 1:10 उन्को सामने को मुख को रूप आदमी को जसो होतो अऊर उन चारयी को दायो तरफ को मुख सिंह को जसो, अऊर बायो तरफ को मुख बईल को जसो होतो, अऊर चारयी को पीछु को मुख उकाब पक्षी को जसो होतो।
EZE 1:11 उन्को चेहरा असोच होतो। उन्को मुख अऊर पंख ऊपर को तरफ अलग अलग होतो, हर एक जीवधारी को दोय दोय पंख होतो, जो एक दूसरो को पंख मिल्यो हुयो होतो, अऊर दोय दोय पंखों सी उन्को शरीर ढक्यो हुयो होतो।
EZE 1:12 हि सीधो अपनो अपनो सामनेच चलत होतो; जित आत्मा जानो चाहत होती, हि उतच जात होतो, अऊर चलतो समय मुड़त नहीं होतो।
EZE 1:13 जीवधारियों को रूप आगी अऊर जलती हुयी मशालों को समान दिखायी देत होतो, अऊर वा आगी जीवधारियों को बीच इत उत चलती फिरती हुयी बड़ो प्रकाश देत रह्यी; अऊर वा आगी सी बिजली निकलत होती।
EZE 1:14 जीवधारियों को चलनो फिरनो बिजली को जसो होतो।
EZE 1:15 जब मय जीवधारियों ख देखतोच रह्यो होतो, त का देख्यो कि जमीन पर उन्को जवर चारयी मुखों की गिनती को अनुसार, एक एक पहिया होतो।
EZE 1:16 उन पहियों कि चमक अऊर बनावट स्वर्णमनि जसी होती, अऊर चारयी को एकच रूप होतो; अऊर उन्को रूप अऊर बनावट असी होती जसो एक पहिया को बीच दूसरो पहिया होना।
EZE 1:17 चलतो समय हि अपनो चारयी तरफ चल सकत होतो, अऊर चलन म मुड़त नहीं होतो।
EZE 1:18 उन चारयी को घेरा बहुत बड़ो अऊर डरावनो होतो, अऊर उन्को घेरावों म चारयी तरफ आंखीच आंखी होती।
EZE 1:19 जब जीवधारी चलत होतो, तब पहिया भी उन्को संग चलत होतो; अऊर जब जीवधारी जमीन पर सी उठत होतो, तब पहिया भी उठत होतो।
EZE 1:20 जित आत्मा जानो चाहत होती, उतच हि जात होतो, अऊर पहिया जीवधारियों को संग उठत होतो; कहालीकि उन्की आत्मा पहिया म होती।
EZE 1:21 जब हि चलत होतो तब हि भी चलत होतो; अऊर जब जब हि खड़ो होत होतो तब हि भी खड़ो होत होतो, अऊर जब हि जमीन पर सी उठत होतो तब पहिया भी उन्को संग उठत होतो; कहालीकि जीवधारियों की आत्मा पहियों म होती।
EZE 1:22 जीवधारियों को मुंड को ऊपर आकाश मण्डल को जसो कुछ होतो जो बरफ को समान भयानक रीति सी चमकत होतो, अऊर ऊ उन्को मुंड को ऊपर फैल्यो हुयो होतो।
EZE 1:23 आकाश मण्डल को खल्लो, उन्को पंख एक दूसरो को तरफ सीधो फैल्यो हुयो होतो; अऊर हर एक जीवधारी को दोय दोय अऊर भी पंख होतो जिन्कोसी उन्को शरीर झक्यो हुयो होतो।
EZE 1:24 उन्को चलतो समय उन्को पंखा की फड़फड़ाहट की आवाज मोख बहुत सो पानी, यां सर्वशक्तिमान की वाणी, यां सेना की हलचल की आवाज सुनायी पड़त होती; अऊर जब हि खड़ो होत होतो, तब अपनो पंख लटकाय देत होतो।
EZE 1:25 फिर उन्को मुंडो को ऊपर जो आकाश मण्डल होतो, ओको ऊपर सी एक आवाज सुनायी पड़त होतो; अऊर जब हि खड़ो होत होतो, तब अपनो पंख खल्लो कर देत होतो।
EZE 1:26 जो आकाश मण्डल उन्को मुंडो को ऊपर होतो, ओको ऊपर मानो कुछ नीलम गोटा को बन्यो हुयो सिंहासन को ऊपर आदमी को समान कोयी दिखायी देत होतो।
EZE 1:27 ओकी कमर सी ले क ऊपर को तरफ मोख मानो चमकायो हुयो पीतल जसो दिखायी पड़्यो, अऊर ओको अन्दर अऊर चारयी तरफ आगी जसी दिखायी पड़त होती; पर ऊ आदमी की कमर सी ले क खल्लो को तरफ भी मोख कुछ आगी जसी दिखायी पड़त होती; अऊर ओको चारयी तरफ प्रकाश होतो।
EZE 1:28 जसो बारीश को दिन बादर म धनुष दिखायी पड़य हय, वसोच चारयी तरफ को प्रकाश दिखायी देत होतो। परमेश्वर की सामर्थ असीच होती। ओख देख क, मय मुंह को बल गिरयो, तब मय न एक शब्द सुन्यो जसो कोयी बाते करय हय।
EZE 2:1 ओन मोरो सी कह्यो, “हे आदमी को सन्तान, अपनो पाय को बल खड़ो हो, अऊर मय तोरो सी बाते करूं।”
EZE 2:2 जसोच ओन मोरो सी कह्यो, तबच आत्मा न मोरो म समाय क मोख पाय को बल खड़ो कर दियो; अऊर जो मोरो सी बाते करत होतो मय न ओकी सुनी।
EZE 2:3 ओन मोरो सी कह्यो, “हे आदमी को सन्तान, मय तोख इस्राएलियों को जवर मतलब विद्रोह करन वाली राष्ट्र को जवर भेजू हय, जिन्न मोरो खिलाफ विद्रोह करयो हय; उन्को पूर्वज अऊर हि भी अज को दिन तक मोरो खिलाफ अपराध करतो चल्यो आयो हय।
EZE 2:4 यो पीढ़ी को लोग जिन्को जवर मय तोख भेजू हय, हि निर्लज्ज अऊर जिद्दी हय;
EZE 2:5 अऊर तय उन्को सी कहजो, ‘प्रभु परमेश्वर यो कह्य हय,’ येकोसी हि, जो विद्रोह करन वालो घराना को हय, चाहे हि सुने यां नहीं सुने, तब भी हि इतनो जान लेयेंन कि हमरो बीच एक भविष्यवक्ता प्रगट भयो हय।
EZE 2:6 “हे आदमियों की सन्तान, तय इन्को सी मत डरजो; चाहे तोख काटां, ऊंटकटारों अऊर बिच्छुवों को बीच भी रहनो पड़े, तब भी उन्को वचनों सी मत डरजो; यदि हि विद्रोही घराना को हय, तब भी नहीं त उन्को वचनों सी डरजो, अऊर नहीं उन्को मुंह देख क तोरो मन कच्चो होय।
EZE 2:7 येकोलायी चाहे हि सुने यां नहीं सुने; तब भी तय मोरो वचन उन्को सी कहजो, हि त बड़ो विद्रोही हंय।
EZE 2:8 “पर हे आदमी को सन्तान, जो मय तोरो सी कहू हय, ओख तय सुन ले, ऊ विद्रोही घराना को समान तय भी मत बनजो, जो मय तोख देऊ हय, ओख मुंह खोल क खाय ले।”
EZE 2:9 तब मय न नजर कर क् देख्यो, कि मोरो तरफ एक हाथ बढ़्यो हुयो हय अऊर ओको म एक किताब हय।
EZE 2:10 ओख ओन मोरो सामने खोल क फैलायो, अऊर वा दोयी तरफ लिखी हुयी होती; अऊर जो ओको म लिख्यो होतो, हि विलाप अऊर शोक अऊर दु:ख भरयो वचन होतो।
EZE 3:1 तब ओन मोरो सी कह्यो, “हे आदमी की सन्तान, जो तोख मिल्यो हय ओख खाय ले; मतलब या किताब ख खा, तब जाय क इस्राएल को घराना सी बाते कर।”
EZE 3:2 येकोलायी मय न मुंह खोल्यो अऊर ओन वा किताब मोख खिलाय दी।
EZE 3:3 तब ओन मोरो सी कह्यो, “हे आदमी की सन्तान, या किताब जो मय तोख देऊ हय ओख पचाय ले, अऊर अपनी पेट भर ले।” मय न ओख खाय लियो; अऊर मोरो मुंह म वा शहेद को जसो मीठो लग्यो।
EZE 3:4 फिर ओन मोरो सी कह्यो, “हे आदमी की सन्तान, तय इस्राएल को घराना को जवर जाय क उन्ख मोरो वचन सुनाव।
EZE 3:5 कहालीकि तय कोयी अनोखी बोली यां कठिन भाषा वालो राष्ट्र को जवर नहीं भेज्यो जावय हय, पर इस्राएलच को घराना को जवर भेज्यो जावय हय।
EZE 3:6 अनोखी बोली यां कठिन भाषावाली बहुत सी राष्ट्रों को जवर जो तोरी बात समझ नहीं सके, तय नहीं भेज्यो जावय। बिना सक यदि मय तोख असो लोगों को जवर भेजतो त हि तोरी सुनतो।
EZE 3:7 पर इस्राएल को घराना वालो तोरी सुनन सी इन्कार करेंन; हि मोरी भी सुनन सी इन्कार करय हय; कहालीकि इस्राएल को पूरो घराना निर्लज अऊर कठोर मन को हय।
EZE 3:8 देख, मय तोरो मुख को सामने, अऊर तोरो मस्तक ख उन्को मस्तक को सामने, कठोर कर देऊ हय।
EZE 3:9 मय तोरो मस्तक ख हीरा को जसो कठोर कर देऊ हय जो चकमक गोटा सी भी कठोर होवय हय; येकोलायी तय उन्को सी मत डरजो, अऊर नहीं उन्को मुंह ख देख क तोरो मन कच्चो होय; कहालीकि हि विद्रोही घराना को हय।”
EZE 3:10 फिर ओन मोरो सी कह्यो, “हे आदमी की सन्तान, जितनो वचन मय तोरो सी कहू, हि सब अपनो दिल म रख अऊर कानों सी सुन।
EZE 3:11 अऊर उन बन्दियों को जवर जाय क, जो राष्ट्र को तोरो जाति भाऊ हय, उन्को सी बाते करजो अऊर कहजो, ‘प्रभु परमेश्वर यो कह्य हय;’ चाहे हि सुने यां नहीं सुने।”
EZE 3:12 तब आत्मा न मोख ऊपर उठायो, अऊर मय न अपनो पीछू बड़ी घड़घड़ाहट को संग एक आवाज सुन्यो : “परमेश्वर की महिमा आशीष की हय।”
EZE 3:13 अऊर ओको संगच उन जीवधारियों को पंखा को आवाज, जो एक दूसरो सी लगत होतो, अऊर ओको संग को पहिया को आवाज अऊर एक बड़ीच घड़घड़ाहट सुनायी दी।
EZE 3:14 अब आत्मा मोख उठाय क ले गयी, अऊर मय कठिन दु:ख सी भरयो हुयो, अऊर मन म जलतो हुयो चली गयो; अऊर परमेश्वर की शक्ति मोरो म प्रबल होती;
EZE 3:15 अऊर मय उन बन्दियों को जवर आयो जो कबार नदी को किनार पर तेलाबीब नगर म रहत होतो। अऊर वहां मय सात दिन तक उन्को बीच दु:खी होय क बैठ्यो रह्यो।
EZE 3:16 सात दिन बितन पर परमेश्वर को यो वचन मोरो जवर पहुंच्यो,
EZE 3:17 “हे आदमी की सन्तान,” मय न तोख इस्राएल को घराना को लायी पहरेदार चुन लियो हय; तय मोरो मुंह की बात सुन क, उन्ख मोरो तरफ सी चितायजो।
EZE 3:18 जब मय दुष्ट सी कहू, तय जरूर मरजो, अऊर यदि तय ओख नहीं चितायजो, अऊर नहीं दुष्ट सी असी बात कहजो जेकोसी की ऊ सचेत अऊर अपनो बुरो रस्ता छोड़ क जीन्दो रहे, त दुष्ट अपनो अधर्म म फस्यो हुयो मरेंन, पर ओको खून को लेखा मय तोरोसीच लेऊं।
EZE 3:19 पर यदि तय ऊ दुष्ट आदमी ख चितायजो, अऊर ऊ अपनी दुष्टता अऊर दुष्ट मार्ग सी नहीं फिरे, त ऊ अपनो अधर्म म फस्यो हुयो मर जायेंन; पर तय अपनो आप ख बचायेंन।
EZE 3:20 “फिर जब धर्मी जन अपनो धर्म सी फिर क कुटिल काम करन लगेंन, अऊर मय ओको सामने बाधाये पैदा करू, त ऊ मर जायेंन, कहालीकि तय न ओख नहीं चितायो होतो, येकोलायी ऊ अपनो पापों म फस्यो हुयो मरेंन; अऊर जो धर्म को काम ओन करयो होना, ओकी सुधि नहीं लियो जायेंन, पर मय ओकी मृत्यु को दोष तोरोसीच लेऊं।
EZE 3:21 पर यदि तय धर्मी आदमी ख असो कह्य क चिताजो, कि ऊ पाप नहीं करजो, त ऊ पाप सी बच जायेंन, त ऊ चितौनी ख स्विकार करन को वजह निश्चित जीन्दो रहेंन, अऊर तय अपनो आप ख बचायजो।”
EZE 3:22 फिर परमेश्वर की सामर्थ वहांच मोरो पर प्रगट भयी, अऊर ओन मोरो सी कह्यो, “उठ क मैदान म जा; अऊर वहां मय तोरो सी बाते करूं।”
EZE 3:23 तब उठ क मैदान म गयो, अऊर वहां का देख्यो, कि परमेश्वर की सामर्थ जसी मोख कबार नदी को किनार पर, वसोच यहां भी दिखायी पड़य हय, तब मय मुंह को बल जमीन पर गिर पड़्यो।
EZE 3:24 तब आत्मा मोरो म समाय क मोख पाय को बल खड़ो कर दियो; फिर ऊ मोरो सी कहन लग्यो, “अपनो घर जा, अऊर दरवाजा बन्द कर अन्दर बैठ।
EZE 3:25 हे आदमी की सन्तान, देख, हि लोग तोख रस्सियों सी बान्ध क रखेंन, अऊर तय निकल क उन्को बीच म नहीं जाय सकजो।
EZE 3:26 मय तोरी जीबली ख तालू सी चिपकाय देऊं; अऊर तय मुक्का होय जाजो, अऊर तय उन्ख डाट नहीं सकजो, कहालीकि हि झगड़ालु घराना को हय।
EZE 3:27 पर जब जब मय तोरो सी बाते करूं, तब तब मय तोरो मुंह ख खोलूं, अऊर तय उन्को सी असो कहजो, ‘प्रभु परमेश्वर यो कह्य हय,’ जो सुनय हय ऊ सुन ले अऊर जो नहीं सुनय ऊ नहीं सुने, हि त झगड़ालु घराना को आय।”
EZE 4:1 “हे आदमी की सन्तान, तय एक ईटा ले अऊर ओख अपनो सामने रख, ओको बाद तय ओको पर यरूशलेम नगर को चित्र बनाव।
EZE 4:2 तय ओख चारयी तरफ सी घेर क मोर्चाबन्दी कर। तय ओको सामने गहरी नाली बनाव, अऊर छावनी डाल, अऊर ओको चारयी तरफ युद्ध को यंत्र लगाव।
EZE 4:3 तब तय लोहा को एक तवा ले क ओख दीवाल को रूप म रख दे, यो तोरो अऊर नगर को बीच मनो लोहा की दीवाल होना। तय नगर को तरफ मुंह कर, अऊर ओख घेर ले। घेराव की स्थिति बनायो रख, यो रेखाचित्र इस्राएल को घराना को लायी चिन्ह ठहरेंन।
EZE 4:4 “फिर तय बायो तरफ करवट ले क इस्राएल को घराना को अधर्म को भार अपनो ऊपर रख, जितनो दिन तय बायो करवट पर लेट्यो रहजो, उतनो दिन तक तय उन लोगों को अधर्म को भार सहतो रहजो।
EZE 4:5 मय तोरो लायी दिनों की संख्या निश्चित कर देऊ हय, तय तीन सौ नब्बे दिन तक उन्की सजा सहजो। एक दिन एक साल को बराबर हय, इस्राएल को घराना ख तीन सौ नब्बे साल तक सजा सहनो पड़ेंन।
EZE 4:6 जब इतनो दिन पूरो होय जायेंन, तब तय दियो तरफ करवट ले क यहूदा को घराना को अधर्म को भार सह लेजो; मय न ओको लायी भी अऊर तोरो लायी एक साल को बदला एक दिन मतलब चालीस दिन ठहरायो हय।
EZE 4:7 “तय दुस्मनों सी घिरयो हुयो यरूशलेम नगर को तरफ अपनो मुंह करजो। गुस्सा प्रगट करन लायी तोरी बाहें फैलाय क रखजो। तब तय यरूशलेम को खिलाफ भविष्यवानी करजो।
EZE 4:8 देख, मय तोख रस्सियों सी जकड़ूं, अऊर जब तक ओको घेरन को दिन पूरो नहीं होयेंन, तब तक तय करवट नहीं बदल सकजो।
EZE 4:9 “तय गहूं, जौ, सेमी, मसूर, बाजरा, अऊर कठिया गहूं, ले क एक बर्तन म रख क उन्को सी रोटी बनायो करजो। जितनो दिन तय वा करवट पर लेट्यो रहजो, उतनो मतलब तीन सौ दिन तक ओख खायो करजो।
EZE 4:10 जो भोजन तय खाजो, ओख तौल क खाजो, मतलब हर दिन दोय सौ तीस ग्राम खायो करजो, अऊर ओख समय समय पर खाजो।
EZE 4:11 पानी भी तय नाप क पियो करजो, मतलब हर दिन दोय गिलास पिजो; अऊर ओख निश्चित समय पर पिजो।
EZE 4:12 अपनो भोजन जौ की रोटियों को जसो बनाय क खायो करजो, अऊर ओख आदमी को मल को कंडा पर उन्को देखतो बनायो करजो।”
EZE 4:13 फिर परमेश्वर न कह्यो, “योच तरह सी इस्राएल राष्ट्र को बीच अपनी अपनी रोटी अशुद्धता सी खायो करेंन, जहां मय उन्ख दूसरो देशों म खदेड़ देऊं।”
EZE 4:14 तब मय न कह्यो, “हाय, यहोवा परमेश्वर देख, मोरो मन कभी अशुद्ध नहीं भयो, अऊर नहीं मय न बचपन सी ले क अब तक अपनी मृत्यु सी मरयो हुयो यां फाड़्यो हुयो जनावर को मांस खायो, अऊर नहीं कोयी तरह को अशुद्ध मांस मोरो मुंह म कभी नहीं गयो हय।”
EZE 4:15 तब ओन मोरो सी कह्यो, “देख, मय न तोरो लायी आदमी को मल को कंडा को बदला गाय को गोबर को कंडा ठहरायो हय, अऊर ओको पर तय अपनी रोटी बनायजो।”
EZE 4:16 फिर ओन मोरो सी कह्यो, “हे आदमी की सन्तान, देख, मय यरूशलेम म अनाजरूपी आधार ख दूर करूं; येकोलायी वहां को लोग तौल तौल क अऊर चिन्ता करतो हुयो रोटी खायो करेंन; अऊर नाप नाप क अऊर दु:ख म होय क पानी पियो करेंन।
EZE 4:17 अऊर उन्ख रोटी अऊर पानी की कमी होयेंन; अऊर हि सब को सब घबरायेंन, अऊर अपनो अधर्म म फस्यो हुयो नाश जायेंन।”
EZE 5:1 “हे आदमी की सन्तान, एक धार वाली तलवार ले, अऊर ओख भाली को उस्तरा को जसो काम म लाय क अपनो मुंड अऊर दाढ़ी को मूंड डाल, अब तौलन को तराजू ले क बालों को हिस्सा कर।
EZE 5:2 जब नगर को घेरन को दिन पूरो होयेंन, तब नगर को अन्दर एक तिहायी हिस्सा आगी म डाल क जलायजो, अऊर एक तिहायी हिस्सा चारयी तरफ तलवार सी मारजो; अऊर एक तिहायी हिस्सा हवा म उड़ायजो, अऊर मय तलवार खीच क ओको पीछू चलाऊं।
EZE 5:3 तब इन म सी थोड़ो सो बाल ले क अपनो कपड़ा को कोना म बान्धजो।
EZE 5:4 फिर इन म सी भी थोड़ो सो बाल ले क आगी म डालजो कि हि आगी म जर जायेंन, तब वाच आगी म सी एक लौ भड़क क निकलेंन अऊर इस्राएल को पूरो घराना म फैल जायेंन।
EZE 5:5 “प्रभु परमेश्वर यो कह्य हय : यरूशलेम नगर असोच हय; मय न ओख दूसरो राष्ट्रों को बीच म ठहरायो हय, अऊर ऊ चारयी तरफ सी दूसरो देशों सी घिरयो हय।
EZE 5:6 ओन मोरो नियमों को खिलाफ काम कर क् दूसरो राष्ट्रों सी जादा दुष्टता करी, अऊर मोरी विधियों को खिलाफ चारयी तरफ को देशों को लोगों सी जादा बुरायी करी हय; कहालीकि उन्न मोरो नियम ख तुच्छ जान्यो, अऊर हि मोरी विधियों पर नहीं चल्यो।
EZE 5:7 यो तरह प्रभु परमेश्वर यो कह्य हय : तुम लोग जो अपनो चारयी तरफ को राष्ट्रों सी जादा हल्ला मचावय, अऊर नहीं मोरी विधियों पर चलय, अऊर नहीं मोरो नियमों को पालन करय अऊर अपनो चारयी तरफ को राष्ट्रों को नियमों को अनुसार भी नहीं करयो,
EZE 5:8 यो वजह प्रभु परमेश्वर यो कह्य हय : देख, मय खुद तोरो खिलाफ हय; अऊर दूसरो राष्ट्रों को देखतो मय तोरो बीच न्याय को काम करूं।
EZE 5:9 तोरो सब घिनौनो कामों को वजह मय तोरो बीच असो करूं, जसो अब तक नहीं करयो हय, अऊर नहीं भविष्य म फिर कभी करूं।
EZE 5:10 सुनो तुम्हरो बीच रहन वालो पिता अपनो बच्चां को मांस खायेंन; अऊर टुरा अपनो पिता को! मय तुम्ख याच सजा देऊं, अऊर जो लोग बच जायेंन, उन्ख मय चारयी तरफ दिशावों म बिखेर देऊं।
EZE 5:11 “येकोलायी प्रभु परमेश्वर की या वाणी हय, कि मोरो जीवन की कसम, येकोलायी कि तय न मोरी पवित्र जागा ख अपनी पूरी घिनौनी मूर्तियों अऊर पूरो घिनौनो कामों सी अशुद्ध करयो हय, मय तोख घटाऊं, अऊर तोरो पर दया नहीं करूं, अऊर तोरो पर कुछ भी तरस नहीं खाऊं।
EZE 5:12 तोरो तीन म सी एक हिस्सा महामारी सी मरेंन, अऊर तोरो बीच म भूख सी मर जायेंन; तीन म सी एक हिस्सा नगर को बाहेर तलवार सी मारी जायेंन; अऊर तीन म सी हिस्सा ख मय चारयी तरफ तितर बितर करूं अऊर तलवार सी उन्को पीछा करूं।
EZE 5:13 “यो तरह सी मोरो क्रोध शान्त होयेंन, अऊर अपनी क्रोध की पूरी शक्ति उन पर भड़काय क मय शान्ति पाऊं; अऊर जब मय अपनी क्रोध की शक्ति उन पर पूरी रीति सी भड़काय देऊ, तब हि जान लेयेंन कि मोख परमेश्वरच न जलन म आय क यो कह्यो हय।
EZE 5:14 मय तोख तोरो चारयी तरफ को जातियों को बीच, सब आन-जान वालों को देखतो हुयो तोख उजाड़ देऊं, अऊर तोरी निन्दा करवाऊं।
EZE 5:15 “येकोलायी जब मय तोख क्रोध अऊर जलजलाहट अऊर फटकार को संग सजा देऊं, तब तोरो चारयी तरफ को राष्ट्र को सामने निन्दा, ठट्ठा, अऊर अपमानित होजो, कहालीकि मोख परमेश्वर न यो कह्यो हय।
EZE 5:16 यो ऊ समय होयेंन, जब मय उन लोगों को नाश करन लायी अकाल को घातक तीर चलाय क, तुम्हरो बीच भयंकर अकाल लाऊं, अऊर भोजनरूपी आधार ख दूर करूं।
EZE 5:17 मय तुम्हरो बीच अकाल अऊर जंगली जनावर भेजूं जो तुम्ख बिन सन्तान को कर देयेंन; अऊर महामारी अऊर खून तुम्हरो बीच चलतो रहेंन; अऊर मय तुम पर दुस्मन की तलवार चलवाऊं, मय, प्रभु न यो कह्यो हय।”
EZE 6:1 फिर परमेश्वर को यो वचन मोरो जवर पहुंच्यो :
EZE 6:2 “हे आदमी की सन्तान, अपनो मुख इस्राएल की पहाड़ी को तरफ कर क् उन्को खिलाफ भविष्यवानी कर,
EZE 6:3 अऊर कह्य, हे इस्राएल को पहाड़ो, प्रभु परमेश्वर को वचन सुनो! प्रभु परमेश्वर पहाड़ो अऊर पहाड़ियों सी, अऊर नाला अऊर चारागाह मैदान सी यो कह्य हय : देखो, मय तुम पर तलवार चलवाऊं, अऊर तुम्हरो पूजा को ऊंचो जागावों को नाश करूं।
EZE 6:4 तुम्हरी वेदियां उजड़ जायेंन अऊर तुम्हरी सूर्य की मूर्तियां तोड़ी जायेंन; अऊर मय तुम म सी मरयो हुयो लोगों ख तुम्हरी मूर्तियों को आगु फेक देऊं।
EZE 6:5 मय इस्राएल को लोगों को शवों ख उन्की मूर्तियों को सामने रखूं, अऊर उन्की हड्डियों ख तुम्हरी वेदियों को चारयी तरफ बिखेर देऊं।
EZE 6:6 तुम्हरो जितनो बसायो हुयो नगर हय, हि सब उजड़ जायेंन, कि तुम्हरो पूजा की जागा भी खण्डर होय जायेंन, तुम्हरी वेदियां उजड़ेंन अऊर गिरायी जायेंन, अऊर तुम्हरी मूर्तियां तोड़ी जायेंन अऊर तुम्हरी सूर्य की मूर्तियां तुकड़ा तुकड़ा होय जायेंन; अऊर तुम्हरी पूरी कारीगरी मिटायी जायेंन।
EZE 6:7 तुम्हरो बीच म शवों को ढेर लग्यो रहेंन, तब तुम जान लेवो कि मय परमेश्वर आय।
EZE 6:8 “तब भी मय कितनो ख बचायो रखूं। येकोलायी जब तुम देश देश म तितर-बितर होय जावो, तब राष्ट्र को बीच तुम्हरो कुछ लोग तलवार को मार सी बच जायेंन।
EZE 6:9 हि बच्यो हुयो लोग, उन जातियों को बीच, जिन म हि बन्दी होय क रहेंन, मोख याद करेंन; अऊर यो भी कि हमरो व्यभिचारी दिल परमेश्वर सी कसो हट गयो हय, अऊर व्यभिचारिनी कि जसी हमरी आखी मूर्तियों पर कसी लगी हय, जेकोसी परमेश्वर को मन टूट्यो हय। यो रीति सी उन बुरायीयों को वजह, जो उन्न अपनो घृणित काम कर क् करयो हय, हि अपनी नजर म घृणित ठहरेंन।
EZE 6:10 तब हि जान लेयेंन कि मय परमेश्वर आय, अऊर उन्की पूरी हानि करन लायी मय न जो यो कह्यो होतो, ऊ बेकार नहीं कह्यो होतो।”
EZE 6:11 प्रभु परमेश्वर यो कह्य हय : “अपनो हाथ पर हाथ मार क अऊर पाय पटक क कहो, इस्राएल को घराना को पूरो घिनौनो कामों पर हाय, हाय, कहालीकि हि तलवार सी, भूखमरी, अऊर महामारी सी मर जायेंन।
EZE 6:12 जो दूर हय हि बीमारी सी मरेंन, अऊर जो जवर हय हि तलवार सी मरेंन, अऊर जो नगर म रहतो हुयो बच जायेंन, हि भूख सी मरेंन। यो तरह मय अपनी क्रोध की शक्ति ख भड़काऊं।
EZE 6:13 जब हर एक ऊची पहाड़ी अऊर पहाड़ों की हर एक सेंडी पर, अऊर हर एक हरो झाड़ को खल्लो, अऊर हर एक घनो बांझ नाम को झाड़ की छाया म, जहां जहां हि अपनी सब मूर्तियों ख सुखदायक सुगन्ध अत्तर चढ़ावय हय, वहां उन्को मरयो हुयो लोगों को शव अपनी वेदियों को आजु-बाजू अपनी मूर्तियों को बीच म पड़्यो रहेंन; तब तुम लोग जान लेवो कि मय परमेश्वर आय।
EZE 6:14 मय अपनो हाथ उन्को खिलाफ बढ़ाय क ऊ देश ख पूरो घरो समेत जंगल सी ले क रिबला नगर तक उजाड़ कर देऊं। तब हि जान लेयेंन कि मय परमेश्वर आय।”
EZE 7:1 फिर परमेश्वर को यो वचन मोरो जवर पहुंच्यो,
EZE 7:2 “हे आदमी की सन्तान,” प्रभु परमेश्वर इस्राएल की जमीन को बारे म यो कह्य हय : कि विनाश आयो; चारयी कोना समेत देश को विनाश आय गयो।
EZE 7:3 हे इस्राएल तोरो विनाश को समय भी आय गयो, अऊर मय अपनो कोप तोरो पर भड़काय क तोरो चालचलन को अनुसार तोख सजा देऊं; अऊर तोरो पूरो घिनौनो कामों को फर तोख देऊं।
EZE 7:4 मोरी दया की नजर तोरो पर नहीं रहेंन, अऊर नहीं मय तरस नहीं खाऊं, अऊर जब तक तोरो म घृणित पाप बन्यो रहेंन, मय तोरो आचरन को अनुसार तोख सजा देऊं। तब तय जान लेजो कि मय परमेश्वर आय।
EZE 7:5 प्रभु परमेश्वर यो कह्य हय : विपत्ति को बाद विपत्ति! देख, तोरो पर विपत्ति आय रह्यी हय।
EZE 7:6 अन्त आय गयो हय, सब को अन्त आय गयो हय; ऊ तोरो सर्वनाश करन लायी जागृत भयो हय। देखो, ऊ आय रह्यो हय।
EZE 7:7 हे इस्राएल देश को निवासियों, तुम्हरो लायी विनाश को समय आय गयो हय, विनाश को चक्र घूम चुक्यो हय, पहाड़ियों पर खुशी उल्लास को शब्द नहीं, पर भगदड़ को दिन होयेंन।
EZE 7:8 “अब थोड़ो दिनों म मय अपनी जलजलाहट तोरो पर भड़काऊं, अऊर तोरो पर पूरो कोप डाल देऊं अऊर तोरो चालचलन को अनुसार तोख सजा देऊं। अऊर तोरो पूरो घृणित कामों लायी तोख सजा देऊं।
EZE 7:9 मोरी दया की नजर तोरो पर नहीं होयेंन अऊर नहीं मय तोरो पर तरस दिखाऊं। मय तोरी चालचलन को फर तोरो सी भुगताऊं, अऊर तोरो घिनौनो पाप तोरो म बन्यो रहेंन। तब तुम जान लेवो कि मय परमेश्वर सजा देन वालो आय।”
EZE 7:10 देखो, ऊ दिन ख देखो, ऊ आय रह्यो हय! विनाश को चक्र घुम चुक्यो हय, अन्याय की छड़ी फूल गयी हय, तोरो घमण्ड बढ़ गयो हय।
EZE 7:11 उपद्रव बढ़तो बढ़तो दुष्कर्म कि सजा बन गयो; उन म सी कोयी नहीं बचेंन, अऊर नहीं उन्की भीड़-भाड़, अऊर नहीं उन्को धन म सी कुछ बचेंन; अऊर नहीं उन म सी कोयी को लायी आंसू बहावन वालो भी नहीं रहेंन।
EZE 7:12 समय आय गयो, दिन जवर आय गयो हय; नहीं त खरीदन वालो खुशी मनायेंन अऊर नहीं बेचन वालो शोक करेंन, कहालीकि उन्की पूरी भीड़ पर कोप भड़क उठ्यो हय।
EZE 7:13 चाहे ऊ जीन्दो रहे, तब भी बेचन वालो बेची हुयी चिज को जवर कभी नहीं जाय सकेंन; कहालीकि क्रोध कि या बात देश की पूरी भीड़ पर घटेंन, कोयी नहीं लौटेंन; कोयी भी आदमी जो अधर्म म जीन्दो रह्य हय, ऊ खुद ख सम्भाल नहीं पायेंन।
EZE 7:14 उन्न नरसिंगा फूक्यो अऊर सब कुछ तैयार कर दियो; पर युद्ध म कोयी नहीं जात होतो कहालीकि देश की पूरी भीड़ पर मोरो कोप भड़क्यो हुयो हय।
EZE 7:15 नगर को बाहेर दुश्मन की तलवार अऊर नगर को अन्दर अकाल अऊर महामारी हय; अऊर जो नगर को मैदान म होना हि तलवार सी मरेंन, अऊर जो नगर को अन्दर हय हि भूख अऊर महामारी सी मारयो जायेंन।
EZE 7:16 उन म सी जो बच निकलेंन हि बचेंन त सही पर अपनो अपनो अधर्म म फस्यो रह्य क घाटियों म रहन वालो कबूतरों को जसो पहाड़ियों को ऊपर शोक करतो रहेंन।
EZE 7:17 सब को हाथ ढीलो अऊर सब को घुटना बहुत कमजोर होय जायेंन।
EZE 7:18 हि कमर म टाट को कपड़ा पहिन लेयेंन, अऊर हि भयभित होय जायेंन, सब को मुंह लज्जा सी ढक जायेंन अऊर सब को मुंड को बाल काट्यो जायेंन।
EZE 7:19 हि अपनी चांदी सड़कों पर फेक देयेंन, अऊर उन्को सोनो अशुद्ध चिज ठहरेंन; परमेश्वर को कोप को दिन उन्को सोनो चांदी उन्ख बचाय नहीं सकेंन, नहीं ओको सी उन्को जीव सन्तुष्ट होयेंन, नहीं उन्को पेट भरेंन। कहालीकि ऊ उन्को अधर्म को ठोकर को वजह भयो हय।
EZE 7:20 उन्को देश जो सुन्दर जेवरों पर घमण्ड करत होतो अऊर सुसज्जित होतो, ओको बारे म उन्न गर्वच गर्व कर क् ओको म अपनी घृणित चिजों की मूर्तियां, अऊर घृणित चिजे बनाय रखी हय, यो वजह मय न ओख उन्को लायी अशुद्ध चिज ठहरायी हय।
EZE 7:21 मय ओख लूटन लायी परदेशियों को हाथ म, अऊर धन छीनन लायी धरती को बुरो लोगों को वश म कर देऊं, अऊर हि ओख अपवित्र कर डालेंन।
EZE 7:22 मय उन सी अपनो मुंह फिराय लेऊं, तब हि मोरो मन्दिर रूपी जागा ख अपवित्र कर डालेंन; डाकू ओको म घुस क ओख अपवित्र कर डालेंन।
EZE 7:23 “एक संकली बनाय दे, कहालीकि देश अन्याय को खून सी, अऊर नगर उपद्रव सी भरयो हुयो हय।
EZE 7:24 मय अलग अलग राष्ट्र को बुरो लोगों ख लाऊं, जो उन्को घरों पर अधिकार कर लेयेंन; अऊर मय ताकतवर लोगों को घमण्ड तोड़ डालूं अऊर उन्को पवित्र जागा अपवित्र कर डालेंन।
EZE 7:25 दु:ख पीड़ा आवन पर, शान्ति ख ढूंढेंन, पर ढूंढन पर भी उन्ख शान्ति नहीं मिलेंन।
EZE 7:26 उन पर एक को बाद एक विपत्ति आयेंन अऊर अफवाहें चारयी तरफ फैलेंन; अऊर लोग भविष्यवक्ता सी दर्शन की बात पूछेंन, पर याजक को जवर व्यवस्था, अऊर बुजूर्ग लोगों को जवर सम्मति देन की शक्ति नहीं रहेंन।
EZE 7:27 राजा त शोक करेंन, अऊर प्रधान आशा छोड़ देयेंन, अऊर देश को लोग कांप उठेंन। मय उन्को चालचलन को अनुसार उन सी व्यवहार करूं, अऊर जसो तय न दूसरों को संग न्याय करयो हय वसोच मय भी तोरो न्याय करूं। तब हि जान लेयेंन कि मय परमेश्वर आय।”
EZE 8:1 फिर छटवों साल को छटवों महिना को पाचवों दिन जब मय अपनो घर म बैठ्यो होतो, अऊर यहूदियों को मुखिया मोरो सामने बैठ्यो होतो, उच समय प्रभु परमेश्वर की सामर्थ मोरो पर प्रगट भयी।
EZE 8:2 तब मय न देख्यो कि आगी जसो एक रूप दिखायी देवय हय; ओकी कमर को खल्लो को तरफ आगी हय, अऊर ओकी कमर को ऊपर को तरफ चमकायो हुयो पीतल की चमक को जसो कुछ हय।
EZE 8:3 ओन अपनो हाथ बढ़ायो अऊर मोरो बाल पकड़ लियो। फिर यो दर्शन म परमेश्वर की आत्मा न मोख हवा म ऊपर उठायो अऊर यरूशलेम ले गयो। ऊ मोख मन्दिर को अन्दर आंगन को जवर फाटक को जवर जेको मुंह उत्तर दिशा को तरफ हय पहुंचाय दियो; जहां एक मूर्ती होती जो परमेश्वर को लायी अपमानजनक होती।
EZE 8:4 फिर वहां इस्राएल को परमेश्वर को तेज वसोच होतो जसो मय न कबार नदी को किनार पर देख्यो होतो।
EZE 8:5 ओन मोरो सी कह्यो, “हे आदमी की सन्तान, अपनी आखी उत्तर दिशा को तरफ उठाय क देख।” मय न अपनी आखी उत्तर को तरफ उठाय क देख्यो की वेदी को फाटक को उत्तर दिशा को तरफ ओको फाटक को जवर मय न वा जलन उपजावन वाली मूर्ती देखी जेकोसी परमेश्वर को अपमान हय।
EZE 8:6 तब परमेश्वर न मोरो सी कह्यो, “हे आदमी की सन्तान, का तय देखय हय कि हि लोग का कर रह्यो हय? इस्राएल को घराना यहां कितनो घृणित काम कर रह्यो हय, ताकि मय अपनो पवित्र जागा सी दूर होय जाऊ; पर तय इन सी भी जादा घृणित काम देखजो।”
EZE 8:7 तब ऊ मोख आंगन की फाटक पर ले गयो, अऊर मय न देख्यो, कि दीवाल म एक छेद हय।
EZE 8:8 तब ओन मोरो सी कह्यो, “हे आदमी कि सन्तान, दीवाल ख फोड़।” येकोलायी मय न दीवाल ख फोड़ क का देख्यो कि एक दरवाजा हय।
EZE 8:9 ओन मोरो सी कह्यो, “अन्दर जाय क देख कि हि लोग यहां कसो कसो अऊर घृणित काम कर रह्यो हय।”
EZE 8:10 मय न अन्दर जाय क देख्यो कि चारयी तरफ की दीवाल पर अलग अलग तरह को रेंगन वालो जन्तुवों अऊर घृणित पशुवों अऊर इस्राएल को द्वारा पूज्यो जान वालो देवी-देवतावों को चित्र बनायो हुयो हय।
EZE 8:11 इस्राएल को घराना को मुखियावों म सी सत्तर आदमी जिन को बीच म शापान को टुरा याजन्याह भी हय, हि उन चित्र को सामने खड़ो हय, अऊर हर एक आदमी अपनो हाथ म धूपदान लियो हुयो हय, अऊर धूप को धूंगा ऊपर उठ रह्यो हय।
EZE 8:12 तब ओन मोरो सी कह्यो, “हे आदमी कि सन्तान, का तय न देख्यो हय कि इस्राएल को घराना को मुखिया अपनी अपनी नक्काशी वालो कमरा को अन्दर मतलब अन्धारो म का कर रह्यो हय? हि कह्य हय कि परमेश्वर हम्ख नहीं देखय; परमेश्वर न देश ख त्याग दियो हय।”
EZE 8:13 फिर ओन मोरो सी कह्यो, “तय इन सी अऊर भी जादा घृणित काम देखजो जो हि करय हय।”
EZE 8:14 तब ऊ मोख परमेश्वर को भवन को ऊ फाटक को जवर ले गयो जो उत्तर दिशा को तरफ होतो अऊर वहां बाईयां बैठी हुयी तम्मूज देवता को लायी रोय रह्यी हय।
EZE 8:15 तब ओन मोरो सी कह्यो, “हे आदमी कि सन्तान, का तय न यो देख्यो हय? फिर इन सी भी बड़ो घृणित काम तय देखजो।”
EZE 8:16 तब ऊ मोख परमेश्वर को भवन को अन्दर आंगन म ले गयो; अऊर वहां परमेश्वर को भवन को फाटक को जवर मन्डप अऊर वेदी को बीच पच्चीस आदमी अपनी पीठ परमेश्वर को भवन को तरफ अऊर अपनो मूख पूर्व दिशा को तरफ करयो हुयो होतो; अऊर हि पूर्व दिशा को तरफ सूर्य ख प्रणाम कर रह्यो होतो।
EZE 8:17 तब ओन मोरो सी कह्यो, “हे आदमी कि सन्तान, का तय न यो देख्यो? का यहूदा को घराना को लायी घृणित कामों को करनो जो हि यहां करय हय छोटी बात हय? उन्न अपनो देश ख उपद्रव सी भर दियो, अऊर फिर यहां आय क मोख गुस्सा दिलावय हय। हि मानो मुंह बनाय क मोरी निन्दा करय हय।
EZE 8:18 येकोलायी मय भी जलजलाहट को संग काम करूं, नहीं मय दया करूं अऊर नहीं मय तरस को व्यवहार करूं, अऊर चाहे हि मोरो कानों म ऊंचो आवाज सी पुकारे, तब भी मय उन्की बात नहीं सुनूं।”
EZE 9:1 फिर मय न परमेश्वर ख ऊंचो आवाज म चिल्लातो हुयो सुन्यो, “हे नगर ख सजा देन वालो आदमियों इत आवों। अपनो हथियार अपनो संग लावो।”
EZE 9:2 येको पर छय आदमी उत्तर दिशा को तरफ ऊपर को फाटक को रस्ता सी अपनो अपनो हाथ म हथियार लियो हुयो आयो; अऊर उन्को बीच मलमल को कपड़ा पहिन्यो, कमर म लिखन की दऊत बान्ध्यो हुयो एक अऊर आदमी होतो; अऊर हि सब भवन को अन्दर जाय क पीतल की वेदी को जवर खड़ो भयो।
EZE 9:3 तब इस्राएल को परमेश्वर की सामर्थ पंख धारी प्रानी पर सी, जिन को ऊपर ऊ रह्यो करत होतो, भवन को मन्डप को ऊपर उठ आयो होतो; अऊर ओन ऊ सन को कपड़ा पहिन्यो हुयो आदमी ख जो कमर म दऊत बान्ध्यो हुयो होतो, पुकारयो।
EZE 9:4 अऊर परमेश्वर न ओको सी कह्यो, “यो यरूशलेम नगर को अन्दर जावो, अऊर उन सब आदमियों को मस्तक पर चिन्ह लगावो, जो नगर म करयो जाय रह्यो घृणित कामों लायी दु:ख मनातो अऊर शोक करय हय।”
EZE 9:5 मय न परमेश्वर ख दूसरों सी बाते करतो सुन्यो, “तुम इन्को पीछु पीछु नगर म जावो; अऊर घृणित काम करन वालों ख मार डालो। तुम उन पर दया मत करो अऊर नहीं नम्रता सी काम करजो।
EZE 9:6 बूढ्ढा, जवान, कुंवारी, बाल-बच्चा, बाईयां, सब ख मार डालो, पर जो कोयी आदमी को मस्तक पर ऊ चिन्ह होना, ओको जवर मत जाजो। मोरो पवित्र जागा सीच शुरू करो।” उन्न उन मुखियावों सी शुरू करयो जो परमेश्वर को भवन को सामने होतो।
EZE 9:7 फिर परमेश्वर न उन्को सी कह्यो, “मोरो भवन ख शवों सी अशुद्ध कर देवो, आंगनों ख शवों सी भर देवो। जावो, मन्दिर को बाहेर जावो।” अऊर हि यरूशलेम नगर म घृणित काम करन वालों ख मारन लग्यो।
EZE 9:8 जब हि मार रह्यो होतो, अऊर मय अकेलो रह्य गयो, तब मय मुंह को बल गिरयो अऊर पुकार क कह्यो, “हे प्रभु परमेश्वर! का तय अपनी जलजलाहट यरूशलेम नगर पर भड़काय क इस्राएल को सब बच्यो हुयो ख भी नाश करजो?”
EZE 9:9 तब ओन मोरो सी कह्यो, “इस्राएल अऊर यहूदा को घराना को अधर्म बहुत जादा हय, यहां तक कि देश हत्या सी अऊर नगर अन्याय सी भर गयो हय; कहालीकि हि कह्य हय, ‘परमेश्वर न धरती ख त्याग दियो अऊर परमेश्वर कुछ नहीं देखय।’
EZE 9:10 येकोलायी उन पर दया नहीं होयेंन, नहीं मय तरस करूं, बल्की उन्की चाल उन्कोच मुंड पर डाल देऊं।”
EZE 9:11 तब मय न का देख्यो, कि जो आदमी सन को कपड़ा पहिन्यो हुयो अऊर कमर म शाही की दऊत बान्ध्यो होतो, ओन यो कह्य क समाचार दियो, “जसो तय न आज्ञा दियो, मय न वसोच करयो हय।”
EZE 10:1 येको बाद मय न देख्यो कि करूबों को मुंड को ऊपर जो आकाश मण्डल हय, अऊर यो आकाश मण्डल म सिंहासन जसो कुछ हय, जो नीलमनि को जसो चमक रह्यो हय।
EZE 10:2 तब परमेश्वर न ऊ सन को कपड़ा पहिन्यो हुयो आदमी सी कह्यो, “घूमन वालो चक्का को बीच करूबों को खल्लो जा अऊर अपनी दोयी मुट्ठियों म पंख धारी प्रानी को बीच म सी आगी उठाव अऊर यरूशलेम नगर पर बगराय दे।” ऊ मोरो देखतो हुयो उन्को बीच म गयो।
EZE 10:3 जब ऊ आदमी अन्दर गयो, तब हि करूब, भवन को दक्षिन दिशा को तरफ खड़ो होतो; अऊर बादर अन्दर को आंगन म समाय गयो।
EZE 10:4 तब परमेश्वर को तेज करूबों को ऊपर सी उठ क भवन की डेहरी पर आय गयो; अऊर बादर भवन म भर गयो; अऊर ऊ डेहरी परमेश्वर को तेज को महिमा सी भर गयो।
EZE 10:5 करूबों को पंखा को आवाज बाहेर को आंगन तक सुनायी देत होतो, ऊ सर्वशक्तिमान परमेश्वर को बोलन को जसो शब्द होतो।
EZE 10:6 जब ओन सन को कपड़ा पहिन्यो हुयो आदमी ख घूमन वालो चक्का को अन्दर करूबों को बीच म सी आगी लेन की आज्ञा दी, तब ऊ उन्को बीच म जाय क एक चक्का को जवर खड़ो भयो।
EZE 10:7 तब करूबों को बीच म सी एक करूब न अपनो हाथ बढ़ा क, वा आगी म सी जो करूबों को बीच म होती, कुछ उठाय क सन को कपड़ा पहिन्यो हुयो आदमी की मुट्ठी म दे दियो; अऊर ऊ ओख ले क बाहेर चली गयो।
EZE 10:8 करूबों को पंखा को खल्लो त आदमी को हाथ को जसो कुछ दिखायी देत होतो।
EZE 10:9 तब मय न देख्यो, कि करूबों को जवर चार चक्का हय; मतलब एक एक करूब को जवर एक एक चक्का हय, अऊर चक्का को रूप किमती चमकीलो गोटा को जसो हय।
EZE 10:10 उन्को असो रूप हय, कि चारयी एक जसो दिखायी दे रह्यो हंय, जसो एक चक्का को बीच दूसरो चक्का हय।
EZE 10:11 जब हि चलत होतो तब चारयी दिशावों म हि बिना मुड़्यो चलत होतो; पर सामने को चक्का जो दिशा म चलत होतो, बाकी चक्का ओको पीछु पीछु चलत होतो, अऊर चलतो समय हि मुड़त नहीं होतो।
EZE 10:12 मय न देख्यो की करूबों को पूरो शरीर पीठ, हाथ अऊर पंखा म अऊर जो चक्का उन्को हय, उन म भी सब को सब चारयी तरफ आंखीच आंखी हय,
EZE 10:13 मोरो सुनतो हुयो इन चक्का ख चक्कर कह्यो गयो, मतलब घुमन वालो चक्का।
EZE 10:14 एक एक को चार चार मुंह होतो : एक मुंह त करूब को जसो, दूसरो मुंह आदमी को जसो, तीसरो मुंह सिंह को जसो, अऊर चौथो मुंह उकाब पक्षी को जसो होतो।
EZE 10:15 करूब जमीन पर सी ऊपर उठ गयो। हि योच जीवधारी हय जो मय न कबार नदी को जवर देख्यो होतो।
EZE 10:16 जब करूब चलत होतो तब तब हि चक्का उन्को जवर जवर चलत होतो; अऊर जब जब करूब धरती पर सी ऊपर उड़न लायी पंख फैलावत होतो तब तब चक्का उन्को जवर सी मुड़त नहीं होतो।
EZE 10:17 जब हि खड़ो होत होतो; तब चक्का भी खड़ो होय जात होतो; अऊर जब हि ऊपर उठय हय तब हि भी उन्को संग उठत होतो; कहालीकि इन जीवधारियों की आत्मा उन्म भी होती।
EZE 10:18 परमेश्वर की सामर्थ भवन को दरवाजा सी बाहेर निकल्यो अऊर करूबों को ऊपर ठहर गयो।
EZE 10:19 तब करूब अपनो पंख फैलाय क मोरो देखतो देखतो धरती पर सी उठ क निकल गयो; अऊर चक्का भी उन्को संग संग गयो, अऊर हि सब परमेश्वर को भवन को पूर्व दिशा को फाटक म खड़ो भय गयो; अऊर इस्राएल को परमेश्वर को तेज उन्को ऊपर रुक्यो रह्यो।
EZE 10:20 हि योच जीवधारी आय जो मय न कबार नदी को जवर इस्राएल को परमेश्वर को आसन को खल्लो देख्यो होतो, अऊर मय न जान लियो कि हि करूब आय।
EZE 10:21 हर एक को चार मुंह अऊर चार पंखा को खल्लो आदमी को जसो हाथ भी होतो।
EZE 10:22 उन्को मुंह को रूप उच हय जो मय न कबार नदी को किनार पर देख्यो होतो। उन्को मुंहच नहीं बल्की शरीर भी वसोच होतो। हि सीधो सामने को तरफ चलत होतो।
EZE 11:1 तब आत्मा न मोख उठाय क परमेश्वर को भवन की पूर्व दिशा की फाटक को जवर जेको मुंह पूर्व दिशा को तरफ हय, पहुंचाय दियो; अऊर वहां मय न का देख्यो, कि फाटक मच पच्चीस आदमी हय। मय न उन्को बीच अज्जूर को टुरा याजन्याह ख अऊर बनायाह को टुरा पलत्याह ख देख्यो, जो प्रजा को मुखिया होतो।
EZE 11:2 तब ओन मोरो सी कह्यो, “हे आदमी की सन्तान, जो आदमी यो नगर म बेकार उपाय अऊर बुरी युक्ति सोचय हय हि हिच आय।
EZE 11:3 हि कह्य हय, ‘घर बनावन को समय नहीं आयो हय, यो नगर मानो हन्डा हय अऊर हम ओको म को मांस आय।’
EZE 11:4 येकोलायी हे आदमी की सन्तान, इन्को खिलाफ भविष्यवानी कर, भविष्यवानी।”
EZE 11:5 तब परमेश्वर को आत्मा मोरो पर उतरयो, अऊर मोरो सी कह्यो, असो कह्य, परमेश्वर यो कह्य हय : “हे इस्राएल को घराना, तुम न असोच कह्यो हय; जो कुछ तुम्हरो मन म आवय हय, ओख मय जानु हय।
EZE 11:6 तुम न त यो नगर म बहुत लोगों ख मार डाल्यो बल्की ओकी सड़कों ख लाशों सी भर दियो हय।
EZE 11:7 “यो वजह प्रभु परमेश्वर यो कह्य हय : जिन लोगों ख तुम न यो नगर म मार डाल्यो हय, नगररूपी हान्डी म को मांस आय; अऊर तुम येको बीच सी निकाल दियो जावो।
EZE 11:8 तुम तलवार सी डरय हय, अऊर मय तुम पर तलवार चलाऊं, प्रभु परमेश्वर की या वाणी हय।
EZE 11:9 मय तुम ख नगर म सी बाहेर निकाल क परदेशियों को हाथ म सौंप देऊं, अऊर तुम्ख सजा देऊं।
EZE 11:10 तुम तलवार सी मर क गिरो, अऊर मय तुम्ख इस्राएल को देश की सीमा पर सजा देऊं; तब तुम जान लेवो कि मयच प्रभु आय।
EZE 11:11 यो नगर तुम्हरो लायी हान्डी अऊर खुद ख ओको अन्दर को मांस मानय हय; पर नहीं, मय तुम्ख सुरक्षित रहन नहीं देऊं। मय तुम्ख इस्राएल देश की सीमा पर सजा देऊं।
EZE 11:12 तब तुम जान लेवो कि मय परमेश्वर आय; तुम त मोरी विधियों पर नहीं चलय, अऊर मोरो नियमों ख तुम न नहीं मान्यो; पर अपनो चारयी तरफ की राज्यों की रीतियों पर चलतो रह्यो।”
EZE 11:13 मय यो तरह की भविष्यवानी कर रह्यो होतो कि बनायाह को टुरा पलत्याह मर गयो। तब मय मुंह को बल गिर क ऊंचो आवाज सी चिल्लाय उठ्यो, अऊर कह्यो, “हाय प्रभु परमेश्वर, का तय इस्राएल को बच्यो हुयो लोगों को सत्यानाश कर डालजो?”
EZE 11:14 तब परमेश्वर को यो वचन मोरो जवर पहुंच्यो,
EZE 11:15 “हे आदमी की सन्तान, यरूशलेम को निवासियों न तोरो जवर भाऊवों सी बल्की इस्राएल को पूरो घराना सी भी कह्यो हय कि ‘तुम परमेश्वर को जवर सी दूर होय जावो, यो देश हमरोच अधिकार म दियो गयो हय।’
EZE 11:16 “पर तय उन्को सी कह्य, ‘प्रभु परमेश्वर यो कह्य हय : मय न तुम्ख तुम्हरो देश सी निकाल क दूसरी जातियों म बसायो अऊर दूसरो देशों म तितर-बितर कर दियो हय, तब भी जिन देशों म तुम आयो हुयो हय, उन म मय खुद तुम्हरो लायी थोड़ो दिन तक पवित्र जागा ठहराऊं।’
EZE 11:17 “येकोलायी, उन्को सी कह्य, ‘प्रभु परमेश्वर यो कह्य हय : मय तुम्ख राज्य राज्य को लोगों को बीच सी जमा करूं, अऊर जिन देशों म तुम तितर-बितर करयो गयो हय, उन्म सी तुम्ख जमा करूं, अऊर तुम्ख इस्राएल की जमीन देऊं।’
EZE 11:18 हि वहां पहुंच क ऊ देश की सब घृणित मूर्तियों ख हटाय देयेंन अऊर अपनो सब घृणित कामों ख घोड़ देयेंन।
EZE 11:19 मय उन्को दिल एक कर देऊं, अऊर उन्को अन्दर नयी आत्मा पैदा करूं, अऊर उन्को शरीर म सी गोटा जसो दिल निकाल क उन्ख मांस को दिल देऊं,
EZE 11:20 जेकोसी हि मोरी विधियों पर हमेशा चल्यो करेंन अऊर मोरो नियमों ख मानेंन; अऊर हि मोरी प्रजा ठहरेंन, अऊर मय उन्को परमेश्वर ठहरूं।
EZE 11:21 पर हि लोग जो अपनी घृणित मूर्तियों अऊर घृणित कामों म मन लगाय क चलतो रह्य हय, उन्ख मय असो करूं कि उन्की चाल उन्कोच मुंड पर पड़ेंन, प्रभु परमेश्वर की याच वाणी आय।”
EZE 11:22 येको पर करूबों न अपनो पंख फैलायो, अऊर चक्का उन्को संग संग चलन लग्यो; अऊर इस्राएल को परमेश्वर की सामर्थ उन्को ऊपर होतो।
EZE 11:23 तब परमेश्वर को तेज नगर को बीच म सी निकल क वा पहाड़ी पर ठहर गयो जो नगर को पूर्व दिशा को तरफ हय।
EZE 11:24 फिर आत्मा न मोख ऊपर उठायो, अऊर परमेश्वर की आत्मा की शक्ति सी दर्शन म मोख कसदियों को देश म बन्दियों को जवर पहुंचाय दियो। जो दर्शन मय न देख्यो होतो ऊ दर्शन गायब भय गयो।
EZE 11:25 तब जितनी बाते परमेश्वर न मोख दिखायी होती, हि सब मय न बन्दियों ख बताय दियो।
EZE 12:1 फिर परमेश्वर को यो वचन मोरो जवर पहुंच्यो,
EZE 12:2 “हे आदमी की सन्तान,” तय झगड़ालु करन वालो घराना को बीच म रह्य हय, जिन्ख देखन लायी आखी त हंय, पर नहीं देखय; अऊर सुनन लायी कान त हंय पर नहीं सुनय; कहालीकि हि विद्रोह करन वालो घराना को आय।
EZE 12:3 “येकोलायी हे आदमी की सन्तान, दिन ख बन्धुवायी को सामान तैयार कर क् उन्को आखी को सामने नगर सी निकल जाजो, उन्को आखी को सामने सी अपनी जागा छोड़ क दूसरी जागा ख चली जाजो। होय सकय हय हि विद्रोही तुम पर ध्यान दे।
EZE 12:4 येकोलायी तय दिन को समय उन्को देखतो हुयो बन्धुवायी को सामान को जसो अपनो सामान बान्ध लेजो, अऊर तय शाम ख बन्धुवायी म जान वालो को जसो उन्को देखतो हुयो निकल जाजो।
EZE 12:5 उन्को देखतो हुयो दीवाल ख फोड़ क वहां सीच निकल जाजो।
EZE 12:6 उन्को देखतो हुयो अपनो सामान कन्धा पर उठाय क अन्धारो म निकालजो, अऊर अपनो मुंह झाक्यो रहजो कि तय अपनो देश ख नहीं देख सके; कहालीकि मय न तोख इस्राएल को घराना को लायी एक चिन्ह ठहरायो हय।”
EZE 12:7 वा आज्ञा को अनुसार मय न वसोच करयो। दिन ख मय न अपनो सामान बन्धुवायी को सामान को जसो निकाल्यो, अऊर शाम ख अपनो हाथ सी दीवाल ख फोड़्यो; फिर अन्धारो म सामान ख निकाल क, उन्को देखतो हुयो अपनो कन्धा पर उठाय क चली गयो।
EZE 12:8 सुबेरे परमेश्वर को यो वचन मोरो जवर पहुंच्यो,
EZE 12:9 “हे आदमी की सन्तान, का इस्राएल को घराना न मतलब ऊ विद्रोह करन वालो घराना न तोरो सी यो नहीं पुच्छ्यो, ‘यो तय का कर रह्यो हय?’
EZE 12:10 तय उन सी कह्य, ‘प्रभु परमेश्वर यो कह्य हय : यो प्रभावशाली वचन यरूशलेम नगर को मुखिया अऊर इस्राएल को पूरो घराना को बारे म हय जेको बीच म हि रह्य हय।’
EZE 12:11 तय उन्को सी कह्य, ‘मय तुम्हरो लायी चिन्ह आय; जसो मय न करयो हय, वसोच इस्राएली लोगों सी भी करयो जायेंन; उन्ख बन्दी बन क जानो पड़ेंन।’
EZE 12:12 उन्को बीच जो मुखिया हय, ऊ अन्धारो म अपनो कन्धा पर बोझ उठाय क निकलेंन; हि अपनो सामान निकालन लायी दीवाल ख फोड़ेंन, अऊर अपनी आखी झाक्यो रहेंन ताकि ओख जमीन दिखायी नहीं दे।
EZE 12:13 मय ओको पर अपनो जार फैलाऊं, अऊर ऊ मोरो फन्दा म फसेंन; अऊर मय ओख कसदियों को देश को बेबीलोन शहर म पहुंचाय देऊं; पर ऊ ओख देख नहीं सकेंन, कहालीकि ऊ अन्धा कर दियो जायेंन अऊर वहांच मर जायेंन।
EZE 12:14 जितनो ओको मदत करन वालो ओको आजु-बाजू होना, उन्ख अऊर उन्को पूरो दलों ख मय सब दिशावों म तितर-बितर कर देऊं; अऊर तलवार खींच क उन्को पीछा करूं।
EZE 12:15 “जब मय उन्ख राज्यों म तितर-बितर कर देऊं, अऊर देश देश म छिन्न भिन्न कर देऊं, तब हि जान लेयेंन कि मय परमेश्वर आय।
EZE 12:16 पर मय उन म सी थोड़ो सो लोगों ख तलवार, भूख अऊर महामारी सी बचाय रखूं; अऊर हि अपनो घृणित कामों को उन राष्ट्रों म वर्णन करेंन जिन को बीच म हि पहुंचेंन; तब हि जान लेयेंन कि मय परमेश्वर आय।”
EZE 12:17 तब परमेश्वर को यो वचन मोरो जवर पहुंच्यो,
EZE 12:18 “हे आदमी की सन्तान, कापतो हुयो अपनी रोटी खाजो अऊर थरथरातो अऊर चिन्ता करतो हुयो अपनो पानी पीजो;
EZE 12:19 अऊर यो देश को लोगों सी यो कहजो, कि प्रभु परमेश्वर अऊर इस्राएल को देश यरूशलेम को निवासियों को बारे म यो कह्य हय : हि अपनी रोटी चिन्ता को संग खायेंन, अऊर अपनो पानी डर को संग पीयेंन; कहालीकि देश अपनो सब रहन वालों को उपद्रव को वजह अपनी पूरी भरपूरी सी रहित होय जायेंन।
EZE 12:20 बस्यो हुयो नगर उजड़ जायेंन, अऊर देश भी उजाड़ होय जायेंन, तब तुम लोग जान लेवो कि मय परमेश्वर आय।”
EZE 12:21 फिर परमेश्वर को यो वचन मोरो जवर पहुंच्यो,
EZE 12:22 “हे आदमी की सन्तान, या का कहावत आय जो तुम लोग इस्राएल को देश म कहत होतो, ‘दिन बहुत बीत गयो हय, अऊर दर्शन की कोयी बात पूरी नहीं भयी?’
EZE 12:23 येकोलायी उन्को सी कह्य, ‘प्रभु परमेश्वर यो कह्य हय : मय या कहावत ख बन्द करूं; अऊर या कहावत इस्राएल पर फिर कभी नहीं चलेंन।’ तय उन सी कह्य कि ऊ दिन जवर आय गयो हय, अऊर दर्शन कि सब बाते पूरी होन पर हय।
EZE 12:24 “कहालीकि इस्राएल को घराना म अऊर जादा झूठो दर्शन की कोयी बाते अऊर कोयी चिकनी-चुपड़ी बाते फिर कभी कही नहीं जायेंन।
EZE 12:25 कहालीकि मय परमेश्वर आय, जब मय बोलू, तब जो वचन मय कहू, वा पूरो होय जायेंन। ओको म देरी नहीं होयेंन, पर हे विद्रोह करन वालो घराना, तुम्हरो दिनो म मय वचन कहूं, अऊर ऊ पूरो होय जायेंन, प्रभु परमेश्वर की या वानी हय।”
EZE 12:26 फिर परमेश्वर को यो वचन मोरो जवर पहुंच्यो,
EZE 12:27 “हे आदमी की सन्तान, देख, इस्राएल को घराना को लोग यो कह्य रह्यो हय, ‘जो दर्शन ऊ देखय हय, ऊ बहुत दिन को बाद पूरो होन वालो हय; अऊर ऊ दूर को भविष्य को बारे म भविष्यवानी करय हय।’
EZE 12:28 येकोलायी तय उन्को सी कह्य, प्रभु परमेश्वर यो कह्य हय : मोरो कोयी वचन को पूरो होन म फिर देर नहीं होयेंन, बल्की जो वचन मय कहू ऊ जरूर पूरो होयेंन, प्रभु परमेश्वर की या वानी हय।”
EZE 13:1 परमेश्वर को यो वचन मोरो जवर पहुंच्यो,
EZE 13:2 “हे आदमी की सन्तान, इस्राएल को जो भविष्यवक्ता अपनोच मन सी भविष्यवानी करय हय, उन्को खिलाफ भविष्यवानी कर क् तय कह्य, परमेश्वर को वचन सुनो।”
EZE 13:3 प्रभु परमेश्वर यो कह्य हय : हाय, “उन मूर्ख भविष्यवक्तावों पर जो अपनीच आत्मा को पीछु भटक जावय हय, अऊर उन्न कुछ दर्शन नहीं पायो!
EZE 13:4 हे इस्राएल, तोरो भविष्यवक्ता खण्डरों म की लोमड़ियों को तरह हय।
EZE 13:5 तुम न इस्राएल की जागा की रखवाली नहीं करी अऊर नहीं दीवाल सुधारी, येकोलायी जब परमेश्वर को दिन म युद्ध होयेंन तब इस्राएल की रक्षा नहीं होय सकेंन।
EZE 13:6 हि लोग जो कह्य हय, परमेश्वर की या वानी हय, उन्न झूठो दर्शन अऊर झूठो दावा करयो हय; अऊर तब भी या आशा दिलायी कि परमेश्वर यो वचन पूरो करेंन; तब भी परमेश्वर न उन्ख नहीं भेज्यो।
EZE 13:7 का तुम्हरो दर्शन झूठो नहाय, अऊर झूठमूठ भविष्य की बाते नहीं कह्य? तुम कह्य हय, परमेश्वर की या वानी हय; पर मय न कुछ नहीं कह्यो हय।”
EZE 13:8 येकोलायी प्रभु परमेश्वर तुम सी यो कह्य हय, “तुम न जो बेकार बात कही अऊर झूठो दर्शन देख्यो हय, येकोलायी मय तुम्हरो खिलाफ हय, प्रभु परमेश्वर की या वानी हय।
EZE 13:9 जो भविष्यवक्ता झूठो दर्शन देखय अऊर भविष्य की झूठी बाते कह्य हय, मोरो हाथ उन्को खिलाफ होयेंन, अऊर हि मोरी प्रजा की मण्डली म सहभागी नहीं होयेंन, उन्को नाम इस्राएल की नामावली म नहीं लिख्यो जायेंन, अऊर नहीं इस्राएल को देश म सिरनो पायेंन; येकोसी तुम लोग जान लेवो कि मय प्रभु परमेश्वर आय।”
EZE 13:10 “कहालीकि भविष्यवक्तावों न ‘शान्ति हय,’ असो कह्य क मोरी प्रजा ख बहकायो हय जब कि शान्ति हयच नहाय; अऊर मोरो लोगों न गोटा की कच्ची दीवाल बनावय हय तब हि ओको पर चुना सी पोतायी करय हय।
EZE 13:11 उन कच्ची पोतायी करन वालों सी कह्य कि वा दीवाल गिर जायेंन। कहालीकि मूसलाधार बारीश होयेंन, अऊर बड़ी-बड़ी गारगोटी गिरेंन, अऊर जोर-दार आन्धी तुफान चलेंन।
EZE 13:12 जब दीवाल गिर जायेंन, तब का लोग तुम सी यो नहीं कहेंन, जो लीपा-पोती तुम न करी होती वा कहां गयी।”
EZE 13:13 यो वजह प्रभु परमेश्वर तुम सी यो कह्य हय : मय क्रोध सी बड़ी आन्धी चलाऊं; अऊर मोरो प्रकोप को वजह मूसलाधार बारीश होयेंन, मोरो गुस्सा म बड़ी-बड़ी गारगोटी गिरेंन कि दीवाल ख नाश कर दे।
EZE 13:14 यो रीति सी तुम न दीवाल पर लीपा-पोती करी हय, ओख मय गिराय देऊं, बल्की माटी म मिलाय देऊं, मय ओको पायवा तक उखाड़ देऊं; अऊर जब वा गिरेंन, तब तुम भी ओको खल्लो दब क मर जावो; तब तुम जान लेवो कि मयच परमेश्वर आय।
EZE 13:15 यो रीति सी मय दीवाल अऊर ओकी लीपा-पोती करन वालो दोयी पर अपनो गुस्सा पूरो रीति सी भड़काऊं; फिर तुम सी कहूं, नहीं त दीवाल रही, अऊर नहीं ओको लीपा-पोती करन वालो रह्यो,
EZE 13:16 हि इस्राएल को हि भविष्यवक्ता जो यरूशलेम को बारे म भविष्यवानी करत होतो, अऊर उन्की शान्ति को दर्शन बतावत होतो, जब कि वहां शान्ति हयच नहाय, पर प्रभु परमेश्वर की या वाणी हय।
EZE 13:17 “फिर हे आदमी की सन्तान, तय अपनो भाऊ-बन्धुवों की टुरियों को खिलाफ अपनो मुंह खोल, जो अपनोच मन सी भविष्यवानी करय हय; उन्को खिलाफ भविष्यवानी कर क् कह्य,
EZE 13:18 प्रभु परमेश्वर यो कह्य हय, “जो बाईयां हाथ सी सब हाथों लायी जादुई ताबीज बनावय अऊर हर कोयी ख मारन लायी सब तरह को आदमियों को मुंड ख झाकन लायी जादुई कपड़ा बनावय हय, उन पर धिक्कार हय! का तुम मोरी प्रजा को लोगों को जीवों ख जाल म डालो अऊर अपनो खुद को जीव बचाय सकजो?
EZE 13:19 तुम न त मुट्ठी भर जौ, गहूं, अऊर रोटी को तुकड़ा को बदला मोख मोरी प्रजा की नजर म अपवित्र ठहराय क, अऊर उन झूठी बातों को द्वारा, जो मोरी प्रजा को लोग तुम सी सुनय हय, जो नाश को लायक नहीं होतो, उन्ख मार डाल्यो; अऊर जो बचन को लायक नहीं होतो उन जीवों ख बचाय क रख्यो हय।
EZE 13:20 “यो वजह प्रभु परमेश्वर तुम सी यो कह्य हय : देखो, मय तुम्हरो उन ताबीज को खिलाफ हय, जिन्को द्वारा तुम जीवों पर जाल म फसावय हय, येकोलायी मय तुम्हरो ताबीजों ख बाहों पर सी छीन क उतार लेऊं, अऊर उन लोगों ख मुक्त कर देऊं, जिन्ख तुम फसावय होतो।
EZE 13:21 मय तुम्हरो मुंड को घुंघट ख फाड़ क अपनी प्रजा को लोगों ख तुम्हरो हाथ सी छुड़ाऊं, अऊर फिर कभी हि तुम्हरो वश म नहीं रहेंन कि तुम उन्को शिकार कर सको; तब तुम जान लेवो कि मय परमेश्वर आय।
EZE 13:22 “तुम न जो झूठी बाते कह्य क धर्मी को मन ख उदास करयो हय, पर मय न ओख उदास करनो नहीं चाहयो, अऊर तुम न दुष्ट जन ख हिम्मत बन्धायी हय, ताकि ऊ अपनो बुरो रस्ता सी नहीं फिरे अऊर जीन्दो रहे।
EZE 13:23 यो वजह तुम फिर कभी झूठो दर्शन नहीं देखो, अऊर नहीं भविष्य कि झूठी बाते कह्य सको; कहालीकि मय अपनी प्रजा ख तुम्हरो हाथ सी छुड़ाऊं। तब तुम जान लेवो कि मय परमेश्वर आय।”
EZE 14:1 फिर इस्राएल को कुछ बुजूर्ग लोग मोरो जवर आय क मोरो सामने बैठ गयो।
EZE 14:2 तब परमेश्वर को यो वचन मोरो जवर पहुंच्यो,
EZE 14:3 “हे आदमी की सन्तान,” हि आदमियों न त अपनो देवता की मूर्ति अपनो मन म बसाय लियो हय, अऊर अपनो अधर्म को ठोकर अपनो सामने रख्यो हय; फिर का हि मोरो सी कुछ पूछ पायेंन?
EZE 14:4 येकोलायी तय उन्को सी कह्य, प्रभु परमेश्वर यो कह्य हय : इस्राएल को घराना म सी जो कोयी अपनी देवता की मूर्ति अपनो मन म बसाय क, अऊर अपनो अधर्म को ठोकर अपनो सामने रख क भविष्यवक्ता को जवर आयेंन, ओख मय परमेश्वर, ओकी बहुत देवता की मूर्तियों को अनुसार उत्तर देऊं,
EZE 14:5 जेको सी इस्राएल को घराना, जो अपनी मूर्तियों को द्वारा मोख छोड़ क दूर भय गयो हय, उन्ख मय उन्कोच मन को द्वारा फसाऊं।
EZE 14:6 “येकोलायी इस्राएल को घराना सी कह्य, प्रभु परमेश्वर यो कह्य हय : पश्चाताप करो अऊर अपनी घृणित मूर्तियों सी मुंह मोड़ों; अऊर अपनो घृणित कामों ख छोड़ो।”
EZE 14:7 कहालीकि इस्राएल को घराना म सी अऊर उन्को बीच म रहन वालो परदेशियों म सी कोयी भी होना, जो मोरो पीछू चलनो छोड़ क अपनी देवता की मूर्ति अपनो मन म बसाय ले, अऊर अपनो अधर्म को ठोकर अपनो सामने रखेंन, अऊर सब मोरो सी अपनी कोयी बात पूछन लायी भविष्यवक्ता को जवर आयेंन, त ओख मय परमेश्वर खुदच उत्तर देऊं।
EZE 14:8 मय ऊ आदमी को खिलाफ होय क ओख निराश करूं, अऊर चिन्ह ठहराऊं; अऊर ऊ अपनी दुर्दशा को वजह समाज म कहावत बन जायेंन, मय ओख अपनो निजी लोगों को बीच म सी निकाल देऊं; तब तुम जान लेवो कि मय परमेश्वर आय।
EZE 14:9 यदि भविष्यवक्ता न धोखा खाय क कोयी वचन कह्यो हय, त जानो कि मय परमेश्वर न ऊ भविष्यवक्ता ख धोखा दियो हय; अऊर मय अपनो हाथ ओको खिलाफ उठाय क ओख अपनी प्रजा म सी नाश कर देऊं।
EZE 14:10 हि सब लोग अपनो अपनो अधर्म को बोझ उठायेंन, मतलब जसो भविष्यवक्ता सी पूछन वालो को अधर्म ठहरेंन, वसोच भविष्यवक्ता को भी अधर्म ठहरेंन।
EZE 14:11 ताकि इस्राएल को घराना आगु सी मोरो पीछू चलनो मत छोड़े अऊर नहीं अपनो अलग अलग तरह को अपराधों को द्वारा आगु सी अशुद्ध बने; बल्की हि मोरी प्रजा बने अऊर मय उन्को परमेश्वर ठहरू, प्रभु परमेश्वर कि या वाणी आय।
EZE 14:12 तब परमेश्वर को यो वचन मोरो जवर पहुंच्यो,
EZE 14:13 “हे आदमी की सन्तान,” जब कोयी देश को लोग मोरो सी विश्वासघात कर क् पापी होय जायेंन, तब मय उन्ख सजा देन लायी उन पर हाथ उठाय क उन्को भोजन को आधार बन्द करूं, अऊर उन पर अकाल भेजूं, मय वहां सी आदमी अऊर जनावर दोयी ख नाश करूं,
EZE 14:14 तब चाहे वहां नूह, दानिय्येल, अऊर अय्यूब रहत होना, त हि अपनो धर्म को वजह अपनो जीव बचाय सकेंन; प्रभु परमेश्वर की या वाणी आय।
EZE 14:15 यदि मय कोयी देश म जंगली जनावर भेजूं जो ओख रौंद क उजाड़ डालेंन, अऊर जंगली जनावर को वजह कोयी भी ऊ देश म सी होय क यात्रा नहीं करेंन,
EZE 14:16 त चाहे ओको म हि तीन धार्मिक आदमी रहत होना, तब भी परमेश्वर की या वाणी हय, मोरो जीवन की कसम, नहीं हि टुरावों ख अऊर नहीं टुरियों ख बचाय सकेंन, केवल हि तीनच आदमी बचेंन; पर पूरो देश नाश होय जायेंन।
EZE 14:17 यदि मय ऊ देश पर दुश्मन द्वारा तलवार चलवाय क कहूं, हे तलवार ऊ देश म चल; अऊर यो रीति सी मय ऊ देश म सी आदमी अऊर जनावर दोयी ख नाश करूं,
EZE 14:18 तब चाहे ओको म हि तीन धार्मिक आदमी भी होना, तब भी प्रभु परमेश्वर की या वाणी हय, मोरो जीवन की कसम, नहीं हि टुरावों ख अऊर नहीं टुरियों ख बचाय सकेंन, केवल हि अकेलोच बचेंन।
EZE 14:19 यदि मय ऊ देश म महामारी फैलाऊं अऊर ओको पर अपनो गुस्सा भड़काय क ओको खून असो बहाऊं कि वहां को आदमी अऊर जनावर दोयी नाश होय जायेंन,
EZE 14:20 त चाहे नूह, दानिय्येल अऊर अय्यूब भी वहां होना, तब भी प्रभु परमेश्वर की या वाणी हय, मोरो जीवन की कसम, हि नहीं टुरावों ख अऊर नहीं टुरियों ख बचाय सकेंन, अपनो धर्म को द्वारा हि केवल अपनोच जीव ख बचाय सकेंन।
EZE 14:21 “कहालीकि प्रभु परमेश्वर यो कह्य हय : मय यरूशलेम नगर पर अपनी चार विपत्तियां भेजूं, मतलब तलवार, अकाल, जंगली जनावर अऊर महामारी, जेको म आदमी अऊर जनावर सब ओको म सी नाश होय जायेंन।
EZE 14:22 तब भी ओको म सी थोड़ो सो टुरा-टुरियां बच जायेंन जो वहां सी निकाल क तुम्हरो जवर लायेंन, अऊर तुम उन्को चालचलन अऊर कामों ख देख क वा विपत्ति को बारे म जो मय यरूशलेम पर डालूं, बल्की जितनी विपत्ति मय ओको पर डालूं, हि सब को बारे म शान्ति पावों।
EZE 14:23 जब तुम उन्को चालचलन अऊर काम देखो, तब हि तुम्हरी शान्ति को वजह होयेंन; अऊर तुम जान लेवो कि मय न यरूशलेम नगर म जो कुछ करयो, ऊ बिना वजह नहीं करयो, प्रभु परमेश्वर की याच वाणी आय।”
EZE 15:1 फिर परमेश्वर को यो वचन मोरो जवर पहुंच्यो,
EZE 15:2 “हे आदमी की सन्तान,” सब झाड़ो म अंगूर की बेला कि का श्रेष्ठता हय? अंगूर की बेला जो जंगल को झाड़ो को तुलना म अंगूर की एक डगाली को का महत्व हय?
EZE 15:3 का कोयी चिज बनावन लायी ओको म सी लकड़ी लियो जावय हय, यां कोयी बर्तन टंगावन लायी वा लकड़ी म सी खूटी बन सकय हय?
EZE 15:4 वा त केवल आगी म जलावन लायी काम म आवय हय; आगी ओको दोयी कोना ख जलाय देवय हय, बीच को हिस्सा आगी सी कारो पड़ जावय हय, पर लकड़ी पूरी तरह नहीं जलय, का वा लकड़ी कोयी काम म आय सकय हय?
EZE 15:5 देख, जब वा बनी होती, तब भी वा कोयी काम की नहीं होती, फिर जब वा आगी म जल क भस्म भय गयी हय, तब का वा कोयी काम म आय सकय हय?
EZE 15:6 येकोलायी प्रभु परमेश्वर यो कह्य हय, जसो जंगल को झाड़ो म सी मय अंगूर की बेला ख निकाल क जलाय दियो जावय हय, वसोच मय यरूशलेम नगर को निवासियों को नाश कर देऊं।
EZE 15:7 मय उन्को खिलाफ होऊं, अऊर हि एक आगी म सी निकाल क दूसरी आगी म भस्म होय जायेंन; जब मय उन सी मुंह फिराय लेऊं, तब तुम जान लेवो कि मय परमेश्वर आय।
EZE 15:8 मय उन्को देश उजाड़ देऊं, कहालीकि उन्न मोरो सी विश्वासघात करयो हय, प्रभु परमेश्वर की या वाणी हय।
EZE 16:1 फिर परमेश्वर को यो वचन मोरो जवर पहुंच्यो,
EZE 16:2 “हे आदमी की सन्तान,” यरूशलेम ख ओको सब घृणित काम बताय दे,
EZE 16:3 अऊर ओको सी कह्य, हे यरूशलेम, प्रभु परमेश्वर तोरो सी यो कह्य हय : अपनो इतिहास देखो, तोरो जनम कनान देश म भयो हय; तोरो बाप एमोरी राज्य को अऊर तोरी माय हित्ती राज्य की होती।
EZE 16:4 तोरो जनम असो भयो कि जो दिन तोरो जनम भयो, ऊ दिन नहीं नार काट्यो गयो, नहीं तय शुद्ध होन लायी पानी सी धोयी गयी, नहीं तोरो पर नमक मल्यो गयो अऊर नहीं कपड़ा म लपेटी गयी।
EZE 16:5 कोयी की तोरो पर दया नहीं भयी कि इन कामों म सी तोरो लायी एक भी काम करयो जातो; बल्की जब तय पैदा भयी तब तोख घृणित चिज समझ क खुलो मैदान म फेक दियो होतो।
EZE 16:6 “जब मय तोरो जवर सी निकल्यो, अऊर तोख खून म लथपथ इत-उत डोलतो देख्यो। तब मय न तोरो सी कह्यो, ‘तय जीन्दी रह्य।’
EZE 16:7 फिर मय न तोख खेत को एक पौधा को जसो बढ़ायो, अऊर तय बढ़त बढ़त बड़ी भय गयी अऊर बहुत सुन्दर भय गयी; अऊर तय युवती बनी, अऊर तोरो बाल बढ़्यो, तब भी तय बीन कपड़ा की होती।”
EZE 16:8 “मय फिर तोरो जवर सी होय क गयो अऊर तोख देख्यो, कि तोरो प्रेम म पड़न को समय आय गयो हय; येकोलायी मय न तोरो नग्न शरीर ख अपनो कपड़ा उड़ाय क तोरो शरीर झाक दियो; अऊर कसम खाय क तोरो सी वादा करयो, अऊर तोरो संग बिहाव करन को वचन दियो, अऊर तय मोरी पत्नि भय गयी।” प्रभु परमेश्वर की या वाणी हय।
EZE 16:9 “तब मय न तोख पानी सी नहलाय क तोरो पर सी खून धोय लियो, अऊर तोरो शरीर पर तेल मल्यो।
EZE 16:10 फिर मय न तोख बुन्यो हुयो कपड़ा अऊर अच्छो चमड़ा की जूती पहिनायो; अऊर तोख सुन्दर रेशमी अऊर किमती कपड़ा उड़ायो।
EZE 16:11 तब मय न तोख जेवरों सी सजाय दियो, अऊर तोरो हाथों म चूड़ियां अऊर गलो म हार पहिनायो।
EZE 16:12 फिर मय न तोरी नाक म नथ अऊर तोरो कानों म बारियां पहनायी, अऊर तोरो मुंड पर सुन्दर मुकुट रख्यो।
EZE 16:13 तोरो सोनो चांदी को जेवर अऊर तोरो कपड़ा सूती, रेशम अऊर बुन्यो हुयो मलमल को होतो; अऊर तय मैदा, शहेद अऊर तेल म पकायो भोजन खात होती; अऊर तय बहुत सुन्दर अऊर रानी बनन को लायक भय गयी।
EZE 16:14 तोरी सुन्दरता की चर्चा दूसरो राज्यों म फैल गयी, कहालीकि ऊ शोभा को वजह, जो मय न अपनो तरफ सी तोख दियो होतो, तय बहुत सुन्दर बन गयी होती, प्रभु परमेश्वर की याच वाणी आय।
EZE 16:15 “पर तय अपनी सुन्दरता पर भरोसा कर क् अपनी कीर्ती को वजह व्यभिचार करन लगी, अऊर सब यात्रियों को संग बहुत कुकर्म करयो, अऊर जो कोयी तोख चाहत होतो तय उन्को सीच व्यभिचार करावत होती।
EZE 16:16 तय न अपनो कपड़ा म सी अपनो लायी पूजा की जागा बनाय दियो, अऊर उन पर व्यभिचार करयो, असो कुकर्म करयो जो कभी नहीं भयो अऊर नहीं होयेंन।
EZE 16:17 तय न अपनो सुन्दर जेवर ले क जो मोरो दियो हुयो सोनो चांदी को होतो, उन सी आदमियों की मूर्तियां बनाय ली, अऊर उन सी भी व्यभिचार करन लगी;
EZE 16:18 अऊर अपनो हाथ सी बुन्यो हुयो कपड़ा ले क उन्ख पहिनायो, अऊर मोरो जैतून को तेल अऊर धूप उन्को सामने चढ़ायो।
EZE 16:19 जो भोजन मय न तोख दियो होतो, मैदा, जैतून को तेल अऊर शहेद मय न तोख दियो होतो, ऊ सब तय न हि मूर्तियों को सामने सुखदायक सुगन्ध कर क् चढ़ायो; प्रभु परमेश्वर की या वाणी हय कि असोच भयो।”
EZE 16:20 “फिर तय न अपनो टुरा-टुरियों ख ले क जिन्ख तय न मोरो लायी जनम दियो होतो, हि मूर्तियों पर बलि कर क् चढ़ाय दियो। का तोरो असो व्यभिचार छोटी बात हय;
EZE 16:21 तय न मोरो बच्चावों ख हि मूर्तियों को आगु आगी म बलि कर क् चढ़ाय दियो?
EZE 16:22 तय न अपनो सब घृणित कामों म अऊर व्यभिचार करतो समय, अपनो बचपन को दिनो की कभी याद नहीं आयी, जब कि तय बिना कपड़ा की अपनो खून म लथपथ पड़ी होती।”
EZE 16:23 “तोख तोरो पूरो बुरो कामों को लायी धिक्कार हय! धिक्कार हय तोख! प्रभु परमेश्वर की या वाणी हय।
EZE 16:24 तय न अपनो लायी एक गुम्मट बनाय लियो, अऊर हर एक खुली जागा म एक ऊंचो पूजा की जागा बनाय लियो
EZE 16:25 अऊर हर एक सड़क को किनार पर तय न अपनो ऊंची जागा बनाय क अपनी सुन्दरता घृणित कर दी, अऊर हर एक जवर सी जान वालो ख बुलाय क कुकर्म करत होती, अऊर तय वेश्या सी जादा बन गयी।
EZE 16:26 तय न अपनो पड़ोसी मिस्रियों सी भी व्यभिचार करयो अऊर मोख गुस्सा दिलावन लायी तय न व्यभिचार करयो।
EZE 16:27 “येकोलायी मय न तोख सजा देन अऊर तोरो निजी हिस्सा छीनन लायी अपनो हाथ उठायो हय, अऊर मय न तोख तोरी दुस्मन पलिश्ती बाईयों को हाथ म सौप दियो हय, जो तोरो सी घृना करय हय, उन्की इच्छा पर मय न तोख छोड़ दियो हय।
EZE 16:28 “फिर भी तोख समाधान नहीं मिल्यो, येकोलायी तय न अश्शूरी लोगो सी भी व्यभिचार करयो; अऊर उन्को सी व्यभिचार करन पर भी तोख सन्तुष्टी नहीं मिली।
EZE 16:29 फिर तय न व्यापारियों को देश म व्यभिचार करत करत कसदियों को देश तक पहुंची, अऊर वहां भी तय तृप्त नहीं भयी।”
EZE 16:30 “प्रभु परमेश्वर की या वाणी हय, कि तोरो दिल कसो चंचल हय कि तय हि सब काम करय हय, जो निर्लज्ज वेश्या को जसो कुकर्म करय हय!
EZE 16:31 तय न हर एक सड़क को सुरूवात म जो अपनो गुम्मट, अऊर हर चौक म अपनो पूजा की जागा बनायो हय, पर तय एक आम वेश्या को समान पैसा को लायी नहाय? कहालीकि तय असी कमायी पर हसय हय?
EZE 16:32 तय व्यभिचारिनी पत्नि हय। तय परायो आदमियों ख अपनो पति को बदला स्विकार करय हय।
EZE 16:33 सब वेश्यावों ख त रुपया मिलय हय, पर तय न अपनो सब संगियों ख खुद रुपया दे क, अऊर उन्ख लालच दिखाय क बुलायो हय कि हि चारयी तरफ सी आय क तोरो सी व्यभिचार करे।
EZE 16:34 यो तरह तोरो व्यभिचार दूसरो व्यभिचारियों सी उलटो हय। तोरो पीछू कोयी व्यभिचारी नहीं चलय, अऊर तय कोयी सी दाम नहीं लेवय, बल्की तयच देवय हय; यो वजह तय उलटी ठहरी।”
EZE 16:35 येकोलायी, हे वेश्या, परमेश्वर को वचन सुन,
EZE 16:36 प्रभु परमेश्वर यो कह्य हय : “तय न जो व्यभिचार म अति निर्लज्ज होय क, अपनो शरीर अपनो संगियों ख दिखायो, अऊर अपनी मूर्तियों सी घृणित काम करयो, अऊर अपनो बच्चां को खून बहाय क उन्ख बलि चढ़ायो हय,
EZE 16:37 यो वजह देख, मय तोरो सब संगियों ख जो तोरो प्रेमी हय अऊर जितनों सी तय प्रेम करत होती, अऊर जितनों सी तय न दुश्मनी रखी, उन सब ख चारयी तरफ सी तोरो खिलाफ जमा कर क् उन्ख तोरो शरीर बिना कपड़ा को दिखाऊं, अऊर हि तोरो तन देखेंन।
EZE 16:38 तब मय तोख असी सजा देऊं, जसो व्यभिचारिनियों अऊर हत्यारिणी बाईयों ख दियो जावय हय, वाच सजा मय तोख देऊं; अऊर गुस्सा अऊर जलन को संग तोरो खून बहाऊं।
EZE 16:39 यो रीति सी मय तोख उन्को वश म कर देऊं; अऊर हि तोरो गुम्मटों ख गिराय देयेंन, अऊर तोरो पूजा जागा ख तोड़ देयेंन, हि तोरो कपड़ा अऊर तोरो सुन्दर जेवर छीन लेयेंन, अऊर तोख बिना कपड़ा की कर क् छोड़ देयेंन।”
EZE 16:40 “तब तोरो खिलाफ एक सभा जमा कर क् हि तोख गोटा सी मारेंन, अऊर तलवार सी तुकड़ा तुकड़ा कर देयेंन।
EZE 16:41 तब हि तोरो घरों ख आगी लगाय क जलाय देयेंन, अऊर तोख बहुत सी बाईयों को सामने सजा देयेंन; अऊर मय तोरो व्यभिचार बन्द कर देऊं, अऊर तय परायो आदमियों ख अपनी वेश्यावृत्ति को दाम नहीं देजो।
EZE 16:42 जब मय तोरो पर अपनी जलजलाहट प्रगट करूं, तब मोरो गुस्सा शान्त होय जायेंन, अऊर मय शान्त होय जाऊं। मय अब गुस्सा यां जलन नहीं करूं।
EZE 16:43 तय न जो अपनो बचपन को दिन याद नहीं रख्यो, बल्की इन सब बातों को द्वारा मोख चिढ़ायो, यो वजह मय तोरो चालचलन तोरो मुंड पर डालूं अऊर तय अपनो सब पिछलो घृणित कामों सी अऊर जादा पाप नहीं करजो, प्रभु परमेश्वर की या वानी हय।”
EZE 16:44 “देख, सब कहावत कहन वालो तोरो बारे म या कहावत कहेंन, ‘जसी माय वसी टुरी।’
EZE 16:45 तोरी माय जो अपनो पति अऊर बच्चां सी घृणा करत होती, तय भी ठीक ओकीच टुरी ठहरी; अऊर तोरी बहिन जो अपनो अपनो पति अऊर बच्चां सी घृणा करत होती, तय भी अपनी बहिनों को जसी निकली। तोरी माय हित्ती राज्य की होती अऊर तोरो बाप एमोरी राज्य को होतो।”
EZE 16:46 “तोरी बड़ी बहिन सामरी नगर आय, जो अपनी टुरियों को समेत उत्तर सीमा को तरफ रह्य हय, अऊर तोरी छोटी बहिन जो तोरो दक्षिन सीमा को तरफ रह्य हय वा टुरियों समेत सदोम नगर आय।
EZE 16:47 तय न उन्को जसी चाल नहीं चली, अऊर उन्को समान घृणित कामों सीच सन्तुष्ट नहीं भयी; या त बहुत छोटी बात हय, पर तोरो पूरो चालचलन उन्को सी भी जादा बिगड़ गयो।
EZE 16:48 “प्रभु परमेश्वर की या वाणी हय,” मोरो जीवन की कसम, “तोरी बहिन सदोम न अपनी टुरियों समेत तोरी अऊर तोरी टुरियों को समान काम नहीं करयो।
EZE 16:49 देख, तोरी बहिन सदोम को अधर्म यो होतो, कि वा अपनी टुरियों समेत घमन्ड करत होती, पेट भर भर क खात होती, अऊर सुख चैन सी रहत होती; उन्न गरीबों अऊर जरूरतमन्दों की मदत नहीं करी।
EZE 16:50 बल्की वा घमन्ड कर क् मोरो सामने घृणित काम करन लगी, अऊर यो देख क मय न उन्ख दूर कर दियो।
EZE 16:51 “फिर शोमरोन नगर न तोरो पापों सी अरधो भी पाप नहीं करयो, तय न त ओको सी भी कहीं जादा घृणित काम करयो, अऊर अपनो घोर घृणित कामों को द्वारा तोरी तुलना म तोरी बहिन निर्दोष ठहरी हय।
EZE 16:52 येकोलायी तय न जो अपनी बहिनों को न्याय करयो होतो, यो वजह लज्जित हो, कहालीकि तय न उन्को सी बढ़ क घृणित पाप करयो हय; यो वजह हि तोरो सी कम दोषी ठहरी हय। येकोलायी तय या बात सी लज्जा कर अऊर लजाती रह्य, कहालीकि तय न अपनी बहिनों ख कम दोषी ठहरायो हय।”
EZE 16:53 “जब मय उन्ख मतलब टुरियों समेत सदोम अऊर शोमरोन ख बन्धुवायी सी वापस लाऊं, तब उन्को बीच म तोरो बन्दियों ख भी वापस लाऊं,
EZE 16:54 जेको सी तोरो अभिमान टूट जायेंन, अऊर अपनो सब कामों ख देख क लजायजो, कहालीकि तय उन्की शान्ति को वजह बनी हय।
EZE 16:55 तोरी बहिनें सदोम अऊर शोमरोन अपनी अपनी टुरियों समेत अपनी पहिली दशा म फिर सी लौट जायेंन, अऊर तय भी अपनी टुरियों समेत अपनी पहिली दशा म फिर सी लौट जायेंन।
EZE 16:56 जब तक तोरी बुरायी प्रगट नहीं भयी होती, मतलब जो समय तक तय आजु बाजू को लोगों समेत अरामी अऊर पलिश्ती छेत्र की बाईयों की जो अब चारयी तरफ सी तोख तुच्छ जानय हंय, नामधरायी करत होती,
EZE 16:57 उन अपनो घमण्ड को दिनों म त तय अपनी बहिन सदोम नगर को नाम भी नहीं लेत होती।
EZE 16:58 पर अब तोख अपनो महापाप अऊर घृणित कामों को बोझ खुद ख उठानो पड़्यो हय, परमेश्वर की याच वानी हय।”
EZE 16:59 “प्रभु परमेश्वर यो कह्य हय : मय तोरो संग असोच बर्ताव करूं, जसो तय न करयो हय, कहालीकि तय न त वाचा तोड़ क कसम तुच्छ समझी हय,
EZE 16:60 तब भी मय तोरो बचपन को दिनों की अपनी वाचा याद करूं, अऊर तोरो संग हमेशा की वाचा बान्धूं।
EZE 16:61 जब तय अपनी बहिनों ख मतलब अपनी बड़ी अऊर छोटी बहिनों ख स्विकार करजो, तब तय अपनो चालचलन याद कर क् लज्जित होयजो; अऊर मय उन्ख तोरी टुरियां ठहराय देऊं; पर या तोरी वाचा को अनुसार नहीं करूं।
EZE 16:62 मय तोरो संग अपनी वाचा स्थिर करूं, अऊर तब तय जान लेजो कि मय परमेश्वर आय,
EZE 16:63 जेकोसी तय याद कर क् लज्जित हो, अऊर लज्जा को मारे फिर कभी मुंह खोलन की हिम्मत नहीं करजो। यो ऊ समय होयेंन, जब मय तोरो सब कामों ख माफ करूं, प्रभु परमेश्वर की या वानी हय।”
EZE 17:1 परमेश्वर को यो वचन मोरो जवर पहुंच्यो :
EZE 17:2 “हे आदमी की सन्तान, इस्राएल को घराना सी या पहेली अऊर दृष्टान्त कह्य; प्रभु परमेश्वर यो कह्य हय,
EZE 17:3 एक लम्बो पंख वालो, पंखों सी भरयो अऊर रंग-बिरंगो बड़ो उकाब पक्षी न लबानोन देश की पहाड़ी पर जाय क एक देवदार को डगाली की सेंडी तोड़ दी।
EZE 17:4 तब ओन वा सब सी कोमल पतली डगाली ख तोड़ लियो, अऊर ओख लेन-देन करन वालों को देश म लिजाय क व्यापारियों को एक नगर म रोप दियो।
EZE 17:5 तब ओन इस्राएल की जमीन सी कुछ बीज ले क एक उपजाऊ खेत म बोयो, अऊर ओख बहुत पानी सी भरयो जागा म मजनू नाम को झाड़ को जसो लगायो।
EZE 17:6 ऊ उग क छोटी फैलन वाली अंगूर की बेला बन गयी जेकी डगाली उकाब को तरफ झुक गयी, अऊर ओकी जड़ी खल्लो फैल गयी, यो तरह सी वा अंगूर की बेला बन ख पिचाटा फूट्यो अऊर पत्ता सी झकन लगी।
EZE 17:7 “फिर एक लम्बो पंख वालो अऊर पंखों सी भरयो हुयो बड़ो उकाब पक्षी होतो; अऊर वा अंगूर की बेला वा जागा सी जहां वा लगायी गयी होती, ऊ दूसरो उकाब पक्षी को तरफ फैलावन अऊर अपनी डगालियां झुकावन लगी कि ऊ ओख सींच सके।
EZE 17:8 पर वा त येकोलायी अच्छी जमीन म लगायी गयी होती, कि पिचाटा फोड़े, अऊर फरे, अऊर अच्छी अंगूर की बेला बने।
EZE 17:9 “येकोलायी तय यो कह्य, प्रभु परमेश्वर यो पूछय हय : का या बेला फलेंन-फूलेंन? का ऊ ओख जड़ी सी नहीं उखाड़ेंन, अऊर ओको फरों ख नहीं झाड़ डालेंन कि वा अपनो सब हरो नयो पाना समेत सूख जायेंन? ओख जड़ी सी उखाड़न लायी जादा ताकत अऊर बहुत आदमियों की जरूरत नहीं पड़ेंन।
EZE 17:10 यदि ओख उखाड़ क दूसरी जागा म लगायो जाये, त का वा फिर सी उग सकेंन, का वा पूरी तरह सूख नहीं जायेंन? जब येको पर पूर्व की हवा चलेंन, वाच जमीन म सूख जायेंन वहां वा उगी होती।”
EZE 17:11 फिर परमेश्वर को वचन मोरो जवर पहुंच्यो,
EZE 17:12 “ऊ विद्रोह करन वालो घराना सी कह्य, का तुम इन बातों को अर्थ नहीं समझय? फिर उन्को सी कह्य, बेबीलोन को राजा यरूशलेम ख जाय क वहां को राजा अऊर मुखियावों ख अपनो संग बेबीलोन म पहुंचायो।
EZE 17:13 तब राजघराना म सी एक आदमी ख ले क ओको सी वाचा बान्धी, अऊर ओख अधिन रहन की कसम खिलायी, अऊर ऊ देश को बलवान लोगों ख बन्दी बनाय क ले गयो
EZE 17:14 कि ऊ राज्य कमजोर रहे अऊर मुंड नहीं उठाय सके, बल्की वाचा पालन करतो हुयो बन्यो रहे।
EZE 17:15 पर यहूदा को राजा न घोड़ा अऊर बड़ी सेना मांगन ख अपनो दूत मिस्र देश म भेज क ओको सी विद्रोह करयो। का ऊ सफल होयेंन? का असो कामों ख करन वालो बच सकय हय? का ऊ अपनी वाचा तोड़न पर भी बच सकेंन?
EZE 17:16 “प्रभू परमेश्वर यो कह्य हय, मोरो जीवन की कसम,” जो राजा की खिलायी हुयी कसम ओन तुच्छ समझ्यो, अऊर जेकी वाचा ओन तोड़ी, जो देश को राजा न ओख राजा बनायो होतो, उच राजा को देश बेबीलोन म ऊ मर गयो।
EZE 17:17 जब हि बेबीलोन को बहुत सो लोगों को नाश करन लायी खाई खोदेंन, अऊर गढ़ बनायेंन, तब मिस्र देश को राजा की शक्तिशाली सेना भी युद्ध म ओकी मदत नहीं कर सकेंन।
EZE 17:18 कहालीकि ओन कसम ख तुच्छ समझ्यो, अऊर वाचा ख तोड़्यो; देखो, ओन वचन देन पर भी असो असो काम करयो हय, येकोलायी अब ऊ बच नहीं सकेंन।
EZE 17:19 प्रभु परमेश्वर यो कह्य हय : मोरो जीवन की कसम, ओन मोरी कसम तुच्छ समझी हय, अऊर मोरी वाचा तोड़ी हय; यो पाप मय ओकोच मुंड पर डालूं।
EZE 17:20 मय अपनो जार ओको पर फैलाऊं अऊर ऊ मोरो फन्दा म फसेंन; अऊर मय ओख बेबीलोन देश म लाय क ओको पर विश्वासघात को मुकद्दमा ओको सी लड़ूं, जो ओन मोरो सी करयो हय।
EZE 17:21 ओको सब दलों म सी जितनो भग्यो हि सब तलवार सी मारयो जायेंन, अऊर जो बच जायेंन हि चारयी दिशावों म तितर-बितर होय जायेंन। तब तुम लोग जान लेवो कि मय परमेश्वर न असो कह्यो हय।
EZE 17:22 फिर प्रभु परमेश्वर यो कह्य हय : “मय भी देवदार की डगाली की सेंडी म सी कुछ ले क लगाऊं, अऊर ओकी सब सी ऊपर वालो पिचाटा म सी एक कवलो पिचाटा तोड़ क एक बहुत ऊंचो पहाड़ पर लगाऊं,
EZE 17:23 मतलब इस्राएल को ऊंचो पहाड़ पर लगाऊं; तब ओको म सी डगालियां निकलेंन अऊर फर लगेंन तब ऊ एक शानदार देवदार को झाड़ बन जायेंन, अऊर ओको खल्लो ओकी डगाली की सावली म अलग अलग तरह को सब पक्षी बसेरा करेंन।
EZE 17:24 तब मैदान को सब झाड़ जान लेयेंन कि मय परमेश्वर न ऊंचो झाड़ ख छोटो अऊर छोटो झाड़ ख ऊंचो करूं, हरो झाड़ ख सुखाय देऊं अऊर सुख्यो झाड़ ख हरो-भरो कर देऊं। मय परमेश्वर नच यो कह्यो अऊर वसोच कर भी दियो हय।”
EZE 18:1 फिर परमेश्वर को यो वचन मोरो जवर पहुंच्यो :
EZE 18:2 “तुम लोग जो इस्राएल को बारे म या कहावत कह्य हय,” खट्टो अंगूर त खायो बाप-दादों न, पर दात खट्टो भयो उन्को बच्चां को। येको का मतलब हय?
EZE 18:3 “प्रभु परमेश्वर यो कह्य हय कि मोरो जीवन की कसम, तुम ख इस्राएल म फिर या कहावत कहन को अवसर नहीं मिलेंन।
EZE 18:4 देखो, सब प्रानी मोरोच हय, जसो बाप को जीव, वसोच टुरा को भी जीव हय; दोयी पर मोरोच अधिकार हय। येकोलायी जो प्रानी पाप करेंन केवल उच मरेंन।”
EZE 18:5 “जो कोयी धर्मी होना, अऊर न्याय अऊर धर्म को काम करेंन,
EZE 18:6 अऊर नहीं त पहाड़ियों को पूजा की जागा को सामने जेवन करयो होना, नहीं इस्राएल को घराना की मूर्तियों को तरफ आंखी उठायी होना; नहीं परायी बाई ख बिगाड़्यो होना, अऊर नहीं ऋतुमास बाई को जवर गयो होना,
EZE 18:7 अऊर नहीं कोयी पर अत्याचार करयो होना बल्की कर्जदार ख ओको कर्ज सी मुक्त करयो होना, नहीं कोयी ख लूट्यो होना, बल्की भूखो ख अपनी रोटी दी होना अऊर नंगो व्यक्ति ख अपनो कपड़ा पहिनायो होना,
EZE 18:8 नहीं ब्याज पर रुपया दियो होना, नहीं ब्याज की कमायी ली होना, अऊर अपनो हाथ गलत काम करन सी रोक्यो होना, आदमी को बीच म सच्चायी सी न्याय करयो होना,
EZE 18:9 अऊर मोरी विधियों पर चलतो अऊर मोरो नियमों ख मानतो हुयो सच्चायी सी काम करय हय, असो व्यक्ति धर्मी हय, ऊ निश्चित जीन्दो रहेंन, प्रभु परमेश्वर की या वानी हय।”
EZE 18:10 “पर ओको टुरा डाकू, हत्यारों, यां ऊपर कह्यो गयो पापों म सी कोयी पाप ख करन वालो होना,
EZE 18:11 अऊर ऊपर कह्यो गयो उचित कामों ख करन वालो नहीं होना, अऊर पहाड़ियों की पूजा की जागा पर जेवन करयो होना, परायी बाई ख बिगाड़्यो होना,
EZE 18:12 ऊ गरीब अऊर जरूरतमन्द पर अत्याचार करयो होना, दूसरो ख लूटत होना, कर्जदार की गिरवी चिज नहीं लौटायो होना, मूर्तियों को तरफ आंखी उठायी होना, ऊ घृणित मूर्तियों की पूजा करत होना,
EZE 18:13 ब्याज पर रुपया दियो होना, अऊर ब्याज कमायो होना, त का ऊ जीन्दो रहेंन? कभीच नहीं। ऊ जरूरच मरेंन; कहालीकि ओन यो घृणित काम करयो हय, ओको खून को दोष ओकोच मुंड पर पड़ेंन।
EZE 18:14 “फिर यदि असो आदमी को टुरा होना अऊर ऊ अपनो बाप को द्वारा करयो गयो सब पापों ख देख क ऊ असो पाप नहीं करत होना।
EZE 18:15 ऊ नहीं त पहाड़ियों को पूजा जागा पर जेवन करयो होना, नहीं इस्राएल को घराना की मूर्तियों को तरफ देखत होना, नहीं परायी बाई ख बिगाड़्यो होना,
EZE 18:16 नहीं कोयी पर अत्याचार करयो होना, नहीं कुछ गिरवी चिज लियो होना, नहीं कोयी ख लूट्यो होना, बल्की अपनी रोटी भूखो ख दियो होना, नंगा ख अपनो कपड़ा पहिनायो होना,
EZE 18:17 ऊ गरीबों ख सतावन सी अपनो हाथ रोक्यो होना, ब्याज की कमायी नहीं ली होना, मोरो नियमों को पालन करयो होना, अऊर मोरी विधियों पर चलत होना, त ऊ अपनो बाप को अधर्म को वजह नहीं मरेंन, बल्की जीन्दो रहेंन।
EZE 18:18 ओको बाप, जेन दूसरों पर अत्याचार करयो अऊर लूट्यो, अऊर अपनो जाति-भाऊवों को बीच अनुचित काम करयो हय, उच अपनो अधर्म को वजह मर जायेंन।”
EZE 18:19 तब भी तुम लोग कह्य हय, कहाली? का टुरा अपनो बाप को अधर्म को बोझ कहाली नहीं उठायेंन? जब टुरा न न्याय अऊर धर्म को काम करयो होना, अऊर मोरी विधियों को पालन कर क् उन पर चल्यो होना, त ऊ जिन्दोच रहेंन।
EZE 18:20 जो प्रानी पाप करेंन उच मरेंन, नहीं टुरा बाप को अधर्म को बोझ उठायेंन अऊर नहीं बाप टुरा को; धर्मी ख अपनोच धर्म को फल, अऊर बुरो ख बुरायी को फल मिलेंन।
EZE 18:21 पर यदि बुरो व्यक्ति अपनो सब पापों सी फिर क, मोरी सब विधियों को पालन करे अऊर न्याय अऊर धर्म को काम करे, त ऊ नहीं मरेंन; बल्की ऊ जिन्दोच रहेंन।
EZE 18:22 ओन जितनो पाप करयो होना, उन म सी कोयी की याद ओको खिलाफ नहीं करयो जायेंन; जो धर्म को काम ओन करयो होना, ओको वजह ऊ जीन्दो रहेंन।
EZE 18:23 प्रभु परमेश्वर की या वानी हय, का मय बुरो व्यक्ति को मरन सी खुश होऊ हय? जब कोयी बुरो व्यक्ति अपनो मार्ग सी फिर क जीन्दो रह्य हय तब मय खुश होऊ हय।
EZE 18:24 पर जब धर्मी व्यक्ति अपनो धर्मीपन ख छोड़ क पाप करय हय अऊर उच घृणित काम करन लगय हय जो बुरो लोग करय हय, त का ऊ जीन्दो रहेंन? ओको द्वारा करयो गयो कोयी भी काम याद नहीं करयो जायेंन। जो विश्वासघात अऊर पार ओन करयो हय, ओको वजह ऊ मर जायेंन।
EZE 18:25 “तब भी तुम लोग कह्य हय, ‘प्रभु की नीति सही नहाय।’ हे इस्राएल को घराना, सुनो, का मोरी नीति सही नहाय? का या तुम्हरीच नीति नोहोय जो अनुचित हय?
EZE 18:26 जब धर्मी अपनो धर्म सी फिर क, बुरो काम करन लगेंन, त ऊ उन्को वजह मरेंन, मतलब ऊ अपनो बुरो कामों कोच वजह मर जायेंन।
EZE 18:27 फिर जब बुरो व्यक्ति अपनो बुरो कामों सी फिर क, न्याय अऊर धर्म को काम करन लगेंन, त ऊ अपनो आप ख बचायेंन।
EZE 18:28 ऊ जो सोच बिचार कर क् अपनो सब अपराधों ख छोड़ क फिरेंन, ऊ नहीं मरेंन, जिन्दोच रहेंन।
EZE 18:29 तब भी इस्राएल को घराना कह्य हय कि प्रभु कि नीति सही नहाय। हे इस्राएल को घराना, का मोरी नीति सही नहाय? का या तुम्हरीच नीति नोहोय जो अनुचित हय?
EZE 18:30 “प्रभु परमेश्वर की या वानी हय, हे इस्राएल को घराना, मय तुम म सी हर एक आदमी को न्याय ओको चालचलन को अनुसारच करूं। पश्चाताप करो अऊर अपनो सब अपराधों ख छोड़ देवो, तबच तुम्हरो अधर्म तुम्हरो ठोकर खान को कारन नहीं होयेंन।
EZE 18:31 अपनो सब अपराधों ख जो तुम न करयो हय, दूर करो; अपनो मन अऊर अपनी आत्मा बदल डालो! हे इस्राएल को घराना, तुम कहाली मरो?
EZE 18:32 कहालीकि, प्रभु परमेश्वर की वानी हय, जो मरयो हय, उन्को मरन सी मय खुश नहीं होऊ, येकोलायी पश्चाताप करो, तबच तुम जीन्दो रहो।”
EZE 19:1 इस्राएल को मुखियावों को बारे म तय यो विलापगीत सुनाव :
EZE 19:2 तोरी माय एक कसी सिंहनी होती! वा सिंहों को बीच म बैठत होती अऊर अपनो बच्चां ख जवान सिंहों को बीच म पालन पोसन करत होती।
EZE 19:3 अपनो बच्चा म सी ओन एक ख पाल्यो अऊर ऊ सिंह जवान भय गयो, अऊर ऊ शिकार करनो सीख गयो; ओन आदमियों ख भी फाड़ खायो।
EZE 19:4 राज्य राज्य को लोगों न ओको बारे म सुन्यो, अऊर ओख अपनो खोद्यो हुयो गड्डा म फसायो, अऊर ओको नाक म हुक डाल क मिस्र देश म ले गयो।
EZE 19:5 जब ओकी माय सिंहनी न देख्यो कि ओकी आशा पूरी नहीं भयी, ओकी आशा टूट गयी, तब ओन अपनो एक बच्चा ख पाल्यो अऊर ओख जवान सिंह बनायो।
EZE 19:6 तब ऊ सिंह जवान होय क सिंहों को बीच चलन फिरन लग्यो, अऊर ऊ भी शिकार करनो सीख गयो; अऊर आदमियों ख भी फाड़ खायो।
EZE 19:7 ओन उन्को भवनों ख नाश कर दियो, अऊर उन्को नगरों ख उजाड़ दियो, पूरो देश अऊर ओको म रहन वालो सब लोग ओकी दहाड़ सी डर गयो।
EZE 19:8 तब चारयी तरफ को राज्य राज्य को लोग अपनो अपनो प्रान्त सी ओको खिलाफ भय गयो, अऊर ओको लायी जार बिछायो; अऊर ऊ उन्को खोद्यो हुयो गड्डा म फस गयो
EZE 19:9 तब उन्न ओको नाक म हुक डाल क कठघरा म बन्द कर क् बेबीलोन को राजा को जवर ले गयो, अऊर किल्ला म पिंजरा को अन्दर बन्द कर दियो, ताकी ओकी दहाड़ इस्राएल को पहाड़ी देश म फिर कभी सुनायी नहीं दे।
EZE 19:10 तोरी माय जेकोसी तय पैदा भयो, वा किनार पर लगायो गयो अंगूर की बाड़ी म अंगूर एक बेला को समान होती, अऊर गहरो पानी को वजह फर अऊर डगालियों सी लदी होती।
EZE 19:11 ओकी डगालियां मजबूत होती, अऊर एक शासन करन वालो राजा को राजदण्ड बनन लायक होती; अऊर ओकी ऊंचायी इतनी भयी कि वा बादलो तक पहुंच गयी; अऊर अपनी बहुत सी डगालियों समेत बहुतच लम्बी भय गयी।
EZE 19:12 तब भी ओख क्रोध म भर क उखाड़ क जमीन पर फेक दियो गयो, अऊर ओको फर पूर्व की हवा लगन सी सूख गयो; अऊर ओकी मोटी डगालियां टूट क सूख गयी; अऊर ओख आगी म जलाय क नाश कर दियो गयो।
EZE 19:13 अब ओख निर्जन प्रदेश म एक सूखी अऊर प्यासी जमीन म लगायो गयो हय।
EZE 19:14 ओकी मुख्य डगाली म सी आगी निकली, जेकोसी ओको फर जर क भस्म भय गयो, ओको म अऊर कोयी मजबूत डगाली नहीं बची जो शासन करन वालो को राजदण्ड को लायी लायक हो, यो एक विलापगीत आय, अऊर यो एक विलापगीत को रूप म प्रचलित हय।
EZE 20:1 सातवों साल को पाचवों महीना को दसवों दिन ख इस्राएल को कितनो मुखिया परमेश्वर सी प्रश्न पूछन आयो, अऊर मोरो सामने बैठ गयो।
EZE 20:2 तब परमेश्वर को यो वचन मोरो जवर पहुंच्यो :
EZE 20:3 “हे आदमी की सन्तान,” इस्राएल को मुखियावों सी यो कह्य, प्रभु परमेश्वर यो कह्य हय, का तुम मोरो सी प्रश्न पूछन आयो हय? प्रभु परमेश्वर की या वानी हय कि मोरो जीवन की कसम, तुम मोरो सी प्रश्न पूछ नहीं सको।
EZE 20:4 हे आदमी की सन्तान, का तय उन्को न्याय नहीं करजो? तय खुद उन्को न्याय कर, उन्को पूर्वजों को घिनौनो काम उन्ख जताय दे,
EZE 20:5 अऊर उन्को सी कह्य, प्रभु परमेश्वर यो कह्य हय : जो दिन मय न इस्राएल ख चुन्यो होतो, ऊ दिन याकूब को वंश सी कसम खायी होती, अऊर मिस्र देश म अपनो खुद ख उन पर प्रगट करयो, अऊर ओन कसम खाय क कह्यो, मय तुम्हरो परमेश्वर यहोवा आय,
EZE 20:6 उच दिन मय न उन्को सी कसम खायी, कि मय तुम्ख मिस्र देश सी निकाल क एक देश म पहुंचाऊं, जेख मय न तुम्हरो लायी चुन लियो हय; ऊ सब देशों म शिरोमनि हय, अऊर ओको म दूध अऊर शहेद की धारा बहय हय।
EZE 20:7 फिर मय न उन्को सी कह्यो, जो घिनौनी मूर्तियों पर तुम म सी हर एक कि आंखी लगी हय, उन्ख फेक देवो; अऊर मिस्र देश की मूर्तियों सी अपनो ख अशुद्ध मत करो; मयच तुम्हरो परमेश्वर यहोवा आय।
EZE 20:8 पर उन्न मोरो सी विरोध करयो अऊर मोरी बात सुननो नहीं चाहयो; जिन घिनौनी मूर्तियों पर उन्की आंखी लगी होती, उन्ख कोयी न नहीं फेक्यो, अऊर नहीं मिस्र देश की मूर्तियों ख छोड़्यो। “तब मय न कह्यो, मय यहांच, मिस्र देश को बीच म तुम पर अपनो गुस्सा भड़काऊं अऊर पूरो कोप दिखाऊं।
EZE 20:9 तब भी अपनो नाम को निमित्त असो करयो कि जिन को बीच म हि होतो, अऊर जिन को देखतो हुयो मय न उन्ख मिस्र देश सी निकालन लायी अपनो आप ख उन पर प्रगट करयो होतो उन राष्ट्रों को सामने हि अपवित्र नहीं ठहरे।”
EZE 20:10 “मय उन्ख मिस्र देश सी निकाल क जंगल म लायो।
EZE 20:11 वहां उन्ख मय न अपनी विधियां बतायी अऊर अपनो नियम भी बतायो कि जो आदमी उन्ख मानेंन, हि उन्को वजह जीन्दो रहेंन।
EZE 20:12 फिर मय न उन्को लायी अपनो आराम दिन ठहरायो जो मोरो अऊर उन्को बीच एक चिन्ह ठहरे; कि हि जानेंन कि मय परमेश्वर उन्ख पवित्र करन वालो आय।
EZE 20:13 तब भी इस्राएल को घराना न जंगल म मोरो सी विद्रोह करयो; हि मोरी विधियों पर नहीं चल्यो, अऊर मोरो नियमों ख अस्विकार करयो, जिन्ख यदि आदमी मानेंन त हि उन्को वजह जीन्दो रहेंन; अऊर उन्न मोरो आराम दिनों ख अति अपवित्र करयो। तब मय न कह्यो, मय जंगल म इन पर अपनो गुस्सा भड़काय क इन्को अन्त कर डालूं।
EZE 20:14 पर मय अपनो नाम को निमित्त असो करयो कि हि उन राष्ट्रों को सामने, जिन्को देखतो हुयो मय न इस्राएलियों ख मिस्र देश सी निकाल लायो होतो, अपवित्र नहीं होय जाय।
EZE 20:15 फिर मय न जंगल म उन सी कसम खायी कि जो देश मय न उन्ख दे दियो हय, अऊर जो सब देशों को शिरोमनि हय, जेको म दूध अऊर शहेद की धारा बहय हय, ओको म उन्ख नहीं पहुंचाऊं,
EZE 20:16 कहालीकि उन्न मोरो नियम ख तुच्छ जान्यो अऊर मोरी विधियों पर नहीं चल्यो, अऊर मोरो आराम दिन ख अपवित्र करयो होतो; येकोलायी उन्को मन उन्की मूर्तियों पर लग्यो रह्यो।
EZE 20:17 “तब भी मय न उन पर दयादृष्टि करी, अऊर उन्ख नाश नहीं करयो, अऊर नहीं जंगल म पूरी रीति सी उन्को नाश नहीं करयो।
EZE 20:18 फिर मय न जंगल म उन्की सन्तान सी कह्यो, अपनो पूर्वजों की विधियों पर मत चलो, नहीं उन्की रीतियों ख मानो अऊर नहीं उन्की मूर्तियों ख पूज क अपनो आप ख अशुद्ध करो।
EZE 20:19 मय तुम्हरो परमेश्वर यहोवा आय, मोरी विधियों पर चलो, अऊर मोरो नियमों ख पालन करन म चौकस रहो,
EZE 20:20 अऊर मोरो आराम दिनों ख पवित्र मानो कि हि मोरो अऊर तुम्हरो बीच एक चिन्ह ठहरेंन, अऊर तुम्ख अनुभव होयेंन कि मय तुम्हरो परमेश्वर यहोवा आय।”
EZE 20:21 पर उन्की सन्तान न भी मोरो सी विद्रोह करयो; हि मोरी विधियों पर नहीं चल्यो, नहीं मोरो नियमों को पालन करन म चौकसी करी; जिन्ख यदि आदमी मानेंन त हि उन्को वजह जीन्दो रहेंन; मोरो आराम दिनों ख उन्न अपवित्र करयो। “तब मय न कह्यो, मय जंगल म अपनो गुस्सा भड़काय क अपनो कोप दिखाऊं।
EZE 20:22 तब भी मय न अपनो हाथ रोक लियो, अऊर अपनो नाम को निमित्त असो करयो, कि उन राज्य को सामने इस्राएलियों ख मिस्र देश सी निकाल लायो होतो, कि हि अपवित्र नहीं ठहरे।
EZE 20:23 फिर मय न जंगल म उन्को सी कसम खायी, कि मय तुम्ख राज्य राज्य म तितर-बितर कर देऊं, अऊर देश देश म बिखेर देऊं,
EZE 20:24 कहालीकि उन्न मोरो नियम नहीं मान्यो, मोरी विधियों ख तुच्छ जान्यो, मोरो आराम दिनों ख अपवित्र करयो, अऊर अपनो पूर्वजों कि मूर्तियों को तरफ उन्की आंखी लगी रह्यी।”
EZE 20:25 “फिर मय न उन्को लायी असी असी विधियां ठहरायी जो अच्छी नहीं होती अऊर असी असी रीतियां जिन्को वजह हि जीन्दो नहीं रह्य सके;
EZE 20:26 हि सब अपनो सब पहिलो टुरा ख आगी म होमबलि चढ़ावन लग्यो; यो रीति सी मय न उन्ख उन्कीच भेंटों को द्वारा अशुद्ध करयो जेकोसी हि बहुत भयभीत होय जायेंन; तब हि जान लेयेंन कि मय परमेश्वर आय।”
EZE 20:27 “हे आदमी की सन्तान, तय इस्राएल को घराना सी कह्य, प्रभु परमेश्वर यो कह्य हय : तुम्हरो पूर्वजों न येको म भी मोरी निन्दा करी कि उन्न मोरो सी विश्वासघात करयो।
EZE 20:28 कहालीकि जब मय न उन्ख ऊ देश म पहुंचायो, जेख उन्ख देन की कसम मय न उन्को सी खायी होती, तब हि हर एक ऊंची पहाड़ी अऊर हर एक घनो झाड़ पर नजर कर क् वहांच अपनो मेलबलि चढ़ावन लग्यो; अऊर रिस दिलावन वाली अपनी भेंट चढ़ावन लग्यो अऊर वहांच अपनो सुगन्धित धूप जलावन लग्यो, अऊर वहांच अपनो पेयबलि देन लग्यो।
EZE 20:29 तब मय न उन्को सी पुच्छ्यो, जो ऊंची जागा ख तुम लोग जावय हय, ऊ का हय? येकोसी ओको नाम अज तक बामा कह्यो जावय हय।
EZE 20:30 येकोलायी इस्राएल को घराना सी कह्य, प्रभु परमेश्वर तुम सी यो पूछय हय : का तुम भी अपनो पूर्वजों की रीति पर चल क अऊर अशुद्ध होय क, अऊर उन्को घिनौनो कामों को अनुसार व्यभिचारिनी को जसो काम करय हय?
EZE 20:31 अज तक जब जब तुम अपनी भेंट चढ़ावय हय अऊर अपनो बाल-बच्चां ख होमबलि कर क् आगी म चढ़ावय हय, तब तब तुम अपनी मूर्तियों को वजह अशुद्ध ठहरय हय। हे इस्राएल को घराना, का तुम मोरो सी पूछ सको? प्रभु परमेश्वर की या वाणी हय, मोरो जीवन की कसम तुम मोरी इच्छा जान नहीं सको।
EZE 20:32 जो बाते तुम्हरो मन म आवय हय, ‘हम लकड़ी अऊर गोटा की सेवा करन वालो होय क राज्य राज्य अऊर देश देश को कुलों को जसो होय जाबोंन,’ पर वा कभी पूरी नहीं होयेंन।”
EZE 20:33 “प्रभु परमेश्वर यो कह्य हय, मोरो जीवन की कसम मय शक्तिशाली हाथ अऊर अपनो हाथ बढ़ाय क अऊर भड़क्यो हुयो कोप सी तुम्हरो ऊपर शासन करूं।
EZE 20:34 मय शक्तिशाली हाथ अऊर बढ़ायी हुयी भुजा अऊर भड़क्यो हुयो कोप को संग तुम्ख देश देश को लोगों म सी अलग करूं, अऊर उन देशों म सी जेको म तुम तितर-बितर भय गयो होतो, जमा करूं;
EZE 20:35 अऊर मय तुम्ख देश देश को लोगों ख जंगल म लिजाय क, वहां आमने-सामने तुम्हरो न्याय करूं।
EZE 20:36 जो तरह मय तुम्हरो पूर्वजों सी मिस्र को जंगल म न्याय करयो होतो, उच तरह मय तुम पर मुकद्दमा चलाऊं, प्रभु परमेश्वर की या वाणी हय।”
EZE 20:37 “मय तुम्ख अपनी लाठी को खल्लो चलाऊं, अऊर तुम्ख वाचा को बन्धन म बान्धूं;
EZE 20:38 मय तुम म सी सब विद्रोहियों ख निकाल क, जो मोरो खिलाफ अपराध करय हंय, तुम्ख शुद्ध करूं, अऊर जो देश म हि रह्य हंय ओको म सी मय उन्ख निकाल देऊं; पर इस्राएल को देश म घुसन नहीं देऊं। तब तुम जान लेवो की मय परमेश्वर आय।”
EZE 20:39 हे इस्राएल को घराना तुम सी त प्रभु परमेश्वर यो कह्य हय : जाय क अपनी अपनी मूर्तियों की उपासना करो; अऊर यदि तुम मोरी नहीं सुनो, त आगु भी योच करतो रहो; पर मोरो पवित्र नाम ख अपनी भेंटों अऊर मूर्तियों को द्वारा फिर अपवित्र मत करजो।
EZE 20:40 “कहालीकि प्रभु परमेश्वर की या वाणी हय कि इस्राएल को पूरो घराना अपनो देश म मोरो पवित्र पहाड़ी पर, इस्राएल को ऊंचो पहाड़ी पर, सब को सब मोरी आराधना करेंन; वहांच मय उन्को सी खुश होऊं, अऊर वहांच मय तुम्हरी उठायी हुयी भेंट अऊर चढ़ायी हुयी अच्छी अच्छी चिजे, अऊर तुम्हरी सब पवित्र करी हुयी चिजे तुम सी लियो करूं।
EZE 20:41 जब मय तुम्ख देश देश को लोगों म सी अलग करूं अऊर उन देशों म सी जिन म सी तुम तितर-बितर भयो हय, जमा करूं, तब तुम्ख सुगन्धित धूप को रूप म ग्रहन करूं, अऊर दूसरी राज्यों को सामने तुम्हरो द्वारा पवित्र ठहरायो जाऊं।
EZE 20:42 जब मय तुम्ख इस्राएल को देश म पहुंचाऊं, जेख देन की कसम मय न तुम्हरो पूर्वजों सी खायी होती, तब तुम जान लेवो कि मय परमेश्वर आय।
EZE 20:43 वहां तुम अपनी चालचलन अऊर अपनो सब कामों ख जिन्ख करन सी तुम अशुद्ध भयो हय याद करो, अऊर अपनो सब बुरो कामों को वजह अपनी नजर म घिनौनो ठहरो।
EZE 20:44 हे इस्राएल को घराना, जब मय तुम्हरो संग तुम्हरो बुरो चालचलन अऊर बिगड़्यो हुयो कामों को अनुसार नहीं, पर अपनोच नाम को निमित्त दयापूर्न व्यवहार करूं, तब तुम जान लेवो कि मय परमेश्वर आय, प्रभु परमेश्वर की या वाणी हय।”
EZE 20:45 परमेश्वर को यो वचन मोरो जवर पहुंच्यो :
EZE 20:46 “हे आदमी की सन्तान, अपनो मुंह दक्षिन दिशा को तरफ कर, दक्षिन को खिलाफ बाते कर, अऊर दक्षिन देश को जंगल को बारे म भविष्यवानी कर;
EZE 20:47 अऊर दक्षिन देश को जंगल सी कह्य; परमेश्वर को यो वचन सुन : प्रभु परमेश्वर यो कह्य हय, मय तोरो म आगी लगाऊं, अऊर तोरो म जितनो हरो यां सुख्यो झाड़ हय, सब ख वा जलाय क भस्म कर देयेंन; ओकी धधकती आगी नहीं बुझेंन, अऊर ओको वजह दक्षिन सी उत्तर तक सब को मुख झुलस जायेंन।
EZE 20:48 तब सब प्रानी जान लेयेंन कि या आगी परमेश्वर की लगायी हुयी हय; अऊर वा कभी नहीं बुझेंन।”
EZE 20:49 तब मय न कह्यो, “हे प्रभु परमेश्वर! लोग त मोरो बारे म कह्य हय कि का ऊ दृष्टान्त को कहन वालो नोहोय?”
EZE 21:1 परमेश्वर को यो वचन मोरो जवर पहुंच्यो :
EZE 21:2 “हे आदमी की सन्तान, अपनो मुंह यरूशलेम को तरफ कर अऊर पवित्र जागा को तरफ वचन सुनाव; इस्राएल देश को बारे म भविष्यवानी कर अऊर ओको सी कह्य,
EZE 21:3 प्रभु परमेश्वर यो कह्य हय : देख, मय तोरो खिलाफ हय, अऊर अपनी तलवार म्यान म सी निकाल क तोरो म सी धर्मी अऊर अधर्मी दोयी को नाश करूं।
EZE 21:4 येकोलायी कि मय तोरो म सी धर्मी अऊर अधर्मी सब को नाश करन वालो हय, यो वजह मय तलवार म्यान सी निकाल क दक्षिन सी उत्तर तक सब प्रानियों को खिलाफ चलाऊं;
EZE 21:5 तब सब प्रानी जान लेयेंन कि परमेश्वर न म्यान म सी अपनी तलवार निकाली हय; अऊर वा तलवार ओको म फिर सी रखी नहीं जायेंन।”
EZE 21:6 “येकोलायी हे आदमी की सन्तान, तय आह भर, दु:खी होय क अऊर टूटी कमर ले क लोगों को सामने आह भर।
EZE 21:7 जब हि तोरो सी पूछेंन, ‘तय कहाली आह भरय हय?’ तब कहजो, ‘समाचार को वजह। कहालीकि असी बात आवन वाली हय कि सब को मन टूट जायेंन अऊर सब को हाथ ढीलो पड़ेंन, सब को दिल बेबस अऊर सब को घुटना कमजोर होय जायेंन। देखो, असीच बात आवन वाली हय, अऊर वा जरूर पूरी होयेंन,’ परमेश्वर यहोवा की या वानी हय।”
EZE 21:8 फिर परमेश्वर को यो वचन मोरो जवर पहुंच्यो,
EZE 21:9 “हे आदमी की सन्तान, भविष्यवानी कर क् कह्य, परमेश्वर यहोवा यो कह्य हय :” देख, धार लगायी हुयी तलवार, अऊर चमकायी हुयी तलवार!
EZE 21:10 ऊ येकोलायी धार लगायी गयी कि ओको सी घात करयो जाय सके, अऊर येकोलायी चमकायी गयी कि बिजली को समान चमके! त का हम हर्ष मनायबो? ऊ परमेश्वर को टुरा को राजदण्ड आय अऊर सब झाड़ो ख तुच्छ जानन वालो आय।
EZE 21:11 वा चमकावन लायी येकोलायी दी गयी कि तलवार हाथ म पकड़ी जाय सके, वा येकोलायी धार लगायी गयी अऊर चमकायी गयी कि घात करन वालों को हाथ म दियो जाय सके।
EZE 21:12 हे आदमी की सन्तान चिल्लाव, अऊर शोक मनाव! कहालीकि मोरी तलवार मोरोच निज लोगों को खिलाफ निकली हय, वा इस्राएल को पूरो मुखियावों मोरो निज लोगों को संग तलवार सी मारयो जाय रह्यो हय। येकोलायी तय छाती पीट-पीट क रोव।
EZE 21:13 कहालीकि सचमुच ओकी जांच भयी हय, अऊर यदि ओख तुच्छ जानन वालो राजदण्ड भी नहीं रहेंन, त का? परमेश्वर यहोवा की या वानी हय।
EZE 21:14 “येकोलायी हे आदमी की सन्तान, भविष्यवानी कर, अऊर ताली बजावो, अऊर तीन बार तलवार की शक्ति दोय गुना करयो जाय, वा त घात करन की तलवार बल्की बड़ो सी बड़ो को घात करन की तलवार आय, जेकोसी कोठरियों म लूक्यो हुयो कोयी भी नहीं बच सकय।
EZE 21:15 मय न घात करन वाली तलवार ख उन्को सब फाटकों को खिलाफ येकोलायी उठायो हय कि लोगों को मन टूट जाये, अऊर हि बहुत ठोकर खाये। देखो, वा त बिजली को समान चमकीली हय, अऊर घात करन लायी धार लगायी गयी हय।
EZE 21:16 हे तलवार, अपनी दायो तरफ जा, फिर तैयार होय क बायो तरफ मुड़, जित भी तोरी धार होना उत काट।
EZE 21:17 मय भी ताली बजाऊं अऊर अपनो गुस्सा ख शान्त करूं, मय परमेश्वर न असो कह्यो हय।”
EZE 21:18 फिर परमेश्वर को यो वचन मोरो जवर पहुंच्यो :
EZE 21:19 “हे आदमी की सन्तान,” दोय रस्ता ठहराय ले कि बेबीलोन को राजा अपनी तलवार को संग आयेंन; दोयी रस्ता एकच देश सी निकलेंन। जहां सी रस्ता नगर को तरफ जावय हय, वहां एक मार्ग-सूचक चिन्ह लगाव;
EZE 21:20 एक रस्ता ख अम्मोनियों को रब्बा नगर को खिलाफ तलवार ख आवन लायी, अऊर दूसरो रस्ता यहूदा देश को गढ़वालो नगर यरूशलेम को खिलाफ चिन्ह बनाव।
EZE 21:21 कहालीकि बेबीलोन को राजा इन दोयी रस्ता को बीज वालो जागा पर शकुन जानन लायी खड़ो हय, ऊ बान ख हिलावय हय; अऊर ऊ गृहदेवतावों सी पूछय हय, ऊ बलि करयो हुयो पशु को कलेजा की जांच करय हय।
EZE 21:22 ओको दायो हाथ म यरूशलेम को नाम की चिट्ठी हय कि ऊ ओको तरफ युद्ध को यन्त्र लगाये, अऊर मुंह खोल क घात करन की आज्ञा दे अऊर ऊंचो आवाज सी ललकारे, फाटकों को तरफ युद्ध को यन्त्र लगाये अऊर घेराबन्दी करे अऊर ढलान बनाये।
EZE 21:23 पर लोग त ऊ भविष्य बतावन वालो ख झूठो समझेंन; उन्न जो उन्की कसम खायी हय; यो वजह उन्को अधर्म ख याद दिलाय क पकड़ लेयेंन।
EZE 21:24 “यो वजह प्रभु परमेश्वर यो कह्य हय : येकोलायी कि तुम्हरो अधर्म जो याद करयो गयो हय, अऊर तुम्हरो अपराध जो खुल गयो हय, कहालीकि तुम्हरो सब कामों म पापच पाप दिखायी देवय हय, अऊर तुम याद आयो हय, येकोलायी तुम इन्कोच द्वारा पकड़्यो जावो।”
EZE 21:25 “हे इस्राएल को बुरो शासक, तोरो दिन आय गयो हय; अधर्म को वजह आखरी सजा को समय आय गयो हय।
EZE 21:26 तोरो बारे म परमेश्वर यहोवा यो कह्य हय : फेटा उतार, अऊर मुकुट भी उतार दे; ऊ पहले जसो नहीं रहेंन; जो खल्लो हय ओख ऊंचो करयो जायेंन अऊर जो ऊंचो हय ओख खल्लो करयो जायेंन।
EZE 21:27 मय नगर ख उलट देऊं अऊर उलट-पुलट कर देऊं; हव उलट देऊं अऊर जब तक ओको अधिकारी नहीं आय जाये तब तक ऊ उलट्यो हुयो रहेंन; तब मय ओख दे देऊं।”
EZE 21:28 “फिर हे आदमी की सन्तान, भविष्यवानी कर क् कह्य कि प्रभु परमेश्वर अम्मोनियों अऊर उन्की करी हुयी नामधरायी को बारे म यो कह्य हय;” तय यो कह्य, निकाली हुयी तलवार हय, वा तलवार घात करन लायी चमकायी गयी हय कि नाश करे अऊर ओकी चमक बिजली को समान हो।
EZE 21:29 जब तक कि हि तोरो बारे म झूठो दर्शन देखतो हय, अऊर झूठो भविष्य तोख बतावय हय कि तलवार उन बुरो दुर्जनों की गर्दन पर चल जिन्को अन्तकाल आय गयो हय, उन्को आखरी सजा को समय आय गयो हय।
EZE 21:30 तलवार ख फिर सी म्यान म रख। जो जागा म तय बनायी गयी अऊर जो देश म तोरी उत्पत्ति भयी, वहांच मय तोरो न्याय करूं।
EZE 21:31 मय तोरो पर अपनो गुस्सा भड़काऊं अऊर तोख अपनो क्रोध की आगी सी भस्म कर देऊं; अऊर तुम्ख असो क्रूर लोगों को हाथ म सौप देऊं जो विनाश करन म निपुन हय।
EZE 21:32 तय आगी सी नाश होय जाजो; तोरो खून देश म बहायो जायेंन; अऊर तोख कोयी याद नहीं करेंन कहालीकि तोख परमेश्वरनच असो कह्यो हय।
EZE 22:1 परमेश्वर को यो वचन मोरो जवर पहुंच्यो :
EZE 22:2 “हे आदमी की सन्तान,” का तय ऊ हत्यारों नगर को न्याय नहीं करजो? का तय ओको न्याय नहीं करजो? ओख ओको सब घिनौनो काम बताय दे,
EZE 22:3 अऊर कह्य, परमेश्वर यहोवा यो कह्य हय : हे नगर तय अपनो बीच म हत्या करय हय जेकोसी तोरो समय आयेंन, अऊर अपनोच विनाश करन अऊर अशुद्ध होन लायी मूर्तियां बनावय हय।
EZE 22:4 जो हत्या तय न करी हय, ओको सी तय दोषी ठहरी हय, अऊर जो मूर्ती तय न बनायी हय, उन्को वजह तय अशुद्ध भय गयी हय; तय न अपनो अन्त को दिन ख जवर लाय लियो हय, अऊर तोरो समय पूरो भय गयो हय। यो वजह मय न तोख राज्य राज्य को लोगों को तरफ सी बुरायी को, अऊर सब देशों को मजाक उड़ावन को कारन बनाय दियो हय।
EZE 22:5 हे बदनाम, हल्ला सी भरयो हुयो नगर, जो देश तोरो जवर हय अऊर जो तोरो सी दूर हय, हि सब तोख हसी म उड़ायेंन।
EZE 22:6 “देख, इस्राएल को हर एक मुखिया अपनो अपनो शक्ति को अनुसार हत्या करय हंय।
EZE 22:7 नगर म तुम जसो कोयी भी अपनो माय बाप को आदर नहीं करय। तुम परदेशी ख धोका देवय हय अऊर विधवावों ख अऊर अनाथ लोगों सी लाभ उठावय हय।
EZE 22:8 तय न मोरी पवित्र चिजों ख तुच्छ जान्यो हय, अऊर मोरो आराम दिनों ख अपवित्र करयो हय।
EZE 22:9 तोरो म लुच्चा लोग हत्या करन लायी तैयार भयो, अऊर तोरो लोगों न पहाड़ियों पर जेवन करयो हय; तोरो बीच म महापाप करयो गयो हय।
EZE 22:10 तोरो म असो भी लोग हय, जो अपनो बाप की पत्नि को संग सोवय हय; अऊर उन्को मासिक धर्म को समय शारीरिक सम्बन्ध बनावन लायी मजबूर करय हय।
EZE 22:11 कोयी व्यक्ति न तोरो म पड़ोसी की पत्नि को संग घिनौनो काम करयो; अऊर कोयी न अपनी बहू ख बिगाड़ क महापाप करयो हय; अऊर कोयी न अपनी सौतेली बहिन यां अपनी टुरी ख भ्रष्ट करयो हय।
EZE 22:12 तोरो म असो लोग हय हत्या करन लायी घूस लियो हय; तय न इस्राएलियों सी ब्याज अऊर सूद लियो हय अऊर अपनो पड़ोसी ख पीस पीस क अन्याय सी फायदा कमायो; अऊर मोख तय न भुलाय दियो हय, प्रभु परमेश्वर की या वानी हय।
EZE 22:13 “येकोलायी देख, जो फायदा तय न अन्याय सी उठायो अऊर अपनो बीच म हत्या करी हय, ओको सी मय न तोरो पर दोयी हाथ उठायो हय।
EZE 22:14 ऊ दिन का तुम म साहस रहेंन यां तुम्हरो हाथ मजबूत रहेंन, जब मय तुम्हरो न्याय करूं? मय प्रभु न कह्यो हय, अऊर असोच करूं।
EZE 22:15 मय तोरो लोगों ख राज्य राज्य म तितर-बितर करूं, अऊर देश देश म बिखेर देऊं, अऊर तोरी अशुद्धता ख तोरो म सी नाश करूं।
EZE 22:16 तय राज्य राज्य को देखतो हुयो अपनीच नजर म अपवित्र ठहरजो; तब तय जान लेजो कि मय परमेश्वर आय।”
EZE 22:17 फिर परमेश्वर को यो वचन मोरो जवर पहुंच्यो :
EZE 22:18 “हे आदमी की सन्तान, इस्राएल को घराना मोरी नजर म धातु को मयील भय गयो हय; हि सब को सब भट्टी को बीच को पीतल, टीन, लोहा अऊर काच को समान बन गयो हय; हि चांदी को मयील को समान भय गयो हय।
EZE 22:19 यो वजह प्रभु परमेश्वर उन सी यो कह्य हय : येकोलायी कि तुम सब को सब धातु को मयील को समान बन गयो हय, येकोलायी देखो, मय तुम्ख यरूशलेम को अन्दर जमा करूं।
EZE 22:20 जसो लोग चांदी, पीतल, लोहा, काच, अऊर टीन येकोलायी भट्टी को अन्दर जमा कर क् रखय हंय कि उन्ख आगी लगाय क पिघलावय हय, वसोच मय भी तुम्ख अपनो कोप अऊर जलजलाहट सी जमा कर क् वहांच रख क पिघलाय देऊं।
EZE 22:21 मय तुम्ख यरूशलेम म जमा कर क् अपनो गुस्सा की आगी सी फूंकूं, अऊर तुम ओको बीच पिघल जावो।
EZE 22:22 जसो चांदी भट्टी को बीच म पिघलायी जावय हय, वसोच तुम ओको बीच म पिघल जावो; तब तुम जान लेवो कि जेन हम पर अपनी जलजलाहट भड़कायी हय, ऊ परमेश्वर आय।”
EZE 22:23 फिर परमेश्वर को यो वचन मोरो जवर पहुंच्यो :
EZE 22:24 “हे आदमी की सन्तान, ऊ देश सी कह्य, तय असो देश आय जो शुद्ध नहीं भयो, अऊर जलजलाहट को दिन म तोरो पर बारीश नहीं भयी।
EZE 22:25 तोरो भविष्यवक्ता दहाड़तो हुयो सिंह हय, उन्न गरजन वालो सिंह को समान शिकार पकड़्यो अऊर प्रानियों ख खाय डाल्यो हय; हि रख्यो हुयो धन ख छीन लेवय हंय, अऊर उन्को अन्दर बहुत बाईयों ख विधवा बनाय देवय हय।
EZE 22:26 उन्को याजकों न मोरी व्यवस्था को अर्थ ख तोड़य हय, अऊर मोरी पवित्र चिजों ख अपवित्र करयो हय; उन्न पवित्र-अपवित्र को कुछ भेद नहीं मान्यो, अऊर नहीं शुद्ध-अशुद्ध को भेद सिखायो हय, अऊर हि मोरो आराम दिनों को बारे म निश्चिन्त रह्य हय, जेकोसी मय उन्को बीच अपवित्र ठहरू हय।
EZE 22:27 ओको मुखिया भेड़ियों को समान शिकार पकड़य हय, अऊर अन्याय सी फायदा उठावन लायी हत्या करय हंय अऊर जीव हत्या करन लायी तैयार रह्य हंय।
EZE 22:28 ओको भविष्यवक्ता उन्को लायी कच्ची लीपा-पोती करय हंय, उन्को दर्शन पानो झूठो हय; परमेश्वर को कुछ कहे बिना झूठो शकुन बतावय हंय कि ‘प्रभु परमेश्वर यो कह्य हय।’
EZE 22:29 देश को साधारन लोग भी अत्याचार करय अऊर परायो धन छीनय हय, हि गरीबों ख पीसय अऊर न्याय की चिन्ता छोड़ क परदेशी पर अत्याचार करय हय।
EZE 22:30 मय न उन म सी असो आदमी ढूंढनो चाहयो जो दीवाल बनाय सके, अऊर जहां दीवाल गिर गयी हय वहां खड़ो होय सके, अऊर जब मोरो गुस्सा देश ख नाश करन पर हो त ओकी रक्षा कर सके, पर मोख कोयी नहीं मिल्यो।
EZE 22:31 यो वजह मय न उन पर अपनो गुस्सा भड़कायो अऊर अपनी जलजलाहट की आगी सी भस्म कर दियो हय; मय न उन्की चाल उन्कोच मुंड पर डाल दियो हय, परमेश्वर यहोवा की या वानी हय।”
EZE 23:1 परमेश्वर को यो वचन मोरो जवर पहुंच्यो :
EZE 23:2 “हे आदमी की सन्तान, दोय बाईयां होती, जो एकच माय की टुरी होती।
EZE 23:3 हि अपनो बचपन मच वेश्या को काम मिस्र म करन लगी; अऊर उन्न अपनो कौमार्य खोय दियो अऊर वेश्या बन गयी।
EZE 23:4 उन टुरियों म सी बड़ी को नाम ओहोला अऊर छोटी बहिन को नाम ओहोलीबा होतो। मय न उन दोयी बहिनों ख अपनाय लियो, अऊर उन्को टुरा-टुरियां पैदा भयो। उन्को नामों को अनुसार ओहोला सामरी नगर, अऊर ओहोलीबा यरूशलेम नगर हय।”
EZE 23:5 “ओहोला जब मोरीच होती, तब व्यभिचारिनी होय क अपनो प्रेमियों पर मोहित होन लगी जो ओको पड़ोसी अश्शूरी योद्धा होतो।
EZE 23:6 हि त सब को सब नीलो कपड़ा पहिनन वालो सुन्दर जवान सेनापति अऊर अधिकारी होतो, अऊर घोड़ा पर सवारी करत होतो।
EZE 23:7 येकोलायी उन्को सी उन्कोच संग व्यभिचार करयो जो सब सी अच्छो अश्शूरी होतो; अऊर जो कोयी पर वा मोहित भयी ओकीच मूर्तियों सी वा अशुद्ध भयी।
EZE 23:8 जो व्यभिचार ओन मिस्र म सिख्यो होतो, उन्ख भी ओन नहीं छोड़्यो; कहालीकि बचपन म आदमियों न ओको संग कुकर्म करयो, अऊर ओकी छातियों पर हाथ फेरयो होतो, अऊर तन-मन सी ओको संग व्यभिचार करयो गयो होतो।
EZE 23:9 यो वजह मय न ओख उन अश्शूरी प्रेमियों को हाथ म सौंप दियो जिन पर वा मोहित भयी होती।
EZE 23:10 उन्न ओख नंगी करयो; ओकी टुरा-टुरियां छीन क ओख तलवार सी मार डाल्यो; यो तरह उन्को हाथ सी सजा पा क वा बाईयों प्रसिद्ध भय गयी।”
EZE 23:11 “ओकी बहिन ओहोलीबा न अपनी बहिन को विनाश देख्यो, तब भी वा मोहित होय क व्यभिचार करन म अपनी बहिन ओहोला सी भी जादा बढ़ गयी।
EZE 23:12 वा अपनो अश्शूरी पड़ोसियों पर मोहित होत होती, जो सब को सब सुन्दर कपड़ा पहिनन वालो घोड़ा को सवार सुन्दर जवान सेनापति अऊर सब तरह को अधिकारी होतो।
EZE 23:13 तब मय न देख्यो कि वा भी अशुद्ध भय गयी हय; उन दोयी बहिनों की एकच चाल होती।”
EZE 23:14 पर ओहोलीबा जादा व्यभिचार करत गयी; जब ओन दीवाल पर लाल रंग सी उतारयो हुयो असो कसदी आदमियों को चित्र देख्यो
EZE 23:15 जो कमर म पट्टा बान्ध्यो हुयो, मुंड म छोर लटकतो हुयो रंगीलो फेटा पहिन्यो हुयो, अऊर सब को सब बेबीलोन को लोगों की रीति पर मुखियावों को जसो दिख रह्यो होतो, उन्की जन्मभूमि कसदी होती,
EZE 23:16 तब उन्ख देखतोच वा उन पर मोहित भयी अऊर उन्को जवर कसदियों को देश म दूत भेज्यो।
EZE 23:17 येकोलायी बेबीलोन को लोग ओको जवर पलंग पर आयो, अऊर ओको संग व्यभिचार कर क् ओख अशुद्ध करयो; अऊर जब वा उन्को सी अशुद्ध भय गयी, तब ओको मन उब गयो, अऊर ओन उन्को सी मुंह फिराय लियो।
EZE 23:18 जब ओन खुलेआम व्यभिचार करयो अऊर अपनो नंगो शरीर ख दिखायो, त मय घृना म ओको सी दूर भय गयो, जसो कि मय ओकी बहिन सी भय गयो होतो।
EZE 23:19 येको पर भी वा मिस्र देश को अपनो बचपन को दिन याद कर क् जब वा वेश्या को काम करतो हुयो, अऊर भी जादा व्यभिचार करत गयी;
EZE 23:20 अऊर असो प्रेमियों पर मोहित भयी, जिन म गधा यां घोड़ा को समान वासना होती।
EZE 23:21 तय यो तरह सी अपनो बचपन को ऊ समय को महापाप को याद करय हय जब मिस्री लोग तोरी छातियों ख पकड़त होतो।
EZE 23:22 यो वजह हे ओहोलीबा, परमेश्वर यहोवा तोरो सी यो कह्य हय : “देख, मय तोरो प्रेमियों ख भड़काऊं जिन्कोसी तय घृना करतो हुयो दूर भय गयी होती, मय उन्ख चारयी तरफ सी तुम्हरो खिलाफ ले आऊं।
EZE 23:23 मतलब बेबीलोन निवासियों अऊर सब कसदियों ख, अऊर पकोद, शोआ अऊर कोआ को लोगों ख; अऊर उन्को सब अश्शूरियों ख लाऊं जो सब को सब घोड़ा को सवार सुन्दर जवान अधिपति, अऊर कुछ तरह को अधिकारी, मुखिया अऊर नामी आदमी हंय।
EZE 23:24 हि लोग हथियार, रथ, छकड़ा अऊर देश देश को लोगों को दल ले क उत्तर दिशा सी चढ़ायी करेंन; अऊर ढाल अऊर भाला अऊर टोप धारन करयो हुयो तोरो खिलाफ चारयी तरफ सी घेर लेयेंन; अऊर मय उन्कोच हाथ म न्याय को काम सौंप देऊं, अऊर हि अपनो अपनो नियम को अनुसार तोरो न्याय करेंन।
EZE 23:25 मय तोरो पर क्रोधित होऊं, जेकोसी हि जलजलाहट को संग व्यवहार करेंन। हि तोरी नाक अऊर कान काट डालेंन, अऊर तुम म सी जो भी बच जायेंन ऊ तलवार सी मारयो जायेंन। हि तोरो टुरा-टुरियों ख छीन क लिजायेंन, अऊर तुम म सी जो भी बच्यो रहेंन, ऊ आगी म जल क भस्म होय जायेंन।
EZE 23:26 हि तोरो कपड़ा भी उतार क तोरो सुन्दर-सुन्दर जेवर छीन क लिजायेंन।
EZE 23:27 यो तरह सी मय तोरो महापाप अऊर जो वेश्या को काम तय न मिस्र देश म सिख्यो होतो, ओख छुड़ाऊं, यहां तक तय उन्ख अब नहीं देखजो अऊर नहीं मिस्र देश ख फिर कभी याद करजो।”
EZE 23:28 कहालीकि प्रभु परमेश्वर तोरो सी यो कह्य हय : देख, मय तोख उन्को हाथ म सौंप देऊं जिन्कोसी तय घृना करय हय अऊर जिन्कोसी तोरो मन फिर गयो हय;
EZE 23:29 अऊर हि तोरो सी दुस्मनी को संग बर्ताव करेंन, अऊर तोरी पूरी कमायी ख उठाय लिजायेंन, अऊर तोरो कपड़ा उतार क नंगो कर क् छोड़ देयेंन, अऊर तोरो तन ख उघाड़्यो जानो पर तोरो व्यभिचार को कुकर्म प्रगट होय जायेंन।
EZE 23:30 यो काम तोरो सी यो वजह करयो जायेंन कहालीकि तय दूसरो राज्यों को पीछु व्यभिचारिनी को समान भय गयी हय, अऊर उन्की मूर्तियां पूज क अशुद्ध भय गयी हय।
EZE 23:31 तय अपनी बहिन को रस्ता पर चली हय; यो वजह मय तोख सजा को वसोच प्याला पिलाऊं।
EZE 23:32 प्रभु परमेश्वर यो कह्य हय : “अपनी बहिन को कटोरा म सी तोख पीनो पड़ेंन जो गहरो अऊर चौड़ो हय; तय हसी अऊर मजाक म उड़ायी जाजो, कहालीकि ऊ कटोरा म बहुत कुछ समावय हय।”
EZE 23:33 तय मतवालोपन अऊर दु:ख म डुब जाजो। तय अपनी बहिन सामरियां को कटोरा ख, मतलब डर अऊर बर्बादी ख पी क अस्थिर होय जाजो।
EZE 23:34 ओको म सी तय छान-छान क पीजो, अऊर ओको तुकड़ा ख भी चबायजो अऊर अपनी छातियां ख घायल करजो; कहालीकि मय नच असो कह्यो हय, प्रभु परमेश्वर की या वानी हय।
EZE 23:35 तय न जो मोख भुलाय दियो हय अऊर अपनो मुंह मोरो सी मोड़ लियो हय, येकोलायी तय खुदच अपनो महापाप अऊर व्यभिचार को बोझ उठाव, परमेश्वर यहोवा को यो वचन आय।
EZE 23:36 परमेश्वर न मोरो सी कह्यो : “हे आदमी की सन्तान, का तय ओहोला अऊर ओहोलीबा को न्याय करजो? त फिर ओको घिनौनो काम उन्ख बताय दे।
EZE 23:37 कहालीकि उन्न व्यभिचार करयो हय, अऊर उन्को हाथों म खून लग्यो हय; उन्न अपनी मूर्तियों को संग व्यभिचार करयो, अऊर अपनो बच्चां ख जो मोरो सी पैदा भयो होतो, उन मूर्तियों को आगु भस्म होन लायी चढ़ायो हंय।
EZE 23:38 फिर उन्न मोरो सी असो बर्ताव भी करयो कि ओकोच संग मोरो पवित्र जागा ख भी अशुद्ध करयो अऊर मोरो आराम दिनों ख अपवित्र करयो हय।
EZE 23:39 हि अपनो बच्चां ख अपनी मूर्तियों को सामने बलि चढ़ाय क उच दिन मोरो पवित्र जागा अपवित्र करन ख ओको म घुस गयी। देख, उन्न यो तरह को काम मोरो भवन को अन्दर करयो हय।”
EZE 23:40 उन्न दूर-दूर सी आदमियों ख बुलावा भेज्यो, अऊर हि आयो भी। उन्को लायी तय न आंग धोव, आंखी म काजर लगाव, जेवर पहिन क;
EZE 23:41 सुन्दर पलंग पर बैठी रह्यी; अऊर तोरो सामने मेज बिछी हुयी होती, जेको पर तय न मोरो सुगन्धित धूप अऊर तेल रख्यो होतो।
EZE 23:42 तब ओको संग लापरवाह लोगों की भीड़ को आवाज सुनायी पड़्यो, अऊर उन साधारन लोगों को जवर जंगल सी लायो गयो पियक्कड़ लोग भी होतो; उन्न उन दोयी बहिनों को हाथों म चूड़ियां पहनायी, अऊर उन्को मुंड पर सुन्दर मुकुट रख्यो।
EZE 23:43 “तब जो व्यभिचार करत करत बूढ्ढी भय गयी होती, तब मय न वा बाई को बारे म कह्यो, अब त लोग ओकोच संग व्यभिचार करेंन।
EZE 23:44 कहालीकि हि ओको जवर असो गयो जसो लोग वेश्या को जवर जावय हय। वसोच हि ओहोला अऊर ओहोलीबा नाम की बाईयों को जवर गयो।
EZE 23:45 पर धर्मी लोग व्यभिचारिनियों अऊर हत्यारों को लायक न्याय करे; कहालीकि हि व्यभिचारिनी हय, अऊर उन्को हाथों म खून लग्यो हय।”
EZE 23:46 यो वजह परमेश्वर यहोवा यो कह्य हय : “मय एक भीड़ सी उन पर चढ़ायी करवाय क उन्ख असो करूं कि हि मारी मारी फिरेंन अऊर लूटी जायेंन।
EZE 23:47 वा भीड़ को लोग उन पर पथराव कर क् उन्ख अपनी तलवारों सी काट डालेंन; तब हि उन्को टुरा-टुरियों ख मार क उन्को घरों ख भी आगी लगाय क फूक देयेंन।
EZE 23:48 यो तरह मय महापाप ख देश म सी दूर करूं, ताकी सब बाईयां शिक्षा पा क तुम्हरो जसो महापाप करन सी बची रहेंन।
EZE 23:49 तुम्हरो महापाप तुम्हरोच मुंड पर पड़ेंन; अऊर तुम निश्चित अपनी मूर्तियों की पूजा को पापों को बोझ उठावों; अऊर तब तुम जान लेवो कि मय परमेश्वर यहोवा आय।”
EZE 24:1 नववों साल को दसवों महिना को दसवों दिन ख, परमेश्वर को यो वचन मोरो जवर पहुंच्यो :
EZE 24:2 “हे आदमी की सन्तान,” अज को दिन लिख क रख, कहालीकि “अज को दिनच बेबीलोन को राजा न यरूशलेम नगर ख घेर लियो होतो।”
EZE 24:3 यो विद्रोही घराना सी दृष्टान्त कह्य; प्रभु परमेश्वर कह्य हय : हन्डा ख आगी पर रख देवो; ओख रख क ओको म पानी डाल देवो;
EZE 24:4 तब ऊ हन्डा म जांघ अऊर कन्धा अऊर सब अच्छो अच्छो मांस को तुकड़ा डाल देवो; अऊर ओको म अच्छी अच्छी हड्डियां भी भर देवो।
EZE 24:5 झुण्ड म सी सब सी अच्छो जनावर लेवो तब उन हड्डियों को लायी हन्डा को खल्लो लकड़ियों को ढेर करो; अऊर मांस ख खूब उबालो ताकी अन्दर की हड्डी भी पक जायेंन।
EZE 24:6 येकोलायी प्रभु परमेश्वर यो कह्य हय : धिक्कार हय, वा हत्यारी नगरी पर! धिक्कार हय ऊ हन्डा पर! जेको म जंग लग्यो हय अऊर निकल्यो नहीं; ओको म सी एक एक तुकड़ा कर क् निकाल लेवो, ओको पर चिट्ठी डालन की जरूरत नहाय।
EZE 24:7 कहालीकि वा नगरी म करयो हुयो खून अपनोच बीच करयो हय; ओन खून ख जमीन पर डाल क धूल सी नहीं झाक्यो, पर नंगी चट्टान पर डाल दियो हय।
EZE 24:8 येकोलायी मय न भी ओको खून नंगी चट्टान पर रख्यो हय कि ऊ झाक नहीं सके कि बदला लेन ख जलजलाहट भड़के।
EZE 24:9 प्रभु परमेश्वर यो कह्य हय : “धिक्कार हय वा खूनी नगरी पर! मय भी जलाऊ लकड़ी को ढेर ख बड़ो करूं।
EZE 24:10 अऊर जादा लकड़ी डालो, आगी ख भड़कावो, अऊर मसाला मिलाय क मांस ख अच्छो तरह सी पकावों, अऊर हड्डियां जलाय देवो।
EZE 24:11 तब खाली हन्डा ख आगी पर रख जेकोसी ऊ गरम हो अऊर ओको पीतल लाल हो अऊर ओको मयील गल जाय, अऊर ओको जंग जर जाये।
EZE 24:12 मय ओको वजह मेहनत करतो करतो थक गयो, पर ओको भारी जंग निकल्यो नहीं, ओको जंग आगी सी भी निकल्यो नहीं।
EZE 24:13 हे यरूशलेम नगरी तोरो अनैतिक कामों न तोख अशुद्ध कर दियो हय। मय न त तोख शुद्ध करन की कोशिश करी, पर तय शुद्ध नहीं भयी, यो वजह जब तक मय अपनी जलजलाहट तोरो पर शान्त नहीं कर लेऊ, तब तक तय फिर सी शुद्ध नहीं होयजो।
EZE 24:14 मय परमेश्वर नच यो कह्यो हय; अऊर ऊ जरूर होय जायेंन; मय असोच करूं, मय तोख नहीं छोड़ू, नहीं तोरो पर तरस खाऊं, नहीं पछताऊं; तोरो चालचलन अऊर कामों को अनुसार तोरो न्याय करयो जायेंन, प्रभु परमेश्वर की या वानी हय।”
EZE 24:15 परमेश्वर को यो वचन मोरो जवर पहुंच्यो :
EZE 24:16 “हे आदमी की सन्तान, देख, मय तोरो ऊ व्यक्ति ख छीन लेऊं जेख तय बहुत प्रेम करय हय; नहीं शोक करजो नहीं तय रोयजो नहीं तय आसू बहायजो।
EZE 24:17 लम्बी स्वास लेजो, पर वा सुनायी नहीं दे; मरयो हुयो को लायी भी शोक मत करजो। मुंड पर फेटा बान्ध्यो अऊर पाय म जूता पहिन्यो रहजो; अऊर नहीं ओठों ख मत झाकजो नहीं शोक करन वालों को प्रथा को अनुसार जेवन मत करजो।”
EZE 24:18 तब मय न सुबेरे लोगों सी बाते करी, अऊर शाम ख मोरी पत्नि मर गयी। तब सुबेरे मय न वसोच करयो जसो मोख आज्ञा दी गयी होती।
EZE 24:19 तब लोग मोरो सी कहन लग्यो, “का तय हम्ख नहीं बतायजो कि यो जो तय करय हय, येको हम लोगों को लायी का अर्थ हय?”
EZE 24:20 मय न उन्ख उत्तर दियो, “परमेश्वर को यो वचन मोरो जवर पहुंच्यो :”
EZE 24:21 तय इस्राएल को घराना सी कह्य : प्रभु परमेश्वर यो कह्य हय : देखो, मय अपनो पवित्र जागा ख जो मजबूत गढ़ जेको पर तुम घमण्ड करय हय; जो तुम्हरी आखी को तारा हय, अऊर जेख तुम्हरो मन चाहवय हय, ओख मय अपवित्र करन पर हय; अऊर तुम्हरो टुरा-टुरियां जो यरूशलेम म रह्य गयो हय, हि तलवार सी मारयो जायेंन।
EZE 24:22 जसो मय न करयो हय वसोच तुम लोग भी करो; तुम भी अपनो ओंठ मत झाको, नहीं शोक को लायक रोटी खावो।
EZE 24:23 तुम मुंड पर फेटा बान्ध्यो अऊर पाय म जूता पहिन्यो रहो, नहीं छाती पीटो, बल्की अपनो अधर्म को कामों म फस्यो हुयो गलतो जावो अऊर एक दूसरो को तरफ देख क विलाप करो।
EZE 24:24 यो रीति सी यहेजकेल तुम्हरो लायी चिन्ह ठहरेंन; जसो ओन करयो, ठीक वसोच तुम भी करो। जब या बाते होय जायेंन, तब तुम जान लेवो कि मय परमेश्वर यहोवा आय।
EZE 24:25 “हे आदमी की सन्तान, का यो सच नहाय, कि जो दिन मय उन्को मजबूत गढ़, उन्की शोभा, अऊर हर्ष को कारन अऊर उन्को टुरा-टुरियां जो उन्की शोभा, उन्की आखी की खुशी, अऊर मन की इच्छा हय, उन्ख मय छीन लेऊं,
EZE 24:26 उच दिन जो व्यक्ति भग क बचेंन, ऊ तोरो जवर आय क तोख समाचार सुनायेंन।
EZE 24:27 उच दिन तोरो मुंह खुलेंन, अऊर फिर तय चुप नहीं रहजो पर ऊ बच्यो हुयो को संग बाते करजो। यो तरह तय इन लोगों को लायी चिन्ह ठहरजो; अऊर यो जान लेयेंन कि मय परमेश्वर आय।”
EZE 25:1 परमेश्वर को यो वचन मोरो जवर पहुंच्यो :
EZE 25:2 “हे आदमी की सन्तान, अम्मोनियों को तरफ मुंह कर क् उन्को बारे म भविष्यवानी कर।
EZE 25:3 उन्को सी कह्य, हे अम्मोनियों, परमेश्वर यहोवा को वचन सुनो, परमेश्वर यहोवा यो कह्य हय कि तुम न जो मोरो पवित्र जागा को बारे म जब ऊ अपवित्र करयो गयो, इस्राएल को देश को बारे म जब ऊ उजड़ गयो, अऊर यहूदा को घराना को बारे म जब हि बन्धुवायी म गयो, अहा, अहा! कह्यो।
EZE 25:4 यो वजह देखो, मय तोख पूर्व देश को लोगों को अधिकार म करन पर हय; अऊर हि तोरो बीच अपनी छावनियां डालेंन अऊर अपनो घर बनायेंन; हि तोरो फर खायेंन अऊर तोरो दूध पीयेंन।
EZE 25:5 मय रब्बा नगर ख ऊंटों ख रहन अऊर अम्मोनियों को देश ख मेंढी-शेरियों को बैठन की जागा कर देऊं; तब तुम जान लेवो कि मय परमेश्वर आय।”
EZE 25:6 कहालीकि परमेश्वर यहोवा यो कह्य हय : तुम न जो इस्राएल को देश को वजह ताली बजायी अऊर नाच्यो, अऊर अपनो पूरो मन को अभिमान सी खुशी मनायी,
EZE 25:7 यो वजह देख, मय न अपनो हाथ तोरो ऊपर उठायो हय; अऊर तुम्ख राज्य राज्य को लोगों की लूट बनाय देऊं; अऊर देश देश म सी नाश करूं। मय तोरो सत्यानाश कर डालूं; तब तय जान लेजो कि मय परमेश्वर आय।
EZE 25:8 “परमेश्वर यहोवा यो कह्य हय : मोआब अऊर सेईर जो कह्य हंय, देखो, यहूदा को घराना दूसरो राज्यों को समान भय गयो हय।
EZE 25:9 यो वजह देख, मोआब देश की सीमा की रक्षा करन वालो नगरों ख बेत्यशीमोत, बालमोन, अऊर किर्यातैम, जो ऊ देश को शिरोमनि हय, मय उन्को रस्ता खोल क
EZE 25:10 मय उन्ख पूर्व देश को लोगों को वश म असो कर देऊं कि हि अम्मोनियों पर चढ़ायी करे; अऊर मय अम्मोनियों ख यहां तक उन्को अधिकार म कर देऊं कि राज्य राज्य को बीच उन्की याद नहीं करी जायेंन।
EZE 25:11 मय मोआब ख भी सजा देऊं। तब हि जान लेयेंन कि मय परमेश्वर आय।
EZE 25:12 “परमेश्वर यहोवा यो भी कह्य हय : एदोम न जो यहूदा को घराना सी बदला लियो, अऊर उन सी बदला ले क बड़ो दोषी भय गयो,
EZE 25:13 यो वजह परमेश्वर यो कह्य हय, मय एदोम को देश को खिलाफ अपनो हाथ बढ़ाय क ओको म सी आदमी अऊर जनावर दोयी ख नाश कर देऊं; अऊर तेमान नगर सी ले क ददान नगर तक ओख उजाड़ देऊं; अऊर हि तलवार सी मारयो जायेंन।
EZE 25:14 मय अपनी प्रजा इस्राएल को द्वारा एदोम नगर सी अपनो बदला लेऊं; अऊर हि ऊ देश म मोरो कोप अऊर जलजलाहट को अनुसार काम करेंन। तब हि मोरो बदला ख जान लेयेंन, परमेश्वर यहोवा की या वानी हय।
EZE 25:15 “परमेश्वर यहोवा यो कह्य हय : कहालीकि पलिश्ती लोगों न बदला लियो, बल्की अपनी युग युग की दुश्मनी को वजह अपनो मन को अभिमान सी बदला लियो कि उन्को नाश करे,
EZE 25:16 यो वजह परमेश्वर यहोवा यो कह्य हय, देख, मय पलिश्तियों को खिलाफ अपनो हाथ उठावन पर हय, अऊर करेतियों ख मिटाय डालूं; अऊर समुन्दर किनार को बच्यो हुयो सब रहन वालों को नाश करूं।
EZE 25:17 मय जलजलाहट को संग मुकद्दमा लड़ क, गुस्सा को संग बदला लेऊं। अऊर जब मय उन्को सी बदला ले लेऊं, तब हि जान लेयेंन कि मय परमेश्वर आय।”
EZE 26:1 ग्यारावों साल को पहिले महिना को पहिलो दिन ख परमेश्वर को यो वचन मोरो जवर पहुंच्यो :
EZE 26:2 “हे आदमी की सन्तान, सोर नगर न यरूशलेम को बारे म कह्यो, ‘अहा, जनता को सिरन की फाटक टूट गयी! जो देश देश को लोगों को फाटक को जसी होती, ऊ नाश भय गयो हय! ओको उजड़ जान सी मय उन्नति पाऊं।’”
EZE 26:3 यो वजह परमेश्वर यहोवा कह्य हय : हे सोर नगर देख, मय तोरो खिलाफ हय; अऊर असो करूं कि बहुत सी राज्य तोरो खिलाफ असी उठेंन जसी समुन्दर की लहर उठय हय।
EZE 26:4 हि सोर नगर की दीवाल गिरायेंन, अऊर ओको गुम्मटों ख तोड़ डालेंन; अऊर मय उन पर सी उन्की माटी खुरच क ओख नंगी चट्टान कर देऊं।
EZE 26:5 ऊ समुन्दर को बीच को मछवारों को जार सुखावन की जागा बन जायेंन; कहालीकि परमेश्वर यहोवा की या वानी हय, अऊर ऊ राज्य राज्य को लोगों सी लूटी जायेंन;
EZE 26:6 अऊर मुख्य जमीन म बस्ती म रहन वालो ख तलवार सी मार दियो जायेंन। तब हि जान लेयेंन कि मय परमेश्वर आय।
EZE 26:7 “कहालीकि परमेश्वर यहोवा यो कह्य हय : देख, मय सोर नगर को खिलाफ राजाधिराज बेबीलोन को राजा नबूकदनेस्सर ख घोड़ा, रथों, सवारों, बड़ी भीड़, अऊर दल समेत उत्तर दिशा सी ले आऊं।
EZE 26:8 ऊ तोरी मुख्य जमीन म तुम्हरी बस्ती ख तलवार सी मारेंन, अऊर तोरो खिलाफ घेराबन्दी करेंन अऊर तोरी दीवारों सी ढलान बनायेंन; अऊर ढाल उठायेंन।”
EZE 26:9 ऊ तोरी शहर की दीवाल को खिलाफ युद्ध को यंत्र चलायेंन अऊर तोरो गुम्मटों ख हथियार सी गिराय देयेंन।
EZE 26:10 उन्को घोड़ा इतनो होयेंन, कि तय उन्की धूल सी झक जाजो, अऊर जब ऊ तोरो फाटकों म असो घुसेंन जसो लोग नाका वालो नगर म घुसय हय, तब तोरी शहर की दीवाल सवारों, छकड़ों, अऊर रथों की आवाज सी काप उठेंन।
EZE 26:11 ऊ अपनी घोड़ा की टापों सी तोरी सब सड़कों ख रौंद डालेंन, अऊर तोरो निवासियों ख तलवार सी मार डालेंन, अऊर तोरो मजबूत खम्बा ख जमीन पर गिराय देयेंन।
EZE 26:12 लोग तोरो धन लूटेंन अऊर तोरो व्यापार की चिजे छीन लेयेंन; हि तोरी शहर की दीवाल गिराय देयेंन अऊर तोरो सुन्दर घरों ख तोड़ डालेंन; तोरो गोटा अऊर लकड़ी, अऊर तोरी घर की माटी सब समुन्दर म फेक देयेंन।
EZE 26:13 मय तोरो सब गाना को सुरताल बन्द कर देऊं, अऊर तोरी वीनावों की आवाज फिर कभी सुनायी नहीं देयेंन।
EZE 26:14 मय तोख नंगी चट्टान बनाय देऊं, तय जार सुखावन कीच जागा बन जाजो, अऊर फिर सी बसायो नहीं जाजो; कहालीकि मय परमेश्वर नच यो कह्य हय, परमेश्वर यहोवा की या वानी हय।
EZE 26:15 “परमेश्वर यहोवा सोर नगर सी यो कह्य हय : तोरो गिरन को आवाज सी जब घायल लोग कराहेंन अऊर तुम्हरो बीच हत्यायें होयेंन, तब का तुम्हरी जमीन काप नहीं उठेंन?”
EZE 26:16 तब समुन्दर किनार को देश को सब मुखिया अपनो अपनो सिंहासन पर सी उतरेंन, अऊर अपनो राजकीय कपड़ा अऊर बुन्यो हुयो कपड़ा उतार क आतंकित कपड़ा पहिनेंन हर क्षन कापतो हुयो, तुम सी डर क जमीन पर बैठ जायेंन।
EZE 26:17 हि तोरो बारे म विलाप को गाना बनाय क मोरो सी कहेंन, हे प्रसिद्ध नगर, तय कसो नाश भय गयो, समुन्दर किनार पर तुम म लोग बस्यो होतो, तुम समुन्दर पर एक शक्ति होतो, तुम अऊर तुम्हरो निवासी; तुम न उन सब पर आतंक फैलायो जो वहां रहत होतो?
EZE 26:18 तोरो गिरन को दिन टापू काप उठेंन, अऊर तोरो विनाश को वजह समुन्दर को सब टापू घबराय जायेंन।
EZE 26:19 “कहालीकि परमेश्वर यहोवा यो कह्य हय : जब मय तोख उजड़्यो हुयो नगरों को समान उजाड़ करूं अऊर तोरो ऊपर महासागर चढ़ाऊं, अऊर तय गहरो पानी म डूब जाजो,
EZE 26:20 तब गड्डा म अऊर गिरन वालों को संग मय तोख भी प्राचीन युग को लोगों म उतार देऊं; अऊर गड्डा म अऊर गिरन वालों को संग तोख भी खल्लो अधोलोक म रख क प्राचीन काल को उजड़्यो हुयो जागा को समान कर देऊं; यहां तक कि तय फिर सी नहीं बसजो अऊर नहीं जीन्दो को देश म तुम्हरी कोयी जागा नहीं रहेंन।
EZE 26:21 मय तोख घबरावन को वजह बनाऊं, अऊर तय भविष्य म फिर नहीं रहजो, बल्की ढूंढन पर भी तोरो पता नहीं लगेंन, परमेश्वर यहोवा की या वानी हय।”
EZE 27:1 परमेश्वर को यो वचन मोरो जवर पहुंच्यो :
EZE 27:2 “हे आदमी की सन्तान, सोर नगर को बारे म एक विलाप गीत बनाय क ओको सी यो कहो,”
EZE 27:3 हे समुन्दर को प्रवेश-द्वार पर रहनवाली, हे बहुत सी द्वीपों को लायी देश देश को लोगों को संग व्यापार करनवाली, परमेश्वर यहोवा यो कह्य हय : हे सोर नगर, तय न कह्यो हय कि मय सब सी सुन्दर हय।
EZE 27:4 तोरी सीमा समुन्दर को बीच हय; तोरो बनावन वालो न तोख बहुत सुन्दर बनायो हय।
EZE 27:5 तोरो सब तक्ता सनीर पहाड़ी की सनौवर की लकड़ी की बनी हय; तोरो मस्तूल बनावन लायी लबानोन को देवदार की लकड़ी लियो हय।
EZE 27:6 तोरो डान्ड बाशान प्रदेश को बांझ झाड़ों को बन्यो हय; तोरो जहाज की छत कित्तियों को द्वीपों सी लायो हुयो सीधो हत्ती को दात जड़्यो गयो सनौवर की लकड़ी सी बनायो गयो।
EZE 27:7 तोरो जहाजों की पाल मिस्र देश सी लायो हुयो बूटेदार सन को कपड़ा को बने कि तोरो लायी झन्डा को काम दे; तोरी चान्दनी एलीशा को द्वीपों सी लायी हुयी नीलो अऊर जामुनी रंग को कपड़ा की बनी हय।
EZE 27:8 तोरो जहाज चलावन वालो सीदोन अऊर अर्वद को रहनवालो होतो; हे सोर नगर, तोरोच बीच को बुद्धिमान लोग तोरोच चलावन वालो माझी होतो।
EZE 27:9 तोरो बनावन वालो बढ़यी गबल नगर को अनुभवी अऊर बुद्धिमान लोग होतो; तोरो म व्यापार करन लायी मल्लाहों समेत समुन्दर पर को सब जहाज तोरो म आय गयो होतो।
EZE 27:10 तोरी सेना म फारसी, लूदी, अऊर पूती लोग भरती भयो होतो; उन्न जहाज की दीवारों पर ढाल, अऊर टोपी लटकाय दियो होतो; अऊर उन्कोच वजह तोरो प्रताप बढ़्यो होतो।
EZE 27:11 तोरी शहरपनाह की दीवाल की रखवाली तोरी सेना को संग अर्वद नगर को लोग चारयी तरफ सी करत होतो; अऊर तोरो गम्मद नगर को शूरवीर गुम्मटों म पहरा दे रह्यो होतो; उन्न अपनी ढाल तोरी शहरपनाह की दीवाल पर टंगायी होती; तोरी सुन्दरता उन्को वजह पूरी भयी होती।
EZE 27:12 “अपनी सब तरह की सम्पत्ति की बहुतायत को वजह तर्शीश को लोग तोरो व्यापारी होतो; उन्न चांदी, लोहा, टीन अऊर काच दे क तोरो माल खरीद लियो।
EZE 27:13 यावान, तूबल, अऊर मेशेक देश को व्यापारी तोरो माल को बदला म दास-दासी अऊर पीतल को बर्तन को व्यापार करत होतो।
EZE 27:14 बेत-तोगर्मा को घराना को लोगों न तोरी सम्पत्ति ले क घोड़ा, सवारी को घोड़ा अऊर खच्चर दियो।”
EZE 27:15 ददान नगर को व्यापारी भी होतो; बहुत सो समुन्दर किनार को देश तोरो व्यापार की मन्डी होती; हि तोरो जवर हत्ती दात अऊर आबनूस की लकड़ी व्यापार म लावत होतो।
EZE 27:16 सीरिया को लोगों न तोरो माल को बदला तोरी बहुत कारीगरी को वजह अराम तोरो व्यापारी होतो; मरकत, जामुनी रंग को कपड़ा, बुन्यो हुयो बूटेदार कपड़ा, मलमल को कपड़ा, मूंगा अऊर माणिक देत होतो।
EZE 27:17 यहूदा अऊर इस्राएल देश भी तोरो व्यापारी होतो; उन्न मिन्नित को गहूं, शहेद, जैतून को तेल, अऊर मसाला दे क तोरो माल लियो।
EZE 27:18 तुम्हरो जवर हर तरह की कारीगरी भयी अऊर हर तरह को धन जमा भयो, येकोसी दमिश्क नगर को लोग तोरो व्यापारी भयो; तोरो जवर हेलबोन नगर की दारू अऊर सफेद ऊन पहुंचायो गयो।
EZE 27:19 ददान अऊर यावान नगर न तोरो माल को बदला म सूत दियो; अऊर उन्को वजह फौलाद, तज अऊर अगर म भी तोरो व्यापारी भयो।
EZE 27:20 ददान नगर न भी तुम्हरो सामान को बदला तुम्ख घोड़ा की पीठ पर बिछावन वालो जीन को कपड़ा को व्यापार करत होतो।
EZE 27:21 अरब अऊर केदार को सब मुखिया तोरो व्यापारी ठहरयो; उन्न मेम्ना, मेंढा अऊर बकरा ले क तोरो संग लेन देन करयो।
EZE 27:22 शबा अऊर रामा नगर को व्यापारी तोरो व्यापारी ठहरयो; उन्न अच्छी जाति को सब अलग तरह को मसाला, कुछ तरह को मनि, अऊर सोनो दे क तोरो माल लियो।
EZE 27:23 हारान, कन्ने, एदेन, शबा नगर को व्यापारी, अऊर अश्शूर अऊर कलमद नगर, हि सब तोरो व्यापारी ठहरयो।
EZE 27:24 इन्न अच्छी अच्छी चिजे मतलब ओढ़न को नीलो रंग को अऊर बूटेदार कपड़ा अऊर रस्सियों सी बन्धी देवदार की बनी हुयी रंग-बिरंगी पेटियां लाय क तोरो संग लेन देन करत होतो।
EZE 27:25 तर्शीश को जहाज तोरो व्यापार को माल ढोवनवालो बन्यो। “उन्को द्वारा तय समुन्दर को बीच रह्य क बहुत धनवान अऊर प्रतापी भय गयो होतो।
EZE 27:26 तोरो मल्लाहों न तोख गहरो पानी म पहुंचाय दियो हय, अऊर पूर्व की हवा न तोख समुन्दर को बीच जमीन तक तोड़ दियो हय।”
EZE 27:27 जो दिन तय डूबजो, उच दिन तोरी धन-सम्पत्ति, व्यापार को माल, मल्लाह, जहाज चलावन वालो, जहाज बनावन वालो, व्यापारी लोग, अऊर तुम्हरो सब सिपाही, अऊर जहाज को पूरो लोग समुन्दर म डूब जायेंन।
EZE 27:28 तोरो मल्लाहों की चिल्लाहट को आवाज सी तोरो आजु-बाजू को इलाका काप उठेंन।
EZE 27:29 सब जहाज चलावन वालो अऊर मल्लाह, अऊर समुन्दर म जितनो जहाज चलावन वालो रह्य हय, हि अपनो अपनो जहाज पर सी उतरेंन।
EZE 27:30 अऊर हि जमीन पर खड़ो होय क तोरो बारे म ऊंचो आवाज सी बिलख बिलख क रोयेंन। हि अपनो अपनो मुंड पर धूल डाल क राख म लोटेंन;
EZE 27:31 अऊर तोरो शोक म अपनो मुंड मुंडवाय देयेंन, अऊर कमर म टाट बान्ध क अपनो मन को कड़ो दु:ख को संग तोरो बारे म रोयेंन अऊर छाती पीट पीट क शोक मनायेंन।
EZE 27:32 हि विलाप करतो हुयो तोरो बारे म विलाप को यो गीत बनाय क गायेंन: सोर नगर जो अब समुन्दर को बीच चुपचाप पड़्यो हय, ओको समान कौन सी नगरी हय?
EZE 27:33 जब तोरो माल समुन्दर पर सी निकलत होतो, तब बहुत सी राज्यों को लोग तृप्त होत होतो; तोरो धन अऊर व्यापार को माल की बहुतायत सी धरती को राजा धनी होत होतो।
EZE 27:34 जो समय तय गहरो पानी म लहरों सी टूट गयी, ऊ समय तोरो व्यापार को माल, अऊर तोरो सब निवासी भी जहाज को अन्दर रह्य क डूब क नाश भय गयो।
EZE 27:35 “समुन्दर किनार को देशों को सब रहन वालो तोरी दशा देख क डर गयो; अऊर उन्को सब राजा डर सी काप गयो, अऊर उन्को मुंह पर उदासी छाय गयी।
EZE 27:36 देश देश को व्यापारी तोरो खिलाफ ताना मार रह्यो हय; तय डर को कारन भय गयो हय अऊर फिर कभी स्थिर नहीं रह्य सकजो।”
EZE 28:1 परमेश्वर को यो वचन मोरो जवर पहुंच्यो :
EZE 28:2 “हे आदमी की सन्तान, सोर नगर को मुखिया सी कह्य, परमेश्वर यहोवा यो कह्य हय : तय अपनो मन म घमण्ड सी फूल क यो कह्य हय, ‘मय ईश्वर आय, मय समुन्दर को बीच परमेश्वर को आसन पर बैठ्यो हय,’ पर, तय अपनो आप ख परमेश्वर जसो दिखावन को दिखावा कर सकय हय, पर ईश्वर नहीं, तय आदमीच आय।
EZE 28:3 तय दानिय्येल सी जादा बुद्धिमान त हय; कोयी भी रहस्य तोरो सी लूकायो नहीं जाय सकय;
EZE 28:4 तय न अपनी बुद्धि अऊर समझ को द्वारा धन हासिल करयो, अऊर अपनो भण्डारों म सोना-चांदी को ढेर लगाय दियो हय;”
EZE 28:5 तय बुद्धिमान व्यापारी हय, तय न व्यापार सी धन-सम्पत्ति बढ़ायी हय, अऊर धन को वजह तोरो मन घमण्ड सी फूल गयो हय।
EZE 28:6 यो वजह परमेश्वर यहोवा यो कह्य हय : तय अपनो आप ख परमेश्वर को समान बुद्धिमान समझय हय,
EZE 28:7 येकोलायी देख, मय तोरो पर एक असो परदेशी देश सी चढ़ायी कराऊं, जो सब राज्यों सी जादा क्रूर हय, हि अपनी तलवारे तोरी बुद्धिमानी अऊर सुन्दरता पर चलायेंन अऊर तोरी सुन्दर चिजों ख बिगाड़ेंन।
EZE 28:8 हि तोख कब्र म फेक देयेंन, अऊर तय समुन्दर को बीच मारयो हुयो को समान मर जाजो।
EZE 28:9 तब, का तय अपनो मारन वालो को सामने कहतो रह्यजो, मय परमेश्वर आय? तय अपनो मारन वालो को हाथ म मरनशील आदमी हय, ईश्वर नहीं।
EZE 28:10 तय परदेशियों को हाथ सी खतनाहीन लोगों को जसो मारयो जाजो; कहालीकि मयनच असो कह्यो हय, परमेश्वर यहोवा की या वानी हय।
EZE 28:11 फिर परमेश्वर को यो वचन मोरो जवर पहुंच्यो :
EZE 28:12 “हे आदमी की सन्तान, सोर नगर को राजा को बारे म विलाप को गीत बनाय क ओको सी कह्य; परमेश्वर यहोवा यो कह्य हय : तय त अच्छो सी भी अच्छो हय; तय बुद्धिमान अऊर सब सी सुन्दर हय।
EZE 28:13 तय परमेश्वर को अदन नाम को बगीचा म होतो; तोरो जवर आभूषन, माणिक, पुखराज, हीरा, फिरोज़ा, सुलैमानी मनि, यशब, नीलमनि, मरकद, अऊर लाल सब तरह को मनि अऊर सोना को जेवर होतो; तोरी डफली अऊर बांसुरी तोरोच म बनायी गयी होती; जो दिन तय बनायो गयो होतो, उच दिन हि बनायी गयी होती।
EZE 28:14 तय सुरक्षा को लायी अभिषिक्त करूब होतो, मय न तोख असो नियुक्त करयो कि तय परमेश्वर को पवित्र पहाड़ी पर रहत होतो; तय आगी को जसो चमकन वालो मनियों को बीच चलत फिरत होतो।
EZE 28:15 जो दिन सी तय रच्यो गयो, अऊर जो दिन तक तोरो म कुटिलता नहीं पायी गयी, ऊ समय तक तय अपनी पूरो चालचलन म निर्दोष रह्यो।
EZE 28:16 पर लेन-देन की बहुतायत को वजह तय उपद्रव सी भर क पापी भय गयो; येकोसीच मय न तोख अपवित्र जान क परमेश्वर को पवित्र पहाड़ी पर सी हटाय दियो, अऊर हे रक्षा करन वालो करूब मय न तोख आगी जसो चमकन वालो मनियों को बीच सी नाश कर दियो हय।
EZE 28:17 सुन्दरता को वजह तोरो मन फूल गयो होतो; अऊर वैभव को वजह तोरी बुद्धि बिगड़ गयी होती। मय न तोख जमीन पर पटक दियो; अऊर राजावों को सामने तोख रख्यो कि हि तोख देखे।
EZE 28:18 तोरो अधर्म को कामों की बहुतायत सी अऊर तोरो लेन-देन की कुटिलता सी तोरो पवित्र जागा अपवित्र भय गयो; येकोलायी मय न तोरो म विद्रोह की आगी पैदा करी जेकोसी तय भस्म होय जाय, अऊर मय तोख देखन वालों को सामने जमीन पर भस्म कर दियो हय।
EZE 28:19 देश देश को लोगों म सी जितनो तोख जानय हंय सब तोरो वजह डर गयो; तोरो भयानक अन्त भयो हय अऊर तोरो अस्तित्व अब नहीं रहेंन।”
EZE 28:20 परमेश्वर को यो वचन मोरो जवर पहुंच्यो :
EZE 28:21 “हे आदमी की सन्तान, अपनो मुख सीदोन को तरफ कर क् ओको खिलाफ भविष्यवानी कर,
EZE 28:22 अऊर कह्य, प्रभु परमेश्वर यो कह्य हय : हे सीदोन नगर, मय तोरो खिलाफ हय; मय तोरो बीच अपनी महिमा कराऊं। जब मय ओको बीच सजा देऊं अऊर ओको म अपनो आप ख पवित्र ठहराऊं, तब लोग जान लेयेंन कि मय परमेश्वर आय।
EZE 28:23 मय ओको म महामारी फैलाऊं, अऊर ओकी सड़कों म खून बहाऊं; अऊर ओको चारयी तरफ तलवार चलेंन; तब ओको बीच म लोग मारयो जायेंन, तब हि जान लेयेंन कि मय परमेश्वर आय।
EZE 28:24 “इस्राएल को घराना को चारयी तरफ को राज्य उन्को संग अभिमानी जसो बर्ताव करय हय, उन म सी कोयी भी काटां अऊर झाड़ियों को समान फिर कभी इस्राएल ख हानि नहीं पहुंचायेंन; तब हि जान लेयेंन कि मय परमेश्वर यहोवा आय।
EZE 28:25 “परमेश्वर यहोवा यो कह्य हय : जब मय इस्राएल को घराना ख उन सब लोगों म सी जमा करूं, जिन्को बीच म हि तितर-बितर भयो हय, अऊर देश देश को लोगों को सामने उन्को द्वारा पवित्र ठहराऊं, तब हि ऊ देश म निवास करेंन जो मय न अपनो दास याकूब ख दियो होतो।
EZE 28:26 हि ओको म निडर होय क बस्यो रहेंन; हि घर बनाय क अऊर अंगूर की बाड़ी लगाय क निडर रहेंन; तब मय उन्को चारयी तरफ को सब लोगों ख सजा देऊं जो उन्को सी अभिमानी जसो बर्ताव करय हंय, तब हि जान लेयेंन कि उन्को परमेश्वर यहोवाच हय।”
EZE 29:1 दसवों साल को दसवों महिना को बारहवों दिन ख परमेश्वर को यो वचन मोरो जवर पहुंच्यो :
EZE 29:2 “हे आदमी की सन्तान, अपनो मुंह मिस्र देश को राजा फिरौन को तरफ कर क् ओको सी अऊर पूरो मिस्र देश को खिलाफ भविष्यवानी कर;
EZE 29:3 यो कह्य, परमेश्वर यहोवा यो कह्य हय : हे मिस्र को राजा फिरौन, मय तोरो खिलाफ हय, हे बड़ो मगर, तय जो अपनी नदियों को बीच म पड़्यो रह्य हय, तय कह्य हय, ‘नील नदी मोरी आय, अऊर मय नच ओख बनायो हय।’
EZE 29:4 मय तोरो जबड़ा म आकड़ा डालूं, अऊर तोरी नदियों की मच्छियों ख तोरी खाल म चिपकाऊं, अऊर मय तोरी खाल म चिपकी हुयी सब मच्छियों समेत नील नदी सी बाहेर निकालूं।
EZE 29:5 तब मय तोख तोरी पूरी मच्छियों समेत जंगल म फेक देऊं, अऊर तय मैदान म पड़्यो रहजो; अऊर नहीं गाड़्यो जाजो। मय न तोख जंगली जनावर अऊर आसमान को पक्षियों को भोजन बनाय दियो हय।”
EZE 29:6 “तब मिस्र को पूरो निवासी जान लेयेंन कि मय परमेश्वर आय।” तय न हि इस्राएलियों ख घराना को लायी नाजुक लाठी ठहरयो हय।
EZE 29:7 जब उन्न तोख पकड़्यो तब तय टूट गयो अऊर ओको कन्धा उखड़ गयो, अऊर जब हि तोख टेक्यो, तब तय टूट गयो, अऊर ओकी कमर की पूरी नस चढ़ गयी।
EZE 29:8 यो वजह प्रभु परमेश्वर यो कह्य हय : देख, मय तोरो पर तलवार चलवाय क, तोरो आदमी अऊर जनावर, सब को नाश करूं।
EZE 29:9 तब मिस्र देश उजाड़ अऊर वैरान होय जायेंन; अऊर हि जान लेयेंन कि मय परमेश्वर आय। “तय न कह्यो हय,” “मोरी नील नदी मोरीच आय, अऊर मय नच ओख बनायो हय।
EZE 29:10 यो वजह देख, मय तोरो अऊर तोरी नदियों को खिलाफ हय अऊर मिस्र देश ख उत्तर म मिग्दोल नगर सी ले क दक्षिन म सवेने नगर तक बल्की कूश देश की सीमा तक उजाड़च उजाड़ कर देऊं।
EZE 29:11 चालीस साल तक ओको म आदमी यां जनावर को पाय तक नहीं पड़ेंन; अऊर नहीं ओको म कोयी बसेंन।
EZE 29:12 चालीस साल तक मय मिस्र देश ख उजड़्यो हुयो देशों को बीच उजाड़ कर क् रखूं; अऊर ओको नगर उजड़्यो हुयो नगरों को बीच खण्डरच बन्यो रहेंन। मय मिस्र देश को लोगों ख राज्य राज्य म अलग अलग कर देऊं, अऊर देश देश म तितर-बितर कर देऊं।”
EZE 29:13 “परमेश्वर यहोवा यो कह्य हय : चालीस साल बीतन पर मय मिस्र देश को लोगों ख उन राज्यों को बीच सी जमा करूं, जेको म हि तितर-बितर भयो होतो;
EZE 29:14 अऊर मय मिस्रियों ख बन्धुवायी सी छुड़ाय क पत्रास देश म लाऊं, जो उन्की जन्मभूमि हय, फिर सी बसाऊं; अऊर वहां उन्को छोटो सो राज्य होय जायेंन।
EZE 29:15 ऊ सब राज्यों म छोटो होयेंन, अऊर फिर ऊ दूसरो राज्यों पर अपनो मुंड नहीं उठायेंन; कहालीकि मय मिस्रियों ख असो घटाऊं कि हि राज्य राज्य पर फिर कभी शासन नहीं करेंन।
EZE 29:16 मिस्र फिर इस्राएल को घराना को भरोसा को वजह नहीं होयेंन, कहालीकि जब हि फिर उन्को तरफ देखन लगेंन, तब हि उन्को अधर्म ख याद करेंन। तब हि जान लेयेंन कि मय परमेश्वर आय।”
EZE 29:17 फिर सत्ताईसवो साल को पहिलो दिन ख परमेश्वर को यो वचन मोरो जवर पहुंच्यो :
EZE 29:18 “हे आदमी की सन्तान, बेबीलोन को राजा नबूकदनेस्सर न सोर नगर ख घेरन म अपनी सेना सी बड़ी मेहनत करायी; हर एक को मुंड को बाल झड़ गयो, अऊर हर एक को कन्धा छिल गयो; तब भी ओख अऊर नहीं ओको सैनिकों ख अपनो यो कठोर मेहनत की मजूरी सोर देश सी हासिल भयी।
EZE 29:19 यो वजह परमेश्वर यहोवा यो कह्य हय : देख, मय बेबीलोन को राजा नबूकदनेस्सर ख मिस्र देश देऊं, अऊर ऊ ओकी भीड़ ख ले क जायेंन, अऊर ओकी धन-सम्पत्ति लूट क अपनो कब्जा म कर लेयेंन; अऊर या ओकी सेना की मजूरी होयेंन।
EZE 29:20 मय न ओकी मेहनत को बदला म ओख मिस्र देश येकोलायी दियो हय कि उन लोगों न मोरो लायी काम करयो होतो, परमेश्वर यहोवा की या वानी हय।
EZE 29:21 “उच समय म इस्राएल को घराना म सामर्थ को एक सींग पैदा करूं, अऊर उन्को बीच म तोरो मुंह खोलूं। तब हि जान लेयेंन कि मय परमेश्वर आय।”
EZE 30:1 फिर परमेश्वर को यो वचन मोरो जवर पहुंच्यो :
EZE 30:2 “हे आदमी की सन्तान, भविष्यवानी कर क् कहो, परमेश्वर यहोवा यो कह्य हय :” विलाप करो अऊर कहो, हाय, हाय ऊ दिन पर!
EZE 30:3 कहालीकि ऊ दिन मतलब परमेश्वर को दिन जवर हय; ऊ बादलो को एक दिन होयेंन, अऊर राज्यों को सजा को समय होयेंन।
EZE 30:4 मिस्र देश पर तलवार चलेंन, अऊर जब मिस्र म लोग मारयो जायेंन, तब कूश देश म भी संकट पड़ेंन, लोग मिस्र देश ख लूट क लिजायेंन, अऊर ओकी नीव उलटाय दियो जायेंन।
EZE 30:5 कूशी, पूती, लूदी अऊर सब अरबी, अऊर कूब देशों को लोग, अऊर वाचा बान्ध्यो हुयो देश को निवासी, मिस्रियों को संग तलवार सी मारयो जायेंन।
EZE 30:6 “परमेश्वर यो कह्य हय : मिस्र देश ख सम्भालन वालो भी गिर जायेंन, अऊर अपनी जो सामर्थ पर मिस्री लोग घमण्ड करय हय, हि टूट जायेंन; मिग्दोल नगर सी ले क सवेने नगर तक ओको निवासी तलवार सी मारयो जायेंन, परमेश्वर यहोवा की या वानी हय।
EZE 30:7 हि उजड़्यो हुयो देशों को बीच उजड़्यो रहेंन, अऊर उन्को नगर खण्डर करयो हुयो नगरों म गिन्यो जायेंन।
EZE 30:8 जब मय मिस्र देश म आगी लगाऊं अऊर ओको सब मदतगार नाश होयेंन, तब हि जान लेयेंन कि मय परमेश्वर आय।
EZE 30:9 “ऊ समय मोरो सामने सी दूत जहाजों पर निडर होय क जायेंन अऊर कूश देश को लोगों ख डरायेंन; अऊर उन पर असो संकट आयेंन जसो की मिस्र देश को विनाश को समय ख देख; ऊ दिन आवय हय!
EZE 30:10 “परमेश्वर यहोवा यो कह्य हय : मय बेबीलोन को राजा नबूकदनेस्सर को हाथ सी मिस्र देश की भीड़-भाड़ को नाश कराय देऊं।
EZE 30:11 ऊ अपनी प्रजा समेत, जो सब राज्यों म भयानक हय, ऊ देश को नाश करन ख पहुंचायो जायेंन; अऊर हि मिस्र देश को खिलाफ तलवार उठायेंन अऊर पूरो देश ख लाशों सी भर देयेंन।
EZE 30:12 मय नदियों ख सुखाय डालूं, अऊर मिस्र देश ख बुरो लोगों को हाथ म सौप देऊं; अऊर मय परदेशियों को द्वारा देश ख, अऊर जो कुछ ओको म हय उजाड़ देऊं; मय परमेश्वर नच यो कह्यो हय।
EZE 30:13 “परमेश्वर यहोवा यो कह्य हय : मय मेम्फिस नगर म सी सब मूर्तियों को नाश करूं अऊर ओको म की सब मूर्तियों को अस्तित्व मिटाय देऊं; फिर कोयी मुखिया मिस्र देश म नहीं उठेंन; अऊर मय मिस्र देश म डर पैदा करूं।
EZE 30:14 मय पत्रोस नगर ख उजाड़ूं, अऊर सोअन नगर म आगी लगाऊं, अऊर नोप नगर ख सजा देऊं।
EZE 30:15 सीन नगर जो मिस्र को मजबूत गढ़ आय, ओको पर मय अपनी जलजलाहट भड़काऊं, अऊर नो नगर की भीड़ को अन्त कर डालूं।
EZE 30:16 मय मिस्र देश म आगी लगाऊं; सीन नगर बहुत थरथरायेंन; अऊर नो नगर की दीवाल तोड़ी जायेंन अऊर मेम्फिस नगर को विरोधी दिन दहाड़े उठेंन।
EZE 30:17 आवेन नगर अऊर पीवेसेत नगर को जवान तलवार सी मारयो जायेंन, अऊर हि नगर गुलामी म चली जायेंन।
EZE 30:18 जब मय मिस्रियों की शक्ति ख तहपन्हेस नगर म तोड़ूं, तब ओको म दिन ख अन्धारो होयेंन, अऊर ओकी सामर्थ जेको पर ऊ घमण्ड करय हय, ऊ नाश होय जायेंन; ओको पर बादर को ढग छाय जायेंन अऊर ओकी टुरियां गुलामी म चली जायेंन।
EZE 30:19 यो तरह मय मिस्रियों ख सजा देऊं। तब हि जान लेयेंन कि मय परमेश्वर आय।”
EZE 30:20 फिर ग्यारावों साल को पहिलो महिना को सातवों दिन परमेश्वर को यो वचन मोरो जवर पहुंच्यो :
EZE 30:21 “हे आदमी की सन्तान, मय न मिस्र देश को राजा फिरौन की भुजा तोड़ दियो हय; अऊर देख, नहीं वा जोड़ी गयी, नहीं ओको पर लेप लगाय क पट्टी बान्धी गयी कि ऊ बान्धन सी तलवार पकड़ को लायक बन सके।
EZE 30:22 येकोलायी प्रभु यहोवा यो कह्य हय : देख मय मिस्र को राजा फिरौन को खिलाफ हय, अऊर ओकी अच्छी अऊर टूटी दोयी भुजावों ख तोड़ डालूं; अऊर तलवार ख ओको हाथ सी गिराय देऊं।
EZE 30:23 मय मिस्रियों ख राज्य राज्य म तितर-बितर कर देऊं, अऊर देश देश म बिखेर देऊं।
EZE 30:24 मय बेबीलोन को राजा की भुजावों ख मजबूत कर क् अपनी तलवार ओको हाथ म देऊं; पर फिरौन की भुजावों ख तोड़ डालूं, अऊर ऊ बेबीलोन को राजा को सामने कराहेंन जसो मरन वालो व्यक्ति करावय हय।
EZE 30:25 मय बेबीलोन को राजा की भुजावों ख मजबूत करूं, अऊर फिरौन की भुजायें ढीली पड़ जायेंन, तब हि जानेंन कि मय परमेश्वर आय। जब मय बेबीलोन को राजा को हाथ म अपनी तलवार देऊं, तब ऊ ओख मिस्र देश पर चलायेंन;
EZE 30:26 अऊर मय मिस्र देश को लोगों ख राज्य राज्य म तितर-बितर कर देऊं अऊर देश देश म बिखेर देऊं। तब हि जान लेयेंन कि मय परमेश्वर आय।”
EZE 31:1 ग्यारावों साल को तीसरो महिना को पहिलो दिन ख परमेश्वर को यो वचन मोरो जवर पहुंच्यो :
EZE 31:2 “हे आदमी की सन्तान,” मिस्र को राजा फिरौन अऊर ओकी पूरी प्रजा सी कहो, तय अपनी बड़ायी कौन्को सी कर सकय हय।
EZE 31:3 देख, अश्शूर त लबानोन को देवदार को झाड़ को समान होतो जेकी सुन्दर सुन्दर डगाली होती, घनी छाव देत होती; कि वा बादर तक पहुंच जात होती।
EZE 31:4 पानी न ओख बढ़ायो, अऊर गहरो पानी को वजह ऊ ऊंचो भयो, जेकोसी नदियां ओकी जागा सी चारयी तरफ बहत होती; अऊर ओकी धारायें निकल क मैदान को पूरो झाड़ों को जवर पहुंचत होती।
EZE 31:5 यो वजह देवदार को झाड़ की ऊंचायी मैदान को सब झाड़ो सी जादा बड़ गयी; ओकी डगालियां बहुत बड़ गयी, अऊर ओकी डगाली लम्बी भय गयी, कहालीकि जब हि निकली, तब ओकी जड़ियों ख बहुत पानी मिल्यो।
EZE 31:6 ओकी डगालियों म आसमान को सब तरह को पक्षी बसेरा करत होतो, अऊर ओकी खांदियों को खल्लो मैदान को सब तरह को जीवजन्तु अपनो बच्चा देत होतो; अऊर ओकी छाया म सब बड़ी जातियां रहत होती।
EZE 31:7 ऊ अपनी ऊंचायी अऊर अपनी डगालियों की लम्बायी को वजह सुन्दर हय; कहालीकि ओकी जड़ी बहुत अन्दर पानी को जवर पहुंची होती।
EZE 31:8 परमेश्वर को बगीचा को देवदार को झाड़ भी ओकी बराबरी नहीं कर सकत होतो, अऊर सनौवर को झाड़ ओकी डगालियों को जसो नहीं होतो, अऊर नहीं अर्मोन झाड़ भी ओकी तुलना म नहीं होतो; परमेश्वर की बाड़ी को कोयी भी झाड़ ओकी सुन्दरता को बराबर नहीं होतो।
EZE 31:9 मय न ओख डगालियों की बहुतायत सी सुन्दर बनायो होतो, यहां तक कि अदन बगीचा को सब झाड़ जो परमेश्वर को बगीचा म होतो, ओको सी घृना करत होतो।
EZE 31:10 “यो वजह परमेश्वर यहोवा न यो कह्यो : ऊ झाड़ को का होयेंन जो बादर तक बढ़तो गयो, जब जब ऊ लम्बो होतो गयो, तब तब ओको घमण्ड बढ़तो गयो,
EZE 31:11 येकोलायी जातियों म जो बलवान हय, मय ओकोच हाथ म ओख सौंप देऊं, अऊर ऊ निश्चित ऊ झाड़ सी बुरो व्यवहार करेंन। ओकी दुष्टता को वजह मय न ओख निकाल दियो हय।
EZE 31:12 परदेशी, जो जातियों म क्रूर लोग हंय, हि ओख काट क छोड़ देयेंन, ओकी खांदियां अऊर डगाली देश को हर एक पहाड़ी अऊर घाटियों म गिरेंन। जितनी जातियां ओकी छाया म रहत होतो हि सब दूर होय जायेंन।
EZE 31:13 ऊ गिरयो हुयो झाड़ पर आसमान को सब पक्षी बसेरा करय हय, अऊर ओकी डगालियों को ऊपर सी मैदान को सब जीवजन्तु चलय हय।
EZE 31:14 अऊर येकोलायी अब सी कोयी भी झाड़, चाहे ऊ कितनो भी अच्छो तरह सी सिंच्यो गयो होना, फिर सी इतनो ऊंचो नहीं होयेंन यां बादर तक नहीं पहुंचेंन, कहालीकि हि सब को सब कब्र म गड़्यो हुयो आदमियों को समान मृत्यु को वश म कर क् अधोलोक म डाल दियो जायेंन।
EZE 31:15 “परमेश्वर यहोवा यो कह्य हय : जो दिन ऊ अधोलोक म चली जायेंन, ऊ दिन मय न विलाप करायो अऊर गहरो समुन्दर ख झाक दियो, अऊर नदियों को पानी रोक दियो; अऊर ओको वजह ओको विनाश ख देख क पूरो लबानोन नगर शोक म डुब जायेंन, अऊर मैदान को सब झाड़ मुरझाय जायेंन।
EZE 31:16 जब मय न ओख कब्र म गड़्यो हुयो को जवर अधोलोक म फेंक दियो, तब ओको गिरन की आवाज सी राज्य राज्य को लोग थरथराय गयो, अऊर अदन बगीचा को सब झाड़ मतलब लबानोन को अच्छो अच्छो झाड़ों न, जितनो झाड़ ओको सी भरपूर पानी पात होतो, उन सब न अधोलोक म शान्ति पायी।
EZE 31:17 हि भी ओको संग तलवार सी मारयो हुयो को जवर अधोलोक म खल्लो उतर गयो; जो हथियारबन्ध आदमी ओकी छाया म जाति जाति को लोगों को बीच रहत होतो, हि भी उन्को संग होतो।
EZE 31:18 “येकोलायी महिमा अऊर बड़ायी को बारे म अदन बगीचा को झाड़ों म सी तय कौन को समान हय? तय त अदन अऊर झाड़ों को संग अधोलोक म उतारयो जाजो, खतनाहीन लोगों को बीच तलवार सी मारयो हुयो को संग पड़्यो रह्यजो, फिरौन अपनी पूरी भीड़ भाड़ सहीत योच होयेंन, परमेश्वर यहोवा की या वानी हय।”
EZE 32:1 बारहवों साल को बारहवों महिना को पहलो दिन ख परमेश्वर को यो वचन मोरो जवर पहुंच्यो :
EZE 32:2 “हे आदमी की सन्तान,” मिस्र देश को राजा फिरौन को बारे म विलाप को गीत बनाय क ओख सुनाव : राज्य राज्य म तोरी उपमा जवान सिंह सी करी गयी होती, पर तय समुन्दर को मगर को समान हय; तय अपनी नदियों म फूस्काड़ मारय हय, अऊर ओको पानी ख पाय सी खुन्द क गन्दो करय हय।
EZE 32:3 परमेश्वर यहोवा यो कह्य हय : मय बहुत सी राज्यों कि एक बड़ी भीड़ को द्वारा तोरो पर अपनो जाल फैलाऊं अऊर हि तोख मोरो महाजाल म फसाय क बाहेर खींच लेयेंन।
EZE 32:4 तब मय तोख जमीन पर फेक देऊं, अऊर तोख मैदान म फेक क आसमान को सब पक्षियों ख तोरो पर बैठाऊं; अऊर जमीन को सब पशु तोरो मांस नोंच नोंच क खायेंन अऊर अपनो पेट भरेंन।
EZE 32:5 मय तोरो मांस ख पहाड़ियों पर बगराय देऊं, अऊर घाटियों ख तोरो बच्यो हुयो अंगों सी भर देऊं।
EZE 32:6 जो देश म तय तैरय हय, ओख पहाड़ियों तक मय तोरो खून सी सीचूं; अऊर उन्को नदी नाला तोरो खून सी भर जायेंन।
EZE 32:7 जो समय मय तोख जमीन की सतह सी मिटाय देऊं, ऊ समय मय आसमान ख झाक देऊं अऊर तारा ख धुन्धलो कर देऊं; मय सूरज ख बादर सी लूकाऊं, अऊर चन्दा अपनो उजाड़ो नहीं देयेंन।
EZE 32:8 आसमान म जितनी प्रकाशमान ज्योतियां हंय, उन सब ख मय तोरो वजह धुन्धलो कर देऊं, अऊर तोरो देश म अन्धकार कर देऊं, परमेश्वर यहोवा की या वानी आय।
EZE 32:9 “जब मय तोरो विनाश को समाचार राज्य राज्य म अऊर तोरो अनजानो देशों म फैलाऊं, तब बड़ो बड़ो देशों को लोगों को मन ख व्याकुल करूं।
EZE 32:10 मय बहुत सी राज्यों ख तोरो वजह भयभीत कर देऊं, अऊर जब मय उन्को राजावों को सामने अपनी तलवार भेजूं, तब तोरो वजह राजा डर सी कांप उठेंन, अऊर तोरो गिरन को दिन हि अपनो अपनो जीव को लायी कांपतो रहेंन।”
EZE 32:11 कहालीकि परमेश्वर यहोवा यो कह्य हय : बेबीलोन को राजा की तलवार तोरो पर चलेंन।
EZE 32:12 मय तोरी भीड़ ख असो शूरवीरों की तलवारों को द्वारा मार डालूं जो सब राज्यों म भयानक हंय। हि मिस्र देश को घमण्ड ख तोड़ेंन, अऊर ओकी पूरी भीड़ को सत्यानाश होयेंन।
EZE 32:13 मय ओको सब जनावरों ख ओको सब नदी-नालां को किनार पर सी नाश करूं; अऊर भविष्य म पानी ख गन्दो करन लायी अब कोयी लोग यां जनावर नहीं बचेंन।
EZE 32:14 तब मय उन्को पानी शुद्ध कर देऊं, अऊर उन्की नदियां तेल को समान बहेंन, परमेश्वर यहोवा की या वानी आय।
EZE 32:15 जब मय मिस्र देश ख उजाड़ देऊं जेकोसी हि भरपूर हय, ओको सी ओख वंचित कर देऊं, अऊर जब मय ओको सब रहन वालों ख मारूं, तब हि जान लेयेंन कि मय परमेश्वर आय।
EZE 32:16 “लोगों ख विलाप करन लायी विलाप को गीत योच आय; राष्ट्रों की टुरियां येख गायेंन; मिस्र देश अऊर ओकी पूरी भीड़ को बारे म हि योच विलाप गीत गायेंन, परमेश्वर यहोवा की या वानी आय।”
EZE 32:17 फिर बारहवों साल को पहिलो महिना को पन्द्रावों दिन ख परमेश्वर को यो वचन मोरो जवर पहुंच्यो :
EZE 32:18 “हे आदमी की सन्तान, मिस्र देश को लोगों को लायी शोक मनाव, अऊर उन्ख दूसरो शक्तिशाली राष्ट्रों को संग अधोलोक म भेज दे।
EZE 32:19 तय कौन्को सी सुन्दर हय?” तय मरयो हुयो की दुनिया म उतर क खतनाहीनों को संग पड़्यो रह्य।
EZE 32:20 “हि तलवार सी मरयो हुयो को बीच गिरेंन, उन्को लायी तलवारच ठहरायी गयी हय; येकोलायी मिस्र देश ख ओकी पूरी भीड़ समेत घसीट लिजावों।
EZE 32:21 बलवान शूरवीर ओको सी अऊर ओको सहायकों सी अधोलोक म बाते करेंन; हि खतनाहीन लोग वहां तलवार सी मारयो गयो हय।”
EZE 32:22 “अपनी पूरी सभा समेत अश्शूर भी वहां हय, ओकी कब्र ओको चारयी तरफ हय; सब को सब तलवार सी मारयो गयो हय।
EZE 32:23 ओकी कब्र अधोलोक को सब सी गहरो जागा म हय, अऊर ओकी कब्र को चारयी तरफ ओकी सैनिकों की कब्र हय; फिर भी हि सब को सब जीवनलोक की दुनिया ख डरावत होतो, अब तलवार सी मरयो पड़्यो हय।”
EZE 32:24 “वहां एलाम भी पड़्यो हय, अऊर ओकी कब्र को चारयी तरफ ओकी सैनिकों की कब्र हय; हि सब को सब तलवार सी मारयो गयो हंय, हि खतनारहित लोग अधोलोक म उतर गयो हय; हि जीवनलोक म डर फैलावय हय, पर अब कब्र म अऊर गड़्यो हुयो को संग उन्को मुंह पर अपमान को बोझ छायो हुयो हय।
EZE 32:25 ओकी पूरी भीड़ समेत एलाम ख मारयो हुयो को बीच कब्र मिली, ओको सैनिकों की कब्र ओकोच चारयी तरफ हंय, हि सब को सब खतनारहित तलवार सी मारयो गयो; उन्न जीवनलोक म डर फैलायो होतो, पर अब कब्र म अऊर गड़्यो हुयो को संग अपमान को बोझ साझा कर रह्यो हय; अऊर हि मरयो हुयो को बीच रख्यो गयो हय।”
EZE 32:26 “वहां पूरी भीड़ समेत मेशेक अऊर तूबल हंय, उन्को चारयी तरफ उन्को सैनिकों की कब्र हंय; हि सब को सब खतनारहित तलवार सी मारयो गयो, कहालीकि जीवनलोक म हि डर फैलावत होतो।
EZE 32:27 उन पूरानो गिरयो हुयो खतनारहित शूरवीरों को संग पड़्यो नहीं रहेंन जो अपनो अपनो हथियार लियो हुयो अधोलोक म उतर गयो हंय, वहां उन्की तलवारे उन्को मुंड को खल्लो रखी गयी हंय; अऊर उन्की ढाले उन्को शरीर पर रखी गयी हंय; कहालीकि जीवनलोक म भी मेशेक अऊर तूबल को सैनिकों को आतंक फैल्यो हुयो होतो।”
EZE 32:28 येकोलायी तय भी तुकड़ा तुकड़ा होय क तलवार सी मारयो हुयो को संग पड़्यो रहजो।
EZE 32:29 “वहां एदोम अऊर ओको राजा अऊर ओको पूरो मुखिया हंय, जो शक्तिशाली होन पर भी तलवार सी मरयो हुयो को संग रख्यो हंय; गड्डा म गड़्यो हुयो खतनारहित लोगों को संग हि भी पड़्यो रहेंन।”
EZE 32:30 “वहां उत्तर दिशा को पूरो मुखिया अऊर पूरो सीदोन को भी मुखिया हंय जो मरयो हुयो को संग अधोलोक म उतर गयो; उन्न अपनो पराक्रम सी डर फैलायो होतो, पर अब हि लज्जित भयो हय अऊर तलवार सी अऊर मरयो हुयो को संग हि भी खतनारहित पड़्यो हुयो हंय, अऊर कब्र म दूसरो गड़्यो हुयो को संग अपमान को बोझ उठाय रह्यो हय।
EZE 32:31 “इन्ख देख क फिरौन ख भी अपनी पूरी भीड़ को बारे म शान्ति मिलेंन, फिरौन अऊर ओकी पूरी सेना जो तलवार सी मारी गयी हय, परमेश्वर यहोवा की या वानी आय।”
EZE 32:32 “कहालीकि मय न ओको वजह जीवनलोक म डर फैलायो होतो; येकोलायी वा पूरी भीड़ समेत तलवार सी अऊर मरयो हुयो समेत खतनारहितों को बीच दफनायो जायेंन, परमेश्वर यहोवा की या वानी आय।”
EZE 33:1 परमेश्वर को यो वचन मोरो जवर पहुंच्यो :
EZE 33:2 “हे आदमी की सन्तान,” अपनो लोगों सी कहो, जब मय कोयी देश पर तलवार चलावन लगू अऊर ऊ देश को लोग कोयी ख अपनो पहरेदार कर क् ठहरायेंन,
EZE 33:3 तब यदि ऊ यो देख क कि यो देश पर तलवार चलावन वालो हय, नरसिंगा फूक क चेतावनी दे,
EZE 33:4 तब जो कोयी नरसिंगा को आवाज सुन क ओको पर ध्यान नहीं देयेंन अऊर तलवार को आक्रमन सी ऊ मर जायेंन, त ओको खून ओकीच मुंड पर पड़ेंन।
EZE 33:5 ओन नरसिंगा को आवाज सुन्यो, पर ध्यान नहीं दियो; येकोलायी ओको खून ओकीच मुंड पर पड़ेंन। पर यदि ऊ ध्यान देतो, त अपनो जीव बचाय लेतो।
EZE 33:6 पर यदि पहरेदार यो देखन पर कि आक्रमन होन वालो हय नरसिंगा फूक क लोगों ख नहीं चिताये, अऊर दुश्मन की तलवार चलन पर उन म सी कोयी मर जाये, त मरन वालो अपनो अधर्म को वजह मर जायेंन, पर मय ओको खून को लायी ऊ पहरेदार ख जिम्मेदार ठहराऊं।
EZE 33:7 “येकोलायी, हे आदमी की सन्तान, मय न तोख इस्राएल को घराना को पहरेदार ठहराय दियो हय; येकोलायी जो बात मय तोरो सी कहू हय, ओख सुन अऊर उन्ख मोरो तरफ सी सावधान कर।
EZE 33:8 यदि मय बुरो आदमी सी कहू, ‘हे बुरो आदमी, तय जरूर मरजो,’ तब यदि तय बुरो आदमी को ओको रस्ता को बारे म नहीं चितायजो, कि ऊ अपनो रस्ता बदले, कि ऊ अपनो जीव बचाये, त ऊ पापी होय क मरच जायेंन, अऊर मय ओकी मृत्यु को लायी तोख दोषी ठहराऊं।
EZE 33:9 यदि तय कोयी बुरो आदमी ख चितायजो, अऊर ऊ पाप करनो नहीं छोड़ेंन, त ऊ पापी होय क मर जायेंन, पर तोरो जीव बचाय लेयेंन।”
EZE 33:10 “फिर हे आदमी की सन्तान, इस्राएल को घराना सी यो कहो, तुम लोग कह्य हय : ‘हमरो अपराधों अऊर पापों को बोझ सी दब्यो हुयो हय अऊर हम ओको वजह नाश होय रह्यो हय; हम कसो जीन्दो रह्य सकजे हय?’
EZE 33:11 येकोलायी तय उन्को सी यो कह्य, परमेश्वर यहोवा की या वानी आय : मोरो जीवन की कसम, पापियों को मरन सी मोख खुशी नहीं होवय, पर पाप करनो छोड़े अऊर जीन्दो रहे; हे इस्राएल को घराना, तुम अपनो अपनो बुरो रस्ता सी फिर जावो; तुम कहाली मरनो चाहवय हय?
EZE 33:12 “हे आदमी की सन्तान,” अपनो लोगों सी यो कहो, जब धर्मी जन अपराध करे तब ओको धर्म ओख बचाय नहीं सकेंन, दुष्ट की दुष्टता जो भी होना, जब ऊ ओको सी फिर जाये, त ओख सजा नहीं मिलेंन; अऊर धर्मी जन, यदि ऊ पाप करे, त अपनो अधर्म को वजह नहीं बचेंन।
EZE 33:13 यदि मय धर्मी सी कहू कि तय जरूर जीन्दो रहजो, अऊर ऊ अपनो धर्म पर भरोसा कर क् कुटिल काम करन लगेंन, तब ओको धर्म को कामों म सी कोयी ख याद नहीं करयो जायेंन; जो ओन कुटिल काम करयो हय ओकोच म फस्यो हुयो मरेंन।
EZE 33:14 फिर जब मय बुरो आदमी सी कहू, तय जरूर मरजो, पर ऊ अपनो पापों सी मन फिरावय हय अऊर उच करय हय जो सही अऊर न्याय अऊर धर्म को काम करय हय,
EZE 33:15 यदि बुरो आदमी कर्ज लौटाय दे, अऊर अपनी लूटी हुयी चिज वापस दे दे, बिना कुटिल काम करयो जीवनदायक विधियों पर चलन लगेंन, त ऊ नहीं मरेंन; ऊ जरूर जीन्दो रहेंन।
EZE 33:16 जितनो पाप ओन करयो हय, उन म सी कोयी ख याद नहीं करयो जायेंन; ओन न्याय अऊर धर्म को काम करयो हय ऊ जरूर जीन्दो रहेंन।
EZE 33:17 “तब भी तुम्हरो लोग कह्य हय, प्रभु को व्यवहार ठीक नहाय; पर उन्कोच व्यवहार ठीक नहाय।
EZE 33:18 जब धर्मी अपनो धर्म सी फिर क कुटिल काम करन लगेंन, त ऊ ओको वजह जरूर मरेंन।
EZE 33:19 जब बुरो आदमी अपनी दुष्टता सी फिर क न्याय अऊर धर्म को काम करन लगेंन, तब ऊ उन्को वजह जीन्दो रहेंन।
EZE 33:20 हे इस्राएल तब भी तुम कह्य हय, ‘प्रभु जो करय हय ठीक नहाय?’ पर मय हर एक आदमी को न्याय ओको कामों को अनुसार करूं।”
EZE 33:21 फिर हमरो बन्धुवायी को ग्यारहवों साल को दसवों महिना को पाचवों दिन ख, एक आदमी जो यरूशलेम सी भग क बच गयो होतो, ऊ मोरो जवर आय क कहन लग्यो, “यरूशलेम नगर नाश भय गयो।”
EZE 33:22 ऊ आदमी को आवन सी पहिली शाम ख परमेश्वर की सामर्थ मोरो पर प्रबल भयी होती; जब ऊ आदमी सुबेरे आयो, तब ओन मोरो मुंह खोल दियो; अऊर मोरो मुंह; खुल गयो, अऊर मोरो मूक्कापन दूर भय गयो।
EZE 33:23 तब परमेश्वर को यो वचन मोरो जवर पहुंच्यो :
EZE 33:24 “हे आदमी की सन्तान, इस्राएल की जमीन को उन खण्डरों म रहन वालो यो कह्य हय, ‘अब्राहम त एकच आदमी होतो, तब भी देश को अधिकारी होतो; पर हम बहुत सो लोग हय, येकोलायी देश हमरोच अधिकार म दियो गयो हय।’”
EZE 33:25 “यो वजह तय उन्को सी कह्य, परमेश्वर यहोवा यो कह्य हय : तुम लोग खून समेत मांस खावय हय अऊर अपनी मूर्तियों को तरफ नजर कर क् हत्या करय हय; तब का तुम ऊ देश पर अधिकार कर पावों?
EZE 33:26 तुम अपनी तलवार पर भरोसा करय हय, तुम घृणित काम करय हय, अऊर अपनी पड़ोसी की पत्नि ख अशुद्ध करय हय : तब का तुम ऊ देश पर अधिकार कर सको?”
EZE 33:27 तय उन्को सी यो कह्य, परमेश्वर यहोवा यो कह्य हय : मोरो जीवन की कसम, जो लोग उजड़्यो हुयो नगर म रह्य हय, हि तलवार सी मारयो जायेंन, अऊर जो खुलो मैदान म रह्य हय, उन्ख मय जंगली जनावर को आहार बनाय देऊं, अऊर जो पहाड़ी अऊर गुफावों म रह्य हय, हि महामारी सी मरेंन।
EZE 33:28 मय ऊ देश ख उजाड़च उजाड़ कर देऊं; अऊर जो शक्ति पर हि घमण्ड करत होतो ओको अन्त होय जायेंन; अऊर इस्राएल देश को पहाड़ इतनो उजाड़ होय जायेंन कि वहां सी होय क कोयी भी नहीं जायेंन।
EZE 33:29 येकोलायी जब मय उन लोगों को लायी सब करयो गयो घिनौनो कामों को वजह ऊ देश ख उजाड़च उजाड़ कर देऊं, तब हि जान लेयेंन कि मय परमेश्वर आय।
EZE 33:30 “हे आदमी की सन्तान, तोरो लोग दीवालों को जवर अऊर घरों को दरवाजा म तोरो बारे म बाते करतो हुयो एक दूसरो सी कह्य हय, ‘आवो अऊर ऊ सन्देश ख सुनो, कि परमेश्वर को तरफ सी कौन सो वचन निकलय हय।’
EZE 33:31 हि प्रजा को समान आवय हय अऊर मोरी प्रजा बन क तोरो सामने बैठ क तोरो वचन सुनय हंय, पर हि उन पर चलय नहाय; मुंह सी त हि बहुत प्रेम दिखावय हंय, पर उन्को मन लालच मच लग्यो रह्य हय।
EZE 33:32 तय उन्की नजर म प्रेम को मधुर गीत गावन वालो अऊर बजावन वालो ठहरयो हय, कहालीकि हि तोरो वचन सुनय त हंय, पर उन पर चलय नहाय।
EZE 33:33 येकोलायी जब या बात पूरी होयेंन, अऊर वा जरूर पूरी होयेंन! तब हि जान लेयेंन कि हमरो बीच एक भविष्यवक्ता आयो होतो।”
EZE 34:1 परमेश्वर को यो वचन मोरो जवर पहुंच्यो :
EZE 34:2 “हे आदमी की सन्तान,” इस्राएल को चरवाहों को खिलाफ भविष्यवानी कर क् उन चरवाहों सी कह्य, परमेश्वर यहोवा यो कह्य हय : धिक्कार हय इस्राएल को चरवाहों पर जो अपनो अपनो पेट भरय हंय! का चरवाहों ख मेंढि-शेरियों को पेट नहीं भरनो चाहिये?
EZE 34:3 तुम लोग दही खावय हय, ऊन को कपड़ा पहिनय हय, अऊर मोटो ताजो पशुवों ख खावय हय; पर मेंढी-शेरियों ख तुम नहीं चरावय हय।
EZE 34:4 तुम न कमजोरों ख बलवान नहीं बनायो, नहीं रोगियों ख चंगो करयो, घायलों को घावों पर मलम-पट्टी नहीं बान्धी, तुम भटक्यो हुयो ख सही रस्ता पर नहीं लायो, नहीं घुमी हुयी ख ढूंढ्यो, पर तुम न जोर-जबरदस्ती सी शासन करयो हय।
EZE 34:5 हि चरवाहा को नहीं होन को वजह तितर-बितर भय गयी; अऊर सब जंगली जनावरों को आहार बन गयी।
EZE 34:6 मोरी मेंढी-शेरियां तितर-बितर भय गयी हंय; हि पहाड़ों पर अऊर ऊंचो ऊंचो पहाड़ियों पर भटकती रही; मोरी मेंढी-शेरियां धरती को सब देशों म तितर-बितर भय गयी हय; अऊर नहीं कोयी उन्की सुधि लेत होतो, अऊर नहीं कोयी उन्ख ढूंढत होतो।
EZE 34:7 “यो वजह, हे चरवाहों, परमेश्वर को यो वचन सुनो :
EZE 34:8 परमेश्वर यहोवा की या वानी आय, मोरो जीवन की कसम, मोरी मेंढी-शेरियां जो लूट गयी हय, अऊर मोरी मेंढी-शेरियां जो चरवाहा को नहीं होन को वजह सब जंगली जनावरों को आहार भय गयी हय; अऊर येकोलायी कि मोरो चरवाहों न मोरी मेंढी-शेरियों की सुधि नहीं ली, अऊर मोरी मेंढी-शेरियों को पेट नहीं भरयो, बल्की अपनोच पेट भरयो;
EZE 34:9 यो वजह हे चरवाहों, परमेश्वर को यो वचन सुनो,”
EZE 34:10 परमेश्वर यहोवा यो कह्य हय : देखो, मय चरवाहों को खिलाफ हय; अऊर मय उन्को सी अपनी मेंढी-शेरियों को लेखा लेऊं, अऊर उन्ख फिर कभी चरावन नहीं देऊं; हि फिर अपनो अपनो पेट नहीं भर पायेंन। मय अपनी मेंढी-शेरियां उन्को मुंह सी छुड़ाऊं कि हि फिर उन्को आहार नहीं होयेंन।
EZE 34:11 “कहालीकि परमेश्वर यहोवा यो कह्य हय : देखो, मय खुदच अपनी मेंढी-शेरियों की सुधि लेऊं, अऊर उन्ख ढूंढूं।
EZE 34:12 जसो चरवाहा अपनी मेंढी-शेरियों म सी भटकी हुयी ख फिर सी अपनो झुण्ड म जमा करय हय, वसोच मय भी अपनी मेंढी-शेरियों ख जमा करूं; मय उन्ख हि सब जागावों म सी वापस लाऊं, जहां हि बादर अऊर घोर अन्धकार को दिन तितर-बितर भय गयी होती।
EZE 34:13 मय उन्ख देश देश को लोगों म सी निकाल लाऊं, अऊर देश देश सी जमा करूं, अऊर उन्कीच निजी जमीन म ले आऊं; अऊर इस्राएल को पहाड़ियों पर अऊर नालां म अऊर उन देश को जागावों म चराऊं जहां लोग बस्यो हुयो हय।
EZE 34:14 मय उन्ख अच्छी हरी चराइयों म चराऊं, अऊर इस्राएल को ऊंचो ऊंचो पहाड़ियों पर उन्ख अच्छी चराइ मिलेंन; वहां हि अच्छी हरियाली म बैठ्यो करेंन, अऊर इस्राएल को पहाड़ो पर अच्छी सी अच्छी चराइ चरेंन।
EZE 34:15 मय खुदच अपनी मेंढी-शेरियों को चरवाहा होऊं, अऊर मय खुदच उन्ख आराम कराऊं, परमेश्वर यहोवा की या वानी आय।
EZE 34:16 “मय घुमी हुयी ख ढूंढूं, अऊर भटकी हुयी ख वापस लाऊं, अऊर घायल को घाव ख मलम-पट्टी करूं, अऊर जो कमजोर हय उन्ख बलवान बनाऊं अऊर जो मोटो अऊर बलवान हय उन्ख नाश करूं; मय न्याय को संग झुण्ड की देखभाल करूं।”
EZE 34:17 “हे मोरो झुण्ड, तुम सी परमेश्वर यहोवा यो कह्य हय : देखो, मय एक मेंढी अऊर दूसरी मेंढी को बीच अऊर मेंढा अऊर बकरा को बीच न्याय करूं।
EZE 34:18 का तुम्हरो लायी यो अच्छो नहाय कि तुम अच्छो चारागाह म चरो? का जरूरी हय कि अपनो बच्यो हुयो चारागाह ख अपनो पाय सी रौंद डालो? का साफ पानी पीनो तुम्हरो लायी अच्छो नहाय? अऊर बच्यो पानी ख अपनो पाय सी गन्दो करो?
EZE 34:19 का तुम मोरी मेंढी-शेरियों ख तुम्हरो पाय सी रौंद्यो हुयो घास ख खायेंन, अऊर तुम्हरो पाय सी गन्दो करयो हुयो पानी ख पीनो पड़ेंन?”
EZE 34:20 “यो वजह परमेश्वर यहोवा यो कह्य हय : देखो, मय खुद मोटी अऊर दुबली मेंढी-शेरियों को बीच न्याय करूं।”
EZE 34:21 तुम जो सब बीमारों ख अपनो अंग सी अऊर अपनो सींग सी यहां तक मारय हय कि हि दूर नहीं चली जावय हय,
EZE 34:22 यो वजह मय अपनी मेंढी-शेरियों ख छुड़ाऊं, अऊर उन पर फिर अत्याचार नहीं होन देऊं, अऊर मय मेंढी-मेंढी अऊर शेरी-शेरी को बीच न्याय करूं।
EZE 34:23 मय उन पर एक असो चरवाहा ठहराऊं जो उन्ख चरायेंन, ऊ मोरो दास दाऊद होयेंन, उच उन्ख चरायेंन, अऊर उच उन्को चरवाहा होयेंन।
EZE 34:24 मय प्रभु, उन्को परमेश्वर ठहरूं, अऊर मोरो दास दाऊद उन्को बीच मुखिया होयेंन; मय परमेश्वरनच यो कह्यो हय।
EZE 34:25 “मय उन्को बीच शान्ति की वाचा बान्धूं, अऊर मय बुरो जनावरों ख देश म सी निकाल देऊं; ताकी हि खेतों म सुरक्षित रहेंन, अऊर जंगल म सोयेंन।”
EZE 34:26 मय उन्ख अऊर अपनी पवित्र पहाड़ी को आजु बाजू को जागावों ख आशीर्वादित करूं; अऊर बारीश ख ठीक समय पर बरसाऊं; अऊर हि आशीषों की बारीश होयेंन।
EZE 34:27 मैदान को झाड़ फरेंन अऊर खेत अपनी फसल उपजायेंन, अऊर हर एक व्यक्ति अपनो देश म निडर होय क रहेंन; जब मय उन्को गुलामी को जंजीर तोड़ डालूं अऊर उन लोगों को हाथ सी उन्ख छुड़ाऊं, जिन्न उन्ख गुलाम बनायो होतो, तब हि जान लेयेंन कि मय परमेश्वर आय।
EZE 34:28 हि फिर दूसरो राज्य सी लूट्यो नहीं जायेंन, अऊर नहीं उन्ख जंगली जनावर मार क खायेंन; हि निडर रहेंन, अऊर उन्ख कोयी नहीं डरायेंन।
EZE 34:29 मय उन्को लायी उपजाऊ जमीन देऊं, अऊर हि देश म भूखो नहीं मरेंन, अऊर नहीं राज्य राज्य को लोग फिर उन्को मजाक उड़ायेंन।
EZE 34:30 हि जान लेयेंन कि मय परमेश्वर यहोवा, उन्को संग हय, अऊर हि जो इस्राएल को घराना हंय, हि मोरी प्रजा आय, मय परमेश्वर यहोवा की या वानी हय।
EZE 34:31 “तुम त मोरी मेंढी-शेरियां, मोरी चराइ की मेंढी-शेरियां आय, तुम त आदमी आय, अऊर मय तुम्हरो परमेश्वर आय, परमेश्वर यहोवा की या वानी आय।”
EZE 35:1 परमेश्वर को यो वचन मोरो जवर पहुंच्यो :
EZE 35:2 “हे आदमी की सन्तान, अपनो मुंह सेईर पहाड़ी को तरफ कर क् ओको खिलाफ भविष्यवानी कर,
EZE 35:3 अऊर ओको सी कह्य, परमेश्वर यहोवा यो कह्य हय :” हे सेईर पहाड़ी, मय तोरो खिलाफ हय; मय अपनो हाथ तुम्हरो खिलाफ बढ़ाऊं अऊर उजाड़ जमीन बनाय देऊं।
EZE 35:4 मय तोरो नगरों ख खण्डर बनाय देऊं, अऊर तय उजाड़ होय जाजो; तब तय जान लेजो कि मय परमेश्वर आय।
EZE 35:5 कहालीकि तय पुरानो समय सी इस्राएलियों को संग दुश्मनी रखत होतो, अऊर ओकी विपत्ति को समय जब उन्को अधर्म को समय आयो, तब उन्ख तलवार सी मार डाल्यो गयो होतो।
EZE 35:6 येकोलायी परमेश्वर यहोवा की या वानी हय : मोरो जीवन की कसम, मय तोख हत्या को लायी तैयार करूं अऊर हत्या को खून तोरो पीछा करेंन; तुम्ख त खून सी घृना नहाय, यो वजह हत्या को खून तोरो पीछा करेंन।
EZE 35:7 यो रीति सी मय सेईर पहाड़ी देश ख उजाड़ कर देऊं, अऊर जो कोयी ओको म सी होय क जायेंन, मय ओख मार डालूं।
EZE 35:8 मय ओको पहाड़ियों ख लोथों सी भर देऊं; तोरो टीला, घाटी अऊर सब नालां म युद्ध म मरयो हुयो लोगों को लोथों सी भर देऊं।
EZE 35:9 मय तोख हमेशा लायी उजाड़ देऊं, अऊर तुम्हरो नगरों म फिर कोयी नहीं बसेंन। तब तुम जान लेवो कि मय परमेश्वर आय।
EZE 35:10 “कहालीकि तय न कह्यो हय, ‘हि दोयी राज्य अऊर हि दोयी देश यहूदा अऊर इस्राएल मोरोच आय; अऊर हमच उन्को अधिकारी होय जाबोंन,’ पर मय परमेश्वर वहां होतो।
EZE 35:11 यो वजह, परमेश्वर यहोवा की या वानी हय, मोरो जीवन की कसम, तोरो कोप को अनुसार, अऊर जो जलजलाहट तय म उन पर अपनी दुश्मनी को वजह करी हय, ओकोच अनुसार मय तोरो सी बर्ताव करूं, अऊर जब मय तोरो न्याय करूं, तब तुम म अपनो आप ख प्रगट करूं।
EZE 35:12 तब तय जानजो कि मय परमेश्वर न तोरी सब तिरस्कार की बाते सुनी हय, जो तय न इस्राएल को पहाड़ियों को बारे म कह्यो हय, ‘हि त उजड़ गयो, हि हम्खच दियो गयो हंय कि हम उन्ख हड़प डाले।’
EZE 35:13 तुम न अपनो मुंह सी बड़ी बड़ी बाते करी, अऊर मोरो खिलाफ बहुत बाते कहीं हय; येख मय न सुन्यो हय।”
EZE 35:14 परमेश्वर यहोवा यो कह्य हय : जब पूरी धरती खुशी मनायेंन, तब मय तोख उजाड़ देऊं।
EZE 35:15 तय इस्राएल को घराना को निजी हिस्सा को उजड़ जान को वजह खुश भयो हय, येकोलायी मय भी तोरो सी वसोच करूं; हे सेईर पहाड़, हे एदोम को पूरो देश, तय उजड़ जाजो। तब हि जान लेयेंन कि मय परमेश्वर आय।
EZE 36:1 “फिर हे आदमी की सन्तान, तय इस्राएल को पहाड़ियों सी भविष्यवानी कर क् कह्य, हे इस्राएल को पहाड़ों, परमेश्वर को वचन सुनो।
EZE 36:2 परमेश्वर यहोवा यो कह्य हय : दुश्मन न त हमरो बारे म कह्यो हय, ‘आहा! प्राचीनकाल को ऊंची पहाड़ियां अब हमरो अधिकार म आय गयी हय।’”
EZE 36:3 येकोलायी भविष्यवानी कर क् कहो, परमेश्वर यहोवा यो कह्य हय : लोगों न तुम पर कब्जा कर लियो अऊर तुम्ख लूट लियो कि तुम बची हुयी राज्यों को अधिकार म भय गयो, अऊर तुम्हरी बुरी बुरी बाते करय अऊर साधारन लोग तुम्हरी निन्दा करय हंय;
EZE 36:4 यो वजह, हे इस्राएल को पहाड़ों, परमेश्वर यहोवा को वचन सुनो, परमेश्वर यहोवा तुम सी यो कह्य हय : मतलब पहाड़ों अऊर पहाड़ियों सी अऊर नालां अऊर घाटियों सी, अऊर उजड़्यो हुयो खण्डरों अऊर निर्जन नगरों सी जो चारयी तरफ की बची हुयी राज्यों सी जो लूट गयी हय अऊर उन्को मजाक उड़ावन को वजह बन गयो हय;
EZE 36:5 परमेश्वर यो कह्य हय : निश्चय मय न अपनी ज्वाला की आगी म बची हुयी राज्यों अऊर एदोम को खिलाफ म कह्यो हय कि जिन्न मोरो देश ख उल्लास अऊर तिरस्कार को संग उन्न मोरी जमीन पर अधिकार कर लियो अऊर ओको चारागाह ख लूट लियो।
EZE 36:6 यो वजह इस्राएल को देश को बारे म भविष्यवानी कर क् पहाड़ों, पहाड़ियों, नालां, घाटियों सी कहो, परमेश्वर यो कह्य हय : देखो, तुम न राज्य राज्य को लोगों की निन्दा सही हय, यो वजह मय न अपनी बड़ी जलजलाहट को वजह बोल्यो हय।
EZE 36:7 परमेश्वर यहोवा यो कह्य हय : मय न या कसम खायी हय कि तुम्हरी चारयी तरफ जो राज्य हय, उन्ख भी अपनी निन्दा खुद खच सहनो पड़ेंन।
EZE 36:8 “पर हे इस्राएल को पहाड़ों, तुम म सी नयी नयी डगाली निकलेंन अऊर उन म फर मोरी प्रजा इस्राएल को लोगों को लायी लगेंन; कहालीकि उन्को घर लौटनो जवर हय।
EZE 36:9 देखो, मय तुम्हरो पक्ष म हय, अऊर तुम्हरो तरफ कृपादृष्टि करूं, कि तुम्हरी जमीन फिर सी जोती जाये अऊर ओको पर बीज बोयो जाये;
EZE 36:10 अऊर मय तुम पर इस्राएल को पूरो घराना को बहुत सो लोगों ख बसाऊं; अऊर नगर ख फिर सी बनायो जायेंन।
EZE 36:11 मय तुम पर आदमी अऊर जनावर दोयी ख बहुत बढ़ाऊं; अऊर हि बढ़ेंन अऊर फलवन्त होयेंन; अऊर मय तुम्ख पहिलो को समय को जसो बसाऊं, अऊर पहिले सी जादा तुम्हरी भलायी करूं। तब तुम जान लेवो कि मय परमेश्वर आय।
EZE 36:12 मय असो करूं कि लोग मतलब मोरी प्रजा इस्राएल तुम म बसेंन; अऊर हि तुम्हरो अधिकारी होयेंन, अऊर तुम उन्को निजी हिस्सा होय जावो, अऊर हि तुम्हरो बच्चां ख भूखो नहीं रहन देयेंन।”
EZE 36:13 “परमेश्वर यहोवा यो कह्य हय : जो लोग तुम्हरो बारे म कह्य हय, ‘तय लोगों ख खाय जावय हय अऊर अपनो राज्य ख ओको बच्चां सी वंचित कर देवय हय,’
EZE 36:14 येकोलायी अब तय आदमियों ख नहीं खाजो, अऊर नहीं अपनो राज्य ख ओकी सन्तान सी वंचित करजो, परमेश्वर यहोवा की या वानी हय।
EZE 36:15 मय फिर तोख राज्य को लोगों सी तोख निन्दा नहीं सुननो पड़ेंन, अऊर फिर तुम्ख लोगों सी अपमान नहीं सहनो पड़ेंन, अऊर तोरो पर बस्यो हुयो राज्य को नाश नहीं होन देजो, परमेश्वर यहोवा की या वानी हय।”
EZE 36:16 फिर परमेश्वर को यो वचन मोरो जवर पहुंच्यो :
EZE 36:17 “हे आदमी की सन्तान, जब इस्राएल को घराना अपनो देश म रहत होतो, तब अपनो चालचलन अऊर कामों को द्वारा हि ओख अशुद्ध करत होतो; मोरी नजर म उन्को चालचलन एक बाई को मासिक धर्म अशुद्धता को जसी होती।
EZE 36:18 येकोलायी जो हत्या उन्न देश म करी, अऊर देश ख अपनी मूर्तियों को द्वारा अशुद्ध करयो, यो वजह मय न उन पर अपनो क्रोध भड़कायो।
EZE 36:19 मय न उन्ख राज्य म तितर-बितर कर दियो, अऊर हि देश देश म बिखर गयो; उन्को चालचलन अऊर कामों को अनुसार मय न उन्को न्याय करयो।
EZE 36:20 पर हि उन देशों म पहुंच्यो जिन म हि पहुंचायो गयो, तब उन्न मोरो पवित्र मान ख अपवित्र करयो, कहालीकि लोग उन्को बारे म कहन लग्यो, ‘हि परमेश्वर को लोग आय, पर ओको देश सी निकाल्यो गयो हंय।’
EZE 36:21 पर मय न अपनो नाम की सुधि ली, कहालीकि इस्राएल को लोग जहां जहां जात होतो वहां मोरो पवित्र नाम ख अपवित्र करत होतो।
EZE 36:22 “यो वजह तय इस्राएल को घराना सी कहो, परमेश्वर यहोवा यो कह्य हय : हे इस्राएल को घराना, मय येख तुम्हरो निमित्त नहीं, पर अपनो पवित्र नाम को निमित्त करू हय जेख तुम न उन देशों म अपवित्र ठहरायो होतो जहां तुम गयो होतो।
EZE 36:23 मय अपनो बड़ो नाम ख पवित्र ठहराऊं, कहालीकि ऊ दूसरो राज्यों म अपवित्र ठहरायो गयो हय, जेख तुम न उन्को बीच म अपवित्र करयो हय; अऊर जब मय उन्को सामने तुम्हरो बीच अपनी पवित्रता ख सिद्ध करू हय, तब सब राज्य जान लेयेंन कि मय परमेश्वर आय, परमेश्वर यहोवा की या वानी आय।
EZE 36:24 मय तुम्ख अलग अलग राज्यों म सी निकालूं, अऊर सब देशों म सी जमा करूं; अऊर तुम्ख तुम्हरो देश म फिर सी पहुंचाय देऊं।
EZE 36:25 मय तुम पर शुद्ध पानी छिड़कूं, अऊर तुम शुद्ध होय जावो; अऊर मय तुम्ख तुम्हरी पूरी अशुद्धता अऊर मूर्तियों सी शुद्ध करूं।
EZE 36:26 मय तुम्ख नयो मन देऊं, अऊर तुम्हरो अन्दर नयी आत्मा पैदा करूं, अऊर तुम्हरो दिल म सी गोटा को दिल निकाल क तुम्ख मांस को दिल देऊं।
EZE 36:27 मय अपनी आत्मा तुम्हरो अन्दर दे क असो करूं कि तुम मोरी विधियों पर चलो अऊर मोरो नियमों ख मान क उन्को अनुसार करो।
EZE 36:28 तुम ऊ देश म बस जावो जो मय न तुम्हरो पूर्वजों ख दियो होतो; अऊर तुम मोरी प्रजा ठहरो, अऊर मय तुम्हरो परमेश्वर ठहरूं।
EZE 36:29 मय तुम्ख तुम्हरी पूरी अशुद्धता सी छुड़ाऊं, अऊर अनाज उपजावन की आज्ञा दे क, ओख बढ़ाऊं अऊर तुम्हरो बीच अकाल नहीं लाऊं।
EZE 36:30 मय झाड़ को फर अऊर खेत की उपज बढ़ाऊं, कि राज्यों म अकाल को वजह फिर तुम्हरी नामधरायी नहीं होयेंन।
EZE 36:31 तब तुम अपनो बुरो चालचलन अऊर अपनो कामों ख जो अच्छो नहीं होतो, याद कर क् अपनो अधर्म अऊर घिनौनो कामों को वजह अपनो आप सी घृना करो।
EZE 36:32 परमेश्वर यहोवा की या वानी आय, तुम जान लेवो कि मय येख तुम्हरो वजह नहीं करू। हे इस्राएल को घराना अपनो चालचलन को बारे म तुम लज्जित होय जावो अऊर तुम्हरो मुंह कारो होय जाये।
EZE 36:33 “परमेश्वर यहोवा यो कह्य हय : जब मय तुम्ख तुम्हरो सब अधर्म को कामों सी शुद्ध करूं, तब तुम्हरो नगरों ख बसाऊं; अऊर तुम्हरो खण्डरों ख फिर सी बनाऊं।
EZE 36:34 तुम्हरो देश जो सब आन जान वालो को सामने उजाड़ पड़्यो हय, ऊ उजाड़ होन को वजह फिर सी जोत्यो अऊर बोयो जायेंन।
EZE 36:35 लोग कहतो रहेंन, ‘यो देश जो उजाड़ होतो, ऊ अदन को बगीचा जसो भय गयो हय, अऊर जो नगर खण्डर अऊर उजाड़ भय गयो अऊर गिर गयो होतो, हि आबाद भय गयो, उन म गढ़ बनायो गयो।
EZE 36:36 तब जो राज्य तुम्हरो आजु-बाजू बच्यो रहेंन, हि जान लेयेंन कि मय परमेश्वर न गिरयो हुयो नगरों ख फिर सी बनायो, अऊर जो उजाड़ भय गयो होतो उन म झाड़ लगायो गयो हय, मय परमेश्वर न यो कह्यो हय, अऊर असोच करूं।’”
EZE 36:37 “परमेश्वर यहोवा यो कह्य हय : इस्राएल को घराना म फिर मोरो बिन्ती करी जायेंन कि मय उन्को लायी यो करू; अऊर मय उन आदमी की संख्या मेंढी-शेरियों को समान बढ़ाऊं।
EZE 36:38 जसो पवित्र समयों की मेंढी-शेरियां, मतलब नियमित त्यौहारों को समय यरूशलेम की मेंढी-शेरियां अनगिनत होवय हय वसोच जो नगर अब खण्डर हय हि अनगिनत आदमियों को झुण्डों सी भरयो जायेंन। तब हि जान लेयेंन कि मय परमेश्वर आय।”
EZE 37:1 परमेश्वर की सामर्थ मोरो पर प्रबल भयी। परमेश्वर न अपनी आत्मा को द्वारा मोख बाहेर निकाल्यो अऊर घाटी को बीच म खड़ो कर दियो। मय न देख्यो कि घाटी हड्डियों सी भरी हुयी हय।
EZE 37:2 परमेश्वर न मोख घाटी को चारयी तरफ घुमायो। मय न देख्यो की घाटी की तल तक बहुत सी हड्डियां होती; हि बहुत सूखी होती।
EZE 37:3 तब ओन मोरो सी पुच्छ्यो, “हे आदमी की सन्तान, का हि हड्डियां जीन्दी होय सकय हय?” मय न कह्यो, “हे परमेश्वर यहोवा, तयच जानय हय।”
EZE 37:4 तब ओन मोरो सी कह्यो, “इन हड्डियों सी भविष्यवानी कर क् कहो, ‘हे सूखी हड्डियों, परमेश्वर को वचन सुनो।
EZE 37:5 परमेश्वर यहोवा तुम हड्डियों सी यो कह्य हय : देखो, मय खुद तुम म स्वास समाऊं, अऊर तुम जीन्दी होय जावो।
EZE 37:6 मय तुम म नस भर क मांस चढ़ाऊं, अऊर तुम्ख चमड़ा सी झाकूं; अऊर तुम म स्वास समाऊं अऊर तुम जीन्दी होय जावो; तब तुम जान लेवो की मय परमेश्वर आय।’”
EZE 37:7 या आज्ञा को अनुसार मय भविष्यवानी करन लग्यो; अऊर मय भविष्यवानी करच रह्यो होतो, कि एक आवाज आयी, अऊर भूईडोल भयी, अऊर हि हड्डियां जमा होय क हड्डी सी हड्डी जुड़ गयी।
EZE 37:8 मय देखतो रह्यो, कि उन म नस पैदा भयी अऊर मांस चढ़्यो, अऊर हि मांस चमड़ा झक गयो; पर उन म जीवन को स्वास कुछ भी नहीं होतो।
EZE 37:9 तब ओन मोरो सी कह्यो, “हे आदमी की सन्तान, स्वास सी भविष्यवानी कर, अऊर स्वास सी भविष्यवानी कर क् कहो, हे स्वास परमेश्वर यहोवा यो कह्य हय : चारयी दिशावों सी आय क इन मारयो हुयो म समाय जावो कि हि जीन्दो होय जाये।”
EZE 37:10 उन्की या आज्ञा को अनुसार मय न भविष्यवानी करी, तब स्वास उन म समाय गयी, अऊर हि जीन्दो होय क अपनो अपनो पाय को बल पर खड़ो भय गयो; अऊर एक बड़ी सेना भय गयी।
EZE 37:11 फिर ओन मोरो सी कह्यो, “हे आदमी की सन्तान, हि हड्डियां इस्राएल को पूरो घराना की उपमा आय, हमरी हड्डियां सूख गयी, अऊर हमरी आशा टूट गयी; हम पूरी तरह नाश भय गयो हय।
EZE 37:12 यो वजह भविष्यवानी कर क् उन्को सी कहो, परमेश्वर यहोवा यो कह्य हय : हे मोरी प्रजा को लोगों, देखो, मय तुम्हरी कब्र खोल क तुम्ख वहां सी निकालूं, अऊर इस्राएल को देश म पहुंचाय देऊं।
EZE 37:13 येकोलायी जब मय तुम्हरी कब्र खोलूं, अऊर तुम्ख वहां सी निकालूं, तब हे मोरी प्रजा को लोगों, तुम जान लेवो कि मय परमेश्वर आय।
EZE 37:14 मय तुम म अपनी आत्मा समाऊं, अऊर तुम जीन्दो होय जावो; अऊर तुम्ख तुम्हरो निजी देश म बसाऊं; तब तुम जान लेवो कि मय परमेश्वर नच यो कह्यो हय, अऊर करयो भी हय, परमेश्वर की या वानी आय।”
EZE 37:15 फिर परमेश्वर को यो वचन मोरो जवर पहुंच्यो :
EZE 37:16 “हे आदमी की सन्तान,” एक लकड़ी की पाटी ले क ओको पर लिख, “या पाटी यहूदा की अऊर ओको संगी इस्राएलियों की आय; ओको बाद दूसरी पाटी ले क ओको पर लिख, ‘या पाटी यूसुफ की मतलब एप्रैम की, अऊर ओको संगी इस्राएलियों की पाटी आय।’”
EZE 37:17 फिर उन लकड़ियों कि पाटियों ख एक दूसरो सी जोड़ क एकच बनाय ले कि हि तोरो हाथ म एकच लकड़ी की पाटी होय जाये।
EZE 37:18 जब तोरो लोग तोरो सी पूछेंन, का तय हम्ख नहीं बतायजो कि इन पाटियों को का अर्थ हय?
EZE 37:19 तब उन सी कह्यजो, परमेश्वर यहोवा यो कह्य हय : देखो, मय यूसुफ की लकड़ी की पाटी ख जो एप्रैम को हाथ म हय, अऊर इस्राएल को जो कुल ओको संगी हय, उन्ख ले क यहूदा की लकड़ी की पाटी सी जोड़ क ओको संग एकच लकड़ी कर देऊं; अऊर दोयी मोरो हाथ म एकच लकड़ी बनेंन।
EZE 37:20 जिन लकड़ी की पाटियों पर तय असो लिखजो, हि उन्को सामने तोरो हाथ म रहे।
EZE 37:21 तब तय उन लोगों सी कह्यजो, परमेश्वर यहोवा यो कह्य हय : देखो, मय इस्राएलियों ख उन राज्यों म सी ले क जिन म हि चली गयो हंय, चारयी तरफ सी जमा करूं; अऊर उन्को निजी देश म पहुंचाऊं।
EZE 37:22 मय उन्ख ऊ देश मतलब इस्राएल को पहाड़ों पर एकच राज्य कर देऊं; अऊर उन सब को एकच राजा होयेंन; अऊर हि फिर दोय नहीं रहेंन अऊर नहीं दोय राज्यों म कभी बटेंन।
EZE 37:23 हि फिर अपनी मूर्तियों, अऊर घिनौनो कामों यां अपनो कोयी तरह को पाप को द्वारा अपनो आप ख शुद्ध नहीं करेंन; पर मय उन्ख उन सब बस्तियों सी, जहां हि पाप करत होतो, निकाल क शुद्ध करूं, अऊर हि मोरी प्रजा होयेंन, अऊर मय उन्को परमेश्वर होऊं।
EZE 37:24 “मोरो दास दाऊद उन्को राजा होयेंन; अऊर उन सब को एकच चरवाहा होयेंन। हि मोरो नियमों पर चलेंन अऊर मोरी विधियों ख मान क उन्को अनुसार चलेंन।
EZE 37:25 हि ऊ देश म रहेंन जेख मय न अपनो दास याकूब ख दियो होतो; अऊर जेको म तुम्हरो पूर्वज रहत होतो, ओकोच म हि अऊर ओको टुरा अऊर नाती हमेशा बस्यो रहेंन; अऊर मोरो दास दाऊद उन्को मुखिया रहेंन।
EZE 37:26 मय उन्को संग शान्ति की वाचा बान्धूं; वा हमेशा की वाचा ठहरेंन; अऊर मय उन्ख जागा दे क गिनती म बढ़ाऊं, अऊर उन्को बीच अपनो पवित्र जागा हमेशा बनायो रखूं।
EZE 37:27 मोरो निवास को तम्बू उन्को ऊपर बन्यो रहेंन; अऊर मय उन्को परमेश्वर होऊं, अऊर हि मोरी प्रजा होयेंन।
EZE 37:28 जब मोरो पवित्र जागा उन्को बीच हमेशा को लायी रहेंन, तब सब राज्य को लोग जान लेयेंन कि मय परमेश्वर इस्राएल ख पवित्र करन वालो आय।”
EZE 38:1 फिर परमेश्वर को यो वचन मोरो जवर पहुंच्यो :
EZE 38:2 “हे आदमी की सन्तान, अपनो मुंह मागोग देश को राजा गोग को तरफ कर क् जो रोश, मेशेक अऊर तूबल नगरों को शासक हय, उन्को खिलाफ भविष्यवानी कर,
EZE 38:3 अऊर यो कह्य, हे राजा गोग, हे रोश, मेशेक, अऊर तूबल को मुखिया, परमेश्वर यहोवा यो कह्य हय : देख, मय तोरो खिलाफ हय।
EZE 38:4 मय ओख घुमाऊं, अऊर तोरो जबड़ा म आकड़ा डाल क तोख निकालूं; अऊर तोरी पूरी सेना ख भी मतलब घोड़ा अऊर सवारों ख जो सब को सब कवच पहिन्यो हुयो एक बड़ी भीड़ हंय, जो बर्छी अऊर ढाल लियो हुयो सब को सब तलवार चलावन वालो होयेंन;
EZE 38:5 अऊर ओको संग फारस, कूश अऊर पूत देशों को पूरो सैनिक दल रहेंन, जो सब को सब ढाल लियो अऊर टोप पहिन्यो रहेंन;
EZE 38:6 अऊर गोमेर अऊर ओको पूरो दलों ख, अऊर उत्तर दिशा को दूर दूर को देशों को तोगर्मा को घराना, अऊर ओको पूरो दलों ख निकालूं; तोरो संग बहुत सो देशों को लोग रहेंन।
EZE 38:7 येकोलायी तय तैयार होय जा; तय अऊर जितनी सैनिकों की भीड़ तोरो जवर जमा होयेंन, तैयार रह्यजो, अऊर तय उन्को अगुवा बनजो।
EZE 38:8 बहुत दिन बितन पर तोरी सुधि लियो जायेंन; अऊर आखरी को साल म तय ऊ देश म आजो, जो तलवार को वश सी बच्यो हुयो होना, अऊर जो राज्य को निवासी बहुत सी राज्यों म सी जमा होयेंन; मतलब तय इस्राएल को पहाड़ पर आजो जो लगातार उजाड़ रह्यो हय; पर हि देश देश को लोगों को वश सी छुड़ायो जाय क सब को सब निडर रहेंन।
EZE 38:9 तय चढ़ायी करजो अऊर आन्धी को समान आजो, अऊर अपनो पूरो दलों अऊर बहुत देशों को लोगों समेत बादर को जसो छाय जाजो।”
EZE 38:10 “परमेश्वर यहोवा यो कह्य हय : ऊ दिन तोरो मन म असी असी बाते आयेंन कि तय एक बुरी योजना भी बनायजो;
EZE 38:11 अऊर तय कह्यजो, ‘मय बिना दीवाल वालो गावों को देशों पर चढ़ायी करूं; मय उन लोगों को जवर जाऊं जो चैन सी निडर रह्य हंय; जो सब को सब बिना दीवाल अऊर बिना फाटक अऊर बिना पल्लां को बस्यो हुयो हय,’”
EZE 38:12 ताकी छीन क तय उन्ख लूटजो अऊर अपनो हाथ उन खण्डरों पर बढ़ायजो जो फिर सी बसायो गयो हय, अऊर उन लोगों को खिलाफ जाजो जो राज्यों म सी जमा भयो होतो, अऊर उन्को जवर जनावर अऊर जायजाद हय जो देश को बीच म रह्य हय।
EZE 38:13 शबा अऊर ददान नगर को लोग अऊर तर्शीश नगर को व्यापारी अपनो देश को सब जवान तोरो सी पूछेंन, का तय लूटन लायी आयो हय? का तय न सोना, चांदी, जनावर अऊर जायजाद लिजान लायी, अऊर बड़ी लूट लिजान लायी अपनी भीड़ जमा करी हय?
EZE 38:14 “यो वजह, हे आदमी की सन्तान, भविष्यवानी कर क् राजा गोग सी कहो, परमेश्वर यो कह्य हय : जो समय मोरी प्रजा इस्राएल निडर होय क बसी रहेंन, का तोख येको समाचार नहीं मिलेंन?
EZE 38:15 तय उत्तर दिशा को दूर दूर को जागावों सी आयेंन; तय अऊर तोरो संग बहुत सो राज्यों को लोग, जो सब को सब घोड़ा पर चढ़्यो हुयो रहेंन, मतलब एक बड़ी भीड़ अऊर शक्तिशाली सेना।”
EZE 38:16 जसो बादर जमीन पर छाय जावय हय, वसोच तय मोरी प्रजा इस्राएल को देश पर असो चढ़ायी करेंन। येकोलायी हे राजा गोग, आखरी को दिनों म असोच होयेंन, मय तोरो सी अपनो देश पर येकोलायी चढ़ायी कराऊं, कि जब मय राज्यों को देखतो तोरो द्वारा अपनो ख पवित्र ठहराऊं, तब हि मोख पहिचान लेयेंन।
EZE 38:17 “परमेश्वर यहोवा यो कह्य हय : का तय उच नोहोय जेकी चर्चा मय न पहले को समय म अपनो दासों को, मतलब इस्राएल को उन भविष्यवक्तावों द्वारा करी होती, जो उन दिनों म कुछ सालों तक या भविष्यवानी करतो गयो, कि परमेश्वर राजा गोग सी इस्राएल पर चढ़ायी करायेंन?”
EZE 38:18 जो दिन इस्राएल को देश पर राजा गोग चढ़ायी करेंन, उच दिन मोरी जलजलाहट मोरो मुंह सी प्रगट होयेंन, परमेश्वर यहोवा की या वानी आय।
EZE 38:19 मय न अपनी जलजलाहट अऊर गुस्सा की आग म कह्यो कि बिना सक ऊ दिन इस्राएल को देश म बड़ी भूईडोल होयेंन।
EZE 38:20 मोरो दर्शन म समुन्दर की मच्छियां अऊर आसमान को पक्षी, मैदान को जनावर अऊर जमीन पर जितनो जीवजन्तु रेंगय हंय, अऊर जमीन को ऊपर जितनो मनुष्य रह्य हंय, सब कांप उठेंन अऊर पहाड़ गिरायो जायेंन; सीधी चट्टान नाश होयेंन, अऊर सब दीवाले गिर क माटी म मिल जायेंन।
EZE 38:21 परमेश्वर यहोवा की या वानी आय कि मय ओको खिलाफ तलवार चलावन लायी अपनो सब पहाड़ियों ख पुकारूं अऊर हर एक की तलवार ओको भाऊ को खिलाफ उठेंन।
EZE 38:22 मय महामारी अऊर खून को द्वारा ओको सी मुकद्दमा लड़ूं; अऊर ओको पर अऊर ओको दलों पर, अऊर उन बहुत सी राज्यों पर जो ओको जवर होना, मय पानी की बड़ी झड़ी करवाऊं अऊर गारगोटी अऊर आगी अऊर गन्धक बरसाऊं।
EZE 38:23 यो तरह मय अपनो आप ख महान अऊर पवित्र ठहराऊं अऊर बहुत सी राज्यों को सामने अपनो आप ख प्रगट करूं। तब हि जान लेयेंन कि मय परमेश्वर आय।
EZE 39:1 फिर हे आदमी की सन्तान, राजा गोग को खिलाफ भविष्यवानी कर क् यो कह्य, हे राजा गोग, हे रोश, मेशेक अऊर तूबल नगर को मुखिया, परमेश्वर यहोवा यो कह्य हय : मय तोरो खिलाफ हय।
EZE 39:2 मय तोख घुमाय क ले आऊं, अऊर उत्तर दिशा को दूर दूर को देशों सी चढ़ाय क ले आऊं, अऊर इस्राएल को पहाड़ों पर पहुंचाऊं।
EZE 39:3 वहां मय तोरो धनुष तोरो बायो हाथ सी गिराय देऊं, अऊर तोरो बान ख तोरो दायो हाथ सी गिराय देऊं।
EZE 39:4 तय अपनो पूरो दलों अऊर अपनो संग की पूरी राज्यों समेत इस्राएल को पहाड़ियों पर मार डाल्यो जाजो; मय तोख अलग अलग को मांसाहारी पक्षियों अऊर जंगली जनावरों को आहार बनाय देऊं।
EZE 39:5 तय खेत म गिरजो, कहालीकि मयनच असो कह्यो हय, परमेश्वर यहोवा की या वानी हय।
EZE 39:6 मय मागोग नगर म अऊर द्वीपों म निडर रहन वालों को बीच आगी लगाय देऊं; अऊर हि जान लेयेंन कि मय परमेश्वर आय।
EZE 39:7 “मय अपनी प्रजा इस्राएल को बीच अपनो नाम प्रगट करूं; अऊर अपनो पवित्र नाम फिर अपवित्र होन नहीं देऊं; तब राज्य राज्य को लोग भी जान लेयेंन कि मय परमेश्वर, इस्राएल को पवित्र आय।”
EZE 39:8 या घटना होन वाली हय अऊर वा होय जायेंन, परमेश्वर यहोवा की या वानी आय। यो उच दिन आय जेकी चर्चा मय न करी हय।
EZE 39:9 “तब इस्राएल को नगरों को रहनवालो निकलेंन अऊर हथियारों म आगी लगाय क जलाय देयेंन, ढाल, अऊर फरी, धनुष, अऊर बान, लाठी, बरछा, सब ख हि सात साल तक हि जलातो रहेंन।
EZE 39:10 येको वजह हि मैदान म लकड़ी नहीं बीनेंन, नहीं जंगल म लकड़ी काटेंन, कहालीकि हि हथियारों खच जलायो करेंन, हि अपनो लूटन वालो ख लूटेंन, अऊर अपनो छीनन वालो सी छीनेंन, परमेश्वर यहोवा की या वानी आय।
EZE 39:11 “ऊ समय मय राजा गोग ख इस्राएल को देश म कब्रस्थान देऊं, ऊ तलाव को पूर्व दिशा को तरफ रहेंन; ऊ आन जान वालों की घाटी कहलायेंन, अऊर आन जान वालों ख वहां रुकनो पड़ेंन; वहां सब भीड़ समेत राजा गोग ख माटी दियो जायेंन अऊर ऊ जागा को नाम गोग की भीड़ की घाटी पड़ेंन।
EZE 39:12 इस्राएल को घराना उन्ख सात महीना तक माटी देतो रहेंन ताकी अपनो देश ख शुद्ध करे।
EZE 39:13 देश को सब लोग मिल क उन्ख माटी देयेंन; अऊर जो समय तोरी महिमा होयेंन, ऊ समय उन्को भी नाम बड़ो होयेंन, परमेश्वर यहोवा की या वानी आय।
EZE 39:14 तब हि आदमियों ख चुनेंन, जो हमेशा योच काम म लग्यो रहेंन, मतलब देश म घुम घुम क आन जान वालों को संग होय क देश ख शुद्ध करन लायी उन्ख जो जमीन को ऊपर पड़्यो होना, माटी देयेंन; अऊर सात महिना को बितन तक हि ढूंढ ढूंढ क यो काम करतो रहेंन।
EZE 39:15 देश म आन जान वालो म सी जब कोयी आदमी की हड्डी देखे, तब ओको जवर एक चिन्ह खड़ो करेंन, यो ऊ समय तक बन्यो रहेंन जब तक माटी देन वालो ओख राजा गोग की भीड़ की घाटी म गाड़ नहीं दे।
EZE 39:16 वहां को नगर को नाम भी ‘हमोना’ हय। यो देश शुद्ध करयो जाये।
EZE 39:17 “फिर ओ आदमी की सन्तान, परमेश्वर यहोवा यो कह्य हय : अलग अलग को सब पक्षियों अऊर सब जंगली जनावरों ख आज्ञा दे, जमा होय क आवो, मोरो यो बड़ो यज्ञ म जो मय तुम्हरो लायी इस्राएल को पहाड़ियों पर करू हय, हर एक दिशा म जमा हो कि तुम मांस खावो अऊर खून पीवो।
EZE 39:18 तुम शूरवीरों को मांस खावो, अऊर धरती को मुखियावों को खून पीवो अऊर मेंढा, मेम्ना, बकरा अऊर बईलों को भी जो सब को सब बाशान देश को तैयार करयो हुयो होना।
EZE 39:19 मोरो ऊ भोज की चर्बी सी जो मय तुम्हरो लायी करू हय, तुम खातो खातो अघाय जावो, अऊर ओको खून पीतो पीतो मतवालो होय जावो।
EZE 39:20 तुम मोरी मेज पर घोड़ावों, सवारों, शूरवीरों, अऊर सब तरह को योद्धावों सी तृप्त होवो, परमेश्वर यहोवा की या वानी आय।
EZE 39:21 “मय राज्य राज्य को बीच अपनी महिमा प्रगट करूं, अऊर राज्य राज्य को सब लोग मोरो न्याय को काम जो मय करूं, अऊर मोरो हाथ जो उन पर पड़ेंन, देख लेयेंन।
EZE 39:22 ऊ दिन सी आगु इस्राएल को घराना जान लेयेंन कि यहोवा हमरो परमेश्वर आय।
EZE 39:23 राज्य राज्य को लोग भी जान लेयेंन कि इस्राएल को घराना अपनो अधर्म को वजह बन्धुवायी म गयो होतो; कहालीकि उन्न मोरो सी असो विश्वासघात करयो कि मय न अपनो मुंह उन सी मोड़ लियो अऊर उन्ख उन्को दुश्मनों को वश म कर दियो, अऊर हि सब तलवार सी मारयो गयो।
EZE 39:24 मय न उन्की अशुद्धता अऊर अपराधों को अनुसार उन सी बर्ताव कर क् उन सी अपनो मुंह मोड़ लियो होतो।
EZE 39:25 “येकोलायी परमेश्वर यहोवा यो कह्य हय : अब मय याकूब ख बन्धुवायी सी लौटाय लाऊं, अऊर इस्राएल को पूरो घराना पर दया करूं; अऊर अपनो पवित्र नाम को लायी मोख जलन होयेंन।
EZE 39:26 तब ऊ पूरो विश्वासघात को वजह जो उन्न मोरो खिलाफ करयो हि लज्जित होयेंन; अऊर अपनो देश म निडर रहेंन; अऊर कोयी उन्ख नहीं डरायेंन।
EZE 39:27 जब मय उन्ख राज्य राज्य को बीच सी लौटाय लाऊं, अऊर उन दुश्मनों को देश सी जमा करूं, तब बहुत राज्यों को नजर म उन्को द्वारा पवित्र ठहरूं।
EZE 39:28 तब हि जान लेयेंन कि यहोवा हमरो परमेश्वर आय, कहालीकि मय न उन्ख राज्य राज्य म बन्धुवा कर क् फिर उन्को निजी देश म जमा करयो हय। मय उन म सी कोयी ख फिर परदेश म नहीं छोड़ूं,
EZE 39:29 अऊर उन सी अपनो मुंह फिर कभी नहीं फिराऊं, कहालीकि मय न इस्राएल को घराना पर अपनी आत्मा उण्डेल्यो हय, परमेश्वर यहोवा की या वानी आय।”
EZE 40:1 हमरी बन्धुवायी को पच्चीसवों साल मतलब यरूशलेम नगर ख ले लियो जान को बाद चौदा साल को पहले महीना को दसवों दिन ख, परमेश्वर की शक्ति मोरो पर प्रगट भयी, अऊर ओन मोख वहां पहुंचायो।
EZE 40:2 अपनो दर्शनों म परमेश्वर न मोख इस्राएल को देश म पहुंचायो अऊर वहां एक बहुत ऊंचो पहाड़ पर खड़ो करयो, जेको पर दक्षिन को तरफ मानो कोयी नगर को आकार होतो।
EZE 40:3 जब ऊ मोख वहां ले गयो, त मय न का देख्यो कि पीतल को जसो अऊर हाथ म सन को दोरी अऊर नापन को एक बांस लियो हुयो एक आदमी फाटक म खड़ो हय।
EZE 40:4 ऊ आदमी न मोरो सी कह्यो, “हे आदमी की सन्तान, अपनी आंखी सी देख, अऊर अपनो कानों सी सुन; अऊर जो कुछ मय तोख दिखाऊं ऊ सब पर ध्यान दे, कहालीकि तय येकोलायी यहां तक पहुंचायो गयो हय कि मय तोख या बाते दिखाऊं; अऊर जो कुछ तय देखजो ऊ सब इस्राएल को घराना ख बतायजो।”
EZE 40:5 अऊर देखो, भवन को बाहेर चारयी तरफ एक दीवाल होती, अऊर ऊ आदमी को हाथ म नापन को बांस होतो, जेकी लम्बायी असी छय हाथ मतलब लगभग तीन मीटर की हय, ओन दीवाल की मोटायी अऊर ऊंचायी नापी त तीन मीटर की निकली।
EZE 40:6 तब ऊ वा फाटक को जवर आयो जेको मुंह पूर्व दिशा को तरफ होतो, अऊर ओकी सीढ़ी पर चढ़ क फाटक की दोयी सिरन को फाटक की चौड़ायी तीन मीटर की होती।
EZE 40:7 पहरा वाली कोठरियां तीन मीटर लम्बी अऊर तीन मीटर चौड़ी होती; अऊर दोय दोय कोठरियों को अन्तर पाच हाथ को होतो; अऊर फाटक को सिरन को द्वार जो फाटक को ओसारा को जवर भवन को तरफ होतो, वा भी तीन मीटर की होती।
EZE 40:8 तब ओन फाटक को ऊ ओसारा जो भवन को सामने होतो, नाप क चार मीटर पायो।
EZE 40:9 ओन फाटक को ओसारा नाप क आठ हाथ को पायो, अऊर ओको खम्बा दोय दोय हाथ को पायो, अऊर फाटक को ओसारा भवन को सामने होतो।
EZE 40:10 पूर्व दिशा को तरफ फाटक को तरफ तीन तीन पहरा वालो कमरा होतो जो सब एकच नाप की होती, अऊर दोयी तरफ को खम्बा भी एकच नाप को होतो।
EZE 40:11 फिर ओन फाटक को द्वार की चौड़ायी नाप क दस हाथ की पायी; अऊर फाटक की लम्बायी नाप क तेरा हाथ की पायी।
EZE 40:12 दोयी तरफ की पहरा वाली कोठरियां को सामने हाथ भर की जागा होती अऊर दोयी तरफ कोठरियां छय छय हाथ की होती।
EZE 40:13 फिर ओन फाटक ख एक तरफ की पहरा वाली कोठरी की छत सी ले क दूसरो तरफ की पहरा वाली कोठरी की छत तक नाप क पच्चीस हाथ की दूरी पायी, अऊर द्वार आमने-सामने होतो।
EZE 40:14 अऊर ओन साठ हाथ को खम्बा नाप्यो, अऊर आंगन, फाटक को आजु-बाजू, खम्बा तक होतो।
EZE 40:15 फाटक को बाहेर को द्वार को आगु सी ले क ओको अन्दर को ओसारा को सामने तक पचास हाथ को अन्तर होतो।
EZE 40:16 पहरा वालो कमरा म, अऊर फाटक को अन्दर चारयी तरफ कोठरियों को बीच को खम्बा को बीच बीच म झिलमिलीदार खिड़कियां होती, अऊर खम्बा को ओसारा म भी वसीच होती; अऊर फाटक को अन्दर को चारयी तरफ खिड़कियां होती, अऊर हर एक खम्बा पर खजूर को झाड़ खुद्यो हुयो होतो।
EZE 40:17 तब ऊ मोख बाहेर को आंगन म ले गयो, अऊर ऊ आंगन को चारयी तरफ कमरा होतो; अऊर एक फर्स बन्यो हुयो होतो, जेको पर तीस कमरा बन्यो होतो।
EZE 40:18 यो फर्स मतलब खल्लो को फर्स फाटक सी लग्यो हुयो होतो अऊर उन्की लम्बायी को अनुसार होतो।
EZE 40:19 फिर ओन खल्लो को फाटक को आगु सी ले क अन्दर को आंगन को बाहेर को भाग तक नाप क सौ हाथ निकल्यो; ऊ पूर्व अऊर उत्तर दिशा दोयी तरफ असोच होतो।
EZE 40:20 तब बाहेर को आंगन को उत्तर मुंह को फाटक की लम्बायी अऊर चौड़ायी ओन नापी।
EZE 40:21 ओको दोयी तरफ तीन तीन पहरा देन वालो कमरा होतो, अऊर ओको भी खम्बा को ओसारा को नाप पहिलो फाटक को अनुसार होतो; येकी लम्बायी पचास हाथ अऊर चौड़ायी पच्चीस हाथ की होती।
EZE 40:22 येकी भी खिड़कियां अऊर खम्बा को ओसारा अऊर खजूर को झाड़ को नाप पूर्व मुंह को फाटक को जसी होती; अऊर येको पर चढ़न लायी सात सीढ़ी होती; अऊर उन्को सामने येको ओसारा होतो।
EZE 40:23 अन्दर को आंगन को उत्तर अऊर पूर्व को तरफ दूसरो फाटक को सामने फाटक होतो अऊर ओन फाटक की दूरी नाप क सौ हाथ की पायी।
EZE 40:24 फिर ऊ मोख दक्षिन को तरफ ले गयो, अऊर दक्षिन को तरफ एक फाटक होतो; अऊर ओन येको खम्बा अऊर खम्बा को ओसारा नाप क इन्की भी वसीच लम्बायी पायी।
EZE 40:25 उन खिड़कियों को समान येको अऊर येको खम्बा को ओसारा को चारयी तरफ भी खिड़कियां होती; येकी भी लम्बायी पचास अऊर चौड़ायी पच्चीस हाथ की होती।
EZE 40:26 येको म भी चढ़न लायी सात सीढ़ियां होती अऊर उन्को सामने खम्बा को ओसारा होतो; अऊर ओको दोयी तरफ को खम्बा पर खजूर को झाड़ खुद्यो होतो।
EZE 40:27 दक्षिन को तरफ भी अन्दर को आंगन को एक फाटक होतो, अऊर ओन दक्षिन तरफ को दोयी फाटकों की दूरी नाप क सौ हाथ पायी।
EZE 40:28 तब ऊ दक्षिन दिशा की फाटक सी होय क मोख अन्दर आंगन म ले गयो, अऊर ओन दक्षिनी फाटक ख नाप क वसोच पायो।
EZE 40:29 मतलब येको भी पहरा देन वालो कमरा, अऊर खम्बा, अऊर खम्बा को ओसारा, सब वसोच होतो; अऊर येको अऊर येको खम्बा को ओसारा को भी चारयी तरफ खिड़कियां होती; अऊर येकी लम्बायी पचास अऊर चौड़ायी पच्चीस हाथ की होती।
EZE 40:30 येको चारयी तरफ को खम्बा को ओसारा भी पच्चीस हाथ लम्बो, अऊर पचास हाथ चौड़ो होतो।
EZE 40:31 येको खम्बा को ओसारा बाहेर को आंगन को तरफ होतो, अऊर येको खम्बा पर भी खजूर को झाड़ खुद्यो हुयो होतो, अऊर येको पर चढ़न लायी आठ सीढ़ियां होती।
EZE 40:32 फिर ऊ आदमी मोख पूर्व दिशा को तरफ अन्दर को आंगन म ले गयो, अऊर ऊ तरफ को फाटक ख नाप क वसोच पायो।
EZE 40:33 येको भी पहरा देन वालो कमरा अऊर खम्बा अऊर खम्बा को ओसारा, सब वसोच होतो; अऊर येको अऊर येको खम्बा को ओसारा को चारयी तरफ भी खिड़कियां होती; येकी लम्बायी पचास अऊर चौड़ायी पच्चीस हाथ की होती।
EZE 40:34 येको ओसारा भी बाहेर को आंगन को तरफ होतो, अऊर ओको दोयी तरफ को खम्बा पर खजूर को झाड़ खुद्यो हुयो होतो; अऊर येको पर भी चढ़न लायी आठ सीढ़ियां होती।
EZE 40:35 फिर ऊ आदमी न मोख उत्तर दिशा की फाटक को जवर लिजाय क ओख नाप्यो, अऊर ओको भी नाप वसोच पायो।
EZE 40:36 ओको भी पहरा देन वालो कमरा अऊर खम्बा अऊर ओको ओसारा होतो; अऊर ओको भी चारयी तरफ खिड़कियां होती, ओकी लम्बायी पचास अऊर चौड़ायी पच्चीस हाथ की होती।
EZE 40:37 ओको खम्बा बाहेर को आंगन को तरफ होतो, अऊर उन पर भी दोयी तरफ खजूर को झाड़ खुद्यो हुयो होतो; अऊर ओको म चढ़न लायी आठ सीढ़ियां होती।
EZE 40:38 फिर फाटकों को जवर को खम्बा को जवर दरवाजा समेत कमरा होतो, जहां होमबलि म चढ़ायो जान वालो पशु ख धोयो जात होतो।
EZE 40:39 होमबलि, पापबलि, अऊर दोषबलि को पशुवों ख चढ़ावन लायी फाटक को ओसारा को जवर ओको दोयी तरफ दोय दोय तक्ता होतो।
EZE 40:40 फाटक को एक बाहरी बाजू पर मतलब उत्तर दिशा को द्वार को चढ़ायी पर दोय तक्ता होतो; अऊर ओको दूसरो बहरी बाजू पर भी, जो फाटक को ओसारा को जवर होती, दोय तक्ता होतो।
EZE 40:41 फाटक को दोयी तरफ चार चार तक्ता होतो, सब मिल क आठ तक्ता होतो, जो बलिपशु काट्यो जात होतो।
EZE 40:42 फिर होमबलि लायी तरास्यो हुयो गोटा की चार चौकी होती, जो देढ़ हाथ लम्बी, देढ़ हाथ चौड़ी, अऊर एक हाथ ऊंची होती; उन पर होमबलि अऊर मेलबलि को पशुवों ख काटन को औजार रख्यो जात होतो।
EZE 40:43 अन्दर चारयी तरफ किनार पर आंकड़ी लगी होती, अऊर चौकियों को ऊपर चढ़ावन को मांस रख्यो जात होतो।
EZE 40:44 अन्दर आंगन को उत्तरी फाटक को बाहेर गान वालो को कमरा होतो जेको दरवाजा दक्षिन दिशा को तरफ होतो; अऊर पूर्व दिशा को फाटक को तरफ एक कमरा होतो, जेको दरवाजा उत्तर दिशा को तरफ होतो।
EZE 40:45 ओन मोरो सी कह्यो, “यो कमरा, जेको दरवाजा दक्षिन को तरफ हय, उन याजकों को लायी हय जो भवन की चौकसी करय हंय,
EZE 40:46 अऊर जो कमरा को दरवाजा उत्तर को तरफ हय, ऊ उन याजकों को हय जो वेदी की चौकसी करय हय; हि सादोक की सन्तान आय; अऊर लेवियों म सी परमेश्वर की सेवा करन लायी केवल हिच ओको जवर आय सकय हय।”
EZE 40:47 फिर ओन आंगन ख नाप क ओख चौकोन मतलब सौ हाथ लम्बो अऊर सौ हाथ चौड़ो पायो; अऊर भवन को सामने वेदी होती।
EZE 40:48 फिर ऊ मोख भवन को ओसारा म ले गयो, अऊर ओसारा को दोयी तरफ को खम्बा ख नाप क पाच पाच हाथ को पायो; अऊर दोयी तरफ फाटक की चौड़ायी तीन तीन हाथ की होती।
EZE 40:49 ओसारा की लम्बायी बीस हाथ अऊर चौड़ायी ग्यारा हाथ की होती; अऊर ओको पर चढ़न लायी सीढ़ियां होती; अऊर दोयी तरफ को खम्बा को जवर एक खम्बा होतो।
EZE 41:1 फिर ऊ मोख मन्दिर को जवर ले गयो, अऊर ओको दोयी तरफ को खम्बा ख नाप क छय छय हाथ चौड़ो पायो, या त तम्बू की चौड़ायी होती।
EZE 41:2 दरवाजा की चौड़ायी दस हाथ की होती, अऊर दरवाजा को दोयी तरफ की दीवाले पाच पाच हाथ की होती; अऊर ओन मन्दिर की लम्बायी नाप क चालीस हाथ की, अऊर ओकी चौड़ायी बीस हाथ की पायी।
EZE 41:3 तब ओन अन्दर जाय क दरवाजा को खम्बा ख नाप्यो, अऊर दोय दोय हाथ को पायो; अऊर दरवाजा छय हाथ को होतो; अऊर दरवाजा की चौड़ायी सात हाथ की होती।
EZE 41:4 तब ओन अन्दर को भवन की लम्बायी अऊर चौड़ायी मन्दिर को सामने नाप क बीस बीस हाथ की पायी; अऊर ओन मोरो सी कह्यो, “यो त परमपवित्र जागा आय।”
EZE 41:5 फिर ओन भवन की दीवाल ख नाप क छय हाथ को पायो, अऊर भवन को आजु बाजू चार चार हाथ चौड़ी बाहेर की कमरा होतो।
EZE 41:6 हि बाहेर को कमरा तीन मंजिला होतो; अऊर एक एक मंजिल म तीस तीस कमरा होतो। भवन को आजु बाजू की दीवाल येकोलायी होती की बाहेर को कमरा ओको सहारा सी हो; अऊर ओकोच म कमरा की कड़ियां डाली गयी होती अऊर भवन की दीवाल को सहारा सी नहीं होती।
EZE 41:7 भवन को आजु बाजू को कमरा बाहेर होतो, उन म सी जो ऊपर होतो, हि जादा चौड़ो होतो; मतलब भवन को आजु बाजू जो कुछ बन्यो होतो, ऊ जसो जसो ऊपर को तरफ चढ़तो गयो, वसो वसो चौड़ो होतो गयो; यो रीति सी, यो घर की चौड़ायी ऊपर को तरफ बड़ गयी होती, अऊर लोग खल्लो को मंजिल को बीच सी ऊपर को मंजिल ख चढ़ सकत होतो।
EZE 41:8 फिर मय न भवन को आजु बाजू ऊंची जमीन देखी, अऊर बाहेर को कमरा की ऊंचायी जोड़ तक छय हाथ को बांस को बराबर होती।
EZE 41:9 बाहेर को कमरा को लायी जो दीवाल होती, वा पाच हाथ मोटी होती, अऊर जो जागा खाली रह्य गयो होतो, वा भवन को बाहेर को कमरा को जागा होतो।
EZE 41:10 बाहेर को कमरा को बीच भवन को आजु बाजू बीस हाथ को अन्तर होतो।
EZE 41:11 बाहेर को कमरा को दरवाजा ऊ जागा को तरफ होतो, जो खाली होतो, मतलब एक दरवाजा उत्तर दिशा को तरफ अऊर दूसरो दक्षिन दिशा को तरफ होतो; अऊर जो जागा रह्य गयी, ओकी चौड़ायी चारयी तरफ पाच पाच हाथ की होती।
EZE 41:12 फिर जो भवन मन्दिर को पश्चिम को तरफ को सामने होतो, ऊ सत्तर हाथ चौड़ो होतो; अऊर भवन को आजु बाजू की दीवाल पाच हाथ मोटी होती, अऊर ओकी लम्बायी नब्बे हाथ की होती।
EZE 41:13 तब ओन भवन की लम्बायी नाप क सौ हाथ की पायी; अऊर दीवालों समेत आंगन की भी लम्बायी नाप क सौ हाथ की पायी।
EZE 41:14 भवन को सामने वालो पूर्वी भाग अऊर ओको आंगन सौ हाथ चौड़ो होतो।
EZE 41:15 फिर ओन पीछु को आंगन को सामने की दीवाल की लम्बायी जेको दोयी तरफ सज्जा होतो, नाप क सौ हाथ को पायो; अऊर अन्दर को भवन अऊर आंगन को ओसारा ख भी नाप्यो।
EZE 41:16 तब ओन डेहरियों अऊर झिलमिलीदार खिड़कियों, अऊर आजु-बाजू को तीनयी मंजिलों को सज्जा ख नाप्यो जो डेहरी को सामने होतो, चारयी तरफ उन्की तक्ताबन्दी भयी होती; अऊर जमीन सी खिड़कियों तक अऊर खिड़कियों को आजु-बाजू सब कहीं तक्ताबन्दी भयी होती।
EZE 41:17 फिर ओन दरवाजा को ऊपर को जागा अन्दर को भवन तक अऊर ओको बाहेर भी अऊर आजु बाजू की पूरी दीवाल को अन्दर अऊर बाहेर भी नाप्यो।
EZE 41:18 ओन करूब अऊर खजूर को झाड़ असो खुद्यो हुयो होतो कि दोय दोय करूब को बीच एक एक खजूर को झाड़ होतो; अऊर करूबों को दोय दोय मुंह होतो।
EZE 41:19 यो तरह सी एक एक खजूर को झाड़ को तरफ आदमी को मुंह बनायो हुयो होतो, अऊर दूसरो तरफ जवान सिंह को मुंह बनायो हुयो होतो। योच रीति सी पूरो भवन को चारयी तरफ बन्यो होतो।
EZE 41:20 जमीन सी ले क दरवाजा को ऊपर तक करूब अऊर खजूर को झाड़ खुद्यो हुयो होतो, मन्दिर की दीवाल योच तरह बनी हुयी होती।
EZE 41:21 भवन को दरवाजा को खम्बा चौकोन होतो, अऊर पवित्र जागा को सामने को रूप मन्दिर को जसो होतो।
EZE 41:22 वेदी लकड़ी की बनी होती, अऊर ओकी ऊंचायी तीन हाथ, अऊर लम्बायी दोय हाथ की होती; अऊर ओको कोना अऊर ओको पूरो पाट अऊर आधार भी लकड़ी की होती। ओन मोरो सी कह्यो, “यो त परमेश्वर को सामने को मेज आय।”
EZE 41:23 मन्दिर अऊर पवित्र जागा को दरवाजा को दोय दोय किवाड़ होतो।
EZE 41:24 अऊर हर एक किवाड़ म दोय दोय मुड़न वालो पल्ला होतो, हर एक किवाड़ को लायी दोय दोय पल्ला।
EZE 41:25 जसो मन्दिर को दीवालों म करूब अऊर खजूर को झाड़ खुद्यो हुयो होतो, वसोच ओको किवाड़ों म भी होतो, अऊर ओसारा को बाहेर को तरफ लकड़ी को मोटो मोटो सज्जा होतो।
EZE 41:26 ओसारा को दोयी तरफ झिलमिलीदार खिड़कियां होती अऊर खजूर को झाड़ खुद्यो होतो; अऊर भवन को बाहेर को कमरा अऊर मोटो मोटो सज्जा भी होतो।
EZE 42:1 फिर ऊ मोख बाहेर को आंगन म उत्तर दिशा को तरफ ले गयो, अऊर मोख उन दोय कमरा को जवर लायो जो भवन को आंगन को सामने अऊर ओको उत्तर दिशा को तरफ होतो।
EZE 42:2 सौ हाथ की दूरी पर उत्तरी दरवाजा होतो, अऊर चौड़ायी पचास हाथ की होती।
EZE 42:3 अन्दर को आंगन को बीस हाथ सामने अऊर बाहेर को आंगन को फर्श को सामने तीनयी मंजिल को सज्जा होतो।
EZE 42:4 कमरा को सामने अन्दर को तरफ जान वालो दस हाथ चौड़ो एक रस्ता होतो; अऊर हाथ भर को एक अऊर रस्ता होतो; अऊर कमरा को दरवाजा उत्तर को तरफ होतो।
EZE 42:5 ऊपर को कमरा छोटो होतो, मतलब सज्जा को वजह हि खल्लो को अऊर बीच को कमरा सी छोटो होतो।
EZE 42:6 कहालीकि हि तीन मंजिल की होती, अऊर आंगनों को सामने उन्को खम्बा नहीं होतो; यो वजह ऊपर को कमरा खल्लो को अऊर बीच को कमरा सी छोटो होतो।
EZE 42:7 जो दीवाल कमरा को बाहेर उन्को जवर जवर होतो मतलब कमरा को सामने बाहेर को आंगन को तरफ होतो, ओकी लम्बायी पचास हाथ की होती।
EZE 42:8 कहालीकि बाहेर को आंगन को कमरा पचास हाथ लम्बो होतो, अऊर मन्दिर को सामने को आधार सौ हाथ को होतो।
EZE 42:9 इन कमरा को खल्लो पूर्व दिशा को तरफ रस्ता होतो, जहां लोग बाहेर को आंगन सी इन म जात होतो।
EZE 42:10 आंगन की दीवाल चौड़ायी म पूर्व को तरफ अलग जागा अऊर भवन दोयी को सामने कमरा होतो।
EZE 42:11 उन्को सामने को रस्ता उत्तर कमरा को रस्ता को जसो होतो; उन्की लम्बायी चौड़ायी बराबर होती अऊर निकास अऊर ढंग उन्को दरवाजा को जसो होतो।
EZE 42:12 दक्षिनी कमरा को दरवाजा को अनुसार रस्ता को सुरूवात म दरवाजा होतो, मतलब पूर्व को तरफ की दीवाल को सामने, जहां सी लोग उन म जात होतो।
EZE 42:13 फिर ओन मोरो सी कह्यो, “हि उत्तरी अऊर दक्षिनी कमरा जो आंगन को सामने हय, हिच पवित्र कमरा हय, जिन म परमेश्वर को जवर जान वालो याजक परमपवित्र चिजे खायो करेंन, हि परमपवित्र चिजे, अऊर अन्नबलि, अऊर पापबलि, अऊर दोषबलि वहांच रखेंन; कहालीकि वा जागा पवित्र हय।
EZE 42:14 जब जब याजक लोग अन्दर जायेंन, तब तब निकलन को समय हि पवित्र जागा सी बाहेर आंगन म असोच नहीं निकलेंन, मतलब हि पहिले अपनी सेवा करन को कपड़ा पवित्र जागा म रख देयेंन; कहालीकि हि कमरा पवित्र हय। तब हि दूसरो कपड़ा पहिन क साधारन लोगों को संग म जायेंन।”
EZE 42:15 जब ऊ अन्दर को भवन ख नाप चुक्यो, तब मोख पूर्व दिशा को फाटक को रस्ता सी बाहेर लिजाय क बाहेर को जागा चारयी तरफ नापन लग्यो।
EZE 42:16 ओन पूर्व को तरफ को नापन को बांस सी नाप क पाच सौ बांस को पायो।
EZE 42:17 तब ओन उत्तर को तरफ ख नापन को बांस सी नाप क पाच सौ बांस को पायो।
EZE 42:18 तब ओन दक्षिन को तरफ को नापन को बांस सी नाप क पाच सौ बांस पायो;
EZE 42:19 अऊर पश्चिम को तरफ ख मुड़ क ओन नापन को बांस सी नाप क ओख पाच सौ बांस को पायो।
EZE 42:20 ओन ऊ जागा को चारयी सीमा नापी, अऊर ओको चारयी तरफ एक दीवाल होती, वा पाच सौ बांस लम्बी अऊर पाच सौ बांस चौड़ी होती, अऊर येकोलायी बनी होती कि पवित्र अऊर सर्वसाधारन ख अलग अलग करे।
EZE 43:1 फिर ऊ मोख वा फाटक को जवर ले गयो जो पूर्व को मुंह को होतो।
EZE 43:2 तब इस्राएल को परमेश्वर को तेज पूर्व दिशा सी आयो; अऊर ओकी वानी बहुत सो पानी की गर्जन जसी भयी; अऊर ओको तेज सी धरती प्रकाशित भयी।
EZE 43:3 यो दर्शन ऊ दर्शन को जसो होतो, जो मय न ओख नगर को नाश करन ख आतो समय देख्यो होतो; अऊर ऊ दर्शन को जसो, जो मय न कबार नदी को किनार पर देख्यो होतो; अऊर मय मुंह को बल गिर पड़्यो।
EZE 43:4 तब परमेश्वर को तेज वा फाटक सी होय क जो पूर्व को तरफ मुंह होतो, भवन म आय गयो।
EZE 43:5 तब आत्मा न मोख उठाय क अन्दर को आंगन म पहुंचायो; अऊर परमेश्वर को तेज भवन म भर गयो होतो।
EZE 43:6 तब मय न एक जन को आवाज सुन्यो, जो भवन म सी मोरो सी बोल रह्यो होतो, अऊर ऊ आदमी मोरो जवर खड़ो होतो।
EZE 43:7 ओन मोरो सी कह्यो, “हे आदमी की सन्तान, परमेश्वर की या वानी हय : यो त मोरो सिंहासन की जागा अऊर मोरो पाय रखन की जागा आय, जहां मय इस्राएल को बीच म हमेशा वाश करतो रहूं। नहीं त इस्राएल को घराना, अऊर नहीं ओको राजा अपनो व्यभिचार सी, यां अपनी ऊंची जागा म अपनो राजावों को शवों को द्वारा मोरो पवित्र नाम अशुद्ध ठहरायेंन।
EZE 43:8 हि अपनो चौखट मोरो चौखट को जवर, अऊर अपनो दरवाजा को खम्बा मोरो दरवाजा को खम्बा को जवर बनावय होतो, अऊर मोरो अऊर उन्को बीच केवल दीवालच होती, अऊर उन्न अपनो घिनौनो कामों सी मोरो पवित्र नाम अशुद्ध ठहरायो होतो; येकोलायी मय न क्रोध म आय क उन्ख नाश करयो।
EZE 43:9 अब हि अपनो व्यभिचार अऊर अपनो राजावों को शव मोरो सामने सी दूर कर दे, तब मय उन्को बीच हमेशा वाश करतो रहूं।
EZE 43:10 “हे आदमी की सन्तान, तय इस्राएल को घराना ख यो भवन को नमूना दिखाव कि हि अपनो अधर्म को कामों सी लज्जित होय क ऊ नमूना ख नापे।
EZE 43:11 यदि हि अपनो पूरो कामों सी लज्जित होये, त उन्ख यो भवन को आकार अऊर स्वरूप, अऊर येको बाहेर अऊर अन्दर आन जान को रस्ता, अऊर येको सब आकार अऊर विधियां, अऊर नियम बतायजो, अऊर उन्को सामने लिख क रखजो; जेकोसी हि येको सब आकार अऊर येकी सब विधियां याद कर क् ओको अनुसार करे।
EZE 43:12 भवन को नियम यो हय कि पहाड़ी की सेंडी को चारयी तरफ को पूरो भाग परमपवित्र हय। देख, भवन को नियम योच आय।
EZE 43:13 “असो हाथ को नाप सी जो साधारन हाथ सी चार बोट जादा हो, वेदी को नाप यो हय, मतलब ओको आधार एक हाथ को, अऊर ओकी चौड़ायी एक हाथ की, अऊर ओको चारयी तरफ को कोना पर की किनार चार बोट की हो। वेदी की ऊंचायी या आय :
EZE 43:14 जमीन पर रख्यो हुयो आधार सी ले क खल्लो की बैठक तक दोय हाथ की ऊंचायी रहे, अऊर ओकी चौड़ायी हाथ भर की हो; अऊर छोटी बैठक सी ले क बड़ी बैठक तक चार हाथ हो अऊर ओकी चौड़ायी हाथ भर की हो;
EZE 43:15 अऊर ऊपर को भाग चार हाथ को हो; अऊर वेदी पर जलावन की जागा को चार सींग ऊपर को तरफ निकल्यो हो।
EZE 43:16 वेदी पर जलावन की जागा चौकोन मतलब बारा हाथ लम्बो अऊर बारा हाथ चौड़ो हो।
EZE 43:17 खल्लो की बैठक चौदा हाथ लम्बी अऊर चौदा हाथ चौड़ी हो, अऊर ओको चारयी तरफ की किनार अरधो हाथ की हो, अऊर ओको आधार चारयी तरफ हाथ भर को हो। ओकी सीढ़ी ओको पूर्व को तरफ हो।”
EZE 43:18 फिर ओन मोरो सी कह्यो, “हे आदमी की सन्तान, परमेश्वर यहोवा यो कह्य हय, जो दिन होमबलि चढ़ावन अऊर खून छिड़कन को लायी वेदी बनायी जाये, ऊ दिन की विधियां या ठहरे :
EZE 43:19 मतलब लेवीय याजक लोग, जो सादोक की सन्तान आय, अऊर मोरी सेवा करन ख मोरो जवर रह्य हय, उन्ख तय पापबलि को लायी एक बछड़ा देजो, परमेश्वर यहोवा की या वानी आय।
EZE 43:20 तब तय ओको खून म सी कुछ ले क वेदी को चारयी सींगों अऊर बैठक को चारयी कोना अऊर चारयी तरफ की किनार पर लगायजो; यो तरह सी ओको लायी पश्चाताप करन को द्वारा ओख पवित्र करजो।
EZE 43:21 तब पापबलि को बछड़ा ख ले क, भवन को पवित्र जागा को बाहेर ठहरायो हुयो जागा म जलाय देजो।
EZE 43:22 दूसरो दिन एक निर्दोष बकरा पापबलि कर क् चढ़ायजो; अऊर जसो बछड़ा को द्वारा वेदी पवित्र करी जाये, वसोच ऊ यो बकरा को द्वारा भी पवित्र करयो जाये।
EZE 43:23 जब तय ओख पवित्र कर चुक्यो, तब एक निर्दोष बछड़ा अऊर एक निर्दोष मेंढा चढ़ायजो।
EZE 43:24 तय उन्ख परमेश्वर को सामने ले आजो, अऊर याजक लोग उन पर नमक डाल क उन्ख परमेश्वर ख होमबलि कर क् चढ़ाये।
EZE 43:25 सात दिन तक तय हर दिन पापबलि को लायी एक बकरा तैयार रखजो, अऊर निर्दोष बछड़ा अऊर मेंढा म सी निर्दोष मेंढा भी तैयार करयो जाये।
EZE 43:26 सात दिन तक याजक लोग वेदी को लायी पश्चाताप कर क् ओख शुद्ध करतो रहे; यो तरह ओको संस्कार हो।
EZE 43:27 जब हि दिन खतम होये, तब आठवों दिन को बाद सी याजक लोग तुम्हरो होमबलि अऊर मेलबलि वेदी पर चढ़ायो करे; तब मय तुम सी खुश रहूं, परमेश्वर यहोवा की या वानी आय।”
EZE 44:1 फिर ऊ मोख पवित्र जागा को ऊ बाहेर को फाटक को जवर लौटाय ले गयो, जो पूर्व को मुंह को हय; अऊर ऊ बन्द होतो।
EZE 44:2 तब परमेश्वर न मोरो सी कह्यो, “यो फाटक बन्द रहे अऊर खोल्यो नहीं जाये; कोयी येकोसी होय क अन्दर जानो नहीं पाये; कहालीकि इस्राएल को परमेश्वर यहोवा येकोसी होय क अन्दर आयो हय; यो वजह यो बन्द रहे।
EZE 44:3 केवल प्रधानच, प्रधान होन को वजह, परमेश्वर को सामने जेवन करन ख वहां बैठेंन; वा फाटक को ओसारा सी होय क अन्दर जाये, अऊर येकोसी होय क बाहेर निकले।”
EZE 44:4 फिर ऊ उत्तर दिशा को फाटक को जवर सी होय क मोख भवन को सामने ले गयो; तब मय न देख्यो कि परमेश्वर को भवन परमेश्वर को तेज सी भर गयो हय; अऊर मय मुंह को बल गिर पड़्यो।
EZE 44:5 तब परमेश्वर न मोरो सी कह्यो, “हे आदमी की सन्तान, ध्यान दे क अपनी आंखी सी देख, अऊर जो कुछ मय तोरो सी अपनो भवन की सब विधियों अऊर नियमों को बारे म कहू, ऊ सब अपनो कानों सी सुन; अऊर भवन म आवन अऊर पवित्र जागा म जान की अनुमति हय यां नहीं।”
EZE 44:6 अऊर उन विद्रोही मतलब इस्राएल को घराना सी कहजो, परमेश्वर यहोवा यो कह्य हय : हे इस्राएल को घराना, अपनो सब घृणित कामों ख छोड़ो।
EZE 44:7 जब तुम मोरो भोजन मतलब चर्बी अऊर खून चढ़ावत होतो, तब तुम बिराने लोगों ख जो मन अऊर तन दोयी को खतनारहित होतो, मोरो पवित्र जागा म आवन देत होतो कि हि मोरो भवन अपवित्र करे; अऊर उन्न मोरी वाचा ख तोड़ दियो जेकोसी तुम्हरो सब घृणित काम बढ़ गयो।
EZE 44:8 तुम न मोरी पवित्र चिजों की रक्षा नहीं करी, पर तुम न अपनोच मन सी दूसरो लोगों ख मोरो पवित्र जागा म मोरी चिजों की रक्षा करन वालो ठहरायो।
EZE 44:9 “येकोलायी परमेश्वर यहोवा यो कह्य हय : इस्राएलियों को बीच जितनो दूसरो लोग होना, जो मन अऊर तन दोयी को खतनाहीन हय, उन म सी कोयी मोरो पवित्र जागा म नहीं आनो पाये।”
EZE 44:10 “पर लेवीय लोग जो ऊ समय मोरो सी दूर भय गयो होतो, जब इस्राएली लोग मोख छोड़ क अपनी मूर्तियों को पीछू भटक गयो होतो, हि अपनो अधर्म को भार उठायेंन।
EZE 44:11 पर हि मोरो पवित्र जागा म सेवक होय क भवन को फाटकों को पहरा देन वालो अऊर भवन को सेवक रहे; हि होमबलि अऊर मेलबलि को जनावर लोगों को लायी बलि करे, अऊर उन्की सेवा करन लायी उन्को सामने खड़ो रहे।
EZE 44:12 कहालीकि इस्राएल को घराना की सेवा हि उन्की मूर्तियों को सामने करत होतो, अऊर उन्को ठोकर खान अऊर अधर्म म फसन को कारन भय गयो होतो; यो वजह मय न उन्को बारे म कसम खायी हय कि हि अपनो अधर्म को बोझ उठाये, परमेश्वर यहोवा की याच वानी आय।
EZE 44:13 हि मोरो जवर नहीं आयो, अऊर नहीं मोरो लायी याजक को काम करे; अऊर नहीं मोरी कोयी पवित्र चिज, यां कोयी परमपवित्र चिज ख छूनो पाये; हि अपनी लज्जा को अऊर जो घृणित काम उन्न करयो, उन्को भी बोझ उठायेंन।
EZE 44:14 तब मय उन्ख भवन म की सौंपी हुयी चिजों को रक्षक ठहराऊं; ओको म सेवा को जितनो काम होना, अऊर जो कुछ ओको म करनो होना, ओको करन वालो हिच हो।”
EZE 44:15 “फिर लेवीय याजक जो सादोक की सन्तान हंय, अऊर जिन्न ऊ समय मोरो पवित्र जागा की रक्षा करी जब इस्राएली मोरो जवर सी भटक गयो होतो, हि मोरी सेवा करन ख मोरो जवर आयो करे, अऊर मोख चर्बी अऊर खून चढ़ावन ख मोरो सामने खड़ो होतो रहे, परमेश्वर यहोवा की या वानी हय।
EZE 44:16 हि मोरो पवित्र जागा म आयो करे, अऊर मोरी मेज को जवर मोरी सेवा करन ख आये अऊर मोरी चिजों की रक्षा करे।”
EZE 44:17 जब हि अन्दर को आंगन को फाटकों सी होय क जायो करे, तब सन को कपड़ा पहिन्यो हुयो आये, अऊर जब हि अन्दर को आंगन को फाटकों म यां ओको अन्दर सेवा करत होना, तब ऊन को कोयी कपड़ा नहीं पहिने।
EZE 44:18 हि मुंड पर सन की सुन्दर टोपियां पहिने अऊर कमर म सन की जांघियां पहिन्यो रहे; कोयी असो कपड़ा सी हि कमर नहीं बान्धे जेकोसी पसीना होवय हय।
EZE 44:19 जब हि बाहेर को आंगन म लोगों को जवर गयो, तब जो कपड़ा पहिन्यो हुयो हि सेवा करत होतो, उन कपड़ा ख उतार क अऊर पवित्र कमरा म रख क दूसरो कपड़ा पहिन्यो, जेको सी लोग उन्को कपड़ा को वजह पवित्र नहीं ठहरयो।
EZE 44:20 “नहीं त हि मुंड मुंडाये, अऊर नहीं बाल लम्बो होन दे; हि केवल अपनो बाल कटाये।
EZE 44:21 अन्दर को आंगन म जान को समय कोयी याजक अंगूरीरस नहीं पीये।
EZE 44:22 हि विधवा यां छोड़ी हुयी बाई को संग बिहाव नहीं करे; केवल इस्राएल को घराना को वंश म सी कुवारी यां असी विधवा सी बिहाव कर ले जो कोयी याजक की पत्नि भयी होना।
EZE 44:23 “हि मोरो लोगों ख पवित्र अपवित्र को भेद सिखायो करे, अऊर शुद्ध अशुद्ध को अन्तर बतायो करे।
EZE 44:24 जब कोयी मुकद्दमा होना तब न्याय करन ख भी हिच बैठे, अऊर मोरो नियमों को अनुसार न्याय करे। मोरो सब निर्धारित त्यौहारों को बारे म भी हि मोरी व्यवस्था अऊर विधियों को पालन करे, अऊर मोरो आराम दिनों ख पवित्र माने।”
EZE 44:25 “हि कोयी आदमी को शव को जवर नहीं जाये कि अशुद्ध होय जाये; केवल माय-बाप, टुरा-टुरी; भाऊ अऊर असी बहिन को शव को वजह जेको बिहाव नहीं भयो होना हि अपनो ख अशुद्ध कर सकय हंय।
EZE 44:26 जब हि अशुद्ध होय जाये, तब उन्को लायी सात दिन गिन्यो जाये अऊर तब हि शुद्ध ठहरे,
EZE 44:27 अऊर जो दिन हि पवित्र जागा मतलब अन्दर को आंगन म सेवा करन ख फिर सिरे, ऊ दिन अपनो लायी पापबलि चढ़ाये, परमेश्वर यहोवा की या वाणी आय।”
EZE 44:28 “उन्को एकच निजी भाग होयेंन, मतलब उन्को भाग मच हय; तुम उन्ख इस्राएल को बीच कुछ असी जमीन मत देजो जो उन्की निजी होना; उन्की निजी जमीन मयच आय।
EZE 44:29 हि अन्नबलि, पापबलि अऊर दोषबलि खायो करे; अऊर इस्राएल म जो चिज अर्पन करी जाये, ऊ उन्ख मिल्यो करे।
EZE 44:30 सब तरह की सब सी पहली फसल अऊर सब तरह की उठायी हुयी चिज जो तुम उठाय क चढ़ावों, याजकों ख मिल्यो करे; अऊर नयो अनाज को पहलो उसन्यो हुयो आटा भी याजकों ख दियो करजो, जेकोसी तुम लोगों को घर म आशीष हो।
EZE 44:31 जो कुछ अपनो आप मरे यां फाड़्यो गयो होना, चाहे पक्षी होना यां जनावर ओको मांस याजक नहीं खाये।”
EZE 45:1 “जब तुम चिट्ठी डाल क देश ख बाटो, तब देश म सी एक हिस्सा पवित्र जान क परमेश्वर ख अर्पन करो; ओकी लम्बायी पच्चीस हजार बांस की अऊर चौड़ायी दस हजार बांस की होना, ऊ हिस्सा अपनो चारयी तरफ की सीमा तक पवित्र ठहरे।
EZE 45:2 ओको म सी पवित्र जागा लायी पाच सौ बांस लम्बी अऊर पाच सौ बांस चौड़ी चौकोन जमीन होना, अऊर ओको चारयी तरफ पचास पचास हाथ चौड़ी जमीन खुली रहे।
EZE 45:3 वा पवित्र जागा म तुम पच्चीस हजार बांस लम्बी अऊर दस हजार बांस चौड़ी जमीन ख नापो, अऊर ओकोच म पवित्र जागा बनावो, जो परमपवित्र ठहरे।
EZE 45:4 जो याजक पवित्र जागा की सेवा करे अऊर परमेश्वर की सेवा करन ख जवर आये, ऊ उन्कोच लायी हो; वहां उन्को घर को लायी जागा हो अऊर पवित्र जागा लायी पवित्र ठहरे।
EZE 45:5 फिर पच्चीस हजार बांस लम्बो, अऊर दस हजार बांस चौड़ो एक हिस्सा, भवन की सेवा करन वालो लेवियों को बीस कमरा को लायी होना।”
EZE 45:6 “फिर नगर लायी, अर्पन करयो हुयो पवित्र हिस्सा को जवर तुम पाच हजार बांस चौड़ी अऊर पच्चीस हजार बांस लम्बी, विशेष जमीन ठहराजो; ऊ इस्राएल को पूरो घराना लायी होना।”
EZE 45:7 “मुखिया को निजी हिस्सा पवित्र अर्पन करयो हुयो हिस्सा अऊर नगर की विशेष जमीन को दोयी तरफ मतलब दोयी को पश्चिम अऊर पूर्व दिशावों म दोयी हिस्सावों को सामने हो; अऊर उन्की लम्बायी पश्चिम सी ले क पूर्व तक उन दोयी हिस्सावों म सी कोयी भी एक को तुल्य होना।
EZE 45:8 इस्राएल को देश म मुखिया की याच निजी जमीन हो। मोरो ठहरायो हुयो मुखिया मोरो लोगों पर फिर अत्याचार नहीं करे; पर इस्राएल को घराना ख उन्को कुल को अनुसार देश मिले।”
EZE 45:9 “परमेश्वर यहोवा यो कह्य हय : हे इस्राएल को मुखियावों! बस करो, उपद्रव अऊर उत्पात ख दूर करो, अऊर न्याय अऊर धर्म को काम करतो रहो; मोरी प्रजा को लोगों ख निकाल देजो छोड़ देजो, परमेश्वर यहोवा की या वानी आय।
EZE 45:10 “तुम्हरो जवर सच्चो तराजू, सच्चो एपा, अऊर सच्चो बट रहे।
EZE 45:11 “एपा अऊर बट दोयी एकच नाप को होना, मतलब दोयी म कुड़ो को दसवों अंश समाये; दोयी को नाप कुड़ो को हिसाब सी होना।”
EZE 45:12 शेकेल बीस गेरा को होना; अऊर तुम्हरो माना बीस, पच्चीस, यां पन्द्रा शेकेल को होना।
EZE 45:13 “तुम्हरी उठायी हुयी भेंट या होना, मतलब गहूं को कुड़ो सी एपा को छटवों अंश, अऊर जौ को कुड़ो म सी एपा को छटवों अंश देजो।
EZE 45:14 तेल को निश्चित अंश कोर म सी बट को दसवों अंश होना; कोर त दस बट मतलब एक कुड़ो को बराबर हय, कहालीकि कुड़ो दस बट को होवय हय।”
EZE 45:15 इस्राएल की अच्छी अच्छी चराइयों सी दोय दोय मेंढि-शेरियों म सी एक मेंढी यां शेरी दियो जाये। हि सब चिजे अन्नबलि, होमबलि अऊर मेलबलि लायी दियो जाये जेको सी उन्को लायी पश्चाताप करयो जाये, परमेश्वर यहोवा की या वानी हय।
EZE 45:16 इस्राएल को मुखिया लायी देश को सब लोग या भेंट दे।
EZE 45:17 त्यौहारों, नयो चन्दा को दिनों, आराम दिनों अऊर इस्राएल को घराना को सब निश्चित समयों म होमबलि, अन्नबलि, अऊर अर्घ देनो मुखिया कोच काम हो। घराना लायी पश्चाताप करन लायी ऊ पापबलि, होमबलि, अऊर मेलबलि तैयार करे।
EZE 45:18 “परमेश्वर यहोवा यो कह्य हय : पहिलो महिना को पहिलो दिन ख तय एक निर्दोष बछड़ा ले क पवित्र जागा ख पवित्र करजो।
EZE 45:19 यो पापबलि को खून म सी याजक कुछ ले क भवन को चौखट को खम्बा, अऊर वेदी की कुर्सी को चारयी तरफ कोना, अऊर अन्दर को आंगन को फाटक को खम्बा पर लगाये।
EZE 45:20 फिर भूल सी यां अज्ञानवश जिन्न पाप करयो होना उन्को लायी महिना को सातवों दिन ख भी असोच करजो; योच तरह सी भवन को लायी पश्चाताप करजो।”
EZE 45:21 “पहिलो महिना को चौदावों दिन ख तुम्हरो त्यौहार होतो रहे, ऊ सात दिन को त्यौहार हो अऊर ओको म अखमीरी रोटी खायी जाये।
EZE 45:22 ऊ दिन मुखिया अपनो अऊर प्रजा को सब लोगों को निमित्त एक बछड़ा पापबलि लायी तैयार करे।
EZE 45:23 त्यौहार को सातों दिन ऊ परमेश्वर को लायी होमबलि तैयार करे, मतलब हर एक दिन सात सात निर्दोष बछड़ा अऊर सात सात निर्दोष मेंढा अऊर हर दिन एक एक बकरा पापबलि लायी तैयार करे।
EZE 45:24 हर एक बछड़ा अऊर मेंढा को संग ऊ एपा भर अन्नबलि अऊर एपा को पीछु हीन भर तेल तैयार करे।
EZE 45:25 “सातवों महिना को पन्द्रावों दिन सी ले क सात दिन तक मतलब त्यौहार को दिनों म ऊ पापबलि, होमबलि, अन्नबलि, अऊर तेल याच विधि को अनुसार करे।”
EZE 46:1 “परमेश्वर यहोवा यो कह्य हय : अन्दर को आंगन को पूर्वमुखी फाटक काम-काज को हप्ता को छय दिन बन्द रहे, पर आराम दिन ख खुलो रहे। नयो चन्दा को दिन भी खुलो रहे।
EZE 46:2 मुखिया बाहेर सी फाटक को ओसारा को रस्ता सी आय क फाटक को एक खम्बा को जवर खड़ो होय जाये, अऊर याजक ओको होमबलि अऊर मेलबलि तैयार करे; अऊर ऊ फाटक की डेहरी पर दण्डवत करे; तब ऊ बाहेर जाये, अऊर फाटक शाम सी पहले बन्द नहीं करयो जाये।
EZE 46:3 लोग आराम अऊर नयो चन्दा को दिनो म वा फाटक को दरवाजा म परमेश्वर को सामने दण्डवत करे।
EZE 46:4 आराम दिन म जो होमबलि मुखिया परमेश्वर लायी चढ़ाये, ऊ मेंढा को छय निर्दोष बच्चा अऊर एक निर्दोष मेंढा को होना।
EZE 46:5 अन्नबलि यो होना : मतलब मेंढा को संग एपा भर अनाज अऊर भेड़ को बच्चा को संग यथाशक्ति अनाज अऊर एपा को पीछु हीन भर तेल।
EZE 46:6 नयो चन्दा को दिन ऊ एक निर्दोष बछड़ा अऊर भेड़ को छय बच्चा अऊर एक मेंढा चढ़ाये; हि सब निर्दोष होना।
EZE 46:7 बछड़ा अऊर मेंढा दोयी को संग ऊ एक एक एपा अन्नबलि तैयार करे, अऊर भेड़ को बच्चां को संग यथाशक्ति अनाज, अऊर एपा को पीछु हीन भर तेल।
EZE 46:8 जब मुखिया अन्दर जाये तब वा फाटक को ओसारा सी होय क जाये, अऊर उच रस्ता सी निकल जाये।
EZE 46:9 “जब साधारन लोग नियमित समयों म परमेश्वर को सामने दण्डवत करन आये, तब जो उत्तरी फाटक सी होय क दण्डवत करन ख अन्दर आये, वा दक्षिनी फाटक सी होय क निकले, अऊर जो दक्षिनी फाटक सी होय क अन्दर आये, ऊ उत्तरी फाटक सी होय क निकले, मतलब जो फाटक सी अन्दर आयो होना, ऊ उच फाटक सी नहीं लौटे, अपनो सामनेच निकल जाये।
EZE 46:10 जब हि अन्दर आयो तब मुखिया उन्को बीच होय क आयो, अऊर जब हि निकल्यो, तब हि एक संग निकल्यो।
EZE 46:11 त्यौहारों अऊर दूसरो नियमित समयो को अन्नबलि एक बछड़ा को पीछु एपा भर, एक मेंढा को पीछु एपा भर को होना; अऊर भेड़ को बच्चां को संग यथाशक्ति अनाज अऊर एपा को पीछु हीन भर तेल।
EZE 46:12 “फिर जब मुखिया होमबलि यां मेलबलि ख खुद की इच्छाबलि कर क् परमेश्वर लायी तैयार करे, तब पूर्वमुखी फाटक उन्को लायी खोल्यो जाये, अऊर ऊ अपनो होमबलि यां मेलबलि वसोच तैयार करे जसो ऊ आराम दिन ख करय हय; तब ऊ निकले, अऊर ओको निकलन को पीछु फाटक बन्द करयो जाये।”
EZE 46:13 “हर दिन तय साल भर को एक निर्दोष भेड़ को बच्चा परमेश्वर को होमबलि लायी तैयार करजो, यो हर सुबेरे तैयार करयो जाये।
EZE 46:14 हर सुबेरे ओको संग एक अन्नबलि तैयार करजो, मतलब एपा को छटवों अंश अऊर मैदा म मिलावन लायी हीन भर तेल की तीसरो हिस्सा परमेश्वर लायी हमेशा को अन्नबलि नियमित विधि को अनुसार चढ़ायो जाये।
EZE 46:15 भेड़ को बच्चा, अन्नबलि अऊर तेल, हर सुबेरे नियमित होमबलि कर क् चढ़ायो जाये।”
EZE 46:16 “परमेश्वर यहोवा यो कह्य हय : यदि मुखिया अपनो कोयी टुरा ख कुछ दे, त ऊ ओको हिस्सा होय क ओको नाती ख भी मिले; हिस्सा को नियम को अनुसार ऊ उन्को भी निजी धन ठहरेंन।
EZE 46:17 पर यदि ऊ अपनो हिस्सा म सी अपनो कोयी कर्मचारी ख कुछ दे, त छुट्टी को साल तक त ऊ ओको बन्यो रहे, पर ओको बाद मुखिया ख लौटाय दियो जाये; अऊर ओको निजी हिस्साच ओको टुरावों ख मिले।
EZE 46:18 प्रजा को असो कोयी हिस्सा मुखिया नहीं ले, जो अत्याचार सी उन्की निजी जमीन म सी छीन्यो होना; अपनो टुरावों ख ऊ अपनीच निजी जमीन म सी हिस्सा दे; असो नहीं होय कि मोरी प्रजा को लोग अपनी अपनी निजी जमीन सी तितर-बितर होय जायेंन।”
EZE 46:19 फिर ऊ मोख फाटक को दूसरो तरफ को दरवाजा सी होय क याजकों की उत्तरमुखी पवित्र कमरा म ले गयो; वहां पश्चिमी तरफ को कोना म एक जागा होती।
EZE 46:20 तब ओन मोरो सी कह्यो, “यो ऊ जागा आय जेको म याजक लोग दोषबलि अऊर पापबलि को मांस ख पकाये अऊर अन्नबलि ख पकाये, असो नहीं होय कि उन्ख बाहेर को आंगन म लिजान सी साधारन लोग पवित्र ठहरे।”
EZE 46:21 तब ओन मोख बाहेर को आंगन म लिजाय क ऊ आंगन को चारयी तरफ को कोना म घुमायो, अऊर आंगन को हर एक कोना म एक एक छोटो आंगन बन्यो होतो,
EZE 46:22 मतलब आंगन को चारयी कोना म चालीस हाथ लम्बो अऊर तीस हाथ चौड़ो आंगन होतो; चारयी कोना को आंगन को एक जसो नाप होतो।
EZE 46:23 अन्दर चारयी तरफ दीवाल होती, अऊर दीवालों को खल्लो पकावन को चुलो बन्यो हुयो होतो।
EZE 46:24 तब ओन मोरो सी कह्यो, “पकावन को घर, जहां भवन को सेवक लोगों को लायी बलिदानों ख पकाये, हि योच आय।”
EZE 47:1 फिर ऊ मोख भवन को दरवाजा पर लौटाय ले गयो; अऊर भवन की डेहरी को खल्लो सी एक सोता निकल क पूर्व को तरफ बह रह्यी होती। भवन को दरवाजा त पूर्वमुखी होतो, अऊर सोता भवन को दायो तरफ अऊर वेदी की दक्षिन तरफ खल्लो सी निकलत होतो।
EZE 47:2 तब ऊ मोख उत्तर की फाटक सी होय क बाहेर ले गयो, अऊर बाहेर बाहेर सी घुमाय क बाहरी मतलब पूर्वमुखी फाटक को जवर पहुंचाय दियो, अऊर दक्षिन को तरफ सी पानी टपक क बह रह्यो होतो।
EZE 47:3 जब ऊ आदमी हाथ म नापन की दोरी लियो हुयो पूर्व को तरफ निकल्यो, तब ओन भवन सी ले क, हजार हाथ तक ऊ सोता ख नाप्यो, अऊर मोख पानी म सी चलायो, अऊर पानी येड़ी तक होतो।
EZE 47:4 ओन फिर हजार हाथ नाप क मोख पानी म सी चलायो, अऊर पानी घुटना तक होतो। फिर अऊर हजार हाथ नाप क मोख पानी म सी चलायो, अऊर पानी कमर तक होतो।
EZE 47:5 तब फिर ओन एक हजार हाथ नाप्यो, अऊर असी नदी बन गयी जेको ओनपार मय नहीं जाय सक्यो, कहालीकि पानी बढ़ क तैरन को लायक होतो; मतलब असी नदी होती जेको ओनपार कोयी नहीं जाय सकत होतो।
EZE 47:6 तब ओन मोरो सी पुच्छ्यो, “हे आदमी की सन्तान,” का तय न यो देख्यो हय? फिर ओन मोख नदी को किनार-किनार लौटाय क पहुंचाय दियो।
EZE 47:7 लौट क मय न का देख्यो, कि नदी को दोयी किनार पर बहुत सो झाड़ हय।
EZE 47:8 तब ओन मोरो सी कह्यो, “यो सोता पूर्व देश को तरफ बह रह्यो हय, अऊर अराबा म उतर क तलाव को तरफ बहेंन; अऊर यो भवन सी निकलतो हुयो सीधो तलाव म मिल जायेंन; अऊर ओको पानी मीठो होय जायेंन।
EZE 47:9 जहां जहां या नदी बहेंन, वहां वहां सब तरह को बहुत अन्डा देन वालो जीवजन्तु जीयेंन अऊर मच्छियां भी बहुत होय जायेंन; कहालीकि यो सोता को पानी वहां पहुंच्यो हय, अऊर तलाव को पानी मीठो होय जायेंन; अऊर जहां कहीं या नदी पहुंचेंन वहां सब जन्तु जीयेंन।
EZE 47:10 तलाव को किनार पर मछवारा खड़ो रहेंन, अऊर एनगदी सी ले क ऐनेग्लैम तक वहां जार फैलायो जायेंन, अऊर उन्ख महासागर की जसी अलग अलग की अनगिनत मच्छियां मिलेंन।
EZE 47:11 पर तलाव को जवर जो दलदल अऊर गड्डा हय, उन्को पानी मीठो नहीं होयेंन; हि खारोच रहेंन।
EZE 47:12 नदी को दोयी किनार पर अलग अलग को खान को लायक फलदायक झाड़ उगेंन, जिन्को पत्ता नहीं मुर्झायेंन अऊर उन्को फरनो भी कभी बन्द नहीं होयेंन, कहालीकि नदी को पानी पवित्र जागा सी निकल्यो हय। उन म महीना महीना नयो नयो फर लगेंन। उन्को फर त खान को, अऊर पत्ता दवायी को काम आयेंन।”
EZE 47:13 परमेश्वर यहोवा यो कह्य हय, “जो सीमा को अन्दर तुम्ख यो इस्राएल देश अपनो बारा कुलों को अनुसार बांटनो पड़ेंन, ऊ यो आय : यूसुफ ख दोय हिस्सा मिल्यो।
EZE 47:14 ओख तुम एक दूसरो को जसो निजी हिस्सा म पावों, कहालीकि मय न कसम खायी कि ओख तुम्हरो पूर्वजों ख देऊं, येकोलायी यो देश तुम्हरो निजी हिस्सा ठहरेंन।”
EZE 47:15 “देश की सीमा या हो : मतलब उत्तर को तरफ की सीमा महासागर सी हेतलोन नगर को जवर सी सदाद की घाटी तक पहुंचे,
EZE 47:16 अऊर वा सीमा को जवर हमात बेरोता, अऊर सिब्रैम जो दमिश्क अऊर हमात की सीमावों को बीच म हय, अऊर हसर्हत्तीकोन तक, जो हौरान नगर की सीमा पर हय।
EZE 47:17 या सीमा समुन्दर सी ले क दमिश्क की सीमा को जवर को हसरेनोत नगर तक पहुंचे, अऊर ओको उत्तर को तरफ हमात की सीमा हो। उत्तर की सीमा याच होय।
EZE 47:18 “पूर्वी सीमा जेको एक तरफ हौरान अऊर दमिश्क; अऊर यरदन को तरफ गिलाद अऊर इस्राएल को देश हो; उत्तर की सीमा सी ले क पूर्वी तलाव तक ओख नापजो। पूर्वी सीमा त याच हो।”
EZE 47:19 “दक्षिन की सीमा तामार सी ले क कादेश नगर को मरीबोत नाम को सोता तक मतलब मिस्र को नाला तक, अऊर महासागर तक पहुंचे। दक्षिन की सीमा याच हो।”
EZE 47:20 “पश्चिमी सीमा दक्षिनी सीमा सी ले क हमात की घाटी को सामने तक को महासागर हो। पश्चिमी सीमा याच हो।”
EZE 47:21 “यो तरह देश ख इस्राएल को कुलों को अनुसार आपस म बांट लेजो।
EZE 47:22 येख आपस म अऊर उन परदेशियों को संग बांट लेजो, जो तुम्हरो बीच रहतो हुयो बालकों ख जनम दे। हि तुम्हरी नजर म देशी इस्राएलियों को जसो ठहरे, अऊर तुम्हरो कुलों को बीच अपनो अपनो हिस्सा पाये।
EZE 47:23 जो परदेशी जो कुल को देश म रहत होना, ओख वहांच हिस्सा देवो, परमेश्वर यहोवा की या वानी हय।”
EZE 48:1 “कुलों को हिस्सा यो होना : उत्तर की सीमा सी लग्यो हुयो हेतलोन को रस्ता को जवर सी हमात की घाटी तक, अऊर दमिश्क की सीमा को जवर को हसरेनान सी उत्तर को तरफ हमात को जवर तक एक हिस्सा दान को होना; अऊर ओको पूर्व को तरफ पश्चिम की सीमा भी होना।”
EZE 48:2 दान की सीमा सी लग्यो हुयो पूर्व सी पश्चिम तक आशेर को एक हिस्सा हो।
EZE 48:3 आशेर की सीमा सी लग्यो हुयो, पूर्व सी पश्चिम तक नप्ताली को एक हिस्सा हो।
EZE 48:4 नप्ताली की सीमा सी लग्यो हुयो पूर्व सी पश्चिम तक मनश्शे को एक हिस्सा।
EZE 48:5 मनश्शे की सीमा सी लग्यो हुयो पूर्व सी पश्चिम तक एप्रैम को एक हिस्सा हो।
EZE 48:6 एप्रैम की सीमा सी लग्यो हुयो पूर्व सी पश्चिम तक रूबेन को एक हिस्सा हो।
EZE 48:7 रूबेन की सीमा सी लग्यो हुयो, पूर्व सी पश्चिम तक यहूदा को एक हिस्सा हो।
EZE 48:8 “यहूदा की सीमा सी लग्यो हुयो पूर्व सी पश्चिम तक ऊ अर्पन करयो हुयो हिस्सा होना, जेख तुम्ख अर्पन करनो पड़ेंन, ऊ पच्चीस हजार बांस चौड़ो अऊर पूर्व सी पश्चिम तक कोयी एक कुल ख हिस्सा को समान लम्बो हो, अऊर ओको बीच म पवित्र जागा हो।”
EZE 48:9 जो हिस्सा तुम्ख परमेश्वर ख अर्पन करनो पड़ेंन, उन्की लम्बायी पच्चीस हजार बांस अऊर चौड़ायी दस हजार बांस की होना।
EZE 48:10 यो अर्पन करयो हुयो पवित्र हिस्सा याजकों ख मिले; ऊ उत्तर को तरफ पच्चीस हजार बांस लम्बो, पश्चिम को तरफ दस हजार बांस चौड़ो, पूर्व को तरफ दस हजार बांस चौड़ो अऊर दक्षिन को तरफ पच्चीस हजार बांस लम्बो होना; अऊर ओको बीचोबीच परमेश्वर को पवित्र जागा हो।
EZE 48:11 यो विशेष पवित्र हिस्सा सादोक की सन्तान को उन याजकों को होये जो मोरी आज्ञावों को पालन करतो रहे, अऊर इस्राएलियों को भटक जान को समय लेवियों को समान नहीं भटक्यो होतो।
EZE 48:12 येकोलायी देश को अर्पन करयो हुयो हिस्सा म सी यो उन्को लायी हिस्सा मतलब परमपवित्र देश ठहरे; अऊर लेवियों की सीमा सी लग्यो रहे।
EZE 48:13 याजकों की सीमा सी लग्यो हुयो लेवियों को हिस्सा हो, ऊ पच्चीस हजार बांस लम्बो अऊर दस हजार बांस चौड़ो होना। पूरी लम्बायी पच्चीस हजार बांस की अऊर चौड़ायी दस हजार बांस की होना।
EZE 48:14 हि ओको म सी नहीं त कुछ बेचे, नहीं दूसरी जमीन सी बदले; अऊर नहीं जमीन की पहली फसल अऊर कोयी ख दियो जाये। कहालीकि ऊ परमेश्वर लायी पवित्र हय।
EZE 48:15 “चौड़ायी को पच्चीस हजार बांस को सामने जो पाच हजार बच्यो रहेंन, ऊ नगर अऊर बस्ती अऊर चरायी लायी साधारन हिस्सा होना; अऊर नगर ओको बीच म होना।
EZE 48:16 नगर को यो नाप हो, मतलब उत्तर, दक्षिन, पूर्व अऊर पश्चिम को तरफ साढ़े चार चार हजार हाथ।
EZE 48:17 नगर को जवर उत्तर, दक्षिन, पूर्व, पश्चिम म चराइयां हो। जो ढायी ढायी सौ बांस चौड़ी होना।
EZE 48:18 अर्पन करयो हुयो पवित्र हिस्सा को जवर की लम्बायी म सी जो कुछ बचे, मतलब पूर्व अऊर पश्चिम दोयी तरफ दस दस हजार बांस जो अर्पन करयो हुयो हिस्सा को जवर होना, ओकी फसल नगर म मेहनत करन वालों को खान को लायी होना।
EZE 48:19 इस्राएल को पूरो कुल म सी जो नगर म मेहनत करे, हि ओकी खेती करे।”
EZE 48:20 पूरो अर्पन करयो हुयो हिस्सा पच्चीस हजार बांस लम्बो अऊर पच्चीस हजार बांस चौड़ो होना; तुम्ख चौकोन पवित्र हिस्सा अर्पन करनो पड़ेंन जेको म नगर की विशेष जमीन होना।
EZE 48:21 “जो हिस्सा रह जाये, ऊ मुखिया ख मिले। पवित्र अर्पन करयो हुयो हिस्सा को, अऊर नगर की विशेष जमीन को दोयी तरफ मतलब उन्को पूर्व को तरफ पश्चिम को तरफ को पच्चीस पच्चीस हजार बांस की चौड़ायी को जवर, जो अऊर कुलों को हिस्सावों को जवर रहे, ऊ मुखिया ख मिले। अर्पन करयो हुयो पवित्र हिस्सा अऊर भवन को पवित्र जागा उन्को बीच म रहे।
EZE 48:22 जो मुखिया को हिस्सा रहे, ऊ लेवियों को बीच अऊर नगरों की विशेष जमीन होना। मुखिया को हिस्सा यहूदा अऊर बिन्यामीन की सीमा को बीच म रहे।”
EZE 48:23 दूसरो कुलों को हिस्सा यो तरह हो : पूर्व सी पश्चिम तक बिन्यामीन को एक हिस्सा हो।
EZE 48:24 बिन्यामीन की सीमा सी लग्यो हुयो पूर्व सी पश्चिम तक शिमोन को एक हिस्सा।
EZE 48:25 शिमोन की सीमा सी लग्यो हुयो पूर्व सी पश्चिम तक इस्साकार को एक हिस्सा।
EZE 48:26 इस्साकार की सीमा सी लग्यो हुयो पूर्व सी पश्चिम तक जबूलून को एक हिस्सा।
EZE 48:27 जबूलून की सीमा सी लग्यो हुयो पूर्व सी पश्चिम तक गाद को एक हिस्सा।
EZE 48:28 अऊर गाद की सीमा को जवर दक्षिन को तरफ सीमा तामार सी ले क कादेश को मरीबोत नाम को सोता तक, अऊर मिस्र को नाला अऊर महासागर तक पहुंचे।
EZE 48:29 जो देश तुम्ख इस्राएल को कुलों ख बांटनो पड़ेंन ऊ योच आय, अऊर उन्को हिस्सा भी योच आय, परमेश्वर यहोवा की या वानी आय।
EZE 48:30 “नगर को निकलन को रस्ता यो आय, मतलब उत्तर को तरफ जेकी लम्बायी साढ़े चार हजार बांस की होना।
EZE 48:31 ओको म तीन फाटक होना; मतलब एक रूबेन को फाटक, एक यहूदा को फाटक,अऊर एक लेवी को फाटक होना; कहालीकि नगर की फाटकों को नाम इस्राएल को कुलों को नामों पर रखनो पड़ेंन।
EZE 48:32 पूर्व को तरफ सीमा साढ़े चार हजार बांस लम्बो होना; अऊर ओको म तीन फाटक होना; मतलब एक यूसुफ की फाटक, एक बिन्यामीन की फाटक, अऊर एक दान की फाटक होना।
EZE 48:33 दक्षिन को तरफ सीमा साढ़े चार हजार बांस लम्बो होना, अऊर ओको म तीन फाटक होना; मतलब एक शिमोन की फाटक, एक इस्साकार की फाटक, अऊर एक जबूलून की फाटक होना;
EZE 48:34 अऊर पश्चिम को तरफ सीमा साढ़े चार हजार बांस लम्बी होना, अऊर ओको म तीन फाटक होना; मतलब एक गाद की फाटक, एक आशेर की फाटक अऊर एक नप्ताली की फाटक होना।
EZE 48:35 नगर को चारयी तरफ को घेरा अठरा हजार बांस को होना, अऊर ऊ दिन सी आगु नगर को नाम ‘यहोवा शाम्मा’ रहेंन।”
DAN 1:1 यहूदा को राजा यहोयाकीम को राज्य को तीसरो साल म बेबीलोन को राजा नबूकदनेस्सर न यरूशलेम पर चढ़ायी कर क् ओख घेर लियो।
DAN 1:2 तब प्रभु परमेश्वर न यहूदा को राजा यहोयाकीम ख परमेश्वर को भवन को कयी बर्तनों समेत ओको हाथ म कर दियो; अऊर ओन उन बर्तनों ख शिनार देश म अपनो देवता को मन्दिर म लिजाय क, अपनो देवता को भण्डार घर म रख दियो।
DAN 1:3 तब ऊ राजा न अपनो मुख्य प्रधान अशपनज ख आज्ञा दी कि इस्राएली राज घराना को अऊर प्रतिष्ठित परिवार म सी असो कयी जवानों ख लाव,
DAN 1:4 जो निर्दोष, सुन्दर अऊर सब तरह की बुद्धि म तेज, अऊर आज्ञा म परिपूर्ण अऊर विद्वान, अऊर राजमन्दिर म हाजिर रहन को लायक हो; अऊर उन्ख कसदियों को शास्त्र अऊर भाषा की शिक्षा दे।
DAN 1:5 राजा न आज्ञा दी कि ओको जेवन अऊर पीवन को अंगूरीरस म सी उन्ख हर दिन खान पीवन ख दियो जाये। यो तरह तीन साल तक उन्को पालन पोषन होतो रहे; तब ओको बाद हि राजा को आगु हाजिर करयो जाये।
DAN 1:6 उन्म यहूदा की सन्तान सी चुन्यो हुयो दानिय्येल, हनन्याह, मीशाएल, अऊर अजर्याह नाम को यहूदी होतो।
DAN 1:7 खोजों को प्रधान न उन्को दूसरो नाम रख्यो; मतलब दानिय्येल को नाम ओन बेलतशस्सर, हनन्याह को शद्रक, मीशाएल को मेशक, अऊर अजर्याह को नाम अबेदनगो रख्यो।
DAN 1:8 पर दानिय्येल न अपनो मन म ठान लियो कि ऊ राजा को जेवन खाय क, अऊर ओको पीवन को अंगूरीरस पी क अपवित्र न होये; येकोलायी ओन मुख्य प्रधान सी बिनती करी कि ओख अपवित्र न होनो पड़े।
DAN 1:9 परमेश्वर न मुख्य प्रधान को मन म दानिय्येल को प्रति कृपा अऊर दया भर दी।
DAN 1:10 खोजों को प्रधान न दानिय्येल सी कह्यो, “मय अपनो स्वामी राजा सी डरू हय, कहालीकि तुम्हरो खानो पीनो ओनच ठहरायो हय, कही असो नहीं होय कि ऊ तोरो मुंह तोरो संग को जवानों सी उतरयो हुयो अऊर उदास देखे अऊर तुम मोरी मुंड राजा को आगु जोखिम म डालो।”
DAN 1:11 तब दानिय्येल न ऊ मुखिया सी, जेख खोजों को प्रधान न दानिय्येल, हनन्याह, मीशाएल, अऊर अजर्याह को खान पिवन की व्यवस्था करन लायी नियुक्त करयो होतो, कह्यो,
DAN 1:12 “मय तोरो सी बिनती करू हय, कि अपनो दासों ख दस दिन तक जांच, हमरो खान लायी सब्जी भाजी अऊर पीवन लायी पानीच दियो जाये।
DAN 1:13 तब दस दिन को बाद हमरो मुंह अऊर जो जवान राजा को जेवन खावय हंय उन्को मुंह ख देख; अऊर जसो तोख दिखेंन, ओकोच अनुसार अपनो दासों सी व्यवहार करजो।”
DAN 1:14 उन्की या बिनती ओन मान ली, अऊर दस दिन तक उन्ख जांचतो रह्यो।
DAN 1:15 दस दिन को बाद उन्को मुंह राजा को जेवन ख खान वालो सब जवानों सी बहुत अच्छो अऊर मोटो दिखायी पड़्यो।
DAN 1:16 तब जो जेवन की व्यवस्था करत होतो ऊ मुखिया उन्को जेवन अऊर उन्को पीवन लायी ठह्यरायो हुयो अंगूरी रस दोयी छुड़ाय क, उन्ख सब्जी भाजी देन लग्यो।
DAN 1:17 परमेश्वर न उन चारों जवानों ख सब तरह को पढ़नो लिखनो अऊर सब तरह की शिक्षा म बुद्धिमानी अऊर चतुरायी दी; अऊर दानिय्येल सब तरह को दर्शन अऊर सपनो को अर्थ को ज्ञानी भय गयो।
DAN 1:18 तब तीन साल को बाद नबूकदनेस्सर राजा न जवानों ख अन्दर ले आवन की आज्ञा दी होती, उतनो दिनों को बीतन पर खोजों को प्रधान उन्ख ओको आगु ले गयो।
DAN 1:19 राजा उन सी बातचीत करन लग्यो; अऊर दानिय्येल, हनन्याह, मीशाएल, अऊर अजर्याह को जसो उन सब म सी कोयी नहीं ठह्यरयो; येकोलायी हि राजा को आगु मौजूद रहन लग्यो।
DAN 1:20 बुद्धि अऊर हर तरह की समझ को बारे म जो कयी राजा उन्को सी पूछत होतो ओको म हि राज्य भर को सब ज्योतिषियों अऊर तंत्रियों सी दसगुना होशियार ठह्यरत होतो।
DAN 1:21 अऊर दानिय्येल बेबीलोन को दरबार म कुस्रू राजा को राज्यकाल को पहिलो साल तक बन्यो रह्यो।
DAN 2:1 अपनो राज्य को दूसरो साल म नबूकदनेस्सर न असो सपनो देख्यो जेको सी ओको मन बहुतच चिन्तित भय गयो अऊर ओकी नींद उड़ गयी।
DAN 2:2 तब राजा न आज्ञा दी, कि भविष्य देखन वालो, तांत्रीक, टोना करन वालो अऊर कसदी पंडित बुलायो जाये कि हि राजा ख ओको सपनो बताये; येकोलायी हि आयो अऊर राजा को आगु हाजिर भयो।
DAN 2:3 तब राजा न उन्को सी कह्यो, “मय न एक सपनो देख्यो हय, अऊर मोरो मन व्याकुल हय कि सपनो ख कसो समझुं।”
DAN 2:4 तब कसदियों न राजा सी अरामी भाषा म कह्यो, “हे राजा, तय चिरंजीवी रह्यजो! अपनो दासों ख सपनो बता, अऊर हम ओको अर्थ बतायबो।”
DAN 2:5 राजा न कसदियों ख उत्तर दियो, “मय या आज्ञा दे चुक्यो हय कि यदि तुम अर्थ सहीत सपनो ख नहीं बतावो त तुम टुकड़ा टुकड़ा करयो जावों, अऊर तुम्हरो घर जलाय दियो जायेंन।
DAN 2:6 पर यदि तुम अर्थ सहीत सपनो ख बताय देवो त मोरो सी भाति भाति को इनाम अऊर भारी प्रतिष्ठा पावों। येकोलायी तुम मोख अर्थ सहीत सपनो बतावो।”
DAN 2:7 उन्न दूसरी बार कह्यो, “हे राजा, सपनो तोरो दासों ख बतायो जाये, अऊर हम ओको अर्थ समझाय देबो।”
DAN 2:8 राजा न उत्तर दियो, “मय निश्चय जानु हय कि तुम या बाते केवल समय काटन लायी कह्य रह्यो हय; कहालीकि तुम जानय हय कि मोरो यो वचन अटल हय।
DAN 2:9 येकोलायी यदि तुम मोख सपनो नहीं बतावो त तुम्हरो लायी एकच आज्ञा हय। कहालीकि तुम आपस म या बात म एकमत भय गयो हय कि जब तक समय न बदले, तब तक हम राजा को आगु झूठी अऊर गपशप की बाते कित करबों। येकोलायी तुम मोख सपनो बतावो, तब मय जानूं कि तुम ओको अर्थ भी समझाय सकय हय।”
DAN 2:10 कसदियों न राजा सी कह्यो, “धरती भर म असो कोयी आदमी नहीं जो राजा को मन की बात बता सके; अऊर न कोयी असो राजा, या प्रधान, या हाकिम कभी भयो हय जेन कोयी ज्योतिषी, या तांत्रीक, या कसदी पंडित सी असी बात पूछी हो।
DAN 2:11 जो बात राजा पूछय हय, वा कठिन हय, अऊर देवतावों ख छोड़ क जिन्को निवास आदमियों को संग नहाय, अऊर कोयी दूसरो नहीं, जो राजा ख यो बताय सके।”
DAN 2:12 येको पर राजा नबूकदनेस्सर नाराज भय गयो, अऊर बहुतच गुस्सा होय क, बेबीलोन को सब पण्डितों को मारन की आज्ञा दे दी।
DAN 2:13 फिर या आज्ञा निकली, अऊर ज्ञानी लोगों ख मारन पर होतो; अऊर लोग दानिय्येल अऊर ओको संगियों ख ढूंढ़ रह्यो होतो कि हि भी मारयो जाये।
DAN 2:14 तब दानिय्येल न, अंगरक्षकों को प्रधान अर्योक सी, जो बेबीलोन को पण्डितों ख मारन लायी निकल्यो होतो, सोच बिचार कर बुद्धिमानी को साथ कह्यो;
DAN 2:15 अऊर राजा को हाकिम अर्योक सी पूछन लग्यो, “या आज्ञा राजा को तरफ सी असी उतावली को संग कहाली निकली?” तब अर्योक न दानिय्येल ख येको भेद बताय दियो।
DAN 2:16 तब दानिय्येल न अन्दर जाय क राजा सी बिनती करी, कि ओको लायी कोयी समय ठहरायो जाये, ताकि ऊ महाराज ख सपनो को अर्थ बताय सके।
DAN 2:17 तब दानिय्येल न अपनो घर जाय क, अपनो संगी हनन्याह, मीशाएल, अऊर अजर्याह ख यो हाल बताय क कह्यो,
DAN 2:18 यो भेद को बारे म स्वर्ग को परमेश्वर की दया लायी यो कह्य क प्रार्थना करो, कि बेबीलोन को अऊर सब पण्डितों को संग, दानिय्येल अऊर ओको संगी भी नाश नहीं करयो जाये।
DAN 2:19 तब ऊ भेद दानिय्येल ख रात को समय दर्शन को द्वारा प्रगट करयो गयो। तब दानिय्येल न स्वर्ग को परमेश्वर को यो कह्य क धन्यवाद करयो,
DAN 2:20 दानिय्येल न कह्यो, “परमेश्वर को नाम युगानुयुग धन्य हय; कहालीकि बुद्धि अऊर पराक्रम ओकीच हंय।
DAN 2:21 उच हय, जो समयों अऊर ऋतुवों ख उच बदलय हय; राजावों ख सिंहासन सी हटावय हय अऊर दूसरो ख सिंहासन पर बैठावय हय; हि बुद्धिमानों ख बुद्धि अऊर समझदार ख समझ देवय हय;
DAN 2:22 उच अच्छो अऊर गुप्त बातों ख प्रगट करय हंय; ऊ जानय हय कि अन्धारो म का हय, अऊर ओको संग हमेशा उजारो बन्यो रह्य हय।
DAN 2:23 हे मोरो पूर्वजों को परमेश्वर, मय तोरो धन्यवाद अऊर स्तुति करू हय, कहालीकि तय न मोख बुद्धि अऊर शक्ति दी हय, अऊर जो भेद को खुलनो हम लोगों न तोरो सी मांग्यो होतो, ओख तय न मोरो पर प्रगट करयो हय, तय न हम्ख राजा कि बात बतायी हय।”
DAN 2:24 तब दानिय्येल अर्योक को जवर गयो, जेख राजा न बेबीलोन को पण्डितों को नाश करन लायी ठह्यरायो होतो, अन्दर जाय क कह्यो, “बेबीलोन को पण्डितों को नाश मत कर, मोख राजा को आगु अन्दर ले क चल, मय राजा ख उन्को सपनो को अर्थ बताऊं।”
DAN 2:25 तब अर्योक न दानिय्येल ख राजा को आगु जल्दीच अन्दर लिजाय क ओको सी कह्यो, “यहूदी बन्दियों म सी एक आदमी मोख मिल्यो हय, जो राजा ख सपनो को अर्थ बतायेंन।”
DAN 2:26 राजा नबूकदनेस्सर न दानिय्येल सी, जेको नाम बेलतशस्सर भी होतो, पुच्छ्यो, “का तोरो म इतनी शक्ति हय कि जो सपनो मय न देख्यो हय, ओख अर्थ सहीत मोख बता सके?”
DAN 2:27 दानिय्येल न राजा ख उत्तर दियो, जो भेद राजा तय पूछय हय, ऊ न त पंडित, न तांत्रीक, न ज्योतिषी, न दूसरो भावी बताय सकय हंय, यो कोयी आदमी सी सम्भव नहाय,
DAN 2:28 पर भेदो को प्रगटकर्ता परमेश्वर स्वर्ग म हय; अऊर ओन नबूकदनेस्सर राजा ख बतायो हय कि भविष्य म का का होन वालो हय। तोरो सपनो अऊर जो कयी तय न पलंग पर पड़्यो हुयो देख्यो, ऊ यो आय :
DAN 2:29 हे राजा, जब तोख पलंग पर यो बिचार आयो कि भविष्य म का का होन वालो हय, तब भेदों ख खोलन वालो न तोख बतायो कि का का होन वालो हय।
DAN 2:30 मोरो पर यो भेद यो वजह नहीं खोल्यो गयो कि मय अऊर सब जीवित लोगों सी अधिक बुद्धिमान हय, पर केवल यो वजह खोल्यो गयो हय कि सपनो को अर्थ राजा ख बतायो जाये, अऊर तय अपनो मन को बिचार समझ सके।
DAN 2:31 “हे राजा, जब तय देख रह्यो होतो, तब एक बड़ी मुर्ति देख पड़ी, अऊर वा मूर्ति जो तोरो आगु खड़ी होती, वा लम्बी चौड़ी होती; ओकी चमक अनुपम होती, अऊर ओको रूप भयंकर होतो।
DAN 2:32 वा मूर्ति की मुंड त शुद्ध सोनो की होती, ओकी छाती अऊर भुजाये चांदी की, ओको पेट अऊर जांघ पीतल की,
DAN 2:33 ओकी टांग लोहा की अऊर ओको पाय कुछ त लोहा को अऊर कुछ माटी को होतो।
DAN 2:34 तब देखतो देखतो, तय न का देख्यो, कि एक गोटा न, बिना कोयी को उखाड़्यो, खुदच उखड़ क वा मूर्ति को पाय पर लग क जो लोहा अऊर माटी की होती, उन्ख चूर चूर कर डाल्यो।”
DAN 2:35 तब लोहा, माटी, पीतल, चांदी अऊर सोनो भी सब चूर चूर भय गयो, अऊर उनारो को दिन म खलिहानों को भूसा को जसो हवा सी असी उड़ गयी कि उन्को कही पता नहीं रह्यो; अऊर ऊ गोटा जो मूर्ति पर लग्यो होतो, ऊ बड़ो पहाड़ बन क पूरी धरती पर फैल गयो।
DAN 2:36 “सपनो त योच भयो; अऊर अब हम ओको अर्थ राजा ख समझाय देजे हय।
DAN 2:37 हे राजा, तय त महाराजाधिराज हय, कहालीकि स्वर्ग को परमेश्वर न तोख राज्य, सामर्थ, शक्ति अऊर महीमा दी हय,
DAN 2:38 अऊर जहां कही आदमी पायो जावय हंय, उत ओन उन पूरो ख, अऊर मैदान को जीवजन्तु, अऊर आसमान को पक्षी भी तोरो बस म कर दियो हय; अऊर तोख उन सब को अधिकारी ठह्यरायो हय। यो सोनो की मुंड तयच आय।
DAN 2:39 तोरो बाद एक राज्य अऊर उदय होयेंन जो तोरो सी छोटो होयेंन; फिर एक अऊर तीसरो पीतल को जसो राज्य होयेंन जो पूरी धरती पर शासन करेंन।
DAN 2:40 चौथो राज्य लोहा को तुल्य मजबूत होयेंन; लोहा सी त सब चिजे चूर चूर होय जावय अऊर पिस जावय हय; येकोलायी जो लोहा सीच हि सब कुचली जावय हय, वसोच, ऊ चौथो राज्य सी सब कयी चूर चूर होय क पिस जायेंन।
DAN 2:41 तय न जो मूर्ति को पाय अऊर उन्की उंगलियों ख देख्यो, जो कयी कुम्हार की माटी की अऊर कयी लोहा की होती, येको सी ऊ चौथो राज्य बट्यो हुयो होयेंन; तब भी ओको म लोहा को जसो ताकतवर रहेंन, जसो कि तय न कुम्हार की माटी को संग लोहा भी मिल्यो हुयो देख्यो होतो।
DAN 2:42 जसी पाय की उंगलियां कुछ लोहा की अऊर कुछ माटी की होती, येको अर्थ यो हय, कि ऊ राज्य कुछ त मजबूत अऊर कुछ कमजोर होयेंन।
DAN 2:43 तय न जो लोहा ख कुम्हार की माटी को संग मिल्यो हुयो देख्यो, येको अर्थ यो हय, कि ऊ राज्य को लोग एक दूसरों आदमी सी मिल्यो जुल्यो त रहेंन, पर जसो लोहा माटी को संग मेल नहीं खावय, वसोच हि भी एक नहीं बन्यो रहेंन।
DAN 2:44 उन राजावों को राज्य काल म स्वर्ग को परमेश्वर, एक असो राज्य उदय करेंन जो अनन्तकाल तक नहीं टूटेंन, अऊर न ऊ कोयी दूसरी जाति को हाथ म करयो जायेंन। अऊर ऊ उन सब राज्यों ख चूर चूर करेंन, अऊर उन्को अन्त कर डालेंन; अऊर ऊ हमेशा स्थिर रहेंन :
DAN 2:45 जसो राजा तय न देख्यो कि एक गोटा कोयी आदमी को हाथ सी बिना खोद्यो पहाड़ी म सी निकल्यो, अऊर ओन लोहा, पीतल, माटी, चांदी, अऊर सोना ख चूर चूर करयो, यो रीति महान परमेश्वर न राजा ख बतायो हय कि येको बाद का का होन वालो हय। न सपनो म न ओको अर्थ म कुछ सन्देह हय।”
DAN 2:46 इतनो सुन क नबूकदनेस्सर राजा न मुंह को बल गिर क दानिय्येल ख दण्डवत करयो, अऊर आज्ञा दी कि ओख भेंट चढ़ावों, अऊर ओको आगु सुगन्ध चिज जलावो।
DAN 2:47 तब राजा न दानिय्येल सी कह्यो, “सच त यो हय कि तुम लोगो को परमेश्वर, सब ईश्वरों को ईश्वर, राजावों को राजा अऊर भेदों को खोलन वालों हय, येको लायी तय यो भेद प्रगट कर पायो।”
DAN 2:48 तब राजा न दानिय्येल को पद बड़ो करयो, अऊर ओख बहुत सो बड़ो बड़ो दान दियो; अऊर या आज्ञा दी कि ऊ बेबीलोन को पूरो क्षेत्र पर शासक कर दियो अऊर बेबीलोन को सब पण्डितों पर मुख्य प्रधान बनाय दियो।
DAN 2:49 तब दानिय्येल को बिनती करनो सी राजा न शद्रक, मेशक, अऊर अबेदनगो ख बेबीलोन को प्रान्त को कार्य को ऊपर नियुक्त कर दियो; पर दानिय्येल खुद राजा को दरबार म रहत होतो।
DAN 3:1 नबूकदनेस्सर राजा न सोनो की एक मूर्ति बनायी, जेकी ऊंचायी साठ हाथ, अऊर चौड़ायी छय हाथ होती। ओन ओख बेबीलोन को देश को दूरा नाम को मैदान म खड़ो करायो।
DAN 3:2 तब नबूकदनेस्सर राजा न अधिपतियों, शासकों, राज्यपालों, जजों, हिसाब देखन वालो, न्यायियों, शास्त्रियों अऊर देश देश को सब अधिकारियों ख बुलावा भेज्यो कि हि वा मूर्ति की प्रतिष्ठा म आये जो नबूकदनेस्सर राजा न खड़ी करवायी होती।
DAN 3:3 तब अधिपति, हाकिम, राज्यपालों, जज, हिसाब देखन वालो, न्यायी, शास्त्री अऊर देश देश को सब अधिकारी नबूकदनेस्सर राजा की खड़ी करायी हुयी मूर्ति की प्रतिष्ठा लायी जमा भयो, अऊर वा मूर्ति को आगु खड़ो भयो।
DAN 3:4 तब दवन्डी देन वालो न ऊंची आवाज सी पुकार क कह्यो, “हे देश देश अऊर राज्य राज्य को लोगों, अऊर अलग अलग भाषा को बोलन वालो, तुम ख या आज्ञा सुनायी जावय हय कि,
DAN 3:5 जो समय तुम नरसिंगे, बांसुरी, वीणा, सारंगी, सितार, पेपाड़ी आदि सब तरह को बाजा को शब्द सुनो, तुम उच समय गिर क नबूकदनेस्सर राजा की खड़ी करायी हुयी सोनो की मूर्ति ख दण्डवत करो।
DAN 3:6 जो कोयी गिर क दण्डवत नहीं करेंन ऊ उच घड़ी धधकती हुयी भट्ठी को बीच म डाल दियो जायेंन।”
DAN 3:7 यो वजह ऊ समय असोच सब राज्य को लोगों ख नरसिंगे, बांसुरी, वीणा, सारंगी, सितार, पेपाड़ी, अऊर सब तरह को बाजा की आवाज सुनायी दी, तबच देश देश अऊर राज्य राज्य को लोगों अऊर अलग अलग भाषा बोलन वालो न गिर क वा सोनो की मूर्ति ख, जो नबूकदनेस्सर राजा न खड़ी करायी होती, दण्डवत करयो।
DAN 3:8 उच समय कुछ कसदी लोग राजा को जवर गयो, अऊर कपट सी यहूदियों की चुगली करी।
DAN 3:9 हि नबूकदनेस्सर राजा सी कहन लग्यो, “हे राजा, तय हमेशा जीन्दो रहे।
DAN 3:10 हे राजा, तय न त या आज्ञा दी हय कि जो आदमी नरसिंगे, बांसुरी, वीणा, सारंगी, सितार, पेपाड़ी अऊर सब तरह को बाजा की आवाज सुने, ऊ गिर क वा सोनो की मूर्ति ख दण्डवत करे;
DAN 3:11 अऊर जो कोयी गिर क दण्डवत नहीं करेंन ऊ धधकती हुयी भट्ठी को बीच म डाल दियो जाये।
DAN 3:12 देख शद्रक, मेशक, अऊर अबेदनगो नाम को कुछ यहूदी आदमी हय, जिन्ख तय न बेबीलोन की सीमा को काम को ऊपर नियुक्त करयो हय। उन आदमियों न, हे राजा, तोरी आज्ञा को पालन नहीं करयो; हि तोरो देवता की आराधना नहीं करय, अऊर जो सोनो की मूर्ति तय न खड़ी करायी हय, ओख दण्डवत नहीं करय।”
DAN 3:13 तब नबूकदनेस्सर राजा न गुस्सा अऊर जलजलाहट म आय क आज्ञा दी कि शद्रक, मेशक, अऊर अबेदनगो ख लावो। तब हि आदमी राजा को आगु हाजिर करयो गयो।
DAN 3:14 नबूकदनेस्सर न उन्को सी पूछ्यो, “हे शद्रक, मेशक अऊर अबेदनगो, तुम लोग जो मोरो देवता की आराधना नहीं करय, अऊर मोरी खड़ी करायी हुयी सोनो की मूर्ति ख दण्डवत नहीं करय, त का तुम जान बूझ क असो कर रह्यो हय?
DAN 3:15 यदि तुम अभी तैयार हय, कि जब नरसिंगे, बांसुरी, वीणा, सारंगी, सितार, पेपाड़ी अऊर सब तरह को बाजा की आवाज सुनो, अऊर उच घड़ी गिर क मोरी बनायी हुयी मूर्ति ख दण्डवत करो, त बचो; अऊर यदि तुम दण्डवत नहीं करो त योच समय धधकती हुयी भट्ठी को बीच म डाल्यो जावों; फिर असो कौन देवता हय, जो तुम ख मोरो हाथ सी छुड़ाय सके?”
DAN 3:16 शद्रक, मेशक, अऊर अबेदनगो न राजा सी कह्यो, “हे नबूकदनेस्सर, यो बारे तोख जवाब देन लायी हम्ख कुछ जरूरत नहाय।
DAN 3:17 हमरो परमेश्वर जेकी हम आराधना करजे हंय ऊ हम ख वा धधकती हुयी भट्ठी की आगी सी बचान की शक्ति रखय हय; अऊर हे राजा, ऊ हम्ख तोरो हाथ सी भी छुड़ाय सकय हय।
DAN 3:18 पर यदि नहीं भी छुड़ायेंन, त हे राजा, तोख मालूम हो, कि हम लोग तोरो देवता की आराधना नहीं करबोंन, अऊर न तोरी खड़ी करायी हुयी सोनो की मूर्ति ख दण्डवत करबोंन।”
DAN 3:19 तब नबूकदनेस्सर गुस्सा भय गयो, अऊर ओको चेहरा को रंग शद्रक, मेशक अऊर अबेदनगो को प्रति बदल गयो। ओन आज्ञा दी कि भट्ठी ख सात गुना ज्यादा धधकाय देवो।
DAN 3:20 तब अपनी सेना म सी कुछ बलवान आदमियों ख ओन आज्ञा दी, कि शद्रक, मेशक अऊर अबेदनगो ख बांध क उन्ख धधकती हुयी भट्ठी म डाल देवो।
DAN 3:21 तब हि आदमी पायजामा, कपड़ा, बागों अऊर दूसरो कपड़ावों सहीत बांध क, वा धधकती हुयी भट्ठी म डाल दियो गयो।
DAN 3:22 ऊ भट्ठी त राजा की अटल आज्ञा होन को वजह बहुत ज्यादा धधकायी गयी होती, यो वजह जिन आदमियों न शद्रक, मेशक अऊर अबेदनगो ख भट्ठी म फेकन लायी उठायो हि आगी की आच सी जल क मरयो,
DAN 3:23 अऊर उच धधकतो हुयो भट्ठे को बीच हि तीनों आदमी, शद्रक, मेशक अऊर अबेदनगो, बन्ध्यो हुयो फेंक दियो गयो।
DAN 3:24 तब नबूकदनेस्सर राजा अचम्भित भयो अऊर घबराय क उठ खड़ो भयो, अऊर अपनो संगियों सी पूछन लग्यो, “का हम न वा आगी को बीच तीनच आदमी बन्ध्यो हुयो नहीं डलवायो?” उन्न राजा ख उत्तर दियो, “हव राजा, सच बात हय।”
DAN 3:25 तब ओन कह्यो, “अब मय देखू हय कि चार आदमी आगी को बीच खुल्यो हुयो ठहल रह्यो हय, अऊर उन्ख कुछ भी हानि नहीं पहुंची; अऊर चौथो आदमी को स्वरूप ईश्वर को टुरा को जसो हय।”
DAN 3:26 फिर नबूकदनेस्सर ऊ धधकती हुयी भट्ठी को दरवाजा को जवर जाय क कहन लग्यो, “हे शद्रक, मेशक अऊर अबेदनगो, हे परमप्रधान परमेश्वर को दासो, निकल क इत आवो!” यो सुन क शद्रक, मेशक अऊर अबेदनगो आगी को बीच सी निकल आयो।
DAN 3:27 जब अधिपति, शासक, राज्यपाल अऊर राजा को मंत्रियों न, जो जमा भयो होतो, उन आदमियों को तरफ देख्यो, तब उन्को शरीर म आगी को कुछ भी प्रभाव नहीं पायो; अऊर उन्की मुंड को एक बाल भी नहीं जरयो, न उन्को पायजामा कुछ बिगड़्यो, अऊर न उन म जरन की कुछ सुगन्ध पायी गयी।
DAN 3:28 नबूकदनेस्सर कहन लग्यो, “धन्य हय शद्रक, मेशक, अऊर अबेदनगो को परमेश्वर, जेन अपनो दूत भेज क अपनो इन दासों ख येकोलायी बचायो, कहालीकि इन्ह राजा की आज्ञा न मान क, तोरो पर भरोसा रख्यो, अऊर यो सोच क अपनो शरीर भी अर्पण करयो, कि हम अपनो परमेश्वर ख छोड़, कोयी देवता की उपासना या दण्डवत् नही करबोंन।
DAN 3:29 येकोलायी अब मय या आज्ञा देऊ हय कि देश देश अऊर राज्य राज्य को लोगों, अऊर अलग अलग भाषा बोलन वालों म सी जो कयी शद्रक, मेशक अऊर अबेदनगो को परमेश्वर की कुछ निन्दा करजो, ऊ टुकड़ा टुकड़ा करयो जायेंन, अऊर ओको घर ख मलमा को ढेर बनायो जायेंन; कहालीकि असो कोयी अऊर देवता नहीं जो या रीति सी बचाय सके।”
DAN 3:30 तब राजा न बेबीलोन को सीमा म शद्रक, मेशक, अबेदनगो को पद अऊर ऊंचो करयो।
DAN 4:1 नबूकदनेस्सर राजा को तरफ सी देश-देश अऊर राज्य-राज्य को लोगों, अऊर अलग-अलग भाषा बोलन वालो जितनो पूरी धरती पर रह्य हय, उन सभी ख यो वचन मिल्यो : “तुम्ख बहुत शान्ति मिले!”
DAN 4:2 मोख यो अच्छो लग्यो, कि परमप्रधान परमेश्वर न मोख जो जो चिन्ह अऊर चमत्कार दिखायो हय, उन्ख प्रगट करूं।
DAN 4:3 ओको दिखायो हुयो चिन्ह का च बड़ो, अऊर ओको चमत्कारों म का च बड़ी शक्ति प्रगट होवय हय! ओको राज्य त हमेशा को अऊर ओको शासन पीढ़ी सी पीढ़ी तक बनी रह्य हय।
DAN 4:4 “मय, नबूकदनेस्सर, अपनो भवन म चैन सी अऊर सुखी जीवन जी रह्यो होतो।”
DAN 4:5 मय न असो सपनो देख्यो जेको वजह मय डर गयो; अऊर पलंग पर पड़्यो पड़्यो जो बिचार मोरो मन म आयो अऊर जो बातें मय न देखी, उन्को वजह मय घबराय गयो होतो।
DAN 4:6 तब मय आज्ञा दी कि बेबीलोन को सब पंडित मोरो सपनो को अर्थ मोख बतावन लायी मोरो आगु हाजिर करयो जाये।
DAN 4:7 जब ज्योतिषी, तांत्रीक, कसदी अऊर होनहार बतान वालो अन्दर आयो, अऊर मय न उन्ख अपनो सपनो नहीं बतायो, पर हि ओको अर्थ नहीं बताय सक्यो।
DAN 4:8 आखरी म दानिय्येल मोरो जवर आयो, जेको नाम मोरो देवता को नाम को वजह बेलतशस्सर रख्यो गयो होतो, अऊर जेको म पवित्र ईश्वरों की आत्मा रह्य हय; अऊर मय न ओख अपनो सपनो यो कह्य क बताय दियो :
DAN 4:9 हे बेलतशस्सर, तय त सब ज्योतिषियों को प्रधान हय, मय जानु हय कि तोरो म पवित्र ईश्वरों की आत्मा रह्य हय, अऊर कोयी भेद को वजह नहीं घबरावय; येकोलायी जो सपनो मय न देख्यो हय ओख अर्थ सहीत मोख बताय क समझाय दे।
DAN 4:10 जब मय बिस्तर पर होतो, तब मय न यो दर्शन देख्यो : मय न देख्यो, कि धरती को बीचोबीच एक झाड़ लग्यो हय; ओकी ऊंचायी बहुत बड़ी हय।
DAN 4:11 ऊ झाड़ बड़ो होय क मजबूत भय गयो, अऊर ओकी ऊंचायी आसमान तक पहुंची, अऊर ऊ पूरी धरती को कोना तक दिखायी पड़त होतो।
DAN 4:12 ओको पत्ता सुन्दर, अऊर ओको म बहुत फर होतो, यहां तक कि ओको म पूरो लायी भोजन होतो, ओको खल्लो मैदान को सब जनावरों ख छाव मिलत होती, अऊर ओकी डगालियों म आसमान की सब चिड़ियां बसेरा करत होती, अऊर सब जनावर ख भोजन मिलत होतो।
DAN 4:13 “मय न बिस्तर पर दर्शन पातो समय का देख्यो, कि एक पवित्र स्वर्गदूत स्वर्ग सी उतर आयो।”
DAN 4:14 ओन ऊंचो आवाज सी पुकार क यो कह्यो, “झाड़ ख काट डालो, ओकी डगालियों ख छांट देवो, ओको पत्ता झड़ाय देवो अऊर ओको फर बिखराय डालो; अऊर जनावर ओको खल्लो सी हट जाये, अऊर चिड़ियां ओकी डगालियों पर सी उड़ जाये।
DAN 4:15 तब ओको खोड़ ख जड़ी समेत जमीन म छोड़ो, अऊर ओख लोहा अऊर पीतल को बन्धन सी बांध क मैदान की हरी घास को बीच रहन देवो। ऊ आसमान की ओस सी गिलो हो जाये अऊर जमीन की घास खानो म मैदान को जनावरों को संग सहभागी हो।”
DAN 4:16 ओको मन बदले अऊर आदमी को न रहे, पर जनावर को जसो बन जाये; अऊर ओको पर सात साल बीतें।
DAN 4:17 या आज्ञा पहरेदार को निर्नय सी, अऊर या बात पवित्र दूतों को वचन सी निकली, कि जो जीन्दो हय हि जान ले कि परमप्रधान परमेश्वर आदमियों को राज्य म शासन करय हय, अऊर ओख जेख चाहे ओख दे देवय हय, अऊर ऊ छोटो सी छोटो आदमी ख भी ओको पर अधिकारी ठह्यराय देवय हय।
DAN 4:18 नबूकदनेस्सर राजा न सपनो देख्यो। येकोलायी हे बेलतशस्सर, तय येको अर्थ बता, कहालीकि मोरो राज्य म अऊर कोयी पंडित येको अर्थ मोख समझाय नहीं सकय, पर तोरो म पवित्र ईश्वरों की आत्मा रह्य हय, यो वजह तय ओख समझाय सकय हय।
DAN 4:19 तब दानिय्येल जेको नाम बेलतशस्सर भी होतो, घड़ी भर घबरातो रह्यो, अऊर सोचतो सोचतो व्याकुल भय गयो। तब राजा कहन लग्यो, “हे बेलतशस्सर, यो सपनो सी, या येको अर्थ सी तय व्याकुल मत हो।” बेलतशस्सर न कह्यो, “हे मोरो प्रभु, यो सपनो तोरो नफरत करन वालों पर, अऊर येको अर्थ तोरो द्रोहियों पर पड़े!
DAN 4:20 जो झाड़ क तय न देख्यो, जो बड़ो होय क मजबूत भय गयो, अऊर जो झाड़ को कोना आसमान ख छुवन लग्यो होतो अऊर जेख पूरी धरती सी देख्यो जाय सकत होतो;
DAN 4:21 जेको पत्ता सुन्दर अऊर फर बहुत होतो, अऊर जेको म सभी लायी जेवन होतो; जेको खल्लो मैदान को सब जनावर रहत होतो, अऊर जेकी डालियों म आसमान की चिड़ियां बसेरा करत होती,
DAN 4:22 हे राजा, ऊ तयच आय। तय महान अऊर सामर्थी भय गयो, तोरी महीमा बढ़ी हय अऊर आसमान ख छुवन लगी हय, अऊर तोरी प्रभुता धरती को कोना तक फैली हय।
DAN 4:23 हे राजा, तय न जो एक पवित्र स्वर्गदूत ख स्वर्ग सी उतरतो अऊर यो कह्यतो देख्यो कि झाड़ ख काट डालो अऊर ओको नाश करो, तब ओको खोड़ ख जड़ी समेत जमीन म छोड़ो, अऊर येख लोहा अऊर पीतल को बन्धन सी बांध क मैदान की हरी घास को बीच म रहन देवो; ऊ आसमान की ओस सी गिल्लो होयेंन, अऊर ओख मैदान को जनावरों को संगच भाग मिले; अऊर जब तक सात साल ओको पर बीत न जायेंन; तब तक ओकी असीच दशा रहेंन।
DAN 4:24 हे राजा, येको अर्थ जो परमप्रधान न ठान लियो हय कि राजा पर घटे, ऊ यो आय,
DAN 4:25 कि तय आदमियों को बीच सी निकल्यो जाजों, अऊर मैदान को जनावरों को संग रह्यजों; तय बईल को जसो घास चरजो अऊर आसमान की ओस सी गिल्लो होजो; अऊर सात साल तोरो पर बीतेंन, जब तक कि तय न जान ले कि आदमियों को राज्य म परमप्रधानच प्रभुता करय हय, अऊर जेख चाहे ओख दे देवय हय।
DAN 4:26 ऊ झाड़ को खोड़ ख जड़ी समेत छोड़न की आज्ञा जो भयी हय, येको अर्थ यो हय कि तोरो राज्य तोरो लायी बन्यो रहेंन; अऊर जब तय जान लेजो कि जगत को प्रभु स्वर्गच म हय, तब तय फिर सी राज्य करनो पाजों।
DAN 4:27 यो वजह, हे राजा, मोरी या सलाह स्वीकार कर, कि यदि तय पाप छोड़ क धर्म करन लगजो, अऊर अधर्म छोड़ क गरीब पर दया करन लगजो, त सम्भव हय कि असो करनो सी तोरो चैन बन्यो रहेंन।”
DAN 4:28 यो सब कुछ नबूकदनेस्सर राजा पर बीत गयी।
DAN 4:29 बारा महीना को बीतन पर जब ऊ बेबीलोन को राजभवन की छत पर टहल रह्यो होतो, तब ऊ कहन लग्यो,
DAN 4:30 “का यो बड़ो बेबीलोन नोहोय, जेख मय नच अपनी ताकत अऊर सामर्थ सी राजनिवास होन ख अऊर अपनो प्रताप की बड़ायी लायी बसायो हय?”
DAN 4:31 यो वचन राजा को मुंह सी निकल्यो भी नहीं होतो कि आकाशवानी भयी, “हे राजा नबूकदनेस्सर, तोरो बारे म या आज्ञा निकलय हय : राज्य तोरो हाथ सी निकल गयो,
DAN 4:32 अऊर तय आदमियों को बीच सी निकाल्यो जाजों, अऊर मैदान को जनावरों को संग रह्यजो; अऊर बईल को जसो घास चरजो; अऊर सात साल तोरो पर बीतेंन, जब तक कि तय न जान ले कि परमप्रधान, आदमियों को राज्य म प्रभुता करय हय अऊर जेख चाहे ऊ ओख दे देवय हय।”
DAN 4:33 उच घड़ी यो वचन नबूकदनेस्सर को बारे म पूरो भयो। ऊ आदमियों म सी निकाल्यो गयो, अऊर बईल को जसो घास चरन लग्यो, अऊर ओको शरीर आसमान की ओस म गिलो होत होतो, यहां तक कि ओको बाल गिधाड़ को पंखा जसो अऊर ओको नख पक्षी को पंजा को जसो बढ़ गयो।
DAN 4:34 सात साल को बीतन पर, नबूकदनेस्सर न अपनी आंखी स्वर्ग को तरफ उठायो, अऊर मोरी बुद्धि फिर जसी की वसी भय गयी; तब मय न परमप्रधान ख धन्य कह्यो, अऊर जो हमेशा जीन्दो हय ओकी स्तुति अऊर महिमा यो कह्य क करन लग्यो : ओकी प्रभुता सदा की हय, अऊर ओको राज्य पीढ़ी सी पीढ़ी तक बन्यो रहन वालो हय।
DAN 4:35 धरती को सब रहन वालो ओको आगु बेकार गिन्यो जावय हय, अऊर वा स्वर्ग की सेना अऊर धरती को रहन वालो को बीच अपनी इच्छा को अनुसार काम करय हय; अऊर कोयी ओख रोख क ओको सी नहीं कह्य सकय हय, “तय न यो का करयो हय?”
DAN 4:36 उच समय, मोरी बुद्धि फिर जसी की वसी भय गयी; अऊर मोरो राज्य की महीमा लायी मोरो प्रताप अऊर मुकुट मोरो पर फिर आय गयो। मोरो मन्त्री अऊर प्रधान लोग मोरो सी भेंट करन लायी आवन लग्यो, अऊर मय अपनो राज्य म स्थिर भय गयो; अऊर मोरी अऊर प्रशंसा होन लगी।
DAN 4:37 अब मय नबूकदनेस्सर स्वर्ग को राजा ख सराहतो हय; अऊर ओकी स्तुति महिमा करू हय, कहालीकि ओको सब काम सच्चो, अऊर ओको सब व्यवहार न्याय को हय; अऊर जो लोग घमण्ड सी चलय हय, उन्ख ऊ खल्लो कर सकय हय।
DAN 5:1 बेलशस्सर नाम को राजा न अपनो हजार मुखियावों लायी बड़ो भोज करयो, अऊर उन हजार लोगों को संग अंगूरीरस पियो।
DAN 5:2 अंगूरीरस पीतो पीतो बेलशस्सर न आज्ञा दी, कि सोनो चांदी को जो बर्तन ओको पिता नबूकदनेस्सर न यरूशलेम को मन्दिर म सी निकाल्यो होतो, उन्ख लायो जाये कि राजा अपनो मुखियावों, अऊर रानियों अऊर रखेलियों सहीत उन्म पीये।
DAN 5:3 तब जो सोनो को बर्तन यरूशलेम म परमेश्वर को भवन को मन्दिर म सी निकाल्यो गयो होतो, ऊ लायो गयो; अऊर राजा अपनो मुखियावों, अऊर रानियों अऊर रखेलियों सहीत उन्म पीवन लग्यो।
DAN 5:4 हि अंगूरीरस पी पी क सोनो, चांदी, पीतल, लोहा, लकड़ी अऊर गोटा को देवतावों की स्तुति करच रह्यो होतो,
DAN 5:5 कि वाच घड़ी आदमी को हाथ को जसी उंगलियां निकल क दीवट को आगु राजमन्दिर की दीवार को चुना पर कुछ लिखन लगी; अऊर हाथ को जो भाग लिख रह्यो होतो, ऊ राजा ख दिखायी पड़्यो।
DAN 5:6 ओख देख क राजा डर गयो, अऊर मन च मन घबराय गयो, अऊर ओकी कमर की जोड़ ढीली पड़ गयी, अऊर कापतो कापतो ओको घुटना एक दूसरो सी टकरान लग्यो।
DAN 5:7 तब राजा न ऊंचो आवाज सी पुकार क तांत्रिकों, कसदियों अऊर ज्योतिषियों ख हाजिर करावन की आज्ञा दी। जब बेबीलोन को बुद्धिमान जवर आयो, तब राजा उन्को सी कहन लग्यो, “जो कोयी ऊ लिख्यो हुयो पढ़ क ओको अर्थ मोख समझायेंन ओख जामुनी रंग को कपड़ा, अऊर ओको गरो म सोनो की कण्ठमाला पहिनायी जायेंन; अऊर मोरो राज्य म तीसरो उच शासन करेंन।”
DAN 5:8 तब राजा को सब बुद्धिमान लोग अन्दर आयो, पर ऊ लिख्यो हुयो ख नहीं पढ़ सक्यो अऊर न राजा ख ओको अर्थ समझाय सक्यो।
DAN 5:9 या बात पर बेलशस्सर राजा बहुत घबराय गयो अऊर ओको चेहरा को रंग बदल गयो; अऊर ओको मुखिया भी बहुत व्याकुल भयो।
DAN 5:10 राजा अऊर मुखियावों को वचनों ख सुन क, रानी भोज को भवन म आयी अऊर कहन लगी, “हे राजा, तय युग युग जीन्दो रहे, अपनो मन म मत घबरा न उदास हो।
DAN 5:11 तोरो राज्य म दानिय्येल नाम को एक आदमी हय जेको नाम तोरो पिता न बेलतशस्सर रख्यो होतो, ओको म पवित्र ईश्वरों की आत्मा रह्य हय, अऊर ऊ राजा को राज्य काल म ओको म प्रकाश, हुनर अऊर ईश्वरों को तुल्य बुद्धि पायी गयी। हे राजा, तोरो पिता जो राजा होतो, नबूकदनेस्सर न ओख सब ज्योतिषियों, तांत्रिकों, जादूगरों अऊर दूसरो भविष्य बतान वालो को मुखिया ठह्यरायो होतो,
DAN 5:12 कहालीकि ओको म उत्तम आत्मा, ज्ञान अऊर हुनर, अऊर शक दूर करन की शक्ति पायी गयी, जेको नाम तुम्हरो बाप न बेलतशस्सर रख्यो होतो। येकोलायी अब दानिय्येल ख बुलायो जाये, अऊर ऊ येको अर्थ बतायेंन।”
DAN 5:13 तब दानिय्येल राजा को आगु अन्दर बुलायो गयो। राजा दानिय्येल सी पूछन लग्यो, “का तयच दानिय्येल आय जो मोरो पिता नबूकदनेस्सर राजा द्वारा यहूदा देश सी लायो हुयो यहूदी बन्दियों म सी हय?
DAN 5:14 मय न तोरो बारे म सुन्यो हय कि ईश्वर की आत्मा तोरो म रह्य हय; अऊर बुद्धि, हुनर अऊर उत्तम ज्ञान तोरो म पायो जावय हय।
DAN 5:15 देख, अभी बुद्धिमान अऊर तांत्रीक लोग मोरो आगु येकोलायी लायो गयो होतो कि यो लिख्यो हुयो पढ़े अऊर ओको अर्थ मोख बताये, पर हि ऊ बात को अर्थ नहीं समझाय सक्यो।
DAN 5:16 पर मय तोरो बारे म सुन्यो हय कि दानिय्येल भेद खोल सकय अऊर शक दूर कर सकय हय। येकोलायी अब यदि तय ऊ लिख्यो हुयो ख पढ़ सकय अऊर ओको अर्थ भी मोख समझाय सकय, त तोख जामुनी रंग को कपड़ा, अऊर तोरो गरो म सोनो की कण्ठमाला पहिनायी जायेंन, अऊर राज्य म तीसरों तयच शासन करजो।”
DAN 5:17 दानिय्येल न राजा सी कह्यो, “अपनो पुरस्कार अपनोच जवर रख; अऊर जो दान तय देनो चाहवय हय, ऊ दूसरों ख दे; वा लिखी हुयी बात मय राजा ख पढ़ क सुनाऊं, अऊर ओको अर्थ भी तोख समझाऊं।
DAN 5:18 हे राजा, परमप्रधान परमेश्वर न तोरो पिता नबूकदनेस्सर ख राज्य, बढ़ायी, आदर अऊर प्रताप दियो होतो;
DAN 5:19 अऊर वा बढ़ायी को कारन जो ओन ओख दी होती, देश देश अऊर राज्य राज्य को सब लोग, अऊर अलग अलग भाषा बोलन वालो ओको आगु कापतो अऊर थरथरावत होतो; जेख ऊ चाहत रह्य ओख ऊ मार डालत होतो, अऊर जेख ऊ चाहतो ओख ऊ जीन्दो रखत होतो; जेख ऊ चाहतो ओख ऊ ऊंचो पद देत होतो, अऊर जेख ऊ चाहतो ओख ऊ गिराय देत होतो।”
DAN 5:20 पर जब ओको मन घमण्ड सी भर गयो, अऊर ओकी आत्मा कठोर भय गयी, यहां तक कि ऊ घमण्ड करन लग्यो, तब ऊ अपनो राजसिहासन पर सी उतारयो गयो, अऊर ओकी प्रतिष्ठा भंग करी गयी;
DAN 5:21 ऊ आदमियों म सी निकाल्यो गयो, अऊर ओको मन जनावरों को जसो, अऊर ओको निवास जंगली गधा को बीच भय गयो; उ बईल को जसो घास चरतो, अऊर ओको शरीर आसमान की ओस सी गिलो होत होतो, जब तक कि ओन जान लियो कि परमप्रधान परमेश्वर आदमियों को राज्य म प्रभुता करय हय अऊर जेख चाहतो ओखच ओको पर अधिकारी ठह्यरावय हय।
DAN 5:22 हे बेलशस्सर, तय जो ओको टुरा आय, अऊर यो सब कुछ जानत होतो, तब भी तोरो मन नम्र नहीं भयो।
DAN 5:23 बल्की तय न स्वर्ग को प्रभु को विरुद्ध मुंड उठाय क ओको भवन को बर्तन मांग क अपनो आगु रखवाय लियो, अऊर अपनो मुखियावों, रानियों, रखेलियों सहीत तय न ओको म अंगूरीरस पीयो; अऊर चांदी सोनो, पीतल, लोहा, लकड़ी अऊर गोटा को देवता जो न देखय अऊर न सुनय, न कुछ जानय हय, उन्की त स्तुति करी, पर परमेश्वर, जेको हाथ म तोरो जीव हय, अऊर जेको वश म तोरो सब चलनो फिरनो हय, ओको सम्मान तय न नहीं करयो।
DAN 5:24 “तबच यो हाथ को एक हिस्सा ओकोच तरफ सी प्रगट करयो गयो हय अऊर हि शब्द लिख्यो गयो हय।
DAN 5:25 जो शब्द लिख्यो गयो ऊ यो आय : मने, मने, तकेल, अऊर ऊपर्सीन।
DAN 5:26 यो लेख को अर्थ यो आय : अने, मतलब परमेश्वर न तोरो राज्य को दिन गिन क ओको अन्त कर दियो हय।
DAN 5:27 तकेल, मतलब तय समझ तराजू म तौल्यो गयो अऊर हल्को पायो गयो हय।
DAN 5:28 परेस, मतलब तोरो राज्य बांट क मादियों अऊर फारसियों ख दियो गयो हय।”
DAN 5:29 तब बेलशस्सर न आज्ञा दी, अऊर दानिय्येल ख जामुनी रंग को कपड़ा अऊर ओको गरो म सोनो की कण्ठमाला पहिनायी गयी; अऊर दवन्डी देन वालो न ओको बारे म पूकारयो, कि दानिय्येल राज्य को तीसरो मुख्य शासन हय।
DAN 5:30 ऊच रात कसदियों को राजा बेलशस्सर मार डाल्यो गयो,
DAN 5:31 अऊर दारा मादी जो कोयी बासठ साल को होतो राजगद्दी पर विराजमान भयो।
DAN 6:1 दारा ख यो अच्छो लग्यो कि अपनो राज्य को ऊपर एक सौ बीस असो अधिपति ठहरायो, जो पूरो राज्य म अधिकार रखें,
DAN 6:2 अऊर ओको ऊपर ओन तीन अध्यक्ष, जिम्न सी दानिय्येल एक होतो, येकोलायी ठहरायो कि हि उन अधिपतियों सी लेखा लियो करें, अऊर यो वजह राजा की कुछ हानि न होनो पाये।
DAN 6:3 जब यो देख्यो कि दानिय्येल म अच्छी आत्मा रह्य हय, तब ओख उन अध्यक्षों अऊर अधिपतियों सी ज्यादा आदर मिल्यो; अऊर राजा यो भी सोचत होतो कि ओख पूरो राज्य को ऊपर ठह्यराये।
DAN 6:4 तब अध्यक्ष अऊर अधिपति राजकाम को बारे म दानिय्येल को खिलाफ दोष ढूंढ़न लग्यो; पर ऊ विश्वास लायक होतो, अऊर ओको काम म कोयी भूल या दोष नहीं निकल्यो, अऊर हि असो कोयी अपराध या दोष नहीं पा सक्यो।
DAN 6:5 तब हि लोग कहन लग्यो, “हम ऊ दानिय्येल को परमेश्वर की व्यवस्था ख छोड़, अऊर कोयी बारे म ओको खिलाफ कोयी दोष नहीं पा सकेंन।”
DAN 6:6 तब हि अध्यक्ष अऊर अधिपति राजा को जवर आयो, अऊर ओन कह्यो, “हे राजा दारा, तय युगयुग जीन्दो रहे।
DAN 6:7 राज्य को पूरो अध्यक्षों न, अऊर शासकों, अधिपतियों, न्यायियों, अऊर राज्यपाल न भी आपस म सम्मति करी हय, कि राजा असी आज्ञा दे अऊर असी कड़ी आज्ञा निकाले, कि तीस दिन तक जो कोयी, हे राजा, तोख छोड़ क कोयी अऊर आदमी या देवता सी बिनती करे, ऊ सिंहों को पिंजरा म डाल दियो जाये।
DAN 6:8 येकोलायी अब हे राजा, असी आज्ञा दे, अऊर या चिट्ठी पर सही कर, जेको सी या बात, मादियों अऊर फारसियों की अटल व्यवस्था को अनुसार, बदल्यो नहीं जाय सकेंन।”
DAN 6:9 तब दारा राजा न वा आज्ञा चिट्ठी पर सही कर दियो।
DAN 6:10 जब दानिय्येल ख मालूम भयो कि वा चिट्ठी पर सही करयो गयी, तब ऊ अपनो घर म गयो जेकी ऊपर की कोठरी की खिड़कियां यरूशलेम को तरफ खुली रहत होती, अऊर अपनी रीति को अनुसार जसो ऊ दिन म तीन बार अपनो परमेश्वर को आगु घुटना टेक क प्रार्थना अऊर धन्यवाद करत होतो, वसोच तब भी करतो रह्यो।
DAN 6:11 तब उन आदमियों न झुण्ड म आय क दानिय्येल ख अपनो परमेश्वर को आगु प्रार्थना अऊर बिनती करतो हुयो पायो।
DAN 6:12 तब हि राजा को जवर जाय क, ओकी राज आज्ञा को बारे म ओको सी कहन लग्यो, “हे राजा, का तय न असो आज्ञा की चिट्ठी पर सही नहीं करयो कि तीस दिन तक जो कोयी तोख छोड़ ख, कोयी आदमी या देवता सी बिनती करेंन, ऊ सिंहों को गड्डा म डाल दियो जायेंन?” राजा न उत्तर दियो, “हव, मादियों अऊर फारसियों की अटल व्यवस्था को अनुसार या बात सही हय।”
DAN 6:13 तब उन्न राजा सी कह्यो, “यहूदी बन्दियों म सी जो दानिय्येल हय, ओन, हे राजा, न त तोरो तरफ कुछ ध्यान दियो, अऊर न तोरो सही करयो हुयो आज्ञा की चिट्ठी को तरफ; ऊ अपनो परमेश्वर सी दिन म तीन बार बिनती करय हय।”
DAN 6:14 या बात सुन क, राजा बहुत उदास भयो, अऊर दानिय्येल ख बचान को उपाय सोचन लग्यो; अऊर सूरज को डूबन तक ओख बचान की कोशिश करतो रह्यो।
DAN 6:15 तब हि आदमी राजा को जवर उतावली सी आय क कहन लग्यो, “हे राजा, यो जान रख कि मादियों अऊर फारसियों म या व्यवस्था हय कि जो जो निषेधाज्ञा या आज्ञा राजा ठह्यराये, वा नहीं बदल सकय।”
DAN 6:16 तब राजा न आज्ञा दी, अऊर दानिय्येल ख लाय क सिंहों को गड्डा म डाल दियो गयो। ऊ समय राजा न दानिय्येल सी कह्यो, “तोरो परमेश्वर, जेकी तय हर समय उपासना करय हय, उच तोख बचायेंन!”
DAN 6:17 तब एक गोटा लाय क उन्न ओख पिंजरा को मुंह को ऊपर रख दियो, अऊर राजा न ओको पर अपनी अंगूठी सी, अऊर अपनो प्रधानों कि अंगूठियों सी मुहर लगाय दी कि दानिय्येल को बारे म कुछ बदलनो न पाये।
DAN 6:18 तब राजा अपनो महल म चली गयो, अऊर वा रात ख ऊ बिना जेवन करयो रह्यो; अऊर ओको जवर सुख विलाश की कोयी चिज नहीं पहुंचायी गयी, अऊर ओख नींद भी नहीं आयी।
DAN 6:19 सुबेरे भुन्सारे राजा उठ्यो अऊर सिंहो को गड्डा को तरफ फुरती सी चली गयो।
DAN 6:20 जब राजा पिंजरा को मुंह को जवर आयो, तक दु:ख भरी आवाज सी चिल्लान लग्यो अऊर दानिय्येल सी कह्यो, “हे दानिय्येल, हे जीन्दो परमेश्वर को दास, का तोरो परमेश्वर जेकी तय हमेशा उपासना करय हय, तोख सिंहो सी बचाय सक्यो हय?”
DAN 6:21 तब दानिय्येल न राजा सी कह्यो, हे राजा, तय हमेशा हमेशा जीन्दो रहे!
DAN 6:22 मोरो परमेश्वर न अपनो दूत भेज क सिंहो को मुंह ख असो बन्द कर रख्यो कि उन्न मोरी कुछ भी हानि नहीं करी; येको वजह यो हय, कि मय ओको आगु निर्दोश पायो गयो; अऊर हे राजा, तोरो आगु भी मय न कयी भूल नहीं करी।
DAN 6:23 तब राजा न बहुत खुश होय क, दानिय्येल ख गड्डा म सी निकालन की आज्ञा दी। तब दानिय्येल गड्डा म सी निकाल्यो गयो, अऊर ओको पर हानि को कोयी चिन्ह नहीं पायो गयो, कहालीकि ऊ अपनो परमेश्वर पर विश्वास रखत होतो।
DAN 6:24 तब राजा न आज्ञा दी की जिन आदमियों न दानिय्येल पर दोष लगायो होतो, हि अपनो अपनो बाल बच्छा अऊर स्त्रियों सहीत लाय क सिंहो को गड्डा म डाल दियो जाये; अऊर हि गड्डा की पेंदी तक भी नहीं पहुंचे कि सिंहो न उन्को पर झपट क सब हड्डियों सहीत उन्ख चबाय डाल्यो।
DAN 6:25 तब दारा राजा न पूरी धरती को रहन वालो देश देश अऊर राज्य राज्य को सब लोगों अऊर अलग अलग भाषा बोलन वालो को जवर यो लिख्यो : “तुम्ख शान्ति मिले!
DAN 6:26 मय या आज्ञा देऊ हय कि जहां मोरो पूरो राज्य को अधिकार हय, उत को लोग दानिय्येल को परमेश्वर को आगु कापतो अऊर थरथरातो रहें, कहालीकि जीन्दो अऊर हमेशा हमेशा रहन वालो परमेश्वर ऊच आय; ओको राज्य अविनाशी अऊर ओको शासन हमेशा रहेंन।
DAN 6:27 जेन दानिय्येल ख सिंहो सी बचायो हय, उच बचान अऊर छुड़ान वालो आय; अऊर स्वर्ग म अऊर धरती पर चिन्हों अऊर चमत्कारों ख प्रगट करन वालो आय।”
DAN 6:28 यो तरह दानिय्येल, दारा अऊर कुस्रू अऊर फारसी, हि दोयी को राज्य को दिनों म सुख चैन सी रह्यो।
DAN 7:1 बेबीलोन को राजा बेलशस्सर को पहिलो साल म, दानिय्येल न बिस्तर पर सपनो अऊर दर्शन देख्यो। तब ओन ऊ सपनो लिख्यो, अऊर बातों को अर्थ भी बयान करयो।
DAN 7:2 दानिय्येल न यो कह्यो, “मय न रात ख यो सपनो देख्यो कि महासागर पर चारों दिशावों सी आंधी तुफान चलन लगी।
DAN 7:3 तब समुन्दर म सी चार बड़ो बड़ो जनावर निकल आयो, जो एक दूसरो सी अलग होतो।
DAN 7:4 पहिलो जनावर सिंह को जसो होतो अऊर ओको पंख गिधाड़ को जसो होतो। मोरो देखतो देखतो ओको पंखों को पर नोच्यो गयो अऊर ऊ जमीन पर सी उठाय क, आदमी को जसो पाय को बल खड़ो करयो गयो; अऊर ओख आदमी को दिल दियो गयो।
DAN 7:5 तब मय न एक अऊर जन्तु देख्यो जो आस्वल को जसो होतो, अऊर पीछू को दोय पाय को बल पर खड़ो होतो, अऊर ओको मुंह म दातों को बीच तीन पसलियां होती; अऊर लोग ओको सी कह्य रह्यो होतो, ‘उठ क बहुत मांस खा।’
DAN 7:6 येको बाद मय न नजर सी देख्यो, कि चिता को जसो अऊर एक जनावर हय जेकी पीठ पर पक्षी को जसो चार पंख हय; अऊर ऊ जनावर की चार मुंड होती; अऊर ओख अधिकार दियो गयो।
DAN 7:7 तक येको बाद मय न सपनो म नजर सी देख्यो, कि एक चौथो जनावर हय जो भयंकर अऊर डरावनो अऊर बहुत सक्तिशाली हय; अऊर ओको बड़ो बड़ो लोहा को दांत हय; ऊ सब कुछ खाय डालय हय अऊर चूर चूर करय हय, अऊर जो बच जावय हय, ओख पाय सी खुंद डालय हय। ऊ सब पहिलो जनावरों सी अलग हय।
DAN 7:8 मय उन सींगो ख ध्यान सी देखत होतो, त का देख्यो कि उन्को बीच एक अऊर छोटो सो सींग निकल्यो, जेको सी पहिले को तीन सींग उखड़ गयो; तब मय न देख्यो कि यो सींग म आदमी को जसी आंखी, अऊर बड़ी बड़ी बाते मुंह भी हय।”
DAN 7:9 “मय न देखतो देखतो आखरी म यो देख्यो, कि सिंहासन रख्यो गयो, अऊर कोयी अति पूर्वज विराजमान भयो; ओको कपड़ा बरफ जसो सफेद, अऊर मुंड को बाल ऊन को जसो होतो; ओको सिंहासन अग्निमय अऊर ओको पहिया धधकती हुयी आगी को जसो दिखायी देत होतो।
DAN 7:10 ऊ प्राचीन को आगु सी आगी की धारा निकल क बह्य रही होती; तब हजारों हजार लोग ओकी सेवा टहल कर रह्यो होतो, अऊर लाखो लाख लोग ओको आगु हाजिर होतो; तब न्यायी बैठ गयो, अऊर किताबे खोली गयी।”
DAN 7:11 ऊ समय ऊ सींग को बड़ो बोल सुन क मय देखत रह्यो, अऊर देखतो देखतो आखरी म देख्यो कि ऊ जनावर ख मार डाल्यो गयो, अऊर ओको शरीर धधकती हुयी आगी सी भस्म करयो गयो।
DAN 7:12 बच्यो हुयो जनावरों को अधिकार ले लियो गयो, पर उन्को जीव कुछ समय लायी बचायो गयो।
DAN 7:13 मय न रात म दर्शन म यो देख्यो, कि आदमी की सन्तान को जसो कोयी आसमान को बादर सहीत आय रह्यो होतो, अऊर ऊ अति पूर्वज आदमी को जवर पहुंच्यो, अऊर ओख हि ओको जवर लायो।
DAN 7:14 तब ओख असो शासन, महिमा अऊर राज्य दियो गयो, कि देश देश राज्य राज्य को लोग अऊर अलग अलग भाषा बोलन वालो सब ओको अधिकार म हो; ओको शासन हमेशा तक अटल, अऊर ओको राज्य अविनाशी ठह्यरयो।
DAN 7:15 मय दानिय्येल को मन चिन्तित भय गयो, अऊर जो कयी मय न देख्यो होतो ओको वजह मय घबराय गयो।
DAN 7:16 तब जो लोग जवर खड़ो होतो, उन म सी एक को जवर जाय क मय न उन पूरी बातों को भेद पूच्छ्यो, ओन यो कह्य क मोख उन बातो को अर्थ बतायो,
DAN 7:17 उन चार बड़ो बड़ो जन्तुवों को अर्थ चार राजा हंय, जो धरती पर उदय होयेंन।
DAN 7:18 पर परमेश्वर को पवित्र लोग राज्य ख पायेंन, अऊर युगानयुग ओको अधिकारी बन्यो रहेंन।
DAN 7:19 “तब मोरो मन म या इच्छा भयी कि ऊ चौथो जनावर को भेद भी जान लेऊं जो दूसरो तीनों सी अलग अऊर बहुत भयंकर होतो अऊर जेको दांत लोहा को अऊर नख पीतल को होतो; ऊ सब कयी खाय डालत होतो, अऊर चूर चूर करत होतो अऊर बच्यो हुयो ख पाय सी रौंद डालत होतो।”
DAN 7:20 तब ओकी मुंड म को दस सींगो को भेद, अऊर जो नयो सींग को निकलनो सी तीन सींग गिर गयो, मतलब जो सींग की आंखी अऊर बड़ो बोल बोलन वालो मुंह अऊर सब दूसरो सींगो सी ज्यादा भयंकर होतो, ओको भी भेद जानन की मोख इच्छा भयी।
DAN 7:21 तब मय न देख्यो होतो कि ऊ सींग पवित्र लोगों को संग लड़ायी कर रह्यो होतो, तब तक हरातो रह्यो,
DAN 7:22 जब तक ऊ अति पूर्वज नहीं आयो, अऊर परमप्रधान को पवित्र लोग न्यायी नहीं ठह्यरयो, अऊर उन पवित्र लोगों को राज्यधिकारी होन को समय नहीं आय पहुंच्यो।
DAN 7:23 “ओन कह्यो, ‘ऊ चौथो जन्तु को अर्थ, एक चौथो राज्य हय, जो धरती पर होय क अऊर सब राज्यों सी अलग होयेंन, अऊर पूरी धरती को नाश करेंन, अऊर रौंद क चूर चूर करेंन।
DAN 7:24 उन दस सींगों को अर्थ यो हय, कि ऊ राज्य म सी दस राजा उठेंन, अऊर उन्को बाद उन पहिलों सी अलग एक अऊर राजा उठेंन, जो तीन राजावों ख गिराय देयेंन,
DAN 7:25 अऊर ऊ परमप्रधान को खिलाफ बाते कहेंन, अऊर परमप्रधान को पवित्र लोगों ख पीस डालेंन, अऊर समयों अऊर व्यवस्था को बदल देन की आशा करेंन, अऊर साढ़े तीन साल तक हि सब ओको बस म कर दियो जायेंन।
DAN 7:26 पर, स्वर्ग को परमेश्वर न्याय लायी बैठेंन, अऊर ओकी प्रभुता छीन क मिटायी अऊर नाश करी जायेंन; यहां तक कि ओको अन्त होय जायेंन।
DAN 7:27 तब राज्य अऊर प्रभुता अऊर धरती पर को राज्य की महिमा, परमप्रधान परमेश्वरच की प्रजा मतलब ओको पवित्र लोगों ख दी जायेंन, ओको राज्य हमेशा को राज्य हय, अऊर सब प्रभुता करन वालो ओको अधिन होयेंन अऊर ओकी आज्ञा मानेंन।’”
DAN 7:28 “यो बात को वर्णन मय अब कर चुक्यो, पर मय दानिय्येल को मन म बड़ी घबराहट बनी रही, अऊर मय बहुत डर गयो; अऊर या बात ख मय अपनो मन म रख्यो रह्यो।”
DAN 8:1 बेलशस्सर राजा को राज्य को तीसरो साल म ऊ पहिलो दर्शन को बाद एक अऊर बात मय दानिय्येल ख दर्शन को द्वारा दिखायी गयी।
DAN 8:2 जब मय एलाम नाम को प्रान्त म, शूशन नाम को राजगढ़ म रहत होतो, तब मय न दर्शम म देख्यो कि मय ऊलै नदी को किनार पर हय।
DAN 8:3 तब मय न आंखी उठाय क देख्यो, कि वा नदी को आगु दोय सींग वालो एक मेंढा खड़ो हय, ओको दोयी सींग बड़ो हय, पर उन्म सी एक बहुत बड़ो हय, अऊर जो बड़ो हय, ऊ दूसरो को बाद निकल्यो।
DAN 8:4 मय न ऊ मेंढा ख देख्यो कि ऊ पश्चिम, उत्तर अऊर दक्षिन की सींग मारय हय, अऊर कोयी जनावर ओको आगु खड़ो नहीं रह्य सकय, अऊर न ओको हाथ सी कोयी कोयी ख बचाय सकय हय; अऊर ऊ अपनीच इच्छा को अनुसार काम कर क् बढ़तो जावय हय।
DAN 8:5 मय सोच रह्यो होतो, त फिर यो देख्यो कि एक बकरा पश्चिम दिशा सी निकल क पूरी धरती को ऊपर असो फिरयो कि चलतो समय जमीन पर पाय नहीं टिकायो अऊर ऊ बकरा की दोयी आंखी को बीच एक देखन लायक सींग होतो।
DAN 8:6 ऊ दोय सींग वालो मेंढा को जवर जाय क, जेख मय न नदी को आगु खड़ो देख्यो होतो, ओको पर गुस्सा होय क अऊर अपनी पूरी ताकत सी टक्कर मारयो।
DAN 8:7 मय न देख्यो कि ऊ मेंढा को जवर आय क ओको पर चिड़्यो; अऊर मेंढा ख मार क ओको दोयी सींगो ख तोड़ दियो; अऊर ओको सामना करन ख मेंढा म कुछ भी ताकत नहीं रही; तब बकरा न ओख जमीन पर गिराय क खुंद डाल्यो; अऊर मेंढा ख ओको हाथ सी छुड़ान वालो कोयी नहीं मिल्यो।
DAN 8:8 तब बकरा बहुत ज्यादा बड़ायी मारन लग्यो, अऊर जब ताकतवर भयो, तब ओको बड़ो सींग टूट गयो, अऊर ओको बदला देखन लायक चार सींग निकल क आसमान को चारों दिशावों को तरफ बढ़न लग्यो।
DAN 8:9 तब इन चार सींगों म सी एक सींग सी एक अऊर छोटो सो सींग निकल्यो, ऊ दक्षिन, पूर्व को तरफ बढ़न लग्यो अऊर यो सींग सुन्दर देश को तरफ आगु बड़ गयो।
DAN 8:10 ऊ स्वर्ग की सेना तक बढ़ गयो; अऊर ओको म सी अऊर तारों म सी भी कितनो ख जमीन पर गिराय ख रौंद डाल्यो।
DAN 8:11 अऊर ऊ स्वर्ग को सेना को मुखिया तक भी बढ़ गयो, अऊर ओकी नित्य होमबलि बन्द कर दी गयी; अऊर ओकी पवित्र रहन की जागा गिराय दी गयी।
DAN 8:12 अऊर लोगो को अपराध को वजह पवित्र जागा म नित्य होमबलि को संग सेना भी ओको हाथ म कर दी गयी, अऊर ऊ सींग न सच्चायी ख माटी म मिलाय दियो, अऊर ऊ काम करतो करतो सफल भय गयो।
DAN 8:13 तब मय न एक पवित्र जन ख बोलतो सुन्यो; तब अऊर एक पवित्र जन न ऊ पहिले बोलन वालो सी पूच्छ्यो, “नित्य होमबलि अऊर उजाड़न वालो अपराध को बारे म जो कोयी दर्शन देख्यो गयो, ऊ कब तक फलतो रहेंन; मतलब पवित्र जागा अऊर सेना दोयी को खुंद्यो जानो कब तक होतो रहेंन?”
DAN 8:14 तब ओन मोरो सी कह्यो, “जब तक शाम अऊर सुबेरे दोय हजार तीन सौ बार नहीं होय, तब तक ऊ होतो रहेंन; तब पवित्र जागा शुद्ध करयो जायेंन।”
DAN 8:15 या बात दर्शन म देख क, मय, दानिय्येल, या बात समझन की कोशिश करन लग्यो; इतनो म आदमी को रूप धरयो हुयो कोयी मोरो आगु खड़ो हुयो दिखायी पड़्यो।
DAN 8:16 तब मोख ऊलै नदी को बीच सी एक आदमी को आवाज सुनायी दियो, जो पुकार क कहत होतो, “हे जिब्राएल, ऊ जन ख ओकी देखी हुयी बाते समझाय दे।”
DAN 8:17 तब जित मय खड़ो होतो, उत ऊ मोरो जवर आयो; अऊर ओको आतोच मय घबराय गयो; अऊर मुंह को बल गिर गयो। तब ओन मोरो सी कह्यो, “हे आदमी की सन्तान, उन देखी हुयी बातों ख समझ ले, कहालीकि उन्को अर्थ को समय म घटेंन।”
DAN 8:18 जब ऊ मोरो सी बाते कर रह्यो होतो, तब मय अपनो मुंह जमीन को तरफ करयो हुयो भारी नींद म पड़्यो होतो, पर ओन मोख छुय ख सीधो खड़ो कर दियो।
DAN 8:19 तब ओन कह्यो, “गुस्सा भड़कन को आखरी को दिनो म जो कयी होयेंन, ऊ मय तोख बताऊं हय; कहालीकि आखरी को ठहरायो हुयो समय म ऊ सब पूरो होय जायेंन।
DAN 8:20 जो दोय सींग वालो मेंढा तय न देख्यो हय, ओको अर्थ मादियों अऊर फारसियों को राज्य सी हय।
DAN 8:21 अऊर ऊ रोंआब बकरा यूनान को राज्य हय; अऊर ओकी आंखी को बीच जो बड़ो सींग निकल्यो, ऊ पहिलो राजा ठह्यरयो।
DAN 8:22 ऊ सींग जो टूट गयो अऊर ओको बदला जो चार सींग निकल्यो, येको अर्थ यो हय कि ऊ राज्य सी चार राज्य उदय होयेंन, पर उन्की ताकत ऊ पहिले जसी नहीं होयेंन।
DAN 8:23 इन चारों राज्यों को आखरी को दिनों म, जब उन्को पाप को घड़ा भर जायेंन, एक राजा पैदा होयेंन। ऊ बहुत जिद्दी अऊर कुटिल स्वभाव को अऊर धोकेबाज राजा होयेंन।
DAN 8:24 ओकी सामर्थ बड़ी होयेंन, पर ऊ पहिलो राजा क जसो नहीं; अऊर ऊ अद्भुत रीति सी लोगों को नाश करेंन, अऊर सफल होय क काम करतो जायेंन, अऊर सामर्थियों अऊर पवित्र लोगों को समुदाय ख नाश करेंन।
DAN 8:25 ओकी चतुरायी को वजह ओको छल सफल होयेंन, अऊर ऊ मन म फूल क निडर रह्यतो हुयो बहुत लोगों को नाश करेंन। ऊ सब शासकों को शासक को खिलाफ भी खड़ो होयेंन; पर आखरी ख ऊ कोयी को हाथ सी बिना मार खायो नाश होय जायेंन।
DAN 8:26 शाम अऊर सुबेरे को बारे म जो कयी तय न देख्यो अऊर सुन्यो हय ऊ सच हय; पर जो कयी तय न दर्शन म देख्यो हय ओख बन्द रख, कहालीकि ऊ बहुत दिनों को बाद घटेंन।”
DAN 8:27 तब मय दानिय्येल को ताकत जातो रह्यो, अऊर मय कुछ दिन तक बिमार पड़्यो रह्यो, तब मय उठ क राजा को काम काज फिर करन लग्यो; पर जो कयी मय न दर्शन म देख्यो होतो ओको सी मय चकित रह्यो, कहालीकि ओको कोयी समझान वालो नहीं होतो।
DAN 9:1 मादी क्षयर्ष को टुरा दारा, जो कसदियों को देश पर राजा ठह्यरायो गयो होतो,
DAN 9:2 ओको राज्य पहिलो साल म, मय दानिय्येल न पवित्रशास्त्र को द्वारा समझ लियो कि यरूशलेम की उजड़ी हुयी दशा यहोवा को ऊ वचन को अनुसार जो यिर्मयाह नबी को जवर पहुंच्यो होतो, कुछ सालों को बीतनो पर मतलब सत्तर साल को बाद पूरी होय जायेंन।
DAN 9:3 तब मय अपनो मुख प्रभु परमेश्वर को तरफ कर क् गिड़गिड़ाहट को संग प्रार्थना करन लग्यो, अऊर उपवास कर क्, बोरा को कपड़ा पहिन क, अऊर राख म बैठ क वरदान मांगन लग्यो।
DAN 9:4 मय न अपनो परमेश्वर यहोवा सी यो तरह प्रार्थना करयो अऊर पाप ख मान लियो, “हे प्रभु, तय महान अऊर डर लायक परमेश्वर हय, जो अपनो प्रेम रखनो अऊर आज्ञा मानन वालों को संग अपनी वाचा ख पूरो करय अऊर करुना करतो रह्य हय,
DAN 9:5 हम लोगों न त पाप, कुटिलता, दुष्टता अऊर विद्रोह करयो हय, अऊर तोरी आज्ञावों अऊर नियमों ख तोड़ दियो हय।
DAN 9:6 तोरो जो दास भविष्यवक्ता लोग, हमरो राजावों, शासकों, पूर्वजों अऊर सब साधारन लोगों सी तोरो नाम सी बाते करत होतो, उन्की हम्न नहीं सुनी।
DAN 9:7 हे प्रभु, तय न्यायी हय, पर हम लोगों ख अज को दिन लज्जित होनो पड़य हय, मतलब यरूशलेम म रहन वालो सब यहूदियों ख, का नजीक, का दूर को सब इस्राएली लोगों ख, जिन्ख तय न ऊ विश्वासघात को वजह जो उन्न तोरो संग करयो होतो, देश देश म तीतर बीतर कर दियो हय, उन सभी ख लज्जित होनो पड़य हय।
DAN 9:8 हे यहोवा, हम लोगों न अपनो राजावों, शासकों अऊर पूर्वजों सहीत तोरो खिलाफ पाप करयो हय, यो वजह हम्ख लज्जित होनो पड़य हय।
DAN 9:9 पर, कभी हम अपनो परमेश्वर प्रभु सी फिर गयो, तब भी तय दयासागर अऊर माफ करन वालों आय।
DAN 9:10 हम त अपनो परमेश्वर यहोवा की शिक्षा सुनन पर भी ओको पर नहीं चल्यो जो ओन अपनो दास भविष्यवक्तावों सी हम्ख सुनायी।
DAN 9:11 तब सब इस्राएलियों न तोरी व्यवस्था को उल्लंघन करयो, अऊर असो हट गयो कि तोरी नहीं सुनी। यो वजह जो श्राप अऊर कसम की चर्चा परमेश्वर को दास मूसा की व्यवस्था म लिखी हुयी हय, ऊ श्राप हम पर घट गयो, कहालीकि हम न ओको खिलाफ पाप करयो।
DAN 9:12 येकोलायी ओन हमरो अऊर न्यायियों को बारे म जो वचन कह्यो होतो, उन्ख हम पर बड़ी विपत्ति डाल क पूरो करयो हय; यहां तक कि जसी विपत्ति यरूशलेम पर पड़ी हय, वसी पूरी धरती पर अऊर कहीं नहीं पड़ी।
DAN 9:13 जसो मूसा कि व्यवस्था म लिख्यो हय, वसोच या पूरी विपत्ति हमरो पर आय पड़ी हय, तब भी हम अपनो परमेश्वर यहोवा ख मानन लायी न त अपनो अधर्म को कामों सी फिरयो, अऊर न तोरी सत्य बातों पर ध्यान दियो।
DAN 9:14 यो वजह यहोवा न सोच बिचार क हमरो पर विपत्ति डाली हय; कहालीकि हमरो परमेश्वर यहोवा जितनो काम करय हय उन पूरो म न्यायी ठह्यरय हय; पर हम न ओकी नहीं सुनी।
DAN 9:15 अब, हे हमरो परमेश्वर, हे प्रभु, तय न अपनी प्रजा ख मिस्र देश सी, बली हाथ को द्वारा निकाल लायो अऊर अपनो असो बड़ो नाम करयो, जो अज तक प्रसिद्ध हय, पर हम न पाप करयो हय अऊर दुष्टताच करी हय।
DAN 9:16 हे प्रभु, हमरो पापों अऊर हमरो पूर्वजों को अधर्म को कामों को वजह यरूशलेम की अऊर तोरी प्रजा की, हमरो आस पास को सब लोगों को तरफ सी नामधरायी होय रही हय; गुस्सा अऊर जलजलाहट अपनो नगर यरूशलेम पर सी उतार दे, जो तोरो पवित्र पहाड़ पर बस्यो हय।
DAN 9:17 हे हमरो परमेश्वर, अपनो दास की प्रार्थना अऊर गिड़गिड़ाहट सुन क, अपनो उजड़्यो हुयो पवित्र जागा पर अपनो मुख को उजारो चमका; हे प्रभु, अपनो नाम को निमित्त यो कर।
DAN 9:18 हे मोरो परमेश्वर, कान लगाय क सुन, आंखी खोल क हमरी उजड़ी हुयी दशा अऊर ऊ नगर ख भी देख जो तोरो कह्यलावय हय; कहालीकि हम जो तोरो आगु गिड़गिड़ाय क प्रार्थना करजे हंय, ऊ अपनो धर्म को कामों पर नहीं, बल्की तोरी बड़ी दयाच को कामों पर भरोसा रख क करजे हय।
DAN 9:19 हे प्रभु, सुन ले, हे प्रभु, पाप माफ कर; हे प्रभु, ध्यान दे क जो करनो हय ओख कर, देरी मत कर; हे मोरो परमेश्वर, तोरो नगर अऊर तोरी प्रजा तोरीच कह्यलावय हय; येकोलायी अपनो नाम को निमित्त असोच कर।”
DAN 9:20 यो तरह मय प्रार्थना करतो, अऊर अपनो अऊर अपनो इस्राएली लोगों को पाप ख मानतो हुयो, अपनो परमेश्वर यहोवा को जवर ओकी पवित्र पहाड़ी-नगर लायी गिड़गिड़ाय क बिनती करतोच होतो,
DAN 9:21 तब ऊ आदमी जिब्राएल जेख मय न ऊ समय देख्यो जब जब तोख पहिले दर्शन भयो होतो, ओन तेजी सी उड़न की आज्ञा पा क, शाम की अन्नबलि को समय मोख छूय लियो; अऊर मोख समझाय क मोरो संग बातें करन लग्यो।
DAN 9:22 ओन मोरो सी कह्यो, “हे दानिय्येल, मय तोख बुद्धि अऊर समझ देन ख अभी निकल आयो हय।
DAN 9:23 जब तय गिड़गिड़ाय क बिनती करन लग्यो, तबच येकी आज्ञा निकली, येकोलायी मय तोख बतान आयो हय, कहालीकि तय अति प्रिय ठह्यरयो हय; येकोलायी ऊ विषय ख समझ ले अऊर दर्शन की बात को अर्थ जान ले।”
DAN 9:24 “तोरो लोगों अऊर तोरो पवित्र नगर लायी सत्तर हप्ता ठह्यरायो गयो हय कि उन्को अन्त तक अपराध को होनो बन्द हो, अऊर पापों को अन्त अऊर अधर्म को प्रायश्चित करयो जाये, अऊर हमेशा हमेशा की धार्मिकता प्रगट हो; अऊर दर्शन की बात पर अऊर भविष्यवानी पर छाप दी जाये, अऊर पवित्र जागा को अभिषेक करयो जायेंन।
DAN 9:25 येकोलायी यो जान अऊर समझ ले, कि यरूशलेम ख फिर बसान की आज्ञा को निकलनो सी ले क अभिषिक्त प्रधान को समय साल को सात हप्ता बीतेंन। फिर बासठ हप्ता बीतन पर चौक अऊर खायी सहीत ऊ नगर कष्ट को समय म फिर बसायो जायेंन।
DAN 9:26 साल को बासठ हप्ता को बीतन पर अभिषिक्त करयो हुयो आदमी काट्यो जायेंन : अऊर ओको हाथ कुछ नहीं लगेंन; अऊर आवन वालो प्रधान की प्रजा नगर अऊर पवित्र जागा ख नाश त करेंन। पर ऊ प्रधान को अन्त असो होयेंन जसो बाढ़ सी होवय हय; तब भी ओको अन्त तक लड़ायी होती रहेंन; कहालीकि ओको उजड़ जानो निश्चय ठान लियो गयो हय।
DAN 9:27 ऊ मुखिया सालों को एक हप्ता लायी बहुतों को संग मजबूत वाचा बांधेंन, पर सालों को आधोच हप्ता को बीतन पर ऊ मेलबलि अऊर अन्नबिल ख बन्द करेंन; अऊर सेंडा पर उजाड़न वाली बुरी चीजे दिखायी देयेंन अऊर निश्चयच ठनी हुयी बात को हप्ता होन तक परमेश्वर को गुस्सा उजाड़न वालो पर पड़्यो रहेंन।”
DAN 10:1 फारस देश को राजा कुस्रू को राज्य को तीसरो साल म दानिय्येल पर, जो बेलतशस्सर भी कह्यलावय हय, एक बात प्रगट करी गयी। वा बात सच होती कि बड़ो युद्ध होयेंन। ओन या बात ख जान लियो, अऊर ओख या देखी हुयी बात समझ आय गयी।
DAN 10:2 उन दिनों म, दानिय्येल, तीन हप्ता तक दु:ख मनातो रह्यो।
DAN 10:3 उन तीन हप्ता को पूरो होन तक, मय न स्वादिष्ट जेवन नहीं करयो अऊर न मांस या अंगूरीरस अपनो मुंह म रख्यो, अऊर न अपनो शरीर म कुछ तेल लगायो।
DAN 10:4 फिर पहिलो महीना को चौबीसवों दिन ख जब मय हिद्देकेल नाम की नदी को किनार पर होतो,
DAN 10:5 तब मय न आंखी उठाय क देख्यो, कि सन को कपड़ा पहिन्यो हुयो, अऊर ऊफाज देश को सोनो को कुन्दा सी कमर बांध्यो हुयो एक आदमी खड़ो हय।
DAN 10:6 ओको शरीर फीरोजा किमती गोटा को जसो, ओको मुख बिजली को जसो, ओकी आंखी जलतो हुयो दीया को जसो, ओकी बाहें अऊर पाय चमकायो हुयो पीतल को जसो, अऊर ओको वचनों की आवाज भीड़ की आवाज की जसी होती।
DAN 10:7 ओख केवल मय दानिय्येल नच देख्यो, अऊर संगी आदमियों ख ओको कुछ भी दर्शन नहीं भयो; पर हि बहुतच थरथरान लग्यो, अऊर लुकन लायी भग गयो।
DAN 10:8 तब मय अकेलो रह्य क यो अद्भुत दर्शन देखतो रह्यो, येको सी मोरी ताकत जाति रही; मय भयभीत भय गयो, अऊर मोरो म कुछ भी ताकत नहीं रही।
DAN 10:9 तब भी मय न ऊ आदमी को वचनों को शब्द सुन्यो, अऊर जब ऊ मोख सुनायी पड़्यो, तब मय मुंह को बल गिर गयो अऊर गह्यरी नींद म जमीन पर उबड़ो को मुंह पड़्यो रह्यो।
DAN 10:10 तक कोयी एक हाथ न मोरो शरीर ख छुयो अऊर मोख उठाय क घुटनावों अऊर हथेरियों को बल थरथरातो हुयो बैठाय दियो।
DAN 10:11 तब ओन मोरो सी कह्यो, “हे दानिय्येल, हे अति प्रिय आदमी, जो वचन मय तोरो सी कहूं हय ओख समझ ले, अऊर सीधो खड़ो हो, कहालीकि मय अभी तोरो जवर भेज्यो गयो हय।” जब ओन मोरो सी यो वचन कह्यो, तब मय खड़ो भय गयो पर थरथरातो रह्यो।
DAN 10:12 तब ओन मोरो सी कह्यो, “हे दानिय्येल, मत डर, कहालीकि पहिलोच दिन ख जब तय न समझन भूझन आयी मन लगायो अऊर अपनो परमेश्वर को आगु अपनो ख नम्र करयो, उसी दिन तोरो वचन सुन्यो गयो, अऊर मय तोरो वचनों को वजह आय गयो हय।
DAN 10:13 फारस को राज्य को मुखिया इक्कीस दिन तक मोरो सामना करतो रह्यो; पर मीकाएल जो मुख्य मुखियावों म सी हय, ऊ मोरी मदत लायी आयो, येकोलायी मय फारस को राजावों को जवर रह्यो,
DAN 10:14 अऊर अब मय तोख समझान आयो हय, कि आखरी को दिनों म तोरो लोगों की का दशा होयेंन। कहालीकि जो दर्शन तय न देख्यो हय ऊ कुछ दिन को बाद पूरो होयेंन।”
DAN 10:15 जब ऊ आदमी मोरो सी असी बाते कह्य चुक्यो, तब मय न जमीन को तरफ मुंह करयो अऊर चुप रह्य गयो।
DAN 10:16 तब आदमी की सन्तान को आगु कोयी न मोरो ओंठ छुयो, अऊर मय मुंह खोल क बोलन लग्यो। जो मोरो आगु खड़ो होतो, ओको सी मय न कह्यो, “हे मोरो प्रभु, दर्शन की बातों को वजह मोख तकलिफ जसी उठी, अऊर मोरो म कुछ भी ताकत नहीं रही।
DAN 10:17 येकोलायी प्रभु को दास, अपनो प्रभु को संग कसी बाते कर सकेंन? कहालीकि मोरो शरीर म न त कुछ ताकत रही, अऊर न कुछ स्वास च रही।”
DAN 10:18 तब ऊ जो आदमी को जसो दिखत होतो, फिर सी ओन मोख छुयो, अऊर मोख हिम्मत दी;
DAN 10:19 अऊर ओन कह्यो, “हे अति प्रिय आदमी, मत डर, तोख शान्ति मिले; तय मजबुत हो अऊर तय हिम्मत बांध्यो रह्य।” जब ओन यो कह्यो, तब मय न हिम्मत सी कह्यो, “हे मोरो प्रभु, अब कह्य, कहालीकि तय न मोख हिम्मत प्रदान करयो हय।”
DAN 10:20 तब ओन कह्यो, “का तय जानय हय कि मय कसो वजह सी तोरो जवर आयो हय? अब मय फारस को प्रधान सी लड़न लायी लौटूं; अऊर जब मय निकलूं, तब यूनान को प्रधान आयेंन।
DAN 10:21 जो कयी सच्ची बातों सी भरी हुयी किताब म लिख्यो हय, ऊ मय तोख बताऊं हय; उन प्रधानों को खिलाफ, तुम्हरो प्रधान मीकाएल ख छोड़ मोरो संग स्थिर रहन वालो अऊर कोयी भी नहाय।”
DAN 11:1 “दारा नाम को मादी राजा को राज्य को पहिलो साल म ओख हिम्मत दिलान लायी अऊर ताकत देन लायी मयच खड़ो भय गयो।”
DAN 11:2 “अब मय तोख सच्ची बात बताऊ हंय। देख, फारस को राज्य म अब तीन अऊर राज्य उठेंन; अऊर चौथो राज्य उन पूरो सी ज्यादा धनी होयेंन; अऊर जब ऊ धन को वजह बलवान होयेंन, तब सब लोगों ख यूनान को राज्य को खिलाफ भड़कायेंन।”
DAN 11:3 ओको बाद एक पराक्रमी राजा उदय होयेंन, जो बड़ी शक्ति सी राज्य करेंन अऊर ओख जो अच्छो लगेंन उच ऊ करेंन।
DAN 11:4 अऊर जब ऊ बड़ो होयेंन, तब ओको राज्य टूट जायेंन; अऊर चारयी दिशावों म बट जायेंन। यो राज्य ओकी सन्तानों ख नहीं मिलेंन; अऊर नहीं ओकी शक्ति को प्रभाव ऊ राज्य म होयेंन, कहालीकि ओको राज्य ओको सी छीन क, कोयी दूसरो ख दे दियो जायेंन।
DAN 11:5 “तब दक्षिन देश को राजा शक्तिशाली बनेंन: पर ओको एक शासक ओको सी ज्यादा शक्तिशाली होय जायेंन; यहां तक कि ऊ एक नयो राज्य स्थापित करेंन, अऊर ओको राज्य एक बहुत बड़ो साम्राज्य बन जायेंन।
DAN 11:6 कयी सालों को बीतन पर, हि दोयी आपस म मिलेंन, अऊर दक्षिन देश को राजा की टुरी सीरिया देश को राजा को जवर शान्ति की वाचा बांधन ख जायेंन; पर ओकी शक्ति हमेशा बनी नहीं रहेंन, अऊर न ऊ राजा अऊर न ओको नाम रहेंन; पर वा स्त्री अपनो पहुंचान वालों अऊर अपनो पिता अऊर अपनो सम्भालन वालों समेत अलग कर दी जायेंन।
DAN 11:7 तब वा टुरी को वंश को एक जन ओकी जागा म उठ खड़ो होयेंन। ऊ सीरिया देश को राजा की सेना पर आक्रमन करेंन, अऊर ओको किला म सीरेंन, ऊ उन्को सी लड़ेंन अऊर विजय होयेंन।
DAN 11:8 तब ऊ उन्को देवतावों की बनायी हुयी मूर्ती, अऊर सोनो चांदी को बहुत किमती बर्तनों ख छीन क मिस्र म ले जायेंन; येको बाद ऊ कुछ साल तक सीरिया देश को राजा को खिलाफ हाथ रोक्यो रहेंन।
DAN 11:9 तब ऊ राजा दक्षिन देश को राजा को देश म आक्रमन करन आयेंन, पर हार को बिचार सी अपनो देश म लौट जायेंन।”
DAN 11:10 “ओको टुरा लड़ायी की तैयारी करन लायी एक बड़ी सेना जमा करेंन, अऊर बिना रूकन वाली बाढ़ को जसो तेजी सी आगु बढ़ेंन, अऊर लड़ायी ख ओको किला तक लिजायेंन।
DAN 11:11 तब दक्षिन देश को राजा चढ़ेंन, अऊर निकल क सीरिया देश को ऊ राजा सी युद्ध करेंन, अऊर ऊ राजा लड़न लायी बड़ी भीड़ जमा करेंन, पर वा भीड़ ओको हाथ म कर दी जायेंन।
DAN 11:12 वा भीड़ क जीत क ओको मन घमण्ड सी भर जायेंन, अऊर ऊ लाखों लोगों ख गिरायेंन, पर ऊ विजयी नहीं होयेंन।”
DAN 11:13 कहालीकि सीरिया देश को राजा एक दूसरी सेना खड़ी करेंन; जो ओकी पहिले की सेना सी बड़ी होयेंन, अऊर कयी सालों को बाद, ऊ पूरी तैयारी को संग एक बड़ी सेना ख ले क आगु बढ़ेंन।
DAN 11:14 उन दिनों म बहुत सो लोग दक्षिन देश को राजा को खिलाफ उठेंन; बल्की तोरो लोगों म सी भी उपद्रवी लोग उठ खड़ो होयेंन, जेको सी यो दर्शन की बात पूरी होय जायेंन; पत हि ठोकर खाय क गिरेंन।
DAN 11:15 तब सीरिया देश को राजा आय क घेराबन्दी करेंन अऊर मजबूत नगर ले लेयेंन; अऊर दक्षिन देश को न त सेना खड़ी रहेंन अऊर न बड़ो वीर, कहलीकि कोयी म खड़ो रहन की ताकत नहीं रहेंन।
DAN 11:16 तब ऊ उन्को खिलाफ आयेंन ऊ जसो चाहेंन वसोच करेंन अऊर कोयी भी ओको आगु ठह्यर नहीं सकेंन। ऊ अपनो आप ख ऊ सुन्दर देश म खड़ो करेंन अऊर ओको जवर ओख नाश करन की शक्ति होयेंन।
DAN 11:17 तब ऊ अपनो राज्य को पूरी ताकत समेत, कयी सीधो लोगों ख संग धर क आन लगेंन, अऊर अपनी इच्छा को अनुसार काम करेंन। ऊ ओख एक स्त्री येकोलायी देयेंन कि ओको राज्य बिगाड़्यो जाये; पर ऊ सीधो नहीं रहेंन, न ऊ राजा की होयेंन।
DAN 11:18 तब ऊ अपनो ध्यान समुन्दर तटो पर लगायेंन अऊर उन्म सी कयी राज्य पर अपनो अधिकार म कर लेयेंन, पर एक सेनापति ओको अहंकार को अनुसार ओको सी बदला लेयेंन।
DAN 11:19 तब ऊ अपनो देश को गढ़ों को तरफ मुंह फेरेंन, अऊर ऊ ठोकर खाय क गिरेंन, अऊर ओको नाश होय जायेंन।
DAN 11:20 “तब ओकी जागा म कोयी असो राजा उठेंन, जो राजकिय वैभय ख बनायो रखन लायी कर जमा करन वालो ख भेजेंन। फिर भी कुछ सालों म ऊ नाश होय जायेंन, पर ऊ गुस्सा या लड़ायी करयो बिना च नाश होय जायेंन।”
DAN 11:21 “ओकी जागा म एक बेकार आदमी उठेंन, जेकी राजप्रतिष्ठा पहिले त नहीं होयेंन, तब भी ऊ चैन को समय आय क चिकनी चुपड़ी बातों को द्वारा राज्य ख हासिल करेंन।”
DAN 11:22 तब सेनाये ओको आगु पूरी तरह नाश होय जायेंन, बल्की हमरो वाचा को प्रमुख व्यक्ति भी, नाश होय जायेंन।
DAN 11:23 कहालीकि ऊ ओको संग वाचा बांधन पर भी छल करेंन, अऊर थोड़ोच लोगों ख संग लियो हुयो पूरी शक्ति को संग राज्य पर शासन करेंन।
DAN 11:24 जब धनी राज्य सुरक्षित महसुस कर रह्यो होना तब ऊ ऊच समय उन्को पर आक्रमन करेंन; अऊर असी सफलता हासिल करेंन, जसो न त ओको बापदादों अऊर नहीं ओको पूर्वजों न करयो होतो। ऊ लूटी अऊर छिनी गयी चिजो अऊर जायजात ख अपनो लोगों म बाट देयेंन। ऊ किला ख जीतन लायी योजना बनायेंन, पर कुछ समय लायी।
DAN 11:25 तब ऊ दक्षिन देश को राजा को खिलाफ बड़ी सेना लियो हुयो अपनी ताकत अऊर हिम्मत ख बढ़ायेंन, अऊर ऊ राजा बहुत बड़ी अऊर सामर्थी सेना लियो हुयो लड़ायी त करेंन पर ठहर नहीं सकेंन, कहालीकि लोग ओको खिलाफ बिचार करेंन।
DAN 11:26 यहां तक कि राजा को द्वारा करयो गयो, जेवन ख खात होतो हिच ओख नाश करन की कोशिश करेंन, ओकी सेना ख भगाय दियो जायेंन अऊर बहुत सारो लोग लड़ायी म मारयो जायेंन।
DAN 11:27 तब उन दिनों राजावों को मन बुरायी करनो म लगेंन, यहां तक कि हि एकच मेज पर बैठ्यो हुयो आपस म झूठ बोलेंन, पर येको सी कुछ बन नहीं पड़ेंन; कहालीकि इन सब बातों को अन्त ठह्यरायो गयो समय म यो सब होन वालो हय।
DAN 11:28 तब सीरिया देश को राजा बड़ी लूट लियो हुयो अपनो मिस्र देश ख लौटेंन, अऊर ओको मन पवित्र वाचा को खिलाफ उभरेंन, अऊर ऊ अपनी इच्छा पूरी कर क् अपनो देश ख लौट जायेंन।
DAN 11:29 “ठह्यरायो गयो समय पर ऊ फिर दक्षिन देश को तरफ जायेंन, पर ऊ पिछलो बार को जसो इस बार ओको वश नहीं चलेंन।
DAN 11:30 कहालीकि कित्तियों को जहाजों ओको खिलाफ आयेंन, अऊर ऊ उदास होय क लौटेंन,” अऊर पवित्र वाचा पर चिढ़ क अपनी इच्छा पूरी करेंन। ऊ लौट क पवित्र वाचा को तोड़न वालो की सुधि लेयेंन।
DAN 11:31 तब ओको सैनिकों को दल खड़ो होय क, मजबूत पवित्र जागा अऊर गढ़ ख अपवित्र करेंन, अऊर हर दिन होमबलि ख बन्द करेंन। हि वा बुरी चिज ख खड़ो करेंन जो उजाड़ कराय देवय हय;
DAN 11:32 अऊर जो लोग दुष्ट होय क वा वाचा ख तोड़ेंन, ओख ऊ चिकनी चुपड़ी बाते कह्य क बहकाय देयेंन; पर जो लोग अपनो परमेश्वर ख जानत होतो, हि हिम्मत रख क बड़ो काम करेंन।
DAN 11:33 लोगों को सिखान वालो बुद्धिमान जन बहुतों ख समझायेंन, तब भी हि बहुत दिन तक तलवार सी मर क अऊर आगी म जर क, अऊर कैदी होय क अऊर उन्की जायजाद लुट क, बड़ो दु:ख म पड़्यो रहेंन।
DAN 11:34 जब हि दु:ख म पड़ेंन तब उन्ख थोड़ी कुछ मदत मिलेंन, पर बहुत सो लोग चिकनी चुपड़ी बाते कह्य क उन सी मिल जायेंन;
DAN 11:35 अऊर सिखान वालों म सी कितनो गिरेंन, अऊर येकोलायी गिरनो पायेंन कि जांच्यो जाये, अऊर परख्यो जाये अऊर अपनो विश्वास म शुद्ध अऊर उजलो करयो जाये। या दशा अन्त को समय तक बनी रहेंन, कहालीकि इन सब बातों को अन्त ठह्यरायो समय म होन वालो हय।
DAN 11:36 “तब ऊ सिरीया को राजा अपनी इच्छा को अनुसार काम करेंन, अऊर अपनो आप ख पूरो देवतावों सी ऊंचो अऊर बड़ो ठह्यरायेंन; बल्की सब देवतावों को परमेश्वर को खिलाफ भी बाते कहेंन। जब तक परमेश्वर को गुस्सा शान्त नहीं होय जायेंन तब तक ऊ राजा को कार्य सफल होतो रहेंन; कहालीकि जो कयी निश्चय कर क ठान्यो हुयो हय ऊ जरूरच पूरो होन वालो हय।
DAN 11:37 ऊ न अपनो बापदादावों को परमेश्वर को तरफ ध्यान देयेंन, अऊर न स्त्रियों की लालसा को तरफ अऊर न कोयी देवतावों को तरफ ध्यान करेंन; कहालीकि ऊ अपनो आप ख सब सी ज्यादा बड़ो समझेंन।
DAN 11:38 ऊ राजा बापदादावों को देवतावों को सम्मान को बदला ऊ किला को देवतावों को मान सम्मान करेंन, जिन्ख उन्को बापदादावों भी नहीं जानेंन, ऊ उन्ख सोनो, चांदी, किमती मनि अऊर मनभावनी चिजे चढ़ाय क ओको मान सम्मान करेंन।
DAN 11:39 ऊ परायो देवता को सहारे ऊ बहुत दृढ़ गढ़ों सी लड़ेंन, अऊर जो कोयी ओख मानेंन ओख ऊ बड़ी प्रतिष्ठा देयेंन। असो लोगों ख ऊ बहुतों को ऊपर प्रभुता देयेंन, अऊर अपनो लाभ लायी अपनो देश की जमीन ख बांट देयेंन।”
DAN 11:40 “आखरी को समय दक्षिन देश को राजा उन्को सी लड़ायी करेंन; पर सीरिया देश को राजा ओको पर बवण्डर को जसो बहुत सो रथ सवार अऊर जहाज ले क चढ़ायी करेंन; यो रीति सी ऊ बहुत सो देशों म फैल जायेंन, अऊर उन्म सी निकल जायेंन।
DAN 11:41 ऊ सुन्दर देश म भी आयेंन, अऊर बहुत सो देश उजड़ जायेंन, पर एदोमी, मोआबी अऊर मुख्य मुख्य अम्मोनी लोगों को देश ओको हाथ सी बच जायेंन।
DAN 11:42 ऊ कयी देशों पर आक्रमन करेंन अऊर मिस्र देश भी नहीं बचेंन।
DAN 11:43 ऊ मिस्र को सोनो चांदी को खजानों अऊर सब मनभावनी चिजों को स्वामी होय जायेंन; अऊर लूबी अऊर कूशी लोग भी ओको अधिन होय जायेंन।
DAN 11:44 उच समय ऊ पूर्व अऊर उत्तर दिशावों सी समाचार सुन क बेचैन होय जायेंन, अऊर बड़ो गुस्सा म आय क बहुतो को सत्यानाश करन लायी निकलेंन।
DAN 11:45 ऊ अपनो राजकीय तम्बू समुन्दर अऊर सुन्दर पवित्र पहाड़ी को बीच खड़ो करेंन। तब भी ओको अन्त होय जायेंन, अऊर कोयी भी ओकी मदत लायी नहीं आयेंन।”
DAN 12:1 “उच समय मीकाएल नाम को बड़ो स्वर्गदूत, जो तोरो लोगों को पक्ष करन ख खड़ो रह्य हय, ऊ उठेंन। तब असो संकट को समय होयेंन, जसो कोयी देश को पैदा होन को समय सी ले क अब तक कभी नहीं भयो, न होयेंन; पर ऊ समय तोरो लोगों म सी जितनों को नाम परमेश्वर कि किताब म लिख्यो हुयो हंय, हि बच निकलेंन।
DAN 12:2 जो जमीन को खल्लो सोयो रहेंन उन्म सी बहुत सो लोग जाग उठेंन, कितनो त हमेशा को जीवन लायी, अऊर कितनो अपनी बदनामी अऊर हमेशा तक बहुत बेकार ठह्यरन लायी।
DAN 12:3 जो समझदार हय, हि आसमान की ज्योति को जसो चमकेंन, अऊर जो बहुतों ख धर्म की रस्ता पर लिजावय हय, हि तारों को जसो हमेशा चमकतो रहेंन।
DAN 12:4 पर हे दानिय्येल, तय या किताब पर मुहर कर क् इन वचनों ख आखरी समय तक लायी बन्द रख। बहुत सो लोग पूछ पाछ अऊर ढूंढ़ ढांढ करेंन, अऊर येको सी ज्ञान भी बढ़ जायेंन।”
DAN 12:5 यो सब सुन क, दानिय्येल न नजर सी यो देख्यो कि अऊर दोय आदमी खड़ो हय, एक त नदी को यो किनार पर, अऊर दूसरो नदी को ऊ किनार पर हय।
DAN 12:6 तब जो आदमी सन को कपड़ा पहिन्यो हुयो नदी को पानी को ऊपर होतो, ओको सी उन आदमियों म सी एक न पूच्छ्यो, “इन आश्चर्य कर्मों को अन्त कब तक होयेंन?”
DAN 12:7 तक जो आदमी सन को कपड़ा पहिन्यो हुयो नदी को पानी को ऊपर होतो, ओन मोरो सुनतोच दाहिनो अऊर बायो, अपनो दोयी हाथ स्वर्ग को तरफ उठायक, हमेशा जीन्दो रहन वालो की कसम खाय क कह्यो, “या दशा साढे़ तीन साल तकच रहेंन; अऊर जब पवित्र प्रजा की शक्ति टूटत टूटत खतम होय जायेंन, तब ये सब बातें पूरी होयेंन।”
DAN 12:8 या बात मय सुनत त होतो पर कयी नहीं समझ्यो। तब मय न कह्यो, “हे मोरो प्रभु, इन बातों को आखरी परिनाम का होयेंन?”
DAN 12:9 ओन कह्यो, “हे दानिय्येल, चली जा; कहालीकि या बातें आखरी समय लायी बन्द हंय अऊर इन पर मुहर लगायी हुयी हय।
DAN 12:10 बहुत सो लोग त अपनो अपनो ख निर्मल अऊर शुद्ध करेंन, अऊर स्वच्छ होय जायेंन; पर दुष्ट लोग दुष्टताच करतो रहेंन; अऊर दुष्टों म सी कोयी या बातें नहीं समझायेंन; पर जो बुद्धिमान हंय हिच समझायेंन।
DAN 12:11 जो दिन रोज की होमबलि चढ़ानो बन्द होय जायेंन, अऊर बेकार चिजे वा जागा पर स्तापित करी जायेंन, जो नाश को वजह होयेंन, तब तक बारा सौ नब्बे दिन बीत जायेंन।
DAN 12:12 का हि धन्य हय ऊ, जो धीरज धर क तेरा सौ पैंतीस दिन को आखरी तक भी पहुंचे।
DAN 12:13 दानिय्येल अब तय जाय क आखरी तक ठह्यरयो रह्य; अऊर तय आराम करतो रह्यजो; अऊर उन दिनों को आखरी म तय अपनो निज भाग पान लायी खड़ो होजो।”
AMO 1:1 तकोआवासी आमोस जो जनावर चरावन वालों होतो, ओको यो वचन आय जो ओन यहूदा को राजा उजिय्याह को, अऊर योआश को टुरा इस्राएल को राजा यारोबाम को दिनों म, भूईडोल सी दोय साल पहिले, इस्राएल को बारे म दर्शन देख क कह्यो :
AMO 1:2 “यहोवा सिय्योन सी गरजेंन , अऊर यरूशलेम सी अपनो शब्द सुनायेंन ; तब चरवाहों की चराइयाँ विलाप करेंन , अऊर कर्मेल पहाड़ की सेंडी झुलस जायेंन।”
AMO 1:3 यहोवा यो कह्य हय : दमिश्क को तीन का, बल्की चार अपराधों को वजह मय ओकी सजा नहीं छोड़ूं; कहालीकि उन्न गिलाद ख लोहा को दांवन वालो अवजारों सी रौंद डाल्यो हंय।
AMO 1:4 येकोलायी मय हजाएल को किल्ला म आगी लगाऊं , अऊर ओकोसी बेन्हदद को किल्ला भी जर क भस्म होय जायेंन।
AMO 1:5 मय दमिश्क को द्वारों ख तोड़ डालूं , अऊर आवेन नाम की तरायी को रहनवालों ख अऊर बेतएदेन को घर म रहनवालो राजदण्डधारी ख नाश करूं; अऊर अराम को लोग गुलाम होय क कीर ख जायेंन, यहोवा को योच वचन आय।
AMO 1:6 यहोवा यो कह्य हय : “गाजा को बार बार करयो हुयो अपराधों को वजह मय ओकी सजा नहीं छोड़ूं; कहालीकि हि सब लोगों ख बन्दी बनाय क ले गयो कि उन्ख एदोम राज्य को वश म कर दे।
AMO 1:7 येकोलायी मय गाजा नगर की दीवाल म आगी लगाऊं अऊर ओको सी ओको किल्ला जर क भस्म होय जायेंन।
AMO 1:8 मय अशदोद नगर को रहनवालों ख अऊर अश्कलोन नगर को राजा ख भी नाश करूं; मय अपनो हाथ एक्रोन को खिलाफ चलाऊं, अऊर बच्यो पलिश्ती लोग नाश होयेंन, परमेश्वर यहोवा को योच वचन आय।”
AMO 1:9 यहोवा यो कह्य हय सोर को बार बार करयो हुयो अपराधों को वजह मय ओकी सजा नहीं छोड़ूं; कहालीकि ओन सब लोगों ख गुलाम बनाय क एदोम को वश म कर दियो अऊर भाऊ को संग को करी हुयी वाचा ख याद नहीं करयो।
AMO 1:10 येकोलायी मय सोर को नगर को किल्ला ख आगी लगाऊं, अऊर ओकोसी ओको किल्ला भी भस्म हो जायेंन।
AMO 1:11 “यहोवा यो कह्य हय एदोम को बार बार करयो हुयो अपराधों को वजह मय ओकी सजा नहीं छोड़ूं ; कहालीकि ओन अपनो भाऊ ख तलवार पकड्यो हुयो भगायो अऊर कुछ भी दया नहीं करी, पर गुस्सा सी उन्ख लगातार फाड़तच रह्यो, अऊर अपनो गुस्सा ख हमेशा लायी बनाये रह्यो।
AMO 1:12 येकोलायी मय तेमान शहर म आगी लगाऊं, अऊर ओको सी बोस्रा को किल्ला भस्म हो जायेंन।”
AMO 1:13 यहोवा यो कह्य हय : “अम्मोन को बार बार करयो हुयो अपराधों को वजह मय ओकी सजा नहीं छोडूं कहालीकि ओन अपनी सीमा ख बढ़ावन लायी गिलाद की गर्भवती बाइयों को पेट चीर डाल्यो।
AMO 1:14 येकोलायी मय रब्बा नगर को किल्ला म आगी लगाऊं, अऊर ओको सी ओको भवन भी भस्म होय जायेंन। ऊ युद्ध को दिन म ललकार होयेंन, ऊ आन्धी बल्की माट्या को दिन होयेंन;
AMO 1:15 अऊर उन्को राजा अपनो अधिकारी समेत गुलामी म जायेंन,” यहोवा को योच वचन आय।
AMO 2:1 यहोवा यो कह्य हय : “मोआब को बार बार करयो हुयो अपराधों को वजह, मय ओकी सजा नहीं छोड़ूं; कहालीकि ओन एदोम को राजा की हड्डियों ख जलाय क राख बनाय दियो।
AMO 2:2 येकोलायी मय मोआब प्रदेश म आगी लगाऊं, अऊर ओको सी करिय्योत नगर को किल्ला जर क भस्म होय जायेंन; अऊर मोआब हल्ला अऊर ललकार, अऊर नरसिंगा को आवाज होतो-होतो मर जायेंन।
AMO 2:3 मय ओको बीच म सी शासक को नाश करूं, अऊर संगच संग ओको सब अधिकारी ख भी मार डालूं,” यहोवा को योच वचन आय।
AMO 2:4 यहोवा यो कह्य हय : “यहूदा प्रदेश को बार बार करयो हुयो अपराधों को वजह, मय ओकी सजा नहीं छोड़ूं; कहालीकि ओन यहोवा की व्यवस्था ख तुच्छ जान्यो, अऊर मोरो नियम ख नहीं मान्यो; अऊर अपनो झूठो देवतावों को वजह जेको पीछू उन्को पूर्वज चलत होतो, हि भी भटक गयो हंय।
AMO 2:5 येकोलायी मय यहूदा म आगी लगाऊं , अऊर ओको सी यरूशलेम नगर को किल्ला जर क भस्म होय जायेंन।”
AMO 2:6 यहोवा यो कह्य हय : “इस्राएल को तीन का, बल्की चार अपराधों को वजह, मय ओकी सजा नहीं छोड़ूं; कहालीकि ओन निर्दोष ख पैसा लायी अऊर गरीब ख एक जोड़ी जूतियों को दामों म बेच डाल्यो हंय।
AMO 2:7 हि कमजोर अऊर कंगालों को मुंड जमीन की धूल को समान कुचल देवय हय, अऊर नम्र लोगों ख रस्ता सी हटाय देवय हंय; अऊर बाप-बेटा दोयी एकच कुमारी को जवर जावय हंय, जेकोसी मोरो पवित्र नाम ख अपवित्र ठहराये।
AMO 2:8 हि हर एक वेदी को जवर गिरवी रख्यो कपड़ा पर सोवय हंय, अऊर जुर्माना को पैसा सी लियो हुयो अंगूरीरस अपनो देवता को मन्दिर म पी लेवय हय।
AMO 2:9 मय न उन्को आगु सी एमोरियों ख नाश करयो होतो, जेकी लम्बाई देवदार को झाड़ को जसी, अऊर जिन्की ताकत बांज झाड़ों को जसो होतो; तब भी मय न ऊपर सी ओको फर, अऊर खल्लो सी ओकी जड़ी नाश करी।
AMO 2:10 मय तुम्ख मिस्र देश सी निकाल लायो, अऊर निर्जन जागा म चालीस साल तक ले क फिरतो रह्यो, कि तुम एमोरियों को देश को अधिकारी होय जावो।
AMO 2:11 मय न तुम्हरो टुरावों म सी भविष्यवक्ता होन लायी अऊर तुम्हरो कुछ जवानों म सी नाज़ीर होन लायी ठहरायो। हे इस्राएलियों, का यो सब सच नहाय?” यहोवा की या वानी आय।
AMO 2:12 पर तुम न नाज़ीरों ख अंगूरीरस पिलायो, अऊर भविष्यवक्तावों ख आज्ञा दी कि भविष्यवानी मत करो।
AMO 2:13 देखो, मय तुम्ख असो दबाऊं, जसो अनाज गठ्ठावों सी भरी हुयी गाड़ी खल्लो दबायी जावय हय।
AMO 2:14 येकोलायी तेज दौड़नवालो ख भग जान की जागा नहीं मिलेंन, अऊर सामर्थी को सामर्थ कुछ काम नहीं देयेंन; अऊर नहीं पराक्रमी अपनो जीव बचाय सकेंन;
AMO 2:15 धनुर्धारी टिक नहीं सकेंन, अऊर फुर्ती सी दौड़नवालो नहीं बचेंन; सवार भी अपनो जीव नहीं बचाय सकेंन;
AMO 2:16 अऊर शूरवीरों म जो जादा धीर होना, ऊ भी ऊ दिन नंगो भग जायेंन, यहोवा यो कह्य हय।
AMO 3:1 हे इस्राएलियों, यो वचन सुनो जो यहोवा न तुम्हरो बारे म मतलब ऊ पूरो कुल को बारे म कह्यो हय जेख मय न मिस्र देश सी लायो हय:
AMO 3:2 “धरती को पूरो कुलों म सी मय न केवल तुम पर मन लगायो हय, यो वजह मय तुम्हरो पूरो अपराधों की सजा देऊं।
AMO 3:3 “यदि दोय आदमी पहले सी सहमत नहीं होयेंन; त का हि एक संग चल सकेंन?
AMO 3:4 का सिंह बिना शिकार पाये जंगल म गरजेंन? का जवान सिंह बिना कुछ पकड़े अपनो गुफा म सी गुर्रायेंन?
AMO 3:5 का चिड़िया बिना फन्दा लगायो फसेंन? का बिना कुछ फंसे फन्दा जमीन पर सी उचकेंन?
AMO 3:6 का कोयी नगर म नरसिंगा फूंकन पर लोग नहीं थरथरायेंन? का यहोवा को बिना भेज्यो कोयी नगर म कोयी विपत्ति पड़ेंन?
AMO 3:7 योच तरह सी प्रभु यहोवा अपनो दास भविष्यक्ताओं पर अपनो भेद बिना प्रगट करयो कुछ भी नहीं करेंन।
AMO 3:8 सिंह गरज्यो; कौन नहीं डरेंन? परमेश्वर यहोवा बोल्यो; कौन हय जो भविष्यवानी हय जो नहीं करेंन?”
AMO 3:9 अशदोद को किल्ला अऊर मिस्र देश को राजकिल्ला पर प्रचार कर क् कहो: “सामरिया को पहाड़ियों पर जमा होय क देखो कि ओको म का बड़ो हल्ला अऊर ओको बीच का अत्याचार को काम होय रह्यो हय!”
AMO 3:10 यहोवा यो कह्य हय, “जो लोग अपनो किल्लावों म उपद्रव अऊर लुट को धन जमा रखय हय, हि सीधो काम करनो जानयच नहाय।”
AMO 3:11 यो वजह परमेश्वर यहोवा यो कह्य हय: “देश ख घेरन वालो एक दुश्मन होयेंन, अऊर ऊ तोरी ताकत तोड़ेंन, अऊर तोरो किल्ला लूट्यो जायेंन।”
AMO 3:12 यहोवा यो कह्य हय : “जो तरह चरवाहा सिंह को मुंह सी दोय टांग यां कान को एक टुकड़ा छुड़ावय हय, वसोच इस्राएली लोग, जो सामरिया म बिस्तर को एक कोना यां रेशमी गद्दी पर बैठ्यो करय हय, हि भी छुड़ायो जायेंन।”
AMO 3:13 सेनावों को परमेश्वर, प्रभु यहोवा की या वानी आय, “देखो, अऊर याकूब को घराना को खिलाफ गवाही देवो:
AMO 3:14 जो समय मय इस्राएल ख ओको अपराधों की सजा देऊं, उच समय मय बेतेल की वेदियों ख भी सजा देऊं, अऊर वेदी को सींग टूट क जमीन पर गिर जायेंन।
AMO 3:15 मय जाड़ो को घर ख अऊर धूपकाल को घर, दोयी ख गिराऊं; अऊर हत्तीदांत को बन्यो घर भी नाश होयेंन, अऊर बड़ो बड़ो घर नाश होय जायेंन, यहोवा न यो कह्यो हय।
AMO 4:1 “ओ बाशान राज्य की धनवान गायों, ओ सामरिया पहाड़ी गायों, यो वचन सुनो, जो गरीबों पर अत्याचार करय, अऊर दरिद्रों ख कुचल डालय हय, अऊर अपनो अपनो पति सी कह्य हय, ‘लाव, दे हम पीबो!’
AMO 4:2 परमेश्वर यहोवा अपनो पवित्रता की कसम खाय क कह्य हंय, देखो, तुम पर असो दिन आवनवालो हंय, कि तुम काटावों सी, अऊर तुम्हरी सन्तान मच्छी पकड़न की गरी सी खींच लियो जायेंन।
AMO 4:3 तुम म सी हर एक शहरपनाह की दीवाल की फट सी होय क सीधी निकल जावों अऊर हर्म्मोन पहाड़ी म डाली जावो, यहोवा की याच वानी आय।
AMO 4:4 “बेतेल नगर म आय क अपराध करो, अऊर गिलगाल नगर म आय क बहुत सो अपराध करो; अपनो चढ़ावा पहेट ख, अऊर अपनो दशमांश हर तीसरो दिन ले आयो करो;
AMO 4:5 धन्यवाद की भेंट खमीर मिलाय क चढ़ावो, अऊर अपनी इच्छाबलियों की चर्चा चलाय क उन्को प्रचार करो; कहालीकि हे इस्राएलियों, असो करनो तुम्ख भावय हय,” परमेश्वर यहोवा की याच वानी आय।
AMO 4:6 “मय न त तुम्हरो सब नगरों म अकाल भेज्यो, अऊर तुम्हरो सब जागा म रोटी की कमी करी हय, तब भी तुम मोरो तरफ फिर क नहीं आयो,” यहोवा की याच वानी आय।
AMO 4:7 “जब कटनी को तीन महीना रह्य गयो, तब मय न तुम्हरो लायी बरसात नहीं करी; मय न एक नगर म पानी बरसायो दूसरो म नहीं बरसायो; एक खेत म पानी बरस्यो, अऊर दूसरो खेत जेको म नहीं बरस्यो, ऊ सूख गयो।
AMO 4:8 येकोलायी दोय तीन नगरों को लोग पानी पीवन ख मारे मारे फिरयो, पर तृप्त नहीं भयो; तब भी तुम मोरो तरफ नहीं फिरयो, यहोवा की याच वानी आय।
AMO 4:9 “मय न तुम्ख गर्मी अऊर गेरुए किड़ा सी मारयो हय; अऊर जब तुम्हरो बगीचा अऊर अंगूर की बाड़ियों, अऊर अंजीर अऊर जैतून को झाड़ बहुत भय गयो, तब फाफा उन्ख खाय गयी; तब भी तुम मोरो तरफ फिर क नहीं आयो, यहोवा की याच वानी आय
AMO 4:10 “मय न तुम्हरो बीच म मिस्र देश को जसी महामारी फैलायी; मय न तुम्हरो घोड़ा ख छिन क तुम्हरो जवानों ख तलवार सी मरवाय दियो; अऊर तुम्हरी छावनी की दुर्गन्ध तुम्हरो जवर पहुंचायो; तब भी तुम मोरो तरफ फिर क नहीं आयो, यहोवा की याच वानी आय।
AMO 4:11 “मय न तुम म सी कुछ एक ख असो उलट दियो, जसो परमेश्वर न सदोम अऊर अमोरा ख नाश कर दियो होतो, अऊर तुम आगी सी निकाली हुयी लकड़ी को जसो ठहरयो; तब भी तुम मोरो तरफ फिर क नहीं आयो, यहोवा की याच वानी आय।
AMO 4:12 “यो वजह, हे इस्राएल, मय तोरो सी असोच करूं, अऊर येकोलायी कि मय तोरो म यो काम करन पर हय, हे इस्राएल, अपनो परमेश्वर को सामने आवन लायी तैयार होय जा!”
AMO 4:13 देख, पहाड़ियों ख बनावन वालो अऊर हवा ख सिरजन वालो, अऊर मनुष्य ख ओको मन को बिचार बतावन वालो अऊर पहेट ख अन्धकार करन वालो, अऊर जो धरती को ऊंचो जागावों पर चलन वालो हय, ओकोच नाम सेनावों को परमेश्वर यहोवा आय!
AMO 5:1 हे इस्राएल को घराना, यो विलाप को गीत को वचन सुनो जो मय तुम्हरो बारे म कहू हय:
AMO 5:2 “इस्राएल कुमारी कन्या हय जो गिर गयी, अऊर फिर उठ नहीं सकेंन; वा अपनीच जमीन पर पटक दी गयी हय, अऊर ओको उठान वालो कोयी नहाय।”
AMO 5:3 कहालीकि परमेश्वर यहोवा यो कह्य हय: “जो नगर सी हजार सैनिक निकल्यो होतो, ओको म इस्राएल को घराना को सौ सैनिक बच्यो रहेंन, अऊर जेकोसी सौ निकलत होतो, ओको म दसच बच्यो रहेंन।”
AMO 5:4 यहोवा, इस्राएल को घराना सी यो कह्य हय: मोरी खोज करो, तब जिन्दो रहो।
AMO 5:5 बेतेल की खोज म मत लगो, नहीं गिलगाल म सिरो, अऊर नहीं बेर्शेबा ख जावो; कहालीकि गिलगाल निश्चय गुलामी म जायेंन, अऊर बेतेल सूनो पड़ेंन।
AMO 5:6 यहोवा की खोज करो, तब जिन्दो रहो, नहीं त ऊ यूसुफ को घराना पर आगी को जसो भड़केंन, अऊर वा ओख भस्म करेंन, अऊर बेतेल म कोयी ओको बुझावन वालो नहीं होयेंन।
AMO 5:7 हे न्याय ख कड़वाहट म बदलन वालो अऊर न्यायीपन ख माटी म मिलावन वालो लोग आय!
AMO 5:8 जो कृतिका अऊर मृगशिरा नक्षत्रों ख बनावन वालो आय, ऊ घनो अन्धकार ख पहेट को उजाड़ो बनावय हय,जो दिन ख अन्धारो कर क् रात बनाय देवय हय, अऊर समुन्दर को पानी जमीन को ऊपर बहाय देवय हय, ओको नाम यहोवा आय।
AMO 5:9 ऊ तुरतच बलवान को विनाश कर देवय, अऊर किल्ला को भी सत्यानाश करय हय।
AMO 5:10 ऊ न्याय-सभा म सच्चायी सी न्याय करय हय ओको सी हि नफरत रखय हंय, अऊर खरी बात बोलन वालो सी घृना करय हय।
AMO 5:11 तुम जो गरीबों ख लताड़य हय, अऊर भेंट कह्य क उन्को सी अनाज पर कर लादय हय, येकोलायी जो घर तुम न गोटावों को बनायो हंय, उन म रहनो नहीं पावों; अऊर जो मनभावनी अंगूर की बाड़ियां तुम न लगायी हंय, उन्को अंगूरीरस पी नहीं पावों।
AMO 5:12 कहालीकि मय जानु हय कि तुम्हरो अपराध भारी हय। तुम न्यायी ख सतावय अऊर घूस लेवय, अऊर न्याय-सभा म दरिद्रों को न्याय बिगाड़य हय।
AMO 5:13 यो वजह जो बुद्धिमान होना, ऊ असो समय चुप रहे, कहालीकि समय बुरो हय।
AMO 5:14 हे लोगों, बुरायी ख नहीं, भलायी ख ढूंढो, ताकि तुम जिन्दो रहो; सेनावों को प्रभु यहोवा सच म तुम्हरो संग हय, जसो तुम कह्य हय।
AMO 5:15 बुरायी सी नफरत अऊर भलायी सी प्रेम रखो, अऊर न्याय-सभा म न्याय ख स्थिर करो; का जाने सेनावों को परमेश्वर यहोवा यूसुफ को बच्यो हुयो पर अनुग्रह करे।
AMO 5:16 यो वजह सेनावों को परमेश्वर, प्रभु यहोवा यो कह्य हय: “सब चौक म रोनो होयेंन; अऊर सब सड़कों म लोग हाय, हाय, करेंन! हि किसानों ख शोक करन लायी, अऊर जो लोग विलाप करन म परिपूर्न हय, उन्ख रोवन लायी बुलायेंन;
AMO 5:17 अऊर सब अंगूर की बाड़ियों म रोनो होयेंन, कहालीकि यहोवा यो कह्य हय, मय तुम्हरो बीच म सी होय क जाऊं।
AMO 5:18 हाय तुम पर, जो यहोवा को दिन की इच्छा करय हय! यहोवा को दिन सी तुम्हरो का फायदा होयेंन? ऊ त उजाड़ो को नहीं, अन्धारो को दिन होयेंन।
AMO 5:19 जसो कोयी सिंह सी भगे अऊर ओख आसवल मिले; यां घर म आय क भीती पर हाथ टेके अऊर सांप ओख डसे।
AMO 5:20 का यो सच नोहोय कि यहोवा को दिन उजाड़ो को नहीं, बल्की अन्धियारोच को होयेंन? हव, असो घनो अन्धारो को जेको म कुछ भी चमक नहीं होना।
AMO 5:21 “मय तुम्हरो त्यौहारों सी नफरत रखू, अऊर उन्ख मय ठुकराऊ हय, अऊर तुम्हरी महासभावों सी मय खुश नहाय।
AMO 5:22 चाहे तुम मोरो लायी होमबलि अऊर अन्नबलि चढ़ावो, तब भी मय खुश नहीं होऊ, अऊर तुम्हरो पल्यो हुयो जनावरों को मेलबलियों को तरफ नजर नहीं डालूं।
AMO 5:23 अपनो गीतों को आवाज मोरो सी दूर करो; तुम्हरी सारंगियों को सुर मय नहीं सुनूं।
AMO 5:24 पर न्याय ख नदी को जसो, अऊर सच्चायी ख नदी की धारा को जसो बहन देवो।
AMO 5:25 “हे इस्राएल को घराना, तुम सुनसान जागा म चालीस साल तक पशुबलि अऊर अन्नबलि का मोखच चढ़ातो रह्यो?
AMO 5:26 तुम त अपनो राजा सक्कुत को तम्बू, अऊर अपनो मूर्तियों को चौरंग, अऊर अपनो केवान देवता को तारा लियो फिरत रह्यो।
AMO 5:27 यो वजह मय तुम्ख दमिश्क नगर को ओन पार गुलामी म कर देऊं, सेनावों को परमेश्वर यहोवा को योच वचन आय।
AMO 6:1 “हाय उन पर जो सिय्योन म सुख सी रह्य, अऊर उन पर जो सामरिया की पहाड़ी पर निश्चिन्त रह्य हय, हि जो श्रेष्ठ राज्य म प्रसिद्ध हंय, जेको जवर इस्राएल को घराना आवय हय!
AMO 6:2 कलने नगर ख जाय क देखो, अऊर उत सी हमात नाम को बड़ो नगर ख जावो; फिर पलिश्तियों को गत नगर ख जावो. का हि इन राज्यों सी अच्छो हंय? का उन्की सीमा तुम्हरी सीमा सी कुछ बड़ी हय?
AMO 6:3 तुम बुरो दिन ख दूर कर देवय, अऊर उपद्रव की गद्दी को जवर लावय हय।
AMO 6:4 “तुम हत्ती दांत को खटिया पर सोवय, अऊर अपनो अपनो बिस्तर पर पाय फैलाये सोवय हय, अऊर मेंढियों अऊर मोटो ताजो बछड़ा ख खावय हय।
AMO 6:5 तय सारंगी को संग गीत गावय, अऊर दाऊद को जसो नयो नयो बाजा को आवाज निकालय हय;
AMO 6:6 अऊर कटोरा म सी अंगूरीरस पीवय, अऊर अच्छो अच्छो तेल लगावय हय, पर यूसुफ पर आवन वाली विपत्ति को हाल सुन क शोकित नहीं होवय!
AMO 6:7 यो वजह हि अब गुलामी म पहले जायेंन, येकोलायी हि अपनो देश सी निकाल्यो जायेंन, अऊर जो पाय फैलाये सोवत होतो, उन्की विलासिता खतम होय जायेंन।”
AMO 6:8 परमेश्वर यहोवा न अपनीच कसम खाय क कह्यो हय: “जेको पर याकूब घमण्ड करय हय, ओको सी मय घृना, अऊर ओको राजगढ़ों सी दुश्मनी रखू हय; अऊर मय यो नगर ख ऊ सब समेत जो ओको म हय, दुश्मन को वश म कर देऊं।”
AMO 6:9 यदि कोयी घर म दस आदमी बच्यो रहेंन, तब भी हि मर जायेंन।
AMO 6:10 जब कोयी को काका, जो ओको जलावन वालो हय, ओकी हड्डियों ख घर सी निकालन लायी उठायेंन, अऊर जो घर को कोना म लूक्यो होना ओको सी पूछेंन, का तोरो जवर कोयी अऊर हय? तब ऊ कहेंन, “कोयी नहीं;” तब ऊ कहेंन, “चुप रह! हम्ख यहोवा को नाम नहीं लेनो चाहिये।”
AMO 6:11 कहालीकि यहोवा की आज्ञा सी बड़ो घर को तुकड़ा तुकड़ा होयेंन, अऊर छोटो घर म फट होयेंन।
AMO 6:12 का घोड़ा चट्टान पर दौड़े? का कोयी असो जागा म बईलों सी नांगर जोते जहां तुम लोगों न न्याय ख जहेर म, अऊर न्यायीपन को फल ख कड़वो फल म बदल डाल्यो हंय?
AMO 6:13 तुम असो चिज को वजह खुशी मनावय हय जो बेकार हय; अऊर कह्य हय, “हम अपनो बल सी करनईम नगर जीत्यो हय?”
AMO 6:14 यो वजह सेनावों को परमेश्वर यहोवा को वचन आय, “हे इस्राएल को घराना, देख, मय तुम्हरो खिलाफ एक असी राज्य खड़ो करूं, जो हमात की घाटी सी ले क अराबा की नदी तक तुम्ख तंग करेंन।”
AMO 7:1 परमेश्वर यहोवा न मोख यो दिखायो अऊर मय का देखू हय कि ओन पिछलो घास को उगन को सुरूवात म फाफा पैदा करयो; अऊर ऊ राजा की फसल कटनी को बाद की घास होती।
AMO 7:2 जब हि जमीन को पूरो घास खाय चुक्यो, तब मय न कह्यो, “हे परमेश्वर यहोवा, माफ कर! नहीं त याकूब कसो स्थिर रह सकेंन? ऊ कितनो कमजोर हय!”
AMO 7:3 येको बारे म यहोवा न अपनो मन बदल्यो, अऊर ओन कह्यो, “असी बात अब नहीं होयेंन।”
AMO 7:4 परमेश्वर यहोवा न मोख यो दिखायो अऊर का देखू हय कि परमेश्वर यहोवा न आगी को द्वारा न्याय करन लायी पुकारयो, अऊर वा आगी सी महासागर सूख गयो, अऊर जमीन भी भस्म होन लगी होती।
AMO 7:5 तब मय न कह्यो, हे परमेश्वर यहोवा, सजा देनो रोक दे! नहीं त याकूब कसो स्थिर रह सकेंन? ऊ कसो कमजोर हय।
AMO 7:6 येको बारे म भी यहोवा न अपनो मन बदल्यो; अऊर परमेश्वर यहोवा न कह्यो, “असी बात फिर नहीं होयेंन।”
AMO 7:7 ओन मोख यो भी दिखायो मय न देख्यो कि प्रभु गोला लगाय क बनायी हुयी कोयी दीवाल पर खड़ो हय, अऊर ओको हाथ म गोला आय।
AMO 7:8 यहोवा न मोरो सी कह्यो, “हे आमोस, तोख का दिख पड़य हय?” मय न कह्यो, “एक गोला।” तब परमेश्वर न कह्यो, “देख, मय अपनी प्रजा इस्राएल को बीच म गोला लगाऊं, अब मय उन्ख नहीं छोड़ूं।
AMO 7:9 इसहाक को ऊंची जागा उजाड़ देऊं, अऊर इस्राएल को पवित्र जागा खण्डर होय जायेंन, अऊर मय यारोबाम को घराना पर तलवार लियो हुयो चढ़ायी करूं।”
AMO 7:10 तब बेतेल को याजक अमस्याह न इस्राएल को राजा यारोबाम को जवर बुलावा भेज्यो, “आमोस न इस्राएल को घराना को बीच म तोरो सी षड़यन्त्र की योजना बनायी हय; ओको पूरो वचनों ख देश नहीं सह सकय।
AMO 7:11 कहालीकि आमोस यो कह्य हय, ‘यारोबाम तलवार सी मारयो जायेंन, अऊर इस्राएल को लोगों ख गुलामी बनाय क अपनो देश सी निकाल्यो जायेंन।’”
AMO 7:12 तब अमस्याह न आमोस सी कह्यो, हे दर्शन देखन वालो, यहां सी निकल क यहूदा देश म भग जा, अऊर वहांच रोटी खायो कर, अऊर वहांच भविष्यवानी कर;
AMO 7:13 पर बेतेल म फिर कभी भविष्यवानी मत कर, कहालीकि यो राजा को पवित्र जागा अऊर राज-गढ़ आय।
AMO 7:14 आमोस न उत्तर दे क अमस्याह सी कह्यो, मय नहीं त भविष्यवक्ता होतो, अऊर नहीं भविष्यवक्ता को टुरा; मय त जनावर चरावन वालो, अऊर उम्बर को झाड़ों को छांटन वालो होतो,
AMO 7:15 अऊर यहोवा न मोख मेंढी-शेरीयों को पीछू पीछु फिरन सी बुलाय क कह्यो, जा, मोरी प्रजा इस्राएल सी भविष्यवानी कर।
AMO 7:16 येकोलायी अब तय यहोवा को वचन सुन, तय कह्य हय, इस्राएल को खिलाफ भविष्यवानी मत कर; अऊर इसहाक को घराना को खिलाफ बार बार वचन मत सुनाव।
AMO 7:17 यो वजह यहोवा यो कह्य हय: “तोरी पत्नि नगर म वेश्या होय जायेंन, अऊर तोरो बेटा-बेटियां तलवार सी मारी जायेंन। अऊर तोरी जमीन दोरी सी माप क बांट लियो जायेंन, अऊर तय खुद अशुद्ध देश म मरजो। अऊर इस्राएल अपनो देश सी गुलाम बनाय क निकाल्यो जायेंन।”
AMO 8:1 परमेश्वर यहोवा न मोख यो दिखायो: कि धूपकाल को फरों सी भरी हुयी एक टोपली हय।
AMO 8:2 ओन कह्यो, “हे आमोस, तोख का दिखायी देवय हय?” मय न कह्यो, “धूपकाल को फरों सी भरी एक टोपली।” तब यहोवा न मोरो सी कह्यो, “मोरी प्रजा इस्राएल को अन्त आय गयो हय; मय अब ओख अऊर नहीं छोड़ूं।”
AMO 8:3 परमेश्वर यहोवा की वानी आय, “ऊ दिन मन्दिर को गीत हाहाकार म बदल जायेंन, अऊर लाशों को बड़ो ढेर लगेंन; अऊर सब जागावों म हि चुपचाप फेंक दियो जायेंन।”
AMO 8:4 यो सुनो, तुम जो पिड़ित ख रौंदनो अऊर देश को नम्र लोगों ख नाश करनो चाहवय हय,
AMO 8:5 जो कह्य हय, नयो चन्दा कब बीतेंन कि हम अनाज बेच सके? “आरामदिन कब बीतेंन, जेकोसी हम अपनो गेहूं बेचन ख लाय सकबो हम तराजू को बट ख असो बनाय देबो की लोगों ख ठगाय सके,
AMO 8:6 कि हम गरीबों ख पैसा दे क, अऊर दरिद्रों ख एक जोड़ी जूतियां की किम्मत दे क खरीद लेवय हय, अऊर तुम घुन लग्यो हुयो गहूं बेचय हय?”
AMO 8:7 यहोवा, याकूब को घमण्ड, उच अपनी कसम खाय क कह्य हय, मय तुम्हरो कोयी काम ख कभी नहीं भूलूं।
AMO 8:8 का यो वजह जमीन नहीं कापेंन? का उन पर को सब रहनवालो विलाप नहीं करेंन? यो देश सब को सब मिस्र की नील नदी को जसो होयेंन, जो उमड़य हय, अऊर घट जावय हय।
AMO 8:9 परमेश्वर यहोवा की या वानी आय, “ऊ समय मय सूरज ख दुपहर को समय डूबाय देऊं, अऊर यो देश ख दिन दहाड़े अन्धकार कर देऊं।
AMO 8:10 मय तुम्हरो त्यौहारों को उत्सव ख दूर कर क् विलाप कराऊं, अऊर तुम्हरो सब गीतों ख दूर कर क् विलाप को गीत गवाऊं; मय तुम सब की कमर म शोक को कपड़ा बान्धूं, अऊर तुम सब को मुन्ड ख मुंडाऊं, अऊर असो विलाप कराऊं जसो एकलौतो को लायी होवय हय, अऊर ओको अन्त कठिन दु:ख को दिन को जसो होयेंन।”
AMO 8:11 परमेश्वर यहोवा यो कह्य हय, देखो, असो दिन आय रह्यो हंय, जब मय यो देश म अकाल भेजूं; ओको म नहीं त रोटी को भूखो नहीं अऊर पानी को प्यासो नहीं, पर यहोवा को वचनों को भूखो होयेंन।
AMO 8:12 लोग यहोवा को वचन की खोज म समुन्दर सी दुसरो समुन्दर तक अऊर उत्तर सी पूर्व तक मारे मारे फिरेंन, पर ओख नहीं पायेंन।
AMO 8:13 “ऊ समय सुन्दर कुमारियां अऊर जवान आदमी दोयी प्यास को मारे मूर्झाय जायेंन।
AMO 8:14 जो लोग सामरिया को देवता की कसम, अऊर ‘दान को देवता की कसम, अऊर बेर्शेबा को पन्थ की कसम खावय हय,’ हि सब गिर पड़ेंन, अऊर फिर नहीं उठेंन।”
AMO 9:1 मय न प्रभु ख वेदी को ऊपर खड़ो देख्यो, अऊर ओन कह्यो खम्भा को सिरा पर मार जेकोसी डेहरी हले, अऊर उन्ख सब लोगों को मुंड पर गिराय क तुकड़ा तुकड़ा कर; अऊर जो नाश होन सी बच्यो, उन्ख मय तलवार सी मार डालूं; उन म सी एक भी नहीं भग सकेंन, अऊर जो अपनो ख बचाये, ऊ बच नहीं पायेंन।
AMO 9:2 कहालीकि चाहे हि गड्डा खोद क अधोलोक म उतर जाये, त वहां सी मय हाथ बढ़ाय क उन्ख लाऊं; चाहे हि आसमान पर चढ़ जाये, त वहां सी मय उन्ख उतार लाऊं।
AMO 9:3 चाहे हि कर्मेल पहाड़ी की सेंडी पर लूक जाये, पर वहां भी मय उन्ख ढूंढ-ढूंढ क पकड़ लेऊं, अऊर चाहे हि समुन्दर की गहरायी म मोरी नजर सी लूक जाये, वहां भी मय सांप ख उन्ख डसन की आज्ञा देऊं।
AMO 9:4 चाहे दुश्मन उन्ख देश सी निकाल क अपनो देश म ले जाये, वहां भी मय आज्ञा दे क तलवार सी उन्ख मार डालूं; अऊर मय उन पर भलायी करन लायी नहीं, बुरायीच करन लायी नजर करूं।
AMO 9:5 सेनावों को परमेश्वर यहोवा को छुवन सी धरती पिघलय हय, अऊर ओको पुरो रहनवालो विलाप करय हय; अऊर हि सब को सब मिस्र की नील नदी को जसो होय जावय हय, जो बढ़य हय, अऊर घट जावय हय।
AMO 9:6 जो आसमान म अपनो घर बनावय, अऊर अपनो आकाशमण्डल की नीव धरती पर डालय, अऊर आज्ञा कर क् समुन्दर को पानी धरती पर बहाय देवय हय, ओकोच नाम यहोवा आय।
AMO 9:7 हे इस्राएलियों, यहोवा यो कह्य हय, “का तुम मोरो लायी कूशियों को जसो नहाय? का मय इस्राएल ख मिस्र देश सी अऊर पलिश्तियों ख कप्तोर क्षेत्र सी नहीं निकाल लायो? अऊर सीरिया वासियों ख कीर क्षेत्र सी नहीं लायो।
AMO 9:8 देखो, प्रभु यहोवा की नजर यो पापमय राज्य पर लगी हय, अऊर मय येख धरती पर सी नाश करूं; तब भी मय पूरी रीति सी याकूब को घराना को नाश नहीं करूं,” यहोवा की याच वानी आय।
AMO 9:9 “मोरी आज्ञा सी इस्राएल को घराना सब राज्यों म असो चाल्यो जायेंन जसो अनाज चालनी म छान्यो जावय हय, पर ओको एक भी कंकड़ दाना जमीन पर नहीं गिरेंन।
AMO 9:10 मोरी प्रजा म को सब पापी जो कह्य हंय, वा विपत्ति हम पर नहीं पड़ेंन, अऊर नहीं हम्ख घेरेंन, हि सब तलवार सी मारयो जायेंन।”
AMO 9:11 “ऊ समय मय दाऊद की गिरी हुयी झोपड़ी ख खड़ो करूं, अऊर ओकी दीवाल की फट ख सुधारूं, अऊर ओको खण्डरों ख फिर बनाऊं, अऊर जसो ऊ पुरानो समय म होतो, ओख वसोच बनाय देऊं;
AMO 9:12 जेकोसी हि बच्यो हुयो एदोमियों ख बल्की सब राष्ट्रों ख जो मोरो कहलावय हंय, अपनो अधिकार म ले, यहोवा जो यो काम पूरो करय हय, ओकी याच वानी आय।”
AMO 9:13 यहोवा यो कह्य हय, “देखो, असो दिन आवय हंय, कि नांगर जोतन वालो काटन वालो ख अऊर अंगूर रौंदन वालो बीज बोवन वालो सी आगु निकल जायेंन; अऊर पहाड़ियों सी नयो अंगूरीरस टपकन लगेंन, अऊर सब पहाड़ियों सी बह निकलेंन।
AMO 9:14 मय अपनी प्रजा इस्राएल को बन्दियों ख लौटाय ले आऊं, अऊर हि उजड़्यो हुयो नगरों ख फिर सी बनाय क उन म बसेंन; हि अंगूर की बाड़ियां लगाय क अंगूरीरस पीयेंन, अऊर बगीचा लगाय क उन्को फर खायेंन।
AMO 9:15 मय उन्ख, उन्कीच जमीन म बोऊं, अऊर हि अपनी जमीन म सी जो मय न उन्ख दी हय, फिर कभी उखाड़्यो नहीं जायेंन,” तुम्हरो परमेश्वर यहोवा को योच वचन आय।
JON 1:1 परमेश्वर को वचन अमितै को टुरा योना सी कह्यो:
JON 1:2 “उठ क ऊ बड़ो नगर नीनवे ख जा, अऊर ओको खिलाफ प्रचार कर; कहालीकि ओकी बुरायी मोरो तक पहुंची हय।”
JON 1:3 पर योना परमेश्वर को जवर सी तर्शीश नगर ख भगन लायी उठ्यो, अऊर याफा बन्दरगाह ख जाय क तर्शीश जान वालो एक जहाज देख्यो; अऊर किराया दे क ओको अन्दर गयो की उन्को संग परमेश्वर को आगु सी तर्शीश ख चली जाये।
JON 1:4 तब परमेश्वर न समुन्दर म एक भयानक आन्धी चलायी, अऊर समुन्दर म बड़ो तुफान उठ्यो, असो लग रह्यो होतो कि जहाज टूट जायेंन।
JON 1:5 तब जहाज चलावन वालो लोग डर क अपनो अपनो परमेश्वर ख सुमरन लग्यो; अऊर जहाज म जो व्यापार को सामान होतो ओख समुन्दर म फेकन लग्यो कि जहाज हल्को होय जाये। पर योना जहाज को खल्लो को हिस्सा म उतर क सोय गयो होतो, अऊर गहरी नींद म पड़्यो होतो।
JON 1:6 तब जहाज को मुखिया ओको जवर आय क कहन लग्यो, “तय गहरी नींद म पड़्यो हुयो का कर रह्यो हय? उठ, अपनो देवता ख सुमर! सम्भव हय की परमेश्वर हमरी चिन्ता करेंन, अऊर हमरो नाश नहीं होयेंन।”
JON 1:7 तब उन्न आपस म कह्यो, “आवो, हम चिट्ठी डाल क जान लेबो की या विपत्ति हम पर कौन्को वजह सी आयी हय।” तब उन्न चिट्ठी डाली, अऊर चिट्ठी योना को नाम पर निकली।
JON 1:8 तब उन्न ओको सी कह्यो, “हम्ख बताव कि या विपत्ति हम पर कहाली आयी हय? तय का काम करय हय? तय कहां सी आयो हय? तय कौन्सो देश को अऊर कौन्सो लोगों म सी आयो हय?”
JON 1:9 योना न उन्को सी कह्यो, “मय इब्री आय; अऊर स्वर्ग को परमेश्वर यहोवा न समुन्दर अऊर जमीन दोयी ख बनायो हय, ओकोच डर मानु हय।”
JON 1:10 तब हि बहुत डर गयो, अऊर ओको सी कहन लग्यो, “तय न यो का करयो हय?” हि जान गयो कि ऊ परमेश्वर को आगु सी भग क आयो हय; कहालीकि की ओन खुदच उन्ख बताय दियो होतो।
JON 1:11 तब उन्न योना सी पुच्छ्यो, “हम तोरो संग का करबो जेकोसी समुन्दर शान्त होय जायेंन?” उच समय समुन्दर की लहर बढ़तच जात होती।
JON 1:12 ओन उन्को सी कह्यो, “मोख उठाय क समुन्दर म फेक देवो; तब समुन्दर शान्त होय जायेंन; कहालीकि की मय जानु हय, कि यो बड़ो तुफान तुम्हरो ऊपर मोरोच वजह सी आयो हय।”
JON 1:13 फिर भी हि बड़ो कोशिश सी चलावत रह्यो कि ओख किनारो पर लगाये, पर पहुंच नहीं सक्यो, कहालीकि की समुन्दर की लहर उन्को विरुद्ध बड़तच जात होती।
JON 1:14 तब उन्न परमेश्वर ख पुकार क कह्यो, “हे परमेश्वर, हम बिनती करजे हय, कि यो आदमी को जीव को बदला म हमरो नाश नहीं होय, अऊर नहीं हम्ख निर्दोष की हत्या को दोषी ठहराव; कहालीकि हे परमेश्वर, जो कुछ तोरी इच्छा होती उच तय न करयो हय।”
JON 1:15 तब उन्न योना ख उठाय क समुन्दर म फेक दियो; अऊर समुन्दर की भयानक लहर रुक गयी।
JON 1:16 तब उन आदमियों न परमेश्वर को बहुतच डर मान्यो, अऊर ओख बलि चड़ायो अऊर मन्नत मानी।
JON 1:17 परमेश्वर न एक बड़ी मच्छी ठहरायी होती की योना ख गिटक ले; अऊर योना वा बड़ी मच्छी को पेट म तीन दिन अऊर तीन रात पड़्यो रह्यो।
JON 2:1 तब योना न बड़ी मच्छी को पेट म सी अपनो परमेश्वर यहोवा सी प्रार्थना कर क् कह्यो,
JON 2:2 “मय संकट म पड़्यो हुयो परमेश्वर ख पुकारयो, अऊर ओन मोरी सुन ली हय; मय न मदत लायी अधोलोक को अन्दर सी पुकारयो, अऊर तय न मोरी सुन ली।
JON 2:3 तय न मोख गहरो समुन्दर की गहरायी तक डाल दियो; अऊर मय धारावों को बिचमच पड़्यो होतो, तोरी भड़कायी हुयी सब तरंगें अऊर लहर मोरो ऊपर सी बह गयी।
JON 2:4 तब मय न कह्यो, ‘मय तोरो आगु सी निकाल दियो गयो हय, फिर भी मय तोरो पवित्र मन्दिर ख कसो देखूं?’
JON 2:5 मय पानी सी यहां तक घिरयो हुयो होतो; की मोरो जीव निकल्यो जात होतो; गहरो समुन्दर मोरो चारयी तरफ होतो, अऊर मोरो मुंड म कायी लपट्यो हुयो होतो।
JON 2:6 मय पहाड़ी की जड़ तक पहुंच गयो होतो; मय हमेशा को लायी जमीन म बन्द भय गयो होतो; फिर भी हे मोरो परमेश्वर यहोवा, तय न मोरो जीव ख गड्डा म सी निकाल्यो हय।
JON 2:7 जब मोरो जीवन खतम होन वालो होतो, तब मय न परमेश्वर ख याद करयो; अऊर मोरी प्रार्थना तोरो जवर बल्की तोरो पवित्र मन्दिर म पहुंच गयी।
JON 2:8 जो लोग बेकार कि चिजों पर मन लगावय हय, हि अपनो अनुग्रह करन वालो परमेश्वर ख छोड़ देवय हय।
JON 2:9 पर मय धन्यवाद को गीत गाय क तोख बलिदान चढ़ाऊं; जो मन्नत मय न मानी, ओख पूरी करूं। उद्धार परमेश्वर सीच होवय हय!”
JON 2:10 तब परमेश्वर न बड़ी मच्छी ख आज्ञा दियो, अऊर ओन योना ख समुन्दर को किनार पर उगल दियो।
JON 3:1 तब परमेश्वर न दूसरी बार योना सी कह्यो:
JON 3:2 “उठ क ऊ बड़ो नगर नीनवे ख जा, अऊर जो बात मय तोरो सी कहूं, ओको प्रचार कर।”
JON 3:3 तब योना यहोवा को वचन को अनुसार नीनवे ख गयो। नीनवे एक बहुत बड़ो नगर होतो, ऊ तीन दिन की यात्रा को होतो,
JON 3:4 योना नगर म सिरयो एक दिन की यात्रा पूरी कर ली, अऊर यो प्रचार करतच गयो, “अब सी चालीस दिन बीतन पर नीनवे ख नाश कर दियो जायेंन।”
JON 3:5 तब नीनवे को आदमियों न परमेश्वर को वचन पर विश्वास करयो; अऊर उपवास को प्रचार करयो गयो अऊर छोटो सी ले क बड़ो तक सब लोग न दु:ख को कपड़ा पहिन्यो।
JON 3:6 तब यो समाचार नीनवे को राजा को कान म पहुंच्यो; अऊर ओन सिंहासन पर सी उठ क, अपनो राजकीय कपड़ा उतार क दु:ख को कपड़ा ओढ़ लियो, अऊर लाखड़ पर बैठ गयो।
JON 3:7 राजा न मुखियावों सी सलाह ले क नीनवे म या आज्ञा को ढिंढोरा पिटवायो : “का आदमी, का गाय-बईल, का मेंढी-शेरी, यां अऊर कोयी पशु, कोयी कुछ भी नहीं खाये अऊर नहीं पानी पीये।
JON 3:8 मनुष्य अऊर पशु दोयी दु:ख को कपड़ा ओढ़ेंन, अऊर हि रोय रोय क परमेश्वर सी प्रार्थना करे; अऊर अपनो बुरो मार्ग सी फिरे; अऊर ऊ उपद्रव सी, जो हि करय हय, ओख छोड़ दे।
JON 3:9 सम्भव हय, परमेश्वर दया करे अऊर अपनी मर्जी बदल दे, अऊर ओको भड़क्यो हुयो क्रोध शान्त होय जायेंन अऊर हम नाश होन सी बच जाये।”
JON 3:10 जब परमेश्वर न उन्को आचरन ख देख्यो, कि हि बुरो रस्ता सी फिर रह्यो हय, तब परमेश्वर न अपनी इच्छा बदल दियो, अऊर उन्की जो हानि करन कि ठानी होती, ओख नहीं करयो।
JON 4:1 या बात योना ख बहुतच बुरी लगी, अऊर ओको गुस्सा भड़क्यो।
JON 4:2 अऊर योना न यहोवा सी यो कह्य क प्रार्थना करी, “हे परमेश्वर, जब मय अपनो देश म होतो, तब का मय याच बात नहीं कहत होतो? योच वजह सी मय न तोरी आज्ञा सुनतच तर्शीश ख भगन लायी फुर्ती करी; कहालीकि मय जानत होतो कि तय अनुग्रहकारी अऊर दयालु परमेश्वर आय, अऊर विलम्ब सी कोप करन वालो दयालु हय, अऊर दु:ख देन सी खुश नहीं होवय।
JON 4:3 येकोलायी अब हे यहोवा, मोरो जीव ले ले; कहालीकि मोरो लायी जीन्दो रहन सी मरनोच भलो हय।”
JON 4:4 यहोवा न कह्यो, “तोरो जो गुस्सा भड़क्यो हय, का यो उचित हय?”
JON 4:5 येको पर योना ऊ नगर सी निकल क, ओको पूर्व तरफ बैठ गयो; अऊर वहांच एक छप्पर बनाय क ओकी छाव म बैठ्यो हुयो यो देखन लग्यो कि यो नगर को का होयेंन?
JON 4:6 तब यहोवा परमेश्वर न एक एरंडी को झाड़ उगाय क असो बढ़ायो की योना को मुंड पर सांवली होय, जेको म ओको दु:ख दूर हो। योना ऊ एरंडी को झाड़ को वजह सी बहुतच खुश भयो।
JON 4:7 भुन्सारो जब उजाड़ो होन लग्यो, तब परमेश्वर न एक कीड़ा ख भेज्यो, जेन एरंडी को झाड़ असो काट्यो की ऊ सुख गयो।
JON 4:8 जब सूरज निकल्यो, तब परमेश्वर न पुरवायी बहाय क लू चलायी, अऊर तपन योना को मुंड पर असी लगी कि ऊ चकरावन लग्यो; अऊर ओन यो कह्य क मौत मांगी, “मोरो लायी जीन्दो रहन सी मरनोच अच्छो हय।”
JON 4:9 परमेश्वर न योना सी कह्यो, “तोरो गुस्सा, जो एरंडी को झाड़ को वजह सी भड़क्यो हय, का ऊ उचित हय?” ओन कह्यो, “हां, मोरो जो गुस्सा भड़क्यो हय, ओको सी मोरो जीव गयो त भी ऊ अच्छो हय।”
JON 4:10 तब परमेश्वर न कह्यो, “जो एरंडी को झाड़ को लायी तय न कुछ मेहनत नहीं करयो नहीं ओख बढ़ायो, जो एकच रात म भयो, अऊर एकच रात म नाश भी भयो; ओको लायी तय चिन्तित कहाली हय।
JON 4:11 फिर यो बड़ो नगर नीनवे, जेको म एक लाख बीस हजार सी जादा मनुष्य हय। जो अपनो दायो बायो हाथ को भेद नहीं पहिचानय, अऊर जादा घरेलू जनावर भी ओको म रह्य हय, त का मय ओको पर मय चिन्ता नहीं करू?”
MAT 1:1 अब्राहम की सन्तान, दाऊद की सन्तान, अऊर यीशु मसीह की लिखित वंशावली।
MAT 1:2 अब्राहम सी इसहाक पैदा भयो, इसहाक सी याकूब, याकूब सी यहूदा अऊर ओको भाऊ पैदा भयो,
MAT 1:3 यहूदा अऊर तामार सी फिरिस अऊर जोरह पैदा भयो, फिरिस सी हिस्रोन, अऊर हिस्रोन सी एराम,
MAT 1:4 एराम सी अम्मीनादाब, अम्मीनादाब सी नहशोन, अऊर नहशोन सी सलमोन,
MAT 1:5 सलमोन अऊर राहब सी बोअज, बोअज अऊर रूत सी ओबेद, अऊर ओबेद सी यिशै,
MAT 1:6 अऊर यिशै सी दाऊद राजा। अऊर दाऊद सी सुलैमान वा बाई सी पैदा भयो जो पहिले उरिय्याह की पत्नी होती,
MAT 1:7 सुलैमान सी रहबाम पैदा भयो, रहबाम सी अबिय्याह, अऊर अबिय्याह सी आसा,
MAT 1:8 आसा सी यहोशाफात, यहोशाफात सी योराम, अऊर योराम सी उज्जियाह पैदा भयो,
MAT 1:9 अऊर उज्जियाह सी योताम, योताम सी आहाज, अऊर आहाज सी हिजकिय्याह,
MAT 1:10 हिजकिय्याह सी मनश्शिह, मनश्शिह सी आमोन, अऊर आमोन सी योशिय्याह पैदा भयो,
MAT 1:11 अऊर बन्दी होय क बेबीलोन जान को समय म योशिय्याह सी यकुन्याह, अऊर ओको भाऊ पैदा भयो।
MAT 1:12 बन्दी बेबीलोन पहुंचाय जान को बाद यकुन्याह सी शालतिएल पैदा भयो, अऊर शालतिएल सी जरुब्बाबिल,
MAT 1:13 अऊर जरुब्बाबिल सी अबीहूद, अबीहूद सी इल्याकीम, अऊर इल्याकीम सी अजोर,
MAT 1:14 अऊर अजोर सी सदोक, सदोक सी अखीम, अऊर अखीम सी इलीहूद,
MAT 1:15 इलीहूद सी इलियाजार, इलियाजार सी मत्तान, अऊर मत्तान सी याकूब,
MAT 1:16 याकूब सी यूसुफ पैदा भयो, जो मरियम को पति होतो, अऊर मरियम सी यीशु पैदा भयो, जो मसीह कहलावय हय।
MAT 1:17 यो तरह अब्राहम सी दाऊद तक चौदा पीढ़ी भयी, अऊर दाऊद को समय सी बेबीलोन ख बन्दी होय क पहुंचायो जानो तक चौदा पीढ़ी भयी, अऊर बन्दी होय क बेबीलोन ख पहुंचायो जानो को समय सी मसीह तक चौदा पीढ़ी भयी।
MAT 1:18 यीशु मसीह को जनम यो तरह सी भयो, कि जब ओकी माय मरियम की मंगनी यूसुफ को संग भय गयी, त उन्को एक तन होन सी पहिलेच वा पवित्र आत्मा को तरफ सी गर्भवती पायी गयी।
MAT 1:19 येकोलायी ओको पति यूसुफ न जो सच्चो होन को वजह ओख बदनाम नहीं करन की इच्छा सी चुपचाप सी ओख छोड़ देन को बिचार करयो।
MAT 1:20 जब ऊ यो बातों ख सोच रह्यो होतो त प्रभु को स्वर्गदूत ओख सपनो म दिखायी दे क कहन लग्यो, “हे यूसुफ! दाऊद की सन्तान, तय मरियम ख अपनी पत्नी बनानो सी मत डर, कहालीकि जो ओको गर्भ म हय, ऊ पवित्र आत्मा को तरफ सी हय।
MAT 1:21 वा बेटा ख जनम देयेंन अऊर तय ओको नाम यीशु रखजो, कहालीकि ऊ अपनो लोगों ख उन्को पापों सी बचायेंन।”
MAT 1:22 यो पूरो येकोलायी भयो कि जो वचन प्रभु न भविष्यवक्ता को द्वारा कह्यो होतो, ऊ पूरो हो:
MAT 1:23 “देखो, एक कुंवारी गर्भवती होयेंन अऊर एक बेटा ख जनम देयेंन, अऊर ओको नाम इम्मानुएल रख्यो जायेंन,” जेको मतलब हय “परमेश्वर हमरो संग।”
MAT 1:24 तब यूसुफ नींद सी जाग क प्रभु को स्वर्गदूत को आज्ञानुसार ओख अपनो घर बिहाव कर क् लायो;
MAT 1:25 अऊर मरियम को जवर तब तक नहीं गयो जब तक ओन बेटा ख जनम नहीं दियो। अऊर यूसुफ न ओको नाम यीशु रख्यो।
MAT 2:1 हेरोदेस राजा को दिनो म जब यहूदिया प्रदेश को बैतलहम गांव म यीशु को जनम भयो, त पूर्व दिशा सी कुछ जोतिषी यरूशलेम म आय क पूछन लग्यो,
MAT 2:2 “यहूदियों को राजा जेको जनम भयो हय, कित हय? कहालीकि हम्न पूर्व दिशा म ओको तारा देख्यो हय अऊर ओख दण्डवत प्रनाम करन आयो हंय।”
MAT 2:3 राजा हेरोदेस न यो सुन्यो त ऊ अऊर ओको संग पूरो यरूशलेम घबराय गयो।
MAT 2:4 तब ओन लोगों को पूरो मुख्य याजकों अऊर धर्मशास्त्रियों ख जमा कर क् उन्को सी पुच्छ्यो, “मसीह को जनम कित होनो चाहिये?”
MAT 2:5 उन्न ओको सी कह्यो, “यहूदिया प्रदेश को बैतलहम गांव म, कहालीकि भविष्यवक्ता को द्वारा असो लिख्यो गयो हय:
MAT 2:6 “हे बैतलहम गांव, तय जो यहूदा को प्रदेश म हय, तय यहूदा को अधिकारियों म कोयी सी छोटो नहाय, कहालीकि तोरो म सी एक शासक निकलेंन जो मोरी प्रजा इस्राएल को रखवाली करेंन।”
MAT 2:7 तब हेरोदेस न जोतिषियों ख चुपचाप सी बुलाय क उन्को सी पुच्छ्यो कि तारा ठीक कौन्सो समय दिखायी दियो होतो,
MAT 2:8 अऊर यो कह्य क उन्ख बैतलहम भेज्यो, “जावो, ऊ बालक को बारे म ठीक-ठीक मालूम करो, अऊर जब ऊ मिल जायेंन त मोख खबर देवो ताकि मय भी आय क ओख प्रनाम करूं।”
MAT 2:9 हि राजा की बात सुन क चली गयो, अऊर जो उच तारा उन्न पूर्व दिशा म देख्यो होतो ऊ उन्को आगु आगु चलन लग्यो; अऊर जित बच्चा होतो, ऊ जागा को ऊपर पहुंच क रूक गयो।
MAT 2:10 ऊ तारा ख देख क हि बहुत खुश भयो।
MAT 2:11 जोतिषियों न ऊ घर म जाय क ऊ बच्चा ख ओकी माय मरियम को संग देख्यो, अऊर झुक क बच्चा ख नमस्कार करयो, अऊर अपनो-अपनो झोली खोल क ओख सोना, लुबान, अऊर गन्धरस की भेंट चढ़ायो।
MAT 2:12 तब सपनो म परमेश्वर सी या चेतावनी पा क कि राजा हेरोदेस को जवर फिर नहीं लौटजो, हि दूसरी रस्ता सी अपनो देश ख चली गयो।
MAT 2:13 जब हि चली गयो त, प्रभु को एक दूत न सपनो म यूसुफ ख दिखायी दे क कह्यो, “उठ, ऊ बच्चा ख अऊर ओकी माय ख ले क मिस्र देश ख निकल जा; अऊर जब तक मय तोरो सी नहीं कहूं, तब तक उतच रहजो; कहालीकि हेरोदेस राजा यो बच्चा ख ढूंढन पर हय कि ओख मरवाय डाले।”
MAT 2:14 तब ऊ रात मच उठ क बच्चा अऊर ओकी माय ख ले क मिस्र ख चली गयो,
MAT 2:15 अऊर हेरोदेस को मरन तक उतच रह्यो। येकोलायी कि ऊ वचन जो प्रभु न भविष्यवक्ता को द्वारा कह्यो होतो पूरो भयो: “मय न अपनो बेटा ख मिस्र सी बुलायो।”
MAT 2:16 जब हेरोदेस न यो देख्यो, कि जोतिषियों न ओको संग धोका करयो हय, तब ऊ गुस्सा सी भर गयो, अऊर लोगों ख भेज क जोतिषियों सी ठीक-ठीक बतायो गयो समय को अनुसार बैतलहम अऊर ओको आजु-बाजू की जागा को सब बच्चां ख जो दोय साल को यां ओको सी छोटो होतो, मरवाय डाल्यो।
MAT 2:17 तब जो वचन यिर्मयाह भविष्यवक्ता को द्वारा कह्यो गयो होतो, ऊ पूरो भयो:
MAT 2:18 “रामाह गांव म एक दु:ख भरी आवाज सुनायी दियो, रोवनो अऊर बड़ो विलाप; राहेल अपनो बच्चां लायी रोवत होती, अऊर चुप होनो नहीं चाहत होती, कहालीकि ओको त पूरो बच्चां मर गयो होतो।”
MAT 2:19 हेरोदेस को मरन को बाद, प्रभु को दूत न मिस्र म यूसुफ ख सपनो म दर्शन दे क कह्यो,
MAT 2:20 “उठ, बच्चा अऊर ओकी माय ख ले क इस्राएल को देश म चली जा, कहालीकि जो बच्चा को जीव लेनो चाहावत होतो, हि मर गयो हंय।”
MAT 2:21 ऊ उठ्यो, अऊर बच्चा अऊर ओकी माय ख संग ले क इस्राएल को देश म आयो।
MAT 2:22 पर यो सुन क कि अरखिलाउस अपनो बाप हेरोदेस की जागा पर यहूदिया पर राज्य कर रह्यो हय, उत जानो सी डरयो। फिर सपनो म परमेश्वर सी सुचना पा क गलील प्रदेश म चली गयो,
MAT 2:23 अऊर नासरत नाम को एक नगर म जाय बसयो, ताकि ऊ वचन पूरो होय, जो भविष्यवक्तावों सी कह्यो गयो होतो : “ऊ नासरी कहलायेंन।”
MAT 3:1 उन दिनो म यूहन्ना बपतिस्मा देन वालो यहूदिया को सुनसान जागा म आय क यो प्रचार करन लग्यो:
MAT 3:2 “पापों सी मन फिरावो, कहालीकि स्वर्ग को राज्य जवर आय गयो हय।”
MAT 3:3 यो उच आय जेकी चर्चा यशायाह भविष्यवक्ता को द्वारा करी गयी: “जंगल म एक पुकारन वालो को आवाज होय रह्यो हय, कि प्रभु को रस्ता तैयार करो, अऊर ओकी सड़के सीधी करो।”
MAT 3:4 यूहन्ना ऊंट को बाल को कपड़ा पहिन्यो होतो अऊर कमर म चमड़ा को पट्टा बान्ध्यो हुयो होतो। ओको जेवन टिड्डियां अऊर जंगली शहेद होतो।
MAT 3:5 तब यरूशलेम, अऊर पूरो यहूदिया क्षेत्र, अऊर यरदन को आजु-बाजू को गांव म रहन वालो सब लोग निकल क ओको जवर आयो,
MAT 3:6 उन्न अपनो अपनो पापों को पश्चाताप कर क् यरदन नदी म ओको सी बपतिस्मा लियो।
MAT 3:7 पर जब ओन अपनो जवर बहुत सो फरीसियों अऊर सदूकियों ख बपतिस्मा लेन लायी आवतो देख्यो, त ओन कह्यो, “हे सांप को पिल्ला, तुम्ख कौन न जताय दियो कि आवन वालो गुस्सा सी भगो?
MAT 3:8 येकोलायी पापों सी मन फिराव की लायक फर लावो;
MAT 3:9 अऊर अपनो अपनो मन म यो मत सोचो कि हमरो बाप अब्राहम आय; कहालीकि मय तुम सी सच कहू हय कि परमेश्वर इन गोटा सी अब्राहम लायी सन्तान पैदा कर सकय हय।”
MAT 3:10 टंग्या झाड़ों की जड़ी पर रखी हुयी हय, येकोलायी जो जो झाड़ अच्छो फर नहीं लावय, ऊ काट्यो अऊर आगी म झोक्यो जावय हय।
MAT 3:11 “मय त पानी सी तुम्ख मन फिराव को बपतिस्मा देऊ हय; पर जो मोरो बाद आवन वालो हय; ऊ मोरो सी ताकतवर हय; कि मय ओको पाय कि चप्पल उठावन को लायक नहाय। ऊ तुम्ख पवित्र आत्मा अऊर आगी सी बपतिस्मा देयेंन।
MAT 3:12 ओको सूपा ओको हाथ म हय, अऊर ऊ अपनो खरियान अच्छो तरह सी साफ करेंन, अऊर अपनो गहूं ख त ढोला म जमा करेंन, पर भूसा ख ऊ आगी म जलायेंन जो बुझन की नहीं।”
MAT 3:13 ऊ समय यीशु गलील प्रदेश सी यरदन नदी को किनार पर यूहन्ना को जवर ओको सी बपतिस्मा लेन आयो।
MAT 3:14 पर यूहन्ना यो कह्य क ओख रोकन लग्यो, “मोख त तोरो हाथ सी बपतिस्मा लेन कि जरूरत हय, अऊर तय मोरो जवर आयो हय?”
MAT 3:15 पर यीशु न ओख यो उत्तर दियो, “अब त असोच होन दे, कहालीकि हम्ख यो रीति सी सब सच्चायी ख पूरो करनो ठीक हय।” तब ओन ओकी बात मान ली।
MAT 3:16 अऊर यीशु बपतिस्मा ले क तुरतच पानी सी ऊपर आयो, अऊर उच समय ओको लायी स्वर्ग खुल गयो, अऊर ओन परमेश्वर को आत्मा ख कबूत्तर को जसो उतरतो अऊर अपनो ऊपर आवतो देख्यो।
MAT 3:17 अऊर, स्वर्ग सी या आकाशवानी भयी: “यो मोरो प्रिय बेटा आय, जेकोसी मय बहुत सन्तुष्ट हय।”
MAT 4:1 तब आत्मा यीशु ख सुनसान जागा म ले गयो ताकि शैतान सी ओकी परीक्षा हो।
MAT 4:2 जब ऊ चालीस दिन अऊर चालीस रात उपवास कर लियो, तब ओख बहुत भूख लगी।
MAT 4:3 तब शैतान न जवर आय क ओको सी कह्यो, “यदि तय परमेश्वर को बेटा आय, त कह्य दे, कि यो गोटा रोटी बन जाये।”
MAT 4:4 यीशु न उत्तर दियो: “यो शास्त्र म लिख्यो हय, ‘आदमी केवल रोटीच सी नहीं, पर हर एक वचन सी जो परमेश्वर को मुंह सी निकलय हय, जीन्दो रहेंन।’”
MAT 4:5 तब शैतान ओख पवित्र नगर यरूशलेम म ले गयो अऊर मन्दिर को ऊचाई पर खड़ो करयो,
MAT 4:6 अऊर ओको सी कह्यो, “यदि तय परमेश्वर को बेटा आय, त अपनो आप ख खल्लो गिराय दे; कहालीकि शास्त्र म लिख्यो हय; ‘ऊ तोरो बारे म अपनो स्वर्गदूतों ख आज्ञा देयेंन, अऊर हि तोख हाथों-हाथ उठाय लेयेंन; कहीं असो नहीं होय कि तोरो पाय म गोटा सी ठेस लग जाये।’”
MAT 4:7 यीशु न ओको सी कह्यो, “नियम शास्त्र म यो भी लिख्यो हय: ‘तय प्रभु अपनो परमेश्वर की परीक्षा नहीं करजो।’”
MAT 4:8 तब शैतान ओख एक बहुत ऊचो पहाड़ी पर ले गयो अऊर सारो जगत को राज्य अऊर ओको वैभव दिखाय क
MAT 4:9 ओको सी कह्यो, “यदि तय झुक क मोख दण्डवत प्रनाम करजो, त मय यो सब कुछ तोख दे देऊं।”
MAT 4:10 तब यीशु न ओको सी कह्यो, “हे शैतान दूर होय जा, कहालीकि शास्त्र म लिख्यो हय: ‘तय प्रभु अपनो परमेश्वर ख प्रनाम कर, अऊर केवल ओकीच सेवा कर।’”
MAT 4:11 तब शैतान ओको जवर सी चली गयो, अऊर देखो, स्वर्गदूत आय क ओकी सेवा करन लग्यो।
MAT 4:12 जब यीशु न यो सुन्यो कि यूहन्ना बन्दी बनाय लियो गयो हय, त ऊ गलील ख चली गयो।
MAT 4:13 अऊर ऊ नासरत नगर ख छोड़ क कफरनहूम नगर म, जो झील को किनार जबूलून अऊर नप्ताली को देश म हय, जाय क रहन लग्यो;
MAT 4:14 ताकि जो यशायाह भविष्यवक्ता को द्वारा कह्यो गयो होतो, ऊ पूरो हो:
MAT 4:15 झील को रस्ता सी “जबूलून अऊर नप्ताली को देश, यरदन को पार, गैरयहूदियों को गलील
MAT 4:16 जो लोग अन्धारो म बैठ्यो होतो, उन्न बड़ी ज्योति देखी; अऊर जो मृत्यु को देश म बैठ्यो होतो, उन पर ज्योति चमकी।”
MAT 4:17 ऊ समय सी यीशु न प्रचार करनो अऊर यो कहनो सुरू करयो, “पापों सी मन फिरावो कहालीकि स्वर्ग को राज्य जवर आय गयो हय।”
MAT 4:18 गलील की झील को किनार फिरतो हुयो यीशु न दोय भाऊवों यानेकि शिमोन ख जो पतरस कहलावय हय, अऊर ओको भाऊ अन्द्रियास ख झील म जार डालतो हुयो देख्यो; कहालीकि हि मछवारा होतो।
MAT 4:19 यीशु न उन सी कह्यो, “मोरो पीछू चली आवो, त मय तुम्ख लोगों ख परमेश्वर को राज्य म लावन लायी सिखाऊं।”
MAT 4:20 हि तुरतच जार ख छोड़ क ओको पीछू भय गयो।
MAT 4:21 उत सी आगु जाय क, यीशु न अऊर दोय भाऊवों ख यानेकि जब्दी को बेटा याकूब अऊर ओको भाऊ यूहन्ना ख देख्यो। हि अपनो बाप जब्दी को संग डोंगा पर अपनो जारो ख सुधारत होतो। ओन उन्ख भी बुलायो।
MAT 4:22 हि तुरतच डोंगा अऊर अपनो बाप ख छोड़ क ओको पीछू भय गयो।
MAT 4:23 यीशु पूरो गलील म फिरतो हुयो उन्को यहूदियों को सभागृह म शिक्षा करतो, अऊर राज्य को सुसमाचार प्रचार करतो, अऊर लोगों की हर तरह की बीमारियों को चंगो करयो अऊर कमजोरी ख दूर करयो।
MAT 4:24 अऊर पूरो सीरिया देश म ओको यश फैल गयो; अऊर लोग सब बीमारों ख जो अलग अलग तरह की बीमारियों अऊर दु:खों म जकड़्यो हुयो होतो, अऊर जेको म दुष्ट आत्मायें होती, अऊर मिर्गी वालो अऊर लकवा को रोगियों ख, ओको जवर लायो अऊर ओन पूरो ख चंगो करयो।
MAT 4:25 गलील अऊर दिकापुलिस, यरूशलेम, यहूदिया, अऊर यरदन नदी को ओन पार सी भीड़ की भीड़ ओको पीछू चली गयी।
MAT 5:1 ऊ यो भीड़ ख देख क पहाड़ी पर चढ़ गयो, अऊर जब बैठ गयो त ओको चेलां ओको जवर आयो।
MAT 5:2 अऊर ऊ अपनो मुंह खोल क उन्ख यो उपदेश देन लग्यो।
MAT 5:3 “धन्य हंय हि, जो मन को नरम हय, कहालीकि स्वर्ग को राज्य उन्कोच हय।”
MAT 5:4 “धन्य हंय हि, जो शोक करय हय, कहालीकि हि समाधान पायेंन।”
MAT 5:5 “धन्य हंय हि, जो नम्र हंय, कहालीकि हि धरती को वारीसदार होयेंन।”
MAT 5:6 “धन्य हंय हि, जो सच्चायी को भूखो अऊर प्यासो हंय, कहालीकि हि सन्तुष्ट करयो जायेंन।”
MAT 5:7 “धन्य हंय हि, जो दयालु हंय, कहालीकि उन पर दया करयो जायेंन।”
MAT 5:8 “धन्य हंय हि, जिन को मन शुद्ध हंय, कहालीकि हि परमेश्वर ख देखेंन।”
MAT 5:9 “धन्य हंय हि, जो मिलाप करावन वालो हंय, कहालीकि हि परमेश्वर को बच्चां कहलायेंन।”
MAT 5:10 “धन्य हंय हि, जो सच्चायी को वजह सतायो जावय हंय, कहालीकि स्वर्ग को राज्य उन्कोच आय।”
MAT 5:11 “धन्य हय तुम, जब आदमी मोरो वजह तुम्हरी निन्दा करेंन, अऊर सतायो अऊर झूठ बोल बोल क तुम्हरो विरोध म सब तरह की बुरी बात कहेंन।
MAT 5:12 तब खुश अऊर मगन होजो, कहालीकि तुम्हरो लायी स्वर्ग म बड़ो प्रतिफल हय। येकोलायी कि उन्न उन भविष्यवक्तावों ख जो तुम सी पहिलो होतो योच रीति सी सतायो होतो।”
MAT 5:13 “तुम धरती को नमक आय; पर यदि नमक को स्वाद बिगड़ जायेंन, त ऊ फिर कौन्सी चिज सी नमकीन करयो जायेंन? तब ऊ कोयी काम को नहाय, केवल येको कि बाहेर फेक्यो जाये अऊर लोगों को पाय को खल्लो खुंद्यो जाये।”
MAT 5:14 “तुम जगत की ज्योति आय। जो नगर पहाड़ी पर बस्यो हुयो हय ऊ लुक नहीं सकय।
MAT 5:15 अऊर लोग दीया जलाय क बर्तन को खल्लो नहीं पर दीवाल पर प्रकाश देन की जागा पर रखय हंय, तब ओको सी घर को सब लोगों ख प्रकाश पहुंचय हय।
MAT 5:16 उच तरह तुम्हरो प्रकाश लोगों को आगु चमके कि हि तुम्हरो भलायी को कामों ख देख क तुम्हरो बाप की, जो स्वर्ग म हय, बड़ायी करे।”
MAT 5:17 “यो मत समझो, कि मय व्यवस्था यां भविष्यवक्तावों की किताबों ख खतम करन लायी आयो हय, खतम करन लायी नहीं, पर पूरो करन आयो हय।
MAT 5:18 कहालीकि मय तुम सी सच कहूं हय, कि जब तक आसमान अऊर धरती टल नहीं जाये, तब तक व्यवस्था सी एक मात्रा यां बिन्दु भी बिना पूरो हुयो नहीं टलेंन।
MAT 5:19 येकोलायी जो कोयी इन छोटी सी छोटी आज्ञावों म सी कोयी एक ख तोड़े, अऊर वसोच लोगों ख सिखायेंन, ऊ स्वर्ग को राज्य म सब सी छोटो कहलायेंन; पर जो कोयी उन आज्ञावों को पालन करेंन अऊर उन्ख सिखायेंन, उच स्वर्ग को राज्य म महान कहलायेंन।
MAT 5:20 कहालीकि मय तुम सी कहूं हय, कि यदि तुम्हरी सच्चायी धर्मशास्त्रियों अऊर फरीसियों की सच्चायी सी बढ़ क नहाय, त तुम स्वर्ग को राज्य म कभी सिरनो नहीं पावों।”
MAT 5:21 “तुम्न सुन लियो हय, कि पूर्वजों सी कह्यो गयो होतो कि ‘हत्या नहीं करनो,’ अऊर जो कोयी हत्या करेंन ऊ कचहरी म सजा को लायक जायेंन।
MAT 5:22 पर मय तुम सी यो कहूं हय, कि जो कोयी अपनो भाऊ पर गुस्सा करेंन, ऊ कचहरी म सजा को लायक होयेंन, अऊर जो कोयी अपनो भाऊ ख निकम्मा कहेंन ऊ महासभा म सजा को लायक होयेंन; अऊर जो कोयी कहेंन ‘अरे मूर्ख’ ऊ नरक की आगी को सजा को लायक होयेंन।”
MAT 5:23 “येकोलायी यदि तय अपनी भेंट अर्पन की वेदी पर लावय, अऊर उत तोख याद आवय, कि तोरो भाऊ को मन म तोरो लायी कुछ विरोध हय,
MAT 5:24 त अपनी भेंट उत वेदी को आगु छोड़ दे, अऊर जाय क पहिले अपनो भाऊ सी मेल मीलाप कर अऊर तब आय क अपनी भेंट चढ़ाव।”
MAT 5:25 “जब तक तय आरोप लगान वालो को संग रस्ता म हय, ओको सी मेल मीलाप कर लेवो कहीं असो नहीं होय कि आरोप लगान वालो तोख न्यायधीश ख सौंप देयेंन, अऊर न्यायधीश तोख सिपाही ख सौंप देयेंन, अऊर तोख जेलखाना म डाल दियो जाये।
MAT 5:26 मय तोरो सी सच कहू हय कि जब तक तय पूरो दाम नहीं भर देजो तब तक उत सी छूटनो नहीं पायजो।”
MAT 5:27 “तुम सुन चुक्यो हय कि कह्यो गयो होतो, ‘व्यभिचार मत करो।’
MAT 5:28 पर मय तुम सी यो कहूं हय, कि जो भी कोयी बाई पर बुरी नजर डालेंन ऊ अपनो मन म ओको सी व्यभिचार कर चुक्यो रहेंन।
MAT 5:29 यदि तोरी दायो आंखी तोख ठोकर खिलावय, त ओख निकाल क फेक दे; कहालीकि तोरो लायी योच ठीक हय कि तोरो शरीर म सी एक अंग नाश होय जायेंन पर तोरो पूरो शरीर नरक म नहीं डाल्यो जायेंन।
MAT 5:30 यदि तोरो दायो हाथ तोरो सी पाप करवावय, त ओख काट क फेक दे; कहालीकि तोरो लायी योच ठीक हय कि तोरो शरीर म सी एक अंग नाश होय जाय पर तोरो पूरो शरीर नरक म नहीं डाल्यो जाय।”
MAT 5:31 “यो भी कह्यो गयो होतो, ‘जो कोयी अपनी पत्नी ख छोड़ देनो चाहवय, त ओख छोड़चिट्ठी दे।’
MAT 5:32 पर मय तुम सी यो कहू हय कि जो कोयी अपनी पत्नी ख व्यभिचार को अलावा कोयी अऊर वजह सी छोड़ दे, त ऊ ओको सी व्यभिचार करावय हय; अऊर जो कोयी वा छोड़ी हुयी सी बिहाव करे, ऊ व्यभिचार करय हय।”
MAT 5:33 “तब तुम सुन चुक्यो हय कि पुरानो समय को लोगों सी कह्यो गयो होतो, ‘झूठी कसम मत खाजो, पर प्रभु को लायी अपनी कसम ख पूरी करजो।’
MAT 5:34 पर मय तुम सी यो कहू हय कि कभी कसम मत खावो; न त स्वर्ग की, कहालीकि ऊ परमेश्वर को सिंहासन हय;
MAT 5:35 नहीं धरती की, कहालीकि ऊ ओको पाय को खल्लो की चौकी आय; नहीं यरूशलेम की, कहालीकि ऊ महाराजा को नगर आय।
MAT 5:36 अपनो मुंड की भी कसम मत खाजो कहालीकि तय एक बाल ख भी नहीं सफेद, नहीं कारो कर सकय हय।
MAT 5:37 पर तुम्हरी बात ‘हव’ की ‘हव’ यां ‘नहीं’ की ‘नहीं’ हो; कहालीकि जो कोयी येको सी जादा होवय हय ऊ बुरायी सी होवय हय।”
MAT 5:38 “तुम्न सुन लियो हय कि कह्यो गयो होतो, ‘आंखी को बदला आंखी, अऊर दात को बदला दात।’
MAT 5:39 पर मय तुम सी यो कहू हय कि जो तुम सी बुरो व्यवहार करय हय ओको सी सामना मत करजो; पर जो कोयी तोरो दायो गाल पर थापड़ मारे, ओको तरफ दूसरों भी गाल घुमाय दे।
MAT 5:40 यदि कोयी तोरो पर जबरदस्ती कर क् तोरो कुरता लेनो चाहेंन, त ओख बाहेर को कोट भी ले लेन दे।
MAT 5:41 अऊर यदि कोयी तोख दबाव म एक कोस ले जायेंन, त तय ओको संग दोय कोस चली जाजो।
MAT 5:42 जो कोयी तोरो सी मांगे, ओख दे; अऊर जो तोरो सी उधार लेनो चाहेंन, ओको सी मुंह न फिराव।”
MAT 5:43 “तुम्न सुन लियो हय कि कह्यो गयो होतो, ‘अपनो पड़ोसी सी प्रेम रखजो, अऊर दुश्मन सी बैर।’
MAT 5:44 पर मय तुम सी यो कहू हय कि अपनो दुश्मनों सी प्रेम रखजो अऊर अपनो सतावन वालो लायी प्रार्थना करजो।
MAT 5:45 जेकोसी तुम अपनो स्वर्गीय पिता की सन्तान बन सको कहालीकि ऊ भलो अऊर बुरो दोयी पर अपनो सूरज उगावय हय, अऊर सच्चो अऊर बुरो दोयी पर पानी बरसावय हय।
MAT 5:46 कहालीकि यदि तुम अपनो प्रेम रखन वालो सीच प्रेम रखजो, त तुम्हरो लायी का प्रतिफल होयेंन? का कर लेनवालो भी असोच नहीं करय?
MAT 5:47 यदि तुम केवल अपनो भाऊवों लायी भलायी करय हय, त कौन सो बड़ो काम करय हय? का गैरयहूदी भी असो नहीं करय?
MAT 5:48 येकोलायी कि तुम सिद्ध बनो, जसो तुम्हरो स्वर्गीय पिता सिद्ध हय।”
MAT 6:1 “चौकस रहो!” तुम आदमी ख दिखावन लायी अपनो सच्चायी को काम मत करो, नहीं त अपनो स्वर्गीय पिता सी कुछ भी फर नहीं पावों।
MAT 6:2 “येकोलायी जब तय दान करय हय, त अपनो आगु पोंगा मत बजवा, जसो कपटी, सभावों अऊर गलियो म करय हंय, ताकि लोग उन्की बड़ायी करे। मय तुम सी सच कहू हय कि हि अपनो प्रतिफल पा लियो।
MAT 6:3 पर जब तय दान करय, त जो तोरो दायो हाथ करय हय, ओख तोरो बायो हाथ नहीं जाननो पाये।
MAT 6:4 ताकि तोरो दान गुप्त रहे, अऊर तब तोरो बाप जो गुप्त म देखय हय, तोख प्रतिफल देयेंन।”
MAT 6:5 “जब तय प्रार्थना करय हय, त कपटियों को जसो नहीं हो, कहालीकि लोगों ख दिखावन लायी यहूदियों को सभागृह म अऊर रस्ता कि मोड़ों पर खड़ो होय क प्रार्थना करनो उन्ख पसंद हय। मय तुम सी सच कहू हय कि हि अपनो प्रतिफल पा लियो
MAT 6:6 पर जब तय प्रार्थना करय हय, त अपनी कोठरी म जा; अऊर दरवाजा बन्द कर क् अपनो बाप सी जो गुप्त म हय प्रार्थना कर। तब तोरो बाप जो गुप्त म देखय हय, तोख प्रतिफल देयेंन।”
MAT 6:7 प्रार्थना करतो समय गैरयहूदियों को जसो बक-बक मत करो, कहालीकि हि समझय हंय कि उन्को बहुत बोलनो सी उन्की सुनी जायेंन।
MAT 6:8 येकोलायी तुम उन्को जसो मत बनो, कहालीकि तुम्हरो बाप तुम्हरो मांगनो सी पहिलेच जानय हय कि तुम्हरी का-का जरूरत हंय।
MAT 6:9 येकोलायी तुम यो रीति सी प्रार्थना करतो रहो: “हे हमरो पिता, तय जो स्वर्ग म हय; तोरो नाम पवित्र मान्यो जाये।”
MAT 6:10 “तोरो राज्य आये। तोरी इच्छा जसी स्वर्ग म पूरी होवय हय, वसी धरती पर भी हो”
MAT 6:11 “हमरी दिन भर की रोटी अज हम्ख दे।”
MAT 6:12 “अऊर जो तरह हम न अपनो अपराधियों ख माफ करयो हय, वसोच तय भी हमरो अपराधो ख माफ कर।”
MAT 6:13 “अऊर हम्ख परीक्षा म मत लाव, पर बुरायी सी बचाव; कहालीकि राज्य पराक्रम अऊर महिमा हमेशा तोरीच हंय।” आमीन।
MAT 6:14 “येकोलायी यदि तुम आदमी को अपराध माफ करो, त तुम्हरो स्वर्गीय पिता भी तुम्ख माफ करेंन।
MAT 6:15 अऊर यदि तुम लोगों को अपराध माफ नहीं करो, त तुम्हरो स्वर्गीय पिता भी तुम्हरो अपराध माफ नहीं करेंन।”
MAT 6:16 “जब तुम उपवास करो, त कपटियों को जसो तुम्हरो मुंह पर उदासी नहीं रहन ख होना, कहालीकि हि अपनो मुंह असो बनायो रह्य हंय, कि लोग उन्ख उपवासी हय असो जान सके। मय तुम सी सच कहू हय कि हि अपनो प्रतिफल पा चुक्यो हय।
MAT 6:17 पर जब तय उपवास करजो त अपनो चेहरा धोव अऊर बाल पर तेल लगाय क कंग्गी कर,
MAT 6:18 ताकि लोग नहीं पर तोरो बाप जो गुप्त म हय, तोख उपवासी जाने। यो दशा म तोरो बाप जो गुप्त म देखय हय, तोख प्रतिफल देयेंन।”
MAT 6:19 “अपनो लायी धरती पर धन जमा मत करो, जित कीड़ा अऊर जंग लगय हंय, अऊर चोर तिजोरी तोड़ क चोरी करय हंय।
MAT 6:20 पर अपनो लायी स्वर्ग म धन जमा करो, जित नहीं त कीड़ा अऊर नहीं जंग लगय हंय, अऊर जित चोर तिजोरी तोड़ क चोरी करय हंय।
MAT 6:21 कहालीकि जित तोरो धन हय उत तोरो मन भी लग्यो रहेंन।”
MAT 6:22 “शरीर को दीया आंखी आय : येकोलायी यदि तोरी आंखी अच्छी हय, त तोरो पूरो शरीर भी उजाड़ो होयेंन।
MAT 6:23 पर यदि तोरी आंखी बुरी हय, त तोरो पूरो शरीर अन्धारो म रहेंन; त अगर तोरो म उजाड़ो जो अन्धारो हय, त यो कितनो गहरो होयेंन!”
MAT 6:24 “कोयी आदमी दोय मालिक की सेवा नहीं कर सकय, कहालीकि ऊ एक सी दुश्मनी अऊर दूसरों सी प्रेम रखेंन, यां एक सी मिल्यो रहेंन अऊर दूसरों ख तुच्छ जानेंन। तुम परमेश्वर अऊर धन दोयी की सेवा नहीं कर सकय।”
MAT 6:25 “येकोलायी मय तुम सी कहू हय कि अपनो जीव लायी यो चिन्ता मत करजो कि हम का खाबो अऊर का पीबो; अऊर न अपनो शरीर लायी कि का पहिनबो। का जीव भोजन सी, अऊर शरीर कपड़ा सी बढ़ क नहाय?”
MAT 6:26 आसमान को पक्षिंयों ख देखो! हि नहीं बोवय हंय, न काटय हंय, अऊर न अपनो घोसला म जमा करय हंय; फिर भी तुम्हरो स्वर्गीय पिता उन्ख खिलावय हय। का तुम उन्को सी जादा कीमत नहीं रखय?
MAT 6:27 तुम म सी असो कौन हय, जो चिन्ता करन सी अपनी उमर म एक घड़ी भी बढ़ाय सकय हय?
MAT 6:28 अऊर कपड़ा लायी कहाली चिन्ता करय हय? जंगली फूलो ख देखो कि हि कसो बढ़य हंय! हि नहीं त मेहनत करय, न काटय हंय।
MAT 6:29 तब भी मय तुम सी कहू हय कि सुलैमान भी, अपनो पूरो वैभव म उन्म सी कोयी को जसो कपड़ा पहिन्यो हुयो नहीं होतो।
MAT 6:30 येकोलायी जब परमेश्वर मैदान को घास ख, जो अज हय अऊर कल आगी म झोक दियो जायेंन, असो कपड़ा पहिनावय हय, त हे अविश्वासियों, तुम्ख ऊ इन सी बढ़ क कहाली नहीं पहिनायेंन?
MAT 6:31 “येकोलायी तुम चिन्ता कर क् यो मत कहजो कि हम का खाबो, यां का पीबो, यां का पहिनबो।
MAT 6:32 कहालीकि गैरयहूदी इन सब चिजों की खोज म रह्य हंय, पर तुम्हरो स्वर्गीय पिता जानय हय कि तुम्ख इन सब चिजों की जरूरत हय।
MAT 6:33 येकोलायी पहिले तुम परमेश्वर को राज्य अऊर ओको सच्चायी की खोज करो त यो सब चिजे भी तुम्ख मिल जायेंन।
MAT 6:34 येकोलायी कल की चिन्ता मत करो, कहालीकि कल को दिन अपनी चिन्ता खुद कर लेयेंन; अज लायी अजच को दु:ख बहुत हय।”
MAT 7:1 “दोष मत लगावो कि तुम्हरो पर भी दोष नहीं लगायो जाये,
MAT 7:2 कहालीकि जो तरह तुम दोष लगावय हय, उच तरह सी तुम पर भी दोष लगायो जायेंन; अऊर जो नाप सी तुम नापय हय, उच नाप सी तुम्हरो लायी भी नाप्यो जायेंन।”
MAT 7:3 “तय कहाली अपनो भाऊ की आंखी को तिनका ख देखय हय, अऊर अपनी आंखी को लट्ठा तोख नहीं सूझय?
MAT 7:4 जब तोरीच आंखी म लट्ठा हय, त तय अपनो भाऊ सी कसो कह्य सकय हय, ‘लाव मय तोरी आंखी सी तिनका निकाल देऊ?’
MAT 7:5 हे कपटी, पहिले अपनी आंखी म सी लट्ठा निकाल ले, तब तय अपनो भाऊ की आंखी को तिनका अच्छो सी देख क निकाल सकजो।”
MAT 7:6 “पवित्र चिज कुत्ता ख मत दे, अऊर अपनो मोती डुक्करों को आगु मत डालो; असो न होय कि हि उन्ख पाय खल्लो खुंदेन अऊर पलट क तुम ख फाड़ डालेंन।
MAT 7:7 “मांगो, त तुम्ख दियो जायेंन; ढूंढो त तुम पावों; खटखटावों, त तुम्हरो लायी खोल्यो जायेंन।
MAT 7:8 कहालीकि जो कोयी मांगय हय, ओख मिलय हय; अऊर जो ढूंढय हय, ऊ पावय हय; अऊर जो खटखटावय हय, ओको लायी खोल्यो जायेंन।
MAT 7:9 तुम म सी असो कौन आदमी हय, कि यदि ओको बेटा ओको सी रोटी मांगेंन, त ऊ ओख गोटा देयेंन?
MAT 7:10 यां मच्छी मांगेंन, त ओख सांप देयेंन?
MAT 7:11 येकोलायी जब तुम बुरो होय क, अपनो बच्चां ख अच्छी चिजे देनो जानय हय, त तुम्हरो स्वर्गीय पिता अपनो मांगन वालो ख अच्छी चिजे कहाली नहीं देयेंन?
MAT 7:12 “यो वजह जो कुछ तुम चाहवय हय कि लोग तुम्हरो संग करे, तुम भी उन्को संग वसोच करो; कहालीकि मूसा की व्यवस्था अऊर भविष्यवक्तावों की शिक्षा याच आय।
MAT 7:13 “निरून्द द्वार सी सिरो, कहालीकि चौड़ो हय ऊ फाटक अऊर सरल हय ऊ रस्ता जो नाश को तरफ लिजावय हय; अऊर बहुत सो हंय जो ओको सी सिरय हंय।
MAT 7:14 कहालीकि निरून्द हय ऊ फाटक अऊर कठिन हय ऊ रस्ता जो जीवन को तरफ लिजावय हय; अऊर थोड़ो हंय जो ओख पावय हंय।
MAT 7:15 “झूठो भविष्यवक्तावों सी चौकस रहो, जो मेंढीं को रूप म तुम्हरो जवर आवय हंय, पर आखरी म हि फाड़न वालो भेड़िया आय।
MAT 7:16 उन्को फर सी तुम उन्ख जान जावो। का लोग झाड़ियों सी अंगूर, यां काटा को झुड़ूपो सी अंजीर तोड़य हंय?
MAT 7:17 असो तरह हर एक अच्छो झाड़ अच्छो फर लावय हय अऊर बुरो झाड़ बुरो फर लावय हय।
MAT 7:18 अच्छो झाड़ बुरो फर नहीं लाय सकय, अऊर न बुरो झाड़ अच्छो फर लाय सकय हय।
MAT 7:19 जो जो झाड़ अच्छो फर नहीं लावय, ऊ काट क आगी म डाल दियो जावय हय।
MAT 7:20 यो तरह उन्को फर सी तुम भविष्यवक्तावों ख जान लेवो।
MAT 7:21 “जो मोरो सी, ‘हे प्रभु! हे प्रभु!’ कह्य हय, उन्म सी हर एक स्वर्ग को राज्य म सिर नहीं सकेंन, पर उच जो मोरो स्वर्गीय पिता की इच्छा पर चलय हय।
MAT 7:22 न्याय को दिन बहुत सो लोग मोरो सी कहेंन, ‘हे प्रभु, हे प्रभु, का हम्न तोरो नाम सी भविष्यवानी नहीं करी, अऊर तोरो नाम सी दुष्ट आत्मावों ख नहीं निकाल्यो, अऊर तोरो नाम सी सामर्थ को काम नहीं करयो?’
MAT 7:23 तब मय उन्को सी खुल क कह्य देऊं, ‘मय न तुम्ख कभी नहीं जान्यो। हे कुकर्मियों मोरो जवर सी चली जावो।’
MAT 7:24 “येकोलायी जो कोयी मोरी या बाते सुन क उन्ख मानय हय, ऊ उन बुद्धिमान आदमी को जसो ठहरेंन जेन अपनो घर चट्टान पर बनायो।
MAT 7:25 अऊर पानी बरस्यो, अऊर बाढ़ आयी, अऊर आन्धिया चली, अऊर यो सब ऊ घर सी टकरायी, तब भी ऊ नहीं गिरयो, कहालीकि ओको नींव चट्टान पर डाल्यो गयो होतो।
MAT 7:26 “पर जो कोयी मोरी या बाते सुनय हय अऊर उन पर नहीं चलय, यो ऊ मूर्ख आदमी को जसो ठहरेंन जेन अपनो घर रेतु पर बनायो।
MAT 7:27 अऊर पानी बरस्यो, अऊर बाढ़ आयी, अऊर आन्धिया चली, अऊर ऊ घर सी टकरायी अऊर ऊ गिर क नाश भय गयो।”
MAT 7:28 जब यीशु या बाते कह्य चुक्यो, त असो भयो कि भीड़ ओको उपदेश सी चकित भयी,
MAT 7:29 कहालीकि ऊ उन्को धर्मशास्त्रियों को जसो नहीं पर अधिकार को जसो उन्ख उपदेश देत होतो।
MAT 8:1 जब यीशु पहाड़ी सी उतरयो, त एक बड़ी भीड़ ओको पीछू भय गयी।
MAT 8:2 अऊर देखो, एक कोढ़ी न जवर आय क ओख प्रनाम करयो अऊर कह्यो, “हे प्रभु, यदि तय चाहवय, त मोख शुद्ध कर सकय हय।”
MAT 8:3 यीशु न हाथ बढ़ाय क ओख छूयो, अऊर कह्यो, “मय चाहऊ हय, तय शुद्ध होय जा।” अऊर ऊ तुरतच कोढ़ सी चंगो भय गयो।
MAT 8:4 यीशु न ओको सी कह्यो, “देख, कोयी सी मत कहजो, पर जाय क अपनो आप ख याजक ख दिखाव अऊर जो चढ़ावा मूसा न ठहरायो हय ओख भेंट चढ़ाव, ताकि लोगों लायी गवाही हो।”
MAT 8:5 जब ऊ कफरनहूम नगर म आयो त एक रोमन अधिकारी न ओको जवर आय क ओको सी बिनती करी,
MAT 8:6 “हे प्रभु, मोरो सेवक ख घर म लकवा मारयो हय अऊर ओख बहुत दु:ख होय रह्यो हय।”
MAT 8:7 यीशु न ओको सी कह्यो, “मय आय क ओख चंगो करूं।”
MAT 8:8 जवाबदार अधिकारी न उत्तर दियो, “हे प्रभु, मय यो लायक नहाय कि तय मोरो छत को खल्लो आये, पर केवल आज्ञा दे त मोरो सेवक चंगो होय जायेंन।
MAT 8:9 कहालीकि मय भी दूसरों को अधीन हय, अऊर सिपाही मोरो अधीन हंय। जब मय एक सी कहूं हय, ‘जा!’ त ऊ जावय हय; अऊर दूसरों सी कहूं हय, ‘आव!’ त ऊ आवय हय; अऊर जब अपनो सेवक सी कहूं हय, ‘यो कर!’ त ऊ करय हय।”
MAT 8:10 यो सुन क यीशु ख अचम्भा भयो, अऊर जो ओको पीछू आय रह्यो होतो उन्को सी कह्यो, “मय तुम सी सच कहू हय कि मय न इस्राएल म भी असो विश्वास नहीं पायो।
MAT 8:11 अऊर मय तुम सी कहू हय कि पूर्व अऊर पश्चिम सी बहुत सो लोग आय क अब्राहम अऊर इसहाक अऊर याकूब को संग स्वर्ग को राज्य म भोज म बैठेंन।
MAT 8:12 पर राज्य को प्रजा बाहेर अन्धारो म डाल दियो जायेंन: उत रोवनो अऊर दात को कटरनो होयेंन।”
MAT 8:13 तब यीशु न अधिकारी सी कह्यो, “जा, जसो तोरो विश्वास हय, वसोच तोरो लायी हो।” अऊर ओको सेवक उच घड़ी चंगो भय गयो।
MAT 8:14 यीशु जब पतरस को घर आयो, त ओन पतरस की सासु ख बुखार म पड़ी देख्यो।
MAT 8:15 यीशु न ओको हाथ छूयो अऊर ओको बुखार उतर गयो, अऊर वा उठ क ओकी सेवा-भाव करन लगी।
MAT 8:16 जब शाम भयी तब हि ओको जवर बहुत सो लोगों ख लायो जेको म दुष्ट आत्मायें होती अऊर यीशु न उन आत्मावों ख अपनो वचन सी निकाल दियो; अऊर सब बीमारों ख चंगो करयो।
MAT 8:17 ताकि जो वचन यशायाह भविष्यवक्ता सी कह्यो गयो होतो ऊ पूरो हो: “यीशु न खुदच हमरी कमजोरियों ख पकड़ लियो अऊर हमरी बीमारियों ख उठाय लियो।”
MAT 8:18 यीशु न जब अपनो चारयी तरफ एक बड़ी भीड़ देखी त चेलां ख झील को ओन पार जान को आदेश दियो।
MAT 8:19 तब एक धर्मशास्त्री न जवर आय क ओको सी कह्यो, “हे गुरु, जित कहीं तय जाजो, मय तोरो पीछू होय जाऊं।”
MAT 8:20 यीशु न ओको सी कह्यो, “लोमड़ियों की गुफा अऊर आसमान को पक्षिंयों को घोसला होवय हंय; पर आदमी को बेटा लायी मुंड रखन की भी जागा नहाय।”
MAT 8:21 एक अऊर चेला न ओको सी कह्यो, “हे प्रभु, मोख पहिले जान दे कि मय अपनो बाप ख गाड़ देऊ।”
MAT 8:22 यीशु न ओको सी कह्यो, “तय मोरो पीछू होय जा, अऊर मुर्दों ख अपनो मुर्दा गाड़न दे।”
MAT 8:23 जब यीशु डोंगा पर चढ़्यो, त ओको चेला ओको पीछू गयो।
MAT 8:24 अऊर देखो, झील म अचानक असो बड़ो तूफान उठ्यो कि डोंगा लहर सी दबन लग्यो, पर यीशु सोय रह्यो होतो।
MAT 8:25 तब चेलावों न जवर आय क ओख जगायो अऊर कह्यो, “हे प्रभु, हम्ख बचाव, हम नाश होय रह्यो हंय।”
MAT 8:26 यीशु न उन्को सी कह्यो, “हे अविश्वासियों, कहाली डरय हय?” तब ओन उठ क आन्धी अऊर पानी ख डाट्यो, अऊर सब शान्त भय गयो।
MAT 8:27 अऊर हि अचम्भा कर क् कहन लग्यो, “यो कसो आदमी आय कि आन्धी अऊर पानी भी ओकी आज्ञा मानय हंय।”
MAT 8:28 जब यीशु ओन पार गदरेनियों को देश म पहुंच्यो, त दोय आदमी जिन्म दुष्ट आत्मायें होती कब्रो सी निकलतो हुयो ओख मिल्यो। हि इतनो खतरनाक होतो कि कोयी ऊ रस्ता सी जाय नहीं सकत होतो।
MAT 8:29 उन्न चिल्लाय क कह्यो, “हे परमेश्वर को बेटा, हमरो तोरो सी का काम? का तय समय सी पहिले हम्ख दु:ख देन ख इत आयो हय?”
MAT 8:30 उन्को सी कुछ दूरी पर बहुत सो डुक्करों को एक झुण्ड चर रह्यो होतो।
MAT 8:31 दुष्ट आत्मावों न ओको सी यो कह्य क बिनती करी, “यदि तय हम्ख निकालय हय, त डुक्करों को झुण्ड म भेज दे।”
MAT 8:32 यीशु न उन्को सी कह्यो, “जावो!” अऊर हि निकल क डुक्करों म समाय गयी अऊर देखो, पूरो झुण्ड ढलान पर सी झपट क झील को किनार पर गिर पड़्यो, अऊर पानी म डुब क मरयो।
MAT 8:33 उन्को चरवाहे भग क अऊर नगर म जाय क या सब बाते अऊर जेको म दुष्ट आत्मायें होती उन्को पूरो हाल सुनायो।
MAT 8:34 तब पूरो नगर को लोग यीशु सी मिलन ख निकल आयो, अऊर ओख देख क बिनती करी कि हमरी सीमा सी बाहेर चली जा।
MAT 9:1 तब यीशु डोंगा पर चढ़ क ओन पार गयो, अऊर अपनो नगर म आयो।
MAT 9:2 अऊर देखो, कुछ लोग एक लकवा को रोगी ख खटिया पर रख क ओको जवर लायो। यीशु न उन्को विश्वास ख देख क, ऊ लकवा को रोगी सी कह्यो, “हे बेटा, हिम्मत रख; तोरो पाप माफ भयो।”
MAT 9:3 येको पर कुछ धर्मशास्त्रियों न आपस म बोलन लग्यो, “यो त परमेश्वर की निन्दा करय हय।”
MAT 9:4 यीशु न उन्को मन की बाते जान क कह्यो, “तुम लोग अपनो-अपनो मन म बुरो बिचार कहाली लाय रह्यो हय?
MAT 9:5 सहज का हय? यो कहनो, ‘तोरो पाप माफ भयो,’ यां यो कहनो, ‘उठ अऊर चल फिर।’
MAT 9:6 पर तुम यो जान लेवो कि आदमी को बेटा ख धरती पर पाप माफ करन को अधिकार हय।” येकोलायी यीशु न लकवा को रोगी सी कह्यो, “उठ, अपनी खटिया उठाव, अऊर अपनो घर चली जा।”
MAT 9:7 ऊ उठ क अपनो घर चली गयो।
MAT 9:8 लोग यो देख क डर गयो अऊर परमेश्वर की महिमा करन लग्यो जेन लोगों ख असो अधिकार दियो हय।
MAT 9:9 उत सी आगु जाय क यीशु न मत्ती नाम को एक आदमी ख कर वसुली की चौकी पर बैठ्यो देख्यो, अऊर ओको सी कह्यो, “मोरो पीछू चली आव।” ऊ उठ क ओको पीछू चली गयो।
MAT 9:10 जब ऊ घर म जेवन करन लायी बैठ्यो त बहुत सो कर लेनवालो अऊर पापी आय क यीशु अऊर ओको चेलावों को संग जेवन करन बैठ्यो।
MAT 9:11 यो देख क फरीसियों न ओको चेलावों सी कह्यो, “तुम्हरो गुरु कर लेनवालो अऊर पापियों को संग कहाली खावय हय?”
MAT 9:12 यो सुन क यीशु न उन्को सी कह्यो, “डाक्टर भलो चंगो लायी नहीं पर बीमारों लायी जरूरी हय।
MAT 9:13 येकोलायी तुम जाय क येको मतलब सीख लेवो: ‘मय बलिदान नहीं पर दया चाहऊ हय।’ कहालीकि मय सच्चो लोगों ख नहीं, पर पापियों ख बुलावन ख आयो हय।”
MAT 9:14 तब बपतिस्मा देन वालो यूहन्ना को चेलावों न ओको जवर आय क कह्यो, “का वजह हय कि हम अऊर फरीसी इतनो उपवास करजे हंय, पर तोरो चेला उपवास नहीं करय?”
MAT 9:15 यीशु न उन्को सी कह्यो, “दूल्हा उन्को संग हय, त का बराती शोक कर सकय हंय? पर ऊ दिन आयेंन जब दूल्हा उन्को सी अलग कर दियो जायेंन, ऊ समय हि उपवास करेंन।
MAT 9:16 “नयो कपड़ा को थेगड़ पुरानो कपड़ा पर कोयी नहीं लगावय, कहालीकि ऊ थेगड़ ऊ कपड़ा सी कुछ अऊर खीच लेवय हय, अऊर ऊ ज्यादा फट जावय हय।
MAT 9:17 अऊर लोग नयो अंगूररस पुरानी मशकों म नहीं भरय हंय, कहालीकि असो करनो सी मशके फट जावय हंय, अऊर अंगूररस बह जावय हय; अऊर मशके नाश होय जावय हंय; पर नयो अंगूररस नयी मशकों म भरय हंय अऊर हि दोयी बच्यो रह्य हंय।”
MAT 9:18 ऊ उन्को सी यो बाते कह्यच रह्यो होतो, कि देखो, एक मुखिया न आय क ओख प्रनाम करयो अऊर कह्यो, “मोरी बेटी अभी मरी हय, पर चल क अपनो हाथ ओको पर रखजो, त वा जीन्दी होय जायेंन।”
MAT 9:19 यीशु उठ क अपनो चेलावों को संग ओको पीछू भय गयो।
MAT 9:20 अऊर देखो, एक बाई न जेक बारा साल सी खून बहन कि बीमारी होती, पीछू सी आय क ओको कपड़ा को कोना ख छूय लियो।
MAT 9:21 कहालीकि वा अपनो मन म कहत होती, “यदि मय ओको कपड़ा ख छूय लेऊ त चंगी होय जाऊं।”
MAT 9:22 यीशु न मुड़ क ओख देख्यो अऊर कह्यो, “बेटी हिम्मत रख; तोरो विश्वास न तोख चंगो करयो हय।” येकोलायी वा बाई उच घड़ी चंगी भय गयी।
MAT 9:23 जब यीशु ऊ मुखिया को घर म पहुंच्यो अऊर पेपाड़ी बजावन वालो अऊर भीड़ ख हल्ला मचावत देख्यो,
MAT 9:24 तब कह्यो, “हट जा, बेटी मरी नहाय, पर सोय रही हय।” याच बात पर हि ओकी मजाक उड़ावन लग्यो।
MAT 9:25 पर जब भीड़ ख बाहेर निकाल दियो त यीशु अन्दर जाय क बेटी को हाथ पकड़्यो अऊर वा जीन्दी भय गयी।
MAT 9:26 अऊर या बात की चर्चा ऊ पूरो देश म फैल गयी।
MAT 9:27 जब यीशु उत सी आगु बढ़्यो, त दोय अन्धा ओको पीछू यो पुकारतो हुयो चल्यो, “हे दाऊद की सन्तान, हम पर दया कर!”
MAT 9:28 जब यीशु घर म पहुंच्यो, त हि अन्धा ओको जवर आयो, अऊर यीशु न उन्को सी कह्यो, “का तुम्ख विश्वास हय कि मय तुम्ख चंगो कर सकू हय?” उन्न ओको सी कह्यो, “हव, प्रभु!”
MAT 9:29 तब यीशु न यो कहतो हुयो उन्की आंखी ख छूय क कह्यो, “तुम्हरो विश्वास को जसो तुम्हरो लायी हो।”
MAT 9:30 अऊर उन्की आंखी खुल गयी। यीशु न उन्ख चिताय क कह्यो, “चौकस रहो, कोयी या बात ख नहीं जाने।”
MAT 9:31 पर उन्न निकल क पूरो देश म ओकी बात फैलाय दियो।
MAT 9:32 जब हि बाहेर जाय रह्यो होतो, त देख्यो, लोग एक मुक्का ख जेको म दुष्ट आत्मायें होती, ओको जवर लायो;
MAT 9:33 अऊर जब दुष्ट आत्मा निकाल दियो गयो, त मुक्का बोलन लग्यो। येको पर भीड़ न अचम्भा कर क् कह्यो, “इस्राएल म असो कभी नहीं देख्यो गयो।”
MAT 9:34 पर फरीसियों न कह्यो, “यो त दुष्ट आत्मावों को सरदार की मदत सी शैतानी आत्मावों ख निकालय हय।”
MAT 9:35 यीशु सब नगरों अऊर गांवो म जाय जाय क उन्को सभागृहों म उपदेश करतो, अऊर राज्य को सुसमाचार प्रचार करतो, अऊर कुछ तरह की बीमारी अऊर कमजोरी ख दूर करतो रह्यो।
MAT 9:36 जब यीशु न भीड़ ख देख्यो त ओख लोगों पर तरस आयो, कहालीकि हि उन मेंढीं को जसो होतो जिन्को कोयी चरवाहा नहीं होतो दु:खी अऊर भटक्यो हुयो को जसो होतो।
MAT 9:37 तब ओन अपनो चेलावों सी कह्यो, “पकी फसल त बहुत हंय, पर मजूर थोड़ो हंय।
MAT 9:38 येकोलायी फसल को मालिक सी प्रार्थना करो कि अपनो खेत की फसल काटन लायी मजूर भेज दे।”
MAT 10:1 तब यीशु न अपनो बारयी चेलावों ख जवर बुलाय क, उन्ख दुष्ट आत्मावों पर अधिकार दियो कि उन्ख निकाले अऊर सब तरह की बीमारियों अऊर सब तरह की कमजोरियों ख दूर करे।
MAT 10:2 इन बारयी प्रेरितों को नाम यो हंय: पहिलो शिमोन, जो पतरस कहलावय हय, अऊर ओको भाऊ अन्द्रियास; जब्दी को टुरा याकूब, अऊर ओको भाऊ यूहन्ना;
MAT 10:3 फिलिप्पुस, अऊर बरतुल्मै, थोमा, अऊर कर लेनवालो मत्ती, हलफई को टुरा याकूब, अऊर तद्दै,
MAT 10:4 शिमोन कनानी, अऊर यहूदा इस्करियोती जेन ओख पकड़वाय भी दियो होतो।
MAT 10:5 इन बारयी चेलावों ख यीशु न यो आज्ञा दे क भेज्यो: “गैरयहूदियों को तरफ मत जाजो, अऊर सामरियों को कोयी नगर म मत सिरजो।
MAT 10:6 पर इस्राएल को घरानों की गुमी हुयी मेंढीं को जवर जाजो।
MAT 10:7 अऊर चलतो-चलतो यो प्रचार करो: ‘स्वर्ग को राज्य जवर आय गयो हय।’
MAT 10:8 बीमारों ख चंगो करो, मरयो हुयो ख जीन्दो करो, कोढ़ियों ख शुद्ध करो, दुष्ट आत्मावों ख निकालो। तुम न बिना कुछ दियो प्रभु की आशीष अऊर शक्तियां पायी हंय, येकोलायी उन्ख दूसरों ख बिना कुछ लियो मुक्त भाव सी देवो।”
MAT 10:9 “अपनो खीसा म नहीं त सोना, अऊर नहीं चांदी, अऊर नहीं तांबो को पैसा रखजो;
MAT 10:10 रस्ता लायी नहीं झोली रखो, नहीं दूसरों कुरता, नहीं जूता अऊर नहीं लाठी रखो, कहालीकि मजूर ख ऊ दियो जानो चाहिये जेकी उन्ख जरूरत हय।”
MAT 10:11 “जो कोयी नगर यां गांव म जावो, त पता लगावो कि उत कौन विश्वास लायक हय। अऊर बिदा होन तक उतच रुक्यो रहो।
MAT 10:12 जब तुम ऊ घर म सिरतो हुयो उन्को सी कहो कि तुम्ख शान्ति मिले।
MAT 10:13 यदि ऊ घर को लोग तुम्हरो स्वागत करेंन त तुम्हरी शान्ति उन पर पहुंचेंन, पर यदि हि स्वागत नहीं करेंन त तुम्हरी शान्ति तुम्हरो जवर लौट आयेंन।
MAT 10:14 जो कोयी तुम्ख स्वीकार नहीं करे अऊर तुम्हरी बाते नहीं सुनेंन, त ऊ घर यां ऊ नगर सी निकलतो हुयो अपनो पाय की धूल झाड़तो हुयो वापस लौट जावो।
MAT 10:15 मय तुम सी सच कहू हय कि न्याय को दिन ऊ नगर की दशा सी सदोम अऊर गमोरा को देश की दशा ज्यादा सहन लायक होयेंन।”
MAT 10:16 “देखो, मय तुम्ख मेंढीं को जसो भेड़ियों को बीच म भेजूं हय, येकोलायी सांप को जसो बुद्धिमान अऊर कबूत्तरों को जसो भोलो बनो।”
MAT 10:17 “पर लोगों सी चौकस रहो,” कहालीकि हि तुम्ख महासभावों म सौंपेंन, अऊर अपनी पंचायतो म तुम्ख कोड़ा मारेंन।
MAT 10:18 तुम मोरो वजह शासक अऊर राजावों को आगु उन पर, अऊर गैरयहूदियों पर गवाह होन लायी पहुंचायो जायेंन।
MAT 10:19 जब हि तुम्ख पकड़वायेंन त तुम या चिन्ता मत करो कि हम कसो तरह सी का कहबोंन, कहालीकि जो कुछ तुम ख कहनो होना, ऊ उच समय तुम्ख बताय दियो जायेंन।
MAT 10:20 कहालीकि बोलन वालो तुम नोहोय, पर तुम्हरो स्वर्गीय पिता की आत्मा जो तुम म बोलय हय।
MAT 10:21 “भाऊ, अपनो भाऊ ख अऊर बाप अपनो बेटा ख, मार डालन लायी सौंपेंन, अऊर बच्चा अपनो माय बाप को विरोध म खड़ो होय क उन्ख मरवाय डालेंन।
MAT 10:22 मोरो नाम को वजह सब लोग तुम सी दुश्मनी करेंन, पर जो आखरी तक धीरज रखेंन ओकोच उद्धार होयेंन।”
MAT 10:23 जब हि तुम्ख एक नगर म सतायेंन त दूसरों नगर म भग जावो। मय तुम सी सच कहूं हय, कि येको सी पहले कि तुम इस्राएल को सब नगरों को चक्कर पूरो करो, आदमी को बेटा दुबारा आय जायेंन।
MAT 10:24 “चेला अपनो गुरु सी बड़ो नहीं होवय; अऊर नहीं सेवक अपनो मालिक सी।
MAT 10:25 चेला अपनो गुरु को, अऊर सेवक अपनो मालिक को बराबर होन मच बहुत हय। जब उन्न घर को मालिक ख शैतान कह्यो त ओको घर वालो ख का कुछ नहीं कहेंन।”
MAT 10:26 येकोलायी लोगों सी मत डरो; कहालीकि कुछ ढक्यो नहीं जो खोल्यो नहीं जायेंन, अऊर नहीं कुछ लुक्यो हय जो जान्यो नहीं जायेंन।
MAT 10:27 जो मय तुम सी अन्धारो म कहूं हय, ओख तुम उजाड़ो म कहो; अऊर जो कानो कान सुनय हय, ओख तुम छत पर सी प्रचार करो।
MAT 10:28 उन्को सी मत डरो जो शरीर ख नाश करय हंय, पर आत्मा ख नाश नहीं कर सकय, पर परमेश्वर सी डरो, जो आत्मा अऊर शरीर दोयी ख नरक म नाश कर सकय हय।
MAT 10:29 का एक पैसा म दोय पक्षी नहीं बिकय? तब भी तुम्हरो स्वर्गीय पिता की इच्छा को बिना उन्म सी एक भी धरती पर नहीं गिर सकय।
MAT 10:30 तुम्हरो मुंड को सब बाल भी गिन्यो हुयो हंय।
MAT 10:31 येकोलायी डरो मत; तुम बहुत सी पक्षी सी बहुत महत्वपूर्ण हय।
MAT 10:32 “जो कोयी लोगों को आगु मोख मान लेयेंन, ओख मय भी अपनो स्वर्गीय पिता को आगु मान लेऊ।
MAT 10:33 पर जो कोयी लोगों को आगु मोरो इन्कार करेंन, ओको सी मय भी अपनो स्वर्गीय पिता को आगु इन्कार करूं।”
MAT 10:34 “यो मत समझो कि मय धरती पर शान्ति लावन लायी आयो हय, पर मय शान्ति लावन नहीं, पर तलवार चलावन आयो हय।
MAT 10:35 मय त आयो हय कि: ‘बच्चां ख ओको बाप सी, अऊर बेटी ख ओकी माय सी, अऊर बहू ख ओकी सासु सी अलग कर देऊ;’
MAT 10:36 आदमी को दुश्मन ओको घर कोच लोग होयेंन।”
MAT 10:37 “जो माय यां बाप ख मोरो सी ज्यादा अच्छो जानय हय, ऊ मोरो लायक नहाय; अऊर जो बेटा यां बेटी ख मोरो सी ज्यादा प्रिय जानय हय, ऊ मोरो लायक नहाय।
MAT 10:38 अऊर जो अपनो क्रूस उठाय क मोरो पीछू नहीं चलय ऊ मोरो लायक नहाय।
MAT 10:39 जो अपनो जीव बचावय हय, ऊ ओख खोयेंन; अऊर जो मोरो वजह अपनो जीव खोवय हय, ऊ ओख पायेंन।”
MAT 10:40 “जो तुम्ख स्वीकार करय हय, ऊ मोख स्वीकार करय हय; अऊर जो मोख स्वीकार करय हय, ऊ मोरो भेजन वालो ख स्वीकार करय हय।
MAT 10:41 जो भविष्यवक्ता ख भविष्यवक्ता जान क स्वीकार करय, ऊ भविष्यवक्ता को प्रतिफल पायेंन; अऊर जो सच्चो ख सच्चो जान क स्वीकार करे, ऊ सच को प्रतिफल पायेंन।
MAT 10:42 जो कोयी इन छोटो म सी एक ख मोरो चेला जान क मोख केवल एक गिलास ठंडो पानी पिलाये, त मय तुम सी सच कहूं हय, ऊ कोयी रीति सी अपनो प्रतिफल जरूर पायेंन।”
MAT 11:1 जब यीशु अपनो बारयी चेलावों ख शिक्षा दे चुक्यो, त ऊ उन्को नगरों म उपदेश अऊर प्रचार करन ख उत सी चली गयो।
MAT 11:2 जब यूहन्ना न जेलखाना म मसीह को कामों को समाचार सुन्यो अऊर अपनो चेलावों ख ओको सी यो पूछन भेज्यो,
MAT 11:3 “का आवन वालो तयच आय, का हम कोयी दूसरों की रस्ता देखबो?”
MAT 11:4 यीशु न उत्तर दियो, “जो कुछ तुम सुनय हय अऊर देखय हय, ऊ सब जाय क यूहन्ना सी कह्य देवो,
MAT 11:5 कि अन्धा देखय हंय अऊर लंगड़ा चलय फिरय हंय, कोढ़ी शुद्ध करयो जावय हंय, अऊर बहिरा सुनय हंय, मुर्दों ख जीन्दो करयो जावय हंय, अऊर गरीबों ख सुसमाचार सुनायो जावय हय।
MAT 11:6 अऊर धन्य हय, जो मोरो वजह ठोकर नहीं खावय।”
MAT 11:7 जब हि उत सी चली गयो, त यीशु यूहन्ना को बारे म लोगों सी कहन लग्यो, “तुम सुनसान जंगल म का देखन गयो होतो? का हवा सी हलतो हुयो घास ख?
MAT 11:8 तब तुम का देखन गयो होतो? का चमकदार कपड़ा पहिन्यो हुयो आदमी ख? देखो, जो चमकदार कपड़ा पहिनय हंय, हि राजभवनों म रह्य हंय!
MAT 11:9 त फिर कहाली गयो होतो? का कोयी भविष्यवक्ता ख देखन ख? हव, मय तुम सी कहू हय कि भविष्यवक्ता सी भी बड़ो ख।
MAT 11:10 यो उच आय जेको बारे म लिख्यो हय: ‘देख, मय अपनो दूत ख तोरो आगु भेजूं हय, जो तोरो आगु तोरो रस्ता तैयार करेंन।’
MAT 11:11 मय तुम सी सच कहू हय कि जो बाईयों सी जनम लियो हय, उन्म सी यूहन्ना बपतिस्मा देन वालो सी कोयी बड़ो नहीं भयो; पर जो स्वर्ग को राज्य म छोटो सी छोटो हय ऊ ओको सी बड़ो हय।
MAT 11:12 यूहन्ना बपतिस्मा देन वालो को दिनो सी अब तक स्वर्ग को राज्य म बलपूर्वक सिरतो रह्यो हय, अऊर बलवान ओख छीन लेवय हंय।
MAT 11:13 कहालीकि सब भविष्यवक्तावों अऊर मूसा की व्यवस्था, यूहन्ना को आनो तक भविष्यवानी करत रह्यो होतो।
MAT 11:14 अऊर चाहो त मानो कि एलिय्याह जो आवन वालो होतो, ऊ योच आय।
MAT 11:15 जेको कान होना ऊ सुन ले।
MAT 11:16 “मय यो पीढ़ी को लोगों की तुलना कौन्को सी करू? हि उन बच्चां को जसो हंय, जो बजार म बैठ्यो हुयो एक दूसरों सी पुकार क कह्य हंय:
MAT 11:17 ‘हम न तुम्हरो लायी बांसुरी बजायी, अऊर तुम नहीं नाच्यो; हम न विलाप करयो, अऊर तुम रोयो नहीं।’
MAT 11:18 कहालीकि यूहन्ना बपतिस्मा देन वालो नहीं खातो आयो अऊर नहीं पीतो, अऊर हि कह्य हंय, ‘ओको म दुष्ट आत्मा हय।’
MAT 11:19 आदमी को बेटा खातो पीतो आयो, अऊर हि कह्य हंय ‘देखो, खादाड़ अऊर पियक्कड़ आदमी, कर लेनवालो अऊर पापियों को संगी!’ पर परमेश्वर को ज्ञान अपनो कामों सी सच्चो ठहरायो गयो हय।”
MAT 11:20 तब यीशु उन नगरों को बारे म धिक्कारन लग्यो, जिन्म ओन बहुत सो सामर्थ को काम करयो होतो, लेकिन उन्न अपनो मन नहीं फिरायो होतो।
MAT 11:21 “हाय, खुराजीन! हाय, बैतसैदा! नगर जो सामर्थ को काम तुम म करयो गयो, यदि हि सूर अऊर सैदा म करयो जातो, त बोरा ओढ़ क, अऊर राखड़ म बैठ क हि अपनो पापों सी कब को फिराय लेतो।
MAT 11:22 पर मय तुम सी कहू हय कि न्याय को दिन तुम्हरी दशा सी सूर अऊर सैदा की दशा जादा सहन लायक होयेंन।
MAT 11:23 हे कफरनहूम, का तय स्वर्ग तक ऊंचो करयो जाजो? तय त अधोलोक तक खल्लो जाजो! जो सामर्थ को काम तोरो म करयो गयो हंय, यदि सदोम म करयो जातो, त ऊ अज तक बन्यो रहतो।
MAT 11:24 पर मय तुम सी कहू हय कि न्याय को दिन तोरी दशा सी सदोम की दशा जादा सहन लायक होयेंन।”
MAT 11:25 उच समय यीशु न कह्यो, “हे बाप, स्वर्ग अऊर धरती को प्रभु, मय तोरो धन्यवाद करू हय कि तय न इन बातों ख ज्ञानियों अऊर पड़्यो लिख्यो सी लुकाय क रख्यो हय, अऊर बच्चां पर प्रगट करयो हय।
MAT 11:26 हव, हे बाप, कहालीकि तोख योच अच्छो लग्यो।
MAT 11:27 “मोरो बाप न मोख सब कुछ सौंप दियो हय; अऊर कोयी बेटा ख नहीं जानय, केवल बाप ख; अऊर कोयी बाप ख नहीं जानय, केवल बेटा ख; अऊर ऊ जेक बेटा प्रगट करयो।
MAT 11:28 “हे सब मेहनत करन वालो अऊर बोझ सी दब्यो हुयो लोगों, मोरो जवर आवो; मय तुम्ख आराम देऊं।
MAT 11:29 मोरो बोझ अपनो ऊपर उठाय लेवो, अऊर मोरो सी सीखो; कहालीकि मय नम्र अऊर मन म नरम हय: अऊर तुम अपनो मन म आराम पावों।
MAT 11:30 कहालीकि मोरो जूवा सहज अऊर मोरो बोझ हल्को हय।”
MAT 12:1 ऊ समय यीशु आराम दिन म खेतो म सी होय क जाय रह्यो होतो, अऊर ओको चेलावों ख भूख लगी त हि गहूं को लोम्बा तोड़-तोड़ क खान लग्यो।
MAT 12:2 फरीसियों न यो देख क ओको सी कह्यो, “देख, तोरो चेला ऊ काम कर रह्यो हंय, जो आराम को दिन मूसा को नियम को अनुसार उचित नहाय।”
MAT 12:3 यीशु उन्को सी कह्यो, “का तुम्न नहीं पढ़्यो, कि जब दाऊद अऊर ओको संगी ख भूख लगी त ओन का करयो?
MAT 12:4 ऊ कसो परमेश्वर को मन्दिर म गयो, अऊर अर्पन की रोटी खायी, ओख अऊर ओको संगियों ख उन्की रोटी मूसा को नियम को अनुसार उचित नहाय। पर केवल याजकों ख उचित होतो?
MAT 12:5 का तुम न मूसा की व्यवस्था म नहीं पढ़्यो कि याजक आराम दिन को मन्दिर म आराम दिन की विधि ख तोड़न पर भी निर्दोष ठहरय हंय?
MAT 12:6 पर मय तुम सी कहू हय कि इत ऊ हय जो आराधनालय सी भी बड़ो हय।”
MAT 12:7 “यदि तुम येको मतलब जानतो, ‘मय दया सी सन्तुष्ट होऊं हय, बलिदान सी नहीं,’ त तुम निर्दोष ख दोषी नहीं ठहरायतो।
MAT 12:8 आदमी को बेटा त आराम दिन को भी प्रभु आय।”
MAT 12:9 उत सी चल क यीशु उन्को सभागृह म आयो।
MAT 12:10 उत एक आदमी होतो, जेको हाथ म लकवा भयो होतो। फरीसियों न यीशु पर दोष लगावन लायी ओको सी पुच्छ्यो, “का आराम को दिन नियम को अनुसार चंगो करनो उचित हय?”
MAT 12:11 यीशु न उन्को सी कह्यो, “तुम म असो कौन हय जेकी एकच मेंढीं हय, अऊर ऊ आराम दिन गड्डा म गिर जाये, त ऊ ओख पकड़ क नहीं निकालेंन?
MAT 12:12 भलो, आदमी की कीमत मेंढा सी कितनो बढ़ क हय! येकोलायी आराम दिन म भलायी करनो नियम को अनुसार उचित हय।”
MAT 12:13 तब यीशु न ऊ आदमी सी कह्यो, “अपनो हाथ बढ़ाव।” ओन बढ़ायो, अऊर ऊ तब दूसरों हाथ को जसो अच्छो भय गयो।
MAT 12:14 तब फरीसियों न बाहेर जाय क ओको विरोध म चर्चा करयो कि ओख कसो तरह सी नाश करबो।
MAT 12:15 यो जान क यीशु उत सी चली गयो। अऊर बहुत लोग ओको पीछू होय लियो, अऊर ओन सब ख चंगो करयो,
MAT 12:16 अऊर उन्ख चितायो कि मोख प्रगट मत करजो,
MAT 12:17 ताकि जो वचन यशायाह भविष्यवक्ता सी कह्यो गयो होतो, ऊ पूरो हो:
MAT 12:18 “देखो, यो मोरो सेवक आय, जेक मय न चुन्यो हय: मोरो प्रिय, जेकोसी मोरो मन खुश हय: मय अपनी आत्मा ओको पर डालू, अऊर ऊ गैरयहूदियों ख न्याय को सुसमाचार देयेंन।
MAT 12:19 ऊ नहीं झगड़ा करेंन, अऊर नहीं धूम मचायेंन, अऊर नहीं बजारों म जोर सी चिल्लाय क भाषन सुनायेंन।
MAT 12:20 ऊ कुचल्यो हुयो घास ख नहीं तोड़ेंन, अऊर धुवा देन वाली बत्ती ख नहीं बुझायेंन, जब तक ऊ न्याय ख मजबूत नहीं कराये।
MAT 12:21 अऊर पूरो राष्ट्र को लोग ओको नाम पर आशा रखेंन।”
MAT 12:22 तब लोग एक अन्धा अऊर मुक्का ख यीशु को जवर लायो; जेको म दुष्ट आत्मायें होती, अऊर ओन ओख अच्छो करयो, अऊर ऊ बोलन अऊर देखन लग्यो।
MAT 12:23 येको पर सब लोग अचम्भित होय क कहन लग्यो, “यो का दाऊद की सन्तान आय?”
MAT 12:24 पर फरीसियों न यो सुन क कह्यो, “यो त दुष्ट आत्मावों को मुखिया बालजबूल की मदत को बिना शैतानी आत्मावों ख नहीं निकालय।”
MAT 12:25 यीशु न उन्को मन की बात जान क उन्को सी कह्यो, “जो कोयी राज्य म फूट होवय हय, ऊ उजड़ जावय हय; अऊर कोयी नगर यां घराना जेको म फूट होवय हय, बन्यो नहीं रहेंन।”
MAT 12:26 अऊर यदि शैतानच शैतान ख निकाले, त ऊ अपनोच विरोधी भय गयो हय; तब ओको राज्य कसो बन्यो रहेंन?
MAT 12:27 भलो, यदि मय बालजबूल की मदत सी दुष्ट आत्मावों ख निकालू हय, त तुम्हरो अनुयायी कौन की मदत सी निकालय हंय? येकोलायी हिच तुम्हरो न्याय करेंन।
MAT 12:28 पर यदि मय परमेश्वर की आत्मा की मदत सी दुष्ट आत्मावों ख निकालू हय, त परमेश्वर को राज्य तुम्हरो जवर आय गयो हय।
MAT 12:29 “कसो कोयी आदमी कोयी ताकतवर को घर म घुस क ओको माल लूट सकय हय जब तक कि पहिले ऊ ताकतवर ख नहीं बान्ध ले? तब तक ऊ ओको घर को माल लूट नहीं लेयेंन।”
MAT 12:30 जो मोरो संग नहाय ऊ मोरो विरोध म हय, अऊर जो मोरो संग नहीं ऊ जमा करय हय अऊर बिखरावय हय।
MAT 12:31 येकोलायी मय तुम सी कहू हय कि आदमी को सब तरह को पाप अऊर निन्दा माफ करयो जायेंन, पर पवित्र आत्मा कि निन्दा माफ नहीं करी जायेंन।
MAT 12:32 जो कोयी आदमी को बेटा को विरोध म कोयी बात कहेंन, ओको यो अपराध माफ करयो जायेंन, पर जो कोयी पवित्र आत्मा को विरोध म कुछ कहेंन, ओको अपराध नहीं त यो जगत म अऊर नहीं स्वर्ग म माफ करयो जायेंन।
MAT 12:33 “यदि एक झाड़ अच्छो हय, त ओको फर भी अच्छो रहेंन, यदि एक झाड़ बुरो हय, त ओको फर भी बुरो रहेंन; कहालीकि झाड़ अपनो फर सीच पहिचान्यो जावय हय।
MAT 12:34 हे सांप को बच्चां, तुम बुरो होय क कसी अच्छी बाते कह्य सकय हय? कहालीकि जो मन म भरयो हय, उच मुंह पर आवय हय।
MAT 12:35 अच्छो आदमी मन को अन्दर सी अच्छी बाते निकालय हय, अऊर बुरो आदमी उच मन सी बुरी बाते निकालय हय।
MAT 12:36 “अऊर मय तुम सी कहू हय कि जो बुरी बाते आदमी कहेंन, न्याय को दिन हि हर एक वा बात को हिसाब देयेंन।
MAT 12:37 कहालीकि तय अपनी बातों को वजह निर्दोष, अऊर अपनी बातों को वजह दोषी ठहरायो जाजो।”
MAT 12:38 येको पर कुछ धर्मशास्त्रियों अऊर फरीसियों न ओको सी कह्यो, “हे गुरु, हम तोरो सी एक चमत्कार को चिन्ह देखनो चाहजे हय।”
MAT 12:39 ओन उन्ख उत्तर दियो, “यो पीढ़ी को बुरो अऊर व्यभिचारी लोग चिन्ह ढूंढय हंय, पर योना भविष्यवक्ता को चिन्ह ख छोड़ कोयी अऊर चिन्ह उन्ख नहीं दियो जायेंन।
MAT 12:40 योना तीन दिन अऊर तीन रात बड़ी मच्छी को पेट म रह्यो, वसोच आदमी को बेटा तीन दिन अऊर तीन रात धरती को अन्दर रहेंन।
MAT 12:41 नीनवे को लोग न्याय को दिन यो पीढ़ी को लोगों को संग उठ क उन्ख दोषी ठहरायेंन, कहालीकि उन्न योना को प्रचार सुन क मन फिरायो; अऊर देखो, इत ऊ हय जो योना सी भी बड़ो हय।
MAT 12:42 दक्षिन की रानी न्याय को दिन यो पीढ़ी को लोगों को संग उठ क उन्ख दोषी ठहरायेंन, कहालीकि ऊ सुलैमान को ज्ञान सुनन लायी धरती को छोर सी आयी हय; अऊर देखो, इत ऊ हय जो सुलैमान सी भी बड़ो हय।
MAT 12:43 “जब दुष्ट आत्मा आदमी म सी निकल जावय हय, त सूखी जागा म आराम ढूंढती फिरय हय, अऊर नहीं पावय हय।
MAT 12:44 तब कह्य हय, ‘मय अपनो उच घर म जित सी निकली होती, उतच लौट जाऊं।’ अऊर लौट क आवय हय त ओख खाली, झाड़्यो-बुहारयो अऊर सज्यो-सजायो पावय हय।
MAT 12:45 तब ऊ जाय क अपनो सी अऊर बुरी सात आत्मावों ख अपनो संग लावय हय। अऊर हि ओको म घुस क उत वाश करय हंय, अऊर ऊ आदमी की पुरानी दशा पहिले सी भी बुरी होय जावय हय। त यो पीढ़ी को बुरो लोगों की दशा भी असीच होयेंन।”
MAT 12:46 जब यीशु भीड़ सी बाते कर रह्यो होतो, तब ओकी माय अऊर भाऊ बाहेर खड़ो होतो अऊर ओको सी बाते करनो चाहत होतो।
MAT 12:47 कोयी न यीशु सी कह्यो, “देख, तोरी माय अऊर तोरो भाऊ बाहेर खड़ो हंय। अऊर तोरो सी बाते करनो चाहवय हंय।”
MAT 12:48 यो सुन क यीशु न कहन वालो ख उत्तर दियो, “कौन आय मोरी माय? अऊर कौन हंय मोरो भाऊ?”
MAT 12:49 अऊर अपनो चेलावों को तरफ अपनो हाथ बढ़ाय क कह्यो, “देखो, मोरी माय अऊर मोरो भाऊ हि आय।
MAT 12:50 कहालीकि जो कोयी मोरो स्वर्गीय पिता की इच्छा पर चलय हय, उच मोरो भाऊ, अऊर मोरी बहिन, अऊर मोरी माय आय।”
MAT 13:1 उच दिन यीशु घर सी निकल क झील को किनार को जवर जाय बैठ्यो।
MAT 13:2 अऊर ओको जवर असी बड़ी भीड़ जमा भयी कि ऊ डोंगा पर चढ़ गयो, अऊर पूरी भीड़ किनार पर खड़ी रही।
MAT 13:3 अऊर ओन उन्को सी दृष्टान्तों म बहुत सी बाते कहीं। “एक बोवन वालो बीज बोवन निकल्यो।
MAT 13:4 बोवतो समय कुछ बीज रस्ता को किनारे गिरयो अऊर पक्षिंयों न आय क उन्ख खाय लियो।
MAT 13:5 कुछ बीज गोटाड़ी जमीन पर गिरयो, जित उन्ख जादा माटी नहीं मिली अऊर गहरी माटी नहीं मिलन को वजह हि जल्दी उग गयो।
MAT 13:6 पर सूरज निकलन पर हि जर गयो, अऊर जमीन म जड़ी नहीं पकड़न को वजह हि सूख गयो।
MAT 13:7 कुछ बीज काटा को झुडूप म गिरयो अऊर काटा को झुडूप न बढ़ क उन्ख दबाय डाल्यो।
MAT 13:8 पर कुछ बीज अच्छी जमीन पर गिरयो, अऊर फर लायो, कोयी सौ गुना, कोयी साठ गुना, अऊर कोयी तीस गुना।
MAT 13:9 “जेको कान हय ऊ सुन ले।”
MAT 13:10 चेलावों न जवर आय क यीशु सी कह्यो, “तय लोगों सी दृष्टान्तों म कहाली बाते करय हय?”
MAT 13:11 यीशु न उत्तर दियो, “तुम ख स्वर्ग को राज्य को भेद की समझ दी गयी हय, पर उन्ख नहीं।”
MAT 13:12 कहालीकि जेको जवर हय, ओख दियो जायेंन, अऊर ओको जवर बहुत होय जायेंन; पर जेको जवर कुछ भी नहाय, ओको सी सब कुछ भी ले लियो जायेंन।
MAT 13:13 मय उन्को सी दृष्टान्तों म येकोलायी बाते करू हय कि हि देखतो हुयो भी नहीं देखय अऊर सुनतो हुयो भी नहीं सुनय, अऊर नहीं समझय।
MAT 13:14 उन्को बारे म यशायाह की या भविष्यवानी पूरी होवय हय: “तुम कानो सी त सुनो, पर समझो नहीं; अऊर आंखी सी त देखो, पर तुम्ख दिखेंन नहीं।
MAT 13:15 कहालीकि इन लोगों को मन मोटो भय गयो हय, अऊर हि कानो सी ऊचो सुनय हंय अऊर उन्न अपनी आंखी मूंद लियो हंय; कहीं असो नहीं होय कि हि आंखी सी देखे, अऊर कानो सी सुने अऊर मन सी समझे, अऊर फिर जाय, अऊर मय उन्ख चंगो करूं।”
MAT 13:16 पर धन्य हंय तुम्हरी आंखी, की वा देखय हंय; अऊर तुम्हरो कान की सुनय हंय।
MAT 13:17 कहालीकि मय तुम सी सच कहू हय कि बहुत सो भविष्यवक्तावों न अऊर न्यायियों न चाह्यो कि जो बाते तुम देखय हय, देखो, पर नहीं देख पायो; अऊर जो बाते तुम सुनय हय, सुनो, पर नहीं सुन सको।
MAT 13:18 “अब तुम बोवन वालो को दृष्टान्त को मतलब सुनो:
MAT 13:19 जो कोयी राज्य को वचन सुन क नहीं समझय, ओको मन म जो कुछ बोयो गयो होतो, ओख ऊ शैतान आय क छीन लेवय हय। यो उच वचन आय, जो रस्ता को किनार म बोयो गयो होतो।
MAT 13:20 अऊर जो गोटाड़ी जमीन पर बोयो गयो, यो ऊ आय, जो वचन सुन क तुरतच खुशी को संग मान लेवय हय।
MAT 13:21 पर अपनो म जड़ी नहीं रखन को वजह ऊ थोड़ो दिन को हय, अऊर जब वचन को वजह कठिनायी यां उपद्रव होवय हय, त तुरतच ठोकर खावय हय।
MAT 13:22 जो काटा को झुड़ूप म बोयो गयो, यो ऊ आय, जो वचन ख सुनय हय, पर यो जगत की चिन्ता अऊर धन को धोका वचन ख दबाय देवय हय, अऊर ऊ फर नहीं लावय।
MAT 13:23 जो अच्छी जमीन म बोयो गयो, यो ऊ आय, जो वचन ख सुन क समझय हय, अऊर फर लावय हय; कोयी सौ गुना, कोयी साठ गुना, अऊर कोयी तीस गुना।”
MAT 13:24 यीशु न उन्ख एक अऊर दृष्टान्त दियो: “स्वर्ग को राज्य ऊ आदमी को जसो हय जेन अपनो खेत म अच्छो बीज बोयो।
MAT 13:25 पर जब लोग सोय रह्यो होतो त ओको दुश्मन आय क गहूं को बीच म जंगली बीज बोय क चली गयो।
MAT 13:26 जब अंकुर निकल्यो अऊर लोम्ब लगी, त जंगली दाना को पौधा भी दिखायी दियो।
MAT 13:27 येको पर घर को सेवकों न आय क ओको सी कह्यो, ‘हे मालिक, का तय न अपनो खेत म अच्छो बीज नहीं बोयो होतो? तब जंगली दाना को पौधा ओको म कित सी आयो?’
MAT 13:28 ओन उन्को सी कह्यो, ‘यो कोयी दुश्मन को काम आय।’ सेवकों न ओको सी कह्यो, ‘का तोरी इच्छा हय, कि हम जाय क उन पौधा ख उखाड़ दे?’
MAT 13:29 ओन कह्यो, ‘नहीं, असो नहीं होय कि जंगली दाना को पौधा जमा करतो हुयो तुम उन्को संग गहूं भी उखाड़ लेवो।
MAT 13:30 काटन तक दोयी ख एक संग बढ़न देवो, अऊर काटन को समय मय काटन वालो सी कहूं कि पहिले जंगली दाना को पौधा जमा कर क् जलावन लायी उन्को बोझा बान्ध लेवो, अऊर गहूं ख मोरो ढोला म जमा कर देवो।’”
MAT 13:31 यीशु न उन्ख एक अऊर दृष्टान्त दियो: “स्वर्ग को राज्य राई को एक दाना को जसो हय, जेक कोयी आदमी न ले क अपनो खेत म बोय दियो।
MAT 13:32 ऊ सब बीज सी छोटो त होवय हय पर जब बढ़ जावय हय तब सब साग-पात सी बड़ो होवय हय; अऊर असो झाड़ होय जावय हय कि आसमान को पक्षी आय क ओकी डगालियों पर बसेरा करय हंय।”
MAT 13:33 यीशु न एक अऊर दृष्टान्त उन्को सी कह्यो: “स्वर्ग को राज्य खमीर को जसो हय जेक एक बाई तीन पसेरी मतलब बारा किलो खमीर आटा म मिलाय दियो अऊर तब तक मिलावत रही जब तक चुन आखिर म फुग नहीं जाये।”
MAT 13:34 या सब बाते यीशु न दृष्टान्तों म लोगों सी कहीं, अऊर बिना दृष्टान्त सी ऊ उन्को सी कुछ नहीं कहत होतो,
MAT 13:35 कि जो वचन भविष्यवक्ता सी कह्यो गयो होतो, ऊ पूरो हो: “मय दृष्टान्त कहन ख अपनो मुंह खोलूं: मय उन बातों ख जो जगत की उत्पत्ति सी लुक रही हंय प्रगट करूं।”
MAT 13:36 तब यीशु भीड़ ख छोड़ क घर म आयो, अऊर ओको चेलावों न यीशु को जवर आय क कह्यो, “खेत को जंगली दाना को दृष्टान्त हम्ख समझाय दे।”
MAT 13:37 यीशु न उन्ख उत्तर दियो, “अच्छो बीज ख बोवन वालो आदमी को बेटा आय।
MAT 13:38 खेत जगत आय अच्छो बीज राज्य की सन्तान, अऊर जंगली बीज दुष्ट की सन्तान आय।
MAT 13:39 जो दुश्मन न उन्ख बोयो ऊ शैतान आय; कटायी जगत को अन्त हय, अऊर काटन वालो स्वर्गदूत आय।
MAT 13:40 येकोलायी जसो जंगली दाना जमा करयो जावय अऊर जलायो जावय हंय वसोच जगत को अन्त म होयेंन।
MAT 13:41 आदमी को बेटा अपनो स्वर्गदूतों ख भेजेंन, अऊर हि ओको राज्य म सी सब ठोकर को वजह ख अऊर अधर्म को काम करन वालो ख जमा करेंन,
MAT 13:42 अऊर उन्ख आगी को कुण्ड म डालेंन, जित रोवनो अऊर दात कटरनो होयेंन।
MAT 13:43 ऊ समय सच्चो लोग अपनो स्वर्गीय पिता को राज्य म सूरज को जसो चमकेंन। जेको कान हय ऊ सुन ले।
MAT 13:44 “स्वर्ग को राज्य खेत म लूक्यो हुयो धन को जसो हय, जेक कोयी आदमी न पायो अऊर ओख फिर सी लूकाय दियो, अऊर ओको वजह खुश होय क ओन अपनो सब कुछ बिक दियो अऊर ऊ खेत ख लेय लियो।
MAT 13:45 “फिर स्वर्ग को राज्य एक व्यापारी को जसो हय जो अच्छो मोतियों की खोज म होतो।
MAT 13:46 जब ओख एक कीमती मोती मिल्यो त ओन जाय क अपनो सब कुछ बिक डाल्यो अऊर ओख ले लियो।
MAT 13:47 “फिर स्वर्ग को राज्य ऊ बड़ो जार को जसो हय जो समुन्दर म डाल्यो गयो, अऊर हर तरह की मच्छी अऊर जीवजन्तु ख जमा कर क् लायो।
MAT 13:48 अऊर जब जार मच्छी अऊर जीवजन्तु सी भर गयो, त मछवारों न ओख किनार पर झीकन क लायो, अऊर बैठ क अच्छो बर्तनों म मच्छी अऊर जीव ख जमा करयो अऊर बेकार बेकार ख फेक दियो।
MAT 13:49 जगत को अन्त म असोच होयेंन। स्वर्गदूत आय क बुरो ख सच्चो लोगों सी अलग करेंन,
MAT 13:50 अऊर उन्ख आगी को कुण्ड म डालेंन। जित रोवनो अऊर दात कटरनो होयेंन।
MAT 13:51 “का तुम न यो सब बाते समझी?” चेला न उत्तर दियो “हव।”
MAT 13:52 यीशु न उन्को सी कह्यो, “येकोलायी हर एक धर्मशास्त्री जो स्वर्ग को राज्य को चेला बन्यो हय, ऊ घर को मालिक को जसो हय जो अपनो भण्डार सी नयी अऊर पुरानी चिजे निकालय हय।”
MAT 13:53 जब यीशु यो सब दृष्टान्त कहन को बाद, उत सी चली गयो।
MAT 13:54 अऊर अपनो नगर म आय क उन्को आराधनालय म उन्ख असो उपदेश देन लग्यो कि हि अचम्भित होय क कहन लग्यो, “येख यो ज्ञान अऊर अद्भुत सामर्थ को काम कित सी मिल्यो?
MAT 13:55 का यो बढ़यी को बेटा नोहोय? अऊर का येकी माय को नाम मरियम अऊर येको भाऊ को नाम याकूब, यूसुफ, शिमोन अऊर यहूदा नोहोय?
MAT 13:56 अऊर का येकी सब बहिन हमरो बीच म नहीं रह्य? फिर येख यो सब कित सी मिल्यो?”
MAT 13:57 यो तरह उन्न ओको वजह ठोकर खायी। पर यीशु न उन्को सी कह्यो, “भविष्यवक्ता को अपनो देश अऊर अपनो घर ख छोड़ अऊर कहीं भी अपमान नहीं होवय।”
MAT 13:58 अऊर ओन उत उन्को अविश्वास को वजह बहुत सो सामर्थ को काम नहीं करयो।
MAT 14:1 ऊ समय देश को चौथाई भाग को राजा हेरोदेस न यीशु की चर्चा सुनी,
MAT 14:2 अऊर अपनो सेवकों सी कह्यो, “यो यूहन्ना बपतिस्मा देन वालो आय! ऊ मरयो हुयो म सी फिर सी जीन्दो भयो हय, येकोलायी ओको सी यो सामर्थ को काम प्रगट होवय हंय।”
MAT 14:3 कहालीकि हेरोदेस न अपनो भाऊ फिलिप्पुस की पत्नी हेरोदियास को वजह, यूहन्ना ख पकड़ क बान्ध्यो अऊर जेलखाना म डाल दियो होतो।
MAT 14:4 कहालीकि यूहन्ना न ओको सी कह्यो होतो कि येख रखनो तोरो लायी उचित नहाय।
MAT 14:5 येकोलायी ऊ ओख मार डालनो चाहत होतो, पर लोगों सी डरत होतो कहालीकि हि ओख भविष्यवक्ता मानत होतो।
MAT 14:6 पर जब हेरोदेस को जनम दिन आयो, त हेरोदियास की बेटी न उत्सव म नाच दिखाय क हेरोदेस ख खुश करयो।
MAT 14:7 येको पर ओन कसम खाय क वचन दियो, “जो कुछ तय मोख मांगजो, मय तोख देऊं।”
MAT 14:8 वा अपनी माय ख उकसायो जानो सी बोली, “यूहन्ना बपतिस्मा देन वालो को मुंड थारी म यहां मोख मंगाय देवो।”
MAT 14:9 राजा दु:खी भयो, पर अपनी कसम को, अऊर संग म जेवन करन बैठन वालो को वजह, आज्ञा दियो कि दे दियो जाये।
MAT 14:10 अऊर ओन जेलखाना म लोगों ख भेज क यूहन्ना को मुंड कटाय दियो;
MAT 14:11 अऊर ओको मुंड थारी म लायो अऊर बेटी ख दियो गयो, अऊर ओन अपनी माय को जवर ले गयी।
MAT 14:12 तब यूहन्ना को चेला आयो अऊर ओकी लाश ख लिजाय क गाड़ दियो, अऊर जाय क यीशु ख समाचार दियो।
MAT 14:13 जब यीशु न यूहन्ना को बारे म यो सुन्यो, त ऊ डोंगा पर चढ़ क उत सी कोयी सुनसान जागा को, एकान्त म चली गयो। लोग यो सुन क नगर-नगर सी पैदल चल ख ओको पीछू चली गयो।
MAT 14:14 ओन निकल क एक बड़ी भीड़ देखी अऊर उन पर तरस खायो, अऊर उन्को बीमारों ख चंगो करयो।
MAT 14:15 जब शाम भयी त ओको चेलावों न ओको जवर आय क कह्यो, “यो सुनसान जागा आय अऊर देर होय रही हय; लोगों ख बिदा करयो जाये कि हि बस्तियों म जाय क अपनो लायी भोजन ले ले।”
MAT 14:16 पर यीशु न उन्को सी कह्यो, “उन्को जानो जरूरी नहाय! तुमच इन्क खान ख देवो।”
MAT 14:17 उन्न ओको सी कह्यो, “इत हमरो जवर पाच रोटी अऊर दोय मच्छी ख छोड़ क अऊर कुछ नहाय।”
MAT 14:18 यीशु न कह्यो, “उन्ख इत मोरो जवर लावो।”
MAT 14:19 तब यीशु न लोगों ख घास पर बैठन ख कह्यो, अऊर उन पाच रोटी अऊर दोय मच्छी ख लियो; अऊर स्वर्ग को तरफ देख क धन्यवाद करयो अऊर रोटी तोड़-तोड़ क चेलावों ख दियो, अऊर चेलावों न लोगों ख।
MAT 14:20 जब सब लोग खाय क सन्तुष्ट भय गयो, त चेलावों न बच्यो हुयो टुकड़ा सी भरी हुयी बारा टोकनियां उठायी।
MAT 14:21 अऊर खान वालो बाईयों अऊर बच्चां ख छोड़ क, पाच हजार आदमियों को लगभग होतो।
MAT 14:22 तब यीशु न तुरतच अपनो चेलावों ख डोंगा पर चढ़न लायी मजबूर करयो कि हि ओको सी पहिले ओन पार चली जाये, जब तक ऊ लोगों ख बिदा करे।
MAT 14:23 ऊ लोगों ख बिदा कर क्, प्रार्थना करन ख अलग पहाड़ी पर चली गयो; अऊर शाम ख ऊ उत अकेलो होतो।
MAT 14:24 ऊ समय डोंगा किनार सी दूर झील को बीच लहरो सी डगमगावत होतो, कहालीकि हवा आगु की होती।
MAT 14:25 अऊर यीशु तीन बजे सी छे बजे को बीच भुन्सारो म झील पर चलतो हुयो उन्को जवर आयो।
MAT 14:26 चेला ओख झील पर चलतो हुयो देख क घबराय गयो। अऊर कहन लग्यो, “यो भूत आय!” अऊर डर को मारे चिल्लावन लग्यो।
MAT 14:27 तब यीशु न तुरतच उन्को सी बाते करी अऊर कह्यो, “हिम्मत रखो! मय आय, डरो मत!”
MAT 14:28 पतरस न ओख उत्तर दियो, “हे प्रभु, यदि तयच आय, त मोख अपनो जवर पानी पर चल क आवन कि आज्ञा दे।”
MAT 14:29 ओन कह्यो, “आव!” तब पतरस डोंगा पर सी उतर क यीशु को जवर जाय क पानी पर चलन लग्यो।
MAT 14:30 पर हवा ख देख क डर गयो, अऊर जब डुबन लग्यो त चिल्लाय क कह्यो, “हे प्रभु, मोख बचाव!”
MAT 14:31 यीशु न तुरतच हाथ बढ़ाय क ओख धर लियो अऊर ओको सी कह्यो, “हे अविश्वासी, तय न कहाली सक करयो?”
MAT 14:32 जब हि डोंगा पर चढ़ गयो, त हवा रुक गयी।
MAT 14:33 येको पर उन्न जो डोंगा पर होतो, ओख दण्डवत प्रनाम कर क् कह्यो, “सचमुच, तय परमेश्वर को बेटा आय।”
MAT 14:34 हि झील को ओन पार उतर क गन्नेसरत म पहुंच्यो।
MAT 14:35 उत को लोगों न ओख पहिचान लियो अऊर आजु बाजू को पूरो देश म सुसमाचार भेज्यो, अऊर सब बीमारों ख ओको जवर लायो,
MAT 14:36 अऊर ओको सी बिनती करन लग्यो कि ऊ उन्ख अपनो कपड़ा को कोना ख छूवन दे; अऊर जितनो न ओको कपड़ा ख छूयो, हि चंगो भय गयो।
MAT 15:1 तब यरूशलेम सी कुछ फरीसी अऊर धर्मशास्त्री यीशु को जवर आय क कहन लग्यो,
MAT 15:2 “तोरो चेला बुजूर्गों की परम्परावों ख कहाली टालय हंय, कि हाथ धोयो बिना रोटी खावय हंय?”
MAT 15:3 यीशु न उन्ख उत्तर दियो, “तुम भी अपनी परम्परावों को वजह कहाली परमेश्वर की आज्ञा टालय हय?”
MAT 15:4 कहालीकि परमेश्वर न कह्यो हय, “अपनो बाप अऊर माय को आदर करजो, अऊर जो कोयी बाप यां माय ख बुरो कहेंन, ऊ मार डाल्यो जाय।”
MAT 15:5 पर तुम कह्य हय कि यदि कोयी अपनो बाप यां माय सी कहे, “जो कुछ तोख मोरो सी फायदा मिल सकत होतो, ऊ परमेश्वर ख दान कर दियो,”
MAT 15:6 त ऊ अपनो बाप को आदर नहीं करय, यो तरह तुम न अपनी परम्परा को वजह परमेश्वर को वचन ख टाल दियो।
MAT 15:7 हे कपटियों, यशायाह न तुम्हरो बारे म या भविष्यवानी ठीकच करी हय:
MAT 15:8 “हि लोग होठों सी त मोरो आदर करय हंय, पर उन्को मन मोरो सी दूर रह्य हय।
MAT 15:9 अऊर हि बेकार म मोरी भक्ति करय हंय, कहालीकि उन्की शिक्षा त केवल आदमियों को सिखायो हुयो नियम शास्त्र हंय।”
MAT 15:10 तब ओन भीड़ ख अपनो जवर बुलाय क उन्को सी कह्यो, “सुनो, अऊर समझो:
MAT 15:11 जो मुंह म जावय हय, ऊ आदमी ख अशुद्ध नहीं करय, पर जो मुंह सी निकलय हय, उच आदमी ख अशुद्ध करय हय।”
MAT 15:12 तब चेलावों न आय क यीशु सी कह्यो, “का तय जानय हय कि फरीसियों न यो वचन सुन क ठोकर खायो?”
MAT 15:13 ओन उत्तर दियो, “हर एक रोप जो मोरो स्वर्गीय पिता न नहीं लगायो, ऊ उखाड़्यो जायेंन।
MAT 15:14 उन्ख जान देवो; हि अन्धा रस्ता दिखावन वालो आय अऊर अन्धा यदि अन्धो आदमी ख रस्ता दिखाये, त दोयीच गड्डा म गिर जायेंन।”
MAT 15:15 यो सुन क पतरस न ओको सी कह्यो, “यो दृष्टान्त हम्ख समझाय दे।”
MAT 15:16 यीशु न कह्यो, “का तुम भी अब तक नासमझ हय?
MAT 15:17 का तुम नहीं जानय कि जो कुछ मुंह म जावय हय, ऊ पेट म पड़य हय, अऊर शरीर सी निकल जावय हय?
MAT 15:18 पर जो कुछ मुंह सी निकलय हय, ऊ मन सी निकलय हय, अऊर उच आदमी ख अशुद्ध करय हय।
MAT 15:19 कहालीकि बुरो बिचार, हत्या, परस्त्रीगमन, व्यभिचार, चोरी, झूठी गवाही अऊर निन्दा यो मन सीच निकलय हय।
MAT 15:20 योच आय जो आदमी ख अशुद्ध करय हंय, पर बिना हाथ धोयो जेवन करनो आदमी ख अशुद्ध नहीं करय।”
MAT 15:21 यीशु उत सी निकल क, सूर अऊर सैदा को प्रदेश को तरफ चली गयो।
MAT 15:22 अऊर देखो, ऊ प्रदेश की एक कनानी बाई निकल क आयी, अऊर जोर की आवाज सी कहन लगी, “हे प्रभु! दाऊद की सन्तान, मोरो पर दया कर! मोरी बेटी ख दुष्ट आत्मा सताय रही हय।”
MAT 15:23 पर ओन ओख कुछ भी उत्तर नहीं दियो। चेलावों न ओको जवर आय क बिनती करन लग्यो, “येख भेज दे, कहालीकि वा चिल्लाती हमरो पीछू आय रही हय।”
MAT 15:24 पर यीशु न उत्तर दियो, “इस्राएल को घराना की खोयी हुयी मेंढीं ख छोड़ मय कोयी को जवर नहीं भेज्यो गयो।”
MAT 15:25 पर वा आयी, अऊर यीशु ख प्रनाम कर क् कहन लगी, “हे प्रभु, मोरी मदद कर!”
MAT 15:26 यीशु न उत्तर दियो, “बच्चा की रोटी ले क कुत्ता को आगु डालनो ठीक नहाय।”
MAT 15:27 यो बात पर बाई न कह्यो, “सच हय प्रभु, पर कुत्ता भी ऊ जुठो खावय हंय, जो उन्को मालिक की मेज सी गिरय हंय।”
MAT 15:28 येको पर यीशु न ओख उत्तर दियो, “हे बाई, तोरो विश्वास बड़ो हय। जसो तय चाहवय हय, तोरो लायी वसोच हो।” अऊर ओकी बेटी उच घड़ी सी चंगी भय गयी।
MAT 15:29 यीशु उत सी गलील को झील को जवर आयो, अऊर उत पहाड़ी पर चढ़ क बैठ गयो।
MAT 15:30 तब भीड़ की भीड़ ओको जवर आयी। हि अपनो संग बहुत लंगड़ा, अन्धा, मुक्का, टुण्डा अऊर दूसरों बहुत सो ख ओको जवर लायो, अऊर उन्ख ओको पाय पर डाल दियो, अऊर ओन उन्ख चंगो कर दियो।
MAT 15:31 जब लोगों न देख्यो कि मुक्का बोलय, अऊर टुण्डा चंगो होवय, अऊर लंगड़ा चलय, अऊर अन्धा देखय हंय त अचम्भा कर क् इस्राएल को परमेश्वर की बड़ायी करी।
MAT 15:32 यीशु न अपनो चेलावों ख बुलाय क कह्यो, “मोख यो भीड़ पर तरस आवय हय, कहालीकि हि तीन दिन सी मोरो संग हंय अऊर उन्को जवर कयीच खान को नहाय। मय उन्ख भूखो भेजनो नहीं चाहऊ, कहीं असो नहीं होय कि रस्ता म थक क रह्य जाये।”
MAT 15:33 चेलावों न यीशु सी कह्यो, “हम्ख यो जंगल म कित सी इतनी रोटी मिलेंन कि हम इतनी बड़ी भीड़ ख सन्तुष्ट करबो?”
MAT 15:34 यीशु न उन्को सी पुच्छ्यो, “तुम्हरो जवर कितनी रोटी हंय?” उन्न कह्यो, “सात, अऊर थोड़ी सी छोटी मच्छी।”
MAT 15:35 तब यीशु न लोगों ख जमीन पर बैठन की आज्ञा दियो।
MAT 15:36 अऊर उन सात रोटी अऊर मच्छी ख लियो, अऊर धन्यवाद कर क् तोड़्यो, अऊर अपनो चेलावों ख देतो गयो, अऊर चेलावों न लोगों ख।
MAT 15:37 तब सब खाय क सन्तुष्ट भय गयो अऊर चेलावों न बच्यो हुयो टुकड़ा सी भरयो हुयो सात टोकनी उठायी।
MAT 15:38 जितनो न खायो, उन्म बाईयों अऊर बच्चां को अलावा चार हजार आदमी होतो।
MAT 15:39 तब उन भीड़ ख बिदा कर क् डोंगा पर चढ़ गयो, अऊर मगदन क्षेत्र म आयो।
MAT 16:1 यीशु को जवर फरीसियों अऊर सदूकियों न आय क परखन लायी ओको सी कह्यो, “हम्ख स्वर्ग को कोयी चिन्ह दिखाव।”
MAT 16:2 यीशु न उन्ख उत्तर दियो, “शाम ख तुम कह्य हय, ‘मौसम अच्छो रहेंन, कहालीकि आसमान लाल हय,’
MAT 16:3 अऊर भुन्सारे म कह्य हय, ‘अज आन्धी आयेंन, कहालीकि आसमान लाल अऊर धूंधलो हय।’ तुम आसमान को हवामान ख देख क ओको भेद बताय सकय हय, पर समय को चिन्ह को भेद कहाली नहीं बताय सकय?
MAT 16:4 यो युग को बुरो अऊर व्यभिचारी लोग चिन्ह ढूंढय हंय, पर योना को चिन्ह ख छोड़ उन्ख अऊर कोयी चिन्ह दियो नहीं जायेंन।” अऊर ऊ उन्ख छोड़ क चली गयो।
MAT 16:5 चेला समुन्दर को ओन पार पहुंच्यो, पर हि रोटी धरनो भूल गयो होतो।
MAT 16:6 यीशु न उन्को सी कह्यो, “देखो, फरीसियों अऊर सदूकियों को खमीर जसो शिक्षा सी चौकस रहजो।”
MAT 16:7 हि आपस म बिचार करन लग्यो, “हम न रोटी नहीं लायो येकोलायी ऊ असो कह्य हय।”
MAT 16:8 यो जान क, यीशु न उन्को सी कह्यो, “हे अविश्वासियों, तुम आपस म कहाली बिचार करय हय कि हमरो जवर रोटी नहाय?
MAT 16:9 का तुम अब तक नहीं समझ्यो? का याद करय कि जब पाच हजार लोगों लायी पाच रोटी होती त तुम्न कितनी टोकनियां उठायी होती?
MAT 16:10 अऊर चार हजार लायी सात रोटी होती त तुम्न कितनी टोकनी उठायी होती?
MAT 16:11 तुम कहाली नहीं समझय कि मय न तुम्हरो सी रोटी को बारे म नहीं कह्यो, पर यो कि तुम फरीसियों अऊर सदूकियों को खमीर सी चौकस रहजो।”
MAT 16:12 तब चेला को समझ म आयो कि ओन रोटी को खमीर को बारे म नहीं, पर फरीसियों अऊर सदूकियों की शिक्षा सी चौकस रहन लायी कह्यो होतो।
MAT 16:13 यीशु कैसरिया फिलिप्पी को प्रदेश म आयो, अऊर अपनो चेलावों सी पूछन लग्यो, “लोग आदमी को बेटा ख का कह्य हंय?”
MAT 16:14 उन्न कह्यो, “कुछ त यूहन्ना बपतिस्मा देन वालो कह्य हंय, अऊर कुछ एलिय्याह, अऊर कुछ यिर्मयाह यां भविष्यवक्तावों म सी कोयी एक कह्य हंय।”
MAT 16:15 ओन उन्को सी कह्यो, “पर तुम मोख का कह्य हय?”
MAT 16:16 शिमोन पतरस न उत्तर दियो, “तय जीन्दो परमेश्वर को बेटा मसीह आय।”
MAT 16:17 यीशु न ओख उत्तर दियो, “हे शिमोन, योना को बेटा, तय धन्य हय; कहालीकि मांस अऊर खून न नहीं; पर मोरो बाप न जो स्वर्ग म हय, यो बात तोरो पर प्रगट करी हय।
MAT 16:18 अऊर मय भी तोरो सी कहू हय कि तय पतरस आय, अऊर मय यो गोटा पर अपनी मण्डली बनाऊं, अऊर मृत्यु की सामर्थ ओको पर हावी नहीं होयेंन।
MAT 16:19 मय तोख स्वर्ग को राज्य की कुंजी देऊं: अऊर जो कुछ तय धरती पर बान्धजो, ऊ स्वर्ग म बन्धेंन; अऊर जो कुछ तय धरती पर खोलजो, ऊ स्वर्ग म खुलेंन।”
MAT 16:20 तब ओन चेलावों ख चितायो कि कोयी सी मत कहजो कि मय मसीह आय।
MAT 16:21 ऊ समय सी यीशु अपनो चेलावों ख बतावन लग्यो, “जरूरी हय कि मय यरूशलेम ख जाऊं अऊर बुजूर्गों, अऊर मुख्य याजकों, अऊर धर्मशास्त्रियों को हाथ सी बहुत दु:ख उठाऊ; अऊर मार डाल्यो जाऊं; अऊर तीसरो दिन जीन्दो होऊं।”
MAT 16:22 येको पर पतरस ओख अलग लिजाय क डाटन लग्यो, “हे प्रभु परमेश्वर असो नहीं करे! तोरो संग असो कभी नहीं होयेंन।”
MAT 16:23 ओन मुड़ क पतरस सी कह्यो, “हे शैतान, मोरो आगु सी दूर होय जा! तय मोरो लायी ठोकर को वजह हय; कहालीकि तय परमेश्वर की बातों पर नहीं, पर आदमियों की बातों पर मन लगावय हय।”
MAT 16:24 तब यीशु न अपनो चेलावों सी कह्यो, “यदि कोयी मोरो पीछू आवनो चाहवय, त अपनो खुद को इन्कार करे अऊर अपनो क्रूस उठाये, अऊर मोरो पीछू हो ले।
MAT 16:25 कहालीकि जो कोयी अपनो जीव बचावनो चाहेंन, ऊ ओख खोयेंन; अऊर जो कोयी मोरो लायी अपनो जीव खोयेंन, ऊ ओख पायेंन।
MAT 16:26 यदि आदमी पूरो जगत ख पा ले अऊर अपनो जीव की हानि उठायेंन, त ओख का फायदा होयेंन? यो आदमी अपनो जीव को बदला का देयेंन?
MAT 16:27 आदमी को बेटा अपनो स्वर्गदूतों को संग अपनो बाप की महिमा म आयेंन, अऊर ऊ घड़ी ‘ऊ हर एक ख ओको काम को अनुसार प्रतिफल देयेंन।’
MAT 16:28 मय तुम सी सच कहू हय कि जो इत खड़ो हंय, उन्म सी कुछ असो हंय कि हि जब तक आदमी को बेटा ख ओको राज्य म आवतो हुयो नहीं देख लेयेंन, तब तक मरन को स्वाद कभी नहीं चखेंन।”
MAT 17:1 छे दिन को बाद यीशु न पतरस अऊर याकूब अऊर ओको भाऊ यूहन्ना ख अपनो संग ले क उन्ख एकान्त म कोयी ऊचो पहाड़ी पर ले गयो।
MAT 17:2 उत उन्को आगु ओको रूप को बदलाव भयो अऊर ओको मुंह सूरज को जसो चमक्यो अऊर ओको कपड़ा प्रकाश को जसो उजलो भय गयो।
MAT 17:3 अऊर मूसा अऊर एलिय्याह ओको संग बाते करतो हुयो उन्ख दिखायी दियो।
MAT 17:4 येको पर पतरस न यीशु सी कह्यो, “हे प्रभु, हमरो इत रहनो अच्छो हय। यदि तोरी इच्छा हय त मय इत तीन मण्डा बनाऊं; एक तोरो लायी, एक मूसा लायी, अऊर एक एलिय्याह लायी।”
MAT 17:5 ऊ बोलतच रह्यो होतो कि एक उज्वल बादर न उन्ख छाय लियो, अऊर ऊ बादर म सी यो आवाज निकली: “यो मोरो प्रिय बेटा आय, जेकोसी मय बहुत खुश हय: येकी सुनो।”
MAT 17:6 जब चेलावों न यो सुन्यो त हि मुंह को बल गिरयो अऊर बहुत डर गयो।
MAT 17:7 यीशु न जवर आय क उन्ख छूयो, अऊर कह्यो, “उठो, डरो मत।”
MAT 17:8 तब उन्न ऊपर देख्यो अऊर यीशु ख छोड़ अऊर कोयी ख नहीं देख्यो।
MAT 17:9 जब हि पहाड़ी सी उतर रह्यो होतो तब यीशु न उन्ख यो आज्ञा दियो, “जब तक आदमी को बेटा मरयो हुयो म सी जीन्दो नहीं होवय, तब तक जो कुछ तुम न देख्यो हय कोयी सी मत कहजो।”
MAT 17:10 येको पर ओको चेलावों न ओको सी पुच्छ्यो, “फिर धर्मशास्त्री कहाली कह्य हंय कि एलिय्याह को पहिलो आवनो जरूरी हय?”
MAT 17:11 ओन उत्तर दियो, “एलिय्याह जरूर आयेंन,” अऊर सब कुछ सुधारेंन।
MAT 17:12 पर मय तुम सी कहू हय कि एलिय्याह आय गयो हय, अऊर लोगों न ओख नहीं जान्यो; पर जसो उन्न चाह्यो वसोच ओको संग करयो। वसोच आदमी को बेटा भी उन्को हाथ सी दु:ख उठायेंन।
MAT 17:13 तब चेलावों न समझ्यो कि ओन हमरो सी यूहन्ना बपतिस्मा देन वालो को बारे म कह्यो होतो।
MAT 17:14 जब हि भीड़ को जवर पहुंच्यो, त एक आदमी यीशु को जवर आयो, अऊर ओको आगु घुटना टेक क कहन लग्यो,
MAT 17:15 “हे प्रभु, मोरो बेटा पर दया कर! कहालीकि ओख मिर्गी आवय हय, अऊर ऊ बहुत दु:ख उठावय हय; अऊर बार-बार कभी आगी अऊर कभी पानी म गिर पड़य हय।
MAT 17:16 मय ओख तोरो चेलावों को जवर लायो होतो, पर हि ओख चंगो नहीं कर सक्यो।”
MAT 17:17 यीशु न उत्तर दियो, “हे अविश्वासी अऊर जिद्दी लोगों, मय कब तक तुम्हरो संग रहूं? मय कब तक तुम्हरी सहूं? ओख इत मोरो जवर लावो।”
MAT 17:18 तब यीशु न दुष्ट आत्मा ख डाट्यो, अऊर वा ओको म सी निकल गयी; अऊर बेटा उच घड़ी चंगो भय गयो।
MAT 17:19 तब चेलावों न एकान्त म यीशु को जवर आय क कह्यो, “हम दुष्ट आत्मा कहाली नहीं निकाल सक्यो?”
MAT 17:20 ओन उन्को सी कह्यो, “अपनो विश्वास की कमी को वजह सी, कहालीकि मय तुम सी सच कहू हंय, यदि तुम्हरो विश्वास राई को दाना को बराबर भी हय, त यो पहाड़ी सी कहजो, ‘इत सी सरक क उत चली जा,’ त ऊ चली जायेंन; अऊर कोयी बात तुम्हरो लायी असम्भव नहीं होयेंन।
MAT 17:21 पर यो जाति प्रार्थना अऊर उपवास को अलावा अऊर कोयी उपाय सी नहीं निकलय।”
MAT 17:22 जब हि गलील क्षेत्र म होतो, त यीशु न उन्को सी कह्यो, “आदमी को बेटा आदमियों को हाथ म पकड़ायो जायेंन;
MAT 17:23 हि ओख मार डालेंन, अऊर ऊ तीसरो दिन जीन्दो होयेंन।” यो बात पर चेला बहुत उदास भयो।
MAT 17:24 जब हि कफरनहूम पहुंच्यो, त मन्दिर को कर लेनवालो न पतरस को जवर आय क पुच्छ्यो, “का तुम्हरो गुरु मन्दिर को कर नहीं देवय?”
MAT 17:25 ओन कह्यो, “हव, देवय हय।” जब ऊ घर म आयो, त यीशु न पहिले ओको सी पुच्छ्यो, “शिमोन, तय का सोचय हय? धरती को राजा चुंगी यां कर कौन्को सी लेवय हंय, अपनो बेटा सी यां परायो सी?”
MAT 17:26 पतरस न ओको सी कह्यो, “परायो सी।” यीशु न ओको सी कह्यो, “त बेटा कर देनो सी बच गयो।
MAT 17:27 पर असो नहीं होय कि हम उन्को लायी ठोकर को वजह बने, तय झील को किनार जाय क गरी डाल, अऊर जो मच्छी पहिले निकले, ओख ले; अऊर ओको मुंह खोलन पर तोख एक सिक्का मिलेंन, ओख ले क मोरो अऊर अपनो बदला को उन्ख दे देजो।”
MAT 18:1 ऊ समय चेला यीशु को जवर आय क पूछन लग्यो, “स्वर्ग को राज्य म सब सी बड़ो कौन हय?”
MAT 18:2 येको पर ओन एक बच्चा ख जवर बुलाय क उन्को बीच म खड़ो करयो,
MAT 18:3 अऊर कह्यो, “मय तुम सी सच कहू हय कि जब तक तुम नहीं फिरो अऊर बच्चा को जसो नहीं बनो, त तुम स्वर्ग को राज्य म सिरनो नहीं पावों।
MAT 18:4 जो कोयी अपनो आप ख यो बच्चा को जसो छोटो करेंन, ऊ स्वर्ग को राज्य म बड़ो होयेंन।
MAT 18:5 अऊर जो कोयी मोरो नाम सी एक असो बच्चा ख स्वीकार करय हय ऊ मोख स्वीकार करय हय।
MAT 18:6 “पर जो कोयी इन छोटो म सी जो मोरो पर विश्वास करय हंय एक ख ठोकर खिलावय, त ओको लायी ठीक होतो कि ओको गरो म गरहट को पाट लटकाय क ओख समुन्दर की गहरायी म डुबायो जातो।
MAT 18:7 ठोकरो को वजह सी जगत पर हाय! ठोकरो को लगनो जरूरी हय; पर हाय ऊ आदमी पर जेकोसी ठोकर लगय हय।
MAT 18:8 “यदि तोरो हाथ यां तोरो पाय तोख ठोकर खिलावय, त ओख काट क फेक दे; कहालीकि तोरो लायी टुण्डा यां लंगड़ा होय क जीवन म सिरनो येको सी कहीं अच्छो हय कि तय दोय हाथ यां दोय पाय होतो हुयो, अनन्त आगी म डाल्यो जाये।
MAT 18:9 यदि तोरी आंखी तोख ठोकर खिलावय, त ओख निकाल क फेक दे; कहालीकि तोरो लायी एक आंखी सी अन्धो होय क जीवन म सिरनो येको सी कहीं अच्छो हय कि दोय आंखी रह्य क भी तय नरक की आगी म डाल्यो जाये।
MAT 18:10 “देखो, तुम इन छोटो म सी कोयी ख भी तुच्छ नहीं जानो; कहालीकि मय तुम सी कहू हय कि स्वर्ग म उन्को दूत मोरो स्वर्गीय पिता को मुंह हमेशा देखय हय।
MAT 18:11 कहालीकि आदमी को बेटा खोयो हुयो ख बचावन आयो हय।
MAT 18:12 “तुम का सोचय हय? यदि कोयी आदमी की सौ मेंढीं हय, अऊर उन्म सी एक भटक जाये, त का ऊ निन्यानवे ख पहाड़ी पर छोड़ क ऊ भटक्यो हुयो मेंढा ख नहीं ढूंढेंन?
MAT 18:13 अऊर यदि असो होय कि ओख मिल जावय, त मय तुम सी सच कहू हय कि ऊ उन निन्यानवे मेंढीं लायी जो भटक्यो नहीं होतो, इतनो खुशी नहीं करेंन जितनो कि यो मेंढा लायी करेंन।
MAT 18:14 असोच तुम्हरो बाप की जो स्वर्ग म हय यो इच्छा नहाय कि इन छोटो म सी एक भी नाश होय।
MAT 18:15 “यदि तोरो भाऊ तोरो विरोध म अपराध करे, त जा अऊर अकेलो म बातचीत कर क् ओख समझाव; यदि ऊ तोरी सुनय त तय न अपनो भाऊ ख पा लियो।
MAT 18:16 यदि ऊ नहीं सुनय, त एक यां दोय लोगों ख अपनो संग अऊर लिजाव, कि ‘हर एक बात दोय यां तीन गवाहों को मुंह सी निश्चित करयो जाये।’
MAT 18:17 यदि ऊ उन्की भी नहीं मानय, त मण्डली सी कह्य दे, पर यदि ऊ मण्डली की भी न मानय त तय ओख गैरयहूदी अऊर कर लेनवालो जसो जान।
MAT 18:18 “मय तुम सी सच कहूं हय, जो कुछ तुम धरती पर बान्धो, ऊ स्वर्ग म बन्धेंन अऊर जो कुछ तुम धरती पर खोलो, ऊ स्वर्ग म खुलेंन।
MAT 18:19 “तब मय तुम सी सच कहूं हय, यदि तुम म सी दोय लोग धरती पर कोयी बात लायी एक मन होय क ओख मांगेंन, त ऊ मोरो बाप को तरफ सी जो स्वर्ग म हय, उन्को लायी होय जायेंन।
MAT 18:20 कहालीकि जित दोय यां तीन मोरो नाम पर जमा होवय हंय, उत मय उन्को बीच म होऊं हय।”
MAT 18:21 तब पतरस न जवर आय क ओको सी कह्यो, “हे प्रभु, यदि मोरो भाऊ अपराध करतो रह्यो, त मय कितनो बार ओख माफ करूं? का सात बार तक?”
MAT 18:22 यीशु न ओको सी कह्यो, “मय तोरो सी यो नहीं कहूं कि सात बार तक, बल्की सात बार को सत्तर गुना तक।”
MAT 18:23 येकोलायी स्वर्ग को राज्य ऊ राजा को जसो हय, जेन अपनो सेवकों सी हिसाब लेनो चाह्यो।
MAT 18:24 जब ऊ हिसाब लेन लग्यो, त एक लोग ओको जवर लायो गयो जो करोड़ो को कर्जदार होतो।
MAT 18:25 जब कि कर्ज चुकावन लायी ओको जवर कुछ भी नहीं होतो, त ओको मालिक न कह्यो, “यो अऊर येकी पत्नी अऊर येको बाल-बच्चा अऊर जो कुछ येको हय सब कुछ बेच्यो जाये, अऊर कर्ज चुकाय दियो जाये।
MAT 18:26 येको पर ऊ सेवक न गिर क ओख प्रनाम करयो, अऊर कह्यो, हे मालिक धीरज धर, मय सब कुछ भर देऊं।”
MAT 18:27 तब ऊ सेवक को मालिक न दया कर क ओख छोड़ दियो, अऊर ओको कर्ज भी माफ कर दियो।
MAT 18:28 “पर जब ऊ सेवक बाहेर निकल्यो, त ओको संगी सेवकों म सी एक ओख मिल्यो जो ओको सौ दीनार को कर्जदार होतो; ओन ओख पकड़ क ओकी घाटी पिचकल्यो अऊर कह्यो, ‘जो कुछ तोरो पर कर्ज हय भर दे।’
MAT 18:29 येको पर ओको संगी सेवक ओको पाय पर गिर क ओको सी बिनती करन लग्यो, ‘धीरज धर, मय सब भर देऊं।’
MAT 18:30 ओन नहीं मान्यो, पर जाय क ओख जेलखाना म डाल दियो कि जब तक कर्ज भर नहीं दे तब तक उतच रहे।
MAT 18:31 ओको संगी सेवक यो जो भयो होतो ओख देख क बहुत उदास भयो, अऊर जाय क अपनो मालिक ख पूरो हाल बताय दियो।
MAT 18:32 तब ओको मालिक न ओख बुलाय क ओको सी कह्यो, ‘हे दुष्ट सेवक, तय न जो मोरो सी बिनती करी, त मय न तोरो पूरो कर्ज माफ कर दियो।
MAT 18:33 येकोलायी जसो मय न तोरो पर दया करी, वसोच का तोख भी अपनो संगी सेवक पर दया करनो नहीं चाहत होतो?’
MAT 18:34 अऊर ओको मालिक न गुस्सा म आय क ओख सजा देन वालो को हाथ म सौंप दियो, कि जब तक ऊ पूरो कर्ज भर नहीं दे, तब तक ऊ उन्को हाथ म रहेंन।
MAT 18:35 “येकोलायी यदि तुम म सी हर एक अपनो भाऊ ख मन सी माफ नहीं करेंन, त मोरो बाप जो स्वर्ग म हय, तुम सी भी वसोच करेंन।”
MAT 19:1 जब यीशु या बाते कह्य दियो, तब गलील सी चली गयो; अऊर यरदन नदी को पार यहूदिया को प्रदेश म आयो।
MAT 19:2 तब बड़ी भीड़ ओको पीछू भय गयी, अऊर ओन उत उन्ख चंगो करयो।
MAT 19:3 तब फरीसी ओकी परीक्षा लेन लायी ओको जवर आय क कहन लग्यो, “का कोयी भी अपनी पत्नी ख कोयी भी वजह सी छोड़ देनो उचित हय?”
MAT 19:4 ओन उत्तर दियो, “का तुम न नहीं पढ़्यो कि जेन उन्ख बनायो? ओन सुरूवात सीच नर अऊर नारी बनायो,
MAT 19:5 अऊर कह्यो ‘येकोलायी आदमी अपनो माय-बाप सी अलग होय क अपनी पत्नी को संग रहेंन अऊर हि दोयी एक शरीर होयेंन?’
MAT 19:6 येकोलायी हि अब दोय नहीं, पर एक शरीर हंय। येकोलायी जेक परमेश्वर न जोड़्यो हय, ओख आदमी अलग नहीं करे।”
MAT 19:7 उन्न यीशु सी कह्यो, “त मूसा न यो कहाली ठहरायो हय कि कोयी पति अपनी पत्नी ख छोड़चिट्ठी दे क छोड़ दे?”
MAT 19:8 ओन उन्को सी कह्यो, “मूसा न तुम्हरो मन की कठोरता को वजह तुम्ख अपनी-अपनी पत्नी ख छोड़ देन की आज्ञा दी, पर सुरूवात सी असो नहीं होतो।
MAT 19:9 अऊर मय तुम सी कहूं हय, कि जो कोयी व्यभिचार ख छोड़ अऊर कोयी वजह सी अपनी पत्नी ख छोड़ क दूसरी सी बिहाव करे, त ऊ व्यभिचार करय हय।”
MAT 19:10 तब चेलावों न यीशु सी कह्यो, “यदि आदमी को अपनी पत्नी को संग असो सम्बन्ध हय, त यो अच्छो हय कि बिहाव नहीं करे।”
MAT 19:11 पर ओन कह्यो, “हि सब बिहाव को बिना नहीं रह्य सकय हंय, पर केवल उच रह्य सकय हय जेक यो दान दियो गयो हय।
MAT 19:12 कहालीकि कुछ नपुसक असो हंय, जो अपनी माय को गर्भ सी असो पैदा भयो; अऊर कुछ नपुसक असो हंय, जिन्ख आदमी न नपुसक बनायो; अऊर कुछ नपुसक असो भी हंय, जिन्न स्वर्ग को राज्य लायी अपनो आप ख नपुसक बनायो हय। जो येख स्वीकार कर सकय हय, ऊ स्वीकार करे।”
MAT 19:13 तब लोग बच्चां ख ओको जवर लायो कि ऊ उन पर हाथ रख क प्रार्थना करे, पर चेलावों न उन्ख डाट्यो।
MAT 19:14 तब यीशु न कह्यो, “बच्चां ख मोरो जवर आवन देवो, अऊर उन्ख मना मत कर, कहालीकि स्वर्ग को राज्य असोच को हय।”
MAT 19:15 अऊर ऊ उन पर हाथ रखन को बाद उत सी चली गयो।
MAT 19:16 एक आदमी यीशु को जवर आयो अऊर ओको सी कह्यो, “हे गुरु, मय कौन सो भलो काम करूं कि अनन्त जीवन पाऊ?”
MAT 19:17 यीशु न ओको सी कह्यो, “तय मोरो सी भलायी को बारे म कहाली पूछय हय? भलो त एकच हय, पर यदि तय जीवन म सिरनो चाहवय हय, त आज्ञावों ख मानतो जावो।”
MAT 19:18 ओन ओको सी कह्यो, “कौन सी आज्ञा?” यीशु न कह्यो, “यो कि हत्या नहीं करनो, व्यभिचार नहीं करनो, चोरी नहीं करनो, झूठी गवाही नहीं देनो,
MAT 19:19 अपनो बाप अऊर अपनी माय को आदर करनो, अऊर अपनो पड़ोसी सी अपनो जसो प्रेम रखनो।”
MAT 19:20 ऊ जवान न यीशु सी कह्यो, “इन सब ख त मय न मान्यो हय; अब मोरो म कौन्सी बात की कमी हय?”
MAT 19:21 यीशु न ओको सी कह्यो, “यदि तय सिद्ध होनो चाहवय हय त जा, अपनो धन जायजाद बेच क गरीबों ख दे, अऊर तोख स्वर्ग म धन मिलेंन: अऊर आय क मोरो पीछू हो जा।”
MAT 19:22 पर ऊ जवान यो बात सुन्क उदास होय क चली गयो, कहालीकि ऊ बहुत धनी होतो।
MAT 19:23 तब यीशु न अपनो चेलावों सी कह्यो, “मय तुम सी सच कहू हय कि धनवान को स्वर्ग को राज्य म सिरनो कठिन हय।
MAT 19:24 तुम सी फिर कहू हय कि परमेश्वर को राज्य म धनवान को सिरनो सी ऊंट को सूई को नाक म सी निकल जानोच सहज हय।”
MAT 19:25 यो सुन क चेलावों न बहुत अचम्भित होय क कह्यो, “फिर कौन्को उद्धार होय सकय हय?”
MAT 19:26 यीशु न उन्को तरफ देख क कह्यो, “आदमियों सी त यो नहीं होय सकय, पर परमेश्वर सी सब कुछ होय सकय, हय।”
MAT 19:27 येको पर पतरस न यीशु सी कह्यो, “देख, हम त सब कुछ छोड़ क् तोरो पीछू भय गयो हंय: त हम्ख का मिलेंन?”
MAT 19:28 यीशु न उन्को सी कह्यो, “मय तुम सी सच कहू हय कि नयी सृष्टि म जब आदमी को बेटा अपनी महिमा को सिंहासन पर बैठेंन, त तुम भी जो मोरो पीछू भय गयो हय, बारयी सिंहासनों पर बैठ क, इस्राएल को बारयी गोत्रों को न्याय करो।
MAT 19:29 अऊर जो कोयी न घरो, यां भाऊवों यां बहिनों, यां बाप यां माय, यां बाल-बच्चां यां खेतो ख मोरो नाम लायी छोड़ दियो हय, ओख सौ गुना मिलेंन, अऊर ऊ अनन्त जीवन को अधिकारी होयेंन।”
MAT 19:30 पर बहुत सो जो पहिलो हंय ऊ पिछलो होयेंन; अऊर जो पिछलो हंय, ऊ पहिलो होयेंन।
MAT 20:1 “स्वर्ग को राज्य कोयी घर को मालिक को जसो हय, जो सबेरे निकल्यो कि अपनी अंगूर की बाड़ी म मजूरों ख काम म लगाये।
MAT 20:2 ओन हर एक मजूरों सी एक दीनार रोज पर ठहरायो अऊर उन्ख अपनी अंगूर की बाड़ी म काम पर भेज्यो।
MAT 20:3 तब नव बजे निकल क ओन दूसरों कुछ लोगों ख बजार म बेकार खड़ो देख्यो,
MAT 20:4 अऊर ओन कह्यो, ‘तुम भी अंगूर की बाड़ी म जावो, अऊर जो कुछ ठीक हय, तुम्ख देऊं।’
MAT 20:5 येकोलायी हि भी गयो, तब ओन दूसरों बार बारा बजे अऊर तीन बजे निकल क वसोच करयो।
MAT 20:6 दिन डुबन को पहिले ओन पाच बजे फिर निकल क दूसरों ख खड़ो पायो, अऊर ओन कह्यो, ‘तुम कहाली इत दिन भर बेकार म खड़ो रह्यो?’
MAT 20:7 उन्न ओको सी कह्यो, ‘कोयी न हम्ख मजूरी पर नहीं लगायो।’ ओन ओको सी कह्यो, ‘तुम भी अंगूर की बाड़ी म जावो।’”
MAT 20:8 “शाम ख अंगूर की बाड़ी को मालिक न अपनो मुनीम सी कह्यो, ‘मजूरों ख बुलाय क पिछलो सी ले क पहिलो तक उन्ख मजूरी दे।’
MAT 20:9 पाच बजे जो मजूर ख लगायो गयो होतो, त उन्ख भी एक एक दीनार मिल्यो।
MAT 20:10 जो पहिले आयो उन्न यो समझ्यो कि हम्ख जादा मिलेंन, पर उन्ख भी एक एक दीनारच मिल्यो।
MAT 20:11 जब मिल्यो त हि घर मालिक पर कुड़कुड़ाय क कहन लग्यो,
MAT 20:12 ‘इन पिछलो न एकच घंटा काम करयो, अऊर तय न उन्ख हमरो बराबर कर दियो, जिन्न दिन भर काम करयो अऊर तपन झेली?’”
MAT 20:13 ओन उन्म सी एक ख उत्तर दियो, “हे संगी, मय तोरो सी कुछ अन्याय नहीं करू। का तय नच मोरो सी एक दीनार मजूरी नहीं ठहरायो होतो?
MAT 20:14 जो तोरो हय, ओख ले अऊर चली जा; मोरी इच्छा यो हय कि जितनो तोख देऊं उतनोच यो पिछलो वालो ख भी देऊं।
MAT 20:15 का यो उचित नहाय कि जो मोरो हय ओको म सी जो चाहऊ ऊ करूं? का मोरो अच्छो होन को वजह तय बुरी नजर सी देखय हय?”
MAT 20:16 योच तरह सी “जो पीछू हंय, हि आगु होयेंन; अऊर जो आगु हंय हि पीछू होयेंन।”
MAT 20:17 यीशु यरूशलेम ख जातो हुयो बारयी चेलावों ख एकान्त म लिजायो, अऊर रस्ता म उन्को सी कहन लग्यो,
MAT 20:18 “देखो, हम यरूशलेम ख जाय रह्यो हंय; अऊर आदमी को बेटा मुख्य याजकों अऊर धर्मशास्त्रियों को हाथ म पकड़ायो जायेंन, अऊर हि ओख सजा को लायक ठहरायेंन।
MAT 20:19 अऊर ओख गैरयहूदियों को हाथ सौंपेंन कि हि ओख ठट्ठा करे, अऊर कोड़ा मारे, अऊर क्रूस पर चढ़ाये, अऊर ऊ तीसरो दिन जीन्दो करयो जायेंन।”
MAT 20:20 तब जब्दी को बेटा की माय न, अपनो बेटा को संग यीशु को जवर आय क नमस्कार करयो, अऊर ओको सी कुछ मांगन लगी।
MAT 20:21 यीशु न ओको सी कह्यो, “तय का चाहवय हय?” वा ओको सी बोली, “यो वचन दे कि मोरो यो दोयी बेटा तोरो राज्य म एक तोरो दायो अऊर एक तोरो बायो तरफ बैठे।”
MAT 20:22 यीशु न उत्तर दियो, “तुम नहीं जानय कि का मांगय हय। जो कटोरा मय पीवन पर हय, का तुम पी सकय हय?” उन्न ओको सी कह्यो, “पी सकय हंय।”
MAT 20:23 यीशु न ओको सी कह्यो, “तुम मोरो कटोरा त पीवो, पर अपनो दायो अऊर बायो कोयी ख बैठानो मोरो काम नहाय, पर जेको लायी मोरो बाप को तरफ सी तैयार करयो गयो, उन्कोच लायी हय।”
MAT 20:24 यो सुन्क दसो चेलावों उन दोयी भाऊवों पर गुस्सा भयो।
MAT 20:25 यीशु न उन्ख जवर बुलाय क कह्यो, “तुम जानय हय कि गैरयहूदियों को अधिकारी उन पर प्रभुता करय हंय; अऊर जो बड़ो हंय, हि उन पर अधिकार जतावय हंय।
MAT 20:26 पर तुम म असो नहीं होयेंन; पर जो कोयी तुम म बड़ो होनो चाहवय, ऊ तुम्हरो सेवक बने;
MAT 20:27 अऊर जो तुम म मुख्य होनो चाहवय, ऊ तुम्हरो सेवक बने;
MAT 20:28 जसो कि आदमी को बेटा; ऊ येकोलायी नहीं आयो कि ओकी सेवा टहल करी जाये, पर येकोलायी आयो कि खुद सेवा टहल करे, अऊर बहुत सो की छुड़ौती लायी अपनो जीव दे।”
MAT 20:29 जब हि यरीहो नगर सी निकल रह्यो होतो, त एक बड़ी भीड़ यीशु को पीछू भय गयी।
MAT 20:30 अऊर दोय अन्धा, जो सड़क को किनार पर बैठ्यो होतो, यो सुन्क कि यीशु जाय रह्यो हय, पुकार क कहन लग्यो, “हे प्रभु, दाऊद की सन्तान, हमरो पर दया कर।”
MAT 20:31 लोगों न उन्ख डाट्यो कि चुप रहे; पर हि अऊर भी चिल्लाय क बोल्यो, “हे प्रभु, दाऊद की सन्तान, हमरो पर दया कर।”
MAT 20:32 तब यीशु न खड़ो होय क, उन्ख बुलायो अऊर कह्यो, “तुम का चाहवय हय कि मय तुम्हरो लायी करूं?”
MAT 20:33 उन्न ओको सी कह्यो, “हे प्रभु, यो कि हमरी आंखी खुल जाये।”
MAT 20:34 यीशु न तरस खाय क उन्की आंखी छूयो, अऊर हि तुरतच देखन लग्यो; अऊर ओको पीछू भय गयो।
MAT 21:1 जब हि यरूशलेम नगर को जवर पहुंच्यो अऊर जैतून पहाड़ी पर बैतफगे गांव को जवर आयो, त यीशु न दोय चेलावों ख यो कह्य क भेज्यो,
MAT 21:2 “आगु को गांव म जावो। उत पहुंचतोच एक गधी को बछड़ा ख खोल क मोरो जवर लावो।
MAT 21:3 यदि तुम सी कोयी कुछ कहेंन, त कहजो कि प्रभु ख येकी जरूरत हय, तब ऊ तुरतच उन्ख भेज देयेंन।”
MAT 21:4 यो येकोलायी भयो कि जो वचन भविष्यवक्ता सी कह्यो गयो होतो, ऊ पूरो होय:
MAT 21:5 “सिय्योन की बेटी सी कहो, ‘देख, तोरो राजा तोरो जवर आवय हय; ऊ नम्र हय, अऊर गधी को बच्चा पर बैठ्यो हय; जो मेहनती गधी को बछड़ा पर।’”
MAT 21:6 चेलावों न जाय क, जसो यीशु न उन्को सी कह्यो होतो, वसोच करयो।
MAT 21:7 अऊर गधी अऊर बछड़ा दोयी ख लाय क, उन पर अपनो कपड़ा डाल्यो, अऊर ऊ ओको पर बैठ गयो।
MAT 21:8 तब बहुत सो लोगों न उन्को स्वागत की अपेक्षा सी अपनो कपड़ा रस्ता म बिछायो, अऊर दूसरों लोगों न झाड़ों सी डगाली काट क रस्ता म बिछायी।
MAT 21:9 जो भीड़ आगु-आगु जात होती अऊर पीछू-पीछू चली आवत होती, पुकार-पुकार क कहत होती, “दाऊद की सन्तान की जय होय, धन्य हय ऊ जो प्रभु को नाम सी आवय हय, दाऊद की सन्तान की महिमा हो।”
MAT 21:10 जब यीशु यरूशलेम म सिरन लग्यो, त सारो नगर म हलचल मच गयी, अऊर लोग कहन लग्यो, “यो कौन आय?”
MAT 21:11 लोगों न कह्यो, “यो त गलील को नासरत नगर को भविष्यवक्ता यीशु आय।”
MAT 21:12 यीशु न परमेश्वर को मन्दिर म जाय क उन सब ख, जो मन्दिर म सामान लेन-देन कर रह्यो होतो, उन्ख निकाल दियो, अऊर धन्दा करन वालो को पीढ़ा अऊर कबूत्तर बेचन वालो की पीढ़ा उलटाय दियो;
MAT 21:13 अऊर उन्को सी कह्यो, “लिख्यो हय, ‘मोरो घर प्रार्थना को घर कहलायेंन;’ पर तुम ओख डाकुवों को अड्डा बनावय हय।”
MAT 21:14 तब अन्धा अऊर लंगड़ा, मन्दिर म ओको जवर आयो, अऊर ओन उन्ख चंगो करयो।
MAT 21:15 पर जब मुख्य याजकों अऊर धर्मशास्त्रियों न इन आश्चर्य कामों ख, जो ओन करयो होतो, देख्यो अऊर बच्चां ख जो मन्दिर म यो पुकार रह्यो होतो, “दाऊद की सन्तान की महिमा हो,” पुकारतो हुयो देख्यो, त हि गुस्सा भयो!
MAT 21:16 अऊर ओको सी कहन लग्यो, “का तय सुनय हय कि यो का कह्य रह्यो हंय?” यीशु न उन्को सी कह्यो, “हव; का तुम्न यो शास्त्र म कभी नहीं पढ़्यो: ‘बच्चां अऊर दूध पीतो बच्चां को मुंह सी तय न स्तुति करायी?’”
MAT 21:17 तब ऊ उन्ख छोड़ क नगर को बाहेर बैतनिय्याह ख गयो अऊर उत रात बितायी।
MAT 21:18 भुन्सारो ख जब यीशु नगर ख लौटतो समय ओख भूख लगी।
MAT 21:19 त सड़क को किनार पर अंजीर को एक झाड़ देख क ऊ ओको जवर गयो, अऊर पाना ख छोड़ ओको म अऊर कुछ नहीं पा क ओको सी कह्यो। “अब सी तोरो म फिर कभी फर नहीं लगे।” अऊर अंजीर को झाड़ तुरतच सूख गयो।
MAT 21:20 यो देख क चेलावों ख अचम्भा भयो अऊर उन्न कह्यो, “यो अंजीर को झाड़ तुरतच कसो सूख गयो?”
MAT 21:21 यीशु न उन्ख उत्तर दियो, “मय तुम सी सच कहूं हय, यदि तुम विश्वास रखो अऊर शक मत करो, त नहीं केवल यो करजो जो यो अंजीर को झाड़ सी करयो गयो हय, पर यदि यो पहाड़ी सी भी कहो, ‘उखड़ जा अऊर समुन्दर म जाय गिर,’ त यो होय जायेंन।
MAT 21:22 अऊर जो कुछ तुम प्रार्थना म विश्वास सी मांगो ऊ सब तुम्ख मिल जायेंन।”
MAT 21:23 ऊ मन्दिर म फिर सी जाय क उपदेश देत होतो, त मुख्य याजकों अऊर लोगों को बुजूर्गों न ओको जवर आय क पुच्छ्यो, “तय यो काम कौन्को अधिकार सी करय हय? अऊर तोख यो अधिकार कौन न दियो हय?”
MAT 21:24 यीशु न उन्ख उत्तर दियो, “मय भी तुम सी एक बात पूछू हय; यदि ऊ मोख बतावो, त मय भी तुम्ख बताऊं कि यो काम कौन्सो अधिकार सी करू हय।
MAT 21:25 यूहन्ना को बपतिस्मा कित सी होतो? स्वर्ग को तरफ सी यां आदमियों को तरफ सी?” तब हि आपस म विवाद करन लग्यो, “यदि हम कहबोंन ‘स्वर्ग को तरफ सी,’ त ऊ हम सी कहेंन, ‘फिर तुम न ओको विश्वास कहाली नहीं करयो?’
MAT 21:26 अऊर यदि कहेंन ‘आदमियों को तरफ सी,’ त हम्ख भीड़ को डर हय, कहालीकि हि सब यूहन्ना ख भविष्यवक्ता मानय हंय।”
MAT 21:27 येकोलायी उन्न यीशु ख उत्तर दियो, “हम नहीं जानजे।” ओन भी उन्को सी कह्यो, “त मय भी तुम्ख नहीं बताऊ कि यो काम कौन्सो अधिकार सी करू हय।
MAT 21:28 “तुम का सोचय हय? कोयी आदमी को दोय बेटा होतो; ओन पहिलो बेटा को जवर जाय क कह्यो, ‘हे बेटा, अज अंगूर की बाड़ी म काम कर।’
MAT 21:29 ओन उत्तर दियो, ‘मय नहीं जाऊं,’ पर बाद म पछताय गयो।
MAT 21:30 तब बाप न दूसरों बेटा को जवर जाय क असोच कह्यो, ओन उत्तर दियो, ‘जी हव मय जाऊं हय,’ पर नहीं गयो।
MAT 21:31 इन दोयी म सी कौन बाप की इच्छा पूरी करी?” उन्न कह्यो, “बड़ो न।” यीशु न उन्को सी कह्यो, “मय तुम सी सच कहू हय कि, कर लेनवालो अऊर वेश्यायें तुम सी पहिले परमेश्वर को राज्य म सिरय हंय।
MAT 21:32 कहालीकि यूहन्ना सच्चायी को रस्ता दिखातो हुयो तुम्हरो जवर आयो, अऊर तुम्न ओको विश्वास नहीं करयो; पर कर लेनवालो अऊर वेश्यावों न ओको विश्वास करयो: अऊर तुम यो देख क बाद म भी नहीं पछतायो कि ओको विश्वास कर लेतो।
MAT 21:33 “एक अऊर दृष्टान्त सुनो: एक जमीन को मालिक होतो, जेन अंगूर की बाड़ी लगायी, ओको चारयी तरफ बाड़ी रुन्द्यो, ओको म रस को गड्डा खोद्यो अऊर मचान बनायो, अऊर किसान ख ओको ठेका दे क परदेश चली गयो।
MAT 21:34 जब फर को समय जवर आयो, त ओन अपनो सेवकों ख ओको फर लेन को लायी किसानों को जवर भेज्यो।
MAT 21:35 पर किसानों न ओको सेवकों ख पकड़ क्, कोयी ख पिट्यो, अऊर कोयी ख मार डाल्यो, अऊर कोयी पर गोटा सी मारयो।
MAT 21:36 तब ओन पहिलो सी जादा अऊर सेवकों ख भेज्यो, अऊर उन्न उन्को सी भी वसोच करयो।
MAT 21:37 आखरी म ओन अपनो बेटा ख उन्को जवर यो सोच क भेज्यो कि हि मोरो बेटा को आदर करेंन।
MAT 21:38 पर किसानों न मालिक को बेटा ख देख क आपस म कह्यो, ‘यो त वारिस आय, आवो, येख मार डालो अऊर येकी जायजाद ले ले।’
MAT 21:39 येकोलायी उन्न ओख पकड़्यो अऊर अंगूर की बाड़ी सी बाहेर निकाल क मार डाल्यो।
MAT 21:40 “येकोलायी, जब अंगूर की बाड़ी को मालिक आयेंन, त उन किसान को संग का करेंन?”
MAT 21:41 उन्न ओको सी कह्यो, “ऊ उन बुरो लोगों ख बुरी रीति सी नाश करेंन; अऊर अंगूर की बाड़ी को ठेका दूसरों किसानों ख देयेंन, जो समय पर ओख फसल दियो करेंन।”
MAT 21:42 यीशु न उन्को सी कह्यो, “का तुम न कभी पवित्र शास्त्र म यो नहीं पढ़्यो:” “जो गोटा ख राजमिस्त्रियों न नकारयो होतो, उच गोटा को कोना को सिरा मतलब महत्वपूर्ण भय गयो? यो प्रभु को तरफ सी भयो, अऊर हमरी नजर म अद्भुत हय।”
MAT 21:43 “येकोलायी मय तुम सी कहू हय कि परमेश्वर को राज्य तुम सी ले लियो जायेंन अऊर जो लोग परमेश्वर की आज्ञा मान क सच बाते करय हय, ओख फर दियो जायेंन।
MAT 21:44 जो यो गोटा पर गिरेंन, ऊ तुकड़ा-तुकड़ा होय जायेंन; अऊर जेक पर ऊ गिरेंन, ओख पीस डालेंन।”
MAT 21:45 मुख्य याजक अऊर फरीसी ओको दृष्टान्तों ख सुन क समझ गयो कि ऊ उन्को बारे म कह्य हय।
MAT 21:46 अऊर उन्न ओख पकड़नो चाह्यो, पर लोगों सी डर गयो कहालीकि हि ओख भविष्यवक्ता मानत होतो।
MAT 22:1 यीशु तब उन्को सी दृष्टान्तों म कहन लग्यो,
MAT 22:2 “स्वर्ग को राज्य की तुलना एक राजा सी कर सकय हय, जेन अपनो बेटा को बिहाव को जेवन दियो।
MAT 22:3 अऊर ओन बिहाव को जेवन म नेवता वालो ख बुलावन लायी अपनो सेवक ख भेज्यो, पर उन लोगों न बिहाव म आनो नहीं चाह्यो।
MAT 22:4 तब ओन अऊर सेवकों ख यो कह्य क भेज्यो, ‘नेवता वालो सी कहो: देखो, मय जेवन तैयार कर दियो हय, मोरो जनावर अऊर पाल्यो पशु काट्यो गयो हंय; अऊर सब कुछ तैयार हय; बिहाव को जेवन म आवो।’
MAT 22:5 पर हि अनसुनी कर क् चली गयो: कोयी अपनो खेत ख, कोयी अपनो धन्दा ख।
MAT 22:6 बाकी न ओको सेवकों ख पकड़ क उन्को अपमान करयो अऊर मार डाल्यो।
MAT 22:7 तब राजा ख गुस्सा आयो, अऊर ओन अपनी सेना भेज क उन हत्यारों को नाश करयो, अऊर उन्को नगर ख जलाय दियो।
MAT 22:8 तब ओन अपनो सेवकों सी कह्यो, ‘बिहाव को जेवन त तैयार हय पर नेवता वालो लोग लायक नहीं होतो।
MAT 22:9 येकोलायी सड़क पर जावो अऊर जितनो लोग तुम्ख मिले, सब ख बिहाव को जेवन म बुलाय लावो।’
MAT 22:10 येकोलायी उन सेवकों न सड़क म जाय क जो भी बुरो यां भलो, जितनो मिल्यो, सब ख जमा करयो; अऊर बिहाव को घर मेहमानों सी भर गयो।”
MAT 22:11 “जब राजा मेहमानों ख देखन अन्दर आयो, त ओन उत एक आदमी ख देख्यो, जो बिहाव को कपड़ा पहिन्यो नहीं होतो।
MAT 22:12 ओन ओको सी कह्यो, ‘हे संगी; तय इत बिहाव को कपड़ा पहिन्यो बिना कसो आय गयो?’ अऊर ऊ कुछ नहीं कह्य सक्यो।
MAT 22:13 तब राजा न सेवकों सी कह्यो, ‘येको हाथ-पाय बान्ध क ओख बाहेर अन्धारो म डाल देवो, उत रोवनो अऊर दात कटरनो होयेंन।’”
MAT 22:14 कहालीकि “बुलायो हुयो त बहुत हंय, पर चुन्यो हुयो थोड़ो हंय।”
MAT 22:15 तब फरीसियों न जाय क आपस म बिचार करयो कि ओख कसो तरह बातों म फसायबोंन।
MAT 22:16 येकोलायी उन्न अपनो चेलावों ख हेरोदियों को संग ओको जवर यो कहन ख भेज्यो, “हे गुरु, हम जानजे हंय कि तय सच्चो हय, अऊर परमेश्वर को रस्ता सच्चायी सी सिखावय हय, अऊर कोयी कि परवाह नहीं करय, कहालीकि तय आदमियों को चेहरा देख क बाते नहीं करय।
MAT 22:17 येकोलायी हम्ख बता कि तय का सोचय हय? कैसर ख कर देनो उचित हय कि नहाय।”
MAT 22:18 यीशु न उन्की दुष्ट हरकत जान क कह्यो, “हे कपटियों, मोख कहाली परखय हय?
MAT 22:19 मोख ऊ सिक्का दिखाव।” जेकोसी कर चुकायो जावय हय। तब हि ओको जवर एक सिक्का ले क आयो।
MAT 22:20 ओन उन्को सी पुच्छ्यो, “यो चेहरा अऊर नाम कौन्को आय?”
MAT 22:21 उन्न ओको सी कह्यो, “कैसर को हय।” तब यीशु उन्को सी कह्यो, “जो कैसर को हय, ऊ कैसर ख देवो; अऊर जो परमेश्वर को हय, ऊ परमेश्वर ख देवो।”
MAT 22:22 यो सुन क उन्न अचम्भित भयो, अऊर हि यीशु ख छोड़ क चली गयो।
MAT 22:23 उच दिन सदूकी जो कह्य हंय कि मरयो हुयो को पुनरुत्थान हयच नहाय, यीशु को जवर आयो अऊर ओको सी पुच्छ्यो,
MAT 22:24 “हे गुरु, मूसा न कह्यो होतो, कि यदि कोयी आदमी बिना सन्तान मर जाये, त ओको भाऊ ओकी पत्नी सी बिहाव कर क् अपनो भाऊ लायी सन्तान पैदा करे।
MAT 22:25 अब हमरो इत सात भाऊ होतो; पहिलो बिहाव कर क् मर गयो, अऊर सन्तान नहीं होन को वजह अपनी विधवा पत्नी ख अपनो भाऊ लायी छोड़ गयो।
MAT 22:26 यो तरह दूसरों अऊर तीसरो न भी करयो, अऊर सातों तक योच भयो।
MAT 22:27 सब को बाद आखरी म वा बाई भी मर गयी।
MAT 22:28 येकोलायी पुनरुत्थान को समय जीन्दो होन पर वा उन सातों म सी कौन्की पत्नी होयेंन? कहालीकि वा सब की पत्नी भय गयी होती।”
MAT 22:29 यीशु न उन्ख उत्तर दियो, “तुम पवित्र शास्त्र अऊर परमेश्वर को सामर्थ नहीं जानय; यो वजह सी भूल म पड़्यो हय।
MAT 22:30 कहालीकि पुनरुत्थान को समय जीन्दो होनो पर हि नहीं बिहाव करेंन अऊर नहीं बिहाव म दियो जायेंन पर स्वर्ग म परमेश्वर को दूतों को जसो होयेंन।
MAT 22:31 पर मरयो हुयो को जीन्दो होन को बारे म का तुम न यो वचन नहीं पढ़्यो जो परमेश्वर न तुम सी कह्यो:
MAT 22:32 ‘मय अब्राहम को परमेश्वर, अऊर इसहाक को परमेश्वर, अऊर याकूब को परमेश्वर आय?’ ऊ मरयो हुयो को नहाय, पर जीन्दो को परमेश्वर आय।”
MAT 22:33 यो सुन क लोग ओकी शिक्षा सी अचम्भित भयो।
MAT 22:34 जब फरीसियों न सुन्यो कि यीशु न सदूकियों को मुंह बन्द कर दियो, त हि जमा भयो।
MAT 22:35 उन्म सी एक व्यवस्था को शिक्षक न ओख परखन लायी ओको सी पुच्छ्यो,
MAT 22:36 “हे गुरु, व्यवस्था म कौन सी आज्ञा सब सी बड़ी हय?”
MAT 22:37 ओन ओको सी कह्यो, “तय परमेश्वर अपनो प्रभु सी अपनो पूरो दिल अऊर अपनो पूरो जीव अऊर अपनी पूरी मन को संग प्रेम रख।
MAT 22:38 बड़ी अऊर मुख्य आज्ञा त योच आय।
MAT 22:39 अऊर ओकोच जसो यो दूसरी भी हय कि तय अपनो पड़ोसी सी अपनो जसो प्रेम रख।
MAT 22:40 योच दोय आज्ञाये पूरी व्यवस्था अऊर भविष्यवक्तावों को आधार हंय।”
MAT 22:41 जब फरीसी जमा होतो, त यीशु न उन्को सी पुच्छ्यो,
MAT 22:42 “मसीह को बारे म तुम का सोचय हय? ऊ कौन्को बेटा आय?” उन्न ओको सी कह्यो, “दाऊद को।”
MAT 22:43 ओन उन्को सी पुच्छ्यो, “त दाऊद आत्मा म होय क ओख ‘प्रभु’ कहाली कह्य हय?”
MAT 22:44 “प्रभु न, मोरो प्रभु सी कह्यो, मोरो दायो बैठ, जब तक कि मय तोरो दुश्मनों ख तोरो पाय को खल्लो नहीं कर देऊं।”
MAT 22:45 “जब दाऊद ओख ‘प्रभु’ कह्य हय, त ऊ ओको बेटा कसो भयो?”
MAT 22:46 कोयी भी ओख कुछ उत्तर नहीं दे सक्यो। अऊर ऊ दिन सी कोयी ख फिर ओको सी अऊर प्रश्न करन को साहस नहीं भयो।
MAT 23:1 तब यीशु न भीड़ सी अऊर अपनो चेलावों सी कह्यो,
MAT 23:2 “धर्मशास्त्री अऊर फरीसी मूसा की गद्दी पर बैठ्यो हंय;
MAT 23:3 येकोलायी हि तुम सी जो कुछ कहेंन ऊ करजो अऊर मानजो, पर उन्को जसो काम मत करजो; कहालीकि हि कह्य त हंय पर करय नहाय।
MAT 23:4 हि भारी बोझ ख जिन्ख उठानो कठिन हय, बान्ध क आदमियों पर लाद देवय हंय; पर खुद ओख अपनी बोट सी भी सरकानो नहीं चाहवय।
MAT 23:5 हि अपनो पूरो काम लोगों ख दिखान लायी करय हंय: हि अपनो ताबीजो ख चौड़ी करय अऊर अपनो कपड़ा की झालर बढ़ावय हंय।
MAT 23:6 जेवन म सम्मानित जागा, अऊर सभा म मुख्य-मुख्य आसन,
MAT 23:7 बजारों म आदर सत्कार पानो, अऊर आदमी म गुरु कहलानो उन्ख भावय हय।
MAT 23:8 पर तुम गुरु नहीं कहलावों, कहालीकि तुम्हरो एकच गुरु हय, अऊर तुम सब भाऊवों हो।
MAT 23:9 धरती पर कोयी ख अपनो स्वर्गीय पिता नहीं कहजो, कहालीकि तुम्हरो एकच स्वर्गीय पिता हय, जो स्वर्ग म हय।
MAT 23:10 अऊर स्वामी भी नहीं कहलावों, कहालीकि तुम्हरो एकच स्वामी हय, यानेकि मसीह।
MAT 23:11 जो तुम म बड़ो हय, ऊ तुम्हरो सेवक बने।
MAT 23:12 जो कोयी अपनो आप ख बड़ो बनायेंन, ऊ छोटो करयो जायेंन: अऊर जो कोयी अपनो आप ख नम्र बनायेंन, ऊ बड़ो करयो जायेंन।
MAT 23:13 “हे कपटी धर्मशास्त्रियों अऊर फरीसियों, तुम पर हाय! तुम आदमियों लायी स्वर्ग को राज्य को दरवाजा बन्द करय हय, नहीं त खुदच ओको म सिरय हय अऊर नहीं ओको म सिरन वालो ख सिरन देवय हय।
MAT 23:14 हे कपटी धर्मशास्त्रियों अऊर फरीसियों, तुम पर हाय! तुम विधवावों को घरो ख बर्बाद कर देवय हय, अऊर दिखावन लायी बहुत देर तक प्रार्थना करय हय: येकोलायी तुम्ख बहुत सजा मिलेंन।
MAT 23:15 “हे कपटी धर्मशास्त्रियों अऊर फरीसियों, तुम पर हाय! तुम एक आदमी ख अपनो मत म लान लायी पूरो जल अऊर थल म फिरय हय, अऊर जब ऊ मत म आय जावय हय त ओख अपनो सी दोय गुना खराब बनाय देवय हय।
MAT 23:16 “हे अन्धो अगुवों, तुम पर हाय! जो कह्य हय कि यदि कोयी मन्दिर की कसम खाये त कुछ नहीं, पर यदि कोयी मन्दिर को सोनो की कसम खायेंन त ओको सी बन्ध जायेंन।
MAT 23:17 हे मूर्खो अऊर अन्धो, कौन बड़ो हय; सोनो यां ऊ मन्दिर जेकोसी सोनो पवित्र होवय हय?
MAT 23:18 फिर कह्य हय कि यदि कोयी वेदी की कसम खाये त कुछ नहीं, पर जो भेंट ओको पर हय, यदि कोयी ओकी कसम खाये त बन्ध जायेंन।
MAT 23:19 हे अन्धो, कौन बड़ो हय; भेंट यां वेदी जेकोसी भेंट पवित्र होवय हय?
MAT 23:20 येकोलायी जो वेदी की कसम खावय हय, ऊ ओकी अऊर जो कुछ ओको पर रखी हय, ओकी भी कसम खावय हय।
MAT 23:21 जो मन्दिर की कसम खावय हय, ऊ मन्दिर अऊर ओको म रहन वालो परमेश्वर की भी कसम खावय हय।
MAT 23:22 जो स्वर्ग की कसम खावय हय, ऊ परमेश्वर को सिंहासन को अऊर ओको पर बैठन वालो की भी कसम खावय हय।
MAT 23:23 “हे कपटी धर्मशास्त्रियों अऊर फरीसियों, तुम पर हाय! तुम पदीना, अऊर सौंफ, अऊर जीरा को दसवा अंश त देवय हय, पर तुम न व्यवस्था की गम्भीर बातों ख यानेकि न्याय, अऊर दया, अऊर विश्वास ख छोड़ दियो हय; पर असो होनो होतो कि इन्क भी करत रहतो अऊर उन्ख भी नहीं छोड़तो।
MAT 23:24 हे अन्धो अगुवों, तुम मच्छर ख त छान डालय हय, पर ऊंट ख गिटक लेवय हय।
MAT 23:25 “हे कपटी धर्मशास्त्रियों अऊर फरीसियों, तुम पर हाय! तुम कटोरा अऊर थारी ख बाहेर सी त मांजय हय पर हि अन्दर सी लालच अऊर खुद को भलो को बारे म सोचय हंय।
MAT 23:26 हे अन्धो फरीसी, पहिले कटोरा अऊर थारी ख अन्दर सी मांज कि ऊ बाहेर सी भी साफ होय जाये।
MAT 23:27 “हे कपटी धर्मशास्त्रियों अऊर फरीसियों, तुम पर हाय! तुम चूना सी पोती हुयी कब्र को जसो हय जो बाहेर सी त सुन्दर दिखायी देवय हंय, पर अन्दर मुर्दों की हड्डियों अऊर सब तरह की गंदगी सी भरी हंय।
MAT 23:28 योच रीति सी तुम भी बाहेर सी आदमियों ख त अच्छो दिखायी देवय हय, पर अन्दर सी कपट अऊर बुरायी सी भरयो हुयो हय।
MAT 23:29 “हे कपटी धर्मशास्त्रियों अऊर फरीसियों, तुम पर हाय! तुम भविष्यवक्तावों की कब्र बनावय अऊर न्यायियों की स्मारक सजावय हय,
MAT 23:30 अऊर कह्य हय, ‘यदि हम अपनो बापदादों को दिनो म होतो त भविष्यवक्तावों की हत्या म सहभागी नहीं होतो।’
MAT 23:31 येको सी त तुम अपनो खुद पर हि गवाही देवय हय कि तुम भविष्यवक्तावों को हत्यारों की सन्तान आय।
MAT 23:32 येकोलायी तुम अपनो बापदादों को पाप को घड़ा पूरो तरह सी भर देवो।
MAT 23:33 हे सांपों, हे सांप को पिल्ला, तुम नरक की सजा सी कसो बचो?
MAT 23:34 येकोलायी देखो, मय तुम्हरो जवर भविष्यवक्तावों अऊर बुद्धिमानों अऊर शिक्षकों ख भेजू हय; अऊर तुम उन्म सी कुछ ख मार डालेंन अऊर क्रूस पर चढ़ायेंन, अऊर कुछ ख अपनो आराधनालयों म कोड़े मारेंन अऊर एक नगर सी दूसरों नगर म खदेड़तो फिरेंन।
MAT 23:35 जेकोसी सच्चो हाबील सी ले क बिरिक्याह को बेटा जकर्याह तक, जेक तुम न मन्दिर अऊर वेदी को बीच म मार डाल्यो होतो, जितनो न्यायियों को खून धरती पर बहायो गयो हय ऊ सब तुम्हरो मुंड पर पड़ेंन।
MAT 23:36 मय तुम सी सच कहू हय, यो सब बाते यो समय को लोगों पर आयेंन।
MAT 23:37 “हे यरूशलेम, हे यरूशलेम! तय जो भविष्यवक्तावों ख मार डालय हय, अऊर जो तोरो जवर भेज्यो गयो, उन पर पथराव करय हय। कितनो बार मय न चाहयो कि जसो मुर्गी अपनो बच्चां ख अपनो पंखा को खल्लो जमा करय हय, वसोच मय भी तोरो बच्चा ख जमा कर लेऊ, पर तुम न नहीं चाह्यो,
MAT 23:38 देखो, तुम्हरो घर तुम्हरो लायी उजाड़ छोड़्यो जावय हय।
MAT 23:39 कहालीकि मय तुम सी सच कहू हय कि अभी सी जब तक तुम मोख तब तक नहीं देखो, जब तक यो नहीं कहो ‘धन्य हय ऊ, जो प्रभु को नाम सी आवय हय’ तब तक तुम मोख फिर कभी नहीं देखो।”
MAT 24:1 जब यीशु मन्दिर सी निकल क जाय रह्यो होतो, त ओको चेला ओख मन्दिर को भवन दिखावन लायी ओको जवर आयो।
MAT 24:2 ओन उन्को सी कह्यो, “तुम यो सब देख रह्यो हय न! मय तुम सी सच कहू हय, इत गोटा पर गोटा भी न छूटेंन जो ढायो नहीं जायेंन।”
MAT 24:3 जब ऊ जैतून पहाड़ी पर बैठ्यो होतो, त चेलावों न एकान्त म ओको जवर आय क कह्यो, “हम्ख बताव कि यो बाते कब होयेंन? तोरो आवन को अऊर जगत को अन्त को का चिन्ह होयेंन?”
MAT 24:4 यीशु न उन्ख उत्तर दियो, “चौकस रहो!” कोयी तुम्ख धोका नहीं दे पाये,
MAT 24:5 कहालीकि बहुत सो असो होयेंन जो मोरो नाम सी आय क कहेंन, “मय मसीह आय,” अऊर बहुत सो ख भटकायेंन।
MAT 24:6 तुम लड़ाईयों अऊर लड़ाईयों की चर्चा सुनो, त घबराय नहीं जावो कहालीकि इन को होनो जरूरी हय, पर ऊ समय अन्त नहीं होयेंन।
MAT 24:7 कहालीकि राष्ट्र पर राष्ट्र अऊर राज्य पर राज्य चढ़ायी करेंन, अऊर जागा जागा म अकाल पड़ेंन, अऊर भूईडोल होयेंन।
MAT 24:8 यो सब बाते दु:ख की सुरूवात होयेंन।
MAT 24:9 “तब हि दु:ख देन लायी तुम्ख पकड़वायेंन, अऊर तुम्ख मार डालेंन, अऊर मोरो नाम को वजह सब गैरयहूदियों को लोग तुम सी दुश्मनी रखेंन।
MAT 24:10 तब बहुत सो ठोकर खायेंन, अऊर एक दूसरों ख पकड़वायेंन, अऊर एक दूसरों सी दुश्मनी रखेंन।
MAT 24:11 बहुत सो झूठो भविष्यवक्ता उठेंन, अऊर बहुत सो ख बहकायेंन।
MAT 24:12 अधर्म को बढ़नो सी बहुत सो को प्रेम कम होय जायेंन,
MAT 24:13 पर जो आखरी तक धीरज रखेंन, ओकोच उद्धार होयेंन।
MAT 24:14 अऊर परमेश्वर को राज्य को यो सुसमाचार पूरो जगत म प्रचार करयो जायेंन, कि सब लोगों पर गवाही होय, तब अन्त आय जायेंन।”
MAT 24:15 “येकोलायी जब तुम लोग ‘भयानक विनाशकारी घृणित चिज ख,’ जेको उल्लेख दानिय्येल भविष्यवक्ता को द्वारा करयो गयो होतो, मन्दिर को पवित्र जागा पर खड़ो देखो।” पढ़ेंन वालो खुद समझ ले कि येको अर्थ का हय
MAT 24:16 तब ऊ समय जो यहूदिया म होना हि पहाड़ी पर भग जाये।
MAT 24:17 जो छत पर हय, ऊ अपनो घर म सी सामान लेन लायी मत उतरो;
MAT 24:18 अऊर जो खेत म हय, ऊ अपनो कपड़ा लेन लायी पीछू नहीं लौटे।
MAT 24:19 उन दिनो म जो गर्भवती अऊर दूध पिलावन वाली होना उन्को लायी प्रकोप को दिन कहलायो जायेंन उन्को लायी हाय, होयेंन।
MAT 24:20 प्रार्थना करतो रहो कि तुम्ख ठन्डी म यां आराम को दिन म भगनो नहीं पड़े।
MAT 24:21 कहालीकि ऊ समय असो भारी संकट होयेंन, जसो जगत की सुरूवात सी न अब तक भयो अऊर न कभी होयेंन।
MAT 24:22 यदि परमेश्वर ऊ दिन ख घटायो नहीं जातो त कोयी प्रानी नहीं बचतो, पर चुन्यो हुयो को वजह ऊ दिन घटायो जायेंन।
MAT 24:23 “ऊ समय यदि कोयी तुम सी कहे, ‘देखो, मसीह इत हय!’ यां ‘उत हय!’ त विश्वास मत करजो।
MAT 24:24 कहालीकि झूठो मसीह अऊर झूठो भविष्यवक्ता उठ खड़ो होयेंन, अऊर बड़ो चिन्ह चमत्कार, अऊर लोगों ख धोका देन लायी अद्भुत काम दिखायेंन कि यदि होय सकय त चुन्यो हुयो ख भी धोका देयेंन।
MAT 24:25 देखो, मय न पहिले सी तुम सी यो सब कुछ कह्य दियो हय।”
MAT 24:26 “येकोलायी यदि हि तुम सी कहे, ‘देखो, ऊ जंगल म हय,’ त बाहेर नहीं निकल जाजो; यो ‘देखो, ऊ कोठरियों म हय,’ त विश्वास मत करजो।
MAT 24:27 कहालीकि जसो बिजली पूर्व सी निकल क पश्चिम तक चमकय हय, वसोच आदमी को बेटा को भी आनो होयेंन।”
MAT 24:28 “जित लाश हय, उत गिधाड़ जमा होयेंन।”
MAT 24:29 “उन दिनो अचानक संकट को तुरतच सूरज कारो होय जायेंन, अऊर चन्दा को उजाड़ो कम होतो रहेंन, अऊर चांदनी आसमान सी गिर पड़ेंन अऊर आसमान की शक्तियां हिलायी जायेंन।
MAT 24:30 तब आदमी को बेटा को चिन्ह आसमान म दिखायी देयेंन, अऊर तब धरती को सब गोत्र को लोग छाती पीटेंन; अऊर आदमी को बेटा ख बड़ी सामर्थ अऊर महिमा को संग आसमान को बादलो पर आवतो देखेंन।
MAT 24:31 ऊ तुरही की बड़ी आवाज को संग अपनो दूतों ख भेजेंन, अऊर हि आसमान को यो छोर सी ऊ छोर तक, चारयी दिशावों सी ओको चुन्यो हुयो ख जमा करेंन।”
MAT 24:32 “अंजीर को झाड़ सी यो दृष्टान्त सीखो: जब ओकी डगाली कवली होय जावय अऊर पाना निकलन लगय हंय, त तुम जान लेवय हय कि गरमी को मौसम जवर हय।
MAT 24:33 योच तरह सी जब तुम यो सब बातों ख देखो, त जान लेवो कि ऊ जवर हय, बल्की दरवाजाच पर हय।
MAT 24:34 मय तुम सी सच कहू हय कि जब तक यो सब बाते पूरी नहीं होयेंन, तब तक यो पीढ़ी को अन्त नहीं होयेंन।
MAT 24:35 आसमान अऊर धरती टल जायेंन, पर मोरी बाते कभी नहीं टलेंन।”
MAT 24:36 “पर ऊ दिन अऊर ऊ समय को बारे म कोयी नहीं जानय, नहीं स्वर्गदूत अऊर नहीं बेटा, पर केवल बाप।”
MAT 24:37 “जसो नूह को दिन म भयो होतो, वसोच आदमी को बेटा को आनो भी होयेंन।”
MAT 24:38 कहालीकि जसो जल-प्रलय सी पहिले को दिनो म, जो दिन तक कि नूह जहाज पर नहीं चढ़्यो, ऊ दिन तक लोग खातो-पीतो होतो, अऊर उन म बिहाव होत होतो।
MAT 24:39 अऊर जब तक जल-प्रलय आय क उन सब ख बहाय नहीं ले गयो, तब तक उन्ख कुछ भी मालूम नहीं पड़्यो; वसोच आदमी को बेटा को आवनो भी होयेंन।
MAT 24:40 ऊ समय दोय लोग खेत म होयेंन, एक उठाय लियो जायेंन अऊर दूसरों छोड़ दियो जायेंन।
MAT 24:41 दोय बाई गरहट पीसती रहेंन, एक उठाय ली जायेंन अऊर दूसरी छोड़ दी जायेंन।
MAT 24:42 “येकोलायी जागतो रहो, कहालीकि तुम नहीं जानय कि तुम्हरो प्रभु कौन्सो दिन आयेंन।
MAT 24:43 पर यो जान लेवो कि यदि घर को मालिक जानतो कि चोर कौन्सो समय आयेंन त जागतो रहतो, अऊर अपनो घर म चोरी होन नहीं देतो।
MAT 24:44 येकोलायी तुम भी तैयार रहो, कहालीकि ओको आवन को बारे म तुम सोचय भी नहीं हय, उच समय आदमी को बेटा आय जायेंन।”
MAT 24:45 “येकोलायी ऊ विश्वास लायक अऊर बुद्धिमान सेवक कौन हय, जेक मालिक न अपनो नौकर-चाकर पर मुखिया ठहरायो कि समय पर उन्ख भोजन दे?
MAT 24:46 धन्य हय ऊ सेवक, जेक ओको मालिक आय क असोच करतो देखे।
MAT 24:47 मय तुम सी सच कहू हय, ऊ ओख अपनी सब जायजाद पर अधिकारी ठहरायेंन।”
MAT 24:48 पर यदि ऊ दुष्ट सेवक अपनो मन म सोचन लग्यो कि मोरो मालिक को आवनो म समय हय,
MAT 24:49 अऊर अपनो संगी सेवकों ख पीटन लग्यो, अऊर पीवन वालो को संग खान-पीवन लग्यो।
MAT 24:50 त ऊ सेवक को मालिक असो दिन आयेंन, जब ऊ ओकी रस्ता नहीं देखेंन, अऊर असो समय ख जेक ऊ नहीं जानय हय,
MAT 24:51 तब ऊ ओख भारी ताड़ना देयेंन अऊर ओको हिस्सा कपटियों को संग ठहरायेंन: उत रोवनो अऊर दात कटरनो होयेंन।
MAT 25:1 “स्वर्ग को राज्य उन दस कुंवारियों को जसो होयेंन जो अपनी दीया पकड़ क दूल्हा सी मिलन लायी निकली।
MAT 25:2 उन्म पाच मूर्ख अऊर पाच समझदार होती।
MAT 25:3 मूर्खो न अपनी दीया त ली, पर अपनो संग तेल नहीं लियो;
MAT 25:4 पर समझदारों न अपनी दीया को संग अपनो कुप्पियों म तेल भी भर लियो।
MAT 25:5 जब दूल्हा को आनो म देर भयी, त हि सब नींद सी झुलन लगी अऊर सोय गयी।”
MAT 25:6 “अरधी रात ख धूम मची: ‘देखो, दूल्हा आय रह्यो हय! ओको सी मिलन लायी चलो।’
MAT 25:7 तब हि सब कुंवारिया उठ क अपनी दीया ठीक करन लगी।
MAT 25:8 अऊर मूर्खो न समझदारों सी कह्यो, ‘अपनो तेल म सी कुछ हम्ख भी देवो, कहालीकि हमरो दीया बुझ रह्यो हंय।’
MAT 25:9 पर समझदारों न उत्तर दियो, ‘यो हमरो अऊर तुम्हरो लायी पूरो नहीं होय; भलो त यो हय कि तुम तेल बेचन वालो को जवर जाय क अपनो लायी ले लेवो।’
MAT 25:10 जब हि तेल लेन ख जाय रही होती त दूल्हा आय पहुंच्यो, अऊर जो तैयार होती, हि ओको संग बिहाव को भवन म चली गयी अऊर दरवाजा बन्द कर दियो गयो।”
MAT 25:11 “येको बाद हि दूसरी कुंवारिया भी आय क कहन लगी, ‘हे मालिक, हे मालिक, हमरो लायी दरवाजा खोल दे अऊर हम ख अन्दर आवन दे!’
MAT 25:12 ओन उत्तर दियो, ‘मय तुम सी सच कहूं हय, मय तुम्ख नहीं जानु।’”
MAT 25:13 येकोलायी “जागतो रहो,” कहालीकि तुम न ऊ दिन ख जानय हय, अऊर न ऊ समय ख।
MAT 25:14 “कहालीकि यो ऊ आदमी को जसो हय जेन परदेश जातो समय अपनो सेवकों ख बुलाय क अपनी जायजाद उन्ख सौंप दियो।
MAT 25:15 ओन एक ख पाच हजार सोनो को सिक्का दियो, दूसरों ख दोय हजार दियो, अऊर तीसरो ख एक हजार; यानेकि हर एक ख ओकी लायकता को अनुसार दियो, अऊर तब ऊ अपनी यात्रा पर चली गयो।
MAT 25:16 तब, जेक पाच हजार को सिक्का मिल्यो होतो, ओन तुरतच जाय क उन्को सी लेन-देन करयो, अऊर पाच हजार सिक्का अऊर कमायो।
MAT 25:17 योच रीति सी जेक दोय हजार सोनो को सिक्का मिल्यो होतो, ओन भी दोय अऊर कमायो।
MAT 25:18 पर जेक एक हजार सोनो को सिक्का मिल्यो होतो, ओन जाय क माटी खोदी, अऊर अपनो मालिक को धन लूकाय दियो।”
MAT 25:19 “बहुत दिनो को बाद उन सेवकों को मालिक आय क उन्को सी हिसाब लेन लग्यो।
MAT 25:20 जो नौकर ख पाच हजार सिक्का मिल्यो होतो, ओन आय क दूसरों पाच हजार सिक्का अऊर लाय क कह्यो, ‘हे मालिक, तय न मोख पाच हजार सिक्का दियो, देख, मय न पाच हजार सिक्का अऊर कमायो हंय।’
MAT 25:21 ओको मालिक न ओको सी कह्यो, ‘शाबाश, हे अच्छो अऊर विश्वास लायक सेवक, तय थोड़ो म विश्वास लायक रह्यो; मय तोख बहुत धन को अधिकारी बनाऊं। अपनो मालिक की खुशी म सहभागी हो।’”
MAT 25:22 अऊर जेक दोय हजार सिक्का मिल्यो होतो, ओन भी आय क कह्यो, हे मालिक, “तय न मोख दोय हजार सिक्का दियो होतो, देख, मय न दोय हजार सिक्का अऊर कमायो।”
MAT 25:23 ओको मालिक न ओको सी कह्यो, “शाबाश, हे अच्छो अऊर विश्वास लायक सेवक, तय थोड़ो म विश्वास लायक रह्यो; मय तोख बहुत धन को अधिकारी बनाऊं। अपनो स्वामी को खुशी म सहभागी हो।”
MAT 25:24 “तब जेक एक हजार सिक्का मिल्यो होतो, ओन आय क कह्यो, ‘हे मालिक, मय तोख जानत होतो कि तय कठोर आदमी हय: तय जित कहीं नहीं बोवय उत काटय हय, अऊर जित नहीं बोवय उत सी जमा करय हय।
MAT 25:25 येकोलायी मय डर गयो अऊर जाय क तोरो धन माटी म लूकाय दियो। देख, जो तोरो हय, ऊ यो आय।’”
MAT 25:26 ओको मालिक न ओख उत्तर दियो, “हे दुष्ट अऊर आलसी सेवक, जब तय यो जानत होतो कि जित मय न फसल नहीं बोयो, उत सी फसल काटू हय, अऊर जित मय न बीज नहीं बोयो उत सी फसल जमा कर लेऊ हय;
MAT 25:27 त तोख समझनो होतो कि मोरो धन व्यापारी ख दे देतो, तब मय आय क अपनो धन ब्याज समेत ले लेतो।
MAT 25:28 अब, धन ख ओको सी ले लेवो, अऊर जेको जवर दस हजार को सिक्का हंय, ओख दे देवो।
MAT 25:29 हर एक आदमी लायी जेको जवर कुछ हय, ओख अऊर भी जादा दियो जायेंन; अऊर ओको जवर जादा सी जादा होयेंन: पर जो आदमी को जवर कुछ भी नहाय, यो तक कि ओको जवर जो कुछ भी हय, ऊ ओको सी ले लियो जायेंन।
MAT 25:30 अऊर यो बेकार सेवक ख बाहेर अन्धारो म डाल देवो, जित रोवनो अऊर दात कटरनो होयेंन।”
MAT 25:31 “जब आदमी को बेटा अपनी महिमा म आयेंन अऊर सब स्वर्गदूत ओको संग आयेंन, त ऊ अपनी महिमा को सिंहासन पर विराजमान होयेंन।
MAT 25:32 अऊर सब राष्ट्रों को लोगों ख ओको आगु जमा करयो जायेंन; अऊर जसो चरावन वालो मेंढीं ख शेरी सी अलग कर देवय हय, वसोच ऊ उन्ख एक दूसरों सी अलग करेंन।
MAT 25:33 ऊ मेंढीं ख अपनो दायो तरफ अऊर शेरी ख बायो तरफ खड़ो करेंन।
MAT 25:34 तब राजा अपनो दायो तरफ वालो सी कहेंन, ‘हे मोरो बाप को धन्य लोगों, आवो, ऊ राज्य को अधिकारी होय जावो, जो जगत की सुरूवात सी तुम्हरो लायी तैयार करयो गयो हय।
MAT 25:35 कहालीकि मय भूखो होतो, अऊर तुम्न मोख खान ख दियो; मय प्यासो होतो, अऊर तुम्न मोख पानी पिलायो; मय अनजान होतो, अऊर तुम न मोख अपनो घर म रख्यो;
MAT 25:36 मय नंगा होतो, अऊर तुम्न मोख कपड़ा पहिनायो; मय बीमार होतो, अऊर तुम्न मोरी देखभाल करी, मय जेलखाना म होतो, अऊर तुम मोरो सी मिलन आयो।’
MAT 25:37 “तब सच्चो ओख उत्तर देयेंन, ‘हे प्रभु, हम न कब तोख भूखो देख्यो अऊर खिलायो? यां प्यासो देख्यो अऊर पानी पिलायो?
MAT 25:38 हम न तोख कभी अनजानो देख्यो अऊर अपनो घर म ठहरायो? यां बिना कपड़ा को देख क मोख कपड़ा पहिनायो?
MAT 25:39 हम्न कब तोख बीमार यां जेलखाना म देख्यो अऊर तोरो सी मिलन आयो?’
MAT 25:40 तब राजा उन्ख उत्तर देयेंन, ‘मय तुम सी सच कहू हय कि तुम्न जो मोरो इन छोटो भाऊवों म सी कोयी एक को संग करयो, ऊ मोरोच संग करयो।’
MAT 25:41 “तब ऊ बायो तरफ वालो सी कहेंन, ‘हे श्रापित लोगों, मोरो आगु सी ऊ अनन्त आगी म चली जावो, जो शैतान अऊर ओको दूतों लायी तैयार करी गयी हय।
MAT 25:42 कहालीकि मय भूखो होतो, अऊर तुम्न मोख खान ख नहीं दियो; मय प्यासो होतो, अऊर तुम्न मोख पानी नहीं पिलायो;
MAT 25:43 मय अनजानो होतो, अऊर तुम्न मोख अपनो घर म नहीं रख्यो; मय नंगा होतो, अऊर तुम्न मोख कपड़ा नहीं पहिनायो; अऊर मय बीमार अऊर जेलखाना म होतो, अऊर तुम्न मोरी सुधि नहीं ली।’
MAT 25:44 “तब हि उत्तर देयेंन, ‘हे प्रभु, हम्न तोख कब भूखो, प्यासो, अनजान, नंगा, बीमार, यां जेलखाना म देख्यो, अऊर तोरी सेवा नहीं करी?’
MAT 25:45 तब ऊ उन्ख उत्तर देयेंन, ‘मय तुम सी सच कहू हय कि तुम्न जो इन छोटो सी छोटो म सी कोयी एक को संग मदत नहीं करयो, ऊ मोरो संग भी नहीं करयो।’
MAT 25:46 अऊर हि अनन्त सजा भोगन लायी लिजायेंन पर धर्मी न्याय को अनन्त जीवन म सिरेंन।”
MAT 26:1 जब यीशु यो सब बाते कह्य चुक्यो त अपनो चेलावों सी कहन लग्यो,
MAT 26:2 “तुम जानय हय कि दोय दिन को बाद फसह को पर्व हय, अऊर आदमी को बेटा क्रूस पर चढ़ायो जान लायी पकड़वायो जायेंन।”
MAT 26:3 तब मुख्य याजकों अऊर प्रजा को बुजूर्गों कैफा नाम को महायाजक को भवन म जमा भयो,
MAT 26:4 अऊर आपस म बिचार करन लग्यो कि यीशु ख चुपचाप सी पकड़ क मार डालो।
MAT 26:5 पर हि कहत होतो, “पर्व को समय नहीं, कहीं असो नहीं होय कि लोगों म दंगा होय जाये।”
MAT 26:6 जब यीशु बैतनिय्याह म शिमोन कोढ़ी को घर म होतो,
MAT 26:7 त एक बाई संगमरमर को बर्तन म बहुमूल्य अत्तर ले क ओको जवर आयी, अऊर जब ऊ जेवन करन बैठ्यो होतो त ओकी मुंड पर कुड़ाय दियो।
MAT 26:8 यो देख क ओको चेला गुस्सा भयो अऊर कहन लग्यो, “येको कहाली नाश करयो गयो?
MAT 26:9 येख त अच्छो दाम पर बेच क गरीबों ख बाट्यो जाय सकत होतो।”
MAT 26:10 यो जान क यीशु न उन्को सी कह्यो, “या बाई ख कहाली सतावय हय? ओन मोरो संग भलायी को काम करयो हय।
MAT 26:11 गरीब त तुम्हरो संग हमेशा रह्य हंय, पर मय तुम्हरो संग हमेशा नहीं रहूं।
MAT 26:12 ओन मोरो शरीर पर जो यो अत्तर कुड़ायो हय, ऊ मोरो गाड़्यो जान की तैयारी लायी करयो हय।
MAT 26:13 मय तुम सी सच कहू हय, कि पूरो जगत म जित कहीं यो सुसमाचार प्रचार करयो जायेंन, उत ओको यो काम को वर्नन भी ओकी याद म करयो जायेंन।”
MAT 26:14 तब यहूदा इस्करियोती न, जो बारा चेलावों म सी एक होतो, मुख्य याजकों को जवर गयो,
MAT 26:15 अऊर ओन कह्यो, “यदि मय ओख तुम्हरो हाथ म सौंप देऊ त मोख का देवो?” उन्न ओख तीस चांदी को सिक्का गिन क दे दियो।
MAT 26:16 अऊर ऊ उच समय सी ओख सौंपन को अच्छो मौका ढूंढन लग्यो।
MAT 26:17 अखमीरी रोटी को पर्व को पहिलो दिन, चेला यीशु को जवर आय क पूछन लग्यो, “तय कहां पर चाहवय हय कि हम तोरो लायी फसह खान की तैयारी करे?”
MAT 26:18 ओन कह्यो, “नगर म अनजान आदमी को जवर जाय क ओको सी कहो, ‘गुरु कह्य हय कि मोरो समय जवर हय। मय अपनो चेलावों को संग तोरो इत फसह को पर्व मनाऊं।’”
MAT 26:19 येकोलायी चेलावों न यीशु की आज्ञा मानी अऊर फसह तैयार करयो।
MAT 26:20 जब शाम भयी त ऊ बारयी चेलावों को संग जेवन करन लायी बैठ्यो।
MAT 26:21 जब हि खाय रह्यो होतो त ओन कह्यो, “मय तुम सी सच कहू हय कि तुम म सी एक मोख पकड़वायेंन।”
MAT 26:22 येको पर हि बहुत उदास भयो, अऊर हर एक चेला ओको सी पूछन लग्यो, “हे प्रभु, का ऊ मय आय?”
MAT 26:23 यीशु न उत्तर दियो, “जेन मोरो संग थारी म हाथ डाल्यो हय, उच मोख पकड़वायेंन।
MAT 26:24 आदमी को बेटा त जसो ओको बारे म लिख्यो हय, पर ऊ आदमी लायी शोक हय जेको द्वारा आदमी को बेटा पकड़वायो जावय हय: यदि ऊ आदमी को जनमच नहीं होतो, त ओको लायी भलो होतो।”
MAT 26:25 तब ओको सौंपन वालो यहूदा न कह्यो, “हे गुरु, का ऊ मय आय?” ओन ओको सी कह्यो, “तय कह्य चुक्यो।”
MAT 26:26 जब हि खाय रह्यो होतो त यीशु न रोटी ली, अऊर धन्यवाद कर क् तोड़ी, अऊर चेलावों ख दे क कह्यो, “लेवो, खावो; यो मोरो शरीर आय।”
MAT 26:27 तब ओन कटोरा पकड़ क धन्यवाद करयो, अऊर उन्ख दे क कह्यो, “तुम सब येको म सी पीवो,
MAT 26:28 कहालीकि यो वाचा को मोरो ऊ खून आय, जो पूरो लोगों लायी पापों की माफी लायी बहायो जावय हय।
MAT 26:29 मय तुम सी कहू हय कि अंगूर को यो रस ऊ दिन तक कभी नहीं पीऊ, जब तक तुम्हरो संग अपनो बाप को राज्य म नयो रस नहीं पी लेऊ।”
MAT 26:30 तब हि भजन गाय क जैतून पहाड़ी पर गयो।
MAT 26:31 तब यीशु न उन्को सी कह्यो, “तुम सब अजच रात ख मोरो बारे म ठोकर खावो, कहालीकि शास्त्र म लिख्यो हय: ‘मय चरवाहे ख मारू, अऊर झुण्ड की मेंढीं तितर-बितर होय जायेंन।’
MAT 26:32 पर मय जीन्दो होन को बाद तुम सी पहिले गलील ख जाऊं।”
MAT 26:33 येको पर पतरस न यीशु सी कह्यो, “यदि सब तोरो वजह सी ठोकर खावय त खावय, पर मय कभी भी ठोकर नहीं खाऊ।”
MAT 26:34 यीशु न पतरस सी कह्यो, “मय तोरो सी सच कहू हय कि अजच रात ख मुर्गा को बाग देन सी पहिले, तय तीन बार मोरो इन्कार करजो।”
MAT 26:35 पतरस न ओको सी कह्यो, “यदि मोख तोरो संग मरनो भी पड़ेंन, तब भी मय तोरो मय कभी इन्कार नहीं करूं।” अऊर असोच सब चेलावों न भी कह्यो।
MAT 26:36 तब यीशु अपनो चेलावों को संग गतसमनी नाम को एक जागा म आयो अऊर अपनो चेलावों सी कहन लग्यो, “इतच बैठ्यो रहजो, जब तक मय उत जाय क प्रार्थना करूं।”
MAT 26:37 ऊ पतरस अऊर जब्दी को दोयी टुरावों ख संग ले गयो, अऊर उदास अऊर व्याकुल होन लग्यो।
MAT 26:38 तब ओन उन्को सी कह्यो, “मोरो मन बहुत उदास हय, यहां तक कि मोरो जीव निकल्यो जाय रह्यो हय। तुम इतच ठहरो अऊर मोरो संग जागतो रहो।”
MAT 26:39 तब ऊ थोड़ो अऊर आगु बढ़ क मुंह को बल गिरयो, अऊर यो प्रार्थना करी, “हे मोरो बाप, यदि होय सकय त यो दु:ख को कटोरा मोरो सी टल जाये, तब भी जसो मय चाहऊ हय वसो नहीं, पर जसो तय चाहऊ हय वसोच हो।”
MAT 26:40 तब ओन चेलावों को जवर आय क उन्ख सोतो देख्यो अऊर पतरस सी कह्यो, “का तुम मोरो संग एक घड़ी भी नहीं जाग सक्यो?
MAT 26:41 जागतो रहो, अऊर प्रार्थना करतो रहो कि तुम परीक्षा म मत पड़ो: आत्मा त तैयार हय, पर शरीर कमजोर हय।”
MAT 26:42 तब ओन दूसरी बार जाय क यो प्रार्थना करी, “हे मोरो बाप, यदि यो कटोरा मोरो पीयो बिना नहीं हट सकय त तोरी इच्छा पूरी होय।”
MAT 26:43 तब ओन आय क उन्ख फिर सोतो पायो, कहालीकि उन्की आंखी नींद सी भरी होती।
MAT 26:44 उन्ख छोड़ क ऊ फिर चली गयो, अऊर उन्कोच शब्दों म फिर तीसरी बार प्रार्थना करी।
MAT 26:45 तब ओन चेलावों को जवर आय क उन्को सी कह्यो, “का तुम अब तक सोय रह्यो हय, देखो! घड़ी आय पहुंची हय, अऊर आदमी को बेटा पापियों को हाथ सौंप्यो जायेंन।
MAT 26:46 उठो, चलो; देखो, मोरो सौंपन वालो जवर आय गयो हय।”
MAT 26:47 यीशु यो कह्यच रह्यो होतो कि यहूदा जो बारयी म सी एक होतो, आयो, अऊर ओको संग मुख्य याजकों अऊर बुजूर्ग लोगों को तरफ सी बड़ी भीड़, तलवारे अऊर लाठियां पकड़ क आयो।
MAT 26:48 ओको सौंपन वालो न उन्ख यो इशारा दियो होतो : “जेक मय चुम्मा लेऊ उच आय; ओख पकड़ लेजो।”
MAT 26:49 अऊर तुरतच यीशु को जवर आय क कह्यो, “हे गुरु, प्रनाम!” अऊर ओख बहुत चुम्मा लियो।
MAT 26:50 यीशु न ओको सी कह्यो, “हे संगी, जो काम लायी तय आयो हय, ओख कर ले।” तब उन्न जवर आय क यीशु पर हाथ डाल्यो अऊर ओख पकड़ लियो।
MAT 26:51 यीशु को संगियों म सी एक न हाथ बढ़ाय क अपनी तलवार खीच ली अऊर महायाजक को सेवक पर चलाय क ओको कान काट डाल्यो।
MAT 26:52 तब यीशु न ओको सी कह्यो, “अपनी तलवार म्यान म रख ले कहालीकि जो तलवार चलावय हंय हि सब तलवार सी नाश करयो जायेंन।
MAT 26:53 का तय नहीं जानय कि मय अपनो बाप सी बिनती कर सकू हय, अऊर ऊ स्वर्गदूतों की बारा पलटन सी जादा मोरो जवर अभी खड़ो कर देयेंन?
MAT 26:54 पर पवित्र शास्त्र की हि बाते असोच होनो जरूरी हय, कसो पूरी होयेंन?”
MAT 26:55 ऊ समय यीशु न भीड़ सी कह्यो, “का तुम तलवारे अऊर लाठियां धर क मोख डाकू को जसो पकड़न लायी निकल्यो हय? मय हर दिन मन्दिर म बैठ क उपदेश करत होतो, अऊर तुम न मोख नहीं पकड़्यो।”
MAT 26:56 पर यो सब येकोलायी भयो हय कि भविष्यवक्तावों को वचन पूरो होय। तब सब चेला ओख छोड़ क भग गयो।
MAT 26:57 तब यीशु को पकड़न वालो ओख कैफा नाम को महायाजक को जवर लिजायो, जहां धर्मशास्त्री अऊर बुजूर्गों जमा भयो होतो।
MAT 26:58 पतरस दूरच दूर ओको पीछू-पीछू महायाजक को आंगन तक गयो, अऊर अन्दर जाय क यीशु को का होयेंन देखन सेवकों को संग बैठ गयो।
MAT 26:59 मुख्य याजक अऊर पूरी महासभा यीशु ख मार डालन लायी ओको विरोध म झूठी गवाही की खोज म होतो,
MAT 26:60 पर बहुत सो झूठो गवाहों को आनो पर भी नहीं पायो आखरी म दोय लोग आयो,
MAT 26:61 अऊर कह्यो, “येन कह्यो हय कि मय परमेश्वर को मन्दिर ख गिराय सकू हय अऊर ओख तीन दिन म बनाय सकू हय।”
MAT 26:62 तब महायाजक न खड़ो होय क यीशु सी कह्यो, “का तय कोयी उत्तर नहीं देवय? हि लोग तोरो विरोध म का गवाही देवय हंय?”
MAT 26:63 पर यीशु चुप रह्यो। तब महायाजक न ओको सी कह्यो, “मय तोख जीन्दो परमेश्वर की कसम देऊ हय कि यदि तय परमेश्वर को बेटा मसीह आय, त हम सी कह्य दे।”
MAT 26:64 यीशु न ओको सी कह्यो, “तय न खुदच कह्य दियो; बल्की मय तुम सी यो भी कहू हय कि अब सी तुम केवल आदमी को बेटा ख सर्वशक्तिमान को दायो तरफ बैठ्यो, अऊर आसमान को बादलो पर आवतो देखो।”
MAT 26:65 येको पर महायाजक न अपनो कपड़ा फाड़्यो अऊर कह्यो, “येन परमेश्वर की निन्दा करी हय, अब हम्ख गवाहों की का जरूरत? देखो, तुम न अभी यो निन्दा सुनी हय!
MAT 26:66 तुम का सोचय हय?” उन्न उत्तर दियो, “यो दोषी हय अऊर येख मरनो चाहिये।”
MAT 26:67 तब उन्न ओको मुंह पर थूक्यो अऊर ओख घूसा मारयो, दूसरों न थापड़ मार क,
MAT 26:68 कह्यो, “हे मसीह, हम सी भविष्यवानी कर क् कह्य कि कौन न तोख मारयो?”
MAT 26:69 पतरस बाहेर आंगन म बैठ्यो हुयो होतो कि एक दासी ओको जवर आयी अऊर कह्यो, “तय भी यीशु गलीली को संग होतो।”
MAT 26:70 पतरस न सब को आगु यो कहतो हुयो इन्कार करयो, “मय नहीं जानु तय का कह्य रही हय।”
MAT 26:71 जब ऊ बाहेर द्वार म गयो, त दूसरी सेविका न ओख देख क उन्को सी जो उत होतो कह्यो, “यो भी त यीशु नासरी को संग होतो।”
MAT 26:72 पतरस न कसम खाय क फिर इन्कार करयो: “मय ऊ आदमी ख नहीं जानु।”
MAT 26:73 थोड़ी देर बाद लोगों न जो उत खड़ो होतो, पतरस को जवर आय क ओको सी कह्यो, “सचमुच तय भी उन्म सी एक आय, कहालीकि तोरी बोली भाषा न तोरो भेद खोल दियो हय।”
MAT 26:74 तब ऊ धिक्कारन अऊर कसम खान लग्यो: “मय ऊ आदमी ख नहीं जानु।” अऊर तुरतच मुर्गा न बाग दियो।
MAT 26:75 तब पतरस ख यीशु की कहीं हुयी बात याद म आयी: “मुर्गा को बाग देन सी पहिले तय तीन बार मोरो इन्कार करजो।” अऊर ऊ बाहेर जाय क फूट फूट क रोयो।
MAT 27:1 जब सबेरे भयी त सब मुख्य याजकों अऊर बुजूर्गों लोगों न यीशु ख मार डालन की योजना बनायी।
MAT 27:2 उन्न ओख बान्ध्यो अऊर ले जाय क पिलातुस शासक को हाथ म सौंप दियो।
MAT 27:3 जब ओको सौंपन वालो यहूदा न देख्यो कि ऊ दोषी ठहरायो गयो हय त ऊ पछतायो अऊर हि तीस चांदी को सिक्का मुख्य याजकों अऊर बुजूर्गों को जवर वापस देन गयो
MAT 27:4 अऊर कह्यो, “मय न निर्दोष ख मारन लायी सौंप क पाप करयो हय!” उन्न कह्यो, “हम्ख ओकी का परवाह हय? उन्न जवाब दियो। अपनो तयच देख ले।”
MAT 27:5 तब ऊ उन सिक्का ख मन्दिर म फेक क चली गयो, अऊर जाय क अपनो आप ख फासी दे दियो।
MAT 27:6 मुख्य याजकों न उन सिक्का ले क कह्यो, “इन्क, भण्डार म रखनो ठीक नहाय, कहालीकि यो खून को दाम आय।”
MAT 27:7 येकोलायी उन्न सलाह कर क् उन सिक्का सी परदेशियों को गाड़्यो जान लायी कुम्हार को खेत ले लियो।
MAT 27:8 यो वजह ऊ खेत अज तक खून को खेत कहलावय हय।
MAT 27:9 तब जो वचन यिर्मयाह भविष्यवक्ता सी कह्यो गयो होतो ऊ पूरो भयो: “उन्न हि तीस सिक्का यानेकि ऊ ठहरायो हुयो कीमत ख जेक इस्राएल की सन्तान म सी कितनो न सम्मति सी ठहरायो होतो ऊ ले लियो,
MAT 27:10 अऊर जसो प्रभु न मोख आज्ञा दियो होतो वसोच उन्ख कुम्हार को खेत ख मोल म ले लियो।”
MAT 27:11 जब यीशु रोमन शासक को आगु खड़ो होतो त शासक न ओको सी पुच्छ्यो, “का तय यहूदियों को राजा आय?” यीशु न ओको सी कह्यो, “तय खुदच कह्य रह्यो हय।”
MAT 27:12 जब मुख्य याजक अऊर बुजूर्ग ओको पर दोष लगाय रह्यो होतो, त यीशु न कुछ उत्तर नहीं दियो।
MAT 27:13 येको पर पिलातुस न ओको सी कह्यो, “का तय नहीं सुनय कि यो तोरो विरोध म कितनी गवाही दे रह्यो हय?”
MAT 27:14 पर यीशु न ओख एक बात को भी उत्तर नहीं दियो, यहां तक कि शासक ख बड़ो आश्चर्य भयो।
MAT 27:15 शासक की यो रीति होती कि ऊ पर्व म लोगों लायी कोयी एक बन्दी ख जेक हि चाहत होतो, छोड़ देत होतो।
MAT 27:16 ऊ समय उन्को इत बरअब्बा नाम को एक बदनाम आदमी बन्दी होतो।
MAT 27:17 येकोलायी जब हि जमा भयो, त पिलातुस न उन्को सी कह्यो, “तुम कौन्क चाहवय हय कि मय तुम्हरो लायी छोड़ देऊ? बरअब्बा ख, यां यीशु ख जो मसीह कहलावय हय?”
MAT 27:18 कहालीकि ऊ जानत होतो कि उन्न ओख धोका सी पकड़वायो हय।
MAT 27:19 जब पिलातुस न्याय कि गद्दी पर बैठ्यो हुयो होतो त ओकी पत्नी न ओख कह्यो, “तय ऊ सच्चो को मामला म हाथ मत डालजो, कहालीकि मय न अज सपनो म ओको वजह बहुत दु:ख उठायो हय।”
MAT 27:20 मुख्य याजकों अऊर बुजूर्गों लोगों न पिलातुस ख बहकायो कि हि बरअब्बा ख मांग ले, अऊर यीशु को नाश करायो।
MAT 27:21 लेकिन पिलातुस न भीड़ सी पुच्छ्यो, “तुम इन दोयी म सी कौन्सो चाहवय हय कि मय तुम्हरो लायी फुकट म छोड़ देऊ?” उन्न कह्यो, “बरअब्बा” ख।
MAT 27:22 पिलातुस न ओको सी पुच्छ्यो, “फिर यीशु ख, जो मसीह कहलावय हय, का करू?” सब न ओको सी कह्यो, “ऊ क्रूस पर चढ़ायो जाय!”
MAT 27:23 शासक न कह्यो, “कहाली, ओन का बुरायी करी हय?” पर हि अऊर भी चिल्लाय-चिल्लाय क कहन लग्यो, “ऊ क्रूस पर चढ़ायो जाये।”
MAT 27:24 जब पिलातुस न देख्यो कि कुछ बन नहीं पड़य पर येको विरुद्ध हल्ला बढ़तो जावय हय, त ओन पानी ले क भीड़ को आगु अपनो हाथ धोयो अऊर कह्यो, “मय यो सच्चो को खून सी निर्दोष हय; तुमच जानो।”
MAT 27:25 सब लोगों न उत्तर दियो, “येको खून हम पर अऊर हमरी सन्तान पर हो!”
MAT 27:26 येको पर ओन बरअब्बा ख उन्को लायी छोड़ दियो, अऊर यीशु ख कोड़ा मरवाय क सौंप दियो, कि क्रूस पर चढ़ायो जाये।
MAT 27:27 तब शासक को सिपाहियों न यीशु ख राजभवन म ले जाय क पूरी पलटन ओको चारयी तरफ जमा करयो,
MAT 27:28 अऊर ओको कपड़ा उतार क ओख लाल रंग को चोंगा पहिनायो,
MAT 27:29 अऊर काटा को मुकुट गूथ क ओको मुंड पर रख्यो, अऊर ओको दायो हाथ म सरकण्डा दियो अऊर ओको आगु घुटना टेक क ओकी मजाक उड़ावन लग्यो अऊर कह्यो, “हे यहूदियों को राजा, प्रनाम!”
MAT 27:30 अऊर ओको पर थूक्यो; अऊर उच सरकण्डा ले क ओको मुंड पर मारन लग्यो।
MAT 27:31 जब हि ओकी मजाक उड़ाय लियो त ऊ चोंगा ओको पर सी उतार क फिर ओकोच कपड़ा ओख पहिनायो, अऊर क्रूस पर चढ़ान लायी ले गयो।
MAT 27:32 बाहेर जातो हुयो उन्ख शिमोन नाम को एक कुरेनी आदमी मिल्यो। उन्न ओख बेकार म पकड़्यो कि ओको क्रूस ख उठाय क ले चल्यो।
MAT 27:33 ऊ जागा पर जो गुलगुता यानेकि खोपड़ी की जागा कहलावय हय, पहुंच क
MAT 27:34 उन्न पित्त मिलायो हुयो अंगूररस ओख पीवन ख दियो, पर ओन चख क पीनो नहीं चाह्यो।
MAT 27:35 तब उन्न ओख क्रूस पर चढ़ायो, अऊर चिट्ठियां डाल क ओको कपड़ा बाट लियो,
MAT 27:36 अऊर उत बैठ क ओकी पहरेदारी करन लग्यो।
MAT 27:37 अऊर ओकी दोष कि चिट्ठी ओकी मुंड को ऊपर लगायो, कि “यो यहूदियों को राजा यीशु आय।”
MAT 27:38 तब यीशु को संग दोय डाकू ख क्रूस पर चढ़ायो गयो एक ख दायो तरफ अऊर एक ख बायो तरफ।
MAT 27:39 आन–जान वालो मुंड हिला–हिलाय क ओकी निन्दा करत होतो,
MAT 27:40 अऊर यो कहत होतो, “हे मन्दिर ख गिरावन वालो अऊर तीन दिन म बनावन वालो, अपनो आप ख त बचाव! यदि तय परमेश्वर को बेटा आय, त क्रूस पर सी उतर आव।”
MAT 27:41 योच रीति सी मुख्य याजक भी धर्मशास्त्रियों अऊर बुजूर्गों समेत मजाक कर क् कहत होतो,
MAT 27:42 “येन बहुतों ख बचायो, अऊर अपनो आप ख नहीं बचाय सकय। यो त ‘इस्राएल को राजा’ आय। अब क्रूस पर सी उतर आयो त हम ओको पर विश्वास करबो।
MAT 27:43 ओन परमेश्वर पर भरोसा रख्यो हय; यदि ऊ येख चाहवय हय, त अब येख छुड़ाय ले, कहालीकि येन कह्यो होतो, ‘मय परमेश्वर को बेटा आय।’”
MAT 27:44 योच तरह डाकू भी जो ओको संग क्रूस पर चढ़ायो गयो होतो, ओकी निन्दा करत होतो।
MAT 27:45 दोपहर सी ले क तीन बजे तक ऊ पूरो प्रदेश म अन्धारो छायो रह्यो।
MAT 27:46 तीन बजे को जवर यीशु न बड़ो आवाज सी पुकार क कह्यो, “एली, एली, लमा शबक्तनी?” यानेकि “हे मोरो परमेश्वर, हे मोरो परमेश्वर, तय न मोख कहाली छोड़ दियो?”
MAT 27:47 जो उत खड़ो होतो, उन्म सी कुछ न यो सुन क कह्यो, “ऊ त एलिय्याह ख पुकार रह्यो हय।”
MAT 27:48 उन्म सी एक तुरतच दौड़्यो, अऊर स्पंज ले क सिरका म डुबायो, अऊर सरकण्डा पर रख क ओख चुसायो।
MAT 27:49 दूसरों न कह्यो, “रह्य जावो, देखो एलिय्याह ओख बचावन आवय हय कि नहीं।”
MAT 27:50 तब यीशु न फिर ऊचो आवाज सी चिल्लाय क जीव छोड़ दियो।
MAT 27:51 अऊर देखो, मन्दिर को परदा ऊपर सी खल्लो तक फट क दोय टुकड़ा भय गयो: अऊर जमीन हल गयी अऊर चट्टान तड़क गयी,
MAT 27:52 अऊर कब्रें खुल गयी, अऊर सोयो हुयो पवित्र लोगों को बहुत सो शरीर जीन्दो भयो,
MAT 27:53 अऊर ओको जीन्दो होन को बाद हि कब्रो म सी निकल क पवित्र नगर यरूशलेम म गयो अऊर बहुत लोगों ख दिखायी दियो।
MAT 27:54 तब सूबेदार अऊर जो ओको संग यीशु की पहरेदारी करत होतो, भूईडोल अऊर जो कुछ भयो होतो ओख देख क बहुतच डर गयो अऊर कह्यो, “सच म यो परमेश्वर को बेटा होतो!”
MAT 27:55 उत बहुत सी बाईयां होती जो गलील सी यीशु की सेवा करती हुयी ओको संग आयी होती, दूर सी यो देख रही होती।
MAT 27:56 उन्म मरियम मगदलीनी, अऊर याकूब अऊर योसेस की माय मरियम, अऊर जब्दी की पत्नी भी होती।
MAT 27:57 जब शाम भयी त यूसुफ नाम को अरिमतिया को एक धनी आदमी जो खुदच यीशु को चेला होतो, ऊ आयो।
MAT 27:58 ओन पिलातुस को जवर जाय क यीशु की लाश मांग्यो। पिलातुस न शरीर ख यूसुफ ख दे देन की आज्ञा दियो।
MAT 27:59 त यूसुफ न लाश लियो, अऊर ओख उज्वल चादर म लपेट्यो,
MAT 27:60 अऊर ओन अपनी नयी कब्र म रख्यो, जो ओन चट्टान म खुदवायी होती, अऊर कब्र को द्वार पर बड़ो गोटा लुढ़काय क चली गयो।
MAT 27:61 मरियम मगदलीनी अऊर दूसरी मरियम उत कब्र को आगु बैठी होती।
MAT 27:62 दूसरों दिन जो आराम दिन को बाद को दिन होतो, मुख्य याजकों अऊर फरीसियों न पिलातुस को जवर जमा होय क कह्यो,
MAT 27:63 “हे महाराज, हम्ख याद हय कि ऊ भरमावन वालो न जब ऊ जीन्दो होतो, त कह्यो होतो, ‘मय तीन दिन को बाद जीन्दो होऊं।’
MAT 27:64 येकोलायी आज्ञा दे कि तीसरो दिन तक कब्र की पहरेदारी करी जाये, असो नहीं होय कि ओको चेला आय क ओख चोर क लिजाये अऊर लोगों सी कहन लग्यो, ‘ऊ मरयो हुयो म सी जीन्दो भयो हय।’ तब पिछलो धोका पहिलो सी भी बुरो होयेंन।”
MAT 27:65 पिलातुस न उन्को सी कह्यो, “तुम्हरो जवर पहरेदार त हंय। जावो, अपनी समझ सी कब्र ख रखवाली करो।”
MAT 27:66 येकोलायी हि पहरेदारों ख संग ले क गयो, अऊर गोटा पर मुहर लगाय क कब्र ख सुरक्षित कर दियो।
MAT 28:1 आराम दिन को बाद हप्ता को पहिलो दिन भुन्सारे होतोच मरियम मगदलीनी अऊर दूसरी मरियम कब्र ख देखन आयी।
MAT 28:2 अऊर देखो, एक बड़ो भूईडोल भयो, कहालीकि प्रभु को एक दूत स्वर्ग सी उतरयो अऊर जवर आय क ओन गोटा ख लुढ़काय दियो, अऊर ओको पर बैठ गयो।
MAT 28:3 ओको रूप बिजली को जसो चमकत होतो अऊर ओको कपड़ा बर्फ को जसो उज्वल होतो।
MAT 28:4 ओको डर सी पहरेदार काप उठ्यो, अऊर मरयो जसो भय गयो।
MAT 28:5 स्वर्गदूत न बाईयों सी कह्यो, “मत डरो, मय जानु हय कि तुम यीशु ख ढूंढय हय, जो क्रूस पर चढ़ायो गयो होतो।
MAT 28:6 ऊ इत नहाय, पर अपनो वचन को अनुसार जीन्दो भय गयो हय। आवो, या जागा ख देखो, जहां प्रभु पड़्यो होतो,
MAT 28:7 अऊर तुरतच जाय क ओको चेलावों सी कहो कि ऊ मरयो हुयो म सी जीन्दो भयो हय, अऊर ऊ तुम सी पहिले गलील ख जायेंन, उत ओको दर्शन पावों! देखो, मय न जो तुम्ख बतायो हय, ओख याद रखो।”
MAT 28:8 हि डर अऊर बड़ो खुशी को संग कब्र सी तुरतच लौट क ओको चेलावों ख समाचार देन लायी दवड़ गयी।
MAT 28:9 तब यीशु उन्ख मिल्यो। अऊर कह्यो, “नमस्कार।” उन्न जवर आय क अऊर ओको पाय पकड़ क ओख प्रनाम करयो।
MAT 28:10 तब यीशु न उन्को सी कह्यो, “मत डरो; मोरो भाऊवों सी जाय क कहो कि गलील ख चली जाये, उत हि मोख देखेंन।”
MAT 28:11 हि जायच रही होती कि पहरेदारों म सी कुछ न नगर म आय क पूरो हाल मुख्य याजकों सी कह्यो जो कुछ भयो होतो।
MAT 28:12 तब उन्न बुजूर्गों को संग जमा होय क सलाह करी अऊर सिपाहियों ख बहुत धन दियो,
MAT 28:13 अऊर कह्यो “तुम यो कहनो चाहवय हय कि रात ख जब हम सोय रह्यो होतो, त ओको चेला आय क ओको शरीर चुराय ले गयो।
MAT 28:14 अऊर यदि यो बात शासक को कान तक पहुंचेंन, त हम ओख समझाय लेबो कि तुम निर्दोष हय, अऊर तुम्ख चिन्ता करनो सी बचाय लेबो।”
MAT 28:15 सिपाहियों न धन लियो अऊर उच करयो जो उन्ख करन लायी कह्यो गयो होतो। अऊर येकोलायी यो बात अज तक यहूदियों द्वारा फैलायी गयी हय।
MAT 28:16 ग्यारा चेला गलील म ऊ पहाड़ी पर गयो, जेक यीशु न उन्ख बतायो होतो।
MAT 28:17 जब उन्न ओख देख्यो, त उन्न ओख प्रनाम करयो, तब भी उन्म सी कुछ ख शक भयो।
MAT 28:18 यीशु न उन्को जवर आय क कह्यो, “स्वर्ग अऊर धरती को पूरो अधिकार मोख दियो गयो हय।
MAT 28:19 येकोलायी तुम जावो, सब लोगों ख चेला बनावो; अऊर उन्ख बाप, अऊर बेटा, अऊर पवित्र आत्मा को नाम सी बपतिस्मा देवो,
MAT 28:20 अऊर उन्ख सब बाते जो मय न तुम्ख आज्ञा दियो हय, माननो सिखावो: अऊर देखो, मय जगत को अन्त तक सदा तुम्हरो संग हय।”
MAR 1:1 परमेश्वर को बेटा यीशु मसीह को सुसमाचार की सुरूवात।
MAR 1:2 जसो की यशायाह भविष्यवक्ता की किताब म लिख्यो हय “परमेश्वर न कह्यो, ‘मय तोरो आगु अपनो दूत ख भेजूं, ऊ तोरो लायी रस्ता तैयार करेंन।’
MAR 1:3 जंगल म एक पुकारन वालो को आवाज सुनायी दे रह्यो हय कि ‘प्रभु को रस्ता तैयार करो, अऊर ओकी सड़के सीधी करो!’”
MAR 1:4 येकोलायी यूहन्ना बपतिस्मा देन वालो सुनसान जागा म बपतिस्मा अऊर शिक्षा देतो हुयो लोगों सी कह्यो, अपनो पापों सी दूर रहो अऊर माफी लायी। “मन फिराव को बपतिस्मा लेवो, अऊर परमेश्वर तुम्हरो पापों ख माफ करेंन।”
MAR 1:5 सब यहूदिया प्रदेश को अऊर यरूशलेम नगर को सब रहन वालो लोग निकल क यूहन्ना को जवर गयो। अऊर उन्न अपनो पापों ख मान क, यरदन नदी म ओको सी बपतिस्मा लेन लग्यो।
MAR 1:6 यूहन्ना ऊंट को बाल को कपड़ा पहिन्यो अऊर अपनी कमर म चमड़ा को पट्टा बान्ध्यो रहत होतो, अऊर टिड्डियां अऊर जंगली शहेद खात होतो।
MAR 1:7 अऊर ऊ यो प्रचार करत होतो, “मोरो बाद ऊ आवन वालो हय, जो मोरो सी शक्तिमान हय। मय त यो लायक नहाय की झुक क ओको चप्पल को बन्ध निकाल सकू।
MAR 1:8 मय न त तुम्ख पानी सी बपतिस्मा दियो हय पर ऊ तुम्ख पवित्र आत्मा सी बपतिस्मा देयेंन।”
MAR 1:9 उन दिनो म यीशु न नासरत नगर सी गलील प्रदेश म आय क, यरदन नदी म यूहन्ना सी पानी म डुब क बपतिस्मा लियो।
MAR 1:10 अऊर जब यीशु पानी सी निकल क ऊपर आयो, त तुरतच ओन आसमान ख खुलतो अऊर पवित्र आत्मा ख कबूत्तर को जसो अपनो ऊपर उतरता देख्यो।
MAR 1:11 अऊर या स्वर्ग सी आवाज सुनी, “तय मोरो प्रिय बेटा आय, तोरो सी मय खुश हय।”
MAR 1:12 तब आत्मा न तुरतच ओख सुनसान जागा को तरफ भेज्यो।
MAR 1:13 अऊर सुनसान जागा म चालीस दिन तक शैतान न ओकी परीक्षा करी; अऊर ऊ जंगली पशु को संग रह्यो, अऊर स्वर्गदूत ओकी सेवा करत रह्यो।
MAR 1:14 यूहन्ना ख जेलखाना म डाल्यो जान को बाद यीशु न गलील म आय क परमेश्वर को राज्य को सुसमाचार प्रचार करयो,
MAR 1:15 “सही समय पूरो भयो हय,” उन्न कह्यो, “अऊर परमेश्वर को राज्य जवर आय गयो हय! अपनो पापों सी मन फिरावो अऊर सुसमाचार पर विश्वास करो!”
MAR 1:16 जब यीशु गलील को झील को किनार-किनार जातो हुयो, ओन दोय भाऊ शिमोन अऊर ओको भाऊ अन्द्रियास ख झील म जार डालतो देख्यो; कहालीकि हि मछवारा होतो।
MAR 1:17 यीशु न उन्को सी कह्यो; “मोरो पीछू आवो; मय तुम्ख लोगों ख परमेश्वर को राज्य म लावनो सिखाऊं।”
MAR 1:18 हि तुरतच जार ख छोड़ क ओको पीछू चली गयो।
MAR 1:19 अऊर कुछ आगु आय क, ओन जब्दी को दोय बेटा याकूब, अऊर ओको भाऊ यूहन्ना ख, डोंगा पर जार ख सुधारतो देख्यो।
MAR 1:20 जब यीशु न उन्ख देख्यो, अऊर तुरतच उन्ख बुलायो; हि अपनो बाप जब्दी ख मजूरों को संग डोंगा पर छोड़ क, ओको पीछू चली गयो।
MAR 1:21 यीशु अऊर ओको चेला कफरनहूम नगर म आयो, अऊर ऊ आराम दिन म यहूदियों को आराधनालय म जाय क शिक्षा देन लग्यो।
MAR 1:22 अऊर लोग ओकी शिक्षा सी अचम्भित भयो; कहालीकि ऊ उन्ख धर्मशास्त्री को जसो नहीं, पर अधिकार सी शिक्षा देत होतो।
MAR 1:23 उच समय म, उन्को आराधनालय म एक आदमी होतो, जेको म एक दुष्ट आत्मा होती।
MAR 1:24 ओन चिल्लाय क कह्यो, “हे नासरत नगर को यीशु, हम्ख तोरो सी का काम? का तय हम्ख नाश करन आयो हय? मय तोख जानु हय, तय कौन आय? परमेश्वर को पवित्र जन आय!”
MAR 1:25 यीशु न ओख डाट क कह्यो, “चुप रह्य; अऊर ओको म सी निकल जा।”
MAR 1:26 तब दुष्ट आत्मा ओख मुरकट क, अऊर बड़ो आवाज सी चिल्लाय क ओको म सी निकल गयी।
MAR 1:27 येको पर सब लोग अचम्भा करतो हुयो आपस म वाद-विवाद करन लग्यो, की “या का बात आय? या त कोयी नयी शिक्षा आय! ऊ अधिकार को संग दुष्ट आत्मावों ख भी आज्ञा देत होतो, अऊर हि ओकी आज्ञा मानत होतो।”
MAR 1:28 अऊर यीशु को समाचार को बारे म तुरतच गलील को आजु-बाजू को पूरो प्रदेश म फैल गयो।
MAR 1:29 यीशु आराधनालय म सी निकल क, याकूब अऊर यूहन्ना को संग शिमोन अऊर अन्द्रियास को घर आयो।
MAR 1:30 शिमोन की सासु बुखार म पड़ी होती, अऊर उन्न तुरतच ओको बारे म यीशु सी कह्यो।
MAR 1:31 तब ओन जवर जाय क ओको हाथ पकड़ क ओख उठायो; अऊर ओको बुखार उतर गयो, अऊर वा उन्की सेवा-भाव करन लगी।
MAR 1:32 शाम को समय जब सूरज डुब गयो त लोग सब बीमारों ख अऊर उन्ख, जेको म दुष्ट आत्मायें होती, यीशु को जवर लायो।
MAR 1:33 अऊर नगर को सब लोग फाटक को बाहेर जमा भयो।
MAR 1:34 यीशु न बहुत सो ख जो कुछ तरह की बीमारी सी जकड़्यो हुयो होतो, उन्ख चंगो करयो, अऊर बहुत सी दुष्ट आत्मावों ख निकाल्यो, अऊर दुष्ट आत्मावों ख बोलन नहीं दियो, कहालीकि हि ओख जानत होती की ऊ कौन आय।
MAR 1:35 भुन्सारो ख, यीशु उठ क निकल गयो, अऊर एक एकान्त जागा म गयो अऊर प्रार्थना करन लग्यो।
MAR 1:36 पर शिमोन अऊर ओको संगी ओख ढूंढन गयो।
MAR 1:37 अऊर जब ऊ मिल्यो, त ओको सी कह्यो, “सब लोग तोख ढूंढ रह्यो हय।”
MAR 1:38 पर यीशु न उन्ख उत्तर दियो, “आवो; हम अऊर कहीं आजु-बाजू को गांवो म जाबो, कि मय उत भी प्रचार करू, कहालीकि मय येको लायीच आयो हय।”
MAR 1:39 येकोलायी ऊ पूरो गलील म यहूदियों को सभागृह म जाय-जाय क प्रचार करत अऊर दुष्ट आत्मावों ख निकालत रह्यो।
MAR 1:40 अऊर एक कोढ़ को रोगी यीशु को जवर आय क ओको सी बिनती करी, अऊर ओको सामने घुटना टेक क ओको सी कह्यो; “यदि तय चाहवय त मोख शुद्ध कर सकय हय।”
MAR 1:41 यीशु न कोढ़ी पर तरस खाय क हाथ बढ़ायो, अऊर ओख छूय क कह्यो, “मय चाहऊ हय तय शुद्ध होय जा!”
MAR 1:42 अऊर तुरतच ओको कोढ़ सुधरतो चल्यो, अऊर ऊ शुद्ध भय गयो।
MAR 1:43 तब यीशु न ओख कठिन चेतावनी दे क तुरतच बिदा करयो,
MAR 1:44 अऊर ओको सी कह्यो, “सुन, कोयी सी कुछ मत कहजो, पर जाय क अपनो आप ख याजक ख दिखाव, अऊर अपनो शुद्ध होन को बारे म जो कुछ मूसा न ठहरायो हय ओख भेंट चढ़ाव कि उन पर गवाही हो।”
MAR 1:45 पर ऊ आदमी बाहेर जाय क यो बात को बहुत प्रचार करन अऊर यहां तक फैलावन लग्यो कि यीशु फिर खुलेआम नगर म नहीं जाय सक्यो, पर बाहेर सुनसान जागा म रह्यो; अऊर चारयी तरफ सी लोग ओको जवर आतो रह्यो।
MAR 2:1 कुछ दिनो बाद यीशु वापस कफरनहूम आयो, अऊर खबर फैल गयी की ऊ घर म हय।
MAR 2:2 तब इतनो लोग जमा भयो कि द्वार को जवर भी जागा नहीं होती। अऊर यीशु उन्ख सन्देश सुनाय रह्यो होतो।
MAR 2:3 अऊर लोग एक लकवा को रोगी ख चार आदमी सी उठाय क यीशु को जवर लायो।
MAR 2:4 पर जब हि भीड़ को वजह सी ओको जवर नहीं पहुंच सक्यो। त उन्न ऊ घर को ऊपर को छत ख जित यीशु होतो खोल दियो। अऊर जब हि छत ख उधड़ दियो, त वा खटिया ख जेको म लकवा को रोगी पड़यो होतो, ओख छत पर सी जमीन पर उतार दियो।
MAR 2:5 यीशु न, उन्को विश्वास देख क ऊ लकवा को रोगी सी कह्यो, “हे बेटा, तोरो पाप माफ भयो।”
MAR 2:6 तब बहुत सो धर्मशास्त्री जो उत बैठ्यो होतो, अपनो-अपनो मन म बिचार करन लग्यो,
MAR 2:7 “यो आदमी कसो बात करन की हिम्मत करय हय? यो त परमेश्वर की निन्दा करय हय! परमेश्वर को अलावा अऊर कौन पाप माफ कर सकय हय?”
MAR 2:8 यीशु न खुद अपनी आत्मा म जान लियो कि हि अपनो-अपनो मन सी असो बिचार कर रह्यो हय, अऊर उन्को सी कह्यो, “तुम अपनो-अपनो मन म यो बिचार कहाली कर रह्यो हय?
MAR 2:9 का यो कहनो सहज हय? लकवा को रोगी सी कि ‘तोरो पाप माफ भयो, यां यो कहनो कि उठ अपनी खटिया उठाय क चल फिर?’
MAR 2:10 यीशु न लकवा को रोगी सी कह्यो, तुम जान लेवो कि आदमी को बेटा ख धरती पर पाप माफ करन को भी अधिकार हय।”
MAR 2:11 “मय तोरो सी कहूं हय, उठ, अपनी खटिया उठाय क अपनो घर चली जा।”
MAR 2:12 ऊ उठ्यो अऊर तुरतच खटिया उठाय क सब को सामने सी निकल क चली गयो; येको पर सब अचम्भित भयो, अऊर परमेश्वर कि बड़ायी कर क् कहन लग्यो, “हम न असो कभी नहीं देख्यो!”
MAR 2:13 यीशु निकल क गलील की झील को किनारा पर गयो, अऊर बहुत भीड़ ओको जवर आयी, अऊर ऊ उन्ख शिक्षा देन लग्यो।
MAR 2:14 जातो हुयो ओन हलफई को टुरा लेवी ख कर वसुली की चौकी पर बैठ्यो देख्यो, यीशु न ओको सी कह्यो, “मोरो पीछू चली आव।” अऊर ऊ उठ क ओको पीछू चली गयो।
MAR 2:15 जब यीशु लेवी को घर म जेवन करन गयो, तब बहुत सो कर लेनवालो अऊर दूसरों लोग भी, यीशु अऊर ओको चेलावों को संग जेवन करन बैठ्यो; कहालीकि हि बहुत सो होतो, अऊर ओको पीछू चल रह्यो होतो।
MAR 2:16 धर्मशास्त्रियों अऊर फरीसियों न यो देख क कि ऊ त पापियों अऊर कर लेनवालो को संग जेवन कर रह्यो हय, उन्न अपनो चेलावों सी कह्यो, “ऊ त कर लेनवालो अऊर पापियों को संग कहाली खावय पीवय हय?”
MAR 2:17 यीशु न यो सुन क उन्को सी कह्यो, “भलो चंगो ख डाक्टर की जरूरत नहाय, पर बीमारों ख हय: मय धर्मियों ख नहीं, पर पापियों को स्विकार करन आयो हय।”
MAR 2:18 बपतिस्मा देन वालो यूहन्ना को चेला, अऊर फरीसियों को चेला उपवास करत होतो। कुछ लोग आय क यीशु सी पुच्छ्यो, “यूहन्ना अऊर फरीसियों को चेला कहालीकि उपवास रखय हंय, पर तोरो चेला उपवास नहीं रखय?”
MAR 2:19 यीशु न उन्को सी कह्यो, “जब तक दूल्हा बरातियों को संग रह्य हय, का हि बिना खायो जाय सकय हंय? बिल्कुल नहीं! जब तक दूल्हा उन्को संग हय, तब तक हि नहीं खाय सकय।
MAR 2:20 पर ऊ दिन आयेंन, जब दूल्हा उन्को सी अलग कर दियो जायेंन; ऊ समय हि उपवास करेंन।
MAR 2:21 “नयो कपड़ा को थेगड़ पुरानो कपड़ा पर कोयी नहीं लगावय; नहीं त धोवन को बाद ऊ थेगड़ ओको म सी कुछ सुकड़ जायेंन, यानेकि नयो, पुरानो सी, अऊर ऊ पहिलो सी जादा फट जायेंन।
MAR 2:22 नयो अंगूररस ख पुरानो चमड़ा को मशकों म कोयी नहीं रखय, नहीं त अंगूररस ऊ मशकों ख फाड़ देयेंन, अऊर अंगूररस अऊर मशकों दोयी नाश होय जायेंन; पर नयो अंगूररस नयो झोली म भरयो जावय हय।”
MAR 2:23 असो भयो कि यीशु आराम दिन ख गहूं को खेतो म सी होय क जाय रह्यो होतो, अऊर ओको चेला चलतो हुयो गहूं को लोम्बा तोड़न लग्यो।
MAR 2:24 तब फरीसियों न यीशु सी कह्यो, “देखो; यो आराम को दिन ऊ काम कहाली करय हय जो उचित नहाय?”
MAR 2:25 यीशु न उन्को सी कह्यो, “का तुम न यो कभी नहीं पढ़्यो कि जब दाऊद ख जरूरत पड़ी, अऊर जब ऊ अऊर ओको संगी ख भूख लगी, तब ओन का करयो होतो?
MAR 2:26 ओन कसो अबियातार महायाजक को समय म, परमेश्वर को मन्दिर म जाय क अर्पन करी हुयी रोटी खायी, पर नियम को अनुसार याजक लोगों ख छोड़ कोयी भी नहीं खाय सकय होतो, पर दाऊद न खायी अऊर अपनो संगियों ख भी दियो?”
MAR 2:27 अऊर यीशु न उन्को सी कह्यो, “आराम दिन आदमी लायी बनायो गयो हय, नहीं कि आदमी आराम दिन को लायी।
MAR 2:28 येकोलायी आदमी को बेटा आराम दिन को भी प्रभु आय।”
MAR 3:1 यीशु तब यहूदियों को आराधनालय म गयो; उत एक आदमी होतो जेको हाथ लकवा को रोग सी सूख गयो होतो,
MAR 3:2 अऊर हि यीशु पर दोष लगावन लायी ओख मारन म लग्यो होतो कि देखो, ऊ आराम दिन म ऊ आदमी ख चंगो करय हय कि नहीं।
MAR 3:3 यीशु न लकवा को सुख्यो हाथ वालो आदमी सी कह्यो, “सामने खड़ो हो।”
MAR 3:4 अऊर उन्को सी कह्यो, “का आराम दिन को नियम को अनुसार भलो करनो ठीक हय यां बुरो करनो? जीव ख बचावनो यां मारनो?” पर हि चुप रह्यो।
MAR 3:5 यीशु न उन्को मन की कठोरता सी उदास होय क, उन्ख गुस्सा सी चारयी तरफ देख्यो, अऊर ऊ आदमी सी कह्यो, “अपनो हाथ बढ़ाव।” ओन बढ़ायो, अऊर ओको हाथ पहिलो जसो अच्छो भय गयो।
MAR 3:6 तब फरीसी बाहेर जाय क यीशु को विरोध म हेरोदेस राजा को राजनैतिक सभा को संग योजना बनायी कि ओख कसो नाश करबो।
MAR 3:7 यीशु अपनो चेलावों को संग झील को जवर चली गयो: अऊर गलील, यहूदिया सी एक बड़ी भीड़ ओको पीछू चलन लगी;
MAR 3:8 अऊर यहूदिया, अऊर यरूशलेम, अऊर इदूमिया, अऊर यरदन नदी को ओन पार, अऊर सूर अऊर सैदा को आजु बाजू सी लोगों कि एक बड़ी भीड़ यो सुन क आयी कि ऊ कसो अचम्भा को काम करय हय, ओको जवर आयी।
MAR 3:9 यीशु न अपनो चेलावों सी कह्यो, “भीड़ को वजह सी एक छोटो डोंगा मोरो लायी तैयार रखे कहालीकि हि मोख घेर नहीं सकेंन।”
MAR 3:10 ओन बहुत सो ख चंगो करयो होतो, येकोलायी जितनो लोग रोग-ग्रस्त होतो, ओख छूवन लायी ओको पर गिरत पड़त होतो।
MAR 3:11 अऊर दुष्ट आत्मायें सी ग्रस्त लोग, जब ओख देखत होती, त यीशु को आगु गिरत होती, अऊर चिल्लाय क कहत होती कि तय परमेश्वर को बेटा आय।
MAR 3:12 अऊर यीशु न दुष्ट आत्मा ख आदेश दियो कि ऊ कोयी ख भी मत बतावो कि ऊ कौन आय।
MAR 3:13 तब यीशु पहाड़ी पर चढ़ गयो, अऊर जेक ऊ चाहत होतो उन्ख अपनो जवर बुलायो; अऊर हि ओको जवर आयो।
MAR 3:14 तब यीशु न बारा आदमियों ख चुन्यो अऊर उन्ख प्रेरित नाम दे क, ओन उन्को सी कह्यो मोरो संग रहे अऊर मय उन्ख भेज सकू कि हि प्रचार करे,
MAR 3:15 अऊर दुष्ट आत्मा ख निकालन को अधिकार रखेंन।
MAR 3:16 हि बारा म सी यो आय : शिमोन जेको नाम ओन पतरस रख्यो,
MAR 3:17 अऊर जब्दी को बेटा याकूब अऊर याकूब को भाऊ यूहन्ना, जिन्को नाम ओन बुअनरगिस मतलब “गर्जन को बेटा” रख्यो,
MAR 3:18 अऊर अन्द्रियास, अऊर फिलिप्पुस, अऊर बरतुल्मै, अऊर मत्ती, अऊर थोमा, अऊर हलफई को बेटा याकूब, अऊर तद्दै, अऊर शिमोन कनानी,
MAR 3:19 अऊर यहूदा इस्करियोती जेन यीशु ख बैरियों को हाथ म धोका दे क पकड़वायो।
MAR 3:20 तब यीशु घर म गयो: अऊर असी भीड़ जमा भय गयी कि यीशु अऊर ओको चेलावों को जवर रोटी खान ख भी समय नहीं मिल्यो।
MAR 3:21 जब ओको घराना न यो सुन्यो, त हि ओख सम्भालन लायी निकल्यो; कहालीकि हि कहत होतो कि ओको चित ठिकाना पर नहाय।
MAR 3:22 धर्मशास्त्री भी जो यरूशलेम सी आयो होतो, यो कहत होतो, “ओको म शैतान हय,” अऊर “बालजबूल जो दुष्ट आत्मावों को सरदार हय येकी शक्ति सी दुष्ट आत्मावों ख निकालय हय।”
MAR 3:23 येकोलायी यीशु उन्ख जवर बुलाय क उन्को सी दृष्टान्तों म कहन लग्यो, “शैतान कसो शैतान ख निकाल सकय हय?
MAR 3:24 यदि कोयी राज्य म फूट पड़ेंन, त ऊ राज्य कसो बन्यो रह्य सकय हय?
MAR 3:25 अऊर यदि कोयी परिवार म फूट पड़ेंन, त ऊ परिवार कसो बन्यो रह्य सकेंन?
MAR 3:26 अऊर यदि शैतान अपनोच विरोधी म होय क अपनोच राज्य म फूट डालेंन, त ऊ कसो बन्यो रह्य सकय हय? ओको त अन्त होय जावय हय।
MAR 3:27 “पर कोयी ताकतवर आदमी को घर म घुस क ओको माल नहीं लूट सकय, जब तक की पहिले ऊ ताकतवर आदमी ख बान्ध नहीं लेवय; तब ऊ ओको घर ख लूट सकेंन।
MAR 3:28 “मय तुम सी सच कहू हय, कि आदमी की सन्तान को सब पाप अऊर निन्दा जो हि करय हय, माफ करयो जायेंन,
MAR 3:29 पर जो कोयी पवित्र आत्मा को खिलाफ निन्दा करेंन, ऊ कभी भी माफ नहीं करयो जायेंन: बल्की ऊ अनन्त पाप को अपराधी होयेंन।”
MAR 3:30 यीशु न लोगों सी असो कह्यो कि कुछ लोग असो कहत होतो कि ओको म दुष्ट आत्मा हय।
MAR 3:31 तब यीशु की माय अऊर ओको भाऊ बहिन आयो, अऊर घर को बाजू म खड़ो होय क ओख बुलावन भेज्यो।
MAR 3:32 अऊर भीड़ यीशु को आजु बाजू बैठी होती, अऊर उन्न ओको सी कह्यो, “देखो, तोरी माय अऊर तोरो भाऊ-बहिन बाहेर तोख ढूंढ रह्यो हय अऊर तुम सी मिलनो चाहवय हय।”
MAR 3:33 यीशु न उन्ख उत्तर दियो, “मोरी माय अऊर मोरो भाऊ-बहिन कौन आय?”
MAR 3:34 अऊर उन पर जो ओको चारयी तरफ बैठ्यो होतो, उन्को तरफ देख क कह्यो, “देखो, मोरी माय अऊर मोरो भाऊ-बहिन यहां हय।
MAR 3:35 कहालीकि जो कोयी परमेश्वर की इच्छा पर चलेंन, उच मोरो भाऊ, अऊर बहिन, अऊर माय आय।”
MAR 4:1 फिर सी यीशु न गलील की झील को किनार पर शिक्षा देन लग्यो। अऊर असी बड़ी भीड़ ओको जवर जमा भय गयी कि ऊ एक डोंगा पर चढ़ क बैठ गयो। अऊर पूरी भीड़ झील को किनार पर खड़ी रही।
MAR 4:2 अऊर ऊ उन्ख दृष्टान्त म बहुत सी बात सिखावन लग्यो, अऊर अपनो शिक्षा म उन्को सी कह्यो।
MAR 4:3 “सुनो! एक किसान बीज बोवन निकल्यो।
MAR 4:4 तब बीज बोवतो समय कुछ रस्ता को किनार पर गिरयो अऊर पक्षिंयों न आय क ओख खाय लियो।
MAR 4:5 अऊर कुछ बीज गोटाड़ी जमीन पर गिरयो जित ओख थोड़ी सी माटी मिली होती, अऊर गहरी माटी नहीं मिलन को वजह जल्दी उग गयो,
MAR 4:6 अऊर जब सूरज निकल्यो त बड़ो पौधा जर गयो, अऊर गहरी जड़ी नहीं पकड़न को वजह सूख गयो।
MAR 4:7 कुछ बीज काटा को झाड़ियों म गिरयो, अऊर झाड़ियों न बढ़ क ओख दबाय दियो, अऊर ओन फर नहीं लायो।
MAR 4:8 पर कुछ बीज अच्छी जमीन पर गिरयो, अऊर ऊ उग्यो अऊर बढ़ क ओख अच्छो फर लग्यो; अऊर कोयी तीस गुना, कोयी साठ गुना अऊर कोयी सौ गुना फर लायो।”
MAR 4:9 तब यीशु न कह्यो, “जेको जवर सुनन लायी कान हय, ऊ सुन ले।”
MAR 4:10 जब यीशु अकेलो रह्य गयो, त ओको संगियों न उन बारा चेलावों समेत ओको सी इन दृष्टान्तों को बारे म पुच्छ्यो।
MAR 4:11 ओन उन्को सी कह्यो, “तुम्ख त परमेश्वर को राज्य को भेद की समझ दी गयी हय, पर बाहेर वालो लायी सब बाते दृष्टान्तों म होवय हय।
MAR 4:12 “हि लोग देखय हय पर देख नहीं सकय, अऊर सुनय हय पर सुन नहीं सकय, अऊर हि समझ नहीं पायेंन। अऊर हि समझ सकय त परमेश्वर को तरफ मुड़ सकय हय अऊर उन्को पाप माफ होय सकय हय।”
MAR 4:13 तब यीशु न उन्को सी पुच्छ्यो, “का तुम यो दृष्टान्त नहीं समझय? त फिर अऊर कोयी दृष्टान्तों ख कसो समझो?
MAR 4:14 बोवन वालो परमेश्वर को सन्देश बोवय हय।
MAR 4:15 कुछ लोग बीज को जसो हय जो रस्ता को किनार पर आवय हय, जब हि सन्देश सुनय हय, त शैतान तुरतच आवय हय अऊर जो सन्देश उन्म बोयो गयो हय ओख उठाय लिजावय हय।
MAR 4:16 कुछ लोग ऊ बीज को जसो होवय हय, जो गोटाड़ी जमीन पर गिरय हय। जसोच हि सन्देश सुनय हय, हि तुरतच खुशी सी स्वीकार कर लेवय हय।
MAR 4:17 पर उन्म जड़ी गहरायी तक नहीं होवय हय, अऊर हि जादा दिन तक नहीं रह्य सकय। येकोलायी सन्देश स्वीकार नहीं करन को वजह सी भूल जावय हय, त उन पर कठिनायी यां उपद्रव आवय हय, त हि तुरतच ठोकर खावय हय।
MAR 4:18 कुछ लोग काटा की झाड़ियों म जगन वालो बीज को जसो हय जो सन्देश ख सुनय हय,
MAR 4:19 अऊर जीवन की चिन्ता, अऊर धन को धोका, अऊर दूसरी चिजों को लोभ ओको म समाय क सन्देश ख दबाय देवय हय अऊर ऊ असफल रह्य जावय हय।
MAR 4:20 पर कुछ लोग अच्छी जमीन म बोयो गयो बीज को जसो हंय जो सन्देश ख सुन क स्वीकार करय हंय अऊर अच्छो फर लावय हंय: कोयी तीस गुना, कोयी साठ गुना, कोयी सौ गुना।”
MAR 4:21 यीशु न उन्को सी कह्यो, “का दीया ख येकोलायी लावय हय कि बर्तन यां खटिया को खल्लो रख्यो जायेंन? का येकोलायी नहीं कि दीवट पर रख्यो जायेंन?
MAR 4:22 असो कुछ भी नहाय, जो लूक्यो हय अऊर खोल्यो नहीं जायेंन अऊर नहीं कुछ लूक्यो हय, जो प्रकाश म नहीं लायो जायेंन।
MAR 4:23 यदि कोयी को कान हय, त ऊ सुन ले।”
MAR 4:24 तब ओन उन्को सी यो भी कह्यो, “तुम सुनय हय ओको पर ध्यान देवो! उच नियम सी तुम दूसरों को न्याय करय हय उच नियम तुम्हरो लायी भी व्यवहार म लायो जायेंन, अऊर तुम्हरो लायी त ओको सी भी जादा होयेंन।
MAR 4:25 कहालीकि जेको जवर हय, उन्ख जादा दियो जायेंन; अऊर जेको जवर नहाय, ओको सी ऊ भी जो ओको जवर हय, ले लियो जायेंन।”
MAR 4:26 यीशु न कह्यो, “परमेश्वर को राज्य असो हय। जसो कोयी आदमी जमीन म बीज बोवय हय,
MAR 4:27 अऊर रात ख सोवय हय, अऊर दिन ख जागय हय, तब सब बीज अंकुरित होय क असो बढ़य हय। कि ऊ नहीं जानय की यो कसो भयो।
MAR 4:28 जमीन अपनो आप फर लावय हय, पहिले अंकुर, तब लोम्ब, अऊर तब लोम्बा म तैयार दाना।
MAR 4:29 पर जब फसल पक जावय हय, तब ऊ तुरतच हसिया सी काटय हय, कहालीकि काटन को समय आय गयो हय।”
MAR 4:30 तब यीशु न कह्यो, “परमेश्वर को राज्य कसो हय ओख समझावन लायी कौन सो दृष्टान्त सी ओको वर्नन कर सकय हय?
MAR 4:31 ऊ राई को दाना को जसो हय: जब जमीन म बोयो जावय हय त जमीन को सब बीजावों सी छोटो होवय हय,
MAR 4:32 पर जब बोयो गयो, त उग क सब पौधा सी बड़ो होय जावय हय, अऊर ओकी असी बड़ी डगाली निकलय हय कि आसमान को पक्षी ओकी छाव म घोसला बनाय क बसेरा कर सकय हय।”
MAR 4:33 यीशु न लोगों ख सन्देश दियो, असो कुछ दृष्टान्तों को उपयोग करतो हुयो ओन उन्ख उतनोच बतायो जितनो हि समझ सकत होतो।
MAR 4:34 अऊर बिना दृष्टान्त को ऊ उन्को सी कुछ भी नहीं बोलत होतो; पर एकान्त म ऊ अपनो चेलावों ख सब बातों को मतलब समझावत होतो।
MAR 4:35 ओनच दिन शाम ख, ओन अपनो चेलावों सी कह्यो, “आवो, हम झील को ओन पार चलबो।”
MAR 4:36 येकोलायी हि भीड़ ख छोड़ क जो डोंगा म यीशु पहिलेच बैठ्यो होतो, वसोच चेलावों भी ओख डोंगा पर ओन पार ले गयो; अऊर ओको संग अऊर भी डोंगा होतो।
MAR 4:37 तब अचानक बड़ी आन्धी तूफान आयी, अऊर लहर डोंगा सी यहां तक टकरावन लगी कि ऊ पानी सी भरन लगी।
MAR 4:38 यीशु खुद जहाज को पीछू को भाग म मुन्डेसो लगाय क सोय रह्यो होतो। तब चेलावों न ओख जगायो अऊर कह्यो, “हे गुरु, का तोख चिन्ता नहाय कि हम मरन पर हय?”
MAR 4:39 यीशु न उठ क आन्धी ख आज्ञा दियो, “शान्त रह, थम जा!” अऊर आन्धी थम गयी, अऊर बड़ो चैन मिल गयो।
MAR 4:40 तब यीशु न अपनो चेलावों सी कह्यो, “तुम कहाली डरय हय? का तुम्ख अब भी विश्वास नहाय?”
MAR 4:41 हि बहुतच डर गयो अऊर आपस म बोलन लग्यो, “यो आदमी कौन आय? कि आन्धी अऊर लहर भी ओकी आज्ञा मानय हय!”
MAR 5:1 यीशु अऊर ओको चेला गलील की झील को ओन पार गिरासेनियों प्रदेश म पहुंच्यो,
MAR 5:2 जब यीशु डोंगा पर सी उतरयो, त तुरतच एक आदमी कब्रस्थान सी बाहेर निकल क आयो। जेको म दुष्ट आत्मा होती ओख मिल्यो
MAR 5:3 अऊर ऊ कब्रस्थान म रहत होतो। अऊर कोयी ओख संकली सी भी बान्ध नहीं सकत होतो,
MAR 5:4 कहालीकि ऊ बार-बार बेड़ियों अऊर संकली सी बान्ध्यो गयो होतो, पर ओन संकली ख तोड़ दियो अऊर हाथ अऊर पाय की बेड़ियों को टुकड़ा टुकड़ा कर दियो होतो, अऊर कोयी ओख वश म नहीं कर सकत होतो।
MAR 5:5 ऊ लगातार रात-दिन कब्रस्थान अऊर पहाड़ी म फिरत होतो, अऊर अपनो आप ख गोटा सी घायल करत होतो।
MAR 5:6 ऊ दूर सी यीशु ख देख क दवड़्यो, अऊर ओको पाय पर घुटना को बल गिर पड़्यो,
MAR 5:7 अऊर ऊचो आवाज सी चिल्लाय क कह्यो, “हे यीशु, परमप्रधान परमेश्वर को बेटा, मोख तोरो सी का काम? मय तोख परमेश्वर की कसम देऊ हय कि मोख सजा मत दे।”
MAR 5:8 कहालीकि यीशु न ओको सी कह्यो होतो, “हे दुष्ट आत्मा, यो आदमी म सी निकल जा!”
MAR 5:9 यीशु न ओको सी पुच्छ्यो, “तोरो का नाम हय?” ओन ओको सी कह्यो, “मोरो नाम सेना हय; कहालीकि हम बहुत हय।”
MAR 5:10 अऊर ओन यीशु सी बहुत बिनती करी, “हम्ख बुरी आत्मावों ख यो जागा सी बाहेर मत भेज।”
MAR 5:11 उत पहाड़ी को ढलान पर डुक्करों को एक बड़ो झुण्ड चर रह्यो होतो।
MAR 5:12 येकोलायी बुरी आत्मा न यीशु सी बिनती कर क् कह्यो, “हम्ख उन डुक्करों म भेज दे कि हम उन्को अन्दर समाय जाबो।”
MAR 5:13 येकोलायी ओन उन्ख आज्ञा दियो अऊर दुष्ट आत्मा निकल क डुक्करों को अन्दर समाय गयी अऊर डुक्करों को जो झुण्ड, लग-भग दोय हजार होतो, ढलान पर सी झील म गिर क डुब मरयो।
MAR 5:14 उन डुक्करों ख चरावन वालो न खेतो सी दौड़ क नगर अऊर गांवो म समाचार सुनायो, अऊर जो घटना घटी होती, लोग ओख देखन आयो।
MAR 5:15 तब हि यीशु को जवर आयो, अऊर ऊ आदमी ख जेको म दुष्ट आत्मायें होती, जेको म सेना समायी होती, कपड़ा पहिन क अच्छो अवस्था म बैठ्यो देख क डर गयो।
MAR 5:16 जिन लोगों न ओख देख्यो होतो, ओको म दुष्ट आत्मायें होती, अऊर डुक्करों को पूरो हाल उन्ख बतायो।
MAR 5:17 तब हि यीशु सी बिनती कर क् कहन लग्यो कि हमरो सरहद सी चली जा।
MAR 5:18 जब यीशु डोंगा पर चढ़न लग्यो त ऊ आदमी जेको म दुष्ट आत्मायें होती, ओको सी बिनती करन लग्यो, “मोख अपनो संग चलन दे।”
MAR 5:19 पर यीशु न ओख जान नहीं दियो। अऊर ओको सी कह्यो, “अपनो घर जाय क अपनो लोगों ख बताव कि तोरो पर दया कर क् प्रभु न तोरो लायी कसो बड़ो काम करयो हय।”
MAR 5:20 ऊ जाय क दस नगर को बड़ो शहर दिकापुलिस म यो बात को प्रचार करन लग्यो कि यीशु न मोरो लायी कसो बड़ो काम करयो हय; अऊर सब लोग अचम्भा करत होतो।
MAR 5:21 जब यीशु डोंगा सी ओन पार गयो, त एक बड़ी भीड़ ओको आजु बाजू जमा भय गयी। अऊर ऊ झील को किनार पर होतो।
MAR 5:22 याईर नाम को आराधनालय को मुखिया म सी एक लोग आयो, अऊर यीशु ख देख क ओको पाय पर गिर पड़्यो,
MAR 5:23 अऊर यो कह्य क ओको सी बहुत बिनती करी, “मोरी छोटी बेटी बीमार हय: तय आय क ओको पर हाथ रख कि वा चंगी होय क जीन्दी रहे।”
MAR 5:24 तब यीशु ओको संग गयो; अऊर बड़ी भीड़ ओको पीछू चलन लगी, यहां तक कि लोगों कि भीड़ ओको पर गिर पड़त होती।
MAR 5:25 एक बाई होती, जेक बारा साल सी खून बहन कि बीमारी होती।
MAR 5:26 ओन बहुत दु:ख उठायो अऊर बहुत डाक्टरों सी इलाज करवायो, अऊर अपनो सब पैसा खर्च करन पर भी ओख कुछ फायदा नहीं मिल्यो, पर अऊर भी बीमारी भय गयी।
MAR 5:27 ओन यीशु को बारे म ओकी चर्चा सुनी, येकोलायी भीड़ म ओको पीछू सी आयी अऊर ओको कपड़ा ख छूय लियो,
MAR 5:28 कहालीकि वा कहत होती, “यदि मय ओको कपड़ाच ख छूय लेऊ, त चंगी होय जाऊं।”
MAR 5:29 अऊर तुरतच ओको खून बहनो बन्द भय गयो, अऊर ओन अपनो शरीर म जान लियो कि मय वा बीमारी सी अच्छी भय गयी हय।
MAR 5:30 यीशु न तुरतच अपनो आप म जान लियो कि मोरो म सी सामर्थ निकली हय, अऊर भीड़ म पीछू मुड़ क पुच्छ्यो, “मोरो कपड़ा ख कौन न छूयो?”
MAR 5:31 ओको चेलावों न ओको सी कह्यो, “तय देखय हय कि भीड़ तोरो पर गिर पड़य हय, अऊर तय कह्य हय कि कौन न मोख छूयो?”
MAR 5:32 पर यीशु न ओख देखन लायी जेन यो काम करयो होतो, चारयी तरफ देख्यो।
MAR 5:33 तब वा बाई यो जान क कि मोरी कसी भलायी भयी हय, डरती अऊर कापती आयी, अऊर ओको पाय पर घुटना को बल गिर क ओख सब सच्चायी बताय दियो।
MAR 5:34 यीशु न ओको सी कह्यो, “मोरी बेटी, तोरो विश्वास न तोख चंगो करयो हय: शान्ति सी जा, अऊर अपनी यो बीमारी सी बची रह्य।”
MAR 5:35 जब यीशु कह्य रह्यो होतो कि आराधनालय को मुखिया को घर सी लोगों न आय क कह्यो, “तोरी बेटी त मर गयी, अब गुरु ख कहालीकि परेशान करय हय?”
MAR 5:36 पर यीशु न उन्की बात नहीं सुनी पर उन्की बात पर ध्यान नहीं दियो, अऊर आराधनालय को मुखिया सी कह्यो। “मत डर; केवल विश्वास रख।”
MAR 5:37 अऊर ओन पतरस, याकूब, अऊर याकूब को भाऊ यूहन्ना ख छोड़ क, अऊर कोयी ख भी अपनो संग आवन नहीं दियो।
MAR 5:38 याईर अधिकारी को घर म जाय क यीशु न, लोगों ख भ्रमित अवस्था म बहुत रोवत अऊर चिल्लावत देख्यो।
MAR 5:39 तब ओन घर को अन्दर जाय क उन सी कह्यो, “तुम कहाली भ्रम म हय? कहाली रोवय हय? बेटी मरी नहीं, पर वा सोय रही हय।”
MAR 5:40 हि ओकी मजाक उड़ावन लग्यो, येकोलायी ओन सब ख बाहेर निकाल क बेटी को माय-बाप अऊर अपनो तीन चेलावों को संग ऊ कमरा को अन्दर गयो, जित बेटी पड़ी होती।
MAR 5:41 अऊर बेटी को हाथ पकड़ क ओको सी कह्यो, “तलीता कूमी!” जेको मतलब आय, “हे बेटी, मय तोरो सी कहूं हय, उठ!”
MAR 5:42 अऊर बारा साल की वा बेटी तुरतच उठ क चलन फिरन लगी; येको पर लोगों ख बहुत आश्चर्य भयो।
MAR 5:43 तब ओन उन्ख चिताय क आज्ञा दियो कि या बात कोयी ख मत बतावो, “अऊर येख कुछ खान ख देवो।”
MAR 6:1 यीशु उत सी निकल क अपनो नासरत नगर म आयो, अऊर ओको चेला भी ओको पीछू गयो।
MAR 6:2 आराम दिन म ऊ आराधनालय म शिक्षा देन लग्यो, अऊर बहुत सो लोग सुन क अचम्भित होय क कहन लग्यो, “येख या सब बाते कित सी आय गयी? यो कौन सो ज्ञान आय जो ओख दियो गयो हय? कसो सामर्थ को काम येको हाथों सी प्रगट होवय हय?
MAR 6:3 ऊ बढ़यी त आय, जो मरियम को बेटा, अऊर याकूब, योसेस, यहूदा, अऊर शिमोन को भाऊ आय? का ओकी बहिन यहां हमरो बीच म नहाय?” येकोलायी उन्न ओको इन्कार करयो।
MAR 6:4 यीशु न उन्को सी कह्यो, “भविष्यवक्ता ख अपनो नगर म, अऊर अपनो कुटुम्ब म, अऊर अपनो परिवार ख छोड़ क सब जागा म आदर, मिलय हय।”
MAR 6:5 ऊ उत कोयी सामर्थ को काम नहीं कर सक्यो, केवल थोड़ो सो बीमारों पर हाथ रख क उन्ख चंगो करयो।
MAR 6:6 अऊर यीशु ख लोगों को अविश्वास पर आश्चर्य भयो, अऊर ऊ चारयी तरफ को गांव म शिक्षा दे रह्यो होतो।
MAR 6:7 ओन बारयी चेलावों ख अपनो जवर बुलायो अऊर उन्ख दोय-दोय कर क् भेज्यो; अऊर उन्ख दुष्ट आत्मावों पर अधिकार दियो।
MAR 6:8 ओन उन्ख आदेश दियो, “अपनी यात्रा लायी लाठी को अलावा अऊर कुछ मत लेवो नहीं रोटी, नहीं झोली, नहीं पैसा।
MAR 6:9 पर चप्पल पहिनो, अऊर पहिन्यो हुयो कुरता को अलावा दूसरों कुरता मत रखो।”
MAR 6:10 अऊर ओन उन्को सी कह्यो, “जित कहीं भी तुम कोयी घर म जावो त तुम्हरो स्वागत होवय हय, त उच घर म रहो, जब तक बिदा नहीं करय तब तक ऊ घर ख मत छोड़ो।
MAR 6:11 जो गांव को लोग तुम्हरो स्वागत नहीं करय अऊर तुम्हरी नहीं सुनय, त ऊ घर ख छोड़ देवो अऊर उलटो पाय वापस होय जावो। कि उन्को लायी चेतावनी होयेंन।”
MAR 6:12 तब उन्न जाय क प्रचार करयो कि पाप करनो छोड़ो, अऊर परमेश्वर को तरफ फिरो।
MAR 6:13 अऊर बहुत सी दुष्ट आत्मावों ख निकाल्यो, अऊर बहुत सो बीमारों पर जैतून को तेल मल क उन्ख चंगो करयो।
MAR 6:14 हेरोदेस राजा न भी ओकी चर्चा सुन्यो, कहालीकि ओको नाम फैल गयो होतो, अऊर लोग कहत होतो, “यूहन्ना बपतिस्मा देन वालो मरयो हुयो म सी जीन्दो भयो हय! येकोलायी ओको सी यो सामर्थ को काम प्रगट होवय हंय।”
MAR 6:15 पर कुछ लोगों न कह्यो, “यो एलिय्याह आय।” पर कुछ लोगों न कह्यो, “भविष्यवक्ता यां भविष्यवक्तावों म सी कोयी एक को जसो हय।”
MAR 6:16 राजा हेरोदेस न यो सुन क कह्यो, “जो बपतिस्मा देन वालो यूहन्ना को मुंड मय न कटवायो होतो! पर उच जीन्दो भयो हय!”
MAR 6:17 हेरोदेस न सैनिकों द्वारा यूहन्ना ख संकली सी बान्ध क जेलखाना म डाल दियो होतो। कहालीकि हेरोदेस न अपनो भाऊ फिलिप्पुस की पत्नी हेरोदियास सी बिहाव कर लियो होतो, येकोलायी यूहन्ना ओख गलत साबित करत होतो।
MAR 6:18 बपतिस्मा देन वालो यूहन्ना न बार बार हेरोदेस सी कह्यो होतो, “अपनो भाऊ की पत्नी सी बिहाव करनो तोख उचित नहाय।”
MAR 6:19 कहालीकि हेरोदियास बपतिस्मा देन वालो यूहन्ना सी घृना रखत होती येकोलायी ओख मरवानो चाहत होती पर वा हेरोदेस को वजह सी असो नहीं कर सकी,
MAR 6:20 हेरोदेस यूहन्ना सी डरत होतो कहालीकि ऊ एक पवित्र अऊर सच्चो व्यक्ति आय जान क ओख सम्भाल क रखत होतो, पर जब भी ओकी बाते सुनत होतो त ऊ बहुत घबरावत होतो।
MAR 6:21 जब हेरोदियास ख मौका मिल्यो। तब हेरोदेस न अपनो जनम दिन म अपनो प्रधानों, अऊर सेनापतियों, अऊर गलील को मुख्य लोगों ख जेवन म नेवता दियो।
MAR 6:22 त हेरोदियास की बेटी अन्दर आयी, अऊर नाच क हेरोदेस अऊर ओको संग बैठन वालो मुख्य लोगों ख खुश करयो। त राजा न टुरी सी कह्यो, “तय जो चाहवय हय मोरो सी मांग मय तोख देऊ।”
MAR 6:23 अऊर मय तुम सी वादा करू हय, “मय अपनो अरधो राज्य तक जो कुछ तय मांगजो मय तोख देऊ।”
MAR 6:24 ओन बाहेर जाय क अपनी माय सी पुच्छ्यो, “मय का मांगू?” वा बोली, “यूहन्ना बपतिस्मा देन वालो को मुंड।”
MAR 6:25 वा तुरतच राजा को जवर आयी अऊर ओको सी मांग करी, “मय चाहऊ हय कि तय अभी यूहन्ना बपतिस्मा देन वालो को मुंड एक थारी म मोख मंगाय दे।”
MAR 6:26 तब राजा बहुत दु:खी भयो, कि ओन अपनो मेहमानों को आगु वा टुरी सी कसम को वजह ओख टाल नहीं सक्यो।
MAR 6:27 येकोलायी राजा न तुरतच एक पहरेदार ख आज्ञा दे क जेलखाना भेज्यो कि ओको मुंड काट क लाव।
MAR 6:28 ओन जेलखाना म जाय क ओको मुंड काट्यो, अऊर एक थारी म रख क लायो अऊर टुरी ख दियो, अऊर टुरी न अपनी माय ख दियो।
MAR 6:29 यो सुन क यूहन्ना को चेला आयो, अऊर ओको शरीर ख ले गयो अऊर कब्र म रख्यो।
MAR 6:30 प्रेरितों न यीशु को जवर आय क जमा भयो, अऊर जो कुछ उन्न करयो अऊर सिखायो होतो, सब ओख बतायो।
MAR 6:31 यीशु न चेला सी कह्यो, “आवो अऊर एकान्त जागा म चल क थोड़ो आराम करो।” कहालीकि बहुत लोग आवत-जात होतो, अऊर उन्ख जेवन करन को समय भी नहीं मिलत होतो।
MAR 6:32 येकोलायी हि डोंगा पर चढ़ क सुनसान जागा म अलग चली गयो।
MAR 6:33 अऊर बहुत लोगों न उन्ख जातो देख क पहिचान लियो, अऊर सब नगर सी जमा होय क पैदल दवड़्यो अऊर यीशु अऊर ओको चेलावों को पहिले जा पहुंच्यो।
MAR 6:34 यीशु डोंगा सी उतर क लोगों की बड़ी भीड़ ख देख्यो, अऊर ओको दिल उन्को लायी दया सी भर गयो, कहालीकि हि चरवाहा को बिना मेंढीं को जसो होतो। येकोलायी ऊ उन्ख बहुत सी बाते सिखावन लग्यो।
MAR 6:35 जब दिन बहुत डुब गयो, त ओको चेला ओको जवर आय क कहन लग्यो, “यो सुनसान जागा हय, अऊर दिन बहुत डुब गयो हय।
MAR 6:36 उन लोगों ख भेज क कि चारयी बाजू को खेतो अऊर गांवो म जाय क, अपनो लायी कुछ खान को लेय क लावो।”
MAR 6:37 ओन उत्तर दियो, “तुमच उन्ख खान ख देवो।” उन्न यीशु सी कह्यो। “का हम चांदी को सिक्का की रोटी लेय लेबो जेकी कीमत दोय सौ दिन की मजूरी को बराबर हय, उन्ख खिलायबो?”
MAR 6:38 यीशु न उन्को सी कह्यो, “जाय क देखो तुम्हरो जवर कितनी रोटी हय?” उन्न मालूम कर क् कह्यो, “पाच रोटी अऊर दोय मच्छी।”
MAR 6:39 तब यीशु न चेलावों ख आज्ञा दियो कि सब ख हरी घास पर पंगत-पंगत सी बिठाय देवो।
MAR 6:40 येकोलायी हि सौ सौ अऊर पचास पचास कर क् पंगत-पंगत सी बैठ गयो।
MAR 6:41 तब यीशु न पाच रोटी अऊर दोय मच्छी ख लियो, अऊर स्वर्ग को तरफ देख क परमेश्वर ख धन्यवाद दियो। अऊर ओन रोटी तोड़-तोड़ क चेलावों ख देत गयो कि हि लोगों ख परोसो। अऊर हि दोय मच्छी भी उन सब म बाट दियो।
MAR 6:42 अऊर सब खाय क सन्तुष्ट भय गयो,
MAR 6:43 तब चेलावों न रोटी अऊर मच्छी म सी बच्यो हुयो टुकड़ा सी बारा टोकनी भर क उठायी।
MAR 6:44 जिन्न जेवन करयो, हि पाच हजार आदमी होतो।
MAR 6:45 तब यीशु न तुरतच अपनो चेलावों ख डोंगा पर चढ़ायो अऊर हि ओको सी पहिले ओन पार बैतसैदा ख चली जाय, जब तक कि ऊ लोगों ख बिदा करन लग्यो।
MAR 6:46 उन्ख बिदा कर क् ऊ पहाड़ी पर प्रार्थना करन गयो।
MAR 6:47 जब शाम भयी, त डोंगा झील को बीच म होतो, अऊर यीशु किनारो पर अकेलो होतो।
MAR 6:48 जब ओन देख्यो कि हि डोंगा चलावत-चलावत घबराय गयो हय, कहालीकि हवा उन्को विरुद्ध होती, त रात को तीन सी छे बजे को बीच सबेरे होन सी पहिले ऊ झील पर चलत उन्को जवर आयो; कहालीकि ऊ उन्को सी आगु निकल जानो चाहत होतो।
MAR 6:49 पर उन्न ओख झील पर चलतो देख क समझ्यो कि यो भूत आय, अऊर चिल्लाय उठ्यो।
MAR 6:50 कहालीकि सब ओख देख क घबराय गयो होतो। पर यीशु न तुरतच उन्को सी बाते करी अऊर कह्यो, “हिम्मत रखो: मय आय; डरो मत!”
MAR 6:51 तब ऊ उन्को जवर डोंगा पर आयो, अऊर हवा रुक गयी: अऊर चेला बहुतच अचम्भित भयो।
MAR 6:52 हि उन पाच हजार आदमियों ख रोटी खिलावन वाली बात को अर्थ नहीं समझ सक्यो, कहालीकि उन्को मन कट्टर भय गयो होतो।
MAR 6:53 जसोच हि झील को पार होय क गन्नेसरत म पहुंच्यो, अऊर डोंगा किनार पर लगायो।
MAR 6:54 जब हि डोंगा सी उतरयो, त लोगों न तुरतच यीशु ख पहिचान लियो,
MAR 6:55 आजु बाजू को पूरो देश म दवड़्यो, अऊर बीमारों ख खटिया पर धर क, जित-जित समाचार सुन्यो कि ऊ आय, उत-उत लेय क फिरयो।
MAR 6:56 अऊर जित कहीं यीशु गांवो, नगरों, यां खेतो म जात होतो, लोग बीमारों ख बजारों म रख क ओको सी बिनती करत होतो कि ऊ उन्ख अपनो कपड़ा को कोना ख छूवन देवो; अऊर जितनो ओख छूवत होतो, सब चंगो होय जात होतो।
MAR 7:1 तब फरीसी अऊर कुछ धर्मशास्त्री जो यरूशलेम सी आयो होतो, यीशु को जवर जमा भयो,
MAR 7:2 लोगों न देख्यो फरीसियों की शिक्षा को अनुसार हाथ धोवनो होतो, पर चेलावों ख बिना हाथ धोयो रोटी खातो देख्यो।
MAR 7:3 कहालीकि फरीसी अऊर सब यहूदी, बुजूर्गों की रीति पर चलय हय अऊर जब तक हाथ नहीं धोय लेवय तब तक नहीं खावय;
MAR 7:4 अऊर बजार सी लायी जो कुछ चिज ओख अपनी शिक्षा को अनुसार धोय नहीं लेवय, तब तक नहीं खावय; जसो कटोरा, कप, अऊर तांबो को बर्तन अऊर बिस्तर इतनो धोवन को अलग-अलग तरीका होतो।
MAR 7:5 येकोलायी उन फरीसियों अऊर धर्मशास्त्रियों न यीशु सी पुच्छ्यो, “तोरो चेला कहालीकि बुजूर्गों की परम्परावों पर नहीं चलय, अऊर बिना हाथ धोयो रोटी खावय हय?”
MAR 7:6 यीशु न उन्को सी कह्यो, यशायाह न तुम कपटियों को बारे म भविष्यवानी ठीकच करी! जसो लिख्यो हय: हि लोग होठों सी त मोरो आदर करय हय, पर उन्को मन मोरो सी दूर रह्य हय
MAR 7:7 हि बेकार मोरी भक्ति करय हय, कहालीकि आदमियों को नियम ख परमेश्वर को नियम आय असो कर क् सिखावय हय।
MAR 7:8 “कहालीकि तुम परमेश्वर की आज्ञा ख टालय हय अऊर आदमियों की शिक्षावों को पालन करय हय।”
MAR 7:9 यीशु न उन्को सी कह्यो, “तुम अपनी शिक्षावों ख बनायो रखन लायी परमेश्वर की आज्ञा ख टालन म चालाक भय गयो हय।
MAR 7:10 कहालीकि मूसा न कह्यो हय, ‘अपनो बाप अऊर माय को आदर करो,’ अऊर ‘जो कोयी बाप यां माय ख बुरो कहेंन, ओख निश्चित मार डाल्यो जायेंन।’
MAR 7:11 पर तुम सिखावय हय कि यदि कोयी अपनो बाप यां माय सी कहेंन, मय जो कुछ तोख मदत कर सकत होतो, पर कह्य हय, ‘यो कुरबान हय’ जेको मतलब हय, यो परमेश्वर ख दान हय,
MAR 7:12 त असो आदमी ख अपनो बाप यां माय की सेवा नहीं करन को बहाना मिल जावय हय।
MAR 7:13 यो तरह सी तुम अपनो नियम बनाय क, परमेश्वर को शिक्षा टाल देवय हय; अऊर यो तरह सी बहुत सो काम करय हय।”
MAR 7:14 तब यीशु न लोगों ख अपनो जवर बुलाय क उन्को सी कह्यो, “तुम सब मोरी बात सुनो, अऊर समझो।
MAR 7:15 असी कोयी चिज नहाय जो आदमी म बाहेर सी अन्दर जाय क अशुद्ध नहीं करय; पर जो चिज आदमी को अन्दर सी बाहेर निकलय हय, हिच ओख अशुद्ध करय हय।
MAR 7:16 जेको कान हय ऊ सुन ले।”
MAR 7:17 जब ऊ भीड़ को जवर सी घर म गयो, त ओको चेलावों न यो दृष्टान्त को बारे म समझावन ख कह्यो।
MAR 7:18 ओन उन्को सी कह्यो, “का तुम भी असो नासमझ हय? का तुम नहीं समझय कि जो चिज बाहेर सी आदमी को अन्दर जावय हय, ऊ ओख अशुद्ध नहीं कर सकय?
MAR 7:19 कहालीकि यो तुम्हरो दिल म नहीं, पर पेट म जावय हय, अऊर शरीर सी बाहेर निकल जावय हय?” यो कह्य क यीशु न सब खान की चिज ख शुद्ध ठहरायो हय।
MAR 7:20 तब ओन कह्यो, “जो बाते आदमी को अन्दर सी बाहेर निकलय हय, उच आदमी ख अशुद्ध करय हय।
MAR 7:21 कहालीकि अन्दर सी, अपनो दिल सी बुरो बिचार, अनैतिक काम, चोरी, यां मारनो,
MAR 7:22 व्यभिचार, लालच, कपट, ईर्ष्या, घमण्ड, अऊर मूर्खता
MAR 7:23 या सब बुरी बाते अन्दर सीच निकलय हय अऊर तुम्ख अशुद्ध करय हय।”
MAR 7:24 तब यीशु उत सी उठ क सूर अऊर सैदा को प्रदेश चली गयो। अऊर एक घर म गयो अऊर ऊ नहीं चाहत होतो कि कोयी ख पता चले, पर ऊ लूक्यो नहीं रह्य सक्यो।
MAR 7:25 एक बाई जेकी छोटी बेटी म दुष्ट आत्मा होती, यीशु की चर्चा सुन क आयी, अऊर ओको पाय पर गिर पड़ी।
MAR 7:26 या बाई गैरयहूदी होती या सिरीया को फिनीकी म पैदा भयी होती। ओन यीशु सी बिनती करी कि मोरी बेटी म सी दुष्ट आत्मा ख निकाल दे।
MAR 7:27 पर यीशु न कह्यो, “पहिले बच्चां ख सन्तुष्ट होन दे, कहालीकि बच्चां की रोटी ले क कुत्तावों को आगु डालनो ठीक नहाय।”
MAR 7:28 ओन ओख उत्तर दियो, “सच हय प्रभु; पर मेज को खल्लो कुत्ता भी त बच्चां को जूठन ख खावय हय।”
MAR 7:29 यीशु न ओको सी कह्यो, तय चली जा “तुम्हरो जवाब को वजह सी; दुष्ट आत्मा तोरी बेटी म सी निकल गयी हय!”
MAR 7:30 ओन अपनो घर आय क देख्यो कि बेटी खटिया पर पड़ी हय, अऊर दुष्ट आत्मा निकल गयी हय।
MAR 7:31 तब यीशु सूर को प्रदेश सी निकल क सैदा को रस्ता सी गलील की झील पहुंच क दिकापुलिस म आयो।
MAR 7:32 त लोगों न एक बहिरा ख जो मुक्का भी होतो, ओको जवर लाय क ओको सी बिनती करी कि अपनो हाथ ओको पर रखे।
MAR 7:33 येकोलायी ऊ ओख भीड़ सी अलग ले गयो, अऊर अपनो बोट ओको कानो म डाली, अऊर थूक लगाय क ओकी जीबली ख छूयो;
MAR 7:34 अऊर यीशु स्वर्ग को तरफ देख क आह भरी, अऊर ओको सी कह्यो, “इप्फत्तह!” मतलब “खुल जा!”
MAR 7:35 अऊर आदमी को कान खुल गयो, अऊर ओकी जीबली की गाठ भी खुल गयी, अऊर ऊ साफ साफ बोलन लग्यो।
MAR 7:36 तब यीशु न लोगों ख आदेश दियो कि ऊ कोयी सी नहीं कहेंन; पर जितनो जादा ओन उन्ख आदेश दियो, उतनोच उन्न अऊर बतायो।
MAR 7:37 हि सुन क बहुतच अचम्भित भयो, “ऊ कितनो अच्छो तरह सी सब कुछ करय हय!” उन्न कह्यो। “ऊ बहिरा ख सुनन की, अऊर मुक्का ख बोलन की शक्ति देवय हय!”
MAR 8:1 उन दिनो म जब फिर बड़ी भीड़ जमा भयी, अऊर लोगों को जवर कुछ खान को नहीं होतो, त यीशु न अपनो चेलावों ख जवर बुलाय क उन्को सी कह्यो,
MAR 8:2 “मोख यो भीड़ पर तरस आवय हय, कहालीकि हि लोग तीन दिन सी बराबर मोरो संग हय, अऊर उन्को जवर कुछ भी खान लायी नहीं होतो।
MAR 8:3 यदि मय उन्ख भूखो घर भेज देऊं, त रस्ता म थक क बेहोश होय जायेंन; कहालीकि इन म सी कुछ दूर दूर सी आयो हय।”
MAR 8:4 ओको चेलावों न ओख उत्तर दियो, “इत सुनसान जागा म इतनी रोटी कोयी कित सी लायेंन कि हि सन्तुष्ट होय जायेंन?”
MAR 8:5 यीशु न उन्को सी पुच्छ्यो, “तुम्हरो जवर कितनी रोटी हय?” उन्न कह्यो, “सात।”
MAR 8:6 तब ओन लोगों ख जमीन पर बैठन को आदेश दियो, अऊर हि सात रोटी ख धरी अऊर परमेश्वर को धन्यवाद कर क् तोड़ी, अऊर अपनो चेलावों ख देत गयो कि उन्ख परोसो, अऊर उन्न लोगों को आगु परोस दियो।
MAR 8:7 उन्को जवर थोड़ी सी छोटी मच्छी भी होती; ओन परमेश्वर ख धन्यवाद कर क् उन्ख भी लोगों को आगु परोसन को आदेश दियो।
MAR 8:8 हि खाय क सन्तुष्ट भय गयो अऊर चेलावों न बच्यो टुकड़ा कि सात टोकनी भर क उठायी।
MAR 8:9 अऊर लोग चार हजार को लगभग होतो; तब ओन लोगों ख बिदा कर दियो,
MAR 8:10 अऊर ऊ तुरतच अपनो चेलावों को संग डोंगा पर चढ़ क दलमनूता प्रदेश ख चली गयो।
MAR 8:11 कुछ फरीसियों आय क यीशु सी वाद-विवाद करन लग्यो, अऊर ओख जांचन लायी ओको सी उन लोगों न आश्चर्य कर्म करन लायी कह्यो की ऊ परमेश्वर की तरफ सी स्वर्ग को कोयी चिन्ह बताव।
MAR 8:12 ओन अपनी आत्मा म आह भर क कह्यो, “यो पीढ़ी को लोग कहाली चिन्ह ढूंढय हय? मय तुम सी सच कहू हय कि यो पीढ़ी को लोगों ख कोयी चिन्ह नहीं दियो जायेंन।”
MAR 8:13 अऊर ऊ उन्ख छोड़ क फिर डोंगा पर चढ़ गयो अऊर झील को पार चली गयो।
MAR 8:14 चेला रोटी धरनो भूल गयो होतो, अऊर डोंगा म उन्को जवर एकच रोटी होती।
MAR 8:15 यीशु न उन्ख चितायो, “देखो, फरीसियों को खमीर अऊर हेरोदेस को खमीर सी चौकस रहो।”
MAR 8:16 कहालीकि हि आपस म बाते कर क् कहन लग्यो, “हमरो जवर रोटी नहाय।”
MAR 8:17 यो जान क यीशु न उन्को सी कह्यो, तुम कहालीकि आपस म बाते कर रह्यो हय कि हमरो जवर रोटी नहाय? का अब तक नहीं जानय अऊर नहीं समझय? का तुम्हरो मन सुस्त भय गयो हय?
MAR 8:18 का आंखी रह्य क भी नहीं देखय, अऊर कान रह्य क भी नहीं सुनय? अऊर का तुम्ख याद नहाय।
MAR 8:19 कि जब मय न पाच हजार लोगों लायी पाच रोटी तोड़ी होती त तुम न टुकड़ा की कितनी टोकनियां भर क उठायी होती? उन्न ओको सी कह्यो, “बारा टोकनी।”
MAR 8:20 यीशु न उन्ख पुच्छ्यो “का तुम्ख याद नहाय जब चार हजार लोगों लायी सात रोटी अऊर तुम न कितनी टोकनी भर क उठायी होती?” उन्न ओको सी कह्यो, “सात टोकनी।”
MAR 8:21 यीशु न उन्को सी पुच्छ्यो, “का तुम अब भी नहीं समझ्यो?”
MAR 8:22 हि बैतसैदा नगर म आयो; अऊर कुछ लोग एक अन्धा ख यीशु को जवर लायो अऊर ओको सी बिनती करी कि ओख छूव।
MAR 8:23 ऊ अन्धा को हाथ पकड़ क ओख गांव को बाहेर ले गयो, अऊर ओकी आंखी म थूक लगाय क ओको पर हाथ रख्यो, अऊर ओको सी पुच्छ्यो, “का तय कुछ देख सकय हय?”
MAR 8:24 ओन ऊपर देख क कह्यो, “मय आदमी ख देखूं हय; हि मोख चलतो हुयो झाड़ को जसो लग रह्यो हय।”
MAR 8:25 तब यीशु न दुबारा ओकी आंखी पर हाथ रख्यो, अऊर ओकी आंखी की रोशनी लौट आय गयी, अऊर सब कुछ साफ साफ देखन लग्यो।
MAR 8:26 यीशु न ओख यो कह्य क घर भेज्यो, “दुबारा यो गांव म सी मत जाजो सीधो घर जा।”
MAR 8:27 यीशु अऊर ओको चेला कैसरिया फिलिप्पी को गांवो म जातो हुयो। रस्ता म ओन अपनो चेलावों सी पुच्छ्यो, “मोख बतावो लोग मोरो बारे म का कह्य हय कि मय कौन आय?”
MAR 8:28 उन्न उत्तर दियो, “कुछ कह्य हय, तय यूहन्ना बपतिस्मा देन वालो; पर कोयी कह्य, तय एलिय्याह अऊर कोयी भविष्यवक्तावों म सी एक हय।”
MAR 8:29 ओन उन्को सी पुच्छ्यो, “पर तुम मोख का कह्य हय?” पतरस न ओख उत्तर दियो, “तय मसीहा आय।”
MAR 8:30 तब यीशु न उन्ख आदेश दे क कह्यो कि मोरो बारे म यो कोयी सी मत कहजो।
MAR 8:31 तब यीशु उन्ख सिखावन लग्यो कि आदमी को बेटा लायी जरूरी हय कि मय बहुत दु:ख उठाऊ, अऊर बुजूर्ग अऊर मुख्य याजक, अऊर धर्मशास्त्री को द्वारा ठुकरायो जाऊं अऊर मय मार दियो जाऊं, पर मय तीन दिन को बाद जीन्दो होय जाऊं।
MAR 8:32 ओन यो बात उन्को सी साफ-साफ कह्य दियो। येको पर पतरस ओख अलग लिजाय क डाटन लग्यो असो नहीं होय सकय।
MAR 8:33 पर यीशु न मुड़ क अपनो चेलावों को तरफ देख्यो, अऊर पतरस ख डाट क कह्यो, “हे शैतान, मोरो आगु सी दूर होय जा; कहालीकि तय परमेश्वर की बातों पर नहीं, पर आदमियों की बातों पर मन लगावय हय।”
MAR 8:34 यीशु न भीड़ अऊर अपनो चेलावों ख अपनो जवर बुलाय क उन्को सी कह्यो, “जो कोयी मोरो पीछू आवनो चाहवय, ऊ अपनो आप ख इन्कार कर क् अऊर अपनो क्रूस उठाये अऊर मरन लायी तैयार रहेंन तब ऊ मोरो पीछू चले।
MAR 8:35 कहालीकि जो कोयी अपनो जीव बचावनो चाहवय हय त ऊ ओख खोयेंन, पर जो कोयी मोरो अऊर सुसमाचार को लायी अपनो जीव खोयेंन, ऊ ओख बचायेंन।
MAR 8:36 यदि आदमी पूरो जगत ख हासिल करेंन अऊर अपनो जीव की हानि उठायेंन, त ओख का फायदा होयेंन?
MAR 8:37 आदमी अपनो जीवन ख फिर सी हासिल करन लायी का दे सकय हय?
MAR 8:38 जो कोयी यो व्यभिचारी अऊर पापी जाति को बीच मोरो सी अऊर मोरी बातों सी शरमायेंन, त मय जब पवित्र स्वर्गदूतों को संग अपनो बाप कि महिमा को संग आऊं, तब ऊ मोरो सी शरमायेंन।”
MAR 9:1 यीशु न उन्को सी कह्यो, “मय तुम सी सच कहूं हय, कि जो इत खड़ो हंय उन्म सी कोयी कोयी असो हंय, कि जब तक परमेश्वर को राज्य ख सामर्थ संग आतो हुयो नहीं देख ले, तब तक ऊ नहीं मरेंन।”
MAR 9:2 छे दिन को बाद यीशु न पतरस, याकूब अऊर यूहन्ना ख संग ले गयो, अऊर एकान्त म कोयी एक ऊचो पहाड़ी पर ले गयो। उत उन्को सामने यीशु को रूप बदल गयो,
MAR 9:3 अऊर ओको कपड़ा असो चमकन लग्यो अऊर यहां तक उज्वल भयो, कि धरती पर कोयी धोबी भी वसो उज्वल नहीं कर सकय।
MAR 9:4 तीन चेलावों न एलिय्याह अऊर मूसा ख यीशु को संग बाते करतो देख्यो।
MAR 9:5 येको पर पतरस न यीशु सी कह्यो, “हे गुरु, हमरो इत रहनो अच्छो हय: येकोलायी हम तीन मण्डा बनायबो, एक तोरो लायी, एक मूसा लायी, अऊर एक एलिय्याह लायी।”
MAR 9:6 पतरस बहुत डर गयो होतो की ओख समझ म नहीं आय रह्यो होतो कि मय का उत्तर देऊ।
MAR 9:7 तब एक बादर न उन्ख झाक दियो, अऊर ऊ बादर म सी यो आवाज निकल्यो, “यो मोरो प्रिय बेटा आय, येकी बाते सुनो।”
MAR 9:8 तब उन्न अचानक चारयी तरफ देख क, अऊर यीशु ख छोड़ क अपनो संग अऊर कोयी ख नहीं देख्यो।
MAR 9:9 पहाड़ी सी उतरतो समय यीशु न उन्ख आदेश दियो कि जब तक मय आदमी को बेटा मरयो हुयो म सी जीन्दो नहीं होय जाय, तब तक जो कुछ तुम न देख्यो हय ओख कोयी ख मत बतावो।
MAR 9:10 उन्न यीशु की आज्ञा ख मान्यो; अऊर आपस म चर्चा करन लग्यो, “मरयो हुयो म सी जीन्दो होन को का मतलब हय?”
MAR 9:11 अऊर उन्न यीशु सी पुच्छ्यो, “धर्मशास्त्री कहाली कह्य हंय कि एलिय्याह को पहिलो आवनो जरूर हय?”
MAR 9:12 ओन उन्ख उत्तर दियो, “एलिय्याह सचमुच पहिलो आय क सब कुछ तैयार करन लायी आयेंन, पर मय आदमी को बेटा को बारे म शास्त्र म लिख्यो हय कि बहुत दु:ख उठायेंन, अऊर ठुकरायो जायेंन?
MAR 9:13 पर मय तुम सी कहू हय, कि एलिय्याह त आय गयो, अऊर जसो ओको बारे म लिख्यो हय, उन्न जो कुछ चाहयो वसोच ओको संग करयो।”
MAR 9:14 जब यीशु चेलावों को जवर आयो, त देख्यो कि उन्को चारयी तरफ बड़ी भीड़ लगी हय अऊर धर्मशास्त्री उन्को संग वाद विवाद कर रह्यो हंय।
MAR 9:15 ओख देखतोच सब बहुतच अचम्भित भयो, अऊर ओको तरफ दौड़ क यीशु ख नमस्कार करयो।
MAR 9:16 यीशु न चेलावों सी पुच्छ्यो, “तुम इन्को सी का बहस कर रह्यो हय?”
MAR 9:17 भीड़ म सी एक आदमी न ओख उत्तर दियो, “हे गुरु, मय अपनो बेटा ख, जेको म दुष्ट आत्मा समायी हय, ओख तोरो जवर लायो ऊ बोल नहीं सकय।
MAR 9:18 जित कहीं आत्मा ओख पकड़य हय, उतच पटक देवय हय: अऊर ऊ मुंह म फेस लावय हय, अऊर दात कटरय हय, अऊर सूखतो जावय हय। मय न तोरो चेलावों सी कह्यो कि वा बुरी आत्मा ख निकाल दे, पर हि नहीं निकाल सक्यो।”
MAR 9:19 यो सुन क यीशु न चेलावों सी उत्तर दे क कह्यो, “हे अविश्वासी लोगों, मय कब तक तुम्हरो संग रहूं? अऊर कब तक तुम्हरी सहू? ऊ टुरा ख मोरो जवर लावो।”
MAR 9:20 तब हि बच्चा ख यीशु को जवर लायो: अऊर जब ओन ओख देख्यो, त वा दुष्ट आत्मा न तुरतच ओख मुरकट्यो; अऊर ऊ जमीन पर गिर क, मुंह सी फेस फेकतो लोटन लग्यो।
MAR 9:21 यीशु न ओको बाप सी पुच्छ्यो, “येकी या दशा कब सी हय?” ओन कह्यो, “बचपना सी।
MAR 9:22 ओन येख मारन लायी कभी आगी म अऊर कभी पानी म गिरायो; पर यदि तय कुछ कर सकय हय, त हम पर तरस खाय क हमरी मदत कर।”
MAR 9:23 यीशु न ओको सी कह्यो, “यदि तय कर सकय हय? त या का बात आय! विश्वास करन वालो लायी सब कुछ होय सकय हय।”
MAR 9:24 बच्चा को बाप न तुरतच गिड़गिड़ाय क कह्यो, “मय विश्वास करू हय, पर मोरो विश्वास कमजोर हय मोरो अविश्वास म मोरी मदत कर।”
MAR 9:25 जब यीशु न देख्यो कि लोग दौड़ क भीड़ लगाय रह्यो हंय, त ओन दुष्ट आत्मा ख यो कह्य क डाट्यो कि, “मुक्की अऊर बहरी आत्मा, मय तोख आदेश देऊ हय, ओको म सी निकल आव, अऊर ओको म फिर कभी मत सिरजो।”
MAR 9:26 तब दुष्ट आत्मा चिल्लाय क अऊर ओख मुरकट क, निकल गयी; अऊर बच्चा मरयो हुयो सो भय गयो, यहां तक कि बहुत लोग कहन लग्यो कि “ऊ मर गयो हय।”
MAR 9:27 पर यीशु न ओको हाथ पकड़ क ओख उठायो, अऊर ऊ खड़ो भय गयो।
MAR 9:28 जब यीशु घर म आयो, त ओको चेलावों न एकान्त म ओको सी पुच्छ्यो, “हम दुष्ट आत्मा ख कहाली नहीं निकाल सक्यो?”
MAR 9:29 यीशु न उन्को सी कह्यो, “यो तरह की दुष्ट आत्मा प्रार्थना करनो सीच निकल सकय हय।”
MAR 9:30 तब यीशु अऊर ओको चेला उत सी निकल क गलील प्रदेश म सी होतो हुयो जाय रह्यो होतो। त ऊ नहीं चाहत होतो कि कोयी ख मालूम पड़यो कि ऊ उत हय,
MAR 9:31 कहालीकि ऊ अपनो चेलावों ख शिक्षा दे रह्यो होतो अऊर उन्को सी कहत होतो, “मय आदमी को बेटा, आदमियों को हाथ म पकड़वायो जाऊं, अऊर हि मोख मार डालेंन; अऊर मय मरन को तीन दिन बाद जीन्दो होय जाऊं।”
MAR 9:32 पर हि यीशु की बात समझ नहीं सक्यो, कहालीकि हि ओको सी पूछन सी डरत होतो।
MAR 9:33 तब हि कफरनहूम पहुंच्यो; अऊर घर म आय क यीशु न चेलावों सी पुच्छ्यो, “रस्ता म तुम कौन्सी बात पर बहस कर रह्यो होतो?”
MAR 9:34 पर हि चुप रह्यो, कहालीकि रस्ता म हि आपस म बहस कर रह्यो होतो कि हम म सी बड़ो कौन हय?
MAR 9:35 तब यीशु न बैठ क बारयी चेलावों ख बुलायो अऊर उन्को सी कह्यो, “यदि कोयी बड़ो होनो चाहवय, त सब सी छोटो अऊर सब को सेवक बनेंन।”
MAR 9:36 अऊर ओन एक बच्चा ख ले क उन्को बीच म खड़ो करयो, अऊर ओख गोदी म ले क उन्को सी कह्यो,
MAR 9:37 “जो कोयी मोरो नाम सी असो बच्चा म सी कोयी एक ख भी स्वीकार करय हय, ऊ मोख स्वीकार करय हय; अऊर जो कोयी मोख स्वीकार करय हय, ऊ मोख नहीं, पर मोरो भेजन वालो ख स्वीकार करय हय।”
MAR 9:38 तब यूहन्ना न यीशु सी कह्यो, “हे गुरु, हम न एक आदमी ख तोरो नाम सी दुष्ट आत्मावों ख निकालता देख्यो अऊर हम्न ओख रूकन लायी कह्यो, कहालीकि ऊ हमरो झुण्ड म सी नहीं होतो।”
MAR 9:39 यीशु न कह्यो, “ओख मना मत करो” कहालीकि असो कोयी नहाय जो मोरो नाम सी सामर्थ को काम करय हय, अऊर जल्दी सी मोख बुरो कह्य सकेंन।
MAR 9:40 कहालीकि जो हमरो विरोध म नहाय, ऊ हमरो तरफ हय।
MAR 9:41 जो कोयी एक प्याला पानी तुम्ख येकोलायी पिलायेंन कि तुम मसीह को आय त मय तुम सी सच कहू हय कि ऊ निश्चित रूप सी अपनो पुण्य पायेंन।
MAR 9:42 “जो आदमी मोरो पर विश्वास करन वालो इन छोटो म सी छोटो पाप करन लायी उत्साहित करेंन त ओको लायी ठीक यो हय कि एक बड़ो गरहट को पाट ओको गरो म टंगाय क ओख समुन्दर म फेक दियो जाये।”
MAR 9:43 यदि तोरो हाथ तोरो सी पाप करवावय त ओख काट डाल। तोरो लायी दोयी हाथों को बजाय एक हाथ को जीवन म सिरनो कहीं अच्छो हय बजाय दोयी हाथ वालो होय क नरक म डाल्यो जाये, जहां की आगी कभी नहीं बुझय।
MAR 9:44 जित कीड़ा नहीं मरय अऊर आगी नहीं बुझय।
MAR 9:45 यदि तोरो पाय तोख पापों लायी उत्साहित करन को वजह बनेंन त ओख काट डाल। लंगड़ा होय क् जीवन म सिरनो तोरो लायी येको सी ठीक हय कि दोय पाय रह्य क् भी नरक म डाल दियो जाये।
MAR 9:46 जित उन्को कीड़ा नहीं मरय अऊर आगी नहीं बुझय।
MAR 9:47 यदि तोरी आंखी तोख पापों लायी उत्साहित करन को वजह बनय हय त ओख निकाल डाल। तोरो लायी यो ठीक हय कि दोयी आंखी रखन यां नरक म फेकन को बजाय केवल एक आंखी सी परमेश्वर को राज्य म सिर।
MAR 9:48 जित कीड़ा नहीं मरय अऊर आगी नहीं बुझय।
MAR 9:49 हर एक लोग ख आगी सी शुद्ध करयो जायेंन, जसो बलिदान नमक सी शुद्ध करयो जावय हय।
MAR 9:50 “नमक अच्छो हय, पर यदि नमकपन को स्वाद खोय देवय हय, त ओख फिर सी कसो नमकीन करो? “आपस म दोस्ती को नमक रखे, अऊर आपस म मिलझुल क अऊर एक दूसरों सी शान्ति सी रहे।”
MAR 10:1 तब यीशु न उत सी उठ क यहूदिया प्रदेश को सीमा म अऊर यरदन नदी को पार आयो। अऊर भीड़ ओको जवर फिर सी जमा भय गयी, अऊर ऊ अपनो रीति को अनुसार उन्ख फिर सी सिखावन लग्यो।
MAR 10:2 तब फरीसियों न ओको जवर आय क ओकी बातों म फसावन लायी ओको सी पुच्छ्यो, “का हमरो नियम को अनुसार यो ठीक हय कि आदमी ख अपनी पत्नी ख छोड़चिट्ठी देन कि अनुमति देवय हय?”
MAR 10:3 यीशु न उन्ख उत्तर दियो, “कि मूसा न तुम्ख का आज्ञा दियो हय?”
MAR 10:4 मूसा न अनुमति दियो हय कि, “छोड़चिट्ठी लिख क देन अऊर छोड़न की आज्ञा दियो हय।”
MAR 10:5 यीशु न उन्को सी कह्यो, “तुम्हरो मन की कठोरता को वजह मूसा न तुम्हरो लायी यो आज्ञा लिख्यो।”
MAR 10:6 पर शास्त्र म लिख्यो हय सुरूवात सी परमेश्वर न नर अऊर नारी कर क् उन्ख बनायो हय।
MAR 10:7 येकोलायी आदमी अपनो माय-बाप सी अलग होय क अपनी पत्नी को संग रहेंन,
MAR 10:8 अऊर हि दोयी एक शरीर होयेंन; येकोलायी हि अब दोय नहीं पर एक शरीर हंय।
MAR 10:9 येकोलायी “जेक परमेश्वर न जोड़्यो हय ओख आदमी अलग नहीं करे।”
MAR 10:10 हि जब घर गयो त चेलावों न येको बारे म यीशु सी पुच्छ्यो।
MAR 10:11 ओन उन्को सी कह्यो, “जो कोयी अपनी पत्नी ख छोड़ क दूसरी सी बिहाव करय हय त ऊ अपनी पहिली पत्नी को विरोध म व्यभिचार करय हय।
MAR 10:12 अऊर एक पत्नी जो अपनो पति ख छोड़ क दूसरों सी बिहाव करय त वा भी व्यभिचार करय हय।”
MAR 10:13 तब लोग बच्चां ख यीशु को जवर लान लग्यो कि ऊ ओख छूवय, पर चेलावों न लोगों ख डाट्यो।
MAR 10:14 यीशु न यो देख गुस्सा म होय क उन्को सी कह्यो, “बच्चा ख मोरो जवर आवन देवो अऊर उन्ख मना मत करो, कहालीकि परमेश्वर को राज्य असोच को हय।
MAR 10:15 मय तुम सी सच कहू हय कि जो कोयी परमेश्वर को राज्य ख बच्चा को जसो स्वीकार नहीं करय, ऊ उन्म कभी नहीं सिर पायेंन।”
MAR 10:16 तब ओन बच्चां ख गोदी म लियो, अऊर उन पर हाथ रख क आशीर्वाद दियो।
MAR 10:17 जब यीशु उत सी निकल क रस्ता म जाय रह्यो होतो, त एक आदमी ओको जवर दौड़ क आयो, अऊर ओको आगु घुटना पर होय क ओको सी पुच्छ्यो, “हे उत्तम गुरु, अनन्त जीवन पावन लायी मय का करू?”
MAR 10:18 यीशु न ओको सी कह्यो, “तय मोख उत्तम कहालीकि कह्य हय?” केवल परमेश्वर ख छोड़ क। “कोयी भी उत्तम नहाय।
MAR 10:19 तय परमेश्वर कि आज्ञा ख त जानय हय: ‘हत्या नहीं करनो, व्यभिचार नहीं करनो, चोरी नहीं करनो, झूठी गवाही नहीं देनो, छल नहीं करनो, अपनो बाप अऊर अपनी माय को आदर करनो।’”
MAR 10:20 ओन यीशु सी कह्यो, “हे गुरु, इन सब ख मय छोटो होतो तब सी मानतो आयो हय।”
MAR 10:21 यीशु न प्रेम सी ओको तरफ देख क कह्यो, “तोरो म एक बात की कमी हय। जा, जो कुछ तोरो हय ओख बेच क गरीबों ख दे, तब तोख स्वर्ग म धन मिलेंन, तब आय क मोरो पीछू चल।”
MAR 10:22 ऊ आदमी या बात ख सुन क ओको चेहरा पर उदासी छाय गयी, अऊर ऊ दु:खी होय क चली गयो, कहालीकि ऊ बहुत धनी होतो।
MAR 10:23 यीशु न चारयी तरफ देख क अपनो चेलावों सी कह्यो, “धनवानों ख परमेश्वर को राज्य म सिरनो कितनो कठिन हय!”
MAR 10:24 हि चेला ओको बातों सी अचम्भित भयो। येको पर यीशु न फिर सी उन्को सी कह्यो; “हे बच्चा, जो धन पर भरोसा रखय हय, उन्को लायी परमेश्वर को राज्य म सिरनो कितनो कठिन हय?
MAR 10:25 परमेश्वर को राज्य म अमीर आदमी को सिरनो सी ऊंट लायी सूई को नाक म सी होय क निकल जानो सहज हय!”
MAR 10:26 चेला बहुतच अचम्भित होय क आपस म कहन लग्यो, “त फिर कौन को उद्धार होय सकय हय?”
MAR 10:27 यीशु न उन्को तरफ देख क कह्यो, “यो आदमी लायी असम्भव हय, परमेश्वर लायी नहाय, पर परमेश्वर लायी सब कुछ सम्भव हय।”
MAR 10:28 पतरस ओको सी कहन लग्यो, “देखो, हम त सब कुछ छोड़ क तोरो पीछू भय गयो हय।”
MAR 10:29 यीशु न कह्यो, “मय तुम सी सच कहू हय कि असो कोयी नहाय, जेन मोरो अऊर मोरो सुसमाचार को लायी घर यां भाऊ-बहिनों यां माय-बाप यां बालबच्चा यां खेतो ख छोड़ दियो हय,
MAR 10:30 अऊर अब यो समय को जीवन म सौ गुना मिलेंन, घर अऊर भाऊ-बहिन अऊर माय अऊर बालबच्चा अऊर खेतो म, पर सताव को संग अऊर आवन वालो युग म अनन्त जीवन मिलेंन।
MAR 10:31 पर बहुत सो जो आगु हंय, हि पीछू होयेंन, अऊर जो पीछू हंय, हि आगु होयेंन।”
MAR 10:32 हि यरूशलेम ख जातो हुयो रस्ता म होतो, अऊर यीशु उन्को आगु-आगु चल रह्यो होतो : चेला घबरायो हुयो होतो अऊर जो लोग ओको पीछू-पीछू चल रह्यो होतो हि डरयो हुयो होतो। तब ऊ फिर उन बारयी चेलावों ख अलग लिजाय क उन्को सी जो बात ओको पर घटन वाली होती ओख बतावन लग्यो।
MAR 10:33 “सुनो, हम यरूशलेम जाय रह्यो हंय, जित आदमी को बेटा मुख्य याजकों अऊर धर्मशास्त्रियों को हाथ सौंप दियो जायेंन। अऊर हि ओख मारन लायी दोष लगायेंन। अऊर फिर गैरयहूदियों को हाथ म सौंप दियो जायेंन।
MAR 10:34 हि ओकी मजाक उड़ायेंन, ओको पर थूकेंन, ओख कोड़ा सी मार क ओख मार डालेंन, अऊर तीन दिन बाद ऊ फिर सी जीन्दो होयेंन।”
MAR 10:35 तब जब्दी को दोय टुरा याकूब अऊर यूहन्ना यीशु को जवर आय क कह्यो, “हे गुरु, हम चाहजे हंय कि जो कुछ हम तोरो सी मांगबो, ऊ तय हमरो लायी करे।”
MAR 10:36 अऊर यीशु न कह्यो, “तुम का चाहवय हय कि मय तुम्हरो लायी करू?”
MAR 10:37 उन्न यीशु सी कह्यो, “जब तुम अपनो महिमामय राज्य को सिंहासन पर बैठ्यो, तब हम असो चाहवय हय कि हम म सी एक तोरो दायो तरफ अऊर दूसरों तोरो बायो तरफ बैठे।”
MAR 10:38 यीशु न उन्को सी कह्यो, “तुम नहीं जानय कि का मांग रह्यो हय? जो दु:ख को कटोरा मय पीवन पर हय, का तुम पी सकय हय? अऊर जो मरन को बपतिस्मा मय लेन पर हय, का तुम ले सकय हय?”
MAR 10:39 उन्न ओको सी कह्यो, “हम सी होय सकय हय।” यीशु न उन्को सी कह्यो, “जो दु:ख को प्याला मय पीवन पर हय, तुम भी पीवो; अऊर जो मरन को बपतिस्मा मय लेन पर हय, ओख तुम भी लेवो।
MAR 10:40 पर मोरो अधिकार नहाय कि मय कौन ख चुनू कि कौन कित बैठेंन, केवल परमेश्वरच ओको लायी जागा तैयार करेंन कि कौन मोरो दायो अऊर बायो बैठेंन।”
MAR 10:41 यो सुन क दसो चेलावों याकूब अऊर यूहन्ना की बातों पर नाराज भय गयो।
MAR 10:42 तब यीशु न उन्ख जवर बुलाय क उन्को सी कह्यो, “तुम जानय भी हय कि जो हेथेंन को शासक समझ्यो जावय हंय, हि उन पर शासन करय हंय; अऊर उन्म जो बड़ो हंय, उन पर अधिकार जतावय हंय,
MAR 10:43 पर तुम म सी असो नहाय, जो कोयी तुम म सी बड़ो होनो चाहवय हय, ऊ सब को सेवक बने;
MAR 10:44 अऊर जो कोयी तुम म मुख्य बननो चाहवय हय, ऊ सब को सेवक बने।
MAR 10:45 कहालीकि मय आदमी को बेटा येकोलायी नहीं आयो कि अपनी सेवा करावन, बल्की दूसरों कि सेवा करन, अऊर लोगों को पापों की कीमत चुकावन लायी अपनो जीवन देन आयो होतो।”
MAR 10:46 हि यरीहो नगर म पहुंच्यो, अऊर जब ऊ अऊर ओको चेलावों, अऊर एक बड़ी भीड़ यरीहो सी निकलत होती, त बरतिमाई नाम को एक अन्धा भिखारी, जो तिमाई को बेटा होतो, सड़क को किनार बैठ्यो होतो।
MAR 10:47 जब ऊ सुन्यो कि यो नासरत निवासी यीशु हय, त पुकार पुकार क कहन लग्यो, “हे यीशु! दाऊद को बेटा! मोरो पर दया करो!”
MAR 10:48 बहुत सो न डाट क कह्यो कि ऊ चुप रहे। पर ऊ अऊर भी पुकारन लग्यो, “हे दाऊद की सन्तान, मोरो पर दया कर!”
MAR 10:49 तब यीशु न रुक क कह्यो, “ओख बुलाव।” अऊर लोगों न ऊ अन्धा ख बुलाय क ओको सी कह्यो, “हिम्मत रख! उठ! ऊ तोख बुलावय हय।”
MAR 10:50 ऊ अपनो कपड़ा फेक क उछल पड़यो, अऊर यीशु को जवर आयो।
MAR 10:51 येको पर यीशु न ओको सी कह्यो, “तय का चाहवय हय कि मय तोरो लायी करू?” अन्धा न ओको सी कह्यो, “हे गुरु, यो कि मय देखन लगू।”
MAR 10:52 यीशु न ओको सी कह्यो, “चली जा, तोरो विश्वास न तोख चंगो करयो हय।” अऊर ऊ तुरतच देखन लग्यो, अऊर रस्ता म ओको पीछू चली गयो।
MAR 11:1 जब हि यरूशलेम नगर को जवर, जैतून पहाड़ी पर बैतफगे गांव अऊर बैतनिय्याह नगर ख पहुंच्यो त यीशु न अपनो चेलावों म सी दोय ख यो कह्य क भेज्यो,
MAR 11:2 उन्ख समझाय क भेज्यो “आगु को गांव म जावो, अऊर उत पहुंचतोच एक गधी को बछड़ा, जेको पर अभी तक कोयी सवार नहीं भयो, बन्ध्यो हुयो तुम्ख मिलेंन। ओख खोल क लावो।
MAR 11:3 यदि कोयी तुम सी कहेंन, ‘असो कहालीकि करय हय?’ त तुम कहो, ‘प्रभु ख येकी जरूरत हय,’ अऊर ऊ तुरतच ओख इत भेज देयेंन।”
MAR 11:4 हि गयो अऊर उन्न बाहेर गली म द्वार को जवर एक गधी को बछड़ा बन्ध्यो हुयो पायो, अऊर हि ओख खोलन लग्यो।
MAR 11:5 उत खड़ो, कुछ लोग न उन्को सी कह्यो, “यो का कर रह्यो हय, गधी को बछड़ा ख कहालीकि खोल रह्यो हय?”
MAR 11:6 जसो यीशु न कह्यो होतो, वसोच उन्न उन्को सी कह्य दियो, तब लोगों न उन्ख लिजान दियो।
MAR 11:7 उन्न गधी को बछड़ा ख यीशु को जवर लाय क ओख पर अपनो कपड़ा बिछायो अऊर यीशु ओको पर बैठ गयो।
MAR 11:8 तब लोगों न अपनो कपड़ा रस्ता म स्वागत लायी बिछायो अऊर कुछ न खेतो म सी खजूर की छोटी छोटी डगालियां ओको स्वागत लायी काट काट क फैलाय दियो।
MAR 11:9 जो ओको आगु आगु अऊर पीछू पीछू चल रह्यो होतो, हि नारा लगाय लगाय क कहत जाय रह्यो होतो, “परमेश्वर की महिमा हो! धन्य हय ऊ जो प्रभु को नाम सी आवय हय!
MAR 11:10 हमरो परमेश्वर को आशीर्वाद सी दाऊद को राज्य जो आय रह्यो हय; धन्य हय! आसमान म परमेश्वर की महिमा हो!”
MAR 11:11 यीशु यरूशलेम पहुंच क मन्दिर म आयो, कहालीकि शाम भय गयी होती, येकोलायी चारयी तरफ कुछ चिज देख क बारयी चेलावों को संग बैतनिय्याह नगर ख चली गयो।
MAR 11:12 दूसरों दिन जब हि बैतनिय्याह नगर सी निकल्यो त यीशु ख भूख लगी।
MAR 11:13 अऊर पाना सी भरयो एक अंजीर को झाड़ ख दूर सी देख क ऊ ओको जवर गयो कि अचानक कुछ मिल जाये: पर उत पहुंच क पाना को शिवाय कुछ भी नहीं मिल्यो; कहालीकि ऊ फर लगन को मौसम नहीं होतो।
MAR 11:14 येकोलायी यीशु न झाड़ सी कह्यो, “अब सी कोयी तोरो फर कभी नहीं खायेंन!” अऊर ओको चेला सुन रह्यो होतो।
MAR 11:15 फिर हि यरूशलेम म पहुंच्यो, त यीशु मन्दिर म गयो; अऊर उत जो लेनो अऊर बिकनो करत होतो उन्ख बाहेर निकालन लग्यो, अऊर धन्दा करन वालो को पीढ़ा अऊर कबूत्तर बिकन वालो ख बाहेर निकाल दियो,
MAR 11:16 अऊर ओन कोयी ख भी मन्दिर म सी सामान लेय क आवन-जान नहीं दियो।
MAR 11:17 अऊर ऊ उन्ख शिक्षा देन लग्यो, “का यो शास्त्र म नहीं लिख्यो हय, ‘कि मोरो मन्दिर सब देशों को लोगों लायी प्रार्थना को घर कहलायेंन।’ पर तुम न येख डाकुवों को अड्डा बनाय दियो हय!”
MAR 11:18 अऊर मुख्य याजकों अऊर धर्मशास्त्रियों न जब यो सुन्यो त ओख नाश करन को अवसर ढूंढन लग्यो; कहालीकि हि ओको सी डरत होतो, येकोलायी कि सब लोग ओकी शिक्षा सी अचम्भित होतो।
MAR 11:19 जब शाम भयी, त यीशु अऊर ओको चेला नगर सी बाहेर निकल गयो।
MAR 11:20 जब हि भुन्सारो ख सड़क सी जाय रह्यो होतो, त उन्न ऊ अंजीर को झाड़ ख ऊपर सी ले क जड़ी तक सूख्यो हुयो देख्यो।
MAR 11:21 पतरस ख ऊ बात याद आयो, अऊर ओन यीशु सी कह्यो, “हे गुरु, देख! यो अंजीर को झाड़ जेक तय न श्राप दियो होतो, सूख गयो हय।”
MAR 11:22 यीशु न ओख उत्तर दियो, परमेश्वर पर विश्वास रखो।
MAR 11:23 मय तुम सी सच कहू हय कि जो कोयी यो पहाड़ी सी कहेंन, उखड़ जा, अऊर समुन्दर म जा गिर, अऊर अपनो दिल म शक नहीं करे, पर जो कुछ ओन कह्यो हय, अऊर विश्वास करे कि होय जायेंन त ओको लायी उच होय जायेंन।
MAR 11:24 येकोलायी मय तुम सी कहू हय कि जो कुछ तुम प्रार्थना म मांगय हय, त विश्वास कर लेवो कि तुम्ख मिल गयो, त ऊ तुम्हरो लायी होय जायेंन।
MAR 11:25 अऊर जब कभी तुम खड़ो होय क प्रार्थना करय हय, त यदि तुम्हरो मन म कोयी को बारे म कुछ विरोध हय, त माफ करो: येकोलायी कि तुम्हरो स्वर्गीय पिता परमेश्वर भी तुम्हरो अपराध माफ करेंन।
MAR 11:26 अऊर यदि तुम कोयी को अपराध माफ नहीं करो त तुम्हरो पिता परमेश्वर भी जो स्वर्ग म हय, तुम्हरो अपराध माफ नहीं करेंन।
MAR 11:27 हि फिर यरूशलेम म आयो, अऊर जब यीशु मन्दिर म टहल रह्य होतो, त मुख्य याजक, धर्मशास्त्री अऊर बुजूर्गों ओको जवर आय क पूछन लग्यो,
MAR 11:28 “तय यो काम कौन्सो अधिकार सी करय हय? अऊर यो अधिकार तोख कौन न दियो हय कि तय यो काम करय?”
MAR 11:29 यीशु न उन्को सी कह्यो, “मय भी तुम सी एक प्रश्न पूछू हय; मोख उत्तर देवो: त मय भी तुम्ख बताऊं कि यो काम मय कौन्सो अधिकार सी करू हय।
MAR 11:30 यूहन्ना ख बपतिस्मा देन को अधिकार परमेश्वर को तरफ सी होतो यां लोगों को तरफ सी होतो? मोख उत्तर देवो।”
MAR 11:31 तब हि आपस म बहस करन लग्यो: “कि यदि हम कहबो? ‘परमेश्वर को तरफ सी,’ त ऊ कहेंन, ‘कहाली, तब, तुम न यूहन्ना को विश्वास कहाली नहीं करयो?’
MAR 11:32 अऊर धर्मशास्त्रियों डरत होतो यदि हम कहबो, ‘लोगों को तरफ सी’” त लोग हमरो विरोध म होय जायेंन, कहालीकि हि सब जानय हंय कि यूहन्ना सच म भविष्यवक्ता होतो।
MAR 11:33 येकोलायी उन्न यीशु ख उत्तर दियो, “हम नहीं जानजे।” यीशु न उन्को सी कह्यो, “मय भी तुम्ख नहीं बताऊं कि यो काम कौन्सो अधिकार सी करू हय।”
MAR 12:1 तब यीशु दृष्टान्तों म उन्को सी बाते करन लग्यो: “कोयी आदमी न अंगूर की बाड़ी लगायी, अऊर ओको चारयी तरफ सी बाड़ी ख बान्ध दियो, अऊर रसकुण्ड खोद्यो, अऊर मचान बनाय क, किसानों ख ओको ठेका दे क परदेश ख चली गयो।”
MAR 12:2 तब अंगूर की बाड़ी को फसल को सिजन आयो त ओन किसानों को जवर एक सेवक ख भेज्यो कि अपनो हिस्सा ले ले,
MAR 12:3 पर बटईदार न ओको सेवक ख पकड़ क पिट्यो, अऊर खाली हाथ भेज दियो।
MAR 12:4 तब मालिक न एक अऊर सेवक ख ओको जवर भेज्यो; अऊर उन्न ओको मुंड फोड़ डाल्यो अऊर ओको अपमान करयो।
MAR 12:5 तब मालिक न एक अऊर सेवक ख भेज्यो; उन्न ओख भी मार डाल्यो। तब उन्न अऊर बहुत सो ख भेज्यो; उन्म सी उन्न कुछ ख पिट्यो अऊर कुछ ख मार डाल्यो।
MAR 12:6 आखरी म अपनो प्रिय बेटा ख भेज्यो, यो सोच क कि हि मोरो बेटा को आदर करेंन,
MAR 12:7 पर उन बटईदारों न आपस म कह्यो, योच त वारिस आय; आवो, हम येख भी मार डाल्बो, तब पूरी जायजाद हमरी होय जायेंन।
MAR 12:8 अऊर उन्न ओख पकड़ क मार डाल्यो, अऊर अंगूर की बाड़ी को बाहेर फेक दियो।
MAR 12:9 “यीशु न पुच्छ्यो येको पर अंगूर की बाड़ी को मालिक का करेंन? ऊ आय क उन किसानों को नाश करेंन, अऊर अंगूर की बाड़ी दूसरों ख दे देयेंन।
MAR 12:10 का तुम्न शास्त्र म नहीं पढ़्यो:” “जो गोटा ख राजमिस्त्रियों न नकारयो होतो, उच गोटा महत्वपूर्ण भय गयो।
MAR 12:11 यो प्रभु की तरफ सी भयो; अऊर हमरी नजर म अद्भुत नजारा हय!”
MAR 12:12 तब धर्मशास्त्रियों न यीशु ख पकड़नो चाह्यो; कहालीकि हि समझ गयो होतो कि ओन हमरो विरोध म यो दृष्टान्त कह्यो हय। पर हि लोगों सी डरत होतो, येकोलायी हि ओख छोड़ क चली गयो।
MAR 12:13 तब उन्न यीशु ख ओकीच बातों म फसान लायी कुछ फरीसियों अऊर राजा हेरोदेस को पक्ष को कुछ लोग ओको जवर भेज्यो।
MAR 12:14 उन्न आय क यीशु सी कह्यो, “हे गुरु, हम जानजे हंय, कि तय सच्चो हय, अऊर कोयी की परवाह नहीं करय; कहालीकि तय आदमियों को मुंह देख क बाते नहीं करय, पर परमेश्वर को सच्चो रस्ता सिखावय हय। त का हमरो नियम को अनुसार रोम को राजा ख कर देनो सही हय यां नहीं?”
MAR 12:15 हम कर देबो यां नहीं देबो? यीशु न उन्को कपट जान क उन्को सी कह्यो, “मोख कहाली फसावन कि कोशिश कर रह्यो हय? एक चांदी को सिक्का मोरो जवर लावो, अऊर मोख देखन देवो।”
MAR 12:16 हि सिक्का ले आयो, अऊर यीशु न उन्को सी कह्यो, “यो कौन्को चेहरा अऊर नाम हय?” उन्न कह्यो “रोम को राजा को।”
MAR 12:17 यीशु न उन्को सी कह्यो, “जो कैसर राजा को आय, ऊ राजा ख देवो, अऊर जो परमेश्वर को आय ऊ परमेश्वर ख देवो।” तब हि चकित भयो।
MAR 12:18 फिर कुछ सदूकियों जो कह्य हंय कि पुनरुत्थान हयच नहाय, यीशु को जवर आय क ओको सी पूछन लग्यो,
MAR 12:19 “हे गुरु, मूसा न हमरो लायी एक व्यवस्था लिख्यो हय कि यदि कोयी को भाऊ बिना सन्तान को मर जाये अऊर ओकी पत्नी रह जाये, त ओको भाऊ ओकी पत्नी सी बिहाव कर ले अऊर अपनो भाऊ लायी वंश पैदा कर सके।
MAR 12:20 सात भाऊ होतो। सब सी बड़ो भाऊ बिहाव कर क् बिना सन्तान को मर गयो।
MAR 12:21 तब दूसरों भाऊ न वा बाई सी बिहाव कर लियो अऊर ऊ भी बिना सन्तान को मर गयो; अऊर वसोच तीसरो न भी करयो।
MAR 12:22 अऊर सातों भाऊ न वा बाई सी बिहाव कर लियो अऊर उन्ख भी सन्तान नहीं भयी। आखरी म वा बाई भी मर गयी।
MAR 12:23 जब पुनरुत्थान होन को दिन मरयो हुयो लोग जीन्दो होयेंन, त वा बाई उन्म सी कौन की पत्नी होयेंन? कहालीकि वा सातों की पत्नी बनी होती।”
MAR 12:24 यीशु न उन्को सी कह्यो, “का तुम यो वजह सी भ्रम म पड़यो हय कि तुम नहीं त शास्त्रच ख जानय हय, अऊर नहीं परमेश्वर को सामर्थ ख?
MAR 12:25 कहालीकि जब मरयो हुयो लोग दुबारा सी जीन्दो होयेंन, त हि स्वर्ग को स्वर्गदूतों को जसो होयेंन अऊर हि बिहाव नहीं करेंन।
MAR 12:26 अब मरयो हुयो ख जीन्दो होन को बारे म का तुम्न मूसा की किताब म जरती हुयी झाड़ी को बारे म नहीं पढ़्यो? कि परमेश्वर न ओको सी कह्यो, ‘मय अब्राहम को परमेश्वर, अऊर इसहाक को परमेश्वर, अऊर याकूब को परमेश्वर आय?’
MAR 12:27 परमेश्वर मरयो हुयो को नहीं, पर जीन्दो को परमेश्वर आय; तुम पूरी तरह शंका म पड़यो हय!”
MAR 12:28 जब धर्मशास्त्रियों म सी एक न आय क उन्ख चर्चा करतो सुन्यो, अऊर यो जान क कि यीशु न सदूकियों ख अच्छो तरह सी उत्तर दियो, ओको सी पुच्छ्यो, “कौन सी आज्ञा महत्वपूर्ण हय?”
MAR 12:29 यीशु न उत्तर दियो, “सब आज्ञावों म सी महत्वपूर्ण यो हय: ‘हे इस्राएल को लोगों सुनो,’ प्रभु हमरो परमेश्वर एकच प्रभु हय।
MAR 12:30 अऊर तय प्रभु अपनो परमेश्वर सी अपनो पूरो दिल सी, अऊर अपनो पूरो जीव सी, अऊर अपनो पूरी बुद्धि सी, अऊर अपनो पूरी शक्ति सी, प्रेम रखजो।”
MAR 12:31 अऊर दूसरी महत्वपूर्ण आज्ञा या हय, तय अपनो पड़ोसी सी अपनो जसो प्रेम रखजो। “इन दोयी आज्ञा सी बढ़ क अऊर कोयी महत्वपूर्ण आज्ञा नहाय।”
MAR 12:32 धर्मशास्त्री न यीशु सी कह्यो, “हे गुरु, बहुत अच्छो! तय न सच कह्यो, कि परमेश्वर एकच हय, अऊर ओख छोड़ अऊर कोयी परमेश्वर नहाय।
MAR 12:33 अऊर ओख अपनो पूरो दिल सी, अऊर पूरी बुद्धि सी, अऊर पूरो ताकत सी प्रेम करजो; अऊर पड़ोसी सी अपनो जसो प्रेम करजो, होमबली अऊर बलिदानों कि तुलना म इन दोयी आज्ञावों को पालन करनो जादा महत्वपूर्ण हय।”
MAR 12:34 जब यीशु न देख्यो कि ओन समझदारी सी उत्तर दियो, त ओको सी कह्यो, “तय परमेश्वर को राज्य सी दूर नहाय।” अऊर येको बाद कोयी न ओको सी कोयी न प्रश्न पूछन की हिम्मत नहीं करी।
MAR 12:35 तब यीशु न मन्दिर म शिक्षा देत हुयो यो कह्यो, “धर्मशास्त्री कह्य हंय कि मसीह दाऊद को वंश कसो होय सकय हय?
MAR 12:36 दाऊद न पवित्र आत्मा म होय क कह्यो हय;” प्रभु परमेश्वर न मोरो प्रभु सी कह्यो, “मय तुम्ख अपनो दायो तरफ बैठाऊं, जब तक कि मय तोरो दुश्मनों ख तोरो पाय को खल्लो नहीं कर देऊ।”
MAR 12:37 दाऊद त खुदच ओख प्रभु कह्य हय, तब ऊ ओको वंश कसो होय सकय हय? अऊर भीड़ को लोग खुशी सी ओकी सुनत होतो।
MAR 12:38 यीशु न अपनो शिक्षा सी सिखावत होतो, “धर्मशास्त्रियों सी चौकस रहो, जो लम्बो चोंगा वालो कपड़ा पहिन क बाजारों म घुमत फिरत होतो कि आदर सत्कार मिलेंन।
MAR 12:39 अऊर आराधनालयों म मुख्य आसन अऊर जेवन म आदर सम्मान को जागा भी चाहत होतो।
MAR 12:40 हि विधवावों को धन जायजाद कपट सी हड़प लेत होतो, अऊर दिखावन लायी बहुत देर तक प्रार्थना करत रहत होतो। हि परमेश्वर सी अधिक सजा पायेंन।”
MAR 12:41 यीशु मन्दिर को आगु बैठ क देख रह्य होतो कि लोग मन्दिर को दान भण्डार म कसो तरह पैसा डालय हंय; अऊर बहुत सो अमीरों न बहुत सो पैसा डाल्यो।
MAR 12:42 इतनो म एक गरीब विधवा न आय क तांबा को दोय छोटो सिक्का डाल्यो, जेकी कीमत लगभग एक पैसा को बराबर होती।
MAR 12:43 तब यीशु न अपनो चेलावों ख जवर बुलाय क उन्को सी कह्यो, “मय तुम सी सच कहू हय कि मन्दिर को दान भण्डार म डालन वालो म सी यो गरीब विधवा न सब सी बढ़ क दान डाल्यो हय।
MAR 12:44 कहालीकि सब न अपनो धन की बढ़ती म सी डाल्यो हय, पर येन अपनो घटती म सी जो कुछ ओको होतो मतलब अपनी पूरी जीविका डाल दियो हय।”
MAR 13:1 जब यीशु मन्दिर सी निकल रह्यो होतो, त ओको चेलावों म सी एक न ओको सी कह्यो, “हे गुरु, देख, कसो अद्भुत बड़ो गोटा अऊर भवन हंय!”
MAR 13:2 यीशु न ओको सी कह्यो, “का तुम यो बड़ो-बड़ो भवन देखय हय: इत गोटा पर गोटा भी बच्यो नहीं रहेंन जो गिरायो जायेंन।”
MAR 13:3 जब यीशु जैतून पहाड़ी पर मन्दिर को आगु बैठ गयो, त पतरस, याकूब, यूहन्ना अऊर अन्द्रियास न अलग जाय क ओको सी पुच्छ्यो,
MAR 13:4 “हम्ख बताव कि या बाते कब होयेंन? अऊर कौन्सो चिन्ह सी पता चलेंन कि यो सब पूरो होन पर हय?”
MAR 13:5 यीशु उन्को सी कह्यो, “चौकस रहो कि कोयी तुम्ख भरमानो नहीं पाये।
MAR 13:6 बहुत सो मोरो नाम सी आय क कहेंन, ‘मय मसीह आय!’ अऊर बहुत सो ख भरमायेंन।
MAR 13:7 जब तुम लड़ाईयों, अऊर लड़ाईयों की चर्चा सुनो, त मत घबरायजो; कहालीकि इन्को होनो जरूरी हय, पर उन्को मतलब यो नोहोय कि अन्त होय जायेंन।
MAR 13:8 कहालीकि एक राष्ट्र को विरोध म दूसरों राष्ट्र, अऊर एक राज्य को विरोध म दूसरों राज्य चढ़ायी करेंन। बहुत जागा म भूईडोल होयेंन, अऊर अकाल पड़ेंन। यो त सब दु:ख, पीड़ावों की सुरूवात होयेंन।
MAR 13:9 “पर तुम अपनो बारे म चौकस रहो; कहालीकि लोग तुम्ख न्यायालयों म लिजायेंन अऊर तुम सभावों म पिट्यो जावो, अऊर मोरो वजह शासकों अऊर राजावों को आगु खड़ो करयो जायेंन, ताकि तुम्ख उन्को लायी सुसमाचार सुनावन को अवसर मिलेंन।
MAR 13:10 पर जरूरी हय कि अन्त आवन सी पहिले, सुसमाचार सब लोगों म प्रचार करयो जाये।
MAR 13:11 जब हि तुम्ख न्यायालयों म बन्दी बनाय क् सौंपेंन, त पहिले चिन्ता मत करजो कि हम का कहबो; पर जो कुछ तुम्ख ऊ समय बतायो जायेंन उच कहजो; कहालीकि बोलन वालो तुम नोहोय, पर पवित्र आत्मा आय।
MAR 13:12 भाऊ भाऊ ख धोका देयेंन अऊर बाप ख बेटा मारन लायी ओको विरोध म होयेंन, अऊर बच्चां माय-बाप को विरोध म उठ क् उन्ख मरवाय डालेंन।
MAR 13:13 अऊर मोरो नाम को वजह सब लोग तुम सी बैर करेंन; पर जो आखरी समय तक विश्वास म बन्यो रहेंन, उन्को उद्धार होयेंन।
MAR 13:14 “येकोलायी जब तुम वा उजाड़न वाली घृणित चिज ख जित ठीक नहाय उत खड़ी देखो।” पढ़न वालो समझ लेवो, तब जो यहूदिया म हय, हि पहाड़ी पर भग जाये।
MAR 13:15 बिना समय गवायो जो घर को छत पर हय, ऊ कुछ लेन खल्लो मत उतरे अऊर नहीं अन्दर जाये;
MAR 13:16 अऊर जो खेत म हय, ओख घर म कपड़ा लावन लायी वापस नहीं जानो चाहिये।
MAR 13:17 उन दिनो म जो गर्भवती अऊर बच्चां ख दूध पिलावन वाली होना उन्को लायी कितनो भयानक होयेंन!
MAR 13:18 अऊर परमेश्वर सी प्रार्थना करतो रहो कि यो ठन्डी को दिन म मत होय।
MAR 13:19 कहालीकि ऊ दिन असो कठिन होयेंन कि सृष्टि को सुरूवात सी, जो परमेश्वर न रच्यो हय, अब तक नहीं भयो अऊर नहीं फिर कभी होयेंन।
MAR 13:20 यदि प्रभु उन दिनो ख नहीं घटातो, त कोयी प्रानी भी नहीं बचतो; पर उन चुन्यो हुयो लोगों को वजह ओन मुसीबत को दिनो ख घटायो हय।
MAR 13:21 ऊ समय यदि कोयी तुम सी कहेंन, देखो, मसीह इत हय, यो देखो, उत हय, त विश्वास मत करो।
MAR 13:22 कहालीकि झूठो मसीह अऊर झूठो भविष्यवक्ता उठ खड़ो होयेंन, अऊर चिन्ह अऊर अचम्भा को काम दिखायेंन कि यदि होय सकय त परमेश्वर को चुन्यो हुयो लोगों ख भी भरमायो डालेंन।
MAR 13:23 पर तुम चौकस रहो; देखो, मय न तुम्ख सब बाते पहिले सीच बताय दियो हय।
MAR 13:24 “उन दिनो म, ऊ कठिनायी को बाद सूरज अन्धारो होय जायेंन, अऊर चन्दा प्रकाश नहीं देयेंन;
MAR 13:25 अऊर आसमान सी चांदनी गिरेंन; अऊर आसमान की शक्तियां हिलायी जायेंन।
MAR 13:26 तब लोग आदमी को बेटा ख बड़ी सामर्थ अऊर महिमा को संग बादलो म आवतो देखेंन।
MAR 13:27 ऊ समय ऊ अपनो दूतों ख भेज क, धरती को यो कोना सी ले क दूसरों कोना तक, चारयी दिशा सी अपनो परमेश्वर को चुन्यो हुयो लोगों ख जमा करेंन।
MAR 13:28 “अंजीर को झाड़ सी यो दृष्टान्त सीखो: जब ओकी डगाली कवली हो, अऊर ओको म पाना निकलन लगय हय; त तुम जान लेवय हय कि गरमी को मौसम जवर हय।
MAR 13:29 असो तरह सी जब तुम या बाते ख होतो देखो, त जान लेवो कि ऊ समय जवर हय बल्की बहुतच जवर हय।
MAR 13:30 मय तुम सी सच कहू हय कि जब तक या सब बाते पूरी नहीं होय जाये, तब तक यो पीढ़ी को अन्त नहीं होयेंन।
MAR 13:31 आसमान अऊर धरती टल जायेंन, पर मोरी बाते कभी नहीं टलेंन।
MAR 13:32 “ऊ दिन यां ऊ समय को बारे म कोयी नहीं जानय, नहीं स्वर्गदूत अऊर नहीं बेटा; केवल बापच जानय हय।
MAR 13:33 देखो, चौकस अऊर जागतो रहो; कहालीकि तुम नहीं जानय कि ऊ समय कब आयेंन।
MAR 13:34 ऊ असोच हय जसो कोयी आदमी कोयी यात्रा पर जातो हुयो सेवकों को ऊपर अपनो घर छोड़ जावय, अऊर हर एक ख अपनो काम दे जाये। अऊर पहरेदार ख या आज्ञा दे कि ऊ जागतो रहे।
MAR 13:35 येकोलायी जागतो रहो, कहालीकि तुम नहीं जानय कि घर को मालिक कब आयेंन, शाम म यां अरधी रात म, यां भुन्सारे ख, यां सबेरे सी पहिले।
MAR 13:36 कहीं असो नहीं होय की ऊ अचानक आय जाये अऊर तुम्ख सोतो हुयो देखे।
MAR 13:37 अऊर जो मय तुम सी कहू हय, उच सब सी कहू हय: जागतो रहो!”
MAR 14:1 दोय दिन को बाद फसह अऊर अखमीरी रोटी को त्यौहार होन वालो होतो। मुख्य याजक अऊर धर्मशास्त्री या बात की खोज म होतो कि ओख कसो कपट सी पकड़ क मार डाल्बो:
MAR 14:2 पर हि कह्य रह्यो होतो, “त्यौहार को दिन म नहीं, पर कहीं असो मत होय कि लोगों म दंगा होय जायेंन।”
MAR 14:3 जब यीशु बैतनिय्याह को शिमोन नाम को कोढ़ी को घर जेवन करन बैठ्यो होतो, तब एक बाई संगमरमर को बर्तन म जटामांसी को बहुत कीमती शुद्ध अत्तर ले क आयी; अऊर बर्तन तोड़ क अत्तर ख यीशु को मुंड पर कुड़ायो।
MAR 14:4 पर कोयी लोग अपनो मन म कुड़कुड़ाय क कहन लग्यो, “यो अत्तर ख कहालीकि नाश करयो गयो?
MAR 14:5 कहालीकि यो अत्तर त तीन सौ दीनार सी अधिक कीमत म बेच क गरीबों म बाट्यो जाय सकत होतो।” अऊर हि वा बाई ख डाटन लग्यो।
MAR 14:6 यीशु न कह्यो, “ओख छोड़ देवो; ओख कहाली सतावय हय? ओन त मोरो संग भलायी करी हय।
MAR 14:7 गरीब त तुम्हरो संग हमेशा रह्य हय, अऊर तुम जब चाहो तब उनकी मदत कर सकय हय; पर मय तुम्हरो संग हमेशा नहीं रह सकू।
MAR 14:8 जो कुछ वा कर सकी, ओन करी; ओन मोरो गाड़्यो जान की तैयारी म पहिलो सी मोरो शरीर पर अत्तर मल्यो हय।
MAR 14:9 मय तुम सी सच कहू हय कि पूरो जगत म जित कहीं सुसमाचार प्रचार करयो जायेंन, उत वा बाई को काम की चर्चा भी ओकी याद म करी जायेंन।”
MAR 14:10 तब यहूदा इस्करियोती जो बारा चेलावों म सी एक होतो, मुख्य याजकों को जवर गयो कि यीशु ख उन्को हाथ म सौंप सके।
MAR 14:11 हि यो सुन क खुश भयो, अऊर ओख पैसा देन की प्रतिज्ञा करयो; अऊर यहूदा मौका ढूंढन लग्यो कि यीशु ख कोयी भी तरह सी उन्ख सौंप देऊ।
MAR 14:12 अखमीरी रोटी को त्यौहार को पहिलो दिन, जेको म हि फसह को मेम्ना को बलिदान करत होतो, ओको चेलावों न यीशु सी पुच्छ्यो, “तय चाहवय हय कि कित हम जाय क तोरो लायी फसह को जेवन खान की तैयारी करबो?”
MAR 14:13 यीशु न अपनो चेलावों म सी दोय ख यो कह्य क भेज्यो, “नगर म जावो, अऊर एक आदमी पानी को घड़ा उठाय क लावतो हुयो तुम्ख मिलेंन, ओको पीछू जावो;
MAR 14:14 अऊर ऊ जो घर म जायेंन, ऊ घर को मालिक सी कहो, ‘गुरु कह्य हय कि मोरी मेहमानी को कमरा कित हय जेको म मय अपनो चेलावों को संग फसह को जेवन खाऊ?’
MAR 14:15 ऊ तुम्ख एक सजायो अऊर तैयार करयो हुयो बड़ो सो ऊपर को कमरा दिखायेंन, उत हमरो लायी सब कुछ तैयार मिलेंन।”
MAR 14:16 अऊर चेलावों नगर म गयो, अऊर जसो यीशु न उन्को सी कह्यो होतो वसोच पायो; अऊर फसह को जेवन की तैयारी करी।
MAR 14:17 जब शाम भयी, त यीशु बारा चेलावों को संग आयो।
MAR 14:18 जब हि बैठ क जेवन कर रह्यो होतो, त यीशु न कह्यो, “मय तुम सी सच कहू हय कि तुम म सी एक, जो मोरो संग जेवन कर रह्यो हय, मोख बैरियों को हाथ म सौंप देयेंन।”
MAR 14:19 उन पर उदासी छाय गयी अऊर हि एक को बाद एक ओको सी कहन लग्यो, “का ऊ मय आय?”
MAR 14:20 यीशु न उन्को सी कह्यो, “ऊ बारा चेलावों म सी एक हय, जो मोरो संग जेवन करय हय।
MAR 14:21 कहालीकि मय आदमी को बेटा मृत्यु पाऊ, जसो शास्त्रों म लिख्यो हय, पर ऊ आदमी पर हाय जेको द्वारा आदमी को बेटा ख ओको बैरियों को हाथ म सौंप दियो जायेंन! यदि ऊ आदमी पैदाच नहीं होतो, त ओको लायी ठीक होतो।”
MAR 14:22 जब हि खायच रह्यो होतो, ओन रोटी लियो, अऊर धन्यवाद कर क् तोड़ी, अऊर चेलावों ख दियो, अऊर कह्यो, “लेवो, यो मोरो शरीर आय।”
MAR 14:23 तब ओन प्याला ले क परमेश्वर ख धन्यवाद करयो, अऊर उन्ख दियो; अऊर उन सब न ओको म सी पीयो।
MAR 14:24 अऊर यीशु न उन्को सी कह्यो, “यो वाचा को मोरो ऊ खून आय; जो आदमी अऊर परमेश्वर को बीच नयो वाचा ख दर्शावय हय, जो बहुतों लायी बहायो जावय हय।
MAR 14:25 मय तुम सी सच कहू हय कि अंगूररस ऊ दिन तक फिर कभी नहीं पीऊ, जब तक परमेश्वर को राज्य म नयो अंगूररस नहीं पी लेऊं।”
MAR 14:26 तब हि परमेश्वर को भजन गाय क बाहेर जैतून की पहाड़ी पर गयो।
MAR 14:27 तब यीशु न चेलावों सी कह्यो, “तुम सब मोख छोड़ क भग जावो, कहालीकि शास्त्रों म लिख्यो हय; ‘चरवाहा ख मार डालूं, अऊर मेंढीं तितर-बितर होय जायेंन।’
MAR 14:28 पर मय अपनो जीन्दो होन को बाद तुम सी पहिले गलील ख चली जाऊं।”
MAR 14:29 पतरस न ओको सी कह्यो, “यदि सब छोड़ेंन त छोड़ेंन, पर मय तोख नहीं छोड़ूं।”
MAR 14:30 यीशु न ओको सी कह्यो, “मय तोरो सी सच कहू हय कि अजच योच रात ख मुर्गा को दोय बार बाग देन सी पहिले, तय तीन बार मोख पहिचानन सी इन्कार करजो।”
MAR 14:31 पर ओन अऊर भी जोर दे क कह्यो, “यदि मोख तोरो संग मरनो भी पड़ेंन, तब भी मय तोरो इन्कार कभी नहीं करू।” योच तरह अऊर सब न भी कह्यो।
MAR 14:32 फिर हि गतसमनी नाम एक जागा म आयो, अऊर यीशु न अपनो चेलावों सी कह्यो, “इत बैठ्यो रहो, जब तक मय प्रार्थना करू हय।”
MAR 14:33 अऊर ओन पतरस, याकूब अऊर यूहन्ना ख अपनो संग ले गयो; अऊर बहुत संकट अऊर दु:ख ओको पर आय गयो,
MAR 14:34 अऊर यीशु न उन्को सी कह्यो, “मोरो दिल बहुत उदास हय, यहां तक कि मय मरन पर हय। तुम इत ठहरो, अऊर देखतो रहो।”
MAR 14:35 तब ऊ थोड़ो आगु बढ़ क जमीन म गिर क प्रार्थना करन लग्यो, कि यदि होय सकय त यो तकलीफ को समय मोरो पर सी टल जाये,
MAR 14:36 अऊर कह्यो, “हे पिता, हे बाप, तोरो लायी सब कुछ सम्भव हय; यो दु:ख को कटोरा मोरो जवर सी हटाय ले: तब भी जसो मय चाहऊ हय वसो नहीं, पर जो तय चाहवय हय उच हो।”
MAR 14:37 तब यीशु वापस आयो अऊर उन तीन चेलावों ख सोयो देख क पतरस सी कह्यो, “हे शिमोन, तय सोय रह्यो हय? का तय एक घंटा भी नहीं जाग सक्यो?”
MAR 14:38 अऊर ओन उन्को सी कह्यो, “जागतो अऊर प्रार्थना करतो रहो कि तुम परीक्षा म नहीं पड़ो। आत्मा त तैयार हय, पर शरीर कमजोर हय।”
MAR 14:39 यीशु तब उत सी चली गयो अऊर उच शब्दों म प्रार्थना करी।
MAR 14:40 तब यीशु आय क उन्ख सोयो देख्यो, कहालीकि उन्की आंखी नींद सी भरी होती; अऊर हि नहीं जानत होतो कि ओख का कहनो हय।
MAR 14:41 तब, ओन तीसरी बार आय क उन्को सी कह्यो, “कहालीकि तुम अब तक सोय रह्य हय अऊर आराम कर रह्य हय? बहुत होय गयो! बस, समय आय पहुंच्यो हय। देखो, मय आदमी को बेटा पापियों को हाथ म सौंप दियो जाऊं।
MAR 14:42 उठो, चलो! देखो, मोख धोका देन वालो जवर आय गयो हय!”
MAR 14:43 यीशु यो कह्यच रह्यो होतो कि यहूदा जो बारा चेलावों म सी एक होतो, अपनो संग मुख्य याजकों अऊर धर्मशास्त्रियों अऊर बुजूर्गों को तरफ सी एक बड़ी भीड़ लेय क उन्ख भेज्यो, जो तलवारे अऊर लाठियां को संग होती।
MAR 14:44 ओको पकड़वान वालो न उन्ख यो इशारा दियो होतो कि जेको मय चुम्मा लेऊ उच आय, ओख पकड़ क सावधानी सी लिजाजो।
MAR 14:45 उत पहुंच क तुरतच यहूदा यीशु को जवर जाय क कह्यो, “हे गुरु!” अऊर ओको चुम्मा लियो।
MAR 14:46 तब उन्न यीशु ख पकड़ क बन्दी बनाय लियो।
MAR 14:47 उन म सी जो जवर खड़े होतो, एक न तलवार निकाल क महायाजक को सेवक पर चलाय क ओको कान काट दियो।
MAR 14:48 यीशु न उत्तर देतो हुयो उन्को सी कह्यो, “का तुम तलवारे अऊर लाठियां ले क मोख बन्दी बनावन आयो हय? का मय कोयी अपराधी आय?
MAR 14:49 मय त हर दिन मन्दिर म तुम्हरो संग रह्य क शिक्षा देत होतो, अऊर तब तुम्न मोख नहीं पकड़्यो: पर यो येकोलायी भयो हय कि शास्त्र को लेख पूरो होय।”
MAR 14:50 येको पर सब चेला ओख छोड़ क भाग गयो।
MAR 14:51 एक जवान लिनन को चादर पहिन्यो हुयो यीशु को पीछू भय गयो। अऊर लोगों न ओख पकड़न की कोशिश करी।
MAR 14:52 पर ऊ चादर ख छोड़ क नंगोच भग गयो।
MAR 14:53 फिर हि यीशु ख महायाजक को घर को आंगन म ले गयो; अऊर सब मुख्य याजक, बुजूर्गों अऊर धर्मशास्त्री उत जमा भय गयो।
MAR 14:54 पतरस दूरच दूर सी ओको पीछू-पीछू महायाजक को आंगन को अन्दर तक गयो, अऊर पहरेदारों को संग बैठ क आगी तापन लग्यो।
MAR 14:55 मुख्य याजक अऊर पूरी यहूदियों की महासभा यीशु ख मार डालन लायी ओको विरोध म सबूत ढूंढत होतो, पर सबूत नहीं मिल्यो।
MAR 14:56 कुछ लोग यीशु को विरोध म झूठो सबूत दे रह्यो होतो, पर उन्को सबूत एक जसो नहीं होतो।
MAR 14:57 तब कुछ लोगों न उठ क यीशु को विरोध म यो झूठो सबूत दियो,
MAR 14:58 “हम न येख यो कहतो सुन्यो हय, ‘मय यो आदमी को हाथ को बनायो हुयो मन्दिर ख गिराय देऊं, अऊर तीन दिन म दूसरों बनाय देऊं, जो आदमी को हाथ सी नहीं बन्यो हय।’”
MAR 14:59 येको पर भी उन्को सबूत एक जसो नहीं निकल्यो।
MAR 14:60 तब महायाजक न बीच म खड़े होय क यीशु सी पुच्छ्यो, “तय कोयी उत्तर नहीं देवय? हि लोग तोरो विरोध म का सबूत दे रह्यो हंय?”
MAR 14:61 पर यीशु चुपचाप रह्यो, अऊर कुछ उत्तर नहीं दियो। महायाजक न ओको सी फिर सी पुच्छ्यो, “का तय ऊ परम धन्य परमेश्वर को बेटा मसीह आय?”
MAR 14:62 यीशु न कह्यो, “हव मय आय,” अऊर “तुम आदमी को बेटा ख सर्वशक्तिमान परमेश्वर को दायो तरफ बैठ्यो, अऊर आसमान को बादलो को संग आवता देखो।”
MAR 14:63 तब महायाजक न अपनो कपड़ा फाड़ क कह्यो, “अब हम्ख गवाहों की अऊर का जरूरत हय?
MAR 14:64 तुम्न यो निन्दा सुनी। येको पर तुम्हरी का राय हय?” उन सब न कह्यो कि यो मृत्यु की सजा को लायक हय।
MAR 14:65 तब कोयी त ओको पर थूकन लग्यो, अऊर ओको पर कपड़ा सी ढक क घूसा मारन लग्यो अऊर ओको सी कहन लग्यो, “भविष्यवानी कर!” की तोख कौन न मारयो अऊर पहरेदारों न ओख पकड़ क थापड़ मारयो।
MAR 14:66 जब पतरस आंगन म बैठ्यो होतो, त महायाजक की दासी उत आयी,
MAR 14:67 अऊर पतरस ख आगी तापतो देख क पहिचानन लायी ओको पर टकटकी लगाय क देख्यो अऊर कहन लगी, “तय भी त ऊ नासरत को यीशु को संग होतो।”
MAR 14:68 पर पतरस न यीशु को इन्कार करतो हुयो कह्यो, “मय नहीं जानु अऊर नहीं समझू हय कि तय का कह्य रह्यो हय?” तब ऊ बाहेर डेहरी को तरफ जान लग्यो: अऊर मुर्गा न बाग दियो।
MAR 14:69 ओख देख क जवर खड़ो लोगों सी वा दासी फिर सी कहन लगी, “यो त उन्म सी एक” आय!
MAR 14:70 पर पतरस यीशु ख पहिचानन सी फिर सी इन्कार करयो। थोड़ी देर बाद जो जवर खड़ो होतो उन्न फिर पतरस सी कह्यो, “निश्चय तय उन्म सी एक आय; कहालीकि तय भी गलीली आय।”
MAR 14:71 तब पतरस कसम खाय क कहन लग्यो, सच कहू हय, “मय ऊ आदमी ख, जेकी तुम चर्चा करय हय, नहीं जानु।”
MAR 14:72 तब तुरतच दूसरों बार मुर्गा न बाग दियो। पतरस ख ऊ बात जो यीशु न ओको सी कह्यो होतो याद आयी: “मुर्गा को दोय बार बाग देन सी पहिले तय तीन बार मोख पहिचानन सी इन्कार करजो।” अऊर ऊ या बात ख सोच मान क रोवन लग्यो।
MAR 15:1 भुन्सारे होतोच तुरतच मुख्य याजकों, बुजूर्गों, अऊर धर्मशास्त्रियों न बल्की पूरी यहूदी महासभा न सल्ला कर क् यीशु ख बन्दी बनाय क, ओख लिजाय क पिलातुस शासक को हाथ म सौंप दियो।
MAR 15:2 पिलातुस न यीशु सी पुच्छ्यो, “का तय यहूदियों को राजा आय?” ओन ओख उत्तर दियो, “तय खुदच कह्य रह्यो हय।”
MAR 15:3 मुख्य याजक यीशु पर बहुत बातों को दोष लगाय रह्यो होतो।
MAR 15:4 पिलातुस न ओको सी फिर पुच्छ्यो, “का तय कुछ भी उत्तर नहीं देवय? देख हि तोरो पर कितनी बातों को दोष लगावय हंय।”
MAR 15:5 यीशु न फिर कुछ भी उत्तर नहीं दियो; येकोलायी पिलातुस बड़ो अचम्भित भयो।
MAR 15:6 हमेशा को जसो ऊ फसह को त्यौहार म यहूदी लोग कोयी एक बन्दी ख जेक हि चाहत होतो, पिलातुस उन्को लायी छोड़ देत होतो।
MAR 15:7 बरअब्बा नाम को एक आदमी विद्रोहियों को संग बन्दी होतो, ओन रोमन शासक को विद्रोह म हत्यायें करी होती।
MAR 15:8 अऊर भीड़ पिलातुस सी बिन्ती करन लग्यो, कि जसो तय हमरो लायी करत आयो हय वसोच कर।
MAR 15:9 पिलातुस न उन्ख उत्तर दियो, “का तुम चाहवय हय, कि मय तुम्हरो लायी यहूदियों को राजा ख छोड़ देऊ?”
MAR 15:10 पिलातुस जानत होतो कि मुख्य याजकों न ओख जलन सी सौंप दियो होतो।
MAR 15:11 पर मुख्य याजकों न लोगों ख उकसायो कि ऊ बरअब्बा ख उन्को लायी छोड़ दे।
MAR 15:12 यो सुन क पिलातुस न उन्को सी फिर पुच्छ्यो, “त जेक तुम यहूदियों को राजा कह्य हय, ओख मय का करू?”
MAR 15:13 हि फिर चिल्लावन लग्यो, “ओख क्रूस पर हाथ अऊर पाय म खिल्ला सी ठोक क ओख चढ़ाय देवो।”
MAR 15:14 पिलातुस न उन्को सी कह्यो, “येन का बुरो करयो हय?” पर हि अऊर भी जोर सी चिल्लावन लग्यो, “ओख क्रूस पर चढ़ाय देवो।”
MAR 15:15 तब पिलातुस न भीड़ ख खुश करन की इच्छा सी, बरअब्बा ख उन्को लायी छोड़ दियो, अऊर यीशु ख कोड़ा सी पीट क सौंप दियो कि क्रूस पर चढ़ायो जाये।
MAR 15:16 प्रीटोरियुम, जो राज्यपाल को राजभवन को आंगन कहलावय हय, ओख ले गयो जित पूरी रोमी सेना की पलटन ख बुलाय क जमा करयो।
MAR 15:17 तब उन्न यीशु ख जामुनी कपड़ा पहिनायो अऊर काटा की डगाली सी मुकुट बनाय क ओको मुंड पर रख्यो,
MAR 15:18 अऊर यो कह्य क ओख प्रनाम करन लग्यो, “हे यहूदियों को राजा, तोरी जय जयकार होय!”
MAR 15:19 हि ओको मुंड पर सरकण्डा मारतो, अऊर ओको पर थूकतो अऊर घुटना को बल पर होय क ओकी जय जयकार करतो रह्यो।
MAR 15:20 जब हि ओको मजाक उड़ाय लियो, त ओको पर सी जामुनी कपड़ा उतार क ओकोच कपड़ा पहिनायो; अऊर तब ओख क्रूस पर चढ़ावन लायी बाहेर ले गयो।
MAR 15:21 सिकन्दर अऊर रूफुस को बाप शिमोन कुरेनी, जो गांव सी आवतो हुयो उत सी निकल रह्यो होतो; त सिपाहियों न ओख जबरदस्ती म पकड़्यो कि यीशु को क्रूस उठाय क चले।
MAR 15:22 हि ओख गुलगुता नाम को जागा पर ले गयो, जेको अर्थ खोपड़ी की जागा हय।
MAR 15:23 अऊर ओख कड़वो मसाला मिलायो हुयो अंगूररस देन कि कोशिश करी, पर ओन नहीं पियो।
MAR 15:24 तब उन्न ओख क्रूस पर चढ़ायो अऊर ओको कपड़ा पर चिट्ठियां डाल क, कि कोन्ख का मिलेंन, ओको कपड़ा ख आपस म बाट लियो।
MAR 15:25 अऊर सबेरे को नौ बजे एक पहर दिन चढ़ आयो होतो, जब उन्न ओख क्रूस पर चढ़ायो।
MAR 15:26 अऊर असो लिख क यो दोष चिट्ठी ओको ऊपर क्रूस पर लगाय दियो कि “यहूदियों को राजा।”
MAR 15:27 उन्न ओको संग दोय डाकूवों, एक ओको दायो तरफ अऊर दूसरों ख ओको बायो तरफ क्रूस पर चढ़ायो।
MAR 15:28 तब शास्त्र को ऊ वचन पूरो भयो जेको म कह्यो हय कि ऊ अपराधियों को संग गिन्यो गयो।
MAR 15:29 अऊर उत सी आनो जानो वालो मुंड हिला हिलाय क अऊर यो कह्य क ओकी निन्दा करत होतो, “अरे! यो त मन्दिर ख गिराय क, अऊर तीन दिन म बनावन वालो होतो!
MAR 15:30 क्रूस पर सी उतर क अपनो आप ख बचाय ले।”
MAR 15:31 येको पर मुख्य याजक भी, धर्मशास्त्रियों को संग आपस म मजाक उड़ाय रह्यो होतो, “येन त दुसरो ख बचायो, पर खुद ख नहीं बचा सक्यो।”
MAR 15:32 “इस्राएल को राजा, मसीह, अब क्रूस पर सी उतर गयो कि हम ओख देख क विश्वास करबो।” अऊर जो ओको संग क्रूस पर चढ़ायो गयो होतो, हि भी ओकी निन्दा करत होतो।
MAR 15:33 बारा बजे दोपहर होन पर पूरो देश म अन्धारो छाय गयो, अऊर तीन घंटा तक अन्धारो छायो रह्यो।
MAR 15:34 तीसरो पहर तीन बजे यीशु न बड़ो आवाज सी पुकार क कह्यो, “एलोई, एलोई, लमा शबक्तनी?” जेको अर्थ यो हय, “हे मोरो परमेश्वर, हे मोरो परमेश्वर, तय न मोख कहाली छोड़ दियो?”
MAR 15:35 जो जवर खड़ो होतो, उन्म सी कुछ लोगों न यो सुन क कह्यो, “सुनो, ऊ एलिय्याह ख पुकार रह्यो हय।”
MAR 15:36 अऊर एक न दौड़ क स्पंज ख सिरका म डुबायो, अऊर सरकण्डा पर रख क ओख चुसायो अऊर कह्यो, “रुक जावो, देखबोंन, एलिय्याह ओख उतारन लायी आवय हय यां नहीं।”
MAR 15:37 तब यीशु न ऊचो आवाज सी चिल्लाय क जीव छोड़ दियो।
MAR 15:38 अऊर मन्दिर को परदा ऊपर सी खल्लो तक फट क दोय टुकड़ा भय गयो।
MAR 15:39 सूबेदार न जो उत आगु खड़ो होतो, ओख यो तरह सी जीव छोड़तो हुयो देख्यो, त ओन कह्यो, “सचमुच यो आदमी, परमेश्वर को बेटा होतो!”
MAR 15:40 कुछ बाई भी दूर सी देख रही होती: उन्म मरियम मगदलीनी, छोटो याकूब अऊर योसेस की माय मरियम, अऊर सलोमी होती।
MAR 15:41 जब ऊ गलील म होतो त हि ओको पीछू होय जात होती अऊर ओकी सेवा टहल करत होती; अऊर बहुत सी बाईयां भी होती, जो ओको संग यरूशलेम म आयी होती।
MAR 15:42 जब शाम भय गयी त येकोलायी कि तैयारी को दिन होतो, जो यहूदियों को आराम को दिन सी एक दिन पहिले होवय हय,
MAR 15:43 अरिमतिया को निवासी यूसुफ आयो, जो यहूदियों को महासभा को सम्मानिय सदस्य होतो अऊर खुद भी परमेश्वर को राज्य की रस्ता देखत होतो। ऊ हिम्मत कर क् पिलातुस को जवर जाय क यीशु को लाश मांग्यो।
MAR 15:44 पिलातुस ख अचम्भा भयो कि यीशु की मृत्यु इतनो जल्दी भय गयी; अऊर ओन सूबेदार ख बुलाय क पुच्छ्यो, “का ऊ मर गयो हय?”
MAR 15:45 तब ओन सूबेदार सी हाल जान क लाश यूसुफ ख दे दियो।
MAR 15:46 तब यूसुफ न लिनन कि एक चादर लियो, अऊर लाश ख उतार क ऊ चादर म लपेट क, अऊर एक कब्र म जो चट्टान ख काट क बनायो गयो कब्र म रख्यो, अऊर कब्र को द्वार पर एक बड़ो गोटा लुढ़काय दियो।
MAR 15:47 मरियम मगदलीनी अऊर योसेस की माय मरियम देख रही होती कि ओख कित रख्यो गयो हय।
MAR 16:1 जब आराम को दिन बीत गयो, त मरियम मगदलीनी, याकूब की माय मरियम अऊर सलोमी न सुगन्धित अत्तर लेय लियो अऊर आय क यीशु की लाश पर मल्यो।
MAR 16:2 हप्ता को पहिलो दिन इतवार ख भुन्सारो म जब सूर्योदय होतो समय, हि कब्र पर आयी,
MAR 16:3 अऊर आपस म कहत होती, “हमरो लायी कब्र को द्वार पर सी गोटा कौन हटायेंन?”
MAR 16:4 गोटा बहुत बड़ो होतो, जब उन्न देख्यो, त गोटा हट्यो हुयो होतो।
MAR 16:5 कब्र को अन्दर जाय क उन्न स्वर्गदूत ख एक जवान आदमी को रूप म सफेद कपड़ा पहिन्यो दायो तरफ बैठ्यो देख्यो, अऊर हि बहुत डर गयी होती।
MAR 16:6 ओन उन्को सी कह्यो, “मत डरो, तुम नासरत को यीशु ख, जो क्रूस पर चढ़ायो गयो होतो, ओख ढूंढ रही हय। ऊ जीन्दो भयो हय, इत नहाय; देखो, याच जागा आय, जित उन्न ओख रख्यो होतो।
MAR 16:7 पर तुम जावो, अऊर ओको चेलावों अऊर पतरस सी कहो कि ऊ तुम सी पहिले गलील ख जायेंन। जसो ओन तुम सी कह्यो होतो, तुम उतच ओख देखो।”
MAR 16:8 अऊर हि निकल क कब्र सी भाग गयी; कपकपी अऊर घबराहट उन पर छाय गयी होती; अऊर उन्न कोयी सी कुछ नहीं कह्यो, कहालीकि हि डर गयी होती।
MAR 16:9 हप्ता को पहिलो दिन इतवार को भुन्सारे ख ऊ जीन्दो होय क सब सी पहिले मरियम मगदलीनी ख जेको म सी सात दुष्ट आत्मा ख निकाल्यो होतो ओख दिखायी दियो।
MAR 16:10 ओन जाय क यीशु को संगियों ख जो शोक म डुब्यो होतो अऊर रोय रह्यो होतो, यो समाचार बतायो।
MAR 16:11 जब उन्न यो सुन्यो कि यीशु जीन्दो हय अऊर उन्ख दिखायी दियो हय, त उन्ख विश्वास नहीं भयो।
MAR 16:12 येको बाद यीशु दूसरों रूप म उन्म सी दोय चेलावों ख जब हि गांव को तरफ जाय रह्य होतो, दिखायी दियो।
MAR 16:13 उन्न भी जाय क दूसरों ख समाचार बतायो, पर उन्न तब भी उन्की बात पर विश्वास नहीं करयो।
MAR 16:14 पीछू ऊ उन ग्यारा चेलावों ख भी, जब हि जेवन करन बैठ्यो होतो दिखायी दियो, अऊर उन्को अविश्वास अऊर मन की कठोरता पर डाट्यो, कहालीकि जेन ओख जीन्दो होन को बाद देख्यो होतो, इन्न उन्को विश्वास नहीं करयो होतो।
MAR 16:15 अऊर यीशु न उन्को सी कह्यो, “तुम पूरो जगत म जाय क पूरी सृष्टि को लोगों ख सुसमाचार प्रचार करो।
MAR 16:16 जो विश्वास करेंन अऊर बपतिस्मा लेयेंन ओकोच उद्धार होयेंन, पर जो विश्वास नहीं करेंन ओको न्याय होयेंन अऊर ऊ दोषी ठहरायो जायेंन;
MAR 16:17 विश्वास करन वालो म यो चिन्ह होयेंन कि हि मोरो नाम सी दुष्ट आत्मावों ख निकालेंन, अऊर नयी नयी भाषा बोलेंन,
MAR 16:18 सांपो ख उठाय लेयेंन, अऊर यदि हि जहेर ख भी पी लेयेंन तब भी उन्की कुछ हानि नहीं होयेंन; हि बीमारों पर हाथ रखेंन, अऊर बीमार चंगो होय जायेंन।”
MAR 16:19 प्रभु यीशु उन्को सी बाते करन को बाद स्वर्ग पर उठाय लियो गयो, अऊर परमेश्वर को दायो तरफ बैठ गयो।
MAR 16:20 अऊर उन्न निकल क हर जागा म प्रचार करयो, अऊर प्रभु उन्को संग काम करत रह्यो, अऊर उन चिन्ह को द्वारा जो संग संग होत होतो, वचन ख मजबूत करत रह्यो। आमीन।
LUK 1:1 प्रिय थियुफिलुस: बहुत सो न उन बातों ख जो हमरो बीच म बीती हंय, इतिहास लिखन म हाथ लगायो हय।
LUK 1:2 जसो कि उन्न जो पहले सीच इन बातों ख देखन वालो अऊर सुसमाचार को प्रचार करन वालो न, हम तक पहुंचायो।
LUK 1:3 अऊर येकोलायी, मान्यवर थियुफिलुस मोख भी यो ठीक मालूम भयो कि उन सब बातों को पूरो हाल सुरूवात सी ठीक-ठीक जांच कर क्, उन्ख तोरो लायी एक को बाद एक लिखूं।
LUK 1:4 मय असो येकोलायी कहू हय कि तोख हर वा चिज को बारे म पूरी सच्चायी मालूम होय जाये जो तोख सिखायी गयी हय।
LUK 1:5 यहूदिया को राजा हेरोदेस को समय अबिय्याह को दल म जकर्याह नाम को एक याजक होतो। अऊर ओकी पत्नी हारून को वंश की होती; जेको नाम इलीशिबा होतो।
LUK 1:6 हि दोयी परमेश्वर को आगु सच्चो होतो, अऊर प्रभु की पूरी आज्ञावों अऊर पूरी विधियों पर निर्दोष चलन वालो होतो।
LUK 1:7 उन्की कोयी भी सन्तान नहीं होती, कहालीकि इलीशिबा बांझ होती, अऊर हि दोयी बूढ्ढा होतो।
LUK 1:8 जब ऊ मन्दिर म अपनो दल की पारी पर परमेश्वर को आगु याजक को काम करत होतो,
LUK 1:9 त याजकों की रीति को अनुसार ओको नाम की चिट्ठी निकली कि प्रभु को मन्दिर म जाय क धूप जलायेंन।
LUK 1:10 धूप जलावन को समय लोगों की पूरी मण्डली बाहेर प्रार्थना कर रही होती।
LUK 1:11 ऊ समय प्रभु को एक स्वर्गदूत धूप की वेदी को दायो तरफ जकर्याह ख प्रगट भयो दिखायी दियो।
LUK 1:12 जकर्याह देख क घबरायो अऊर ओको पर बड़ो डर छाय गयो।
LUK 1:13 पर स्वर्गदूत न ओको सी कह्यो, “हे जकर्याह, डरू मत! कहालीकि तोरी प्रार्थना सुन लियो हय, अऊर तोरी पत्नी इलीशिबा सी तोरो लायी एक बेटा पैदा होयेंन। अऊर तय ओको नाम यूहन्ना रखजो।
LUK 1:14 अऊर तोख बहुत खुशी होयेंन, अऊर बहुत लोग ओको जनम को वजह खुश होयेंन!
LUK 1:15 कहालीकि ऊ प्रभु को आगु महान होयेंन; अऊर नशा वालो अंगूररस अऊर मदिरा कभी नहीं पीयेंन; अऊर अपनी माय को गर्भ सीच पवित्र आत्मा सी परिपूर्ण होय जायेंन;
LUK 1:16 अऊर इस्राएलियों म सी बहुत सो ख उन्को प्रभु परमेश्वर को तरफ वापस लायेंन।
LUK 1:17 ऊ नबी एलिय्याह को जसो आत्मा अऊर सामर्थ म होय क प्रभु सी आगु निकल जायेंन। कि बाप को मन बाल-बच्चां को तरफ घुमाय देयेंन; अऊर आज्ञा नहीं मानन वालो ख धर्मियों की समझ पर लाये; अऊर प्रभु लायी एक लायक प्रजा तैयार करेंन।”
LUK 1:18 जकर्याह न स्वर्गदूत सी पुच्छ्यो, “यो मय कसो जानु? कहालीकि मय त बूढ्ढा हय; अऊर मोरी पत्नी भी बूढ्ढी होय गयी हय।”
LUK 1:19 स्वर्गदूत न ओख उत्तर दियो, “मय जिब्राईल आय, जो परमेश्वर को आगु खड़ो रहू हय; अऊर मय तोरो सी बाते करन अऊर तोख यो सुसमाचार सुनावन लायी भेज्यो गयो हय।
LUK 1:20 देख, जब तक या बाते पूरी नहीं होय, तब तक तय मुक्का रहजो अऊर बोल नहीं सकजो, कहालीकि तय न मोरी बातों ख जो अपनो समय पर पूरी होन वाली होती, ओको पर विश्वास नहीं करयो।”
LUK 1:21 लोग जकर्याह की रस्ता देखतच रह्यो अऊर अचम्भा करन लग्यो कि ओख मन्दिर म इतनी देर कहाली लगी।
LUK 1:22 जब ऊ बाहेर आयो, त ओन उन्को सी बात नहीं कर सक्यो: येकोलायी हि जान गयो कि ओन मन्दिर म कोयी दर्शन पायो हय; अऊर ऊ अपनो हाथों सी उन्ख इशारा करतो रह्यो, अऊर मुक्का बन गयो।
LUK 1:23 जब जकर्याह को मन्दिर म को सेवा को दिन पूरो भयो, त ऊ अपनो घर चली गयो।
LUK 1:24 ऊ दिन को बाद सी ओकी पत्नी इलीशिबा गर्भवती भयी; अऊर पाच महीना तक अपनो आप ख यो कह्य क लूकाय क रख्यो,
LUK 1:25 “आदमियों म मोरो अपमान को दूर करन लायी, प्रभु न इन दिनो म दयादृष्टि कर क् मोरो लायी असो करयो हय।”
LUK 1:26 इलीशिबा को गर्भ धारन को छठवो महीना म परमेश्वर को तरफ सी जिब्राईल स्वर्गदूत, गलील को नासरत नगर म,
LUK 1:27 एक कुंवारी को जवर भेज्यो गयो जेकी मंगनी यूसुफ नाम को दाऊद को घराना को एक पुरुष सी भयी होती: वा कुंवारी को नाम मरियम होतो।
LUK 1:28 स्वर्गदूत न ओको जवर अन्दर आय क कह्यो, “खुशी अऊर आशीर्वाद तोरो संग हय, जेक पर ईश्वर को अनुग्रह भयो हय! प्रभु तोरो संग हय!”
LUK 1:29 मरियम ऊ वचन सी बहुत परेशान भय गयी, अऊर सोचन लगी कि यो कसो तरह को अभिवादन आय?
LUK 1:30 स्वर्गदूत न ओको सी कह्यो, “हे मरियम, डरो मत, कहालीकि परमेश्वर को अनुग्रह तोरो पर भयो हय।
LUK 1:31 देख, तय गर्भवती होजो, अऊर तोख एक बेटा पैदा होयेंन; तय ओको नाम यीशु रखजो।
LUK 1:32 ऊ महान होयेंन अऊर परमप्रधान परमेश्वर को बेटा कह्यो जायेंन, अऊर प्रभु परमेश्वर ओको बाप दाऊद को सिंहासन ओख देयेंन,
LUK 1:33 अऊर ऊ याकूब को घरानों पर हमेशा राज करेंन; अऊर ओको राज्य कभी खतम नहीं होयेंन।”
LUK 1:34 मरियम न स्वर्गदूत सी कह्यो, “यो कसो होयेंन। मय त कोयी भी पुरुष ख जानु नहाय।”
LUK 1:35 स्वर्गदूत न ओख उत्तर दियो, “पवित्र आत्मा तोरो पर उतरेंन, अऊर परमेश्वर जो सब सी ऊचो हय ओकी सामर्थ तोरो पर छायेंन; येकोलायी ऊ पवित्र जो पैदा होन वालो हय, परमेश्वर को बेटा कहलायेंन।
LUK 1:36 अऊर देख, तोरी कुटुम्बिनी इलीशिबा ख भी बुढ़्ढापा म बेटा होन वालो हय, यो ओको, जो बांझ कहलावत होती ओको गर्भ धारन को छठवो महीना हय।
LUK 1:37 कहालीकि जो वचन परमेश्वर को तरफ सी होवय हय ऊ असम्भव नहीं होवय।”
LUK 1:38 मरियम न कह्यो, “देख मय प्रभु की दासी आय, मोख तोरो वचन को अनुसार हो।” तब स्वर्गदूत ओको जवर सी चली गयो।
LUK 1:39 उन दिनो म मरियम उठ क जल्दीच पहाड़ी देश म यहूदा को एक नगर ख गयी,
LUK 1:40 ओन जकर्याह को घर म जाय क इलीशिबा ख नमस्कार करी।
LUK 1:41 जसोच इलीशिबा न मरियम को नमस्कार सुन्यो, वसोच बच्चा ओको पेट म उछल्यो, अऊर इलीशिबा पवित्र आत्मा सी परिपूर्ण भय गयी।
LUK 1:42 अऊर ओन बड़ो आवाज सी पुकार क कह्यो, “तय पूरी बाईयों म सब सी जादा आशीर्वाद हय, अऊर तोरो पेट को बच्चा आशीर्वाद हय!
LUK 1:43 यो अनुग्रह मोख कित सी भयो कि मोरो प्रभु की माय मोरो जवर आयी?
LUK 1:44 जसोच तोरो नमस्कार को आवाज मोरो कानो म पड़्यो, वसोच बच्चा मोरो पेट म खुशी सी उछल पड़्यो।
LUK 1:45 धन्य हय ऊ जेन विश्वास करयो कि जो बाते प्रभु को तरफ सी ओको सी कहीं गयी, हि पूरी होयेंन!”
LUK 1:46 तब मरियम न कह्यो, “मोरो जीव प्रभु की बड़ायी करय हय
LUK 1:47 अऊर मोरी आत्मा मोरो उद्धार करन वालो परमेश्वर सी खुश भयी,
LUK 1:48 कहालीकि ओन अपनी दासी पर नजर करी हय; येकोलायी देखो, अब सी पूरो युग-युग को लोग मोख धन्य कहेंन,
LUK 1:49 कहालीकि ऊ सर्वशक्तिमान परमेश्वर न मोरो लायी बड़ो बड़ो काम करयो हय। ओको नाम पवित्र हय,
LUK 1:50 एक पीढ़ी सी दूसरी पीढ़ी म, ऊ उन लोगों पर दया करय हय, जो ओको आदर करय हंय।
LUK 1:51 ओन अपनो ताकतवर भुजा दिखायो, अऊर जो अपनो आप ख बड़ो समझत होतो, उन्ख तितर-बितर कर दियो।
LUK 1:52 ओन राजावों ख उन्को सिंहासनों सी गिराय दियो; अऊर नम्र लोगों ख ऊंचो करयो।
LUK 1:53 ओन भूखो ख अच्छी चिजों सी सन्तुष्ट करयो, अऊर धनवानों ख खाली हाथ निकाल दियो।
LUK 1:54 ओन अपनो सेवक इस्राएल ख सम्भाल लियो कि अपनो ऊ दया ख याद करेंन,
LUK 1:55 जो अब्राहम अऊर ओको वंश पर हमेशा रहेंन, जसो ओन हमरो बापदादों सी कह्यो होतो।”
LUK 1:56 मरियम लगभग तीन महीना इलीशिबा को संग रह्य क अपनो घर लौट गयी।
LUK 1:57 तब इलीशिबा को प्रसव को समय पूरो भयो, अऊर ओन बेटा ख जनम दियो।
LUK 1:58 ओको पड़ोसियों अऊर कुटुम्बियों न यो सुन क कि प्रभु न ओको पर बड़ी दया करी हय, ओको संग खुशी मनायो।
LUK 1:59 अऊर असो भयो कि आठवों दिन हि बच्चा को खतना करन आयो अऊर ओको नाम ओको बाप को नाम पर जकर्याह रखन लग्यो।
LUK 1:60 येको पर ओकी माय न उत्तर दियो, “नहीं; बल्की ओको नाम यूहन्ना रख्यो जाय।”
LUK 1:61 उन्न ओको सी कह्यो, “तोरो कुटुम्ब म कोयी को यो नाम नहाय!”
LUK 1:62 तब उन्न ओको बाप सी इशारा कर क् पुच्छ्यो कि तय ओको नाम का रखनो चाहवय हय?
LUK 1:63 जकर्याह न एक लिखन की पाटी मांगी अऊर लिख दियो, “ओको नाम यूहन्ना आय,” अऊर सब अचम्भित भयो।
LUK 1:64 तब ओको मुंह अऊर जीबली तुरतच खुल गयी; अऊर ऊ बोलन अऊर परमेश्वर को महिमा करन लग्यो।
LUK 1:65 ओको आजु बाजू को सब रहन वालो पर डर छाय गयो; अऊर उन सब बातों की चर्चा यहूदिया को पूरो पहाड़ी प्रदेश म फैल गयी,
LUK 1:66 अऊर सब सुनन वालो न अपनो-अपनो मन म बिचार कर क् कह्यो, “यो बच्चा कसो होयेंन?” कहालीकि प्रभु को हाथ ओको पर होतो।
LUK 1:67 ओको बाप जकर्याह पवित्र आत्मा सी परिपूर्ण भय गयो, अऊर परमेश्वर को खबर देन लग्यो:
LUK 1:68 “प्रभु इस्राएल को परमेश्वर की महिमा हो, कहालीकि ओन अपनो लोगों पर नजर करी अऊर उन्को छुटकारा करयो हय,
LUK 1:69 अऊर अपनो सेवक दाऊद को घराना म ओन हमरो लायी एक शक्तिशाली उद्धारकर्ता दियो हय,
LUK 1:70 ओन अपनो पवित्र भविष्यवक्तावों को द्वारा जो जगत को सुरूवात सी होत आयो हंय, कह्यो होतो,
LUK 1:71 यानेकि हमरो दुश्मनों सी, अऊर हमरो सब दुश्मनों को हाथ सी हमरो उद्धार करयो हय,
LUK 1:72 ओन कह्यो होतो कि अपनो पूर्वजों पर दया कर क् अपनी पवित्र वाचा ख याद करेंन,
LUK 1:73 वा कसम ओन हमरो बाप अब्राहम सी खायी होती,
LUK 1:74 कि हमरो दुश्मनों को हाथों सी हमरो छुटकारा हो अऊर बिना कोयी डर को प्रभु की सेवा करन की अनुमति मिले।
LUK 1:75 ओको आगु पवित्रता अऊर सच्चायी सी जीवन भर निडर रह्य क ओकी सेवा करतो रहबो।
LUK 1:76 अऊर तय मोरो बच्चा, परमप्रधान परमेश्वर जो सब सी ऊचो हय। भविष्यवक्ता कहलायेंन, कहालीकि तय प्रभु को रस्ता तैयार करन लायी ओको आगु-आगु चलेंन,
LUK 1:77 कि ओको लोगों ख उद्धार को ज्ञान देयेंन, कि उन्को पापों की माफी सी होवय हय।
LUK 1:78 यो हमरो परमेश्वर की बड़ी दया सी होयेंन; जेको वजह ऊपर सी हम पर उद्धार को प्रकाश उदय होयेंन,
LUK 1:79 कि अन्धकार अऊर मरन की छाया म बैठन वालो ख उद्धार को प्रकाश देयेंन, अऊर हमरो पाय ख शान्ति को रस्ता म सीधो चलाये।”
LUK 1:80 अऊर ऊ बच्चा बढ़तो अऊर आत्मा म बलवन्त होत गयो, अऊर इस्राएल पर प्रगट होन को दिन तक जंगल म रह्यो।
LUK 2:1 उन दिनो म औगुस्तुस जो रोम को राजा होतो ओको तरफ सी आज्ञा निकली कि पूरो रोम साम्राज्य को लोगों को नाम लिख्यो जाये।
LUK 2:2 जब यो पहिली नाम लिखायी ऊ समय भयी, जब क्विरिनियुस सीरिया को शासक होतो।
LUK 2:3 सब लोग नाम लिखावन लायी अपनो अपनो नगर ख गयो।
LUK 2:4 यूसुफ भी येकोलायी कि ऊ दाऊद को वंश को होतो, गलील को नासरत नगर सी यहूदिया म दाऊद को नगर बैतलहम ख गयो,
LUK 2:5 कि अपनी पत्नी मरियम को संग जो गर्भवती होती नाम लिखावन गयो।
LUK 2:6 अऊर जब हि बैतलहम म होतो, तब ऊ समय आयो कि ओको जनम देन को दिन पूरो भयो,
LUK 2:7 अऊर ओन अपनो पहिलो बेटा ख जनम दियो, अऊर ओख कपड़ा म लपेट क चरनी म रख्यो; कहालीकि उन्को लायी सरायी म रहन लायी जागा नहीं होती।
LUK 2:8 अऊर ऊ देश म कितनो चरावन वालो होतो, जो रात ख खेतो म रह्य क अपनो झुण्ड की देखरेख करतो हुयो, पहरा देत होतो।
LUK 2:9 अऊर प्रभु को एक दूत उन्को जवर आय खड़ो भयो, अऊर प्रभु की महिमा उन्को चारयी तरफ चमकन लगी, अऊर हि बहुत डर गयो होतो।
LUK 2:10 तब स्वर्गदूत न उन्को सी कह्यो, “मत डरो; कहालीकि देखो, मय तुम्ख बड़ी खुशी को सुसमाचार सुनाऊ हय, जेकोसी पूरो लोगों ख बहुत खुशी होयेंन,
LUK 2:11 कहालीकि अज दाऊद को नगर म तुम्हरो लायी एक उद्धारकर्ता न जनम लियो हय, अऊर योच मसीह प्रभु आय।
LUK 2:12 अऊर यो उच आय जो तुम्हरो लायी यो चिन्ह हय कि तुम एक बच्चा ख कपड़ा म लिपट्यो हुयो अऊर एक चरनी म सोयो हुयो पावों।”
LUK 2:13 तब अचानक ऊ स्वर्गदूत को संग स्वर्गीय सेना को शक्तिशाली दल परमेश्वर की स्तुति करतो हुयो अऊर यो कहतो दिखायी दियो,
LUK 2:14 “आसमान म परमेश्वर की महिमा अऊर धरती पर उन आदमियों म जिन्कोसी ऊ प्रसन्न हय, शान्ति हो।”
LUK 2:15 जब स्वर्गदूत उन्को जवर सी स्वर्ग ख चली गयो, त चरावन वालो न आपस म कह्यो, “आवो, हम बैतलहम जाय क या बात जो भयी हय, अऊर जेक प्रभु न हम्ख बतायो हय, देखबो।”
LUK 2:16 अऊर उन्न तुरतच जाय क मरियम अऊर यूसुफ ख पायो, अऊर चरनी म ऊ बच्चा ख पड़्यो देख्यो।
LUK 2:17 जब चरावन वालो न उन्ख देख्यो, त उन्न उन्ख बतायो कि स्वर्गदूत न वा बात बच्चा को बारे म उन्को सी कह्यो होतो, प्रगट करयो,
LUK 2:18 अऊर सब सुनन वालो न उन बातों सी जो चरावन वालो न उन्को सी कह्यो होतो अचम्भा करयो।
LUK 2:19 पर मरियम न या पूरी बाते अपनो मन म याद रख क गहरायी सी सोचत रही।
LUK 2:20 अऊर चरवाहे ख जसो स्वर्गदूत न कह्यो गयो होतो, वसोच सब सुन क अऊर देख क परमेश्वर की महिमा अऊर स्तुति करतो हुयो लौट गयो।
LUK 2:21 जब आठ दिन पूरो भयो अऊर बच्चा को खतना को समय आयो, त ओको नाम यीशु रख्यो गयो जो स्वर्गदूत न ओको पेट म आवन सी पहिले कह्यो होतो।
LUK 2:22 जब मूसा की व्यवस्था को अनुसार यूसुफ अऊर मरियम को शुद्ध होन को दिन पूरो भयो, त हि ओख यरूशलेम म ले गयो कि प्रभु को आगु लायो,
LUK 2:23 जसो कि प्रभु की व्यवस्था म लिख्यो हय: “हर एक पहिलौठा प्रभु ख अर्पन करन लायी अलग करयो जायेंन।”
LUK 2:24 अऊर प्रभु की व्यवस्था को वचन को अनुसार कबूत्तर को एक जोड़ा, यां दोय पण्डुकों को बलिदान चढ़ाये।
LUK 2:25 यरूशलेम म शिमोन नाम को एक आदमी होतो, ऊ एक सच्चो अऊर परमेश्वर सी डरन वालो आदमी होतो; अऊर परमेश्वर इस्राएल को बचावन की असी रस्ता देख रह्यो होतो, अऊर पवित्र आत्मा ओको संग होतो।
LUK 2:26 अऊर पवित्र आत्मा को द्वारा ओको पर प्रगट भयो कि जब तक ऊ प्रभु म जो प्रतिज्ञा करयो ऊ मसीहा ख देख नहीं लेयेंन, तब तक मरेंन नहीं।
LUK 2:27 शिमोन आत्मा को प्रेरना सी मन्दिर म आयो; अऊर जब माय-बाप न यीशु ख जो छोटो बच्चा हय, मन्दिर म अन्दर लायो, कि ओको लायी व्यवस्था की रीति को अनुसार करे,
LUK 2:28 त शिमोन न बच्चा ख अपनी गोदी म लियो अऊर परमेश्वर ख धन्यवाद कर क् कह्यो:
LUK 2:29 “हे मालिक, अब तय अपनो सेवक ख प्रतिज्ञा को अनुसार तोरो वचन ख पूरो होतो देख्यो हय अब मोख शान्ति सी मरन दे,
LUK 2:30 कहालीकि मोरी आंखी न तोरो उद्धार ख देख लियो हय,
LUK 2:31 जेक तय न सब देशों को लोगों को आगु तैयार करयो हय।
LUK 2:32 कि ऊ गैरयहूदियों ख प्रकाशित करन लायी ज्योति, अऊर तोरो निजी लोग इस्राएल की महिमा करन वाली हो।”
LUK 2:33 शिमोन को बाप अऊर माय इन बातों सी जो ओको बारे म कहीं जात होती, अचम्भा करत होतो।
LUK 2:34 तब शिमोन न उन्ख आशीर्वाद दे क, ओकी माय मरियम सी कह्यो, “देख, यो बच्चा त इस्राएल म बहुत सो ख विनाश, अऊर उद्धार लायी, अऊर एक असो चिन्ह होन लायी ठहरायो गयो हय, जेको विरोध म बाते करी जायेंन
LUK 2:35 येकोलायी बहुत लोगों को मन को बिचार प्रगट होयेंन। अऊर दु:ख, एक तेज तलवार की तरह तुम्हरो खुद को दिल छेदेंन।”
LUK 2:36 अशेर को गोत्र म सी हन्नाह नाम की फनूएल की बेटी वा एक भविष्यवक्तिन होती। वा बहुत बूढ्ढी होती, अऊर बिहाव होन को बाद सात साल अपनो पति को संग रही फिर ओको पति मर गयो होतो।
LUK 2:37 अऊर वा चौरासी साल सी विधवा होती: अऊर मन्दिर ख नहीं छोड़त होती, पर उपवास अऊर प्रार्थना कर कर क् रात-दिन परमेश्वर की पूजा अऊर उपासना करत होती।
LUK 2:38 अऊर वा उच घड़ी उत आय क परमेश्वर को धन्यवाद करन लगी, अऊर उन सब सी, जो यरूशलेम को छुटकारा की रस्ता देखत होतो, ऊ बच्चा को बारे म बाते करन लगी।
LUK 2:39 अऊर जब हि प्रभु की व्यवस्था को अनुसार सब कुछ पूरो कर लियो त गलील म अपनो नगर नासरत ख फिर चली गयो।
LUK 2:40 अऊर बच्चा बढ़तो, अऊर बलवान होतो गयो, अऊर बुद्धि सी परिपूर्ण होत गयो; अऊर ओको पर परमेश्वर को अनुग्रह होतो गयो।
LUK 2:41 यीशु को माय-बाप हर साल फसह को त्यौहार म यरूशलेम जात होतो।
LUK 2:42 जब यीशु बारा साल को भयो, त हि त्यौहार की रीति को अनुसार यरूशलेम ख गयो।
LUK 2:43 जब हि उन दिनो ख पूरो कर क् लौटन लग्यो, त बच्चा यीशु यरूशलेम म रह गयो; अऊर यो ओको माय-बाप नहीं जानत होतो।
LUK 2:44 उन्न यो सोच्यो कि ऊ दूसरों यात्रियों को संग होना, एक दिन को पूरो दिन निकल गयो: अऊर ओख अपनो कुटुम्बियों अऊर जान-पहिचान वालो म ढूंढन लग्यो।
LUK 2:45 पर जब नहीं मिल्यो, त ढूंढत-ढूंढत यरूशलेम ख फिर लौट गयो,
LUK 2:46 अऊर तीन दिन को बाद उन्न ओख मन्दिर म यहूदी शिक्षकों को बीच म बैठ्यो, अऊर उन्की सुनत अऊर उन्को सी प्रश्न करतो हुयो पायो।
LUK 2:47 जितनो ओकी सुन रह्यो होतो, हि सब ओकी बुद्धिमानी को उत्तरो सी चकित होतो।
LUK 2:48 तब हि ओख देख क चकित भयो अऊर ओकी माय न ओको सी कह्यो, “हे बेटा, तय न हम सी कहाली असो व्यवहार करयो? देख, तोरो बाप अऊर मय चिन्ता करतो हुयो तोख ढूंढत होतो?”
LUK 2:49 ओन उन्को सी कह्यो, “तुम मोख कहाली ढूंढत होतो? का तुम नहीं जानत होतो कि मोख अपनो बाप को भवन म होनो जरूरी हय?”
LUK 2:50 पर जो बात ओन उन्को सी कहीं, उन्न ओख नहीं समझ्यो।
LUK 2:51 तब ऊ उन्को संग गयो, अऊर नासरत म आयो, अऊर उन्को वश म रह्यो; अऊर ओकी माय न या सब बाते अपनो मन म रखी।
LUK 2:52 अऊर यीशु न शरीर अऊर बुद्धि दोयी म वृद्धी करी, अऊर परमेश्वर अऊर आदमियों को अनुग्रह म बढ़तो गयो।
LUK 3:1 तिबिरियुस रोम को राज्य को पन्द्रावों साल म जब पुन्तियुस पिलातुस यहूदिया को शासक होतो, अऊर गलील म हेरोदेस, इतूरैया अऊर त्रखोनीतिस म ओको भाऊ फिलिप्पुस, अऊर अबिलेने म लिसानियास, चौथाई को राजा होतो,
LUK 3:2 अऊर जब हन्ना अऊर कैफा महायाजक होतो, ऊ समय परमेश्वर को वचन सुनसान जागा म जकर्याह को बेटा यूहन्ना बपतिस्मा देन वालो को जवर पहुंच्यो।
LUK 3:3 ऊ यरदन को आजु बाजू को पूरो प्रदेश म जाय क, अपनो पापों की माफी लायी मन फिराव को बपतिस्मा को प्रचार करन लग्यो।
LUK 3:4 जसो यशायाह भविष्यवक्ता को कह्यो हुयो वचनों की किताब म लिख्यो हय: “जंगल म एक पुकारन वालो को आवाज आय रह्यो हय कि, ‘प्रभु को रस्ता तैयार करो, ओकी सड़के सीधी बनावो।
LUK 3:5 हर एक घाटी भर दी जायेंन, अऊर हर एक पहाड़ी अऊर टेकरा सवान कर दियो जायेंन; अऊर जो तेड़ो हय सीधो कर दियो जायेंन, अऊर जो उबड़ खाबड़ हय सवान कर दियो जायेंन, अऊर ऊ रस्ता चौड़ो बनेंन।
LUK 3:6 अऊर हर प्रानी परमेश्वर को उद्धार ख देखेंन।’”
LUK 3:7 जो भीड़ की भीड़ ओको सी बपतिस्मा लेन ख निकल क आवत होती, उन्को सी यूहन्ना कहत होतो, “हे सांप को पिल्ला, तुम्ख कौन जताय दियो कि आवन वालो गुस्सा सी भगो।
LUK 3:8 असी बाते करो जो अपनो पश्चाताप ख दर्शावय, अऊर अपनो अपनो मन म यो मत सोचो कि हमरो बाप अब्राहम आय; कहालीकि मय तुम सी सच कहू हय कि परमेश्वर इन गोटा सी अब्राहम लायी सन्तान पैदा कर सकय हय।
LUK 3:9 अब टंग्या झाड़ों की जड़ी पर रख्यो हुयो हय, येकोलायी जो जो झाड़ अच्छो फर नहीं लावय, ऊ काट्यो अऊर आगी म झोक्यो जावय हय।”
LUK 3:10 तब लोगों न ओको सी पुच्छ्यो, “त हम का करबो?”
LUK 3:11 ओन उन्ख उत्तर दियो, “जिन्को जवर दोय कुरता होना, ऊ ओको संग जिन्को जवर नहाय ऊ बाट लेवो अऊर जिन्को जवर भोजन होना, ऊ भी असोच करे।”
LUK 3:12 कर लेनवालो भी बपतिस्मा लेन आयो, अऊर ओको सी पुच्छ्यो, “हे गुरु, हम का करबो?”
LUK 3:13 ओन ओको सी कह्यो, “जो तुम्हरो लायी ठहरायो गयो हय, ओको सी जादा मत लेवो।”
LUK 3:14 कुछ सिपाहियों न भी ओको सी यो पुच्छ्यो, “हम का करबो?” ओन उन्को सी कह्यो, “कोयी सी जबरदस्ती पैसा नहीं लेनो अऊर नहीं झूठो दोष लगावनो, अऊर अपनो रोजी पर सन्तुष्ट रहनो।”
LUK 3:15 जब लोग आस लगायो हुयो होतो, अऊर सब अपनो अपनो मन म यूहन्ना को बारे म बिचार कर रह्यो होतो कि का योच मसीह त नोहोय,
LUK 3:16 त यूहन्ना न उन सब सी कह्यो, “मय त तुम्ख पानी सी बपतिस्मा देऊ हय, पर ऊ आवन वालो हय जो मोरो सी शक्तिमान हय; मय त यो लायक भी नहाय कि ओको चप्पल को बन्ध निकाल सकू। ऊ तुम्ख पवित्र आत्मा अऊर आगी सी बपतिस्मा देयेंन।
LUK 3:17 ओको सूपा, ओको हाथ म हय; अऊर ऊ अपनो खरियान अच्छो तरह सी साफ करेंन; अऊर गहूं ख अपनो ढोला म जमा करेंन; पर भूसी ख वा आगी म जो बुझन कि नहीं जलाय देयेंन।”
LUK 3:18 येकोलायी यूहन्ना बहुत सी चेतावनी दे क लोगों ख सुसमाचार सुनावत होतो कि अपनो रस्ता ख बदले।
LUK 3:19 पर जब यूहन्ना न चौथाई देश को राजा हेरोदेस ख ओको भाऊ फिलिप्पुस कि पत्नी हेरोदियास को बारे म अऊर सब अपराधो को बारे म जो ओन करयो होतो, फटकार लगायी,
LUK 3:20 त हेरोदेस न उन सब सी बड़ क यो अपराध भी करयो कि यूहन्ना ख जेलखाना म डाल दियो।
LUK 3:21 जब सब लोगों न बपतिस्मा लियो अऊर यीशु भी बपतिस्मा ले क प्रार्थना कर रह्यो होतो, त आसमान खुल गयो,
LUK 3:22 अऊर पवित्र आत्मा शारीरिक रूप म कबूत्तर को जसो ओको पर उतरयो, अऊर स्वर्ग सी या आकाशवानी भयी: “तय मोरो प्रिय बेटा आय, मय तोरो सी खुश हय।”
LUK 3:23 जब यीशु खुद उपदेश करन लग्यो, त लगभग तीस साल की उमर को होतो अऊर जसो समझ्यो जात होतो यूसुफ को बेटा होतो; अऊर ऊ एली को,
LUK 3:24 अऊर ऊ मत्तात को टुरा, अऊर ऊ लेवी को टुरा, अऊर ऊ मलकी को टुरा, अऊर ऊ यन्ना को टुरा, अऊर ऊ यूसुफ को टुरा,
LUK 3:25 अऊर ऊ मत्तित्याह को टुरा, अऊर ऊ आमोस को टुरा, अऊर ऊ नहूम को टुरा, अऊर ऊ असल्याह को टुरा, अऊर ऊ नोगह को टुरा,
LUK 3:26 अऊर ऊ मात को टुरा, अऊर ऊ मत्तित्याह को टुरा, अऊर ऊ शिमी को टुरा, अऊर ऊ योसेख को टुरा, अऊर ऊ योदाह को टुरा,
LUK 3:27 अऊर ऊ यूहन्ना को टुरा, अऊर ऊ रेसा को टुरा, अऊर ऊ जरुब्बाबिल को टुरा, अऊर ऊ शालतिएल को टुरा, अऊर ऊ नेरी को टुरा,
LUK 3:28 अऊर ऊ मलकी को टुरा, अऊर ऊ अद्दी को टुरा, अऊर ऊ कोसाम को टुरा, अऊर ऊ इलमोदाम को टुरा, अऊर ऊ एर को टुरा,
LUK 3:29 अऊर ऊ यहोशू को टुरा, अऊर ऊ इलाजार को टुरा, अऊर ऊ योरीम को टुरा, अऊर ऊ मत्तात को टुरा, अऊर ऊ लेवी को टुरा,
LUK 3:30 अऊर ऊ शिमोन को टुरा, अऊर ऊ यहूदा को टुरा, अऊर ऊ यूसुफ को टुरा, अऊर ऊ योनान को टुरा, अऊर ऊ इलियाकीम को टुरा,
LUK 3:31 अऊर ऊ मलेआह को टुरा, अऊर ऊ मिन्नाह को टुरा, अऊर ऊ मत्तता को टुरा, अऊर ऊ नातान को टुरा, अऊर ऊ दाऊद को टुरा,
LUK 3:32 अऊर ऊ यिशै को टुरा, अऊर ऊ ओबेद को टुरा, अऊर ऊ बोअज को टुरा, अऊर ऊ सलमोन को टुरा, अऊर ऊ नहशोन को टुरा,
LUK 3:33 अऊर ऊ अम्मीनादाब को टुरा, अऊर ऊ अरनी को टुरा, अऊर ऊ हिस्रोन को टुरा, अऊर ऊ फिरिस को टुरा, अऊर ऊ यहूदा को टुरा,
LUK 3:34 अऊर ऊ याकूब को टुरा, अऊर ऊ इसहाक को टुरा, अऊर ऊ अब्राहम को टुरा, अऊर ऊ तिरह को टुरा, अऊर ऊ नाहोर को टुरा,
LUK 3:35 अऊर ऊ सरूग को टुरा, अऊर ऊ रऊ को टुरा, अऊर ऊ फिलिग को टुरा, अऊर ऊ एबिर को टुरा, अऊर ऊ शिलह को टुरा,
LUK 3:36 अऊर ऊ केनान को टुरा, अऊर ऊ अरफक्षद को टुरा, अऊर ऊ शेम को टुरा, अऊर ऊ नूह को टुरा, अऊर ऊ लिमिक को टुरा,
LUK 3:37 अऊर ऊ मथूशिलह को टुरा, अऊर ऊ हनोक को टुरा, अऊर ऊ यिरिद को टुरा, अऊर ऊ महललेल को टुरा, अऊर ऊ केनान को टुरा,
LUK 3:38 अऊर ऊ एनोश को टुरा, अऊर ऊ शेत को टुरा, अऊर ऊ आदम को टुरा, अऊर ऊ परमेश्वर को टुरा होतो।
LUK 4:1 तब यीशु पवित्र आत्मा सी भरयो हुयो, यरदन सी लौट्यो;
LUK 4:2 अऊर चालीस दिन तक आत्मा को सिखावनो सी सुनसान जागा म फिरतो रह्यो; अऊर शैतान ओकी परीक्षा करत रह्यो। उन दिनो म ओन कुछ नहीं खायो, अऊर जब हि दिन पूरो भय गयो, त ओख भूख लगी।
LUK 4:3 तब शैतान न ओको सी कह्यो, “यदि तय परमेश्वर को बेटा आय, त यो गोटा सी कह्य, कि रोटी बन जाय।”
LUK 4:4 यीशु न ओख उत्तर दियो, “शास्त्र म लिख्यो हय: ‘आदमी केवल रोटी सी जीन्दो नहीं रहेंन।’”
LUK 4:5 तब शैतान ओख ले गयो अऊर ओख पल भर म जगत को पूरो राज्य दिखायो,
LUK 4:6 अऊर शैतान न ओको सी कह्यो, “मय यो सब अधिकार, अऊर इन्को वैभव तोख देऊ, कहालीकि ऊ मोख सौंप्यो गयो हय: अऊर जेक चाहऊ हय ओख दे देऊ हय।
LUK 4:7 येकोलायी यदि तय मोरी आराधना करजो, त यो सब तोरो होय जायेंन।”
LUK 4:8 यीशु न ओख उत्तर दियो, “शास्त्र म लिख्यो हय: ‘तय प्रभु अपनो परमेश्वर कि सेवा कर; अऊर केवल ओकीच आराधना कर।’”
LUK 4:9 तब शैतान ओख यरूशलेम म लिजाय क मन्दिर की ऊचाई पर खड़ो करयो, अऊर ओको सी कह्यो, “यदि तय परमेश्वर को बेटा आय, त अपनो आप ख ऊपर सी खल्लो गिराय दे।
LUK 4:10 कहालीकि असो शास्त्र म लिख्यो हय: ‘ऊ तोरो बारे म अपनो स्वर्गदूतों ख आज्ञा देयेंन, कि हि तोख सम्भाल लेयेंन।’
LUK 4:11 अऊर असो भी कह्यो गयो हय ‘हि तोख हाथों हाथ उठाय लेयेंन, असो नहीं होय कि तोरो पाय म गोटा सी ठेस लगेंन।’”
LUK 4:12 यीशु न ओख उत्तर दियो, “शास्त्र म यो भी कह्यो गयो हय: ‘तय प्रभु अपनो परमेश्वर की परीक्षा नहीं करजो।’”
LUK 4:13 जब शैतान सब परीक्षा कर लियो, तब थोड़ो समय लायी ओको जवर सी चली गयो।
LUK 4:14 तब यीशु आत्मा की सामर्थ सी भर क फिर सी गलील म आयो, अऊर ओकी चर्चा आजु बाजू को पूरो देश म फैल गयी।
LUK 4:15 ऊ उन्को सभागृहों म उपदेश करतो रह्यो, अऊर सब ओकी बड़ायी करत होतो।
LUK 4:16 तब ऊ नासरत नगर म आयो, जित लालन पालन भयो होतो; अऊर अपनी रीति को अनुसार आराम को दिन आराधनालय म जाय क पढ़न लायी खड़ो भयो।
LUK 4:17 यशायाह भविष्यवक्ता की किताब ओख दी गयी, अऊर ओन किताब खोल क, ऊ पन्ना निकाल्यो जित यो लिख्यो होतो :
LUK 4:18 “प्रभु की आत्मा मोरो पर हय, येकोलायी कि ओन गरीबों ख सुसमाचार सुनावन लायी मोरो अभिषेक करयो हय, अऊर मोख येकोलायी भेज्यो हय कि बन्दियों ख छुड़ावन को अऊर अन्धो ख नजर पावन को सुसमाचार प्रचार करू अऊर कुचल्यो हुयो ख छुड़ाऊ,
LUK 4:19 अऊर परमेश्वर को कृपा दृष्टी को साल की घोषना करू।”
LUK 4:20 तब ओन किताब बन्द कर क् सेवक को हाथ म दे दियो अऊर बैठ गयो; अऊर आराधनालय को सब लोगों की आंखी ओको पर टिकी होती।
LUK 4:21 तब ऊ उन्को सी कहन लग्यो, “अजच शास्त्र को यो लेख तुम्हरो आगु पूरो भयो हय।”
LUK 4:22 सब लोगों न ओकी प्रशंसा करी, अऊर जो अनुग्रह की बाते ओको मुंह सी निकलत होती, उन्को सी अचम्भित भयो; अऊर कहन लग्यो, “का यो यूसुफ को बेटा नोहोय?”
LUK 4:23 ओन उन्को सी कह्यो, “तुम मोरो पर यो दृष्टान्त जरूर कहो कि ‘हे डाक्टर, अपनो आप ख चंगो कर! जो कुछ हम न सुन्यो हय कि कफरनहूम म करयो गयो हय, ओख इत अपनो देश म भी कर।’”
LUK 4:24 अऊर ओन कह्यो, “मय तुम सी सच कहू हय कोयी भविष्यवक्ता अपनो देश म मान-सम्मान नहीं पावय।
LUK 4:25 मय तुम सी सच कहू हय कि एलिय्याह को दिनो म जब साढ़े तीन साल तक आसमान बन्द रह्यो, यहां तक कि पूरो देश म बड़ो अकाल पड़्यो होतो, इस्राएल म बहुत सी विधवाये होती।
LUK 4:26 पर एलिय्याह उन्म सी कोयी को जवर नहीं भेज्यो गयो, केवल सैदा को सारफत नगर म एक विधवा को जवर।
LUK 4:27 अऊर एलीशा भविष्यवक्ता को समय इस्राएल म बहुत सो कोढ़ी होतो, पर सीरिया देश को वासी नामान ख छोड़ उन्म सी कोयी शुद्ध नहीं करयो गयो।”
LUK 4:28 या बाते सुनतच जितनो आराधनालय म होतो, सब गुस्सा सी भर गयो,
LUK 4:29 अऊर उठ क यीशु ख नगर सी बाहेर निकाल्यो, अऊर जो पहाड़ी पर उन्को नगर बस्यो हुयो होतो, ओकी सेन्डी पर ले चल्यो कि ओख उत सी खल्लो गिराय दे।
LUK 4:30 पर ऊ उन्को बीच म सी निकल क चली गयो।
LUK 4:31 तब ऊ गलील को कफरनहूम नगर ख गयो; अऊर आराम को दिन लोगों ख उपदेश दे रह्यो होतो।
LUK 4:32 हि ओको उपदेश सी अचम्भित भय गयो कहालीकि ओको वचन अधिकार सहित होतो।
LUK 4:33 आराधनालय म एक आदमी होतो, ऊ दुष्ट आत्मा जो ओख परमेश्वर को आगु अशुद्ध ठहरावत होती। ऊ ऊचो आवाज सी चिल्लाय उठ्यो,
LUK 4:34 “हे यीशु नासरी, हम्ख तोरो सी का काम? का तय हम्ख नाश करन आयो हय? मय तोख जानु हय तय कौन आय? तय परमेश्वर को पवित्र लोग आय!”
LUK 4:35 यीशु न ओख डाट क कह्यो, “चुप रह, अऊर ओको म सी निकल जा!” तब दुष्ट आत्मा ओख बीच म पटक क बिना नुकसान पहुंचायो ओको म सी निकल गयी।
LUK 4:36 येको पर सब ख अचम्भा भयो, अऊर हि आपस म बाते कर क् कहन लग्यो, “यो कसो वचन आय? कहालीकि ऊ अधिकार अऊर सामर्थ को संग दुष्ट आत्मावों ख आज्ञा देवय हय, अऊर हि निकल जावय हंय।”
LUK 4:37 यो तरह चारयी तरफ हर जागा यीशु की चर्चा होन लगी।
LUK 4:38 यीशु आराधनालय म सी उठ क शिमोन को घर म गयो। शिमोन की सासु ख बुखार चढ़्यो हुयो होतो, अऊर उन्न ओको लायी ओको सी बिनती करी।
LUK 4:39 ओन ओको खटिया को जवर खड़ो होय क बुखार ख डाट्यो अऊर बुखार उतर गयो, अऊर वा तुरतच उठ क उन्की सेवा-भाव करन लगी।
LUK 4:40 सूरज डुबतो समय, जिन-जिन को इत लोग कुछ तरह की बीमारियों म पड़्यो हुयो होतो, हि सब उन्ख ओको जवर लायो, अऊर ओन एक एक पर हाथ रख क उन्ख चंगो करयो।
LUK 4:41 अऊर दुष्ट आत्मायें भी चिल्लाती अऊर यो कहत होती कि, “तय परमेश्वर को बेटा आय,” बहुत सो म सी निकल गयी। पर यीशु उन्ख डाटतो अऊर बोलन नहीं देत होतो, कहालीकि हि जानत होती कि ऊ मसीहा हय।
LUK 4:42 जब दिन निकल्यो त ऊ निकल क एक सुनसान जागा म चली गयो, अऊर भीड़ की भीड़ ओख ढूंढती हुयी ओको जवर आयी, अऊर ओख रोकन लगी कि ऊ उन्को जवर सी नहीं जाय।
LUK 4:43 पर ओन उन्को सी कह्यो, “मोख अऊर नगरों म भी परमेश्वर को राज्य को सुसमाचार सुनावनो जरूरी हय, कहालीकि मय येकोलायी भेज्यो गयो हय।”
LUK 4:44 अऊर ऊ गलील को पूरो सभागृहों अऊर यहूदियों को देशों म प्रचार करतो रह्यो।
LUK 5:1 जब भीड़ परमेश्वर को वचन सुनन लायी ओको पर गिरत होती, अऊर ऊ गन्नेसरत की झील को किनार पर खड़ो होतो, त असो भयो
LUK 5:2 कि ओन झील को किनार दोय डोंगा लग्यो हुयो देख्यो, अऊर मछवारों उन पर सी उतर क जार धोय रह्यो होतो।
LUK 5:3 उन डोंगा म सी एक पर, जो शिमोन की होती, चढ़ क ओन ओको सी बिनती करी कि किनार सी थोड़ो हटाय ले। तब ऊ बैठ क लोगों ख डोंगा पर सी उपदेश देन लग्यो।
LUK 5:4 जब ऊ बाते कर लियो त शिमोन सी कह्यो, “गहरो म लिजा, अऊर मच्छी पकड़न लायी अपनो जार डालो।”
LUK 5:5 शिमोन न यीशु ख उत्तर दियो, “हे मालिक, हम न पूरी रात मेहनत करी अऊर कुछ नहीं पकड़्यो; तब भी तोरो कहन सी जार डालू।”
LUK 5:6 जब उन्न असो करयो, त बहुत मच्छी घेर लायी, अऊर उन्को जार फटन लग्यो।
LUK 5:7 येख पर उन्न अपनो संगियों ख जो दूसरों डोंगा पर होतो, इशारा करयो कि आय क हमरी मदद करो, अऊर उन्न आय क दोयी डोंगा इतनो तक भर ली कि हि डुबन लगी।
LUK 5:8 यो देख क शिमोन पतरस यीशु को पाय पर गिरयो अऊर कह्यो, “हे प्रभु मोरो जवर सी चली जा, कहालीकि मय पापी आदमी हय।”
LUK 5:9 कहालीकि इतनी मच्छी ख पकड़्यो जानो सी ओख अऊर ओको संगियों ख बहुत अचम्भा भयो,
LUK 5:10 अऊर वसोच जब्दी को बेटा याकूब अऊर यूहन्ना ख भी, जो शिमोन को सहभागी होतो, अचम्भा भयो। तब यीशु न शिमोन सी कह्यो, “मत डर; अब सी तय आदमियों ख परमेश्वर को राज्य म लायजो।”
LUK 5:11 अऊर हि डोंगा ख किनार पर लायो अऊर सब कुछ छोड़ क ओको पीछू भय गयो।
LUK 5:12 जब यीशु कोयी दूसरों नगर म होतो, त उत कोढ़ की बीमारी वालो एक आदमी आयो; अऊर ऊ यीशु ख देख क मुंह को बल गिरयो अऊर बिनती करी, “हे प्रभु, यदि तय चाहवय त मोख शुद्ध कर सकय हय।”
LUK 5:13 ओन हाथ बढ़ाय क ओख छूयो अऊर कह्यो, “मय चाहऊ हय, तय शुद्ध होय जा।” अऊर ओको कोढ़ तुरतच जातो रह्यो।
LUK 5:14 तब यीशु न ओख आज्ञा दी, “कोयी सी मत कहजो, पर जाय क अपनो आप ख याजक ख दिखाव, अऊर अपनो शुद्ध होन को बारे म जो कुछ मूसा न अर्पन की विधि ठहरायो हय ओख चढ़ाव कि उन पर गवाही हो।”
LUK 5:15 पर यीशु की चर्चा अऊर भी फैलत गयी, अऊर भीड़ की भीड़ ओकी सुनन लायी अऊर अपनी बीमारियों सी चंगो होन लायी जमा भयी।
LUK 5:16 पर ऊ सुनसान जागा म अलग जाय क प्रार्थना करत होतो।
LUK 5:17 एक दिन असो भयो कि यीशु उपदेश दे रह्यो होतो, अऊर फरीसी अऊर व्यवस्थापक उत बैठ्यो हुयो होतो जो गलील अऊर यहूदिया को हर गांव सी अऊर यरूशलेम सी आयो होतो, अऊर चंगो करन लायी प्रभु की सामर्थ यीशु को संग होती।
LUK 5:18 ऊ समय कुछ लोग एक आदमी ख जो लकवा को रोगी होतो, खटिया पर लायो, अऊर हि ओख अन्दर लिजान अऊर यीशु को आगु रखन को उपाय ढूंढ रह्यो होतो।
LUK 5:19 पर जब भीड़ को वजह ओख अन्दर नहीं लाय सक्यो त उन्न छत पर चढ़ क अऊर खपरैल हटाय क, ओख खटिया समेत बीच म यीशु को आगु उतार दियो।
LUK 5:20 यीशु न उन्को विश्वास देख क ओको सी कह्यो, “हे आदमी, तोरो पाप माफ भयो।”
LUK 5:21 तब धर्मशास्त्री अऊर फरीसी अपनो मन म बिचार करन लग्यो, “यो कौन आय? जो परमेश्वर की निन्दा करय हय! परमेश्वर ख छोड़ अऊर कौन पापों ख माफ कर सकय हय?”
LUK 5:22 यीशु न उन्को मन की बाते जान क, उन्को सी कह्यो, “तुम अपनो मन म का बिचार कर रह्यो हय?
LUK 5:23 सहज का हय? का यो कहनो कि ‘तोरो पाप माफ भयो,’ या यो कहनो कि ‘उठ अऊर चल फिर?’
LUK 5:24 पर येकोलायी कि तुम जानो कि मय आदमी को बेटा ख धरती पर पाप माफ करन को भी अधिकार हय।” ओन ऊ लकवा को रोगी सी कह्यो, “मय तोरो सी कहू हय, उठ अऊर अपनी खटिया उठाय क अपनो घर चली जा।”
LUK 5:25 ऊ तुरतच उन्को आगु उठ्यो, अऊर जो खटिया पर ऊ पड़्यो होतो ओख उठाय क, परमेश्वर की बड़ायी करतो हुयो अपनो घर चली गयो।
LUK 5:26 तब सब अचम्भित भयो अऊर परमेश्वर की बड़ायी करन लग्यो अऊर बहुत डर क कहन लग्यो, “अज हम्न अनोखी बाते देखी हंय!”
LUK 5:27 यीशु बाहेर गयो अऊर लेवी नाम को एक कर लेनवालो ख कर वसुली की चौकी पर बैठ्यो देख्यो, अऊर ओको सी कह्यो, “मोरो पीछू होय जा।”
LUK 5:28 तब लेवी सब कुछ छोड़ क उठ्यो, अऊर ओको पीछू चली गयो।
LUK 5:29 तब लेवी न अपनो घर म यीशु लायी एक बड़ो भोज दियो; अऊर कर लेनवालो अऊर दूसरों लोगों की जो ओको संग जेवन करन बैठ्यो होतो, एक बड़ी भीड़ होती।
LUK 5:30 येको पर फरीसी अऊर उन्को धर्मशास्त्री ओको चेलावों सी यो कह्य क कुड़कुड़ान लग्यो, “तुम कर लेनवालो अऊर पापियों को संग कहालीकि खावय-पीवय हय?”
LUK 5:31 यीशु न उन्ख उत्तर दियो, “डाक्टर भलो चंगो लायी नहीं, पर बीमारों लायी जरूरी हय।
LUK 5:32 मय धर्मियों ख नहीं, पर पापियों ख पश्चाताप करावन लायी आयो हय।”
LUK 5:33 उन्न ओको सी कह्यो, “बपतिस्मा देन वालो यूहन्ना को चेला त बराबर उपवास रखय अऊर प्रार्थना करय हंय, अऊर वसोच फरीसियों को चेला भी, पर तोरो चेला त खावय-पीवय हंय।”
LUK 5:34 यीशु न उन्को सी कह्यो, “का तुम बरातियों सी, जब तक दूल्हा उन्को संग रहेंन, उपवास करवाय सकय हय?
LUK 5:35 पर ऊ दिन आयेंन, जब की दूल्हा उन्को सी अलग करयो जायेंन, तब हि उन दिनो म उपवास करेंन।”
LUK 5:36 यीशु न एक अऊर दृष्टान्त भी उन्को सी कह्यो: “कोयी आदमी नयो कपड़ा म सी फाड़ क पुरानो कपड़ा म थेगड़ नहीं लगावय, नहीं त नयो भी फट जायेंन अऊर ऊ थेगड़ पुरानो म मेल भी नहीं खायेंन।
LUK 5:37 अऊर कोयी नयो अंगूररस पुरानी मशकों म नहीं भरय, नहीं त नयो अंगूररस मशकों ख फाड़ क बह जायेंन, अऊर मशके भी नाश होय जायेंन।
LUK 5:38 पर नयो अंगूररस नयो मशकों म भरनो चाहिये होतो।
LUK 5:39 कोयी आदमी पुरानो अंगूररस पी क नयो नहीं चाहवय कहालीकि ऊ कह्य हय, कि पुरानोच अच्छो हय।”
LUK 6:1 तब आराम को दिन ऊ गहूं खेतो म सी जाय रह्यो होतो, अऊर ओको चेलावों लोम्बा तोड़-तोड़ क अऊर हाथों सी मस-मस क खात जाय रह्यो होतो।
LUK 6:2 तब फरीसियों म सी कुछ कहन लग्यो, “तुम ऊ काम कहालीकि करय हय जो आराम को दिन जो नियम को खिलाफ हय ऊ करनो ठीक नहाय?”
LUK 6:3 यीशु न उन्ख उत्तर दियो, “का तुम न यो नहीं पढ़्यो कि दाऊद न, जब ऊ अऊर ओको संगी भूखो होतो त का करयो?
LUK 6:4 ऊ कसो परमेश्वर को मन्दिर म गयो, अऊर भेंट की रोटी ले क खायी, जिन्ख खानो याजकों ख छोड़ अऊर ऊ नियम को विरुद्ध हय, अऊर अपनो संगियों ख भी दियो।”
LUK 6:5 अऊर यीशु न उन्को सी कह्यो, “मय आदमी को बेटा आराम दिन को भी प्रभु हय।”
LUK 6:6 असो भयो कि कोयी अऊर आराम को दिन ऊ आराधनालय म जाय क उपदेश करन लग्यो; अऊर उत एक आदमी होतो जेको दायो हाथ लकवा ग्रस्त होतो।
LUK 6:7 धर्मशास्त्री अऊर फरीसी ओको पर दोष लगावन को अवसर पावन की ताक म होतो कि देखे ऊ आराम को दिन चंगो करय हय कि नहीं।
LUK 6:8 पर ऊ उन्को बिचार जानत होतो; येकोलायी ओन लकवा ग्रस्त हाथ वालो आदमी सी कह्यो, “उठ, बीच म खड़ो हो।” ऊ बीच म खड़ो भयो।
LUK 6:9 यीशु न उन्को सी कह्यो, “मय तुम सी यो पूछू हय कि हमरो नियम को अनुसार आराम को दिन का ठीक हय, भलो करनो यां बुरो करनो; जीव ख बचावनो या नाश करनो?”
LUK 6:10 तब ओन चारयी तरफ उन सब ख देख क ऊ आदमी सी कह्यो, “अपनो हाथ बढ़ाव।” ओन असोच करयो, अऊर ओको हाथ फिर चंगो भय गयो।
LUK 6:11 पर हि गुस्सा म आय क बाहेर आपस म चर्चा करन लग्यो कि “हम यीशु को संग का करबो?”
LUK 6:12 उन दिनो म यीशु पहाड़ी पर प्रार्थना करन गयो, अऊर परमेश्वर सी प्रार्थना करन म पूरी रात बितायी।
LUK 6:13 जब दिन भयो त ओन अपनो चेलावों ख बुलाय क उन्म सी बारा ख चुन लियो, अऊर उन्ख प्रेरित कह्यो;
LUK 6:14 अऊर हि यो आय : शिमोन जेको नाम ओन पतरस भी रख्यो, अऊर ओको भाऊ अन्द्रियास, अऊर याकूब, अऊर यूहन्ना, अऊर फिलिप्पुस, अऊर बरतुल्मै,
LUK 6:15 अऊर मत्ती, अऊर थोमा, अऊर हलफई को बेटा याकूब, अऊर शिमोन जो देशभक्त कहलावय हय,
LUK 6:16 अऊर याकूब को बेटा यहूदा, अऊर यहूदा इस्करियोती जो ओको सौंपन वालो बन्यो।
LUK 6:17 तब यीशु उन्को संग उतर क चौरस जागा म खड़ो भयो, अऊर ओको चेलावों की बड़ी भीड़, अऊर पूरो यहूदिया, यरूशलेम, अऊर सूर अऊर सैदा को समुन्दर को किनार सी बहुत लोग,
LUK 6:18 जो ओकी सुनन अऊर अपनी बीमारियों सी चंगो होन लायी ओको जवर आयो होतो, उत होतो। अऊर दुष्ट आत्मावों को सतायो हुयो लोग भी अच्छो करयो जात होतो।
LUK 6:19 सब ओख छूवनो चाहत होतो, कहालीकि ओको म सी सामर्थ निकल क सब ख चंगो करत होती।
LUK 6:20 तब ओन अपनो चेलावों की तरफ देख क कह्यो, “धन्य हय तुम जो गरीब हय, कहालीकि परमेश्वर को राज्य तुम्हरो हय!”
LUK 6:21 “धन्य हय तुम जो अब भूखो हय, कहालीकि सन्तुष्ट करयो जायेंन।” “धन्य हय तुम जो अब रोवय हय, कहालीकि तुम हसो।”
LUK 6:22 “धन्य हय तुम जब आदमी को बेटा को वजह लोग तुम सी दुश्मनी करेंन, अऊर तुम्ख निकाल देयेंन, अऊर तुम्हरी निन्दा करेंन, अऊर तुम्हरो नाम बुरो जान क काट देयेंन।”
LUK 6:23 ऊ दिन खुश होय क उछलजो, कहालीकि देखो, तुम्हरो लायी स्वर्ग म बड़ो प्रतिफल हय; उन्को बाप-दादा भविष्यवक्तावों को संग भी वसोच करत होतो।
LUK 6:24 “पर हाय तुम पर जो धनवान हय, कहालीकि तुम अपनो सुख पा लियो।”
LUK 6:25 “हाय तुम पर जो अब सन्तुष्ट हय, कहालीकि भूखो होयेंन।” “हाय तुम पर जो अब हसय हय, कहालीकि शोक करो अऊर रोवो।
LUK 6:26 “हाय तुम पर जब सब आदमी तुम्ख भलो कहेंन, कहालीकि उन्को बाप-दादा झूठो भविष्यवक्तावों को संग भी असोच करत होतो।
LUK 6:27 “पर मय तुम सुनन वालो सी कहू हय कि अपनो दुश्मनों सी प्रेम रखो; जो तुम सी दुश्मनी करेंन, उन्को भलो करो।
LUK 6:28 जो तुम्ख श्राप दे, उन्ख आशीर्वाद दे; जो तुम्हरो बुरो व्यवहार करेंन, उन्को लायी प्रार्थना करो।
LUK 6:29 जो तोरो एक गाल पर थापड़ मारेंन ओको तरफ दूसरों भी घुमाय दे; अऊर जो तोरो झंग्गा छीन लेन, ओख कुरता लेनो सी भी मत रोक।
LUK 6:30 जो कोयी तोरो सी मांगेंन, ओख दे; अऊर जो कोयी तोरी चिज छीन लेन, ओको सी फिर सी मत मांग।
LUK 6:31 जसो तुम चाहवय हय कि लोग तुम्हरो संग करेंन, तुम भी उन्को संग वसोच करो।
LUK 6:32 “यदि तुम अपनो प्रेम रखन वालो को संग प्रेम रखय, त तुम्हरी का बड़ायी? कहालीकि पापी भी अपनो प्रेम रखन वालो को संग प्रेम रखय हंय।
LUK 6:33 यदि तुम अपनो भलायी करन वालोच को संग भलायी करय हय, त तुम्हरी का बड़ायी? कहालीकि पापी भी असोच करय हंय।
LUK 6:34 यदि तुम उन्ख उधार दे जिन्कोसी फिर पावन कि आशा रखय हय, त तुम्हरी का बड़ायी? कहालीकि पापी पापियों ख उधार देवय हंय कि उतनोच फिर पावय।
LUK 6:35 बल्की अपनो दुश्मनों सी प्रेम रखो, अऊर भलायी करो, अऊर फिर पावन कि आशा नहीं रख क उधार दे; अऊर तुम्हरो लायी बड़ो फर होयेंन, अऊर परमेश्वर जो सब सी ऊचो हय ओको सन्तान ठहरो, कहालीकि ऊ उन पर जो धन्यवाद नहीं करय अऊर बुरो पर भी दयालु हय।
LUK 6:36 जसो तुम्हरो बाप दयावन्त हय, वसोच तुम भी दयावन्त बनो।
LUK 6:37 “दोष मत लगावो, त तुम पर भी दोष नहीं लगायो जायेंन। दोषी नहीं ठहरावों, त तुम भी दोषी नहीं ठहरायो जावो। माफ करो, त तुम्ख भी माफ करयो जायेंन।
LUK 6:38 दूसरों ख दे, त तुम्ख भी परमेश्वर देयेंन। लोग पूरो नाप दबाय दबाय क अऊर हिलाय हिलाय क अऊर उभरतो हुयो तुम्हरी गोदी म डालेंन, कहालीकि जो नाप सी तुम नापय हय, उच नाप सी तुम्हरो लायी भी नाप्यो जायेंन।”
LUK 6:39 तब यीशु न उन्को सी एक दृष्टान्त कह्यो: “का अन्धा, अन्धा ख रस्ता बताय सकय हय? का दोयी गड्डा म नहीं गिरेंन?
LUK 6:40 चेला अपनो गुरु सी बड़ो नहाय, पर जो कोयी सिद्ध होयेंन, ऊ अपनो गुरु को जसो होयेंन।
LUK 6:41 “तय अपनो भाऊ की आंखी को तिनका ख का देखय हय, अऊर अपनी आंखी को लट्ठा तोख नहीं सूझय?
LUK 6:42 जब तय अपनोच आंखी को लट्ठा नहीं देखय, त अपनो भाऊ सी कसो कह्य सकय हय, ‘हे भाऊ; रुक जा तोरी आंखी सी तिनका ख निकाल देऊ?’ हे कपटी, पहिले अपनो आंखी सी लट्ठा निकाल, तब जो तिनका तोरो भाऊ कि आंखी म हय, ओख भली भाति देख क निकाल सकेंन।
LUK 6:43 “कोयी अच्छो झाड़ नहीं जो खराब फर देयेंन, अऊर नहीं त कोयी खराब झाड़ हय जो अच्छो फर देयेंन।
LUK 6:44 हर एक झाड़ अपनो फर सी पहिचान्यो जावय हय; कहालीकि लोग काटा की झाड़ियों सी अंजीर नहीं तोड़य अऊर नहीं झड़बेरी सी अंगूर या बबुर को झाड़ सी आम्बा।
LUK 6:45 भलो आदमी अपनो दिल को भलो भण्डार सी भली बाते निकालय हय, अऊर बुरो आदमी अपनो मन को बुरो भण्डार सी बुरी बाते निकालय हय; कहालीकि जो मन म भरयो हय उच ओको मुंह पर आवय हय।
LUK 6:46 “जब तुम मोरो कहनो नहीं मानय त कहालीकि मोख ‘हे प्रभु, हे प्रभु’ कह्य हय?
LUK 6:47 जो कोयी मोरो जवर आवय हय अऊर मोरी बाते सुन क उन्ख मानय हय, मय तुम्ख बताऊ हय कि ऊ कौन्को जसो हय:
LUK 6:48 यो ऊ आदमी को जसो हय, जेन घर बनावतो समय जमीन गहरी खोद क चट्टान पर पायवा डाल्यो, अऊर जब बाढ़ आयी त धार ओको पर टकरायी पर ओख हिलाय नहीं सकी; कहालीकि ऊ प्रबल बन्यो होतो।
LUK 6:49 पर जो सुन क नहीं मानय ऊ उन आदमी को जसो हय, जेन माटी पर बिना पायवा को घर बनायो, जब ओको पर धार टकरायी त ऊ तुरतच गिर पड़्यो अऊर गिर क ओको नाश भय गयो।”
LUK 7:1 जब यीशु लोगों सी सब बाते कह्य दियो, त कफरनहूम नगर म आयो।
LUK 7:2 उत सौ रोमन सिपाहियों को अधिकारी को एक सेवक जो ओको प्रिय होतो, बीमारी सी मरन पर होतो।
LUK 7:3 ओन यीशु की चर्चा सुन क यहूदियों को कुछ बुजूर्गों ख ओको सी या बिनती करन क् ओको जवर भेज्यो कि आय क मोरो सेवक ख चंगो कर।
LUK 7:4 हि यीशु को जवर आयो, अऊर ओको सी बहुत बिनती कर क् कहन लग्यो, “ऊ यो लायक हय कि तय ओको लायी यो कर,
LUK 7:5 कहालीकि ऊ हमरो लोगों सी प्रेम रखय हय, अऊर ओनच हमरो आराधनालय ख बनायो हय।”
LUK 7:6 यीशु उन्को संग गयो, पर जब ऊ घर सी दूर नहीं होतो, त सूबेदार न ओको जवर कुछ संगियों ख यो कहन भेज्यो, “हे प्रभु, दु:ख मत उठाव, कहालीकि मय यो लायक नहाय कि तय मोरी छत को खल्लो आय सकय।
LUK 7:7 योच वजह मय न अपनो आप ख यो लायक भी नहीं समझ्यो कि तोरो जवर आऊं, पर वचनच कह्य दे त मोरो सेवक चंगो होय जायेंन।
LUK 7:8 मय भी शासन को अधीन आदमी हय, अऊर सिपाही मोरो हाथ म हंय; अऊर जब एक ख कहूं हय, ‘जा,’ त ऊ जावय हय; अऊर दूसरों सी कहूं हय, ‘आव,’ त आवय हय; अऊर अपनो कोयी सेवक ख कि ‘यो कर,’ त ऊ ओख करय हय।”
LUK 7:9 यो सुन क यीशु ख अचम्भा भयो अऊर ओन मुंह घुमाय क वा भीड़ सी जो ओको पीछू आय रही होती, कह्यो, “मय तुम सी कहू हय कि मय न इस्राएल म भी असो विश्वास नहीं पायो।”
LUK 7:10 अऊर भेज्यो हुयो लोगों न घर लौट क ऊ सेवक ख चंगो पायो।
LUK 7:11 थोड़ो दिन को बाद यीशु नाईन नाम को एक नगर ख गयो। ओको चेला अऊर बड़ी भीड़ ओको संग जाय रही होती।
LUK 7:12 जब ऊ नगर को द्वार को जवर पहुंच्यो, त देख्यो, लोग एक मुरदा ख बाहेर गाड़न लायी लिजाय रह्यो होतो; जो अपनी माय को एकलौतो बेटा होतो, अऊर वा विधवा होती; अऊर नगर को बहुत सो लोग ओको संग होतो।
LUK 7:13 ओख देख क प्रभु ख तरस आयो, अऊर ओको सी कह्यो, “मत रो।”
LUK 7:14 तब ओन जवर आय क सकोली ख छूयो, अऊर उठावन वालो रुक गयो। तब ओन कह्यो, “हे जवान, मय तोरो सी कहू हय, उठ!”
LUK 7:15 तब ऊ मुरदा बेटा उठ बैठ्यो, अऊर बोलन लग्यो। यीशु न ओख ओकी माय ख सौंप दियो।
LUK 7:16 येको सी सब डर गयो, अऊर हि परमेश्वर की बड़ायी कर क् कहन लग्यो, “हमरो बीच म एक बड़ो भविष्यवक्ता उठ्यो हय, अऊर परमेश्वर न अपनो लोगों पर दयादृष्टि करी हय।”
LUK 7:17 अऊर ओको बारे म या बात पूरो यहूदिया अऊर आजु बाजू को पूरो देश म फैल गयी।
LUK 7:18 यूहन्ना ख ओको चेलावों न इन सब बातों को समाचार दियो।
LUK 7:19 तब यूहन्ना न अपनो चेलावों म सी दोय ख बुलाय क प्रभु को जवर यो पूछन लायी भेज्यो, “का आवन वालो तयच आय, यां हम कोयी अऊर की रस्ता देखबो?”
LUK 7:20 उन्न ओको जवर आय क कह्यो, “यूहन्ना बपतिस्मा देन वालो न हम्ख तोरो जवर यो पूछन ख भेज्यो हय कि ‘का आवन वालो तयच आय, यां हम कोयी दूसरों की रस्ता देखबो?’”
LUK 7:21 उच समय यीशु न बहुत सो ख बीमारियों अऊर दु:ख, अऊर दुष्ट आत्मावों सी छुड़ायो; अऊर बहुत सो अन्धा ख आंखी दियो;
LUK 7:22 अऊर ओन यूहन्ना सी कह्यो: “जो कुछ तुम न देख्यो अऊर सुन्यो हय, जाय क यूहन्ना सी कह्य दे; कि अन्धा देखय हंय, लंगड़ा चलय-फिरय हंय, कोढ़ी शुद्ध करयो जावय हंय, बहिरा सुनय हंय, मुरदा जीन्दो करयो जावय हंय, अऊर गरीबों ख सुसमाचार सुनायो जावय हय।
LUK 7:23 अऊर धन्य हय, जो मोरो वजह ठोकर नहीं खावय।”
LUK 7:24 जब यूहन्ना को भेज्यो हुयो लोग चली गयो त यीशु यूहन्ना को बारे म लोगों सी कहन लग्यो, “तुम जंगल म का देखन गयो होतो? का हवा सी हिलतो हुयो सरकण्डा ख?
LUK 7:25 त फिर तुम का देखन गयो होतो? का चमकदार कपड़ा पहिन्यो हुयो आदमी ख? जो चमकदार कपड़ा पहिनतो अऊर ठाट बाठ सी रह्य हंय, हि राजभवनों म रह्य हंय।
LUK 7:26 त फिर का देखन गयो होतो? का कोयी भविष्यवक्ता ख? हां, मय तुम सी कहू हय, बल्की भविष्यवक्ता सी भी बड़ो ख।
LUK 7:27 परमेश्वर न तुम सी कह्यो यो उच यूहन्ना आय, जेको बारे म लिख्यो हय: ‘मय अपनो दूत ख तोरो आगु-आगु भेजू हय, जो तोरो आगु तोरो रस्ता सीधो करेंन।’
LUK 7:28 मय तुम सी कहू हय कि जो बाईयों सी जनम लियो हंय, उन्म सी यूहन्ना बपतिस्मा देन वालो सी बड़ो कोयी नहाय: पर जो परमेश्वर को राज्य म छोटो सी छोटो हय, ऊ ओको सी भी बड़ो हय।”
LUK 7:29 अऊर सब लोगों न सुन क अऊर कर लेनवालो न भी यूहन्ना सी बपतिस्मा ले क परमेश्वर ख सच्चो मान्यो।
LUK 7:30 पर फरीसियों अऊर व्यवस्थापकों न ओको सी बपतिस्मा नहीं ले क परमेश्वर को इरादा ख अपनो बारे म टाल दियो।
LUK 7:31 “त मय यो युग को लोगों की तुलना कौन्को सी देऊ कि हि कौन्को जसो हंय?
LUK 7:32 हि उन बच्चां को जसो हंय जो बजार म बैठ्यो हुयो एक दूसरों सी पुकार क कह्य हंय, ‘हम न तुम्हरो लायी बांसुरी बजायी, अऊर तुम नहीं नाच्यो; हम्न विलाप गीत गायो, अऊर तुम नहीं रोयो!’
LUK 7:33 कहालीकि यूहन्ना बपतिस्मा देन वालो नहीं रोटी खातो आयो, नहीं अंगूररस पीतो आयो, अऊर तुम कह्य हय, ‘ओको म दुष्ट आत्मा हय।’
LUK 7:34 मय आदमी को बेटा खातो-पीतो आयो हय, अऊर तुम कह्य हय, ‘देखो, खादाड़ अऊर पियक्कड़ आदमी, कर लेनवालो को अऊर पापियों को संगी।’
LUK 7:35 जो लोग परमेश्वर को ज्ञान स्वीकारय हय ऊ ज्ञान सच्चो हय।”
LUK 7:36 फिर कोयी फरीसी न ओको सी बिनती करी कि ऊ ओको संग जेवन करेंन, येकोलायी ऊ उन फरीसी को घर म जाय क जेवन करन बैठ्यो।
LUK 7:37 ऊ नगर की एक पापिन बाई यो जान क कि ऊ फरीसी को घर म जेवन करन बैठ्यो हय, संगमरमर को बर्तन म अत्तर लायी,
LUK 7:38 अऊर ओको पाय को जवर, पीछू खड़ी होय क, रोवती हुयी ओको पाय क् आसुवों सी गिलो कर क् अऊर अपनो मुंड को बालों सी पोछन लगी, अऊर ओको पाय क् बार-बार चुम्मा ले क ओको पर अत्तर मल्यो।
LUK 7:39 यो देख क ऊ फरीसी जेन ओख बुलायो होतो, अपनो मन म सोचन लग्यो, “यदि यो भविष्यवक्ता होतो त जान लेतो कि या जो ओख छूय रही हय, वा कौन अऊर कसी बाई आय, कहालीकि वा त पापिन आय।”
LUK 7:40 यीशु न ओको उत्तर म कह्यो, “हे शिमोन, मोख तोरो सी कुछ कहनो हय।” “ऊ बोल्यो, हे गुरु, कहो।”
LUK 7:41 “यीशु न कह्यो कोयी महाजन को दोय कर्जदार होतो, एक पर पाच सौ अऊर दूसरों पर पचास चांदी को सिक्का को कर्जा होतो।
LUK 7:42 जब उन्को जवर कर्जा पटावन ख कुछ नहीं रह्यो, त ओन दोयी ख माफ कर दियो। येकोलायी उन्म सी कौन ओको सी जादा प्रेम रखेंन?”
LUK 7:43 शिमोन न उत्तर दियो, “मोरी समझ म ऊ, जेको ओन जादा छोड़ दियो।” यीशु न ओको सी कह्यो, “तय न ठीक उत्तर दियो हय।”
LUK 7:44 अऊर वा बाई को तरफ घुम क ओन शिमोन सी कह्यो, “का तय या बाई ख देखय हय? मय तोरो घर म आयो पर तय न मोरो पाय धोवन लायी पानी नहीं दियो, पर येन मोरो पाय आसुवों सी गिलो अऊर अपनो बालों सी पोछ्यो।
LUK 7:45 तय न मोरो स्वागत चुम्मा सी नहीं करयो, पर जब सी मय आयो हय तब सी येन मोरो पाय ख चुमनो नहीं छोड़्यो।
LUK 7:46 तय न मोरो मुंड पर तेल नहीं मल्यो, पर येन मोरो पाय पर अत्तर मल्यो हय।
LUK 7:47 येकोलायी मय तोरो सी कहू हय कि येको पाप जो बहुत होतो, माफ भयो, कहालीकि येन बहुत प्रेम करी; पर जेको थोड़ो माफ भयो हय, ऊ थोड़ो प्रेम करय हय।”
LUK 7:48 अऊर यीशु न बाई सी कह्यो, “तोरो पाप माफ भयो।”
LUK 7:49 तब जो लोग ओको संग जेवन करन बैठ्यो होतो, हि अपनो-अपनो मन म सोचन लग्यो, “यो कौन आय जो पापों ख भी माफ करय हय?”
LUK 7:50 पर यीशु न बाई सी कह्यो, “तोरो विश्वास न तोख बचाय लियो हय, शान्ति सी चली जा।”
LUK 8:1 येको बाद यीशु नगर-नगर अऊर गांव-गांव प्रचार करतो हुयो, अऊर परमेश्वर को राज्य को सुसमाचार सुनावतो हुयो फिरन लग्यो, अऊर हि बारा चेला ओको संग होतो,
LUK 8:2 अऊर कुछ बाईयां भी होती जो दुष्ट आत्मावों सी अऊर बीमारियों सी छुड़ायी गयी होती, अऊर हि यो आय : मरियम जो मगदलीनी कहलावत होती, जेको म सी सात दुष्ट आत्मायें निकली होती,
LUK 8:3 अऊर हेरोदेस को भण्डारी खुजा की पत्नी योअन्ना, अऊर सूसन्नाह, अऊर बहुत सी दूसरी बाईयां। जो अपनी जायजाद सी यीशु अऊर ओको चेलावों की सेवा करत होती।
LUK 8:4 जब बड़ी भीड़ जमा भयी अऊर नगर-नगर को लोग ओको जवर आवत होतो, त ओन दृष्टान्त म कह्यो।
LUK 8:5 “एक बोवन वालो बीज बोवन निकल्यो। बोवतो हुयो कुछ बीज रस्ता को किनार गिरयो, अऊर खुंद्यो गयो, अऊर आसमान को पक्षिंयों न ओख खाय लियो।
LUK 8:6 कुछ गोटाड़ी जागा पर गिरयो, अऊर उग्यो पर ओल नहीं मिलनो सी सूख गयो।
LUK 8:7 कुछ बीज काटा को बीच म गिरयो, अऊर झाड़ियों न संग-संग बढ़ क ओख दबाय दियो।
LUK 8:8 कुछ बीज अच्छी जमीन पर गिरयो, अऊर उग क सौ गुना फर लायो।” यो कह्य क यीशु न ऊचो आवाज सी कह्यो, “जेको सुनन को कान हय ऊ सुन ले!”
LUK 8:9 यीशु को चेलावों न ओको सी पुच्छ्यो कि यो दृष्टान्त को अर्थ का हय?
LUK 8:10 ओन कह्यो, “तुम ख परमेश्वर को राज्य को भेदो की समझ दियो हय, पर दूसरों ख दृष्टान्तों म सुनायो जावय हय, येकोलायी कि ‘हि देखतो हुयो भी नहीं देखय, अऊर सुनतो हुयो भी नहीं समझय।’
LUK 8:11 “दृष्टान्त को अर्थ यो हय: बीज परमेश्वर को वचन हय।
LUK 8:12 रस्ता को किनार को हि आय, जिन्न सुन्यो, तब शैतान आय क उन्को मन म सी वचन उठाय लेवय हय कि कहीं असो नहीं होय कि हि विश्वास कर क् उद्धार पायेंन।
LUK 8:13 चट्टान पर को हि आय कि जब सुनय हंय, त खुशी सी वचन ख स्वीकार त करय हंय, पर जड़ी नहीं पकड़न सी हि थोड़ी देर तक विश्वास रखय हंय अऊर परीक्षा को समय बहक जावय हंय।
LUK 8:14 काटो की झाड़ियों म गिरयो, यो हि आय जो सुनय हंय, पर आगु चल क, चिन्ता अऊर धन, अऊर जीवन को सूख विलाश म फस जावय हंय अऊर उन्को फर नहीं पकय।
LUK 8:15 पर अच्छी जमीन म को हि आय, जो वचन सुन क अच्छो अऊर शुद्ध मन म सम्भाल्यो रह्य हंय, अऊर धीरज सी फर लावय हंय।
LUK 8:16 “कोयी दीया जलाय क बर्तन सी नहीं झाकय, अऊर नहीं खटिया को खल्लो रखय हय, पर दीवट पर रखय हय कि अन्दर आवन वालो प्रकाश पाये।
LUK 8:17 “कुछ लूक्यो नहाय जो जान्यो नहीं जाये, अऊर नहीं कुछ लूक्यो हय जो जाननो नहीं पाये अऊर दिख नहीं जाय।
LUK 8:18 “येकोलायी चौकस रहो कि तुम कौन्सो तरह सी सुनय हय? कहालीकि जेको जवर हय ओख दियो जायेंन, अऊर जेको जवर नहाय ओको सी ऊ भी ले लियो जायेंन, जेक ऊ अपनो समझय हय।”
LUK 8:19 यीशु की माय अऊर ओको भाऊ ओको जवर आयो, पर भीड़ को वजह ओको सी मुलाखात नहीं कर सक्यो।
LUK 8:20 ओको सी कह्यो गयो, “तोरी माय अऊर तोरो भाऊ बाहेर खड़ो हुयो, तोरो सी मिलनो चाहवय हंय।”
LUK 8:21 यीशु न येको उत्तर म उन्को सी कह्यो, “मोरी माय अऊर मोरो भाऊ हि आय, जो परमेश्वर को वचन सुनय अऊर मानय हंय।”
LUK 8:22 फिर एक दिन यीशु अऊर ओको चेला डोंगा पर चढ़्यो, अऊर ओन उन्को सी कह्यो, “आवो, झील को ओन पार चलबो।” येकोलायी उन्न डोंगा खोल दियो अऊर निकल गयो।
LUK 8:23 पर जब डोंगा चल रह्यो होतो, त यीशु सोय गयो: अऊर झील म अचानक आन्धी आयी, अऊर डोंगा पानी सी भरन लग्यो अऊर हि खतरा म पड़ गयो।
LUK 8:24 तब उन्न जवर आय क ओख जगायो, अऊर कह्यो, “मालिक! मालिक! हम नाश होय रह्यो हंय।” तब यीशु न उठ क आन्धी ख अऊर पानी की लहरो ख डाट्यो अऊर हि थम गयी अऊर चैन मिल गयो।
LUK 8:25 तब ओन उन्को सी कह्यो, “तुम्हरो विश्वास कित हय?” पर हि डर गयो अऊर अचम्भित होय क आपस म कहन लग्यो, “यो कौन आय जो आन्धी अऊर पानी ख भी आज्ञा देवय हय, अऊर हि ओकी मानय हंय?”
LUK 8:26 तब यीशु अऊर ओको चेला गिरासेनियों को देश म पहुंच्यो, जो गलील की झील को ओन पार होतो।
LUK 8:27 जब ऊ किनार पर उतरयो त ऊ नगर को एक आदमी ओख मिल्यो जेको म दुष्ट आत्मायें होती। ऊ बहुत दिनो सी कपड़ा नहीं पहिनत होतो अऊर घर म नहीं रहत होतो बल्की कब्रस्थान म रहत होतो।
LUK 8:28 ऊ यीशु ख देख क चिल्लायो अऊर ओको आगु गिर क ऊंचो आवाज सी कह्यो, “हे परमेश्वर को बेटा यीशु! मोख तोरो सी का काम? मय तोरो सी बिनती करू हय, मोख सजा मत दे।”
LUK 8:29 कहालीकि यीशु ऊ दुष्ट आत्मा ख ऊ आदमी म सी निकालन की आज्ञा दे रह्यो होतो, येकोलायी कि ऊ ओख पर बार बार हावी होत होती। लोग ओख संकली अऊर बेड़ियों सी हाथ पाय बान्धत होतो अऊर पहरा देत होतो तब भी ऊ बन्धनों ख तोड़ डालत होतो, अऊर दुष्ट आत्मा ओख जंगल म भटकावत फिरत होती।
LUK 8:30 यीशु न ओको सी पुच्छ्यो, “तोरो का नाम हय?” ओन कह्यो, “सेना,” कहालीकि बहुत सी दुष्ट आत्मायें ओको म घुस गयी होती।
LUK 8:31 उन्न यीशु सी बिनती करी कि हम्ख अधोलोक म जान की आज्ञा मत दे।
LUK 8:32 उत पहाड़ी पर डुक्कर को एक बड़ो झुण्ड चर रह्यो होतो, येकोलायी उन्न ओको सी बिनती करी कि हम्ख उन्म घुसन दे। ओन उन्ख जान दियो।
LUK 8:33 तब दुष्ट आत्मायें ऊ आदमी म सी निकल क डुक्कर म गयी अऊर ऊ झुण्ड ढलान पर सी झपट क झील म जाय गिरयो अऊर डुब मरयो।
LUK 8:34 चरावन वालो न यो जो भयो होतो देख क भग्यो, अऊर नगर म अऊर गांव म जाय क ओको खबर दियो।
LUK 8:35 लोग यो जो भयो होतो ओख देखन ख निकल्यो, अऊर यीशु को जवर आय क जो आदमी सी दुष्ट आत्मायें निकली होती, ओख यीशु को पाय को जवर कपड़ा पहिन्यो सुदबुद म बैठ्यो हुयो देख्यो अऊर डर गयो;
LUK 8:36 अऊर देखन वालो न लोगों ख बतायो कि ऊ दुष्ट आत्मावों को सतायो हुयो आदमी कसो तरह सी अच्छो भयो।
LUK 8:37 तब गिरासेनियों को आजु बाजू को सब लोगों न यीशु सी बिनती करी कि हमरो इत सी चली जा; कहालीकि उन पर बड़ो डर छाय गयो होतो। येकोलायी ऊ डोंगा पर चढ़ क लौट गयो।
LUK 8:38 जो आदमी म सी दुष्ट आत्मायें निकली होती ऊ ओको सी बिनती करन लग्यो कि मोख अपनो संग रहन दे, पर यीशु न ओख बिदा कर क् कह्यो।
LUK 8:39 “अपनो घर ख लौट जा अऊर लोगों सी बताव कि परमेश्वर न तोरो लायी कसो बड़ो बड़ो काम करयो हंय।” ऊ जाय क पूरो नगर म प्रचार करन लग्यो कि यीशु न मोरो लायी कसो बड़ो-बड़ो काम करयो।
LUK 8:40 जब यीशु लौट्यो त लोग ओको सी खुशी को संग मिल्यो, कहालीकि हि सब ओकी रस्ता देख रह्यो होतो।
LUK 8:41 इतनो म याईर नाम को एक आदमी जो यहूदियों को आराधनालय को मुखिया होतो, आयो अऊर यीशु को पाय पर गिर क ओको सी बिनती करन लग्यो कि मोरो घर चल।
LUK 8:42 कहालीकि ओकी बारा साल की एकलौती बेटी होती, अऊर वा मरन पर होती। जब यीशु जाय रह्यो होतो, तब लोग ओको पर गिरत पड़त होतो।
LUK 8:43 एक बाई जेक बारा साल सी खून बहन को रोग होतो, अऊर जो अपनी पूरी जीवन की कमायी बैद्धो को पीछू कुछ खर्चा कर लियो होती, तब भी कोयी को हाथ सी चंगी नहीं भय सकी,
LUK 8:44 भीड़ को पीछू सी आय क ओको कपड़ा को कोना ख छूयो, अऊर तुरतच ओको खून बहन की बीमारी सी ठीक भय गयी।
LUK 8:45 येख पर यीशु न कह्यो, “मोख कौन छूयो?” जब सब मुकरन लग्यो, त पतरस न कह्यो। “हे मालिक, तोख त भीड़ दबाय रही हय अऊर तोरो पर गिर पड़य हय।”
LUK 8:46 पर यीशु न कह्यो, “कोयी न मोख छूयो हय, कहालीकि मय न जान लियो हय कि मोरो म सी सामर्थ निकली हय।”
LUK 8:47 जब बाई न देख्यो कि मय लूक नहीं सकू, तब कापती हुयी आयी अऊर ओको पाय पर गिर क सब लोगों को आगु बतायो कि ओन कौन्सो वजह सी ओख छूयो, अऊर कसी तुरतच चंगी भय गयी।
LUK 8:48 यीशु न ओको सी कह्यो, “बेटी, तोरो विश्वास न तोख चंगो करयो हय, शान्ति सी चली जा।”
LUK 8:49 यीशु यो कहतच रह्यो होतो कि कोयी न यहूदी आराधनालय को मुखिया को तरफ सी आय क कह्यो, “तोरी बेटी मर गयी: गुरु ख दु:ख मत दे।”
LUK 8:50 यीशु न यो सुन क याईर ख कह्यो, “मत डर; केवल विश्वास रख, त वा ठीक होय जायेंन।”
LUK 8:51 घर म आय क ओन पतरस, यूहन्ना, याकूब, अऊर बेटी को माय-बाप ख छोड़ दूसरों कोयी ख अपनो संग अन्दर आवन नहीं दियो।
LUK 8:52 सब ओको लायी विलाप कर क् रोय रह्यो होतो, पर यीशु न कह्यो, “रोवो मत; वा मरी नहाय पर सोय रही हय।”
LUK 8:53 हि यो जान क कि वा मर गयी हय ओकी हसी करन लग्यो।
LUK 8:54 पर यीशु न ओको हाथ पकड़्यो, अऊर पुकार क कह्यो, “हे बेटी, उठ!”
LUK 8:55 तब ओको जीव लौट आयो अऊर वा तुरतच उठ क खड़ी भय गयी। तब यीशु न आज्ञा दियो कि ओख कुछ खान ख दे।
LUK 8:56 ओको माय-बाप अचम्भित भयो, पर यीशु न उन्ख चितायो कि यो जो भयो हय कोयी सी मत कहजो।
LUK 9:1 तब यीशु न बारयी चेला ख बुलाय क उन्ख सब दुष्ट आत्मावों अऊर बीमारियों ख दूर करन की सामर्थ अऊर अधिकार दियो,
LUK 9:2 अऊर उन्ख स्वर्ग को राज्य को प्रचार करन अऊर बीमारों ख अच्छो करन लायी भेज्यो।
LUK 9:3 ओन उन्को सी कह्यो, “रस्ता लायी कुछ मत लेवो, नहीं लाठी, नहीं झोला, नहीं रोटी, नहीं रुपया अऊर नहीं दोय-दोय कुरता।
LUK 9:4 जो कोयी घर म तुम जावो, उतच रहो, अऊर उतच सी बिदा हो।
LUK 9:5 जो कोयी तुम्ख स्वीकार नहीं करेंन, ऊ नगर सी निकलतो हुयो अपनो पाय की धूरला झाड़तो हुयो वापस लौट जावो कि उन पर गवाही होय।”
LUK 9:6 येकोलायी हि निकल क गांव-गांव सुसमाचार सुनावतो, अऊर जित उत लोगों ख चंगो करतो हुयो फिरत रह्यो।
LUK 9:7 देश को चौथाई को राजा हेरोदेस जो गलील को शासक होतो यो सब सुन क घबराय गयो, कहालीकि कुछ न कह्यो कि यूहन्ना बपतिस्मा देन वालो मरयो हुयो म सी फिर सी जीन्दो भयो हय,
LUK 9:8 अऊर कुछ न यो कह्यो कि एलिय्याह दिखायी दियो हय, अऊर दूसरों न यो कि पुरानो भविष्यवक्तावों म सी कोयी फिर सी जीन्दो भयो हय।
LUK 9:9 पर हेरोदेस न कह्यो, “यूहन्ना को मुंड त मय न कटवाय दियो, अब यो कौन आय जेको बारे म असी बाते सुनू हय?” अऊर ओन यीशु ख देखन की इच्छा करी।
LUK 9:10 तब प्रेरितों न लौट क जो कुछ उन्न करयो होतो, यीशु ख बताय दियो; अऊर ऊ उन्ख अलग कर क् बैतसैदा नाम को नगर ख ले गयो।
LUK 9:11 यो जान क भीड़ ओको पीछू भय गयी, अऊर ऊ खुशी को संग उन्को सी मिल्यो, अऊर उन्को सी परमेश्वर को राज्य की बाते करन लग्यो, अऊर जो चंगो होनो चाहत होतो उन्ख चंगो करयो।
LUK 9:12 जब दिन डुबन लग्यो त बारा चेलावों न आय क ओको सी कह्यो, “भीड़ ख बिदा कर कि चारों तरफ को गांवो अऊर बस्तियों म जाय क रूकन की अऊर जेवन को व्यवस्था करेंन, कहालीकि हम इत सुनसान जागा म हंय।”
LUK 9:13 यीशु न उन्को सी कह्यो, “तुमच उन्ख खान ख दे।” उन्न कह्यो, “हमरो जवर पाच रोटी अऊर दोय मच्छी ख छोड़ अऊर कुछ नहाय; पर हां, यदि हम जाय क इन सब लोगों लायी भोजन ले लेबो, त होय सकय हय।” हि लोग त पाच हजार पुरुषों को लगभग होतो।
LUK 9:14 तब यीशु न अपनो चेलावों सी कह्यो, “उन्ख पचास-पचास कर क् पंगत-पंगत सी बैठाय दे।”
LUK 9:15 उन्न असोच करयो, अऊर सब ख बैठाय दियो।
LUK 9:16 तब यीशु न हि पाच रोटी अऊर दोय मच्छी धरी, अऊर स्वर्ग की तरफ देख क परमेश्वर ख धन्यवाद करयो, अऊर तोड़-तोड़ क चेलावों ख देतो गयो कि लोगों ख परोसो।
LUK 9:17 तब सब खाय क सन्तुष्ट भयो, अऊर चेलावों न बच्यो हुयो टुकड़ा सी भरी बारा टोकनी उठायी।
LUK 9:18 जब यीशु एकान्त जागा म प्रार्थना कर रह्यो होतो अऊर चेला ओको संग होतो, त ओन उन्को सी पुच्छ्यो, “लोग मोख का कह्य हंय?”
LUK 9:19 उन्न उत्तर दियो, “यूहन्ना बपतिस्मा देन वालो, अऊर कोयी कोयी एलिय्याह, अऊर कोयी यो कि पुरानो भविष्यवक्तावों म सी कोयी फिर सी जीन्दो भयो हय।”
LUK 9:20 ओन उन्को सी पुच्छ्यो, “पर तुम मोख का कह्य हय?” पतरस न उत्तर दियो, “परमेश्वर को द्वारा भेज्यो हुयो मसीहा।”
LUK 9:21 तब यीशु न उन्ख आदेश दे क कह्यो कि यो कोयी सी मत कहजो।
LUK 9:22 तब यीशु न कह्यो, “आदमी को बेटा लायी जरूरी हय कि ऊ बहुत दु:ख उठायेंन, अऊर बुजूर्गों अऊर मुख्य याजक अऊर धर्मशास्त्री ओख ठुकराय क मार डालेंन, अऊर ऊ तीसरो दिन फिर सी जीन्दो होयेंन।”
LUK 9:23 ओन सब सी कह्यो, “यदि कोयी मोरो पीछू आवनो चाहवय, त अपनो आप सी इन्कार कर अऊर हर दिन जो मोरो लायी अपनो जीवन देन लायी तैयार हय मोरो पीछू आव।
LUK 9:24 कहालीकि जो कोयी अपनो जीव बचावनो चाहेंन ऊ ओख खोयेंन, पर जो कोयी मोरो लायी अपनो जीव खोयेंन उच ओख बचायेंन।
LUK 9:25 यदि आदमी पूरो जगत ख पा ले अऊर अपनो जीव खोय दे यां ओकी हानि उठाये, त ओख का फायदा होयेंन?
LUK 9:26 जो कोयी मोरो सी अऊर मोरी शिक्षा सी शर्मायेंन, आदमी को बेटा भी, जब अपनी अऊर अपनो बाप की अऊर पवित्र स्वर्गदूतों की महिमा सहित आयेंन, त ओको सी शर्मायेंन।
LUK 9:27 मय तुम सी सच कहू हय, कि जो इत खड़ो हंय, उन्म सी कुछ असो हंय कि जब तक परमेश्वर को राज्य नहीं देख ले, तब तक नहीं मरेंन।”
LUK 9:28 इन बातों को कोयी आठ दिन बाद यीशु पतरस, यूहन्ना अऊर याकूब ख संग ले क प्रार्थना करन लायी पहाड़ी पर गयो।
LUK 9:29 जब ऊ प्रार्थना करतच होतो, त ओको चेहरा को रूप बदल गयो, अऊर ओको कपड़ा उज्वल होय क चमकन लग्यो।
LUK 9:30 अऊर अचानक, मूसा अऊर एलिय्याह, हि दोय आदमी ओको संग बाते कर रह्यो होतो।
LUK 9:31 हि स्वर्ग की महिमा सहित दिखायी दियो अऊर यीशु को मरन की चर्चा कर रह्यो होतो, परमेश्वर को उद्देश जो कि यरूशलेम म पूरो होन वालो होतो।
LUK 9:32 पतरस अऊर ओको संगी की आंखी म नींद छायी होती, अऊर जब हि अच्छी तरह सचेत भयो, त यीशु की महिमा अऊर उन दोय आदमी ख, जो ओको संग खड़ो होतो, देख्यो।
LUK 9:33 जब हि ओको जवर सी जान लग्यो, त पतरस न यीशु सी कह्यो, “हे मालिक, हमरो इत रहनो भलो हय: येकोलायी हम तीन मण्डप बनायबो, एक तोरो लायी, एक मूसा लायी, अऊर एक एलिय्याह लायी।” ऊ जानत नहीं होतो कि का कह्य रह्यो हय।
LUK 9:34 ऊ यो कहतच रह्यो होतो कि एक बादर न आय क उन्ख छाय लियो; अऊर जब बादर सी घिरन लग्यो त चेला डर गयो।
LUK 9:35 तब ऊ बादर म सी यो आवाज निकल्यो, “यो मोरो बेटा अऊर मोरो चुन्यो हुयो आय, येकी सुनो।”
LUK 9:36 यो आवाज बन्द होनो पर यीशु अकेलो पायो गयो; अऊर हि चुप रह्यो, अऊर जो कुछ देख्यो होतो ओकी कोयी बात उन दिनो म कोयी सी नहीं कहीं।
LUK 9:37 दूसरों दिन जब यीशु अऊर ओको तीन चेलावों पहाड़ी सी उतरयो त एक बड़ी भीड़ ओको सी आय क मिली।
LUK 9:38 अऊर देखो, भीड़ म सी एक आदमी न चिल्लाय क कह्यो, “हे गुरु, मय तोरो सी बिनती करू हय कि मोरो बेटा पर दयादृष्टि कर; कहालीकि ऊ मोरो एकलौतो बेटा आय।
LUK 9:39 एक दुष्ट आत्मा ओख पकड़य हय, अऊर ऊ अचानक चिल्लावन लगय हय; अऊर ऊ ओख असो मुरकटय हय कि ऊ मुंह म फेस भर लावय हय; अऊर ओख कठिनायी सी गिराय क छोड़य हय।
LUK 9:40 मय न तोरो चेलावों सी बिनती करी कि दुष्ट आत्मा ख निकाले, पर हि नहीं निकाल सक्यो।”
LUK 9:41 यीशु न उन्ख उत्तर दियो, “हे अविश्वासी अऊर जिद्दी लोगों, मय कब तक तुम्हरो संग रहूं अऊर तुम्हरी सहू? अपनो बेटा ख इत ले आव।”
LUK 9:42 बेटा आयच रह्यो होतो कि दुष्ट आत्मा न ओख पटक क मुरकट्यो, पर यीशु न दुष्ट आत्मा ख डाट्यो अऊर बेटा ख अच्छो कर क् ओको बाप ख सौंप दियो।
LUK 9:43 तब सब लोग परमेश्वर को महासामर्थ सी अचम्भित भयो। पर जब सब लोग उन सब कामों सी जो कुछ यीशु करत होतो, अचम्भित होतो, त ओन अपनो चेलावों सी कह्यो,
LUK 9:44 “तुम इन बातों पर कान लगावो, कहालीकि आदमी को बेटा आदमियों को हाथ म सौंप्यो जायेंन।”
LUK 9:45 पर चेलावों या बात ख नहीं जान सक्यो, अऊर यो उन्को सी लूकी रही कि हि ओख समझ नहीं पायो; अऊर हि या बात को बारे म ओको सी पूछन सी डरत होतो।
LUK 9:46 तब उन्म यो विवाद होन लग्यो कि हम म सी बड़ो कौन हय।
LUK 9:47 पर यीशु न उन्को मन को बिचार जान लियो, अऊर एक बच्चा ख ले क अपनो जवर खड़ो करयो,
LUK 9:48 अऊर उन्को सी कह्यो, “जो कोयी मोरो नाम सी यो बच्चा ख स्वीकारय हय, ऊ मोख स्वीकारय हय; अऊर जो कोयी मोख स्वीकारय हय, ऊ मोरो भेजन वालो ख स्वीकारय हय, कहालीकि जो तुम म सब सी छोटो सी छोटो हय, उच बड़ो हय।”
LUK 9:49 तब यूहन्ना न कह्यो, “हे मालिक, हम न एक आदमी ख तोरो नाम सी दुष्ट आत्मावों ख निकालता देख्यो, अऊर हम न ओख मना करयो, कहालीकि ऊ हमरो संग होय क तोरो अनुसरन नहीं करत होतो।”
LUK 9:50 यीशु न यूहन्ना अऊर दूसरों चेला सी कह्यो, “ओख मना मत करो; कहालीकि जो तुम्हरो विरोध म नहाय, ऊ तुम्हरो तरफ हय।”
LUK 9:51 जब यीशु ख स्वर्ग म उठायो जान को दिन पूरो होन पर होतो, त ओन यरूशलेम जान को बिचार ठान लियो।
LUK 9:52 ओन अपनो आगु दूत भेज्यो। हि सामरियों को एक गांव म गयो कि ओको लायी जागा तैयार करे।
LUK 9:53 पर उन लोगों न ओख उतरन नहीं दियो, कहालीकि ऊ यरूशलेम जाय रह्यो होतो।
LUK 9:54 यो देख क ओको चेलावों याकूब अऊर यूहन्ना न कह्यो, “हे प्रभु, का तय चाहवय हय कि हम आज्ञा दे, कि आसमान सी आगी गिर क उन्ख भस्म कर दे?”
LUK 9:55 पर यीशु न मुड़ क उन्ख डाट्यो।
LUK 9:56 यीशु अऊर ओको चेला कोयी दूसरों गांव म चली गयो।
LUK 9:57 जब हि रस्ता म जाय रह्यो होतो, त कोयी न यीशु सी कह्यो, “जित-जित तय जाजो, मय तोरो पीछू होय जाऊं।”
LUK 9:58 यीशु न ओको सी कह्यो, “लोमड़ियों को गुफा अऊर आसमान को पक्षिंयों को घोसला होवय हंय, पर आदमी को बेटा ख मुंड लूकान की भी जागा नहीं।”
LUK 9:59 यीशु न दूसरों सी कह्यो, “मोरो पीछू होय जा।” ओन कह्यो, “हे प्रभु, मोख पहिले जान दे कि अपनो बाप ख गाड़ देऊ।”
LUK 9:60 यीशु न ओको सी कह्यो, “मरयो हुयो ख अपनो मुर्दा गाड़न दे, पर तय जाय क परमेश्वर को राज्य को सुसमाचार प्रचार कर।”
LUK 9:61 कोयी अऊर न भी कह्यो, “हे प्रभु, मय तोरो पीछू होय जाऊं; पर पहिले मोख जान दे कि अपनो घर को लोगों सी बिदा ले लेऊ।”
LUK 9:62 यीशु न ओको सी कह्यो, “जो कोयी अपनो हाथ नांगर पर रख क पीछू देखय हय, ऊ परमेश्वर को राज्य को लायक नहाय।”
LUK 10:1 इन बातों को बाद प्रभु न बहात्तर अऊर आदमी ख चुन्यो, अऊर जो-जो नगर अऊर जागा म ऊ खुद जान पर होतो, उत उन्ख दोय-दोय कर क् अपनो आगु भेज्यो।
LUK 10:2 यीशु उन्को सी कह्यो, “पकी फसल बहुत हंय, पर मजूर थोड़ो हंय; येकोलायी खेत को मालिक सी प्रार्थना करो कि ऊ अपनी खेत कि फसल काटन ख मजूर भेज दे।”
LUK 10:3 जावो! मय तुम्ख मेंढीं को जसो भेड़ियों को बीच म भेजू हय।
LUK 10:4 येकोलायी नहीं बटवा, नहीं झोली, नहीं जूता लेवो; अऊर नहीं रस्ता म कोयी ख नमस्कार करो।
LUK 10:5 जो कोयी घर म जावो, पहिले कहो, यो घर पर शान्ति होय।
LUK 10:6 यदि उत कोयी शान्ति को लायक होना, त तुम्हरो शान्ति ओको पर ठहरेंन, नहीं त तुम्हरो जवर लौट आयेंन।
LUK 10:7 उच घर म रहो, अऊर जो कुछ उन्को सी मिलेंन, उच खावो-पीवो, कहालीकि मजूर ख अपनी मजूरी मिलन खच होना; घर-घर मत फिरो।
LUK 10:8 जो नगर म जावो, अऊर उत को लोग तुम्ख उतरेंन, त जो कुछ तुम्हरो आगु परोसेंन उच खावो।
LUK 10:9 उत को बीमारों ख चंगो करो, अऊर उन्को सी कहो, “परमेश्वर को राज्य तुम्हरो जवर आय गयो हय।”
LUK 10:10 पर जो नगर म जावो, अऊर उत को लोग तुम्ख स्वीकार नहीं करेंन, त ओख बजारों म जाय क कहो,
LUK 10:11 “तुम्हरो नगर की धूरला भी जो हमरो पाय म लगी हय, हम तुम्हरो आगु झाड़ देजे हंय। तब भी यो जान लेवो कि परमेश्वर को राज्य तुम्हरो जवर आय गयो हय!”
LUK 10:12 मय तुम सी कहू हय कि ऊ दिन परमेश्वर न्याय करेंन ऊ नगर की दशा सी सदोम की दशा जादा सहन लायक होयेंन।
LUK 10:13 “हाय खुराजीन! हाय बैतसैदा! नगर जो सामर्थ को काम तुम म करयो गयो, यदि हि सूर अऊर सैदा म करयो जातो त बोरा ओढ़ क अऊर राख म बैठ क हि मन फिराय लेतो।”
LUK 10:14 पर न्याय को दिन तुम्हरी दशा सी सूर अऊर सैदा की दशा जादा सहन लायक होयेंन।
LUK 10:15 अऊर हे कफरनहूम, का तय स्वर्ग तक ऊचो करयो जाजो? तय त अधोलोक तक खल्लो जाजो।
LUK 10:16 यीशु न चेलावों सी कह्यो, “जो तुम्हरी सुनय हय, ऊ मोरी सुनय हय; अऊर जो तुम्ख तुच्छ जानय हय, ऊ मोख तुच्छ जानय हय; अऊर जो मोख तुच्छ जानय हय, ऊ मोरो भेजन वालो ख तुच्छ जानय हय।”
LUK 10:17 हि बहात्तर लोग खुशी मनावत लौट्यो अऊर कहन लग्यो, “हे प्रभु, तोरो नाम कि आज्ञा सी दुष्ट आत्मा भी हमरो आदेश मानय हय।”
LUK 10:18 यीशु न उन्को सी कह्यो, “मय शैतान ख बिजली को जसो स्वर्ग सी गिरयो हुयो देख रह्यो होतो।
LUK 10:19 सुनो! मय न तुम्ख सांपो अऊर बिच्छूवों ख रौंदन को, अऊर दुश्मन की सामर्थ पर विजय पावन को अधिकार दियो हय; अऊर कोयी चिज सी तुम्ख कुछ हानि नहीं होयेंन।
LUK 10:20 तब भी येको सी खुश मत होय कि दुष्ट आत्मा तुम्हरो आज्ञा मानय हंय, पर येको सी खुश होय कि तुम्हरो नाम स्वर्ग पर लिख्यो हय।”
LUK 10:21 उच समय यीशु पवित्र आत्मा म होय क खुशी सी भर गयो, अऊर कह्यो, “हे बाप, स्वर्ग अऊर धरती को प्रभु, मय तोरो धन्यवाद करू हय कि तय न इन बातों ख ज्ञानियों अऊर समझदारों सी लूकाय रख्यो, अऊर बच्चां पर प्रगट करयो। हां, हे बाप, कहालीकि तोख योच अच्छो लग्यो।
LUK 10:22 “मोरो बाप न मोख सब कुछ सौंप दियो हय; अऊर कोयी नहीं जानय कि बेटा कौन हय केवल बाप, अऊर बाप कौन हय यो भी कोयी नहीं जानय केवल बेटा को अऊर ऊ जेक पर बेटा ओख प्रगट करनो चाहेंन।”
LUK 10:23 तब यीशु चेलावों को तरफ मुड़ क अकेलो म कह्यो, “धन्य हंय हि आंखी, जो उन बातों ख देखय हंय जेक तुम देखतच हय।
LUK 10:24 कहालीकि मय तुम सी कहू हय कि तुम जिन बातों ख देखय हय उन्ख बहुत सो भविष्यवक्तावों अऊर राजावों न देखनो चाह्यो पर नहीं देख्यो, अऊर उन बातों ख सुननो चाह्यो जेक तुम सुनय हय पर नहीं सुन्यो।”
LUK 10:25 एक व्यवस्थापक उठ्यो अऊर यो कह्य क ओकी परीक्षा करन लग्यो, “हे गुरु, अनन्त जीवन ख पान लायी मय का करू?”
LUK 10:26 यीशु न ओको सी कह्यो, “मूसा की व्यवस्था म का लिख्यो हय? तय कसो पढ़य हय?”
LUK 10:27 आदमी न उत्तर दियो, “व्यवस्था म लिख्यो हय, ‘तय प्रभु अपनो परमेश्वर सी अपनो पूरो मन अऊर अपनो पूरो जीव अऊर अपनी पूरी शक्ति अऊर अपनी पूरी बुद्धि को संग प्रेम रख;’ अऊर ‘अपनो शेजारी सी अपनो जसो प्रेम रख।’”
LUK 10:28 यीशु न ओको सी कह्यो, “तय न ठीक उत्तर दियो, योच कर त तय जीन्दो रहजो।”
LUK 10:29 पर ओन अपनो आप ख सच्चो ठहरान की इच्छा सी यीशु सी पुच्छ्यो, “त मोरो शेजारी कौन आय?”
LUK 10:30 यीशु न उत्तर दियो, “एक आदमी यरूशलेम सी यरीहो ख जाय रह्यो होतो कि डाकुवो न घेर क ओको कपड़ा उतार लियो, अऊर मार पीट क ओख अधमरो छोड़ क चली गयो।
LUK 10:31 अऊर असो भयो कि उच रस्ता सी एक याजक जाय रह्यो होतो, पर ओख देख क नजर बचाय क दूसरों तरफ सी चली गयो।
LUK 10:32 योच तरह सी एक लेवी ऊ जागा पर आयो, ऊ भी ओख देख क नजर बचाय क दूसरी रस्ता सी चली गयो।
LUK 10:33 पर एक सामरी भी जो यात्रा कर रह्यो होतो, उत पहुंच्यो, जब ओन ओख देख्यो त ओको पर तरस खायो।
LUK 10:34 ओन ओको जवर आय क ओको घावों पर तेल अऊर अंगूररस डाल क पट्टी बान्धी, अऊर अपनी सवारी पर चढ़ाय क सरायी म ले गयो, अऊर ओकी सेवा करी।
LUK 10:35 दूसरों दिन ओन दोय चांदी को सिक्का निकाल क सरायी को मालिक ख दियो, अऊर कह्यो, ‘येकी सेवा करजो, अऊर जो कुछ तोरो अऊर लगेंन, ऊ मय आनो पर तोख वापस दे देऊ।’”
LUK 10:36 यीशु न कह्यो, “अब तोरो बिचार सी जो डाकुवो न पकड़ रख्यो होतो, इन तीनों म सी ओको शेजारी कौन होयेंन?”
LUK 10:37 ओन कह्यो, “उच जेन ओको पर दया करी।” यीशु न ओको सी कह्यो, “जा, तय भी असोच कर।”
LUK 10:38 जब यीशु अऊर ओको चेला जाय रह्यो होतो त यीशु एक गांव म गयो, अऊर मार्था नाम की एक बाई न ओख अपनो घर म उतारयो।
LUK 10:39 मरियम नाम की ओकी एक बहिन होती। वा प्रभु को पाय को जवर बैठ क ओको वचन सुनत होती।
LUK 10:40 पर मार्था सेवा करत करत चिन्तित भय गयी, अऊर ओको जवर आय क कहन लगी, “हे प्रभु, का तोख कुछ भी चिन्ता नहाय कि मोरी बहिन न मोख सेवा करन लायी अकेलीच छोड़ दियो हय? येकोलायी ओको सी कह्य कि मोरी मदत कर।”
LUK 10:41 प्रभु न ओख उत्तर दियो, “मार्था, हे मार्था; तय बहुत बातों लायी चिन्ता करय हय।
LUK 10:42 पर एक बात जरूरी हय, अऊर ऊ बहुत उत्तम भाग ख मरियम न चुन लियो हय जो ओको सी छीन्यो नहीं जायेंन।”
LUK 11:1 एक दिन यीशु कोयी दूसरी जागा म प्रार्थना कर रह्यो होतो। जब ऊ प्रार्थना कर लियो, त ओको चेलावों म सी एक न ओको सी कह्यो, “हे प्रभु, जसो बपतिस्मा देन वालो यूहन्ना न अपनो चेलावों ख प्रार्थना करनो सिखायो वसोच हम्ख भी तय सिखाय दे।”
LUK 11:2 यीशु न उन्को सी कह्यो, “जब तुम प्रार्थना करो त कहो: ‘हे हमरो पिता: तोरो नाम पवित्र मान्यो जाय; तोरो राज्य आय।’
LUK 11:3 ‘हमरी दिन भर की रोटी हर दिन हम्ख दियो कर,’
LUK 11:4 ‘अऊर हमरो पापों ख माफ कर, कहालीकि हम भी अपनो हर एक अपराधियों ख माफ करजे हंय, अऊर हम्ख परीक्षा म मत लाव।’”
LUK 11:5 तब यीशु न उन्को सी कह्यो, “तुम म सी कौन आय कि ओको एक संगी हो, अऊर ऊ अरधी रात ख ओको जवर जाय क ओको सी कह्य, ‘हे संगी; मोख तीन रोटी दे।
LUK 11:6 कहालीकि मोरो एक संगी यात्रा करतो हुयो मोरो जवर आयो हय, अऊर मोरो जवर ओख खिलावन लायी कुछ भी नहाय।’
LUK 11:7 अऊर ऊ अन्दर सी उत्तर दे क कह्यो, ‘मोख मत सताव; अब त दरवाजा बन्द भय गयो हय अऊर मोरो बच्चा मोरो बिस्तर पर हंय, मय उठ क तोख कुछ भी नहीं दे सकू?’
LUK 11:8 मय तुम सी कहू हय, यदि ओको संगी होन पर भी ओख उठ क नहीं दे, फिर भी ओको खुशामत करन पर ऊ उठ क ओकी जितनी भी जरूरत होना देयेंन।
LUK 11:9 अऊर मय तुम सी कहू हय: कि मांगो, त तुम्ख दियो जायेंन; ढूंढो, त तुम पावों; खटखटावों, त तुम्हरो लायी खोल्यो जायेंन।
LUK 11:10 कहालीकि जो कोयी मांगय हय, ओख मिलय हय; अऊर जो ढूंढय हय, ऊ पावय हय; अऊर जो खटखटावय हय, ओको लायी खोल्यो जायेंन।
LUK 11:11 तुम म सी असो कौन बाप होनो, कि ओको बेटा मच्छी मांगय त ओख सांप देयेंन?
LUK 11:12 यां अंडा मांगेंन त ओख बिच्छू देयेंन?
LUK 11:13 येकोलायी जब तुम बुरो होय क अपनो बच्चां ख अच्छी चिजे देनो जानय हय, त तुम्हरो स्वर्गीय बाप अपनो मांगन वालो ख पवित्र आत्मा कहाली नहीं देयेंन।”
LUK 11:14 तब यीशु न मुक्की दुष्ट आत्मा ख निकाल्यो। जब वा दुष्ट आत्मा निकल गयी त मुक्का बोलन लग्यो; अऊर लोगों ख अचम्भा भयो।
LUK 11:15 पर उन्म सी कुछ न कह्यो, “यो त बालजबूल नाम को दुष्ट आत्मावों को मुखिया हय ओकी सामर्थ सी दुष्ट आत्मावों ख निकालय हय।”
LUK 11:16 दूसरों कुछ लोगों न यीशु की परीक्षा करन लायी परमेश्वर को तरफ सी स्वर्ग को एक चिन्ह मांग्यो।
LUK 11:17 पर ओन उन्को मन की बाते जान क उन्को सी कह्यो, “जो जो राज्य म फूट पड़य हय, ऊ राज्य उजड़ जावय हय; अऊर जो घर म फूट पड़य हय, ऊ नाश होय जावय हय।
LUK 11:18 यदि शैतान अपनोच विरोधी होय जाये, त ओको राज्य कसो बन्यो रहेंन? कहालीकि तुम मोरो बारे म त कह्य हय कि बालजबूल की सामर्थ सी दुष्ट आत्मा निकालय हय।
LUK 11:19 भलो यदि मय शैतान की मदत सी दुष्ट आत्मावों ख निकालू हय, त तुम्हरो मानन वालो कौन्की मदत सी निकालय हय? येकोलायी हिच तुम्हरो न्याय चुकायेंन।
LUK 11:20 पर यदि मय परमेश्वर की सामर्थ सी दुष्ट आत्मा ख निकालू हय, त परमेश्वर को राज्य तुम्हरो जवर आय गयो हय।
LUK 11:21 “जब ताकतवर आदमी अवजार समेत अपनो घर की रखवाली करय हय, त ओकी जायजाद बची रह्य हय।
LUK 11:22 पर जब ओको सी बढ़ क कोयी अऊर ताकतवर चढ़ायी कर क् ओख जीत लेवय हय, त ओको हि हथियार जेक पर ओको भरोसा होतो, छीन लेवय हय अऊर ओकी जायजाद लूट क बाट देवय हय।
LUK 11:23 “जो मोरो संग नहाय ऊ मोरो विरोध म हय, अऊर जो मोरो संग नहीं जमा करय हय ऊ बिखरावय हय।
LUK 11:24 “जब दुष्ट आत्मा आदमी म सी निकल जावय हय त सूखी जागा म आराम ढूंढती फिरय हय, अऊर जब नहीं पावय त कह्य हय, ‘मय अपनो उच घर म जित सी निकली होती लौट जाऊं।’
LUK 11:25 अऊर आय क घर ख झाड़्यो हुयो अऊर सज्यो सजायो पावय हय।
LUK 11:26 तब वा जाय क अपनो सी बुरी सात अऊर आत्मावों ख अपनो संग ले आवय हय, अऊर हि ओको म घुस क वाश करय हंय, अऊर ऊ आदमी की पिछली दशा पहिलो सी भी बुरी होय जावय हय।”
LUK 11:27 जब यीशु या बाते कहतच रह्यो होतो त भीड़ म सी कोयी बाई न ऊचो आवाज सी कह्यो, “धन्य हय ऊ गर्भ जेको म तय रह्यो अऊर हि स्तन जो तय न पीयो।”
LUK 11:28 यीशु न कह्यो, “हां; पर धन्य हि हंय जो परमेश्वर को वचन सुनय अऊर मानय हंय।”
LUK 11:29 जब बड़ी भीड़ जमा होत जात होती त यीशु कहन लग्यो, “यो युग को लोग बुरो हंय; हि चिन्ह ढूंढय हंय; पर योना को चिन्ह ख छोड़ कोयी अऊर चिन्ह उन्ख नहीं दियो जायेंन।
LUK 11:30 जसो योना नीनवे को लोगों लायी चिन्ह बन्यो, वसोच आदमी को बेटा भी यो युग को लोगों लायी ठहरेंन।
LUK 11:31 दक्षिन की रानी न्याय को दिन यो समय को आदमियों को संग उठ क उन्ख दोषी ठहरायेंन, कहालीकि ऊ सुलैमान को ज्ञान सुनन ख धरती को छोर सी आयी, अऊर देखो, इत ऊ हय जो सुलैमान सी भी बड़ो हय।
LUK 11:32 नीनवे को लोग न्याय को दिन यो समय को लोगों को संग खड़ो होय क, उन्ख दोषी ठहरायेंन; कहालीकि उन्न योना को प्रचार सुन क पाप करनो छोड़ दियो; अऊर देखो, इत ऊ हय जो योना सी भी बड़ो हय।
LUK 11:33 “कोयी आदमी दीया जलाय क लूकावय नहीं यां बर्तन को खल्लो नहीं रखय, पर दीवट पर रखय हय कि अन्दर आवन वालो प्रकाश देखेंन।
LUK 11:34 तोरो शरीर को दीया तोरी आंखी हय, येकोलायी जब तोरी आंखी पवित्र हय त तोरो पूरो शरीर भी प्रकाश जसो हय; पर जब ऊ बुरी हय त तोरो शरीर भी अन्धारो जसो हय।
LUK 11:35 येकोलायी चौकस रहजो कि जो प्रकाश तोरो म हय ऊ अन्धारो नहीं होय जाये।
LUK 11:36 येकोलायी यदि तोरो पूरो शरीर प्रकाश हय अऊर ओको कोयी भाग अन्धारो म नहीं रहेंन त सब को सब असो प्रकाश होयेंन, जसो ऊ समय होवय हय जब दीया अपनी चमक सी तोख प्रकाश देवय हय।”
LUK 11:37 जब यीशु बात कर चुक्यो होतो त कोयी फरीसी न ओको सी बिनती करी कि मोरो इत जेवन कर। ऊ अन्दर जाय क जेवन करन बैठ्यो।
LUK 11:38 फरीसी ख यो देख क अचम्भा भयो कि ओन जेवन करन सी पहिले यहूदियों को अनुसार हाथ नहीं धोयो।
LUK 11:39 प्रभु न ओको सी कह्यो, “हे फरीसियों, तुम कटोरा अऊर थारी ख ऊपर ऊपर सी त मांजय हय, पर तुम्हरो अन्दर अन्धारो अऊर बुरायी भरी हय।
LUK 11:40 हे मूर्खो, जेन बाहेर को भाग बनायो, का ओन अन्दर को भाग नहीं बनायो?
LUK 11:41 पर हां, जो तुम्हरो जवर हय ओख गरीबों ख दान कर दे, त देखो, सब कुछ तुम्हरो लायी शुद्ध होय जायेंन।
LUK 11:42 “पर हे फरीसियों, तुम पर हाय! तुम पदीना अऊर मसाला को अऊर सब तरह को साग पात को दसवा अंश देवय हय, पर न्याय ख अऊर परमेश्वर को प्रेम ख टाल देवय हय; पर असो भी त होतो कि इन्क भी करतो रहतो अऊर उन्ख भी नहीं छोड़तो।
LUK 11:43 “हे फरीसियों, तुम पर हाय! तुम आराधनालयों म मुख्य मुख्य आसन अऊर बजारों म आदर सत्कार चाहवय हय।
LUK 11:44 हाय तुम पर! कहालीकि तुम उन लूकी कब्रो को जसो हय, जेक पर लोग चलय हंय पर नहीं जानय।”
LUK 11:45 तब एक व्यवस्थापक न ओख उत्तर दियो, “हे गुरु, इन बातों ख कहन सी तय हमरी निन्दा करय हय।”
LUK 11:46 यीशु न कह्यो; “हे व्यवस्थापकों, तुम पर भी हाय! तुम असो बोझा जिन्ख उठावनो कठिन हय, आदमियों पर लादय हय पर तुम खुद उन बोझा ख अपनो एक बोट सी भी नहीं छूवय।
LUK 11:47 हाय तुम पर! तुम उन भविष्यवक्तावों की कब्र बनावय हय, जिन्ख तुम्हरोच बाप दादो न मार डाल्यो होतो।
LUK 11:48 येकोलायी तुम गवाह हय, अऊर अपनो बाप दादो को कामों सी सहमत हय; कहालीकि उन्न उन्ख मार डाल्यो अऊर तुम उन्की कब्रें बनावय हय।
LUK 11:49 येकोलायी परमेश्वर की बुद्धि न भी कह्यो हय, ‘मय उन्को जवर भविष्यवक्तावों अऊर प्रेरितों ख भेजूं, अऊर हि उन्म सी कुछ ख मार डालेंन, अऊर कुछ ख सतायेंन।’
LUK 11:50 ताकि जितनो भविष्यवक्तावों को खून जगत की उत्पत्ति सी बहायो गयो हय, सब को लेखा यो युग को लोगों सी लियो जाये:
LUK 11:51 हाबील की हत्या सी ले क जकर्याह की हत्या तक, जो वेदी अऊर मन्दिर को बीच म घात करयो गयो। मय तुम सी सच कहू हय, इन सब को लेखा योच समय को लोगों सी लियो जायेंन।
LUK 11:52 “हाय तुम व्यवस्थापकों पर! तुम न ज्ञान की कुंजी ले त ली, पर तुम खुदच सिर नहीं सक्यो, अऊर सिरन वालो ख भी रोक दियो।”
LUK 11:53 जब यीशु उत सी निकल्यो, त धर्मशास्त्री अऊर फरीसी बुरी तरह ओको पीछू पड़ गयो अऊर छेड़न लग्यो कि ऊ बहुत सी बातों की चर्चा करे,
LUK 11:54 अऊर मारन म लग्यो रह्यो कि ओको मुंह की कोयी बात पकड़े।
LUK 12:1 इतनो म जब हजारों की भीड़ लग गयी, यहां तक कि हि एक दूसरों पर गिरत पड़त होतो, त ऊ सब सी पहिले अपनो चेलावों सी कहन लग्यो, “फरीसियों को कपटरूपी खमीर सी चौकस रहो।
LUK 12:2 कुछ ढक्यो नहीं, जो खोल्यो नहीं जायेंन; अऊर नहीं कुछ लूक्यो हय, जो जान्यो नहीं जायेंन।
LUK 12:3 येकोलायी जो कुछ तुम न अन्धारो म कह्यो हय, ऊ प्रकाश म सुन्यो जायेंन; अऊर जो तुम न कोठरियों म कानो कान कह्यो हय, ऊ छत पर सी प्रचार करयो जायेंन।
LUK 12:4 “मय तुम सी जो मोरो संगी हय कहू हय कि जो शरीर ख घात करय हंय पर ओको पीछू अऊर कुछ नहीं कर सकय, उन्को सी मत डरो।
LUK 12:5 मय तुम्ख चिताऊ हय कि तुम्ख कौन्को सी डरनो चाहिये, घात करन को बाद जेक नरक म डालन को अधिकार हय, परमेश्वर सी डरो; हां, मय तुम सी कहूं हय, ओको सी डरो।
LUK 12:6 “का दोय पैसा की पाच चिड़िया पक्षी नहीं बिकय? तब भी परमेश्वर उन्म सी एक ख भी नहीं भूलय।
LUK 12:7 तुम्हरो मुंड को सब बाल भी गिन्यो हुयो हंय, येकोलायी डरो मत, तुम बहुत चिड़िया पक्षी सी बढ़ क हय।
LUK 12:8 “मय तुम सी कहू हय जो कोयी आदमियों को आगु मोख मान लेयेंन ओख आदमी को बेटा भी परमेश्वर को स्वर्गदूतों को आगु मान लेयेंन।
LUK 12:9 पर जो आदमियों को आगु मोरो इन्कार करेंन ओख परमेश्वर को स्वर्गदूतों को आगु इन्कार करयो जायेंन।
LUK 12:10 “जो कोयी आदमी को बेटा को विरोध म कोयी बात कहेंन, ओको ऊ अपराध माफ करयो जायेंन, पर जो पवित्र आत्मा की निन्दा करेंन, ओको अपराध माफ नहीं करयो जायेंन।
LUK 12:11 “जब लोग तुम्ख सभावों अऊर शासकों अऊर अधिकारियों को आगु लिजाये, त चिन्ता मत करजो कि हम कौन्सो तरह सी यां का उत्तर देबो, यां का कहबो।
LUK 12:12 कहालीकि पवित्र आत्मा उच समय तुम्ख सिखाय देयेंन कि का कहनो चाहिये।”
LUK 12:13 तब भीड़ म सी एक न यीशु सी कह्यो, “हे गुरु, मोरो भाऊ सी कह्य कि बाप की जायजाद मोरो संग बाट ले।”
LUK 12:14 यीशु न ओको सी कह्यो, “हे आदमी, कौन न मोख तुम्हरो न्याय करन वालो यां बाटन वालो नियुक्त करयो हय?”
LUK 12:15 अऊर ओन उन्को सी कह्यो, “चौकस रहो, अऊर हर तरह को लोभ सी अपनो आप ख बचायो रखो; कहालीकि कोयी को जीवन ओकी जायजाद की बड़ोत्तरी सी नहीं होवय।”
LUK 12:16 यीशु न उन्को सी एक दृष्टान्त कह्यो: “कोयी धनवान की जमीन म बड़ी फसल भयी।
LUK 12:17 तब ऊ अपनो मन म बिचार करन लग्यो, ‘मय का करू? कहालीकि मोरो इत जागा नहाय जित अपनी फसल रखू।’
LUK 12:18 अऊर ओन कह्यो, ‘मय यो करू: मय अपनो फसल रखन को ढोला ख तोड़ क बड़ो बनाऊं; अऊर उत अपनो सब अनाज अऊर जायजाद बड़ो जागा म रखूं;
LUK 12:19 अऊर मय अपनो आप सी कहूं कि हे मोरो जीव, तोरो जवर बहुत साल लायी बहुत जायजाद रखी हय; धीरज धर, खाय, पी, सूख सी रह।’
LUK 12:20 पर परमेश्वर न ओको सी कह्यो, ‘हे मूर्ख! योच रात तोरो जीव तोरो सी ले लियो जायेंन; तब जो कुछ तय न जमा करयो हय ऊ कौन्को होयेंन?’
LUK 12:21 “असोच ऊ आदमी भी हय जो अपनो लायी धन जमा करय हय, पर परमेश्वर की नजर म धनी नहीं।”
LUK 12:22 तब यीशु न अपनो चेलावों सी कह्यो, “येकोलायी मय तुम सी कहू हय, अपनो जीव की चिन्ता मत कर कि हम का खाबोंन; नहीं अपनो शरीर लायी का पहिनबों।
LUK 12:23 कहालीकि भोजन सी जीव, अऊर कपड़ा सी शरीर बढ़ क हय।
LUK 12:24 पक्षिंयों पर ध्यान दे; हि नहीं बोवय हंय, नहीं काटय; नहीं उन्को भण्डार अऊर नहीं रखन की जागा होवय हय; तब भी परमेश्वर उन्ख पालय हय। तुम्हरी कीमत पक्षिंयों सी बढ़ क हय।
LUK 12:25 तुम म सी असो कौन हय जो चिन्ता करन सी अपनी उमर म एक घड़ी भी बढ़ाय सकय हय?
LUK 12:26 येकोलायी यदि तुम सब सी छोटो काम भी नहीं कर सकय, त अऊर बातों लायी कहालीकि चिन्ता करय हय?”
LUK 12:27 “जंगली फूल पर ध्यान करो कि हि कसो बढ़य हंय: हि मेहनत नहीं करय, तब भी मय तुम सी कहू हय कि सुलैमान भी अपनो पूरो वैभव म, उन्म सी कोयी एक को समान कपड़ा पहिन्यो हुयो नहीं होतो।
LUK 12:28 येकोलायी यदि परमेश्वर मैदान की घास ख, जो अज हय अऊर कल आगी म झोक दियो जायेंन, असो पहिनावय हय; त हे अल्पविश्वासियों, ऊ तुम्ख कहाली नहीं पहिनायेंन?”
LUK 12:29 “अऊर तुम या बात की खोज म नहीं रहो कि का खाबोंन अऊर का पीबो, अऊर नहीं सक करो।
LUK 12:30 यो जगत को लोग इन सब चिजों की खोज म रह्य हंय: अऊर तुम्हरो बाप जानय हय कि तुम्ख इन चिजों की जरूरत हय।
LUK 12:31 पर ओको राज्य की खोज म रहो, त या चिजे भी तुम्ख मिल जायेंन।”
LUK 12:32 “हे मोरो छोटो झुण्ड को लोगों, मत डरो; कहालीकि तुम्हरो बाप ख यो भायो हय, कि तुम्ख राज्य दे।
LUK 12:33 अपनी जायजाद बिक क गरीबों ख दान कर दे; अऊर अपनो लायी असो बटवा बनावो जो पुरानो नहीं होवय, यानेकि स्वर्ग म असो धन जमा करो जो घटय नहीं अऊर जेको जवर चोर नहीं जावय, अऊर कीड़ा नहीं खावय।
LUK 12:34 कहालीकि जित तुम्हरो धन हय, उत तुम्हरो मन भी लग्यो रहेंन।”
LUK 12:35 “हमेशा तैयार रहो, अऊर तुम्हरो दीया जलतो रहे,
LUK 12:36 अऊर तुम उन आदमियों को जसो बनो, जो अपनो मालिक की रस्ता देख रहे हय कि ऊ बिहाव सी कब आयेंन, कि जब ऊ आय क दरवाजा खटखटावय त तुरतच ओको लायी खोल दे।
LUK 12:37 धन्य हंय हि सेवक जिन्ख मालिक आय क जागतो देखेंन; मय तुम सी सच कहू हय कि ऊ कमर बान्ध क उन्ख जेवन करन ख बैठायेंन, अऊर जवर आय क उन्की सेवा करेंन।
LUK 12:38 यदि ऊ रात को दूसरों पहर या तीसरो पहर म आय क उन्ख जागतो देखेंन, त हि सेवक धन्य हंय।
LUK 12:39 पर तुम यो जान लेवो कि यदि घर को मालिक जानतो कि चोर कौन्सो समय आयेंन, त जागतो रहतो अऊर अपनो घर म चोरी होन नहीं देतो।”
LUK 12:40 तुम भी तैयार रहो; कहालीकि जो समय तुम सोचय भी नहीं, “पर उच समय आदमी को बेटा आय जायेंन।”
LUK 12:41 तब पतरस न कह्यो, “हे प्रभु, का यो दृष्टान्त तय हम सीच यां सब सी कह्य हय।”
LUK 12:42 प्रभु न कह्यो, “ऊ विश्वास लायक अऊर बुद्धिमान व्यवस्थापक कौन आय, जेको मालिक ओख नौकर चाकर पर अधिकारी ठहराये कि उन्ख समय पर भोजन वस्तु दे।
LUK 12:43 धन्य हय ऊ सेवक, जेक ओको मालिक आय क असोच करतो देखे।
LUK 12:44 मय तुम सी सच कहू हय, ऊ ओख अपनी सब जायजाद पर अधिकारी ठहरायेंन।
LUK 12:45 पर यदि ऊ सेवक अपनो मन म सोचन लग्यो कि मोरो मालिक आवन म देर कर रह्यो हय, अऊर सेवकों अऊर दासियों ख मारन पीटन लग्यो, अऊर खान पीवन अऊर पियक्कड़ होन लग्यो।
LUK 12:46 त ऊ सेवक को मालिक असो दिन, जब ऊ ओकी रस्ता देखतो नहीं रहेंन, अऊर असो समय जेक ऊ जानतो नहीं होय, आयेंन अऊर ओख भारी सजा दे क ओको भाग अविश्वासियों को संग ठहरायेंन।
LUK 12:47 “ऊ सेवक जो अपनो मालिक की इच्छा जानत होतो, अऊर तैयार नहीं रह्यो अऊर नहीं ओकी इच्छा को अनुसार चल्यो, त बहुत मार खायेंन।
LUK 12:48 पर जो नहीं जान क मार खान्को लायक काम करेंन ऊ थोड़ो मार खायेंन। येकोलायी जेक बहुत दियो गयो हय, ओको सी बहुत मांग्यो जायेंन; अऊर जेक बहुत सौंप्यो गयो हय, ओको सी बहुत लियो जायेंन।
LUK 12:49 “मय धरती पर आग लगावन आयो हय; अऊर का चाहऊ हय केवल यो कि अभी सुलग जाती!
LUK 12:50 मोख त एक बपतिस्मा लेनो हय, अऊर जब तक ऊ नहीं होय जाये तब तक कसी व्याकुल म रहूं!
LUK 12:51 का तुम समझय हय कि मय धरती पर शान्ति ले क आयो हय? मय तुम सी कहू हय; नहीं, बल्की अलग करावन आयो हय।
LUK 12:52 कहालीकि अब सी एक घर म पाच लोग आपस म विरोध रखेंन, तीन दोय सी अऊर दोय तीन सी।
LUK 12:53 बाप बेटा सी, अऊर बेटा बाप सी विरोध रखेंन; माय बेटी सी, अऊर बेटी माय सी, सासु बहू सी, अऊर बहू सासु सी विरोध रखेंन।”
LUK 12:54 यीशु भीड़ सी भी कह्यो, “जब तुम बादर ख पश्चिम सी उठतो देखय हय त तुरतच कह्य हय कि बारीश होयेंन, अऊर असोच होवय हय;
LUK 12:55 अऊर जब दक्षिनी हवा चलती देखय हय त कह्य हय कि लू चलेंन अऊर असोच होवय हय।
LUK 12:56 हे कपटियों, तुम धरती अऊर आसमान को रूप रंग म भेद कर सकय हय, पर यो युग को बारे म कहालीकि भेद करनो नहीं जानय?
LUK 12:57 “तुम खुदच न्याय कहालीकि नहीं कर लेवय कि ठीक का हय?
LUK 12:58 जब तय अपनो आरोप लगावन वालो को संग शासक को जवर जाय रह्यो हय त रस्ताच म ओको सी छूटन की कोशिश कर ले, असो नहीं होय कि ऊ तोख न्यायधीश को जवर खीच लिजाये, अऊर न्यायधीश तोख सिपाही ख सौंप दे अऊर सिपाही तोख जेलखाना म डाल दे।
LUK 12:59 मय तुम सी कहू हय कि जब तक तय एक एक पैसा भर नहीं दे तब तक उत सी छूटनो नहीं पायजो।”
LUK 13:1 ऊ समय कुछ लोग आय पहुंच्यो, अऊर यीशु उन गलील को लोगों को बारे म की चर्चा करन लग्यो जेको खून पिलातुस न उन्कोच बलिदानों को संग मिलायो होतो।
LUK 13:2 यीशु न उन्ख उत्तर दियो, “का तुम समझय हय कि यो गलीली अऊर पूरो गलीलियों सी बहुत पापी होतो कि उन पर असी मुसीबत म पड़यो?
LUK 13:3 मय तुम सी कहू हय कि; यदि तुम पाप सी मन नहीं फिरावो त तुम पूरो योच तरह सी नाश होयेंन।
LUK 13:4 का तुम समझय हय कि हि अठरा लोग जेको पर शीलोह को गुम्मट गिरयो, अऊर हि दब क मर गयो: यरूशलेम को अऊर पूरो रहन वालो सी अधिक अपराधी होतो?
LUK 13:5 मय तुम सी कहू हय कि नहीं; पर यदि तुम अपनो पापों सी मन नहीं फिरावो त तुम पूरो योच तरह सी नाश होयेंन।”
LUK 13:6 तब यीशु न यो दृष्टान्त भी कह्यो: “कोयी को अंगूर को बाड़ी म एक अंजीर को झाड़ लग्यो हुयो होतो। ऊ उन्म फर ढूंढन आयो, पर नहीं पायो।
LUK 13:7 तब ओन बाड़ी को रख वालो सी कह्यो, ‘देख, तीन साल सी मय यो अंजीर को झाड़ म फर ढूंढन आऊं हय, पर नहीं पाऊ हय। येख काट डाल! कि यो जागा ख भी कहालीकि रोक क रखय?’
LUK 13:8 पर रख वालो न उत्तर दियो, ‘हे मालिक, येख यो साल अऊर रहन दे कि मय येको चारयी तरफ खोद क खाद डालू।
LUK 13:9 यदि आवन वालो साल म फरय त ठीक, नहीं त ओख काट डालजो।’”
LUK 13:10 आराम दिन ख ऊ एक आराधनालय म उपदेश कर रह्यो होतो।
LUK 13:11 उत एक बाई होती जेक अठरा साल सी एक कमजोर करन वाली दुष्ट आत्मा लगी होती, अऊर वा कुबड़ी भय गयी होती अऊर कोयी तरह सी सीधी नहीं होय सकत होती।
LUK 13:12 यीशु न ओख देख क बुलायो अऊर कह्यो, “हे नारी, तय अपनी कमजोरी सी चंगी भय गयी हय!”
LUK 13:13 तब ओन ओको पर हाथ रख्यो, अऊर वा तुरतच सीधी भय गयी अऊर परमेश्वर की महिमा करन लगी।
LUK 13:14 येकोलायी कि यीशु न आराम दिन ख ओख अच्छो करयो होतो, यहूदी आराधनालय को मुखिया गुस्सा म आय क लोगों सी कहन लग्यो, “छे दिन हंय जेको म काम करन ख होना, येकोलायी उनच दिनो म आय क चंगो हो, पर आराम दिन म नहीं।”
LUK 13:15 यो सुन क प्रभु न उत्तर दियो, “हे कपटियों! का आराम दिन म तुम म सी हर एक अपनो बईल यां गधा ख थान सी खोल क पानी पिलावन नहीं लिजावय?
LUK 13:16 त वा बाई जो अब्राहम की सन्तान हय जेक शैतान न अठरा साल सी बान्ध रख्यो होतो, आराम दिन ख यो बन्धन सी छुड़ायो जानो जरूरी नहीं?”
LUK 13:17 ओको उत्तर सी ओको पूरो विरोधी शर्मिन्दा भय गयो, अऊर पूरी भीड़ उन महिमा को कामों सी जो ऊ करत होतो, खुश भयी।
LUK 13:18 यीशु न कह्यो, “परमेश्वर को राज्य कौन्को जसो हय? अऊर मय ओकी तुलना कौन्को सी करू?
LUK 13:19 ऊ राई को एक दाना को जसो हय, जेक कोयी आदमी न ले क अपनो खेत म बोयो, अऊर ऊ बढ़ क झाड़ भय गयो, आसमान को पक्षिंयों न ओकी डगालियों पर घोसला बनाय लियो।”
LUK 13:20 यीशु न तब कह्यो, “मय परमेश्वर को राज्य की तुलना कौन्को सी करू?
LUK 13:21 ऊ खमीर को जसो हय, जेक एक बाई न कुछ खमीर ले क बहुत सो आटा म मिलायो, अऊर पूरो आटा खमीर भय गयो।”
LUK 13:22 यीशु नगर नगर, अऊर गांव-गांव होय क उपदेश करतो हुयो यरूशलेम को तरफ जाय रह्यो होतो,
LUK 13:23 त कोयी न ओको सी पुच्छ्यो, “हे प्रभु, का उद्धार पावन वालो थोड़ो हंय?” यीशु न उन्को सी कह्यो,
LUK 13:24 “सकरो द्वार सी सिरन की कोशिश करो; कहालीकि बहुत सो लोग सिरनो चाहेंन, अऊर नहीं सिर सकेंन।
LUK 13:25 जब घर को मालिक खड़ो होय क दरवाजा बन्द कर देनो पर; अऊर तुम बाहेर खड़्यो हुयो दरवाजा खटखटाय क कहन लग्यो, ‘हे प्रभु, हमरो लायी खोल दे,’ अऊर ऊ उत्तर दे, ‘मय तुम्ख नहीं जानु, तुम कित को होय?’
LUK 13:26 तब तुम उत्तर देयेंन, ‘हम न तोरो आगु खायो-पीयो; अऊर तय न हमरो शहर म उपदेश करयो!’
LUK 13:27 पर ऊ फिर सी कहेंन, ‘मय नहीं जानु तुम कित को हय? हे कुकर्मियों, तुम सब मोरो सी दूर हय!’
LUK 13:28 उत रोवनो अऊर दात कटरनो होयेंन; जब तुम अब्राहम अऊर इसहाक अऊर याकूब अऊर सब भविष्यवक्तावों ख परमेश्वर को राज्य म बैठ्यो देखो, अऊर अपनो आप ख बाहेर देखो;
LUK 13:29 अऊर पूर्व अऊर पश्चिम, उत्तर अऊर दक्षिन सी, लोग आय क परमेश्वर को राज्य को भोज म सहभागी होयेंन।
LUK 13:30 कुछ पिछलो हंय ऊ पहिलो होयेंन, अऊर कुछ जो पहिलो हंय, ऊ पिछलो होयेंन।”
LUK 13:31 उच समय कुछ फरीसियों न यीशु को जवर आय क ओको सी कह्यो, “इत सी निकल क चली जा, कहालीकि हेरोदेस तोख मार डालनो चाहवय हय।”
LUK 13:32 यीशु न उन्ख उत्तर दियो, “जाय क ऊ लोमड़ी सी कह्य दे कि देख; ‘मय अज अऊर कल दुष्ट आत्मावों ख निकालू अऊर बीमारों ख चंगो करू हय, अऊर तीसरो दिन अपनो कार्य पूरो करू।’
LUK 13:33 तब भी मोख अज, कल, अऊर परसो चलनो जरूरी हय; कहालीकि होय नहीं सकय कि कोयी भविष्यवक्ता यरूशलेम को बाहेर मारयो जाये।
LUK 13:34 “हे यरूशलेम, हे यरूशलेम! तय जो भविष्यवक्तावों ख मार डालय हय, अऊर जो परमेश्वर को तरफ सी भेज्यो गयो उन्को पर पथराव करय हय। कितनोच बार मय न यो चाह्यो कि जसो मुर्गी अपनो पिल्ला ख अपनो पंखा को खल्लो जमा करय हय, वसोच मय भी तोरो बच्चां ख जमा करू, पर तुम न यो नहीं चाह्यो।
LUK 13:35 तुम्हरो घर तुम्हरो लायी प्रकाश पड़्यो हय, अऊर मय तुम सी कहू हय: जब तक तुम नहीं कहो, ‘धन्य हय ऊ, जो प्रभु को नाम सी आवय हय,’ तब तक तुम मोख फिर कभी नहीं देखो।”
LUK 14:1 तब यीशु आराम दिन म फरीसियों को मुखिया म सी कोयी को घर रोटी खान गयो; अऊर हि ओकी ताक म होतो।
LUK 14:2 उत एक आदमी जेक सूजन को रोग होतो यीशु को जवर आयो।
LUK 14:3 येको पर यीशु न व्यवस्थापकों अऊर फरीसियों सी कह्यो, “हमरो नियम को अनुसार आराम दिन म चंगो करनो ठीक हय यां नहीं?”
LUK 14:4 पर हि चुपचाप रह्यो। तब यीशु न ओख छूय क चंगो करयो अऊर जान दियो,
LUK 14:5 अऊर ओन उन्को सी कह्यो, “तुम म सी असो कौन हय, जेको बेटा यां बईल कुंवा म गिर जाये अऊर ऊ आराम को दिन ओख तुरतच बाहेर नहीं निकालेंन?”
LUK 14:6 हि यो बातों को कुछ उत्तर नहीं दे सक्यो।
LUK 14:7 जब यीशु न देख्यो कि नेवता म बुलायो लोग कसो मुख्य–मुख्य जागा चुन लेवय हय त एक दृष्टान्त दे क उन्को सी कह्यो,
LUK 14:8 “जब कोयी तोख बिहाव को जेवन म बुलाये, त मुख्य जागा म नहीं बैठजो। कहीं असो नहीं होय कि ओन तोरो सी भी कोयी बड़ो ख नेवता दियो हय,
LUK 14:9 अऊर जेन तोख अऊर ओख दोयी ख नेवता दियो हय, आय क तोरो सी कहेंन, ‘येख जागा दे,’ अऊर तब तोख शर्मिन्दा होय क सब सी खल्लो जागा म बैठ्नो पड़ेंन।
LUK 14:10 पर जब तय बुलायो जाये त सब सी खल्लो जागा म बैठ कि जब ऊ, जेन तोख नेवता दियो हय आयेंन, त तोरो सी कहेंन, ‘हे संगी, आगु बढ़ क बैठ,’ तब तोरो संग बैठन वालो को आगु तोरी बड़ायी होयेंन।
LUK 14:11 कहालीकि जो कोयी अपनो आप ख बड़ो बनायेंन, ऊ छोटो करयो जायेंन; अऊर जो कोयी अपनो आप ख छोटो बनायेंन, ऊ बड़ो करयो जायेंन।”
LUK 14:12 तब यीशु अपनो नेवता देन वालो सी भी कह्यो, “जब तय दिन ख यां रात ख जेवन रखय, त अपनो संगियों यां भाऊ यां कुटुम्बियों यां धनवान पड़ोसियों ख नहीं बुलाव, कहीं असो नहीं होय कि हि भी तोख नेवता दे, अऊर तोरो बदला खडांय जाये।
LUK 14:13 पर जब तय जेवन रखय त गरीबों, टुण्डों, लंगड़ों अऊर अन्धो ख बुलाव।
LUK 14:14 तब तय धन्य होजो, कहालीकि उन्को जवर तोख वापिस देन लायी कुछ नहाय, पर तोख धर्मियों को जीन्दो होन पर परमेश्वर को तरफ सी प्रतिफल मिलेंन।”
LUK 14:15 ओको संग जेवन करन वालो म सी एक न या बाते सुन क यीशु सी कह्यो, “धन्य हय ऊ जो परमेश्वर को राज्य म जेवन करेंन।”
LUK 14:16 यीशु न ओको सी कह्यो, “कोयी आदमी न बड़ो जेवन दियो अऊर बहुत लोगों ख बुलायो।
LUK 14:17 जब जेवन तैयार भय गयो त ओन अपनो सेवक को हाथ नेवता वालो ख बुलावा भेज्यो, ‘आवो, अब जेवन तैयार हय।’
LUK 14:18 पर हि पूरो को पूरो माफी मांगन लग्यो। पहिलो न ओको सी कह्यो, ‘मय न खेत ले लियो हय, अऊर जरूरी हय कि ओख देखूं; मय तोरो सी बिनती करू हय, मोख माफ कर दे।’
LUK 14:19 दूसरों न कह्यो, ‘मय न पाच जोड़ी बईल ले लियो हंय, अऊर उन्ख परखन जाऊं हय; मय तोरो सी बिनती करू हय, मोख माफ कर दे।’
LUK 14:20 एक अऊर न कह्यो, ‘मय न बिहाव करयो हय, येकोलायी मय नहीं आय सकू।’
LUK 14:21 उस सेवक न आय क अपनो मालिक ख या बाते कह्य सुनायो। तब घर को मालिक न गुस्सा म आय क अपनो सेवक सी कह्यो, ‘नगर को बजारों अऊर गलियो म तुरतच जाय क गरीबों, टुण्डों, लंगड़ों अऊर अन्धो ख इत ले आवो।’
LUK 14:22 सेवक न तब कह्यो, ‘हे मालिक जसो तय न कह्यो होतो, वसोच करयो गयो हय; अऊर तब भी जागा हय।’
LUK 14:23 मालिक न सेवक सी कह्यो, ‘सड़को पर अऊर अपनो बाड़ा तरफ जा अऊर लोगों ख कोशिश कर क् ले आव ताकि मोरो घर भर जाय।
LUK 14:24 कहालीकि मय तुम सी कहू हय कि उन नेवता वालो म सी कोयी मोरो जेवन ख नहीं चखेंन!’”
LUK 14:25 जब बड़ी भीड़ ओको संग जाय रही होती, त यीशु न पीछू मुड़ क भीड़ सी कह्यो,
LUK 14:26 “यदि कोयी मोरो जवर आवय, अऊर अपनो बाप अऊर माय अऊर पत्नी अऊर बच्चां अऊर भाऊ अऊर बहिनों बल्की अपनो जीव ख भी मोरो सी जादा अप्रिय नहीं जानय, त ऊ मोरो चेला नहीं होय सकय;
LUK 14:27 अऊर जो कोयी मरन लायी तैयार नहीं होवय, अऊर मोरो पीछू नहीं होयेंन, ऊ भी मोरो चेला नहीं होय सकय।
LUK 14:28 “तुम म सी कौन हय जो बाड़ा बनानो चाहवय हय, अऊर पहिलो बैठ क खर्च नहीं जोड़य कि पूरो करन की ताकत मोरो जवर हय कि नहाय?
LUK 14:29 कहीं असो नहीं होय कि जब ऊ पायवा खोद लेवय पर बनाय नहीं सकय, त सब देखन वालो यो कह्य क ओख ठट्ठा करन लग्यो,
LUK 14:30 ‘यो आदमी बनान त लग्यो पर तैयार नहीं कर सक्यो!’
LUK 14:31 यो कौन असो राजा हय जो दूसरों राजा सी लड़ाई करन जावय हय, अऊर पहिले बैठ क बिचार नहीं कर ले कि जो बीस हजार ले क मोरो पर चढ़ायी करन आवय हय, त का मय दस हजार ले क ओको सामना कर सकू हय, यां नहीं?
LUK 14:32 नहीं त ओको दूर रहतोच ऊ दूतों ख भेज क शान्ति को मिलाप करनो चाहेंन।
LUK 14:33 यो तरह सी तुम म सी जो कोयी अपनो सब कुछ छोड़ नहीं देन, ऊ मोरो चेला नहीं होय सकय।
LUK 14:34 “नमक त अच्छो हय, पर यदि नमक को स्वाद बिगड़ जावय, त वा कौन चिज सी नमकीन करयो जायेंन।
LUK 14:35 ऊ नहीं त जमीन को अऊर नहीं खात लायी काम म आवय हय; ओख त लोग बाहेर फेक देवय हंय। जेको सुनन को कान हय ऊ सुन लेवो!”
LUK 15:1 सब कर लेनवालो अऊर पापी, यीशु को जवर आय रह्यो होतो की ओकी सुनबो।
LUK 15:2 पर फरीसी अऊर धर्मशास्त्री कुड़कुड़ाय क कहन लग्यो, “यो त पापियों सी मिलय हय अऊर उन्को संग खावय भी हय!”
LUK 15:3 तब यीशु न उन्को सी यो दृष्टान्त कह्यो।
LUK 15:4 “तुम म सी कौन हय जेकी सौ मेंढीं हय, अऊर उन्म सी एक गुम जाये, त निन्यानवे ख जंगल म छोड़ क वा गुमी हुयी ख जब तक मिल नहीं जावय, ढूंढत नहीं रह्यो?
LUK 15:5 अऊर जब मिल जावय हय, तब ऊ बड़ी खुशी सी ओख बख्खा पर उठाय लेवय हय;
LUK 15:6 अऊर घर म आय क संगी अऊर शेजारी ख जमा कर क् कह्य हय, ‘मय बहुत खुश हय कहालीकि मोरी गुमी हुयी मेंढा मिल गयो हय। मोरो संग खुशी मनावो!’
LUK 15:7 मय तुम सी कहू हय कि योच तरह सी एक पाप सी मन फिरावन वालो पापी को बारे म भी स्वर्ग म इतनोच खुशी होयेंन, जितनो कि निन्यानवे असो धर्मियों न पाप करनो छोड़ दियो, जिन्ख मन फिरान की जरूरत नहीं।
LUK 15:8 “कौन असी बाई होयेंन जेको जवर दस सिक्का हय, अऊर उन्म सी एक गुम जायेंन, त वा दीया जलाय क अऊर घर झाड़–बहार क, जब तक मिल नहीं जायेंन मन लगाय क ढूंढतो नहीं रहेंन?
LUK 15:9 अऊर जब मिल जावय हय, त वा अपनी सहेली अऊर पड़ोसीन ख जमा कर क् कह्य हय, ‘मय बहुत खुश हय कहालीकि मोरो गुम्यो वालो सिक्का मिल गयो हय। मोरो संग खुशी करो!’
LUK 15:10 मय तुम सी कहू हय, कि योच तरह सी, एक पाप ख छोड़न वालो पापी को बारे म परमेश्वर को स्वर्गदूतों को सामने खुशी होवय हय।”
LUK 15:11 तब यीशु न कह्यो, “कोयी आदमी को दोय बेटा होतो।
LUK 15:12 उन्म सी छोटो न बाप सी कह्यो, ‘हे बाप, जायजाद म सी जो हिस्सा मोरो हय ऊ मोख दे।’ ओन उन्ख अपनी जायजाद बाट दियो।
LUK 15:13 कुछ दिन को बाद छोटो बेटा सब कुछ जमा कर क् दूर देश ख चली गयो, अऊर उत गन्दो काम म अपनी जायजाद उड़ाय दियो।
LUK 15:14 जब ऊ सब कुछ खर्च कर दियो, अऊर ऊ देश म बड़ो अकाल पड़्यो, अऊर ऊ गरीब भय गयो।
LUK 15:15 येकोलायी यो ऊ देश को निवासियों म सी एक को इत काम मांगन गयो। ओन ओख अपनो खेतो म डुक्कर चरान लायी भेज्यो।
LUK 15:16 अऊर ऊ चाहत होतो कि उन सेगां सी जिन्ख डुक्कर खात होतो, अपनो पेट भरत होतो, अऊर ओख कोयी कुछ जेवन नहीं देत होतो।
LUK 15:17 जब ऊ होश म आयो, तब कहन लग्यो, ‘मोरो बाप को कितनोच मजूरों ख भोजन सी जादा रोटी मिलय हय, अऊर मय इत भूखो मर रह्यो हय।
LUK 15:18 मय अब उठ क अपनो बाप को जवर जाऊं अऊर ओको सी कहूं, हे बाप, मय न स्वर्ग को बाप अऊर तोरो विरोध म पाप करयो हय।
LUK 15:19 अब यो लायक नहीं रह्यो कि तोरो बेटा कहलाऊ; मोख अपनो एक मजूर को जसो रख ले।’
LUK 15:20 तब ऊ उठ क अपनो बाप को जवर चल्यो। “ऊ अभी दूरच होतो कि ओको बाप न ओख देख क तरस खायो; अऊर दवड़ क ओख गलो लगायो, अऊर बहुत चुम्मा लियो।
LUK 15:21 बेटा न कह्यो, ‘हे बाप, मय न स्वर्ग अऊर तोरी विरोध म पाप करयो हय, अऊर अब यो लायक नहीं रह्यो कि तोरो बेटा कहलाऊ।’
LUK 15:22 पर बाप न अपनो सेवकों सी कह्यो, ‘तुरतच!’ अच्छो सी अच्छो कपड़ा निकाल क ओख पहिनाव, अऊर ओको हाथ म अंगुठी, अऊर पाय म जूता पहिनाव।
LUK 15:23 अऊर पल्यो हुयो बछड़ा लाय क काटो, ताकि हम खाबोंन अऊर खुशी मनाबो!
LUK 15:24 कहालीकि मोरो यो बेटा मर गयो होतो, पर अब जीन्दो भय गयो हय; ‘ऊ गुम गयो होतो, पर अब मिल गयो हय।’ अऊर हि खुशी करन लग्यो।
LUK 15:25 “पर ओको बड़ो बेटा खेत म होतो। जब ऊ आवतो हुयो घर को जवर पहुंच्यो, त ओन गाना बजानो अऊर नाचन को आवाज सुन्यो।
LUK 15:26 येकोलायी ओन एक सेवक ख बुलाय क पुच्छ्यो, ‘यो का होय रह्यो हय?’
LUK 15:27 ओन ओको सी कह्यो, ‘तोरो भाऊ घर वापस आयो हय, अऊर तोरो बाप न पल्यो हुयो बछड़ा कटवायो हय, येकोलायी कि ओख भलो चंगो पायो हय।’”
LUK 15:28 “बड़ो भाऊ यो सुन क गुस्सा सी भर गयो अऊर अन्दर जानो नहीं चाह्यो; पर ओको बाप बाहेर आय क ओख बिनती करन लग्यो।
LUK 15:29 ओन बाप ख उत्तर दियो, ‘देख, मय इतनो साल सी तोरी सेवा कर रह्यो हय, अऊर कभी भी तोरी आज्ञा नहीं टाली, तब भी तय न मोख कभी भी एक शेरी को बच्चा तक नहीं दियो? कि मय अपनो संगी को संग खुशी मनाऊं!
LUK 15:30 पर तोरो यो बेटा जेन तोरी जायजाद वेश्यावों म उड़ाय दियो हय, जब ऊ घर वापस आयो, त ओको लायी तय न पल्यो हुयो बछड़ा कटवायो!’
LUK 15:31 बाप न कह्यो, ‘मोरो बेटा, तय हमेशा मोरो संग हय, अऊर जो कुछ मोरो हय ऊ सब तोरोच हय।
LUK 15:32 पर अब खुशी मनानो अऊर मगन होनो चाहिये, कहालीकि यो तोरो भाऊ मर गयो होतो, पर अब जीन्दो भय गयो हय; गुम गयो होतो, अब मिल गयो हय।’”
LUK 16:1 यीशु न चेलावों सी कह्यो, “कोयी धनवान को एक मुनीम होतो, अऊर लोगों न ओको आगु ओको पर यो दोष लगायो कि ऊ तोरी पूरी जायजाद उड़ाय देवय हय।
LUK 16:2 येकोलायी ओन ओख बुलाय क कह्यो, ‘यो का आय जो मय तोरो बारे म सुन रह्यो हय? अपनो मुनीम पन को लेखा दे, कहालीकि तय अब सी मोरो मुनीम नहीं रह्य सकय।’
LUK 16:3 तब मुनीम सोचन लग्यो, ‘अब मय का करू? कहालीकि मोरो मालिक अब मुनीम को काम मोरो सी छीन रह्यो हय। माटी त मोरो सी खोदी नहीं जावय, अऊर भीख मांगन म मोख शरम आवय हय।
LUK 16:4 मय समझ गयो कि का करू! ताकि जब मय मुनीमगिरी को काम सी छुड़ायो जाऊं त लोग मोख अपनो घरो म ले ले।’
LUK 16:5 “तब ओन अपनो मालिक को कर्जा चुकावन वालो ख एक–एक कर क् बुलायो अऊर पहिलो सी पुच्छ्यो, ‘तोरो पर मोरो मालिक को कितनो कर्जा हय?’
LUK 16:6 ओन उत्तर दियो, ‘सौ मन तेल,’ तब मुनीम न ओको सी कह्यो; ‘अपनो बही-खाता ले अऊर बैठ क तुरतच पचास लिख दे।’
LUK 16:7 तब ओन दूसरों सी पुच्छ्यो, ‘तोरो पर कितनो कर्जा हय?’ ओन उत्तर दियो, ‘एक हजार बोरा गहूं,’ तब ओन ओको सी कह्यो; ‘अपनो बही-खाता म आठ सौ लिख दे।’
LUK 16:8 “मालिक न ऊ अधर्मी मुनीम की तारीफ करयो कि ओन हुसीयारी सी काम करयो हय। कहालीकि यो जगत को लोग अपनो समय को लोगों को संग लेन-देन म प्रकाश को लोगों सी अधिक हुसीयार हंय।”
LUK 16:9 यीशु न उन्को सी कह्यो, “मय तुम सी कहू हय: कि जगत को धन सी अपनो लायी संगी बनाय ले, ताकि जब ऊ जातो रहेंन त हि तुम्ख अनन्त निवासों म ले ले।
LUK 16:10 जो थोड़ो सो थोड़ो म विश्वास लायक हय, ऊ बहुत म भी विश्वास लायक हय; अऊर जो थोड़ो सो थोड़ो म अधर्मी हय, ऊ बहुत म भी अधर्मी हय।
LUK 16:11 येकोलायी जब तुम जगत को धन म सच्चो नहीं ठहरो, त विश्वास को धन तुम्ख कौन सौंपेंन?
LUK 16:12 अऊर तुम परायो धन म सच्चो नहीं ठहरो त जो तुम्हरो हय, ओख तुम्ख कौन देयेंन?
LUK 16:13 “कोयी सेवक दोय मालिक की सेवा नहीं कर सकय; कहालीकि ऊ त एक सी बैर अऊर दूसरों सी प्रेम रखेंन या एक सी विश्वास लायक रहेंन अऊर दूसरों ख तुच्छ जानेंन। तुम परमेश्वर अऊर धन दोयी की सेवा नहीं कर सकय।”
LUK 16:14 फरीसी जो पैसा को लोभी होतो, या सब बाते सुन क यीशु ख ताना मारन लग्यो।
LUK 16:15 यीशु न उन्को सी कह्यो, “तुम त आदमी को आगु अपनो आप ख सच्चो दिखावय हय, पर परमेश्वर तुम्हरो मन ख जानय हय, कहालीकि जो चिज आदमी की नजर म महान हय, ऊ परमेश्वर को नजर म तुच्छ हय।
LUK 16:16 “मूसा की व्यवस्था अऊर भविष्यवक्ता यूहन्ना बपतिस्मा देन वालो को समय तक त रह्यो; ऊ समय सी परमेश्वर को राज्य को सुसमाचार सुनायो जाय रह्यो हय, अऊर हर कोयी ओको म ताकत सी सिरय हय।
LUK 16:17 आसमान अऊर धरती को गायब होय जानो व्यवस्था को एक बिन्दु को मिट जानो सी सहज हय।
LUK 16:18 “जो कोयी अपनी पत्नी ख तलाक दे क दूसरी बाई सी बिहाव करय हय, ऊ व्यभिचार करय हय; अऊर जो पति सी तलाक भयी बाई सी बिहाव करय हय, ऊ भी व्यभिचार करय हय।
LUK 16:19 “एक धनवान आदमी होतो जो महगों जामुनी कपड़ा पहिनतो अऊर हर दिन सुख–विलाश सी रहत होतो।
LUK 16:20 लाजर नाम को एक गरीब आदमी, घावों सी भरयो हुयो, ओकी द्वार पर छोड़ दियो जात होतो,
LUK 16:21 अऊर ऊ चाहत होतो कि मय धनवान की मेज पर सी गिरयो जेवन सी अपनो पेट भरू। यहां तक कि कुत्ता भी आय क ओकी घावों ख चाटत होतो।
LUK 16:22 “असो भयो कि ऊ गरीब मर गयो, अऊर स्वर्गदूतों न ओख उठाय क अब्राहम की बाजू म पहुंचायो। ऊ धनवान भी मरयो अऊर गाड़्यो गयो,
LUK 16:23 अऊर अधोलोक म ओन दु:ख म पड़्यो हुयो अपनी आंखी ऊपर उठायी, अऊर दूर सी अब्राहम को जवर म लाजर ख देख्यो।
LUK 16:24 तब ओन पुकार क कह्यो, ‘हे बाप अब्राहम! मोरो पर दया कर, अऊर लाजर ख भेज दे ताकि ऊ अपनी बोट को सिरा पानी म फिजाय क मोरी जीबली ख ठंडी करेंन, कहालीकि मय या आगी म तड़प रह्यो हय!’
LUK 16:25 “पर अब्राहम न कह्यो, ‘हे बेटा, याद कर, कि तय अपनो जीवन म अच्छी चिज ले लियो हय, अऊर वसोच लाजर बुरी चिज। पर अब ऊ इत शान्ति पा रह्यो हय, अऊर तय तड़प रह्यो हय।
LUK 16:26 या सब बातों ख छोड़ हमरो अऊर तुम्हरो बीच एक गहरो गड्डा ठहरायो गयो हय कि जो इत सी ओन पार तुम्हरो जवर जानो चाह्यो, त हि नहीं जाय सक्यो, अऊर नहीं कोयी उत सी येन पार हमरो जवर आय सक्यो।’
LUK 16:27 धनवान आदमी न कह्यो, ‘मय तुम सी बिनती करू हय, हे बाप अब्राहम, तय लाजर ख मोरो बाप को घर भेज,
LUK 16:28 कहालीकि उत मोरो पाच भाऊ हंय। ऊ जाय क उन्को जवर या बातों ख चिताय दे, असो नहीं होय कि हि भी यो दु:ख की जागा म आय।’
LUK 16:29 “अब्राहम न कह्यो, ‘तुम्हरो भाऊ को जवर त मूसा अऊर भविष्यवक्ता की किताब हंय उन्ख चितावन लायी, हि उन्की सुनो कि का कह्य।’
LUK 16:30 धनवान आदमी न उत्तर दियो, ‘पर्याप्त नहीं, हे बाप अब्राहम! पर यदि कोयी मरयो हुयो म सी जीन्दो होय क उन्को जवर जाये, त हि अपनो पाप सी मन फिरायेंन।’
LUK 16:31 पर अब्राहम न कह्यो, ‘जब हि मूसा अऊर भविष्यवक्तावों की नहीं सुनय, त यदि मरयो हुयो म सी कोयी जीन्दो भी होयेंन तब भी ओकी नहीं मानेंन।’”
LUK 17:1 यीशु न अपनो चेलावों सी कह्यो, “होय नहीं सकय कि पाप म पड़य, पर हाय, ऊ आदमी पर जेको वजह हि आवय हंय!
LUK 17:2 जो इन छोटो म सी कोयी एक ख पाप म पड़य हय, ओको लायी यो भलो होवय कि गरहट को पाट ओको गरो म लटकायो जातो, अऊर ऊ समुन्दर म डाल दियो जातो।
LUK 17:3 सचेत रहो! तुम का करय हय। “यदि तोरो भाऊ अपराध करय हय त, ओख समझाव, अऊर यदि पछतावय हय त, ओख माफ कर।
LUK 17:4 यदि दिन भर म ऊ सात बार तोरो विरोध म पाप करय अऊर सातों बार तोरो जवर आय क कह्य, ‘मय पछताऊ हय,’ त ओख माफ कर।”
LUK 17:5 प्रेरितों न प्रभु सी कह्यो, “हमरो विश्वास बढ़ाव।”
LUK 17:6 प्रभु न उत्तर दियो, “यदि तुम ख राई को दाना को बराबर भी विश्वास होतो, त तुम यो शहतूत को झाड़ सी कहतो, कि जड़ी सी उचक क अपनो आप समुन्दर म लग जा। अऊर ऊ तुम्हरी आज्ञा मान लेतो।”
LUK 17:7 यदि “तुम म सी असो कौन हय, जेको सेवक नांगर जोतय या मेंढीं चरावय हय, अऊर जब ऊ खेत सी आवय हय, त ओको सी कहेंन, ‘तुरतच आव जेवन करन बैठ?’
LUK 17:8 अऊर यो नहीं कहेंन, निश्चितच नहाय! ‘मोरो जेवन तैयार कर, अऊर जब तक मय खाऊ–पीऊ तब तक सेवा कर; येको बाद तय भी खाय पी लेजो?’
LUK 17:9 का ऊ सेवक को अहसान मानेंन कि ओन उच काम करयो जेकी आज्ञा दी गयी होती?
LUK 17:10 योच तरह सी तुम भी जब उन सब कामों ख कर लेवो जेकी आज्ञा तुम्ख दियो गयी होती, त कहो, ‘हम साधारन सेवक हंय; जो हम्ख करनो होतो हम न केवल उच करयो हय।’”
LUK 17:11 असो भयो कि यीशु यरूशलेम जातो हुयो सामरियां अऊर गलील को सिमा सी होय क जाय रह्यो होतो।
LUK 17:12 कोयी गांव म सिरतो समय ओख दस कोढ़ी मिल्यो। जो ओको सी दूर खड़ो होतो।
LUK 17:13 उन्न ऊचो आवाज सी पुकार क कह्यो, “हे यीशु! हे मालिक! हम पर दया कर!”
LUK 17:14 यीशु न उन्ख देख क कह्यो, “जावो, अऊर अपनो आप ख याजकों ख दिखावो।” अऊर हि रस्ता म जातोच शुद्ध भय गयो।
LUK 17:15 तब उन्म सी एक यो देख क कि मय चंगो भय गयो हय, ऊचो आवाज सी परमेश्वर कि बड़ायी करतो हुयो वापस लौट्यो,
LUK 17:16 अऊर यीशु को पाय पर मुंह को बल गिर क ओको धन्यवाद करन लग्यो, अऊर ऊ सामरी होतो।
LUK 17:17 येख पर यीशु न कह्यो, “का दसो शुद्ध नहीं भयो; त फिर हि नव कित हंय?
LUK 17:18 का यो परदेशी ख छोड़ कोयी अऊर वापस नहीं आयो जो परमेश्वर की बड़ायी करय हय?”
LUK 17:19 अऊर यीशु न ओको सी कह्यो, “उठ क चली जा; तोरो विश्वास न तोख अच्छो करयो हय।”
LUK 17:20 कुछ फरीसियों न यीशु सी पुच्छ्यो कि परमेश्वर को राज्य कब आयेंन, त ओन ओख उत्तर दियो, “परमेश्वर को राज्य दिखन वालो रूप को जसो नहीं आवय।
LUK 17:21 अऊर लोग यो नहीं कहेंन, ‘इत हय! यां, उत हय!’ कहालीकि परमेश्वर को राज्य तुम्हरो बीच म हय।”
LUK 17:22 तब ओन चेलावों सी कह्यो, “असो समय आयेंन, जेको म तुम आदमी को बेटा को दिनो म सी एक दिन ख देखन चाहो, अऊर नहीं देख सको।
LUK 17:23 लोग तुम सी कहेंन, ‘देखो, उत हय!’ यां ‘देखो, इत हय!’ पर तुम चली नहीं जावो अऊर नहीं उन्को पीछू होय जावो।
LUK 17:24 कहालीकि जसो बिजली आसमान को एक छोर सी चमक क आसमान को दूसरों छोर तक चमकय हय, वसोच आदमी को बेटा भी अपनो दिन म प्रगट होयेंन।
LUK 17:25 पर पहिले जरूरी हय कि ऊ बहुत दु:ख उठाये, अऊर यो युग को लोग ओख नकारयो दियो जायेंन।
LUK 17:26 जसो नूह को दिन म भयो होतो, वसोच आदमी को बेटा को दिन म भी होयेंन।
LUK 17:27 जो दिन तक नूह जहाज पर नहीं चढ़्यो, ऊ दिन तक लोग खातो-पीतो रहत होतो, अऊर उन्म बिहाव होत होतो। तब जल–प्रलय न आय क उन सब ख नाश करयो।
LUK 17:28 अऊर जसो लूत को दिन म भयो होतो कि लोग खातो–पीतो, लेन–देन करतो, झाड़ लगातो अऊर घर बनावत होतो;
LUK 17:29 पर जो दिन लूत सदोम सी निकल्यो, ऊ दिन आगी अऊर गन्धक आसमान सी बरसी अऊर सब ख नाश कर दियो।
LUK 17:30 आदमी को बेटा को प्रगट होन को दिन भी असोच होयेंन।
LUK 17:31 “ऊ दिन जो घर को छत पर हय अऊर ओको सामान घर म हय, त ऊ ओख लेन लायी मत उतरो; अऊर वसोच जो खेत म हय ऊ वापस घर नहीं जाय।
LUK 17:32 लूत की पत्नी ख याद रखो!
LUK 17:33 जो कोयी अपनो जीव बचावनो चाहेंन ऊ ओख खोयेंन; अऊर जो कोयी ओख खोयेंन ऊ ओख बचायेंन।
LUK 17:34 मय तुम सी कहू हय, ऊ रात, दोय आदमी एक खटिया पर सोतो रहेंन: एक ले लियो जायेंन अऊर दूसरों छोड़ दियो जायेंन।
LUK 17:35 दोय बाई एक संग गरहट म अनाज पीसत रहेंन, एक ले ली जायेंन अऊर दूसरी छोड़ दियो जायेंन।
LUK 17:36 दोय लोग खेत म होयेंन, एक ले लियो जायेंन अऊर दूसरों छोड़ दियो जायेंन।”
LUK 17:37 यो सुन क चेलावों न ओको सी पुच्छ्यो, “हे प्रभु यो कित होयेंन?” यीशु न उत्तर दियो, “जित लाश हय, उत गिधाड़ जमा होयेंन।”
LUK 18:1 तब यीशु न अपनो चेलावों ख दृष्टान्त म कह्यो कि हमेशा प्रार्थना करनो अऊर हिम्मत नहीं छोड़न ख होना असो सिखायो।
LUK 18:2 “कोयी शहर म एक सच्चो रहत होतो, जो परमेश्वर सी नहीं डरत होतो अऊर नहीं कोयी आदमी की परवाह करत होतो।
LUK 18:3 उच शहर म एक विधवा भी रहत होती, जो ओको जवर आय–आय क कहत होती, ‘मोरो न्याय कर क् मोख आरोप लगावन वालो सी बचाव!’
LUK 18:4 कुछ समय तक त ऊ नहीं मान्यो पर आखरी म अपनो आप म बिचार कर ख कह्यो, ‘जब कि मय परमेश्वर सी नहीं डरू, अऊर नहीं आदमी की कुछ परवाह करू हय,
LUK 18:5 तब भी या विधवा मोख सतावती रह्य हय, येकोलायी मय ओको न्याय चुकाऊं, कहीं असो नहीं होय कि बार-बार आय क आखिर म मोरी नाक म दम करेंन!’”
LUK 18:6 प्रभु न कह्यो, “सुनो, यो अधर्मी न्यायधीश न का कह्यो?
LUK 18:7 येकोलायी का परमेश्वर अपनो चुन्यो हुयो को न्याय नहीं चुकायेंन, जो रात–दिन ओकी मदत लायी पुकारतो रह्य हंय? का ऊ उन्को मदत करन म देर करेंन?
LUK 18:8 मय तुम सी कहू हय, ऊ तुरतच उन्को न्याय चुकायेंन। तब भी आदमी को बेटा जब आयेंन, त का ऊ धरती पर विश्वास पायेंन?”
LUK 18:9 यीशु न उन लोगों सी जो अपनो ऊपर भरोसा रखत होतो, कि हम सच्चो हंय, अऊर दूसरों ख तुच्छ जानत होतो, यो दृष्टान्त कह्यो:
LUK 18:10 “दोय आदमी मन्दिर म प्रार्थना करन लायी गयो: एक फरीसी होतो अऊर दूसरों कर लेनवालो।
LUK 18:11 “फरीसी खड़ो होय क अपनो मन म यो प्रार्थना करन लग्यो, ‘हे परमेश्वर, मय तोरो धन्यवाद करू हय कि मय दूसरों आदमी को जसो लोभी, अधर्मी, अऊर व्यभिचारी नहीं, अऊर नहीं यो कर लेनवालो को जसो हय।
LUK 18:12 मय हप्ता म दोय बार उपवास रखू हय, मय अपनी सब कमायी को दसवा अंश भी देऊ हय।’
LUK 18:13 “पर कर लेनवालो न दूर खड़ो होय क, स्वर्ग को तरफ आंखी उठावनो भी नहीं चाह्यो, बल्की अपनी छाती पीट–पीट क कह्यो, ‘हे परमेश्वर, मुझ पापी पर दया कर!’
LUK 18:14 यीशु न कह्यो, मय तुम सी कहू हय कि ऊ फरीसी नहीं, पर योच कर लेनवालो आदमी सच्चो ठहरायो गयो अऊर ऊ अपनो घर गयो; कहालीकि जो कोयी अपनो आप ख बड़ो बनायेंन, ऊ नम्र करयो जायेंन; अऊर जो अपनो आप ख नम्र बनायेंन, ऊ बड़ो करयो जायेंन।”
LUK 18:15 तब लोग अपनो बच्चां ख भी ओको जवर लान लग्यो कि ऊ उन्को पर हाथ रखेंन, पर चेलावों न देख क उन्ख डाट्यो।
LUK 18:16 यीशु न बच्चां ख जवर बुलाय क कह्यो, “बच्चां ख मोरो जवर आवन दे, अऊर उन्ख मना मत करो: कहालीकि परमेश्वर को राज्य असोच को हय।
LUK 18:17 मय तुम सी सच कहू हय कि जो कोयी परमेश्वर को राज्य ख बच्चा को जसो स्वीकार नहीं करेंन ऊ ओको म कभी सिरनो नहीं पायेंन।”
LUK 18:18 कोयी यहूदी मुखिया न यीशु सी पुच्छ्यो, “हे उत्तम गुरु, अनन्त जीवन को अधिकारी होन लायी मय का करू?”
LUK 18:19 यीशु न ओको सी कह्यो, “तय मोख अच्छो कहालीकि कह्य हय?” कोयी अच्छो नहाय, “केवल एक, यानेकि परमेश्वर।
LUK 18:20 तय आज्ञावों ख त जानय हय: ‘व्यभिचार नहीं करनो; हत्या नहीं करनो; अऊर चोरी नहीं करनो; कोयी की झूठी गवाही नहीं देनो; अपनो बाप अऊर अपनी माय को आदर करनो।’”
LUK 18:21 यहूदी मुखिया न कह्यो, “मय त यो आज्ञावों ख जब सी मय समझन लग्यो तब सी मानतो आयो हय।”
LUK 18:22 यो सुन क, यीशु न ओको सी कह्यो, “तोरो म अब भी एक बात ख करनो हय, अपनो सब कुछ बिक क अपनो पैसा गरीबों म बाट दे, अऊर तोख स्वर्ग म धन मिलेंन; अऊर आय क मोरो पीछू होय जा।”
LUK 18:23 पर यो सुन क, ऊ बहुत उदास भयो, कहालीकि ऊ बड़ो धनी होतो।
LUK 18:24 यीशु न ओख देख क कह्यो, “धनवानों को परमेश्वर को राज्य म सिरनो कितनो कठिन हय!
LUK 18:25 परमेश्वर को राज्य म धनवान को सिरनो इतनो कठिन हय कि सूई को नाक म सी ऊंट को निकल जानो सहज हय।”
LUK 18:26 येको पर सुनन वालो न पुच्छ्यो, “त फिर कौन्को उद्धार होय सकय हय?”
LUK 18:27 यीशु न कह्यो, “जो आदमी ख असम्भव हय, ऊ परमेश्वर ख सम्भव हय।”
LUK 18:28 पतरस न कह्यो, “देख! हम त घर–दार छोड़ क तोरो पीछू भय गयो हंय।”
LUK 18:29 “हां,” यीशु न उन्को सी कह्यो, “मय तुम सी सच कहू हय कि असो कोयी नहाय जेन परमेश्वर को राज्य लायी घर या पत्नी या भाऊ या माय-बाप या बाल–बच्चां ख छोड़ दियो हय;
LUK 18:30 अऊर यो समय म भी जादा, यां आवन वालो युग म अनन्त जीवन मिलेंन, असो कोयी नहीं रहेंन।”
LUK 18:31 तब यीशु न बारा चेलावों ख अलग लिजाय क उन्को सी कह्यो, “सुनो! हम यरूशलेम ख जाय रह्यो हंय, अऊर जितनी बाते आदमी को बेटा लायी भविष्यवक्तावों सी लिख्यो गयो हंय, हि सब पूरी होयेंन।
LUK 18:32 कहालीकि ऊ गैरयहूदी को हाथ म सौंप्यो जायेंन, अऊर हि ओख ठट्ठो म उड़ायेंन, अऊर ओको अपमान करेंन, अऊर ओको पर थूकेंन,
LUK 18:33 अऊर ओख कोड़ा मारेंन अऊर घात करेंन, अऊर ऊ तीसरो दिन फिर सी जीन्दो होयेंन।”
LUK 18:34 पर चेलावों न इन बातों म सी कोयी बात नहीं समझी; अऊर या बात उन्को सी लूकी रही, कि यीशु का कह्य रह्यो होतो उन्को समझ म नहीं आयो।
LUK 18:35 जब यीशु यरीहो नगर को जवर पहुंच्यो, त एक अन्धा आदमी सड़क को किनार बैठ्यो हुयो, भीख मांग रह्यो होतो।
LUK 18:36 ऊ भीड़ की चलनो की आवाज सुन क पूछन लग्यो, “यो का होय रह्यो हय?”
LUK 18:37 उन्न अन्धा ख बतायो, “यीशु नासरी जाय रह्यो हय।”
LUK 18:38 तब ओन पुकार क कह्यो, “हे यीशु, दाऊद की सन्तान, मोरो पर दया कर!”
LUK 18:39 जो आगु–आगु जाय रह्यो होतो, हि ओख डाटन लग्यो कि चुप रहो; पर ऊ अऊर भी जोर सी चिल्लावन लग्यो, “हे दाऊद की सन्तान, मोरो पर दया कर!”
LUK 18:40 तब यीशु न रूक क आज्ञा दियो कि अन्धा आदमी ख मोरो जवर लावो, अऊर जब ऊ जवर आयो त यीशु न ओको सी पुच्छ्यो,
LUK 18:41 “तय का चाहवय हय कि मय तोरो लायी करू?” ओन कह्यो, “हे प्रभु, यो कि मय फिर सी देखन लगू।”
LUK 18:42 यीशु न ओको सी कह्यो, “देखन लग! तोरो विश्वास न तोख अच्छो कर दियो हय।”
LUK 18:43 तब ऊ तुरतच देखन लग्यो अऊर परमेश्वर की बड़ायी करतो हुयो ओको पीछू भय गयो; अऊर सब लोगों न देख क परमेश्वर की स्तुति करी।
LUK 19:1 यीशु यरीहो नगर म सी जाय रह्यो होतो।
LUK 19:2 उत जक्कई नाम को एक आदमी होतो जो कर लेनवालो को मुखिया होतो अऊर धनी होतो।
LUK 19:3 ऊ यीशु ख देखनो चाहत होतो कि ऊ कौन सो आय। पर भीड़ को वजह देख नहीं सकत होतो, कहालीकि ऊ बुटरो होतो।
LUK 19:4 तब ओख देखन लायी ऊ आगु दौड़ क एक उम्बर को झाड़ पर चढ़ गयो, कहालीकि यीशु उच रस्ता सी जान वालो होतो।
LUK 19:5 जब यीशु ऊ जागा म पहुंच्यो, त ऊपर नजर कर क् ओको सी कह्यो, “हे जक्कई, जल्दी उतर आव; कहालीकि अज मोख तोरो घर म रहनो जरूरी हय।”
LUK 19:6 ऊ तुरतच उतर क खुशी सी यीशु को स्वागत करयो।
LUK 19:7 यो देख क सब लोग कुड़कुड़ाय क कहन लग्यो, “ऊ त एक पापी आदमी को इत उतरयो हय।”
LUK 19:8 जक्कई न खड़ो होय क प्रभु सी कह्यो, “हे प्रभु, देख, मय अपनी अरधी जायजाद गरीबों ख देऊ हय, अऊर यदि कोयी को कुछ भी अन्याय कर क् ले लियो हय त ओख चौगुना वापस कर देऊ हय।”
LUK 19:9 तब यीशु न ओको सी कह्यो, “अज यो घर म उद्धार आयो हय, येकोलायी कि यो भी अब्राहम की सन्तान आय।
LUK 19:10 कहालीकि आदमी को बेटा खोयो हुयो ख ढूंढन अऊर उन्को उद्धार करन आयो हय।”
LUK 19:11 जब हि या बात सुन रह्यो होतो, त यीशु न एक दृष्टान्त कह्यो, येकोलायी कि ऊ यरूशलेम को जवर होतो, अऊर हि समझत होतो कि परमेश्वर को राज्य अभी प्रगट होन वालो हय।
LUK 19:12 येकोलायी ओन कह्यो, “एक ऊचो पद वालो आदमी दूर देश ख गयो ताकि राजपद पा क लौट आयो।
LUK 19:13 ओन अपनो सेवकों म सी दस ख बुलाय क उन्ख दस सोना को सिक्का दियो अऊर ओन कह्यो, ‘मोरो लौट क आनो तक लेन–देन करजो।’
LUK 19:14 पर ओको रहन वालो ओको सी जलन रखत होतो, अऊर ओको पीछू दूतों सी कहन भेज्यो, ‘हम नहीं चाहवय कि यो हम पर राज्य करे।’
LUK 19:15 “जब ऊ राजपद पा क लौट्यो, त असो भयो कि ओन अपनो सेवकों ख जेक रकम दियो होतो, अपनो जवर बुलवायो जेकोसी मालूम करे कि उन्न लेन–देन सी का–का कमायो।
LUK 19:16 तब पहिलो न आय क कह्यो, ‘हे मालिक, तोरो सिक्का सी दस अऊर सिक्का कमायो हंय।’
LUK 19:17 ओन ओको सी कह्यो, ‘शाबाश, हे अच्छो सेवक! तय बहुतच थोड़ो म विश्वास को लायक निकल्यो अब दस शहर पर अधिकार रख।’
LUK 19:18 दूसरों सेवक न आय क कह्यो, ‘हे मालिक, तोरो एक सिक्का सी पाच अऊर सिक्का कमायो हंय।’
LUK 19:19 ओन ओको सी भी कह्यो, ‘तय भी पाच शहर पर अधिकारी होय जा।’
LUK 19:20 “तीसरो न आय क कह्यो, ‘हे मालिक, देख तोरो सिक्का यो आय; जेक मय न गमछा म लूकाय क रख्यो होतो।
LUK 19:21 कहालीकि मय तोरो सी डरत होतो, येकोलायी कि तय कठोर मालिक हय; जो तय न नहीं रख्यो ओख उठाय लेवय हय, अऊर जो तय न नहीं बोयो, ओख काटय हय।’
LUK 19:22 ओन ओको सी कह्यो, ‘हे दुष्ट सेवक! मय तोरोच मुंह सी तोख दोषी ठहराऊ हय! तय मोख जानत होतो कि मय कठोर हय, जो मय न नहीं रख्यो ओख उठाय लेऊ हय, अऊर जो मय न नहीं बोयो ओख काटू हय।
LUK 19:23 त तय न मोरो धन ब्याज पर कहालीकि नहीं रख दियो कि मय आय क ब्याज समेत ले लेतो?’
LUK 19:24 “अऊर जो लोग जवर खड़ो होतो, ओन उन्को सी कह्यो, ‘ऊ सिक्का ओको सी ले लेवो, अऊर जेको जवर दस सिक्का हंय ओख दे।’
LUK 19:25 उन्न ओको सी कह्यो, ‘हे मालिक, ओको जवर पहिलो सीच दस सिक्का त हंय!’
LUK 19:26 ‘मय तुम सी कहू हय कि जेको जवर हय, ओख दियो जायेंन; अऊर जेको जवर नहाय, ओको सी ऊ भी जो ओको जवर हय ले लियो जायेंन।
LUK 19:27 पर मोरो ऊ दुश्मनों ख जो नहीं चाहवय कि मय उन्को पर राज्य करू, उन्ख इत लाय क मोरो आगु मार डालो।’”
LUK 19:28 या बात कह्य क यीशु यरूशलेम को तरफ उन्को आगु आगु चल्यो।
LUK 19:29 जब ऊ जैतून नाम को पहाड़ी पर बैतफगे अऊर बैतनिय्याह को जवर पहुंच्यो, त ओन अपनो चेलावों म सी दोय ख यो कह्य क भेज्यो,
LUK 19:30 “आगु को गांव म जावो; अऊर उत पहुंचतोच एक गधी को बछड़ा जेको पर कभी कोयी सवार नहीं भयो, बन्ध्यो हुयो तुम्ख मिलेंन, ओख खोल क लावो।
LUK 19:31 यदि कोयी तुम सी पुछेंन कि कहालीकि खोलय हय, त यो कह्य देजो कि प्रभु ख येकी जरूरत हय।”
LUK 19:32 जो भेज्यो गयो होतो, उन्न जाय क जसो ओन उन्को सी कह्यो होतो, वसोच पायो।
LUK 19:33 जब हि गधा को बछड़ा खोल रह्यो होतो, त गधा को मालिक न उन्को सी पुच्छ्यो, “यो बछड़ा ख कहालीकि खोलय हय?”
LUK 19:34 उन्न कह्यो, “प्रभु ख येकी जरूरत हय।”
LUK 19:35 हि ओख यीशु को जवर लायो, अऊर अपनो कपड़ा ऊ बछड़ा पर डाल क यीशु ख ओको पर बैठाय दियो।
LUK 19:36 जब ऊ जाय रह्यो होतो, त हि अपनो कपड़ा रस्ता म बिछावत जात होतो।
LUK 19:37 यरूशलेम को जवर आतो हुयो जब ऊ जैतून पहाड़ी की ढलान पर पहुंच्यो, त चेलावों की पूरी भीड़ उन सब सामर्थ को कामों को वजह जो उन्न देख्यो होतो, खुशी होय क बड़ो आवाज सी परमेश्वर की महिमा करन लगी:
LUK 19:38 “धन्य हय ऊ राजा, जो प्रभु को नाम सी आवय हय! स्वर्ग म शान्ति अऊर आसमान म परमेश्वर की महिमा हो!”
LUK 19:39 तब भीड़ म सी कुछ फरीसी ओको सी कहन लग्यो, “हे गुरु, अपनो चेलावों ख आज्ञा दे क चुप कराव!”
LUK 19:40 यीशु न उत्तर दियो, “मय तुम सी कहू हय यदि इन चुप रह्यो त गोटा चिल्लाय उठेंन।”
LUK 19:41 जब ऊ जवर आयो त नगर ख देख क ओको पर रोयो
LUK 19:42 अऊर कह्यो, “यदि अज को दिन तय, हां, तयच, उन बातों ख जानतो जो शान्ति की हंय, पर अब हि तोरी आंखी सी लूक गयी हंय।
LUK 19:43 कहालीकि ऊ दिन तोरो पर आयेंन कि तोरो दुश्मन मोर्चा बान्ध क तोख घेर लेयेंन, अऊर चारयी तरफ सी तोख दबायेंन।
LUK 19:44 अऊर तोख अऊर तोरो बच्चां ख जो तोरो म हंय, माटी म मिलायेंन, अऊर तोरो म गोटा पर गोटा भी नहीं छोड़ेंन; कहालीकि तय न ऊ अवसर ख जेको म परमेश्वर तुम्ख बचावन तोरो पर दया की नजर करी गयी होती नहीं पहिचान्यो।”
LUK 19:45 तब यीशु मन्दिर म जाय क व्यापारियों ख बाहेर निकालन लग्यो,
LUK 19:46 अऊर उन्को सी कह्यो, “शास्त्र म लिख्यो हय, कि ‘मोरो घर प्रार्थना को मन्दिर होयेंन,’ पर तुम न ओख डाकुवों को अड्डा बनाय दियो हय।”
LUK 19:47 यीशु हर दिन मन्दिर म शिक्षा देत होतो; अऊर मुख्य याजक अऊर धर्मशास्त्री अऊर लोगों को मुखिया ओख मारन को अवसर ढूंढत होतो।
LUK 19:48 पर कोयी उपाय नहीं निकाल सक्यो कि यो कसो तरह करे, कहालीकि सब लोग मन लगाय क ओको सी सुनत होतो।
LUK 20:1 एक दिन असो भयो कि जब यीशु मन्दिर म लोगों ख उपदेश दे रह्यो होतो अऊर सुसमाचार सुनाय रह्यो होतो, त मुख्य याजक अऊर धर्मशास्त्री, बुजूर्गों को संग जवर आय क खड़ो भयो;
LUK 20:2 अऊर कहन लग्यो, “हम्ख बताव, तय इन कामों ख कौन्सो अधिकार सी करय हय, अऊर ऊ कौन हय? जेन तोख अधिकार दियो हय?”
LUK 20:3 यीशु न उन्ख उत्तर दियो, “मय भी तुम सी एक प्रश्न पूछू हय; मोख बताव।
LUK 20:4 यूहन्ना को बपतिस्मा करन को अधिकार स्वर्ग सी होतो या आदमियों को तरफ सी होतो?”
LUK 20:5 तब हि आपस म चर्चा करन लग्यो, “यदि हम कहबोंन, ‘स्वर्ग को तरफ सी,’ त ऊ कहेंन, ‘तब तुम न ओको विश्वास कहाली नहीं करयो?’
LUK 20:6 अऊर यदि हम कहबोंन, ‘आदमियों को तरफ सी,’ त सब लोग हमरो पर गोटा मारेंन, कहालीकि हि मानय हंय कि यूहन्ना भविष्यवक्ता होतो।”
LUK 20:7 येकोलायी उन्न उत्तर दियो, “हम नहीं जानय कि ऊ कौन्को तरफ सी होतो।”
LUK 20:8 यीशु न उन्को सी कह्यो, “त मय भी तुम्ख नहीं बताऊ कि मय यो काम कौन्सो अधिकार सी करू हय।”
LUK 20:9 तब यीशु लोगों सी यो दृष्टान्त कहन लग्यो: “कोयी आदमी न अंगूर की बाड़ी लगायी, अऊर ओको ठेका दे दियो अऊर बहुत दिनो लायी परदेश चली गयो।
LUK 20:10 जब अंगूर को पकन को समय आयो त मालिक न किसानों को जवर एक सेवक ख भेज्यो कि ऊ अंगूर की बाड़ी को फरो को भाग ओख दे, पर किसानों न ओख पीट क खाली हाथ लौटाय दियो।
LUK 20:11 तब ओन एक अऊर सेवक ख भेज्यो; अऊर उन्न ओख भी पीट क अऊर ओको अपमान कर क् खाली हाथ लौटाय दियो।
LUK 20:12 तब ओन तीसरो सेवक ख भेज्यो; अऊर उन्न ओख भी घायल कर क् फेक दियो।
LUK 20:13 तब अंगूर की बाड़ी को मालिक न कह्यो, ‘मय का करू? मय अपनो प्रिय बेटा ख भेजूं; होय सकय हय हि ओको निश्चितच सम्मान करेंन!’
LUK 20:14 जब किसानों न ओख देख्यो त आपस म बिचार करन लग्यो, ‘यो त वारिस आय; आवो, हम येख मार डाल्बो कि जायजाद हमरी होय जायेंन।’
LUK 20:15 अऊर उन्न ओख अंगूर की बाड़ी सी बाहेर निकाल क मार डाल्यो। “येकोलायी अंगूर की बाड़ी को मालिक उन्को संग का करेंन?
LUK 20:16 ऊ आय क उन किसानों ख नाश करेंन, अऊर अंगूर की बाड़ी दूसरों ख सौंपेंन।” यो सुन क उन्न कह्यो “परमेश्वर करे असो नहीं हो।”
LUK 20:17 यीशु न उन्को तरफ देख क कह्यो, “त फिर यो का लिख्यो हय?” “यो गोटा ख राजमिस्त्रियों न नकार दियो होतो, उच गोटा कोना को सिरा मतलब महत्वपूर्ण भय गयो।”
LUK 20:18 “जो कोयी यो गोटा पर गिरेंन ऊ तुकड़ा-तुकड़ा होय जायेंन, पर जो कोयी पर ऊ गोटा गिरेंन, ओख पीस डालेंन।”
LUK 20:19 उच समय धर्मशास्त्रियों अऊर मुख्य याजकों न यीशु को पकड़नो चाह्यो, कहालीकि हि समझ गयो होतो कि ओन हमरो पर यो दृष्टान्त कह्यो; पर हि लोगों सी डरत होतो।
LUK 20:20 अऊर हि यीशु कि ताक म रह्यो अऊर असो भेद लेनवालो ख भेज्यो कि सच्चो होन को ढोंग धर क ओकी सवालों म फसाय सकेंन, ताकि ओख रोमन शासक को हाथ अऊर अधिकार म सौंप दे।
LUK 20:21 सवालों म फसावन वालो न यीशु सी यो पुच्छ्यो, “हे गुरु, हम जानय हंय कि तय ठीक कह्य अऊर सिखावय भी हय, अऊर कोयी को पक्ष–पात नहीं करय, बल्की परमेश्वर को रस्ता सच्चायी सी बतावय हय।
LUK 20:22 का हम्ख रोम को अधिकारी कैसर ख कर देनो उचित हय यां नहाय?”
LUK 20:23 यीशु न उन्की चतुरायी ख जान क उन्को सी कह्यो,
LUK 20:24 “एक चांदी को सिक्का मोख दिखाव। येको पर कौन्को चेहरा अऊर नाम हय?” उन्न कह्यो, “रोम को राजा को।”
LUK 20:25 यीशु न उन्को सी कह्यो, “त जो रोमी राजा को हय, ऊ रोमी राजा ख दे; अऊर जो परमेश्वर को हय, ऊ परमेश्वर ख दे।”
LUK 20:26 हि लोगों को आगु या बात म ओख पकड़ नहीं सक्यो, बल्की ओको उत्तर सी अचम्भा होय क चुप रह्य गयो।
LUK 20:27 फिर सदूकी जो कह्य हंय कि मरयो हुयो को फिर सी जीन्दो होनो हयच नहाय, उन्म सी कुछ न यीशु को जवर आय क पुच्छ्यो,
LUK 20:28 “हे गुरु, मूसा न हमरो लायी असी व्यवस्था म यो लिख्यो हय: ‘यदि कोयी को भाऊ अपनी पत्नी को रहतो हुयो बिना सन्तान को मर जायेंन, त ओको भाऊ वा विधवा सी बिहाव कर ले, अऊर अपनो भाऊ लायी सन्तान पैदा करे।’
LUK 20:29 सात भाऊ होतो, पहिलो भाऊ बिहाव कर क् बिना सन्तान को मर गयो।
LUK 20:30 तब दूसरों, न बिहाव करयो,
LUK 20:31 अऊर तीसरो न भी वा बाई सी बिहाव कर लियो। यो तरह सी सातों बिना सन्तान को मर गयो।
LUK 20:32 आखरी म वा बाई भी मर गयी।
LUK 20:33 येकोलायी फिर जीन्दो होन पर वा उन्म सी कौन्की पत्नी होयेंन? कहालीकि वा सातों भाऊ न ओको संग बिहाव कर लियो होतो।”
LUK 20:34 यीशु न उन्को सी कह्यो, “यो युग को लोगों म त बिहाव होवय हय,
LUK 20:35 पर जो लोग ऊ युग म सिरनो अऊर मरयो हुयो म सी जीन्दो होन को लायक हुयो हंय, नहीं त बिहाव करेंन अऊर नहीं करवायेंन।
LUK 20:36 हि तब मरन को भी नहीं; कहालीकि हि स्वर्गदूतों को जसो होयेंन, अऊर मरयो हुयो म सी जीन्दो उठन को वजह सी परमेश्वर की भी सन्तान होयेंन।
LUK 20:37 पर या बात ख कि मरयो हुयो फिर सी जीन्दो होवय हंय, मूसा न भी जरती झाड़ी की कथा म प्रगट करी हय कि ऊ प्रभु ख ‘अब्राहम को परमेश्वर, अऊर इसहाक को परमेश्वर अऊर याकूब को परमेश्वर’ कह्य हय।
LUK 20:38 परमेश्वर त मुर्दों को नहीं पर जीन्दो को परमेश्वर हय: कहालीकि ओको जवर सब जीन्दो हंय।”
LUK 20:39 तब यो सुन क धर्मशास्त्रियों म सी कुछ न यो कह्यो, “हे गुरु, तय न ठीक कह्यो।”
LUK 20:40 अऊर उन्ख तब ओको सी कुछ अऊर पूछन की हिम्मत नहीं भयी।
LUK 20:41 यीशु न उन्को सी पुच्छ्यो, “मसीह ख दाऊद को सन्तान कसो कह्य हंय?
LUK 20:42 दाऊद खुदच भजन संहिता की किताब म कह्य हय, ‘प्रभु न मोरो प्रभु सी कह्यो: मोरो दायो तरफ बैठ,
LUK 20:43 जब तक कि मय तोरो दुश्मनों ख तोरो पाय को खल्लो की चौकी नहीं कर देऊं।’
LUK 20:44 दाऊद त ओख ‘प्रभु’ कह्य हय, त तब ऊ ओकी सन्तान कसो भयो?”
LUK 20:45 जब सब लोग सुन रह्यो होतो, त यीशु न अपनो चेलावों सी कह्यो,
LUK 20:46 “धर्मशास्त्रियों सी चौकस रह, जेक लम्बो चोंगा वालो कपड़ा पहिन क घुमनो अच्छो लगय हय, अऊर जिन्ख बजारों म आदर सत्कार, अऊर आराधनालयों म मुख्य आसन अऊर भोज म मुख्य जागा अच्छो लगय हंय।
LUK 20:47 हि विधवावों को फायदा उठावय हय, अऊर उनकी जायजाद हड़प लेवय हय, अऊर दिखान लायी बड़ो देर तक प्रार्थना करय हंय: इन बहुतच सजा पायेंन।”
LUK 21:1 यीशु न चारयी तरफ आंखी उठाय क धनवानों ख मन्दिर को भण्डार म अपनो दान डालतो देख्यो।
LUK 21:2 ओन एक गरीब विधवा ख भी ओको म तांबा को दोय सिक्का डालतो देख्यो।
LUK 21:3 तब ओन कह्यो, “मय तुम सी सच कहू हय कि या गरीब विधवा न सब सी बढ़ क डाल्यो हय।
LUK 21:4 कहालीकि उन सब न अपनी अपनी बढ़ती म सी दान म कुछ डाल्यो हय, पर येन अपनी कमी म सी अपनी पूरी जीविका डाल दियो हय।”
LUK 21:5 जब चेला म सी कुछ लोग मन्दिर को बारे म कह्य रह्यो होतो, कि ऊ कसो सुन्दर गोटावों सी अऊर भेंट की चिजों सी सजायो गयो हय। त यीशु न कह्यो,
LUK 21:6 “ऊ दिन आयेंन, जिन्म यो सब जो तुम देखय हय, उन्म सी इत एक भी गोटा पर गोटा भी नहीं रहेंन जो गिरायो नहीं जायेंन।”
LUK 21:7 उन्न यीशु सी पुच्छ्यो, “हे गुरु, यो सब कब होयेंन? अऊर या बाते जब पूरी होन पर होयेंन, त ऊ समय को का चिन्ह होयेंन?”
LUK 21:8 यीशु न कह्यो, “चौकस रह कि भरमायो नहीं जावो, कहालीकि बहुत सी मोरो नाम सी आय क कहेंन, ‘मय उच आय!’ अऊर यो भी कि, ‘समय जवर आय गयो हय।’ तुम उन्को पीछू नहीं चली जावो।
LUK 21:9 जब तुम लड़ाईयों अऊर लड़ाईयों की चर्चा सुनो त घबराय नहीं जावो, कहालीकि इन्को पहिलो होनो जरूरी हय; पर ऊ समय तुरतच अन्त नहीं होयेंन।”
LUK 21:10 तब ओन उन्को सी कह्यो, “राष्ट्र पर राष्ट्र अऊर राज्य पर राज्य चढ़ायी करेंन,
LUK 21:11 अऊर कुछ जागा भूईडोल होयेंन, अऊर जागा–जागा अकाल अऊर महामारियां पड़ेंन, अऊर आसमान सी भयंकर घटना अऊर बड़ो–बड़ो चिन्ह प्रगट होयेंन।
LUK 21:12 पर इन सब बातों सी पहिले हि मोरो नाम को वजह तुम्ख पकड़ेंन, अऊर सतायेंन, अऊर सभावों म सौंपेंन, अऊर जेलखाना म डलवायेंन, अऊर राजावों अऊर शासकों को आगु लिजायेंन।
LUK 21:13 पर यो तुम्हरो लायी सुसमाचार की गवाही देन को अवसर होय जायेंन।
LUK 21:14 येकोलायी अपनो अपनो मन म ठान लेवो कि हम पहिलो सी अपनो आप ख बचायो जान कि चिन्ता नहीं करबोंन,
LUK 21:15 कहालीकि मय तुम्ख असो बोल अऊर बुद्धि देऊ कि तुम्हरो कोयी भी दुश्मन सामना या खण्डन नहीं कर सकेंन।
LUK 21:16 तुम्हरो माय-बाप, अऊर भाऊ, अऊर रिश्तेदार, अऊर संगी भी तुम्ख पकड़वायेंन; यो तक कि तुम म सी कुछ ख मरवाय डालेंन।
LUK 21:17 मोरो वजह सब लोग तुम सी दुश्मनी करेंन।
LUK 21:18 पर तुम्हरो मुंड को एक बाल भी नहीं निकाल सकेंन।
LUK 21:19 अपनो धीरज सी तुम अपनो जीव ख बचायो रखेंन।
LUK 21:20 “जब तुम यरूशलेम ख सेनावों सी घिरयो हुयो देखो, त जान लेजो कि ओको नाश होनो जवर हय।
LUK 21:21 तब जो यहूदिया म हय हि पहाड़ी पर भग जाव; अऊर जो यरूशलेम को अन्दर हय बाहेर निकल जाये; अऊर जो गांव म हय हि शहर को अन्दर नहीं जाये।
LUK 21:22 कहालीकि यो बदला लेन को असो दिन होयेंन, वचन म लिख्यो गयी सब बात पूरी होय जायेंन।
LUK 21:23 उन दिनो म जो गर्भवती अऊर दूध पिलाती होयेंन, उन्को लायी हाय, हाय! कहालीकि देश म बड़ो कठिनायी अऊर इन लोगों पर बड़ो सजा होयेंन।
LUK 21:24 हि तलवार सी मार दियो जायेंन, अऊर सब देशों म बन्दी बनाय क पहुंचायो जायेंन; अऊर जब तक गैरयहूदियों को समय पूरो नहीं होय, तब तक यरूशलेम गैरयहूदियों को पाय सी कुचल्यो जायेंन।
LUK 21:25 “सूरज, अऊर चन्दा, अऊर तारों म चिन्ह दिखायी देयेंन; अऊर धरती पर देश–देश को लोगों ख संकट होयेंन, कहालीकि हि समुन्दर को गरजनो अऊर लहरो की भयानक आवाज सी घबराय जायेंन।
LUK 21:26 डर को वजह अऊर जगत पर आवन वाली घटना की रस्ता देखत–देखत लोगों को जीव म जीव नहीं रहेंन, कहालीकि आसमान की शक्तियां हिलायी जायेंन।
LUK 21:27 तब हि आदमी को बेटा ख बड़ी सामर्थ अऊर महिमा को संग बादर पर आवतो देखेंन।
LUK 21:28 जब या बाते होन लगी, त खड़ो होय क अपनी मुंड ऊपर उठायजो; कहालीकि तुम्हरो छुटकारा जवर होयेंन।”
LUK 21:29 यीशु न उन्को सी एक दृष्टान्त भी कह्यो: “अंजीर को झाड़ अऊर सब झाड़ों ख देखो।
LUK 21:30 जसोच उन्म सी नयी पोख निकलय हंय, त तुम देख क खुदच जान लेवय हय कि गरमी को मौसम जवर हय।
LUK 21:31 योच तरह सी जब तुम या बाते होतो देखो, तब जान लेवो कि परमेश्वर को राज्य जवर हय।
LUK 21:32 “मय तुम सी सच कहू हय कि जब तक यो सब बाते नहीं होय जाये, तब तक यो पीढ़ी को अन्त नहीं होयेंन।
LUK 21:33 आसमान अऊर धरती टल जायेंन, पर मोरी बाते कभी नहीं टलेंन।
LUK 21:34 “येकोलायी चौकस रहो, असो नहीं होय कि तुम्हरो दिल दुराचार, अऊर दारूबाजी, अऊर यो जीवन की चिन्ता सी दब जाये अऊर ऊ दिन तुम पर फन्दा को जसो अचानक आय पड़ेंन।
LUK 21:35 कहालीकि वा पूरी धरती को सब रहन वालो पर योच तरह सी आय पड़ेंन।
LUK 21:36 येकोलायी जागतो रहो अऊर हर समय प्रार्थना करतो रहो कि तुम इन सब आवन वाली घटना सी बचनो अऊर आदमी को बेटा को आगु खड़ो होन को लायक बनो।”
LUK 21:37 यीशु मन्दिर म हर दिन सिखावत होतो, अऊर रात ख बाहेर जाय क जैतून नाम को पहाड़ी पर रात बितावत होतो;
LUK 21:38 अऊर हर दिन भुन्सारो ख बहुत जल्दी सब लोग ओकी सुनन लायी मन्दिर म ओको जवर आवत होतो।
LUK 22:1 अखमीरी रोटी को त्यौहार जो फसह कहलावय हय, जवर होतो;
LUK 22:2 अऊर मुख्य याजक अऊर धर्मशास्त्री यो बात की खोज म होतो कि यीशु को कसो मार डाल्बो, पर हि लोगों सी डरत होतो।
LUK 22:3 तब शैतान यहूदा म समायो, जो इस्करियोती कहलावय होतो अऊर बारा चेलावों म गिन्यो जात होतो।
LUK 22:4 यहूदा न जाय क मुख्य याजकों अऊर मन्दिर को पहरेदारों को मुखिया को संग बातचीत करी कि ओख कसो तरह सी उन्को हाथ पकड़वाबो।
LUK 22:5 हि खुश भयो, अऊर ओख रुपये देन लायी राजी भय गयो।
LUK 22:6 ओन मान लियो, अऊर मौका ढूंढन लग्यो कि जब भीड़ नहीं होय त यीशु ख उन्को हाथ पकड़वाय दे।
LUK 22:7 तब अखमीरी रोटी को त्यौहार को दिन आयो, जेको म फसह को मेम्ना बलि करनो जरूरी होतो।
LUK 22:8 यीशु न पतरस अऊर यूहन्ना ख यो कह्य क भेज्यो: “जाय क हमरो खान लायी फसह को भोज की तैयार करो।”
LUK 22:9 उन्न ओको सी पुच्छ्यो, “तय कित चाहवय हय कि हम येख तैयार करबोंन?”
LUK 22:10 ओन ओको सी कह्यो, “देखो, नगर म सिरतोच एक आदमी पानी को घड़ा उठायो हुयो तुम्ख मिलेंन; जो घर म ऊ जायेंन तुम ओको पीछू चली जाजो,
LUK 22:11 अऊर ऊ घर को मालिक सी कहजो: ‘गुरु तोरो सी कहू हय कि ऊ पहुंनायी की जागा कित हय जेको म मय अपनो चेलावों को संग फसह को भोज खाऊ?’
LUK 22:12 ऊ तुम्ख एक सजी–सजायी बड़ो ऊपर को कमरा दिखायी देयेंन; उतच तैयार करजो।”
LUK 22:13 उन्न जाय क जसो यीशु न उन्को सी कह्यो होतो, वसोच पायो अऊर फसह को भोज तैयार करयो।
LUK 22:14 जब समय आय पहुंच्यो, त ऊ प्रेरितों को संग जेवन करन बैठ्यो।
LUK 22:15 अऊर ओन उन्को सी कह्यो, “मोख बड़ी इच्छा होती कि दु:ख भोगन सी पहिले यो फसह को भोज तुम्हरो संग खाऊ।
LUK 22:16 कहालीकि मय तुम सी कहू हय कि जब तक ऊ परमेश्वर को राज्य म पूरो नहीं होय तब तक मय ओख कभी नहीं खाऊं।”
LUK 22:17 तब यीशु न कटोरा लेय क धन्यवाद करयो अऊर कह्यो, “येख लेवो अऊर आपस म बाट लेवो।
LUK 22:18 कहालीकि मय तुम सी कहू हय कि जब तक परमेश्वर को राज्य नहीं आवय तब तक मय अंगूररस अब सी कभी नहीं पीऊं।”
LUK 22:19 तब ओन रोटी लियो, अऊर धन्यवाद कर क् तोड़ी, अऊर उन्ख यो कह्य क दियो, “यो मोरो शरीर आय जो तुम्हरो लायी दियो जावय हय : मोरी याद म असोच करतो रहो।”
LUK 22:20 योच रीति सी ओन जेवन को बाद कटोरा भी यो कहतो हुयो दियो, “यो कटोरा मोरो ऊ खून म नयी वाचा हय जो तुम्हरो लायी बहायो जावय हय।
LUK 22:21 “पर देखो! मोरो पकड़ावन वालो को हाथ मोरो संग मेज पर हय।
LUK 22:22 कहालीकि आदमी को बेटा त जसो ओको लायी ठहरायो गयो, वसोच मरेंन भी पर हाय ऊ आदमी पर जेकोसी ऊ पकड़वायो जावय हय!”
LUK 22:23 तब हि आपस म पूछताछ करन लग्यो कि हम म सी कौन हय, जो यो काम करेंन।
LUK 22:24 उन्म यो वाद–विवाद भी भयो कि उन म सी कौन बड़ो समझ्यो जावय हय।
LUK 22:25 यीशु न उन्को सी कह्यो, “गैरयहूदी को राजा उन पर प्रभुता करय हंय; अऊर जो उन पर अधिकार रखय हंय, उन्ख हि परोपकारी असो कह्य हंय।
LUK 22:26 पर तुम असो नहीं होनो चाहिये; बल्की जो तुम म बड़ो हय, ऊ छोटो को जसो अऊर जो मुख्य हय, ऊ सेवक को जसो बने।
LUK 22:27 कहालीकि बड़ो कौन हय, ऊ जो जेवन करन बैठ्यो हय, यां जो जेवन परोसय हय? का ऊ नहीं जो जेवन करन बैठ्यो हय? पर मय तुम्हरो बीच म सेवक को जसो हय।
LUK 22:28 “तुम ऊ हय, जो मोरी परीक्षावों म लगातार मोरो संग रह्यो;
LUK 22:29 अऊर जसो मोरो बाप न मोरो लायी राज्य पर अधिकार दियो हय, वसोच मय भी तुम्हरो लायी अधिकार देऊ,
LUK 22:30 ताकि तुम मोरो राज्य म मोरी मेज पर खावो–पीवो, बल्की सिंहासनों पर बैठ क इस्राएल को बारा पीढ़ी को न्याय करो।
LUK 22:31 “शिमोन, हे शिमोन! सुनो, शैतान न तुम सब लोगों ख परखन लायी मांग्यो हय कि बुरो म सी अच्छो अलग करय जसो किसान गहूं म सी भूसा अलग करय हय,
LUK 22:32 पर मय न तोरो लायी प्रार्थना करी कि तोरो विश्वास कमजोर नहीं होय; अऊर जब तय वापस फिरजो, त अपनो भाऊ ख हिम्मत देजो।”
LUK 22:33 पतरस न ओको सी कह्यो, “हे प्रभु, मय तोरो संग जेलखाना जान लायी, अऊर मरन लायी भी तैयार हय।”
LUK 22:34 यीशु न कह्यो, “हे पतरस, मय तोरो सी कहू हय कि अज रात मुर्गा बाग नहीं देयेंन जब तक कि तय तीन बार मोरो इन्कार नहीं कर लेजो कि तय मोख नहीं जानय।”
LUK 22:35 तब यीशु न चेलावों सी कह्यो, “जब मय न तुम्ख बटवा, झोली, अऊर जूता को बिना भेज्यो होतो, त का तुम्ख कोयी चिज की कमी भयी होती?” उन्न कह्यो, “कोयी चिज की नहीं।”
LUK 22:36 यीशु न उन्को सी कह्यो, “पर अब जेको जवर बटवा हय ऊ ओख लेवो अऊर वसोच झोली भी, अऊर जेको जवर तलवार नहीं हय ऊ अपनो कपड़ा बिक क एक लेय लेवो।
LUK 22:37 कहालीकि मय तुम सी कहू हय, कि यो जो शास्त्र म लिख्यो हय: ‘ऊ अपराधियों को संग गिन्यो गयो,’ ओको मोरो म पूरो होनो जरूरी हय; कहालीकि मोरो बारे म लिख्यो बाते पूरी होन पर हंय।”
LUK 22:38 चेलावों न कह्यो, “हे प्रभु! इत दोय तलवारे हंय।” ओन उन्को सी कह्यो, “बहुत हंय।”
LUK 22:39 तब ऊ बाहेर निकल क अपनी रीति को अनुसार जैतून को पहाड़ी पर गयो, अऊर चेलावों ओको पीछू भय गयो।
LUK 22:40 ऊ जागा पहुंच क ओन उन्को सी कह्यो, “प्रार्थना करो कि तुम परीक्षा म नहीं पड़ो।”
LUK 22:41 अऊर ऊ उन्को सी अलग लगभग गोटा फेकन की दूरी भर गयो, अऊर घुटना टेक क प्रार्थना करन लग्यो,
LUK 22:42 “हे मोरो बाप, यदि तय चाहवय त यो दु:ख सी भरयो कटोरा ख मोरो जवर सी हटाय ले, तब भी मोरी नहीं पर तोरीच इच्छा पूरी होय।”
LUK 22:43 तब स्वर्ग सी एक दूत ओख दिखायी दियो जो ओख सामर्थ देत होतो।
LUK 22:44 ऊ व्याकुल होय क अऊर भी जादा प्रार्थना करन लग्यो; अऊर ओको पसीना खून की बड़ी बड़ी थेम्ब को जसो जमीन पर गिर रह्यो होतो।
LUK 22:45 तब ऊ प्रार्थना सी उठ्यो अऊर अपनो चेलावों को जवर आय क उन्ख उदास को मारे म सोतो पायो।
LUK 22:46 अऊर उन्को सी कह्यो, “कहालीकि सोवय हय? उठो, प्रार्थना करो कि परीक्षा म मत पड़ो।”
LUK 22:47 यीशु यो कह्यच रह्यो होतो कि एक भीड़ आयी, अऊर उन बारा म सी एक जेको नाम यहूदा होतो उन्को आगु–आगु आय रह्यो होतो। ऊ यीशु को जवर आयो कि ओको चुम्मा ले।
LUK 22:48 यीशु न ओको सी कह्यो, “हे यहूदा, का तय चुम्मा ले क आदमी को बेटा ख पकड़ावय हय?”
LUK 22:49 ओको चेलावों न जो संग होतो जब देख्यो कि का होन वालो हय, त कह्यो, “हे प्रभु, का हम तलवार चलायबो?”
LUK 22:50 अऊर उन्म सी एक न महायाजक को सेवक पर तलवार चलाय क ओको दायो कान उड़ाय दियो।
LUK 22:51 येको पर यीशु न कह्यो, “अब बस करो।” अऊर ओको कान छूय क ओख ठीक कर दियो।
LUK 22:52 तब यीशु न मुख्य याजकों अऊर मन्दिर को पहरेदारों को मुखिया अऊर बुजूर्गों सी, जो ओको पर चढ़ आयो होतो, कह्यो, “का तुम मोख विद्रोही जान क तलवारे अऊर लाठियां धर क निकल्यो हय?
LUK 22:53 जब मय मन्दिर म हर दिन तुम्हरो संग होतो, त तुम न मोख पकड़न लायी कोशिश नहीं करयो; पर यो तुम्हरो समय हय, अऊर अन्धारो को अधिकार हय।”
LUK 22:54 तब हि ओख पकड़ क ले गयो, अऊर महायाजक को घर म लायो। पतरस दूरच दूर ओको पीछू–पीछू चलत होतो;
LUK 22:55 अऊर जब हि आंगन म आगी जलाय क एक संग बैठ्यो, त पतरस भी उन्को बीच म बैठ गयो।
LUK 22:56 तब एक दासी ओख आगी को प्रकाश म बैठ्यो देख क अऊर ओको तरफ जवर सी देख क कहन लग्यो, “यो भी त यीशु को संग होतो।”
LUK 22:57 पर पतरस न यो कह्य क इन्कार करयो, “हे नारी, मय ओख नहीं जानु हय।”
LUK 22:58 थोड़ी देर बाद कोयी अऊर न ओख देख क कह्यो, “तय भी त उन्म सी एक आय।” पतरस न कह्यो, “हे आदमी, मय नहीं आय।”
LUK 22:59 लगभग एक घंटा बीत जान को बाद एक आदमी जोर दे क कहन लग्यो, “निश्चय यो भी त ओको संग होतो कहालीकि यो भी गलीली हय।”
LUK 22:60 पतरस न कह्यो, “हे आदमी, मय नहीं जानु कि तय का कह्य हय!” ऊ कह्यच रह्यो होतो कि तुरतच मुर्गा न बाग दियो।
LUK 22:61 तब प्रभु न मुड़ क पतरस को तरफ देख्यो, अऊर पतरस ख प्रभु की ऊ बात याद आयी जो ओन कहीं होती: “अज भुन्सारे ख मुर्गा को बाग देन सी पहिले, तय तीन बार मोरो इन्कार करेंन।”
LUK 22:62 अऊर ऊ बाहेर निकल क सिसक-सिसक क रोयो।
LUK 22:63 हि लोग जो यीशु ख पकड़्यो हुयो होतो, ओख ठट्ठा कर क् पीट रह्यो होतो;
LUK 22:64 अऊर ओकी आंखी झाक क ओको सी पुच्छ्यो, “पता कर क् बता कि तोख कौन न मारयो!”
LUK 22:65 अऊर उन्न बहुत सी अऊर भी निन्दा की बाते ओको विरोध म कहीं।
LUK 22:66 जब दिन भयो त महासभा को बुजूर्ग अऊर मुख्य याजक अऊर धर्मशास्त्री जमा हुयो, अऊर ओख अपनी महासभा म लायो,
LUK 22:67 उन्न पुच्छ्यो हम्ख बताव, “का तय मसीह आय?” त हम सी कह्य दे यीशु न उन्ख उत्तर दियो; “यदि मय तुम सी कहूं फिर भी तुम विश्वास नहीं करो!” ओन उन्को सी कह्यो, “यदि मय तुम सी कहूं, त विश्वास नहीं करजो;
LUK 22:68 अऊर यदि मय प्रश्न पूछू, त तुम उत्तर नहीं दे सको।
LUK 22:69 पर अब सी आदमी को बेटा सर्वशक्तिमान परमेश्वर को दायो तरफ बैठ्यो रहेंन।”
LUK 22:70 उन्न कह्यो, “त का तय परमेश्वर को बेटा हय?” ओन उत्तर दियो, “मय हय असो तुम खुदच कह्य हय, कहालीकि मय उच हय।”
LUK 22:71 तब उन्न कह्यो, “अब हम्ख गवाही की का जरूरत हय; कहालीकि हम न खुदच ओको मुंह सी सुन लियो हय।”
LUK 23:1 तब पूरी सभा उठ क यीशु ख पिलातुस को जवर ले गयो।
LUK 23:2 हि यो कह्य क ओको पर दोष लगान लग्यो: “हम न येख हमरो यहूदी लोगों ख बहकातो, अऊर रोमी राजा ख कर देन सी मना करत होतो, अऊर खुद ख मसीह, एक राजा कहतो सुन्यो हय।”
LUK 23:3 पिलातुस न ओको सी पुच्छ्यो, “का तय यहूदियों को राजा हय?” ओन ओख उत्तर दियो, “तय खुदच कह्य रह्यो हय।”
LUK 23:4 तब पिलातुस न मुख्य याजकों अऊर भीड़ सी कह्यो, “मय यो आदमी म कोयी दोष लगावन को वजह नहीं देखूं हय।”
LUK 23:5 पर हि अऊर भी हिम्मत सी कहन लग्यो, “यो गलील सी ले क इत तक, पूरो यहूदिया प्रदेश म सिखाय क लोगों ख भड़कात होतो।”
LUK 23:6 यो सुन क पिलातुस न पुच्छ्यो, “का यो आदमी गलील को आय?”
LUK 23:7 अऊर यो जान क कि ऊ हेरोदेस को अधिकार सीमा को हय, ओख हेरोदेस को जवर भेज दियो, कहालीकि उन दिनो म ऊ भी यरूशलेम म होतो।
LUK 23:8 हेरोदेस यीशु ख देख क बहुतच खुश भयो, कहालीकि ऊ बहुत दिनो सी ओख देखन चाहत होतो; येकोलायी कि ओको बारे म सुन्यो होतो, अऊर ओको सी कुछ चिन्ह चमत्कार देखन की आशा रखत होतो।
LUK 23:9 ऊ ओको सी बहुत सो सवाल पुच्छ्यो, पर ओन ओख कुछ भी उत्तर नहीं दियो।
LUK 23:10 मुख्य याजक अऊर धर्मशास्त्री खड़ो होय क यीशु पर बहुत दोष लगावत रह्यो।
LUK 23:11 तब हेरोदेस न अपनो सिपाहियों को संग ओको अपमान कर क् ठट्ठा करयो, अऊर सुन्दर कपड़ा पहिनायो अऊर ओख पिलातुस को जवर लौटाय दियो।
LUK 23:12 उच दिन सी पिलातुस अऊर हेरोदेस संगी बन गयो; येको सी पहिले हि एक दूसरों को दुश्मन होतो।
LUK 23:13 पिलातुस न मुख्य याजकों अऊर मुखिया अऊर लोगों ख बुलाय क,
LUK 23:14 अऊर उन्को सी कह्यो, “तुम यो आदमी ख लोगों को बहकावन वालो हय यो कह्य क मोरो जवर लायो हय, अऊर देखो, मय न तुम्हरो सामने ओकी जांच करी, पर जो बातों को तुम ओको पर दोष लगावय हय उन बातों को बारे म मय न ओको म कुछ भी दोष नहीं पायो हय;
LUK 23:15 अऊर न त हेरोदेस राजा ख ओको म कोयी दोष मिल्यो, येकोलायी ओन ओख हमरो जवर लौटाय दियो हय: अऊर देखो, ओको म असो कोयी दोष नहीं कि ऊ मृत्यु की सजा को लायक ठहरायो जायेंन।
LUK 23:16 येकोलायी मय ओख पिटवाय क छोड़ देऊ हय।”
LUK 23:17 पर्व को दिन पिलातुस ख उन्को लायी एक कैदी ख छोड़नो पड़त होतो।
LUK 23:18 तब सब मिल क चिल्लाय उठ्यो, “येख मार डालो, अऊर हमरो लायी बरअब्बा ख छोड़ दे!”
LUK 23:19 ऊ कोयी दंगा को वजह जो नगर म भयो होतो, अऊर हत्या को वजह जेलखाना म डाल्यो गयो होतो।
LUK 23:20 पर पिलातुस न यीशु ख छोड़न की इच्छा सी लोगों ख फिर सी समझायो,
LUK 23:21 पर उन्न फिर सी चिल्लाय क कह्यो, “ओख क्रूस पर चढ़ावों, क्रूस पर!”
LUK 23:22 ओन तीसरो बार उन्को सी कह्यो, “कहालीकि, ओन कौन सो अपराध करयो हय? मय न ओको म मृत्यु दण्ड को लायक कोयी बात नहीं पायी। येकोलायी मय ओख कोड़ा मरवाय क छोड़ देऊ हय।”
LUK 23:23 पर हि चिल्लाय-चिल्लाय क पीछू पड़ गयो कि ऊ क्रूस पर चढ़ायो जाये, अऊर उन्को चिल्लानो सही भय गयो।
LUK 23:24 येकोलायी पिलातुस न आज्ञा दियो कि उन्की मांग को अनुसार करयो जाये।
LUK 23:25 ओन ऊ आदमी ख जो दंगा फसाद अऊर हत्या को वजह जेलखाना म डाल्यो गयो होतो, अऊर जेक हि मांगत होतो, छोड़ दियो। यीशु ख उन्की इच्छा को अनुसार सौंप दियो ताकि जो चाहे ऊ कर सके।
LUK 23:26 जब हि यीशु ख लि जात होतो, त उन्न शिमोन नाम को एक कुरेनी ख जो शहर सी आय रह्यो होतो, पकड़ क ओको पर क्रूस लाद दियो कि ओख यीशु को पीछू–पीछू धर क चलन लगे।
LUK 23:27 लोगों की बड़ी भीड़ ओको पीछू भय गयी अऊर ओको म कुछ बाईयां भी होती जो ओको लायी छाती पीटती अऊर शोक करत होती।
LUK 23:28 यीशु न ओको तरफ मुड़ क कह्यो, “हे यरूशलेम की टुरियों, मोरो लायी मत रोवो; पर अपनो अऊर अपनो बच्चां लायी रोवो।
LUK 23:29 कहालीकि देखो, असो दिन आय रह्यो हंय, जेको म लोग कहेंन, ‘धन्य हंय हि बांझ अऊर हि गर्भ जेन जनम नहीं दियो अऊर हि स्तन जेन कभी दूध नहीं पिलायो।’
LUK 23:30 ऊ समय ‘हि पहाड़ी सी कहन लगेंन कि हम पर गिर, अऊर टेकरा सी कि हम्ख झाक लेवो।’
LUK 23:31 यदि जब हि हरो झाड़ को संग असो करय हंय, त सूख्यो झाड़ को संग का कुछ नहीं करयो जायेंन?”
LUK 23:32 हि दूसरों दोय आदमी ख भी जो अपराधी होतो यीशु को संग मारन लायी ले गयो।
LUK 23:33 जब हि ऊ जागा जेक खोपड़ी कह्य हंय पहुंच्यो, त उन्न उत ओख अऊर उन अपराधियों ख भी, एक ख दायो तरफ दूसरों ख बायो तरफ क्रूस पर चढ़ायो।
LUK 23:34 तब यीशु न कह्यो, “हे बाप, इन्क माफ कर, कहालीकि हि जानय नहीं कि का कर रह्यो हंय।” अऊर उन्न चिट्ठी डाल क ओको कपड़ा बाट लियो।
LUK 23:35 लोग खड़ो–खड़ो देख रह्यो होतो, अऊर यहूदी मुखिया भी ठट्ठा कर कर क् कहत होतो : “येन दूसरों ख बचायो, यदि यो परमेश्वर को मसीह हय, अऊर ओको चुन्यो हुयो हय, त अपनो आप ख बचाय ले।”
LUK 23:36 सिपाही भी जवर आय क अऊर कड़वाहट सिरका दे क ओको ठट्ठा कर क् कहत होतो,
LUK 23:37 “यदि तय यहूदियों को राजा हय, त अपनो आप ख बचाव!”
LUK 23:38 अऊर ओको ऊपर एक दोष–पत्र भी लग्यो होतो : “यो यहूदियों को राजा हय।”
LUK 23:39 जो अपराधी उत लटकायो गयो होतो, उन्म सी एक न ओकी निन्दा कर क् कह्यो, “का तय मसीह नहीं? त फिर अपनो आप ख अऊर हम्ख बचाव!”
LUK 23:40 येको पर दूसरों अपराधी न ओख डाट क कह्यो, “का तय परमेश्वर सी भी नहीं डरय? तय भी त उच सजा पा रह्यो हय,
LUK 23:41 अऊर हम त न्याय को अनुसार सजा पा रह्यो हंय, कहालीकि हम अपनो कामों को ठीक फर पा रह्यो हंय; पर येन कोयी अपराध नहीं करयो।”
LUK 23:42 तब ओन कह्यो, “हे यीशु, जब तय अपनो राज्य म आयेंन, त मोरी याद करजो।”
LUK 23:43 यीशु न ओको सी कह्यो, “मय तोरो सी सच कहू हय कि अजच तय मोरो संग स्वर्गलोक म होजो।”
LUK 23:44 दोपहर लगभग बारा बजे सी तीन बजे दिन तक सारो देश म अन्धारो छायो रह्यो,
LUK 23:45 कहालीकि सूरज को प्रकाश कम होतो रह्यो, अऊर मन्दिर को परदा बीच सी दोय भाग म फट गयो,
LUK 23:46 अऊर यीशु न ऊचो आवाज सी पुकार क कह्यो, “हे पिता, मय अपनी आत्मा तोरो हाथ म सौंप्यो हय।” अऊर यो कह्य क मर गयो।
LUK 23:47 सूबेदार न, जो कुछ हुयो होतो देख क परमेश्वर की महिमा करी, अऊर कह्यो, “निश्चय यो आदमी सच्चो होतो।”
LUK 23:48 अऊर भीड़ जो यो देखन ख जमा भयी होती, यो घटना ख देख क छाती पीटती हुयी लौट गयी।
LUK 23:49 पर ओको सब जान पहिचान वालो, अऊर जो बाईयां गलील सी ओको पीछू आयी होती, दूर खड़ी हुयी यो सब देख रही होती।
LUK 23:50 उत यूसुफ नाम को महासभा को एक सदस्य होतो जो भलो अऊर सच्चो पुरुष होतो
LUK 23:51 अऊर उन्को फैसला अऊर उन्को यो काम सी सहमत नहीं होतो। ऊ यहूदियों को शहर अरिमतिया नगर को रहन वालो अऊर परमेश्वर को राज्य की रस्ता देखन वालो होतो।
LUK 23:52 ओन पिलातुस को जवर जाय क यीशु को मरयो शरीर मांग्यो;
LUK 23:53 अऊर मरयो शरीर उतार क मलमल को कफन म लपेट्यो, अऊर एक कब्र म रख्यो, जो चट्टान म खोदी हुयी होती; अऊर ओको म कोयी कभी नहीं रख्यो गयो होतो।
LUK 23:54 ऊ तैयारी को दिन होतो, अऊर आराम को दिन सुरूवात होन पर होतो।
LUK 23:55 उन बाईयों न जो ओको संग गलील सी आयी होती, यूसुफ को पीछू पीछू जाय क ऊ कब्र ख देख्यो, अऊर यो भी कि ओको लाश कसो तरह सी रख्यो गयो हय।
LUK 23:56 तब उन्न वापस घर लौट क सुगन्धित अत्तर अऊर मसाला तैयार करयो जो लाश पर लगावन लायी होतो; अऊर आराम को दिन उन्न आज्ञा को अनुसार आराम करयो।
LUK 24:1 पर हप्ता को पहिलो दिन ख बड़ो भुन्सारो हि बाईयां सुगन्धित अत्तर अऊर मसाला ख जो उन्न तैयार करी होती, ले क कब्र पर आयी।
LUK 24:2 जो गोटा कब्र को द्वार पर ढक्यो हुयो होतो उन्न ओख सरक्यो हुयो पायो,
LUK 24:3 जब हि अन्दर गयी तब प्रभु यीशु को शव नहीं देख्यो।
LUK 24:4 जब हि या बात सी उलझन म पड़ी होती त देख्यो, अचानक दोय पुरुष सफेद उज्वल कपड़ा पहिन्यो हुयो उन्को जवर आय क खड़ो भयो।
LUK 24:5 जब बाईयां डर क जमीन को तरफ मुंह झुकायी हुयी होती, त उन पुरुषों न उन्को सी कह्यो, “तुम जीन्दो ख मरयो हुयो म कहालीकि ढूंढय हय?
LUK 24:6 ऊ इत नहाय, पर जीन्दो भय गयो हय। याद करो कि ओन गलील म रहतो हुयो तुम सी कह्यो होतो,
LUK 24:7 ‘जरूरी हय कि मय आदमी को बेटा पापियों को हाथ सी पकड़वायो जाऊं, अऊर क्रूस पर चढ़ायो जाऊं, अऊर तीसरो दिन जीन्दो होऊं।’”
LUK 24:8 तब ओकी बाते उन्ख याद आयी,
LUK 24:9 अऊर कब्र सी लौट क उन्न उन ग्यारा चेलावों ख, अऊर दूसरों सब ख, या सब बाते कह्य सुनायी।
LUK 24:10 जिन्न प्रेरितों सी या बाते कहीं हि मरियम मगदलीनी अऊर योअन्ना अऊर याकूब की माय मरियम अऊर उन्को संग की दूसरी बाईयां भी होती।
LUK 24:11 पर या बाते उन्ख फालतु की लगी, अऊर उन्न उन्को विश्वास नहीं करी।
LUK 24:12 तब पतरस उठ क कब्र पर दौड़त गयो, अऊर झुक क केवल कपड़ा पड़्यो देख्यो, अऊर जो भयो होतो ओको सी अचम्भा करतो हुयो अपनो घर चली गयो।
LUK 24:13 उच दिन उन्म सी दोय लोग इम्माऊस नाम को एक गांव क जाये रह्यो होतो, जो यरूशलेम सी कोयी ग्यारा किलोमीटर की दूरी पर होतो।
LUK 24:14 हि इन सब बातों पर जो भयी होती, आपस म बातचीत करतो जाय रह्यो होतो,
LUK 24:15 अऊर जब हि आपस म बातचीत अऊर चर्चा कर रह्यो होतो, त यीशु आस पास आय क उन्को संग होय गयो।
LUK 24:16 पर उन्की आंखी असी बन्द कर दी होती कि ओख पहिचान नहीं सक्यो।
LUK 24:17 यीशु न उन्को सी पुच्छ्यो, “या का बाते आय, जो तुम चलतो चलतो आपस म करय हय?” हि उदास सी खड़ो रह्य गयो।
LUK 24:18 यो सुन क उन्म सी क्लियोपास नाम को एक आदमी न कह्यो, “का तय यरूशलेम म अकेलो यात्री हय, जो नहीं जानय कि इन दिनो म उन्म का का भयो हय?”
LUK 24:19 ओन उन्को सी पुच्छ्यो, “कौन सी बाते?” उन्न ओको सी कह्यो, “यीशु नासरी को बारे म जो परमेश्वर अऊर सब लोगों को जवर काम अऊर वचन म सामर्थी भविष्यवक्ता होतो,
LUK 24:20 अऊर मुख्य याजकों अऊर हमरो मुखिया न ओख पकड़वाय दियो कि ओको पर मृत्यु की आज्ञा दियो जाये; अऊर ओख क्रूस पर चढ़वायो।
LUK 24:21 पर हम्ख आशा होती कि योच इस्राएल लोगों ख छुटकारा देयेंन। हि सब बात को अलावा या घटना ख भयो तीसरो दिन हय,
LUK 24:22 अऊर हम म सी कुछ बाईयों न भी हम्ख आश्चर्य म डाल दियो हय, जो भुन्सारे ख कब्र पर गयी होती;
LUK 24:23 अऊर जब यीशु को लाश नहीं पायो त यो कहत आयी कि हम न स्वर्गदूतों को दर्शन पायो, जिन्न कह्यो कि ऊ जीन्दो हय।
LUK 24:24 तब हमरो संगियों म सी कुछ एक कब्र पर गयो, अऊर जसो बाईयों न कह्यो होतो वसोच पायो; पर ओख नहीं देख्यो।”
LUK 24:25 तब यीशु न उन्को सी कह्यो, “हे निर्बुद्धियों, अऊर भविष्यवक्तावों की सब बातों पर विश्वास करनो म मतिमन्द लोगों!
LUK 24:26 का जरूरी नहीं होतो कि मसीह यो दु:ख उठाय क अपनी महिमा म सिरन लग्यो?”
LUK 24:27 तब ओन मूसा सी अऊर सब भविष्यवक्तावों सी सुरूवात कर क् पूरो पवित्र शास्त्र म सी अपनो बारे म लिख्यो बातों को मतलब, उन्ख समझाय दियो।
LUK 24:28 इतनो म हि ऊ गांव को जवर पहुंच्यो जित हि जाय रह्यो होतो, अऊर ओको ढंग सी असो जान पड़्यो कि ऊ आगु बढ़न चाहवय हय।
LUK 24:29 पर उन्न यो कह्य क ओख बिनती कर क् रोक्यो, “हमरो संग रह, कहालीकि शाम भय गयी हय अऊर दिन अब डुब रह्यो हय।” तब ऊ उन्को संग रहन लायी अन्दर गयो।
LUK 24:30 जब ऊ उन्को संग जेवन करन बैठ्यो, त ओन रोटी लेय क परमेश्वर ख धन्यवाद करयो अऊर ओख तोड़ क उन्ख देन लग्यो।
LUK 24:31 तब उन्की आंखी खुल गयी; अऊर उन्न ओख पहिचान लियो, अऊर ऊ उन्की आंखी सी लूक गयो।
LUK 24:32 उन्न आपस म कह्यो, “जब ऊ रस्ता म हम सी बाते करत होतो अऊर पवित्र शास्त्र को मतलब हम्ख समझावत होतो, त का हमरो मन म उत्सुक नहीं होय रह्यो होतो?”
LUK 24:33 हि उच समय उठ क यरूशलेम ख फिर सी गयो, अऊर उन ग्यारा चेलावों अऊर उन्को संगियों ख एक संग जमा पायो।
LUK 24:34 हि कहत होतो, “प्रभु सच म जीन्दो भयो हय, अऊर शिमोन पतरस ख दिखायी दियो हय!”
LUK 24:35 अऊर हि दोयी रस्ता को अपनो अनुभव ख अऊर यो कि रोटी तोड़तो समय उन्न यीशु ख कसो पहिचान्यो गयो होतो, बतावन लग्यो।
LUK 24:36 जब हि या बाते कहतच रह्यो होतो कि ऊ अचानक उन्को बीच म आय खड़ो भयो, अऊर उन्को सी कह्यो, “तुम्ख शान्ति मिले।”
LUK 24:37 पर हि घबराय गयो अऊर डर गयो, अऊर समझ्यो कि हम कोयी भूत ख देख रह्यो हंय।
LUK 24:38 ओन उन्को सी कह्यो, “कहाली डरय हय? अऊर तुम्हरो मन म कहालीकि सक आवय हंय?
LUK 24:39 मोरो हाथ अऊर मोरो पाय ख देखो कि मय उच आय। मोख छूय क देखो, कहालीकि भूत की हड्डी मांस नहीं होवय जसो मोर म देखय हय।”
LUK 24:40 यो कह्य क ओन उन्ख अपनो हाथ पाय दिखायो।
LUK 24:41 तब खुशी को मारे उन्ख अभी भी विश्वास नहीं होय रह्यो होतो, अऊर हि अचम्भा करत होतो, त ओन उन्को सी पुच्छ्यो, “का इत तुम्हरो जवर कुछ जेवन हय?”
LUK 24:42 उन्न ओख भुजी हुयी मच्छी को टुकड़ा दियो।
LUK 24:43 ओन टुकड़ा ख उन्को आगु खायो।
LUK 24:44 तब ओन उन्को सी कह्यो, “या मोरी ऊ बाते हंय, जो मय न तुम्हरो संग रहतो हुयो तुम सी कहीं होती कि जरूरी हय कि जितनी बाते मूसा कि व्यवस्था अऊर भविष्यवक्तावों अऊर भजनों की किताब म मोरो बारे म लिख्यो हंय, सब पूरी होय।”
LUK 24:45 तब ओन धर्म शास्त्र जानन लायी उन्की बुद्धि खोल दियो,
LUK 24:46 अऊर ओन कह्यो, “यो लिख्यो हय कि मसीह दु:ख उठायेंन, अऊर तीसरो दिन मरयो हुयो म सी जीन्दो होयेंन,
LUK 24:47 अऊर यरूशलेम सी ले क सब भाषा को लोगों म पाप करनो बन्द करे अऊर परमेश्वर उन्को पापों ख माफ करेंन, यो प्रचार ओकोच नाम सी करयो जायेंन।
LUK 24:48 तुम इन पूरी बातों को गवाह हय।
LUK 24:49 जेकी प्रतिज्ञा मोरो बाप न नहीं करी हय, मय ओख तुम पर ऊपर सी उतारू अऊर जब तक स्वर्ग सी सामर्थ नहीं पावों, तब तक तुम योच नगर म रुक्यो रहो।”
LUK 24:50 तब ऊ उन्ख बैतनिय्याह गांव तक बाहेर ले गयो, अऊर अपनो हाथ उठाय क उन्ख आशीर्वाद दियो;
LUK 24:51 अऊर उन्ख आशीर्वाद देतो हुयो ऊ उन्को सी अलग भय गयो अऊर स्वर्ग पर उठाय लियो गयो।
LUK 24:52 तब हि ओकी आराधना कर क् बड़ो खुशी सी यरूशलेम ख लौट गयो;
LUK 24:53 अऊर हि लगातार मन्दिर म हाजीर होय क परमेश्वर को धन्यवाद करत होतो।
JOH 1:1 सुरूवात म शब्द होतो, अऊर शब्द परमेश्वर को संग होतो, अऊर शब्द परमेश्वर होतो।
JOH 1:2 योच शब्द सुरूवात सीच परमेश्वर को संग होतो।
JOH 1:3 अऊर सब कुछ ओको द्वारा पैदा भयो, अऊर जो कुछ पैदा भयो हय ओको म सी कोयी भी चिज ओको बिना नहीं भयी।
JOH 1:4 शब्द जीवन को स्त्रोत होतो अऊर यो जीवन म आदमियों लायी प्रकाश लायो।
JOH 1:5 प्रकाश अन्धारो म चमकय हय, अऊर अन्धारो ओख हराय नहीं सकय।
JOH 1:6 परमेश्वर को तरफ सी एक सन्देश लावन वालो ख भेज्यो जेको नाम यूहन्ना होतो।
JOH 1:7 ऊ प्रकाश की गवाही देन आयो, ताकि सब लोग ओको सन्देश सुन क विश्वास करे।
JOH 1:8 ऊ खुदच त प्रकाश नहीं होतो, पर ऊ प्रकाश की गवाही देन लायी आयो होतो।
JOH 1:9 यो सच्चो प्रकाश हय जो हर एक आदमी ख प्रकाशित करय हय, जो जगत म आवन वालो होतो।
JOH 1:10 ऊ शब्द जगत म होतो, अऊर तब भी परमेश्वर न ओको द्वारा जगत बनायो, फिर भी जगत न ओख नहीं पहिचान्यो।
JOH 1:11 ऊ अपनो खुद को लोगों को जवर आयो पर ओको अपनो लोगों न ओख स्वीकार नहीं करयो।
JOH 1:12 पर जितनो न ओख स्वीकार करयो, मतलब उन्ख जो ओको नाम पर विश्वास रखय हय, ओन उन्ख परमेश्वर की सन्तान होन को अधिकार दियो।
JOH 1:13 हि नहीं त स्वाभाविक तरीका सी परमेश्वर की सन्तान बने मतलब मानविय बाप सी नहीं जनम्यो बल्की परमेश्वर खुद ओको बाप होतो।
JOH 1:14 अऊर वचन शरीर रूप धारन करयो; अऊर अनुग्रह अऊर सच्चायी सी परिपूर्ण होय क हमरो बीच म जीवन जियो, अऊर हम न ओकी असी महिमा देखी, जसो बाप को एकलौतो बेटा की।
JOH 1:15 यूहन्ना न ओको बारे म गवाही दी, अऊर पुकार क कह्यो, “यो उच आय, जेको मय न वर्नन करयो कि जो मोरो बाद आय रह्यो हय, ऊ मोरो सी बढ़ क हय कहालीकि ऊ मोरो जनम सी पहिले होतो।”
JOH 1:16 कहालीकि परमेश्वर न अनुग्रह की परिपूर्णता सी हम्ख आशिषित करयो मतलब आशिषों सी भरपूर करयो।
JOH 1:17 येकोलायी कि व्यवस्था त मूसा को द्वारा दी गयी, पर अनुग्रह अऊर सच्चायी यीशु मसीह को द्वारा आयी।
JOH 1:18 परमेश्वर ख कोयी न कभी नहीं देख्यो। एकलौतो बेटा, जो परमेश्वर को बराबर हय अऊर बाप को बाजू म बैठ्यो हय, उच बेटा पर परमेश्वर न अपनो आप ख प्रगट करयो।
JOH 1:19 यूहन्ना को सन्देश यो आय, कि जब यहूदी अधिकारियों न यरूशलेम सी याजकों अऊर लेवियों ख ओको सी यो पूछन लायी भेज्यो, “तय कौन आय?”
JOH 1:20 यूहन्ना न उत्तर देन लायी इन्कार नहीं करयो, पर ओन स्पष्टता अऊर खुल क मान लियो, “मय मसीह नोहोय।”
JOH 1:21 तब उन्न ओको सी पुच्छ्यो, “फिर तय कौन आय? का तय एलिय्याह आय?” ओन कह्यो, “मय नोहोय। त का तय ऊ भविष्यवक्ता आय?” ओन उत्तर दियो, “नहीं।”
JOH 1:22 तब उन्न ओको सी पुच्छ्यो, “फिर तय कौन आय? ताकि हम अपनो भेजन वालो ख उत्तर देबो। तय अपनो बारे म का कह्य हय?”
JOH 1:23 यूहन्ना न कह्यो, “जसो यशायाह भविष्यवक्ता न कह्यो हय: ‘मय जंगल म एक पुकारन वालो को आवाज आय कि तुम प्रभु को रस्ता सीधो करो।’”
JOH 1:24 हि सन्देश देन वालो जो फरीसियों को तरफ सी भेज्यो गयो होतो।
JOH 1:25 उन्न यूहन्ना सी यो प्रश्न पुच्छ्यो, “यदि तय मसीह नोहोय, अऊर नहीं एलिय्याह, अऊर नहीं ऊ भविष्यवक्ता आय, त फिर बपतिस्मा कहाली देवय हय?”
JOH 1:26 यूहन्ना न उन्ख उत्तर दियो, “मय त पानी सी बपतिस्मा देऊ हय, पर तुम्हरो बीच म एक आदमी खड़ो हय जेक तुम नहीं जानय।
JOH 1:27 यानेकि मोरो बाद ऊ आवन वालो हय, पर मय ओको चप्पल को बन्ध खोलन लायक नहाय।”
JOH 1:28 या बाते यरदन नदी को पार बैतनिय्याह नगर म भयी, जित यूहन्ना बपतिस्मा देत होतो।
JOH 1:29 दूसरों दिन ओन यीशु ख अपनो तरफ आवतो देख क कह्यो, “देखो, यो परमेश्वर को मेम्ना आय जो जगत को पाप उठाय लिजावय हय।
JOH 1:30 यो उच आय जेको बारे म मय न कह्यो होतो, ‘एक आदमी मोरो पीछू आवय हय जो मोरो सी महान हय, कहालीकि ऊ मोरो सी पहिले अस्तित्व म होतो।’
JOH 1:31 मोख मालूम नहीं होतो ऊ कौन आय, पर येकोलायी मय पानी सी बपतिस्मा देतो हुयो आयो कि ऊ इस्राएल पर प्रगट होय जाय।”
JOH 1:32 अऊर यूहन्ना न या गवाही दी: “मय न पवित्र आत्मा ख कबूत्तर को जसो स्वर्ग सी उतरतो देख्यो हय, अऊर ऊ ओको पर ठहर गयो।
JOH 1:33 मोख अभी भी मालूम नहीं होतो, पर ऊ एक होतो परमेश्वर, जेन मोख पानी सी बपतिस्मा देन ख भेज्यो, ओनच मोरो सी कह्यो, ‘जेको पर तय आत्मा ख उतरतो अऊर ठहरतो देखो, उच पवित्र आत्मा सी बपतिस्मा देन वालो आय।’
JOH 1:34 अऊर मय न देख्यो, अऊर गवाही देऊ हय कि योच परमेश्वर को टुरा आय।”
JOH 1:35 दूसरों दिन फिर यूहन्ना अऊर ओको चेला म सी दोय लोग खड़ो भयो होतो,
JOH 1:36 जब यीशु जो जाय रह्यो होतो, देख क कह्यो, “देखो, यो परमेश्वर को मेम्ना आय।”
JOH 1:37 तब हि दोयी चेला ओकी यो सुन क यीशु को पीछू चली गयो।
JOH 1:38 यीशु न मुड़ क उन्ख पीछू आवतो देख्यो अऊर उन्को सी कह्यो, “तुम कौन की खोज म हय?” उन्न ओको सी कह्यो, “हे रब्बी यानेकि हे गुरु, तय कित रह्य हय?”
JOH 1:39 यीशु न उन्को सी कह्यो, “आवो, अऊर देखो।” तब उन्न जाय क ओकी रहन की जागा देखी, अऊर ऊ दिन ओको संग रह्यो। लगभग शाम को चार बज्यो होतो।
JOH 1:40 यूहन्ना की बात सुन क यीशु को पीछू जान वालो म सी एक जो शिमोन पतरस को भाऊ अन्द्रियास होतो।
JOH 1:41 ओन पहिले अपनो सगो भाऊ शिमोन सी मिल क ओको सी कह्यो, “हम ख मसीहा, मतलब ख्रिस्त, मिल गयो।”
JOH 1:42 हि ओख यीशु को जवर लायो। यीशु न ओख देख क कह्यो, “तय यूहन्ना को टुरा शिमोन आय : तय कैफा कहलाजो। मतलब पतरस जेको अर्थ चट्टान आय।”
JOH 1:43 दूसरों दिन यीशु न गलील ख जान को निश्चय करयो। ऊ फिलिप्पुस सी मिल्यो अऊर कह्यो, “मोरो संग आव।”
JOH 1:44 फिलिप्पुस, यो अन्द्रियास अऊर पतरस को नगर बैतसैदा को निवासी होतो।
JOH 1:45 फिलिप्पुस नतनएल सी मिल्यो अऊर ओको सी कह्यो, “जेको वर्नन मूसा न व्यवस्था म अऊर भविष्यवक्तावों न करयो हय, ऊ हम्ख मिल गयो; ऊ यूसुफ को टुरा, यीशु नासरत नगर सी आय।”
JOH 1:46 नतनएल न ओको सी कह्यो, “का कोयी अच्छी चिज नासरत सी निकल सकय हय?” फिलिप्पुस न ओको सी कह्यो, “चल क देख ले।”
JOH 1:47 यीशु न नतनएल ख अपनो तरफ आवता देख क ओको बारे म कह्यो, “देखो, यो सच्चो इस्राएली आय; येको म कोयी कपट नहाय!”
JOH 1:48 नतनएल न ओको सी कह्यो, “तय मोख कसो जानय हय?” यीशु न ओख उत्तर दियो, “येको सी पहिले कि फिलिप्पुस न तोख बुलायो, जब तय अंजीर को झाड़ को खल्लो होतो, तब मय न तोख देख्यो होतो।”
JOH 1:49 नतनएल न ओख उत्तर दियो, “हे गुरु, तय परमेश्वर को बेटा आय; तय इस्राएल को राजा आय।”
JOH 1:50 यीशु न ओख उत्तर दियो, “मय न जो तोरो सी कह्यो कि मय न तोख अंजीर को झाड़ को खल्लो देख्यो, का तय येकोलायी विश्वास करय हय? तय येको सी भी बड़ो-बड़ो काम देखजो।”
JOH 1:51 फिर ओको सी कह्यो, “मय तुम सी सच सच कहू हय कि तुम स्वर्ग ख खुल्यो हुयो, अऊर परमेश्वर को स्वर्गदूतों ख आदमी को बेटा को ऊपर उतरतो अऊर ऊपर जातो देखो।”
JOH 2:1 फिर तीसरो दिन गलील प्रदेश को काना नगर म एक बिहाव होतो, अऊर यीशु की माय भी उत होती।
JOH 2:2 यीशु अऊर ओको चेला भी ऊ बिहाव म निमन्त्रित होतो।
JOH 2:3 जब अंगूररस खतम भय गयो, त यीशु की माय न ओको सी कह्यो, “उन्को जवर अंगूरीरस नहीं रह्यो।”
JOH 2:4 यीशु न उत्तर दियो “हे बाई, मोख का करनो हय मोख मत बतावो? अभी मोरो समय नहीं आयो।”
JOH 2:5 यीशु की माय न सेवकों सी कह्यो, “जो कुछ ऊ तुम सी कहेंन, उच करो।”
JOH 2:6 उत यहूदियों ख हाथ पाय धोय क शुद्ध करन की रीति को अनुसार गोटा को छे घड़ा रख्यो होतो, जेको म सौ लीटर पानी समावत होतो।
JOH 2:7 यीशु न सेवकों सी कह्यो, “घड़ा म पानी भर देवो।” उन्न उन्ख लबालब भर दियो।
JOH 2:8 तब ओन उन्को सी कह्यो, “थोड़ो सो पानी निकाल क भोज को मुखिया को जवर ले जावो।” अऊर हि ले गयो।
JOH 2:9 जब भोज को मुखिया न ऊ पानी चख्यो, जो अंगूररस बन गयो होतो अऊर नहीं जानत होतो कि ऊ कित सी आयो हय पर जिन सेवकों न पानी निकाल्यो होतो हि जानत होतो, त भोज को मुखिया न दूल्हा ख बुलायो,
JOH 2:10 अऊर ओको सी कह्यो “हर एक आदमी पहिले अच्छो अंगूररस देवय हय, अऊर जब लोग पी क सन्तुष्ट होय जावय हंय, तब फिको देवय हय; पर तय न अच्छो अंगूररस अभी तक रख्यो हय।”
JOH 2:11 यीशु न गलील को काना नगर म अपनो यो पहिलो चिन्ह चमत्कार दिखाय क अपनी महिमा प्रगट करी अऊर ओको चेलावों न ओको पर विश्वास करयो।
JOH 2:12 येको बाद यीशु अऊर ओकी माय अऊर ओको भाऊ अऊर ओको चेला कफरनहूम नगर ख गयो अऊर उत कुछ दिन रह्यो।
JOH 2:13 यहूदियों को फसह को त्यौहार जवर होतो, अऊर यीशु यरूशलेम नगर ख गयो।
JOH 2:14 ओन मन्दिर म बईल, मेंढा अऊर कबूत्तर ख बेचन वालो अऊर पैसा बदलन वालो ख व्यापार करतो हुयो बैठ्यो देख्यो।
JOH 2:15 तब ओन रस्सियों को कोड़ा बनाय क, सब मेंढी अऊर बईल ख मन्दिर सी निकाल दियो, अऊर पैसा बदलन वालो को पैसा बगराय दियो अऊर पीढ़ा ख उलटाय दियो,
JOH 2:16 अऊर कबूत्तर बेचन वालो सी कह्यो, “इन्क इत सी जल्दी लि जावो। मोरो बाप को घर ख बजार को घर मत बनावो।”
JOH 2:17 तब ओको चेलावों ख याद आयो कि शास्त्र म लिख्यो हय, “तोरो घर की धुन मोख आगी को जसो जलाय डालेंन।”
JOH 2:18 येको पर यहूदी अधिकारियों न यीशु सी प्रश्न पुच्छ्यो, “तय हम्ख कौन सो चिन्ह चमत्कार दिखाय सकय हय, जेकोसी तोरो यो करन को अधिकार सिद्ध हो?”
JOH 2:19 यीशु न उन्ख उत्तर दियो, “यो मन्दिर ख गिराय देवो, अऊर मय येख तीन दिन म खड़ो कर देऊं।”
JOH 2:20 यहूदी अधिकारियों न कह्यो, “यो मन्दिर ख बनावन म छियालीस साल लग्यो हंय, अऊर का तय ओख तीन दिन म खड़ो कर देजों?”
JOH 2:21 पर यीशु न अपनो शरीर को मन्दिर को बारे म कह्यो होतो।
JOH 2:22 येकोलायी जब ऊ मरयो हुयो म सी जीन्दो भयो तब ओको चेलावों ख याद आयो कि ओन यो कह्यो होतो; अऊर उन्न शास्त्र अऊर ऊ वचन ख जो यीशु न कह्यो होतो, विश्वास करयो।
JOH 2:23 जब यीशु यरूशलेम म फसह को समय त्यौहार म होतो, त बहुत सो न उन चिन्ह चमत्कारों ख जो ऊ दिखावत होतो देख क ओको नाम पर विश्वास करयो।
JOH 2:24 पर यीशु न अपनो आप ख उन्को विश्वास पर नहीं छोड़्यो, कहालीकि ऊ सब ख जानत होतो;
JOH 2:25 अऊर ओख जरूरत नहीं होती कि आदमी को बारे म कोयी गवाही दे, कहालीकि ऊ खुदच जानत होतो कि आदमी को मन म का हय?
JOH 3:1 फरीसियों म नीकुदेमुस नाम को एक आदमी होतो, जो यहूदियों को मुखिया होतो।
JOH 3:2 एक रात ऊ यीशु को जवर आय क ओको सी कह्यो, “हे गुरु, हम जानजे हंय कि तोख परमेश्वर को तरफ सी गुरु बनाय क भेज्यो हय, कहालीकि कोयी इन चिन्ह चमत्कारों ख जो तय दिखावय हय, यदि परमेश्वर ओको संग नहीं होय त नहीं दिखाय सकय।”
JOH 3:3 यीशु न ओख उत्तर दियो, “मय तोरो सी सच सच कहू हंय, यदि कोयी नयो सिरा सी जनम नहीं ले त परमेश्वर को राज्य ख देख नहीं सकय।”
JOH 3:4 नीकुदेमुस न ओको सी कह्यो, “आदमी जब बूढ्ढा भय गयो, त कसो फिर सी जनम ले सकय हय? का ऊ अपनी माय को गर्भ म दूसरी बार सिर क जनम ले सकय हय?”
JOH 3:5 यीशु न उत्तर दियो, “मय तोरो सी सच सच कहू हंय, जब तक कोयी आदमी पानी अऊर आत्मा सी जनम नहीं लेवय त ऊ परमेश्वर को राज्य म सिर नहीं सकय।
JOH 3:6 कहालीकि जो शरीर सी जनम्यो हय, ऊ शरीर आय; अऊर जो आत्मा सी जनम्यो हय, ऊ आत्मा आय।
JOH 3:7 अचम्भा मत कर कि मय न तोरो सी कह्यो, ‘तोख नयो सिरा सी जनम लेनो जरूरी हय।’
JOH 3:8 हवा जित चाहवय हय उत चलय हय अऊर तय ओकी आवाज सुनय हय, पर नहीं जानय कि वा कित सी आवय अऊर कित जावय हय? जो कोयी आत्मा सी जनम्यो हय ऊ असोच हय।”
JOH 3:9 नीकुदेमुस न ओको सी कह्यो, “यो बाते कसी होय सकय हंय?”
JOH 3:10 यीशु न ओको सी कह्यो, “तय इस्राएलियों को गुरु होय क भी का इन बातों ख नहीं समझय?
JOH 3:11 मय तोरो सी सच सच कहू हंय कि हम जो जानजे हंय ऊ कहजे हंय, अऊर जेक हम्न देख्यो हय ओकी गवाही देजे हंय, अऊर तुम हमरी गवाही स्वीकार नहीं करय।
JOH 3:12 जब मय न तुम सी जगत की बाते कहीं अऊर तुम विश्वास नहीं करय, त यदि मय तुम सी स्वर्ग की बाते कहूं त फिर कसो विश्वास करो?
JOH 3:13 “कोयी भी स्वर्ग पर नहीं चढ़्यो, केवल उच जो स्वर्ग सी उतरयो, मतलब आदमी को बेटा जो स्वर्ग म हय।
JOH 3:14 अऊर जो रीति सी मूसा न सुनसान जागा म कासो को सांप ख लकड़ी को ऊपर चढ़ायो, उच रीति सी जरूरी हय कि आदमी को बेटा भी ऊचो पर चढ़ायो जाये;
JOH 3:15 येकोलायी जो कोयी ओको पर विश्वास करेंन ओको म ऊ अनन्त जीवन पायेंन।”
JOH 3:16 “कहालीकि परमेश्वर न जगत सी असो प्रेम करयो कि ओन अपनो एकलौतो टुरा दे दियो, ताकि जो कोयी ओको पर विश्वास करेंन त ऊ नाश नहीं होयेंन, पर अनन्त जीवन ख प्राप्त करेंन।
JOH 3:17 परमेश्वर न अपनो टुरा ख जगत म येकोलायी नहीं भेज्यो कि जगत को न्याय करे, पर येकोलायी कि जगत ओको द्वारा उद्धार पाये।
JOH 3:18 “जो ओको पर विश्वास करय हय, ऊ दोषी नहीं ठहरय हय, पर जो ओको पर विश्वास नहीं करय ऊ दोषी ठहरय हय; येकोलायी कि ओन परमेश्वर को एकलौतो टुरा को नाम पर विश्वास नहीं करयो।
JOH 3:19 अऊर दोषी ठहरायो जान को वजह यो आय कि ज्योति जगत म आयी हय, अऊर आदमियों न अन्धारो ख प्रकाश सी जादा प्रिय जान्यो कहालीकि उन्को काम बुरो होतो।
JOH 3:20 कहालीकि जो कोयी बुरायी करय हय, ऊ प्रकाश सी दुश्मनी रखय हय, अऊर प्रकाश को जवर नहीं आवय, कि ओको बुरो काम प्रगट नहीं होय जाये,
JOH 3:21 पर जो सच पर चलय हय, ऊ प्रकाश को जवर आवय हय, ताकि ओको काम प्रगट हो कि ऊ परमेश्वर को तरफ सी करयो गयो हंय।”
JOH 3:22 येको बाद यीशु अऊर ओको चेला यहूदिया देश म आयो; अऊर ऊ उत उन्को संग रह्य क बपतिस्मा देन लग्यो।
JOH 3:23 यूहन्ना भी शालेम नगर को जवर ऐनोन म बपतिस्मा देत होतो, कहालीकि उत बहुत पानी होतो, अऊर लोग ओको जवर आवत होतो अऊर ऊ उन्ख बपतिस्मा देत होतो
JOH 3:24 यूहन्ना ऊ समय तक जेलखाना म नहीं डाल्यो गयो होतो।
JOH 3:25 उत यूहन्ना को चेला ख कोयी यहूदी को संग धार्मिक रीति को अनुसार धोवन की शुद्धिकरन को बारे म वाद विवाद भयो।
JOH 3:26 अऊर उन्न यूहन्ना को जवर जाय क ओको सी कह्यो, “हे गुरु, जो आदमी यरदन नदी को जवर तोरो संग होतो, अऊर जेको बारे म तय न बतायो होतो; ऊ बपतिस्मा देवय हय, अऊर सब ओको जवर जावय हंय।”
JOH 3:27 यूहन्ना न उत्तर दियो, “जब तक आदमी ख स्वर्ग सी नहीं दियो जाये, तब तक ऊ कुछ नहीं पा सकय।
JOH 3:28 तुम त खुदच मोरो गवाह हो मय न कह्यो, ‘मय मसीह नोहोय, पर ओको आगु भेज्यो गयो हय।’
JOH 3:29 दूल्हा उच आय जेकी दुल्हिन हय, पर दूल्हा को संगी जो खड़ो हय ओकी सुनय हय, दूल्हा को आवाज सुन क बहुत खुश होवय हय: अब मोरी या खुशी पूरी भयी हय।
JOH 3:30 जरूरी हय कि ऊ बढ़े अऊर मय घटू।
JOH 3:31 “जो ऊपर सी आवय हय ऊ सब सी अच्छो हय; जो धरती सी आवय हय ऊ धरती को आय, अऊर धरती की बाते कह्य हय: जो स्वर्ग सी आवय हय, ऊ सब को ऊपर हय।
JOH 3:32 जो कुछ ओन देख्यो अऊर सुन्यो हय, ओकी गवाही देवय हय; अऊर कोयी ओकी गवाही स्वीकार नहीं करय।
JOH 3:33 जेन ओकी गवाही स्वीकार कर ली ओन यो बात ख प्रमाणित करयो कि परमेश्वर सच्चो हय।
JOH 3:34 कहालीकि जेक परमेश्वर न भेज्यो हय, ऊ परमेश्वर कि बाते कह्य हय; कहालीकि ऊ आत्मा नाप नाप क नहीं देवय।
JOH 3:35 बाप बेटा सी प्रेम रखय हय, अऊर ओन सब सामर्थ ओको हाथ म दे दियो हंय।
JOH 3:36 जो टुरा पर विश्वास करय हय, अनन्त जीवन ओको आय; पर जो टुरा की आज्ञा नहीं मानय, ऊ जीवन ख नहीं देखेंन, पर परमेश्वर की सजा ओको पर रह्य हय।”
JOH 4:1 जब फरीसियों न यो सुन्यो हय की यीशु बपतिस्मा करन वालो यूहन्ना सी जादा चेलावों ख बपतिस्मा देवय हय।
JOH 4:2 पर यीशु खुद बपतिस्मा नहीं देत होतो बल्की ओको चेला देत होतो।
JOH 4:3 जब यीशु ख या बाते पता चली की फरीसियों न सुन्यो हय, तब ऊ यहूदिया ख छोड़ क फिर सी गलील ख चली गयो,
JOH 4:4 अऊर ओख सामरियां सी होय क जानो जरूरी होतो।
JOH 4:5 येकोलायी ऊ सूखार नाम को सामरियां को एक नगर तक आयो, जो ऊ जागा को जवर हय जेक याकूब न अपनो टुरा यूसुफ ख दियो होतो;
JOH 4:6 अऊर याकूब को कुंवा भी उतच होतो। येकोलायी यीशु रस्ता को थक्यो हुयो ऊ कुंवा पर असोच बैठ गयो। या बात दोपहर को लगभग भयी।
JOH 4:7 इतनो म एक सामरी बाई पानी भरन आयी। यीशु न ओको सी कह्यो, “मोख पानी पिलाव।”
JOH 4:8 कहालीकि ओको चेला त नगर म भोजन लेन गयो होतो।
JOH 4:9 वा सामरी बाई न ओको सी कह्यो, “तय यहूदी होय क मोरो सी पानी कहाली मांगय हय?” कहालीकि यहूदी सामरियों को संग कोयी तरह को व्यवहार नहीं रखय हय।
JOH 4:10 यीशु न उत्तर दियो, “यदि तय परमेश्वर को वरदान ख जानती, अऊर यो भी जानती कि ऊ कौन आय जो तोरो सी कह्य हय, ‘मोख पानी पिलाव,’ त तय ओको सी मांगती, अऊर ऊ तोख जीवन को पानी देतो।”
JOH 4:11 बाई न ओको सी कह्यो, “हे प्रभु, तोरो जवर पानी भरन ख त बर्तन भी नहाय, अऊर कुंवा गहरो हय; त फिर ऊ जीवन को पानी तोरो जवर कित सी आयो?
JOH 4:12 का तय हमरो बाप याकूब सी बड़ो हय, जेन हम्ख यो कुंवा दियो; अऊर खुदच अपनी सन्तान, अऊर अपनो जनावरों समेत येको म सी पीयो?”
JOH 4:13 यीशु न ओख उत्तर दियो, “जो कोयी यो पानी पीयेंन ऊ फिर प्यासो होयेंन,
JOH 4:14 पर जो कोयी ऊ पानी म सी पीयेंन जो मय ओख देऊं, ऊ फिर अनन्त काल तक प्यासो नहीं होयेंन; बल्की जो पानी मय ओख देऊ, ऊ ओको म एक सोता बन जायेंन जो अनन्त जीवन लायी उमड़तो रहेंन।”
JOH 4:15 बाई न ओको सी कह्यो, “हे प्रभु, ऊ पानी मोख दे ताकि मय प्यासी नहीं होऊं अऊर नहीं पानी भरन ख इतनी दूर आऊं।”
JOH 4:16 यीशु न ओको सी कह्यो, “जा, अपनो पति ख इत बुलाय क लाव।”
JOH 4:17 बाई न उत्तर दियो, “मय बिना पति की हय।” यीशु न ओको सी कह्यो, “तय ठीक कह्य हय, ‘मय बिना पति की आय।’
JOH 4:18 कहालीकि तय पाच पति बनाय चुकी हय, अऊर जेको जवर तय अब हय ऊ भी तोरो पति नोहोय। यो तय न सच कह्यो हय।”
JOH 4:19 बाई न ओको सी कह्यो, “हे प्रभु, मोख लगय हय कि तय भविष्यवक्ता आय।
JOH 4:20 हमरो बापदादों न योच पहाड़ी पर आराधना करी, अऊर तुम कह्य हय कि ऊ जागा जित आराधना करनो चाहिये यरूशलेम म हय।”
JOH 4:21 यीशु न ओको सी कह्यो, “हे नारी, मोरी बात को विश्वास कर कि ऊ समय आवय हय कि तुम नहीं त यो पहाड़ी पर परमेश्वर पिता की आराधना करो, नहीं यरूशलेम म।
JOH 4:22 तुम जेक नहीं जानय, ओकी आराधना करय हय; अऊर हम जेक जानजे हंय ओकी आराधना करजे हंय; कहालीकि उद्धार यहूदियों म सी हय।
JOH 4:23 पर ऊ समय आवय हय, बल्की अब भी हय, जेको म सच्चो भक्त परमेश्वर पिता की आराधना आत्मा अऊर सच्चायी सी करेंन, कहालीकि बाप अपनो लायी असोच आराधकों ख ढूंढय हय।
JOH 4:24 परमेश्वर आत्मा हय, अऊर जरूरी हय कि ओकी आराधना करन वालो आत्मा अऊर सच्चायी सी आराधना करे।”
JOH 4:25 बाई न ओको सी कह्यो, “मय जानु हय कि मसीह जो ख्रिस्त कहलावय हय, आवन वालो हय; जब ऊ आयेंन, त हम्ख सब बाते बताय देयेंन।”
JOH 4:26 यीशु न ओको सी कह्यो, “मय जो तोरो सी बोल रह्यो हय, उच आय।”
JOH 4:27 इतनो म ओको चेला आय गयो, अऊर अचम्भा करन लग्यो कि यीशु बाई सी बाते कर रह्यो हय; तब भी कोयी न नहीं पुच्छ्यो, “तय का चाहवय हय?” या “कौन्को लायी ओको सी बाते करय हय?”
JOH 4:28 तब बाई अपनो घड़ा छोड़ क नगर म चली गयी, अऊर लोगों सी कहन लगी,
JOH 4:29 “आवो, एक आदमी ख देखो, जेन सब कुछ जो मय न करयो मोख बताय दियो। कहीं योच त मसीह नोहोय?”
JOH 4:30 येकोलायी हि नगर सी निकल क ओको जवर आवन लग्यो।
JOH 4:31 यो बीच ओको चेलावों न यीशु सी यो बिनती करी, “हे गुरु, कुछ खाय लेवो।”
JOH 4:32 पर ओन उन्को सी कह्यो, “मोरो जवर खान लायी असो भोजन हय जेक तुम नहीं जानय।”
JOH 4:33 तब चेलावों न आपस म कह्यो, “का कोयी ओको लायी कुछ खान ख लायो हय?”
JOH 4:34 यीशु न उन्को सी कह्यो, “मोरो जेवन यो आय कि अपनो भेजन वालो की इच्छा को अनुसार चलू अऊर ओको काम पूरो करू।
JOH 4:35 का तुम नहीं कह्य, ‘कटायी होन म अब भी चार महीना बाकी हंय?’ देखो, मय तुम सी कहू हय, अपनी आंखी उठाय क खेतो पर नजर डालो कि हि कटायी लायी पक गयो हंय।
JOH 4:36 काटन वालो मजूरी पावय हय अऊर अनन्त जीवन लायी फर जमा करय हय, ताकि बोवन वालो अऊर काटन वालो दोयी मिल क खुशी करेंन।
JOH 4:37 कहालीकि इत यो कहावत ठीक बैठय हय: ‘बोवन वालो अलग हय अऊर काटन वालो अलग।’
JOH 4:38 मय न तुम्ख ऊ खेत काटन लायी भेज्यो जेको म तुम न मेहनत नहीं करयो: दूसरों न मेहनत करयो अऊर तुम उन्को मेहनत को फर म भागी भयो।”
JOH 4:39 ऊ नगर को बहुत सो सामरियों न वा बाई को कहनो सी यीशु पर विश्वास करयो; कहालीकि ओन यो गवाही दी होती: “ओन सब कुछ जो मय न करयो हय, मोख बताय दियो।”
JOH 4:40 येकोलायी जब यो सामरी ओको जवर आयो, त ओको सी बिनती करन लग्यो कि हमरो इत रह्य। येकोलायी ऊ उत दोय दिन तक रह्यो।
JOH 4:41 ओको वचन को वजह अऊर भी बहुत सो लोगों न विश्वास करयो
JOH 4:42 अऊर वा बाई सी कह्यो, “अब हम तोरो कहनो सी विश्वास नहीं करजे; कहालीकि हम न खुदच सुन लियो, अऊर जानजे हंय कि योच सचमुच म जगत को उद्धारकर्ता आय।”
JOH 4:43 तब उन दोय दिन को बाद ऊ उत सी निकल क गलील ख गयो,
JOH 4:44 कहालीकि यीशु न खुदच गवाही दी कि भविष्यवक्ता अपनो देश म आदर नहीं पावय।
JOH 4:45 जब ऊ गलील म आयो, त गलीली खुशी को संग ओको सी मिल्यो; कहालीकि जितनो काम ओन यरूशलेम म त्यौहार को समय करयो होतो, उन्न उन सब ख देख्यो होतो, कहालीकि हि भी त्यौहार म गयो होतो।
JOH 4:46 तब ऊ फिर गलील को काना नगर म आयो, जित ओन पानी ख अंगूररस बनायो होतो। उत राजा को एक नौकर होतो जेको बेटा कफरनहूम नगर म बीमार होतो।
JOH 4:47 ऊ यो सुन्क कि यीशु यहूदिया सी गलील म आय गयो हय, ओको जवर गयो अऊर ओको सी बिनती करन लग्यो कि चल क मोरो बेटा ख चंगो कर दे: कहालीकि ऊ मरन पर होतो।
JOH 4:48 यीशु न ओको सी कह्यो, “जब तक तुम चिन्ह अऊर अचम्भा को काम नहीं देखो तब तक तुम कभी भी विश्वास नहीं कर सको।”
JOH 4:49 राजा को नौकर न यीशु सी कह्यो, “हे प्रभु, मोरो बेटा को मरन सी पहिले चल।”
JOH 4:50 यीशु न ओको सी कह्यो, “जा, तोरो बेटा जीन्दो हय।” ऊ आदमी न यीशु की कहीं हुयी बात पर विश्वास करयो अऊर चली गयो।
JOH 4:51 ऊ रस्ताच म होतो कि ओको सेवक ओको सी आय मिल्यो अऊर कहन लग्यो, “तोरो बेटा जीन्दो हय।”
JOH 4:52 ओन उन्को सी पुच्छ्यो, “कौन्सो समय ऊ अच्छो होन लग्यो?” उन्न ओको सी कह्यो, “कल सातवों घंटो म ओको बुखार उतर गयो।”
JOH 4:53 तब बाप जान गयो कि यो उच समय भयो जो समय यीशु न ओको सी कह्यो, “तोरो बेटा जीन्दो हय,” अऊर ओन अऊर ओको पूरो घर परिवार न विश्वास करयो।
JOH 4:54 यो दूसरों चिन्ह चमत्कार होतो जो यीशु न यहूदिया सी गलील म आय क दिखायो।
JOH 5:1 इन बातों को बाद यहूदियों को एक त्यौहार भयो, अऊर यीशु यरूशलेम ख गयो।
JOH 5:2 यरूशलेम म मेंढा की फाटक को जवर एक कुण्ड हय जो इब्रानी बोली म बैतसैदा कहलावय हय; ओको पाच छप्परियां हंय।
JOH 5:3 इन म बहुत सो बीमार, अन्धा, लंगड़ा अऊर सूख्यो शरीर वालो पानी को हिलन की आशा म पड़्यो रहत होतो।
JOH 5:4 कहालीकि ठहरायो समय पर परमेश्वर को स्वर्गदूत कुण्ड म उतर क पानी ख हिलावत होतो। पानी हलतोच जो कोयी पहिले उतरन वालो चंगो होय जात होतो चाहे ओकी कोयी भी बीमारी हो।
JOH 5:5 उत एक आदमी होतो, जो अड़तीस साल सी बीमारी म पड़्यो होतो।
JOH 5:6 यीशु न ओख पड़्यो हुयो देख क अऊर यो जान क कि ऊ बहुत दिनो सी यो दशा म पड़्यो हय, ओको सी पुच्छ्यो, “का तय चंगो होनो चाहवय हय?”
JOH 5:7 ऊ बीमार आदमी न ओख उत्तर दियो, “हे प्रभु, मोरो जवर कोयी आदमी नहाय कि जब पानी हिलायो जाये, त मोख कुण्ड म उतारे; पर मोरो पहुंचतो दूसरों मोरो सी पहिले उतर जावय हय।”
JOH 5:8 यीशु न ओको सी कह्यो, “उठ, अपनी खटिया उठाव, अऊर चल फिर।”
JOH 5:9 ऊ आदमी तुरतच चंगो भय गयो, अऊर अपनी खटिया उठाय क चलन फिरन लग्यो।
JOH 5:10 ऊ आराम को दिन होतो। येकोलायी यहूदी ओको सी जो चंगो भयो होतो, कहन लग्यो, “अज त आराम को दिन हय, तोख खटिया उठावनो उचित नहाय।”
JOH 5:11 ओन उन्ख उत्तर दियो, “जेन मोख चंगो करयो, ओनच मोरो सी कह्यो, ‘अपनी खटिया उठाव, अऊर चल फिर।’”
JOH 5:12 उन्न ओको सी पुच्छ्यो, “ऊ कौन आदमी आय जेन तोरो सी कह्यो, ‘खटिया उठाव, अऊर चल फिर?’”
JOH 5:13 पर जो चंगो भय गयो होतो ऊ नहीं जानत होतो कि ऊ कौन आय, कहालीकि ऊ जागा म भीड़ होन को वजह यीशु उत सी हट गयो होतो।
JOH 5:14 इन बातों को बाद ऊ यीशु ख मन्दिर म मिल्यो। यीशु न ओको सी कह्यो, “देख, तय चंगो भय गयो हय: फिर सी पाप मत करजो, असो नहीं होय कि येको सी कोयी भारी दु:ख तोरो पर आय पड़े।”
JOH 5:15 ऊ आदमी न जाय क यहूदियों सी कह्य दियो कि जेन मोख चंगो करयो ऊ यीशु आय।
JOH 5:16 यो वजह यहूदी यीशु ख सतावन लग्यो, कहालीकि ऊ असो काम आराम दिन ख करत होतो।
JOH 5:17 येको पर यीशु न उन्को सी कह्यो, “मोरो बाप अब तक काम करय हय, अऊर मय भी काम करू हय।”
JOH 5:18 यो वजह यहूदी अऊर भी जादा ओख मार डालन को कोशिश करन लग्यो, कहालीकि ऊ नहीं केवल आराम दिन की विधि ख तोड़तो, पर परमेश्वर ख अपनो बाप कह्य क अपनो आप ख परमेश्वर को समान भी ठहरावत होतो।
JOH 5:19 येको पर यीशु न ओको सी कह्यो, “मय तुम सी सच सच कहू हंय, बेटा खुद सी कुछ नहीं कर सकय, केवल ऊ जो बाप ख करतो देखय हय; कहालीकि जो जो कामों ख ऊ करय हय उन्ख बेटा भी उच रीति सी करय हय।
JOH 5:20 कहालीकि बाप बेटा सी प्रेम रखय हय अऊर जो जो काम ऊ खुद करय हय, ऊ सब ओख दिखावय हय; अऊर ऊ इन्को सी भी बड़ो काम ओख दिखायेंन, ताकि तुम अचम्भा करो।
JOH 5:21 जसो बाप मरयो हुयो ख उठावय अऊर जीन्दो करय हय, वसोच बेटा भी जिन्ख चाहवय हय उन्ख जीन्दो करय हय।
JOH 5:22 बाप कोयी को न्याय नहीं करय, पर न्याय करन को सब काम बेटा ख सौंप दियो हय,
JOH 5:23 कि सब लोग बाप को आदर करय हंय वसोच बेटा को भी आदर करे। जो बेटा को आदर नहीं करय, ऊ बाप को जेन ओख भेज्यो हय, ओको आदर नहीं करय।”
JOH 5:24 मय तुम सी सच सच कहू हय जो मोरो वचन सुन क मोरो भेजन वालो पर विश्वास करय हय, अनन्त जीवन ओको आय; अऊर ओको पर सजा की आज्ञा नहीं होवय पर ऊ मरनो सी पार होय क जीवन म सिर चुक्यो हय।
JOH 5:25 “मय तुम सी सच सच कहू हय ऊ समय आवय हय, अऊर अब हय, जेको म मृतक परमेश्वर को बेटा को आवाज सुनेंन, अऊर जो सुनेंन हि जीवन जीयेंन।
JOH 5:26 कहालीकि जो रीति सी बाप अपनो आप म जीवन रखय हय, उच रीति सी ओन बेटा ख भी यो अधिकार दियो हय कि अपनो आप म जीवन रखे;
JOH 5:27 बल्की ओख न्याय करन को भी अधिकार दियो हय, येकोलायी कि ऊ आदमी को बेटा आय।
JOH 5:28 येको सी अचम्भा मत करो; कहालीकि ऊ समय आवय हय कि जितनो कब्र म हंय हि ओको आवाज सुन क निकल आयेंन।
JOH 5:29 जिन्न भलायी करी हय हि जीवन को पुनरुत्थान लायी जीन्दो होयेंन अऊर जिन्न बुरायी करी हय हि सजा को पुनरुत्थान लायी जीन्दो होयेंन।”
JOH 5:30 “मय अपनो आप सी कुछ नहीं कर सकू; जसो सुनू हय, वसो न्याय करू हय; अऊर मोरो न्याय सच्चो हय, कहालीकि मय अपनी इच्छा नहीं पर अपनो भेजन वालो की इच्छा चाहऊ हय।”
JOH 5:31 यदि मय खुदच अपनी गवाही देऊ, त मोरी गवाही सच्ची नहाय।
JOH 5:32 एक अऊर हय जो मोरी गवाही देवय हय, अऊर मय जानु हय कि मोरी जो गवाही ऊ देवय हय, ऊ सच्ची आय।
JOH 5:33 तुम न यूहन्ना सी पुछवायो अऊर ओन सच्चायी की गवाही दियो हय।
JOH 5:34 पर मय अपनो बारे म आदमी की गवाही नहीं चाहऊ; तब भी मय या बाते येकोलायी कहू हय कि तुम्ख उद्धार मिले।
JOH 5:35 ऊ त जलतो अऊर चमकतो हुयो दीया होतो, अऊर तुम्ख कुछ समय तक ओकी ज्योति म मगन होनो अच्छो लग्यो।
JOH 5:36 पर मोरो जवर जो गवाही हय ऊ यूहन्ना की गवाही सी बड़ी हय; कहालीकि जो काम बाप न मोख पूरो करन ख सौंप्यो हय मतलब योच काम जो मय करू हय, हि मोरो गवाह हंय कि परमेश्वर पिता न मोख भेज्यो हय।
JOH 5:37 अऊर बाप जेन मोख भेज्यो हय, ओनच मोरी गवाही दियो हय। तुम न नहीं कभी ओको आवाज सुन्यो, अऊर नहीं ओको चेहरा देख्यो हय;
JOH 5:38 अऊर ओको वचन ख मन म स्थिर नहीं रखय, कहालीकि जेक ओन भेज्यो तुम ओको विश्वास नहीं करय।
JOH 5:39 तुम शास्त्र म ढूंढय हय, कहालीकि समझय हय कि ओको म अनन्त जीवन तुम्ख मिलय हय; अऊर यो उच आय जो मोरी गवाही देवय हय;
JOH 5:40 तब भी तुम जीवन पावन लायी मोरो जवर आवनो नहीं चाहवय।
JOH 5:41 “मय आदमियों सी आदर नहीं चाहऊ।
JOH 5:42 पर मय तुम्ख जानु हय कि तुम म परमेश्वर को प्रेम नहाय।
JOH 5:43 मय अपनो बाप को नाम सी आयो हय, अऊर तुम मोख स्वीकार नहीं करय; यदि दूसरों कोयी अपनोच नाम सी आयेंन, त ओख स्वीकार कर लेवो।
JOH 5:44 तुम जो एक दूसरों सी आदर चाहवय हय अऊर ऊ आदर जो परमेश्वरच को तरफ सी हय, नहीं चाहवय, कसो तरह विश्वास कर सकय हय?
JOH 5:45 यो मत समझो कि मय बाप को आगु तुम पर दोष लगाऊं; तुम पर दोष लगावन वालो त मूसा आय, जेको पर तुम न भरोसा रख्यो हय।
JOH 5:46 कहालीकि यदि तुम मूसा को विश्वास करतो, त मोरो भी विश्वास करतो, येकोलायी कि ओन मोरो बारे म लिख्यो हय।
JOH 5:47 पर यदि तुम ओकी लिखी हुयी बातों पर विश्वास नहीं करय, त मोरी बातों पर कसो विश्वास करो?”
JOH 6:1 इन बातों को बाद यीशु गलील की झील मतलब तिबिरियास की झील को ओन पार गयो।
JOH 6:2 अऊर एक बड़ी भीड़ ओको पीछू भय गयी कहालीकि जो अद्भुत चिन्ह को काम ऊ बीमारों पर दिखात होतो हि उन्ख देखत होतो।
JOH 6:3 तब यीशु पहाड़ी पर चढ़ क अपनो चेलावों को संग उत बैठ गयो।
JOH 6:4 यहूदियों को फसह को त्यौहार जवर होतो।
JOH 6:5 जब यीशु न अपनी आंखी उठाय क एक बड़ी भीड़ ख अपनो जवर आवतो देख्यो, त फिलिप्पुस सी कह्यो, “हम इन्को जेवन लायी कित सी रोटी लेय क लाबो?”
JOH 6:6 ओन या बात ओख परखन लायी कहीं, कहालीकि ऊ खुद जानत होतो कि ऊ का करेंन।
JOH 6:7 फिलिप्पुस न ओख उत्तर दियो, “दोय सौ चांदी को सिक्का की रोटी भी उन्को लायी पूरी नहीं होयेंन कि उन्म सी सब ख थोड़ी पूर जाये।”
JOH 6:8 ओको चेला म सी एक शिमोन पतरस को भाऊ अन्द्रियास न ओको सी कह्यो,
JOH 6:9 “इत एक टुरा हय जेको जवर जौ की पाच रोटी अऊर दोय मच्छी हंय; पर इतनो लोगों लायी का होयेंन?”
JOH 6:10 यीशु न कह्यो, “लोगों ख बैठाय देवो।” ऊ जागा म बहुत घास होतो : तब लोग जेको म आदमियों की संख्या लगभग पाच हजार की होती, बैठ गयो।
JOH 6:11 तब यीशु न रोटी पकड़ी, अऊर धन्यवाद कर क् बैठन वालो ख बाट दियो; अऊर वसोच मच्छी म सी जितनी हि चाहत होतो बाट दियो।
JOH 6:12 जब हि खाय क सन्तुष्ट भय गयो त ओन अपनो चेलावों सी कह्यो, “बच्यो हुयो टुकड़ा जमा कर लेवो कि कुछ फेक्यो म नहीं जाये।”
JOH 6:13 येकोलायी उन्न जमा करयो, अऊर जौ की पाच रोटी को टुकड़ा सी जो खान वालो को बाद बच गयी होती, बारा टोकनी भरी।
JOH 6:14 तब जो अद्भुत चिन्ह ओन कर दिखायो ओख हि लोग देख क कहन लग्यो, “ऊ भविष्यवक्ता जो जगत म आवन वालो होतो निश्चय योच आय।”
JOH 6:15 यीशु यो जान क कि हि मोख राजा बनान लायी पकड़नो चाहवय हय, तब पहाड़ी पर अकेलो चली गयो।
JOH 6:16 जब शाम भयी, त ओको चेला झील को किनार गयो,
JOH 6:17 अऊर डोंगा पर चढ़ क झील को ओन पार कफरनहूम गांव ख जान लग्यो। ऊ समय अन्धारो भय गयो होतो, अऊर यीशु अभी तक उन्को जवर नहीं आयो होतो।
JOH 6:18 आन्धी को वजह झील म लहर उठन लगी।
JOH 6:19 जब हि डोंगा चलावत पाच छे किलोमीटर को लगभग निकल गयो, त उन्न यीशु ख झील पर चलतो अऊर डोंगा को जवर आवतो देख्यो, अऊर डर गयो।
JOH 6:20 पर ओन उन्को सी कह्यो, “मय आय; मत डर।”
JOH 6:21 येकोलायी हि ओख डोंगा पर चढ़ाय लेन लायी तैयार भयो अऊर तुरतच ऊ डोंगा ऊ जागा पर जाय पहुंच्यो जित हि जाय रह्यो होतो।
JOH 6:22 दूसरों दिन ऊ भीड़ न, जो झील को पार खड़ी होती, यो देख्यो कि इत एक ख छोड़ अऊर कोयी डोंगा नहीं होती; अऊर यीशु अपनो चेलावों को संग ऊ डोंगा पर नहीं चढ़्यो होतो, पर केवल ओकोच चेला गयो होतो।
JOH 6:23 तब दूसरों डोंगा तिबिरियास सी ऊ जागा को जवर आयी, जित उन्न प्रभु को धन्यवाद करन को बाद रोटी खायी होती।
JOH 6:24 येकोलायी जब भीड़ न देख्यो कि इत यीशु नहाय अऊर नहीं ओको चेला, त हि भी डोंगा पर चढ़ क यीशु ख ढूंढतो हुयो कफरनहूम गांव पहुंच्यो।
JOH 6:25 झील को पार जब हि ओको सी मिल्यो त कह्यो, “हे गुरु, तय इत कब आयो?”
JOH 6:26 यीशु न उन्ख उत्तर दियो, “मय तुम सी सच सच कहू हंय, तुम मोख येकोलायी नहीं ढूंढय हय कि तुम न अचम्भा को चिन्ह देख्यो, पर येकोलायी कि तुम रोटी खाय क सन्तुष्ट भयो।
JOH 6:27 नाशवान जेवन लायी परिश्रम मत करो, पर ऊ जेवन लायी जो अनन्त जीवन तक ठहरय हय, जेक आदमी को बेटा तुम्ख देयेंन; कहालीकि बाप येकोलायी परमेश्वर न ओकोच पर मुहर लगायी हय।”
JOH 6:28 उन्न ओको सी कह्यो, “परमेश्वर को कार्य करन लायी हम का करबो?”
JOH 6:29 यीशु न उन्ख उत्तर दियो, “परमेश्वर को कार्य यो आय कि तुम ओको पर, जेक ओन भेज्यो हय, विश्वास करो।”
JOH 6:30 तब उन्न ओको सी कह्यो, “तब तय कौन सो चमत्कार को चिन्ह दिखावय हय कि हम ओख देख क तोरो विश्वास करे? तय कौन सो काम दिखावय हय?
JOH 6:31 हमरो बापदादा न जंगल म मन्ना खायो; जसो लिख्यो हय, ‘ओन उन्ख खान लायी स्वर्ग सी रोटी दी।’”
JOH 6:32 यीशु न उन्को सी कह्यो, “मय तुम सी सच सच कहू हय कि मूसा न तुम्ख वा रोटी स्वर्ग सी नहीं दी, पर मोरो बाप तुम्ख सच्ची रोटी स्वर्ग सी देवय हय।
JOH 6:33 कहालीकि परमेश्वर की रोटी वाच आय जो स्वर्ग सी उतर क जगत ख जीवन देवय हय।”
JOH 6:34 तब उन्न ओको सी कह्यो, “हे प्रभु, या रोटी हम्ख हमेशा दियो कर।”
JOH 6:35 यीशु न ओको सी कह्यो, “जीवन की रोटी मय आय : जो मोरो जवर आवय हय ऊ कभी भूखो नहीं होयेंन, अऊर जो मोरो पर विश्वास करय हय ऊ कभी प्यासो नहीं होयेंन।
JOH 6:36 पर मय न तुम सी कह्यो होतो कि तुम न मोख देख भी लियो हय तब भी विश्वास नहीं करय।
JOH 6:37 जो कुछ बाप मोख देवय हय ऊ सब मोरो जवर आयेंन, अऊर जो कोयी मोरो जवर आयेंन ओख मय कभी नहीं निकालू।
JOH 6:38 कहालीकि मय अपनी इच्छा नहीं बल्की अपनो भेजन वालो की इच्छा पूरी करन लायी स्वर्ग सी उतरयो हय;
JOH 6:39 अऊर मोरो भेजन वालो की इच्छा यो हय कि जो कुछ ओन मोख दियो हय, ओको म सी मय कुछ नहीं खोऊं, पर ओख आखरी दिन फिर सी जीन्दो करू।
JOH 6:40 कहालीकि मोरो बाप की इच्छा यो हय कि जो कोयी बेटा ख देखे अऊर ओको पर विश्वास करेंन, ऊ अनन्त जीवन पायेंन; अऊर मय ओख आखरी दिन फिर सी जीन्दो करू।”
JOH 6:41 येकोलायी यहूदी ओको पर कुड़कुड़ान लग्यो, कहालीकि ओन कह्यो होतो, “जो रोटी स्वर्ग सी उतरी, ऊ मय आय।”
JOH 6:42 अऊर उन्न कह्यो, “का यो यूसुफ को बेटा यीशु नोहोय, जेको माय–बाप ख हम जानजे हंय? त ऊ कसो कह्य हय कि मय स्वर्ग सी उतरयो हय?”
JOH 6:43 यीशु न उन्ख उत्तर दियो, “आपस म मत कुड़कुड़ावों।
JOH 6:44 कोयी मोरो जवर नहीं आय सकय जब तक बाप, जेन मोख भेज्यो हय, ओख खीच ले; अऊर मय ओख आखरी दिन फिर सी जीन्दो करू।
JOH 6:45 भविष्यवक्तावों को लेखों म यो लिख्यो हय: ‘हि सब परमेश्वर को तरफ सी सिखायो हुयो होना।’ जो कोयी न बाप सी सुन्यो अऊर सिख्यो हय, ऊ मोरो जवर आवय हय;
JOH 6:46 यो नहीं कि कोयी न बाप ख देख्यो हय; पर जो परमेश्वर को तरफ सी हय, केवल ओनच बाप ख देख्यो हय।
JOH 6:47 मय तुम सी सच सच कहू हय कि जो कोयी विश्वास करय हय, अनन्त जीवन ओकोच हय।
JOH 6:48 जीवन की रोटी मय आय।
JOH 6:49 तुम्हरो पूर्वजों न जंगल म मन्ना खायो अऊर मर गयो।
JOH 6:50 या वा रोटी आय जो स्वर्ग सी उतरय हय ताकि आदमी ओको म सी खाये अऊर नहीं मरय।
JOH 6:51 जीवन की रोटी जो स्वर्ग सी उतरी, मय आय। यदि कोयी यो रोटी म सी खावय, त हमेशा जीन्दो रहेंन; अऊर जो रोटी मय जगत को जीवन लायी देऊ, ऊ मोरो मांस आय।”
JOH 6:52 येको पर यहूदी यो कह्य क आपस म झगड़ा करन लग्यो, “यो आदमी कसो हम्ख अपनो मांस खान ख दे सकय हय?”
JOH 6:53 यीशु न उन्को सी कह्यो, “मय तुम सी सच सच कहू हय कि जब तक तुम आदमी को बेटा यानेकि मसीह को मांस नहीं खावो, अऊर ओको खून नहीं पीवो, तुम म जीवन नहाय।
JOH 6:54 जो मोरो मांस खावय अऊर मोरो खून पीवय हय, अनन्त जीवन ओकोच हय; अऊर मय ओख आखरी दिन फिर जीन्दो करू।
JOH 6:55 कहालीकि मोरो मांस सच म खान की चिज हय, अऊर मोरो खून सच म पीवन की चिज हय।
JOH 6:56 जो मोरो मांस खावय अऊर मोरो खून पीवय हय ऊ मोरो म मजबूत बन्यो रह्य हय, अऊर मय ओको म।
JOH 6:57 जसो जीन्दो बाप न मोख भेज्यो, अऊर मय बाप को वजह जीन्दो हय, वसोच ऊ भी जो मोख खायेंन मोरो वजह जीन्दो रहेंन।
JOH 6:58 जो रोटी स्वर्ग सी उतरी योच आय, ऊ रोटी को जसो नहाय जेक बापदादों न खायो अऊर मर गयो; जो कोयी यो रोटी खायेंन, ऊ हमेशा जीन्दो रहेंन।”
JOH 6:59 या बाते यीशु न कफरनहूम को एक आराधनालय म शिक्षा देतो समय कह्यो।
JOH 6:60 ओको चेलावों म सी बहुत सो न यो सुन क कह्यो, “या कठोर बात आय; येख कौन सुन सकय हय?”
JOH 6:61 यीशु न अपनो मन म यो जान क कि मोरो चेला आपसी म या बात पर कुड़कुड़ावय हंय, उन्को सी पुच्छ्यो, “का या बात सी तुम्ख ठोकर लगय हय?
JOH 6:62 यदि तुम आदमी को बेटा ख जहां ऊ पहिले होतो, वहां ऊपर जातो देखो, त का होयेंन?
JOH 6:63 आत्मा त जीवन देन वाली आय, शरीर सी कुछ फायदा नहाय; जो बाते मय न तुम सी कहीं हंय हि आत्मा आय, अऊर जीवन भी आय।
JOH 6:64 पर तुम म सी कुछ असो हंय जो विश्वास नहीं करय।” कहालीकि यीशु पहिलेच सी जानत होतो कि जो विश्वास नहीं करय, हि कौन आय; अऊर मोख पकड़वायेंन।
JOH 6:65 अऊर ओन कह्यो, “येको लायी मय न तुम सी कह्यो होतो कि जब तक कोयी ख बाप को तरफ सी यो वरदान नहीं दियो जाय तब तक ऊ मोरो जवर नहीं आय सकय।”
JOH 6:66 येको पर ओको बहुत सो चेलावों पीछू हट गयो अऊर ओको बाद ओको संग नहीं चल्यो।
JOH 6:67 तब यीशु न उन बारयी चेला सी कह्यो, “का तुम भी चल्यो जानो चाहवय हय?”
JOH 6:68 शिमोन पतरस न ओख उत्तर दियो, “हे प्रभु, हम कौन्को जवर जाबो? अनन्त जीवन की बाते त तोरोच जवर हंय;
JOH 6:69 अऊर हम न विश्वास करयो अऊर जान गयो हंय कि परमेश्वर को पवित्र लोग तयच आय।”
JOH 6:70 यीशु न उन्ख उत्तर दियो, “का मय न तुम बारयी ख नहीं चुन्यो? तब भी तुम म सी एक आदमी शैतान हय।”
JOH 6:71 यो ओन शिमोन इस्करियोती को टुरा यहूदा को बारे म कह्यो होतो, कहालीकि उच जो बारयी म सी एक होतो, ओख पकड़वान ख होतो।
JOH 7:1 इन बातों को बाद यीशु गलील म फिरतो रह्यो; कहालीकि यहूदी ओख मार डालन को कोशिश कर रह्यो होतो, येकोलायी ऊ यहूदिया म फिरनो नहीं चाहत होतो।
JOH 7:2 यहूदियों को झोपड़ियों को त्यौहार जवर होतो।
JOH 7:3 येकोलायी ओको भाऊवों न ओको सी कह्यो, “इत सी यहूदिया ख जा, कि जो काम तय करय हय उन्ख तोरो चेला उत भी देखे।
JOH 7:4 कहालीकि असो कोयी नहीं होना जो प्रसिद्ध होनो चाहे, अऊर लूक क काम करे। यदि तय यो काम करय हय, त अपनो आप ख जगत पर प्रगट करे।”
JOH 7:5 कहालीकि ओको भाऊ भी ओको पर विश्वास नहीं करत होतो।
JOH 7:6 तब यीशु न ओको सी कह्यो, “मोरो समय अभी तक नहीं आयो, पर तुम्हरो लायी सब समय हय।
JOH 7:7 जगत तुम सी दुश्मनी नहीं कर सकय, पर ऊ मोरो सी दुश्मनी करय हय कहालीकि मय ओको विरोध म यो गवाही देऊ हय कि ओको काम बुरो हंय।
JOH 7:8 तुम त्यौहार म जावो; मय अभी यो त्यौहार म नहीं जाऊ, कहालीकि अभी तक मोरो समय पूरो नहीं भयो।”
JOH 7:9 ऊ उन्को सी या बाते कह्य क गलील मच रह्य गयो।
JOH 7:10 पर जब ओको भाऊ पर्व म चली गयो त ऊ खुद भी, सरेआम म नहीं पर मानो चुपचाप सी गयो।
JOH 7:11 यहूदी त्यौहार म ओख यो कह्य क ढूंढन लग्यो, “ऊ कित हय?”
JOH 7:12 अऊर लोगों म ओको बारे म चुपका सी बहुत बाते भयी: कुछ कहत होतो, “ऊ भलो आदमी हय।” अऊर कुछ कहत होतो, “नहीं, ऊ लोगों ख भरमावय हय।”
JOH 7:13 तब भी यहूदियों को डर को मारे कोयी व्यक्ति ओको बारे म खुल क नहीं बोलत होतो।
JOH 7:14 जब त्यौहार को अरधो दिन बीत गयो; त यीशु मन्दिर म जाय क शिक्षा देन लग्यो।
JOH 7:15 तब यहूदियों न चकित होय क कह्यो, “येख बिना पढ़्यो अक्कल कसी आय गयी?”
JOH 7:16 यीशु न उन्ख उत्तर दियो, “मोरो उपदेश मोरो नहीं, पर मोरो भेजन वालो को हय।
JOH 7:17 यदि कोयी ओकी इच्छा पर चलनो चाहे, त ऊ यो उपदेश को बारे म जान जायेंन कि यो परमेश्वर को तरफ सी आय यां मय अपनो तरफ सी कहू हय।
JOH 7:18 जो अपनो तरफ सी कुछ कह्य हय, ऊ अपनीच बड़ायी चाहवय हय; पर जो अपनो भेजन वालो की बड़ायी चाहवय हय उच सच्चो आय, अऊर ओको म अधर्म नहीं।
JOH 7:19 का मूसा न तुम्ख व्यवस्था नहीं दियो? तब भी तुम म सी कोयी व्यवस्था पर नहीं चलय। तुम कहाली मोख मार डालनो चाहवय हय?”
JOH 7:20 लोगों न उत्तर दियो, “तोरो म दुष्ट आत्मा हय! कौन तोख मार डालनो चाहवय हय?”
JOH 7:21 यीशु न उन्ख उत्तर दियो, “मय न एक काम करयो, अऊर तुम सब अचम्भा करय हय।
JOH 7:22 योच वजह सी मूसा न तुम्ख खतना की आज्ञा दी हय यो नहीं कि ऊ मूसा को तरफ सी आय पर बापदादा सी चली आयी हय, अऊर तुम आराम दिन म आदमी को खतना करय हय।
JOH 7:23 जब आराम दिन म आदमी को खतना करयो जावय हय ताकि मूसा की व्यवस्था की आज्ञा टल नहीं जाये, त तुम मोरो पर कहाली येकोलायी गुस्सा करय हय कि मय न आराम दिन म एक आदमी ख पूरी रीति सी चंगो करयो।
JOH 7:24 मुंह देख क न्याय मत करो, पर ठीक ठीक न्याय करो।”
JOH 7:25 तब कुछ यरूशलेम नगर म रहन वालो लोगों म सी कुछ न कह्यो, “का यो उच नोहोय जेक मार डालन की कोशिश करयो जाय रह्यो हय?
JOH 7:26 देखो, ऊ त खुल क बाते करय हय अऊर कोयी ओको सी कुछ नहीं कह्य। का मुखिया न सच सच जान लियो हय कि योच मसीह आय?
JOH 7:27 येख त हम जानजे हंय कि यो कित को आय; पर मसीह जब आयेंन त कोयी नहीं जानेंन कि ऊ कित को आय।”
JOH 7:28 तब यीशु न मन्दिर म शिक्षा देतो हुयो पुकार क कह्यो, “तुम मोख जानय हय, अऊर यो भी जानय हय कि मय कित को आय। मय त अपनो आप सी नहीं आयो, पर मोरो भेजन वालो सच्चो हय, ओख तुम नहीं जानय।
JOH 7:29 मय ओख जानु हय कहालीकि मय ओको तरफ सी आय अऊर ओनच मोख भेज्यो हय।”
JOH 7:30 येको पर उन्न ओख पकड़नो चाह्यो, तब भी कोयी न ओको पर हाथ नहीं डाल्यो कहालीकि ओको समय अब तक नहीं आयो होतो।
JOH 7:31 तब भी भीड़ म सी बहुत सो लोगों न ओको पर विश्वास करयो, अऊर कहन लग्यो, “मसीह जब आयेंन त का येको सी जादा अचम्भा को चिन्ह दिखायेंन जो येन दिखायो?”
JOH 7:32 फरीसियों न लोगों ख ओको बारे म या बाते चुपका सी करतो सुन्यो; अऊर मुख्य याजकों अऊर फरीसियों न ओख पकड़न लायी सिपाही भेज्यो।
JOH 7:33 येको पर यीशु न कह्यो, “मय थोड़ी देर तक अऊर तुम्हरो संग हय, तब अपनो भेजन वालो को जवर चली जाऊं।
JOH 7:34 तुम मोख ढूंढो, पर नहीं पावों; अऊर जित मय हय, उत तुम नहीं आय सकय।”
JOH 7:35 येको पर यहूदियों न आपस म कह्यो, “यो कह्यो जायेंन कि हम येख नहीं पा सकबो? का ऊ उन्को जवर जायेंन जो गैरयहूदियों म तितर बितर रह्य हय, अऊर गैरयहूदियों ख भी शिक्षा देयेंन?
JOH 7:36 या का बात आय जो ओन कहीं, कि ‘तुम मोख ढूंढो, पर नहीं पावों; अऊर जित मय हय, उत तुम नहीं आय सकय?’”
JOH 7:37 त्यौहार को आखरी दिन, जो मुख्य दिन होतो, यीशु खड़ो भयो अऊर पुकार क कह्यो, “यदि कोयी प्यासो हय त मोरो जवर आवो अऊर पीवो।
JOH 7:38 जो मोरो पर विश्वास करेंन, जसो पवित्र शास्त्र म आयो हय, ‘ओको दिल म सी जीवन को पानी की नदी बह निकलेंन।’”
JOH 7:39 ओन यो वचन पवित्र आत्मा को बारे म कह्यो, जेक ओको पर विश्वास करन वालो पवित्र आत्मा पावन पर होतो; कहालीकि आत्मा अब तक नहीं उतरी होतो, कहालीकि यीशु अब तक अपनी महिमा ख नहीं पहुंच्यो होतो।
JOH 7:40 तब भीड़ म सी कोयी न या बाते सुन क कह्यो, “सचमुच योच ऊ भविष्यवक्ता आय।”
JOH 7:41 दूसरों न कह्यो, “यो मसीह आय।” पर कुछ न कह्यो, “कहाली? का मसीह गलील सी आयेंन?
JOH 7:42 का पवित्र शास्त्र म यो नहीं आयो कि मसीह दाऊद को वंश सी अऊर बैतलहम गांव सी आयेंन, जित दाऊद रहत होतो?”
JOH 7:43 येकोलायी ओको वजह लोगों म फूट पड़ी।
JOH 7:44 उन्म सी कुछ ओख पकड़नो चाहत होतो, पर कोयी न ओको पर हाथ नहीं डाल्यो।
JOH 7:45 तब सिपाही मुख्य याजकों अऊर फरीसियों को जवर लौट आयो; उन्न उन्को सी कह्यो, “तुम ओख कहाली नहीं लायो?”
JOH 7:46 सिपाहियों न उत्तर दियो, “कोयी आदमी न कभी असी बाते नहीं करी।”
JOH 7:47 फरीसियों न उन्ख उत्तर दियो, “का तुम भी बहकायो गयो हय?
JOH 7:48 का मुखिया या फरीसियों म सी कोयी न भी ओको पर विश्वास करयो हय?
JOH 7:49 पर हि लोग जो व्यवस्था नहीं जानय, हि श्रापित हंय।”
JOH 7:50 नीकुदेमुस न, जो पहिले ओको जवर आयो होतो अऊर उन्म सी एक होतो, उन्को सी कह्यो,
JOH 7:51 “का हमरी व्यवस्था कोयी आदमी ख, जब तक पहिले ओकी सुन क जान नहीं लेवय कि ऊ का करय हय, दोषी ठहरावय हय?”
JOH 7:52 उन्न ओख उत्तर दियो, “का तय भी गलील को हय? ढूंढ अऊर देख कि गलील सी कोयी भविष्यवक्ता प्रगट नहीं होन को।”
JOH 7:53 तब सब कोयी अपनो अपनो घर चली गयो।
JOH 8:1 सब कोयी अपनो घर चली गयो पर यीशु जैतून की पहाड़ी पर गयो।
JOH 8:2 भुन्सारे ख ऊ फिर मन्दिर म आयो; सब लोग ओको जवर आयो अऊर ऊ बैठ क उन्ख शिक्षा देन लग्यो।
JOH 8:3 तब धर्मशास्त्री अऊर फरीसी एक बाई ख लायो जो व्यभिचार म पकड़ायी होती, ओख बीच म खड़ो कर क् यीशु सी कह्यो,
JOH 8:4 “हे गुरु, या बाई व्यभिचार करता पकड़ी गयी हय।
JOH 8:5 व्यवस्था म मूसा न हम्ख आज्ञा दी हय कि असी बाईयों पर गोटा मारे। पर तय या बाई को बारे म का कह्य हय?”
JOH 8:6 उन्न ओख परखन लायी या बात कहीं ताकि ओको पर दोष लगान लायी कोयी बात मिले। पर यीशु झुक क बोट सी जमीन पर लिखन लग्यो।
JOH 8:7 जब हि ओको सी पूछतोच रह्यो त ओन खड़ो होय क उन्को सी कह्यो “तुम म जेन कोयी पाप नहीं करयो हय, उच पहिले ओख गोटा मारे।”
JOH 8:8 अऊर फिर झुक क जमीन पर बोट सी लिखन लग्यो।
JOH 8:9 पर हि यो सुन क बुजूर्ग सी ले क छोटो तक, एक एक कर क् निकल गयो, अऊर यीशु अकेलो रह गयो अऊर बाई उतच खड़ी रह्य गयी।
JOH 8:10 यीशु न खड़ो होय क ओको सी कह्यो, “हे बाई हि कित गयो? का कोयी न तोख सजा नहीं दी?”
JOH 8:11 ओन कह्यो, “हे प्रभु, कोयी न नहीं।” यीशु न कह्यो, “मय भी तोरो पर कोयी सजा की आज्ञा नहीं देऊ; जा अऊर फिर सी कोयी पाप मत करजो।”
JOH 8:12 यीशु न तब लोगों सी कह्यो, “जगत की ज्योति मय आय; जो मोरो पीछू होय जायेंन ऊ अन्धारो म नहीं चलेंन, पर जीवन की ज्योति पायेंन।”
JOH 8:13 फरीसियों न ओको सी कह्यो, “तय अपनी गवाही खुदच देवय हय, तोरी गवाही सही नहाय।”
JOH 8:14 यीशु न उन्ख उत्तर दियो, “पर मय अपनी गवाही खुद देऊ हय, फिर भी मोरी गवाही सही हय, कहालीकि मय जानु हय कि मय कित सी आयो हय अऊर कित जाय रह्यो हय? पर तुम लोग नहीं जानय कि मय कित सी आयो हय अऊर कित जाय रह्यो हय।
JOH 8:15 तुम शरीर को अनुसार न्याय करय हय; मय कोयी को न्याय नहीं करू हय।
JOH 8:16 अऊर यदि मय न्याय करू भी, त मोरो न्याय सच्चो हय; कहालीकि मय अकेलो नहाय, पर मय हय, अऊर बाप हय जेन मोख भेज्यो।
JOH 8:17 तुम्हरी व्यवस्था म भी लिख्यो हय कि दोय लोगों की गवाही मिल क सही होवय हय;
JOH 8:18 एक त मय खुद अपनी गवाही देऊ हय, अऊर दूसरों बाप मोरी गवाही देवय हय जेन मोख भेज्यो।”
JOH 8:19 उन्न ओको सी कह्यो, “तोरो बाप कित हय?” यीशु न उत्तर दियो, “नहीं तुम मोख जानय हय, नहीं मोरो बाप ख, यदि मोख जानतो त मोरो बाप ख भी जानतो।”
JOH 8:20 या बाते ओन मन्दिर म शिक्षा देतो हुयो दान भण्डार घर म कहीं, अऊर कोयी न ओख नहीं पकड़्यो, कहालीकि ओको समय अब तक नहीं आयो होतो।
JOH 8:21 ओन फिर ओको सी कह्यो, “मय जाऊ हय, अऊर तुम मोख ढूंढो अऊर अपनो पाप म मरो; जित मय जाऊ हय, उत तुम नहीं आय सकय।”
JOH 8:22 येको पर यहूदियों न कह्यो, “का ऊ अपनो आप ख मार डालेंन, जो कह्य हय, ‘जित मय जाऊ हय उत तुम नहीं आय सकय?’”
JOH 8:23 ओन उन्को सी कह्यो, “तुम जगत सी आय, अऊर मय ऊपर को आय; तुम जगत को आय, मय जगत को नोहोय।
JOH 8:24 येकोलायी मय न तुम सी कह्यो कि तुम अपनो पापों म मरो, कहालीकि यदि तुम विश्वास नहीं करो कि मय उच आय त अपनो पापों म मरो।”
JOH 8:25 उन्न यीशु सी कह्यो, “तय कौन आय?” यीशु न उन्को सी कह्यो, “उच आय जो सुरूवात सी तुम सी कहतो आयो हय।
JOH 8:26 तुम्हरो बारे म मोख बहुत कुछ कहनो अऊर न्याय करनो हय; पर मोरो भेजन वालो सही हय, अऊर जो मय न ओको सी सुन्यो हय उच जगत सी कहू हय।”
JOH 8:27 हि यो नहीं समझ्यो कि हम सी बाप को बारे म कह्य हय।
JOH 8:28 तब यीशु न कह्यो, “जब तुम आदमी को बेटा ख ऊचो पर चढ़ावो, त जानो कि मय उच आय; मय अपनो आप सी कुछ नहीं करू हय पर जसो मोरो बाप न मोख सिखायो वसोच या बाते कहू हय।
JOH 8:29 मोरो भेजन वालो मोरो संग हय; ओन मोख अकेलो नहीं छोड़्यो कहालीकि मय हमेशा उच काम करू हय जेकोसी ऊ खुश होवय हय।”
JOH 8:30 ऊ या बाते कह्यच रह्यो होतो कि बहुत सो न ओको पर विश्वास करयो।
JOH 8:31 तब यीशु न उन यहूदियों सी जिन्न ओको पर विश्वास करयो होतो, कह्यो, “यदि तुम मोरो वचन म बन्यो रहो, त सच म मोरो चेला ठहरो।
JOH 8:32 तुम सच ख जानो त, सच तुम्ख स्वतंत्र करेंन।”
JOH 8:33 उन्न ओख उत्तर दियो, “हम त अब्राहम को वंश सी आय, अऊर कभी कोयी को सेवक नहीं भयो। फिर तय कसो कह्य हय कि तुम स्वतंत्र होय जायो?”
JOH 8:34 यीशु न उन्ख उत्तर दियो, “मय तुम सी सच सच कहू हय कि जो कोयी पाप करय हय ऊ पाप को सेवक हय।
JOH 8:35 सेवक हमेशा घर म नहीं रह्य; बेटा सदा रह्य हय।
JOH 8:36 येकोलायी यदि बेटा तुम्ख स्वतंत्र करेंन, त सचमुच तुम स्वतंत्र होय जावो।”
JOH 8:37 “मय जानु हय कि तुम अब्राहम को वंश सी आय; तब भी मोरो वचन तुम्हरो दिल म जागा नहीं पावय हय, येकोलायी तुम मोख मार डालनो चाहवय हय।
JOH 8:38 मय उच कहू हय, जो अपनो बाप को इत देख्यो हय; अऊर तुम उच करतो रह्य हय जो तुम न अपनो बाप सी सुन्यो हय।”
JOH 8:39 उन्न ओख उत्तर दियो, “हमरो बाप त अब्राहम आय।” यीशु न उन्को सी कह्यो, “यदि तुम अब्राहम की सन्तान होतो त अब्राहम को जसो काम करतो।
JOH 8:40 पर अब मोरो जसो आदमी ख मार डालनो चाहवय हय, जेन तुम्ख ऊ सत्य वचन बतायो जो परमेश्वर सी सुन्यो; असो त अब्राहम न नहीं करयो होतो।
JOH 8:41 तुम अपनो बाप को जसो काम करय हय।” उन्न ओको सी कह्यो, “हम व्यभिचार सी नहीं जनम लियो, हमरो एक बाप हय मतलब परमेश्वर।”
JOH 8:42 यीशु न उन्को सी कह्यो, “यदि परमेश्वर तुम्हरो पिता होतो त तुम मोरो सी प्रेम रखतो; कहालीकि मय परमेश्वर को तरफ सी आयो हय। मय अपनो आप सी नहीं आयो, पर ओनच मोख भेज्यो।
JOH 8:43 तुम मोरी बात कहाली नहीं समझय? येकोलायी कि तुम मोरो वचन सुन नहीं सकय।
JOH 8:44 तुम अपनो बाप शैतान सी आय अऊर अपनो बाप की लालसावों ख पूरो करनो चाहवय हय। ऊ त सुरूवात सी हत्यारों हय अऊर सत्य पर स्थिर नहीं रह्यो, कहालीकि सत्य ओको म हयच नहाय। जब ऊ झूठ बोलय, त अपनो स्वभाव सीच बोलय हय; कहालीकि ऊ झूठो हय बल्की झूठ को बाप हय।
JOH 8:45 पर मय जो सच कहू हय, येकोच लायी तुम मोरो विश्वास नहीं करय।
JOH 8:46 तुम म सी कौन मोख पापी ठहरावय हय? यदि मय सच बोलू हय, त तुम मोरो विश्वास कहाली नहीं करय?
JOH 8:47 जो परमेश्वर सी होवय हय, ऊ परमेश्वर की बाते सुनय हय; अऊर तुम येकोलायी नहीं सुनय कि परमेश्वर को तरफ सी नहीं हो।”
JOH 8:48 यो सुन यहूदियों न ओको सी कह्यो, “का हम ठीक नहीं कहजे कि तय सामरी हय, अऊर तोरो म दुष्ट आत्मा हय?”
JOH 8:49 यीशु न उत्तर दियो, “मोरो म दुष्ट आत्मा नहाय; पर मय अपनो बाप को आदर करू हय, अऊर तुम मोरो अपमान करय हय।
JOH 8:50 पर मय अपनो आदर नहीं चाहऊ; हव, एक हय जो चाहवय हय अऊर न्याय करय हय।
JOH 8:51 मय तुम सी सच सच कहू हय कि यदि कोयी आदमी मोरो वचन पर चलेंन, त ऊ अनन्त काल तक अपनी मृत्यु ख नहीं देखेंन।”
JOH 8:52 यहूदियों न ओको सी कह्यो, “अब हम न जान लियो हय कि तोरो म दुष्ट आत्मा हय। अब्राहम मर गयो, अऊर भविष्यवक्ता भी मर गयो हंय; अऊर तय कह्य हय, ‘यदि कोयी मोरो वचन पर चलेंन त ऊ अनन्त काल तक मृत्यु को स्वाद नहीं चख सकेंन।’
JOH 8:53 हमरो बाप अब्राहम त मर गयो। का तय ओको सी भी बड़ो हय? अऊर भविष्यवक्ता भी मर गयो। तय अपनो आप ख का ठहरावय हय?”
JOH 8:54 यीशु न उत्तर दियो, “यदि मय खुद अपनी महिमा करू, त मोरी महिमा कुछ नहाय; पर मोरी महिमा करन वालो मोरो बाप हय, जेक तुम कह्य हय कि ऊ तुम्हरो परमेश्वर आय।
JOH 8:55 तुम न त ओख नहीं जान्यो: पर मय ओख जानु हय। यदि मय कहूं कि मय ओख नहीं जानु, त मय तुम्हरो जसो झूठो ठहरू; पर मय ओख जानु हय अऊर ओको वचन पर चलू हय।
JOH 8:56 तुम्हरो बाप अब्राहम मोरो दिन देखन की इच्छा सी बहुत मगन होतो; अऊर ओन देख्यो अऊर खुश भी भयो।”
JOH 8:57 यहूदियों न ओको सी कह्यो, “अब तक तय पचास साल को भी नहीं भयो तब भी तय न अब्राहम ख देख्यो हय?”
JOH 8:58 यीशु न उन्को सी कह्यो, “मय तुम सी सच्ची कहू हय, कि पहिले येको कि अब्राहम पैदा भयो, मय आय।”
JOH 8:59 तब उन्न ओख मारन लायी गोटा उठायो, पर यीशु लूक क मन्दिर सी निकल गयो।
JOH 9:1 जातो हुयो ओन एक आदमी ख देख्यो जो जनम सी अन्धा होतो।
JOH 9:2 ओको चेला न ओको सी पुच्छ्यो, “हे गुरु, कौन पाप करयो होतो कि यो अन्धा जनम्यो, यो आदमी न या येको बाप–माय न?”
JOH 9:3 यीशु न उत्तर दियो, “नहीं येन पाप करयो होतो, नहीं येको माय–बाप न; पर यो येकोलायी भयो कि परमेश्वर को काम ओको म प्रगट हो।
JOH 9:4 जेन मोख भेज्यो हय, हम्ख ओको काम दिनच दिन म करनो जरूरी हय; ऊ रात आवन वाली हय जेको म कोयी काम नहीं कर सकय।
JOH 9:5 जब तक मय जगत म हय, तब तक जगत की ज्योति आय।”
JOH 9:6 यो कह्य क ओन जमीन पर थूक्यो, अऊर ऊ थूक सी माटी सानी, अऊर ऊ माटी ऊ अन्धा की आंखी पर लगाय क
JOH 9:7 ओको सी कह्यो, “जा, शीलोह को कुण्ड म धोय ले” शीलोह को मतलब “भेज्यो हुयो हय।” ओन जाय क धोयो, अऊर देखतो हुयो लौट आयो।
JOH 9:8 तब पड़ोसी अऊर जिन्न पहिले ओख भीख मांगतो देख्यो होतो, कहन लग्यो, “का यो उच नोहोय, जो बैठ्यो भीख मांगत होतो?”
JOH 9:9 कुछ लोगों न कह्यो, “यो उच आय,” दूसरों न कह्यो, “नहीं, पर ओको जसो हय।” ओन कह्यो, “मय उच आय।”
JOH 9:10 तब हि ओको सी पूछन लग्यो, “तोरी आंखी कसी खुल गयी?”
JOH 9:11 ओन उत्तर दियो, “यीशु नाम को एक आदमी न माटी सानी, अऊर मोरी आंखी पर लगाय क मोरो सी कह्यो, ‘शीलोह को कुण्ड म जाय क धोय ले,’ येकोलायी मय गयो अऊर धोयो अऊर देखन लग्यो।”
JOH 9:12 उन्न ओको सी पुच्छ्यो, “ऊ कित हय?” ओन कह्यो, “मय नहीं जानु हय।”
JOH 9:13 लोग ओख जो पहिले अन्धा होतो फरीसियों को जवर ले गयो।
JOH 9:14 जो दिन यीशु न माटी सान क ओकी आंखी खोली होती, ऊ आराम को दिन होतो।
JOH 9:15 तब फरीसियों न भी ओको सी पुच्छ्यो कि ओकी आंखी कौन्सी रीति सी खुल गयी। ओन उन्को सी कह्यो, “ओन मोरी आंखी पर माटी लगायी, तब मय न धोय लियो, अऊर अब देखू हय।”
JOH 9:16 येको पर कुछ फरीसी कहन लग्यो, “यो आदमी परमेश्वर को तरफ सी नहीं, कहालीकि ऊ आराम दिन ख नहीं मानय।” दूसरों न कह्यो, “पापी आदमी असो चिन्ह कसो दिखाय सकय हय?” येकोलायी ओको म फूट पड़ गयी।
JOH 9:17 उन्न ऊ अन्धा सी फिर कह्यो, “ओन तोरी आंखी खोली हंय। तय ओको बारे म का कह्य हय?” ओन कह्यो, “ऊ भविष्यवक्ता आय।”
JOH 9:18 पर यहूदियों ख विश्वास नहीं भयो कि ऊ अन्धा होतो अऊर अब देखय हय, जब तक उन्न ओको, जेकी आंखी खुल गयी होती, माय–बाप ख बुलाय क
JOH 9:19 उन्को सी नहीं पुच्छ्यो, “का यो तुम्हरो बेटा आय, जेक तुम कह्य हय कि अन्धा जनम्यो होतो? फिर अब ऊ कसो देखय हय?”
JOH 9:20 उन्को माय–बाप न उत्तर दियो, “हम त जानजे हंय कि यो हमरो बेटा आय, अऊर अन्धा जनम्यो होतो;
JOH 9:21 पर हम यो नहीं जानजे हंय कि अब कसो देखय हय, अऊर नहीं जानय हंय कि कौन न ओकी आंखी खोली। ऊ सियानो हय, ओको सीच पूछ लेवो; ऊ अपनो बारे म खुदच कह्य देयेंन।”
JOH 9:22 या बाते ओको माय–बाप न येकोलायी कहीं कहालीकि हि यहूदियों सी डरत होतो, कहालीकि यहूदी एक मन को होय गयो होतो कि यदि कोयी कहेंन कि ऊ मसीह आय, त आराधनालयों म सी निकाल दियो जायेंन।
JOH 9:23 येकोलायी ओको माय-बाप न कह्यो, “ऊ सियानो हय, ओको सीच पूछ लेवो।”
JOH 9:24 तब उन्न ऊ आदमी ख जो अन्धा होतो, दूसरी बार बुलाय क ओको सी कह्यो, “परमेश्वर की महिमा कर हम त जानजे हंय कि ऊ आदमी पापी हय।”
JOH 9:25 ओन उत्तर दियो, “मय नहीं जानु हय कि ऊ पापी आय या नहीं; मय एक बात जानु हय कि मय अन्धा होतो अऊर अब देखू हय।”
JOH 9:26 उन्न ओको सी कह्यो, “ओन तोरो संग का करयो? अऊर कसो तरह तोरी आंखी खोली?”
JOH 9:27 ओन ओको सी कह्यो, “मय त तुम सी कह्यो होतो, अऊर तुम न नहीं सुन्यो; अब दूसरों बार कहाली सुननो चाहवय हय? का तुम भी ओको चेला होनो चाहवय हय?”
JOH 9:28 तब हि ओख बुरो भलो कह्य क बोल्यो, “तयच ओको चेला आय, हम त मूसा को चेला आय।
JOH 9:29 हम जानजे हय कि परमेश्वर न मूसा सी बाते करी; पर यो आदमी ख नहीं जानजे कि कित को आय।”
JOH 9:30 ओन उन्ख उत्तर दियो, “या त अचम्भा की बात आय कि तुम नहीं जानय हय कि ऊ कित को आय, तब भी ओन मोरी आंखी खोल दी।
JOH 9:31 हम जानजे हंय कि परमेश्वर पापियों की नहीं सुनय, पर यदि कोयी परमेश्वर को भक्त हय अऊर ओकी इच्छा पर चलय हय, त ऊ ओकी सुनय हय।
JOH 9:32 जगत को सुरूवात सी यो कभी सुननो म नहीं आयो कि कोयी न जनम को अन्धा की आंखी खोली हय।
JOH 9:33 यदि यो आदमी परमेश्वर को तरफ सी नहीं होतो, त कुछ भी नहीं कर सकय।”
JOH 9:34 उन्न ओख उत्तर दियो, “तय त बिल्कुल पापों म जनम्यो हय, तय हम्ख का सिखावय हय?” अऊर उन्न ओख बाहेर निकाल दियो।
JOH 9:35 यीशु न सुन्यो कि उन्न ओख बाहेर निकाल दियो हय, अऊर जब ओको सी भेंट भयी त कह्यो, “का तय आदमी को बेटा पर विश्वास करय हय?”
JOH 9:36 ओन उत्तर दियो, “हे प्रभु, ऊ कौन आय, कि मय ओको पर विश्वास करू?”
JOH 9:37 यीशु न ओको सी कह्यो, “तय न ओख देख्यो भी हय, अऊर जो तोरो संग बाते कर रह्यो हय ऊ उच आय।”
JOH 9:38 ओन कह्यो, “हे प्रभु, मय विश्वास करू हय।” अऊर ओख घुटना को बल प्रनाम करयो।
JOH 9:39 तब यीशु कह्यो, “मय यो जगत म न्याय करन आयो हय, ताकि जो नहीं देखय ऊ देखय हय हि देखेंन जो देखय हय हि अन्धा होय जायेंन।”
JOH 9:40 जो फरीसी ओको संग होतो उन्न यो बाते सुन क ओको सी कह्यो, “का हम भी अन्धा हय?”
JOH 9:41 यीशु न उन्को सी कह्यो, “यदि तुम अन्धा होतो त पापी नहीं ठहरतो; पर अब कह्य हय कि हम देखजे हंय, येकोलायी तुम्हरो पाप बन्यो रह्य हय।
JOH 10:1 “मय तुम सी सच सच कहू हय कि जो कोयी द्वार सी मेंढीं को बाड़ा म नहीं सिरय, पर कोयी दूसरी तरफ सी आवय हय, ऊ चोर अऊर डाकू आय।
JOH 10:2 पर जो द्वार सी अन्दर सिरय हय ऊ मेंढीं को चरावन वालो आय।
JOH 10:3 ओको लायी पहरेदार द्वार खोल देवय हय, अऊर मेंढीं ओको आवाज सुनय हंय, अऊर ऊ अपनी मेंढीं ख नाम ले ले क बुलावय हय अऊर बाहेर ले जावय हय।
JOH 10:4 जब ऊ अपनी सब मेंढीं ख बाहेर निकाल देवय हय, त उन्को आगु आगु चलय हय, अऊर मेंढीं ओको पीछू पीछू होय जावय हंय, कहालीकि हि ओको आवाज पहिचानय हंय।
JOH 10:5 पर हि परायो को पीछू नहीं जायेंन, पर ओको सी भगेंन, कहालीकि हि परायो की आवाज नहीं पहिचानय।”
JOH 10:6 यीशु न उन्को सी यो दृष्टान्त कह्यो, पर हि नहीं समझ्यो कि या का बाते हंय जो ऊ हम सी कह्य हय।
JOH 10:7 तब यीशु न उन्को सी फिर कह्यो, मय तुम सी सच सच कहू हय, मेंढीं को दरवाजा मय हय।
JOH 10:8 जितनो मोरो सी पहिले आयो हि सब चोर अऊर डाकू आय, पर मेंढीं न उन्की नहीं सुनी।
JOH 10:9 दरवाजा म हय; यदि कोयी मोरो द्वारा अन्दर सिरे, त उद्धार पायेंन, अऊर अन्दर बाहेर आयो जायो करेंन अऊर चारा पायेंन।
JOH 10:10 चोर कोयी अऊर काम लायी नहीं पर केवल चोरी करनो अऊर घात करनो अऊर नाश करन ख आवय हय; मय येकोलायी आयो कि हि जीवन पाये, अऊर बहुतायत सी पाये।
JOH 10:11 अच्छो चरवाहा मय आय; अच्छो चरवाहा मेंढीं लायी अपनो जीव देवय हय।
JOH 10:12 मजूर जो नहीं चरवाहा आय अऊर नहीं मेंढीं को मालिक आय, भेड़िया ख आवता देख मेंढीं ख छोड़ क भग जावय हय अऊर भेड़िया उन्ख पकड़तो अऊर तितर-बितर कर देवय हय।
JOH 10:13 ऊ येकोलायी भग जावय हय कि ऊ मजूर आय, अऊर ओख मेंढीं की चिन्ता नहीं।
JOH 10:14 अच्छो चरवाहा मय आय; मय अपनी मेंढीं ख जानु हय, अऊर मोरी मेंढीं मोख जानय हंय।
JOH 10:15 जसो बाप मोख जानय हय अऊर मय बाप ख जानु हय अऊर मय मेंढीं लायी अपनो जीव देऊ हय।
JOH 10:16 मोरी अऊर भी मेंढीं हंय, जो यो बाड़ा की नहाय। मोख उन्को भी लावनो जरूरी हय। हि मोरो आवाज सुनेंन, तब एकच झुण्ड अऊर एकच चरवाहा होयेंन।
JOH 10:17 “बाप येकोलायी मोरो सी प्रेम रखय हय कि मय अपनो जीव देऊ हय कि ओख फिर ले लेऊ।
JOH 10:18 कोयी ओख मोरो सी छीनय नहीं, बल्की मय ओख खुदच देऊ हय। मोख ओको देन को भी अधिकार हय, अऊर ओख फिर लेन को भी अधिकार हय: यो आज्ञा मोरो बाप सी मोख मिली हय।”
JOH 10:19 इन बातों को वजह यहूदियों म फिर फूट पड़ी।
JOH 10:20 उन्म सी बहुत सो कहन लग्यो, “ओको म दुष्ट आत्मा हय, अऊर ऊ पागल हय; ओकी कहाली सुनय हय?”
JOH 10:21 दूसरों लोगों न कह्यो, “या बाते असो आदमी की नहीं जेको म दुष्ट आत्मा हय। का दुष्ट आत्मा अन्धा की आंखी खोल सकय हय?”
JOH 10:22 यरूशलेम म समर्पन को त्यौहार मनायो जाय रह्यो होतो; जो ठन्डी को दिन होतो।
JOH 10:23 यीशु मन्दिर म सुलैमान को छप्पर म टहल रह्यो होतो।
JOH 10:24 तब यहूदियों न ओख आय घेरयो अऊर पुच्छ्यो, “तय हमरो मन ख कब तक दुविधा म रखजो? यदि तय मसीह आय त हम सी साफ साफ कह्य दे।”
JOH 10:25 यीशु न उन्ख उत्तर दियो, “मय न तुम सी कह्य दियो पर तुम विश्वास करय नहाय। जो काम मय अपनो बाप को नाम सी करू हय हिच मोरो गवाह हंय,
JOH 10:26 पर तुम येकोलायी विश्वास नहीं करय कहालीकि मोरी मेंढीं म सी नहीं हय।
JOH 10:27 मोरी मेंढीं मोरो आवाज सुनय हंय; मय उन्ख जानु हय, अऊर हि मोरो पीछू पीछू चलय हंय;
JOH 10:28 अऊर मय उन्ख अनन्त जीवन देऊ हय। हि कभी नाश नहीं होयेंन, अऊर कोयी उन्ख मोरो हाथ सी छीन नहीं लेयेंन।
JOH 10:29 मोरो बाप, जेन उन्ख मोख दियो हय, सब सी बड़ो हय अऊर कोयी उन्ख बाप को हाथ सी छीन नहीं सकय।
JOH 10:30 मय अऊर बाप एक हंय।”
JOH 10:31 यहूदियों न ओको पर पथराव करन ख फिर गोटा उठाये।
JOH 10:32 येको पर यीशु न उन्को सी कह्यो, “मय न तुम्ख अपनो बाप को तरफ सी बहुत सो भलो काम दिखायो हंय; उन्म सी कौन्सो काम लायी तुम मोरो पर पथराव करय हय?”
JOH 10:33 यहूदियों न ओख उत्तर दियो, “भलो काम लायी हम तोरो पर पथराव नहीं करजे पर परमेश्वर की निन्दा करन को वजह; अऊर येकोलायी कि तय आदमी होय क अपनो आप ख परमेश्वर बतावय हय।”
JOH 10:34 यीशु न उन्ख उत्तर दियो, “का तुम्हरी व्यवस्था म नहीं लिख्यो हय, ‘मय न कह्यो, तुम ईश्वर आय?’
JOH 10:35 यदि ओन उन्ख ईश्वर कह्यो जिन्को जवर परमेश्वर को वचन पहुंच्यो अऊर पवित्र शास्त्र की बात असत्य नहीं होय सकय,
JOH 10:36 त जेक बाप न पवित्र ठहराय क जगत म भेज्यो हय, तुम ओको सी कह्य हय, ‘तय निन्दा करय हय,’ येकोलायी कि मय न कह्यो, ‘मय परमेश्वर को बेटा आय?’
JOH 10:37 यदि मय अपनो बाप को काम नहीं करतो, त मोरो विश्वास मत करो।
JOH 10:38 पर यदि मय करू हय, त चाहे मोरो विश्वास नहीं भी करो, पर उन कामों को त विश्वास करो, ताकि तुम जानो अऊर समझो कि बाप मोरो म हय अऊर मय बाप म हय।”
JOH 10:39 तब उन्न फिर ओख पकड़न को कोशिश करयो पर ऊ उन्को हाथ सी निकल गयो।
JOH 10:40 तब ऊ यरदन नदी को पार ऊ जागा पर चली गयो, जित यूहन्ना पहिले बपतिस्मा दियो करत होतो, अऊर उतच रह्यो।
JOH 10:41 बहुत सो लोग ओको जवर आय क कहत होतो, “यूहन्ना न त कोयी चिन्ह नहीं दिखायो, पर जो कुछ यूहन्ना न येको बारे म कह्यो होतो, ऊ सब सच होतो।”
JOH 10:42 अऊर उत बहुतों न यीशु पर विश्वास करयो।
JOH 11:1 मरियम अऊर ओकी बहिन मार्था को गांव बैतनिय्याह को लाजर नाम को एक आदमी बीमार होतो।
JOH 11:2 या वा मरियम होती जेन प्रभु पर अत्तर डाल क ओको पाय ख अपनो बालों सी पोछ्यो होतो, येको भाऊ लाजर बीमार होतो।
JOH 11:3 येकोलायी ओकी बहिनों न ओख कहला भेज्यो, “हे प्रभु, देख, जेक तय बहुत प्रेम करय हय, ऊ बीमार हय।”
JOH 11:4 यो सुन्क यीशु न कह्यो, “या बीमारी मृत्यु की नोहोय; पर परमेश्वर की महिमा लायी आय, कि ओको द्वारा परमेश्वर को बेटा की महिमा हो।”
JOH 11:5 यीशु मार्था अऊर ओकी बहिन अऊर लाजर सी प्रेम रखत होतो।
JOH 11:6 तब भी जब ओन सुन्यो कि ऊ बीमार हय, त जो जागा पर ऊ होतो, उत दोय दिन अऊर रुक गयो।
JOH 11:7 येको बाद ओन चेलावों सी कह्यो, “आवो, हम फिर यहूदिया ख चलबो।”
JOH 11:8 चेलावों न ओको सी कह्यो, “हे गुरु, अभी त यहूदी तोरो पर पथराव करनो चाहत होतो, अऊर का तय फिर भी उतच जावय हय?”
JOH 11:9 यीशु न उत्तर दियो, “का दिन को बारा घंटा नहीं होवय? यदि कोयी दिन म चलय त ठोकर नहीं खावय, कहालीकि यो जगत को प्रकाश देखय हय।
JOH 11:10 पर यदि कोयी रात म चलय त ठोकर खावय हय, कहालीकि ओको म प्रकाश नहाय।”
JOH 11:11 ओन यो बाते कहीं, अऊर येको बाद उन्को सी कहन लग्यो, “हमरो संगी लाजर सोय गयो हय, पर मय ओख जगावन जाऊं हय।”
JOH 11:12 तब चेलावों न ओको सी कह्यो, “हे प्रभु, यदि ऊ सोय गयो हय, त चंगो होय जायेंन।”
JOH 11:13 यीशु न त ओको मरन को बारे म कह्यो होतो, पर हि समझ्यो कि ओन नींद सी सोय जान को बारे म कह्यो।
JOH 11:14 तब यीशु न उन्को सी साफ साफ कह्य दियो, “लाजर मर गयो हय;
JOH 11:15 अऊर मय तुम्हरो वजह खुश हय कि मय उत नहीं होतो जेकोसी तुम विश्वास करो। पर अब आवो, हम ओको जवर चलबो।”
JOH 11:16 तब थोमा न जो दिदुमुस कहलावय हय, अपनो संगी चेलावों सी कह्यो, “आवो, हम भी ओको संग मरन ख चलबो।”
JOH 11:17 उत पहुंचन पर यीशु ख यो मालूम भयो कि लाजर ख कब्र म रख्यो चार दिन भय गयो हंय।
JOH 11:18 बैतनिय्याह गांव यरूशलेम नगर को जवर लगभग कुछ तीन किलोमीटर दूर होतो।
JOH 11:19 बहुत सो यहूदी मार्था अऊर मरियम को जवर उन्को भाऊ को मरन पर शान्ति देन लायी आयो होतो।
JOH 11:20 जब मार्था न यीशु को आवन को समाचार सुन्यो त ओको सी मुलाखात करन क गयी, पर मरियम घर परच रही।
JOH 11:21 मार्था न यीशु सी कह्यो, “हे प्रभु, यदि तय इत होतो, त मोरो भाऊ कभीच नहीं मरतो।
JOH 11:22 अऊर अब भी मय जानु हय कि जो कुछ तय परमेश्वर सी मांगजो, परमेश्वर तोख देयेंन।”
JOH 11:23 यीशु न ओको सी कह्यो, “तोरो भाऊ फिर जीन्दो होयेंन।”
JOH 11:24 मार्था न ओको सी कह्यो, “मय जानु हय कि आखरी दिन म पुनरुत्थान को समय ऊ जीन्दो होयेंन।”
JOH 11:25 यीशु न ओको सी कह्यो, “पुनरुत्थान अऊर जीवन मयच आय; जो कोयी मोरो पर विश्वास करय हय ऊ यदि मर भी जाय तब भी जीयेंन,
JOH 11:26 अऊर जो कोयी जीन्दो हय अऊर मोर पर विश्वास करय हय, ऊ अनन्त काल तक नहीं मरेंन। का तय या बात पर विश्वास करय हय?”
JOH 11:27 ओन ओको सी कह्यो, “हव हे प्रभु, मय विश्वास करू हय कि परमेश्वर को बेटा मसीह जो जगत म आवन वालो होतो, ऊ तयच आय।”
JOH 11:28 यो कह्य क वा चली गयी, अऊर अपनी बहिन मरियम ख बुलाय क चुपचाप सी कह्यो, “गुरु इतच हय अऊर तोख बुलावय हय।”
JOH 11:29 यो सुनतोच ऊ तुरतच उठ क् ओको जवर आयी।
JOH 11:30 यीशु अभी गांव म नहीं पहुंच्यो होतो पर वाच जागा म होतो जित मार्था न ओको सी मुलाखात करी होती।
JOH 11:31 तब जो यहूदी ओको संग घर म होतो अऊर ओख शान्ति दे रह्यो होतो, यो देख क कि मरियम तुरतच उठ क् बाहेर गयी हय यो समझ्यो कि वा कब्र पर रोवन ख जाय रही हय, त हि ओको पीछू गयो।
JOH 11:32 जब मरियम उत पहुंची जित यीशु होतो, त ओख देखतोच ओको पाय पर गिर क कह्यो, “हे प्रभु, यदि तय इत होतो त मोरो भाऊ नहीं मरतो।”
JOH 11:33 जब यीशु न ओख अऊर उन यहूदियों ख जो ओको संग आयो होतो, रोवतो हुयो देख्यो, त आत्मा म बहुतच उदास अऊर व्याकुल भयो।
JOH 11:34 अऊर कह्यो, “तुम्न ओख कित रख्यो हय?” उन्न ओको सी कह्यो, “हे प्रभु, चल क देख ले।”
JOH 11:35 यीशु रोयो।
JOH 11:36 तब यहूदी कहन लग्यो, “देखो, ऊ ओको सी कितनो प्रेम रखत होतो।”
JOH 11:37 पर उन्म सी कुछ न कह्यो, “का यो जेन अन्धा की आंखी खोल्यो, यो भी नहीं कर सक्यो कि यो आदमी नहीं मरतो।”
JOH 11:38 यीशु मन म बहुतच उदास होय क कब्र पर आयो। ऊ एक गुफा होती अऊर एक गोटा ओको पर रख्यो होतो।
JOH 11:39 यीशु न कह्यो, “गोटा हटाव।” वा मरयो हुयो की बहिन मार्था ओको सी कहन लगी, “हे प्रभु, ओको म सी अब त बास आवय हय, कहालीकि ओख मरयो चार दिन भय गयो हंय।”
JOH 11:40 यीशु न ओको सी कह्यो, “का मय न तोरो सी नहीं कह्यो होतो कि यदि तय विश्वास करजो, त परमेश्वर की महिमा ख देखेंन।”
JOH 11:41 तब उन्न ऊ गोटा ख हटायो। यीशु न आंखी उठाय क कह्यो, “हे पिता, मय तोरो धन्यवाद करू हय कि तय न मोरी सुन ली हय।
JOH 11:42 मय जानत होतो कि तय हमेशा मोरी सुनय हय, पर जो भीड़ आजु बाजू खड़ी हय, उन्को वजह मय न यो कह्यो, जेकोसी कि हि विश्वास करेंन कि तय न मोख भेज्यो हय।”
JOH 11:43 यो कह्य क ओन बड़ो आवाज सी पुकारयो, “हे लाजर, निकल आव!”
JOH 11:44 जो मर गयो होतो ऊ कफन सी हाथ पाय बन्ध्यो हुयो निकल आयो, अऊर ओको मुंह गमछा सी लिपट्यो हुयो होतो। यीशु न उन्को सी कह्यो, “ओख खोल दे अऊर जान दे।”
JOH 11:45 तब जो यहूदी मरियम को जवर आयो होतो अऊर ओको यो काम देख्यो होतो, उन्म सी बहुत सो न ओको पर विश्वास करयो।
JOH 11:46 पर उन्म सी कुछ न फरीसियों को जवर जाय क यीशु को काम को समाचार दियो।
JOH 11:47 येको पर मुख्य याजकों अऊर फरीसियों न महासभा बुलायो, अऊर कह्यो, “हम का करजे हंय? यो आदमी त बहुत आश्चर्य को चिन्ह दिखावय हय
JOH 11:48 यदि हम ओख असोच रहन दियो, त हर कोयी ओको पर विश्वास करेंन, अऊर यो तरह रोमी लोग यहां आय जायेंन अऊर हमरो मन्दिर अऊर राष्ट्र ख नाश कर देयेंन।”
JOH 11:49 तब उन्म सी कैफा नाम को एक आदमी न जो ऊ साल को महायाजक होतो, उन्को सी कह्यो, “तुम कुछ भी नहीं जानय;
JOH 11:50 अऊर नहीं यो समझय हय कि तुम्हरो लायी यो अच्छो हय कि हमरो लोगों लायी एक आदमी मरे, अऊर पूरी जाति नाश नहीं होय।”
JOH 11:51 या बात ओन अपनो तरफ सी नहीं कहीं, पर ऊ साल को महायाजक होय क भविष्यवानी करी, कि यीशु यहूदी लोगों लायी मरेंन;
JOH 11:52 अऊर नहीं केवल ऊ जाति लायी, बल्की येकोलायी भी कि परमेश्वर की तितर–बितर सन्तानों ख एक कर दे।
JOH 11:53 येकोलायी उच दिन सी हि ओख मार डालन को साजीश रचन लग्यो।
JOH 11:54 येकोलायी यीशु ऊ समय सी यहूदियों म प्रगट होय क नहीं फिरयो, पर उत सी जंगल को जवर को प्रदेश को इफ्राईम नाम को एक नगर ख चली गयो; अऊर अपनो चेलावों को संग उतच रहन लग्यो।
JOH 11:55 यहूदियों को फसह को त्यौहार जवर होतो, अऊर बहुत सो लोग फसह सी पहिले गांव सी यरूशलेम ख गयो कि अपनो खुद ख शुद्ध करे।
JOH 11:56 येकोलायी हि यीशु ख ढूंढन लग्यो अऊर मन्दिर म खड़ो होय क आपस म कहन लग्यो, “तुम का सोचय हय? का ऊ पर्व म नहीं आयेंन?”
JOH 11:57 मुख्य याजकों अऊर फरीसियों न या आज्ञा दे रख्यो होतो कि यदि कोयी यो जानेंन कि यीशु कित हय त बताव, ताकि हि ओख पकड़ सकेंन।
JOH 12:1 यीशु फसह को त्यौहार सी छे दिन पहिले बैतनिय्याह गांव म आयो जित लाजर होतो, जेक यीशु न मरयो हुयो म सी जीन्दो करयो होतो।
JOH 12:2 उत उन्न ओको लायी भोजन तैयार करयो; अऊर मार्था सेवा करत होती, अऊर लाजर उन्म सी एक होतो जो ओको संग जेवन करन लायी बैठ्यो होतो।
JOH 12:3 तब मरियम न जटामांसी को अरधो लीटर बहुत कीमती अत्तर ले क यीशु को पाय पर डाल्यो, अऊर अपनो बालों सी ओको पाय पोछ्यो; अऊर अत्तर की सुगन्ध सी घर सुगन्धित भय गयो।
JOH 12:4 पर ओको चेलावों म सी यहूदा इस्करियोती नाम को एक चेला जो ओख पकड़वान पर होतो, कहन लग्यो,
JOH 12:5 “यो अत्तर तीन सौ चांदी को सिक्का म बेच क गरीबों ख कहाली नहीं दियो गयो?”
JOH 12:6 ओन या बात येकोलायी नहीं कहीं कि ओख गरीबों की चिन्ता होती पर येकोलायी कि ऊ चोर होतो, अऊर ओको जवर उन्की पैसा कि झोली रहत होती अऊर ओको म जो कुछ डाल्यो जात होतो, ऊ निकाल लेत होतो।
JOH 12:7 यीशु न कह्यो, “ओख रहन दे। ओख यो मोरो गाड़्यो जान को दिन लायी रखन दे।
JOH 12:8 कहालीकि गरीब त तुम्हरो संग हमेशा रह्य हंय, पर मय तुम्हरो संग हमेशा नहीं रहूं।”
JOH 12:9 जब यहूदियों की बड़ी भीड़ जान गयी कि ऊ उत हय, त हि नहीं केवल यीशु को वजह आयो पर येकोलायी भी कि लाजर ख देखे, जेक ओन मरयो हुयो म सी जीन्दो करयो होतो।
JOH 12:10 तब मुख्य याजकों न लाजर ख भी मार डालन को साजीश रच्यो।
JOH 12:11 कहालीकि ओको वजह बहुत सो यहूदी चली गयो अऊर यीशु पर विश्वास करयो।
JOH 12:12 दूसरों दिन बहुत सो लोगों न जो त्यौहार म आयो होतो यो सुन्यो कि यीशु यरूशलेम म आय रह्यो हय।
JOH 12:13 येकोलायी उन्न खजूर की डगाली धरी अऊर ओको सी भेंट करन ख निकल्यो, अऊर पुकारन लग्यो, “परमेश्वर की महिमा हो! धन्य इस्राएल को राजा, जो प्रभु को नाम सी आवय हय।”
JOH 12:14 जब यीशु ख गधा को एक बछड़ा मिल्यो; त ऊ ओको पर बैठ गयो, जसो लिख्यो हय,
JOH 12:15 “हे सिय्योन की बेटी, मत डर; देख, तोरो राजा गधा को बछड़ा पर सवार हुयो आवय हय।”
JOH 12:16 ओको चेलावों या बाते पहिले नहीं समझ्यो होतो, पर जब यीशु की महिमा प्रगट भयी त उन्ख याद आयो कि या बाते ओको बारे म लिख्यो हुयी होती अऊर लोगों न ओको सी योच तरह को व्यवहार करयो होतो।
JOH 12:17 तब भीड़ को उन लोगों न गवाही दी, जो ऊ समय ओको संग होतो, जब ओन लाजर ख कब्र म सी बुलाय क मरयो हुयो म सी जीन्दो करयो होतो।
JOH 12:18 योच वजह लोग ओको सी मिलन आयो होतो कहालीकि उन्न सुन्यो होतो कि ओन यो आश्चर्य चिन्ह दिखायो हय।
JOH 12:19 तब फरीसियों न आपस म कह्यो, “सोचो त सही कि तुम सी कुछ नहीं बन पड़य। देखो, जगत ओको पीछू चलन लग्यो हय।”
JOH 12:20 जो लोग ऊ त्यौहार म आराधना करन आयो होतो उन्म सी कुछ गैरयहूदियों होतो।
JOH 12:21 उन्न गलील प्रदेश को बैतसैदा नगर को रहन वालो फिलिप्पुस को जवर आय क ओको सी बिनती करी, “महाराज, हम यीशु ख देखनो चाहजे हंय।”
JOH 12:22 फिलिप्पुस न आय क अन्द्रियास सी कह्यो, तब अन्द्रियास अऊर फिलिप्पुस न जाय क यीशु सी कह्यो।
JOH 12:23 येको पर यीशु न उन्को सी कह्यो, “ऊ समय आय गयो हय कि आदमी को बेटा की महिमा हो।
JOH 12:24 मय तुम सी सच सच कहू हय कि जब तक गहूं को बीजा जमीन म गिड़ क मर नहीं जावय, ऊ अकेलो रह्य हय; पर जब मर जावय हय, त बहुत फर लावय हय।
JOH 12:25 जो अपनो जीव ख प्रिय जानय हय, ऊ ओख खोय देवय हय; अऊर जो यो जगत म अपनो जीव ख अप्रिय जानय हय, ऊ अनन्त जीवन लायी ओकी रक्षा करेंन।
JOH 12:26 यदि कोयी मोरी सेवा करे, त मोरो पीछू होय जा; अऊर जित मय हय, उत मोरो सेवक भी होयेंन। यदि कोयी मोरी सेवा करेंन, त बाप ओको आदर करेंन।
JOH 12:27 “अब मोरो जीव परेशान हय। येकोलायी अब मय का कहूं? ‘हे पिता, मोख या घड़ी सी बचाव?’ असो नहीं पर मय योच वजह सी यो घड़ी तक पहुंच्यो हय।
JOH 12:28 हे पिता, अपनो नाम की महिमा कर।” तब यो स्वर्ग सी आवाज भयी। “मय न ओकी महिमा करी हय, अऊर फिर भी करू।”
JOH 12:29 तब जो लोग खड़ो हुयो सुन रह्यो होतो उन्न कह्यो कि बादर गरज्यो। दूसरों न कह्यो, “कोयी स्वर्गदूत ओको सी बोल्यो।”
JOH 12:30 येको पर यीशु न कह्यो, “यो शब्द मोरो लायी नहीं, पर तुम्हरो लायी आयो हय।
JOH 12:31 अब यो जगत को न्याय होवय हय, अब यो जगत को शासक निकाल दियो जायेंन;
JOH 12:32 अऊर मय यदि धरती पर सी ऊचो पर चढ़ायो जाऊं, त सब ख अपनो जवर खीचूं।”
JOH 12:33 असो कह्य क ओन यो प्रगट कर दियो कि ऊ कसो मृत्यु सी मरेंन।
JOH 12:34 येको पर लोगों न ओको सी कह्यो, “हम न व्यवस्था की या बात सुनी हय कि मसीह हमेशा रहेंन, तब तय कहाली कह्य हय कि आदमी को बेटा ख ऊचो पर चढ़ायो जानो जरूरी हय? यो आदमी को बेटा कौन आय?”
JOH 12:35 यीशु न उन्को सी कह्यो, “ज्योति अब थोड़ी देर तक तुम्हरो बीच म हय। जब तक ज्योति तुम्हरो संग हय तब तक चलतो रहो, असो नहीं होय कि अन्धारो तुम्ख आय घेरे; जो अन्धारो म चलय हय ऊ नहीं जानय कि कित जावय हय।
JOH 12:36 जब तक ज्योति तुम्हरो संग हय, ज्योति पर विश्वास करो ताकि तुम ज्योति की सन्तान बनो।” या बाते कह्य क यीशु चली गयो अऊर उन्को सी लूक्यो रह्यो।
JOH 12:37 ओन उन्को आगु इतनो आश्चर्य को चिन्ह दिखायो, तब भी उन्न ओको पर विश्वास नहीं करयो;
JOH 12:38 ताकि यशायाह भविष्यवक्ता को वचन पूरो होय जो ओन कह्यो: “हे प्रभु, हमरो समाचार को कौन न विश्वास करयो हय? अऊर प्रभु को भुजबल कौन्को पर प्रगट भयो हय?”
JOH 12:39 यो वजह हि विश्वास नहीं कर सक्यो, कहालीकि यशायाह न यो भी कह्यो हय:
JOH 12:40 “ओन उन्की आंखी अन्धो, अऊर उन्को मन कठोर कर दियो हय; कहीं असो नहीं होय कि हि आंखी सी देखे, अऊर मन सी समझे, अऊर मोरो तरफ फिरे, अऊर मय उन्ख चंगो करू।”
JOH 12:41 यशायाह न या बात येकोलायी कहीं कि ओन ओकी महिमा देखी, अऊर ओन ओको बारे म बाते करी।
JOH 12:42 तब भी अधिकारियों म सी बहुत सो न ओको पर विश्वास करयो, पर फरीसियों को वजह प्रगट म नहीं मानत होतो, कहीं असो नहीं होय कि हि आराधनालयों म सी निकाल दियो जायेंन:
JOH 12:43 कहालीकि आदमियों को तरफ सी बड़ायी उन्ख परमेश्वर को तरफ सी बड़ायी की अपेक्षा बहुत प्रिय लगत होती।
JOH 12:44 यीशु न पुकार क कह्यो, “जो मोर पर विश्वास करय हय, ऊ मोरो पर नहीं बल्की मोरो भेजन वालो पर विश्वास करय हय।
JOH 12:45 अऊर जो मोख देखय हय, ऊ मोरो भेजन वालो ख देखय हय।
JOH 12:46 मय जगत म ज्योति होय क आयो हय, ताकि जो कोयी मोरो पर विश्वास करेंन ऊ अन्धारो म नहीं रहेंन।
JOH 12:47 यदि कोयी मोरी बाते सुन्क नहीं मानेंन, त मय ओख दोषी नहीं ठहराऊ; कहालीकि मय जगत ख दोषी ठहरान लायी नहीं, पर जगत को उद्धार करन लायी आयो हय।
JOH 12:48 जो मोख बेकार जानय हय अऊर मोरी बाते स्वीकार नहीं करय हय ओख दोषी ठहरान वालो त एक हय: यानेकि जो वचन मय न कह्यो हय, उच पिछलो दिन म ओख दोषी ठहरायेंन।
JOH 12:49 कहालीकि मय न अपनी तरफ सी बाते नहीं करी; पर बाप जेन मोख भेज्यो हय ओन मोख आज्ञा दी हय कि का का कहूं अऊर का का बोलू?
JOH 12:50 अऊर मय जानु हय कि ओकी आज्ञा अनन्त जीवन आय। येकोलायी मय जो कुछ बोलू हय, ऊ जसो बाप न मोरो सी कह्यो हय वसोच बोलू हय।”
JOH 13:1 फसह को त्यौहार सी पहिले, जब यीशु न जान लियो कि मोरो ऊ समय आय पहुंच्यो हय कि जगत छोड़ क बाप को जवर जाऊं, त अपनो लोगों सी जो जगत म होतो जसो प्रेम ऊ रखत होतो, आखरी तक वसोच प्रेम रखत रह्यो।
JOH 13:2 यीशु अऊर ओको चेला उत होतो तबच शैतान शिमोन को टुरा यहूदा इस्करियोती को मन म यो डाल चुक्यो होतो कि ओख पकड़वाये, त जेवन को समय
JOH 13:3 यीशु न, यो जान क कि बाप न सब कुछ मोरो हाथ म कर दियो हय अऊर मय परमेश्वर को जवर सी आयो हय अऊर परमेश्वर को जवर जाऊं हय,
JOH 13:4 जेवन पर सी उठ क अपनो बनियाइन को ऊपर को कपड़ा को कुरता उतार दियो, अऊर गमछा ले क अपनो कमर बान्ध्यो।
JOH 13:5 तब बर्तन म पानी भर क चेलावों को पाय धोवन लग्यो अऊर जो गमछा सी ओकी कमर बन्धी होती ओको सी पोछन लग्यो।
JOH 13:6 जब ऊ शिमोन पतरस को जवर आयो, तब पतरस न ओको सी कह्यो, “हे प्रभु, का तय मोरो पाय धोवय हय?”
JOH 13:7 यीशु न ओख उत्तर दियो, “जो मय करू हय, तय ओख अभी नहीं जानय, पर येको बाद समझेंन।”
JOH 13:8 पतरस न ओको सी कह्यो, “तय मोरो पाय कभी नहीं धोय सकजो!” यो सुन्क यीशु न ओको सी कह्यो, “यदि मय तोरो पाय नहीं धोऊं, त मोरो संग तोरो कुछ भी साझा नहीं।”
JOH 13:9 शिमोन पतरस न ओको सी कह्यो, “हे प्रभु, त मोरो पायच नहीं, बल्की हाथ अऊर मुंड भी धोय दे।”
JOH 13:10 यीशु न ओको सी कह्यो, “जो आंगधोय लियो हय ओख पाय को अलावा अऊर कुछ धोवन की जरूरत नहाय, पर ऊ बिल्कुल शुद्ध हय; अऊर तुम शुद्ध हो, पर सब को सब नहीं।”
JOH 13:11 ऊ त अपनो पकड़वान वालो ख जानत होतो येकोलायी ओन कह्यो, “तुम सब को सब शुद्ध नहाय।”
JOH 13:12 जब ऊ उन्को पाय धोय लियो, अऊर अपनो कपड़ा पहिन क फिर बैठ गयो, त उन्को सी कहन लग्यो, “का तुम समझ्यो कि मय न तुम्हरो संग का करयो?
JOH 13:13 तुम मोख गुरु अऊर प्रभु कह्य हय, अऊर ठीकच कह्य हय, कहालीकि मय उच आय।
JOH 13:14 यदि मय न प्रभु अऊर गुरु होय क् तुम्हरो पाय धोयो, त तुम्ख भी एक दूसरों को पाय धोवन क होना।
JOH 13:15 कहालीकि मय न तुम्ख कर क् दिखाय दियो हय कि जसो मय न तुम्हरो संग करयो हय, तुम भी वसोच करो।
JOH 13:16 मय तुम सी सच सच कहू हय, सेवक अपनो मालिक सी बड़ो नहाय, अऊर नहीं भेज्यो हुयो अपनो भेजन वालो सी।
JOH 13:17 तुम या बात जानय हय, अऊर यदि उन पर चलो त धन्य हय।
JOH 13:18 “मय तुम सब को बारे म नहीं कहू; जिन्ख मय न चुन लियो हय, उन्ख मय जानु हय; पर यो येकोलायी हय कि शास्त्र को यो वचन पूरो होय, ‘जो मोरी रोटी खावय हय, ऊ मोरो विरुद्ध हय।’
JOH 13:19 अब मय ओको होन सी पहिले तुम्ख बताय देऊ हय कि जब यो होय जाये त तुम विश्वास करो कि मय उच आय।
JOH 13:20 मय तुम सी सच सच कहू हय कि जो मोरो भेज्यो हुयो ख स्वीकार करय हय, ऊ मोख स्वीकार करय हय; अऊर जो मोख स्वीकार करय हय; ऊ मोरो भेजन वालो ख स्वीकार करय हय।”
JOH 13:21 या बाते कह्य क यीशु आत्मा म दु:खी भयो अऊर या गवाही दी, “मय तुम सी सच सच कहू हय कि तुम म सी एक मोख पकड़वायेंन।”
JOH 13:22 चेलावों एक दूसरों ख ताकन लग्यो कहालीकि समझ नहीं सक्यो कि ऊ कौन्को बारे म कह्य रह्य हय।
JOH 13:23 ओको चेलावों म सी एक जेकोसी यीशु प्रेम रखत होतो, यीशु को आगु बैठ्यो होतो।
JOH 13:24 शिमोन पतरस न ओको तरफ इशारा कर क् ओको सी पुच्छ्यो, “बताव, त ऊ कौन्को बारे म कह्य हय?”
JOH 13:25 तब ओन वसोच यीशु को तरफ झुक्यो हुयो ओको सी पुच्छ्यो, “हे प्रभु, ऊ कौन हय?”
JOH 13:26 यीशु न उत्तर दियो, “जेक मय यो रोटी को टुकड़ा डुबाय क देऊं उच आय।” अऊर ओन टुकड़ा डुबाय क शिमोन इस्करियोती को टुरा यहूदा ख दियो।
JOH 13:27 टुकड़ा लेतोच शैतान ओको म समाय गयो। तब यीशु न ओको सी कह्यो, “जो तय करय हय, तुरतच कर।”
JOH 13:28 पर बैठन वालो म सी कोयी न नहीं जान्यो कि ओन या बात ओको सी कहाली कहीं।
JOH 13:29 यहूदा को जवर पैसा कि झोली रहत होती, येकोलायी कोयी कोयी न समझ्यो कि यीशु ओको सी कह्य रह्यो हय कि जो कुछ हम्ख त्यौहार लायी होना ऊ ले ले, यां यो कि गरीबों ख कुछ दे।
JOH 13:30 अऊर ऊ टुकड़ा ले क तुरतच बाहेर चली गयो; अऊर यो रात को समय होतो।
JOH 13:31 जब ऊ बाहेर चली गयो त यीशु न कह्यो, “अब आदमी को बेटा की महिमा भयी हय, अऊर परमेश्वर की महिमा उन्म भयी हय;
JOH 13:32 यदि उन्म परमेश्वर की महिमा भयी हय, त परमेश्वर भी अपनो म ओकी महिमा करेंन अऊर तुरतच करेंन।
JOH 13:33 हे बच्चां, मय अऊर थोड़ी देर तुम्हरो जवर हय: फिर तुम मोख ढूंढो, अऊर जसो मय न यहूदियों सी कह्यो, ‘जित मय जाऊ हय उत तुम नहीं आय सकय,’ वसोच मय अब तुम सी भी कहू हय।
JOH 13:34 मय तुम्ख एक नयी आज्ञा देऊ हय कि एक दूसरों सी प्रेम रखो; जसो मय न तुम सी प्रेम रख्यो हय, वसोच तुम भी एक दूसरों सी प्रेम रखो।
JOH 13:35 यदि आपस म प्रेम रखेंन, त येको सी सब जानेंन कि तुम मोरो चेलां आय।”
JOH 13:36 शिमोन पतरस न ओको सी कह्यो, “हे प्रभु, तय कित जावय हय?” यीशु न उत्तर दियो, “जित मय जाऊ हय उत तय अभी मोरो पीछू आय नहीं सकय; पर येको बाद मोरो पीछू आयेंन।”
JOH 13:37 पतरस न ओको सी कह्यो, “हे प्रभु, अभी मय तोरो पीछू कहाली नहीं आय सकू? मय त तोरो लायी अपनो जीव भी दे देऊ।”
JOH 13:38 यीशु न उत्तर दियो, “का तय मोरो लायी अपनो जीव देजो? मय तोरो सी सच सच कहू हय कि मुर्गा बाग देयेंन ओको सी पहिले तक तय तीन बार मोरो इन्कार कर लेजो।
JOH 14:1 “तुम्हरो मन दु:खी नहीं हो; परमेश्वर पर विश्वास रखो अऊर मोरो पर भी विश्वास रखो।
JOH 14:2 मोरो बाप को घर म बहुत सो रहन की जागा हंय, यदि नहीं होतो त मय तुम सी कह्य देतो; कहालीकि मय तुम्हरो लायी जागा तैयार करन जाऊ हय।
JOH 14:3 अऊर यदि मय जाय क तुम्हरो लायी जागा तैयार करू, त फिर आय क तुम्ख अपनो इत ले जाऊं कि जित मय रहूं उत तुम भी रहो।
JOH 14:4 जित मय जाऊ हय तुम उत को रस्ता जानय हय।”
JOH 14:5 थोमा न ओको सी कह्यो, “हे प्रभु, हम नहीं जानय कि तय कित जाय रह्यो हय; त रस्ता कसो जानबो?”
JOH 14:6 यीशु न ओको सी कह्यो, “रस्ता अऊर सत्य अऊर जीवन मयच हय; बिना मोरो द्वारा कोयी बाप को जवर नहीं पहुंच सकय।
JOH 14:7 यदि तुम न मोख जान्यो होतो, त मोरो बाप ख भी जानतो; अऊर अब ओख जानय हय, अऊर ओख देख्यो भी हय।”
JOH 14:8 फिलिप्पुस न ओको सी कह्यो, “हे प्रभु, पिता ख हम्ख दिखाय दे, योच हमरो लायी बहुत हय।”
JOH 14:9 यीशु न ओको सी कह्यो, “हे फिलिप्पुस, मय इतनो दिन सी तुम्हरो संग हय, अऊर का तय मोख नहीं जानय? जेन मोख देख्यो हय ओन बाप ख देख्यो हय। तय कहाली कह्य हय कि बाप ख हम्ख दिखाव?
JOH 14:10 का तय विश्वास नहीं करय कि मय बाप म हय अऊर बाप मोर म हय? या बाते जो मय तुम सी कहू हय, अपनो तरफ सी नहीं कहूं, पर बाप मोर म रह्य क अपनो काम करय हय।
JOH 14:11 जो मोरी या बात पर विश्वास करो कि मय बाप म हय अऊर बाप मोर म हय; नहीं त कामों को वजह मोरो विश्वास करो।”
JOH 14:12 “मय तुम सी सच सच कहू हय कि जो मोर पर विश्वास रखय हय, यो काम जो मय करू हय ऊ भी करेंन, बल्की इन सी भी बड़ो काम करेंन, कहालीकि मय बाप को जवर जाऊं हय।
JOH 14:13 जो कुछ तुम मोरो नाम सी मांगो, उच मय करू कि बेटा को द्वारा बाप की महिमा होय।
JOH 14:14 यदि तुम मोरो सी मोरो नाम सी कुछ मांगो, त मय ओख करू।”
JOH 14:15 “यदि तुम मोरो सी प्रेम रखय हय, त मोरी आज्ञावों ख मानो।
JOH 14:16 मय बाप सी बिनती करू, अऊर ऊ तुम्ख एक अऊर सहायक देयेंन कि ऊ हमेशा तुम्हरो संग रहेंन”
JOH 14:17 यानेकि सत्य की आत्मा, जेक जगत स्वीकार नहीं कर सकय, कहालीकि ऊ नहीं ओख देखय हय अऊर नहीं ओख जानय हय; तुम ओख जानय हय, कहालीकि ऊ तुम्हरो संग रह्य हय, अऊर ऊ तुम म रहेंन।
JOH 14:18 “मय तुम्ख अनाथ नहीं छोड़ूं; मय तुम्हरो जवर आऊं।
JOH 14:19 अऊर थोड़ी देर रह गयी हय कि फिर जगत मोख नहीं देखेंन, पर तुम मोख देखेंन; येकोलायी कि मय जीन्दो हय, तुम भी जीन्दो रहेंन।
JOH 14:20 ऊ दिन तुम जानेंन कि मय अपनो बाप म हय, अऊर तुम मोर म, अऊर मय तुम म।”
JOH 14:21 जेको जवर मोरी आज्ञाये हंय अऊर ऊ उन्ख मानय हय, उच मोरो सी प्रेम रखय हय; अऊर जो मोरो सी प्रेम रखय हय ओको सी मोरो बाप प्रेम रखेंन, अऊर मय ओको सी प्रेम रखू अऊर अपनो आप ख ओको पर प्रगट करू।
JOH 14:22 ऊ यहूदा न जो इस्करियोती नहीं होतो, ओको सी कह्यो, “हे प्रभु, का भयो कि तय अपनो आप ख हम पर प्रगट करनो चाहवय हय अऊर जगत पर नहीं?”
JOH 14:23 यीशु न ओख उत्तर दियो, “यदि कोयी मोर सी प्रेम रखेंन त ऊ मोरो वचन ख मानेंन, अऊर मोरो बाप ओको सी प्रेम रखेंन, अऊर हम ओको जवर आबो अऊर ओको संग रहबो।
JOH 14:24 जो मोरो सी प्रेम नहीं रखय, ऊ मोरो वचन नहीं मानय; अऊर जो वचन तुम सुनय हय ऊ मोरो नहीं बल्की बाप को हय, जेन मोख भेज्यो।”
JOH 14:25 “या बाते मय न तुम्हरो संग रहतो हुयो तुम सी कहीं।
JOH 14:26 पर सहायक यानेकि पवित्र आत्मा जेख बाप मोरो नाम सी भेजेंन, ऊ तुम्ख सब बाते सिखायेंन, अऊर जो कुछ मय न तुम सी कह्यो हय, ऊ सब तुम्ख याद दिलायेंन।”
JOH 14:27 मय तुम्ख शान्ति दियो जाऊं हय, अपनी शान्ति तुम्ख देऊ हय; जसो जगत देवय हय, मय तुम्ख नहीं देऊ: तुम्हरो मन दु:खी नहीं हो अऊर मत डरो।
JOH 14:28 तुम न सुन्यो कि मय न तुम सी कह्यो, “मय जाऊं हय, अऊर तुम्हरो जवर फिर आऊं।” यदि तुम मोरो सी प्रेम रखतो, त या बात सी खुशी होतो कि मय बाप को जवर जाऊं हय, कहालीकि बाप मोर सी बड़ो हय।
JOH 14:29 अऊर मय न अब येको होनो सी पहिले तुम सी कह्य दियो हय, कि जब ऊ होय जाये, त तुम विश्वास करो।
JOH 14:30 मय अब तुम्हरो संग अऊर बहुत बाते नहीं करू, कहालीकि यो जगत को शासक आवय हय। मोरो पर ओको कोयी अधिकार नहीं;
JOH 14:31 पर यो येकोलायी होवय हय कि जगत जाने कि मय बाप सी प्रेम रखू हय, अऊर जसो बाप न मोख आज्ञा दियो हय मय वसोच करू हय। उठो, इत सी चलबो।
JOH 15:1 “सच्ची दाखलता मय आय, अऊर मोरो बाप किसान आय।
JOH 15:2 जो डगाली मोर म हय अऊर नहीं फरय, ओख ऊ काट डालय हय; अऊर जो फरय हय, ओख ऊ छाटय हय ताकि अऊर फरे।
JOH 15:3 तुम त ऊ वचन को वजह जो मय न तुम सी कह्यो हय, शुद्ध हो।
JOH 15:4 तुम मोर म बन्यो रहो, अऊर मय तुम म जसो डगाली यदि दाखलता म बन्यो नहीं रहो त अपनो आप सी नहीं फर सकय, वसोच तुम भी यदि मोर म बन्यो नहीं रहो त नहीं फर सकय।”
JOH 15:5 “मय दाखलता आय : तुम डगाली आय। जो मोर म बन्यो रह्य हय अऊर मय उन्म, ऊ बहुत फर फरय हय, कहालीकि मोर सी अलग होय क तुम कुछ भी नहीं कर सकय।
JOH 15:6 यदि कोयी मोर म बन्यो नहीं रहे, त ऊ डगाली को जसो फेक दियो जावय, अऊर सूख जावय हय; अऊर लोग उन्ख जमा कर क् आगी म झोक देवय हंय, अऊर हि जल जावय हंय।
JOH 15:7 यदि तुम मोर म बन्यो रहो अऊर मोरो वचन तुम म बन्यो रहे, त जो चाहो मांगो अऊर ऊ तुम्हरो लायी होय जायेंन।
JOH 15:8 मोरो बाप की महिमा येको सी होवय हय कि तुम बहुत सो फर लावो, तबच तुम मोरो चेला ठहरो।”
JOH 15:9 “जसो बाप न मोर सी प्रेम रख्यो, वसोच मय न तुम सी प्रेम रख्यो; मोरो प्रेम म बन्यो रहो।
JOH 15:10 यदि तुम मोरी आज्ञावों ख मानजो, त मोरो प्रेम म बन्यो रहेंन; जसो कि मय न अपनो बाप की आज्ञावों ख मान्यो हय, अऊर ओको प्रेम म बन्यो रहू हय।”
JOH 15:11 मय न या बाते तुम सी येकोलायी कहीं हंय, कि मोरी खुशी तुम म बन्यो रहे, अऊर तुम्हरी खुशी पूरी होय जाय।
JOH 15:12 मोरी आज्ञा यो आय, कि जसो मय न तुम सी प्रेम रख्यो, वसोच तुम भी एक दूसरों सी प्रेम रखो।
JOH 15:13 येको सी बड़ो प्रेम कोयी को नहीं कि कोयी अपनो संगी लायी अपनो जीव दे।
JOH 15:14 जो आज्ञा मय तुम्ख देऊ हय, यदि ओख मानो त तुम मोरो संगी हय।
JOH 15:15 अब सी मय तुम्ख सेवक नहीं कहूं, कहालीकि सेवक नहीं जानय कि ओको मालिक का करय हय; पर मय न तुम्ख संगी कह्यो हय, कहालीकि मय न जो बाते अपनो बाप सी सुनी, हि सब तुम्ख बताय दियो।
JOH 15:16 तुम न मोख नहीं चुन्यो पर मय न तुम्ख चुन्यो हय अऊर तुम्ख नियुक्त करयो कि तुम जाय क फर लावो अऊर तुम्हरो फर बन्यो रहे, कि तुम मोरो नाम सी जो कुछ बाप सी मांगो, ऊ तुम्ख दे।
JOH 15:17 इन बातों की आज्ञा मय तुम्ख येकोलायी देऊ हय कि तुम एक दूसरों सी प्रेम रखो।
JOH 15:18 “यदि जगत तुम सी दुश्मनी रखय हय, त तुम जानय हय कि ओन तुम सी पहिले मोरो सी दुश्मनी रख्यो।
JOH 15:19 यदि तुम जगत को होतो, त जगत अपनो सी प्रेम रखतो; पर यो वजह कि तुम जगत को नोहोय, बल्की मय न तुम्ख जगत म सी चुन लियो हय, येकोलायी जगत तुम सी दुश्मनी रखय हय।
JOH 15:20 जो बात मय न तुम सी कहीं होती, ‘सेवक अपनो मालिक सी बड़ो नहीं होवय,’ ओख याद रखो। यदि उन्न मोख सतायो, त तुम्ख भी सतायेंन; यदि उन्न मोरी बात मानी, त तुम्हरी भी मानेंन।
JOH 15:21 पर यो सब कुछ हि मोरो नाम को वजह तुम्हरो संग करेंन, कहालीकि हि मोरो भेजन वालो ख नहीं जानय।”
JOH 15:22 “यदि मय नहीं आतो अऊर उन्को सी बाते नहीं करतो, त हि पापी नहीं ठहरतो; पर अब उन्ख उन्को पाप लायी कोयी बहाना नहीं।
JOH 15:23 जो मोरो सी दुश्मनी रखय हय, ऊ मोरो बाप सी भी दुश्मनी रखय हय।
JOH 15:24 यदि मय उन्म हि काम नहीं करतो जो अऊर कोयी न नहीं करयो, त हि पापी नहीं ठहरतो; पर अब त उन्न मोख अऊर मोरो बाप दोयी ख देख्यो अऊर दोयी सी दुश्मनी करयो।
JOH 15:25 यो येकोलायी भयो कि ऊ वचन पूरो होय, जो उन्की व्यवस्था म लिख्यो हय, ‘उन्न मोरो सी बेकार दुश्मनी करयो।’”
JOH 15:26 पर जब ऊ सहायक आयेंन, जेक मय तुम्हरो जवर बाप को तरफ सी भेजूं, यानेकि सत्य की आत्मा जो बाप को तरफ सी निकलय हय, त ऊ मोरी गवाही देयेंन;
JOH 15:27 अऊर तुम भी मोरो गवाह आय कहालीकि तुम सुरूवात सी मोरो संग रह्यो हय।
JOH 16:1 “या बाते मय न तुम सी येकोलायी कह्यो कि तुम ठोकर नहीं खावो।
JOH 16:2 हि तुम्ख आराधनालयों म सी निकाल दियो जायेंन, बल्की ऊ समय आवय हय, कि जो कोयी तुम्ख मार डालेंन ऊ समझेंन कि मय परमेश्वर की सेवा करू हय।
JOH 16:3 असो हि येकोलायी करेंन कि उन्न नहीं बाप ख जान्यो हय अऊर नहीं मोख जानय हंय।
JOH 16:4 पर या बाते मय न येकोलायी तुम सी कह्यो, कि जब इन्को समय आये त तुम्ख याद आय जाये कि मय न तुम सी पहिलेच कह्य दियो होतो। “मय न सुरूवात म तुम सी या बाते येकोलायी नहीं कहीं कहालीकि मय तुम्हरो संग होतो।
JOH 16:5 पर अब मय अपनो भेजन वालो को जवर जाऊं हय; अऊर तुम म सी कोयी मोरो सी नहीं पूछय, ‘तय कित जावय हय?’
JOH 16:6 पर मय न जो या बाते तुम सी कह्यो हंय येकोलायी तुम्हरो मन दु:ख सी भर गयो हय।
JOH 16:7 तब भी मय तुम सी सच कहू हय कि मोरो जानो तुम्हरो लायी अच्छो हय, कहालीकि यदि मय नहीं जाऊं त ऊ सहायक तुम्हरो जवर नहीं आयेंन; पर यदि मय जाऊं, त ओख तुम्हरो जवर भेजूं।
JOH 16:8 ऊ आय क जगत को पाप अऊर सच्चायी अऊर न्याय को बारे म जगत को शक ख दूर करेंन।
JOH 16:9 पाप को बारे म येकोलायी कि हि मोरो पर विश्वास नहीं करय;
JOH 16:10 अऊर सच्चायी को बारे म येकोलायी कि मय बाप को जवर जाऊं हय, अऊर तुम मोख फिर नहीं देखो;
JOH 16:11 न्याय को बारे म येकोलायी कि जगत को शासक दोषी ठहरायो गयो हय।
JOH 16:12 “मोख तुम सी अऊर भी बहुत सी बाते कहनो हंय, पर अभी तुम उन्ख सहन नहीं कर सकय।
JOH 16:13 पर जब ऊ मतलब सत्य को आत्मा आयेंन, त तुम्ख सब सत्य को रस्ता बतायेंन कहालीकि ऊ अपनो तरफ सी नहीं कहेंन पर जो कुछ सुनेंन उच कहेंन, अऊर आवन वाली बाते तुम्ख बतायेंन।
JOH 16:14 ऊ मोरी महिमा करेंन, कहालीकि ऊ मोरी बाते म सी ले क तुम्ख बतायेंन।
JOH 16:15 जो कुछ बाप को आय, ऊ सब मोरो आय; येकोलायी मय न कह्यो कि ऊ मोरी बातों म सी ले क तुम्ख बतायेंन।
JOH 16:16 “थोड़ी देर म तुम मोख नहीं देखो, अऊर फिर थोड़ी देर म मोख देखो।”
JOH 16:17 तब ओको कुछ चेला न आपस म कह्यो, “यो का हय जो ऊ हम सी कह्य हय, ‘थोड़ी देर म तुम मोख नहीं देखो, अऊर फिर थोड़ी देर म मोख देखो?’ अऊर यो ‘येकोलायी कि मय बाप को जवर जाऊं हय?’”
JOH 16:18 तब उन्न कह्यो, “यो ‘थोड़ी देर’ जो ऊ कह्य हय, का बात आय? हम नहीं जानजे कि ऊ का कह्य हय।”
JOH 16:19 यीशु न यो जान क कि हि मोरो सी पूछनो चाहवय हंय, ओन कह्यो, “का तुम आपस म मोरी या बात को बारे म पूछताछ करय हय, थोड़ी देर म तुम मोख नहीं देखो, अऊर फिर थोड़ी देर म मोख देखो?”
JOH 16:20 मय तुम सी सच सच कहू हय कि तुम रोयेंन अऊर विलाप करेंन, पर जगत खुशी मनायेंन; तुम ख दु:ख होयेंन, पर तुम्हरो दु:ख खुशी म बदल जायेंन।
JOH 16:21 प्रसव को समय बाई ख दु:ख होवय हय, कहालीकि ओकी दु:ख की घड़ी आय पहुंची हय, पर जब वा बच्चा ख जनम दे देवय हय, त यो खुशी सी कि जगत म एक आदमी पैदा भयो, ऊ संकट ख फिर याद नहीं कर सकय।
JOH 16:22 उच तरह तुम्ख भी अब त दु:ख हय, पर मय तुम सी फिर मिलूं अऊर तुम्हरो मन खुशी सी भर जायेंन; अऊर तुम्हरी खुशी कोयी तुम सी छीन नहीं लेयेंन।
JOH 16:23 ऊ दिन तुम मोरो सी कुछ मत पूछो। मय तुम सी सच सच कहू हय, यदि बाप सी कुछ मांगो, त ऊ मोरो नाम सी तुम्ख देयेंन।
JOH 16:24 अब तक तुम न मोरो नाम सी कुछ नहीं मांग्यो; मांगो, त पावों ताकि तुम्हरी खुशी पूरी होय जाये।
JOH 16:25 “मय न या बाते तुम सी दृष्टान्तों म कहीं हंय, पर ऊ समय आवय हय कि मय तुम सी फिर दृष्टान्तों म नहीं कहूं, पर खुल क तुम्ख बाप को बारे म बताऊं।
JOH 16:26 ऊ दिन तुम मोरो नाम सी मांगो; अऊर मय तुम सी यो नहीं कहूं कि मय तुम्हरो लायी बाप सी बिनती करू;
JOH 16:27 कहालीकि बाप त तुम सीच प्रेम रखय हय, येकोलायी कि तुम न मोरो सी प्रेम रख्यो हय अऊर यो भी विश्वास करयो हय कि मय बाप को तरफ सी आयो।
JOH 16:28 मय बाप को तरफ सी जगत म आयो हय; मय फिर जगत ख छोड़ क बाप को जवर जाऊ हय।”
JOH 16:29 ओको चेलां न कह्यो, “देख, अब त तय खोल क कह्य हय, अऊर कोयी दृष्टान्त नहीं कह्य।
JOH 16:30 अब हम जान गयो हंय कि तय सब कुछ जानय हय, अऊर येकी जरूरत नहीं कि कोयी तोरो सी कुछ पूछेंन; येको सी हम विश्वास करजे हंय कि तय परमेश्वर को तरफ सी आयो हय।”
JOH 16:31 यो सुन क यीशु न ओको सी कह्यो, “का तुम अब विश्वास करय हय?
JOH 16:32 ऊ घड़ी आवय हय बल्की आय गयी हय कि तुम सब जगर-बगर होय क अपनो अपनो रस्ता धरेंन, अऊर मोख अकेलो छोड़ देयेंन; तब भी मय अकेलो नहाय कहालीकि बाप मोरो संग हय।
JOH 16:33 मय न या बाते तुम सी येकोलायी कह्यो हंय कि तुम्ख मोरो म शान्ति मिले। जगत म तुम्ख तकलीफ होवय हय, पर हिम्मत बान्धो, मय न जगत ख जीत लियो हय।”
JOH 17:1 यीशु न या बाते कह्यो अऊर अपनी आंखी स्वर्ग को तरफ उठाय क कह्यो, “हे पिता, वा घड़ी आय गयी हय; अपनो बेटा की महिमा कर कि बेटा भी तोरी महिमा करे।”
JOH 17:2 कहालीकि तय न ओख सब मानव पर अधिकार दियो, कि जिन्ख तय न ओख दियो हय उन सब ख ऊ अनन्त जीवन दे।
JOH 17:3 अऊर अनन्त जीवन यो हय कि हि तय एकच सच्चो परमेश्वर ख अऊर यीशु मसीह ख, जेक तय न भेज्यो हय, जाने।
JOH 17:4 जो कार्य तय न मोख करन ख दियो होतो, ओख पूरो कर क् मय न धरती पर तोरी महिमा करी हय।
JOH 17:5 अब हे पिता, तय अपनो संग मोरी महिमा वा महिमा सी कर जो जगत ख बनान सी पहिले, मोरी तोरो संग होती।
JOH 17:6 “मय न तोरो नाम उन आदमियों पर प्रगट करयो हय जिन्ख तय न जगत म सी मोख दियो हय। हि तोरो होतो अऊर तय न उन्ख मोख दियो, अऊर उन्न तोरो वचन ख मान लियो हय।
JOH 17:7 अब हि जान गयो हंय कि जो कुछ तय न मोख दियो हय, सब तोरो तरफ सी आय;
JOH 17:8 कहालीकि जो बात तय न मोख दियो, मय न ऊ उन्ख पहुंचाय दियो; अऊर उन्न उन्ख स्वीकार करयो, अऊर सच सच जान लियो हय, कि मय तोरो तरफ सी आयो हय, अऊर विश्वास कर लियो हय कि तयच न मोख भेज्यो।”
JOH 17:9 मय उन्को लायी बिनती करू हय; जगत लायी बिनती नहीं करू हय पर उन्कोच लायी जिन्ख तय न मोख दियो हय, कहालीकि हि तोरो आय;
JOH 17:10 अऊर जो कुछ मोरो हय ऊ सब तोरो हय, अऊर जो तोरो हय ऊ मोरो हय, अऊर इन सी मोरी महिमा प्रगट भयी हय।
JOH 17:11 मय अब जगत म नहीं रहूं, पर यो जगत म रहेंन, अऊर मय तोरो जवर आऊं हय। हे पवित्र पिता, अपनो ऊ नाम सी जो तय न मोख दियो हय, उनकी रक्षा कर कि हि हमरो जसो एक होय।
JOH 17:12 जब मय उन्को संग होतो, त मय न तोरो ऊ नाम सी, जो तय न मोख दियो हय उन्की रक्षा करी। मय न उन्की चौकसी करी, अऊर जेन नाश को रस्ता चुन्यो होतो ओख छोड़ उन्म सी कोयी नाश नहीं भयो, येकोलायी कि शास्त्र म जो कह्यो गयो ऊ पूरो भयो।
JOH 17:13 अब मय तोरो जवर आऊं हय, अऊर या बाते जगत म कहू हय, कि हि मोरी खुशी अपनो म पूरो पाये।
JOH 17:14 मय न तोरो खबर उन्ख पहुंचाय दियो हय; अऊर जगत न उन्को सी दुश्मनी करयो, कहाली की जसो मय जगत को नोहोय, वसोच हि भी जगत को नोहोय।
JOH 17:15 मय यो बिनती नहीं करू कि तय उन्ख जगत सी उठाय लेवो; पर यो कि तय उन्ख ऊ दुष्ट सी बचायो रख।
JOH 17:16 जसो मय जगत को नोहोय, वसोच हि भी जगत को नोहोय।
JOH 17:17 सत्य को द्वारा उन्ख पवित्र कर: तोरो वचन सत्य हय।
JOH 17:18 जसो तय न मोख जगत म भेज्यो, वसोच मय न भी उन्ख जगत म भेज्यो;
JOH 17:19 अऊर उन्को लायी मय खुद ख समर्पित करू हय, ताकि हि भी सत्य को द्वारा पवित्र करयो जाये।
JOH 17:20 “मय केवल इन्कोच लायी बिनती नहीं करू, पर उन्को लायी भी जो इन्को सन्देश को द्वारा मोरो पर विश्वास करेंन,
JOH 17:21 कि हि सब एक हो; जसो तय हे बाप मोरो म हय, अऊर मय तोरो म हय, वसोच हि भी हम म हो, जेकोसी जगत विश्वास करे कि तयच न मोख भेज्यो हय।
JOH 17:22 ऊ महिमा जो तय न मोख दी मय न उन्ख दी हय, कि जसो हम एक हंय वसोच हि भी एक हो,
JOH 17:23 मय उन म अऊर तय मोरो म ताकी हि पूरो तरह एक होय जाये, जेकोसी जगत जाने कि तय नच मोख भेज्यो, अऊर जसो तय न मोरो सी प्रेम रख्यो वसोच उन्को सी प्रेम रख्यो।”
JOH 17:24 हे बाप, मय चाहऊ हय कि जिन्ख तय न मोख दियो हय, जित मय हय उत हि भी मोरो संग हो, कि हि मोरो ऊ महिमा ख देखे जो तय न मोख दी हय, कहालीकि तय न जगत की उत्पत्ति सी पहिले मोरो सी प्रेम रख्यो।
JOH 17:25 “हे सच्चो पिता, जगत न मोख नहीं जान्यो, पर मय न तोख जान्यो; अऊर इन्न भी जान्यो कि तय न मोख भेज्यो हय।
JOH 17:26 मय न तोरो नाम उन्ख बतायो अऊर बतातो रहूं कि जो प्रेम तोरो ख मोरो सी होतो ऊ उन्म रहे, अऊर मय उन्म रहूं।”
JOH 18:1 यीशु या बाते कह्य क अपनो चेलावों को संग किद्रोन नाला को पार गयो। उत एक बगीचा होती, जेको म ऊ अऊर ओको चेला गयो।
JOH 18:2 ओको पकड़ावन वालो यहूदा भी ऊ जागा जानत होतो, कहालीकि यीशु अपनो चेलावों को संग उत जातो रहत होतो।
JOH 18:3 तब यहूदा पलटन को एक दल ख अऊर मुख्य याजकों अऊर फरीसियों को तरफ सी सिपाहियों ख ले क, कंदील अऊर मशालों अऊर अवजारों ख लियो हुयो उत आयो।
JOH 18:4 तब यीशु, उन सब बातों ख जो ओको पर आवन वाली होती जान क, निकल्यो अऊर उन्को सी कह्यो, “कौन ख ढूंढय हय?”
JOH 18:5 उन्न ओख उत्तर दियो, “यीशु नासरी ख।” यीशु न उन्को सी कह्यो, “मय आय।” ओको पकड़ावन वालो यहूदा भी उन्को संग खड़ो होतो।
JOH 18:6 ओको यो कहतच, “मय आय,” हि पीछू हट क जमीन पर गिर पड़्यो।
JOH 18:7 तब ओन फिर उन्को सी पुच्छ्यो, “तुम कोख ढूंढय हय।” हि बोल्यो, “यीशु नासरी ख।”
JOH 18:8 यीशु न उत्तर दियो, “मय त तुम सी कह्य दियो हय कि मय आय, यदि मोख ढूंढय हय त इन्क जान दे।”
JOH 18:9 यो येकोलायी भयो कि ऊ वचन पूरो होय जो ओन कह्यो होतो : “जिन्ख तय न मोख दियो उन्म सी मय न एक ख भी नहीं खोयो।”
JOH 18:10 तब शिमोन पतरस न तलवार, जो ओको जवर होती, खीची अऊर महायाजक को सेवक पर चलाय क ओको दायो कान उड़ाय दियो। ऊ सेवक को नाम मलखुस होतो।
JOH 18:11 तब यीशु न पतरस सी कह्यो, “अपनी तलवार म्यान म रख। जो प्याला बाप न मोख दियो हय, का मय ओख नहीं पीऊ?”
JOH 18:12 तब सैनिकों अऊर उन्को सूबेदार अऊर यहूदियों को पहरेदारों न यीशु ख पकड़ क बान्ध लियो,
JOH 18:13 अऊर पहिले ओख हन्ना को जवर लिजायो, कहालीकि ऊ उन साल को महायाजक कैफा को ससरो होतो।
JOH 18:14 यो उच कैफा होतो, जेन यहूदियों ख सलाह दी होती कि हमरो लोगों लायी एक आदमी को मरनो ठीक हय।
JOH 18:15 शिमोन पतरस अऊर एक दूसरों चेला भी यीशु को पीछू भय गयो। यो चेला महायाजक को जानो पहिचानो होतो, येकोलायी ऊ यीशु को संग महायाजक को आंगन म गयो,
JOH 18:16 पर पतरस बाहेर द्वार पर खड़ो रह्यो। तब ऊ दूसरों चेला जो महायाजक को जान पहिचान को होतो, बाहेर निकल्यो अऊर पहरेदारिन सी कह्य क पतरस ख अन्दर लायो।
JOH 18:17 वा दासी न जो पहरेदारिन होती, पतरस सी कह्यो, “कहीं तय भी यो आदमी को चेला म सी त नहाय?” ओन कह्यो, “मय नोहोय।”
JOH 18:18 सेवक अऊर पहरेदार ठन्डी को वजह कोरस्या जलाय क खड़ो आगी ताप रह्यो होतो, अऊर पतरस भी ओको संग खड़ो आगी ताप रह्यो होतो।
JOH 18:19 तब महायाजक न यीशु सी ओको चेलावों को बारे म अऊर ओको उपदेश को बारे म पूछताछ करी।
JOH 18:20 यीशु न ओख उत्तर दियो, “मय न जगत सी खुल क बाते करी; मय न आराधनालयों अऊर मन्दिर म, जित सब यहूदी जमा होत होतो, सदा उपदेश करयो अऊर गुप्त म कुछ भी नहीं कह्यो।
JOH 18:21 तय मोरो सी का पूछय हय? सुनन वालो सी पूछ कि मय न उन्को सी का कह्यो देख, हि जानय हंय कि मय न का का कह्यो।”
JOH 18:22 तब ओन यो कह्यो, त पहरेदारों म सी एक न जो जवर खड़ो होतो, यीशु ख थापड़ मार क कह्यो, “का तय महायाजक ख यो तरह उत्तर देवय हय?”
JOH 18:23 यीशु न ओख उत्तर दियो, “यदि मय न बुरो कह्यो, त ऊ बुरायी की गवाही दे; पर यदि सही कह्यो, त मोख कहाली मारय हय?”
JOH 18:24 हन्ना न ओख बन्ध्यो हुयो ख कैफा महायाजक को जवर भेज दियो।
JOH 18:25 शिमोन पतरस खड़ो होय क आगी ताप रह्यो होतो। तब उन्न ओको सी कह्यो, “कहीं तय भी ओको चेलावों म सी त नहाय?” पतरस न इन्कार कर क् कह्यो, “मय नोहोय।”
JOH 18:26 महायाजक को सेवकों म सी एक, जो ओको कुटुम्ब म सी होतो जेको कान पतरस न काट डाल्यो होतो, बोल्यो, “का मय न तोख ओको संग बगीचा म नहीं देख्यो होतो?”
JOH 18:27 पतरस न फिर सी इन्कार कर दियो अऊर तुरतच मुर्गा न बाग दियो।
JOH 18:28 तब हि यीशु ख कैफा को जवर सी राजभवन को तरफ ले गयो, अऊर भुन्सारे को समय होतो, पर हि खुद किला को अन्दर नहीं गयो ताकि अशुद्ध नहीं होय पर फसह को त्यौहार खाय सके।
JOH 18:29 तब पिलातुस उन्को जवर बाहेर निकल क आयो अऊर कह्यो, “तुम यो आदमी पर का बात को आरोप लगावय हय?”
JOH 18:30 उन्न ओख उत्तर दियो, “यदि ऊ अपराधी नहीं होतो त हम ओख तोरो हाथ नहीं सौपतो।”
JOH 18:31 पिलातुस न उन्को सी कह्यो, “तुमच येख लिजाय क अपनी व्यवस्था को अनुसार ओको न्याय करो।” यहूदियों न ओको सी कह्यो, “हम्ख अधिकार नहाय कि कोयी को जीव लेबो।”
JOH 18:32 यो येकोलायी भयो कि यीशु की ऊ बात पूरी होय जो ओन यो इशारा देतो हुयो कहीं होती कि ओकी मृत्यु कसी होयेंन।
JOH 18:33 तब पिलातुस फिर राजभवन को अन्दर गयो, अऊर यीशु ख बुलाय क ओको सी पुच्छ्यो, “का तय यहूदियों को राजा आय?”
JOH 18:34 यीशु न उत्तर दियो, “का तय या बात अपनो तरफ सी कह्य हय या दूसरों न मोरो बारे म तोरो सी यो कह्यो हय?”
JOH 18:35 पिलातुस न उत्तर दियो, “का मय यहूदी आय? तोरीच जाति अऊर मुख्य याजकों न तोख मोरो हाथ म सौंप्यो हय। तय न का करयो हय?”
JOH 18:36 यीशु न उत्तर दियो, “मोरो राज यो जगत को नहाय; यदि मोरो राज्य यो जगत को होतो त मोरो सेवक लड़तो कि मय यहूदियों को हाथ सौंप्यो नहीं जातो: पर मोरो राज इत को नहाय।”
JOH 18:37 पिलातुस न ओको सी कह्यो, “त का तय राजा आय?” यीशु न उत्तर दियो, “तय कह्य हय कि मय राजा आय। मय न येकोलायी जनम लियो अऊर येकोलायी जगत म आयो हय कि सत्य की गवाही देऊ। जो कोयी सत्य को आय, ऊ मोरी आवाज सुनय हय।”
JOH 18:38 पिलातुस न ओको सी कह्यो, “सत्य का हय?” यो कह्य क ऊ फिर यहूदियों को जवर निकल गयो अऊर उन्को सी कह्यो, “मय त ओको म कुछ दोष नहीं पाऊ।
JOH 18:39 पर तुम्हरी यो रीति हय कि मय फसह को त्यौहार म तुम्हरो लायी एक व्यक्ति ख छोड़ देऊ येकोलायी तुम चाहवय की मय तुम्हरो लायी यहूदियों को राजा ख छोड़ देऊ।”
JOH 18:40 तब उन्न फिर चिल्लाय क कह्यो, “येख नहीं, पर हमरो लायी बरअब्बा ख छोड़ दे।” अऊर बरअब्बा डाकू होतो।
JOH 19:1 येको पर पिलातुस न यीशु ख कोड़ा सी पीटवायो।
JOH 19:2 सिपाहियों न काटा को मुकुट गूथ क ओकी मुंड पर रख्यो, अऊर ओख जामुनी कपड़ा पहिनायो,
JOH 19:3 अऊर ओको जवर आय-आय क कहन लग्यो, “हे यहूदियों को राजा, प्रनाम!” अऊर ओख थापड़ भी मारयो।
JOH 19:4 तब पिलातुस न फिर बाहेर निकल क लोगों सी कह्यो, “देखो, मय ओख तुम्हरो जवर फिर बाहेर लाऊं हय; ताकि तुम जानो कि मय ओको म कुछ भी दोष नहीं पाऊ।”
JOH 19:5 तब यीशु काटा को मुकुट अऊर जामुनी कपड़ा पहिन्यो हुयो बाहेर निकल्यो; अऊर पिलातुस न उन्को सी कह्यो, “देखो, यो आदमी!”
JOH 19:6 जब मुख्य याजकों अऊर पहरेदारों न ओख देख्यो, त चिल्लाय क कह्यो, “ओख क्रूस पर चढ़ाव, क्रूस पर!” पिलातुस न उन्को सी कह्यो, “तुमच ओख ले क क्रूस पर चढ़ावो, कहालीकि मय ओको म कोयी दोष नहीं पाऊ।”
JOH 19:7 यहूदियों न ओख उत्तर दियो, “हमरी भी व्यवस्था हय अऊर ऊ व्यवस्था को अनुसार ऊ मारयो जान को लायक हय, कहालीकि ओन अपनो आप ख परमेश्वर को टुरा होन को दावा करयो हय।”
JOH 19:8 जब पिलातुस न या बात सुनी त अऊर भी डर गयो।
JOH 19:9 अऊर फिर राजभवन को अन्दर गयो अऊर यीशु सी कह्यो, “तय कित को आय?” पर यीशु न ओख कुछ भी उत्तर नहीं दियो।
JOH 19:10 येको पर पिलातुस न ओको सी कह्यो, “मोरो सी कहाली नहीं बोलय? का तय नहीं जानय कि तोख छोड़ देन को अधिकार मोख हय, अऊर तोख क्रूस पर चढ़ान को भी मोख अधिकार हय।”
JOH 19:11 यीशु न उत्तर दियो, “यदि तोख ऊपर सी नहीं दियो जातो, त तोरो मोरो पर कुछ अधिकार नहीं होतो; येकोलायी जेन मोख तोरो हाथ पकड़वायो हय ओको पाप बहुत जादा हय।”
JOH 19:12 येको पर पिलातुस न ओख छोड़ देनो चाह्यो, पर यहूदियों न चिल्लाय-चिल्लाय क कह्यो, “यदि तय येख छोड़ देजो, त तोरी भक्ति कैसर को तरफ नहीं। जो कोयी अपनो आप ख राजा बनावय हय ऊ कैसर को सामना करय हय।”
JOH 19:13 या बात सुन क पिलातुस यीशु ख बाहेर लायो अऊर ऊ जागा एक “चबूतरा” होतो जो इब्रानी म “गब्बता” कहलावय हय, अऊर उत न्याय-आसन पर बैठ्यो।
JOH 19:14 यो फसह को त्यौहार की तैयारी को दिन होतो, अऊर छे घंटा को लगभग होतो। तब ओन यहूदियों सी कह्यो, “देखो तुम्हरो राजा!”
JOH 19:15 पर हि चिल्लायो, “लिजाव! लिजाव! ओख क्रूस पर चढ़ाव!” पिलातुस न उन्को सी कह्यो, “का मय तुम्हरो राजा ख क्रूस पर चढ़ाऊ?” मुख्य याजकों न उत्तर दियो, “कैसर ख छोड़ हमरो अऊर कोयी राजा नहीं।”
JOH 19:16 तब ओन ओख उन्को हाथ सौंप दियो ताकि यीशु क्रूस पर चढ़ायो जाये।
JOH 19:17 तब हि यीशु ख ले गयो, अऊर ऊ अपनो क्रूस उठायो हुयो ऊ जागा तक बाहेर गयो, जो “खोपड़ी की जागा” कहलावय हय अऊर इब्रानी म “गुलगुता।”
JOH 19:18 उत उन्न ओख अऊर ओको संग अऊर दोय आदमियों ख क्रूस पर चढ़ायो, एक ख इत अऊर एक ख उत, अऊर बीच म यीशु ख।
JOH 19:19 पिलातुस न एक दोष-पत्र लिख क क्रूस पर लगाय दियो, अऊर ओको म यो लिख्यो हुयो होतो, “यीशु नासरी, यहूदियों को राजा।”
JOH 19:20 यो दोष–पत्र बहुत सो यहूदियों न पढ़्यो, कहालीकि ऊ जागा जित यीशु क्रूस पर चढ़ायो गयो होतो जो नगर को जवर होतो; अऊर पत्र इब्रानी अऊर लतीनी अऊर यूनानी भाषा म लिख्यो हुयो होतो।
JOH 19:21 तब यहूदियों को मुख्य याजकों न पिलातुस सी कह्यो, “‘यहूदियों को राजा’ मत लिख पर यो कि ‘ओन कह्यो, मय यहूदियों को राजा आय।’”
JOH 19:22 पिलातुस न उत्तर दियो, “मय न जो लिख दियो, ऊ लिख दियो।”
JOH 19:23 जब सिपाही यीशु ख क्रूस पर चढ़ाय चुक्यो, त ओको कपड़ा ले क चार भाग करयो, हर सिपाही लायी एक भाग, अऊर कुरता भी लियो, पर कुरता बिना सीयो ऊपर सी खल्लो तक बुन्यो हुयो होतो
JOH 19:24 येकोलायी उन्न आपस म कह्यो, “हम येख नहीं फाड़बो, पर येख पर चिट्ठी डालबो कि यो कोन्को होयेंन।” यो येकोलायी भयो कि पवित्र शास्त्र म जो कह्यो गयो ऊ पूरो हो, “उन्न मोरो कपड़ा आपस म बाट लियो अऊर मोरो कपड़ा पर चिट्ठी डाली।” सैनिकों न असोच करयो।
JOH 19:25 सैनिकों न असोच करयो। यीशु को क्रूस को जवर ओकी माय, अऊर ओकी माय की बहिन, क्लोपास की पत्नी मरियम, अऊर मरियम मगदलीनी खड़ी होती।
JOH 19:26 जब यीशु न अपनी माय, अऊर ऊ चेला ख जेकोसी ऊ प्रेम रखत होतो जवर खड़ो देख्यो त अपनी माय सी कह्यो, “हे नारी, देख, यो तोरो बेटा आय।”
JOH 19:27 तब ओन चेला सी कह्यो, “या तोरी माय आय।” अऊर उच समय सी ऊ चेला ओख अपनो घर ले गयो।
JOH 19:28 येको बाद यीशु न यो जान क कि अब सब कुछ पूरो भय गयो, येकोलायी कि शास्त्र म जो कह्यो गयो ऊ पूरो होय, कह्यो, “मय प्यासो हय।”
JOH 19:29 उत सिरका सी भरयो हुयो एक बर्तन रख्यो होतो, येकोलायी उन्न सिरका सी गिलो करयो हुयो स्पंज ख जूफा पर रख क ओको मुंह सी लगायो।
JOH 19:30 जब यीशु न ऊ सिरका पियो अऊर आत्मा म दु:खी भयो, अऊर कह्यो, “पूरो भयो।” अऊर मुंड झुकाय क जीव छोड़ दियो।
JOH 19:31 येकोलायी कि ऊ तैयारी को दिन होतो, यहूदियों न पिलातुस सी बिनती करी कि उन्को टांगे तोड़ दियो जाये अऊर हि उतारयो जाये, ताकि आराम दिन म हि क्रूस पर नहीं रहे, कहालीकि ऊ आराम दिन मतलब बड़ो दिन होतो।
JOH 19:32 यानेकि सैनिकों न आय क उन आदमियों म सी पहिलो आदमी को टांगे तोड़्यो तब दूसरों आदमी को भी, जो ओको संग क्रूस पर चढ़ायो गयो होतो;
JOH 19:33 पर जब यीशु को जवर आय क देख्यो कि यो मर गयो हय, त ओकी टांगे नहीं तोड़्यो।
JOH 19:34 पर सैनिकों म सी एक न बरछा सी ओको फसली म भेद्यो, अऊर ओको म सी तुरतच खून अऊर पानी निकल्यो।
JOH 19:35 जेन यो देख्यो, ओन गवाही दियो हय, अऊर ओकी गवाही सच्ची आय; अऊर ऊ जानय हय कि ऊ सच कह्य हय कि तुम भी विश्वास करो।
JOH 19:36 या बाते येकोलायी भयी कि शास्त्र म जो कह्यो गयो ऊ पूरो भयो, “ओकी कोयी हड्डी तोड़्यो नहीं जायेंन।”
JOH 19:37 फिर एक अऊर जागा पर शास्त्र म यो लिख्यो हय, “जेक उन्न भेज्यो हय, ओको पर हि नजर करेंन।”
JOH 19:38 इन बातों को बाद अरिमतिया को यूसुफ न जो यीशु को चेला होतो, पर यहूदियों को डर सी या बात ख लूकायो रखत होतो, पिलातुस सी बिनती करी कि का ऊ यीशु को लाश लिजाय सकय हय। पिलातुस न ओकी बिनती सुनी, अऊर ऊ आय क ओको लाश ले गयो।
JOH 19:39 नीकुदेमुस भी, जो पहिले यीशु को जवर रात ख गयो होतो, पचास शेर को लगभग मिल्यो हुयो अत्तर अऊर एलवा ले आयो।
JOH 19:40 तब उन्न यीशु की लाश ख उठाय क यहूदियों को गाड़न की रीति को अनुसार ओख अत्तर को संग कपड़ा म लपेट्यो।
JOH 19:41 ऊ जागा पर जित यीशु क्रूस पर चढ़ायो गयो होतो, एक बगीचा होतो, अऊर उत एक नयी कब्र होती जेको म कभी कोयी नहीं रख्यो होतो।
JOH 19:42 येकोलायी यहूदियों की तैयारी को दिन को वजह उन्न यीशु ख ओको म रख्यो, कहालीकि ऊ कब्र जवर होती।
JOH 20:1 हप्ता को पहिलो दिन मरियम मगदलीनी भुन्सारे को अन्धारो म एक कब्र पर आयी, अऊर गोटा ख कब्र सी हट्यो हुयो देख्यो।
JOH 20:2 तब वा उत सी भगी अऊर शिमोन पतरस अऊर ऊ दूसरों चेला को जवर जेकोसी यीशु प्रेम रखत होतो, आय क कह्यो, “हि प्रभु ख कब्र म सी निकाल ले गयो हंय, अऊर हम नहीं जानजे कि ओख कित रख दियो हय।”
JOH 20:3 तब पतरस अऊर ऊ दूसरों चेला निकल क कब्र को तरफ चल्यो।
JOH 20:4 हि दोयी संग–संग दौड़ रह्यो होतो, पर दूसरों चेला पतरस सी आगु बढ़ क कब्र पर पहिले पहुंच्यो;
JOH 20:5 अऊर झुक क कपड़ा पड़े देख्यो, तब भी ऊ अन्दर नहीं गयो।
JOH 20:6 तब शिमोन पतरस ओको पीछू-पीछू पहुंच्यो, अऊर कब्र को अन्दर गयो अऊर कपड़ा पड़्यो देख्यो;
JOH 20:7 अऊर ऊ गमछा जो ओको मुंड सी बन्ध्यो हुयो होतो, कपड़ा को संग पड़्यो हुयो नहीं, पर अलग एक जागा म लपेट क रख्यो हुयो देख्यो।
JOH 20:8 तब दूसरों चेला भी जो कब्र पर पहिले पहुंच्यो होतो, अन्दर गयो अऊर देख क विश्वास करयो।
JOH 20:9 हि त अब तक शास्त्र की वा बात नहीं समझ्यो होतो कि ओख मरयो हुयो म सी जीन्दो होनो पड़ेंन।
JOH 20:10 तब यो चेलाये अपनो घर लौट गयो।
JOH 20:11 पर मरियम रोवती हुयी कब्र को जवर बाहेर खड़ी रही, अऊर रोवत-रोवत कब्र को तरफ झुक क,
JOH 20:12 दोय स्वर्गदूतों ख उज्वल कपड़ा पहिन्यो हुयो एक ख मुन्डेसो अऊर दूसरों ख पायतो तरफ बैठ्यो देख्यो, जित यीशु को लाश रख्यो गयो होतो।
JOH 20:13 उन्न ओको सी कह्यो, “हे नारी, तय कहाली रोवय हय?” ओन उन्को सी कह्यो, “हि मोरो प्रभु ख उठाय ले गयो अऊर मय नहीं जानु कि ओख कित रख्यो हय।”
JOH 20:14 यो कह्य क वा पीछू मुड़ी अऊर यीशु ख खड़्यो देख्यो, पर नहीं पहिचान्यो कि यो यीशु आय।
JOH 20:15 यीशु न ओको सी कह्यो, “हे नारी, तय कहाली रोवय हय? कौन्क ढूंढय हय?” ओन बगीचा को माली समझ क ओको सी कह्यो, “हे महाराज, यदि तय न ओख उठाय लियो हय त मोख बताव कि ओख कित रख्यो हय, अऊर मय ओख लिजाऊं।”
JOH 20:16 यीशु न ओको सी कह्यो, “मरियम!” ओन पीछू मुड़ क ओको सी इब्रानी म कह्यो, “रब्बूनी!” मतलब “हे गुरु।”
JOH 20:17 यीशु न ओको सी कह्यो, “मोख मत छूव, कहालीकि मय अब तक बाप को जवर ऊपर नहीं गयो, पर मोरो भाऊवों को जवर जाय क उन्को सी कह्य दे, कि मय अपनो बाप अऊर तुम्हरो बाप, अऊर अपनो परमेश्वर अऊर तुम्हरो परमेश्वर को जवर ऊपर जाऊं हय।”
JOH 20:18 मरियम मगदलीनी न जाय क चेलावों ख बतायो, “मय न प्रभु ख देख्यो, अऊर ओन मोरो सी या बाते कहीं।”
JOH 20:19 उच दिन जो हप्ता को पहिलो दिन होतो, शाम को समय जब उत को द्वार पर जित चेलाये एक मुस्त जमा होतो, यहूदियों को डर को मारे द्वार बन्द होतो, तब यीशु आयो अऊर उन्को बीच म खड़ो होय क उन्को सी कह्यो, “तुम्ख शान्ति मिले।”
JOH 20:20 अऊर यो कह्य क ओन अपनो हाथ अऊर अपनी हथेली उन्ख दिखायो। तब चेला प्रभु ख देख क खुश भयो।
JOH 20:21 यीशु न फिर उन्को सी कह्यो, “तुम्ख शान्ति मिले; जसो बाप न मोख भेज्यो हय, वसोच मय भी तुम्ख भेजू हय।”
JOH 20:22 यो कह्य क ओन उन पर फूक्यो अऊर उन्को सी कह्यो, “पवित्र आत्मा लेवो।
JOH 20:23 जिन्को पाप तुम माफ करो, हि उन्को लायी माफ करयो गयो हंय; जिन्को पाप तुम रखो, हि रख्यो गयो हंय।”
JOH 20:24 पर बारायी चेला म सी एक, यानेकि थोमा जो दिदुमुस कहलावय हय, जब यीशु आयो त उन्को संग नहीं होतो।
JOH 20:25 जब दूसरों चेला ओको सी कहन लग्यो, “हम न प्रभु ख देख्यो हय!” तब ओन उन्को सी कह्यो, “जब तक मय ओको हथेली म खिल्ला सी भयो छेद देख नहीं लेऊ, अऊर खिल्ला सी भयो छेद म अपनो बोट नहीं डाल लेऊ, तब तक मय विश्वास नहीं करू।”
JOH 20:26 आठ दिन को बाद ओको चेलाये घर को अन्दर होतो, अऊर थोमा ओको संग होतो; अऊर द्वार बन्द होतो, तब यीशु आयो अऊर उन्को बीच म खड़ो होय क कह्यो, “तुम्ख शान्ति मिले।”
JOH 20:27 तब ओन थोमा सी कह्यो, “अपनो बोट इत लाय क मोरो हाथों ख देख अऊर अपनो हाथ लगाय क मोरो हथेली म डाल, अऊर अविश्वासी नहीं पर विश्वासी बन।”
JOH 20:28 यो सुन क थोमा न उत्तर दियो, “हे मोरो प्रभु, हे मोरो परमेश्वर!”
JOH 20:29 यीशु न ओको सी कह्यो, “तय न मोख देख्यो हय, का येकोलायी विश्वास करयो हय? धन्य हि आय जिन्न बिना देख्यो विश्वास करयो।”
JOH 20:30 यीशु न अऊर भी बहुत सो आश्चर्य को चिन्ह चेलावों को आगु दिखायो, जो या किताब म लिख्यो नहीं गयो;
JOH 20:31 पर ये येकोलायी लिख्यो गयो हंय कि तुम विश्वास करो कि यीशुच परमेश्वर को टुरा मसीह आय, अऊर विश्वास कर क् ओको नाम सी जीवन पावों।
JOH 21:1 इन बातों को बाद यीशु न अपनो आप ख तिबिरियास झील को किनार चेलावों पर प्रगट करयो, अऊर यो रीति सी प्रगट करयो:
JOH 21:2 शिमोन पतरस अऊर थोमा जो दिदुमुस कहलावय हय, अऊर गलील को काना नगर को नतनएल अऊर जब्दी को टुरा अऊर ओको चेलावों म सी दोय लोग जमा होतो।
JOH 21:3 शिमोन पतरस न उन्को सी कह्यो, “मय मच्छी पकड़न जाय रह्यो हय।” उन्न ओको सी कह्यो, “हम भी तोरो संग चलजे हय।” येकोलायी हि निकल क डोंगा पर चढ़्यो, पर ऊ रात कुछ नहीं पकड़्यो।
JOH 21:4 भुन्सारे होतोच यीशु किनार पर आय खड़ो भयो; तब भी चेलावों न नहीं पहिचानो कि यो यीशु आय।
JOH 21:5 तब यीशु न उन सी कह्यो, “हे बच्चां, का तुम्हरो जवर कुछ मच्छी हय?” उन्न उत्तर दियो, “नहीं।”
JOH 21:6 ओन उन्को सी कह्यो, “डोंगा को दायो तरफ जार डालो त मिलेंन।” येकोलायी उन्न जार डाल्यो, अऊर अब बहुत सी मच्छी को वजह ओख खीच नहीं सक्यो।
JOH 21:7 तब ऊ चेला न जेकोसी यीशु प्रेम रखत होतो, पतरस सी कह्यो, “यो त प्रभु आय!” शिमोन पतरस न यो सुन क कि ऊ प्रभु आय, कमर म गमछा कस लियो, कहालीकि ओन कपड़ा नहीं पहिन्यो होतो, अऊर झील म कूद्यो।
JOH 21:8 पर दूसरों चेला डोंगा पर मच्छी सी भरयो हुयो जार खीचतो हुयो आयो, कहालीकि हि किनार सी जादा दूर नहीं पर कोयी दोय सौ हाथ पर होतो।
JOH 21:9 जब हि किनार पर उतरयो, त उन्न कोरस्या की आगी पर मच्छी रखी हुयी, रोटी देख्यो।
JOH 21:10 यीशु न उन्को सी कह्यो, “जो मच्छी तुम न अभी पकड़्यो हंय, उन्को म सी कुछ लाव।”
JOH 21:11 त शिमोन पतरस न डोंगा पर चढ़ क एक सौ त्रेपन बड़ी मच्छी सी भरयो हुयो जार किनार पर खीच्यो, अऊर इतनी मच्छी होन पर भी जार नहीं फट्यो।
JOH 21:12 यीशु न उन्को सी कह्यो, “आवो, जेवन करो।” चेलावों म सी कोयी ख हिम्मत नहीं भयो कि ओको सी पूछतो कि, “तय कौन आय?” कहालीकि हि जानत होतो कि यो प्रभुच आय।
JOH 21:13 यीशु आयो अऊर रोटी ले क उन्ख दी, अऊर वसोच मच्छी भी।
JOH 21:14 यो तीसरो बार आय कि यीशु मरयो हुयो म सी जीन्दो उठन को बाद चेलावों ख दिखायी दियो।
JOH 21:15 भोजन करन को बाद यीशु न शिमोन पतरस सी कह्यो, “हे शिमोन, यूहन्ना को टुरा, का तय इन सी बढ़ क मोरो सी प्रेम रखय हय?” ओन ओको सी कह्यो, “हव, प्रभु; तय त जानय हय कि मय तोरो सी प्रीति रखू हय।” ओन ओको सी कह्यो, “मोरो मेंढीं को बछड़ा ख चराव।”
JOH 21:16 ओन फिर दूसरों बार ओको सी कह्यो, “हे शिमोन, यूहन्ना को टुरा, का तय मोरो सी प्रेम रखय हय?” ओन ओको सी कह्यो, “हव।” ओन ओको सी कह्यो, “हव प्रभु!” तय जानय हय कि मय तोरो सी प्रीति रखू हय। ओन ओको सी कह्यो, “मोरी मेंढीं की रखवाली कर।”
JOH 21:17 ओन तीसरी बार ओको सी कह्यो, “हे शिमोन, यूहन्ना को टुरा,” का तय मोरो सी प्रीति रखय हय? पतरस उदास भयो कि ओन ओको सी तीसरी बार असो कह्यो, “का तय मोरो सी प्रीति रखय हय?” अऊर ओको सी कह्यो, “हे प्रभु, तय त सब कुछ जानय हय; तय यो जानय हय कि मय तोरो सी प्रीति रखू हय।” यीशु न ओको सी कह्यो, “मोरी मेंढीं ख चराव।
JOH 21:18 मय तोरो सी सच सच कहू हय, जब तय जवान होतो त अपनी कमर बान्ध क जित चाहत होतो उत फिरत होतो; पर जब तय बूढ्ढा होजो त अपनो हाथ फैयलायेंन अऊर दूसरों तोरी कमर बान्ध क जित तय नहीं चाहेंन उत तोख लिजायेंन।”
JOH 21:19 ओन इन बातों सी इशारा दियो कि पतरस कसी मौत सी परमेश्वर की महिमा करेंन। अऊर तब ओन ओको सी कह्यो, “मोरो पीछू आव।”
JOH 21:20 पतरस न मुड़ क ऊ चेला ख पीछू आवतो देख्यो, जेकोसी यीशु प्रेम रखत होतो, अऊर जेन जेवन को समय ओकी छाती को तरफ झुक क पुच्छ्यो होतो, “हे प्रभु, तोरो पकड़न वालो कौन आय?”
JOH 21:21 ओख देख क पतरस न यीशु सी कह्यो, “हे प्रभु, येको का हाल होयेंन?”
JOH 21:22 यीशु न ओको सी कह्यो, “यदि मय चाहतो कि ऊ मोरो आवनो तक रूक्यो रहे, त तोख येको सी का? तय मोरो पीछू हो जावो।”
JOH 21:23 येकोलायी भाऊवों म या बात फैल गयी कि ऊ चेला नहीं मरेंन; तब भी यीशु न ओको सी यो नहीं कह्यो कि ऊ नहीं मरेंन, पर यो कि “यदि मय चाहतो कि ऊ मोरो आनो तक रूक्यो रह्य, त तोख येको सी का?”
JOH 21:24 यो उच चेला आय जो इन बातों की गवाही देवय हय अऊर जेन इन बातों ख लिख्यो हय, अऊर हम जानजे हंय कि ओकी गवाही सच्ची आय।
JOH 21:25 अऊर भी बहुत सो काम हंय, जो यीशु न करयो; यदि हि एक एक कर क् लिख्यो जातो, त मय समझू हय कि किताबे जो लिख्यो जाती हि जगत म भी नहीं समाती।
ACT 1:1 हे प्रिय, थियुफिलुस, मय न पहिली किताब उन सब बातों को बारे म लिख्यो जो यीशु सुरूवात सी करतो अऊर सिखावत रह्यो,
ACT 1:2 ऊ स्वर्ग म उठावन को दिन सी जब तक ऊ उन प्रेरितों ख जिन्ख ओन चुन्यो होतो पवित्र आत्मा सी आज्ञा दे क निर्देश देत रह्यो।
ACT 1:3 ओन मरन को बाद बहुत सो पक्को प्रमानों सी अपनो आप ख उन्ख जीन्दो दिखायो, अऊर चालीस दिन तक ऊ उन्ख दिखायी देतो रह्यो, अऊर परमेश्वर को राज्य की बाते करत रह्यो।
ACT 1:4 अऊर उन्को सी मिल क उन्ख आज्ञा दियो, “यरूशलेम ख मत छोड़ो, पर बाप की ऊ प्रतिज्ञा की पूरो होन की रस्ता देखत रहो, जेको बारे म मय न तुम्ख बतायो होतो।
ACT 1:5 कहालीकि यूहन्ना न त पानी सी बपतिस्मा दियो हय पर थोड़ो दिन को बाद तुम्ख पवित्र आत्मा सी बपतिस्मा दियो जायेंन।”
ACT 1:6 येकोलायी उन्न जमा होय क यीशु सी पुच्छ्यो, “हे प्रभु, का तय योच समय इस्राएल ख राज्य फिर सी दे देजो?”
ACT 1:7 यीशु न उन्को सी कह्यो, “उन समयो या कालो ख जाननो, जिन्ख बाप न अपनोच अधिकार म रख्यो हय, उन्ख जाननो तुम्हरो काम नोहोय।
ACT 1:8 पर जब पवित्र आत्मा तुम पर आयेंन तब तुम सामर्थ पावों; अऊर यरूशलेम अऊर पूरो यहूदिया अऊर सामरियां म, अऊर धरती की छोर तक मोरो गवाह होयेंन।”
ACT 1:9 यो कह्य क ऊ उन्को देखतो देखतो ऊपर उठाय लियो गयो, अऊर बादर न ओख उनकी आंखी सी लूकाय लियो।
ACT 1:10 ओको जातो समय जब हि आसमान को तरफ लगातार देख रह्यो होतो, त देखो, दोय पुरुष उज्वल कपड़ा पहिन्यो हुयो उन्को जवर आय खड़ो भयो,
ACT 1:11 अऊर ओन कह्यो, “हे गलीली लोगों, तुम कहाली खड़ो आसमान को तरफ देख रह्यो हय? योच यीशु, जो तुम्हरो जवर सी स्वर्ग पर उठाय लियो गयो हय, जो रीति सी तुम न ओख स्वर्ग ख जातो देख्यो हय उच रीति सी ऊ फिर आयेंन।”
ACT 1:12 तब प्रेरित जैतून नाम की पहाड़ी सी उतरयो जो यरूशलेम को जवर एक किलोमीटर की दूरी पर हय, यरूशलेम ख लौट्यो।
ACT 1:13 जब हि उत पहुंच्यो त ऊ ऊपर को कमरा म गयो, जित पतरस अऊर यूहन्ना अऊर याकूब अऊर अन्द्रियास अऊर फिलिप्पुस अऊर थोमा अऊर बरतुल्मै अऊर मत्ती अऊर हलफई को टुरा याकूब अऊर शिमोन जेलोतेस अऊर याकूब को बेटा यहूदा रहत होतो।
ACT 1:14 हि सब कुछ बाईयों अऊर यीशु की माय मरियम अऊर ओको भाऊवों को संग एक चित अऊर जमा होय क प्रार्थना म लग्यो रह्यो।
ACT 1:15 फिर कुछ दिनो बाद पतरस भाऊवों को बीच म जो एक सौ बीस विश्वासी लोग को लगभग होतो, खड़ो होय क कहन लग्यो,
ACT 1:16 “हे भाऊवों, यीशु ख पकड़न वालो को अगुवा जरूर होतो कि पवित्र शास्त्र को ऊ लेख पूरो होय जो दाऊद को मुंह सी यहूदा को बारे म, पवित्र आत्मा न जो पहिले सी कह्यो होतो ओको पूरो होनो जरूरी होतो।
ACT 1:17 ऊ हमरो बीच म सी एक होतो, अऊर यो कार्य म सहभागी होन लायी चुन्यो गयो होतो।”
ACT 1:18 ओन अधर्म की कमायी सी एक खेत लेय लियो, अऊर मुंड को बल गिरयो अऊर ओको पेट फट गयो अऊर ओकी सब अतड़िया निकल गयी।
ACT 1:19 या बात ख यरूशलेम को सब रहन वालो जान गयो, यहां तक कि ऊ खेत को नाम उन्की भाषा म हकलदमा यानेकि “खून को खेत” पड़ गयो।
ACT 1:20 भजन संहिता म लिख्यो हय, “ओको घर उजड़ जाये; अऊर ओको म कोयी नहीं बसे,” “अऊर ओको पद कोयी दूसरों ले ले।”
ACT 1:21 “येकोलायी जितनो दिन तक प्रभु यीशु हमरो संग आतो जातो रह्यो यानेकि यूहन्ना को बपतिस्मा सी ले क ओको हमरो जवर सी ऊपर उठायो जान तक जो लोग बराबर हमरो संग रह्यो,
ACT 1:22 यूहन्ना को बपतिस्मा सी ले क प्रभु को स्वर्गारोहन को दिन तक जो लोग बराबर हमरो संग होतो, उन्म सी एक लोग हमरो संग यीशु को जीन्दो होन को गवाह होय जाये।”
ACT 1:23 तब उन्न दोय ख खड़ो करयो, एक यूसुफ ख जो बरसब्बा कहलावय हय, जेको उपनाम यूसतुस हय, दूसरों मत्तियाह ख,
ACT 1:24 अऊर या प्रार्थना करी, “हे प्रभु, तय जो सब को मन जानय हय, यो प्रगट कर कि इन दोयी म सी तय न कोन्ख चुन्यो हय,
ACT 1:25 कि ऊ यो प्रेरितायी की सेवकायी को पद ले, जेक यहूदा छोड़ क अपनो जागा म चली गयो।”
ACT 1:26 तब उन्न उन्को बारे म चिट्ठियां डाली, अऊर चिट्ठी मत्तियाह को नाम पर निकली। येकोलायी ऊ उन ग्यारा प्रेरितों को संग गिन्यो गयो।
ACT 2:1 जब पिन्तेकुस्त को दिन मतलब पचासवो दिन आयो, त हि सब विश्वासी एक जागा म जमा होतो।
ACT 2:2 अचानक आसमान सी बड़ी आन्धी को जसो सनसनाहट को आवाज भयो, अऊर ओको सी पूरो घर गूंजन लग्यो जित हि बैठ्यो होतो।
ACT 2:3 अऊर उन्ख आगी को जसी जीबली फटती हुयी दिखायी दी अऊर ओको म सी हर एक पर आय ठहरी।
ACT 2:4 हि सब पवित्र आत्मा सी भर गयो, अऊर जो तरह आत्मा न उन्ख बोलन की सामर्थ दी, हि अलग अलग भाषा बोलन लग्यो।
ACT 2:5 आसमान को खल्लो को सब राष्ट्रों सी आयो हुयो हर तरह की भाषा बोलन वालो यहूदी भक्त ऊ समय यरूशलेम म रहत होतो।
ACT 2:6 जब यो आवाज भयो त भीड़ लग गयी अऊर लोग अचम्भित भय गयो, कहालीकि हर एक ख योच सुनायी देत होतो कि ऊ मोरीच भाषा म बोल रह्यो हंय।
ACT 2:7 हि सब चकित अऊर उलझन म होय क कहन लग्यो, “देखो, हि जो बोल रह्यो हंय का सब गलीली नोहोय का?
ACT 2:8 त फिर कहाली हम उन्को मुंह सी हर एक अपनी अपनी जनम स्थान की भाषा सुनय हय?
ACT 2:9 हम जो पारथी अऊर मेदी अऊर एलामी अऊर मेशोपोटामियां अऊर यहूदिया अऊर कप्पदूकिया अऊर पुन्तुस अऊर आसिया,
ACT 2:10 अऊर फ्रूगिया अऊर पंफूलिया अऊर मिस्र अऊर लीबिया देश जो कुरेनी को आजु बाजू हय, इन सब देशों को रहन वालो अऊर रोमी प्रवासी,
ACT 2:11 यानेकि यहूदी अऊर यहूदी बिचार धारन करन वालो, क्रेती अऊर अरबी भी हंय, पर अपनो अपनो भाषा म उन्को सी परमेश्वर को बड़ो बड़ो कामों की चर्चा सुनय हंय।”
ACT 2:12 अऊर हि सब अचम्भित भयो अऊर उलझन म एक दूसरों सी कहन लग्यो, “यो का होय रह्यो हय?”
ACT 2:13 पर दूसरों न मजाक उड़ाय क कह्यो, “हि त पी क नशा म चूर हंय।”
ACT 2:14 तब पतरस उन ग्यारा प्रेरितों को संग खड़ो भयो अऊर ऊचो आवाज सी कहन लग्यो, “हे यहूदियों अऊर हे यरूशलेम को सब रहन वालो, यो जान लेवो, अऊर कान लगाय क मोरी बाते सुनो।”
ACT 2:15 जसो तुम समझ रह्यो हय, हि लोग नशा म नहाय, कहालीकि अभी त सबेरे को नवच बज्यो हय।
ACT 2:16 पर वा या बात आय, जो योएल परमेश्वर सी सन्देश लावन वालो को द्वारा कहीं गयी होती:
ACT 2:17 “परमेश्वर कह्य हय, कि आखरी को दिनो म असो होयेंन कि मय अपनी आत्मा पूरो आदमियों पर उंडेलूं, अऊर तुम्हरो बेटा अऊर तुम्हरी बेटियां परमेश्वर को तरफ सी भविष्यवानी करेंन, अऊर तुम्हरो जवान दर्शन देखेंन, अऊर तुम्हरो बुजूर्ग लोग सपनो देखेंन।”
ACT 2:18 बल्की मय अपनो सेवकों अऊर अपनी दासियों पर भी “उन दिनो म अपनी आत्मा म सी उंडेलूं, अऊर हि परमेश्वर को तरफ सी भविष्यवानी करेंन।
ACT 2:19 अऊर मय ऊपर आसमान म चमत्कार अऊर खल्लो धरती पर चिन्ह दिखाऊं, यानेकि खून अऊर आगी अऊर धुवा को बादर दिखाऊं।
ACT 2:20 प्रभु को महान अऊर महिमामय दिन को आवन सी पहिले सूरज अन्धारो अऊर चन्दा खून को जसो लाल होय जायेंन।
ACT 2:21 अऊर जो कोयी प्रभु को नाम सी पुकारेंन, ऊ उद्धार पायेंन।”
ACT 2:22 “हे इस्राएलियों, या बाते सुनो: यीशु नासरी एक आदमी होतो जेको परमेश्वर को तरफ सी होन को सबूत उन सामर्थ को कामों अऊर अचम्भा को कामों अऊर चिन्हों सी प्रगट हय, जो परमेश्वर न तुम्हरो बीच ओको सी कर दिखायो जेक तुम खुदच जानय हय।”
ACT 2:23 उच यीशु ख, जो परमेश्वर की ठहरायी हुयी योजना अऊर पहले को ज्ञान को अनुसार पकड़वायो गयो, तुम न अधर्मियों को हाथ सी क्रूस पर चढ़ाय क मार डाल्यो।
ACT 2:24 पर ओखच परमेश्वर न मरन को बन्धनों सी छुड़ाय क जीन्दो करयो; कहालीकि यो असम्भव होतो कि ऊ ओको वश म रहतो।
ACT 2:25 कहालीकि दाऊद ओको बारे म कह्य हय, “मय प्रभु ख हमेशा अपनो सम्मुख रख्यो हय: येकोलायी कि ऊ मोरी दायो हाथ को तरफ रह्य हय, मय कभी नहीं डगमगाऊं।
ACT 2:26 योच वजह मोरो दिल बहुत खुश अऊर मगन भयो; मोरो शरीर भी आशा सी रहेंन।
ACT 2:27 कहालीकि तय मोरो जीव ख अधोलोक म नहीं छोड़जो; अऊर नहीं अपनो पवित्र भक्त ख सड़न देजो।
ACT 2:28 तय मोख जीवन को रस्ता बतायजो; तोरो आगु खुशी की भरपूरी हय, तोरो दायो हाथ म सुख हमेशा बन्यो रह्य हय।”
ACT 2:29 “हे भाऊवों, मय पुर्वज दाऊद को बारे म तुम सी हिम्मत को संग कह्य सकू हय कि ऊ त मर गयो अऊर गाड़्यो भी गयो अऊर ओकी कब्र अज तक हमरो यहां मौजूद हय।”
ACT 2:30 ऊ भविष्यवक्ता होतो, ऊ जानत होतो कि परमेश्वर न मोरो सी कसम खायी हय कि मय तोरो वंश म सी एक लोग ख तोरो आसन पर बैठाऊं;
ACT 2:31 ओन होन वाली बात ख पहिलेच सी देख क मसीह को जीन्दो होन को बारे म भविष्यवानी करी की “ओको जीव न त अधोलोक म छोड़्यो गयो अऊर न ओको शरीर सड़नो पायो।”
ACT 2:32 योच यीशु ख परमेश्वर न जीन्दो करयो, जेको हम सब गवाह हंय।
ACT 2:33 यो तरह परमेश्वर को दायों हाथ सी मुख्य पद पा क, अऊर बाप सी ऊ पवित्र आत्मा प्राप्त कर क् जेकी प्रतिज्ञा करी गयी होती, ओन यो उंडेल दियो हय जो तुम देखय अऊर सुनय हय।
ACT 2:34 कहालीकि दाऊद त स्वर्ग पर नहीं चढ़्यो; पर ऊ खुद कह्य हय, “प्रभु न मोरो प्रभु सी कह्यो, मोरो दायों बैठ,
ACT 2:35 जब तक कि मय तोरो दुश्मनों ख तोरो पाय को खल्लो की चौकी नहीं कर देऊं।”
ACT 2:36 “येकोलायी अब इस्राएल को पूरो घरानों निश्चित रूप सी जान ले कि परमेश्वर न उच यीशु ख जेक तुम न क्रूस पर चढ़ायो, प्रभु भी ठहरायो अऊर मसीह भी।”
ACT 2:37 तब सुनन वालो को दिल छिद गयो, अऊर हि पतरस अऊर बच्यो प्रेरितों सी पूछन लग्यो, “हे भाऊ, हम का करबो?”
ACT 2:38 पतरस न उन्को सी कह्यो, “मन फिरावो, अऊर तुम म सी हर एक अपनो अपनो पापों की माफी लायी यीशु मसीह को नाम सी बपतिस्मा ले; त तुम पवित्र आत्मा को दान पावों।
ACT 2:39 कहालीकि या प्रतिज्ञा तुम, अऊर तुम्हरी सन्तानों, अऊर उन सब दूर दूर को लोगों लायी भी हय जिन्ख प्रभु हमरो परमेश्वर अपनो जवर बुलायेंन।”
ACT 2:40 ओन बहुत अऊर बातों सी भी गवाही दी अऊर बिनती कि अपनो आप ख यो कुटिल जाति सी बचाव।
ACT 2:41 येकोलायी जिन्न ओको वचन स्वीकार करयो उन्न बपतिस्मा लियो; अऊर उच दिन तीन हजार आदमी को लगभग उन्म मिल गयो।
ACT 2:42 अऊर हि प्रेरितों सी शिक्षा पावन, अऊर संगति रखन, अऊर रोटी तोड़न, अऊर प्रार्थना करन म लौलीन रह्यो।
ACT 2:43 अऊर सब लोगों पर डर छाय गयो, अऊर बहुत सो अचम्भा को चिन्ह अऊर चमत्कार प्रेरितों सी होत होतो।
ACT 2:44 अऊर सब विश्वास करन वालो जमा रहत होतो, अऊर उनकी सब चिजे साझा म होती।
ACT 2:45 हि अपनी अपनी जायजाद सामान बिक-बिक क जसी जेकी जरूरत होत होती बाट दियो जात होतो।
ACT 2:46 हि हर दिन एक मन होय क मन्दिर म जमा होत होतो, अऊर घर-घर रोटी तोड़तो हुयो खुशी अऊर सच्चो मन सी जेवन करत होतो,
ACT 2:47 अऊर परमेश्वर की स्तुति करत होतो, अऊर सब लोग उन्को सी खुश होतो : अऊर जो उद्धार पात होतो, उन्ख प्रभु हर दिन उन्म मिलाय देत होतो।
ACT 3:1 पतरस अऊर यूहन्ना दोपहर को तीन बजे प्रार्थना को समय मन्दिर म जाय रह्यो होतो।
ACT 3:2 अऊर लोग एक जनम को लंगड़ा ख लाय रह्यो होतो, जेक हि हर दिन मन्दिर को ऊ द्वार पर जो सुन्दर कहलावय हय, बैठाय देत होतो कि ऊ मन्दिर म जान वालो सी भीख मांगे।
ACT 3:3 जब ओन पतरस अऊर यूहन्ना ख मन्दिर म जातो देख्यो, त ओन भीख मांगी।
ACT 3:4 पतरस न यूहन्ना को संग ओको तरफ ध्यान सी देख क कह्यो, “हमरो तरफ देख!”
ACT 3:5 येकोलायी ऊ उन्को सी कुछ पावन की आशा रखतो हुयो उन्को तरफ ताकन लग्यो।
ACT 3:6 तब पतरस न कह्यो, “चांदी अऊर सोना त मोरो जवर नहाय, पर जो मोरो जवर हय ऊ तोख देऊ हय; यीशु मसीह नासरी को नाम सी चलन लग।”
ACT 3:7 अऊर ओन ओको दायों हाथ पकड़ क ओख उठायो; अऊर तुरतच ओको पाय अऊर घुटना म ताकत आय गयो।
ACT 3:8 ऊ उछल क खड़ो भय गयो अऊर चलन-फिरन लग्यो; अऊर चलतो, अऊर कूदतो, अऊर परमेश्वर की स्तुति करतो हुयो उन्को संग मन्दिर म गयो।
ACT 3:9 सब लोगों न ओख चलतो फिरतो अऊर परमेश्वर की स्तुति करतो देख क,
ACT 3:10 ओख पहिचान लियो कि यो उच आय जो मन्दिर को सुन्दर द्वार पर बैठ क भीख मांगतो रहत होतो; अऊर ऊ घटना सी जो ओको संग भयी होती हि बहुत अचम्भित अऊर चकित भयो।
ACT 3:11 जब ऊ पतरस अऊर यूहन्ना ख पकड़्यो हुयो होतो, त सब लोग बहुत आश्चर्य करतो हुयो ऊ छप्पर म जो सुलैमान को कहलावय हय, उन्को जवर दौड़त आयो।
ACT 3:12 यो देख क पतरस न लोगों सी कह्यो, “हे इस्राएलियों, तुम यो आदमी पर कहाली अचरज करय हय, अऊर हमरी तरफ कहाली असो तरह देख रह्यो हय कि मानो हम नच अपनो सामर्थ या भक्ति सी येख चलन-फिरन लायक बनाय दियो।
ACT 3:13 अब्राहम अऊर इसहाक अऊर याकूब को परमेश्वर, हमरो बापदादा को परमेश्वर न अपनो सेवक यीशु की महिमा करी, जेक तुम न पकड़वाय दियो, अऊर जब पिलातुस न ओख छोड़ देन को बिचार करयो, तब तुम न ओको सामने ओको इन्कार करयो।
ACT 3:14 तुम न ऊ पवित्र अऊर सच्चो को इन्कार करयो, अऊर बिनती करी कि एक हत्यारों ख तुम्हरो लायी छोड़ दियो जायेंन;
ACT 3:15 अऊर तुम न जीवन को कर्ता ख मार डाल्यो, जेक परमेश्वर न मरयो हुयो म सी जीन्दो करयो; अऊर या बात को हम गवाह हंय।
ACT 3:16 अऊर ओकोच नाम न, ऊ विश्वास सी जो ओको नाम पर हय, यो आदमी ख जेक तुम देखय हय अऊर जानय भी हय सामर्थ दियो हय। उच विश्वास न जो ओको सी हय, येख तुम सब को सामने भलो चंगो कर दियो हय।
ACT 3:17 “अब हे भाऊ, मय जानु हय कि यो काम तुम न अज्ञानता म करयो, अऊर वसोच तुम्हरो मुखिया न भी करयो।
ACT 3:18 पर जो बातों ख परमेश्वर न सब भविष्यवक्तावों को मुंह सी पहिलोच बताय दियो होतो, कि ओको मसीह दु:ख उठायेंन, उन्ख ओन यो रीति सी पूरी करयो।
ACT 3:19 येकोलायी, मन फिराव अऊर लौट आव कि तुम्हरो पाप माफ करयो जाये, जेकोसी प्रभु को जवर सी आराम को दिन आये,
ACT 3:20 अऊर ऊ यीशु ख भेजेंन जो तुम्हरो लायी पहिलोच सी प्रभु मसीह ठहरायो गयो हय।
ACT 3:21 जरूरी हय कि ऊ स्वर्ग म ऊ समय तक रहेंन जब तक कि ऊ सब बातों को सुधार नहीं कर लेयेंन जेकी चर्चा पुरानो समय सी परमेश्वर न अपनो पवित्र भविष्यवक्तावों को मुंह सी करी हय।
ACT 3:22 जसो कि मूसा न कह्यो, ‘प्रभु परमेश्वर तुम्हरो भाऊवों म सी तुम्हरो लायी मोरो जसो एक भविष्यवक्ता उठायेंन, जो कुछ ऊ तुम सी कहेंन, ओकी सुनजो।
ACT 3:23 पर हर एक आदमी जो उन भविष्यवक्ता की नहीं सुनय, लोगों म सी नाश करयो जायेंन।’
ACT 3:24 अऊर शमूएल सी ले क ओको बाद वालो तक जितनो भविष्यवक्ता न बोल्यो उन सब न यो दिन को खबर दियो हय।
ACT 3:25 तुम भविष्यवक्तावों की सन्तान अऊर ऊ वाचा को भागीदार हय, जो परमेश्वर न तुम्हरो बापदादा सी बान्धी, जब ओन अब्राहम सी कह्यो, ‘तोरो वंश सी धरती को पूरो घरानों आशीष पायेंन।’
ACT 3:26 परमेश्वर न अपनो सेवक ख उठाय क पहिले तुम्हरो जवर भेज्यो, कि तुम म सी हर एक ख ओकी बुरायी सी फेर क आशीष दे।”
ACT 4:1 जब हि लोगों सी यो कह्य रह्यो होतो, त याजक अऊर मन्दिर पहरेदारों को मुखिया अऊर सदूकी उन पर चढ़ आयो।
ACT 4:2 कहालीकि हि बहुत गुस्सा भयो कि हि लोगों ख सिखावत होतो अऊर यीशु को मरयो हुयो म सी जीन्दो होन को प्रचार करत होतो।
ACT 4:3 उन्न उन्ख पकड़ क दूसरों दिन तक जेलखाना म रख्यो कहालीकि शाम भय गयी होती।
ACT 4:4 पर वचन को सुनन वालो म सी बहुत सो न विश्वास करयो, अऊर उन्की गिनती पाच हजार पुरुषों को लगभग भय गयी।
ACT 4:5 दूसरों दिन यरूशलेम म असो भयो कि उन्को मुखिया अऊर बुजूर्गों अऊर धर्मशास्त्री
ACT 4:6 अऊर महायाजक हन्ना अऊर कैफा अऊर यूहन्ना अऊर सिकन्दर अऊर जितनो महायाजक को घरानों को होतो, सब यरूशलेम म जमा भयो।
ACT 4:7 हि उन्ख बीच म खड़ो कर क् पूछन लग्यो कि तुम न यो काम कौन्सो सामर्थ सी अऊर कौन्सो नाम सी करयो हय।
ACT 4:8 तब पतरस न पवित्र आत्मा सी परिपूर्ण होय क बुजूर्गों सी कह्यो,
ACT 4:9 हे लोगों को मुखिया अऊर बुजूर्गों, यो कमजोर आदमी को संग जो भलायी करी गयी हय, यदि अज हम सी ओको बारे म पूछताछ करी जावय हय, कि ऊ कसो अच्छो भयो।
ACT 4:10 त तुम सब अऊर पूरो इस्राएली लोग जान ले कि यीशु मसीह नासरी को नाम सी जेक तुम न क्रूस पर चढ़ायो, अऊर परमेश्वर न मरयो हुयो म सी जीन्दो करयो, यो आदमी तुम्हरो सामने भलो चंगो खड़ो हय।
ACT 4:11 यो उच गोटा आय जेक तुम राजमिस्त्रियों न बेकार जान्यो अऊर ऊ कोना को छोर को गोटा भय गयो।
ACT 4:12 “कोयी दूसरों सी उद्धार नहाय; कहालीकि स्वर्ग को खल्लो आदमी म अऊर कोयी दूसरों नाम नहीं दियो गयो, जेकोसी हम उद्धार पा सकय।”
ACT 4:13 जब उन्न पतरस अऊर यूहन्ना को हिम्मत देख्यो, अऊर यो जान्यो कि यो अनपढ़ अऊर साधारन आदमी हंय, त अचम्भा करयो; तब उन्ख पहिचान्यो, कि इन यीशु को संग रह्यो हंय।
ACT 4:14 ऊ आदमी ख जो अच्छो भयो होतो, उन्को संग खड़ो देख क, हि विरोध म कुछ नहीं कह्य सक्यो।
ACT 4:15 पर उन्ख सभा को बाहेर जान की आज्ञा दे क, हि आपस म बिचार करन लग्यो,
ACT 4:16 “हम इन आदमी को संग का करबो? कहालीकि यरूशलेम को सब रहन वालो पर प्रगट हय, कि इन्को सी एक प्रसिद्ध चिन्ह चमत्कार दिखायो गयो हय; अऊर हम ओको इन्कार नहीं कर सकय।
ACT 4:17 पर येकोलायी कि या बात लोगों म अऊर जादा फैल नहीं जाये, हम उन्ख धमकायबो, कि हि यो नाम सी अऊर कोयी आदमी सी बात नहीं करे।”
ACT 4:18 तब उन्ख बुलायो अऊर चेतावनी दे क यो कह्यो, “यीशु को नाम सी कुछ भी नहीं बोलनो अऊर नहीं सिखानो।”
ACT 4:19 पर पतरस अऊर यूहन्ना न उन्ख उत्तर दियो, “तुमच न्याय करो; का यो परमेश्वर को जवर ठीक हय कि हम परमेश्वर की बात सी बढ़ क तुम्हरी बात मानबो।
ACT 4:20 कहालीकि यो त हम सी होय नहीं सकय कि जो हम न देख्यो अऊर सुन्यो हय, ऊ नहीं कहेंन।”
ACT 4:21 तब उन्न ओख अऊर धमकाय क छोड़ दियो, कहालीकि लोगों को वजह उन ख सजा देन को कोयी दाव नहीं मिल्यो, येकोलायी कि जो घटना भयी होती ओको वजह सब लोग परमेश्वर की बड़ायी करत होतो।
ACT 4:22 ऊ आदमी, जेको पर यो चंगो करन को चिन्ह चमत्कार दिखायो गयो होतो, चालीस साल सी जादा उमर को होतो।
ACT 4:23 हि छूट क अपनो संगियों को जवर आयो, अऊर जो कुछ महायाजक अऊर बुजूर्गों न उन्को सी कह्यो होतो, उन्ख सुनाय दियो।
ACT 4:24 यो सुन क उन्न एक मन होय क ऊचो आवाज सी परमेश्वर सी कह्यो, “हे मालिक, तय उच आय जेन स्वर्ग अऊर धरती अऊर समुन्दर अऊर जो कुछ उन्म हय बनायो।”
ACT 4:25 तय न पवित्र आत्मा सी अपनो सेवक हमरो बाप दाऊद को मुंह सी कह्यो, गैरयहूदियों न दंगा कहाली मचायो? अऊर देश देश को लोगों न कहाली बेकार की बात सोच्यो?
ACT 4:26 प्रभु अऊर ओको मसीह को विरोध म धरती को राजा खड़ो भयो, अऊर शासक एक संग जमा भय गयो।
ACT 4:27 कहालीकि सचमुच तोरो पवित्र सेवक यीशु को विरोध म, जेको तय न अभिषेक करयो, हेरोदेस अऊर पुन्तियुस पिलातुस भी गैरयहूदियों अऊर इस्राएलियों को संग यो नगर म जमा भयो,
ACT 4:28 कि जो कुछ पहिलो सी तोरी सामर्थ अऊर राय सी ठहरो होतो उच करो।
ACT 4:29 “अब हे प्रभु, उन्की धमकियों ख देख; अऊर अपनो सेवकों ख यो वरदान दे कि तोरो वचन बड़ो हिम्मत सी सुनाय।
ACT 4:30 चंगो करन लायी तय अपनो हाथ बढ़ाव कि चिन्ह चमत्कार अऊर अद्भुत काम तोरो पवित्र सेवक यीशु को नाम सी करयो जाये।”
ACT 4:31 जब हि प्रार्थना कर लियो, त ऊ जागा जित हि जमा होतो हल गयो, अऊर हि सब पवित्र आत्मा सी परिपूर्ण भय गयो, अऊर परमेश्वर को वचन हिम्मत सी सुनावतो रह्यो।
ACT 4:32 विश्वास करन वालो की मण्डली एक चित्त अऊर एक मन की होती, यहां तक कि कोयी भी अपनी जायजाद अपनी नहीं कहत होतो, पर सब कुछ साझा म होतो।
ACT 4:33 प्रेरित बड़ो सामर्थ सी प्रभु यीशु को जीन्दो होन की गवाही देत रह्यो अऊर उन सब पर बड़ो अनुग्रह होतो।
ACT 4:34 उन्म कोयी भी गरीब नहीं होतो, कहालीकि जेको जवर जमीन या घर होतो, हि उन्ख बिक बिक क बिकी हुयी चिजों को दाम लावय, अऊर ओख प्रेरितों को पाय पर रखत होतो;
ACT 4:35 अऊर जसी जेक जरूरत होत होती, ओको अनुसार हर एक ख बाट देत होतो।
ACT 4:36 यूसुफ नाम साइप्रस को एक लेवी होतो जेको नाम प्रेरितों न बरनबास मतलब शान्ति को बेटा रख्यो होतो।
ACT 4:37 ओकी कुछ जमीन होती, जेक ओन बिकी, अऊर दाम को रुपया लाय क प्रेरितों को पाय पर रख दियो।
ACT 5:1 हनन्याह नाम को एक आदमी अऊर ओकी पत्नी, सफीरा न कुछ जमीन बिकी
ACT 5:2 अऊर ओको दाम म सी कुछ रख छोड़्यो, अऊर या बात ओकी पत्नी भी जानत होती। अऊर ओको एक भाग लाय क प्रेरितों को पाय को आगु रख दियो।
ACT 5:3 पतरस न कह्यो, “हे हनन्याह! शैतान न तोरो मन म या बात कहाली डाली कि तय पवित्र आत्मा सी झूठ बोल्यो, अऊर जमीन को दाम म सी कुछ रख छोड़्यो?
ACT 5:4 जब तक ऊ तोरो जवर रही, का तोरी नहीं होती? अऊर जब बिक गयी त का तोरो अधिकार म नहीं होती? तय न या बात अपनो मन म कहाली सोच्यो? तय आदमी सी नहीं, पर परमेश्वर सी झूठ बोल्यो हय।”
ACT 5:5 या बाते सुनतोच हनन्याह गिर पड़्यो अऊर जीव छोड़ दियो, अऊर सब सुनन वालो पर बड़ो डर छाय गयो।
ACT 5:6 तब जवानों न उठ क ओकी सकोली बनायी अऊर बाहेर लिजाय क गाड़ दियो।
ACT 5:7 लगभग तीन घंटा को बाद ओकी पत्नी, जो कुछ भयो होतो नहीं जान क, अन्दर आयी।
ACT 5:8 तब पतरस न ओको सी कह्यो, “मोख बताव का तुम न ऊ जमीन इतनोच म बिकी होती?” ओन कह्यो, “हव, इतनोच म।”
ACT 5:9 पतरस न ओको सी कह्यो, “या का बात हय कि तुम दोयी न प्रभु की आत्मा की परीक्षा लायी एक मन कर लियो? देख, तोरो पति को गाड़न वालो द्वारच पर खड़ो हंय, अऊर तोख भी बाहेर लिजायेंन।”
ACT 5:10 तब ऊ तुरतच ओको पाय पर गिर पड़ी, अऊर जीव छोड़ दियो; अऊर जवानों न अन्दर आय क ओख मरयो पायो, अऊर बाहेर लिजाय क ओको पति को जवर गाड़ दियो।
ACT 5:11 पूरी मण्डली पर अऊर इन बातों को सब सुनन वालो पर बड़ो डर छाय गयो।
ACT 5:12 प्रेरितों को हाथों सी बहुत चिन्ह चमत्कार अऊर अद्भुत काम लोगों को बीच म दिखायो जात होतो, अऊर हि सब एक मन होय क सुलैमान को छप्पर म जमा होत होतो।
ACT 5:13 पर दूसरों म सी कोयी ख यो हिम्मत नहीं होत होती कि उन्म जाय मिलबो; तब भी लोग उन्की बड़ायी करत होतो।
ACT 5:14 विश्वास करन वालो बहुत सो पुरुष अऊर बाईयां प्रभु की मण्डली म बड़ी संख्या म मिलत रह्यो।
ACT 5:15 यहां तक कि लोग बीमारों ख सड़को पर लाय लाय क, खटिया अऊर बिस्तर पर सुलाय देत होतो कि जब पतरस आयेंन, त ओकी छाया उन्म सी कोयी पर पड़ जाये।
ACT 5:16 यरूशलेम के आजु बाजू को नगर सी भी बहुत लोग बीमारों अऊर दुष्ट आत्मावों को सतायो हुयो ख लाय लाय क, जमा करत होतो, अऊर सब अच्छो कर दियो जात होतो।
ACT 5:17 तब महायाजक अऊर ओको सब संगी जो सदूकियों को पंथ को होतो, जलन सी भर गयो
ACT 5:18 अऊर प्रेरितों को पकड़ क जेलखाना म बन्द कर दियो।
ACT 5:19 पर रात ख प्रभु को एक स्वर्गदूत न जेलखाना को दरवाजा खोल क उन्ख बाहेर लाय क कह्यो,
ACT 5:20 “जाव, मन्दिर म खड़ो होय क यो जीवन की सब बाते लोगों ख सुनाव।”
ACT 5:21 हि यो सुन क भुन्सारो होतोच मन्दिर म जाय क उपदेश देन लग्यो। तब महायाजक अऊर ओको संगियों न आय क महासभा ख अऊर इस्राएलियों को सब बुजूर्गों को जमा करयो, अऊर जेलखाना म कहला भेज्यो कि उन्ख लाये।
ACT 5:22 पर सिपाहियों न उत पहुंच क उन्ख जेलखाना म नहीं पायो, अऊर लौट क खबर दियो,
ACT 5:23 “हम न जेलखाना ख बड़ो चौकसी सी बन्द करयो हुयो हय, अऊर पहरेदारों ख बाहेर द्वार पर खड़ो हुयो पायो; पर जब खोल्यो त अन्दर कोयी नहीं मिल्यो।”
ACT 5:24 जब मन्दिर को मुखिया अऊर महायाजक न या बाते सुनी, त उन्को बारे म बहुत चिन्ता म पड़ गयो कि उन्को का भयो!
ACT 5:25 इतनो म कोयी न आय क उन्ख बतायो, “देखो, जेक तुम न जेलखाना म बन्द रख्यो होतो, हि आदमी मन्दिर म खड़ो हुयो लोगों ख उपदेश दे रह्यो हंय।”
ACT 5:26 तब मुखिया, सिपाहियों को संग जाय क, उन्ख लायो पर ताकत सी नहीं, कहालीकि हि लोगों सी डरत होतो कि हम पर गोटा सी हमला मत कर दे।
ACT 5:27 उन्न उन्ख लाय क महासभा को आगु खड़ो कर दियो; तब महायाजक न उन्को सी पुच्छ्यो,
ACT 5:28 “का हम न तुम्ख बताय क आज्ञा नहीं दी होती कि तुम यो नाम सी उपदेश नहीं करो? तब भी देखो, तुम न पूरो यरूशलेम ख अपनो उपदेश सी भर दियो हय अऊर ऊ आदमी को खून हमरी मान पर लावनो चाहवय हय।”
ACT 5:29 तब पतरस अऊर दूसरों प्रेरितों न उत्तर दियो, “आदमियों की आज्ञा सी बढ़ क परमेश्वर की आज्ञा ख माननो हम्ख जरूरी हय।
ACT 5:30 हमरो बापदादों को परमेश्वर न यीशु ख जीन्दो करयो, जेक तुम न क्रूस पर लटकाय क मार डाल्यो होतो।
ACT 5:31 ओखच परमेश्वर न प्रभु अऊर उद्धारकर्ता ठहराय क अऊर, अपनो दायों हाथ पर महान बनाय दियो, कि ऊ इस्राएलियों ख मन फिराव की ताकत अऊर पापों की माफी दे सके।
ACT 5:32 हम इन बातों को गवाह हय अऊर वसोच पवित्र आत्मा भी, जेक परमेश्वर न उन्ख दियो हय जो ओकी आज्ञा मानय हंय।”
ACT 5:33 यो सुन क हि जलन लग्यो, अऊर उन्ख मार डालनो चाहयो।
ACT 5:34 पर गमलीएल नाम को एक फरीसी न जो व्यवस्थापक अऊर सब लोगों म मानवायीक होतो, न्यायालय म खड़ो होय क प्रेरितों ख थोड़ो देर लायी बाहेर कर देन की आज्ञा दी।
ACT 5:35 तब ओन कह्यो, “हे इस्राएलियों, तुम जो कुछ यो आदमी सी करनो चाहवय हय, सोच समझ क करो।
ACT 5:36 कहालीकि इन दिनो सी पहिलो थियूदास यो कहतो हुयो उठ्यो, कि मय भी कुछ हय; अऊर कोयी चार सौ आदमी ओको संग भय गयो, पर ऊ मारयो गयो अऊर जितनो लोग ओको पर भरोसा करत होतो, सब बिखर गयो अऊर नाश भय गयो।
ACT 5:37 ओको बाद नाम लिखायी को दिन म यहूदा गलीली उठ्यो, अऊर कुछ लोग ख ओन अपनो तरफ कर लियो; अऊर ऊ भी नाश भय गयो अऊर जितनो लोग ओख मानत होतो, सब तितर बितर भय गयो।
ACT 5:38 येकोलायी अब मय तुम सी कहू हय, यो आदमी सी दूरच रहो अऊर इन सी कुछ काम मत रखो; कहालीकि यदि यो धरम यां काम आदमियों को तरफ सी होना तब त नाश होय जायेंन;
ACT 5:39 पर यदि परमेश्वर की तरफ सी आय, त तुम उन्ख कभी भी मिटाय नहीं सको। कहीं असो नहीं होय कि तुम परमेश्वर सी भी लड़न वालो ठहरो।”
ACT 5:40 तब उन्न ओकी बात मान ली; अऊर प्रेरितों ख बुलाय क पिटवायो; अऊर यो आदेश दे क छोड़ दियो कि यीशु को नाम सी फिर कोयी बात नहीं करो।
ACT 5:41 हि या बात सी खुशी होय क महासभा को जवर सी चली गयो, कि हम ओको नाम लायी अपमान होन लायक त ठहरयो।
ACT 5:42 हि हर दिन मन्दिर म अऊर घर घर म उपदेश करनो, अऊर या बात को सुसमाचार सुनावन लग्यो कि यीशुच मसीह आय।
ACT 6:1 उन दिन म जब चेलां की संख्या बहुत बढ़न लगी, तब यूनानी भाषा बोलन वालो इब्रानी भाषा बोलन वालो पर कुड़कुड़ान लग्यो, कि हर दिन की सेवकायी म हमरी विधवावों की सुधि नहीं ली जावय।
ACT 6:2 तब उन बारहो न चेलां की मण्डली ख अपनो जवर बुलाय क कह्यो, “यो ठीक नहीं कि हम परमेश्वर को वचन छोड़ क खिलावन पिलावन की सेवा म रहबो।
ACT 6:3 येकोलायी, हे भाऊ, अपनो म सी सात अच्छो पुरुषों ख जो पवित्र आत्मा अऊर बुद्धि सी परिपूर्ण होय, चुन लेवो, कि हम उन्ख यो काम पर ठहराय दे।
ACT 6:4 पर हम त प्रार्थना म अऊर वचन को सेवा म लग्यो रहबो।”
ACT 6:5 या बात पूरी मण्डली ख अच्छी लगी, अऊर उन्न स्तिफनुस नाम को एक पुरुष ख जो विश्वास अऊर पवित्र आत्मा सी परिपूर्ण होतो, अऊर फिलिप्पुस, अऊर प्रुखुरुस, अऊर नीकानोर, अऊर तीमोन, अऊर परमिनास, अऊर अन्ताकिया को रहन वालो नीकुलाउस ख जो यहूदी को राय म आय गयो होतो, चुन लियो।
ACT 6:6 इन्क प्रेरितों को आगु खड़ो करयो अऊर उन्न प्रार्थना कर क् उन पर हाथ रख्यो।
ACT 6:7 परमेश्वर को वचन फैलत गयो अऊर यरूशलेम म चेलां की गिनती बहुत बढ़ गयी; अऊर याजकों को एक बड़ो जाती यो, विश्वास को मानन वालो भय गयो।
ACT 6:8 स्तिफनुस अनुग्रह अऊर सामर्थ सी परिपूर्ण होय क लोगों म बड़ो-बड़ो आश्चर्य कर्म अऊर चिन्ह चमत्कार दिखावत होतो।
ACT 6:9 तब उस आराधनालय म सी जो लिबिरतीनों की कहलावत होती, अऊर कुरेनी अऊर सिकन्दरियां अऊर किलिकिया अऊर आसिया को लोगों म सी कुछ एक उठ क स्तिफनुस सी वाद विवाद करन लग्यो।
ACT 6:10 पर ऊ ज्ञान अऊर वा आत्मा को जेकोसी ऊ बाते करत होतो, हि सामना नहीं कर सक्यो।
ACT 6:11 येको पर उन्न कुछ लोगों ख उभारयो जो कहन लग्यो, “हम न येख मूसा अऊर परमेश्वर को विरोध म निन्दा की बाते कहतो सुन्यो हय।”
ACT 6:12 अऊर लोगों अऊर बुजूर्गों अऊर धर्मशास्त्रियों ख भड़काय क चढ़ आयो अऊर ओख पकड़ क महासभा म लायो।
ACT 6:13 अऊर झूठो गवाह खड़ो करयो, जिन्न कह्यो, “यो आदमी यो पवित्र जागा अऊर व्यवस्था को विरोध म बोलनो नहीं छोड़य।
ACT 6:14 कहालीकि हम न ओख यो कहत सुन्यो हय कि योच यीशु नासरी यो जागा ख गिराय देयेंन, अऊर उन रीतियों ख बदल डालेंन जो मूसा न हम्ख सौंप्यो हंय।”
ACT 6:15 तब सब लोगों न जो सभा म बैठ्यो होतो, ओको पर नजर रखी त ओको मुंह स्वर्गदूत को जसो देख्यो।
ACT 7:1 तब महायाजक न कह्यो, “का या बाते सच हंय?”
ACT 7:2 स्तिफनुस न कह्यो, “हे भाऊ, अऊर पितरो सुनो। हमरो बाप अब्राहम हारान म बसनो सी पहिलो जब मेशोपोटामियां म होतो; त महिमामय परमेश्वर न ओख दर्शन दियो,
ACT 7:3 अऊर ओको सी कह्यो, ‘तय अपनो देश अऊर अपनो कुटुम्ब सी निकल क ऊ देश म जा, जेक मय तोख दिखाऊं।’”
ACT 7:4 तब ऊ कसदियों को देश सी निकल क हारान म जाय बस्यो। ओको बाप को मरन को बाद परमेश्वर न ओख उत सी यो देश म लाय क बसायो जेको म अब तुम बस्यो हय,
ACT 7:5 अऊर ओख कुछ मीरास बल्की पाय रखन भर की भी ओको म जागा नहीं दी, पर प्रतिज्ञा खायी कि मय यो देश तोरो अऊर तोरो बाद तोरो वंश को हाथ कर देऊ; यानेकि ऊ समय ओको कोयी बेटा भी नहीं होतो।
ACT 7:6 अऊर परमेश्वर न यो कह्यो, तोरी सन्तान को लोग परायो देश म परदेशी होयेंन, अऊर हि उन्ख सेवक बनायेंन अऊर चार सौ साल तक दु:ख देयेंन।
ACT 7:7 तब परमेश्वर न कह्यो, जो जात को हि सेवक होयेंन, ओख मय न्याय करू, अऊर येको बाद हि निकल क योच जागा मोरी सेवा करेंन।
ACT 7:8 अऊर ओन ओको सी खतना की वाचा बान्धी; अऊर योच दशा म इसहाक ओको सी पैदा भयो अऊर आठवों दिन ओको खतना करयो गयो; अऊर इसहाक सी याकूब अऊर याकूब सी बारा कुलपति पैदा भयो।
ACT 7:9 “कुलपतियों न यूसुफ सी जलन कर क् ओख मिस्र देश जान वालो को हाथ बेच्यो। पर परमेश्वर ओको संग होतो,
ACT 7:10 अऊर ओख ओको सब कठिनायी सी छुड़ाय क मिस्र को राजा फिरौन की नजर म अनुग्रह अऊर बुद्धि प्रदान करी, अऊर ओन ओख मिस्र पर अऊर अपनो पूरो घर पर शासक नियुक्त करयो।”
ACT 7:11 तब मिस्र अऊर कनान को पूरो देश म अकाल पड़्यो; जेकोसी भारी कठिन परिस्थिति भयी, अऊर हमरो बापदादों ख अनाज नहीं मिलत होतो।
ACT 7:12 पर याकूब न यो सुन क कि मिस्र म अनाज हय, हमरो बापदादों ख पहिली बार भेज्यो।
ACT 7:13 दूसरी बार यूसुफ न अपनो खुद ख अपनो भाऊ पर प्रगट करयो अऊर यूसुफ की जाती फिरौन ख मालूम भय गयी।
ACT 7:14 तब यूसुफ न अपनो बाप याकूब अऊर अपनो पूरो कुटुम्ब ख, जो पचत्तर आदमी होतो, बुलाय भेज्यो।
ACT 7:15 तब याकूब मिस्र म गयो; अऊर उत ऊ अऊर हमरो बापदादा मर गयो।
ACT 7:16 उन्को लाश शकेम म पहुंचायो जाय क ऊ कब्र म रख्यो गयो, जेक अब्राहम न चांदी दे क शकेम म हमोर की सन्तान सी मोल लियो होतो।
ACT 7:17 “पर जब वा प्रतिज्ञा को पूरो होन को समय जवर आयो जो परमेश्वर न अब्राहम सी करी होती, त मिस्र म हि लोग बढ़ गयो अऊर बहुत भय गयो।”
ACT 7:18 तब मिस्र म दूसरों राजा भयो जो यूसुफ ख नहीं जानत होतो।
ACT 7:19 ओन हमरी जाती सी चालाकी कर क् हमरो बापदादों को संग यो तक बुरो व्यवहार करयो, कि उन्ख अपनो बच्चां ख फेक देनो पड़्यो कि हि जीन्दो नहीं रहे।
ACT 7:20 ऊ समय मूसा पैदा भयो। ऊ परमेश्वर की नजर म बहुतच सुन्दर होतो। ऊ तीन महीना तक अपनो बाप को घर म पाल्यो गयो।
ACT 7:21 जब फेक दियो गयो त फिरौन की बेटी न ओख उठाय लियो, अऊर अपनो बेटा जसो पाल्यो।
ACT 7:22 मूसा ख मिस्रियों की पूरी विद्या पढ़ायो गयो, अऊर ऊ वचन अऊर कर्म दोयी म सामर्थी होतो।
ACT 7:23 “जब ऊ चालीस साल को भयो, त ओको मन म आयो कि मय अपनो इस्राएली भाऊ सी मुलाखात करू।”
ACT 7:24 ओन एक आदमी पर अन्याय होतो देख क ओख बचायो, अऊर मिस्री ख मार क सतायो हुयो को बदला लियो।
ACT 7:25 ओन सोच्यो कि ओको भाऊ समझेंन कि परमेश्वर ओको हाथों सी उन्को उद्धार करेंन, पर उन्न नहीं समझ्यो।
ACT 7:26 दूसरों दिन जब हि आपस म लड़ रह्यो होतो, त ऊ उत आयो; अऊर यो कह्य क उन्ख मेल करन लायी समझायो, हे पुरुषों, तुम त भाऊ-भाऊ आय, एक दूसरों पर कहाली अन्याय करय हय?
ACT 7:27 पर जो अपनो शेजारी पर अन्याय कर रह्यो होतो, ओन ओख यो कह्य क हटाय दियो, तोख कौन न हम पर शासक अऊर सच्चो ठहरायो हय?
ACT 7:28 का जो रीति सी तय न कल मिस्री ख मार डाल्यो मोख भी मार डालनो चाहवय हय?
ACT 7:29 या बात सुन क मूसा भग्यो अऊर मिद्यान देश म परदेशी होय क रहन लग्यो, अऊर उत ओको दोय बेटा पैदा भयो।
ACT 7:30 “जब पूरो चालीस साल बीत गयो, त एक स्वर्गदूत न सीनै पहाड़ी को जंगल म ओख जलती हुयी झाड़ी की लपेट म दर्शन दियो।
ACT 7:31 मूसा ख यो दर्शन देख क अचरज भयो, अऊर जब देखन लायी ऊ जवर गयो, त प्रभु को यो आवाज भयो,
ACT 7:32 ‘मय तोरो बापदादों, अब्राहम, इसहाक, अऊर याकूब को परमेश्वर आय,’ तब त मूसा काप गयो, यहां तक कि ओख देखन को हिम्मत नहीं रह्यो।”
ACT 7:33 तब प्रभु न ओको सी कह्यो, अपनो पाय सी चप्पल उतार लेवो, कहालीकि जो जागा तय खड़ो हय, ऊ पवित्र जमीन आय।
ACT 7:34 मय न सचमुच अपनो लोगों की जो मिस्र देश म हंय, दुर्दशा ख देख्यो हय; अऊर उन्की आह अऊर उन्को रोवनो सुन्यो हय; येकोलायी उन्ख छुड़ावन लायी उतरयो हय। अब आव, मय तोख मिस्र देश म भेजूं।
ACT 7:35 “जो मूसा ख उन्न यो कह्य क नकारयो होतो, ‘तोख कौन न हम पर शासक अऊर सच्चो ठहरायो हय?’ ओखच परमेश्वर न शासक अऊर छुड़ावन वालो ठहराय क, ऊ स्वर्गदूत को द्वारा जेन ओख झाड़ी म दर्शन दियो होतो, भेज्यो।
ACT 7:36 योच आदमी मिस्र देश अऊर लाल समुन्दर अऊर जंगल म चालीस साल तक अद्भुत काम अऊर चिन्ह चमत्कार दिखाय दिखाय क उन्ख निकाल लायो।
ACT 7:37 यो उच मूसा आय, जेन इस्राएलियों सी कह्यो, ‘परमेश्वर तुम्हरो भाऊ म सी तुम्हरो लायी मोरो जसो एक भविष्यवक्ता उठायेंन।’
ACT 7:38 यो उच आय, जेन जंगल म मण्डली को बीच ऊ स्वर्गदूत को संग सीनै पहाड़ी पर ओको सी बाते करी अऊर हमरो बापदादों को संग होतो, ओखच जीन्दो वचन मिले कि हम तक पहुंचाये।”
ACT 7:39 “पर हमरो बापदादों न ओकी माननो नहीं चाह्यो, बल्की ओख हटाय क अपनो मन मिस्र को तरफ फिरायो,
ACT 7:40 अऊर हारून सी कह्यो, ‘हमरो लायी असो भगवान बना, जो हमरो आगु-आगु चलेंन, कहालीकि यो मूसा जो हम्ख मिस्र देश सी निकाल लायो, हम नहीं जानजे ओख का भयो?’”
ACT 7:41 उन दिन म उन्न एक बछड़ा बनाय क ओकी मूर्ति को आगु बलि चढ़ायी, अऊर अपनो हाथों को कामों म मगन होन लग्यो।
ACT 7:42 येकोलायी परमेश्वर न मुंह मोड़ क उन्ख छोड़ दियो, कि आसमान को तारांगन की पूजा करे, जसो भविष्यवक्तावों की किताब म लिख्यो हय: हे इस्राएल को घरानों! का तुम जंगल म चालीस साल तक पशुबलि अऊर अन्नबलि मोखच चढ़ावतो रह्यो?
ACT 7:43 तुम मोलेक को तम्बू अऊर रिफान भगवान को तारों ख धर क फिरत होतो, बल्की उन मूर्तियों ख जिन्ख तुम न आराधना करन लायी बनायो होतो। येकोलायी मय तुम्ख बेबीलोन को जवर लिजाय क बसाऊं।
ACT 7:44 “साक्षी को तम्बू जंगल म हमरो बापदादों को बीच म होतो, जसो ओन ठहरायो जेन मूसा सी कह्यो, जो नमुना तय न देख्यो हय, ओको अनुसार येख बनाव।”
ACT 7:45 उच तम्बू ख हमरो बापदादों पूर्वकाल सी पा क यहोशू को संग इत ले आयो; जो समय कि उन्न उन गैरयहूदियों पर अधिकार पायो, जिन्ख परमेश्वर न हमरो बापदादों को आगु सी निकाल दियो, अऊर ऊ तम्बू दाऊद को समय तक रह्यो।
ACT 7:46 ओको पर परमेश्वर न अनुग्रह करयो; येकोलायी ओन बिनती करी कि ऊ याकूब को परमेश्वर लायी रहन की जागा बनाये।
ACT 7:47 पर सुलैमान न ओको लायी घर बनायो।
ACT 7:48 “पर परमप्रधान हाथ को बनायो घरो म नहीं रह्य, जसो कि भविष्यवक्ता न कह्यो,”
ACT 7:49 प्रभु कह्य हय, स्वर्ग मोरो आसन अऊर धरती मोरो पाय को खल्लो की चौकी आय, मोरो लायी तुम कसो तरह को घर बनावो? अऊर मोरो आराम को कौन सो जागा होयेंन?
ACT 7:50 का या सब चिजे मोरी हाथ की बनायी नहीं?
ACT 7:51 “हे जिद्दी, अऊर मन अऊर कान को खतनारहित लोगों, तुम हमेशा पवित्र आत्मा को विरोध करय हय। जसो तुम्हरो बापदादों करत होतो, वसोच तुम भी करय हय।
ACT 7:52 भविष्यवक्तावों म सी कौन ख तुम्हरो बापदादों न नहीं सतायो? उन्न ऊ सच्चो को आवन को पूर्वकाल सी खबर देन वालो ख मार डाल्यो; अऊर अब तुम भी ओख पकड़न वालो अऊर मार डालन वालो भयो।
ACT 7:53 तुम न स्वर्गदूतों सी ठहरायो हुयो व्यवस्था त पायो, पर ओको पालन नहीं करयो।”
ACT 7:54 या बाते सुन क हि जल गयो अऊर ओको पर दात कटरन लग्यो।
ACT 7:55 पर ओन पवित्र आत्मा सी परिपूर्ण होय क स्वर्ग को तरफ देख्यो अऊर परमेश्वर की महिमा ख अऊर यीशु ख परमेश्वर को दायों तरफ खड़ो हुयो देख क कह्यो,
ACT 7:56 “देखो, मय स्वर्ग ख खुल्यो हुयो, अऊर आदमी को बेटा ख परमेश्वर को दायों तरफ खड़ो हुयो देखूं हय।”
ACT 7:57 तब उन्न बड़ो आवाज सी चिल्लाय क कान बन्द कर लियो, अऊर एक संग ओको पर झपट्यो;
ACT 7:58 अऊर ओख नगर को बाहेर निकाल क ओको पर पथराव करन लग्यो। गवाहों न अपनो कपड़ा शाऊल नाम को एक जवान को पाय को जवर उतार क रख दियो।
ACT 7:59 हि स्तिफनुस पर पथराव करतो रह्यो, अऊर ऊ यो कह्य क प्रार्थना करतो रह्यो, “हे प्रभु यीशु, मोरी आत्मा ख स्वीकार कर।”
ACT 7:60 तब घुटना टेक क ऊचो आवाज सी पुकारयो, “हे प्रभु, यो पाप उन पर मत लगा।” अऊर यो कह्य क ऊ सोय गयो।
ACT 8:1 शाऊल ओख मारन म सहमत होतो। उन दिन यरूशलेम की मण्डली पर बड़ो छल को सुरूवात भयो अऊर प्रेरितों ख छोड़ पूरो को पूरो यहूदिया अऊर सामरियां देशों म तितर बितर भय गयो।
ACT 8:2 कुछ भक्तो न स्तिफनुस ख कब्र म रख्यो अऊर ओको लायी जोर सी रोयो।
ACT 8:3 शाऊल मण्डली ख उजाड़ रह्यो होतो; अऊर घर-घर घुस क पुरुषों अऊर बाईयों ख घसीट-घसीट क जेलखाना म डालत होतो।
ACT 8:4 जो तितर-बितर हुयो होतो, हि सुसमाचार सुनावतो हुयो फिरयो;
ACT 8:5 अऊर फिलिप्पुस सामरियां नगर म जाय क लोगों म मसीह को प्रचार करन लग्यो।
ACT 8:6 जो बाते फिलिप्पुस न कह्यो उन्ख लोगों न सुन क अऊर जो चिन्ह चमत्कार ऊ दिखावत होतो उन्ख देख देख क, एक चित्त होय क मन लगायो।
ACT 8:7 कहालीकि बहुत सो म सी दुष्ट आत्मायें बड़ो आवाज सी चिल्लावत निकल गयी, अऊर बहुत सो लकवा को रोगी अऊर लंगड़ा भी अच्छो करयो गयो;
ACT 8:8 अऊर ऊ नगर म बड़ी खुशी छाय गयो।
ACT 8:9 येको सी पहिलो ऊ नगर म शिमोन नाम को एक आदमी होतो, जो जादू-टोना कर क् सामरियां को लोगों ख चकित करतो अऊर अपनो आप ख एक महान पुरुष बतावत होतो।
ACT 8:10 छोटो सी बड़ो तक सब ओको पर ध्यान दे क कहत होतो “यो आदमी परमेश्वर की वा सामर्थ आय, जो महान कहलावय हय।”
ACT 8:11 ओन बहुत दिन सी उन्ख अपनो जादू को कामों सी चकित कर रख्यो होतो, येकोलायी हि ओख बहुत मानत होतो।
ACT 8:12 पर जब उन्न फिलिप्पुस को विश्वास करयो जो परमेश्वर को राज्य अऊर यीशु मसीह को नाम को सुसमाचार सुनावत होतो त लोग, का पुरुष, का बाई, बपतिस्मा लेन लग्यो।
ACT 8:13 तब शिमोन न खुद भी विश्वास करयो अऊर बपतिस्मा ले क फिलिप्पुस को संग रहन लग्यो। ऊ चिन्ह चमत्कार अऊर बड़ो-बड़ो सामर्थ को काम होतो देख क चकित होत होतो।
ACT 8:14 जब प्रेरितों न जो यरूशलेम म होतो, सुन्यो कि सामरियों न परमेश्वर को वचन मान लियो हय त पतरस अऊर यूहन्ना ख उन्को जवर भेज्यो।
ACT 8:15 उन्न जाय क उन्को लायी प्रार्थना करी कि पवित्र आत्मा पाये।
ACT 8:16 कहालीकि ऊ अब तक उन्म सी कोयी पर नहीं उतरयो होतो; उन्न त केवल प्रभु यीशु को नाम म बपतिस्मा लियो होतो।
ACT 8:17 तब उन्न उन पर हाथ रख्यो अऊर उन्न पवित्र आत्मा पायो।
ACT 8:18 जब शिमोन न देख्यो कि प्रेरितों को हाथ रखन सी पवित्र आत्मा दियो जावय हय, त उन्को जवर रुपये लाय क कह्यो,
ACT 8:19 “यो अधिकार मोख भी दे, कि जो कोयी पर हाथ रखू ऊ पवित्र आत्मा पाये।”
ACT 8:20 पतरस न ओको सी कह्यो, “तोरो रुपये तोरो संग नाश होय, कहालीकि तय न परमेश्वर को दान रुपयों सी मोल लेन को बिचार करयो।
ACT 8:21 या बात म नहीं तोरो हिस्सा हय, नहीं भाग हय; कहालीकि तोरो मन परमेश्वर को आगु सही नहाय।
ACT 8:22 येकोलायी अपनी यो बुरायी सी मन फिराय क प्रभु सी प्रार्थना कर, होय सकय हय कि तोरो मन को बिचार माफ करयो जाये।
ACT 8:23 कहालीकि मय देखू हय कि तय पित्त जसी कड़वाहट अऊर पाप को बन्धन म पड़्यो हय।”
ACT 8:24 शिमोन न उत्तर दियो “तुम मोरो लायी प्रभु सी प्रार्थना करो कि जो बाते तुम न कहीं, उन्म सी कोयी मोर पर नहीं आय पड़े।”
ACT 8:25 येकोलायी हि गवाही दे क अऊर प्रभु को वचन सुनाय क यरूशलेम ख लौट गयो, अऊर सामरियों को बहुत सो गांवो म सुसमाचार सुनावतो गयो।
ACT 8:26 फिर प्रभु को एक स्वर्गदूत न फिलिप्पुस सी कह्यो, “उठ अऊर दक्षिन को तरफ ऊ रस्ता पर जा, जो यरूशलेम सी गाजा ख जावय हय।” यो रेगिस्तानी रस्ता हय।
ACT 8:27 ऊ उठ क चल दियो, अऊर देखो, कूश देश को एक आदमी आय रह्यो होतो जो खोजा अऊर कूशियो की रानी कन्दाके को मंत्री अऊर खजांची होतो। ऊ आराधना करन ख यरूशलेम आयो होतो।
ACT 8:28 ऊ अपनो रथ पर बैठ्यो हुयो होतो, अऊर यशायाह भविष्यवक्ता की किताब पढ़तो हुयो लौटत जाय रह्यो होतो।
ACT 8:29 तब आत्मा न फिलिप्पुस सी कह्यो, “जवर जाय क यो रथ को संग हो ले।”
ACT 8:30 फिलिप्पुस ओको तरफ दवड़्यो अऊर ओख यशायाह भविष्यवक्ता की किताब पढ़तो हुयो सुन्यो, अऊर पुच्छ्यो “तय जो पढ़ रह्यो हय का ओख समझय भी हय?”
ACT 8:31 ओन कह्यो, “जब तक कोयी मोख नहीं समझाये त मय कसो समझू?” अऊर ओन फिलिप्पुस सी बिनती करी कि ऊ चढ़ क ओको जवर बैठ्यो।
ACT 8:32 धर्म शास्त्र को जो अध्याय ऊ पढ़ रह्यो होतो, ऊ यो होतो : “ऊ मेंढीं को जसो वध होन लायी पहुंचायो गयो, अऊर जसो मेम्ना अपनो ऊन कतरन वालो को आगु चुपचाप रह्य हय, वसोच ओन भी अपनो मुंह नहीं खोल्यो।
ACT 8:33 ओकी दीनता म ओको न्याय नहीं होन पायो। ओको समय को लोगों को वर्नन कौन करेंन? कहालीकि धरती सी ओको जीवन उठा लियो जावय हय।”
ACT 8:34 येको पर खोजे न फिलिप्पुस सी पुच्छ्यो, “मय तोरो सी प्रार्थना करू हय, यो बताव कि भविष्यवक्ता यो कौन को बारे म कह्य हय, अपनो यां कोयी दूसरों को बारे म?”
ACT 8:35 तब फिलिप्पुस न अपनो मुंह खोल्यो अऊर योच शास्त्र सी सुरूवात कर क् ओख यीशु को सुसमाचार सुनायो।
ACT 8:36 रस्ता म चलतो-चलतो हि कोयी पानी को जागा म पहुंच्यो। तब खोजे न कह्यो, “देख इत पानी हय, अब मोख बपतिस्मा लेनो म का रोक हय।”
ACT 8:37 फिलिप्पुस न कह्यो, “यदि तय पूरो मन सी विश्वास करय हय त ले सकय हय।” ओन उत्तर दियो, “मय विश्वास करू हय कि यीशु मसीह परमेश्वर को बेटा आय।”
ACT 8:38 तब ओन रथ खड़ो करन की आज्ञा दी, अऊर फिलिप्पुस अऊर खोजा दोयी पानी म उतरयो, अऊर ओन खोजा ख बपतिस्मा दियो।
ACT 8:39 जब हि पानी सी निकल क ऊपर आयो, त प्रभु को आत्मा फिलिप्पुस ख उठा ले गयो, अऊर खोजे न ओख फिर नहीं देख्यो, अऊर ऊ खुश होतो हुयो अपनो रस्ता पर चली गयो।
ACT 8:40 फिलिप्पुस अशदोद म आय निकल्यो, अऊर जब तक कैसरिया म नहीं पहुंच्यो, तब तक नगर-नगर सुसमाचार सुनावतो गयो।
ACT 9:1 शाऊल जो अब तक प्रभु को चेलां ख धमकान अऊर मार डालन की धुन म होतो, महायाजक को जवर गयो
ACT 9:2 अऊर ओको सी दमिश्क को आराधनालयों को नाम पर या बात की चिट्ठियां मांगी कि का पुरुष का बाई, जिन्ख ऊ यो पंथ पर पाये उन्ख बान्ध क यरूशलेम ले आये।
ACT 9:3 पर चलतो चलतो जब ऊ दमिश्क को जवर पहुंच्यो, त अचानक आसमान सी ओको चारयी तरफ ज्योति चमकी,
ACT 9:4 अऊर ऊ जमीन पर गिर पड़्यो अऊर यो आवाज सुन्यो, “हे शाऊल, हे शाऊल, तय मोख कहाली सतावय हय?”
ACT 9:5 ओन पुच्छ्यो, “हे प्रभु, तय कौन आय?” ओन कह्यो, “मय यीशु आय, जेक तय सतावय हय
ACT 9:6 पर अब उठ क नगर म जाव, अऊर जो तोख करनो हय ऊ तोरो सी कह्यो जायेंन।”
ACT 9:7 जो आदमी ओको संग होतो, हि सन्न रह्य गयो; कहालीकि आवाज त सुनत होतो पर कोयी ख देखत नहीं होतो।
ACT 9:8 तब शाऊल जमीन पर सी उठ्यो, पर जब आंखी खोली त ओख कुछ नहीं दिख्यो, अऊर हि ओको हाथ पकड़ क दमिश्क म ले गयो।
ACT 9:9 ऊ तीन दिन तक नहीं देख सक्यो, अऊर नहीं खायो अऊर नहीं पीयो।
ACT 9:10 दमिश्क म हनन्याह नाम को एक चेला होतो, ओन दर्शन देख्यो कि प्रभु न ओको सी कह्यो, “हे हनन्याह!” “हव प्रभु, मय आय।”
ACT 9:11 तब प्रभु न ओको सी कह्यो, “उठ क वा गली म जाव जो ‘सीधी’ कहलावय हय, अऊर यहूदा को घर म शाऊल नाम को एक तरसुस वासी ख पूछ; कहालीकि देख, ऊ प्रार्थना कर रह्यो हय,
ACT 9:12 अऊर ओन हनन्याह नाम को एक पुरुष ख अन्दर आवतो अऊर अपनो ऊपर हाथ रखतो देख्यो हय; ताकि फिर सी देख पाये।”
ACT 9:13 हनन्याह न उत्तर दियो, “हे प्रभु, मय न यो आदमी को बारे म बहुत सो सी सुन्यो हय कि येन यरूशलेम म तोरो पवित्र लोगों को संग बड़ी-बड़ी बुरायी करी हंय;
ACT 9:14 अऊर इत भी येख महायाजक को तरफ सी अधिकार मिल्यो हय कि जो लोग तोरो नाम लेवय हंय, उन पूरो ख बान्ध लेवो।”
ACT 9:15 पर प्रभु न ओको सी कह्यो, “तय चली जा; कहालीकि उत गैरयहूदियों अऊर राजावों अऊर इस्राएलियों को आगु मोरो नाम प्रगट करन लायी मोरो चुन्यो हुयो पात्र हय।
ACT 9:16 अऊर मय ओख बताऊ कि मोरो नाम लायी ओख कसो कसो दु:ख उठावनो पड़ेंन।”
ACT 9:17 तब हनन्याह उठ क ऊ घर म गयो, अऊर ओको पर अपनो हाथ रख क कह्यो, “हे भाऊ शाऊल, प्रभु, यानेकि यीशु, जो ऊ रस्ता म, जित सी तय आयो तोख दिखायी दियो होतो, ओनच मोख भेज्यो हय कि तय फिर नजर पाये अऊर पवित्र आत्मा सी परिपूर्न होय जाये।”
ACT 9:18 अऊर तुरतच ओकी आंखी सी छिलका को जसो गिरयो अऊर ऊ देखन लग्यो, अऊर उठ क बपतिस्मा लियो।
ACT 9:19 फिर जेवन कर क् ताकत पायो। ऊ कुछ दिन उन चेलां को संग रह्यो जो दमिश्क म होतो।
ACT 9:20 अऊर ऊ तुरतच आराधनालयों म यीशु को प्रचार करन लग्यो कि ऊ परमेश्वर को बेटा हय।
ACT 9:21 सब सुनन वालो चकित होय क कहन लग्यो, “का यो उच आदमी नोहोय जो यरूशलेम म उन्ख जो यो नाम ख लेत होतो, नाश करत होतो; अऊर इत भी येकोलायी आयो होतो कि उन्ख बान्ध क महायाजक को जवर लिजाये?”
ACT 9:22 पर शाऊल अऊर भी सामर्थी होत गयो, अऊर या बात को सबूत दे क कि मसीह योच आय, दमिश्क को रहन वालो यहूदियों को मुंह बन्द करतो रह्यो।
ACT 9:23 जब बहुत दिन भय गयो, त यहूदियों न मिल क ओख मार डालन की साजीश रचा।
ACT 9:24 पर उन्को साजीश शाऊल ख मालूम भय गयो। हि त ओख मार डालन लायी रात दिन द्वारों पर मारन की ताक म लग्यो रहत होतो।
ACT 9:25 पर रात को ओको चेलां न ओख टोकनी म बैठायो, अऊर दिवार पर सी उतार दियो।
ACT 9:26 यरूशलेम म पहुंच क ओन चेलां को संग मिल जान को कोशिश करयो; पर सब ओको सी डरत होतो, कहालीकि उन्ख विश्वास नहीं होत होतो, कि ऊ भी चेला आय।
ACT 9:27 पर बरनबास न ओख अपनो संग प्रेरितों को जवर लिजाय क उन्ख बतायो कि येन कसो तरह सी रस्ता म प्रभु ख देख्यो, अऊर ओन येको सी बाते करी; तब दमिश्क म येन कसो हिम्मत सी यीशु को नाम सी प्रचार करयो।
ACT 9:28 ऊ उन्को संग यरूशलेम म आतो-जातो रह्यो
ACT 9:29 अऊर बेधड़क होय क प्रभु को नाम सी प्रचार करत होतो; अऊर यूनानी भाषा बोलन वालो यहूदियों को संग बातचीत अऊर वाद-विवाद करत होतो; पर हि ओख मार डालन की कोशिश करन लग्यो।
ACT 9:30 यो जान क भाऊ ओख कैसरिया ले आयो, अऊर तरसुस ख भेज दियो।
ACT 9:31 यो तरह पूरो यहूदिया, अऊर गलील, अऊर सामरियां म मण्डली ख सन्तुष्ट भयो, अऊर ओकी उन्नति होत गयी; अऊर ऊ प्रभु को डर अऊर पवित्र आत्मा की शान्ति म चलती अऊर बढ़ती गयी।
ACT 9:32 तब असो भयो कि पतरस हर जागा फिरतो हुयो, उन पवित्र लोगों को जवर भी पहुंच्यो जो लुद्दा म रहत होतो।
ACT 9:33 उत ओख एनियास नाम को एक लकवा को रोगी मिल्यो, जो आठ साल सी खटिया पर पड़्यो होतो।
ACT 9:34 पतरस न ओको सी कह्यो, “हे एनियास! यीशु मसीह तोख चंगो करय हय। उठ, अपनो बिस्तर बिछाव।” तब ऊ तुरतच उठ खड़ो भयो।
ACT 9:35 तब लुद्दा अऊर शारोन को सब रहन वालो ओख देख क प्रभु को तरफ फिरे।
ACT 9:36 याफा म तबीता यानेकि दोरकास नाम को एक विश्वासिनी रहत होती। वा बहुत सो अच्छो अच्छो काम अऊर दान करत होती।
ACT 9:37 उन दिन म वा बीमार होय क मर गयी; अऊर उन्न ओख नहलाय क ऊपर को कमरा म रख दियो।
ACT 9:38 येकोलायी कि लुद्दा याफा को जवर होतो, चेलां न यो सुन क कि पतरस उत हय, दोय आदमी भेज क ओको सी बिनती करी, “हमरो जवर आवनो म देर मत कर।”
ACT 9:39 तब पतरस उठ क उन्को संग भय गयो, अऊर जब ऊ पहुंच्यो त हि ओख वा ऊपर को कमरा म लिजायो। पूरी विधवा रोवती हुयी ओको जवर आय क खड़ी भयी, अऊर जो कुरता अऊर कपड़ा दोरकास न उन्को संग रहतो हुयो बनायो होतो, दिखान लगी।
ACT 9:40 तब पतरस न सब क् बाहेर कर दियो, अऊर घुटना टेक क प्रार्थना करी अऊर लाश को तरफ देख क कह्यो, “हे तबीता, उठ।” तब ओन अपनी आंखी खोल दी; अऊर पतरस ख देख क उठ बैठी।
ACT 9:41 ओन हाथ दे क ओख उठायो, अऊर पवित्र लोगों अऊर विधवावों ख बुलाय क ओख जीन्दो दिखाय दियो।
ACT 9:42 या बात पूरो याफा म फैल गयी; अऊर बहुत सो न प्रभु पर विश्वास करयो।
ACT 9:43 अऊर पतरस याफा म शिमोन नाम को कोयी चमड़ा को धन्दा करन वालो को इत बहुत दिन तक रह्यो।
ACT 10:1 कैसरिया म कुरनेलियुस नाम को एक आदमी होतो, जो इतालियानी नाम को पलटन को सूबेदार होतो।
ACT 10:2 ऊ भक्त होतो, अऊर अपनो पूरो घरानों को संग परमेश्वर सी डरत होतो, अऊर यहूदी गरीब लोगों ख बहुत दान देत होतो, अऊर बराबर परमेश्वर सी प्रार्थना करत होतो।
ACT 10:3 ओन दोपहर लगभग तीन बजे दर्शन म साफ तरह सी देख्यो कि परमेश्वर को एक स्वर्गदूत ओको जवर अन्दर आय क कह्य हय, “हे कुरनेलियुस!”
ACT 10:4 ओन ओख ध्यान सी देख्यो अऊर डर क कह्यो, “हे प्रभु, का आय?” स्वर्गदूत न ओको सी कह्यो, “तोरी प्रार्थनाये अऊर तोरो दान परमेश्वर को जवर याद लायी पहुंच्यो हंय;
ACT 10:5 अऊर अब याफा म आदमी भेज क शिमोन ख, जो पतरस कहलावय हय, बुलाय लेवो।
ACT 10:6 ऊ शिमोन, चमड़ा को धन्दा करन वालो को इत मेहमान हय, जेको घर समुन्दर को किनार पर हय।”
ACT 10:7 जब ऊ स्वर्गदूत जेन ओको सी बाते करी होती चली गयो, त ओन दोय सेवक, अऊर जो ओको जवर मौजूद रहत होतो उन्म सी एक भक्त सिपाही ख बुलायो,
ACT 10:8 अऊर उन्न सब बाते बताय क याफा ख भेज्यो।
ACT 10:9 दूसरों दिन जब हि चलतो चलतो नगर को जवर पहुंच्यो, त दोपहर को समय पतरस छत पर प्रार्थना करन चढ़्यो।
ACT 10:10 ओख भूख लगी अऊर कुछ खानो चाहत होतो, पर जब हि तैयारी कर रह्यो होतो त ऊ बेहोश भय गयो;
ACT 10:11 अऊर ओन देख्यो, कि आसमान खुल गयो; अऊर एक पात्र बड़ी चादर को जसो चारों कोना सी लटकतो हुयो, धरती को तरफ उतर रह्यो हय।
ACT 10:12 जेको म धरती को सब तरह को चार पाय वालो जीव अऊर रेंगन वालो जन्तु अऊर आसमान को पक्षी होतो।
ACT 10:13 ओख एक असो आवाज सुनायी दियो, “हे पतरस उठ, मार अऊर खा।”
ACT 10:14 पर पतरस न कह्यो, “नहीं प्रभु, कभीच नहीं; कहालीकि मय न कभी कोयी अपवित्र या अशुद्ध चिज नहीं खायी हय।”
ACT 10:15 तब दूसरी बार ओख आवाज सुनायी दियो, “जो कुछ परमेश्वर न शुद्ध ठहरायो हय, ओख तय अशुद्ध मत कह्य।”
ACT 10:16 तीन बार असोच भयो; तब तुरतच ऊ पात्र आसमान पर उठाय लियो गयो।
ACT 10:17 जब पतरस अपनो मन म संका म होतो, कि यो दर्शन जो मय न देख्यो ऊ का होय सकय हय, त देखो, हि आदमी जिन्ख कुरनेलियुस न भेज्यो होतो, शिमोन को घर को पता लगाय क द्वार पर आय खड़ो भयो,
ACT 10:18 अऊर बुलाय क पूछन लग्यो, “का शिमोन जो पतरस कहलावय हय, इतच मेहमान हय?”
ACT 10:19 पतरस त ऊ दर्शन पर सोचत रह्यो होतो, कि आत्मा न ओको सी कह्यो, “देख, तीन आदमी तोरी खोज म हंय।
ACT 10:20 येकोलायी उठ क खल्लो जा, अऊर बिन शक सी उन्को संग होय जा; कहालीकि मय नच उन्ख भेज्यो हय।”
ACT 10:21 तब पतरस न उतर क उन आदमियों सी कह्यो, “देखो, जेकी खोज तुम कर रह्यो हय, ऊ मयच आय। तुम्हरो आवन को का वजह हय?”
ACT 10:22 उन्न कह्यो, “कुरनेलियुस सूबेदार जो सच्चो अऊर परमेश्वर सी डरन वालो अऊर पूरी यहूदी जाति म सुनाम आदमी हय, ओन एक पवित्र स्वर्गदूत सी यो निर्देश पायो हय कि तोख अपनो घर बुलाय क तोरो सी वचन सुने।”
ACT 10:23 तब ओन उन्ख अन्दर बुलाय क उन्की मेहमानी करी। दूसरों दिन ऊ उन्को संग गयो, अऊर याफा नगर को भाऊ म सी कुछ ओको संग भय गयो।
ACT 10:24 दूसरों दिन हि कैसरिया पहुंच्यो, अऊर कुरनेलियुस अपनो कुटुम्बियों अऊर प्रिय संगियों ख जमा कर क् उन्की रस्ता देख रह्यो होतो।
ACT 10:25 जब पतरस अन्दर आय रह्यो होतो, त कुरनेलियुस न ओको सी भेंट करी, अऊर ओको घुटना को बल पर गिर क ओख नमस्कार करयो;
ACT 10:26 पर पतरस न ओख उठाय क कह्यो, “खड़ो हो, मय भी त आदमी आय।”
ACT 10:27 अऊर ओको संग बातचीत करतो हुयो अन्दर गयो, अऊर बहुत सो लोगों ख जमा देख क
ACT 10:28 ओन कह्यो, “तुम जानय हय कि गैरयहूदी की संगति करनो यां ओको इत जानो यहूदी लायी अधर्म हय, पर परमेश्वर न मोख बतायो हय कि कोयी आदमी ख अपवित्र या अशुद्ध नहीं कहूं।
ACT 10:29 येकोलायी मय जब बुलायो गयो त बिना कुछ कह्यो चली आयो। अब मय पूछू हय कि मोख कौन्सो काम लायी बुलायो गयो?”
ACT 10:30 कुरनेलियुस न कह्यो, “योच घड़ी, पूरो चार दिन भयो, मय अपनो घर म दोपहर तीन बजे को लगभग प्रार्थना कर रह्यो होतो; त देखो, एक पुरुष चमकदार कपड़ा पहिन्यो हुयो, मोरो आगु आय खड़ो भयो
ACT 10:31 अऊर कहन लग्यो, ‘हे कुरनेलियुस, तोरी प्रार्थना सुन ली गयी हय अऊर तोरो दान परमेश्वर को आगु याद करयो गयो हंय।
ACT 10:32 येकोलायी कोयी ख याफा नगर भेज क शिमोन ख जो पतरस कहलावय हय, बुलाव। ऊ समुन्दर को किनार शिमोन, चमड़ा को धन्दा करन वालो को घर म मेहमान हय।’
ACT 10:33 तब मय न तुरतच तोरो जवर लोग भेज्यो, अऊर तय न अच्छो करयो जो आय गयो। अब हम सब इत परमेश्वर को आगु हंय, ताकि जो कुछ परमेश्वर न तोरो सी कह्यो हय ओख सुनबो।”
ACT 10:34 तब पतरस न कह्यो, “अब मोख निश्चय भयो कि परमेश्वर कोयी को पक्षपात नहीं करय,
ACT 10:35 बल्की हर जाति म जो ओको सी डरय अऊर सच्चायी को काम करय हय, ऊ ओख भावय हय।
ACT 10:36 जो वचन ओन इस्राएलियों को जवर भेज्यो, जब ओन यीशु मसीह को द्वारा जो सब को प्रभु हय शान्ति को सुसमाचार सुनायो,
ACT 10:37 ऊ वचन तुम जानय हय, जो यूहन्ना को बपतिस्मा को प्रचार को बाद गलील सी सुरूवात होय क पूरो यहूदिया प्रदेश म फैल गयो:
ACT 10:38 परमेश्वर न कौन्सो रीति सी यीशु नासरी ख पवित्र आत्मा अऊर सामर्थ सी अभिषेक करयो; ऊ भलायी करतो अऊर सब ख जो शैतान को सतायो हुयो होतो, अच्छो करतो फिरयो, कहालीकि परमेश्वर ओको संग होतो।
ACT 10:39 हम उन सब कामों को गवाह हंय; जो ओन यहूदियों को देश अऊर यरूशलेम म भी करयो, अऊर उन्न ओख क्रूस पर लटकाय क मार डाल्यो।
ACT 10:40 ओख परमेश्वर न तीसरो दिन जीन्दो करयो, अऊर प्रगट भी कर दियो हय;
ACT 10:41 सब लोगों पर नहीं बल्की उन गवाहों पर जिन्ख परमेश्वर न पहिले सी चुन लियो होतो, यानेकि हम पर जिन्न ओको मरयो हुयो म सी जीन्दो होन को बाद ओको संग खायो-पीयो;
ACT 10:42 अऊर ओन हम्ख आज्ञा दियो कि लोगों म प्रचार करो अऊर गवाही दे, कि यो उच आय जेक परमेश्वर न जीन्दो अऊर मरयो हुयो को न्यायकर्ता ठहरायो हय।
ACT 10:43 ओकी सब भविष्यवक्ता गवाही देवय हंय कि जो कोयी ओको पर विश्वास करेंन, ओख ओको नाम को द्वारा पापों की माफी मिलेंन।”
ACT 10:44 पतरस या बाते कहतच रह्यो होतो कि पवित्र आत्मा वचन को सब सुनन वालो पर उतर आयो।
ACT 10:45 अऊर जितनो खतना करयो हुयो विश्वासी पतरस को संग आयो होतो, हि सब अचम्भित हुयो कि गैरयहूदियों पर भी पवित्र आत्मा को दान कुड़ायो गयो हय।
ACT 10:46 कहालीकि उन्न उन्ख अलग-अलग तरह की भाषा बोलत अऊर परमेश्वर की बड़ायी करतो सुन्यो। येको पर पतरस न कह्यो,
ACT 10:47 “का कोयी उन्ख रोक सकय हय कि हि बपतिस्मा नहीं पाये, जिन्न हमरो जसो पवित्र आत्मा पायो हय?”
ACT 10:48 अऊर ओन आज्ञा दियो कि उन्ख यीशु मसीह को नाम म बपतिस्मा दियो जाये। तब उन्न ओको सी बिनती करी कि ऊ कुछ दिन अऊर उन्को संग रहे।
ACT 11:1 तब प्रेरितों अऊर भाऊ न जो यहूदियों म होतो सुन्यो कि गैरयहूदियों न भी परमेश्वर को वचन मान लियो हय।
ACT 11:2 येकोलायी जब पतरस यरूशलेम म आयो, त खतना करयो हुयो लोग ओको सी वाद-विवाद करन लग्यो,
ACT 11:3 “तय न खतनारहित करयो लोगों को इत जाय क उन्को संग खायो।”
ACT 11:4 तब पतरस न उन्ख सुरूवात सी एक को बाद एक ख कह्य सुनायो:
ACT 11:5 “मय याफा नगर म प्रार्थना कर रह्यो होतो, अऊर बेहोश होय क एक दर्शन देख्यो कि एक चिज, बड़ो चादर को जसो चारों कोना सी लटकायो हुयो, आसमान सी उतर क मोरो जवर आयो।
ACT 11:6 जब मय न ओको पर ध्यान करयो, त ओको म धरती को चार पाय वालो अऊर जंगली पशु अऊर रेंगन वालो जन्तु अऊर आसमान को पक्षी देख्यो;
ACT 11:7 अऊर यो आवाज भी सुन्यो, ‘हे पतरस उठ, मार अऊर खा।’
ACT 11:8 मय न कह्यो, ‘नहीं प्रभु, नहीं; कहालीकि कोयी अपवित्र यां अशुद्ध चिज मोरो मुंह म कभी नहीं गयी।’
ACT 11:9 येको उत्तर म आसमान सी दूसरों बार आवाज भयो, ‘जो कुछ परमेश्वर न शुद्ध ठहरायो हय, ओख अशुद्ध मत कह्य।’
ACT 11:10 तीन बार असोच भयो; तब सब कुछ आसमान पर खीच लियो गयो।
ACT 11:11 अऊर देखो, तुरतच तीन आदमी जो कैसरिया सी मोरो जवर भेज्यो गयो होतो, ऊ घर पर जेको म हम होतो, आय खड़ो हुयो।
ACT 11:12 तब आत्मा न मोरो सी उन्को संग बिन शक सी होय जान कह्यो, अऊर हि छे भाऊ भी मोरो संग होय गयो; अऊर हम ऊ आदमी को घर गयो।
ACT 11:13 ओन हम्ख बतायो, कि ओन एक स्वर्गदूत ख अपनो घर म खड़ो देख्यो, जेन ओको सी कह्यो, ‘याफा नगर म आदमी भेज क शिमोन ख जो पतरस कहलावय हय, बुलाय लेवो।
ACT 11:14 ऊ तुम सी असी बाते कहेंन, जिन्को द्वारा तय अऊर तोरो पूरो घराना उद्धार पायेंन।’
ACT 11:15 जब मय बाते करन लग्यो, त पवित्र आत्मा उन पर उच तरह सी उतरयो जो तरह सी सुरूवात म हम पर उतरयो होतो।
ACT 11:16 तब मोख प्रभु को ऊ वचन याद आयो; जो ओन कह्यो होतो, ‘यूहन्ना न त पानी सी बपतिस्मा दियो, पर तुम पवित्र आत्मा सी बपतिस्मा पावों।’
ACT 11:17 येकोलायी जब परमेश्वर न उन्ख भी उच दान दियो, जो हम्ख प्रभु यीशु मसीह पर विश्वास करन सी मिल्यो होतो; त मय कौन होतो जो परमेश्वर ख रोक सकत होतो?”
ACT 11:18 यो सुन क हि चुप रह्यो, अऊर परमेश्वर की बड़ायी कर क् कहन लग्यो, “तब त परमेश्वर न गैरयहूदियों ख भी जीवन लायी मन फिराव को दान दियो हय।”
ACT 11:19 जो लोग ऊ कठिनायी को मारे जो स्तिफनुस को वजह पड़्यो होतो, तितर-बितर भय गयो होतो, हि फिरतो-फिरतो फीनीके अऊर साइप्रस अऊर अन्ताकिया म पहुंच्यो; पर यहूदियों ख छोड़ कोयी अऊर ख वचन नहीं सुनावत होतो।
ACT 11:20 पर उन्म सी कुछ साइप्रस निवासी अऊर कुरेनी होतो, जो अन्ताकिया म आय क यूनानी भाषा बोलन वालो ख भी प्रभु यीशु को सुसमाचार सुनावन लग्यो।
ACT 11:21 प्रभु को हाथ उन पर होतो, अऊर बहुत लोग विश्वास कर क् प्रभु को तरफ फिरयो।
ACT 11:22 जब उन्की चर्चा यरूशलेम की मण्डली को सुनन म आयी, त उन्न बरनबास ख अन्ताकिया भेज्यो।
ACT 11:23 ऊ उत पहुंच क अऊर परमेश्वर को अनुग्रह ख देख क खुश भयो, अऊर सब ख उपदेश दियो कि तन मन लगाय क प्रभु सी लिपट्यो रहो।
ACT 11:24 ऊ एक अच्छो आदमी होतो, अऊर पवित्र आत्मा अऊर विश्वास सी परिपूर्न होतो; अऊर दूसरों बहुत सो लोग प्रभु म आय मिल्यो।
ACT 11:25 तब ऊ शाऊल ख ढूंढन लायी तरसुस ख चली गयो।
ACT 11:26 जब ऊ ओको सी मिल्यो त ओख अन्ताकिया लायो; अऊर असो भयो कि हि एक साल तक मण्डली को संग मिलत अऊर बहुत लोगों ख उपदेश देतो रह्यो; अऊर चेला सब सी पहिले अन्ताकियाच म मसीही कहलायो।
ACT 11:27 उनच दिनो म कुछ भविष्यवक्ता यरूशलेम सी अन्ताकिया आयो।
ACT 11:28 उन्म सी अगबुस नाम को एक न खड़ो होय क आत्मा की प्रेरना सी यो बतायो कि पूरो जगत म बड़ो अकाल पड़ेंन ऊ अकाल क्लौदियुस को समय म पड़्यो।
ACT 11:29 तब चेलां न निर्णय करयो कि हर एक अपनी अपनी पूंजी को अनुसार यहूदियों म रहन वालो भाऊ की मदत लायी कुछ भेज्यो।
ACT 11:30 उन्न असोच करयो; अऊर बरनबास अऊर शाऊल को हाथ म बुजूर्गों को जवर कुछ भेज दियो।
ACT 12:1 ऊ समय हेरोदेस राजा न मण्डली को कुछ लोगों ख सतावन लायी उन पर हाथ डाल्यो।
ACT 12:2 ओन यूहन्ना को भाऊ याकूब ख तलवार सी मरवाय डाल्यो।
ACT 12:3 जब ओन देख्यो कि यहूदी लोग येको सी खुश होवय हंय, त ओन पतरस ख भी पकड़ लियो। ऊ दिन अखमीरी रोटी को दिन होतो।
ACT 12:4 ओन ओख पकड़ क जेलखाना म डाल्यो, अऊर चार-चार सिपाहियों को चार निगरानी म रख्यो; यो बिचार सी कि फसह को बाद ओख लोगों को आगु लायेंन।
ACT 12:5 जेलखाना म पतरस बन्द होतो; पर मण्डली ओको लायी मन लगाय क परमेश्वर सी प्रार्थना कर रही होती।
ACT 12:6 जब हेरोदेस ओख लोगों को आगु लावन को होतो, उच रात पतरस दोय संकली सी बन्ध्यो हुयो दोय सिपाहियों को बीच म सोय रह्यो होतो; अऊर पहरेदार द्वार पर जेलखाना की पहरेदारी कर रह्यो होतो।
ACT 12:7 त देखो, प्रभु को एक स्वर्गदूत आय खड़ो भयो अऊर ऊ कोठरी म ज्योति चमकी, अऊर ओन पतरस की पसली पर हाथ मार क ओख जगायो अऊर कह्यो, “उठ, जल्दी कर।” अऊर ओको हाथों सी संकली खुल क गिर गयी।
ACT 12:8 तब स्वर्गदूत न ओको सी कह्यो, “कमर बान्ध, अऊर अपनो चप्पल पहिन ले।” ओन वसोच करयो। तब ओन ओको सी कह्यो, “अपनो कपड़ा पहिन क मोरो पीछू होय जा।”
ACT 12:9 ऊ निकल क ओको पीछू चल दियो; पर यो नहीं जानत होतो कि जो कुछ स्वर्गदूत कर रह्यो हय ऊ सच हय, बल्की यो समझ्यो कि मय दर्शन देख रह्यो हय।
ACT 12:10 तब हि पहिलो अऊर दूसरों पहरा सी निकल क ऊ लोहा को द्वार पर पहुंच्यो, जो नगर को तरफ हय। ऊ उन्को लायी अपनो आप खुल गयो, अऊर हि निकल क एकच गली होय क गयो, अऊर तुरतच, स्वर्गदूत ओख छोड़ क चली गयो।
ACT 12:11 तब पतरस न सचेत होय क कह्यो, “अब मय न सच जान लियो हय कि प्रभु न अपनो स्वर्गदूत भेज क मोख हेरोदेस को हाथ सी छुड़ाय लियो, अऊर यहूदियों की पूरी आशा तोड़ दियो हय।”
ACT 12:12 यो जान क वा ऊ यूहन्ना की माय मरियम को घर आयो, जो मरकुस कहलावय हय। उत बहुत सो लोग जमा होय क प्रार्थना कर रह्यो होतो।
ACT 12:13 जब ओन द्वार की खिड़की खटखटायो, त रूदे नाम की एक दासी देखन ख आयी।
ACT 12:14 पतरस को आवाज पहिचान क ओन खुशी को मारे द्वार नहीं खोल्यो, पर तुरतच दौड़ क अन्दर गयी अऊर बतायो कि पतरस द्वार पर खड़ो हय।
ACT 12:15 उन्न ओको सी कह्यो, “तय पागल हय।” पर वा जोर दे क बोली कि असोच हय। तब उन्न कह्यो, “ओको स्वर्गदूत होना।”
ACT 12:16 पर पतरस खटखटातो रह्यो: येकोलायी उन्न खिड़की खोली, अऊर ओख देख क चकित रह्य गयो।
ACT 12:17 तब ओन उन्ख हाथ सी इशारा करयो कि चुप रह्य; अऊर उन्ख बतायो कि प्रभु कौन्सी रीति सी ओख जेलखाना सी निकाल लायो हय। तब कह्यो, “याकूब अऊर भाऊ ख या बात बताय देजो।” तब निकल क दूसरी जागा चली गयो।
ACT 12:18 जसोच सबेरे भयी वसोच सिपाहियों म बड़ी हलचल भय गयी कि पतरस ख का भयो।
ACT 12:19 जब हेरोदेस न ओकी खोज करी अऊर नहीं पायो, त पहरेदारों की जांच कर क् आज्ञा दी कि हि मार डाल्यो जाये: अऊर ऊ यहूदियों ख छोड़ क कैसरिया म जाय क रहन लग्यो।
ACT 12:20 हेरोदेस सूर अऊर सैदा को लोगों सी गुस्सा म होतो। येकोलायी हि एक मन होय क ओको जवर आयो, अऊर बलास्तुस ख जो राजा को एक नौकर होतो, मनाय क मेल मिलाप करनो चाहत होतो; कहालीकि राजा को देश सी उन्को देश को पालन-पोषन होत होतो।
ACT 12:21 ठहरायो हुयो दिन हेरोदेस राजा को कपड़ा पहिन क सिंहासन पर बैठ्यो, अऊर उन्ख बतावन लग्यो।
ACT 12:22 तब लोग चिल्लावन लग्यो, “यो त आदमी को नहीं ईश्वर को आवाज आय।”
ACT 12:23 उच समय प्रभु को एक स्वर्गदूत न तुरतच ओख मारयो, कहालीकि ओन परमेश्वर ख महिमा नहीं दी; अऊर ऊ कीड़ा पड़ क मर गयो।
ACT 12:24 पर परमेश्वर को वचन बढ़तो अऊर फैलत गयो।
ACT 12:25 जब बरनबास अऊर शाऊल अपनी सेवा पूरी कर लियो त यूहन्ना ख जो मरकुस कहलावय हय, संग ले क यरूशलेम सी लौट्यो।
ACT 13:1 अन्ताकिया की मण्डली म कुछ भविष्यवक्ता अऊर शिक्षक होतो; जसो: बरनबास अऊर शिमोन जो कारो कहलावत होतो; अऊर लूकियुस जो कुरेनी को निवासी होतो, अऊर जो हेरोदेस प्रशासक को संग म पल्यो बड़्यो मनाहेम, अऊर शाऊल।
ACT 13:2 जब हि उपवास को संग प्रभु की उपासना कर रह्यो होतो, त पवित्र आत्मा न उन्को सी कह्यो, “मोरो लायी बरनबास अऊर शाऊल ख सेवा लायी अलग करो जेको लायी मय न उन्ख बुलायो हय।”
ACT 13:3 तब उन्न उपवास अऊर प्रार्थना कर क् अऊर उन पर हाथ रख क उन्ख बिदा करयो।
ACT 13:4 येकोलायी हि पवित्र आत्मा को भेज्यो हुयो सिलूकिया ख गयो; अऊर उत सी जहाज पर चढ़ क साइप्रस ख चल्यो;
ACT 13:5 अऊर सलमीस म पहुंच क, परमेश्वर को वचन यहूदियों को आराधनालयों म सुनायो। यूहन्ना उन्को सहायक को रूप म उन्को संग होतो।
ACT 13:6 हि ऊ पूरो द्वीप म होतो हुयो पाफुस तक पहुंच्यो। उत उन्ख बार-यीशु नाम को एक यहूदी जादूगर अऊर झूठो भविष्यवक्ता मिल्यो।
ACT 13:7 बार-यीशु ऊ, राज्यपाल सिरगियुस पौलुस को संगी होतो जो बुद्धिमान आदमी होतो। राज्यपाल न बरनबास अऊर शाऊल ख अपनो जवर बुलाय क परमेश्वर को वचन सुननो चाह्यो।
ACT 13:8 पर इलीमास जादूगर न, योच ओको नाम को ग्रीक म मतलब हय, उन्को विरोध कर क् राज्यपाल ख विश्वास करन सी रोकनो चाह्यो।
ACT 13:9 पर शाऊल जो पौलुस भी कहलावय हय, पवित्र आत्मा सी परिपूर्ण होय क इलीमास जादूगर को तरफ टकटकी लगाय क देख्यो अऊर कह्यो,
ACT 13:10 “हे पूरो कपट अऊर चालाकी सी भरयो हुयो शैतान की सन्तान, पूरो धर्म को दुश्मन, का तय प्रभु को सच्चायी को रस्ता ख झूठ म बदलनो नहीं छोड़जो?
ACT 13:11 अब देख, प्रभु को हाथ तोरो विरोध म उठ्यो हय; अऊर तय कुछ समय तक अन्धा रहजो अऊर सूरज को प्रकाश ख नहीं देखजो।” तब तुरतच धुंधलोपन अऊर अन्धारो ओको आंखी पर छाय गयो, अऊर ऊ इत उत टटोलन लग्यो ताकि कोयी ओको हाथ पकड़ क सम्भाल सके।
ACT 13:12 तब राज्यपाल न जो भयो होतो ओख देख क अऊर प्रभु की शिक्षा सी चकित होय क विश्वास करयो।
ACT 13:13 पौलुस अऊर ओको संगी पाफुस सी जहाज को द्वारा पंफूलिया को पिरगा शहर म आयो; अऊर यूहन्ना उन्ख छोड़ क यरूशलेम ख लौट गयो।
ACT 13:14 पिरगा सी आगु बढ़ क हि पिसिदिया को अन्ताकिया म पहुंच्यो; अऊर यहूदियों को आराधनालय म जाय क बैठ गयो।
ACT 13:15 मूसा की व्यवस्था अऊर भविष्यवक्तावों की किताब सी पढ़न को बाद आराधनालय को मुखिया न उन्को जवर कहला भेज्यो, “हे भाऊवों, हम चाहजे हय की यदि लोगों को प्रोत्साहन करन लायी कुछ बात हय त कहो।”
ACT 13:16 तब पौलुस न खड़ो होय क अऊर हाथ सी इशारा कर क् कह्यो, “हे इस्राएलियों, अऊर परमेश्वर सी डरन वालो, सुनो:
ACT 13:17 इन इस्राएली लोगों को परमेश्वर न हमरो बापदादों ख चुन लियो, अऊर जब यो लोग मिस्र देश म परदेशी होय क रहत होतो, त उन्की उन्नति करी; अऊर बड़ी ताकत सी निकाल लायो।”
ACT 13:18 ऊ चालीस साल तक जंगल म उन्की सहतो रह्यो,
ACT 13:19 अऊर कनान देश म सात जातियों ख नाश कर क् उन्ख लगभग साढ़े चार सौ साल म जमीन ख वारिस दार स्वरूप दे दियो।
ACT 13:20 यो सब कुछ म साढ़े चार सौ साल लग्यो। “येको बाद ओन शमूएल भविष्यवक्ता तक उन्म न्याय करन वालो दियो।
ACT 13:21 ओको बाद उन्न एक राजा मांग्यो: तब परमेश्वर न चालीस साल लायी बिन्यामीन को गोत्र म सी एक आदमी; यानेकि कीश को बेटा शाऊल ख उन पर राजा ठहरायो।
ACT 13:22 फिर ओख अलग कर क् दाऊद ख उन्को राजा बनायो; जेको बारे म ओन गवाही दियो, ‘मोख एक आदमी, यिशै को बेटा दाऊद, मोरो मन को अनुसार मिल गयो हय; उच मोरी इच्छा पूरी करेंन।’”
ACT 13:23 योच वंश म सी परमेश्वर न अपनी प्रतिज्ञा को अनुसार इस्राएल को जवर एक उद्धारकर्ता, यानेकि यीशु ख भेज्यो।
ACT 13:24 जेको आवन सी पहिले यूहन्ना न सब इस्राएलियों म मन फिराव को बपतिस्मा को प्रचार करयो।
ACT 13:25 जब यूहन्ना अपनी सेवा पूरी करन पर होतो, त ओन कह्यो, तुम मोख का समझय हय? मय ऊ नोहोय! बल्की देखो, मोरो बाद एक आवन वालो हय, जेको पाय की चप्पल भी मय निकालन को लायक भी नहाय।
ACT 13:26 “हे भाऊ, तुम जो अब्राहम की सन्तान आय; अऊर तुम जो परमेश्वर सी डरय हय, तुम्हरो जवर यो उद्धार को वचन भेज्यो गयो हय।
ACT 13:27 कहालीकि यरूशलेम को रहन वालो अऊर उन्को मुखिया न, ओख नहीं पहिचान्यो अऊर नहीं भविष्यवक्तावों की बाते समझी, जो हर यहूदियों को आराम दिन ख पढ़्यो जावय हंय, येकोलायी ओख दोषी ठहराय क उन बातों ख पूरो करयो।”
ACT 13:28 उन्न मार डालन को लायक कोयी दोष ओको म नहीं देख्यो, तब भी पिलातुस सी बिनती करी कि ऊ मार डाल्यो जाये।
ACT 13:29 जब उन्न ओको बारे म लिख्यो हुयो सब बाते पूरी करी, त ओख क्रूस पर सी उतार क कब्र म रख्यो।
ACT 13:30 पर परमेश्वर न ओख मरयो हुयो म सी जीन्दो करयो,
ACT 13:31 अऊर ऊ उन्ख जो ओको संग गलील सी यरूशलेम आयो होतो, बहुत दिनो तक दिखायी देत रह्यो; लोगों को आगु अब हिच ओको गवाह हंय।
ACT 13:32 हम तुम्ख ऊ प्रतिज्ञा को बारे म जो पूर्वजों सी करी होती, यो सुसमाचार सुनाजे हंय,
ACT 13:33 कि परमेश्वर न यीशु ख जीन्दो कर क्, उच प्रतिज्ञा हमरी सन्तान लायी पूरी करी; जसो दूसरों भजन म भी लिख्यो हय, तय मोरो बेटा आय; अज मय नच तोख पैदा करयो हय।
ACT 13:34 अऊर ओन ओख मरयो म सी जीन्दो करयो कि ऊ कभी नहीं सड़े, ओन असो कह्यो, मय दाऊद की पवित्र अऊर अटल विश्वास तुम पर करू।
ACT 13:35 येकोलायी ओन एक अऊर भजन म भी कह्यो हय, तय अपनो पवित्र लोग ख सड़न नहीं देजो।
ACT 13:36 कहालीकि दाऊद त परमेश्वर की इच्छा को अनुसार अपनो समय म सेवा कर क् मर गयो, अऊर अपनो पूर्वजों म जाय मिल्यो, अऊर सड़ भी गयो।
ACT 13:37 पर जेक परमेश्वर न जीन्दो करयो, ऊ सड़नो नहीं पायो।
ACT 13:38 हे भाऊ, तुम अच्छो सी जान लेवो कि जो समाचार तुम्ख सुनायो जाय रह्यो हय, यो ऊ आय कि यीशु को द्वारा पापों की माफी मिलय हय। मूसा की व्यवस्था जो बातों सी तुम्ख छुटकारा नहीं दे सकी;
ACT 13:39 अऊर जो बातों म तुम मूसा की व्यवस्था सी निर्दोष नहीं ठहर सकत होतो, उन सब म हर एक विश्वास करन वालो ओको सी निर्दोष ठहरय हय।
ACT 13:40 “येकोलायी चौकस रह, असो नहीं होय कि जो भविष्यवक्तावों की किताब म आयो हय तुम पर भी आय पड़े:
ACT 13:41 ‘हे निन्दा करन वालो, देखो, अऊर चकित हो, अऊर मिट जावो; कहालीकि मय तुम्हरो दिनो म एक काम करू हय, असो काम कि यदि कोयी तुम सी ओकी चर्चा करय, त तुम कभी विश्वास नहीं करो।’”
ACT 13:42 उन्को बाहेर निकलतो समय लोग उन्को सी बिनती करन लग्यो कि आवन वालो आराम को दिन हम्ख या बाते फिर सुनायी जाये।
ACT 13:43 जब सभा उठ गयी त यहूदियों अऊर यहूदी को राय म आयो हुयो भक्तो म सी बहुत सो पौलुस अऊर बरनबास को पीछू भय गयो; अऊर उन्न उन्को सी बाते कर क् समझायो कि परमेश्वर को अनुग्रह म बन्यो रहो।
ACT 13:44 आवन वालो आराम को दिन नगर को लगभग सब लोग परमेश्वर को वचन सुनन ख जमा भय गयो।
ACT 13:45 पर यहूदी भीड़ ख देख क जलन सी भर गयो, अऊर निन्दा करतो हुयो पौलुस की बातों को विरोध म बोलन लग्यो।
ACT 13:46 तब पौलुस अऊर बरनबास न निडर होय क कह्यो, “जरूरी होतो कि परमेश्वर को वचन पहिले तुम्ख सुनायो जातो; पर जब तुम ओख दूर हटावय हय, अऊर अपनो ख अनन्त जीवन को लायक नहीं ठहरावय, त देखो, हम गैरयहूदियों को तरफ फिरय हंय।”
ACT 13:47 कहालीकि प्रभु न हम्ख या आज्ञा दी हय, मय न तोख गैरयहूदियों लायी ज्योति ठहरायो हय, ताकि तय धरती की छोर तक उद्धार को द्वार हो।
ACT 13:48 यो सुन क गैरयहूदियों खुश भयो, अऊर परमेश्वर को वचन की बड़ायी करन लग्यो; अऊर जितनो अनन्त जीवन लायी ठहरायो गयो होतो उन्न विश्वास करयो।
ACT 13:49 तब प्रभु को वचन ऊ पूरो देश म फैलन लग्यो।
ACT 13:50 पर यहूदियों न भक्त अऊर प्रसिद्ध बाईयों ख अऊर नगर को मुख्य लोगों ख उकसायो, अऊर पौलुस अऊर बरनबास को विरुद्ध उपद्रव कराय क उन्ख अपनी सीमा सी निकाल दियो।
ACT 13:51 तब हि उन्को आगु अपनो पाय की धूरला झाड़ क इकुनियुम ख चली गयो।
ACT 13:52 अऊर चेला खुशी सी अऊर पवित्र आत्मा सी परिपूर्ण होत गयो।
ACT 14:1 इकुनियुम म असो भयो कि हि यहूदियों को आराधनालय म संग संग गयो, अऊर यो तरह बाते करी कि यहूदियों अऊर गैरयहूदियों दोयी म सी बहुत सो न विश्वास करयो।
ACT 14:2 पर विश्वास नहीं करन वालो यहूदियों न गैरयहूदियों को मन भाऊ को विरोध म उकसायी अऊर कड़वाहट पैदा कर दी।
ACT 14:3 हि बहुत दिन तक उत रह्यो, अऊर प्रभु को भरोसा पर हिम्मत सी बाते करत होतो; अऊर ऊ उन्को हाथों सी चिन्ह अऊर चमत्कार को काम करवाय क अपनो अनुग्रह को वचन पर गवाही देत होतो।
ACT 14:4 पर नगर को लोगों म फूट पड़ गयी होती, येको सी कितनो त यहूदियों को तरफ अऊर कितनो प्रेरितों को तरफ भय गयो।
ACT 14:5 पर जब गैरयहूदियों अऊर यहूदी उन्को अपमान अऊर उन पर पथराव करन लायी अपनो मुखिया समेत उन पर दौड़्यो,
ACT 14:6 त हि या बात ख जान गयो, अऊर लुकाउनिया को लुस्रा अऊर दिरबे नगरों म, अऊर आस पास को प्रदेशों म भाग गयो
ACT 14:7 अऊर उत सुसमाचार सुनावन लग्यो।
ACT 14:8 लुस्रा म एक आदमी बैठ्यो होतो, जो पाय सी कमजोर होतो। ऊ जनम सीच लंगड़ा होतो अऊर कभी नहीं चल्यो होतो।
ACT 14:9 ऊ पौलुस ख बाते करत सुन रह्यो होतो। पौलुस न ओको तरफ टकटकी लगाय क देख्यो कि ओख अच्छो होय जान को विश्वास हय,
ACT 14:10 अऊर ऊचो आवाज सी कह्यो, “अपनो पाय को बल सीधो खड़ो हो।” तब ऊ उछल क चलन फिरन लग्यो।
ACT 14:11 लोगों न पौलुस को यो काम देख क लुकाउनिया की भाषा म ऊचो आवाज सी कह्यो, “भगवान आदमियों को रूप म होय क हमरो जवर उतर आयो हंय।”
ACT 14:12 उन्न बरनबास ख ज्यूस देवता, अऊर पौलुस ख हिरमेस देवता कह्यो कहालीकि ऊ बाते करन म मुख्य होतो।
ACT 14:13 ज्यूस को ऊ मन्दिर को पुजारी जो उन्को नगर को आगु होतो, बईल अऊर फूलो की माला द्वारों पर लाय क लोगों को संग बलिदान करनो चाहत होतो।
ACT 14:14 पर बरनबास अऊर पौलुस प्रेरितों न जब यो सुन्यो, त अपनो कपड़ा फाड़्यो अऊर भीड़ को बीच भगतो हुयो, अऊर बुलाय क कहन लग्यो,
ACT 14:15 “हे लोगों, तुम का करय हय? हम भी त तुम्हरो जसो दु:ख–सुख भोग्यो आदमी आय, अऊर तुम्ख सुसमाचार सुनाजे हंय कि तुम इन बेकार चिजों सी अलग होय क जीन्दो परमेश्वर को तरफ फिरो, जेन स्वर्ग अऊर धरती अऊर समुन्दर अऊर जो कुछ उन्म हय बनायो।
ACT 14:16 ओन बितयो समय म सब जातियों ख अपनो–अपनो रस्ता म चलन दियो।
ACT 14:17 तब भी ओन अपनो आप ख गवाह रहित नहीं छोड़्यो; पर भी ऊ भलायी करत रह्यो, अऊर आसमान सी बरसात अऊर फलवन्त मौसम दे क तुम्हरो मन ख जेवन अऊर खुशी सी भरत रह्यो।”
ACT 14:18 यो कह्य क भी उन्न लोगों ख बड़ी कठिनायी सी रोक्यो कि उन्को लायी बलिदान नहीं करे।
ACT 14:19 पर कुछ यहूदियों न अन्ताकिया अऊर इकुनियुम सी आय क लोगों ख अपनो तरफ कर लियो, अऊर पौलुस पर पथराव करयो, अऊर मरयो समझ क ओख नगर को बाहेर खीचत ले गयो,
ACT 14:20 पर जब चेला ओको चारयी तरफ आय खड़ो भयो, त ऊ उठ क नगर म गयो अऊर दूसरों दिन बरनबास को संग दिरबे ख चली गयो।
ACT 14:21 हि ऊ नगर को लोगों ख सुसमाचार सुनाय क, अऊर बहुत सो चेला बनाय क, लुस्रा अऊर इकुनियुम अऊर अन्ताकिया ख लौट आयो,
ACT 14:22 अऊर चेलां को मन ख स्थिर करतो रह्यो अऊर या शिक्षा देत होतो कि विश्वास म बन्यो रहो; अऊर यो कहत होतो, “हम्ख बड़ी कठिनायी उठाय क परमेश्वर को राज्य म सिरनो पड़ेंन।”
ACT 14:23 अऊर उन्न हर एक मण्डली म उन्को लायी बुजूर्ग ठहरायो, अऊर उपवास को संग प्रार्थना कर क् उन्ख प्रभु को हाथ सौंप्यो जेको पर उन्न विश्वास करयो होतो।
ACT 14:24 तब पिसिदिया सी होतो हुयो हि पंफूलिया पहुंच्यो;
ACT 14:25 तब पिरगा म वचन सुनाय क इटली म आयो,
ACT 14:26 अऊर उत सी हि जहाज पर अन्ताकिया गयो, जित हि ऊ काम लायी जो उन्न पूरो करयो होतो परमेश्वर को अनुग्रह म सौंप्यो गयो होतो।
ACT 14:27 उत पहुंच क उन्न मण्डली जमा करी अऊर बतायो कि परमेश्वर न उन्को संग रह्य क कसो बड़ो–बड़ो काम करयो, अऊर गैरयहूदियों लायी विश्वास को द्वार खोल दियो।
ACT 14:28 अऊर हि चेलां को संग बहुत दिन तक रह्यो।
ACT 15:1 तब कुछ लोग यहूदियों सी आय क भाऊ ख सिखावन लग्यो: “यदि मूसा की रीति पर तुम्हरो खतना नहीं होय त तुम उद्धार नहीं पा सकय।”
ACT 15:2 जब पौलुस अऊर बरनबास को उन्को सी बहुत झगड़ा अऊर वाद–विवाद भयो त यो ठहरायो गयो कि पौलुस अऊर बरनबास अऊर उन्म सी कुछ लोग या बात को बारे म प्रेरितों अऊर बुजूर्गों को जवर यरूशलेम ख जाये।
ACT 15:3 येकोलायी मण्डली न उन्ख कुछ दूर तक पहुंचायो; अऊर हि फीनीके अऊर सामरियां सी होतो हुयो गैरयहूदियों ख मन फिरान को सुसमाचार सुनावतो गयो, अऊर सब भाऊ बहुत खुश भयो।
ACT 15:4 जब हि यरूशलेम पहुंच्यो, त मण्डली अऊर प्रेरित अऊर बुजूर्ग उन्को सी खुशी को संग मिल्यो, अऊर उन्न बतायो कि परमेश्वर न उन्को संग होय क कसो–कसो काम करयो होतो।
ACT 15:5 पर फरीसियों को पंथ म सी जिन्न विश्वास करयो होतो, उन्म सी कुछ न उठ क कह्यो, “उन्ख खतना करावन अऊर मूसा की व्यवस्था ख मानन की आज्ञा देन ख होना।”
ACT 15:6 तब प्रेरित अऊर बुजूर्ग या बात को बारे म बिचार करन लायी जमा भयो।
ACT 15:7 तब पतरस न बहुत वाद-विवाद होय जान को बाद खड़ो होय क उन्को सी कह्यो, “हे भाऊ, तुम जानय हय कि बहुत दिन भयो परमेश्वर न तुम म सी मोख चुन लियो कि मोरो मुंह सी गैरयहूदियों सुसमाचार को वचन सुन क विश्वास करे।
ACT 15:8 मन को जांचन वालो परमेश्वर न उन्ख भी हमरो समान पवित्र आत्मा दे क उन्की गवाही दी;
ACT 15:9 अऊर विश्वास सी उन्को मन शुद्ध कर क् हम म अऊर उन म कुछ भेद नहीं रख्यो।
ACT 15:10 त अब तुम कहाली परमेश्वर की परीक्षा करय हय कि चेलां की गरदन पर असो बोझ रख्यो, जेक नहीं हमरो बापदादा उठाय सकत होतो अऊर नहीं हम उठाय सकय हंय?
ACT 15:11 हव, हमरो यो विश्वास हय कि जो रीति सी हि प्रभु यीशु को अनुग्रह सी उद्धार पायेंन; वाच रीति सी हम भी पाबो।”
ACT 15:12 तब पूरी सभा चुपचाप बरनबास अऊर पौलुस की सुनन लग्यो, कि परमेश्वर न उन्को सी गैरयहूदियों म कसो बड़ो–बड़ो चिन्ह चमत्कार, अऊर अचरज काम दिखायो।
ACT 15:13 जब हि चुप भयो त याकूब कहन लग्यो, “हे भाऊ, मोरी सुनो।
ACT 15:14 शिमोन न बतायो कि परमेश्वर न पहिलो सी गैरयहूदियों पर कसी दयादृष्टि करी कि उन्म सी अपनो नाम लायी एक लोग बनाय ले।
ACT 15:15 येको सी भविष्यवक्तावों की बाते भी मिलय हंय, जसो कि लिख्यो हय,”
ACT 15:16 येको बाद मय फिर आय क दाऊद को गिरयो हुयो डेरा उठाऊ, अऊर ओको खंडहरो ख फिर बनाऊ, अऊर ओख खड़ो करू,
ACT 15:17 येकोलायी कि बाकी आदमी, मतलब सब गैरयहूदियों जो मोरो नाम को कहलावय हंय, प्रभु ख ढूंढो,
ACT 15:18 यो उच प्रभु कह्य हय जो जगत की उत्पत्ति सी इन बातों को खबर देत आयो हय।
ACT 15:19 “येकोलायी मोरो बिचार यो हय कि गैरयहूदियों म सी जो लोग परमेश्वर को तरफ फिरय हंय, हम उन्ख दु:ख नहीं देबो;
ACT 15:20 पर उन्ख लिख भेज्यो कि हि मूर्तियों की अशुद्धतावों अऊर व्यभिचार अऊर गलो घोट्यो हुयो को मांस सी अऊर खून सी दूर रह्यो।
ACT 15:21 कहालीकि पूरानो समय सी नगर नगर मूसा की व्यवस्था को प्रचार करन वालो होत चल्यो आयो हंय, अऊर वा हर आराम को दिन म आराधनालय म पढ़ी जावय हय।”
ACT 15:22 तब पूरी मण्डली सहित प्रेरितों अऊर बुजूर्गों ख अच्छो लग्यो कि अपनो म सी कुछ आदमियों ख चुन्यो, मतलब यहूदा जो बरसब्बा कहलावय हय, अऊर सीलास ख जो भाऊ म मुखिया होतो; अऊर उन्ख पौलुस अऊर बरनबास को संग अन्ताकिया भेज्यो।
ACT 15:23 उन्न उन्को हाथ यो लिख भेज्यो: “अन्ताकिया अऊर सीरिया अऊर किलिकिया को रहन वालो भाऊ ख जो गैरयहूदियों म सी हंय, प्रेरितों अऊर बुजूर्ग भाऊ को नमस्कार।
ACT 15:24 हम्न सुन्यो हय कि हम म सी कुछ न उत जाय क, तुम्ख अपनी बातों सी घबराय दियो; अऊर तुम्हरो मन उलट दियो हंय पर हम न उन्ख आज्ञा नहीं दी होती।
ACT 15:25 येकोलायी हम न एक मन होय क ठीक समझ्यो कि चुन्यो हुयो आदमियों ख अपनो प्रिय बरनबास अऊर पौलुस को संग तुम्हरो जवर भेज्यो।
ACT 15:26 यो असो आदमी हंय जिन्न अपनो जीव हमरो प्रभु यीशु मसीह को नाम लायी खतरा म डाल्यो हंय
ACT 15:27 येकोलायी हम न यहूदा अऊर सीलास ख भेज्यो हय, जो अपनो मुंह सी भी या बाते कह्य देयेंन।
ACT 15:28 पवित्र आत्मा ख अऊर हम ख ठीक जान पड़्यो कि इन जरूरी बातों ख छोड़, तुम पर अऊर बोझ नहीं डाले
ACT 15:29 कि तुम मूर्तियों पर बलि करयो हुयो सी अऊर खून सी; अऊर गलो घोट्यो हुयो को मांस सी; अऊर व्यभिचार सी दूर रहो। इन सी दूर रहो त तुम्हरो भलो होयेंन। आगु शुभ।”
ACT 15:30 तब हि बिदा होय क अन्ताकिया पहुंच्यो, अऊर सभा ख जमा कर क् वा चिट्ठी उन्ख दे दियो।
ACT 15:31 हि चिट्ठी पढ़ क ऊ उपदेश की बात सी प्रोत्साहित होय क बहुत खुश भयो।
ACT 15:32 यहूदा अऊर सीलास न जो आप भी भविष्यवक्ता होतो, बहुत बातों सी भाऊ ख उपदेश दे क उत्साहित अऊर स्थिर करयो।
ACT 15:33 हि कुछ दिन रह्य क, भाऊ सी शान्ति को संग बिदा हुयो कि अपनो भेजन वालो को जवर जाये।
ACT 15:34 पर सीलास ख उत रहनो अच्छो लग्यो।
ACT 15:35 पर पौलुस अऊर बरनबास अन्ताकिया म रह्य गयो: अऊर दूसरों बहुत सो लोगों को संग प्रभु को वचन को उपदेश करतो अऊर सुसमाचार सुनावतो रह्यो।
ACT 15:36 कुछ दिन बाद पौलुस न बरनबास सी कह्यो, “जो जो नगरों म हम न प्रभु को वचन सुनायो होतो, आवो, तब उन्म चल क अपनो भाऊ ख देखबो कि हि कसो हंय।”
ACT 15:37 तब बरनबास न यूहन्ना ख जो मरकुस कहलावय हय, संग लेन को बिचार करयो।
ACT 15:38 पर पौलुस न ओख जो पंफूलिया म उन्को सी अलग होय गयो होतो, अऊर काम पर उन्को संग नहीं गयो, संग ले जानो अच्छो नहीं समझ्यो।
ACT 15:39 येकोलायी असो विवाद उठ्यो कि हि एक दूसरों सी अलग होय गयो; अऊर बरनबास, मरकुस ख ले क जहाज पर साइप्रस चली गयो।
ACT 15:40 पर पौलुस न सीलास ख चुन लियो, अऊर भाऊ सी परमेश्वर को अनुग्रह म सौंप्यो जाय क उत सी चली गयो;
ACT 15:41 अऊर वा मण्डली ख स्थिर करतो हुयो सीरिया अऊर किलिकिया सी होतो हुयो निकल्यो।
ACT 16:1 तब ऊ दिरबे अऊर लुस्रा म भी गयो। उत तीमुथियुस नाम को एक चेला होतो, जो कोयी विश्वासी यहूदिनी को बेटा होतो, पर ओको बाप यूनानी होतो।
ACT 16:2 ऊ लुस्रा अऊर इकुनियुम को भाऊ म अच्छो होतो।
ACT 16:3 पौलुस की इच्छा होती कि ऊ ओको संग चले; अऊर जो यहूदी लोग उन जागा म होतो उन्को वजह ओन ओको खतना करयो, कहालीकि हि सब जानत होतो, कि ओको बाप गैरयहूदी होतो।
ACT 16:4 अऊर नगर नगर जातो हुयो हि उन विधियों ख जो यरूशलेम को प्रेरितों अऊर बुजूर्गों न ठहरायी होती, मानन लायी उन्ख पहुंचावत जात होतो।
ACT 16:5 यो तरह मण्डली विश्वास म मजबूत होत गयी अऊर संख्या म हर दिन बढ़ती गयी।
ACT 16:6 हि फ्रूगिया अऊर गलातिया प्रदेशों म सी होय क गयो, कहालीकि पवित्र आत्मा न उन्ख आसिया म वचन सुनावन सी मना करयो।
ACT 16:7 उन्न मूसिया को जवर पहुंच क, बितूनिया म जानो चाह्यो; पर यीशु की आत्मा न उन्ख जान नहीं दियो।
ACT 16:8 येकोलायी हि मूसिया सी होय क त्रोआस म आयो।
ACT 16:9 उत पौलुस न रात ख एक दर्शन देख्यो कि एक मकिदुनिया को पुरुष खड़ो भयो ओको सी बिनती कर क् कह्य रह्यो हय, “पार उतर क मकिदुनिया म आव, अऊर हमरी मदत कर।”
ACT 16:10 ओको यो दर्शन देखतच हम न तुरतच मकिदुनिया जानो चाह्यो, यो समझ क कि परमेश्वर न हम्ख उन्ख सुसमाचार सुनावन लायी बुलायो हय।
ACT 16:11 येकोलायी त्रोआस सी जहाज खोल क हम सीधो सुमात्राके अऊर दूसरों दिन नियापुलिस म आयो।
ACT 16:12 उत सी हम फिलिप्पी पहुंच्यो, जो मकिदुनिया राज्य को मुख्य नगर अऊर रोमियों की बस्ती आय; अऊर हम ऊ नगर म कुछ दिन तक रह्यो।
ACT 16:13 आराम को दिन हम नगर की द्वार को बाहेर नदी को किनार यो समझ क गयो कि उत प्रार्थना करन की जागा होना, अऊर बैठ क उन बाईयों सी जो जमा भयी होती, बाते करन लग्यो।
ACT 16:14 लुदिया नाम की थुआतीरा नगर की जामुनी कपड़ा बेचन वाली एक भक्त बाई सुन रही होती। प्रभु न ओको मन खोल्यो कि वा पौलुस की बातों पर मन लगायो।
ACT 16:15 जब ओन अपनो घरानों समेत बपतिस्मा लियो, त ओन हम सी बिनती करी, “यदि तुम मोख प्रभु की विश्वासिनी समझय हय, त चल क मोरो घर म रहो,” अऊर वा हम्ख मनाय क ले गयी।
ACT 16:16 जब हम प्रार्थना करन की जागा जाय रह्यो होतो, त हम्ख एक दासी मिली जेको म भविष्य बतावन वाली दुष्ट आत्मा सी ग्रसित होती; अऊर लोगों को भविष्य बताय क अपनो मालिक लायी बहुत कुछ कमाय लेत होती।
ACT 16:17 वा पौलुस को अऊर हमरो पीछू आय क चिल्लावन लगी, “यो आदमी परमप्रधान परमेश्वर को सेवक आय, जो हम्ख उद्धार को रस्ता की कथा सुनावय हंय।”
ACT 16:18 ऊ बहुत दिन तक असोच करत रही; पर पौलुस दु:खी भयो, अऊर मुड़ क वा आत्मा सी कह्यो, “मय तोख यीशु मसीह को नाम सी आज्ञा देऊ हय कि ओको म सी निकल जा।” अऊर आत्मा उच समय निकल गयी।
ACT 16:19 जब ओको मालिकों न देख्यो कि हमरी कमायी की आशा जाती रही, त पौलुस अऊर सीलास ख पकड़ क् चौक म मुखिया को जवर खीच ले गयो;
ACT 16:20 अऊर उन्ख फौजदारी को शासकों को जवर ले गयो अऊर कह्यो, “हि लोग जो यहूदी हंय, हमरो नगर म बड़ी हलचल मचाय रह्यो हंय;
ACT 16:21 अऊर असो नियम बताय रह्यो हंय, जिन्ख स्वीकार करनो यां माननो हम रोमियों लायी ठीक नहाय।”
ACT 16:22 तब भीड़ को लोग उन्को विरोध म जमा होय क चढ़ आयो, अऊर शासकों न उन्को कपड़ा फाड़ क उतार डाल्यो, अऊर उन्ख कोड़ा मारन की आज्ञा दी।
ACT 16:23 बहुत कोड़ा लगवाय क उन्न उन्ख जेलखाना म डाल दियो अऊर दरोगा ख आज्ञा दियो कि उन्ख चौकस सी रखे।
ACT 16:24 ओन असी आज्ञा पा क उन्ख अन्दर की कोठरी म रख्यो अऊर उन्को पाय लकड़ी म ठोक दियो।
ACT 16:25 अरधी रात को लगभग पौलुस अऊर सीलास प्रार्थना करतो हुयो परमेश्वर को भजन गाय रह्यो होतो, अऊर कैदी उन्की सुन रह्यो होतो।
ACT 16:26 इतनो म अचानक बड़ो भूईडोल आयो, यहां तक कि जेलखाना को पायवा हल गयो, अऊर तुरतच सब दरवाजा खुल गयो; अऊर सब को बन्धन खुल गयो।
ACT 16:27 दरोगा जाग उठ्यो, अऊर जेलखाना को दरवाजा खुल्यो देख क समझ गयो कि कैदी भग गयो हंय, येकोलायी ओन तलवार निकाल क अपनो आप ख मार डालनो चाहयो।
ACT 16:28 पर पौलुस न ऊचो आवाज सी पुकार क कह्यो, “अपनो आप ख कुछ हानि मत पहुंचाव, कहालीकि हम सब इतच हंय।”
ACT 16:29 तब ऊ दीया मंगाय क अन्दर लपक्यो, अऊर कापतो हुयो पौलुस अऊर सीलास को आगु गिरयो;
ACT 16:30 अऊर उन्ख बाहेर लाय क कह्यो, “हे सज्जनो, उद्धार पान लायी मय का करू?”
ACT 16:31 उन्न कह्यो, “प्रभु यीशु मसीह पर विश्वास कर, त तय अऊर तोरो घराना उद्धार पायेंन।”
ACT 16:32 अऊर उन्न ओख अऊर ओको पूरो घर को लोगों ख प्रभु को वचन सुनायो।
ACT 16:33 रात ख उच समय ओन उन्ख ली जाय क उन्को घाव धोयो, अऊर ओन अपनो सब लोगों को संग तुरतच बपतिस्मा लियो।
ACT 16:34 तब ओन उन्ख अपनो घर म ली जाय क उन्को आगु भोजन रख्यो, अऊर पूरो घरानों को संग परमेश्वर पर विश्वास कर क् खुश करयो।
ACT 16:35 जब दिन भयो तब शासकों न सिपाहियों को हाथ कहला भेज्यो कि उन आदमियों ख छोड़ दे।
ACT 16:36 दरोगा न या बाते पौलुस सी कह्यो, “शासकों न तुम्ख छोड़ देन की आज्ञा भेज दियो हय। येकोलायी अब निकल क शान्ति सी चली जावो।”
ACT 16:37 पर पौलुस न उन्को सी कह्यो, “उन्न हम्ख जो रोमी आदमी हंय, दोषी ठहरायो बिना लोगों को आगु मारयो अऊर जेलखाना म डाल्यो। अब का हम्ख चुपचाप सी निकाल रह्यो हंय? असो नहीं; पर हि खुद आय क हम्ख बाहेर निकाले।”
ACT 16:38 सिपाहियों न या बाते शासकों सी कह्यो, अऊर हि यो सुन क कि रोमी हंय, डर गयो,
ACT 16:39 अऊर आय क उन्ख मनायो, अऊर बाहेर ली जाय क बिनती करी कि नगर सी चली जाये।
ACT 16:40 हि जेलखाना सी निकल क लुदिया को इत गयो, अऊर भाऊ सी मुलाखात कर क् उन्ख प्रोत्साहन कर ख, उत सी चली गयो।
ACT 17:1 तब हि अम्फिपुलिस अऊर अपुल्लोनिया होय क थिस्सलुनीके म आयो, जित यहूदियों को एक आराधनालय होतो।
ACT 17:2 पौलुस अपनो रीति को अनुसार उन्को जवर गयो, अऊर तीन आराम को दिन तक पवित्र शास्त्रों सी उन्को संग वाद विवाद करयो;
ACT 17:3 अऊर उन्को मतलब सरल कर क् समझावत होतो कि मसीह ख दु:ख उठावनो, अऊर मरयो हुयो म सी जीन्दो होनो, जरूरी होतो; अऊर “योच यीशु जेकी मय तुम्ख कथा सुनाऊ हय, मसीह आय।”
ACT 17:4 उन्म सी कितनो न, अऊर भक्त गैरयहूदियों म सी बहुत सो न, अऊर बहुत सी प्रसिद्ध बाईयों न मान लियो, अऊर पौलुस अऊर सीलास को संग मिल गयो।
ACT 17:5 पर यहूदियों न जलन सी भर क बजार सी कुछ बुरो आदमियों ख अपनो संग म लियो, अऊर भीड़ जमा कर क् नगर म हल्ला मचान लग्यो, अऊर यासोन को घर पर चढ़ायी कर क् उन्ख लोगों को आगु लावनो चाह्यो।
ACT 17:6 पर जब उन्न उत उन्ख नहीं पायो त हि यासोन अऊर कुछ भाऊ ख नगर को शासक को जवर खीच लायो अऊर चिल्लाय क कहन लग्यो, “यो लोग जिन्न जगत ख उलटो पुलटो कर दियो हय, इत भी आय गयो हंय।
ACT 17:7 यासोन न उन्ख अपनो इत उतारयो हय। यो सब को सब यो कह्य हंय कि यीशु राजा आय, अऊर कैसर राजा की आज्ञा को विरोध करय हंय।”
ACT 17:8 उन्न लोगों ख अऊर नगर को शासकों ख यो सुनाय क घबराय दियो।
ACT 17:9 येकोलायी उन्न यासोन अऊर बाकी लोगों सी जमानत ले क उन्ख छोड़ दियो।
ACT 17:10 भाऊ न तुरतच रातच रात पौलुस अऊर सीलास ख बिरीया भेज दियो; अऊर हि उत पहुंच क यहूदियों को आराधनालय म गयो।
ACT 17:11 यो लोग त थिस्सलुनीके को यहूदियों सी ठीक होतो, अऊर उन्न बड़ी लालसा सी वचन स्वीकार करयो, अऊर हर दिन पवित्र शास्त्रों म जांच करयो कि या बाते योच आय कि नहाय।
ACT 17:12 येकोलायी उन्म सी बहुत सो न, अऊर गैरयहूदी बाईयों म सी अऊर पुरुषों म सी भी बहुतों न विश्वास करयो।
ACT 17:13 जब थिस्सलुनीके को यहूदी जान गयो कि पौलुस बिरीया म भी परमेश्वर को वचन सुनावय हय, त उत भी आय क लोगों ख उकसावनो अऊर हल्ला मचान लग्यो।
ACT 17:14 तब भाऊ न तुरतच पौलुस ख बिदा करयो कि समुन्दर को किनार चली जाये; पर सीलास अऊर तीमुथियुस उतच रह्य गयो।
ACT 17:15 पौलुस ख पहुंचान वालो ओख एथेंस तक ले गयो; अऊर सीलास अऊर तीमुथियुस लायी या आज्ञा पा क बिदा भयो कि हि ओको जवर जल्दी सी जल्दी आये।
ACT 17:16 जब पौलुस एथेंस म ओकी रस्ता देख रह्यो होतो, त नगर ख मूर्ति सी भरयो हुयो देख क ऊ अपनी आत्मा म जर गयो।
ACT 17:17 येकोलायी ऊ आराधनालय म यहूदियों अऊर भक्तो सी, अऊर चौक म जो लोग ओको सी मिलत होतो उन्को सी हर दिन वाद-विवाद करत होतो।
ACT 17:18 तब इपिकूरी अऊर स्तोईकी देखन वालो म सी कुछ ओको सी तर्क-वितर्क करन लग्यो, अऊर कुछ न कह्यो, “यो बकवास करन वालो का कहनो चाहवय हय?” पर दूसरों न कह्यो, “ऊ दूसरों देवता को प्रचारक मालूम पड़य हय” कहालीकि ऊ यीशु को अऊर जीन्दो होन को सुसमाचार सुनावत होतो।
ACT 17:19 तब हि ओख अपनो संग अरियुपगुस पर ले गयो अऊर पुच्छ्यो, “का हम जान सकजे हंय कि या नयी राय जो तय सुनावय हय, का आय?
ACT 17:20 कहालीकि तय नयी अनोखी बाते हम्ख सुनावय हय, येकोलायी हम जाननो चाहजे हय कि इन्को मतलब का हय।”
ACT 17:21 येकोलायी कि सब एथेंस को रहन वालो अऊर परदेशी जो उत रहत होतो, नयी-नयी बाते कहन अऊर सुनन को अलावा अऊर कोयी काम म समय नहीं बितात होतो।
ACT 17:22 तब पौलुस न अरियुपगुस को बीच म खड़ो होय क कह्यो, “हे एथेंस को लोगों, मय देखू हय कि तुम हर बात म देवता को बड़ो मानन वालो हय।
ACT 17:23 कहालीकि मय फिरतो हुयो जब तुम्हरी पूजा की चिजे ख देख रह्यो होतो, त एक असी पूजा अर्पन की वेदी भी पायो, जेक पर लिख्यो होतो, ‘अनजाने ईश्वर लायी।’ येकोलायी जेक तुम बिना जाने पूजा अर्पन करय हय, मय तुम्ख ओको सुसमाचार सुनाऊ हय।”
ACT 17:24 जो परमेश्वर न जगत अऊर ओकी सब चिजों ख बनायो, ऊ स्वर्ग अऊर धरती को मालिक होय क, हाथ को बनायो हुयो मन्दिरों म नहीं रह्य;
ACT 17:25 नहीं कोयी चिज की जरूरत लायी आदमियों को हाथों की सेवा लेवय हय, कहालीकि ऊ खुदच सब ख जीवन अऊर श्वास अऊर सब कुछ देवय हय।
ACT 17:26 ओन एकच आदमी सी आदमियों की सब जातियां पूरो धरती पर रहन लायी बनायी हंय; अऊर उन्को ठहरायो हुयो समय अऊर निवास की सीमावों ख येकोलायी बान्ध्यो हय,
ACT 17:27 कि उन परमेश्वर ख ढूंढे, हो सके कि ओख टटोल क पा ले, तब भी ऊ हम म सी कोयी सी दूर नहाय।
ACT 17:28 कहालीकि हम ओको म जीन्दो रहजे हय, अऊर चलतो फिरतो, अऊर स्थिर रहजे हंय। जसो तुम्हरो कितनो कवियो न भी कह्यो हय, हम त ओकोच वंशज आय।
ACT 17:29 येकोलायी परमेश्वर को वंश होय क हम्ख यो समझनो ठीक नहाय कि परमेश्वर सोनो यां चांदी यां गोटा को जसो हय, जो आदमी की कारीगरी अऊर कल्पना सी तरास्यो गयो हय।
ACT 17:30 “येकोलायी परमेश्वर न अज्ञानता को समयो पर ध्यान नहीं दियो, पर अब हर जागा सब आदमियों ख मन फिरावन की आज्ञा देवय हय।
ACT 17:31 कहालीकि ओन एक दिन ठहरायो हय, जेको म एक आदमी सी जेक ओन चुन्यो हय ऊ सच्चायी सी जगत को न्याय करेंन; अऊर ओन मरयो हुयो म सी ओख जीन्दो कर क् या बात ख सब आदमी पर प्रमाणित कर दियो हय।”
ACT 17:32 मरयो हुयो को जीन्दो होन की बात सुन क कुछ त मजाक उड़ावन लग्यो, अऊर कुछ न कह्यो, “या बात हम तोरो सी फिर कभी सुनबो।”
ACT 17:33 येकोलायी पौलुस उन्को बीच म सी निकल गयो।
ACT 17:34 पर कुछ आदमी उन्को संग मिल गयो, अऊर विश्वास करयो; जिन्म दियुनुसिस जो अरियुपगुस को सदस्य होतो, अऊर दमरिस नाम की एक बाई होती, अऊर उन्को संग अऊर भी लोग होतो।
ACT 18:1 येको बाद पौलुस एथेंस ख छोड़ क कुरिन्थुस नगर म आयो।
ACT 18:2 उत ओख अक्विला नाम को एक यहूदी मिल्यो, जेको जनम पुन्तुस म भयो होतो। ऊ अपनी पत्नी प्रिस्किल्ला को संग इटली सी आयो होतो, कहालीकि क्लौदियुस न सब यहूदियों ख रोम सी निकल जान की आज्ञा दी होती। येकोलायी ऊ उन्को इत गयो।
ACT 18:3 ओको अऊर उन्को एकच काम होतो, येकोलायी ऊ उन्को संग रह्यो अऊर हि काम करन लग्यो; अऊर उन्को काम तम्बू बनान को होतो।
ACT 18:4 ऊ हर एक आराम को दिन आराधनालय म वाद-विवाद कर क् यहूदियों अऊर गैरयहूदियों ख भी समझावत होतो।
ACT 18:5 जब सीलास अऊर तीमुथियुस मकिदुनिया सी आयो, त पौलुस वचन सुनावन की धुन म यहूदियों ख गवाही देन लग्यो कि यीशुच मसीह आय।
ACT 18:6 पर जब हि विरोध अऊर निन्दा करन लग्यो, त ओन अपनो कपड़ा झाड़ क उन्को सी कह्यो, “तुम्हरो खून तुम्हरीच मान पर रहे! मय निर्दोष हय। अब सी मय गैरयहूदियों को जवर जाऊं।”
ACT 18:7 उत सी चल क ऊ तीतुस यूस्तुस नाम को परमेश्वर को एक भक्त को घर म आयो; जेको घर आराधनालय सी लग्यो हुयो होतो।
ACT 18:8 तब आराधनालय को मुखिया क्रिसपुस न अपनो पूरो घरानों को संग प्रभु पर विश्वास करयो; अऊर बहुत सी कुरिन्थवासी सुन क विश्वास लायो अऊर बपतिस्मा लियो।
ACT 18:9 प्रभु न एक रात दर्शन म पौलुस सी कह्यो, “मत डर, बल्की कहत जा अऊर चुप मत रह्य;
ACT 18:10 कहालीकि मय तोरो संग हय, अऊर कोयी तोरो पर चढ़ायी कर क् तोरी हानि नहीं करेंन; कहालीकि यो नगर म मोरो बहुत सी लोग हंय।”
ACT 18:11 येकोलायी ऊ उन्म परमेश्वर को वचन सिखातो हुयो डेढ़ साल तक रह्यो।
ACT 18:12 जब गल्लियो अखया देश को शासक होतो, त यहूदी लोग एकता कर क् पौलुस पर चढ़ आयो, अऊर ओख न्याय आसन को आगु लाय क कहन लग्यो,
ACT 18:13 “यो लोगों ख समझावय हय कि परमेश्वर की भक्ति असी रीति सी करे, जो व्यवस्था को विरुद्ध हय।”
ACT 18:14 जब पौलुस बोलन परच होतो, त गल्लियो न यहूदियों सी कह्यो, “हे यहूदियों, यदि यो कुछ अन्याय या अपराध की बात होती, त ठीक होतो कि मय तुम्हरी सुनतो।
ACT 18:15 पर यदि यो वाद-विवाद शब्दों, अऊर नामो, अऊर तुम्हरो इत की व्यवस्था को बारे म आय, त तुमच जानो; कहालीकि मय इन बातों को सच्चो नहीं बननो चाहऊं।”
ACT 18:16 अऊर ओन उन्ख न्याय आसन को आगु सी निकाल दियो।
ACT 18:17 तब सब लोगों न आराधनालय को मुखिया सोस्थिनेस ख पकड़ क् न्याय आसन को आगु पिट्यो। पर गल्लियो न इन बातों की कुछ भी चिन्ता नहीं करी।
ACT 18:18 पौलुस बहुत दिन तक उत रह्यो। तब भाऊ सी बिदा होय क किंख्रिया म येकोलायी मुंड मुंडायो, कहालीकि ओन मन्नत मानी होती, अऊर जहाज पर सीरिया ख चल दियो अऊर ओको संग प्रिस्किल्ला अऊर अक्विला होतो।
ACT 18:19 ओन इफिसुस पहुंच क उन्ख उत छोड़्यो, अऊर खुद आराधनालय म जाय क यहूदियों सी विवाद करन लग्यो।
ACT 18:20 जब उन्न ओको सी बिनती करी, “हमरो संग अऊर कुछ दिन रह्य।” त ओन स्वीकार नहीं करयो;
ACT 18:21 पर यो कह्य क उन्को सी बिदा भयो, “यदि परमेश्वर न चाह्यो त मय तुम्हरो जवर फिर आऊं।” तब ऊ इफिसुस सी जहाज खोल क चली गयो।
ACT 18:22 अऊर कैसरिया म उतर क यरूशलेम ख गयो अऊर मण्डली ख नमस्कार कर क् अन्ताकिया म आयो।
ACT 18:23 तब कुछ दिन रह्य क ऊ उत सी निकल्यो, अऊर एक तरफ सी गलातिया अऊर फ्रूगिया प्रदेशों म सब चेलां ख स्थिर करतो फिरयो।
ACT 18:24 अपुल्लोस नाम को एक यहूदी, जेको जनम सिकन्दरियां म भयो होतो, जो ज्ञानी पुरुष होतो अऊर पवित्र शास्त्र ख अच्छो तरह सी जानत होतो, इफिसुस म आयो।
ACT 18:25 ओन प्रभु म चलन की शिक्षा पायी होती, अऊर मन लगाय क यीशु को बारे म ठीक ठीक सुनावतो अऊर सिखावत होतो, पर ऊ केवल यूहन्ना को बपतिस्मा की बात जानत होतो।
ACT 18:26 ऊ आराधनालय म निडर होय क बोलन लग्यो, पर प्रिस्किल्ला अऊर अक्विला ओकी बाते सुन क ओख अपनो इत ले गयो अऊर परमेश्वर को शिक्षा ओख अऊर भी ठीक ठीक बतायो।
ACT 18:27 जब ओन ठान लियो कि ओन पार उतर क अखया ख जाये त भाऊ न ओख हिम्मत दे क चेलां ख लिख्यो कि हि ओको सी अच्छो तरह मिले; अऊर ओन उत पहुंच क उन लोगों की बड़ी मदत करी जिन्न अनुग्रह को वजह विश्वास करयो होतो।
ACT 18:28 कहालीकि ऊ पवित्र शास्त्र सी सबूत दे क कि यीशुच मसीह आय, बड़ी मजबुतायी सी यहूदियों ख सब को आगु बतावत रह्यो।
ACT 19:1 जब अपुल्लोस कुरिन्थुस म होतो, त पौलुस ऊपर को पूरो प्रदेश सी होय क इफिसुस म आयो। उत कुछ चेलां ख देख क,
ACT 19:2 ओन कह्यो, “का तुम न विश्वास करतो समय पवित्र आत्मा पायो?” उन्न ओको सी कह्यो, “हम न त पवित्र आत्मा की चर्चा भी नहीं सुनी।”
ACT 19:3 ओन उन्को सी कह्यो, “त फिर तुम न कोन्को बपतिस्मा लियो?” उन्न कह्यो, “यूहन्ना को बपतिस्मा।”
ACT 19:4 पौलुस न कह्यो, “यूहन्ना न यो कह्य क मन फिराव को बपतिस्मा दियो कि जो मोरो बाद आवन वालो हय, ओको पर यानेकि यीशु पर विश्वास करनो।”
ACT 19:5 यो सुन क उन्न प्रभु यीशु को नाम म बपतिस्मा लियो।
ACT 19:6 जब पौलुस न उन पर हाथ रख्यो, त पवित्र आत्मा उन पर उतरयो, अऊर हि अलग-अलग भाषा बोलन अऊर भविष्यवानी करन लग्यो।
ACT 19:7 हि सब लगभग बारा लोग होतो।
ACT 19:8 ऊ आराधनालय म जाय क तीन महीना तक निडर होय क बोलत रह्यो, अऊर परमेश्वर को राज्य को बारे म विवाद करतो अऊर समझावत रह्यो।
ACT 19:9 पर जब कुछ लोगों न कड़क भय क ओकी नहीं मानी बल्की लोगों को आगु यो रस्ता ख बुरो कहन लग्यो, त ओन उन्ख छोड़ दियो अऊर चेलां ख अलग कर लियो, अऊर हर दिन तुरन्नुस की सभा म वाद-विवाद करत होतो।
ACT 19:10 दोय साल तक योच होतो रह्यो, इत तक कि आसिया को रहन वालो का यहूदी का गैरयहूदी सब न प्रभु को वचन सुन लियो।
ACT 19:11 परमेश्वर पौलुस को हाथों सी सामर्थ को काम दिखावत होतो।
ACT 19:12 इत तक कि रूमाल अऊर गमछा ओको शरीर सी छूवाय क बीमारों पर डालत होतो, अऊर उन्की बीमारिया सुधरत जात होती; अऊर दुष्ट आत्मायें उन्म सी निकलत होती।
ACT 19:13 पर कुछ यहूदी जो झाड़ा फूकी करन वालो जो इत उत घुमत होतो, हि उन लोगों पर जो दुष्ट आत्मा सी जकड़्यो लोग होतो, उन पर प्रभु यीशु को नाम कह्य क यो कोशिश करन लग्यो, “जो यीशु को प्रचार पौलुस करय हय, मय तुम्ख ओकीच कसम देऊ हय।”
ACT 19:14 अऊर स्किवास नाम को एक यहूदी महायाजक को सात बेटा होतो, जो असोच करत होतो।
ACT 19:15 पर दुष्ट आत्मा न उन्ख उत्तर दियो, “यीशु ख मय जानु हय, अऊर पौलुस ख भी पहिचानू हय, पर तुम कौन आय?”
ACT 19:16 अऊर ऊ आदमी न जेको म दुष्ट आत्मा होती उन पर झपट क अऊर उन्ख वश म लाय क, उन पर असो उपद्रव करयो कि हि नंगो अऊर घायल होय क ऊ घर सी निकल क भग्यो।
ACT 19:17 या बात इफिसुस को रहन वालो सब यहूदी अऊर गैरयहूदियों भी जान गयो, अऊर उन सब पर डर छाय गयो; अऊर प्रभु यीशु को नाम की बड़ायी भयी।
ACT 19:18 जिन्न विश्वास करयो होतो, उन्म सी बहुतों न आय क अपनो अपनो कामों ख मान लियो अऊर प्रगट करयो।
ACT 19:19 जादू करन वालो म सी बहुतों न अपनी-अपनी किताब जमा कर क् सब को आगु जलाय दियो, अऊर जब उन्को दाम जोड़्यो गयो, त पचास हजार चांदी को सिक्का को बराबर निकल्यो।
ACT 19:20 यो तरह प्रभु को वचन बलपूर्वक फैलत अऊर मजबूत होतो गयो।
ACT 19:21 जब या बाते भय गयी त पौलुस न आत्मा म ठान्यो कि मकिदुनिया अऊर अखया सी होय क यरूशलेम ख जाऊं, अऊर कह्यो, “उत जान को बाद मोख रोम ख भी देखनो जरूरी हय।”
ACT 19:22 येकोलायी अपनी सेवा करन वालो म सी तीमुथियुस अऊर इरास्तुस ख मकिदुनिया भेज क खुद कुछ दिन आसिया म रह्य गयो।
ACT 19:23 ऊ समय उस पंथ को बारे म बड़ो हल्ला भयो।
ACT 19:24 कहालीकि देमेत्रियुस नाम को एक सुनार देवी अरतिमिस को चांदी को मन्दिर बनवाय क कारीगरो ख बहुत काम दिलावत होतो।
ACT 19:25 ओन उन्ख अऊर असीच चिजों को कारीगरो ख जमा कर क् कह्यो, “हे आदमियों, तुम जानय हय कि यो काम सी हम्ख कितनो कमायी मिलय हय।
ACT 19:26 तुम देखय अऊर सुनय हय कि केवल इफिसुस मच नहीं, बल्की लगभग पूरो आसिया म यो कह्य क यो पौलुस न बहुत सो लोगों ख समझायो हय, कि जो हाथ सी बनायो हंय, हि ईश्वर नोहोय।
ACT 19:27 येको सी अब केवल योच बात को डर नहाय कि हमरो यो काम-धन्दा को महत्व जातो रहेंन, बल्की यहां तक कि महान देवी अरतिमिस को मन्दिर तुच्छ समझो जायेंन, अऊर जेक पूरो आसिया अऊर जगत भक्ति करय हय ओको सम्मान भी घटतो रहेंन।”
ACT 19:28 हि यो सुन क गुस्सा सी भर गयो अऊर चिल्लाय-चिल्लाय क कहन लग्यो, “इफिसियों की अरतिमिस देवी, महान हय!”
ACT 19:29 अऊर पूरो नगर म बड़ो हल्ला होय गयो, अऊर लोगों न गयुस अऊर अरिस्तर्खुस नाम को पौलुस को संगी यात्रियों ख जो मकिदुनिया सी आयो होतो पकड़्यो अऊर हि एक संग दौड़ क नाटक घर म गयो।
ACT 19:30 जब पौलुस न लोगों को जवर अन्दर जानो चाह्यो त चेलां न ओख जान नहीं दियो।
ACT 19:31 आसिया को शासकों म सी भी ओको कुछ संगियों न ओको जवर बुलावा भेज्यो अऊर बिनती करी कि नाटक घर म जाय क खतरा मत उठावों।
ACT 19:32 उत कोयी कुछ चिल्लावत होतो अऊर कोयी कुछ, कहालीकि सभा म बड़ी गड़बड़ी होय रही होती, अऊर बहुत सो लोग त यो जानत भी नहीं होतो कि हम कोन्को लायी जमा भयो हंय।
ACT 19:33 तब उन्न सिकन्दर ख, जेक यहूदियों न खड़ो करयो होतो, भीड़ म सी आगु बढ़ायो। सिकन्दर हाथ सी इशारा कर क् लोगों को आगु उत्तर देनो चाहत होतो।
ACT 19:34 पर जब उन्न जान लियो कि ऊ यहूदी आय, त सब को सब एक आवाज सी कोयी दोय घंटा तक चिल्लावत रह्यो, “इफिसियों की अरतिमिस देवी, महान हय।”
ACT 19:35 तब नगर को मन्त्री न लोगों ख चुप करवाय क कह्यो, “हे इफिसुस को लोगों, कौन नहीं जानय कि इफिसियों को नगर महान देवी अरतिमिस को मन्दिर, अऊर ज्यूस को तरफ सी गिरी हुयी मूर्ति को रक्षा करन वालो आय।
ACT 19:36 येकोलायी जब कि इन बातों को खण्डनच नहीं होय सकय, त ठीक हय कि तुम चुप रहो अऊर बिना सोच्यो बिचार कुछ मत करो।
ACT 19:37 कहालीकि तुम इन आदमियों ख लायो हय जो नहीं मन्दिर को लूटन वालो आय अऊर नहीं हमरी देवी को निन्दा करन वालो आय।
ACT 19:38 यदि देमेत्रियुस अऊर ओको संगी कारीगरो ख कोयी सी विवाद होना त कचहरी खुल्यो हय अऊर शासक भी हंय; हि एक दूसरों पर आरोप करे।
ACT 19:39 पर यदि तुम कोयी अऊर बात को बारे म कुछ पूछन चाहवय हय, त सभा को बीच म फैसला करयो जायेंन।
ACT 19:40 कहालीकि अज को दंगा को वजह हम पर दोष लगाय जान को डर हय, येकोलायी कि येको कोयी वजह नहीं, अऊर हम यो भीड़ को जमा होन को कोयी उत्तर नहीं दे सकेंन।”
ACT 19:41 यो कह्य क ओन सभा ख बिदा करयो।
ACT 20:1 जब हल्ला रुक गयो त पौलुस न चेलां ख बुलाय क उत्साहित करयो, अऊर उन्को सी बिदा होय क मकिदुनिया को तरफ चली गयो।
ACT 20:2 ऊ पूरो प्रदेश म सी होय क अऊर चेलां ख बहुत उत्साहित कर ऊ यूनान म आयो।
ACT 20:3 जब तीन महीना रह्य क ऊ उत सी जहाज पर सीरिया को तरफ जान पर होतो, त यहूदी ओख मारन म लग्यो, येकोलायी ओन यो ठान लियो कि मकिदुनिया होय क लौट जाऊं।
ACT 20:4 बिरीया को पुर्रुस को बेटा सोपत्रुस अऊर थिस्सलुनीकियों म सी अरिस्तर्खुस अऊर सिकुन्दुस, अऊर दिरबे को गयुस, अऊर तीमुथियुस, अऊर आसिया को तुखिकुस अऊर त्रुफिमुस आसिया तक ओको संग भय गयो।
ACT 20:5 हि आगु जाय क त्रोआस म हमरी रस्ता देखतो रह्यो।
ACT 20:6 अऊर हम अखमीरी रोटी को दिनो को बाद फिलिप्पी सी जहाज पर चढ़ क पाच दिन म त्रोआस म ओको जवर पहुंच्यो, अऊर सात दिन तक जित रह्यो।
ACT 20:7 हप्ता को पहिलो दिन जब हम रोटी तोड़न लायी जमा भयो, त पौलुस न जो दूसरों दिन चली जान पर होतो, उन्को सी बाते करी; अऊर अरधी रात तक बाते करतो रह्यो।
ACT 20:8 जो ऊपर को कमरा म हम जमा होतो, ओको म बहुत दीया जल रह्यो होतो।
ACT 20:9 अऊर यूतुखुस नाम को एक जवान खिड़की पर बैठ्यो हुयो गहरी नींद सी झुक रह्यो होतो। जब पौलुस देर तक बाते करतो रह्यो त ऊ नींद की झपकी सी तीसरो ऊपर को कमरा सी गिर पड़्यो, अऊर मरयो हुयो उठायो गयो।
ACT 20:10 पर पौलुस उतर क ओको सी लिपट गयो, अऊर गलो लगाय क कह्यो, “घबरावो मत; कहालीकि ओको जीव ओकोच म हय।”
ACT 20:11 अऊर ऊपर जाय क रोटी तोड़ी अऊर खाय क इतनो देर तक उन्को सी बाते करतो रह्यो कि भुन्सारो भय गयी। तब ऊ चली गयो।
ACT 20:12 अऊर हि ऊ जवान बच्चा ख जीन्दो ले आयो अऊर बहुत शान्ति पायी।
ACT 20:13 हम पहिलोच जहाज पर चढ़ क अस्सुस ख यो बिचार सी आगु गयो कि उत सी हम पौलुस ख चढ़ाय लेबो, कहालीकि ओन यो येकोलायी ठहरायो होतो कि खुदच पैदल जान वालो होतो।
ACT 20:14 जब ऊ अस्सुस म हम्ख मिल्यो त हम ओख चढ़ाय क मितुलेने म आयो।
ACT 20:15 उत सी जहाज खोल क हम दूसरों दिन खियुस को आगु पहुंच्यो, अऊर दूसरों दिन सामुस म जान लग्यो; तब अगलो दिन मिलेतुस म आयो।
ACT 20:16 कहालीकि पौलुस न इफिसुस को जवर सी होय क जान को सोच लियो होतो कि कहीं असो नहीं होय कि ओख आसिया म देर लगे; कहालीकि ऊ जल्दी म होतो कि यदि होय सकय त ऊ पिन्तेकुस्त को दिन यरूशलेम म रह्य।
ACT 20:17 ओन मिलेतुस सी इफिसुस म खबर भेज्यो, अऊर मण्डली को बुजूर्गों ख बुलायो।
ACT 20:18 जब हि ओको जवर आयो, त ओन कह्यो: “तुम जानय हय कि पहिलोच दिन सी जब मय आसिया म पहुंच्यो, मय हर समय तुम्हरो संग कसो तरह रह्यो।
ACT 20:19 यानेकि बड़ी दीनता सी, अऊर आसु बहाय बहाय क, अऊर उन परीक्षावों म जो यहूदियों को साजीश को वजह मोरो पर आय पड़्यो, मय प्रभु की सेवा करतच रह्यो;
ACT 20:20 अऊर जो-जो बाते तुम्हरो फायदा की होती, उन्ख बतानो अऊर लोगों को आगु अऊर घर घर सिखावन सी कभी नहीं झिझक्यो,
ACT 20:21 यहूदियों अऊर गैरयहूदियों को आगु गवाही देतो रह्यो कि परमेश्वर को तरफ मन फिरावनो अऊर हमरो प्रभु यीशु मसीह पर विश्वास करन ख होना।
ACT 20:22 अब देखो, मय आत्मा म बन्ध्यो हुयो यरूशलेम ख जाऊ हय, अऊर नहीं जानु कि उत मोरो पर का-का बीतेन;
ACT 20:23 केवल यो कि पवित्र आत्मा हर नगर म गवाही दे क मोरो सी कह्य हय कि बन्धन अऊर सताव तोरो लायी तैयार हंय।
ACT 20:24 पर मय अपनो जीव ख कुछ नहीं समझू कि ओख प्रिय जानु, बल्की यो कि मय अपनी दौड़ ख अऊर ऊ सेवा ख पूरी करू, जो मय न परमेश्वर को अनुग्रह को सुसमाचार पर गवाही देन लायी प्रभु यीशु सी पायो हय।
ACT 20:25 “अब देखो, मय जानु हय कि तुम सब जेको म मय परमेश्वर को राज्य को प्रचार करतो फिरयो, मोरो मुंह फिर नहीं देखो।
ACT 20:26 येकोलायी मय अज को दिन तुम सी गवाही दे क कहू हय, कि मय सब को खून सी निर्दोष हय।
ACT 20:27 कहालीकि मय परमेश्वर को पूरो इच्छा ख तुम्ख पूरी रीति सी बतानो सी नहीं झिझक्यो।
ACT 20:28 येकोलायी अपनी अऊर पूरो झुण्ड की चौकसी करो जेको म पवित्र आत्मा न तुम्ख मुखिया ठहरायो हय, कि तुम परमेश्वर की मण्डली की देखभाल करो, जेक ओन अपनो खून सी ले लियो हय।
ACT 20:29 मय जानु हय कि मोरो जान को बाद फाड़न वालो भेड़िया तुम म आयेंन जो झुण्ड ख नहीं छोड़ेंन।
ACT 20:30 तुम्हरोच बीच म सी भी असो-असो आदमी उठेंन, जो चेलां ख अपनो पीछू खीच लेन लायी टेढ़ी-मेंढीं बाते कहेंन।
ACT 20:31 येकोलायी जागतो रहो, अऊर याद करो कि मय न तीन साल तक रात दिन आसु बहाय-बहाय क हर एक ख चेतावनी देनो नहीं छोड़्यो।
ACT 20:32 “अऊर अब मय तुम्ख परमेश्वर ख, अऊर ओको अनुग्रह को वचन ख सौंप देऊ हय; जो तुम्हरी उन्नति कर सकय हय अऊर सब पवित्र करयो गयो लोगों म साझी कर क् मीरास दे सकय हय।
ACT 20:33 मय न कोयी को चांदी, सोना या कपड़ा को लोभ नहीं करयो।
ACT 20:34 तुम खुदच जानय हय कि योच हाथों न मोरी अऊर मोरो संगियों की जरूरत पूरी करी।
ACT 20:35 मय न तुम्ख सब कुछ कर क् दिखायो कि योच रीति सी मेहनत करतो हुयो कमजोरों ख सम्भालनो अऊर प्रभु यीशु को वचन याद रखनो जरूरी हय, जो ओन खुदच कह्यो हय: ‘लेनो सी देनो धन्य हय।’”
ACT 20:36 यो कह्य क ओन घुटना टेक्यो अऊर उन सब को संग प्रार्थना करी।
ACT 20:37 तब हि सब बहुत रोयो अऊर पौलुस को गलो लिपट क ओख चुम्मा लेन लग्यो।
ACT 20:38 हि यो सोच क या बात सी दु:ख सी होतो जो ओन कहीं होती कि तुम मोरो मुंह फिर नहीं देख सको। तब उन्न ओख जहाज तक पहुंचायो।
ACT 21:1 जब हम न उन्को सी अलग भय क जहाज खोल्यो, त सीधो रस्ता सी कोस द्वीप म आयो, अऊर दूसरों दिन रुदुस म अऊर उत सी पतरा म
ACT 21:2 उत एक जहाज फीनीके ख जातो हुयो मिल्यो, अऊर हम न ओको पर चढ़ क ओख खोल दियो।
ACT 21:3 जब हम्ख साइप्रस द्वीप दिखायी दियो, त ओख बायो तरफ छोड़ क सीरिया को तरफ बड़ क सूर नगर म उतरयो, कहालीकि उत जहाज को सामान उतारनो होतो।
ACT 21:4 चेलां ख ले क हम उत सात दिन तक रह्यो। उन्न आत्मा को अगुवायी सी पौलुस सी कह्यो कि यरूशलेम म पाय मत रखजो।
ACT 21:5 जब हि दिन पूरो भय गयो, त हम न उत सी चल दियो; अऊर सब न बाईयों अऊर बच्चां समेत हम्ख नगर को बाहेर तक पहुंचायो; अऊर हम न किनार पर घुटना टेक क प्रार्थना करी,
ACT 21:6 तब एक दूसरों सी बिदा होय क, हम त जहाज पर चढ़्यो अऊर हि अपनो अपनो घर लौट गयो।
ACT 21:7 तब हम सूर सी जलयात्रा पूरी कर क् पतुलिमयिस म पहुंच्यो, अऊर भाऊ ख नमस्कार कर क् उन्को संग एक दिन रह्यो।
ACT 21:8 दूसरों दिन हम उत सी चल क कैसरिया म आयो, अऊर फिलिप्पुस सुसमाचार प्रचार करन वालो को घर म जो सातों म सी एक होतो; जाय क ओको इत रह्यो।
ACT 21:9 ओकी चार कुंवारी बेटी होती, जो भविष्यवानी करत होती।
ACT 21:10 जब हम उत बहुत दिन रह्य चुक्यो, त अगबुस नाम को एक भविष्यवक्ता यहूदिया सी आयो।
ACT 21:11 ओन हमरो जवर आय क पौलुस को कमर को पट्टा लियो, अऊर अपनो हाथ पाय बान्ध क कह्यो, “पवित्र आत्मा यो कह्य हय कि जो आदमी को यो कमर को पट्टा आय, ओख यरूशलेम नगर म यहूदी योच रीति सी बन्धेंन, अऊर गैरयहूदियों को हाथ म सौंपेंन।”
ACT 21:12 जब हम न या बाते सुनी, त हम अऊर उत को लोगों न ओको सी बिनती करी कि यरूशलेम ख मत जा।
ACT 21:13 पर पौलुस न उत्तर दियो, “तुम का करय हय कि रोय-रोय क मोरो दिल तोड़य हय? मय त प्रभु यीशु को नाम लायी यरूशलेम म नहीं केवल बान्ध्यो जान को लायी बल्की मरन लायी भी तैयार हय।”
ACT 21:14 जब ओन नहीं मान्यो त हम यो कह्य क चुप भय गयो, “प्रभु की इच्छा पूरी हो।”
ACT 21:15 इन दिनो को बाद हम न तैयारी करी अऊर यरूशलेम ख चली गयो।
ACT 21:16 कैसरिया सी भी कुछ चेला हमरो संग भय गयो, अऊर हम्ख साइप्रस शहर को मनासोन नाम को एक पुरानो चेला को जवर ले गयो, कि जेको संग हम्ख ठहरनो होतो।
ACT 21:17 जब हम यरूशलेम म पहुंच्यो, त भाऊ बड़ो खुशी को संग हम सी मिल्यो।
ACT 21:18 दूसरों दिन पौलुस हम्ख ले क याकूब को जवर गयो, जित सब बुजूर्ग जमा होतो।
ACT 21:19 तब ओन उन्ख नमस्कार कर क्, जो जो काम परमेश्वर न ओकी सेवा को द्वारा गैरयहूदियों म करयो होतो, एक एक कर क् सब बतायो।
ACT 21:20 उन्न यो सुन क परमेश्वर की महिमा करी, तब ओको सी कह्यो, “हे भाऊ, तय देखय हय कि यहूदियों म सी कुछ हजारों न विश्वास करयो हय; अऊर सब व्यवस्था लायी धुन लगायो हंय।
ACT 21:21 उन्ख तोरो बारे म सिखायो गयो हय कि तय गैरयहूदियों म रहन वालो यहूदियों ख मूसा सी फिर जान ख सिखावय हय, अऊर कह्य हय, कि नहीं अपनो बच्चां को खतना करावो अऊर नहीं रीतियों पर चलो।
ACT 21:22 त फिर का करयो जाये? लोग जरूर सुनेंन कि तय आयो हय।
ACT 21:23 येकोलायी जो हम तोरो सी कहजे हंय, ऊ कर। हमरो इत चार आदमी हंय जिन्न मन्नत मानी हय।
ACT 21:24 उन्ख ले क उन्को संग अपनो आप ख शुद्ध कर; अऊर उन्को लायी खर्चा दे कि हि मुंड मुड़ाये। तब सब जान लेन कि जो बाते उन्ख तोरो बारे म बतायो गयी, उन्म कुछ सच्चायी नहीं हय पर तय खुद भी व्यवस्था ख मान क ओको अनुसार चलय हय।
ACT 21:25 पर उन गैरयहूदियों को बारे म जिन्न विश्वास करयो हय, हम न यो निर्णय कर क् लिख भेज्यो हय कि हि मूर्तियों को आगु बलि करयो हुयो मांस सी, अऊर खून सी अऊर गलो घोट्यो हुयो को मांस सी, अऊर व्यभिचार सी बच्यो रहो।”
ACT 21:26 तब पौलुस उन आदमियों ख ले क, अऊर दूसरों दिन उन्को संग शुद्ध होय क मन्दिर म गयो, अऊर उत बताय दियो कि शुद्ध होन को दिन, यानेकि उन्म सी हर एक लायी चढ़ावा चढ़ायो जान तक को दिन कब पूरो होयेंन।
ACT 21:27 जब हि सात दिन पूरो होन पर होतो, त आसिया को यहूदियों न पौलुस ख मन्दिर म देख क सब लोगों ख उकसायो, अऊर चिल्लाय क ओख पकड़ लियो,
ACT 21:28 “हे इस्राएलियों, मदत करो; यो उच आदमी आय, जो लोगों को, अऊर व्यवस्था को, अऊर यो जागा को विरोध म हर जागा सब लोगों ख सिखावय हय, इत तक कि गैरयहूदियों ख भी मन्दिर म लाय क ओन यो पवित्र जागा ख अशुद्ध करयो हय।”
ACT 21:29 उन्न येको सी पहिले इफिसुस निवासी त्रुफिमुस ख ओको संग नगर म देख्यो होतो, अऊर समझ्यो होतो कि पौलुस ओख मन्दिर म ले आयो हय।
ACT 21:30 तब पूरो नगर म हल्ला मच गयो, अऊर लोग दौड़ क जमा भयो अऊर पौलुस ख पकड़ क मन्दिर को बाहेर घसीट लायो, अऊर तुरतच दरवाजा बन्द करयो गयो।
ACT 21:31 जब हि ओख मार डालनो चाहत होतो, त पलटन को मुखिया ख खबर पहुंच्यो कि पूरो यरूशलेम म हल्ला होय रह्यो हय।
ACT 21:32 तब ऊ तुरतच सैनिकों अऊर सूबेदारों ख ले क उन्को जवर खल्लो दौड़ आयो; अऊर उन्न पलटन को मुखिया ख अऊर सैनिकों ख देख क पौलुस ख मारनो पीटनो छोड़ दियो।
ACT 21:33 तब पलटन को मुखिया न जवर आय क ओख पकड़ लियो; अऊर दोय संकली सी बान्धन की आज्ञा दे क पूछन लग्यो, “यो कौन आय अऊर येन का करयो हय?”
ACT 21:34 पर भीड़ म सी कोयी कुछ अऊर कोयी कुछ चिल्लातो रह्यो। जब हल्ला को मारे ऊ ठीक सच्चायी नहीं जान सक्यो, त ओख किला म ले जान की आज्ञा दियो।
ACT 21:35 जब ऊ पायरी पर पहुंच्यो, त असो भयो कि भीड़ को दबाव को मारे सैनिकों न पौलुस ख उठाय क लि जानो पड़्यो।
ACT 21:36 कहालीकि लोगों की भीड़ यो चिल्लाती हुयी ओको पीछू पड़ी होती, “ओख मार डालो।”
ACT 21:37 जब हि पौलुस ख किला म ली जान पर होतो, त ओन पलटन को मुखिया सी कह्यो, “का मोख आज्ञा हय कि मय तोरो सी कुछ कहूं?” “ओन कह्यो, का तय यूनानी भाषा जानय हय?”
ACT 21:38 “का तय ऊ मिस्री नहीं, जो इन दोयी सी पहिलो विद्रोही बनाय क, चार हजार कटारबन्द लोगों ख सुनसान जागा म ले गयो?”
ACT 21:39 पौलुस न कह्यो, “मय त तरसुस को यहूदी आदमी आय! किलिकिया को प्रसिद्ध नगर को निवासी आय। मय तोरो सी प्रार्थना करू हय कि मोख लोगों सी बाते करन देवो।”
ACT 21:40 जब ओन आज्ञा दियो, त पौलुस न पायरी पर खड़ो होय क लोगों ख हाथ सी इशारा करयो। जब हि चुप भय गयो, त ऊ इब्रानी भाषा म बोलन लग्यो।
ACT 22:1 “हे भाऊ अऊर पितरो, मोरो प्रतिउत्तर सुनो, जो मय अब तुम्हरो आगु रखू हय।”
ACT 22:2 हि यो सुन क कि ऊ हम सी इब्रानी भाषा म बोलय हय, अऊर भी चुप भय गयो। तब ओन कह्यो:
ACT 22:3 “मय त यहूदी आदमी आय, जो किलिकिया को तरसुस म जनम लियो; पर यो नगर म गमलीएल को पाय को जवर बैठ क पढ़ायो गयो, अऊर बापदादों की व्यवस्था की ठीक रीति पर सिखायो गयो; अऊर परमेश्वर लायी असी धुन लगायो होतो, जसो तुम सब अज लगायो हय।
ACT 22:4 मय न पुरुष अऊर बाई दोयी ख बान्ध-बान्ध क अऊर जेलखाना म डाल-डाल क यो पंथ ख इत तक सतायो कि उन्ख मरवाय भी डाल्यो।
ACT 22:5 या बात लायी महायाजक अऊर सब महासभा को बुजूर्ग गवाह हंय, कि उन्को सी मय भाऊ को नाम पर चिट्ठियां ले क दमिश्क ख चली जाय रह्यो होतो, कि जो उत हय उन्ख भी सजा दिलावन लायी बान्ध क यरूशलेम लाऊं।
ACT 22:6 “जब मय चलत-चलत दमिश्क को जवर पहुंच्यो, त असो भयो कि दोपहर को लगभग अचानक एक बड़ी ज्योति आसमान सी मोरो चारयी तरफ चमकी।
ACT 22:7 अऊर मय जमीन पर गिर पड़्यो अऊर यो आवाज सुन्यो, ‘हे शाऊल, हे शाऊल, तय मोख कहाली सतावय हय?’
ACT 22:8 मय न उत्तर दियो, ‘हे प्रभु, तय कौन आय?’ ओन मोरो सी कह्यो, ‘मय यीशु नासरी आय, जेक तय सतावय हय।’
ACT 22:9 मोरो संगियों न ज्योति त देखी, पर जो मोरो सी बोलत होतो ओकी आवाज नहीं सुन्यो।
ACT 22:10 तब मय न कह्यो, ‘हे प्रभु, मय का करू?’ प्रभु न मोरो सी कह्यो, ‘उठ क दमिश्क म जा, अऊर जो कुछ तोरो करन लायी ठहरायो गयो हय उत तोख सब बताय दियो जायेंन।’
ACT 22:11 जब ऊ ज्योति को तेज को मारे मोख कुछ दिखायी नहीं दियो, त मय अपनो संगियों को हाथ पकड़ क दमिश्क म आयो।
ACT 22:12 “तब हनन्याह नाम को व्यवस्था को अनुसार एक भक्त आदमी, जो उत रहन वालो सब यहूदियों म अच्छो नाम होतो, मोरो जवर आयो,
ACT 22:13 अऊर खड़ो होय क मोरो सी कह्यो, ‘हे भाऊ शाऊल, फिर देखन लग।’ उच घड़ी मोरी आंखी खुल गयी अऊर मय न ओख देख्यो।
ACT 22:14 तब ओन कह्यो, ‘हमरो बापदादों को परमेश्वर न तोख येकोलायी ठहरायो हय कि तय ओकी इच्छा ख जान्जो, अऊर ऊ सच्चो ख देखो अऊर ओको मुंह सी बाते सुनजो।
ACT 22:15 कहालीकि तय ओको तरफ सी सब आदमियों को आगु उन बातों को गवाह होजो जो तय न देख्यो अऊर सुन्यो हंय।
ACT 22:16 अब कहाली देर करय हय? उठ, बपतिस्मा लेवो, अऊर ओको नाम ले क अपनो पापों ख धोय डाल।’
ACT 22:17 “जब मय फिर यरूशलेम म आय क मन्दिर म प्रार्थना कर रह्यो होतो, त मगन भय गयो,
ACT 22:18 अऊर ओख देख्यो कि ऊ मोरो सी कह्य हय, ‘जल्दी कर क् यरूशलेम सी जल्दी निकल जा; कहालीकि हि मोरो बारे म तोरी गवाही नहीं मानेंन।’
ACT 22:19 मय न कह्यो, ‘हे प्रभु, हि त खुद जानय हंय कि मय तोरो पर विश्वास करन वालो ख जेलखाना म डालत होतो अऊर आराधनालय म जाय क उन्ख पिटवात होतो।
ACT 22:20 जब तोरो गवाह स्तिफनुस को खून बहायो जाय रह्यो होतो तब मय भी उत खड़ो होतो अऊर या बात म सामिल होतो, अऊर उन्को मारन वालो को कपड़ा की रखवाली करत होतो।’
ACT 22:21 अऊर ओन मोरो सी कह्यो, ‘चली जा: कहालीकि मय तोख गैरयहूदियों को जवर दूर-दूर भेजूं।’”
ACT 22:22 हि या बात तक ओकी सुनतो रह्यो, तब ऊची आवाज सी चिल्लायो, “असो आदमी को नाश करो, ओको जीन्दो रहनो ठीक नहाय!”
ACT 22:23 जब हि चिल्लातो अऊर कपड़ा फेकतो हुयो अऊर आसमान म धूरला उड़ात होतो;
ACT 22:24 त पलटन को मुखिया न कह्यो, “येख किला म ले जावो, अऊर कोड़ा मार क जांचो, कि मय जानु कि लोग कौन्सो वजह ओको विरोध म असो चिल्लाय रह्यो हंय।”
ACT 22:25 जब उन्न ओख बन्दी बनाय दियो त पौलुस ऊ सूबेदार सी जो जवर खड़ो होतो, कह्यो, “का यो ठीक हय कि तुम एक रोमी आदमी ख, अऊर ऊ भी बिना दोषी ठहरायो हुयो, कोड़ा मारो?”
ACT 22:26 सूबेदार न यो सुन क पलटन को मुखिया को जवर जाय क कह्यो, “तय यो का करय हय? यो त रोमी आदमी आय।”
ACT 22:27 तब पलटन को मुखिया न ओको जवर आय क कह्यो, “मोख बताव, का तय रोमी आय?” ओन कह्यो, “हव।”
ACT 22:28 यो सुन क पलटन को मुखिया न कह्यो, “मय न रोमी होन को पद बहुत रुपया दे क पायो हय।” पौलुस न कह्यो, “मय त जनम सी रोमी आय।”
ACT 22:29 तब जो लोग ओख जांचन पर होतो, हि तुरतच ओको जवर सी हट गयो; अऊर पलटन को मुखिया भी यो जान क कि यो रोमी आय अऊर मय न ओख बान्ध्यो हय; डर गयो।
ACT 22:30 दूसरों दिन ओन सच जानन की इच्छा सी कि यहूदी ओको पर कहाली दोष लगावय हंय, ओको बन्धन खोल दियो; अऊर महायाजक अऊर पूरी महासभा ख जमा होन की आज्ञा दी, अऊर पौलुस ख खल्लो ले जाय क उन्को आगु खड़ो कर दियो।
ACT 23:1 पौलुस न महासभा को तरफ टकटकी लगाय क देख्यो अऊर कह्यो, “हे भाऊ, मय न अज तक परमेश्वर लायी बिल्कुल अच्छो मन सी जीवन बितायो हय।”
ACT 23:2 येको पर हनन्याह महायाजक न उन्ख जो ओको जवर खड़ो होतो, ओको मुंह पर थापड़ मारन की आज्ञा दी।
ACT 23:3 तब पौलुस न ओको सी कह्यो, “हे चूना पोती हुयी भीत, परमेश्वर तोख मारेंन। तय व्यवस्था को अनुसार मोरो न्याय करन ख बैठ्यो हय, अऊर फिर का व्यवस्था को खिलाफ मोख मारन की आज्ञा देवय हय?”
ACT 23:4 जो जवर खड़ो होतो उन्न कह्यो, “का तय परमेश्वर को महायाजक ख बुरो-भलो कह्य हय?”
ACT 23:5 पौलुस न कह्यो, “हे भाऊ, मय नहीं जानत होतो कि यो महायाजक आय; कहालीकि लिख्यो हय: ‘अपनो लोगों को मुखिया ख बुरो मत कह्य।’”
ACT 23:6 तब पौलुस न यो जान क कि एक दल सदूकियों अऊर दूसरों फरीसियों को हय, सभा म पुकार क कह्यो, “हे भाऊ, मय फरीसी अऊर फरीसियों को वंश को आय, मरयो हुयो की आशा अऊर जीन्दो होन को बारे म मोरो मुकद्दमा चल रह्यो हय।”
ACT 23:7 जब ओन या बात कहीं त फरीसियों अऊर सदूकियों म झगड़ा होन लग्यो; अऊर सभा म फूट पड़ गयी।
ACT 23:8 कहालीकि सदूकी त यो कह्य हंय, कि नहीं मरयो म सी जीन्दो होनो हय, नहीं स्वर्गदूत अऊर नहीं आत्मा हय; पर फरीसी इन सब ख मानय हंय।
ACT 23:9 तब बड़ो हल्ला भयो अऊर कुछ धर्मशास्त्री जो फरीसियों को दल को होतो, उठ खड़ो भयो अऊर यो कह्य क झगड़ा करन लग्यो, “हम यो आदमी म कोयी बुरायी नहीं देखजे, अऊर यदि कोयी आत्मा यां स्वर्गदूत ओको सी बोल्यो हय त फिर का?”
ACT 23:10 जब बहुत झगड़ा भयो, त सिपाही को मुखिया न यो डर सी कि हि पौलुस को टुकड़ा टुकड़ा मत कर डाले, पलटन ख आज्ञा दी कि उतर क ओख उन्को बीच म सी जबरदस्ती निकाल क, अऊर किला म ले जाये।
ACT 23:11 वाच रात प्रभु न ओको जवर खड़ो होय क कह्यो, “हे पौलुस, हिम्मत बान्ध; कहालीकि जसो तय न यरूशलेम म मोरी गवाही दियो, वसोच तोख रोम म भी गवाही देनो पड़ेंन।”
ACT 23:12 जब दिन भयो त यहूदियों न साजीश रच्यो अऊर कसम खायी कि जब तक हम पौलुस ख मार नहीं डाले, तब तक खाबोंन अऊर पीबो त हम पर धिक्कार हय।
ACT 23:13 जिन्न आपस म यो साजीश रच्यो, हि चालीस लोग सी जादा होतो।
ACT 23:14 उन्न महायाजक अऊर बुजूर्गों को जवर जाय क कह्यो, “हम न यो ठान लियो हय कि जब तक हम पौलुस ख मार नहीं डाल्बो, तब तक यदि कुछ चख भी ले त हम पर धिक्कार हय।
ACT 23:15 येकोलायी अब महासभा समेत पलटन को मुखिया ख समझावों कि ओख तुम्हरो जवर ले आये, मानो कि तुम ओको बारे म अऊर भी ठीक सी जांच करनो चाहवय हय; अऊर हम ओको पहुंचन सी पहिलेच ओख मार डालन लायी तैयार रहबो।”
ACT 23:16 पौलुस को बहिन को लड़का न सुन्यो कि हि ओख मारन म हंय, त किला म जाय क पौलुस ख खबर दियो।
ACT 23:17 पौलुस न सूबेदार म सी एक ख अपनो जवर बुलाय क कह्यो, “यो जवान ख पलटन को मुखिया को जवर लिजावो, यो ओको सी कुछ कहनो चाहवय हय।”
ACT 23:18 येकोलायी ओन ओख पलटन को मुखिया को जवर ली जाय क कह्यो, “बन्दी पौलुस न मोख बुलाय क बिनती करी कि यो जवान पलटन को मुखिया सी कुछ कहनो चाहवय हय; येख ओको जवर ली जा।”
ACT 23:19 पलटन को मुखिया न ओको हाथ पकड़ क अऊर अलग ली जाय क पुच्छ्यो, “तय मोरो सी का कहनो चाहवय हय?”
ACT 23:20 ओन कह्यो, “यहूदियों न साजीश रच्यो हय कि तोरो सी बिनती करे कि कल पौलुस ख महासभा म लाये, मानो हि अऊर ठीक सी ओकी जांच करनो चाहवय हंय।
ACT 23:21 पर ओकी मत मानजो, कहालीकि उन म सी चालीस सी ज्यादा आदमी ओख मारन म हंय, जिन्न यो ठान लियो हय कि जब तक हि पौलुस ख मार नहीं डालय, तब तक नहीं खाबोंन अऊर नहीं पीबो। अऊर अब हि तैयार हंय अऊर तोरो वचन को रस्ता देख रह्यो हंय।”
ACT 23:22 तब पलटन को मुखिया न जवान ख यो आज्ञा दे क बिदा करयो, “कोयी सी मत कहजो कि तय न मोख या बाते बतायो हंय।”
ACT 23:23 तब ओन दोय सूबेदारों ख बुलाय क कह्यो, “कैसरिया जान लायी रात ख नव बजे तक दोय सौ सैनिक, सत्तर घुड़सवार, अऊर दोय सौ भाला वालो रखो।
ACT 23:24 अऊर पौलुस की सवारी लायी घोड़ा तैयार रखो, कि ओख फेलिक्स शासक को जवर कुशल सी पहुंच्यो दे।”
ACT 23:25 ओन यो तरह की चिट्ठी भी लिखी:
ACT 23:26 “महानुभव फेलिक्स शासक ख क्लौदियुस लूसियास को नमस्कार।”
ACT 23:27 यो आदमी ख यहूदियों न पकड़ क मार डालनो चाह्यो, पर जब मय न जान्यो कि रोमी हय, त पलटन ले क छुड़ाय लायो।
ACT 23:28 मय जाननो चाहत होतो कि हि ओको पर कौन्सो वजह दोष लगावय हंय, येकोलायी ओख उन्की महासभा म ले गयो।
ACT 23:29 तब मय न जान लियो कि हि अपनी व्यवस्था को विवाद को बारे म ओको पर दोष लगावय हंय, पर मार डालनो यां बान्ध्यो जान को लायक ओको म कोयी दोष नहाय।
ACT 23:30 जब मोख बतायो गयो कि हि यो आदमी की घात म लग्यो हंय त मय न तुरतच ओख तोरो जवर भेज दियो; अऊर आरोप लगावन वालो ख भी आज्ञा दी कि तोरो आगु ओको पर आरोप करे।
ACT 23:31 येकोलायी जसो सैनिकों ख आज्ञा दी होती, वसोच हि पौलुस ख लेय क रातों-रात अन्तिपत्रिस म आयो।
ACT 23:32 दूसरों दिन घुड़सवारों ख ओको संग जान लायी छोड़ क हि किला ख लौट आयो।
ACT 23:33 उन्न कैसरिया पहुंच क शासक ख चिट्ठी दी; अऊर पौलुस ख भी ओको आगु खड़ो करयो।
ACT 23:34 ओन चिट्ठी पढ़ क पुच्छ्यो, “यो कौन्सो राज्य को आय?” अऊर जब जान लियो कि किलिकिया को आय
ACT 23:35 अऊर जब जान लियो कि किलिकिया को आय त ओको सी कह्यो, “जब तोरो पर आरोप लगावन वालो भी आय जायेंन, त मय तोरी सुनवायी करू।” अऊर ओन ओख हेरोदेस को राजभवन म सुरक्षा म रखन की आज्ञा दी।
ACT 24:1 पाच दिन को बाद हनन्याह महायाजक कुछ बुजूर्गों अऊर तिरतुल्लुस नाम को कोयी वकील ख संग ले क आयो। उन्न शासक को आगु पौलुस पर आरोप करयो।
ACT 24:2 जब ऊ बुलायो गयो त तिरतुल्लुस ओको पर दोष लगाय क कहन लग्यो: “हे महानुभव फेलिक्स, तोरो सी हम म बड़ी शान्ति म हय; अऊर तोरो व्यवस्था सी यो जाति लायी बहुत सी बुरायी सुधरतो जावय हंय।
ACT 24:3 येख हम सब जागा अऊर सब तरह सी धन्यवाद को संग मनाजे हंय।
ACT 24:4 पर येकोलायी कि तोख अऊर दु:ख नहीं देनो चाहऊं, मय तोरो सी बिनती करू हय कि कृपा कर क् हमरी दोय एक बाते सुन लेवो।
ACT 24:5 कहालीकि हम न यो आदमी ख उपद्रवी अऊर जगत को पूरो यहूदियों म फूट करावन वालो, अऊर नासरियों को कुपन्थ को मुखिया पायो हय।
ACT 24:6 ओन मन्दिर ख अशुद्ध करनो चाह्यो, पर हम न ओख पकड़ लियो। हम्न ओख अपनी व्यवस्था को अनुसार सजा दियो होतो;
ACT 24:7 पर पलटन को मुखिया लूसियास न ओख जबरदस्ती हमरो हाथ सी छीन लियो,
ACT 24:8 अऊर आरोप लगावन वालो ख तोरो आगु आवन की आज्ञा दी। इन सब बातों ख जिन्को बारे म हम ओख पर दोष लगायजे हंय, तय खुदच ओख जांच कर क् जान लेजो।”
ACT 24:9 यहूदियों न भी ओको साथ दे क कह्यो, या बाते योच तरह की हंय।
ACT 24:10 जब शासक न पौलुस ख बोलन को इशारा करयो, त ओन उत्तर दियो, “मय यो जान क कि तय बहुत सालो सी यो जाति को न्याय कर रह्यो हय, खुशी सी अपनो प्रतिउत्तर देऊ हय।
ACT 24:11 तय खुद जान सकय हय कि जब सी मय यरूशलेम म आराधना करन ख आयो, मोख बारा दिन सी जादा नहीं भयो।
ACT 24:12 उन्न मोख नहीं मन्दिर म नहीं आराधनालयों म, नहीं नगर म कोयी सी वाद विवाद करतो या भीड़ लगातो पायो;
ACT 24:13 अऊर नहीं त हि उन बातों ख, जिन्को हि अब मोरो पर दोष लगावय हंय, तोरो आगु सच को सबूत दे सकय हंय।
ACT 24:14 पर मय तोरो आगु यो मान लेऊ हय कि जो पंथ ख हि कुपन्थ कह्य हंय, ओकीच रीति पर मय अपनो बापदादों को परमेश्वर की सेवा करू हय; अऊर जो बाते व्यवस्था अऊर भविष्यवक्तावों की किताबों म लिखी हंय, उन सब पर विश्वास करू हय।
ACT 24:15 अऊर परमेश्वर सी आशा रखू हय जो हि खुद भी रखय हंय, कि सच्चो अऊर अधर्मी दोयी ख जीन्दो होनो हय।
ACT 24:16 येको सी मय खुद भी कोशिश करू हय कि परमेश्वर को अऊर आदमियों को तरफ मोरो विवेक हमेशा निर्दोष रहे।
ACT 24:17 “बहुत साल को बाद मय यरूशलेम अपनो लोगों ख दान पहुंचान अऊर भेंट चढ़ान आयो होतो।
ACT 24:18 उन्न मोख मन्दिर म, शुद्ध दशा म, बिना भीड़ को संग, अऊर बिना दंगा करयो भेंट चढ़ावतो पायो, उत आसिया को कुछ यहूदी होतो।
ACT 24:19 आसिया सी आयो कुछ यहूदी उत मौजूद होतो। यदि मोरो विरोध म उन्को जवर कोयी बात होती त इत तोरो आगु आय क मोरो पर दोष लगातो।
ACT 24:20 या यो लोग खुदच बताय कि जब मय महासभा को आगु खड़ो होतो, त उन्न मोरो म कौन सो अपराध पायो?
ACT 24:21 केवल या बात ख छोड़ जेक मय न उन्को बीच म खड़ो भय क जोर सी कह्यो होतो : ‘मरयो हुयो को जीन्दो होन को बारे म तुम्हरो आगु मोरो न्याय होय रह्यो हय।’”
ACT 24:22 फेलिक्स न, जो यो पंथ की बाते ठीक-ठीक जानत होतो, उन्ख यो कह्य क टाल दियो, “जब पलटन को मुखिया लूसियास आयेंन, त तुम्हरी बात को फैसला करू।”
ACT 24:23 अऊर सूबेदार ख आज्ञा दी कि पौलुस ख थोड़ो छुट दे क रखवाली करजो, अऊर ओको संगी म सी कोयी ख भी ओकी सेवा करन सी रोकजो मत।
ACT 24:24 कुछ दिनो को बाद फेलिक्स अपनी पत्नी द्रुसिल्ला ख, जो यहूदिनी होती, संग ले क आयो अऊर पौलुस ख बुलवाय क ऊ विश्वास को बारे म जो मसीह यीशु पर हय, ओको सी सुन्यो।
ACT 24:25 जब ऊ सच्चायी, अऊर संय्यम, अऊर आवन वालो न्याय की चर्चा कर रह्यो होतो, त फेलिक्स न डर क उत्तर दियो, “अभी त जा; समय देख क मय तोख फिर बुलाऊं।”
ACT 24:26 ओख पौलुस सी कुछ रुपये मिलन की भी आशा होती, येकोलायी अऊर भी बुलाय-बुलाय क ओको सी बाते करत होतो।
ACT 24:27 पर जब दोय साल बीत गयो त पुरकियुस फेस्तुस, फेलिक्स की जागा पर आयो; अऊर फेलिक्स यहूदियों ख खुश करन की इच्छा सी पौलुस ख जेलखाना मच छोड़्यो गयो।
ACT 25:1 फेस्तुस ऊ राज्य म पहुंचन को तीन दिन बाद कैसरिया सी यरूशलेम ख गयो।
ACT 25:2 तब महायाजक अऊर यहूदियों को मुख्य लोगों न ओको आगु पौलुस पर आरोप लगायो;
ACT 25:3 अऊर ओको सी अनुग्रह कर क् ओको विरोध म यो मांग करयो कि ऊ पौलुस ख यरूशलेम म बुलाये, कहालीकि हि ओख रस्ताच म मार डालन की ताक म होतो।
ACT 25:4 फेस्तुस न उत्तर दियो, “पौलुस कैसरिया म जेलखाना म हंय, अऊर मय खुद भी जल्दी उत जान वालो हय।”
ACT 25:5 तब कह्यो, “तुम म जो अधिकारी हंय हि संग चलो, अऊर यदि यो आदमी न कुछ गलत काम करयो हय त ओको पर दोष लगाये।”
ACT 25:6 ऊ उन्को बीच आठ यां दस दिन रह्य क कैसरिया ख चली गयो; अऊर दूसरों दिन न्याय-आसन पर बैठ क आदेश दियो कि पौलुस ख लायो जाये।
ACT 25:7 जब ऊ आयो त जो यहूदी यरूशलेम सी आयो होतो, उन्न आजु-बाजू खड़ो होय क ओको पर बहुत सो गम्भीर आरोप लगायो, जिन्को सबूत हि नहीं दे सकत होतो।
ACT 25:8 पर पौलुस न उत्तर दियो, “मय न नहीं त यहूदियों की व्यवस्था को अऊर नहीं मन्दिर को अऊर नहीं कैसर को विरुद्ध कोयी अपराध करयो हय।”
ACT 25:9 तब फेस्तुस न यहूदियों ख खुश करन की इच्छा सी पौलुस सी कह्यो, “का तय चाहवय हय कि यरूशलेम ख जाये; अऊर उत मोरो आगु तोरो यो आरोप रख्यो जाये?”
ACT 25:10 पौलुस न कह्यो, “मय कैसर को न्याय-आसन को आगु खड़ो हय; मोरो मुकद्दमा को योच फैसला होनो चाहिये। जसो तय अच्छो तरह जानय हय, यहूदियों को मय न कुछ अपराध नहीं करयो।
ACT 25:11 यदि मय अपराधी हय अऊर मार डालन की सजा को लायक कोयी काम करयो हय, त मरन सी नहीं मुकरतो; पर जिन बातों को हि मोरो पर दोष लगावय हंय, यदि उन्म सी कोयी भी बात सच नहीं ठहरय, त कोयी मोख उन्को हाथ म नहीं सौंप सकय। मय कैसर की दुवा देऊ हय।”
ACT 25:12 तब फेस्तुस न मन्त्रियों की सभा को संग बाते कर क् उत्तर दियो, “तय न कैसर की दुवा दियो हय, तय कैसर कोच जवर जाजो।”
ACT 25:13 कुछ दिन बीतन को बाद अग्रिप्पा राजा अऊर बिरनीके न कैसरिया म आय क फेस्तुस सी मुलाखात करी।
ACT 25:14 उन्को बहुत दिन उत रहन को बाद फेस्तुस न पौलुस को बारे म राजा ख बतायो: “एक आदमी हय, जेक फेलिक्स न जेलखाना म छोड़ गयो हय।
ACT 25:15 जब मय यरूशलेम म होतो, त महायाजक अऊर यहूदियों को बुजूर्गों न ओको विरुद्ध फैसला करयो अऊर चाहयो कि ओख सजा दियो जाये।
ACT 25:16 पर मय न उन्ख उत्तर दियो कि रोमियों की यो रीति नहाय कि कोयी आदमी ख सजा लायी सौंप दे, जब तक ओख अपनो आरोप लगावन वालो को आगु खड़ो होय क अपनो बचाव म उत्तर देन को अवसर नहीं मिलय।
ACT 25:17 येकोलायी जब हि इत जमा भयो, देर करयो बिना, पर दूसरोंच दिन न्याय आसन पर बैठ क ऊ आदमी ख लावन की आज्ञा दियो।
ACT 25:18 जब ओको आरोप लगावन वालो खड़ो भयो, त उन्न असो कोयी अपराध को दोष नहीं लगायो, जसो मय समझत होतो।
ACT 25:19 पर उन्को मतभेद अऊर यीशु नाम को एक आदमी को बारे म, जो मर गयो होतो अऊर पौलुस ओख जीन्दो बतावत होतो, विवाद करत होतो।
ACT 25:20 मय उलझन म होतो कि इन बातों को पता कसो लगाऊं? येकोलायी मय न ओको सी पुच्छ्यो, ‘का तय यरूशलेम जाजो कि उत इन बातों को फैसला होय?’
ACT 25:21 पर जब पौलुस न दुवा दी कि ओको मुकद्दमा को फैसला महाराजाधिराज को इत हो, त मय न आज्ञा दी कि जब तक ओख कैसर को जवर नहीं भेजूं, ओख हिरासत म रख्यो जाये।”
ACT 25:22 तब अग्रिप्पा न फेस्तुस सी कह्यो, “मय भी ऊ आदमी की सुननो चाहऊ हय।” ओन कह्यो, “तय कल सुन लेजो।”
ACT 25:23 येकोलायी दूसरों दिन जब अग्रिप्पा अऊर बिरनीके बड़ो धूमधाम सी आयो अऊर पलटन को मुखिया अऊर नगर को मुख्य लोगों को संग दरबार म पहुंच्यो। तब फेस्तुस न आज्ञा दी कि हि पौलुस ख ले आये।
ACT 25:24 फेस्तुस न कह्यो, “हे राजा अग्रिप्पा अऊर हे सब आदमियों जो इत हमरो संग हय, तुम यो आदमी ख देखय हय, जेको बारे म सब यहूदियों न यरूशलेम म अऊर इत भी चिल्लाय–चिल्लाय क मोरो सी बिनती करी कि येको जीन्दो रहनो ठीक नहाय।
ACT 25:25 पर मय न जान लियो कि ओन असो कुछ नहीं करयो कि मार डाल्यो जाये; अऊर जब कि ओन खुदच महाराजाधिराज की दुवा दी, त मय न ओख भेजन को निर्णय करयो।
ACT 25:26 मय न ओको बारे म कोयी निश्चित बात नहीं पायी कि अपनो मालिक को जवर लिखूं। येकोलायी मय ओख तुम्हरो आगु अऊर विशेष कर क् हे राजा अग्रिप्पा, तोरो आगु लायो हय कि जांचन को बाद मोख कुछ लिखन ख मिले।
ACT 25:27 कहालीकि बन्दी ख भेजनो अऊर जो दोष ओको पर लगायो गयो, उन्ख नहीं बतानो, मोख बेकार जान पड़य हय।”
ACT 26:1 अग्रिप्पा न पौलुस सी कह्यो, “तोख अपनो बारे म बोलन की आज्ञा हय।” तब पौलुस हाथ बढ़ाय क उत्तर देन लग्यो।
ACT 26:2 “हे राजा अग्रिप्पा, जितनो बातों को यहूदी मोरो पर दोष लगावय हंय, अज तोरो आगु उन्को उत्तर देन म मय अपनो ख धन्य समझू हय,
ACT 26:3 विशेष कर क् येकोलायी कि तय यहूदियों को सब सम्बन्ध अऊर विवाद ख जानय हय। येकोलायी मय प्रार्थना करू हय, धीरज सी मोरी सुन।
ACT 26:4 “मोरो चाल-चलन सुरूवात सी अपनी जाति को बीच अऊर यरूशलेम म जसो होतो, ऊ सब यहूदी जानय हंय।
ACT 26:5 यदि हि गवाही देनो चाहवय, त सुरूवात सी मोख पहिचानय हंय कि मय फरीसी होय क अपनो धर्म को सब सी सही पंथ को अनुसार जीवन पर चल्यो।
ACT 26:6 अऊर अब ऊ प्रतिज्ञा म आशा को वजह जो परमेश्वर न हमरो पूर्वजों सी करी होती, मोरो पर मुकद्दमा चल रह्यो हय।
ACT 26:7 उच प्रतिज्ञा को पूरो होन की आशा लगायो हुयो, हमरो बारा गोत्र अपनो पूरो मन सी रात-दिन परमेश्वर की सेवा करत आयो हंय। हे राजा, योच आशा को बारे म यहूदी मोर पर दोष लगावय हंय।
ACT 26:8 जब कि परमेश्वर मरयो हुयो ख जीन्दो करय हय, त तुम्हरो इत या बात कहाली विश्वास को लायक नहीं समझी जावय?
ACT 26:9 “मय न भी समझ्यो होतो कि यीशु नासरी को नाम को विरोध म मोख बहुत कुछ करन ख होनो होतो।
ACT 26:10 अऊर मय न यरूशलेम म असोच करयो; अऊर महायाजक सी अधिकार पा क बहुत सो पवित्र लोगों ख जेलखाना म डाल्यो, अऊर जब हि मार डाल्यो जात होतो त मय भी उन्को विरोध म अपनी सहमती देत होतो।
ACT 26:11 हर आराधनालय म मय उन्ख ताड़ना दिलाय दिलाय क यीशु की निन्दा करवात होतो, इत तक कि गुस्सा को मारे असो पागल भय गयो कि बाहेर को नगरों म भी जाय क उन्ख सतावत होतो।
ACT 26:12 “योच धुन म जब मय महायाजक सी अधिकार अऊर आज्ञा-पत्र लेय क दमिश्क ख जाय रह्यो होतो;
ACT 26:13 त हे राजा, रस्ता म दोपहर को समय मय न आसमान सी सूरज को तेज सी भी बढ़ क एक ज्योति, अपनो अऊर अपनो संग चलन वालो को चारयी तरफ चमकतो हुयो दिख्यो।
ACT 26:14 जब हम सब जमीन पर गिर पड़्यो, त मय न इब्रानी भाषा म, मोरो सी यो कहत हुयो एक आवाज सुन्यो, ‘हे शाऊल, हे शाऊल, तय मोख कहाली सतावय हय? पैनी नोक पर लात मारनो तोरो लायी कठिन हय।’
ACT 26:15 मय न कह्यो, ‘हे प्रभु, तय कौन आय?’ प्रभु न कह्यो, ‘मय यीशु आय, जेक तय सतावय हय।
ACT 26:16 पर तय उठ, अपनो पाय पर खड़ो हो; कहालीकि मय न तोख येकोलायी दर्शन दियो हय कि तोख उन बातों को भी सेवक अऊर गवाह ठहराऊ, जो तय न देख्यो हंय, अऊर उन्को भी जिन्को लायी मय तोख दर्शन देऊ।
ACT 26:17 अऊर मय तोख तोरो लोगों सी अऊर गैरयहूदियों सी छुड़ातो रहूं, जिन्को जवर मय अब तोख येकोलायी भेजू हय
ACT 26:18 कि तय उन्की आंखी खोल कि हि अन्धकार सी ज्योति को तरफ, अऊर शैतान को अधिकार सी परमेश्वर को तरफ फिरेंन; कि पापों की माफी अऊर उन लोगों को संग जो मोरो पर विश्वास करन सी पवित्र करयो गयो हंय, मीरास पाये।’
ACT 26:19 “येकोलायी हे राजा अग्रिप्पा, मय न ऊ स्वर्गीय दर्शन की बात नहीं टाली,
ACT 26:20 पर पहिलो दमिश्क को, तब यरूशलेम को, अऊर तब यहूदियों को सब रहन वालो ख, अऊर गैरयहूदियों ख समझावत रह्यो, कि मन फिरावो अऊर परमेश्वर को तरफ फिर क मन फिराव को लायक काम करो।
ACT 26:21 इन बातों को वजह यहूदी मोख मन्दिर म पकड़ क् मार डालन को कोशिश करत होतो।
ACT 26:22 पर परमेश्वर की मदत सी मय अज तक बन्यो हय अऊर छोटो बड़ो सब को आगु गवाही देऊ हय, अऊर उन बातों ख छोड़ कुछ नहीं कह्य जो भविष्यवक्तावों अऊर मूसा न भी कह्यो कि होन वाली हंय,
ACT 26:23 कि मसीह ख दु:ख उठावनो पड़ेंन, अऊर उच सब सी पहिले मरयो हुयो म सी जीन्दो होय क, हमरो लोगों म अऊर गैरयहूदियों म ज्योति को प्रचार करेंन।”
ACT 26:24 जब ऊ या रीति सी उत्तर दे रह्यो होतो, त फेस्तुस न ऊचो आवाज सी कह्यो, “हे पौलुस, तय पागल हय। बहुत अक्कल न तोख पागल कर दियो हय।”
ACT 26:25 पर पौलुस न कह्यो, “हे महानुभव फेस्तुस, मय पागल नहाय, पर सच्चायी अऊर बुद्धि को बाते कहू हय।
ACT 26:26 राजा भी जेको आगु मय निडर होय क बोल रह्यो हय, या बाते जानय हय; अऊर मोख विश्वास हय कि इन बातों म सी कोयी ओको सी लूकी नहाय, कहालीकि यो घटना कोयी कोना म नहीं भयी।
ACT 26:27 हे राजा अग्रिप्पा, का तय भविष्यवक्तावों को विश्वास करय हय? हव, मय जानु हय कि तय विश्वास करय हय।”
ACT 26:28 तब अग्रिप्पा न पौलुस सी कह्यो, “तय थोड़ोच समझानो सी मोख मसीही बनानो चाहवय हय?”
ACT 26:29 पौलुस न कह्यो, “परमेश्वर सी मोरी प्रार्थना हय कि का थोड़ो म का बहुत म, केवल तयच नहीं पर जितनो लोग अज मोरी सुनय हंय, इन बन्धनों ख छोड़ हि मोरी जसो होय जाये।”
ACT 26:30 तब राजा अऊर शासक अऊर बिरनीके अऊर उन्को संग बैठन वालो उठ खड़ो भयो;
ACT 26:31 अऊर अलग जाय क आपस म कहन लग्यो, “यो आदमी असो त कुछ नहीं करय, जो मृत्यु दण्ड यां जेलखाना म डालन जान को लायक हय।”
ACT 26:32 अग्रिप्पा न फेस्तुस सी कह्यो, “यदि यो आदमी कैसर की दुवा नहीं देतो, त छूट सकत होतो।”
ACT 27:1 जब यो निश्चित भय गयो कि हम जहाज सी इटली जाये, त उन्न पौलुस अऊर कुछ दूसरों बन्दियों ख भी यूलियुस नाम को औगुस्तुस की पलटन को एक सूबेदार को हाथ सौंप दियो।
ACT 27:2 अद्रमुत्तियुम को एक जहाज पर जो आसिया को किनार की जागा म जान पर होतो, चढ़ क हम न ओख खोल दियो, अऊर अरिस्तर्खुस नाम को थिस्सलुनीके को एक मकिदुनिया वासी हमरो संग होतो।
ACT 27:3 दूसरों दिन हम न सैदा म लंगर डाल्यो, अऊर यूलियुस न पौलुस पर कृपा कर क् ओख संगी को इत जान दियो कि ओको आदर करयो जाये।
ACT 27:4 उत सी जहाज खोल क हवा विरुद्ध होन को वजह हम साइप्रस की आड़ म होय क चले;
ACT 27:5 अऊर किलिकिया अऊर पंफूलिया को जवर को समुन्दर म होय क लूसिया को मूरा म उतरयो।
ACT 27:6 उत सूबेदार ख सिकन्दरियां को एक जहाज इटली जातो हुयो मिल्यो, अऊर ओन हम्ख ओको पर चढ़ाय दियो।
ACT 27:7 जब हम बहुत दिनो तक धीरू–धीरू चल क कठिनायी सी कनिदुस को आगु पहुंच्यो, त येकोलायी कि हवा हम्ख आगु बढ़न नहीं देत होती, हम सलमोन को आगु सी होय क क्रेते की आड़ म चल्यो;
ACT 27:8 अऊर ओको किनार–किनार कठिनायी सी चल क शुभलंगरबारी नाम की एक जागा पहुंच्यो, जित सी लसया नगर जवर होतो।
ACT 27:9 जब बहुत दिन बीत गयो अऊर जलयात्रा म जोखिम येकोलायी होत होती कि उपवास को दिन अब बीत गयो होतो। येकोलायी पौलुस न उन्ख यो कह्य क समझायो,
ACT 27:10 “हे सज्जनो, मोख असो लगय हय कि यो यात्रा म संकट अऊर बहुत हानि, नहीं केवल माल अऊर जहाज की बल्की हमरो जीव की भी होन वाली हय।”
ACT 27:11 पर सूबेदार न पौलुस की बातों सी कप्तान अऊर जहाज को मालिक की बातों ख बढ़ क मान्यो।
ACT 27:12 ऊ बन्दरगाह ठन्डी काटन लायी अच्छो नहीं होतो, येकोलायी बहुतों को बिचार भयो कि उत सी जहाज खोल क यदि कोयी रीति सी होय सकय त फीनिक्स पहुंच क ठन्डी काटे। यो त क्रेते को एक बन्दरगाह हय जो दक्षिन–पश्चिम अऊर उत्तर–पश्चिम को तरफ खुलय हय।
ACT 27:13 जब कुछ–कुछ दक्षिन हवा बहन लगी, त यो समझ क कि हमरो कहन की बात पूरो होय गयो, लंगर उठायो अऊर किनार धर क क्रेते को जवर सी जान लग्यो।
ACT 27:14 पर थोड़ी देर म जमीन को तरफ सी एक बड़ो तूफान उठ्यो, जो “यूरकुलीन” कहलावय हय।
ACT 27:15 जब तूफान जहाज पर लग्यो त ऊ ओको आगु रूक नहीं सक्यो, येकोलायी हम न ओख बहन दियो अऊर योच तरह बहतो हुयो चली गयो।
ACT 27:16 तब कौदा नाम को एक छोटो सो द्वीप को आड़ म बहत-बहत हम कठिनायी सी डोंगा ख वश म कर सके।
ACT 27:17 तब मल्लाहों न ओख उठाय क हर एक उपाय कर क् जहाज ख खल्लो सी बान्ध्यो, अऊर सुरतिस को चोरबालू पर रुक जान को डर सी पाल अऊर सामान उतार क बहतो हुयो चली गयो।
ACT 27:18 जब हम न तूफान सी बहुत हिचकोले अऊर धक्का खायो, त दूसरों दिन हि जहाज को सामान फेकन लग्यो;
ACT 27:19 अऊर तीसरो दिन उन्न अपनो हाथों सी जहाज को साज–सामान भी फेक दियो।
ACT 27:20 जब बहुत दिनो तक नहीं सूरज, नहीं तारा दिखायी दियो अऊर बड़ो तूफान चलती रह्यो, त आखरी म हमरो बचन की पूरी आशा जाती रही।
ACT 27:21 जब हि बहुत दिन तक भूखो रह्य गयो, त पौलुस न उन्को बीच म खड़ो होय क कह्यो, “हे लोगों, असो होना होतो कि तुम मोरी बात मान क क्रेते सी नहीं जहाज खोलतो अऊर नहीं विपत्ति आयती अऊर नहीं हानि उठातो।
ACT 27:22 पर अब मय तुम्ख समझाऊ हय कि हिम्मत रखो, कहालीकि तुम म सी कोयी को जीव की हानि नहीं होयेंन, पर केवल जहाज की।
ACT 27:23 कहालीकि परमेश्वर जेको मय आय, अऊर जेकी सेवा करू हय, ओको स्वर्गदूत न अज रात मोरो जवर आय क कह्यो,
ACT 27:24 ‘हे पौलुस, मत डर! तोख कैसर को आगु खड़ो होनो जरूरी हय। देख, परमेश्वर न सब ख जो तोरो संग यात्रा करय हंय, तोख दियो हय।’
ACT 27:25 येकोलायी, हे सज्जनो, हिम्मत रखो; कहालीकि मय परमेश्वर को विश्वास करू हय, कि जसो मोरो सी कह्यो गयो हय, वसोच होयेंन।
ACT 27:26 पर हम्ख कोयी द्वीप पर जाय क रुकनो पड़ेंन।”
ACT 27:27 जब चौदावी रात आयी, अऊर हम अद्रिया समुन्दर म भटकत फिर रह्यो होतो, त अरधी रात को जवर मल्लाहों न अनुमान सी जान्यो कि हम कोयी देश को जवर पहुंच रह्यो हंय।
ACT 27:28 पानी को अंदाज लेन पर उन्न चालीस मीटर गहरो पायो, अऊर थोड़ो आगु बढ़ क तब गहरायी को अंदाज लियो त तीस मीटर पायो।
ACT 27:29 तब गोटाड़ी जागा सी टकरावन को डर सी उन्न जहाज को पीछू को भाग सी चार लंगर डाल्यो, अऊर भुन्सारो होन की प्रार्थना करतो रह्यो।
ACT 27:30 पर जब मल्लाह जहाज पर सी भगनो चाहत होतो, अऊर गर सी लंगर डालन को बहाना सी डोंगा समुन्दर म उतार दियो;
ACT 27:31 त पौलुस न सूबेदार अऊर सैनिकों सी कह्यो, “यदि यो जहाज पर नहीं रहेंन, त तुम भी नहीं बच सकय।”
ACT 27:32 तब सैनिकों न रस्सा काट क डोंगा गिराय दियो।
ACT 27:33 जब भुन्सारो होन पर होतो, तब पौलुस न यो कह्य क्, सब ख जेवन करन लायी समझायो, “अज चौदा दिन भयो कि तुम आस देखत–देखत भूखो रह्यो, अऊर कुछ जेवन नहीं करयो।
ACT 27:34 येकोलायी तुम्ख समझाऊ हय कि कुछ खाय लेवो, जेकोसी तुम्हरो बचाव हो; कहालीकि तुम म सी कोयी को मुंड को एक बाल भी नहीं गिरेंन।”
ACT 27:35 यो कह्य क ओन रोटी ले क सब को आगु परमेश्वर को धन्यवाद करयो अऊर तोड़ क खान लग्यो।
ACT 27:36 तब हि सब भी हिम्मत बान्ध क जेवन करन लग्यो।
ACT 27:37 हम सब मिल क जहाज पर दोय सौ छिहत्तर लोग होतो।
ACT 27:38 जब हि जेवन कर क् सन्तुष्ट भयो, त गहूं ख समुन्दर म फेक क जहाज हल्को करन लग्यो।
ACT 27:39 जब दिन निकल्यो त उन्न ऊ देश ख नहीं पहिचान्यो, पर एक खाड़ी देखी जेको किनार चौरस होतो, अऊर बिचार करयो कि यदि होय सकय त येको पर जहाज ख टिकाये।
ACT 27:40 तब उन्न लंगरों ख खोल क समुन्दर म छोड़ दियो अऊर उच समय पतवारो को बन्धन खोल दियो, अऊर हवा को आगु सामने की पाल चढ़ाय क किनार को तरफ चल्यो।
ACT 27:41 पर दोय समुन्दर को संगम की जागा पड़ क उन्न जहाज ख टिकायो, अऊर गर त धक्का खाय क गड़ गयी अऊर टल नहीं सकी; पर पिछली लहर को बल सी टूटन लगी।
ACT 27:42 तब सैनिकों को यो बिचार भयो कि बन्दियों ख मार डाले, असो नहीं होय कि कोयी तैर क् निकल भगे।
ACT 27:43 पर सूबेदार न पौलुस ख बचान की इच्छा सी उन्ख यो बिचार सी रोक्यो अऊर यो कह्यो, कि जो तैर सकय हंय, पहिले कूद क किनार पर निकल जाये;
ACT 27:44 अऊर बाकी कोयी पटरो पर, अऊर कोयी जहाज की दूसरी चिज को सहारे निकल जाये। यो रीति सी सब कोयी किनार पर बच निकल्यो।
ACT 28:1 जब हम बच निकल्यो, त पता चल्यो कि यो द्वीप माल्टा कहलावय हय।
ACT 28:2 उत को निवासियों न हम पर अनोखी कृपा करी; कहालीकि बरसात को वजह ठंडी होती, येकोलायी उन्न आगी सिलगाय क हम सब ख रुकायो।
ACT 28:3 जब पौलुस न लकड़ियो को गट्ठा जमा कर क् आगी पर रख्यो, त एक सांप आच पा क निकल्यो अऊर ओको हाथ सी लपट गयो।
ACT 28:4 जब उन निवासियों न सांप ख ओको हाथ सी लपट्यो हुयो देख्यो, त आपस म कह्यो, “सचमुच यो आदमी हत्यारों हय कि यानेकि समुन्दर सी बच गयो, तब भी न्याय न जीन्दो रहन नहीं दियो।”
ACT 28:5 तब ओन सांप ख आगी म झटकार दियो, अऊर ओख कुछ हानि नहीं पहुंची।
ACT 28:6 पर हि रस्ता देखत होतो कि ऊ सूज जायेंन यां एकाएक गिर क् मर जायेंन, पर जब हि बहुत देर तक देखत रह्यो अऊर देख्यो कि ओख कुछ भी नहीं भयो, त अपनो बिचार बदल क कह्यो, “यो त कोयी देवता आय।”
ACT 28:7 ऊ जागा को आस पास ऊ द्वीप को मुखिया पुबलियुस की जमीन होती। ओन हम्ख अपनो घर लिजाय क तीन दिन संगी को जसो मेहमानी करी।
ACT 28:8 पुबलियुस को बाप बुखार अऊर पेचीस सी बीमार पड़्यो होतो। येकोलायी पौलुस न ओको जवर घर म जाय क प्रार्थना करी अऊर ओको पर हाथ रख क ओख चंगो करयो।
ACT 28:9 जब असो भयो त ऊ द्वीप को बाकी बीमार आयो अऊर अच्छो करयो गयो।
ACT 28:10 उन्न हमरो बहुत आदर करयो, अऊर जब हम चलन लग्यो त जो कुछ हमरो लायी जरूरी होतो, जहाज पर रख दियो।
ACT 28:11 तीन महीना को बाद हम सिकन्दरियां को एक जहाज पर चल निकल्यो, जो ऊ द्वीप म ठन्डी को समय तक रह्यो होतो, अऊर जेको चिन्ह दियुसकूरी होतो।
ACT 28:12 सुरकूसा म लंगर डाल क हम तीन दिन उतच रह्यो।
ACT 28:13 उत सी हम घुम क रेगियुम म आयो; अऊर एक दिन को बाद दक्षिनी हवा चली, तब हम दूसरों दिन पुतियुली म आयो।
ACT 28:14 उत हम ख भाऊ मिल्यो, अऊर उन्को आग्रह सी हम उन्को इत सात दिन तक रह्यो; अऊर यो रीति सी हम रोम ख चल्यो।
ACT 28:15 उत सी भाऊ हमरो समाचार सुन क अप्पियुस को चौक अऊर तीन–सराये तक हम सी मुलाखात करन ख निकल आयो, जिन्ख देख क पौलुस न परमेश्वर को धन्यवाद करयो अऊर हिम्मत बान्ध्यो।
ACT 28:16 जब हम रोम म पहुंच्यो, त पौलुस ख एक सैनिक को संग जो ओकी रखवाली करत होतो, अकेलो रहन की आज्ञा मिल गयी।
ACT 28:17 तीन दिन को बाद ओन यहूदियों को मुख्य लोगों ख बुलायो, अऊर जब हि जमा भयो त उन्को सी कह्यो, “हे भाऊ, मय न अपनो लोगों को या बापदादों को व्यवहार को विरोध म कुछ भी नहीं करयो, तब भी बन्दी बनाय क यरूशलेम सी रोमियों को हाथ सौंप्यो गयो।
ACT 28:18 उन्न मोख जांच क छोड़ देनो चाह्यो, कहालीकि मोरो म मृत्यु दण्ड को लायक कोयी दोष नहीं होतो।
ACT 28:19 पर जब यहूदी येको विरोध म बोलन लग्यो, त मोख कैसर को दुवा देनो पड़्यो: यो नहीं कि मोख अपनो लोगों पर कोयी दोष लगानो होतो।
ACT 28:20 येकोलायी मय न तुम ख बुलायो हय कि तुम सी मिलूं अऊर बातचीत करू; कहालीकि इस्राएल की आशा लायी मय या संकली सी जकड़्यो हुयो हय।”
ACT 28:21 उन्न ओको सी कह्यो, “न हम न तोरो बारे म यहूदियों सी चिट्ठियां पायी, अऊर नहीं भाऊ म सी कोयी न आय क तोरो बारे म कुछ बतायो अऊर नहीं बुरो कह्यो।
ACT 28:22 पर तोरो बिचार का हय? उच हम तोरो सी सुननो चाहवय हंय, कहालीकि हम जानजे हंय कि हर जागा यो राय को विरोध म लोग बाते करय हंय।”
ACT 28:23 तब उन्न ओको लायी एक दिन ठहरायो, अऊर बहुत सो लोग ओको इत जमा भयो, अऊर ऊ परमेश्वर को राज्य की गवाही देतो हुयो, अऊर मूसा की व्यवस्था अऊर भविष्यवक्तावों की किताबों सी यीशु को बारे म समझाय समझाय क भुन्सारो सी शाम तक वर्नन करतो रह्यो।
ACT 28:24 तब कुछ न उन बातों ख मान लियो, अऊर कुछ न विश्वास नहीं करयो।
ACT 28:25 जब हि आपस म एक राय नहीं भयो, त पौलुस की या बात को कहन पर चली गयो: “पवित्र आत्मा न यशायाह भविष्यवक्ता को द्वारा तुम्हरो बापदादों सी ठीकच कह्यो,”
ACT 28:26 जाय क हि लोगों सी कह्य, कि सुनतो त रहो, पर नहीं समझो, अऊर देखत त रहो, पर नहीं बुझ सको;
ACT 28:27 कहालीकि हि लोगों को मन मोटो अऊर उन्को कान भारी भय गयो हंय, अऊर उन्न अपनी आंखी बन्द करी हंय, असो नहीं होय कि हि कभी आंखी सी देखे अऊर कानो सी सुने अऊर मन सी समझेंन अऊर फिरेंन, अऊर मय उन्ख चंगो करू।
ACT 28:28 “येकोलायी तुम जानो कि परमेश्वर को यो उद्धार की कथा गैरयहूदियों को जवर भेज्यो गयी हय, अऊर हि सुनेंन!”
ACT 28:29 जब ओन यो कह्यो त यहूदी आपस म बहुत विवाद करन लग्यो अऊर उत सी चली गयो।
ACT 28:30 ऊ पूरो दोय साल अपनो किराया को घर म रह्यो,
ACT 28:31 अऊर जो ओको जवर आवत होतो, उन सब सी मिलतो रह्यो अऊर बिना रोक–टोक बहुत निडर होय क परमेश्वर को राज्य को प्रचार करतो अऊर प्रभु यीशु मसीह की बाते सिखातो रह्यो।
ROM 1:1 पौलुस को तरफ सी जो यीशु मसीह को सेवक हय, अऊर जेख परमेश्वर न प्रेरित होन लायी बुलायो गयो, अऊर परमेश्वर को ऊ सुसमाचार लायी अलग करयो गयो।
ROM 1:2 जेकी पहिलेच अपनो भविष्यवक्तावों को द्वारा पवित्र शास्त्र म घोषना कर दी गयी,
ROM 1:3 जेको सम्बन्ध बेटा सी हय; जो शरीर को भाव सी त दाऊद को वंश सी पैदा भयो;
ROM 1:4 अऊर पवित्रता की आत्मा को भाव सी मरयो हुयो म सी जीन्दो होन को वजह सामर्थ को संग परमेश्वर को बेटा ठहरयो हय, यो यीशु मसीह हमरो प्रभु आय।
ROM 1:5 परमेश्वर द्वारा हम्ख अनुग्रह अऊर प्रेरितायी मिली कि ओको नाम को वजह सब जातियों को लोग विश्वास करे अऊर आज्ञा को पालन करे,
ROM 1:6 येको म तुम भी सामिल हो जो रोम म रह्य हय जिन्ख परमेश्वर न यीशु मसीह को होन लायी बुलायो गयो हय।
ROM 1:7 उन सब लोगों लायी मय लिख रह्यो हय जो रोम म परमेश्वर को प्रिय हंय अऊर उन्ख परमेश्वर न अपनो लोग होन लायी बुलायो गयो हंय। हमरो पिता परमेश्वर अऊर प्रभु यीशु मसीह को तरफ सी तुम्ख अनुग्रह अऊर शान्ति मिलती रहे।
ROM 1:8 पहिले मय तुम सब लायी यीशु मसीह को द्वारा अपनो परमेश्वर को धन्यवाद करू हय, कहालीकि तुम्हरो विश्वास की चर्चा पूरो जगत म होय रही हय।
ROM 1:9 परमेश्वर जेकी सेवा मय अपनी आत्मा सी ओको बेटा को सुसमाचार को बारे म करू हय, उच मोरो गवाह हय कि मय तुम्ख कसो तरह लगातार याद करतो रहू हय,
ROM 1:10 अऊर हर समय अपनी प्रार्थनावों म बिनती करू हय कि कोयी रीति सी अब तुम्हरो जवर आवन की मोरी यात्रा परमेश्वर की इच्छा सी पूरी हो।
ROM 1:11 कहालीकि मय तुम सी मिलन की बहुत इच्छा रखू हय ताकि मय तुम्ख आत्मिक वरदान बाट सकू जेकोसी तुम मजबूत होय जावो;
ROM 1:12 मतलब यो कि जब मय तुम्हरो बीच म रहू, त हम ऊ विश्वास को द्वारा जो मोरो म अऊर तुम म हय, एक दूसरों सी प्रोत्साहन पाये।
ROM 1:13 हे भाऊवों, अऊर बहिनों मय नहीं चाहऊं कि तुम येको सी अनजान रहो कि मय न बार बार तुम्हरो जवर आवनो चाह्यो, कि जसो मोख दूसरों गैरयहूदियों म फर मिल्यो, वसोच तुम म भी मिले, पर अब तक रोक्यो गयो।
ROM 1:14 मय यूनानियों अऊर गैरयूनानियों को अऊर बुद्धिमानों अऊर निर्बुद्धियों को कर्जदार आय।
ROM 1:15 येकोलायी मय तुम्ख भी जो रोम म रह्य हय, मय सुसमाचार सुनावन लायी बहुत उत्सुक हय।
ROM 1:16 कहालीकि मय सुसमाचार सी नहीं लजाऊ, येकोलायी कि ऊ हर एक विश्वास करन वालो लायी, पहिले त यहूदी फिर गैरयहूदी लायी, सब लायी उद्धार को निमित्त परमेश्वर की सामर्थ हय।
ROM 1:17 कहालीकि सुसमाचार यो प्रगट करय हय कि परमेश्वर आदमियों ख अपनो प्रति सही कसो बनावय हय यो पहिले सी आखरी तक विश्वास को द्वाराच हय। जसो कि शास्त्र म लिख्यो हय, “जो आदमी परमेश्वर को संग सच्चो हय ऊ लोग विश्वास को द्वारा सी जीन्दो रहेंन।”
ROM 1:18 परमेश्वर को गुस्सा त उन लोगों को पाप अऊर दुष्टता स्वर्ग सी प्रगट होवय हय, जो सच ख बुरायी सी दबायो रखय हंय।
ROM 1:19 येकोलायी कि परमेश्वर को ज्ञान ओको मनो म प्रगट हय, कहालीकि परमेश्वर न उन पर प्रगट करयो हय।
ROM 1:20 जब सी परमेश्वर न जगत की रचना करी तब सी ओको अनदेख्यो गुन, मतलब ओकी सनातन काल की शक्ति अऊर ओको दैव्य स्वभाव यो दोयीच पूरी रीति सी साफ दिखायी देवय हय। ऊ उन चिजों ख जो परमेश्वर न रची हय हि ओख जान सकय हय, त येकोलायी उन लोगों को जवर कोयी बहाना नहाय।
ROM 1:21 यो वजह कि परमेश्वर ख जानय हय पर हि परमेश्वर को रूप म सम्मान या धन्यवाद नहीं देवय। बल्की हि अपनो बिचार म पूरी रीति सी निरर्थक अऊर उन्को खाली दिमाक अन्धारो सी भर गयो हय।
ROM 1:22 हि अपनो आप ख बुद्धिमान समझय हय, पर हि मूर्ख बन गयो हय,
ROM 1:23 अऊर अविनाशी परमेश्वर की महिमा ख नाशवान आदमियों, अऊर पक्षिंयों, अऊर जनावरों, अऊर रेंगन वालो जन्तुवों की मूर्ति की समानता म बदल डाल्यो।
ROM 1:24 यो वजह परमेश्वर न उन्ख उन्को हर एक मन की इच्छावों को अनुसार अशुद्धता लायी छोड़ दियो कि हि आपस म अपनो शरीर को अनादर करे।
ROM 1:25 कहालीकि उन्न परमेश्वर की सच्चायी ख बदल क झूठ बनाय डाल्यो, अऊर सृष्टि की उपासना अऊर सेवा करी, जेक परमेश्वर न बनायो, न कि ऊ सृष्टिकर्ता की जो हमेशा धन्य हय! आमीन।
ROM 1:26 येकोलायी परमेश्वर न उन्ख नीच कामनावों को हाथों सौंप दियो; यहां तक कि उन्की बाईयों न भी स्वाभाविक योन सम्बन्ध को बजाय अस्वभाविक योन सम्बन्ध रखन लगी।
ROM 1:27 वसोच आदमी भी बाईयों को संग स्वाभाविक व्यवहार छोड़ क आपस म कामातुर होय क जलन लग्यो, अऊर आदमियों न आदमियों को संग निर्लज काम कर क् अपनो भ्रम को ठीक फर पायो।
ROM 1:28 जब उन्न परमेश्वर ख पहिचाननो नहीं चाह्यो, त परमेश्वर न भी उन्ख उन्को निकम्मो मन पर छोड़ दियो कि हि अनुचित काम करन लग्यो जो उन्ख नहीं करनो होतो।
ROM 1:29 येकोलायी हि सब तरह को अधर्म, अऊर दुष्टता, अऊर लोभ, अऊर अनैतिकता सी भर गयो; अऊर हि जलन, अऊर हत्या, अऊर झगड़ा, अऊर छल कपट, अऊर बुरायी सी भर गयो, अऊर चुगलखोर होय गयो,
ROM 1:30 अऊर एक दूसरों की बुरायी करन वालो, परमेश्वर सी निन्दा करन वालो, अऊर अय्याशी करन वालो अऊर घमण्डी अऊर अहंकारी अऊर बुरायी करन लायी हर एक रस्ता ढूंढन वालो, अऊर माय बाप की आज्ञा नहीं मानन वालो,
ROM 1:31 हि विवेकहीन अऊर अपनो दियो गयो वाचा तोड़न वालो अऊर एक दूसरों को प्रति अऊर निर्दयी होय गयो।
ROM 1:32 हि त परमेश्वर की यो नियम जानय हंय कि असो काम करन वालो लोग भी मृत्यु दण्ड को लायक हंय, पर भी हि नहीं केवल उन काम करय हंय बल्की हि लोग उन्को कामों ख समर्थन करय हंय।
ROM 2:1 येकोलायी, हे दूसरों पर दोष लगावन वालो, तय चाहे कोयी भी आय, तोरो कोयी अधिकार नहीं हय; कहालीकि जो बात म तय दूसरों पर दोष लगावय हय उच बात म अपनो आप ख भी दोषी ठहरावय हय, येकोलायी कि तय जो दोष लगावय हय खुदच ऊ काम करय हय।
ROM 2:2 हम जानजे हंय कि असो काम करन वालो ख परमेश्वर सच्चायी को अनुसार न्याय करय हय।
ROM 2:3 पर हे आदमी, तय जो असो-असो काम करन वालो पर दोष लगावय हय अऊर खुद उच काम करय हय; का यो समझय हय कि तय परमेश्वर की सजा की आज्ञा सी बच जाजो?
ROM 2:4 का तय ओकी महान दया, अऊर सहनशीलता, अऊर धीरजरूपी धन ख बेकार जानय हय? का निश्चित यो नहीं समझय कि परमेश्वर की कृपा तोख मन फिरावन को तरफ लिजावय हय?
ROM 2:5 पर तय अपनी कठोरता अऊर हटिलो मन को वजह ऊ दिन लायी जेको म परमेश्वर को गुस्सा अऊर सच्चो न्याय प्रगट होयेंन, अपनो आप लायी खुद गुस्सा लाय रह्यो हय।
ROM 2:6 परमेश्वर हम सब ख अपनो कर्मों को अनुसार फर देयेंन:
ROM 2:7 जो अच्छो कर्म म लग्यो रह्य क परमेश्वर को तरफ सी महिमा, अऊर आदर, अऊर अमरता की खोज म हंय, उन्ख परमेश्वर अनन्त जीवन देयेंन;
ROM 2:8 पर जो लोग स्वार्थी हंय अऊर सच्चायी ख नहीं मानय, ताकि बुरो काम कर सके, असो लोगों पर परमेश्वर को गुस्सा अऊर प्रकोप उन पर पड़ेंन।
ROM 2:9 अऊर कठिनायी अऊर संकट हर एक लोग पर जो बुरो करय हय आयेंन, पहिले यहूदी पर फिर गैरयहूदी पर;
ROM 2:10 पर परमेश्वर हर एक ख जो अच्छो कर्म करय हय, उन्ख महिमा अऊर आदर अऊर शान्ति, प्रदान करेंन, पहिले यहूदी ख फिर गैरयहूदी ख।
ROM 2:11 कहालीकि परमेश्वर बिना पक्षपात करयो सब को न्याय करय हय।
ROM 2:12 गैरयहूदियों को जवर मूसा को नियम नहाय अऊर उन्को पापों को न्याय भी बिना व्यवस्था को होयेंन। यहूदियों को जवर मूसा को नियम हय अऊर उन्को पापों को न्याय नियम को अनुसार होयेंन;
ROM 2:13 कहालीकि परमेश्वर को यहां व्यवस्था को सुनन वालो सच्चो नहीं, पर व्यवस्था पर चलन वालो सच्चो ठहराये जायेंन।
ROM 2:14 फिर जब गैरयहूदियों लोगों को जवर व्यवस्था नहाय, पर तब भी हि अपनो आप व्यवस्था पर चलय हंय, यो वजह सी अपनो आप म व्यवस्था हंय तब भी जब की उन्को जवर मूसा की व्यवस्था हंय।
ROM 2:15 उन्को चाल चलन दिखावय हय कि व्यवस्था उन्को दिल म लिख्यो हंय, अऊर उन्को अन्तरमन भी कह्य हंय कि सही हय, अऊर येख ले क उन्को मानसिक संघर्ष अपराधी या निर्दोष ठहरावय हंय;
ROM 2:16 ऊ दिन परमेश्वर, मोरो प्रचार करयो हुयो सुसमाचार को अनुसार यीशु मसीह को द्वारा लोगों की लूकी हुयी बिचार को न्याय करेंन।
ROM 2:17 यदि तय अपनो आप ख यहूदी कह्य हय, अऊर व्यवस्था पर निर्भर रह्य हय, अऊर अपनो परमेश्वर को बारे म तोख घमण्ड हय,
ROM 2:18 अऊर तोख पता हय परमेश्वर तोरो सी का करानो चाहवय हय अऊर अच्छी बातों ख चुननो तय न व्यवस्था सी सिख्यो हय;
ROM 2:19 अऊर अपनो आप पर भरोसा करय हय कि मय अन्धो को अगुवा, अऊर अन्धारो म पड़्यो हुयो की ज्योति,
ROM 2:20 अऊर बुद्धिहीनों को सिखावन वालो, अऊर भोलो लोगों को शिक्षक हय। अऊर तय निश्चित हय कि जो व्यवस्था तोरो जवर हय ओको म पूरो सच्चायी अऊर ज्ञान को समावेश हय।
ROM 2:21 तय जो दूसरों ख सिखावय हय, ऊ अपनो आप ख कहाली नहीं लागु करय? का तय जो चोरी नहीं करन की शिक्षा देवय हय, अऊर तय खुदच चोरी करय हय?
ROM 2:22 तय जो कह्य हय, “व्यभिचार मत करजो,” का खुदच व्यभिचार करय हय? तय जो मूर्तियों सी चिड़ करय हय, का खुदच मन्दिरों ख लूटय हय?
ROM 2:23 तय जो व्यवस्था को बारे म घमण्ड करय हय, का परमेश्वर की व्यवस्था नहीं मान क परमेश्वर को अपमान करय हय?
ROM 2:24 “कहालीकि तुम्हरो वजह गैरयहूदियों म परमेश्वर को नाम की निन्दा करी जावय हय,” जसो शास्त्र म लिख्यो भी हय।
ROM 2:25 यदि तय व्यवस्था को पालन करय त खतना सी फायदा त हय, पर यदि तय व्यवस्था ख नहीं मानय त तोरो खतना बिन खतना की दशा ठहरयो।
ROM 2:26 येकोलायी यदि गैरयहूदी जेको खतना नहीं भयो हय तब भी ऊ व्यवस्था को पालन करय हय त का ओको खतनारहित होन ख भी खतना नहीं गिन्यो जाये?
ROM 2:27 अऊर तुम यहूदियों ख गैरयहूदियों को द्वारा दोषी ठहरायो जायेंन जो भी तुम्हरो जवर लिखी हुयी व्यवस्था अऊर खतना भयो हय पर गैरयहूदी व्यवस्था को पालन करय हय जब की उन्को शारीरिक रूप सी खतना नहीं भयो हय।
ROM 2:28 एक सच्चो यहूदी कौन हय जेको हकिकत म खतना भयो हय? सच्चो यहूदी ऊ नहीं जो केवल बाहरी रूप यहूदी हय जेको खतना केवल शारीरिक हय।
ROM 2:29 पर सच्चो यहूदी उच आय; जो अन्दर सी यहूदी हय; जेको दिल सी खतना भयो हय अऊर यो परमेश्वर की आत्मा को कार्य हय, नहीं कि लिखी हुयी व्यवस्था को। असो आदमी परमेश्वर को तरफ सी प्रशंसा पायेंन नहीं कि आदमी को तरफ सी।
ROM 3:1 येकोलायी गैरयहूदी को आगु तुम्हरो यहूदी होन को का फायदा यां खतना को का फायदा?
ROM 3:2 हर तरह सी बहुत फायदा हय। पहिले त यो कि परमेश्वर को वचन यहूदियों ख सौंप्यो गयो।
ROM 3:3 यदि कुछ अविश्वासी निकले भी त का भयो? का उन्को विश्वासघाती होनो सी परमेश्वर की सच्चायी ख बेकार कर देयेंन?
ROM 3:4 बिल्कुल नहीं! बल्की परमेश्वर सच्चो हय अऊर हर एक आदमी झूठो ठहर सकय हय, जसो शास्त्र म लिख्यो हय, “जब तय खुद को बचाव म बोलेंन तब तय सही ठहरेंन अऊर न्याय करतो समय तय जीत पायेंन।”
ROM 3:5 येकोलायी यदि हमरो बुरो काम परमेश्वर को आगु सही ठहराय देवय हय, का हम कह्य सकजे हय जब परमेश्वर हम्ख सजा देवय हय त का ऊ गलत करय हय? यो त मय आदमी की रीति पर कहू हय।
ROM 3:6 बिल्कुल नहीं! नहीं त परमेश्वर कसो जगत को न्याय करेंन?
ROM 3:7 यदि मोरो झूठ को वजह परमेश्वर की सच्चायी ओकी महिमा लायी, ज्यादा कर क् प्रगट भयी त तब का पापी को जसो मय सजा को लायक ठहरायो जाऊ हय?
ROM 3:8 “हम कहाली बुरायी करबो कि भलायी निकले?” जसो हम पर योच दोष लगायो भी जावय हय, अऊर कुछ कहजे हंय कि येको योच कहनो हय। पर असो ख दोषी ठहरानो ठीक हय।
ROM 3:9 त फिर का भयो? का हम यहूदी गैरयहूदियों सी अच्छो हंय? कभी नहीं; कहालीकि हम यहूदियों अऊर गैरयहूदियों दोयी पर यो दोष लगाय चुक्यो हंय कि हि सब को सब पाप को अधिन म हंय।
ROM 3:10 जसो लिख्यो हंय: कोयी सच्चो नहाय, एक भी नहीं।
ROM 3:11 कोयी समझदार नहाय; कोयी परमेश्वर ख ढूंढन वालो नहाय।
ROM 3:12 सब परमेश्वर सी भटक गयो हंय, सब को सब निकम्मो बन गयो हंय; कोयी भलायी करन वालो नहाय, एक भी नहाय।
ROM 3:13 उन्को शब्द दु:ख दायक खुल्यो हुयो कब्र जसो हय, उन्न अपनी जीबली सी छल करयो हय, उन्को होठों सांपो को जहेर जसो हय।
ROM 3:14 उन्को मुंह श्राप अऊर कड़वाहट सी भरयो हय।
ROM 3:15 ओको पाय खून बहावन ख फुर्तीलो हंय,
ROM 3:16 ओको रस्ता म नाश अऊर कठिनायी हय।
ROM 3:17 उन्न शान्ति को रस्ता नहीं जान्यो।
ROM 3:18 उन्की आंखी को आगु परमेश्वर को आदर नहाय।
ROM 3:19 हम जानजे हय कि व्यवस्था जो कुछ कह्य हय उन्को सीच कह्य हय, जो व्यवस्था को अधीन हंय; येकोलायी कि हर एक मुंह बन्द करयो जाये अऊर पूरो जगत परमेश्वर को न्याय को लायक हंय;
ROM 3:20 कहालीकि व्यवस्था को कामों सी कोयी आदमी परमेश्वर को आगु सच्चो नहीं ठहरे, येकोलायी कि व्यवस्था को द्वारा पाप की पहिचान होवय हय।
ROM 3:21 पर अब व्यवस्था सी अलग परमेश्वर की ऊ सच्चायी प्रगट भयी हय, जेकी गवाही मूसा की व्यवस्था अऊर भविष्यवक्ता देवय हंय,
ROM 3:22 मतलब परमेश्वर की ऊ सच्चायी जो यीशु मसीह पर विश्वास करन सी मिलय हय ऊ सब लोगों लायी हय। कहालीकि येको म कुछ भेद भाव नहाय;
ROM 3:23 येकोलायी कि सब न पाप करयो हय अऊर परमेश्वर की महिमा सी दूर होय गयो हंय,
ROM 3:24 पर ओको अनुग्रह सी ऊ छुटकारा को द्वारा जो मसीह यीशु म हय, सब को सब सच्चो ठहरायो जावय हंय।
ROM 3:25 यीशु ख परमेश्वर न ओको खून म विश्वास को द्वारा असो जेको द्वारा लोगों की पापों की माफी होवय हय ऊ बली ठहरायो, जो विश्वास करन सी कार्यकारी होवय हय, कि जो पाप पहिले करयो गयो अऊर जिन पर परमेश्वर न अपनी सहनशीलता को वजह ध्यान नहीं दियो। उन्को बारे म ऊ अपनी सच्चायी प्रगट करे।
ROM 3:26 बल्की योच समय ओकी सच्चायी प्रगट हो कि जेकोसी ऊ खुदच सच्चो ठहरे, अऊर जो यीशु पर विश्वास करे ओको भी सच्चो ठहरान वालो हो।
ROM 3:27 त घमण्ड कित हय? घमण्ड करन को वजह का हय? ओको पालन करनो का ऊ यो आय? नहीं, पर ओको पर विश्वास करनो।
ROM 3:28 येकोलायी हम यो परिनाम पर पहुंचजे हंय कि आदमी व्यवस्था को कामों सी अलगच, विश्वास को द्वारा सच्चो ठहरय हय।
ROM 3:29 या परमेश्वर केवल यहूदियों कोच आय? का गैरयहूदियों को नहीं? हव, निश्चितच गैरयहूदियों को भी आय।
ROM 3:30 कहालीकि एकच परमेश्वर हय, यहूदियों ख विश्वास सी अऊर गैरयहूदियों ख भी विश्वास को द्वारा सच्चो ठहरायेंन।
ROM 3:31 त का हम व्यवस्था ख विश्वास को द्वारा बेकार ठहराजे हंय? बिल्कुल नहीं! बल्की व्यवस्था ख बनायो रहजे हंय।
ROM 4:1 येकोलायी हम का कहबो हमरो बुजूर्ग अब्राहम ख का मिल्यो?
ROM 4:2 कहालीकि यदि अब्राहम कामों सी सच्चो ठहरायो जातो, त ओख घमण्ड करन कि जागा होती, पर परमेश्वर की नजर म नहीं।
ROM 4:3 पवित्र शास्त्र का कह्य हय? यो कि “अब्राहम न परमेश्वर पर विश्वास करयो, अऊर ओको विश्वास को वजह परमेश्वर न सच्चो स्वीकार करयो।”
ROM 4:4 काम करन वालो की मजूरी देनो दान नहाय, पर हक्क समझ्यो जावय हय।
ROM 4:5 पर जो विश्वास पर निर्भर रह्य हय, नहीं कि कामों पर अऊर परमेश्वर पर विश्वास करय हय, जो परमेश्वर अभक्तिहीन ख भक्तिहीन बनावय हय अऊर ओको योच परमेश्वर पर को विश्वास सी परमेश्वर ओख सच्चो ठहरावय हय।
ROM 4:6 जेक परमेश्वर बिना कर्मों को सच्चो ठहरावय हय, ओख दाऊद भी धन्य कह्य हय:
ROM 4:7 “धन्य हंय हि जिन्को अपराध माफ भयो, अऊर जिन्को पाप झाक्यो गयो।
ROM 4:8 धन्य हय ऊ आदमी जेक परमेश्वर पापी नहीं ठहराये!”
ROM 4:9 जो धन्य होन की बात दाऊद कह्य रह्यो हय, का यहूदी लायी हय नहीं पर यो बिना गैरयहूदी लायी भी हय जसो हम वचन म सुनजे हय यो कहजे हंय, “अब्राहम न परमेश्वर पर विश्वास करयो अऊर ओको विश्वास को वजह परमेश्वर न ओख सच्चो स्वीकार करयो।”
ROM 4:10 त यो कब भयो? का जब ओको खतना होय गयो होतो यां जब ऊ बिना खतना को होतो? नहीं खतना होन को बाद नहीं पर खतना होन सी पहिले भयो।
ROM 4:11 अऊर ओको खतना बाद म भयो होतो अऊर खतना होनो ऊ एक चिन्ह बन्यो ताकि दर्शा सके कि परमेश्वर न ओको खतना होनो सी पहिलेच ओको विश्वास को द्वारा सच्चो स्वीकार करयो अऊर अब्राहम सब विश्वासियों आत्मिक बाप बन्यो यद्दपि ऊ बिना खतना को हय पर विश्वास हय येकोलायी ऊ भी सच्चो स्वीकार करयो जायेंन।
ROM 4:12 अऊर ऊ उन्को भी बाप हय जिन्को खतना भयो हय ताकी ऊ लोग केवल खतना भयो वालोच नहीं होतो, बल्की हमरो बाप अब्राहम को विश्वास को पद चिन्हों पर चलन वालो होतो ऊ अब्राहम जो खतना होनो सी पहिलो चल्यो।
ROM 4:13 जब परमेश्वर न अब्राहम सी अऊर ओको वंश सी प्रतिज्ञा की ऊ जगत को वारिस होयेंन, या प्रतिज्ञा अब्राहम ख व्यवस्था को पालन सीच नहीं मिल्यो पर ओन विश्वास करयो अऊर ऊ परमेश्वर को द्वारा सच्चो स्वीकार करयो गयो यो वजह मिल्यो।
ROM 4:14 अऊर येकोलायी यदि आप मानय हो कि परमेश्वर न दियो भयो प्रतिज्ञा या व्यवस्था को पालन करन वालो को वजह मिल्यो त तुम्हरो विश्वास बेकार हय अऊर परमेश्वर की प्रतिज्ञा भी बेकार होय जावय हय।
ROM 4:15 व्यवस्था सी परमेश्वर को गुस्सा प्रगट होवय हय, पर, जित व्यवस्था नहाय उत ओको उल्लंघन नहाय।
ROM 4:16 योच वजह प्रतिज्ञा विश्वास पर आधारित हय अऊर या परमेश्वर की मुक्त भेंट आय, पूरो अब्राहम को वंशजों लायी, न केवल ओको लायी जो व्यवस्था वालो हय बल्की उन्को लायी भी जो अब्राहम को जसो विश्वास वालो हंय; कहालीकि अब्राहम हम सब को आत्मिक बाप आय,
ROM 4:17 जसो शास्त्र म लिख्यो हय, “मय न तोख बहुत सी राष्ट्रों को बाप ठहरायो हय” अऊर या प्रतिज्ञा परमेश्वर कि नजर म ठीक हय, यो ऊ परमेश्वर हय जेको पर अब्राहम न विश्वास करयो, अऊर जो मरयो हुयो ख जीन्दो करय हय, अऊर जो परमेश्वर अस्तित्व रहित बातों सी प्रगट करय हय।
ROM 4:18 जसो शास्त्र म लिख्यो हय ऊ तय बहुत सी राष्ट्रों को बाप होयेंन “तोरो वंश तारों को जसो होयेंन या बात पर आशा रखन को कोयी वजह नहीं होतो फिर भी अब्राहम न विश्वास अऊर आशा रखेंन।
ROM 4:19 कहालीकि ऊ लगभग सौ साल को होय गयो होतो, पर ओको विश्वास ओको शरीर को जसो कमजोर नहीं भयो होतो, जसो की ओको शरीर लगभग मरयो हुयो होय चुक्यो होतो, अऊर सच्चायी त यो भी हय, सारा को गर्भ भी बच्चां ख जनम नहीं दे सकत होती।
ROM 4:20 तब भी ओन अपनो विश्वास ख नहीं छोड़्यो अऊर न परमेश्वर की प्रतिज्ञा पर शक करयो, ओको विश्वास न सामर्थ सी भरयो अऊर ओन परमेश्वर की महिमा करी;
ROM 4:21 अऊर ओख पूरो भरोसा हय कि जो बात की परमेश्वर न प्रतिज्ञा करी हय, ऊ ओख पूरो करन म भी समर्थ हय।
ROM 4:22 यो वजह परमेश्वर न अब्राहम ख ओको विश्वास को द्वारा ओख सच्चो स्वीकार करयो।
ROM 4:23 अऊर यो वचन, विश्वास को द्वारा सच्चो स्वीकार करनो” केवल ऊ अकेलो लायी नहीं लिख्यो गयो,
ROM 4:24 यो बल्की हमरो लायी भी लिख्यो गयो, जो हम सच्चो ठहरायो गयो, जो हम यीशु पर विश्वास करय हंय जो हमरो प्रभु जो मृत्यु म सी जीन्दो भयो ओको पर विश्वास करजे हय।
ROM 4:25 कहालीकि ऊ हमरो पापों को वजह सौंप्यो गयो, अऊर हम्ख परमेश्वर को संग सच्चो ठहरान लायी मृत्यु म सी जीन्दो भयो।
ROM 5:1 येकोलायी जब हम विश्वास को वजह परमेश्वर को आगु सच्चो भय गयो हय हमरो प्रभु यीशु मसीह को वजह परमेश्वर हमरो बीच शान्ति प्राप्त भयी हय,
ROM 5:2 अब ओको को द्वारा विश्वास को वजह हम परमेश्वर को अनुग्रह म जीवन जीवय हय। अऊर हम ओको आशा पर घमण्ड करय हय जो आशा परमेश्वर की महिमा को संग भागिदार भयो हय।
ROM 5:3 इतनोच नहीं हमरो मुसीबत पर भी केवल योच नहीं, बल्की हम कठिनायियों म भी घमण्ड करे, यो जान क कि कठिनायी सी धीरज,
ROM 5:4 अऊर धीरज सी परख्यो भयो चरित्र बनय हय, अऊर परख्यो हुयो चरित्र सी आशा निकलय हय;
ROM 5:5 अऊर या आशा हम्ख नाराज नहीं करय, कहालीकि परमेश्वर न ओको प्रेम हमरो दिल म डाल्यो गयो हय। बल्की पवित्र आत्मा को द्वारा जो परमेश्वर को प्रेम हमरो मन म डाल्यो गयो हय।
ROM 5:6 कहालीकि जब हम आशाहीन होतो, त ठीक समय पर हम भक्तिहीनों लायी मसीह न अपनो बलिदान दियो।
ROM 5:7 कोयी सच्चो जान को लायी कोयी मरे, यो त दुर्लभ हय; पर होय सकय हय कोयी भलो आदमी को लायी कोयी मरन को भी हिम्मत करे।
ROM 5:8 पर परमेश्वर हम पर अपनो प्रेम की अच्छायी यो रीति सी प्रगट करय हय कि जब हम पापीच होतो तब भी मसीह हमरो लायी मरयो।
ROM 5:9 येकोलायी जब कि हम अब ओको खून को वजह सच्चो ठहरेंन, त ओको द्वारा परमेश्वर को गुस्सा सी कहाली न बचायो जायेंन?
ROM 5:10 जब हम परमेश्वर को दुश्मन होतो पर परमेश्वर न अपनो बेटा को मृत्यु को द्वारा हमरो संग मेल-मिलाप करयो। अऊर जब हम परमेश्वर को संगी हय त मसीह को जीवन द्वारा बहुत जादा हमरो उद्धार करेंन
ROM 5:11 केवल योच नहीं, पर हम अपनो प्रभु यीशु मसीह सी, हमरो परमेश्वर को संग मेल-मिलाप हुयो हय, परमेश्वर म खुश होवय हंय।
ROM 5:12 येकोलायी जसो एक आदमी को द्वारा पाप जगत म आयो, अऊर पाप को द्वारा मृत्यु आयी, अऊर यो रीति सी मृत्यु सब आदमियों म फैल गयी, कहालीकि सब न पाप करयो।
ROM 5:13 जब व्यवस्था को दियो जान पहिलो पाप जगत म होतो, पर जित व्यवस्था नहीं उत पाप गिन्यो नहीं जावय।
ROM 5:14 पर आदम सी ले क मूसा तक मृत्यु न उन लोगों पर भी राज्य करयो, जब की उन लोगों न आदम जसो को पाप नहीं करयो फिर भी मृत्यु न राज्य करयो, जो ऊ आवन वालो को नमुना आय, की अपराध को जसो पाप नहीं करयो।
ROM 5:15 पर जसो अपराध की दशा हय, वसो अनुग्रह को वरदान की नहीं, कहालीकि जब एक आदमी को अपराध सी बहुत लोग मरयो, त परमेश्वर को अनुग्रह अऊर ओको जो दान एक आदमी को, मतलब यीशु मसीह को, अनुग्रह सी भयो बहुत सो लोगों की भलायी लायी कितनो कुछ अऊर बहुत हय।
ROM 5:16 अऊर परमेश्वर को भेंट अऊर एक आदमी को पाप इन दोयी म फरक हय। फिर एक पाप को वजह दोष को न्याय आयो, पर बहुत पूरो पापों को बाद अऊर अपराधी होन को जेको हम लायक नहीं होतो ऊ भेंट आयो।
ROM 5:17 कहालीकि जब एक आदमी को अपराध को वजह मृत्यु न ऊ एकच को द्वारा राज्य करयो, त जो लोग अनुग्रह अऊर धर्मरूपी वरदान बहुतायत सी पावय हंय ऊ एकच आदमी को, मतलब यीशु मसीह को द्वारा जरूरच अनन्त जीवन म राज्य करे।
ROM 5:18 येकोलायी जसो एक अपराध सब आदमियों लायी सजा की आज्ञा को वजह भयो, वसोच एक सच्च को काम भी सब लोगों ख मुक्त करय हय अऊर जीवन देवय हंय।
ROM 5:19 कहालीकि जसो एक आदमी को आज्ञा न मानन सी बहुत लोग पापी ठहरयो वसोच एक आदमी को आज्ञा मानन को वजह सब लोग परमेश्वर आगु सच्चो ठहरायो जायेंन।
ROM 5:20 व्यवस्था को परिचय येकोलायी भयो कि अपराध बढ़ पाये, पर जित पाप बढ़्यो उत परमेश्वर को अनुग्रह अऊर भी जादा भयो,
ROM 5:21 कि जसो पाप न मृत्यु को द्वारा फैलातो हुयो राज्य करयो, वसोच हमरो प्रभु यीशु मसीह को द्वारा अनुग्रह भी अनन्त जीवन को लायी सच्च को द्वारा ठहरातो हुयो राज्य करे।
ROM 6:1 त का हम लगातार पाप करतो रहबो? का हम पाप करतो रहबो कि अनुग्रह बहुत हो?
ROM 6:2 कभी नहीं! हम जब पाप लायी मर गयो त फिर येको आगु ओको म कसो जीवन बितायबो?
ROM 6:3 का तुम नहीं जानय कि हम सब जिन्न मसीह यीशु म बपतिस्मा लियो, ओकी मरन की एकता म बपतिस्मा लियो।
ROM 6:4 यानेकि ऊ मृत्यु को बपतिस्मा पान सी हम ओको संग गाड़्यो गयो, ताकि जसो मसीह बाप की महिमा को द्वारा मरयो हुयो म सी जीन्दो करयो गयो, वसोच हम भी एक नयो जीवन पाये।
ROM 6:5 कहालीकि यदि हम ओकी मृत्यु की समानता म ओको संग जुट गयो हंय, त निश्चित ओको जीन्दो होन कि समानता म भी जुट जाबोंन।
ROM 6:6 हम जानजे हंय कि हमरो पुरानो मनुष्यत्व ओको संग क्रूस पर चढ़ायो गयो ताकि पाप को शरीर बेकार हो जाय, अऊर हम आगु पाप को सेवक मत बनो।
ROM 6:7 कहालीकि जो मर गयो, ऊ पाप को बन्धन सी मुक्त भय गयो।
ROM 6:8 येकोलायी यदि हम मसीह को संग मर गयो, त हमरो विश्वास यो हय कि ओको संग जाबोंन भी।
ROM 6:9 कहालीकि यो जानजे हंय कि मसीह मरयो हुयो म सी जीन्दो होय क फिर सी मरन को नहीं; ओको पर फिर मृत्यु को वश कभी नहीं चलेंन।
ROM 6:10 अऊर ऊ मर गयो ओको पर पाप को बन्धन नहीं हय अऊर अब ऊ परमेश्वर को संग ओको जीवन जीवय हय।
ROM 6:11 असोच तुम भी अपनो बारे म समझो की पाप लायी त मरयो हय, पर यीशु मसीह म परमेश्वर को संग जीन्दो हय।
ROM 6:12 येकोलायी पाप तुम्हरो नाशवान शरीर म राज्य नहीं करे, कि तुम ओकी इच्छावों को अधीन रहो;
ROM 6:13 अपनो शरीर को अंगों ख अधर्म की सेवा लायी पाप को हाथों म नहीं करो। पर मरयो हुयो म सी जीन्दो होन को जसो परमेश्वर को सौंप देवो, अऊर अपनो शरीर को अंगों ख सच्चायी की सेवा को साधन को रूप म परमेश्वर ख सौंप देवो।
ROM 6:14 तब तुम पर पाप की प्रभुता नहीं होयेंन, कहालीकि तुम व्यवस्था को अधीन नहीं बल्की परमेश्वर को अनुग्रह को अधीन हो।
ROM 6:15 त हम का करबो? का हम पाप करबो कहालीकि हम व्यवस्था को अधीन नहाय बल्की परमेश्वर को अनुग्रह को अधीन जीवय हंय? कभीच नहीं!
ROM 6:16 का तुम नहीं जानय कि जेकी आज्ञा मानन लायी तुम अपनो आप ख सेवकों को जसो सौंप देवय हय ओकोच सेवक हो: चाहे पाप को, जेको अन्त मृत्यु हय, चाहे आज्ञाकारिता को, जेको अन्त सच्चायी हय?
ROM 6:17 पर परमेश्वर को धन्यवाद हो कि एक समय पाप को सेवक होतो अब मन सी ऊ उपदेश को तुम न अपनो दिल म स्वीकार करयो, जेको साचा म ढाल्यो गयो होतो,
ROM 6:18 अऊर तुम पाप सी छुड़ायो जाय क सच्चायी को सेवक बन गयो।
ROM 6:19 मय तुम्हरी शारीरिक कमजोरी को वजह आदमियों की रीति पर कहू हय। जसो तुम न अपनो अंगों ख अपवित्रता अऊर व्यवस्था को दुष्ट पन को आगु सेवक कर क् सौंप्यो होतो, वसोच अब अपनो अंगों ख पवित्रता लायी सच्चायी को अधिन सेवक कर क् सौंप देवो।
ROM 6:20 जब तुम पाप को सेवक होतो, त सच्चायी को तरफ सी स्वतंत्र होतो।
ROM 6:21 येकोलायी जिन बातों सी अब तुम, लज्जित होवय हय, उन्को सी ऊ समय तुम का फर पात होतो? कहालीकि उन्को अन्त त मृत्यु हय।
ROM 6:22 पर अब पाप सी स्वतंत्र होय क अऊर परमेश्वर को सेवक बन क तुम ख फर मिल्यो जेकोसी पवित्रता प्राप्त होवय हय, अऊर ओको अन्त अनन्त जीवन हय।
ROM 6:23 कहालीकि पाप की मजूरी त मृत्यु हय, पर हमरो परमेश्वर की भेंट प्रभु मसीह यीशु म अनन्त जीवन हय।
ROM 7:1 हे भाऊवों-बहिनों, का तुम नहीं जानय मय व्यवस्था को जानन वालो सी कहू हय कि जब तक आदमी जीन्दो रह्य हय, तब तक ओको पर व्यवस्था की प्रभुता रह्य हय?
ROM 7:2 उदाहरन लायी एक बिहाव वाली बाई व्यवस्था को अनुसार अपनो पति को संग व्यवस्था को अनुसार तब तक बन्धी हय, जब तक वा जीन्दी हय, पर यदि ओको पति मर जावय हय त बिहाव सम्बन्धी व्यवस्था सी मुक्त होय जावय हय।
ROM 7:3 येकोलायी यदि पति को जीतो-जी वा कोयी दूसरों आदमी की होय जाये, त व्यभिचारिनी कहलायेंन, यदि पति मर जाये, त वा ऊ व्यवस्था सी छूट गयी, यहां तक कि यदि कोयी दूसरों आदमी की होय जाये तब व्यभिचारिनी नहीं ठहरेंन।
ROM 7:4 वसोच हे मोरो भाऊवों-बहिनों, तुम भी मसीह को शरीर को द्वारा व्यवस्था को लायी मरयो हुयो बन गयो हय, कि ऊ दूसरों को होय जावो, जो मरयो हुयो म सी जीन्दो भयो: ताकि हम परमेश्वर को लायी फर लायबो।
ROM 7:5 कहालीकि जब हम शारीरिक स्वभाव को अधीन होतो, त पापों की अभिलासाये जो व्यवस्था को द्वारा होती, मृत्यु को फर पैदा करन को लायी हमरो अंगों म काम करत होती।
ROM 7:6 पर जेको बन्धन म हम होतो ओको लायी मर क, अब व्यवस्था सी असो छूट गयो, कि लेख की पुरानी रीति पर नहीं, बल्की आत्मा की नयी रीति पर सेवा करय हंय।
ROM 7:7 त हम का कहबो? का व्यवस्था पाप हय? कभीच नहीं! बल्की बिना व्यवस्था को मय पाप ख नहीं पहिचानू: व्यवस्था यदि नहीं कहती, कि लालच मत कर त मय लालच ख नहीं जानतो।
ROM 7:8 पर पाप न मौका मिल्तोच आज्ञा को द्वार मोरो म सब तरह को लालच पैदा करयो, कहालीकि बिना व्यवस्था पाप मरयो हुयो हय।
ROM 7:9 मय त व्यवस्था बिना पहिले जीन्दो होतो, पर जब आज्ञा आयी, त पाप जीन्दो भयो, अऊर मय मर गयो।
ROM 7:10 अऊर वाच आज्ञा जो जीवन लान लायी होती, मोरो लायी मरन को वजह बनी।
ROM 7:11 कहालीकि पाप न मौका मिल्तोच आज्ञा को द्वारा मोख बहकायो, अऊर ओकोच द्वारा मोख मार भी डाल्यो।
ROM 7:12 येकोलायी व्यवस्था पवित्र हय, अऊर आज्ञा भी उचित अऊर अच्छी हय।
ROM 7:13 त का ऊ जो अच्छी होती, मोरो लायी मृत्यु ठहरी? कभीच नहीं! पर पाप ऊ अच्छी चिज को द्वारा मोरो लायी मृत्यु ख पैदा करन वालो भयो कि ओको पाप दिख जाये, अऊर आज्ञा को द्वारा पाप बहुतच पापमय ठहरे।
ROM 7:14 हम जानजे हंय कि व्यवस्था त आत्मिक हय, पर मय शारीरिक अऊर पाप को हाथ म बिक्यो हुयो हय।
ROM 7:15 जो मय कहू हय ओख नहीं जानु; कहालीकि जो मय चाहऊ हय ऊ नहीं करू, पर जेकोसी मोख घृना आवय हय उच करू हय।
ROM 7:16 यदि जो मय नहीं चाहऊ उच करू हय, त मय नाम लेऊ हय कि व्यवस्था ठीक हय।
ROM 7:17 त असी दशा म ओको करन वालो मय नहीं, बल्की पाप हय जो मोरो म बस्यो हुयो हय।
ROM 7:18 कहालीकि मय जानु हय कि मोरो म मतलब मोरो शरीर म कोयी अच्छी चिज वाश नहीं करय। इच्छा त मोरो म हय, पर भलो काम मोरो सी बन नहीं सकय।
ROM 7:19 कहालीकि जो अच्छो काम को मय इच्छा करू हय, ऊ त नहीं करय, पर जो बुरायी कि इच्छा नहीं करय, उच करू हय।
ROM 7:20 अब भी यदि मय उच करू हय जेकी इच्छा नहीं करू, त ओको करन वालो मय नहीं रहू, पर पाप जो मोरो म बस्यो हुयो हय।
ROM 7:21 यो तरह मय यो नियम पाऊ हय कि जब भलायी करन की इच्छा करू हय, त बुरायी खच पाऊ हय।
ROM 7:22 कहालीकि मय अन्दर की अन्तर आत्मा सी त परमेश्वर की व्यवस्था सी बहुत खुश रहू हय।
ROM 7:23 पर मोख अपनो शरीर म दूसरों तरह को नियम दिखायी देवय हय, जो मोरी बुद्धी की व्यवस्था सी लड़य हय अऊर मोख पाप को नियम को बन्धन म डालय हय जो मोरो शरीर म हय।
ROM 7:24 मय कसो दु:खी आदमी आय! मोख यो मृत्यु को शरीर सी कौन छुड़ायेंन?
ROM 7:25 जो हम्ख छुटकारा देवय हय ओको प्रभु यीशु मसीह को द्वारा मय परमेश्वर को धन्यवाद हो। येको तरह बुद्धी सी परमेश्वर को नियम को, पर शरीर सी पाप को नियम को पालन करू हय।
ROM 8:1 अब भी जो मसीह यीशु म जीवन जीवय हंय, उन पर सजा की आज्ञा नहीं।
ROM 8:2 कहालीकि जीवन की आत्मा की व्यवस्था न मसीह यीशु म हम्ख पाप की अऊर मृत्यु की व्यवस्था सी स्वतंत्र कर दियो।
ROM 8:3 कहालीकि जो काम व्यवस्था शरीर को वजह दुर्बल होय क नहीं कर सकी, ओख परमेश्वर न करयो, मतलब अपनोच बेटा ख पापमय शरीर की समानता म अऊर पापबलि होन को लायी भेज क, शरीर म पाप पर सजा की आज्ञा दियो।
ROM 8:4 येकोलायी कि व्यवस्था को नियम हम म जो शरीर को अनुसार नहीं बल्की आत्मा को अनुसार चलय हंय, पूरी करी जाये।
ROM 8:5 कहालीकि जो शारीरिक लोग शरीर की बातों पर मन लगावय हंय, पर जो आत्मिक आत्मा की बातों पर मन लगावय हंय।
ROM 8:6 शरीर पर मन लगानो त मरन हय, पर आत्मा पर मन लगानो जीवन अऊर शान्ति हय;
ROM 8:7 कहालीकि शरीर पर मन लगानो त परमेश्वर सी दुस्मनी रखनो हय, कहालीकि नहीं त परमेश्वर की व्यवस्था को अधीन हय अऊर नहीं होय सकय हय;
ROM 8:8 कहालीकि जो पापपूर्न स्वभाव म जीवय हंय, हि परमेश्वर ख खुश नहीं कर सकय।
ROM 8:9 पर जब कि परमेश्वर को आत्मा तुम म बसय हय; त तुम शारीरिक दशा म नहीं, पर आत्मिक दशा म हो। यदि कोयी म मसीह को आत्मा नहीं त ऊ ओको लोग नहीं।
ROM 8:10 यदि मसीह तुम म हय, त शरीर पाप को वजह मरी हुयी हय; पर आत्मा सच्चायी को जीन्दी हय।
ROM 8:11 यदि ओकोच आत्मा जेन यीशु ख मरयो हुयो सी जीन्दो करयो, तुम म बस्यो हुयो हय, त जेन मसीह ख मरयो हुयो सी जीन्दो करयो, ऊ तुम्हरी मरयो हुयो शरीरों ख भी अपनो आत्मा को द्वारा जो तुम म बस्यो हुयो हय, जीन्दो करेंन।
ROM 8:12 येकोलायी हे भाऊवों-बहिनों, हम भौतिक शरीर को कर्जदार त हंय पर येको यो मतलब नहीं कि शरीर को अनुसार दिन काटे,
ROM 8:13 कहालीकि यदि तुम शरीर को अनुसार दिन काटो त मरो, यदि आत्मा सी शरीर की कामों ख मारो त जीन्दो रहो।
ROM 8:14 येकोलायी कि जितनो लोग परमेश्वर को आत्मा को चलायो चलय हंय, हिच परमेश्वर को सन्तान आय।
ROM 8:15 कहालीकि तुम ख गुलाम बनावन वाली आत्मा नहीं मिली कि डरो, पर परमेश्वर की सन्तान की आत्मा मिली हय, जेकोसी हम हे अब्बा, हे पिता कह्य क पुकारजे हंय।
ROM 8:16 परमेश्वर कि आत्मा खुदच हमरी आत्मा को संग गवाही देवय हय, कि हम परमेश्वर की सन्तान आय;
ROM 8:17 अऊर यदि सन्तान हंय त वारिस भी, बल्की परमेश्वर को वारिस अऊर मसीह को संगी वारिस हंय, कि जब हम ओको संग दु:ख उठाये त ओको संग महिमा भी पाये।
ROM 8:18 कहालीकि मय समझू हय कि यो समय को दु:ख अऊर कठिनायी ऊ महिमा को आगु, जो हम पर प्रगट होन वाली हय, कुछ भी नहाय।
ROM 8:19 कहालीकि सृष्टि बड़ी आशाभरी नजर सी परमेश्वर को बेटों को प्रगट होन की बाट देख रही हय।
ROM 8:20 कहालीकि सृष्टि अपनी इच्छा सी नहीं, पर अधीन करन वालो को तरफ सी बेकार को अधीन या आशा सी करी गयी।
ROM 8:21 कि सृष्टि भी खुदच विनाश को गुलामी सी छुटकारा पा क, परमेश्वर की सन्तानों की महिमा की स्वतंत्रता प्राप्त करे।
ROM 8:22 कहालीकि हम जानजे हंय कि पूरी सृष्टि अब तक मिल क कराहती अऊर तकलिफों म पड़ी तड़पय हय;
ROM 8:23 अऊर केवल उच नहीं पर हम भी जिन्को जवर आत्मा को पहिलो फर हय, खुदच करहावय हंय; अऊर अपनायो हुयो बेटा होन को, मतलब अपनो शरीर को छुटकारा की बाट देखय हंय।
ROM 8:24 या आशा को द्वारा हमरो उद्धार भयो हय; पर जो चिज की आशा करी जावय हय, जब ऊ देखनो म आयो त फिर आशा कित रही? कहालीकि जो चिज ख कोयी देख रह्यो हय ओकी आशा का करेंन?
ROM 8:25 पर जो चिज ख हम नहीं देखजे, यदि ओकी आशा रखजे हंय, त धीरज सी ओकी बाट देखजे भी हंय।
ROM 8:26 योच रीति सी आत्मा भी हमरी कमजोरी म मदत करय हय: कहालीकि हम नहीं जानजे कि प्रार्थना कौन्सो रीति सी करनो चाहिये, पर आत्मा खुदच असी आह भर क, जो बयान सी बाहेर हंय, हमरो लायी बिनती करय हय;
ROM 8:27 अऊर परमेश्वर हमरो दिल देखय हय? कहालीकि ऊ पवित्र लोगों लायी कहालीकि आत्मा परमेश्वर की इच्छा को अनुसार बिनती करय हय।
ROM 8:28 हम जानजे हंय कि जो लोग परमेश्वर सी प्रेम रखय हंय, उन्को लायी सब बाते मिल क भलायीच ख पैदा करय हंय; मतलब उन्कोच लायी जो ओकी इच्छा को अनुसार बुलायो हुयो हंय।
ROM 8:29 कहालीकि जिन्ख ओन पहिले सी जान लियो हय उन्ख पहिले सी ठहरायो भी हय कि ओको बेटा को समानता म हो, ताकि ऊ बहुत भाऊवों सी पहिलो ठहरे।
ROM 8:30 फिर जिन्ख ओन पहिले सी ठहरायो, उन्ख बुलायो भी; अऊर जिन्ख बुलायो, उन्ख सच्चो भी ठहरायो हय; अऊर जिन्ख सच्चो ठहरायो, उन्ख महिमा भी दियो हय।
ROM 8:31 अब तक हम इन बातों को बारे म का कहबो? यदि परमेश्वर हमरो तरफ हय, त हमरो विरोध कौन होय सकय हय?
ROM 8:32 जेन अपनो बेटा ख नहीं छोड़्यो, पर ओख हम सब को लायी दे दियो, ऊ ओको संग हम्ख अऊर सब कुछ मुक्त कहाली नहीं देयेंन?
ROM 8:33 परमेश्वर को चुन्यो हुयो पर दोष कौन लगायेंन? परमेश्वरच हय जो उन्ख सच्चो ठहरान वालो हय।
ROM 8:34 फिर कौन हय जो सजा की आज्ञा देयेंन? मसीह यीशु हय जो मर गयो बल्की मुर्दों म सी जीन्दो भी भयो, अऊर परमेश्वर को दायो तरफ हय, अऊर हमरो लायी समझौता भी करय हय।
ROM 8:35 कौन हम ख मसीह को प्रेम सी अलग करेंन? का कठिनायी, यां संकट, यां उपद्रव, यां अकाल, यां नंगायी, यां जोखिम, यां तलवार?
ROM 8:36 जसो शास्त्र म लिख्यो हय, “तोरो लायी हम दिन भर मारयो जाजे हंय; हम काट्यो जान वाली मेंढा को जसो समझ्यो जाजे हंय।”
ROM 8:37 पर इन सब बातों म हम ओको द्वारा जेन हम सी प्रेम करयो हय, पुर्णता सी भी बढ़ क हंय।
ROM 8:38 कहालीकि मय निश्चय जानु हय कि कोयी हम्ख ओको प्रेम सी अलग कर सकय हय, मृत्यु, न जीवन, न स्वर्गदूत, न दुष्ट शासन, न वर्तमान, न भविष्य, न सामर्थ, न ऊचाई,
ROM 8:39 न धरती की गहरायी, अऊर न कोयी धरती की ऊचाई अऊर न जगत की कोयी निर्मिती हम्ख परमेश्वर को प्रेम सी जो हमरो प्रभु मसीह यीशु म हय, अलग कर सकेंन।
ROM 9:1 मय मसीह म सच कहू हय, मय झूठ नहीं बोल रह्यो अऊर मोरो अन्तरमन भी पवित्र आत्मा म गवाही देवय हय
ROM 9:2 कि मोख बड़ो शोक हय, अऊर मोरो मन सदा दुखय हय,
ROM 9:3 कहालीकि मय यहां तक चाहत होतो कि अपनो भाऊवों को लायी जो शरीर को भाव सी मोरो कुटुम्बी आय, खुदच मसीह सी अलग अऊर परमेश्वर शापित होय जावय।
ROM 9:4 हि इस्राएली आय, अऊर परमेश्वर को सन्तान होन को अधिकार अऊर महिमा अऊर वाचाये अऊर व्यवस्था को उपहार अऊर परमेश्वर को उपासना अऊर प्रतिज्ञाये उन्कोच आय।
ROM 9:5 बुजूर्ग भी उन्कोच आय, अऊर मसीह भी शरीर को भाव सी उन म सी भयो। सब को ऊपर परम परमेश्वर राज्य करय हय, अऊर हमेशा-हमेशा धन्य हय! आमीन।
ROM 9:6 असो नहीं कि परमेश्वर कि अपनो वचन पूरो नहीं करयो हंय, कहालीकि जो इस्राएल को वंश हंय, ऊ सब इस्राएली नोहोय।
ROM 9:7 अऊर न अब्राहम को वंश होन को वजह सब ओकी सन्तान ठहरे, पर पवित्र शास्त्र म लिख्यो हय “इसहाक सीच तोरो वंश कहलायेंन।”
ROM 9:8 मतलब शरीर की सन्तान परमेश्वर की सन्तान नोहोय, पर प्रतिज्ञा की सन्तान वंश गिन्यो जावय हंय।
ROM 9:9 कहालीकि प्रतिज्ञा को वचन यो आय: “मय उच समय को अनुसार आऊं, अऊर सारा को एक बेटा होयेंन।”
ROM 9:10 अऊर केवल योच नहीं, पर जब हमरो बाप इसहाक सी रीबका ख दोय बेटा भयो।
ROM 9:11 पर ओको एक बच्चा ख चुन्यो यो पूरो तरह परमेश्वर को खुद को उद्देश को परिनाम होतो, परमेश्वर न उन्को सी कह्यो, “बड़ो छोटो की सेवा करेंन।”
ROM 9:12 या बात परमेश्वर न उन्को जनम सी पहिलो अऊर उन्को कुछ भलो बुरो करन को पहिलो कहीं; त परमेश्वर की पसंद ओको बुलाहट पर निर्भर हय, न कि उन्न का करयो ओको पर ओन कह्यो, “बड़ो छोटो को सेवक होयेंन।”
ROM 9:13 जसो शास्त्र म लिख्यो हय, “मय न याकूब सी प्रेम करयो, पर एसाव ख अप्रिय जान्यो।”
ROM 9:14 येकोलायी हम का कहबो? का परमेश्वर को यहां अन्याय हय? कभीच नहीं।
ROM 9:15 कहालीकि ऊ मूसा सी कह्य हय, “मय जो कोयी पर दया करयो चाहऊं ओको पर दया करू, अऊर जेको पर तरस खानो चाहऊं, ओको पर तरस खाऊ।”
ROM 9:16 अब भी यो नहीं त चाहन वालो की, नहीं परिश्रम वालो की पर दया करन वालो परमेश्वर पर निर्भर रह्य हय।
ROM 9:17 कहालीकि पवित्र शास्त्र म फिरौन सी कह्यो गयो, “मय न तोख येकोलायी खड़ो करयो हय कि तोरो म अपनी सामर्थ दिखाऊं, अऊर मोरो नाम को प्रचार पूरी धरती पर हो।” निर्गमन
ROM 9:18 येकोलायी ऊ जेक चाहवय हय ओको पर दया करय हय, अऊर जेक चाहवय हय ओख कठोर बनाय देवय हय।
ROM 9:19 “त फिर तुम म सी कोयी मोख सी कहेंन यदि कोयी असो हय कि काम को नियंत्रन करन वालो परमेश्वर हय त फिर ऊ हम्ख दोष ठहरावय हय? कौन परमेश्वर की इच्छा को विरोध कर सकय हय?”
ROM 9:20 हे आदमी, तय कौन आय जो परमेश्वर को विरोध म बोलय हय? का गढ़ी हुयी चिज गढ़न वालो सी कह्य सकय हय, “तय न मोख असो कहाली बनायो हय?”
ROM 9:21 का कुम्हार ख माटी पर अधिकार नहाय कि एकच लोंदा म सी एक बर्तन आदर को लायी, अऊर दूसरों ख अनादर को लायी बनाये?
ROM 9:22 त येको म कौन सी नवल की बात हय कि परमेश्वर न अपनो गुस्सा दिखावन अऊर अपनी सामर्थ प्रगट करन की इच्छा सी गुस्सा को बर्तनों की, जो विनाश को लायी तैयार करयो गयो होतो, बड़ो धीरज सीच सही;
ROM 9:23 अऊर दया को बर्तनों पर, जिन्ख ओन महिमा को लायी पहिले सी तैयार करयो, अपनो महिमा को धन ख प्रगट करन की इच्छा करी
ROM 9:24 मतलब हम पर जिन्ख ओन नहीं केवल यहूदियों म सी, बल्की गैरयहूदियों म सी भी बुलायो।
ROM 9:25 जसो ऊ होशे की किताब म भी कह्य हय, “जो मोरो लोग नहीं होतो, उन्ख मय अपनो लोग कहूं; अऊर जो प्रिय नहीं होती, ओख प्रिय कहूं।
ROM 9:26 अऊर असो होयेंन कि जो जागा म उन्को सी यो कह्यो गयो होतो कि तुम मोरो नोहोय, उच जागा हि जीन्दो परमेश्वर की सन्तान कहलाबो।”
ROM 9:27 अऊर यशायाह इस्राएल को बारे म पुकार क कह्य हय, “चाहे इस्राएल की सन्तानों की गिनती समुन्दर को रेतु को बराबर हय, तब भी उन्म सी थोड़ोच बचायो जायेंन।
ROM 9:28 कहालीकि प्रभु अपनो वचन धरती पर पूरो कर क्, जल्दीच ओख सिद्ध करेंन।”
ROM 9:29 जसो यशायाह न पहिले भी कह्यो होतो, “यदि सेनावों को प्रभु हमरो लायी कुछ वंश नहीं छोड़तो, त हम सदोम को जसो होय जातो, अऊर गमोरा को जसोच ठहरतो।”
ROM 9:30 अब हम का कहबो? यो कि गैरयहूदियों न जो सच्चायी की खोज नहीं करत होतो, सच्चायी ख विश्वास सी प्राप्त मतलब ओन सच्चायी ख जो विश्वास सी हय;
ROM 9:31 पर इस्राएली, जो सच्चायी की व्यवस्था की खोज करत होतो ऊ व्यवस्था तक नहीं पहुंच्यो।
ROM 9:32 कोन्को लायी? येकोलायी कि हि विश्वास सी नहीं, पर मानो कर्मों सी ओकी खोज करत होतो। उन्न ऊ ठेस को गोटा पर ठोकर खायी,
ROM 9:33 जसो शास्त्र म लिख्यो हय, “देखो, मय सिय्योन म एक ठेस लगन को गोटा, अऊर ठोकर खान की चट्टान रखू हय, अऊर जो ओको पर विश्वास करे न ऊ लज्जित नहीं होयेंन।”
ROM 10:1 हे भाऊवों-बहिनों, मोरो मन की अभिलाषा अऊर ओको लायी परमेश्वर सी मोरी प्रार्थना हय कि हि उद्धार पाये।
ROM 10:2 कहालीकि मय या बात सी निश्चित रह्य हय, कि परमेश्वर की पर उन्की भक्ति उन्को सच्चो ज्ञान पर आधारित नहीं।
ROM 10:3 कहालीकि हि परमेश्वर की सच्चायी सी अनजान होय क, अऊर अपनी सच्चायी स्थापित करन को कोशिश कर क्, परमेश्वर की सच्चायी को अधीन नहीं भयो।
ROM 10:4 मसीह न व्यवस्था को अन्त करयो ताकि हर कोयी जो विश्वास करय हय परमेश्वर को संग सही सम्बन्ध म आवय हंय।
ROM 10:5 सच्चायी ख बारे म जो व्यवस्था सी मिल्यो हय, ओको वर्नन मूसा यो तरह करय हय। जो कोयी व्यवस्था की आज्ञा मानय हय ऊ जीन्दो रहेंन
ROM 10:6 पर जो सच्चायी विश्वास सी हय, ओको बारे शास्त्र यो कह्य हय, “तय अपनो मन म यो मत कहजो कि स्वर्ग पर कौन चढ़ेंन?” मतलब मसीह ख उतार लावन लायी!
ROM 10:7 यां “अधोलोक म कौन उतरेंन?” मतलब मसीह ख मरयो हुयो म सी जीन्दो कर क् ऊपर लावन को लायी!
ROM 10:8 पर यो का कह्य हय? “परमेश्वर को वचन तुम्हरो जवर हय, तोरो मुंह म अऊर तोरो मन म हय,” यो उच विश्वास को वचन आय, जो हम प्रचार करजे हंय,
ROM 10:9 कि यदि तय अपनो मुंह सी यीशु ख प्रभु जान क अंगीकार करे, अऊर अपनो मन सी विश्वास करे कि परमेश्वर न ओख मरयो हुयो म सी जीन्दो करयो, त तय पक्को उद्धार पायजो।
ROM 10:10 कहालीकि सच्चायी को लायी मन सी विश्वास करन सी हम परमेश्वर को संग सही सम्बन्ध म आवय हय; अऊर मुंह सी कबूल करन सी मुक्ति पावय हय।
ROM 10:11 कहालीकि पवित्र शास्त्र यो कह्य हय, “जो कोयी ओको पर विश्वास करेंन ऊ लज्जित नहीं होयेंन।”
ROM 10:12 यहूदियों अऊर गैरयहूदियों म कुछ अन्तर नहाय, येकोलायी कि अऊर ऊ परमेश्वर सब को प्रभु आय अऊर अपनो सब ख बहुतायत सी आशिषित करय हय जो ओको पुकारयो हय।
ROM 10:13 कहालीकि शास्त्र कह्य हय, “जो कोयी प्रभु को मदत को लायी पुकारयो हय ऊ बचायो जायेंन।”
ROM 10:14 फिर जेको पर उन्न विश्वास नहीं करयो, हि ओको कसो पुकारेंन? अऊर जेको बारे म सुन्यो नहीं ओको पर कसो विश्वास करे? अऊर प्रचारक को बिना कसो सुनेंन?
ROM 10:15 अऊर यदि सन्देश सुनन वालो न भेज्यो नहीं जाये, त कसो प्रचार करेंन? जसो शास्त्र म लिख्यो हय, “उन्को पाय का सुहावनो हंय, जो सुसमाचार ख लावय हय, जो अच्छी बातों को सुसमाचार सुनावय हंय!”
ROM 10:16 पर सब न ऊ सुसमाचार पर कान नहीं लगायो: यशायाह कह्य हय, “हे प्रभु, कौन न हमरो सुसमाचार पर विश्वास करयो हय?”
ROM 10:17 अब भी सन्देश ख सुनन सी विश्वास उपजय हय अऊर सन्देश तब सुन्यो जावय हय जब कोयी मसीह को वचन सुन्यो होवय हय।
ROM 10:18 पर मय कहू हय, का उन्न नहीं सुन्यो? सुन्यो त जरूर हय; कहालीकि शास्त्र म लिख्यो हय, “उन्को स्वर पूरी धरती पर, अऊर उन्को वचन जगत की छोर तक पहुंच गयो हंय।”
ROM 10:19 मय फिर कहू हय, का इस्राएली नहीं जानत होतो? पहिले त मूसा कह्य हय, “मय उन्को द्वारा जो जाति नहाय, तुम्हरो मन म जलन पैदा करू; मय एक विश्वासहीन जाति को द्वारा तुम्ख गुस्सा दिलाऊं।”
ROM 10:20 फिर यशायाह बड़ो हिम्मत को संग कह्य हय, “जो मोख नहीं ढूंढत होतो, उन्न मोख पा लियो; अऊर जो मोख पूछत भी नहीं होतो, उन पर मय प्रगट भय गयो।”
ROM 10:21 पर मय इस्राएल को बारे म ऊ यो कह्य हय, “मय पूरो दिन अपनो हाथ एक आज्ञा नहीं मानन वाली अऊर विरोध करन वाली प्रजा को तरफ हाथ फैलायो रह्यो।”
ROM 11:1 येकोलायी मय कहू हय, का परमेश्वर न अपनी प्रजा ख छोड़ दियो? कभीच नहीं! मय भी त इस्राएली आय; अब्राहम को वंश अऊर बिन्यामीन को गोत्र म सी आय।
ROM 11:2 परमेश्वर न अपनी ऊ प्रजा ख नहीं छोड़्यो, जेक ओन पहिले सीच जान्यो। का तुम नहीं जानय कि पवित्र शास्त्र एलिय्याह को बारे म का कह्य हय, जब ऊ इस्राएल को विरोध म परमेश्वर सी बिनती करय हय?
ROM 11:3 “हे प्रभु, उन्न तोरो भविष्यवक्तावों ख मार डाल्यो, अऊर तोरी अर्पन की वेदियों ख गिराय दियो हय; अऊर मयच अकेलो बच्यो हय, अऊर हि मोख मारन लायी ढूंढ रह्यो हंय।”
ROM 11:4 पर परमेश्वर सी ओख का उत्तर मिल्यो? “मय न अपनो लायी सात हजार आदमियों ख रख्यो हय, जिन्न झुटो बाल भगवान को आगु घुटना नहीं टेक्यो हंय।”
ROM 11:5 ठीक योच रीति सी यो समय भी, अनुग्रह सी चुन्यो हुयो कुछ लोग बाकी हंय।
ROM 11:6 यदि यो अनुग्रह सी भयो हय, त फिर कर्मों सी नहीं; नहीं त अनुग्रह फिर अनुग्रह नहीं रह्यो।
ROM 11:7 येकोलायी परिनाम का भयो? यो की इस्राएली जेकी खोज म होतो, ऊ उन्ख नहीं मिल्यो; पर चुन्यो हुयो ख मिल्यो, अऊर बच्यो लोग कठोर करयो गयो।
ROM 11:8 जसो शास्त्र म लिख्यो हय, “परमेश्वर न उन्ख मन अऊर दिल ख भारी नींद म कर दियो हय, अऊर असी आंखी दियो जो नहीं देखय अऊर असो कान जो नहीं सुन्यो।”
ROM 11:9 अऊर दाऊद कह्य हय, “उन्को भोजनों म फस क बन्दी बन जाये, अऊर ऊ गिरेंन अऊर उन्को पतन होय अऊर सजा मिले।
ROM 11:10 उन्की आंखी पर अन्धारो छाय जाये ताकि नहीं देखे, अऊर तय हमेशा उन्की कमर ख झुकायो रख।”
ROM 11:11 अब भी मय कहू हय का उन्न येकोलायी ठोकर खायी कि गिर जायेंन? कभीच नहीं! पर उन्को गिरन को वजह गैरयहूदियों ख उद्धार मिल्यो, कि उन्ख जलन हो।
ROM 11:12 येकोलायी यदि उन्को गिरनों जगत को लायी धन अऊर उन्की कमी गैरयहूदियों को लायी अच्छो हय, त उन्की भरपूरी सी बहुत बड़ो आशीर्वाद मिलेंन।
ROM 11:13 यो अब मय तुम गैरयहूदियों सी कह्य हय। जब तक मय विशेष रूप सी गैरयहूदियों को लायी प्रेरित हय, त मय अपनी सेवा की बड़ायी करू हय,
ROM 11:14 जलन पैदा करवाय क उन्म सी कुछ एक को उद्धार कराऊं।
ROM 11:15 कहालीकि परमेश्वर को द्वारा उन्को अस्वीकार करयो जानो यो परमेश्वर को संग मिल क फिर उन्को अपनायो जानो सी का मरयो हुयो को जीन्दो जानो नहीं होयेंन?
ROM 11:16 जब भेंट को पहिलो पेड़ा पवित्र ठहरयो, त पूरो गूंथ्यो हुयो आटा भी पवित्र हय; अऊर जब झाड़ कि जड़ी पवित्र ठहरी, त ओकी डगाली भी पवित्र ठहरी हंय।
ROM 11:17 पर यदि कुछ डगाली तोड़ दियो गयो, अऊर तय जंगली जैतून होय क ओको म कलम करयो गयो, अऊर जैतून की जड़ी की शक्ति को सहभागी भयो,
ROM 11:18 त डगालियों पर घमण्ड मत करजो; अऊर यदि तय घमण्ड करेंन त याद रख कि तय जड़ी ख नहीं पर जड़ी तोख सम्भाल रही हय।
ROM 11:19 फिर तय कहजो, “डगालियां येकोलायी तोड़ी कि मोरी ओको म कलम करी जाये।”
ROM 11:20 ठीक हय, हि त अविश्वास को वजह तोड़ी गयी, पर तय विश्वास को बन्यो रह्य हय येकोलायी अभिमानी नहीं हो, पर डर मान,
ROM 11:21 कहालीकि जब परमेश्वर न स्वाभाविक डगालियों ख नहीं छोड़्यो त मोख भी नहीं छोड़ेंन।
ROM 11:22 कहालीकि परमेश्वर की कृपा अऊर कठोरता ख देख! जो गिर गयो उन पर कठोरता, पर तोरो पर कृपा, यदि तय ओको म बन्यो रह्यो त ठीक हय, नहीं त तय भी काट डाल्यो जायेंन।
ROM 11:23 यहूदी भी यदि अविश्वास म नहीं रह्य, त झाड़ कलम करयो जायेंन; कहालीकि परमेश्वर सामर्थ हय उन्ख फिर कलम कर सकय हय।
ROM 11:24 कहालीकि यदि गैरयहूदी ओको जैतून सी, जो स्वभाव सी जंगली हय, काट्यो गयो अऊर स्वभाव को विरुद्ध अच्छो जैतून म कलम करयो गयो, त यो जो यहूदी डगाली हंय, अपनोच जैतून म कहाली नहीं कलम करयो जायेंन।
ROM 11:25 हे भाऊवों अऊर बहिनों, कहीं असो नहीं होय कि तुम अपनो आप ख बुद्धिमान समझ लेवो; येकोलायी मय नहीं चाहऊं कि तुम यो भेद सी अनजान रहो कि जब गैरयहूदियों पूरी रीति सी प्रवेश कर नहीं ले, तब तक हि इस्राएल को एक भाग असोच कठोर रहेंन।
ROM 11:26 अऊर यो रीति सी पूरो इस्राएल उद्धार पायेंन। जसो शास्त्र म लिख्यो हय, “छुटकारा देनो वालो सिय्योन सी आयेंन, अऊर अभक्ति ख याकूब को वंशज सी दूर करेंन;
ROM 11:27 अऊर उन्को संग मोरी योच वाचा बन्धी रहेंन, जब कि मय उन्को पापों ख दूर कर देऊ।”
ROM 11:28 कहालीकि उन्न सुसमाचार अस्वीकार करयो अऊर गैरयहूदियों को वजह यहूदी परमेश्वर को दुश्मन हंय, पर नियुक्त करयो जान को अऊर उन्को बापदादों को वजह परमेश्वर को प्रिय हंय।
ROM 11:29 कहालीकि परमेश्वर कभी नहीं बदलय अऊर ओको चुनाव अऊर आशीषें अटल हय।
ROM 11:30 कहालीकि जसो तुम न पहिले परमेश्वर की आज्ञा नहीं मानी, पर अभी यहूदियों की आज्ञा नहीं मानन सी तुम पर दया भयी;
ROM 11:31 तुम पर जो दया भयी ओको वजह यहूदी अब परमेश्वर की आज्ञा नहीं मान रह्यो हय, येकोलायी अब तुम्हरो जसो उन पर भी दया हो।
ROM 11:32 कहालीकि परमेश्वर न सब ख आज्ञा न मानन को वजह बन्दी बनाय क रख्यो, ताकि ऊ सब पर दया करेंन।
ROM 11:33 आहा! परमेश्वर को धन अऊर बुद्धी अऊर ज्ञान कितनो महान हय! ओको बिचार ख कौन स्पष्ट कर सकय हय, अऊर ओको रस्ता ख कौन समझ सकय हंय!
ROM 11:34 “शास्त्र कह्य हय की प्रभु को मन कौन जान सकय हय? अऊर ओको सल्ला देन सकय हय?
ROM 11:35 का कोयी न परमेश्वर ख कुछ दियो हय जेको बदले म ऊ ओको फिर सी वापस दे? जेको बदला म ओख दियो जाये?”
ROM 11:36 कहालीकि ओको की तरफ सी, अऊर ओकोच द्वारा, अऊर ओकोच द्वारा अऊर ओकोच लायी सब कुछ हय। परमेश्वर की महिमा हमेशा हमेशा होवय रहे! आमीन।
ROM 12:1 येकोलायी हे भाऊवों अऊर बहिनों, मय परमेश्वर की दया याद दिलाय क बिनती करू हय कि अपनो शरीरों ख जीन्दो, अऊर पवित्र, अऊर परमेश्वर ख भातो हुयो बलिदान कर क् चढ़ावो। योच तुम्हरी सच्चो उपासना हय।
ROM 12:2 यो जगत को जसो मत बनो; पर तुम्हरो मन को नयो पन होय जान सी तुम्हरो चाल-चलन भी बदलतो जाये, जेकोसी तुम परमेश्वर की अच्छी, अऊर भावती, अऊर सिद्ध इच्छा अनुभव सी मालूम करतो रहो।
ROM 12:3 कहालीकि मय ऊ अनुग्रह को वजह जो मोख मिल्यो हय, तुम सी हर एक सी कहू हय कि जसो समझनो चाहिये ओको सी बढ़ क कोयी भी अपनो आप ख मत समझो; पर जसो परमेश्वर न हर एक ख विश्वास परिनाम को अनुसार बाट दियो हय, वसोच सुबुद्धी को संग अपनो आप ख समझो।
ROM 12:4 कहालीकि जसी हमरो एक शरीर म बहुत सो अंग हंय, सब अंगों को एक जसो काम नहाय;
ROM 12:5 वसोच हम जो बहुत अंग रह्य क भी मसीह म एक शरीर हंय, अऊर हम एक दूसरों म, मिल्यो हुयो हय जसो एक शरीर म हय।
ROM 12:6 येकोलायी ऊ अनुग्रह को अनुसार जो हम्ख दियो गयो हय, अलग अलग तरह को वरदान मिल्यो हंय, त जेक सन्देश देन को दान मिल्यो होना, त ऊ विश्वास को अनुसार सन्देश दे;
ROM 12:7 यदि सेवा करन को दान मिल्यो होना, त सेवा म लग्यो रहे; यदि कोयी सिखावन वालो होना, त सिखावन म लग्यो रहे;
ROM 12:8 जो प्रोत्साहन देन वालो हो ऊ प्रोत्साहित करे जो दान देन उदारता सी दे; जो अगुवायी करन वालो हो ऊ लगन को संग अगुवायी करे, अऊर जसो दया दिखानो को दान हो, ऊ प्रसन्नता सी करे।
ROM 12:9 तुम्हरो प्रेम निष्कपट होना; बुरायी सी घृना करो; अऊर भलायी म लग्यो रहो।
ROM 12:10 भाईचारा को प्रेम सी एक दूसरों सी प्रेम करनो अऊर एक दूसरों को लायी आदर दिखावन को लायी उत्सुक होनो चाहिये।
ROM 12:11 कोशिश करन म आलसी नहीं होना; आत्मिक उत्साह म भरयो रहो; प्रभु की सेवा करत रहो।
ROM 12:12 आशा म खुशी रहो; कठिनायी म धिरज रखो; अऊर हर समय प्रार्थना म लग्यो रहो।
ROM 12:13 मसीह लोगों ख जो कुछ जरूरत होना ओको म उन्की मदत करो; अऊर मेहमानी करनो म सहभागी लग्यो रहो।
ROM 12:14 अपनो सतावन वालो ख आशीष देवो; आशीष हि देवो श्राप मत देवो।
ROM 12:15 खुशी मनावन वालो को संग खुशी मनावो, अऊर रोवन वालो को संग रोवो।
ROM 12:16 आपस म एक जसो मन रखो; अभिमानी नहीं हो, पर नम्रता सी संगति रखो; अपनो नजर म बुद्धिमान मत बनो।
ROM 12:17 बुरायी को बदला कोयी सी बुरायी मत करो; जो बाते सब लोगों को नजर म भली हंय, उनकी चिन्ता करतो रहो।
ROM 12:18 जहां तक बन सकय, सब आदमियों को संग मेल मिलाप रखो।
ROM 12:19 हे प्रियो, बदला मत लेवो, पर परमेश्वर को गुस्सा ख मौका देवो, कहालीकि शास्त्र म लिख्यो हय, “बदला लेनो मोरो काम आय, प्रभु कह्य हय मयच बदला देऊ।”
ROM 12:20 पर “यदि तोरो दुश्मन भूखो हय त ओख खाना खिलायजो, यदि प्यासो हय त ओख पानी पिलावो; कहालीकि असो करन सी खुद हि तोख शरमायेंन।”
ROM 12:21 बुरायी सी मत हारो, पर भलायी सी बुरायी ख जीत लेवो।
ROM 13:1 हर एक लोग शासक अधिकारियों को अधीन रहे, कहालीकि कोयी अधिकार असो नहीं जो परमेश्वर को तरफ सी नहाय; अऊर जो अधिकार हंय, हि परमेश्वर को ठहरायो हुयो हंय।
ROM 13:2 येकोलायी जो कोयी अधिकार को विरोध करय हय, ऊ परमेश्वर की विधि को सामना करय हय; अऊर जो कोयी ओको सामना करन ऊ सजा पायेंन।
ROM 13:3 कहालीकि शासक अच्छो काम को नहीं, पर बुरो काम लायी डर को वजह हय; यदि तय अधिकारियों सी निडर रहनो चाहवय हय, त अच्छो काम कर, अऊर ओको तरफ सी तोरी प्रशंसा होयेंन;
ROM 13:4 कहालीकि ऊ तोरी अच्छी को लायी परमेश्वर को सेवक हय। पर यदि तय बुरायी करजो, त डर, कहालीकि ऊ तलवार बेकार धरयो हुयो नहाय; अऊर परमेश्वर को सेवक हय कि ओको गुस्सा को अनुसार बुरो काम करन वालो ख सजा दे।
ROM 13:5 येकोलायी तुम अधिकारियों की आज्ञा मान्यो, न त केवल परमेश्वर को सजा को वजह सी नहीं पर हमरो अन्तरमन को वजह सी मान्यो हय।
ROM 13:6 येकोलायी कर भी देवो कहालीकि शासन करन वालो परमेश्वर को सेवक आय अऊर हमेशा योच काम म लग्यो रह्य हंय।
ROM 13:7 येकोलायी हर एक को कर चुकायो करो; जेक कर होना, ओख कर देवो; जेकोसी डरनो चाहिये, ओको सी डरो; जेको आदर करनो चाहिये, ओको आदर करो।
ROM 13:8 आपस म प्रेम ख छोड़ अऊर कोयी बात म कोयी को कर्जदार मत बनो; कहालीकि जो दूसरों सी प्रेम रखय हय, ओनच व्यवस्था को पालन करयो हय।
ROM 13:9 कहालीकि यो कि “व्यभिचार नहीं करनो, हत्या नहीं करनो, चोरी नहीं करनो, लालच नहीं करनो,” अऊर इन ख छोड़ अऊर कोयी भी आज्ञा होय त सब को सारांश यो आज्ञा म पायो जावय हय, “अपनो पड़ोसी सी अपनो जसो प्रेम रख।”
ROM 13:10 प्रेम अपनो संगी बुरायी नहीं करय, येकोलायी प्रेम रखनो व्यवस्था को पालन करय हय।
ROM 13:11 समय ख पहिचान क असोच करो, येकोलायी कि अब तुम्हरो लायी नींद सी जाग जान की घड़ी आय पहुंची हय; कहालीकि जो समय हम न विश्वास करयो होतो, ऊ समय को बिचार सी अब हमरो उद्धार जवर हय।
ROM 13:12 रात बहुत बीत गयी हय, अऊर दिन निकलन पर हय; येकोलायी हम अन्धारो को कामों ख छोड़ क ज्योति को अवजार बान्ध लेवो।
ROM 13:13 जसो लोग दिन को प्रकाश म रह्य हय, वसोच हम सीधी चाल चले, नहीं कि काम-वासना अऊर पियक्कड़पन म, नहीं अनैतिकता अऊर लुचपन म, अऊर नहीं झगड़ा अऊर जलन म।
ROM 13:14 बल्की प्रभु यीशु मसीह ख पहिचान लेवो, अऊर अपनो मानव स्वभाव की इच्छा ख पूरो करन म मत लग्यो रहो।
ROM 14:1 जो विश्वास म कमजोर हय, ओख अपनी संगति म लेवो, पर ओकी शंकावों बिचारों पर विवाद करन लायी नहीं।
ROM 14:2 कुछ लोगों ख विश्वास हय कि सब कुछ खानो ठीक हय, पर जो विश्वास म कमजोर हय ऊ केवल साकाहारी खावय हय।
ROM 14:3 खान वालो नहीं खान वालो ख तुच्छ मत जानो, अऊर नहीं खान वालो पर दोष नहीं लगाये; कहालीकि परमेश्वर न ओख स्वीकार करयो हय।
ROM 14:4 तय कौन आय जो दूसरों को सेवक पर दोष लगावय हय? ओको स्थिर रहनो यां गिर जानो ओको मालिक सीच सम्बन्ध रखय हय; बल्की ऊ स्थिरच कर दियो जायेंन, कहालीकि प्रभु ओख स्थिर रख सकय हय।
ROM 14:5 कोयी आदमी त एक दिन ख दूसरों दिन सी अच्छो मानय हय, अऊर कोयी सब दिनो ख एक जसो मानय हय। हर एक बुद्धी की बात अपनोच मन म निश्चय कर लेवो।
ROM 14:6 जो कोयी एक दिन ख महत्वपूर्न मानय हय, ऊ प्रभु को आदर लायी मानय हय। जो सब कुछ खावय हय, ऊ प्रभु ख आदर देनो को लायी खावय हय, कहालीकि ऊ अपनो परमेश्वर को धन्यवाद करय हय, अऊर जो कुछ नहीं खावय, ऊ प्रभु ख आदर देनो को लायी नहीं खावय अऊर परमेश्वर को धन्यवाद करय हय।
ROM 14:7 कहालीकि हम म सी नहीं त कोयी अपनो लायी जीवय हय अऊर नहीं कोयी अपनो लायी मरय हय।
ROM 14:8 यदि हम जीन्दो हंय, त प्रभु को लायी जीन्दो हंय; अऊर यदि मरजे हंय, त प्रभु को लायी मरजे हंय; अब भी हम जीबो यां मरबो, हम प्रभु कोच आय।
ROM 14:9 कहालीकि मसीह येकोच लायी मरयो अऊर जीन्दो भी भयो कि ऊ मरयो हुयो अऊर जीन्दो दोयी को प्रभु आय।
ROM 14:10 तुम त, केवल सागभाजीच खावय हय, तुम दूसरों पर न्याय कहाली देवय हय? अऊर तुम जो भी खावय हय, तुम दूसरों विश्वासियों ख तुच्छ कहाली समझय हय? हम सब लोग ओको आगु न्याय करन लायी परमेश्वर को सामने खड़ो होबो।
ROM 14:11 शास्त्र म लिख्यो हय, “प्रभु कह्य हय, मोरो जीवन की कसम कि हर एक घुटना मोरो सामने टेकेंन, अऊर हर एक जीबली मान लेयेंन कि मय परमेश्वर आय।”
ROM 14:12 येकोलायी हम म सी हर एक परमेश्वर ख अपनो लेखा जोखा दे।
ROM 14:13 येकोलायी हम एक दूसरों को न्याय करनो बन्द करो अऊर येको बदले म निश्चय करो कि, अपनो भाऊ को सामने ठोकर खाय कर पाप म पढ़नो को वजह मत बनो।
ROM 14:14 प्रभु यीशु म एक होनो को वजह म जानय हय, कोयी भोजन अपनो आप सी अशुद्ध नहीं, पर जो ओख अशुद्ध समझय हय ओको लायी अशुद्ध हय।
ROM 14:15 यदि तोरो भाऊ यां बहिन तोरो खान को वजह उदास होवय हय, त फिर तय प्रेम की रीति सी नहीं चलय; जेको लायी मसीह मरयो, ओको तय अपनो जेवन को द्वारा नाश मत कर।
ROM 14:16 जेक तुम अच्छो समझय हय ओको कोयी ख बुरो मत कहन देजो।
ROM 14:17 कहालीकि परमेश्वर को राज्य खानो-पीनो नहीं, पर सच्चायी शान्ति अऊर ऊ खुशी हय जो पवित्र आत्मा सी होवय हय।
ROM 14:18 जो कोयी यो रीति सी मसीह की सेवा करय हय, ऊ परमेश्वर ख भावय हय अऊर आदमियों म स्वीकारन लायक ठहरय हय।
ROM 14:19 येकोलायी हम उन बातों म लग्यो रहबोंन जिन्कोसी मेल-मिलाप अऊर एक दूसरों की उन्नति हो।
ROM 14:20 जेवन को लायी जो परमेश्वर न करयो ओको नाश मत करो। सब कुछ शुद्ध त हय, पर ऊ आदमी को लायी बुरो हय जेक ओको जेवन सी ठोकर लगय हय।
ROM 14:21 अच्छो त यो हय कि तय न मांस खाजो नहीं अंगूररस पीजो, नहीं अऊर कुछ असो करजो जेकोसी तोरो विश्वासी भाऊ ठोकर खाये।
ROM 14:22 तोरो जो विश्वास हय, ओख परमेश्वर को आगु अपनोच मन म रख धन्य हय ऊ जो या बात म, जेक ऊ ठीक समझय हय, अपनो आप ख दोषी नहीं ठहरावय।
ROM 14:23 पर जो लोग सन्देश कर क् खावय हय उन्ख परमेश्वर दोषी ठहरय हय, कहालीकि ओको कार्य विश्वास को आधार पर नहीं अऊर जो कुछ विश्वास को आधार पर नहीं हय, पाप हय।
ROM 15:1 हम बलवानो ख होना कि कमजोरों की कमजोरी ख सहे, नहीं कि अपनो आप ख खुश करे।
ROM 15:2 हम म सी हर एक ओकी अच्छायी को लायी खुश करे कि उन्की उन्नति होय।
ROM 15:3 कहालीकि मसीह न अपनो आप ख खुश नहीं करयो, पर जसो शास्त्र म लिख्यो हय: “तोरो निन्दा करन वालो की निन्दा मोरो पर आय गयी हय।”
ROM 15:4 जितनी बाते पहिले सी लिखी गयी, हि हमारीच शिक्षा लायी लिखी गयी हंय कि हम धीरज अऊर पवित्र शास्त्र को प्रोत्साहन द्वारा आशा रखबो।
ROM 15:5 धीरज अऊर शान्ति को दाता परमेश्वर तुम्ख यो वरदान दे कि मसीह यीशु को अनुसार आपस म एक मन रहो।
ROM 15:6 ताकि तुम एक मन अऊर एक स्वर म हमरो प्रभु यीशु मसीह को पिता परमेश्वर की महिमा करो।
ROM 15:7 येकोलायी, जसो मसीह न परमेश्वर की महिमा लायी तुम्ख स्वीकार करयो हय, वसोच तुम भी एक दूसरों ख स्वीकार करो।
ROM 15:8 येकोलायी मय कहू हय कि जो प्रतिज्ञाये बापदादों ख दियो गयी होती उन्ख मजबूत करन लायी मसीह, परमेश्वर की सच्चायी को नमस्कार देन लायी, खतना करयो हुयो यहूदी लोगों को सेवक बन्यो;
ROM 15:9 अऊर गैरयहूदी भी दया को वजह परमेश्वर की महिमा करे; जसो शास्त्र म लिख्यो हय, “येकोलायी मय गैरयहूदियों म तोरो नाम को धन्यवाद करू, अऊर तोरो नाम को भजन गाऊं।”
ROM 15:10 फिर कह्य हय, “हे गैरयहूदियों को सब लोगों, परमेश्वर को लोगों को संग खुशी मनावो।”
ROM 15:11 अऊर फिर, “हे गैरयहूदियों को सब लोगों, प्रभु को लोगों को संग स्तुति करो; अऊर हे राज्य को सब लोगों, ओकी स्तुति करो।”
ROM 15:12 अऊर फिर यशायाह कह्य हय, “यिशै की एक वंशज प्रगट होयेंन, अऊर जो गैरयहूदियों पर शासक करेंन अऊर ऊ लोग ओको पर गैरयहूदियों आशा रखेंन।”
ROM 15:13 परमेश्वर जो आशा को दाता हय तुम्ख विश्वास करन म सब तरह की खुशी अऊर शान्ति सी परिपूर्न करे, कि पवित्र आत्मा की सामर्थ सी तुम्हरी आशा बढ़ती जाये।
ROM 15:14 हे मोरो भाऊवों अऊर बहिनों, मय खुद तुम्हरो बारे म निश्चित जानु हय कि तुम भी खुदच भलायी सी भरयो अऊर ईश्वरीय ज्ञान सी भरपूर हो, अऊर एक दूसरों ख चिताय सकय हय।
ROM 15:15 तब भी मय न या चिट्ठी म कहीं-कहीं याद दिलावन लायी तुम्ख जो बहुत हिम्मत कर क् लिख्यो। यो अनुग्रह को वजह भयो जो परमेश्वर न मोख दियो हय,
ROM 15:16 कि मय गैरयहूदियों को लायी मसीह यीशु को सेवक होय क परमेश्वर को सुसमाचार की सेवा याजक को जसो करू, जेकोसी गैरयहूदियों को मानो चढ़ायो जानो, पवित्र आत्मा सी पवित्र बन क स्वीकार करयो जाय।
ROM 15:17 येकोलायी उन बातों को बारे म जो परमेश्वर सी सम्बन्ध रखय हंय, मय मसीह यीशु म बड़ायी कर सकू हय।
ROM 15:18 कहालीकि उन बातों ख छोड़ मोख अऊर कोयी बात को बारे म कहन को हिम्मत नहाय, जो मसीह म गैरयहूदियों की अधीनता को लायी वचन, अऊर कर्म,
ROM 15:19 अऊर चिन्हों, चमत्कारों को कामों की सामर्थ सी, अऊर पवित्र आत्मा की सामर्थ सी मोरोच द्वारा करयो; यहां तक कि मय न यरूशलेम सी ले क चारयी तरफ इल्लुरिकुम तक मसीह को सुसमाचार को पूरो प्रचार करयो।
ROM 15:20 पर मोरो मन की उमंग यो हय कि जित मसीह को नाम नहीं लियो गयो, वहांच सुसमाचार सुनाऊ असो नहीं होय कि दूसरों को पायवा पर घर बनाऊ।
ROM 15:21 पर जसो शास्त्र म लिख्यो हय वसोच हो, “जिन्ख ओको सुसमाचार नहीं पहुंच्यो, हिच देखेंन अऊर जिन्न नहीं सुन्यो हिच समझेंन।”
ROM 15:22 येकोलायी मय तुम्हरो जवर आवन सी बार बार रुक्यो रह्यो।
ROM 15:23 पर अब इन देशों म मोरो काम लायी अऊर जागा नहीं होती, अऊर बहुत सालो सी मोख तुम्हरो जवर आवन की इच्छा हय।
ROM 15:24 येकोलायी जब मय इसपानिया जातो तब होतो हुयो तुम्हरो जवर आऊं, कहालीकि मोख आशा हय कि ऊ यात्रा म तुम सी भेंट करू, अऊर जब तुम्हरी संगति सी मोरो जी भर जाये त तुम मोख कुछ दूर आगु पहुंचाय देवो।
ROM 15:25 पर अभी त मय परमेश्वर को लोगों की सेवा करन लायी यरूशलेम जाय रह्यो हय।
ROM 15:26 कहालीकि मकिदुनिया अऊर अखया को लोगों ख यो अच्छो लग्यो कि यरूशलेम को परमेश्वर को लोगों म गरीबों की मदत करन लायी कुछ भेंट जमा करे।
ROM 15:27 उन्ख अच्छो त लग्यो, पर हि उन्को कर्जदार भी हंय, कहालीकि यदि गैरयहूदी उन्की आत्मिक बातों म सहभागी भयो, त उन्ख भी ठीक हय कि शारीरिक बातों म उन्की सेवा करे।
ROM 15:28 येकोलायी मय यो काम पूरो कर क् अऊर उन्ख भेंट सौंप क तुम्हरो जवर सी होतो हुयो स्पेन ख जाऊं।
ROM 15:29 अऊर मय जानु हय कि जब मय तुम्हरो जवर आऊं, त मसीह की पूरी आशीर्वाद को संग आऊं।
ROM 15:30 हे भाऊवों अऊर बहिनों, हमरो प्रभु यीशु मसीह को अऊर पवित्र आत्मा को प्रेम ख याद दिलाय क मय तुम सी बिनती करू हय, कि मोरो लायी परमेश्वर सी प्रार्थना करन म मोरो संग मिल क मगन रहो।
ROM 15:31 कि मय यहूदियों नाम को अविश्वासियों लोगों सी बच्यो रहूं, अऊर मोरी ऊ सेवा जो यरूशलेम को लायी हय, परमेश्वर को लोगों ख भाये;
ROM 15:32 अऊर मय परमेश्वर की इच्छा सी तुम्हरो जवर खुशी को संग आय क तुम्हरो संग भेंट करू।
ROM 15:33 शान्ति को परमेश्वर तुम सब को संग रहे। आमीन।
ROM 16:1 मय तुम सी फीबे को लायी जो हमरी बहिन अऊर किंख्रिया की मण्डली की सेविका आय, बिनती करू हय
ROM 16:2 कि तुम, जसो कि परमेश्वर को लोगों ख होना, ओख प्रभु म स्वीकार करो; अऊर जो कोयी बात म ओख तुम्हरी जरूरत हो, ओकी मदत करो, कहालीकि ऊ भी बहुतों की बल्की मोरी भी मदत करन वाली होती।
ROM 16:3 प्रिस्का अऊर अक्विला ख जो मसीह यीशु म मोरो सहकर्मी हंय, प्रनाम।
ROM 16:4 उन्न मोरो जीव लायी अपनोच जीवन जोखिम म डाल दियो होतो; अऊर केवल मयच नहीं, बल्की गैरयहूदियों की पूरी मण्डली भी उन्को धन्यवाद करय हय।
ROM 16:5 ऊ मण्डली ख भी नमस्कार जो उन्को घर म हय। मोरो प्रिय इपैनितुस ख, जो मसीह को लायी आसिया प्रान्त को पहिलो फर आय, नमस्कार।
ROM 16:6 मरियम ख, जेन तुम्हरो लायी बहुत मेहनत करयो, नमस्कार।
ROM 16:7 अन्द्रुनीकुस अऊर यूनियास ख जो मोरो कुटुम्बी आय, अऊर मोरो संग बन्दी भयो होतो अऊर प्रेरितों म नामी हंय, अऊर मोरो सी पहिले मसीही भयो होतो, नमस्कार।
ROM 16:8 अम्पलियातुस ख, जो प्रभु म मोरो प्रिय हय, नमस्कार।
ROM 16:9 उरबानुस ख, जो मसीह म हमरो सहकर्मी हय, अऊर मोरो प्रिय इस्तखुस ख नमस्कार।
ROM 16:10 अपिल्लेस ख जो मसीह म सच्चो निकल्यो, नमस्कार। अरिस्तुबुलुस को घरानों ख नमस्कार।
ROM 16:11 मोरो कुटुम्बी हेरोदियोन ख नमस्कार। नरकिस्सुस को घराना को जो लोग प्रभु म हंय, उन्ख नमस्कार।
ROM 16:12 त्रूफेना अऊर त्रूफोसा ख जो प्रभु म मेहनत करय हंय, नमस्कार। प्रिय पिरसिस ख, जेन प्रभु म बहुत मेहनत करयो, नमस्कार।
ROM 16:13 रूफुस ख जो प्रभु म चुन्यो हुयो हय अऊर ओकी माय ख, जो मोरी होती माय हय, दोयी ख नमस्कार।
ROM 16:14 असुंक्रितुस अऊर फिलगोन अऊर हिरमेस अऊर पत्रुबास अऊर हिर्मास अऊर उन्को संग को भाऊवों ख नमस्कार।
ROM 16:15 फिलुलुगुस अऊर यूलिया अऊर नेर्युस अऊर ओकी बहिन, अऊर उलुम्पास अऊर उन्को संग को सब लोगों ख नमस्कार।
ROM 16:16 आपस म पवित्र चुम्मा सी नमस्कार करो। तुम ख मसीह की पूरी मण्डलियों को तरफ सी नमस्कार।
ROM 16:17 अब हे भाऊवों अऊर बहिनों, मय तुम सी बिनती करू हय, कि जो लोग ऊ शिक्षा को विरुद्ध, जो तुम न पायो हय, फूट डालन अऊर ठोकर खिलावन को वजह होवय हंय, पहिचान लियो करो अऊर उन्को सी दूर रहो।
ROM 16:18 कहालीकि असो लोग हमरो प्रभु मसीह की नहीं, पर अपनो पेट की सेवा करय हंय; अऊर चिकनी चुपड़ी बातों सी सीधो साधो मन को लोगों ख बहकाय देवय हंय।
ROM 16:19 तुम्हरी आज्ञा मानन की चर्चा सब लोगों म फैल गयी हय, येकोलायी मय तुम्हरो बारे म खुश हय, पर मय यो चाहऊ हय कि तुम भलायी को लायी बुद्धिमान पर बुरायी को लायी भोलो बन्यो रहो।
ROM 16:20 शान्ति को परमेश्वर शैतान ख तुम्हरो पाय सी जल्दीच कुचलाय दे। हमरो प्रभु यीशु मसीह को अनुग्रह तुम पर होतो रहे। हमरो प्रभु यीशु मसीह को अनुग्रह तुम पर होतो रहे।
ROM 16:21 मोरो सहकर्मी तीमुथियुस को, अऊर मोरो कुटुम्बियों लूकियुस अऊर यासोन अऊर सोसिपत्रुस को तुम ख नमस्कार।
ROM 16:22 मोख चिट्ठी लिखन वालो तिरतियुस को, प्रभु म तुम ख नमस्कार।
ROM 16:23 गयुस जो मोरी अऊर मण्डली की पाउनचार करन वालो हय, ओको तुम्ख प्रनाम। इरास्तुस जो नगर को व्यवस्थापक हय, अऊर भाऊ क्वारतुस को तुम ख नमस्कार।
ROM 16:24 हमरो प्रभु यीशु मसीह को अनुग्रह तुम पर होतो रहे। आमीन।
ROM 16:25 अब जो तुम ख मोरो सुसमाचार मतलब यीशु मसीह को सन्देश को प्रचार को अनुसार स्थिर कर सकय हय, ऊ भेद को प्रकाश को अनुसार जो अनन्त काल सी लूक्यो रह्यो,
ROM 16:26 पर अब प्रगट होय क अनन्त काल को परमेश्वर की आज्ञा सी भविष्यवक्तावों की किताबों को द्वारा सब जातियों ख बतायो गयो हय कि हि विश्वास सी आज्ञा मानन वालो होय जाये।
ROM 16:27 उच एकच बुद्धिमान परमेश्वर की यीशु मसीह को द्वारा हमेशा हमेशा महिमा होती रहे। आमीन।
1CO 1:1 पौलुस को तरफ सी जो परमेश्वर की इच्छा सी यीशु मसीह को प्रेरित होन लायी बुलायो गयो अऊर भाऊ सोस्थिनेस को तरफ सी।
1CO 1:2 परमेश्वर की ऊ मण्डली को नाम जो कुरिन्थुस म हय, यानेकि उन्को नाम जो मसीह यीशु म पवित्र करयो गयो, अऊर पवित्र होन लायी बुलायो गयो हंय; अऊर उन सब को नाम भी जो सब जागा हमरो अऊर उन्को प्रभु यीशु मसीह को नाम सी प्रार्थना करय हंय।
1CO 1:3 हमरो पिता परमेश्वर अऊर प्रभु यीशु मसीह को तरफ सी तुम्ख अनुग्रह अऊर शान्ति मिलती रहे।
1CO 1:4 मय तुम्हरो बारे म अपनो परमेश्वर को धन्यवाद हमेशा करू हय, येकोलायी कि परमेश्वर को यो अनुग्रह तुम पर मसीह यीशु म भयो।
1CO 1:5 यीशु मसीह म एक होन को वजह तुम हर बात म, मतलब पूरो वचन अऊर पूरो ज्ञान म धनी करयो गयो
1CO 1:6 की मसीह की गवाही तुम म पक्की निकली
1CO 1:7 येकोलायी कि कोयी वरदान म तुम्ख कमी नहाय, जसो कि तुम हमरो प्रभु यीशु मसीह को प्रगट होन की रस्ता देखतो रह्य हय।
1CO 1:8 ऊ तुम्ख आखरी तक मजबूत भी करेंन कि तुम हमरो प्रभु यीशु मसीह को फिर सी वापस आवन को दिन म निर्दोष ठहरो।
1CO 1:9 परमेश्वर विश्वास लायक हय, जेन तुम ख अपनो बेटा हमरो प्रभु यीशु मसीह की संगति म बुलायो हय।
1CO 1:10 हे भाऊवों अऊर बहिनों, मय तुम सी हमरो प्रभु यीशु मसीह को नाम सी बिनती करू हय कि तुम सब एकच बात कहो, अऊर तुम म फूट नहीं होय, पर एकच मन अऊर एकच मत होय क मिल्यो रहो।
1CO 1:11 हे मोरो भाऊवों अऊर बहिनों, खलोए को घराना को लोगों न मोख तुम्हरो बारे म बतायो हय कि तुम म झगड़ा होय रह्यो हंय।
1CO 1:12 मोरो कहन को मतलब यो आय कि तुम म सी कोयी त अपनो आप ख “पौलुस को,” कोयी “अपुल्लोस को,” कोयी “कैफा को,” त कोयी “मसीह को” अनुयायी कह्य हय।
1CO 1:13 का मसीह बट गयो? का पौलुस तुम्हरो लायी क्रूस पर चढ़ायो गयो? यां तुम्ख पौलुस को नाम पर बपतिस्मा मिल्यो?
1CO 1:14 मय परमेश्वर को धन्यवाद करू हय कि क्रिसपुस अऊर गयुस ख छोड़ क मय न तुम म सी कोयी ख भी बपतिस्मा नहीं दियो।
1CO 1:15 येकोलायी कोयी असो नहीं होय कि कोयी कहेंन कि तुम्ख मोरो नाम पर बपतिस्मा मिल्यो।
1CO 1:16 अऊर हां, मय न स्तिफनास को घराना ख भी बपतिस्मा दियो; इन्क छोड़ मय नहीं जानु कि मय न अऊर कोयी ख बपतिस्मा दियो।
1CO 1:17 कहालीकि मसीह न मोख बपतिस्मा देन ख नहीं, बल्की सुसमाचार सुनावन ख भेज्यो हय, अऊर यो भी आदमियों को ज्ञान को अनुसार नहीं, असो नहीं होय कि यीशु को क्रूस पर को मरनो निष्फल ठहरे।
1CO 1:18 कहालीकि क्रूस की कथा नाश होन वालो लायी मूर्खता हय, पर हम उद्धार पान वालो लायी परमेश्वर की सामर्थ आय।
1CO 1:19 कहालीकि शास्त्र म लिख्यो हय, “मय ज्ञान वालो को ज्ञान ख नाश करू, अऊर समझदार की समझ ख बेकार कर देऊ।”
1CO 1:20 कहां रह्यो ज्ञान वालो? कहां रह्यो धर्मशास्त्री? कहां रह्यो यो जगत को विवादी? का परमेश्वर न जगत को ज्ञान ख मूर्खता नहीं ठहरायो?
1CO 1:21 कहालीकि जब परमेश्वर को ज्ञान को अनुसार जगत न ज्ञान सी परमेश्वर ख नहीं जान्यो, त परमेश्वर ख यो अच्छो लग्यो कि यो प्रचार की “मूर्खता” को द्वारा विश्वास करन वालो ख उद्धार दे।
1CO 1:22 यहूदी त चमत्कार को चिन्ह चाहवय हंय, अऊर गैरयहूदी ज्ञान की खोज म हंय,
1CO 1:23 पर हम त ऊ क्रूस पर चढ़ायो हुयो मसीह को प्रचार करय हंय, जो यहूदिया को लायी ठोकर को वजह अऊर गैरयहूदियों लायी मूर्खता हंय;
1CO 1:24 पर जो बुलायो हुयो हंय, का यहूदी, का गैरयहूदी, उन्को जवर मसीह परमेश्वर की सामर्थ अऊर परमेश्वर को ज्ञान हय।
1CO 1:25 कहालीकि परमेश्वर की मूर्खता आदमियों को ज्ञान सी ज्ञानवान हय, अऊर परमेश्वर की कमजोरी आदमियों को बल सी बहुत ताकतवर हय।
1CO 1:26 हे भाऊवों अऊर बहिनों, अपनो बुलायो जान ख त सोचो कि नहीं शरीर को अनुसार बहुत ज्ञानवान, अऊर नहीं बहुत सामर्थी, अऊर नहीं बहुत बड़ो घराना सी बुलायो गयो।
1CO 1:27 पर परमेश्वर न जगत को मूर्खो ख चुन लियो हय कि ज्ञानवानों ख शर्मिन्दा करे, अऊर परमेश्वर न जगत को कमजोरों ख चुन लियो हय कि ताकतवरों ख शर्मिन्दा करे;
1CO 1:28 अऊर परमेश्वर न जगत को नीच अऊर तुच्छ ख, बल्की जो कुछ हंय भी नहाय उन्ख भी चुन लियो कि उन्ख जो कुछ बाते हंय, बेकार ठहराये।
1CO 1:29 परमेश्वर न असो करयो ताकि कोयी प्रानी ओको आगु घमण्ड नहीं करनो पाये।
1CO 1:30 पर परमेश्वर को तरफ सी तुम मसीह यीशु म एक करयो गयो हय, जो परमेश्वर को तरफ सी हमरो लायी ज्ञान बन्यो हय। जेकोसी सच्चो ठहरे, पवित्र, अऊर छुटकारा पाये;
1CO 1:31 जसो शास्त्र म लिख्यो हय, वसोच होय, “जो घमण्ड करे ऊ प्रभु म घमण्ड करे।”
1CO 2:1 हे भाऊवों-बहिनों, जब मय परमेश्वर को भेद सुनावतो हुयो तुम्हरो जवर आयो, त शब्दों यां ज्ञान की उत्तमता को संग नहीं आयो।
1CO 2:2 कहालीकि मय न यो ठान लियो होतो कि तुम्हरो बीच यीशु मसीह बल्की क्रूस पर चढ़ायो हुयो मसीह अऊर ओको मृत्यु ख छोड़ अऊर कोयी बात ख नहीं जानु।
1CO 2:3 मय कमजोरी अऊर डर को संग, अऊर बहुत थरथरातो हुयो तुम्हरो जवर आयो;
1CO 2:4 अऊर मोरो वचन, अऊर मोरो प्रचार म ज्ञान की लुभावन वाली बाते नहीं, पर आत्मा को सामर्थ को सबूत होतो,
1CO 2:5 येकोलायी कि तुम्हरो विश्वास आदमियों को ज्ञान पर नहीं, पर परमेश्वर को सामर्थ पर निर्भर हो।
1CO 2:6 तब भी आत्मिकता म समझदार लोगों म हम ज्ञान सुनावतो हंय, पर यो जगत को अऊर यो जगत को नाश होन वालो शासकों को ज्ञान नहीं;
1CO 2:7 पर हम परमेश्वर को ऊ गुप्त ज्ञान, जो गुप्त होतो भेद की रीति पर बतायजे हंय, जेक परमेश्वर न जगत को पहिलो सी हमरी महिमा लायी ठहरायो।
1CO 2:8 जेक यो जगत को शासकों म सी कोयी न नहीं जान्यो, कहालीकि यदि हि जानय त तेजोमय प्रभु ख क्रूस पर नहीं चढ़ातो।
1CO 2:9 पर जसो लिख्यो हय, “जो बात आंखी न नहीं देखी अऊर कान न नहीं सुनी, अऊर जो बाते आदमी को चित म नहीं चढ़ी, उच हंय जो परमेश्वर न अपनो प्रेम रखन वालो लायी तैयार करी हंय।”
1CO 2:10 पर परमेश्वर न उन्ख अपनो आत्मा को द्वारा हम पर प्रगट करयो, कहालीकि आत्मा सब बाते, बल्की परमेश्वर की गूढ़ बाते भी जांचय हय।
1CO 2:11 आदमियों म सी कौन कोयी आदमी की बाते जानय हय, केवल आदमी की आत्मा जो ओको म हय? वसोच परमेश्वर की बाते भी कोयी नहीं जानय, केवल परमेश्वर की आत्मा जानय हय।
1CO 2:12 पर हम म जगत की आत्मा नहीं, पर वा आत्मा पायो हय जो परमेश्वर की तरफ सी हय कि हम उन बातों ख जाने जो परमेश्वर न हम्ख दी हंय।
1CO 2:13 जेक हम आदमियों को ज्ञान की सिखायी हुयी बातों म नहीं, पर परमेश्वर को आत्मा की सिखायी हुयी बातों म, जेको म परमेश्वर की आत्मा हय उन्ख आत्मिक बाते सुनाजे हंय।
1CO 2:14 पर जो आदमी परमेश्वर को आत्मा की बाते स्वीकार नहीं करय, कहालीकि हि ओकी नजर म मूर्खता की बाते हंय, अऊर नहीं ऊ उन्ख जान सकय हय कहालीकि उन्की जांच आत्मिक रीति सी होवय हय।
1CO 2:15 जेको जवर परमेश्वर की आत्मा हय ऊ सब को न्याय कर सकय हय, पर ओको न्याय कोयी नहीं कर सकय। कहालीकि कह्य हय:
1CO 2:16 जसो शास्त्र म लिख्यो हय: “प्रभु को मन ख कौन जानय हय? कौन ओख सिखाय सकय हय?” पर हमरो जवर मसीह को मन हय।
1CO 3:1 हे भाऊवों-बहिनों, मय तुम सी यो रीति सी बाते नहीं कर सक्यो जसो की उन लोगों सी जिन्म परमेश्वर की आत्मा हय, पर जसो सांसारिक लोगों सी, अऊर उन्को सी जो मसीह म बच्चा हंय।
1CO 3:2 मय न तुम्ख दूध पिलायो, खाना नहीं खिलायो; कहालीकि तुम ओख नहीं खाय सकत होतो; बल्की अब तक भी नहीं खाय सकय हय,
1CO 3:3 कहालीकि अब तक तुम शारीरिक लोगों जसो हय। येकोलायी कि जब तुम म जलन अऊर झगड़ा हय, त का तुम सांसारिक लोगों को जसो नहीं? अऊर का आदमी की रीति पर नहीं चलय?
1CO 3:4 कहालीकि जब एक कह्य हय, “मय पौलुस को आय,” अऊर दूसरों, “मय अपुल्लोस को आय,” त का तुम जगत को लोगों को जसो नहाय?
1CO 3:5 अपुल्लोस का हय? अऊर पौलुस का हय? केवल सेवक, जिन्को द्वारा तुम न विश्वास करयो, जसो हर एक ख प्रभु न दियो। वसो हम्न काम करन ख होना।
1CO 3:6 मय न लगायो, अपुल्लोस न सीच्यो, पर परमेश्वर न बढ़ायो।
1CO 3:7 येकोलायी नहीं त लगावन वालो कुछ हय अऊर नहीं सीचन वालो, पर परमेश्वरच सब कुछ हय जो बढ़ावन वालो हय।
1CO 3:8 लगावन वालो अऊर सीचन वालो दोयी एक हंय; पर हर एक आदमी ख उन्कोच कामों को अनुसार मजूरी देयेंन।
1CO 3:9 कहालीकि हम परमेश्वर को सहकर्मी हंय; तुम परमेश्वर की खेती अऊर परमेश्वर को भवन आय।
1CO 3:10 परमेश्वर को ऊ अनुग्रह को अनुसार जो मोख दियो गयो, मय न बुद्धिमान राजमिस्त्री को जसो नीव डाल्यो, अऊर दूसरों ओको पर रद्दा रखय हय। पर हर एक आदमी चौकस रह कि ऊ ओको पर कसो रद्दा रखय हय।
1CO 3:11 कहालीकि ऊ नीव ख छोड़ जो पड़ी हय, अऊर ऊ यीशु मसीह आय, कोयी दूसरों पायवा नहीं डाल सकय।
1CO 3:12 यदि कोयी यो नीव पर सोना या चांदी या बहुत कीमती वालो गोटा या लकड़ी या घास-फूस को रद्दा रखय,
1CO 3:13 त हर एक को काम प्रगट होय जायेंन; कहालीकि न्याय को दिन ओख बतायेंन, येकोलायी कि आगी को संग प्रगट होयेंन अऊर ऊ आगी हर एक को काम परखेंन कि कसो हय।
1CO 3:14 जेको काम ऊ पायवा पर बन्यो स्थिर रहेंन, ऊ मजूरी पायेंन।
1CO 3:15 यदि कोयी को काम जर जायेंन, त ऊ हानि उठायेंन; पर ऊ खुद बच जायेंन पर ज्वाला।
1CO 3:16 का तुम नहीं जानय कि तुम परमेश्वर को मन्दिर आय, अऊर परमेश्वर की आत्मा तुम म सिरय हय?
1CO 3:17 यदि कोयी परमेश्वर को मन्दिर ख नाश करेंन त परमेश्वर ओख नाश करेंन; कहालीकि परमेश्वर को मन्दिर पवित्र हय, अऊर ऊ तुम आय।
1CO 3:18 कोयी अपनो आप ख नहीं फसाय। यदि तुम म सी कोयी यो जगत म अपनो आप ख ज्ञानी समझय, त ज्ञानी होन लायी मूर्ख बन जाये।
1CO 3:19 कहालीकि यो जगत को ज्ञान परमेश्वर को जवर मूर्खता हय, जसो शास्त्र म लिख्यो हय, “ऊ ज्ञानियों ख उन्की चालाकी म फसाय देवय हय,”
1CO 3:20 अऊर असो भी कह्य हय, “प्रभु ज्ञानियों को बिचार ख जानय हय कि हि बेकार हंय।”
1CO 3:21 येकोलायी आदमियों पर कोयी घमण्ड नहीं करे, कहालीकि सब कुछ तुम्हरो आय :
1CO 3:22 का पौलुस, का अपुल्लोस, का कैफा, का जगत, का जीवन, का मरन, का वर्तमान, का भविष्य, सब कुछ तुम्हरो आय,
1CO 3:23 तुम मसीह को आय, अऊर मसीह परमेश्वर को आय।
1CO 4:1 आदमी हम्ख मसीह को सेवक अऊर परमेश्वर की लूकी बातों को व्यवस्थापक समझे।
1CO 4:2 तब इत देखरेख वालो म या बात जरूरी हय कि जो व्यवस्थापक हय ऊ विश्वास लायक रहन ख होना।
1CO 4:3 पर मोरी नजर म या बहुत छोटी बात आय कि तुम लोग या आदमियों म अगर कोयी मोरो न्याय करे, बल्की मय खुद अपनो आप ख नहीं परखू हय।
1CO 4:4 कहालीकि मोरो मन मोख कोयी बात म दोषी नहीं ठहरावय, पर येको सी मय निर्दोष नहीं ठहरू, कहालीकि मोरो न्याय करन वालो प्रभु हय।
1CO 4:5 येकोलायी जब तक प्रभु नहीं आवय, समय सी पहिले कोयी बात को न्याय मत करो: उच अन्धारो की लूकी बाते ज्योति म दिखायेंन, अऊर मनों को इरादा ख प्रगट करेंन, तब परमेश्वर की तरफ सी हर एक की प्रशंसा होयेंन।
1CO 4:6 हे भाऊवों-बहिनों, मय न या बातों म तुम्हरो लायी अपनी अऊर अपुल्लोस की चर्चा दृष्टान्त की रीति पर करी हय, येकोलायी कि तुम हमरो सी यो सीखो कि असो शास्त्र म लिख्यो हय ओको सी आगु नहीं बढ़नो, अऊर एक को पक्ष म अऊर दूसरों को विरोध म घमण्ड नहीं करनो।
1CO 4:7 तोरो म अऊर दूसरों म कौन भेद करय हय? अऊर तोरो जवर का हय जो तय न परमेश्वर सी नहीं पायो? अऊर जब कि तय न परमेश्वर सी पायो हय, त असो घमण्ड कहाली करय हय कि मानो नहीं पायो?
1CO 4:8 तुम त सन्तुष्ट भय गयो, तुम धनी भय गयो, तुम न हमरो बिना राज करयो; पर भलो होतो कि तुम राज करतो; कि हम भी तुम्हरो संग राज करतो।
1CO 4:9 मोरी समझ म परमेश्वर न हम प्रेरितों ख सब को बाद उन लोगों को जसो ठहरायो हय, जिन की मरन की आज्ञा भय गयी हय; कहालीकि हम जगत अऊर स्वर्गदूतों अऊर आदमी लायी एक तमाशा ठहरो हंय।
1CO 4:10 हम मसीह लायी मूर्ख हंय! पर तुम मसीह म बुद्धिमान हय; हम कमजोर हंय! पर तुम ताकतवर हय! तुम आदर पावय हय, पर हम अपमानित होवय हंय।
1CO 4:11 हम यो घड़ी तक भूखो प्यासो अऊर हम फट्यो कपड़ा पहिन्यो हुयो हंय, अऊर घूसा खावय हंय अऊर मारे मारे फिरय हंय;
1CO 4:12 अऊर अपनोच हाथों सी काम कर क् मेहनत करय हंय। लोग हम्ख बुरो कह्य हंय, हम आशीर्वाद देजे हंय; हि सतावय हंय, हम सहजे हंय,
1CO 4:13 हि बदनाम करय हंय, हम उन्ख आदर को संग उत्तर देजे हंय। हम अज तक जगत को कूड़ा-कचरा अऊर सब चिज को मईल को जसो ठहरो हंय।
1CO 4:14 मय तुम्ख शर्मिन्दा करन लायी या बाते नहीं लिखूं, पर मोरो प्रिय बच्चां जान क तुम्ख समझाऊ हय।
1CO 4:15 कहालीकि यदि मसीह म तुम्हरो सिखावन वालो दस हजार भी होतो, तब भी तुम्हरो बाप बहुत सो नहाय; येकोलायी कि मसीह यीशु म सुसमाचार को द्वारा मय तुम्हरो बाप भयो।
1CO 4:16 येकोलायी मय तुम सी बिनती करू हय कि मोरो अनुकरन करो।
1CO 4:17 येकोलायी मय न तीमुथियुस ख जो प्रभु म मोरो प्रिय टुरा अऊर विश्वास लायक सेवक हय, तुम्हरो जवर भेज्यो हय। ऊ तुम्ख यीशु मसीह म मोरो चरित्र याद करायेंन, जसो कि मय हर जागा हर एक मण्डली म उपदेश करू हय।
1CO 4:18 कुछ त असो घमण्ड म फूल गयो हंय, मानो मय तुम्हरो जवर आऊ नहीं।
1CO 4:19 पर प्रभु न चाह्यो त मय तुम्हरो जवर तुरतच आऊं, अऊर उन घमण्ड म फूल्यो हुयो की बातों ख नहीं, पर उन्की सामर्थ ख जान लेऊ।
1CO 4:20 कहालीकि परमेश्वर को राज्य बातों म नहीं पर सामर्थ म हय।
1CO 4:21 तुम का चाहवय हय? का मय छड़ी ले क तुम्हरो जवर आऊं, या प्रेम अऊर नम्रता को संग?
1CO 5:1 यहां तक सुनन म आवय हय कि तुम म अनैतिक सम्बन्ध होवय हय, बल्की असो अनैतिक सम्बन्ध जो गैरयहूदी म भी नहीं होवय कि एक आदमी अपनो बाप की पत्नी ख रखय हय।
1CO 5:2 अऊर तुम घमण्ड करय हय शोक नहीं करय, जेकोसी असो काम करन वालो तुम्हरो बीच म सी निकाल्यो जावय हय।
1CO 5:3 मय त शरीर सी दूर होतो, पर आत्मा सी तुम्हरो संग हय। उपस्थिति की दशा म असो काम करन वालो को बारे म या आज्ञा दे चुक्यो हय।
1CO 5:4 कि जब तुम अऊर मोरी आत्मा, हमरो प्रभु यीशु की सामर्थ को संग जमा होय, त असो आदमी हमरो प्रभु यीशु को नाम सी
1CO 5:5 शरीर को नाश लायी शैतान ख सौंप्यो जाये, ताकि ओकी आत्मा प्रभु यीशु को दिन म उद्धार पाये।
1CO 5:6 तुम्हरो घमण्ड करनो अच्छो नहाय; का तुम नहीं जानय कि थोड़ो सो खमीर पूरो उसन्यो हुयो आटा ख खमीर कर देवय हय।
1CO 5:7 पुरानो खमीर निकाल क अपनो आप ख शुद्ध करो कि नयो उसन्यो हुयो आटा बन जावो; ताकि तुम अखमीरी बन जावो अच्छो जसो तुम हय! कहालीकि हमरो भी फसह को मेम्ना, जो मसीह आय, बलिदान भयो हय।
1CO 5:8 येकोलायी आवो, हम उत्सव म खुशी मनाबो, नहीं त पुरानो खमीर सी अऊर नहीं बुरायी अऊर दुष्ट हरकत को खमीर सी, पर सीधायी अऊर सच्चायी की अखमीरी रोटी सी।
1CO 5:9 मय न अपनी चिट्ठी म तुम्ख लिख्यो हय कि व्यभिचारियों की संगति नहीं करनो।
1CO 5:10 यो नहीं कि तुम बिल्कुल यो जगत को व्यभिचारियों, यां लोभियों, यां चोरी करन वालो, यां मूर्तिपूजकों की संगति नहीं करे; कहालीकि यो दशा म त तुम्ख जगत म सी निकल जानो पड़तो।
1CO 5:11 पर मोरो कहनो यो आय कि यदि कोयी भाऊ कह्य लाय क, व्यभिचारी, यां लोभी, यां मूर्तिपूजक, यां गाली देन वालो, यां पियक्कड़, यां चोरी करन वालो हय, त ओकी संगति मत करजो; बल्की असो आदमी को संग खाना भी मत खाजो।
1CO 5:12 कहालीकि मोख बाहेर वालो को न्याय करन सी का काम? का तुम अन्दर वालो को न्याय नहीं करय?
1CO 5:13 पर बाहेर वालो को न्याय परमेश्वर करय हय। येकोलायी ऊ कुकर्मी ख अपनो बीच म सी निकाल दे।
1CO 6:1 का तुम म सी कोयी ख या हिम्मत हय कि जब दूसरों को संग झगड़ा होय, त न्याय लायी जो परमेश्वर ख नहीं जानय? उन्को जवर जाये अऊर पवित्र लोगों को जवर नहीं जाये?
1CO 6:2 का तुम नहीं जानय कि पवित्र लोग जगत को न्याय करेंन? येकोलायी जब तुम्ख जगत को न्याय करनो हय, त का तुम छोटो सी छोटो झगड़ा को भी निपटारा करन को लायक नहीं?
1CO 6:3 का तुम नहीं जानय कि हम स्वर्गदूतों को न्याय करबोंन? त का सांसारिक बातों को निपटारा नहीं कर सकय?
1CO 6:4 यदि तुम्ख सांसारिक बातों को निपटारा करनो हय, त का उन्खच बैठावय जिन्ख मण्डली म कुछ नहीं समझ्यो जावय हंय?
1CO 6:5 मय तुम्ख शर्मिन्दा करन लायी यो कहू हय। का सचमुच तुम म एक भी बुद्धिमान नहीं मिलय, जो अपनो भाऊ को न्याय कर सकय?
1CO 6:6 तुम भाऊ–भाऊ न्यायालय म झगड़ा करय हय, अऊर वा भी अविश्वासियों को सामने।
1CO 6:7 पर सचमुच तुम म बड़ो दोष त यो हय कि आपस म न्यायालय म मुकद्दमा करय हय। अन्याय कहाली नहीं सहय? अपनी हानि कहाली नहीं सहय?
1CO 6:8 पर तुम त खुद अन्याय करय अऊर हानि पहुंचावय हय, अऊर ऊ भी भाऊ ख।
1CO 6:9 का तुम नहीं जानय कि अधर्मी लोग परमेश्वर को राज्य को वारिस नहीं होयेंन? धोका नहीं खावो; नहीं व्यभिचारी, नहीं मूर्तिपूजक, नहीं परस्त्रीगामी, नहीं पुरुषगामी,
1CO 6:10 नहीं चोर, नहीं लोभी, नहीं पियक्कड़, नहीं गाली देन वालो, नहीं ठगान वालो परमेश्वर को राज्य को वारिस होयेंन।
1CO 6:11 अऊर तुम म सी कितनो असोच जीवन जीत होतो, पर तुम प्रभु यीशु मसीह को नाम सी अऊर हमरो परमेश्वर की आत्मा सी धोयो गयो अऊर पवित्र हुयो अऊर सच्चो ठहरो।
1CO 6:12 सब चिज मोरो लायी ठीक त हंय, पर सब चिज लाभ की नहाय; सब चिज मोरो लायी ठीक हंय, पर मय कोयी बात को अधीन नहीं होऊं।
1CO 6:13 भोजन पेट लायी, अऊर पेट भोजन लायी हय, पर परमेश्वर येख अऊर ओख दोयी ख नाश करेंन। पर शरीर अनैतिक सम्बन्ध लायी नहाय, बल्की प्रभु की सेवा लायी आय, अऊर प्रभु शरीर की देखभाल करय हय।
1CO 6:14 परमेश्वर न अपनी सामर्थ सी प्रभु ख जीन्दो करयो, अऊर हम्ख भी जीन्दो करेंन।
1CO 6:15 का तुम नहीं जानय कि तुम्हरो शरीर मसीह को शरीर को अंग आय? त का मय मसीह को अंग ले क उन्ख वेश्या को अंग बनाऊं? कभीच नहीं।
1CO 6:16 का तुम नहीं जानय कि जो कोयी वेश्या सी संगति करय हय, ऊ ओको संग एक शरीर होय जावय हय? कहालीकि शास्त्र म लिख्यो हय: “हि दोयी एक शरीर होयेंन।”
1CO 6:17 अऊर जो प्रभु की संगति म जुड़्यो रह्य हय, ऊ ओको संग एक आत्मा भय जावय हय।
1CO 6:18 व्यभिचार सी बच्यो रहो। जितनो अऊर पाप आदमी करय हय हि शरीर को बाहेर हंय, पर व्यभिचार करन वालो अपनोच शरीर को विरुद्ध पाप करय हय।
1CO 6:19 का तुम नहीं जानय कि तुम्हरो शरीर पवित्र आत्मा को मन्दिर आय, जो तुम म बस्यो हय अऊर तुम्ख परमेश्वर को तरफ सी मिल्यो हय; अऊर तुम अपनो नोहोय?
1CO 6:20 कहालीकि परमेश्वर न तुम्ख दाम दे क मोल लियो गयो हय, येकोलायी अपनो शरीर सी परमेश्वर की महिमा करो।
1CO 7:1 उन बातों को बारे म जो तुम न लिख्यो, “यो अच्छो हय कि पुरुष ख बिहाव नहीं करन ख होना।”
1CO 7:2 पर व्यभिचार होन को डर सी हर एक पुरुष की पत्नी, अऊर हर एक बाई को पति होन ख होना।
1CO 7:3 पति अपनी पत्नी को हक पूरो करे; अऊर वसोच पत्नी भी अपनो पति को
1CO 7:4 पत्नी ख अपनो शरीर पर अधिकार नहाय पर ओको पति को अधिकार हय; वसोच पति ख भी अपनो शरीर पर अधिकार नहाय, पर पत्नी को हय।
1CO 7:5 तुम एक दूसरों सी अलग न रहो; पर केवल थोड़ो समय तक आपस की सम्मति सी कि प्रार्थना लायी समय निकालो, अऊर फिर एक संग रह; असो नहीं होय कि तुम्हरो असंयम को वजह शैतान तुम्ख परख ले।
1CO 7:6 पर मय जो यो कहू हय यो सलाह हय नहीं कि आज्ञा।
1CO 7:7 मय यो चाहऊ हय कि जसो मय हय, वसोच सब आदमी हो; पर हर एक ख परमेश्वर को तरफ सी अच्छो अच्छो वरदान मिल्यो हंय; कोयी ख कोयी तरह को, अऊर कोयी ख कोयी अऊर तरह को।
1CO 7:8 अब मय कुंवारी अऊर विधवावों को बारे म कहू हय कि उन्को लायी असोच रहनो अच्छो हय, जसो मय हय।
1CO 7:9 पर यदि हि संय्यम नहीं कर सकय, त बिहाव कर लेवो; कहालीकि बिहाव करनो कामातुर रहनो सी ठीक हय।
1CO 7:10 जिन्को बिहाव भय गयो हय, उन्ख मय नहीं, बल्की प्रभु आज्ञा देवय हय कि पत्नी अपनो पति सी अलग नहीं हो।
1CO 7:11 अऊर यदि अलग भी होय जाये, त बिना दूसरों बिहाव करयो रहे; यां अपनो पति सी फिर मेल-मिलाप कर लेवो अऊर पति अपनी पत्नी ख छोड़-चिट्ठी नहीं देन ख होना।
1CO 7:12 दूसरों सी प्रभु नहीं पर मयच कहू हय, यदि कोयी भाऊ की पत्नी विश्वास नहीं रखय हय अऊर ओको संग रहनो सी खुश हय, त ऊ ओख छोड़-चिट्ठी नहीं देनो चाहिये।
1CO 7:13 जो बाई को पति विश्वास नहीं रखय हय, अऊर ओको संग रहनो सी खुश हय; ऊ पति ख नहीं छोड़े।
1CO 7:14 कहालीकि असो पति जो विश्वास नहीं रखय हय, वा पत्नी को वजह पवित्र ठहरय हय; अऊर असी पत्नी जो विश्वास नहीं रखय, पति को वजह पवित्र ठहरय हय; नहीं त तुम्हरो बाल-बच्चा अशुद्ध होतो, पर अब त पवित्र हंय।
1CO 7:15 पर जो पुरुष विश्वास नहीं रखय, यदि ऊ अलग होय त अलग होन दे, असी दशा म कोयी भाऊ यां बहिन बन्धन म नहीं। परमेश्वर न हम्ख मेल मिलाप लायी बुलायो हय।
1CO 7:16 कहालीकि हे बाई, तय का जानय हय कि तय अपनो पति को उद्धार कराय लेजो? अऊर हे पुरुष, तय का जानय हय कि तय अपनी पत्नी को उद्धार कराय लेजो?
1CO 7:17 जसो प्रभु न हर एक ख जीवन दियो हय, अऊर जसो परमेश्वर न हर एक ख बुलायो हय, वसोच ऊ चले। मय सब मण्डलियों म असोच ठहराऊ हय।
1CO 7:18 जो खतना करयो हुयो बुलायो गयो हो, ऊ बिना खतना को नहीं बने। जो बिना खतना को बुलायो गयो हो, ऊ खतना नहीं कराये।
1CO 7:19 खतना कुछ हय अऊर नहीं बिना खतना को, पर परमेश्वर की आज्ञा को पालन करनो हि सब कुछ हय।
1CO 7:20 हर एक लोग जो दशा म बुलायो गयो हो, ओकोच म रह।
1CO 7:21 यदि तय सेवक की दशा म बुलायो गयो हय त चिन्ता मत कर; पर यदि तय स्वतंत्र होय सकय, त असोच काम कर।
1CO 7:22 कहालीकि जो सेवक की दशा म प्रभु म बुलायो गयो हय, ऊ प्रभु को स्वतंत्र करयो हुयो हय। वसोच जो स्वतंत्रता की दशा म बुलायो गयो हय, ऊ मसीह को सेवक आय।
1CO 7:23 तुम दाम दे क मोल लियो गयो हो; आदमियों को सेवक मत बनो।
1CO 7:24 हे भाऊवों-बहिनों, जो कोयी जो दशा म बुलायो गयो हय, ऊ ओकोच म परमेश्वर को संग रहे।
1CO 7:25 कुंवारियों को बारे म प्रभु की कोयी आज्ञा मोख नहीं मिली, पर विश्वास लायक होन लायी जसी दया प्रभु न मोर पर करी हय, ओकोच अनुसार सम्मति मिली हय।
1CO 7:26 मोरी समझ म यो अच्छो हय कि वर्तमान को कठिनायी को वजह, आदमी जसो हय वसोच रहे।
1CO 7:27 यदि तोरी पत्नी हय, त ओख छोड़-चिट्ठी देन की कोशिश मत कर; अऊर यदि तोरी पत्नी नहीं, त पत्नी की खोज मत कर।
1CO 7:28 पर यदि तय बिहाव भी करय, त पाप नहीं; अऊर यदि कुंवारी बिहायी जाये त कोयी पाप नहाय। पर असो ख शारीरिक दु:ख होयेंन, अऊर मय बचावनो चाहऊ हय।
1CO 7:29 हे भाऊवों-बहिनों, मय यो कहू हय कि समय कम करयो गयो हय, येकोलायी असो होनो होतो कि जेकी पत्नी हो, हि असो हो, मानो उन्की पत्नी नहीं;
1CO 7:30 अऊर रोवन वालो असो हो, मानो रोवय नहीं; अऊर खुशी करन वालो असो हो, मानो खुशी नहीं करय; अऊर मोल लेनवालो असो हो, मानो उन्को जवर कुछ हयच नहाय।
1CO 7:31 अऊर यो जगत कि चिजों को उपयोग करन वालो असो हो, कि जगत कोच नहीं हो; कहालीकि यो जगत की रीति अऊर व्यवहार खतम होय जावय हंय।
1CO 7:32 येकोलायी मय यो चाहऊ हय कि तुम्ख चिन्ता नहीं होय। कुंवारो पुरुष प्रभु की बातों की चिन्ता म रह्य हय कि प्रभु ख कसो प्रसन्न रखेंन।
1CO 7:33 पर बिहाव वालो आदमी जगत की बातों की चिन्ता म रह्य हय कि अपनी पत्नी ख कौन्सी रीति सी खुश रखे।
1CO 7:34 बिहाव वालो अऊर कुंवारो म भी भेद हय: कुंवारी प्रभु की चिन्ता म रह्य हय कि ऊ शरीर अऊर आत्मा दोयी म पवित्र रहे, पर बिहाव वाली जगत की चिन्ता म रह्य हय कि अपनो पति ख खुश रखू।
1CO 7:35 मय या बात तुम्हरोच फायदा लायी कहू हय, नहीं कि तुम पर बन्धन लगावन लायी, बल्की येकोलायी कि जसो शोभा देवय हय वसोच करयो जाये, कि तुम एक मन होय क प्रभु की सेवा म लग्यो रह।
1CO 7:36 यदि कोयी यो समझो कि मय अपनी वा कुंवारी को हक मार रह्यो हय, जेकी जवानी बीत रही हय, अऊर जरूरत भी हय, त जसो चाहवय वसो करे, येको म पाप नहाय, ऊ ओको बिहाव होन दे।
1CO 7:37 पर जो मन म मजबूत रह्य हय, अऊर ओख जरूरत नहाय, बल्की अपनी इच्छा पर अधिकार रखय हय, अऊर अपनो मन म या बात ठान लियो हय कि ऊ अपनी कुंवारी लड़की ख कुंवारी रखेंन, ऊ अच्छो करय हय।
1CO 7:38 येकोलायी जो अपनी कुंवारी को बिहाव कर देवय हय, ऊ अच्छो करय हय, अऊर जो बिहाव नहीं कर देवय, ऊ अऊर भी अच्छो करय हय।
1CO 7:39 जब तक कोयी बाई को पति जीन्दो रह्य हय, तब तक वा ओको सी बन्धी हुयी हय; पर यदि ओको पति मर जाये त जेकोसी चाहवय बिहाव कर सकय हय, पर केवल प्रभु म।
1CO 7:40 पर यदि वा बिना बिहाव कि रहे यदि वसीच रहे, त मोरो बिचार म अऊर भी धन्य हय; अऊर मय समझू हय कि परमेश्वर को आत्मा मोर म भी हय।
1CO 8:1 अब मूर्तियों को आगु चढ़ायी गयी बलि को बारे म: हम जानजे हंय कि हम सब ख ज्ञान हय। ज्ञान घमण्ड पैदा करय हय, पर प्रेम सी उन्नति होवय हय।
1CO 8:2 यदि कोयी समझे कि मय कुछ जानु हय, त जसो जानन को होना वसो अब तब नहीं जानय।
1CO 8:3 पर यदि कोयी परमेश्वर सी प्रेम रखय हय, त परमेश्वर ओख जानय हय।
1CO 8:4 येकोलायी मूर्तियों को आगु बलि करी हुयी चिज को खान को बारे म: हम जानजे हंय कि मूर्ति जगत म कुछ भी नहाय, अऊर एक ख छोड़ अऊर कोयी परमेश्वर नहाय।
1CO 8:5 यानेकि आसमान म अऊर धरती पर बहुत सो “ईश्वर” कहलावय हंय, जसो कि बहुत सो “ईश्वर” अऊर बहुत सो “प्रभु” हंय,
1CO 8:6 तब भी हमरो लायी त एकच परमेश्वर हय: यानेकि बाप जेको तरफ सी सब चिजे आय, अऊर हम ओकोच लायी हंय। अऊर एकच प्रभु आय, यानेकि यीशु मसीह जेको द्वारा सब चिजे भयी, अऊर हम भी ओकोच द्वारा हंय।
1CO 8:7 पर सब ख यो ज्ञान नहाय, पर कुछ त अब तक मूर्ति ख कुछ समझन को वजह मूर्तियों को आगु बलि करी हुयी चिज ख कुछ समझ क खावय हंय, अऊर उन्को विवेक कमजोर होन को वजह अशुद्ध होय जावय हय।
1CO 8:8 भोजन हम्ख परमेश्वर को जवर नहीं पहुंचावय। यदि हम नहीं खाबोंन त हमरी कुछ हानि नहाय, अऊर यदि खाबोंन त कुछ फायदा नहाय।
1CO 8:9 पर चौकस! असो नहीं होय कि तुम्हरी यो स्वतंत्रता कहीं कमजोरों लायी ठोकर को वजह होय जायेंन।
1CO 8:10 यदि कोयी तोरो जसो ज्ञानी ख मूर्ति को मन्दिर म जेवन करतो देखे अऊर ऊ कमजोर लोग होना, त का ओको मन ख मूर्ति को आगु बलि करी हुयी चिज खान को हिम्मत नहीं होय जायेंन।
1CO 8:11 यो तरह सी तोरो ज्ञान को वजह ऊ मन को कमजोर भाऊ जेको लायी मसीह मरयो, नाश होय जायेंन।
1CO 8:12 यो तरह भाऊ को विरुद्ध अपराध करनो सी अऊर उन्को कमजोर मन ख दु:ख पहुंचान सी, तुम मसीह को विरुद्ध अपराध करय हय।
1CO 8:13 यो वजह यदि जेवन मोरो भाऊ ख ठोकर खिलावय, त मय कभी कोयी रीति सी मांस नहीं खाऊ, नहीं होय कि मय अपनो भाऊ लायी ठोकर को वजह बनूं।
1CO 9:1 का मय स्वतंत्र नहाय? का मय प्रेरित नहाय? का मय न यीशु ख जो हमरो प्रभु आय, नहीं देख्यो? का तुम मोरो कामों को वजह प्रभु म मोरो परिनाम नहाय?
1CO 9:2 यदि मय दूसरों लायी प्रेरित नहाय, तब भी तुम्हरो लायी त हय; कहालीकि तुम्हरी प्रभु म एकता मोरो प्रेरित होन को सबूत हय।
1CO 9:3 जो मोख जांचय हंय, उन्को लायी योच मोरो उत्तर आय।
1CO 9:4 का हम्ख हमरो कमायी सी खान पीवन को अधिकार नहाय?
1CO 9:5 का हम्ख यो अधिकार नहाय, कि कोयी मसीही बहिन को संग बिहाव कर क् ओख लियो सफर म फिरय, जसो दूसरों प्रेरित अऊर प्रभु को भाऊ अऊर पतरस करय हंय?
1CO 9:6 या फिर मोख अऊर बरनबास खच जीवन चलान लायी काम करन ख होना।
1CO 9:7 कौन कभी बिना मजूरी को सेना म सिपाही को काम करय हय? कौन अंगूर की बाड़ी लगाय क ओको फर नहीं खावय? कौन मेंढीं की रखवाली कर क् उन्को दूध नहीं पीवय?
1CO 9:8 का व्यवस्था भी नहीं कह्य मय या बाते आदमी की रीति पर बोलू हय?
1CO 9:9 कहालीकि मूसा की व्यवस्था म लिख्यो हय, “दांवन को समय चलतो हुयो बईल को मुंह म मुस्का नहीं बन्धनों।” का परमेश्वर बईलच की चिन्ता करय हय?
1CO 9:10 यां विशेष कर क् हमरो लायी कह्य हय। हां, हमरो लायीच लिख्यो गयो, कहालीकि ठीक हय कि नांगर जोतन वालो फसल मिलन की आशा सी जोतो अऊर दांवन म जोतन वालो फसल को कुछ भाग पान की आशा सी दांवन ख हकले।
1CO 9:11 येकोलायी जब कि हम न तुम्हरो लायी आत्मिक चिजे बोयी हय, त का यो कोयी बड़ी बात हय? कि तुम्हरी शारीरिक चिजे की फसल काटे त कोयी बड़ी बात आय।
1CO 9:12 जब दूसरों को तुम पर यो अधिकार हय, त का हमरो येको सी जादा नहीं होयेंन? पर हम यो अधिकार काम म नहीं लायो; पर सब कुछ सहजे हंय कि हमरो द्वारा मसीह को सुसमाचार म कुछ रुकावट नहीं होय।
1CO 9:13 का तुम नहीं जानय कि जो मन्दिर म सेवा करय हंय, हि मन्दिर म सी खावय हंय; अऊर जो वेदी की सेवा करय हंय, हि वेदी को संग सहभागी होवय हंय?
1CO 9:14 योच रीति सी प्रभु न भी ठहरायो कि जो लोग सुसमाचार सुनावय हंय, उन्की जीविका सुसमाचार सी होन ख होना।
1CO 9:15 पर मय इन म सी कोयी भी बात काम म नहीं लायो, अऊर मय न या बाते येकोलायी नहीं लिखी कि मोरो लायी असो करयो जाये, कहालीकि येको सी त मोरो मरनोच ठीक हय कि कोयी मोरो घमण्ड ख निष्फल ठहराये।
1CO 9:16 यदि मय सुसमाचार सुनाऊ, त मोरो लायी कुछ घमण्ड की बात नहीं; कहालीकि यो त मोरो लायी जरूरी हय। यदि मय सुसमाचार नहीं सुनाऊ, त मोरो पर हाय!
1CO 9:17 कहालीकि यदि अपनी इच्छा सी यो करू हय त मजूरी मोख मिलय हय, अऊर यदि मय अपनो सी नहीं करय तब भी व्यवस्थापक पन मोख सौंप्यो गयो हंय।
1CO 9:18 त मोरी कौन सी मजूरी हय? यो कि सुसमाचार सुनानो म मय मसीह को सुसमाचार बिना पैसा को दूसरों ख सुनाऊ, यहां तक कि सुसमाचार म जो मोरो अधिकार हय ओख भी मय पूरी रीति सी काम म नहीं लाऊं।
1CO 9:19 कहालीकि सब सी स्वतंत्र होन पर भी मय न अपनो आप ख सब को सेवक बनाय दियो हय कि जादा लोगों ख परमेश्वर को राज म खीच लाऊं।
1CO 9:20 मय यहूदियों लायी यहूदी बन्यो कि यहूदियों ख खीच लाऊं। जो लोग मूसा को व्यवस्था को अधीन हंय उन्को लायी मय व्यवस्था को अधीन नहीं होन पर भी व्यवस्था को अधीन बन्यो कि उन्ख जो व्यवस्था को अधीन हंय, खीच लाऊं।
1CO 9:21 व्यवस्था ख नहीं मानन वालो लायी मय, जो परमेश्वर की व्यवस्था सी दूर नहीं पर मसीह की व्यवस्था को अधीन हय, व्यवस्था हीन जसो बन्यो कि व्यवस्था हिनो ख खीच लाऊं।
1CO 9:22 मय कमजोर लायी कमजोर सी बन्यो कि कमजोर ख खीच लाऊं। मय सब आदमियों लायी सब कुछ बन्यो कि कोयी न कोयी तरह सी कुछ एक को उद्धार कराऊं।
1CO 9:23 मय यो सब कुछ सुसमाचार लायी करू हय कि दूसरों को संग ओको सहभागी होय जाऊं।
1CO 9:24 का तुम नहीं जानय कि दौड़ म त सबच दवड़य हय, पर इनाम एकच लिजावय हय? तुम वसोच दौड़ो कि जीतो।
1CO 9:25 हर एक प्रतियोगी सब तरह को नियम को पालन करय हय; हि खेल म इनाम पावन लायी एक मुरझान वालो हार ख पावन लायी यो सब करय हंय, पर हम त ऊ हार लायी करय हंय जो मुरझान वालो नहाय।
1CO 9:26 येकोलायी मय त योच तरह सी दौवड़य हय, पर बिना वजह नहीं; मय भी योच तरह सी घूसा सी झगडू हय, पर ओको जसो नहीं जो हवा पीटतो हुयो लड़य हय।
1CO 9:27 पर मय अपनो शरीर ख मारतो कुचलतो अऊर वश म लाऊ हय, असो नहीं होय कि दूसरों ख प्रचार कर क् मय खुदच कोयी तरह सी बेकार ठहरू।
1CO 10:1 हे भाऊ-बहिन, मय नहीं चाहऊं कि तुम या बात सी अनजान रह कि हमरो सब बापदादा बादर को खल्लो होतो, अऊर सब को सब समुन्दर को बीच सी पार भय गयो;
1CO 10:2 अऊर सब न बादर म अऊर समुन्दर म, मूसा को बपतिस्मा लियो;
1CO 10:3 अऊर सब न एकच आत्मिक जेवन करयो;
1CO 10:4 अऊर सब न एकच आत्मिक पानी पीयो, कहालीकि हि ऊ आत्मिक चट्टान सी पीवत होतो जो उन्को संग-संग चलत होती, अऊर ऊ चट्टान मसीह होतो।
1CO 10:5 पर परमेश्वर उन्म सी बहुत सो सी खुश नहीं भयो, येकोलायी जंगल म उन्को शरीर बिखर गयो।
1CO 10:6 या बाते हमरो लायी दृष्टान्त ठहरी, कि जसो उन्न लोभ करयो, वसो हम बुरो चिजों को लोभ नहीं करे;
1CO 10:7 अऊर न तुम मूर्तिपूजक बनो, जसो कि उन्म सी कितनो बन गयो होतो, जसो शास्त्र म लिख्यो हय, “लोग एक दूसरों को संग खान-पीवन अऊर कूकर्म करन लग्यो।”
1CO 10:8 अऊर न हम व्यभिचार करे, जसो उन्म सी कितनो न करयो; अऊर एक दिन म तेवीस हजार मर गयो।
1CO 10:9 अऊर नहीं हम प्रभु ख परखबो, जसो उन्म सी कितनो न करयो, अऊर सांपो सी नाश करयो गयो।
1CO 10:10 अऊर तुम कुड़कुड़ावों मत जो तरह सी उन्म सी कितनो न कुड़कुड़ायो अऊर नाश करन वालो को द्वारा नाश करयो गयो।
1CO 10:11 पर या सब बाते, जो उन पर पड़ी, दृष्टान्त की रीति पर होती; अऊर हि हमरी चेतावनी लायी जो जगत को आखरी समय म रह्य हंय लिख्यो गयो हंय।
1CO 10:12 येकोलायी जो समझय हय, “मय स्थिर हय,” ऊ चौकस रहेंन कि कहीं गिर नहीं जाये।
1CO 10:13 तुम कोयी असी परीक्षा म नहीं पड़्यो हय, जो आदमी को सहन सी बाहेर हय। परमेश्वर सच्चो हय अऊर ऊ तुम्ख सामर्थ सी बाहेर परीक्षा म नहीं पड़न देयेंन, बल्की परीक्षा म सी बाहेर आवन को रस्ता बतायेंन।
1CO 10:14 यो वजह, हे मोरो प्रिय, मूर्तिपूजा सी बच्यो रहो।
1CO 10:15 मय बुद्धिमान जान क तुम सी कहू हय: जो मय कहू हय, ओख तुम परखो।
1CO 10:16 जो प्रभु भोज को प्याला आय, जेक हम पीजे हय, अऊर परमेश्वर को धन्यवाद करजे हंय; तब हम मसीह को खून की सहभागिता करजे हय। ऊ रोटी जेक हम खाजे हंय, ऊ मसीह की शरीर म सहभागिता करजे हय।
1CO 10:17 येकोलायी कि एकच रोटी हय त हम भी जो बहुत हंय, तब भी एक शरीर आय : कहालीकि हम सब उच एक रोटी म सहभागी होजे हंय।
1CO 10:18 जो इस्राएली हंय, उन्ख देखो: का बलिदानों को खान वालो परमेश्वर की वेदी को सहभागी नहीं
1CO 10:19 तब मय का कहू हय? का यो कि मूर्ति पर चढ़ायो गयो बलिदान कुछ हय, यां मूर्ति कुछ हय?
1CO 10:20 नहीं, बल्की यो कि प्रभु ख जानन वालो लोग जो बलिदान करय हंय; हि परमेश्वर को लायी नहीं पर दुष्ट आत्मा लायी बलिदान करय हंय अऊर मय नहीं चाहऊं कि तुम दुष्ट आत्मा को सहभागी बनो।
1CO 10:21 तुम प्रभु को प्याला अऊर दुष्ट आत्मा को प्याला दोयी म सी नहीं पी सकय। तुम प्रभु की मेज अऊर दुष्ट आत्मा की मेज दोयी को सहभागी नहीं कर सकय।
1CO 10:22 का हम प्रभु ख गुस्सा दिलानो चाहजे हंय? का हम ओको सी शक्तिशाली हंय?
1CO 10:23 “कुछ कह्य हय सब चिज मोरो लायी ठीक त हंय,” पर सब फायदा की नहाय। “सब चिज मोरो लायी ठीक त हंय,” पर सब चिज सी उन्नति नहाय।
1CO 10:24 कोयी अपनीच भलायी ख नहीं, बल्की दूसरों की भलायी ख ढूंढय हय।
1CO 10:25 जो कुछ कस्साइयों को इत बिकय हय, ऊ खावो अऊर अन्तरमन को वजह कुछ मत पूछो?
1CO 10:26 “कहालीकि पवित्र शास्त्र कह्य हय: धरती अऊर ओकी भरपूरी प्रभु की हय।”
1CO 10:27 यदि अविश्वासियों म सी कोयी तुम्ख नेवता दे, अऊर तुम जानो चाहो, त जो कुछ तुम्हरो सामने रख्यो जायेंन उच खावो; अऊर अन्तरमन को वजह कुछ मत पूछो।
1CO 10:28 पर यदि कोयी तुम सी कहेंन, “या त मूर्ति ख बलि करी हुयी चिज आय,” त उच बतावन वालो को वजह अऊर अन्तरमन को वजह नहीं खावो।
1CO 10:29 मोरो मतलब तोरो अन्तरमन नहीं, पर ऊ दूसरों को। “भलो, मोरी,” स्वतंत्रता दूसरों को बिचार सी कहाली परखे जाये?
1CO 10:30 यदि मय धन्यवाद कर क् सहभागी होऊं हय, त जेक पर मय धन्यवाद करू हय, ओको वजह मोरी निन्दा कहाली होवय हय?
1CO 10:31 येकोलायी तुम चाहे खावो, चाहे पीवो, चाहे जो कुछ करो, सब कुछ परमेश्वर की महिमा लायी करो।
1CO 10:32 तुम नहीं यहूदियों, नहीं गैरयहूदियों, अऊर नहीं परमेश्वर की मण्डली लायी ठोकर को वजह बनो।
1CO 10:33 जसो मय भी सब बातों म सब ख खुश रखू हय, अऊर अपनो नहीं पर बहुतों को फायदा ढूंढू हय कि हि उद्धार पाये।
1CO 11:1 तुम मोरी जसी चाल चलो जसो मय मसीह को जसी चाल चलू हय।
1CO 11:2 हे भाऊ, मय तुम्हरी बड़ायी करू हय कि सब बातों म तुम मोख याद करय हय; अऊर जो शिक्षाये मय न तुम्ख दियो हंय, उन्को पालन करय हय।
1CO 11:3 पर मय चाहऊ हय कि तुम यो जान लेवो कि हर एक आदमी को मुंड मसीह आय, अऊर बाई को मुंड आदमी आय, अऊर मसीह को मुंड परमेश्वर आय।
1CO 11:4 हर असो जो आदमी मुंड पर ओड़्यो हुयो प्रार्थना या परमेश्वर को सन्देश देवय हय, ऊ अपनो मुंड को अपमान करय हय।
1CO 11:5 पर हर असी बाई जो बिना मुंड पर ओड़्यो प्रार्थना करय हय यां परमेश्वर को सन्देश देवय हय, वा अपनो मुंड को अपमान करय हय, कहालीकि वा टकली होन को बराबर हय।
1CO 11:6 यदि बाई मुंड पर नहीं ओढ़ेंन त बाल भी कटाय लेवो; यदि बाई लायी बाल कटानो यां मुंडन करनो शरम की बात हय, त मुंड पर ओढ़ लेवो।
1CO 11:7 हां, आदमी ख अपनो मुंड ओड़नो ठीक नहाय, कहालीकि ऊ परमेश्वर को समानता अऊर महिमा हय; पर बाई आदमी की महिमा हय।
1CO 11:8 कहालीकि आदमी बाई सी नहीं बनायो, पर बाई आदमी सी बनायो हय;
1CO 11:9 अऊर आदमी बाई लायी नहीं बनायो गयो, पर बाई आदमी लायी बनायी गयी हय।
1CO 11:10 यो वजह अऊर स्वर्गदूतों को वजह बाई ख ठीक हय कि अधिकार को चिन्ह समझ क मुंड पर रखे।
1CO 11:11 तब भी प्रभु म नहीं त बाई बिना आदमी, अऊर नहीं आदमी बिना बाई को हय।
1CO 11:12 कहालीकि जसी बाई आदमी सी हय, वसोच आदमी बाई सी जनम लेवय हय; पर सब चिजे परमेश्वर को द्वारा आयी हंय।
1CO 11:13 तुम खुदच बिचार करो, का बाई ख उघाड़्यो मुंड परमेश्वर सी प्रार्थना करनो शोभा देवय हय?
1CO 11:14 का स्वाभाविक रीति सी भी तुम नहीं जानय कि यदि आदमी लम्बो बाल रखय, त ओको लायी ठीक नहाय।
1CO 11:15 पर यदि बाई लम्बो बाल रखय त ओको लायी शोभा हय, कहालीकि बाल ओख ढाकन लायी दियो गयो हंय।
1CO 11:16 पर यदि कोयी यो बारे म विवाद करनो चाहेंन, त यो जान लेवो कि नहीं हमरी अऊर नहीं परमेश्वर की मण्डली की असी रीति हय।
1CO 11:17 पर यो आज्ञा देतो हुयो मय तुम्हरी प्रशंसा नहीं करू हय, येकोलायी कि तुम परमेश्वर की आराधना करन लायी जमा होवय हय त भलायी नहीं, पर हानि होवय हय।
1CO 11:18 कहालीकि पहिले त मय यो सुनू हय, कि जब तुम मण्डली म जमा होवय हय त तुम म फूट होवय हय, अऊर मय येको पर कुछ विश्वास भी करू हय।
1CO 11:19 कहालीकि दलबन्दी भी तुम म जरूरी होयेंन, येकोलायी कि जो लोग तुम म जो सच्चो हंय हि प्रगट होय जाये।
1CO 11:20 येकोलायी तुम जो एक जागा म जमा होवय हय त यो प्रभु-भोज खान लायी नहीं,
1CO 11:21 कहालीकि खान को समय एक दूसरों सी पहिले अपनो जेवन कर लेवय हय, यो तरह सी कोयी त भूखो रह्य हय अऊर कोयी मतवालो होय जावय हय।
1CO 11:22 का खान-पीन लायी तुम्हरो घर नहाय? यां परमेश्वर की मण्डली ख तुच्छ जानय हय, अऊर जिन्को जवर नहीं हय उन्ख लज्जित करय हय? मय तुम सी का कहूं? का या बात म तुम्हरी प्रशंसा करू? नहीं, मय प्रशंसा नहीं करू।
1CO 11:23 कहालीकि या शिक्षाये मोख प्रभु सी मिली, अऊर मय न तुम्ख भी पहुंचाय दियो कि प्रभु यीशु न जो रात ऊ पकड़ायो गयो, रोटी ली,
1CO 11:24 अऊर परमेश्वर को धन्यवाद कर क् ओख तोड़ी अऊर कह्यो, “यो मोरो शरीर आय, जो तुम्हरो लायी दियो गयो हय: मोरो याद लायी योच करयो जाये।”
1CO 11:25 योच रीति सी ओन प्याला भी लियो अऊर कह्यो, “यो प्याला मोरो खून म नयी वाचा आय : जब कभी पीवो, त मोरो याद लायी योच करयो जाये।”
1CO 11:26 कहालीकि जब कभी तुम यो रोटी खावय अऊर यो प्याला म सी पीवय हय, त प्रभु की मृत्यु ख जब तक ऊ नहीं आय जाय, प्रचार करजे हय।
1CO 11:27 येकोलायी जो कोयी नियम को विरुद्ध प्रभु की रोटी खायेंन या ओको प्याला म सी पीयेंन, ऊ प्रभु को शरीर अऊर खून को पापी ठहरेंन।
1CO 11:28 येकोलायी आदमी अपनो आप ख परख लेवो अऊर योच रीति सी यो रोटी म सी खाये, अऊर यो प्याला म सी पी।
1CO 11:29 कहालीकि जो खातो-पीतो समय प्रभु को शरीर ख नहीं पहिचानय, ऊ यो खान अऊर पीन सी अपनो ऊपर सजा लावय हय।
1CO 11:30 योच वजह तुम म बहुत सो कमजोर अऊर रोगी हंय, अऊर बहुत सो मर भी गयो।
1CO 11:31 यदि हम अपनो आप ख जांचतो त परमेश्वर को तरफ सी सजा नहीं पातो
1CO 11:32 पर प्रभु हम्ख न्याय कर क सजा देवय हय, येकोलायी कि हम जगत को संग दोषी नहीं ठहरबोंन।
1CO 11:33 येकोलायी, हे मोरो भाऊ-बहिनों, जब तुम प्रभु-भोज लायी जमा होवय हय त एक दूसरों लायी रुक्यो रहो।
1CO 11:34 यदि कोयी भूखो हय त अपनो घर म खाय ले, जेकोसी तुम्हरो जमा होनो सजा को वजह नहीं होय। बाकी बातों ख मय आय क ठीक करू।
1CO 12:1 हे भाऊ-बहिनों, मय नहीं चाहऊ हय कि तुम पवित्र आत्मा को वरदानों को बारे म अनजान रह।
1CO 12:2 तुम जानय हय कि जब तुम गैरयहूदी होतो, त मुक्की मूर्तियों की पूजा करत होतो अऊर वसोच चलत होतो।
1CO 12:3 येकोलायी मय तुम्ख चेतावनी देऊ हय कि जो कोयी परमेश्वर की आत्मा सी बोलय हय, ऊ नहीं कह्य कि यीशु स्त्रापित हय; अऊर नहीं कोयी पवित्र आत्मा को बिना कह्य सकय हय कि यीशु प्रभु हय।
1CO 12:4 वरदान त कुछ तरह को हंय, पर पवित्र आत्मा एकच आय;
1CO 12:5 अऊर सेवा भी कुछ तरह की हंय, पर प्रभु एकच आय;
1CO 12:6 अऊर प्रभावशाली कार्य कुछ तरह को हंय, पर परमेश्वर एकच आय, जो सब म हर एक तरह को प्रभाव पैदा करय हय।
1CO 12:7 पर सब को फायदा पहुंचान लायी हर एक ख पवित्र आत्मा को प्रकाश दियो जावय हय।
1CO 12:8 कहालीकि एक ख आत्मा को द्वारा बुद्धि की बाते दियो जावय हंय, अऊर दूसरों ख उच आत्मा को अनुसार ज्ञान की बाते।
1CO 12:9 कोयी ख उच आत्मा सी विश्वास, अऊर कोयी ख उच एक आत्मा सी चंगो करन को वरदान दियो जावय हय।
1CO 12:10 तब कोयी ख सामर्थ को काम करन की ताकत, अऊर कोयी ख परमेश्वर को सन्देश देन को दान, अऊर कोयी ख आत्मावों को दाना ख परखन, अऊर कोयी ख बहुत तरह की भाषा, अऊर कुछ ख भाषावों को मतलब बतावन को।
1CO 12:11 पर यो सब प्रभावशाली काम उच एक पवित्र आत्मा करावय हय, अऊर जेक जो चाहवय हय ऊ बाट देवय हय।
1CO 12:12 कहालीकि जसो की शरीर त एक हय अऊर ओको हिस्सा बहुत सो हंय, अऊर ऊ एक शरीर को सब हिस्सा बहुत होन पर भी सब मिल क एकच शरीर आय, असोच तरह मसीह को शरीर भी आय।
1CO 12:13 कहालीकि हम सब न का यहूदी होय का गैरयहूदी, का सेवक होय का स्वतंत्र एकच आत्मा को द्वारा एक शरीर होन लायी बपतिस्मा लियो, अऊर हम सब ख एकच आत्मा पिलायो गयो।
1CO 12:14 येकोलायी कि शरीर म एकच हिस्सा नहाय पर बहुत सो हंय।
1CO 12:15 यदि पाय कहेंन, “मय हाथ नोहोय, येकोलायी शरीर को नोहोय,” त का ऊ यो वजह शरीर को नोहोय?
1CO 12:16 अऊर यदि कान कह्य, “मय आंखी नहाय, येकोलायी शरीर को नोहोय,” त का ऊ यो वजह शरीर को नोहोय?
1CO 12:17 यदि पूरो शरीर आंखीच होती त सुननो कहां होतो? यदि पूरो शरीर कान होतो, त सूंघनो कहां होतो?
1CO 12:18 पर अच्छो सी परमेश्वर न शरीर को हिस्सा ख अपनी इच्छा को अनुसार एक एक कर क् शरीर म रख्यो हय।
1CO 12:19 यदि हि सब एकच हिस्सा होतो, त शरीर कहां होतो?
1CO 12:20 पर अब शरीर को हिस्सा त बहुत सो हंय, पर शरीर एकच आय।
1CO 12:21 आंखी हाथ सी नहीं कह्य सकय, “मोख तोरी जरूरत नहाय,” अऊर नहीं मुंड पाय सी कह्य सकय हय, “मोख तुम्हरी जरूरत नहाय।”
1CO 12:22 पर शरीर को हि हिस्सा जो दूसरों सी कमजोर लगय हंय, बहुतच जरूरी हंय;
1CO 12:23 अऊर शरीर को जिन हिस्सा ख हम आदर को लायक नहीं समझय उन्खच हम बहुत आदर देवय हंय; अऊर हमरो अच्छो नहीं दिखन वालो हिस्सा अऊर भी बहुत अच्छो सी ढकजे हंय,
1CO 12:24 तब भी हमरो अच्छो दिखन वालो हिस्सा ख येकी जरूरत नहाय। पर परमेश्वर न शरीर ख असो बनाय दियो हय कि जो हिस्सा ख आदर की कमी होती ओखच बहुत आदर मिल्यो।
1CO 12:25 ताकि शरीर म फूट नहीं पड़े, पर शरीर को हिस्सा एक दूसरों की बराबर चिन्ता करे।
1CO 12:26 येकोलायी यदि एक हिस्सा दु:ख पावय हय, त सब हिस्सा ओको संग दु:ख पावय हंय; अऊर यदि एक हिस्सा की बड़ायी होवय हय, त ओको संग सब हिस्सा खुशी मनावय हंय।
1CO 12:27 यो तरह तुम सब मिल क मसीह को शरीर आय, अऊर हर एक लोग ओको अलग अलग ओको हिस्सा आय;
1CO 12:28 अऊर परमेश्वर न मण्डली म अलग अलग आदमी चुन्यो हंय: पहिलो प्रेरित, दूसरों परमेश्वर को तरफ सी आवन वालो सन्देश लावन वालो, तीसरो शिक्षक, फिर सामर्थ को काम करन वालो, फिर चंगो करन वालो, अऊर दूसरों ख मदत करन वालो, अऊर इन्तजाम करन वालो, अऊर अज्ञात भाषा बोलन वालो।
1CO 12:29 का सब प्रेरित आय? का सब भविष्यवक्ता आय? का सब शिक्षक आय? का सब सामर्थ को काम करन वालो आय?
1CO 12:30 का सब ख चंगो करन को वरदान मिल्यो हय? का सब अज्ञात भाषा बोलय हंय? अऊर का सब अज्ञात भाषा को अनुवाद करय हय?
1CO 12:31 तुम बड़ो सी बड़ो वरदानों की इच्छा रखो। पर मय तुम्ख अऊर भी सब सी उत्तम रस्ता बताऊ हय।
1CO 13:1 यदि मय आदमियों अऊर स्वर्गदूतों की बोली बोलू अऊर प्रेम नहीं रखू, त मय ठनठन बजन वाली घंटी, अऊर झंझनाती हुयी खंजरी आय।
1CO 13:2 अऊर यदि मय परमेश्वर को तरफ सी आवन वालो सन्देश दे सकू, अऊर पूरो भेद अऊर सब तरह को ज्ञान ख समझू, अऊर मोख यहां तक पूरो विश्वास होय कि मय पहाड़ी ख हटाय देऊ, पर प्रेम नहीं रखू, त मय कुछ भी नहाय।
1CO 13:3 यदि मय अपनी पूरी जायजाद गरीबों ख खिलाय देऊ, यां अपनो शरीर जलावन लायी दे देऊ, अऊर प्रेम नहीं रखू, त मोख कुछ भी लाभ नहाय।
1CO 13:4 प्रेम धीरजवन्त हय, अऊर दयालु हय; प्रेम जलन नहीं करय; प्रेम अपनी बड़ायी नहीं करय, अऊर अपनो आप म फूलय नहाय,
1CO 13:5 ऊ अनरीति नहीं चलय, ऊ अपनी भलायी नहीं चाहवय, चिड़य नहीं, दूसरों की बुरी बातों को लेखा नहीं रखय।
1CO 13:6 बुरायी सी खुशी नहीं होवय, पर सत्य सी खुशी होवय हय।
1CO 13:7 ऊ सब बाते सह लेवय हय, सब बातों की विश्वास करय हय, सब बातों की आशा रखय हय, सब बातों म धीरज रखय हय।
1CO 13:8 प्रेम कभी टलय नहाय; परमेश्वर को तरफ सी आवन वालो सन्देश हय त खतम होय जायेंन; अज्ञात भाषा हय त जाती रहेंन, ज्ञान हय, त मिट जायेंन।
1CO 13:9 कहालीकि हमरो ज्ञान अधूरो हय, अऊर हमरो परमेश्वर को तरफ सी आवन वालो सन्देश अधूरो हय;
1CO 13:10 पर जब परिपूर्णता करेंन, त अधूरोपन मिट जायेंन।
1CO 13:11 जब मय बच्चा होतो, त मय बच्चों को जसो बोलत होतो, बच्चा को जसो मन होतो, बच्चों की जसी समझ होती; पर जब समझदार होय गयो त बचपना की बाते छोड़ दियो।
1CO 13:12 अभी हम्ख आरसा म धुंधलो सो दिखायी देवय हय, पर ऊ समय आमने-सामने देखेंन; यो समय मोरो ज्ञान अधूरो हय, पर ऊ समय असी पूरी रीति सी पहिचानू, जसो की परमेश्वर मोख पहिचान्यो हय।
1CO 13:13 पर अब विश्वास, आशा, प्रेम यो तीन हंय, पर इन म सब सी बड़ो प्रेम हय।
1CO 14:1 प्रेम को अनुकरन करन लायी कोशिश करो, अऊर आत्मिक वरदानों की भी धुन म रहो, विशेष कर क् यो कि परमेश्वर को तरफ सी आवन वालो सन्देश को दान करो।
1CO 14:2 कहालीकि जो अज्ञात भाषा म बाते करय हय ऊ आदमियों सी नहीं पर परमेश्वर सी बाते करय हय; येकोलायी कि ओकी बाते कोयी नहीं समझय, कहालीकि ऊ भेद की बाते पवित्र आत्मा म होय क बोलय हय।
1CO 14:3 पर जो परमेश्वर को तरफ सी आवन वालो सन्देश ख बाटय हय, ऊ आदमियों सी उन्नति अऊर उपदेश अऊर प्रोत्साहन की बाते करय हय।
1CO 14:4 जो अज्ञात भाषा म बाते करय हय, ऊ अपनोच उन्नति करय हय; पर जो परमेश्वर को तरफ सी आवन वालो सन्देश की बाते करय हय, ऊ मण्डली की उन्नति करय हय।
1CO 14:5 मय चाहऊ हय कि तुम सब अज्ञात भाषावों म बाते करो पर येको सी जादा यो चाहऊ हय कि परमेश्वर को तरफ सी आवन वालो सन्देश की देन वालो: कहालीकि यदि अज्ञात भाषा बोलन वालो मण्डली की उन्नति लायी अनुवाद नहीं करे त परमेश्वर को तरफ सी आवन वालो सन्देश की करन वालो ओको सी बढ़ क हय।
1CO 14:6 येकोलायी हे भाऊ अऊर बहिनों, यदि मय तुम्हरो जवर आय क अज्ञात भाषावों म बाते करू, त मोरो सी तुम्ख का फायदा होयेंन? अऊर प्रकाश यां ज्ञान यां परमेश्वर को तरफ सी आवन वालो सन्देश करय हय, यां उपदेश की बाते कहूं, त तुम्ख जादा फायदा होयेंन?
1CO 14:7 योच तरह यदि निर्जीव चिजे भी जेकोसी आवाज निकलय हय, जसो बांसुरी यां बीन, यदि उन्को स्वरों म भेद नहीं होय त जो फूक्यो यां बजायो जावय हय, ऊ संगीत ख कसो पहिचान्यो जायेंन?
1CO 14:8 अऊर यदि तुरही को आवाज साफ नहीं होय, त कौन लड़ाई लायी तैयारी करेंन?
1CO 14:9 असोच तुम भी यदि जीबली सी साफ-साफ बाते नहीं कहो, त जो कुछ कह्यो जावय हय ऊ कसो समझ्यो जायेंन? तुम त हवा सी बाते करन वालो ठहरो।
1CO 14:10 जगत म कितनोच तरह की भाषा होना, पर उन्म सी असी कोयी भी नहाय जेको मतलब नहीं निकलत होना।
1CO 14:11 येकोलायी यदि मय कोयी भाषा को मतलब नहीं समझू, त बोलन वालो की नजर म परदेशी ठहरू अऊर बोलन वालो मोरी नजर म परदेशी ठहरेंन।
1CO 14:12 येकोलायी तुम भी जब आत्मिक वरदानों की धुन म रहो, त असो कोशिश करो कि तुम्हरो ऊ वरदानों की उन्नति की कोशिश म रहो जेकोसी मण्डली की उन्नति हो।
1CO 14:13 जो अज्ञात भाषा बोलय हय त, ऊ प्रार्थना करे कि ओको अनुवाद भी कर सके।
1CO 14:14 येकोलायी यदि मय अज्ञात भाषा म प्रार्थना करू, त मोरी आत्मा प्रार्थना करय हय पर मोरी बुद्धि काम नहीं देवय।
1CO 14:15 येकोलायी का करन ख होना? मय आत्मा सी भी प्रार्थना करू, अऊर बुद्धि सी भी प्रार्थना करू; मय आत्मा सी गाऊं, अऊर बुद्धि सी भी गाऊं।
1CO 14:16 नहीं त यदि तय आत्माच सी धन्यवाद करजो, त फिर लोग तोरो धन्यवाद पर आमीन कसो कहेंन? कहालीकि ऊ त नहीं जानय कि तय का कह्य हय?
1CO 14:17 तय त भली भाति धन्यवाद करय हय, पर दूसरों की उन्नति नहीं होवय।
1CO 14:18 मय अपनो परमेश्वर को धन्यवाद करू हय, कि मय तुम सब सी जादा अज्ञात भाषावों म बोलू हय।
1CO 14:19 पर मण्डली म अज्ञात भाषा म दस हजार बाते कहन सी यो मोख अऊर भी अच्छो जान पड़य हय, कि दूसरों ख सिखावन लायी बुद्धि सी पाच बाते कहूं।
1CO 14:20 हे भाऊ-बहिनों, तुम समझ म बच्चा को जसो नहीं बनो: बुरायी म त बच्चा रहो, पर समझ म सियानो बनो।
1CO 14:21 व्यवस्था म लिख्यो हय कि प्रभु कह्य हय, “मय अपरिचित भाषा बोलन वालो को द्वारा, अऊर परायो मुंह को द्वारा इन लोगों सी बाते करू तब भी हि मोरी नहीं सुनेंन।”
1CO 14:22 येकोलायी अज्ञात भाषा बोलन को वरदान विश्वासियों लायी नहाय, पर अविश्वासियों लायी चमत्कार को चिन्ह आय; अऊर परमेश्वर को तरफ सी आवन वालो सन्देश अविश्वासी लायी नहाय पर विश्वासियों लायी चमत्कार को चिन्ह आय।
1CO 14:23 येकोलायी यदि मण्डली एक जागा जमा होय क, अऊर सब को सब अज्ञात भाषा बोले, अऊर बाहेर वालो या अविश्वासी लोग अन्दर आय जाये त का हि तुम्ख पागल नहीं कहेंन?
1CO 14:24 पर यदि सब परमेश्वर को तरफ सी आवन वालो सन्देश करन लग्यो, अऊर कोयी अविश्वासी यां बाहेर वालो आदमी अन्दर आय जाये, त सब ओख दोषी ठहराय देयेंन अऊर जान जायेंन कि हि पापी हय; अऊर उन्ख पश्चाताप की जरूरत हय।
1CO 14:25 अऊर ओको मन को भेद प्रगट होय जायेंन, अऊर तब ऊ मुंह को बल गिर क परमेश्वर ख दण्डवत करेंन, अऊर मान लेयेंन कि सचमुच परमेश्वर तुम्हरो बीच म हय।
1CO 14:26 येकोलायी हे भाऊ-बहिनों, का करन ख होना? जब तुम जमा होवय हय, त हर एक को दिल म भजन यां उपदेश यां अज्ञात भाषा यां प्रकाशन यां अज्ञात भाषा को मतलब बतानो रह्य हय। सब कुछ आत्मिक उन्नति लायी होन ख होना।
1CO 14:27 यदि अज्ञात भाषा म बाते करनो हय त दोय यां तीन लोग पारी-पारी सी बोले, अऊर एक आदमी अनुवाद करन ख होना।
1CO 14:28 पर यदि अनुवाद करन वालो नहीं हय, त अज्ञात भाषा बोलन वालो मण्डली म चुपचाप रहन ख होना, अऊर अपनो मन सी अऊर परमेश्वर सी बाते करतो रह्य।
1CO 14:29 परमेश्वर को तरफ सी सन्देश लावन वालो म सी दोय यां तीन बोले, अऊर बाकी लोग उन्को वचन ख परखे।
1CO 14:30 पर यदि दूसरों जो बैठ्यो हय, यदि कुछ ईश्वरीय प्रकाशन उन्को जवर होना त पहिलो चुप होय जाये।
1CO 14:31 कहालीकि तुम सब एक एक कर क् परमेश्वर को तरफ सी सन्देश कर सकय हय, ताकि सब सीखे अऊर सब शान्ति पाये।
1CO 14:32 अऊर परमेश्वर को तरफ सी सन्देश लावन वालो की आत्मा उन्को वश म रह्य हय।
1CO 14:33 कहालीकि परमेश्वर अव्यवस्था नोहोय। पर शान्ति देवय हय। जसो पवित्र लोगों की सब मण्डलियों म हय।
1CO 14:34 बाईयां मण्डली की सभा म चुप रहे, कहालीकि उन्ख बाते करन की आज्ञा नहाय, पर अधीन रहन की आज्ञा हय, जसो व्यवस्था म लिख्यो भी हय।
1CO 14:35 यदि हि कुछ सीखनो चाहवय, त घर म अपनो अपनो पति सी पूछो, कहालीकि बाई ख मण्डली म बाते करनो शरम की बात हय।
1CO 14:36 का परमेश्वर को वचन तुम म सी निकल्यो हय? यां केवल तुमच तक पहुंच्यो हय?
1CO 14:37 यदि कोयी आदमी अपनो आप ख परमेश्वर को सन्देश लावन वालो यां आत्मिक लोग समझय, त यो जान ले कि जो बाते मय तुम्ख लिखू हय, हि प्रभु की आज्ञा आय।
1CO 14:38 पर यदि कोयी येको तरफ ध्यान नहीं देयेंन, त ओको तरफ भी कोयी ध्यान नहीं दियो जायेंन।
1CO 14:39 येकोलायी हे भाऊ-बहिनों, परमेश्वर को तरफ सी सन्देश देन कि इच्छा रखो अऊर अज्ञात भाषा बोलन सी मना मत करो;
1CO 14:40 पर पूरी बाते समझदारी अऊर एक को बाद एक करयो जाय।
1CO 15:1 हे भाऊ-बहिनों, अब मय तुम्ख याद दिलानो चाहऊ हय पहिले उच सुसमाचार सुनाय चुक्यो हय, जेक तुम न अंगीकार भी करयो होतो अऊर जेको म तुम स्थिर भी हय।
1CO 15:2 ओकोच सी तुम्हरो उद्धार भी होवय हय, यदि ऊ सुसमाचार ख जो मय न तुम्ख सुनायो होतो पकड़्यो रखय हय; नहीं त तुम्हरो विश्वास करनो बेकार भयो।
1CO 15:3 योच वजह मय न सब सी पहिले तुम्ख उच बात पहुंचाय दियो, जो मोख पहुंची होती कि पवित्र शास्त्र को वचन को अनुसार या बहुत किमती बात हय कि यीशु मसीह हमरो पापों लायी मर गयो,
1CO 15:4 अऊर गाड़्यो गयो, अऊर पवित्र शास्त्र को अनुसार तीसरो दिन जीन्दो भयो,
1CO 15:5 अऊर पतरस ख तब बारयी ख भी दिखायी दियो।
1CO 15:6 तब ऊ पाच सौ सी जादा विश्वासियों ख एक संग दिखायी दियो, जिन्म सी बहुत सो अब तक जीन्दो हंय पर कुछ मर गयो।
1CO 15:7 तब ऊ याकूब ख दिखायी दियो तब सब प्रेरितों ख दिखायी दियो।
1CO 15:8 सब को बाद मोख भी दिखायी दियो, जो मानो अधूरो दिनो को पैदा भयो हय।
1CO 15:9 कहालीकि मय प्रेरितों म सब सी छोटो हय, बल्की प्रेरित कहलान को लायक भी नहाय, कहालीकि मय न परमेश्वर की मण्डली ख सतायो होतो।
1CO 15:10 पर मय जो कुछ भी हय, परमेश्वर को अनुग्रह सी हय। ओको अनुग्रह जो मोरो पर भयो, ऊ बेकार नहीं भयो; पर मय न उन सब सी बढ़ क मेहनत भी करयो: तब भी यो मोरो तरफ सी नहीं भयो पर परमेश्वर को अनुग्रह मोरो पर होतो।
1CO 15:11 येकोलायी चाहे मय आय, चाहे उन हो, हम योच प्रचार करजे हंय, अऊर येको पर तुम न विश्वास भी करयो।
1CO 15:12 येकोलायी जब कि मसीह को यो प्रचार करयो जावय हय कि ऊ मरयो हुयो म सी जीन्दो भयो, त तुम म सी कितनो कसो कह्य हंय कि मरयो हुयो को पुनरुत्थान हयच नहाय?
1CO 15:13 यदि मरयो हुयो को पुनरुत्थान हयच नहाय, त मसीह भी जीन्दो नहीं भयो;
1CO 15:14 अऊर यदि मसीह जीन्दो नहीं भयो, त हमरो प्रचार करनो भी बेकार हय, अऊर तुम्हरो विश्वास भी बेकार हय।
1CO 15:15 बल्की हम परमेश्वर को झूठो गवाह ठहरबो; कहालीकि हम न परमेश्वर को बारे म या गवाही दी कि ओन मसीह ख जीन्दो कर दियो, जब कि नहीं जीन्दो करयो यदि मरयो हुयो नहीं जीन्दो होवय।
1CO 15:16 अऊर यदि मुर्दा जीन्दो नहीं होतो, त मसीह भी नहीं जीन्दो होतो;
1CO 15:17 अऊर यदि मसीह नहीं जीन्दो भयो, त तुम्हरो विश्वास बेकार हय, अऊर तुम अब तक अपनो पापों म फस्यो हय।
1CO 15:18 बल्की जो मसीह म विश्वास करन वालो मर गयो, हि भी नाश भयो।
1CO 15:19 यदि हम केवल योच जीवन म मसीह सी आशा रखजे हंय त हम सब आदमियों सी जादा दयालु हंय।
1CO 15:20 पर सचमुच मसीह मुर्दा म सी जीन्दो भयो हय, अऊर जो मर गयो हंय उन्म ऊ पहिलो सबूत हय।
1CO 15:21 कहालीकि जब एक आदमी को द्वारा हि मृत्यु आयी, त एक आदमी को द्वाराच मरयो हुयो को पुनरुत्थान भी आयो।
1CO 15:22 अऊर जसो आदम न सब पर मृत्यु लायी, वसोच मसीह सब ख जीवन देयेंन,
1CO 15:23 मृत्यु म सी पहिले मसीह जीन्दो होयेंन, तब ऊ वापस आयेंन तब ओको पर जो विश्वास करेंन ऊ जीन्दो होयेंन।
1CO 15:24 येको बाद अन्त होयेंन। ऊ समय ऊ पूरो शासक, अधिकार अऊर सामर्थ को मसीह को द्वारा अन्त कर क् राज्य ख परमेश्वर पिता को हाथ म सौंप देयेंन।
1CO 15:25 कहालीकि जब तक ऊ अपनो दुश्मनों ख अपनो पाय खल्लो नहीं ले आवय, तब तक मसीह को राज्य करनो जरूरी हय।
1CO 15:26 सब सी आखरी दुश्मन जो नाश करयो जायेंन, वा मृत्यु आय।
1CO 15:27 कहालीकि शास्त्र कह्य हय “परमेश्वर न सब कुछ ओको पाय खल्लो कर दियो हय,” पर जब ऊ कह्य हय कि सब कुछ मसीह को अधीन कर दियो गयो हय त स्पष्ट हय कि जेन ओको अधीन कर दियो, परमेश्वर खुद अलग रह्यो।
1CO 15:28 अऊर जब सब कुछ ओको अधीन होय जायेंन, त बेटा खुद भी ओको अधीन होय जायेंन, जेन ओको अधीन कर दियो, ताकि सब म परमेश्वर सब बातों म राज करेंन।
1CO 15:29 नहीं त जो लोग मरयो हुयो लायी बपतिस्मा लेवय हंय हि का करेंन? यदि मुर्दा फिर सी जीन्दो होतोच नहीं त फिर कहाली उन्को लायी बपतिस्मा लेवय हंय?
1CO 15:30 अऊर हम भी कहाली हर समय खतरा म पड़्यो रहजे हंय?
1CO 15:31 हे भाऊ-बहिनों, मोख ऊ गर्व सी जो हमरो प्रभु मसीह यीशु म मय तुम्हरो बारे म करू हय कि मय हर दिन मरू हय।
1CO 15:32 यदि मय आदमी की रीति पर इफिसुस म जंगल को जनावर जसो सी लड़्यो त मोख का फायदा भयो? यदि मुर्दा जीन्दो करयो नहीं जाये, “त आवो, खाबोंन-पीबो, कहालीकि कल त मरनोच हय।”
1CO 15:33 धोका मत खा, “बुरी संगति अच्छो चरित्र ख बिगाड़ देवय हय।”
1CO 15:34 जसो की उचित हय अऊर पाप छोड़ो; कहालीकि कुछ असो हंय जो परमेश्वर ख नहीं जानय। मय तुम्ख शर्मिन्दा करन लायी यो कहू हय।
1CO 15:35 अब कोयी यो कहेंन, “मुर्दा कसी रीति सी जीन्दो उठय हंय, अऊर कसो शरीर को संग आवय हय?”
1CO 15:36 हे मुर्ख! जो कुछ तय बोवय हय, जब तक पहिले मर नहीं जावय, तब तक जीन्दो नहीं होवय।
1CO 15:37 अऊर जो तय बोवय हय, यो ऊ पौधा नोहोय जो बढ़न वालो हय, पर निरो दाना आय, चाहे गहूं को चाहे कोयी अऊर अनाज को।
1CO 15:38 पर परमेश्वर अपनी इच्छा को जसो ओख शरीर देवय हय, अऊर हर एक बीज ख ओकी विशेष शरीर।
1CO 15:39 सब शरीर एक जसो नहीं: आदमियों को शरीर अऊर हय, पशुवों को शरीर अऊर हय; पक्षिंयों को शरीर अऊर हय; मच्छी को शरीर अऊर हय।
1CO 15:40 स्वर्गीय शरीर हंय अऊर पार्थिव शरीर भी हंय। पर स्वर्गीय शरीर को तेज अऊर हय, अऊर पार्थिव को अऊर।
1CO 15:41 सूरज को तेज अऊर हय, चन्दा को तेज अऊर हय, अऊर चांदनियों को तेज अऊर हय, कहालीकि एक तारा सी दूसरों तारा को तेज म अन्तर हय।
1CO 15:42 मुर्दा को जीन्दो होनो भी असोच हय। शरीर नाशवान दशा म बोयो जावय हय अऊर अविनाशी रूप म जीन्दो उठय हय।
1CO 15:43 ऊ अपमान को संग बोयो जावय हय, अऊर तेज को संग जीन्दो होवय हय; कमजोर को संग बोयो जावय हय, अऊर महिमा को संग जीन्दो होवय हय।
1CO 15:44 स्वाभाविक शरीर गड़ायो जावय हय, अऊर आत्मिक शरीर जीन्दो होवय हय: जब कि स्वाभाविक शरीर हय, त आत्मिक शरीर भी हय।
1CO 15:45 असोच शास्त्र म लिख्यो हय, कि “पहिलो आदमी, मतलब आदम जीन्दो प्रानी बन्यो” अऊर आखरी आदम, जीवन दायक आत्मा हय।
1CO 15:46 पर पहिले आत्मिक नहीं होतो पर स्वाभाविक शरीर होतो, येको बाद आत्मिक भयो।
1CO 15:47 पहिलो आदमी आदम धरती सी मतलब माटी को होतो; दूसरों आदमी स्वर्गीय आय।
1CO 15:48 जसो ऊ माटी को होतो, वसोच हि भी हंय जो माटी को हंय; अऊर जसो ऊ स्वर्गीय हय, वसोच हि भी हंय जो स्वर्गीय हंय।
1CO 15:49 अऊर जसो हम न ओको शरीर धारन करयो जो माटी को होतो वसोच ऊ स्वर्गीय रूप भी धारन करबो।
1CO 15:50 हे भाऊ-बहिनों, मय यो कहू हय कि मांस अऊर खून परमेश्वर को राज्य को अधिकारी नहीं होय सकय, अऊर नहीं नाशवान अविनाशी को अधिकारी होय सकय हय।
1CO 15:51 देखो, मय तुम सी भेद की बात कहू हय: हम सब नहीं मरबो, पर सब बदल जायेंन,
1CO 15:52 अऊर यो पल भर म, पलक मारतोच आखरी तुरही फूकतोच होयेंन। कहालीकि तुरही फूकी जायेंन अऊर मुर्दा अविनाशी दशा म उठायो जायेंन, अऊर हम बदल जाबो।
1CO 15:53 कहालीकि जरूरी हय कि यो नाशवान शरीर अविनाश ख पहिन ले, अऊर यो मरनहार शरीर अमरता ख पहिन ले।
1CO 15:54 अऊर जब यो नाशवान अविनाश ख पहिन लेन, अऊर यो मरनहार अमरता ख पहिन लेन, तब ऊ वचन जो लिख्यो हय पूरो होय जायेंन: “जय न मृत्यु को नाश कर दियो।”
1CO 15:55 “हे, मृत्यु, तोरी जय कित रही? हे, मृत्यु, तोरो डंक कित रह्यो?”
1CO 15:56 मृत्यु को डंक पाप हय, अऊर पाप ख मूसा को व्यवस्था सी ताकत मिलय हय।
1CO 15:57 पर परमेश्वर को धन्यवाद हो, जो हमरो प्रभु यीशु मसीह को द्वारा हम्ख जयवन्त करय हय।
1CO 15:58 येकोलायी हे मोरो प्रिय भाऊ-बहिनों, मजबूत अऊर अटल रहो, अऊर प्रभु को काम म हमेशा बढ़तो जावो, कहालीकि यो जानय हय कि तुम्हरी मेहनत प्रभु म बेकार नहाय।
1CO 16:1 अब ऊ चन्दा को बारे म जो परमेश्वर को लोगों लायी करयो जावय हय, जसी आज्ञा मय न गलातिया की मण्डली ख दी, वसोच तुम भी करो।
1CO 16:2 हप्ता को पहिले दिन तुम म सी हर एक अपनी आमदनी को अनुसार कुछ अपनो जवर रख छोड़ो कि मोरो आनो पर चन्दा नहीं करनो पड़े।
1CO 16:3 अऊर जब मय आऊं, त जिन्ख तुम चाहो उन्ख मय चिट्ठियां दे क भेज देऊ कि तुम्हरो दान यरूशलेम पहुंचाय दे।
1CO 16:4 यदि मोरो भी जानो ठीक भयो, त हि मोरो संग जायेंन।
1CO 16:5 मय मकिदुनिया होय क तुम्हरो जवर आऊं, कहालीकि मोख मकिदुनिया होय क जानोच हय।
1CO 16:6 पर सम्भव हय कि तुम्हरो इतच रुक जाऊं अऊर ठंडी को मौसम तुम्हरो इत काटू, तब जो तरफ मोरो जानो होय ऊ तरफ तुम मोख भेज देवो।
1CO 16:7 कहालीकि मय अब रस्ता म तुम सी थोड़ो समय की भेंट करनो नहीं चाहऊं; पर मोख आशा हय कि यदि प्रभु चाहवय त कुछ समय तक तुम्हरो संग रहूं।
1CO 16:8 पर मय पिन्तेकुस्त तक इफिसुस म रहूं,
1CO 16:9 कहालीकि मोरो लायी उत एक बड़ो अऊर उपयोगी द्वार खुल्यो हय, अऊर विरोधी बहुत सो हंय।
1CO 16:10 यदि तीमुथियुस आय जाये, त देखजो कि ऊ तुम्हरो इत आदर सी रहे; कहालीकि ऊ मोरो जसो प्रभु को काम करय हय।
1CO 16:11 येकोलायी कोयी ओख तुच्छ नहीं जाने, पर ओख शान्ति सी यो तरफ पहुंचाय देनो कि मोरो जवर आय जाये; कहालीकि मय ओकी रस्ता देख रह्यो हय कि हि भाऊ को संग आये।
1CO 16:12 भाऊ अपुल्लोस सी मय न बहुत बिनती करी हय कि तुम्हरो जवर भाऊ को संग जाये; पर ओन यो समय जान की कुछ भी इच्छा नहीं जतायी, पर जब समय मिलेंन तब आय जायेंन।
1CO 16:13 जागतो रहो, विश्वास म बन्यो रहो, साहसी बनो, बलवन्त हो।
1CO 16:14 जो कुछ करय हय प्रेम सी करो।
1CO 16:15 हे भाऊ-बहिनों, तुम स्तिफनास को घरानों ख जानय हय कि हि अखया को पहिले फर आय, अऊर परमेश्वर को लोगों की सेवा लायी तैयार रह्य हंय।
1CO 16:16 येकोलायी मय तुम सी बिनती करू हय कि असो को अधीन रहो, बल्की हर एक को जो यो काम म मेहनत अऊर सहकर्मी हय।
1CO 16:17 मय स्तिफनास अऊर फूरतूनातुस अऊर अखइकुस को आनो सी खुश हय, कहालीकि उन्न तुम्हरी कमी ख पूरो करयो हय।
1CO 16:18 उन्न मोख अऊर तुम्ख आत्मा ख चैन दियो हय, येकोलायी असो ख मानो।
1CO 16:19 आसिया की मण्डली को तरफ सी तुम ख हार्दिक नमस्कार; अक्विला अऊर प्रिस्का को अऊर उन्को घर की मण्डली को भी तुम ख प्रभु म बहुत–बहुत हार्दिक नमस्कार!
1CO 16:20 सब विश्वासियों को तरफ सी तुम ख नमस्कार। मसीह को प्रेम सी एक दूसरों ख गरो लगाय क आपस म नमस्कार करो।
1CO 16:21 मय पौलुस को अपनो हाथ को लिख्यो हुयो नमस्कार।
1CO 16:22 यदि कोयी प्रभु सी प्रेम नहीं रखय त ओको पर हाय। हे हमरो प्रभु, आव!
1CO 16:23 प्रभु यीशु को अनुग्रह तुम पर होतो रहे।
1CO 16:24 मोरो प्रेम मसीह यीशु म तुम सब को संग रहे। आमीन।
2CO 1:1 पौलुस को तरफ सी जो परमेश्वर की इच्छा सी मसीह यीशु को प्रेरित हय, अऊर भाऊ तीमुथियुस को तरफ सी परमेश्वर की उन मण्डली को, नाम जो कुरिन्थुस म हय, अऊर पूरो अखया को सब पवित्र लोगों ख।
2CO 1:2 हमरो पिता परमेश्वर अऊर प्रभु यीशु मसीह को तरफ सी तुम्ख अनुग्रह अऊर शान्ति मिलती रहें।
2CO 1:3 हमरो प्रभु यीशु मसीह को बाप अऊर परमेश्वर को धन्यवाद हो, जो दया को बाप अऊर सब तरह की शान्ति को परमेश्वर हय।
2CO 1:4 ऊ हमरो सब कठिनायियों म प्रोत्साहन देवय हय; ताकि हम वा प्रोत्साहन को वजह जो परमेश्वर हम्ख देवय हय, उन्ख भी प्रोत्साहन दे सकेंन जो कोयी तरह की कठिनायी म हंय।
2CO 1:5 कहालीकि जसो मसीह को दु:खों म हम बहुत सहभागी होयजे हंय, वसोच हम शान्ति म भी मसीह को द्वारा बहुत सहभागी होयजे हंय।
2CO 1:6 यदि हम कठिनायी उठायजे हंय, त या तुम्हरी शान्ति अऊर मुक्ति लायी हय; यदि हम खुश हंय, त या तुम्हरो खुशी लायी हय; जेको प्रभाव सी तुम धीरज को संग उन कठिनायियों ख सह लेवय हय, जिन्ख हम भी सहजे हंय।
2CO 1:7 हमरी आशा तुम्हरो बारे म मजबूत हय; कहालीकि हम जानजे हंय कि तुम जसो हमरो दु:खों म, वसोच प्रोत्साहन म भी सहभागी हो।
2CO 1:8 हे भाऊवों अऊर बहिनों, हम नहीं चाहजे कि तुम हमरो ऊ कठिनायी सी अनजान रहो जो आसिया को प्रदेश म हम पर पड़्यो; हम असो भारी बोझ सी दब गयो होतो, जो हमरी सामर्थ सी बाहेर होतो, यहां तक कि हम जीवन सी भी हाथ धोय बैठ्यो होतो।
2CO 1:9 बल्की हम न अपनो मन म समझ लियो होतो कि हम पर मरन की आज्ञा भय गयी हय। ताकि हम अपनो भरोसा नहीं रखे बल्की परमेश्वर को जो मरयो हुयो ख जीन्दो करय हय।
2CO 1:10 ओनच हम्ख मरन को असो बड़ो संकट सी बचायो, अऊर छुड़ायेंन; अऊर ओको पर हमरी या आशा हय। कि ऊ आगु भी बचातो रहेंन।
2CO 1:11 तुम भी मिल क प्रार्थना सी हमरी मदत करो कि जो वरदान बहुतों सी हम्ख मिल्यो, परमेश्वर को अनुग्रह सी बहुत लोग हमरो तरफ सी धन्यवाद करें।
2CO 1:12 कहालीकि हम अपनो अन्तरमन की या गवाही पर घमण्ड करजे हंय, कि जगत म अऊर विशेष कर क् तुम्हरो बीच, हमरो चरित्र परमेश्वर को लायक असी पवित्रता अऊर सच्चायी संग होतो, जो मानविय ज्ञान सी नहीं पर परमेश्वर को अनुग्रह को संग होतो।
2CO 1:13 हम तुम्ख अऊर कुछ नहीं लिखजे, केवल ऊ जो तुम पढ़य यां समझ सकय हय, अऊर मोख आशा हय कि आखरी तक भी समझतो रहो। जसो तुम म सी कितनो न समझ लियो हय कि हम तुम्हरो घमण्ड को वजह हंय, वसोच तुम भी प्रभु यीशु को दिन हमरो लायी घमण्ड को वजह ठहरो।
2CO 1:15 योच भरोसा सी मय चाहत होतो कि पहलो तुम्हरो जवर आऊं कि तुम्ख अऊर दुगनी खुशी मिलय;
2CO 1:16 अऊर तुम्हरो जवर सी होय क मकिदुनिया ख जाऊं; अऊर फिर मकिदुनिया सी तुम्हरो जवर आऊं; अऊर तुम मोख यहूदिया को तरफ कुछ दूर तक कुशल सी सार करो।
2CO 1:17 येकोलायी मय न या इच्छा करी होती त का मय न मनमानी दिखायी? यां जो करनो चाहऊ हय का शरीर को अनुसार करनो चाहऊ हय कि मय बात म “हव, हव” भी करू अऊर “नहीं, नहीं” भी करू?
2CO 1:18 परमेश्वर सच्चो गवाह हय कि हमरो ऊ सन्देश म जो तुम सी कह्यो “हव” अऊर “नहीं” दोयी नहीं पायो जावय।
2CO 1:19 कहालीकि परमेश्वर को बेटा यीशु मसीह जेको हमरो सी यानेकि मोरो सिलवानुस अऊर तीमुथियुस को द्वारा तुम्हरो बीच म प्रचार भयो, ओको म “हव” अऊर “नहीं” दोयी नहीं होतो, पर ओको म “हव” होतो।
2CO 1:20 कहालीकि परमेश्वर की जितनो प्रतिज्ञाये हंय, हि सब ओको म “हव” को संग हंय। येकोलायी ओको सी “आमीन” भी भयी कि हमरो सी परमेश्वर की महिमा हो।
2CO 1:21 अऊर जो हम्ख तुम्हरो संग मसीह की संगति म मजबूत करय हय, अऊर जेन हमरो अभिषेक करयो उच परमेश्वर आय,
2CO 1:22 हम ओको आय ओन हम पर मुहर भी लगाय दियो हय अऊर ब्याना म पवित्र आत्मा ख हमरो मनों म दियो।
2CO 1:23 मय परमेश्वर ख गवाह कर क् कहू हय कि मय अब तक कुरिन्थुस म येकोलायी नहीं आयो, कि मोख तुम्ख डाटनो चाहत होतो।
2CO 1:24 यो नहीं कि हम विश्वास को बारे म तुम पर अधिकार जतानो चाहजे हंय; पर तुम्हरो खुशी म सहकर्मी हंय कहालीकि तुम विश्वास सीच स्थिर रह्य हय।
2CO 2:1 मय न अपनो मन म योच ठान लियो होतो कि फिर सी तुम्हरो जवर उदास करन नहीं आऊं।
2CO 2:2 कहालीकि यदि मय तुम्ख उदास करू, त मोख खुशी देन वालो कौन होयेंन, केवल उच जेक मय न उदास करयो हय?
2CO 2:3 अऊर मय न याच बात तुम्ख येकोलायी लिखी कि कहीं असो नहीं होय कि मोरो आनो पर, जिन्कोसी मोख खुशी मिलनो होना मय उन्को सी उदास होऊं; कहालीकि मोख तुम सब पर या बात को भरोसा हय कि जो मोरी खुशी हय, उच तुम सब को भी हय।
2CO 2:4 बड़ो दु:ख अऊर मन को कठिनायी सी मय न बहुत सो आसु बहाय बहाय क तुम्ख लिख्यो होतो, येकोलायी नहीं कि तुम उदास हो पर येकोलायी कि तुम ऊ बड़ो प्रेम ख जान लेवो, जो मोख तुम सी हय।
2CO 2:5 यदि कोयी न उदास करयो हय, त मोखच नहीं बल्की कि ओको संग कड़क स्वभाव सी पेश नहीं आऊं थोड़ो-थोड़ो तुम सब ख भी उदास करयो हय।
2CO 2:6 असो आदमी लायी या सजा जो भाऊवों म सी बहुत सो न दियो, बहुत हय।
2CO 2:7 येकोलायी येको सी अच्छो यो हय कि ओको अपराध माफ करो अऊर प्रेम दिखावो, असो नहीं होय कि आदमी बहुत उदासी म डुब जाये।
2CO 2:8 यो वजह मय तुम सी बिनती करू हय कि ओख अपनो प्रेम को सबूत दे।
2CO 2:9 कहालीकि मय न येकोलायी भी लिख्यो होतो कि तुम्ख परख लेऊ कि तुम मोरी सब बातों ख मानन लायी तैयार हो कि नहीं।
2CO 2:10 जेक तुम माफ करय हय ओख मय भी माफ करू हय। कहालीकि मय न भी जो कुछ माफ करयो हय, यदि करयो हय, त तुम्हरो वजह मसीह की जागा म होय क माफ करयो हय,
2CO 2:11 कि शैतान को हम पर दाव नहीं चलेंन, कहालीकि हम ओकी युक्तियों सी अनजान नहीं।
2CO 2:12 जब मय मसीह को सुसमाचार सुनावन ख त्रोआस शहर म आयो, अऊर प्रभु न मोरो लायी एक मौका खोल दियो,
2CO 2:13 त मोरो मन म चैन नहीं मिल्यो, येकोलायी कि मय न अपनो भाऊ तीतुस ख नहीं पायो, येकोलायी उन्को सी बिदा होय क मय मकिदुनिया राज्य ख चली गयो।
2CO 2:14 पर परमेश्वर को धन्यवाद हो जो मसीह म सदा हम ख विजय को उत्सव म लियो फिरय हय, अऊर मसीह को ज्ञान की सुगन्ध हमरो सी हर जागा फैलावय हय।
2CO 2:15 कहालीकि हम परमेश्वर को जवर उद्धार पावन वालो अऊर नाश होन वालो दोयी लायी मसीह की सुगन्ध हंय।
2CO 2:16 त मरन वालो लायी मरन को गन्ध, अऊर कितनो लायी जीवन वालो लायी जीवन को सुगन्ध। ठीक इन बातों को लायक कौन हय?
2CO 2:17 कहालीकि हम उन बहुत सो को जसो नहीं जो परमेश्वर को वचन अपनो फायदा लायी इस्तेमाल करय हंय; सच्चो मन सी अऊर परमेश्वर को तरफ सी भेज्यो गयो परमेश्वर ख मौजूद जान क शुद्ध मन सी मसीह को सेवक समान बोलय हंय।
2CO 3:1 का हम फिर अपनी बड़ायी करन लग्यो? यां हम्ख दूसरों लोगों को जसो सिफारिश की चिट्ठियां तुम्हरो जवर लावनो यां तुम सी लेनो हंय?
2CO 3:2 हमरी चिट्ठी तुमच आय, जो हमरो दिल पर लिखी हुयी हय अऊर ओख सब आदमी पहिचानय अऊर पढ़य हंय।
2CO 3:3 यो प्रगट हय कि हमरो बीच सेवकायी को वजह सी तुम मसीह की चिट्ठी आय, अऊर जो स्याही सी नहीं पर जीवित परमेश्वर को आत्मा सी, गोटा की पाटियों पर नहीं, पर दिल को मांस रूपी पाटियों पर जो मसीह न लिख्यो हय।
2CO 3:4 हम मसीह सीच परमेश्वर म भरोसा हंय ओकोच द्वारा बोलय हय।
2CO 3:5 यो नहीं कि हम अपनो खुद सी यो लायक हंय कि अपनो तरफ सी कोयी बात को काम कर सकेंन, पर हमरी लायकता परमेश्वर को तरफ सी आय,
2CO 3:6 परमेश्वर न हम्ख नयो वाचा को सेवक होन लायक भी बनायो, यो लिखी हुयी व्यवस्था सी नहीं बल्की आत्मा सी हय; कहालीकि व्यवस्था मारय हय, पर पवित्र आत्मा जीन्दो करय हय।
2CO 3:7 यदि मूसा की वा व्यवस्था की सेवकायी को अक्षर गोटा पर खोद्यो गयो होतो, यहां तक तेजोमय भयी कि मूसा को मुंह पर को तेज को वजह जो घटत भी जात होतो, इस्राएली ओको मुंह पर नजर नहीं कर सकत होतो।
2CO 3:8 ऊ तेज गायब होत जाय रह्यो होतो, त पवित्र आत्मा की सेवा अऊर भी तेजोमय कहाली नहीं होयेंन?
2CO 3:9 यदि जब दोषी ठहरान वाली सेवा तेजोमय होती, त उद्धार ठहरान वाली सेवा अऊर भी तेजोमय कहाली नहीं होयेंन?
2CO 3:10 अऊर जो तेजोमय होतो, ऊ भी ऊ तेज को वजह जो ओको सी बड़ क तेजोमय होतो, तेजोमय नहीं ठहरयो।
2CO 3:11 कहालीकि जब ऊ जो घटत जात होतो तेजोमय होतो, त ऊ जो स्थिर रहेंन अऊर भी तेजोमय कहाली नहीं होयेंन?
2CO 3:12 येकोलायी असी आशा रख क हम हिम्मत को संग बोलजे हंय,
2CO 3:13 अऊर मूसा को जसो नहीं, जेन अपनो मुंह पर परदा डाल्यो होतो ताकि इस्राएली ऊ घटन वालो तेज को अन्त ख नहीं देखे।
2CO 3:14 पर हि मतिमन्द भय गयो, कहालीकि अज तक पुरानो नियम पढ़तो समय उन्को दिलो पर उच परदा पड़्यो रह्य हय। जब कोयी व्यक्ति मसीह म जोड़्यो जावय हय तब ऊ परदा मसीह म उठ जावय हय।
2CO 3:15 अज तक जब कभी मूसा की किताब पढ़्यो जावय हय, त उन्को दिल पर परदा पड़्यो रह्य हय।
2CO 3:16 पर जब कभी उन्को दिल प्रभु को तरफ फिरेंन, तब ऊ परदा उठ जायेंन।
2CO 3:17 प्रभु त आत्मा हय: अऊर जित कहीं प्रभु को आत्मा हय उत स्वतंत्रता हय।
2CO 3:18 पर जब हम सब को खुलो चेहरा सी प्रभु को तेज यो तरह प्रगट होवय हय, जो तरह आरसा म, त प्रभु सी जो आत्मा हय, हम उच तेजस्वी रूप म अधिक सी अधिक कर क् बदल देवय हंय।
2CO 4:1 येकोलायी जब हम पर असी दया भयी कि हम्ख यो सेवा मिली, त हम हिम्मत नहीं छोड़जे।
2CO 4:2 पर हम न लज्जा को लूक्यो कामों ख छोड़ दियो, अऊर नहीं चालाकी सी चलजे, अऊर नहीं परमेश्वर को वचन म मिलावट करजे हंय; पर सत्य ख प्रगट कर क्, परमेश्वर को आगु हर एक आदमी को अन्तरमन म अपनी भलायी बैठायजे हंय।
2CO 4:3 पर यदि हमरो सुसमाचार पर परदा पड़्यो हय, त यो नाश होन वालोच लायी पड़्यो हय।
2CO 4:4 अऊर उन अविश्वासियों लायी, जिन की बुद्धि यो जगत को शैतान को ईश्वर न अन्धी कर दियो हय, ताकि मसीह जो परमेश्वर को प्रतिरूप हय, ओको तेजोमय सुसमाचार को प्रकाश उन पर नहीं चमकेंन।
2CO 4:5 कहालीकि हम अपनो ख नहीं, पर मसीह यीशु को प्रचार करजे हंय; कि ऊ प्रभु आय अऊर अपनो बारे म यो कहजे हंय कि हम यीशु को वजह तुम्हरो सेवक हंय।
2CO 4:6 येकोलायी कि परमेश्वरच आय, जेन कह्यो, “अन्धकार म सी ज्योति चमकेंन,” अऊर उच हमरो दिलो म चमक्यो कि परमेश्वर की महिमा की ज्ञान की ज्योति यीशु मसीह को चेहरा सी प्रकाशित भयो हय।
2CO 4:7 पर हमरो जवर ऊ धन हम जो माटी को बर्तनों जसो हय हम उन्म आत्मिक सम्पत्ति हय यो असीम सामर्थ दिखावन लायी हमरो तरफ सी नहीं, बल्की परमेश्वर कोच तरफ सी ठहरे।
2CO 4:8 हम चारयी तरफ सी कठिनायी त भोगजे हंय, पर संकट म नहीं पड़जे; घबरायो हुयो त हंय, पर निराश नहीं होवय;
2CO 4:9 सतायो त जावय हंय, पर छोड्यो नहीं जावय; गिरायो त जावय हंय, पर नाश नहीं होवय।
2CO 4:10 हम यीशु की मरनो ख अपनो शरीर म हर समय लियो फिरजे हंय कि यीशु को जीवन भी हमरो शरीर म प्रगट हो।
2CO 4:11 कहालीकि हम जीतो जी हमेशा यीशु को वजह मृत्यु को हाथ म सौंप्यो जाजे हंय कि यीशु को जीवन भी हमरो मरन वालो शरीर म प्रगट हो।
2CO 4:12 यो तरह मृत्यु त हम पर प्रभाव डालय हय अऊर जीवन तुम पर।
2CO 4:13 येकोलायी कि हम म उच विश्वास को आत्मा हय, जेको बारे म पवित्र शास्त्र म लिख्यो हय, “मय न विश्वास करयो, येकोलायी मय बोल्यो।” येकोलायी हम भी विश्वास करजे हंय, येकोलायी बोलजे हंय।
2CO 4:14 कहालीकि हम जानजे हंय कि जेन प्रभु यीशु ख जीन्दो करयो, उच हम्ख भी यीशु को संग जीन्दो करेंन, अऊर तुम्हरो संग अपनो आगु लाय क खड़ो करेंन।
2CO 4:15 कहालीकि सब चिजे तुम्हरो लायी हंय, ताकि अनुग्रह बहुतों सी जादा होय क परमेश्वर कि महिमा लायी धन्यवाद भी बढ़ेंन।
2CO 4:16 येकोलायी हम हिम्मत नहीं छोड़जे; येकोलायी हमरो बाहरी मनुष्यत्व नाश होत जावय हय, तब भी हमरो अन्दर को मनुष्यत्व हर दिन नयो होत जावय हय।
2CO 4:17 कहालीकि हमरो पल भर को हल्की सी कठिनायी हमरो लायी बहुतच महत्वपूर्ण अऊर अनन्त काल कि महिमा ख पैदा करय हय;
2CO 4:18 अऊर हम त देखी हुयी चिजों ख नहीं पर अनदेखी चिजों ख देखतो रहजे हंय; कहालीकि देखी हुयी चिजे थोड़ोच दिन की हंय, पर अनदेखी चिजे अनन्त काल तक बनी रह्य हंय।
2CO 5:1 कहालीकि हम जानजे हंय कि जब हमरो धरती पर को डेरा जसो घर जो हमरो शरीर हय गिरायो जायेंन, त हम्ख परमेश्वर को तरफ सी स्वर्ग पर एक असो भवन मिलेंन जो हाथों सी बन्यो हुयो घर नहीं, पर अनन्त काल को हय।
2CO 5:2 येको म त हम करहाते अऊर बड़ी इच्छा रखजे हंय कि अपनो स्वर्गीय घर ख पहिन ले,
2CO 5:3 कि येख पहिनन सी हम नंगो नहीं देख्यो जाये।
2CO 5:4 अऊर हम यो जगत को डेरा म रहतो हुयो बोझ सी दब्यो दु:ख म करहाते रहजे हंय, कहालीकि हम उतारनो नहीं बल्की अऊर पहिननो चाहजे हंय, ताकि ऊ जो मरनहार हय जीवन म डुब जाये।
2CO 5:5 जेन हम्ख या बात को लायी तैयार करयो हय ऊ परमेश्वर आय, जेन हम्ख ब्याना म हम्ख आत्मा भी दियो हय।
2CO 5:6 यानेकि हम हमेशा हिम्मत बान्ध्यो रहजे हंय अऊर यो जानजे हंय कि जब तक हम शरीर को घर म रहजे हंय, तब तक हम प्रभु सी अलग रहजे हंय
2CO 5:7 कहालीकि हमरो जो जीवन जो देखजे हय ओको पर नहीं, पर जो विश्वास सी चलजे हंय
2CO 5:8 येकोलायी हम हिम्मत बान्ध्यो रहजे हंय, अऊर शरीर सी अलग होय क प्रभु को संग रहनो अऊर भी बहुत अच्छो समझजे हंय।
2CO 5:9 यो वजह हमरो मन की उमंग यो आय कि चाहे संग रहे चाहे अलग रहे, पर हम ओख भातो रहबोंन।
2CO 5:10 कहालीकि जरूरी हय कि हम सब को हाल मसीह को न्याय आसन को सामने खुल जाये, कि हर एक आदमी अपनो अपनो अच्छो बुरो कामों को बदला जो ओन शरीर को द्वारा करयो।
2CO 5:11 येकोलायी प्रभु को डर मान क हम लोगों ख समझाजे हंय; पर परमेश्वर पर हमरो हाल प्रगट हय, अऊर मोरी आशा या हय कि तुम्हरो अन्तरमन पर भी प्रगट भयो होना।
2CO 5:12 हम फिर भी अपनी बड़ायी तुम्हरो आगु नहीं करजे, बल्की हम अपनो बारे म तुम्ख घमण्ड करन को अवसर देजे हंय कि तुम उन्ख उत्तर दे सको, जो मन पर नहीं बल्की दिखावटी बातों पर घमण्ड करय हंय।
2CO 5:13 यदि हम मुर्ख समझय हंय त परमेश्वर लायी, अऊर यदि सुध म हंय त तुम्हरो लायी हंय।
2CO 5:14 कहालीकि मसीह को प्रेम हम्ख विवश कर देवय हय; येकोलायी कि हम यो समझजे हंय कि जब एक सब को लायी मरयो त सब मर गयो।
2CO 5:15 अऊर ऊ यो निमित्त सब लायी मरयो कि जो जीन्दो हंय, हि आगु सी अपनो लायी नहीं जीये पर ओको लायी जो उन्को लायी मरयो अऊर फिर जीन्दो भयो।
2CO 5:16 यानेकि अब सी हम कोयी ख आदमी की समझ को अनुसार नहीं समझबोंन। फिर भी हम न मसीह ख भी आदमी की समझ को अनुसार जान्यो होतो, तब भी अब सी ओख असो नहीं जानबोंन।
2CO 5:17 येकोलायी यदि कोयी मसीह म हय त वा नयी रचना आय: पुरानी बाते बीत गयी हंय; देखो, सब बाते नयी भय गयी हंय।
2CO 5:18 या सब बाते परमेश्वर को तरफ सी हंय, जेन मसीह को द्वारा अपनो संग हमरो मेल-मिलाप कर लियो, अऊर मेल-मिलाप की सेवा हम्ख सौंप दियो हय।
2CO 5:19 यानेकि परमेश्वर न मसीह म होय क अपनो संग जगत को मेल-मिलाप कर लियो, अऊर उन्को अपराधो को दोष उन पर नहीं लगायो, अऊर ओन मेल-मिलाप को वचन हम्ख सौंप दियो हय।
2CO 5:20 येकोलायी, हम मसीह को राजदूत हंय; मानो परमेश्वर हमरो द्वारा बिनती कर रह्यो हय। हम मसीह को तरफ सी निवेदन करजे हंय कि परमेश्वर को संग मेल-मिलाप कर लेवो।
2CO 5:21 जो पाप सी अनजान होतो, ओखच ओन हमरो लायी पाप ठहरायो कि हम उन्म होय क परमेश्वर की सच्चायी प्राप्त करे।
2CO 6:1 हम जो परमेश्वर को सहकर्मी हंय यो भी बिनती करजे हंय कि ओको अनुग्रह जो तुम पर भयो, ओख बेकार मत जान दे।
2CO 6:2 कहालीकि परमेश्वर कह्य हय, “अपनो खुशी को समय मय न तोरी सुन ली, अऊर उद्धार को दिन मय न तोरी मदत करी।” देखो, अब ऊ खुशी को समय हय, देखो, अब ऊ उद्धार को दिन आय।
2CO 6:3 हम कोयी बात म ठोकर खान को अवसर नहीं देजे ताकि हमरी सेवा पर कोयी दोष मत आय।
2CO 6:4 पर हर बात सी परमेश्वर को सेवकों को जसो अपनो सद्गुनों ख प्रगट करजे हंय, बड़ो धीरज सी, कठिनायी सी, गरीबी सी, संकटों सी,
2CO 6:5 कोड़ा खानो सी, कैद होनो सी, हल्लावों सी, मेहनत करनो सी, जागतो रहनो सी, उपवास करनो सी,
2CO 6:6 पवित्रता सी, ज्ञान सी, धीरज सी, दयालुता सी, पवित्र आत्मा को सामर्थ सी, सच्चो प्रेम को संग,
2CO 6:7 सत्य को वचन सी, परमेश्वर को सामर्थ सी, सच्चायी को अवजारों सी जो दायो बायो हाथों म हंय,
2CO 6:8 आदर अऊर अपमान सी, बदनाम अऊर अच्छो नाम सी, यानेकि धोका देन वालो जसो मालूम होवय हंय तब भी हम सच्चायी प्रगट करजे हय;
2CO 6:9 बिना पहिचान वालो को जसो हंय, तब भी प्रसिद्ध हंय; मरयो हुयो को जसो हंय अऊर देखो जीन्दो हंय; मार खान वालो को जसो हंय पर जान सी मारयो नहीं जावय;
2CO 6:10 शोक करन वालो को जसो हंय, पर हमेशा खुशी मनावय हंय; गरीबों को जसो हंय, पर बहुतों ख धनवान बनाय देवय हंय; असो हंय जसो हमरो जवर कुछ नहाय तब भी सब कुछ रखजे हंय।
2CO 6:11 हे कुरिन्थवासी, हम न खुल क तुम सी बाते करी हंय, हमरो दिल तुम्हरो तरफ खुल्यो हुयो हय।
2CO 6:12 तुम्हरो लायी हमरो दिल म कोयी संकोच नहाय, पर तुम्हरोच मनों म संकोच हय।
2CO 6:13 मय अपनो बच्चां जान क जसो तुम सी प्रेम करू हय वसोच तुम हम सी प्रेम करो अऊर तुम भी ओको बदला म अपनो दिल खोल दे।
2CO 6:14 अविश्वासियों को संग एक साथ काम करन की कोशिश मत करो, कहालीकि सच्चायी अऊर अधर्म की का संगति? यां प्रकाश अऊर अन्धारो तक संग कसो रह्य सकय हंय?
2CO 6:15 अऊर मसीह अऊर शैतान कसो सहमत होय सकय हय? यां विश्वासी को संग अविश्वासी को का नाता?
2CO 6:16 अऊर मूर्तियों को संग परमेश्वर को मन्दिर को का सम्बन्ध? कहालीकि हम त जीन्दो परमेश्वर को मन्दिर आय; जसो परमेश्वर न कह्यो हय, “मय उन म बसू अऊर उन म चल्यो फिरयो करू; अऊर मय उन्को परमेश्वर होऊं, अऊर हि मोरो लोग होयेंन।”
2CO 6:17 येकोलायी प्रभु कह्य हय, “उन्को बीच म सी निकलो अऊर अलग रहो; अऊर अशुद्ध चिजों ख मत छूवो, त मय तुम्ख स्वीकार करूं;
2CO 6:18 अऊर मय तुम्हरो बाप होऊं, अऊर तुम मोरो बेटा अऊर बेटियां हो। यो सर्वशक्तिमान प्रभु परमेश्वर को वचन आय।”
2CO 7:1 येकोलायी हे प्रियो, जब कि यो प्रतिज्ञाये हम्ख मिली हंय, त आवो, हम अपनो आप ख शरीर अऊर आत्मा की सब अशुद्धता सी शुद्ध करे, अऊर परमेश्वर को डर रखतो हुयो पवित्रता ख सिद्ध करे।
2CO 7:2 हम्ख अपनो दिल म जागा दे। हम न नहीं कोयी को संग अन्याय करयो, नहीं कोयी ख बिगाड़्यो, अऊर नहीं कोयी ख ठगायो।
2CO 7:3 मय तुम्ख दोषी ठहरान लायी यो नहीं कहूं। कहालीकि मय पहिलेच कह्य चुक्यो हय कि तुम हमरो दिल म असो बस गयो हय कि हम तुम्हरो संग मरन जीवन लायी तैयार हंय।
2CO 7:4 मय तुम सी बहुत हिम्मत को संग बोल रह्यो हय, मोख तुम पर बड़ो घमण्ड हय; मय प्रोत्साहन सी भर गयो हय। अपनो पूरो कठिनायी म मय खुशी सी बहुत भरपूरी सी रहू हय।
2CO 7:5 कहालीकि जब हम मकिदुनिया म आयो, तब भी हमरो शरीर ख चैन नहीं मिल्यो, बल्की हम्ख चारयी तरफ सी हर तरह को दु:ख उठानो पड़्यो होतो; बाहेर लड़ाईयों सी, अऊर मन को अन्दर डर सी।
2CO 7:6 तब भी दुखियों ख प्रोत्साहन देन वालो परमेश्वर न तीतुस को आवन सी हम ख दिलासा दियो;
2CO 7:7 अऊर नहीं केवल ओको आनो सीच नहीं पर ओको सी हम्ख अऊर जादा प्रोत्साहन मिल्यो कि, जो ओख तुम्हरो तरफ सी मिली होती। ओन तुम्हरी लालसा, तुम्हरो दु:ख अऊर मोरो लायी तुम्हरी धुन को समाचार हम्ख सुनायो, जेकोसी मोख अऊर भी खुशी भयी।
2CO 7:8 कहालीकि मय न अपनो चिट्ठी सी तुम्ख दु:खी करयो, पर ओको सी पछताऊ नहीं जसो कि पहिले पछतावत होतो, कहालीकि मय देखू हय कि वाच चिट्ठी सी तुम्ख दु:ख त भयो पर ऊ थोड़ो समय लायी होतो।
2CO 7:9 अब मय खुश हय पर येकोलायी नहीं कि तुम ख दु:ख पहुंच्यो, बल्की येकोलायी कि तुम न ऊ दु:ख को वजह मन फिरायो, कहालीकि तुम्हरो दु:ख परमेश्वर की इच्छा को अनुसार होतो कि हमरो तरफ सी तुम्ख कोयी बात म हानि नहीं पहुंचे।
2CO 7:10 कहालीकि परमेश्वर-भक्ति को दु:ख असो पैदा करय हय जेको परिनाम उद्धार हय अऊर फिर ओको सी पछतानो नहीं पड़य। पर सांसारिक दु:ख मृत्यु पैदा करय हय।
2CO 7:11 येकोलायी देखो, याच बात सी कि तुम्ख परमेश्वर को तरफ सी दु:ख भयो तुम म कितनो उत्साह अऊर खुद को बचाव अऊर शोक, अऊर डर, अऊर बढ़ती इच्छा, अऊर आस्था अऊर न्याय देन को बिचार पैदा भयो? तुम न सब तरह सी यो सिद्ध कर दिखायो कि तुम या बात म गलत नहाय।
2CO 7:12 फिर मय न जो तुम्हरो जवर लिख्यो होतो, ऊ नहीं त ओको वजह लिख्यो जेन अन्याय करयो अऊर नहीं ओको वजह जेको पर अन्याय करयो गयो, पर येकोलायी कि तुम्हरो उत्साह जो हमरो लायी हय, ऊ परमेश्वर को आगु तुम पर दिख जाय।
2CO 7:13 येकोलायी हम्ख प्रोत्साहन मिली। हमरी यो प्रोत्साहन को संग तीतुस को खुशी को वजह अऊर भी खुशी भयी कहालीकि ओको जीव तुम सब को वजह ओकी आत्मा ख चैन मिल्यो हय।
2CO 7:14 कहालीकि यदि मय न ओको आगु तुम्हरो बारे म कुछ घमण्ड दिखायो, त शर्मिन्दा नहीं भयो, पर जसो हम न तुम सी सब बाते सच-सच कह्य दियो होतो, वसोच हमरो घमण्ड दिखानो तीतुस को आगु भी सच निकल्यो।
2CO 7:15 जब ओख तुम सब को आज्ञाकारी होन को याद आवय हय कि कसो तुम न डरतो अऊर कापतो हुयो ओको सी मुलाखात करी; त ओको प्रेम तुम्हरो तरफ अऊर भी बढ़तो जावय हय।
2CO 7:16 मय खुश हय कहालीकि मोख हर बात म तुम पर पूरो भरोसा कर सकू हय।
2CO 8:1 अब हे भाऊवों अऊर बहिनों, हम तुम्ख परमेश्वर को ऊ अनुग्रह को समाचार देजे हंय जो मकिदुनिया की मण्डलियों पर भयो हय।
2CO 8:2 कि कठिनायी की बड़ी परीक्षा म उन्को बड़ी खुशी अऊर भारी गरीबपन म उनकी उदारता बहुत बढ़ गयी।
2CO 8:3 अऊर उन्को बारे म मोरी या गवाही हय कि उन्न अपनी सामर्थ भर बल्की सामर्थ सी भी बाहेर मन सी दियो।
2CO 8:4 अऊर यो दान म अऊर परमेश्वर को लोगों की सेवा म सहभागी होन को अनुग्रह को बारे म, हम सी बार-बार बहुत बिनती करी,
2CO 8:5 अऊर जसी हम न आशा करी होती, वसीच नहीं बल्की उन्न प्रभु ख फिर परमेश्वर की इच्छा सी हम ख भी अपनो खुद ख दे दियो।
2CO 8:6 येकोलायी हम न तीतुस ख बिनती करी होती, कि जसो ओन पहिले सुरूवात करयो होतो, वसोच तुम्हरो बीच म यो दान देन को कृपा को काम ख लगातार पूरो भी कर लेवो।
2CO 8:7 येकोलायी जसो तुम हर बात म यानेकि विश्वास, वचन, ज्ञान अऊर सब तरह को यत्न म, अऊर ऊ प्रेम म, जो हम सी रखय हय, बढ़तो जावय हय, वसोच यो दान यां कृपा को काम म भी बढ़तो जावो।
2CO 8:8 मय आज्ञा की रीति पर त नहीं, पर दूसरों को उत्साह सी तुम्हरो प्रेम की सच्चायी ख परखन लायी कहू हय।
2CO 8:9 तुम हमरो प्रभु यीशु मसीह को अनुग्रह जानय हय कि ऊ धनी होय क भी तुम्हरो लायी गरीब बन गयो, ताकि ओको गरीब होय जानो सी तुम धनी होय जावो।
2CO 8:10 या बात म मोरी सलाह याच हय: यो तुम्हरो लायी अच्छो हय, जो एक साल सी नहीं त केवल यो काम ख करनोंच म, पर या बात को चाहनो म भी पहिलो भयो होतो,
2CO 8:11 येकोलायी अब यो काम पूरो करो कि जसो इच्छा करनो म तुम तैयार होतो, वसोच अपनी अपनी पूंजी को अनुसार पूरो भी करो।
2CO 8:12 कहालीकि यदि मन की तैयारी होय त दान ओको अनुसार स्वीकार भी होवय हय जो ओको जवर हय; नहीं कि ओको अनुसार जो ओको जवर हयच नहाय।
2CO 8:13 यो नहीं कि दूसरों ख चैन अऊर तुम ख कठिनायी मिले,
2CO 8:14 पर बराबरी को बिचार सी यो समय तुम्हरी बढ़ती उनकी कमी म काम आये, ताकि उनकी बढ़ती भी तुम्हरी कमी म काम आये कि बराबरी होय जाये।
2CO 8:15 जसो शास्त्र म लिख्यो हय, “जेन बहुत जमा करयो ओको कुछ जादा नहीं निकल्यो, अऊर जेन थोड़ो जमा करयो ओको कुछ कम नहीं निकल्यो।”
2CO 8:16 परमेश्वर को धन्यवाद हो, जेन तुम्हरो लायी उच उत्साह तीतुस को दिल म डाल दियो हय।
2CO 8:17 कि ओन हमरो समझानो मान लियो बल्की बहुत उत्साही होय क ऊ अपनी इच्छा सी तुम्हरो जवर गयो हय।
2CO 8:18 हम न ओको संग ऊ भाऊ ख भी भेज्यो हय जेको नाम सुसमाचार को बारे म सब मण्डली म फैल्यो हुयो हय;
2CO 8:19 अऊर इतनोच नहीं, पर वा मण्डली सी ठहरायो भी गयो कि यो दान को काम लायी हमरो संग जाये। हम या सेवा येकोलायी करजे हंय कि प्रभु की महिमा अऊर हमरो मन की तैयारी प्रगट होय जाये।
2CO 8:20 हम या बात म चौकस रहजे हंय कि यो उदारता को काम को बारे म जेकी सेवा हम करजे हंय, कोयी हम पर दोष नहीं लगानो पाये।
2CO 8:21 कहालीकि जो बाते केवल प्रभुच को जवर नहीं, पर आदमियों को जवर भी ठीक हंय हम उनकी चिन्ता करजे हंय।
2CO 8:22 हम न ओको संग अपनो भाऊ ख भी भेज्यो हय, जेक हम न बार-बार परख क् बहुत बातों म उत्साही पायो हय; पर अब तुम पर ओख बड़ो भरोसा हय, यो वजह ऊ अऊर भी जादा उत्साही हय।
2CO 8:23 यदि कोयी तीतुस को बारे म पुछेंन, त ऊ मोरो संगी अऊर तुम्हरो लायी मोरो सहकर्मी आय; अऊर यदि हमरो भाऊवों को बारे म पुछेंन, त हि मण्डलियों ख भेज्यो हुयो अऊर मसीह की महिमा आय।
2CO 8:24 यानेकि अपनो प्रेम अऊर हमरो ऊ घमण्ड जो तुम्हरो बारे म हय मण्डलियों को आगु सिद्ध कर क् उन्ख दिखावो।
2CO 9:1 अब ऊ सेवा को बारे म जो पवित्र लोगों लायी करी जावय हय, मोख तुम ख लिखनो जरूरी नहाय।
2CO 9:2 कहालीकि मय तुम्हरो मन की तैयारी ख जानु हय, जेको वजह मय तुम्हरो बारे म मकिदुनिया वासियों को आगु घमण्ड दिखाऊं हय कि अखया को लोग एक साल सी तैयार भयो हंय, अऊर तुम्हरो उत्साह न अऊर बहुत सो ख भी उभारयो हय।
2CO 9:3 पर मय न भाऊवों ख येकोलायी भेज्यो हय कि हम न जो घमण्ड तुम्हरो बारे म दिखायो, ऊ या बात म निष्फल नहीं ठहरेंन; पर जसो मय न कह्यो वसोच तुम तैयार रहो,
2CO 9:4 असो नहीं होय कि यदि कोयी मकिदुनिया निवासी मोरो संग आयेंन अऊर तुम्ख तैयार नहीं पाये, त होय सकय हय कि यो आत्मविश्वास को वजह हम यो नहीं कहजे कि हम अऊर तुम शर्मिन्दा हो।
2CO 9:5 येकोलायी मय न भाऊवों सी या बिनती करनो जरूरी समझ्यो कि हि पहिलो सी तुम्हरो जवर जाये, अऊर तुम्हरी उदारता को फर जेको बारे म पहिले सी वचन दियो गयो होतो, तैयार कर रखेंन कि यो दबाव सी नहीं पर उदारता को फर को जसो तैयार हो।
2CO 9:6 पर बात या आय: जो थोड़ो बोवय हय, ऊ थोड़ो काटेंन भी; अऊर जो बहुत बोवय हय, ऊ बहुत काटेंन।
2CO 9:7 हर एक लोग जसो ओन मन म सोच्यो हय वसोच दान करे; नहीं कुड़कुड़ाय क अऊर दबाव सी, कहालीकि परमेश्वर मन की खुशी सी देन वालो सी प्रेम रखय हय।
2CO 9:8 परमेश्वर सब तरह को अनुग्रह तुम्ख बहुतायत सी दे सकय हय जेकोसी हर बात म अऊर हर समय, सब कुछ, जो तुम्ख जरूरी हय, तुम्हरो जवर रहेंन; अऊर हर एक अच्छो काम लायी तुम्हरो जवर बहुत कुछ हो।
2CO 9:9 जसो शास्त्र म लिख्यो हय, “ओन उदारता सी ओन गरीबों ख दान दियो, ओकी सच्चायी हमेशा बनी रहेंन।”
2CO 9:10 यानेकि जो बोवन वालो ख बीज अऊर जेवन लायी रोटी देवय हय, ऊ तुम्ख बीजा देयेंन, अऊर सच्चायी की फसल की बढ़ोतरी करेंन; अऊर तुम्हरो उदारता को फर ख बढ़ायेंन।
2CO 9:11 तुम हर एक बात म सब तरह की उदारता लायी जो हमरो द्वारा परमेश्वर को धन्यवाद करवावय हय, धनवान करयो जाये।
2CO 9:12 कहालीकि या सेवा ख पूरो करनो सी नहीं केवल परमेश्वर को लोगों की जरूरते पूरी होवय हंय, पर लोगों को तरफ सी परमेश्वर को भी बहुत धन्यवाद होवय हय।
2CO 9:13 कहालीकि यो सेवा ख प्रनाम स्वीकार कर हि परमेश्वर की महिमा प्रगट करय हंय कि तुम मसीह को सुसमाचार ख मान क ओको अधीन रह्य हय, अऊर उनकी अऊर सब की मदत करनो म उदारता प्रगट करतो रह्य हय।
2CO 9:14 अऊर हि तुम्हरो लायी बड़ो प्रेम को संग प्रार्थना करय हंय; अऊर येकोलायी कि तुम पर परमेश्वर को बड़ोच अनुग्रह करयो हय।
2CO 9:15 परमेश्वर को, ओको ऊ दान लायी जो वर्नन सी बाहेर हय, धन्यवाद हो।
2CO 10:1 मय पौलुस जो तुम्हरो संग होन पर नम्र अऊर दीन हय, पर जब मय दूर होऊ हय त तुम्हरो संग कठोर व्यवहार करू हय मसीह की नम्रता अऊर कोमल स्वभाव अऊर दया सी समझाऊ हय।
2CO 10:2 मय या बिनती करू हय कि तुम्हरो आगु मोख निडर होय क हिम्मत करनो नहीं पड़ेंन, जसो मय कुछ आदमी पर जो हम ख जगत को अनुसार चलन वालो समझय हंय, हिम्मत दिखान को बिचार करू हय।
2CO 10:3 कहालीकि हम जगत म चलजे फिरजे हंय, तब भी जगत को अनुसार नहीं लड़जे।
2CO 10:4 कहालीकि हमरी लड़ाई को अवजार सांसारिक नहीं, पर दुश्मनों को किल्ला ख गिराय देन लायी परमेश्वर को द्वारा सामर्थी हंय।
2CO 10:5 येकोलायी हम कल्पनावों को अऊर हर एक ऊची बात को, जो परमेश्वर की पहिचान को विरोध म उठय हय, खण्डन करजे हंय; अऊर हर एक भावना ख बन्दी कर क् मसीह को आज्ञाकारी बनाय देजे हंय,
2CO 10:6 अऊर तैयार रहजे हंय कि जब तुम्हरो आज्ञा पालन को सबूत देवो, त हर एक तरह को आज्ञा-उल्लंघन ख सजा देयेंन।
2CO 10:7 तुम उच बातों ख देखो, जो आंखी को आगु हंय। यदि कोयी ख अपनो पर यो भरोसा होय कि मय मसीह को आय, त ऊ यो भी जान ले कि जसो ऊ मसीह को आय वसोच हम भी हंय।
2CO 10:8 कहालीकि यदि मय ऊ अधिकार को बारे म अऊर भी घमण्ड दिखाऊं, जो प्रभु न तुम्हरो बिगाड़न लायी नहीं पर बनावन लायी हम्ख दियो हय, त शर्मिन्दा नहीं होऊं।
2CO 10:9 यो मय येकोलायी कहू हय कि चिट्ठियां को द्वारा तुम्ख डरावन वालो नहीं ठहरू।
2CO 10:10 कहालीकि हि कह्य हंय, “ओकी चिट्ठियां त गम्भीर अऊर प्रभावशाली हंय; पर जब ऊ आगु होवय हय, त ऊ शरीर कमजोर अऊर बोलन म हल्को जान पड़य हय।”
2CO 10:11 जो असो कह्य हय, ऊ यो समझ रखे कि जब हम अनूपस्थिती हय त अपनो वचन म कठोर हंय, वसोच उपस्थिति म हमरो काम अऊर भी कठिन हय।
2CO 10:12 कहालीकि हम्ख यो हिम्मत नहीं कि हम अपनो आप ख उन म सी असो कुछ को संग गिन्यो यां उन सी अपनो ख मिलाये, जो अपनी बढ़ायी आप करय हंय, अऊर अपनो आप ख आपस म नाप तौल क एक दूसरों सी तुलना कर क् ऊ खुद मूर्ख ठहरय हंय।
2CO 10:13 हम त सीमा सी बाहेर घमण्ड कभी भी नहीं करबोंन, पर उच सीमा तक जो परमेश्वर न हमरो लायी ठहराय दियो हय, अऊर ओको म तुम भी आय गयो हय, अऊर ओकोच अनुसार घमण्ड भी करबोंन।
2CO 10:14 कहालीकि हम अपनी सीमा सी बाहेर अपनो आप ख बढ़ानो नहीं चाहजे, जसो कि तुम तक नहीं पहुंचन की दशा म होतो, बल्की मसीह को सुसमाचार सुनातो हुयो तुम तक आयो हंय।
2CO 10:15 हम सीमा सी बाहेर दूसरों को मेहनत पर घमण्ड नहीं करजे; पर हम्ख आशा हय कि जसो-जसो तुम्हरो विश्वास बढ़तो जायेंन वसो-वसो हम अपनी सीमा को अनुसार तुम्हरो वजह अऊर भी बढ़तो जाबोंन,
2CO 10:16 ताकि हम तुम्हरी सीमा सी आगु बढ़ क सुसमाचार सुनाबो, अऊर यो नहीं कि हम दूसरों कि सीमा को अन्दर बन्यो बनायो कामों पर घमण्ड करबो।
2CO 10:17 पर जसो शास्त्र कह्य हय “जो घमण्ड करेंन, ऊ प्रभु पर घमण्ड करेंन।”
2CO 10:18 कहालीकि जो अपनी बड़ायी करय हय ऊ नहीं, पर जेकी बड़ायी प्रभु करय हय, उच स्वीकार करयो जावय हय।
2CO 11:1 यदि तुम मोरी थोड़ी सी मूर्खता सह लेतो त का हि ठीक होतो; हव, मोरी सह भी लेवो!
2CO 11:2 मय तुम्हरो बारे म ईश्वरीय धुन लगायो रहू हय, येकोलायी कि मय न तुम्हरी मसीह सी सगायी कर दी हय कि तुम्ख पवित्र कुंवारी को जसो मसीह ख सौंप देऊ।
2CO 11:3 पर मय डरू हय कि जसो सांप न अपनी चालाकी सी हवा ख बहकायो, वसोच तुम्हरो मन ऊ सीधायी अऊर पवित्रता सी जो मसीह को संग होनो चाहिये, कहीं भ्रष्ट नहीं करयो जाय।
2CO 11:4 यदि कोयी तुम्हरो जवर आय क कोयी दूसरों यीशु को प्रचार करेंन, जेको प्रचार हम न नहीं करयो; यां कोयी अऊर आत्मा तुम्ख मिले, जो पहिले नहीं मिल्यो होतो; यां अऊर कोयी सुसमाचार सुनाये जेक तुम न पहिले नहीं मान्यो होतो, त तुम ओख सह लेवय हय।
2CO 11:5 मय त समझू हय कि मय कोयी बात म बड़ो सी बड़ो “प्रेरितों” सी कम नहाय।
2CO 11:6 यदि मय सन्देश बोलन म अनाड़ी हय, तब भी ज्ञान म नहीं। हम न येख हर बात म सब तरह सी तुम्हरो लायी प्रगट करयो हय।
2CO 11:7 का येख म मय न कुछ पाप करयो कि मय न तुम्ख परमेश्वर को सुसमाचार थोड़ो-मोड़ों सुनायो; अऊर अपनो आप ख नम्र करयो कि तुम ऊचो होय जावो?
2CO 11:8 मय न दूसरी मण्डलियों ख लूट्यो, यानेकि मय न उन सी मजूरी ली ताकि तुम्हरी सेवा करू।
2CO 11:9 अऊर जब मय तुम्हरो संग होतो अऊर मोख कमी भयी, त मय न कोयी पर बोझ नहीं डाल्यो, कहालीकि भाऊवों न मकिदुनिया सी आय क मोरी कमी ख पूरो करयो; अऊर मय न हर बात म अपनो आप ख तुम पर बोझ बननो सी रोक्यो, अऊर रोक्यो रहूं।
2CO 11:10 यदि मसीह की सच्चायी मोरो म हय त अखया देश म कोयी मोख यो घमण्ड सी नहीं रोकेंन।
2CO 11:11 कहाली? का येकोलायी कि मय तुम सी प्रेम नहीं रखू हय? परमेश्वर यो जानय हय कि मय प्रेम रखू हय।
2CO 11:12 पर जो मय करू हय, उच करतो रहूं कि जो बड़ो प्रेरित कहलावय हय, मौका ढूंढय हंय मय उन्ख मौका पावन नहीं देऊ, घमण्ड करन को ताकी जो बात म हम घमण्ड करजे हय।
2CO 11:13 कहालीकि असो लोग झूठो प्रेरित, अऊर छल सी काम करन वालो, अऊर मसीह को प्रेरितों को रूप धरन वालो हंय।
2CO 11:14 या कुछ अचम्भा की बात नहाय कहालीकि शैतान खुदच ज्योतिर्मय स्वर्गदूत को रूप धारन करय हय।
2CO 11:15 येकोलायी यदि ओको सेवक भी सच्चायी को सेवकों को जसो रूप धरेंन, त कोयी बड़ी बात नहीं, पर उन्को न्याय उन्को कामों को अनुसार होयेंन।
2CO 11:16 मय फिर कहू हय, कोयी मोख मूर्ख नहीं समझे; नहीं त मूर्ख बनाय क स्वीकार करो, ताकि थोड़ो सो मय भी घमण्ड कर सकूं।
2CO 11:17 यो आत्मविश्वास को घमण्ड म जो कुछ मय कहूं हय, ऊ प्रभु की आज्ञा को अनुसार नहीं पर मानो मूर्खता सीच कहूं हय।
2CO 11:18 जब कि बहुत सो लोग शरीर को अनुसार घमण्ड करय हंय, त मय भी घमण्ड करू।
2CO 11:19 तुम त समझदार होय क खुशी सी मूर्खो की सहन कर लेवय हय।
2CO 11:20 कहालीकि जब तुम्ख कोयी सेवक बनाय लेवय हय, यां फायदा उठाय लेवय हय, यां फसाय लेवय हय, यां अपनो आप ख बड़ो बनावय हय, यां तुम्हरो मुंह पर थापड़ मारय हय, त तुम सह लेवय हय।
2CO 11:21 मोरो कहनो अपमान को रीति पर हय, मानो हम येकोलायी कमजोर जसो होतो। पर जो कोयी बात म कोयी घमण्ड करन कि हिम्मत करय हय मय मूर्खता सी कहू हय त मय भी हिम्मत करू।
2CO 11:22 का हिच इब्रानी आय? मय भी आय। का हिच इस्राएली आय? मय भी आय। का हिच अब्राहम को वंश आय? मय भी आय।
2CO 11:23 का हिच मसीह को सेवक आय मय पागल को जसो कहू हय मय उन सी बड़ क हय। जादा मेहनत करनो म; बार बार बन्दी होनो म; कोड़ा खानो म; बार बार मरन को खतरा म।
2CO 11:24 पाच गन मय न यहूदियों को हाथ सी उन्चालीस-उन्चालीस कोड़ा सी मार खायो।
2CO 11:25 तीन बार मय न बेत की छड़ी सी मार खायी; एक गन मोरो पर गोटा सी वार करयो गयो; तीन बार जहाज, जेक पर मय चढ़्यो होतो, टूट गयो; एक रात-दिन मय न समुन्दर म बितायो।
2CO 11:26 मय बार बार यात्रावों म; नदियों को खतरावों म; डाकुवो को खतरावों म; यहूदी वालो सी खतरावों म; गैरयहूदी सी खतरावों म; नगरो को खतरावों म; जंगल को खतरावों म; समुन्दर को खतरावों म; झूठो भाऊ को बीच खतरावों म रह्यो।
2CO 11:27 मेहनत अऊर तकलीफ म; बार बार जागतो रहनो म; भूख-प्यास म, बार बार उपवास करनो म; ठंडी म; उघाड़्यो रहनो म;
2CO 11:28 अऊर दूसरी बातों ख छोड़ क जिन्को वर्नन म मय नहीं करू, सब मण्डलियों की चिन्ता हर दिन मोख दबावय हय।
2CO 11:29 कौन्की कमजोरी सी मय कमजोर नहीं होऊं? कौन्को ठोकर खानो सी का मोरो जीव नहीं दुखय?
2CO 11:30 यदि घमण्ड करनो जरूरी हय, त मय अपनी कमजोरी की बातों पर घमण्ड करूं।
2CO 11:31 प्रभु यीशु को परमेश्वर अऊर बाप जो हमेशा धन्य हय, जानय हय कि मय झूठ नहीं बोलू।
2CO 11:32 दमिश्क म अरितास राजा को तरफ सी जो शासक होतो, ओन मोख पकड़न ख दमिश्कियों को नगर को द्वार पर सैनिक ख बैठाय ख रख्यो होतो,
2CO 11:33 अऊर मय टोकना म खिड़की सी होय क शहर को दिवार की खिड़की सी उतारयो गयो, अऊर ओको हाथ सी बच निकल्यो।
2CO 12:1 फिर भी घमण्ड करनो मोरो लायी ठीक नहाय तब भी करनो पड़य हय; येकोलायी मय प्रभु को दियो हुयो दर्शनो अऊर प्रगटिकरन की चर्चा करू।
2CO 12:2 मय मसीह म एक आदमी ख जानु हय; या बात ख चौदा साल भयो कि न जाने शरीर समेत या बिन शरीर को केवल परमेश्वर जानय हय; असो आदमी तीसरो स्वर्ग तक उठाय लियो गयो।
2CO 12:3 मय असो आदमी ख जानु हय का पता शरीर समेत यां बिन शरीर परमेश्वरच जानय हय
2CO 12:4 कि स्वर्गलोक पर उठाय लियो गयो, अऊर असी बाते सुनी जो कहन की नहाय; अऊर जिन्को मुंह पर लावनो आदमी ख उचित नहाय।
2CO 12:5 असो आदमी पर त मय घमण्ड करू, पर अपनो पर अपनी कमजोरियों ख छोड़, अपनो बारे म घमण्ड नहीं करू।
2CO 12:6 कहालीकि यदि मय घमण्ड करनो चाहऊ भी त मूर्ख नहीं होऊं, कहालीकि सच बोलू; तब भी रुक जाऊ हय, असो नहीं होय कि जसो कोयी मोख देखय हय यां मोरो सी सुनय हय, मोख ओको सी बढ़ क समझो।
2CO 12:7 येकोलायी कि मय प्रकाशनों की भरपूरी सी फूल नहीं जाऊं, मोरो शरीर म एक काटा टोच्यो गयो, मतलब शैतान को एक दूत कि मोख घूसा मारे ताकि मय फूल नहीं जाऊं।
2CO 12:8 येको बारे म मय न प्रभु सी तीन गन बिनती करी कि मोरो सी यो दूर होय जाये।
2CO 12:9 पर ओन मोरो सी कह्यो, “मोरो अनुग्रह तोरो लायी बहुत हय; कहालीकि मोरी सामर्थ कमजोरी म सिद्ध होवय हय।” येकोलायी मय बड़ो खुशी सी अपनो कमजोरियों पर घमण्ड करू कि मसीह को सामर्थ मोरो पर छाया करती रहे।
2CO 12:10 यो वजह मय मसीह लायी कमजोरियों म, अऊर निन्दावों म, अऊर गरीबी म, अऊर उपद्रवो म, अऊर संकटों म खुश हय; कहालीकि जब मय कमजोर होऊं हय, तब भी ताकतवर होऊं हय।
2CO 12:11 मय मूर्ख त बन्यो, पर तुम न मोख यो करन लायी मजबूर करयो। तुम्ख त मोरी तारीफ करनो होतो, कहालीकि मय कुछ भी नहाय, तब भी उन बड़ो सी बड़ो प्रेरितों सी कोयी बात म कम नहाय।
2CO 12:12 प्रेरित को लक्षन भी तुम्हरो बीच सब तरह को धीरज सहित चिन्ह, अऊर अचम्भा को कामों, अऊर सामर्थ को कामों सी दिखायो गयो।
2CO 12:13 तुम कौन सी बात म दूसरी मण्डलियों सी कम होतो, केवल येको म कि मय न तुम पर अपनो बोझ नहीं डाल्यो। मोरो यो अन्याय माफ करो।
2CO 12:14 मय तीसरो गन तुम्हरो जवर आवन ख तैयार हय, अऊर मय तुम पर कोयी बोझ नहीं रखू, कहालीकि मय तुम्हरी जायजाद नहीं बल्की तुमच ख चाहऊं हय। कहालीकि बच्चां ख माय-बाप लायी धन जमा नहीं करनो चाहिये, पर माय-बाप ख बच्चां लायी।
2CO 12:15 मय तुम्हरो लायी बहुत खुशी सी खर्च करू, बल्की खुद भी खर्च होय जाऊं। का जितनो बढ़ क मय तुम सी प्रेम रखू हय, उतनोच कम होय क तुम मोरो सी प्रेम रखो?
2CO 12:16 तुम्ख मालूम हय कि मय न तुम पर बोझ नहीं डाल्यो, पर चालाकी सी तुम्ख धोका दे क फसाय लियो।
2CO 12:17 ठीक, जिन्ख मय न तुम्हरो जवर भेज्यो, का उन म सी कोयी को द्वारा मय न छल कर क् तुम सी कुछ ले लियो?
2CO 12:18 मय न तीतुस ख बिनती कर क ओको संग ऊ भाऊ ख भेज्यो, त का तीतुस न छल कर क् तुम सी कुछ गलत फायदा उठायो? का ऊ अऊर मय एकच आत्मा को उद्देश को संग नहीं चल्यो? का एकच पद चिन्ह पर नहीं चल्यो?
2CO 12:19 तुम अब तक समझ रह्यो होना कि हम तुम्हरो आगु प्रतिउत्तर दे रह्यो हंय। हम त परमेश्वर ख उपस्थित जान क मसीह जसो चाहवय हय वसोच बोलजे हंय, अऊर हे प्रियो, सब बाते तुम्हरी उन्नति लायी कहजे हंय।
2CO 12:20 मोख डर हय, कहीं असो नहीं हो कि मय आय क जसो चाहऊ हय, वसो तुम्ख नहीं पाऊं; अऊर मोख भी जसो तुम नहीं चाहवय वसोच पावों; अऊर तुम म झगड़ा, जलन, गुस्सा, विरोध, घृना, चुगली, अहंकार अऊर उपद्रव होय;
2CO 12:21 अऊर कहीं असो नहीं होय कि मोरो परमेश्वर फिर सी तुम्हरो इत आनो पर मोरो पर दबाव डाले अऊर मोख बहुतों लायी फिर शोक करनो पड़े, जिन्न पहले पाप करयो होतो अऊर अशुद्धता अऊर व्यभिचार अऊर वासना सी, जो उन्न करयो, अपनो पापों सी मन नहीं फिरायो।
2CO 13:1 अब तीसरो बार मय तुम्हरो जवर आऊं हय: हर एक मुकद्दमा लायी दोय यां तीन गवाहों को मुंह सी हर एक बात ठहरायी जायेंन।
2CO 13:2 जसो मय जब दूसरों बार तुम्हरो संग होतो, वसोच अब दूर रहतो हुयो उन लोगों सी जिन्न पहले पाप करयो, अऊर दूसरों सब लोगों सी अब पहिलो सी कह्य देऊ हय कि यदि मय फिर आऊं त नहीं छोड़ूं,
2CO 13:3 कहालीकि तुम त येको सबूत चाहवय हय कि मसीह मोरो म बोलय हय, जो तुम्हरो लायी कमजोर नहाय पर तुम म सामर्थी हय।
2CO 13:4 ऊ कमजोरी को वजह क्रूस पर चढ़ायो त गयो, तब भी परमेश्वर को सामर्थ सी जीन्दो हय तुम्हरी मदत करन लायी। हम भी ओको म कमजोर हंय, पर परमेश्वर की सामर्थ सी जो तुम्हरो लायी हय, ओको संग जाबोंन।
2CO 13:5 अपनो आप ख परखो कि विश्वास म हय कि नहाय। अपनो आप ख जांचो। का तुम अपनो बारे म यो नहीं जानय कि यीशु मसीह तुम म हय? नहीं त तुम जांच म बेकार निकल्यो हय।
2CO 13:6 पर मोरी आशा हय कि तुम जान लेवो कि हम असफल नहाय।
2CO 13:7 हम अपनो परमेश्वर सी या प्रार्थना करजे हंय कि तुम कोयी बुरायी मत करो, येकोलायी नहीं कि हम सफल दिखायी दे, पर येकोलायी कि तुम भलायी करो, बल्की हम असफल ठहराये जाये।
2CO 13:8 कहालीकि हम सच को विरोध म कुछ नहीं कर सकजे, पर सच को लायीच कर सकजे हंय।
2CO 13:9 जब हम कमजोर हंय अऊर तुम बलवान हय, त हम्ख खुशी होवय हंय, अऊर या प्रार्थना भी करय हंय कि तुम सिद्ध होय जावो।
2CO 13:10 यो वजह मय तुम्हरो पीठ पीछू या बाते लिखूं हय, कि उपस्थित होय क मोख ऊ अधिकार को अनुसार जेक प्रभु न बिगाड़न लायी नहीं पर बनावन लायी मोख दियो हय, कठोरता सी कुछ करनो नहीं पड़ेंन।
2CO 13:11 येकोलायी हे भाऊवों-बहिनों, खुश रहो; सिद्ध बनत जावो; हिम्मत रखो; एकच मन रखो; मिल क रहो। अऊर प्रेम अऊर शान्ति को दाता परमेश्वर तुम्हरो संग रहेंन।
2CO 13:12 एक दूसरों ख परमेश्वर को पवित्र प्रेम सी नमस्कार करो।
2CO 13:13 सब परमेश्वर को पवित्र लोग तुम्ख नमस्कार कह्य हंय।
2CO 13:14 प्रभु यीशु मसीह को अनुग्रह अऊर परमेश्वर को प्रेम अऊर पवित्र आत्मा की सहभागिता तुम सब को संग होती रहे।
GAL 1:1 पौलुस को तरफ सी, जो नहीं आदमियों को तरफ सी अऊर नहीं आदमी को द्वारा भयो, बल्की यीशु मसीह अऊर परमेश्वर पिता को द्वारा प्रेरित चुन्यो गयो, जेन ओख मरयो हुयो म सी जीन्दो करयो हय,
GAL 1:2 अऊर सब भाऊवों अऊर बहिनों को तरफ सी जो मोरो संग यहां हंय, गलातिया की मण्डलियों ख शुभकामनायें भेजन म शामिल हय।
GAL 1:3 हमरो पिता परमेश्वर अऊर प्रभु यीशु मसीह तुम्ख अनुग्रह अऊर शान्ति देतो रहे।
GAL 1:4 यो वर्तमान बुरो युग सी हम ख छुड़ावन लायी, प्रभु यीशु मसीह न हमरो पापों लायी, हमरो परमेश्वर अऊर बाप की इच्छा को अनुसार ओन खुद ख दियो।
GAL 1:5 परमेश्वर की महिमा हमेशा होती रहे आमीन।
GAL 1:6 मोख अचम्भा होवय हय! कि जेन तुम लोगों ख मसीह को अनुग्रह म बुलायो ओख तुम इतनो जल्दी छोड़ क कोयी दूसरों सुसमाचार को अनुयायी बन गयो हय।
GAL 1:7 वास्तव म, कोयी दूसरों सुसमाचार हयच नहाय: पर मय यो कहू हय कि कुछ लोग हय जो तुम्ख भ्रमित कर रह्यो हय अऊर मसीह को सुसमाचार ख बदलन कि कोशिश कर रह्यो हंय।
GAL 1:8 पर यदि हम, यां कोयी स्वर्गदूत भी तुम ख ऊ सुसमाचार सुनायो, जो तुम्हरी शिक्षा सी अलग हय, त का ऊ शापित नहीं होयेंन।
GAL 1:9 जसो हम न येख पहिले कह्य चुक्यो हंय, वसोच मय अब फिर कहू हय कि ऊ सुसमाचार कि शिक्षा देवय हय, जो तुम्हरो द्वारा स्वीकार करयो हुयो सी अलग हय, त ओको नरक म नाश होयेंन।
GAL 1:10 का मय आदमियों सी समर्थन चाहऊं हय यां जगत को स्वामी सी? यां मोख परमेश्वर को समर्थन मिले? का मय आदमियों ख खुश करन की कोशिश कर रह्यो हय? कहालीकि यदि मय अभी तक आदमियों ख खुश करन की कोशिश कर रह्यो हय, त मय मसीह को सेवक नहीं होय सकू।
GAL 1:11 लेकिन भाऊवों अऊर बहिनों, मय तुम्ख बताऊ हय कि जो सुसमाचार ख मय न सुनायो होतो ऊ आदमी को नोहोय।
GAL 1:12 येकोलायी कि मय न मोख आदमी को तरफ सी हासिल नहीं करयो, अऊर नहीं मोख कोयी न सिखायो होतो। पर मय न येख यीशु मसीह सी सिख्यो होतो।
GAL 1:13 तुम न पहिले सुन्यो होना कि जब मय यहूदी धर्म म पहिले सी मय समर्पित होतो त मय कसो रहत होतो, त मय न परमेश्वर की मण्डली ख बहुतच सतावत अऊर नाश करन कि पूरी कोशिश करयो।
GAL 1:14 मय यहूदी धर्म को अपनो अभ्यास म अपनो उमर को कुछ यहूदियों सी बहुत आगु होतो, अऊर हमरो पूर्वजों की परम्परावों को लायी जादा समर्पित होतो।
GAL 1:15 पर परमेश्वर को अनुग्रह सी, जेन मोरी माय को गर्भ सीच मोख चुन लियो, अऊर मोख ओकी सेवा करन लायी बुलायो। अऊर जब ओन ठान लियो
GAL 1:16 जब इच्छा भयी की अपनो बेटा ख मोरो म प्रगट करे ताकि मय गैरयहूदियों म ओको सुसमाचार को प्रचार कर सकू, मय कोयी को जवर सलाह लेन नहीं गयो,
GAL 1:17 अऊर नहीं यरूशलेम ख उन्को जवर गयो जो मोरो सी पहिले प्रेरित होतो, पर अरब ख चली गयो अऊर फिर उत सी दमिश्क ख लौट आयो।
GAL 1:18 फिर तीन साल को बाद मय पतरस सी मुलाखात करन लायी यरूशलेम गयो, अऊर ओको जवर पन्द्रा दिन तक रह्यो।
GAL 1:19 पर उत प्रभु को भाऊ याकूब ख छोड़ क मोरी मुलाखात कोयी दूसरों प्रेरित सी नहीं भयी।
GAL 1:20 जो बाते मय तुम्ख लिखूं हय, देखो, परमेश्वर ख मौजूद जान क कहू हय कि हि झूठी नहाय।
GAL 1:21 येको बाद मय सीरिया अऊर किलिकिया को प्रान्तों म आयो।
GAL 1:22 पर यहूदिया की मण्डलियों को लोगों न जो मसीह म होतो, मोख व्यक्तिगत रूप सी कभी नहीं मिल्यो।
GAL 1:23 पर मोरो बारे म इतनोच सुनावत होतो: जो आदमी हम्ख पहिले सतावत होतो, ऊ अब उच विश्वास को सुसमाचार सुनावय हय जेक पहिले नाश करन कि कोशिश करत होतो।
GAL 1:24 अऊर उन्न मोरो वजह परमेश्वर की महिमा करी।
GAL 2:1 चौदा साल को बाद मय बरनबास को संग फिर यरूशलेम ख गयो, अऊर तीतुस ख भी संग ले गयो।
GAL 2:2 मय उत गयो अऊर जो सुसमाचार मय गैरयहूदियों को बीच म जो सुसमाचार को प्रचार करू हय, उच सुसमाचार ख मय न एक निजी सभा को बीच मण्डली को मुखियावों ख सुनायो मय उत गयो होतो कि परमेश्वर न मोख दर्शायो होतो कि उत मोख जानो होतो जो काम मय न पिछलो दिनो म करयो होतो अऊर अब भी कर रह्यो हय ऊ बेकार मत जाये।
GAL 2:3 पर तीतुस ख भी जो मोरो सहयोगी हय अऊर जो गैरयहूदी हय, खतना करावन लायी ओको पर दबाव नहीं डाल्यो गयो।
GAL 2:4 यो उन झूठो भाऊवों को वजह भयो जो जासूसों को तरह हमरो बिच म चुपचाप सी घुस आयो होतो, कि ऊ स्वतंत्रता को जो मसीह यीशु म हम्ख मिली हय, भेद लेय क हम्ख सेवक बनाये।
GAL 2:5 एक पल को लायी भी हम्न उन्की अधिनता स्वीकार नहीं करी उन्को अधीन होनो हम न नहीं मान्यो, येकोलायी कि सुसमाचार की सच्चायी तुम म बनी रहे।
GAL 2:6 पर जो लोग महत्वपूर्ण लगय हय हि चाहे जो भी होतो मोख येको सी कुछ फरक नहीं पड़य; परमेश्वर कोयी को बाहरी रूप देख क कोयी को न्याय नहीं करय उन्को सी जो अपनो खुद ख महत्वपूर्ण समझत होतो, उन्न मोख कुछ भी सुझाव नहीं दियो।
GAL 2:7 पर येको विपरीत जब उन्न देख्यो कि जसो गैरयहूदियों लोगों लायी सुसमाचार को काम पतरस ख सौंप्यो गयो, वसोच यहूदियों लायी मोख सुसमाचार सुनावन को काम सौंप्यो गयो।
GAL 2:8 कहालीकि जेन पतरस ख खतना करयो हुयो म प्रेरितायी को काम बड़ो प्रभाव सहित करवायो, ओनच मोरो सी भी गैरयहूदियों म प्रभावशाली काम करवायो,
GAL 2:9 अऊर जब उन्न ऊ अनुग्रह जो मोख परमेश्वर को तरफ सी मिल्यो होतो जान लियो, त याकूब, पतरस, अऊर यूहन्ना न जो मण्डली को खम्बा समझ्यो जात होतो, मोख अऊर बरनबास ख संगति को अधिकार दियो कि हम गैरयहूदियों को जवर जाये अऊर हि यहूदियों को जवर;
GAL 2:10 केवल यो कह्यो कि हम गरीबों की सुधि ले, अऊर योच काम ख करन को मय खुद भी कोशिश कर रह्यो होतो।
GAL 2:11 पर जब पतरस अन्ताकिया म आयो, त सब लोगों को आगु मय न विरोध करयो, कहालीकि ऊ पूरी रीति सी गलत होतो।
GAL 2:12 येकोलायी कि याकूब को तरफ सी कुछ लोगों को इत आनो सी पहिले पतरस गैरयहूदी विश्वासियों को संग खायो पियो करत होतो, पर जब हि लोग पहुंच्यो त पतरस गैरयहूदियों विश्वासियों सी दूर भयो अऊर उन्को संग खानो पीनो बन्द कर दियो यो ओन उन लोगों को डर को मारे ओन असो करयो जो चाहत होतो कि गैरयहूदियों को भी खतना होनो चाहिये।
GAL 2:13 दूसरों यहूदियों न भी यो दिखावा म पतरस को साथ दियो, यहां तक कि यो कपट को वजह बरनबास भी उन्को डर म पड़ गयो।
GAL 2:14 पर जब मय न देख्यो कि हि सुसमाचार की सच्चायी पर सीधी चाल नहीं चलय, त मय न सब लोगों को आगु पतरस सी कह्यो, “जब तय यहूदी होय क गैरयहूदियों को सामने नहीं। त तय गैरयहूदियों ख यहूदियों को आगु चलन ख कहाली कह्य हय?”
GAL 2:15 हम त जनम सी यहूदी हय, अऊर पापी गैरयहूदियों म सी नहाय।
GAL 2:16 तब भी यो जान क कि आदमी व्यवस्था को कामों सी नहीं, पर केवल यीशु मसीह पर विश्वास करन को द्वारा सच्चो ठहरय हय, हम न खुद भी मसीह यीशु पर विश्वास करयो कि हम व्यवस्था को कामों सी नहीं, पर मसीह पर विश्वास करन सी सच्चो ठहरे; येकोलायी कि व्यवस्था को कामों सी कोयी प्रानी सच्चो नहीं ठहरेंन।
GAL 2:17 हम जो मसीह म सच्चो ठहरनो चाहजे हंय, यदि खुदच गैरयहूदी को जसो पापी निकले त का मसीह पाप को सेवक आय? कभीच नहीं!
GAL 2:18 कहालीकि जो कुछ मय न गिराय दियो यदि ओखच फिर बनाऊ हय, त अपनो खुद ख अपराधी ठहराऊ हय।
GAL 2:19 मय त व्यवस्था को द्वारा व्यवस्था लायी मर गयो ताकि परमेश्वर को लायी जीऊ। मय मसीह को संग क्रूस पर चढ़ायो गयो हय,
GAL 2:20 अब मय जीन्दो नहीं रह्यो, पर मसीह मोरो म जीन्दो हय। अऊर मय शरीर म अब जो जीन्दो हय त केवल ऊ विश्वास सी जीन्दो हय जो परमेश्वर को बेटा पर हय, जेन मोरो सी प्रेम करयो अऊर मोरो लायी अपनो आप ख दे दियो।
GAL 2:21 मय परमेश्वर को अनुग्रह ख नहीं ठुकराऊ; पर यदि कोयी आदमी व्यवस्था को द्वारा सच्चो ठहरायो जातो, त येको अर्थ यो हय कि मसीह को मरनो बेकार होतो।
GAL 3:1 हे निर्बुद्धि गलातियों, कौन न तुम्ख मोह लियो हय? तुम्हरी त मानो आंखी को आगु यीशु मसीह क्रूस पर साफ रीति सी दिखायो गयो!
GAL 3:2 मय तुम सी केवल एक बात जाननो चाहऊं हय कि तुम न परमेश्वर की आत्मा ख, का व्यवस्था को पालन करनो सी यां सुसमाचार सुनन सी यां विश्वास करनो सी मिल्यो?
GAL 3:3 का तुम असो निर्बुद्धि हय कि परमेश्वर की आत्मा को द्वारा सुरूवात कर क् अऊर अपनो शरीर की शक्ति को द्वारा पूरो करनो चाहवय हय?
GAL 3:4 का तुम न इतनो दु:ख बेकारच उठायो? पर कभी भी बेकार नहाय।
GAL 3:5 जो परमेश्वर तुम्ख आत्मा प्रदान करय हय अऊर तुम म सामर्थ को काम करय हय, का ऊ यो येकोलायी करय हय कि का तुम व्यवस्था को नियमों ख पालय हय यां येकोलायी कि तुम न सुसमाचार ख सुन्यो अऊर विश्वास करयो?
GAL 3:6 जसो-जसो अब्राहम को अनुभव को बारे म शास्त्र म लिख्यो हय, “परमेश्वर पर विश्वास करयो अऊर यो ओको लायी सच्चो गिन्यो गयो।”
GAL 3:7 अब यो जान लेवो कि जो विश्वास करन वालो हंय, हिच अब्राहम की सन्तान आय।
GAL 3:8 अऊर पवित्र शास्त्र न पहिलेच सी भविष्यवानी करी होती कि परमेश्वर गैरयहूदियों ख विश्वास सी सच्चो ठहरायेंन। पहिलेच सी अब्राहम ख यो सुसमाचार कि घोषना कर दियो “तोरो द्वारा सब लोग आशीष पायेंन।”
GAL 3:9 अब्राहम न विश्वास करयो अऊर आशिषित भयो; उच तरह जो विश्वासी रखय हय हि आशीष पावय हय।
GAL 3:10 येकोलायी जितनो लोग व्यवस्था को पालन कर क् जीवय हय, हि सब श्राप को अधीन हंय। कहालीकि शास्त्र म लिख्यो हय, “जो कोयी व्यवस्था की किताब म लिखी हुयी सब बातों ख पालन करन म स्थिर नहीं रह्य, त ऊ परमेश्वर को श्राप को अधीन हय।”
GAL 3:11 पर या बात साफ हय कि व्यवस्था को द्वारा परमेश्वर को यहां कोयी सच्चो नहीं ठहरय, कहालीकि शास्त्र असो कह्य हय, सच्चो लोग विश्वास सी जीन्दो रहेंन।
GAL 3:12 पर व्यवस्था को विश्वास को संग कोयी सम्बन्ध नहाय; बल्की जसो शास्त्र म लिख्यो हय, “जो उन्को करेंन, ऊ उन्को सहारा जीन्दो रहेंन।”
GAL 3:13 पर मसीह हमरो लायी श्रापित बन्यो, ताकी हम्ख व्यवस्था को श्राप सी छुड़ाये, कहालीकि शास्त्र म लिख्यो हय, “जो कोयी झाड़ पर लटकायो गयो हय ऊ परमेश्वर को श्राप को अधीन हय।”
GAL 3:14 यो येकोलायी भयो कि अब्राहम की आशीष मसीह यीशु म गैरयहूदियों तक पहुंचे, अऊर हम विश्वास को द्वारा वा आत्मा ख हासिल करे जेकी प्रतिज्ञा भयी हय।
GAL 3:15 हे भाऊवों अऊर बहिनों, अब मय तुम्ख दैननदिन जीवन सी एक उदाहरन देन जाय रह्यो हय; जसो कोयी दोय आदमी द्वारा कोयी करार कर दियो जान पर नहीं त ओख रद्द करयो जाय सकय हय अऊर नहीं बढ़ायो जाय सकय हय।
GAL 3:16 मतलब परमेश्वर न अब्राहम अऊर ओको वंश ख प्रतिज्ञाये दी हय। ओको बारे म शास्त्र यो कह्य हय, “तोरो वंशजों ख,” मतलब बहुत सो लोग, पर एक वचन जसो “तोरो वंश ख” मतलब एक लोग जो मसीह आय।
GAL 3:17 मोरो कहनो यो हय कि: जो प्रतिज्ञा परमेश्वर न अब्राहम को संग स्थापित करयो होतो, ओख चार सौ तीस साल को बाद आवन वाली व्यवस्था नहीं बदल सकय।
GAL 3:18 कहालीकि यदि परमेश्वर को दान व्यवस्था पर आधारित हय त वा प्रतिज्ञा को आधार पर नहाय, पर परमेश्वर न यो अब्राहम ख प्रतिज्ञा को आधार पर दे दियो हय।
GAL 3:19 तब फिर व्यवस्था को उद्देश का होतो? आज्ञा को अपराधो को वजह व्यवस्था ख वचन सी जोड़ दियो गयो होतो ताकी जेको लायी अब्राहम को वंशज को आवन तक ऊ रहे, प्रतिज्ञा दी गयी होती; अऊर ऊ स्वर्गदूतों को द्वारा मध्यस्थ सी दी गयी होती।
GAL 3:20 मध्यस्थ त दोय को बीच म होवय हय, पर परमेश्वर एकच आय।
GAL 3:21 त का व्यवस्था परमेश्वर की प्रतिज्ञावों को विरोध म हय? कभीच नहीं! कहालीकि यदि असी व्यवस्था दी जाती जो जीवन दे सकती, त सचमुच सच्चायी व्यवस्था को पालन को द्वारा मिलय हय।
GAL 3:22 पर पवित्र शास्त्र कह्य हय, पूरी दुनिया ख पाप को अधीन कर दियो, अऊर येकोलायी यीशु मसीह म विश्वास को आधार पर प्रतिज्ञा करयो हुयो परमेश्वर को दान, ऊ विश्वास करन वालो ख मिले।
GAL 3:23 पर विश्वास को आनो सी पहिले व्यवस्था की अधिनता म हमरी रखवाली होत होती, अऊर ऊ विश्वास को आवन तक जो प्रगट होन वालो होतो, हम ओकोच बन्धन म रहे।
GAL 3:24 येकोलायी हम्ख मसीह तक पहुंचान लायी व्यवस्था ख हमरो मार्गदर्शक ठहरायो हय कि हम विश्वास सी सच्चो ठहरे।
GAL 3:25 पर जब विश्वास आय चुक्यो, त हम अब व्यवस्था को अधीन नहीं रह्यो।
GAL 3:26 कहालीकि तुम सब ऊ विश्वास को द्वारा जो मसीह यीशु म एक होनो सी परमेश्वर की सन्तान हो।
GAL 3:27 अऊर तुम म सी जितनो न मसीह म एक होन को लायी बपतिस्मा लियो हय, उन्न मसीह यीशु ख मतलब ओको जीवन ख पहिन लियो हय।
GAL 3:28 अब नहीं यहूदी रह्यो अऊर नहीं गैरयहूदी, नहीं कोयी सेवक नहीं स्वतंत्र, नहीं कोयी नर अऊर नहीं नारी, कहालीकि तुम सब मसीह यीशु म मिल जान को वजह एक हो।
GAL 3:29 अऊर यदि तुम मसीह को हय त अब्राहम को वंश अऊर प्रतिज्ञा को अनुसार वारिस भी हो।
GAL 4:1 मय यो कहू हय कि वारिस जब तक बच्चा हय, यानेकि ऊ सब चिजों को मालिक हय, तब भी ओको म अऊर सेवक म कोयी भेद नहाय।
GAL 4:2 पर बाप को ठहरायो हुयो समय तक संरक्षको अऊर व्यवस्थापक को वश म रह्य हय।
GAL 4:3 वसोच हम भी, जब बच्चा होतो त जगत कि सुरूवात की शिक्षा को वश म सेवक बन्यो हुयो होतो।
GAL 4:4 पर जब समय पूरो भयो, त परमेश्वर न अपनो टुरा ख भेज्यो ऊ जो बाई सी जनम्यो, अऊर व्यवस्था को अधीन जीवत होतो,
GAL 4:5 ताकि हम जो व्यवस्था को अधीन हय उन्ख छुड़ाये, जेकोसी हम परमेश्वर को बेटा अऊर बेटी बन सके।
GAL 4:6 अऊर तुम जो परमेश्वर को बेटा अऊर बेटी आय, येकोलायी परमेश्वर न अपनो टुरा की आत्मा ख, जो हे पिता, हे पिता, कह्य क पुकारय हय, हमरो दिलो म भेज्यो हय।
GAL 4:7 येकोलायी तय अब सेवक नहाय, पर बेटा अऊर बेटी आय; अऊर जब बेटा भयो, त परमेश्वर को द्वारा वारिस भी भयो।
GAL 4:8 पर पहिले त तुम परमेश्वर ख नहीं जानत होतो अऊर उन्को तुम सेवक होतो जो वास्तव म ईश्वरीय नहाय,
GAL 4:9 पर अब जो तुम न परमेश्वर ख पहिचान लियो बल्की परमेश्वर न तुम ख पहिचान लियो, त उन कमजोर अऊर बेकार अऊर सुरूवात की शिक्षा को तरफ फिरय हय, जिन्को तुम दुबारा सेवक होनो चाहवय हय?
GAL 4:10 तुम कुछ विशेष दिनो अऊर महीनों अऊर मौसम अऊर सालो ख मानय हय।
GAL 4:11 मय तुम्हरो बारे म चिन्तित हय, कहीं असो नहीं होय कि जो मेहनत मय न तुम्हरो लायी करयो ऊ बेकार ठहरे।
GAL 4:12 हे भाऊवों अऊर बहिनों, मय तुम सी बिनती करू हय, तुम मोरो जसो होय जावो; कहालीकि मय भी तुम्हरो जसो भय गयो हय; तुम न मोरो संग कुछ अन्याय नहीं करयो।
GAL 4:13 पर तुम जानय हय कि पहिली बार मय न शारीरिक कमजोरी को वजह तुम्ख सुसमाचार सुनायो।
GAL 4:14 अऊर तुम न मोरी शारीरिक दशा ख जो तुम्हरी परीक्षा को वजह होती, तुच्छ नहीं जान्यो; अऊर परमेश्वर को दूत बल्की खुद मसीह यीशु को जसो मोख स्वीकार करयो।
GAL 4:15 त ऊ तुम्हरी खुशी मनानो कित गयी? मय तुम्हरो गवाह हय कि यदि होय सकतो त तुम अपनी आंखी भी निकाल क मोख दे देतो।
GAL 4:16 त का तुम सी सच बोलन को वजह मय तुम्हरो दुश्मन बन गयो हय?
GAL 4:17 हि तुम्ख संगी बनानो त चाहवय हंय, पर भलो उद्देश सी नहीं; बल्की तुम्ख मोरो सी अलग करनो चाहवय हंय कि तुम उन्खच संगी बनाय लेवो।
GAL 4:18 पर यो भी अच्छो हय कि भली बात म हर समय संगी बनावन म यत्न करयो जाय, नहीं केवल उच समय कि जब मय तुम्हरो संग रहू हय।
GAL 4:19 हे मोरो बच्चा, जब तक तुम म मसीह को रूप नहीं बन जाये, तब तक मय तुम्हरो लायी फिर प्रसव जसी तकलीफ म हय।
GAL 4:20 इच्छा त यो होवय हय, कि अब तुम्हरो जवर आय क अलग रीति सी बोलू, कहालीकि तुम्हरो बारे म मय चिन्तित हय।
GAL 4:21 तुम जो व्यवस्था को अधीन होनो चाहवय हय, मोरो सी कहो, का तुम व्यवस्था की नहीं सुनय?
GAL 4:22 शास्त्र म लिख्यो हय, कि अब्राहम ख दोय टुरा भयो; एक दासी सी, अऊर एक स्वतंत्र बाई सी।
GAL 4:23 पर जो दासी सी भयो, ऊ शारीरिक रीति सी जनम्यो; अऊर जो स्वतंत्र बाई सी भयो, ऊ प्रतिज्ञा को अनुसार जनम्यो।
GAL 4:24 इन बातों म दृष्टान्त हय: हि बाईयां मानो दोय वाचा आय, एक त सीनै पहाड़ी की जेकोसी गुलाम पैदा होवय हय, अऊर वा हाजिरा आय।
GAL 4:25 अऊर हाजिरा अरब को सीनै पहाड़ी आय, अऊर आधुनिक यरूशलेम ओको तुल्य हय, जो अपनो बच्चां समेत सेवक म हय।
GAL 4:26 पर स्वर्ग को यरूशलेम स्वतंत्र हय, अऊर वा हमरी माय आय।
GAL 4:27 कहालीकि शास्त्र म लिख्यो हय, “हे बांझ, तय जो नहीं जानय खुशी मनाव; जेक तकलीफ नहीं उठय, गलो खोल क जय जयकार कर; कहालीकि छोड़ी हुयी की सन्तान सुहागिन की सन्तान सी भी जादा हय।”
GAL 4:28 हे भाऊवों अऊर बहिनों, हम इसहाक को जसो प्रतिज्ञा की सन्तान आय।
GAL 4:29 अऊर जसो ऊ समय शरीर को अनुसार जनम्यो हुयो जो आत्मा को अनुसार जनम्यो हुयो ख सतावत होतो, वसोच अब भी होवय हय।
GAL 4:30 पर पवित्र शास्त्र का कह्य हय? “दासी अऊर ओको बेटा ख निकाल दे, कहालीकि दासी को बेटा स्वतंत्र बाई को बेटा को संग उत्तराधिकारी नहीं होयेंन।”
GAL 4:31 येकोलायी हे भाऊवों अऊर बहिनों, हम दासी को नहीं पर स्वतंत्र बाई की सन्तान आय।
GAL 5:1 मसीह न स्वतंत्रता को लायी हम्ख स्वतंत्र करयो हय; येकोलायी येकोच म स्थिर रहो, अऊर गुलामी को बोझ म फिर सी मत जीवो।
GAL 5:2 सुनो, मय पौलुस तुम सी कहू हय कि यदि खतना कराय क फिर सी व्यवस्था को तरफ लौटय हय, त तुम्हरो लायी कुछ भी मसीह को महत्व नहाय।
GAL 5:3 फिर भी मय हर एक खतना करावन वालो ख गवाही देऊ हय कि ओख पूरी व्यवस्था माननो पड़ेंन।
GAL 5:4 तुम जो व्यवस्था को द्वारा सच्चो ठहरनो चाहवय हय, मसीह सी अलग अऊर अनुग्रह सी वंचित भय गयो हय।
GAL 5:5 कहालीकि आत्मा को वजह हम विश्वास सी, आशा करी हुयी सच्चायी की रस्ता देखजे हंय।
GAL 5:6 मसीह यीशु म नहीं खतना नहीं खतनारहित कुछ काम को हय, पर केवल विश्वास, जो प्रेम को द्वारा प्रभाव डालय हय।
GAL 5:7 तुम त बहुत अच्छो सी दौड़ रह्यो होतो। अब कौन न तुम्ख रोक दियो कि सच ख मत मानो।
GAL 5:8 असी सीख तुम्हरो बुलावन वालो परमेश्वर को तरफ सी नहाय।
GAL 5:9 थोड़ो सो खमीर पूरो गूंथ्यो हुयो आटा ख खमीर कर डालय हय।
GAL 5:10 प्रभु म एक होन को वजह मोख भरोसा हय कि तुम्हरो कोयी दूसरों बिचार नहीं होना; पर जो तुम्ख दु:खी कर देवय हय, ऊ कोयी भी होना सजा पायेंन।
GAL 5:11 पर हे भाऊवों अऊर बहिनों, यदि मय अज भी जसो की कुछ समझय हय खतना करनो महत्वपूर्ण हय यो प्रचार करू हय, त मोख अब तक ठोकर कहाली दियो जाय रह्यो हय? अब त मसीह को क्रूस को प्रचार करन को वजह पैदा भयी मोरी सब बाधाये खतम होय जानो चाहिये।
GAL 5:12 भलो होतो कि जो तुम्ख दु:खी करय हंय, हि पूरो रस्ता जाये उन्ख जान देवो अऊर खुद को खतना कर देवो।
GAL 5:13 हे भाऊवों अऊर बहिनों, तुम स्वतंत्र होन लायी बुलायो गयो हय; पर असो नहीं होय कि यो स्वतंत्रता शारीरिक कामों लायी अवसर बने, बल्की प्रेम सी एक दूसरों को सेवक बनो।
GAL 5:14 कहालीकि पूरी व्यवस्था या एकच बात म पूरी होय जावय हय, “तय अपनो पड़ोसी सी अपनो जसो प्रेम रख।”
GAL 5:15 पर यदि तुम एक दु:ख अऊर चोट पहुंचावय हय, त चौकस रहो कि एक दूसरों को सत्यानाश मत कर डालो।
GAL 5:16 पर मय कहू हय, आत्मा को अनुसार चलो त तुम शरीर की लालसा कोयी रीति सी पूरी नहीं करो।
GAL 5:17 कहालीकि शरीर आत्मा को विरोध म अऊर आत्मा शरीर को विरोध म लालसा करय हय, अऊर यो एक दूसरों को विरोधी हंय, येकोलायी कि जो तुम करनो चाहवय हय ऊ नहीं कर पावय।
GAL 5:18 अऊर यदि तुम आत्मा को चलाये चलय हय त व्यवस्था को अधीन मत रहो।
GAL 5:19 शरीर को काम त प्रगट हंय, मतलब अनैतिकता, अपवित्रता, अशोभनीय,
GAL 5:20 मूर्तिपूजा, जादूटोना, दुश्मनी, लड़ाई झगड़ा, ईर्ष्या, गुस्सा, स्वार्थी पन,
GAL 5:21 मतवालोपन, लीलाक्रीड़ा अऊर इन को जसो अऊर भी काम हंय, इन को बारे म मय तुम सी पहिले सी कह्य देऊ हय जसो पहिले कह्य भी चुक्यो हय, कि असो-असो काम करन वालो परमेश्वर को राज्य को वारिस नहीं होयेंन।
GAL 5:22 पर आत्मा को फर प्रेम, खुशी, शान्ति, धीरज, दयालु, भलायी, विश्वास,
GAL 5:23 नम्रता, अऊर संय्यम हंय; असो-असो कामों को विरोध म कोयी भी व्यवस्था नहाय।
GAL 5:24 अऊर जो मसीह यीशु को हंय, उन्न शरीर ख ओकी लालसा अऊर अभिलाषावों समेत क्रूस पर चढ़ाय दियो हय।
GAL 5:25 यदि हम आत्मा को द्वारा जीन्दो हंय, त आत्मा को अनुसार चले भी।
GAL 5:26 हम घमण्डी नहीं बने एक दूसरों ख नहीं चिड़ चिड़ाये, अऊर नहीं एक दूसरों को प्रती जलन रखो।
GAL 6:1 हे भाऊवों अऊर बहिनों, यदि कोयी आदमी कोयी अपराध म पकड़्यो भी जाये त तुम जो आत्मिक हो, नम्रता को संग असो ख सम्भालो, अऊर अपनी भी चौकसी रखो कि तुम भी परीक्षा म मत पड़ो।
GAL 6:2 तुम एक दूसरों ख बोझ उठावों, अऊर यो तरह मसीह की व्यवस्था ख पूरो करो।
GAL 6:3 कहालीकि यदि कोयी कुछ भी नहीं होनो पर अपनो आप ख कुछ समझय हय, त अपनो आप ख धोका देवय हय।
GAL 6:4 पर हर एक अपनोच काम ख परख ले, अऊर तब दूसरों को बारे म नहीं पर अपनोच बारे म ओख घमण्ड करन को अवसर मिलेंन।
GAL 6:5 कहालीकि हर एक आदमी अपनोच बोझ उठायेंन।
GAL 6:6 जो वचन की शिक्षा पावय हय, ऊ सब अच्छी चिजों म सिखावन वालो ख सहभागी करे।
GAL 6:7 अपनो आप ख धोका मत देवो; परमेश्वर ख कोयी मुर्ख नहीं बनाय सकय, कहालीकि आदमी जो बोवय हय उच काटेंन।
GAL 6:8 कहालीकि जो अपनो शरीर को लायी बोवय हय, ऊ शरीर को द्वारा विनाश की फसल काटेंन; अऊर जो आत्मा को लायी बोवय हय, ऊ आत्मा को द्वारा अनन्त जीवन की फसल काटेंन।
GAL 6:9 हम अच्छो काम करन म हिम्मत नहीं छोड़बो, कहालीकि यदि हम हार नहीं मानबो त ठीक समय पर फसल काटबो।
GAL 6:10 येकोलायी जित तक मौका मिलय हय तब हम सब को संग अच्छो करनो चाहिये, विशेष कर क् विश्वासी परिवार को भाऊवों अऊर बहिनों को लायी।
GAL 6:11 देखो, मय न कसो बड़ो अक्षरो म तुम ख अपनो हाथ सी लिख्यो हय।
GAL 6:12 जो लोग बाहरी बातों पर जोर देवय हय, अऊर घमण्ड करय हय हिच तुम्हरो खतना करावन लायी दबाव डालय हंय, केवल येकोलायी कि हि मसीह को क्रूस को वजह सतायो नहीं जाये।
GAL 6:13 कहालीकि खतना करावन वालो खुद त व्यवस्था पर नहीं चलय, पर तुम्हरो खतना येकोलायी करानो चाहवय हंय कि तुम्हरी शारीरिक दशा पर घमण्ड करे।
GAL 6:14 पर असो नहीं होय कि मय दूसरी कोयी बात को घमण्ड करू, केवल हमरो प्रभु यीशु मसीह को क्रूस को, जेको द्वारा जगत मोरी नजर म अऊर मय जगत की नजर म क्रूस पर चढ़ायो गयो हय।
GAL 6:15 कहालीकि नहीं त खतना को महत्व हय अऊर नहीं खतनारहित को, यदि महत्व हय त ऊ नयी सृष्टि को हय।
GAL 6:16 जितनो यो नियम पर चलेंन उन पर, अऊर परमेश्वर को इस्राएल पर शान्ति अऊर दया होती रहे।
GAL 6:17 चिट्ठी ख खतम कर क् मय तुम सी बिनती करू हय कि अब मोख दु:ख मत देवो, कहालीकि मोरो शरीर पर पहिले सीच घाव हय ऊ बतावय हय कि मय यीशु को गुलाम हय।
GAL 6:18 हे भाऊवों अऊर बहिनों, हमरो प्रभु यीशु मसीह को अनुग्रह तुम्हरो संग बन्यो रहे। आमीन।
EPH 1:1 पौलुस को तरफ सी जो परमेश्वर की इच्छा सी मसीह यीशु को प्रेरित हय, अऊर मसीह यीशु म परमेश्वर को विश्वासी लोगों ख जो इफिसुस शहर म रह्य हय।
EPH 1:2 हमरो पिता परमेश्वर अऊर प्रभु यीशु मसीह को तरफ सी तुम्ख अनुग्रह अऊर शान्ति मिलती रहे।
EPH 1:3 हमरो प्रभु यीशु मसीह को परमेश्वर अऊर बाप को धन्यवाद हो कि ओन हम्ख मसीह को द्वारा स्वर्गीय जागा म सब तरह की आत्मिक आशीष दी हय।
EPH 1:4 जसो ओन हम्ख जगत की उत्पत्ति सी पहिले मसीह म चुन लियो कि हम, ओको जवर प्रेम म पवित्र अऊर निर्दोष हो।
EPH 1:5 अऊर अपनी इच्छा को भली प्रिती को अनुसार हम्ख अपनो लायी पहिले सी ठहरायो कि यीशु मसीह को द्वारा हम ओको उत्तराधिकारी बेटा अऊर बेटी आय,
EPH 1:6 परमेश्वर की अनुग्रह की महिमा की स्तुति हो, कहालीकि ओन येख हम्ख जो ओको प्रिय बेटा को द्वारा खुलो दिल सी दियो गयो।
EPH 1:7 हम ख ओको म मसीह को खून को द्वारा छुटकारा, यानेकि पापों की माफी, ओको महान अनुग्रह सी मिल्यो हय,
EPH 1:8 जेक ओकी पूरी बुद्धी अऊर समझ को अनुसार हम पर बहुतायत सी करयो।
EPH 1:9 कहालीकि ओन अपनी इच्छा को भेद ऊ भली प्रिती को अनुसार हम्ख बतायो, जेक ओन मसीह अपनो आप म ठान लियो होतो।
EPH 1:10 परमेश्वर की या योजना होती कि उचित समय आवन पर स्वर्ग की अऊर धरती पर की पूरी चिजों ख, जमा करे ताकि मसीह ओको मुखिया हो।
EPH 1:11 ओकोच म जेको म हम भी ओकीच मनसा सी जो अपनी इच्छा को मत को अनुसार सब कुछ करय हय, पहिले सी ठहरायो जाय क ओकी विरासत बन्यो
EPH 1:12 कि हम, जिन्न पहिले सी मसीह पर आशा रखी होती, परमेश्वर की महिमा करे।
EPH 1:13 जब तुम न सच्चो सन्देश सुन्यो अऊर ऊ सुसमाचार सी तुम्हरो उद्धार भयो अऊर तुम भी परमेश्वर को लोग बन गयो। अऊर पवित्र आत्मा जो प्रतिज्ञा करयो हुयो ख तुम्ख देन को द्वारा परमेश्वर न तुम पर मुहर लगायी अऊर तुम्न मसीह पर विश्वास करयो।
EPH 1:14 वा आत्मा ऊ समय लायी दियो गयो जब तक की हम्ख जो ओको अपनो हय छुटकारा नहीं देवय आवो हम ओकी महिमा करे।
EPH 1:15 यो वजह, मय भी ऊ विश्वास अऊर समाचार सुन्यो जो तुम लोगों म प्रभु यीशु पर हय अऊर सब पवित्र लोगों पर प्रेम प्रगट हय,
EPH 1:16 तुम्हरो लायी मय परमेश्वर ख धन्यवाद करनो नहीं छोड्यो, अऊर अपनी प्रार्थनावों म तुम्ख याद करू हय।
EPH 1:17 कि हमरो प्रभु यीशु मसीह को परमेश्वर सी जो महिमा को पिता हय, तुम्ख अपनी पहिचान म ज्ञान अऊर प्रकाश की आत्मा देयेंन, ताकि तुम ओख अच्छो सी जान सको।
EPH 1:18 अऊर तुम्हरो मन की आंखी ज्योतिर्मय हो कि तुम जान लेवो कि ओकी बुलाहट की आशा का हय, अऊर पवित्र लोगों म ओकी विरासत की महिमा को धन कसो हय,
EPH 1:19 अऊर ओकी सामर्थ हम म जो विश्वास करय हंय, कितनी महान हय, ओकी शक्ति को प्रभाव को ऊ कार्य को अनुसार हय।
EPH 1:20 जो ओन मसीह म करयो कि ओख मरयो हुयो म सी जीन्दो कर क् स्वर्गीय जागा म अपनी दायो तरफ बैठायो
EPH 1:21 पूरो शासकों, अऊर अधिकारियों, अऊर सामर्थी, अऊर प्रभुतावों को, अऊर हर एक नाम को ऊपर, जो न केवल यो युग म पर आवन वालो युग म भी लियो जायेंन, बैठायो;
EPH 1:22 अऊर सब कुछ मसीह को पाय खल्लो कर दियो; अऊर ओख सब चिजों पर शिरोमनि ठहराय क मण्डली ख दे दियो,
EPH 1:23 मण्डली मसीह को शरीर आय, अऊर ओकीच परिपूर्णता हय जो सब म सब कुछ पूरो करय हय।
EPH 2:1 एक समय होतो जब तुम आत्मिक रूप सी आज्ञाकारी अऊर पापों म मर गयो होतो
EPH 2:2 यो जगत की बुरो रस्ता पर चलत होतो, अऊर आसमान को अधिकार को शासक यानेकि ऊ दुष्ट आत्मा को अनुसार चलत होतो, जो अब भी आज्ञा नहीं मानन वालो म कार्य करय हय।
EPH 2:3 इन म हम भी सब को सब पहिले अपनो शरीर की लालसावों म दिन बितात रहत होतो, अऊर शरीर अऊर मन की इच्छाये पूरी करत होतो, अऊर दूसरों लोगों को जसो चाल चलन सीच गुस्सा की सन्तान होतो।
EPH 2:4 पर परमेश्वर न जो दया को धनी आय, अपनो ऊ बड़ो प्रेम को वजह जेकोसी ओन हम सी प्रेम करयो,
EPH 2:5 जब हम आज्ञा नहीं मानन को वजह मरयो हुयो होतो त हम्ख मसीह म जीवन दियो हि परमेश्वर को अनुग्रह को द्वारा बचायो गयो,
EPH 2:6 अऊर मसीह यीशु म एक होन को वजह ओको संग जीन्दो करयो, अऊर स्वर्गीय जागा म ओको संग बैठायो।
EPH 2:7 कि ऊ अपनी ऊ कृपा सी जो मसीह यीशु म हम पर हय, आवन वालो युग म अपनो अनुग्रह को असीम समृद्धी ख दिखायो।
EPH 2:8 कहालीकि विश्वास को द्वारा अनुग्रह सीच तुम्हरो उद्धार भयो हय; अऊर यो तुम्हरो तरफ सी नहीं, बल्की परमेश्वर को दान आय,
EPH 2:9 अऊर नहीं कर्मों को वजह, असो नहीं होय कि कोयी घमण्ड करे।
EPH 2:10 कहालीकि हम ओको बनायो हुयो हंय, अऊर मसीह यीशु म उन भलो कामों लायी रच्यो गयो जिन्ख परमेश्वर न पहिले सी हमरो लायी तैयार करयो हय।
EPH 2:11 यो वजह याद करो कि तुम जो जनम सी गैरयहूदी हो अऊर खतना करयो हुयो हय, असो यहूदी द्वारा कह्यो जावय हो जो अपनो आप ख खतना वालो कहलावय हंय, अपनो भूतकाल ख याद रखो,
EPH 2:12 तुम लोग ऊ समय मसीह सी अलग, अऊर इस्राएल की प्रजा को पद सी अलग करयो हुयो, अऊर प्रतिज्ञा की वाचावों को भागी नहीं होतो, अऊर आशाहीन अऊर जगत म ईश्वररहित होतो।
EPH 2:13 पर अब मसीह यीशु म तुम जो पहिले दूर होतो, मसीह को खून को द्वारा जवर भय गयो हय।
EPH 2:14 कहालीकि उच हमरी शान्ति आय जेन दोयी ख एक कर लियो अऊर अलग करन वालो बाड़ा ख जो बीच म होती गिराय दियो,
EPH 2:15 अऊर अपनो शरीर म दुश्मनी मतलब ऊ व्यवस्था जेकी आज्ञाये विधियों की रीति पर होती, मिटाय दियो कि दोयी सी अपनो म एक नयी मानवता की सृष्टि करी अऊर शान्ति स्थापित करी,
EPH 2:16 अऊर मसीह को क्रूस पर मृत्यु सी दुश्मनी ख नाश कर क् मृत्यु को द्वारा दोयी ख एक शरीर बनाय क परमेश्वर सी वापस मिलाये।
EPH 2:17 ओन आय क तुम्ख गैरयहूदियों ख जो परमेश्वर सी बहुत दूर होतो अऊर यहूदियों जो जवर होतो, दोयी ख शान्ति को सुसमाचार सुनायो।
EPH 2:18 कहालीकि मसीह को द्वारा हम दोयी की मतलब यहूदी अऊर गैरयहूदी एक आत्मा सी परमेश्वर पिता को जवर पहुंच भयी।
EPH 2:19 येकोलायी तुम गैरयहूदी अब विदेशी अऊर अनजानो लोग नहीं रह्यो, पर पवित्र लोगों को संगी स्वदेशी अऊर परमेश्वर को घराना को भय गयो हय।
EPH 2:20 अऊर प्रेरितों अऊर भविष्यवक्तावों की नीव पर बनायो हय, जो कोना को गोटा मसीह यीशु खुदच आय।
EPH 2:21 जेको म पूरो भवन एक संग मिल क प्रभु म एक पवित्र मन्दिर बनतो जावय हय,
EPH 2:22 जेको म तुम भी आत्मा को द्वारा परमेश्वर को ठहरन की जागा होन लायी एक संग बनायो जावय हय।
EPH 3:1 येकोच लायी मय पौलुस जो तुम गैरयहूदियों लायी मसीह यीशु को बन्दी हय, परमेश्वर सी प्रार्थना करू हय।
EPH 3:2 यदि तुम न परमेश्वर को ऊ अनुग्रह सी मोख यो काम जो तुम्हरी भलायी लायी मोख दियो गयो हय,
EPH 3:3 यानेकि यो कि ऊ रहस्य मोरो पर प्रकाशन को द्वारा प्रगट भयो, जसो मय पहिलेच संक्षेप म लिख चुक्यो हय,
EPH 3:4 जेकोसी तुम पढ़ क जान सकय हय कि मय मसीह को ऊ रहस्य कसो समझ सकू हय तुम जानो।
EPH 3:5 जो पूरानो समयो म आदमियों की सन्तानों ख असो नहीं बतायो गयो होतो, जसो कि आत्मा को द्वारा अब ओको पवित्र प्रेरितों अऊर परमेश्वर को तरफ सी सन्देश लावन वालो पर प्रगट करयो गयो हय।
EPH 3:6 मतलब यो कि मसीह यीशु म सुसमाचार को द्वारा गैरयहूदियों को लोग विरासत को वारिस हय, अऊर एकच शरीर अऊर प्रतिज्ञा को भागी हंय।
EPH 3:7 मय परमेश्वर को अनुग्रह को ऊ दान को अनुसार, जो ओकी सामर्थ को काम प्रभाव को अनुसार मोख दियो गयो, ऊ सुसमाचार को सेवक बन्यो।
EPH 3:8 मोरो पर जो सब पवित्र लोगों म सी छोटो सी भी छोटो हय, यो अनुग्रह भयो कि मय गैरयहूदियों ख मसीह को अनन्त धन को सुसमाचार सुनाऊ,
EPH 3:9 अऊर सब लोगों ख यो देखन लायी कि रहस्य की सहभागिता का हय, जो जगत की सुरूवात सी परमेश्वर म लूकी हुयी हय, जेन यीशु मसीह को द्वारा पूरी चिजों ख बनायो हय।
EPH 3:10 ताकि अब मण्डली को द्वारा, परमेश्वर को अलग अलग तरह को ज्ञान उन मुख्य याजकों अऊर अधिकारियों पर जो स्वर्गीय जागा म हंय, प्रगट करयो जाये।
EPH 3:11 ऊ अनन्त काल उद्देश्य को अनुसार जो परमेश्वर न हमरो प्रभु यीशु मसीह म पूरो करयो होतो।
EPH 3:12 जेको म हम ख मसीह म एक होन को नाते अऊर ओको पर विश्वास को द्वारा हम्ख साहस अऊर भरोसा को संग परमेश्वर को जवर आवन को अधिकार हय।
EPH 3:13 येकोलायी मय बिनती करू हय कि जो कठिनायी तुम्हरो लायी मोख होय रह्यो हंय, उन्को वजह साहस मत छोड़ो, कहालीकि उन्म तुम्हरो फायदा हय।
EPH 3:14 मय योच वजह ऊ बाप को आगु घुटना टेकु हय।
EPH 3:15 जेकोसी स्वर्ग अऊर धरती पर, हर एक घराना को नाम रख्यो जावय हय,
EPH 3:16 मय प्रार्थना करू हय कि ऊ महिमा को अपनी आत्मा को द्वारा तुम्हरो भीतरी व्यक्तित्व ख शक्ति अऊर सामर्थ प्रदान करे;
EPH 3:17 अऊर विश्वास को द्वारा मसीह तुम्हरो दिल म अपनो घर बनायेंन। मय प्रार्थना करू हय कि तुम्हरी जड़े अऊर नींव प्रेम म हो,
EPH 3:18 येकोलायी की तुम सब परमेश्वर को लोगों को संग अच्छो तरह सी समझ सको की मसीह को प्रेम की लम्बाई, चौड़ाई, ऊचाई, अऊर गहरायी कितनी हय,
EPH 3:19 अऊर मसीह को ऊ प्रेम ख जान सको जो ज्ञान ख पास करय हय कि तुम परमेश्वर को स्वभाव सी भरपूर हो जावो।
EPH 3:20 अब ऊ परमेश्वर को लायी जो अपनी ऊ सामर्थ को अनुसार जो हम म काम करय हय ओको द्वारा जितनो हम मांग सकजे हय यहां तक की हम सोच सकजे हय ओको सी भी कहीं जादा कर सकय हय,
EPH 3:21 परमेश्वर की महिमा मण्डली अऊर मसीह यीशु म पीढ़ी सी पीढ़ी तक हमेशा-हमेशा होती रहे। आमीन।
EPH 4:1 येकोलायी मय जो प्रभु म बन्दी हय तुम सी बिनती करू हय कि जो बुलाहट सी तुम बुलायो गयो होतो, परमेश्वर को लायक हो,
EPH 4:2 यानेकि पूरी नम्रता अऊर कोमलता, अऊर धीरज धर क प्रेम सी एक दूसरों की सह लेवो।
EPH 4:3 ऊ शान्ति को सुत्र म बन्ध क ओकी एकता ख जेक पवित्र आत्मा प्रदान करय हय, ओख बनायो रखन को हर सम्भव सी पूरी कोशिश करे।
EPH 4:4 एकच शरीर हय, अऊर एकच आत्मा; जसो तुम्ख जो बुलायो गयो होतो अपनो बुलायो जानो सी एकच आशा हय।
EPH 4:5 एकच प्रभु हय, एकच विश्वास, एकच बपतिस्मा,
EPH 4:6 एकच परमेश्वर हय, जो सब को बाप हय, सब म काम करय हय, अऊर जो सब म हय।
EPH 4:7 पर हम म सी हर एक ख मसीह न जो कुछ दियो हय, ओको दान को हिसाब को अनुसार अनुग्रह मिल्यो हय।
EPH 4:8 जसो की पवित्र शास्त्र कह्य हय: “जब ऊ बहुत ऊचाई तक चली गयो, त ओन बन्दियों ख बान्ध क ले गयो, अऊर आदमियों ख दान दियो।”
EPH 4:9 अब, “ऊ ऊपर चढ़्यो” ओको अर्थ का हय यो कि ऊ पहिले धरती की सब सी खल्लो की जागा म उतरयो।
EPH 4:10 अऊर जो उतर गयो यो उच आय, जो पूरो आसमान सी ऊपर चढ़ भी गयो कि पूरी सृष्टि ख परिपूर्ण कर दे।
EPH 4:11 अऊर ओन कितनो ख प्रेरित होन को वरदान दियो, अऊर कुछ ख भविष्यवक्ता होन को, अऊर कुछ ख सुसमाचार को प्रचारक होन को, अऊर कुछ ख रख वालो अऊर शिक्षक नियुक्त कर क् दे दियो,
EPH 4:12 जेकोसी परमेश्वर को लोग सिद्ध होय जाये अऊर सेवा को काम करयो जाये अऊर मसीह को शरीर उन्नति पाये,
EPH 4:13 जब तक की हम सब को सब विश्वास अऊर परमेश्वर को टुरा की पहिचान म एक नहीं होय जाये, अऊर एक सिद्ध आदमी न बन जाये अऊर मसीह को पूरो गौरव की उचायी नहीं छूय ले।
EPH 4:14 ताकि हम अब बच्चा को जसो नहीं रह्यो जो आदमियों की धोकाधड़ी अऊर चालाकी सी, उन्को भ्रम की युक्तियों की अऊर शिक्षा की हर एक हवा को झोंका सी उछाल्यो अऊर इत–उत घुमायो जावय हय।
EPH 4:15 बल्की प्रेम म सच्चायी ख व्यक्त करतो हुयो सब बातों म ओको म जो मुंड हय, मतलब मसीह म हर तरह सी बढ़तो जाये,
EPH 4:16 जेकोसी पूरो शरीर को अलग अलग हिस्सा, एक संग मिल क जुड़य हय अऊर पूरो शरीर ख एक संग मिल क रख्यो जावय हय, अऊर एक संग जुड़ क यो प्रदान करयो जावय हय। कि हर एक अलग हिस्सा काम करय हय, तब पूरो शरीर बढ़य हय अऊर प्रेम द्वारा खुद ख बनावय हय।
EPH 4:17 येकोलायी मय प्रभु को नाम सी तुम्ख चेतावनी देऊ हय, कि उन्को बेकार बिचारों को संग उन गैरयहूदियों को जसो जीवन मत जीवो।
EPH 4:18 उनकी बुद्धि अन्धारो म हय। अऊर ऊ अज्ञानता को वजह जो उन्म हय अऊर उन्को मन की कठोरता को वजह हि परमेश्वर को जीवन सी अलग करयो हुयो हय;
EPH 4:19 अऊर लज्जा की भावना उन म सी चली गयी अऊर उन्न अपनो आप ख संय्यम को बिना हर तरह कि अशुद्ध हरकतो म डाल दियो हय।
EPH 4:20 पर तुम न मसीह की असी शिक्षा नहीं सीखी।
EPH 4:21 बल्की तुम न सचमुच ओको बारे म सुनी अऊर ओको अनुयायीयों को रूप म, ऊ सत्य सिखायो गयो हय, जो यीशु म हय।
EPH 4:22 कि तुम पिछलो चाल चलन को पुरानो मनुष्यत्व ख जो भरमावन वाली अभिलाषावों को अनुसार भ्रष्ट होतो जावय हय, उतार डालो।
EPH 4:23 अऊर अपनो मन को आत्मिक स्वभाव म सोचन को तरीका म नयो बनतो जावो,
EPH 4:24 अऊर नयो मनुष्यत्व ख पहिन लेवो जो परमेश्वर की समानता म बनायो गयो हय जो अपनो आप ख सच्चायी अऊर पवित्रता म जीवन खुद ख प्रगट करय हय।
EPH 4:25 येकोलायी तुम लोग झूठ बोलनो छोड़ क हर एक अपनो पड़ोसी सी सच बोले, कहालीकि हम सब मिल क मसीह को शरीर म एक अंग हंय।
EPH 4:26 गुस्सा त करो, पर पाप मत करो; शाम होन तक तुम्हरो गुस्सा नहीं रहे।
EPH 4:27 अऊर न शैतान ख अवसर देवो।
EPH 4:28 चोरी करन वालो फिर चोरी नहीं करे, बल्की भलो काम करनो म अपनो हाथों सी मेहनत करे, येकोलायी कि गरीबों की भी मदद कर सकेंन।
EPH 4:29 कोयी बेकार बात तुम्हरो मुंह सी नहीं निकले, पर जरूरतों को अनुसार उच निकले जो अनुग्रह करन म मदत हो, ताकि ओको सी सुनन वालो की उन्नति हो।
EPH 4:30 अऊर परमेश्वर की पवित्र आत्मा ख दु:खी मत करो; जेकोसी तुम पर छुटकारा को दिन को लायी मुहर दियो गयो हय।
EPH 4:31 सब कड़वाहट, अऊर प्रकोप अऊर गुस्सा, लड़ाई–झगड़ा, निन्दा, अऊर हर तरह की बुरायी अपनो बीच म सी दूर करी जाये।
EPH 4:32 बल्की एक दूसरों को प्रति दयालु अऊर कोमल बने, अऊर जसो परमेश्वर न मसीह म तुम्हरो अपराध माफ करयो, वसोच तुम भी एक दूसरों को अपराध माफ करो।
EPH 5:1 येकोलायी कि तुम परमेश्वर को प्रिय बच्चा हो, तुम ओको जसो बनो,
EPH 5:2 अऊर प्रेम म चलो जसो मसीह न भी तुम सी प्रेम करयो, अऊर हमरो लायी अपनो आप ख सुखदायक सुगन्ध लायी परमेश्वर को आगु भेंट कर क् बलिदान कर दियो।
EPH 5:3 जसो परमेश्वर को लोगों लायी यो सही नहाय, कि तुम म व्यभिचार अऊर कोयी तरह की अशुद्ध काम यां लोभ की चर्चा तक हो।
EPH 5:4 अऊर नहीं निर्लज्जता, मुर्खतापूर्न यां अश्लिल बातचीत करी, अऊर नहीं मजाक करी; कहालीकि या बाते शोभा नहीं देवय, येको बदला तुम्ख परमेश्वर ख धन्यवाद देनो चाहिये।
EPH 5:5 कहालीकि तुम लोग यो निश्चित रूप सी जान लेवो कि कोयी व्यभिचारी, यां अशुद्ध लोग, यां लालची जो मूर्तिपूजक को बराबर हय, मसीह अऊर परमेश्वर को राज्य को अधिकारी नहीं होयेंन।
EPH 5:6 कोयी तुम्ख बेकार बातों सी धोका नहीं दे, कहालीकि इन चिजों को वजह हय कि परमेश्वर को गुस्सा उन पर आय जायेंन जो ओको पालन नहीं करय हंय।
EPH 5:7 येकोलायी असो लोगों सी कोयी सम्बन्ध मत रखो।
EPH 5:8 कहालीकि तुम त खुद अन्धारो म रहत होतो, लेकिन जब सी प्रभु को लोग बन गयो हंय, येकोलायी प्रकाश की सन्तान की तरह जिवो,
EPH 5:9 कहालीकि यो प्रकाश हय जो हर तरह की भलायी, अऊर सच्चायी, अऊर सच्चायी को फसल लावय हय।
EPH 5:10 तुम यो परखो कि प्रभु ख का भावय हय।
EPH 5:11 अन्धारो को बेकार कामों म तुम सहभागी मत हो, बल्की उन्की बुरायी को विरोध करतो हुयो उन्ख प्रकाश म लावो।
EPH 5:12 कहालीकि जो काम गुप्त रूप सी करय हय उन्की चर्चा करन म भी शरम आवय हय।
EPH 5:13 जब सब चिजे प्रकाश म लायो जावय हय तब ओको वास्तविक स्वरूप साफ रूप सी प्रगट होवय हय।
EPH 5:14 कहालीकि प्रकाश सब बाते प्रगट करय हय। यो वजह ऊ कह्य हय, “हे सोवन वालो, जाग अऊर मुर्दों म सी जीन्दो हो; त मसीह को प्रकाश तोरो पर चमकेंन।”
EPH 5:15 येकोलायी ध्यान रहे, कि तुम कसो रह्य हय: त निर्बुद्धि लोगों को जसो नहीं पर बुद्धिमान लोगों को जसो रहो।
EPH 5:16 हर अवसर को अच्छो कर्मों को लायी पूरो-पूरो उपयोग करो, कहालीकि यो दिन बुरो हंय।
EPH 5:17 तुम निर्बुद्धि न बनो, पर ध्यान सी समझो कि प्रभु की इच्छा का हय।
EPH 5:18 दारू सी मतवालो मत बनो, कहालीकि येको सी लुचपन पैदा होवय हय, पर पवित्र आत्मा सी परिपूर्ण होतो जावो।
EPH 5:19 अऊर आपस म भजन अऊर स्तुतिगान अऊर आत्मिक गीत गायो करो, अऊर अपनो–अपनो मन म प्रभु को आदर म गातो रहो।
EPH 5:20 अऊर हमेशा सब बातों लायी हमरो प्रभु यीशु मसीह को नाम सी परमेश्वर पिता को धन्यवाद करतो रहो।
EPH 5:21 हम मसीह को प्रति श्रद्धा–भक्ति रखन को वजह एक दूसरों को लायी प्रस्तुत करो।
EPH 5:22 हे पत्नियों, अपनो पति को अधीन रहो जसो प्रभु को अधीन रह्य हय।
EPH 5:23 कहालीकि पति को उच तरह पत्नी पर अधिकार हय जसो कि मसीह को मण्डली पर अधिकार हय; अऊर खुद मसीह मण्डली को उद्धारकर्ता हय जो ओको शरीर हय।
EPH 5:24 जो तरह मण्डली मसीह को अधीन रह्य हय, वसीच पत्नी भी हर बातों म अपनो पति को अधीन रहनो चाहिये।
EPH 5:25 हे पतियों, तुम अपनी पत्नियों सी उच तरह प्रेम रखो, जो तरह मसीह न मण्डली सी प्रेम करयो अऊर येकोलायी अपनो जीवन दियो।
EPH 5:26 जेकोसी ऊ ओख वचन को द्वारा मण्डली ख समर्पित करयो, जसो पानी सी शुद्ध कर क् पवित्र बनाय सके,
EPH 5:27 अऊर ओख एक असी शुद्ध मण्डली बनाय क अपनो जवर खड़ी करे, जेको म दाग नहीं हो, नहीं झुर्री नहीं कोयी कमतर्ता हो बल्की पवित्र अऊर निर्दोष हो।
EPH 5:28 योच तरह उचित हय कि पति अपनी पत्नी सी अपनो खुद को शरीर को जसो प्रेम रखे। जो अपनी पत्नी सी प्रेम रखय हय, ऊ अपनो आप सी प्रेम रखय हय।
EPH 5:29 कहालीकि कोयी न कभी अपनो शरीर सी दुश्मनी नहीं रख्यो बल्की ओको पालन–पोषन करय हय, जसो मसीह भी मण्डली को करय हय।
EPH 5:30 येकोलायी कि हम ओको शरीर को भाग आय।
EPH 5:31 जसो शास्त्र कह्य हय, “यो वजह आदमी अपनो माय–बाप ख छोड़ क अपनी पत्नी सी मिल्यो रहेंन, अऊर हि दोयी एक तन होयेंन।”
EPH 5:32 यो एक महान रहस्य आय, पर मय यो मसीह अऊर मण्डली को बारे म कहू हय।
EPH 5:33 पर तुम लोगों म सी हर एक पति अपनी पत्नी ख अपनो जसो प्रेम करे अऊर हर एक पत्नी अपनो पति को आदर–सम्मान रखे।
EPH 6:1 हे बच्चां, प्रभु म अपनो माय–बाप को आज्ञाकारी बनो, कहालीकि यो ठीक हय।
EPH 6:2 “अपनो माय–बाप को आदर करो” यां पहिली असी आज्ञा हय जेको संग प्रतिज्ञा भी हय:
EPH 6:3 “कि तोरो भलो हो, अऊर तय धरती पर बहुत दिनो तक जीन्दो रहे।”
EPH 6:4 तुम, जो माय-बाप हो, अपनो बच्चा को गुस्सा मत भड़कावो, पर प्रभु की शिक्षा अऊर उपदेश द्वारा उन्को पालन–पोषन करो।
EPH 6:5 हे सेवकों, मोरो तुम सी अनुरोध हय कि जो लोग यो धरती पर तुम्हरो मालिक हंय, तुम डरतो–कापतो अऊर निष्कपट दिल सी उन्की आज्ञा पूरी करो, मानो तुम मसीह की सेवा कर रह्यो हय।
EPH 6:6 तुम आदमियों ख प्रसन्न करन वालो को जसो दिखावन लायी सेवा मत करो, बल्की मसीह को सेवकों को जसो असो सेवा करो, जो पूरो दिल सी परमेश्वर की इच्छा पूरी करय हंय।
EPH 6:7 अऊर ऊ सेवा ख आदमियों को जसो नहीं पर प्रभु की सेवा जान क सच्चो दिल सी करो।
EPH 6:8 कहालीकि तुम जानय हय कि हर एक आदमी, चाहे ऊ सेवक हो या स्वतंत्र, जो भी भलायी करेंन, वसोच ऊ प्रभु सी इनाम हासिल करेंन।
EPH 6:9 तुम जो मालिक हंय, तुम धमकिया देनो छोड़ देवो, अऊर सेवकों को संग वसोच व्यवहार करो; कहालीकि तुम जानय हय कि स्वर्ग म उन्को अऊर तुम्हरो एकच मालिक हय, अऊर ऊ कोयी को संग पक्षपात नहीं करय।
EPH 6:10 येकोलायी प्रभु म एक होय क अऊर ओकी शक्ति को प्रभाव म बलवन्त बनो।
EPH 6:11 तुम परमेश्वर को पूरो हथियार धारन कर लेवो जेकोसी तुम शैतान की युक्तियों को आगु खड़ो रह्य सको।
EPH 6:12 कहालीकि हमरो मल्लयुद्ध खून अऊर मांस सी नहीं शासकों सी, अऊर अधिकारियों सी, अऊर यो जगत को अन्धकार को शासकों सी अऊर ऊ दुष्टता की आत्मिक सेनावों सी हय जो स्वर्ग म हय।
EPH 6:13 येकोलायी तुम परमेश्वर को पूरो हथियार बान्ध लेवो, जेकोसी तुम बुरो दिन म दुश्मन को सामना करनो म समर्थ रहो, अऊर आखरी तक अपनो कर्तव्य पूरो कर क् विजय प्राप्त कर सको।
EPH 6:14 येकोलायी तुम सच सी अपनी कमर कस क, सच्चायी को कवच धारन करो,
EPH 6:15 अऊर शान्ति को सुसमाचार की घोषना करन लायी जूता पहिन क खड़ो हो।
EPH 6:16 अऊर इन सब को संग विश्वास की ढाल लेय क स्थिर रहो; जेकोसी तुम ऊ दुष्ट को सब जलतो हुयो बान ख बुझाय सको।
EPH 6:17 अऊर उद्धार की टोपी पहिन लेवो अऊर परमेश्वर को वचन तलवार को रूप म जो आत्मा तुम्ख देवय हय।
EPH 6:18 तुम लोग हर समय पवित्र आत्मा म सब तरह की प्रार्थना, अऊर बिनती करतो रहो, अऊर येकोलायी जागतो रहो कि सब पवित्र लोगों लायी लगातार प्रार्थना करतो रहो।
EPH 6:19 तुम मोरो लायी भी प्रार्थना करो, जेकोसी बोलतो समय असो प्रबल वचन दियो जाये कि मय साहस को संग सुसमाचार को भेद बताय सकू।
EPH 6:20 यो सुसमाचार को लायी मय संकली सी बान्ध्यो हुयो राजदूत आय; तुम प्रार्थना करो कि मोख सुसमाचार को बारे म मय घोषना कर सकू, जसो कि मोख बोलनो चाहिये।
EPH 6:21 तुखिकुस, जो प्रिय भाऊ अऊर प्रभु म विश्वास लायक सेवक हय, तुम्ख सब बाते बतायेंन कि तुम भी मोरी हाल जानो कि मय कसो रहू हय।
EPH 6:22 ओख मय न तुम्हरो जवर येकोच लायी भेज्यो हय कि तुम हमरो हाल ख जानो, अऊर ऊ तुम्हरो मनों ख प्रोत्साहन दे।
EPH 6:23 परमेश्वर पिता अऊर प्रभु यीशु मसीह को तरफ सी भाऊवों ख शान्ति अऊर विश्वास सहित प्रेम मिले।
EPH 6:24 पिता परमेश्वर अऊर प्रभु यीशु मसीह सी अमर प्रेम रखय हंय, उन पर परमेश्वर को अनुग्रह होतो रहे।
PHI 1:1 मसीह यीशु को सेवक मय पौलुस अऊर तीमुथियुस को तरफ सी, सब परमेश्वर को लोगों को नाम जो मसीह यीशु म सहभागिता म होय क फिलिप्पी शहर म रह्य हंय, मुखिया अऊर सेवकों को संग रह्य हय।
PHI 1:2 हमरो पिता परमेश्वर अऊर प्रभु यीशु मसीह को तरफ सी तुम्ख अनुग्रह अऊर शान्ति मिलती रहे।
PHI 1:3 मय जब-जब तुम्ख याद करू हय, तब-तब अपनो परमेश्वर ख धन्यवाद देऊ हय;
PHI 1:4 अऊर जब कभी तुम सब को लायी प्रार्थना करू हय, त सदा खुशी को संग प्रार्थना करू हय।
PHI 1:5 येकोलायी कि तुम पहिले दिन सी ले क अज तक सुसमाचार ख फैलावन म मोरो सहभागी रह्यो हय।
PHI 1:6 मोख या बात को भरोसा हय कि जेन तुम म अच्छो काम सुरू करयो हय, उच ओख यीशु मसीह को दुबारा आवन को दिन तक पूरो करेंन।
PHI 1:7 मोख यो उचित लगय हय कि मय तुम सब लायी असोच बिचार करू, कहालीकि तुम मोरो मन म बैठ्यो हय, मय कैद म हय तब भी अऊर सुसमाचार लायी उत्तर अऊर प्रमान देन म तुम सब मोरो संग अनुग्रह म सहभागी हय।
PHI 1:8 येको म परमेश्वर मोरो गवाह हय कि मय मसीह यीशु जसी प्रीति कर क् तुम सब की इच्छा पूरी करू हय।
PHI 1:9 मय या प्रार्थना करू हय कि तुम्हरो प्रेम सच्चो ज्ञान सी अऊर सब तरह को विवेक सहित अऊर भी बड़तो जाय,
PHI 1:10 यहां तक की तुम अच्छो सी अच्छो बातों ख प्रिय हय परखो, अऊर मसीह को दुबारा आवन वालो दिन तक सच्चो बन्यो रहो, अऊर दोषी मत बनो;
PHI 1:11 अऊर ऊ सच्चायी को फर सी जो यीशु मसीह को द्वारा होवय हय, भरपूर होत जावो जेकोसी परमेश्वर की महिमा अऊर स्तुति होती रह्य।
PHI 1:12 हे भाऊवों अऊर बहिनों, मय चाहऊं हय कि तुम यो जान लेवो कि मोरो पर जो बितयो हय, ओको सी सुसमाचार की बढ़ती भयी हय।
PHI 1:13 यहां तक कि राजभवन को पूरो सुरक्षा दलो ख अऊर यहां को सब लोगों ख यो प्रगट भय गयो हय कि मय मसीह को सेवक आय अऊर कैद म हय।
PHI 1:14 अऊर प्रभु म जो मोरो विश्वासी भाऊ अऊर बहिन हंय, उन म सी अधिकांश मोरो कैद म होन को वजह, निडर होय क परमेश्वर को वचन बेधड़क सुनावन को साहस करय हंय।
PHI 1:15 यो त सच हय उन म कुछ त जलन अऊर कुछ त बहस कर क् मसीह को प्रचार करय हंय पर कुछ लोग भली इच्छा सी करय हय।
PHI 1:16 यो त प्रेम को वजह करय हय कहालीकि हि जानय हय कि परमेश्वर न यो काम मोख सुसमाचार कि रक्षा करन लायी मोख दियो हय।
PHI 1:17 पर दूसरों लोग सच्चायी को संग नहीं, बल्की स्वार्थपूर्न इच्छा सी मसीह को प्रचार करय हय; कहालीकि हि सोचय हय कि येको सी हि कैद म मोरो लायी मुश्किले पैदा कर सकेंन।
PHI 1:18 येको सी कोयी फरक नहीं पड़य महत्वपूर्ण त यो आय कि मय येको सी खुश हय, कि यो तरह सी यां ऊ तरीका सी चाहे बुरो उद्देश होना यां चाहे भलो प्रचार त मसीह कोच होवय हय अऊर मय हमेशा येको सी खुश रहूं।
PHI 1:19 कहालीकि मय जानु हय तुम्हरी प्रार्थना को द्वारा अऊर यीशु मसीह की पवित्र आत्मा को द्वारा जेल सी रिहायी प्राप्त करू।
PHI 1:20 मय त याच गहरी इच्छा अऊर आशा रखू हय कि मय कोयी बात म शर्मिन्दा नहीं होऊं, पर जसो मोरी बड़ी साहस को वजह मसीह कि महिमा मोरो शरीर को द्वारा हमेशा होती रही हय, वसीच अब भी हो, चाहे मय जीन्दो रहूं या मर जाऊं।
PHI 1:21 कहालीकि जीवन का हय? मोरो लायी, जीवन मसीह हय, अऊर मृत्यु, मोरो लायी फायदा हय।
PHI 1:22 पर यदि शरीर म जीन्दो रहनोच मोरो काम लायी जादा फायदेमंद हय त मय नहीं जानु कि मोख कौन ख चुननो चाहिये।
PHI 1:23 कहालीकि अब मय दोयी दिशावों को बीच म मोख कठिनायी होय रही हय; मय अपनो जीवन सी बिदा होय क मसीह को जवर जानो चाहऊं हय, कहालीकि या बात मोरो लायी बहुतच अच्छी हय,
PHI 1:24 पर मोरो शरीर म रहनो तुम्हरो लायी जादा जरूरी हय।
PHI 1:25 येकोलायी कि मोख येको भरोसा हय येकोलायी मय जानु हय कि मय जीन्दो रहूं, जेकोसी तुम विश्वास म मजबूत होत जावो अऊर ओको म खुश रहो;
PHI 1:26 अऊर जो घमण्ड तुम मोरो बारे म करय हय, ऊ मोरो फिर तुम्हरो जवर आवन सी मसीह यीशु म एक होन को द्वारा अऊर जादा बढ़ जावो।
PHI 1:27 केवल इतनो करो कि तुम्हरो चाल चलन मसीह को सुसमाचार को लायक हो कि चाहे मय आय क तुम्ख देखूं, चाहे नहीं भी आऊं, तुम्हरो बारे म योच सुनू कि तुम एकच आत्मा म स्थिर रहो, अऊर एक चित्त होय क सुसमाचार को विश्वास लायी मेहनत करतो रह्य हय,
PHI 1:28 अऊर कोयी बात म विरोधियों सी डरो मत। हमेशा साहसी रहो, अऊर यो उन्को लायी विनाश को स्पष्ट चिन्ह हय, पर तुम्हरो लायी उद्धार को अऊर यो परमेश्वर को तरफ सी हय।
PHI 1:29 कहालीकि मसीह की सेवा करन को सौभाग्य तुम्ख दियो गयो हय यो नहीं केवल ओको पर विश्वास करन को वजह पर ओको लायी तकलीफ झेलन को द्वारा भी मिल्यो हय;
PHI 1:30 अऊर तुम्ख वसोच युद्ध करनो हय, जसो तुम न मोख करतो देख्यो हय, अऊर अब भी सुनय हय कि मय वसोच करू हय।
PHI 2:1 मसीह म तुम्हरो जीवन तुम्ख मजबूत करय हय, ओको प्रेम भलायी देवय हय, अऊर आत्मा म तुम्हरी सहभागिता हय, अऊर तुम म करुना अऊर दूसरों को प्रति तरस हय,
PHI 2:2 त मोरो या खुशी पूरी करो कि एक मन रहो, अऊर एकच प्रेम, अऊर एकच चित्त, अऊर एकच मनसा रखो।
PHI 2:3 स्वार्थिपन अऊर घमण्ड करन की बेकार लालसा सी कुछ मत करो, पर दीनता सी एक दूसरों ख अपनो सी अच्छो समझो।
PHI 2:4 हर एक अपनोच हित को नहीं बल्की दूसरों को हित की भी चिन्ता करे।
PHI 2:5 जसो मसीह यीशु को स्वभाव होतो वसोच तुम्हरो भी स्वभाव हो;
PHI 2:6 जो अपनो स्वरूप यद्दपि परमेश्वर को स्वरूप होतो, पर ओन अपनो आप ख परमेश्वर को जसो रहनो, यो फायदा हय असो ओन मान्यो नहीं।
PHI 2:7 बल्की अपनो आप ख असो शून्य कर दियो, अऊर सेवक को स्वरूप धारन कर लियो, अऊर आदमी की समानता म भय गयो।
PHI 2:8 अऊर आदमी को रूप म प्रगट होय क अपनो आप ख नरमी करयो, अऊर यहां तक आज्ञाकारी रह्यो कि मृत्यु तक पहुंच गयो, क्रूस की मृत्यु भी स्वीकार करयो।
PHI 2:9 यो वजह परमेश्वर न ओख ऊचो सी ऊचो जागा तक उठायो, अऊर ओख ऊ नाम दियो जो सब नामो सी उत्तम हय,
PHI 2:10 कि जो स्वर्ग म अऊर धरती पर अऊर धरती को खल्लो हंय, हि सब यीशु को नाम पर घुटना टेके;
PHI 2:11 अऊर परमेश्वर पिता की महिमा लायी हर एक जीबली यो स्वीकार करेंन कि यीशु मसीहच प्रभु आय।
PHI 2:12 येकोलायी हे मोरो प्रियो, जो तरह तुम हमेशा सी आज्ञा मानत आयो हय, वसोच अब भी नहीं केवल मोरो संग रहतो हुयो पर विशेष कर क् अब मोरो दूर रहनो पर भी डरतो अऊर कापतो हुयो अपनो अपनो उद्धार को कार्य पूरो करतो जावो;
PHI 2:13 कहालीकि परमेश्वरच आय जो अपनो प्रेम को काम ख पूरो करन लायी बिचार डालय हय अऊर ओको भलो उद्देश को अनुसार चलन को बल भी देवय हय।
PHI 2:14 सब काम बिना शिकायत अऊर बिना विवाद को करतो रहो,
PHI 2:15 ताकी तुम निर्दोष होय क भ्रष्ट अऊर पापी लोगों को बीच म परमेश्वर को निष्कलंक सन्तान बन्यो रहो, उन्को बीच म चमको जसो तारा आशमान म चमकय हय,
PHI 2:16 जब तुम उन्ख जीवन को सन्देश सुनावय हय। तब मोरो जवर मसीह को आवन को दिन पर घमण्ड करन को वजह हो कि मोरो पूरी मेहनत अऊर काम बेकार नहीं गयी।
PHI 2:17 यदि मोख तुम्हरो विश्वास रूपी बलिदान अऊर सेवा को संग अपनो खून भी बहानो पड़ेंन, तब भी मय खुश हय, अऊर तुम सब को संग खुशी बाटु हय।
PHI 2:18 वसोच तुम भी खुश रहो अऊर मोरो संग खुशी मनावो।
PHI 2:19 मोख प्रभु यीशु म आशा हय कि मय तीमुथियुस ख तुम्हरो जवर तुरतच भेजूं, ताकी तुम्हरी खबर सुन्क मोख प्रोत्साहन मिले।
PHI 2:20 कहालीकि मोरो जवर दूसरों कोयी लोग नहाय जेको जवर मोरी भावनाये होना, जो शुद्ध मन सी तुम्हरी चिन्ता करे।
PHI 2:21 कहालीकि सब अपनो स्वार्थ की खोज म रह्य हंय, नहीं कि यीशु मसीह की।
PHI 2:22 पर ओख त तुम न परख्यो अऊर जान भी लियो हय कि जसो बेटा बाप को संग करय हय, वसोच ओन सुसमाचार को फैलान म मोरो संग सेवा करयो।
PHI 2:23 येकोलायी मोख आशा हय कि जो मोख जसोच मोख जान पड़ेंन कि मोरो संग का होन वालो हय, त मय ओख जल्दी भेज देऊं।
PHI 2:24 अऊर मोख प्रभु म भरोसा हय कि मय खुद भी तुम्हरो जवर जल्दी आऊं।
PHI 2:25 पर मय न इपफ्रुदीतुस ख जो मोरो भाऊ अऊर सेवक अऊर सहकर्मी योद्धा अऊर तुम्हरो दूत, अऊर जरूरी बातों म मोरी सेवा करन वालो हय, तुम्हरो जवर भेजनो जरूरी समझ्यो।
PHI 2:26 कहालीकि ओको मन तुम सब म लग्यो हुयो होतो, यो वजह ऊ व्याकुल अऊर चिन्तित रहत होतो कहालीकि तुम न ओकी बीमारी को हाल सुन्यो होतो।
PHI 2:27 सचमुच ऊ बीमार भय गयो होतो यहां तक कि मरन पर होतो, पर परमेश्वर न ओको पर दया करी, अऊर केवल ओकोच पर नहीं पर मोरो पर भी कि मोख शोक पर शोक मत होय।
PHI 2:28 येकोलायी मय न ओख भेजन को अऊर भी कोशिश करयो कि तुम ओको सी फिर मुलाखात कर क् खुश होय जावो अऊर मोरो भी शोक कम होय जाये।
PHI 2:29 येकोलायी तुम प्रभु म ओको सी बहुत खुशी होय क ओको स्वागत करजो, अऊर असो लोगों को आदर करजो,
PHI 2:30 कहालीकि ऊ मसीह को काम लायी अपनो जीवो पर जोखिम उठाय क मृत्यु को जवर आय गयो होतो, ताकी जो कमी तुम्हरो तरफ सी मोरी सेवा म भयी ओख पूरो करे।
PHI 3:1 येकोलायी हे मोरो भाऊ अऊर बहिनों, प्रभु म खुश रहो। उच बाते दुबारा लिखन म मोख त कोयी कठिनता नहीं होवय, अऊर येको म तुम्हरो लायी यो सुरक्षित हय,
PHI 3:2 बुरी बाते करन वालो उन कुत्तावों, जो शरीर काटन पर जोर देवय हय, उन पर नजर रखो।
PHI 3:3 कहालीकि सच्चो खतना वालो त हमच आय जो परमेश्वर की आत्मा सी प्रेरित होय क सेवा करय हय, अऊर बाहरी रीति रिवाज पर नहीं पर यीशु मसीह पर घमण्ड करय हय।
PHI 3:4 पर मय त बाहरी रीति रिवाज पर भी भरोसा रख सकू हय। यदि कोयी यो समझय हय कि ऊ बाहरी रीति रिवाज पर भरोसा कर सकय हय, त मय अऊर भी असो कर सकू हय।
PHI 3:5 आठवो दिन मोरो खतना भयो, मय इस्राएल को वंश, अऊर बिन्यामीन को वंश को आय, इब्रानियों को इब्रानी सन्तान आय; व्यवस्था को बारे म यदि कहो त फरीसी होतो।
PHI 3:6 उत्साह को बारे म यदि कहतो त मण्डलियों ख सतावन वालो; व्यवस्था की आज्ञा को पालन करन को द्वारा सच्चायी को बारे म यदि कहो त मय निर्दोष होतो।
PHI 3:7 पर जो जो बाते मोरो फायदा कि होती, उन्ख मय न मसीह को वजह हानि समझ लियो हय।
PHI 3:8 बल्की मय अपनो प्रभु मसीह यीशु की पहिचान की उत्तमता की तुलना म सब बातों ख हानि समझू हय। जेको वजह मय न सब चिजों ख त्याग दियो। अऊर इन पूरी चिजों ख मय कूड़ा समझू हय, येकोलायी की मय मसीह ख प्राप्त करू।
PHI 3:9 अऊर मय ओको संग एक हो जाऊं, जो मोख अपनी सच्चायी को नहीं, जो व्यवस्था को पालन सी मिलय हय, बल्की ऊ सच्चायी को भरोसा आय, जो मसीह पर विश्वास आवन सी मिलय हय। ऊ सच्चायी को उद्ग्म परमेश्वर आय अऊर ओको आधार विश्वास आय।
PHI 3:10 मय यो चाहऊं हय कि मसीह ख जान लेऊ। उन्को पुनरुत्थान को सामर्थ को अनुभव करू, अऊर ओको दु:ख म सहभागी बन क ओको जसो बन जाऊं,
PHI 3:11 कि मय कोयी भी रीति सी मरयो हुयो म सी जीन्दो होन को पद तक पहुंचू।
PHI 3:12 यो मतलब नहीं कि मय न पा लियो हय, यो सिद्ध भय गयो हय; पर ऊ पुरस्कार ख जितन लायी दौड़्यो जाऊ हय, जेको लायी मसीह यीशु न मोख पकड़्यो होतो।
PHI 3:13 हे भाऊवों अऊर बहिनों, मोरी भावना या नहाय कि मय पकड़ चुक्यो हय; पर यो एक काम करू हय कि जो बाते पीछू रह गयी हंय उन्ख भूल क, आगु की बातों को तरफ बढ़तो चल्यो जाऊं हय।
PHI 3:14 लक्ष को तरफ दौड़्यो चल्यो जाऊ हय, ताकि ऊपर को स्वर्गीय जीवन को इनाम पाऊ, जेको लायी परमेश्वर न मोख मसीह यीशु म ऊपर बुलायो हय।
PHI 3:15 हम म सी जितनो आत्मिकता म सिद्ध हंय, ऊ योच दृष्टिकोन रखे, अऊर यदि कोयी बात म तुम्हरो अऊरच बिचार हय त परमेश्वर ओख भी तुम पर प्रगट कर देयेंन।
PHI 3:16 येकोलायी जो नियम को अनुसार हम यहां तक पहुंच्यो हंय, उच नियमों को अनुसार चले।
PHI 3:17 हे भाऊवों अऊर बहिनों, तुम सब मिल क मोरो अनुकरन करो जो उदाहरन हम न तुम्हरो आगु रख्यो हय ओको अनुसार जो जीवय हय उन पर भी ध्यान लगायो रहो;
PHI 3:18 कहालीकि बहुत सो असी चाल चलय हंय, जिन्की चर्चा मय न तुम सी बार बार करी हय, अऊर अब भी रोय-रोय क कहू हय; कि हि अपनी चाल चलन सी मसीह को क्रूस की मृत्यु को दुश्मन बन क जीवय हंय।
PHI 3:19 उन्को अन्त नाश हय, शरीर की इच्छाये उन्को ईश्वर आय, हि अपनी लज्जा की बातों पर बड़ायी करय हंय अऊर धरती की चिजों पर मन लगायो रह्य हंय।
PHI 3:20 पर हमरी नागरिकता स्वर्ग कि हय; अऊर हम एक उद्धारकर्ता प्रभु यीशु मसीह को यहां सी आवन की रस्ता देख रह्यो हंय।
PHI 3:21 ऊ अपनी शक्ति को ऊ प्रभाव को अनुसार जेको द्वारा ऊ सब चिजों ख अपनो अधिकार म कर सकय हय, हमरी कमजोर शरीर को रूप बदल क, अपनी महिमा को शरीर को अनुकूल बनाय देयेंन।
PHI 4:1 येकोलायी हे मोरो प्रिय भाऊवों अऊर बहिनों, तुम मोख कितनो प्रिय हय, मोरो मन तुम म लग्यो रह्य हय, जो मोरी खुशी अऊर मुकुट आय, हे प्रियो, प्रभु म योच तरह बन्यो रहो।
PHI 4:2 मय यूओदिया अऊर सुन्तुखे तुम दोयी ख भी बिनती करू हय, कि प्रभु म बहिनों को नायी एक दूसरों सी सहमती बनायो रखो।
PHI 4:3 हे सच्चो सहकर्मी, मय तुम सी भी बिनती करू हय कि तय उन बाईयों की मदत कर, कहालीकि उन्न मोरो संग सुसमाचार फैलावन म, क्लेमेंस अऊर मोरो दूसरों सहकर्मियों समेत मेहनत करी, जिन्को नाम परमेश्वर को जीवन की किताब म लिख्यो हुयो हंय।
PHI 4:4 प्रभु म एक होय क सदा खुश रहो; मय फिर कहू हय, खुश रहो।
PHI 4:5 तुम्हरो नरम स्वभाव सब आदमियों पर प्रगट हो। प्रभु जल्दी आय रह्यो हय।
PHI 4:6 कोयी भी बात की चिन्ता मत करो; पर हर एक बात म तुम्हरी जरूरत, प्रार्थना अऊर बिनती को द्वारा धन्यवाद को संग परमेश्वर को सम्मुख रखो।
PHI 4:7 तब परमेश्वर की शान्ति, जो हमरी समझ सी दूर हय, तुम्हरो दिल अऊर तुम्हरो मन ख मसीह यीशु म एक होन सी सुरक्षित रखेंन।
PHI 4:8 येकोलायी हे भाऊवों अऊर बहिनों, जो जो बाते सच्ची अऊर आदर लायक, उचित, पवित्र, मनभावनी, अऊर स्तुति लायक हय, उन पर ध्यान लगायो करो।
PHI 4:9 जो बाते तुम न मोरो सी सीखी, अऊर स्वीकार करी, ओख अपनो आचरन म लावो। तब परमेश्वर जो हम्ख शान्ति देवय हय, तुम्हरो संग रहेंन।
PHI 4:10 मय प्रभु म बहुत खुश हय कि अब इतनो दिन को बाद तुम्हरी चिन्ता मोरो बारे म फिर सी जागृत भयी हय; निश्चय तुम्ख सुरूवात म भी येको बिचार होतो, पर ओख प्रगट करन को अच्छो अवसर नहीं मिल रह्यो होतो।
PHI 4:11 यो नहीं कि मय अपनी कमी को वजह यो कहू हय; कहालीकि मय न यो सिख्यो हय कि जो दशा म हय; ओको मच सन्तुष्ट करू।
PHI 4:12 मय अनुभव सी जानु हय, अऊर बढ़नो भी; हर एक बात अऊर सब दशावों म मय न सन्तुष्ट होनो, भूखो रहनो, अऊर घटनो-बढ़नो सिख्यो हय।
PHI 4:13 जो मोख सामर्थ देवय हय ओको म मय सब कुछ कर सकू हय।
PHI 4:14 तब भी तुम न भलो करयो कि मोरो कठिनायी म तुम मोरो सहभागी भयो।
PHI 4:15 हे फिलिप्पियों, तुम खुद भी जानय हय कि सुसमाचार प्रचार को सुरूवात को दिनो म, जब मय मकिदुनिया सी चली गयो, तब तुम्ख छोड़ अऊर कोयी मण्डली न लेन देन को बारे म मोरी मदत नहीं करी।
PHI 4:16 यो तरह जब मय थिस्सलुनीके म होतो, तब भी तुम न मोरी कमी पूरी करन लायी बहुत बार मदत भेजी।
PHI 4:17 असो नहीं कि मय दान चाहऊं हय पर मय असो दान चाहऊं हय जो असो फायदा तुम्हरो खाता म जमा होवय हय।
PHI 4:18 मोरो जवर सब कुछ हय, बल्की बहुतायत सी भी हय; जो चिजे तुम न इपफ्रुदीतुस को हाथ सी भेजी होती उन्ख पा क मय सन्तुष्ट भय गयो हय, ऊ त सुखदायक सुगन्ध, स्वीकार करन लायक बलिदान हय, जो परमेश्वर ख भावय हय।
PHI 4:19 मोरो परमेश्वर भी अपनो ऊ धन को अनुसार जो महिमा समेत मसीह यीशु म हय, तुम्हरी हर एक कमी ख पूरी करेंन।
PHI 4:20 हमरो परमेश्वर अऊर पिता की महिमा हमेशा-हमेशा होती रहे। आमीन।
PHI 4:21 हर एक परमेश्वर को लोगों ख, जो मसीह यीशु म हय नमस्कार। जो विश्वासी भाऊ मोरो संग हय, तुम्ख भी नमस्कार।
PHI 4:22 सब परमेश्वर को लोग, विशेष कर क् जो कैसर को घराना को आय, तुम ख नमस्कार कहजे हंय।
PHI 4:23 हमरो प्रभु यीशु मसीह को अनुग्रह तुम सब को संग होतो रहे।
COL 1:1 पौलुस को तरफ सी जो परमेश्वर की इच्छा सी मसीह यीशु को प्रेरित हय, अऊर भाऊ तीमुथियुस की तरफ सी,
COL 1:2 कुलुस्सियों म रहन वालो विश्वास लायक भाऊवों ख जो मसीह म एक हय। हमरो बाप परमेश्वर को तरफ सी तुम्ख अनुग्रह अऊर शान्ति प्राप्त होती रहे।
COL 1:3 जब हम तुम्हरो लायी हमेशा प्रार्थना करजे हय, अपनो प्रभु यीशु मसीह को बाप यानेकि परमेश्वर को धन्यवाद करजे हंय।
COL 1:4 कहालीकि हम न मसीह यीशु पर तुम्हरो विश्वास तथा सब परमेश्वर को लोगों को प्रती तुम्हरो प्रेम को बारे म सुन्यो हय।
COL 1:5 जब सच्चो सन्देश, सुसमाचार, पहिलो बार तुम्हरो जवर आयो, त तुम न या आशा को बारे म सुन्यो कि यो प्रदान करय हय। येकोलायी तुम्हरो विश्वास अऊर प्रेम ऊ चिज पर आधारित हय, जेकी तुम उम्मीद करय हय, जो तुम्हरो लायी स्वर्ग म सुरक्षित रखी हुयी हय।
COL 1:6 सुसमाचार आशीर्वाद लाय रह्यो हय अऊर पूरो जगत म फैलतो जाय रह्यो हय, ठीक वसोच जसो तुम्हरो बीच म ऊ दिन सी हय जब तुम न पहिलो बार परमेश्वर कि कृपा को बारे म सुन्यो, अऊर ओख यो मालूम भयो कि यो वास्तव म हय।
COL 1:7 परमेश्वर को अनुग्रह ख तुम न हमरो प्रिय सहकर्मी सेवक इपफ्रास सी सिख्यो, जो हमरो तरफ सी मसीह को विश्वास लायक सेवक आय।
COL 1:8 ओनच हम्ख ऊ प्रेम को बारे म बतायो हय जो आत्मा न तुम्ख दियो हय।
COL 1:9 यो वजह जब सी हम न तुम्हरो बारे म सुन्यो हय तब सी हम न तुम्हरो लायी हमेशा प्रार्थना करी हय। परमेश्वर सी हम न प्रार्थना करी कि ऊ पूरी बुद्धी अऊर समझ जो ओकी आत्मा देवय हय ओको संग ओकी इच्छा को ज्ञान सी तुम्ख भर दे।
COL 1:10 ताकि तुम्हरो चाल–चलन प्रभु को लायक हो, अऊर ऊ सब तरह सी प्रसन्न हो, अऊर तुम्हरो जीवन को द्वारा हर तरह को अच्छो कार्य ख प्रगट कर सको, अऊर तुम परमेश्वर को ज्ञान म बढ़तो जावो,
COL 1:11 ओकी महिमामय शक्ति सी जो सामर्थ हासिल होवय हय ओको म बलवन्त होतो जावो, ताकि तुम धीरज को संग सब कुछ सहन को लायक बनो। अऊर खुशी को संग बाप को धन्यवाद करो।
COL 1:12 अऊर जेन तुम्ख यो लायक बनायो कि परमेश्वर पिता को उन लोगों को संग जो ओन उन्को लायी पहिले सीच सुरक्षित करयो गयो प्रकाश को राज्य म तुम उत्तराधिकार पावन म सहभागी बन सको।
COL 1:13 अऊर ओन हम्ख अन्धारो कि शक्ति सी छुड़ायो अऊर ओको प्रिय बेटा को राज्य म हम्ख सुरक्षित लायो।
COL 1:14 अऊर ओको द्वारा हमरो छुटकारा करयो गयो मतलब हम्ख हमरो पापों की माफी मिली।
COL 1:15 मसीह अदृश्य परमेश्वर की दृश्य वाली समानता आय। अऊर वा सब बनायी हुयी निर्मिती म पैदा भयो पहिलो बेटा आय।
COL 1:16 परमेश्वर न अपनो द्वारा स्वर्ग अऊर धरती पर सब कुछ बनायो, आध्यात्मिक शक्तियों, प्रभुवों, शासकों, अऊर अधिकारियों सहित देख्यो अऊर दिखायी देन वाली अऊर नहीं दिखायी देन वाली चिजे। परमेश्वर न ओको द्वारा अऊर ओको लायी पूरो ब्रम्हांड ख निर्मान करयो।
COL 1:17 पूरी चिजों को पहिले मसीह अस्तित्व म होतो, अऊर ओकी एकता म पूरी चिजे अपनी सही जागा पर स्थिर रह्य हंय।
COL 1:18 उच शरीर, मतलब मण्डली को मुंड आय; उच आदि आय, अऊर मरयो हुयो म सी जीन्दो होन वालो म पहिलो आय कि सब बातों म पहिली जागा ओखच मिले।
COL 1:19 कहालीकि यो परमेश्वर को खुद को फैसला सी होतो कि पूरी परिपूर्णता ओको म वाश करे।
COL 1:20 टुरा को माध्यम सी, परमेश्वर न पूरो ब्रम्हांड ख अपनो आप वापस लावन को फैसला करयो। परमेश्वर न क्रूस पर अपनो टुरा को खून को माध्यम सी शान्ति बनायी अऊर येकोलायी धरती पर अऊर स्वर्ग म, पूरी चिजों ख वापस लायो।
COL 1:21 एक समय होतो जब तुम परमेश्वर सी दूर होतो अऊर बुरो कामों अऊर बिचार सी परमेश्वर को दुश्मन होतो
COL 1:22 पर अब ओन अपनो बेटा की शारीरिक शरीर म मृत्यु को द्वारा तुम्ख अपनो संगी बनायो हय, ताकि तुम्ख अपनो सम्मुख पवित्र अऊर शुद्ध, अऊर निर्दोष बनाय क उपस्थित करे।
COL 1:23 यदि तुम विश्वास को पायवा पर मजबूत बन्यो रहो अऊर ऊ सुसमाचार की आशा ख जेक तुम न सुन्यो हय मत छोड़ो, जेको प्रचार आसमान को खल्लो की पूरी सृष्टि म करयो गयो, अऊर जेको मय, पौलुस, सेवक बन्यो।
COL 1:24 अब मय उन दु:खों को वजह खुशी करू हय, जो तुम्हरो लायी उठाऊ हय अऊर मसीह की कठिनायी की कमी ओको शरीर लायी, मतलब मण्डली लायी, अपनो शरीर म पूरी करू हय;
COL 1:25 अऊर मय परमेश्वर को द्वारा मण्डली को सेवक बनायो गयो हय, जेन मोख तुम्हरी भलायी करन लायी यो काम दियो। अऊर यो कार्यभार पूरी रीति सी ओको सन्देशो की घोषना करय हय।
COL 1:26 यो सन्देश रहस्यपुर्न सच हय जो आदि काल सी पूरो आदमी सी गुप्त रख्यो गयो, पर ओको उन पवित्र लोगों पर प्रगट करयो गयो हय।
COL 1:27 परमेश्वर की या योजना होती कि गैरयहूदी लोगों पर यो रहस्य न प्रगट करे, यो रहस्य कितनो महिमामय बहुमूल्य हय जो अपनो लोगों लायी हय। अऊर यो रहस्य हय कि मसीह तुम म हय, मतलब परमेश्वर की महिमा की आशा होय सकय हय।
COL 1:28 येकोलायी हम मसीह को प्रचार सब ख करजे हय। अऊर जो हम्ख बुद्धी हासिल हय ऊ पूरी बुद्धी को उपयोग करतो हुयो हम हर कोयी ख निर्देश अऊर शिक्षा प्रदान करजे हय ताकी हम उन्ख मसीह म एक व्यक्तिगत परिपूर्ण व्यक्ति बनाय क परमेश्वर को सामने मौजूद कर सके।
COL 1:29 अऊर पूरो करन लायी मसीह की वा सामर्थ जो मोख मिलती रह्य हय अऊर जो मोरो म काम करय हय, ओको इस्तेमाल करतो हुयो मय कठोर मेहनत अऊर संघर्ष करू हय।
COL 2:1 मय चाहऊ हय कि तुम्ख या बात को पता चल जाये कि मय तुम्हरो लायी अऊर लौदीकिया म रहन वालो लोगों को लायी अऊर उन सब लायी जो व्यक्तिगत तौर पर मोख कभी नहीं मिल्यो मय कितनो कठोर मेहनत करू हय।
COL 2:2 उन्को मनों म प्रोत्साहन मिले अऊर परस्पर प्रेम म एकजुट होय जाये, तथा ऊ पूरो विश्वास को धन जो सच्चो समझ सी प्राप्त होवय हय उन्ख मिल जाये। यो तरह उन्ख परमेश्वर को रहस्य पता चल जायेंन, जो मसीह खुद हय।
COL 2:3 जेको म परमेश्वर की बुद्धि को भण्डार अऊर ज्ञान लूक्यो हुयो हंय।
COL 2:4 यो मय येकोलायी कहू हय कि कोयी आदमी तुम्ख झूठो तरीका सी धोका नहीं दे फिर चाहे हि कितनो भी अच्छो कहाली नहीं लगय।
COL 2:5 भलोच मय शरीर को भाव सी तुम सी दूर हय, तब भी आत्मा भाव सी तुम्हरो जवर हय, अऊर तुम्हरो खुशी को जीवन ख अऊर तुम्हरो विश्वास की, जो मसीह म हय, दृढ़ता देख क खुश होऊ हय।
COL 2:6 येकोलायी जसो तुम न मसीह यीशु ख प्रभु कर क् स्वीकार कर लियो हय, वसोच ओकोच म एक बन्यो रहो।
COL 2:7 अऊर ओकोच म जड़ी पकड़तो अऊर बढ़तो जावो; अऊर जसो तुम सिखायो गयो वसोच विश्वास म मजबूत होतो जावो, अऊर जादा सी जादा धन्यवादी बन्यो रहो।
COL 2:8 सावधान रहो कि कोयी तुम्ख ऊ आदमी की बुद्धी ख धोका सी तुम्ख गुलाम नहीं बनाय ले, जो मानविय परम्परागत शिक्षा सी प्राप्त होत आयी हय अऊर ब्रम्हांड ख शासन करन वाली आत्मावों कि देन आय नहीं की मसीह की।
COL 2:9 कहालीकि ओको म दैविक स्वभाव की पूरी परिपूर्णता हमेशा मसीह को शरीर म वाश करय हय,
COL 2:10 अऊर तुम्ख ओकी एकता म पूरो जीवन दियो गयो हय। ऊ हर आध्यात्मिक शासकों अऊर अधिकारियों को मुखिया आय।
COL 2:11 मसीह कि एकता म तुम्हरो खतना करयो गयो होतो नहीं कि आदमियों को द्वारा करयो जान वालो खतना को संग, पर मसीह द्वारा करयो गयो खतना को संग, जेको म तुम्हरो पापों को सामर्थ सी मुक्त करयो जावय हय।
COL 2:12 जब तुम न बपतिस्मा लियो होतो त तुम्ख मसीह को संग दफनायो गयो होतो, अऊर बपतिस्मा म तुम्हरो परमेश्वर की सक्रिय शक्ति म विश्वास को माध्यम सी मसीह को संग भी उठायो गयो होतो, जेन ओख मरयो हुयो म सी जीन्दो करयो।
COL 2:13 एक समय तुम भी आत्मिकता म मरयो हुयो होतो कहालीकि तुम पापी अऊर गैरयहूदी अऊर बिना व्यवस्था को होतो। पर अब परमेश्वर न तुम्ख मसीह को संग जीवन म लायो हय। परमेश्वर न हमरो पूरो पापों ख माफ करयो हय;
COL 2:14 परमेश्वर न हमरो बुरो कामों को लेखा जोखा ख हमरो बीच म सी मिटाय दियो, जेको म उन विधियों को उल्लेख करयो होतो जो हमरो प्रतिकुल अऊर हमरो विरोध होतो, ओन ओख क्रूस पर खिल्ला सी ठोक क मिटाय दियो हय।
COL 2:15 मसीह न क्रूस को द्वारा आध्यात्मिक शासकों को सामर्थ ख अऊर अधिकारियों ख शासन विहिन कर दियो अऊर अपनो विजय अभियान म बन्दियों को रूप म उन्ख लोगों को सामने खुलेआम तमाशा बनायो।
COL 2:16 येकोलायी कोयी भी व्यक्ति अपनो खानो पीनो यां पवित्र दिनो यां नयो चन्दा को त्यौहार, यां आराम को दिन को बारे म तुम्हरो कोयी न्याय नहीं करेंन।
COL 2:17 कहालीकि यो सब आवन वाली बातों की छाव हंय, वास्तविकता मसीह हंय।
COL 2:18 कोयी भी आदमी द्वारा अपनी निन्दा करी जान की अनुमति नहीं दे जो विशेष दर्शन को वजह श्रेष्ठ होन को दावा करय हय अऊर जो झूठी विनम्रता अऊर स्वर्गदूतों की पूजा पर जोर देवय हय। कोयी भी वजह सी, असो लोग अपनी मानविय सोच सी सब ख प्रभावित करय हंय,
COL 2:19 अऊर मसीह ख पकड़्यो रहनो छोड़ दियो हय, ऊ मसीह जो शरीर को मुंड आय। मसीह को अधिनता म पूरो शरीर हय जो जोड़ो अऊर नशो सी एक संग जुड़्यो हुयो हय, अऊर परमेश्वर जसो बढ़ानो चाहवय हंय वसो बढ़तो जावय हय।
COL 2:20 कहालीकि तुम मसीह को संग मर चुक्यो हय, अऊर ब्रम्हांड कि शासन करन वाली आत्मावों सी मुक्त करयो गयो हय। त फिर कहाली उन्को जसो जो जगत को हंय जीवन बितावय हय? तुम असी विधियों को वश म कहाली रह्य हय
COL 2:21 कि “येख मत छूयजो,” येको स्वाद मत ले, “अऊर ओख हाथ मत लगायजो?”
COL 2:22 या सब बाते इन सब चिजों ख सन्दर्भित करय हंय जो उपयोग करयो जानो को बाद बेकार होय जावय हंय; कहालीकि यो आदमियों की नियम अऊर शिक्षावों को अनुसार हंय।
COL 2:23 निश्चितच यो तरह को पूरो नियम स्वर्गदूतों की मजबूती को संग आराधना की बुद्धी अऊर झूठी विनम्रता, अऊर शरीर को गंभीर उपचारों पर आधारित हय, पर शारीरिक लालसावों ख रोकन म येको सी कुछ भी फायदा नहीं होवय।
COL 3:1 येकोलायी जब तुम मसीह को संग जीन्दो करयो गयो हंय, त येकोलायी अपनो दिल ख स्वर्ग की बातों पर लगावो, जित मसीह परमेश्वर को दायो तरफ अपनो सिंहासन पर विराजमान हय।
COL 3:2 धरती पर की नहीं, पर स्वर्गीय चिजों पर अपनो मन लगावो।
COL 3:3 कहालीकि तुम त मर गयो अऊर तुम्हरो जीवन मसीह को संग परमेश्वर म लूक्यो हुयो हय।
COL 3:4 अपनो सच्चो जीवन मसीह हय, जब मसीह प्रगट होयेंन, तब तुम भी ओकी महिमा को संग प्रगट करयो जावो।
COL 3:5 येकोलायी अपनो सांसारिक इच्छावों ख मार डालो जो तुम म कार्य करय हंय, मतलब व्यभिचार, अशुद्धता, दुष्कामना, लालसा अऊर लोभ ख जो मूर्तिपूजा को रूप हय।
COL 3:6 कहालीकि इन बातों को वजह जो ओकी आज्ञा नहीं मानय उन पर परमेश्वर को गुस्सा प्रगट होन जाय रह्यो हय।
COL 3:7 अऊर एक समय होतो जब तुम भी, असी इच्छावों म जीवन बितावत होतो, अऊर तुम्हरो जीवन ओकोच प्रभुत्व म होतो।
COL 3:8 पर अब तुम भी इन सब बातों ख, मतलब गुस्सा, उत्तेजना, बैरभाव, निन्दा अऊर मुंह सी गालिया देनो यो सब बाते छोड़ देवो।
COL 3:9 कभी एक दूसरों सी झूठ मत बोलो, कहालीकि तुम लोगों न अपनो पुरानो स्वभाव ख ओको आदतो सहित छोड़ दियो हय
COL 3:10 अऊर एक नयो व्यक्तित्व ख धारन करयो हय। यो स्वभाव अपनो परमेश्वर सृजनहार को स्वरूप को अनुसार पूरो ज्ञान हासिल करन लायी हमेशा नयो बनतो जावय हय।
COL 3:11 अऊर येको परिनाम यो हय कि उत यहूदी अऊर गैरयहूदी म कोयी अन्तर नहीं रह्य जावय हय, अऊर नहीं त कोयी खतना करयो हुयो अऊर खतनारहित म, अऊर नहीं कोयी सभ्य, नहीं स्कूती म, नहीं सेवक अऊर नहीं स्वतंत्र व्यक्ति म, पर मसीह सब कुछ अऊर सब विश्वासियों म ओको निवास हंय।
COL 3:12 तुम परमेश्वर को पवित्र लोग आय; ओन तुम सी प्रेम करयो अऊर तुम्ख अपनो होन लायी तुम्ख चुन्यो गयो हय। त फिर सहानुभूति, दया, नम्रता, कोमलता अऊर धीरज धारन करो।
COL 3:13 तुम लोग एक दूसरों ख सहन करो अऊर यदि कोयी ख कोयी सी शिकायत हय, त एक दूसरों को अपराध माफ करो। प्रभु न तुम लोगों को अपराध माफ करयो; वसोच तुम भी करो।
COL 3:14 अऊर इन सब को अलावा प्रेम ख धारन करो, प्रेमच एक दूसरों ख आपस म बान्धय अऊर परिपूर्ण करय हय।
COL 3:15 तुम्हरो लायी जान वालो निर्नयो पर मसीह सी हासिल होन वाली शान्ति को मार्गदर्शन रहे, येकोलायी परमेश्वर न तुम्ख एक संग शान्ति म एक शरीर होन लायी बुलायो हय, अऊर हमेशा धन्यवाद करतो रहो।
COL 3:16 अपनी पूरी सम्पनता को संग मसीह को सन्देश तुम्हरो दिल म वाश करे। अऊर अपनी पूरी बुद्धी सी एक दूसरों ख शिक्षा अऊर निर्देश देतो रहो। भजनों, स्तुति अऊर आत्मिक गीतो ख गातो हुयो अपनो आत्मा म परमेश्वर ख धन्यवाद देतो रहो।
COL 3:17 जो कुछ तुम करो यां कहो सब प्रभु यीशु को नाम होना चाहिये, अऊर ओको द्वारा परमेश्वर पिता को धन्यवाद करो।
COL 3:18 हे पत्नियों, जसो प्रभु म उचित हय, वसोच अपनो अपनो पति को अधीन रहो।
COL 3:19 हे पतियों, अपनी अपनी पत्नी सी प्रेम रखो, अऊर उन्को सी कठोर व्यवहार मत करो।
COL 3:20 हे बच्चां, सब बातों म अपनो अपनो माय–बाप की आज्ञा को हमेशा पालन करो, कहालीकि मसीहच अनुयायी को यो व्यवहार सी परमेश्वर खुश होवय हय।
COL 3:21 हे माय बाप, अपनो बच्चावो ख तंग मत करो, कहीं असो नहीं होय कि उन्को साहस टूट जाये।
COL 3:22 सेवकों सी मोरो अनुरोध यो हय कि जो शरीर को अनुसार तुम्हरो स्वामी हंय, सब बातों म उनकी आज्ञा को पालन करो, केवल आदमियों ख खुश करन लायी उच समय नहीं जब ऊ देख रह्यो होना, बल्की सच्चो मन सी उन्की मानो कहालीकि तुम प्रभु को आदर करय हय।
COL 3:23 तुम लोग जो कुछ करय हय, अपनो पूरो दिल को संग करो, यो समझ क कि आदमियों लायी नहीं पर प्रभु लायी करय हय।
COL 3:24 याद रखो कि तुम्ख प्रभु येको प्रतिफल देयेंन जो ओन अपनो लोगों लायी रख्यो हय। कहालीकि मसीह सच्चो स्वामी हय जेकी तुम सेवा करय हय।
COL 3:25 कहालीकि जो बुरो करय हय ऊ अपनी बुरायी को फर पायेंन, अऊर कहालीकि परमेश्वर कोयी को संग पक्षपात नहीं करय।
COL 4:1 हे मालिकों, तुम अपनो सेवकों ख उन्को कामों को अनुसार उचित मोबदला उन्ख देवो। याद रखो कि स्वर्ग म तुम्हरो भी कोयी एक मालिक हय।
COL 4:2 प्रार्थना म लग्यो रहो, अऊर परमेश्वर ख धन्यवाद देतो हुयो ओको म जागृत रहो।
COL 4:3 अऊर येको संगच संग हमरो लायी भी प्रार्थना करतो रहो, परमेश्वर हमरो लायी मसीह को ऊ भेदो को सुसमाचार सुनावन लायी अच्छो मौका प्रदान करे जेको वजह मय कैद म हय।
COL 4:4 प्रार्थना करो कि मय येख स्पष्टता को संग बताय सकू जसो मोख बतानो चाहिये।
COL 4:5 अवसर ख पूरो-पूरो उपयोग करो अऊर अविश्वासियों को संग बुद्धिमानी सी व्यवहार करो।
COL 4:6 तुम्हरी बोली हमेशा पूरो अनुग्रह सी भरी अऊर लोगों ख पसंद आवन वाली हो ताकी तुम जान लेवो कि हर आदमी ख कसो उत्तर दे सकू।
COL 4:7 हमरो प्रिय भाऊ बहिन अऊर विश्वास लायक सेवक, तुखिकुस, जो प्रभु म मोरो सहकर्मी हय, मोरो पूरो समाचार तुम्ख बताय देयेंन।
COL 4:8 ओख मय न येकोलायी तुम्हरो जवर भेज्यो हय कि तुम्ख हमरी दशा मालूम होय जाये अऊर ऊ तुम्हरो दिलो ख प्रोत्साहन दे।
COL 4:9 ओको संग मय न उनेसिमुस ख भी भेज्यो हय जो विश्वास लायक अऊर प्रिय भाऊ अऊर तुम म सी एक हय। यो तुम्ख यहां की पूरी बाते बताय देयेंन।
COL 4:10 अरिस्तर्खुस, जो जेलखाना म मोरो संग कैदी हय, तथा बरनबास को भाऊ मरकुस को तुम्ख नमस्कार, मरकुस को बारे म तुम आज्ञा पा चुक्यो हय कि यदि ऊ तुम्हरो जवर आये त ओको स्वागत करजो।
COL 4:11 यूस्तुस कहलावन वालो यीशु को भी तुम्ख नमस्कार पहुंचे। केवल तीनयी यहूदी विश्वासियों म परमेश्वर को राज्य लायी मोरो संग काम कर रह्यो हय। अऊर इन्की मोख बहुत मदत मिली हय।
COL 4:12 इपफ्रास, जो तुम म सी एक हय अऊर मसीह यीशु को सेवक हय, तुम्ख नमस्कार कह्य हय। अऊर हमेशा तुम्हरो लायी प्रार्थनावों म कोशिश करय हय, ताकि तुम सिद्ध होय क पूरो विश्वास को संग परमेश्वर की इच्छा पर स्थिर रहो।
COL 4:13 मय व्यक्तिगत रूप सी ओको गवाह आय कि ऊ तुम्हरो लायी अऊर लौदीकिया अऊर हियरापुलिस वालो लायी कठिन मेहनत करतो रह्य हय।
COL 4:14 हमरो प्रिय डाक्टर लूका अऊर देमास तुम्ख नमस्कार भेजय हय।
COL 4:15 लौदीकिया को विश्वासियों ख, अऊर नुमफास अऊर उन्को घर की मण्डली ख नमस्कार कहजो।
COL 4:16 जब या चिट्ठी तुम्हरो इत पढ़ लियो जायेंन त असो करजो कि लौदीकिया की मण्डली म भी पढ़्यो जाये। अऊर उच समय वा चिट्ठी जो लौदीकिया को विश्वासियों तुम्ख भेजेंन ओख तुम भी पढ़ो।
COL 4:17 अऊर अर्खिप्पुस सी कहो कि “जो सेवा प्रभु म तोख सौंपी गयी हय, ऊ ओख निश्चय को संग पूरो करे।”
COL 4:18 मय पौलुस खुद अपनो हाथ सी तुम्ख प्रनाम लिख रह्यो हय। याद रहे कि मय जेलखाना म हय। तुम पर परमेश्वर को अनुग्रह बन्यो रहे।
1TH 1:1 पौलुस अऊर सिलवानुस अऊर तीमुथियुस को तरफ सी, थिस्सलुनीकियों की मण्डली को नाम, जो परमेश्वर बाप अऊर प्रभु यीशु मसीह म हय। अनुग्रह अऊर शान्ति तुम्ख मिलतो रहे।
1TH 1:2 हम तुम्ख प्रार्थनावों म तुम्ख हमेशा याद करजे अऊर हमेशा तुम सब को बारे म परमेश्वर को धन्यवाद करजे हंय,
1TH 1:3 अऊर अपनो परमेश्वर अऊर बाप को सामने तुम्हरो विश्वास को काम, अऊर प्रेम को मेहनत, अऊर हमरो प्रभु यीशु मसीह म धीरज सी धरयो हुयो आशा ख लगातार याद करजे हंय।
1TH 1:4 हमरो भाऊवों अऊर बहिनों, हम जानजे हय कि परमेश्वर तुम सी प्रेम करय हय अऊर तुम्ख चुन्यो हय।
1TH 1:5 कहालीकि हम्न तुम्हरो जवर सुसमाचार लायो यो केवल शब्दों सी नहीं पर सामर्थ, पवित्र आत्मा सी, अऊर पूरी सच्चायी की निश्चयता को संग; तुम जानय हय जब हम तुम्हरो संग होतो तुम कसो रह्यो या तुम्हरी भलायी को लायी होतो।
1TH 1:6 तुम बड़ो कठिनायी म भी, पवित्र आत्मा को खुशी को संग, सन्देश ख स्वीकार करयो। हमरी अऊर प्रभु को अनुकरन करन लग्यो।
1TH 1:7 असो करनो सी मकिदुनिया अऊर अखया प्रदेश को सब विश्वासियों को लायी तुम अच्छो बन्यो।
1TH 1:8 कहालीकि तुम्हरो वचन केवल मकिदुनिया अऊर अखया म सुनायो गयो, असोच नहीं पर तुम्हरो विश्वास को जो परमेश्वर पर हय, हर जागा असी चर्चा फैल गयी। कि हम्ख यो बारे म कुछ कहन की जरूरत नहाय।
1TH 1:9 कहालीकि हि लोग हमरो बारे म बतावय हंय कि तुम्हरो जवर आयो त हमरो कसो स्वागत भयो; अऊर तुम कसो मूर्ति सी परमेश्वर को तरफ फिरयो ताकि जीवतो अऊर सच्चो परमेश्वर की सेवा करो,
1TH 1:10 अऊर ओको बेटा ख स्वर्ग पर सी आवन की रस्ता देखतो रहो जेक ओन मरयो हुयो म सी जीन्दो, मतलब यीशु की, जो हम्ख परमेश्वर सी आवन वालो प्रकोप सी छुड़ावय हय।
1TH 2:1 हे भाऊवों-बहिनों, तुम खुदच जानय हय कि हमरो तुम्हरो जवर आनो बेकार नहीं भयो,
1TH 2:2 बल्की तुम खुदच जानय हय कि फिलिप्पी म आवन को पहिले कसो दु:ख अऊर अपमान सह्यो? पर भी हमरो परमेश्वर न हम्ख असो हिम्मत दियो, कि हम परमेश्वर को सुसमाचार बहुत विरोध होतो हुयो भी तुम्ख सुनायो।
1TH 2:3 कहालीकि हमरो उपदेश नहीं भ्रम सी हय अऊर नहीं गलत उद्देश सी, अऊर नहीं चालाकी को संग हय;
1TH 2:4 पर जसो परमेश्वर न हम्ख लायक ठहराय क सुसमाचार सौंप्यो, हम वसोच बतायजे हंय, अऊर येको म आदमियों ख नहीं, पर परमेश्वर ख, जो हमरो मनों ख परखय हय, खुश करय हंय।
1TH 2:5 कहालीकि तुम जानय हय कि हम नहीं त कभी चापलूसी की बाते करत होतो, अऊर नहीं लोभ लायी बहाना करत होतो, परमेश्वर गवाह हय;
1TH 2:6 तब भी हम आदमियों सी आदर नहीं चाहत होतो, अऊर नहीं तुम सी, नहीं अऊर कोयी सी।
1TH 2:7 मसीह को प्रेरित होन को वजह अऊर फिर भी हम मसीह को प्रेरित होन को वजह तुम पर बोझ डाल सकत होतो, जो तरह माय अपनो बच्चां को पालन पोषन करय हय, वसोच हम न भी तुम्हरो बीच म रह्य क नरमता दिखायी हय;
1TH 2:8 अऊर वसोच हम तुम्ख प्रेम करतो हुयो, नहीं केवल परमेश्वर को सुसमाचार पर अपनो अपनो जीव भी तुम्ख देन ख तैयार होतो, येकोलायी कि तुम हमरो प्रिय भय गयो होतो।
1TH 2:9 कहालीकि, हे भाऊवों-बहिनों, तुम हमरो मेहनत ख निश्चितच तुम्ख याद होना; हम न येकोलायी रात दिन काम धन्दा करतो हुयो तुम म परमेश्वर को सुसमाचार प्रचार करयो कि तुम म सी कोयी पर बोझ नहीं होय।
1TH 2:10 तुम खुदच गवाह हय, अऊर परमेश्वर भी हय कि तुम विश्वासियों को बीच म हमरो व्यवहार कसो पवित्र, उचित अऊर निर्दोष रह्यो।
1TH 2:11 तुम जानय हय कि हम तुम्हरो संग असो व्यवहार करजे हय, जसो बाप अपनो बच्चा को संग करय हय।
1TH 2:12 वसोच हम भी तुम म सी हर एक ख बिनती करत, अऊर शान्ति देतो, अऊर समझावत होतो कि तुम्हरो चाल-चलन परमेश्वर को लायक हो, जो तुम्ख अपनो राज्य अऊर महिमा म भागीदार होन लायी बुलायो।
1TH 2:13 येकोलायी हम भी परमेश्वर को धन्यवाद लगातार करजे हंय कि जब हमरो सी परमेश्वर को सुसमाचार को वचन तुम्हरो जवर पहुंच्यो, त तुम न ओख आदमियों को नहीं पर परमेश्वर को वचन समझ क स्वीकार करयो; अऊर वास्तव म यो असोच हय। अऊर परमेश्वर तुम जो विश्वासियों म काम करय हय, प्रभावशाली हय।
1TH 2:14 येकोलायी तुम, हे भाऊवों-बहिनों, परमेश्वर की उन मण्डलियों म जो बाते भयी जो यहूदिया म मसीह यीशु म हंय, कहालीकि तुम न भी अपनो लोगों सी वसोच छल पायो जसो उन्न यहूदियों सी पायो होतो,
1TH 2:15 जिन्न प्रभु यीशु ख अऊर भविष्यवक्ता ख भी मार डाल्यो अऊर हम ख सतायो। ऊ परमेश्वर ख अप्रसन्न करजे हय, अऊर आदमियों को विरोध करजे हंय,
1TH 2:16 अऊर हि गैरयहूदियों सी उन्को उद्धार लायी परमेश्वर को सुसमाचार करन सी हम्ख रोकय हय कि सदा अपनो पापों को घड़ा भरतो रहे; पर उन पर परमेश्वर को भयानक प्रकोप आय पहुंच्यो हय।
1TH 2:17 हे भाऊवों-बहिनों, जब हम थोड़ो समय लायी, मन म नहीं बल्की प्रगट म, तुम सी अलग भय गयो होतो, त हम न तुम ख याद करयो अऊर दुबारा मिलन की बहुत कोशिश करयो।
1TH 2:18 येकोलायी हम मय पौलुस न एक सी जादा गन तुम्हरो जवर आवनो चाहयो, पर शैतान हम्ख रोक्यो रह्यो।
1TH 2:19 भलो हमरी आशा यां खुशी यां बड़ायी को मुकुट का हय? का हमरो प्रभु यीशु को आगु ओको आवन को समय तुम भी नहीं रहो?
1TH 2:20 हमरी बड़ायी अऊर खुशी तुमच आय।
1TH 3:1 येकोलायी जब हम सी अऊर रह्यो नहीं गयो, त हम न यो ठहरायो कि एथेंस शहर म अकेलो रह्य जाये;
1TH 3:2 अऊर हम न तीमुथियुस ख, जो मसीह को सुसमाचार म हमरो भाऊ अऊर परमेश्वर को सहकर्मी हय, येकोलायी भेज्यो कि ऊ तुम्ख स्थिर करे अऊर तुम्हरो विश्वास को बारे म तुम्ख समझायेंन,
1TH 3:3 कि कोयी या कठिनायियों को वजह डगमगाय नहीं जाये। तुम खुद जानय हय कि हमरो लायी यो सताव परमेश्वर की इच्छा को भाग आय।
1TH 3:4 कहालीकि पहिलेच, जब हम तुम्हरो संग रहत होतो त तुम सी कहत होतो कि हम्ख कठिनायी उठानो पड़ेंन, अऊर असोच भयो हय, जसो कि तुम जानय भी हय।
1TH 3:5 यो वजह जब मोरो सी अऊर भी रह्यो नहीं गयो, त तुम्हरो विश्वास को हाल जानन लायी तीमुथियुस ख भेज्यो, कि कहीं असो नहीं होय कि परीक्षा करन वालो शैतान न तुम्हरी परीक्षा करी होना, अऊर हमरी मेहनत बेकार भय गयी हय।
1TH 3:6 पर अभी तीमुथियुस न, तुम्हरो जवर सी हमरो इत आयो हय, तुम्हरो विश्वास अऊर प्रेम को सुसमाचार सुनायो अऊर या बात ख भी सुनायो कि तुम हमेशा प्रेम को संग हम्ख याद करय हय, अऊर हमरो देखन की लालसा रखय हय, जसो हम भी तुम्ख देखन की।
1TH 3:7 येकोलायी हे भाऊवों बहिनों, हम न अपनो पूरो दु:ख अऊर कठिनायी म तुम्हरो विश्वास सी तुम्हरो बारे म प्रोत्साहन मिल्यो,
1TH 3:8 कहालीकि अब यदि तुम प्रभु म स्थिर रहो त हम जीन्दो हंय।
1TH 3:9 अब हम तुम्हरो लायी परमेश्वर ख धन्यवाद कर सकजे हय। जो खुशी तुम्हरो वजह सी ओकी उपस्थिति म हम्ख मिलय हय। येकोलायी परमेश्वर ख धन्यवाद करे?
1TH 3:10 हम रात दिन बहुतच प्रार्थना करतो रहजे हंय कि तुम्ख सामने देखे अऊर तुम्हरो विश्वास की कमी पूरी करे।
1TH 3:11 अब हमरो परमेश्वर अऊर पिता खुदच अऊर हमरो प्रभु यीशु, तुम्हरो यहां आनो म हमरो रस्ता खोले;
1TH 3:12 अऊर प्रभु असो करे कि जसो हम तुम सी प्रेम रखजे हंय, वसोच तुम्हरो प्रेम भी आपस म अऊर सब आदमियों को संग बढ़े, अऊर उन्नति करतो जाये,
1TH 3:13 ताकि ऊ तुम्हरो मनों ख असो स्थिर करेंन कि जब हमरो प्रभु यीशु अपनो सब पवित्र लोगों को संग आये, त हि हमरो परमेश्वर अऊर पिता को सामने पवित्रता म निर्दोष ठहरेंन।
1TH 4:1 येकोलायी हे भाऊवों बहिनों, हम तुम सी बिनती करजे हंय अऊर तुम्ख प्रभु यीशु म समझाजे हंय कि जसो तुम न हम सी लायक चाल चलनो अऊर परमेश्वर ख खुश करनो सिख्यो हय, अऊर जसो तुम चलय भी हय, वसोच अऊर भी बढ़तो जावो।
1TH 4:2 कहालीकि तुम जानय हय कि हम न प्रभु यीशु को अधिकार को तरफ सी तुम्ख कौन-कौन सी शिक्षाये पहुंचायी।
1TH 4:3 परमेश्वर की इच्छा या हय कि तुम पवित्र बनो: अऊर अनैतिकता सी बच्यो रहो,
1TH 4:4 हे आदमियों अपनी पत्नी को संग कसो पवित्र अऊर आदरनिय व्यवहार करनो चाहिये।
1TH 4:5 अऊर यो काम अभिलाषा सी नहीं, अऊर नहीं उन गैरविश्वासियों को जसो जो परमेश्वर ख नहीं जानय,
1TH 4:6 कि या बात म कोयी अपनो मसीह म भाऊवों ख नहीं ठगाये, अऊर नहीं ओख कोयी फसावय नहीं, कहालीकि प्रभु इन सब बातों को बदला लेनवालो हय; जसो कि हम न पहिलेच तुम सी कह्यो अऊर चितायो भी होतो।
1TH 4:7 कहालीकि परमेश्वर न हम्ख अपवित्रता म रहन लायी नहीं, पर पवित्र होन लायी बुलायो हय।
1TH 4:8 यो वजह जो यो शिक्षा ख नकारय हय, ऊ आदमी ख नहीं पर परमेश्वर ख नकारय हय, जो अपनी पवित्र आत्मा तुम्ख देवय हय।
1TH 4:9 पर भाईचारा कि प्रीति को बारे म यो जरूरी नहाय कि मय तुम्हरो जवर कुछ लिखूं, कहालीकि आपस म प्रेम रखनो तुम न खुदच परमेश्वर सी सिख्यो हय;
1TH 4:10 अऊर पूरो मकिदुनिया को सब भाऊवों को संग प्रेम करय भी हय। पर हे भाऊवों, हम तुम सी बिनती करजे हंय कि अऊर भी बढ़तो जावो,
1TH 4:11 अऊर हम न तुम्ख आज्ञा दी हय, वसोच शान्ति को संग जीवन जीनो अऊर अपनो काम काज करनो अऊर अपनो हाथों सी कमावन की कोशिश करो;
1TH 4:12 यो तरह तुम जो गैरविश्वासी हय उन्को सम्मान प्राप्त करो, अऊर तुम्ख कोयी जरूरतों पर दूसरों पर निर्भर रहन की जरूरत नहीं पड़ेंन।
1TH 4:13 हे भाऊवों बहिनों, हम नहीं चाहाजे कि तुम उन्को बारे म जो मरयो हंय, अज्ञानी रहो; असो नहीं होय कि तुम दूसरों को जसो शोक करो जिन्ख आशा नहाय।
1TH 4:14 कहालीकि यदि हम विश्वास करजे हंय कि यीशु मरयो अऊर जीन्दो भी भयो, त वसोच परमेश्वर उन्ख भी जो यीशु म विश्वास करतो मर गयो हंय, ओकोच संग वापस लायेंन।
1TH 4:15 कहालीकि जो हम्ख प्रभु न सिखायो ऊ हम तुम्ख सिखायजे हय तुम सी यो कहजे हंय कि हम जो जीन्दो हंय अऊर प्रभु को आनो तक बच्यो रहबोंन, मरयो हुयो सी कभी आगु नहीं जाबो।
1TH 4:16 कहालीकि प्रभु खुदच स्वर्ग सी उतरेंन; ऊ समय ललकार, अऊर मुख्य दूत को आवाज सुनायी देयेंन, अऊर परमेश्वर को तुरही फूकी जायेंन; अऊर जो मसीह म मरयो हंय, हि पहिले जीन्दो होयेंन।
1TH 4:17 तब हम जो जीन्दो अऊर बच्यो रहबोंन उन्को संग बादर पर उठाय लियो जाबोंन कि हवा म प्रभु सी मिले; अऊर यो रीति सी हम हमेशा प्रभु को संग रहबोंन।
1TH 4:18 यो तरह इन बातों सी एक दूसरों ख उत्साहित करतो रहो।
1TH 5:1 पर हे भाऊवों अऊर बहिनों, येकी जरूरत नहाय कि समयो अऊर कालो को बारे म तुम्हरो जवर कुछ लिख्यो जाये।
1TH 5:2 कहालीकि तुम खुद ठीक जानय हय कि जसो रात ख चोर आवय हय, वसोच प्रभु को दिन आवन वालो हय।
1TH 5:3 जब लोग कहत होना, “शान्त अऊर सुरक्षित हय, अऊर कुछ डर नहाय,” त उन पर अचानक नाश आय पड़ेंन, जो तरह गर्भवती पर दु:ख तकलीफ; अऊर हि कोयी रीति सी नहीं बचेंन।
1TH 5:4 पर हे भाऊवों अऊर बहिनों, तुम त अन्धारो म नहाय कि ऊ दिन तुम पर चोर जसो आवय हय वसो अचानक आयेंन।
1TH 5:5 कहालीकि तुम सब प्रकाश को लोग अऊर दिन को लोग आय; हम नहीं रात को आय, नहीं अन्धारो को आय।
1TH 5:6 येकोलायी हम दूसरों को जसो सोतो नहीं रहे, पर जागतो अऊर सावधान रहे।
1TH 5:7 कहालीकि जो सोवय हंय हि रातच ख सोवय हंय, कहालीकि जो सोवय हंय नशा म चुर होवय हंय।
1TH 5:8 पर हम जो दिन को आय, विश्वास अऊर प्रेम को झिलम पहिन क अऊर उद्धार को आशा को टोपी पहिन क सावधान रहो।
1TH 5:9 कहालीकि परमेश्वर न हम्ख गुस्सा को लायी नहीं, पर येकोलायी चुन्यो हय कि हम अपनो प्रभु यीशु मसीह को द्वारा उद्धार प्राप्त करे।
1TH 5:10 यीशु हमरो लायी यो वजह मरयो कि हम चाहे जागतो हो चाहे मरयो हो, सब मिल क ओकोच संग जीये।
1TH 5:11 यो वजह एक दूसरों ख प्रोत्साहन देवो अऊर एक दूसरों की मदत को कारण बनो, जसो कि तुम करय भी हय।
1TH 5:12 हे भाऊवों अऊर बहिनों, हम तुम सी बिनती करजे हंय कि जो तुम म मेहनत करय हंय, अऊर प्रभु म तुम्हरो अगुवा हंय, अऊर तुम्ख शिक्षा देवय हंय, उन्को सम्मान करो।
1TH 5:13 अऊर उन्को काम को वजह प्रेम को संग उन्ख बहुतच आदर को लायक समझो। आपस म मेल मिलाप सी रहो।
1TH 5:14 हे भाऊवों अऊर बहिनों, हम तुम्ख इशारा देजे हंय कि जो आलसी हय उन्ख बिनती करजे हय, कायरो ख हिम्मत देवो, कमजोरों ख सम्भालो, सब को तरफ सहनशीलता दिखावो।
1TH 5:15 सावधान! कोयी दूसरों सी बुरायी को बदला बुरायी मत करो; पर हमेशा भलायी करन पर तैयार रहो, आपस म अऊर सब सी भी भलायीच की बाते करो।
1TH 5:16 हमेशा खुश रहो।
1TH 5:17 लगातार प्रार्थना म लग्यो रहो।
1TH 5:18 हर परिस्थिति म परमेश्वर को धन्यवाद करो।
1TH 5:19 पवित्र आत्मा की आगी ख मत बुझावो।
1TH 5:20 परमेश्वर को तरफ सी आवन वालो सन्देश ख मत धिक्कारो।
1TH 5:21 सब बातों ख परखो; जो अच्छी हय ओख पकड़्यो रहो।
1TH 5:22 सब तरह की बुरायी सी बच्यो रहो।
1TH 5:23 शान्ति को परमेश्वर खुदच तुम्ख पूरो रीति सी पवित्र करे; अऊर तुम्हरी आत्मा अऊर जीव अऊर शरीर हमरो प्रभु यीशु मसीह को आवन तक पूरो निर्दोष अऊर सुरक्षित रहे।
1TH 5:24 तुम्हरो बुलावन वालो विश्वास लायक हय, अऊर ऊ असोच करेंन।
1TH 5:25 हे भाऊवों अऊर बहिनों, हमरो लायी प्रार्थना करो।
1TH 5:26 सब भाऊवों अऊर बहिनों ख परमेश्वर को पवित्र प्रेम सी नमस्कार करो।
1TH 5:27 मय तुम्ख प्रभु को अधिकार सी तुम्ख बिनती करू हय कि या चिट्ठी सब विश्वासियों ख पढ़ क सुनायो जाये।
1TH 5:28 हमरो प्रभु यीशु मसीह को अनुग्रह तुम पर होतो रहे।
2TH 1:1 मय पौलुस अऊर सिलवानुस अऊर तीमुथियुस को संग या चिट्ठी लिखू हय, हमरो बाप परमेश्वर अऊर प्रभु यीशु मसीह को उन लोगों ख जो थिस्सलुनीकियों की मण्डली म हय।
2TH 1:2 हमरो बाप परमेश्वर अऊर प्रभु यीशु मसीह को तरफ सी तुम्ख अनुग्रह अऊर शान्ति मिलती रहे।
2TH 1:3 हे भाऊवों अऊर बहिनों, तुम्हरो बारे म हम्ख हर समय परमेश्वर को धन्यवाद करनो चाहिये, अऊर यो ठीक भी हय, येकोलायी कि तुम्हरो विश्वास बहुत बढ़तो जावय हय, अऊर तुम सब को प्रेम आपस म बहुतच बढ़य हय।
2TH 1:4 यहां तक कि हम खुद परमेश्वर की मण्डली म तुम्हरो बारे म घमण्ड करजे हंय, कि जितनो उपद्रव अऊर कठिनायी तुम सहय हय, उन सब म तुम्हरो धीरज अऊर विश्वास प्रगट होवय हय।
2TH 1:5 यो परमेश्वर को सच्चो न्याय को स्पष्ट प्रमान हय कि तुम परमेश्वर को राज्य को लायक ठहरो, जेको लायी तुम दु:ख भी उठावय हय।
2TH 1:6 परमेश्वर को जवर यो न्याय हय कि जो तुम्ख कठिनायी देवय हंय, उन्ख बदला म कठिनायी दे।
2TH 1:7 अऊर तुम्ख, जो कठिनायी पावय हय, हमरो संग चैन देयेंन: ऊ समय जब कि प्रभु यीशु अपनो सामर्थी दूतों को संग, धधकती हुयी आगी म स्वर्ग सी प्रगट होयेंन,
2TH 1:8 अऊर जो परमेश्वर ख नहीं पहिचानय अऊर हमरो प्रभु यीशु को सुसमाचार ख नहीं मानय उन सी बदला लेयेंन।
2TH 1:9 हि प्रभु को सामने सी अऊर ओकी शक्ति को तेज सी दूर होय क अनन्त विनाश को सजा पायेंन।
2TH 1:10 यो ऊ दिन होयेंन, जब ऊ अपनो पवित्र लोगों म महिमा पानो अऊर सब विश्वास करन वालो म अचम्भा को वजह होन ख आयेंन; तुम भी सहभागी रहो कहालीकि तुम न हमरी गवाही पर विश्वास करयो।
2TH 1:11 येकोलायी हम हमेशा तुम्हरो लायी प्रार्थना भी करजे हंय कि हमरो परमेश्वर तुम्ख यो बुलाहट को लायक समझे, अऊर भलायी को हर एक इच्छा अऊर विश्वास को हर एक काम ख सामर्थ को संग पूरो करे,
2TH 1:12 ताकि हमरो परमेश्वर अऊर प्रभु यीशु मसीह को अनुग्रह को अनुसार प्रभु यीशु को नाम तुम म महिमा पाये, अऊर तुम म दिखायी दे।
2TH 2:1 हे भाऊवों अऊर बहिनों, अब हम अपनो प्रभु यीशु मसीह को आनो, अऊर ओको जवर अपनो जमा होन को बारे म तुम सी बिनती करजे हंय
2TH 2:2 होय सकय कि परमेश्वर को तरफ सी आवन वालो सन्देश, वचन अऊर चिट्ठी को द्वारा, जो कि मानो हमरो तरफ सी हय, यो समझ क कि प्रभु को दिन आय गयो हय, तुम्हरो मन अचानक अस्थिर नहीं होय जाय अऊर नहीं तुम दु:खी हो।
2TH 2:3 कोयी रीति सी कोयी को धोका म नहीं आवनो, कहालीकि तब तक परमेश्वर को दिन नहीं आयेंन जब तक परमेश्वर को खिलाफ आखरी विद्रोह नहीं होयेंन, अऊर ऊ पाप को आदमी मतलब दुष्ट आदमी प्रगट नहीं होयेंन ओख नरक म डाल दियो जायेंन।
2TH 2:4 ऊ विरोध करय हय, अऊर हर एक सी जो हर एक ईश्वर यां पूजा की चिज को विरोध करय हय, अपनो आप ख ओको सी बड़ो ठहरावय हय, यहां तक कि ऊ परमेश्वर को मन्दिर म बैठ क अपनो आप ख ईश्वर ठहरावय हय।
2TH 2:5 का तुम्ख याद नहाय कि जब मय तुम्हरो संग होतो, त तुम सी या बाते कह्यो करत होतो?
2TH 2:6 तुम वा बातों ख जानय हय, जो ओख आनो सी रोक रह्यो हय कि ऊ दुष्ट आदमी ठीक समय आयेंन।
2TH 2:7 कहालीकि दुष्टता की लूकी हुयी शक्तियां अभी भी काम करय हय, पर अभी एक रोकन वालो हय, अऊर जब तक ऊ दूर नहीं होय जाये ऊ रोक्यो रहेंन।
2TH 2:8 तब ऊ अधर्मी प्रगट होयेंन, जब प्रभु यीशु मसीह आयेंन तब अपनो मुंह को फूक सी मार डालेंन, अऊर अपनो आगमन को तेज सी भस्म करेंन।
2TH 2:9 ऊ दुष्ट आदमी को आवनो शैतान की सामर्थ को अनुसार सब तरह को झूठो चमत्कार, अऊर अद्भुत काम करेंन,
2TH 2:10 अऊर नाश होन वालो लायी अधर्म को सब तरह को धोका को संग होयेंन; कहालीकि उन्न सच सी प्रेम नहीं करयो जेकोसी ओको उद्धार होतो।
2TH 2:11 योच वजह परमेश्वर उन्म भटकाय देन वाली सामर्थ ख भेजेंन कि हि झूठ पर विश्वास करे,
2TH 2:12 ताकि जितनो लोग सत्य पर विश्वास नहीं करय, यानेकि अनैतिकता सी खुश होवय हंय, हि सब दोषी होयेंन।
2TH 2:13 हे भाऊवों-बहिनों, प्रभु को प्रिय लोगों, चाहजे हय कि हम तुम्हरो बारे म हमेशा परमेश्वर को धन्यवाद करतो रहे, कहालीकि परमेश्वर न पहिले सी तुम्ख चुन लियो कि पवित्र आत्मा को द्वारा पवित्र बन क, अऊर सच पर विश्वास कर क् उद्धार पावों,
2TH 2:14 जेको लायी ओन तुम्ख हमरो सुसमाचार को द्वारा बुलायो, कि तुम हमरो प्रभु यीशु मसीह की महिमा म सहभागी हो।
2TH 2:15 येकोलायी हे भाऊवों-बहिनों, स्थिर रहो; अऊर जो जो बाते तुम न प्रचार यां चिट्ठी को द्वारा हम ख जो दियो हंय, उन्ख पकड़्यो रहो।
2TH 2:16 हमरो प्रभु यीशु मसीह खुदच, अऊर हमरो बाप परमेश्वर, जेन हम सी प्रेम रख्यो अऊर अनुग्रह सी अनन्त उत्साह अऊर अच्छी आशा हम्ख दियो हय,
2TH 2:17 तुम्हरो मनों म शान्ति दे अऊर तुम्ख हर एक अच्छो काम अऊर वचन म मजबूत करे।
2TH 3:1 आखरी म हे भाऊवों-बहिनों, हमरो लायी प्रार्थना करो कि प्रभु को सन्देश असो जल्दी फैलेंन अऊर लोग ओख आदर को संग स्वीकार करे, जो तुम म भयो,
2TH 3:2 अऊर हम टेढ़ो अऊर बुरो आदमियों सी बच्यो रहो कहालीकि हर एक न सन्देश पर विश्वास नहीं करयो।
2TH 3:3 पर प्रभु विश्वास लायक हय; ऊ तुम्ख मजबुतायी सी स्थिर करेंन अऊर ऊ दुष्ट सी बचायो रखेंन।
2TH 3:4 हम्ख प्रभु म तुम्हरो पर भरोसा हय कि जो जो आज्ञा हम तुम्ख देजे हंय, उन्ख तुम मानय हय, अऊर मानतो भी रहो।
2TH 3:5 परमेश्वर को प्रेम अऊर मसीह की हिम्मत को संग प्रभु तुम्हरो मन की अगुवायी करे।
2TH 3:6 हे भाऊवों-बहिनों, हम तुम्ख अपनो प्रभु यीशु मसीह को नाम सी आज्ञा देजे हंय कि तुम हर एक असो विश्वासी भाऊवों सी अलग रहो जो अनुचित चाल चलय अऊर जो शिक्षा ओन हम सी पायी ओको अनुसार नहीं करय।
2TH 3:7 कहालीकि तुम खुद जानय हय कि कोयी रीति सी हमरो जसी चाल चलनो चाहिये, कहालीकि जब हम तुम्हरो संग म होतो त आलसी नहीं होतो,
2TH 3:8 अऊर कोयी की रोटी फुकट म नहीं खायी; पर मेहनत सी रात दिन काम अऊर धन्दा करत होतो कि तुम म सी कोयी पर बोझ नहीं होय।
2TH 3:9 यो नहीं कि हम्ख अधिकार नहाय, पर येकोलायी कि अपनो आप ख तुम्हरो लायी आदर्श ठहराये कि तुम हमरो जसी चाल चलो।
2TH 3:10 कहालीकि जब हम तुम्हरो संग होतो, तब भी या आज्ञा तुम्ख देत होतो कि “यदि कोयी काम करनो नहीं चाहवय त खानो भी नहीं पाये।”
2TH 3:11 हम सुनजे हय कि कुछ लोग तुम्हरो बीच म आलसी हय, अऊर कुछ काम नहीं करय पर दूसरों को काम म बाधा डालय हंय।
2TH 3:12 असो ख हम प्रभु यीशु मसीह म आज्ञा देजे अऊर बिनती करजे हंय कि चुपचाप काम कर क् अपनीच रोटी खायो करो।
2TH 3:13 तुम, हे भाऊवों-बहिनों, भलायी करनो म हिम्मत मत छोड़ो।
2TH 3:14 यदि कोयी हमरी या चिट्ठी की बात ख नहीं मानय त ओख पर नजर रखो, अऊर ओकी संगति मत करो, जेकोसी ऊ शरम आय।
2TH 3:15 तब भी ओख दुश्मन मत समझो, पर विश्वासी जान क चितावो।
2TH 3:16 अब प्रभु जो शान्ति को स्रोता हय खुदच तुम्ख हमेशा अऊर हर समय अऊर हर तरह सी शान्ति दे। प्रभु तुम सब को संग रहे।
2TH 3:17 मय, पौलुस, अपनो हाथ सी नमस्कार लिखू हय, यो तरह हर एक चिट्ठी ख लिखू हय अऊर सही करू हय।
2TH 3:18 हमरो प्रभु यीशु मसीह को अनुग्रह तुम सब पर होतो रहेंन।
1TI 1:1 हमरो उद्धारकर्ता परमेश्वर अऊर हमरी आशा को आधार मसीह यीशु की आज्ञा सी मसीह यीशु को प्रेरित पौलुस को तरफ सी हय।
1TI 1:2 तीमुथियुस को नाम जो विश्वास म मोरो सच्चो बेटा हय: पिता परमेश्वर, अऊर हमरो प्रभु मसीह यीशु को तरफ सी तोख कृपा, दया अऊर शान्ति मिलती रहेंन।
1TI 1:3 जसो मय न मकिदुनिया ख जातो समय तोख समझायो होतो, कि इफिसुस म रह्य क कुछ लोगों ख बिनती करी कि झूठी शिक्षा मत दे,
1TI 1:4 उन्ख तुम असो कहो कि जो उन पुरानी काल्पनिक कहानियों अऊर अनन्त वंशावलियों पर मन नहीं लगाये, जिन्कोसी झगड़ा होवय हंय, अऊर यो परमेश्वर को काम नहीं, यो विश्वास द्वारा हय।
1TI 1:5 आज्ञा को उद्देश यो हय कि प्रेम, शुद्ध मन अऊर अच्छो विवेक, अऊर निष्कपट विश्वास को द्वारा आवय हय।
1TI 1:6 इन ख छोड़ क कितनो लोग फालतु बात को तरफ भटक गयो हंय,
1TI 1:7 अऊर व्यवस्थापक त बननो चाहवय हंय, पर जो बाते कह्य अऊर जिन ख मजबुतायी सी बोलय हंय, उन्ख समझय भी नहाय।
1TI 1:8 पर हम जानजे हंय कि यदि कोयी व्यवस्था ख ठीक रीति सी काम म लाये त ऊ ठीक हय।
1TI 1:9 हम यो भी जानजे हय कि व्यवस्था अच्छो लोग को लायी नहाय पर व्यवस्था तोड़न वालो, विद्रोही, परमेश्वर को अपमान करन वालो, पापियों, अपवित्र अऊर अधार्मिक आदमियों, माय बाप को, हत्या करन वालो।
1TI 1:10 व्यभिचारियों, पुरुषगामियों, गुलामों ख बेचन वालो, झूठ बोलन वालो, अऊर झूठी गवाही देन वालो, अऊर इन्को अलावा सच्चो सिद्धान्त की शिक्षा को सब विरोधियों को लायी ठहरायो गयो हय।
1TI 1:11 यो सुसमाचार महिमामय परमेश्वर जेको जवर पूरी आशीषें हय ओको द्वारा मोख सौंप्यो गयो हय।
1TI 1:12 मय अपनो प्रभु मसीह यीशु को जेन मोख सामर्थ दियो हय, धन्यवाद करू हय कि ओन मोख विश्वास लायक समझ क अपनो सेवा लायी चुन लियो हय।
1TI 1:13 मय त फिर भी पहिले निन्दा करन वालो, अऊर सतावन वालो, अऊर हिन्सा करन वालो होतो, तब भी मोरो पर दया भयी, कहालीकि मय न अविश्वास की दशा म बिना समझ्यो यो काम करत होतो।
1TI 1:14 अऊर हमरो प्रभु को अनुग्रह ऊ विश्वास अऊर प्रेम को संग जो मसीह यीशु म हय, बहुतायत सी भयो।
1TI 1:15 या बात सच अऊर हर तरह सी मानन लायक हय मसीह यीशु पापियों को उद्धार करन लायी जगत म आयो, उन म सी सब सी बड़ो पापी मय आय।
1TI 1:16 पर मोरो पर येकोलायी दया भयी कि मय सब सी बड़ो पापी म यीशु मसीह अपनी पूरी सहनशीलता दिखाये, कि जो लोग ओको पर विश्वास करेंन हि अनन्त जीवन लायी मय एक आदर्श बनू।
1TI 1:17 अब अनन्त युग को राजा मतलब अविनाशी, अनदेखे, केवल एक परमेश्वर को आदर अऊर महिमा हमेशा होती रहे। आमीन।
1TI 1:18 हे मोरो बेटा तीमुथियुस, जो तोरो बारे म वचन कि भविष्यवानी करी गयी होती ओको अनुसार, मय आज्ञा देऊ हय कि तय वचन ख अवजार को अनुसार अच्छी लड़ाई लड़तो रहे,
1TI 1:19 अऊर विश्वास अऊर ऊ अच्छो विवेक ख पकड़्यो रख, जेक नकारन को वजह कितनो को विश्वास रूपी जहाज डुब गयो।
1TI 1:20 उनच म सी हुमिनयुस अऊर सिकन्दर हंय, जिन्ख मय न शैतान ख सौंप दियो हय कि ताकी ऊ सिखे कि दूसरों की निन्दा करनो बन्द कर दे।
1TI 2:1 जब मय सब सी पहिले यो आग्रह करू हय कि बिनती, प्रार्थना, निवेदन, अऊर धन्यवाद सब लोगों को लायी करयो जाये।
1TI 2:2 राजावों अऊर सब ऊचो पद वालो को निमित्त येकोलायी कि हम शान्ति अऊर चैन को संग परमेश्वर ख आदर देतो हुयो अऊर पवित्रता सी जीवन बिताये।
1TI 2:3 यो अच्छो हय अऊर हमरो उद्धारकर्ता परमेश्वर ख स्वीकार लायक हय,
1TI 2:4 जो यो चाहवय हय कि सब आदमियों बचायो जाये, अऊर हि सच को ज्ञान ख अच्छो सी जान ले।
1TI 2:5 कहालीकि परमेश्वर एकच हय, अऊर परमेश्वर अऊर आदमियों को बीच म भी एकच मध्यस्थी हय, मतलब मसीह यीशु जो आदमी हय।
1TI 2:6 यीशु न अपनो आप ख सब को छुटकारा को दाम को तौर पर खुद ख बलिदान कर दियो, अऊर येकी गवाही ठीक समय पर दी गयी।
1TI 2:7 या गवाही लायी मय सच कहू हय, झूठ नहीं बोलू, कि मय योच उद्देश सी प्रचारक अऊर प्रेरित अऊर गैरयहूदियों लायी विश्वास अऊर सच्चो विश्वास को शिक्षक नियुक्त करयो गयो हय।
1TI 2:8 मण्डली म आराधना को समय मय चाहऊ हय सब लोग हाथ उठाय क प्रार्थना करे हर जागा आदमी बिना गुस्सा अऊर वाद विवाद को पवित्र हाथों ख उठाय क प्रार्थना करतो रहे।
1TI 2:9 मय यो भी चाहऊ हय कि बाईयां भी अपनो आप ख सभ्यता अऊर नम्रता को संग, सोभायमान कपड़ा सी अपनो आप ख संवारे; नहीं की बाल गूथनो अऊर सोना अऊर मोतियों अऊर बहुमूल्य कपड़ा सी,
1TI 2:10 पर अच्छो कामों सी, कहालीकि परमेश्वर की भक्ति करन वाली बाईयों ख योच ठीक हय।
1TI 2:11 बाई ख शान्तता अऊर पूरी अधीनता सी सीखनो चाहिये।
1TI 2:12 मय अनुमति नहीं देऊ हय कि बाई शिक्षा दे, अऊर नहीं आदमी पर अधिकार जताये, पर चुपचाप रहे।
1TI 2:13 कहालीकि आदम ख पहिले बनायो गयो, ओको बाद हवा ख बनायो गयो;
1TI 2:14 अऊर आदम जो बहकायो गयो होतो, पर बाई बहकाव म आय गयी होती अऊर ओन परमेश्वर को नियम ख तोड़्यो।
1TI 2:15 तब भी बच्चा जनन को द्वारा उद्धार पायेंन, यदि वा सभ्यता को संग विश्वास, प्रेम, अऊर पवित्रता म स्थिर रहे।
1TI 3:1 यदि कोयी अपनो मन म तय कर लियो हय कि जो मुखिया बननो चाहवय हय, ऊ अच्छो पद कि इच्छा करय हय।
1TI 3:2 यो जरूरी हय कि मण्डली को मुखिया निर्दोष, अऊर एकच पत्नी को पति, सभ्य, आत्मसंयमी, आदरनिय, अतिथि-सत्कार करन वालो, अऊर सिखावन म निपुन हो।
1TI 3:3 पिवन वालो यां मार पीट करन वालो मत बनो; बल्की नरम स्वभाव हो, अऊर नहीं झगड़ालू, अऊर नहीं धन को लालची हो।
1TI 3:4 ऊ अपनो घर को अच्छो इन्तजाम करय हय, अऊर अपनो बाल-बच्चा ख असो अनुशासन म रखे की ओको आज्ञा पालन करतो हुयो ओको आदर करन वालो हो।
1TI 3:5 जब यदि कोयी अपनो घरच को इन्तजाम करनो नहीं जानय हय, त परमेश्वर की मण्डली की रखवाली कसो करेंन?
1TI 3:6 फिर यो कि विश्वास म परिपक्क हो, असो नहीं हो कि घमण्ड कर क् शैतान को जसो सजा पाये।
1TI 3:7 अऊर मण्डली को बाहेर वालो म भी ओको अच्छो नाम हो, असो नहीं होय कि अपमानित होय क शैतान को फन्दा म फस जाय।
1TI 3:8 वसोच मण्डली को सेवकों ख भी समझदार होनो चाहिये, कपटी, पियक्कड़ अऊर नहीं पैसा को लोभी हो;
1TI 3:9 पर विश्वास को सच ख शुद्ध विवेक सी गहरायी सी पकड़्यो रखे।
1TI 3:10 अऊर यो उन्की भी पहिले परख होय जाये, तब यदि निर्दोष निकले त मण्डली को सेवक को काम करे।
1TI 3:11 योच तरह सी उन्की पत्नियों आदर पावन को लायक बाईयां हो यां निन्दा करन वाली नहीं हो, पर सभ्य अऊर पूरी बातों म विश्वास लायक हो।
1TI 3:12 मण्डली को सेवक ख एकच पत्नी को पति रहे अऊर बाल-बच्चा अऊर अपनो घरो को अच्छो इन्तजाम करनो जानत होना।
1TI 3:13 जो मण्डली को सेवक अच्छो काम करय हंय, हि अपनो लायी अच्छो पद अऊर मसीह यीशु म विश्वास को बारे म महान निश्चिता ख प्राप्त करय हय, अऊर बड़ी हिम्मत सी बोलय हंय।
1TI 3:14 मय तोरो जवर जल्दी आवन की आशा रखन पर भी या चिट्ठी तोख लिखू हय,
1TI 3:15 कि यदि मोख देर होय जावय हय, त या चिट्ठी सी जानो कि तुम लोग परमेश्वर को घराना म जो जीन्दो परमेश्वर की मण्डली हय अऊर जो सच को खम्बा अऊर नीव हय, लोगों न आपस म कसो चाल चलन करनो चाहिये।
1TI 3:16 येको म सक नहाय कि भक्ति को भेद गम्भीर हय, मतलब ऊ जो शरीर म प्रगट भयो, आत्मा म सच्चो ठहरयो, स्वर्गदूतों ख दिखायी दियो, अऊर उन्को बारे म कुछ राष्ट्रों म ओको प्रचार करयो गयो, जगत म ओको पर विश्वास करयो गयो, अऊर महिमा म ऊपर उठायो गयो।
1TI 4:1 पवित्र आत्मा स्पष्टता सी कह्य हय कि आवन वालो समयो म कितनो लोग भटकावन वाली आत्मावों, को पीछू चलेंन, अऊर विश्वास ख छोड़ देयेंन अऊर भटकावन वाली आत्मावों अऊर दुष्ट आत्मा द्वारा सिखायी हुयी बातों को पीछू चलेंन।
1TI 4:2 यो उन झूठो कपटी आदमियों को वजह होयेंन, जिन्को अन्तरमन मर गयो हय जसो की जलतो हुयो लोहा सी लसायो गयो हय,
1TI 4:3 जो बिहाव करन सी रोकेन, अऊर भोजन की कुछ चिजों सी दूर रहन की आज्ञा देयेंन, जिन्ख परमेश्वर न येकोलायी बनायो कि विश्वासी अऊर सच को पहिचानन वालो ओख धन्यवाद को संग खाये।
1TI 4:4 कहालीकि परमेश्वर न बनायी हुयी हर एक चिज अच्छी हय, पर कोयी चिज अस्वीकार करन को लायक नहाय; पर यो कि धन्यवाद को संग खायी जाये,
1TI 4:5 कहालीकि परमेश्वर को वचन अऊर प्रार्थना सी शुद्ध होय जावय हय।
1TI 4:6 यदि तय भाऊवों ख इन बातों को याद दिलातो रहजो, अऊर विश्वास की सच्चायी सी अऊर अच्छी शिक्षा की बातों सी, जो तय मानत आयो हय त मसीह यीशु को अच्छो सेवक ठहरजो।
1TI 4:7 परमेश्वर रहित कथा कहानियां अऊर बूढ्ढिंयो द्वारा सुनायी कहानियों सी अलग रह्य; अऊर भक्ति की साधना कर।
1TI 4:8 कहालीकि शरीर की साधना सी कम फायदा होवय हय, पर भक्ति सब बातों को लायी लाभदायक हय, कहालीकि यो समय को जीवन अऊर आवन वालो जीवन को भी आश्वासन येकोच लायी हय।
1TI 4:9 या बात सच हय अऊर हर तरह सी विश्वास लायक अऊर मानन लायक हय।
1TI 4:10 कहालीकि हम मेहनत अऊर कोशिश येकोलायी करजे हंय कि हमरी आशा ऊ जीन्दो परमेश्वर पर हय, जो सब आदमियों को अऊर विशेष कर विश्वासियों को उद्धारकर्ता हय।
1TI 4:11 इन बातों की आज्ञा दे अऊर सिखातो रह्यो।
1TI 4:12 कोयी तोरी जवानी ख बेकार नहीं समझे; पर बातों म, अऊर चाल-चलन, अऊर प्रेम, अऊर विश्वास, अऊर पवित्रता म विश्वासियों को लायी आदर बन जा।
1TI 4:13 जब तक मय नहीं आऊं, तब तक शास्त्र ख पढ़न अऊर उपदेश देन अऊर सिखावन म मगन रह्य।
1TI 4:14 जो वरदान तोख दियो गयो हय, अऊर भविष्यवानी सी बुजूर्गों को हाथ रखतो समय तोख मिल्यो होतो, अनदेखो मत कर।
1TI 4:15 इन बातों ख सोचतो रह्य अऊर इनमच अपनो ध्यान लगायो रह्य, ताकि तोरी उन्नति सब लोगों पर प्रगट हो।
1TI 4:16 अपनो जीवन की अऊर अपनो शिक्षा की चौकसी रख। इन बातों पर स्थिर रह्य, कहालीकि यदि असो करतो रहजो त तय अपनो अऊर अपनो सुनावन वालो लायी भी उद्धार को वजह होजो।
1TI 5:1 कोयी बुजूर्ग ख कठोरता सी मत डाट, पर ओख बाप समझ क बिनती कर, अऊर जवानों ख भाऊ मान क व्यवहार कर;
1TI 5:2 बूढ्ढी बाईयों ख माता जान क; अऊर जवान बाईयों ख पूरी पवित्रता सी बहिन जान क समझाय दे।
1TI 5:3 उन विधवावों को, ध्यान रख, जो सचमुच जरूरत मन्द हंय।
1TI 5:4 यदि कोयी विधवा को बालबच्चा अऊर नाती-पोता होना, त उन्न अपनो माय बाप अऊर दादा दादी को पालन पोषन को बदला चुकावन अऊर अपनो परिवार की चिन्ता करन को द्वारा अपनो धर्म को कार्य ख अपनो जीवन कार्य म लाये कहालीकि येको सी परमेश्वर खुश होवय हय।
1TI 5:5 जो विधवा सचमुच जरूरत मन्द हय, अऊर ओको कोयी नहाय, अऊर ओन अपनी पूरी आशा वा परमेश्वर पर रखी हय, अऊर रात दिन बिनती अऊर प्रार्थना करतो हुयो परमेश्वर सी मदत मांगय हय;
1TI 5:6 पर जो विधवा भोगविलास म जीवय हय, वा जीतो जी मर गयी हय।
1TI 5:7 इन बातों को भी निर्देश दियो कर ताकि हि निर्दोष रहे।
1TI 5:8 पर यदि जो कोयी अपनो रिश्तेदार अऊर अपनो घराना की चिन्ता नहीं करेंन, त ऊ विश्वास सी मुकर गयो हय अऊर अविश्वासी सी भी बुरो बन गयो हय।
1TI 5:9 उन विधवा को सुची म आर्थिक मदत ले रही हय वाच विधवा को नाम लिख्यो जाये जो साठ साल सी कम की नहीं हो, अऊर एकच पति की विश्वास लायक हो,
1TI 5:10 अऊर भलो काम म अच्छी रही हो, जेन बच्चा को पालन-पोषन करयो होना; अतिथियों की सेवा करी होना, सन्तो को पाय धोयो होना, दुखियों कि मदत करी होना, अऊर हर एक अच्छो काम म मन लगायो होना।
1TI 5:11 पर जवान विधवावों ख सुची म सम्मिलित मत करो, कहालीकि मसीह को प्रति उन्को समर्पन पर जब उनकी विषय वासना की पूरी इच्छा हावी होवय हय त हि बिहाव करनो चाहवय हंय,
1TI 5:12 अऊर दोषी ठहरावय हंय, कहालीकि उन्न अपनो पहिले प्रतिज्ञा ख तोड़ दियो हय।
1TI 5:13 येको अलावा बिना काम को बनय हय अऊर घर-घर घुम क आलसी होनो सीखय हंय, अऊर केवल आलसी होनोच नहीं घर घर बाते करती रह्य हय अऊर बेवजह व्यस्त होवय हय असी बाते बोलय हय जो उन्ख नहीं बोलनो चाहिये।
1TI 5:14 येकोलायी मय यो चाहऊ हय कि जवान विधवाये बिहाव करे, अऊर बच्चा जने अऊर घरदार सम्भाले, अऊर कोयी विरोधी ख बदनाम करन को अवसर नहीं दे।
1TI 5:15 कहालीकि कुछ एक बहक क शैतान को पीछू भय गयो हंय।
1TI 5:16 यदि कोयी विश्वासिनी को यहां विधवाये होना, त वाच उनकी मदत करेंन कि मण्डली पर बोझ नहीं हो, ताकि ऊ उनकी मदत कर सकेंन जो सचमुच विधवाये जरूरत मन्द हंय।
1TI 5:17 जो बुजूर्ग मण्डली को अच्छो इन्तजाम करय हंय, विशेष कर क् हि जो वचन सुनावन अऊर सिखावन म मेहनत करय हंय, दोय गुना मजूरी को लायक समझ्यो जाये।
1TI 5:18 कहालीकि शास्त्र कह्य हय, “दांवन वालो बईल को मुंह मत बान्धजो,” कहालीकि “मजूर अपनी मजूरी को हक्कदार हय।”
1TI 5:19 कोयी दोष कोयी बुजूर्ग पर लगायो जाय त दोय यां तीन गवाहों को बिना ओख मत सुन।
1TI 5:20 पाप करन वालो ख सब को सामने डाट दे, ताकि अऊर लोग भी डरे।
1TI 5:21 परमेश्वर, अऊर मसीह यीशु अऊर चुन्यो हुयो स्वर्गदूतों ख मौजूद जान क मय तोख चेतावनी देऊ हय इन निर्देषो ख मानतो रह्य, अऊर बिना मतभेद को कोयी भी काम पक्षपात अऊर कोयी एक को बाजू ले क मत कर।
1TI 5:22 मण्डली सेवा नियुक्ति लायी कोयी पर तुरतच हाथ मत रखजो, अऊर दूसरों को पापों म सामिल मत होजो; अपनो आप ख पवित्र बनायो रखजो।
1TI 5:23 केवल पानीच पीवन वालो मत रह्य, पर अपनो पेट को अऊर अपनो बार-बार बीमार होन को वजह थोड़ो-थोड़ो अंगूररस भी काम म लायो कर।
1TI 5:24 कुछ लोगों को पाप प्रगट होय जावय हंय अऊर न्याय लायी पहिले सी पहुंच जावय हंय, पर कुछ लोगों को पाप बाद म प्रगट होवय हंय।
1TI 5:25 योच तरह अच्छो काम भी स्पष्ट रूप सी प्रगट होवय हय पर जो काम प्रगट नहीं होवय हि लूक नहीं सकय।
1TI 6:1 जितनो सेवक गुलामी को बोझ म हंय, हि अपनो अपनो स्वामी ख बड़ो आदर लायक जाने, ताकि परमेश्वर को नाम अऊर शिक्षा की निन्दा नहीं हो।
1TI 6:2 जिन्को स्वामी विश्वासी हंय उन्ख हि भाऊ होन को वजह कम आदर नहीं दिखाये। बल्की उनकी अऊर भी जादा सेवा करे, कहालीकि सेवा फायदा मिलय हय हि विश्वासी हय अऊर हि उन ख प्रिय हंय। इन बातों ख सिखावो अऊर करन को लायी असोच प्रोत्साहित करतो रहो।
1TI 6:3 यदि कोयी अऊरच तरह की शिक्षा देवय हय अऊर सच्ची बातों ख, मतलब हमरो प्रभु यीशु मसीह को निर्देषो ख अऊर वा शिक्षा ख नहीं मानय, जो दैविय शिक्षा को अनुसार हय,
1TI 6:4 त ऊ घमण्डी भय गयो, अऊर कुछ नहीं जानय; बल्की ओख झगड़ा अऊर शब्दों पर दिमाग लगावन को रोग हय, जेकोसी जलन, अऊर झगड़ा, अऊर निन्दा की बाते, अऊर बुरो-बुरो शक,
1TI 6:5 अऊर उन आदमियों म बेकार लड़ाई-झगड़ा पैदा होवय हंय जिन्की बुद्धि भ्रष्ट भय गयी हय, अऊर हि सत्य सी दूर भय गयो हंय, जो सोचय हंय कि भक्ति कमायी को द्वार हय।
1TI 6:6 पर सन्तुष्ट सहित भक्ति करनोंच सब सी बड़ी कमायी हय।
1TI 6:7 कहालीकि हम जगत म कुछ नहीं लायो हंय अऊर नहीं कुछ लिजाय सकजे हंय।
1TI 6:8 यदि हमरो जवर खान ख अऊर पहिनन ख हो, त इन्कोच पर सन्तुष्ट करनो चाहिये।
1TI 6:9 पर जो धनी होनो चाहवय हंय, हि असी परीक्षा अऊर फन्दा अऊर बहुत सी मुर्खतापूर्न अऊर हानिकारक लालसा म फसय हंय, जो आदमियों ख बिगाड़ देवय हंय अऊर विनाश की गहरी खायी म ढकेल देवय हंय।
1TI 6:10 कहालीकि पैसा को लोभ सब तरह की बुरायीयों की जड़ी आय, जेक हासिल करन की कोशिश करतो हुयो बहुत सो न विश्वास सी भटक क अपनो आप ख कुछ तरह को दु:खों म फस गयो हय।
1TI 6:11 पर हे परमेश्वर को लोग, तय इन बातों सी भग, अऊर सच्चायी, भक्ति, विश्वास, प्रेम, धीरज अऊर नम्रता को पीछा कर।
1TI 6:12 विश्वास की अच्छी दवड़; अऊर ऊ अनन्त जीवन ख हासिल कर ले, जेको लायी तय बुलायो गयो अऊर बहुत सो गवाहों को सामने अच्छो अंगीकार करयो होतो।
1TI 6:13 मय तोख या आज्ञा परमेश्वर को सामने, जो सब ख जीवन देवय हय, अऊर मसीह यीशु ख गवाह कर क् जेन पुन्तियुस पिलातुस को सामने अच्छी गवाही दी, या आज्ञा देऊ हय,
1TI 6:14 कि तय हमरो प्रभु यीशु मसीह ख प्रगट होन तक या आज्ञा ख निष्कलंक अऊर निर्दोष रख,
1TI 6:15 परमेश्वर ओख सही समय पर प्रगट करेंन जो आशिषित हय, ऊ एकच शासक अऊर राजावों को राजा अऊर प्रभुवों को प्रभु हय।
1TI 6:16 अऊर अमरता केवल ओकीच हय, अऊर ऊ ज्योति म रह्य हय, जित तक कोयी पहुंच नहीं सकय हय, अऊर नहीं ओख कोयी आदमी न देख्यो अऊर नहीं कभी देख सकय हय। ऊ प्रतिष्ठा अऊर राज्य अनन्त काल तक रहेंन। आमीन।
1TI 6:17 यो जगत को धनवानों ख आज्ञा दे कि हि घमण्डी मत बनो अऊर अनिश्चित धन पर आशा नहीं रखे, पर परमेश्वर पर जो हमरो सुख को लायी सब कुछ बहुतायत सी देवय हय।
1TI 6:18 उन्ख आज्ञा दे की हि भलायी करे, अऊर भलो कामों म धनी बने, अऊर उदारता सी मदत देन म तैयार रहे,
1TI 6:19 अऊर आगु लायी एक अच्छी नीव डाल रखे कि सच्चो जीवन ख वश म कर ले।
1TI 6:20 हे तीमुथियुस, यो धरोहर की रखवाली कर; अऊर जेक कुछ लोग गलत बात ज्ञान कह्य हय, उन्को अधार्मिक वाद विवाद अऊर विरोध की बातों सी दूर रह्य।
1TI 6:21 कितनो लोगों न प्रतिज्ञा करयो हय कि उन्ख ज्ञान हय फिर भी हि विश्वास सी भटक गयो हंय। तुम पर अनुग्रह होतो रहे।
2TI 1:1 पौलुस को तरफ सी जो परमेश्वर की इच्छा सी जो मसीह यीशु को प्रेरित हय, अऊर जेक मसीह यीशु म एक होन लायी प्रतिज्ञा को प्रचार करन लायी भेज्यो हय।
2TI 1:2 प्रिय बेटा तीमुथियुस को नाम परमेश्वर बाप अऊर हमरो प्रभु मसीह यीशु की तरफ सी मोख अनुग्रह अऊर दया अऊर शान्ति मिलती रहे।
2TI 1:3 मय परमेश्वर ख धन्यवाद करू हय जेकी सेवा मय शुद्ध विवेक सी करू हय, जसो मोरो बाप दादावों न करयो। अऊर रात दिन जब मय हमेशा अपनी प्रार्थनावों म तुम्ख याद करू हय, तब मय ओख धन्यवाद करू हय।
2TI 1:4 अऊर तोरो आसुवों की सुधि ले क तोरो सी मिलन की आशा रखू हय कि खुशी सी भर जाऊं।
2TI 1:5 मय तोरो ऊ सच्चो विश्वास की याद करू हय, जो पहिले तोरी आजी लोइस अऊर तोरी माय यूनीके म होती, अऊर तोख निश्चय हय कि उच विश्वास तोरो म भी हय।
2TI 1:6 योच वजह मय तोख याद दिलाऊं हय कि तय ऊ वरदान ख जीन्दो रख जो तोरो ऊपर मोरो हाथ रखन को द्वारा परमेश्वर न तोख दियो।
2TI 1:7 कहालीकि परमेश्वर न हम्ख डर की नहीं पर सामर्थ, प्रेम अऊर संय्यम की आत्मा दी हय।
2TI 1:8 येकोलायी हमरो प्रभु की गवाही सी, अऊर मोरो सी जो मसीह को कैदी हय, लज्जित मत हो, पर ऊ सामर्थ जो परमेश्वर न तोख दी हय ओको अनुसार सुसमाचार को लायी मोरो संग दु:ख उठाव।
2TI 1:9 जेन हम्ख बचायो अऊर पवित्र जीवन जीन को लायी बुलायो, अऊर यो हमरो कामों को अनुसार नहीं; पर ओको उद्देश अऊर ऊ अनुग्रह को अनुसार हय। ओन यो अनुग्रह हम पर करयो हय मतलब प्रभु यीशु मसीह को द्वारा अनन्त काल को सुरूवात सी हम पर भयो हय।
2TI 1:10 पर अब हमरो उद्धारकर्ता मसीह यीशु को प्रगट होनो सी प्रगट भयो। जेन मृत्यु को सामर्थ ख नाश करयो अऊर अनन्त जीवन को सुसमाचार को द्वारा प्रगट करयो।
2TI 1:11 जेको लायी परमेश्वर न मोख प्रचारक, प्रेरित अऊर शिक्षक लायी नियुक्त करयो, ताकी मय सुसमाचार की घोषना करू।
2TI 1:12 यो वजह मय इन दु:खों ख भी उठाऊ हय, पर लजाऊ नहीं, कहालीकि मय ओख जेक पर मय न विश्वास करयो हय, जानु हय; अऊर मोख निश्चय हय कि वा मोरी धरोहर की ऊ दिन तक रखवाली कर सकय हय।
2TI 1:13 जो सही बाते मोरो सी सुनी हय कि प्रभु यीशु मसीह म अच्छी शिक्षा, विश्वास अऊर प्रेम को संग, एक आदर्श को रूप म कायम रख।
2TI 1:14 अऊर पवित्र आत्मा सी जो हम म बस्यो हुयो हय, या अच्छी बातों की रखवाली कर।
2TI 1:15 तय जानय हय कि आसिया प्रान्त वालो सब मोरो सी फिर गयो हंय, जिन्म फूगिलुस अऊर हिरमुगिनेस हंय।
2TI 1:16 उनेसिफुरुस को घरानों पर प्रभु दया करेंन, कहालीकि ओन बहुत बार मोख सुख पहुंचायो तथा ऊ मोरी संकली म रहन सी लज्जित नहीं भयो।
2TI 1:17 पर जब ऊ रोम शहर म आयो, जब तक मय नहीं मिल्यो तब तक मोख ढूंढतो रह्यो।
2TI 1:18 प्रभु करे कि ऊ दिन ओको पर प्रभु की दया हो अऊर जो जो सेवा ओन इफिसुस म करी हय उन्ख भी तय अच्छो सी जानय हय।
2TI 2:1 येकोलायी हे मोरो बेटा, तय ऊ अनुग्रह सी जो यीशु मसीह म हमरी एकता को द्वारा हय, बलवन्त हो जाय;
2TI 2:2 अऊर जो शिक्षाये तय न बहुत सो गवाह को सामने मोरो सी सुनी हंय, उन्ख विश्वासी आदमियों ख सौंप दे; जो दूसरों ख भी सिखावन को लायक हो।
2TI 2:3 मसीह यीशु को अच्छो योद्धा को जसो मोरो संग दु:ख उठाव।
2TI 2:4 जब कोयी योद्धा लड़ाई पर जावय हय, त येकोलायी कि अपनो भरती करन वालो ख खुश करे, अपनो आप ख जगत को कामों म नहीं फसावय।
2TI 2:5 अगर कोयी अपनी दवड़ म व्यवस्था को पालन नहीं करे त ईनाम नहीं पावय।
2TI 2:6 जो किसान मेहनत करय हय, उपज को पहिलो हिस्सा ओख मिलनो चाहिये।
2TI 2:7 जो मय कहू हय ओको पर ध्यान दे, अऊर प्रभु तोख इन सब बातों की समझ देयेंन।
2TI 2:8 असो यीशु मसीह ख याद रख, जो मरयो हुयो म सी जीन्दो भयो, अऊर दाऊद को वंश सी हय अऊर यो मोरो सुसमाचार को अनुसार हय।
2TI 2:9 कहालीकि सुसमाचार सुनावन लायी मय दु:ख उठाऊ हय, अऊर यहां तक कि अपराधी को जसो जंजीरो म बान्ध्यो जाऊं हय। पर परमेश्वर को वचन जंजीरो म बन्ध्यो नहाय।
2TI 2:10 यो वजह मय चुन्यो हुयो लोगों को लायी सब कुछ सहू हय, कि हि भी उद्धार ख जो मसीह यीशु म हय अनन्त महिमा को संग पाये।
2TI 2:11 या बात सच हय, कि यदि हम ओको संग मर गयो हय, त ओको संग जाबोंन भी;
2TI 2:12 यदि हम धीरज सी सहतो रहबोंन, त ओको संग राज भी करबोंन; यदि हम ओको इन्कार करबोंन त ऊ भी हमरो इन्कार करेंन;
2TI 2:13 यदि हम अविश्वासी भी होना, तब भी ऊ विश्वास लायक बन्यो रह्य हय, कहालीकि ऊ खुद अपनो इन्कार नहीं कर सकय।
2TI 2:14 इन बातों की याद उन्ख दिलाव अऊर प्रभु को सामने चिताय दे कि शब्दों पर दिमाग मत लगायो करे, जिन्कोसी कुछ फायदा नहीं होवय बल्की सुनन वालो को आत्मिक रूप सी नाश होय जावय हंय।
2TI 2:15 अपनो आप ख परमेश्वर को स्वीकारन लायक अऊर असो काम करन वालो ठहरान की कोशिश कर, जो लज्जित होनो नहीं पाये, अऊर जो सच को वचन ख ठीक रीति सी सिखावय हय।
2TI 2:16 बेकार अऊर अधार्मिक वाद विवाद सी बच्यो रह्य, कहालीकि या गलत बाते लोगों ख परमेश्वर सी दूर ले जायेंन,
2TI 2:17 असो लोगों कि शिक्षाये खुलो घाव को जसो शरीर म फैलतच जायेंन। हुमिनयुस अऊर फिलेतुस उन्म म सी हय।
2TI 2:18 जो यो कह्य क कि पुनरुत्थान भय गयो हय अऊर सत्य सी भटक गयो हंय कितनो ख त विश्वास सी नाश कर देवय हंय।
2TI 2:19 तब भी परमेश्वर की पक्की नीव बनी रह्य हय, अऊर ओख पर यो छाप लगी हय: “प्रभु अपनो लोगों ख पहिचानय हय,” अऊर “जो कोयी प्रभु को नाम लेवय हय, ऊ अधर्म सी बच्यो रहेंन।”
2TI 2:20 बड़ो घर म नहीं केवल सोना-चांदीच को, पर लकड़ी अऊर माटी को बर्तन भी होवय हंय; कुछ खास अवसर को वापरन को लायी अऊर कुछ साधारन वापरन लायी।
2TI 2:21 यदि कोयी अपनो आप ख बुरी बातों सी शुद्ध करे, त ऊ खास अवसर वापरन को लायी अऊर खास उद्देश को संग कहालीकि ऊ अपनो मालिक लायी समर्पित अऊर उपयोगी होयेंन, अऊर हर एक अच्छो काम लायी उपयोग म लायो जायेंन।
2TI 2:22 जवानी की इच्छावों सी भग, अऊर जो शुद्ध मन सी प्रभु को नाम लेवय हय उन्को संग सच्चो, अऊर विश्वास, अऊर प्रेम, अऊर शान्ति को पीछा कर।
2TI 2:23 पर मूर्खता अऊर नासमझदारी को विवादों सी अलग रह्य, कहालीकि तय जानय हय कि इन्को सी झगड़ा पैदा होवय हंय।
2TI 2:24 प्रभु को सेवक ख झगड़ालू नहीं होनो चाहिये, पर ऊ सब को संग दयालु अऊर सहनशील अऊर अच्छो सिखावन वालो हो।
2TI 2:25 ऊ विरोधियों ख नम्रता सी समझाये, का जाने परमेश्वर उन्ख मौका दे कि हि अपनो पापों सी फिर क मन फिरावय कि हि भी सच ख पहिचानेंन,
2TI 2:26 अऊर हि सचेत होय क शैतान को फन्दा सी छूट जाये। जेन उन्ख ओकी इच्छा पूरी करन लायी बन्दी बनायो।
2TI 3:1 पर यो याद रख कि आखरी दिनो म कठिन समय आयेंन।
2TI 3:2 कहालीकि आदमी स्वार्थी, लालची, अभिमानी, निन्दक, माय बाप की आज्ञा टालन वालो, एहसान नहीं मानन वालो, अपवित्र,
2TI 3:3 प्रेमरहित, क्षमारहित, निन्दा करन वालो, असंयमी, कठोर, भलायी को बैरी,
2TI 3:4 विश्वासघाती, कठोर, अभिमानी, अऊर परमेश्वर को प्रेम नहीं बल्की सुखविलास को चाहन वालो होयेंन।
2TI 3:5 हि भक्ति को भेष त धरेंन, पर ओकी सामर्थ ख नहीं मानेंन; असो लोगों सी दूर रहजो।
2TI 3:6 इन म सी हि लोग हंय जो घरो म चुपचाप घुस आवय हंय, अऊर उन कमजोर बाईयों ख वश म कर लेवय हंय जो पापों को दोष सी दबी अऊर हर तरह की अभिलाषावों को वश म हंय,
2TI 3:7 अऊर हमेशा सीखती त रह्य हय पर सच ख नहीं जानय।
2TI 3:8 जसो यन्नेस अऊर यम्ब्रेस न मूसा को विरोध करयो होतो, वसोच हि भी सच को विरोध करय हंय; हि असो आदमी हंय, जिन्की बुद्धी भ्रष्ट भय गयी हय अऊर हि विश्वास को बारे म असफल हंय।
2TI 3:9 पर हि येको सी आगु नहीं बढ़ सकय, कहालीकि सब लोग उन्की मुर्खता देखेंन कि हि कितनो मुर्ख हय। वसोच जसो यन्नेस अऊर यम्ब्रेस को संग भयो।
2TI 3:10 पर तय मोरी शिक्षा, आचरन, मोरो जीवन जीन को उद्देश, विश्वास, धीरज, प्रेम, अऊर सहनशीलता, या पूरी बातों ख अच्छी तरह सी जानय हय।
2TI 3:11 मोरो सताव अऊर मोरो दु:ख। अन्ताकिया अऊर इकुनियुम अऊर लुस्रा म मोख कितनो भयानक यातनायें दी गयी होती। जेक मय न सह्यो हय तय जानय हय, पर फिर भी प्रभु न मोख इन सब सी छुड़ायो हय।
2TI 3:12 पर जितनो मसीह यीशु म एक रूप होय क भक्ति को संग जीवन जीनो चाहवय हंय हि सब सतायो जायेंन;
2TI 3:13 पर दुष्ट अऊर बहकान वालो धोका देतो हुयो अऊर धोका खातो हुयो, बिगड़तो चली जायेंन।
2TI 3:14 पर तय उन सच की बातों पर जो तय न सिख्यो हंय अऊर विश्वास करयो हय, यो जान क मजबूत बन्यो रह्य कि तय न उन्ख कौन्सो लोगों सी सिख्यो हय,
2TI 3:15 अऊर तय बचपन सी पवित्र शास्त्र ख जानय हय, जो तोख बुद्धी देवय हय कि तय यीशु मसीह म विश्वास को द्वारा उद्धार तक पहुंचे।
2TI 3:16 पूरो पवित्र शास्त्र परमेश्वर की प्रेरना सी रच्यो गयो हय हि लोगों ख सच की शिक्षा देन, अऊर उन्ख सुधारन, अऊर उनकी बुरायी दर्शावन अऊर लायक जीवन जीन को लायी निर्देश देन लायी फायदेमंद हय,
2TI 3:17 ताकि परमेश्वर को लोग पूरी रीति सी सिद्ध होय जाये, अऊर हर एक अच्छो काम को लायी तैयार होय जाये।
2TI 4:1 परमेश्वर अऊर प्रभु यीशु मसीह की उपस्थिति म जो जीन्दो अऊर मरयो हुयो को न्याय करेंन अऊर राजा बन क शासन करन आयेंन। गवाह मान क मय बिनती करू हय।
2TI 4:2 कि तय वचन को प्रचार कर, समय अऊर असमय तैयार रह्य, सब तरह की सहनशीलता अऊर शिक्षा को संग गलती को सुधार करनो अऊर डाटनो अऊर प्रोत्साहित करनो।
2TI 4:3 कहालीकि असो समय आयेंन जब लोग सच्चो उपदेश नहीं सह सकेंन, ऊ केवल खुद ख समाधान मिले असी बाते कानो सी सुनन को लायी अपनी अभिलाषावों को अनुसार अपनो लायी बहुत सो उपदेशक जमा कर लेयेंन,
2TI 4:4 अऊर अपनो कान सच सी फिराय क काल्पनिक कथा कहानियों पर लगायेंन।
2TI 4:5 पर तय सब बातों म खुद पर ध्यान रख, दु:ख उठाव, सुसमाचार प्रचार को काम कर, अऊर अपनी सेवा ख पूरी कर।
2TI 4:6 कहालीकि बली चढ़ावन लायी मोरी घड़ी आय गयी हय, अऊर मोरो यो जीवन ख त्यागन को समय आय गयो हय।
2TI 4:7 मय अच्छी कुश्ती लड़ चुक्यो हय, मय न अपनी दौड़ पूरी कर लियो हय, मय न विश्वास की रखवाली करी हय।
2TI 4:8 भविष्य म मोरो लायी जीत को ईनाम रख्यो हुयो हय। जेक प्रभु, जो सच्चो अऊर सच्चायी हय, मोख ऊ दिन देयेंन, अऊर मोखच नहीं बल्की उन सब ख भी जो ओको प्रगट होन ख प्रिय जानय हंय।
2TI 4:9 मोरो जवर तुरतच आवन की कोशिश कर।
2TI 4:10 कहालीकि देमास न यो जगत ख प्रिय जान क मोख छोड़ दियो हय अऊर थिस्सलुनीके नगर ख चली गयो हय। क्रेसेन्स गलातिया प्रदेश ख चली गयो अऊर तीतुस दलमतिया ख चली गयो हय।
2TI 4:11 केवल लूका मोरो संग हय। मरकुस ख धर क चली आव; कहालीकि सेवा को लायी ऊ मोरो बहुत मदद को हय।
2TI 4:12 तुखिकुस ख मय न इफिसुस भेज्यो हय।
2TI 4:13 जब तय आयजो त जो कोट त्रोआस म करपुस को यहां छोड़ आयो हय ऊ ले क आयजो; अऊर मोरी किताबे विशेष कर क् चमड़ा पर लिखी चिट्ठी ख ले क आयजो।
2TI 4:14 सिकन्दर धातु को काम करन वालो न मोख बहुत हानि पहुंचायी हय; परमेश्वर ओख ओको कामों को अनुसार फर देयेंन।
2TI 4:15 तय भी ओको सी सावधान रह, कहालीकि ओन हमरी उपदेशों को बहुतच विरोध करयो हय।
2TI 4:16 पहिले मोरो पक्ष म कोयी न मोरो साथ नहीं दियो, बल्की सब न मोख छोड़ दियो होतो। भलो होय कि येको उन्ख लेखा देनो नहीं पड़ेंन।
2TI 4:17 पर प्रभु मोरो संग खड़ो रह्यो अऊर मोख सामर्थ दियो, ताकि मोरो सी पूरो-पूरो प्रचार हो अऊर सब गैरयहूदियों सुन ले। मय मौत की सजा सी छुड़ायो गयो।
2TI 4:18 अऊर प्रभु मोख हर एक बुरो काम सी छुड़ायेंन, अऊर अपनो स्वर्गीय राज्य म सुरक्षित पहुंचायेंन। ओकीच महिमा हमेशा-हमेशा होती रहेंन। आमीन।
2TI 4:19 प्रिस्का अऊर अक्विला ख अऊर उनेसिफुरुस को घराना ख नमस्कार।
2TI 4:20 इरास्तुस कुरिन्थुस म रह्य गयो, अऊर त्रुफिमुस ख मय न मिलेतुस म बीमार छोड्यो हय।
2TI 4:21 ठंडी सी पहिले चली आवन की कोशिश कर। यूबूलुस, अऊर पूदेंस, अऊर लीनुस अऊर क्लौदिया, अऊर सब विश्वासी भाऊवों-बहिनों को तोख नमस्कार।
2TI 4:22 प्रभु तोरी आत्मा को संग रहे। तुम पर परमेश्वर को अनुग्रह होतो रहे।
TIT 1:1 पौलुस को तरफ सी जो परमेश्वर को सेवक अऊर यीशु मसीह को प्रेरित हय। परमेश्वर को चुन्यो हुयो लोगों ख उन्को विश्वास म मदत करन लायी अऊर हमरो धर्म को सच्चो ज्ञान को तरफ बड़ावन लायी भेज्यो गयो हय।
TIT 1:2 ऊ अनन्त जीवन की आशा पर जेकी प्रतिज्ञा परमेश्वर न, जो झूठ बोल नहीं सकय सनातन काल सी करी हय,
TIT 1:3 पर ठीक समय पर अपनो वचन ख ऊ प्रचार सी प्रगट करयो, जो हमरो उद्धारकर्ता परमेश्वर की आज्ञा को अनुसार मोख सौंप्यो गयो अऊर प्रचार करयो गयो हय।
TIT 1:4 तीतुस को नाम, जो विश्वास को सहभागिता को बिचार सी मोरो सच्चो बेटा आय! परमेश्वर पिता अऊर हमरो उद्धारकर्ता मसीह यीशु को तरफ सी तोख अनुग्रह अऊर शान्ति मिलती रहे।
TIT 1:5 मय येकोलायी तोख क्रेते म छोड़ आयो होतो कि तय बची बातों ख सुधारे, अऊर मोरी आज्ञा को अनुसार नगर नगर को मण्डलियों को बुजूर्गों ख चुने।
TIT 1:6 जो निर्दोष अऊर एकच पत्नी को पति हो, जिन को बच्चा विश्वासी हो, अऊर अनुशासन हिनता को दोष उन पर नहीं लगायो जाय सके तथा ऊ कानुन को पालन करन वालो भी हो।
TIT 1:7 कहालीकि मुखिया ख परमेश्वर को काम को व्यवस्थापक होन को वजह ऊ निर्दोष होन ख होना; ओख हटिलो नहीं, जल्दी गुस्सा करन वालो नहीं, पियक्कड़ नहीं, मार पीट करन वालो नहीं, अऊर नहीं पैसा को लालची हो,
TIT 1:8 पर मेहमान को आदर करन वालो, भलायी को चाहन वालो, संय्यमी, सच्चो, पवित्र अऊर सभ्यतासिल होनो चाहिये;
TIT 1:9 ओख ऊ विश्वास करन लायक अऊर सिद्धता पर सहमत होन वालो सन्देश ख मजबुतायी सी पकड़ ख रहनो चाहिये यो तरह लोगों ख सच्चायी की शिक्षा दे क उन्ख प्रोत्साहित करे अऊर येको संग जो येको विरोधी आय ओको खण्डन कर सके।
TIT 1:10 कहालीकि बहुत सो लोग नियम ख तोड़न वालो, बकवास करन वालो अऊर धोका देन वालो आय; विशेष कर यहूदी म सी आयो हय।
TIT 1:11 यो जरूरी हय कि इन्को मुंह बन्द करनो चाहिये। कहालीकि हि लोग बुरो उपदेश की कमायी लायी बेकार बाते सिखाय क घर को घर बिगाड़ देवय हंय।
TIT 1:12 उन म सी एक क्रेते कोच भविष्यवक्ता न, लोगों को बारे म खुद कह्यो हय जो उन्कोच आय, कह्यो हय, “क्रेती को निवासी हमेशा झूठ बोलय हय, दुष्ट पशु, अऊर आलसी पेटू होवय हंय।”
TIT 1:13 या गवाही सच हय, येकोलायी उन्ख कठोरता सी चेतावनी दियो कर कि हि विश्वास म पक्को होय जाये,
TIT 1:14 अऊर यहूदियों की कथा कहानियों अऊर उन आदमियों की आज्ञावों पर मन नहीं लगाये, जो सच ख इन्कार करय हय।
TIT 1:15 शुद्ध लोगों लायी सब चिजे शुद्ध हंय, पर अशुद्ध अऊर अविश्वासियों को लायी कुछ भी शुद्ध नहाय, बल्की उनकी बुद्धी अऊर विवेक दोयी अशुद्ध हंय।
TIT 1:16 हि कह्य हंय कि हम परमेश्वर ख जानजे हंय, पर अपनो कामों सी ओको इन्कार करजे हंय; कहालीकि हि घृणित अऊर आज्ञा नहीं मानन वालो हंय, अऊर कोयी अच्छो काम को लायक नहाय।
TIT 2:1 पर तय असी बाते सिखायो कर जो सच्चो सिद्धान्त को लायक हंय।
TIT 2:2 यानेकि बुजूर्ग आदमी सालिन, सचेत अऊर स्वंय नियंत्रित हो; अऊर उन्को विश्वास म मजबूत, प्रेम अऊर धैर्यपूर्वक सहनशील हो।
TIT 2:3 योच तरह बूढ्ढी बाईयां को चाल चलन पवित्र लोगों को जसो हो; वा निन्दक नहीं बने, दारू को व्यसन कि लत उन्ख नहीं हो, पर अच्छी बाते सिखावन वाली होना
TIT 2:4 ताकि हि जवान बाईयों ख चेतावनी देती रहेंन कि अपनो पतियों ख अऊर बच्चा सी प्रेम रखे;
TIT 2:5 अऊर खुद नियंत्रित, पवित्र, अपनो घर की देखरेख, दयालु अऊर अपनो पति को अधीन रहन वाली बने, ताकि कोयी भी परमेश्वर को तरफ सी आवन वाली वचन की निन्दा नहीं करे।
TIT 2:6 असोच जवान आदमियों ख भी समझायो कर कि खुद नियंत्रित हो।
TIT 2:7 सब बातों म अपनो आप ख सच्चो आचरन को उदाहरन बन। तोरो शिक्षा म सफाई, गम्भीरता,
TIT 2:8 अऊर असी सच्चायी पायो जाये कि कोयी ओकी आलोचना नहीं कर सकेंन, तोरो दुश्मन शर्मिन्दा हो कहालीकि तोरो विरोध म बुरो कहन ख कुछ नहीं रहेंन।
TIT 2:9 सेवकों ख सिखावो कि अपनो मालिक को अधीन रहे, अऊर सब बातों म उन्ख खुश रखेंन। अऊर उलट क उन्ख जवाब नहीं दे;
TIT 2:10 चोरी चालाकी नहीं करे, पर सब तरह सी पूरो विश्वासी निकले कि हि सब बातों म हमरो उद्धारकर्ता परमेश्वर कि शिक्षा की हर तरह की शोभा बढ़ाये।
TIT 2:11 कहालीकि परमेश्वर को ऊ अनुग्रह प्रगट हय, जो सब आदमियों को उद्धार को वजह हय,
TIT 2:12 अऊर ऊ अनुग्रह हम्ख सिखावय हय कि हम अभक्ति अऊर सांसारिक अभिलाषावों ख त्याग दे अऊर खुद ख नियंत्रित, उचित अऊर भक्तिमय जीवन यो जगत म जीये।
TIT 2:13 अऊर ऊ धन्य आशा की मतलब अपनो महान परमेश्वर अऊर उद्धारकर्ता यीशु मसीह की महिमा को प्रगट होन की बाट देखतो रहे।
TIT 2:14 जेन अपनो आप ख हमरो लायी दे दियो कि हम्ख हर तरह को बुरायीयों सी छुड़ाये, अऊर हम्ख ओकोच शुद्ध लोग बनाये अऊर हम अच्छो-अच्छो कामों सी तत्पर रहे।
TIT 2:15 पूरो अधिकार को संग या बाते सिखाव, जसो तय तोरो विरोधियों ख डाटय अऊर प्रोत्साहित करय हय कि कोयी तोख बेकार समझनो नहीं पाये।
TIT 3:1 लोगों ख याद दिलाव कि हि शासकों अऊर अधिकारियों को अधीन रहे, अऊर उन्की आज्ञा को पालन करे, अऊर हर एक अच्छो काम लायी तैयार रहे,
TIT 3:2 उन्ख बताव कोयी की निन्दा मत करो, पर शान्तता सी अऊर दोस्ती सी रहो; अऊर सब को संग हमेशा नरम स्वभाव रखे।
TIT 3:3 कहालीकि हम भी पहिले नासमझ, अऊर आज्ञा नहीं मानन वालो, अऊर गलत होतो। अऊर कुछ तरह की इच्छावों अऊर सुखविलास को चाहत म होतो, अऊर बैरभाव, अऊर जलन करन म जीवन बितावत होतो, अऊर घृना रखत होतो, अऊर एक दूसरों सी दुश्मनी रखत होतो।
TIT 3:4 पर जब हमरो उद्धारकर्ता परमेश्वर की भलायी अऊर प्रेम प्रगट भयो,
TIT 3:5 त ओन हमरो उद्धार करयो; अऊर यो अच्छो कर्मों को वजह सी नहीं, जो हम न खुद करयो, पर ओकी दया सी हम्ख बचायो पवित्र आत्मा को द्वारा, जो हम्ख नयो जनम देवय हय अऊर धोय क हम्ख नयो जीवन देवय हय।
TIT 3:6 परमेश्वर न हम पर पवित्र आत्मा ख उद्धारकर्ता यीशु मसीह को द्वारा भरपूरी सी दियो हय।
TIT 3:7 अपनो अनुग्रह को द्वारा ओको संग सच्चो ठहरायो हय, ताकी हम अनन्त जीवन की आशा ख उत्तराधिकार ख पा सके।
TIT 3:8 यो सच कह्यो गयो हय, अऊर मय चाहऊ हय कि तय इन बातों को बारे म हिम्मत सी बोले येकोलायी कि जिन्न परमेश्वर पर विश्वास करयो हय, हि अच्छो-अच्छो कामों म लग्यो रहन को ध्यान रखे। या बाते अच्छी अऊर आदमियों को फायदा की हंय।
TIT 3:9 पर मूर्खता को विवादों, अऊर वंशावलियों, अऊर विरोध अऊर झगड़ा सी जो व्यवस्था को बारे म हो, बच्यो रहे; कहालीकि हि निष्फल अऊर बेकार हय।
TIT 3:10 जो फूट डालय हय ओख कम सी कम दोय बार चेतावनी दे, अऊर फिर ओख अकेलो छोड़ दे।
TIT 3:11 कहालीकि तुम जानय हय कि असो लोग पापी भय गयो हय अऊर उन्को जवर ऊ गलत होन को प्रमान देवय हय।
TIT 3:12 जब मय तोरो जवर अरतिमास यां तुखिकुस ख भेजूं त मोरो जवर निकुपुलिस नगर म आवन की कोशिश करजो, कहालीकि मय न उच ठंडी को समय बितावन को परख लियो हय।
TIT 3:13 जेनास वकील अऊर अपुल्लोस ख कोशिश कर क् आगु पहुंचाय दे, अऊर देख कि उन्ख कोयी चिज की कमी नहीं होनो पाये।
TIT 3:14 हमरो लोग भी अच्छो काम करनो सिखनो चाहिये ताकि जो जरूरी हय ओकी पूर्ति होय सके अऊर बेकार को जीवन नहीं जीये।
TIT 3:15 मोरो सब संगियों को तोख नमस्कार। जो विश्वास को वजह हम सी प्रीति रखय हंय, उन्ख नमस्कार। तुम सब पर अनुग्रह होतो रहेंन।
PHM 1:1 तीमुथियुस अऊर मय पौलुस को तरफ सी जो प्रभु मसीह यीशु को लायी मय बन्दी बन्यो हय, हमरो प्रिय भाऊ सहकर्मी फिलेमोन,
PHM 1:2 अऊर बहिन अफफिया, अऊर हमरो संगी योद्धा अरखिप्पुस अऊर फिलेमोन को घर म जमा होन वाली मण्डली को नाम।
PHM 1:3 हमरो पिता परमेश्वर अऊर प्रभु यीशु मसीह को तरफ सी अनुग्रह अऊर शान्ति तुम्ख मिलती रहे।
PHM 1:4 भाऊ फिलेमोन, मय हमेशा परमेश्वर को धन्यवाद करू हय, अऊर अपनी प्रार्थनावों म भी तोख याद करू हय।
PHM 1:5 कहालीकि मय प्रभु यीशु मसीह को लोगों को प्रति तुम्हरो प्रेम अऊर विश्वास को बारे म सुनतो रहू हय,
PHM 1:6 मय प्रार्थना करू हय कि आप खुद को विश्वास ख बाटन म तत्पर बन्यो रहे जेकोसी यीशु मसीह म एकता को द्वारा हमरी जीवन की पूरी अच्छी बातों को तुम्ख पूरी रीति सी ज्ञान हो।
PHM 1:7 कहालीकि हे भाऊ, मोख तोरो प्रेम सी बहुत खुशी अऊर प्रोत्साहन मिल्यो, येकोलायी कि तोरो सी परमेश्वर को लोगों को मन खुश भय गयो हंय।
PHM 1:8 येकोलायी कि मोख मसीह म भाऊ होन को नाते जो तुम ख करनो चाहिये ओख धीरज सी बतावन को अधिकार मोरो म हय।
PHM 1:9 तब भी ऊ प्रेम को वजह मोख यानेकि पौलुस को लायी जो अब यीशु मसीह को कैदी भी आय, योच ठीक जान पड़्यो कि तोरो सी बिनती करू।
PHM 1:10 त मय उनेसिमुस को तरफ सी आप ख बिनती करू हय, जो मसीह म मोरो टुरा हय अऊर जब मय जेलखाना को समय मय ओको आत्मिक बाप बन्यो।
PHM 1:11 ऊ त पहिले तोरो कुछ काम को नहीं होतो, पर अब तोरो अऊर मोरो दोयी को बड़ो काम को हय।
PHM 1:12 ओखच यानेकि जो मोरो दिल को टुकड़ा आय, मय न ओख तोरो जवर लौटाय दियो हय।
PHM 1:13 ओख मय अपनोच जवर रखनो चाहत होतो कि तोरो तरफ सी यो जेल म जो सुसमाचार को वजह हय, तोरी जागा पर मोरी सेवा करे।
PHM 1:14 पर मय न तोरी इच्छा को बिना कुछ भी करनो नहीं चाह्यो कि तोरी यो कृपा दबाव सी नहीं पर खुशी सी होय।
PHM 1:15 शायद ऊ मोरो सी कुछ दिन लायी योच वजह अलग भयो कि अनन्त काल तक तोरो जवर रहे।
PHM 1:16 पर अब सी सेवक को जसो नहीं, बल्की सेवक सी भी अच्छो, यानेकि ऊ मोख त प्रिय हय पर ऊ आदमी अऊर एक प्रभु भाऊ होन को नाते ओख मोरो सी जादा प्रेम करो।
PHM 1:17 येकोलायी यदि तय मोख सहभागी समझय हय, त ओख यो तरह स्वीकार कर जसो मोख करय हय।
PHM 1:18 अऊर यदि ओन तोरी कुछ हानि करी हय, यां ओको पर तोरो कुछ कर्जा आवय हय, त मोरो नाम पर लिख ले।
PHM 1:19 मय पौलुस अपनो हाथ सी लिखूं हय, कि मय खुद भर देऊ; अऊर मोख कुछ बतावन की जरूरत नहाय, कि तय त मोरो जीवन भर को लायी मोरो कर्जदार हय।
PHM 1:20 हे भाऊ, मोख तोरो सी प्रभु यीशु मसीह म यो फायदा प्राप्त हो मोरो दिल ख ताजगी मिले।
PHM 1:21 मय निश्चित होय क यो तोख लिखू हय, जो मय न तोख करन लायी कह्यो ऊ तय करजो। अऊर यो जानु हय कि जो कुछ मय कहू हय, तय ओको सी कहीं बढ़ क करजो।
PHM 1:22 अऊर यो भी कि मोरो लायी रूकन की जागा तैयार रख। मोख आशा हय कि तुम्हरी प्रार्थनावों को द्वारा परमेश्वर मोख तुम्हरो जवर लौटाय देयेंन।
PHM 1:23 इपफ्रास, जो मसीह यीशु म मोरो संग कैदी हय,
PHM 1:24 अऊर मरकुस अऊर अरिस्तर्खुस अऊर देमास अऊर लूका जो मोरो सहकर्मी हंय, इन्को तोख प्रनाम।
PHM 1:25 हमरो प्रभु यीशु मसीह को अनुग्रह तुम सब पर बन्यो रहेंन।
HEB 1:1 पहिले को युग म परमेश्वर न बापदादों सी थोड़ो थोड़ो कर क् अऊर तरह तरह सी भविष्यवक्तावों को द्वारा बाते करी,
HEB 1:2 यो आखरी दिनो म ओन हम सी बेटा को द्वारा बाते करी। जेक ओन पूरी चिजों को उत्तराधिकारी ठहरायो अऊर ओकोच द्वारा परमेश्वर न पूरी सृष्टि की रचना करी हय।
HEB 1:3 ऊ बेटा परमेश्वर की महिमा को उजाड़ो अऊर ओको स्वरूप की पक्की छाप आय, अऊर सब चिजों ख अपनी सामर्थ को वचन सी सम्भालय हय। ऊ आदमी जाती को पापों ख माफी कर क् स्वर्ग म जाय क महामहिम को दायो तरफ जाय क बैठ गयो।
HEB 1:4 यो तरह बेटा ख स्वर्गदूतों सी महान बनायो गयो उच तरह जसो परमेश्वर न ओख स्वर्गदूतों सी उत्तम नाम दियो।
HEB 1:5 कहालीकि परमेश्वर न कोयी भी स्वर्गदूतों सी असो नहीं कह्यो, “तय मोरो बेटा आय, अज तय मोरो बाप बन्यो हय” अऊर नहीं कोयी स्वर्गदूत सी कह्यो हय “मय तोरो बाप बनू अऊर तय मोरो बेटा होजो?”
HEB 1:6 पर जब परमेश्वर ओको पहिले जनम्यो सन्तान ख जगत म भेजय हय, त ऊ कह्य हय, “परमेश्वर को सब स्वर्गदूत ओकी आराधना करे।”
HEB 1:7 पर परमेश्वर स्वर्गदूतों को बारे म यो कह्य हय, “ऊ अपनो दूतों ख हवा, अऊर अपनो सेवकों ख धधकती आगी बनावय हय।”
HEB 1:8 पर परमेश्वर बेटा को बारे म असो कह्य हय, “हे परमेश्वर, तोरो सिंहासन, हमेशा हमेशा रहेंन: अऊर तोरो राज्यदण्ड न्याय सी चलेंन अऊर तुम्हरो अपनो लोगों पर अधिकारदण्ड रहेंन।
HEB 1:9 तय न जो सच्चायी हय ओको सी प्रेम करयो हय अऊर दुष्टता सी घृना करय हय; यो वजह परमेश्वर, तोरो परमेश्वर न खुशी को तेल सी तोरो अभिषेक करन को द्वारा संगियों सी बढ़ क चुन्यो।”
HEB 1:10 वचन यो भी कह्य हय, “हे प्रभु, सुरूवात सी तय न धरती की नींव डाली, अऊर स्वर्ग तोरो हाथों की कारीगरी आय।
HEB 1:11 हि त नाश होय जायेंन, पर तय बन्यो रहजो; अऊर हि सब कपड़ा को जसो जिर्न होय जायेंन,
HEB 1:12 अऊर तय उन्ख कोट को जसो लपेटजो, अऊर हि कपड़ा को जसो बदल जायेंन। पर तय वसोच रहजो अऊर तोरो जीवन को अन्त नहीं होयेंन।”
HEB 1:13 अऊर स्वर्गदूतों म सी परमेश्वर न कोन्को सी कब कह्यो, “तय मोरो दायो तरफ बैठ, जब तक कि मय तोरो दुश्मनों ख तोरो पाय को खल्लो की चौकी नहीं बनाय देऊ?”
HEB 1:14 का यो स्वर्गदूत वा आत्मायें नोहोय? जो आत्मायें परमेश्वर की सेवा अऊर ओको द्वारा उद्धार पान वालो ख मदत करन लायी भेजी जावय हंय?
HEB 2:1 येकोलायी हम्ख अऊर जादा सावधानी को संग, जो सत्य कि बाते जो हम न सुनी, अऊर भी मन लगायो, असो नहीं होय कि बहक क उन्को सी दूर चली जाये।
HEB 2:2 कहालीकि जो सन्देश स्वर्गदूतों सी हमरो बापदादों ख कह्यो गयो होतो, जिन्न ओको उल्लंघन करयो ओख दण्ड मिल्यो जेको हि उचित होतो,
HEB 2:3 त हम असो बच सकजे हय यदि हम यो महान उद्धार पर हमरो ध्यान नहीं दे? जेको बारे म प्रभु न पहिले हम्ख बतायो, अऊर जिन्न ओख सुन्यो ऊ हमरो लायी निश्चय भयो कि ऊ उद्धार सत्य हय।
HEB 2:4 अऊर संगच परमेश्वर भी अपनी इच्छा को अनुसार चिन्हों, अऊर अचम्भा को कामों, अऊर अलग अलग तरह को सामर्थ को कामों, अऊर पवित्र आत्मा को वरदानों को बाटन को द्वारा येकी गवाही देतो रह्यो।
HEB 2:5 परमेश्वर न ऊ आवन वालो जगत ख जेकी चर्चा हम कर रह्यो हंय, स्वर्गदूतों को अधीन नहीं करयो।
HEB 2:6 बल्की कोयी न पवित्र शास्त्र म यो गवाही दी हय, “त आदमी का हय कि तय ओकी चिन्ता करे? यो आदमी को बेटा का हय कि तय ओकी चिन्ता करे?
HEB 2:7 तय न ओख स्वर्गदूतों सी कुछच कम करयो; तय न ओको पर महिमा अऊर आदर को मुकुट रख्यो,
HEB 2:8 अऊर उन्ख पूरी चिजों पर शासक बनाय दियो।” येकोलायी यो कह्य हय कि परमेश्वर न उन्ख, पूरी चिजों पर शासक बनायो हय, येको म स्पष्ट रूप सी सब कुछ शामिल हय। पर हम सब चिजों पर शासन करन वालो आदमियों ख नहीं देखजे हंय।
HEB 2:9 पर हम यीशु ख जो स्वर्गदूतों सी कुछच कम करयो गयो होतो, मृत्यु को दु:ख उठावन को वजह महिमा अऊर आदर को मुकुट पहिन्यो हुयो देखजे हंय, ताकि परमेश्वर को अनुग्रह सी ऊ हर एक आदमी लायी मरे।
HEB 2:10 यो परमेश्वर को लायी सही होतो, जेन सब बातों ख बनायो अऊर सम्भाल्यो रख्यो, यीशु ख भी यातनावों को द्वारा परिपूर्ण बनानो चाहिये ताकी बहुत सो सन्तान ओकी महिमा म सामिल होय सके। कहालीकि यीशुच एक हय जो उन्ख उद्धार को तरफ ले जावय हय।
HEB 2:11 ऊ लोगों ख उन्को पापों सी पवित्र करय हय अऊर हि दोयी ऊ पवित्र करयो हुयो, सब एकच परिवार को आय। येकोलायी यीशु उन्ख अपनो भाऊ कहनो सी नहीं लजावय।
HEB 2:12 ऊ परमेश्वर सी कह्य हय, “मय तोरो नाम अपनो भाऊवों अऊर बहिनों ख सुनाऊ; अऊर सभा को बीच म मय तोरी प्रशंसा करू।”
HEB 2:13 अऊर ऊ यो भी कह्य हय “मय अपनो भरोसा परमेश्वर पर रखू।” अऊर कह्य हय, “मय यहां परमेश्वर न दी हुयी सन्तान को संग हय।”
HEB 2:14 येकोलायी जब कि लड़का मांस अऊर खून को भागी हंय, त यीशु खुदच उन्को जसो उन्को सहभागी भय गयो, ताकि मृत्यु को द्वारा ओख जो मृत्यु पर शक्ति मिली भी, मतलब शैतान ख नाश कर दे;
HEB 2:15 योच रीति सी जितनो मृत्यु को डर को वजह जीवन भर गुलामी म फस्यो होतो, उन्ख छुड़ाय लेजो।
HEB 2:16 कहालीकि यो निश्चित हय कि ऊ स्वर्गदूतों की नहीं बल्की अब्राहम को वंश ख मदत करय हय।
HEB 2:17 यो वजह ओख चाहिये होतो, कि सब बातों म अपनो भाऊवों को जसो बने; जेकोसी ऊ उन बातों म जो परमेश्वर सी सम्बन्ध रखय हंय, एक दयालु अऊर विश्वास लायक महायाजक बने ताकि लोगों को पापों की माफी लायी प्रायश्चित करे।
HEB 2:18 कहालीकि जब ओन परीक्षा की दशा म दु:ख उठायो, त ऊ उन्की भी मदत कर सकय हय जेकी परीक्षा होवय हय।
HEB 3:1 येकोलायी हे मसीही भाऊवों अऊर बहिनों, तुम जो परमेश्वर को द्वारा बुलायो गयो हय खुद अपनो ध्यान यीशु पर लगायो रखो, जेक परमेश्वर न मुख्य याजक बनन लायी भेज्यो गयो होतो ओख जेक पर हम हमरी कबूली देजे हय।
HEB 3:2 ऊ जेन ओख चुन्यो ऊ परमेश्वर को प्रती विश्वास लायक होतो, ठीक वसोच जसो मूसा अपनो काम को प्रती परमेश्वर को घरानों म विश्वास लायक होतो।
HEB 3:3 जसो घर बनावन वालो एक आदमी घर सी जादा खुद आदर को पात्र होवय हय, उच रीति सी यीशु भी मूसा सी जादा आदर को पात्र मान्यो गयो।
HEB 3:4 कहालीकि हर एक घर ख कोयी न कोयी बनावन वालो होवय हय, पर परमेश्वर त हर चिज ख बनावन वालो आय।
HEB 3:5 मूसा त परमेश्वर को पूरो घर म सेवक को जसो विश्वास लायक होतो, ओन वा बाते करी जो भविष्य म परमेश्वर को द्वारा कह्यो जानो होतो।
HEB 3:6 पर मसीह बेटा को रूप म परमेश्वर को घर म विश्वास लायक हय। अऊर ओको घर हम आय, यदि हम हमरो साहस अऊर जेको पर हम घमण्ड करजे हय ऊ आशा पर मजबुतायी सी स्थिर रहे।
HEB 3:7 येकोलायी जसो पवित्र आत्मा कह्य हय, “यदि अज तुम परमेश्वर की आवाज सुनो,
HEB 3:8 त अपनो मन ख कठोर मत करो, जसो कि तुम्हरो पूर्वजों जब उनकी मरूस्थल म परीक्षा होय रही होती परमेश्वर को खिलाफ बगावत करी होती।
HEB 3:9 परमेश्वर कह्य हय उत उन्न परीक्षा करी अऊर परख्यो तब भी मोरो कार्यो ख देख जेक मय अऊर चालीस साल तक जो मय न उन्को लायी करयो ओख देख्यो।
HEB 3:10 यो वजह मय ऊ पीढ़ी को लोगों सी गुस्सा रह्यो, अऊर कहतो रह्यो, ‘इन्को मन हमेशा सीच अप्रमानित अऊर हि मोरी रस्ता जानय नहाय।’
HEB 3:11 तब मय न गुस्सा म आय क कसम खायी, ‘येकोलायी जित मय उन्ख आराम देऊ उत हि कभी आराम नहीं कर पायेंन।’”
HEB 3:12 हे भाऊवों अऊर बहिनों, सावधान रहो कि तुम म असो कोयी को असो बुरो अऊर अविश्वासी मन नहीं हो, जो तुम्ख जीन्दो परमेश्वर सी दूर हटाय ले जाये।
HEB 3:13 पर येको बदला जब तक यो “अज को दिन” कहलावय हय, तुम हर दिन एक दूसरों ख प्रोत्साहन देतो रहो, ताकी तुम म सी कोयी भी पाप म भरमायो नहीं जाये अऊर नहीं कठोर होय जाये।
HEB 3:14 यदि हम आखरी तक मजबुतायी को संग अपनो सुरूवात को आत्मविश्वास ख पकड़्यो रह्य हय त हम मसीह को भागीदार बन जाजे हय।
HEB 3:15 जसो शास्त्र कह्य हय, “यदि अज तुम परमेश्वर को आवाज सुनो, त अपनो मनों ख कठोर मत करो, जसो बगावत को दिनो म तुम्हरो पूर्वजों न करयो होतो।”
HEB 3:16 भलो हि कौन लोग होतो जिन्न परमेश्वर की आवाज सुनी अऊर ओको खिलाफ बगावत करयो? का हि लोग नहीं होतो, जिन्ख मूसा न मिस्र सी बचाय क निकाल्यो होतो?
HEB 3:17 अऊर परमेश्वर चालीस साल तक कौन लोगों सी गुस्सा रह्यो? का उन्कोच पर नहीं जिन्न पाप करयो होतो, अऊर उन्को लाश मरूस्थल म पड़्यो होतो?
HEB 3:18 अऊर परमेश्वर न कौन्सो लोगों लायी कसम खायी होती कि हि तुम मोरो आराम जागा म सिर पावों? का हि यो नहीं जिन्न ओकी आज्ञा नहीं मानी?
HEB 3:19 यो तरह हम देखजे हंय कि हि अविश्वास को वजह आराम जागा पर सिर नहीं सक्यो।
HEB 4:1 येकोलायी जब कि परमेश्वर ओको आराम जागा म सिरन की प्रतिज्ञा अब तक हय, त हम्ख डरनो चाहिये असो नहीं होय कि तुम म सी कोयी लोग वंचित रह्य जाये।
HEB 4:2 कहालीकि हम न भी सुसमाचार सुन्यो जसो उन्न सुन्यो होतो, पर जो सन्देश उन्न सुन्यो होतो उन्को लायी ओकी किम्मत नहीं होती, कहालीकि जब उन्न सुन्यो उन्न ओख विश्वास को संग स्वीकार नहीं करयो।
HEB 4:3 हम जो विश्वासी हय ऊ आराम ख परमेश्वर न प्रतिज्ञा करी होती ओख हम हासिल करजे हय, “जसो की परमेश्वर न कह्यो हय, मय न गुस्सा म येको पर कसम ले क कह्यो होतो हि कभी मोरो आराम म सामिल नहीं होय पायेंन।” ओन यो कह्यो होतो जब की जगत की सृष्टि करन को बाद ओको काम पूरो भय गयो होतो।
HEB 4:4 कहालीकि सातवों दिन को बारे म कहीं त शास्त्र म कह्यो हय, “अऊर फिर सातवों दिन सब कामों सी परमेश्वर न आराम करयो।”
HEB 4:5 अऊर यो सन्दर्भ म फिर सी कह्य हय, “हि मोरो आराम जागा म कभी सिर नहीं पायेंन।”
HEB 4:6 जिन्न पहिले सुसमाचार ख सुन्यो हि ऊ आराम ख हासिल नहीं कर सक्यो कहालीकि उन्न विश्वास नहीं करयो होतो। किन्तु दूसरों लायी आराम को द्वार अभी भी खुल्यो हय।
HEB 4:7 येकोलायी परमेश्वर न फिर एक विशेष दिन ठहरायो अऊर ओख कह्यो गयो “अज को दिन” कुछ साल को बाद दाऊद को द्वारा परमेश्वर न ऊ दिन को बारे म शास्त्र म बतायो गयो होतो जेको उल्लेख शास्त्र पहिलेच सी करय हय यदि अज तुम परमेश्वर की आवाज सुनो त अपनो मन ख कठोर मत करो।
HEB 4:8 यदि यहोशू उन्ख आराम म ले गयो होतो, जेन परमेश्वर की प्रतिज्ञा करी होती त परमेश्वर बाद म कोयी दूसरों दिन को बारे म नहीं कहतो।
HEB 4:9 त जो भी हो, यो परमेश्वर सातवों दिन म आराम करय हय वसोच परमेश्वर को लोगों को लायी उत एक आराम बाकी हय।
HEB 4:10 कहालीकि जो कोयी भी परमेश्वर म प्रतिज्ञा करयो हुयो आराम म सिरय हय, ऊ ओको कामों को अनुसार आराम पायेंन वसोच परमेश्वर न अपनो कामों सी आराम पायो हय।
HEB 4:11 येकोलायी आवो हम भी ऊ आराम म हासिल करन लायी अपनी पूरी रीति सी कोशिश करे, ताकी असो नहीं होय कि हमरो बीच म सी कोयी भी ओख पावन म अऊर यशस्वी नहीं हो जसो हि अपनो विश्वास की कमी को द्वारा भयो होतो।
HEB 4:12 कहालीकि परमेश्वर को वचन जीन्दो, अऊर क्रियाशिल, अऊर कोयी भी दोधारी तलवार सी भी बहुत तेज हय। अऊर जीव अऊर आत्मा ख, अऊर जोड़-जोड़ अलग कर क् आर-पार छेदय हय अऊर इच्छाये अऊर बिचार ख जांचय हय।
HEB 4:13 अऊर सृष्टि की कोयी चिज परमेश्वर की नजर सी लूकी नहाय, ओकी आंखी को आगु जेक हम्ख लेखा जोखा देना हय हर चिज बिना कोयी आवरन कि खुली हुयी हय। अऊर कुछ भी लूकी नहाय।
HEB 4:14 येकोलायी जब हमरो असो बड़ो महायाजक हय, जो स्वर्ग सी होय क गयो हय, मतलब परमेश्वर को बेटा यीशु, त आवो, हम अपनो विश्वास जो हम न हासिल करयो हय दृढ़ता सी थाम्यो रहे।
HEB 4:15 कहालीकि हमरो जवर असो महायाजक नहाय कि जो हमरी कमजोरियों को संग सहानुभूति नहीं रख सके। वसोच परख्यो गयो जसो हम्ख, पर ऊ हमेशा पाप रहित रह्यो।
HEB 4:16 येकोलायी आवो, हम आत्मविश्वास को संग अनुग्रह पावन परमेश्वर को सिंहासन को तरफ बढ़े ताकी जरूरत पड़न पर हमरी मदत को लायी हम दया अऊर अनुग्रह ख हासिल कर सके।
HEB 5:1 हर एक महायाजक आदमियों म सीच चुन्यो जावय हय, अऊर लोगों को प्रतिनिधित्व करन को लायी परमेश्वर की सेवा को लायी चुन्यो जावय हय ताकी ऊ पापों को लायी दान अऊर बलिदान चढ़ाये।
HEB 5:2 कहालीकि ऊ खुद भी बहुत रीति सी कमजोरियों को अधिन हय येकोलायी ऊ अज्ञानियों अऊर भूल्यो भटक्यो को संग कोमलता सी व्यवहार कर सकय हय।
HEB 5:3 येकोलायी ओख चाहिये कि जसो लोगों को लायी वसोच अपनो लायी भी पाप-बलि चढ़ायो करे।
HEB 5:4 यो मुख्य याजक को आदर को पद कोयी अपनो आप ख चुन क नहीं लेवय हय, जब तक कि हारून को जसो परमेश्वर को तरफ सी ठहरायो नहीं जाये।
HEB 5:5 वसोच मसीह न भी महायाजक बनन को आदर खुद नहीं लियो, बल्की परमेश्वर ओख कह्य हय: “तय मोरो बेटा आय अऊर अज मय तोरो बाप बन्यो हय।”
HEB 5:6 योच तरह ऊ दूसरी जागा म भी कह्य हय, “तय मलिकिसिदक की रीति पर हमेशा लायी याजक हय।”
HEB 5:7 यीशु न अपनो शरीर म रहन को दिनो म ऊचो आवाज म रोय-रोय क अऊर आसु बहाय-बहाय क ओको सी जो मरन सी बचाय सकत होतो, प्रार्थनाये अऊर बिनती करी, अऊर भक्ति अऊर नम्रता को वजह परमेश्वर न ओख सुन्यो।
HEB 5:8 पर यद्दपि ऊ परमेश्वर को बेटा होतो फिर भी यातनायें झेलतो हुयो ओन आज्ञा को पालन करनो सिख्यो।
HEB 5:9 अऊर सिद्ध बन जानो पर, अपनो सब आज्ञा मानन वालो लायी अनन्त काल को उद्धार को स्त्रोत बन गयो,
HEB 5:10 अऊर ओख परमेश्वर को तरफ सी मलिकिसिदक की रीति पर महायाजक बनायो गयो।
HEB 5:11 येको बारे म हम्ख बहुत सी बाते कहनो हंय, पर जिन्को वर्नन करनो कठिन हय, कहालीकि तुम समझन म बहुत धीमो हय।
HEB 5:12 वास्तव म यो समय तक त तुम्ख गुरु बनानो चाहिये होतो, तब भी या जरूरत भय गयी हय कि कोयी तुम्ख परमेश्वर को वचन की सुरूवात की शिक्षा सिखाये। तुम त असो भय गयो हय कि तुम्ख ठोस जेवन खान को बजाय, तुम ख अभी भी दूध पीनो पड़य हय।
HEB 5:13 कहालीकि जो दूध पीवय हय ऊ अभी भी बच्चाच हय अऊर ओख सच्च गलत को कोयी अनुभव नहीं होवय।
HEB 5:14 पर ठोस जेवन समझदारों को लायी हय, उन्न अपनो अनुभव सी अच्छो-बुरो को ज्ञान करनो सीख लियो हय।
HEB 6:1 येकोलायी आवो मसीह की शिक्षा की सुरूवाती स्तर की शिक्षा ख छोड़ क हम सिद्धता को तरफ आगु बढ़तो जाये, अऊर मृत्यु को तरफ अगुवायी करन वालो कामों सी प्रायश्चित की नीव फिर सी नहीं डाले, अऊर परमेश्वर पर को विश्वास,
HEB 6:2 अऊर बपतिस्मा की शिक्षा अऊर ऊपर हाथों ख रखनो, अऊर मृत्यु सी जीन्दो होनो अऊर अनन्त न्याय।
HEB 6:3 यदि परमेश्वर चाहेंन त हम योच करबोंन।
HEB 6:4 जो लोग अपनो विश्वास ख त्याग देवय हय उन्ख फिर सी पश्चाताप करन लायी कसो लायो जाय सकय हय? हि एक बार परमेश्वर को प्रकाश म होतो, उन्न स्वर्ग को उपहार चख्यो अऊर पवित्र आत्मा को अपनो हिस्सा हासिल करयो हंय,
HEB 6:5 अऊर आवन वालो युग कि सामर्थ को काम अनुभव लियो हय कि परमेश्वर को वचन कितनो अच्छो हय,
HEB 6:6 यदि हि विश्वास सी भटक जाये त उन्ख फिर सी मन फिराव को लायी वापस लावनो मुस्किल हय; कहालीकि हि परमेश्वर को टुरा ख फिर सी क्रूस पर चढ़ावय हंय तथा ओख सब को सामने अपमान को विषय बनावय हंय।
HEB 6:7 कहालीकि जो जमीन प्राय होन वाली बरसात को पानी ख सोख लेवय हय, अऊर जोतन यां बोवन वालो को उपयोगी फसल प्रदान करय हय वा माटी परमेश्वर सी आशीष पावय हय,
HEB 6:8 पर यदि वा जमीन काटा अऊर घासफूंस उगावय हय, त वा बेकार हय अऊर ओख परमेश्वर को श्राप अऊर आगी सी नाश करन को डर रह्य हय।
HEB 6:9 पर हे प्रिय संगियों, चाहे हम यो तरह की बाते कहजे हंय पर तुम्हरो बारे म हम्ख येको सी भी अच्छी बातों को आत्मविश्वास हय, हि बाते जो तुम्हरो उद्धार सी सम्बन्धित हंय।
HEB 6:10 तुम न परमेश्वर को लोगों की हमेशा मदत करतो हुयो जो प्रेम दर्शायो हय, ओख अऊर तुम्हरी दूसरी सेवा ख परमेश्वर कभी नहीं भूलायेंन। ऊ अधर्मी नहाय।
HEB 6:11 हम बहुतायत सी चाहजे हंय कि तुम म सी हर कोयी जीवन भर असोच कठिन मेहनत करय हय, ताकी तुम निश्चय ओख पा लेवो जेकी तुम आशा करय हय।
HEB 6:12 हम नहीं चाहजे की तुम आलसी होय जावो, बल्की उन्को अनुकरन करो जो विश्वास अऊर धीरज को द्वारा उन चिजों ख पा रह्यो हय जिन्की परमेश्वर न प्रतिज्ञा करी होती।
HEB 6:13 परमेश्वर न अब्राहम सी प्रतिज्ञा करतो समय जब कसम खान लायी कोयी ख अपनो सी बड़ो नहीं पायो, त अपनीच कसम खायी,
HEB 6:14 अऊर कह्यो “मय सचमुच तोख बहुत आशीष देऊ, अऊर तोख कुछ वंशज देऊ।”
HEB 6:15 अऊर यो रीति सी अब्राहम न धीरज धर क परमेश्वर न करी हुयी प्रतिज्ञावों ख हासिल करी।
HEB 6:16 आदमी त अपनो सी कोयी बड़ो की कसम खायो करय हंय, अऊर वा कसम सब तर्क-वितर्क को अन्त कर क् जो कुछ कह्यो जावय हय, ओख पक्को कर देवय हय।
HEB 6:17 परमेश्वर न करी हुयी प्रतिज्ञा ख पान वालो ख परमेश्वर स्पष्ट कर देनो चाहवय हय कि ऊ अपनो उद्देश ख कभी नहीं बदलय येकोलायी ओन अपनी प्रतिज्ञा को संग अपनी कसम ख जोड़ दियो।
HEB 6:18 यहां दोय बाते हय ओकी प्रतिज्ञा अऊर ओकी कसम जो कभी नहीं बदल सकय अऊर जिन्को बारे म परमेश्वर कभी झूठ नहीं कह्य सकय। येकोलायी हम जो परमेश्वर को जवर सुरक्षा पान ख आयो हय अऊर जो आशा हम्ख दी हय, ओख पकड़्यो हुयो हय अत्याधिक उत्साहित हय।
HEB 6:19 वा आशा हमरो जीव को लायी असो लंगर हय जो स्थिर अऊर मजबूत हय, अऊर परदा को अन्दर को पवित्र जागा तक पहुंचय हय,
HEB 6:20 जित यीशु न हमरो तरफ सी हम सी पहिले सिरयो। ऊ मलिकिसिदक की परम्परा म सदा हमेशा को लायी मुख्य याजक बन गयो।
HEB 7:1 यो मलिकिसिदक शालेम को राजा होतो, अऊर परमप्रधान परमेश्वर को याजक होतो। जब अब्राहम चार राजावों ख युद्ध सी हराय क लौट रह्यो होतो तब मलिकिसिदक अब्राहम सी मिल्यो अऊर ओख आशीर्वाद दियो।
HEB 7:2 अऊर अब्राहम न ओख ऊ सब कुछ म सी जो ओन युद्ध म जीत्यो होतो ओको दसवों भाग दियो। मलिकिसिदक को नाम को पहिलो अर्थ हय “सच्चायी को राजा” अऊर फिर ओको यो भी अर्थ हय, “शालेम को राजा” मतलब “शान्ति को राजा।”
HEB 7:3 ओको बाप, माय, अऊर पूर्वजों को कोयी इतिहास नहीं मिलय हय, ओको जीवन या मृत्यु को भी कोयी उल्लेख नहाय; पर परमेश्वर को बेटा को जसोच हमेशा को लायी याजक बन्यो रह्य हय।
HEB 7:4 अब येको पर ध्यान करो कि ऊ कसो महान होतो जेक कुलपति अब्राहम न जो कुछ ओन हासिल करयो ओको दसवों भाग दियो।
HEB 7:5 अऊर लेवी को वंशजों म सी जो याजक को पद पावय हंय, उन्ख व्यवस्था को अनुसार आज्ञा मिली हय कि इस्राएली को लोगों सी मतलब अपनो खुद को भाऊवों सी, दशवों भाग ले फिर चाहे हि अब्राहम को वंशज कहाली नहीं होना।
HEB 7:6 पर मलिकिसिदक न, जो लेवी को वंश को भी नहीं होतो, अब्राहम सी दसवों भाग लियो, अऊर ऊ अब्राहम ख आशीर्वाद दियो जेको जवर परमेश्वर की प्रतिज्ञाये होती।
HEB 7:7 येको म कोयी सक नहाय कि जो आशीर्वाद देवय हय ऊ आशीर्वाद लेनवालो सी बड़ो होवय हय।
HEB 7:8 जित तक लेवियों को सवाल हय उन म दसवों भाग उन आदमी को द्वारा जमा करयो हय, जो आदमी मरय हय किन्तु मलिकिसिदक को जित तक सवाल हय दसवों भाग ओको द्वारा जमा करयो जावय हय जो शास्त्र को द्वारा अभी भी जीन्दो हय।
HEB 7:9 त हम यो भी कह्य सकजे हंय कि लेवी न भी, जो दसवों भाग लेवय हय, अब्राहम को द्वारा दसवों भाग दियो।
HEB 7:10 कहालीकि जब मलिकिसिदक अब्राहम सी मिल्यो होतो, तब त लेवी को जनम भी नहीं भयो होतो ऊ अपनो पूर्वजों को शरीर म होतो।
HEB 7:11 यदि लेवी याजकता को परम्परा को द्वारा सम्पुर्नता हासिल करयो जाय सकत होतो कहालीकि कोयी दूसरों याजक ख आवन की का जरूरत होती? कहालीकि येकोच आधार पर लोगों ख व्यवस्था भी दी गयी होती, एक असो याजक की का जरूरत होती जो की मलिकिसिदक की परम्परा को होना, नहीं की हारून कि परम्परा को।
HEB 7:12 कहालीकि जब याजक को पद बदल जावय हय, त व्यवस्था ख भी बदलनो जरूरी हय।
HEB 7:13 कहालीकि जो हमरो प्रभु को बारे म या बाते कहीं जावय हंय जेको गोत्र म सी याजक को रूप म होतो, जेको म सी कोयी न वेदी की सेवा नहीं करी,
HEB 7:14 त प्रगट हय कि हमरो प्रभु यहूदा को गोत्र म सी जनम लियो हय, अऊर यो गोत्र को बारे म मूसा न याजक पद की कुछ चर्चा नहीं करी।
HEB 7:15 हमरो दावा अऊर भी पूरो साफ तरह सी प्रगट होय जावय हय, जब मलिकिसिदक को जसो एक अऊर याजक प्रगट होय जावय हय,
HEB 7:16 जो शारीरिक आज्ञावों सी अऊर व्यवस्था को अनुसार, पर अविनाशी जीवन को सामर्थ को अनुसार याजक बन्यो हय।
HEB 7:17 कहालीकि शास्त्र कह्य हय, ओको बारे म यो गवाही दी गयी हय, “तय मलिकिसिदक की रीति पर हमेशा हमेशा याजक हय।”
HEB 7:18 पहिली आज्ञा येकोलायी रद्द कर दियो गयो कहालीकि ऊ कमजोर अऊर बेकार होतो।
HEB 7:19 येकोलायी कहालीकि मूसा की व्यवस्था न कोयी ख सम्पुर्न सिद्ध नहीं कर सक्यो। अऊर अब ओको जागा पर एक असी उत्तम आशा रखी गयी हय जेको द्वारा हम परमेश्वर को जवर जाय सकजे हंय।
HEB 7:20 मसीह की नियुक्ति परमेश्वर को कसम को द्वारा भयी, बल्की दूसरों को बिना कसम कोच याजक बनायो गयो होतो।
HEB 7:21 पर यीशु एक कसम सी बन्यो होतो, जब ओन कह्यो होतो, “प्रभु न कसम खायी हय, अऊर ऊ अपनो मन कभी नहीं बदलेंन तय हमेशा को लायी एक याजक ठहरजो।”
HEB 7:22 यो कसम को वजह यीशु एक अच्छो वाचा को आश्वासन बन गयो।
HEB 7:23 असो बहुत सो याजक होत होतो, पर उन्की मृत्यु न उन्ख अपनो पदो पर कायम नहीं रहन दियो;
HEB 7:24 पर यीशु अमर हय अऊर ओको याजक को काम भी हमेशा हमेशा लायी जीन्दो रहन वालो हय।
HEB 7:25 येकोलायी जो ओको द्वारा परमेश्वर को जवर आवय हंय, ऊ उन्को पूरो रीति सी उद्धार करन म लायक हय, कहालीकि ऊ उन्को लायी परमेश्वर सी बिनती करन लायी हमेशा जीन्दो हय।
HEB 7:26 असोच महायाजक हमरी जरूरतों ख पूरो कर सकय हय। ऊ पवित्र हय, ऊ निर्दोष हय, अऊर ओको म कोयी पाप नहाय, जो पापियों सी अलग रह्य हय, अऊर ओख स्वर्गों सी भी ओख ऊचो उठायो गयो हय।
HEB 7:27 उन महायाजकों को जसो ओख जरूरत नहाय कि हर दिन पहिले अपनो पापों अऊर फिर लोगों को पापों को लायी बलिदान चढ़ाये कहालीकि ओन अपनो आप ख बलिदान चढ़ाय क एकच बार म सब को लायी पूरो कर दियो।
HEB 7:28 मूसा की व्यवस्था आदमियों ख जो अपुर्न हय महायाजक चुनय हय, पर परमेश्वर की प्रतिज्ञा ओकी कसम को संग बनायी गयी हय या प्रतिज्ञा व्यवस्था को बाद आयी हय, अऊर या प्रतिज्ञा न प्रमुख याजक को रूप म टुरा ख चुन्यो, जो हमेशा हमेशा लायी परिपूर्ण बन्यो रह्य हय।
HEB 8:1 जो कुछ कह्य रह्यो हंय ओकी मुख्य बाते या हय: निश्चय हमरो जवर असो महायाजक हय, जो स्वर्ग म महान परमेश्वर को सिंहासन को दायो तरफ विराजमान हय,
HEB 8:2 अऊर पवित्र जागा मतलब सच्चो तम्बू म परमेश्वर न स्थापित करयो होतो नहीं की आदमी न, ऊ जागा ऊ महायाजक को नाते सेवा करय हय।
HEB 8:3 कहालीकि हर एक महायाजक दान अऊर बलिदान परमेश्वर ख चढ़ावन लायी ठहरायो जावय हय, यो वजह जरूरी हय कि यो याजक को जवर भी कुछ चढ़ावन लायी होना।
HEB 8:4 यदि ऊ धरती पर होतो त कभी याजक नहीं होतो, कहालीकि उत पहिले सीच असो याजक हय जो यहूदी व्यवस्था को अनुसार दान चढ़ावन वालो हंय।
HEB 8:5 जो याजकपन को काम करय हय ऊ स्वर्ग म जो हय ओकी एक छाया अऊर प्रतिकृती आय। योच तरह हय जब मूसा पवित्र तम्बू ख बनावन वालो होतो तब परमेश्वर न ओको सी कह्यो होतो। “ध्यान रहे कि तय हर चिज ठीक उच प्रतिरूप को अनुसार बनाये जो तोख पहाड़ी पर दिखायो गयो होतो।”
HEB 8:6 पर अब जो याजकपन की सेवा यीशु ख प्राप्त भयी हय, ऊ उन्को सेवा काम सी श्रेष्ठ हय। कहालीकि ऊ जो वाचा को मध्यस्थ हय ऊ पूरानो वाचा सी अच्छो हय कहालीकि या अच्छी चिजों को प्रतिज्ञावों पर आधारित हय।
HEB 8:7 कहालीकि यदि वा पहिली वाचा म गलती नहीं होती, त दूसरी वाचा को लायी कोयी जरूरत नहीं होती।
HEB 8:8 पर परमेश्वर ख उन लोगों म दोष मिल्यो अऊर ऊ कह्य हय, “प्रभु कह्य हय, देखो, ऊ दिन आवय हंय कि मय इस्राएल को घराना को संग, अऊर यहूदा को घराना को संग नयी वाचा बान्धू।
HEB 8:9 यो ऊ वाचा को जसो नहीं होयेंन, जो मय न उन्को बापदादों को संग ऊ समय बान्धी होती, जब मय ओको हाथ पकड़ क उन्ख मिस्र देश सी निकाल लायो; कहालीकि हि मोरी वाचा सी विश्वास लायक नहीं रह्यो जसो मय न उन्को संग बान्धी होती, येकोलायी मय न उन पर ध्यान नहीं लगायो।
HEB 8:10 फिर प्रभु कह्य हय, कि जो वाचा मय उन दिनो को बाद इस्राएल को घराना को संग बान्धू, ऊ यो आय कि मय अपनी व्यवस्था ख उन्को मनों म डालू, अऊर मय उन्को दिलो पर लिखूं, अऊर मय उन्को परमेश्वर ठहरू अऊर हि मोरो लोग ठहरेंन।
HEB 8:11 अऊर हर एक अपनो संगियों ख अऊर अपनो पड़ोसी ख यो शिक्षा मत देजो, कि तय प्रभु ख पहिचान, कहालीकि छोटो सी बड़ो तक सब मोख जान लेयेंन।
HEB 8:12 मय उन्को पापों ख माफ करू अऊर कभी उन्को पाप याद नहीं रखू।”
HEB 8:13 या वाचा ख नयी वाचा कह्य क ओन पहिली वाचा ख पुरानी कर दियो अऊर जो पुरानी अऊर जीर्न होय जावय हय वा फिर जल्दीच मिट जावय हय।
HEB 9:1 वा पहिली वाचा म भी सेवा करन को नियम होतो, तथा आदमियों को हाथों सी बनायो गयो पवित्र जागा होतो।
HEB 9:2 एक तम्बू बनायो गयो होतो, जेको पहिलो कमरा म दीवट होतो, अऊर मेज, अऊर जेको पर भेंट की रोटी होती; जेक पवित्र जागा कह्यो जात होतो।
HEB 9:3 दूसरों परदा को पीछू अऊर एक कमरा होतो, जेक परम पवित्र जागा कह्यो जात होतो।
HEB 9:4 ओको म सुगन्धित धूपदानी को लायी सोनो की वेदी अऊर सोनो सी मढ़्यो हुयो वाचा को सन्दूक होतो यो सन्दूक म सोनो को बन्यो मन्ना को एक बर्तन होतो, अऊर हारून की वा छड़ी जेको म अंकुर उग्यो होतो तथा दोय गोटा की पाटियों जेको पर आज्ञाये लिखी हुयी होती हि होतो।
HEB 9:5 सन्दूक को ऊपर परमेश्वर को उपस्थिति को महिमामय याने करूब बन्यो होतो, जो अपनो पंखा ख फैलाय क पश्चाताप को जागा पर छाया करत होतो। पर यो समय हम या बातों को विस्तार को संग चर्चा नहीं कर सकय।
HEB 9:6 सब कुछ यो तरह व्यवस्थित होय जान को बाद याजक पहिलो कमरा म हर दिन सिर कर क् अपनो सेवा को काम पूरो करत होतो,
HEB 9:7 पर परदा को अन्दर दूसरों कमरा म केवल मुख्य याजक साल म एकच बार जात होतो, बिना खून लियो कभी जात नहीं होतो; जेक ऊ अपनो अऊर अपनो लोगों द्वारा अनजानो म करयो गयो पापों को लायी परमेश्वर ख भेंट चढ़ावय हय।
HEB 9:8 येको द्वारा पवित्र आत्मा स्पष्ट रीति सी यो सिखावय हय कि जब तक अभी बाहरी तम्बू खड़ो भयो हय, तब तक परम पवित्र जागा को रस्ता अब तक खोल्यो नहीं गयो होतो।
HEB 9:9 यो तम्बू वर्तमान समय को लायी एक प्रतिक हय; मतलब जेको म असो दान अऊर बलिदान चढ़ायो जावय हंय, जिन्कोसी आराधना करन वालो को मनों ख शुद्ध नहीं कर सकय।
HEB 9:10 यो त बस खान पीवन अऊर अलग–अलग तरह की सुद्धिकरन कि प्रक्रिया यो सब बाहरी नियम आय, अऊर परमेश्वर को द्वारा नयी व्यवस्था बनावन को समय तक लायी लागु होवय हंय।
HEB 9:11 पर जो बाते पहिले सीच यहां असी अच्छी चिजों को मसीह पहिले सीच महायाजक बन क आय गयो हय। ऊ तम्बू जेको म ऊ सेवा करय हय, ऊ जादा अच्छो परिपूर्ण तम्बू हय ऊ आदमी को हाथों द्वारा बनायो गयो तम्बू नहाय अऊर ऊ यो जगत की निर्मिती को भाग नहाय।
HEB 9:12 अऊर बकरा अऊर बछड़ा को खून को द्वारा नहीं पर अपनोच खून को द्वारा, एकच बार तम्बू सी होय क महापवित्र जागा म सिरयो अऊर ओन हमरो लायी पापों सी अनन्त छुटकारा ख हासिल करयो।
HEB 9:13 कहालीकि जब बकरा अऊर बईलो को खून अऊर बछड़ा की राख विधि अनुसार अपवित्र लोगों पर छिड़क्यो जानो सी हि शुद्ध होय जावय हय अऊर विधि अनुसार उन्की अशुद्धता बाहरी रूप सी चली जावय हय,
HEB 9:14 जब यो सच हय त मसीह को खून कितनो प्रभावशाली होयेंन, ओन अनन्त आत्मा अपनो आप ख एक सम्पुर्न बली को रूप म परमेश्वर ख चढ़ाय दियो हय। त ओको खून हमरी चेतना ख उन कर्मों सी शुद्ध करेंन जो मृत्यु को तरफ ले जावय हय ताकि हम जीन्दो परमेश्वर की सेवा कर सके।
HEB 9:15 योच वजह मसीह एक नयी वाचा को मध्यस्थ बन्यो, ताकि जिन्ख परमेश्वर द्वारा बुलायो हय, हि परमेश्वर न प्रतिज्ञा करयो हुयो अनन्त आशिषों को वारिस हो सके। अब देखो पहिली वाचा को अधीन करयो गयो पापों सी उन्ख मुक्त करावन लायी फिरोतियों को रूप म ऊ अपनो जीव दे चुक्यो हय।
HEB 9:16 जित तक वसीहतनामा को प्रश्न हय जेको लायी ओन ओख बनायो हय, ओकी मृत्यु ख प्रमाणित करयो जानो जरूरी हय।
HEB 9:17 कहालीकि कोयी वसीहतनामा केवल तब भी प्रभावित होवय हय, जब ओको करन वालो की मृत्यु होय जावय हय जब तक ओको लिखन वालो जीन्दो रह्य हय ऊ कभी प्रभावित नहीं होवय।
HEB 9:18 येकोलायी पहिली वाचा भी खून को इस्तेमाल को द्वाराच प्रभावी ठहरी
HEB 9:19 पहिले मूसा जब व्यवस्था को विधान को सब आज्ञावों ख सब लोगों ख घोषना कर चुक्यो त ओन पानी को संग बकरा अऊर बछड़ा को खून ख ले क, लाल उन अऊर हिस्सप कि टहनियों सी व्यवस्था की किताब अऊर सब लोगों पर छिड़क दियो होतो।
HEB 9:20 ओन कह्यो होतो, “यो ऊ वाचा को खून आय, जेक परमेश्वर न तुम्ख आज्ञा पालन करन को आदेश दियो हय।”
HEB 9:21 अऊर योच रीति सी ओन तम्बू अऊर आराधना को पूरो सामान पर खून छिड़क्यो।
HEB 9:22 वास्तव म व्यवस्था को अनुसार खून सी लगभग हर चिज शुद्ध होवय हंय, अऊर बिना खून बहायो पाप की माफी नहाय।
HEB 9:23 त फिर यो जरूरी हय कि हि चिजे जो स्वर्ग की प्रतिकृती आय, उन्ख पशुवों को बलिदानों सी शुद्ध करयो जाये पर स्वर्ग की चिजे इन सी भी उत्तम बलिदानों सी शुद्ध करयो जान की अपेक्षा करय हय।
HEB 9:24 कहालीकि मसीह न आदमी को हाथ को बनायो हुयो पवित्र जागा म, जो सच्चो पवित्र जागा को नमुना हय, सिरयो नहीं पर स्वर्ग म खुद सिरयो, ताकि हमरो लायी अब परमेश्वर को सामने प्रगट हो।
HEB 9:25 यो नहीं कि ऊ अपनो आप ख बार–बार चढ़ाये, जसो कि मुख्य याजक हर साल पशुवों को खून ले क पवित्र जागा म सिरय हय,
HEB 9:26 नहीं त जगत की उत्पत्ति सी ले क मसीह ख बार–बार दु:ख उठानो पड़तो; पर अब युग को आखरी म ऊ एकच बार सब को लायी प्रगट भयो हय, ताकि अपनोच बलिदान को द्वारा पाप ख दूर कर दे।
HEB 9:27 अऊर जसो आदमियों को लायी एक बार मरनो अऊर परमेश्वर को द्वारा न्याय को होनो जरूरी हय,
HEB 9:28 वसोच मसीह भी बहुतों को पापों ख उठाय लेन को लायी एक बार बलिदान भयो। अऊर जो लोग ओकी बाट देखय हंय उन्को उद्धार को लायी दूसरी बार प्रगट होयेंन त पापों ख दूर करन लायी नहीं बल्की जो ओकी बाट देख रह्यो हय उन्ख उद्धार देन लायी।
HEB 10:1 व्यवस्था त आवन वालो अच्छी बातों की मात्र छाव हय, पर ऊ वा वास्तविक बातों को अपनो आप म हि बुरो अऊर विश्वास लायक आदर नहाय उनच बलियों को द्वारा जिन्ख निरन्तर हर साल अनन्त रूप सी चढ़ायो जावय हंय, आराधना को जवर आवन वालो ख हमेशा को लायी सम्पुर्न सिद्ध नहीं करयो जाय सकय।
HEB 10:2 यदि असो होय पातो त का उन्को चढ़ायो जानो बन्द नहीं होय जातो? कहालीकि फिर त उपासना करन वालो एकच बार म हमेशा हमेशा लायी पवित्र होय जातो अऊर अपनो पापों को लायी फिर कभी खुद ख अपराधी नहीं समझय।
HEB 10:3 किन्तु हर साल चढ़ायो जान वाली बली आदमी ख उन्को पाप याद करावय हय।
HEB 10:4 कहालीकि बईलो अऊर बकरा को खून पापों ख दूर कर दे, असो सम्भव नहाय।
HEB 10:5 येकोलायी जब मसीह यो जगत म आयो होतो त ओन कह्य होतो, “तय बलिदान अऊर भेंट नहीं चाहवय, पर तय न मोरो लायी एक शरीर तैयार करयो।
HEB 10:6 होमबली अऊर पाप–बली सी तय खुश नहीं भयो।
HEB 10:7 तब फिर मय न कह्यो होतो, अऊर जसो व्यवस्था कि किताब म लिख्यो हय, मय यहां हय, हे परमेश्वर, तोरी इच्छा पूरी करन ख आयो हय।”
HEB 10:8 पहिले ओन कह्यो होतो, “बलिदान अऊर भेंट अऊर होमबली अऊर पाप–बलियों ख तय नहीं चाहवय, अऊर नहीं तय उन्को सी खुश भयो होतो,” यद्दपि व्यवस्था यो चाहवय हय की हि चढ़ायो जाये।
HEB 10:9 फिर यो भी कह्य हय, “मय यहां हय, ताकि हे परमेश्वर तोरी इच्छा पूरी करू,” त दूसरी व्यवस्था ख स्थापित करन लायी पहिली ख रद्द कर देवय हय।
HEB 10:10 परमेश्वर की इच्छा सी हम यीशु मसीह को शरीर ख एकच बार बलिदान चढ़ायो जान को द्वारा पवित्र करयो गयो हंय।
HEB 10:11 हर एक याजक हर दिन खड़ो होय क अपनो धार्मिक कर्तव्यों ख पूरो करय हय, अऊर एकच तरह को बलिदान ख जो पापों ख कभी भी दूर नहीं कर सकय, बार–बार चढ़ावय हय।
HEB 10:12 पर मसीह त याजक को रूप म पापों को लायी हमेशा को लायी बलिदान चढ़ाय क परमेश्वर को दायो हाथ जाय बैठ्यो,
HEB 10:13 अऊर उच समय सी अपनो दुश्मनों ख परमेश्वर को द्वारा ओको पाय को खल्लो की चौकी बनाय दियो जान की बाट देख रह्यो हय।
HEB 10:14 कहालीकि ओन एकच चढ़ावा को द्वारा उन्ख जो पवित्र करयो जावय हंय, हमेशा को लायी सिद्ध कर दियो हय।
HEB 10:15 अऊर पवित्र आत्मा भी हम्ख योच गवाही देवय हय; कहालीकि ओन पहिले कह्यो होतो,
HEB 10:16 “प्रभु कह्य हय कि जो वाचा मय उन दिनो को बाद उन्को सी बान्धू ऊ यो आय कि मय अपनो व्यवस्था ख उन्को दिलो म बसाऊं अऊर ओख मय उन्को मनों म लिखूं।”
HEB 10:17 फिर ऊ यो कह्य हय, “मय उन्को पापों ख अऊर उन्को अधर्म को कामों ख फिर कभी याद नहीं करू।”
HEB 10:18 अऊर फिर जब पाप माफ कर दियो गयो, त पापों को लायी कोयी बली की कोयी जरूरत नहीं रह जावय।
HEB 10:19 येकोलायी हे भाऊवों अऊर बहिनों, कहालीकि यीशु को खून को द्वारा हम्ख ऊ परम पवित्र जागा म सिरन को निडर आत्मविश्वास हय,
HEB 10:20 जेक ओन परदा को द्वारा मतलब जो ओको खुद को शरीर को द्वारा एक नयो अऊर जीन्दो रस्ता को माध्यम सी हमरो लायी खोल दियो हय,
HEB 10:21 अऊर हमरो जवर असो महान याजक हय, जो परमेश्वर को मन्दिर को अधिकारी हय,
HEB 10:22 त आवो, हम सच्चो मन अऊर निश्चय पूरो विश्वास को संग, अऊर दिल को दोष को भावना दूर करन लायी दिल पर खून छिड़क क, अऊर शरीर ख शुद्ध पानी सी धुलाय क परमेश्वर को जवर जाये।
HEB 10:23 आवो हम अपनो आशा को अंगीकार ख मजबुतायी सी पकड़्यो रहे, कहालीकि जेन प्रतिज्ञा करी हय, ऊ विश्वास लायक हय;
HEB 10:24 तथा आवो हम ध्यान रखबो कि हम प्रेम, अऊर अच्छो कामों को लायी हम एक दूसरों की कसी मदद कर सकजे हय,
HEB 10:25 अऊर एक स्वभाव म आवन की अपनी आदते मत छोड़ो, जसो कि कुछ लोगों ख उत नहीं आवन की आदतच पड़ गयी हय, पर एक दूसरों ख अऊर जादा प्रोत्साहित करतो रहो; जसो कि तुम देख रह्यो हय प्रभु को दिन जवर आय रह्यो हय।
HEB 10:26 कहालीकि सच्चायी की पहिचान हासिल करन को बाद यदि हम जान बूझ क पाप करतो रहे, त पापों को लायी फिर कोयी बलिदान बाकी नहाय।
HEB 10:27 बल्की फिर त आवन वालो न्याय अऊर भीषन आगी को डर को संग बाट देखनोंच बाकी रह जावय हय जो परमेश्वर को विरोधियों ख भस्म कर देयेंन।
HEB 10:28 जो कोयी जब मूसा की व्यवस्था को पालन नहीं करय, ओख बिना दया दिखाये दोय यां तीन गवाहों की गवाही ख मान क, मार डाल्यो जावय हय,
HEB 10:29 त सोच लेवो कि ऊ कितनो अऊर भी भारी दण्ड को लायक ठहरेंन, जितनो परमेश्वर को टुरा ख पाय सी खुंद्यो अऊर वाचा को खून ख, जेको द्वारा ऊ पवित्र ठहरायो गयो होतो, अपवित्र जान्यो हय, अऊर अनुग्रह की आत्मा को अपमान करयो।
HEB 10:30 कहालीकि हम ओख जानजे हंय, जेन कह्यो होतो, “बदला लेनो मोरो काम आय, मयच बदला लेऊ।” अऊर फिर ऊ यो भी कह्य हय, “प्रभु अपनो लोगों को न्याय करेंन।”
HEB 10:31 जीन्दो परमेश्वर को हाथों म पड़नो भयानक बात हय।
HEB 10:32 पर उन पिछलो दिनो ख याद करो, जिन म तुम परमेश्वर की ज्योति पा क, ओको बाद जब तुम दु:खों को सामना करतो हुयो कठोर संघर्ष म मजबुतायी को संग डट्यो रहे।
HEB 10:33 अऊर तब कभी त सब लोगों को सामने अपमानित अऊर सतायो गयो अऊर कभी जिन्को संग असो बर्ताव करयो जाय रह्यो होतो, तुम न उन्को साथ दियो।
HEB 10:34 कहालीकि तुम कैदियों को दु:ख म सहानुभूति रखी, अऊर अपनी जायजाद भी खुशी सी लुटन दी; यो जान क कि तुम्हरो जवर एक अऊर भी अच्छी अऊर हमेशा ठहरन वाली जायजाद हय। जो हमेशा लायी बनी रह्य हय।
HEB 10:35 येकोलायी अपनी हिम्मत मत छोड़ो कहालीकि ओको प्रतिफल बड़ो हय।
HEB 10:36 कहालीकि तुम्ख धीरज धरनो जरूरी हय, ताकि परमेश्वर की इच्छा ख पूरी कर क् अऊर जो प्रतिज्ञा करी गयी हय ओख हासिल करो।
HEB 10:37 “कहालीकि जसो वचन कह्य हय: बहुतच जल्दी समय म जो आवन वालो हय ऊ आयेंन, ऊ देर नहीं लगायेंन।
HEB 10:38 पर मोरी सच्चायी सी चलन वालो लोग को विश्वास सी जीन्दो रहेंन, अऊर यदि उन्म सी कोयी पीछू हटेंन त मय ओको सी खुश नहीं रहूं।”
HEB 10:39 पर हम पीछू हटन वालो नहाय कि नाश होय जाये बल्की उन म सी जो हय विश्वास करय हय अऊर बचायो जावय हय।
HEB 11:1 विश्वास को अर्थ हय, जेकी हम आशा करजे हय ओको लायी निश्चित होनो, अऊर कोयी चिज ख हम चाहे देख नहीं रह्यो होना ओको अस्तित्व को बारे म निश्चित होनोच आत्मविश्वास हय।
HEB 11:2 योच तरह प्राचिन काल को बुजूर्गों ख उन्को विश्वास को द्वारा परमेश्वर की सहमती हासिल भयी होती।
HEB 11:3 विश्वास सीच हम जान जाजे हय कि पूरो जगत की रचना परमेश्वर को शब्द को द्वारा भयी, येकोलायी जो बनायी गयी बाते दृश्य हय, ऊ दृश्य सीच नहीं बन्यो हय।
HEB 11:4 विश्वास को द्वारा हाबील न परमेश्वर ख कैन सी उचित बलिदान चढ़ायो होतो, अऊर ओको विश्वास को द्वाराच सच्चायी सी चलन वालो आदमी होन की परमेश्वर सी सहमती हासिल करी कहालीकि परमेश्वर खुदच ओको दाना ख स्वीकार करयो। येको मतलब हाबील विश्वास को वजह ऊ अज भी बोलय हय जब की ऊ मर चुक्यो हय।
HEB 11:5 विश्वास सीच हनोक उठाय लियो गयो कि मृत्यु ख बिना देखे अऊर ओख कोयी नहीं ढूंढ सक्यो कहालीकि परमेश्वर न ओख ऊपर उठाय लियो होतो शास्त्र कह्य हय की हनोक ऊपर उठायो जान सी पहिले ओन परमेश्वर ख खुश करयो होतो।
HEB 11:6 विश्वास को बिना परमेश्वर ख खुश करनो असम्भव हय; कहालीकि जो परमेश्वर को जवर आवय हय ओख विश्वास करनो चाहिये कि परमेश्वर को अस्तित्व हय, अऊर उन्ख प्रतिफल देवय हय जो ओख ढूंढय हय।
HEB 11:7 विश्वास को वजह नूह ख जब परमेश्वर न भविष्य की बातों की चेतावनी दी गयी होती, जो ओन देखी भी नहीं होती, त ओन पवित्र भयपुर्वक अपनो परिवार ख बचावन लायी एक जहाज ख बनायो होतो। परिनाम स्वरूप ओको विश्वास को द्वाराच ओन जगत ख दोषी ठहरायो अऊर विश्वास को द्वारा परमेश्वर सी आवन वाली सच्चायी ख हासिल करयो।
HEB 11:8 विश्वास सीच परमेश्वर न अब्राहम ख बुलायो त आज्ञा मान क असी जागा निकल गयो जेकी परमेश्वर न प्रतिज्ञा करी होती; अऊर यो नहीं जानत होतो कि ऊ कित जाय रह्यो हय, फिर भी अपनो देश छोड़ दियो।
HEB 11:9 विश्वास को वजह जो प्रतिज्ञा करयो हुयो धरती म ओन अनजान परदेशी को जसो अपनो मण्डप बनाय क निवास करयो। ऊ तम्बूवों म वसोच रह्यो जसो इसहाक अऊर याकूब रह्यो होतो जो ओको संग परमेश्वर की उच प्रतिज्ञा को उत्तराधिकारी होतो।
HEB 11:10 अब्राहम ऊ नगर की बाट देख रह्यो होतो जेक परमेश्वर न आकार दे क बनायो अऊर हमेशा मजबूत रहन वाली नीव डाली।
HEB 11:11 विश्वास को वजह अब्राहम जो बहुत बूढ्ढा भय गयो होतो अऊर सारा जो खुद बांझ होती परमेश्वर पर भरोसा करयो कि ऊ ओकी प्रतिज्ञा पूरी करय हय, अऊर अब्राहम बाप बन गयो।
HEB 11:12 यो वजह अब्राहम सीच जो मरयो हुयो जसो होतो आसमान को तारों अऊर समुन्दर की रेतु को जसो अनगिनत वंश पैदा भयो।
HEB 11:13 विश्वास ख अपनो मन म लियो हुयो हि पूरो लोग मर गयो जिन चिजे की परमेश्वर न प्रतिज्ञा करी होती उन्न या चिजे नहीं पायी उन्न बस दूर सीच देख्यो अऊर उन्को स्वागत करयो या उन्न यो खुलो तौर सी मान लियो कि हि यो धरती पर परदेशी अऊर अनजानो हय।
HEB 11:14 हि लोग असी बाते कह्य हय कि हि यो दिखावय हय कि हि एक असो देश कि खोज म हय जो उन्को अपनो आय।
HEB 11:15 जो देश उन्न छोड्यो हय उन्ख सोचतो रहतो त फिर सी लौटन को अवसर रहतो।
HEB 11:16 पर हि एक अच्छो मतलब स्वर्गीय देश को अभिलाषा हंय; येकोलायी परमेश्वर उन्को परमेश्वर कहलावन म नहीं लजावय, कहालीकि ओन उन्को लायी एक नगर तैयार करयो हय।
HEB 11:17 विश्वास कोच वजह अब्राहम न, जब परमेश्वर ओकी परीक्षा ले रह्यो होतो, अपनो बेटा इसहाक ख बलिदान को रूप म भेंट दियो; अब्राहम ऊ होतो जेक परमेश्वर न प्रतिज्ञा दी होती फिर भी ऊ अपनो एकलौतो बेटा ख बली चढ़ावन लायी तैयार होतो।
HEB 11:18 त ओख यद्दपि परमेश्वर न कह्यो होतो, “इसहाक सीच तोरो वंश बढ़ेंन,”
HEB 11:19 अब्राहम न सोच्यो होतो परमेश्वर इसहाक ख मरयो हुयो म सी भी जीन्दो कर सकय हय, अऊर वसो देख्यो जाय त एक तरह सी अब्राहम न इसहाक ख मरयो हुयो म सी फिर वापस पा लियो।
HEB 11:20 विश्वास को वजह इसहाक न याकूब अऊर एसाव ख ओको भविष्य को बारे म आशीर्वाद दियो।
HEB 11:21 विश्वास सीच याकूब न मरतो समय यूसुफ को दोयी बेटावों म सी एक एक ख आशीष दियो, अऊर अपनी लाठी को कोना को सहारा ले क परमेश्वर की आराधना करी।
HEB 11:22 विश्वास सीच यूसुफ न, जब ऊ मरन पर होतो, त इस्राएलों ख निकल जान को बारे म ओन बोल्यो होतो, अऊर अपनी अस्थियों को संग का करनो चाहिये ओको आज्ञा दियो।
HEB 11:23 विश्वास सीच मूसा को माय बाप न ओख, पैदा होन को बाद तीन महीना तक लूकाय रख्यो, कहालीकि उन्न देख्यो कि बच्चा सुन्दर हय, अऊर हि राजा की आज्ञा तोड़न सी नहीं डरयो।
HEB 11:24 विश्वास सीच मूसा न बड़ो होय क फिरौन की बेटी को टुरा कहलावन सी इन्कार करयो।
HEB 11:25 येकोलायी कि ओख पाप म थोड़ो दिन को सुख भोगन सी परमेश्वर को लोगों को संग दु:ख भोगनो जादा उत्तम लग्यो।
HEB 11:26 ओन मसीह को वजह निन्दित होन को मिस्र को भण्डार सी बड़ो धन समझ्यो, कहालीकि ओकी आंखी भविष्य को प्रतिफल पान को तरफ लगी होती।
HEB 11:27 विश्वास सीच राजा को गुस्सा सी नहीं डर क ओन मिस्र ख छोड़ दियो, कहालीकि ऊ अनदेखा ख मानो ओख अदृश्य परमेश्वर दिख रह्यो हय।
HEB 11:28 विश्वास सीच ओन फसह को त्यौहार अऊर दरवाजा पर खून छिड़कन को पालन करयो, ताकि मृत्यु को दूत इस्राएलियों की पहिली सन्तान ख नहीं मार सके।
HEB 11:29 विश्वास सीच हि इस्राएली लाल समुन्दर को पार असो उतर गयो, जसो सूखी जमीन पर सी; अऊर जब मिस्रियों न वसोच करनो चाह्यो त सब पानी म डुब मरयो।
HEB 11:30 विश्वास सीच यरीहो की भीती, जब हि सात दिन तक ओको इस्राएलियों न चारयी तरफ चक्कर लगाय चुक्यो, त वा गिर पड़ी।
HEB 11:31 विश्वास सीच राहब वेश्या परमेश्वर की आज्ञा नहीं मानन वालो को संग मारी नहीं गयी होती, कहालीकि ओन इस्राएली जासूसों को मित्रता पुर्वक स्वागत करयो होतो।
HEB 11:32 अब मय अऊर जादा का कहूं? कहालीकि समय नहीं रह्यो कि गिदोन, बाराक, शिमशोन, इफतह, दाऊद, शमूएल, अऊर भविष्यवक्तावों को वर्नन करू।
HEB 11:33 इन्न विश्वास सीच राज्य जीत लियो; जो सच्च हय उच काम करयो; तथा जो परमेश्वर की प्रतिज्ञाये दी ओख हासिल करयो; उन्न सिंहों को मुंह बन्द करयो;
HEB 11:34 धधकती आगी की लपटो ख शान्त करयो; तलवार की धार सी बच निकल्यो; कमजोरियों म बलवन्त भयो; लड़ाई म वीर निकल्यो; विदेशियों की फौजों ख हरायो।
HEB 11:35 विश्वास को द्वारा बाईयों न अपनो मरयो हुयो रिश्तेदारों ख फिर जीन्दो पायो; कितनो त सतातो हुयो मारयो गयो अऊर छुटकारा नहीं चाह्यो, ताकी हि अच्छो जीवन को पुनरुत्थान पा सकेंन।
HEB 11:36 कुछ त ठट्ठा उड़ायो जानो म; कोड़ा को सामना करनो पड़्यो जब कुछ ख जंजीरो सी जकड़ क जेलखाना म डाल दियो गयो।
HEB 11:37 उन पर पथराव करयो गयो; उन्ख चीर क दोय भाग कर दियो गयो; उन्ख तलवार सी मारयो गयो; हि गरीब होतो, उन्ख यातनायें दी गयी, अऊर उन्को संग बुरो व्यवहार करयो गयो हि मेंढा अऊर शेरीयों की खाल ओढ़ क इत उत भटकत होतो;
HEB 11:38 अऊर मरूस्थलों, पहाड़ियों, गुफावों, अऊर धरती की फूटो म भटकतो फिरयो। जगत उन्को लायक नहीं होतो।
HEB 11:39 विश्वास सीच उन्को लेखा जोखा रख्यो गयो। फिर भी परमेश्वर न करी हुयी बाते अऊर प्रतिज्ञा करी हुयी चिजे नहीं मिली।
HEB 11:40 कहालीकि परमेश्वर न हमरो लायी पहिले सीच एक उत्तम योजना ठहरायी होती, ओको यो होतो कि हि भी हमरो संगच सम्पुर्न सिद्ध करयो जाय।
HEB 12:1 जित तक हम गवाहों को इतनो बड़ो बादर सी घेरयो हुयो हय, त फिर आवो बाधाये डालन वाली हर एक चिज ख अऊर ऊ पाप ख जो सहजता सी हम्ख उलझाय देवय हय ओख फेक दे, अऊर आवो वा दौड़ जो हम्ख दौड़नो हय, ओख धीरज को संग दौड़े,
HEB 12:2 अऊर हमरो विश्वास को कर्ता अऊर सिद्ध करन वालो यीशु को तरफ अपनी आंखी लगायी। जेन अपनो सामने उपस्थित खुशी लायी क्रूस की यातनायें झेली, ओकी लज्जा की कोयी चिन्ता नहाय की अऊर परमेश्वर को सिंहासन को दायो तरफ विराजमान भय गयो।
HEB 12:3 येकोलायी ओको पर ध्यान करो, जेन अपनो विरोध म पापियों को इतनो विरोध सह लियो कि तुम निराश होय क हिम्मत मत छोड़ देवो।
HEB 12:4 तुम न पाप को विरुद्ध म संघर्ष करतो हुयो, तुम्ख इतनो नहीं सहनो पड़ेंन कि तुम्ख अपनो खून बहानो पड़ेंन;
HEB 12:5 का तुम ऊ प्रोत्साहन को शब्द ख जो परमेश्वर न ओको टुरा जान क तुम सी कह्यो का तुम भूल गयो हय: “हे मोरो टुरा, जब परमेश्वर तोख सुधारय त ध्यान लगाव, अऊर जब ऊ तोख ताड़ना करेंन त निराश मत हो।
HEB 12:6 कहालीकि प्रभु जेकोसी प्रेम करय हय, अऊर जेक टुरा बनाय लेवय हय, ओख सजा भी देवय हय।”
HEB 12:7 तुम दु:ख ख ताड़ना समझ क सह लेवो; परमेश्वर तुम ख बेटा जान क तुम्हरो संग बर्ताव करय हय। ऊ कौन सो बेटा आय जेकी ताड़ना बाप नहीं करय?
HEB 12:8 यदि तुम्ख ताड़ना नहीं दी गयी हय जसो सब ताड़ना को भागी होवय हय, त तुम अपनो बाप सी पैदा हुयो टुरा नोहोय त तुम सच्ची सन्तान नोहोय।
HEB 12:9 फिर जब कि हमरो शारीरिक बाप भी हमरी ताड़ना करत होतो अऊर हम न उन्को आदर करयो। त का आत्मिक बाप को अधीन रह्य क जीवन नहीं जीबो।
HEB 12:10 हमरो शारीरिक बापदादों न जसो उन्न उत्तम समझ्यो हम्ख ताड़ना करी पर परमेश्वर हमरी भलायी लायी ताड़ना करय हय जेकोसी हम ओकी पवित्रता को सहभागी होय सके।
HEB 12:11 वर्तमान म हर एक तरह की ताड़ना खुशी की नहीं, पर दु:ख की बात लगय हय; तब भी जो ओख सहतो सहतो पक्को भय गयो हय, तब उन्ख सच्चायी, जीवन अऊर शान्ति को प्रतिफल मिलय हय।
HEB 12:12 येकोलायी थक्यो हाथों ख उठावों अऊर कमजोर घुटना ख मजबूत करो,
HEB 12:13 अऊर अपनो पाय लायी सीधो रस्ता बनावो कि लंगड़ा भटक नहीं जाये पर भलो चंगो होय जाये।
HEB 12:14 सब को संग शान्ति को संग रहन अऊर पवित्र जीवन जीन लायी हर तरह सी कोशिश म रहो कहालीकि येको बिना कोयी भी प्रभु ख देख नहीं सकेंन।
HEB 12:15 अपनो आप की चौकसी करो ताकी कोयी परमेश्वर को अनुग्रह सी पीछू कड़वो रोप की जड़ी को जसो मत बड़ो ताकी ओको जहेर सी बहुत समस्या पैदा मत होय जाये।
HEB 12:16 कोयी भी अनैतिक अऊर अधार्मिक एसाव को जसो नहीं हो जेन एक बार को जेवन को बदला अपनो बड़ो बेटा होन को अधिकार बेच डाल्यो।
HEB 12:17 तुम जानय हय कि बाद म जब ओन अपनो बाप सी आशीर्वाद पानो चाह्यो त असफल गिन्यो गयो, अऊर रोय रोय क ओन आशीर्वाद पानो चाह्यो त पश्चाताप नहीं मिल्यो।
HEB 12:18 तुम आगी सी जलतो हुयो सिय्योन पहाड़ी को जवर नहीं आयो, जेक महसुस करयो जाय सकत होतो अऊर नहीं अन्धारो अऊर नहीं उदासिनता अऊर नहीं बवंडर को जवर आयो हय। जसो इस्राएली लोग आयो होतो।
HEB 12:19 अऊर तुरही की आवाज, अऊर बोलन वालो को असो शब्द को जवर नहीं आयो, जेको सुनन वालो न बिनती करी की अब हम सी अऊर बाते नहीं करी जाये।
HEB 12:20 कहालीकि हि ऊ आज्ञा ख नहीं सह सक्यो: “यदि कोयी भी प्रानी पहाड़ी ख छूवय त ओको पर पथराव करयो जाये।”
HEB 12:21 अऊर ऊ दृश्य असो डरावनो होतो कि मूसा न कह्यो, “मय बहुत भयभित अऊर थर थर काप रह्यो हय।”
HEB 12:22 पर तुम सिय्योन पहाड़ी, जीन्दो परमेश्वर को नगर, स्वर्गीय यरूशलेम अऊर हजारों स्वर्गदूतों की सभा म आय पहुंच्यो हय।
HEB 12:23 तुम परमेश्वर सी पहिले जनम्यो हुयो जिन्को नाम स्वर्ग म लिख्यो हुयो हंय, उन्की सभा म पहुंच चुक्यो हय। तुम ऊ परमेश्वर को जवर आयो हुयो हय जो सब लोगों को न्याय करय हय ताकी सच्चो लोगों की आत्मावों सिद्ध करे,
HEB 12:24 अऊर एक नयी वाचा को मध्यस्थ को यीशु अऊर छिड़काव को ऊ खून को जवर आयो चुक्यो हय, जो हाबील को खून की उम्मीद उत्तम चिजों की प्रतिज्ञा करय हय।
HEB 12:25 सावधान रहो, अऊर ऊ कहन वालो सी मुंह मत फिरावो, कहालीकि हि लोग जब धरती पर को चेतावनी देन वालो सी मुंह फेर क नहीं बच सके, त हम स्वर्ग पर सी चेतावनी देन वालो सी नकार क् कसो बच सकेंन?
HEB 12:26 ऊ समय त ओको शब्द न धरती ख हिलाय दियो, पर अब ओन या प्रतिज्ञा करी हय, “एक बार फिर मय केवल धरती ख बल्की आसमान ख भी हिलाय देऊ।”
HEB 12:27 अऊर यो शब्द “एक बार फिर” ऊ हर चिज को तरफ अंकित करय हय जो बाते निर्मित करी गयी हय वा हिलायी जायेंन अऊर अस्थिर रहेंन ताकी जो बाते हिलायी नहीं जाय सकय वा बनी रहेंन।
HEB 12:28 फिर जब हम्ख एक असो राज्य मिल रह्यो हय, जेक हिलायो नहीं जाय सकय, त आवो हम धन्यवादी बने अऊर आदर मिश्रित डर को संग परमेश्वर की उपासना करे, ताकी परमेश्वर ओख स्वीकार करे।
HEB 12:29 कहालीकि हमरो परमेश्वर भस्म करन वाली आगी आय।
HEB 13:1 एक दूसरों म भाईचारा की प्रेम बन्यो रहे।
HEB 13:2 अनजानो लोगों को सत्कार करनो मत भूलो। कहालीकि स्वर्गदूतों को आदर सत्कार करयो हय।
HEB 13:3 कैदियों की असी सुधि लेवो कि मानो उन्को संग तुम भी कैद हय, अऊर जिन्को संग बुरो बर्ताव करयो जावय हय, उनकी यो तरह सुधि लेवो जसो मानो तुम खुद पिड़ित हय।
HEB 13:4 बिहाव को सब ख आदर करनो चाहिये अऊर पति अऊर पत्नी विश्वास लायक रहे कहालीकि परमेश्वर व्यभिचारियों को न्याय करेंन।
HEB 13:5 तुम्हरो स्वभाव धन सी प्रेम करन वालो नहीं हो, अऊर जो तुम्हरो जवर जो हय ओको म सन्तुष्ट करो; कहालीकि परमेश्वर न खुदच कह्यो हय, “मय तोख कभी नहीं छोड़ूं, अऊर नहीं कभी तोख त्यागूं।”
HEB 13:6 येकोलायी हम निडर होय क कहजे हंय, “प्रभु मोरो सहायक आय, मय नहीं डरू। आदमी मोरो का कर सकय हय।”
HEB 13:7 जो तुम्हरो अगुवा होतो, अऊर जिन्न तुम्ख परमेश्वर को वचन सुनायो हय, उन्ख याद रखो; अऊर ध्यान सी उन्को चाल चालन को अन्त देख क उन्को विश्वास को अनुकरन करो।
HEB 13:8 यीशु मसीह कल अऊर अज अऊर हमेशा हमेशा एक जसो हय।
HEB 13:9 हर तरह की विचित्र शिक्षावों सी भरमायो मत जावो, हमरो दिलो को लायी यो अच्छो हय हि अनुग्रह को द्वारा मजबूत बने नहीं की खान पीवन सम्बन्धित नियमों ख माननो सी, जिन्कोसी उन्को कभी कोयी फायदा नहीं भयो जिन्न उन्ख मान्यो।
HEB 13:10 हमरी एक असी वेदी हय जेको पर खान को अधिकार ऊ याजकों ख नहाय, जो तम्बू म सेवा करय हंय।
HEB 13:11 कहालीकि जिन जनावरों को खून महायाजक पाप-बलि लायी महापवित्र जागा म लिजावय हय, अऊर उन जनावरों को शरीर तम्बूवों को छावनी को बाहेर जलायो जावय हंय।
HEB 13:12 योच वजह, यीशु न भी शहर को द्वार को बाहेर मरयो ताकि लोग पापों सी ओको खून को द्वारा शुद्ध होय सके।
HEB 13:13 त फिर आवो, ओको जवर छावनी को बाहेर चले अऊर ओको अपमान म सहभागी हो।
HEB 13:14 कहालीकि यहां धरती पर हमरो कोयी स्थायी नगर नहाय, बल्की हम आवन वालो एक नगर की खोज म हंय।
HEB 13:15 चलो आवो हम यीशु को द्वारा परमेश्वर की स्तुतिरूपी बलिदान अर्पन करे, जो उन होठों को फर हय जिन्न कबूल करयो।
HEB 13:16 भलायी करनो अऊर एक दूसरों की मदत करनो मत भूलो, कहालीकि परमेश्वर असोच बलिदान सी खुश होवय हय।
HEB 13:17 अपनो अगुवों की आज्ञा मानो अऊर उन्को आदेशों पर चलो। कहालीकि हि तुम पर बिना आराम करे असी चौकसी रखय हय, जसो मानो उन्ख अपनो कामों को लेखा जोखा परमेश्वर ख देना हय। यदि तुम उन्की आज्ञा मानो त हि खुशी को संग अपनो काम करे; यदि तुम नहीं मानो त दु:ख को संग मददगार साबित नहीं होयेंन।
HEB 13:18 हमरो लायी प्रार्थना करतो रहो, कहालीकि हम्ख भरोसा हय कि हमरो अन्तरमन शुद्ध हय: हम सब बातों म अच्छी चाल चलनो चाहजे हंय।
HEB 13:19 मय तुम सी आग्रह करू हय की तुम प्रार्थना करतो रहो ताकी मय जल्दीच तुम्हरो जवर आय सकू हय।
HEB 13:20 जेन मेंढियों को ऊ महान चरवाहा हमरो प्रभु यीशु को खून द्वारा ऊ अनन्त काल की वाचा पर मुहर लगाय क मरयो हुयो म सी जीन्दो करयो, ऊ शान्ति दाता परमेश्वर।
HEB 13:21 तुम्ख सब अच्छी साधनो सी सम्पन्न करे, जेकोसी तुम ओकी इच्छा पूरी कर सको, अऊर यीशु मसीह को द्वारा ऊ हमरो अन्दर ऊ सब कुछ सक्रिय करे जो ओख भावय हय। ओकी महिमा हमेशा हमेशा होती रहे। आमीन।
HEB 13:22 हे भाऊवों अऊर बहिनों, मय तुम सी आग्रह करू हय कि यो प्रोत्साहन को सन्देश ख धीरज को संग सुनो, कहालीकि या चिट्ठी जो मय न तुम्हरो लायी लिखी गयी हय जादा लम्बी नहाय।
HEB 13:23 मय चाहऊ हय कि तुम्ख यो ज्ञात हो कि हमरो भाऊ तीमुथियुस, जेल सी छूट गयो हय। अऊर यदि ऊ जल्दीच आय गयो त मय ओको संग तुम सी भेंट करू।
HEB 13:24 अपनो सब अगुवों अऊर सब परमेश्वर को लोगों ख हमरो नमस्कार कहजो। इटली वालो विश्वासी लोग तुम्ख नमस्कार कह्य हंय।
HEB 13:25 तुम सब पर परमेश्वर को अनुग्रह होतो रहे। आमीन।
JAM 1:1 परमेश्वर को अऊर प्रभु यीशु मसीह को सेवक याकूब को तरफ सी, उन बारा गोत्रों ख जो तितर-बितर हुयो हंय उन्ख नमस्कार।
JAM 1:2 हे मोरो भाऊवों अऊर बहिनों, जब तुम नाना तरह की परीक्षावों म पड़ो, त येख अपनो आप म बहुत आनन्द कि बात समझो,
JAM 1:3 तुम जानय हय कि तुम्हरो विश्वास ख परख्यो जानो सी धीरज तैयार होवय हय।
JAM 1:4 पर धीरज ख अपनो पूरो काम करन देवो कि तुम पूरो अऊर सिद्ध होय जावो, अऊर तुम म कोयी बात की कमी नहीं रहे।
JAM 1:5 पर यदि तुम म सी कोयी ख बुद्धि की कमी हय त परमेश्वर सी मांगो, जो अनुग्रह अऊर उदारता सी देवय हय, अऊर ओख दियो जायेंन।
JAM 1:6 पर विश्वास सी मांगे, अऊर कुछ शक मत करो, कहालीकि शक करन वालो समुन्दर की लहर को जसो हय जो हवा सी बहय अऊर उछलय हय।
JAM 1:7 असो आदमी यो नहीं समझे कि मोख प्रभु सी कुछ मिलेंन,
JAM 1:8 ऊ आदमी शक्की हय अऊर अपनी बातों म अस्थिर हय।
JAM 1:9 गरीब विश्वासियों जब परमेश्वर तुम्ख ऊचो पद देवय हय तब खुशी मनाये,
JAM 1:10 अऊर धनवान आदमी घास को फूल को जसो हय जो नाश होय जावय हय।
JAM 1:11 कहालीकि सूरज निकलतो समय कड़ी धूप पड़य हय अऊर पौधा मुरझाय जावय हय, अऊर ओको फूल झड़ जावय हय अऊर ओकी शोभा कम होत जावय हय। योच तरह धनवान भी अपनो कार्य म चलतो चलतो नाश होय जायेंन।
JAM 1:12 धन्य हय ऊ आदमी जो परीक्षा म स्थिर रह्य हय, कहालीकि ऊ खरो निकल क जीवन को ऊ मुकुट पायेंन जेकी प्रतिज्ञा प्रभु न अपनो प्रेम करन वालो सी करी हय।
JAM 1:13 परीक्षा की घड़ी म कोयी ख यो नहीं कहनो चाहिये कि परमेश्वर मोरी परीक्षा ले रह्यो हय, कहालीकि बुरी बातों सी परमेश्वर ख कोयी लेनो देनो नहाय। ऊ कोयी की परीक्षा नहीं लेवय।
JAM 1:14 पर हर एक आदमी अपनी बुरी इच्छा सी खिच क अऊर फस क परीक्षा म पड़य हय।
JAM 1:15 तब बुरी इच्छा गर्भवती होय क पाप ख जनम देवय हय अऊर जब पाप पूरी रीति सी बढ़ जावय हय त मृत्यु ख पैदा करय हय।
JAM 1:16 हे मोरो प्रिय भाऊवों अऊर बहिनों, धोका मत खावो।
JAM 1:17 कहालीकि हर एक अच्छो दान अऊर हर एक अच्छो परिपूर्ण उपहार स्वर्ग सीच आवय हय, अऊर ऊ परमेश्वर को द्वारा जेन स्वर्गीय प्रकाश ख बनायो हय, ओख खल्लो लायो जावय हय, ऊ हमेशा बदलतो रहन वाली छाव को जसो नहीं बदलय।
JAM 1:18 ओन अपनीच इच्छा सी हम्ख सच को वचन को द्वारा पैदा करयो, ताकि हम ओकी सृष्टि करी हुयी चिजों म सी एक तरह को पहिलो फर हो।
JAM 1:19 हे मोरो प्रिय भाऊवों अऊर बहिनों, या बात तुम जान लेवो: हर एक आदमी सुनन लायी तत्पर अऊर बोलन म धीमो अऊर गुस्सा म भी धीमो हो,
JAM 1:20 कहालीकि आदमी को गुस्सा परमेश्वर को सच्चो उद्देश्य हासिल नहीं कर सकय।
JAM 1:21 येकोलायी पूरी मलिनता अऊर कपट पन की बढ़ती ख दूर कर क्, ऊ वचन ख नम्रता सी स्वीकार कर लेवो जो दिल म बोयो गयो अऊर जो तुम्हरो उद्धार कर सकय हय।
JAM 1:22 केवल सुनन वालो नहीं जो अपनो आप ख धोका देवय हंय पर वचन पर चलन वालो बने।
JAM 1:23 कहालीकि जो कोयी वचन ख सुनन वालो हय अऊर ओको पर चलन वालो नहीं हो, त ऊ आदमी को जसो हय जो अपनो स्वाभाविक मुंह आरसा म देखय हय।
JAM 1:24 ऊ अपनो आप ख देख क चली जावय अऊर तुरतच भूल जावय हय कि मय कसो होतो।
JAM 1:25 पर जो आदमी स्वतंत्रता की सिद्ध व्यवस्था पर ध्यान करतो रह्य हय, ऊ सुन क भूलय नहीं पर वसोच काम करय हय, येकोलायी परमेश्वर ओको काम म आशीष देयेंन।
JAM 1:26 का कोयी अपनो आप ख सच्चो समझय हय? अऊर यदि खुद अपनी जीबली ख वश म नहीं कर सकतो त अपनो आप ख धोका दे रह्यो हय, त ओकी भक्ति बेकार हय।
JAM 1:27 हमरो परमेश्वर अऊर बाप को जवर शुद्ध अऊर निर्मल भक्ति यो हय कि अनाथों अऊर विधवावों को कठिनायी म ओकी सुधि ले, अऊर अपनो आप ख जगत सी निष्कलंक रखे।
JAM 2:1 हे मोरो भाऊवों अऊर बहिनों, हमरो महिमायुक्त प्रभु यीशु मसीह पर तुम्हरो विश्वास पक्षपात को संग नहीं हो।
JAM 2:2 समझो यदि एक धनवान आदमी सोनो को छल्ला अऊर अच्छो कपड़ा पहिन्यो हुयो तुम्हरी सभा म आयेंन, अऊर एक गरीब भी गन्दो कपड़ा पहिन्यो हुयो आये,
JAM 2:3 अऊर तुम ऊ अच्छो कपड़ा वालो को मुंह देख क कहो, “तय उत अच्छी जागा म बैठ,” अऊर ऊ गरीब सी कहो, “तय इत खड़ो रह,” यां “मोरो पाय को जवर बैठ।”
JAM 2:4 त का तय न आपस म भेद-भाव नहीं करयो अऊर बुरो बिचार सी न्याय करन वालो नहीं ठहरयो?
JAM 2:5 हे मोरो प्रिय भाऊवों अऊर बहिनों, सुनो। का परमेश्वर न यो जगत को गरीबों ख नहीं चुन्यो कि विश्वास म धनी अऊर ऊ राज्य को अधिकारी हो, जेकी प्रतिज्ञा ओन उन्को सी करी हय जो ओको सी प्रेम रखय हंय?
JAM 2:6 पर तुम ऊ गरीब को अपमान करय हय। का धनी लोग तुम पर दबाव नहीं डालय अऊर का हिच तुम्ख कचहरी म घसीट क नहीं ले जावय?
JAM 2:7 का हि यो नोहोय, जो ऊ अच्छो नाम की निन्दा नहीं करय जो तुम ख दियो गयो हय?
JAM 2:8 तब भी यदि तुम पवित्र शास्त्र को यो वचन को अनुसार कि “तय अपनो पड़ोसी सी अपनो जसो प्रेम रख” सचमुच ऊ राज व्यवस्था ख पूरी करय हय, त अच्छोच करय हय।
JAM 2:9 पर यदि तुम लोगों को बाहरी पहरावा देख क व्यवहार करय हय त तुम पाप करय हय; अऊर व्यवस्था तुम्ख नियम को उल्लंघन करन वालो ठहरावय हय।
JAM 2:10 कहालीकि जो कोयी पूरी व्यवस्था को पालन करय हय पर एकच बात म चूक जाये त ऊ सब बातों म दोषी ठहर चुक्यो हय।
JAM 2:11 येकोलायी कि जेन यो कह्यो, “तय व्यभिचार मत करजो” ओनच यो भी कह्यो, “तय हत्या मत करजो,” येकोलायी यदि तय न व्यभिचार त नहीं करयो पर हत्या करी तब भी तय व्यवस्था को उल्लंघन करन वालो ठहरयो।
JAM 2:12 तुम उन लोगों को जसो वचन बोलो अऊर काम भी करो, जिन्को न्याय ऊ व्यवस्था को अनुसार होयेंन जो हम्ख स्वतंत्र करय हय।
JAM 2:13 येकोलायी जो दयालु नहाय ओको लायी परमेश्वर को न्याय भी बिना दया कोच होयेंन पर दया न्याय पर विजय हय।
JAM 2:14 हे मोरो भाऊवों अऊर बहिनों, यदि कोयी कहे कि मोख विश्वास हय पर ऊ कर्म नहीं करय हय, त येको सी का फायदा? का असो विश्वास कभी ओको उद्धार कर सकय हय?
JAM 2:15 यदि कोयी भाऊ यां बहिन को जवर कम कपड़ा होना अऊर उन्ख हर दिन भोजन की कमी होना,
JAM 2:16 अऊर तुम म सी कोयी उन्को सी कहे, “शान्ति सी जावो, अऊर तुम्ख कपड़ा की कमी नहीं होय तुम स्वस्थ रहो अऊर अच्छो सी खाय क तृप्त रहो,” पर जो चिजे शरीर लायी जरूरी हंय ऊ उन्ख नहीं दे त का फायदा?
JAM 2:17 वसोच विश्वास भी हय, यदि कर्म सहित नहीं होना त अपनो स्वभाव म मरयो हुयो हय।
JAM 2:18 बल्की कोयी कह्य सकय हय, “तोख विश्वास हय अऊर मय कर्म करू हय।” तय अपनो विश्वास मोख कर्म बिना त दिखाव; अऊर मय अपनो विश्वास अपनो कर्मों को द्वारा तोख दिखाऊं।
JAM 2:19 का तोख विश्वास हय कि एकच परमेश्वर हय? तय अच्छो करय हय। दुष्ट आत्मा भी विश्वास रखय, अऊर कापय हंय।
JAM 2:20 पर हे निकम्मो आदमी, का तय यो भी नहीं जानय कि कर्म बिना विश्वास बेकार हय?
JAM 2:21 जब हमरो पुर्वज अब्राहम न अपनो बेटा इसहाक ख वेदी पर चढ़ायो, त का ऊ कर्मों सी सच्चो नहीं ठहरयो होतो?
JAM 2:22 यानेकि तय न देख लियो कि विश्वास न ओको कामों को संग मिल क प्रभाव डाल्यो हय, अऊर कर्मों सी विश्वास सिद्ध भयो,
JAM 2:23 अऊर पवित्र शास्त्र को यो वचन पूरो भयो: “अब्राहम न परमेश्वर को विश्वास करयो, अऊर यो ओको लायी सच्चो ठहरयो;” अऊर ऊ परमेश्वर को संगी कहलायो।
JAM 2:24 यो तरह तुम न देख लियो कि आदमी केवल विश्वास सीच नहीं, बल्की कर्मों सी भी सच्चो ठहरय हय।
JAM 2:25 वसीच राहब वेश्या भी, जब ओन दूतों ख अपनो घर म उतारयो अऊर दूसरों रस्ता सी बिदा करयो, त का कर्मों सी सच्चो नहीं ठहरी?
JAM 2:26 यानेकि जसो शरीर आत्मा बिना मरी हुयी हय, वसोच विश्वास भी कर्म बिना मरयो हुयो हय।
JAM 3:1 हे मोरो भाऊवों अऊर बहिनों, तुम म सी बहुत शिक्षक मत बनो, कहालीकि जानय हय कि हम शिक्षक को अधीन गम्भीरता सी न्याय करयो जायेंन।
JAM 3:2 येकोलायी कि हम सब बहुत बार चूक जाजे हंय। यदि कोयी ओको बोलन म नहीं चूकय हय त ऊ एक सिद्ध आदमी आय अऊर पूरो शरीर ख भी वश म कर सकय हय।
JAM 3:3 जब हम अपनी आज्ञा मनावन या ओख वश म करन लायी घोड़ा को मुंह म लगाम लगायजे हंय, त हम ओकी पूरो शरीर ख जित चाहे उत घुमाय सकजे हंय।
JAM 3:4 जहाज भी असो बड़ो होवय हंय अऊर बहुत बड़ी हवा सी चलायो जावय हंय, तब भी एक छोटी सी पतवार को द्वारा जहाज चलावन वालो की इच्छा को अनुसार घुमायो जावय हंय।
JAM 3:5 वसीच जीबली भी एक छोटो सो अंग आय अऊर ऊ बड़ी-बड़ी डींग मारय हय। सोचो की, छोटी सी आगी सी कितनो बड़ो जंगल म आगी लग सकय हय।
JAM 3:6 जीबली भी एक आगी आय; जीबली हमरो अंगों म अधर्म को एक जगत आय, अऊर पूरो शरीर पर कलंक लगावय हय, अऊर जीवनगति म आगी लगाय देवय हय, अऊर नरक कुण्ड की आगी सी जरती रह्य हय।
JAM 3:7 कहालीकि हर तरह को वन पशु, पक्षी, अऊर रेंगन वालो जन्तु, अऊर जलचर त आदमी जाति को वश म होय सकय हंय अऊर भय भी गयो हंय,
JAM 3:8 पर जीबली ख आदमियों म सी कोयी वश म नहीं कर सकय; ऊ एक असी बला हय जो कभी रुकय भी नहाय, ऊ जीव नाशक जहेर सी भरयो हुयो हय।
JAM 3:9 येको सी हम प्रभु अऊर बाप की स्तुति करजे हंय, अऊर येको सी आदमियों ख जो परमेश्वर को स्वरूप म पैदा भयो हंय श्राप देजे हंय।
JAM 3:10 एकच मुंह सी धन्यवाद अऊर श्राप दोयी निकलय हंय। हे मोरो विश्वासियों, असो नहीं होनो चाहिये।
JAM 3:11 का झरना को एकच स्रोता सी मीठो अऊर खारो पानी दोयी निकलय हय?
JAM 3:12 हे मोरो संगियों, का अंजीर को झाड़ म जैतून, या अंगूर की डगाली म अंजीर लग सकय हंय? वसोच खारो झरना सी मीठो पानी नहीं निकल सकय।
JAM 3:13 तुम म बुद्धिमान अऊर समझदार कौन हय? जो असो हो ऊ अपनो कामों ख अच्छी चाल चलन सी ऊ नम्रता सहित प्रगट करे जो ज्ञान सी पैदा होवय हय।
JAM 3:14 पर यदि तुम अपनो अपनो मन म जलन, कड़वाहट, स्वार्थिपन अऊर विरोध रखय हय, त बुद्धी पर घमण्ड कर क् सच को विरुद्ध झूठ मत बोलो।
JAM 3:15 यो ज्ञान ऊ नहीं जो स्वर्ग सी उतरय हय, बल्की सांसारिक, अऊर सांसारिक, अऊर शारीरिक, अऊर शैतान को तरफ सी हय।
JAM 3:16 कहालीकि जित जलन अऊर स्वार्थिपन होवय हय, उत अव्यवस्था अऊर हर तरह की बुरी बाते होवय हय।
JAM 3:17 पर जो ज्ञान स्वर्ग सी आवय हय ऊ पहिले त पवित्र होवय हय फिर मिलनसार, नरम स्वभाव अऊर शान्तिमय अऊर दया अऊर अच्छो फरो सी लद्यो हुयो अऊर पक्षपात अऊर निष्कपट होवय हय।
JAM 3:18 शान्ति प्रस्थापित करन वालो शान्ति म बीज बोवय हय ताकि ओख सच्चायी की फसल प्राप्त होवय हय।
JAM 4:1 का तुम्हरो बीच म लड़ाईयां अऊर झगड़ा कित सी आवय हय? का यो इच्छावों सी नहीं होवय हय? जो तुम्हरो अन्दर झगड़ा करतो रह्य हंय।
JAM 4:2 तुम चाहवय हय पर तुम्ख मिलय नहाय; येकोलायी तुम हत्या करय हय; तुम पूरो रीति सी इच्छा रखय हय, अऊर कुछ हासिल नहीं कर पावय; येकोलायी तुम झगड़य अऊर लड़य हय। तुम जो चाहवय हय ऊ मिलय नहाय कहालीकि तुम परमेश्वर सी मांगय नहाय।
JAM 4:3 तुम मांगय हय अऊर पावय नहाय, येकोलायी कि बुरी इच्छा सी मांगय हय, ताकि अपनो सुखविलास म उड़ाय देवो।
JAM 4:4 हे विश्वास हिन लोगों, का तुम नहीं जानय कि जगत सी दोस्ती करनो परमेश्वर सी दुस्मनी करनो हय जो कोयी जगत को संगी होनो चाहवय हय ऊ अपनो आप ख परमेश्वर को दुश्मन बनावय हय।
JAM 4:5 का तुम यो समझय हय कि पवित्र शास्त्र बेकार कह्य हय, “जो आत्मा ख ओन हमरो अन्दर बसायो हय, का ऊ असी लालसा करय हय जेको प्रतिफल ईर्ष्या हय?”
JAM 4:6 ऊ त अऊर भी अनुग्रह देवय हय; यो वजह यो लिख्यो हय, “परमेश्वर अभिमानियों को विरोध करय हय, पर दीनो पर अनुग्रह करय हय।”
JAM 4:7 येकोलायी परमेश्वर को अधीन होय जावो; अऊर शैतान को सामना करो, त ऊ तुम्हरो जवर सी भाग निकलेंन।
JAM 4:8 परमेश्वर को जवर आवो त ऊ भी तुम्हरो जवर आयेंन। हे पापियों, अपनो हाथ धोय लेवो; अऊर हे कपटियों, अपनो दिल ख पवित्र करो।
JAM 4:9 दु:खी हो, अऊर शोक करो, अऊर रोवो। तुम्हरी हसी शोक म अऊर तुम्हरी खुशी उदासी बदल जायेंन।
JAM 4:10 प्रभु को आगु नम्र बनो त ऊ तुम्ख ऊचो करेंन।
JAM 4:11 हे भाऊवों अऊर बहिनों, एक दूसरों को विरोध म मत बोलो, एक दूसरों को विरोध मत करो। तुम व्यवस्था को पालन करन वालो नहीं पर ओको न्याय करन वालो बन जावय हय।
JAM 4:12 व्यवस्था देन वालो अऊर न्याय करन वालो एकच परमेश्वर हय। ऊ अकेलोच बचाय सकय हय यां नाश कर सकय हय। तुम मसीह भाऊ को न्याय करन वालो कौन होवय हय?
JAM 4:13 सुनो तुम जो यो कह्य हय, “अज यां कल हम कोयी अऊर नगर म जाय क उत एक साल बितायबो, अऊर व्यापार कर क् फायदा कमायबो।”
JAM 4:14 अऊर यो नहीं जानय कि कल का होयेंन। सुन त लेवो, तुम्हरो जीवन हयच का? तुम त भाप को जसो हय, जो थोड़ी देर दिखायी देवय हय फिर गायब हो जावय हय।
JAM 4:15 येको उलट तुम्ख यो कहनो चाहिये, “यदि प्रभु चाहेंन त हम जीन्दो रहबोंन, अऊर यो यां ऊ काम भी करबोंन।”
JAM 4:16 पर अब तुम अपनी डींग मारय हय अऊर असो सब घमण्ड बुरो होवय हय।
JAM 4:17 येकोलायी जो कोयी भलायी करनो जानय हय अऊर नहीं करय, ओको लायी यो पाप को दोष आय।
JAM 5:1 हे धनवानों, सुनो, तुम अपनो आवन वाली विपत्तियों पर रोवो अऊर ऊचो आवाज सी विलाप करो।
JAM 5:2 तुम्हरो धन सड़ गयो हय अऊर तुम्हरो कपड़ा ख कीड़ा खाय गयो हंय।
JAM 5:3 तुम्हरो सोना-चांदी म जंग लग गयो हय; अऊर ऊ जंग तुम पर गवाही देयेंन, अऊर आगी को जसो तुम्हरो मांस खाय जायेंन। तुम न आखरी युग म धन जमा करयो हय।
JAM 5:4 देखो, जिन मजूरों न तुम्हरो खेत काट्यो, उनकी वा मजूरी जो तुम न धोका दे क रख लियो हय चिल्लाय रही हय, अऊर काटन वालो की दुवा सर्वशक्तिमान प्रभु को कानो तक पहुंच गयी हय।
JAM 5:5 तुम धरती पर सुखविलास म लग्यो रह्यो अऊर बड़ोच सुख भोग्यो; तुम न यो वध को दिन लायी अपनो दिल को पालन-पोषन कर क् ओख मोटो-ताजो करयो।
JAM 5:6 तुम न सच्चो ख दोषी ठहराय क मार डाल्यो, ऊ तुम्हरो सामना नहीं करय।
JAM 5:7 येकोलायी हे भाऊवों अऊर बहिनों, प्रभु को आगमन तक धीरज रखो। देखो, किसान जमीन की किमती फसल की आशा रखतो हुयो पहिली अऊर आखरी बारीश होन तक धीरज सी बाट देखतो रह्य हय।
JAM 5:8 तुम भी धीरज रखो; अऊर अपनी आशा ख बनायो रखो, कहालीकि प्रभु को आगमन जवर हय।
JAM 5:9 हे भाऊवों अऊर बहिनों, एक दूसरों को प्रति शिकायत मत करो, ताकि परमेश्वर तुम्हरो न्याय नहीं करे। देखो, शासक प्रगट होन पर हय।
JAM 5:10 हे भाऊवों अऊर बहिनों, जिन भविष्यवक्तावों न प्रभु को नाम सी बाते करी, उन ख दु:ख उठावन को समय उन्को धीरज को आदर्श समझो।
JAM 5:11 देखो, हम धीरज धरन वालो उन भविष्यवक्तावों ख धन्य कहजे हंय। तुम न अय्युब को धीरज को बारे म त सुन्योच हय, अऊर प्रभु को तरफ सी जो ओको प्रतिफल भयो ओख भी जान लियो हय, जेकोसी प्रभु की अत्यन्त करुना अऊर दया प्रगट होवय हय।
JAM 5:12 पर हे मोरो भाऊवों अऊर बहिनों, सब सी अच्छी बात या हय कि कसम मत खाजो, नहीं स्वर्ग की, नहीं धरती की, नहीं कोयी अऊर चिज की; पर तुम्हरी बातचीत हव की हव, अऊर नहीं की नहीं हो, कि तुम परमेश्वर को न्याय को लायक नहीं ठहरो।
JAM 5:13 तुम म कोयी विपत्ति म पड़्यो हय? त उन्न प्रार्थना करनो चाहिये। का तुम म कोयी खुश हय, त उन न स्तुति को भजन गानो चाहिये।
JAM 5:14 का तुम म कोयी रोगी हय? त उन्ख चाहिये कि मण्डली को बुजूर्गों ख बुलाये कि हि प्रार्थना करे उन पर प्रभु को नाम सी तेल मले,
JAM 5:15 अऊर विश्वास की प्रार्थना को द्वारा रोगी बच जायेंन अऊर प्रभु ओख फिर सी स्वस्थ शरीर प्रदान करेंन; अऊर यदि ओन पाप भी करयो होना, त उन्की भी माफी होय जायेंन।
JAM 5:16 येकोलायी तुम आपस म एक दूसरों को आगु अपनो-अपनो पापों ख मान लेवो, अऊर एक दूसरों को लायी प्रार्थना करो, जेकोसी चंगो होय जावो: सच्चो लोग की प्रार्थना सामर्थीकारक अऊर प्रभावशाली होवय हय।
JAM 5:17 एलिय्याह भी त हमरो जसो दु:ख-सुख भोग्यो आदमी होतो; अऊर ओन गिड़गिड़ाय क प्रार्थना करी कि पानी नहीं बरसे; अऊर साढ़े तीन साल तक धरती पर पानी नहीं बरस्यो।
JAM 5:18 तब ओन प्रार्थना करी, त आसमान सी बरसात भयी, अऊर धरती फलवन्त भयी।
JAM 5:19 हे मोरो भाऊवों अऊर बहिनों, यदि तुम म कोयी सच को रस्ता सी भटक जाये अऊर कोयी ओख फिर सी लाये,
JAM 5:20 त ऊ यो जान ले कि जो कोयी कोयी भटक्यो हुयो पापी ख ओको गलत रस्ता सी फिर सी लाये, ऊ पापी को जीव ख मरन सी बचायेंन अऊर ओको कुछ पापों ख माफी करयो जान को कारण बनेंन।
1PE 1:1 पतरस को तरफ सी जो यीशु मसीह को प्रेरित हय, उन चुन्यो हुयो परमेश्वर को लोग जो पुन्तुस, गलातिया, कप्पदूकिया, आसिया अऊर बितूनिया म तितर-बितर होय क निर्वाशित जसो रह्य हंय,
1PE 1:2 तुम पिता परमेश्वर को पूर्व उद्देश को अनुसार चुन्यो गयो हय अऊर ओकी आत्मा को द्वारा पवित्र लोग ठहरायो गयो, येकोलायी की यीशु मसीह की आज्ञा माने अऊर ओको खून को छिड़काव को द्वारा पवित्र ठहरायो गयो हय। तुम पर परमेश्वर को तरफ सी अनुग्रह अऊर शान्ति बहुतायत सी होती रहे।
1PE 1:3 हमरो प्रभु यीशु मसीह को परमेश्वर पिता को धन्यवाद हो, जेन यीशु मसीह को मरयो हुयो म सी जीन्दो करन को द्वारा, अपनी बड़ी दया सी हम्ख जीन्दी आशा लायी नयो जनम दियो,
1PE 1:4 मतलब एक अविनाशी, अऊर निर्मल, अजर विरासत लायी जो तुम्हरो लायी स्वर्ग म रखी हय;
1PE 1:5 जो विश्वास को द्वारा सुरक्षित हय परमेश्वर की सामर्थ को द्वारा ऊ उद्धार लायी जो आखरी समय म प्रगट होन को लायी तैयार हय।
1PE 1:6 येकोलायी तुम बहुतायत सी खुश रहो, हालांकि अभी थोड़ो समय को लायी अलग अलग तरह की परीक्षावों को वजह दु:ख उठानो पड़ेंन;
1PE 1:7 अऊर यो येकोलायी हय कि तुम्हरो विश्वास परख्यो जाये, जो आगी सी तपायो हुयो नाशवान सोना सी भी बहुत जादा किमती हय, उन्को उद्देश यो हय कि ऊ शुद्ध निकले, जब यीशु मसीह प्रगट होयेंन ऊ दिन तब तुम्ख प्रशंसा अऊर महिमा अऊर आदर मिलेंन।
1PE 1:8 तुम ओको सी प्रेम करय हय जब की तुम न ओख देख्यो नहीं, अऊर तुम ओको पर विश्वास करय हय जब की तुम न अभी ओख देख्यो नहीं त तुम महिमामय खुशी सी खुश होय जावो शब्दों सी बयान नहीं करयो जाय सकय;
1PE 1:9 तुम्हरो आत्मावों को उद्धार यो जो तुम्हरो विश्वास को उद्देश तुम ओको म प्राप्त करय हय।
1PE 1:10 योच उद्धार को बारे म उन भविष्यवक्तावों न ध्यान सी खोजबीन अऊर जांच-पड़ताल करी, जिन्न ऊ अनुग्रह को बारे म जो तुम पर होन ख होतो, भविष्यवानी करी होती।
1PE 1:11 उन भविष्यवक्तावों न खोज करी ऊ समय कब अऊर कसो आयेंन। ऊ यो समय होतो जेको बारे म मसीह की आत्मा जो उन्म होती जो बाते मसीह पर आवन वालो दु:ख अऊर ओको बाद प्रगट होन वाली महिमा को बारे म निर्देशन करत होती।
1PE 1:12 परमेश्वर न उन भविष्यवक्तावों पर प्रगट करयो गयो कि हि अपनी खुद की नहीं बल्की तुम्हरी सेवा लायी यो बाते कहत होतो, जिन्को समाचार अब तुम्ख उन्को द्वारा मिल्यो जिन्न पवित्र आत्मा सी, जो स्वर्ग सी भेज्यो गयो, तुम्ख सुसमाचार सुनायो; अऊर इन बातों ख स्वर्गदूत भी ध्यान सी समझन की इच्छा रखय हंय।
1PE 1:13 येकोलायी मानसिक रूप सी सचेत रहो; खुद नियंत्रन म रहो, जब यीशु मसीह प्रगट होयेंन तब जो आशीष तुम ख मिलन की हय, ओको पर अपनी आशा पूरी रीति सी लगायो रखो।
1PE 1:14 आज्ञाकारी बच्चां को जसो, ऊ समय की बुरी इच्छावों को अनुसार अपनो आप ख मत ढालो जो तुम म पहिले होती, जब तुम अज्ञानी होतो।
1PE 1:15 पर जसो तुम्हरो बुलावन वालो पवित्र हय, वसोच तुम भी अपनो पूरो चाल-चलन म पवित्र बनो।
1PE 1:16 कहालीकि शास्त्र म लिख्यो हय, “पवित्र बनो, कहालीकि मय पवित्र हय।”
1PE 1:17 अऊर यदि तुम, हरेक को कर्मों को अनुसार पक्षपात रहित होय क न्याय करन वालो परमेश्वर ख प्रार्थना म हे बाप कह्य क पुकारय हय, त यो धरती पर परदेशी होय क परमेश्वर ख सम्मान देतो हुयो डर को संग जीवन जीवो।
1PE 1:18 कहालीकि तुम जानय हय कि तुम्हरो निकम्मो चाल-चलन को तरीका जो बापदादों सी चल्यो आवय हय, ओको सी तुम्हरो छुटकारा चांदी-सोना यानेकि बेकार चिजों को द्वारा नहीं भयो;
1PE 1:19 बल्की बहुमूल्य मसीह को अर्पन को द्वारा जो एक निर्दोष अऊर निष्कलंक मेम्ना को जसो होतो।
1PE 1:20 सृष्टि को निर्मान को पहिले परमेश्वर को द्वारा मसीह ख चुन्यो गयो होतो, पर तुम्हरो लायी आखरी दिनो म ओख प्रगट करयो गयो।
1PE 1:21 ऊ मसीह को द्वारा तुम ऊ परमेश्वर पर विश्वास करय हय, जेन ओख मरयो हुयो म सी जीन्दो करयो अऊर महिमा दी कि ताकी तुम्हरो विश्वास अऊर आशा परमेश्वर पर टिक्यो रहेंन।
1PE 1:22 जब तुम न सच को पालन करतो हुयो सच्चो भाईचारा को प्रेम ख प्रदर्शित करन लायी अपनो आप ख निष्कपट कर लियो हय त पूरो दिल को संग आपस म एक दूसरों सी प्रेम करे।
1PE 1:23 कहालीकि तुम न नाशवान नहीं पर अविनाशी बीज सी, परमेश्वर को जीवतो अऊर हमेशा ठहरन वालो वचन को द्वारा नयो जनम पायो हय।
1PE 1:24 कहालीकि जसो शास्त्र म लिख्यो हय “हर एक प्रानी घास को जसो हय, अऊर ओकी पूरी शोभा जंगली फूलो को जसो हय। अऊर घास सुक जावय हय।
1PE 1:25 पर प्रभु को वचन हमेशा हमेशा स्थिर रह्य हय।” अऊर योच सुसमाचार को वचन हय जो तुम्ख घोषित करयो गयो होतो।
1PE 2:1 येकोलायी सब तरह की बुरायी, अऊर कपट, जलन या अपमानित भाषा ख अपनो आप म सी निकाल देवो।
1PE 2:2 नयो जनम भयो बच्चां को जसो शुद्ध आत्मिक दूध को प्यासो रहो, येकोलायी येको पिवन को द्वारा तुम्हरो विकास अऊर उद्धार बचायो जाये।
1PE 2:3 जसो कि शास्त्र म लिख्यो हय, अपनो आप जान लियो कि प्रभु कितनो भलो हय।
1PE 2:4 प्रभु को जवर आवो, ऊ सजीव गोटा जो लोगों को द्वारा बेकार समझ क नकार दियो होतो पर जो परमेश्वर को लायी बहुमूल्य हय ओको द्वारा चुन्यो गयो होतो,
1PE 2:5 तुम भी सजीव गोटा को जसो आत्मिक मन्दिरों को रूप म बनायो जाय रह्यो हय ताकी एक असो पवित्र याजकमण्डल को रूप म सेवा कर सको जेको कर्तव्य असो आध्यात्मिक बलिदान समर्पित करय हय जो यीशु मसीह को द्वारा परमेश्वर को स्वीकार लायक हो।
1PE 2:6 यो कारण पवित्र शास्त्र म भी लिख्यो हय: “मय एक बहुमूल्य गोटा चुन्यो हय जेक मय न सिय्योन को कोना को गोटा रख्यो हय; जो कोयी ओको म विश्वास करेंन ऊ कभी भी शर्मिन्दा नहीं होयेंन।”
1PE 2:7 तुम विश्वासियों को लायी यो गोटा बहुत बहुमूल्य हय; पर जो विश्वास नहीं करय: ऊ गोटा जेक राजमिस्त्रियों न बेकार समझ क नकारयो उच गोटा सब को लायी महत्वपूर्ण कोना को गोटा बन गयो:
1PE 2:8 अऊर शास्त्र म यो भी लिख्यो हय, “यो ऊ गोटा आय जो लोगों ख ठेस पहुंचायेंन, यो चट्टान जो लोगों ख ठोकर दे क गिरायेंन,” ऊ ठोकर खायेंन कहालीकि हि परमेश्वर को वचन पर विश्वास नहीं करय अऊर योच उन्को लायी परमेश्वर की इच्छा होती।
1PE 2:9 पर तुम एक चुन्यो हुयो वंश, अऊर राज-पदधारी याजकों को समाज, पवित्र प्रजा, अऊर परमेश्वर को खुद को लोग हो, येकोलायी कि जेन तुम्ख अन्धारो म सी अपनी अद्भुत ज्योति म बुलायो हय, ओको महान काम की घोषना करो।
1PE 2:10 एक समय होतो जब तुम प्रजा नहीं होतो पर अब तुम परमेश्वर की प्रजा हो। एक समय होतो जब तुम दया को लायक नहीं होतो पर अब तुम पर परमेश्वर न दया दिखायी हय।
1PE 2:11 हे प्रिय संगियों, मय तुम सी, जो यो जगत म अजनबी को रूप म हय, आग्रह करू हय कि ऊ शारीरिक इच्छावों सी दूर रहो जो तुम्हरी आत्मावों सी लड़ती रह्य हय।
1PE 2:12 गैरयहूदी को बीच अपनो व्यवहार इतनो अच्छो बनायो रखो कि चाहे हि अपराधी को रूप म तुम्हरी आलोचना करे पर तुम्हरो अच्छो कर्मों को परिनाम स्वरूप ओको आवन को दिन हि परमेश्वर ख महिमा प्रदान करे।
1PE 2:13 प्रभु को लायी अपनो आप ख हर मानव अधिकारी को अधीन रहो: सर्वोच्च को अधीन येकोलायी कि ऊ सब पर शासन करय हय,
1PE 2:14 अऊर शासकों को, कहालीकि हि गलत काम करन वालो ख न्याय देन अऊर अच्छो लोगों की बड़ायी को लायी ओको भेज्यो हुयो हंय।
1PE 2:15 कहालीकि परमेश्वर तुम सी यो चाहवय हय कि तुम अपनो अच्छो कार्यो सी मुर्ख लोगों की अज्ञानता की बातों ख चुप कराय देवो।
1PE 2:16 अपनो आप ख स्वतंत्र व्यक्ति को जसो जीवन बितावो; पर अपनी यो स्वतंत्रता को उपयोग बुरी बातों ख झाकन को लायी मत करो पर परमेश्वर को सेवकों को जसो जीवो।
1PE 2:17 सब को आदर करो, अपनो दूसरों विश्वासी भाऊवों सी प्रेम रखो, परमेश्वर को आदर को संग डर मानो, राजा को सम्मान करो।
1PE 2:18 हे सेवकों, अपनो आप ख अपनो मालिकों को अधीन रखो अऊर उन्ख पूरो रीति सी आदर देवो, नहीं केवल उन्को जो अच्छो अऊर दूसरों को लायी चिन्ता करय हय बल्की उन ख भी जो कठोर हय।
1PE 2:19 कहालीकि यदि कोयी परमेश्वर को बिचार कर क् अन्याय सी दु:ख उठातो हुयो कठिनायी सहय हय त यो अच्छो हय।
1PE 2:20 कहालीकि यदि तुम न अपराध कर क् घूसा खायो अऊर धीरज धरयो, त येको म का बड़ायी की बात हय? पर यदि अच्छो काम कर क् दु:ख उठावय हय अऊर धीरज धरय हय, त यो परमेश्वर ख अच्छो भावय हय।
1PE 2:21 पर तुम्ख परमेश्वर न येकोच लायी बुलायो हय, की मसीह न दु:ख उठायो हय, असो कर क् हमरो लायी एक उदाहरन छोड़्यो हय ताकी हम ओको पद चिन्हों पर चले।
1PE 2:22 ओन कोयी पाप नहीं करयो अऊर कोयी न ओको मुंह सी झूठी बात नहीं सुनी।
1PE 2:23 जब ऊ अपमानित भयो तब ओन कोयी को अपमान कर क् प्रतिउत्तर नहीं दियो। जब ओन दु:ख झेल्यो, ओन कोयी ख धमकी नहीं दी बल्की ऊ सच्चो न्याय करन वालो परमेश्वर म अपनी आशावों ख रख्यो।
1PE 2:24 मसीह न खुदच हमरो पापों ख अपनो शरीर पर क्रूस पर ओढ़ लियो ताकी हम अपनो पापों को प्रती हमरी मृत्यु होय जाये अऊर सच्चायी को लायी जीये। यो ओको उन घावों को कारणच भयो जिन्कोसी तुम चंगो करयो गयो हय।
1PE 2:25 तुम मेंढा को जसो होतो जो अपनो रस्ता भटक गयो होतो पर अब खुद फिर सी वापस अपनो चरवाहा अऊर तुम्हरो आत्मावों को रख वालो को जवर लायो गयो हय।
1PE 3:1 योच रीति सी हे पत्नियों, अपनो आप ख अपनो पति को अधीन रहो, ताकी यदि कोयी परमेश्वर को वचन पर विश्वास नहीं करे त वा अपनो व्यवहार सी विश्वास करन को लायी जीतो जाये। येकोलायी तुम्ख ओको सी कोयी बात करन की भी जरूरत नहाय,
1PE 3:2 कहालीकि हि देखेंन की तुम्हरो व्यवहार कसो शुद्ध अऊर भक्तिपूर्ण हय।
1PE 3:3 अपनो आप ख सुन्दर करन लायी बाहरी साज सिंगार को इस्तेमाल मत करे, जसो की बाल गूथन, यां फिर सोनो को जेवर पहिनन, यां तरह-तरह को कपड़ा पहिनन,
1PE 3:4 बल्की तुम्हरी सुन्दरता तुम्हरो मन व्यक्तित्व बनावय हय, कोमल यां शान्त आत्मा को अविनाशी सजावट सी सुसज्जित रहो, परमेश्वर की नजर म मूल्यवान हय।
1PE 3:5 पहिले को काल म पवित्र बाईयां भी, जो परमेश्वर पर आशा रखत होती, अपनो आप ख योच रीति सी संवारती अऊर अपनो-अपनो पति को अधीन रहत होती।
1PE 3:6 जसी सारा अपनो पति अब्राहम की आज्ञा मानत होती, अऊर ओख मोरो मालिक कहत होती। योच तरह तुम भी यदि भलायी करो अऊर कोयी तरह को डर सी भयभित मत हो, त सारा की बेटियां ठहरो।
1PE 3:7 वसोच हे पतियों, तुम भी समझदारी सी पत्नियों को संग जीवन बितावो, अऊर बाई ख कमजोर जान क ओको आदर करो, यो समझ क कि हम दोयी परमेश्वर को जीवन को वरदान म उन्ख अपनो सह उत्तराधिकारी मानो, ताकी तुम्हरी प्रार्थनावों म रुकावट मत पड़े।
1PE 3:8 आखरी म तुम सब को सब एक मन अऊर कृपामय सहानुभूति, भाऊवों सी प्रेम रखन वालो, अऊर दयालुता सी, अऊर एक दूसरों सी नम्र बनो।
1PE 3:9 बुरायी को बदला बुरायी मत करो अऊर नहीं श्राप को बदला श्राप देवो; बल्की प्रतिउत्तर आशीष देवो, कहालीकि आशीष हय जो परमेश्वर न तुम ख देन को वचन दियो होतो जब तुम्ख बुलायो होतो।
1PE 3:10 जसो शास्त्र म लिख्यो हय, “यदि तुम्ख अपनो जीवन की खुशी लेनो हय, अऊर अच्छो समय की इच्छा रखय हय त, अऊर ओख चाहिये की बुरी बात बोलन सी रोके अऊर झूठ बोलनो बन्द करे।
1PE 3:11 ऊ बुरायी को संग छोड़े, अऊर भलायीच करे; ऊ पूरो दिल सी शान्ति पावन लायी कोशिश करे।
1PE 3:12 कहालीकि प्रभु की आंखी न्यायियों पर लगी रह्य हंय, अऊर ओको कान ओकी प्रार्थना को तरफ लगी रह्य हंय; पर प्रभु बुरायी करन वालो को विरुद्ध मुंह फेर लेवय हय।”
1PE 3:13 यदि तुम भलायी करन को लायी तैयार रहो त तुम्हरी बुरायी करन वालो फिर कौन हय?
1PE 3:14 यदि तुम सच्चायी को वजह दु:ख भी उठावय हय, त धन्य हो; पर लोगों को डरानो सी मत डरो, अऊर घबरावो मत,
1PE 3:15 पर अपनो मन म मसीह को लायी आदर रखो, अऊर ओख प्रभु जान क आदर देवो। अऊर यदि कोयी तुम्ख अपनी आशा को बारे म जो तुम म हय समझावन ख कहेंन त ओख उत्तर देन लायी हमेशा तैयार रहो,
1PE 3:16 पर हि विनम्रता अऊर आदर को संगच करो अऊर अपनो विवेक ख शुद्ध रखो, ताकी यीशु मसीह म तुम्हरो आचरन की निन्दा करन वालो लोग तुम्हरो अपमान करतो हुयो शर्मायेंन।
1PE 3:17 कहालीकि यदि परमेश्वर की याच इच्छा हो कि तुम भलायी करन को वजह दु:ख उठावों, त यो बुरायी करन को बदला दु:ख उठानो सी बहुत अच्छो हय।
1PE 3:18 येकोलायी मसीह भी पूरो पापों लायी एकच बार मरयो, मतलब ऊ जो सच्चो होतो ऊ पापियों को लायी मारयो गयो कि हम्ख परमेश्वर को जवर ले जाये। शरीर को भाव सी त ऊ मारयो गयो पर आत्मा को भाव सी जीन्दो करयो गयो।
1PE 3:19 अऊर ओकी आत्मा की स्थिति म जाय क बन्दी आत्मावों ख सन्देश दियो,
1PE 3:20 या वा आत्मायें आय जो ऊ समय म परमेश्वर की आज्ञा नहीं मानन वाली होती, जब नूह को जहाज बनायो जाय रह्यो होतो अऊर परमेश्वर धीरज को संग इन्तजार कर रह्यो होतो ऊ जहाज म थोड़ो लोग यानेकि आठ प्रानी पानी सी बचायो गयो।
1PE 3:21 यो ऊ बपतिस्मा को जसो हय जेकोसी अब तुम्हरो उद्धार होवय हय, येको म शरीर को मईल धोवनो नहीं बल्की एक अच्छो विवेक को लायी परमेश्वर सी वाचा हय। अब त तुम्ख यीशु मसीह को पुनरुत्थान को द्वारा बचावय हय।
1PE 3:22 ऊ स्वर्ग पर जाय क परमेश्वर को दायो तरफ बैठ गयो; अऊर स्वर्गदूत अऊर अधिकारी अऊर सामर्थ को काम ओको अधीन करयो गयो हंय।
1PE 4:1 येकोलायी जब कि मसीह न शरीर म होय क दु:ख उठायो त तुम भी उच मनसा ख अवजार को जसो धारन करो, कहालीकि जेन शरीर म दु:ख उठायो ऊ पाप सी छूट गयो,
1PE 4:2 अब सी आगु, तुम्हरो धरती पर को जीवन मानविय इच्छावों को अनुसार नहीं बल्की परमेश्वर की इच्छा को अनुसार जीवन जीये।
1PE 4:3 कहालीकि गैरयहूदी जो बाते हि करनो पसंद करत होतो ऊ बात की इच्छा को अनुसार, अऊर असभ्यता, वासना, पियक्कड़पन, लीलाक्रिडा, रंगरैली अऊर घृणित मूर्तिपूजा म जित तक हम न पहिले समय गवायो, उच बहुत भयो।
1PE 4:4 येको सी हि अचम्भा करय हंय कि तुम असो भारी घृणित, अऊर लापरवाही को जीवन जीन म शामिल नहीं होवय; येकोलायी हि तुम्हरी निन्दा करय हय।
1PE 4:5 पर जो मरयो हुयो अऊर जीन्दो को न्याय करन को लायी तैयार हय ऊ परमेश्वर ख ऊ खुद अपनो व्यवहार को लेखा-जोखा देयेंन।
1PE 4:6 येकोलायी उन विश्वासी ख जो मर चुक्यो हय सुसमाचार सुनायो होतो कि शारीरिक रूप सी चाहे उन्को मानविय स्तर पर न्याय हो, पर आत्मिक रूप सी परमेश्वर को अनुसार जीन्दो रहे।
1PE 4:7 सब बातों को अन्त तुरतच होन वालो हय; येकोलायी संय्यमी होय क प्रार्थना को लायी सचेत रहो।
1PE 4:8 सब म बड़ी बात या हय कि एक दूसरों सी घनिष्ट प्रेम रखो, कहालीकि प्रेम कुछ पापों ख झाक देवय हय।
1PE 4:9 बिना कुड़कुड़ाये एक दूसरों अतिथियों को स्वागत करो।
1PE 4:10 जेक जो वरदान मिल्यो हय, ऊ ओख परमेश्वर को अलग अलग तरह को दान को भलो व्यवस्थापक को जसो एक दूसरों की सेवा म लगाये।
1PE 4:11 जो कोयी प्रचार करे; जो कोयी सेवा करे, त ऊ वा शक्ति सी करे जो परमेश्वर देवय हय; येकोलायी सब बातों म यीशु मसीह को द्वारा, परमेश्वर ख प्रशंसा मिले। महिमा अऊर साम्राज्य हमेशा हमेशा ओकोच आय। आमीन।
1PE 4:12 हे प्रिय संगियों, जब तुम्हरी अग्नि परीक्षा होवय हय तब एक विचित्र बाते देख क अचम्भित मत होय। कि कोयी अजीब बात तुम पर बीत रही हय।
1PE 4:13 पर जसो मसीह को दु:खों म शामिल होवय हय, तब खुशी मनावो, जेकोसी ओकी महिमा ख प्रगट होतो समय भी तुम पूरी खुशी सी भर जावो।
1PE 4:14 तब यदि मसीह को नाम को लायी तुम्हरी निन्दा करी जावय हय त तुम धन्य हो, कहालीकि महिमामय परमेश्वर की आत्मा, तुम पर छाया करय हय।
1PE 4:15 तुम म सी कोयी व्यक्ति हत्यारों यां चोर यां कुकर्मी होन को, या दूसरों को काम म हाथ डालन को वजह दु:ख नहीं पाये।
1PE 4:16 पर यदि मसीही होन को वजह दु:ख पाये, त लज्जित मत हो, पर या बात को लायी परमेश्वर ख महिमा देवो कहालीकि तुम न मसीह को नाम धारन करयो।
1PE 4:17 कहालीकि न्याय करन की सुरूवात को समय आय चुक्यो हय कि पहिले परमेश्वर को लोगों को न्याय करयो जायेंन; अऊर जब कि न्याय को सुरूवात हम सीच होयेंन त ओको का अन्त होयेंन जो परमेश्वर को सुसमाचार ख नहीं मानय?
1PE 4:18 असो पवित्र शास्त्र म लिख्यो हय, “यदि सच्चो आदमी कठिनायी सी उद्धार पायेंन, त भक्तिहीन अऊर पापी को का ठिकाना?”
1PE 4:19 येकोलायी जो परमेश्वर की इच्छा को अनुसार दु:ख उठावय हंय, हि भलायी करतो हुयो अपनो आप ख विश्वास लायक सृजनहार को हाथ म सौंप दे।
1PE 5:1 तुम म जो बुजूर्ग हंय, मय उन्को जसो बुजूर्ग अऊर मसीह को दु:खों को गवाह अऊर प्रगट होन वाली महिमा म शामिल होय क उन्ख यो समझाऊ हय
1PE 5:2 कि परमेश्वर को ऊ झुण्ड की, जो तुम्हरो बीच म हय रखवाली करो; अऊर यो दबाव सी नहीं पर परमेश्वर की इच्छा को अनुसार खुशी सी, अऊर पैसाच को लायी नहीं पर मन लगाय क कर।
1PE 5:3 जो लोग देख-रेख को लायी तुम्ख सौंप्यो गयो हंय, उन पर अधिकार मत जतावो, बल्की झुण्ड को लायी एक आदर्श बनो।
1PE 5:4 जब प्रधान रख वालो प्रगट होयेंन, त तुम्ख महिमा को मुकुट दियो जायेंन जेकी शोभा कभी घटय नहाय।
1PE 5:5 योच तरह हे नवयुवकों, तुम भी धर्म बुजूर्गों को अधीन रहो, तुम एक दूसरों की सेवा करन को लायी विनम्रता धारन करो कहालीकि शास्त्र कह्य हय। “परमेश्वर अभिमानियों को विरोध करय हय, पर दिनो पर अनुग्रह करय हय।”
1PE 5:6 येकोलायी परमेश्वर को शक्तिशाली हाथ को खल्लो दीनता सी रहो, जेकोसी ऊ तुम्ख ठीक समय पर बढ़ायेंन।
1PE 5:7 अपनी पूरी चिन्ता ओकोच पर डाल देवो, कहालीकि ओख तुम्हरो ध्यान हय।
1PE 5:8 सचेत रहो, अऊर जागतो रहो; कहालीकि तुम्हरो दुस्मन शैतान, एक गर्जन वालो सिंह को जसो इत-उत घुमतो हुयो यो ताक म रह्य हय कि कोख फाड़ खाये।
1PE 5:9 विश्वास म मजबूत होय क, अऊर यो जान क ओको सामना करो कि तुम्हरो भाऊ जो जगत म हंय असोच दु:ख सह रह्यो हंय।
1PE 5:10 अब परमेश्वर जो पूरो अनुग्रह को दाता हय, जेन तुम्ख यीशु मसीह म अपनी अनन्त महिमा को लायी बुलायो, तुम्हरो थोड़ो देर तक दु:ख उठावन को बाद खुदच तुम्ख सिद्ध अऊर स्थिर अऊर बलवन्त करेंन।
1PE 5:11 ओकोच साम्राज्य हमेशा हमेशा रहे। आमीन।
1PE 5:12 मय न तुम्ख एक संक्षिप्त चिट्ठी सिलवानुस को मदत सी लिख्यो, जेक मय विश्वास लायक मसीह भाऊ मानु हय। मय तुम ख प्रोत्साहित करनो चाहऊं हय अऊर अपनी गवाही देऊ हय जो परमेश्वर को सच्चो अनुग्रह हय। येकोच म स्थिर रहो।
1PE 5:13 बेबीलोन नगर की मण्डली जो तुम्हरो जसो दुबारा चुन्यो गयो हय, हि तुम्ख नमस्कार करय हय अऊर मसीह म मोरो बेटा मरकुस तुम्ख नमस्कार करय हंय।
1PE 5:14 एक दूसरों ख प्रेम सी गलो लगाय क नमस्कार करो। जो सब मसीह म हय शान्ति मिले।
2PE 1:1 शिमोन पतरस को तरफ सी, जो यीशु मसीह को सेवक अऊर प्रेरित हय, उन लोगों को नाम जिन्न हमरो परमेश्वर अऊर उद्धारकर्ता यीशु मसीह को सच्चायी द्वारा हमरो जसो बहुमूल्य विश्वास प्राप्त करयो हय।
2PE 1:2 परमेश्वर को तरफ हमरो प्रभु यीशु को पहिचान को द्वारा अनुग्रह अऊर शान्ति तुम म बहुतायत सी बढ़ती जाये।
2PE 1:3 कहालीकि परमेश्वर ईश्वरीय सामर्थ न सब कुछ जो जीवन अऊर भक्तिमय जीवन बितावन लायी हय, हम्ख ओकीच पहिचान को द्वारा दियो हय, जेन हम्ख अपनीच महिमा अऊर सद्गुनों को अनुसार बुलायो हय।
2PE 1:4 जिन्को द्वारा ओन हम्ख बहुमूल्य अऊर बहुतच बड़ी प्रतिज्ञा दी हंय: ताकि इन्को द्वारा तुम ऊ भ्रष्टता सी छूट क, जो जगत म बुरी अभिलाषावों सी होवय हय, ईश्वरीय स्वभाव को सहभागी होय जावो।
2PE 1:5 येकोलायी तुम सब तरह को यत्न कर क् अपनो विश्वास म सद्गुनों ख जोड़ो, अऊर सद्गुनों म ज्ञान ख,
2PE 1:6 अऊर अपनो ज्ञान म आत्म संय्यम ख जोड़ो, अऊर आत्म संय्यम म धीरज ख, अऊर धीरज म परमेश्वर की भक्ति ख जोड़ो,
2PE 1:7 अऊर तुम्हरो परमेश्वर की भक्ति म मसीह भाईचारा ख; अऊर मसीह भाईचारा म प्रेम ख जोड़ो।
2PE 1:8 यो पूरो गुनो की तुम्ख जरूरत हय अऊर यदि यो गुन तुम म यदि बहुतायत सी हय त यो तुम्ख हमरो प्रभु यीशु मसीह को ज्ञान क्रियाशिल अऊर प्रभावशिल बनायेंन।
2PE 1:9 पर यदि तुम म या बाते नहाय, त तुम्ख दूर नजर नहाय तुम अन्धा हय, मतलब तुम भूल गयो हय की अपनो पूर्व पापों ख धोयो जाय चुक्यो हय।
2PE 1:10 येकोलायी हे भाऊवों अऊर बहिनों, अपनो बुलायो जानो, अऊर चुन लियो जानो ख सिद्ध करन को भली भाति यत्न करतो जावो, कहालीकि यदि असो करो त कभी भी ठोकर नहीं खावो;
2PE 1:11 बल्की यो रीति सी तुम हमरो प्रभु अऊर उद्धारकर्ता यीशु मसीह को अनन्त राज्य म बड़ो आदर को संग सिरनो पावों।
2PE 1:12 येकोलायी तुम या बाते जानय हय, अऊर जो सत्य वचन तुम्ख मिल्यो हय ओको म बन्यो रह्य हय, तब भी मय तुम्ख इन बातों की याद दिलावन ख हमेशा तैयार रहूं।
2PE 1:13 मय यो अपनो लायी उचित समझू हय कि जब तक मय यो शरीर म जीन्दो हय, तब तक मय तुम्ख या बात म याद दिलातो रहूं।
2PE 1:14 कहालीकि यो जानु हय कि बहुत जल्दी मय अपनो नाशवन्त शरीर छोड़न वालो हय। जसो कि हमरो प्रभु यीशु मसीह न मोख बतायो होतो।
2PE 1:15 येकोलायी मय अपनो जोर लगाऊं कि मोरो मर जान को बाद भी तुम इन सब बातों ख हमेशा याद कर सको।
2PE 1:16 कहालीकि जब हम न तुम्ख अपनो प्रभु यीशु मसीह की सामर्थ को अऊर आगमन को समाचार दियो होतो, त ऊ चालाकी सी गढ़ी हुयी कहानियों को अनुकरन नहीं होतो बल्की हम न खुदच ओकी महानता ख देख्यो होतो।
2PE 1:17 कहालीकि जब ओन परमेश्वर पिता सी आदर अऊर महिमा पायी अऊर ऊ प्रतापमय महिमा म सी यो शब्द आयो, “यो मोरो प्रिय बेटा आय, जेकोसी मय खुश हय।”
2PE 1:18 तब हम ओको संग पवित्र पहाड़ी पर होतो अऊर आसमान सी आयी या वानी सुनी।
2PE 1:19 हमरो जवर जो भविष्यवक्तावों को वचन हय, ऊ यो घटना सी ठहरयो। तुम यो अच्छो करय हय जो यो समझ क ओको पर ध्यान करय हय कि ऊ एक दीया आय, जो अन्धारो जागा म ऊ समय तक उजाड़ो देतो रह्य हय जब तक कि पौ नहीं फटे अऊर भुन्सारे को तारा तुम्हरो दिल म चमक नहीं उठय।
2PE 1:20 सब सी बड़ी बात या हय कि तुम्ख यो जान लेनो चाहिये कि पवित्र शास्त्र कि कोयी भी बड़ी भविष्यवानी कोयी भविष्यवक्ता को खुद को बिचार सी दियो गयो स्पष्टिकरन नोहोय,
2PE 1:21 कहालीकि कोयी भी भविष्यवानी आदमी की इच्छा सी कभी नहीं भयी, पर भक्त लोग पवित्र आत्मा को द्वारा प्रभावित होय क परमेश्वर को तरफ सी बोलत होतो।
2PE 2:1 जसो भूतकाल को लोगों को बीच म झूठो भविष्यवक्ता होतो, ऊ भटकावन वालो असत्य सिद्धता ख लायेंन, अऊर ऊ मालिक को जेन उन्ख छुड़ायो अऊर असो कर क् अपनो विनाश ख जल्दी नेवता देयेंन।
2PE 2:2 फिर भी बहुत सारो लोग उन्को रस्ता पर चलेंन; अऊर कहालीकि जो हि करय हय, उन्को वजह सी दूसरी बुरी बातों ख सच्चायी को जागा बोलेंन।
2PE 2:3 हि लोभ को लायी बाते बनाय क तुम्ख अपनो फायदा को वजह बनायेंन, अऊर जो सजा की आज्ञा उन पर पहिले सी भय गयी हय, ओको आनो म कुछ भी देर नहाय, अऊर उन्को विनाश सक्रिय हय।
2PE 2:4 कहालीकि जब परमेश्वर न उन स्वर्गदूतों ख जिन्न पाप करयो, उन्ख भी नहीं छोड़्यो, पर नरक म भेज क अन्धारो कुण्ड म जंजीरो सी जकड़ दियो ताकि न्याय को दिन तक बन्दी रहे;
2PE 2:5 अऊर बुजूर्ग युग को जगत ख भी नहीं छोड़्यो बल्की भक्तिहीन जगत पर महा जल-प्रलय भेज्यो, पर सच्चायी को प्रचार करन वालो नूह अऊर सात आदमियों ख बचाय लियो;
2PE 2:6 अऊर सदोम अऊर अमोरा को नगरो ख आगी सी सजा दे क आगी सी भस्म कर दियो ताकि हि आवन वालो भक्तिहीन लोगों की शिक्षा को लायी एक दृष्टान्त बने,
2PE 2:7 अऊर सच्चो लूत ख जो गैरयहूदियों को अनैतिक चाल चलन सी बहुत दु:खी होतो छुटकारा दियो।
2PE 2:8 कहालीकि ऊ सच्चो उन्को बीच म रहतो हुयो अऊर उन्को अधर्म को कामों ख देख देख क अऊर सुन क, हर दिन अपनो सच्चो मन ख पीड़ित करत होतो।
2PE 2:9 त प्रभु भक्तो ख परीक्षा म सी छुड़ाय लेयेंन अऊर अधर्मियों ख न्याय को दिन तक सजा की दशा म रखनो भी जानय हय,
2PE 2:10 विशेष कर क् उन्ख जो अशुद्ध अभिलाषावों को पीछू शरीर को अनुसार चलतो अऊर प्रभुता ख तुच्छ जानय हंय। हि ढीठ अऊर हठी हंय, अऊर ऊचो पद वालो ख बुरो भलो कहनो सी नहीं डरय, अऊर उनकी निन्दा करय हय।
2PE 2:11 तब भी स्वर्गदूत जो शक्ति अऊर सामर्थ म झूठो शिक्षकों सी बड़ो हंय, प्रभु को आगु उन्ख बुरो भलो कह्य क दोष नहीं लगावय।
2PE 2:12 पर हि लोग निर्बुद्धि जनावर को जसो हंय, जो पकड़्यो जानो अऊर नाश होन को लायी पैदा भयो हंय; अऊर जिन बातों ख जानयच नहाय उन्को बारे म दूसरों ख बुरो भलो कह्य हंय, हि जंगली जनावर को जसो नाश कर दियो जायेंन।
2PE 2:13 दूसरों को अन्याय करन को बदला उन्कोच अन्याय होयेंन। उन्ख दिन दोपहर भोग-विलाश करनो भलो लगय हय। हि लोग कलंकित अऊर अपराधी हंय; जब हि तुम्हरो संग खावय-पीवय हंय, त हि धोकाधड़ी सी अपनो तरफ सी प्रेम भोज कर क् भोग-विलाश करय हंय।
2PE 2:14 उन्की आंखी म व्यभिचार बस्यो हुयो हय, अऊर हि पाप करयो बिना रुक नहीं सकय। हि कमजोर लोगों ख जार म फसाय लेवय हंय। उन्को मन ख लोभ करन को अभ्यास होय गयो हय; हि परमेश्वर को श्राप म हंय।
2PE 2:15 हि सीधी रस्ता ख छोड़ क भटक गयो हंय, अऊर बओर को बेटा बिलाम की रस्ता पर होय गयो हंय, जेन अधर्म की मजूरी ख प्रिय जान्यो;
2PE 2:16 अऊर ओको पाप को बारे म ओख फटकार पड़ी, यहां तक कि अबोल गधी न आदमी की बोली सी ऊ भविष्यवक्ता ख ओको बावलोपन सी रोक्यो।
2PE 2:17 हि लोग सूखो कुंवा, अऊर तूफान को उड़ायो हुयो बादर आय; परमेश्वर न उन्को लायी अनन्त गहरो अन्धकार ठहरायो गयो हय।
2PE 2:18 हि बेकार घमण्ड की बाते कर कर क् अनैतिक को कामों को द्वारा, उन लोगों ख जो भटक्यो हुयो म सी निकलन को सुरूवातच कर रह्यो होतो उन्ख शारीरिक अभिलाषावों म फसाय लेवय हंय।
2PE 2:19 हि उन्ख स्वतंत्र करन की प्रतिज्ञा त करय हंय, पर खुदच भ्रष्टता को सेवक हंय; कहालीकि जो आदमी जेकोसी हार गयो हय, ऊ ओको सेवक बन जावय हय।
2PE 2:20 जब हि प्रभु अऊर उद्धारकर्ता यीशु मसीह की पहिचान को द्वारा जगत की नाना तरह की अशुद्धता सी बच निकल्यो, अऊर फिर उन्म फस क हार गयो, त उन्की पिछली दशा पहिली सी भी बुरी भय गयी हय।
2PE 2:21 कहालीकि सच्चायी को रस्ता ख नहीं जाननोच ओको लायी येको सी भलो होतो कि ओख जान क, ऊ पवित्र आज्ञा सी फिर जातो जो उन्ख सौंपी गयी होती।
2PE 2:22 उन पर यो कहावत सही बैठय हय, कि कुत्ता अपनी उल्टी को तरफ अऊर धुलायी हुयी डुक्करनी चीखल म सोवन लायी फिर चली जावय हय।
2PE 3:1 हे प्रिय संगियों, अब मय तुम्ख यो दूसरी चिट्ठी लिखूं हय, अऊर दोयी म याद दिलाय क तुम्हरो शुद्ध मन ख जागृत करू हय;
2PE 3:2 कि तुम उन बातों ख जो पवित्र भविष्यवक्तावों न पहिले सी कहीं हय, अऊर प्रभु अऊर उद्धारकर्ता की ऊ आज्ञा ख याद करो जो तुम्हरो प्रेरितों को द्वारा दी गयी होती।
2PE 3:3 सब सी पहिले यो जान लेवो कि आखरी दिनो म हसी उड़ावन वालो आयेंन जो अपनीच अभिलाषावों को अनुसार चलेंन
2PE 3:4 अऊर पुछेंन कि, “ओन आवन की वाचा करी होती, का ओन नहीं करी होती? कित हय ऊ? हमरो बापदादा पहिले सी मर चुक्यो हंय, पर जब सी सृष्टि बनी हय सब बाते वसी कि वसी चली आय रही हय।”
2PE 3:5 हि त जान बूझ क यो भूल गयो कि परमेश्वर को वचन को द्वारा आसमान पुरानो समय सी बनायी गयी हय अऊर धरती पानी म सी बनी अऊर पानी को द्वारा बनी,
2PE 3:6 येकोच वजह ऊ युग को जगत पानी म डुब क नाश भय गयो।
2PE 3:7 पर आसमान अऊर धरती जो अज अस्तित्व म हय ओकोच आदेश को द्वारा आगी को द्वारा नाश होन को लायी सुरक्षित हय इन ख ऊ दिन को लायी रख्यो जाय रह्यो हय जब अन्यायी लोगों को न्याय होयेंन अऊर हि नाश कर दियो जायेंन।
2PE 3:8 हे प्रिय संगियों, या एक बात ख मत भूलो की प्रभु की नजर म एक दिन अऊर एक हजार साल म कोयी फरक नहाय; ओको लायी हि दोयी भी समान हय।
2PE 3:9 प्रभु अपनी वाचा को बारे म देर नहीं करय, जसी देर कुछ लोग समझय हंय; पर तुम्हरो बारे म धीरज धरय हय, अऊर नहीं चाहवय कि कोयी नाश होय, बल्की यो कि सब ख मन फिराव को अवसर मिले।
2PE 3:10 पर प्रभु को दिन चोर को जसो आय जायेंन, ऊ दिन आसमान की बड़ी गर्जना को संग अदृश्य होय जायेंन ओको बाद आसमान की पूरी चिजे जर क नाश होय जायेंन अऊर धरती अऊर ओको पर की बाते नाश होय जायेंन।
2PE 3:11 जब कि या सब चिजे या रीति सी नाश होन वाली हंय, त तुम्ख कौन्सो तरह को लोग होनो चाहिये? तुम्हरो जीवन पवित्र अऊर परमेश्वर को तरफ समर्पित होनो चाहिये।
2PE 3:12 अऊर परमेश्वर को ऊ दिन की रस्ता कौन्सी रीति सी देखनो चाहिये अऊर ओको जल्दी आवन को लायी कसो यत्न करनो चाहिये, जेको वजह आसमान आगी सी नाश करयो जायेंन, अऊर आसमान की पूरी चिजे बहुतच गर्मी सी तप्त होय क गल जायेंन।
2PE 3:13 पर ओकी प्रतिज्ञा को अनुसार हम एक नयो आसमान अऊर नयी धरती की आस देखजे हंय जिन्म सच्चायी वाश करेंन।
2PE 3:14 येकोलायी, हे प्रिय संगियों, जब कि तुम ऊ दिन को इंतजार कर रह्यो हय, त अपनो तरफ सी पूरी कोशिश करो कि तुम शान्ति सी परमेश्वर की नजर म निष्कलंक अऊर निर्दोष ठहरो,
2PE 3:15 हमरो प्रभु को धीरज ख ओन उद्धार देन लायी दी गयी सन्धी समझो, जसो की हमरो प्रिय भाऊ पौलुस न ज्ञान सी जो परमेश्वर न ओख दियो होतो ओको उपयोग कर क् लिख्यो होतो।
2PE 3:16 वसोच ओन अपनी सब चिट्ठियों म भी इन बातों ख लिख्यो हय। जिन्म कुछ बाते असी हंय जिन्को समझनो कठिन हय, अऊर अनजान अऊर अस्थिर लोग ओको गलत व्याख्यान करय हय जसो की ऊ वचन को दूसरों शास्त्र लेखों को भी करय हय। यो तरह अपनोच नाश को वजह बनय हंय।
2PE 3:17 येकोलायी हे प्रिय संगियों, तुम लोग पहिलेच सी इन बातों ख जान क चौकस रहो, ताकि अनैतिक लोगों को गलातियों को द्वारा भ्रम म फस क अपनी स्थिरता ख कहीं हाथ सी खोय नहीं देवो।
2PE 3:18 पर हमरो प्रभु अऊर उद्धारकर्ता यीशु मसीह को अनुसार अऊर ज्ञान म बढ़तो जावो। ओकीच महिमा अब भी होय, अऊर हमेशा हमेशा होती रहे। आमीन।
1JO 1:1 ऊ जीवन को वचन को बारे म हम लिखजे हय जो सुरू सी होतो, जेक हम न सुन्यो, अऊर जेक अपनी आंखी सी देख्यो, बल्की जेक हम न ध्यान सी देख्यो अऊर हाथों सी छूयो।
1JO 1:2 यो जीवन प्रगट भयो, अऊर हम न ओख देख्यो, अऊर ओकी गवाही देजे हंय, अऊर तुम्ख ऊ अनन्त जीवन को समाचार देजे हंय जो बाप को संग होतो अऊर हम पर प्रगट भयो
1JO 1:3 जो कुछ हम न देख्यो अऊर सुन्यो हय ओको समाचार तुम्ख भी देजे हंय, येकोलायी कि तुम भी हमरो संग सामिल हो; अऊर हमरी या सहभागिता बाप को संग अऊर ओको बेटा यीशु मसीह को संग हय।
1JO 1:4 अऊर या बाते हम येकोलायी लिखजे हंय कि हमरी खुशी पूरी हो जाय।
1JO 1:5 जो समाचार हम न ओको सी सुन्यो अऊर तुम्ख सुनाजे हंय, ऊ यो आय कि परमेश्वर प्रकाश आय अऊर ओको म कुछ भी अन्धारो नहाय।
1JO 1:6 यदि हम कहबो कि ओको संग हमरी सहभागिता हय अऊर फिर अन्धारो म चले, त हम झूठो हंय अऊर सच पर नहीं चलजे;
1JO 1:7 पर यदि जसो ऊ प्रकाश म हय, वसोच हम भी प्रकाश म चले, त एक दूसरों सी सहभागिता रखजे हंय, अऊर ओको बेटा यीशु को खून हम्ख सब पापों सी शुद्ध करय हय।
1JO 1:8 यदि हम कहबो कि हम म कुछ भी पाप नहाय, त अपनो आप ख धोका देजे हंय, अऊर हम म सच नहाय।
1JO 1:9 यदि हम अपनो पापों ख मान ले, त परमेश्वर हमरो पापों ख माफ करन अऊर हम्ख सब पापों सी शुद्ध करन म विश्वास लायक अऊर सच्चो हय।
1JO 1:10 यदि हम कहबो कि हम न पाप नहीं करयो, त हम परमेश्वर ख झूठो ठहरायजे हंय, अऊर ओको वचन हम म नहाय।
1JO 2:1 हे मोरो बच्चां, मय या बाते तुम्ख येकोलायी सिखाऊं हय कि तुम पाप मत करो; अऊर यदि कोयी पाप करेंन, त बाप को जवर हमरो एक सहायक हय, यानेकि सच्चो यीशु मसीह;
1JO 2:2 अऊर उच हमरो पापों को पश्चाताप करय हय अऊर केवल हमरोच नहीं बल्की पूरो जगत को पापों को भी माफ करय हय।
1JO 2:3 यदि हम ओकी आज्ञावों ख मानबो, त येको सी हम जान लेबो कि हम ओख जान गयो हंय।
1JO 2:4 जो कोयी यो कह्य हय, “मय ओख जान गयो हय,” अऊर ओकी आज्ञावों ख नहीं मानु, ऊ झूठो हय अऊर ओको म सच नहाय;
1JO 2:5 पर जो कोयी यीशु को वचन पर चलेंन, ओको म सचमुच परमेश्वर को प्रेम सिद्ध भयो हय। येको सी हम जानजे हंय कि हम परमेश्वर की संगति म एक हंय:
1JO 2:6 जो कोयी यो कह्य हय कि मय ओको म बन्यो रहू हय, ओख होना कि खुद भी वसोच चलेंन जसो यीशु मसीह चल्यो होतो।
1JO 2:7 हे प्रिय संगियों, मय तुम्ख कोयी नयी आज्ञा नहीं लिखूं, पर वाच पुरानी आज्ञा जो सुरूवात सी तुम्ख मिली हय; या पुरानी आज्ञा ऊ वचन आय जेक तुम न सुन्यो हय।
1JO 2:8 फिर भी मय तुम्ख नयी आज्ञा लिखू हय, अऊर यो मसीह म अऊर तुम म सच्ची ठहरय हय; कहालीकि अन्धारो मिटत जावय हय अऊर सच की ज्योति अब चमकन लगी हय।
1JO 2:9 जो कोयी यो कह्य हय कि मय ज्योति म हय अऊर अपनो भाऊ सी दुस्मनी रखय हय, ऊ अब तक अन्धारो मच हय।
1JO 2:10 जो कोयी अपनो भाऊ सी प्रेम रखय हय ऊ ज्योति म रह्य हय, अऊर कोयी को ठोकर को वजह नहीं बनय।
1JO 2:11 पर जो अपनो भाऊ सी दुस्मनी रखय हय ऊ अन्धारो म हय अऊर अन्धारो म चलय हय, अऊर नहीं जानय कि कित जावय हय, कहालीकि अन्धारो न ओकी आंखी अन्धी कर दियो हंय।
1JO 2:12 हे बच्चां, मय तुम्ख येकोलायी लिखू हय कि ओको नाम सी तुम्हरो पाप माफ भयो हंय।
1JO 2:13 हे सब बाप , मय तुम्ख येकोलायी लिखू हय कि जो पहिले सी हय तुम ओख जानय हय। हे जवानों, मय तुम्ख येकोलायी लिखू हय कि तुम न ऊ दुष्ट पर जय पायी हय।
1JO 2:14 हे लड़को, मय न तुम्ख येकोलायी लिख्यो हय कि तुम बाप ख जान गयो हय। हे सब बाप, मय न तुम्ख येकोलायी लिख्यो हय कि जो पहिले सी हय तुम ओख जान गयो हय। हे जवानों, मय न तुम्ख येकोलायी लिख्यो हय की तुम बलवान हो, अऊर परमेश्वर को वचन तुम म बन्यो रह्य हय, अऊर तुम न ऊ दुष्ट पर जय पायी हय।
1JO 2:15 तुम नहीं त जगत सी अऊर नहीं जगत म की चिजों सी प्रेम रखो। यदि कोयी जगत सी प्रेम रखय हय, त ओको म बाप को प्रेम नहाय।
1JO 2:16 कहालीकि जो कुछ जगत म हय, मतलब शरीर की अभिलाषा अऊर आंखी की अभिलाषा अऊर जीविका को घमण्ड, ऊ बाप को तरफ सी नहीं पर जगत कोच तरफ सी हय।
1JO 2:17 जगत अऊर ओकी अभिलासाये दोयी मिटत जावय हंय, पर जो परमेश्वर की इच्छा पर चलय हय ऊ हमेशा जीन्दो रहेंन।
1JO 2:18 हे लड़को, यो आखरी समय आय; अऊर जसो तुम न सुन्यो हय कि मसीह को विरोधी आवन वालो हय, ओको अनुसार अब भी बहुत सो मसीह-विरोधी उठ खड़ो भयो हंय; येको सी हम जानजे हय कि यो आखरी समय आय।
1JO 2:19 हि निकल्यो त हमच म सी, पर हम म सी नहीं होतो; कहालीकि यदि हि हम म सी होतो, त हमरो संग रहतो; पर निकल येकोलायी गयो कि यो प्रगट हो कि हि सब हम म सी नहाय।
1JO 2:20 पर तुम्हरो त ऊ पवित्र आत्मा सी अभिषेक भयो हय, अऊर तुम सब कुछ जानय हय।
1JO 2:21 मय न तुम्ख येकोलायी नहीं लिख्यो कि तुम सच ख नहीं जानय, पर येकोलायी कि ओख जानय हय, अऊर येकोलायी कि कोयी झूठ, सच को तरफ सी नहाय।
1JO 2:22 झूठो कौन आय? केवल ऊ जो कह्य हय यीशु मसीहा नहीं; अऊर मसीह को विरोधी उच आय, जो बाप को अऊर बेटा को इन्कार करय हय।
1JO 2:23 जो कोयी बेटा को इन्कार करय हय ओको जवर बाप भी नहाय: जो बेटा ख मान लेवय हय, ओको जवर बाप भी हय।
1JO 2:24 जो सन्देश तुम न सुरूवात सी सुन्यो हय, उच तुम म बन्यो रहे; जो तुम न सुरूवात सी सुन्यो हय, यदि ऊ तुम म बन्यो रहेंन त तुम भी बेटा म अऊर बाप म बन्यो रहो।
1JO 2:25 अऊर जेकी ओन हम सी प्रतिज्ञा करी ऊ अनन्त जीवन आय।
1JO 2:26 मय न या बाते तुम्ख लोगों को बारे म लिखी हंय, जो तुम्ख भरमावय हंय;
1JO 2:27 पर तुम्हरो ऊ अभिषेक जो पवित्र आत्मा को तरफ सी करयो गयो, तुम म बन्यो रह्य हय; अऊर तुम्ख येकी जरूरत नहाय कि कोयी तुम्ख सिखाये, बल्की जसो ऊ अभिषेक जो ओको तरफ सी करयो गयो तुम्ख सब बाते सिखावय हय, अऊर यो सच्चो हय अऊर झूठो नहाय; अऊर जसो ओन तुम्ख सिखायो हय वसोच तुम ओको म बन्यो रह्य हय।
1JO 2:28 अब हे बच्चां, ओको म बन्यो रहो कि जब ऊ प्रगट हो त हम्ख हिम्मत हो, अऊर हम ओको आनो पर ओको सामने लज्जित नहीं हो।
1JO 2:29 यदि तुम जानय हय, कि ऊ सच्चो हय, त यो भी जानय हय कि जो कोयी सही काम करय हय ऊ परमेश्वर सी जनम्यो हय।
1JO 3:1 देखो, बाप न हम सी कसो प्रेम करयो हय कि हम परमेश्वर की सन्तान कहलाये; अऊर हम भी हंय। यो वजह जगत हम्ख नहीं जानय, कहालीकि ओन ओख भी नहीं जान्यो।
1JO 3:2 हे प्रिय संगियों, अब हम परमेश्वर की सन्तान हय, अऊर अभी तक यो प्रगट नहीं भयो कि हम का कुछ होबोंन। इतनो जानजे हय कि जब ऊ प्रगट होयेंन त हम ओको जसो होबो, कहालीकि ओख वसोच देखबोंन जसो ऊ हय।
1JO 3:3 अऊर जो ओको पर या आशा रखय हय, ऊ अपनो आप ख वसोच शुद्ध करय हय जसो मसीह शुद्ध हय।
1JO 3:4 जो कोयी पाप करय हय, ऊ व्यवस्था को विरोध करय हय; अऊर पाप त व्यवस्था को विरोध हय।
1JO 3:5 तुम जानय हय कि ऊ येकोलायी प्रगट भयो पापों ख निकाल ले जाये; अऊर ओको स्वभाव म पाप नहाय।
1JO 3:6 जो कोयी ओको एकता म बन्यो रह्य हय, ऊ पाप नहीं करय: जो कोयी पाप करय हय, ओन नहीं त ओख देख्यो हय अऊर नहीं ओख जान्यो हय।
1JO 3:7 हे बच्चां, कोयी को बहकाव म मत आजो। जो लोग सही काम करय हय, उच मसीह को जसो सच्चो हय।
1JO 3:8 जो कोयी पाप करय हय ऊ शैतान को तरफ सी हय, कहालीकि शैतान सुरूवात सीच पाप करतो आयो हय। परमेश्वर को बेटा येकोलायी प्रगट भयो कि शैतान को कामों को नाश करे।
1JO 3:9 जो कोयी परमेश्वर सी जनम्यो हय ऊ पाप नहीं करय; कहालीकि ओको स्वभाव ओको म बन्यो रह्य हय, अऊर ऊ पाप करच नहीं सकय कहालीकि परमेश्वर सी जनम्यो हय।
1JO 3:10 येको सीच परमेश्वर की सन्तान अऊर शैतान की सन्तान जान्यो जावय हंय; जो कोयी सच्चायी को काम नहीं करय ऊ परमेश्वर सी नहाय, अऊर नहीं ऊ जो अपनो भाऊ सी प्रेम नहीं रखय।
1JO 3:11 कहालीकि जो समाचार तय न सुरूवात सी सुन्यो, ऊ यो आय कि हम एक दूसरों सी प्रेम रखो;
1JO 3:12 अऊर कैन को जसो मत बनो जो ऊ दुष्ट सी होतो, अऊर जेन अपनो भाऊ को खून करयो। अऊर ओख कौन्सो वजह खून करयो? यो वजह कि ओको काम बुरो होतो, अऊर ओको भाऊ को काम सही होतो।
1JO 3:13 हे भाऊवों अऊर बहिनों, यदि जगत तुम सी दुस्मनी करय हय त अचम्भा मत करजो।
1JO 3:14 हम जानजे हंय कि हम मृत्यु सी पार होय क जीवन म पहुंच्यो हंय; कहालीकि हम भाऊवों सी प्रेम रखजे हंय। जो प्रेम नहीं रखय ऊ मरन की दशा म रह्य हय।
1JO 3:15 जो कोयी अपनो भाऊ-बहिन सी दुस्मनी रखय हय, ऊ हत्यारों हय; अऊर तुम जानय हय कि कोयी हत्यारों म अनन्त जीवन नहीं रह्य।
1JO 3:16 हम न प्रेम येको सीच जान्यो कि ओन हमरो लायी अपनो जीव दे दियो; अऊर हम्ख भी भाऊवों-बहिनों को लायी जीव देनो चाहिये।
1JO 3:17 पर जो कोयी को जवर जगत की जायजाद होना अऊर ऊ अपनो भाऊ ख गरीब देख क ओको पर तरस खानो नहीं चाहवय, त ओको म परमेश्वर को प्रेम कसो बन्यो रह्य सकय हय?
1JO 3:18 हे बच्चां, हम शब्द अऊर जीबली सीच नहीं, पर काम अऊर सच को द्वारा भी प्रेम करबो।
1JO 3:19 यो असो हय हम जानजे हय कि हम सच को हंय; यो तरह हम परमेश्वर की उपस्थिति म भरोसा करबो;
1JO 3:20 गलत कामों को लायी हमरो मन जब भी हम्ख बाहेर करय हय त यो येकोलायी होवय हय कि परमेश्वर हमरो मनों सी बड़ो हय अऊर ऊ कुछ जानय हय।
1JO 3:21 हे प्रियो, यदि हमरो मन हम्ख दोष नहीं दे, त हम्ख परमेश्वर को आगु हिम्मत होवय हय;
1JO 3:22 अऊर जो कुछ हम मांगजे हंय, ऊ हम्ख ओको सी मिलय हय, कहालीकि हम ओकी आज्ञावों ख मानजे हंय अऊर जो ओख भावय हय उच करजे हंय।
1JO 3:23 ओकी आज्ञा यो हय कि ओको बेटा यीशु मसीह को नाम पर विश्वास करे, अऊर जसो मसीह न हम्ख आज्ञा दियो हय ओकोच अनुसार आपस म प्रेम रखे।
1JO 3:24 जो ओकी आज्ञावों ख मानय हय, ऊ परमेश्वर म एक बन्यो रह्य हय: अऊर येको सीच, मतलब ऊ आत्मा सी जो ओन हम्ख दियो हय, हम जानजे हंय कि ऊ हम म एक बन्यो रह्य हय।
1JO 4:1 हे प्रियो, हर एक आत्मा को विश्वास मत करो, बल्की आत्मावों ख परखो कि हि परमेश्वर को तरफ सी हंय कि नहाय; कहालीकि बहुत सो झूठो भविष्यवक्ता पर जय प्राप्त कर लियो हय।
1JO 4:2 परमेश्वर को आत्मा तुम यो रीति सी पहिचान सकय हय: जो आत्मा मान लेवय हय कि यीशु मसीह शरीर म होय क आयो हय ऊ परमेश्वर को तरफ सी हय,
1JO 4:3 अऊर जो आत्मा यीशु ख नहीं मानय, वा परमेश्वर को तरफ सी नहाय; अऊर वाच त मसीह को विरोधी की आत्मा आय, जेकी चर्चा तुम सुन चुक्यो हय कि ऊ आवन वालो हय, अऊर अभी जगत म हय।
1JO 4:4 हे बच्चां, तुम परमेश्वर को आय, अऊर तुम न उन पर जय पायो हय; कहालीकि जो तुम म हय ऊ ओको सी जो जगत म हय, महान हय।
1JO 4:5 हि जगत को आय, यो वजह हि जगत की बाते बोलय हंय, अऊर जगत उनकी सुनय हय।
1JO 4:6 हम परमेश्वर को आय। जो परमेश्वर ख जानय हय, ऊ हमरी सुनय हय; जो परमेश्वर ख नहीं जानय ऊ हमरी नहीं सुनय। यो तरह हम सच की आत्मा अऊर भ्रम की आत्मा ख पहिचान लेजे हंय।
1JO 4:7 हे प्रियो, हम आपस म प्रेम रखबो; कहालीकि प्रेम परमेश्वर सी हय। जो कोयी प्रेम करय हय, ऊ परमेश्वर सी जनम्यो हय अऊर परमेश्वर ख जानय हय।
1JO 4:8 जो प्रेम नहीं रखय ऊ परमेश्वर ख नहीं जानय, कहालीकि परमेश्वर प्रेम हय।
1JO 4:9 जो प्रेम परमेश्वर हम सी रखय हय, ऊ येको सी प्रगट भयो कि परमेश्वर न अपनो एकलौतो बेटा ख जगत म भेज्यो हय कि हम ओको द्वारा जीवन पाये।
1JO 4:10 प्रेम येको म नहाय कि हम न परमेश्वर सी प्रेम करयो, पर येको म हय कि ओन हम सी प्रेम करयो अऊर हमरो पापों को पश्चाताप को बलिदान होन को लायी अपनो बेटा ख भेज्यो।
1JO 4:11 हे प्रियो, जब परमेश्वर न हम सी असो प्रेम करयो, त हम ख भी आपस म प्रेम रखनो चाहिये।
1JO 4:12 परमेश्वर ख कभी कोयी न नहीं देख्यो; यदि हम आपस म प्रेम रखबो, त परमेश्वर हम म बन्यो रह्य हय अऊर ओको प्रेम हम म पूरो भय गयो हय।
1JO 4:13 येको सीच हम जानजे हंय कि हम ओको म बन्यो रहजे हंय, अऊर ऊ हम म; कहालीकि ओन अपनी आत्मा दी हय।
1JO 4:14 हम न देख भी लियो अऊर गवाही देजे हंय कि बाप न बेटा ख जगत को उद्धारकर्ता कर क् भेज्यो हय।
1JO 4:15 जो कोयी यो मान लेवय हय कि यीशु परमेश्वर को बेटा आय, परमेश्वर ओको म बन्यो रह्य हय, अऊर ऊ परमेश्वर म।
1JO 4:16 जो प्रेम परमेश्वर हम सी रखय हय, ओख हम जान गयो अऊर हम्ख ओको विश्वास हय। परमेश्वर प्रेम हय, अऊर जो प्रेम म बन्यो रह्य हय ऊ परमेश्वर म बन्यो रह्य हय, अऊर परमेश्वर ओको म बन्यो रह्य हय।
1JO 4:17 येको सीच प्रेम हम म पूरो भयो कि हम्ख न्याय को दिन हिम्मत हो; कहालीकि जसो मसीह हय वसोच जगत म हम भी हंय।
1JO 4:18 पूरो प्रेम म डर नहीं होवय, बल्की सिद्ध प्रेम डर ख दूर कर देवय हय; कहालीकि डर को सम्बन्ध सजा सी होवय हय, अऊर जो डर करय हय ऊ प्रेम म पूरो नहीं भयो।
1JO 4:19 हम येकोलायी प्रेम करजे हंय, कि पहिले ओन हम सी प्रेम करयो।
1JO 4:20 यदि कोयी कहेंन, “मय परमेश्वर सी प्रेम रखू हय,” अऊर अपनो भाऊ सी दुश्मनी रखे त ऊ झूठो हय; कहालीकि जो अपनो भाऊ सी जेन ओख देख्यो हय प्रेम नहीं रखय, त ऊ परमेश्वर सी भी जेक ओन नहीं देख्यो प्रेम नहीं रख सकय।
1JO 4:21 ओको सी हम्ख या आज्ञा मिली हय, कि जो कोयी परमेश्वर सी प्रेम रखय हय ऊ अपनो भाऊ अऊर बहिन सी भी प्रेम रखे।
1JO 5:1 जेको यो विश्वास हय कि यीशुच मसीह आय, ऊ परमेश्वर को बेटा हय; अऊर जो कोयी ओको बेटा सी प्रेम रखय हय, ऊ ओको सी भी प्रेम रखय हंय जो ओको सी पैदा भयो हय।
1JO 5:2 जब हम परमेश्वर सी प्रेम रखजे हंय अऊर ओकी आज्ञावों ख मानजे हंय, त येको म हम जानजे हंय कि हम परमेश्वर की सन्तानों सी प्रेम रखजे हंय।
1JO 5:3 कहालीकि परमेश्वर को बच्चा सी प्रेम रखनो यो हय कि हम ओकी आज्ञावों ख माने; अऊर ओकी आज्ञाये कठिन नहाय।
1JO 5:4 कहालीकि जो कुछ परमेश्वर सी पैदा भयो हय, ऊ जगत पर जय प्राप्त करय हय, अऊर ऊ विजय जेकोसी जगत पर जय प्राप्त होवय हय हमरो विश्वास हय।
1JO 5:5 जगत पर जय पान वालो कौन आय? केवल ऊ जेको यो विश्वास हय कि यीशु, परमेश्वर को बेटा आय।
1JO 5:6 ऊ यीशु मसीहच आय जो हमरो जवर पानी अऊर खून को संग आयो। केवल पानी को संग नहीं, बल्की पानी अऊर खून को संग। अऊर वा आत्मा आय जो ओकी गवाही देवय हय कहालीकि आत्मा सत्य हय।
1JO 5:7 अऊर जो गवाही देवय हय, ऊ आत्मा आय; कहालीकि आत्मा सत्य हय।
1JO 5:8 गवाही देन वालो तीन हय, आत्मा, अऊर पानी, अऊर खून; अऊर तीनयी एकच बात पर सहमत हंय।
1JO 5:9 जब हम आदमियों की गवाही मान लेजे हंय, त परमेश्वर की गवाही त ओको सी बढ़ क हय; अऊर परमेश्वर की गवाही या हय कि जो ओन अपनो बेटा को बारे म गवाही दियो हय।
1JO 5:10 जो परमेश्वर को बेटा पर विश्वास करय हय ऊ अपनोच गवाही म रखय हय। जेन परमेश्वर पर विश्वास नहीं करयो ओन ओख झूठो ठहरायो, कहालीकि ओन ऊ गवाही पर विश्वास नहीं करयो जो परमेश्वर न अपनो बेटा को बारे म दियो हय।
1JO 5:11 अऊर वा गवाही या हय कि परमेश्वर न हम्ख अनन्त जीवन दियो हय, अऊर यो जीवन ओको बेटा म हय।
1JO 5:12 जेको जवर बेटा हय, ओको जवर जीवन हय; अऊर जेको जवर परमेश्वर को बेटा नहाय, ओको जवर जीवन भी नहाय।
1JO 5:13 मय न तुम्ख, जो परमेश्वर को बेटा को नाम पर विश्वास करय हय, येकोलायी लिख्यो हय कि तुम जानो कि अनन्त जीवन तुम्हरो हय।
1JO 5:14 अऊर हम्ख ओको आगु जो हिम्मत होवय हय, ऊ यो आय; कि यदि हम ओकी इच्छा को अनुसार कुछ मांगजे हंय, त ऊ हमरी सुनय हय।
1JO 5:15 जब हम ओख मांगजे हंय तब ऊ हमरी सुनय हय; अऊर या बात सच हय, त यो भी जानजे हंय कि जो कुछ हम मांगजे हय, ऊ देवय हय।
1JO 5:16 यदि कोयी अपनो भाऊवों-बहिनों ख असो पाप करतो देखे जेको फर मृत्यु नहीं हय, त बिनती करे, अऊर परमेश्वर ओख उन्को लायी, जिन्न असो पाप करयो हय जेको फर मृत्यु नहीं हो, जीवन देयेंन। पाप असो भी होवय हय जेको फर मृत्यु हय; येको बारे म मय बिनती करन को लायी नहीं कहूं।
1JO 5:17 सब तरह को अधर्म त पाप हय, पर असो पाप भी हय जेको परिनाम मृत्यु नहाय।
1JO 5:18 हम जानजे हंय, कि जो कोयी परमेश्वर को बच्चा हय, ऊ पाप नहीं करय; पर जो परमेश्वर सी पैदा भयो, ऊ ओख बचायो रखय हय, अऊर ऊ दुष्ट ओख नहीं पावय।
1JO 5:19 हम जानजे हंय कि हम परमेश्वर सी हंय, अऊर पूरो जगत ऊ दुष्ट को वश म पड़्यो हय।
1JO 5:20 हम यो भी जानजे हंय कि परमेश्वर को बेटा आय गयो हय अऊर ओन हम्ख समझ दियो हय कि हम ऊ सच्चो परमेश्वर ख पहिचानबो; अऊर हम ओको म जो सच हय, मतलब ओको बेटा यीशु मसीह म एकता म होय क रहजे हंय। सच्चो परमेश्वर अऊर अनन्त जीवन योच आय।
1JO 5:21 हे बच्चां, अपनो आप ख मूर्तियों सी बचायो रखो।
2JO 1:1 मय बुजूर्ग को तरफ सी वा चुनी हुयी, बाई अऊर ओको बच्चां को नाम, जिन्कोसी मय सच्चो प्रेम रखू हय, अऊर केवल मयच नहीं बल्की हि सब भी प्रेम रखय हंय जो सच ख जानय हंय।
2JO 1:2 ऊ सच जो हम म स्थिर रह्य हय, अऊर हमेशा हमरो संग रहेंन।
2JO 1:3 परमेश्वर पिता, अऊर बाप को बेटा यीशु मसीह को तरफ सी अनुग्रह अऊर दया अऊर शान्ति, सत्य अऊर प्रेम सहित हमरो संग रहेंन।
2JO 1:4 मय बहुत खुश भयो कि मय न तोरो कुछ बच्चां ख ऊ आज्ञा को अनुसार, जो हम्ख बाप को तरफ सी मिली होती, सच पर चलतो हुयो पायो।
2JO 1:5 अब हे प्रिय बाई, मय तोख कोयी नयी आज्ञा नहीं, पर वाच जो सुरूवात सी मिली हय तुम्ख लिख रह्यो हय, अऊर तोरो सी बिनती करू हय कि हम एक दूसरों सी प्रेम रखे।
2JO 1:6 अऊर प्रेम यो हय कि हम परमेश्वर की आज्ञावों को अनुसार चले; यो वाच आज्ञा आय जो तुम न सुरूवात सी सुनी हय, अऊर तुम्ख येकोलायी प्रेम पुर्वक जीवन जीनो चाहिये।
2JO 1:7 कहालीकि बहुत सो असो भरमावन वालो जगत म निकल आयो हंय, कि हि यो नहीं मानय कि यीशु मसीह शरीर म होय क आयो। भरमावन वालो लोग अऊर मसीह को विरोधी हिच आय।
2JO 1:8 अपनो बारे म चौकस रहो, कि जो मेहनत हम न करयो हय ओख तुम गवा मत देवो, बल्की ओको पूरो प्रतिफल पावों।
2JO 1:9 जो कोयी मसीह कि शिक्षा सी आगु बड़ जावय हय अऊर ओको म बन्यो नहीं रह्य, ओको जवर परमेश्वर नहाय; जो कोयी ओकी शिक्षा म स्थिर रह्य हय, ओको जवर बाप भी हय अऊर बेटा भी।
2JO 1:10 यदि कोयी तुम्हरो जवर आये अऊर याच शिक्षा नहीं दे, ओख नहीं त घर म आवन देवो अऊर नहीं नमस्कार करो।
2JO 1:11 कहालीकि जो कोयी असो लोग ख अभिवादन करय हय, ऊ ओको बुरो कामों म सहभागी होवय हय।
2JO 1:12 मोख बहुत सी बाते तुम्ख लिखनो हंय, पर कागज अऊर स्याही सी लिखनो नहीं चाहऊ, पर आशा हय कि मय तुम्हरो जवर आऊं अऊर आमने-सामने बातचीत करू, जेकोसी तुम पूरो तरह सी खुशी रहो।
2JO 1:13 तोरी बहिन को बच्चा को तरफ सी तोख नमस्कार करजे हंय।
3JO 1:1 बुजूर्ग यूहन्ना को, तरफ सी प्रिय संगी गयुस को नाम, जेकोसी मय सच्चो प्रेम रखू हय।
3JO 1:2 हे प्रिय संगी, मोरी या प्रार्थना हय कि जसो तय आत्मिक उन्नति कर रह्यो हय, वसोच तय सब बातों म उन्नति करे अऊर भलो चंगो रहे।
3JO 1:3 कहालीकि जब विश्वासी भाऊवों न आय क तोरो ऊ सच कि गवाही दी, जो सच पर तय हमेशा चलय हय, त मय बहुतच खुश भयो।
3JO 1:4 मोख येको सी जादा अऊर कोयी खुशी नहाय कि मय सुनू, कि मोरो बच्चा सच को रस्ता पर चलय हंय।
3JO 1:5 हे प्रिय संगियों, जो कुछ तुम उन भाऊवों को संग करय हय, जो परदेशी हंय, ओख ईमानदारी को रूप म करय हय।
3JO 1:6 जो प्रेम तुम न उन पर दर्शायो हय उन्न मण्डली को आगु तोरो प्रेम की गवाही दियो हय। उन्की यात्रा बनायो रखन को लायी कृपया उन्की यो तरह सी मदत करनो जेकोसी परमेश्वर खुश हो।
3JO 1:7 कहालीकि हि मसीह की सेवा की यात्रा पर निकल पड़यो हंय तथा अविश्वासियों सी कुछ मदत नहीं लेवय।
3JO 1:8 येकोलायी हम मसीहियों ख असो लोगों की मदत करनो चाहिये, ताकी हम भी सच को काम म ओको सहकर्मी होय सके।
3JO 1:9 या चिट्ठी मय न मण्डली ख भी लिख्यो होतो, पर दियुत्रिफेस जो उन्म मुखिया बननो चाहवय हय, ऊ मोरी बातों पर ध्यान नहीं लगावय।
3JO 1:10 येकोलायी जब मय आऊं त ओको कामों की जो ऊ कर रह्यो हय, याद दिलाऊं, कि ऊ हमरो बारे म बुरी बाते बकय हय; अऊर हमरो बारे म झूठी बाते बतावय हय पर इतनोच ओको लायी काफी नहाय ऊ मसीही भाऊवों ख स्वीकार नहीं करय, जब हि आवय हय अऊर उन्ख भी रोकय हय जो स्वीकार करनो चाहवय हंय अऊर पूरी कोशिश करय हय कि उन्ख मण्डली सी बाहेर निकाले।
3JO 1:11 हे प्रिय संगी, बुरायी को नहीं पर भलायी को अनुयायी हो। जो भलायी करय हय, ऊ परमेश्वर को तरफ सी हय; पर जो बुरायी करय हय, ओन परमेश्वर ख नहीं देख्यो।
3JO 1:12 दिमेत्रियुस को बारे म सब लोगों न अच्छी गवाही दियो; अऊर हम भी गवाही देजे हंय, अऊर तय जानय हय कि हमरी गवाही सच्ची हय।
3JO 1:13 मोख तोख बहुत कुछ लिखनो त होतो, पर स्याही अऊर कलम सी लिखनो नहीं चाहऊ।
3JO 1:14 पर मोख आशा हय कि तोरो सी जल्दी मिलूं, तब हम आमने सामने बातचीत करबो।
3JO 1:15 तोख शान्ति मिलती रहेंन। यहां को तोरो सब संगियों को तोख नमस्कार। उत को संगियों ख भी नमस्कार कह्य देजो।
JUD 1:1 यहूदा को तरफ सी जो यीशु मसीह को सेवक अऊर याकूब को भाऊ आय, उन बुलायो हुयो को नाम जो परमेश्वर पिता म प्रिय अऊर यीशु मसीह को लायी सुरक्षित हंय।
JUD 1:2 दया अऊर शान्ति अऊर प्रेम तुम्ख बहुतायत सी हासिल होतो रहे।
JUD 1:3 हे प्रिय संगियों, जब मय तुम्ख ऊ उद्धार को बारे म लिखनो म अत्यन्त मेहनत सी कोशिश कर रह्यो होतो जेको म हम सब सहभागी हंय, त मय न तुम्ख यो लिखन अऊर उत्साहित करन की जरूरत महसुस करयो कि तुम ऊ विश्वास को लायी संघर्ष करतो रहो जेक परमेश्वर न अपनो पवित्र लोगों ख एकच बार सब को लायी सौंप्यो गयो हय।
JUD 1:4 कहालीकि कितनो असो आदमी चुपका सी हमरो झुण्ड म आय मिल्यो हंय, उन लोगों को सजा को बारे म शास्त्रों न बहुत पहिलेच भविष्यवानी कर दी होती: हि लोग भक्तिहीन हंय, अऊर हमरो परमेश्वर को अनुग्रह ख इन लोगों न परमेश्वर को अनैतिक रस्ता को बहाना बनाय डाल्यो हय तथा असो हमरो प्रभु यीशु मसीह एकमात्र स्वामी अऊर प्रभु ओख इन्कार करय हंय।
JUD 1:5 पर यानेकि तुम सब बात एक बार जान गयो हय, तब भी मय तुम्ख या बात की याद दिलानो चाहऊ हय कि प्रभु न इस्राएल ख मिस्र देश सी छुड़ावन को बाद विश्वास नहीं लान वालो ख नाश कर दियो।
JUD 1:6 तुम्ख यो भी याद दिलानो चाहऊ हय जो स्वर्गदूतों न अपनी सत्ता ख बनाय क नहीं रख सक्यो पर अपनी निजी निवास ख छोड़ दियो, ओन उन्की भी ऊ कठिन दिन को न्याय को लायी अन्धारो म, जो सनातन काल को लायी हय, बन्धनों म रख्यो हय।
JUD 1:7 जो रीति सी सदोम अऊर अमोरा अऊर उन्को आजु-बाजू को नगर, जो स्वर्गदूतों को जसो व्यभिचारी होय गयो होतो अऊर अनैतिक यौनसंबन्ध को पीछू लग गयो होतो, आगी को अनन्त दण्ड म पड़ क उदाहरन को रूप म स्थित हंय।
JUD 1:8 उच रीति सी यो स्वप्नदर्शी भी अपनो-अपनो शरीर ख अशुद्ध करय, अऊर परमेश्वर को अधिकार अऊर स्वर्गदूतों ख तुच्छ मानय हय, अऊर ऊचो पद वालो ख बुरो भलो कह्य हंय।
JUD 1:9 पर प्रधान स्वर्गदूत मीकाईल न, जब शैतान सी मूसा को मरयो शरीर को बारे म वाद-विवाद करयो, त ओख बुरो-भलो कह्य क् मीकाईल न दोष लगातो हुयो अपमान जनक को साहस नहीं करयो पर कह्यो, “प्रभु तोख डाटे।”
JUD 1:10 पर हि लोग उन बातों की आलोचना करय हय जिन्ख हि समझावय नहाय हि लोग बुद्धीहीन जनावरों को जसो जिन बातों सी सहज रीति सी परिचीत हय यो बाते या आय जिन्कोसी उन्को नाश होन वालो हंय।
JUD 1:11 उन पर हाय! कहालीकि हि कैन को जसी चाल चले, अऊर पैसा को लोभ को वजह सी बिलाम को जसो भ्रष्ट होय गयो हंय, अऊर कोरह को जसो विरोध कर क् नाश भयो हंय।
JUD 1:12 हि लोग तुम्हरो प्रिति भोज म घातक हय हि लूकी हुयो ककंर को जसो हय हि केवल अपनोच स्वार्थ कोच चिन्ता करय हय। हि बिना पानी को बादर को जसो हय, हि पतझड़ को असो झाड़ हय जिन पर फर नहीं होवय हय हि दुबारा मरयो हुयो हय उन्ख जड़ी सी उखाड़्यो जाय चुक्यो हय;
JUD 1:13 ऊ समुन्दर की भयानक लहर जसो हय जो अपनी लज्जा पूरो कार्यो ख फेस दिखाती रह्य हंय, हि भटकतो तारा जसी रह्य हंय, जिन्को लायी परमेश्वर न अनन्त घोर अन्धारो सुनिश्चित कर दियो हय।
JUD 1:14 हनोक न भी जो आदम सी सातवी पीढ़ी म होतो, इन्को बारे म या भविष्यवानी करी, “देखो, प्रभु अपनो हजारों पवित्रों स्वर्गदूतों को संग आयेंन।
JUD 1:15 कि सब को न्याय करे, अऊर सब भक्तिहीनों ख उन्को अभक्ति को सब कामों को बारे म जो उन्न भक्तिहीन होय क करयो हय, अऊर उन सब कठोर बातों को बारे म जो भक्तिहीन पापियों न ओको विरोध म कहीं हंय, दोषी ठहरायो।”
JUD 1:16 हि लोग असंतुष्ट, चुगलखोर अऊर दूसरों पर दोष लगावन वालो हंय, हि लोग अपनीच बुरी लालसावों पर चलन वालो हय, हि अपनोच बारे म घमण्ड करय हंय, अऊर अपनो फायदा को लायी दूसरों की चापलूसी करय हंय।
JUD 1:17 पर हे प्रिय संगियों, तुम उन बातों ख याद रखो जो हमरो प्रभु यीशु मसीह को प्रेरित पहिलेच कह्य चुक्यो हंय।
JUD 1:18 हि तुम सी कहत होतो, “आखरी को दिनो म असो लोग प्रगट होयेंन जो ठट्ठा करन वालो होयेंन हि लोग जो अपनीच अभक्ति की इच्छावों को अनुसार चलेंन।”
JUD 1:19 यो हि लोग आय जो फूट डालय हंय; हि उन्को शारीरिक इच्छावों को नियंत्रन म हंय, जिन को जवर परमेश्वर की आत्मा नहाय।
JUD 1:20 पर हे प्रियो, तुम अपनो अति पवित्र विश्वास म उन्नति करतो हुयो अऊर पवित्र आत्मा की सामर्थ म प्रार्थना करतो हुयो,
JUD 1:21 अपनो आप ख परमेश्वर को प्रेम म बनायो रखो; अऊर अनन्त जीवन को लायी हमरो प्रभु यीशु मसीह की दया की बाट देखतो रहो।
JUD 1:22 उन पर जो शक म हंय दया करो;
JUD 1:23 अऊर बहुतों ख आगी म सी झपट क निकालो; अऊर बहुतों पर डर को संग दया करो, पर उन्को कपड़ा सी घृना करो जिन पर कामुक्ता को धब्बा लग्यो हुयो हय।
JUD 1:24 अब ओको प्रति जो तुम्ख गिरन सी बचाय सकय हय, अऊर अपनी महिमामय उपस्थिति म निर्दोष कर क् खड़ो कर सकय हय,
JUD 1:25 ऊ एकमात्र परमेश्वर हमरो उद्धारकर्ता की महिमा अऊर गौरव अऊर पराक्रम अऊर अधिकार, हमरो प्रभु यीशु मसीह को द्वारा जसो युग युगान्तर काल सी हय, अब भी हो अऊर हमेशा हमेशा रहेंन। आमीन।
REV 1:1 यीशु मसीह को प्रकाशन, जो ओख परमेश्वर न येकोलायी दियो कि अपनो सेवकों ख हि बाते, जिन्को जल्दी होनो जरूरी हय, दिखाये; अऊर ओन अपनो स्वर्गदूतों ख भेज क ओको द्वारा अपनो सेवक यूहन्ना ख बतायो,
REV 1:2 यूहन्ना न परमेश्वर को वचन अऊर यीशु मसीह की गवाही, मतलब जो कुछ ओन देख्यो होतो ओकी गवाही दी।
REV 1:3 धन्य हय हि जो या किताब ख पढ़य हय, अऊर धन्य हय हि भविष्यवानी को सन्देश ख सुनावय हय अऊर जो लिख्यो हय ओको अनुसार चलय हय; कहालीकि या सब बाते घटित होन को समय जवर हय।
REV 1:4 यूहन्ना को तरफ सी आसिया प्रान्त की सात मण्डलियों को नाम: ऊ परमेश्वर को तरफ सी जो हय, अऊर जो होतो, अऊर जो आवन वालो हय; अऊर उन सात आत्मावों को तरफ सी जो ओको सिंहासन को सामने हंय,
REV 1:5 अऊर यीशु मसीह को तरफ सी जो विश्वास लायक गवाह अऊर मरयो हुयो म सी जीन्दो होन वालो म पहिलौठा अऊर धरती को राजावों को शासक हय। तुम्ख अनुग्रह अऊर शान्ति मिलती रहे। ऊ हम सी प्रेम रखय हय, अऊर ओन अपनो खून को द्वारा हम्ख पापों सी छुड़ायो हय,
REV 1:6 अऊर हम्ख एक राज्य अऊर अपनो पिता परमेश्वर लायी याजक भी बनाय दियो। यीशु मसीह की महिमा अऊर पराक्रम हमेशा हमेशा रहे। आमीन।
REV 1:7 देखो, ऊ बादलो को संग आय रह्यो हय, अऊर हर एक आंखी ओख देखेंन, हि भी जिन्न ओख बेध्यो होतो हि भी ओख देखेंन, अऊर धरती को पूरो गोत्र ओको वजह शोक करेंन। आमीन।
REV 1:8 प्रभु परमेश्वर, जो हय अऊर जो होतो अऊर जो आवन वालो हय, जो सर्वशक्तिमान हय, यो कह्य हय, “मयच पहिलो अऊर आखरी आय।”
REV 1:9 मय यूहन्ना, जो तुम्हरो भाऊ आय अऊर यीशु को बड़ी कठिनायी अऊर राज्य अऊर धीरज म तुम्हरो सहभागी हय, परमेश्वर को वचन अऊर यीशु की गवाही को वजह पतमुस नाम को टापू म होतो।
REV 1:10 मय प्रभु को दिन आत्मा म आय गयो, अऊर अपनो पीछू तुरही को जसो बड़ो आवाज यो कहतो सुन्यो, जो कुछ तय देख रह्यो हय ओख एक किताब म लिखतो जा अऊर या किताब ख सात शहरों की मण्डलियों म भेज दे।
REV 1:11 “जो कुछ तय देख रह्यो हय ओख एक किताब म लिखतो जा अऊर या किताब ख सातों मण्डलियों को जवर भेज दे, मतलब इफिसुस, अऊर स्मुरना, अऊर पिरगमुन, अऊर थुआतीरा, अऊर सरदीस, अऊर फिलदिलफिया, अऊर लौदीकिया ख।”
REV 1:12 तब मय न ओख, जो मोरो सी बोल रह्यो होतो, देखन लायी अपनो मुंह फिरायो; अऊर पीछू घुम क मय न सोनो की सात दीवट देख्यो,
REV 1:13 अऊर उन दीवट को बीच म आदमी को बेटा जसो एक आदमी ख देख्यो, जो पाय तक कपड़ा पहिन्यो, अऊर छाती पर सोनो को पट्टा बान्ध्यो हुयो होतो।
REV 1:14 ओकी मुंड अऊर बाल सफेद ऊन जसो उज्वल होतो, अऊर ओकी आंखी आगी को जसी चमकत होती।
REV 1:15 ओको पाय उत्तम पीतर को जसो होतो जो मानो भट्टी म तपायो गयो हय, अऊर ओकी आवाज एक पानी को झरना को जसी लग रही होती
REV 1:16 ऊ अपनो दायो हाथ म सात तारा धरयो हुयो होतो, अऊर ओको मुंह सी तेज दोधारी तलवार निकलत होती। ओको चेहरा भर दोपहर म निकल्यो हुयो सूरज को जसो चमकदार होतो।
REV 1:17 जब मय न ओख देख्यो त ओको पाय पर मरयो हुयो आदमी को जसो गिर पड़्यो। ओन मोरो पर अपनो दायो हाथ रख क कह्यो, “मत डर!” मय पहिलो अऊर आखरी आय;
REV 1:18 मय जीन्दो हय अऊर मय मर गयो होतो, अऊर अब देख मय हमेशा हमेशा जीन्दो रहूं। मृत्यु अऊर अधोलोक की कुंजी पर मोरो अधिकार हय।
REV 1:19 येकोलायी जो बाते तय न देखी हंय अऊर जो बाते होय रही हंय, अऊर जो बाते येको बाद होन वाली हंय, उन सब ख लिख ले।
REV 1:20 मतलब उन सात तारा को भेद जिन्ख तय न मोरो दायो हाथ म देख्यो होतो, अऊर उन सात सोनो को दीवट को भेद: हि सात तारा सातों मण्डलियों को दूत आय, अऊर हि सात दीवट सात मण्डलियां हंय।
REV 2:1 “इफिसुस की मण्डली को दूत ख यो लिख। “जो सातों तारा अपनो दायो हाथ म धरयो हुयो हय, अऊर सोनो की सातों दीवट को बीच म चलय हय, ऊ यो कह्य हय कि
REV 2:2 जो तय न करयो अऊर तोरो मेहनत को काम ख अऊर तोरो धीरज ख जानु हय; अऊर यो भी कि तय बुरो लोगों ख देख नहीं सकय, अऊर जो अपनो आप ख प्रेरित कह्य हंय, अऊर हयच नहाय, उन्ख तय न उन्ख परख क झूठो पायो।
REV 2:3 तय धीरज रखय हय, अऊर मोरो नाम लायी दु:ख उठातो उठातो थक्यो नहीं।
REV 2:4 पर मोख तोरो विरुद्ध यो कहनो हय कि तय न अपनो पहिलो सो प्रेम छोड़ दियो हय।
REV 2:5 येकोलायी याद कर कि तय कहां सी गिरयो हय, अऊर पापों सी मन फिराव अऊर पहिले को जसो काम कर जसो तय पहिले करत होतो। यदि तय पापों सी मन नहीं फिरायजो, त मय तोरो जवर आय क तोरो दीवट ख ओकी जागा सी हटाय देऊ।
REV 2:6 पर हव, तोरो म या बात त हय कि तय नीकुलइयों को कामों सी घृना करय हय, जिन्कोसी मय भी घृना करू हय।”
REV 2:7 “जेको कान हय ऊ सुन ले कि आत्मा मण्डलियों सी का कह्य हय। “जो जय पाये, मय ओख ऊ जीवन को झाड़ म सी जो परमेश्वर को बगीचा म बढ़न वालो झाड़ सी हय, फर खान को अधिकार देऊ।”
REV 2:8 “स्मुरना की मण्डली को दूत ख यो लिख। “जो पहिलो अऊर आखरी हय, जो होतो अऊर अब फिर सी जीन्दो भय गयो हय, ऊ यो कह्य हय कि
REV 2:9 मय तोरी कठिनायी अऊर गरीबी ख जानु हय पर तय धनी हय, जो अपनो आप ख यहूदी कह्य हंय पर हयच नहाय, अऊर तोरो विरुद्ध म जो बुरी बाते कह्य हय उन्ख मय जानु हय। हि शैतान की सभा आय।
REV 2:10 जो दु:ख तोख झेलनो पड़ेंन, उन सी मत डर। देखो, शैतान तुम म सी कुछ ख जेलखाना म डालन पर हय ताकि तुम परख्यो जावो; अऊर तुम्ख दस दिन तक कठिनायी उठानो पड़ेंन। जीव जावन तक विश्वास लायक रहो, त मय तोख जीवन को विजय मुकुट देऊ।”
REV 2:11 “जेको कान हय ऊ सुन ले कि आत्मा मण्डलियों सी का कह्य हय। जो जय पाये, ओख दूसरी मृत्यु सी हानि नहीं पहुंचेंन।”
REV 2:12 “पिरगमुन की मण्डली को दूत ख यो लिख। “जेको जवर दोधारी अऊर तेज तलवार हय, ऊ यो कह्य हय कि
REV 2:13 मय यो जानु हय कि तय उत रह्य हय जित शैतान को सिंहासन हय। तय मोरो संग सच्चो हय, अऊर मोरो पर विश्वास करन सी उन दिनो म भी पीछू नहीं हट्यो जिन्म मोरो विश्वास लायक गवाह अन्तिपास, तुम्हरो बीच ऊ जागा पर मार दियो गयो जित शैतान रह्य हय।
REV 2:14 पर मोख तोरो विरोध कुछ बाते कहनी हंय, कहालीकि तुम्हरो बिच कुछ असो हंय, जो बिलाम की शिक्षा ख मानय हंय, जेन बच्चा ख सिखायो होतो कि इस्राएल को लोगों ख मूर्तियों ख चढ़ायो हुयो खाना खान अऊर व्यभिचार करन को द्वारा उन्ख पाप म गिरावन को लायी अगुवायी करे।
REV 2:15 वसोच तोरो बिच म कुछ असो हंय, जो नीकुलइयों की शिक्षा ख मानय हंय।
REV 2:16 येकोलायी पापों सी मन फिराव, नहीं त मय तोरो जवर जल्दीच आय क अपनो मुंह की तलवार सी उन्को संग लड़ाई करतो।”
REV 2:17 “जेको कान हय ऊ सुन ले कि आत्मा मण्डलियों सी का कह्य हय।” “जो जय पाये, ओख मय गुप्त मन्ना म सी देऊ, अऊर उन म सी हर एक ख सफेद गोटा भी देऊ; अऊर ऊ गोटा पर एक नयो नाम लिख्यो हुयो होयेंन, जेक ओको पान वालो को अलावा अऊर कोयी नहीं जानेंन।”
REV 2:18 थुआतीरा की मण्डली को दूत ख यो लिख। “परमेश्वर को टुरा जेकी आंखी आगी की ज्वाला की जसी, अऊर जेको पाय उत्तम पीतर को जसो चमकदार हंय, ऊ यो कह्य हंय कि
REV 2:19 मय तोरो कामों, तोरो प्रेम अऊर विश्वास अऊर सेवा अऊर धीरज ख जानु हय। अऊर यो भी कि तोरो पिछलो कामों सी अभी को काम पहिले सी बढ़ क हंय यो भी जानु हय।
REV 2:20 पर मोरो जवर तोरो विरोध यो कहनो हय कि तय इजेबेल नाम की बाई ख सह रह्यो हय जो अपनो आप ख परमेश्वर की सन्देश वाहक कह्य हय। अऊर ओकी शिक्षा को द्वारा वा मोरो सेवकों ख व्यभिचार को प्रति तथा मूर्तियों ख चढ़ायो हुयो खाना खान ख मोरो सेवकों की गलत अगुवायी करय हय।
REV 2:21 मय न ओख पापों सी मन फिरावन लायी अवसर दियो, पर वा अपनो अनैतिकता सी मन फिरावनो नहीं चाहत होती।
REV 2:22 अऊर मय न तकलीफ को बिस्तर पर डालन वालो हय तथा उन्ख भी जो ओको संग व्यभिचार म सामिल हय, ताकी हि ऊ समय तक गहन तकलीफ ख झेलतो रहे जब तक हि ओको संग करयो अपनो बुरो कर्म को लायी मन नहीं फिराये।
REV 2:23 मय ओको अनुयायीयों ख मार डालू; तब सब मण्डलियायें जान लेयेंन कि दिल अऊर मन को परखन वालो मयच आय, अऊर मय तुम म सी हर एक ख ओको कामों को अनुसार बदला देऊ।”
REV 2:24 “पर तुम थुआतीरा को बाकी लोगों सी, जितनो यो शिक्षा ख नहीं मानय अऊर उन बातों ख जिन्ख शैतान की गहरो रहस्य बाते कह्य हंय नहीं सिख्यो, यो कहू हय कि मय तुम पर अऊर बोझ नहीं डालू।
REV 2:25 पर हव, जो तुम्हरो जवर हय ओको पर मोरो आनो तक चलतो रहो।
REV 2:26 जो जय पाये अऊर मोरो कामों को अनुसार आखरी तक करतो रहे, मय ओख राष्ट्रों पर अधिकार देऊ जो मय न अपनो बाप सी प्राप्त करयो होतो:
REV 2:27 अऊर उन्ख राष्ट्रों पर अधिकार देऊ हि लोहा की सलाक को संग शासन करे, अऊर उन्ख माटी को बर्तन को जसो टुकड़ा म तोड़ दे।
REV 2:28 अऊर मय ओख भुन्सारे को तारा भी देऊ।”
REV 2:29 जेको कान हय ऊ सुन ले कि आत्मा मण्डलियों सी का कह्य हय।
REV 3:1 “सरदीस की मण्डली को दूत ख यो लिख। “जेको जवर परमेश्वर की सात आत्मायें अऊर सात तारा हंय, ऊ यो कह्य हय कि मय तोरो कामों ख जानु हय: लोगों को कहनो हय कि तय जीन्दो त हय, पर वास्तव म मरयो हुयो हय।
REV 3:2 येकोलायी उठ जा, अऊर ओख मजबूत कर जो बाकी हय, ओको पहिले को जो बाकी रह्य गयी हंय, कहालीकि मय न तोरो कोयी काम ख अपनो परमेश्वर की नजर म पूरो नहीं पायो।
REV 3:3 येकोलायी याद कर कि तय न कसी शिक्षा प्राप्त करी अऊर सुनी होती, अऊर ओको पालन कर अऊर पापों सी मन फिराव। यदि तय नहीं जाग्यो त मय चोर को जसो तोरो जवर आऊं, अऊर तय ऊ समय ख नहीं जान सकजो कि मय कब आऊं।
REV 3:4 पर हव, सरदीस म तोरो यहां कुछ असो लोग हंय जिन्न अपनो–अपनो कपड़ा अशुद्ध नहीं करयो। हि सफेद कपड़ा पहिन्यो हुयो मोरो संग घुमेंन, कहालीकि हि यो लायक हंय।”
REV 3:5 “जो जय पाये ओख योच तरह सफेद कपड़ा पहिनायो जायेंन, अऊर मय ओको नाम जीवन की किताब म सी कोयी भी रीति सी नहीं काटू; बल्की अपनो बाप अऊर ओको स्वर्गदूतों को जसो ओको नाम खुलो तौर पर घोषित करू।
REV 3:6 जेको कान हय ऊ सुन ले कि आत्मा मण्डलियों सी का कह्य हय।”
REV 3:7 “फिलदिलफिया की मण्डली को दूत ख यो लिख: जो पवित्र अऊर सत्य हय, अऊर जो दाऊद की कुंजी रखय हय, अऊर जो दरवाजा ऊ खोलय हय, ओख कोयी बन्द नहीं कर सकय अऊर बन्द करयो हुयो ख कोयी खोल नहीं सकय, ऊ यो कह्य हय कि।”
REV 3:8 “मय तोरो कामों ख जानु हय; देख, मय न तोरो आगु एक दरवाजा खोल क रख्यो हय, जेक कोयी बन्द नहीं कर सकय; मय जानु हय कि तोरी सामर्थ थोड़ी हय, फिर भी तय न मोरी शिक्षा को पालन करयो हय अऊर तय मोरो नाम संग विश्वास लायक रह्यो।”
REV 3:9 देख, मय शैतान को उन मण्डली वालो ख तोरो वश म कर देऊ जो यहूदी बन बैठ्यो हंय, पर हयच नहाय बल्की झूठ बोलय हंय देख, मय असो करू कि हि आय क तोरो घुटना को बल पर गिरेंन, अऊर यो जान लेयेंन कि मय न तोरो सी प्रेम रख्यो हय।
REV 3:10 कहालीकि तुम्ख धैर्यपूर्वक सहनशीलता को मोरो आदेश को पालन करयो हय अऊर मय भी वा कठिन समय सी तुम्हरी रक्षा करू, जो यो धरती पर रहन वालो ख परखन लायी पूरो जगत पर आवन वालो हय।
REV 3:11 मय जल्दीच आवन वालो हय; जो कुछ तोरो जवर हय ओख पकड़्यो रह्य कि ताकी कोयी तुम्हरो विजय को मुकुट कोयी छीन नहीं ले।
REV 3:12 जो विजयी होयेंन ओख मय अपनो परमेश्वर को मन्दिर को खम्बा बनाऊं, अऊर हि यो मन्दिर सी कभी बाहेर नहीं जायेंन; अऊर मय उन पर मोरो परमेश्वर को नाम अऊर मोरो परमेश्वर को शहर को नाम नयो यरूशलेम लिखूं, जो मोरो परमेश्वर को स्वर्ग सी खल्लो उतरेंन। मय उन पर अपनो नयो नाम भी लिखूं।
REV 3:13 जेको कान हय ऊ सुन ले कि आत्मा मण्डलियों सी का कह्य हय।
REV 3:14 “लौदीकिया की मण्डली को दूत ख यो लिख। “जो ‘आमीन’ अऊर विश्वास लायक अऊर सच्चो गवाह हय, अऊर परमेश्वर की सृष्टि को शासक हय, ऊ यो कह्य हय कि
REV 3:15 मय तोरो कामों ख जानु हय कि तय नहीं त ठंडो हय नहीं गरम: भलो होतो कि तय ठंडो या गरम होतो।
REV 3:16 येकोलायी कि तय कुनकुनो हय, अऊर नहीं ठंडो हय अऊर नहीं गरम, मय तोख अपनो मुंह म सी उगलन जाय रह्यो हय।
REV 3:17 तय कह्य हय कि मय धनी आय अऊर धनवान भय गयो हय अऊर मोख कोयी चिज कि कमी नहाय; अऊर यो नहीं जानय कि तय दयालु अऊर बेकार अऊर गरीब अऊर अन्धो अऊर नंगो हय।
REV 3:18 येकोच लायी मय तोख सलाह देऊ हय कि आगी म तपायो हुयो शुद्ध सोना मोरो सी ले ले कि तय धनी होय जाये, अऊर सफेद कपड़ा ले ले कि पहिन क तोख अपनो लज्जा को नंगो पन झाक, अऊर अपनी आंखी म लगावन लायी सुर्मा लगाव कि तय देखन लगजो।
REV 3:19 मय जेको जेकोसी प्रेम करू हय, उन सब ख उलाहना अऊर ताड़ना देऊ हय; येकोलायी साहस म रहो, अऊर पापों सी मन फिरावो।
REV 3:20 देख, मय द्वार पर खड़ो हुयो खटखटाऊ हय; यदि कोयी मोरी आवाज सुन क द्वार खोलेंन, त मय ओको जवर अन्दर आय क ओको संग जेवन करू अऊर ऊ मोरो संग।
REV 3:21 “जो जय पाये मय ओख अपनो संग अपनो सिंहासन पर बैठाऊं, जसो मय भी जय पा क अपनो बाप को संग ओको सिंहासन पर बैठ गयो।
REV 3:22 जेको कान हय ऊ सुन ले की आत्मा मण्डलियों सी का कह्य हय।”
REV 4:1 इन बातों को बाद जो मय न नजर करी त का देखूं हय, कि स्वर्ग म एक द्वार खुल्यो हुयो हय, अऊर जेक मय न पहिले तुरही को जसो आवाज सी अपनो संग बाते करतो सुन्यो होतो, उच कह्य हय, “यहां ऊपर आय जा; अऊर मय हि बाते तोख दिखाऊं, जेको इन बातों को बाद पूरो होनो जरूरी हय।”
REV 4:2 फिर तुरतच आत्मा न मोरो पर नियंत्रन करयो। मय न देख्यो कि मोरो सामने स्वर्ग म सिंहासन होतो अऊर ओको पर कोयी विराजमान होतो।
REV 4:3 जो ओको पर बैठ्यो हय ऊ यशब अऊर माणिक्य को गोटा जसो दिखायी देवय हय, अऊर ऊ सिंहासन को चारयी तरफ चमकीलो जसो एक इंद्रधनुष दिखायी देवय हय।
REV 4:4 ऊ सिंहासन को चारयी तरफ चौबीस सिंहासन अऊर होतो; अऊर इन सिंहासनों पर चौबीस बुजूर्ग लोग सफेद कपड़ा पहिन्यो हुयो बैठ्यो होतो, अऊर उन्को मुंड पर सोनो को मुकुट होतो।
REV 4:5 ऊ सिंहासन म सी बिजली की चमक तथा मेघों की गर्जना निकल रही हय अऊर सिंहासन को सामनेच प्रकाश देन वाली सात मशाले जल रही होती, जो परमेश्वर की सात आत्मायें हंय,
REV 4:6 अऊर भी सिंहासन को सामने पारदर्शी काच को स्फटिक समुन्दर जसो होतो। सिंहासन को ठीक सामने तथा ओको दोयी तरफ चार प्रानी होतो, उन्को आगु पीछू आंखीच आंखी होती।
REV 4:7 पहिलो प्रानी सिंह को जसो होतो, अऊर दूसरों प्रानी बईल को जसो होतो, अऊर तीसरो प्रानी को मुंह आदमियों को जसो होतो, अऊर चौथो प्रानी उड़तो हुयो गरूड़ को जसो होतो।
REV 4:8 चारयी प्रानियों को छे-छे पंखा होतो, अऊर चारयी तरफ अऊर अन्दर आंखीच आंखी होती; अऊर हि रात दिन बिना आराम लियो यो कह्य हंय, “पवित्र, पवित्र, पवित्र प्रभु परमेश्वर, सर्वशक्तिमान, जो होतो अऊर जो हय अऊर जो आवन वालो हय।”
REV 4:9 जब हि प्रानी ओको जो सिंहासन पर बैठ्यो होतो, अऊर जो हमेशा हमेशा जीन्दो हय, महिमा अऊर आदर अऊर धन्यवाद करत होतो;
REV 4:10 तब चौबीसों बुजूर्ग लोग सिंहासन पर बैठ्यो हय ओको चरनों म गिर क ऊ सदा हमेशा जीन्दो रहन वालो की आराधना करय हय। हि सिंहासन को सामने अपनो मुकुट डाल देवय हय अऊर कह्य हय,
REV 4:11 “हे हमरो प्रभु अऊर परमेश्वर, तयच महिमा अऊर आदर अऊर सामर्थ को लायक हय; कहालीकि तय नच सब चिजे सृजी अऊर हि तोरीच इच्छा सी हि अस्तित्व म आयी होती अऊर जीन्दी हय।”
REV 5:1 जो सिंहासन पर बैठ्यो होतो, मय न ओको दायो हाथ म एक किताब अऊर मेम्ना ख देख्यो जो अन्दर अऊर बाहेर लिखी हुयी होती, अऊर वा सात मुहर लगाय क बन्द करी गयी होती।
REV 5:2 फिर मय न एक शक्तिशाली स्वर्गदूत ख देख्यो जो ऊचो आवाज सी यो घोषना कर रह्यो होतो, “या किताब ख खोलन अऊर ओकी मुहरें तोड़न को लायक कौन हय?”
REV 5:3 पर नहीं स्वर्ग म, नहीं धरती पर, नहीं धरती को खल्लो कोयी वा किताब ख खोलन अऊर वा किताब को अन्दर देखन को लायक कोयी नहीं मिल्यो।
REV 5:4 तब मय फूट फूट क रोवन लग्यो, कहालीकि वा किताब ख खोलन यां ओको पर नजर डालन को लायक कोयी नहीं मिल्यो।
REV 5:5 येको पर उन बुजूर्ग लोगों म सी एक न मोरो सी कह्यो, “मत रो; देख, यहूदा को वंश को ऊ सिंह जो दाऊद को वंशज हय, ऊ मुहर तोड़न अऊर लपेट्यो हुयो किताब ख खोलन लायी समर्थ हय।”
REV 5:6 तब मय न देख्यो कि मेम्ना सिंहासन को बिचो बिच खड़ो हय। चारयी प्रानियों अऊर उन बुजूर्ग लोगों सी घिरयो हुयो हय, ऊ असो प्रगट भयो कि मानो ओकी बली चढ़ायी गयी हय। ओको सात सिंग होतो अऊर सात आंखी होती; जो परमेश्वर की सात आत्मायें हय उन्ख पूरो धरती पर भेज्यो गयो होतो।
REV 5:7 मेम्ना न आय क ओको दायो हाथ सी जो सिंहासन पर बैठ्यो होतो, वा किताब ले ली।
REV 5:8 जब ओन किताब ले ली, त हि चारयी प्रानी अऊर चौबीसों बुजूर्ग लोगों न ऊ मेम्ना को सामने घुटना टेक्यो। उन्म सी हर एक को हाथ म वीणा अऊर धूप, जो पवित्र लोगों की प्रार्थनाये हंय, हि सुगन्धित चिजे सी भरयो हुयो सोनो को कटोरा होतो।
REV 5:9 हि एक नयो गीत गाय रह्यो होतो, “तय या किताब लेन ख अऊर येको पर लगी मुहरें खोलन को समर्थ हय कहालीकि तोरी हत्या बली को रूप म कर दियो गयो होतो अऊर ओको द्वारा परमेश्वर को लोगों ख हर जाति सी अऊर भाषा सी अऊर सब गोत्रों सी सब राष्ट्रों सी मोल लियो,
REV 5:10 अऊर उन्ख हमरो परमेश्वर की सेवा करन लायी एक राज्य अऊर याजक बनायो; अऊर हि धरती पर राज्य करेंन।”
REV 5:11 फिर सी मय न देख्यो, अऊर हजारों अऊर लाखों स्वर्गदूतों को ध्वनियों ख सुन्यो, हि ऊ सिंहासन, उन चार प्रानियों तथा बुजूर्ग लोगों को चारयी तरफ खड़ो होतो,
REV 5:12 अऊर हि ऊचो आवाज सी गीत गाय रह्यो होतो; “ऊ मेम्ना जो मारयो गयो होतो उच सामर्थ, धन, ज्ञान, शक्ति, आदर, महिमा अऊर स्तुति प्राप्त करन लायक हय!”
REV 5:13 फिर मय न स्वर्ग म अऊर धरती पर, अऊर धरती को खल्लो अऊर समुन्दर को पूरो प्रानियों अऊर ब्रम्हांड को प्रानियों ख यो गातो सुन्यो, “जो सिंहासन पर बैठ्यो हय ओको अऊर मेम्ना की स्तुति आदर, महिमा अऊर सामर्थ राज्य हमेशा हमेशा रहे!”
REV 5:14 अऊर चारयी प्रानियों न आमीन कह्यो, अऊर बुजूर्ग लोगों न घुटना टेक क आराधना करी।
REV 6:1 फिर मय न देख्यो कि मेम्ना न उन सात मुहरों म सी एक ख खोल्यो; अऊर उन चारयी प्रानियों म सी एक को मेघ गर्जना को जसो आवाज सुन्यो, “आवो!”
REV 6:2 मय न नजर डाली त पायो कि मोरो सामने एक सफेद घोड़ा हय, अऊर ओको सवार धनुष लियो हुयो हय; अऊर ओख एक मुकुट दियो गयो, अऊर ऊ विजय करतो हुयो निकल्यो कि जीत हासिल करे।
REV 6:3 जब मेम्ना न दूसरी मुहर खोल्यो, त मय न दूसरों प्रानी ख यो कहतो सुन्यो, “आवो!”
REV 6:4 फिर एक अऊर घोड़ा आयो जो लाल रंग को होतो; ओको पर बैठ्यो सवार ख या शक्ति दी गयी कि धरती सी शान्ति छीन ले, अऊर लोगों सी परस्पर हत्यायें करवावन लायी। ओख एक बड़ी तलवार दी गयी।
REV 6:5 जब मेम्ना न तीसरी मुहर खोली, त मय न तीसरो प्रानी ख यो कहतो सुन्यो, “आवो!” मय न नजर करी, अऊर देखो एक कारो घोड़ा हय, अऊर ओको सवार को हाथ म एक तराजू हय;
REV 6:6 अऊर मय न उन चारयी प्रानियों को बीच म सी एक आवाज कहतो सुन्यो, “एक दिन की मजूरी को बदला एक दिन को खान को गहूं को चुन अऊर एक दिन की मजूरी को लायी तीन दिन तक खान को जौ, पर जैतून को झाड़ अऊर अंगूररस की बाड़ियों ख हानि मत पहुंचावों!”
REV 6:7 जब ओन चौथी मुहर खोली, त मय न चौथो प्रानी को आवाज यो कहतो सुन्यो, “आवो!”
REV 6:8 फिर मय न नजर करी, अऊर देख्यो, एक पीलो रंग को घोड़ा होतो; अऊर ओको सवार को नाम मृत्यु होतो, अऊर अधोलोक ओको पीछू पीछू होतो; अऊर उन्ख धरती की एक चौथाई पर यो अधिकार दियो गयो कि युद्ध, अकाल, महामारी, अऊर धरती को जंगली पशु को द्वारा लोगों ख मार डाले।
REV 6:9 जब ओन पाचवी मुहर खोली, त मय न वेदी को खल्लो उन्को आत्मावों ख देख्यो जो परमेश्वर को वचनों को प्रचार करन को वजह अऊर ऊ गवाहों म विश्वास लायक रहन को वजह जो उन्न दी होती ओको वजह मारयो गयो होतो।
REV 6:10 उन्न बड़ो आवाज सी पुकार क कह्यो, “हे सर्वशक्तिमान प्रभु, हे पवित्र अऊर सत्य; तय कब तक धरती को न्याय नहीं करजो? अऊर हम्ख मारन वालो ख कब तक सजा नहीं देजो?”
REV 6:11 उन्म सी हर एक ख सफेद कपड़ा दियो गयो, अऊर उन्को सी कह्यो गयो कि अऊर थोड़ी देर तक आराम करो, जब तक कि उन्को उन संगी सेवकों अऊर विश्वासियों कि मरन की संख्या पूरी नहीं होय जावय जिन्की वसीच हत्या करी जान वाली हय जसी तुम्हरी करी गयी हय।
REV 6:12 जब मेम्ना न छठवी मुहर खोली, त मय न देख्यो कि एक बड़ो भूईडोल भयो, अऊर सूरज असो कालो पड़ गयो हय जसो कोयी शोक मनातो हुयो आदमी को कपड़ा होवय हंय अऊर पूरो चन्दा खून को जसो लाल भय गयो।
REV 6:13 आसमान को तारा धरती पर असो गिर पड़्यो जसो बड़ो तूफान सी हल क अंजीर को झाड़ म सी कच्चो फर झड़य हंय।
REV 6:14 आसमान असो सरक गयो जसो किताब ख लपेटन को जसो सुकड़ क लपेट गयो; अऊर हर एक पहाड़ी, अऊर द्वीप, अपनो अपनो जागा म हट गयो।
REV 6:15 तब धरती को राजा, अऊर मुख्य याजक, सरदार, धनवान अऊर शक्तिशाली लोग, अऊर हर एक सेवक अऊर स्वतंत्र आदमी पहाड़ियों की गुफावों म अऊर चट्टानों म जाय क लूक्यो,
REV 6:16 अऊर पहाड़ियों अऊर चट्टानों सी कहन लग्यो, “हम पर गिर पड़ो; अऊर हम्ख ओको मुंह सी जो सिंहासन पर बैठ्यो हय, अऊर मेम्ना को प्रकोप सी हम्ख लूकाय लेवो।
REV 6:17 कहालीकि उन्को प्रकोप को भयानक दिन आय पहुंच्यो हय, असो कौन हय जो ओको सामना कर सकय हय?”
REV 7:1 येको बाद मय न धरती को चारयी कोना पर चार स्वर्गदूत खड़ो देख्यो। हि धरती को चारयी हवावों ख रोक्यो हुयो होतो ताकि धरती पर समुन्दर पर कोयी झाड़ पर हवा नहीं चले।
REV 7:2 फिर मय न एक अऊर स्वर्गदूत ख जीवतो परमेश्वर की मुहर लियो हुयो पूर्व सी ऊपर को तरफ आवतो देख्यो; ओन उन चारयी स्वर्गदूतों सी जिन्ख धरती अऊर समुन्दर की हानि करन को अधिकार दियो गयो होतो, ऊचो आवाज सी पुकार क कह्यो,
REV 7:3 “जब तक हम अपनो परमेश्वर को सेवकों को मस्तक पर मुहर नहीं लगाय देजे, तब तक धरती अऊर समुन्दर अऊर झाड़ों ख हानि मत पहुंचाजो।”
REV 7:4 जिन पर परमेश्वर की मुहर दी गयी मय न उन्की गिनती सुनी, मतलब इस्राएल की सन्तानों को बारा गोत्रों म सी एक लाख चौवालीस हजार पर मुहर दी गयी:
REV 7:5 हर एक गोत्र म सी बारा हजार पर मुहर लगायी गयी, यहूदा को गोत्र म सी बारा हजार पर मुहर दी गयी: रूबेन को गोत्र म सी बारा हजार पर, गाद को गोत्र म सी बारा हजार पर।
REV 7:6 आशेर को गोत्र म सी बारा हजार पर, नप्ताली को गोत्र म सी बारा हजार पर, मनश्शिह को गोत्र म सी बारा हजार पर,
REV 7:7 शिमोन को गोत्र म सी बारा हजार पर, लेवी को गोत्र म सी बारा हजार पर, इस्साकार को गोत्र म सी बारा हजार पर,
REV 7:8 जबूलून को गोत्र म सी बारा हजार पर, यूसुफ को गोत्र म सी बारा हजार पर, अऊर बिन्यामीन को गोत्र म सी बारा हजार पर मुहर दी गयी।
REV 7:9 येको बाद मय न नजर करी, अऊर देखो, हर एक जाति अऊर गोत्र, अऊर राष्ट्र अऊर भाषा म सी एक असी बड़ी भीड़, जेक कोयी गिन नहीं सकत होतो, सफेद कपड़ा पहिन्यो अऊर अपनो हाथों म खजूर की डगाली लियो हुयो सिंहासन को सामने अऊर मेम्ना को सामने खड़ी होती,
REV 7:10 अऊर बड़ी आवाज सी पुकार क कह्य हय, “उद्धार को लायी हमरो परमेश्वर को, जो सिंहासन पर बैठ्यो हय, हमरो परमेश्वर को तरफ सी अऊर मेम्ना को तरफ सी उद्धार हय!”
REV 7:11 अऊर पूरो स्वर्गदूत ऊ सिंहासन अऊर बुजूर्ग लोग अऊर चारयी प्रानियों को चारयी तरफ खड़ो हंय; फिर हि सिंहासन को सामने मुंह को बल गिर पड़्यो अऊर परमेश्वर की आराधना करी,
REV 7:12 अऊर कह्यो “आमीन! हमरो परमेश्वर की स्तुति अऊर महिमा अऊर ज्ञान अऊर धन्यवाद अऊर आदर अऊर सामर्थ अऊर शक्ति हमेशा हमेशा बनी रहे। आमीन!”
REV 7:13 येको पर बुजूर्ग लोगों म सी एक न मोरो सी कह्यो, “यो सफेद कपड़ा पहिन्यो हुयो कौन आय, अऊर कहां सी आयो हंय?”
REV 7:14 मय न ओको सी कह्यो, “हे मालिक, तयच जानय हय।” ओन मोरो सी कह्यो, “यो हि लोग आय, जो कठोर यातनावों को बीच सी होय क आयो हंय; इन्न अपनो-अपनो कपड़ा मेम्ना को खून म धोय क सफेद करयो हंय।
REV 7:15 योच वजह हि परमेश्वर को सिंहासन को सामने हंय, अऊर ओको मन्दिर म दिन-रात ओकी सेवा करय हंय, अऊर जो सिंहासन पर बैठ्यो हय, हि ओकी उपस्थिति म उन्की रक्षा करेंन।
REV 7:16 हि फिर सी भूखो अऊर प्यासो नहीं रहेंन; अऊर नहीं त सूरज कड़कड़ाती धूप उन्ख जलाय पायेंन,
REV 7:17 कहालीकि मेम्ना जो सिंहासन को बीच म हय ऊ उन्को चरवाहा रहेंन, अऊर उन्ख जीवन देन वालो पानी को झरना को जवर लिजायो करेंन; अऊर परमेश्वर उन्की आंखी सी सब आसु पोछ डालेंन।”
REV 8:1 जब ओन सातवी मुहर खोली, त स्वर्ग म अरधो तास तक सन्नाटा छाय गयो।
REV 8:2 तब मय न उन सातों स्वर्गदूतों ख देख्यो जो परमेश्वर को सामने खड़ो रह्य हंय, अऊर उन्ख सात तुरही दी गयी होती।
REV 8:3 फिर एक स्वर्गदूत सोनो को धूपदान लियो हुयो आयो, अऊर वेदी को जवर खड़ो भयो; अऊर ओख धूप दियो गयो कि सब परमेश्वर को लोगों की प्रार्थनावों को संग सोनो की वा वेदी पर, जो सिंहासन को सामने हय चढ़ाये।
REV 8:4 ऊ धूप को धुवा परमेश्वर को लोगों की प्रार्थनावों सहित स्वर्गदूत को हाथ सी परमेश्वर को सामने पहुंच गयो।
REV 8:5 फिर स्वर्गदूत न ऊ धूपदान ख पकड़्यो ओख वेदी की आगी भरयो अऊर जमीन पर फेक दियो। ओको पर मेघों की गर्जना अऊर भीषन आवाज अऊर बिजली की चमक अऊर भूईडोल होन लग्यो।
REV 8:6 तब हि सातों स्वर्गदूत जिन्को जवर सात तुरही होती उन्ख फूकन ख तैयार भयो।
REV 8:7 पहिले स्वर्गदूत न तुरही फूकी, अऊर खून सी मिली हुयी गारगोटी अऊर आगी पैदा भयी, अऊर धरती पर खल्लो कुड़ायी गयी। जेकोसी धरती को एक तिहाई भाग जर क भस्म भय गयी, एक तिहाई झाड़ जर गयो, अऊर सब हरी घास भी जल गयी।
REV 8:8 दूसरों स्वर्गदूत न तुरही फूकी, त मानो आगी को जलतो हुयो एक बड़ो पहाड़ी जसो समुन्दर म फेक दियो गयो हो। येको सी एक तिहाई समुन्दर खून म बदल गयो,
REV 8:9 अऊर समुन्दर को एक तिहाई जीवजन्तु मर गयो अऊर एक तिहाई जहाजें नाश भय गयो।
REV 8:10 तीसरो स्वर्गदूत न तुरही फूकी, अऊर एक बड़ो तारा जो मशाल को जसो जलत हुयो स्वर्ग सी टूट्यो, अऊर एक तिहाई नदियों म अऊर झरना को पानी पर जाय पड़्यो।
REV 8:11 ऊ तारा को नाम कड़वाहट होतो; अऊर एक तिहाई पानी कड़वाहट म बदल गयो, अऊर बहुत सो आदमी ऊ पानी ख पीनो सी बहुत सो लोग मर गयो कहालीकि पानी कड़ू भय गयो होतो।
REV 8:12 जब चौथो स्वर्गदूत न तुरही फूकी, त एक तिहाई सूरज अऊर संग म एक तिहाई चन्दा अऊर एक तिहाई तारा पर मुसीबत आयी। येकोलायी उन्को एक तिहाई हिस्सा कालो पड़ गयो परिनाम स्वरूप एक तिहाई दिन तथा एक तिहाई रात अन्धारो म डुब गयो।
REV 8:13 जब मय न फिर देख्यो, त आसमान को बीच म एक गरूड़ ख उड़तो अऊर ऊचो आवाज सी यो कहतो सुन्यो, “उन तीन स्वर्गदूतों की तुरही को आवाज को वजह, जिन्को फूकनो अभी बाकी हय, धरती को रहन वालो पर कष्ट हो, कष्ट हो, कष्ट हो!”
REV 9:1 जब पाचवों स्वर्गदूत न तुरही फूकी, त मय न स्वर्ग सी धरती पर एक तारा गिरतो हुयो देख्यो, अऊर ओख अधोलोक कुण्ड की कुंजी दी गयी।
REV 9:2 फिर ऊ तारा न अधोलोक कुण्ड ख खोल्यो, अऊर ओको म सी असो धुवा निकल रह्यो होतो जसो ऊ एक बड़ी भट्टी सी निकल रह्यो हय, अऊर अधोलोक सी निकल्यो हुयो सी सूरज अऊर हवा कालो पड़ गयो।
REV 9:3 ऊ धुवा म सी धरती पर टिड्डियां निकली, अऊर उन्ख धरती की बिच्छूवों को जसी शक्ति दी गयी।
REV 9:4 उन्को सी कह्यो गयो कि नहीं धरती की घास ख, नहीं कोयी हरियाली ख, नहीं कोयी झाड़ ख हानि पहुंचावों, केवल उन आदमियों ख हानि पहुंचावों जिन्को मस्तक पर परमेश्वर की मुहर नहीं होती।
REV 9:5 टिड्डियां को दल ख निर्देश दियो गयो होतो कि उन्ख लोगों ख मार डालन को त नहीं पर पाच महीना तक तकलीफ देन को अधिकार दियो गयो: अऊर उन्की यातना असी होती जसी बिच्छू को डंक मारनो सी आदमी ख होवय हय।
REV 9:6 उन पाच महीना को अन्दर आदमी अपनी मृत्यु ख ढूंढेंन अऊर नहीं पायेंन; मरन की लालसा करेंन, अऊर उन्को सी मृत्यु दूर भगेंन।
REV 9:7 हि टिड्डियां लड़ाई को लायी तैयार करयो हुयो घोड़ा को जसी दिख रह्यो होतो। अऊर उन्को मुंड पर सुनहरी सोनो को मुकुट होतो; अऊर उन्को मुंह आदमियों को जसो दिख रह्यो होतो।
REV 9:8 उन्को बाल बाईयों को बाल जसो अऊर दात सिंह को दात जसो होतो।
REV 9:9 उन्की छाती असी दिख रही होती मानो लोहा की झिलम हो; अऊर उन्को पंखा को आवाज लड़ाई म जातो हुयो बहुत सारो घोड़ा को रथों सी पैदा हुयो आवाज को जसी होती।
REV 9:10 उन्की पूछी बिच्छूवों को डंक को जसी होती अऊर उन्म लोगों ख पाच महीना तक दु:ख पहुंचान की शक्ति मिली होती,
REV 9:11 अधोलोक को दूत उन पर राजा होतो; ओको नाम इब्रानी म अबद्दोन, अऊर यूनानी म अपुल्लयोन जेको अर्थ हय “विनाशक।”
REV 9:12 पहिली विपत्ति खतम भय गयी हय, देखो, अब येको बाद दोय विपत्तियां अऊर आवन वाली हंय।
REV 9:13 फिर छठवो स्वर्गदूत न तुरही फूकी त सोनो की वेदी जो परमेश्वर को सामने हय ओको सींगो म सी मय न असो आवाज सुन्यो,
REV 9:14 मानो कोयी छठवो स्वर्गदूत सी, जेको जवर तुरही होती, कह्य रह्यो हय, “उन चार स्वर्गदूतों ख जो बड़ी नदी फरात को जवर बन्ध्यो हुयो हंय, खोल दे।”
REV 9:15 त चारयी दूत छोड़ दियो गयो हि उच घड़ी, उच दिन, उच महीना, अऊर उच साल को लायी तैयार रख्यो गयो होतो, ताकी हि एक तिहाई मानव जाति ख मार डाले।
REV 9:16 उन्की घुड़सवार सैनिकों की गिनती बीस करोड़ होती; मय न उनकी गिनती सुनी।
REV 9:17 मोख यो दर्शन म घोड़ा अऊर उन्को असो सवार दिखायी दियो जिन्की छाती की झिलम धधकती आगी जसी लाल, अऊर गहरो निलो, अऊर गन्धक जसो पिलो दिखायी दियो, अऊर घोड़ा की मुंड सिंहों को मुंड को जसो अऊर उन्को मुंह सी आगी, धुवा अऊर गन्धक निकलन को जसो दिखायी दियो।
REV 9:18 इन तीन महामारियों मतलब उन्को मुंह सी निकल रही आगी, धुवा अऊर गन्धक सी एक तिहाई मानव जाति ख मार डाल्यो गयो।
REV 9:19 कहालीकि उन घोड़ा की सामर्थ उन्को मुंह अऊर उन्की पूछी म होती; येकोलायी कि उन्की पूछी सांपो जसी होती, अऊर उन पूछी की मुंड भी होतो अऊर इन्को सी हि हानि पहुंचात होतो।
REV 9:20 इन पर बाकी को असो मानव जाति न जो इन महामारी सी भी नहीं मरयो गयो होतो, अपनो हाथों को बनायो हुयो चिजों सी मन नहीं फिरायो, तथा दुष्ट आत्मावों की, यां सोनो, चांदी, कासा, गोटा अऊर लकड़ी की मूर्तियों की आराधना नहीं छोड़ी जो नहीं देख सकय हय, नहीं सुन सकय हय, अऊर नहीं चल सकय हंय।
REV 9:21 अऊर जो हत्यायें, जादूटोना, व्यभिचार, अऊर चोरी उन्न करी होती, उन्को सी मन नहीं फिरायो।
REV 10:1 फिर मय न स्वर्ग सी खल्लो उतरतो हुयो एक अऊर सामर्थी स्वर्गदूत ख देख्यो। ओन बादर ख ओढ़्यो हुयो होतो, ओको मुंड को आजु बाजू एक इंद्रधनुष होतो। ओको मुंह सूरज को जसो होतो, अऊर ओको पाय आगी को खम्बा को जसो होतो।
REV 10:2 ओको हाथ म एक छोटी सी खुली हुयी किताब होती। ओन अपनो दायो पाय समुन्दर पर अऊर बायो पाय धरती पर रख दियो,
REV 10:3 फिर ऊ सिंह को जसो गरजतो हुयो ऊचो आवाज म चिल्लायो, त सात गर्जन को संग आवाज सुनायी दियो।
REV 10:4 जब सातों गर्जन को आवाज सुनायी दे दियो, त मय लिखन ख होतो, पर मय न स्वर्ग सी यो आवाज सुन्यो, “जो बाते गर्जन को उन सात शब्दों सी सुनी हंय उन्ख गुप्त रखो, येख लिखो मत!”
REV 10:5 जो स्वर्गदूत ख मय न समुन्दर अऊर धरती पर खड़ो देख्यो होतो, ओन अपनो दायो हाथ स्वर्ग को तरफ उठायो,
REV 10:6 अऊर जो हमेशा जीन्दो रह्य हय, अऊर जेन स्वर्ग ख, धरती ख, अऊर समुन्दर ख, अऊर जो कुछ उन म हय उन्ख बनायो हय। स्वर्गदूत न कह्यो, “अब कोयी देर नहीं होयेंन!
REV 10:7 पर जब सातवों स्वर्गदूत ख सुनन म आयेंन मतलब जब ऊ अपनी तुरही फूकन पर होना तब भी परमेश्वर की वा गुप्त योजना पूरी होय जायेंन, जेक ओन अपनो सेवकों अऊर भविष्यवक्तावों पर घोषित करयो।”
REV 10:8 जो आवाज ख मय न स्वर्ग सी बोलतो सुन्यो होतो, ऊ फिर मोरो संग बाते करन लग्यो, “जा, जो स्वर्गदूत समुन्दर अऊर धरती पर खड़ो हय, ओको हाथ म की खुली हुयी किताब ले ले।”
REV 10:9 मय न स्वर्गदूत को जवर जाय क कह्यो, “या छोटी किताब मोख दे।” ओन मोरो सी कह्यो, “ले, येख खाय ले; येको सी त तोरो पेट खट्टो होय जायेंन, पर तोरो मुंह म यो शहेद को जसो मीठो होय जायेंन।”
REV 10:10 येकोलायी मय वा छोटी किताब ऊ स्वर्गदूत को हाथ सी ले क खाय गयो। ऊ मोरो मुंह म शहेद जसो मीठो त लग्यो, पर जब मय ओख गिटक गयो, त मोरो पेट खट्टो भय गयो।
REV 10:11 तब मोरो सी यो कह्यो गयो, “तोख बहुत सो लोगों, जातियों, भाषावों, अऊर राजावों को बारे म फिर भविष्यवानी करनो पड़ेंन।”
REV 11:1 फिर मोख नापन लायी एक छड़ी दी गयी, अऊर कोयी न कह्यो, “उठ, परमेश्वर को मन्दिर अऊर वेदी, ख नाप ले, अऊर मन्दिर म आराधना करन वालो की गिनती कर ले।
REV 11:2 पर मन्दिर को बाहेर को आंगन छोड़ दे; ओख मत नाप कहालीकि ऊ गैरयहूदी ख दियो गयो हय, अऊर हि पवित्र नगर ख बयालीस महीना तक पाय को खल्लो रौंद देयेंन।
REV 11:3 मय अपनो दोय गवाहों ख पूरो अधिकार देऊ अऊर ऊ एक हजार दोय सौ साठ दिन तक भविष्यवानी करेंन। हि उन्को बोरा को असो कपड़ा धारन करेंन जिन्ख शोक प्रदर्शित करन लायी पहिनायो जावय हय।”
REV 11:4 यो उच जैतून को दोय झाड़ अऊर दोय दीवट आय जो धरती को प्रभु को सामने खड़ो रह्य हंय।
REV 11:5 यदि कोयी उन्ख हानि पहुंचानो चाहवय हय, त उन्को मुंह सी आगी निकल क उन्को दुश्मनों ख भस्म करय हय; अऊर यदि कोयी उन्ख हानि पहुंचानो चाहेंन, त जरूर योच रीति सी मार डाल्यो जायेंन।
REV 11:6 उन्ख अधिकार हय कि आसमान ख बन्द करे, कि उन्की भविष्यवानी को दिनो म पानी नहीं बरसे; अऊर उन्ख सब पानी को झरना पर अधिकार हय कि ओख खून म बदल सके, अऊर उन्ख यो भी अधिकार हय की हि जब चाहे उतनो बार हर तरह की विपत्ति धरती पर लाय सकय हय।
REV 11:7 जब हि परमेश्वर को सन्देश की घोषना कर चुक्यो होना तब अधोलोक म सी हिंसक पशु निकल क उन्को विरोध म लड़ाई करेंन। अऊर ऊ उन्ख मार देयेंन।
REV 11:8 उन्को लाश ऊ महानगर की सड़क पर पड़्यो रहेंन, यो नगर चिन्ह आत्मिक रीति सी सदोम अऊर मिस्र कहलावय हय, योच उन्को प्रभु ख भी क्रूस पर चढ़ाय क मारयो गयो होतो।
REV 11:9 सब राष्ट्रों सब वंशों सब भाषावों अऊर सब गोत्रों को लोग उन्को लाशों ख साढ़े तीन दिन तक देखतो रहेंन, अऊर उन्को लाशों ख कब्र म रखन नहीं देयेंन।
REV 11:10 धरती को रहन वालो उन्की मृत्यु सी खुश अऊर मगन होयेंन, अऊर एक दूसरों को जवर दान भेजेंन, कहालीकि इन दोयी भविष्यवक्तावों न धरती को रहन वालो ख बहुत सतायो होतो।
REV 11:11 पर साढ़े तीन दिन को बाद परमेश्वर को तरफ सी जीवन को श्वास उन्म सिरयो, अऊर हि अपनो पाय को बल खड़ो भय गयो, अऊर उन्को देखन वालो पर बड़ो डर छाय गयो।
REV 11:12 तब हि दोय भविष्यवक्तावों ख स्वर्ग सी एक बड़ो आवाज सुनायी दियो, “यहां ऊपर आवो!” त हि स्वर्ग म चली गयो। उन्ख ऊपर जातो हुयो उन्को दुश्मनों न देख्यो।
REV 11:13 फिर उच घड़ी एक बड़ो भूईडोल भयो, अऊर नगर को दसवों भाग गिर पड़्यो; अऊर ऊ भूईडोल सी सात हजार आदमी मर गयो, अऊर हि डर गयो होतो अऊर स्वर्ग को परमेश्वर की महानता की महिमा करत होतो।
REV 11:14 दूसरी विपत्ति बीत गयी; पर देखो, तीसरी विपत्ति जल्दी आवन वाली हय।
REV 11:15 जब सातवों स्वर्गदूत न तुरही फूकी, त आसमान म तेज आवाज होन लगी। “हि कह्य रही होती अब जगत को राज्य हमरो प्रभु को आय अऊर ओको मसीह म ओको राज्य हमेशा हमेशा को लायी रहेंन।”
REV 11:16 तब चौबीसों बुजूर्ग लोग जो परमेश्वर को सामने अपनो अपनो सिंहासन पर बैठ्यो होतो, मुंह को बल गिर क परमेश्वर की आराधना कर रह्यो होतो,
REV 11:17 यो कहन लग्यो, “हे सर्वशक्तिमान प्रभु परमेश्वर, जो हय अऊर जो होतो, हम तोरो धन्यवाद करजे हंय कि तय न अपनी महाशक्ति सी सब को शासन को सुरूवात करयो होतो।
REV 11:18 राष्ट्रों को लोग गुस्सा होतो, पर तोरो प्रकोप आय पड़्यो, अऊर ऊ समय आय पहुंच्यो हय कि मरयो हुयो को न्याय करयो जाये, अऊर तोरो सेवक भविष्यवक्तावों अऊर पवित्र लोगों ख अऊर उन छोटो बड़ो ख जो तोरो नाम सी डरय हंय प्रतिफल दियो जाये, अऊर जो धरती बिगाड़ रह्यो हय उन्ख नाश करयो जाये।”
REV 11:19 अऊर परमेश्वर को जो मन्दिर स्वर्ग म हय ऊ खोल्यो गयो, अऊर ओको मन्दिर म ओको वाचा को सन्दूक दिखायी दियो। अऊर बिजलियां, शब्द, गर्जन, भूईडोल भयो अऊर बड़ी गारगोटी गिरयो।
REV 12:1 फिर आसमान म एक बड़ो चिन्ह दिखायी दियो, मतलब एक बाई जो सूरज ओढ़्यो हुयी होती, अऊर चन्दा ओको पाय खल्लो होतो, अऊर ओको मुंड पर बारा तारा को मुकुट होतो।
REV 12:2 वा गर्भवती भयी, अऊर वा चिल्लावत होती, कहालीकि वा बच्चा जनन की पीड़ा म होती।
REV 12:3 एक अऊर रहस्यमय चिन्ह आसमान म दिखायी दियो; अऊर देखो, एक बड़ो लाल अजगर होतो, जेको सात मुंड अऊर दस सींग होतो, अऊर ओको मुंड पर सात राजमुकुट होतो।
REV 12:4 ओकी पूछी न आसमान को तारा की एक तिहाई हिस्सा ख खीच क धरती पर फेक दियो। वा बाई जो बच्चा ख जनम देन वाली होती, ऊ अजगर ओको सामने खड़ो भयो कि जब वा बच्चा ख जनम दे, त ऊ बच्चा ख गिटक जाये।
REV 12:5 फिर वा बाई न एक बच्चा ख जनम दियो जो एक लड़का होतो अऊर ऊ बच्चा ख सब राष्ट्रों पर लोहा को राजदण्ड को संग शासन करनो होतो, पर ऊ बच्चा ख उठाय क परमेश्वर अऊर ओको सिंहासन को सामने लिजायो गयो।
REV 12:6 अऊर वा बाई ऊ जंगल ख भग गयी जित परमेश्वर को तरफ सी ओको लायी एक जागा तैयार करी गयी होती कि उत वा बाई एक हजार दोय सौ साठ दिन तक सम्भाल्यो जाये।
REV 12:7 फिर स्वर्ग म लड़ाई भयी, मीकाईल अऊर ओको स्वर्गदूत अजगर सी लड़न ख निकल्यो, अऊर अजगर अऊर ओको दूत ओको सी लड़्यो;
REV 12:8 पर भारी नहीं पड़्यो, अऊर स्वर्ग म उन्को लायी रहन की अनुमति नहीं रही।
REV 12:9 अऊर ऊ अजगर ख खल्लो ढकेल दियो गयो, यो उच पुरानो सांप आय बुरो या शैतान कह्यो गयो हय। यो पूरो जगत ख भरमावय हय। ओख अऊर ओको दूतों ख धरती पर फेक्यो गयो होतो।
REV 12:10 फिर मय न स्वर्ग सी यो बड़ो आवाज आवतो हुयो सुन्यो, “अब हमरो परमेश्वर को उद्धार अऊर सामर्थ अऊर राज्य अऊर ओको मसीह को अधिकार प्रगट भयो हय, कहालीकि हमरो भाऊवों अऊर बहिनों पर दोष लगावन वालो, जो रात दिन हमरो परमेश्वर को सामने उन पर दोष लगायो करत होतो, स्वर्ग सी गिराय दियो गयो हय।”
REV 12:11 हि मेम्ना को खून को वजह अऊर अपनी गवाही को वचन को वजह ओको पर जीत हासिल करी, अऊर उन्न अपनो जीवो ख प्रिय नहीं जान्यो, अऊर हि अपनो जीवन ख छोड़न अऊर मरन लायी तैयार होतो।
REV 12:12 “यो वजह हे स्वर्गों अऊर उन्म रहन वालो, मगन हो; पर हे धरती, अऊर समुन्दर, तुम पर हाय! कहालीकि शैतान बड़ो गुस्सा को संग तुम्हरो जवर उतर आयो हय, कहालीकि जानय हय कि ओको जवर थोड़ोच समय अऊर बाकी हय।”
REV 12:13 जब अजगर को समझ म आयो की ओख धरती पर फेक दियो हय, त ओन वा बाई को पीछा करनो सुरू कर दियो, जेन टुरा ख जनम दियो होतो।
REV 12:14 पर वा बाई ख बड़ो गरूड़ को दोय पंखा दियो गयो कि सांप को सामने सी उड़ क जंगल म ऊ जागा पहुंच जाये, जित ओख अजगर को हमला सी सुरक्षित रखन म साढ़े तीन साल तक ध्यान रख्यो जायेंन।
REV 12:15 अऊर सांप न वा बाई को पीछू अपनो मुंह सी नदी को जसो पानी बहायो कि ओख यो नदी सी बहाय दे।
REV 12:16 पर धरती न वा बाई की मदत करी, अऊर अपनो मुंह खोल क वा नदी ख जो अजगर न अपनो मुंह सी बहायी होती पी लियो।
REV 12:17 येको बाद ऊ अजगर वा बाई पर गुस्सा भयो, अऊर बाई को बाकी वंशजों को संग, जो परमेश्वर को आज्ञावों को पालन करय हय, यीशु को गवाहों ख धारन करय हय, ऊ उन्को संग लड़ाई करन लायी निकल पड़्यो।
REV 12:18 अऊर ऊ सांप समुन्दर को किनार पर खड़ो भय गयो।
REV 13:1 तब मय न एक हिंसक पशु ख समुन्दर म सी निकलतो हुयो देख्यो, जेको दस सींग अऊर सात मुंड होतो। ओको सींगो पर दस राजमुकुट, अऊर ओकी मुंडी पर परमेश्वर की निन्दा को नाम लिख्यो हुयो होतो।
REV 13:2 जो हिंसक पशु मय न देख्यो ऊ चीता को जसो होतो; अऊर ओको पाय आसवल को जसो, अऊर मुंह सिंह को जसो होतो। ऊ अजगर न अपनी सामर्थ अऊर अपनो सिंहासन अऊर बड़ो अधिकार ओख दे दियो।
REV 13:3 मय न ओको मुंडी म सी एक पर असो भारी घाव लग्यो देख्यो मानो ऊ मरन पर हय, तब ओको जीव घातक घाव अच्छो होय गयो, अऊर पूरी धरती को लोग ऊ हिंसक पशु को पीछू-पीछू अचम्भा करतो हुयो चल्यो।
REV 13:4 लोगों न अजगर की पूजा करी, कहालीकि ओन जनावर ख अपनो अधिकार दे दियो होतो, अऊर यो कह्य क हिंसक पशु की पूजा करी, “यो जनावर को जसो कौन हय? कौन येको सी लड़ सकय हय?”
REV 13:5 बड़ो बोल बोलन अऊर परमेश्वर की निन्दा करन लायी ओख एक मुंह दियो गयो, अऊर ओख बयालीस महीना तक काम करन को अधिकार दियो गयो।
REV 13:6 तब ओन परमेश्वर की निन्दा करनो सुरू कर दियो, ऊ परमेश्वर को नाम अऊर जित ऊ रह्य हय ऊ जागा तथा जो स्वर्ग म रह्य हय, उन्की निन्दा करन लग्यो।
REV 13:7 ओख यो भी अधिकार दियो गयो कि परमेश्वर को लोगों सी विरोध म लड़े अऊर उन पर जय पाये, अऊर ओख हर एक गोत्र अऊर लोग, भाषा, अऊर राष्ट्र पर अधिकार दियो गयो।
REV 13:8 जगत कि निर्मिती सी पहिले जिन्को नाम बली करयो गयो मेम्ना को जीवन की किताब म लिख्यो गयो हय, उन्ख छोड़ सब धरती पर रहन वालो लोग ऊ हिंसक पशु की आराधना करेंन।
REV 13:9 जेको कान हय ऊ सुने।
REV 13:10 जेक कैद म पड़नो हय, ऊ कैद म पड़ेंन; जो तलवार सी मारेंन, जरूरी हय कि ऊ तलवार सी मारयो जायेंन। येकोलायी परमेश्वर को लोगों न धीरज अऊर विश्वास रखनो जरूरी हय।
REV 13:11 फिर मय न एक अऊर हिंसक पशु ख जमीन म सी निकलतो हुयो देख्यो, ओको मेम्ना को जसो दोय सींग होतो, अऊर ऊ अजगर को जसो बोलत होतो।
REV 13:12 ऊ पहिले हिंसक पशु को पूरो अधिकार ओको सामने काम म लावत होतो; अऊर धरती अऊर ओको पर रहन वालो सी ऊ पहिलो पशु की, जेको जीव घातक घाव अच्छो भय गयो होतो, ओकी पूजा पूरो जगत को लोगों सी करावत होतो।
REV 13:13 दूसरों हिंसक पशु बड़ो-बड़ो चिन्ह दिखावत होतो, यहां तक कि आदमियों को सामने आसमान सी धरती पर आगी बरसाय देत होतो।
REV 13:14 उन चिन्हों को वजह, जिन्ख ऊ हिंसक पशु को सामने दिखावन को अधिकार ओख दियो गयो होतो, ऊ धरती को रहन वालो ख भरमावत होतो अऊर धरती को रहन वालो सी कहत होतो कि जो पशु पर तलवार को घाव लग्यो होतो ऊ जीन्दो भय गयो हय, ओकी मूर्ति बनावो।
REV 13:15 ओख ऊ हिंसक पशु की मूर्ति म जीव डालन को अधिकार दियो गयो कि पशु की मूर्ति बोलन लगे, अऊर जितनो लोग ऊ पशु की मूर्ति की पूजा नहीं करय, उन्ख मरवाय डाले।
REV 13:16 दूसरों हिंसक पशु न छोटो-बड़ो, धनी-गरीब, सेवक अऊर स्वतंत्र सब लोगों ख विवश करयो कि हि अपनो अपनो हाथों यां मस्तकों पर ओकी छाप लगवाये,
REV 13:17 कि ओख छोड़ जेको पर छाप मतलब ऊ हिंसक पशु को नाम यां अंक हो, दूसरों कोयी लेन-देन नहीं कर सके।
REV 13:18 ज्ञान येकोच म हय: जेको म बुद्धि हय ऊ यो हिंसक पशु को अंक को अर्थ निकाल ले, कहालीकि ऊ अंक कोयी लोग को नाम सी सम्बन्धित हय, अऊर ओको अंक हय छे सौ छियासठ।
REV 14:1 फिर मय न नजर करी, अऊर देख्यो, ऊ मेम्ना सिय्योन पहाड़ी पर खड़ो हय, अऊर ओको संग एक लाख चौवालीस हजार लोग हंय, जिन्को मस्तक पर ओको अऊर ओको बाप को नाम लिख्यो हुयो हय।
REV 14:2 अऊर स्वर्ग सी मोख एक असो आवाज सुनायी दियो जो पानी को झरना अऊर बड़ो गर्जन को जसो आवाज होतो, अऊर जो आवाज मय न सुन्यो ऊ असो होतो मानो संगीतकारों संगीत बजाय रह्यो हंय।
REV 14:3 हि सिंहासन को सामने अऊर चारयी प्रानियों अऊर बुजूर्ग लोग को सामने एक नयो गीत गाय रह्यो होतो। उन एक लाख चौवालीस हजार लोग ख छोड़ क, जो धरती पर सी मोल ले क छुड़ायो गयो होतो, उन्ख छोड़ दूसरों कोयी भी लोग ऊ गीत ख सीख नहीं सकत होतो।
REV 14:4 हि असो लोग होतो जिन्न कोयी बाई को संसर्ग सी अपनो आप ख अशुद्ध नहीं करयो होतो। कहालीकि हि कुंवारो होतो, जित कहीं मेम्ना जात होतो हि ओको अनुसरन करत होतो पूरी मानव जाती सी उन्ख मोल ले क छुड़ायो गयो होतो। हि परमेश्वर अऊर मेम्ना को लायी फसल को पहिलो फर होतो।
REV 14:5 उन्को मुंह सी कभी झूठ नहीं निकल्यो होतो, हि निर्दोष हंय।
REV 14:6 फिर मय न एक अऊर स्वर्गदूत ख आसमान को बीच म उड़तो हुयो देख्यो, जेको जवर धरती पर को रहन वालो की हर एक राष्ट्र, अऊर गोत्र, भाषा, अऊर लोगों ख सुनावन लायी अनन्त काल को सुसमाचार होतो।
REV 14:7 ओन बड़ो आवाज सी कह्यो, “परमेश्वर सी डरो, अऊर ओकी महानता की महिमा करो, कहालीकि ओको न्याय करन को समय आय पहुंच्यो हय; ओकी आराधना करो, जेन आसमान, धरती, समुन्दर अऊर पानी को सोता ख बनायो।”
REV 14:8 फिर येको बाद एक अऊर, दूसरों, स्वर्गदूत यो कहतो हुयो आयो, “गिर पड़्यो, ऊ बड़ो बेबीलोन गिर पड़्यो, जेन अपनो व्यभिचार की कोपमय दारू पूरी लोगों ख पिलायी हय।”
REV 14:9 उन दिनो को बाद एक अऊर तीसरो स्वर्गदूत आयो अऊर बड़ो आवाज सी यो कहतो हुयो आयो, “जो कोयी ऊ हिंसक पशु अऊर ओकी मूर्ति की पूजा करे, अऊर अपनो मस्तक या अपनो हाथ पर ओकी छाप ले
REV 14:10 त ऊ परमेश्वर की प्रकोप की दारू पीयेंन, असी अमिश्रित तीखी मदिरा जो परमेश्वर को प्रकोप को कटोरा म तैयार करी गयी हय। ऊ लोग ख पवित्र स्वर्गदूतों अऊर मेम्ना को सामने धधकती हुयी आगी अऊर गन्धक म यातनायें दियो जायेंन की पीड़ा म पड़ेंन।
REV 14:11 उन्की पीड़ा को धुवा हमेशा हमेशा उठतो रहेंन, अऊर जो ऊ हिंसक पशु अऊर ओकी मूर्ति की पूजा करय हंय, अऊर जो ओको नाम की छाप लेवय हंय, उन्ख रात दिन चैन नहीं मिलेंन।”
REV 14:12 येकोलायी पवित्र लोगों ख धीरज रखनो जरूरी हय, जो परमेश्वर की आज्ञावों ख मानय अऊर यीशु पर विश्वास रखय हंय।
REV 14:13 फिर मय न स्वर्ग सी यो आवाज सुन्यो, “लिख: अब सी हि लोग धन्य होयेंन जो प्रभु म बन्यो रह्य क मरय हंय।” आत्मा कह्य हय, “हव, कहालीकि हि अपनो पूरो मेहनत सी आराम पायेंन, अऊर उन्को सेवा को फर उन्ख मिलेंन।”
REV 14:14 मय न नजर करी, अऊर देखो, एक सफेद बादर हय, अऊर ऊ बादर पर आदमी को बेटा को जसो कोयी बैठ्यो हय, जेको मुंड पर सोनो को मुकुट अऊर हाथ म तेज हसिया हय।
REV 14:15 फिर एक अऊर स्वर्गदूत न मन्दिर म सी निकल क ओको सी, जो बादर पर बैठ्यो होतो, बड़ो आवाज सी पुकार क कह्यो, “अपनो हसिया चलाव अऊर फसल जमा कर कहालीकि फसल काटन को समय आय पहुंच्यो हय, येकोलायी की धरती की फसल पक गयी हय।”
REV 14:16 येकोलायी जो बादर पर बैठ्यो होतो ओन धरती पर अपनो हसिया लगायो, अऊर धरती की फसल काट ली गयी।
REV 14:17 फिर एक अऊर स्वर्गदूत ऊ मन्दिर म सी निकल्यो जो स्वर्ग म हय, अऊर ओको जवर भी तेज हसिया होतो।
REV 14:18 फिर एक अऊर स्वर्गदूत, जेक आगी पर अधिकार होतो, वेदी म सी निकल्यो, अऊर जेको जवर तेज हसिया होतो ओको सी ऊचो आवाज सी कह्यो, “अपनो तेज हसिया लगाय क धरती की बेला को अंगूर को गूच्छा काट ले, कहालीकि ओको अंगूर पक गयो हय।”
REV 14:19 तब ऊ स्वर्गदूत न धरती पर अपनो हसिया चलायो अऊर धरती को अंगूर उतार लियो अऊर उन्ख परमेश्वर को भयंकर प्रकोप को बड़ो रसकुण्ड म डाल दियो;
REV 14:20 अऊर नगर को बाहेर ऊ रसकुण्ड म अंगूर रौंद्यो गयो, अऊर रसकुण्ड म सी इतनो खून निकल्यो कि दोय मीटर दूर सी घोड़ा की लगाम तक पहुंच्यो, अऊर सौ कोस तक बह गयो।
REV 15:1 फिर मय न आसमान म एक अऊर बड़ो अऊर अद्भुत चिन्ह देख्यो, मय न देख्यो की सात स्वर्गदूत सात आखरी महामारियों ख लियो हुयो हय, यो आखरी विनाश आय कहालीकि इन्को संग परमेश्वर को प्रकोप भी खतम होय जावय हय।
REV 15:2 फिर मोख एक काच को एक समुन्दर दिखायी दियो जेको म मानो आगी हो। अऊर मय न देख्यो कि जिन्न ऊ हिंसक पशु की मूर्ति पर अऊर ओको नाम सी सम्बन्धित संख्या पर विजय पा ली हय, हि भी ऊ काच को समुन्दर पर खड़ो हय। उन्न परमेश्वर को द्वारा दी गयी विणाये पा ली।
REV 15:3 हि परमेश्वर को सेवक मूसा अऊर मेम्ना को गीत गाय रह्यो होतो, “हि कर्म जिन्ख तय करय हय महान हय; तोरो कर्म अद्भुत हय, तोरी शक्ति अनन्त हय, प्रभु परमेश्वर, तोरो रस्ता सच्चो अऊर सच्चो सी भरयो हुयो हय, सब राष्ट्रों को राजा हय।”
REV 15:4 “हे प्रभु, कौन तोरो सी नहीं डरेंन अऊर तोरो नाम की महिमा नहीं करेंन? कहालीकि केवल तयच पवित्र हय। पूरो राष्ट्रों को लोग आय क तोरो सामने दण्डवत करेंन, कहालीकि तोरो न्याय को काम प्रगट भय गयो हंय।”
REV 15:5 येको बाद मय न देख्यो कि स्वर्ग को मन्दिर मतलब वाचा को तम्बू ख खोल्यो गयो;
REV 15:6 अऊर हि सातों स्वर्गदूत जिन्को जवर सातों महामारियां होती, मलमल को शुद्ध अऊर चमकदार कपड़ा पहिन्यो अऊर छाती पर सोनो को पट्टा बान्ध्यो हुयो मन्दिर सी निकल्यो।
REV 15:7 तब उन चारयी प्रानियों म सी एक न उन सात स्वर्गदूतों ख परमेश्वर, जो हमेशा हमेशा जीन्दो रह्य हय, को प्रकोप सी भरयो हुयो सोनो को सात कटोरा दियो;
REV 15:8 अऊर परमेश्वर की महिमा अऊर ओकी सामर्थ को वजह मन्दिर धुवा सी भर गयो, अऊर जब तक उन सातों स्वर्गदूतों की सातों महामारियां खतम नहीं भयी तब तक कोयी मन्दिर को अन्दर कोयी सिर नहीं सक्यो।
REV 16:1 तब मय न सुन्यो मन्दिर म ऊचो आवाज उन सात स्वर्गदूतों सी यो कह्य रह्यो हय, “जावो, परमेश्वर को प्रकोप को सातों कटोरा ख धरती पर कुड़ाय देवो।”
REV 16:2 येकोलायी पहिलो स्वर्गदूत न जाय क अपनो कटोरा धरती पर कुड़ाय दियो। परिनाम स्वरूप उन लोगों को, जिन पर उन हिंसक पशु को छाप लिख्यो होतो जो ओकी मूर्ति की पूजा करत होतो, उन पर भयानक अऊर दर्दनाक छाला फूट आयो।
REV 16:3 येको बाद दूसरों स्वर्गदूत न अपनो कटोरा समुन्दर पर कुड़ाय दियो, अऊर ऊ मरयो हुयो आदमी को खून जसो बन गयो, अऊर समुन्दर म रहन वालो सब जीवजन्तु मर गयो।
REV 16:4 फिर तीसरो स्वर्गदूत न अपनो कटोरा नदियों अऊर पानी को झरना पर कुड़ाय दियो, अऊर ऊ खून बन गयो।
REV 16:5 तब मय न पानी को मालिक स्वर्गदूत ख यो कहतो सुन्यो, “ऊ तयच आय जो सच्चो हय, जो हमेशा हमेशा सी, तयच आय जो पवित्र तय न जो करयो हय न्याय हय।
REV 16:6 उन्न परमेश्वर को लोगों अऊर भविष्यवक्तावों को खून बहायो, तय सच्चो हय तय न उन्ख पीवन ख बस खूनच दियो, कहालीकि हि योच लायक हंय।”
REV 16:7 फिर मय न वेदी सी यो आवाज सुन्यो, “हव, हे सर्वशक्तिमान प्रभु परमेश्वर, तोरो न्याय सच्चो अऊर नेक हंय।”
REV 16:8 चौथो स्वर्गदूत न अपनो कटोरा सूरज पर कुड़ाय दियो, अऊर भयानक गर्मी की आगी सी आदमियों ख जलाय देन को अधिकार दियो गयो।
REV 16:9 अऊर लोग भयानक गर्मी सी झुलस गयो, अऊर उन्न परमेश्वर को नाम ख कोस्यो कहालीकि की इन विनाशों पर ओकोच अधिकार हय। पर उन्न कोयी मन नहीं फिरायो अऊर नहीं ओख महिमा प्रदान करी।
REV 16:10 पाचवों स्वर्गदूत न अपनो कटोरा ऊ हिंसक पशु को सिंहासन पर कुड़ाय दियो, अऊर ओको राज्य पर अन्धारो छाय गयो। अऊर लोगों न तकलीफ को मारे अपनी जीबली चबाय ली,
REV 16:11 अऊर अपनी पीड़ावों अऊर फोड़ा को वजह स्वर्ग को परमेश्वर की निन्दा करी; पर अपनो अपनो कामों सी हि उन्को पापों सी नहीं फिरयो।
REV 16:12 छठवो स्वर्गदूत न अपनो कटोरा महा नदी फरात पर कुड़ाय दियो, अऊर ओको पानी सूख गयो कि पूर्व दिशा सी आवन वालो राजावों को लायी रस्ता तैयार होय जाये।
REV 16:13 फिर मय न ऊ अजगर को मुंह सी, अऊर ऊ हिंसक पशु को मुंह सी, अऊर ऊ झूठो भविष्यवक्ता को मुंह सी तीन अशुद्ध आत्मावों ख मेंढका को रूप म निकलतो देख्यो।
REV 16:14 यो चिन्ह दिखावन वाली शैतान की दुष्ट आत्मायें आय। या तीन आत्मायें जो पूरो जगत को राजावों को जवर निकल क येकोलायी जावय हंय कि उन्ख सर्वशक्तिमान परमेश्वर को ऊ बड़ो दिन की लड़ाई को लायी जमा करे।
REV 16:15 “देख, मय चोर को जसो आऊं हय; धन्य ऊ हय जो जागतो रह्य हय, अऊर अपनो कपड़ा की रक्षा करय हय कि नंगो नहीं फिरे, अऊर लोग ओख लज्जित होतो नहीं देखे!”
REV 16:16 फिर बुरी आत्मावों न राजावों ख एक संग ऊ जागा जमा करयो, जो इब्रानी म हरमगिदोन कहलावय हय।
REV 16:17 सातवों स्वर्गदूत न अपनो कटोरा हवा पर कुड़ाय दियो, अऊर मन्दिर को सिंहासन सी यो बड़ो आवाज भयो, “भय गयो!”
REV 16:18 तब बिजलियां चमकी, अऊर आवाज अऊर मेघों को गर्जन भयो, अऊर एक असो भयानक भूईडोल भी भयो। जब सी आदमी की उत्पत्ति धरती पर भयी, तब सी असो भयानक भूईडोल कभी नहीं आयो होतो।
REV 16:19 येको सी ऊ बड़ो नगर को तीन टुकड़ा भय गयो, अऊर पूरो राष्ट्रों को नगर नाश भय गयो; परमेश्वर न महान बेबीलोन ख सजा देन लायी याद करयो होतो। अऊर ऊ ओख अपनो भभकतो हुयो गुस्सा की दारू सी भरयो हुयो प्याला ओख पिवन ख दियो होतो।
REV 16:20 अऊर हर एक टापू अपनी जागा सी गायब भय गयो, अऊर पूरो पहाड़ी को पता नहीं चल्यो।
REV 16:21 आसमान सी आदमियों पर बड़ी बड़ी गारगोटी गिरी, जो चालीस किलो की होती, अऊर येकोलायी कि या विपत्ति बहुतच भारी होती, लोगों न गारगोटी की विपत्ति को वजह परमेश्वर की निन्दा करी।
REV 17:1 येको बाद उन सात स्वर्गदूतों को जवर हि सात कटोरा होतो, उन्म सी एक न आय क मोरो सी यो कह्यो, “इत आव, ताकी बहुत सी नदियों को किनारे बैठी वा प्रसिद्ध वेश्या को दण्ड ख दिखाऊं।
REV 17:2 जेको संग धरती को राजावों न व्यभिचार करयो; अऊर धरती को रहन वालो ओको व्यभिचार की दारू सी नशा म चूर भय गयो होतो।”
REV 17:3 तब मोख पूरी रीति सी आत्मा न नियंत्रन करयो, अऊर स्वर्गदूत मोख जंगल को तरफ ले गयो। उत मय न लाल रंग को हिंसक पशु पर वा बाई ख बैठ्यो देख्यो, ओको पर परमेश्वर को निन्दा को नाम ख सब जागा पर लिख्यो होतो, अऊर हिंसक पशु को सात मुंड अऊर दस सींग होतो।
REV 17:4 या बाई जामुनी अऊर लाल रंग को कपड़ा पहिन्यो होती, अऊर सोनो अऊर बहुमूल्य रत्नों अऊर मोतियों सी सजी हुयी होती, अऊर ओको संग म एक सोनो को कटोरा होतो जो घृणित चिजों सी अऊर ओको व्यभिचार की अशुद्ध चिजों सी भरयो हुयो होतो।
REV 17:5 ओको मस्तक पर यो नाम लिख्यो होतो, “भेद, महान बेबीलोन धरती की वेश्यावों अऊर घृणित चिजों की माता।”
REV 17:6 मय न वा बाई ख परमेश्वर को लोगों को खून अऊर यीशु को प्रति विश्वास लायक होतो ओको वजह मारयो गयो उन्को खून पीनो सी मतवाली भय गयी हय; ओख देख क मय चकित भय गयो।
REV 17:7 तब ऊ स्वर्गदूत न मोरो सी कह्यो, “तय कहाली चकित भयो? मय या बाई अऊर ऊ हिंसक पशु को, जेको पर हवा सवार हय अऊर जेको सात मुंड अऊर दस सींग हंय, तोख ओको भेद बताऊ हय।
REV 17:8 “जो हिंसक पशु तय न देख्यो हय, ऊ पहिले कभी जीन्दो होतो पर अब जीन्दो नहाय, फिर भी अधोलोक सी निकलेंन तब भी ओको विनाश होय जायेंन; अऊर धरती को रहन वालो जिन्को नाम जगत की उत्पत्ति को समय सी जीवन की किताब म लिख्यो नहीं गयो, यो पशु की या दशा देख क कि पहिले जीन्दो होतो अऊर अब नहाय पर फिर प्रगट होयेंन, यो देख क फिर धरती को सब लोग अचम्भा करेंन।
REV 17:9 यो समझन लायी बुद्धि अऊर ज्ञान होना, हि सातों मुंड सात पहाड़ी आय जिन पर वा बाई बैठी हय, हि सात मुंड सात राजा भी आय।
REV 17:10 जिन म सी पाच त गिर चुक्यो हंय, अऊर एक अभी हय, अऊर एक अभी शासन कर रह्यो हय, अऊर दूसरों अभी तक आयो नहाय। पर ऊ जब आयेंन त ओकी या नियत हय ऊ कुछ देरच शासन कर पायेंन।
REV 17:11 जो हिंसक पशु एक समय जीन्दो होतो, अऊर अब जीन्दो नहाय, ऊ खुद आठवो राजा हय जो उन सातों म सीच एक आय, ओको भी विनाश होन वालो हय।
REV 17:12 जो दस सींग तय न देख्यो हि दस राजा आय जिन्न अब तक शासन को सुरूवात नहीं करयो हय, पर ओख ऊ हिंसक पशु को संग घड़ी भर शासन करन को अधिकार मिलेंन।
REV 17:13 हि दस लोग एक मन होयेंन, अऊर हि अपनी अपनी सामर्थ अऊर अधिकार ऊ हिंसक पशु ख सौंप देयेंन।
REV 17:14 हि मेम्ना को विरुद्ध लड़ाई करेंन, पर मेम्ना अपनो बुलायो हुयो, चुन्यो हुयो अऊर विश्वास लायक अनुयायीयों ख जमा कर क् उन्ख हराय देयेंन, कहालीकि ऊ प्रभुवों को प्रभु अऊर राजावों को राजा आय।”
REV 17:15 फिर स्वर्गदूत न मोरो सी कह्यो, “जो पानी तय न देख्यो, जिन पर वेश्या बैठी हय, हि त राष्ट्र, लोग अऊर वंश अऊर भाषाये हंय।
REV 17:16 जो दस सींग तय न देख्यो, हि अऊर हिंसक पशु सी दुस्मनी रखेंन, तथा ओको सब कुछ छीन क ओख बिना कपड़ा को छोड़ जायेंन, अऊर ओको शरीर खाय जायेंन, अऊर ओख आगी म जलाय डालेंन।
REV 17:17 अपनो इच्छा ख पूरो करन लायी परमेश्वर न उन सब ख एक मत कर क्, उन्को मन म योच बैठाय दियो हय कि, हि जब तक परमेश्वर को वचन पूरो नहीं होय जावय, तब तक शासन करन को अपनो अधिकार ऊ हिंसक पशु ख सौंप दे।
REV 17:18 वा बाई, जेक तुम न देख्यो हय, ऊ बड़ो नगर आय जो धरती को राजावों पर शासन करय हय।”
REV 18:1 येको बाद मय न एक अऊर स्वर्गदूत ख स्वर्ग सी उतरतो देख्यो, जेक बड़ो अधिकार प्राप्त होतो; अऊर धरती ओको तेज सी चमक उठी।
REV 18:2 ओन ऊचो आवाज सी पुकार क कह्यो, “वा गिर गयी, बेबीलोन की बड़ी नगरी गिर गयी हय! वा दुष्ट आत्मा को निवास, अऊर हर एक अशुद्ध आत्मा को अड्डा, अऊर हर एक तरह की पक्षिंयों अशुद्ध अऊर घृणित पशुवों को अड्डा बन गयो।
REV 18:3 कहालीकि सब राष्ट्रों न ओकी दारू मतलब अनैतिकता की भयंकर वासना ख पियो हय। यो धरती को राजावों न ओको संग अनैतिक व्यभिचार करयो हय अऊर यो जगत को व्यापारी ओको भोग वासना सी सम्पन्न बन्यो हंय।”
REV 18:4 फिर मय न स्वर्गदूत सी अऊर एक आवाज सुन्यो, “हे मोरो लोगों, ओको म सी निकल आवो कि तुम ओको पापों म भागी मत बनो, अऊर ओकी सजा म खुद सहभागी मत बनो।
REV 18:5 कहालीकि ओको पापों को ढेर स्वर्ग तक पहुंच गयो हय, अऊर ओको अपराध को काम परमेश्वर ख याद आयो हंय।
REV 18:6 तुम भी ओको संग वसोच व्यवहार करो; जसो ओन तुम्हरो संग करयो, ओको बदला दुगुना ओको संग करो। तुम्हरो लायी जो कटोरा म ओन मदिरा मिलायी वसोच ओको संग दुगुनी मिलावों।
REV 18:7 कहालीकि जो महिमा अऊर वैभव ओन खुद ख दियो तुम उच ढंग सी ओख यातनायें अऊर तकलीफ देवो। कहालीकि ऊ खुदच अपनो खुद ख कहती रह्य हय, ‘मय विराजमान रानी आय, मय विधवा नहाय; अऊर मय कभी शोक नहीं करू।’
REV 18:8 यो वजह एकच दिन म ओको पर विपत्तिया आय पड़ेंन, मतलब मृत्यु, अऊर शोक, अऊर अकाल; अऊर वा आगी सी भस्म कर दी जायेंन, कहालीकि ओको न्याय करन वालो प्रभु परमेश्वर शक्तिमान हय।”
REV 18:9 धरती को राजा जिन्न ओको संग व्यभिचार अऊर सुखविलास करयो, जब ओको जरन को धुवा देखेंन, त ओको लायी रोयेंन अऊर विलाप करेंन।
REV 18:10 ओको तकलीफ को डर को मारे हि बड़ो दूर खड़ो होय क कहेंन, “हे बड़ो नगर, बेबीलोन! हे दृढ़ नगर, हाय! हाय! तोरी सजा तोख घड़ी भर मच मिल गयो हय।”
REV 18:11 “धरती को व्यापारी ओको लायी रोयेंन अऊर विलाप करेंन, कहालीकि उन्की चिजे अब कोयी मोल नहीं लेयेंन;
REV 18:12 मतलब सोनो, चांदी, रत्न, मोती, अऊर मलमल, अऊर जामुनी, चमकदार, अऊर लाल रंग को कपड़ा, अऊर हर तरह की सुगन्धित लकड़ी, अऊर हत्ती को दात की हर तरह की चिजे, अऊर बहुमूल्य लकड़ी अऊर पीतर अऊर लोहा अऊर संगमरमर की सब तरह तरह की चिजे,
REV 18:13 अऊर कलमी, मसाला, धूप, अत्तर, लुबान, दारू, तेल, मैदा, गहूं, गाय बईल, मेंढीं शेरी, घोड़ा, रथ, अऊर सेवक, अऊर आदमी को शरीरों अऊर उन्को जीव तक।
REV 18:14 व्यापारी ओको सी कहेंन हि सब उत्तम फर जेको म तोरो दिल रम्यो होतो, ऊ सब अदृश्य भय गयी हय अऊर तोरो सब सुख विलाश वैभव चली गयो हय अब नहीं कभी ढूंढ पावों।”
REV 18:15 हि व्यापारी जो इन चिजे को व्यापार करतो हुयो धनवान भय गयो होतो, हि ओको संग ओकी तकलीफ म सहभागी होन को डर को वजह दूरच खड़ो होयेंन, अऊर हि रोयेंन अऊर विलाप करेंन,
REV 18:16 अऊर कहेंन “हाय! हाय!” यो बड़ो नगर जो मलमल, अऊर जामुनी अऊर लाल रंग को कपड़ा पहिन्यो होतो, अऊर सोना अऊर रत्नों अऊर मोतियों सी सज्यो हुयो होतो।
REV 18:17 अऊर घड़ी भर म ओकी पूरी सम्पत्ति मिट गयी। हर एक माझी अऊर यात्री अऊर मल्लाह, अऊर जितनो समुन्दर म व्यापार करय हंय, सब दूर खड़ो भयो,
REV 18:18 अऊर ओको जरन को धुवा देखतो हुयो पुकार क कहेंन, “कौन सो नगर यो बड़ो नगर को जसो बन्यो हय?”
REV 18:19 अऊर अपनो अपनो मुंडी पर धूल डालेंन, अऊर रोवतो हुयो अऊर विलाप करतो हुयो कहेंन, महानगर हाय! हाय! यो कितनो भयावह अऊर भयानक हय जेकी सम्पत्ति को द्वारा समुन्दर को सब जहाज वालो धनी भय गयो होतो, घड़ी भर म ओको सब कुछ उजड़ गयो।
REV 18:20 हे स्वर्ग, अऊर हे परमेश्वर को लोगों, अऊर प्रेरितों, अऊर भविष्यवक्तावों, ओको विनाश पर खुशी मनावो, कहालीकि परमेश्वर न ओख ठीक वसोच दोष दियो हय जसो ऊ दण्ड ओन तुम्ख दियो होतो!
REV 18:21 फिर एक ताकतवर स्वर्गदूत न बड़ी चक्की को पाट को जसो एक गोटा उठायो, अऊर यो कह्य क समुन्दर म फेक दियो, “बड़ो नगर बेबीलोन असोच हिंसक रीति सी खल्लो फेक दियो जायेंन अऊर फिर कभी ओको पता नहीं चलेंन।”
REV 18:22 “वानी बजावन वालो, अऊर गावन वालो, अऊर बांसुरी बजावन वालो, अऊर तुरही फूकन वालो को आवाज फिर कभी तोरो म सुनायी नहीं देयेंन; अऊर कोयी उद्धम को कोयी कारीगर भी फिर कभी तोरो म नहीं मिलेंन; अऊर चक्की पिसन को आवाज फिर कभी तोरो म सुनायी नहीं देयेंन;
REV 18:23 अऊर दीया को प्रकाश फिर कभी तोरो म नहीं दिखेंन, अऊर दूल्हा अऊर दुल्हिन को आवाज फिर कभी तोरो म सुनायी नहीं देयेंन। तोरो व्यापारी धरती म सब सी शक्तिशाली होतो, अऊर धरती को पूरो लोग तोरो झूठो चमत्कारों को वजह सी भरमायो गयो होतो।
REV 18:24 भविष्यवक्तावों अऊर परमेश्वर को लोगों, अऊर धरती पर मारयो गयो सब लोगों को खून बेबीलोन नगर म पायो गयो होतो।”
REV 19:1 येको बाद मय न स्वर्ग म मानो बड़ी भीड़ को लोगों को ऊचो आवाज सी यो कहतो सुन्यो, “हल्लिलूय्याह! उद्धार अऊर महिमा अऊर सामर्थ हमरो परमेश्वर कीच आय।
REV 19:2 कहालीकि ओको न्याय सच्चो अऊर उचित हंय। ओन वा वेश्या को, जो अपनो व्यभिचार सी धरती ख भ्रष्ट करत होती, न्याय करयो अऊर परमेश्वर न अपनो सेवकों को खून को बदला लियो हय।”
REV 19:3 फिर दूसरी बार उन्न चिल्लाय क कह्यो, “हल्लिलूय्याह! ओको जरन को धुवा हमेशा हमेशा उठतो रहेंन।”
REV 19:4 तब चौबीसों बुजूर्गों अऊर चारयी प्रानियों न गिर क परमेश्वर ख दण्डवत कर क् आराधना करयो, जो सिंहासन पर बैठ्यो होतो। अऊर कह्यो, “आमीन! परमेश्वर की स्तुति हो!”
REV 19:5 तब सिंहासन म सी एक आवाज निकल्यो, “सब ओको सेवक अऊर सब लोग दोयी बड़ो या छोटो हमरो परमेश्वर की स्तुति करो, तुम जो ओको सी डरय हय।”
REV 19:6 फिर मय न एक बड़ी भीड़ को जसो, जलप्रवाह को गर्जन को जसो अऊर मेघों कि बड़ी जोर गर्जनों को जसो आवाज सुन्यो, मय न उन्ख कहतो सुन्यो “परमेश्वर की स्तुति हो! कहालीकि प्रभु हमरो परमेश्वर सर्वशक्तिमान राजा आय।
REV 19:7 आवो, हम खुश अऊर मगन हो, अऊर ओकी महानता को लायी ओकी महिमा करे, कहालीकि मेम्ना को बिहाव को समय आय गयो हय, अऊर ओकी दुल्हिन न अपनो खुद ख तैयार कर लियो हय।
REV 19:8 ओख स्वच्छ अऊर चमकदार मलमल को कपड़ा पहिनन ख दियो गयो। कहालीकि मलमल परमेश्वर को लोगों को अच्छो कामों को प्रतिक हय।”
REV 19:9 तब स्वर्गदूत न मोरो सी कह्यो, “यो लिख, कि धन्य हि हंय, जो मेम्ना को बिहाव को जेवन म बुलायो गयो हंय।” अऊर स्वर्गदूत न मोरो सी कह्यो, “यो परमेश्वर को सत्य वचन आय।”
REV 19:10 तब मय ओकी आराधना करन लायी ओको पाय पर गिर पड़्यो। पर ओन मोरो सी कह्यो, “असो मत कर, मय तोरो जसो अऊर दूसरों विश्वासियों को जसो एक सेवक आय, हि सब यीशु न प्रगट करी हुयी सच्चायी ख पकड़्यो हुयो हय। परमेश्वर की स्तुति करो कहालीकि जो सच्चायी यीशु न प्रगट करी हि भविष्यवक्तावों ख प्रेरना देवय हय।”
REV 19:11 फिर मय न स्वर्ग ख खुल्यो हुयो देख्यो, अऊर उत एक सफेद घोड़ा होतो; अऊर घोड़ा को सवार ख विश्वसनिय अऊर सत्य कह्यो जावय होतो, कहालीकि सच्चायी को संग ऊ निर्णय करय हय अऊर ओकी लड़ाई लड़य हय।
REV 19:12 ओकी आंखी असी होती मानो अग्नि की ज्वाला जसी लपेट होती, अऊर ओको मुंड पर बहुत सो राजमुकुट होतो। ओको पर एक नाम लिख्यो होतो, पर ओख छोड़ क ऊ का होतो कोयी नहीं जानय।
REV 19:13 ऊ खून छिड़क्यो हुयो कपड़ा पहिन्यो होतो, अऊर ओको नाम परमेश्वर को शब्द होतो।
REV 19:14 स्वर्ग की सेना सफेद घोड़ा पर सवार अऊर सफेद अऊर शुद्ध मलमल को कपड़ा पहिन्यो हुयो ओको पीछू पीछू होती।
REV 19:15 राष्ट्रों ख हरावन लायी ओको मुंह सी एक तेज तलवार निकलय हय। ऊ उन पर लोहा को राजदण्ड सी शासन करेंन, अऊर सर्वशक्तिमान परमेश्वर को भयानक प्रकोप की भाति ऊ अंगूररस ख रौंदेंन।
REV 19:16 ओको कपड़ा अऊर जांघ पर यो नाम लिख्यो हय: “राजावों को राजा अऊर प्रभुवों को प्रभु।”
REV 19:17 फिर मय न एक स्वर्गदूत ख सूरज पर खड़ो हुयो देख्यो। ओन बड़ो आवाज सी पुकार क आसमान को बीच म सी उड़न वालो सब पक्षिंयों सी कह्यो, “आवो, परमेश्वर को बड़ो भोज को लायी जमा होय जावो,
REV 19:18 आवो अऊर राजावों को मांस, अऊर सरदारों को मांस, अऊर सिपाहियों को मांस, अऊर शक्तिमान आदमियों को मांस, अऊर घोड़ा को अऊर उन्को सवारों को मांस, अऊर उन्को शरीर, अऊर सेवक छोटो अऊर बड़ो, सब लोगों को शरीर खावो।”
REV 19:19 फिर मय न ऊ हिंसक पशु, अऊर धरती को राजावों अऊर उनकी सेनावों ख ऊ घोड़ा को सवार अऊर ओकी सेना सी लड़न लायी जमा देख्यो।
REV 19:20 ऊ हिंसक पशु, अऊर ओको संग ऊ झूठो भविष्यवक्ता दोयी ख कैदी बनायो गयो जेन ओको सामने असो चिन्ह दिखायो होतो जिन्को द्वारा ओन उन्ख भरमायो जिन पर ऊ पशु की छाप होती अऊर जो वा मूर्ति की पूजा करत होतो। उन हिंसक पशु अऊर झूठो भविष्यवक्ता ख भी जरती हुयी आगी म जीन्दो डाल्यो गयो।
REV 19:21 बाकी को सैनिक ऊ घोड़ा को सवार की तलवार सी, जो ओको मुंह सी निकलत होती, मार डाल्यो गयो; अऊर सब पक्षी उन्को मांस खाय क सन्तुष्ट भय गयो।
REV 20:1 फिर मय न एक स्वर्गदूत ख स्वर्ग सी उतरतो देख्यो, जेको हाथ म अधोलोक की कुंजी अऊर एक बड़ी संकली होती।
REV 20:2 ओन ऊ अजगर, मतलब पुरानो सांप ख, जो इब्लीस अऊर शैतान हय, पकड़ क हजार साल को लायी संकली सी बान्ध दियो,
REV 20:3 तब ओन ऊ स्वर्गदूत न ओख अधोलोक म डाल क ताला लगाय दियो अऊर ओको पर मुहर लगाय दी ताकी जब हजार साल पूरो होन तक ऊ लोगों ख फिर नहीं भरमाय सकय। हजार साल पूरो होन को बाद थोड़ो समय को लायी ओख छोड्यो जानो जरूरी हय।
REV 20:4 फिर मय न सिंहासनों ख देख्यो, अऊर जो ओको पर बैठ्यो होतो, अऊर उन्ख न्याय करन को अधिकार दियो गयो होतो। मय न उन्की आत्मावों ख भी देख्यो, जिन्को मुंड यीशु की गवाही देनो अऊर परमेश्वर को वचन को वजह काट्यो गयो होतो, अऊर जिन्न ऊ हिंसक पशु की, अऊर नहीं ओकी मूर्ति की पूजा करी होती, अऊर नहीं ओकी छाप अपनो मस्तक अऊर हाथों पर ली होती। अऊर जीन्दो मसीह को संग राजावों को नायी एक हजार साल तक राज्य करतो रहेंन।
REV 20:5 जब तक यो हजार साल पूरो नहीं भयो तब तक बाकी मरयो हुयो जीन्दो नहीं भयो। यो त पहिलो पुनरुत्थान आय।
REV 20:6 धन्य अऊर पवित्र ऊ आय, जो यो पहिलो पुनरुत्थान को भागी हय। असो पर दूसरी मृत्यु को कुछ भी अधिकार नहाय, हि मसीह अऊर परमेश्वर को याजक होयेंन अऊर ओको संग एक हजार साल तक राज्य करेंन।
REV 20:7 जब हजार साल पूरो होय जायेंन त शैतान कैद सी छोड़ दियो जायेंन।
REV 20:8 अऊर ऊ पूरी धरती पर फैलेंन राष्ट्रों ख बहकान लायी निकल पड़ेंन, ऊ गोग अऊर मागोग ख बहकायेंन। ऊ उन्ख लड़ाई को लायी जमा करेंन। हि उतनोच अनगिनत होयेंन जितनो समुन्दर किनार की रेतु को कन।
REV 20:9 हि पूरी धरती पर फैल जायेंन हि परमेश्वर को लोगों को छावनी अऊर प्रिय नगर ख घेर लेयेंन; पर आगी स्वर्ग सी खल्लो आयेंन अऊर उन्ख भस्म कर देयेंन।
REV 20:10 उन्को भरमावन वालो शैतान आगी अऊर गन्धक की ऊ झील म, जेको म ऊ हिंसक पशु अऊर झूठो भविष्यवक्ता भी होयेंन, इन दोयी ख डाल दियो जायेंन; अऊर हि रात दिन हमेशा हमेशा तकलीफ म तड़पतो रहेंन।
REV 20:11 तब मय न एक बड़ो सफेद सिंहासन अऊर ओख, जो ओको पर बैठ्यो हुयो हय, देख्यो; ओको सामने सी धरती अऊर आसमान भग खड़ो भयो, अऊर उन्को पता नहीं चल पायो।
REV 20:12 तब मय न छोटो बड़ो सब मरयो हुयो ख सिंहासन को सामने खड़ो हुयो देख्यो, अऊर किताबे खोली गयी; अऊर फिर एक अऊर किताब खोली गयी, मतलब जीवन की किताब; अऊर जसो उन किताबों म लिख्यो हुयो होतो, वसोच उन्को कामों को अनुसार मरयो हुयो को न्याय करयो गयो।
REV 20:13 जो मृतक लोग समुन्दर म होतो, उन्ख समुन्दर न दे दियो, अऊर मृत्यु अऊर अधोलोक न भी अपनो अपनो मृतक लोगों ख सौंप दियो। अऊर उन म सी हर एक को कामों को अनुसार उन सब को न्याय करयो गयो।
REV 20:14 येको बाद मृत्यु अऊर अधोलोक आगी की झील म डाल्यो गयो। या आगी की झील दूसरी मृत्यु आय;
REV 20:15 अऊर जो कोयी को नाम जीवन की किताब म लिख्यो हुयो नहीं मिल्यो, ऊ आगी की झील म डाल्यो गयो।
REV 21:1 फिर मय न नयो आसमान अऊर नयी धरती ख देख्यो, कहालीकि पहिलो आसमान अऊर पहिली धरती गायब होय चुकी होती, अऊर सब समुन्दर भी नहीं रह्यो।
REV 21:2 फिर मय न पवित्र नगर नयो यरूशलेम ख स्वर्ग सी परमेश्वर को जवर सी उतरतो देख्यो। ऊ नगरी ख जो दुल्हिन को समान होती जो अपनो पति लायी सिंगार करयो होना।
REV 21:3 फिर मय न सिंहासन म सी कोयी ख ऊचो आवाज सी यो कहतो हुयो सुन्यो, “देखो, अब परमेश्वर को घर आदमियों को बीच म हय। अऊर ऊ उन्को संग रहेंन, अऊर हि ओको लोग होयेंन। अऊर परमेश्वर खुद उन्को संग रहेंन अऊर उन्को परमेश्वर होयेंन।
REV 21:4 ऊ उन्की आंखी सी सब आसु पोछ डालेंन। अऊर येको बाद मृत्यु नहीं रहेंन, अऊर नहीं शोक, नहीं विलाप, नहीं तकलीफ रहेंन; पुरानी सब बाते खतम भय गयी हय।”
REV 21:5 अऊर जो सिंहासन पर बैठ्यो होतो, ओन कह्यो, “देख, मय सब कुछ नयो कर देऊ हय।” तब ओन कह्यो, “लिख ले, कहालीकि यो वचन विश्वास लायक अऊर सत्य हंय।”
REV 21:6 फिर ओन मोरो सी कह्यो, “या बाते पूरी भय गयी हंय। मय अल्फा अऊर ओमेगा आय, पहिलो अऊर आखरी आय। अऊर जो कोयी प्यासो हय ओख मय जीवन को जल को सोता सी फुकट म पिवन को अधिकार देऊ।
REV 21:7 जो विजयी होयेंन उच यो सब मोरो सी पायेंन, अऊर मय ओको परमेश्वर होऊं अऊर हि मोरो बेटा होयेंन।
REV 21:8 पर डरपोकों, अऊर अविश्वासियों, घिनौना, हत्यारों, व्यभिचारियों, टोन्हों, मूर्तिपूजकों, अऊर सब झूठो को भाग ऊ झील म मिलेंन जो आगी अऊर गन्धक सी जरती रह्य हय: या दूसरी मृत्यु आय।”
REV 21:9 फिर जिन सात स्वर्गदूतों को जवर सात आखरी विपत्तियों सी भरयो हुयो सात कटोरा होतो, उन्म सी एक मोरो जवर आयो, अऊर मोरो संग बाते कर क् कह्यो, “इत आव, मय तोख दुल्हिन मतलब मेम्ना की पत्नी दिखाऊं।”
REV 21:10 अऊर आत्मा को द्वारा नियंत्रित भयो अऊर स्वर्गदूत न मोख एक बड़ो अऊर ऊचो पहाड़ी पर ले गयो, अऊर ओन मोख पवित्र नगरी यरूशलेम दिखायो ऊ परमेश्वर को तरफ सी स्वर्ग सी खल्लो उतर रही होती।
REV 21:11 अऊर ऊ परमेश्वर की महिमा को संग चमक रही होती, अऊर नगरी बहुमूल्य गोटा, यशब को जसो अऊर काच तरह साफ होती।
REV 21:12 नगरी को चारयी तरफ बड़ो ऊचो शहरपनाह होतो जेको म बारा द्वार होतो। उन बारा द्वारों पर स्वर्गदूत होतो। तथा बारा द्वारों पर इस्राएल को बारा गोत्रों को नाम लिख्यो होतो।
REV 21:13 इन म सी तीन द्वार पूर्व को तरफ तीन द्वार, उत्तर को तरफ तीन द्वार, दक्षिन को तरफ तीन द्वार, अऊर पश्चिम को तरफ तीन द्वार होती।
REV 21:14 नगर को शहरपनाह बारा गोटावों को नीव पर बनायो गयो होतो, अऊर हर एक पर मेम्ना को बारा प्रेरितों को बारा नाम लिख्यो होतो।
REV 21:15 जो स्वर्गदूत मोरो संग बाते कर रह्यो होतो ओको जवर नगर अऊर ओको द्वारों अऊर ओकी शहरपनाह ख नापन लायी एक सोनो को छड़ी होतो।
REV 21:16 ऊ नगर ख वर्गाकार म बसायो गयो होतो अऊर ओकी लम्बाई, चौड़ाई को बराबर होती; अऊर ओन ऊ छड़ी सी नगर ख नाप्यो, त दोय हजार चार सौ को निकल्यो: ओकी लम्बाई अऊर चौड़ाई अऊर ऊचाई बराबर होती।
REV 21:17 ओन ओकी शहरपनाह ख यानेकि जो आदमियों को नाप होतो ऊ स्वर्गदूत को हाथ म होतो नाप सी नाप्यो, त एक सौ चौवालीस हाथ निकली।
REV 21:18 ओकी शहरपनाह यशब की बनी होती, अऊर नगर असो शुद्ध सोनो को होतो जो साफ काच को जसो हो।
REV 21:19 ऊ शहरपनाह की नीव हर तरह को बहुमूल्य गोटावों सी सवारी हुयी होती; पहिली नीव यशब की, दूसरी नीलमणि की, तीसरी स्फटिक की, चौथी मलकत की,
REV 21:20 पाचवी गोमेदक की, छठवी माणिक्य की, सातवी पीतमणि की, आठवी पेरोज की, नववी पुखराज की, दसवी लहसनिए की, ग्यारहवी धूम्रकान्त की, अऊर बारहवी याकूत की होती।
REV 21:21 बारा द्वार बारा मोतियों को होतो; एक एक द्वार एक एक मोती को बन्यो होतो। नगर की सड़क साफ काच को जसो शुद्ध सोनो की होती।
REV 21:22 मय न ओको म कोयी मन्दिर नहीं देख्यो, कहालीकि सर्वशक्तिमान प्रभु परमेश्वर अऊर मेम्ना ओको मन्दिर हय।
REV 21:23 ऊ नगर म सूरज अऊर चन्दा को उजाड़ो की जरूरत नहीं, कहालीकि परमेश्वर को तेज सी ओको म उजाड़ो होय रह्यो हय, अऊर मेम्ना ओको दीया हय।
REV 21:24 जाति–जाति को लोग ओकी ज्योति म चले–फिरेंन, अऊर धरती को राजा अपनो अपनो वैभव ओको म लायेंन।
REV 21:25 ओकी द्वार पूरो दिन भर खुली रहेंन, अऊर रात उत नहीं होयेंन।
REV 21:26 अऊर लोग राष्ट्रों को वैभव अऊर धन को सामान ओको म लायेंन।
REV 21:27 पर ओको म कोयी अपवित्र चिज, या घृणित काम करन वालो, या झूठ को गढ़न वालो कोयी रीति सी सिरय नहीं, पर केवल हि लोग जिन्को नाम मेम्ना को जीवन की किताब म लिख्यो हंय।
REV 22:1 येको बाद ऊ स्वर्गदूत न मोख जीवन देन वालो पानी की नदी दिखायी। वा नदी स्फटिक को जसी उज्वल होती। ऊ परमेश्वर अऊर मेम्ना को सिंहासन सी निकलत होती
REV 22:2 ऊ नगर की सड़क को बीचो बीच सी बहत होती। नदी को यो पार अऊर ओन पार जीवन को झाड़ होतो; उन पर हर साल बारा बार फर लगत होतो हर महीना म एक बार, अऊर ऊ झाड़ियों को पाना सी राष्ट्रों को लोगों ख निरोगी करन लायी होतो।
REV 22:3 अऊर नगर म कोयी भी परमेश्वर को श्राप म नहीं रहेंन, अऊर परमेश्वर को सिंहासन अऊर मेम्ना ऊ नगरी म रहेंन अऊर ओको सेवक ओकी सेवा करेंन।
REV 22:4 हि ओको मुंह देखेंन, अऊर ओको नाम ओको हाथों पर लिख्यो हुयो होना।
REV 22:5 फिर रात नहीं होयेंन, अऊर उन्ख दीया अऊर सूरज को प्रकाश की जरूरत नहीं होयेंन, कहालीकि प्रभु परमेश्वर उन्को प्रकाश होयेंन, अऊर ऊ राजा को जसो हमेशा हमेशा शासन करेंन।
REV 22:6 फिर ऊ स्वर्गदूत न मोरो सी कह्यो, “या बाते सत्य अऊर विश्वास को लायक हंय। अऊर प्रभु परमेश्वर, जो भविष्यवक्तावों ख ओकी आत्मा देवय हय, अपनो स्वर्गदूत ख येकोलायी भेज्यो कि अपनो सेवकों ख हि बाते, जिन्को जल्दी पूरो होनो जरूरी हय, दिखाये।”
REV 22:7 “देख, मय जल्दी आवन वालो हय! धन्य हय ऊ जो या किताब की भविष्यवानी की बाते पालन करय हय।”
REV 22:8 मय उच यूहन्ना आय, जो या बाते सुनत अऊर देखत होतो। जब मय न सुन्यो अऊर देख्यो, त जो स्वर्गदूत मोख या बाते दिखावत होतो, मय ओको पाय पर दण्डवत आराधना करन लायी गिर पड़्यो।
REV 22:9 पर ओन मोरो सी कह्यो, “देख, असो मत कर; कहालीकि मय तोरो, अऊर तोरो भाऊ भविष्यवक्तावों, अऊर या किताब की बातों को मानन वालो को संगी सेवक हय। परमेश्वर कि आराधना कर।”
REV 22:10 फिर ओन मोरो सी कह्यो, “या किताब की भविष्यवानी की बातों ख गुप्त मत रख; कहालीकि या सब बातों को पूरो होन को समय बहुत जवर हय।
REV 22:11 जो अधर्म करय हय, ऊ अन्याय करतो रहे; अऊर जो मलिन हय, ऊ मलिन बन्यो रहे; अऊर जो अच्छो हय, ऊ अच्छो बन्यो रहे; अऊर जो सच्चो हय; ऊ पवित्र बन्यो रहे।”
REV 22:12 “देख, मय जल्दी आवन वालो हय; अऊर हर एक को काम को अनुसार बदला देन लायी प्रतिफल मोरो जवर हय।
REV 22:13 मय अल्फा अऊर ओमेगा, पहिलो अऊर आखरी, आदि अऊर अन्त आय।
REV 22:14 “धन्य हि आय, जो अपनो कपड़ा धोय लेवय हंय, कहालीकि उन्ख जीवन को झाड़ को जवर आवन को अधिकार मिलेंन, अऊर हि द्वार सी होय क नगर म सिरेंन।
REV 22:15 पर कुत्ता, अऊर टोन्हा करन वालो, अऊर अनैतिक सम्बन्ध करन वालो, अऊर हत्यारों, अऊर मूर्तिपूजक, अऊर हर एक झूठ को चाहन वालो अऊर गढ़न वालो बाहेर रहेंन।
REV 22:16 “यीशु न अपनो स्वर्गदूत ख येकोलायी भेज्यो कि तुम्हरो आगु मण्डलियों को बारे म इन बातों की गवाही दे। मय दाऊद को परिवार को वंशज आय, अऊर भोर को चमकतो हुयो तारा आय।”
REV 22:17 आत्मा अऊर दुल्हिन दोयी कह्य हंय, “आव!” अऊर सुनन वालो भी कहे, “आव!” जो प्यासो हय ऊ आवो, अऊर जो कोयी चाहे ऊ जीवन को जल को ईनाम फुकट भाव सी ले।
REV 22:18 मय यूहन्ना हर एक आदमी ख, जो या किताब की भविष्यवानी की बाते सुनय हय, चेतावनी देऊ हय: यदि कोयी आदमी इन बातों म कुछ बढ़ाये त परमेश्वर उन विपत्तियों ख, जो इन किताब म लिखी हंय, ओको शिक्षा पर बढ़ायेंन।
REV 22:19 यदि कोयी या भविष्यवानी की किताब की बातों म सी कुछ निकाल डाले, त परमेश्वर ऊ जीवन को झाड़ अऊर पवित्र नगर म सी, जेको वर्नन या किताब म हय, ओको भाग निकाल देयेंन।
REV 22:20 यीशु जो इन बातों को गवाह हय, ऊ कह्य हय, “हव, मय जल्दी आय रह्यो हय।” आमीन। हे प्रभु यीशु आव!
REV 22:21 प्रभु यीशु को अनुग्रह परमेश्वर को लोगों को संग रहे। आमीन।
