﻿निर्गमन.
6.
तब परमेश्वर न मूसा सी कह्यो, “अब तय देखजो कि मय फिरौन राजा सी का करूं, अब तय ओख देखजो, ऊ मोरी महान शक्ति को वजह, अपनो देश सी निकाल देयेंन।” 
परमेश्वर न मूसा सी कह्यो, “मय यहोवा आय। 
मय सर्वशक्तिमान परमेश्वर को नाम सी अब्राहम, इसहाक, अऊर याकूब ख दर्शन देत होतो, पर परमेश्वर को नाम सी कभी अपनो आप ख उन पर प्रगट नहीं करयो। 
अऊर मय न उन्को संग अपनी वाचा करयो, कि मय उन्ख कनान देश देऊं, जेको म हि परदेशी होय क रहत होतो, ओख उन्ख दे देऊ। 
इस्राएलियों जिन्ख मिस्री लोग गुलाम बनाय क रख्यो होतो, उन्को चिल्लानो भी सुन क मय न अपनी वाचा ख याद करयो हय। 
येकोलायी तय इस्राएलियों सी कह्यजो, ‘मय परमेश्वर आय, अऊर तुम ख मिस्रियों को बोझां सी निकालू, अऊर उन्की गुलामी सी छुड़ाऊं, अऊर अपनो हाथ बढ़ाय क तुम्हरी रक्षा करूं, 
अऊर मय तुम ख अपनी प्रजा बनान लायी अपनाय लेऊं, अऊर मय तुम्हरो परमेश्वर ठहरूं; अऊर तुम जान लेवो कि मय तुम्हरो परमेश्वर यहोवा आय जो तुम्ख मिस्रियों को दबाव अऊर बोझ सी निकाल ले आयो, 
अऊर जो देश ख हाथ उठाय क देन की कसम मय न अब्राहम, इसहाक, अऊर याकूब सी खायी होती। ओको म मय तुम्ख पहुंचाय क ओख तुम्हरो अधिकार म कर देऊं। मय परमेश्वर आय’।” 
मूसा न इस्राएलियों ख यो बाते सुनायी, पर उन्न मन की बेचैनी अऊर गुलामी को वजह उन्की बाते नहीं सुन्यो। 
तब परमेश्वर न मूसा सी कह्यो, 
“जावो अऊर मिस्र देश को राजा फिरौन सी कहजो इस्राएलियों ख ओको देश सी बाहेर जान दे।” 
पर मूसा न परमेश्वर सी कह्यो, “देख, इस्राएलियों न मोरी बात नहीं सुन्यो; तब फिरौन मोरी कसी बात सुनेंन? मय त बोलनो म लड़खड़ाऊ हय।” 
तब परमेश्वर न मूसा अऊर हारून ख आदेश दियो कि इस्राएलियों अऊर मिस्र देश को फिरौन राजा सी कहो, हि इस्राएली लोग मिस्र देश सी बाहेर निकाल ले जाये। 
उन्को पूर्वजों को घराना को मुख्य आदमियों को नाम यो आय : इस्राएल को बड़ो बेटा रूबेन को टुरा: हनोक, पल्लू, हेस्रोन अऊर कर्मी; इन्को म सी रूबेन को वंश निकल्यो। 
शिमोन को छय टुरा होतो : यमूएल, यामीन, ओहद याकीन अऊर सोहर अऊर एक कनानी बाई को टुरा शाऊल होतो; इन्को सी शिमोन को वंश निकल्यो। 
लेवी को तीन टुरा होतो : उन्की वंशावली को नाम यो आय : गेर्शोन, कहात अऊर मरारी; अऊर लेवी की पूरी उमर एक सौ सैतीस साल की हुयी। 
गेर्शोन को वंश अनुसार गेर्शोन को दोय टुरा होतो : लिबनी अऊर शिमी। 
कहात को चार टुरा होतो : अम्राम, यिसहार, हेब्रोन अऊर उज्जीएल। कहात की उमर एक सौ तैतीस साल की भयी। 
मरारी को दोय टुरा होतो : महली अऊर मूशी। लेवियों पीढ़ी जिन्कोसी उन्की वंशावली चली यो आय। 
अम्राम न अपनी फूफू योकेबेद सी बिहाव करयो अऊर ओको सी हारून अऊर मूसा पैदा भयो; अऊर अम्राम की पूरी उमर एक सौ सैतीस साल की भयी। 
यिसहार को तीन टुरा होतो : कोरह, नेपेग अऊर जिक्री। 
उज्जीएल को तीन टुरा होतो : मीशाएल, एलसाफन अऊर सित्री। 
हारून न अम्मीनादाब की टुरी अऊर नहशोन कि बहिन एलीशेबा सी बिहाव करयो; अऊर ओको सी नादाब, अबीहू, एलाजार अऊर ईतामार पैदा भयो। 
कोरह को तीन टुरा होतो : अस्सीर, एलकाना अऊर अबीआसाप; अऊर इन्को सी कोरह को वंश निकल्यो। 
हारून को टुरा एलाजार न पूतीएल की टुरी सी बिहाव करयो; अऊर ओको सी पीनहास पैदा भयो। इन्को सी उन्को वंश चल्यो। लेवियों को पूर्वजों को घरानों को मुख्य आदमी हिच आय। 
हारून अऊर मूसा योच आय जिन्ख परमेश्वर न आज्ञा दी: “इस्राएलियों ख दल बनाय क मिस्र देश सी बाहेर निकाल लावो।” 
यो उच मूसा अऊर हारून हंय जिन्न मिस्र देश को राजा फिरौन सी कह्यो कि हम इस्राएलियों ख मिस्र देश सी निकाल ले जाबो। 
जो दिन परमेश्वर न मूसा सी मिस्र देश म बाते करी, 
ओन मूसा ख बतायो, “मय यहोवा आय; जो कुछ मय तोरो सी कहूं ऊ सब बात मिस्र देश को फिरौन राजा सी कह्यजो।” 
पर मूसा न परमेश्वर ख उत्तर दियो, “मय अच्छो तरह बोल नहीं सकू; अऊर फिरौन राजा मोरी बात कसी सुनेंन?” 
