GEN 1:1 གོ༌མ༌རང༌ དཀོན༌མཆོག༌གི༌ ནམ༌ཁའ༌ དང༌ ཇིག༌རྟེན༌ ཛད༌ ཟ༌ནེ༌,
GEN 1:2 ཇིག༌རྟེན༌བོ༌ ཟོས༌ཏ༌ མེད༌ཁན༌ དང༌ སྟོང༌པ༌, ཆུ༌ ཏིང༌ཅན༌ཀོན༌དྲོའེ༌ གངས༌ཏེ༌ ཡང༌ ཏེ༌བོ༌ མུན༌གྲིག༌གི༌ ཀབས༌ཏེ༌ ཡོད༌པིན༌། ཡང༌ དཀོན༌མཆོག༌གི༌ ཐུག༌ཉིད༌ ཏེ༌ ཆུའི༌ ཁེ༌ཐོག༌ག༌ ཁོར༌ཨིན༌ སྣང༌ང༌ བོར༌ར༌ ཛད༌དད༌པིན༌།
GEN 1:3 དཀོན༌མཆོག༌གི༌ མོལ༌ལ༌ ཛདས༌, “འོད༌ ཇུང༌ཤིག༌” ཏེ༌ནེ༌ འོད༌ ཇུང༌།
GEN 1:4 འོད༌པོ༌ ཟིགས༌ཏེ༌ དཀོན༌མཆོག༌ ཐུགས༌ཐདས༌། ཏེ༌སྟིང༌ནེ༌ དཀོན༌མཆོག༌གི༌ འོད༌པོ༌, མུན༌གྲིག༌ནེ༌ སོ༌སོ༌ ཕེའ༌ཛདས༌།
GEN 1:5 ཡང༌ དཀོན༌མཆོག༌གི༌ འོད༌ལ༌ ཉི༌མ༌ ཡང༌ མུན༌གྲིག༌ག༌ ཚན༌ མོལ༌ཏེ༌ མིང༌ ཏག༌ག༌ ཛདས༌། ཏེ༌ནེ༌ ཕི༌ཏོག༌ བུད༌ཏེ༌ ང༌མོ༌ ལེབ༌, ཡང༌ ཏེ༌བོ༌ ཞག༌ ཏང༌པོ༌ ཨིན༌པིན༌།
GEN 1:6 དཀོན༌མཆོག༌གི༌ མོལ༌ལ༌ ཛདས༌, “ཁེ༌ཐོག༌གི༌ ཆུ༌ ཇིག༌རྟེན༌ནི༌ ཆུ༌ནེ༌ སོ༌སོ༌ ཕེ༌ཅེས༌ལ༌ ཏེ༌ ཉིས༌ཀོའེ༌ པར༌ལ༌ ནས༌ས༌ཞིག༌ གྲུབ༌ཤིག༌།”
GEN 1:7 དཀོན༌མཆོག༌གི༌ མོལ༌ཁན༌ ནང༌ཞིན༌ གྲུབ༌། དཀོན༌མཆོག༌གི༌ ཁེ༌ཐོག༌གི༌ ཆུ༌ དང༌ ཇིག༌རྟེན༌ནི༌ ཆུའི༌ པར༌ལ༌ ནས༌ས༌ཞིག༌ གྲུབ༌ ཅུག༌ག༌ ཛདས༌།
GEN 1:8 ཡང༌ དཀོན༌མཆོག༌གི༌ ཏེ༌ ནས༌ས༌བོའ༌ ནམ༌ ཟེར༌ཏེ༌ མིང༌ ཏག༌ག༌ ཛདས༌། ཏེ༌ནེ༌ ཕི༌ཏོག༌ བུད༌ཏེ༌ ང༌མོ༌ ལེབ༌, ཡང༌ ཏེ༌བོ༌ ཞག༌ ཉིས༌པ༌ ཨིན༌པིན༌།
GEN 1:9 དཀོན༌མཆོག༌གི༌ མོལ༌ལ༌ ཛདས༌, “ས༌ སྐམ༌པོ༌ ཇུང༌ཅེས༌སི༌ ཕིའ༌, ནམ༌མི༌ ཡོག༌ག༌ ཡོད༌ཁན༌ནི༌ ཆུ༌གུན༌ ནས༌ས༌ ཅིག༌ཅིག༌ག༌ གྲིལ༌ཤིག༌།” དཀོན༌མཆོག༌གི༌ མོལ༌ཁན༌ ནང༌ཞིན༌ གྲུབ༌།
GEN 1:10 ཡང༌ དཀོན༌མཆོག༌གི༌ ས༌ སྐམ༌པོ༌བོའ༌ ས༌ཀྱད༌ ཡང༌ ཆུ༌ གྲིལ༌ཁན༌བོའ༌ གྱ༌ཚོ༌ མོལ༌ཏེ༌ མིང༌ ཏག༌ག༌ ཛདས༌། ཁོང༌རང༌ངི༌ ཛད༌ཁན༌གུན༌ ཟིགས༌ཏེ༌, དཀོན༌མཆོག༌ ཐུགས༌ཐདས༌།
GEN 1:11 ཏེ༌ནེ༌ དཀོན༌མཆོག༌གི༌ མོལ༌ལ༌ ཛདས༌, “ས༌ཀྱད༌བོའེ༌ཀ༌ ཁ༌ཟས༌ སྨིན༌ཁན༌ནི༌ ལྕང༌མ༌ དང༌ གྲུ༌ སྨིན༌ཁན༌ནི༌ སྔོན༌པོ༌ ཚང༌མ༌ སྐྱེ༌ཤིག༌། ཏེ༌ ས༌འོན༌གུན༌ནི༌ རང༌རང༌ངི༌ རིགས༌སི༌ ལྕང༌མ༌ དང༌ རྩཱ༌སྔོན༌པོ༌ གུན༌ སྐྱེ༌ཅུག༌ཨིན༌།” དཀོན༌མཆོག༌གི༌ མོལ༌ཁན༌ ནང༌ཞིན༌ གྲུབ༌།
GEN 1:12 ཏེ༌ ས༌ཀྱད༌བོའེ༌ཀ༌ སྔོན༌པོའེ༌ རིགས༌ ཚང༌མ༌ སྨིན༌, ཡང༌ན༌ ཁ༌ཟས༌སི༌ ལྕང༌མ༌ དང༌ གྲུ༌ སྣ༌ཚོགས༌སི༌ སྔོན༌པོ༌, ཀ༌བོའེ༌ ས༌འོན༌གུན༌ནི༌ རང༌རང༌ངི༌ རིགས༌སི༌ ལྕང༌མ༌ དང༌ རྩཱ༌སྔོན༌པོ༌ གུན༌ སྐྱེ༌ཨིན༌། ཁོང༌རང༌ངི༌ ཛད༌ཁན༌གུན༌ ཟིགས༌ཏེ༌, དཀོན༌མཆོག༌ ཐུགས༌ཐདས༌།
GEN 1:13 ཏེ༌ནེ༌ ཕི༌ཏོག༌ བུད༌ཏེ༌ ང༌མོ༌ ལེབ༌, ཡང༌ ཏེ༌བོ༌ ཞག༌ སུམ༌པ༌ ཨིན༌པིན༌།
GEN 1:14 ཏེ༌ནེ༌ དཀོན༌མཆོག༌གི༌ མོལ༌ལ༌ ཛདས༌, “ཉི༌མ༌ དང༌ ཚན༌ ཕེ༌ཅེས༌སི༌ ཕིའ༌, ནམ༌མི༌ ནང༌ང༌ འོད༌གུན༌ ཇུང༌ཤིག༌། ཏེ༌གུན༌ ནམ༌ཟླ༌, ཞག༌ དང༌ ལོ༌ གུན༌ སྟན༌ཅེས༌ལ༌ སྟགས༌གུན༌ གྱུར༌ཤིག༌།
GEN 1:15 ཏེ༌ འོད༌ ནམ༌མི༌ ནང༌ང༌ ཡོད༌ཁན༌གུན༌ནི༌ ཇིག༌རྟེན༌ནི༌ཀ༌ འོད༌ ཏོང༌ཤིག༌།” དཀོན༌མཆོག༌གི༌ མོལ༌ཁན༌ ནང༌ཞིན༌ གྲུབ༌།
GEN 1:16 ཡང༌ དཀོན༌མཆོག༌གི༌ འོད༌ ཀྲག༌པོ༌ ཉིས༌ ཅོའ༌ ཛད༌, འོད༌ ཤུག༌ཆེ༌བོའ༌ ཉི༌མའ༌ ཡང༌ ཤུག༌ཆུང༌ང༌བོའ༌ ཚན༌ལ༌ འོད༌ ཏང༌ ཅུག༌ག༌ ཛདས༌། ཁོང༌ངི༌ སྐར༌མ༌གུན༌ནའང༌ ཅོའ༌ ཛདས༌།
GEN 1:17 དཀོན༌མཆོག༌གི༌ ཏེ༌ འོད༌གུན༌ ཇིག༌རྟེན༌ནི༌ཀ༌ ལྡངས༌ ཏང༌ཅེས༌སི༌ ཕིའ༌ ནམ༌ཁའེ༌ ནང༌ང༌ བོར༌ར༌ ཛདས༌།
GEN 1:18 ཏེ༌གུན༌ ཉི༌མ༌ དང༌ ཚན༌ལ༌ ལྡངས༌ ཏང༌ཅེས༌ ཡང༌ འོད༌པོ༌ མུན༌གྲིག༌ནེ༌ སོ༌སོའ༌ ཕེ༌ཅེས༌ལ༌ ཛདས༌། ཁོང༌རང༌ངི༌ ཛད༌ཁན༌གུན༌ ཟིགས༌ཏེ༌ དཀོན༌མཆོག༌ ཐུགས༌ཐདས༌།
GEN 1:19 ཏེ༌ནེ༌ ཕི༌ཏོག༌ བུད༌ཏེ༌ ང༌མོ༌ ལེབ༌, ཡང༌ ཏེ༌བོ༌ ཞག༌ ཞི༌པ༌ ཨིན༌པིན༌།
GEN 1:20 དཀོན༌མཆོག༌གི༌ མོལ༌ལ༌ ཛདས༌, “ཆུ༌ ཚང༌མའེ༌ ནང༌ང༌ འུགས༌ ཡོད༌ཁན༌ནི༌ སེམས༌ཅན༌ མང༌པོ༌ ཡང༌ ནམ༌ཁའ༌ ཅ༌ཅིའུ༌ སྣ༌ཚོགས༌སི༌ གང༌ཤིག༌།”
GEN 1:21 ཏེན༌ན༌ ཟུག༌གི༌ དཀོན༌མཆོག༌གི༌ གྱ༌ཚོའེ༌ ནང༌ང༌ ཧ༌ལས༌ཤེས༌སི༌ སེམས༌ཅན༌ ཇིགས༌པོ༌, ཆུའི༌ ནང༌ང༌ གྲུལ༌ཁན༌ དང༌ རྐྱལ༌ཁན༌ སེམས༌ཅན༌ སྣ༌ཚོགས༌ མང༌པོ༌ ཡང༌ ཤོག༌པ༌ ཡོད༌ཁན༌ནི༌ ཅ༌ཅིའུ༌འི༌ རིགས༌ ཚང༌མ༌ ཅོའ༌ ཛདས༌། ཁོང༌རང༌ངི༌ ཛད༌ཁན༌གུན༌ ཟིགས༌ཏེ༌ དཀོན༌མཆོག༌ ཐུགས༌ཐདས༌།
GEN 1:22 ཏེ༌ནེ༌ དཀོན༌མཆོག༌གི༌ ཛད༌ཁན༌ ཚང༌མ༌ལ༌ ཅིན༌ལབས༌ སལ༌ཏེ༌ མོལས༌, “ཕྲུ༌གུ༌ སྐྱེས༌ཏེ༌ རང༌ངི༌ ཀྲངས༌ཀ༌ གྱས༌ཤུག༌ཤིག༌, ཉ༌གུན༌ནི༌ གྱ༌ཚོའེ༌ ནང༌ང༌, ཡང༌ ཅ༌ཅིའུ༌གུན༌ནི༌ ཇིག༌རྟེན༌ནི༌ ནང༌ང༌ རང༌ངི༌ ཀྲངས༌ཀ༌ གུན༌ མང༌པོ༌ ཕེལ༌ཅུག༌ཤིག༌།”
GEN 1:23 ཏེ༌ནེ༌ ཕི༌ཏོག༌ བུད༌ཏེ༌ ང༌མོ༌ ལེབ༌, ཡང༌ ཏེ༌བོ༌ ཞག༌ ལྔ༌པ༌ ཨིན༌པིན༌།
GEN 1:24 དཀོན༌མཆོག༌གི༌ མོལ༌ལ༌ ཛདས༌, “སེམས༌ཅན༌ སྣ༌མི༌ སྣ༌ཚོགས༌ཤིག༌ ཇིག༌རྟེན༌ནི༌ཀ༌ ཇུང༌ཤིག༌, ཏེ༌གུན༌ལ༌ རང༌རང༌ངི༌ རིགས༌སི༌ ཕྲུ༌གུ༌ སྐྱེ༌ཨིན༌, ཏེ༌བོའེ༌ ནང༌ང༌ སྲལ༌ཁན༌ནི༌ སེམས༌ཅན༌, སའེ༌ཀ༌ གྲུལ༌ཁན༌ནི༌ སེམས༌ཅན༌ ཆུ༌ངུན༌ དང༌ ནག༌ཚོགས༌སི༌ སེམས༌ཅན༌ གུན༌ ཨིན༌ནོག༌།” དཀོན༌མཆོག༌གི༌ མོལ༌ཁན༌ ནང༌ཞིན༌ གྲུབ༌།
GEN 1:25 ཏེན༌ན༌ ཟུག༌གི༌ དཀོན༌མཆོག༌གི༌ ནག༌ཚོགས༌སི༌ སེམས༌ཅན༌ནི༌ རིགས༌, སྲལ༌ཁན༌ནི༌ སེམས༌ཅན༌ནི༌ རིགས༌, སེམས༌ཅན༌ ཆུ༌ངུན༌ནི༌ རིགས༌ ཚང༌མ༌ ཅོའ༌ ཛདས༌། ཁོང༌རང༌ངི༌ ཛད༌ཁན༌གུན༌ ཟིགས༌ཏེ༌ དཀོན༌མཆོག༌ ཐུགས༌ཐདས༌།
GEN 1:26 ཏེ༌ནེ༌ དཀོན༌མཆོག༌གི༌ མོལ༌ལ༌ ཛདས༌, “ང༌དང༌ངི༌ ང༌དང༌རང༌ ཙོགས༌སི༌ མི༌རིག༌ ཅོ༌ཨིན༌, ཁོང༌གུན༌ ང༌དང༌ ཙོགས༌ ཡོང༌ཨིན༌། ཁོང༌གུན༌ནི༌ གྱ༌ཚོའེ༌ ནང༌ང༌ ཡོད༌ཁན༌ནི༌ ཉ༌, ནམ༌མི༌ ནང༌ང༌ ཡོད༌ཁན༌ནི༌ ཅ༌ ཚང༌མ༌ དང༌ ནག༌ཚོགས༌སི༌ སེམས༌ཅན༌, སྲལ༌ཁན༌ནི༌ སེམས༌ཅན༌, སའེ༌ཀ༌ གྲུལ༌ཁན༌ནི༌ སེམས༌ཅན༌ ཆུ༌ངུན༌ སྣ༌ཚོགས༌ ཚང༌མའེ༌ཀ༌ ཝང༌སྲུལ༌ཨིན༌།”
GEN 1:27 ཏེ༌ནེ༌ དཀོན༌མཆོག༌གི༌ ཁོང༌རང༌ ཙོགས༌ མི༌གུན༌ ཅོའ༌ ཛདས༌། དེན༌བ༌ དཀོན༌མཆོག༌གི༌ ཏེ༌གུན༌ ཁོང༌རང༌ དང༌ཙོགས༌ ཅོའ༌ ཛདས༌, ཁོང༌ངི༌ བུ༌ཚ༌ དང༌ བུ༌མོ༌ ཅོའ༌ ཛདས༌།
GEN 1:28 ཏེ༌ནེ༌ དཀོན༌མཆོག༌གི༌ ཁོང༌གུན༌ལ༌ ཅིན༌ལབས༌ སལ༌ཏེ༌ མོལ༌ལ༌ ཛདས༌, “ཕྲུ༌གུ༌ སྐྱེ༌ཅུག༌ཏེ༌ རང༌ངི༌ ཀྲངས༌ཀ༌ ཕེལ༌ཅུག༌། ཇིག༌རྟེན༌ནི༌ ནང༌ང༌ གང༌ཅུགས༌ཏེ༌ ཝང༌སྲུལ༌། གྱ༌ཚོའེ༌ ནང༌ང༌ ཡོད༌ཁན༌ནི༌ ཉ༌, ནམ༌མི༌ ནང༌ང༌ ཡོད༌ཁན༌ནི༌ ཅ༌ ཡང༌ སའེ༌ཀ༌ གྲུལ༌ཁན༌ནི༌ སེམས༌ཅན༌ ཚང༌མའེ༌ཀ༌ ཝང༌སྲུལ༌།”
GEN 1:29 ཡང༌ དཀོན༌མཆོག༌གི༌ མོལས༌, “ལྟོས༌ཤིག༌, ངའེ༌ ཁྱོ༌ཞ༌གུན༌ལ༌ ཟའ༌ཅེས༌སི༌ ཕིའ༌, ཇིག༌རྟེན༌ གང༌པོའེ༌ ནང༌ང༌ ཡོད༌ཁན༌ནི༌ ཁ༌ཟས༌སི༌ ལྕང༌མ༌ དང༌ ས༌འོན༌ སྐྱེ༌ཁན༌ནི༌ སྔོན༌པོའེ༌ རིགས༌ ཚང༌མ༌ ཏངས༌ཏེ༌ ཨིན༌།
GEN 1:30 ཡང༌ རྩཱ༌ དང༌ ལོ༌མ༌ སྔོན༌པོ༌ ཚང༌མ༌ ནག༌ཚོགས༌སི༌ སེམས༌ཅན༌, ནམ༌མ༌ འུར༌ཁན༌ནི༌ ཅ༌ཅིའུ༌, སའེ༌ཀ༌ གྲུལ༌ཁན༌ནི༌ སེམས༌ཅན༌ ཆུ༌ངུན༌ དང༌ འུགས༌ ཡོད༌ཁན༌ ཚང༌མ༌ལ༌ ཟའ༌ཅེས༌སི༌ ཕིའ༌ ཏངས༌ཏེ༌ ཨིན༌།” དཀོན༌མཆོག༌གི༌ མོལ༌ཁན༌ ནང༌ཞིན༌ གྲུབ༌།
GEN 1:31 ཏེ༌ནེ༌ ཁོང༌རང༌ངི༌ ཛད༌ཁན༌ ཚང༌མ༌ལ༌ ཟིགས༌ཏེ༌ དཀོན༌མཆོག༌ ཐུགས༌ཐདས༌། དེན༌བ༌ ཁོང༌ མ༌སྲན༌ཏྲེ༌ ཐུགས༌ཐདས༌། ཏེ༌ནེ༌ ཕི༌ཏོག༌ བུད༌ཏེ༌ ང༌མོ༌ ལེབ༌, ཡང༌ ཏེ༌བོ༌ ཞག༌ དྲུག༌པ༌ ཨིན༌པིན༌།
GEN 2:1 ཏེན༌ན༌ ཚུལ༌ལ༌ དཀོན༌མཆོག༌གི༌ ནམ༌ཁའ༌, ཇིག༌རྟེན༌ ཡང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཅོའ༌ ཛད༌ཅེས༌པོ༌ གྲུབ༌།
GEN 2:2 དཀོན༌མཆོག༌གི༌ ཛད༌པའེ༌ ཆག༌ལས༌ ཚང༌མ༌ གྲུབ༌ཚར༌པ༌, ཞག༌མ༌ རྡུན༌པའེ༌ ཞག༌ག༌ ཁོང༌ ངལ༌ཚོས༌ཏེ༌ ཞུགས༌།
GEN 2:3 དཀོན༌མཆོག༌གི༌ ཞག༌ རྡུན༌པ༌བོའ༌ ཅིན༌ལབས༌ སལ༌ལ༌ ཛད༌ཏེ༌, ཏེ༌ ཞག༌པོ༌ ཏམ༌པ༌ ཐེའ༌ ཛདས༌, ཅིའ༌ཟེར༌ན༌ ཆག༌ལས༌ གང༌པོ༌ གྲུབ༌ཚར༌པ༌, ཏེ༌ ཞག༌ག༌ ཁོང༌ ངལ༌ཚོའ༌ ཛད༌ཏེ༌ ཨིན༌པིན༌།
GEN 2:4 ཏེན༌ན༌བོ༌ ནམ༌ཁའ༌ དང༌ ཇིག༌རྟེན༌ ཛད༌ཅེས༌སི༌ ཚིར༌བོ༌ ཨིན༌པིན༌། 2:4-25 ཡ༌ཝ༌ དཀོན༌མཆོག༌གི༌ ནམ༌ཁའ༌ དང༌ ཇིག༌རྟེན༌ ཛད༌ ཟ༌ནེ༌,
GEN 2:5 ཇིག༌རྟེན༌ནི༌ཀ༌ ཏབ༌ཁན༌ ཡ༌ མ༌ཏབ༌ཁན༌ནི༌ རྩཱ༌ སྐྱེའ༌ མེད༌པིན༌, ཅིའ༌ཟེར༌ན༌ ཡ༌ཝ༌ དཀོན༌མཆོག༌གི༌ ཏ༌རུང༌ཚག༌པ༌ ཇིག༌རྟེན༌ནི༌ཀ༌ ཆར༌པ༌ བབས༌ ཅུག༌ག༌ མ༌ཛད༌ད༌ ཨིན༌པིན༌, ཡང༌ ཇིག༌རྟེན༌ནི༌ཀ༌ སྟོན༌ཐོག༌ བད༌ཁན༌ནི༌ མི༌སུའང༌ མེད༌པིན༌།
GEN 2:6 ཨིན༌ནའང༌ སའེ༌ ནང༌ནེ༌ ཆུ༌མིག༌གི༌ ཆུ༌ བིང༌ཏེ༌ ས༌ཀྱད༌ ཚང༌མ༌ ལོན༌པ༌ སོང༌།
GEN 2:7 ཏེ༌ནེ༌ ཡ༌ཝ༌ དཀོན༌མཆོག༌གི༌ ས༌ཀྱད༌དི༌ ཀ༌ནེ༌ ས༌ ནམས༌ཏེ༌ མི༌ཞིག༌གི༌ ཟོའེ༌ ནང༌ང༌ ཅོའ༌ ཛདས༌། ཁོང༌ངི༌ ཏེ༌ མི༌བོའེ༌ ན༌ཁུང༌ངི༌ ནང༌ང༌ ཚེ༌ སལ༌ཁན༌ནི༌ འུགས༌པོ༌ སལ༌ལ༌ ཛད༌པ༌, ཏེ༌ མི༌བོ༌ སྲོག༌ ཡོད༌ཁན༌ནི༌ མི༌ཞིག༌ གྱུར༌།
GEN 2:8 ཏེ༌ནེ༌ ཡ༌ཝ༌ དཀོན༌མཆོག༌གི༌ ཨི༌དན༌ ཟེར༌སའེ༌ ནས༌སའེ༌ ཤར༌ ཆོགས༌ལ༌ ཚས༌ཤིག༌ ཏབ༌བ༌ ཛདས༌, ཡང༌ ཏེ༌ནང༌ང༌ ཁོང༌ངི༌ ཅོའ༌ ཛད༌ཁན༌ནི༌ མི༌བོ༌ བོར༌ར༌ ཛདས༌།
GEN 2:9 ཡ༌ཝ༌ དཀོན༌མཆོག༌གི༌ ཚས༌པོའེ༌ ནང༌ང༌ ལྕང༌མ༌ སྣ༌མི༌ སྣ༌ཚོགས༌ སྐྱེ༌ ཅུག༌ག༌ ཛདས༌, ཀ༌བོའེ༌ ནང༌ང༌ ལྡེ༌མོ༌ དང༌ ཁ༌ཟས༌ ཞིམ༌པོ༌ ཆགས༌ཁན༌ནི༌ ལྕང༌མ༌གུན༌ ཡོད༌པིན༌། ཏེ༌ ཚས༌སི༌ སྐྱིལ༌ལ༌ སྲོག༌ སལ༌ཁན༌ ཡང༌ ངན༌པ༌ དང༌ ཟང༌པོ༌ ཤེས༌ཤུག༌ཁན༌ནི༌ ལྕང༌མ༌ ཉིས༌ ཡོད༌པིན༌།
GEN 2:10 ཡང༌ ཨི༌དན༌ནི༌ ནས༌ས༌ནེ༌ ལྩངས༌པོ༌ བིངས༌ཏེ༌ གྱུག༌ཁན༌ནི༌ ཆུའི༌ ཚས༌པོའ༌ ཆུ༌ ཏང༌ངད༌པིན༌། ཚས༌སི༌ སྟིང༌ནེ༌ ཏེ༌ ལྩངས༌པོ༌བོ༌ ཁག༌ཞིའི༌ ནང༌ང༌ བེའད༌པིན༌།
GEN 2:11 ཁག༌ ཏང༌པོ༌བོ༌ པི༌ཤོན༌ ཟེར༌ཁན༌ནི༌ ལྩངས༌པོ༌ ཨིན༌པིན༌, ཀ༌བོ༌ ཁོར༌ཨིན༌ སེར༌ ཡོད༌ཁན༌ནི༌ ཧ༌ཝི༌ལའེ༌ ཡུལ༌ གང༌པོའེ༌ ནང༌ང༌ གྱུག༌གད༌པིན༌།
GEN 2:12 ཏེ༌ ཡུལ༌ལི༌ སེར༌བོ༌ གྱལ༌ཤོག༌, ཡང༌ ཏེ༌རུ༌ ཏྲི༌ཞིམ༌ཅན༌ནི༌ མར༌ དང༌ རྡོའ༌ མ༌ རིན༌ཅན༌ ཨོ༌ནེཀས༌ ཟེར༌ཁན༌གུན༌ནའང༌ ཐོབ༌བད༌པིན༌།
GEN 2:13 ཁག༌ ཉིས༌པ༌བོ༌ གི༌ཧོན༌ ཟེར༌ཁན༌ནི༌ ལྩངས༌པོ༌ ཨིན༌པིན༌, ཀ༌བོ༌ ཁོར༌ཨིན༌ ཀུཤ༌ཤེ༌ ཡུལ༌ གང༌པོའེ༌ ནང༌ང༌ གྱུག༌གད༌པིན༌།
GEN 2:14 ཁག༌ སུམ༌པ༌བོ༌ ཀྲི༌གརིས༌ ཟེར༌ཁན༌ནི༌ ལྩངས༌པོ༌ ཨིན༌པིན༌, ཀ༌བོ༌ ཨ༌ཤེར༌ ནས༌སའེ༌ ཤར༌ ཆོགས༌ནེ༌ གྱུག༌གད༌པིན༌། ཡང༌ ཁག༌ ཞི༌པ༌བོ༌ ཡུཕ༌རེ༌ཀྲས༌ ཟེར༌ཁན༌ནི༌ ལྩངས༌པོ༌ ཨིན༌པིན༌།
GEN 2:15 ཡ༌ཝ༌ དཀོན༌མཆོག༌གི༌ ཁོང༌རང༌ངི༌ ཛད༌ཁན༌ནི༌ མི༌བོ༌ ཨི༌དན༌ནི༌ ཚས༌སི༌ ནང༌ང༌ སྟོན༌ཐོག༌ བད༌ཅེས༌ དང༌ ཏེ༌བོའ༌ སྟ༌སྟོག༌ ཅོ༌ཅེས༌སི༌ ཕིའ༌ བོར༌ར༌ ཛདས༌།
GEN 2:16 ཡང༌ ཡ༌ཝ༌ དཀོན༌མཆོག༌གི༌ བུ༌ཚ༌བོའ༌ བཀའ༌ སལས༌, “འི༌ ཚས༌སི༌ ནང༌ང༌ ཡོད༌ཁན༌ནི༌ ལྕང༌མ༌གུན༌ནེ༌, ཁྱོ༌རང༌ ཐད༌ཁན༌ནི༌ ཁ༌ཟས༌ ཟན༌ནའང༌ གྲིག༌།
GEN 2:17 ཨིན༌ནའང༌ ངན༌པ༌ དང༌ ཟང༌པོ༌ ཤེས༌ཤུག༌ཁན༌ནི༌ ལྕང༌མའེ༌ ཁ༌ཟས༌པོ༌ ཟའ༌ མ༌གོས༌, ཀལ༌ཏེས༌ ཟའ༌ན༌ ཏེན༌ན༌ ཞག༌ག༌ ཁྱོ༌རང༌ ཤི༌ཨིན༌།”
GEN 2:18 ཏེ༌ནེ༌ ཡ༌ཝ༌ དཀོན༌མཆོག༌གི༌ མོལ༌ལ༌ ཛདས༌, “ཕྲོ༌པ༌ མེད༌ཅེས༌པོ༌ བུ༌ཚའེ༌ ཕིའ༌ གྱལ༌ལ༌ཞིག༌ མི༌དུག༌, ངའེ༌ ཁོའ༌ ཟོབ༌ཤེས༌སི༌ རོགས༌ ཅོ༌ཁན༌ཞིག༌ ཅོ༌ཨིན༌།”
GEN 2:19 ཡ༌ཝ༌ དཀོན༌མཆོག༌གི༌ སེམས༌ཅན༌ དང༌ ཅ༌ཅིའུ༌ ཚང༌མའ༌, ཅི༌ མིང༌ ཏག༌དུག༌ ཟིགས༌ས༌ལ༌, ས༌ ཉམ༌པོ༌ ཁོང༌རང༌ངི༌ ཆག༌ནེ༌ ཛད༌ཁན༌ནི༌ མི༌བོའེ༌ དུན༌ལ༌ ཁྱོང༌ང༌ ཛདས༌, ཡང༌ ཀ༌ཟུག༌ མིང༌ རིག༌ ཏག༌ནའང༌ ཏེ༌བོ༌ ཏེན༌ན༌བོའེ༌ མིང༌བོ༌ གྱུར༌།
GEN 2:20 ཏེ༌ནེ༌ མི༌བོའེ༌ སྲལ༌ཁན༌ནི༌ སེམས༌ཅན༌, ནམ༌མ༌ འུར༌ཁན༌ནི༌ ཅ༌ དང༌ རིའི༌ སེམས༌ཅན༌ ཚང༌མ༌ལ༌ མིང༌ ཏགས༌། ཨིན༌ནའང༌ ཏེ༌གུན༌ནི༌ ནང༌ནེ༌ ཁོའ༌ ཟོབས༌ཤེས༌ཅན༌ནི༌ ཕྲོ༌པ༌ རོགས༌ ཅོ༌ཁན༌ཞིག༌ མ༌ཐོབ༌།
GEN 2:21 ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌ཚ༌བོའ༌ མ༌ ཉིད༌ ལྕིན༌ཏྲེ༌ ཡོང༌ ཅུག༌ག༌ ཛདས༌། ཁོའེ༌ ཟུགས༌པོའེ༌ ནང༌ནེ༌ ཙིབ༌མ༌ཅིག༌ ཕིང༌ང༌ ཛད༌ཏེ༌ ཏེ༌བོ༌ ཤ༌ ཉམ༌པོ༌ ཀབ༌བ༌ ཛདས༌།
GEN 2:22 ཡ༌ཝ༌ དཀོན༌མཆོག༌གི༌ བུ༌ཚ༌བོའེ༌ ཀ༌ནེ༌ ཕིང༌ང༌ ཛད༌ཁན༌ནི༌ ཏེ༌ ཙིབ༌མ༌བོའ༌, བུ༌མོ༌ཞིག༌ ཅོའ༌ ཛད༌ཏེ༌ བུ༌ཚའེ༌ དུན༌ལ༌ ཁྱོང༌ང༌ ཛདས༌།
GEN 2:23 ཏེ༌ནེ༌ བུ༌ཚའེ༌ ཟེརས༌, “ཝའོ༌! ཏ༌ འི༌ རུས༌པ༌བོ༌ ངའེ༌ རུས༌པ༌, འི༌ ཤ༌བོ༌ ངའེ༌ ཤ༌ ཨིན༌ནོག༌། ཁོའ༌ བུ༌མོ༌ ཟེར༌ཨིན༌ ཅིའ༌ཟེར༌ན༌ ཁོ༌ བུ༌ཚའེ༌ ནང༌ནེ༌ ཕིངས༌ཏེ༌ ཨིན༌ནོག༌།”
GEN 2:24 ཏེན༌ན༌ གྱུན༌ཚན༌བོའེ༌ ཕིའ༌ བུ༌ཚ༌ ཁོ༌རང༌ངི༌ ཨ༌བ༌ དང༌ ཨ༌མ༌ནེ༌ བེ༌ཏེ༌ ཁོ༌རང༌ངི༌ ན༌མ༌ ཉམ༌པོ༌ ཛོམ༌མ༌ནོག༌, ཡང༌ ཁོང༌ ཉིས༌ཀོ༌ ཅིག༌ གྱུར༌ཨིན༌།
GEN 2:25 ཏེ༌ཏུས༌ལ༌ བུ༌ཚ༌ དང༌ བུ༌མོ༌ ཉིས༌ཀོ༌ ལྗེར༌ཉལ༌ ཡོད༌ནའང༌, ཁོང༌གུན༌ ཁྲེལ༌ལ༌ མེད༌པིན༌།
GEN 3:1 ཏ༌ རུལ༌བོ༌ ནི༌, ཡ༌ཝ༌ དཀོན༌མཆོག༌གི༌ ཛད༌ཁན༌ནི༌ ནག༌ཚོགས༌སི༌ སེམས༌ཅན༌ ཚང༌མའེ༌སང༌, སྐྱོན༌ཇན༌ ཡོད༌པིན༌། ཁོའེ༌ བུ༌མོའ༌ ཟེརས༌, “དཀོན༌མཆོག༌གི༌ ཏན༌ཏན༌ལ༌, ཁྱོ༌རང༌ང༌ འི༌ ཚས༌སི༌ ལྕང༌མ༌ ཅིག༌གི༌ ཀ༌ནེའང༌ ཁ༌ཟས༌ ཟའ༌ མ༌གོས༌ མོལ༌ལ༌ རག༌ག༌?”
GEN 3:2 ཏེ༌ནེ༌ བུ༌མོའེ༌ རུལ༌ལ༌ ལན༌ཏངས༌, “དཀོན༌མཆོག༌གི༌ ང༌ཞའ༌, ‘ཚས༌སི༌ ནང༌ནེ༌ ཁ༌ཟས༌ ཚང༌མ༌ ཟའ༌ནའང༌ གྲིག༌,
GEN 3:3 ཨིན༌ནའང༌ ཚས༌སི༌ སྐྱིལ༌ལ༌ ཡོད༌ཁན༌ནི༌ ལྕང༌མའེ༌ ཁ༌ཟས༌པོ༌ ཟའ༌ མ༌གོས༌ ཡ༌ ལག༌པའང༌ མ༌རྩེ༌, ཏེ༌ཟུག༌ ཅོ༌ན༌ ཁྱོ༌ཞའ༌ ཤི༌ཨིན༌’ མོལ༌ལ༌རག༌།’”
GEN 3:4 ཨིན༌ནའང༌ རུལ༌བོའེ༌ བུ༌མོའ༌ ཟེརས༌, “ཁྱོ༌ཞའ༌ ཤིའ༌ མ༌ནོག༌།
GEN 3:5 ཏེ༌ ཁ༌ཟས༌པོ༌ ཟའ༌ན༌ ཁྱོ༌ཞའེ༌ མིག༌ བེ༌ཏེ༌, ཁྱོ༌ཞ༌གུན༌ དཀོན༌མཆོག༌ ཙོགས༌ གྱུར༌ཏེ༌ ཟང༌པོ༌ དང༌ ངན༌པ༌ གུན༌ ཧ༌གོ༌ཅེས༌པོ༌ དཀོན༌མཆོག༌ག༌ གྱུས༌ཡོད༌ པ༌སང༌, ཏེ༌ ཁ༌ཟས༌པོ༌ མ༌ཟ༌ མོལ༌ཏེ༌ ཨིན༌ནོག༌།”
GEN 3:6 བུ༌མོའ༌ ཏེ༌ ལྕང༌མའེ༌ཀ༌ ཡོད༌ཁན༌ནི༌ ཁ༌ཟས༌གུན༌ མ༌ ལྡེ༌མོ༌ དང༌ ཞིམ༌པོ༌ ཡོད༌ཁན༌བོ༌ ཐོང༌ ཡང༌ ཏེ༌ ཤེས༌རབས༌པོ༌ ཐོབ༌ཅེས༌སི༌ དོད༌པ༌ ཡོད༌ པ༌སང༌, ཁོའེ༌ ཁ༌ཟས༌ཞིག༌ ཁྱོངས༌ཏེ༌ ཟོས༌། ཡང༌ ཉམ༌པོ༌ ཡོད༌ཁན༌ ཁོ༌རང༌ངི༌ མག༌པ༌ ཟའ༌ཅེས༌ལ༌ ཏངས༌པ༌, ཁོའེང༌ ཟོས༌།
GEN 3:7 ཏེན༌ན༌མལ༌ལ༌, ཁོང༌གུན༌ནི༌ མིག༌ ཕེད༌ཏེ༌, ཁོང༌ ཉིས༌ཀོ༌ ལྗེར༌ཉལ༌ལ༌ ཡོད༌ཁན༌བོ༌ ཧ༌གོ༌པ༌, ཕིག༌ ཟེར༌ཁན༌ནི༌ ལྕང༌མའེ༌ ལོ༌མ༌གུན༌ ཙེམས༌ཏེ༌ ཁོང༌གུན༌ནི༌ ཟུགས༌པོའེ༌ རྨད༌བོ༌ ཀབས༌།
GEN 3:8 ཏེ༌ནེ༌ བུ༌ཚ༌ དང༌ བུ༌མོ༌ ཉིས༌ཀོའ༌, ཡ༌ཝ༌ དཀོན༌མཆོག༌ ཚས༌སི༌ ནང༌ང༌ ཕི༌ཏོག༌གི༌ སིལ༌མོ༌ ལུངས༌པོའེ༌ ཏུས༌ ཞབ༌གྲུལ༌ལ༌ སྐྱོད༌ཨིན༌ ཡོད༌ཁན༌ནི༌ སྐད༌ ཚོར༌པ༌, ཡ༌ཝ༌ དཀོན༌མཆོག༌གི༌ མི༌ཟིགས༌ཅེས༌སི༌ ཕིའ༌ ཁོང༌གུན༌ ཚས༌སི༌ ལྕང༌མའེ༌ གྱབ༌བ༌ ཨིབས༌།
GEN 3:9 ཨིན༌ནའང༌ ཡ༌ཝ༌ དཀོན༌མཆོག༌གི༌ བུ༌ཚ༌བོའ༌ བོད༌ཏེ༌, “ཁྱོ༌རང༌ ཀ༌ནེ༌ ཡོད༌?” མོལས༌།
GEN 3:10 བུ༌ཚ༌བོའེ༌ ལན༌ཏངས༌ཏེ༌, “ཉེ༌རང༌ ཚས༌སི༌ ནང༌ང༌ སྐྱོད༌ཅེས༌སི༌ སྐད༌པོ༌ ཚོར༌ར༌ཅིག༌, ང༌ ཇིགས༌ཏེ༌ ཨིབས༌པིན༌ ཅིའ༌ཟེར༌ན༌ ང༌ ལྗེར༌ཉལ༌ལ༌ ཡོད༌པིན༌།”
GEN 3:11 ཁོང༌ངི༌ མོལས༌, “སུའི༌ ཟེར༌ར༌རག༌ ཁྱོ༌རང༌ ལྗེར༌ཉལ༌ལ༌ དུག༌ ཟེར༌ཏེ༌? ཁྱོ༌རང༌ངི༌ ཚས༌སི༌ སྐྱིལ༌ལ༌ ཡོད༌ཁན༌ནི༌ ལྕང༌མའེ༌ ཀ༌ནེ༌ ཁ༌ཟས༌, ངའེ༌ མ༌ཟ༌ ཟེར༌ཁན༌བོ༌ ཏ༌ མ༌ཟོས༌པིན༌ན༌?”
GEN 3:12 ཏེ༌ནེ༌ བུ༌ཚ༌བོའེ༌ ཟེརས༌, “ཉེ༌རང༌ངི༌ ང༌ རོགས༌ ཅོའ༌ལ༌ སལ༌ཁན༌ནི༌ བུ༌མོའེ༌ ང༌ ཏེ༌ ལྕང༌མའེ༌ ཁ༌ཟས༌པོ༌ ཏངས༌པ༌, ངའེ༌ ཟོས༌པིན༌ལེ༌།”
GEN 3:13 ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌མོའ༌, “ཁྱོ༌རང༌ངི༌ འི༌བོ༌ ཅི༌ ཅོས༌ཏེ༌ ཨིན༌” མོལས༌། བུ༌མོའེ༌ ཟེརས༌, “རུལ༌ལི༌ ངའ༌ གོབ༌སྐོར༌པ༌ ངའེ༌ ཟོས༌པིན༌ལེ༌།”
GEN 3:14 ཡ༌ཝ༌ དཀོན༌མཆོག༌གི༌ རུལ༌ལ༌ མོལས༌, “ཁྱོ༌རང༌ངི༌ འི༌བོ༌ ཅོས༌ པ༌སང༌, སྲལ༌ཁན༌ དང༌ ནག༌ཚོགས༌སི༌ སེམས༌ཅན༌ ཚང༌མའེ༌ ཕྲོ༌ནེ༌ ངའེ༌ ཁྱོ༌རང༌ ཅིག༌པོའ༌ ཆད༌པ༌ ཏང༌ངད༌། ཏ༌ནེ༌ཕར༌ལ༌, ནམ༌ཚོག༌པ༌ ཁྱོ༌རང༌ ཤི༌ མི༌ཤི༌ ཁྱོ༌རང༌ གྲོད༌པའེ༌ཀ༌ གྲུལ༌ཨིན༌, སའེ༌ ཐལ༌བའེ༌ ནང༌ང༌ ཏུས༌གྱུན༌ དུག༌ཨིན༌།
GEN 3:15 ངའེ༌ ཁྱོ༌རང༌ དང༌ བུ༌མོ༌ ཉིས༌ཀོ༌ གྲ༌འོ༌ གྱུར༌ཅུག༌ཨིན༌, མ༌ཚད༌ ཁྱོ༌རང༌ངི༌ མིར༌གྱུད༌ དང༌ ཁོའེ༌ མིར༌གྱུད༌དའང༌ གྲ༌འོ༌ གྱུར༌ཨིན༌། ཁོའེ༌ མིར༌གྱུད༌པོའེ༌ ཁྱོ༌རང༌ངི༌ གོའ༌ སྟིང༌ཟིས༌ ཏང༌ཨིན༌, ཡང༌ ཁྱོ༌རང༌ངི༌ ཁོའེ༌ རྐང༌པའེ༌ཀ༌ ཐམས༌ཨིན༌།”
GEN 3:16 ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌མོ༌བོའ༌ མོལས༌, “ཏ༌ ངའེ༌ ཁྱོ༌རང༌ང༌ ཕྲུ༌གུ༌ ཇོར༌རི༌ ཏུས༌ ནགས༌ མང༌ང༌ ཐོང༌ཅུག༌ཨིན༌, ཡང༌ ཟུ༌མོ༌ སྲན༌ཏྲེ༌ ཡོངས༌ཏེ༌ མ༌ནེ༌ ཁྱོ༌རང༌ང༌ ཕྲུ༌གུ༌ མི༌སྐྱེ༌། ཏེ༌ནེའང༌ ཁྱོ༌རང༌ང༌ མག༌པའེ༌ ཕིའ༌ མའ༌ དོད༌པ༌ ཡོང༌ཨིན༌, ཡང༌ ཁོའེ༌ ཁྱོ༌རང༌ངི༌ཀ༌ ཝང༌ སྲུལ༌ཨིན༌།”
GEN 3:17 ཏེ༌ནེ༌ ཡ༌ཝ༌ དཀོན༌མཆོག༌གི༌ བུ༌ཚའ༌ མོལས༌, “ཁྱོ༌རང༌ངི༌ རང༌ངི༌ ན༌མའེ༌ ཁའ༌ཉན༌ཏེ༌ ངའེ༌ མ༌ཟ༌ ཟེར༌ཁན༌ནི༌ ལྕང༌མའེ༌ ཁ༌ཟས༌པོ༌ ཟོས༌། ཁྱོ༌རང༌ངི༌ ཞས༌ཏེ༌, ཏ༌ ངའེ༌ ས༌ཀྱད༌ལ༌ ངན༌ ཏབ༌བད༌, ཏ༌ནེ༌ཕར༌ལ༌ ཀགས༌པོ༌ ཉམ༌པོ༌ མ༌ནེ༌ ཁྱོ༌རང༌ང༌ ཟའ༌ཅེས༌ལ༌ ཁར༌ཇི༌ སྨིན༌ཅུག༌ མི༌ཐུབ༌།
GEN 3:18 ཞིང༌ངི༌ཀ༌ ཙེར༌མང༌ དང༌ ལྗང༌ཙེར༌ མང༌པོའང༌ སྐྱེ༌ཨིན༌, ཡང༌ ཁྱོ༌རང༌ངི༌ སའེ༌ཀ༌ ཏབ༌ཁན༌ དང༌ མ༌ཏབ༌བ༌ སྐྱེས༌ཁན༌ནི༌ སྔོན༌པོ༌གུན༌ ཙལ༌ཏེ༌ ཟེན༌།
GEN 3:19 ཁྱོ༌རང༌ སའེ༌ ནང༌ང༌ དྲེས༌དྲེས༌ ཚག༌པ༌ལ༌, ཁོ༌རང༌ངི༌ ཚད༌པ༌ བིང༌བིང༌ ལས༌ མ༌སྲན༌ཏྲེ༌ ཅོས༌ཏེ༌ མ༌ནེ༌, ཁྱོ༌རང༌ང༌ ཟའ༌ཅེས༌ལ༌ ཁར༌ཇི༌ མི༌ཐོབ༌། ཁྱོ༌རང༌ ས༌ནེ༌ ཅོས༌ཏེ༌ ཨིན༌ པ༌སང༌, ཁྱོ༌རང༌ ལོགས༌ཏེ༌ ས༌ གྱུར༌ཨིན༌།”
GEN 3:20 ཨ༌དམ༌མི༌ ཁོ༌རང༌ངི༌ ན༌མའེ༌ མིང༌ང༌ ཧ༌ཝ༌ ཏགས༌, ཅིའ༌ཟེར༌ན༌ ཁོ༌ མི༌ཚང༌མའེ༌ ཨ༌མ༌ གྱུར༌ཨིན༌།
GEN 3:21 ཡང༌ ཡ༌ཝ༌ དཀོན༌མཆོག༌གི༌ སེམས༌ཅན༌ནི༌ པགས༌པའ༌ ཀོས༌ ཙེམས༌ཏེ༌ ཨ༌དམ༌ དང༌ ཁོའེ༌ ན༌མ༌ སྐོན༌ན༌ ཛདས༌།
GEN 3:22 ཏེ༌ནེ༌ ཡ༌ཝ༌ དཀོན༌མཆོག༌གི༌ མོལས༌, “ལྟོས༌སའང༌, ཏ༌ ཁོང༌ ཉིས༌ཀོའ༌ ཟང༌པོ༌ དང༌ ངན༌པ༌ ཤེས༌ཏེ༌, ང༌དང༌གུན༌ ཙོགས༌ གྱུར༌ཏེ༌ ཨིན༌ནོག༌། ཏ༌ ཁོང༌གུན༌ལ༌ ཏེ༌ སྲོག༌ ཏང༌ཁན༌ནི༌ ལྕང༌མའེ༌ ཁ༌ཟས༌པོ༌ ལེན༌ཏེ༌ ཟའ༌ཅུག༌ མ༌གོས༌, ཏེ༌ མ༌ནེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།”
GEN 3:23 ཏེན༌ན༌བོའེ༌ཕིའ༌ ཡ༌ཝ༌ དཀོན༌མཆོག༌གི༌ ཀ༌ ས༌བོའེ༌ ཀ༌ནེ༌ ཁོ༌ ཞང༌ང༌ ཛད༌ཏེ༌ ཨིན༌པིན༌ ཏེན༌ན༌ ས༌ བད༌ཅེས༌ལ༌ ཁོང༌གུན༌ ཨི༌དན༌ ཚས༌ནེ༌ ཕི༌ལོག༌ག༌ ཕིང༌ང༌ ཛདས༌
GEN 3:24 ཁོང༌གུན༌ ཚས༌ནེ༌ ཕིང༌ཚར༌ཏེ༌ སྟིང༌ནེ༌, ཡ༌ཝ༌ དཀོན༌མཆོག༌གི༌ སྲོག༌ སལ༌ཁན༌ནི༌ ལྕང༌མ༌ སྐྱོབ༌ཅེས༌སི༌ ཕིའ༌ ཚས༌སི༌ ཤར༌ ཆོགས༌ལ༌, སྲུང༌སྐྱོབ༌ ཛད༌ཁན༌ནི༌ ཆེ༌ར༌བེམ༌གུན༌ དང༌ མེ༌ བར༌ཁན༌ནི༌ ར༌འི༌ ཡུག༌ཨིན༌ བོར༌ར༌ ཛདས༌།
GEN 4:1 ཨ༌དམ༌ དང༌ ཁོའེ༌ ན༌མ༌ ཧ༌ཝ༌ ཉིས༌ཀོ༌ ཛོམས༌ཏེ༌, ཧ༌ཝ༌ སྐྱེ༌ཅེས༌མ༌ཞིག༌ གྱུར༌། ཡང༌ བུ༌ཚ༌ ཀ༌ཡིན༌ ཟེར༌ཁན༌བོ༌ སྐྱེས༌པ༌ ཁོའེ༌ ཟེརས༌ “ཡ༌ཝ༌ དཀོན༌མཆོག༌གི༌ རོགས༌ ཉམ༌པོ༌ ང༌ བུ༌ཚ༌ཞིག༌ ཇོར༌།”
GEN 4:2 ཏུས༌བན༌ཤིག༌གི༌ སྟིང༌ནེ༌, ཧ༌ཝའ༌ ཀ༌ཡིན༌ནི༌ ནོ༌ ཨ༌བེལ༌ སྐྱེས༌། ཁོང༌གུན༌ ཆེན༌མོ༌ སོང༌ཏེ༌, ཨ༌བེལ༌ ལུག༌རྫི༌ ཡང༌ ཀ༌ཡིན༌ ཞིང༌བད༌པ༌ཞིག༌ གྱུར༌།
GEN 4:3 ཞག༌ཤིག༌, ཀ༌ཡིན༌ནི༌ ཁོ༌རང༌ངི༌ སྟོན༌ཐོག༌གི༌ ཁག༌ཅིག༌ ཡ༌ཝའ༌ ཆོད༌པའ༌ ཕུལས༌།
GEN 4:4 ཡང༌ ཨ༌བེལ༌ལིའང༌ ཁོ༌རང༌ངི༌ ལུག༌ཁྱུའི༌ ནང༌ནེ༌ ཚང༌མའེ༌སང༌ རིན༌ཅན༌ གོ༌མ༌ སྐྱེས༌ཁན༌ ལུ༌གུའི༌ ཚང༌མའེ༌སང༌ གྱལ༌ལ༌ ཚིལ༌ཅན༌ནི༌ ཤ༌བོ༌ ཡ༌ཝའ༌ ཆོད༌པའ༌ ཕུལས༌། ཡ༌ཝའ༌ ཨ༌བེལ༌ལི༌ ཕུལ༌ཁན༌བོའ༌ ཐུགས༌ཐདས༌,
GEN 4:5 ཨིན༌ནའང༌ ཀ༌ཡིན༌ནི༌ སམ༌ཚུལ༌ དང༌ ཁོའེ༌ ཕུལ༌ཁན༌བོའེ༌ཀ༌ ཐུགས༌ མ༌ཐདས༌། ཏེན༌ན༌བོའེ༌ཕིའ༌ ཀ༌ཡིན༌ལ༌ མ༌ སྲན༌ཏྲེ༌ སྲོ༌ ཡོངས༌ ཡང༌ ཏེ༌བོ༌ ཁོའེ༌ ལྡོང༌ངི༌ཀ༌ སྔོནས༌།
GEN 4:6 ཏེ༌ནེ༌ ཡ༌ཝའེ༌ མོལས༌, “ཅི༌ཕིའ༌ སྲོ༌ ཡོང༌ངད༌, ཡང༌ ཏེ༌བོ༌ ཁྱོ༌རང༌ངི༌ ལྡོང༌ངི༌ཀ༌ ཅི༌ཕིའ༌ སྟན༌ནད༌?
GEN 4:7 འོས༌པ༌ ཅོ༌ན༌, ཅི༌ ངའ༌ ཁྱོ༌རང༌ངི༌ཀ༌ ཐད༌པོ༌ མི༌ཆའ༌? ཨིན༌ནའང༌ ཀལ༌ཏེས༌ ཁྱོ༌རང༌ངི༌ ཀྲང༌པོ༌བོ༌ ཅོའ༌ མེད༌ན༌, ཏེ༌ནེ༌ ཤང༌ ཅོས༌, སྡིག༌པ༌ ཁྱོ༌རང༌ ཟུམ༌ཅེས༌ལ༌ ཁྱོ༌རང༌ངི༌ སྒོའེ༌ཀ༌ སྲུངས༌ཏེ༌ ཁྱོ༌རང༌ངི༌ཀ༌ ཝང༌ ཅོའ༌ལ༌ གྲལ༌གྲིག༌ དུག༌། ཨིན༌ནའང༌ ཁྱོ༌རང༌ངི༌ ཁོའ༌ ཕམ༌ཀལ༌ཏེ༌ ཁོའེ༌ཀ༌ ཝང༌ ཅོ༌གོས༌།”
GEN 4:8 ཞག༌ཤིག༌, ཀ༌ཡིན༌ནི༌ རང༌ངི༌ ནོ༌ ཨ༌བེལ༌ལ༌ ཟེརས༌, “ཡོང༌ངའང༌, ང༌དང༌ ཞིང༌ངི༌ཀ༌ ཆེན༌” ཡང༌ ཁོང༌གུན༌ ཏེ༌རུ༌ ཡོད༌ ཟ༌ནེ༌, ཀ༌ཡིན༌ནི༌ ཧུན༌མེད༌ལ༌ རང༌ངི༌ ནོ༌ ཨ༌བེལ༌ལི༌ཀ༌ སྤུང༌གོལ༌ ཅོས༌ཏེ༌ སདས༌།
GEN 4:9 སྟིང༌ནེ༌ ཡ༌ཝའེ༌ ཀ༌ཡིན༌ལ༌ བྲིའ༌ ཛདས༌, “ཁྱོ༌རང༌ངི༌ ནོ༌ ཨ༌བེལ༌ ཀ༌ནེ༌ ཡོད༌།” ཀ༌ཡིན༌ནི༌ ཟེརས༌, “ང༌ གྱུས༌མེད༌, ཅི༌ ང༌, ངའེ༌ ནོ༌ སྲུང༌ཁན༌ ཨིན༌ནོག༌ག༌?”
GEN 4:10 ཨིན༌ནའང༌ ཡ༌ཝའེ༌ མོལས༌, “ཁྱོ༌རང༌ངི༌ ཅི༌ ཅོས༌ཏེ༌ ཨིན༌? ཉོན༌, ས༌ཀྱད༌དི༌ ཀ༌ནེ༌ ཁྱོ༌རང༌ངི༌ ནོའེ༌ ཁྲག༌པོའེ༌ ངའ༌ བོད༌དུག༌།
GEN 4:11 ཏ༌ ཁྱོ༌རང༌ང༌ ངན༌ ཕོག༌ཏེ༌ ཁྱོ༌རང༌ངི༌ ནོའེ༌ ཁྲག༌ ཐིམས༌ཁན༌ནི༌ ས༌ཀྱད༌པོའེ༌ ཁྱོ༌རང༌ ཕངས༌ཏེ༌ ཨིན༌།
GEN 4:12 ཁྱོ༌རང༌ངི༌ སའེ༌ཀ༌ སྟོན༌ཐོག༌ ཏབ༌ན༌, ཏེ༌བོའ༌ སྟོན༌ཐོག༌ ཅའང༌ མི༌སྨིན༌། ཏ༌ནེ༌ཕར༌ལ༌ ཁྱོ༌རང༌ང༌ དུག༌ས༌ མེད༌པ༌ ཁྱོ༌རང༌ ས༌ཆ༌ ཅིག༌ནེ༌ ཅིག༌ག༌ ཁྱམ༌ཨིན༌ མི༌ཚེ༌ ཕུད༌གོས༌ཨིན༌།”
GEN 4:13 ཏེ༌ནེ༌ ཀ༌ཡིན༌ནི༌ ཡ༌ཝའ༌ ཞུས༌, “ཉེ༌རང༌ངི༌ ངའ༌ ཆད༌པ༌ ཀལ༌ལ༌ ཛད༌ཁན༌བོ༌ ང༌ ཁུར༌ ཐུབ༌ཅེས༌སི༌ ཁྱུད༌དི༌ སང༌ ཐལ༌ཏེ༌ དུག༌།
GEN 4:14 ཉེ༌རང༌ངི༌ ང༌ ས༌ཀྱད༌ དང༌ ཉེ༌རང༌ངི༌ སྐུན༌དུན༌ནེ༌ ཕང༌ང༌ ཛད༌ཏེ༌ ང༌ འི༌ ཇིག༌རྟེན༌ནི༌ཀ༌ དུག༌ས༌ མེད༌ཁན༌ནི༌ ཁྱམ༌པོ༌ཞིག༌ ཅོའ༌ ཛད༌པ༌, ངའ༌ ཐུག༌ཁན༌གུན༌ནི༌ ང༌ སད༌ད༌ནོག༌།”
GEN 4:15 ཨིན༌ནའང༌ ཡ༌ཝའེ༌ ཁོའ༌ མོལས༌, “ཏེ༌ཟུག༌ མ༌ནེ༌ མི༌ཆ༌, ཀལ༌ཏེས༌ སུ༌ཞིག༌གི༌ ཁྱོ༌རང༌ སད༌ན༌ ཏེ༌བོའ༌ ཆད༌པ༌, ཁྱོ༌རང༌ངི༌ སང༌ རྡུན༌ལྡབ༌ མང༌ང༌ ཕོག༌ཨིན༌།” སུ༌ཞིག༌གིའང༌ ཀ༌ཡིན༌ མི༌སད༌ཅེས༌སི༌ ཕིའ༌ ཡ༌ཝའེ༌ ཁོའེ༌ཀ༌ སྟགས༌ གྱབ༌བ༌ ཛདས༌།
GEN 4:16 ཏེ༌ནེ༌ ཀ༌ཡིན༌ ཡ༌ཝའེ༌ སྐུན༌དུན༌ནེ༌ བེ༌ཏེ༌ སོང༌, ཡང༌ ཨི༌དན༌ནི༌ ཤར༌ ཆོགས༌སི༌ ནས༌ས༌ ནོདྲ༌ ཡང༌ན༌ “ཁོར༌ཨིན༌ དུག༌ཁན༌གུན༌ནི༌ ནས༌ས༌” ཟེར༌སའེ༌ ནང༌ང༌ དུགས༌།
GEN 4:17 ཏུས༌བན༌ཤིག༌གི༌ སྟིང༌ནེ༌, ཀ༌ཡིན༌ ཁོ༌རང༌ངི༌ ན༌མ༌ ཉམ༌པོ༌ ཛོམས༌ཏེ༌, ཁོའེ༌ ན༌མ༌ སྐྱེ༌ཅེས༌མ༌ཞིག༌ གྱུར༌, ཡང༌ ཨེ༌ནོག༌ ཟེར༌ཁན༌ནི༌ བུ༌ཚ༌ཞིག༌ སྐྱེས༌། ཀ༌ཡིན༌ནི༌ གྱལ༌ས༌ཞིག༌ རྩིགས༌ཏེ༌ ཏེ༌བོའ༌ ཁོ༌རང༌ངི༌ བུ༌ཚའེ༌ མིང༌ ཙོགས༌, ཨེ༌ནོག༌ ཏགས༌།
GEN 4:18 ཨེ༌ནོག༌ག༌ ཨི༌རད༌ ཟེར༌ཁན༌ནི༌ བུ༌ཚ༌ཞིག༌ ཡོད༌པིན༌། ཨི༌རད༌ ནི༌ མེ༌ཧུ༌ཇེལ༌ལི༌ ཨ༌བ༌, ཡང༌ མེ༌ཧུ༌ཇེལ༌ ནི༌ མེ༌ཐུ༌ཤེལ༌ལི༌ ཨ༌བ༌, མེ༌ཐུ༌ཤེལ༌ ནི༌ ལ༌མེག༌གི༌ ཨ༌བ༌ ཨིན༌པིན༌།
GEN 4:19 ལ༌མེག༌གི༌, ཨ༌ད༌ དང༌ ཟི༌ལ༌ བུ༌མོ༌ གུན༌ ཉམ༌པོ༌ ན༌མ༌ ཅོས༌།
GEN 4:20 ཨ༌ད༌ལ༌, ཡ༌བལ༌ ཟེར༌ཁན༌ནི༌ བུ༌ཚ༌བོ༌ སྐྱེས༌། ཡ༌བལ༌ ནི༌ སེམས༌ཅན༌ སྲལ༌ཨིན༌, ཀུར༌རི༌ ནང༌ང༌ དུག༌ཁན༌ ཏང༌པོ༌ མི༌བོ༌ ཨིན༌པིན༌།
GEN 4:21 ཁོའེ༌ ནོ༌ ཡུ༌བལ༌ ཟེར༌ཁན༌བོ༌ ཏར༌ཅན༌ནི༌ རོལ༌མོ༌ དང༌ ལིང༌བུ༌ ཕུ༌ཁན༌གུན༌ནི༌ མི༌ ཏང༌པོ༌བོ༌ ཨིན༌པིན༌།
GEN 4:22 ལ༌མེག༌གི༌ ན༌མ༌ ཟི༌ལའ༌ ཏ༌བུལ༌ཀ༌ཡིན༌ ཟེར༌ཁན༌ནི༌ བུ༌ཚ༌བོ༌ སྐྱེས༌། ཁོའེ༌ ལྕགས༌ དང༌ ཟངས༌སི༌ ལག༌ཆ༌གུན༌ ཅོའད༌པིན༌། ཡང༌ ཏ༌བུལ༌ཀ༌ཡིན༌ནི༌ ནོ༌མོ༌ ནི༌ ནའ༌མཧ༌ ཟེར༌ཁན༌བོ༌ ཨིན༌པིན༌།
GEN 4:23 ལ༌མེག༌གི༌ རང༌ངི༌ ན༌མ༌ ཉིས༌ཀོའ༌ ཟེརས༌, “ཨ༌ད༌ དང༌ ཟི༌ལ༌, ངའེ༌ སྤེ༌ར༌ ཉོན༌ཤིག༌། ལ༌མེག༌གི༌ ན༌མ༌གུན༌ ངའེ༌ ཟེར༌ཁན༌བོའ༌ ཉོན༌ཤིག༌། ངའེ༌ ངའ༌ སྤུང༌གོལ༌ ཅོ༌ཁན༌ནི༌ མི༌ཞིག༌ སད༌པིན༌, ང༌ མ༌ཁའ༌ ཕིང༌ཁན༌ནི༌ ཁྱོག༌ཏོང༌ཞིག༌།
GEN 4:24 ཀལ༌ཏེས༌ ཀ༌ཡིན༌ སད༌ཁན༌བོའ༌ རྡུན༌ ལྡབ༌བི༌ ཆད༌པ༌ ཕོག༌ན༌ ཏེ༌ནེ༌ ངའ༌ སད༌ཅེས༌སི༌ རྩོན༌གྲུས༌ ཅོ༌ཁན༌བོའ༌ ཏེ༌བོའེ༌ རྡུན༌ཅུ༌དོན༌རྡུན༌ ལྡབ༌བི༌ ཆད༌པ༌ ཕོག༌ཨིན༌།”
GEN 4:25 ཨ༌དམ༌ རང༌ངི༌ ན༌མ༌ ཉམ༌པོ༌ ཡང༌སྐྱར༌ ཛོམས༌པ༌, ཁོའེ༌ ན༌མ༌ བུ༌ཚ༌ སེད༌ ཟེར༌ཁན༌ཞིག༌ ཇོར༌། ཧ༌ཝའེ༌ ཟེརས༌, “ཀ༌ཡིན༌ནི༌ སད༌ཁན༌ ཨ༌བེལ༌ལི༌ ཚབས༌ལ༌ དཀོན༌མཆོག༌གི༌ ངའ༌ ཡང༌ བུ༌ཚ༌ཞིག༌ སལ༌ལ༌ ཛདས༌།”
GEN 4:26 སེད༌ ཆེན༌མོ༌ སོང༌ཏེ༌ ཁོའེ༌ ན༌མའ༌ བུ༌ཚ༌ཞིག༌ སྐྱེས༌, ཡང༌ ཁོའེ༌ མིང༌ང༌ ཨེ༌ནོཤ༌ ཏགས༌། ཏེ༌ཏུས༌ནེ༌ ཕར༌ལ༌ མི༌གུན༌ནི༌ དཀོན༌མཆོག༌ག༌ ཡ༌ཝ༌ ཟེར༌ཨིན༌ ཅོལ༌ཅེས༌ གོ༌ཟུག༌།
GEN 5:1 འི༌བོ༌ ཨ༌དམ༌མི༌ པུར༌གྱུད༌གུན༌ནི༌ སྐོར༌ལ༌ བྲིས༌ཁན༌ནི༌ ཐོ༌ ཨིན༌ནོག༌། དཀོན༌མཆོག༌གི༌ མི༌ ཛད༌ ཟ༌ནེ༌, ཁོང༌ངི༌ མི༌གུན༌ ཁོང༌རང༌ ཙོགས༌ ཛདས༌།
GEN 5:2 ཏེ༌གུན༌ ཁོང༌ངི༌ བུ༌ཚ༌ དང༌ བུ༌མོ༌ ཛད༌ཏེ༌ ཅིན༌ལབས༌ སལ༌ལ༌ ཛདས༌། ཡང༌ ཏེ༌གུན༌ ཛད༌ ཚར༌ར༌ཅིག༌, མི༌ ཟེར༌ཏེ༌ མིང༌ ཏག༌ག༌ ཛདས༌།
GEN 5:3 ཨ༌དམ༌མ༌ ལོ༌ 130 ཆ༌ ཟ༌ནེ༌ ཁོ༌, ཁོ༌རང༌ངི༌ ཡིབས༌ དང༌ཙོགས༌ ཡོད༌ཁན༌ནི༌ ཕྲུ༌གུ༌ཞིག༌གི༌ ཨ༌བ༌ གྱུར༌། ཁོའེ༌ ཁོ༌རང༌ངི༌ བུ༌ཚ༌བོའ༌ སེད༌ མིང༌ང༌ ཏགས༌།
GEN 5:4 སེད༌ སྐྱེས༌ཏེ༌ སྟིང༌ནེ༌, ཨ༌དམ༌ ཡང༌ ལོ༌ 800 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:5 ཨ༌དམ༌ ལོ༌ 930 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:6 སེད༌ལ༌ ལོ༌ 105 ཆ༌ ཟ༌ནེ༌ ཁོ༌, ཨེ༌ནོཤ༌ཤི༌ ཨ༌བ༌ གྱུར༌།
GEN 5:7 ཨེ༌ནོཤ༌ སྐྱེས༌ཏེ༌ སྟིང༌ནེ༌, སེད༌ ཡང༌ ལོ༌ 807 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:8 སེད༌ ལོ༌ 912 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:9 ཨེ༌ནོཤ༌ལ༌ ལོ༌ 90 ཆའ༌ ཟ༌ནེ༌ ཁོ༌, ཀེ༌ནན༌ནི༌ ཨ༌བ༌ གྱུར༌།
GEN 5:10 ཀེ༌ནན༌ སྐྱེས༌ཏེ༌ སྟིང༌ནེ༌ ཨེ༌ནོཤ༌, ཡང༌ ལོ༌ 815 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:11 ཨེ༌ནོཤ༌ ལོ༌ 905 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:12 ཀེ༌ནན༌ལ༌ ལོ༌ 70 ཆ༌ ཟ༌ནེ༌, ཁོ༌ མ༌ཧ༌ལ༌ལེལ༌ལི༌ ཨ༌བ༌ གྱུར༌།
GEN 5:13 མ༌ཧ༌ལ༌ལེལ༌ སྐྱེས༌ཏེ༌ སྟིང༌ནེ༌ ཀེ༌ནན༌, ཡང༌ ལོ༌ 840 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:14 ཀེ༌ནན༌ ལོ༌ 910 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:15 མ༌ཧ༌ལ༌ལེལ༌ལ༌ ལོ༌ 65 ཆ༌ ཟ༌ནེ༌, ཁོ༌ ཡེ༌རེད༌དི༌ ཨ༌བ༌ གྱུར༌།
GEN 5:16 ཡེ༌རེད༌ སྐྱེས༌ཏེ༌ སྟིང༌ནེ༌ མ༌ཧ༌ལ༌ལེལ༌ ཡང༌ ལོ༌ 830 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:17 མ༌ཧ༌ལ༌ལེལ༌ ལོ༌ 895 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:18 ཡེ༌རེད༌ལ༌ ལོ༌ 162 ཆ༌ ཟ༌ནེ༌, ཁོ༌ ཨེ༌ནོག༌གི༌ ཨ༌བ༌ གྱུར༌།
GEN 5:19 ཨེ༌ནོག༌ སྐྱེས༌ཏེ༌ སྟིང༌ནེ༌ ཡེ༌རེད༌ ཡང༌ ལོ༌ 800 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:20 ཡེ༌རེད༌ ལོ༌ 962 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:21 ཨེ༌ནོག༌ག༌ ལོ༌ 65 ཆ༌ ཟ༌ནེ༌ ཁོ༌ མ༌ཐུ༌ཤེ༌ལག༌གི༌ ཨ༌བ༌ གྱུར༌།
GEN 5:22 མ༌ཐུ༌ཤེ༌ལག༌ སྐྱེས༌ཏེ༌ སྟིང༌ནེ༌ ལོ༌ 300 ཨེ༌ནོག༌གི༌ བྲེལ༌ དཀོན༌མཆོག༌ ཉམ༌པོ༌ མ༌ ཉེ༌མོ༌ ཡོད༌པིན༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:23 ཨེ༌ནོག༌ ལོ༌ 365 སོན༌ཏེའ༌ ལུས༌།
GEN 5:24 དཀོན༌མཆོག༌ དང༌ ཉེ༌མོ༌ བྲེལ༌ ཡོད༌དི༌ ཏུས༌, ཞག༌ཤིག༌ ཨེ༌ནོག༌ སྟོར༌ སོང༌, ཅིའ༌ཟེར༌ན༌ དཀོན༌མཆོག༌གི༌ ཁོ༌ ཁོང༌རང༌ ཡོད༌ས༌ ཁྱེར༌ར༌ ཛདས༌།
GEN 5:25 མ༌ཐུ༌ཤེ༌ལག༌ག༌ ལོ༌ 187 ཆ༌ ཟ༌ནེ༌ ཁོ༌ ལ༌མེག༌གི༌ ཨ༌བ༌ གྱུར༌།
GEN 5:26 ལ༌མེག༌ སྐྱེས༌ཏེ༌ སྟིང༌ནེ༌ མ༌ཐུ༌ཤེ༌ལག༌, ཡང༌ ལོ༌ 782 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:27 མ༌ཐུ༌ཤེ༌ལག༌ ལོ༌ 969 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:28 ལ༌མེག༌ག༌ ལོ༌ 182 ཆ༌ ཟ༌ནེ༌, ཁོ༌ བུ༌ཚ༌ཞིག༌གི༌ ཨ༌བ༌ གྱུར༌།
GEN 5:29 ལ༌མེག༌གི༌ ཁོ༌རང༌ངི༌ བུ༌ཚའ༌ ནོ༌ཨ༌ མིང༌ང༌ ཏགས༌ཏེ༌, ཟེརས༌, “འི༌ བུ༌ཚ༌བོའེ༌ ང༌དང༌གུན༌, དཀོན༌མཆོག༌གི༌ ངན༌ ཏབ༌བ༌ ཛད༌ཁན༌ནི༌, འི༌ ས༌ཀྱད༌པོ༌ བད༌ཅེས༌སི༌ ནགས༌ དང༌ བར༌དོ༌ གུན༌ནི༌ ཀ༌ནེ༌ ཐར༌ཅུག༌ག༌ནོག༌།”
GEN 5:30 ནོ༌ཨ༌ སྐྱེས༌ཏེ༌ སྟིང༌ནེ༌ ལ༌མེག༌ ཡང༌ ལོ༌ 595 སོན༌ཏེའ༌ ལུས༌། ཁོའ༌ ཞན༌ཡང༌ ཕྲུ༌གུ༌, བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 5:31 ལ༌མེག༌ ལོ༌ 777 སོན༌ཏེའ༌ ལུས༌ ཏེ༌ནེ༌ ཤི༌།
GEN 5:32 ནོ༌ཨ༌ ལོ༌ 500 ཆའད༌པིན༌ ནམ༌, ཁོ༌ ཤེམ༌, ཧེམ༌ དང༌, ཡབ༌ཕེད༌ གུན༌ནི༌ ཨ༌བ༌ གྱུར༌།
GEN 6:1 མི༌གུན༌ ཇིག༌རྟེན༌ནི༌ཀ༌ ཕེལ༌ཅེས༌ གོ༌ཟུག༌ ཟ༌ནེ༌ ཁོང༌གུན༌ལ༌ བུ༌མོ༌ མང༌པོའང༌ སྐྱེས༌།
GEN 6:2 དཀོན༌མཆོག༌གི༌ བུ༌ཚ༌གུན༌ནི༌ མིའི༌ བུ༌མོ༌གུན༌ མ༌ཛེས༌མོ༌ ཐོང༌པ༌, ཁོང༌གུན༌ནི༌ ཁོ༌རང༌ ཐད༌ཁན༌ནི༌ བུ༌མོ༌གུན༌ལ༌ ན༌མ༌ ཅོས༌ ཡང༌ ཏེ༌ བུ༌མོ༌གུན༌ནའང༌ ཏེ༌ཟུག༌ ཅོ༌ཅེས༌ལ༌ ཐད༌དད༌པིན༌།
GEN 6:3 ཏེ༌ནེ༌ ཡ༌ཝའེ༌ མོལས༌, “ངའེ༌ མི༌གུན༌ལ༌ ཏང༌ཁན༌ནི༌ ཏེ༌ མི༌ཚེ༌བོ༌ ཁོང༌གུན༌ནི༌ ནང༌ང༌ ཏུས༌གྱུན༌ནི༌ ཕིའ༌ ལུས༌ མི༌ཅུག༌, ཅིའ༌ཟེར༌ན༌ ཁོང༌གུན༌ ཏུས༌གྱུན༌ སོན༌ཏེའ༌ མི༌ལུས༌ཁན༌ནི༌ རིགས༌ནེ༌ ཨིན༌ནོག༌། ཁོང༌གུན༌ ལོ༌ 120 མ༌ནེ༌ སོན༌ཏེའ༌ མི༌ལུས༌།”
GEN 6:4 ཏེ༌ཏུས༌ ཡང༌ སྟིང༌ནེའང༌, ནེ༌ཕི༌ལིམ༌ ཟེར༌ཁན༌ནི༌ མི༌ མ༌ ཆེན༌མོ༌གུན༌ ཇིག༌རྟེན༌ནི༌ཀ༌ དུག༌གད༌པིན༌, ཀ༌གུན༌ དཀོན༌མཆོག༌གི༌ བུ༌ཚ༌གུན༌ དང༌ མིའི༌ བུ༌མོ༌གུན༌ ཛོམས༌ཏེ༌ སྐྱེ༌ཁན༌ནི༌ ཕྲུ༌གུ༌གུན༌ ཨིན༌པིན༌། ཁོང༌གུན༌ ཏེན༌ན༌ ཏུས༌སི༌ སྤའ༌འོ༌གུན༌ དང༌ མག༌གི༌ ནང༌ང༌ ནོལ༌ཁན༌ མིང༌ཅན༌གུན༌ ཨིན༌པིན༌།
GEN 6:5 ཇིག༌རྟེན༌ནི༌ཀ༌ མི༌གུན༌ནི༌ ངན༌པ༌བོ༌ མངས༌ཏེའང༌ རྩོག༌པོ༌ ཡང༌ ཁོང༌གུན༌ནི༌ སམ༌བ༌ དང༌ དོད༌པ༌ ཚང༌མ༌ ཏུས༌གྱུན༌ ངན༌པ༌ ཅོ༌ཅེས༌ ཡོད༌ཁན༌ གུན༌ ཡ༌ཝའེ༌ ཟིགས༌།
GEN 6:6 ཏེ༌ནེ༌ ཁོང༌ངི༌ འི༌ ཇིག༌རྟེན༌ནི༌ཀ༌ མི༌གུན༌ ཅོའ༌ ཛད༌ཁན༌བོའེ༌ཀ༌ ཡ༌ཝའ༌ མ༌སྲན༌ཏྲེ༌ གྱོད༌པ༌ སྐྱེའ༌ ཛདས༌, ཡང༌ ཁོང༌ངི༌ སེམས༌སི༌ ཏིང༌ང༌ སྲན༌ཏྲེ༌ རྡུག༌ངལ༌ ཇུང༌།
GEN 6:7 ཏེ༌བོའེ༌ ཞས༌ཏེ༌ ཡ༌ཝའེ༌ མོལས༌, “ངའེ༌ ཅོ༌ཁན༌ནི༌ མི༌ཚང༌མ༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ཨིན༌། མི༌གུན༌ མ༌ཚད༌ སེམས༌ཅན༌ ཆེན༌མོ༌ དང༌ ཆུ༌ངུན༌ ཡང༌ ནམ༌མི༌ ནང༌ང༌ འུར༌ཁན༌ནི༌ ཅ༌ ཚང༌མའང༌ མེད༌ཁན༌ ཅོ༌ཨིན༌། ཏེ༌གུན༌ ཅོ༌ཁན༌བོའེ༌ཀ༌ ངའ༌ མ༌ ཚེར༌ཁ༌ རག༌།”
GEN 6:8 ཨིན༌ནའང༌ ཡ༌ཝའ༌ ནོ༌ཨའེ༌ཀ༌ ཐུགས༌ཐདས༌།
GEN 6:9 འི༌བོ༌ ནི༌ ནོ༌ཨའེ༌ མི༌ཚེའེ༌ སྐོར༌ལ༌ རུངས༌པོ༌ ཨིན༌ནོག༌། ཏེ༌ཏུས༌ལ༌ ནོ༌ཨ༌ ཅིག༌པོ༌ ནི༌ ཇིག༌རྟེན༌པ༌ ཚང༌མའེ༌ ནང༌ནེ༌ སྐྱོན༌མེད༌ཁན༌ དང༌ མི༌ ཀྲང༌པོ༌ཞིག༌ ཨིན༌པིན༌། ཁོའེ༌ བྲེལ༌ དཀོན༌མཆོག༌ ཉམ༌པོ༌ མ༌ ཉེ༌མོ༌ ཡོད༌པིན༌།
GEN 6:10 ནོ༌ཨའ༌ བུ༌ཚ༌ སུམ༌, ཤེམ༌, ཧེམ༌ དང༌, ཡབ༌ཕེད༌ ཟེར༌ཁན༌གུན༌ ཡོད༌པིན༌།
GEN 6:11 ཏ༌ དཀོན༌མཆོག༌གི༌ འི༌ ཇིག༌རྟེན༌པ༌གུན༌ མ༌ ངན༌པ༌, ཛིང༌མོ༌ དང༌ ནོད༌སྐྱལ༌ཅེས༌ གུན༌ གངས༌ཏེ༌ ཟིགས༌།
GEN 6:12 ཡང༌ དཀོན༌མཆོག༌གི༌ ཇིག༌རྟེན༌བོ༌ ངན༌པའེ༌ གངས༌ཏེ༌ ཟིགས༌, ཅིའ༌ཟེར༌ན༌ ཇིག༌རྟེན༌ནི༌ཀ༌ སྲོག༌ ཡོད༌ཁན༌ ཚང༌མའེ༌ ངན༌པ༌ མི༌ཚེ༌ཞིག༌ ཕུད༌དད༌པིན༌།
GEN 6:13 ཏེ༌ནེ༌ དཀོན༌མཆོག༌གི༌ ནོ༌ཨ༌ མོལས༌, “ཇིག༌རྟེན༌ གང༌པོའེ༌ ནང༌ང༌, འུགས༌ ཡོད༌ཁན༌ ཚང༌མའ༌ སྲོའེ༌ གངས༌ཏེ༌, ཅིག༌ དང༌ ཅིག༌ག༌ ནོད༌སྐྱལ༌ པ༌སང༌, ངའེ༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌ལ༌ ཐག༌ཅད༌ཏེ༌ ཨིན༌།”
GEN 6:14 “ཏེ༌བོའེ༌ཕིའ༌ ཁྱོ༌རང༌ངི༌ གོ༌ཕེར༌ ཟེར༌ཁན༌ནི༌ ཤིང༌ངི༌ མ༌ ཆེན༌མོ༌ གྲུ༌ཟིང༌ཞིག༌ རྩིག༌, ཡང༌ ཏེ༌ནང༌ང༌ ནང༌མིག༌ རིག༌ ཅོས༌། ཏེ༌ནེ༌ ཆུ༌ ནང༌ཀུག༌ག༌ མི༌ཡོང༌ཅེས༌སི༌ ཕིའ༌ ཕི༌ནང༌ ཉིས༌ཀོའ༌ ཏར༌ཀོལ༌ སྐུས༌།
GEN 6:15 གྲུ༌ཟིང༌ངི༌ རིང༌བོ༌ མི༌ཀྲར༌ 135, ཞང༌བོ༌ མི༌ཀྲར༌ 22 དང༌ ཐོན༌བོ༌ མི༌ཀྲར༌ 13 ཡོང༌གོས༌།
GEN 6:16 ཡང༌ ཏེ༌ གྲུ༌ཟིང༌བོའ༌ ཐོག༌གའང༌ ཅོས༌, ཨིན༌ནའང༌ རྩིག༌པ༌ དང༌ ཐོག༌གི༌ ནང༌ང༌ མི༌ཀྲར༌ ཕེད༌དི༌ པར༌ བོར༌གོས༌། གྲུ༌ཟིང༌ངི༌ ནང༌ང༌ ཐོག༌ཚད༌ སུམ༌ ཡང༌ ཆོགས༌ ཅིག༌ག༌ སྒོ༌ ཅོ༌གོས༌།”
GEN 6:17 “ཏ༌, འུགས༌ ཡོད༌ཁན༌ ཚང༌མ༌ མེད༌ཁན༌ ཅོ༌ཅེས༌ལ༌ ངའེ༌ ཇིག༌རྟེན༌ གང༌པོ༌ ཆུ༌ལོག༌གི༌ཆུའི༌ གང༌ཅུག༌ཨིན༌། ཇིག༌རྟེན༌ནི༌ཀ༌ ཡོད༌ཁན༌ ཚང༌མ༌ ཤི༌ཨིན༌།
GEN 6:18 ཨིན༌ནའང༌ ངའེ༌ ཁྱོ༌རང༌ ཉམ༌པོ༌ ཆད༌དོན༌ཞིག༌ ཅོའད༌, ཁྱོ༌རང༌ དང༌ ཁྱོ༌རང༌ངི༌ ན༌མ༌, ཁྱོ༌རང༌ངི༌ བུ༌ཚ༌གུན༌ དང༌ ཁོང༌གུན༌ནི༌ ན༌མ༌གུན༌ གྲུ༌ཟིང༌ངི༌ ནང༌ང༌ ཡོང༌གོས༌།
GEN 6:19 ཡང༌ ཁྱོ༌རང༌ངི༌ སེམས༌ཅན༌ དང༌ ཅ༌ཅིའུ༌ རིགས༌ ཚང༌མའེ༌ ཕོ༌ དང༌ མོ༌ གུན༌ སོན༌ཏེའ༌ ལུས༌ཤེས༌ལ༌ གྲུ༌ཟིང༌ངི༌ ནང༌ང༌ ཁྱོང༌གོས༌།
GEN 6:20 ཅ༌ཅིའུ༌ རིགས༌ ཚང༌མའེ༌ ཆའ༌ཅིག༌, སེམས༌ཅན༌ ཆེན༌མོའེ༌ རིགས༌ ཚང༌མའེ༌ ཆའ༌ཅིག༌ དང༌, སེམས༌ཅན༌ ཆུ༌ངུན༌ནི༌ རིགས༌ ཚང༌མའེ༌ ཆའ༌ཅིག༌, སོན༌ཏེའ༌ ལུས༌ཤེས༌ལ༌ ཁྱོ༌རང༌ངི༌ཀ༌ གྲུ༌ཟིང༌ངི༌ ནང༌ང༌ ཡོང༌ཨིན༌།
GEN 6:21 ཡང༌ ཁྱོ༌རང༌ དང༌ ཏེ༌གུན༌ནི༌ ཟའ༌ཅེས༌སི༌ ཕིའ༌ སྣ༌ཚོགས༌སི༌ ཟ༌གྱུ༌ ཚང༌མ༌ གྲུ༌ཟིང༌ངི༌ ནང༌ང༌ སག༌གོས༌།”
GEN 6:22 ཏེ༌ནེ༌ དཀོན༌མཆོག༌གི༌ ཅོས༌ མོལ༌ཁན༌ ཚང༌མ༌ ནོ༌ཨའེ༌ ཅོས༌།
GEN 7:1 ཏེ༌ནེ༌ ཡ༌ཝའེ༌ ནོ༌ཨ༌ མོལ༌ལ༌ ཛདས༌, “ཁྱོ༌རང༌ དང༌ ཁྱོ༌རང༌ངི༌ ནང༌ཚངས༌ གང༌པོ༌ གྲུ༌ཟིང༌ངི༌ ནང༌ང༌ སོང༌ཤིག༌, ཇིག༌རྟེན༌ གང༌པོའེ༌ ནང༌ང༌ ངའ༌ ཁྱོ༌རང༌ མ༌ནེ༌ ཡང༌སུ༌ཞིག༌གའང༌ ཀྲང༌པོ༌ མི༌ཞིག༌ མ༌ཐོབ༌།
GEN 7:2 རྩང༌མ༌ སེམས༌ཅན༌གུན༌ནི༌ ཕོ༌ དང༌ མོའེ༌ ཆ༌ རྡུན༌རྡུན༌, ཡང༌ རྩང༌མ༌ མན༌ཁན༌ སེམས༌ཅན༌གུན༌ནི༌ ཕོ༌ དང༌ མོའེ༌ ཆ༌ གུན༌, ཁྱོ༌རང༌ ཉམ༌པོ༌ གྲུ༌ཟིང༌ངི༌ ནང༌ང༌ ཉེན༌།
GEN 7:3 ཡང༌ ཅ༌ཅིའུ༌གུན༌ནིའང༌ ཕོ༌ དང༌ མོའེ༌ ཆ༌ རྡུན༌ ཉེན༌། ཆུ༌ལོག༌གི༌ སྟིང༌ནེའང༌, ཇིག༌རྟེན༌ནི༌ཀ༌ སེམས༌ཅན༌ དང༌ ཅ༌ཅིའུ༌ གུན༌ནི༌ རིགས༌ ཚང༌མ༌ སོན༌ཏེའ༌ ལུས༌ཤེས༌སི༌ ཕིའ༌ ཁྱོ༌རང༌ངི༌ ངའེ༌ ཟེར༌ཁན༌གུན༌ ཅོ༌གོས༌།
GEN 7:4 ཞག༌མ༌ རྡུན༌ནི༌ སྟིང༌ནེ༌, ངའེ༌ ཇིག༌རྟེན༌ནི༌ཀ༌ ཚན༌ཉིན༌ 40 ཆར༌པ༌ ཏང༌ཅུགས༌ཏེ༌, ཇིག༌རྟེན༌ གང༌པོའེ༌ ནང༌ང༌ ངའེ༌ ཅོ༌ཁན༌ནི༌ སྲོག༌ ཡོད༌ཁན༌ ཚང༌མ༌ མེད༌ཁན༌ ཅོ༌ཨིན༌།”
GEN 7:5 ནོ༌ཨའེ༌ ཡ༌ཝའེ༌ བཀའ༌ སལ༌ལ༌ ཛད༌ཁན༌ ཚང༌མ༌ ཅོས༌།
GEN 7:6 ནོ༌ཨའ༌ ལོ༌ 600 ཆའད༌པིན༌ ནམ༌ ཇིག༌རྟེན༌ནི༌ཀ༌ ཆུ༌ལོག༌ ཡོངས༌།
GEN 7:7 ཆུ༌ལོག༌ནེ༌ ཐར༌ཅེས༌ལ༌ ནོ༌ཨ༌, ཁོ༌རང༌ངི༌ ན༌མ༌, ཁོ༌རང༌ངི༌ བུ༌ཚ༌གུན༌ དང༌ ཁོང༌གུན༌ནི༌ ན༌མ༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ ཞུགས༌།
GEN 7:8 རྩང༌མ༌ དང༌ རྩང༌མ༌ མན༌ཁན༌ནི༌ སེམས༌ཅན༌ ཆེན༌མོ༌, ཅ༌ཅིའུ༌ དང༌ སའེ༌ཀ༌ གྲུལ༌ཁན༌ནི༌ སེམས༌ཅན༌ ཆུ༌ངུན༌ ཚང༌མ༌,
GEN 7:9 ཕོ༌ དང༌ མོའེ༌ ཆ༌ ཅོས༌ཏེ༌ དཀོན༌མཆོག༌གི༌ བཀའ༌ ནང༌ཞིན༌ ནོ༌ཨ༌ ཡོད༌སའེ༌ གྲུ༌ཟིང༌ངི༌ ནང༌ང༌ ཡོངས༌།
GEN 7:10 ཏེ༌ནེ༌ ཞག༌མ༌ རྡུན༌ནི༌ སྟིང༌ནེ༌, ཇིག༌རྟེན༌བོ༌ ཆུ༌ལོག༌གི༌ ཆུའི༌ གང༌ཅེས༌ གོ༌ཟུགས༌།
GEN 7:11 ནོ༌ཨའ༌ ལོ༌ 600 ཆའེ༌ ཞག༌ག༌ ཀ༌བོ༌ ཟླ༌ཝ༌ ཉིས༌པའི༌ ཞག༌མ༌ 17 པ༌ ཨིན༌པིན༌ ཏེ༌ ཞག༌ག༌ སའེ༌ ཐིལ༌ལ༌ ཡོད༌ཁན༌ནི༌ ཆུ༌ ཚང༌མ༌ ས༌ཀྱད༌ ཡས༌ཏེ༌ བིངས༌ཏེ༌ ཡོངས༌, ཡང༌ ནམ༌ཁའ༌ནེ༌ ཆར༌པ༌བོ༌ ཆུ༌ལོག༌ ཡོང༌ང༌ ཙོགས༌ལ༌ བབས༌།
GEN 7:12 ཇིག༌རྟེན༌ནི༌ཀ༌ ཚན༌ཉིན༌ 40 ཆད༌མེད༌ལ༌ ཆར༌པ༌ ཏངས༌།
GEN 7:13 ཆར༌པ༌ བབས༌ཤེས༌ གོ༌ཟུག༌ ཆའེ༌ ཞག༌ག༌, ནོ༌ཨ༌, ཁོའེ༌ ན༌མ༌, བུ༌ཚ༌ ཤེམ༌, ཧེམ༌ དང༌, ཡབ༌ཕེད༌ སུམ༌ཀོ༌ ཡང༌ ཁོང༌གུན༌ནི༌ ན༌མ༌གུན༌ གྲུ༌ཟིང༌ངི༌ ནང༌ང༌ ཞོནས༌,
GEN 7:14 ཁོང༌གུན༌ ཉམ༌པོ༌ སེམས༌ཅན༌ནི༌ རིགས༌ ཚང༌མའེ༌ ཆའ༌ཅིག༌ ཡོད༌པིན༌: སྲལ༌ཁན༌ དང༌ ནག༌ཚོགས༌སི༌ སེམས༌ཅན༌ ཆེན༌མོ༌ དང༌ ཆུ༌ངུན༌ གུན༌, ཡང༌ ཅ༌ཅིའུ༌འི༌ རིགས༌ ཚང༌མ༌།
GEN 7:15 འུགས༌ ལེན༌ཁན༌ནི༌ སྲོག༌ ཡོད༌ཁན༌ ཚང༌མ༌ ཉིས༌ཉིས༌སི༌ ཆ༌ ཅོས༌ཏེ༌ ནོ༌ཨ༌ ཉམ༌པོ༌ གྲུ༌ཟིང༌ངི༌ ནང༌ང༌ ཡོངས༌།
GEN 7:16 རིགས༌ ཚང༌མའེ༌ ཕོ༌ དང༌ མོ༌ རེ༌རེ༌ ཡོངས༌, ཀ༌ཟུག༌གི༌ ནོ༌ཨའ༌ དཀོན༌མཆོག༌གི༌ མོལ༌ལ༌ ཛད༌ཏེ༌ ཨིན༌པིན༌། ཁོང༌ ཚང༌མ༌ གྲུ༌ཟིང༌ངི༌ ནང༌ང༌ ཞུགས༌ ཚར༌ར༌ཅིག༌, ཡ༌ཝ༌ དཀོན༌མཆོག༌གི༌ སྒོ༌བོ༌ ཅུག༌ག༌ ཛདས༌།
GEN 7:17 ཞག༌མ༌ 40 ཇིག༌རྟེན༌ནི༌ཀ༌ ཆར༌པ༌ ཆད༌མེད༌ལ༌ བབས༌, ཡང༌ ཆུ༌ལོག༌གི༌ ཆུ༌ ཕེལ༌པ༌ ས༌ཀྱད༌ ཆུའི༌ གངས༌ཏེ༌ གྲུ༌ཟིང༌བོ༌ ས༌ཀྱད༌ནེ༌ ཐོན༌པོའ༌ སྟགས༌།
GEN 7:18 སའེ༌ཀ༌ ཆུ༌ མང༌ནེ༌ མང༌ང༌ ཕེལ༌ཨིན༌ སོང༌པ༌ གྲུ༌ཟིང༌བོ༌ ཆུའི༌ ཁེ༌ཐོག༌ག༌ ཇིགས༌པ༌ མེད༌པ༌ ལྡིངས༌།
GEN 7:19 སྟིང༌ཇུག༌ག༌ ཇིག༌རྟེན༌ནི༌ རི༌ ཐོ༌ཤོག༌གུན༌ནའང༌ ཆུའི༌ ནང༌ང༌ ནུབ༌།
GEN 7:20 ཆུ༌ ཕེལ༌ཨིན༌ སོང༌ཏེ༌, རི༌ ཐོ༌ཤོག༌གུན༌ནི༌ སང༌ མི༌ཀྲར༌ 6 ཐོའ༌ སོང༌།
GEN 7:21 ཇིག༌རྟེན༌ནི༌ཀ༌ ཡོད༌ཁན༌ནི༌ སྲོག༌ ཡོད༌ཁན༌ ཚང༌མ༌ ཤི༌: ཅ༌ཅིའུ༌, སྲལ༌ཁན༌ དང༌ ནག༌ཚོགས༌སི༌ སེམས༌ཅན༌, སའེ༌ཀ༌ གྲུལ༌ཁན༌ནི༌ ཆུ༌ངུན༌ སེམས༌ཅན༌ དང༌, མི༌ཚང༌མ༌།
GEN 7:22 ས༌ སྐམ༌པོའེ༌ཀ༌ དུག༌ཁན༌ནི༌ འུགས༌ ཡོད༌ཁན༌ ཚང༌མ༌ ཤི༌།
GEN 7:23 ཡ༌ཝའེ༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མ༌ མེད༌ཁན༌ ཅོའ༌ ཛདས༌: མི༌གུན༌, སྲལ༌ཁན༌ དང༌ སའེ༌ཀ༌ གྲུལ༌ཁན༌ནི༌ ཆུ༌ངུན༌ སེམས༌ཅན༌ གུན༌ དང༌ ནམ༌མི༌ ཅི༌པ༌ ཚང༌མ༌། ཏེ༌ ཚང༌མ༌ མེད༌ཁན༌ ཅོའ༌ ཛདས༌། ནོ༌ཨ༌ དང༌ ཁོ༌ ཉམ༌པོ༌ གྲུ༌ཟིང༌ངི༌ ནང༌ང༌ ཡོད༌ཁན༌གུན༌ མ༌སྟོགས༌ སུ༌ཞིག༌གའང༌ སོན༌ཏེའ༌ མ༌ལུས༌།
GEN 7:24 ཡང༌ ས༌ཀྱད༌པོ༌ ཞག༌མ༌ 150 ཆུའི༌ ནང༌ང༌ ལུས༌།
GEN 8:1 ཨིན༌ནའང༌ དཀོན༌མཆོག༌གི༌ ནོ༌ཨ༌ དང༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ སྲལ༌ཁན༌ དང༌ ནག༌ཚོགས༌སི༌ སེམས༌ཅན༌ ཚང༌མའ༌ རྗེད༌ད༌ མ༌ཛདས༌། ཁོང༌ངི༌ ཇིག༌རྟེན༌ནི༌ཀ༌ ལུངས༌པོ༌ ཀལ༌ལ༌ ཛད༌པ༌, ཆུ༌ལོག༌གི༌ ཆུ༌ ཉུ༌ངུན༌ ཆ༌ཅེས༌ གོ༌ཟུགས༌།
GEN 8:2 ཁོང༌ངི༌ སའེ༌ ཐིལ༌ནེ༌ བིང༌སའེ༌ ཆུའི༌ ནས༌ས༌གུན༌ ཀག༌ག༌ ཛདས༌, ཡང༌ ནམ༌ཁའ༌ནེ༌ ཆུ༌ལོག༌ ཙོགས༌སི༌ ཆར༌པ༌ ཆད༌ ཅུག༌ག༌ ཛདས༌།
GEN 8:3 ཇིག༌རྟེན༌ནི༌ ནང༌ང༌ གངས༌ཁན༌ནི༌ ཆུ༌ལོག༌གི༌ ཆུ༌ ཚང༌མ༌ ཐིམས༌ཨིན༌ ཉུ༌ངུན༌ ཆེན༌ སོང༌། ཞག༌མ༌ 150 སྟིང༌ནེ༌,
GEN 8:4 ཆུ༌ལོག༌ གོ༌ཟུགས༌ཏེ༌, ཟླ༌ཝ༌ 7 པའེ༌ ཞག༌མ༌ 17 ནི༌ ཞག༌ག༌ གྲུ༌ཟིང༌བོ༌ ཨ༌ར༌རད༌ ཟེར༌ཁན༌ནི༌ རི༌གྱུད༌གུན༌ནི༌ཀ༌ ཁད༌ཏེ༌ ལུས༌།
GEN 8:5 ཡང༌ ཆུ༌གུན༌ ཆད༌མེད༌ལ༌, ཟླ༌ཝ༌ 10 ཚོག༌པ༌ ཉུ༌ངུན༌ ཆེན༌ སོང༌། ཏེ༌ནེ༌ ཏེན༌ན༌ ཟླ༌ཝའེ༌ གོ༌མའེ༌ ཞག༌ག༌, རིའི༌ གོ༌གུན༌ ཆུ༌ནེ༌ ཕི༌ལོག༌ག༌ བིང༌ཏེ༌ ཐོང༌།
GEN 8:6 རི༌ གོ༌གུན༌ ཐོང༌ཏེ༌ ཞག༌མ༌ 40 སྟིང༌ནེ༌, ནོ༌ཨའེ༌ ཁོ༌རང༌ངི༌ ཅོས༌ཁན༌ནི༌ གྲུ༌ཟིང༌ངི༌ ཀར༌ཁུང༌བོ༌ ཕེས༌ཏེ༌,
GEN 8:7 ཕོ༌རོག༌ཞིག༌ ཕུདས༌། ཁོ༌ ཆུ༌ སྐམས༌ཏེ༌ ས༌ཀྱད༌ བིང༌བིང༌ འུར༌ཨིན༌ དུགས༌ཏེ༌, གྲུ༌ཟིང༌ངི༌ཀ༌ ལོགས༌ཏེ༌ མ༌ནེ༌ མ༌ཡོངས༌།
GEN 8:8 ཏེ༌ནེ༌ ནོ༌ཨའེ༌ ཆུ༌ སྐམས༌ཏེ༌ ས༌ཀྱད༌ སྐམ༌པོ༌ བིངས༌ཏེ༌ དུག༌ག༌ ལྟ༌ཅེས༌ལ༌ ཕུར༌གོན༌ཞིག༌ ཕུདས༌།
GEN 8:9 ཨིན༌ནའང༌ ཕུར༌གོན༌ལ༌ རང༌ངི༌ རྐང༌པ༌ བོར༌ཅེས༌ལ༌ ནས༌ས༌ མ༌ཐོབ༌, ཅིའ༌ཟེར༌ན༌ ཇིག༌རྟེན༌ ཏ༌རུང༌ངའང༌ ཆུའི༌ ནང༌ང༌ ནུབས༌ཏེ༌ ཡོད༌པིན༌། ཕུར༌གོན༌བོ༌ ནོ༌ཨ༌ ཡོད༌ས༌ གྲུ༌ཟིང༌ངི༌ ནང༌ང༌ ལོགས༌ཏེ༌ ཡོངས༌པ༌, ནོ༌ཨའེ༌ ཁོ༌རང༌ངི༌ ལག༌པ༌ ཕི༌ལོག༌ག༌ ཕིངས༌ཏེ༌, ཕུར༌གོན༌བོ༌ གྲུ༌ཟིང༌ངི༌ ནང༌ང༌ ཁྱོངས༌།
GEN 8:10 ཞག༌པོ༌ རྡུན༌ སྲིངས༌ཏེ༌ སྟིང༌ནེ༌, ནོ༌ཨའེ༌ ཕུར༌གོན༌བོ༌ ཡང༌སྐྱར༌ ཕུདས༌།
GEN 8:11 ཕི༌ཏོག༌ ཕུར༌གོན༌བོ༌ ལོགས༌ཏེ༌ ཡོང༌ ཟ༌ནེ༌, ཁོའེ༌ ཁམ༌ཅུའི༌ ནང༌ང༌ ཨོ༌ལིཝ༌ཝི༌ ལྕང༌མའེ༌ ལོ༌མ༌ སྔོན༌པོ༌ཞིག༌ ཁུར༌ཏེ༌ ཐོང༌པ༌, ནོ༌ཨའ༌, ཇིག༌རྟེན༌ནི༌ ཀ༌ནེ༌ ཆུ༌ ཧ༌ལམ༌ ཚར༌ཏེ༌ ཨིན༌ཅེས༌པོ༌ ཧ༌གོ༌།
GEN 8:12 ཏེ༌ནེ༌ ཡང༌ཞག༌པོ༌ རྡུན༌ སྲིངས༌ཏེ༌, ཁོའེ༌ ཕུར༌གོན༌བོ༌ ཡང༌ ལམ༌ཅུགས༌, ཨིན༌ནའང༌ འི༌ ལན༌ ཁོ༌ ནོ༌ཨའེ༌ཀ༌ ལོགས༌ཏེ༌ མ༌ནེ༌ མ༌ཡོངས༌།
GEN 8:13 ཏ༌ ནོ༌ཨ༌ ལོ༌ 601 སོང༌ཏེ༌, ཟླ༌ཝ༌ ཀྲང༌པོའེ༌ གོ༌མའེ༌ ཞག༌ག༌, ས༌ཀྱད༌དི༌ ཀ༌ནེ༌ ཆུ༌ ཚང༌མ༌ ཧ༌ལམ༌ སྐམས༌ཏེ༌ ཡོད༌པིན༌། ནོ༌ཨའེ༌ གྲུ༌ཟིང༌ངི༌ཀ༌ ཀབས༌ཏེ༌ ཡོད༌ཁན༌བོ༌ ཐེན༌ཏེ༌ ལྟས༌པ༌, ས༌ཀྱད༌ ཚང༌མ༌ སྐམས༌ཨིན༌ ཐོང༌།
GEN 8:14 ཏེ༌བོའེ༌ སྟིང༌ནེ༌ ཧ༌ལམ༌ ཟླ༌ཝ༌ 2 ནེ༌, ས༌ཀྱད༌ གང༌པོ༌ སྐམ༌པོ༌ སོང༌།
GEN 8:15 ཏེ༌ནེ༌ དཀོན༌མཆོག༌གི༌ ནོ༌ཨའ༌ མོལ༌ལ༌ ཛདས༌,
GEN 8:16 “ཁྱོ༌རང༌, ཁྱོ༌རང༌ངི༌ ན༌མ༌, བུ༌ཚ༌གུན༌ དང༌ ཁོང༌གུན༌ནི༌ ན༌མ༌གུན༌ གྲུ༌ཟིང༌ནེ༌ བིངས༌ཏེ༌ ཡོང༌།
GEN 8:17 ཡང༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ སྲོག༌ ཡོད༌ཁན༌: ཅ༌ཅིའུ༌, སེམས༌ཅན༌ ཆེན༌མོ༌ དང༌ ཆུ༌ངུན༌ སའེ༌ཀ༌ གྲུལ༌ཁན༌ ཚང༌མ༌ ཕི༌ལོག༌ག༌ ཕིང༌། ཁོང༌གུན༌ གྱས༌ཏེ༌ ཇིག༌རྟེན༌ གང༌པོའེ༌ ནང༌ང༌ ཕེལ༌ཅེས༌སི༌ ཕིའ༌ ཏེ༌ཟུག༌ ཅོས༌།”
GEN 8:18 ཏེ༌ནེ༌ ནོ༌ཨ༌, ཁོ༌རང༌ངི༌ ནང༌ཚངས༌ ཉམ༌པོ༌ གྲུ༌ཟིང༌ངི༌ ནང༌ནེ༌ བིངས༌ཏེ༌ ཡོངས༌།
GEN 8:19 ཡང༌ ཏེ༌ནང༌ང༌ ཡོད༌ཁན༌ནི༌ ཆེན༌མོ༌ དང༌ ཆུ༌ངུན༌ སེམས༌ཅན༌ དང༌ ཅ༌ཅིའུ༌ ཚང༌མ༌ ཉིས༌ཉིས༌སི༌ ཆ༌ ཅོས༌ཏེ༌ བིང༌ཏེ༌ ཡོངས༌།
GEN 8:20 ཏེ༌ནེ༌ ནོ༌ཨའེ༌ ཡ༌ཝའ༌ ཆོད༌པ༌ ཕུལ༌ཅེས༌སི༌ ཕིའ༌ ནས༌ས༌ཞིག༌ རྩིགས༌། ཁོའེ༌ རྩང༌མ༌ སེམས༌ཅན༌ དང༌ ཅ༌ཅིའུ༌ གུན༌ནི༌ ནང༌ནེ༌ སྣ༌རེ༌རེ༌ ཁྱོངས༌ཏེ༌ སདས༌ ཡང༌ མེའ༌ སྲགས༌ཏེ༌ ཆོད༌པ༌ ཕུལས༌།
GEN 8:21 ཡ༌ཝའ༌ ཏེ༌ ཆོད༌པའེ༌ ཏྲི༌ཞིམ༌བོ༌ ཚོར༌ར༌ཅིག༌, ཡ༌ཝའེ༌ ཁོང༌རང༌ངི༌ སེམས༌སི༌ ནང༌ང༌ མོལ༌ལ༌ ཛད༌, “མི༌གུན༌ནི༌ ཞས༌ཏེ༌ ངའེ༌ འི༌ ཇིག༌རྟེན༌བོ༌ ཡང༌ ཆུ༌ ཉམ༌པོ༌ མ༌ནེ༌ མེད༌ཁན༌ མི༌ཅོ༌། ཆུ༌ངུན༌ནི༌ ཏུས༌ནེ༌ ཕར༌ལ༌, མི༌གུན༌ནི༌ སྙིང༌པོ༌ ངན༌པའེ༌ ཆོགས༌ལ༌ ཡོད༌ནའང༌, ངའེ༌ སྲོག༌ ཡོད༌ཁན༌ ཚང༌མ༌ མེད༌ཁན༌ མ༌ནེ༌ མི༌ཅོ༌།
GEN 8:22 ཇིག༌རྟེན༌བོ༌ ལུས༌ལུས༌ ཚོག༌པ༌, ཞིང༌ ཏབ༌ཅེས༌ དང༌ རྔོ༌ཅེས༌, ཚད༌ དང༌ གྲང༌མོ༌, ཡར༌ དང༌ དགུན༌, ཡང༌ ཉི༌མ༌ དང༌ ཚན༌ནི༌ ཏུས༌ གུན༌ ཡོང༌ཨིན༌།”
GEN 9:1 དཀོན༌མཆོག༌གི༌ ནོ༌ཨ༌ དང༌ ཁོའེ༌ བུ༌ཚ༌གུན༌ལ༌ ཅིན༌ལབས༌ སལ༌ཏེ༌ མོལ༌ལ༌ ཛདས༌, “ཇིག༌རྟེན༌ གང༌པོའེ༌ ནང༌ང༌ ཕེལ༌ཅེས༌སི༌ ཕིའ༌ ཕྲུ༌གུ༌ མང༌པོ༌ སྐྱེ༌ཅུག༌ཤིག༌།
GEN 9:2 སའེ༌ཀ༌ དུག༌ཁན༌ནི༌ སེམས༌ཅན༌, ནམ༌ཁའེ༌ ཅ༌, སའེ༌ཀ༌ གྲུལ༌ཁན༌ནི༌ སེམས༌ཅན༌ ཆུ༌ངུན༌ དང༌ ཆུའི༌ ནང༌ང༌ ཡོད༌ཁན༌ནི༌ ཉ༌ ཚང༌མའ༌ ཁྱོ༌རང༌གུན༌ནི༌ ཇིགས༌སི༌ ནང༌ང༌ དུག༌ཨིན༌། ངའེ༌ ཏེ༌ ཚང༌མ༌ ཁྱོ༌ཞའེ༌ ཝང༌ངི༌ ཡོག༌ག༌ ཏང༌ངད༌།
GEN 9:3 ངའེ༌ སྲོག༌ ཡོད༌ཏེ༌ གྲུལ༌ཁན༌ ཚང༌མ༌ ཁྱོ༌ཞའ༌ ཟའ༌ཅེས༌ལ༌ ཏང༌ངད༌, ཀ༌ཟུག༌གི༌ ངའེ༌ ཁྱོ༌ཞའ༌ སྔོན༌པོའེ༌ རིགས༌ དང༌ ཀྲོ༌ནས༌ ཚང༌མ༌ ཏངས༌ཏེ༌ ཨིན༌པིན༌། ཟའ༌ཅེས༌ལ༌ ཏ༌ ངའེ༌ ཁྱོ༌ཞའ༌ ཅི༌ཚང༌མ༌ ཏང༌ངད༌།”
GEN 9:4 “ཨིན༌ནའང༌ ཁྲག༌ ཡོད༌ཁན༌ནི༌ ཤ༌ ཟའ༌ མ༌གོས༌, ཅིའ༌ཟེར༌ན༌ སྲོག༌པོ༌ ཁྲག༌གི༌ ནང༌ང༌ ཡོད༌ཏེ༌ ཨིན༌ནོག༌།
GEN 9:5 ཀལ༌ཏེས༌ མི༌ཞིག༌གི༌ སྲོག༌ ལེན༌ན༌, ཏེ༌ སྲོག༌ ལེན༌ཁན༌བོའ༌ ཤི༌ཅེས༌སི༌ ཆད༌པ༌ ཕོག༌གོས༌། སེམས༌ཅན༌ ཨིན༌གྲོ༌ ཡ༌ མི༌, མི༌ སད༌ཁན༌བོ༌ སད༌གོས༌།”
GEN 9:6 “མི༌ སད༌ཁན༌བོའ༌ ཤི༌ཅེས༌སི༌ ཆད༌པ༌ ཞན༌ཡང༌ མི༌གུན༌ནི༌ ཏང༌གོས༌, ཅིའ༌ཟེར༌ན༌ དཀོན༌མཆོག༌གི༌ མི༌བོ༌ ཁོང༌རང༌ ཙོགས༌ ཅོའ༌ ཛད༌ཏེ༌ ཨིན༌ནོག༌།
GEN 9:7 ཡང༌ ཁྱོ༌ཞ༌གུན༌, ཇིག༌རྟེན༌ གང༌པོའེ༌ ནང༌ང༌ ཕེལ༌ཅེས༌སི༌ ཕིའ༌ ཕྲུ༌གུ༌ མང༌པོ༌ སྐྱེ༌ཅུག༌ཤིག༌།”
GEN 9:8 ཏེ༌ནེ༌ དཀོན༌མཆོག༌གི༌ ནོ༌ཨ༌ དང༌ ཁོའེ༌ བུ༌ཚ༌གུན༌ལ༌ མོལས༌,
GEN 9:9 “ཏ༌ ངའེ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཏངས༌ཁན༌ནི༌ ཆད༌དོན༌བོ༌ ཏན༌ཏན༌ ཅོའད༌།
GEN 9:10 ཏེ༌ ཆད༌དོན༌བོ༌ ཁྱོ༌རང༌ ཉམ༌པོ༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ སྲོག༌ ཡོད༌ཁན༌: སྲལ༌ཁན༌ དང༌ ནག༌ཚོགས༌སི༌ སེམས༌ཅན༌, དང༌ ཅ༌ཅིའུ༌ ཡང༌ན༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མའེ༌ ཕིའང༌ ཨིན༌།
GEN 9:11 འོ༌ན༌, ངའེ༌ ཁྱོ༌རང༌ ཉམ༌པོ༌ ཅོ༌ཁན༌ནི༌ ཆད༌དོན༌བོ༌ སྟན༌པོ༌ ཅོའད༌། ཏ༌ནེ༌ཕར༌ལ༌ ཆུ༌ལོག༌གི༌ ཆུའི༌ སྲོག༌ ཡོད༌ཁན༌ ཚང༌མ༌ མེད༌ཁན༌ མ༌ནེ༌ མི༌ཅོ༌། འི༌ ཇིག༌རྟེན༌བོ༌ ཆུ༌ལོག༌གི༌ ཆུ༌ གྱུད༌ཏེ༌ མེད༌ཁན༌ མ༌ནེ༌ མི༌ཆ༌།”
GEN 9:12 དཀོན༌མཆོག༌གི༌ མོལས༌ལ༌ ཛདས༌, “འི༌བོ༌ ངའེ༌ ཁྱོ༌ཞ༌གུན༌ དང༌ སྲོག༌ ཡོད༌ཁན༌ ཚང༌མ༌, ཡང༌ ཡོང༌ཅེས༌ཅན༌ནི༌ ཏུས༌སི༌ མིར༌གྱུད༌ ཚང༌མ༌ ཉམ༌པོ༌ ཅོས༌ཁན༌ནི༌ ཆད༌དོན༌ནི༌ སྟགས༌པོ༌ ཨིན༌།
GEN 9:13 ངའེ༌ ནམ༌ཁའེ༌ ནང༌ང༌ ཟའ༌ཆུ༌ཐུང༌ཞིག༌ ཤར༌ཅུག༌ཨིན༌, ཏེ༌བོ༌ ཁྱོ༌ཞའ༌ དང༌ ཇིག༌རྟེན༌ གང༌པོ༌ ཉམ༌པོ༌ ངའེ༌ ཆད༌དོན༌ ཅོ༌ཁན༌ནི༌ སྟགས༌པོ༌ ཨིན༌།
GEN 9:14 ངའེ༌ སྲིན༌ ཀལ༌ཏེ༌ ཇིག༌རྟེན༌ནི༌ཀ༌ ཆར༌པ༌ ཕབས༌ཏེ༌, ནམ༌མི༌ ནང༌ང༌ ཟའ༌ཆུ༌ཐུང༌ ཐོང༌ ཟ༌ནེ༌,
GEN 9:15 ངའ༌ ཁྱོ༌ཞའ༌ དང༌ སྲོག༌ ཡོད༌ཁན༌ ཚང༌མ༌ ཉམ༌པོ༌ ཅོ༌ཁན༌ནི༌ ཆད༌དོན༌བོ༌ ཨིད༌ཏུ༌ ཡོང༌ཨིན༌། ཆུ༌ལོག༌གི༌ ཆུའི༌ སྲོག༌ ཡོད༌ཁན༌ ཚང༌མ༌ ཡང༌སྐྱར༌ མེད༌ཁན༌ མ༌ནེ༌ མི༌ཅོ༌།
GEN 9:16 ཟའ༌ཆུ༌ཐུང༌ ནམ༌མི༌ ནང༌ང༌ ཤར༌ཏེ༌ ཐོང༌ང༌ཅིག༌, ངའ༌ ཇིག༌རྟེན༌ནི༌ཀ༌ ཡོད༌ཁན༌ནི༌ སྲོག༌ ཡོད༌ཁན༌ ཚང༌མ༌ ཉམ༌པོ༌ ངའེ༌ ཅོ༌ཁན༌ནི༌ ཆད༌དོན༌བོ༌ ཨིད༌ཏུ༌ ཡོང༌ཨིན༌།”
GEN 9:17 དཀོན༌མཆོག༌གི༌ ནོ༌ཨ༌ མོལས༌ལ༌ ཛདས༌, “འི༌ ཟའ༌ཆུ༌ཐུང༌བོ༌ ངའེ༌ ཇིག༌རྟེན༌ནི༌ སྲོག༌ ཡོད༌ཁན༌ ཚང༌མ༌ ཉམ༌པོ༌ ཅོ༌ཁན༌ནི༌ ཆད༌དོན༌ནི༌ སྟགས༌པོ༌ ཨིན༌།”
GEN 9:18 གྲུ༌ཟིང༌ངི༌ ནང༌ནེ༌ བིང༌ཁན༌ནི༌ ནོ༌ཨའེ༌ བུ༌ཚ༌གུན༌ ནི༌, ཤེམ༌, ཧེམ༌ དང༌ ཡབ༌ཕེད༌ གུན༌ ཨིན༌པིན༌། ༼ཧེམ༌ ཀེ༌ནན༌ ནི༌ ཨ༌བ༌ ཨིན༌པིན༌།༽
GEN 9:19 ནོ༌ཨའེ༌ འིན༌ན༌ བུ༌ཚ༌ སུམ༌ཀོའེ༌ ཀ༌ནེ༌ ཇིག༌རྟེན༌ནི༌ ནང༌ང༌ མི༌ཚང༌མ༌ ཕེལ༌།
GEN 9:20 ཞིང༌བད༌པ༌ ནོ༌ཨ༌ ནི༌ རྒུན༌ཚས༌ ཏབ༌ཁན༌ ཏང༌པོ༌ མི༌བོ༌ ཨིན༌པིན༌།
GEN 9:21 ཞག༌ཤིག༌, ཁོ༌ རྒུན༌ནི༌ ཆང༌ ཐུངས༌ཏེ༌ ར༌རོས༌པ༌, ཁོ༌ ལྗེར༌ཉལ༌ལ༌ ཁོ༌རང༌ངི༌ ཀུར༌རི༌ ནང༌ང༌ ཉིད༌ལ༌ སོང༌།
GEN 9:22 ཀེ༌ནན༌ནི༌ ཨ༌བ༌, ཧེམ༌, ཁོ༌རང༌ངི༌ ཨ༌བའེ༌ ཀུར༌རི༌ ནང༌ང༌ སོང༌པ༌, ཨ༌བ༌ ལྗེར༌ཉལ༌ལ༌ ཡོད༌ཁན༌བོ༌ ཐོང༌། ཁོ༌ ཕི༌ལོག༌ག༌ ཡོངས༌ཏེ༌ ཁོ༌རང༌ངི༌ ཨ༌ཅོ༌ ཉིས༌ཀོའ༌ ཤདས༌།
GEN 9:23 ཏེ༌ནེ༌ ཤེམ༌ དང༌ ཡབ༌ཕེད༌དི༌ རས༌ ཆེན༌མོ༌ཞིག༌ ཁོ༌རང༌གུན༌ནི༌ སྤུང༌པའེ༌ཀ༌, ལག༌པ༌ ཉམ༌པོ༌ ཟུམས༌ཏེ༌ གྱབ༌ལོག༌ག༌ ཀུར༌རི༌ ནང༌ང༌ ཨ༌བ༌ ཡོད༌ས༌ སོང༌ཏེ༌, ནོ༌ཨ༌ ལྗེར༌ཉལ༌ ཡོད༌ཁན༌བོ༌ ཀབས༌། ཏེ༌ཟུག༌ ཅོ༌ ཟ༌ནེ༌ ཨ༌བ༌ ལྗེར༌ཉལ༌ལ༌ མི༌ཐོང༌ཅེས༌སི༌ ཕིའ༌ ཁོང༌གུན༌ནི༌ ལྡོང༌བོ༌ ཨ༌བ༌ མེད༌ས༌ ཆོགས༌ལ༌ གྱུརས༌།
GEN 9:24 ནོ༌ཨ༌ ར༌ཞུ༌ཏེ༌ ཉིད༌ཚད༌ད༌དང༌, ཁོའ༌ ཁོའེ༌ བུ༌ཚ༌ ཆུང༌ཤོག༌པོའེ༌ ཁྲེལ༌བའེ༌ ལས༌ ཅོས༌ཁན༌བོ༌ གྱུས༌སོང༌།
GEN 9:25 ཡང༌ ཁོའེ༌ ཟེརས༌, “ཧམ༌མི༌ བུ༌ཚ༌ ཀེ༌ནན༌ དང༌ ཁོའེ༌ པུར༌གྱུད༌གུན༌ལ༌ ངན༌ ཕོག༌ཤིག༌། ཁོང༌གུན༌ ཁོང༌ངི༌ ཨ༌ཅོ༌གུན༌ནི༌ ཚེ༌ཡོག༌ ཚང༌མའེ༌སང༌ རྩི༌ཝ༌ མེད༌ཁན༌བོ༌ གྱུར༌ཤིག༌།”
GEN 9:26 ནོ༌ཨའེ༌ ཡང༌ ཟེརས༌, “ཡ༌ཝ༌, ཤེམ༌མི༌ དཀོན༌མཆོག༌ག༌ སྟོད༌པ༌ ཐོབ༌ཤིག༌, ཡང༌ ཀེ༌ནན༌ ཁོའེ༌ ཚེ༌ཡོག༌ གྱུར༌ཤིག༌།
GEN 9:27 དཀོན༌མཆོག༌གི༌ ཡབ༌ཕེད༌དི༌ མིར༌གྱུད༌གུན༌ ཕེལ༌ཅུག༌ཤིག༌། ཡབ༌ཕེད༌ དང༌ ཤེམ༌མི༌ མིར༌གྱུད༌གུན༌ནི༌ མི༌ཚེ༌ ཉམ༌པོ༌ ཕུད༌ཤིག༌། ཡང༌ ཀེ༌ནན༌པ༌གུན༌ ཡབ༌ཕེད༌དི༌ པུར༌གྱུད༌གུན༌ནི༌ ཚེ༌ཡོག༌ གྱུར༌ཤིག༌།”
GEN 9:28 ཆུ༌ལོག༌གི༌ སྟིང༌ནེ༌ ནོ༌ཨ༌ ཡང༌ ལོ༌ 350 སོན༌ཏེའ༌ ལུས༌།
GEN 9:29 ཁོ༌ ལོ༌ 950 སོན༌ཏེའ༌ ལུས༌ ཏེ༌ནེ༌ ཤི༌།
GEN 10:1 འི༌གུན༌ ནི༌ ནོ༌ཨའེ༌ བུ༌ཚ༌ ཤེམ༌, ཧེམ༌ དང༌ ཡབ༌ཕེད༌ གུན༌ནི༌ མིར༌གྱུད༌གུན༌ ཨིན༌ནོག༌། ཆུ༌ལོག༌གི༌ སྟིང༌ནེ༌, ཁོང༌གུན༌ལ༌ ཕྲུ༌གུ༌ མང༌པོ༌ ཇོར༌།
GEN 10:2 ཡབ༌ཕེད༌ ནི༌, གོ༌མེར༌, མ༌གོག༌, མ༌དའི༌, ཡ༌ཝན༌, ཏུ༌བལ༌, མེ༌ཤེག༌ དང༌ ཀྲི༌རས༌ གུན༌ནི༌ ཨ༌བ༌ ཨིན༌པིན༌།
GEN 10:3 གོ༌མེར༌ ནི༌, ཨེཤ༌ཀི༌ནེཟ༌, རི༌ཕད༌ དང༌ ཏོ༌གར༌མ༌ གུན༌ནི༌ ཕ༌མེས༌པོ༌ ཨིན༌པིན༌།
GEN 10:4 ཡ༌ཝན༌ ནི༌, ཨེ༌ལི༌ཤ༌, ཏར༌ཤིཤ༌, ཀིཏ༌ དང༌ རོ༌ད༌ གུན༌ནི༌ ཕ༌མེས༌པོ༌ ཨིན༌པིན༌།
GEN 10:5 ཡ༌ཝན༌ ནི༌, ཚོའེ༌ ཐའ༌མ༌ དང༌ ཚོ༌ལིང༌ངི༌ཀ༌ དུག༌ཁན༌ནི༌ མིར༌གྱུད༌ གུན༌ནི༌ ཕ༌མེས༌པོ༌ ཨིན༌པིན༌། འི༌གུན༌ ཡབ༌ཕེད༌དི༌ མིར༌གྱུད༌གུན༌ ཨིན༌ནོག༌ ཀ༌གུན༌ལ༌ རང༌རང༌ངི༌ རིགས༌, སྐད༌ དང༌ ཡུལ༌ གུན༌ ཡོད༌པིན༌།
GEN 10:6 ཧེམ༌མི༌ བུ༌ཚ༌གུན༌ ཀུཤ༌, ཨི༌ཇིབ༌, ཕུཏ༌ དང༌ ཀེ༌ནན༌ གུན༌ ཨིན༌པིན༌།
GEN 10:7 ཀུཤ༌ ནི༌ སི༌བ༌, ཧ༌ཝི༌ལ༌, སབ༌ཏ༌, ར༌མཧ༌ དང༌ སབ༌ཏི༌ཀ༌ གུན༌ནི༌ ཕ༌མེས༌པོ༌ ཨིན༌པིན༌། ཡང༌ ར༌མཧ༌ ནི༌ ཤི༌བ༌ དང༌ དི༌དན༌ གུན༌ནི༌ ཕ༌མེས༌པོ༌ ཨིན༌པིན༌།
GEN 10:8 ཀུཤ༌ ནིམ༌རོད༌དི༌ ཨ༌བ༌ གྱུར༌། ནིམ༌རོད༌ ནི༌ ཇིག༌རྟེན༌ནི༌ ནང༌ང༌ ཞན༌ཡང༌ མིར༌གྱུད༌གུན༌ལ༌ ཕམ༌ཀལ༌ཁན༌ནི༌ མག༌མི༌ མ༌ ཀྲག༌པོ༌ ཏང༌པོ༌བོ༌ གྱུར༌།
GEN 10:9 ནིམ༌རོད༌ ནི༌ ལིངས༌པ༌ མ༌ ཁས༌པ༌ཞིག༌གའང༌ ཨིན༌པིན༌། ཏེན༌ན༌བོའེ༌ཕིའ༌ མི༌གུན༌ནི༌, “ཁོ༌ ཇིག༌རྟེན༌ནི༌ ལིངས༌པ༌ ཀྲག༌པོ༌, ནིམ༌རོད༌ ཙོགས༌ དུག༌” ཟེར༌རད༌པིན༌།
GEN 10:10 ཏང༌པོ༌རང༌ ཁོའེ༌ ཝང༌སྲུལ༌ཁན༌ནི༌ གྱལ༌ས༌གུན༌ ནི༌, ཤི༌ནར༌རི༌ ཡུལ༌ལི༌ ནང༌ང༌ ཡོད༌ཁན༌ བ༌བེལ༌, ཨི༌རིག༌, ཨ༌ཀད༌ དང༌ ཀལ༌ནེཧ༌ གུན༌ ཨིན༌པིན༌།
GEN 10:11 ཏེ༌ཀ༌ནེ༌ ཁོའེ༌ ཨ༌སི༌རི༌ཡཱའེ༌ ཡུལ༌ལི༌ ནང༌ང༌ ཁོ༌རང༌ངི༌ གྱལ༌སྲིད༌པོ༌ གྱས༌ཅུགས༌ཏེ༌ ནི༌ནེ༌ཝ༌, རེ༌ཧོ༌བོཐ༌ འིར༌ དང༌ ཀ༌ལའ༌ ཟེར༌ཁན༌ནི༌ གྱལ༌ས༌གུན༌ རྩིག༌ཅུགས༌།
GEN 10:12 ཡང༌ ནི༌ནེ༌ཝ༌ དང༌ ཀ༌ལའ༌ ཉིས༌ཀོའེ༌ ཞུང༌ང༌ ཆགས༌ཏེ༌ ཡོད༌ཁན༌ནི༌ རི༌སིན༌ ཟེར༌ཁན༌ནི༌ གྱལ༌ས༌ ཀྲག༌པོ༌བོའང༌ རྩིག༌ཅུགས༌།
GEN 10:13 ཨི༌ཇིབ༌ ནི༌ ལུད༌པ༌གུན༌, ཨ༌ནམ༌པ༌གུན༌, ལེ༌ཧབ༌པ༌གུན༌, ནབ༌ཏུ༌པ༌གུན༌,
GEN 10:14 ཕ༌ཏུ༌རུས༌པ༌གུན༌, ཀེས༌ལུ༌པ༌གུན༌ ༼ཀ༌བོའེ༌ པུར༌གྱུད༌ ཕི༌ལིས༌ཏི༌པ༌གུན༌ ཨིན༌ནོག༌༽ དང༌ ཀེབ༌ཐོར༌པ༌གུན༌ནི༌ ཕ༌མེས༌པོ༌ ཨིན༌པིན༌།
GEN 10:15 ཀེ༌ནན༌ ནི༌, སི༌དོན༌ ༼ཁོའེ༌ བུ༌ཚ༌ གོ༌བུ༌༽ དང༌ ཧེད༌ གུན༌ནི༌ ཨ༌བ༌ ཨིན༌པིན༌།
GEN 10:16 ཀེ༌ནན༌ ནི༌ ཡེ༌བས༌པ༌གུན༌, ཨ༌མོར༌པ༌གུན༌, གིར༌གཤ༌པ༌གུན༌,
GEN 10:17 ཧིཝ༌པ༌གུན༌, ཨར༌ཀ༌པ༌གུན༌, སིན༌པ༌གུན༌,
GEN 10:18 ཨར༌བིད༌པ༌གུན༌, ཟི༌མར༌པ༌གུན༌ དང༌ ཧ༌མད༌པ༌གུན༌ནིའང༌ ཕ༌མེས༌པོ༌ ཨིན༌པིན༌། སྟིང༌ནེ༌ ཀེ༌ནན༌ནི༌ མིར༌གྱུད༌གུན༌ ནས༌ས༌ མང༌པོའེ༌ ནང༌ང༌ ཕེལ༌།
GEN 10:19 ཡང༌ ཀེ༌ནན༌པ༌གུན༌ནི༌ དུག༌སའེ༌ ས༌ཀྱད༌པོ༌ སི༌དོན༌ནེ༌ ཏངས༌ཏེ༌ གེ༌རར༌, མ༌ཚད༌ ག༌ཟ༌ ཚོག༌པའང༌ ཕེལ༌ཏེ༌ སོང༌། ཡང༌ ཤར༌ ཆོགས༌ལ༌ སོ༌དོམ༌, གོ༌མོ༌ར༌, ཨད༌མཧ༌, ཟི༌བོ༌ཡིམ༌ དང༌ ལ༌ཤ༌ ཚོག༌པའང༌ ཕེལ༌།
GEN 10:20 ཏེ༌གུན༌ ནི༌, ཧེམ༌མི༌ པུར༌གྱུད༌གུན༌ ཨིན༌ནོག༌། ཁོང༌གུན༌ མི༌རིགས༌ གྱུར༌ ཡང༌ མི༌རིགས༌གུན༌ནི༌ ནང༌ང༌ སྡེ༌སོ༌སོའ༌ རང༌རང༌ སོ༌སོའེ༌ སྐད༌ དང༌ ས༌ཀྱད༌ གུན༌ ཡོད༌པིན༌།
GEN 10:21 ཡབ༌ཕེད༌དི༌ ཨ༌ཅོ༌ ཤེམ༌མའང༌ བུ༌ཚ༌ མང༌པོའེ༌ ཨ༌བ༌ གྱུར༌། ཡང༌ ཤེམ༌ ནི༌ ཨེ༌བར༌པ༌གུན༌ནི༌ ཕ༌མེས༌པོ༌ ཨིན༌པིན༌།
GEN 10:22 ཤེམ༌མི༌ བུ༌ཚ༌གུན༌ ཨེ༌ལམ༌, ཨ༌ཤེར༌, ཨར༌ཕ༌ཤེད༌, ལུད༌ དང༌ ཨ༌རམ༌ གུན༌ ཨིན༌པིན༌།
GEN 10:23 ཨ༌རམ༌ ནི༌ ཨུཟ༌, ཧལ༌, གི༌ཏར༌ དང༌ མེ༌ཤེག༌ གུན༌ནི༌ ཕ༌མེས༌པོ༌ ཨིན༌པིན༌།
GEN 10:24 ཨར༌ཕ༌ཤེད༌ ནི༌ ཤེ༌ལག༌གི༌ ཨ༌བ༌, ཡང༌ ཤེ༌ལག༌ ནི༌ ཨེ༌བར༌རི༌ ཨ༌བ༌ གྱུར༌།
GEN 10:25 ཨེ༌བར༌ལ༌ བུ༌ཚ༌ ཉིས༌ ཡོད༌པིན༌: ཅིག༌པོའེ༌ མིང༌ང༌ པེ༌ལེག༌ ༼ཀ༌བོའེ༌ ཏོན༌བོ༌ པོ༌བུད༌ཅེས༌༽ ཅིའ༌ཟེར༌ན༌ ཁོའེ༌ ཏུས༌ལ༌, ཇིག༌རྟེན༌ནི༌ མི༌གུན༌ནི༌ ནང༌ང༌ པོ༌བུད༌། ཡང༌ ཁོའེ༌ ནོའེ༌ མིང༌ང༌ ཡོག༌ཏན༌ ཟེར༌རད༌པིན༌།
GEN 10:26 ཡོག༌ཏན༌ ནི༌ ཨལ༌མོ༌དད༌, ཤི༌ལེཕ༌, ཧ༌ཟར༌མ༌ཝེད༌, ཡི༌ར༌,
GEN 10:27 ཧ༌དོ༌རམ༌, འུ༌ཟལ༌, དིག༌ལ༌,
GEN 10:28 འོ༌བལ༌, ཨ༌བི༌མེལ༌, ཤི༌བ༌,
GEN 10:29 འོ༌ཕིར༌, ཧ༌ཝི༌ལ༌ དང༌ ཡོ༌བབ༌ གུན༌ནི༌ ཕ༌མེས༌པོ༌ ཨིན༌པིན༌, ཡང༌ ཁོང༌གུན༌ ཡོག༌ཏན༌ནི༌ པུར༌གྱུད༌ ཚང༌མ༌ ཨིན༌པིན༌།
GEN 10:30 ཁོང༌གུན༌ དུག༌སའེ༌ ས༌ཀྱད༌པོ༌ མེ༌ཤ༌ནེ༌ ཏངས༌ཏེ༌ ཤར༌ ཆོགས༌ལ༌ ཡོད༌ཁན༌ནི༌ རི༌ ཡུལ༌, སི༌ཕར༌ ཆོགས༌ལའང༌ ཕེལ༌།
GEN 10:31 ཏེ༌གུན༌ ཤེམ༌མི༌ པུར༌གྱུད༌གུན༌ ཨིན༌པིན༌། ཁོང༌གུན༌ མི༌རིགས༌ གྱུར༌ ཡང༌ མི༌རིགས༌གུན༌ནི༌ ནང༌ང༌ སྡེ༌སོ༌སོའ༌ རང༌རང༌ སོ༌སོའེ༌ སྐད༌ དང༌ ས༌ཀྱད༌ གུན༌ ཡོད༌པིན༌།
GEN 10:32 ཏེ༌ ཚང༌མ༌ ནི༌ ནོ༌ཨའེ༌ བུ༌ཚ༌གུན༌ནི༌ པུར༌གྱུད༌གུན༌ ཨིན༌ནོག༌, ཡང༌ མིར༌གྱུད༌ སོ༌སོའེ༌ མིང༌གུན༌ སྐྱེ༌ཚིར༌ ནང༌ཞིན༌ལ༌ བྲིས༌ཏེ༌ ཡོད༌ཏེ༌ ཨིན༌ནོག༌། ཆུ༌ལོག༌གི༌ སྟིང༌ནེ༌ འིན༌ན༌ མི༌རིགས༌གུན༌ནི༌ ཀ༌ནེ༌ ཇིག༌རྟེན༌ གང༌པོའེ༌ ནང༌ང༌ གྱལ༌ཁབ༌གུན༌ ཕེལ༌ཏེ༌ ཨིན༌པིན༌།
GEN 11:1 ཏུས༌ཤིག༌ག༌ ཇིག༌རྟེན༌ གང༌པོའེ༌ མི༌གུན༌ནི༌ ཅའང༌ ཁྱད༌ མེད༌ཁན༌ནི༌ སྐད༌ ཅིག༌ཅིག༌ ཏང༌ངད༌པིན༌།
GEN 11:2 ཤར༌ ཆོགས༌ནེ༌ ཡོང༌ ཟ༌ནེ༌ ཁོང༌གུན༌ ཤི༌ནར༌ ཡུལ༌ལི༌ ཏར༌ཏར༌ ནས༌ས༌ཞིག༌ག༌ ལེབ༌ ཡང༌ ཏེ༌རུ༌ ཚུགས༌ཏེ༌ དུགས༌།
GEN 11:3 ཁོང༌ངི༌ ཅིག༌ དང༌ ཅིག༌ག༌ ཟེརས༌, “ཡོང༌ཤིག༌། ང༌དང༌ངི༌ པག༌བུ༌ ཅོས༌ཏེ༌ སྲན༌ཏྲེ༌ ཆ༌ཅེས༌ལ༌ མེའེ༌ ནང༌ང༌ སྲག༌ཨིན༌།” ཁོང༌གུན༌ནི༌ རྡོའེ༌ ཚབས༌ལ༌ པག༌བུ༌ ཡང༌ ཀ༌ལག༌གི༌ ཚབས༌ལ༌ ཏར༌ཀོལ༌ ཀོལས༌།
GEN 11:4 ཏེ༌ནེ༌ ཁོང༌གུན༌ནི༌ ཟེརས༌, “ཡོང༌ཤིག༌, ང༌དང༌རང༌ངི༌ ཕིའ༌ གྱལ༌ས༌ དང༌ ཏེ༌ནང༌ང༌ ནམ༌ཁའ༌ ཐུག༌ཅེས༌སི༌ པི༌འུ༌ ཐོན༌པོ༌ཞིག༌གའང༌ རྩིགས༌ཏེ༌, ང༌དང༌གུན༌ མིང༌ཅན༌ གྱུར༌ཨིན༌། ཡང༌ ང༌དང༌གུན༌ ཇིག༌རྟེན༌ གང༌པོའེ༌ ནང༌ང༌ བེས༌ཏེ༌ ཆ༌ མི༌གོས༌།”
GEN 11:5 ཨིན༌ནའང༌ ཡ༌ཝ༌ དཀོན༌མཆོག༌, མིའི༌ རྩིགས༌ཁན༌ནི༌ གྱལ༌ས༌ དང༌ ཐོན༌པོ༌ པི༌འུ༌ གུན༌ ཟིགས༌ས༌ལ༌ ཡོག༌ག༌ བབས༌ཏེ༌ སྐྱོདས༌།
GEN 11:6 ཡ༌ཝའེ༌ མོལས༌, “མི༌གུན༌ ཅིག༌གྲིལ༌ སོང༌ཏེ༌ སྐད༌ ཅིག༌ཅིག༌གི༌ ནང༌ང༌ སྤེ༌ར༌ ཏང༌ཨིན༌ འི༌ཟུག༌ ཅོ༌ཉན༌པ༌, ཏ༌ ཁོང༌གུན༌ལ༌ ཅི༌ཞིག༌ ཅོ༌ཅེས༌སི༌ དོད༌པ༌ ཡོད༌ནའང༌ ཏེ༌གུན༌ ཅོ༌ཉན༌ཅེས༌ ཨིན༌ནོག༌།
GEN 11:7 ཡོང༌, ང༌དང༌ ཇིག༌རྟེན༌ནི༌ཀ༌ བབས༌ཏེ༌ ཆེན༌, ཡང༌ མི༌གུན༌ལ༌ ཅིག༌ དང༌ ཅིག༌གི༌ སྐད༌གུན༌ ཧ༌གོ༌ མི༌ཐུབ༌ཅེས༌སི༌ ཕིའ༌ སྐད༌གུན༌ སྲེ༌ཨིན༌།”
GEN 11:8 ཏེ༌ནེ༌ ཡ༌ཝའེ༌ མི༌ཚང༌མ༌ ཇིག༌རྟེན༌ གང༌པོའེ༌ ནང༌ང༌ ཡན༌ ཅུག༌ག༌ ཛད༌པ༌, ཁོང༌གུན༌ནི༌ གྱལ༌ས༌ རྩིག༌ཅེས༌པོ༌ གྲུབ༌ མ༌གྲུབ༌བ༌ ལུས༌།
GEN 11:9 ཏེ༌བོའེ༌ ཞས༌ཏེ༌ ཏེ༌ གྱལ༌ས༌བོའ༌ བ༌བེལ༌ ཟེར༌ཏེ༌ མིང༌ ཏགས༌, ཅིའ༌ཟེར༌ན༌ འིན༌ན༌ ནས༌ས༌བོའེ༌ཀ༌ ཡ༌ཝའེ༌ ཇིག༌རྟེན༌ནི༌ཀ༌ སྐད༌བོ༌ སྲེའ༌ ཛདས༌ཏེ༌ སྐད༌ སྣ༌ཚོགས༌ཤིག༌ ཅོའ༌ ཛདས༌། ཡང༌ ཏེ༌ཀ༌ནེ༌ མི༌ཚང༌མ༌ ཇིག༌རྟེན༌ གང༌པོའེ༌ ནང༌ང༌ ཡན༌ ཅུག༌ག༌ ཛདས༌།
GEN 11:10 འི༌གུན༌ནི༌ ཤེམ༌མི༌ པུར༌གྱུད༌གུན༌ནི༌ ཐོ༌ ཨིན༌ནོག༌། ཆུ༌ལོག༌ ཡོངས༌ཏེ༌ ལོ༌ ཉིས༌སི༌ སྟིང༌ནེ༌, ནམ༌ ཤེམ༌མ༌ ལོ༌ 100 ཆའད༌པིན༌, ཁོ༌ ཨར༌ཕ༌ཤེད༌དི༌ ཨ༌བ༌ གྱུར༌།
GEN 11:11 ཨར༌ཕ༌ཤེད༌ སྐྱེས༌ཏེ༌ སྟིང༌ནེ༌ ཤེམ༌ ཡང༌ ལོ༌ 500 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:12 ཨར༌ཕ༌ཤེད༌ལ༌ ལོ༌ 35 ཆའད༌པིན༌ ནམ༌ ཁོ༌ ཤེ༌ལག༌གི༌ ཨ༌བ༌ གྱུར༌།
GEN 11:13 ཤེ༌ལག༌ སྐྱེས༌ཏེ༌ སྟིང༌ནེ༌ ཨར༌ཕ༌ཤེད༌ ཡང༌ ལོ༌ 403 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:14 ཤེ༌ལག༌ག༌ ལོ༌ 30 ཆའད༌པིན༌ ནམ༌ ཁོ༌ ཨེ༌བར༌རི༌ ཨ༌བ༌ གྱུར༌།
GEN 11:15 ཨེ༌བར༌ སྐྱེས༌ཏེ༌ སྟིང༌ནེ༌ ཤེ༌ལག༌ ཡང༌ ལོ༌ 403 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:16 ཨེ༌བར༌ལ༌ ལོ༌ 34 ཆའད༌པིན༌ ནམ༌ ཁོ༌ པེ༌ལེག༌གི༌ ཨ༌བ༌ གྱུར༌།
GEN 11:17 པེ༌ལེག༌ སྐྱེས༌ཏེ༌ སྟིང༌ནེ༌ ཨེ༌བར༌ ཡང༌ ལོ༌ 430 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:18 པེ༌ལེག༌ག༌ ལོ༌ 30 ཆའད༌པིན༌ ནམ༌ ཁོ༌ རི༌འུའི༌ ཨ༌བ༌ གྱུར༌།
GEN 11:19 རི༌འུ༌ སྐྱེས༌ཏེ༌ སྟིང༌ནེ༌ པེ༌ལེག༌ ཡང༌ ལོ༌ 209 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:20 རི༌འུའ༌ ལོ༌ 32 ཆའད༌པིན༌ ནམ༌ ཁོ༌ སེ༌རུག༌གི༌ ཨ༌བ༌ གྱུར༌།
GEN 11:21 སེ༌རུག༌ སྐྱེས༌ཏེ༌ སྟིང༌ནེ༌ རི༌འུ༌ ཡང༌ ལོ༌ 207 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:22 སེ༌རུག༌ག༌ ལོ༌ 30 ཆའད༌པིན༌ ནམ༌ ཁོ༌ ན༌ཧོར༌རི༌ ཨ༌བ༌ གྱུར༌།
GEN 11:23 ན༌ཧོར༌ སྐྱེས༌ཏེ༌ སྟིང༌ནེ༌ སེ༌རུག༌ ཡང༌ ལོ༌ 200 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:24 ན༌ཧོར༌ལ༌ ལོ༌ 29 ཆའད༌པིན༌ ནམ༌ ཁོ༌ ཏི༌རཧའེ༌ ཨ༌བ༌ གྱུར༌།
GEN 11:25 ཏི༌རཧ༌ སྐྱེས༌ཏེ༌ སྟིང༌ནེ༌ ན༌ཧོར༌ ཡང༌ ལོ༌ 119 སོན༌ཏེའ༌ ལུས༌, ཡང༌ ཁོའ༌ ཞན༌ ཕྲུ༌གུ༌ བུ༌ཚ༌ དང༌ བུ༌མོ༌ གུན༌ ཡོད༌པིན༌།
GEN 11:26 ཏི༌རཧ༌ ལོ༌ 70 ཆའད༌པིན༌ ནམ༌ ཁོ༌ ཨབ༌རམ༌, ན༌ཧོར༌ དང༌ ཧ༌རན༌ གུན༌ནི༌ ཨ༌བ༌ གྱུར༌།
GEN 11:27 འི༌གུན༌ནི༌ ཏི༌རཧའེ༌ པུར༌གྱུད༌གུན༌ནི༌ ཐོ༌ ཨིན༌ནོག༌། ཏི༌རཧ༌ ཨབ༌རམ༌, ན༌ཧོར༌ དང༌ ཧ༌རན༌ གུན༌ནི༌ ཨ༌བ༌ གྱུར༌, ཡང༌ ཧ༌རན༌ ལོད༌དི༌ ཨ༌བ༌ གྱུར༌།
GEN 11:28 ཨ༌བ༌ ཏི༌རཧ༌ སོན༌ཏེའ༌ ཡོད༌དི༌ ཏུས༌ལ༌, ཧ༌རན༌ ཀཱལ༌དིའ༌པའེ༌ ཨུར༌ ཟེར༌སའེ༌ ནས༌སའེ༌ ནང༌ང༌ ཤི༌, ཀ༌རུ༌ ཁོ༌ སྐྱེས༌ཏེ༌ ཨིན༌པིན༌།
GEN 11:29 ཨབ༌རམ༌ དང༌ ན༌ཧོར༌ ཉིས༌ཀོའེ༌ བག༌སྟོན༌ ཅོས༌། ཨབ༌རམ༌མི༌ ན༌མའེ༌ མིང༌ང༌ སཱ༌རཱི༌ ཡང༌ ན༌ཧོར༌རི༌ ན༌མའེ༌ མིང༌ང༌ མིལ༌ཀ༌ ཟེར༌རད༌པིན༌། ༼མིལ༌ཀ༌ དང༌ འིས༌ཀ༌ ཨ༌ཅེ༌ ནོ༌མོ༌ ཉིས༌ཀོ༌ ཧ༌རན༌ ནི༌ བུ༌མོ༌གུན༌ ཨིན༌པིན༌། ཡང༌ ཧ༌རན༌ནི༌ ན༌ཧོར༌རི༌ ནོ༌ ཨིན༌པིན༌༽
GEN 11:30 ཏ༌ སཱ༌རཱིའ༌ ཕྲུ༌གུ༌ ཇོར༌ མ༌ཐུབ༌པ༌ ཁོའ༌ ཕྲུ༌གུ༌ མེད༌པིན༌།
GEN 11:31 ཞག༌ཤིག༌ ཏི༌རཧའེ༌ ཁོ༌རང༌ངི༌ བུ༌ཚ༌ ཨབ༌རམ༌ དང༌ ཨབ༌རམ༌མི༌ ན༌མ༌ སཱ༌རཱི༌, ཏི༌རཧའེ༌ ཚ༌འོ༌ ལོད༌ ༼ཧ༌རན༌ནི༌ བུ༌ཚ༌༽ གུན༌ ཁྲིད༌ཏེ༌ ཀཱལ༌དིའ༌པའེ༌ ཨུར༌ ཟེར༌སའེ༌ ནས༌ས༌ནེ༌ བིང༌ཏེ༌ ཀེ༌ནན༌ནི༌ ཡུལ༌ལ༌ སོང༌། ཨིན༌ནའང༌ ཧ༌རན༌ལ༌ ལེབ༌བ༌ཅིག༌, ཁོང༌གུན༌ ཏེ༌རུ༌ ཚུགས༌ཏེ༌ དུགས༌།
GEN 11:32 ཏི༌རཧ༌ ལོ༌ 205 སོན༌ཏེའ༌ ལུས༌ཏེ༌ སྟིང༌ནེ༌ ཁོ༌ ཧ༌རན༌ ཟེར༌སའེ༌ ནས༌སའེ༌ ནང༌ང༌ ཤི༌།
GEN 12:1 ཡ༌ཝ༌ དཀོན༌མཆོག༌གི༌ ཨབ༌རམ༌མ༌ མོལས༌, “རང༌ཡུལ༌, ཉེན༌གྲུང༌ དང༌ ཨ༌བའེ༌ ནང༌མི༌ གུན༌ ཕངས༌ཏེ༌ ངའེ༌ སྟན༌ཅེས༌ཅན༌ནི༌ ས༌ཆ༌བོའ༌ སོང༌།
GEN 12:2 ངའེ༌ ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ ཀྲག༌པོ༌ཞིག༌ གྱུར༌ཅུག༌ཨིན༌, ཡང༌ ཁྱོ༌རང༌ང༌ ཅིན༌ལབས༌ ཏངས༌ཏེ༌ མིང༌ཅན༌ གྱུར༌ཅུག༌ཨིན༌། ཏེ༌ནེ༌ ཁྱོ༌རང༌ གྱུད༌ཏེ༌ ཞན༌མ༌གུན༌ལ༌ ཅིན༌ལབས༌ ཐོབ༌ཨིན༌།
GEN 12:3 ཁྱོ༌རང༌ང༌ ཅིན༌ལབས༌ ཏང༌ཁན༌གུན༌ལ༌ ངའེ༌ ཅིན༌ལབས༌ ཏང༌ཨིན༌, ཡང༌ ཁྱོ༌རང༌ང༌ ངན༌ ཏབ༌ཁན༌གུན༌ལ༌ ངའེ༌ ངན༌ ཏབ༌ཨིན༌། ཇིག༌རྟེན༌པ༌ མི༌ཚང༌མ༌ལ༌ ཁྱོ༌རང༌ གྱུད༌ཏེ༌ ཅིན༌ལབས༌ ཐོབ༌ཨིན༌།”
GEN 12:4 ཏེ༌ནེ༌ ཡ༌ཝའེ༌ མོལ༌ཁན༌ ནང༌ཞིན༌, ཨབ༌རམ༌ ཏེ༌ ནས༌ས༌བོ༌ ཕངས༌ཏེ༌ སོང༌, ཡང༌ ལོད༌དའང༌ ཁོ༌ ཉམ༌པོ༌ སོང༌། ཨབ༌རམ༌ ཧ༌རན༌ནེ༌ བིང༌ཏེ༌ ཆ༌ ཟ༌ནེ༌ ཁོའ༌ ལོ༌ 75 ཆའད༌པིན༌།
GEN 12:5 ཁོའེ༌ ཁོ༌རང༌ངི༌ ན༌མ༌ སཱ༌རཱི༌, ཁོ༌རང༌ངི༌ ཚ༌འོ༌ ལོད༌, ཁོང༌གུན༌ནི༌ གྱུར༌ནོར༌ སགས༌ཁན༌ ཚང༌མ༌ ཡང༌ ཧ༌རན༌ནི༌ ནང༌ང༌ ཉོས༌ཁན༌ནི༌ སེམས༌ཅན༌ དང༌ ཚེ༌ཡོག༌ གུན༌ ཁྲིད༌ཏེ༌, ཀེ༌ནན༌ནི༌ ས༌ཆའ༌ སོང༌། ཀེ༌ནན༌ལ༌ ལེབ༌བ༌ཅིག༌,
GEN 12:6 ཨབ༌རམ༌ དང༌ ཁོའེ༌ ཕྲོ༌པ༌ ཚང༌མ༌ ཤེ༌ཀེམ༌མི༌ གྲོང༌སེབ༌ ཚོག༌པ༌ སོང༌, ཏེ༌རུ༌ ཁོང༌ མོ༌རེཧ༌ ཨིན༌ཁན༌ནི༌ མིང༌ཅན༌ ལྕང༌མའེ༌ ཉེ༌མོའ༌ ཏུས༌བན༌ཤིག༌ ནས༌ཏེ༌ དུགས༌། ༼ཏེ༌ཏུས༌ལ༌ ཀེ༌ནན༌པ༌གུན༌ ཏེ༌ ས༌ཆའེ༌ ནང༌ང༌ དུག༌གད༌པིན༌།༽
GEN 12:7 ཏེ༌ནེ༌ ཨབ༌རམ༌མ༌ ཡ༌ཝ༌ ཇལ༌, ཡང༌ ཁོང༌ངི༌ མོལ༌ལ༌ ཛདས༌, “ངའེ༌ འི༌ ས༌ཆ༌བོ༌ ཁྱོ༌རང༌ངི༌ པུར༌གྱུད༌གུན༌ལ༌ ཏང༌ཨིན༌།” ཏེན༌ན༌བོའེ༌ཕིའ༌ ཨབ༌རམ༌མི༌ ཁོའ༌ ཇལ༌ཁན༌ནི༌ ཡ༌ཝའ༌ ཆོད༌པ༌ ཕུལ༌ཅེས༌ལ༌ ཆོད༌ཁྲི༌ཞིག༌ རྩིགས༌།
GEN 12:8 སྟིང༌ནེ༌ ཨབ༌རམ༌ ཏེ༌ཀ༌ནེ༌ ལྷོ༌ ཆོགས༌ལ༌ སོང༌, ཡང༌ ནུབ༌ ཆོགས༌ལ༌ བེ༌ཐེལ༌ལི༌ གྲོང༌ཁྱེར༌ དང༌ ཤར༌ ཆོགས༌ལ༌ ཨའི༌ གྲོང༌ཁྱེར༌ ཉིས༌ཀོའེ༌ པར༌རི༌ རི༌ཡུལ༌ཞིག༌གི༌ ནང༌ང༌ ཚུགས༌ཏེ༌ དུགས༌། ཏེ༌རུ༌ ཁོའེ༌ ཆོད༌ཁྲི༌ཞིག༌ རྩིགས༌ཏེ༌ དཀོན༌མཆོག༌ག༌ ཡ༌ཝ༌ ཟེར༌ཨིན༌ ཅོལ༌ཅེས༌ གོ༌ཟུགས༌།
GEN 12:9 ཏེ༌ ནས༌ས༌ནེ༌ བིང༌ཏེ༌ ཏུས༌ མང༌པོའེ༌ སྟིང༌ནེ༌ ཨབ༌རམ༌ ནེ༌གེཝ༌ ཟེར༌ཁན༌ནི༌ ས༌ཆ༌ ལེབ༌།
GEN 12:10 ཏེ༌ཏུས༌ལ༌ ཀེ༌ནན༌ནི༌ ནང༌ང༌ མུ༌གེ༌ ཡོངས༌། ཨབ༌རམ༌ ཐུར༌ ཆོགས༌ལ༌ ཨི༌ཇིབ༌བི༌ ཡུལ༌ལ༌ དུག༌ཅེས༌སི༌ ཕིའ༌ ཆ༌གོས༌ ཅིའ༌ཟེར༌ན༌ མུ༌གེ༌ མ༌སྲན༌ཏྲེ༌ ཡོངས༌ཏེ༌ ཡོད༌པིན༌།
GEN 12:11 ཨི༌ཇིབ༌བི༌ ནང༌ང༌ ལེབ༌ཀྱིས༌ལ༌ ཁོའེ༌ ཁོ༌རང༌ངི༌ ན༌མ༌ ཟེརས༌, “སཱ༌རཱི༌ ཁྱོ༌རང༌ བུ༌མོ༌ མ༌ ལྡེ༌མོ༌ ཡོད༌ཅེས༌པོའེ༌,
GEN 12:12 ཨི༌ཇིབ༌པ༌གུན༌ནི༌ ཁྱོ༌རང༌ ཐོང༌ང༌ཅིག༌, ‘ཁྱོ༌རང༌ ངའེ༌ ན༌མ༌ ཨིན༌ནོག༌’ སམས༌ཏེ༌ ང༌ སད༌ད༌ནོག༌ ཨིན༌ནའང༌ ཁྱོ༌རང༌ སོན༌ཏེའ༌ བོར༌ར༌ནོག༌།
GEN 12:13 ཁྱོ༌རང༌ངི༌ ཞས༌ཏེ༌ ང༌ མ༌སད༌ད༌ གྱལ༌ལ༌ ཅོ༌ཅེས༌སི༌ ཕིའ༌ ཁོང༌གུན༌ལ༌ ‘ཁྱོ༌རང༌ ངའེ༌ སྲིང༌མོ༌ ཨིན༌ ཟེར༌།’”
GEN 12:14 ཨབ༌རམ༌ ཨི༌ཇིབ༌བི༌ ཡུལ༌ལ༌ ལེབ༌བ༌ཅིག༌, ཨི༌ཇིབ༌པ༌གུན༌ནི༌ སཱ༌རཱི༌ མ༌ བུ༌མོ༌ ལྡེ༌མོ༌ཞིག༌ ཡོད༌ཁན༌བོ༌ ཐོང༌།
GEN 12:15 ཨི༌ཇིབ༌བི༌ གྱལ༌པོ༌ ཕེ༌རོའེ༌ སྤོན༌བོ༌གུན༌ནི༌ སཱ༌རཱི༌ ཐོང༌ཏེ༌, ཁོང༌གུན༌ནི༌ གྱལ༌པོའ༌ ཁོ༌ ཙམ༌ཤིག༌ ལྡེ༌མོ༌ ཡོད༌ཁན༌བོའེ༌ སྐོར༌ལ༌ ཤདས༌། ཡང༌ སཱ༌རཱི༌ གྱལ༌པོའེ༌ ཁར༌ལ༌ ཁྲིད༌ཏེ༌ ཁྱེརས༌།
GEN 12:16 སཱ༌རཱི༌ ཞས༌ཏེ༌, གྱལ༌པོའེ༌ ཨབ༌རམ༌མ༌ སྙིང༌རྗེ༌ སྟནས༌ ཡང༌ ཁོའ༌ སྐྱེས༌ མང༌པོ༌ ཏངས༌, སྤེར༌ན༌ ལུག༌, ར༌མ༌, བ༌ལང༌, བུང༌བུ༌ ཕོ༌ དང༌ མོ༌, རྔ༌བོང༌ དང༌ ཚེ༌ཡོག༌ བུ༌མོ༌ དང༌ བུ༌ཚ༌ གུན༌།
GEN 12:17 ཨིན༌ནའང༌ ཡ༌ཝའེ༌ གྱལ༌པོ༌ དང༌ ཁོའེ༌ ནང༌ཚངས༌ ཚང༌མ༌ལ༌ ཟུ༌མོ༌ མ༌ ཇིགས༌ནང༌ཅན༌ རིག༌ ཡོང༌ ཅུག༌ག༌ ཛདས༌, ཅིའ༌ཟེར༌ན༌ གྱལ༌པོའེ༌ ཨབ༌རམ༌མི༌ ན༌མ༌ སཱ༌རཱི༌, ན༌མ༌ ཅོ༌ཅེས༌ལ༌ ཁྱེར༌ཏེ༌ ཨིན༌པིན༌།
GEN 12:18 ཏེན༌ན༌བོའེ༌ཕིའ༌ ཕེ༌རོའེ༌ ཨབ༌རམ༌མ༌ བོད༌ཏེ༌ ཟེརས༌, “ཁྱོ༌རང༌ངི༌ ངའ༌ འི༌བོ༌ ཅིའ༌ ཅོས༌ཏེ༌ ཨིན༌? ཁོ༌ ཁྱོ༌རང༌ངི༌ ན༌མ༌ ཨིན༌ ཟེར༌ཏེ༌ ང༌ ཅི༌ཕིའ༌ ཁྱོ༌རང༌ངི༌ མ༌ཤད༌པིན༌?
GEN 12:19 ཁོ༌ ཁྱོ༌རང༌ངི༌ སྲིང༌མོ༌ ཨིན༌ ཟེར༌པ༌, ངའེ༌ ཁོ༌ ང༌རང༌ངི༌ ན༌མ༌ ཅོ༌ཅེས༌ལ༌ ཁྱེར༌པིན༌། ཅི༌ཕིའ༌ ཁྱོ༌རང༌ངི༌ ཏེ༌ཟུག༌ ཟེར༌པིན༌? ཡའ༌, ཁྱོ༌རང༌ངི༌ ན༌མ༌ ཁྲིད༌ཏེ༌ སོང༌!”
GEN 12:20 གྱལ༌པོའེ༌ ཁོ༌རང༌ངི༌ མག༌མི༌ སྤོན༌བོ༌གུན༌ལ༌ བཀའ༌ ཏངས༌པ༌ ཁོང༌གུན༌ནི༌ ཨབ༌རམ༌ དང༌ ཁོའེ༌ ན༌མ༌, ཁོང༌གུན༌ནི༌ ནོར༌གུན༌ ཉམ༌པོ༌ ཨི༌ཇིབ༌བི༌ ཡུལ༌ནེ༌ ཕི༌ལོག༌ག༌ ལམ༌ཅུགས༌།
GEN 13:1 ཏེན༌ན༌བོའེ༌ཕིའ༌ ཨབ༌རམ༌ ཨི༌ཇིབ༌ནེ༌ རང༌ངི༌ ན༌མ༌ དང༌ ཁོ༌རང༌ང༌ ཡོད༌ཁན༌ ཚང༌མ༌ ཁུར༌ཏེ༌ ཀེན༌ ཆོགས༌ལ༌ ནེ༌གེཝ༌ ཟེར༌སའེ༌ ནས༌ས༌ ལོགས༌ཏེ༌ སོང༌, ལོད༌དའང༌ ཁོ༌ ཉམ༌པོ༌ སོང༌།
GEN 13:2 ཨབ༌རམ༌ མ༌ ཆུག༌པོ༌ གྱུར༌། ཁོའ༌ མུལ༌, སེར༌ དང༌ ཀྲུད༌ཏྲོ༌ མང༌པོ༌ ཡོད༌པིན༌།
GEN 13:3 ནེ༌གེཝ༌ནེ༌ ཁོ༌ ནས༌ས༌ ཅིག༌ནེ༌ ཅིག༌ག༌ དུག༌ཨིན༌ བེ༌ཐེལ༌ལ༌ ལེབ༌ལེབ༌ ཚོག༌པ༌ སོང༌, བེ༌ཐེལ༌ དང༌ ཨའི༌ པར༌རི༌ ནས༌ས༌ ཀ༌བོའེ༌ཀ༌ སྔུན༌ལའང༌ ཁོའེ༌ ཁོ༌རང༌ངི༌ ཀུར༌བོ༌ ཙུགས༌ཏེ༌
GEN 13:4 ཆོད༌ཁྲི༌ རྩིགས༌ཏེ༌ ཡོད༌ཁན༌ནི༌ ཏེན༌ན༌ ནས༌ས༌བོའེ༌ཀ༌ ཁོའེ༌ ཡང༌སྐྱར༌ ཡ༌ཝ༌ དཀོན༌མཆོག༌ག༌ ཅོལས༌།
GEN 13:5 ཏ༌ ཨབ༌རམ༌ ཉམ༌པོ༌ ཡོད༌ཁན༌ནི༌ ལོད༌དའང༌ ར༌ལུག༌གི༌ ཁྱུ༌, བ༌ལང༌ངི༌ ཁྱུ༌ དང༌ མི༌གུན༌ནི༌ ཕིའ༌ ཀུར༌ མང༌པོ༌ཞིག༌ ཡོད༌པིན༌།
GEN 13:6 ཨིན༌ནའང༌ ཁོང༌ ཉིས༌ཀོའེ༌ ཀྲུད༌ཏྲོའ༌ ལྡང༌ཤེས༌སི༌ རྩ༌ཁ༌ ཏེ༌ ནས༌སའེ༌ ནང༌ང༌ སྨིན༌ མ༌ཐུབ༌, ཅིའ༌ཟེར༌ན༌ ཁོང༌གུན༌ལ༌ ཀྲུད༌ཏྲོ༌ མ༌ མང༌པོ༌ སོང༌ཏེ༌ ཡོད༌པིན༌།
GEN 13:7 ཏེན༌ན༌བོའེ༌ཕིའ༌ ཨབ༌རམ༌ དང༌ ལོད༌དི༌ སེམས༌ཅན༌ ཚོ༌ཁན༌གུན༌ནི༌ པར༌ལ༌ ཛིང༌མོ༌ ཆ༌ཅེས༌ གོ༌ཟུགས༌། ཏེ༌ཏུས༌ལ༌ ཀེ༌ནན༌པ༌ དང༌ པེ༌རིཟ༌པ༌ གུན༌ནའང༌ ཏེན༌ན༌ ནས༌སའེ༌ ནང༌ང༌ དུག༌གད༌ཀྱག༌།
GEN 13:8 ཏེ༌ནེ༌ ཨབ༌རམ༌མི༌ ལོད༌ལ༌ ཟེརས༌, “ང༌དང༌ ཡ༌ ང༌དང༌ངི༌ སེམས༌ཅན༌ ཚོ༌ཁན༌གུན༌ནི༌ པར༌ལ༌ ཛིང༌མོ༌ མི༌ཏང༌, ཅིའ༌ཟེར༌ན༌ ང༌དང༌ ཉིས༌ཀོ༌ སྤུན༌ ཨིན༌ནོག༌།
GEN 13:9 ང༌དང༌ངི༌ དུན༌ལ༌ ས༌ཀྱད༌ མ༌ ཆེན༌མོ༌ཞིག༌ ཡོད༌ཏེ༌ ཨིན༌ནོག༌། ཁྱོ༌རང༌ ཐད༌ཁན༌ནི༌ ས༌ཀྱད༌དི༌ ཁག༌པོ༌ ལྡོམ༌, ང༌དང༌ ཉིས༌ཀོ༌ བེ༌ཨིན༌། ཀལ༌ཏེས༌ ཁྱོ༌རང༌ ཡོ༌མ༌ ཆོགས༌ལ༌ ཆ༌ན༌ ཏེ༌ནེ༌ ང༌ ཡས༌པ༌ ཆོགས༌ལ༌ ཆེན༌, ཡ༌ ཁྱོ༌རང༌ ཡས༌པ༌ ཆོགས༌ལ༌ ཆ༌ན༌ ང༌ ཡོ༌མ༌ ཆོགས༌ལ༌ ཆེན༌།”
GEN 13:10 ལོད༌དི༌ ཟོའར༌ གྲོང༌ཁྱེར༌རི༌ ཆོགས༌ལ༌ ལྟས༌པ༌, ཁོའ༌ ཡོར༌དཱན༌ ལུང༌པ༌བོ༌ ཀ༌རུང༌ས༌ མ༌ སྔོན༌པོ༌, ཨི༌དན༌ནི༌ ས༌ཆའེ༌ ཚས༌ ཡ༌ ཨི༌ཇིབ༌བི༌ ས༌ཆའ༌ ཙོགས༌ ཐོང༌། ༼ཏེ༌བོ༌ ཡ༌ཝའེ༌ སོ༌དོམ༌ དང༌ གོ༌མོ༌རའི༌ གྱལ༌ས༌གུན༌ ཁྲེས༌ཏོར༌ ཅོའེ༌ སང༌ སྔུན༌ལ༌ ཨིན༌པིན༌།༽
GEN 13:11 ལོད༌དི༌ ཁོ༌རང༌ངི༌ ཕིའ༌ ཡོར༌དཱན༌ནི༌ སྤང༌ཐང༌ ཚང༌མ༌ ལྡམས༌ཏེ༌ ཤར༌ ཆོགས༌ལ༌ སོང༌། ཏེ༌ཟུག༌གི༌ ཁོ༌ དང༌ ཨབ༌རམ༌ ཉིས༌ཀོ༌ བེ༌།
GEN 13:12 ལོད༌ ཡོར༌དཱན༌ ཐང༌ངི༌ གྱལ༌ས༌གུན༌ནི༌ ཕྲོའ༌ དུགས༌ཏེ༌ ཁོ༌རང༌ངི༌ ཀུར༌བོ༌ སོ༌དོམ༌མི༌ གྱལ༌སའེ༌ ཉེ༌ཁོར༌ལ༌ ཙུགས༌། ཨིན༌ནའང༌ ཨབ༌རམ༌ ཀེ༌ནན༌ནི༌ ས༌ཆའེ༌ ནང༌ང༌ དུགས༌།
GEN 13:13 ཏ༌ སོ༌དོམ༌པ༌གུན༌ མངས༌ཏེའང༌ ངན༌པ༌ ཡོད༌ཅེས༌པོའེ༌ ཡ༌ཝའེ༌ གྱབ༌གལ༌ལ༌ སྡིག༌པ༌ ཆད༌མེད༌ལ༌ ཅོའད༌པིན༌།
GEN 13:14 ལོད༌ སོང༌ ཚར༌ཏེ༌ སྟིང༌ནེ༌ ཡ༌ཝའེ༌ ཨབ༌རམ༌མ༌ མོལས༌, “ཁྱོ༌རང༌ ཡོད༌སའེ༌ ནས༌སའེ༌ ཀ༌ནེ༌ མིག༌ སྟགས༌ཏེ༌ ཆོགས༌ ཚང༌མ༌ལ༌ ལྟོས༌།
GEN 13:15 ཁྱོ༌རང༌ངི༌ མིག༌ནེ༌ ཐོང༌ཁན༌ནི༌ ནས༌ས༌ ཚང༌མ༌ ཏུས༌གྱུན༌ནི༌ ཕིའ༌ ངའེ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཏང༌ཨིན༌།
GEN 13:16 ཡང༌ ཇིག༌རྟེན༌ནི༌ཀ༌ ཡོད༌ཁན༌ནི༌ ཐལ༌བ༌ ཙོགས༌ལ༌ ངའེ༌ ཁྱོ༌རང༌ངི༌ པུར༌གྱུད༌གུན༌ སུ༌ཞིག༌གའང༌ རྩི༌ མི༌ཉན༌ཅེས༌ མང༌པོ༌ ཕེལ༌ཅུག༌ཨིན༌།
GEN 13:17 ཏ༌ སོང༌ ཡང༌ ས༌ཀྱད༌དི༌ ཆོགས༌ ཚང༌མ༌ལ༌ ཁོར༌, ཅིའ༌ཟེར༌ན༌ ངའེ༌ འི༌ ཚང༌མ༌ ཁྱོ༌རང༌ང༌ ཏང༌ཨིན༌།”
GEN 13:18 ཏེ༌ནེ༌ ཨབ༌རམ༌མི༌ ཀུར༌གུན༌ ཁྱེར༌ཏེ༌ ཧེབ༌རོན༌ནི༌ ནང༌ང༌ ཡོད༌ཁན༌ནི༌ མམ༌རེ༌ ཟེར༌ཁན༌ནི༌ མི༌བོའེ༌ མིང༌ཅན༌ ལྕང༌མ༌གུན༌ནི༌ ཉེ༌མོའ༌ དུག༌ག༌ལ༌ ཙུག༌ཅུགས༌, ཡང༌ ཏེ༌རུ༌ ཁོའེ༌ ཡ༌ཝའ༌ ཅོལ༌ཅེས༌ལ༌ ཆོད༌ཁྲི༌ཞིག༌ རྩིགས༌།
GEN 14:1 བ༌བེ༌ལོན༌ནི༌ གྱལ༌པོ༌ ཨམ༌ར༌ཕེལ༌, འེ༌ལ༌སར༌རི༌ གྱལ༌པོ༌ ཨེ༌ར༌ཡོག༌, ཨེ༌ལེམ༌མི༌ གྱལ༌པོ༌ ཀ༌དོར༌ལ༌འོ༌མེར༌ དང༌ གོའིམ༌མེ༌ གྱལ༌པོ༌ ཀྲི༌གྲལ༌ ཞི༌ཀོ༌,
GEN 14:2 སོ༌དོམ༌མི༌ གྱལ༌པོ༌ བེ༌ར༌, གོ༌མོ༌རའི༌ གྱལ༌པོ༌ བིར༌ཤའ༌, ཨད༌མཧའེ༌ གྱལ༌པོ༌ ཤི༌ནབ༌, ཟི༌བོ༌ཡིམ༌མི༌ གྱལ༌པོ༌ ཤེམ༌མེ༌བར༌ དང༌ བི༌ལའེ༌ ༼ཡང༌ན༌ ཟོར༌རི༌༽ གྱལ༌པོ༌ ལྔ༌ཀོའེ༌ གྱབ༌གལ༌ལ༌ མག༌ཏང༌ང༌ལ༌ སོང༌།
GEN 14:3 ཏེ༌ གྱལ༌པོ༌ ལྔ༌ཀོའེ༌ མག༌མི༌གུན༌ སི༌དིམ༌མི༌ ལུང༌པའེ༌ ནང༌ང༌ ཛོམས༌ཏེ༌ ཅིག༌གྲིལ༌ སོང༌ཏེ༌ ཡོད༌པིན༌ ༼ཏེ༌བོའ༌ ཚོ༌རུལ༌ལི༌ ལུང༌པའང༌ ཟེར༌ར༌ནོག༌།༽
GEN 14:4 ཁོང༌གུན༌ ལོ༌ རྕུག༌ཉིས༌ གྱལ༌པོ༌ ཀ༌དོར༌ལ༌འོ༌མེར༌རི༌ ངའ༌ཡོག༌ག༌ ཡོད༌པིན༌། ཨིན༌ནའང༌ ལོ༌ ཅུག༌སུམ༌པའེ༌ ནང༌ང༌ ཁོང༌གུན༌ནི༌ ཏེ༌ གྱལ༌པོའེ༌ གྱབ༌གལ༌ ཅོས༌།
GEN 14:5 ལོ༌ ཅུབ༌ཞི༌པའེ༌ ནང༌ང༌ གྱལ༌པོ༌ ཀ༌དོར༌ལ༌འོ༌མེར༌ དང༌ ཁོའེ༌ ཝང༌ངི༌ ཡོག༌ག༌ ཡོད༌ཁན༌ནི༌ གྱལ༌པོ༌གུན༌ནི༌, ཨེཤ༌ཏི༌རོཐ༌ ཀར༌ནེ༌འིམ༌མི༌ ཡུལ༌ལི༌ ནང༌ང༌ རེ༌ཕའེ༌འམ༌པ༌གུན༌ལ༌, ཧམ༌མི༌ ཡུལ༌ལི༌ ནང༌ང༌ ཟུ༌ཟེམ༌པ༌གུན༌ལ༌ ཡང༌ ཤ༌ཝེཧ༌ ཀི༌རིའ༌ཐ༌ཡེམ༌མི༌ ཡུལ༌ལི༌ ནང༌ང༌ ཨི༌མམ༌པ༌གུན༌ལ༌ ཕམ༌ཀལས༌།
GEN 14:6 སེ༌འིར༌རི༌ རི༌ ཡུལ༌, རི༌སྟོང༌ངི༌ ཐའ༌མ༌ ཡོད༌ཁན༌ནི༌ ཨེལ༌ཕ༌རན༌ ཚོག༌པ༌ དུག༌ཁན༌ནི༌ ཧོར༌པ༌གུན༌ལའང༌ ཕམ༌ཀལས༌།
GEN 14:7 ཏེ༌ནེ༌ ཁོང༌གུན༌ ལོགས༌ཏེ༌ ཨེན༌མིཤ༌པཏ༌ ༼ཡང༌ན༌ ཀ༌དེཤ༌ལ༌༽ ཡོངས༌, ཡང༌ ཏེ༌རུ༌ དུག༌ཁན༌ནི༌ ཨ༌མ༌ལིཀ༌པ༌གུན༌ལ༌ མ༌ཚད༌ ཧ༌ཟ༌ཟོན༌ ཏ༌མར༌རི༌ ནང༌ང༌ དུག༌ཁན༌ནི༌ ཨ༌མོར༌པ༌གུན༌ལའང༌ མ༌སྲན༌ཏྲེ༌ ཕམ༌ཀལས༌།
GEN 14:8 ཏེ༌ནེ༌ ཀ༌དོར༌ལ༌འོ༌མེར༌ གྱལ༌པོའ༌ གྱབ༌གལ༌ ཅོ༌ཁན༌ནི༌ སོ༌དོམ༌, གོ༌མོ༌ར༌, ཨད༌མཧ༌, ཟི༌བོ༌ཡིམ༌ དང༌ བི༌ལའེ༌ ༼ཡང༌ན༌ ཟོར༌༽ གྱལ༌པོ༌ ལྔ༌ཀོའེ༌ སི༌དིམ༌མི༌ ལུང༌པའེ༌ ནང༌ང༌ ཁོ༌ དང༌ ཁོའ༌ ཆོགས༌སྐྱོར༌ ཅོ༌ཁན༌ནི༌ གྱལ༌པོ༌གུན༌ནི༌ མག༌མི༌ གྱབ༌གལ༌ལ༌ མག༌ཏང༌ང༌ ཡོངས༌། གྱལ༌པོ༌ ལྔའེ༌ གྱབ༌གལ༌ལ༌ གྱལ༌པོ༌ ཞི༌ མག༌ ཏངས༌།
GEN 14:10 ཏ༌ ཏེ༌ ལུང༌པ༌བོ༌ ཏར༌ཀོལ༌ལི༌ ས༌དོང༌ངི༌ གངས༌ཏེ༌ ཡོད༌པིན༌, ཡང༌ སོ༌དོམ༌ དང༌ གོ༌མོ༌རའི༌ གྱལ༌པོའེ༌ མག༌མི༌གུན༌ ཕམ༌ཕོགས༌ཏེ༌ མག༌ནེ༌ ཤོར༌ཏེ༌ ཆ༌ ཟ༌ནེ༌ ཁ༌ཅིག༌ ཏེ༌ ས༌དོང༌གུན༌ནི༌ ནང༌ང༌ བུད༌, ཡང༌ མ༌བུད༌ཁན༌གུན༌ རི༌ཡུལ༌གུན༌ལ༌ ཤོར༌ཏེ༌ སོང༌།
GEN 14:11 གྱལ༌ཐོབ༌ཁན༌ནི༌ གྱལ༌པོ༌ ཞི༌ཀོའེ༌ སོ༌དོམ༌ དང༌ གོ༌མོ༌རའི༌ ནོར༌ དང༌ ཟན༌ ཚང༌མ༌ ཁུར༌ཏེ༌ སོང༌།
GEN 14:12 ཁོང༌གུན༌ནི༌ ཨབ༌རམ༌མི༌ ཚ༌འོ༌ སོ༌དོམ༌མི༌ ནང༌ང༌ དུག༌ཁན༌ ལོད༌ དང༌ ཁོའེ༌ གྱུ༌ནོར༌གུན༌ནའང༌ ཁྱེརས༌།
GEN 14:13 ཨིན༌ནའང༌ ཤོར༌ཁན༌གུན༌ནི༌ ནང༌ནེ༌ ཅིག༌, ཨ༌མོར༌པ༌ མམ༌རེའེ༌ ཨིན༌ཁན༌ནི༌ མིང༌ཅན༌ ལྕང༌མ༌གུན༌ནི༌ ཉེ༌མོའ༌ དུག༌ཁན༌ ཨིབ༌རི༌པ༌, ཨབ༌རམ༌ ཡོད༌ས༌ ཡོངས༌ཏེ༌ ཇུང༌ཁན༌གུན༌ ཤདས༌། མམ༌རེ༌ ནོ༌ ཨེཤ༌ཀོལ༌ དང༌ ཨ༌ནེར༌ གུན༌ ཨབ༌རམ༌མི༌ ཆོགས༌པ༌ ཨིན༌པིན༌།
GEN 14:14 ཨབ༌རམ༌མ༌ ཁོའེ༌ ཚ༌འོ༌བོ༌ ཟུམས༌ཏོགས༌ ཟེར༌ཏེ༌ ཚོར༌ར༌ཅིག༌, ཁོའེ༌ ནང༌ཚངས༌སི༌ ནང༌ང༌ སྐྱེས༌ཁན༌, ནོལ༌ཉན༌ཁན༌ནི༌ མི༌ 318 ཛོམ༌ཅེས༌ལ༌ བོདས༌། ཡང༌ ཁོང༌གུན༌ནི༌ དཱན༌ ཟེར༌སའེ༌ ནས༌ས༌ ཚོག༌པ༌ གྱལ༌པོ༌ ཞི༌ཀོའེ༌ མག༌མི༌གུན༌ ཐོབ༌ཐོབ༌ སོང༌།
GEN 14:15 ཏེ༌རུ༌ ཨབ༌རམ༌མི༌ ཁོ༌རང༌ངི༌ མི༌གུན༌ སྡེ༌སྡེ༌ ནང༌ང༌ བགོས༌, ཡང༌ ཚན༌ལ༌ གྲ༌འོ༌གུན༌ནི༌ཀ༌ སྤུང༌གོལ༌ ཅོ༌ཅུགས༌པ༌ ཁོང༌གུན༌ ཤོར༌ཏེ༌ སོང༌། ཨབ༌རམ༌མི༌ མི༌གུན༌ནི༌ དཱ༌མེས༌ཀས༌ གྱལ༌སའེ༌ བྱང༌ ཆོགས༌ལ༌ ཡོད༌ཁན༌ནི༌ ནས༌ས༌ ཧོ༌བ༌ ཚོག༌པ༌ ཁོང༌གུན༌ལ༌ ཏེད༌ཏེ༌ ཁྱེརས༌།
GEN 14:16 ཁོའེ༌ གྱུ༌ནོར༌ ཁྱེར༌ཁན༌ ཚང༌མ༌ ལོགས༌ཏེ༌ ཁྱོངས༌, ཡང༌ ཁོ༌རང༌ངི༌ ཉེན༌ ལོད༌ དང༌ ཁོའེ༌ གྱུ༌ནོར༌, ཡང༌ བུ༌མོ༌གུན༌ དང༌ ཞན༌མི༌གུན༌ནའང༌ ལོགས༌ཏེ༌ ཁྱོངས༌།
GEN 14:17 ཨབ༌རམ༌མི༌ གྱལ༌པོ༌ ཀ༌དོར༌ལ༌འོ༌མེར༌ དང༌ ཁོའ༌ རོགས༌ ཅོ༌ཁན༌ནི༌ གྱལ༌པོ༌གུན༌ལ༌ ཕམ༌ཀལ༌ཏེ༌ ལོགས༌ཏེ༌ ཡོང༌ ཟ༌ནེ༌ སོ༌དོམ༌མི༌ གྱལ༌པོ༌, ཤ༌ཝེཧ༌ ལུང༌པ༌ ༼ཡང༌ན༌ གྱལ༌པོའེ༌ ལུང༌པ༌ ཟེར༌སའེ༌༽, ནང༌ང༌ ཁོའ༌ ཐུག༌ག༌ ཡོངས༌།
GEN 14:18 ཏེ༌ནེ༌ ཀུན༌ཝང༌ དཀོན༌མཆོག༌གི༌ བླ༌མ༌, སེ༌ལམ༌མི༌ གྱལ༌པོ༌ མེལ༌ཀ༌ཟེ༌དེག༌གི༌ ཨབ༌རམ༌མ༌ ཏ༌གི༌ དང༌ ཆང༌ ཁྱོངས༌།
GEN 14:19 ཡང༌ ཁོའ༌ ཅིན༌ལབས༌ སལ༌ཏེ༌ མོལས༌, “ནམ༌ཁའ༌ དང༌ ཇིག༌རྟེན༌ ཉིས༌ཀོ༌ ཛད༌ཁན༌ནི༌ ཀུན༌ཝང༌ དཀོན༌མཆོག༌གི༌ ཁྱོ༌རང༌ང༌ ཅིན༌ལབས༌ སལ༌ཤིག༌།
GEN 14:20 ཁྱོ༌རང༌ང༌ གྲ༌འོ༌གུན༌ནི༌ཀ༌ གྱལ༌ཁའ༌ ཐོབ༌ ཅུག༌ག༌ ཛད༌ཁན༌ནི༌ ཀུན༌ཝང༌ དཀོན༌མཆོག༌ག༌ སྟོད༌པ༌ ཐོབ༌ཤིག༌།”, ཡང༌ ཨབ༌རམ༌མི༌ མེལ༌ཀ༌ཟེ༌དེག༌ག༌ ལོགས༌ཏེ༌ ཁྱོང༌ཁན༌ནི༌ གྱུ༌ནོར༌ ཚང༌མའེ༌ རྕུ༌ཁག༌པོ༌ ཏངས༌།
GEN 14:21 སོ༌དོམ༌མི༌ གྱལ༌པོའེ༌ ཨབ༌རམ༌མ༌ ཟེརས༌, “ངའེ༌ མི༌གུན༌ ལོགས༌ཏེ༌ ཏོང༌, ཨིན༌ནའང༌ ལོགས༌ཏེ༌ ཁྱོང༌ཁན༌ནི༌ གྱུ༌ནོར༌ ཚང༌མ༌ བོར༌ནའང༌ གྲིག༌།”
GEN 14:22 ཨིན༌ནའང༌ ཨབ༌རམ༌མི༌ སོ༌དོམ༌མི༌ གྱལ༌པོའ༌ ཟེརས༌, “ངའེ༌ ནམ༌ཁའ༌ དང༌ ཇིག༌རྟེན༌ ཛད༌ཁན༌ནི༌ ཡ༌ཝ༌ ཀུན༌ཝང༌ དཀོན༌མཆོག༌གི༌ སྐུན༌དུན༌ལ༌ ནའ༌ ཁུར༌རད༌,
GEN 14:23 ཁྱོ༌རང༌ངི༌ ཨིན༌ཁན༌ ཅི༌ཞིག༌གའང༌ ངའེ༌ མི༌ཁྱེར༌, པ༌བུ༌ ཡ༌ སྐུད༌པ༌ཞིག༌གའང༌, ཅིའ༌ཟེར༌ན༌ ཁྱོ༌རང༌ངི༌, ‘ངའེ༌ ཨབ༌རམ༌ ཆུག༌པོ༌ གྱུར༌ཅུགས༌པིན༌’ ཟེར༌སྲིད༌ཅེས༌ ཨིན༌ནོག༌།
GEN 14:24 ངའེ༌ མི༌གུན༌ནི༌ ཟའ༌ཁན༌ནི༌ ཁར༌ཇི༌ ཡང༌ ངའ༌ རོགས༌ ཅོ༌ཁན༌ ཨ༌ནེར༌, ཨེཤ༌ཀོལ༌ དང༌, མམ༌རེ༌ གུན༌ནི༌ སྐལ༌ལའེ༌ ནོར༌གུན༌ མན༌པ༌ ངའེ༌ ཡང༌ ཅའང༌ མི༌ཁྱེར༌།”
GEN 15:1 ཏེ༌སྟིང༌ནེ༌ ཞལ༌ཟིགས༌ཤིག༌གི༌ ནང༌ང༌ ཨབ༌རམ༌མ༌ ཡ༌ཝའེ༌ མོལས༌, “ཨབ༌རམ༌ ཇིགས༌ མ༌ཇིགས༌, ངའེ༌ ཁྱོ༌རང༌ སྐྱོབས༌ཏེ༌ བོར༌ཨིན༌, ཁྱོ༌རང༌ང༌ སོལ༌རས༌ ཆེན༌མོ༌ཞིག༌ ཐོབ༌ཨིན༌།”
GEN 15:2 ཨིན༌ནའང༌ ཨབ༌རམ༌མི༌ ལན༌ཏངས༌, “ཡ༌ཝ༌, ངའེ༌ གཙོ༌བོ༌, ཉེ༌རང༌ངི༌ སོལ༌རས༌པོའེ༌ ངའ༌ ཅི༌ ཕན༌ཐོགས༌ ཨིན༌? ང༌ ཕྲུ༌གུ༌ མེད༌པ༌, དཱ༌མེས༌ཀས༌སི༌ ཨེ༌ལི༌འ༌ཟར༌ལ༌ ངའེ༌ ནོར༌སྐལ༌ ཚང༌མ༌ ཐོབ༌བ༌ནོག༌།
GEN 15:3 ཉེ༌རང༌ངི༌ ངའ༌ ཕྲུ༌གུ༌ མ༌སལ༌ པ༌སང༌ ངའེ༌ ཡོག༌པོ༌ ཅིག༌ཅིག༌ ངའེ༌ ནོར༌སྐལ༌ ལེན༌ཁན༌བོ༌ གྱུར༌ཨིན༌།”
GEN 15:4 ཏེ༌ནེ༌ ཁོའ༌ ཡ༌ཝའེ༌ ཡང༌སྐྱར༌ མོལ༌ཨིན༌ ཚོར༌, “མན༌, ཁྱོ༌རང༌ངི༌ ཡོག༌པོ༌ ཁྱོ༌རང༌ངི༌ ནོར༌སྐལ༌ ལེན༌ཁན༌བོ༌ མི༌གྱུར༌། ཨིན༌ནའང༌ ཁྱོ༌རང༌ རང༌ངི༌ བུ༌ཚ༌ ཁྱོ༌རང༌ངི༌ ནོར༌སྐལ༌ ལེན༌ཁན༌བོ༌ གྱུར༌ཨིན༌།”
GEN 15:5 ཡ༌ཝའེ༌ ཨབ༌རམ༌ ཀུར༌རི༌ ནང༌ནེ༌ ཕི༌ལོག༌ག༌ ཁྱོངས༌ཏེ༌ མོལས༌, “ནམ༌ཁའ༌ ལྟོས༌སའང༌, ཁྱོ༌རང༌ང༌ སྐར༌མ༌གུན༌ རྩི༌ཉན༌ཅེས༌ རག༌ག༌? ཏེ༌ སྐར༌མ༌ ཙོགས༌ མང༌པོ༌ ཁྱོ༌རང༌ངི༌ པུར༌གྱུད༌གུན༌ གྱུར༌ཨིན༌།”
GEN 15:6 ཨབ༌རམ༌མི༌ ཡ༌ཝའེ༌ཀ༌ ཨིད༌ཤེས༌ ཅོས༌ པ༌སང༌ ཡ༌ཝའེ༌ ཁོའ༌ ཀྲང༌པོ༌ མི༌ཞིག༌ ཐེའ༌ ཛདས༌།
GEN 15:7 ཡ༌ཝའེ༌ ཁོའ༌ ཡང༌ མོལས༌, “ཁྱོ༌རང༌ང༌ འི༌ ས༌ཀྱད༌པོ༌ ཏང༌ཅེས༌ལ༌ བ༌བེ༌ལོན༌ནི༌ ནང༌ང༌ ཡོད༌ཁན༌ནི༌ ཨུར༌ནེ༌ ཕིངས༌ཏེ༌ ཁྱོང༌ཁན༌, ང༌ ཡ༌ཝ༌ དཀོན༌མཆོག༌ ཨིན༌།”
GEN 15:8 ཨིན༌ནའང༌ ཨབ༌རམ༌མི༌ ཟེརས༌, “ཡ༌ཝ༌, ངའེ༌ གཙོ༌བོ༌, འི༌ ས༌ཀྱད༌པོ༌ ངའེ༌ གྱུར༌ཨིན༌ ཟེར༌ཏེ༌ ངའ༌ ཀ༌ཟུག༌གི༌ གྱུས༌ཆེན༌?”
GEN 15:9 ཡ༌ཝའེ༌ ཁོའ༌ མོལས༌, “ངའ༌ ལོ༌ སུམ༌ ཆའ༌ཁན༌ནི༌ བ༌ལང༌, ར༌མ༌ དང༌, ལུག༌ཕོ༌ ཡང༌ ཐི༌བ༌ ཟེར༌ཁན༌ནི༌ ཅ༌ དང༌ ཕུར༌གོན༌ནི༌ ཕྲུ༌གུ༌ཞིག༌ ཁྱོང༌།”
GEN 15:10 ཨབ༌རམ༌མི༌ ཡ༌ཝའ༌ མོལ༌ཁན༌ནི༌ སེམས༌ཅན༌གུན༌ ཁྱོངས༌ཏེ༌, ཏེ༌གུན༌ནི༌ ཟུགས༌པོ༌ ཁག༌ཉིས༌སི༌ ནང༌ང༌ ཅད༌ཏེ༌ གྲལ༌ ཉིས༌སི༌ ནང༌ང༌ རིགས༌ཏེ༌ བོརས༌, ཨིན༌ནའང༌ ཅ༌གུན༌ ཁག༌ཉིས༌སི༌ ནང༌ང༌ མ༌ཅདས༌།
GEN 15:11 ཤ༌ ཟའ༌ཁན༌ནི༌ ཅ༌གུན༌ སད༌ཁན༌ནི༌ རོ༌གུན༌ནི༌ཀ༌ བབས༌ཏེ༌ ཡོངས༌, ཨིན༌ནའང༌ ཨབ༌རམ༌མི༌ ཏེ༌གུན༌ལ༌ སྲོགས༌ཏེ༌ ཆ༌ཅུགས༌།
GEN 15:12 ཉི༌མ༌ སྐྱོད༌ཨིན༌ ཡོད༌ ཟ༌ནེ༌ ཨབ༌རམ༌མ༌ མའ༌ ཉིད༌ སྲན༌ཏྲེ༌ ཡོངས༌ ཡང༌ ཁོའེ༌ སེམས༌པོ༌ ཇིགས༌ནང༌ངི༌ གངས༌པ༌ ཁོ༌ དྲོགས༌།
GEN 15:13 ཏེ༌ནེ༌ ཡ༌ཝའེ༌ མོལས༌, “འི༌བོ༌ ཏན༌ཏན༌ ཨིན༌, ཁྱོ༌རང༌ངི༌ པུར༌གྱུད༌གུན༌ ཞན༌མའེ༌ ཡུལ༌ལི༌ ནང༌ང༌ མ༌ཤེས༌ཁན༌ནི༌ མི༌ ཚུལ༌ལ༌ དུག༌ཨིན༌། ཡང༌ ཏེ༌རུ༌ ཚེ༌ཡོག༌ གྱུར༌ཏེ༌ ལོ༌ ཞིབ༌གྱ༌ ཁོང༌གུན༌ལ༌ མ༌སྲན༌ཏྲེ༌ ནགས༌ སྟན༌ཨིན༌།
GEN 15:14 ཨིན༌ནའང༌ ངའེ༌ ཁོང༌གུན༌ ཚེ༌ཡོག༌ག༌ ལུས༌ཁན༌ནི༌ ཏེ༌ གྱལ༌ཁམས༌བོའ༌ ཆད༌པ༌ ཏང༌ཨིན༌, ཡང༌ ཏེ༌བོའེ༌ སྟིང༌ནེ༌ ཁོང༌གུན༌ ཏེ༌ གྱལ༌ཁབ༌ནེ༌ གྱུ༌ནོར༌ མང༌པོ༌ ཉམ༌པོ༌ བིངས༌ཏེ༌ ཡོང༌ཨིན༌།
GEN 15:15 ཁྱོ༌རང༌ངི༌ སྐོར༌ལ༌ ཟེར༌ན༌, ཁྱོ༌རང༌ ལོ༌ མང༌པོ༌ སོན༌ཏེ༌ ལུས༌ཏེ༌ ཞི༌དེ༌ ཉམ༌པོ༌ ཤི༌ཨིན༌།
GEN 15:16 ཁྱོ༌རང༌ངི༌ པུར༌གྱུད༌གུན༌ མི༌རབས༌ ཞི༌པའེ༌ སྟིང༌ནེ༌ འིན༌ན༌ ནས༌སའེ༌ ནང༌ང༌ ལོགས༌ཏེ༌ ཡོང༌ཨིན༌, ཅིའ༌ཟེར༌ན༌ ཨ༌མོར༌པ༌གུན༌ནི༌ སྡིག༌པའེ༌ ལས༌གུན༌, མེད༌ཁན༌ ཅོ༌གོ༌ཤེས༌སི༌ ཚད༌ ཚག༌པ༌ ཏ༌རུང༌ མ༌ལེབ༌བ༌ ཨིན༌ནོག༌།”
GEN 15:17 ཉི༌མ༌ སྐྱོད༌ ཚར༌ཏེ༌ མུན༌གྲིག༌ སོང༌ཏེ༌ སྟིང༌ནེ༌ ཨབ༌རམ༌མ༌ ཏུད༌པ༌ བིང༌ཁན༌ནི༌ ཟ༌མ༌ཞིག༌ དང༌ མེའེ༌ པམ༌བར༌ཞིག༌ ཏེ༌ སེམས༌ཅན༌ནི༌ རོ༌ ཁག༌ཉིས༌ པུད༌ཁན༌གུན༌ནི༌ པར༌པོ༌ནེ༌ སྐྱོད༌ད༌ ཐོང༌།
GEN 15:18 ཏེན༌ན༌ ཞག༌ག༌ ཡ༌ཝའེ༌ ཨབ༌རམ༌ ཉམ༌པོ༌ ཆད༌དོན༌ཞིག༌ ཅོའ༌ ཛདས༌ཏེ༌ མོལས༌, “ངའེ༌ ཁྱོ༌རང༌ངི༌ པུར༌གྱུད༌གུན༌ལ༌ ཨི༌ཇིབ༌བི༌ ལྩངས༌པོ༌ནེ༌ ཡུཕ༌རེ༌ཀྲས༌སི༌ ལྩངས༌པོ༌ ཆེན༌མོ༌ ཚག༌པའེ༌ ས༌ཀྱད༌པོ༌ ཏང༌ངད༌,
GEN 15:19 ཀ༌གུན༌ ཀེན༌པའེ༌, ཀེ༌ནས༌པའེ༌, ཀད༌མོན༌པའེ༌,
GEN 15:20 ཧེད༌པའེ༌, པེ༌རིཟ༌པའེ༌, རེ༌ཕ༌པའེ༌,
GEN 15:21 ཨ༌མོར༌པའེ༌, ཀེ༌ནན༌པའེ༌, གིར༌གཤ༌པའེ༌ དང༌ ཡེ༌བས༌པའེ༌ ས༌ཀྱད༌གུན༌ ཨིན༌ནོག༌།”
GEN 16:1 ཨབ༌རམ༌མི༌ ན༌མ༌ སཱ༌རཱིའ༌ ཕྲུ༌གུ༌ མ༌ནེ༌ མ༌ཇོར༌, ཨིན༌ནའང༌ ཁོའ༌ ཧཱ༌གར༌ ཟེར༌ཁན༌ནི༌ ཨི༌ཇིབ༌མ༌ ཚེ༌ཡོག༌ཞིག༌ ཡོད༌པིན༌།
GEN 16:2 སཱ༌རཱིའི༌ ཨབ༌རམ༌མ༌ ཟེརས༌, “ཡ༌ཝའེ༌ ང༌ ཕྲུ༌གུ༌ སྐྱེ༌ ཅུག༌ག༌ མ༌ཛདས༌པ༌, ཁྱོ༌རང༌ངི༌ ངའེ༌ ཨི༌ཇིབ༌མ༌ ཚེ༌ཡོག༌ ཉམ༌པོ༌ བྲེལ༌ཅོས༌། ཅི༌གྱུས༌, ཁོ༌ གྱུད༌ཏེ༌ ང༌ ཕྲུ༌གུ༌ ཐོབ༌སྲིད༌ཅེས༌ ཨིན༌ནོག༌།” ཨབ༌རམ༌མི༌ སཱ༌རཱིའི༌ ཟེར༌ཁན༌བོའ༌ ཁའ༌ཉནས༌།
GEN 16:3 ཏེན༌ན༌བོའེ༌ཕིའ༌ སཱ༌རཱིའི༌, ཨི༌ཇིབ༌མ༌ ཚེ༌ཡོག༌ ཧཱ༌གར༌ ཨབ༌རམ༌མི༌ ན༌མ༌ ཉིས༌པ༌ ཅོ༌ཅེས༌ལ༌ ཏངས༌ ༼འི༌བོ༌ ཇུང༌ ཟ༌ནེ༌ ཨབ༌རམ༌ ཀེ༌ནན༌ནི༌ ཡུལ༌ལི༌ ནང༌ང༌ ཚུགས༌ཏེ༌ ལོ༌ 10 ཆའད༌པིན༌།༽
GEN 16:4 ཨབ༌རམ༌མི༌ ཧཱ༌གར༌ ཉམ༌པོ༌ ལུས༌བྲེལ༌ བོར༌པ༌ ཁོ༌ སྐྱེ༌ཅེས༌མ༌ཞིག༌ གྱུར༌། ཏེ༌བོ༌ གྱུས༌ ཆ༌ནའང༌, ཧཱ༌གར༌ ཕོ༌སོ༌ཅན༌ གྱུར༌ཏེ༌ སཱ༌རཱིའ༌ ཀུས༌པ༌ མི༌ཅོ༌ཅེས༌ གོ༌ཟུགས༌།
GEN 16:5 ཏེ༌ནེ༌ སཱ༌རཱིའི༌ ཨབ༌རམ༌མ༌ ཟེརས༌, “ཧཱ༌གར༌རི༌ ངའ༌ ངན༌པ༌ ཅོ༌ཅེས༌པོ༌ ཁྱོ༌རང༌ངི༌ སྐྱོན༌ ཨིན༌ནོག༌། ཁྱོ༌རང༌ང༌ ངའེ༌ ང༌རང༌ངི༌ ཚེ༌ཡོག༌པོ༌ ཏངས༌པིན༌ ཡང༌ ཁོའ༌ སྐྱེ༌ཅེས༌མ༌ཞིག༌ གྱུར༌ཁན༌བོ༌ གྱུས༌ ཆ༌ནའང༌, ཁོའེ༌ ངའ༌ ཀུས༌པ༌ ཅོ༌ཅེས༌ ཕངས༌། ཡ༌ཝའེ༌ ང༌དང༌ ཉིས༌ཀོའེ༌ ནང༌ནེ༌ ནོངས༌ཅན༌བོའ༌ ཁྲིམས༌ཅད༌ ཛད༌ཤིག༌།”
GEN 16:6 ཨབ༌རམ༌མི༌ ཟེརས༌, “ལྟོས༌, ཁོ༌ ཁྱོ༌རང༌ངི༌ ཚེ༌ཡོག༌ ཨིན༌ནོག༌, ཁྱོ༌རང༌ ཐད༌ཁན༌བོ༌ ཁོ༌ ཉམ༌པོ༌ ཅོས༌།” ཏེ༌ནེ༌ སཱ༌རཱིའི༌ ཧཱ༌གར༌ལ༌ གྱལ༌ལ༌ མ༌ཅོས༌ པ༌སང༌ ཁོ༌ ཏེ༌ ནས༌ས༌ནེ༌ ཤོར༌ཏེ༌ སོང༌།
GEN 16:7 རི༌སྟོང༌ངི༌ ནང༌ང༌ ཆུ༌མིག༌ཤིག༌གི༌ དུན༌ལ༌ ཡ༌ཝའེ༌ ཕོ༌ཉ༌ ཧཱ༌གར༌ ཐུག༌ག༌ལ༌ སྐྱོདས༌ ༼ཏེ༌ ཆུ༌མིག༌པོ༌ ཤུར༌རི༌ གྱ༌ལམ༌མི༌ཀ༌ ཡོད༌པིན༌།༽
GEN 16:8 ཕོ༌ཉའེ༌ མོལས༌, “ཧཱ༌གར༌, སཱ༌རཱིའི༌ ཚེ༌ཡོག༌, ཁྱོ༌རང༌ ཀ༌ནེ༌ ཡོངས༌པིན༌, ཡང༌ ཀ༌རུ༌ ཆའད༌?” ཁོའེ༌ ཟེརས༌, “ང༌ སཱ༌རཱིའི༌ ངའེ༌ སྤོན༌མོ༌ནེ༌ ཤོར༌ཏེ༌ ཆའད༌།”
GEN 16:9 ཏེ༌ནེ༌ ཡ༌ཝའེ༌ ཕོ༌ཉའེ༌ ཁོའ༌ མོལས༌, “རང༌ངི༌ སྤོན༌མོ༌ ཡོད༌ས༌ ལོགས༌ཏེ༌ སོང༌, ཡང༌ ཁོའེ༌ ཝང༌ངི༌ ཡོག༌ག༌ དུག༌།
GEN 16:10 ངའེ༌ ཁྱོ༌རང༌ངི༌ པུར༌གྱུད༌གུན༌ རྩི༌ མི༌ཉན༌ཅེས༌ མང༌པོ༌ ཕེལ༌ཅུག༌ཨིན༌།”
GEN 16:11 ཡ༌ཝའེ༌ ཕོ༌ཉའེ༌ ཡང༌སྐྱར༌ མོལས༌, “ཁྱོ༌རང༌ ཕན༌ཅེས༌མ༌ཞིག༌ ཨིན༌ནོག༌, ཡང༌ ཁྱོ༌རང༌ང༌ བུ༌ཚ༌ཞིག༌ ཇོར༌ཨིན༌། ཁྱོ༌རང༌ངི༌ ཁོའེ༌ མིང༌ང༌ ཨིཤ༌མ༌ཨེལ༌ ཏོག༌ ༼ཀ༌བོའེ༌ ཏོན༌ ནི༌ དཀོན༌མཆོག༌གི༌ སན༌ན༌ ཛདས༌༽, ཅིའ༌ཟེར༌ན༌ ཁྱོ༌རང༌ངི༌ རྡུག༌ངལ༌གུན༌ ཡ༌ཝའེ༌ སན༌ན༌ ཛད༌ཏེ༌ ཨིན༌ནོག༌།
GEN 16:12 ཁྱོ༌རང༌ངི༌ བུ༌ཚ༌བོ༌ ནག༌ཚོགས༌སི༌ བུང༌བུ༌ ཙོགས༌ སྐྱོང༌པོ༌ དང༌ ཁའ༌མི༌ཉན༌ ཡོང༌ཨིན༌། ཁོའེ༌ མི༌ཚང༌མ༌ལ༌ ཡང༌ མི༌ཚང༌མའེ༌ ཁོའ༌ གྱབ༌གལ༌ ཅོ༌ཨིན༌། ཁོ༌ ཁོ༌རང༌ངི༌ སྤུན༌ ཚང༌མ༌ ཉམ༌པོ༌ མ༌ནེ༌ མི༌ཐུན༌།”
GEN 16:13 ཧཱ༌གར༌རི༌ ཁོའ༌ ཞལ༌ཏ༌ སལ༌ཁན༌ནི༌ ཡ༌ཝའ༌ ཡང༌ཚན༌ཞིག༌ ཉམ༌པོ༌ བོད༌ད༌ ཛད༌ཏེ༌ ཟེརས༌, “ཉེ༌རང༌ ནི༌ ངའ༌ ཟིགས༌ཁན༌ནི༌ དཀོན༌མཆོག༌ ཨིན༌ནོག༌།” ཁོའེ༌ སམ༌ “ཅི༌ ངའེ༌ ངོས༌པོའ༌ ངའ༌ ཟིགས༌ཁན༌ནི༌ དཀོན༌མཆོག༌ ཇལ༌ཏེ༌ ཨིན༌ནོག༌ག༌?”
GEN 16:14 ཏེན༌ན༌བོའེ༌ཕིའ༌ ཏེ༌ ཆུ༌དོང༌བོའ༌, ཀ༌དེཤ༌ དང༌ བེ༌རིད༌ གྲོང༌ཁྱེར༌རི༌ པར༌ལ༌ ཡོད༌ཁན༌ནི༌ བེར༌ལ༌ཧཱའི༌རོའི༌ ཟེར༌ར༌ནོག༌ ༼ཀ༌བོའེ༌ ཏོན༌ ནི༌ ངའ༌ ཟིགས༌ཁན༌ སོན༌པོ༌ ཞུགས༌ཁན༌ནི༌ ཆུ༌དོང༌།༽
GEN 16:15 ཨབ༌རམ༌མ༌ ཧཱ༌གར༌ གྱུད༌ཏེ༌ བུ༌ཚ༌ཞིག༌ སྐྱེས༌, ཡང༌ ཨབ༌རམ༌མི༌ ཁོའ༌ ཨིཤ༌མ༌ཨེལ༌ མིང༌ང༌ ཏགས༌།
GEN 16:16 ཧཱ༌གར༌ལ༌ ཨིཤ༌མ༌ཨེལ༌ སྐྱེ༌ ཟ༌ནེ༌ ཨབ༌རམ༌མ༌ ལོ༌ 86 ཆའད༌པིན༌།
GEN 17:1 ཨབ༌རམ༌མི༌ ལོ༌ 99 ཨིན༌ ཟ༌ནེ༌ ཁོའ༌ ཡ༌ཝ༌ ཇལ༌ ཡང༌ མོལས༌, “ང༌ ནི༌ ཀུན༌ཝང༌ དཀོན༌མཆོག༌ ཨིན༌, ངའ༌ ཨིད༌ཤེས༌ཅན༌ ཞབས༌ཏོག༌ ཞུ༌ཨིན༌ ནོངས༌མེད༌ཁན༌ནི༌ མི༌ཚེ༌ཞིག༌ པུད༌།
GEN 17:2 ངའེ༌ ཁྱོ༌རང༌ དང༌ ངའེ༌ ཕར༌ལ༌ ཅོ༌ཁན༌ནི༌ ཆད༌དོན༌བོ༌ སྟན༌པོ༌ ཅོས༌ཏེ༌ ཁྱོ༌རང༌ང༌ པུར༌གྱུད༌ མང༌པོ༌ ཏང༌ཨིན༌།”
GEN 17:3 ཨབ༌རམ༌མི༌ གོ༌ སྒུས༌ཏེ༌ ཆག༌ཕུལས༌ ཡང༌ དཀོན༌མཆོག༌གི༌ ཁོའ༌ མོལས༌,
GEN 17:4 “ངའེ༌ འི༌ ཆད༌དོན༌བོ༌ ཁྱོ༌རང༌ ཉམ༌པོ༌ ཅོའད༌། ཁྱོ༌རང༌ གྱལ༌ཁམས༌ མང༌པོའེ༌ ཕ༌མེས༌པོ༌ གྱུར༌ཨིན༌།
GEN 17:5 ཏ༌ནེ༌ཕར༌ལ༌ ཁྱོ༌རང༌ང༌ ཨབ༌རམ༌ མ༌ཟེར༌ར༌ ཨབ༌ར༌ཧམ༌ ཟེར༌ཨིན༌, ཅིའ༌ཟེར༌ན༌ ངའེ༌ ཁྱོ༌རང༌ གྱལ༌ཁམས༌ མང༌པོའེ༌ ཕ༌མེས༌པོ༌ གྱུར༌ཅུག༌ཨིན༌།
GEN 17:6 ངའེ༌ ཁྱོ༌རང༌ང༌ པུར༌གྱུད༌ མང༌པོ༌ ཏང༌ཨིན༌ ཀ༌གུན༌ གྱལ༌ཁམས༌ མང༌པོ༌ གྱུར༌ཨིན༌ ཡང༌ ཁོང༌གུན༌ནི༌ ནང༌ནེ༌ གྱལ༌པོ༌གུན༌ བིང༌ཨིན༌།
GEN 17:7 ངའེ༌ ཁྱོ༌རང༌ དང༌ ང༌ ཡང༌ ཁྱོ༌རང༌ངི༌ པུར༌གྱུད༌གུན༌ནི༌ པར༌ལ༌ ཅོ༌ཁན༌ནི༌ ཆད༌དོན༌, ཀ༌བོ༌ ང༌ ཁྱོ༌རང༌ དང༌ ཁོང༌གུན༌ནི༌ དཀོན༌མཆོག༌ ཨིན༌ཁན༌བོ༌ མི༌རབས༌ནེ༌ མི༌རབས༌ ལུས༌ཨིན༌།
GEN 17:8 ཡང༌ ངའེ༌ ཁྱོ༌རང༌ང༌ ཀེ༌ནན༌ནི༌ ཡུལ༌ གང༌པོ༌ ཏང༌ཨིན༌ ཀ༌རུ༌ དག༌ས༌ ཁྱོ༌རང༌ ཞན༌ཡུལ༌ལི༌ མི༌ ཙོགས༌ལ༌ དུག༌ཨིན༌ ཡོད༌, འི༌ ས༌ཀྱད༌ ཁྱོ༌རང༌ངི༌ པུར༌གྱུད༌གུན༌ནི༌ ལག༌ག༌ ཏུས༌གྱུན༌ནི༌ གྱུ༌ནོར༌རི༌ ཚུལ༌ལ༌ ལུས༌ཨིན༌ ཡང༌ ང༌ ཁོང༌གུན༌ནི༌ དཀོན༌མཆོག༌།”
GEN 17:9 ཏེ༌ནེ༌ དཀོན༌མཆོག༌གི༌ ཨབ༌ར༌ཧམ༌མ༌ མོལས༌, “ངའེ༌ ཁྱོ༌རང༌ ཉམ༌པོ༌ ཆད༌དོན༌ ཅོ༌ཁན༌བོ༌ ཁྱོ༌རང༌ངི༌ ཁའ༌ཉན༌གོས༌ ཡང༌ ཡོང༌ཅེས༌ཅན༌ནི༌ ཁྱོ༌རང༌ངི༌ པུར༌གྱུད༌ ཚང༌མེའང༌།
GEN 17:10 ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌ གུན༌ནི༌ འི༌ ཆད༌དོན༌བོ༌ ཅོས༌, ཁྱོ༌ཞ༌གུན༌ནི༌ ཕྲོའ༌ ཡོད༌ཁན༌ནི༌ བུ༌ཚ༌ ཚང༌མའེ༌ སུན༌ནད༌ ཅོ༌གོས༌།
GEN 17:11 ངའ༌ དང༌ ཁྱོ༌ཞ༌གུན༌ནི༌ ཕར༌ལ༌ ཅོ༌ཁན༌ནི༌ ཆད༌དོན༌ནི༌ སྟགས༌སི༌ ཚུལ༌ལ༌ ཁྱོ༌ཞའེ༌ སུན༌ནད༌ ཅོ༌གོས༌།
GEN 17:12 ཏ༌ནེ༌ཕར༌ལ༌ ཁྱོ༌ཞ༌གུན༌ནི༌ ཕྲུ༌གུ༌ བུ༌ཚ༌གུན༌ལ༌ ཞག༌པོ༌ 8 ཆའ༌ཅིག༌ སུན༌ནད༌ ཅོ༌གོས༌, ཏེ༌བོ༌ ཁྱོ༌རང༌ངི༌ པུར༌གྱུད༌གུན༌ ཅིག༌པོ༌ མན༌པ༌ ཁྱོ༌རང༌ངི༌ ཁང༌པའེ༌ ནང༌ང༌ སྐྱེས༌ཁན༌ དང༌ ཞན༌ མི༌རིགས༌གུན༌ནི༌ ཀ༌ནེ༌ ཉོ༌ཁན༌ནི༌ ཚེ༌ཡོག༌ གུན༌ལའང༌ ཅོ༌གོས༌།
GEN 17:13 བུ༌ཚ༌ ཚང༌མའ༌ སུན༌ནད༌ ཅོ༌གོས༌། ངའེ༌ ཏུས༌གུན༌ ལུས༌ཤེས༌སི༌ ཆད༌དོན༌ ནི༌ སྟགས༌པོ༌ ཁྱོ༌ཞའེ༌ ཟུགས༌པོའེ༌ཀ༌ ལུས༌གོས༌།
GEN 17:14 སུན༌ནད༌ མ༌ཅོས༌ཁན༌ནི༌ བུ༌ཚ༌གུན༌ ངའེ༌ མི༌གུན༌ནི༌ ཕྲོ༌ནེ༌ ཕིང༌གོས༌ ཅིའ༌ཟེར༌ན༌ ཁོང༌གུན༌ནི༌ ངའེ༌ ཆད༌དོན༌བོ༌ ཅགས༌ཏེ༌ ཨིན༌ནོག༌།”
GEN 17:15 དཀོན༌མཆོག༌གི༌ ཨབ༌ར༌ཧམ༌མ༌ འི༌བོའང༌ མོལས༌, “ཏ༌ནེ༌ཕར༌ལ༌ ཁྱོ༌རང༌ངི༌ ན༌མའ༌ སཱ༌རཱིའ༌ མ༌ཟེར༌ར༌ སཱ༌ར༌ ཟེར༌གོས༌།
GEN 17:16 ངའེ༌ ཁོའ༌ ཅིན༌ལབས༌ ཏང༌ཨིན༌, ཏན༌ཏན༌ ངའེ༌ ཁྱོ༌རང༌ང༌ ཁོ༌ གྱུད༌ཏེ༌ བུ༌ཚ༌ཞིག༌ ཏང༌ཨིན༌། ཁོ༌ གྱལ༌ཁམས༌ མང༌པོའེ༌ ཨ༌མ༌ གྱུར༌ཨིན༌ ཡང༌ ཁོའེ༌ པུར༌གྱུད༌གུན༌ནི༌ ཕྲོའ༌ གྱལ༌པོ༌ མང༌པོ༌ བིང༌ཨིན༌།”
GEN 17:17 ཨབ༌ར༌ཧམ༌མི༌ ཆག༌ཕུལས༌ ཨིན༌ནའང༌ གོད༌ཅེས༌ ཡོངས༌ཏེ༌ སམ༌, “ང༌ ལོ༌ 100 ལོན༌ཏེ༌ ཀ༌ཟུག༌གི༌ ཨ༌བ༌ གྱུར༌ཉན༌ཨིན༌?” ཡང༌ “སཱ༌ར༌ ལོ༌ 90 སོང༌ཏེ༌ ཀ༌ཟུག༌གི༌ ཕྲུ༌གུ༌ སྐྱེ༌ཉན༌ཨིན༌?”
GEN 17:18 ཁོའེ༌ དཀོན༌མཆོག༌ག༌ ཞུས༌, “ཉེ༌རང༌ངི༌ ཅིན༌ལབས༌པོ༌ ཨིཤ༌མ༌ཨེལ༌ལ༌ སལ༌ལ༌ ཛད༌ལེ༌།”
GEN 17:19 ཨིན༌ནའང༌ དཀོན༌མཆོག༌གི༌ མོལས༌, “མན༌ ཁྱོ༌རང༌ངི༌ ན༌མ༌ སཱ༌ར༌ བུ༌ཚ༌ཞིག༌ སྐྱེ༌ཨིན༌ ཡང༌ ཁྱོ༌རང༌ངི༌ ཁོའེ༌ མིང༌ང༌ ཨི༌སཱག༌ ཏག༌ཨིན༌། ངའེ༌ ཅོ༌ཁན༌ནི༌ ཆད༌དོན༌བོ༌ ཁོ༌ དང༌ ཁོའེ༌ པུར༌གྱུད༌གུན༌ ཉམ༌པོ༌ ཐའ༌མེད༌པ༌ ལུས༌ཨིན༌།
GEN 17:20 ཁྱོ༌རང༌ངི༌ ཞུ༌ཝ༌ ཕུལ༌ཁན༌ ནང༌ཞིན༌ ངའེ༌ ཨིཤ༌མ༌ཨེལ༌ལའང༌ ཅིན༌ལབས༌ ཏང༌ཨིན༌། ཁོའ༌ ཕྲུ༌གུ༌ མང༌པོ༌ ཇོར༌ཏེ༌ ཁོའེ༌ པུར༌གྱུད༌ མང༌པོ༌ ཕེལ༌ཅུག༌ཨིན༌ ཡང༌ ཁོ༌ ཝང༌སྲུལ༌པ༌ རྕུག༌ཉིས༌སི༌ ཨ༌བ༌ གྱུར༌ཨིན༌། ངའེ༌ ཁོའེ༌ གྱལ༌ཁམས༌པོ༌ བྲག༌པོ༌ གྱུར༌ཅུག༌ ཨིན༌།
GEN 17:21 ཨིན༌ནའང༌ ངའེ༌ ཆད༌དོན༌བོ༌ ཁྱོ༌རང༌ངི༌ བུ༌ཚ༌ ཨི༌སཱག༌ ཉམ༌པོ༌ བོར༌རད༌, ཀ༌བོ༌ སྟིང༌མ༌ ལོ༌ འིན༌ན༌ ཏུས༌པོའི༌ཀ༌ སཱ༌ར༌ གྱུད༌ཏེ༌ ཁྱོ༌རང༌ང༌ སྐྱེ༌ཨིན༌།”
GEN 17:22 དཀོན༌མཆོག༌གི༌ ཨབ༌ར༌ཧམ༌ ཉམ༌པོ༌ ཞལ༌ཏ༌ མོལ༌ ཚར༌ར༌ཅིག༌ ཁོང༌ ཀེན༌ལ༌ སྐྱོདས༌།
GEN 17:23 ཏེན༌ན༌ ཞག༌ག༌ དཀོན༌མཆོག༌གི༌ མོལ༌ཁན༌ ནང༌ཞིན༌ ཨབ༌ར༌ཧམ༌མི༌ བུ༌ཚ༌ ཨིཤ༌མ༌ཨེལ༌, ཁོའེ༌ ཁང༌པའེ༌ ནང༌ང༌ སྐྱེ༌ཁན༌ ཡང༌ ཉོ༌ཁན༌ བུ༌ཚ༌ ཚེ༌ཡོག༌ ཚང༌མ༌ལ༌ སུན༌ནད༌ ཅོས༌།
GEN 17:24 ཨབ༌ར༌ཧམ༌མ༌ སུན༌ནད༌ ཅོ༌ ཟ༌ནེ༌ ཁོའ༌ ལོ༌ 99 ཆའད༌པིན༌,
GEN 17:25 ཡང༌ ཁོའེ༌ བུ༌ཚ༌ ཨིཤ༌མ༌ཨེལ༌ལ༌ ལོ༌ 13 ཆའད༌པིན༌།
GEN 17:26 ཏེན༌ན༌ ཞག༌ག༌ ཁོང༌ ཉིས༌ཀོའ༌ སུན༌ནད༌ ཅོས༌ཏེ༌ ཨིན༌པིན༌,
GEN 17:27 ཡང༌ ཁོའེ༌ ཁང༌པའེ༌ ནང༌ང༌ སྐྱེ༌ཁན༌ དང༌ ཉོ༌ཁན༌ བུ༌ཚ༌ ཚེ༌ཡོག༌ ཚང༌མ༌ལའང༌ སུན༌ནད༌ ཅོས༌།
GEN 18:1 ཞག༌ཤིག༌ ཉིང༌གུང༌ངི༌ ཏུས༌ ཨབ༌ར༌ཧམ༌ མམ༌རེ༌ ལྕང༌མ༌གུན༌ནི༌ དུན༌ལ༌ ཁོ༌རང༌ངི༌ ཀུར༌རི༌ སྒོའེ༌ཀ༌ དུགས༌ཏེ༌ ཡོད༌ ཟ༌ནེ༌ ཁོའ༌ ཡ༌ཝ༌ ཇལ༌།
GEN 18:2 ཁོའེ༌ སྐྱེན༌ལ༌ ལྟས༌པ༌ འ༌ཟམ༌ཤིག༌ག༌ མི༌ སུམ༌ ལངས༌ཏེ༌ ཐོང༌། ཁོང༌གུན༌ ཐོང༌ང༌ཅིག༌, ཁོ༌ བང༌ཏངས༌ཏེ༌ ཁོང༌གུན༌ལ༌ ཐུག༌ག༌ སོང༌, ཡང༌ ས༌ ཐུག༌ ཅུགས༌ཏེ༌ གོ༌ སྒུས༌།
GEN 18:3 ཁོའེ༌ ཟེརས༌, “ངའེ༌ གཙོ༌བོ༌ ཀལ༌ཏེས༌ ཉེ༌རང༌ངི༌ ང༌ འོས༌པ༌ སམ༌མད༌ན༌ ཉེ༌རང༌ངི༌ ཞབས༌ཏོག༌པ༌ ངའེ༌ ཁང༌པ༌ སྐྱོད༌ད༌ ཛད༌།
GEN 18:4 ཉེ༌ཞའ༌ འི༌ཀ༌ ལྕང༌མའེ༌ སིལ༌ལ༌ ངལ༌ཚོས༌ཏེ༌ ཞུགས༌ས༌ཛད༌ ངའེ༌ ཉེ༌ཞའེ༌ རྐང༌པ༌ ཁྲུ༌ཅེས༌ལ༌ ཆུ༌ ཁྱོང༌ཨིན༌།
GEN 18:5 ངའེ༌ ཁང༌པ༌ སྐྱོད༌ཅེས༌པོའེ༌, ངའ༌ ཉེ༌ཞའ༌ དོན༌ཅེས༌ལ༌ ཁར༌ཇི༌ ཁྱོང༌ ཅུག༌ག༌ཛད༌ ཀ༌བོའེ༌ ཉེ༌ཞའ༌ བེས༌ལ༌ སྐྱོད༌ཅེས༌སི༌ ནང༌ང༌ རོགས༌ ཐོབ༌ཨིན༌།” ཁོང༌གུན༌ནི༌ མོལས༌, “གྱལ༌ལ༌ རག༌,” ཁྱོ༌རང༌ངི༌ ཟེར༌ཁན༌བོ༌ ཅོས༌།
GEN 18:6 ཨབ༌ར༌ཧམ༌ གྱོགས༌པ༌ ཀུར༌རི༌ ནང༌ང༌ སོང༌ ཡང༌ སཱ༌ར༌ ཟེརས༌, “གྱོགས༌པ༌ པག༌པའེ༌ གྱལ༌ཤོག༌ བན༌ཤིག༌ ཁྱོངས༌ཏེ༌ ཏ༌གི༌ སྲོག༌།”
GEN 18:7 ཏེ༌ནེ༌ ཁོ༌ བང༌ཏངས༌ཏེ༌ བ༌ལང༌གུན༌ནི༌ ཕྲོའ༌ སོང༌ཏེ༌ བེ༌ཙོ༌ གྱགས༌པ༌ཞིག༌ ལྡམས༌ ཡང༌ ཏེ༌བོ༌ སད༌ཏེ༌ ཡོག༌པོའ༌ ཏངས༌, ཁོའེ༌ གྱོགས༌པ༌ ཏེ༌བོ༌ སྐོལ༌ཏེ༌ ཁྱོངས༌།
GEN 18:8 ཁོའེ༌ ཞོ༌, འོ༌མ༌ དང༌ ཤ༌ སྐོལ༌ཁན༌གུན༌ ཁོང༌གུན༌ནི༌ དུན༌ལ༌ རིགས༌ ཡང༌ ཁོང༌གུན༌ དོན༌ཏང༌ དོན༌ ཟ༌ནེ༌ ཨབ༌ར༌ཧམ༌ ལྕང༌མའེ༌ ཡོག༌ག༌ ཁོང༌གུན༌ནི༌ དུན༌ལ༌ དུགས༌།
GEN 18:9 ཁོང༌གུན༌ནི༌ ཁོའ༌ ཏྲིའ༌ ཛདས༌, “ཁྱོ༌རང༌ངི༌ ན༌མ༌ སཱ༌ར༌ ཀ༌ནེ༌ ཡོད༌?” ཁོའེ༌ ལན༌ཏངས༌, “ཀུར༌རི༌ ནང༌ཀུག༌ག༌ ཡོད༌ལེ༌།”
GEN 18:10 ཁོང༌ ཅིག༌གི༌ མོལས༌, “སྟིང༌མ༌ ལོ༌ འིན༌ན༌ ཏུས༌པའེ༌ཀ༌ ང༌ ལོགས༌ཏེ༌ ཡོང༌ཨིན༌ ཡང༌ ཁྱོ༌རང༌ངི༌ ན༌མའ༌ བུ༌ཚ༌ཞིག༌ ཇོར༌ཏེ༌ ཡོང༌ཨིན༌།” སཱ༌ར༌ ཀུར༌རི༌ སྒོའེ༌ དུན༌ལ༌ ཉན༌ཏེ༌ ཡོད༌པིན༌།
GEN 18:11 ཨབ༌ར༌ཧམ༌ དང༌ སཱ༌ར༌ ལོ༌ མང༌པོ༌ སོང༌ཏེ༌ རྒད༌པོ༌ ཡོད༌པིན༌, ཡང༌ སཱ༌ར༌ ཟླ༌ཁྲག༌ བིང༌ཅེས༌པོའང༌ ཆད༌ཏེ༌ མེད༌པིན༌།
GEN 18:12 ཏེན༌ན༌བོའེ༌ཕིའ༌ སཱ༌ར༌ གོདས༌ ཡང༌ སམ༌, “ང༌ དང༌ ངའེ༌ ཞིད༌མད༌ སྒས༌ཏེ༌ ཀ༌ཟུག༌གི༌ ང༌ཞའ༌ ཕྲུ༌གུ༌ ཇོར༌ཏེ༌ སྐྱིད༌པོའེ༌ ཏུས༌ཤིག༌ ཐོབ༌ཐུབ༌ཨིན༌།”
GEN 18:13 ཏེ༌ནེ༌ ཡ༌ཝའེ༌ ཨབ༌ར༌ཧམ༌མ༌ མོལས༌, “ཅི༌ཕིའ༌ སཱ༌ར༌ གོད༌ཏེ༌ ཟེར༌ར༌ནོག༌, ‘ཅི༌ དེན༌བའ༌ ང༌ ཙོགས༌ རྒད༌མོ༌ བུ༌མོ༌ ཞིག༌ག༌ ཕྲུ༌གུ༌ ཇོར༌ཨིན༌ན༌?’
GEN 18:14 ཡ༌ཝའ༌ ཅོ༌མི༌ཉན༌ཅེས༌ ཅི༌ ཡོད༌ཀྱག༌? ཀ༌ཟུག༌ ངའེ༌ ཟེརས༌ སྟིང༌མ༌ ལོ༌ འིན༌ན༌ ཏུས༌པའེ༌ཀ༌ ང༌ ལོགས༌ཏེ༌ ཡོང༌ ཟ༌ནེ༌ སཱ༌ར༌ བུ༌ཚ༌ཞིག༌ ཇོར༌ཏེ༌ ཡོང༌ཨིན༌།”
GEN 18:15 སཱ༌ར༌ ཇིགས༌ པ༌སང༌ ཁོའེ༌ ཟུན༌ ཏངས༌ཏེ༌ ཟེརས༌, “ང༌ མ༌གོད༌པིན༌ལེ༌།” ཨིན༌ནའང༌ ཡ༌ཝའེ༌ མོལས༌, “མན༌, ཁྱོ༌རང༌ གོདས༌།”
GEN 18:16 དོན༌ཏང༌ དོན༌ ཚར༌ར༌ཅིག༌ མི༌གུན༌ སྐྱོད༌ད༌ལ༌ ཞངས༌ཏེ༌ སོ༌དོམ༌མི༌ གྱལ༌ས༌ ཆོགས༌ལ༌ ཟིགས༌ ཡང༌ ཨབ༌ར༌ཧམ༌ དན༌སྐྱལ༌ལ༌ ཁོང༌གུན༌ ཉམ༌པོ༌ སོང༌།
GEN 18:17 ཡ༌ཝའེ༌ ཁོང༌རང༌ང༌ མོལས༌, “ངའེ༌ ཅོ༌ཅེས༌ཅན༌བོ༌ ཨབ༌ར༌ཧམ༌མ༌ ཤད༌ད༌?
GEN 18:18 ཁོའེ༌ པུར༌གྱུད༌གུན༌ གྱལ༌ཁམས༌ ཀྲག༌པོ༌ དང༌ ཝང༌ཅན༌ གྱུར༌ཨིན༌ ཡང༌ ཁོང༌གུན༌ གྱུད༌ཏེ༌ གྱལ༌ཁམས༌ ཚང༌མ༌ལ༌ ཅིན༌ལབས༌ ཐོབ༌ཨིན༌།
GEN 18:19 ངའེ༌ ཁོ༌ ལྡམས༌ཏེ༌ ཨིན༌, ཁོའེ༌ ཁོ༌རང༌ངི༌ པུར༌གྱུད༌གུན༌ དང༌ ཁོའེ༌ ཁང༌པའེ༌ ནང༌ང༌ དུག༌ཁན༌གུན༌ལ༌ འོས༌པ༌ དང༌ ཀྲང༌པོ༌ ཅོ༌ཨིན༌ ཡ༌ཝའེ༌ ལམ༌མི༌ཀ༌ གྲུལ༌ཅེས༌ལ༌ བཀའ༌ཏང༌ཨིན༌། ཏེ༌ནེ༌ ངའེ༌ ཁོ༌ ཉམ༌པོ༌ ཁ༌ཆད༌ ཅོས༌ཁན༌ ཚང༌མ༌ གྲུབ༌ཅུག༌ ཨིན༌།”
GEN 18:20 ཏེ༌ནེ༌ ཡ༌ཝའེ༌ ཨབ༌ར༌ཧམ༌མ༌ མོལས༌, “སོ༌དོམ༌ དང༌ གོ༌མོ༌ར༌པ༌ གུན༌ནི༌ གྱབ༌གལ༌ལ༌ ཉད༌གལ༌ ཀྲག༌པོ༌ ཕོགས༌ཏེ༌ དུག༌ ཅིའ༌ཟེར༌ན༌ ཁོང༌གུན༌ནི༌ སྡིག༌པ༌གུན༌ མ༌ ངན༌པ༌ ཡོད༌ཏེ༌ ཨིན༌ནོག༌།
GEN 18:21 ང༌ ཐུར༌ལ༌ སོང༌ཏེ༌ ཁོང༌ངི༌ སྡིག༌པ༌, ཉད༌གལ༌ ཀལ༌ཁན༌ ཙོགས༌ ངན༌པ༌ དུག༌ག༌ ལྟེན༌, ཀལ༌ཏེས༌ མེད༌ན༌, ངའེ༌ ཤེས༌ཨིན༌།”
GEN 18:22 ཏེ༌ནེ༌ མི༌ ཉིས༌ཀོ༌ སོ༌དོམ༌ གྱལ༌སའེ༌ ཆོགས༌ལ༌ སོང༌ ཨིན༌ནའང༌ ཨབ༌ར༌ཧམ༌ ཡ༌ཝའ༌ ཉམ༌པོ༌ ལངས༌ཏེ༌ དུགས༌།
GEN 18:23 ཨབ༌ར༌ཧམ༌ ཡ༌ཝའེ༌ དུན༌ལ༌ སོང༌ཏེ༌ ཏྲིས༌, “དེན༌བའ༌ ཉེ༌རང༌ངི༌ ཀྲང༌པོ༌ མི༌གུན༌ ངན༌པ༌གུན༌ ཉམ༌པོ༌ མེད༌ཁན༌ ཛད༌ཅེས༌ ཨིན༌ན༌ལེ༌?
GEN 18:24 ཀལ༌ཏེས༌ གྱལ༌སའེ༌ ནང༌ང༌ ཀྲང༌པོ༌ མི༌ 50 ཡོད༌ན༌, ཉེ༌རང༌ངི༌ གྱལ༌ས༌ གང༌མ༌ མེད༌ཁན༌ ཛད༌ཨིན༌ན༌, ཉེ༌རང༌ངི༌ 50 སྐྱོབ༌ཅེས༌སི༌ ཕིའ༌ ཁོང༌གུན༌ལ༌ ཤགས༌པ༌ མི༌སལ༌ལ༌?
GEN 18:25 ཉེ༌རང༌ངི༌ འི༌ཟུག༌ ཅོའ༌ མན༌ནེ༌ མི༌ཛད༌, ཀྲང༌པོ༌ མི༌གུན༌ ངན༌པ༌གུན༌ ཉམ༌པོ༌ སད༌ད༌ མི༌ཛད༌། ཅི༌ཕིའ༌ ཉེ༌རང༌ངི༌ ཀྲང༌པོ༌གུན༌ སྡིག༌ཅན༌གུན༌ ཙོགས༌ ཐེན༌, ཏན༌ཏན༌ལ༌ ཉེ༌རང༌ངི༌ ཏེ༌ཟུག༌ ཅོའ༌ མི༌ཛད༌། ཇིག༌རྟེན༌པ༌གུན༌ལ༌ ཁྲིམས༌ཅད༌ད༌ ཛད༌ཁན༌བོའེ༌ ཀྲང༌པོ༌ ཅི༌ མི༌ཛད༌?”
GEN 18:26 ཡ༌ཝའེ༌ ལན༌སལས༌, “ཀལ༌ཏེས༌ སོ༌དོམ༌མི༌ ནང༌ང༌ ངའ༌ མི༌ ཀྲང༌པོ༌ 50 ཐོབ༌ན༌, ངའེ༌ གྱལ༌ས༌ གང༌པོའ༌ ཁོང༌གུན༌ནི༌ ཏོན༌ལ༌ ཤགས༌པ༌ ཏང༌ཨིན༌།”
GEN 18:27 ཏེ༌ནེ༌ ཨབ༌ར༌ཧམ༌མི༌ ཡང༌སྐྱར༌ ཟེརས༌, “ཧམ༌པ༌ ཅོས༌ཏེ༌ ཡ༌ཝའ༌ ཟེར༌ཁན༌ ངའ༌ ཐལ༌བ༌ དང༌ ཀོག༌ཐལ༌ ཙོགས༌ ཨིན༌,
GEN 18:28 ཀལ༌ཏེས༌ ཀྲང༌པོ༌གུན༌ནི༌ ཀྲངས༌ཀ༌ 50 མན༌པ༌ 45 ཡོད༌ན༌ ཅི༌ ཉེ༌རང༌ངི༌ ལྔ༌ ཉུ༌ངུན༌ ཡོད༌ཅེས༌པའེ༌ གྱལ༌ས༌ གང༌པོ༌ མེད༌ཁན༌ ཛད༌ཨིན༌ན༌?” ཡ༌ཝའེ༌ ལན༌སལས༌ “ཀལ༌ཏེས༌ ངའ༌ ཀྲང༌པོ༌ མི༌ 45 ཐོབ༌ན༌ ངའེ༌ གྱལ༌ས༌ མེད༌ཁན༌ མི༌ཅོ༌?”
GEN 18:29 ཨབ༌ར༌ཧམ༌མི༌ ཡང༌སྐྱར༌ ཟེརས༌, “ཀལ༌ཏེས༌ 40 མ༌ནེ༌ མེད༌ན༌?” ཡ༌ཝའེ༌ མོལས༌, “40 ཏོན༌ལ༌ ངའེ༌ གྱལ༌ས༌ མེད༌ཁན༌ མི༌ཅོ༌།”
GEN 18:30 ཨབ༌ར༌ཧམ༌མི༌ ཟེརས༌, “གཙོ༌བོ༌ལེ༌ ངའེ༌ ཟེར༌ཅེས༌ཅན༌བོའ༌ ཇུ༌ཇུ༌ ཐུགས༌སྲོ༌ མ༌སྐྱོད༌, ཀལ༌ཏེས༌ 30 མ༌ནེ༌ མེད༌ན༌?” ཁོང༌ངི༌ མོལས༌, “ཀལ༌ཏེས༌ 30 ཐོབ༌ན༌ ངའེ༌ གྱལ༌ས༌ མེད༌ཁན༌ མི༌ཅོ༌།”
GEN 18:31 ཨབ༌ར༌ཧམ༌མི༌ ཟེརས༌, “གཙོ༌བོ༌ལེ༌ ཇུ༌ཇུ༌ ངའེ༌ ཧམ༌པ༌ ཅོ༌ཅེས༌པོའ༌ གོངས༌པ༌ སལ༌, ཀལ༌ཏེས༌ 20 མ༌ནེ༌ མེད༌ན༌?” ཁོང༌ངི༌ མོལས༌, “20 ཏོན༌ལ༌ ངའེ༌ གྱལ༌ས༌ མེད༌ཁན༌ མི༌ཅོ༌།”
GEN 18:32 ཏེ༌ནེ༌ ཨབ༌ར༌ཧམ༌མི༌ ཟེརས༌, “ཇུ༌ཇུ༌ ཐུགས༌སྲོ༌ མ༌སྐྱོད༌ད༌ ངའ༌ ཡང༌ ལན༌ཅིག༌ ཟེར༌ཅུག༌, ཀལ༌ཏེས༌ 10 མ༌ནེ༌ མེད༌ན༌?” ཁོང༌ངི༌ མོལས༌, “10 ཏོན༌ལ༌ ངའེ༌ གྱལ༌ས༌ མེད༌ཁན༌ མི༌ཅོ༌།”
GEN 18:33 ཡ༌ཝའེ༌ ཨབ༌ར༌ཧམ༌ ཉམ༌པོ༌ ཞལ༌ཏ༌ མོལ༌ ཚར༌ཏེ༌ སྟིང༌ནེ༌ ཁོང༌ སྐྱོད༌ད༌ ཛདས༌ ཡང༌ ཨབ༌ར༌ཧམ༌ ཁོ༌རང༌ངི༌ ཀུར༌ལ༌ ལོགས༌ཏེ༌ སོང༌།
GEN 19:1 ཕོ༌ཉ༌ ཉིས༌ཀོ༌ ཏེན༌ན༌ ཕི༌ཏོག༌ སོ༌དོམ༌མ༌ ལེབ༌བ༌ཅིག༌, ལོད༌ གྱལ༌སའེ༌ གྱས༌སྒོའེ༌ཀ༌ དུགས༌ཏེ༌ ཡོད༌པིན༌། ཁོང༌གུན༌ ཐོང༌ང༌ཅིག༌ ཁོ༌ ཐུག༌ག༌ལ༌ སོང༌ ཡང༌ ཀུས༌པ༌ སྟན༌ཏེ༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 19:2 ཡང༌ ཁོའེ༌ ཟེརས༌, “སྤོན༌བོ༌གུན༌, ཇུ༌ཇུ༌ ཉེ༌ཞའེ༌ ཞབས༌ཏོག༌པའེ༌ ཁང༌པ༌ སྐྱོད༌ད༌ ཛད༌ ཡང༌ རྐང༌པ༌ ཁྲུའ༌ ཛད༌ཏེ༌ ཚན༌ལ༌ ཞུགས༌ས༌ཛད༌, ཏེ༌ནེ༌ ང༌མོ༌ནེ༌ ཞངས༌ཏེ༌ ཉེ༌ཞ༌གུན༌ རང༌ངི༌ བེས༌ལ༌ སྐྱོད༌།” ཁོང༌གུན༌ནི༌ མོལས༌ “ཐུག༌རྗེ༌ཆེ༌, ང༌ཞའེ༌ ཚན༌བོ༌ གྱལ༌སའེ༌ ལམ༌མི༌ཀ༌ ཕུད༌ཨིན༌།”
GEN 19:3 ཨིན༌ནའང༌ ཁོའེ༌ རང༌གྱལ༌ ཏངས༌ པ༌སང༌ ཁོང༌གུན༌ ཁོ༌ ཉམ༌པོ༌ ཁོའེ༌ ཁང༌པ༌ སྐྱོདས༌། ལོད༌དི༌ ཁོང༌གུན༌ནི༌ ཕིའ༌ སྐྱུར༌ མེད༌ཁན༌ནི༌ ཏ༌གི༌ དང༌ དོན༌ཏང༌ གྱས༌པ༌ ཅོ༌ཅུགས༌ ཡང༌ ཁོང༌གུན༌ནི༌ དོནས༌།
GEN 19:4 ཁོང༌གུན༌ ཉིད༌ལོག༌ག༌ སྐྱོད༌དི༌ སང༌ སྔུན༌ལ༌ སོ༌དོམ༌པ༌ ཞུ༌ནུ༌ དང༌ རྒད༌པོ༌ བུ༌ཚ༌ ཚང༌མའེ༌ ལོད༌དི༌ ཁང༌པའ༌ ཐའ༌ སྐོརས༌།
GEN 19:5 ཁོང༌གུན༌ནི༌ ཀུ༌ཅོ༌ ཏངས༌ཏེ༌ ལོད༌ལ༌ ཏྲིས༌, “དི༌རིང༌ ཚན༌ལ༌ ཁྱོ༌རང༌ངི༌ ཁང༌པ༌ དུག༌ག༌ལ༌ ཡོངས༌ཁན༌ནི༌ མི༌གུན༌ ཀ༌ནེ༌ ཡོད༌, ང༌ཞའ༌ ཁོང༌གུན༌ ཉམ༌པོ༌ ལུས༌བྲེལ༌ ཅོ༌ཉན༌ཅེས༌ལ༌ ཁོང༌གུན༌ ཕི༌ལོག༌ག༌ ཕིང༌།”
GEN 19:6 ཁོང༌གུན༌ ཉམ༌པོ༌ སྤེ༌ར༌ ཏང༌ང༌ལ༌ ལོད༌ ཕི༌ལོག༌ག༌ བིང༌ཏེ༌ སོང༌ ཡང༌ སྒོ༌བོ༌ ཅུགས༌།
GEN 19:7 ཁོའེ༌ ཁོང༌གུན༌ལ༌ ཟེརས༌, “ཇུ༌ཇུ༌ ཛ༌འོ༌གུན༌ འི༌ཙོགས༌ ལས༌ ངན༌པ༌ མ༌ཅོ༌ཤིག༌།
GEN 19:8 ལྟོས༌, ངའ༌ བུ༌ཚ༌ ཉམ༌པོ༌ མ༌ དྲེས༌ཁན༌ནི༌ བུ༌མོ༌ ཉིས༌ ཡོད༌། ངའེ༌ ཁོང༌གུན༌ ཁྱོ༌ཞ༌གུན༌ནི༌ ཕིའ༌ ཕིངས༌ཏེ༌ ཁྱོང༌ཨིན༌ ཡང༌ ཁྱོ༌ཞ༌གུན༌ནི༌ ཁོང༌གུན༌ ཉམ༌པོ༌ ཅི༌ ཅོ༌ཨིན༌ སམ༌ནའང༌ ཅོས༌, ཨིན༌ནའང༌ འི༌ མི༌གུན༌ལ༌ ཅའང༌ མ༌ཅོ༌ཤིག༌། ཁོང༌གུན༌ ངའེ༌ གྲོན༌པོ༌ ཨིན༌ཅེས༌པོའེ༌ ངའེ༌ ཁོང༌གུན༌ སྐྱོབ༌གོས༌།”
GEN 19:9 ཨིན༌ནའང༌ ཁོང༌གུན༌ནི༌ ཟེརས༌, “ང༌ཞ༌གུན༌ནི༌ ལམ༌མི༌ ཀ༌ནེ༌ ལོངས༌, ཁྱོད༌ ཞན༌མ༌ ཡུལ༌ལི༌མི༌, ང༌ཞའ༌ ལམ༌སྟོན༌ ཏང༌ཁན༌ ཁྱོ༌རང༌ སུ༌ ཨིན༌། ང༌ཞ༌གུན༌ནི༌ ཁྱོ༌རང༌ང༌ ཁོང༌གུན༌ནི༌ སང༌ མང༌ང༌ ངན༌པ༌ ཅོ༌ཨིན༌།” སྒོ༌བོ༌ ཅག༌ཅེས༌ལ༌ ཁོང༌གུན༌ནི༌ ལོད༌ གྱབ༌བ༌ སྲན༌ཏྲེ༌ ཕུལས༌།
GEN 19:10 ཨིན༌ནའང༌ ནང༌ཀུག༌ག༌ ཡོད༌ཁན༌ནི༌ མི༌ ཉིས༌ཀོའེ༌ ལོད༌ ནང༌ཀུག༌ག༌ དྲུད༌ཏེ༌ སྒོ༌བོ༌ ཅུགས༌།
GEN 19:11 ཏེ༌ནེ༌ ཁོང༌གུན༌ནི༌ སྒོའེ༌ དུན༌ལ༌ ཡོད༌ཁན༌ མི༌ཚང༌མ༌ལ༌ སྒོ༌བོ༌ མི༌ཐོང༌ཅེས༌ལ༌ ཞ༌ར༌ གྱུར༌ཅུག༌ག༌ ཛདས༌།
GEN 19:12 ཕོ༌ཉ༌ ཉིས༌ཀོའེ༌ ལོད༌ལ༌ མོལས༌, “ཁྱོ༌རང༌ང༌ འི༌རུ༌ ཞན༌སུ༌ ཡོད༌? བུ༌ཚ༌, བུ༌མོ༌, བུ༌མོའེ༌ མག༌པ༌ ཡ༌ ཞན༌ ཉེན༌གྲུང༌ འི༌ གྱལ༌སའེ༌ ནང༌ང༌ དུག༌ཁན༌, ཁོང༌གུན༌ འི༌ཀ༌ནེ༌ ཕིངས༌ཏེ༌ ཁྱེར༌,
GEN 19:13 ཅིའ༌ཟེར༌ན༌ ང༌ཞའེ༌ འི༌ ནས༌ས༌བོ༌ མེད༌ཁན༌ ཅོ༌ཅེས༌ ཨིན༌། འི༌ མི༌གུན༌ནི༌ གྱབ༌གལ༌ལ༌ ཉད༌གལ༌ ངན༌པ༌བོ༌ ཡ༌ཝའེ༌ སན༌ན༌ ཛདས༌ཏེ༌ ང༌ཞ༌གུན༌ འི༌ ནས༌ས༌ མེད༌ཁན༌ ཅོ༌ཅེས༌ལ༌ ལམ༌ཅུག༌ག༌ ཛདས༌།”
GEN 19:14 ཏེ༌ནེ༌ ལོད༌ ཁོའེ༌ བུ༌མོ༌གུན༌ ཉམ༌པོ༌ བག༌སྟོན༌ ཅོ༌ཅེས༌ཅན༌ བུ༌ཚ༌གུན༌ནི༌ཀ༌ སོང༌, ཡང༌ ཟེརས༌, “གྱོགས༌པ༌ འི༌ ནས༌ས༌ནེ༌ བིང༌། ཡ༌ཝའེ༌ འི༌ ནས༌ས༌བོ༌ མེད༌ཁན༌ ཛད༌ཅེས༌ དུག༌།” ཨིན༌ནའང༌ ཁོང༌གུན༌ནི༌ ཁོའེ༌ ཡངས༌པ༌ ཏང༌ཏེ༌ ཨིན༌ནོག༌ སམ༌།
GEN 19:15 ང༌ཏོག༌ ནམ༌ལངས༌ལ༌ ཕོ༌ཉ༌གུན༌ནི༌ ལོད༌ལ༌ མོལས༌, “གྱོགས༌པ༌ རང༌ངི༌ ན༌མ༌ དང༌ བུ༌མོ༌ ཉིས༌ཀོ༌ ཁྲིད༌ཏེ༌ འི༌ཀ༌ནེ༌ བིང༌ཏེ༌ སོང༌ ཏེ༌མན༌ནེ༌ གྱལ༌ས༌བོ༌ མེད༌ཁན༌ ཅོའ༌ཅིག༌ ཁྱོ༌རང༌ངའང༌ མེད༌ཁན༌ ཆེན༌།”
GEN 19:16 ལོད༌དི༌ ཐེ༌ཚོམས༌ ཅོས༌པ༌ ཕོ༌ཉ༌གུན༌ནི༌ ཁོ༌, ཁོའེ༌ ན༌མ༌ དང༌ བུ༌མོ༌ ཉིས༌ཀོ༌ ལག༌པ༌ ཐམས༌ཏེ༌ གྱལ༌ས༌ནེ༌ ཕི༌ལོག༌ག༌ ཕིངས༌ཏེ༌ ཁྱེརས༌, ཡ༌ཝའེ༌ ཁོའེ༌ཀ༌ སྙིང༌རྗེ༌ ཛདས༌།
GEN 19:17 ཏེ༌ནེ༌ ཕོ༌ཉ༌ ཅིག༌གི༌ མོལས༌, “ཤོར༌ ཡང༌ རང༌ངི༌ མི༌ཚེའེ༌ སྐྱོབ༌, གྱབ༌ ལོགས༌ཏེ༌ མ༌ལྟ༌, ཡང༌ ཤི༌ མི༌ཤི༌ཅེས༌སི༌ ཕིའ༌ ལུང༌པའེ༌ ནང༌ང༌ མ༌དུག༌ག༌ བྲག༌གུན༌ ཆོགས༌ལ༌ ཤོར༌།”
GEN 19:18 ལོད༌དི༌ ཟེརས༌, “ཇུ༌ཇུ༌ སྤོན༌བོ༌ལེ༌ ང༌ཞ༌གུན༌ལ༌ ཏེ༌ཟུག༌ ཅོ༌ཅུག༌ག༌ མ༌ཛད༌།
GEN 19:19 ཉེ༌རང༌ངི༌ ངའེ༌ མི༌ཚེ༌ སྐྱོབ༌བ༌ ཛད༌ཏེ༌ ངའ༌ ཐུག༌རྗེ༌ ཆེན༌མོ༌ ཛདས༌། ཨིན༌ནའང༌ ངའ༌ འ༌ ཐག༌རིང༌ང༌ ཡོད༌ཁན༌ནི༌ བྲག༌གུན༌ ཚག༌པ༌ ཤོར༌ཐུབ༌ཅེས༌ མེ༌རག༌། ངའ༌ ཇིགས༌ས༌རག༌ འི༌ རྡུག༌ངལ༌བོ༌ ངའེ༌ཀ༌ ལེབས༌ཏེ༌ ང༌ མེད༌ཁན༌ ཆའ༌ནོག༌།
GEN 19:20 ཟིགས༌སའང༌, འ༌ གྲོང༌ཁྱེར༌བོ༌ དུན༌ལ༌ དུག༌ལེ༌, ང༌ ཏེ༌རུ༌ ཤོར༌ཅུག༌ག༌ ཛད༌, ཏེ༌བོ༌ ས༌ཆ༌ ཆུ༌ངུན༌ཞིག༌ མ༌ནེ༌ མི༌དུག༌ ཡང༌ ང༌ ཐར༌ཨིན༌ལེ༌།”
GEN 19:21 ཁོང༌ངི༌ ལན༌སལས༌, “ངའེ༌ ཁྱོ༌རང༌ངི༌ ཕིའ༌ འི༌བོའང༌ ཅོ༌ཨིན༌, ང༌ཞའེ༌ གྲོང༌ཁྱེར༌བོ༌ མེད༌ཁན༌ མི༌ཅོ༌།
GEN 19:22 གྱོགས༌པ༌ སོང༌ ཁྱོ༌ཞ༌གུན༌ ཏེ༌རུ༌ ལེབས༌ཏེ༌ མ༌ནེ༌ ངའ༌ ཅའང༌ ཅོ༌མི༌ཉན༌།” ལོད༌དི༌ ཏེ༌ གྲོང༌ཁྱེར༌རི༌ མིང༌ང༌ ཟོ༌འར༌ ཏགས༌།
GEN 19:23 ལོད༌ ཟོ༌འར༌ གྲོང༌ཁྱེར༌ལ༌ ལེབ༌བ༌ཅིག༌ ཉི༌མ༌ ཤར༌ཏེ༌ ཡོད༌པིན༌།
GEN 19:24 ཏེ༌ནེ༌ ཡ༌ཝའེ༌ མེ༌ དང༌ མུ༌ཟི༌ ཆར༌པ༌ ནམ༌ཁའ༌ནེ༌ སོ༌དོམ༌ དང༌ གོ༌མོ༌རའི༌ གྱལ༌ས༌ གུན༌ནི༌ཀ༌ ཕབ༌བ༌ ཛདས༌,
GEN 19:25 ཡང༌ གྱལ༌ས༌གུན༌ དང༌ ལུང༌པ༌ གང༌པོ༌, མ༌ཚད༌ ཏེ༌ནང༌ང༌ དུག༌ཁན༌ དང༌ རྩ༌ཁའ༌ ཚང༌མ༌ མེད༌ཁན༌ ཅོའ༌ ཛདས༌།
GEN 19:26 ཨིན༌ནའང༌ ལོད༌དི༌ ན༌མའེ༌ གྱབ༌ ལོགས༌ཏེ༌ ལྟས༌པ༌ ཁོ༌ ཚཱའེ༌ ཀ༌ཝ༌ ཞིག༌ག༌ གྱུར༌།
GEN 19:27 སྟིང༌མ༌ཞག༌ག༌ ང༌ཏོག༌ ང༌མོ༌ནེ༌ ཨབ༌ར༌ཧམ༌, ཡ༌ཝ༌ ཉམ༌པོ༌ ཞལ༌ཏ༌ སལ༌ཁན༌ནི༌ ནས༌སའེ༌ཀ༌ ཡང༌སྐྱར༌ སོང༌།
GEN 19:28 ཁོའེ༌ ཐུར༌ལ༌ སོ༌དོམ༌, གོ༌མོ༌ར༌ དང༌ ལུང༌པ༌ ཚང༌མ༌ ལྟས༌པ༌ ཁོའ༌ མེ༌ བྲག༌པོ༌ བར༌ ཟ༌ནེ༌ བིང༌ཁན༌ ཙོགས༌ སྐན༌ཏེ༌ ཏུད༌པ༌ ཀེན༌ལ༌ བིང༌ཨིན༌ ཐོང༌།
GEN 19:29 ཨིན༌ནའང༌ དཀོན༌མཆོག༌གི༌ ཏེ༌ ལུང༌པའེ༌ གྱལ༌ས༌གུན༌ མེད༌ཁན༌ ཅོའ༌ ཛད༌ ཟ༌ནེ༌ ཁོང༌ངི༌ ཨབ༌ར༌ཧམ༌ ཨིད༌ཏུ༌ ཛད༌ཏེ༌ ལོད༌ ཏེ༌ གྱལ༌ས༌གུན༌ མེད༌ཁན༌ ཅོའ༌ ཛད༌ཅེས༌སི༌ ཇིགས༌ནང༌ནེ༌ ཕིང༌ཏེ༌ ཁྱོང༌ང༌ ཛདས༌།
GEN 19:30 ལོད༌ ཟོ༌འར༌ གྲོང༌ཁྱེར༌རི༌ ནང༌ང༌ དུག༌ག༌ལ༌ ཇིགས༌པ༌, ཁོ༌ དང༌ ཁོའེ༌ བུ༌མོ༌ ཉིས༌ཀོ༌ རི༌གུན༌ནི༌ཀ༌ བྲག༌ཕུགས༌ ཤིག༌གི༌ ནང༌ང༌ དུགས༌།
GEN 19:31 བུ༌མོ༌ ཆེན༌མོ༌བོའེ༌ ཁོ༌རང༌ངི༌ ནོ༌མོའ༌ ཟེརས༌, “ང༌དང༌ངི༌ ཨ༌བ༌ སྒས༌ཏེ༌ ཨིན༌ནོག༌ ཡང༌ འི༌ ནས༌སའེ༌ ནང༌ང༌ ང༌དང༌གུན༌ནི༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌ལ༌ བུ༌ཚ༌ཞིག༌ མེད༌ཏེ༌ ཨིན༌ནོག༌།
GEN 19:32 ཡོང༌ ང༌དང༌ངི༌ ཨ༌བ༌ ར༌རོས༌ ཅུགས༌ཏེ༌ ང༌དང༌གུན༌ནི༌ པུར༌གྱུད༌ ལུས༌ཤེས༌ལ༌ ཁོང༌ ཉམ༌པོ༌ ལུས༌བྲེལ༌ ཅོ༌ཨིན༌།”
GEN 19:33 ཏེན༌ན༌ ཚན༌ལ༌ ཁོང༌གུན༌ནི༌ ཨ༌བའ༌ ཆང༌ ཐུང༌ཅེས༌ལ༌ ཏངས༌ ཡང༌ བུ༌མོ༌ ཆེན༌མོ༌བོའེ༌ ཁོ༌ ཉམ༌པོ༌ ལུས༌བྲེལ༌ ཅོས༌། ཨིན༌ནའང༌ ལོད༌ མ༌ སྲན༌ཏྲེ༌ ར༌རོས༌ཏེ༌ ཡོད༌ པ༌སང༌ ཁོའ༌ ཏེ༌བོ༌ གྱུས༌ མ༌སོང༌།
GEN 19:34 སྟིང༌མ༌ཞག༌པོ༌ བུ༌མོ༌ ཆེན༌མོ༌བོའེ༌ ནོ༌མོའ༌ ཟེརས༌, “དའང༌ ཚན༌ལ༌ ང༌ ཨ༌བ༌ ཉམ༌པོ༌ དུགས༌པིན༌, དི༌རིང༌ ཚན༌ལ༌ ཁོང༌ ར༌རོས༌ ཅུག༌ཏེ༌ ཁྱོ༌རང༌ངི༌ ཁོང༌ ཉམ༌པོ༌ ལུས༌བྲེལ༌ ཅོས༌། ཏེ༌ནེ༌ ཨ༌བ༌ གྱུད༌ཏེ༌ ང༌དང༌ངི༌ ང༌དང༌ རང༌ངི༌ པུར༌གྱུད༌ སྐྱོབ༌ཨིན༌།”
GEN 19:35 ཏེ༌ནེ༌ ཏེ༌ ཚན༌བོའ༌ ཁོང༌གུན༌ནི༌ ཨ༌བ༌ ཆང༌ ཏངས༌ ཡང༌ བུ༌མོ༌ ཆུང༌ང༌བོའེ༌ ཁོ༌ ཉམ༌པོ༌ དུགས༌། ཡང༌སྐྱར༌ ཁོ༌ མ༌ བྲག༌པོ༌ ར༌རོས༌ཏེ༌ ཡོད༌ པ༌སང༌ ཁོའ༌ ཏེ༌བོ༌ གྱུས༌ མ༌སོང༌།
GEN 19:36 ཏེན༌ན༌ ཟུག༌ག༌ ལོད༌དི༌ བུ༌མོ༌ ཉིས༌ཀོ༌ ཁོང༌རང༌གུན༌ནི༌ ཨ༌བ༌ གྱུད༌ཏེ༌ སྐྱེ༌ཅེས༌མ༌ གྱུར༌།
GEN 19:37 བུ༌མོ༌ ཆེན༌མོའ༌ བུ༌ཚ༌ཞིག༌ ཇོར༌ ཀ༌བོའ༌ ཁོའེ༌ མོ༌འབ༌ མིང༌ ཏགས༌། ཁོ༌ ནི༌ འི༌ ཏུས༌སི༌ མོ༌འབ༌པའེ༌ ཕ༌མེས༌པོ༌ ཨིན༌ནོག༌།
GEN 19:38 བུ༌མོ༌ ཆུ༌ངུན༌བོའང༌ བུ༌ཚ༌ཞིག༌ སྐྱེས༌, ཀ༌བོའ༌ ཁོའེ༌ བིན༌ཨམ༌མི༌ མིང༌ ཏགས༌། ཁོ༌ ནི༌ འི༌ ཏུས༌སི༌ ཨེམ༌མོན༌པའེ༌ ཕ༌མེས༌པོ༌ ཨིན༌ནོག༌།
GEN 20:1 ཨབ༌ར༌ཧམ༌ མམ༌རེ༌ནེ༌ ནེ༌གེཝ༌ ཡུལ༌ཇོངས༌ལ༌ སོང༌ ཡང༌ ཀ༌དེཤ༌ དང༌ ཤུར༌རི༌ པར༌རི༌ ནས༌སའེ༌ ནང༌ང༌ ཚུགས༌ཏེ༌ དུགས༌། སྟིང༌ནེ༌ ཁོ༌ གེ༌རར༌རི༌ ནང༌ང༌ དུག༌ ཟ༌ནེ༌,
GEN 20:2 ཨབ༌ར༌ཧམ༌མི༌ ཁོའེ༌ ན༌མ༌ སཱ༌ར༌, “ཁོ༌ ངའེ༌ སྲིང༌མོ༌ ཨིན༌” ཟེར༌ པ༌སང༌ གེ༌རར༌རི༌ གྱལ༌པོ༌ ཨ༌བི༌མེ༌ལེག༌གི༌ སཱ༌ར༌ ན༌མ༌ ཅོ༌ཅེས༌ལ༌ ཁོའེ༌ ཁར༌ལ༌ ཁྱོང༌ང༌ ལམ༌ཅུགས༌།
GEN 20:3 ཨིན༌ནའང༌ ཚན༌ལ༌ ཁོའ༌ ཉི༌ལམ༌མི༌ ནང༌ང༌ དཀོན༌མཆོག༌ ཇལ༌ཏེ༌ མོལས༌, “ཁྱོ༌རང༌ ཤི༌ཨིན༌ ཅིའ༌ཟེར༌ན༌ ཁྱོ༌རང༌ངི༌ ཁྱེར༌ཁན༌ནི༌ བུ༌མོ༌ ན༌མ༌ ཅོ༌ཁན༌ཞིག༌ ཨིན༌།”
GEN 20:4 ཏ༌རོང༌ ཚག༌པ༌ ཨ༌བི༌མེ༌ལེག༌གི༌ ཁོའ༌ ལག༌པའང༌ མ༌རྩེའ༌ ཨིན༌པིན༌, ཁོའེ༌ ཟེརས༌, “གཙོ༌བོ༌ལེ༌, ཉེ༌རང༌ངི༌ ང༌ཞའེ༌ གྱལ༌ཁམས༌ ནོངས༌མེད༌པོ༌ མེད༌ཁན༌ ཛད༌ཨིན༌ན༌?
GEN 20:5 ཨབ༌ར༌ཧམ༌ ཁོ༌རང༌ངི༌ སཱ༌ར༌ ‘ཁོ༌ ངའེ༌ སྲིང༌མོ༌ ཨིན༌’ ཟེར༌ར༌རག༌པིན༌ ཡང༌ བུ༌མོ༌བོའེང༌ ཟེརས༌, ‘ཁོ༌ ངའེ༌ མིང༌བོ༌ ཨིན༌’ ངའེ༌ ཏེ༌བོ༌ སྐྱོན༌ མ༌ཏང༌ང༌ སེམས༌ ལག༌མོ༌ ཉམ༌པོ༌ ཅོས༌པིན༌།”
GEN 20:6 ཏེན༌ན༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཁོའ༌ མོལས༌, “འོ༌ན༌ ང༌ གྱུས༌ཡོད༌ ཁྱོ༌རང༌ངི༌ ཏེ༌བོ༌ སེམས༌ ལག༌མོ༌ ཉམ༌པོ༌ ཅོས༌ པ༌སང༌ ངའེ༌ ཁྱོ༌རང༌ང༌ ངའེ༌ གྱབ༌གལ༌ལ༌ སྡིག༌པ༌ ཅོ༌ མ༌ཅུགས༌པིན༌། ཏེན༌ན༌བོའེ༌ཕིའ༌ ངའེ༌ ཁྱོ༌རང༌ང༌ ཁོའ༌ ལག༌པ༌ རྩེ༌ མ༌ཅུགས༌པིན༌།
GEN 20:7 ཏ༌ བུ༌མོ༌བོ༌ ཁོ༌རང༌ངི༌ མག༌པ༌ ལོགས༌ཏེ༌ ཏོང༌ ཅིའ༌ཟེར༌ན༌ ཁོ༌ ལུང༌སྟོན༌པ༌ཞིག༌ ཨིན༌, ཡང༌ ཁོའེ༌ ཁྱོ༌རང༌ངི༌ ཕིའ༌ མོས༌ལམ༌ ཞུ༌ཅེས༌པའེ༌ ཁྱོ༌རང༌ ཤི༌ མི༌ཤི༌། ཨིན༌ནའང༌ ཀལ༌ཏེས༌ ཁྱོ༌རང༌ངི༌ ཁོ༌ ལོགས༌ཏེ༌ མ༌ཏང༌ན༌, ཏན༌ཏན༌ ཁྱོ༌རང༌ དང༌ ཁྱོ༌རང༌ངི༌ མི༌ ཚང༌མ༌ ཤི༌ཨིན༌།”
GEN 20:8 སྟིང༌མ༌ཞག༌ ང༌མོ༌ནེ༌ ཨ༌བི༌མེ༌ལེག༌གི༌ ཁོ༌རང༌ངི༌ ལས༌མི༌ ཚང༌མ༌ བོད༌ཏེ༌ ཁོང༌གུན༌ལ༌ ཇུང༌ཁན༌ ཚང༌མ༌ ཤདས༌ ཡང༌ ཁོང༌གུན༌ སྲན༌ཏྲེ༌ ཇིགས༌།
GEN 20:9 ཏེ༌ནེ༌ ཨ༌བི༌མེ༌ལེག༌གི༌ ཨབ༌ར༌ཧམ༌མ༌ བོད༌ཏེ༌ ཟེརས༌, “ཁྱོ༌རང༌ངི༌ ང༌ཞ༌གུན༌ལ༌ འི༌བོ༌ ཅི༌ ཅོས༌ཏེ༌ ཨིན༌? ངའེ༌ གྱལ༌སྲིད༌དི༌ཀ༌ འི༌ ནོད༌པ༌ ཁོང༌ཅེས༌ལ༌ ངའེ༌ ཁྱོ༌རང༌ ཉམ༌པོ༌ ཅི༌ ངན༌པ༌ ཅོས༌། ཁྱོ༌རང༌ངི༌ ཅོས༌ཁན༌ ཙོགས༌ སུ༌ཞིག༌གིའང༌ མི༌ཅོ༌།
GEN 20:10 ཅི༌ཕིའ༌ ཁྱོ༌རང༌ངི༌ འི༌བོ༌ ཅོས༌པིན༌?”
GEN 20:11 ཨབ༌ར༌ཧམ༌མི༌ ལན༌ཏངས༌, “‘འི༌ ནས༌སའེ༌ ནང༌ང༌ དཀོན༌མཆོག༌ག༌ རྩི༌ཝ༌ ཅོ༌ཁན༌ སུ༌ཞིག༌གའང༌ མེད༌གྲོ༌ ཡང༌ ཁྱོ༌ཞ༌གུན༌ནི༌ ངའེ༌ ན༌མའེ༌ ཕིའ༌ ང༌ སད༌ད༌ནོག༌’ སམ༌།
GEN 20:12 དེན༌བའ༌ ཟེར༌ན༌ ཁོ༌ ངའེ༌ སྲིང༌མོ༌ ཨིན༌, ཁོ༌ ངའེ༌ ཨ༌བའེ༌ བུ༌མོ༌, ཨིན༌ནའང༌ ང༌ཞའེ༌ ཨ༌མ༌ སོ༌སོ༌ ཨིན༌ ཡང༌ ངའེ༌ ཁོ༌ ཉམ༌པོ༌ ན༌མ༌ ཅོས༌པིན༌།
GEN 20:13 དཀོན༌མཆོག༌གི༌ ངའ༌ ང༌རི༌ ཨ༌བའེ༌ ཁང༌པ༌ནེ༌ ཞན༌ཡུལ༌གུན༌ལ༌ ལམ༌ཅུག༌ ཟ༌ནེ༌, ངའེ༌ ཁོའ༌ ཟེར༌པིན༌, ‘ང༌དང༌ ཀ༌རུ༌ ཆ༌ནའང༌ ཚང༌མ༌ལ༌ ང༌ ཁྱོ༌རང༌ངི༌ མིང༌བོ༌ ཨིན༌ ཟེར༌ཏེ༌ ཁྱོ༌རང༌ངི༌ ངའེ༌ ཕིའ༌ ཐུག༌རྗེ༌ ཅོས༌།’”
GEN 20:14 ཏེ༌ནེ༌ ཨ༌བི༌མེ༌ལེག༌གི༌ སཱ༌ར༌ ཨབ༌ར༌ཧམ༌མ༌ ལོགས༌ཏེ༌ ཏངས༌, ཏེ༌ མ༌ཚད༌ ཁོའེ༌ ཁོའ༌ ལུག༌ དང༌ བ༌ལང༌ དང༌ ཚེ༌ཡོག༌ གུན༌ ཏངས༌
GEN 20:15 ཡང༌ ཟེརས༌, “ཨབ༌ར༌ཧམ༌ ངའེ༌ ས༌ཀྱད༌ ཚང༌མ༌ ལྟོས༌, ཁྱོ༌རང༌ ཀ༌རུ༌ ཚུགས༌ཏེ༌ དུག༌ཨིན༌ སམ༌ནའང༌ དུག༌།”
GEN 20:16 ཁོའེ༌ སཱ༌ར༌ ཟེརས༌, “ཁྱོ༌རང༌ ཉམ༌པོ༌ ཡོད༌ཁན༌གུན༌ལ༌ ཁྱོ༌རང༌ ནོངས༌མེད༌ ཨིན༌ཁན༌ སྟན༌ཅེས༌སི༌ ཕིའ༌ ངའེ༌ ཁྱོ༌རང༌ངི༌ མིང༌བོའ༌ མུལ༌ སྟོང༌ ཅིག༌ ཏང༌ངད༌།”
GEN 20:17 ཏེ༌ནེ༌ ཨབ༌ར༌ཧམ༌མི༌ དཀོན༌མཆོག༌ག༌ མོས༌ལམ༌ ཞུས༌ ཡང༌ དཀོན༌མཆོག༌གི༌ ཨ༌བི༌མེ༌ལེག༌, ཁོའེ༌ ན༌མ༌ དང༌ ཁོའེ༌ ཡོག༌མོ༌གུན༌ ཕན༌ཅུག༌ག༌ ཛད༌པ༌ ཡང༌སྐྱར༌ ཁོང༌གུན༌ལ༌ ཕྲུ༌གུ༌ ཇོར༌ཐུབ༌,
GEN 20:18 ཅིའ༌ཟེར༌ན༌ ཨབ༌ར༌ཧམ༌མི༌ ན༌མ༌ སཱ༌རའེ༌ ཞས༌ཏེ༌, ཡ༌ཝའེ༌ ཨ༌བི༌མེ༌ལེག༌གི༌ ཁར༌རི༌ ནང༌ང༌ ཡོད༌ཁན༌ བུ༌མོ༌ ཚང༌མའེ༌ ཕྲུ༌གུ༌ ཇོར༌ཅེས༌སི༌ ཁྱུད༌པོ༌ མེད༌ཁན༌ ཛད༌ཏེ༌ ཨིན༌པིན༌།
GEN 21:1 ཡ༌ཝའེ༌ སཱ༌ར༌ ཁོང༌རང༌ངི༌ ཞལ༌ཆད༌ ཛད༌ཁན༌ ནང༌ཞིན༌ ཅིན༌ལབས༌ སལས༌།
GEN 21:2 ཁོ༌ སྐྱེ༌ཅེས༌མ༌ཞིག༌ གྱུར༌ ཡང༌ ཨབ༌ར༌ཧམ༌ སྒས༌ཏེ༌ ཡོད༌ནའང༌ དཀོན༌མཆོག༌གི༌ མོལ༌ཁན༌ནི༌ ཏུས༌པོའེ༌ཀ༌ ཁོའེ༌ ན༌མ༌ སཱ༌རའ༌ བུ༌ཚ༌ཞིག༌ སྐྱེས༌།
GEN 21:3 ཨབ༌ར༌ཧམ༌མི༌ སཱ༌རའ༌ སྐྱེ༌ཁན༌ནི༌ ཁོའེ༌ བུ༌ཚའེ༌ མིང༌ང༌ ཨི༌སཱག༌ ཏགས༌།
GEN 21:4 ཡང༌ ཨི༌སཱག༌ག༌ ཞག༌པོ༌ རྒྱད༌ ཆའ༌ཅིག༌, ཨབ༌ར༌ཧམ༌མི༌ ཁོའ༌ སུན༌ནད༌ ཅོས༌ ཀ༌ཟུག༌ དཀོན༌མཆོག༌གི༌ བཀའ༌ སལ༌ཏེ༌ ཨིན༌པིན༌།
GEN 21:5 ཨི༌སཱག༌ སྐྱེ༌ ཟ༌ནེ༌ ཨབ༌ར༌ཧམ༌མ༌ ལོ༌ གྱ༌ ཆའད༌པིན༌།
GEN 21:6 ཡང༌ སཱ༌རའེ༌ ཟེརས༌, “དཀོན༌མཆོག༌གི༌ ངའ༌ སྐྱིད༌པོ༌ དང༌ ཧབ༌གོད༌ ཁྱོང༌ང༌ ཛདས༌། འི༌ ནས༌ཚུལ༌ ཚོར༌ཁན༌ ཚང༌མ༌ ང༌ ཉམ༌པོ༌ གའ༌མོ༌ ཅོས༌ཏེ༌ གོད༌ཨིན༌།”
GEN 21:7 ཏེ༌ནེ༌ ཁོའེ༌ ཟེརས༌, “སཱ༌རའེ༌ ཕྲུ༌གུ༌གུན༌ལ༌ པི༌བི༌ ཏང༌ཨིན༌ སམས༌ཏེ༌ སུའི༌ ཨབ༌ར༌ཧམ༌མ༌ ཟེར༌ཉན༌ཨིན༌? རྒད༌པོའེ༌ ཏུས༌ལའང༌ ངའེ༌ ཁོའ༌ བུ༌ཚ༌ཞིག༌ ཏངས༌པིན༌།”
GEN 21:8 ཕྲུ༌གུ༌ ལྡན༌ཨིན༌ སོང༌ ཡང༌ ཕྲུ༌གུའ༌ པི༌བི༌ ཅད༌དི༌ ཞག༌ག༌ ཨབ༌ར༌ཧམ༌མི༌ གྲོན༌ ཆེན༌མོ༌ཞིག༌ ཏངས༌།
GEN 21:9 ཨིན༌ནའང༌ ཨབ༌ར༌ཧམ༌མི༌ བུ༌ཚ༌, ཨི༌ཇིབ༌པ༌ ཡོག༌མོ༌ ཧཱ༌གར༌ལ༌ སྐྱེ༌ཁན༌ ཨིཤ༌མ༌ཨེལ༌ལི༌ ཨི༌སཱག༌ག༌ ཁྲེལ༌གོད༌ ཏང༌ཨིན༌ ཐོང༌པ༌
GEN 21:10 སཱ༌རའེ༌ ཨབ༌ར༌ཧམ༌མ༌ ཟེརས༌, “འི༌ ཚེ༌ཡོག༌ བུ༌མོ༌ དང༌ ཁོའེ༌ བུ༌ཚའ༌ ཕིངས༌ཏེ༌ ཡང༌ ནས༌ས༌ ཞིག༌ག༌ ལམ༌ཅུག༌། ངའེ༌ བུ༌ཚ༌ ཨི༌སཱག༌ག༌ ཐོབ༌ཅེས༌ཅན༌ནི༌ ནོར༌སྐལ༌བོ༌ འི༌ ཚེ༌ཡོག༌གི༌ བུ༌ཚ༌ ཉམ༌པོ༌ བགོ༌ མ༌གོས༌།”
GEN 21:11 ཨབ༌ར༌ཧམ༌མ༌ ཚེར༌ཁའ༌ སྲན༌ཏྲེ༌ ཡོངས༌ ཅིའ༌ཟེར༌ན༌ ཨིཤ༌མ༌ཨེལ༌ལའང༌ ཁོའེ༌ བུ༌ཚ༌ ཨིན༌པིན༌།
GEN 21:12 ཨིན༌ནའང༌ དཀོན༌མཆོག༌གི༌ ཁོའ༌ མོལས༌, “ཁྱོ༌རང༌ངི༌ བུ༌ཚ༌ དང༌ ཚེ༌ཡོག༌ ཧཱ༌གར༌རི༌ ཕིའ༌ ཚེར༌ མ༌ཚེར༌། ཁྱོ༌རང༌ངི༌ སཱ༌རའེ༌ ཟེར༌ཁན༌བོ༌ ཅོས༌, ཅིའ༌ཟེར༌ན༌ ངའེ༌ ཁ༌ཆད༌ ཅོས༌ཁན༌ ནང༌ཞིན༌ ཁྱོ༌རང༌ངི༌ པུར༌གྱུད༌གུན༌ ཨི༌སཱག༌ གྱུད༌ཏེ༌ ཕེལ༌ཨིན༌།
GEN 21:13 ངའེ༌ ཚེ༌ཡོག༌གི༌ བུ༌ཚའང༌ པུར༌གྱུད༌ མང༌པོ༌ ཏངས༌ཏེ༌ ཁོང༌གུན༌ གྱལ༌ཁམས༌ གྱུར༌ཨིན༌ ཅིའ༌ཟེར༌ན༌ ཁོའང༌ ཁྱོ༌རང༌ངི༌ བུ༌ཚ༌ ཨིན༌ནོག༌།”
GEN 21:14 ཐོ༌རེ༌ཟུག༌པོ༌ ངོ༌ཏོག༌ ང༌མོ༌ནེ༌ ཨབ༌ར༌ཧམ༌མི༌ ཧཱ༌གར༌ལ༌ ཟའ༌ཅེས༌ དང༌ སྐྱ༌པའེ༌ ནང༌ང༌ ཆུ༌ སྐངས༌ཏེ༌ ཁོའེ༌ གྱབ༌བ༌ ཀལས༌ ཡང༌ ཕྲུ༌གུ༌ ཉམ༌པོ༌ ཁོ༌ ལམ༌ཅུགས༌། ཁོང༌གུན༌ བེར༌ཤེ༌བའེ༌ རི༌སྟོང༌ངི༌ ནང༌ང༌ ཁྱམས༌ཏེ༌ སོང༌།
GEN 21:15 ཆུ༌ ཚང༌མ༌ ཚར༌ར༌ཅིག༌ བུ༌མོའེ༌ ཁོ༌རང༌ངི༌ ཕྲུ༌གུ༌བོ༌ ལྕང༌མ༌ ཆུ༌ངུན༌ཞིག༌གི༌ སིལ༌ལ༌ བོརས༌།
GEN 21:16 ཏེ༌ནེ༌ ཧ༌ལམ༌ མི༌ཀྲར༌ གུབ༌ཅུ༌ ཟམ༌ཤིག༌ ཐག༌རིང༌ང༌ སོང༌ཏེ༌ དུགས༌, ཅིའ༌ཟེར༌ན༌ ཁོའེ༌ སམ༌, “ངའ༌ ང༌རང༌ངི༌ བུ༌ཚ༌ ཤི༌ཨིན༌ ལྟ༌ཉན༌ཅེས༌ མེ༌རག༌།” ཡང༌ ཁོ༌ ཏེ༌ཀ༌ དུགས༌ཏེ༌ ངུས༌།
GEN 21:17 དཀོན༌མཆོག༌གི༌ བུ༌ཚ༌ ངུ༌ཁན༌བོ༌ སནས༌ ཡང༌ ནམ༌ཁའ༌ནེ༌ དཀོན༌མཆོག༌གི༌ ཕོ༌ཉའེ༌ ཧཱ༌གར༌ལ༌ མོལས༌, “ཧཱ༌གར༌ ཁྱོ༌རང༌ང༌ ཅི༌ སོང༌? ཇིགས༌ མ༌ཇིགས༌། དཀོན༌མཆོག༌གི༌ བུ༌ཚ༌ ངུ༌ཅེས༌པོ༌ སན༌ན༌ ཛད༌ཏེ༌ ཨིན༌ནོག༌།
GEN 21:18 རང༌ངི༌ བུ༌ཚ༌ ལངས༌ཏེ༌ ལག༌པ༌ ཐམས༌ཏེ༌ སོང༌། ངའེ༌ ཁོའེ༌ པུར༌གྱུད༌གུན༌ གྱལ༌ཁམས༌ བྲག༌པོ༌ གྱུར༌ཅུག༌ ཨིན༌།”
GEN 21:19 ཏེ༌ནེ༌ དཀོན༌མཆོག༌གི༌ བུ༌མོའེ༌ མིག༌པོ༌ ཕེའ༌ ཛདས༌ ཡང༌ ཁོའ༌ ཆུ༌དོང༌ཞིག༌ ཐོང༌། ཁོ༌ སོང༌ཏེ༌ སྐྱ༌པ༌ ཆུའི༌ སྐངས༌ཏེ༌ བུ༌ཚ༌ ཆུ༌ ཐུང༌ང༌ ཏངས༌།
GEN 21:20 བུ༌ཚ༌ ལྡན༌ཨིན༌ སོང༌ ཡང༌ དཀོན༌མཆོག༌ ཁོ༌ ཉམ༌པོ༌ ཡོད༌པིན༌། ཁོ༌ པ༌རན༌ ཟེར༌སའེ༌ རི༌སྟོང༌ངི༌ ནང༌ང༌ དུགས༌ ཡང༌ དའ༌ ཞུ༌ ཀོལ༌ཁན༌ མ༌ ཁས༌པ༌ཞིག༌ གྱུར༌།
GEN 21:21 ཁོང༌གུན༌ ཏེ༌རུ༌ ཡོད༌ ཟ༌ནེ༌ ཁོའེ༌ ཨ༌མའེ༌ ཁོའེ༌ ཕིའ༌ ན༌མ༌ ཨི༌ཇིབ༌ནེ༌ ཁྱོངས༌།
GEN 21:22 ཏེ༌ ཏུས༌ལ༌ ཨ༌བི༌མེ༌ལེག༌ དང༌ ཁོའེ༌ མག༌མི༌གུན༌ནི༌ འུ༌སྐྱོང༌ ཕི༌ཀོལ༌ལི༌ ཨབ༌ར༌ཧམ༌མ༌ ཟེརས༌, “ཁྱོ༌རང༌ངི༌ ཅོ༌ཁན༌ ཚང༌མའེ༌ ནང༌ང༌ དཀོན༌མཆོག༌ ཁྱོ༌རང༌ ཉམ༌པོ༌ ཡོད༌ཏེ༌ ཨིན༌ནོག༌།
GEN 21:23 ངའ༌, ངའེ༌ ཕྲུ༌གུ༌གུན༌ དང༌ ངའེ༌ མིར༌གྱུད༌གུན༌ལ༌ གོབ༌སྐོར༌ མི༌ཏང༌ ཟེར༌ཏེ༌ དཀོན༌མཆོག༌གི༌ སྐུ༌དུན༌ལ༌ ཁྱོ༌རང༌ངི༌ ནའ༌ ཁུར༌། ངའེ༌ ཁྱོ༌རང༌ང༌ ཐུག༌རྗེ༌ ཅོ༌ཁན༌ ཙོགས༌ ཁྱོ༌རང༌ངིའང༌ འི༌ གྱལ༌ཁམས༌ ཉམ༌པོ༌ ཅོས༌ ཀ༌རུ༌ ཁྱོ༌རང༌ དུགས༌ཏེ༌ ཡོད༌།”
GEN 21:24 ཨབ༌ར༌ཧམ༌མི༌ ཟེརས༌, “ངའེ༌ ནའ༌ ཁུར༌རད༌།”
GEN 21:25 ཨབ༌ར༌ཧམ༌མི༌ ཨ༌བི༌མེ༌ལེག༌ག༌ ཁོའེ༌ ཡོག༌པོ༌གུན༌ནི༌ ཆུ༌དོང༌ ཀོགས༌ཏེ༌ ཁྱེར༌ཁན༌ནི༌ ལས༌ ངན༌པའེ༌ སྐོར༌ལ༌ ཤདས༌།
GEN 21:26 ཨ༌བི༌མེ༌ལེག༌གི༌ ཟེརས༌, “ངའ༌ གྱུས༌མེད༌, འི༌བོ༌ སུའི༌ ཅོས༌། ཁྱོ༌རང༌ངི༌ ངའ༌ ཤད༌ད༌ མེ༌རག༌ ཡང༌ ངའ༌ དི༌རིང༌ མ༌ནེ༌ འི༌བོའེ༌ སྐོར༌ལ༌ མ༌ ཚོར༌།”
GEN 21:27 ཏེ༌ནེ༌ ཨབ༌ར༌ཧམ༌མི༌ ཨ༌བི༌མེ༌ལེག༌ག༌ ལུག༌ དང༌ བ༌ལང༌ གུན༌ ཏངས༌ ཡང༌ ཁོང༌ ཉིས༌ཀོའེ༌ ཆད༌དོན༌ ཅོས༌།
GEN 21:28 ཁོའེ༌ ལུག༌ཁྱུའི༌ ཕྲོ༌ནེ༌ ལུ༌གུ༌ རྡུན༌ སོ༌སོའ༌ ཕེས༌,
GEN 21:29 ཡང༌ ཨ༌བི༌མེ༌ལེག༌གི༌ ཁོའ༌ ཏྲིས༌, “ཁྱོ༌རང༌ངི༌ ལུག༌ཁྱུའི༌ ཕྲོ༌ནེ༌ ལུ༌གུ༌ རྡུན༌ སོ༌སོའ༌ ཕེ༌ཅེས༌སི༌ ཏོན༌བོ༌ ཅི༌ ཨིན༌?”
GEN 21:30 ཨབ༌ར༌ཧམ༌མི༌ ལན༌སལས༌, “འི༌ ལུ༌གུ༌ རྡུན༌བོ༌ ལེན༌ན༌ ཛད༌ཏེ༌ འི༌ ཆུ༌དོང༌ ངའེ༌ བྲུས༌ཏེ༌ ཨིན༌ཁན༌བོའེ༌ སྤང༌པོ༌ སལ༌ཅེས༌སི༌ ཆད༌དོན༌ ཅོས༌།”
GEN 21:31 ཏེ༌བོའེ༌ཕིའ༌ ཏེ༌ ས༌ཆ༌བོའ༌ བེར༌ཤེ༌བ༌ ཟེརས༌ ཅིའ༌ཟེར༌ན༌ ཏེ༌ཀ༌ ཁོང༌ ཉིས༌ཀོའེ༌ དམ༌ཆའ༌ ཅོས༌།
GEN 21:32 ཁོང༌གུན༌ནི༌ བེར༌ཤེ༌བའེ༌ ནང༌ང༌ དམ༌ཆ༌ ཅོས༌ཏེ༌ སྟིང༌ནེ༌, ཨ༌བི༌མེ༌ལེག༌ དང༌ ཁོའེ༌ མག༌མི༌གུན༌ནི༌ འུ༌སྐྱོང༌ ཕི༌ཀོལ༌ ལོགས༌ཏེ༌ ཕི༌ལིས༌ཏིའ༌ སོང༌།
GEN 21:33 ཨབ༌ར༌ཧམ༌མི༌ བེར༌ཤེ༌བའེ༌ ནང༌ང༌ ཀྲ༌མ༌རིག༌གི༌ ལྕང༌མ༌ ཙུགས༌ ཡང༌ ཡ༌ཝ༌, ཐའ༌མེད༌པའེ༌ དཀོན༌མཆོག༌ ཅོལས༌།
GEN 21:34 ཕི༌ལིས༌ཏིའི༌ ནང༌ང༌ ཨབ༌ར༌ཧམ༌ ཏུས༌ མང༌པོ༌ ཞན༌ཡུལ༌ལི༌ མི༌ ཙོགས༌ལ༌ དུགས༌།
GEN 22:1 ལོ༌ ཁ༌ཅིག༌གི༌ སྟིང༌ནེ༌ དཀོན༌མཆོག༌གི༌ ཨབ༌ར༌ཧམ༌མི༌ ཏད༌པའ༌ ཚོད༌ལྟ༌ ཛདས༌། ཁོང༌ངི༌ ཁོའ༌ བོད༌ད༌ ཛདས༌, “ཨབ༌ར༌ཧམ༌།” ཨབ༌ར༌ཧམ༌མི༌ ཟེརས༌, “ང༌ འི༌ཀ༌ནེ༌ ཡོད༌ལེ༌།”
GEN 22:2 དཀོན༌མཆོག༌གི༌ མོལས༌, “ཁྱོ༌རང༌ངི༌ བུ༌ཚ༌ ཅིག༌ཅིག༌ ཨི༌སཱག༌ ཀ༌བོའ༌ ཁྱོ༌རང༌ངི༌ མའ༌ ཡ༌ཤ༌ ཅོའད༌, ཁྲིད༌ཏེ༌ མོ༌རའཧ༌ ཡུལ༌ཇོངས༌ལ༌ སོང༌། ཏེ༌རུ༌ ངའེ༌ སྟན༌ཁན༌ནི༌ རི༌ཀ༌ ཁྱོ༌རང༌ངི༌ ཁོའེ༌ སྲོག༌ ངའེ༌ ཕིའ༌ ཆོད༌པ༌ ཕུལ༌ཏེ༌ མེའ༌ སྲོག༌།”
GEN 22:3 ཐོ༌རེ༌ཟུག༌པོ༌ ང༌ཏོག༌ ང༌མོ༌ནེ༌ ཨབ༌ར༌ཧམ༌མི༌ བུང༌བུའ༌ གྱབ༌ཆ༌ སྟདས༌ ཡང༌ ཆོད༌པ༌ ཕུལ༌ཅེས༌སི༌ ཕིའ༌ ཤིང༌ ཅད༌ཏེ༌ ཀལས༌། ཨི༌སཱག༌ དང༌ ཞན༌ ཡོག༌པོ༌ ཉིས༌ ཁོ༌རང༌ ཉམ༌པོ༌ ཁྲིད༌ཏེ༌ དཀོན༌མཆོག༌གི༌ མོལ༌ཁན༌ནི༌ ནས༌ས༌བོའ༌ ཆ༌ཅེས༌ གོ༌ཟུག༌།
GEN 22:4 ཞག༌ སུམ༌པའེ༌ ཞག༌ག༌ ཨབ༌ར༌ཧམ༌མི༌ ཏེ༌ ནས༌ས༌བོ༌ ཐག༌རིང༌ཞིག༌ནེ༌ ཐོང༌།
GEN 22:5 ཏེ༌ནེ༌ ཁོའེ༌ ཡོག༌པོ༌གུན༌ལ༌ ཟེརས༌, “ཁྱོ༌ཞའ༌ འི༌ཀ༌ བུང༌བུ༌ ཉམ༌པོ༌ དུག༌, བུ༌ཚ༌ དང༌ ངའ༌ འ༌ཀ༌ སོང༌ཏེ༌ དཀོན༌མཆོག༌ག༌ ཅོལ༌ཨིན༌, ཅོལ༌ ཚར༌ཏེ༌ སྟིང༌ནེ༌ ང༌ཞའ༌ ལོགས༌ཏེ༌ ཡོང༌ཨིན༌།”
GEN 22:6 ཨབ༌ར༌ཧམ༌མི༌ ཨི༌སཱག༌ག༌ ཆོད༌པ༌ ཕུལ༌ཅེས༌སི༌ ཤིང༌བོ༌ ཁུར༌ཅུགས༌, ཡང༌ ཁོའེ༌ ཀྲི༌ དང༌ སྤར༌ཅེས༌སི༌ ཕིའ༌ སོལ༌ལེ༌ མེ༌ ཁུར༌ཏེ༌ ཁོང༌ ཉིས༌ཀོ༌ གྲུལ༌ཨིན༌ ཆའ༌ ཟ༌ནེ༌,
GEN 22:7 ཨི༌སཱག༌གི༌ ཟེརས༌, “ཨ༌བ༌ལེ༌?” ཁོའེ༌ ལན༌ཏངས༌, “ཅི༌ སོང༌ ངའེ༌ བུ༌ཚ༌?” ཨི༌སཱག༌གི༌ ཏྲིས༌, “ང༌དང༌ངི༌ ལག༌ག༌ མེ༌ དང༌ ཤིང༌ ཡོད༌ཏེ༌ ཨིན༌ནོག༌ ཨིན༌ནའང༌ ཆོད༌པ༌ ཕུལ༌ཅེས༌སི༌ ཕིའ༌ ལུ༌གུ༌ ཀ༌རེ༌?”
GEN 22:8 ཨབ༌ར༌ཧམ༌མི༌ ལན༌ཏངས༌, “དཀོན༌མཆོག༌ ཁོང༌རང༌ངི༌ ཆོད༌པ༌ ཕུལ༌ཅེས༌སི༌ ཕིའ༌ ལུ༌གུ༌ སལ༌ལ༌ ཛད༌ཨིན༌” ཡང༌ ཁོང༌ ཉིས༌ཀོ༌ གྲུལ༌ཨིན༌ ཆའད༌པིན༌།
GEN 22:9 ཁོང༌གུན༌ དཀོན༌མཆོག༌གི༌ མོལ༌ཁན༌ནི༌ ནས༌སའེ༌ཀ༌ ལེབ༌བ༌ཅིག༌, ཨབ༌ར༌ཧམ༌མི༌ ཆོད༌ཁྲི༌ཞིག༌ རྩིགས༌ ཡང༌ ཤིང༌གུན༌ ཏེ༌ཀ༌ རིགས༌། ཏེ༌ནེ༌ ཁོའེ༌ ཁོ༌རང༌ངི༌ བུ༌ཚ༌ ཨི༌སཱག༌ ལྡམས༌ཏེ༌ ཆོད༌ཁྲི༌ཀ༌ ཤིང༌གུན༌ནི༌ ཁེ༌ཐོག༌ག༌ བོརས༌།
GEN 22:10 ཡང༌ ཁོའེ༌ ཁོ༌རང༌ངི༌ བུ༌ཚ༌ སད༌ཅེས༌ལ༌ ཀྲི༌བོ༌ ལེནས༌།
GEN 22:11 ཨིན༌ནའང༌ ཏེན༌ན༌ ཏུས༌ལ༌ ནམ༌ཁའ༌ནེ༌ ཡ༌ཝའེ༌ ཕོ༌ཉའེ༌ ཁོའ༌ བོད༌ད༌ ཛདས༌, “ཨབ༌ར༌ཧམ༌, ཨབ༌ར༌ཧམ༌།” ཁོའེ༌ ལན༌ཏངས༌, “ང༌ འི༌ཀ༌ནེ༌ ཡོད༌ལེ༌།”
GEN 22:12 ཁོང༌ངི༌ མོལས༌, “བུ༌ཚའ༌ ལག༌པ༌ མ༌རྩེ༌ ཡ༌ ནོད༌ མ༌སྐྱལ༌། ཁྱོ༌རང༌ངི༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ མི༌ཚེ༌ ཕུད༌ཁན༌བོ༌ ངའ༌ ཧ༌གོ༌ ཅིའ༌ཟེར༌ན༌ ཁོ༌རང༌ངི༌ རང༌ངི༌ བུ༌ཚ༌ ཅིག༌ཅིག༌པོའང༌ ངའེ༌ ཕིའ༌ ཏང༌ཅེས༌ལ༌ ཐེ༌ཚོམས༌ མ༌ཅོས༌།”
GEN 22:13 ཨབ༌ར༌ཧམ༌མི༌ ཀེན༌ལ༌ ལྟས༌, ཁོའ༌ ལུག༌ཕོ༌ ཞིག༌གི༌ ར༌ཅོ༌ ཚེར༌མང༌ངི༌ ནང༌ང༌ ཁད༌ཏེ༌ ཐོང༌། ཏེ༌ནེ༌ ཁོའེ༌ ལུག༌ཕོ༌ ཁྱོངས༌ཏེ༌ ཁོ༌རང༌ངི༌ བུ༌ཚའེ༌ ཚབས༌ལ༌ སྲོག༌ཆོད༌ལ༌ ཏངས༌།
GEN 22:14 ཨབ༌ར༌ཧམ༌མི༌ ཏེ༌ ནས༌ས༌བོའ༌ “ཡ༌ཝའེ༌ སལ༌ལ༌ ཛད༌ཨིན༌” ཟེར༌ཏེ༌ མིང༌ ཏགས༌། ཡང༌ དང༌དི༌རིང༌ངའང༌ མི༌གུན༌ནི༌, “ཡ༌ཝའེ༌ ཨིན༌ཁན༌ནི༌ རི༌ཀ༌ ཁོང༌ངི༌ སལ༌ལ༌ ཛད༌ཨིན༌” ཟེར༌ར༌ནོག༌།
GEN 22:15 ཏེ༌ནེ༌ ནམ༌ཁའ༌ནེ༌ ཡ༌ཝའེ༌ ཕོ༌ཉའེ༌ ཨབ༌ར༌ཧམ༌མ༌ ལན༌ ཉིས༌པ༌ བོད༌ད༌ ཛད༌ཏེ༌
GEN 22:16 མོལས༌, “ཡ༌ཝའེ༌ མོལས༌, ‘ཁྱོ༌རང༌ངི༌ རང༌ངི༌ བུ༌ཚ༌ ཅིག༌ཅིག༌པོའང༌ ངའེ༌ ཕིའ༌ ཏང༌ཅེས༌ལ༌ ཐད༌ པ༌སང༌ ངའེ༌ ང༌རང༌ངི༌ མིང༌ངི༌ ནང༌ང༌ ནའ༌ ཁུར༌ཏེ༌ ཁ༌ཆད༌ ཅོའད༌,
GEN 22:17 ངའེ༌ ཁྱོ༌རང༌ང༌ ཏན༌ཏན༌ལ༌ ཅིན༌ལབས༌ ཏང༌ཨིན༌, ཁྱོ༌རང༌ངི༌ པུར༌གྱུད༌ ནམ༌མི༌ སྐར༌མ༌ ཡང༌ ཚོའེ༌ ཐའ༌མའེ༌ པེ༌མ༌ ཙོགས༌ མང༌པོ༌ གྱུར༌ཨིན༌། ཁྱོ༌རང༌ངི༌ པུར༌གྱུད༌གུན༌ནི༌ ཁོ༌རང༌གུན༌ནི༌ གྲ༌འོའེ༌ གྱལ༌ས༌གུན༌ ངའ༌ཡོག༌ག༌ ཁྱོང༌ཨིན༌།
GEN 22:18 ཁྱོ༌རང༌ངི༌ པུར༌གྱུད༌ གྱུད༌ཏེ༌ གྱལ༌ཁམས༌ ཚང༌མ༌ལ༌ ཅིན༌ལབས༌ ཐོབ༌ཨིན༌, ཅིའ༌ཟེར༌ན༌ ཁྱོ༌རང༌ངི༌ ངའེ༌ བཀའ༌ ཁའ༌ ཉནས༌།’”
GEN 22:19 ཏེ༌ནེ༌ ཁོང༌གུན༌ ཁོང༌རང༌ངི༌ ཡོག༌པོ༌གུན༌ ཡོད༌ས༌ ལོགས༌ཏེ༌ སོང༌ ཡང༌ ཁོང༌ ཚང༌མ༌ བེར༌ཤེ༌བའ༌ ལོགས༌ཏེ༌ སོང༌ ཀ༌རུ༌ ཨབ༌ར༌ཧམ༌ ནས༌ཏེ༌ དུགས༌།
GEN 22:20 ཏུས༌བན༌ཤིག༌གི༌ སྟིང༌ནེ༌ ཨབ༌ར༌ཧམ༌མ༌ ཁོའེ༌ ནོ༌ ན༌ཧོར༌ལ༌ མིལ༌ཀ༌ གྱུད༌ཏེ༌ ཕྲུ༌གུ༌ ཇོར༌ཁན༌བོ༌ གྱུས༌སོང༌།
GEN 22:21 གོ༌སྐྱེས༌ བུ༌ཚ༌ ཨུཟ༌, ཁོའེ༌ ནོ༌ བའས༌, ཀེ༌མུའེལ༌ ཨ༌རམ༌མི༌ ཨ༌བ༌,
GEN 22:22 ཀེ༌སིད༌, ཧ༌ཟོ༌, པིལ༌དེས༌, ཡིད༌ལབ༌ དང༌ བེ༌ཐུལ༌།
GEN 22:23 བེ༌ཐུལ༌ ར༌བེ༌ཀའེ༌ ཨ༌བ༌ གྱུར༌། མིལ༌ཀ༌ གྱུད༌ཏེ༌ ཨབ༌ར༌ཧམ༌མི༌ ནོ༌ ན༌ཧོར༌ལ༌ ཏེ༌ བུ༌ཚ༌ རྒྱད༌ཀོ༌ ཇོར༌ཏེ༌ ཨིན༌པིན༌།
GEN 22:24 རིའུ༌མ༌ ཟེར༌ཁན༌ནི༌ ཚེ༌ཡོག༌ ན༌མ༌ གྱུད༌ཏེ༌ ན༌ཧོར༌ལ༌ ཁྲི༌བཧ༌, ག༌ཧམ༌, ཏ༌ཧཤ༌ དང༌ མའ༌ཀཧ༌ ཟེར༌ཁན༌ནི༌ བུ༌ཚ༌གུན༌ ཇོར༌།
GEN 23:1 སཱ༌ར༌ ལོ༌ 127 ཚོག༌པ༌ སོན༌ཏེའ༌ ལུས༌།
GEN 23:2 ཁོ༌ ཀེ༌ནན༌ ཡུལ༌ཇོངས༌སི༌ ཀི༌རི༌འཐ༌ ཨར༌བའི༌ ནང༌ང༌ ཀྲོངས༌ ཀ༌བོའ༌ དག༌ས༌ ཧེབ༌རོན༌ ཟེར༌ར༌ནོག༌ ཡང༌ ཨབ༌ར༌ཧམ༌མི༌ སཱ༌རའེ༌ ཕིའ༌ རྡུག༌པོ༌ ཅོས༌ཏེ༌ ངུས༌།
GEN 23:3 སཱ༌རའེ༌ སྤུར༌རི༌ དུན༌ནེ༌ ཁོ༌ ལངས༌ཏེ༌ ཧེད༌དི༌ པུར༌གྱུད༌གུན༌ལ༌ ཟེརས༌,
GEN 23:4 “ཁྱོ༌ཞ༌གུན༌ནི༌ ཕྲོའ༌ དུག༌ཁན༌ ང༌ ཞན༌ཡུལ༌ལི༌ མི༌ཞིག༌ ཨིན༌, ཇུ༌ཇུ༌ ངའེ༌ ན༌མའེ༌ སྤུར༌ སུབ༌ཅེས༌ལ༌ ངའ༌ ས༌ཀྱད༌ཞིག༌ ཙོང༌ང༌ ཛད༌།”
GEN 23:5 ཧེད༌པའེ༌ བུ༌ཚ༌གུན༌ནི༌ ཨབ༌ར༌ཧམ༌མ༌ ལན༌ཏངས༌,
GEN 23:6 “ང༌ཞ༌གུན༌ལ༌ སན༌ནའང༌ ཀ༌ག༌ལེ༌, ང༌ཞའེ༌ ཕྲོའ༌ ཉེ༌རང༌ སྤོན༌བོ༌ ཁྱུད༌ཅན༌ཞིག༌ ཨིན༌ནོག༌། ང༌ཞའེ༌ སྤུར༌ཁང༌ངི༌ ནས༌ས༌ ཉེ༌རང༌ ཐད༌ཁན༌བོའེ༌ ནང༌ང༌ ཉེ༌རང༌ངི༌ ན༌མ༌ སུབ༌བ༌ ཛད༌། ཉེ༌རང༌ང༌ སྤུར༌ཁང༌ངི༌ ནས༌ས༌ ཏང༌ཅེས༌ལ༌ ང༌ཞའ༌ ཚང༌མ༌ ཐད༌པོ༌ ཨིན༌།”
GEN 23:7 ཏེ༌ནེ༌ ཨབ༌ར༌ཧམ༌མི༌ གོ༌ སྒུས༌ཏེ༌ ཁོང༌གུན༌ལ༌ ཀུས༌པ༌ ཅོས༌
GEN 23:8 ཡང༌ མོལས༌, “ཀལ༌ཏེས༌ ཁྱོ༌ཞ༌གུན༌ ངའེ༌ ང༌རང༌ངི༌ ན༌མ༌ སུབ༌ཅུག༌ཅེས༌ལ༌ ཐད༌དད༌ན༌, ཇུ༌ཇུ༌ ཟོ༌ཧར༌རི༌ བུ༌ཚ༌ ཨེ༌ཕོ༌རོན༌ལ༌
GEN 23:9 ཁོའེ༌ ཨིན༌ཁན༌ མེཁ༌ཕི༌ལའི༌ བྲག༌ཕུག༌པོ༌ ངའ༌ ཙོང༌ཅེས༌ལ༌ མོལ༌ལའང༌, ཀ༌བོ༌ ཁོའེ༌ ཞིང༌ངི༌ ཐའ༌མའ༌ དུག༌། ཤི༌ཁན༌གུན༌ སུབ༌ཅེས༌སི༌ ཕིའ༌ ཏེ༌ ནས༌ས༌བོ༌ ཁྱོ༌ཞ༌གུན༌ནི༌ དུན༌ལ༌ རིན༌ དྲན༌དྲ༌ ཏངས༌ཏེ༌ ངའེ༌ ཉོ༌ཨིན༌།”
GEN 23:10 གྱལ༌སའེ༌ སྒོའེ༌ཀ༌ ཛོམས༌ཁན༌ནི༌ ཧེད༌པ༌གུན༌ནི༌ ཕྲོའ༌ ཨེ༌ཕོ༌རོན༌ནའང༌ ཡོད༌པིན༌, ཏེ༌ཀ༌ ཡོད༌ཁན༌ ཚང༌མའེ༌ དུན༌ལ༌ ཁོའེ༌ ཨབ༌ར༌ཧམ༌མ༌ ལན༌ཏངས༌,
GEN 23:11 “ཀ༌ག༌ལེ༌ ཉན༌ན༌ཛད༌, ངའེ༌ ཉེ༌རང༌ང༌ ཞིང༌ གང༌པོ༌ དང༌ ཏེ༌ནང༌ང༌ ཡོད༌ཁན༌ བྲག༌ཕུག༌པོའང༌ ཏང༌ཨིན༌། འི༌ཀ༌ ཡོད༌ཁན༌ མི༌ཚང༌མའེ༌ དུན༌ལ༌ ཏེ༌བོ༌ ངའེ༌ ཉེ༌རང༌ང༌ ཏང༌ངད༌, ཉེ༌རང༌ངི༌ ཤི༌ཁན༌བོ༌ སུབ༌བ༌ ཛད༌།”
GEN 23:12 ཡང༌སྐྱར༌ ཨབ༌ར༌ཧམ༌མི༌ ཧེད༌པ༌གུན༌ནི༌ དུན༌ལ༌ སྒུས༌ཏེ༌ ཀུས༌པ༌ སྟནས༌,
GEN 23:13 ཡང༌ ཚང༌མའེ༌ དུན༌ལ༌ ཁོའེ༌ ཨེ༌ཕོ༌རོན༌ལ༌ ཟེརས༌, “ཇུ༌ཇུ༌ ངའ༌ ཉན༌ན༌ཛད༌ ངའེ༌ ཞིང༌ གང༌པོའེ༌ རིན༌བོ༌ ཏང༌ཨིན༌, ལེན༌ན༌ ཛད༌དའང༌ ཏེ༌ནེ༌ ངའ༌ ང༌རང༌ངི༌ ན༌མ༌ ཏེ༌རུ༌ སུབ༌ ཉན༌ཨིན༌།”
GEN 23:14 ཨེ༌ཕོ༌རོན༌ནི༌ ལན༌ཏངས༌,
GEN 23:15 “ཀ༌ག༌ལེ༌ ས༌ཆའེ༌ རིན༌བོ༌ མུལ༌ ཞིབ༌གྱ༌ མ༌ནེ༌ མ༌ནོག༌, ང༌དང༌ ཉིས༌ཀོའེ༌ ཕར༌ལ༌ ཏེ༌བོ༌ ཅི༌ ཨིན༌ནོག༌། ཉེ༌རང༌ངི༌ ན༌མ༌ ཏེ༌ ནང༌ང༌ སུབ༌བ༌ཛད༌།”
GEN 23:16 ཨབ༌ར༌ཧམ༌མི༌ ཨེ༌ཕོ༌རོན༌ ཉམ༌པོ༌ ཁའ༌ཆམས༌ཏེ༌ མི༌ཚང༌མའེ༌ དུན༌ལ༌ ཁོའེ༌ ཟེར༌ཁན༌ནི༌ མུལ༌ 400 སྐར༌ཏེ༌ ཏངས༌, ཀ༌བོ༌ ཏེན༌ན༌ ཏུས༌སི༌ ཚོང༌པའེ༌ ཀོལ༌ཁན༌ནི༌ ཚད༌པོ༌ ནང༌ཞིན༌ ཨིན༌པིན༌།
GEN 23:17 ཏེན༌ན༌ ཟུག༌གི༌ མམ༌རེའེ༌ ཉེ༌མོའ༌ མེཁ༌ཕི༌ལའི༌ ནང༌ང༌ ཡོད༌ཁན༌ནི༌ ཨེ༌ཕོ༌རོན༌ནི༌ བྲག༌ཕུག༌, ཞིང༌ དང༌ ཏེ༌ ནང༌ཀུག༌ དང༌ ཐའ༌མ༌ ཡོད༌ཁན༌ནི༌ ལྕང༌མ༌ ཚང༌མ༌ ཨབ༌ར༌ཧམ༌མི༌ ཉོས༌།
GEN 23:18 ཡང༌ གྱལ༌སའེ༌ སྒོའེ༌ཀ༌ ཛོམས༌ཏེ༌ ཡོད༌ཁན༌ ཧེད༌པ༌ ཚང༌མའེ༌ དུན༌ལ༌ ཨབ༌ར༌ཧམ༌ ཏེ༌ ནོར༌གུན༌ནི༌ དག༌པོ༌ གྱུར༌།
GEN 23:19 ཏེ༌སྟིང༌ནེ༌ ཨབ༌ར༌ཧམ༌མི༌ ཁོ༌རང༌ངི༌ ན༌མ༌ སཱ༌ར༌ མམ༌རེའེ༌ ཉེ༌མོའ༌ མེཁ༌ཕི༌ལའི༌ ཞིང༌ངི༌ བྲག༌ཕུགས༌པོའེ༌ ནང༌ང༌ སུབས༌, ཀ༌བོ༌ ཀེ༌ནན༌ནི༌ ནང༌ང༌ ཨིན༌པིན༌།
GEN 23:20 ཏེན༌ན༌ ཟུག༌གི༌ ཧེད༌པ༌གུན༌ནི༌ ཞིང༌ དང༌ བྲག༌ཕུག༌ ཨབ༌ར༌ཧམ༌མི༌ ནོར༌ གྱུར༌, ཀ༌བོ༌ སྤུར༌ སུབ༌སའེ༌ ས༌ཀྱད༌ གྱུར༌།
GEN 24:1 ཏ༌ ཨབ༌ར༌ཧམ༌མའ༌ ལོ༌ མང༌པོ༌ སོང༌ཏེ༌ རྒད༌པོ༌ གྱུར༌ཏེ༌ ཡོད༌པིན༌, ཡང༌ ཡ༌ཝའེ༌ ཁོའ༌ ཅི༌ས༌ཐོག༌ནེ༌ ཅིན༌ལབས༌ སལ༌ལ༌ ཛདས༌།
GEN 24:2 ཞག༌ཤིག༌ ཨབ༌ར༌ཧམ༌མི༌ ཁོ༌རང༌ངི༌ ཡོག༌པོ༌ ཆེ༌ཤོག༌, ཁོའ༌ ཡོད༌ཁན༌ ཚང༌མའེ༌ ཁག༌ཁུར༌པ༌བོའ༌ མོལས༌, “ཁྱོ༌རང༌ངི༌ ལག༌པ༌ ངའེ༌ ཇང༌བར༌ལ༌ བོར༌ཏེ༌
GEN 24:3 ནམ༌ཁའ༌ དང༌ ཇིག༌རྟེན༌ནི༌ དཀོན༌མཆོག༌ ཡ༌ཝའེ༌ མིང༌ངི༌ ནང༌ང༌, ང༌དང༌ དུག༌སའེ༌ ཀེ༌ནན༌པའེ༌ བུ༌མོ༌ ཉམ༌པོ༌ ངའེ༌ བུ༌ཚའ༌ ན༌མའ༌ ཅོ༌ མི༌ཅུག༌ཅེས༌ལ༌ ནའ༌ ཁུར༌།
GEN 24:4 ང༌ སྐྱེས༌ཁན༌ནི༌ ཡུལ༌ལ༌ སོང༌ཏེ༌ ངའེ༌ བུ༌ཚ༌ ཨི༌སཱག༌གི༌ ཕིའ༌ ན༌མའ༌ ང༌རང༌ངི༌ ཉེན༌གྲུང༌གུན༌ནི༌ ནང༌ནེ༌ ཁྱོང༌།”
GEN 24:5 ཨིན༌ནའང༌ ཡོག༌པོའེ༌ ཏྲིས༌, “ཀལ༌ཏེས༌ བུ༌མོ༌བོ༌ ཁང༌པ༌ ཕངས༌ཏེ༌ ང༌ ཉམ༌པོ༌ འི༌ ཡུལ༌ལ༌ ཡོང༌ང༌ མ༌ཐད༌ན༌ ཏེ༌ནེ༌ ངའེ༌ ཉེ༌རང༌ངི༌ བུ༌ཚ༌ ཉེ༌རང༌ སྐྱེས༌སའེ༌ ཡུལ༌ལ༌ ལོགས༌ཏེ༌ ཁྱེར༌ར༌ལེ༌?”
GEN 24:6 ཨབ༌ར༌ཧམ༌མི༌ ལན༌ཏངས༌, “མན༌! ཏན༌ཏན༌, ཁྱོ༌རང༌ངི༌ ངའེ༌ བུ༌ཚ༌ ཏེ༌རུ༌ ལོགས༌ཏེ༌ ཁྱེར༌ མ༌གོས༌།
GEN 24:7 ངའེ༌ ཨ༌བའེ༌ ཁང༌པ༌ དང༌ ངའ༌ སྐྱེས༌སའེ༌ ཡུལ༌ནེ༌ ང༌ ཕིང༌ཏེ༌ ཁོངས༌ཁན༌ ནམ༌ཁའ༌ ཞུགས༌ཁན༌ནི༌ དཀོན༌མཆོག༌ ཡ༌ཝའེ༌ འི༌ ས༌ཆ༌བོ༌ ངའེ༌ པུར༌གྱུད༌གུན༌ལ༌ སལ༌ཨིན༌ མོལ༌ཏེ༌ ཞལ༌ཆད༌ ཅོའ༌ ཛད༌ཏེ༌ ཨིན༌། ཁོང༌ངི༌ ཁོང༌རང༌ངི༌ ཕོ༌ཉ༌ ཁྱོ༌རང༌ངི༌ སང༌ སྔུན༌ལ༌ ཀལ༌ལ༌ ཛད༌ཏེ༌ ཁྱོ༌རང༌ང༌ ངའེ༌ བུ༌ཚའེ༌ ཕིའ༌ ན༌མ༌ ཐོབ༌ཅུག༌ཨིན༌།
GEN 24:8 ཀལ༌ཏེས༌ བུ༌མོ༌བོ༌ ཁྱོ༌རང༌ ཉམ༌པོ༌ ཡོང༌ང༌ མ༌ཐད༌ན༌, ཁྱོ༌རང༌ ཁྱོ༌རང༌ངི༌ ཁུར༌ཁན༌ནི༌ ནའ༌ནེ༌ ཐར༌ཏེ༌ ཨིན༌, ཨིན༌ནའང༌ ངའེ༌ བུ༌ཚ༌ ཏེ༌རུ༌ ལོགས༌ཏེ༌ ཁྱེར༌ མ༌གོས༌།
GEN 24:9 ཏེ༌ནེ༌ ཡོག༌པོའེ༌ ཁོ༌རང༌ངི༌ ལག༌པ༌བོ༌ ཁོའེ༌ སྤོན༌བོ༌ ཨབ༌ར༌ཧམ༌མི༌ ཇང༌བར༌ལ༌ བོར༌ཏེ༌ ཁོང༌ངི༌ ཅོས༌ ཟེར༌ཁན༌བོ༌ ཅོ༌ཅེས༌ལ༌ ནའ༌ ཁུརས༌།”
GEN 24:10 ཨབ༌ར༌ཧམ༌མི༌ ཡོག༌པོའེ༌ ཁོ༌རང༌ངི༌ སྤོན༌བོའེ༌ རྔ༌བོང༌ རྕུ༌ ཁྲིདས༌ ཡང༌ སྤོན༌བོའེ༌ ཆོགས༌ནེ༌ རིན༌ཅན༌ནི༌ སྟགས༌གུན༌ ཁུར༌ཏེ༌ ན༌ཧོར༌ དུག༌སའེ༌ གྲོང༌ཁྱེར༌ ཨ༌རམ༌ ན༌ཧ༌རཱ༌འིམ༌མི༌ ཡུལ༌ཇོངས༌ལ༌ སོང༌།
GEN 24:11 ཏེ༌རུ༌ ལེབས༌ཏེ༌ ཁོའེ༌ རྔ༌བོང༌གུན༌ གྲོང༌ཁྱེར༌རི༌ ཕི༌ལོག༌ག༌ ཡོད༌ཁན༌ནི༌ ཆུ༌དོང༌ངི༌ དུན༌ལ༌ དུག༌ཅུགས༌, ཏེ༌བོ༌ ཛ༌རེ༌སྟིང༌ནེ༌ ཨིན༌པིན༌ ནམ༌ བུ༌མོ༌གུན༌ ཆུ༌ ལེན༌ན༌ལ༌ ཕི༌ལོག༌ག༌ ཡོང༌ངད༌པིན༌།
GEN 24:12 ཁོའེ༌ མོས༌ལམ༌ ཞུས༌, “ངའེ༌ སྤོན༌བོ༌ ཨབ༌ར༌ཧམ༌མི༌ དཀོན༌མཆོག༌ ཞུགས༌ཁན༌ནི༌ ཀྱེ༌ ཡ༌ཝ༌ལེ༌, དི༌རིང༌ ངའ༌ ཐར༌ཁྱེལ༌ སལ༌ཏེ༌ ངའེ༌ སྤོན༌བོ༌ ཉམ༌པོ༌ ཐུག༌རྗེ༌ སྟན༌ན༌ ཛད༌།
GEN 24:13 གྲོང༌ཁྱེར༌རི༌ ཞུ༌ནུ༌མ༌གུན༌ ཆུ༌ ལེན༌ན༌ལ༌ ཡོང༌སེ༌ ཆུ༌དོང༌ངི༌ དུན༌ལ༌ ངའ༌ དུགས༌ཏེ༌ ཡོད༌།
GEN 24:14 ངའེ༌ ཁོང༌ ཅིག༌ག༌ ཟེར༌ཨིན༌, ‘ཇུ༌ཇུ༌ ཆུ༌ ནོད༌པོ༌ ཕབས༌ཏེ༌ ང༌ ཆུ༌ ཐུང༌ཅེས༌ཤིག༌ སལ༌’, ཀལ༌ཏེས༌ ཁོའེ༌ དོན༌ལེ༌ ཡང༌ ངའེ༌ ཉེ༌རང༌ངི༌ རྔ༌བོང༌གུན༌ནི༌ ཕིའང༌ ཆུ༌ ཁྱོང༌ཉིན༌ ཟེར༌ན༌, ཏེ༌ནེ༌ ཁོ༌ ཉེ༌རང༌ངི༌ ཡོག༌པོ༌ ཨི༌སཱག༌གི༌ ཕིའ༌ ཉེ༌རང༌ངི༌ ལྡམ༌ཁན༌ནི༌ བུ༌མོ༌བོ༌ ཨིན༌ ཅུག༌ག༌ ཛད༌། འི༌བོ༌ ཇུང༌ན༌ ཉེ༌རང༌ངི༌ ངའེ༌ སྤོན༌བོའ༌ ཐུག༌རྗེ༌ ཛད༌ཁན༌བོ༌ ང༌ ཧ༌གོ༌ཨིན༌།”
GEN 24:15 ཁོའེ༌ མོས༌ལམ༌ ཞུ༌ མ༌ཚར༌ར༌, ཆུ༌ ནོད༌ སྤུང༌པའེ༌ཀ༌ ཁུར༌ཏེ༌ ར༌བེ༌ཀ༌ ལེབ༌། ཁོ༌ ནི༌ བེ༌ཐུལ༌ལི༌ བུ༌མོ༌, བེ༌ཐུལ༌ ནི༌ མིལ༌ཀའེ༌ བུ༌ཚ༌ ཨིན༌པིན༌ ཡང༌ མིལ༌ཀ༌ ནི༌ ཨབ༌ར༌ཧམ༌མི༌ ནོ༌ ན༌ཧོར༌རི༌ ན༌མ༌ ཨིན༌པིན༌།
GEN 24:16 བུ༌མོ༌བོ༌ ན༌ཆུང༌ མ༌ ལྡེ༌མོ༌, བུ༌ཚའ༌ ཉམ༌པོ༌ བྲེལ༌ མ༌ཆའ༌ཁན༌ཞིག༌ ཡོད༌པིན༌། ཁོ༌ ཐུར༌ལ༌ ཆུ༌དོང༌ངི༌ཀ༌ སོང༌ཏེ༌ ཁོ༌རང༌ངི༌ ཆུ༌ ནོད༌པོ༌ སྐངས༌ ཡང༌ ལོགས༌ཏེ༌ ཡོངས༌།
GEN 24:17 ཡོག༌པོ༌ བང༌ཏངས༌ཏེ༌ བུ༌མོ༌བོའ༌ ཐུག༌ག༌ སོང༌ཏེ༌ ཟེརས༌, “ཇུ༌ཇུ༌ ཉེ༌རང༌ངི༌ ཆུ༌ ནོད༌དི༌ ནང༌ནེ༌ ངའ༌ ཆུ༌ ཐུང༌ཅེས༌ཤིག༌ སལ༌ལའང༌།”
GEN 24:18 ཁོའེ༌ ཟེརས༌, “དོན༌ནའང༌ ཀ༌ག༌ལེ༌!” ཡང༌ གྱོགས༌པ༌ ཁོ༌རང༌ངི༌ ཆུ༌ ནོད༌པོ༌ སྤུང༌པའེ༌ ཀ༌ནེ༌ ཕབས༌ཏེ༌ ཁོའ༌ ཆུ༌ ཐུང༌ཅེས༌ལ༌ ཏངས༌།
GEN 24:19 ཁོའ༌ ཆུ༌ ཏང༌ ཚར༌ར༌ཅིག༌ བུ༌མོའེ༌ ཟེརས༌, “ངའེ༌ ཉེ༌རང༌ངི༌ རྔ༌བོང༌གུན༌ནི༌ ཕིའང༌ ཆུ༌ ཁྱོང༌ཨིན༌ ཏེ༌གུན༌ སྔོམས༌ སྔོམས༌ ཚག༌པ༌།”
GEN 24:20 ཁོའེ༌ གྱོགས༌པ༌ ཆུ༌ ནོད༌དི༌ ཆུ༌བོ༌ སེམས༌ཅན༌གུན༌ ཆུ༌ ཐུང༌སའེ༌ ནོད༌དི༌ ནང༌ང༌ ལུགས༌ ཡང༌ ཆུ༌ ཁྱོང༌ཅེས༌ལ༌ ཆུ༌དོང༌ ཆོགས༌ལ༌ བང༌ཏངས༌ཏེ༌ སོང༌། བུ༌མོའེ༌ རྔ༌བོང༌ ཚང༌མའེ༌ ཕིའ༌ ཆུ༌ ཁྱོངས༌།
GEN 24:21 ཡ༌ཝའེ༌ ཁོའེ༌ བེས༌པོ༌ ཐར༌ཁྱེལ༌ ཛད༌ཏེ༌ ཨིན༌ན༌ མན༌ ལྟའ༌ཅེས༌ལ༌ མི༌བོ༌ ཅུབ༌ཅད༌ཏེ༌ བུ༌མོ༌བོའ༌ ལྟེན༌ དུགས༌།
GEN 24:22 རྔ༌བོང༌གུན༌ནི༌ ཆུ༌ ཐུང༌ ཚར༌ར༌ཅིག༌, མི༌བོའེ༌ ན༌ཁུང༌ང༌ ཏག༌ཅེས༌སི༌ སེར༌རི༌ ཀྱི༌ལྡིར༌ ཆེན༌མོ༌ དང༌ སེར༌རི༌ ལྡུ༌གུ༌ ལྕིན༌ཏྲེ༌ ཉིས༌ ཕིངས༌ཏེ༌ བུ༌མོའེ༌ ལག༌པའ༌ སྐརས༌,
GEN 24:23 ཡང༌ ཁོའ༌ ཏྲིས༌, “ཤོད༌དའང༌ ཁྱོ༌རང༌ སུའི༌ བུ༌མོ༌ ཨིན༌? ང༌ཞའ༌ དི༌རིང༌ངི༌ ཚན༌བོ༌ དུག༌ཅེས༌སི༌ ཕིའ༌ ཁྱོ༌རང༌ངི༌ ཨ༌བའེ༌ ཁང༌པའེ༌ ནང༌ང༌ ནས༌ས༌ ཡོད༌ད༌?”
GEN 24:24 བུ༌མོའེ༌ ཁོའ༌ ལན༌ཏངས༌, “ངའེ༌ ཨ༌བ༌ ནི༌ ན༌ཧོར༌ དང༌ མིལ༌ཀའེ༌ བུ༌ཚ༌, བེ༌ཐུལ༌ ཨིན༌།
GEN 24:25 ང༌ཞའེ༌ ཁང༌པ༌ ཕུག༌མ༌ དང༌ ཙ༌ མང༌པོ༌ ཡང༌ ཉེ༌ཞའ༌ དུག༌ཅེས༌སི༌ ཕིའ༌ ནས༌སའང༌ ཡོད༌།”
GEN 24:26 ཏེ༌ནེ༌ ཡོག༌པོའེ༌ པིག༌དོང༌ ཙུགས༌ཏེ༌ ཡ༌ཝའ༌ ཅོལས༌།
GEN 24:27 ཁོའེ༌ ཟེརས༌, “ངའེ༌ སྤོན༌བོ༌ ཨབ༌ར༌ཧམ༌མི༌ དཀོན༌མཆོག༌ ཞུགས༌ཁན༌ ཡ༌ཝའ༌ སྟོད༌པ༌, ཁོང༌ངི༌ ངའེ༌ སྤོན༌བོའེ༌ ཉམ༌པོ༌ ཁོང༌རང༌ངི༌ ཐུག༌རྗེ༌ དང༌ ཁ༌ཆད༌ སྟན༌པོ༌ བོར༌ར༌ ཛདས༌། ཡ༌ཝའེ༌ ང༌ བེས༌སི༌ ནང༌ང༌ ང༌རང༌ངི༌ སྤོན༌བོའེ༌ ཉེན༌གྲུང༌གུན༌ ཡོད༌ས༌ ཁྱོང༌ང༌ཛད༌།”
GEN 24:28 བུ༌མོ༌བོ༌ ཁོ༌རང༌ངི༌ ཨ༌མའེ༌ ཁང༌པ༌ བང༌ཏངས༌ཏེ༌ སོང༌ ཡང༌ ཅི༌ཚང༌མ༌ ཤདས༌།
GEN 24:29 ཏ༌ ར༌བེ༌ཀ༌ ལ༌བན༌ ཟེར༌ཁན༌ནི༌ ཨ༌ཅོ༌ཞིག༌ ཡོད༌པིན༌, ཡང༌ ལ༌བན༌ བང༌ཏངས༌ཏེ༌ ཕི༌ལོག༌ག༌ ཆུ༌དོང༌ངི༌ཀ༌ ཨབ༌ར༌ཧམ༌མི༌ ཡོག༌པོ༌ ཡོད༌ས༌ སོང༌།
GEN 24:30 ལ༌བན༌ལ༌ ན༌ཁུང༌ངི༌ཀ༌ ཏག༌ཅེས༌སི༌ ཀྱི༌ལྡིར༌ དང༌ ཁོའེ༌ སྲིང༌མོའེ༌ ལག༌པའ༌ ཏགས༌ཏེ༌ ཡོད༌ཁན༌ནི༌ ལྡུ༌གུ༌ གུན༌ ཐོང༌ ཡང༌ མི༌བོའེ༌ ཟེར༌ཁན༌ ར༌བེ༌ཀའེ༌ ཤད༌ཁན༌གུན༌ ཚོར༌ར༌ཅིག༌, ཁོ༌ མི༌བོ༌ ཡོད༌ས༌ སོང༌ ཡང༌ རྔ༌བོང༌གུན༌ ཡོད༌ས༌ ཆུ༌དོང༌ངི༌ དུན༌ལ༌ ཁོ༌ ལངས༌ཏེ༌ ཐོང༌།
GEN 24:31 ཁོའེ༌ ཟེརས༌, “སྐྱོད༌ལེ༌, ཉེ༌རང༌, ཡ༌ཝའེ༌ ཅིན༌ལབས༌ ཐོབ༌ཁན༌ནི༌ མི༌ཞིག༌ ཨིན༌ནོག༌། ཉེ༌རང༌ ཏེ༌ཀ༌ ཅིའ༌ ཞུགས༌སད༌ ནམ༌ ངའེ༌ ཉེ༌རང༌ངི༌ ཕིའ༌ ང༌ཞའེ༌ ཁང༌པ༌ གྲལ༌གྲིག༌ ཅོས༌ཏེ༌ ཡོད༌ ཡང༌ རྔ༌བོང༌གུན༌ བོར༌སའང༌།”
GEN 24:32 ཏེ༌ནེ༌ ཁོ༌ ལ༌བན༌ནི༌ ཁང༌པའ༌ སོང༌ ཡང༌ རྔ༌བོང༌གུན༌ནི༌ ཀ༌ནེ༌ ཁུ༌རུ༌གུན༌ ཕབ༌ ཅུགས༌ཏེ༌ ཏེ༌གུན༌ལ༌ རྩོའ༌ ཏངས༌། ལ༌བན༌ནི༌ ཨབ༌ར༌ཧམ༌མི༌ ཡོག༌པོ༌ དང༌ ཁོའེ༌ མི༌གུན༌ནི༌ རྐང༌པ༌ ཁྲུ༌ཅེས༌སི༌ ཕིའ༌ ཆུ༌ ཁྱོངས༌།
GEN 24:33 ཡང༌ མི༌བོའེ༌ དུན༌ལ༌ ཁར༌ཇི༌ ཟའ༌ཅེས༌ལ༌ ཁྱོང༌ང༌ཅིག༌ ཁོའེ༌ ཟེརས༌, “ངའེ༌ ཟེར༌གོ༌ཤེས༌པོ༌ ཟེར༌ཏེ༌ མ༌ནེ༌ ངའེ༌ འི༌ ཁར༌ཇི༌བོ༌ མི༌ཟ༌།” ཏེ༌ནེ༌ ལ༌བན༌ནི༌ ཟེརས༌, “ང༌ཞའ༌ མོལ༌ལའང༌།”
GEN 24:34 ཁོའེ༌ ཤད༌ཅེས༌ གོ༌ཟུག༌, “ང༌ ནི༌ ཨབ༌ར༌ཧམ༌མི༌ ཡོག༌པོ༌ཞིག༌ ཨིན༌།
GEN 24:35 ཡ༌ཝའེ༌ ངའེ༌ སྤོན༌བོའ༌ ཅིན༌ལབས༌ མང༌པོ༌ སལ༌ཏེ༌ ཁོང༌ ཆུག༌པོ༌ གྱུར༌ཅུག༌ག༌ ཛདས༌། ཁོང༌ང༌ ལུག༌ དང༌ བ༌ལང༌, མུལ༌ དང༌ སེར༌, བུ༌མོ༌ དང༌ བུ༌ཚའེ༌ ཚེ༌ཡོག༌ དང༌ རྔ༌བོང༌ དང༌ བུང༌བུ༌ གུན༌ནི༌ ཁྱུ༌ མང༌པོ༌ ཡོད༌།
GEN 24:36 ངའེ༌ སྤོན༌བོའེ༌ ན༌མ༌ སཱ༌རའ༌ རྒད༌མོ༌ ཡོད༌ ཟ༌ནེ༌ བུ༌ཚ༌ཞིག༌ ཇོར༌ ཡང༌ ངའེ༌ སྤོན༌བོའེ༌ ཁོང༌རང༌ངི༌ ཨིན༌ཁན༌ ཅི༌ཚང༌མ༌ ཁོའ༌ སལས༌།
GEN 24:37 ངའེ༌ སྤོན༌བོའེ༌ ངའ༌ ནའ༌ ཁུར༌ཅུགས༌ཏེ༌ མོལས༌, ‘ངའེ༌ བུ༌ཚའ༌ ང༌ དུག༌སའེ༌ ཀེ༌ནན༌ནི༌ ཡུལ༌ནེ༌ ན༌མ༌ མ༌ཁྱོང༌།
GEN 24:38 ཨིན༌ནའང༌ ངའེ༌ ཨ༌བའེ༌ ནང༌ཚངས༌ དང༌ ཉེན༌གྲུང༌གུན༌ ཡོད༌ས༌ སོང༌ཏེ༌ ཁོའེ༌ ཕིའ༌ ན༌མ༌ ཁྱོང༌།’”
GEN 24:39 “ཏེ༌ནེ༌ ངའེ༌ སྤོན༌བོའ༌ ཏྲིས༌པིན༌, ‘ཀལ༌ཏེས༌ བུ༌མོ༌བོ༌ ང༌ ཉམ༌པོ༌ ཡོང༌ཅེས༌ལ༌ མ༌ཐད༌ན༌?’”
GEN 24:40 “ཁོང༌ངི༌ ལན༌སལས༌, ‘ངའེ༌ ཏུས༌གྱུན༌ ཁའ༌ ཉན༌ཁན༌ནི༌ ཡ༌ཝའེ༌ ཁོང༌རང༌ངི༌ ཕོ༌ཉ༌ ཁྱོ༌རང༌ ཉམ༌པོ༌ ཀལ༌ལ༌ ཛད༌ཏེ༌ ཁྱོ༌རང༌ངི༌ བེས༌པོ༌ ཐར༌ཁྱེལ༌ ཛད༌ཨིན༌། ཁྱོ༌རང༌ང༌ ངའེ༌ བུ༌ཚའེ༌ ཕིའ༌ ན༌མ༌ ངའེ༌ ཨ༌བའེ༌ ནང༌ཚངས༌, ང༌རང༌ངི༌ ཉེན༌གྲུང༌གུན༌ནི༌ ནང༌ནེ༌ ཐོབ༌ཨིན༌།
GEN 24:41 ཏེ༌ནེ༌ ཁྱོ༌རང༌ ཁྱོ༌རང༌ངི༌ ནའ༌ ཁུར༌ཁན༌ནེ༌ ཐར༌ཏེ༌ ཨིན༌ནོག༌། ཀལ༌ཏེས༌ ཁྱོ༌རང༌ ངའེ༌ ཉེན༌གྲུང༌གུན༌ ཡོད༌ས༌ སོང༌ཏེ༌ ཁོང༌གུན༌ནི༌ ཁྱོ༌རང༌ང༌ བུ༌མོ༌བོ༌ མ༌ཏང༌ན༌ ཁྱོ༌རང༌ངི༌ ནའ༌ ཁུར༌ཁན༌ནེ༌ ཁྱོ༌རང༌ ཐར༌ཏེ༌ ཨིན༌ནོག༌།’”
GEN 24:42 “དི༌རིང༌ ང༌ ཆུ༌དོང༌ ཡོད༌ས༌ ལེབ༌བ༌ཅིག༌, ངའེ༌ ང༌རང༌ངི༌ སྤོན༌བོའེ༌ དཀོན༌མཆོག༌ ཡ༌ཝའ༌ མོས༌ལམ༌ ཞུས༌པིན༌, ‘ཀལ༌ཏེས༌ ཉེ༌རང༌ ཐུགས༌ཐད༌ན༌ ཇུ༌ཇུ༌ ངའེ༌ བེས༌པོ༌ ཐར༌ཁྱེལ༌ ལུས༌ཤུག༌ག༌ ཛད༌།’
GEN 24:43 ང༌ ཆུ༌དོང༌ངི༌ དུན༌ལ༌ ཡོད༌ ཟ༌ནེ༌ བུ༌མོ༌ ཆུ༌ ལེན༌ན༌ལ༌ ཡོང༌ཁན༌བོའ༌ ངའེ༌ ཟེར༌ཨིན༌, ‘ཇུ༌ཇུ༌ ཉེ༌རང༌ངི༌ ཆུ༌ནོད༌ནེ༌ ངའ༌ ཐུང༌ཅེས༌ལ༌ ཆུ༌ ཉུ༌ངུན༌ཞིག༌ སལ༌ལའང༌།’
GEN 24:44 ཀལ༌ཏེས༌ ཁོའེ༌ ‘དོན༌ལེ༌, ཡང༌ ངའེ༌ ཉེ༌རང༌ངི༌ རྔ༌བོང༌གུན༌ནི༌ ཕིའང༌ ཆུ༌ ཁྱོང༌ཨིན༌’ ཟེར༌ན༌, ཏེ༌ བུ༌མོ༌བོ༌ ཉེ༌རང༌ངི༌ ངའེ༌ སྤོན༌བོའེ༌ བུ༌ཚའེ༌ ཕིའ༌ ལྡམ༌མ༌ ཛད༌ཁན༌བོ༌ ཨིན༌ ཅུག༌ག༌ ཛད༌།”
GEN 24:45 “མོས༌ལམ༌ ཞུ༌ཚར༌རི༌ སང༌ སྔུན༌ལ༌ ར༌བེ༌ཀ༌ ཁོ༌རང༌ངི༌ ཆུ༌ནོད༌པོ༌ སྤུང༌པའེ༌ཀ༌ ཁུར༌ཏེ༌ ཡོངས༌ ཡང༌ ཐུར༌ལ༌ ཆུ༌དོང༌ ཡོད༌ས༌ སོང༌ཏེ༌ ཆུ༌ ཕིངས༌། ངའེ༌ ཁོའ༌ ཟེར༌པིན༌, ‘ཇུ༌ཇུ༌ ངའ༌ ཆུ༌ ཐུང༌ཅེས༌ཤིག༌ སལ༌ལའང༌།’”
GEN 24:46 “ཁོའེ༌ ཏེན༌ན༌མལ༌ལ༌ ཁོ༌རང༌ངི༌ ཆུ༌ནོད༌པོ༌ སྤུང༌པའེ༌ ཀ༌ནེ༌ ཕབས༌ཏེ༌ ‘དོན༌ལེ༌ ཡང༌ ངའེ༌ ཉེ༌རང༌ངི༌ རྔ༌བོང༌ངི༌ ཕིའང༌ ཆུ༌ ཁྱོང༌ཨིན༌’ ཟེར༌ར༌རག༌། ཏེ༌ནེ༌ ངའེ༌ ཐུངས༌པིན༌, ཡང༌ ཁོའེ༌ རྔ༌བོང༌གུན༌ལ༌ ཆུ༌ ཏངས༌།”
GEN 24:47 “ངའེ༌ ཏྲིས༌པིན༌, ‘ཁྱོ༌རང༌ སུའི༌ བུ༌མོ༌ ཨིན༌?’ ཁོའེ༌ ལན༌ཏངས༌, ‘ང༌ ནི༌ ན༌ཧོར༌ དང༌ མིལ༌ཀའེ༌ བུ༌ཚ༌ བེ༌ཐུལ༌ལི༌ བུ༌མོ༌ ཨིན༌།’ ངའེ༌ ཁོའ༌ ན༌ཁུང༌ངི༌ཀ༌ སྟག༌ཅེས༌ ཀྱི༌ལྡིར༌ དང༌ ལག༌པའ༌ ལྡུ༌གུ༌གུན༌ ཏགས༌པིན༌།
GEN 24:48 ཏེ༌ནེ༌ ངའེ༌ པིག༌དོང༌ ཙུགས༌ཏེ༌ ཡ༌ཝའ༌ ཅོལ༌པིན༌, ངའེ༌ ང༌རང༌ངི༌ སྤོན༌བོ༌ ཨབ༌ར༌ཧམ༌མི༌ དཀོན༌མཆོག༌ ཡ༌ཝ༌ སྟོད༌པ༌ ཕུལ༌པིན༌། ཁོང༌ངི༌ ང༌ ངའེ༌ སྤོན༌བོའེ༌ ཉེན༌གྲུང༌གུན༌ནི༌ ཕྲོའ༌ ཁ༌དྲང༌ང༌ ཁྱོང༌ང༌ ཛད༌ཏེ༌ ཁོང༌ངི༌ བུ༌ཚའེ༌ ན༌མའེ༌ ཕིའ༌ ཁོང༌ངི༌ ནོའེ༌ ཚ༌མོ༌ ལྡམ༌མ༌ ཛདས༌།
GEN 24:49 ཏ༌ ང༌ ཤོད༌དའང༌ ཁྱོ༌ཞའེ༌ ངའེ༌ སྤོན༌བོའ༌ ཐུག༌རྗེ༌ དང༌ ཨིད༌ཤེས༌ཅན༌ ཨིན༌ཁན༌ སྟན༌ཨིན༌ན༌ ཡ༌ མི༌སྟན, ཀལ༌ཏེས༌ མ༌སྟན༌ན༌ ཏེན༌ནེ༌ འི༌ སྟིང༌ནེ༌ ཅོ༌གོ༌ཤེས༌པོ༌ ངའ༌ ཧ༌གོ༌ཨིན༌།”
GEN 24:50 ལ༌བན༌ དང༌ བེ༌ཐུལ༌ལི༌ ལན༌ཏངས༌, “འི༌གུན༌ ཡ༌ཝའེ༌ ཆོགས༌ནེ༌ ཨིན༌ པ༌སང༌, ང༌ཞའ༌ ཐག༌ཅད༌ ཏང༌ཅེས༌སི༌ ཝང༌ཆ༌ མེད༌།
GEN 24:51 ར༌བེ༌ཀ༌ ཉེ༌རང༌ངི༌ དུན༌ནེ༌, ཉེ༌རང༌ངི༌ སྤོན༌བོའེ༌ བུ༌ཚའ༌ ན༌མ༌ ཅོ༌ཅེས༌ལ༌ ཁོ༌ ཉེ༌རང༌ ཉམ༌པོ༌ ཁྱེར༌ར༌ཛད༌, ཀ༌ཟུག༌ ཡ༌ཝ༌ ཐག༌ཅདས༌།”
GEN 24:52 ཏེ༌བོ༌ ཚོར༌ར༌ཅིག༌, ཨབ༌ར༌ཧམ༌མི༌ ཡོག༌པོའེ༌ པིག༌དོང༌ ཙུགས༌ཏེ༌ ཡ༌ཝའ༌ ཅོལས༌།
GEN 24:53 ཏེ༌ནེ༌ ཁོའེ༌ མུལ༌ དང༌ སེར༌རི༌ གྱན༌ཆ༌ དང༌ ཀོས༌ལག༌ གུན༌ ཁྱོངས༌ཏེ༌ ར༌བེ༌ཀ༌ ཏངས༌། བུ༌མོའེ༌ ཨ༌ཅོ༌ དང༌ ཨ༌མའ༌ ཁོའེ༌ སྟགས༌ རིན༌ཅན༌གུན༌ ཏངས༌།
GEN 24:54 ཏེ༌ནེ༌ ཨབ༌ར༌ཧམ༌མི༌ ཡོག༌པོ༌ དང༌ ཁོ༌ ཉམ༌པོ༌ ཡོད༌ཁན༌ནི༌ མི༌གུན༌ནི༌ ཟན༌ ཟོས༌ ཡང༌ ཐུངས༌ ཡང༌ ཚན༌ལ༌ ཏེ༌རུ༌ དུགས༌། ཐོ༌རེ༌ཟུག༌པོ༌ ང༌ཏོག༌ ཁོང༌གུན༌ ལངས༌ཏེ༌ ཁོའེ༌ ཟེརས༌, “ང༌ ང༌རང༌ངི༌ སྤོན༌བོ༌ ཡོད༌ས༌ ལོགས༌ཏེ༌ ཆ༌ཅུག༌།”
GEN 24:55 ཨིན༌ནའང༌ ར༌བེ༌ཀའེ༌ ཨ༌ཅོ༌ དང༌ ཨ༌མའེ༌ ཟེརས༌, “ཁོ༌ ང༌ཞའ༌ ཉམ༌པོ༌ ཞག༌མ༌ རྕུ༌ དུག༌ཅུག༌ག༌ཛད༌, ཏེ༌སྟིང༌ནེ༌ ཁོ༌ ཆ༌ནའང༌ གྲིག༌།”
GEN 24:56 ཨིན༌ནའང༌ ཁོའེ༌ ཟེརས༌, “ཡ༌ཝའེ༌ ངའེ༌ བེས༌པོ༌ ཁྲངས༌པོ༌ ཅོའ༌ ཛདས༌པ༌ ངའ༌ གོར༌ མ༌ཅུག༌ག༌ ངའེ༌ སྤོན༌བོ༌ ཡོད༌ས༌ ལོགས༌ཏེ༌ ཆ༌ཅུག༌ག༌ ཛད༌།”
GEN 24:57 ཁོང༌གུན༌ནི༌ ལན༌ཏངས༌, “བུ༌མོའ༌ བོད༌ཏེ༌ ཁོའེ༌ ཅི༌ ཟེར༌དུག༌ ལྟེན༌།”
GEN 24:58 ཏེ༌ནེ༌ ཁོང༌གུན༌ནི༌ ར༌བེ༌ཀ༌ བོད༌ཏེ༌ ཏྲིས༌, “ཁྱོ༌རང༌ འི༌ མི༌བོ༌ ཉམ༌པོ༌ ཆའ༌ ཐད༌ད༌རག༌ག༌?” ཁོའེ༌ ལན༌ཏངས༌, “ང༌ ཆ༌ ཐད༌ད༌རག༌ལེ༌།”
GEN 24:59 ཏེ༌ནེ༌ ཁོང༌གུན༌ནི༌ ར༌བེ༌ཀ༌ དང༌ ཁོའ༌ སྟ༌སྟོག༌ ཅོ༌ཁན༌ནི༌ ཡོག༌པོ༌ གུན༌ ཨབ༌ར༌ཧམ༌མི༌ ཡོག༌པོ༌ དང༌ ཁོའེ༌ མི༌གུན༌ ཉམ༌པོ༌ ལམ༌ཅུགས༌།
GEN 24:60 ཁོང༌གུན༌ནི༌ ར༌བེ༌ཀ༌ ཅིན༌ལབས༌ ཏངས༌ཏེ༌ ཟེརས༌, “ང༌ཞའེ༌ སྲིང༌མོ༌ ཁྱོ༌རང༌ སྟོང༌ཁྲག༌ མ༌ མང༌པོའེ༌ ཨ༌མ༌ གྱུར༌ཤིག༌། ཁྱོ༌རང༌ངི༌ པུར༌གྱུད༌གུན༌ནི༌ ཁོང༌རང༌ངི༌ གྲ༌འོའེ༌ གྱལ༌ས༌གུན༌ནི༌ཀ༌ ཝང༌སྲུལ༌ཤིག༌།”
GEN 24:61 ཏེ༌ནེ༌ ར༌བེ༌ཀ༌ དང༌ ཁོའེ༌ ཡ༌ཏོ༌ བུ༌མོ༌གུན༌ རྔ༌བོང༌ངི༌ཀ༌ ཞོན༌ཏེ༌ ཨབ༌ར༌ཧམ༌མི༌ ཡོག༌པོ༌ དང༌ ཁོའེ༌ མི༌གུན༌ ཉམ༌པོ༌ སོང༌། ཏེ༌ནེ༌ ཁོང༌གུན༌ ར༌བེ༌ཀ༌ ཁྲིད༌ཏེ༌ སོང༌།
GEN 24:62 ཏ༌ ཨི༌སཱག༌ ནེ༌གེཝ༌ ཡུལ༌ཇོངས༌སི༌ བེར༌ལ༌ཧཱའི༌རོའི༌ ཟེར༌སའེ༌ ནས༌སའེ༌ ནང༌ང༌ དུག༌གད༌པིན༌།
GEN 24:63 ཁོ༌ ཕི༌ཏོག༌ ཞིང༌ངི༌ཀ༌ གྲུལ༌ལ༌ལ༌ སོང༌ ཡང༌ ཀེན༌ལ༌ ལྟས༌པ༌ རྔ༌བོང༌གུན༌ ཡོང༌ང༌ ཐོང༌།
GEN 24:64 ར༌བེ༌ཀའེ༌ ཀེན༌ལ༌ ལྟས༌པ༌ ཨི༌སཱག༌ ཐོང༌ ཡང༌ ཁོ༌ རྔ༌བོང༌ངི༌ ཀ༌ནེ༌ བབས༌ཏེ༌
GEN 24:65 ཨབ༌ར༌ཧམ༌མི༌ ཡོག༌པོའ༌ ཏྲིས༌, “ཞིང༌ངི༌ ཀ༌ནེ༌ གྲུལ༌ཨིན༌ ང༌དང༌ ཆོགས༌ལ༌ ཡོང༌ཁན༌ནི༌ མི༌བོ༌ སུ༌ ཨིན༌ནོག༌?” ཁོའེ༌ ལན༌ཏངས༌, “ཁོང༌, ངའེ༌ སྤོན༌བོ༌ ཨིན༌ནོག༌།” ཏེ༌ནེ༌ བུ༌མོའེ༌ ལྡོང༌ སྐབ༌ཅེས༌པོ༌ ལེན༌ཏེ༌ ཁོ༌རང༌ངི༌ ལྡོང༌བོ༌ སྐབས༌།
GEN 24:66 ཡོག༌པོའེ༌ ཨི༌སཱག༌ག༌ ཁོའེ༌ ཅོ༌ཁན༌ ཚང༌མ༌ ཤདས༌།
GEN 24:67 ཏེ༌ནེ༌ ཨི༌སཱག༌གི༌ ར༌བེ༌ཀ༌ ཁོ༌རང༌ངི༌ ཨ༌མའེ༌ ཀུར༌རི༌ ནང༌ང༌ ཁྱེརས༌ ཡང༌ ཁོ༌ ཉམ༌པོ༌ ན༌མ༌ ཅོས༌། ཨི༌སཱག༌གི༌ ར༌བེ༌ཀ༌ ཡ༌ཤ༌ ཅོའད༌པིན༌ ཡང༌ ཁོ༌རང༌ངི༌ ཨ༌མ༌ ཀྲོངས༌ཏེ༌ སྟིང༌ནེ༌ ཁོའ༌ སེམས༌སོ༌ ཐོབ༌།
GEN 25:1 ཨབ༌ར༌ཧམ༌མི༌ ཀེ༌ཏུ༌ར༌ ཟེར༌ཁན༌ནི༌ ཡང༌ བུ༌མོ༌ཞིག༌ ཉམ༌པོ༌ ན༌མ༌ ཅོས༌།
GEN 25:2 ཏེ༌ བུ༌མོ༌བོ༌ གྱུད༌ཏེ༌ ཁོའ༌ བུ༌ཚ༌ དྲུག༌ ཇོར༌ ཁོང༌གུན༌ ནི༌ ཟིམ༌རན༌, ཡོག༌ཤན༌, མི༌དན༌, མི༌དིའན༌, འིཤ༌བག༌, དང༌ ཤུའ༌ ཨིན༌པིན༌།
GEN 25:3 ཡོག༌ཤན༌, ཤི༌བ༌ དང༌ དི༌དན༌ ནི༌ ཨ༌བ༌ ཨིན༌པིན༌ ཡང༌ ཨ༌ཤུ༌རམ༌པ༌, ལི༌ཏུ༌ཤམ༌པ༌ དང༌ ལིའུ༌མིམ༌པ༌ གུན༌, དི༌དན༌ ནི༌ པུར༌གྱུད༌གུན༌ ཨིན༌ནོག༌།
GEN 25:4 མི༌དིའན༌ ནི༌ བུ༌ཚ༌གུན༌ ཨི༌ཕ༌, ཨི༌ཕེར༌, ཧ༌ནོག༌, ཨ༌བི༌ད༌ དང༌ འེལ༌ལྡ༌ གུན༌ ཨིན༌པིན༌། ཁོང༌ ཚང༌མ༌ ཀི༌ཏུ༌རའ༌ གྱུད༌ཏེ༌ ཨབ༌ར༌ཧམ༌མི༌ པུར༌གྱུད༌གུན༌ ཨིན༌ནོག༌།
GEN 25:5 ཨབ༌ར༌ཧམ༌མི༌ ཁོའ༌ ཡོད༌ཁན༌ ཚང༌མ༌ ཨི༌སཱག༌ག༌ ཏངས༌།
GEN 25:6 ཨིན༌ནའང༌ ཨབ༌ར༌ཧམ༌ མ༌ཤིའ༌ ཡོད༌ཏུས༌, ཁོའེ༌ ཚེ༌ཡོག༌ ན༌མ༌གུན༌ གྱུད༌ཏེ༌ སྐྱེ༌ཁན༌ནི༌ བུ༌ཚ༌གུན༌ལ༌ སྐྱེས༌ ཏངས༌ཏེ༌ ཤར༌ཆོགས༌ལ༌ ཡོད༌ཁན༌ནི༌ ནས༌སའ༌ ཨི༌སཱག༌ནེ༌ ཐག༌རིང༌ང༌ ལམ༌ཅུགས༌།
GEN 25:7 མི༌ཚེ༌ རིང༌མོ༌ གྱལ༌ལ༌ཞིག༌ ཕུད༌ཏེ༌ ལོ༌ 175 སོང༌ཏེ༌
GEN 25:8 ཨབ༌ར༌ཧམ༌ ཤི༌ ཡང༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌།
GEN 25:9 ཁོའེ༌ བུ༌ཚ༌ ཨི༌སཱག༌ དང༌ ཨིཤ༌མ༌ཨེལ༌ལི༌ ཁོང༌ མེཁ༌ཕི༌ལའི༌ བྲག༌ཕུགས༌ ཀ༌བོ༌ ཧེད༌པ༌ ཟོ༌ཧར༌རི༌ བུ༌ཚ༌ ཨེ༌ཕོ༌རོན༌ནི༌ ཞིང༌ མམ༌རེའེ༌ ཤར༌ཆོགས༌ལ༌ ཡོད༌ཁན༌བོའེ༌ ནང༌ང༌ སུབས༌།
GEN 25:10 འི༌བོ༌ ཨབ༌ར༌ཧམ༌མི༌ ཧེད༌པ༌གུན༌ནི༌ ཀ༌ནེ༌ ཉོས༌ཁན༌ནི༌ ཞིང༌བོ༌ ཨིན༌པིན༌། ཏེ༌ནང༌ང༌ ཨབ༌ར༌ཧམ༌ ཁོ༌རང༌ངི༌ ན༌མ༌ སཱ༌རའ༌ ཉམ༌པོ༌ སུབས༌།
GEN 25:11 ཨབ༌ར༌ཧམ༌ ཀྲོངས༌ཏེ༌ སྟིང༌ནེ༌ དཀོན༌མཆོག༌གི༌ ཁོའེ༌ བུ༌ཚའ༌ ཨི༌སཱག༌ག༌ ཅིན༌ལབས༌ སལས༌ ཡང༌ ཏེ༌ཏུས༌ ཁོ༌ བེར༌ལ༌ཧཱའི༌རོའི༌ ནང༌ང༌ དུག༌གད༌པིན༌།
GEN 25:12 འི༌བོ༌ ཨབ༌ར༌ཧམ༌མ༌ ཧཱ༌གར༌ ཨི༌ཇིབ༌མ༌ སཱ༌རའེ༌ ཚེ༌ཡོག༌ གྱུད༌ཏེ༌ ཇོར༌ཁན༌ ནི༌ ཨིཤ༌མ༌ཨེལ༌ལི༌ པུར༌གྱུད༌གུན༌ནི༌ ཐོ༌ ཨིན༌།
GEN 25:13 སྐྱེ༌ཚིར༌ལ༌ ཨིཤ༌མ༌ཨེལ༌ལི༌ བུ༌ཚ༌གུན༌ནི༌ མིང༌ ནི༌ ནི༌བེ༌འོད༌, ཀི༌དར༌, ཨད༌བིལ༌, མིབ༌སམ༌,
GEN 25:14 མིཤ༌མ༌, དུ༌མཧ༌, མས༌ས༌,
GEN 25:15 ཧ༌དད༌, ཏི༌མ༌, ཡི༌ཏུར༌, ན༌ཕིཤ༌ དང༌ ཀི༌དི༌མཧ༌ གུན༌ ཨིན༌།
GEN 25:16 ཁོང༌གུན༌ ཨིཤ༌མ༌ཨེལ༌ལི༌ བུ༌ཚའེ༌ སྡེ༌, ཝང༌སྲུལ༌པ༌ རྕུག༌ཉིས༌སི༌ ཕ༌མེས༌པོ༌གུན༌ ཨིན༌པིན༌, ཁོང༌གུན༌ནི༌ མིང༌ ཁོང༌རང༌གུན༌ནི༌ གྲོང༌སེབ༌ དང༌ དུག༌སའེ༌ ས༌ཆ༌གུན༌ ནང༌ཞིན༌ ཐོགས༌།
GEN 25:17 ལོ༌ 137 སོན༌ཏེའ༌ ལུས༌ཏེ༌ སྟིང༌ནེ༌ ཨིཤ༌མ༌ཨེལ༌ ཤི༌ ཡང༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌།
GEN 25:18 ཨིཤ༌མ༌ཨེལ༌ལི༌ པུར༌གྱུད༌གུན༌ ཧ༌ཝི༌ལ༌ནེ༌ ཤུར༌ ཚག༌པ༌, ཀ༌བོ༌ ཨི༌ཇིབ༌བི༌ ཤར༌ཆོགས༌, ཨ༌ཤུར༌ ཆོགས༌ལ༌ ཡོད༌པིན༌། ཁོང༌གུན༌ ཨབ༌ར༌ཧམ༌མི༌ ཞན༌ པུར༌གྱུད༌གུན༌ ཉམ༌པོ༌ ཐུན༌ན༌ མེད༌པིན༌།
GEN 25:19 འི༌བོ༌ ཨི༌སཱག༌གི༌ བུ༌ཚ༌གུན༌ནི༌ སྐོར༌, ཨི༌སཱག༌ ནི༌ ཨབ༌ར༌ཧམ༌མི༌ བུ༌ཚ༌ ཨིན༌།
GEN 25:20 ཨི༌སཱག༌ག༌ ལོ༌ 40 ཆའད༌པིན༌ ནམ༌ ཁོའེ༌ ར༌བེ༌ཀ༌ ཉམ༌པོ༌ བག༌སྟོན༌ ཅོས༌། ར༌བེ༌ཀ༌ པ༌དམ༌ཨ༌རམ༌ནེ༌ ཨིན༌ཁན༌ ཨ༌རམ༌པ༌ བེ༌ཐུལ༌ལི༌ བུ༌མོ༌ དང༌ ལ༌བན༌ནི༌ སྲིང༌མོ༌ ཨིན༌པིན༌།
GEN 25:21 ཨི༌སཱག༌གི༌ ར༌བེ༌ཀའེ༌ ཕིའ༌ ཡ༌ཝའ༌ མོས༌ལམ༌ ཞུས༌ ཅིའ༌ཟེར༌ན༌ ཁོའ༌ ཕྲུ༌གུ༌ མེད༌པིན༌། ཡ༌ཝའེ༌ ཁོའེ༌ མོས༌ལམ༌མ༌ ལན༌སལ༌ཏེ༌ ར༌བེ༌ཀ༌ སྐྱེ༌ཅེས༌མ༌ཞིག༌ གྱུར༌།
GEN 25:22 ཁོའེ༌ བུ༌སྣོད༌དི༌ ནང༌ང༌ ཙག༌ཕྲུག༌གུན༌ ནོལ༌ པ༌སང༌ ཁོའེ༌ ཟེརས༌, “འི༌ཟུག༌ ང༌ ཉམ༌པོ༌ ཅིའ༌ སོང༌ཏེ༌ ཨིན༌ནོག༌?” ཏེ༌བོའེ༌ཕིའ༌ ཁོའེ༌ ཡ༌ཝའ༌ ཏྲིས༌,
GEN 25:23 ཡ༌ཝའེ༌ ཁོའ༌ མོལས༌, “གྱལ༌ཁམས༌ ཉིས༌ ཁྱོ༌རང༌ངི༌ ནང༌ང༌ ཡོད༌, ཁྱོ༌རང༌ང༌ སྐྱེ༌ཁན༌ ཉིས༌ཀོ༌ མ༌ནེ༌ མི༌ཐུན༌། ཅིག༌པོ༌ ཞན༌བོའེ༌ སང༌ མང༌ང༌ ཤེད༌ཅན༌ ཡོང༌ཨིན༌, ཆེའ༌བོའེ༌ ཆུ༌ངུན༌བོའ༌ ཞབས༌ཏོག༌ ཞུ༌ཨིན༌།”
GEN 25:24 ཕྲུ༌གུ༌གུན༌ སྐྱེ༌ཅེས༌སི༌ ཏུས༌པོ༌ ལེབ༌བ༌ཅིག༌ ཁོའ༌ བུ༌ཚ༌ ཙག༌ཕྲུག༌ སྐྱེས༌།
GEN 25:25 གོ༌མ༌ སྐྱེ༌ཁན༌བོ༌ མར༌པོ༌ཞིག༌ ཡང༌ ཁོའེ༌ ཟུགས༌པོ༌ སྤུ༌ཅན༌ནི༌ ཀོས༌ལག༌ ཙོགས༌ ཡོད༌པིན༌, ཏེན༌ན༌བོའེ༌ཕིའ༌ ཁོའེ༌ མིང༌ང༌ ཨི༌སུ༌ ཏགས༌།
GEN 25:26 ཏེ༌སྟིང༌ནེ༌ ཁོའེ༌ ནོ༌ སྐྱེ༌ཁན༌བོའེ༌ ཨི༌སུའི༌ རྐང༌པའེ༌ སྟིང༌པའ༌ ཐམས༌ཏེ༌ ཡོད༌ པ༌སང༌ ཁོའེ༌ མིང༌ང༌ ཡ༌ཀོབ༌ ཏགས༌། ར༌བེ༌ཀའ༌ ཁོང༌གུན༌ སྐྱེ༌ ཟ༌ནེ༌ ཨི༌སཱག༌ག༌ ལོ༌ དྲུག༌ཅུ༌ ཆའད༌པིན༌།
GEN 25:27 བུ༌ཚ༌གུན༌ ལྡན༌ ཡང༌ ཨི༌སུ༌ ལིངས༌པ༌ ཁས༌པ༌ཞིག༌ གྱུར༌ ཡང༌ ཁོ༌ ཕི༌ལོག༌ག༌ ཆའ༌ ཐད༌ཁན༌ ཨིན༌ནའང༌ ཡ༌ཀོབ༌ ཉམ༌ཤུང༌ ནང༌ང༌ དུག༌ག༌ ཐད༌ཁན༌ ཡོད༌པིན༌།
GEN 25:28 ཨི༌སཱག༌གི༌ ཨི༌སུའ༌ མང༌ང༌ ཡ༌ཤ༌ ཅོའད༌པིན༌ ཅིའ༌ཟེར༌ན༌ ཁོ༌ ཨི༌སུའི༌ སད༌ཁན༌ནི༌ སེམས༌ཅན༌གུན༌ནི༌ ཤ༌ ཟའ༌ཅེས༌ལ༌ ཐད༌དད༌པིན༌ ཨིན༌ནའང༌ ར༌བེ༌ཀའེ༌ ཡ༌ཀོབ༌བ༌ ཡ༌ཤ༌ མང༌ང༌ ཅོའད༌པིན༌།
GEN 25:29 ཞག༌ཅིག༌ ཡ༌ཀོབ༌བི༌ ཐུག༌པ༌ སྐོལ༌ཨིན༌ ཡོད༌ ཟ༌ནེ༌ ཨི༌སུ༌ ལིངས༌ནེ༌ ལོགས༌ཏེ༌ ཡོངས༌ ཡང༌ ཁོ༌ མ༌སྲན༌ཏྲེ༌ སྟོགས༌ཏེ༌ ཡོད༌པིན༌།
GEN 25:30 ཁོའེ༌ ཡ༌ཀོབ༌བ༌ ཟེརས༌, “ང༌ མ༌སྲན༌ཏྲེ༌ སྟོགས༌ས༌རག༌ ངའ༌ ཐུག༌པ༌ མར༌པོ༌ ཐུང༌ང༌ལ༌ ཏོང༌ངའང༌།” ༼ཏེ༌བོའེ༌ཕིའ༌ ཁོའེ༌ མིང༌ང༌ ཨི༌དོམ༌ ཐོགས༌ ཀ༌བོའེ༌ ཏོན༌ མར༌པོ༌ ཨིན༌ནོག༌།༽
GEN 25:31 ཡ༌ཀོབ༌བི༌ ལན༌ཏངས༌, “ཁྱོ༌རང༌ གོ༌མ༌ སྐྱེ༌ཁན༌ནི༌ ཐོབ༌ཏང༌བོ༌ ངའ༌ ཏང༌ན༌ ངའེ༌ འི༌བོ༌ ཁྱོ༌རང༌ང༌ ཏང༌ཨིན༌།”
GEN 25:32 ཨི༌སུའི༌ ཟེརས༌, “ང༌ སྟོགས༌ཏེ༌ ཤི༌ཅེས༌རག༌, གོ༌སྐྱེས༌སི༌ ཐོབ༌ཏང༌ངི༌ ངའ༌ ཅི༌ ཕན༌ཐོགས༌ ཨིན༌?”
GEN 25:33 ཡ༌ཀོབ༌བི༌ ཟེརས༌, “གོ༌མ༌ ནའ༌ ཁུར༌།” ཏེ༌ནེ༌ ཨི༌སུའི༌ ནའ༌ ཁུར༌ཏེ༌ ཁོ༌རང༌ངི༌ གོ༌སྐྱེས༌སི༌ ཐོབ༌ཏང༌བོ༌ ཡ༌ཀོབ༌བ༌ ཙོངས༌།
GEN 25:34 ཏེ༌ནེ༌ ཡ༌ཀོབ༌བི༌ ཁོའ༌ ཏ༌གི༌ ཁ༌ཅིག༌ དང༌ སྲན༌མའེ༌ ཐུག༌པ༌ ཏངས༌པ༌ ཁོའེ༌ ཟོས༌ ཡང༌ ཐུངས༌། ཏེ༌ནེ༌ ལངས༌ཏེ༌ ཕི༌ལོག༌ག༌ སོང༌། ཏེན༌ན༌ཟུག༌གི༌ ཨི༌སུའི༌ ཁོ༌རང༌ངི༌ གོ༌སྐྱེས༌སི༌ ཐོབ༌ཏང༌བོའ༌ རིན༌མེད༌ ཐེས༌།
GEN 26:1 ཨབ༌ར༌ཧམ༌མི༌ ཏུས༌ལ༌ ཇུང༌ཁན༌ནི༌ མུ༌གེ༌ མན༌པ༌ ཡང༌ མུ༌གེ༌ཞིག༌ ཇུངས༌པ༌, ཨི༌སཱག༌ གེ༌རར༌ལ༌ ཕི༌ལིས༌ཏིའི༌ གྱལ༌པོ༌ ཨ༌བི༌མེ༌ལེག༌གི༌ཀ༌ སོང༌།
GEN 26:2 ཡ༌ཝ༌ ཨི༌སཱག༌ག༌ ཇལ༌ཏེ༌ མོལས༌, “ཨི༌ཇིབ༌བི༌ ཡུལ༌ལ༌ མ༌ཆ༌, ངའེ༌ སྟན༌ཅེས༌ཅན༌ནི༌ ས༌ཀྱད༌པོའེ༌ཀ༌ དུག༌།
GEN 26:3 ཏེ༌རུ༌ ཞན༌ཡུལ༌ལི༌ མི༌ཞིག༌ ཙོགས༌ལ༌ དུག༌ ཡང༌ ང༌ ཁྱོ༌རང༌ ཉམ༌པོ༌ དུགས༌ཏེ༌ ཁྱོ༌རང༌ང༌ ཅིན༌ལབས༌ ཏང༌ཨིན༌། ངའེ༌ ཁྱོ༌རང༌ ཡང༌ ཁྱོ༌རང༌ངི༌ པུར༌གྱུད༌གུན༌ལ༌ འི༌ ས༌ཀྱད༌ ཚང༌མ༌ ཏང༌ཨིན༌ ཡང༌ ངའེ༌ ཁྱོ༌རང༌ངི༌ ཨ༌བ༌ ཨབ༌ར༌ཧམ༌ ཉམ༌པོ༌ ནའ༌ ཁུར༌ཁན༌བོ༌ དྲན༌དྲའ༌ གྲུབ༌ཅུག༌ ཨིན༌།
GEN 26:4 ངའེ༌ ཁྱོ༌རང༌ངི༌ པུར༌གྱུད༌གུན༌ ནམ༌མི༌ སྐར༌མ༌ ཙོགས༌ ཕེལ༌ཅུགས༌ཏེ༌ ཁོང༌གུན༌ལ༌ འི༌ ས༌ཀྱད༌ ཚང༌མ༌ ཏང༌ཨིན༌ ཡང༌ ཁྱོ༌རང༌ངི༌ པུར༌གྱུད༌གུན༌ གྱུད༌ཏེ༌ གྱལ༌ཁམས༌ ཚང༌མ༌ལ༌ ཅིན༌ལབས༌ ཐོབ༌ཨིན༌
GEN 26:5 ཅིའ༌ཟེར༌ན༌ ཨབ༌ར༌ཧམ༌མི༌ ངའེ༌ ཁའ༌ཉན༌ཏེ༌ ངའེ༌ བཀའ༌ཁྲིམས༌, བཀའ༌རྒྱ༌ དང༌ ལབ༌ཞ༌ གུན༌ནི༌ཀ༌ གྲུལས༌།”
GEN 26:6 ཏེན༌ན༌བོའེ༌ཕིའ༌ ཨི༌སཱག༌ གེ༌རར༌རི༌ ནང༌ང༌ དུགས༌།
GEN 26:7 ཏེ༌རུ༌ ཡོད༌ཁན༌ནི༌ མི༌གུན༌ནི༌ ཁོའ༌ ཁོ༌རང༌ངི༌ ན༌མའེ༌ སྐོར༌ལ༌ ཏྲིའ༌ཅིག༌, ཁོའེ༌ ཟེརས༌, “ཁོ༌ ངའེ༌ སྲིང༌མོ༌ ཨིན༌” ཅིའ༌ཟེར༌ན༌ ར༌བེ༌ཀ༌ མའ༌ ལྡེ༌མོ༌ ཡོད༌ པ༌སང༌ ཁོའེ༌ ན༌མ༌ ཨིན༌ ཟེར༌ན༌ ཁོང༌གུན༌ནི༌ ར༌བེ༌ཀའེ༌ ཕིའ༌ ཁོ༌ སད༌སྲིད༌ཅེས༌ ཨིན༌ནོག༌ སམས༌ཏེ༌ ཇིགས༌།
GEN 26:8 ཨི༌སཱག༌ ཏེ༌རུ༌ དུག༌ཏེ༌ ཏུས༌ མང༌པོའེ༌ སྟིང༌ནེ༌ ཕི༌ལིས༌ཏིའི༌ གྱལ༌པོ༌ ཨ༌བི༌མེ༌ལེག༌གི༌ ཁོ༌རང༌ངི༌ ཀར༌ཁུང༌ནེ༌ ལྟའ༌ཅིག༌ ཁོའ༌ ཨི༌སཱག༌གི༌ ར༌བེ༌ཀ༌ ཅེས༌པ༌ ཅོ༌ཨིན༌ ཐོང༌།
GEN 26:9 ཨ༌བི༌མེ༌ལེག༌གི༌ ཨི༌སཱག༌ བོད༌ཏེ༌ ཁྱོང༌ཅུགས༌ ཡང༌ ཟེརས༌, “ར༌བེ༌ཀ༌ ཁྱོ༌རང༌ངི༌ ན༌མ༌ ཨིན༌ཀྱག༌ ཏེ༌ནེ༌ ཁོ༌ ཁྱོ༌རང༌ངི༌ སྲིང༌མོ༌ ཨིན༌ ཅིའ༌ ཟེར༌པིན༌?” ཁོའེ༌ ལན༌ཏངས༌, “ར༌བེ༌ཀའེ༌ ཕིའ༌ ཁྱོ༌ཞའེ༌ ང༌ སད༌སྲིད༌ཅེས༌ ཨིན༌ནོག༌ སམ༌།”
GEN 26:10 ཨ༌བི༌མེ༌ལེག༌གི༌ ཟེརས༌, “ཁྱོ༌རང༌ངི༌ ང༌ཞའ༌ ཅི༌ ཅོས༌ཏེ༌ ཨིན༌? ང༌ཞའ༌ ཅིག༌གི༌ ཁྱོ༌རང༌ངི༌ ན༌མ༌ ཉམ༌པོ༌ ལུས༌བྲེལ༌ བོར༌ སྲིད༌ཅེས༌ ཨིན༌ནོག༌ ཡང༌ ཁྱོ༌རང༌ངི༌ ང༌ཞའ༌ གལ༌ཅན༌ གྱུར༌ཅུགས༌ཏེ༌ ཡོད༌གྲོ༌།”
GEN 26:11 ཏེ༌ནེ༌ ཨ༌བི༌མེ༌ལེག༌གི༌ མི༌ཚང༌མ༌ལ༌ སྤང༌པུད༌ཏེ༌ ཟེརས༌, “འི༌ མི༌ དང༌ ཁོའེ༌ ན༌མའ༌ ངན༌པ༌ ཅོ༌ཁན༌གུན༌ སད༌ཨིན༌།”
GEN 26:12 ཏེ༌རུ༌ ཨི༌སཱག༌གི༌ སྟོན༌ཐོག༌ ཏབས༌ ཡང༌ ཏེན༌ན༌ ལོའེ༌ ནང༌ང༌ ཁོའེ༌ སྟོན༌ཐོག༌ ཏབ༌ཁན༌ནི༌ གྱ༌ལྡབ༌པོ༌ རྔས༌, ཅིའ༌ཟེར༌ན༌ ཡ༌ཝའེ༌ ཁོའ༌ ཅིན༌ལབས༌ སལས༌།
GEN 26:13 ཁོའེ༌ གྱུ༌ནོར༌གུན༌ གྱས༌ཨིན༌ སོང༌ཏེ༌ ཁོ༌ མའ༌ མི༌ ཆུག༌པོ༌ཞིག༌ གྱུར༌།
GEN 26:14 ཁོའ༌ ལུག༌ དང༌ བ༌ལང༌ངི༌ ཁྱུ༌ མང༌པོ༌ ཡང༌ ཡོག༌པོ༌ མང༌པོ༌ ཡོད༌ པ༌སང༌ ཕི༌ལིས༌ཏི༌པ༌གུན༌ ཁོའེ༌ཀ༌ ཚིག༌གད༌པིན༌།
GEN 26:15 ཏེན༌ན༌བོའེ༌ཕིའ༌ ཁོང༌གུན༌ནི༌ ཆུ༌དོང༌ ཚང༌མ༌ སྐངས༌ ཀ༌བོ༌ ཁོའེ༌ ཨ༌བ༌ ཨབ༌ར༌ཧམ༌མི༌ ཏུས༌ལ༌ ཁོའེ༌ ཡོག༌པོ༌གུན༌ནི༌ བྲུས༌ཏེ༌ ཨིན༌པིན༌།
GEN 26:16 ཏེ༌ནེ༌ ཨ༌བི༌མེ༌ལེག༌གི༌ ཨི༌སཱག༌ག༌ ཟེརས༌, “ང༌ཞའེ༌ ཡུལ༌ནེ༌ བིང༌ཏེ༌ སོང༌ ཅིའ༌ཟེར༌ན༌ ཁྱོ༌རང༌ ང༌ཞ༌གུན༌ནི༌ སང༌ མང༌ང༌ ཤེད༌ཆེའ༌ གྱུར༌ཏེ༌ ཨིན༌ནོག༌།”
GEN 26:17 ཏེ༌ནེ༌ ཨི༌སཱག༌ ཏེ༌ ནས༌ས༌ནེ༌ བིང༌ཏེ༌ སོང༌ ཡང༌ གེ༌རར༌རི༌ ལུང༌པའེ༌ ནང༌ང༌ ཁོང༌གུན༌ ཀུར༌ ཙུགས༌ཏེ༌ དུགས༌།
GEN 26:18 ཁོའེ༌ ཁོ༌རང༌ངི༌ ཨ༌བ༌ ཨབ༌ར༌ཧམ༌མི༌ ཏུས༌ལ༌ བྲུས༌ཁན༌ནི༌ ཆུ༌དོང༌གུན༌ ཡང༌སྐྱར༌ བྲུས༌ ཀ༌བོ༌ ཨབ༌ར༌ཧམ༌ ཀྲོངས༌ཏེ༌ སྟིང༌ནེ༌ ཕི༌ལིས༌ཏི༌པ༌གུན༌ནི༌ སྐངས༌ཏེ༌ ཨིན༌པིན༌། ཨི༌སཱག༌གི༌ ཆུ༌དོང༌གུན༌ལ༌ ཁོའེ༌ ཨ༌བའེ༌ ཏགས༌ཁན༌ནི༌ ཏེན༌ན༌ མིང༌གུན༌ ཏགས༌།
GEN 26:19 ཨི༌སཱག༌གི༌ ཡོག༌པོ༌གུན༌ནི༌ ལུང༌པའེ༌ ནང༌ང༌ ཆུ༌དོང༌ སོ༌མ༌ བྲུས༌པ༌ ཆུ༌ ལག༌མོ༌ བིང༌།
GEN 26:20 གེ༌རར༌པའེ༌ ལུག༌རྫི༌གུན༌ནི༌ ཨི༌སཱག༌གི༌ ལུག༌རྫི༌གུན༌ལ༌ ཛིང༌མོ༌ ཏངས༌ཏེ༌ ཟེརས༌, “འི༌ ཆུ༌བོ༌ ང༌ཞའེ༌ ཨིན༌།” ཏེ༌བོའེ༌ཕིའ༌ ཨི༌སཱག༌གི༌ ཏེ༌ ཆུ༌དོང༌བོའ༌, ཨི༌སཱག༌ ཡང༌ན༌ ཛིང༌མོ༌ ཟེར༌ཏེ༌ མིང༌ ཏགས༌།
GEN 26:21 ཨི༌སཱག༌གི༌ ཡོག༌པོ༌གུན༌ནི༌ ཡང༌ ཆུ༌དོང༌ཞིག༌ བྲུས༌ ཡང༌ ཏེ༌བོའེ༌ ཕིའང༌ ཛིང༌མོ༌ སོང༌པ༌ ཁོའེ༌ ཏེ༌བོའ༌ “སིཏ༌ནཧ༌ ཡང༌ན༌ གྱབ༌གལ༌” ཟེར༌ཏེ༌ མིང༌ ཏགས༌།
GEN 26:22 ཁོ༌ ཏེ༌ཀ༌ནེ༌ ཐག༌རིང༌ང༌ སོང༌ཏེ༌ ཡང༌ ཆུ༌དོང༌ཞིག༌ བྲུས༌། ཏེ༌བོའེ༌ ཕིའ༌ ཅའང༌ ཟེར༌ལེན༌ མ༌སོང༌ པ༌སང༌ ཁོའེ༌ ཏེ༌བོའ༌ རེ༌ཧོ༌བོཐ༌ ཟེར༌ཏེ༌ མིང༌ ཏགས༌ ཡང༌ ཁོའེ༌ ཟེརས༌, “ཏ༌ ཡ༌ཝའེ༌ ང༌དང༌གུན༌ལ༌ དུག༌ཅེས༌སི༌ ཕིའ༌ ས༌ཀྱད༌ ཕལ༌ཅན༌ སལ༌ཏེ༌ ཨིན༌ནོག༌ ཡང༌ ང༌དང༌གུན༌ འི༌ ནས༌སའེ༌ ནང༌ང༌ གྱས༌ཨིན༌།”
GEN 26:23 ཏེ༌ཀ༌ནེ༌ བིང༌ཏེ༌ ཨི༌སཱག༌ བེར༌ཤེ༌བ༌ ཟེར༌ཁན༌ནི༌ ནས༌སའ༌ སོང༌།
GEN 26:24 ཏེ༌ ཚན༌བོའ༌ ཁོའ༌ ཡ༌ཝའ༌ ཇལ༌ཏེ༌ མོལས༌, “ང༌ ནི༌ ཁྱོ༌རང༌ངི༌ ཨ༌བ༌ ཨབ༌ར༌ཧམ༌མི༌ དཀོན༌མཆོག༌ ཨིན༌; ཇིགས༌ མ༌ཇིགས༌; ང༌ ཁྱོ༌རང༌ ཉམ༌པོ༌ ཡོད༌། ངའེ༌ ཁྱོ༌རང༌ང༌ ཅིན༌ལབས༌ ཏངས༌ཏེ༌ ངའེ༌ ཡོག༌པོ༌ ཨབ༌ར༌ཧམ༌མི༌ ཏོན༌ལ༌ ཁྱོ༌རང༌ངི༌ པུར༌གྱུད༌ མང༌པོ༌ གྱས༌ཅུག༌ཨིན༌།”
GEN 26:25 ཏེ༌རུ༌ ཨི༌སཱག༌གི༌ ཆོད༌ཁྲི༌ རྩིགས༌ཏེ༌ ཡ༌ཝའ༌ ཅོལས༌། ཏེ༌རུ༌ ཁོའེ༌ ཁོ༌རང༌ངི༌ ཀུར༌བོ༌ ཙུགས༌ ཡང༌ ཁོའེ༌ ཡོག༌པོ༌གུན༌ནི༌ ཆུ༌དོང༌ བྲུས༌།
GEN 26:26 ཨ༌བི༌མེ༌ལེག༌ གེ༌རར༌ནེ༌ ཁོ༌རང༌ངི༌ ལབ༌སྟོན༌པ༌ ཨ༌ཧུ༌ཟཐ༌ དང༌ ཁོའེ༌ མག༌མིའི༌ སྤོན༌བོ༌ ཕི༌ཀོལ༌ ཁྲིད༌ཏེ༌ ཨི༌སཱག༌ ཡོད༌ས༌ སོང༌།
GEN 26:27 ཨི༌སཱག༌གི༌ ཁོང༌གུན༌ལ༌ ཏྲིས༌, “ཅི༌ཕིའ༌ ཁྱོ༌ཞ༌གུན༌ ང༌ ཡོད༌ས༌ ཡོངས༌པིན༌? ཁྱོ༌རང༌གུན༌ནི༌ ང༌ ནཕ༌རད༌ ཅོས༌ཏེ༌ ཁྱོ༌ཞའེ༌ ཡུལ༌ནེ༌ ཕིངས༌ཏེ༌ ཏངས༌།”
GEN 26:28 ཁོང༌གུན༌ནི༌ ལན༌ཏངས༌, “ང༌ཞའ༌ གྱུས༌སོང༌ ཡ༌ཝའ༌ ཁྱོ༌རང༌ ཉམ༌པོ༌ ཡོད༌ཏེ༌ ཨིན༌ནོག༌ ཏེ༌བོའེ༌ཕིའ༌ ང༌དང༌གུན༌ནི༌ པར༌ལ༌ ཆད༌དོན༌ ཡོང༌གོས༌། ཇུ༌ཇུ༌ ང༌ཞའ༌ ཉམ༌པོ༌ ཆད༌དོན༌ཞིག༌ ཅོས༌།
GEN 26:29 ཁྱོ༌རང༌ངི༌ ང༌ཞའ༌ ནོད༌སྐྱལ༌ ཏང༌ མ༌གོས༌, ཀ༌ཟུག༌ ང༌ཞའེ༌ ཁྱོ༌རང༌ང༌ གྱལ༌ལ༌ ཅོས༌ཏེ༌ ནོད༌ མ༌སྐྱལ༌ལ༌ ཁྱོ༌རང༌ ཞི༌དེ༌ ཉམ༌པོ༌ ཆ༌ཅུགས༌པིན༌། ཏ༌ ཡ༌ཝའེ༌ ཁྱོ༌རང༌ང༌ ཅིན༌ལབས༌ སལ༌ཏེ༌ ཨིན༌ནོག༌།”
GEN 26:30 ཏེ༌ནེ༌ ཨི༌སཱག༌གི༌ ཁོང༌གུན༌ནི༌ ཕིའ༌ དོན༌ཏང༌ གྲལ༌གྲིག༌ ཅོས༌ ཡང༌ ཁོང༌གུན༌ ཟོས༌ཏེ༌ ཐུངས༌ཏེ༌ ཐད༌པོ༌ ཅོས༌།
GEN 26:31 ཐོ༌རེ༌ཟུག༌པོ༌ ང༌མོ༌ནེ༌ ཁོང༌གུན༌ནི༌ ཅིག༌ དང༌ ཅིག༌ག༌ ནོད༌སྐྱལ༌ མི༌ཏང༌ཅེས༌སི༌ ནའ༌ ཁུརས༌། ཏེ༌ནེ༌ ཨི༌སཱག༌གི༌ ཁོང༌གུན༌ ཞི༌དེ༌ ཉམ༌པོ༌ ལོགས༌ཏེ༌ ལམ༌ཅུགས༌།
GEN 26:32 ཏེན༌ན༌ ཞག༌ག༌ ཨི༌སཱག༌གི༌ ཡོག༌པོ༌གུན༌ ཡོངས༌ཏེ༌ ཁོའ༌ ཤདས༌, “ང༌ཞའ༌ ཆུ༌དོང༌ བྲུས༌ཏེ༌ ཆུ༌ ཐོབས༌།”
GEN 26:33 ཁོའེ༌ ཏེ༌ ཆུ༌དོང༌བོའ༌ ཤི༌བཧ༌ ཡང༌ན༌ དམ༌ཆའ༌ ཟེར༌ཏེ༌ མིང༌ ཏགས༌ ཡང༌ ཏེན༌ན༌ ནས༌ས༌བོའ༌ དག༌སའང༌ བེར༌ཤེ༌བ༌ གྲོང༌ཁྱེར༌ ཟེར༌ར༌ནོག༌།
GEN 26:34 ཨི༌སུའ༌ ལོ༌ ཞིབ༌ཅུ༌ ཆའ༌ཅིག༌ ཁོའེ༌ ཧེད༌པ༌ བེ༌རི༌ བུ༌མོ༌ ཡུ༌གྲིད༌ དང༌ ཨི༌ལོན༌ནི༌ བུ༌མོ༌ བེས༌མེད༌ གུན༌ ཉམ༌པོ༌ བག༌སྟོན༌ ཅོས༌།
GEN 26:35 ཨི༌སུའི༌ ན༌མ༌གུན༌ནི༌ ཨི༌སཱག༌ དང༌ ར༌བེ༌ཀའེ༌ མི༌ཚེ༌ ནང༌ང༌ རྡུག༌ངལ༌ ཁྱོངས༌།
GEN 27:1 ཨི༌སཱག༌ སྒས༌ ཡང༌ ཁོའེ༌ མིག༌ནེའང༌ ཐོང༌ང༌ མེད༌པིན༌, ཏེ༌ཏུས༌ལ༌ ཁོའེ༌ ཁོ༌རང༌ངི༌ བུ༌ཚ༌ ཆེན༌མོ༌ ཨི༌སུའ༌ བོད༌ཏེ༌ ཟེརས༌, “ངའེ༌ བུ༌ཚ༌།” ཁོའེ༌ ལན༌ཏངས༌, “ཧ༌ ཨ༌བ༌ལེ༌།”
GEN 27:2 ཨི༌སཱག༌གི༌ ཟེརས༌, “ལྟོས༌སའང༌ ང༌ སྒས༌ཏེ༌ ཨིན༌ནོག༌ ཡང༌ ནམ༌ ཤི༌ཨིན༌ གྱུས༌མེད༌།
GEN 27:3 ཏེ༌བོའེ༌ཕིའ༌ ཁྱོ༌རང༌ ཞུ༌ དང༌ དའ༌ ཁུར༌ཏེ༌ ལིངས༌ལ༌ སོང༌ ཡང༌ ངའེ༌ ཕིའ༌ སེམས༌ཅན༌ཞིག༌ སད༌ཏེ༌
GEN 27:4 ང༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལ༌ཏེ༌ ངའ༌ ཟའ༌ཅེས༌ལ༌ ཁྱོང༌། ཏེ༌བོ༌ ཟོས༌ཏེ༌ ངའེ༌ ང༌ ཤིའི༌ སང༌ སྔུན༌ལ༌ ཁྱོ༌རང༌ང༌ ཅིན༌ལབས༌ ཏང༌ཨིན༌།”
GEN 27:5 ཨི༌སཱག༌གི༌ ཨི༌སུའ༌ ཏེ༌གུན༌ ཟེར༌ ཟ༌ནེ༌, ར༌བེ༌ཀ༌ ཉན༌ཏེ༌ ཡོད༌པིན༌། ཏེ༌ནེ༌ ཨི༌སུ༌ ལིངས༌ལ༌ སེམས༌ཅན༌ སད༌ཏེ༌ ཁྱོང༌ང༌ ཆའ༌ཅིག༌,
GEN 27:6 ར༌བེ༌ཀའེ༌ ཁོ༌རང༌ངི༌ བུ༌ཚ༌ ཡ༌ཀོབ༌བ༌ ཟེརས༌, “ཉོ༌ནའང༌, ངའེ༌ ཁྱོ༌རང༌ངི༌ ཨ༌བའེ༌ ཨི༌སུ༌ ཟེར༌ཨིན༌ ཚོར༌,
GEN 27:7 ‘ངའེ༌ ཕིའ༌ སེམས༌ཅན༌ཞིག༌ སད༌ཏེ༌ ང༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལ༌ཏེ༌ ཁྱོང༌ ཏེ༌ནེ༌ ངའེ༌ ང༌ ཤིའི༌ སང༌ སྔུན༌ལ༌ ཡ༌ཝའེ༌ སྐུན༌དུན༌ལ༌ ཁྱོ༌རང༌ང༌ ཅིན༌ལབས༌ ཏང༌ཨིན༌།’
GEN 27:8 ཏ༌ ངའེ༌ བུ༌ཚ༌, ངའེ༌ ཁའ༌ཉན༌ཏེ༌ ངའེ༌ ཟེར༌ཁན༌བོ༌ ཅོས༌།
GEN 27:9 ངའ༌ ཁྱོ༌རང༌ངི༌ ཨ༌བ༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལ༌ཉན༌ཅེས༌ལ༌ ཁྱོ༌རང༌ ར༌མའེ༌ ཁྱུའི༌ ཕྲོའ༌ སོང༌ཏེ༌ རི༌གུ༌ ཆུ༌ངུན༌ གྱལ༌ལ༌ ཉིས༌ སད༌ཏེ༌ ཁྱོང༌།
GEN 27:10 ཏེ༌ནེ༌ ཨ༌བའེ༌ ཁྱོ༌རང༌ང༌ ཤི༌ སང༌ སྔུན༌ལ༌ ཅིན༌ལབས༌ ཏང༌ཅེས༌ལ༌ ཁྱོ༌རང༌ངི༌ ཏེ༌བོ༌ ཁོང༌ང༌ ཟའ༌ཅེས༌ལ༌ ཁྱེར༌།”
GEN 27:11 ཨིན༌ནའང༌ ཡ༌ཀོབ༌བི༌ ཁོ༌རང༌ངི༌ ཨ༌མ༌ ཟེརས༌, “ཨི༌སུའི༌ ཟུགས༌པོ༌ སྤུན༌ཇན༌ ཡང༌ ངའ༌ སྤུ༌ མེད༌ཁན༌བོ༌ ཉེ༌རང༌ང༌ གྱུས༌ཨིན༌ནོག༌།
GEN 27:12 ཨ༌བའེ༌ ངའ༌ ལག༌པ༌ རྩེ༌ན༌ ངའེ༌ ཁོང༌ང༌ གོབ༌སྐོར༌ ཏང༌ཁན༌བོ༌ ཧ༌གོ༌ཏེ༌ ངའེ༌ ང༌རང༌ངི༌ཀ༌ ཅིན༌ལབས༌སི༌ ཚབས༌ལ༌ ངན༌ ཁྱོང༌ཨིན༌།”
GEN 27:13 ཁོའེ༌ ཨ༌མའེ༌ ཟེརས༌, “ངའེ༌ བུ༌ཚ༌, ཁྱོ༌རང༌ང༌ ཏང༌ཁན༌ནི༌ ངན༌, ངའེ༌ཀ༌ བབས༌ཤིག༌། སོང༌ཏེ༌ ངའེ༌ ཟེར༌ཁན༌བོ༌ ཅོས༌།”
GEN 27:14 ཏེ༌ནེ༌ ཁོ༌ སོང༌ ཡང༌ རི༌གུ༌གུན༌ནི༌ ཤ༌ ཁྱོངས༌ཏེ༌ ཨ༌མའ༌ ཏངས༌ ཡང༌ ཨ༌མའེ༌ ཨ༌བ༌ ཐད༌ཁན༌ནི༌ ཞིམ༌པོ༌ ཁར༌ཇི༌ སྐོལས༌།
GEN 27:15 ཏེ༌ནེ༌ ར༌བེ༌ཀའེ༌ ཁང༌པའེ༌ ནང༌ང༌ ཡོད༌ཁན༌ནི༌ ཨི༌སུའི༌ ཀོས༌ གྱལ༌ཤོག༌པོ༌ ཁྱོངས༌ཏེ༌ ཡ༌ཀོབ༌བ༌ སྐོནས༌།
GEN 27:16 ཡང༌ ཁོའེ༌ ལག༌པ༌ དང༌ ཇིང༌བ༌ རི༌གུའི༌ པགས༌པ༌ ཀབས༌།
GEN 27:17 ཏེ༌ནེ༌ ཡ༌ཀོབ༌བི༌ ལག༌ག༌ ཁར༌ཇི༌ སྐོལ༌ཁན༌ ཞིམ༌པོ༌ དང༌ ཏ༌གི༌ ཏངས༌།
GEN 27:18 ཡ༌ཀོབ༌ ཁོ༌རང༌ངི༌ ཨ༌བ༌ ཡོད༌ས༌ སོང༌ཏེ༌ ཟེརས༌, “ཨ༌བ༌ལེ༌།” ཨ༌བའེ༌ ཟེརས༌, “ང༌ འི༌ཀ༌ནེ༌ ཡོད༌། ངའེ༌ བུ༌ཚ༌གུན༌ནི༌ ནང༌ནེ༌ ཀ༌བོ༌ ཨིན༌?”
GEN 27:19 ཡ༌ཀོབ༌བི༌ ལན༌ཏངས༌ “ང༌ ཉེ༌རང༌ངི༌ གོ༌སྐྱེས༌ བུ༌ཚ༌ ཨི༌སུ༌ ཨིན༌ལེ༌། ངའེ༌ ཉེ༌རང༌ངི༌ ཟེར༌ཁན༌ ནང༌ཞིན༌ ཅོས༌པིན༌། ཏ༌ ཞུགས༌ཏེ༌ ངའེ༌ སྐོལ༌ཁན༌ནི༌ ཤ༌ དོན༌ན༌ ཛད༌། ཏེ༌ནེ༌ ཉེ༌རང༌ངི༌ ངའ༌ ཅིན༌ལབས༌ སལ༌ ཉན༌ཨིན༌།”
GEN 27:20 ཨི༌སཱག༌གི༌ བུ༌ཚའ༌ ཏྲིས༌, “ངའེ༌ བུ༌ཚ༌, ཁྱོ༌རང༌ང༌ འི༌ཟུག༌ གྱོགས༌པ༌ ཏེ༌བོ༌ ཀ༌ཟུག༌གི༌ ཐོབ༌?” ཡ༌ཀོབ༌བི༌ ལན༌ཏངས༌, “ཡ༌ཝ༌ ཉེ༌རང༌ངི༌ དཀོན༌མཆོག༌གི༌ ཏེ༌བོ༌ ཐོབ༌ཅེས༌སི༌ ནང༌ང༌ ངའ༌ རོགས༌ ཛདས༌།”
GEN 27:21 ཨི༌སཱག༌གི༌ ཡ༌ཀོབ༌བ༌ ཟེརས༌, “ངའེ༌ བུ༌ཚ༌, ཁྱོ༌རང༌ དེན༌བའ༌ ཨི༌སུ༌ ཨིན༌ན༌ མན༌ ལག༌པ༌ རྩེས༌ཏེ༌ ཉུག༌ཅེས༌ལ༌ ངའེ༌ དུན༌ལ༌ ཡོང༌།”
GEN 27:22 ཡ༌ཀོབ༌ ཁོ༌རང༌ངི༌ ཨ༌བའེ༌ དུན༌ལ༌ སོང༌ ཡང༌ ཨི༌སཱག༌གི༌ ཉུགས༌ཏེ༌ ཟེརས༌, “ཁྱོ༌རང༌ངི༌ སྐད༌ ཡ༌ཀོབ༌ ཙོགས༌ ཨིན༌ནའང༌ ལག༌པ༌ ཨི༌སུའི༌ ཙོགས༌ རག༌།”
GEN 27:23 ཁོའེ༌ ལག༌པ༌ ཨི༌སུའི༌ ལག༌པ༌ ཙོགས༌ སྤུན༌ཇན༌ ཡོད༌ པ༌སང༌ ཨི༌སཱག༌ག༌ ཡ༌ཀོབ༌ ཨིན༌ཁན༌བོ༌ མ༌ཤེས༌ ཡང༌ ཁོའེ༌ ཁོའ༌ ཅིན༌ལབས༌ ཏང༌ཀི༌ ཡོད༌པིན༌།
GEN 27:24 ཨིན༌ནའང༌ ཡང༌སྐྱར༌ ཏྲིས༌, “ཁྱོ༌རང༌ དེན༌བའ༌ ཨི༌སུ༌ ཨིན༌ན༌?” ཁོའེ༌ ལན༌ཏངས༌, “ང༌ ཨིན༌ལེ༌།”
GEN 27:25 ཨི༌སཱག༌གི༌ ཟེརས༌, “སྐོལ༌ཁན༌ནི༌ ཤ༌ ངའེ༌ དུན༌ལ༌ ཁྱོང༌, ཏེ༌བོ༌ ཟོས༌ཏེ༌ ངའེ༌ ཁྱོ༌རང༌ང༌ ཅིན༌ལབས༌ ཏང༌ཨིན༌།” ཡ༌ཀོབ༌བི༌ ཁྱོངས༌པ༌ ཁོ༌ ཟོས༌ ཡང༌ རྒུན༌ཆང༌ ཁྱོང༌ཁན༌བོའང༌ ཐུངས༌།
GEN 27:26 ཏེ༌ནེ༌ ཨ༌བའེ༌ ཁོའ༌ ཟེརས༌, “བུ༌ཚ༌ དུན༌ལ༌ ཡོང༌ཏེ༌ ངའ༌ པུག༌ཏོང༌།”
GEN 27:27 ཁོ༌ ཡོངས༌ཏེ༌ ཁོའ༌ པུག༌ ཏང༌ང༌ཅིག༌ ཨི༌སཱག༌གི༌ ཁོའེ༌ ཀོས༌ལག༌ག༌ ནུམས༌ཏེ༌ ཏན༌ཏན༌ ཅོས༌, ཏེ༌ནེ༌ ཁོའེ༌ ཁོའ༌ ཅིན༌ལབས༌ ཏངས༌ཏེ༌ ཟེརས༌, “ངའེ༌ བུ༌ཚའེ༌ ཏྲི༌མ༌ ཞིང༌ངི༌ ཏྲི༌མ༌ ཙོགས༌ ཀ༌བོའ༌ ཡ༌ཝའེ༌ ཅིན༌ལབས༌ སལ༌ཏེ༌ ཨིན༌།
GEN 27:28 དཀོན༌མཆོག༌གི༌ ཁྱོ༌རང༌ང༌ ནམ༌ཁའེ༌ ཆུ༌ སལ༌ཏེ༌ ཁྱོ༌རང༌ངི༌ ཞིང༌ང༌ སྟོན༌ཐོག༌ གྱལ༌ལ༌ སྨིན༌ཤིག༌། ཁྱོ༌རང༌ང༌ གྲུ༌ དང༌ རྒུན༌ཆང༌ མ༌ མང༌པོ༌ སལ༌ཤིག༌།
GEN 27:29 གྱལ༌ཁམས༌གུན༌ནི༌ ཁྱོ༌རང༌ང༌ ཞབས༌ཏོག༌ ཞུ༌ཅུག༌ག༌ ཛད༌ཤིག༌ ཡང༌ མི༌གུན༌ནི༌ ཁྱོ༌རང༌ང༌ ཀུས༌པ༌ ཅོ༌ཅུག༌ག༌ ཛད༌ཤིག༌། ཁྱོ༌རང༌ ཁྱོ༌རང༌ངི༌ ཨ༌ཅོ༌ནོ༌གུན༌ནི༌ སྤོན༌བོ༌ གྱུར༌ཅུག༌ག༌ ཛད༌ཤིག༌། ཁྱོ༌རང༌ངི༌ ཨ༌མའེ༌ བུ༌ཚ༌གུན༌ལ༌ ཁྱོ༌རང༌ངི༌ དུན༌ལ༌ གོ༌ སྒུ༌ཅུག༌ག༌ ཛད༌ཤིག༌ ཁྱོ༌རང༌ང༌ ངན༌ ཏབ༌ཁན༌གུན༌ལ༌ ངན༌ ཕོག༌ཤིག༌། ཡང༌ ཁྱོ༌རང༌ང༌ ཅིན༌ལབས༌ ཏང༌ཁན༌གུན༌ལ༌ ཅིན༌ལབས༌ ཐོབ༌ཤིག༌།”
GEN 27:30 ཨི༌སཱག༌གི༌ ཅིན༌ལབས༌ ཏང༌ ཚར༌ཏེ༌ ཨ༌བ༌ ཡོད༌ས༌ནེ༌ ཡ༌ཀོབ༌ ཅབ༌ བིངས༌ཏེ༌ ཆའ༌ཅིག༌ ཁོའེ༌ ཨ༌ཅོ༌ ཨི༌སུ༌ ལིངས༌ནེ༌ ལོགས༌ཏེ༌ ལེབ༌།
GEN 27:31 ཁོའེང༌ ཞིམ༌པོ༌ ཁར༌ཇི༌ སྐོལས༌ཏེ༌ ཨ༌བ༌ ཁྱེརས༌, ཡང༌ ཟེརས༌, “ཨ༌བ༌ལེ༌ ཞངས༌ཏེ༌ ངའ༌ ཅིན༌ལབས༌ སལ༌ཅེས༌སི༌ ཕིའ༌ ངའེ༌ སྐོལ༌ཁན༌ནི༌ ཁར༌ཇི༌ དོན༌ནའང༌།”
GEN 27:32 ཨི༌སཱག༌གི༌ ཁོའ༌ ཏྲིས༌, “ཁྱོ༌རང༌ སུ༌ ཨིན༌?” ཁོའེ༌ ལན༌ཏངས༌, “ཉེ༌རང༌ངི༌ བུ༌ཚ༌ ཆེན༌མོ༌ ཨི༌སུ༌ ཨིན༌ལེ༌།”
GEN 27:33 ཨི༌སཱག༌ དར༌ཨིན༌ ཏྲིས༌, “ཏེ༌ནེ༌ སེམས༌ཅན༌ སད༌ཏེ༌ ངའ༌ ཁར༌ཇི༌ ཟའ༌ལ༌ ཁྱོང༌ཁན༌བོ༌ སུ༌ ཨིན༌? ཁྱོ༌རང༌ ཡོང༌ངི༌ སང༌ སྔུན༌ལ༌ ཏེ༌བོ༌ ཟོས༌ཏེ༌ ངའེ༌ ཁོའ༌ ང༌རང༌ངི༌ ཅིན༌ལབས༌པོ༌ ཏངས༌པིན༌, ཡང༌ ཏེ༌བོ༌ ཁོ༌ ཉམ༌པོ༌ ལུས༌གོས༌།”
GEN 27:34 ཏེ༌བོ༌ ཚོར༌ར༌ཅིག༌ ཨི༌སུའི༌ སྲན༌ཏྲེ༌ ཀུ༌ཅོ༌ ཏངས༌ཏེ༌ ཟེརས༌, “ཨ༌བ༌ལེ༌ ངའང༌ ཉེ༌རང༌ངི༌ ཅིན༌ལབས༌པོ༌ སལ༌ལའང༌།”
GEN 27:35 ཨི༌སཱག༌གི༌ ལན༌ཏངས༌, “ཁྱོ༌རང༌ངི༌ ནོ༌ ཡོངས༌ ཡང༌ ངའ༌ གོབ༌སྐོར༌ཏེ༌ ཁྱོ༌རང༌ངི༌ ཅིན༌ལབས༌པོ༌ ཁྱེརས༌།”
GEN 27:36 ཨི༌སུ༌ ཟེརས༌, “ཁོའེ༌ མིང༌ང༌ ཡ༌ཀོབ༌ ཤེས༌ཏེ༌ ཏགས༌ཏེ༌ ཨིན༌ནོག༌ ཅིའ༌ཟེར༌ན༌ ཁོའེ༌ ལན༌ ཉིས༌ ངའ༌ གོབ༌སྐོརས༌། གོ༌མ༌ ངའེ༌ གོས༌ སྐྱེས༌སི༌ ཐོབ༌ཏང༌ ཡང༌ དག༌ས༌ ཉེ༌རང༌ངི༌ ངའ༌ སལ༌ཅེས༌ཅན༌ནི༌ ཅིན༌ལབས༌པོ༌, ཅི༌ ཉེ༌རང༌ངི༌ ངའེ༌ ཕིའ༌ ཅིན༌ལབས༌ ཉུ༌ངུན༌ཞིག༌གའང༌ སྲིས༌ཏེ༌ མ༌བོར༌པིན༌ན༌?”
GEN 27:37 ཨི༌སཱག༌གི༌ ལན༌ཏངས༌, “ངའེ༌ ཁོ༌ ཁྱོ༌རང༌ངི༌ཀ༌ སྤོན༌བོ༌ ཅོ༌ཚར༌ ཡང༌ ཁོའེ༌ ཉེན༌གྲུང༌ ཚང༌མ༌ ཁོའ༌ ཞབས༌ཏོག༌ ཅོ༌ཅེས༌ལ༌ ཏངས༌པིན༌། ངའེ༌ ཁོའ༌ གྲུ༌ དང༌ རྒུན༌ཆང༌ མང༌པོའེ༌ ཅིན༌ལབས༌ ཏང༌ཚར༌། ཏ༌ ཁྱོ༌རང༌ང༌ ཏང༌ཅེས༌ ངའ༌ ཅའང༌ ལུས༌ཏེ༌ མེད༌, བུ༌ཚ༌།”
GEN 27:38 ཨི༌སུའི༌ ཁོ༌རང༌ངི༌ ཨ༌བ༌ ཟེརས༌, “ཉེ༌རང༌ང༌ ཅིན༌ལབས༌ ཅིག༌ཅིག༌ མ༌ནེ༌ མེད༌ད༌? ངའང༌ ཅིན༌ལབས༌ སལ༌ལའང༌ ཨ༌བ༌ལེ༌།” ཏེ༌ནེ༌ ཨི༌སུ༌ སྲན༌ཏྲེ༌ ངུས༌།
GEN 27:39 ཏེ༌ནེ༌ ཁོའེ༌ ཨ༌བ༌ ཨི༌སཱག༌གི༌ ཟེརས༌, “ཁྱོ༌རང༌ ཚུག༌སའེ༌ ནས༌སའེ༌ ས༌ ཞིང༌ བད༌ཅེས༌ལ༌ སྟོབས༌ཅན༌ གྱལ༌ལ༌ མི༌ཡོང༌ ཡང༌ ནམ༌ཁའ༌ནེ༌ ཆུ༌ མི༌བབས༌།
GEN 27:40 ཁྱོ༌རང༌ངི༌ ར༌འི༌ ཀོལ༌ཏེ༌ མི༌ཚེ༌ ཕུད༌ཨིན༌, ཡང༌ ཁྱོ༌རང༌ངི༌ ཁྱོ༌རང༌ངི༌ ནོའེ༌ ཞབས༌ཏོག༌ ཞུ༌ཨིན༌། ཨིན༌ནའང༌ ཁྱོ༌རང༌ངི༌ ཁོའེ༌ གྱབ༌གལ༌ ཅོ༌ཅེས༌ ཐག༌ཅད༌ད༌ཅིག༌, ཁྱོ༌རང༌ ཁོའེ༌ ཝང༌ངི༌ ཡོག༌ག༌ མ༌དུག༌ག༌ རང༌ཝང༌ ལེན༌ཨིན༌།”
GEN 27:41 ཨ༌བའེ༌ ཡ༌ཀོབ༌བ༌ ཅིན༌ལབས༌ ཏང༌ཅེས༌པོའེ༌ ཨི༌སུའི༌ ཡ༌ཀོབ༌བ༌ ནཕ༌རད༌ ཅོའད༌པིན༌། ཁོའེ༌ ཁོ༌རང༌ང༌ ཟེརས༌, “ཨ༌བ༌ ཤིའ༌ཅིག༌, ཉ༌ངན༌ ཅོས༌ཏེ༌ སྟིང༌ནེ༌, ངའེ༌ ཡ༌ཀོབ༌ སད༌ཨིན༌།”
GEN 27:42 ཨིན༌ནའང༌ ར༌བེ༌ཀ༌ ཨི༌སུའི༌ ཟེར༌ཁན༌བོ༌ ཚོར༌པ༌ ཁོའེ༌ ཡ༌ཀོབ༌བ༌ བོད༌ཏེ༌ ཟེརས༌, “ཉོན༌ ཁྱོ༌རང༌ངི༌ ཨ༌ཅོ༌ ཨི༌སུའི༌ ཁྱོ༌རང༌ སད༌ཅེས༌སི༌ ཐབས༌ལྡིང༌ དུག༌།
GEN 27:43 ཏ༌ བུ༌ཚ༌, ངའེ༌ ཅོས༌ ཟེར༌ཅེས༌པོ༌ ཅོས༌, དག༌ས༌རང༌ ཧ༌རན༌ནི༌ ནང༌ང༌ ངའེ༌ མིང༌བོ༌ ལ༌བན༌ ཡོད༌ས༌ ཤོར༌ཏེ༌ སོང༌།
GEN 27:44 ཡང༌ ཁྱོ༌རང༌ངི༌ ཨ༌ཅོའེ༌ སྲོ༌ ཞུ༌ཞུ༌ ཚག༌པ༌ ཁོ༌ ཉམ༌པོ༌ དུག༌།
GEN 27:45 ཁྱོ༌རང༌ངི༌ ཅོས༌ཁན༌གུན༌ རྗེད༌ཏེ༌ ཁོའེ༌ སྲོ༌ མེད༌ཁན༌ ཆའ༌ཅིག༌, ངའེ༌ ཁྱོ༌རང༌ང༌ ལོགས༌ཏེ༌ ཡོང༌ཅེས༌ལ༌ ལོན༌ ཀལ༌ཨིན༌། ཨི༌སུའི༌ ཁྱོ༌རང༌ སད༌ན༌ ཞན༌གུན༌ནི༌ ཁོ༌ སད༌ད༌ནོག༌། ཞག༌ ཅིག༌གི༌ ནང༌ང༌ ངའེ༌ བུ༌ཚ༌ ཉིས༌ཀ༌ ཅིའ༌ ཤི༌གོས༌?”
GEN 27:46 ར༌བེ༌ཀའེ༌ ཨི༌སཱག༌ག༌ ཟེརས༌, “ངའ༌ ཨི༌སུའི༌ ཧེད༌པ༌ ན༌མ༌གུན༌ ཉམ༌པོ༌ ངལ༌ཏེ༌ རག༌, ཡ༌ཀོབ༌བིའང༌ ཧེད༌པ༌ བུ༌མོ༌ ཉམ༌པོ༌ ན༌མ༌ ཅོ༌ན༌ ངའ༌ སོན༌ཏེའ༌ ལུས༌ཏེ༌ ཅི༌ ཕན༌།”
GEN 28:1 ཏེ༌ནེ༌ ཨི༌སཱག༌གི༌ ཡ༌ཀབ༌བ༌ བོད༌ཏེ༌ ཅིན༌ལབས༌ ཏངས༌ ཡང༌ ཁོའ༌ བཀའ༌ ཏངས༌ཏེ༌ ཟེརས༌, “ཀེ༌ནན༌མ༌ བུ༌མོ༌ ཉམ༌པོ༌ བག༌སྟོན༌ མ༌ཅོ༌།
GEN 28:2 དག༌ས༌རང༌ ཁྱོ༌རང༌ངི༌ མེ༌མེ༌ བེ༌ཐུལ༌ དུག༌སའེ༌ ཡུལ༌ པ༌དན༌ཨ༌རམ༌མ༌ སོང༌ཏེ༌ ཁྱོ༌རང༌ངི༌ ཨ༌ཞང༌ ལ༌བན༌ནི༌ བུ༌མོ༌ ཞིག༌ ཉམ༌པོ༌ བག༌སྟོན༌ ཅོས༌།
GEN 28:3 དཀོན༌མཆོག༌ ཀུན༌ཝང༌ངི༌ ཅིན༌ལབས༌ སལ༌ཏེ༌ ཁྱོ༌རང༌ང༌ ཕྲུ༌གུ༌ མང༌པོ༌ ཇོར༌ཤིག༌ ཡང༌ ཁྱོ༌རང༌ངི༌ མིར༌གྱུད༌ མང༌པོ༌ གྱུར༌ཤིག༌།
GEN 28:4 ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌ ཚང༌མ༌ལ༌ ཁོང༌ངི༌ ཨབ༌ར༌ཧམ༌མ༌ སལ༌ཁན༌ནི༌ ཅིན༌ལབས༌པོ༌ སལ༌ཤིག༌, ཡང༌ ཁྱོ༌རང༌ ཞན༌ཡུལ༌ལི༌ མི༌ ཚུལ༌ལ༌ དུག༌ཁན༌ནི༌ ས༌ཀྱད༌ ཀ༌བོ༌ དཀོན༌མཆོག༌གི༌ ཨབ༌ར༌ཧམ༌མ༌ སལ༌ལ༌ ཛདས༌ ཏེ༌བོ༌ ཁྱོ༌རང༌ངི༌ གྱུར༌ཤིག༌།”
GEN 28:5 ཏེ༌ནེ༌ ཨི༌སཱག༌གི༌ ཡ༌ཀོབ༌ ལམ༌ཅུགས༌ ཡང༌ ཁོ༌ པ༌དན༌ཨ༌རམ༌མ༌ སོང༌ཏེ༌ ཨ༌རམ༌པ༌ བེ༌ཐུལ༌ལི༌ བུ༌ཚ༌ ར༌བེ༌ཀའེ༌ མིང༌བོ༌ ལ༌བན༌ ཉམ༌པོ༌ དུགས༌, ར༌བེ༌ཀ༌ ནི༌ ཨི༌སུ༌ དང༌ ཡ༌ཀོབ༌བི༌ ཨ༌མ༌ ཨིན༌པིན༌།
GEN 28:6 ཨི༌སཱག༌གི༌ ཡ༌ཀོབ༌བ༌ ཅིན༌ལབས༌ ཏང༌ཏེ༌ པ༌དན༌ཨ༌རམ༌མ༌ ན༌མ༌ ཙལ༌ལ༌ ལམ༌ཅུག༌ཁན༌ ཡང༌ ཀེ༌ནན༌མ༌ བུ༌མོ༌ ཉམ༌པོ༌ ན༌མ༌ མི༌ཅོ༌ཅེས༌ལ༌ ཁོའ༌ བཀའ༌ ཏང༌ཁན༌བོ༌ ཡང༌
GEN 28:7 ཡ༌ཀོབ༌བི༌ ཁོ༌རང༌ངི༌ ཨ༌བ༌ དང༌ ཨ༌མའེ༌ ཁའ༌ ཉན༌ཏེ༌ པ༌དན༌ཨ༌རམ༌མ༌ ཆའ༌ཁན༌བོ༌ ཨི༌སུའ༌ གྱུས༌སོང༌།
GEN 28:8 ཏེ༌ནེ༌ ཨི༌སུའ༌ ཁོའེ༌ ཨ༌བའ༌ ཀེ༌ནན༌མ༌ བུ༌མོའ༌ མ༌ ཐད༌ཁན༌བོ༌ ཧ༌གོ༌།
GEN 28:9 ཁོའེ༌ སྔུན༌ནི༌ ན༌མ༌གུན༌ནི༌ཀ༌ ནན༌མ༌ ཨབ༌ར༌ཧམ༌མི༌ བུ༌ཚ༌ ཨིཤ༌མ༌ཨེལ༌ ཡོད༌ས༌ སོང༌ཏེ༌ ཁོའེ༌ བུ༌མོ༌ མ༌ཧ༌ལད༌ ཉམ༌པོ༌ བག༌སྟོན༌ ཅོས༌ ཁོ༌ ནི༌བེ༌འོད༌དི༌ ནོ༌མོ༌ ཨིན༌པིན༌།
GEN 28:10 ཡ༌ཀོབ༌ བེར༌ཤེ༌བའེ༌ གྲོང༌ཁྱེར༌ནེ༌ བིང༌ཏེ༌ ཧ༌རན༌ ཆོགས༌ལ༌ སོང༌།
GEN 28:11 ཁོ༌ ས༌ཆ༌ཞིག༌གི༌ཀ༌ ལེབ༌བ༌ཅིག༌ ཁོའེ༌ ཏེ༌རུ༌ ཚན༌བོ༌ དུག༌ཨིན༌ སམ༌ ཅིའ༌ཟེར༌ན༌ ཉི༌མ༌ སྐྱོད༌ཏེ༌ ཡོད༌པིན༌། ཏེ༌རུ༌ རྡོའ༌ཞིག༌ ཁོ༌རང༌ངི༌ གོའེ༌ ཡོག༌ག༌ བོར༌ཏེ༌ ཉིད༌ ཏངས༌།
GEN 28:12 ཁོའ༌ ཉི༌ལམ༌ཞིག༌ ཐོང༌ ཀ༌བོའེ༌ ནང༌ང༌ ཁོའ༌ ཇིག༌རྟེན༌ནི༌ ཀ༌ནེ༌ ནམ༌ཁའ༌ ཚོག༌པ༌ སྲེས༌ཀ༌ཞིག༌ རྐྱངས༌ཏེ༌ ཐོང༌ ཡང༌ ཏེ༌བོའེ༌ཀ༌ དཀོན༌མཆོག༌གི༌ ཕོ༌ཉ༌གུན༌ ཛགས༌བབས༌ ཏང༌ངད༌ པིན༌།
GEN 28:13 སྲེས༌ཀའེ༌ གོའེ༌ཀ༌ ཡ༌ཝ༌ ཞངས༌ཏེ༌ ཁོང༌ངི༌ མོལས༌, “ང༌ ནི༌ ཨབ༌ར༌ཧམ༌ དང༌ ཨི༌སཱག༌གི༌ དཀོན༌མཆོག༌ ཡ༌ཝ༌ ཨིན༌། ངའེ༌ ཁྱོ༌རང༌ ཉིད༌ལོགས༌ཏེ༌ ཡོད༌ཁན༌ནི༌ ས༌ཆ༌བོ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཏང༌ཨིན༌།
GEN 28:14 ཁོང༌གུན༌ ཇིག༌རྟེན༌ནི༌ཀ༌ ཡོད༌ཁན༌ནི༌ ཐལ༌བ༌ ཙོགས༌ལ༌ ཇིག༌རྟེན༌ནི༌ ཆོགས༌ ཚང༌མ༌ལ༌ ཁྱེད༌ཨིན༌ ཡང༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌ གུན༌ གྱུད༌ཏེ༌ མི༌ཚང༌མ༌ལ༌ ཅིན༌ལབས༌ ཐོབ༌ཨིན༌།
GEN 28:15 ངའ༌ ཁྱོ༌རང༌ ཉམ༌པོ༌ ཡོད༌, ཀ༌རུ༌ ཆ༌ནའང༌ ངའེ༌ ཁྱོ༌རང༌ སྐྱོབས༌ཏེ༌ བོར༌ཨིན༌ ཡང༌ ངའེ༌ ཁྱོ༌རང༌ འིན༌ན༌ ས༌ཆའེ༌ཀ༌ ལོགས༌ཏེ༌ ཁྱོང༌ཨིན༌, ནམ༌ཚོག༌པ༌ ངའེ༌ ཁ༌ཆད༌ ཅོ༌ཁན༌ ཚང༌མ༌ གྲུབ༌ མི༌གྲུབ༌ ངའེ༌ ཁྱོ༌རང༌གུན༌ ཕང༌མི༌ཕང༌།”
GEN 28:16 ཡ༌ཀོབ༌བ༌ ཉིད༌ཚད༌ ཡང༌ ཁོའེ༌ སམ༌, “ཡ༌ཝ༌ འི༌ ནས༌སའེ༌ ནང༌ང༌ ནས༌ཏེ༌ ཨིན༌ནོག༌ ཡང༌ ངའ༌ དག༌ས༌ མ༌ནེ༌ གྱུས༌ མ༌སོང༌།”
GEN 28:17 ཁོ༌ ཇིགས༌ ཡང༌ ཟེརས༌, “འི༌ ནས༌ས༌བོ༌ ཙམ༌ཤིག༌གི༌ ཇིགས༌པོ༌ མ༌ནོག༌། ཏན༌ཏན༌ལ༌ འི༌བོ༌ དཀོན༌མཆོག༌གི༌ ཞུགས༌ཁང༌ ཡང༌ ནམ༌ཁའེ༌ གྱས༌སྒོ༌ ཨིན༌ནོག༌།”
GEN 28:18 ཐོ༌རེ༌ཟུག༌པོ༌ ཡ༌ཀོབ༌ ང༌མོ༌ནེ༌ ལངས༌ཏེ༌ གོ༌ བོར༌ཁན༌ནི༌ རྡོའ༌བོ༌ ཁུརས༌ ཡང༌ ཏེ༌བོ༌ ཀ༌ཝ༌ ཙོགས༌ལ༌ ལངས༌ཏེ༌ ཏེ༌བོའེ༌ཀ༌ ཨོ༌ལིཝ༌ཝི༌ མར༌ནག༌ ལུགས༌།
GEN 28:19 ཏེ༌ནེ༌ ཁོའེ༌ ཏེ༌ ནས༌ས༌བོའ༌ བེ༌ཐེལ༌ མིང༌ང༌ ཏགས༌ སྔུན༌ལ༌ ཏེ༌ གྱལ༌ས༌བོའ༌ ལུཟ༌ ཟེར༌རད༌པིན༌།
GEN 28:20 ཏེ༌ནེ༌ ཡ༌ཀོབ༌བི༌ ནའ༌ ཁུརས༌, “ཀལ༌ཏེས༌ དཀོན༌མཆོག༌ ང༌ ཉམ༌པོ༌ ཞུགས༌ཏེ༌ འི༌ བེས༌སི༌ ནང༌ང༌ ང༌ སྐྱོབ༌ཏེ༌ ངའ༌ ཁར༌ཇི༌ དང༌ ཀོས༌ལག༌ སལ༌ན༌,
GEN 28:21 ཡང༌ ང༌ ང༌རང༌ངི༌ ཨ༌བའེ༌ ཁང༌པ༌ ལོགས༌ཏེ༌ ཁམ༌ཟང༌ ལེབ༌ན༌ ཏེ༌ནེ༌ ངའེ༌ དཀོན༌མཆོག༌ ཡ༌ཝ༌ ཉེ༌རང༌ ཨིན༌།
GEN 28:22 ངའེ༌ འི༌ རྡོའ༌ ལངས༌ཁན༌ནི༌ ནས༌ས༌བོ༌ ཉེ༌རང༌ངི༌ ཞུགས༌ཁང༌ གྱུར༌ཨིན༌ ཡང༌ ཉེ༌རང༌ངི༌ སལ༌ཁན༌ ཚང༌མའེ༌ ནང༌ནེ༌ ངའེ༌ ཉེ༌རང༌ང༌ རྕུ༌ཁག༌པོ༌ ཕུལ༌ཨིན༌།”
GEN 29:1 ཡང༌སྐྱར༌ ཡ༌ཀོབ༌བི༌ ཁོ༌རང༌ངི༌ བེས༌པོ༌ གོ༌ཟུགས༌ ཡང༌ ཁོ༌ ཀེ༌ནན༌ནི༌ ཤར༌ ཆོགས༌ལ༌ ཡོད༌ཁན༌ནི༌ ས༌ཆའ༌ ལེབ༌།
GEN 29:2 ཁོའ༌ འ༌ཟམ༌ཤིག༌ནེ༌ ཆུ༌དོང༌ཞིག༌ ཐོང༌ ཀ༌བོའེ༌ དུན༌ལ༌ ལུག༌གི༌ ཁྱུ༌ སུམ༌ དུག༌པིན༌, ཅིའ༌ཟེར༌ན༌ ལུག༌གི༌ ཁྱུ༌གུན༌ལ༌ ཏེ༌ ཆུ༌དོང༌ནེ༌ ཆུ༌ ཏང༌ངད༌པིན༌། ཆུ༌དོང༌ངི༌ ཁའ༌བོའ༌ རྡོའ༌ ཆེན༌མོ༌ཞིག༌ ཀབས༌ཏེ༌ ཡོད༌པིན༌།
GEN 29:3 ལུག༌ཁྱུ༌ ཚང༌མ༌ ཏེ༌ཀ༌ ཛོམ༌མ༌ཅིག༌ ལུག༌རྫི༌གུན༌ནི༌ ཏེ༌ རྡོའ༌བོ༌ རིལ༌ཏེ༌ ལུག༌གུན༌ལ༌ ཆུ༌ ཏང༌ངད༌པིན༌། ཆུ༌ ཏང༌ ཚར༌ར༌ཅིག༌ རྡོའ༌བོ༌ ལོགས༌ཏེ༌ ཁའེ༌ཀ༌ ཀབ༌བད༌པིན༌།
GEN 29:4 ཡ༌ཀོབ༌བི༌ ཏེ༌ཀ༌ ཡོད༌ཁན༌ནི༌ ལུག༌རྫི༌གུན༌ལ༌ ཏྲིས༌, “ཛ༌འོ༌ ཁྱོ༌ཞ༌གུན༌ ཀ༌ནེ༌ ཨིན༌?” ཁོང༌གུན༌ནི༌ ལན༌ཏངས༌, “ང༌ཞའ༌ ཧ༌རན༌ནེ༌ ཨིན༌།”
GEN 29:5 ཁོའེ༌ ཏྲིས༌, “ཁྱོ༌ཞའེ༌ ན༌ཧོར༌རི༌ ཚ༌འོ༌ ལ༌བན༌ ཤེས༌ས༌ད༌?” ཁོང༌གུན༌ནི༌ ལན༌ཏངས༌, “ང༌ཞའེ༌ ཁོ༌ ཤེས༌སད༌།”
GEN 29:6 ཁོའེ༌ ཏྲིས༌, “ཁོང༌ ཁམ༌ཟང༌ དུག༌ག༌?” ཁོང༌གུན༌ནི༌ ལན༌ཏངས༌, “ཁོ༌ ཁམ༌ཟང༌ དུག༌, ལྟོས༌སའང༌ འ༌ནེ༌ ཁོའེ༌ བུ༌མོ༌ རེ༌ཅལ༌ ལུག༌ཁྱུ༌ ཉམ༌པོ༌ ཡོང༌ང༌ལ༌།”
GEN 29:7 ཡ༌ཀོབ༌བི༌ ཟེརས༌, “ཟིགས༌སའང༌, ཏ༌རུང༌ ཉི༌མའེ༌ སྐྱིལ༌དུག༌, ལུག༌ ཁྱུ༌ ཚང༌མ༌ ཅིའ༌ ཛོམ༌ ཅུག༌གད༌? ཁྱོ༌ཞའེ༌ ལུག༌གུན༌ལ༌ ཆུ༌ ཏངས༌ཏེ༌ རྩ༌ཟའ༌ལ༌ ལོགས༌ཏེ༌ ཁྱེར༌ར༌ མེད༌ད༌?”
GEN 29:8 ཁོང༌གུན༌ནི༌ ཟེརས༌, “ལུག༌ཁྱུ༌ ཚང༌མ༌ ཛོམ༌ཏེ༌ མ༌ནེ༌ ང༌ཞའེ༌ རྡོའ༌བོ༌ རིལ༌ཏེ༌ ལུག༌གུན༌ལ༌ ཆུ༌ ཏང༌ མི༌ཉན༌།”
GEN 29:9 ཁོང༌གུན༌ ཉམ༌པོ༌ ཡ༌ཀོབ༌ སྤེ༌ར༌ ཏང༌ཨིན༌ ཡོད༌ ཟ༌ནེ༌ རེ༌ཅལ༌ལི༌ ཚོ༌ཨིན༌ ཡོད༌ཁན༌ ཁོའེ༌ ཨ༌བའེ༌ ལུག༌ཁྱུ༌ ཉམ༌པོ༌ ཏེ༌ཀ༌ ལེབ༌།
GEN 29:10 ཡ༌ཀོབ༌བི༌ རེ༌ཅལ༌ ཁོའེ༌ ཨ༌ཞང༌ ལ༌བན༌ནི༌ ལུག༌ཁྱུ༌ ཉམ༌པོ༌ ཐོང༌ང༌ཅིག༌, ཁོ༌ ཆུ༌དོང༌ ཡོད༌ས༌ སོང༌ཏེ༌ རྡོའ༌བོ༌ རིལས༌ ཡང༌ ལུག༌གུན༌ལ༌ ཆུ༌ ཏངས༌།
GEN 29:11 ཏེ༌ནེ༌ ཁོའེ༌ རེ༌ཅལ༌ལ༌ པུག༌ ཏངས༌ ཡང༌ སྲན༌ཏྲེ༌ ངུས༌ ཅིའ༌ཟེར༌ན༌ ཁོ༌ མང༌པོ༌ ཐད༌།
GEN 29:12 ཁོའེ༌ རེ༌ཅལ༌ལ༌ ཁོ༌ ཁོའེ༌ ཉེན༌, ཁོའེ༌ ཨ༌བའེ༌ སྲིང༌མོ༌ ར༌བེ༌ཀའེ༌ བུ༌ཚ༌ ཨིན༌ ཟེརས༌། རེ༌ཅལ༌ བང༌ཏངས༌ཏེ༌ སོང༌ ཡང༌ ཨ༌བ༌ ཤདས༌།
GEN 29:13 ལ༌བན༌ལ༌ ཁོའེ༌ ཚ༌འོ༌ ཡ༌ཀོབ༌བི༌ སྐོར༌ལ༌ ཚོར༌ར༌ཅིག༌ ཁོ༌ བང༌ཏངས༌ཏེ༌ ཁོའ༌ ཐུག༌ག༌ལ༌ ཡོངས༌ ཡང༌ ཁྲིལ༌ཏེ༌ པུག༌ ཏངས༌། ཁོ༌ ཁྲིད༌ཏེ༌ ཁང༌པ༌ ཁྱེརས༌, ཏེ༌རུ༌ ཡ༌ཀོབ༌བི༌ ལ༌བན༌ལ༌ ཅི༌ཚང༌མ༌ ཤདས༌།
GEN 29:14 ལ༌བན༌ནི༌ ཟེརས༌, “ཁྱོ༌རང༌ ངའེ༌ ཤ༌ཁྲག༌ ཨིན༌ནོག༌།” 29:14-30:24 ཡ༌ཀོབ༌ ཏེ༌རུ༌ དུགས༌ཏེ༌ ཟླ༌ཝ༌ ཅིག༌གི༌ སྟིང༌ནེ༌,
GEN 29:15 ལ༌བན༌ནི༌ ཡ༌ཀོབ༌བ༌ ཟེརས༌, “ཁྱོ༌རང༌ ངའེ༌ ཉེན༌གྲུང༌ ཨིན༌ཅེས༌པོའེ༌ ཁྱོ༌རང༌ངི༌ ངའེ༌ ཕིའ༌ ཆོན༌ལ༌ ལས༌ ཅོ༌ མ༌གོས༌། ཟེར༌རའང༌ ཁྱོ༌རང༌ང༌ ལ༌ཆ༌ ཙམ༌ ཏང༌?”
GEN 29:16 ལ༌བན༌ལ༌ བུ༌མོ༌ ཉིས༌ ཡོད༌པིན༌, ཆེན༌མོ༌བོའ༌ ལི༌ཡ༌ ཡང༌ ཆུང༌ང༌བོའ༌ རེ༌ཅལ༌ ཟེར༌རད༌པིན༌།
GEN 29:17 ལི༌ཡའེ༌ མིག༌ མ༌ ལྡེ༌མོ༌ ཨིན༌ནའང༌ རེ༌ཅལ༌ལ༌ ཟུགས༌ ལྡེ༌མོ༌ དང༌ ཁོ༌ མ༌ཛེས༌མོ༌ ཡོད༌པིན༌།
GEN 29:18 ཡ༌ཀོབ༌ རེ༌ཅལ༌ལ༌ ཐད༌པ༌ ཁོའེ༌ ཟེརས༌, “ཉེ༌རང༌ངི༌ ང༌ རེ༌ཅལ༌ ཉམ༌པོ༌ བག༌སྟོན༌ ཅོ༌ཅུག༌ན༌ ངའེ༌ ཉེ༌རང༌ངི༌ ཕིའ༌ ལོ༌ རྡུན༌ ལས༌ ཅོ༌ཨིན༌།”
GEN 29:19 ལ༌བན༌ནི༌ ལན༌ཏངས༌, “ཞན༌མ༌ཞིག༌གི༌ སང༌ ངའེ༌ ཁོ༌ ཁྱོ༌རང༌ང༌ ཏང༌ན༌ གྱལ༌, འི༌རུ༌ ང༌ ཉམ༌པོ༌ དུག༌།”
GEN 29:20 རེ༌ཅལ༌ ཐོབ༌ཅེས༌ལ༌ ཡ༌ཀོབ༌བི༌ ལོ༌ རྡུན༌ ལ༌བན༌ནི༌ ཕིའ༌ ལས༌ ཅོས༌, ཡང༌ རེ༌ཅལ༌ལ༌ ཐད༌ཅེས༌པའེ༌ ཁོའ༌ ཏེ༌ ཏུས༌པོ༌ ཞག༌པོ༌ ཁ༌ཅིག༌ ཙོགས༌ ཚོར༌།
GEN 29:21 ཏེ༌ནེ༌ ཡ༌ཀོབ༌བི༌ ལ༌བན༌ལ༌ ཟེརས༌, “ཏུས༌པོ༌ ཚངས༌། ཏ༌ ང༌ ཉེ༌རང༌ངི༌ བུ༌མོ༌ ཉམ༌པོ༌ བག༌སྟོན༌ ཅོས༌ཏེ༌ ཁོ༌ ཉམ༌པོ༌ དུག༌ཅེས༌ལ༌ སལ༌།”
GEN 29:22 ཏེ༌ནེ༌ ལ༌བན༌ནི༌ ཁྱིམ༌ཚེས༌ ཚང༌མ༌ལ༌ བོད༌ཏེ༌ བག༌སྟོན༌ནི༌ གྲོན༌ ཏངས༌།
GEN 29:23 ཨིན༌ནའང༌ ཏེ༌ ཚན༌ལ༌ ལ༌བན༌ནི༌ ཁོའེ༌ བུ༌མོ༌ ལི༌ཡ༌ ཡ༌ཀོབ༌བ༌ ཏངས༌ ཡང༌ ཁོ༌ ཉམ༌པོ༌ ཡ༌ཀོབ༌བི༌ ལུས༌བྲེལ༌ ཅོས༌།
GEN 29:24 ལ༌བན༌ནི༌ ཁོ༌རང༌ངི༌ ཡོག༌མོ༌ ཟིལ༌པཧ༌, ཁོའེ༌ བུ༌མོ༌ ལི༌ཡ༌ ཡ༌ཏོ༌ ཚུལ༌ལ༌ ཏངས༌།
GEN 29:25 ང༌མོ༌ ཆའ༌ཅིག༌ ཡ༌ཀོབ༌བ༌ ལི༌ཡ༌ ཨིན༌ཁན༌བོ༌ ཤེས༌པ༌ ཁོའེ༌ ལ༌བན༌ལ༌ ཟེརས༌, “ཉེ༌རང༌ངི༌ འི༌བོ༌ ཅི༌ ཅོས༌ཏེ༌ ཨིན༌? ངའེ༌ རེ༌ཅལ༌ལི༌ ཕིའ༌ ལས༌ ཅོས༌པིན༌, ཅི༌ཕིའ༌ ཉེ༌རང༌ངི༌ ངའ༌ གོབ༌སྐོར༌ཏེ༌ ཨིན༌?”
GEN 29:26 ལ༌བན༌ནི༌ ལན༌ཏངས༌, “ང༌ཞའེ༌ ཡུལ༌ལི༌ ལུག༌སྲོལ༌ ནང༌ཞིན༌ བུ༌མོ༌ ཆུ༌ངུན༌བོ༌ ཆེན༌མོའེ༌སང༌ སྔུན༌ལ༌ ན༌མ༌ ཏང༌ང༌ མ༌ནོག༌།
GEN 29:27 འི༌ གའ༌སྟོན༌ནི༌ རྡུན༌ཞག༌པོ༌ ཚར༌ཅུག༌ ཏེ༌ནེ༌ ངའེ༌ ཁྱོ༌རང༌ང༌ རེ༌ཅལ༌ལའང༌ ཏང༌ཨིན༌, ཀལ༌ཏེས༌ ཁྱོ༌རང༌ངི༌ ངའེ༌ ཕིའ༌ ཡང༌ ལོ༌ རྡུན༌ ལས༌ ཅོ༌ན༌།”
GEN 29:28 ཡ༌ཀོབ༌བི༌ ཁའ༌ ཆམས༌ཏེ༌ གའ༌སྟོན༌ནི༌ རྡུན༌ཞག༌པོ༌ ཚར༌ཅུགས༌ ཏེ༌ནེ༌ ལ༌བན༌ནི༌ ཁོ༌རང༌ངི༌ བུ༌མོ༌ རེ༌ཅལ༌ ཁོའ༌ ན༌མའ༌ ཏངས༌།
GEN 29:29 ལ༌བན༌ནི༌ ཁོ༌རང༌ངི༌ ཡོག༌མོ༌ བིལ༌ལཧ༌ ཁོའེ༌ བུ༌མོ༌ རེ༌ཅལ༌ལ༌ ཡ༌ཏོ༌ ཚུལ༌ལ༌ ཏངས༌།
GEN 29:30 ཡ༌ཀོབ༌བི༌ རེ༌ཅལ༌ ཉམ༌པོའང༌ ལུས༌བྲེལ༌ ཅོས༌ ཡང༌ ཁོའེ༌ ཁོའ༌ ལི༌ཡ༌ སང༌ མང༌ང༌ ཡ༌ཤ༌ ཅོའད༌པིན༌། ཁོའེ༌ ལ༌བན༌ནི༌ ཕིའ༌ ཡང༌ ལོ༌ རྡུན༌ ལས༌ ཅོས༌།
GEN 29:31 ཡ༌ཝའེ༌ ཡ༌ཀོབ༌བི༌ ལི༌ཡ༌ ཡ༌ཤ༌ མི༌ཅོ༌ཅེས༌པོ༌ ཟིགས༌ཏེ༌ ཁོང༌ངི༌ ཁོའ༌ ཕྲུ༌གུ༌ ཇོར༌ ཅུག༌ག༌ ཛདས༌ ཨིན༌ནའང༌ རེ༌ཅལ༌ལ༌ ཕྲུ༌གུ༌ མ༌ཇོར༌།
GEN 29:32 ལི༌ཡ༌ སྐྱེ༌ཅེས༌མ༌ གྱུར༌ ཡང༌ བུ༌ཚ༌ཞིག༌ ཇོར༌། ཁོའེ༌ བུ༌ཚའེ༌ མིང༌ང༌ རུ༌བེན༌ ཏགས༌ ཅིའ༌ཟེར༌ན༌ ཁོའེ༌ ཟེརས༌, “ཡ༌ཝའེ༌ ངའེ༌ རྡུག༌ངལ༌བོ༌ ཟིགས༌, ཏན༌ཏན༌ ཏ༌ ངའེ༌ མག༌པའེ༌ ངའ༌ ཡ༌ཤ༌ ཅོའ༌ནོག༌།”
GEN 29:33 ཁོ༌ ཡང༌སྐྱར༌ སྐྱེ༌ཅེས༌མ༌ གྱུར༌ཏེ༌ བུ༌ཚ༌ཞིག༌ ཇོར༌ ཡང༌ ཁོའེ༌ ཟེརས༌, “ང༌ ཡ༌ཤ༌ མ༌ཅོ༌ཁན༌བོ༌ ཡ༌ཝའེ༌ སན༌ཏེ༌ ངའ༌ འི༌ བུ༌ཚ༌བོའང༌ སལས༌།” ཁོའེ༌ བུ༌ཚའེ༌ མིང༌ང༌ སི༌མི༌འོན༌ ཏགས༌།
GEN 29:34 ཡང༌སྐྱར༌ ཁོ༌ སྐྱེ༌ཅེས༌མ༌ གྱུར༌ཏེ༌ ཁོའ༌ བུ༌ཚ༌ཞིག༌ ཇོར༌། ཁོའེ༌ ཟེརས༌, “ཏ༌ ང༌ དང༌ ངའེ༌ མག༌པའེ༌ སེམས༌ ཉེ༌མོ༌ གྱུར༌ཨིན༌ ཅིའ༌ཟེར༌ན༌ ངའེ༌ ཁོའ༌ བུ༌ཚ༌ སུམ༌ སྐྱེ༌ཅུགས༌ཏེ༌ ཨིན༌ནོག༌།” ཁོའེ༌ བུ༌ཚའེ༌ མིང༌ང༌ ལི༌ཝི༌ ཏགས༌།
GEN 29:35 ཏེ༌ནེ༌ ཁོ༌ ཡང༌སྐྱར༌ སྐྱེ༌ཅེས༌མ༌ གྱུར༌ ཡང༌ བུ༌ཚ༌ཞིག༌ ཇོར༌ ཡང༌ ཁོའེ༌ ཟེརས༌, “འི༌རེས༌ལ༌ ངའེ༌ ཡ༌ཝའ༌ སྟོད༌པ༌ ཕུལ༌ཨིན༌།” ཁོའེ༌ བུ༌ཚའེ༌ མིང༌ང༌ ཡ༌ཧུ༌དཱ༌ ཏགས༌། ཏེ༌སྟིང༌ནེ༌ ཁོའ༌ ཕྲུ༌གུ༌ མ༌ཇོར༌།
GEN 30:1 ཨིན༌ནའང༌ རེ༌ཅལ༌ལ༌ ཡ༌ཀོབ༌བི༌ ཕིའ༌ ཕྲུ༌གུ༌ ཅིག༌གའང༌ ཇོར༌ མ༌ཉན༌པ༌ ཁོ༌ ཁོ༌རང༌ངི༌ ཨ༌ཅེ༌ཀ༌ ཚིག༌ཅེས༌ ཡོངས༌ ཡང༌ ཡ༌ཀོབ༌བ༌ ཟེརས༌, “ངའ༌ ཕྲུ༌གུ༌ ཏོང༌ ཏེ༌ མ༌ནེ༌ ང༌ ཤི༌ཨིན༌།”
GEN 30:2 ཡ༌ཀོབ༌བ༌ རེ༌ཅལ༌ལི༌ཀ༌ སྲོ༌ ཡོངས༌ཏེ༌ ཟེརས༌, “ཅི༌ ང༌ དཀོན༌མཆོག༌ ཨིན༌ནོག༌ག༌? ཁོང༌ངི༌ ཁྱོ༌རང༌ང༌ ཕྲུ༌གུ༌ ཇོར༌ མ༌ཅུག༌ག༌ ཨིན༌ནོག༌།”
GEN 30:3 རེ༌ཅལ༌ལི༌ ཟེརས༌, “ངའེ༌ ཡོག༌མོ༌ བིལ༌ལཧ༌ ཉམ༌པོ༌ ཁྱོ༌རང༌ དུགས༌ཏེ༌ ངའེ༌ ཕིའ༌ ཕྲུ༌གུ༌ ཇོར༌ཅུག༌ ཡང༌ ཁོ༌ གྱུད༌ཏེ༌ ངའ༌ ཕྲུ༌གུ༌གུན༌ ཡོང༌ཨིན༌།”
GEN 30:4 ཏེ༌ནེ༌ ཁོའེ༌ ཁོ༌རང༌ངི༌ ཡ༌ཏོ༌ བིལ༌ལཧ༌ ཁོ༌རང༌ངི༌ མག༌པའ༌ ན༌མའེ༌ ཚུལ༌ལ༌ ཏངས༌ ཡང༌ ཁོའེ༌ ཁོ༌ ཉམ༌པོ༌ ལུས༌བྲེལ༌ ཅོས༌།
GEN 30:5 ཁོ༌ སྐྱེ༌ཅེས༌མ༌ གྱུར༌ཏེ༌ ཡ༌ཀོབ༌བི༌ ཕིའ༌ བུ༌ཚ༌ཞིག༌ ཇོར༌།
GEN 30:6 རེ༌ཅལ༌ལི༌ ཟེརས༌, “དཀོན༌མཆོག༌གི༌ ངའ༌ ཏམ༌ངན༌ནེ༌ ཕིང༌ང༌ ཛདས༌། ཁོང༌ངི༌ ངའེ༌ མོས༌ལམ༌བོ༌ སན༌ན༌ ཛད༌ཏེ༌ ང༌ བུ༌ཚ༌ཞིག༌ སལས༌།” ཏེ༌བོའེ༌ཕིའ༌ ཁོའེ༌ བུ༌ཚའེ༌ མིང༌ང༌ གྲེན༌ ཏགས༌།
GEN 30:7 རེ༌ཅལ༌ལི༌ ཡ༌ཏོ༌ བིལ༌ལཧ༌ ཡང༌སྐྱར༌ སྐྱེ༌ཅེས༌མ༌ གྱུར༌ཏེ༌ ཡ༌ཀོབ༌བི༌ ཕིའ༌ བུ༌ཚ༌ ཉིས༌པ༌ ཇོར༌།
GEN 30:8 རེ༌ཅལ༌ལི༌ ཟེརས༌, “ང༌ ང༌རང༌ངི༌ ཨ༌ཅེ༌ ཉམ༌པོ༌ སྲན༌ཏྲེ༌ ནོལ༌ གོས༌ ཨིན༌ནའང༌ ང༌ གྱལ༌ཁའ༌ ཐོབ༌།” ཏེ༌བོའེ༌ཕིའ༌ ཁོའེ༌ བུ༌ཚའེ༌ མིང༌ང༌ ནཕ༌ཐལ༌ལི༌ ཏགས༌།
GEN 30:9 ལི༌ཡ༌ ཕྲུ༌གུ༌ མི༌སྐྱེ༌ཅེས༌པོ༌ ཧ༌གོའ༌ཅིག༌ ཁོའེ༌ ཁོ༌རང༌ངི༌ ཡ༌ཏོ༌ ཟིལ༌པཧ༌ ཡ༌ཀོབ༌བ༌ ན༌མའེ༌ ཚུལ༌ལ༌ ཏངས༌།
GEN 30:10 ཏེ༌ནེ༌ ཟིལ༌པཧ༌ ཡ༌ཀོབ༌བི༌ ཕིའ༌ བུ༌ཚ༌ཞིག༌ ཇོར༌།
GEN 30:11 ལི༌ཡའེ༌ ཟེརས༌, “ང༌ སོ༌དེ༌ཅན༌ ཨིན༌ནོག༌།” ཏེ༌བོའེ༌ཕིའ༌ ཁོའེ༌ བུ༌ཚའེ༌ མིང༌ང༌ གཱད༌ ཏགས༌།
GEN 30:12 ལི༌ཡའེ༌ ཡ༌ཏོ༌ ཟིལ༌པཧ༌, ཡ༌ཀོབ༌བི༌ ཕིའ༌ ཡང༌ བུ༌ཚ༌ཞིག༌ ཇོར༌།
GEN 30:13 ཏེ༌ནེ༌ ལི༌ཡའེ༌ ཟེརས༌, “ང༌ མ༌ཐད༌པོ༌ རག༌། ཏ༌ བུ༌མོ༌གུན༌ནི༌ ངའ༌ སྐྱིད༌པོ༌ ཟེར༌ཨིན༌།” ཏེ༌བོའེ༌ཕིའ༌ ཁོའེ༌ བུ༌ཚའེ༌ མིང༌ང༌ ཨ༌ཤེར༌ ཏགས༌།
GEN 30:14 ཀྲོའེ༌ རྔབ༌སའེ༌ ཏུས༌ལ༌ རུ༌བེན༌ ཞིང༌ང༌ སོང༌ ཡང༌ ཁོའ༌ མེན༌གྲེགས༌ ཟེར༌ཁན༌ནི༌ རྩཱ༌ ༼ཀ༌བོའེ༌ བུ༌མོ༌གུན༌ལ༌ ཕྲུ༌གུ༌ སྐྱེ༌ཅེས༌སི༌ ནང༌ང༌ རོགས༌ ཅོའ༌ནོག༌༽ ཐོབ༌པ༌ ཁོའེ༌ ཏེ༌བོ༌ ཁོ༌རང༌ངི༌ ཨ༌མ༌ ལི༌ཡ༌ ཕིའ༌ ཁྱོངས༌། རེ༌ཅལ༌ལི༌ ལི༌ཡ༌ ཟེརས༌, “ཇུ༌ཇུ༌ ངའ༌ ཉེ༌རང༌ངི༌ བུ༌ཚའེ༌ ཁྱོངས༌ཁན༌ནི༌ མེན༌གྲེགས༌ ཙ༌པིག༌ སལ༌ལའང༌།”
GEN 30:15 ཨིན༌ནའང༌ ལི༌ཡའེ༌ ཟེརས༌, “ངའེ༌ མག༌པ༌ ཁྱེར༌ཏེ༌ ཁྱོ༌རང༌ མ༌ཚིམས༌ས༌? ཏ༌ ཁྱོ༌རང༌ངི༌ ངའེ༌ བུ༌ཚའེ༌ ཁྱོངས༌ཁན༌ནི༌ མེན༌གྲེགས༌པོའང༌ ཁྱེར༌ཨིན༌ན༌།” རེ༌ཅལ༌ལི༌ ཟེརས༌, “ཁྱོ༌རང༌ངི༌ ངའ༌ མེན༌གྲེགས༌ ཏང༌ན༌ ཁྱོ༌རང༌ དི༌རིང༌ ཚན༌ལ༌ ཡ༌ཀོབ༌ ཉམ༌པོ༌ དུག༌ ཅུག༌ཨིན༌།”
GEN 30:16 ཕི༌ཏོག༌ ཡ༌ཀོབ༌ ཞིང༌ནེ༌ ཡོང༌ང༌ཅིག༌ ལི༌ཡ༌ ཁོའ༌ ཐུག༌ག༌ལ༌ ཕི༌ལོག༌ག༌ སོང༌ཏེ༌ ཟེརས༌, “དི༌རིང༌ ཉེ༌རང༌ ང༌ ཉམ༌པོ༌ དུག༌གོས༌ ཅིའ༌ཟེར༌ན༌ ངའེ༌ བུ༌ཚའེ༌ ཁྱོངས༌ཁན༌ནི༌ མེན༌གྲེགས༌ རེ༌ཅལ༌ལ༌ ཏངས༌ཏེ༌ ངའེ༌ ཉེ༌རང༌ངི༌ ཕིའ༌ རིན༌ ཤལ༌ཏེ༌ ཨིན༌།” ཏེ༌བོའེ༌ཕིའ༌ ཁོ༌ ཏེ༌ ཚན༌ལ༌ ལི༌ཡ༌ ཉམ༌པོ༌ དུགས༌།
GEN 30:17 དཀོན༌མཆོག༌གི༌ ལི༌ཡའེ༌ མོས༌ལམ༌མ༌ ལན༌སལས༌ ཡང༌ ཁོ༌ སྐྱེ༌ཅེས༌མ༌ གྱུར༌ཏེ༌ ཡ༌ཀོབ༌བ༌ བུ༌ཚ༌ ལྔ༌པ༌ ཇོར༌།
GEN 30:18 ལི༌ཡའེ༌ ཟེརས༌, “ངའེ༌ ང༌རང༌ངི༌ ཡ༌ཏོ༌ ང༌རང༌ངི༌ མག༌པ༌ ན༌མའེ༌ ཚུལ༌ལ༌ ཏངས༌པ༌ དཀོན༌མཆོག༌གི༌ ངའ༌ སོལ༌རས༌ སལ༌ལ༌ ཛདས༌།” ཏེ༌བོའེ༌ཕིའ༌ ཁོ༌རང༌ངི༌ བུ༌ཚའེ༌ མིང༌ང༌ ཨིས༌ས༌ཁར༌ ཏགས༌།
GEN 30:19 ལི༌ཡ༌ ཡང༌སྐྱར༌ སྐྱེ༌ཅེས༌མ༌ གྱུར༌ ཡང༌ ཡ༌ཀོབ༌བི༌ ཕིའ༌ བུ༌ཚ༌ དྲུག༌པ༌ ཇོར༌།
GEN 30:20 ཁོའེ༌ ཟེརས༌, “དཀོན༌མཆོག༌གི༌ ངའ༌ སོལ༌རས༌ གྱལ༌ལ༌ཞིག༌ སལ༌ལ༌ ཛདས༌། ཏ༌ ངའེ༌ མག༌པའེ༌ ང༌ རྩི༌ཝ༌ ཅོའ༌ནོག༌ ཅིའ༌ཟེར༌ན༌ ངའེ༌ ཁོའ༌ བུ༌ཚ༌ དྲུག༌ ཇོར༌ ཅུགས༌ཏེ༌ ཨིན༌ནོག༌།” ཏེ༌བོའེ༌ཕིའ༌ ཁོའེ༌ བུ༌ཚའེ༌ མིང༌ང༌ ཟེ༌བུ༌ལོན༌ ཏགས༌།
GEN 30:21 ཏེ༌སྟིང༌ནེ༌ ཁོའ༌ བུ༌མོ༌ཞིག༌ སྐྱེས༌ ཡང༌ ཁོའེ༌ མིང༌ང༌ དི༌ནཱ༌ ཏགས༌།
GEN 30:22 ཏེ༌ནེ༌ དཀོན༌མཆོག༌གི༌ རེ༌ཅལ༌ལ༌ སྣང༌ང༌ སལ༌ཏེ༌ ཁོའ༌ ཕྲུ༌གུ༌ ཇོར༌ ཅུག༌ག༌ ཛདས༌
GEN 30:23 ཁོ༌ སྐྱེ༌ཅེས༌མ༌ གྱུར༌ ཡང༌ བུ༌ཚ༌ཞིག༌ ཇོར༌ཏེ༌ ཁོའེ༌ ཟེརས༌, “དཀོན༌མཆོག༌གི༌ ངའ༌ བུ༌ཚ༌ཞིག༌ སལ༌ཏེ༌ ངའ༌ ཕོག༌ཁན༌ནི༌ ཁྲེལ༌བ༌ མེད༌ཁན༌ ཛདས༌།”
GEN 30:24 ཁོའེ༌ ཁོ༌རང༌ངི༌ བུ༌ཚའེ༌ མིང༌ང༌ ཡོ༌སེབ༌ ཏགས༌ ཡང༌ ཟེརས༌, “དཀོན༌མཆོག༌གི༌ ངའ༌ ཡང༌ བུ༌ཚ༌ཞིག༌ སལ༌ཤིག༌།”
GEN 30:25 ཡོ༌སེབ༌ སྐྱེས༌ཏེ༌ སྟིང༌ནེ༌ ཡ༌ཀོབ༌བི༌ ལ༌བན༌ལ༌ ཟེརས༌, “ང༌ ང༌རང༌ངི༌ ཁང༌པ༌ ལོགས༌ཏེ༌ ཆ༌ཉན༌ཅེས༌སི༌ ཕིའ༌ ངའ༌ ལམ༌ཅུག༌ག༌ ཛད༌།
GEN 30:26 ཉེ༌རང༌ངི༌ ཕིའ༌ ལས༌ ཅོས༌ཏེ༌ ཐོབ༌ཁན༌ནི༌ ངའེ༌ ན༌མ༌ དང༌ ཕྲུ༌གུ༌ གུན༌ ངའ༌ སལ༌ ཏེ༌ནེ༌ ང༌ ཆེན༌། ངའེ༌ ཉེ༌རང༌ང༌ གྱལ༌ལ༌ ཞབས༌ཏོག༌ ཞུས༌ཁན༌བོ༌ ཉེ༌རང༌ང༌ གྱུས༌ཨིན༌ནོག༌།”
GEN 30:27 ལ༌བན༌ནི༌ ཁོའ༌ ཟེརས༌, “ངའ༌ འི༌བོ༌ ཟེར༌ཅུག༌, སེམ༌ཉིད༌གུན༌ གྱུད༌ཏེ༌ ང༌ གྱུས༌ སོང༌ ཁྱོ༌རང༌ངི༌ ཞས༌ཏེ༌ ཡ༌ཝའེ༌ ངའ༌ ཅིན༌ལབས༌ སལ༌ལ༌ ཛདས༌, ཇུ༌ཇུ༌ འི༌རུ༌ ང༌ ཉམ༌པོ༌ ཞུགས༌།”
GEN 30:28 ཁོའེ༌ ཟེརས༌, “ཁྱོ༌རང༌ངི༌ ཟེར༌ཁན༌ནི༌ ལ༌ཆ༌ ངའེ༌ ཁྱོ༌རང༌ང༌ ཏང༌ཨིན༌།”
GEN 30:29 ཡ༌ཀོབ༌བི༌ ལན༌ཏངས༌, “ཉེ༌རང༌ངི༌ ཕིའ༌ ལས༌ ཅོས༌ཏེ༌ ངའེ༌ སྟ༌སྟོག༌གི༌ ནང༌ང༌ ཉེ༌རང༌ངི༌ སེམས༌ཅན༌ མང༌པོ༌ ཕེལ༌ཁན༌བོ༌ ཉེ༌རང༌ང༌ གྱུས༌ཨིན༌ནོག༌།
GEN 30:30 ངའ༌ ཡོང༌ངི༌ སང༌ སྔུན༌ལ༌ ཉེ༌རང༌ང༌ ཉུ༌ངུན༌ ཡོད༌ཁན༌བོ༌ མང༌པོ༌ ཕེལ༌ཏེ༌ ཡ༌ཝའེ༌ ངའེ༌ ལས༌ ཅོ༌ཁན༌ ཚང༌མའེ༌ ནང༌ང༌ ཉེ༌རང༌ང༌ ཅིན༌ལབས༌ སལས༌། ཏ༌ ངའེ༌ ང༌རང༌ངི༌ ནང༌ཚངས༌སི༌ ཕིའང༌ ལས༌ ཅོ༌ཅེས༌སི༌ ཏུས༌པོ༌ ཨིན༌ནོག༌།”
GEN 30:31 ལ༌བན༌ནི༌ ཟེརས༌, “ངའེ༌ ཁྱོ༌རང༌ང༌ ཙམ༌ཤིག༌ ཏང༌གོས༌?” ཡ༌ཀོབ༌བི༌ ལན༌ཏངས༌, “ངའ༌ ཅའང༌ མ༌ ཏང༌ནའང༌ གྲིག༌། ཀལ༌ཏེས༌ ཉེ༌རང༌ངི༌ འི༌བོ༌ ཅོ༌ན༌ ངའེ༌ ཏ༌རུང༌ངའང༌ ཉེ༌རང༌ངི༌ ཁྱུ༌ ཚང༌མ༌ སྟ༌སྟོག༌ ཅོ༌ཨིན༌།
GEN 30:32 དི༌རིང༌ ང༌ ཉེ༌རང༌ངི༌ ཁྱུ༌ ཚང༌མའེ༌ ནང༌ང༌ སོང༌ཏེ༌ ལུ༌གུ༌ ནག༌པོ༌, ལུག༌ དང༌ ར༌མ༌ ནག༌ཐིག༌ དང༌ ཁྲ༌འོ༌ ཚང༌མ༌ ཕེས༌ཏེ༌ ཁྱེར༌ཨིན༌། ཏེ༌གུན༌ ངའེ༌ ལ༌ཆ༌བོ༌ ཨིན༌།
GEN 30:33 ཉེ༌རང༌ སྐྱོད༌ཏེ༌ ངའ༌ ལ༌ཆ༌ ཐོབ༌ཁན༌གུན༌ལ༌ ལྟའ༌ཅིག༌ ང༌ ཀྲང༌པོ༌ ཨིན༌ན༌ མན༌ ཉེ༌རང༌ང༌ གྱུས༌ ཆ༌ཉན༌ཅེས༌ ཨིན༌ནོག༌། ཀལ༌ཏེས༌ ངའེ༌ ཁྱུའི༌ ཕྲོའ༌ ཉེ༌རང༌ང༌ ར༌མ༌ ཁྲ༌འོ༌ ཡ༌ ནག༌ཐིག༌ མན༌ཁན༌ ཡ༌ ལུག༌ ནག༌པོ༌ མན༌ཁན༌ ཐོང༌ན༌ ཏེ༌གུན༌ ངའེ༌ རྐུས༌ཏེ༌ ཨིན༌ཁན༌ ཉེ༌རང༌ང༌ གྱུས༌ཆེན༌།”
GEN 30:34 ལ༌བན༌ནི༌ ལན༌ཏངས༌, “ཁྲིག༌རག༌, ཁྱོ༌རང༌ངི༌ ཟེར༌ཁན༌བོ༌ ཅོ༌ཨིན༌།”
GEN 30:35 ཨིན༌ནའང༌ ཏེ༌ ཞག༌ག༌ ལ༌བན༌ནི༌ ར༌མ༌ དང༌ ར༌བོ༌ ནག༌ཐིག༌ དང༌ ཁྲ༌འོ༌ ཚང༌མ༌ ཡང༌ ལུ༌གུ༌ ནག༌པོ༌ ཚང༌མའང༌ ཁྱུའི༌ ཕྲོ༌ནེ༌ ཕེས༌ཏེ༌ ཐེནས༌ ཡང༌ ཁོ༌རང༌ངི༌ བུ༌ཚ༌གུན༌ ཏེ༌གུན༌ནི༌ སྟ༌སྟོག༌ ཅོའ༌ བོརས༌།
GEN 30:36 ཏེ༌ནེ༌ ཁོའེ༌ ཏེ༌ ཁྱུ༌བོ༌ ཞག༌མ༌ སུམ༌ གྲུལ༌ཏེ༌ ལེབ༌ཅེས༌ ཟམ༌ཤིག༌ ཐག༌རིང༌ངི༌ ནས༌ས༌ ཞིག༌ག༌ ཁྱེརས༌། ཡ༌ཀོབ༌བི༌ ལ༌བན༌ནི༌ ལུས༌ཁན༌ནི༌ ཁྱུ༌བོའེ༌ སྟ༌སྟོག༌ ཅོས༌།
GEN 30:37 ཡ༌ཀོབ༌བི༌ ཡར༌པ༌, བ༌དམ༌ དང༌ ཞན༌ ལྕང༌མ༌ གུན༌ནི༌ ཡལ༌ག༌ ཅདས༌ ཡང༌ པར༌པར༌ནེ༌ པགས༌པ༌ ཀོགས༌ཏེ༌ ཏེ༌གུན༌ ཁྲ༌འོ༌ ཅོས༌།
GEN 30:38 ཁོའེ༌ ཏེ༌ ཡལ༌ག༌ ཚང༌མ༌ ར༌ལུག༌གུན༌ ཆུ༌ཐུང༌སའེ༌ ཞོང༌པའེ༌ དུན༌ལ༌ ཁྱུ༌ ཕྲོའ༌ བོརས༌, ཅིའ༌ཟེར༌ན༌ སེམས༌ཅན༌གུན༌ ཆུ༌ ཐུང༌ ཟ༌ནེ༌ ཛོམས༌ཏེ༌ གྱུད༌སྤེལ༌ ཅོའད༌པིན༌།
GEN 30:39 ཏེ༌ནེ༌ ཏེ༌ཀ༌ ཛོམ༌ཁན༌ནི༌ ར༌ལུག༌གུན༌ལ༌ སྐྱེ༌ཁན༌ནི༌ རི༌གུ༌ དང༌ ལུ༌གུ༌གུན༌ ཁྲ༌འོ༌ ཡ༌ ནག༌ཐིག༌ ཅན༌ ཡོད༌པིན༌།
GEN 30:40 ཡ༌ཀོབ༌བི༌ ཏེ༌ ལུ༌གུ༌གུན༌ སོ༌སོའ༌ ཕེས༌ ཡང༌ ལུས༌ཁན༌ནི༌ ལུག༌གུན༌ ལ༌བན༌ནི༌ ཁྱུ༌ ནག༌པོ༌ དང༌ ཁྲ༌འོ༌ སེམས༌ཅན༌གུན༌ནི༌ ཆོགས༌ལ༌ ལྟ༌ ཅུགས༌ཏེ༌ བོརས༌། འིན༌ན༌ཟུག༌གི༌ ཁོའེ༌ ཁོ༌རང༌ངི༌ ཕིའ༌ ར༌ལུག༌གི༌ ཁྱུ༌ སོ༌སོ༌ ཅོས༌ ཡང༌ ཏེ༌གུན༌ ལ༌བན༌ནི༌ ཁྱུ༌གུན༌ ཉམ༌པོ༌ སྲེ༌ མ༌སྲེས༌།
GEN 30:41 མོ༌ ལུག༌ ཤེད༌ཅན༌ ཚང༌མ༌ གྱུད༌སྤེལ༌ལི༌ ཕིའ༌ གྲལ༌གྲིག༌ ཡོད༌ ཟ༌ནེ༌ ཡ༌ཀོབ༌བི༌ ཡལ༌ག༌ ཚང༌མ༌ ཏེ༌གུན༌ནི༌ མིག༌ནེ༌ ཐོང༌སའེ༌ ཆུའི༌ ཞོང༌པའེ༌ དུན༌ལ༌ བོརས༌ ཀ༌རུ༌ གྱུད༌སྤེལ༌ལི༌ ཕིའ༌ པོ༌ དང༌ མོ༌ ཛོམ༌མད༌པིན༌།
GEN 30:42 ཨིན༌ནའང༌ ཁོའེ༌ ཁྱུ༌ འུ༌ཐུགས༌གུན༌ནི༌ དུན༌ལ༌ ཡལ༌ག༌ མ༌བོརས༌། ཏེན༌ན༌བོའེ༌ཕིའ༌ ལ༌བན༌ལ༌ ར༌ལུག༌གི༌ ཁྱུ༌ འུ༌ཐུགས༌ ཚང༌མ༌ ཐོབ༌ ཡང༌ ཡ༌ཀོབ༌བ༌ ཤེད༌ཅན༌ ཚང༌མ༌།
GEN 30:43 འིན༌ན༌ཟུག༌གི༌ ཡ༌ཀོབ༌ མའ༌ ཆུག༌པོ༌ གྱུར༌། ཁོའ༌ ར༌ལུག༌གི༌ ཁྱུ༌, རྔ༌བོང༌ དང༌ བུང༌བུ༌ མང༌པོ༌ ཡང༌ ཡོག༌པོའང༌ མང༌པོ༌ ཡོད༌པིན༌།
GEN 31:1 ཡ༌ཀོབ༌བ༌ ལ༌བན༌ནི༌ བུ༌ཚ༌གུན༌ནི༌, “ཡ༌ཀོབ༌བི༌ ང༌དང༌ངི༌ ཨ༌བའེ༌ ཨིན༌ཁན༌ ཚང༌མ༌ ཁྱེར༌ཏེ༌ ཨིན༌ནོག༌, ཡང༌ ང༌དང༌ངི༌ ཨ༌བའེ༌ ཞས༌ཏེ༌ ཁོའ༌ གྱུ༌ནོར༌ མང༌པོ༌ ཇོར༌ཏེ༌ ཨིན༌ནོག༌” ཟེར༌ཨིན༌ ཚོར༌།
GEN 31:2 ཡང༌ ལ༌བན༌ནི༌ ལྟ༌ཝ༌ ཁོའེ༌ ཆོགས༌ལ༌ སྔུན༌མ༌ ཙོགས༌ མེད༌ཁན༌བོ༌ ཡ༌ཀོབ༌བ༌ ཧ༌གོ༌།
GEN 31:3 ཏེ༌ནེ༌ ཡ༌ཝའེ༌ ཡ༌ཀོབ༌བ༌ མོལས༌, “ཁྱོ༌རང༌ ཁྱོ༌རང༌ངི༌ ཕ༌མེས༌པོ༌ དང༌ ཉེན༌གྲུང༌ གུན༌ ཡོད༌སའེ༌ ས༌ཆ༌ ལོགས༌ཏེ༌ སོང༌ ཡང༌ ང༌ ཁྱོ༌རང༌ ཉམ༌པོ༌ ཡོད༌།”
GEN 31:4 ཏེན༌ན༌བོའེ༌ཕིའ༌ ཡ༌ཀོབ༌བི༌ རེ༌ཅལ༌ དང༌ ལི༌ཡ༌, ཁོའེ༌ སེམས༌ཅན༌ནི༌ ཁྱུ༌ ཡོད༌སའེ༌ ཞིང༌ངི༌ཀ༌ ཡོང༌ཅེས༌ལ༌ ལོན༌ ཀལས༌།
GEN 31:5 ཁོའེ༌ ཁོང༌གུན༌ལ༌ ཟེརས༌, “ཁྱོ༌ཞའེ༌ ཨ༌བའེ༌ ལྟ༌ཝ༌ ངའེ༌ ཕིའ༌ གྱུར༌ཏེ༌ ཡོད༌ཁན༌བོ༌ ངའ༌ ཐོང༌དུག༌, ཨིན༌ནའང༌ ངའེ༌ ཨ༌བའེ༌ དཀོན༌མཆོག༌ ང༌ ཉམ༌པོ༌ ཞུགས༌ཏེ༌ ཡོད༌།
GEN 31:6 ཁྱོ༌ཞའེ༌ ཨ༌བའེ༌ ཕིའ༌ ངའེ༌ རྩོན༌གྲུས༌ ཉམ༌པོ༌ ལས༌ ཅོས༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌།
GEN 31:7 ཁོའེ༌ ངའེ༌ ལ༌ཆའེ༌ ནང༌ང༌ ལན༌ རྕུ༌ གྱུར༌ཇ༌ ཁྱོངས༌ཏེ༌ ངའ༌ གོབ༌སྐོར༌ ཏངས༌། ཨིན༌ནའང༌ དཀོན༌མཆོག༌གི༌ ཁོའ༌, ངའ༌ ནོད༌སྐྱལ༌ ཅུག༌ག༌ མ༌ཛད༌།
GEN 31:8 ལ༌བན༌ནི༌ ར༌ལུག༌ ཁྲ༌འོ༌ ཚང༌མ༌ ཁྱོ༌རང༌ངི༌ ལ༌ཆ༌ ཨིན༌ ཟེར༌ར༌ཅིག༌, ཏེ༌གུན༌ལ༌ ལུ༌གུ༌ དང༌ རི༌གུ༌ གུན༌ ཁྲ༌འོ༌ སྐྱེས༌, ཡང༌ ཁོའེ༌ ནག༌ཐིག༌ཅན༌ ཚང༌མ༌ ཁྱོ༌རང༌ངི༌ ལ༌ཆ༌ ཨིན༌ ཟེར༌ར༌ཅིག༌, ཏེ༌གུན༌ལ༌ ལུ༌གུ༌ དང༌ རི༌གུ༌ གུན༌ ནག༌ཐིག༌ཅན༌ སྐྱེས༌།
GEN 31:9 དཀོན༌མཆོག༌གི༌ ཁྱོ༌ཞའེ༌ ཨ༌བའེ༌ ཀ༌ནེ༌ སེམས༌ཅན༌གུན༌ ཁྱེར༌ར༌ ཛད༌ཏེ༌ ངའ༌ སལ༌ཏེ༌ ཨིན༌ནོག༌།
GEN 31:10 ཁྱུའི༌ གྱུད༌སྤེལ༌ལི༌ ཏུས༌ ངའ༌ ཉི༌ལམ༌ཞིག༌ ཐོང༌ ཡང༌ ཏེ༌ནང༌ང༌ ར༌མ༌ ཉམ༌པོ༌ གྱུད༌སྤེལ༌ ཅོ༌ཁན༌ནི༌ ར༌བོ༌ གུན༌ ཁྲ༌འོ༌ དང༌ ནག༌ཐིག༌ཅན༌ དུག༌པིན༌།
GEN 31:11 ཏེ༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཕོ༌ཉའེ༌ ངའ༌ མོལས༌, ‘ཡ༌ཀོབ༌’ ངའེ༌ ཟེར༌པིན༌, ‘ངའ༌ འི༌ཀ༌ནེ༌ ཡོད༌ལེ༌།’
GEN 31:12 ཁོང༌ངི༌ མོལས༌, ‘ལྟོས༌, ཁྱོ༌རང༌ངི༌ ར༌མ༌གུན༌ ཉམ༌པོ༌ གྱུད༌སྤེལ༌ ཅོ༌ཁན༌ནི༌ ར༌བོ༌ ཚང༌མ༌, ཁྲ༌འོ༌ དང༌ ནག༌ཐིག༌ཅན༌ དུག༌, ཅིའ༌ཟེར༌ན༌ ལ༌བན༌ནི༌ ཁྱོ༌རང༌ང༌ ཅོ༌ཁན༌ ཚང༌མ༌ ངའེ༌ ཐོང༌།
GEN 31:13 ང༌ ཁྱོ༌རང༌ང༌ བེ༌ཐེལ༌ལི༌ ནང༌ང༌ ཐོང༌ཁན༌ནི༌ ཏེན༌ན༌ དཀོན༌མཆོག༌པོ༌ ཨིན༌, ཀ༌རུ༌ ཁྱོ༌རང༌ངི༌ རྡོའ༌ ལངས༌ཏེ༌ ཏེ༌ཀ༌ ཨོ༌ལིཝ༌ཝི༌ མར༌ནག༌ ལུགས༌ཏེ༌ ནའ༌ ཁུར༌ཏེ༌ ཨིན༌པིན༌། ཏ༌ དག༌ས༌རང༌ འི༌ ས༌ཆའ༌ ཕངས༌ཏེ༌ ཁྱོ༌རང༌ སྐྱེས༌སའེ༌ ནས༌ས༌ ལོགས༌ཏེ༌ སོང༌།’”
GEN 31:14 རེ༌ཅལ༌ དང༌ ལི༌ཡའེ༌ ཡ༌ཀོབ༌བ༌ ལན༌ཏངས༌, “ཨ༌བའེ༌ ཀ༌ནེ༌ ང༌ཞའ༌ ཅའང༌ ནོར༌སྐལ༌ ཐོབ༌ཅེས༌ མེད༌།
GEN 31:15 ཁོང༌ངི༌ ང༌ཞ༌གུན༌ལ༌ ཞན༌མ༌ ཙོགས༌ལ༌ མ༌ཐེས༌ས༌? ཁོང༌ངི༌ ང༌ཞའ༌ ཙོངས༌ ཡང༌ ང༌ཞའེ༌ ཕིའ༌ ཏང༌ཁན༌ནི༌ པེ༌ནེ༌ ཚང༌མ༌ སྐྱགས༌།
GEN 31:16 དཀོན༌མཆོག༌གི༌ ང༌ཞའེ༌ ཨ༌བའེ༌ ཀ༌ནེ༌ ཁྱེར༌ར༌ ཛད༌ཁན༌ནི༌ གྱུ༌ནོར༌ ཚང༌མ༌ ང༌ཞའ༌ དང༌ ང༌ཞའེ༌ ཕྲུ༌གུ༌གུན༌ནི༌ ཨིན༌ནོག༌། དཀོན༌མཆོག༌གི༌ ཉེ༌རང༌ང༌ ཅོས༌ མོལ༌ཁན༌བོ༌ ཅོས༌ལེ༌།”
GEN 31:17 ཏེ༌ནེ༌ ཡ༌ཀོབ༌བི༌ ཁོ༌རང༌ངི༌ ཕྲུ༌གུ༌གུན༌ དང༌ ན༌མ༌གུན༌ རྔ༌བོང༌གུན༌ནི༌ཀ༌ སྐྱོནས༌,
GEN 31:18 ཡང༌ ཁྱུ༌ ཚང༌མ༌ ཁོ༌རང༌ངི༌ སང༌ སྔུན༌ལ༌ སྲུལ༌ཨིན༌ ཁྱེརས༌, ཏེ༌གུན༌ མ༌ཚད༌ ཁོའ༌ པ༌དན༌ཨ༌རམ༌མི༌ ནང༌ང༌ ཇོར༌ཁན༌ ཞན༌ ནོར༌ ཚང༌མའང༌ ཁུར༌ཏེ༌ ཁོ༌རང༌ངི༌ ཨ༌བ༌ ཨི༌སཱག༌ ཡོད༌སའེ༌ ནས༌ས༌ ཀེ༌ནན༌ལ༌ སོང༌།
GEN 31:19 ཡ༌ཀོབ༌ ཉམ༌པོ༌ ཆའེ༌སང༌ སྔུན༌ལ༌, ལ༌བན༌ ཁོ༌རང༌ངི༌ ལུག༌གུན༌ནི༌ བལ༌ བྲག༌ག༌ ཆའ༌ཅིག༌ རེ༌ཅལ༌ལི༌ ཨ༌བའེ༌ ཁང༌པའེ༌ ནང༌ང༌ ཡོད༌ཁན༌ནི༌ སྐུན༌དྲ༌གུན༌ རྐུས༌།
GEN 31:20 ཡ༌ཀོབ༌བི༌ ཨ༌རམ༌པ༌ ལ༌བན༌ལ༌ ཁོ༌ ཆའད༌ ཟེར༌ཏེ༌ མ༌ཤད༌ད༌ ཁོའ༌ གོབ༌སྐོར༌ ཏངས༌།
GEN 31:21 ཁོའེ༌ ཁོ༌རང༌ང༌ ཡོད༌ཁན༌ ཚང༌མ༌ ཁུར༌ཏེ༌ གྱོགས༌པ༌ ཡུཕ༌རེ༌ཀྲས༌ ལྩངས༌པོ༌ རྒལ༌ཏེ༌ རི༌ ཡུལ༌ གི༌ལེད༌ ཆོགས༌ལ༌ སོང༌།
GEN 31:22 ཞག༌པོ༌ སུམ༌མི༌ སྟིང༌ནེ༌ ལ༌བན༌ལ༌ ཡ༌ཀོབ༌ ཤོར༌ཏོག༌ ཟེར༌ཏེ༌ ཚོར༌།
GEN 31:23 ཁོའེ༌ ཁོ༌རང༌ངི༌ ཉེན༌གྲུང༌གུན༌ ཁྲིད༌ཏེ༌ གི༌ལེད༌དི༌ རི༌ ཡུལ༌ལ༌ ཡ༌ཀོབ༌ ཐུག༌ཐུག༌ ཚོག༌པ༌ ཞག༌པོ༌ རྡུན༌ ཁོའེ༌ གྱབ༌ནེ༌ སོང༌།
GEN 31:24 ཨིན༌ནའང༌ ཚན༌ལ༌ ཨ༌རམ༌པ༌ ལ༌བན༌ལ༌ ཉི༌ལམ༌མི༌ ནང༌ང༌ དཀོན༌མཆོག༌གི༌ སྤང༌ པུད༌ད༌ ཛད༌ཏེ༌ མོལས༌, “སྤེ༌ར༌ ངན༌པ༌ ཟེར༌ཏེ༌ ཡ༌ཀོབ༌བ༌ ཇིགས༌ནང༌ མ༌སྟན༌།”
GEN 31:25 གི༌ལེད༌དི༌ རི༌ ཡུལ༌ལ༌ ཡ༌ཀོབ༌བི༌ ཀུར༌གུན༌ ཙུགས༌ཏེ༌ ཡོད༌སའ༌ ལ༌བན༌ དང༌ ཁོའེ༌ ཉེན༌གྲུང༌གུན༌ ལེབ༌བ༌ཅིག༌ ཁོང༌གུན༌ནིའང༌ ཀུར༌ ཙུགས༌།
GEN 31:26 ལ༌བན༌ནི༌ ཡ༌ཀོབ༌བ༌ ཟེརས༌, “ངའ༌ གོབ༌སྐོར༌ ཏངས༌ཏེ༌ ཁྱོ༌རང༌ངི༌ ཅི༌ ཅོས༌ཏེ༌ ཨིན༌? ཁྱོ༌རང༌ངི༌ ངའེ༌ བུ༌མོ༌གུན༌ མག༌གི༌ ནང༌ང༌ ཟུམ༌ཁན༌ནི༌ ཙོན༌པ༌གུན༌ ཙོགས༌ལ༌ ཟུམས༌ཏེ༌ ཁྱེརས༌།
GEN 31:27 ཁྱོ༌རང༌ངི༌ ངའ༌ གོབ༌སྐོར༌ཏེ༌ ངའ༌ མ༌ཤད༌ད༌ ཅི༌ཕིའ༌ ཤོར༌པིན༌? ངའེ༌ ཁྱོ༌རང༌ ཐད༌པོ༌ ཉམ༌པོ༌ ཀྲམ༌བུ༌རིན༌ དང༌ ཧརྦ༌ ཕུས༌ཏེ༌ ལུ༌ ཏང༌ཨིན༌ ལམ༌ཅུགས༌ཏེ༌ ཡོད༌གྲོ༌།
GEN 31:28 ཁྱོ༌རང༌ངི༌ ངའེ༌ ཚ༌འོ༌གུན༌ལ༌ པུག༌ ཡང༌ ངའེ༌ བུ༌མོ༌གུན༌ལ༌ ཇུ༌ ཟེར༌ མ༌ཅུག༌ག༌ སམ༌བ༌ མེད༌ཁན༌ནི༌ ལས༌ ཅོས༌ཏེ༌ ཨིན༌ནོག༌།
GEN 31:29 ངའ༌ ཁྱོ༌རང༌ང༌ ནོད༌ སྐྱལ༌ཅེས༌སི༌ ཁྱུད༌ ཡོད༌ ཨིན༌ནའང༌ དའང༌ ཚན༌ལ༌ ཁྱོ༌རང༌ངི༌ ཨ༌བའེ༌ དཀོན༌མཆོག༌གི༌ ངའ༌ མོལ༌ལ༌རག༌, ‘སྤེ༌ར༌ ངན༌པ༌ ཟེར༌ཏེ༌ ཡ༌ཀོབ༌བ༌ ཇིགས༌ནང༌ མ༌སྟན༌།’
GEN 31:30 ང༌ ཧ༌གོ༌, ཁྱོ༌རང༌ང༌ ཁྱོ༌རང༌ངི༌ ཨ༌བ༌ ཡོད༌ས༌ ལོགས༌ཏེ༌ ཆ༌ཅེས༌སི༌ དོད༌པ༌ སྲན༌ཏྲེ༌ ཡོད༌པ༌ ཁྱོ༌རང༌ ཤོར༌ ཨིན༌ནའང༌ ཁྱོ༌རང༌ངི༌ ངའེ༌ སྐུན༌དྲ༌གུན༌ ཅིའ༌ རྐུས༌ཏེ༌ ཁྱེར༌པིན༌?”
GEN 31:31 ཡ༌ཀོབ༌བི༌ ལ༌བན༌ལ༌ ལན༌ཏངས༌, “ཉེ༌རང༌ངི༌ ངའེ༌ ཀ༌ནེ༌ ཝང༌ ཉམ༌པོ༌ ཉེ༌རང༌ངི༌ བུ༌མོ༌གུན༌ ཁྱེར༌ར༌ནོག༌ སམ༌ཏེ༌ ང༌ ཇིགས༌།
GEN 31:32 ཨིན༌ནའང༌ ཀལ༌ཏེས༌ ཉེ༌རང༌ང༌ སུ༌ཞིག༌གི༌ ལག༌ག༌ ཉེ༌རང༌ངི༌ སྐུན༌དྲ༌གུན༌ ཐོབ༌ན༌, ཁོ༌ སོད༌། ང༌དང༌ངི༌ ཉེན༌གྲུང༌གུན༌ནི༌ དུན༌ལ༌, ང༌ཞའེ༌ ལག༌ག༌ ཉེ༌རང༌ངི༌ ཅི༌ཞིག༌ ཡོད༌ནའང༌ ཙལ༌ཏེ༌ ཁྱེར༌ར༌ཛད༌།” ཡ༌ཀོབ༌བ༌ རེ༌ཅལ༌ལི༌ སྐུན༌དྲ༌གུན༌ སྐུ༌ཁན༌བོ༌ གྱུས༌ མེད༌པིན༌།
GEN 31:33 ལ༌བན༌ ཡ༌ཀོབ༌, ལི༌ཡ༌ དང༌ ཡོག༌མོ༌ ན༌མ༌ ཉིས༌ཀོའེ༌ ཀུར༌ གུན༌ནི༌ ནང༌ང༌ ཙལ༌ལ༌ སོང༌ ཨིན༌ནའང༌ ཁོའ༌ ཅའང༌ མ༌ཐོབ༌། ཏེ༌ནེ༌ ཁོ༌ རེ༌ཅལ༌ལི༌ ཀུར༌རི༌ ནང༌ང༌ སོང༌།
GEN 31:34 རེ༌ཅལ༌ལི༌ སྐུན༌དྲ༌གུན༌ རྐུས༌ཏེ༌ ཁོ༌རང༌ངི༌ རྔ༌བོང༌ངི༌ གྱབ༌ཆའེ༌ ནང༌ང༌ སྦས༌ཏེ༌ ཁོ༌ གྱབ༌ཆའེ༌ཀ༌ དུགས༌ཏེ༌ ཡོད༌པིན༌། ལ༌བན༌ནི༌ ཀུར༌རི༌ ནང༌ང༌ ཙལས༌ ཨིན༌ནའང༌ ཁོའ༌ ཅའང༌ མ༌ཐོབ༌།
GEN 31:35 རེ༌ཅལ༌ལི༌ ཁོ༌རང༌ངི༌ ཨ༌བ༌ ཟེརས༌, “ཐུགས༌སྲོ༌ མ༌སྐྱོད༌ སྤོན༌བོ༌ལེ༌, ང༌ ཉེ༌རང༌ངི༌ དུན༌ལ༌ ལང༌ཉན༌ཅེས༌ མེད༌ ཅིའ༌ཟེར༌ན༌ ང༌ ཟུགས༌པོ༌ ཞིག༌ཅེས༌སི༌ ཏུས༌པོའེ༌ ནང༌ང༌ ཨིན༌།” ཏེ༌ནེ༌ ལ༌བན༌ནི༌ ཀ༌རུང༌ས༌ ཙལས༌ ཨིན༌ནའང༌ ཁོའེ༌ སྐུན༌དྲ༌གུན༌ མ༌ཐོབ༌།
GEN 31:36 ཏེ༌ནེ༌ ཡ༌ཀོབ༌བ༌ སྲོ༌ ཡོངས༌ ཡང༌ ལ༌བན༌ལ༌ ཁའ༌ སྐྱེས༌ཏེ༌ ཟེརས༌, “ངའེ༌ ཅི༌ ཁྲིམས༌གལ༌ ཅོས༌? ཁྱོ༌རང༌ངི༌ ང༌ འི༌ ཚག༌པ༌ ཏེད༌ཏེ༌ ཁྱོང༌ཅེས༌ ངའེ༌ ཅི༌ སྡིག༌པ༌ ཅོས༌ཏོག༌?
GEN 31:37 ཏ༌ ཁྱོ༌རང༌ངི༌ ངའེ༌ ཅ༌ལག༌ ཚང༌མ༌ ལོངས༌ཏེ༌ ཁྱོ༌རང༌ང༌ ཁྱོ༌རང༌ངི༌ ཨིན༌ཁན༌ ཅ༌ལག༌ ཅི༌ ཐོབ༌? ང༌དང༌ངི༌ ཉེན༌གྲུང༌གུན༌ནི༌ དུན༌ལ༌ ཁྱོང༌ ཡང༌ ང༌དང༌ ཉིས༌ཀོའེ༌ ནང༌ནེ༌ སུ༌ ཀྲང༌པོ༌ ཨིན༌ཁན༌བོ༌ ཁོང༌གུན༌ལ༌ ཐག༌ཅད༌ཅུག༌།”
GEN 31:38 “ང༌ ཁྱོ༌རང༌ ཉམ༌པོ༌ ལོ༌ ཉི༌ཤུ༌ དུགས༌པིན༌། ཏེ༌ཏུས༌ ཁྱོ༌རང༌ངི༌ ལུག༌ དང༌ ར༌མ༌གུན༌ནི༌ ལུ༌གུ༌ དང༌ རི༌གུ༌གུན༌ མ༌ནེ༌ མ༌སྐྱུརས༌ མ༌ཚད༌ ངའེ༌ ཁྱོ༌རང༌ངི༌ ཁྱུའི༌ ནང༌ནེ༌ ར༌བོ༌ གུན༌ནི༌ ཤ༌ མ༌ཟོས༌པིན༌།
GEN 31:39 རི༌ སེམས༌ཅན༌ནི༌ སད༌ཁན༌ནི༌ ར༌ལུག༌གུན༌ ཁྱོ༌རང༌ངི༌ཀ༌ མ༌ཁྱོང༌ང༌ ཏེ༌གུན༌ནི༌ ཀོད༌ཀ༌ ང༌རང༌ངི༌ ཁུར༌པིན༌། ཉི༌མ༌ ཡ༌ ཚན༌ལ༌ རྐུས༌ཏེ༌ ཁྱེར༌ཁན༌གུན༌ལ༌ ངའ༌ རིན༌ ཤལ༌ཅུགས༌།
GEN 31:40 ཏུས༌ མང༌པོ༌ ཉི༌མའེ༌ ཚད༌ དང༌ ཚན༌ ཀྲང༌མོའི༌ བར༌དོ༌ ངའ༌ ཐོང༌, ཡང༌ ཚན༌ མང༌པོ༌ ཉིད༌ མེད༌པ༌ ལུས༌།
GEN 31:41 བུད༌ཁན༌ནི༌ ལོ༌ ཉི༌ཤུ༌ ཁྱོ༌རང༌ ཉམ༌པོ༌ ང༌ དུག༌ ཟ༌ནེ༌ ཏེན༌ན༌ ཙོགས༌ སོང༌། ངའེ༌ ཉེ༌རང༌ངི༌ བུ༌མོ༌གུན༌ནི༌ ཕིའ༌ ལོ༌ ཅུབ༌ཞི༌ ལས༌ ཅོ༌པིན༌ ཡང༌ ཁྱོ༌རང༌ངི༌ ཁྱུ༌གུན༌ནི༌ ཕིའ༌ ལོ༌ དྲུག༌, ཏེ༌བོ༌ མ༌ཚད༌ ཁྱོ༌རང༌ངི༌ ངའེ༌ ལ༌ཆའེ༌ ནང༌ང༌ ལན༌ རྕུ༌ གྱུར༌ཇ༌ ཁྱོངས༌།
GEN 31:42 ཀལ༌ཏེས༌ ངའེ༌ ཨ༌བ༌ དང༌ ཨབ༌ར༌ཧམ༌མི༌ དཀོན༌མཆོག༌ ཀ༌བོའ༌ ཨི༌སཱག༌ ཇིགས༌སད༌, ང༌ ཉམ༌པོ༌ ཞུགས༌ཏེ༌ མེད༌པིན༌ན༌ ཁྱོ༌རང༌ངི༌ ང༌ ལག༌པ༌ སྟོང༌པ༌ ལམ༌ཅུག༌ཏེ༌ ཡོད༌གྲོ༌། ཨིན༌ནའང༌ དཀོན༌མཆོག༌གི༌ ངའེ༌ རྡུག༌ངལ༌ དང༌ རྩོན༌གྲུས༌ གུན༌ ཛིགས༌ཏེ༌ དའང༌ ཚན༌ལ༌ ཁོང༌ངི༌ ཁྱོ༌རང༌ང༌ ཁའ༌སྐྱེའ༌ ཛདས༌།”
GEN 31:43 ལ༌བན༌ནི༌ ཡ༌ཀོབ༌བ༌ ལན༌ཏངས༌, “འི༌ ན༌ཆུང༌གུན༌ ངའེ༌ བུ༌མོ༌, འི༌ ཕྲུ༌གུ༌གུན༌ ངའེ༌ ཚ༌འོ༌ དང༌ ཚ༌མོ༌ ཡང༌ འི༌ ཁྱུ༌གུན༌ ངའེ༌ ཁྱུ༌ ཨིན༌། འི༌ཀ༌ ཁྱོ༌རང༌ངི༌ ཐོང༌ཁན༌ ཚང༌མ༌ ངའེ༌ ཨིན༌ནོག༌། ཏ༌ ངའ༌ ང༌རང༌ངི༌ བུ༌མོ༌གུན༌ དང༌ ཁོང༌གུན༌ནི༌ ཕྲུ༌གུ༌གུན༌ལ༌ ཅའང༌ ཅོ༌ མི༌ཉན༌།
GEN 31:44 ཡོང༌ངའང༌ ང༌དང༌ ཉིས༌ཀོའེ༌ པར༌ལ༌ ཆད༌དོན༌ ཞིག༌ ཅོ༌ཨིན༌ ཀ༌བོ༌ ང༌དང༌གུན༌ནི༌ པར༌ལ༌ སྤང༌པོ༌བོ༌ ཨིན༌ནོག༌།”
GEN 31:45 ཏེ༌ནེ༌ ཡ༌ཀོབ༌བི༌ རྡོའ༌ཞིག༌ ཁུར༌ཏེ༌ ཏེ༌བོ༌ ཀ༌ཝ༌ ཙོགས༌ལ༌ ལངས༌།
GEN 31:46 ཁོའེ༌ ཁོ༌རང༌ངི༌ ཉེན༌གྲུང༌གུན༌ལ༌ ཟེརས༌, “རྡོའ༌ སྤུང༌ཤིག༌།” ཁོང༌གུན༌ནི༌ རྡོའ༌ སྤུངས༌ ཡང༌ ཏེ༌བོའེ༌ དུན༌ལ༌ ཁར༌ཇི༌ ཟོས༌།
GEN 31:47 ལ༌བན༌ནི༌ ཏེ༌ ནས༌ས༌བོའ༌ ཡི༌གར༌ ཤ༌ཧ༌དུ༌ཐ༌ མིང༌ང༌ ཏགས༌ ཨིན༌ནའང༌ ཡ༌ཀོབ༌བི༌ ཏེ༌ ས༌ཀྱད༌པོའེ༌ མིང༌ང༌ ག༌ལིད༌ ཏགས༌།
GEN 31:48 ལ༌བན༌ནི༌ ཟེརས༌ “དི༌རིང༌ ང༌དང༌ ཉིས༌ཀོའེ༌ པར༌ལ༌ འི༌ རྡོའ༌ སྤུང༌ཁན༌བོ༌ སྤང༌པོ༌ ཨིན༌ནོག༌།” ཏེན༌ན༌བོའེ༌ ཕིའ༌ ཏེ༌ ས༌ཆ༌བོའ༌ ག༌ལིད༌ ཟེར༌ར༌ནོག༌།
GEN 31:49 ཁོང༌གུན༌ནི༌ ཏེ༌ ནས༌སའེ༌ མིང༌ང༌ མིཟ༌པཧ༌ཧའང༌ ཏགས༌, ཅིའ༌ཟེར༌ན༌ ལ༌བན༌ནི༌ ཟེརས༌, “ང༌དང༌གུན༌ བེ༌ཏེ༌ ཆའ༌ཅིག༌ ཡ༌ཝའེ༌ ང༌དང༌གུན༌ལ༌ ཟིགས༌ཤིག༌།
GEN 31:50 ཀལ༌ཏེས༌ ཁྱོ༌རང༌ངི༌ ངའེ༌ བུ༌མོ༌གུན༌ལ༌ ནགས༌ སྟན༌ན༌ ཡ༌ ཁྱོ༌རང༌ངི༌ ཞན༌ བུ༌མོ༌ ཉམ༌པོ༌ ན༌མ༌ ཅོ༌ན༌, ངའ༌ ཁྱོ༌རང༌ ཉམ༌པོ༌ མེད༌ནའང༌ ཨིད༌ཏུ༌ བོར༌ དཀོན༌མཆོག༌གི༌ ང༌དང༌ངི༌ ལས༌ ཅོ༌ཁན༌གུན༌ལ༌ ཟིགས༌ས༌ནོག༌།”
GEN 31:51 ལ༌བན༌ནི༌ ཡ༌ཀོབ༌བ༌ ཟེརས༌, “འི༌ཀ༌ རྡོའ༌ སྤུངས༌ཏེ༌ ང༌དང༌ ཉིས༌ཀོའེ༌ པར༌ལ༌ ཀ༌ཝ༌ ཙོགས༌ལ༌ ལངས༌ཏེ༌ ཨིན༌།
GEN 31:52 སྤུང༌གོལ༌ ཅོ༌ཅེས༌ལ༌ ངའ༌ འི༌ རྡོའ༌ སྤུང༌ཁན༌བོ༌ རྒལ༌ཏེ༌ ཁྱོ༌རང༌ ཆོགས༌ལ༌ མི༌ཡོང༌ ཡང༌ ཁྱོ༌རང༌ འི༌བོ༌ རྒལ༌ཏེ༌ ང༌ ཆོགས༌ལ༌ མི༌ཡོང༌ཅེས༌ལ༌, འི༌ རྡོའ༌ སྤུང༌ཁན༌བོ༌ ང༌དང༌ ཉིས༌ཀོའེ༌ པར༌ལ༌ སྤང༌པོ༌ ཨིན༌ནོག༌།
GEN 31:53 ཨབ༌ར༌ཧམ༌ དང༌ ན༌ཧོར༌རི༌ དཀོན༌མཆོག༌, ཡང༌ ཁོང༌གུན༌ནི༌ ཨ༌བའེ༌ དཀོན༌མཆོག༌གི༌ ང༌དང༌ ཉིས༌ཀོའ༌ ཁྲིམས༌ཅད༌ ཛད༌ཤིག༌།” ཏེ༌ནེ༌ ཡ༌ཀོབ༌བི༌ ཁོའེ༌ ཨ༌བ༌ ཨི༌སཱག༌གི༌ ཇིགས༌སི༌ ནང༌ང༌ རྩི༌ཝ༌ ཅོ༌ཁན༌ དཀོན༌མཆོག༌གི༌ ཚན༌ནི༌ ནང༌ང༌ ནའ༌ ཁུརས༌།
GEN 31:54 ཁོའེ༌ ཏེ༌ རི༌ཀ༌ དཀོན༌མཆོག༌ག༌ སེམས༌ཅན༌ ཆོད༌པའ༌ ཕུལ༌ཏེ༌ ཁོ༌རང༌ངི༌ ཉེན༌གྲུང༌གུན༌ གྲོན༌ལ༌ བོདས༌། ཁོང༌གུན༌ནི༌ དོན༌ཏང༌ ཟོ༌ཚར༌ཏེ༌ ཁོང༌གུན༌ནི༌ ཏེ༌ ཚན༌བོ༌ རི༌ཀ༌ ཕུདས༌།
GEN 31:55 ཐོ༌རེ༌ཟུག༌པོ༌ ང༌མོ༌ནེ༌ ལ༌བན༌ནི༌ ཁོ༌རང༌ངི༌ ཚ༌འོ༌, ཚ༌མོ༌ དང༌ བུ༌མོ༌ གུན༌ལ༌ པུག༌ ཏངས༌ཏེ༌ ཇུ༌ ཟེརས༌ ཡང༌ ཁོ༌རང༌ངི༌ ཁང༌པ༌ ལོགས༌ཏེ༌ སོང༌།
GEN 32:1 ཡ༌ཀོབ༌བའང༌ ཏེ༌ཀ༌ནེ༌ ཁོ༌རང༌ངི༌ བེས༌ལ༌ བིང༌ ཡང༌ ཁོའ༌ ཐུག༌ག༌ལ༌ དཀོན༌མཆོག༌གི༌ ཕོ༌ཉ༌གུན༌ སྐྱོདས༌།
GEN 32:2 ཁོང༌གུན༌ ཐོང༌ང༌ཅིག༌ ཁོའེ༌ ཟེརས༌, “འི༌བོ༌ དཀོན༌མཆོག༌གི༌ མག༌མི༌ ཛོམ༌སའེ༌ ནས༌ས༌ ཨིན༌ནོག༌།” ཏེ༌བོའེ༌ཕིའ༌ ཁོའེ༌ ཏེ༌ ས༌ཆ༌བོའེ༌ མིང༌ང༌ མ༌ཧ༌ནཱའིམ༌ ཏགས༌།
GEN 32:3 ཏེ༌ནེ༌ ཡ༌ཀོབ༌བི༌ ཨི༌དོམ༌ ཡུལ༌ལི༌ སེ༌འིར༌རི༌ ས༌ཆའེ༌ ནང༌ང༌ དུག༌ཁན༌ ཁོ༌རང༌ངི༌ ཨ༌ཅོ༌ ཨི༌སུའ༌ ལོན༌ ཁྱེར༌ཁན༌གུན༌ སྔུན༌ལ༌ ལམ༌ཅུགས༌།
GEN 32:4 ཁོའེ༌ ཁོང༌གུན༌ལ༌ ལབ༌ཞ༌ ཏངས༌ཏེ༌ ཟེརས༌, “ཁྱོ༌ཞའེ༌ འི༌ཟུག༌ ཟེར༌གོས༌, ‘སྤོན༌བོ༌ ཨི༌སུ༌ ཉེ༌རང༌ངི༌ ཡོག༌པོ༌ ཡ༌ཀོབ༌བི༌ མོལ༌ལ༌རག༌, དི༌རིང༌ ཚག༌པ༌ ང༌ ལ༌བན༌ ཉམ༌པོ༌ དུགས༌པིན༌།
GEN 32:5 ཡང༌ ངའ༌ བ༌ལང༌, བུང༌བུ༌, ལུག༌ དང༌ ར༌མ༌, ཡོག༌པོ༌ དང༌ ཡོག༌མོ༌ མང༌པོ༌ ཡོད༌། ང༌ ང༌རང༌ངི༌ སྤོན༌བོའེ༌ ཆོགས༌སྐྱོར༌ ཐོབ༌ཅེས༌ལ༌ ངའེ༌ ཁོང༌གུན༌ ཉམ༌པོ༌ ལོན༌ ཀལ༌ལད༌།’”
GEN 32:6 ལོན༌ ཁྱེར༌ཁན༌གུན༌ ཡ༌ཀོབ༌ ཡོད༌ས༌ ལོགས༌ཏེ༌ ལེབས༌ཏེ༌ ཟེརས༌, “ང༌ཞའ༌ ཉེ༌རང༌ངི༌ ཨ༌ཅོ༌ ཨི༌སུ༌ ཡོད༌ས༌ སོང༌པིན༌, ཁོང༌ ཉེ༌རང༌ང༌ ཐུག༌ག༌ལ༌ ཡོང༌ངད༌ ཡང༌ ཁོང༌ ཉམ༌པོ༌ མི༌ ཞིབ༌གྱ༌ དུག༌།”
GEN 32:7 ཡ༌ཀོབ༌ ཇིགས༌ ཡང༌ ཚབས༌, ཁོའེ༌ ཁོ༌ ཉམ༌པོ༌ ཡོད༌ཁན༌ནི༌ མི༌གུན༌ ཡང༌ ལུག༌, ར༌མ༌ དང༌ བ༌ལང༌ གུན༌ནི༌ ཁྱུ༌, ཡང༌ རྔ༌བོང༌གུན༌ སྡེ༌ ཉིས༌སི༌ ནང༌ང༌ བགོས༌།
GEN 32:8 ཁོའེ༌ སམ༌, “ཀལ༌ཏེས༌ ཨི༌སུ༌ ཡོངས༌ཏེ༌ སྡེ༌ ཅིག༌ག༌ སྤུང༌གོལ༌ ཅོ༌ན༌ ཞན༌ སྡེ༌བོ༌ ཤོར༌ཉན༌ཅེས༌ ཨིན༌ནོག༌།”
GEN 32:9 ཏེ༌ནེ༌ ཡ༌ཀོབ༌བི༌ མོས༌ལམ༌ ཞུས༌, “ངའེ༌ མེ༌མེ༌ ཨབ༌ར༌ཧམ༌མི༌ དཀོན༌མཆོག༌ དང༌ ངའེ༌ ཨ༌བ༌ ཨི༌སཱག༌གི༌ དཀོན༌མཆོག༌, ཡ༌ཝ༌ ཉེ༌རང༌ངི༌ ངའ༌ མོལ༌ལ༌ ཛདས༌, ‘རང༌ ཡུལ༌ དང༌ རང༌ངི༌ ཉེན༌གྲུང༌གུན༌ ཡོད༌སའེ༌ ས༌ཆའ༌ ལོགས༌ཏེ༌ སོང༌ ཡང༌ ངའེ༌ ཁྱོ༌རང༌ ཅི༌ཚང༌མའེ༌ ནང༌ང༌ ཐར༌ཁྱེལ༌ ཆ༌ཅུག༌ཨིན༌།’
GEN 32:10 ཉེ༌རང༌ངི༌ ཡོག༌པོའ༌ སྟན༌ན༌ ཛད༌ཁན༌ ཨིད༌ཤེས༌ དང༌ ཐུག༌རྗེ༌ ཚང༌མ༌ ཐོབ༌ཅེས༌སི༌ འོས༌པ༌ ངའ༌ མན༌། ཡོར༌དཱན༌ ལྩངས༌པོ༌ རྒལ༌ཏེ༌ ཆ༌ ཟ༌ནེ༌ ངའེ༌ ལག༌ག༌ རྟེན༌ཅེས༌སི༌ བེར༌ཀ༌བོ༌ མ༌ནེ༌ ཅའང༌ མེད༌པིན༌ ཨིན༌ནའང༌ ཏ༌ ངའེ༌ ལག༌ག༌ སྡེ༌ ཉིས༌ དུག༌།
GEN 32:11 ང༌ ངའེ༌ ཨ༌ཅོ༌ ཨི༌སུའི༌ ཀ༌ནེ༌ སྐྱོབ༌བ༌ ཛད༌ཅེས༌ལ༌ ངའེ༌ མོས༌ལམ༌ ཞུའད༌། ང༌ ཇིགས༌ས༌རག༌ ཅིའ༌ཟེར༌ན༌ ཁོ༌ ཡོངས༌ཏེ༌ སྤུང༌གོལ༌ ཅོས༌ཏེ༌ ང༌ མ༌ཚད༌ ངའེ༌ ན༌མ༌གུན༌ དང༌ ཕྲུ༌གུ༌གུན༌ སད༌སྲིད༌ཅེས༌ ཨིན༌ནོག༌།
GEN 32:12 ཨིན༌ནའང༌ ཉེ༌རང༌ངི༌ མོལ༌ལ༌ ཛདས༌, ‘ངའེ༌ ཁྱོ༌རང༌ ཅི༌ཚང༌མའེ༌ ནང༌ང༌ ཐར༌ཁྱེལ༌ ཅུགས༌ཏེ༌ ཁྱོ༌རང༌ངི༌ པུར༌གྱུད༌ ཚོའེ༌ ཐའ༌མའེ༌ པེ༌མ༌ རྩི༌ མི༌ཉན༌ཅེས༌ ཙོགས༌ གྱུར༌ཅུག༌ཨིན༌།’”
GEN 32:13 ཏེ༌ ཚན༌ལ༌ ཡ༌ཀོབ༌ ཏེན༌ན༌རུ༌ དུགས༌ ཡང༌ ཁོ༌རང༌ང༌ ཡོད༌ཁན༌གུན༌ནི༌ ནང༌ནེ༌ ཁོའེ༌ ཁོ༌རང༌ངི༌ ཨ༌ཅོ༌ ཨི༌སུའི༌ ཕིའ༌ སྐྱེས༌ ལྡམས༌།
GEN 32:14 ཏེ༌གུན༌ ར༌མ༌ 200, ར༌ཕོ༌ 20, ལུག༌ 200, ལུག༌ཕོ༌ 20,
GEN 32:15 རྔ༌བོང༌མོ༌ 30 དང༌ ཏེ༌གུན༌ནི༌ ཕྲུ༌གུ༌གུན༌, བ༌ལང༌ 40 དང༌ ལང༌ཏོ༌ 10, བུང༌མོ༌ 20 དང༌ བུང༌ཕོ༌ 10 ཨིན༌པིན༌།
GEN 32:16 ཁོའེ༌ ཏེ༌གུན༌ནི༌ ཁྱུ༌ སོ༌སོ༌ ཅོས༌ཏེ༌ ཁོ༌རང༌ངི༌ ཡོག༌པོ༌གུན༌ལ༌ སྟ༌སྟོག༌ ཅོ༌ཅུགས༌། ཁོའེ༌ ཁོང༌གུན༌ལ༌ ཟེརས༌, “ངའེ༌ སང༌ སྔུན༌ལ༌ སོང༌ ཨིན༌ནའང༌ ཁྱུ༌གུན༌ནི༌ པར༌ལ༌ པར༌ བོར༌།”
GEN 32:17 ཁོའེ༌ གོ༌མ༌ ཆའ༌ཁན༌ནི༌ ཡོག༌པོའ༌ ལབ༌ཞ༌ ཏངས༌, “ངའེ༌ ཨ༌ཅོ༌ ཨི༌སུ༌ ཐུག༌ཏེ༌ ‘ཁྱོ༌རང༌ངི༌ སྤོན༌བོ༌ སུ༌ ཨིན༌ ཡང༌ ཁྱོ༌རང༌ ཀ༌རུ༌ ཆའད༌། འི༌ སེམས༌ཅན༌ ཚང༌མའ༌ སུའི༌ ཨིན༌ ཟེར༌ཏེ༌ ཏྲི༌ན༌?’
GEN 32:18 ཁྱོ༌རང༌ངི༌ ལན༌ འི༌ཟུག༌ ཏང༌གོས༌, ‘འི༌ ཚང༌མ༌ ཉེ༌རང༌ངི༌ ཡོག༌པོ༌ ཡ༌ཀོབ༌བི༌ ཨིན༌ལེ༌། འི༌ ཚང༌མ༌ ཁོང༌ངི༌ སྤོན༌བོ༌ ཨི༌སུའི༌ ཕིའ༌ སྟགས༌ ཀལ༌ཁན༌གུན༌ ཨིན༌ ཡང༌ ཡ༌ཀོབ༌ ཁོང༌རང༌ ང༌ཞའེ༌ སྟིང༌ནེ༌ ཡོང༌ངད༌ལེ༌།’”
GEN 32:19 ཁོའེ༌ ཉིས༌པ༌ དང༌ སུམ༌པ༌ ཁྱུ༌གུན༌ ཉམ༌པོ༌ ཡོད༌ཁན༌ནི༌ ཡོག༌པོ༌གུན༌ལའང༌ ལབ༌ཞའ༌ ཏངས༌, “ཨི༌སུ༌ ཐུག༌ག༌ཅིག༌ ཁྱོ༌ཞ༌གུན༌ནི༌ ཏེན༌ན༌ ཙོགས༌ ཟེར༌,
GEN 32:20 ‘ཉེ༌རང༌ངི༌ ཡོག༌པོ༌ ཡ༌ཀོབ༌ ང༌ཞའེ༌ སྟིང༌ནེ༌ ཡོང༌ངད༌’ ཟེར༌ཅེས༌པོ༌ རྗེད༌ མ༌གོས༌།” ཡ༌ཀོབ༌བི༌ སམ༌, “ཅི༌གྱུས༌, ངའེ༌ སྟགས༌ ཀལ༌ཁན༌བོའེ༌ ཁོ༌ ཐད༌ཅུགས༌ཏེ༌, སྟིང༌ནེ༌ ང༌ ཐུག༌ག༌ཅིག༌ ཁོའེ༌ ཤགས༌པ༌ ཏངས༌ཏེ༌ ངའ༌ སྙིང༌རྗེ༌ སྟན༌ སྲིད༌ཅེས༌ ཨིན༌ནོག༌།”
GEN 32:21 ཏེ༌བོའེ༌ཕིའ༌ ཁོའེ༌ སྟགས༌ ཚང༌མ༌ ཁོ༌རང༌ངི༌ སང༌ སྔུན༌ལ༌ ཀལས༌, ཨིན༌ནའང༌ ཁོ༌རང༌ ཏེ༌ ཚན༌བོ༌ ཏེན༌ན༌རུ༌ དུགས༌།
GEN 32:22 ཏེན༌ན༌ ཚན༌ལ༌ ཡ༌ཀོབ༌ ལངས༌ཏེ༌ ཁོ༌རང༌ངི༌ ན༌མ༌ ཉིས༌ཀོ༌, ཁོའེ༌ ཚེ༌ཡོག༌ ན༌མ༌ ཉིས༌ཀོ༌, ཁོ༌རང༌ངི༌ ཕྲུ༌གུ༌ ཅུག༌ཤིག༌པོ༌ ཁྲིད༌ཏེ༌ ཡབ༌བོག༌ ལྩངས༌པོ༌ རྒལ༌ཏེ༌ ཆ༌ཅེས༌ལ༌ སོང༌།
GEN 32:23 ཁོའེ༌ ཁོང༌ དང༌ ཁོའེ༌ གྱུ༌ནོར༌ ཚང༌མ༌ ལྩངས༌པོའེ༌ ཕར༌ཀ༌ ཀལ༌ ཚར༌ཏེ༌
GEN 32:24 ཁོ༌རང༌ ཅིག༌པོ༌ ལུས༌ཏེ༌ ཡོད༌ ཟ༌ནེ༌ མི༌ཞིག༌གི༌ ཁོ༌ ཉམ༌པོ༌ ནམ༌ ལང༌ལངས༌ ཚོག༌པ༌ ནོལས༌།
GEN 32:25 མི༌བོའ༌ ནོལ༌ཅེས༌སི༌ ནང༌ང༌ ཁོང༌ མི༌གྱལ༌ཅེས༌པོ༌ ཧ༌གོའ༌ཅིག༌ ཁོང༌ངི༌ ཡ༌ཀོབ༌བི༌ སྤི༌རུས༌པོའ༌ ཆག༌ རྩེས༌ཏེ༌ ཏེ༌བོ༌ ཚིགས༌སི༌ ནང༌ནེ༌ ཕིངས༌ཏངས༌།
GEN 32:26 ཏེ༌ནེ༌ མི༌བོའེ༌ མོལས༌, “ང༌ ཆ༌ཅུག༌, ཉི༌མ༌ ཤར༌དུག༌།” ཡ༌ཀོབ༌བི༌ ལན༌ཏངས༌, “ཉེ༌རང༌ངི༌ ངའ༌ ཅིན༌ལབས༌ སལ༌ཏེ༌ མ༌ནེ༌ ངའེ༌ ཉེ༌རང༌ ཆ༌ མི༌ཅུག༌།”
GEN 32:27 མི༌བོའེ༌ ཏྲིའ༌ ཛདས༌, “ཁྱོ༌རང༌ངི༌ མིང༌ང༌ ཅི༌ ཨིན༌།” ཁོའེ༌ ཟེརས༌, “ཡ༌ཀོབ༌།”
GEN 32:28 ཁོང༌ངི༌ མོལས༌, “ཏ༌ནེ༌ཕར༌ལ༌ ཁྱོ༌རང༌ང༌ ཡ༌ཀོབ༌ མན༌པ༌ ཨིས༌ར༌ཨེལ༌ ཟེར༌ཨིན༌, ཅིའ༌ཟེར༌ན༌ ཁྱོ༌རང༌ངི༌ དཀོན༌མཆོག༌ དང༌ མི༌གུན༌ ཉམ༌པོ༌ རད༌ཏེ༌ ཁྱོ༌རང༌ང༌ གྱལ༌ཁའ༌ ཐོབ༌།”
GEN 32:29 ཡ༌ཀོབ༌བི༌ ཟེརས༌, “ཇུ༌ཇུ༌ ཉེ༌རང༌ངི༌ མིང༌ ཤད༌ད༌ ཛད༌།” ཨིན༌ནའང༌ ཁོང༌ངི༌ ལན༌སལས༌, “ཅི༌ཕིའ༌ ཁྱོ༌རང༌ངི༌ ངའེ༌ མིང༌ ཏྲིའད༌?” ཡང༌ ཁོང༌ངི༌ ཡ༌ཀོབ༌བ༌ ཅིན༌ལབས༌ སལས༌།
GEN 32:30 ཡ༌ཀོབ༌བི༌ ཟེརས༌, “ངའེ༌ ང༌རང༌ངི༌ མིག༌ནེ༌ དཀོན༌མཆོག༌ ཇལ༌ཏེའང༌ ང༌ སོན༌ཏེའ༌ ལུས༌།” ཏེ༌བོའེ༌ཕིའ༌ ཁོའེ༌ ཏེ༌ ས༌ཆ༌བོའེ༌ མིང༌ང༌ པེ༌ནིལ༌ ཏགས༌།
GEN 32:31 ཡ༌ཀོབ༌ པེ༌ནིལ༌ནེ༌ ཆའ༌ ཟ༌ནེ༌ ཉི༌མ༌ ཤར༌, ཡང༌ ཁོའེ༌ སྤི༌རུས༌པོའེ༌ ཞས༌ཏེ༌ ཁོ༌ ཞ༌འོ༌ རྩེའད༌པིན༌།
GEN 32:32 ཏེན༌ན༌བོའེ༌ཕིའ༌ དག༌སའང༌ ཨིས༌ར༌ཨེལ༌པ༌གུན༌ནི༌ སྤི༌ཤ༌ ཟའ༌ མ༌ནོག༌, ཅིའ༌ཟེར༌ན༌ ཡ༌ཀོབ༌བི༌ སྤི༌ཤའེ༌ གྱུས༌པ༌ མ༌སྐྱོན༌ སོང༌ཏེ༌ ཨིན༌པིན༌།
GEN 33:1 ཏེ༌ནེ༌ ཨི༌སུ༌ ཁོ༌རང༌ངི༌ མི༌ ཞིབ༌གྱ༌ ཉམ༌པོ༌ ཡོང༌ང༌ལ༌ ཡ༌ཀོབ༌བི༌ ཐོང༌། ཁོའེ༌ ཕྲུ༌གུ༌གུན༌ ལི༌ཡ༌ དང༌ རེ༌ཅལ༌ གུན༌ནི༌ པར༌ལ༌ གོས༌ ཡང༌ ཚེ༌ཡོག༌ ན༌མ༌ ཉིས༌ཀོའང༌།
GEN 33:2 ཁོའེ༌ ཚེ༌ཡོག༌ ན༌མ༌ ཉིས༌ཀོ༌ དང༌ ཁོང༌གུན༌ནི༌ ཕྲུ༌གུ༌གུན༌ ཚང༌མའེ༌སང༌ དུན༌ལ༌, ཏེ༌ནེ༌ ལི༌ཡ༌ དང༌ ཁོའེ༌ ཕྲུ༌གུ༌གུན༌ ཡང༌ རེ༌ཅལ༌ དང༌ ཡོ༌སེབ༌ སྟིང༌ཇུག༌པོའེ༌ཀ༌ བོརས༌།
GEN 33:3 ཡ༌ཀོབ༌ ཁོང༌གུན༌ནི༌ སྔུན༌ལ༌ སོང༌ ཡང༌ ཨ༌ཅོའེ༌ ཉེ༌མོའ༌ ལེབ༌བ༌ཅིག༌ རྩི༌ཝ༌ ཅོས༌ཏེ༌ ཁོའེ༌ དུན༌ལ༌ ལེབ༌ལེབ༌ ཚག༌པ༌ ཡ༌ཀོབ༌བི༌ ལན༌ རྡུན༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 33:4 ཨིན༌ནའང༌ ཨི༌སུ༌ བང༌ཏངས༌ཏེ༌ ཁོའ༌ ཐུག༌ག༌ལ༌ ཡོངས༌ ཡང༌ ཁོའ༌ ཁྲིལ༌ཏེ༌ པུག༌ ཏངས༌། ཁོང༌ ཉིས༌ཀོ༌ ངུས༌།
GEN 33:5 ཨི༌སུའི༌ གོ༌ སྟགས༌ཏེ༌ ལྟའ༌ཅིག༌ ཁོའ༌ བུ༌མོ༌ དང༌ ཕྲུ༌གུ༌གུན༌ ཐོང༌ ཡང༌ ཁོའེ༌ ཏྲིས༌, “ཁྱོ༌རང༌ ཉམ༌པོ༌ ཡོད༌ཁན༌གུན༌ སུ༌ ཨིན༌?” ཡ༌ཀོབ༌བི༌ ཟེརས༌, “དཀོན༌མཆོག༌གི༌ ཉེ༌རང༌ངི༌ ཡོག༌པོའ༌ ཐུག༌རྗེའེ༌ ཛད༌ཏེ༌ སལ༌ཁན༌ནི༌ ངའེ༌ ཕྲུ༌གུ༌གུན༌ ཨིན༌།”
GEN 33:6 ཏེ༌ནེ༌ ཚེ༌ཡོག༌ ན༌མ༌གུན༌ དང༌ ཁོང༌གུན༌ནི༌ ཕྲུ༌གུ༌གུན༌ ཡོངས༌ ཡང༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 33:7 ཏེ༌ སྟིང༌ནེ༌ ལི༌ཡ༌ དང༌ ཁོའེ༌ ཕྲུ༌གུ༌གུན༌ ཡང༌ སྟིང༌ཇུག༌ག༌ ཡོ༌སེབ༌ དང༌ རེ༌ཅལ༌ ཡོངས༌ཏེ༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 33:8 ཨི༌སུའི༌ ཏྲིས༌, “ངའ༌ ཐུག༌ག༌ལ༌ ཀལ༌ཁན༌ནི༌ མི༌ དང༌ སེམས༌ཅན༌ གུན༌ནི༌ ཏོན༌ ཅི༌ ཨིན༌?” ཡ༌ཀོབ༌བི༌ ལན༌ཏངས༌, “སྤོན༌བོ༌, ཉེ༌རང༌ངི༌ ཆོགས༌སྐྱོར༌ ཐོབ༌ཅེས༌ལ༌ ཨིན༌ལེ༌།”
GEN 33:9 ཨིན༌ནའང༌ ཨི༌སུའི༌ ཟེརས༌, “ངའ༌ ང༌རང༌ང༌ མ༌མང༌པོ༌ ཡོད༌། ནོ༌, ཁྱོ༌རང༌ངི༌ ཨིན༌ཁན༌གུན༌ རང༌ངི༌ ཕིའ༌ བོར༌།”
GEN 33:10 ཡ༌ཀོབ༌བི༌ ཟེརས༌, “མན༌, ཇུ༌ཇུ༌ ཀལ༌ཏེས༌ ཉེ༌རང༌ངི༌ ངའ༌ ཆོགས༌སྐྱོར༌ ཛད༌ཏེ༌ ཨིན༌ན༌ འི༌ སྟགས༌གུན༌ ལེན༌ན༌ ཛད༌། ཉེ༌རང༌ངི༌ ཞལ༌དོང༌ ཐོང༌ཅེས༌པོ༌ ནི༌ དཀོན༌མཆོག༌གི༌ ཞལ༌དོང༌ ཇལ༌ཁན༌ ཙོགས༌ ཨིན༌ནོག༌ ཅིའ༌ཞུ༌ན༌ ཉེ༌རང༌ངི༌ ངའེ༌ཀ༌ ཐུག༌རྗེ༌ ཛད༌ཏེ༌ ཨིན༌ནོག༌།
GEN 33:11 ཇུ༌ཇུ༌ ངའེ༌ ཉེ༌རང༌ང༌ ཁྱོང༌ཁན༌ནི༌ སྟགས༌གུན༌ ནམས༌ས༌ ཛད༌ ཅིའ༌ཞུ༌ན༌ དཀོན༌མཆོག༌གི༌ ངའེ༌ཀ༌ ཐུག༌རྗེ༌ ཛད༌ཏེ༌ ངའ༌ སྒོས༌དོམ༌ ཚང༌མ༌ སལས༌།” ཡ༌ཀོབ༌བི༌ འུ༌ཙུག༌ ཏངས༌པ༌ ཨི༌སུའི༌ ཏེ༌གུན༌ ལེནས༌།
GEN 33:12 ཨི༌སུའ༌ ཟེརས༌, “ང༌དང༌ངི༌ བེས༌པོ༌ ཡང༌སྐྱར༌ གོ༌ཟུག༌ ཨིན༌ ཡང༌ ང༌ ཁྱོ༌རང༌ ཉམ༌པོ༌ ཆེན༌།”
GEN 33:13 ཡ༌ཀོབ༌བི༌ ཟེརས༌, “ངའེ༌ སྤོན༌བོ༌, ཕྲུ༌གུ༌གུན༌ འུ༌ཐུགས༌ ཡང༌ ཕྲུ༌གུ༌གུན༌ལ༌ འོ༌མ༌ སྟེར༌ཁན༌ནི༌ ལུག༌ དང༌ བ༌ལང༌ གུན༌ནི༌ ཕིའ༌ ང༌ སམ༌བ༌ ཏང༌ གོ༌ཤེས༌པོ༌ ཉེ༌རང༌ངི༌ ཧ༌གོའ༌ནོག༌། ཀལ༌ཏེས༌ ཏེ༌གུན༌ ཞག༌ཅིག༌གའང༌ གྱོགས༌པ༌ སྲུལ༌ན༌ ཏེ༌གུན༌ ཤི༌ཨིན༌།
GEN 33:14 ཇུ༌ཇུ༌ ཉེ༌རང༌ ངའེ༌ སང༌ སྔུན༌ལ༌ སྐྱོད༌། ང༌ ཕྲུ༌གུ༌གུན༌ དང༌ ཀྲུད༌ཏྲོའེ༌ ཁྱུ༌ ཉམ༌པོ༌ ཀུ༌ལེ༌ ཀུ༌ལེའ༌ སེ༌འིར༌ལ༌ ལེབ༌ལེབ༌ ཚག༌པ༌ ཉེ༌རང༌ངི༌ སྟིང༌རང༌ནེ༌ ཡོང༌ཨིན༌།”
GEN 33:15 ཨི༌སུའི༌ ཟེརས༌, “ང༌ ངའེ༌ མི༌ ཁ༌ཅིག༌ ཁྱོ༌རང༌ ཉམ༌པོ༌ བོར༌ཅུག༌།” ཡ༌ཀོབ༌བི༌ ལན༌ཏངས༌, “ཏེ༌ཟུག༌ མ༌ཛད༌། ངའེ༌ ཕིའ༌ ཉེ༌རང༌ངི༌ ཐུག༌རྗེ༌བོ༌ ཙམ༌ ཐད༌ཐད༌ ཨིན༌།”
GEN 33:16 ཏེ༌ནེ༌ ཨི༌སུ༌ ཏེན༌ན༌ ཞག༌ག༌ ལོགས༌ཏེ༌ ཁོ༌རང༌ངི༌ ལམ༌མི༌ཀ༌ སེ༌འིར༌ ཆོགས༌ལ༌ སོང༌།
GEN 33:17 ཨིན༌ནའང༌ ཡ༌ཀོབ༌ སུ༌ཀོད༌ལ༌ སོང༌ ཀ༌རུ༌ ཁོའེ༌ ཁོང༌རང༌ངི༌ ཕིའ༌ ཁང༌པ༌ རྩིགས༌ ཡང༌ སེམས༌ཅན༌ ཚང༌མ༌ ཕིའ༌ དུགས༌ས༌ ཅོས༌། ཏེན༌ན༌བོའེ༌ཕིའ༌ ཏེ༌ ས༌ཀྱད༌པོའེ༌ མིང༌ང༌ སུ༌ཀོད༌ ཟེར༌ར༌ནོག༌།
GEN 33:18 པ༌དན༌ཨ༌རམ༌ནེ༌ བིང༌ཏེ༌ ཡ༌ཀོབ༌ ཀེ༌ནན༌ ཡུལ༌ཇོངས༌སི༌ ཤེ༌ཀེམ༌ གྱལ༌སའ༌ ཁམ༌ཟང༌ ལེབ༌ ཡང༌ གྱལ༌ས༌ དང༌ ཉེ༌མོའ༌ ཀུར༌གུན༌ ཙུགས༌ཏེ༌ དུགས༌།
GEN 33:19 ཡ༌ཀོབ༌བི༌ ཁོང༌ དུག༌སའེ༌ ས༌ཀྱད༌པོ༌ ཤེ༌ཀེམ༌མི༌ ཨ༌བ༌ ཧ༌མོར༌རི༌ པུར༌གྱུད༌གུན༌ནི༌ ཀ༌ནེ༌ མུལ༌ལི༌ པེ༌ནེ༌ 100 ཉོས༌།
GEN 33:20 ཁོའེ༌ ཏེ༌ཀ༌ ཆོད༌ཁྲི༌ཞིག༌ རྩིགས༌ཏེ༌ ཏེ༌བོའ༌ ཨེལ༌ ཨེ༌ལོ༌ཧི༌ ཨིས༌ར༌ཨེལ༌ ༼ཡང༌ན༌ དཀོན༌མཆོག༌, ཨིས༌ར༌ཨེལ༌པའེ༌ དཀོན༌མཆོག༌༽ ཟེར༌ཏེ༌ མིང༌ ཏགས༌།
GEN 34:1 ལོ༌ ཁ༌ཅིག༌གི༌ སྟིང༌ནེ༌, ཞག༌ཤིག༌ ཡ༌ཀོབ༌ དང༌ ལི༌ཡའེ༌ བུ༌མོ༌ དི༌ནཱ༌ ཏེ༌ ནས༌སའེ༌ ནང༌ང༌ དུག༌ཁན༌ བུ༌མོ༌གུན༌ལ༌ ཐུག༌ག༌ སོང༌།
GEN 34:2 ཨིན༌ནའང༌ ཏེ༌ ནས༌སའེ༌ ཝང༌སྲུལ༌པ༌ ཧིཝ༌པ༌ ཧ༌མོར༌རའི༌ བུ༌ཚ༌ ཤེ༌ཀེམ༌མི༌ དི༌ནཱ༌ ཐོང༌ང༌ཅིག༌, ཁོའེ༌ ཁོ༌ ཟུམས༌ཏེ༌ ཝང༌ ཉམ༌པོ༌ ལུས༌བྲེལ༌ ཅོས༌།
GEN 34:3 ཁོའེ༌ སེམས༌ དི༌ནཱའེ༌ཀ༌ སོང༌ཏེ༌ ཁོ༌ ཁོའེ༌ཀ༌ མ༌སྲན༌ཏྲེ༌ ཐད༌ ཡང༌ སྤེ༌ར༌ ལྡེ༌མོ༌ ཉམ༌པོ༌ ཁོའེ༌ ཡ༌ཤ༌ ཐོབ༌ཅེས༌སི༌ རྩོན༌གྲུས༌ ཅོས༌།
GEN 34:4 ཁོའེ༌ ཁོ༌རང༌ངི༌ ཨ༌བ༌ ཧ༌མོར༌ལ༌ ཟེརས༌, “འི༌ བུ༌མོ༌བོ༌ ངའ༌ ན༌མའ༌ ཁྱོང༌།”
GEN 34:5 ཡ༌ཀོབ༌བ༌ ཁོའེ༌ བུ༌མོ༌ ཉམ༌པོ༌ ངན༌པ༌ ཆའ༌ཁན༌བོ༌ གྱུས༌སོང༌, ཁོའེ༌ བུ༌ཚ༌གུན༌ སེམས༌ཅན༌གུན༌ ཉམ༌པོ༌ ཕི༌ལོག༌ག༌ ཡོད༌ པ༌སང༌ ཁོང༌གུན༌ ལོགས༌ཏེ༌ ཡོང༌ཡོང༌ ཚོག༌པ༌ ཁོའེ༌ སུའང༌ ཅའང༌ མ༌ཟེརས༌།
GEN 34:6 ཤེ༌ཀེམ༌མི༌ ཨ༌བ༌ ཧ༌མོར༌ ཡ༌ཀོབ༌བ༌ སྤེ༌ར༌ ཏང༌ང༌ལ༌ ཡོངས༌།
GEN 34:7 ཡ༌ཀོབ༌བི༌ བུ༌ཚ༌གུན༌ ཞིང༌ནེ༌ ལེབས༌ཏེ༌ སྲིང༌མོ༌ ཉམ༌པོ༌ ངན༌པ༌ ཆའ༌ཁན༌བོ༌ ཚོར༌ར༌ཅིག༌ ཁོང༌གུན༌ལ༌ མ༌སྲན༌ཏྲེ༌ སྲོ༌ ཡོངས༌ ཅིའ༌ཟེར༌ན༌ ཤེ༌ཀེམ༌མི༌ ཝང༌ ཉམ༌པོ༌ ཁོང༌ངི༌ སྲིང༌མོའ༌ ལུས༌བྲེལ༌ ཅོས༌ཏེ༌ ཡ༌ཀོབ༌བི༌ ནང༌ཚངས༌སི༌ཀ༌ ཁྲེལ༌བ༌ ཁྱོངས༌ཏེ༌ ཨིན༌པིན༌, ཏེ༌ཟུག༌ ལས༌ ཅོ༌ཅེས༌པོ༌ འོས༌པ༌ མན༌པིན༌།
GEN 34:8 ཧ༌མོར༌རི༌ ཁོང༌གུན༌ལ༌ ཟེརས༌, “ངའེ༌ བུ༌ཚ༌ ཤེ༌ཀེམ༌མི༌ ཉེ༌རང༌ངི༌ བུ༌མོའ༌ སྙིང༌ནེ༌ ཡ༌ཤ༌ ཅོ༌རུག༌། ཐུག༌རྗེ༌ ཛད༌ཏེ༌ ཁོའ༌ དི༌ནཱ༌ ཉམ༌པོ༌ བག༌སྟོན༌ ཅོ༌ཅུག༌ག༌ ཛད༌།
GEN 34:9 ང༌ཞའེ༌ བུ༌མོ༌གུན༌ ཁྱོ༌ཞའེ༌ བུ༌ཚ༌གུན༌ ཉམ༌པོ༌ ཡང༌ ཁྱོ༌ཞའེ༌ བུ༌མོ༌གུན༌ ང༌ཞའེ༌ བུ༌ཚ༌གུན༌ ཉམ༌པོ༌ བག༌སྟོན༌ ཅོ༌ཅུག༌།
GEN 34:10 ཉེ༌ཞའ༌ ང༌ཞའེ༌ ཡུལ༌ལ༌ དུག༌ནའང༌ གྲིག༌, འི༌ ས༌ཀྱད༌པོ༌ ཉེ༌ཞའེ༌ ཕིའ༌ ཕེས༌ཏེ༌ ཨིན༌ ཉེ༌ཞའ༌ ཀ༌རུ༌ ཐད༌ནའང༌ དུགས༌ཏེ༌ ཉོབ༌ཚོང༌ ཏོང༌ ཡང༌ ཁྱོ༌ཞ༌རང༌ངི༌ ཕིའ༌ གྱུ༌ནོར༌ ཅོས༌།”
GEN 34:11 ཤེ༌ཀེམ༌མི༌ དི༌ནཱའེ༌ ཨ༌བ༌ དང༌ མིང༌བོ༌གུན༌ལ༌ ཟེརས༌, “འི༌ ཐུག༌རྗེ༌བོ༌ ངའེ༌ཀ༌ ཛད༌ ཡང༌ ངའེ༌ ཉེ༌ཞའེ༌ ཅི༌ཏོང༌ མོལ༌ནའང༌ ཏང༌ཨིན༌།
GEN 34:12 ན༌མའེ༌ རིན༌ ཅོའད༌ ཡང༌ རིན༌ཅན༌ སྐྱེས༌ ངའ༌ ཁྱོང༌ ཟེར༌ཁན༌གུན༌ ངའེ༌ ཁྱོང༌ཨིན༌། ངའ༌ ན༌མ༌ ཅོ༌ཅེས༌ལ༌ དི༌ནཱ༌ ཅིག༌པོ༌ སལ༌།”
GEN 34:13 ཤེ༌ཀེམ༌མི༌ ཁོང༌གུན༌ནི༌ སྲིང༌མོའ༌ ངན༌པ༌ ཅོས༌ཏེ༌ ཨིན༌ པ༌སང༌ ཡ༌ཀོབ༌བི༌ བུ༌ཚ༌གུན༌ནི༌ ཤེ༌ཀེམ༌ དང༌ ཁོའེ༌ ཨ༌བ༌ ཧ༌མོར༌ལ༌ གོབ༌སྐོར༌ཏེ༌ ལན༌ཏངས༌།
GEN 34:14 ཁོང༌གུན༌ནི༌ ཁོང༌གུན༌ལ༌ ཟེརས༌, “ང༌ཞའེ༌ སྲིང༌མོ༌ སུན༌ནད༌ མ༌ཅོ༌ཁན༌ནི༌ མི༌ཞིག༌ག༌ མི༌ཏང༌། ཏེ༌བོ༌ ང༌ཞའེ༌ ཕིའ༌ ཁྲེལ༌བ༌ ཨིན༌ནོག༌།
GEN 34:15 ཨིན༌ནའང༌ ཁྱོ༌ཞ༌ དང༌ ཁྱོ༌ཞའེ༌ བུ༌ཚ༌གུན༌ནི༌ སུན༌ནད༌ ཅོས༌ཏེ༌ ང༌ཞའ༌ ཙོགས༌ གྱུར༌ན༌, ཁྱོ༌རང༌ངི༌ ཁོ༌ ཉམ༌པོ༌ བག༌སྟོན༌ ཅོ༌ནའང༌ གྲིག༌།
GEN 34:16 ཏེ༌ནེ༌ ང༌ཞའེ༌ བུ༌མོ༌གུན༌ ཁྱོ༌ཞའ༌ ཏང༌ཉིན༌ ཡང༌ ཁྱོ༌ཞའེ༌ བུ༌མོ༌གུན༌ ཉམ༌པོ༌ ང༌ཞའེ༌ བག༌སྟོན༌ ཅོ༌ཨིན༌། ཡང༌ ང༌ཞ༌གུན༌ ཁྱོ༌ཞའ༌ ཉམ༌པོ༌ དུགས༌ཏེ༌ ང༌དང༌གུན༌ གྱལ༌ཁག༌ ཅིག༌ གྱུར༌ཨིན༌།
GEN 34:17 ཨིན༌ནའང༌ ཀལ༌ཏེས༌ ཁྱོ༌ཞ༌ སུན༌ནད༌ ཅོའ༌ མ༌ཐད༌ན༌ ཏེ༌ནེ༌ ང༌ཞའ༌ ང༌ཞ༌རང༌ངི༌ སྲིང༌མོ༌ ཁྲིད༌ཏེ༌ འི༌ ས༌ཀྱད༌པོ༌ ཕངས༌ཏེ༌ ཆེན༌།”
GEN 34:18 ཁོང༌གུན༌ནི༌ ཟེར༌ཁན༌བོ༌ ཧ༌མོར༌ དང༌ ཁོའེ༌ བུ༌ཚ༌ ཤེ༌ཀེམ༌མ༌ འོས༌པ༌ ཚོར༌།
GEN 34:19 ཤེ༌ཀེམ༌ ཡ༌ཀོབ༌བི༌ བུ༌མོའ༌ མ༌སྲན༌ཏྲེ༌ ཐད༌པ༌ ཏུས༌ གོད༌ལ༌ མ༌ཏང༌ང༌ ཁོང༌གུན༌ནི༌ ཟེར༌ཁན༌བོ༌ ཅོ༌ཅེས༌ལ༌ ཁའ༌ ཆམས༌། ཁོ༌ ཁོ༌རང༌ངི༌ ནང༌ཚངས༌སི༌ ཚང༌མའེ༌ སང༌ ཀུས༌པ༌ཅན༌ནི༌ བུ༌ཚ༌བོ༌ ཨིན༌པིན༌།
GEN 34:20 ཏེ༌ནེ༌ ཧ༌མོར༌ དང༌ ཁོའེ༌ བུ༌ཚ༌ ཤེ༌ཀེམ༌ གྱལ༌སའེ༌ གྱས༌སྒོའེ༌ཀ༌ སོང༌ ཡང༌ གྱལ༌སའེ༌ འུ༌སྐྱོང༌གུན༌ ཉམ༌པོ༌ སྤེ༌ར༌ ཏངས༌། ཁོང༌གུན༌ནི༌ ཟེརས༌,
GEN 34:21 “འི༌ མི༌གུན༌ནི༌ ཀ༌ནེ༌ ང༌དང༌གུན༌ལ༌ ཅའང༌ ཇིགས༌པ༌ མི༌དུག༌, ཁོང༌གུན༌ནའང༌ ང༌དང༌ངི༌ ས༌ཀྱད༌དི༌ཀ༌ དུག༌ཅུགས༌ཏེ༌ ཚོང༌ ཅོ༌ཅུག༌ཨིན༌, འི༌ ས༌ཆ༌བོའེ༌ ནང༌ང༌ ཁོང༌གུན༌ནའང༌ ཆུད༌ཅེས༌ དུག༌། ཡང༌ ང༌དང༌གུན༌ནི༌ ཁོང༌ངི༌ བུ༌མོ༌གུན༌ ཉམ༌པོ༌ ཡང༌ ཁོང༌གུན༌ནི༌ ང༌དང༌ངི༌ བུ༌མོ༌གུན༌ ཉམ༌པོ༌ བག༌སྟོན༌ ཅོ༌ཉན༌ཅེས༌ ཨིན༌ནོག༌།
GEN 34:22 ཨིན༌ནའང༌ ང༌དང༌གུན༌ནི༌ ང༌དང༌ངི༌ བུ༌ཚ༌ ཚང༌མའེ༌ སུན༌ནད༌ ཅོས༌ཏེ༌ ཁོང༌གུན༌ ཙོགས༌ གྱུར༌ཏེ༌ མ༌ནེ༌ ཁོང༌ ང༌དང༌གུན༌ ཉམ༌པོ༌ གྱལ༌ཁག༌ ཅིག༌ མི༌གྱུར༌ ཟེར༌དུག༌།
GEN 34:23 ཁོང༌གུན༌ནི༌ སེམས༌ཅན༌ དང༌ གྱུ༌ནོར༌ ཚང༌མ༌ ང༌དང༌གུན༌ནི༌ མི༌གྱུར༌ར༌? ཏེ༌བོའེ༌ཕིའ༌ ང༌དང༌གུན༌ནི༌ ཁའ༌ ཆམས༌ཏེ༌ ཁོང༌གུན༌ ང༌དང༌ངི༌ ཕྲོའ༌ དུག༌ཅུག༌ཨིན༌།”
GEN 34:24 ཧ༌མོར༌ དང༌ ཤེ༌ཀེམ༌མི༌ ཟེར༌ཁན༌བོའེ༌ཀ༌ ཡུལ༌པ༌ ཚང༌མ༌ ཁའ༌ ཆམས༌ཏེ༌ བུ༌ཚ༌ ཚང༌མའ༌ སུན༌ནད༌ ཅོ༌ཅུགས༌།
GEN 34:25 ཞག༌ སུམ༌པའེ༌ ཞག༌ག༌ བུ༌ཚ༌གུན༌ནི༌ སུན༌ནད༌ ཅོ༌ཁན༌ནི༌ མ༌ཁའ༌ མ༌གྱལ༌ལ༌ ཡོད༌ཏུས༌ ཡ༌ཀོབ༌བི༌ བུ༌ཚ༌ ཉིས༌ སི༌མེ༌འོན༌ དང༌ ལི༌ཝི༌, དི༌ནཱའེ༌ ཨ༌ཅོ༌གུན༌ནི༌ ར༌འི༌ ཁུར༌ཏེ༌ ཧུན༌མེད༌ལ༌ གྱལ༌སའེ༌ཀ༌ སྤུང༌གོལ༌ ཅོས༌ཏེ༌ བུ༌ཚ༌ ཚང༌མ༌ སདས༌།
GEN 34:26 ཁོང༌གུན༌ནི༌ ཧ༌མོར༌ དང༌ ཁོའེ༌ བུ༌ཚ༌ ཤེ༌ཀེམ༌མའང༌ སདས༌ ཡང༌ ཁོའེ༌ ཁང༌པ༌ནེ༌ དི༌ནཱ༌ ཁྲིད༌ཏེ༌ སོང༌།
GEN 34:27 ཁོང༌གུན༌ནི༌ སྲིང༌མོའ༌ ངན༌པ༌ ཅོ༌ཁན༌བོའེ༌ ལན༌ཏངས༌ཏེ༌ ཡ༌ཀོབ༌བི༌ ཞན༌ བུ༌ཚ༌གུན༌ནི༌ གྱལ༌ས༌བོ༌ ཅོམས༌།
GEN 34:28 ཁོང༌གུན༌ནི༌ ར༌ལུག༌ དང༌ བ༌ལང༌ངི༌ ཁྱུ༌, བུང༌བུ༌གུན༌ ཡང༌ གྱལ༌ས༌ དང༌ ཞིང༌ངི༌ཀ༌ ཡོད༌ཁན༌ ཚང༌མ༌ ཁྱེརས༌།
GEN 34:29 ཁོང༌གུན༌ནི༌ ཁང༌པའེ༌ ནང༌ང༌ ཡོད༌ཁན༌ གྱུ༌ནོར༌, བུ༌མོ༌ དང༌ ཕྲུ༌གུ༌ ཚང༌མ༌ ཅོམས༌ཏེ༌ ཁྱེརས༌།
GEN 34:30 ཡ༌ཀོབ༌བི༌ སི༌མེ༌འོན༌ དང༌ ལི༌ཝི༌ ཟེརས༌, “ཁྱོ༌ཞའེ༌ ངའེ༌ཀ༌ ནགས༌ ཁྱོངས༌ཏེ༌ ཨིན༌ནོག༌། ཀེ༌ནན༌པ༌, པེ༌རིཟ༌པ༌ དང༌ འི༌ ནས༌སའེ༌ ནང༌ང༌ དུག༌ཁན༌ ཚང༌མའེ༌ ང༌དང༌ང༌ ནཕ༌རད༌ ཅོ༌རུག༌། ང༌དང༌གུན༌ མང༌པོ༌ཞིག༌ མེད༌ཏེ༌ ཨིན༌ནོག༌། ཀལ༌ཏེས༌ ཁོང༌ ཚང༌མའ༌ ང༌དང༌ངི༌ གྱབ༌གལ༌ལ༌ ཅིག༌ སོང༌ཏེ༌ ང༌དང༌ངི༌ཀ༌ སྤུང༌གོལ༌ ཅོ༌ན༌ ང༌དང༌ངི༌ ནང༌ཚངས༌ ཚང༌མ༌ མེད༌ཁན༌ ཆེན༌།”
GEN 34:31 ཨིན༌ནའང༌ ཁོང༌གུན༌ནི༌ ལན༌ཏངས༌, “ཁོའེ༌ ང༌ཞའེ༌ སྲིང༌མོའ༌ ཟུགས༌ཙོང༌མ༌ ཙོགས༌ ཅོ༌གོས༌ས༌?”
GEN 35:1 ཏེ༌ནེ༌ དཀོན༌མཆོག༌གི༌ ཡ༌ཀོབ༌བ༌ མོལས༌, “བེ༌ཐེལ༌ལ༌ སོང༌ ཡང༌ ཏེ༌རུ༌ ཚུགས༌ཏེ༌ དུག༌། ཏེ༌རུ༌, ཁྱོ༌རང༌ ཁྱོ༌རང༌ངི༌ ཨ༌ཅོ༌ ཨི༌སུ༌ནེ༌ ཤོར༌ཏེ༌ ཆ༌ ཟ༌ནེ༌ ཁྱོ༌རང༌ངི༌ ཇལ༌ཁན༌ དཀོན༌མཆོག༌གི༌ ཕིའ༌ ཆོད༌ཁྲི༌ཞིག༌ རྩིག༌།”
GEN 35:2 ཏེ༌ནེ༌ ཡ༌ཀོབ༌བི༌ ཁོ༌རང༌ངི༌ ནང༌ཚངས༌ དང༌ ཁོ༌རང༌ ཉམ༌པོ༌ ཡོད༌ཁན༌ ཚང༌མ༌ལ༌ ཟེརས༌, “ཁྱོ༌ཞའེ༌ ཕྲོའ༌ ཡོད༌ཁན༌ ཏད༌པ༌ མེད༌ཁན༌ནི༌ སྐུན༌དྲ༌གུན༌ ཕངས༌ཏེ༌ ཁྱོ༌ཞ༌རང༌གུན༌ རྩང༌མ༌ ཅོས༌ ཡང༌ ཀོས༌ལག༌གུན༌ སྤོས༌།
GEN 35:3 ཏེ༌ནེ༌ ཡོང༌ ང༌དང༌གུན༌ བེ༌ཐེལ༌ལ༌ ཆེན༌ ཀ༌རུ༌ ངའེ༌ དཀོན༌མཆོག༌གི༌ ཕིའ༌ ཆོད༌ཁྲི༌ཞིག༌ རྩིག༌ཨིན༌། ཁོང༌ངི༌ ང༌ བར༌དོའེ༌ ནང༌ང༌ ཡོད༌ ཟ༌ནེ༌ ང༌ རོགས༌ ཛད༌ཏེ༌ ང༌ ཀ༌རུ༌ ཆ༌ནའང༌ ཉམ༌པོ༌ ཞུགས༌ཏེ༌ ཡོད༌པིན༌།”
GEN 35:4 ཏེ༌ནེ༌ ཁོང༌གུན༌ནི༌ ཁོ༌རང༌གུན༌ནི༌ ལག༌ག༌ ཡོད༌ཁན༌ སྐུན༌དྲ༌ ཚང༌མ༌ དང༌ ནམ༌ཅོག༌གི༌ ཨ༌ལོང༌གུན༌ ཡ༌ཀོབ༌བ༌ ཏངས༌། ཁོའེ༌ ཏེ༌གུན༌ ཤེ༌ཀེམ༌མི༌ ཉེ༌མོའ༌ ཡོད༌ཁན༌ནི༌ འོག༌གི༌ ལྕང༌མའེ༌ ཡོག༌ག༌ སུབས༌།
GEN 35:5 ཏེ༌ནེ༌ ཁོང༌གུན༌ བེས༌ལ༌ བིང༌ང༌ཅིག༌ དཀོན༌མཆོག༌གི༌ ཉེ༌ཁོར༌རི༌ གྲོང༌ཁྱེར༌རི༌ ནང༌ང༌ དུག༌ཁན༌གུན༌ལ༌ སྲན༌ཏྲེ༌ ཇིགས༌ཤུག༌ག༌ ཛད༌ཅེས༌པོའེ༌ སུ༌ཞིག༌གིའང༌ ཁོང༌གུན༌ལ༌ ཏེད༌ཏེ༌ མ༌ཁྱོངས༌།
GEN 35:6 ཡ༌ཀོབ༌ དང༌ ཁོ༌ ཉམ༌པོ༌ ཡོད༌ཁན༌ནི༌ མི༌གུན༌ ཀེ༌ནན༌ནི༌ ནང༌ང༌ ལུཟ༌ ༼ཡང༌ན༌ བེ༌ཐེལ༌༽ ཟེར༌ཁན༌ནི༌ ནས༌ས༌ ལེབ༌།
GEN 35:7 ཁོའེ༌ ཏེ༌རུ༌ ཆོད༌ཁྲི༌ཞིག༌ རྩིགས༌, ཡང༌ ཏེ༌ ནས༌ས༌བོའ༌ ཨེལ༌ བེ༌ཐེལ༌ ༼ཡང༌ན༌ བེ༌ཐེལ༌ལི༌ དཀོན༌མཆོག༌༽ ཟེར༌ཏེ༌ མིང༌ ཏགས༌, ཅིའ༌ཟེར༌ན༌ ཏེན༌ན༌རུ༌ དཀོན༌མཆོག༌གི༌ ཁོང༌རང༌ ཡ༌ཀོབ༌བ༌ སྔོན༌ཅུག༌ག༌ ཛདས༌ ནམ༌ ཁོ༌ ཁོ༌རང༌ངི༌ ཨ༌ཅོ༌ ཨི༌སུ༌ནེ༌ ཤོར༌ཏེ༌ སོང༌།
GEN 35:8 ཏ༌ ར༌བེ༌ཀའེ༌ མ༌ རྒད༌མོ༌ ཡ༌ཏོ༌ དྲེབ༌རཧ༌ ཤི༌ ཡང༌ ཁོའེ༌ སྤུར༌ བེ༌ཐེལ༌ནེ༌ ཐུར༌ལ༌ ཡོད༌ཁན༌ནི༌ འོག༌གི༌ ལྕང༌མའེ༌ ཡོག༌ག༌ སུབས༌ ཡང༌ ཏེ༌བོའ༌ འེ༌ལོན༌ བ༌ཁཐ༌ ༼ཡང༌ན༌ ངུ༌སའེ༌ འོག༌༽ མིང༌ང༌ ཏགས༌།
GEN 35:9 ཡ༌ཀོབ༌ པ༌དན༌ཨ༌རམ༌ནེ༌ ལོགས༌ཏེ༌ ཡོང༌ཏེ༌ སྟིང༌ནེ༌ ཁོའ༌ དཀོན༌མཆོག༌ ཡང༌སྐྱར༌ ཇལ༌ ཡང༌ ཅིན༌ལབས༌ སལས༌།
GEN 35:10 དཀོན༌མཆོག༌གི༌ ཁོའ༌ མོལས༌, “ཁྱོ༌རང༌ངི༌ མིང༌ ཡ༌ཀོབ༌ ཨིན༌ནོག༌ ཨིན༌ནའང༌ ཏ༌ནེ༌ཕར༌ལ༌ ཁྱོ༌རང༌ངི༌ མིང༌ང༌ ཡ༌ཀོབ༌ མན༌པ༌ ཨིས༌ར༌ཨེལ༌ ཟེར༌ཨིན༌།” ཏེ༌བོའེ༌ཕིའ༌ དཀོན༌མཆོག༌གི༌ ཁོའེ༌ མིང༌ང༌ ཨིས༌ར༌ཨེལ༌ ཏག༌ག༌ ཛད༌།
GEN 35:11 དཀོན༌མཆོག༌གི༌ ཁོའ༌ མོལས༌, “ངའ༌ ཀུན༌ཝང༌ དཀོན༌མཆོག༌ ཨིན༌, ཕྲུ༌གུ༌ སྐྱེ༌ཅུགས༌ཏེ༌ ཁྱོ༌རང༌ངི༌ པུར༌གྱུད༌ གྱས༌ཅུག༌། ཁྱོ༌རང༌ངི༌ པུར༌གྱུད༌ནེ༌ གྱལ༌ཁམས༌ མང༌པོ༌ དང༌ གྱལ༌པོ༌གུན༌ བིང༌ཨིན༌།
GEN 35:12 ཨབ༌ར༌ཧམ༌ དང༌ ཨི༌སཱག༌ག༌ ཏང༌ཁན༌ནི༌ ས༌ཆ༌བོ༌ ངའེ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཏང༌ཨིན༌།”
GEN 35:13 ཏེ༌ནེ༌ དཀོན༌མཆོག༌, ཁོའ༌ ཞལ༌ཏ༌ སལ༌ཁན༌ནི༌ ས༌ཆའེ༌ ཀ༌ནེ༌ ཀེན༌ལ༌ སྐྱོདས༌།
GEN 35:14 དཀོན༌མཆོག༌གི༌ ཞལ༌ཏ༌ སལ༌ཁན༌ནི༌ ས༌ཆའེ༌ཀ༌ ཡ༌ཀོབ༌བི༌ རྡོའ༌ ཆེན༌མོ༌ ཞིག༌ ཀ༌ཝ༌ ཙོགས༌ལ༌ ལངས༌ཏེ༌ ཏེ༌བོའེ༌ཀ༌ ཆང༌ དང༌ ཨོ༌ལིཝ༌ཝི༌ མར༌ནག༌ ལུགས༌།
GEN 35:15 དཀོན༌མཆོག༌གི༌ ཁོའ༌ ཞལ༌ཏ༌ སལ༌ཁན༌ནི༌ ས༌ཆ༌བོའ༌ ཁོའེ༌ བེ༌ཐེལ༌ མིང༌ང༌ ཏགས༌།
GEN 35:16 ཡ༌ཀོབ༌ དང༌ ཁོའེ༌ ནང༌ཚངས༌, བེ༌ཐེལ༌ནེ༌ ཡང༌སྐྱར༌ བེས༌ལ༌ བིང༌, ཁོང༌གུན༌ ཏ༌རུང༌ ཨེ༌ཕ༌རེད༌ནེ༌ ཐག༌རིང༌ང༌ ཡོད༌ཏུས༌ རེ༌ཅལ༌ལ༌ ཕྲུ༌གུ༌ ཇོར༌ཅེས༌སི༌ ཏུས༌པོ༌ ལེབས༌ཏེ༌ ཁོའ༌ སྐྱེ༌ཟེར༌ སྲན༌ཏྲེ༌ ཡོངས༌།
GEN 35:17 ཁོའ༌ སྐྱེ༌ཟེར༌ སྲན༌ཏྲེ༌ ཡོང༌ ཟ༌ནེ༌, རོགས༌ ཅོ༌ཨིན༌ ཡོད༌ཁན༌ནི༌ བུ༌མོའེ༌ ཁོའ༌ ཟེརས༌, “ཇིགས༌ མ༌ཇིགས༌, ཁྱོ༌རང༌ང༌ ཡང༌ བུ༌ཚ༌ཞིག༌ ཇོར༌དུག༌།”
GEN 35:18 རེ༌ཅལ༌ལི༌ སྟིང༌ཇུག༌གི༌ འུགས༌པོ༌ ལེན༌ཨིན༌ ཁོ༌རང༌ངི༌ བུ༌ཚའེ༌ མིང༌ང༌ བིན༌འོ༌ནི༌ ཏགས༌ ༼ཀ༌བོའེ༌ ཏོན༌ རྡུག༌པོའེ༌ བུ༌ཚ༌༽ ཨིན༌ནའང༌ ཁོའེ༌ ཨ༌བའེ༌ བུ༌ཚའེ༌ མིང༌ང༌ བེན༌ཡཱ༌མིན༌ ཏགས༌ ༼ཀ༌བོའེ༌ ཏོན༌ ངའེ༌ ལག༌པ༌ ཡས༌པའེ༌ བུ༌ཚ༌།༽
GEN 35:19 ཏེ༌ནེ༌ རེ༌ཅལ༌ ཤི༌ ཡང༌ ཨེ༌ཕ༌རེད༌ལ༌ ཆ༌སའེ༌ ལམ༌མི༌ཀ༌ ཁོའེ༌ སྤུར༌ སུབས༌ ཀ༌བོའ༌ དག༌ས༌ བེད༌ལེ༌ཧེམ༌ ཟེར༌ར༌ནོག༌།
GEN 35:20 ཁོའེ༌ སྤུར༌ཁང༌ངི༌ཀ༌ ཡ༌ཀོབ༌བི༌ ཀ༌ཝ༌ ཙོགས༌ལ༌ རྡོའ༌ རྩིགས༌། རེ༌ཅལ༌ལི༌ སྤུར༌ཁང༌ངི༌ཀ༌ རྡོའ༌ རྩིགས༌ཁན༌ནི༌ སྟགས༌ དག༌སའང༌ ཡོད༌ཏེ༌ ཨིན༌ནོག༌།
GEN 35:21 ཏ༌ ཨིས༌ར༌ཨེལ༌ ཡང༌ན༌ ཡ༌ཀོབ༌བི༌ ཡང༌སྐྱར༌ བེས༌ གོ༌ཟུགས༌ཏེ༌ ལྷོ༌ ཆོགས༌ལ༌ སོང༌ ཡང༌ ཁོ༌རང༌ངི༌ ཀུར༌བོ༌ མིག༌དལ༌ ཨེ༌དར༌ནེ༌ འ༌ཟམ༌མ༌ སོང༌ཏེ༌ ཙུགས༌།
GEN 35:22 ཨིས༌ར༌ཨེལ༌ ཏེ༌ ས༌ཆའེ༌ ནང༌ང༌ དུག༌ ཟ༌ནེ༌ རུ༌བེན༌ནི༌ ཁོ༌རང༌ངི༌ ཨ༌བའེ༌ ཚེ༌ཡོག༌ ན༌མ༌ བིལ༌ལཧ༌ ཉམ༌པོ༌ ལུས༌བྲེལ༌ ཅོས༌ ཡང༌ ཨིས༌ར༌ཨེལ༌ལ༌ གྱུས༌སོང༌། ཨིས༌ར༌ཨེལ༌ ཡང༌ན༌ ཡ༌ཀོབ༌བ༌ ཕྲུ༌གུ༌ རྕུག༌ཉིས༌ ཡོད༌པིན༌།
GEN 35:23 ལི༌ཡའེ༌ བུ༌ཚ༌གུན༌: རུ༌བེན༌ ཡ༌ཀོབ༌བི༌ གོ༌སྐྱེས༌, སི༌མེ༌འོན༌, ལི༌ཝི༌, ཡ༌ཧུ༌དཱ༌, ཨིས༌ས༌ཁར༌ དང༌ ཟེ༌བུ༌ལོན༌།
GEN 35:24 རེ༌ཅལ༌ལི༌ བུ༌ཚ༌གུན༌: ཡོ༌སེབ༌ དང༌ བེན༌ཡཱ༌མིན༌།
GEN 35:25 རེ༌ཅལ༌ལི༌ ཡ༌ཏོ༌ བུ༌མོ༌ བིལ༌ལཧའེ༌ བུ༌ཚ༌གུན༌: དཱན༌ དང༌ ནཕ༌ཐལ༌ལི༌།
GEN 35:26 ལི༌ཡའེ༌ ཡ༌ཏོ༌ བུ༌མོ༌ ཟིལ༌པཧའེ༌ བུ༌ཚ༌གུན༌: གཱད༌ དང༌ ཨ༌ཤེར༌། ཁོང༌གུན༌ པ༌དན༌ཨ༌རམ༌མི༌ ནང༌ང༌ སྐྱེས༌ཁན༌ ཡ༌ཀོབ༌བི༌ བུ༌ཚ༌གུན༌ ཨིན༌པིན༌།
GEN 35:27 ཡ༌ཀོབ༌ ཁོང༌རང༌ངི༌ ཨ༌བ༌ ཨི༌སཱག༌ ཡོད༌ས༌ མམ༌རེའ༌ ལོགས༌ཏེ༌ ཡོངས༌ ཀ༌བོ༌ ཀི༌རི༌འཐ༌ ཨར༌བ༌ ༼ཡང༌ན༌ ཧེབ༌རོན༌ནི༌༽ ཉེ༌མོའ༌ ཡོད༌པིན༌ ཀ༌རུ༌ ཨབ༌ར༌ཧམ༌ དང༌ ཨི༌སཱག༌ གུན༌ དུག༌གད༌པིན༌།
GEN 35:28 ཨི༌སཱག༌ ལོ༌ 180 སོན༌ཏེའ༌ ལུས༌།
GEN 35:29 ཏེ༌ནེ༌ མི༌ཚེ༌ རིང༌མོ༌ཞིག༌གི༌ སྟིང༌ནེ༌ ཁོའེ༌ སྟིང༌ཇུག༌གི༌ འུགས༌པོ༌ ལེན༌ཏེ༌ བྲོངས༌ ཡང༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌། ཁོའེ༌ བུ༌ཚ༌ ཨི༌སུ༌ དང༌ ཡ༌ཀོབ༌བི༌ ཁོའེ༌ སྤུར༌ སུབས༌།
GEN 36:1 འི༌བོ༌ ཨི༌སུའི༌ པུར༌གྱུད༌གུན༌ ཨིན༌ནོག༌, ཁོའ༌ ཨི༌དོམ༌མའང༌ ཟེར༌རད༌པིན༌།
GEN 36:2 ཨི༌སུའི༌ ཀེ༌ནན༌མ༌ བུ༌མོ༌གུན༌ ཉམ༌པོ༌ བག༌སྟོན༌ ཅོས༌, ཁོང༌གུན༌ ཧེད༌པ༌ ཨི༌ལོན༌ནི༌ བུ༌མོ༌ ཨ༌ད༌, ཨ༌ནཧའེ༌ བུ༌མོ༌, ཧིཝ༌པ༌ ཟི༌བི༌འོན༌ནི༌ ཚ༌མོ༌ ཨོ༌ཧོ༌ལི༌བ༌མཧ༌,
GEN 36:3 ཡང༌ ཨིཤ༌མ༌ཨེལ༌ལི༌ བུ༌མོ༌ དང༌ ནེ༌བཱའེ༌འོད༌དི༌ སྲིང༌མོ༌ བེས༌མད༌ ཨིན༌པིན༌།
GEN 36:4 ཨི༌སུའི༌ ན༌མ༌ ཨ༌དའ༌ ཨེ༌ལི༌ཕས༌ ཡང༌ བེས༌མེད༌ལ༌ རི༌འུལ༌ བུ༌ཚ༌ གུན༌ སྐྱེས༌,
GEN 36:5 ཡང༌ ཨོ༌ཧོ༌ལི༌བ༌མཧ༌ ཡི༌འུཤ༌, ཡ༌ལམ༌ དང༌ ཀོ༌རཧ༌ གུན༌ སྐྱེས༌། ཁོང༌ ཚང༌མ༌ ཀེ༌ནན༌ནི༌ ཡུལ༌ལ༌ སྐྱེས༌ཁན༌ ཨི༌སུའི༌ བུ༌ཚ༌གུན༌ ཨིན༌པིན༌།
GEN 36:6 ཏེ༌ནེ༌ ཨི༌སུའི༌ ཁོ༌རང༌ངི༌ ན༌མ༌གུན༌, བུ༌ཚ༌གུན༌, བུ༌མོ༌གུན༌ ཡང༌ ཁོ༌རང༌ངི༌ ནང༌མི༌ ཚང༌མ༌, ར༌ལུག༌ དང༌ ཞན༌ ཀྲུད༌ཏྲོ༌ གུན༌ ཡང༌ ཁོ༌རང༌ང༌ ཀེ༌ནན༌ནི༌ ནང༌ང༌ ཇོར༌ཁན༌ནི༌ ནོར༌གུན༌ ཁུར༌ཏེ༌ ཡ༌ཀོབ༌ནེ༌ ཐག༌རིང༌ང༌ ཡང༌ ས༌ཆ༌ཞིག༌ག༌ སོང༌
GEN 36:7 ཅིའ༌ཟེར༌ན༌ ཁོང༌གུན༌ལ༌ གྱུར༌ནོར༌ མ༌མང༌པོ༌ ཡོད༌ཅེས༌པའེ༌ ཏེ༌ ས༌ཆ༌བོའེ༌ ནང༌ང༌ ཁོང༌གུན༌ དང༌ ཁོང༌གུན༌ནི༌ སེམས༌ཅན༌ ཚང༌མའེ༌ ཕིའ༌ ཟ༌གྱུ༌ དྲན༌དྲའ༌ བིང༌ མ༌ཐུབ༌།
GEN 36:8 ཏེ༌བོའེ༌ཕིའ༌ ཨི༌སུ༌ ཡང༌ན༌ ཨི༌དོམ༌, སེ༌འིར༌ རི༌ལྗོངས༌སི༌ ནང༌ང༌ དུགས༌།
GEN 36:9 འི༌བོ༌ སེ༌འིར༌ རི༌ལྗོངས༌སི༌ ནང༌ང༌ དུག༌ཁན༌ ཨི༌དོམ༌པ༌གུན༌ནི༌ ཨ༌བ༌ ཨི༌སུའི༌ པུར༌གྱུད༌གུན༌ ཨིན༌ནོག༌།
GEN 36:10 ཨི༌སུའི༌ བུ༌ཚ༌གུན༌ནི༌ མིང༌ ནི༌ ཨི༌སུའི༌ ན༌མ༌ ཨ༌དའེ༌ བུ༌ཚ༌ ཨེ༌ལི༌ཕས༌ དང༌ ཨི༌སུའི༌ ན༌མ༌ བེས༌མེད༌དི༌ བུ༌ཚ༌ རི༌འུལ༌།
GEN 36:11 ཨེ༌ལི༌ཕས༌སི༌ བུ༌ཚ༌གུན༌ ནི༌ ཏི༌མན༌, ཨོ༌མར༌, ཟེ༌ཕོ༌, ག༌ཏམ༌ དང༌ ཀི༌ནཟ༌ གུན༌ ཨིན༌ནོག༌།
GEN 36:12 ཨི༌སུའི༌ བུ༌ཚ༌ ཨེ༌ལི༌ཕས༌སི༌ ཚེ༌ཡོག༌ ན༌མ༌ ཏིམ༌ན༌, ཨ༌མ༌ལིཀ༌ བུ༌ཚ༌བོ༌ སྐྱེས༌། ཁོང༌གུན༌ ཨི༌སུའི༌ ན༌མ༌ ཨ༌དའེ༌ ཚ༌འོ༌གུན༌ ཨིན༌ནོག༌།
GEN 36:13 ཡང༌ རི༌འུལ༌ལི༌ བུ༌ཚ༌གུན༌ ནི༌ ན༌ཧད༌, ཟེ༌རཧ༌, ཤམ༌མཧ༌ དང༌ མི༌ཟཧ༌ གུན༌ ཨིན༌ནོག༌། ཁོང༌གུན༌ ཨི༌སུའི༌ ན༌མ༌ བེས༌མེད༌དི༌ ཚ༌འོ༌གུན༌ ཨིན༌ནོག༌།
GEN 36:14 ཨི༌སུའི༌ ན༌མ༌, ཨ༌ནཧའེ༌ བུ༌མོ༌ དང༌ ཟི༌བི༌འོན༌ནི༌ ཚ༌མོ༌ ཨོ༌ཧོ༌ལི༌བ༌མཧའེ༌ བུ༌ཚ༌ གུན༌ནི༌ ཡི༌འུཤ༌, ཡ༌ལམ༌ དང༌ ཀོ༌རཧ༌ ཨིན༌ནོག༌།
GEN 36:15 འི༌གུན༌ འུ༌སྐྱོང༌ གྱུར༌ཁན༌ནི༌ ཨི༌སུའི༌ པུར༌གྱུད༌གུན༌ ཨིན༌ནོག༌། ཨི༌སུའི༌ གོ༌སྐྱེས༌ ཨེ༌ལི༌ཕས༌སི༌ བུ༌ཚ༌ ཏི༌མན༌, འོ༌མར༌, ཟེ༌ཕོ༌, ཀི༌ནཟ༌
GEN 36:16 ཀོ༌རཧ༌, ག༌ཏམ༌ དང༌ ཨ༌མ༌ལིཀ༌ གུན༌ ཨིན༌ནོག༌། ཁོང༌གུན༌ ཨི༌དོམ༌མི༌ ནང༌ང༌ དུག༌ཁན༌ ཨེ༌ལི༌ཕས༌སི༌ པུར༌གྱུད༌གུན༌ནི༌ འུ༌སྐྱོང༌གུན༌ ཡང༌ ཨ༌དའེ༌ ཚ༌འོ༌གུན༌ ཨིན༌པིན༌།
GEN 36:17 ཨི༌སུའི༌ བུ༌ཚ༌ རི༌འུལ༌ལི༌ བུ༌ཚ༌གུན༌ ནི༌ ན༌ཧད༌, ཟེ༌རཧ༌, ཤམ༌མཧ༌ དང༌ མི༌ཟཧ༌ གུན༌ ཨིན༌པིན༌, ཁོང༌གུན༌ ཨི༌དོམ༌མི༌ ནང༌ང༌ དུག༌ཁན༌ རི༌འུལ༌ལི༌ པུར༌གྱུད༌གུན༌ནི༌ འུ༌སྐྱོང༌གུན༌ ཡང༌ ཨི༌སུའི༌ ན༌མ༌ བེས༌མེད༌དི༌ ཚ༌འོ༌གུན༌ ཨིན༌པིན༌།
GEN 36:18 ཨི༌སུའི༌ ན༌མ༌ ཨོ༌ཧོ༌ལི༌བ༌མཧའེ༌ བུ༌ཚ༌གུན༌ ནི༌ ཡི༌འུཤ༌, ཡ༌ལམ༌ དང༌ ཀོ༌རཧ༌ གུན༌ ཨིན༌པིན༌། ཁོང༌གུན༌ ཨ༌ནཧའེ༌ བུ༌མོ༌ ཨི༌སུའི༌ ན༌མ༌ ཨོ༌ཧོ༌ལི༌བ༌མཧའེ༌ པུར༌གྱུད༌གུན༌ནི༌ འུ༌སྐྱོང༌གུན༌ ཨིན༌པིན༌།
GEN 36:19 ཏེ༌གུན༌ ཨི༌སུའི༌ པུར༌གྱུད༌གུན༌, ཏེ༌ མི༌སྡེ༌ ཚང༌མ༌ ཨི༌སུ༌ ཡང༌ན༌ ཨི༌དོམ༌མི༌ གྱུད༌ཟིན༌གུན༌ ཨིན༌ནོག༌།
GEN 36:20 ཨི༌སུའི༌ སང༌ སྔུན༌ལ༌ ཏེ༌ ནས༌སའེ༌ ནང༌ང༌ དུག༌ཁན༌ ཧོར༌པ༌ སེ༌འིར༌རི༌ བུ༌ཚ༌གུན༌ ནི༌ ལོ༌ཏན༌, ཤོ༌བལ༌, ཟི༌བིའོན༌, ཨ༌ནཧ༌,
GEN 36:21 དི༌ཤོན༌, ཨེ༌ཟར༌ དང༌ དི༌ཤན༌ གུན༌ ཨིན༌ནོག༌། ཁོང༌གུན༌ ཧོར༌པ༌གུན༌ནི༌ འུ༌སྐྱོང༌གུན༌ ཨིན༌པིན༌།
GEN 36:22 ལོ༌ཏན༌ནི༌ བུ༌ཚ༌གུན༌ ནི༌ ཧོ༌རི༌ དང༌ ཧོ༌མམ༌ ཡང༌ ཏིམ༌ན༌ ལོ༌ཏན༌ནི༌ སྲིང༌མོ༌ ཨིན༌པིན༌།
GEN 36:23 ཤོ༌བལ༌ལི༌ བུ༌ཚ༌གུན༌ ནི༌ ཨལ༌ཝན༌, མ༌ནཧ༌ཧད༌, ཨེ༌བལ༌, ཤི༌པོ༌ དང༌ འོ༌ནམ༌ གུན༌ ཨིན༌པིན༌།
GEN 36:24 ཟི༌བི༌འོན༌ནི༌ བུ༌ཚ༌གུན༌ ནི༌ ཨའེ༌ དང༌ ཨ༌ནཧ༌ ཨིན༌པིན༌། ༼ཨ༌ནཧ༌, ཁོ༌རང༌ངི༌ ཨ༌བའེ༌ བུང༌བུ༌གུན༌ ཚོ༌ ཟ༌ནེ༌ རི༌སྟོང༌ངི༌ ནང༌ང༌ ཆུ༌ཚན༌ ཐོབ༌ཁན༌བོ༌ ཨིན༌ནོག༌།༽
GEN 36:25 ཨ༌ནཧའེ༌ ཕྲུ༌གུ༌གུན༌ ནི༌ དི༌ཤོན༌ དང༌ ཨོ༌ཧོ༌ལི༌བ༌མཧ༌ ཨིན༌པིན༌, ཨོ༌ཧོ༌ལི༌བ༌མཧ༌ ནི༌ ཨ༌ནཧའེ༌ བུ༌མོ༌ ཨིན༌ནོག༌།
GEN 36:26 དི༌ཤོན༌ནི༌ བུ༌ཚ༌གུན༌ ནི༌ ཧེམ༌དན༌, ཨེཤ༌བན༌, ཨི༌ཐན༌ དང༌ ཀི༌རན༌ གུན༌ ཨིན༌པིན༌།
GEN 36:27 ཨེ༌ཟར༌རི༌ བུ༌ཚ༌གུན༌ ནི༌ བིལ༌ཧན༌, ཟ༌ཝན༌ དང༌ ཨ༌ཀེན༌ གུན༌ ཨིན༌པིན༌།
GEN 36:28 དི༌ཤན༌ནི༌ བུ༌ཚ༌གུན༌ ནི༌ ཨུཟ༌ དང༌ ཨ༌རན༌ གུན༌ ཨིན༌པིན༌།
GEN 36:29 ཧོར༌པ༌གུན༌ནི༌ འུ༌སྐྱོང༌གུན༌ ལོ༌ཏན༌, ཤོ༌བལ༌, ཟི༌བིའོན༌, ཨ༌ནཧ༌,
GEN 36:30 དི༌ཤོན༌, ཨེ༌ཟར༌ དང༌ དི༌ཤན༌ གུན༌ ཨིན༌ནོག༌, ཡང༌ ཁོང༌གུན༌ སེ༌འིར༌ ཡུལ༌ཇོངས༌སི༌ ནང༌ང༌ དུག༌ཁན༌ ཧོར༌པ༌གུན༌ནི༌ འུ༌སྐྱོང༌གུན༌ ཨིན༌པིན༌།
GEN 36:31 ཨིས༌ར༌ཨེལ༌པ༌གུན༌ནི༌ གྱལ༌པོའེ༌ ཝང༌སྲུལ༌ལི༌ སང༌ སྔུན༌ལ༌ ཨི༌དོམ༌ ཡུལ༌ལི༌ ནང༌ང༌ འི༌ གྱལ༌པོ༌གུན༌ནི༌ ཝང༌སྲུལ༌ལད༌པིན༌།
GEN 36:32 བེ༌འོར༌རི༌ བུ༌ཚ༌ བི༌ལ༌ ཨི༌དོམ༌མི༌ གྱལ༌པོ༌ གྱུར༌ ཡང༌ ཁོའེ༌ གྱལ༌སའ༌ དིན༌ཧ༌བད༌ ཟེར༌རད༌པིན༌།
GEN 36:33 བི༌ལ༌ ཤིའ༌ཅིག༌ བོཟ༌རཧ༌ གྱལ༌ས༌ནེ༌ ཨིན༌ཁན༌ ཟེ༌རཧའེ༌ བུ༌ཚ༌ ཡོ༌བབ༌ གྱལ༌པོ༌ གྱུར༌།
GEN 36:34 ཡོ༌བབ༌ ཤིའ༌ཅིག༌ ཏི༌མན༌པའེ༌ ཡུལ༌ནེ༌ ཨིན༌ཁན༌ ཧུ༌ཤམ༌ གྱལ༌པོ༌ གྱུར༌།
GEN 36:35 ཧུ༌ཤམ༌ ཤིའ༌ཅིག༌ བེ༌དད༌དི༌ བུ༌ཚ༌ ཧ༌དད༌ གྱལ༌པོ༌ གྱུར༌། མོ༌འབ༌ ཡུལ༌ལི༌ ནང༌ང༌ མི༌དིའན༌པ༌གུན༌ལ༌ ཕམ༌ཀལ༌ཁན༌བོ༌ ཁོ༌ ཨིན༌པིན༌ ཡང༌ ཁོའེ༌ གྱལ༌སའ༌ ཨ༌ཝེད༌ ཟེར༌རད༌པིན༌།
GEN 36:36 ཧ༌དད༌ ཤིའ༌ཅིག༌ མས༌རེ༌ཀཧ༌ནེ༌ ཨིན༌ཁན༌ སམ༌ལཧ༌ གྱལ༌པོ༌ གྱུར༌།
GEN 36:37 སམ༌ལཧ༌ ཤིའ༌ཅིག༌ ལྩངས༌པོའེ༌ ཐའ༌མའ༌ ཡོད༌ཁན༌ རེ༌ཧོ༌བོཐ༌ནེ༌ ཨིན༌ཁན༌ ཤོལ༌ གྱལ༌པོ༌ གྱུར༌།
GEN 36:38 ཤོལ༌ ཤིའ༌ཅིག༌ ཨཀ༌བོར༌རི༌ བུ༌ཚ༌ བའལ༌ ཧ༌ནན༌ གྱལ༌པོ༌ གྱུར༌།
GEN 36:39 ཨཀ༌བོར༌རི༌ བུ༌ཚ༌ བའལ༌ ཧ༌ནན༌ ཤིའ༌ཅིག༌ ཧ༌དད༌ གྱལ༌པོ༌ གྱུར༌ ཡང༌ ཁོའེ༌ གྱལ༌ས༌ པ༌འུ༌ ཟེར༌རད༌པིན༌། ཁོའེ༌ ན༌མ༌ ནི༌ མི༌ཧེ༌ཏ༌བེལ༌ ཨིན༌ ཁོ༌ མཏ༌རེད༌དི༌ བུ༌མོ༌ དང༌ མི༌ཟ༌ཧབ༌བི༌ ཚ༌མོ༌ ཨིན༌པིན༌།
GEN 36:40 འི༌གུན༌ སྡེ༌ དང༌ ཡུལ༌ཇོངས༌ སོ༌སོ༌ ནང༌ཞིན༌ ཨི༌སུའི༌ པུར༌གྱུད༌དི༌ འུ༌སྐྱོང༌གུན༌ནི༌ མིང༌ ཨིན༌ནོག༌། ཏེ༌གུན༌ ནི༌ ཏིམ༌ན༌, ཨལ༌ཝ༌, ཡི༌ཐེད༌,
GEN 36:41 ཨོ༌ཧོ༌ལི༌བ༌མཧ༌, ཨེ༌ལཧ༌, པི༌ནོན༌,
GEN 36:42 ཀི༌ནཟ༌, ཏི༌མན༌, མིབ༌ཟར༌,
GEN 36:43 མག༌དེལ༌ དང༌ ཨི༌རམ༌ ཨིན༌ནོག༌། ཏེ༌གུན༌ ཨི༌དོམ༌མི༌ འུ༌སྐྱོང༌གུན༌ ཨིན༌པིན༌, ཀ༌བོ༌ ཁོང༌རང༌གུན༌ནི༌ ས༌ཀྱད༌ ཟུམས༌ཏེ༌ ཚུགས༌ཏེ༌ དུག༌ཁན༌ ནང༌ཞིན༌ ཐོགས༌ཏེ༌ ཨིན༌ནོག༌། ཁོང༌གུན༌ ཨི༌དོམ༌པའེ༌ ཕ༌མེས༌པོ༌ ཨི༌སུའི༌ པུར༌གྱུད༌གུན༌ ཨིན༌ནོག༌།
GEN 37:1 ཡ༌ཀོབ༌ ཀེ༌ནན༌ནི༌ ནང༌ང༌ ཁོའེ༌ ཨ༌བ༌ དུག༌སའེ༌ ཏེན༌ན༌ ཡུལ༌ལ༌ དུགས༌།
GEN 37:2 ཡང༌ འི༌བོ༌ ཡ༌ཀོབ༌བི༌ ནང༌ཚངས༌སི༌ ལོ༌རྒྱུས༌ ཨིན༌ནོག༌། ཡོ༌སེབ༌ ལོ༌ ཅུབ༌དུན༌ ཆའ༌ཁན༌ནི༌ ཞུ༌ནུ༌, ཁོའེ༌ ཨ༌བའེ༌ ན༌མ༌ བིལ༌ལཧ༌ དང༌ ཟིལ༌པཧའེ༌ བུ༌ཚ༌ ཁོ༌རང༌ངི༌ ཨ༌ཅོ༌གུན༌ ཉམ༌པོ༌ ར༌ལུག༌ ཚོའད༌པིན༌, ཨ༌ཅོ༌གུན༌ནི༌ ལས༌ ངན༌པ༌ ཅོ༌ཁན༌ཞིག༌གི༌ སྐོར༌ ཁོའེ༌ ཨ༌བ༌ ཤདས༌།
GEN 37:3 ཡ༌ཀོབ༌བི༌ ཡོ༌སེབ༌བ༌ ཁོ༌རང༌ངི༌ ཞན༌ བུ༌ཚ༌གུན༌ནི༌ སང༌ མང༌ང༌ ཡ༌ཤ༌ ཅོའད༌པིན༌ ཅིའ༌ཟེར༌ན༌ ཁོ༌ སྒས༌ཏེ༌ ཡོད༌ ཟ༌ནེ༌ ཡོ༌སེབ༌ སྐྱེས༌ཏེ༌ ཨིན༌པིན༌། ཁོའེ༌ ཡོ༌སེབ༌བི༌ ཕིའ༌ མིག༌སལ༌ ཀོས༌ཤིག༌ ཙེམ༌ཅུགས༌།
GEN 37:4 ཁོའེ༌ ཨ༌ཅོ༌གུན༌ནི༌ ཁོང༌གུན༌ནི༌ ཨ༌བའེ༌ ཡོ༌སེབ༌བ༌ ཚང༌མའེ༌སང༌ མང༌ང༌ ཡ༌ཤ༌ ཅོ༌ཅེས༌པོ༌ ཐོང༌ང༌ཅིག༌, ཁོང༌གུན༌ནི༌ ཁོའ༌ ནཕ༌རད༌ ཅོས༌ཏེ༌ ཁོ༌ ཉམ༌པོ༌ སྤེ༌ར༌ ལྡེ༌མོའ༌ ཏང༌ང༌ མེད༌པིན༌།
GEN 37:5 ཡོ༌སེབ༌བ༌ ཉི༌ལམ༌ཞིག༌ ཐོང༌ ཡང༌ ཁོའེ༌ ཏེ༌བོ༌ ཁོ༌རང༌ངི༌ ཨ༌ཅོ༌གུན༌ལ༌ ཤད༌ད༌ཅིག༌ ཁོང༌གུན༌ནི༌ ཁོའ༌ མང༌ང༌ ནཕ༌རད༌ ཅོས༌།
GEN 37:6 ཁོའེ༌ ཁོང༌གུན༌ལ༌ ཟེརས༌, “ང༌ ཐོང༌ཁན༌ནི༌ ཉི༌ལམ༌བོའ༌ ཉོན༌ནའང༌།
GEN 37:7 ང༌དང༌ ཚང༌མའེ༌ ཞིང༌ངི༌ཀ༌ གྲུའི༌ ཞིང༌གུན༌ ལྡམ༌ དུག༌པིན༌། ངའེ༌ གྲུའི༌ ཞིང༌བོ༌ ཀྲོང༌ལངས༌ ཡང༌ ཏེ༌བོའ༌ ཁྱོ༌ཞ༌གུན༌ནི༌ གྲུའི༌ ཞིང༌གུན༌ ཁོར༌ཏེ༌ གོ༌ སྒུས༌ཏེ༌ དུག༌པིན༌།”
GEN 37:8 ཁོའེ༌ ཨ༌ཅོ༌གུན༌ནི༌ ཟེརས༌, “ཅི༌ ཁྱོ༌རང༌ངི༌ ང༌ཞ༌གུན༌ནི༌ཀ༌ ཝང༌སྲུལ༌ཨིན༌ སམ༌མ༌ རག༌ག༌?” ཏེ༌བོའེ༌ཕིའ༌ ཁོའེ༌ ཟེར༌ཁན༌ དང༌ ཉི༌ལམ༌བོའེ༌ ཞས༌ཏེ༌ ཁོང༌གུན༌ནི༌ ཁོའ༌ མང༌ང༌ ནཕ༌རད༌ ཅོས༌།
GEN 37:9 ཏེ༌ནེ༌ ཡོ༌སེབ༌བ༌ ཡང༌ ཉི༌ལམ༌ཞིག༌ ཐོང༌ ཡང༌ ཁོའེ༌ ཨ༌ཅོ༌གུན༌ལ༌ ཟེརས༌, “ཉོན༌ཤིག༌གའང༌, ང༌ ཡང༌ ཉི༌ལམ༌ ཞིག༌གི༌ ནང༌ང༌ ཉི༌མ༌, ཟླ༌ཝ༌, ཡང༌ སྐར༌མ༌ ཅུག༌ཤིག༌ གུན༌ནི༌ ངའེ༌ དུན༌ལ༌ གོ༌ སྒུ༌ཨིན༌ ཐོང༌།”
GEN 37:10 ཁོའེ༌ ཉི༌ལམ༌བོ༌ ཁོ༌རང༌ངི༌ ཨ༌བའང༌ ཤདས༌པ༌ ཨ༌བའེ༌ ཁོའ༌ ཁའ༌སྐྱེས༌ཏེ༌ ཟེརས༌, “ཁྱོ༌རང༌ང༌ ཐོང༌ཁན༌ནི༌ ཉི༌ལམ༌བོ༌ ཅི༌ ཨིན༌ནོག༌? ཅི༌ ཁྱོ༌རང༌ངི༌ ཨ༌མ༌, ཨ༌ཅོ༌ནོ༌གུན༌ དང༌ ངའེ༌ ཁྱོ༌རང༌ངི༌ དུན༌ལ༌ གོ༌ སྒུ༌ཨིན༌ན༌?”
GEN 37:11 ཡོ༌སེབ༌བི༌ ཨ༌ཅོ༌གུན༌ལ༌ ཁོའེ༌ཀ༌ ཚིག༌ཅེས༌ ཡོངས༌, ཨིན༌ནའང༌ ཁོའེ༌ ཨ༌བའེ༌ ཏེ༌ ཚང༌མའེ༌ སྐོར༌ལ༌ སམ༌བ༌ ཏང༌ཨིན༌ དུགས༌།
GEN 37:12 ཡོ༌སེབ༌བི༌ ཨ༌ཅོ༌གུན༌ ཤེ༌ཀེམ༌མ༌ ཁོ༌རང༌གུན༌ནི༌ ཨ༌བའེ༌ ར༌ལུག༌གི༌ ཁྱུ༌གུན༌ ཚོའ༌ སོང༌ཏེ༌ ཡོད༌ཏུས༌,
GEN 37:13 ཡ༌ཀོབ༌བི༌ ཡོ༌སེབ༌བ༌ ཟེརས༌, “ཁྱོ༌རང༌ངི༌ ཨ༌ཅོ༌གུན༌ ཤེ༌ཀེམ༌མི༌ ནང༌ང༌ ར༌ལུག༌ ཚོ༌ཨིན༌ ཡོད༌ཁན༌བོ༌ ཁྱོ༌རང༌ང༌ གྱུས༌ ཨིན༌ནོག༌། ཡོང༌, ངའེ༌ ཁྱོ༌རང༌ ཁོང༌གུན༌ ཡོད༌ས༌ ལམ༌ ཅུག༌གད༌།” ཡོ༌སེབ༌བི༌ ལན༌ཏངས༌, “ང༌ ཆ༌ཅེས༌ལ༌ གྲལ༌གྲིག༌ ཨིན༌ལེ༌།”
GEN 37:14 ཁོའེ༌ ཨ༌བའེ༌ ཟེརས༌, “ཁྱོ༌རང༌ངི༌ ཨ༌ཅོ༌གུན༌ དང༌ ར༌ལུག༌གུན༌ ཁམ༌ཟང༌ དུག༌ག༌ མི༌དུག༌ ལྟའ༌ སོང༌ཏེ༌ ངའ༌ ཁོང༌གུན༌ནི༌ སྐོར༌ལ༌ ནས༌ཚུལ༌ ཁྱོང༌།” ཏེ༌ནེ༌ ཁོའེ༌ ཡོ༌སེབ༌ ཧེབ༌རོན༌ནི༌ ལུང༌པ༌ནེ༌ ལམ༌ཅུགས༌། ཡོ༌སེབ༌ ཤེ༌ཀེམ༌མ༌ ལེབ༌བ༌ཅིག༌,
GEN 37:15 མི༌ཞིག༌གི༌ ཁོ༌ སྤང༌ཐང༌གུན༌ནི༌ ནང༌ང༌ ཁོར༌ཨིན༌ ཐོང༌ཏེ༌ ཏྲིས༌, “ཁྱོ༌རང༌ངི༌ ཅི༌ ཙལ༌ལད༌?”
GEN 37:16 ཁོའེ༌ ཟེརས༌, “ངའེ༌ ང༌རང༌ངི༌ ཨ༌ཅོ༌གུན༌ ཙལ༌ལད༌། ཇུ༌ཇུ༌ ང༌ ཤོད༌དའང༌ ཁོང༌གུན༌ནི༌ ར༌ལུག༌གུན༌ ཀ༌རུ༌ ཚོ༌ཨིན༌ དུག༌?”
GEN 37:17 མི༌བོའེ༌ ཟེརས༌, “ཁོང༌གུན༌ སོང༌ཚར༌། ཁོང༌གུན༌ནི༌ ‘ང༌དང༌ དོ༌ཐན༌ལ༌ ཆེན༌’ ཟེར༌ཨིན༌ ངའེ༌ ཚོར༌།” ཏེ༌བོའེ༌ཕིའ༌ ཡོ༌སེབ༌ ཁོ༌རང༌ངི༌ ཨ༌ཅོ༌གུན༌ནི༌ སྟིང༌རང༌ནེ༌ དོ༌ཐན༌ལ༌ སོང༌ ཡང༌ ཁོང༌གུན༌ ཐོབ༌།
GEN 37:18 ཁོང༌གུན༌ནི༌ ཐག༌རིང༌ནེ༌ ཡོ༌སེབ༌ ཡོང༌ཨིན༌ ཐོང༌ ཡང༌ ཁོ༌ དུན༌ལ༌ ལེབ༌བི༌ སང༌ སྔུན༌ལ༌ ཁོང༌གུན༌ནི༌ ཁོ༌ སད༌ཅེས༌སི༌ ཅུས༌ངན༌ ལྡིངས༌།
GEN 37:19 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “འི༌ནེ༌ ཉི༌ལམ༌མི༌ གྱལ༌པོ༌ ཡོང༌ང༌ལ༌།
GEN 37:20 ཡོང༌, ཁོ༌ སད༌ཏེ༌ འི༌ ས༌དོང༌ ཅིག༌གི༌ ནང༌ང༌ ཕང༌ཨིན༌, ཡང༌ ཨ༌བའ༌ ཁོ༌ རིའི༌ སེམས༌ཅན༌ནི༌ སད༌ཏོག༌ ཟེར༌ཨིན༌། ཏེ༌ནེ༌ ཁོའེ༌ ཉི༌ལམ༌གུན༌ལ༌ ཅི༌ ཆ༌རུག༌ ང༌དང༌ངི༌ ལྟེན༌།”
GEN 37:21 རུ༌བེན༌ནི༌ ཏེ༌བོ༌ ཚོར༌ར༌ཅིག༌ ཡོ༌སེབ༌ སྐྱོབ༌ཅེས༌ལ༌ ཁོའེ༌ ཟེརས༌, “ཁོ༌ སད༌ མ༌སད༌ད༌,
GEN 37:22 འི༌ རི༌སྟོང༌ངི༌ ས༌དོང༌ ཅིག༌གི༌ ནང༌ང༌ ཕང༌ཨིན༌ ཨིན༌ནའང༌ ཁོའ༌ རྡུང༌ མི༌ རྡུང༌།” ཡོ༌སེབ༌ སྐྱོབས༌ཏེ༌ ཁོ༌རང༌ངི༌ ཨ༌བའེ༌ཀ༌ ལོགས༌ཏེ༌ ཁྱེར༌ཅེས༌ལ༌ ཁོའེ༌ ཏེ༌བོ༌ ཟེརས༌།
GEN 37:23 ཏེ༌ནེ༌ ཡོ༌སེབ༌ ཁོ༌རང༌ངི༌ ཨ༌ཅོ༌གུན༌ ཡོད༌ས༌ ལེབ༌བ༌ཅིག༌ ཁོང༌གུན༌ནི༌, ཁོའ༌ ཨ༌བའེ༌ ཏངས༌ཁན༌ནི༌ ཀོས༌པོ༌ ཕུདས༌།
GEN 37:24 ཏེ༌ནེ༌ ཁོང༌གུན༌ནི༌ ཁོ༌ ཟུམས༌ཏེ༌ ཆུ༌ མེད༌ཁན༌ནི༌ ས༌དོང༌ སྐམ༌པོའེ༌ ནང༌ང༌ ཕངས༌།
GEN 37:25 ཁོང༌གུན༌ ཟན༌ཟའ༌ལ༌ དུག༌ག༌ཅིག༌ ཁོང༌གུན༌ནི༌ གི༌ལེད༌ནེ༌ ཡོང༌ཁན༌ ཨིཤ༌མ༌ཨེལ༌པ༌ བེས༌པ༌གུན༌ ཐོང༌། ཁོང༌གུན༌ནི༌ རྔ༌བོང༌གུན༌ལ༌ ཚ༌མིག༌, བའམ༌ དང༌ མའེར༌ སྐངས༌ཁན༌ནི༌ རྒལ༌ ཀལ༌ཏེ༌ ཁོང༌གུན༌ ཨི༌ཇིབ༌ ཡུལ༌ལ༌ ཆའད༌པིན༌།
GEN 37:26 ཡ༌ཧུ༌དཱའེ༌ ཁོ༌རང༌ངི༌ ཨ༌ཅོ༌ནོ༌གུན༌ལ༌ ཟེརས༌, “ང༌དང༌གུན༌ནི༌ ནོ༌ སད༌ཏེ༌ ཁོ༌ སད༌ཁན༌བོ༌ སྦས༌ཏེ༌ བོར༌ན༌ ང༌དང༌གུན༌ལ༌ ཅི༌ ཕན༌ཐོགས༌ ཨིན༌?
GEN 37:27 ཡོང༌, ང༌དང༌ངི༌ ཁོ༌ མ༌སད༌ད༌ འི༌ ཨིཤ༌མ༌ཨེལ༌པ༌ བེས༌པ༌གུན༌ལ༌ ཙོང༌ཨིན༌, ཅིའ༌ཟེར༌ན༌ ཁོ༌ ང༌དང༌ངི༌ ནོ༌, ང༌དང༌ངི༌ ཤ༌ཁྲག༌ ཨིན༌ནོག༌།” ཁོའེ༌ ཨ༌ཅོ༌ནོ༌གུན༌ནི༌ ཁའ༌ ཆམས༌།
GEN 37:28 ཏེ༌ནེ༌ མི༌དིའན༌པ༌ ཚོང༌པ༌གུན༌ ཉེ༌མོའ༌ ལེབ༌བ༌ཅིག༌, ཁོང༌གུན༌ནི༌ ཡོ༌སེབ༌ ས༌དོང༌ནེ༌ ཕིངས༌ཏེ༌ ཨིཤ༌མ༌ཨེལ༌པ༌གུན༌ལ༌ མུལ༌ལི༌ པེ༌ནེ༌ ཉི༌ཤུའ༌ ཙོངས༌, ཀ༌གུན༌ནི༌ ཁོ༌ ཨི༌ཇིབ༌ ཡུལ༌ལ༌ ཁྱེརས༌།
GEN 37:29 རུ༌བེན༌ ས༌དོང༌ ཡོད༌ས༌ ལོགས༌ཏེ༌ ཡོངས༌ ཡང༌ ཁོའ༌ ཡོ༌སེབ༌ ཏེ༌ནང༌ང༌ མེད༌ཁན༌བོ༌ ཐོང༌ཏེ༌ ཁོའ༌ ཚེར༌ཁ༌ ཡོངས༌ཏེ༌ ཁོ༌རང༌ངི༌ ཀོས༌པོ༌ ཤགས༌།
GEN 37:30 ཁོ༌ ལོགས༌ཏེ༌ ཁོ༌རང༌ངི༌ ནོ༌གུན༌ ཡོད༌ས༌ སོང༌ཏེ༌ ཟེརས༌, “ས༌དོང༌ངི༌ ནང༌ང༌ བུ༌ཚ༌བོ༌ མི༌དུག༌, ཏ༌ ངའེ༌ ཅི༌ ཅོ༌?”
GEN 37:31 ཏེ༌ནེ༌ ཁོང༌གུན༌ནི༌ ར༌མ༌ཞིག༌ སདས༌ ཡང༌ ཡོ༌སེབ༌བི༌ ཀོས༌པོ༌ ཏེ༌བོའེ༌ ཁྲག༌གི༌ ནང༌ང༌ སྦངས༌།
GEN 37:32 ཁོང༌གུན༌ནི༌ ཏེ༌ ཀོས༌པོ༌ ཁོ༌རང༌གུན༌ནི༌ ཨ༌བའ༌ ཁྱེརས༌ ཡང༌ ཟེརས༌, “འི༌ ཀོས༌པོ༌ ང༌ཞའ༌ ཐོབ༌, ཟིགས༌སའང༌ འི༌བོ༌ ཉེ༌རང༌ངི༌ བུ༌ཚའེ༌ ཏ༌ མ༌ནོག༌ག༌?”
GEN 37:33 ཡ༌ཀོབ༌བ༌ ཏེ༌བོ༌ ཁོའེ༌ བུ༌ཚ༌ ཡོ༌སེབ༌བི༌ ཨིན༌ཁན༌ ཤེས༌ ཡང༌ ཟེརས༌, “ཏན༌ཏན༌ རི༌ སེམས༌ཅན༌ནི༌ ངའེ༌ བུ༌ཚ༌ ཡོ༌སེབ༌ སད༌ཏེ༌ ཁོའེ༌ ཟུགས༌པོ༌ ཏུམ༌པ༌ ཏུམ༌པ༌ ཅོས༌ཏེ༌ ཨིན༌ནོག༌།”
GEN 37:34 ཡ༌ཀོབ༌བི༌ ཁོ༌རང༌ངི༌ ཀོས༌པོ༌ ཤགས༌ ཡང༌ ཕ༌ཙའེ༌ རས༌ གོན༌ཏེ༌ ཁོ༌རང༌ངི༌ བུ༌ཚའེ༌ ཕིའ༌ ཞག༌ མང༌པོ༌ ཉ༌ངན༌ ཅོས༌།
GEN 37:35 ཁོའེ༌ བུ༌ཚ༌ དང༌ བུ༌མོ༌ ཚང༌མ༌ ཁོའ༌ སེམས༌སོ༌ ཏང༌ང༌ ཡོངས༌ ཨིན༌ནའང༌ ཁོའེ༌ སེམས༌སོ༌ མ༌ལེནས༌ ཡང༌ ཟེརས༌, “མན༌ ངའེ༌ ཤི༌ཤི༌ ཚོག༌པ༌ ང༌རང༌ངི༌ བུ༌ཚའེ༌ ཕིའ༌ ཉ༌ངན༌ ཅོ༌ཨིན༌།” ཡང༌ ཁོ༌ ཁོ༌རང༌ངི༌ བུ༌ཚའེ༌ ཕིའ༌ ངུས༌།
GEN 37:36 ཏེན༌ན༌ ཏུས༌ལ༌ མི༌དིའན༌པ༌གུན༌ནི༌ ཨི༌ཇིབ༌བི༌ ནང༌ང༌ ཡོ༌སེབ༌ པོ༌ཏི༌ཕར༌ལ༌ ཙོངས༌, ཁོ༌ གྱལ༌པོ༌ ཕེ༌རོའེ༌ ལས༌ཅེད༌པ༌, གྱལ༌པོ༌ སྲུང༌ཁན༌ནི༌ མག༌མི༌གུན༌ནི༌ འུ༌སྐྱོང༌ ཨིན༌པིན༌།
GEN 38:1 ཏེན༌ན༌ ཏུས༌ཤིག༌ག༌ ཡ༌ཧུ༌དཱ༌ ཁོ༌རང༌ངི༌ ཨ༌ཅོ༌ནོ༌གུན༌ བོར༌ཏེ༌ ཨ༌དུལ༌ལམ༌པ༌ ཧི༌རཧ༌ ཟེར༌ཁན༌ནི༌ མི༌བོ༌ ཉམ༌པོ༌ དུག༌ག༌ སོང༌།
GEN 38:2 ཏེ༌རུ༌ ཡ༌ཧུ༌དཱ༌ ཀེ༌ནན༌མ༌ ཤུའ༌ ཟེར༌ཁན༌ནི༌ བུ༌མོ༌ ཐུག༌ ཡང༌ ཁོའེ༌ ཏེ༌ བུ༌མོ༌ ཉམ༌པོ༌ བག༌སྟོན༌ ཅོས༌ཏེ༌ ལུས༌བྲེལ༌ ཅོས༌།
GEN 38:3 ཁོ༌ སྐྱེ༌ཅེས༌མ༌ གྱུར༌ཏེ༌ ཁོའ༌ བུ༌ཚ༌ཞིག༌ ཇོར༌ ཡང༌ ཡ༌ཧུ༌དཱའེ༌ ཁོའེ༌ མིང༌ང༌ ཨེར༌ ཏགས༌།
GEN 38:4 བུ༌མོ༌ ཡང༌སྐྱར༌ སྐྱེ༌ཅེས༌མ༌ གྱུར༌ ཡང༌ ཁོའ༌ བུ༌ཚ༌ཞིག༌ ཇོར༌། ཁོའེ༌ བུ༌ཚའེ༌ མིང༌ང༌ འོ༌ནན༌ ཏགས༌།
GEN 38:5 ཀ༌ཟིབ༌ གྲོང༌ཁྱེར༌རི༌ ནང༌ང༌ ཁོའ༌ བུ༌ཚ༌ སུམ༌པ༌ ཇོར༌ ཡང༌ ཁོའེ༌ མིང༌ང༌ ཤེ༌ལག༌ ཏགས༌།
GEN 38:6 ཡ༌ཧུ༌དཱའེ༌ ཁོའེ༌ གོ༌བུ༌ བུ༌ཚ༌ ཨེར༌ལ༌ ཏ༌མར༌ ཟེར༌ཁན༌ནི༌ བུ༌མོ༌ ན༌མའ༌ ཁྱོངས༌།
GEN 38:7 ཨིན༌ནའང༌ ཡ༌ཧུ༌དཱའེ༌ གོ༌བུ༌ བུ༌ཚ༌ ཨེར༌རི༌ སྕོད༌པ༌ ཡ༌ཝའེ༌ སྐུན༌དུན༌ལ༌ ངན༌པ༌ ཡོད༌པ༌ ཡ༌ཝའེ༌ ཁོ༌ ཤི༌ཅུག༌ག༌ ཛདས༌།
GEN 38:8 ཏེ༌ནེ༌ ཡ༌ཧུ༌དཱའེ༌ འོ༌ནན༌ལ༌ ཟེརས༌, “སོང༌ ཡང༌ ཁྱོ༌རང༌ངི༌ ཨ༌ཅོའེ༌ པུར༌གྱུད༌ ལུས༌ཤེས༌ལ༌ ཁོའེ༌ ན༌མ༌ ཉམ༌པོ༌ བྲེལ༌ བོར༌ཏེ༌ ཁོའེ༌ མག༌པའེ༌ ནོ༌ ཨིན༌ཁན༌ནི༌ ཁག༌པོ༌ དྲན༌དྲའ༌ ཅོས༌།”
GEN 38:9 ཨིན༌ནའང༌ འོ༌ནན༌ལ༌ ཕྲུ༌གུ༌ ཇོར༌ཁན༌གུན༌ ཁོའེ༌ པུར༌གྱུད༌ མི༌ གྱུར༌ཅེས༌པོ༌ ཧ༌གོ༌པ༌ ཁོའེ༌ ཨ༌ཅོའེ༌ ན༌མའ༌ ཉམ༌པོ༌ ལུས༌བྲེལ༌ ཅོ༌ ཟ༌ནེ༌ ཕྲུ༌གུ༌ མི༌ཇོར༌ཅེས༌ལ༌ ཁོའེ༌ ཐིག༌ལེ༌བོ༌ སའེ༌ཀ༌ ཕོའད༌པིན༌།
GEN 38:10 ཨིན༌ནའང༌ ཁོའེ༌ ཅོ༌ཁན༌ནི༌ ལས༌པོ༌ ཡ༌ཝའེ༌ སྐུན༌དུན༌ལ༌ ངན༌པ༌ ཨིན༌ པ༌སང༌ ཡ༌ཝའེ༌ ཨོ༌ནན༌ནའང༌ ཤི༌ཅུག༌ག༌ ཛདས༌།
GEN 38:11 ཏེ༌ནེ༌ ཡ༌ཧུ༌དཱའེ༌ ཁོ༌རང༌ངི༌ བུ༌ཚའེ༌ ན༌མ༌ ཏ༌མར༌ལ༌ ཟེརས༌, “ངའེ༌ བུ༌ཚ༌ ཤེ༌ལག༌ ཆེན༌མོ༌ ཆ༌ཆ༌ ཚག༌པ༌ ཁྱོ༌རང༌ ཁྱོ༌རང༌ངི༌ ཨ༌བའེ༌ ཁང༌པ༌ ཡུག༌ས༌མོ༌ ཚུལ༌ལ༌ དུག༌” ཅིའ༌ཟེར༌ན༌ ཁོའེ༌ སམ༌, “ཁོའང༌ ཁོ༌རང༌ངི༌ ཨ༌ཅོ༌གུན༌ ཙོགས༌ལ༌ ཤི༌སྲིད༌ཅེས༌ ཨིན༌ནོག༌།” ཏེ༌ནེ༌ ཏ༌མར༌ ཁོ༌རང༌ངི༌ ཨ༌བའེ༌ ཁང༌པ༌ དུག༌ག༌ལ༌ སོང༌།
GEN 38:12 ལོ༌ མང༌པོ༌ཞིག༌གི༌ སྟིང༌ནེ༌ ཤུའི༌ བུ༌མོ༌, ཡ༌ཧུ༌དཱའེ༌ ན༌མ༌ ཤི༌། ཉ༌ངན༌ནི༌ ཏུས༌པོ༌ ཚར༌ཏེ༌ ཁོ༌རང༌ངི༌ ཛ༌འོ༌ ཨ༌དུལ༌ལམ༌པ༌ ཧི༌རཧ༌ ཉམ༌པོ༌ ཡ༌ཧུ༌དཱ༌ ཏིམ༌ནཧ༌ ཡུལ༌ལ༌ ཁོ༌རང༌ངི༌ ལུག༌གི༌ བལ༌ བྲག༌ཁན༌གུན༌ ཡོད༌ས༌ སོང༌།
GEN 38:13 ཏ༌མར༌ལ༌ ཤདས༌, “ཁྱོ༌རང༌ངི༌ མག༌པའེ༌ ཨ༌བ༌, ཁོ༌རང༌ངི༌ ལུག༌གུན༌ནི༌ བལ༌ བྲག༌ག༌ལ༌ ཏིམ༌ནཧ༌ ཆ༌རུག༌།”
GEN 38:14 ཁོའེ༌ ཁོ༌རང༌ གོན༌ཁན༌ནི༌ ཡུག༌ས༌མོའི༌ ཀོས༌པོ༌ ཞེབས༌ཏེ༌ མི༌ ཤེ༌ཤེས༌སི༌ ཕིའ༌ ཁོ༌རང༌ངི༌ ལྡོང༌བོ༌ རས༌ ཉམ༌པོ༌ ཀབས༌ ཡང༌ ཏིམ༌ནཧ༌ ཆ༌སའེ༌ ལམ༌མི༌ཀ༌ ཨི༌ནེམ༌ གྲོང༌ཁྱེར༌ལ༌ ཆ༌སའེ༌ཀ༌ དུགས༌, ཅིའ༌ཟེར༌ན༌ ཡ༌ཧུ༌དཱའེ༌ བུ༌ཚ༌ ཤེ༌ལག༌ ལྡན༌ཏེ༌ ཡོད༌ནའང༌ ཁོ༌ ཉམ༌པོ༌ བག༌སྟོན༌ ཅོ༌ཅེས༌ལ༌ མ༌ཏང༌ང༌ ཨིན༌ཁན༌བོ༌ ཁོའ༌ ཧ༌གོ༌།
GEN 38:15 ཡ༌ཧུ༌དཱའེ༌ བུ༌མོ༌བོ༌ ཐོང༌ང༌ཅིག༌ ཁོའེ༌ ཁོ༌ ཟུགས༌ཙོང༌མ༌ཞིག༌ ཨིན༌ནོག༌ སམ༌ ཅིའ༌ཟེར༌ན༌ ཁོའེ༌ ལྡོང༌བོ༌ ཀབས༌ཏེ༌ ཡོད༌པིན༌།
GEN 38:16 ཡང༌ ཁོའེ༌ བུ༌ཚའེ༌ ན༌མ༌ ཨིན༌ཁན༌བོ༌ མ༌ཤས༌པ༌ ཁོ༌ ཏེ༌ བུ༌མོའེ༌ དུན༌ལ༌ སོང༌ཏེ༌ ཟེརས༌, “ལུས༌བྲེལ༌ ཅོའ༌ལ༌ ངའ༌ ཉམ༌པོ༌ ཡོང༌།” ཁོའེ༌ ཏྲིས༌, “ཉེ༌རང༌ ཉམ༌པོ༌ དུག༌ཅེས༌ལ༌ ཉེ༌རང༌ངི༌ ང༌ ཅི༌ ཏང༌ཨིན༌?”
GEN 38:17 ཁོའེ༌ ལན༌ཏངས༌, “ང༌རང༌ངི༌ ཁྱུའི༌ ནང༌ནེ༌ རི༌གུ༌ཞིག༌ ཀལ༌ཨིན༌།” བུ༌མོའེ༌ ཟེརས༌, “ཉེ༌རང༌ངི༌ དམ༌ཆ༌ ཅོ༌ཁན༌བོའེ༌ སྟགས༌སི༌ ཚུལ༌ལ༌ ང༌ ཅི༌ཏོང༌ཤིག༌ སལ༌།”
GEN 38:18 ཁོའེ༌ ཏྲིས༌, “དམ༌ཆའེ༌ ཚུལ༌ལ༌ ངའེ༌ ཁྱོ༌རང༌ང༌ ཅི༌ ཏང༌?” བུ༌མོའེ༌ ལན༌ཏངས༌, “ཉེ༌རང༌ངི༌ ཐེ༌ཙེ༌ སེར༌དུབ༌, ཏེ༌བོ༌ ཏགས༌ཁན༌ནི༌ རས༌ཀུད༌ དང༌ ཁུར༌ཁན༌ནི༌ བེར༌ཀ༌ གུན༌ སལ༌།” ཁོའེ༌ ཏེ༌ ཚང༌མ༌ ཁོའ༌ ཏངས༌ཏེ༌ ཁོ༌ ཉམ༌པོ༌ ལུས༌བྲེལ༌ ཅོས༌པ༌ བུ༌མོ༌བོ༌ སྐྱེ༌ཅེས༌མ༌ གྱུར༌།
GEN 38:19 ཏ༌མར༌ ལོགས༌ཏེ༌ ཁང༌པ༌ སོང༌ ཡང༌ ལྡོང༌ང༌ ཀབ༌ཁན༌བོ༌ ཕུད༌ཏེ༌ ཁོ༌རང༌ངི༌ ཡུག༌ས༌མོའི༌ ཀོས༌པོ༌ གོནས༌།
GEN 38:20 ཡ༌ཧུ༌དཱའེ༌ ཁོ༌རང༌ངི༌ ཛ༌འོ༌ ཨ༌དུལ༌ལམ༌པ༌ ཧི༌རཧ༌ ཏེ༌ བུ༌མོའ༌ རི༌གུ༌ ཁྱེར༌ཏེ༌ དམ༌ཆ༌ ཅོས༌ཏེ༌ ཏང༌ཁན༌ནི༌ ཅ༌ལག༌གུན༌ ལོགས༌ཏེ༌ ཁྱོང༌ཅེས༌ལ༌ ལམ༌ཅུགས༌, ཨིན༌ནའང༌ ཁོའ༌ བུ༌མོ༌བོ༌ མ༌ཐོབ༌།
GEN 38:21 ཁོའེ༌ ཏེ༌རུ༌ དུག༌ཁན༌ནི༌ མི༌ ཁ༌ཅིག༌ག༌ ཏྲིས༌, “ཨི༌ནེམ༌མི༌ དུན༌ལ༌ འི༌ ལམ༌མི༌ཀ༌ དུག༌ཁན༌ནི༌ ཟུགས༌ཙོང༌མ༌བོ༌ ཀ༌རུ༌ སོང༌?” ཁོང༌གུན༌ནི༌ ལན༌ཏངས༌, “འི༌རུ༌ ཟུགས༌ཙོང༌མ༌ཞིག༌ མ༌ནེ༌ མེད༌པིན༌།”
GEN 38:22 ཁོ༌ ལོགས༌ཏེ༌ ཡ༌ཧུ༌དཱ༌ ཡོད༌ས༌ སོང༌ ཡང༌ ཟེརས༌, “ངའ༌ ཏེ༌ བུ༌མོ༌བོ༌ མ༌ཐོབ༌, ཡང༌ ཏེ༌རུ༌ དུག༌ཁན༌གུན༌ནི༌ ‘འི༌རུ༌ ཟུགས༌ཙོང༌མ༌ཞིག༌ མ༌ནེ༌ མེད༌’ ཟེར༌ར༌རག༌།”
GEN 38:23 ཡ༌ཧུ༌དཱའེ༌ ཟེརས༌, “ཁོའེ༌ ལག༌ག༌ ཡོད༌ཁན༌ ཚང༌མ༌ ཁོའ༌ བོར༌ཅུག༌ ཏེ༌ མན༌ན༌ ང༌དང༌གུན༌ སམ༌བ༌ མེད༌ཁན༌ ཐེས༌ཏེ༌ ཁྲེལ༌བ༌ ཆེན༌། ངའེ༌ ཁ༌ཆད༌ ཅོ༌ཁན༌ ནང༌ཞིན༌ རི༌གུ༌ ཀལ༌པིན༌ ཨིན༌ནའང༌ ཁྱོ༌རང༌ང༌ ཁོ༌ མ༌ཐོབ༌།”
GEN 38:24 ཟླ༌ཝ༌ སུམ༌མི༌ སྟིང༌ནེ༌ ཡ༌ཧུ༌དཱའ༌ ཁོ༌རང༌ངི༌ བུ༌ཚའེ༌ ན༌མ༌ ཏ༌མར༌ ཟུགས༌ཙོང༌མ༌ གྱུར༌ཏེ༌ ཁོའ༌ ཕྲུ༌གུ༌ སྐྱེ༌ཅེས༌དུག༌ ཟེར༌ཏེ༌ ཚོར༌། ཡ༌ཧུ༌དཱའེ༌ ཟེརས༌, “བུ༌མོ༌བོ༌ ཕི༌ལོག༌ག༌ ཕིངས༌ཏེ༌ མེའ༌ སྲགས༌ཏེ༌ སོད༌།”
GEN 38:25 བུ༌མོ༌བོ༌ ཕི༌ལོག༌ག༌ ཁྱོང༌ ཟ༌ནེ༌ ཁོའེ༌ ཁོ༌རང༌ངི༌ མག༌པའེ༌ ཨ༌བ༌ ལོན༌ ཀལས༌། ཁོའེ༌ ཟེརས༌, “འི༌ ཅ༌ལག༌གུན༌ནི༌ དག༌པོའེ༌ ང༌ སྐྱེ༌ཅེས༌མ༌ གྱུར༌ཅུགས༌། ཟིགས༌སའང༌, འི༌ ཐེ༌ཙེ༌, ཏེ༌བོ༌ ཏགས༌ཁན༌ནི༌ རས༌ཀུད༌ དང༌ བེར༌ཀ༌ གུན༌ སུའི༌ ཨིན༌ནོག༌?”
GEN 38:26 ཡ༌ཧུ༌དཱའེ༌ ཏེ༌གུན༌ ཤེས༌ ཡང༌ ཟེརས༌, “ང༌ སང༌ མང༌ང༌ བུ༌མོ༌བོ༌ ཀྲང༌པོ༌ ཨིན༌ནོག༌, ཅིའ༌ཟེར༌ན༌ ངའེ༌ ཁོའ༌ ང༌རང༌ངི༌ བུ༌ཚ༌ ཤེ༌ལག༌ ཉམ༌པོ༌ བག༌སྟོན༌ ཅོ༌ མ༌ཅུག༌ག༌ ཨིན༌ནོག༌།” ཡང༌ ཡ༌ཧུ༌དཱའེ༌ ཁོ༌ ཉམ༌པོ༌ ཡང༌སྐྱར༌ ལུས༌བྲེལ༌ མ༌ཅོས༌།
GEN 38:27 ཏ༌མར༌ལ༌ ཕྲུ༌གུ༌ སྐྱེ༌ཅེས༌སི༌ ཏུས༌པོ༌ ལེབ༌བ༌ཅིག༌ ཁོའེ༌ ཁོག༌པའེ༌ ནང༌ང༌ ཚག༌ཕྲུག༌ ཡོད༌པིན༌།
GEN 38:28 ཁོའ༌ ཕྲུ༌གུ༌ སྐྱེ༌ ཟ༌ནེ༌ ཅིག༌པོའེ༌ ལག༌པ༌ བིང༌ང༌ཅིག༌ ཡ༌ཏོ༌ ཅོ༌ཁན༌བོའེ༌ སྐུད༌པ༌ མར༌པོ༌ཞིག༌ ལྡམས༌ཏེ༌ ཟེརས༌, “འི༌ བུ༌ཚ༌བོ༌ གོ༌མ༌ སྐྱེས༌།”
GEN 38:29 ཨིན༌ནའང༌ ཁོའེ༌ ལག༌པ༌ ལོགས༌ཏེ༌ ནང༌ཀུག༌ག༌ ཁྱེརས༌ ཡང༌ ཁོའེ༌ སང༌ སྔུན༌ལ༌ ཡང༌ ཅིག༌པོ༌ སྐྱེས༌། ཏེ༌ནེ༌ ཡ༌ཏོ༌བོའེ༌ ཟེརས༌, “ཁྱོ༌རང༌ ཝང༌ ཏངས༌ཏེ༌ ཕི༌ལོག༌ག༌ བིང༌།” ཏེ༌བོའེ༌ཕིའ༌ ཁོའེ༌ མིང༌ང༌ པེ༌རེཟ༌ ཏགས༌།
GEN 38:30 ཏེ༌ནེ༌ ཁོའེ༌ ནོ༌ ལག༌པའ༌ སྐུད༌པ༌ མར༌པོ༌ ལྡམས༌ཁན༌བོ༌ སྐྱེས༌ ཡང༌ ཁོའེ༌ མིང༌ང༌ ཟེ༌རཧ༌ ཏགས༌།
GEN 39:1 ཡོ༌སེབ༌ ཨི༌ཇིབ༌བ༌ ཁྱེརས༌, ཏེ༌རུ༌ ཁོ༌ གྱལ༌པོ༌ ཕེ༌རོ༌ སྲུང༌ཁན༌ མག༌མི༌གུན༌ནི༌ སྤོན༌བོ༌ པོ༌ཏི༌ཕར༌རི༌ ཨིཤ༌མ༌ཨེལ༌པ༌ ཚོང༌པ༌གུན༌ནི༌ ཀ༌ནེ༌ ཉོས༌།
GEN 39:2 ཡ༌ཝ༌ ཡོ༌སེབ༌ ཉམ༌པོ༌ ཡོད༌པིན༌ ཡང༌ ཁོ༌ ཅི༌ཚང༌མའེ༌ ནང༌ང༌ ཁྲངས༌པོ༌ མི༌ཞིག༌ གྱུར༌, ཁོ༌ ཨི༌ཇིབ༌པ༌ སྤོན༌བོའེ༌ ཁང༌པའེ༌ ནང༌ང༌ དུགས༌།
GEN 39:3 ཡ༌ཝ༌ ཡོ༌སེབ༌ ཉམ༌པོ༌ ཞུགས༌ཁན༌ ཡང༌ ཁོ༌ ཅི༌ཚང༌མའེ༌ ནང༌ང༌ ཁྲངས༌པོ༌ གྱུར༌ ཅུག༌ག༌ ཛད༌ཁན༌བོ༌ ཁོའེ༌ སྤོན༌བོའེ༌ ཐོང༌།
GEN 39:4 ཡོ༌སེབ༌བ༌ པོ༌ཏི༌ཕར༌རི༌ ཆོགས༌སྐྱོར༌ ཐོབ༌ཏེ༌ ཁོའ༌ ཞབས༌ཏོག༌ ཞུ༌ཁན༌བོ༌ གྱུར༌། པོ༌ཏི༌ཕར༌རི༌ ཁོ༌ ཁོ༌རང༌ངི༌ ཁང༌པ༌ དང༌ གྱུ༌ནོར༌གུན༌ནི༌ སྟ༌སྟོག༌ ཅོ༌ཁན༌ལ༌ སྐོས༌།
GEN 39:5 པོ༌ཏི༌ཕར༌རི༌ ཡོ༌སེབ༌ ཁོ༌རང༌ངི༌ ཁང༌པ༌ དང༌ གྱུ༌ནོར༌གུན༌ནི༌ སྟ༌སྟོག༌ ཅོ༌ཁན༌ལ༌ སྐོས༌པ༌ནེ༌ ཕར༌ལ༌ ཡ༌ཝའེ༌ པོ༌ཏི༌ཕར༌རི༌ ནང༌ཚངས༌ལ༌ ཅིན༌ལབས༌ སལས༌། ཡོ༌སེབ༌བི༌ ཞས༌ཏེ༌ ཡ༌ཝའེ༌ ཁོའ༌ ཅི༌ཚང༌མའེ༌ ནང༌ང༌ ཅིན༌ལབས༌ སལས༌, ཁང༌པ༌ དང༌ ཞིང༌ ཉིས༌ཀོའེ༌ ནང༌ང༌།
GEN 39:6 ཏེ༌བོའེ༌ཕིའ༌ པོ༌ཏི༌ཕར༌རི༌ ཁོའ༌ ཡོད༌ཁན༌ ཚང༌མ༌ ཡོ༌སེབ༌བི༌ ལག༌ག༌ སྟདས༌ ཡང༌ ཁོའ༌ ཁོ༌རང༌ངི༌ ཁར༌ཇི༌ མ༌ནེ༌ ཞན༌ ཅི༌ཞིག༌གི༌ ཕིའང༌ ཚེར༌ཁ༌ མེད༌པིན༌། ཡོ༌སེབ༌ སྒོབ༌ཞག༌ཅན༌ དང༌ ངམས༌ཅན༌ ཡོད༌པིན༌,
GEN 39:7 ཡང༌ ཏུས༌བན༌ཤིག༌གི༌ སྟིང༌ནེ༌ ཁོའེ༌ སྤོན༌བོའེ༌ ན༌མ༌ ཡོ༌སེབ༌བི༌ཀ༌ དོད༌པ༌ སྐྱེས༌ཏེ༌ ཟེརས༌, “མལ༌ཙའེ༌ ནང༌ང༌ ང༌ ཉམ༌པོ༌ དུག༌ག༌ ཡོང༌།”
GEN 39:8 ཁོའེ༌ ཁའ༌ མ༌ཉནས༌ ཡང༌ ཟེརས༌, “ངའེ༌ སྤོན༌བོའེ༌ ཁོང༌རང༌ངི༌ ལག༌ག༌ ཅའང༌ མ༌བོར༌ར༌ ལོ༌ཁྱེལ༌ ཉམ༌པོ༌ ཅི༌ཚང༌མའེ༌ཀ༌ ངའ༌ ཝང༌ཆ༌ ཏངས༌།
GEN 39:9 འི༌ ཁང༌པའེ༌ ནང༌ང༌ ངའེ༌ སང༌ ཀྲག༌ག༌ སུའང༌ མེད༌ ཡང༌ ཁོང༌ངི༌ ཉེ༌རང༌ མན༌པ༌ ཞན༌ ཅི༌ཚང༌མ༌ ངའ༌ སལ༌ཏེ༌ དུག༌ ཅིའ༌ཟེར༌ན༌ ཉེ༌རང༌ ཁོང༌ངི༌ ན༌མ༌ ཨིན༌ནོག༌། ཏེ༌ནེ༌ ཀ༌ཟུག༌གི༌ ངའེ༌ འི༌ཟམ༌ ངན༌པ༌ ལས༌ ཡང༌ དཀོན༌མཆོག༌གི༌ གྱབ༌གལ༌ལ༌ སྡིག༌པ༌ ཅོ༌?”
GEN 39:10 ཁོའེ༌ ཡོ༌སེབ༌བ༌ ཞག༌ཏང༌ ཟེར༌ཨིན༌ དུགས༌ ཨིན༌ནའང༌ ཡོ༌སེབ༌ ཁོ༌ ཉམ༌པོ༌ མལ༌ཙའེ༌ ནང༌ང༌ མི༌དུག༌ཅེས༌ མ༌ཚད༌ ཁོའེ༌ དུན༌ལའང༌ མ༌ཡོངས༌།
GEN 39:11 ཞག༌ཤིག༌ ཡོ༌སེབ༌ པོ༌ཏི༌ཕར༌རི༌ ཁང༌པའེ༌ ནང༌ང༌ ལས༌ ཅོའ༌ལ༌ ཆ༌ ཟ༌ནེ༌ ཞན༌ཡང༌ ཡོག༌པོ༌ སུའང༌ ཏེ༌རུ༌ མེད༌པིན༌,
GEN 39:12 པོ༌ཏི༌ཕར༌རི༌ ན༌མའེ༌ ཁོའེ༌ ཀོས༌པོ༌ ཟུམས༌ཏེ༌ ཟེརས༌, “ང༌ ཉམ༌པོ༌ མལ༌ཙའེ༌ ནང༌ང༌ ཡོང༌།” ཁོ༌ ཤོར༌ཏེ༌ སོང༌ ཨིན༌ནའང༌ ཁོའེ༌ ཁེ༌ཐོག༌གི༌ ཀོས༌པོ༌ བུ༌མོའེ༌ ལག༌ག༌ ལུས༌།
GEN 39:13 ཡོ༌སེབ༌ ཕི༌ལོག༌ག༌ ཤོར༌ཏེ༌ ཁོའེ༌ ཀོས༌པོ༌ ཁོའེ༌ ལག༌ག༌ ལུས༌ཁན༌བོ༌ ཐོང༌ང༌ཅིག༌,
GEN 39:14 ཁོའེ༌ ཞན༌ ཡོག༌པོ༌གུན༌ལ༌ བོདས༌ ཡང༌ ཟེརས༌ “ལྟོས༌, ངའེ༌ མག༌པའེ༌ འི༌ ཨིབ༌རི༌པ༌ མི༌བོ༌ ང༌དང༌ང༌ ཁྲེལ༌བ༌ སྟན༌ན༌ལ༌ ཁྱོངས༌ཏེ༌ ཨིན༌ནོག༌། ང༌ ཉམ༌པོ༌ ལུས༌བྲེལ༌ ཅོ༌ཅེས༌ལ༌ ཁོ༌ ངའེ༌ ནང༌ང༌ ཡོངས༌ ཨིན༌ནའང༌ ངའེ༌ ཀུ༌ཅོ༌ ཏངས༌པིན༌།
GEN 39:15 ངའེ༌ ཀུ༌ཅོ༌ ཏང༌ང༌ཅིག༌, ཁོ༌ ཕི༌ལོག༌ག༌ ཤོར༌ཏེ༌ སོང༌ ཨིན༌ནའང༌ ཁོའེ༌ ཀོས༌པོ༌ འི༌ཀ༌ ལུས༌ཏེ༌ དུག༌།”
GEN 39:16 ཁོའེ༌ ཡོ༌སེབ༌བི༌ ཀོས༌པོ༌ ཁོ༌རང༌ངི༌ མག༌པ༌ ལོགས༌ཏེ༌ ཡོང༌ཡོང༌ ཚོག༌པ༌ བོར༌།
GEN 39:17 ཏེ༌ནེ༌ ཁོའེ༌ ཏེན༌ན༌ རུངས༌པོ༌ ཁོའ༌ ཤདས༌, “ཉེ༌རང༌ངི༌ ཁྱོང༌ཁན༌ནི༌ ཨིབ༌རི༌པ༌ ངའེ༌ ནང༌ང༌ ཡོངས༌ཏེ༌ ངའ༌ ཉམ༌པོ༌ ལུས༌བྲེལ༌ ཅོ༌ཅེས༌ ཅོས༌།
GEN 39:18 ཨིན༌ནའང༌ ངའེ༌ ཀུ༌ཅོ༌ ཏང༌ང༌ཅིག༌ ཁོ༌ ཕི༌ལོག༌ག༌ ཤོར༌ཏེ༌ སོང༌ ཡང༌ ཁོའེ༌ ཀོས༌པོ༌ འི༌ཀ༌ ལུས༌ཏེ༌ དུག༌།”
GEN 39:19 ཡོ༌སེབ༌བི༌ སྤོན༌བོའ༌ ཁོའེ༌ ན༌མའེ༌ “ཉེ༌རང༌ངི༌ ཡོག༌པོའེ༌ ཏེ༌ཟུག༌ ངན༌པ༌ ངའ༌ ཅོས༌” ཟེར༌ཏེ༌ ཚོར༌ར༌ཅིག༌ པོ༌ཏི༌ཕར༌ལ༌ མ༌སྲན༌ཏྲེ༌ སྲོ༌ ཡོངས༌,
GEN 39:20 ཡང༌ ཡོ༌སེབ༌ ཟུམས༌ཏེ༌ ཙོན༌ཁང༌ངི༌ ནང༌ང༌ ཀག༌ཅུགས༌ ཀ༌རུ༌ གྱལ༌པོའེ༌ ཙོན༌པ༌གུན༌ ཀག༌གད༌པིན༌ ཡང༌ ཁོ༌ ཏེ༌ནང༌ང༌ དུགས༌།
GEN 39:21 ཨིན༌ནའང༌ ཡ༌ཝ༌ ཡོ༌སེབ༌ ཉམ༌པོ༌ ཡོད༌པིན༌, ཁོང༌ངི༌ ཁོའ༌ ཐུག༌རྗེ༌ ཟིགས༌ཏེ༌ ཙོན༌ཁང༌ སྲུང༌ཁན༌ནི༌ འུ༌སྐྱོང༌ངི༌ ཆོགས༌སྐྱོར༌ ཐོབ༌ཅུགས༌།
GEN 39:22 ཁོའེ༌ ཡོ༌སེབ༌ ཞན༌ ཙོན༌པ༌ ཚང༌མའེ༌ སྟ༌སྟོག༌ ཅོ༌ཅེས༌སི༌ ཕིའ༌ སྐོས༌ ཡང༌ ཙོན༌ཁང༌ངི༌ ལས༌ ཚང༌མའེ༌ ཁག༌ ཁོའ༌ ཀལས༌།
GEN 39:23 ཙོན༌ཁང༌ སྲུང༌ཁན༌ནི༌ འུ༌སྐྱོང༌ང༌ ཡོ༌སེབ༌བ༌ ཁག༌ ཀལ༌ཁན༌གུན༌ལ༌ ལྟ༌གོས༌ས༌ མེད༌པིན༌, ཅིའ༌ཟེར༌ན༌ ཡ༌ཝ༌ ཡོ༌སེབ༌ ཉམ༌པོ༌ ཞུགས༌ཏེ༌ ཁོའ༌ ལས༌ ཚང༌མའེ༌ ནང༌ང༌ ཐར༌ཁྱེལ༌ ཅོའ༌ ཛད༌དད༌པིན༌།
GEN 40:1 ཏུས༌བན༌ཤིག༌གི༌ སྟིང༌ནེ༌ ཨི༌ཇིབ༌བི༌ གྱལ༌པོ༌ ཁོའེ༌ ཆང༌ལུག༌ཁན༌ དང༌ ཏ༌གི༌ ཅོ༌ཁན༌ ཉིས༌ཀོའེ༌ཀ༌ མ༌ཐད༌།
GEN 40:2 གྱལ༌པོའ༌ ཁོང༌གུན༌ནི༌ཀ༌ སྲོ༌ ཡོངས༌,
GEN 40:3 ཡང༌ སྲུང༌ཁན༌ནི༌ མག༌མི༌ སྤོན༌བོའེ༌ ཝང༌ངི༌ ཡོག༌ག༌ ཡོད༌ཁན༌ནི༌ ཙོན༌ཁང༌ངི༌ ནང༌ང༌ ཁོང༌གུན༌ ཀག༌ཅུགས༌ ཀ༌རུ༌ ཡོ༌སེབ༌བའང༌ ཀགས༌ཏེ༌ ཡོད༌པིན༌།
GEN 40:4 ཙོན༌ཁང༌ངི༌ མག༌མི༌ སྤོན༌བོའེ༌ ཡོ༌སེབ༌ ཁོང༌གུན༌ནི༌ ཞབས༌ཏོག༌ ཅོ༌ཁན༌ལ༌ སྐོས༌། ཙོན༌ཁང༌ངི༌ ནང༌ང༌ ཏུས༌ བན༌ཤིག༌གི༌ སྟིང༌ནེ༌,
GEN 40:5 ཞག༌ཤིག༌ ཚན༌ལ༌ ཨི༌ཇིབ༌བི༌ གྱལ༌པོའེ༌ ཆང༌ལུག༌ཁན༌ དང༌ ཏ༌གི༌ ཅོ༌ཁན༌གུན༌ལ༌ ཉི༌ལམ༌ རིག༌ ཐོང༌ ཀ༌གུན༌ནི༌ ཏོན༌ སོ༌སོ༌ ཡོད༌པིན༌།
GEN 40:6 ཐོ༌རེ༌ཟུག༌པོ༌ ང༌ཏོག༌ ཡོ༌སེབ༌ ཁོང༌གུན༌ ཡོད༌ས༌ ཡོང༌ང༌ཅིག༌, ཁོང༌གུན༌ ཚེར༌ཁའེ༌ ནང༌ང༌ ཡོད༌ཁན༌བོ༌ ཐོང༌།
GEN 40:7 ཁོའེ༌ ཁོང༌གུན༌ལ༌ ཏྲིས༌, “དི༌རིང༌ ཉེ༌ཞའ༌ ཚེར༌ཁའེ༌ ནང༌ང༌ ཅིའ༌ ཨིན༌?”
GEN 40:8 ཁོང༌གུན༌ནི༌ ལན༌ཏངས༌, “ང༌ཞའ༌ ཉི༌ལམ༌ རིག༌ ཐོང༌, ཡང༌ ཏེ༌གུན༌ནི༌ ཏོན༌ ཤད༌ཁན༌ འི༌རུ༌ སུའང༌ མེད༌པ༌ ཨིན༌ནོག༌།” ཏེ༌ནེ༌ ཡོ༌སེབ༌བི༌ ཟེརས༌, “ཉི༌ལམ༌ གྱུར༌ཅེས༌སི༌ ཁྱུད༌ དཀོན༌མཆོག༌གི༌ སལ༌ལ༌ ཛད༌ད༌ མ༌ནོག༌ག༌? ཉེ༌ཞའེ༌ ཉི༌ལམ༌གུན༌ ངའ༌ ཤད༌ད༌ཛད༌།”
GEN 40:9 ཏེ༌ནེ༌ ཆང༌ ལུག༌ཁན༌ནི༌ འུ༌སྐྱོང༌ངི༌ ཡོ༌སེབ༌བ༌ ཁོ༌རང༌ངི༌ ཉི༌ལམ༌ ཤདས༌། ཁོའེ༌ ཟེརས༌, “ངའེ༌ ཉི༌ལམ༌མི༌ ནང༌ང༌ ངའེ༌ དུན༌ལ༌ རྒུན༌ནི༌ ལྕང༌མ༌ཞིག༌ ཐོང༌,
GEN 40:10 ཀ༌བོའེ༌ཀ༌ ཡལ༌ག༌ སུམ༌ དུག༌པིན༌། པ༌ཏུམ༌ ཏངས༌ཏེ༌ མེན༌ཏོག༌ བར༌ ཡང༌ རྒུན༌ ཆགས༌ཏེ༌ ཚོས༌།
GEN 40:11 གྱལ༌པོའེ༌ དོན༌སྐྱོག༌ ངའེ༌ ལག༌པའེ༌ ནང༌ང༌ དུག༌པིན༌ ཡང༌ ངའེ༌ རྒུན༌བོ༌ ཁྱོངས༌ཏེ༌ དོན༌སྐྱོག༌གི༌ ནང༌ང༌ ཙིར༌ཏེ༌ ཁོང༌ང༌ ཏང༌དུག༌པིན༌།”
GEN 40:12 ཡོ༌སེབ༌བི༌ ཟེརས༌, “ཡལ༌ག༌ སུམ༌ཀོའེ༌ ཏོན༌བོ༌ ནི༌ ཞག༌པོ༌ སུམ༌བོ༌ ཨིན༌ནོག༌།
GEN 40:13 ཞག༌པོ༌ སུམ༌མི༌ ནང༌ང༌ གྱལ༌པོའེ༌ ཁྱོ༌རང༌ ཙོན༌ནེ༌ ཕུད༌ཏེ༌ ཁྱོ༌རང༌ངི༌ སྔུན༌ནི༌ ཀོ༌སའེ༌ཀ༌ སྐོ༌ཨིན༌། ཁྱོ༌རང༌ངི༌ ཕེ༌རོའེ༌ དོན༌སྐྱོག༌པོ༌ ཁོང༌ངི༌ ཆག༌ག༌ ཏང༌ཨིན༌ ཀ༌ཟུག༌ སྔུན༌ལ༌ ཁྱོ༌རང༌ ཁོང༌ངི༌ ཆང༌ ལུག༌ཁན༌བོ༌ ཨིན༌ ཟ༌ནེ༌ ཅོའད༌པིན༌།
GEN 40:14 ཨིན༌ནའང༌ ཅི༌ཚང༌མ༌ ཉེ༌རང༌ངི༌ ཕིའ༌ གྱལ༌ལ༌ ཆ༌ ཟ༌ནེ༌ ཇུ༌ཇུ༌ ངའ༌ ཨིད༌ཏུ༌ ཅོའ༌ ཛད༌། གྱལ༌པོའ༌ ངའེ༌ སྐོར༌ལ༌ ཤད༌ཏེ༌ ཇུ༌ཇུ༌ ངའ༌ ཐུག༌རྗེ༌ སྟན༌ན༌ ཛད༌ཏེ༌ ངའ༌ འི༌ ཙོན༌ཁང༌ནེ༌ ཕུད༌ཅུག༌ག༌ ཛད༌།
GEN 40:15 ཨིབ༌རི༌པའེ༌ ཡུལ༌ནེ༌ ངའ༌ མི༌གུན༌ནི༌ ཝང༌ ཉམ༌པོ༌ ཁྱོངས༌, མ༌ཚད༌ འི༌རུའང༌ ཙོན༌ཁང༌ང༌ ཀག༌ཅེས༌སི༌ འོས༌པ༌ ངའེ༌ ཅའང༌ མ༌ཅོས༌པིན༌།”
GEN 40:16 ཏ༌གི༌ ཅོ༌ཁན༌ནི༌ འུ༌སྐྱོང༌ངི༌ ཡོ༌སེབ༌བི༌ ཉི༌ལམ༌ གྱུར༌ཁན༌བོ༌ ཕན༌ཐོགས༌ཅན༌ ཐོང༌ང༌ཅིག༌ ཁོའེ༌ ཡོ༌སེབ༌བ༌ ཟེརས༌, “ངའང༌ ཉི༌ལམ༌ཞིག༌ ཐོང༌, ངའེ༌ གོའེ༌ཀ༌ ཏ༌གི༌ ཙེ༌པོ༌ སུམ༌ ཁུར༌ཏེ༌ ཐོང༌།
GEN 40:17 ངའེ༌ གོའེ༌ཀ༌ ཡོད༌ཁན༌ནི༌ ཁེ༌ཐོག༌གི༌ ཙེ༌པོའེ༌ ནང༌ང༌ གྱལ༌པོའེ༌ ཕིའ༌ སྲགས༌ཁན༌ནི༌ ཏ༌གི༌ སྣ༌ཚོགས༌ དུག༌པིན༌ ཨིན༌ནའང༌ ཏེ༌གུན༌ ཅི༌པ༌གུན༌ནི༌ ཟ༌དུག༌པིན༌།”
GEN 40:18 ཡོ༌སེབ༌བི༌ ལན༌ཏངས༌, “ཙེ༌པོ༌ སུམ༌ཀོའེ༌ ཏོན༌བོ༌ ནི༌ ཞག༌པོ༌ སུམ༌བོ༌ ཨིན༌ནོག༌།
GEN 40:19 ཞག༌པོ༌ སུམ༌མི༌ ནང༌ང༌ གྱལ༌པོའེ༌ ཁྱོ༌རང༌ ཕུད༌ཨིན༌ ཡང༌ ཁྱོ༌རང༌ངི༌ གོ༌ ཅད༌ཅུགས༌ཏེ༌ ཁྱོ༌རང༌ངི༌ ཟུགས༌པོ༌ ལྡུང༌མའེ༌ཀ༌ ཏག༌ཨིན༌ ཡང༌ ཅི༌པ༌གུན༌ནི༌ ཁྱོ༌རང༌ངི༌ ཤ༌ཟེན༌།”
GEN 40:20 ཞག༌ སུམ༌པའེ༌ ཞག༌ག༌ གྱལ༌པོའེ༌ སྐྱེ༌ཞག༌ ཨིན༌པིན༌, ཁོའེ༌ ཁོ༌རང༌ངི༌ ལོན༌པོ༌གུན༌ལ༌ གྲོན༌ ཏངས༌ཏེ༌ ཁོ༌རང༌ངི༌ ཆང༌ ལུག༌ཁན༌ དང༌ ཏ༌གི༌ ཅོ༌ཁན༌ནི༌ འུ༌སྐྱོང༌གུན༌ ཙོན༌ཁང༌ནེ༌ པུད༌ཏེ༌ ཁོ༌རང༌ངི༌ ལོན༌པོ༌གུན༌ནི༌ དུན༌ལ༌ ཁྱོངས༌།
GEN 40:21 ཁོའེ༌ ཆང༌ ལུག༌ཁན༌ནི༌ འུ༌སྐྱོང༌, ཁོ༌རང༌ངི༌ སྔུན༌ནི༌ ཀོ༌སའེ༌ཀ༌ སྐོས༌པ༌ ཡང༌སྐྱར༌ ཁོའེ༌ ཕེ༌རོའེ༌ དོན༌སྐྱོག༌པོ༌ གྱལ༌པོའེ༌ ལག༌པའེ༌ ནང༌ང༌ ཏངས༌།
GEN 40:22 ཨིན༌ནའང༌ ཏ༌གི༌ ཅོ༌ཁན༌ནི༌ འུ༌སྐྱོང༌ངི༌ ཟུགས༌པོ༌ ལྡུང༌མའེ༌ཀ༌ ཏགས༌, ཀ༌ཟུག༌ ཡོ༌སེབ༌བི༌ ཉི༌ལམ༌མི༌ ཏོན༌ ཤད༌ ཟ༌ནེ༌ ཟེརས༌།
GEN 40:23 ཨིན༌ནའང༌ གྱལ༌པོའེ༌ ཆང༌ ལུག༌ཁན༌ནི༌ འུ༌སྐྱོང༌ང༌ ཡོ༌སེབ༌ ཨིད༌ཏུ༌ མ༌ལུས༌ ཡང༌ ཁོའ༌ ཁོ༌ རྗེད༌།
GEN 41:1 ལོ༌ ཉིས༌སི༌ སྟིང༌ནེ༌ ཨི༌ཇིབ༌བི༌ གྱལ༌པོའ༌ ཉི༌ལམ༌ ཞིག༌གི༌ ནང༌ང༌ ཁོ༌ ནཱའེལ༌ ལྩངས༌པོའེ༌ དུན༌ལ༌ ལངས༌ཏེ༌ ཡོད༌ ཟ༌ནེ༌
GEN 41:2 ངད༌ཅན༌ གྱགས༌པ༌ བ༌ལང༌ རྡུན༌ ལྩངས༌པོའེ༌ ནང༌ནེ༌ བིངས༌ཏེ༌ ཡོངས༌ ཡང༌ ཏེ༌ ཐའ༌མ༌ ཡོད༌ཁན༌ནི༌ ལྗངས༌པ༌ ཟེན༌ དུགས༌།
GEN 41:3 ཏེ༌ནེ༌ ཏེ༌གུན༌ནི༌ སྟིང༌ནེ༌ ཞན༌ཡང༌ རིད༌པ༌ དང༌ ཁམ༌ལོག༌ བ༌ལང༌ རྡུན༌ ལྩངས༌པོའེ༌ ནང༌ནེ༌ བིང༌ཏེ༌ ཡང༌ ཏེ༌ ཐའ༌མ༌ ཡོད༌ཁན༌ནི༌ བ༌ལང༌ གྱགས༌པ༌གུན༌ནི༌ དུན༌ལ༌ ལངས༌ཏེ༌ ཐོང༌།
GEN 41:4 ཡང༌ བ༌ལང༌ ཁམ༌ལོག༌ རིད༌པ༌གུན༌ནི༌ བ༌ལང༌ ངད༌ཅན༌ གྱགས༌པ༌གུན༌ ཟོས༌། ཏེ༌ནེ༌ གྱལ༌པོའ༌ ཉིད༌ཚད༌།
GEN 41:5 གྱལ༌པོ༌ ཡང༌སྐྱར༌ ཉིད༌ལ༌ སོང༌ཏེ༌ ཉི༌ལམ༌ ཉིས༌པ༌ ཐོང༌; ཁོའ༌ ཞིང༌ངི༌ སོག༌མ༌ ཅིག༌གི༌ཀ༌ ཁྲངས༌པོ༌ གྱལ༌ལ༌ གང༌ཏེ༌ ཡོད༌ཁན༌ནི༌ སྙེ༌མ༌ རྡུན༌ ཆགས༌ཏེ༌ ཐོང༌།
GEN 41:6 ཏེ༌ སྟིང༌ནེ༌ ཁོའ༌ ཞན༌ཡང༌ སྙེ༌མ༌ རྡུན༌ བིང༌ཨིན༌ ཐོང༌, ཀ༌གུན༌ ཇ༌རོ༌ དང༌ ཤར༌ལུང༌ངི༌ སྲགས༌ཏེ༌ དུག༌པིན༌།
GEN 41:7 ཡང༌ ཏེ༌ ཇ༌རོ༌ སྙེ༌མ༌གུན༌ནི༌ ཁྲངས༌པོ༌ སྙེ༌མ༌གུན༌ སྨིད༌ ཏངས༌། ཏེ༌ནེ༌ ཡང༌སྐྱར༌ གྱལ༌པོའ༌ ཉིད༌ཚད༌ ཡང༌ ཁོའ༌ ཉིད༌ལམ༌ ཐོངས༌ཏེ༌ ཨིན༌ཁན༌བོ༌ ཧ༌གོ༌།
GEN 41:8 ང༌མོ༌ ཉི༌ལམ༌མི༌ ཏོན༌བོ༌ ཅི༌ ཨིན༌ཧེ༌ སམས༌ཏེ༌ གྱལ༌པོ༌ ཚེར༌པ༌ ཁོའེ༌ ཨི༌ཇིབ༌པ༌ སེམ༌ཉིད༌གུན༌ལ༌ བོད༌ཁན༌ དང༌ མི༌ ཤེས༌རབས༌ཅན༌ ཚང༌མ༌ བོད༌ཏེ༌ ཁོང༌གུན༌ལ༌ ཁོ༌རང༌ངི༌ ཉི༌ལམ༌གུན༌ ཤདས༌, ཨིན༌ནའང༌ སུ༌ཞིག༌གའང༌ ཁོའ༌ ཏེ༌གུན༌ནི༌ ཏོན༌ ཤད༌ མ༌ཉན༌།
GEN 41:9 ཏེ༌ནེ༌ ཆང༌ ལུག༌ཁན༌ནི༌ སྤོན༌བོའེ༌ གྱལ༌པོ༌ ཟེརས༌, “དི༌རིང༌ ང༌ ངའེ༌ ནོར༌ཁྲུལ༌ ཅོ༌ཁན༌བོ༌ ཨིད༌ཏུ༌ ཡོངས༌།
GEN 41:10 ཉེ༌རང༌ང༌ ཐུགས༌སྲོ༌ སྐྱོད༌ཏེ༌ ཉེ༌རང༌ངི༌ ཏ༌གི༌ ཅོ༌ཁན༌ནི༌ འུ༌སྐྱོང༌ དང༌ ང༌, སྲུང༌ཁན༌ནི༌ མག༌མི༌ སྤོན༌བོའེ༌ ཙོན༌ཁང༌ངི༌ ནང༌ང༌ ཀག༌ཅུགས༌ཏེ༌ ཡོད༌ ཟ༌ནེ༌,
GEN 41:11 ཞག༌ཤིག༌ ཚན༌ལ༌ ང༌ཞའ༌ ཏོན༌ཏག༌ སོ༌སོ༌ ཡོད༌ཁན༌ནི༌ ཉི༌ལམ༌ རིག༌ ཐོང༌།
GEN 41:12 ང༌ཞ༌གུན༌ ཉམ༌པོ༌ སྲུང༌ཁན༌ནི༌ མག༌མི༌ འུ༌སྐྱོང༌ངི༌ ཡོག༌པོ༌ ཨིབ༌རི༌པ༌ ཞུ༌ནུ༌ཞིག༌ ཡོད༌པིན༌། ང༌ཞའེ༌ ཁོའ༌ ཉི༌ལམ༌གུན༌ ཤད༌པིན༌ ཡང༌ ཁོའེ༌ ང༌ཞའ༌ རེ༌རེའ༌ ང༌ཞའེ༌ ཉི༌ལམ༌མི༌ ཏོན༌ ཤདས༌།
GEN 41:13 ཁོའེ༌ ཟེར༌ཁན༌ ཚང༌མ༌ དྲན༌དྲའ༌ གྲུབ༌, ཉེ༌རང༌ངི༌ ང༌ ང༌རང༌ངི༌ ཀོ༌ས༌ ལོགས༌ཏེ༌ སལས༌ ཡང༌ ཏ༌གི༌ ཅོ༌ཁན༌ནི༌ ཟུགས༌པོ༌ ལྕང༌མ༌ ཏགས༌།”
GEN 41:14 གྱལ༌པོའེ༌ ཡོ༌སེབ༌ ཁྱོང༌ཅེས༌ལ༌ བཀའ༌ ཏངས༌ ཡང༌ ཁོ༌ ཏེན༌ན༌མལ༌ལ༌ ཙོན༌ཁང༌ནེ༌ ཕིངས༌ཏེ༌ ཁོའེ༌ སམ༌དལ༌ བྲགས༌ ཡང༌ ཀོས༌ལག༌ སྤོས༌ཏེ༌ གྱལ༌པོའེ༌ དུན༌ལ༌ ཁྱོངས༌།
GEN 41:15 གྱལ༌པོའེ༌ ཡོ༌སེབ༌བ༌ ཟེརས༌, “ངའ༌ ཉི༌ལམ༌ཞིག༌ ཐོང༌ ཡང༌ སུ༌ཞིག༌གའང༌ ཏེ༌བོའེ༌ ཏོན༌ ཤད༌ མ༌ཉན༌། ཨིན༌ནའང༌ ཁྱོ༌རང༌ང༌ ཉི༌ལམ༌མི༌ ཏོན༌ ཤད༌ཉན༌དུག༌ ཟེར༌ཏེ༌ ངའ༌ ཚོར༌།”
GEN 41:16 ཡོ༌སེབ༌བི༌ ལན༌ཏངས༌, “ངའ༌ ཤད༌ ཉན༌ན༌མེད༌ ཨིན༌ནའང༌ ཉེ༌རང༌ངི༌ ཕན༌ཐོགས༌སི༌ ཕིའ༌ དཀོན༌མཆོག༌གི༌ ཉེ༌རང༌ངི༌ ཉིད༌ལམ༌མི༌ ཏོན༌བོ༌ ཤད༌ད༌ ཛད༌ཨིན༌།”
GEN 41:17 གྱལ༌པོའེ༌ ཟེརས༌, “ཉིད༌ལམ༌མི༌ ནང༌ང༌ ང༌ ནཱའེལ༌ ལྩངས༌པོའེ༌ ཐའ༌མ༌ ལངས༌ཏེ༌ ཡོད༌ ཟ༌ནེ༌
GEN 41:18 ངད༌ཅན༌ གྱགས༌པ༌ བ༌ལང༌ རྡུན༌ ལྩངས༌པོའེ༌ ནང༌ནེ༌ བིངས༌ཏེ༌ ཡོངས༌ ཡང༌ ཏེ༌ ཐའ༌མའེ༌ ལྗངས༌པ༌ ཟེན༌ དུགས༌།
GEN 41:19 ཏེ༌གུན༌ནི༌ སྟིང༌ནེ༌ ཞན༌ཡང༌ མ༌ རིད༌པ༌ ཁམ༌ལོག༌ བ༌ལང༌ རྡུན༌ ལྩངས༌པོའེ༌ ནང༌ནེ༌ བིངས༌ཏེ༌ ཡོངས༌, ཏེ༌ཙོགས༌ ཁམ༌ལོག༌ བ༌ལང༌ རིག༌ ངའེ༌ ཨི༌ཇིབ༌བི༌ ཡུལ༌ གང༌པོའེ༌ ནང༌ང༌ མ༌ནེ༌ མ༌ཐོང༌།
GEN 41:20 རིད༌པ༌ ཁམ༌ལོག༌ བ༌ལང༌གུན༌ནི༌ གྱགས༌པ༌ རྡུན༌བོ༌ ཟོས༌།
GEN 41:21 ཨིན༌ནའང༌ ཏེ༌གུན༌ནི༌ གྱགས༌པ༌ བ༌ལང༌གུན༌ ཟོས༌ཏེ༌ ཨིན༌ཁན༌བོ༌ སུའིང༌ ཤེས༌ མ༌ཐུབ༌ ཅིའ༌ཟེར༌ན༌ ཏེ༌གུན༌ གོ༌མ༌ ཙོགས༌ལ༌ ཁམ༌ལོག༌ དང༌ རིད༌པ༌ དུག༌པིན༌། ཏེ༌ནེ༌ ངའ༌ ཉིད༌ཚད༌།”
GEN 41:22 “ང༌ ཡང༌སྐྱར༌ ཉིད༌ལ༌ སོང༌ཏེ༌ འི༌ ཉི༌ལམ༌བོའང༌ ཐོང༌, ཞིང༌ངི༌ སོག༌མ༌ ཅིག༌གི༌ཀ༌ ཁྲངས༌པོ༌ གྱལ༌ལ༌ གང༌ཏེ༌ ཡོད༌ཁན༌ནི༌ སྙེ༌མ༌ རྡུན༌ ཆགས༌ཏེ༌ ཐོང༌།
GEN 41:23 ཏེ༌ནེ༌ ཞན༌ཡང༌ སྙེ༌མ༌ རྡུན༌ བིང༌ཨིན༌ ཐོང༌, ཀ༌གུན༌ ཇ༌རོ༌ དང༌ ཤར༌ལུང༌ངི༌ སྲགས༌ཏེ༌ དུག༌པིན༌།
GEN 41:24 ཡང༌ ཏེ༌ ཇ༌རོ༌ སྙེ༌མ༌གུན༌ནི༌ ཁྲངས༌པོ༌ སྙེ༌མ༌གུན༌ སྨིད༌ ཏངས༌། ངའེ༌ སེམ༌ཉིད༌ལ༌ བོད༌ཁན༌གུན༌ལ༌ ཉི༌ལམ༌བོ༌ ཤད༌པིན༌ ཨིན༌ནའང༌ སུ༌ཞིག༌གིའང༌ ཏེ༌བོའེ༌ ཏོན༌ ཤད༌ མ༌ཉན༌།”
GEN 41:25 ཡོ༌སེབ༌བི༌ གྱལ༌པོའ༌ ཟེརས༌, “ཉི༌ལམ༌ ཉིས༌ཀོའེ༌ ཏོན༌ཏག༌ ཙོགས༌ ཨིན༌ནོག༌། དཀོན༌མཆོག༌གི༌ ཅོའ༌ ཛད༌ཅེས༌པོ༌ ཉེ༌རང༌ང༌ སྔོན༌ཅུགས༌ཏེ༌ ཨིན༌ནོག༌།
GEN 41:26 བ༌ལང༌ གྱགས༌པ༌ རྡུན༌བོ༌ ནི༌ ལོ༌ རྡུན༌ ཡང༌ ཁྲངས༌པོ༌ གྱལ༌ལ༌ གངས༌ཁན༌ སྙེ༌མ༌ རྡུན༌གུན༌ནའང༌ ལོ༌ རྡུན༌ ཨིན༌ནོག༌། ཉི༌ལམ༌ ཉིས༌ཀོ༌ ཙོགས༌ ཨིན༌ནོག༌།
GEN 41:27 སྟིང༌ནེ༌ བིང༌ཁན༌ནི༌ བ༌ལང༌ རིད༌པ༌ ཁམ༌ལོག༌ རྡུན༌ དང༌ ཤར༌ལུང༌ངི༌ སྲགས༌ཁན༌ སྙེ༌མ༌ ཇ༌རོ༌ རྡུན༌གུན༌, ལོ༌ རྡུན༌ནི༌ མུ༌གེ༌ ཨིན༌ནོག༌།”
GEN 41:28 “ཏེན༌ན༌བོ༌ ཇུང༌ཨིན༌ ཀ༌ཟུག༌ ངའེ༌ ཉེ༌རང༌ང༌ ཟེརས༌, དཀོན༌མཆོག༌གི༌ ཛད༌ཅེས༌ཅན༌བོ༌ ཉེ༌རང༌ང༌ སྟན༌ན༌ ཛད༌ཏེ༌ ཨིན༌ནོག༌།
GEN 41:29 ཨི༌ཇིབ༌བི༌ ས༌ཆ༌ གང༌པོའེ༌ ནང༌ང༌ ལོ༌ རྡུན༌ སྟོན༌ཐོག༌ མངས༌ཏེའང༌ མང༌པོ༌ སྨིན༌ཨིན༌།
GEN 41:30 ཏེ༌ སྟིང༌ནེ༌ ལོ༌ རྡུན༌ནི༌ ཕིའ༌ མུ༌གེ༌ ཇུང༌ཨིན༌ ཡང༌ སྟོན༌ཐོག༌ གྱལ༌ལ༌ ཡོང༌ཁན༌ནི༌ ཏུས༌པོ༌ རྫེད༌ཨིན༌ ཅིའ༌ཟེར༌ན༌ ཡུལ༌ གང༌པོའེ༌ ནང༌ང༌ མུ༌གེ༌ སྲན༌ཏྲེ༌ ཡོང༌ཨིན༌།
GEN 41:31 མུ༌གེ༌ ཞས༌ཏེ༌ སྕོད༌པའེ༌ ཏུས༌གུན༌ རྫེད༌ཅུག༌ཨིན༌ ཅིའ༌ཟེར༌ན༌ མུ༌གེ༌ ཏུས༌པོ༌ མ༌བར༌དོ༌ཅན༌ ཡོང༌ཨིན༌།
GEN 41:32 ཉེ༌རང༌ང༌ ཉི༌ལམ༌ ལྡབས༌ཏེ༌ ཐོང༌ཅེས༌སི༌ ཏོན༌ ནི༌ དཀོན༌མཆོག༌གི༌ ཏེ༌ཟུག༌ ཛད༌ཅེས༌ལ༌ ཐག༌ཅད༌ད༌ ཛད༌ཁན༌ ཡང༌ ཏེ༌བོ༌ གྱོགས༌པ༌ ཇུང༌ཅེས༌པོ༌ ཨིན༌ནོག༌།”
GEN 41:33 “ཏ༌ ཕེ༌རོ༌ ཉེ༌རང༌ངི༌ རིག༌པ༌ དང༌ ཤེས༌རབས༌ཅན༌ མི༌ཞིག༌ ལྡམས༌ཏེ༌ ཁོ༌ ཡུལ༌ལི༌ ཁག༌ཁུར༌པ༌ ཅོའ༌ ཛད༌།
GEN 41:34 སྟོན༌ཐོག༌ གྱལ༌ལ༌ ཡོང༌ཁན༌ནི༌ ལོ༌ རྡུན༌ནི༌ ཏུས༌ལ༌ ཏེ༌བོའེ༌ ལྔ༌ ཁག༌པོ༌ ཐེན༌ཏེ༌ བོར༌ཅེས༌ལ༌ ཉེ༌རང༌ངི༌ ཞན༌ཡང༌ འུ༌སྐྱོང༌གུན༌ སྐོའ༌ ཛད༌།
GEN 41:35 གྱལ༌པོ༌ ཕེ༌རོའེ༌ ཝང༌ཆའེ༌ ནང༌ང༌ ཁོང༌གུན༌ལ༌ ལོ༌ ཟང༌པོ༌གུན༌ནི༌ ནང༌ང༌ སྟོན༌ཐོག༌ ཐེ༌བ༌ སྨིན༌ཁན༌ ཚང༌མ༌ ལྡུ༌ཏེ༌ གྱལ༌ས༌གུན༌ནི༌ ནང༌ང༌ སག༌ཅུག༌ག༌ ཛད༌།
GEN 41:36 ཨི༌ཇིབ༌བི༌ ནང༌ང༌ ཡོང༌ཅེས༌ཅན༌ནི༌ ལོ༌ རྡུན༌ནི༌ མུ༌གེ༌ ཏུས༌ལ༌ ཡུལ༌པ༌གུན༌ནི༌ ཕིའ༌ ཀོལ༌ཅེས༌ལ༌ ཏེ༌ ཁར༌ཇི༌གུན༌ སགས༌ཏེ༌ བོར༌གོས༌། ཏེ༌ནེ༌ ཡུལ༌མི༌གུན༌ སྟོགས༌ཏེ༌ མི༌ཤི༌།”
GEN 41:37 གྱལ༌པོ༌ དང༌ ཁོའེ༌ སྤོན༌བོ༌ ཚང༌མའ༌ ཐབ༌ལྡིངས༌པོ༌ གྱལ༌ལ༌ ཚོར༌
GEN 41:38 ཏེ༌ནེ༌ ཕེ༌རོའེ༌ ཁོང༌གུན༌ལ༌ ཟེརས༌, “ང༌དང༌གུན༌ལ༌ ཡོ༌སེབ༌ ཙོགས༌སི༌ མི༌ དཀོན༌མཆོག༌གི༌ ཐུག༌ཉིད༌ ཡོད༌ཁན༌ཞིག༌ ཐོབ༌ ཨིན༌ན༌?”
GEN 41:39 ཏེ༌ནེ༌ གྱལ༌པོའེ༌ ཡོ༌སེབ༌བ༌ ཟེརས༌, “དཀོན༌མཆོག༌གི༌ ཁྱོ༌རང༌ང༌ འི༌ ཚང༌མ༌ སྔོན༌ཅུག༌ག༌ ཛད༌ པ༌སང༌ ཏན༌ཏན༌ ཁྱོ༌རང༌ ཚང༌མའེ༌སང༌ ཤེས༌རབས༌ དང༌ རིག༌པ༌ཅན༌ ཡོད༌ཏེ༌ ཨིན༌ནོག༌།
GEN 41:40 ངའེ༌ གྱལ༌སྲིད༌དི༌ ཁག༌པོ༌ ངའེ༌ ཁྱོ༌རང༌ང༌ ཀལ༌ལད༌, ཡང༌ ངའེ༌ མི༌ཚང༌མའེ༌ ཁྱོ༌རང༌ངི༌ བཀའ༌ ཁའ༌ ཉན༌ཨིན༌། ང༌ མན༌པ༌ ཁྱོ༌རང༌ང༌ ཅི༌ཚང༌མའེ༌ཀ༌ ཝང༌ཆ༌ ཡོད༌།”
GEN 41:41 ཏེ༌ནེ༌ ཕེ༌རོའེ༌ ཡོ༌སེབ༌བ༌ ཟེརས༌, “ཏ༌ ངའེ༌ ཁྱོ༌རང༌ ཨི༌ཇིབ༌བི༌ ཡུལ༌ གང༌པོའེ༌ཀ༌ ཝང༌སྲུལ༌པ༌ སྐོའད༌།”
GEN 41:42 གྱལ༌པོའེ༌ ཁོ༌རང༌ངི༌ ཛི༌གུའི༌ ཀ༌ནེ༌ ཐེ༌ཙེ༌ སེར༌དུབ༌པོ༌ ཕུད༌ཏེ༌ ཡོ༌སེབ༌བི༌ ཛི༌གུའ༌ སྐརས༌། ཁོའ༌ ཀུས༌པོ༌ ཀོས༌ སྐོནས༌ ཡང༌ ཁོའེ༌ སྐྱེའ༌ སེར༌རི༌ ཉག༌ཐག༌ ཏགས༌།
GEN 41:43 ཕེ༌རོའེ༌ ཝང༌སྲུལ༌པ༌ ཉིས༌པའེ༌ ཚུལ༌ལ༌ ཁོའ༌ རྟ༌རེལ༌ ཞོན༌ཅེས༌ལ༌ ཏངས༌, ཡང༌ མི༌གུན༌ ཁོའེ༌ སྔུན༌སྔུན༌ལ༌ ཆེན༌ ཀུ༌ཅོ༌ ཏང༌ཨིན༌ ཟེརས༌, “གོ༌ སྒུས༌ཏེ༌ ཀུས༌པ༌ ཅོས༌།” གྱལ༌པོའེ༌ ཡོ༌སེབ༌ ཨི༌ཇིབ༌ ཡུལ༌ གང༌པོའེ༌ཀ༌ ཝང༌སྲུལ༌པའ༌ སྐོས༌།
GEN 41:44 གྱལ༌པོའེ༌ ཁོའ༌ ཟེརས༌, “ང༌ ཨི༌ཇིབ༌བི༌ གྱལ༌པོ༌ ཨིན༌ ཨིན༌ནའང༌ ཁྱོ༌རང༌ངི༌ གོངས༌པ༌ མེད༌པ༌ ཨི༌ཇིབ༌ གང༌པོའེ༌ ནང༌ང༌ སུ༌ཞིག༌གའང༌ ཅའང༌ ཅོ༌ མི༌ཉན༌།”
GEN 41:45 ཕེ༌རོའེ༌ ཡོ༌སེབ༌བི༌ མིང༌ ཟི༌ཕི༌ནེཐ༌ པེ༌ནེ༌ཨཧ༌ ཏགས༌ ཡང༌ འོན༌ ཡུལ༌ལི༌ བླ༌མ༌ པོ༌ཏི༌ཕར༌རི༌ བུ༌མོ༌ ཨ༌སི༌ནད༌ ཁོའ༌ ན༌མའ༌ ཏངས༌། ཏེ༌ནེ༌ ཡོ༌སེབ༌བི༌ ཨི༌ཇིབ༌ གང༌པོའེ༌ཀ༌ ཝང༌ སྲུལས༌།
GEN 41:46 ཨི༌ཇིབ༌བི༌ གྱལ༌པོའ༌ ཞབས༌ཏོག༌ ཞུ༌ཅེས༌ གོ༌ཟུག༌ ཟ༌ནེ༌ ཡོ༌སེབ༌བ༌ ལོ༌ སུམ༌ཅུ༌ ཆའད༌པིན༌། ཁོ༌ གྱལ༌པོའེ༌ ཁར༌ནེ༌ བིང༌ཏེ༌ ཨི༌ཇིབ༌བི༌ ཡུལ༌ གང༌པོའེ༌ ནང༌ང༌ སྟ༌སྟོག༌ག༌ སོང༌།
GEN 41:47 ལོ༌ རྡུན༌ ས༌ཆའེ༌ ཀ༌ནེ༌ སྟོན༌ཐོག༌ མ༌ མང༌པོ༌ སྨིན༌།
GEN 41:48 ཡོ༌སེབ༌བི༌ ལོ༌ རྡུན༌ནི༌ ནང༌ང༌ ཐེ༌བ༌ སྟོན༌ཐོག༌ སྨིན༌ཁན༌གུན༌ ལྡུས༌ཏེ༌ གྱལ༌ས༌གུན༌ནི༌ ཛོད༌ཁང༌ངི༌ ནང༌ང༌ སགས༌། ཁོའེ༌ གྱལ༌ས༌ རེ༌རེ༌ ནང༌ང༌ ཏེ༌ ཉེ༌ཁོར༌རི༌ སྟོན༌ཐོག༌གུན༌ ལྡུས༌ཏེ༌ སགས༌།
GEN 41:49 ཡོ༌སེབ༌བི༌ གྱ༌ཚོའེ༌ པེ༌མ༌ ཙོགས༌ མང༌པོ༌ གྲུ༌ སགས༌, ཁོའ༌ ཏེ༌བོ༌ ཏབ༌ ཁོ༌རང༌ མ༌ཉན༌ ཅིའ༌ཟེར༌ན༌ གྲུ༌ ཏེ༌ཟམ༌ མང༌པོ༌ ཡོད༌པིན༌།
GEN 41:50 མུ༌གེ༌ ཇུང༌ངི༌ སང༌ སྔུན༌ལ༌ ཡོ༌སེབ༌བ༌ བུ༌ཚ༌ ཉིས༌ ཡོད༌པིན༌, ཀ༌གུན༌ འོན༌ ཡུལ༌ལི༌ བླ༌མ༌ པོ༌ཏི༌ཕར༌རི༌ བུ༌མོ༌ ཨ༌སི༌ནད༌ལ༌ ཇོར༌ཏེ༌ ཨིན༌པིན༌།
GEN 41:51 ཁོའེ༌ ཁོ༌རང༌ངི༌ གོ༌མའེ༌ བུ༌ཚའེ༌ མིང༌ང༌ མ༌ནས༌ས༌ ཏགས༌ ཅིའ༌ཟེར༌ན༌ ཁོའེ༌ ཟེརས༌, “དཀོན༌མཆོག༌གི༌ ངའེ༌ རྡུག༌ངལ༌ དང༌ ངའེ༌ ཨ༌བའེ༌ ནང༌ཚངས༌ ཚང༌མ༌ རྗེད༌ ཅུག༌ག༌ ཛདས༌།”
GEN 41:52 ཁོའེ༌ ཁོ༌རང༌ངི༌ བུ༌ཚ༌ ཉིས༌པ༌བོའ༌ ཨེཕ༌ར༌ཡིམ༌ མིང༌ང༌ ཏགས༌ ཡང༌ ཟེརས༌, “དཀོན༌མཆོག༌གི༌ ངའ༌ རྡུག༌ངལ༌ ཐོང༌སའེ༌ ས༌ཆའེ༌ ནང༌ང༌ ཕྲུ༌གུ༌ སལ༌ལ༌ ཛདས༌།”
GEN 41:53 ཨི༌ཇིབ༌བི༌ ནང༌ང༌ སྟོན༌ཐོག༌ གྱལ༌ལ༌ སྨིན༌ཁན༌ནི༌ སྐྱིད༌པའེ༌ ལོ༌ རྡུན༌བོ༌ ཚར༌
GEN 41:54 ཡང༌ ཡོ༌སེབ༌བི༌ ཟེར༌ཁན༌ ནང༌ཞིན༌ མུ༌གེ༌ ལོ༌ རྡུན༌བོ༌ གོ༌ཟུག༌ སོང༌། ཞན༌ ཡུལ༌ ཚང༌མའེ༌ ནང༌ངའང༌ མུ༌གེ༌ ཇུང༌, ཨིན༌ནའང༌ ཨི༌ཇིབ༌བི༌ ཡུལ༌ གང༌པོའེ༌ ནང༌ང༌ ཟ༌གྱུ༌ ཡོད༌པིན༌།
GEN 41:55 ཨི༌ཇིབ༌པ༌གུན༌ལ༌ མུ༌གེ༌ ཞས༌ཏེ༌ སྟོག༌རི༌ ཐོང༌ང༌ཅིག༌ ཁོང༌གུན༌ནི༌ གྱལ༌པོའ༌ ཟའ༌ཅེས༌ ཏོང༌ ཟེར༌ཏེ༌ ཀུ༌ཅོ༌ ཏངས༌། ཏེ༌ནེ༌ གྱལ༌པོའེ༌ ཁོང༌ ཚང༌མ༌ ཟེརས༌, “ཡོ༌སེབ༌ ཡོད༌ས༌ སོང༌ཏེ༌ ཁོའེ༌ ཟེར༌ཁན༌བོ༌ ཅོས༌།”
GEN 41:56 མུ༌གེ༌ ཡུལ༌ གང༌པོའེ༌ ནང༌ང༌ ཕེལ༌ལ༌ཅིག༌ ཡོ༌སེབ༌བི༌ ཛོད༌ཁང༌ ཚང༌མ༌ ཕེས༌ཏེ༌ ཨི༌ཇིབ༌པ༌གུན༌ལ༌ གྲུ༌ ཙོངས༌ ཅིའ༌ཟེར༌ན༌ ཨི༌ཇིབ༌བི༌ ཡུལ༌ གང༌པོའེ༌ ནང༌ང༌ མུ༌གེ༌ མ༌ སྲན༌ཏྲེ༌ ལངས༌ཏེ༌ ཡོད༌པིན༌།
GEN 41:57 ཇིག༌རྟེན༌ གང༌པོ༌ནེ༌ མི༌གུན༌ ཨི༌ཇིབ༌བ༌ ཡོ༌སེབ༌བི༌ ཀ༌ནེ༌ གྲུ༌ ཉོའ༌ལ༌ ཡོངས༌ ཅིའ༌ཟེར༌ན༌ ཇིག༌རྟེན༌ གང༌པོའེ༌ ནང༌ང༌ མུ༌གེ༌ སྲན༌ཏྲེ༌ ལངས༌ཏེ༌ ཡོད༌པིན༌།
GEN 42:1 ཡ༌ཀོབ༌བ༌ ཨི༌ཇིབ༌བི༌ ནང༌ང༌ གྲུ༌ ཡོད༌ཁན༌བོ༌ ཚོར༌ར༌ཅིག༌ ཁོའེ༌ ཁོང༌རང༌ངི༌ བུ༌ཚ༌གུན༌ལ༌ ཟེརས༌, “ཁྱོ༌རང༌གུན༌ ཚེར༌ཨིན༌ ཅའང༌ མ༌ཅོའ༌ དུགས༌ཏེ༌ ཅི༌ ཅོའད༌?
GEN 42:2 ཨི༌ཇིབ༌བི༌ ནང༌ང༌ གྲུ༌ དུག༌ ཟེར༌ཏེ༌ ངའེ༌ ཚོར༌, ང༌དང༌གུན༌ སྟོག༌རིའ༌ མི༌ ཤི༌ཅེས༌ལ༌ ཏེ༌རུ༌ སོང༌ཏེ༌ གྲུ༌ ཉོས༌ཏེ༌ ཁྱོང༌།”
GEN 42:3 ཏེ༌ནེ༌ ཡོ༌སེབ༌བི༌ ཨ༌ཅོ༌ རྕུ༌ ཨི༌ཇིབ༌བ༌ གྲུ༌ ཉོའ༌ལ༌ སོང༌།
GEN 42:4 ཨིན༌ནའང༌ ཡ༌ཀོབ༌བི༌ ཡོ༌སེབ༌བི༌ ནོ༌ བེན༌ཡཱ༌མིན༌ ཁོང༌གུན༌ ཉམ༌པོ༌ ལམ༌ མ༌ཅུགས༌ ཅིའ༌ཟེར༌ན༌ ཁོ༌ ཉམ༌པོ༌ ངན༌པ༌ ཆ༌སྲིད༌ཅེས༌ ཨིན༌ནོག༌ སམ༌ཏེ༌ ཁོ༌ ཇིགས༌།
GEN 42:5 ཞན༌ མི༌གུན༌ ཉམ༌པོ༌ ཡ༌ཀོབ༌བི༌ བུ༌ཚ༌གུན༌ གྲུ༌ ཉོ༌ཅེས༌ལ༌ སོང༌ ཅིའ༌ཟེར༌ན༌ ཀེ༌ནན༌ནི༌ ནང༌ངའང༌ མུ༌གེ༌ ཇུང༌ཏེ༌ ཡོད༌པིན༌།
GEN 42:6 ཡོ༌སེབ༌ ཨི༌ཇིབ༌བི༌ ལོན༌པོ༌ ཨིན༌ པ༌སང༌ མི༌ཚང༌མ༌ལ༌ གྲུ༌ ཙོང༌ཅེས༌སི༌ ཁག༌ ཁོའེ༌ ཨིན༌པིན༌། ཡོ༌སེབ༌བི༌ ཨ༌ཅོ༌གུན༌ ཁོ༌ ཡོད༌ས༌ ཡོངས༌ ཡང༌ ཁོའེ༌ དུན༌ལ༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 42:7 ཨ༌ཅོ༌གུན༌ ཐོང༌ང༌ཅིག༌ ཡོ༌སེབ༌བི༌ ཁོང༌གུན༌ ཤེས༌ ཨིན༌ནའང༌ མི༌ཤེས༌ཟུན༌ ཏངས༌ཏེ༌ ཁོའེ༌ ཁོང༌གུན༌ལ༌ སྤེ༌ར༌ སྐྱོང༌པོ༌ ཏངས༌ཏེ༌ ཏྲིས༌, “ཁྱོ༌ཞ༌གུན༌ ཀ༌ནེ༌ ཡོངས༌ཏེ༌ ཨིན༌?” ཁོང༌གུན༌ནི༌ ལན༌ཏངས༌, “ང༌ཞ༌གུན༌ ཀེ༌ནན༌ནེ༌ ཟའ༌ཅེས༌ ཉོའ༌ལ༌ ཡོངས༌པིན༌།”
GEN 42:8 ཡོ༌སེབ༌བི༌ ཁོང༌གུན༌ ཤེས༌ ཨིན༌ནའང༌ ཁོང༌གུན༌ནི༌ ཡོ༌སེབ༌ མ༌ཤེས༌།
GEN 42:9 ཁོའ༌ ཁོང༌གུན༌ནི༌ སྐོར༌ལ༌ ཉི༌ལམ༌ ཐོང༌ཁན༌བོ༌ ཨིད༌ཏུ༌ ཡོངས༌ ཡང༌ ཁོང༌གུན༌ལ༌ ཟེརས༌, “ཁྱོ༌ཞའ༌ ང༌ཞའེ༌ གྲ༌འོ༌, སང༌ཝའེ༌ ཐོག༌ནེ༌ ང༌ཞའེ༌ ཡུལ༌ལི༌ སྲུང༌སྐྱོབ༌ འུ༌ཐུགས༌ ཡོད༌ས༌གུན༌ ལྟའ༌ལ༌ ཡོངས༌ཏེ༌ ཨིན༌ནོག༌།”
GEN 42:10 ཁོང༌གུན༌ནི༌ ལན༌ཏངས༌, “མན༌, སྤོན༌བོ༌ལེ༌། ཉེ༌རང༌ངི༌ ཡོག༌པོ༌ ང༌ཞའ༌, ཟའ༌ཅེས༌ ཉོའ༌ལ༌ ཡོངས༌ཏེ༌ ཨིན༌།
GEN 42:11 ང༌ཞའ༌ ཚང༌མ༌ ཨ༌བ༌ ཅིག༌གི༌ བུ༌ཚ༌གུན༌ ཨིན༌། སྤོན༌བོ༌ལེ༌ ང༌ཞ༌གུན༌ ཀྲང༌པོ༌ མི༌རིག༌ ཨིན༌, གྲ༌འོ༌ མན༌།”
GEN 42:12 ཡོ༌སེབ༌བི༌ ཁོང༌གུན༌ལ༌ ཟེརས༌, “མན༌, ཁྱོ༌ཞ༌གུན༌ ང༌ཞའེ༌ ཡུལ༌ལི༌ སྲུང༌སྐྱོབ༌ འུ༌ཐུགས༌ ཡོད༌ས༌གུན༌ ལྟའ༌ལ༌ ཡོངས༌ཏེ༌ ཨིན༌ནོག༌།”
GEN 42:13 ཁོང༌གུན༌ནི༌ ཟེརས༌, “ང༌ཞའ༌ ཨ༌བ༌ ཅིག༌གི༌ བུ༌ཚ༌ ཨ༌ཅོ༌ནོ༌ རྕུག༌ཉིས༌ ཀེ༌ནན༌ ཡུལ༌ལི༌ ནང༌ང༌ དུག༌ཁན༌གུན༌ ཨིན༌། ང༌ཞའེ༌ ནོ༌ ཆུང༌ཤོག༌པོ༌ དག༌ས༌ ང༌ཞའེ༌ ཨ༌བ༌ ཉམ༌པོ༌ ཡོད༌ ཡང༌ ཅིག༌ཅིག༌ ཤི༌།”
GEN 42:14 ཡོ༌སེབ༌བི༌ ཟེརས༌, “ངའེ༌ ཟེར༌ཁན༌བོ༌ ཏན༌ཏན༌ ཨིན༌ནོག༌ ཁྱོ༌ཞ༌གུན༌ སང༌ཝའེ༌ ཐོག༌ནེ༌ ལྟའ༌ ཡོང༌ཁན༌ གྲ༌འོ༌གུན༌ ཨིན༌ནོག༌།
GEN 42:15 ཁྱོ༌ཞ༌གུན༌ནི༌ ཟེར༌ཁན༌བོ༌ ཀྲང༌པོ༌ ཨིན༌ན༌ མན༌ ལྟ༌ཅེས༌ལ༌ ངའེ༌ གྱལ༌པོའེ༌ མིང༌ངི༌ ནའ༌ ཁུར༌རད༌, ཁྱོ༌ཞའེ༌ ནོ༌ ཆུང༌ཤོག༌པོ༌ འི༌རུ༌ ཡོངས༌ཏེ༌ མ༌ནེ༌ ཁྱོ༌ཞའ༌ འི༌ ནས༌ས༌ནེ༌ བིངས༌ཏེ༌ ཆ༌ མི༌ཉན༌།
GEN 42:16 ཁྱོ༌ཞའེ༌ ནང༌ནེ༌ ཅིག༌, ནོ༌ ཁྱོང༌ང༌ལ༌ སོང༌, ཞན༌གུན༌ ཙོན༌ཁང༌ངི༌ ནང༌ང༌ བོར༌ཨིན༌ ནམ༌ཚོག༌པ༌ ཁྱོ༌ཞའེ༌ ཟེར༌ཁན༌བོ༌ ཀྲང༌པོ༌ མི༌བིང༌, ཀལ༌ཏེས༌ ཀྲང༌པོ༌ མ༌བིང༌ན༌ གྱལ༌པོའེ༌ སོན༌པོ༌ འིན༌ན༌ ཙོགས༌ལ༌ ཁྱོ༌ཞའ༌ གྲ༌འོ༌ སང༌ཝའེ༌ ཐོག༌ནེ༌ ཡོང༌ཁན༌བོ༌ ཏན༌ཏན༌ ཨིན༌ནོག༌།”
GEN 42:17 ཏེ༌ནེ༌ ཁོའེ༌ ཁོང༌གུན༌ ཙོན༌ཁང༌ངི༌ ནང༌ང༌ ཞག༌པོ༌ སུམ༌མི༌ ཕིའ༌ ཀག༌ཅུགས༌།
GEN 42:18 ཞག༌པོ༌ སུམ༌པའེ༌ ཞག༌ག༌ ཡོ༌སེབ༌བི༌ ཁོང༌གུན༌ལ༌ ཟེརས༌, “ང༌ དཀོན༌མཆོག༌ག༌ ཇིགས༌ཁན༌ནི༌ མི༌ཞིག༌ ཨིན༌། ངའེ༌ ཟེར༌ཁན༌བོ༌ ཅོ༌ན༌ ཁྱོ༌ཞ༌གུན༌ སོན༌ཏེའ༌ ལུས༌ཨིན༌།
GEN 42:19 ཁྱོ༌རང༌གུན༌ ཀྲང༌པོ༌ ཨིན༌ན༌ ཁྱོ༌ཞ༌གུན༌ནི༌ ནང༌ནེ༌ ཅིག༌ ཙོན༌ཁང༌ངི༌ ནང༌ང༌ དུག༌, ཞན༌གུན༌ནི༌ ཁྱོ༌ཞའེ༌ ནང༌མི༌ སྟོག༌རིའ༌ ཡོད༌ཁན༌གུན༌ནི༌ ཕིའ༌ གྲུ༌ ཉོས༌ཁན༌བོ༌ ཁྱེར༌།
GEN 42:20 ཨིན༌ནའང༌ ཁྱོ༌ཞའེ༌ ཟེར༌ཁན༌བོ༌ ཀྲང༌པོ༌ ཨིན༌ཁན༌ སྟན༌ཅེས༌ལ༌ ཁྱོ༌ཞ༌གུན༌ནི༌ ནོ༌ ཆུང༌ཤོག༌པོ༌ ང༌ ཡོད༌ས༌ ཁྲིད༌ཏེ༌ ཁྱོང༌གོས༌། ཏེ༌ནེ༌ ངའེ༌ ཁྱོ༌རང༌གུན༌ སད༌ མི༌སད༌།” ཁོང༌གུན༌ནི༌ ཏེ༌བོ༌ ཅོ༌ཅེས༌ལ༌ ཁའ༌ ཆམས༌།
GEN 42:21 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “ཏན༌ཏན༌ལ༌, ང༌དང༌གུན༌ནི༌ ནོ༌ ཉམ༌པོ༌ ཅོ༌ཁན༌བོའེ༌ ཞས༌ཏེ༌ ང༌དང༌གུན༌ལ༌ ཆད༌པ༌ ཕོག༌ཏེ༌ ཨིན༌ནོག༌། ཁོའ༌ ནོད༌པ༌ མི༌སྐྱལ༌ཅེས༌ལ༌ ཞུ༌ཝ༌ ཕུལ༌ ཟ༌ནེ༌ ཁོ༌ ཚེར༌ཁ༌ དང༌ ཇིགས༌ཏེ༌ ཡོད༌ཁན༌བོ༌ ང༌དང༌གུན༌ནི༌ ཐོང༌ ཨིན༌ནའང༌ ང༌དང༌གུན༌ནི༌ ཁོའེ༌ ཞུ༌ཝ༌ མ༌ཉནས༌། ཏེན༌ན༌བོའེ༌ ཞས༌ཏེ༌ དག༌ས༌ ང༌དང༌གུན༌ལ༌ ནགས༌ ཐོང༌ཨིན༌ ཨིན༌ནོག༌།”
GEN 42:22 རུ༌བེན༌ནི༌ ཟེརས༌, “ངའེ༌ ཁྱོ༌ཞའ༌ ཟེར༌ར༌ མེ༌རག༌ག༌ ‘བུ༌ཚའེ༌ གྱབ༌གལ༌ལ༌ སྡིག༌པ༌ མ༌ཅོ༌’ ཨིན༌ནའང༌ ཁྱོ༌ཞའེ༌ མ༌ཉནས༌། ཏ༌ ང༌དང༌གུན༌ལ༌ ཁོའེ༌ སྲོག༌རིན༌ ཤལ༌གོས༌ཏེ༌ ཨིན༌ནོག༌།”
GEN 42:23 ཁོང༌གུན༌ནི༌ ཟེར༌ཁན༌གུན༌ ཡོ༌སེབ༌བ༌ ཧ༌གོ༌ཅེས༌པོ༌ ཁོང༌གུན༌ལ༌ མ༌ཤེས༌ ཅིའ༌ཟེར༌ན༌ ཁོའེ༌ སྐད༌གྱུར༌ཁན༌ ཀོལ༌ལད༌པིན༌།
GEN 42:24 ཡོ༌སེབ༌ ཁོང༌གུན༌ནེ༌ ཐག༌རིང༌ང༌ སོང༌ཏེ༌ ངུས༌ ཨིན༌ནའང༌ ཡང༌སྐྱར༌ ལོགས༌ཏེ༌ ཡོངས༌ཏེ༌ ཁོང༌གུན༌ལ༌ སྤེ༌ར༌ ཏངས༌། ཁོང༌གུན༌ནི༌ ཕྲོ༌ནེ༌ ཁོའེ༌ སི༌མེ༌འོན༌ ཁྱེར༌ཏེ༌ ཚང༌མའེ༌ དུན༌ལ༌ ཁོ༌ ལྡམས༌ཏེ༌ ཙོན༌ཁང༌ངི༌ ནང༌ང༌ བོར༌ཅུགས༌།
GEN 42:25 ཡོ༌སེབ༌བི༌ ཁོའེ༌ ཨ༌ཅོ༌གུན༌ནི༌ ཕ༌ཙ༌གུན༌ གྲུའི༌ སྐང༌ཅུགས༌, ཁོང༌གུན༌ནི༌ པེ༌ནེ༌ གྲུའི༌ ཕ༌ཙའེ༌ ནང༌ང༌ ལོགས༌ཏེ༌ གྱང༌ཅུགས༌ ཡང༌ ཁོང༌གུན༌ནི༌ བེས༌སི༌ ཕིའ༌ ཁར༌ཇི༌ ཏང༌ཅེས༌ལ༌ བཀའ༌ ཏངས༌། ཏེ༌གུན༌ ཅོས༌ ཚར༌ར༌ཅིག༌,
GEN 42:26 ཨ༌ཅོ༌གུན༌ནི༌ ཁོང༌རང༌ངི༌ བུང༌བུ༌གུན༌ནི༌ཀ༌ གྲུའི༌ ཁུ༌རུ༌ ཀལས༌ ཡང༌ སོང༌།
GEN 42:27 ཁོང༌གུན༌ ཚན༌ལ༌ དུགས༌སའེ༌ ནས༌སའེ༌ཀ༌ ཁོང༌ ཅིག༌གི༌ ཁོ༌རང༌ངི༌ བུང༌བུའ༌ གྲུ༌ ཏང༌ཅེས༌ལ༌ ཕ༌ཙ༌བོ༌ ཕེས༌པ༌ ཁོ༌རང༌ངི༌ པེ༌ནེ༌བོ༌ ཕ༌ཙའེ༌ ཁའེ༌ཀ༌ ཐོང༌།
GEN 42:28 ཁོའེ༌ ཁོ༌རང༌ངི༌ ཨ༌ཅོ༌ནོ༌གུན༌ལ༌ ཟེརས༌, “ངའེ༌ པེ༌ནེ༌ ཕ༌ཙའེ༌ གྲུ༌ ཉམ༌པོ༌ ལོགས༌ཏེ༌ ཏངས༌ཏེ༌ དུག༌།” ཁོང༌གུན༌ ཇིགས༌ཏེ༌ སྲན༌ཏྲེ༌ དར༌ཨིན༌ ཟེརས༌, “དཀོན༌མཆོག༌གི༌ ང༌དང༌གུན༌ ཉམ༌པོ༌ ཅི༌ ཛད༌ཏེ༌ ཨིན༌ནོག༌?”
GEN 42:29 ཁོང༌གུན༌ ཀེ༌ནན༌ལ༌ ཁོ༌རང༌གུན༌ནི༌ ཨ༌བ༌ ཡ༌ཀོབ༌ ཡོད༌ས༌ ལེབ༌བ༌ཅིག༌, ཁོང༌གུན༌ནི༌ ཇུང༌ཁན༌ ཚང༌མ༌ ཁོའ༌ ཤདས༌། ཁོང༌གུན༌ནི༌ ཟེརས༌,
GEN 42:30 “ཨི༌ཇིབ༌བི༌ ལོན༌པོའི༌ ང༌ཞའ༌ ཉམ༌པོ༌ སྤེ༌ར༌ སྐྱོང༌པོ༌ ཏངས༌ ཡང༌ ‘ང༌ཞའ༌ ཁོའེ༌ ཡུལ༌ལི༌ ནང༌ང༌ སང༌ཝའེ༌ ཐོག༌ནེ༌ ལྟའ༌ལ༌ ཡོང༌ཏེ༌ ཨིན༌ནོག༌’ ཟེར༌ཏེ༌ ཉད༌གལ༌ ཀལས༌།
GEN 42:31 ཨིན༌ནའང༌ ང༌ཞའེ༌ ཁོའ༌ ཟེར༌པིན༌ ‘ང༌ཞ༌གུན༌ མི༌ ཀྲང༌པོ༌ ཨིན༌ གྲ༌འོ༌ མན༌།
GEN 42:32 ང༌ཞའ༌ ཨ༌ཅོ༌ནོ༌ རྕུག༌ཉིས༌ ཡོད༌, ཨ༌བ༌ ཅིག༌ཅིག༌གི༌ བུ༌ཚ༌གུན༌, ཅིག༌ཅིག༌ ཤི༌ ཡང༌ ཆུང༌ཤོག༌པོ༌ ཀེ༌ནན༌ནི༌ ནང༌ང༌ ང༌ཞའེ༌ ཨ༌བ༌ ཉམ༌པོ༌ ཡོད༌།’”
GEN 42:33 “ཏེ༌ནེ༌ ཏེ༌ ས༌ཆའེ༌ ལོན༌པོའེ༌ ཟེར༌ར༌རག༌, ‘ཁྱོ༌ཞའེ༌ ཟེར༌ཁན༌བོ༌ ཀྲང༌པོ༌ ཨིན༌ཁན༌ ཏན༌ཏན༌ ཅོ༌ཅེས༌ལ༌ ཁྱོ༌ཞའེ༌ ནང༌ནེ༌ ཅིག༌ འི༌ཀ༌ བོར༌ཏེ༌ ཞན༌གུན༌ནི༌ ཁྱོ༌ཞའེ༌ ནང༌ཚངས༌ལ༌ སྟོག༌རི༌ མི༌ཐོང༌ཅེས༌སི༌ ཕིའ༌ གྲུ༌ ཉོས༌ཁན༌བོ༌ ཁྱེར༌།
GEN 42:34 ཡང༌ ཁྱོ༌ཞ༌གུན༌ནི༌ ནོ༌ ཆུང༌ཤོག༌པོ༌ ངའ༌ ཡོད༌ས༌ ཁྲིད༌ཏེ༌ ཁྱོང༌ ཏེ༌ནེ༌ ཁྱོ༌ཞ༌གུན༌ མི༌ ཀྲང༌པོ༌, གྲ༌འོ༌ མན༌ཁན༌བོ༌ ངའ༌ གྱུས༌ཆེན༌། ཡང༌ ངའེ༌ ཁྱོ༌རང༌གུན༌ནི༌ ནོ༌ ལོགས༌ཏེ༌ ཏང༌ཨིན༌ ཡང༌ ཁྱོ༌རང༌གུན༌ འི༌རུ༌ དུག༌ཏེ༌ ཚོང༌ ཅོ༌ནའང༌ གྲིག༌།’”
GEN 42:35 ཁོང༌གུན༌ནི༌ རང༌རང༌ངི༌ ཕ༌ཙ༌ ནང༌ནེ༌ གྲུ༌ ལུག༌ ཟ༌ནེ༌ ཁོང༌གུན༌ནི༌ པེ༌ནེ༌ སྒི༌གུ༌བོ༌ ཐོང༌ ཡང༌ ཁོང༌གུན༌ནི༌ པེ༌ནེ༌ སྒི༌གུ༌ ཐོང༌ང༌ཅིག༌ ཁོང༌གུན༌ དང༌ ཁོང༌གུན༌ནི༌ ཨ༌བ༌ སྲན༌ཏྲེ༌ ཇིགས༌།
GEN 42:36 ཨ༌བའེ༌ ཁོང༌གུན༌ལ༌ ཟེརས༌, “ཁྱོ༌རང༌གུན༌ནི༌ ངའ༌ ཕྲུ༌གུ༌ མེད༌ཁན༌ ཅོའ༌ནོག༌, ཡོ༌སེབ༌ སྟོར༌, སི༌མེ༌འོན༌ འི༌རུ༌ མེད༌, ཏ༌ བེན༌ཡཱ༌མིན༌ནའང༌ ཁྱེར༌རད༌ད༌? འི༌ ཚང༌མ༌ ངའེ༌ཀ༌ ཇུང༌གོས༌ས༌?”
GEN 42:37 རུ༌བེན༌ནི༌ ཨ༌བ༌ ཟེརས༌, “ཀལ༌ཏེས༌ ངའེ༌ བེན༌ཡཱ༌མིན༌ ལོགས༌ཏེ༌ མ༌ཁྱོང༌ན༌, ཉེ༌རང༌ངི༌ ངའེ༌ བུ༌ཚ༌ ཉིས༌ཀོ༌ སད༌ནའང༌ གྲིག༌། ལོ༌ཁྱེལ༌ ཛད༌ཏེ༌ ཁོ༌ ངའེ༌ ལག༌ག༌ སལ༌ ཡང༌ ངའེ༌ ཁོ༌ ལོགས༌ཏེ༌ ཁྱོང༌ཨིན༌།”
GEN 42:38 ཨིན༌ནའང༌ ཡ༌ཀོབ༌བི༌ ཟེརས༌, “ངའེ༌ བུ༌ཚ༌ ཁྱོ༌རང༌ ཉམ༌པོ༌ མི༌ཆ༌། ཁོའེ༌ ཨ༌ཅོ༌ ཤི༌, ཏ༌ ཁོ༌ མ༌ནེ༌ ལུས༌ཏེ༌ མེད༌། བེས༌སི༌ ནང༌ང༌ ཀལ༌ཏེས༌ ཁོ༌ ཉམ༌པོ༌ ངན༌པ༌ ཆ༌ན༌ ཁྱོ༌ཞ༌གུན༌ནི༌ ངའ༌ རྒད༌པོ༌ མིའ༌ རྡུག༌ངལ༌ སྟན༌ཏེ༌ ཤི༌ ཅུག༌ག༌ནོག༌།”
GEN 43:1 ཏ༌ ཀེ༌ནན༌ནི༌ ནང༌ང༌ མུ༌གེ༌བོ༌ མང༌ང༌ ཐུའ༌ སོང༌།
GEN 43:2 ཡ༌ཀོབ༌བི༌ ནང༌ཚང༌གུན༌ནི༌ ཨི༌ཇིབ༌ནེ༌ ཁྱོངས༌ཁན༌ནི༌ གྲུ༌ ཚང༌མ༌ ཟའ༌ ཚར༌ར༌ཅིག༌, ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ལ༌ ཟེརས༌, “ཡང༌སྐྱར༌ ཟའ༌ཅེས༌ ཉོའ༌ལ༌ ཨི༌ཇིབ༌བ༌ སོང༌།”
GEN 43:3 ཨིན༌ནའང༌ ཡ༌ཧུ༌དཱའེ༌ ཨ༌བའ༌ ཟེརས༌, “གྲུ༌ ཙོང༌ཁན༌ནི༌ མི༌བོའེ༌, ནོ༌ ཆུང༌ཤོག༌པོ༌ ཁྲིད༌ཏེ༌ མ༌ནེ༌ ཁོ༌ ཡོད༌ས༌ མི༌ཡོང༌ཅེས༌ལ༌ ང༌ཞའ༌ སྤང༌པུད༌ད༌ རག༌།
GEN 43:4 ཀལ༌ཏེས༌ ཉེ༌རང༌ངི༌ ང༌ཞའེ༌ ནོ༌ ང༌ཞ༌གུན༌ ཉམ༌པོ༌ ཀལ༌ན༌ ང༌ཞ༌གུན༌ ཉེ༌རང༌ངི༌ ཕིའ༌ ཟའ༌ཅེས༌ ཉོའ༌ལ༌ ཆེན༌།
GEN 43:5 ཨིན༌ནའང༌ ནོ༌ མ༌ཀལ༌ན༌ ང༌ཞ༌གུན༌ མི༌ཆ༌ ཅིའ༌ཟེར༌ན༌ ཏེ༌ མི༌བོའེ༌ ང༌ཞའ༌, ནོ༌ ཁྲིད༌ཏེ༌ མ༌ནེ༌ ཁོ༌ ཡོད༌ས༌ མ༌ཡོང༌ ཟེར༌ར༌རག༌།”
GEN 43:6 ཡ༌ཀོབ༌བི༌ ཟེརས༌, “ཁྱོ༌ཞའ༌ ནོ༌ ཡོད༌ཁན༌བོ༌ ཏེ༌ མི༌བོའ༌ ཤད༌ཏེ༌, ཅི༌ཕིའ༌ ཁྱོ༌ཞ༌གུན༌ནི༌ ངའ༌ ནགས༌ སྟན༌ཏེ༌ ཨིན༌?”
GEN 43:7 ཁོང༌གུན༌ནི༌ ལན༌ཏངས༌, “མི༌བོའེ༌ ང༌ཞའ༌ དང༌ ང༌ཞའེ༌ ནང༌ཚངས༌སི༌ སྐོར༌ལ༌ ཏྲི༌ཨིན༌ དུགས༌། ཁོའེ༌ ཏྲིས༌ ‘ཁྱོ༌རང༌གུན༌ནི༌ ཨ༌བ༌ སོན༌ཏེའ༌ ཡོད༌ད༌? ཁྱོ༌རང༌གུན༌ལ༌ ཡང༌ ནོ༌ ཡོད༌ད༌?’ ང༌ཞའེ༌ ཁོའེ༌ ཏྲི༌ཝ༌གུན༌ལ༌ ལན༌ཏངས༌པིན༌། ཁོའེ༌, ‘ཁྱོ༌ཞའེ༌ ནོ༌ ཁྲིད༌ཏེ༌ ཁྱོང༌’ ཟེར༌ཅེས༌པོ༌ ང༌ཞ༌གུན༌ལ༌ ཅི༌གྱུས༌?”
GEN 43:8 ཡ༌ཧུ༌དཱའེ༌ ཁོ༌རང༌ངི༌ ཨ༌བ༌ ཟེརས༌, “བུ༌ཚ༌བོ༌ ང༌ ཉམ༌པོ༌ ཀོལ༌ ཡང༌ ང༌ཞ༌གུན༌ དག༌ས༌རང༌ བེས༌ལ༌ བིང༌ཨིན༌། ཏེ༌ནེ༌ ཉེ༌རང༌, ང༌ཞའ༌ དང༌ ང༌ཞའེ༌ ཕྲུ༌གུ༌གུན༌ སྟོག༌རིའ༌ མི༌ཤི༌།
GEN 43:9 ཁོའེ༌ སྲུང༌སྐྱོབ༌བི༌ དམ༌ཆའ༌ ངའེ༌ ཅོའད༌, ཏེ༌ ཁག༌པོ༌ ངའེ༌ ཁུར༌རད༌། ཀལ༌ཏེས༌ ངའེ༌ ཁོ༌ ཉེ༌རང༌ ཡོད༌ས༌ ལོགས༌ཏེ༌ མ༌ཁྱོང༌ན༌ ཏུས༌གྱུན༌ནི༌ ཕིའ༌ ངའེ༌ཀ༌ ཏེ༌ སྐྱོན༌བོ༌ ཀལ༌ལ༌ ཛད༌།
GEN 43:10 ཀལ༌ཏེས༌ ང༌དང༌ངི༌ ཏུས༌པོ༌ གོད༌ལ༌ མ༌ ཏངས༌པིན༌ན༌ ང༌ཞ༌གུན༌ ཏེ༌རུ༌ སོང༌ཏེ༌ ལན༌ཕོག༌ ཉིས༌ ལོག༌ཏེ༌ ཡོང༌ ཚར༌ཏེ༌ ཡོད༌གྲོ༌།”
GEN 43:11 ཏེ༌ནེ༌ ཁོང༌གུན༌ནི༌ ཨ༌བ༌ ཡ༌ཀོབ༌བི༌ ཟེརས༌, “ཀལ༌ཏེས༌ ཏེ༌བོ༌ ཅོ༌གོས༌ན༌ ཅོ༌ཤིག༌, ཡང༌ ང༌དང༌ངི༌ ས༌ཆའེ༌ ཀ༌ནེ༌ ཐོང༌ཁན༌ ཀྲག༌ཤོག༌པོ༌ ལོན༌པོའ༌ སྟགས༌ལ༌ ཁྱེར༌, ཏྲི༌ཞིམ༌ཅན༌ནི༌ མར༌ནག༌, རང༌རྩི༌, ཚ༌མིག༌ དང༌ མའེར༌, པིས༌ཏ༌ དང༌ བ༌དམ༌།
GEN 43:12 པེ༌ནེ༌ ཉི༌ལྡབ༌ ཁུར༌ ཅིའ༌ཟེར༌ན༌ ཕ༌ཙའེ༌ ཁེ༌ཐོག༌ག༌ ཡོད༌ཁན༌ནི༌ པེ༌ནེ༌གུན༌ ལོགས༌ཏེ༌ ཁྱེར༌གོས༌། ཅི༌གྱུས༌ ཏེ༌བོ༌ ནོར༌ཏེ༌ ཨིན༌གྲོ༌།
GEN 43:13 ཁྱོ༌ཞ༌གུན༌ ནོ༌ ཁྲིད༌ཏེ༌ དག༌ས༌རང༌ ཏེ༌ མི༌བོའེ༌ཀ༌ ལོགས༌ཏེ༌ སོང༌།
GEN 43:14 ངའེ༌ མོས༌ལམ༌ ཞུའད༌, ཀུན༌ཝང༌ དཀོན༌མཆོག༌གི༌ ཏེ༌ མི༌བོའ༌ ཁྱོ༌ཞ༌གུན༌ནི༌ཀ༌ སྙིང༌རྗེ༌ སྐྱེ༌ཅུག༌ག༌ ཛད༌ཏེ༌ ཁྱོ༌ཞ༌གུན༌ནི༌ ཨ༌ཅོ༌ དང༌ བེན༌ཡཱ༌མིན༌ ཁྱོ༌ཞའ༌ ཉམ༌པོ༌ ལོགས༌ཏེ༌ ལམ༌ཅུག༌ སྲིད༌ཅེས༌ ཨིན༌ནོག༌། ཨིན༌ནའང༌ ཀལ༌ཏེས༌ ངའེ༌ ཕྲུ༌གུ༌གུན༌ ལོགས༌ཏེ༌ མ༌ ལེབ༌ན༌ ངའེ༌ཀ༌ ཏེ༌བོ༌ ཇུང༌གོ༌ཤེས༌ ཡོད༌ཏེ༌ ཨིན༌ནོག༌།”
GEN 43:15 ཏེ༌ནེ༌ བུ༌ཚ༌གུན༌ནི༌ སྐྱེས༌གུན༌ དང༌ པེ༌ནེ༌ ཉི༌ལྡབ༌ ཁུརས༌ ཡང༌ ཨི༌ཇིབ༌བ༌ བེན༌ཡཱ༌མིན༌ ཁྲིད༌ཏེ༌ སོང༌, ཡང༌ ཁོང༌གུན༌ ཡོ༌སེབ༌ ཡོད༌ས༌ ལེབ༌།
GEN 43:16 ཡོ༌སེབ༌བི༌ ཁོང༌གུན༌ ཉམ༌པོ༌ བེན༌ཡཱ༌མིན༌ ཐོང༌ང༌ཅིག༌ ཁོའེ༌ ཁོ༌རང༌ངི༌ ཁང༌པའེ༌ སྟ༌སྟོག༌ ཅོ༌ཁན༌བོའ༌ ཟེརས༌, “འི༌ མི༌གུན༌ ངའེ༌ ཁང༌པ༌ ཁྱེར༌, སེམས༌ཅན༌ སད༌ཏེ༌ ཁར༌ཇི༌ གྲལ༌གྲིག༌ ཅོས༌, ཁོང༌གུན༌ ང༌ ཉམ༌པོ༌ ཛ༌ར༌ ཟའེན༌།”
GEN 43:17 ཡོ༌སེབ༌བི༌ བཀའ༌ ཏང༌ཁན༌ ནང༌ཞིན༌ ཡོག༌པོའེ༌ ཅོས༌ ཡང༌ ཁོང༌གུན༌ ཡོ༌སེབ༌བི༌ ཁང༌པ༌ ཁྱེརས༌།
GEN 43:18 ཨིན༌ནའང༌ ཁང༌པ༌ ཁྱེར༌ར༌ཅིག༌ ཁོང༌གུན༌ སྲན༌ཏྲེ༌ ཇིགས༌ ཡང༌ སམ༌, “ང༌དང༌གུན༌ནི༌ ཕ༌ཙའེ༌ ནང༌ང༌ པེ༌ནེ༌ ལོགས༌ཏེ༌ ཏངས༌ཏེ༌ ཡོད༌ཅེས༌པའེ༌ ང༌དང༌གུན༌ འི༌ཀ༌ ཁྱོངས༌ཏེ༌ ཨིན༌ནོག༌། ཁོའེ༌ ང༌དང༌གུན༌ ཟུམས༌ཏེ༌ ང༌དང༌གུན༌ ཡོག༌པོ༌ ཅོ༌ཅེས༌ ཡང༌ ང༌དང༌ངི༌ བུང༌བུ༌གུན༌ ཁྱེར༌ཅེས༌ ཨིན༌ནོག༌།”
GEN 43:19 ཏེ༌ནེ༌ ཡོ༌སེབ༌བི༌ ཁང༌པའེ༌ སྒོའེ༌ དུན༌ལ༌ ལེབ༌བ༌ཅིག༌ ཁོང༌གུན༌ནི༌ ཡོག༌པོ༌ ཁག༌ཁུར༌པ༌བོའ༌ ཟེརས༌,
GEN 43:20 “སྤོན༌བོ༌ལེ༌, ང༌ཞ༌གུན༌ སྔུན༌ལ༌ གྲུ༌ ཉོའ༌ལ༌ ཨི༌ཇིབ༌བ༌ ཡོངས༌པིན༌།
GEN 43:21 ཨིན༌ནའང༌ ལམ༌མ༌ ངལ༌ཚོ༌སའེ༌ཀ༌ ང༌ཞའེ༌ ཕ༌ཙའེ༌ ཁའ༌ ཕེའ༌ཅིག༌ རང༌རང༌ངི༌ པེ༌ནེ༌ སྒི༌གུ༌གུན༌ ཐོང༌། ང༌ཞའེ༌ ཏེ༌ པེ༌ནེ༌གུན༌ ལོགས༌ཏེ༌ ཁྱོངས༌ཏེ༌ ཡོད༌ལེ༌།
GEN 43:22 གྲུ༌ ཉོ༌ཅེས༌ལ༌ ང༌ཞ༌གུན༌ནི༌ མུལ༌ལི༌ པེ༌ནེ༌ ཐེ༌བ༌ ཁྱོངས༌ཏེ༌ ཡོད༌། ང༌ཞའེ༌ ཕ༌ཙའེ༌ ནང༌ང༌ པེ༌ནེ༌ སྒི༌གུ༌གུན༌ སུའི༌ བོརས༌ ང༌ཞའ༌ གྱུས༌མེད༌ ལེ༌།”
GEN 43:23 ཡོག༌པོའེ༌ ཟེརས༌, “ཇིགས༌ མ༌ཇིགས༌, ཁྱོ༌ཞའ༌ དང༌ ཁྱོ༌ཞའེ༌ ཨ༌བའེ༌ དཀོན༌མཆོག༌གི༌ ཁྱོ༌ཞའ༌ ནོར༌ སལ༌ལ༌ ཛད༌ཏེ༌ ཨིན༌ནོག༌། ངའ༌ གྲུའི༌ རིན༌ནི༌ པེ༌ནེ༌ དྲན༌དྲའ༌ ཐོབས༌།” ཏེ༌ནེ༌ ཁོའེ༌ སི༌མོན༌ ཁོང༌གུན༌ནི༌ ཕིའ༌ ཙོན༌ཁང༌ནེ༌ ཕིངས༌ཏེ༌ ཁྱོངས༌།
GEN 43:24 ཏེ༌ནེ༌ ཡོག༌པོའེ༌ ཁོང༌གུན༌ ཁང༌པའེ༌ ནང༌ང༌ ཁྱེར༌ཏེ༌ ཆུ༌ ཏངས༌ ཡང༌ ཁོང༌གུན༌ནི༌ རྐང༌པ༌ ཁྲུ༌། ཁོའེ༌ ཁོང༌གུན༌ནི༌ བུང༌བུ༌གུན༌ལ༌ རྩའ༌ ཏངས༌།
GEN 43:25 ཁོང༌གུན༌ནི༌ ཡོ༌སེབ༌བ༌ སྟགས༌གུན༌ ཏང༌ཅེས༌ལ༌ གྲལ༌གྲིག༌ ཅོས༌ ཅིའ༌ཟེར༌ན༌ ཁོང༌གུན༌ ཉམ༌པོ༌ ཡོ༌སེབ༌ ཛ༌ར༌ དོན༌ཅེས༌ལ༌ སྐྱོད༌ཨིན༌ ཟེར༌ཏེ༌ ཡོག༌པོའེ༌ ཤདས༌།
GEN 43:26 ཡོ༌སེབ༌ ཁང༌པ༌ ལེབ༌བ༌ཅིག༌ ཁོང༌གུན༌ནི༌ སྟགས༌ ཁྱོང༌ཁན༌གུན༌ ཁོའ༌ ཕུལ༌ཏེ༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 43:27 ཁོའེ༌ ཁོང༌གུན༌ལ༌ ཁམ༌ཟང༌ ཨིན༌ན༌ ཟེར༌ཏེ༌ ཏྲིས༌ ཡང༌ ཟེརས༌, “ངའ༌ མི༌ རྒད༌པོའེ༌ སྐོར༌ལ༌ ཤད༌ཁན༌ ཁྱོ༌ཞའེ༌ ཨ༌བ༌ ཁམ༌ཟང༌, སོན༌ཏེའ༌ ཡོད༌ད༌?”
GEN 43:28 ཁོང༌གུན༌ནི༌ ལན༌ཏངས༌, “ང༌ཞ༌གུན༌ནི༌ ཨ༌བ༌ ཉེ༌རང༌ངི༌ ཡོག༌པོ༌ ཁམ༌ཟང༌ དང༌ སོན༌ཏེའ༌ ཡོད༌ལེ༌།” ཏེ༌ནེ༌ ཁོང༌གུན༌ནི༌ གོ༌ སྒུས༌ཏེ༌ ཀུས༌པ༌ སྟནས༌།
GEN 43:29 ཡོ༌སེབ༌བི༌ ལྟའ༌ཅིག༌ ཁོའ༌ ཁོ༌རང༌ངི༌ ནོ༌, ཨ༌མ༌ ཅིག༌གི༌ བུ༌ཚ༌ བེན༌ཡཱ༌མིན༌ ཐོང༌ ཡང༌ ཏྲིས༌, “ཁོ༌ ཁྱོ༌ཞ༌གུན༌ནི༌ ནོ༌ ཆུང༌ཤོག༌པོ༌ ཨིན༌ན༌ ཀ༌བོའེ༌ སྐོར༌ལ༌ ཁྱོ༌ཞའེ༌ ངའ༌ ཤདས༌? ངའེ༌ བུ༌ཚ༌, ཁྱོ༌རང༌ང༌ དཀོན༌མཆོག༌གི༌ ཅིན༌ལབས༌ སལ༌ཤིག༌།”
GEN 43:30 ཁོ༌རང༌ངི༌ ནོའེ༌ ཕིའ༌ ཤ༌ཚ༌ སྐྱེས༌ཏེ༌ ཁོའ༌ ངུ༌ཅེས༌ ཡོངས༌པ༌ ཡོ༌སེབ༌ གྱོགས༌པ༌ ཁོ༌རང༌ངི༌ ནང༌ང༌ སོང༌ ཡང༌ ངུས༌།
GEN 43:31 ཏེ༌ནེ༌ ཁོའེ༌ ཁོ༌རང༌ངི༌ ལྡོང༌ ཁྲུས༌ཏེ༌ ལོགས༌ཏེ༌ ཡོངས༌ ཡང༌ རང༌སེམས༌ ཅུན༌ཏེ༌ ཁོའེ༌ དོན༌ཏང༌ ཁྱོང༌ཅེས༌ལ༌ བཀའ༌ ཏངས༌།
GEN 43:32 ཡོ༌སེབ༌བ༌ ཅོག༌ཙེ༌ ཅིག༌གི༌ཀ༌ ཡང༌ ཁོའེ༌ ཨ༌ཅོ༌ནོ༌གུན༌ལ༌ ཞན༌ ཅོག༌ཙེ༌ ཞིག༌གི༌ཀ༌ ཡང༌ ཁོ༌ ཉམ༌པོ༌ དོན༌ཁན༌ནི༌ ཨི༌ཇིབ༌པ༌གུན༌ལ༌ སོ༌སོ༌ ཅོག༌ཙེ༌ཀ༌ དོན༌ཏང༌ ཏངས༌ ཅིའ༌ཟེར༌ན༌ ཨི༌ཇིབ༌པ༌གུན༌ ཨིབ༌རི༌པ༌གུན༌ ཉམ༌པོ༌ ཟའ༌ ཆོགས༌ས༌ མེད༌པིན༌, ཏེ༌བོ༌ ཁོང༌གུན༌ནི༌ ཕིའ༌ ཚི༌ཏུའེ༌ ལས༌ ཨིན༌པིན༌།
GEN 43:33 ཅོག༌ཙེ༌ཀ༌ ཡོ༌སེབ༌བི༌ ཨ༌ཅོ༌ནོ༌གུན༌ ལོ༌ ནང༌ཞིན༌ ཚིར༌ལ༌ དུག༌ཅུགས༌ པ༌སང༌ ཧ༌ལས༌ཏེ༌ ཁོང༌གུན༌ནི༌ ཅིག༌ དང༌ ཅིག༌ག༌ ལྟས༌།
GEN 43:34 ཁོང༌གུན༌ལ༌ ཡོ༌སེབ༌བི༌ ཅོག༌ཙེ༌ ཀ༌ནེ༌ ཁར༌ཇི༌ ཏངས༌ ཨིན༌ནའང༌ བེན༌ཡཱ༌མིན༌ནི༌ སྐལ༌ལ༌ ཞན༌གུན༌ནི༌ སང༌ རྔ༌ ལྡབ༌ མང༌ང༌ ཡོད༌པིན༌། ཁོང༌གུན༌ནི༌ ཉན༌ཉན༌ ཟའེན༌ ཐུང༌ཨིན༌ ཡོ༌སེབ༌ ཉམ༌པོ༌ སྐྱིད༌པོ༌ ཅོས༌།
GEN 44:1 ཡོ༌སེབ༌བི༌ ཁོང༌རང༌ངི༌ ཁང༌པའེ༌ ཁག༌ཁུར༌པའ༌ བཀའ༌ ཏངས༌ཏེ༌ ཟེརས༌, “ཁོང༌གུན༌ནི༌ ཕ༌ཙ༌གུན༌ནི༌ ཁའ༌ ཚག༌པ༌ སྐངས༌ཏེ༌ གྲུ༌ གྱོང ཡང༌ པེ༌ནེ༌ གི༌གུ༌ ཁོང༌གུན༌ནི༌ ཕ༌ཙའེ༌ ཁའེ༌ཀ༌ ལོགས༌ཏེ༌ གྱོང༌།
GEN 44:2 ནོ༌ ཆུང༌ཤོག༌གི༌ ཕ༌ཙའེ༌ ཁའེ༌ཀ༌ གྲུ༌ ཉོས༌ཁན༌ནི༌ པེ༌ནེ༌ ཉམ༌པོ༌ ངའེ༌ མུལ༌ལི༌ ཀོ༌རེ༌བོའང༌ གྱོང༌།” ཁོའེ༌ ཡོ༌སེབ༌བི༌ ཅོས༌ ཟེར༌ཁན༌བོ༌ ཅོས༌།
GEN 44:3 ཐོ༌རེ༌ཟུག༌པོ༌ ང༌མོ༌ནེ༌ ཡོ༌སེབ༌བི༌ ཨ༌ཅོ༌ནོ༌གུན༌ ཁོ༌རང༌གུན༌ནི༌ བུང༌བུ༌ ཉམ༌པོ༌ ལོགས༌ཏེ༌ ལམ༌ཅུགས༌།
GEN 44:4 ཁོང༌གུན༌ གྱལ༌ས༌ནེ༌ མ༌ ཐག༌རིང༌ང༌ མེད༌ ཟ༌ནེ༌ ཡོ༌སེབ༌བི༌ ཁོ༌རང༌ངི༌ ཁང༌པའེ༌ ཁག༌ཁུར༌པའ༌ ཟེརས༌, “གྱོགས༌པ༌ ཏེ༌ མི༌གུན༌ནི༌ སྟིང༌རང༌ནེ༌ སོང༌ ཡང༌ ཁོང༌གུན༌ ཐུག༌ག༌ཅིག༌ ཟེར༌, ‘ཟང༌པོའེ༌ ཚབས༌ལ༌ ངན༌པ༌ ཅིའ༌ ཅོས༌པིན༌?
GEN 44:5 ཁྱོ༌ཞའེ༌ ངའེ༌ སྤོན༌བོའེ༌ དོན༌ཅེས༌ དང༌ མ༌འོངས༌པའེ༌ ཏུས༌སི༌ ནང༌ང༌ ཇུང༌ཅེས༌གུན༌ ལྟའ༌ལ༌ ཀོལ༌ཁན༌ནི༌ མུལ༌ལི༌ ཀོ༌རེ༌ ཅིའ༌ རྐུས༌པིན༌? ཁྱོ༌ཞའེ༌ ངན༌པ༌ ལས༌ ཅོས༌ཏེ༌ ཨིན༌ནོག༌།’”
GEN 44:6 ཡོག༌པོའེ༌ ཁོང༌གུན༌ ཐུག༌ག༌ཅིག༌, ཁོའེ༌ ཏེན༌ན༌ ཙོགས༌ ཟེརས༌།
GEN 44:7 ཨིན༌ནའང༌ ཁོང༌གུན༌ནི༌ ལན༌ཏངས༌, “སྤོན༌བོ༌ལེ༌ ཉེ༌རང༌ངི༌ ཏེ༌ཟུག༌ ཅིའ༌ མོལ༌ལད༌? ཏན༌ཏན༌ ང༌ཞའེ༌ ཏེ༌ཟུག༌ ལས༌ མ༌ཅོས༌པིན༌།
GEN 44:8 ཕ༌ཙའེ༌ ནང༌ང༌ ཡོད༌ཁན༌ནི༌ པེ༌ནེ༌ ང༌ཞའེ༌ ཀེ༌ནན༌ནེ༌ ལོགས༌ཏེ༌ ཁྱོངས༌ཏེ༌ ཉེ༌རང༌ང༌ མ༌ཏངས༌ས༌? ཏེ༌ནེ༌ ཉེ༌རང༌ངི༌ སྤོན༌བོའེ༌ ཁང༌པ༌ནེ༌ མུལ༌ ཡ༌ སེར༌ ང༌ཞ༌གུན༌ནི༌ ཅིའ༌ རྐུ༌ཨིན༌?
GEN 44:9 ང༌ཞའ༌ སུ༌ཞིག༌གི༌ ལག༌ནེ༌ ཏེ༌བོ༌ ཐོབ༌ན༌ ཁོ༌ སད༌ནའང༌ གྲིག༌ ཡང༌ ང༌ཞའ༌ ལུས༌ཁན༌ ཚང༌མ༌ ཉེ༌རང༌ངི༌ སྤོན༌བོའེ༌ ཚེ༌ཡོག༌ གྱུར༌ཨིན༌།”
GEN 44:10 ཁོའེ༌ ཟེརས༌, “ཁྲིག༌རག༌། ཨིན༌ནའང༌ ཀོ༌རེ༌ ཐོབ༌ཁན༌ ཅིག༌པོ༌ ངའེ༌ ཚེ༌ཡོག༌ གྱུར༌ཨིན༌, ཞན༌གུན༌ ལོགས༌ཏེ༌ ཆ༌ནའང༌ གྲིག༌།”
GEN 44:11 ཁོང༌གུན༌ནི༌ གྱོགས༌པ༌ ཁོ༌རང༌གུན༌ནི༌ ཕ༌ཙ༌ སའི༌ཀ༌ ཕབས༌ཏེ༌ ཁའ༌ ཕེས༌།
GEN 44:12 ཏེ༌ནེ༌ ཡོག༌པོའེ༌ ཙལ༌ཅེས༌ གོ༌ཟུག༌, ཆེ༌ཤོག༌ནེ༌ ཏངས༌ཏེ༌ ཆུང༌ཤོག༌ ཚོག༌པ༌ ཡང༌ ཀོ༌རེ༌བོ༌ བེན༌ཡཱ༌མིན༌ནི༌ ཕ༌ཙའེ༌ ནང༌ང༌ ཐོབ༌།
GEN 44:13 ཏེ༌བོ༌ ཐོང༌ཏེ༌ ཨ༌ཅོ༌གུན༌ནི༌ ཚེར༌ཁའེ༌ ནང༌ང༌ ཁོ༌རང༌གུན༌ནི༌ ཀོས༌ ཤགས༌ ཡང༌ ཁོ༌རང༌གུན༌ནི༌ བུང༌བུ༌གུན༌ལ༌ གལ༌ ཀལ༌ཏེ༌ གྱལ༌ས༌ ལོགས༌ཏེ༌ སོང༌།
GEN 44:14 ཡ༌ཧུ༌དཱ༌ དང༌ ཁོའེ༌ ཨ༌ཅོ༌ནོ༌གུན༌ནི༌ ཡོ༌སེབ༌བི༌ ཁང༌པ༌ ལེབ༌བ༌ཅིག༌ ཁོ༌ ཏེ༌རུ༌ ཡོད༌པིན༌། ཁོང༌གུན༌ ཁོའེ༌ རྐང༌པའེ༌ཀ༌ གྱེལས༌།
GEN 44:15 ཡོ༌སེབ༌བི༌ ཁོང༌གུན༌ལ༌ ཟེརས༌, “ཁྱོ༌ཞའེ༌ འི༌བོ༌ ཅི༌ ཅོས༌ཏེ༌ ཨིན༌? ངའ༌, སྦས༌ཏེ༌ ཅོ༌ཁན༌གུན༌ ཤད༌ ཉན༌ཁན༌ནི༌ མི༌ཞིག༌ ཨིན༌ཁན༌བོ༌ ཁྱོ༌ཞའ༌ གྱུས༌ མེ༌ད༌?”
GEN 44:16 ཡ༌ཧུ༌དཱའེ༌ ལན༌ཏངས༌, “སྤོན༌བོ༌ལེ༌ ང༌ཞའེ༌ ཉེ༌རང༌ང༌ ཅི༌ ཞུ༌? ང༌ཞའེ༌ ཅི༌ ཟེར༌? ཀ༌ཟུག༌གི༌ ང༌ཞའེ༌ ང༌ཞའ༌ ནོངས༌མེད༌ ཨིན༌ཁན༌བོ༌ སྟན༌? དཀོན༌མཆོག༌གི༌ ང༌ཞའེ༌ ཅོ༌ཁན༌ནི༌ སྡིག༌པ༌ སྟན༌ན༌ ཛད༌ཏེ༌ ཨིན༌ནོག༌། ཏ༌ ཀོ༌རེ༌ ཐོབ༌ཁན༌བོ༌ ཅིག༌པོ༌ མན༌པ༌ ང༌ཞའ༌ ཚང༌མ༌ ཉེ༌རང༌ངི༌ ཚེ༌ཡོག༌ ཨིན༌།”
GEN 44:17 ཨིན༌ནའང༌ ཡོ༌སེབ༌བི༌ ཟེརས༌, “ངའེ༌ ཏེ༌ཟུག༌ མ༌ནེ༌ མི༌ཅོ༌། ཀོ༌རེ༌ ཐོབ༌ཁན༌བོ༌ ཅིག༌པོ༌ ངའེ༌ ཚེ༌ཡོག༌ གྱུར༌གོས༌། ཞན༌གུན༌ ཞི༌དེ༌ ཉམ༌པོ༌ ཁྱོ༌ཞ༌རང༌ངི༌ ཨ༌བ༌ ཡོད༌ས༌ སོང༌།”
GEN 44:18 ཡ༌ཧུ༌དཱ༌ ཡོ༌སེབ༌ ཡོད༌ས༌ སོང༌ཏེ༌ ཟེརས༌, “ཇུ༌ཇུ༌ སྤོན༌བོ༌ལེ༌, ཉེ༌རང༌ངི༌ ཡོག༌པོའ༌ སྤེ༌ར༌ ཞིག༌ ཟེར༌ཅུག༌ག༌ ཛད༌། ངའེ༌ཀ༌ ཐུགས༌སྲོ༌ མ༌སྐྱོད༌, ཉེ༌རང༌ང༌ ཝང༌ཆ༌ ཨི༌ཇིབ༌བི༌ གྱལ༌པོ༌ ཙོགས༌ ཡོད༌།
GEN 44:19 སྤོན༌བོ༌ལེ༌ ཉེ༌རང༌ངི༌ ང༌ཞའ༌ ཏྲིའ༌ ཛདས༌, ‘ཁྱོ༌ཞ༌གུན༌ལ༌ ཨ༌བ༌ ཡ༌ ཞན༌ ཨ༌ཅོ༌ནོ༌ ཡོད༌ད༌?’
GEN 44:20 ཡང༌ ང༌ཞའེ༌ ཉེ༌རང༌ང༌ ལན༌ཏངས༌པིན༌, ‘ང༌ཞ༌གུན༌ལ༌ ཨ༌བ༌ རྒད༌པོ༌ ཡང༌ ཁོང༌ང༌ རྒད༌པོའེ༌ ཏུས༌ལ༌ ཇོར༌ཁན༌ནི༌ བུ༌ཚ༌ཞིག༌ ཡོད༌། ཨ༌མ༌ ཅིག༌གི༌ ཕྲུ༌གུ༌ ཁོའེ༌ ཨ༌ཅོ༌ ཤི༌པ༌ ཁོ༌རང༌ ཅིག༌པོ༌ མན༌ནེ༌ མེད༌ ཡང༌ ཁོའེ༌ ཨ༌བའེ༌ ཁོའ༌ མའ༌ སྲན༌ཏྲེ༌ ཡ༌ཤ༌ ཅོའད༌།’”
GEN 44:21 “སྤོན༌བོ༌ལེ༌ ཉེ༌རང༌ངི༌ ང༌ཞའ༌ མོལ༌ལ༌རག༌, ‘ང༌ ཁོ༌ ཐོང༌ཐུབ༌ཅེས༌ལ༌ ཁྱོ༌ཞའེ༌ ཁོ༌ འི༌རུ༌ ཁྲིད༌ཏེ༌ ཁྱོང༌།’
GEN 44:22 ཡང༌ ང༌ཞའེ༌ ཟེར༌པིན༌, ‘བེན༌ཡཱ༌མིན༌ ཨ༌བ༌ བོར༌ཏེ༌ ཡོང༌མི༌ཉན༌, ཀལ༌ཏེས༌ ཡོང༌ན༌ ཨ༌བ༌ ཀྲོངས༌ས༌ནོག༌།’
GEN 44:23 ཨིན༌ནའང༌ ཉེ༌རང༌ངི༌ མོལས༌, ‘ཁྱོ༌རང༌གུན༌ ཉམ༌པོ༌ ནོ༌ ཆུང༌ཤོག༌པོ༌ ཡོད༌ཏེ༌ མན༌ནེ༌ ཁྱོ༌ཞ༌གུན༌ ངའེ༌ དུན༌ལ༌ ཡོང༌ མི༌ཆོགས༌།’
GEN 44:24 ང༌ཞ༌གུན༌ ང༌ཞའེ༌ ཨ༌བའེ༌ཀ༌ ལོགས༌ཏེ༌ སོང༌ཏེ༌ ང༌ཞའེ༌ ཉེ༌རང༌ངི༌ མོལ༌ཁན༌ ཚང༌མ༌ ཁོང༌ང༌ ཤད༌པིན༌།”
GEN 44:25 “སྟིང༌ནེ༌ ང༌ཞའེ༌ ཨ༌བའེ༌ ང༌ཞའ༌ གྲུ༌ ཉོའ༌ལ༌ ཡང༌སྐྱར༌ སོང༌ ཟེར༌ར༌རག༌།
GEN 44:26 ཨིན༌ནའང༌ ང༌ཞའེ༌ ཁོང༌ང༌ ཟེར༌པིན༌, ‘ནོ༌ ཆུང༌ཤོག༌པོ༌ ང༌ཞའ༌ ཉམ༌པོ༌ ཀལ༌ན༌ ང༌ཞ༌གུན༌ ཆེན༌། ང༌ཞ༌གུན༌ནི༌ ནོ༌ ང༌ཞའ༌ ཉམ༌པོ༌ ཡོད༌ཏེ༌ མན༌ནེ༌ ང༌ཞའ༌ ཏེ༌ མི༌བོའེ༌ དུན༌ལ༌ ཆ༌ མི༌ཉན༌།’”
GEN 44:27 “ཉེ༌རང༌ངི༌ ཡོག༌པོ༌, ང༌ཞའེ༌ ཨ༌བའེ༌ ང༌ཞའ༌ མོལས༌, ‘ཁྱོ༌རང༌གུན༌ལ༌ གྱུས༌ཨིན༌ནོག༌ ངའེ༌ ན༌མ༌ རེ༌ཅལ༌ལི༌ ངའ༌ བུ༌ཚ༌ ཉིས༌ ཏངས༌།
GEN 44:28 ཏེ༌ནང༌ནེ༌ ཅིག༌པོ༌ སྟོར༌, ཏན༌ཏན༌ ཁོ༌ རི༌ སེམས༌ཅན༌གུན༌ནི༌ ཟོས༌ཏེ༌ ཡོད༌གྲོ༌། ཏེ༌ ཏུས༌ནེ༌ ཕར༌ལ༌ ངའེ༌ ཁོ༌ མ༌ཐོང༌ང༌ཨིན༌།
GEN 44:29 ཀལ༌ཏེས༌ ཁྱོ༌ཞ༌གུན༌ནི༌ ཁོའང༌ ངའེ༌ ཀ༌ནེ༌ ཁྱེར༌ཏེ༌ ཁོ༌ ཉམ༌པོ༌ ངན༌པ༌ ཆ༌ན༌, ཁྱོ༌ཞ༌གུན༌ནི༌ རྒད༌པོ༌ ངའ༌ རྡུག༌ངལ༌ སྟན༌ཏེ༌ ཤི༌ ཅུག༌ཨིན༌།’”
GEN 44:30 “ཏ༌ སྤོན༌བོ༌ལེ༌ ང༌ཞའ༌ བུ༌ཚ༌བོ༌ མ༌ཁྲིད༌ད༌ ཨ༌བ༌ ཡོད༌ས༌ ཆ༌ ཉན༌ཅེས༌ མེད༌། ང༌ཞ༌གུན༌ནི༌ ཨ༌བའེ༌ སྲོག༌, འི༌ བུ༌ཚའེ༌ ནང༌ང༌ ཡོད༌ཏེ༌ ཨིན༌ནོག༌,
GEN 44:31 བེན༌ཡཱ༌མིན༌ ང༌ཞའ༌ ཉམ༌པོ༌ མེད༌ཁན༌བོ༌ ཐོང༌ཏེ༌ ཁོང༌ ཀྲོངས༌ཨིན༌། ང༌ཞའེ༌ ང༌ཞ༌རང༌ངི༌ ཨ༌བ༌ རྒད༌པོའ༌ རྡུག༌ངལ༌ སྟན༌ཏེ༌ ཤི༌ ཅུག༌ག༌ནོག༌།
GEN 44:32 ངའེ༌ ཁོ༌ ཁམ༌ཟང༌ ཉམ༌པོ༌ ལོགས༌ཏེ༌ ཁྱོང༌ཨིན༌ ཟེར༌ཏེ༌ ང༌རང༌ངི༌ ཨ༌བའ༌ ཁ༌ཆད༌ ཅོས༌ཏེ༌ ཟེར༌པིན༌, ‘ཀལ༌ཏེས༌ མ༌ཁྱོང༌ན༌ མི༌ཚེ༌ གང༌པོ༌ ཏེ༌བོའེ༌ སྐྱོན༌ ངའ༌ ཀལ༌ནའང༌ གྲིག༌།’”
GEN 44:33 “སྤོན༌བོ༌ལེ༌, ཏ༌ ང༌ འི༌རུ༌ ཁོའེ༌ ཚབས༌ལ༌ ཉེ༌རང༌ངི༌ ཚེ༌ཡོག༌ག༌ བོར༌ར༌ ཛད༌ ཡང༌ ཁོ༌ ཁོ༌རང༌ངི༌ ཨ༌ཅོ༌གུན༌ ཉམ༌པོ༌ ལོགས༌ཏེ༌ ཆའ༌ ཅུག༌ག༌ ཛད༌།
GEN 44:34 བུ༌ཚ༌བོ༌ མ༌ཁྲིད༌ད༌ ཀ༌ཟུག༌གི༌ ང༌ ང༌རང༌ངི༌ ཨ༌བ༌ ཡོད༌ས༌ ལོགས༌ཏེ༌ ཆེན༌། ཨ༌བའ༌ རྡུག༌ངལ༌ ཐོང༌ཅེས༌པོ༌ ངའ༌ ལྟ༌ཐུབ༌ཅེས༌ མེ༌རག༌།”
GEN 45:1 ཡོ༌སེབ༌བ༌ ཁོ༌ ཉམ༌པོ༌ ཡོད༌ཁན༌གུན༌ནི༌ དུན༌ལ༌ སེམས༌ཚེར༌ སྒགས༌ཏེ༌ བོར༌ མ༌ཉན༌པ༌ ཁོའེ༌ ཟེརས༌ “མི༌ཚང༌མ༌ ངའེ༌ དུན༌ནེ༌ སོང༌།” ཏེ༌ནེ༌ ཞན༌སུའང༌ མེད༌ས༌ ཁོ༌རང༌ངི༌ ཨ༌ཅོ༌ནོ༌གུན༌ལ༌ ཁོའེ༌ ཁོ༌རང༌ སྔོན༌ཅུགས༌།
GEN 45:2 ཁོ༌ སྲན༌ཏྲེ༌ ངུས༌པ༌ ཨི༌ཇིབ༌པ༌གུན༌ནི༌ ཚོར༌, ཡང༌ གྱལ༌པོའེ༌ ཁར༌ལ༌ ཡོད༌ཁན༌གུན༌ནིའང༌ ཏེ༌ ནས༌ཚུལ༌བོ༌ ཚོར༌།
GEN 45:3 ཡོ༌སེབ༌བི༌ ཁོ༌རང༌ངི༌ ཨ༌ཅོ༌ནོ༌གུན༌ལ༌ ཟེརས༌, “ང༌ ཡོ༌སེབ༌ ཨིན༌, ངའེ༌ ཨ༌བ༌ ཏ༌རུང༌ངའང༌ སོན༌ཏེའ༌ ཡོད༌ད༌?” ཨིན༌ནའང༌ ཁོའེ༌ ཨ༌ཅོ༌ནོ༌གུན༌ལ༌ ལན༌ཏང༌ མ༌ཉན༌ ཅིའ༌ཟེར༌ན༌ ཁོང༌གུན༌ མ༌སྲན༌ཏྲེ༌ ཇིགས༌།
GEN 45:4 ཏེ༌ནེ༌ ཡོ༌སེབ༌བི༌ ཁོང༌གུན༌ལ༌ ཟེརས༌, “ངའེ༌ དུན༌ལ༌ ཡོང༌།” ཁོང༌གུན༌ ཡོང༌ང༌ཅིག༌ ཁོའེ༌ ཟེརས༌, “ངའ༌ ཁྱོ༌ཞའེ༌ ཨི༌ཇིབ༌བ༌ ཆའ༌ཁན༌ནི༌ བེས༌པ༌གུན༌ལ༌ ཚེ༌ཡོག༌ག༌ ཙོང༌ཁན༌ནི༌ ཁྱོ༌ཞའེ༌ ནོ༌ ཡོ༌སེབ༌ ཨིན༌།
GEN 45:5 ཏ༌ ཚེར༌ མ༌ཚེར༌ ཡང༌ ང༌ ཙོང༌ཅེས༌སི༌ ཕིའ༌ ཁྱོ༌ཞ༌རང༌ང༌ སྐྱོན༌ མ༌ཀལ༌། ཏེ༌བོ༌ སྲོག༌ སྐྱོབ༌ཅེས༌ལ༌ དཀོན༌མཆོག༌གི༌ ཁྱོ༌ཞ༌གུན༌ནི༌ སང༌ སྔུན༌ལ༌ ང༌ ལམ༌ཅུག༌ག༌ ཛད༌ཏེ༌ ཨིན༌ནོག༌།
GEN 45:6 མུ༌གེ༌ ཡོངས༌ཏེ༌ ལོ༌ ཉིས༌ སོང༌ཏེ༌ ཨིན༌ནོག༌ ཏ༌རུང༌ ལོ༌ ལྔ༌ ཞིང༌ལོག༌ཅེས༌ དང༌ རྔ༌ཅེས༌ མི༌ཡོང།
GEN 45:7 འི༌ ཀགས༌པོའེ༌ ཏུས༌སི༌ ནང༌ནེ༌ ང༌དང༌གུན༌ སྐྱོབ༌བ༌ ཛད༌ཏེ༌ ང༌དང༌ངི༌ པུར༌གྱུད༌པོ༌ ལུས༌ཤུགས༌ཅེས༌ལ༌ དཀོན༌མཆོག༌གི༌ ང༌ སྔུན༌ལ༌ ཀལ༌ལ༌ ཛད༌ཏེ༌ ཨིན༌ནོག༌།”
GEN 45:8 “ཏེ༌བོའེ༌ཕིའ༌ ཁྱོ༌ཞ༌གུན༌ནི༌ མན༌པ༌ དཀོན༌མཆོག༌གི༌ ང༌ འི༌རུ༌ ལམ༌ཅུག༌ག༌ ཛད༌ཏེ༌ ཨིན༌ནོག༌། ཁོང༌ངི༌ ང༌ གྱལ༌པོའ༌ ལབ༌ཞའ༌ ཏང༌ཁན༌, གྱལ༌པོའེ༌ ཁར༌རི༌ ཁག༌ཁུར༌པ༌ དང༌ ཨི༌ཇིབ༌ གང༌པོའེ༌ཀ༌ ཝང༌སྲུལ༌པ༌ ཅོའ༌ ཛདས༌།
GEN 45:9 ཏ༌ གྱོགས༌པ༌ ངའེ༌ ཨ༌བ༌ ཡོད༌ས༌ སོང༌ཏེ༌ ཁོང༌ང༌ ཟེར༌, ‘ཉེ༌རང༌ངི༌ བུ༌ཚ༌ ཡོ༌སེབ༌བི༌ ཟེར༌ར༌རག༌, དཀོན༌མཆོག༌གི༌ ང༌ ཨི༌ཇིབ༌ གང༌པོའེ༌ཀ༌ ཝང༌སྲུལ༌པ༌ ཅོའ༌ ཛདས༌། གོར༌ མ༌ཅུག༌ག༌ ང༌ ཡོད༌ས༌ སྐྱོད༌ད༌ ཛད༌།
GEN 45:10 ཉེ༌རང༌ ངའེ༌ ཉེ༌མོའ༌ གོ༌ཤེན༌ནི༌ ས༌ཆའེ༌ ནང༌ང༌ ཞུགས༌, ཉེ༌རང༌ངི༌ ཕྲུ༌གུ༌གུན༌, ཚ༌འོ༌ ཚ༌མོ༌ གུན༌, ར༌ལུག༌གི༌ ཁྱུ༌ ཡང༌ ཉེ༌རང༌ང༌ ཡོད༌ཁན༌ ཚང༌མའང༌།
GEN 45:11 ཏེ༌རུ༌ ངའེ༌ ཉེ༌རང༌ང༌ སྟ༌སྟོག༌ ཅོ༌ཉན༌ ཨིན༌། མུ༌གེ༌ ཏ༌རུང༌ ལོ༌ ལྔ༌ ལུས༌ཤེས༌ ཨིན༌ནོག༌། འི༌རུ༌ མ༌སྐྱོད༌ན༌ ཉེ༌རང༌ དང༌ ཉེ༌རང༌ངི༌ ནང༌ཚངས༌གུན༌ ཟ༌གྱུ༌ མེད༌པ༌ སྟོག༌རིའ༌ ཤི༌ཨིན༌།’”
GEN 45:12 “ཏ༌ ཁྱོ༌ཞ༌གུན༌ དང༌ ངའེ༌ ནོ༌ བེན༌ཡཱ༌མིན༌ནི༌ ང༌ ཏན༌ཏན༌ ཡོ༌སེབ༌ ཨིན༌ཁན༌བོ༌ ཐོང༌ཏེ༌ ཨིན༌ནོག༌།
GEN 45:13 འི༌རུ༌ ཨི༌ཇིབ༌བི༌ ནང༌ང༌ ང༌ ཙམ༌ཤིག༌གི༌ ཀུས༌པ༌ ཡོད༌ཁན༌ དང༌ ཁྱོ༌ཞ༌གུན༌ནི༌ ཐོང༌ཁན༌ ཚང༌མ༌ ངའེ༌ ཨ༌བའ༌ ཤོད༌, ཡང༌ ཁོང༌ གྱོགས༌པ༌ འི༌རུ༌ ཁྲིད༌ཏེ༌ ཁྱོང༌།”
GEN 45:14 ཁོ༌ ཁོ༌རང༌ངི༌ ནོ༌ བེན༌ཡཱ༌མིན༌ལ༌ ཁྲིལ༌ཏེ༌ ངུས༌ ཡང༌ བེན༌ཡཱ༌མིན༌ནའང༌ ཁོའ༌ ཁྲིལ༌ཏེ༌ ངུས༌།
GEN 45:15 ཡོ༌སེབ༌བི༌ ཁོ༌རང༌ངི༌ ཨ༌ཅོ༌ ཚང༌མ༌ པུག༌ ཏངས༌ཏེ༌ ངུས༌། ཏེ༌ནེ༌ ཁོའེ༌ ཨ༌ཅོ༌གུན༌ནི༌ ཁོ༌ ཉམ༌པོ༌ སྤེ༌ར༌ ཏངས༌།
GEN 45:16 ཡོ༌སེབ༌བི༌ ཨ༌ཅོ༌ནོ༌གུན༌ ཡོངས༌ཁན༌ནི༌ ནས༌ཚུལ༌ གྱལ༌པོའ༌ ཚོར༌ར༌ཅིག༌ ཁོ༌ དང༌ ཁོའེ༌ སྤོན༌བོ༌གུན༌ ཐད༌།
GEN 45:17 གྱལ༌པོའེ༌ ཡོ༌སེབ༌བ༌ ཟེརས༌, “ཁྱོ༌རང༌ངི༌ ཨ༌ཅོ༌ནོ༌གུན༌ལ༌ ཟེར༌, ‘སེམས༌ཅན༌གུན༌ལ༌ སྒལ༌ཀལ༌ཏེ༌ ཀེ༌ནན༌ལ༌ ལོགས༌ཏེ༌ སོང༌,
GEN 45:18 ཡང༌ ཁྱོ༌ཞ༌གུན༌ནི༌ ཨ༌བ༌ དང༌ ཁྱོ༌ཞ༌གུན༌ནི༌ ནང༌ཚངས༌ གུན༌ ཁྲིད༌ཏེ༌ ངའ༌ ཡོད༌ས༌ ལོགས༌ཏེ༌ ཡོང༌། ངའེ༌ ཁྱོ༌ཞ༌གུན༌ལ༌ ཨི༌ཇིབ༌བི༌ ཚང༌མའེ༌སང༌ ས༌ཆ༌ གྱལ༌ཤོག༌པོ༌ ཏང༌ཨིན༌ ཡང༌ ཁྱོ༌ཞ༌གུན༌ནི༌ འི༌ ས༌ཆའེ༌ ཟན༌ གྱལ༌ཤོག༌པོ༌ ཟེན༌།’”
GEN 45:19 “ཁོང༌གུན༌ལ༌ འི༌བོའང༌ ཟེར༌, ‘ཁྱོ༌ཞའེ༌ ན༌མ༌, ཕྲུ༌གུ༌ གུན༌ ཞོན༌ཅེས༌ལ༌ ལང༌རེལ༌གུན༌ ཨི༌ཇིབ༌ནེ༌ ཁྱེར༌ ཡང༌ ཁོང༌གུན༌ དང༌ ཨ༌བ༌ ཁྲིད༌ཏེ༌ ཁྱོང༌།
GEN 45:20 ཁྱོ༌ཞའེ༌ ནོར༌གུན༌ བོར༌ཏེ༌ ཡོང༌ཅེས༌ལ༌ ཚེར༌ཁ༌ ཅོ༌ མ༌གོས༌ ཅིའ༌ཟེར༌ན༌ ཨི༌ཇིབ༌བི༌ ཚང༌མའེ༌སང༌ གྱལ༌ཤོག༌ ས༌ཆ༌བོ༌ ཁྱོ༌ཞའེ༌ གྱུར༌ཅེས༌ ཨིན༌ནོག༌།’”
GEN 45:21 ཡ༌ཀོབ༌བི༌ བུ༌ཚ༌གུན༌ནི༌ ཏེན༌ན༌བོ༌ ཅོས༌། གྱལ༌པོའེ༌ བཀའ༌ སལ༌ཁན༌ ནང༌ཞིན༌ ཡོ༌སེབ༌བི༌ ཁོང༌གུན༌ལ༌ ལང༌རེལ༌གུན༌ ཏངས༌ ཡང༌ བེས༌སི༌ ནང༌ང༌ ཟའ༌ཅེས༌སི༌ ཟན༌གུན༌ ཀལས༌།
GEN 45:22 ཁོའེ༌ ཁོང༌ རེ༌རེའ༌ ཀོས༌ལག༌ སོ༌མའེ༌ ཆའ༌ཅིག༌ ཏངས༌ ཨིན༌ནའང༌ བེན༌ཡཱ༌མིན༌ལ༌ མུལ༌ལི༌ པེ༌ནེ༌ སུམ༌གྱ༌ དང༌ ཀོས༌ལག༌ ཆའ༌ ལྔ༌ ཏངས༌།
GEN 45:23 ཁོའེ༌ ཁོ༌རང༌ངི༌ ཨ༌བའེ༌ ཕིའ༌ བུང༌བུ༌ རྕུའི༌ཀ༌ ཨི༌ཇིབ༌བི༌ ཅ༌ལག༌ གྱལ༌ཤོག༌གུན༌ ཀལས༌ ཡང༌ བུང༌མོ༌ རྕུའི༌ཀ༌ གྲུ༌, ཏ༌གི༌ དང༌ ཟ༌གྱུ༌ གུན༌ ཁོང༌ངི༌ བེས༌སི༌ ཕིའ༌ ཀལས༌།
GEN 45:24 ཏེ༌ནེ༌ ཁོའེ༌ ཁོ༌རང༌ངི༌ ཨ༌ཅོ༌ནོ༌གུན༌ ལམ༌ཅུགས༌ ཡང༌ ཁོང༌གུན༌ ཆ༌ ཟ༌ནེ༌ ཁོའེ༌ ལམ༌བར༌ལ༌ ཛིང༌མོ༌ མི༌ཏང༌ཅེས༌ལ༌ ཟེརས༌།
GEN 45:25 ཁོང༌གུན༌ ཨི༌ཇིབ༌ནེ༌ བིང༌ཏེ༌ སོང༌ ཡང༌ ཁོ༌རང༌གུན༌ནི༌ ཨ༌བ༌ ཡ༌ཀོབ༌ ཡོད༌ས༌ ཀེ༌ནན༌ལ༌ ལེབ༌།
GEN 45:26 ཁོང༌གུན༌ནི༌ ཨ༌བའ༌ ཟེརས༌, “ཡོ༌སེབ༌ སོན༌ཏེའ༌ དུག༌ མ༌ཚད༌ ཁོའེ༌ ཨི༌ཇིབ༌ གང༌པོའེ༌ཀ༌ ཝང༌སྲུལ༌ དུག༌།” ཡ༌ཀོབ༌ ཧ༌ལས༌ ཡང༌ ཁོའ༌ ཁོང༌གུན༌ནི༌ཀ༌ ཨིད༌ མ༌ཤེས༌།
GEN 45:27 ཨིན༌ནའང༌ ཁོང༌གུན༌ནི༌ ཡོ༌སེབ༌བི༌ ཁོང༌གུན༌ལ༌ ཟེར༌ཁན༌ ཚང༌མ༌ ཤད༌ད༌ཅིག༌ ཡང༌ ཡོ༌སེབ༌བི༌ ཁོ༌ ཁྱོང༌ཅེས༌ལ༌ ཀལ༌ཁན༌ནི༌ ལང༌རེལ༌གུན༌ ཐོང༌ང༌ཅིག༌ ཁོའེ༌ ཁོང༌གུན༌ནི༌ ཟེར༌ཁན༌གུན༌ དེན༌ཤེས༌ཏེ༌ ཐད༌པོ༌ སོང༌།
GEN 45:28 ཏེ༌ནེ༌ ཡ༌ཀོབ༌བི༌ ཟེརས༌, “ངའེ༌ བུ༌ཚ༌ ཡོ༌སེབ༌ སོན༌ཏེའ༌ ཡོད༌ཁན༌བོ༌ ཏ༌ ང༌ དེན༌ཤེས༌། ང༌ ཤིའི༌ སང༌ སྔུན༌ལ༌ ཁོའ༌ ཐུག༌ག༌ལ༌ ཆ༌གོས༌།”
GEN 46:1 ཡ༌ཀོབ༌བི༌ ཁོ༌རང༌ང༌ ཡོད༌ཁན༌ ཚང༌མ༌ ཁུར༌ཏེ༌ ཨི༌ཇིབ༌བ༌ སོང༌ ཡང༌ བེར༌ཤེ༌བ༌ ལེབ༌བ༌ཅིག༌ ཁོའེ༌ ཁོ༌རང༌ངི༌ ཡབ༌ ཨི༌སཱག༌གི༌ དཀོན༌མཆོག༌ག༌ ཆོད༌པ༌ ཕུལས༌།
GEN 46:2 ཚན༌ལ༌ ཞལ༌ཟིགས༌ཤིག༌གི༌ ནང༌ང༌ དཀོན༌མཆོག༌གི༌ ཁོའ༌ ཞལ༌ཏ༌ སལ༌ཏེ༌ མོལས༌, “ཡ༌ཀོབ༌། ཡ༌ཀོབ༌།” ཡ༌ཀོབ༌བི༌ ལན༌ཏངས༌, “ང༌ འི༌ཀ༌ནེ༌ ཡོད༌ལེ༌།”
GEN 46:3 ཁོང༌ངི༌ མོལས༌, “ང༌ དཀོན༌མཆོག༌ ཨིན༌, ཁྱོ༌རང༌ངི༌ ཨ༌བའེ༌ དཀོན༌མཆོག༌། ཨི༌ཇིབ༌བ༌ ཆ༌ཅེས༌ལ༌ ཇིགས༌ མ༌ཇིགས༌, ཅིའ༌ཟེར༌ན༌ ཏེ༌ ནས༌སའེ༌ ནང༌ང༌ ངའེ༌ ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ ཀྲག༌པོ༌ཞིག༌ གྱུར༌ཅུག༌ཨིན༌།
GEN 46:4 ང༌ ཁྱོ༌རང༌ ཉམ༌པོ༌ ཨི༌ཇིབ༌བ༌ ཆེན༌ ཡང༌ ངའེ༌ ཁྱོ༌རང༌ངི༌ པུར༌གྱུད༌གུན༌ ཏེ༌ ས༌ཆའེ༌ ནང༌ནེ༌ ཕིངས༌ཏེ༌ ཁྱོང༌ཨིན༌། ཤི༌ ཟ༌ནེ༌ ཁྱོ༌རང༌ངི༌ མིག༌ ཡོ༌སེབ༌བི༌ ཁོ༌རང༌ངི༌ ལག༌པ༌ ཉམ༌པོ༌ ཀབ༌ཨིན༌།”
GEN 46:5 ཏེ༌ནེ༌ ཡ༌ཀོབ༌ བེར༌ཤེ༌བ༌ནེ༌ བིངས༌། ཁོའེ༌ བུ༌ཚ༌གུན༌ནི༌ ཨ༌བ༌ ཡ༌ཀོབ༌, ཁོ༌རང༌གུན༌ནི༌ ན༌མ༌ དང༌ ཕྲུ༌གུ༌གུན༌ ཨི༌ཇིབ༌བི༌ གྱལ༌པོའེ༌ ཀལ༌ཁན༌ནི༌ ལང༌རེལ༌གུན༌ནི༌ ནང༌ང༌ སྐྱོན༌ཏེ༌ ཁྱེརས༌།
GEN 46:6 ཡ༌ཀོབ༌ དང༌ ཁོའེ༌ པུར༌གྱུད༌ ཚང༌མའེ༌ ཀེ༌ནན༌ནི༌ ནང༌ང༌ ཇོར༌ཁན༌ནི༌ སེམས༌ཅན༌ དང༌ ནོར༌ གུན༌ ཁུར༌ཏེ༌ ཨི༌ཇིབ༌བ༌ སོང༌།
GEN 46:7 ཡ༌ཀོབ༌བི༌ ཨི༌ཇིབ༌བ༌ ཁོ༌རང༌ ཉམ༌པོ༌ ཁོ༌རང༌ངི༌ བུ༌ཚ༌ དང༌ བུ༌མོ༌, ཚ༌འོ༌ དང༌ ཚ༌མོ༌ ཡང༌ན༌ ཁོའེ༌ པུར༌གྱུད༌ ཚང༌མ༌ ཁྲིད༌ཏེ༌ ཁྱེརས༌།
GEN 46:8 འི༌ ཚང༌མ༌ ཨི༌ཇིབ༌བ༌ ཆའ༌ཁན༌ནི༌ ཨིས༌ར༌ཨེལ༌པ༌གུན༌ནི༌ མིང༌ ཨིན༌ནོག༌ ཀ༌གུན༌ ཡ༌ཀོབ༌ དང༌ ཁོའེ༌ པུར༌གྱུད༌གུན༌ ཨིན༌། རུ༌བེན༌, ཡ༌ཀོབ༌བི༌ བུ༌ཚ༌ གོ༌སྐྱེས༌།
GEN 46:9 རུ༌བེན༌ ནི༌ བུ༌ཚ༌གུན༌ ཧ༌ནོག༌, པ༌ལུ༌, ཧེས༌རོན༌ དང༌ ཀར༌མི༌།
GEN 46:10 སི༌མེ༌འོན༌ ནི༌ བུ༌ཚ༌གུན༌ ཡེ༌མའུལ༌, ཡ༌མིན༌, ཨོ༌ཧད༌, ཡ༌ཀིན༌, ཟོ༌ཧར༌ དང༌ ཤོལ༌ ༼ཤོལ༌ལི༌ ཨ༌མ༌ ཀེ༌ནན༌མ༌ ཨིན༌པིན༌།༽
GEN 46:11 ལི༌ཝི༌ བུ༌ཚ༌གུན༌ གེར༌ཤོན༌, ཀོ༌ཧད༌ དང༌ མི༌ར༌རི༌།
GEN 46:12 ཡ༌ཧུ༌དཱའེ༌ བུ༌ཚ༌གུན༌ ཨེར༌, ཨོ༌ནན༌, ཤེ༌ལག༌, པེ༌རེཟ༌ དང༌ ཟེ༌རཧ༌ ༼ཨིན༌ནའང༌ ཨེར༌ དང༌ ཨོ༌ནན༌ གུན༌ ཀེ༌ནན༌ནི༌ ནང༌ང༌ ཤི༌།༽ པེ༌རེཟ༌སི༌ བུ༌ཚ༌གུན༌ ཧེཟ༌རོན༌ དང༌ ཧ༌མུལ༌ ཨིན༌པིན༌།
GEN 46:13 ཨིས༌ས༌ཁར༌རི༌ བུ༌ཚ༌གུན༌ ཏོ༌ལ༌, པུ༌འཧ༌, ཡ༌ཤེབ༌ དང༌ ཤིམ༌རོན༌།
GEN 46:14 ཟེ༌བུ༌ལོན༌ ནི༌ བུ༌ཚ༌གུན༌ སེ༌རེད༌, ཨི༌ལོན༌ དང༌ ཡ༌ལིལ༌ གུན༌ ཨིན༌པིན༌།
GEN 46:15 ཁོང༌གུན༌ པ༌དན༌ཨ༌རམ༌མི༌ ནང༌ང༌ ཡ༌ཀོབ༌བ༌ ལི༌ཡ༌ གྱུད༌ཏེ༌ ཇོར༌ཁན༌ནི༌ བུ༌ཚ༌གུན༌, དང༌ དི༌ནཱ༌ ཁོའེ༌ བུ༌མོ༌ ཨིན༌ནོག༌། ལི༌ཡ༌ གྱུད༌ཏེ༌ ཡ༌ཀོབ༌བ༌ ཕྲུ༌གུ༌ དང༌ ཚ༌འོ༌ ཚ༌མོ༌ ཚང༌མ༌ སུམ༌ཅུ༌སོག༌སུམ༌ ཡོད༌པིན༌།
GEN 46:16 གཱད༌དི༌ བུ༌ཚ༌གུན༌ ནི༌ ཛེ༌ཕོན༌, ཧ༌གི༌, ཤུ༌ནི༌, ཨེཟ༌བོན༌, ཨེ༌རི༌, ཨ༌རོད༌དི༌ དང༌ ཨ༌རེ༌ལི༌།
GEN 46:17 ཨ༌ཤེར༌རི༌ བུ༌ཚ༌གུན༌ ནི༌ འིམ༌ནཧ༌, ཨིཤ༌ཝ༌, ཨིཤ༌ཝི༌ དང༌ བེ༌རིའ༌ ཡང༌ ཁོང༌གུན༌ནི༌ སྲིང༌མོ༌ སཱ༌ར༌ ཨིན༌པིན༌། བེ༌རིའ༌འི༌ བུ༌ཚ༌གུན༌ ནི༌ ཧེ༌བེར༌ དང༌ མལ༌ཀེལ༌།
GEN 46:18 ཁོང༌གུན༌ ཟིལ༌པཧ༌ གྱུད༌ཏེ༌ སྐྱེ༌ཁན༌ ཡ༌ཀོབ༌བི༌ ཕྲུ༌གུ༌ ཅུ༌རུག༌བོ༌ ཨིན༌ནོག༌, ལ༌བན༌ནི༌ ཁོ༌རང༌ངི༌ བུ༌མོ༌ ལི༌ཡའ༌ ཁོ༌ ཡོག༌མོའ༌ ཏངས༌ཏེ༌ ཨིན༌པིན༌།
GEN 46:19 ཡ༌ཀོབ༌བི༌ ན༌མ༌ རེ༌ཅལ༌ལ༌ བུ༌ཚ༌ ཡོ༌སེབ༌ དང༌ བེན༌ཡཱ༌མིན༌ སྐྱེས༌།
GEN 46:20 ཨི༌ཇིབ༌བི༌ ནང༌ང༌ ཡོ༌སེབ༌བ༌ མ༌ནས༌ས༌ དང༌ ཨེཕ༌ར༌ཡིམ༌ བུ༌ཚ༌ ཉིས༌ ཡོད༌པིན༌, ཁོང༌གུན༌ འོན༌ནེ༌ ཨིན༌ཁན༌ བླ༌མ༌ པོ༌ཏི༌ཕར༌རི༌ བུ༌མོ༌ ཨ༌སི༌ནད༌ལ༌ སྐྱེས༌ཏེ༌ ཨིན༌པིན༌།
GEN 46:21 བེན༌ཡཱ༌མིན༌ནི༌ བུ༌ཚ༌གུན༌ ནི༌ བི༌ལ༌, བེ༌ཀར༌, ཨཤ༌བེལ༌, གི༌ར༌, ནཱའ༌མན༌, ཨེ༌ཧི༌, རོཤ༌, མུ༌པིམ༌, ཧུ༌པིམ༌ དང༌ ཨ༌རད༌ ཨིན༌པིན༌།
GEN 46:22 འི༌ ཅུབ༌ཞི༌བོ༌ རེ༌ཅལ༌ གྱུད༌ཏེ༌ ཡ༌ཀོབ༌བི༌ བུ༌ཚ༌ དང༌ ཚ༌འོ༌ གུན༌ ཨིན༌ནོག༌།
GEN 46:23 དཱན༌ནི༌ བུ༌ཚ༌ ཧུ༌ཤིམ༌།
GEN 46:24 ཡང༌ ནབ༌ཐལ༌ལིའི༌ བུ༌ཚ༌གུན༌ ནི༌ ཡཧ༌ཟིལ༌, གུ༌ནི༌, ཡ༌ཟེར༌ དང༌ ཤི༌ལེམ༌ གུན༌ ཨིན༌པིན༌།
GEN 46:25 ཏེ༌ བུ༌ཚ༌ རྡུན༌ཀོ༌ བིལ༌ལཧ༌ གྱུད༌ཏེ༌ སྐྱེ༌ཁན༌ ཡ༌ཀོབ༌བི༌ ཕྲུ༌གུ༌གུན༌ ཨིན༌ནོག༌, ལ༌བན༌ནི༌ ཁོ༌རང༌ངི༌ བུ༌མོ༌ རེ༌ཅལ༌ལ༌ ཁོ༌ ཡོག༌མོའ༌ ཏངས༌ཏེ༌ ཨིན༌པིན༌།
GEN 46:26 ཡ༌ཀོབ༌ ཉམ༌པོ༌ ཨི༌ཇིབ༌བ༌ ཆའ༌ཁན༌ ཁོའེ༌ པུར༌གྱུད༌གུན༌ནི༌ ཀྲངས༌ཀ༌ དྲུག༌ཅུ༌ ར༌རུག༌ ཡོད༌པིན༌ ཀ༌བོའེ༌ ནང༌ང༌ ཁོའེ༌ བུ༌ཚ༌གུན༌ནི༌ ན༌མ༌ མ༌ཐེའ༌ ཨིན༌ནོག༌།
GEN 46:27 ཨི༌ཇིབ༌བི༌ ནང༌ང༌ ཡོ༌སེབ༌བ༌ སྐྱེས༌ཁན༌ནི༌ བུ༌ཚ༌ ཉིས༌ཀོ༌ ཐེས༌ཏེ༌ ཡ༌ཀོབ༌བི༌ ནང༌ཚངས༌ ཨི༌ཇིབ༌བ༌ ཆའ༌ཁན༌གུན༌ནི༌ ཀྲངས༌ཀ༌ རྡུན༌ཅུ༌ ཡོད༌པིན༌།
GEN 46:28 ཡ༌ཀོབ༌བི༌ གོ༌ཤེན༌ལ༌ ཆ༌སའེ༌ ལམ༌ གྱུས༌ཅོ༌ཅེས༌ལ༌ ཡ༌ཧུ༌དཱ༌ སྔུན༌ལ༌ ཡོ༌སེབ༌བི༌ཀ༌ ལམ༌ཅུགས༌། ཁོང༌གུན༌ གོ༌ཤེན༌ནི༌ ས༌ཆའེ༌ཀ༌ ལེབ༌བ༌ཅིག༌
GEN 46:29 ཡོ༌སེབ༌བི༌ ཁོ༌རང༌ངི༌ རྟ༌རེལ༌ གྲལ༌གྲིག༌ ཅོས༌ཏེ༌ གོ༌ཤེན༌ལ༌ ཁོ༌རང༌ངི༌ ཨ༌བ༌ ཐུག༌ག༌ སོང༌། ཨ༌བའ༌ ཐུག༌ག༌ཅིག༌ ཡོ༌སེབ༌བི༌ ཨ༌བའ༌ ཁྲིལ༌ཏེ༌ ཏུས༌བན༌ཤིག༌ ངུས༌།
GEN 46:30 ཡ༌ཀོབ༌བི༌ ཡོ༌སེབ༌བ༌ ཟེརས༌, “ངའེ༌ ཁྱོ༌རང༌ སོན༌ཏེའ༌ ཐོང༌པ༌ ཏ༌ ང༌ ཤི༌ཅེས༌ལ༌ གྲལ༌གྲིག༌ ཨིན༌།”
GEN 46:31 ཏེ༌ནེ༌ ཡོ༌སེབ༌བི༌ ཁོ༌རང༌ངི༌ ཨ༌ཅོ༌ནོ༌ དང༌ ཞན༌ ནང༌མི༌གུན༌ལ༌ ཟེརས༌, “ཏ༌ ང༌ གྱལ༌པོའེ༌ཀ༌ སོང༌ཏེ༌ ཟེར༌ཨིན༌ ‘ཀེ༌ནན༌ནི༌ ནང༌ང༌ དུག༌ཁན༌ ངའེ༌ ཨ༌ཅོ༌ནོ༌ དང༌ ངའེ༌ ཨ༌བའེ༌ ནང༌མི༌ ཚང༌མ༌ ཡོང༌ཏེ༌ དུག༌།
GEN 46:32 ཁོང༌གུན༌ ལུག༌རྫི༌ ཡང༌ སེམས༌ཅན༌ གུན༌ལ༌ སྟ༌སྟོག༌ ཅོ༌ཁན༌ ཨིན༌ནོག༌ ཡང༌ ཁོང༌གུན༌ནི༌ ཁོ༌རང༌གུན༌ནི༌ སྲལ༌ཁན༌ནི༌ སེམས༌ཅན༌ནི༌ ཁྱུ༌གུན༌ དང༌ ཁོང༌གུན༌ལ༌ ཡོད༌ཁན༌ ཚང༌མ༌ ཁྱོངས༌ཏེ༌ དུག༌།’
GEN 46:33 གྱལ༌པོའེ༌ ཁྱོ༌ཞ༌གུན༌ བོད༌ཏེ༌ ‘ཁྱོ༌རང༌གུན༌ནི༌ ལས༌ ཅི༌ ཅོའད༌?’ ཟེར༌ཏེ༌ ཏྲིའ༌ཅིག༌,
GEN 46:34 ཁྱོ༌ཞ༌གུན༌ནི༌ ཟེར༌གོས༌, ‘ང༌ཞའེ༌ ཕ༌མེས༌པོ༌གུན༌ ཙོགས༌ལ༌ ང༌ཞའ༌ ཕྲུ༌གུ༌ནེ༌ པར༌ལ༌ སེམས༌ཅན༌ སྲལ༌ཏེ༌ ཚོ༌ཁན༌གུན༌ ཨིན༌།’ ཏེ༌ནེ༌ ཁོའེ༌ ཁྱོ༌ཞ༌གུན༌ གོ༌ཤེན༌ ཡུལ༌ཇོངས༌སི༌ ནང༌ང༌ དུག༌ཅུག༌ཨིན༌ ཅིའ༌ཟེར༌ན༌ ཨི༌ཇིབ༌པ༌གུན༌ནི༌ སེམས༌ཅན༌ སྲལ༌ཁན༌ནི༌ མི༌གུན༌ རྩང༌མ༌ ཐེའ༌ མེད༌པིན༌།”
GEN 47:1 ཏེ༌ནེ༌ ཡོ༌སེབ༌ སོང༌ཏེ༌ ཨི༌ཇིབ༌བི༌ གྱལ༌པོ༌ ཕེ༌རོའ༌ ཟེརས༌, “ངའེ༌ ཨ༌བ༌ དང༌ ཨ༌ཅོ༌ནོ༌གུན༌ ཀེ༌ནན༌ནེ༌ སེམས༌ཅན༌ནི༌ ཁྱུ༌ དང༌ ཁོ༌རང༌གུན༌ལ༌ ཡོད༌ཁན༌ ཚང༌མ༌ ཉམ༌པོ༌ ཡོངས༌ཏེ༌ དག༌ས༌ གོ༌ཤེན༌ནི༌ ཡུལ༌ཇོངས༌སི༌ ནང༌ང༌ ཡོད༌།”
GEN 47:2 ཁོའེ༌ ཁོ༌རང༌ ཉམ༌པོ༌ ཡོད༌ཁན༌ ཨ༌ཅོ༌ རྔ༌བོ༌ གྱལ༌པོའེ༌ དུན༌ལ༌ ཁྱོངས༌།
GEN 47:3 གྱལ༌པོའེ༌ ཁོང༌གུན༌ལ༌ ཏྲིས༌, “ཁྱོ༌ཞ༌གུན༌ནི༌ ལས༌སྣ༌ ཅི༌ ཨིན༌?” ཁོང༌གུན༌ནི༌ ལན༌ཏངས༌, “སྤོན༌བོ༌ལེ༌, ང༌ཞ༌གུན༌ ང༌ཞའེ༌ ཕ༌མེས༌པོ༌གུན༌ ཙོགས༌ལ༌ ལུག༌རྫི༌ ཨིན༌།
GEN 47:4 ཀེ༌ནན༌ནི༌ ནང༌ང༌ མུ༌གེ༌ ཀྲག༌པོ༌ ལངས༌ཏེ༌ སེམས༌ཅན༌གུན༌ལ༌ ཟ༌གྱུ༌ མེད༌ པ༌སང༌ ང༌ཞའ༌ ཏུས༌བན༌ཤིག༌ འི༌ ཡུལ༌ལ༌ དུག༌ག༌ ཡོངས༌པིན༌། ཇུ༌ཇུ༌ ང༌ཞ༌གུན༌ གོ༌ཤེན༌ནི༌ ཡུལ༌ཇོངས༌སི༌ ནང༌ང༌ དུག༌ཅེས༌ལ༌ གོངས༌པ༌ སལ༌།”
GEN 47:5 གྱལ༌པོའེ༌ ཡོ༌སེབ༌བ༌ ཟེརས༌, “ཁྱོ༌རང༌ངི༌ ཨ༌བ༌ དང༌ ཨ༌ཅོ༌ནོ༌གུན༌ ཁྱོ༌རང༌ ཡོད༌ས༌ ཡོངས༌ཏེ༌ ཨིན༌ནོག༌།
GEN 47:6 ཨི༌ཇིབ༌བི༌ ས༌ཆ༌ གང༌པོ༌ ཁྱོ༌རང༌ངི༌ དུན༌ལ༌ དུག༌, ཏ༌ ཁོང༌གུན༌ ས༌ཆ༌ ཚང༌མའེ༌སང༌ གྱལ༌ཤོག༌ གོ༌ཤེན༌ནི༌ ནང༌ང༌ ནས༌ཏེ༌ དུག༌ཅུག༌། ཡང༌ ཁོང༌གུན༌ནི༌ ཕྲོ༌ནེ༌ ཁས༌པ༌གུན༌ལ༌ ངའེ༌ སེམས༌ཅན༌ནི༌ ཁྱུ༌གུན༌ནི༌ སྟ༌སྟོག༌ ཅོ༌ཅེས༌སི༌ ཁག༌ ཀོལ༌།”
GEN 47:7 ཏེ༌ནེ༌ ཡོ༌སེབ༌བི༌ ཁོ༌རང༌ངི༌ ཨ༌བ༌ ཡ༌ཀོབ༌ གྱལ༌པོའེ༌ དུན༌ལ༌ ཁྱོངས༌ ཡང༌ ཡ༌ཀོབ༌བི༌ གྱལ༌པོའ༌ ཅིན༌ལབས༌ ཏངས༌།
GEN 47:8 གྱལ༌པོའེ༌ ཁོའ༌ ཏྲིས༌, “ཉེ༌རང༌ང༌ ལོ༌ ཙམ༌ ཆ༌ཅེན༌?”
GEN 47:9 ཡ༌ཀོབ༌བི༌ ལན༌ཏངས༌, “ཇིག༌རྟེན༌ནི༌ ནང༌ང༌ ཁོར༌ཨིན༌ དུགས༌ཏེ༌ ངའ༌ ལོ༌ གྱ༌ དང༌ སུམ༌ཅུ༌ སོང༌། ངའེ༌ མི༌ཚེའེ༌ རྡུག༌ངལ༌ཅན༌ ཡང༌ ངའེ༌ ཕ༌མེས༌པོ༌གུན༌ ཙོགས༌ལ༌ རིང༌མོ༌ཞིག༌ མེད༌པ༌ ཨིན༌ནོག༌།”
GEN 47:10 ཏེ༌ནེ༌ ཡ༌ཀོབ༌བི༌ གྱལ༌པོའ༌ ཅིན༌ལབས༌ ཏངས༌ཏེ༌ ཁོའེ༌ དུན༌ནེ༌ སོང༌།
GEN 47:11 ཕེ༌རོའེ༌ བཀའ༌ ནང༌ཞིན༌ ཡོ༌སེབ༌བི༌ ཁོ༌རང༌ངི༌ ཨ༌བ༌ དང༌ ཨ༌ཅོ༌ནོ༌གུན༌ ཨི༌ཇིབ༌བི༌ ས༌ཆ༌ ཚང༌མའེ༌སང༌ གྱལ༌ཤོག༌ རམ༌སིས༌སི༌ ཡུལ༌ཇོངས༌སི༌ ནང༌ང༌ ཚུགས༌ཏེ༌ དུག༌ཅུགས༌།
GEN 47:12 ཡང༌ ནང༌ཚངས༌སི༌ ནང༌མི༌ སྤེས༌ཏེ༌ ཡོ༌སེབ༌བི༌ ཁོ༌རང༌ངི༌ ཨ༌བ༌ དང༌ ཨ༌ཅོ༌ནོ༌གུན༌ ཡང༌ ཁོང༌གུན༌ནི༌ ནང༌ཚངས༌གུན༌ལ༌ ཟ༌གྱུ༌གུན༌ནའང༌ རིགས༌།
GEN 47:13 མུ༌གེ༌ མ༌སྲན༌ཏྲེ༌ ཡོང༌ཅེས༌པོའེ༌ ཨི༌ཇིབ༌ དང༌ ཀེ༌ནན༌ནི༌ ནང༌ང༌ ཟ༌གྱུ༌ མེད༌པིན༌། ནས༌ས༌ གང༌པོའེ༌ ནང༌ང༌ མི༌གུན༌ལ༌ སྟོག༌རི༌ སྲན༌ཏྲེ༌ ཐོང༌ངད༌པིན༌།
GEN 47:14 ཨི༌ཇིབ༌པ༌ དང༌ ཀེ༌ནན༌པ༌ གུན༌ལ༌ གྲུ༌ ཙོང༌ཁན༌ནི༌ པེ༌ནེ༌ ཚང༌མ༌ ཡོ༌སེབ༌བི༌ སགས༌ཏེ༌ ཕེ༌རོའེ༌ ཁར༌ལ༌ ཁྱེར༌རད༌པིན༌།
GEN 47:15 ཨི༌ཇིབ༌པ༌ དང༌ ཀེ༌ནན༌པ༌ གུན༌ལ༌ པེ༌ནེ༌ ཚང༌མ༌ ཚར༌ར༌ཅིག༌, ཨི༌ཇིབ༌པ༌གུན༌ ཡོ༌སེབ༌ ཡོད༌ས༌ ཡོངས༌ཏེ༌ ཟེརས༌, “ང༌ཞ༌གུན༌ལ༌ ཟ༌གྱུ༌ སལ༌། ཉེ༌རང༌ངི༌ མིག༌གི༌ དུན༌ལ༌ ང༌ཞ༌གུན༌ ཤི༌ ཅུག༌ག༌ མ༌ཛད༌། ང༌ཞའེ༌ པེ༌ནེ༌གུན༌ ཚར༌།”
GEN 47:16 ཡོ༌སེབ༌བི༌ ཟེརས༌, “ཀལ༌ཏེས༌ ཁྱོ༌ཞ༌གུན༌ནི༌ པེ༌ནེ༌ ཚང༌མ༌ ཚར༌ཏེ༌ མེད༌ན༌ ཁྱོ༌ཞའེ༌ སྲལ༌ཁན༌ནི༌ སེམས༌ཅན༌གུན༌ ཁྱོང༌ ངའེ༌ ཏེ༌གུན༌ནི༌ ཚབས༌ལ༌ ཟ༌གྱུ༌ ཏང༌ཨིན༌།”
GEN 47:17 ཏེ༌བོའེ༌ཕིའ༌ ཁོང༌གུན༌ནི༌ སེམས༌ཅན༌ སྲལ༌ཁན༌གུན༌ ཁྱོངས༌ ཡང༌ ཁོའེ༌ ཁོང༌གུན༌ནི༌ ཁྱོང༌ཁན༌ རྟ༌, ལུག༌ དང༌ ར༌མ༌, བ༌ལང༌ དང༌ བུང༌བུ༌ གུན༌ནི༌ ཚབས༌ལ༌ ཟ༌གྱུ༌ ཏངས༌། ཏེ༌ ལོ༌བོ༌ ཁོའེ༌ ཁོང༌ ཚང༌མ༌ལ༌ སེམས༌ཅན༌ སྲལ༌ཁན༌གུན༌ནི༌ ཚབས༌ལ༌ ཟ༌གྱུ༌ ཏངས༌།
GEN 47:18 ཏེ༌ ལོ༌ ཚར༌ཏེ༌ སྟིང༌མ༌ ལོ༌ ཁོང༌གུན༌ ཡོ༌སེབ༌ ཡོད༌ས༌ ཡོངས༌ཏེ༌ ཟེརས༌, “སྤོན༌བོ༌ལེ༌, ང༌ཞའེ༌ པེ༌ནེ༌ ཚར༌ ཡང༌ ང༌ཞའེ༌ སེམས༌ཅན༌ ཚང༌མ༌ ཉེ༌རང༌ངི༌ གྱུར༌ཁན༌བོ༌ ང༌ཞའ༌ སྦས༌ཏེ༌ བོར༌ མི༌ཉན༌། ཏ༌ ང༌ཞ༌རང༌ངི༌ ཟུགས༌པོ༌ དང༌ ས༌ཀྱད༌པོ༌ མ༌ནེ༌ ཅའང༌ ལུས༌ཏེ༌ མེད༌།
GEN 47:19 ཉེ༌རང༌ངི༌ མིག༌གི༌ དུན༌ལ༌ ང༌ཞའ༌ དང༌ ང༌ཞའེ༌ ཞིང༌གུན༌ ཤི༌ ཅུག༌ག༌ མ༌ཛད༌། ང༌ཞའ༌ དང༌ ང༌ཞའེ༌ ས༌ཀྱད༌གུན༌ནི༌ ཚབས༌ལ༌ ང༌ཞའ༌ ཟ༌གྱུ༌ སལ༌ལ༌ ཛད༌དའང༌, ང༌ཞའེ༌ ས༌ཀྱད༌ དང༌ ང༌ཞ༌གུན༌ གྱལ༌པོའེ༌ ཚེ༌ཡོག༌ གྱུར༌ཨིན༌། ང༌ཞ༌གུན༌ སོན༌ཏེའ༌ ལུས༌ཤེས༌ ཡང༌ ཞིང༌གུན༌ རི༌སྟོང༌ མི༌གྱུར༌ཅེས༌སི༌ ཕིའ༌ ང༌ཞ༌གུན༌ལ༌ གྲུ༌ སལ༌ལ༌ ཛད༌།”
GEN 47:20 ཏེ༌ནེ༌ ཡོ༌སེབ༌བི༌ ཨི༌ཇིབ༌བི༌ ས༌ཆ༌ ཚང༌མ༌ གྱལ༌པོའེ༌ ཕིའ༌ ཉོས༌། མུ༌གེ༌ མ༌སྲན༌ཏྲེ༌ གྱས༌པ༌ ཨི༌ཇིབ༌པ༌ ཚང༌མའེ༌ ཁོ༌རང༌གུན༌ནི༌ ས༌ཀྱད༌ ཙོངས༌ ཡང༌ ས༌ཀྱད༌ ཚང༌མ༌ ཕེ༌རོའེ༌ གྱུར༌།
GEN 47:21 ཡོ༌སེབ༌བི༌ ཨི༌ཇིབ༌ གང༌པོའེ༌ མི༌གུན༌ གྱལ༌པོའེ༌ ཚེ༌ཡོག༌ གྱུར༌ཅུགས༌།
GEN 47:22 ཨིན༌ནའང༌ ཁོའེ༌ བླ༌མ༌གུན༌ནི༌ ས༌ཀྱད༌ མ༌ཉོས༌ ཅིའ༌ཟེར༌ན༌ གྱལ༌པོའེ༌ ཁོང༌གུན༌ལ༌ ཐག༌ཅད༌ཁན༌ནི༌ ལ༌ཆ༌ ཏང༌ངད༌པིན༌ ཏེ༌བོའེ༌ཕིའ༌ ཁོང༌གུན༌ལ༌ ཟ༌གྱུ༌ ཉོ༌ཅེས༌ལ༌ ཁོ༌རང༌གུན༌ནི༌ ས༌ཀྱད༌ ཙོང༌ མ༌གོས༌།
GEN 47:23 ཡོ༌སེབ༌བི༌ མི༌གུན༌ལ༌ ཟེརས༌, “ཏ༌ ངའེ༌ ཁྱོ༌ཞ༌གུན༌ དང༌ ཁྱོ༌ཞ༌གུན༌ནི༌ ས༌ཀྱད༌ གྱལ༌པོའེ༌ ཕིའ༌ ཉོས༌ཏེ༌ ཨིན༌, འི༌ཀ༌ནེ༌ ས༌འོན༌, ཁྱེར༌ཏེ༌ ཞིང༌ ཏོབ༌ཤིག༌།
GEN 47:24 སྟོན༌ཐོག༌ སྨིན༌ན༌ཅིག༌ ཁྱོ༌ཞ༌གུན༌ནི༌ ཁག༌ ལྔའེ༌ ནང༌ནེ༌ ཅིག༌ གྱལ༌པོའ༌ ཏང༌གོས༌། ལུས༌ཁན༌ནི༌ ཁག༌ ཞི༌ ཁྱོ༌ཞའེ༌ ནང༌ཚངས༌གུན༌ནི༌ ཁར༌ཇི༌ དང༌ ཞིང༌ངི༌ ས༌འོན༌ནི༌ ཕིའ༌ ཀོལ༌།”
GEN 47:25 ཁོང༌གུན༌ནི༌ ལན༌ཏངས༌, “ཉེ༌རང༌ངི༌ ང༌ཞ༌གུན༌ནི༌ སྲོག༌ སྐྱོབས༌ཏེ༌ ཨིན༌ནོག༌། སྤོན༌བོ༌ལེ༌, ཉེ༌རང༌ངི༌ ང༌ཞའེ༌ཀ༌ ཐུག༌རྗེ༌ སྟན༌ཅེས༌པོའེ༌ ང༌ཞ༌གུན༌ གྱལ༌པོའེ༌ ཚེ༌ཡོག༌ གྱུར༌ཨིན༌།”
GEN 47:26 ཏེན༌ན༌བོའེ༌ཕིའ༌ ཡོ༌སེབ༌བི༌ ཨི༌ཇིབ༌བི༌ ས༌ཀྱད༌ ནང༌ བྲེལ༌ཏེ༌ བཀའ༌ཁྲིམས༌ཤིག༌ ཅོས༌ ཀ༌བོ༌ སྟོན༌ཐོག༌གི༌ ཁག༌ ལྔའེ༌ ནང༌ནེ༌ ཅིག༌ གྱལ༌པོའ༌ ཏང༌གོ༌ཤེས༌། ཏེ༌ ཁྲིམས༌པོ༌ དག༌སའང༌ ཡོད༌ཏེ༌ ཨིན༌ནོག༌། བླ༌མ༌གུན༌ནི༌ ས༌ཀྱད༌ ཅིག༌པོ༌ གྱལ༌པོའེ༌ མ༌གྱུར༌།
GEN 47:27 ཨིས༌ར༌ཨེལ༌པ༌གུན༌ གོ༌ཤེན༌ནི༌ ཡུལ༌ཇོངས༌སི༌ ནང༌ང༌ ཚུགས༌ཏེ༌ དུགས༌། ཏེ༌རུ༌ ཁོང༌གུན༌ལ༌ གྱུ༌ནོར༌ ཇོར༌ཏེ༌ ཁོང༌གུན༌ནི༌ ཀྲངས༌ཀ༌ ཕེལ༌ཨིན༌ སོང༌།
GEN 47:28 ཡ༌ཀོབ༌ ཨི༌ཇིབ༌བི༌ གོ༌ཤེན༌ ཡུལ༌ཇོངས༌སི༌ ནང༌ང༌ ལོ༌ ཅུབ༌དུན༌ སོན༌ཏེའ༌ ལུས༌ ཡང༌ ཁོའ༌ ལོ༌ གྱ༌ དང༌ ཞིབ༌ཅུ༌ཞབ༌དུན༌ ཆའད༌པིན༌།
GEN 47:29 ཤི༌ཅེས༌སི༌ ཏུས༌པོ༌ ཉེ༌མོའ༌ ལེབ༌བ༌ཅིག༌ ཡ༌ཀོབ༌བི༌ ཁོ༌རང༌ངི༌ བུ༌ཚ༌ ཡོ༌སེབ༌ བོད༌ཏེ༌ ཁོའ༌ ཟེརས༌, “ཀལ༌ཏེས༌ ཁྱོ༌རང༌ངི༌ ངའ༌ ཅམས༌པ༌ ཅོའད༌ན༌ ཁྱོ༌རང༌ངི༌ ལག༌པ༌ ངའེ༌ ཇང༌བར༌ལ༌ བོར༌ཏེ༌ ངའ༌ ཐུག༌རྗེ༌ དང༌ ལོ༌ཁྱེལ༌ སྟན༌ཏེ༌ ངའེ༌ ཟེར༌ཁན༌བོ༌ ཅོ༌ཅེས༌ལ༌ ཁ༌ཆད༌ ཅོས༌། ངའ༌ ཨི༌ཇིབ༌བི༌ ནང༌ང༌ མ༌སུབ༌།
GEN 47:30 ང༌ ཤིའ༌ཅིག༌ ངའེ༌ ཟུགས༌པོ༌ ཨི༌ཇིབ༌ནེ༌ ཕི༌ལོག༌ག༌ ཁྱེར༌ཏེ༌ ངའེ༌ ཕ༌མེས༌པོ༌གུན༌ སུབ༌སའེ༌ ནས༌སའེ༌ཀ༌ སུབ༌ཅུག༌།” ཡོ༌སེབ༌བི༌ ཟེརས༌, “ངའེ༌ ཉེ༌རང༌ངི༌ མོལ༌ཁན༌ ནང༌ཞིན༌ ཅོ༌ཨིན༌།”
GEN 47:31 ཡ༌ཀོབ༌བི༌ ཟེརས༌, “ཏེ༌བོ༌ ཅོ༌ཅེས༌ལ༌ ཁྱོ༌རང༌ངི༌ ནའ༌ ཁུར༌།” ཡོ༌སེབ༌བི༌ ནའ༌ ཁུརས༌ ཡང༌ ཡ༌ཀོབ༌བི༌ མལ༌ཙེ༌ཀ༌ གོ༌ སྒུས༌ཏེ༌ དཀོན༌མཆོག༌ག༌ ཅོལས༌།
GEN 48:1 ཏུས༌བན༌ཤིག༌གི༌ སྟིང༌ནེ༌ ཡོ༌སེབ༌བ༌, “ཁྱོ༌རང༌ངི༌ ཨ༌བ༌ ཟུ༌མོ༌ དུག༌” ཟེར༌ཏེ༌ ཤདས༌པ༌ ཁོ༌ ཁོ༌རང༌ངི༌ བུ༌ཚ༌ མ༌ནས༌ས༌ དང༌ ཨེཕ༌ར༌ཡིམ༌ ཁྲིད༌ཏེ༌ ཨ༌བ༌ ཐུག༌ག༌ལ༌ སོང༌།
GEN 48:2 ཡ༌ཀོབ༌བ༌, “ཁྱོ༌རང༌ངི༌ བུ༌ཚ༌ ཡོ༌སེབ༌, ཁྱོ༌རང༌ང༌ ཐུག༌ག༌ལ༌ ཡོངས༌ཏེ༌ དུག༌” ཟེར༌ཏེ༌ ཤད༌ད༌ཅིག༌ ཁོའེ༌ ཟུགས༌པོའེ༌ ནང༌ང༌ ཤེད༌ ཡོངས༌ཏེ༌ ཁོ༌ མལ༌ཙེ༌ཀ༌ ལངས༌ཏེ༌ དུགས༌།
GEN 48:3 ཡ༌ཀོབ༌བི༌ ཡོ༌སེབ༌བ༌ ཟེརས༌, “ངའ༌ ཀེ༌ནན༌ནི༌ ས༌ཆ༌ ལུཟ༌སི༌ ནང༌ང༌ དཀོན༌མཆོག༌ ཀུན༌ཝང༌ ཇལས༌ ཡང༌ ཁོང༌ངི༌ ངའ༌ ཅིན༌ལབས༌ སལ༌ཏེ༌
GEN 48:4 མོལས༌, ‘ངའེ༌ ཁྱོ༌རང༌ང༌ ཕྲུ༌གུ༌ མང༌པོ༌ ཇོར༌ ཅུགས༌ཏེ༌ གྱས༌ཅུག༌ ཨིན༌། ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ མང༌པོ༌ གྱུར༌ཏེ༌ ངའེ༌ འི༌ ས༌ཀྱད༌ ཏུས༌གྱུན༌ ལུས༌ཤེས༌སི༌ གྱུ༌ནོར༌རི༌ ཚུལ༌ལ༌ ཁོང༌གུན༌ལ༌ ཏང༌ཨིན༌།’”
GEN 48:5 “ང༌ འི༌རུ༌ ཡོང༌ངི༌ སང༌ སྔུན༌ལ༌ ཁྱོ༌རང༌ང༌ ཨི༌ཇིབ༌བི༌ ནང༌ང༌ སྐྱེས༌ཁན༌ནི༌ བུ༌ཚ༌ ཨེཕ༌ར༌ཡིམ༌ དང༌ མ༌ནས༌ས༌ ཉིས༌ཀོ༌ ངའེ༌ བུ༌ཚ༌ རུ༌བེན༌ དང༌ སི༌མེ༌འོན༌ ཙོགས༌ལ༌ ང༌རང༌ངི༌ ཨིན༌།
GEN 48:6 ཁོང༌གུན༌ནི༌ སྟིང༌ནེ༌ ཁྱོ༌རང༌ང༌ སྐྱེས༌ཁན༌ནི༌ ཞན༌ བུ༌ཚ༌གུན༌ ཁྱོ༌རང༌ངི༌ ཨིན༌ནོག༌ ཡང༌ ཁོང༌གུན༌ལ༌ ཨེཕ༌ར༌ཡིམ༌ དང༌ མ༌ནས༌ས༌ ཡོད༌ཁན༌ནི༌ ས༌ཆ༌གུན༌ནེ༌ ནོར༌སྐལ༌ ཐོབ༌ཨིན༌།
GEN 48:7 ཏུས༌མང༌པོའེ༌ སྔུན༌ལ༌ ང༌ པ༌དན༌ཨ༌རམ༌ནེ༌ ལོགས༌ཏེ༌ ཡོང༌ ཟ༌ནེ༌ ཁྱོ༌རང༌ངི༌ ཨ༌མ༌ རེ༌ཅལ༌, ལ༌མ༌ ཀེ༌ནན༌ནི༌ ཡུལ༌ལི༌ ནང༌ང༌ ཤི༌ ཀ༌བོ༌ ཨེ༌ཕ༌རེད༌ནེ༌ ཐག༌རིང༌ ཡོད༌པིན༌། ངའེ༌ ཁོ༌ ཏེ༌རུ༌ ཨེ༌ཕ༌རེད༌ལ༌ ཡོང༌སའེ༌ ལམ༌མི༌ཀ༌ སུབས༌པིན༌” ༼ཏེ༌བོ༌ དག༌ས༌ བེད༌ལེ༌ཧེམ༌ ཨིན༌ནོག༌།༽
GEN 48:8 ཡ༌ཀོབ༌བི༌ ཡོ༌སེབ༌བི༌ བུ༌ཚ༌གུན༌ ཐོང༌ང༌ཅིག༌ ཁོའ༌ ཏྲིས༌, “ཁོང༌གུན༌ སུ༌ ཨིན༌?”
GEN 48:9 ཡོ༌སེབ༌བི༌ ལན༌ཏངས༌, “ཁོང༌གུན༌, དཀོན༌མཆོག༌གི༌ ངའ༌ ཨི༌ཇིབ༌བི༌ ནང༌ང༌ སལ༌ཁན༌ནི༌ ངའེ༌ བུ༌ཚ༌གུན༌ ཨིན༌།” ཏེ༌ནེ༌ ཡ༌ཀོབ༌བི༌ ཟེརས༌, “ཅིན༌ལབས༌ ཏང༌ཉན༌ཅེས༌ལ༌ ཁོང༌གུན༌ ངའེ༌ དུན༌ལ༌ ཁྱོང༌།”
GEN 48:10 རྒད༌པོ༌ ཡོད༌ཅེས༌པའེ༌ ཡ༌ཀོབ༌བ༌ མིག༌ནེ༌ ལག༌མོ༌ ཐོང༌ང༌ མེད༌པིན༌། ཏེ༌བོའེ༌ཕིའ༌ ཡོ༌སེབ༌བི༌ བུ༌ཚ༌གུན༌ ཨ༌བའེ༌ དུན༌ལ༌ ཁྱོངས༌ ཡང༌ ཁོའེ༌ ཁོང༌གུན༌ལ༌ ཁྲིལ༌ཏེ༌ པུག༌ ཏངས༌།
GEN 48:11 ཡ༌ཀོབ༌བི༌ ཡོ༌སེབ༌བ༌ ཟེརས༌, “ང༌ ཁྱོ༌རང༌ ཡང༌སྐྱར༌ ཐོང༌ཅེས༌སི༌ རེ༌ཝ༌ མེད༌པིན༌། ཨིན༌ནའང༌ དཀོན༌མཆོག༌གི༌ ངའ༌ ཁྱོ༌རང༌ངི༌ ཕྲུ༌གུ༌གུན༌ནའང༌ ཐོང༌ ཅུག༌ག༌ ཛད༌།”
GEN 48:12 ཏེ༌ནེ༌ ཡོ༌སེབ༌བི༌ བུ༌ཚ༌གུན༌ ཨ༌བའེ༌ པིག༌མོའེ༌ དུན༌ནེ༌ ཐེན༌ཏེ༌ ཨ༌བའེ༌ དུན༌ལ༌ ཁོ༌རང༌ངི༌ གོ༌ ས༌ ཐུག༌ ཅུགས༌ཏེ༌ སྒུས༌།
GEN 48:13 ཡོ༌སེབ༌བི༌ ཨེཕ༌ར༌ཡིམ༌ ཁོ༌རང༌ངི༌ ཡས༌པ༌ ཡ༌ཀོབ༌བི༌ ཡོ༌མ༌ ཆོགས༌ལ༌ ཡང༌ མ༌ནས༌ས༌ ཁོ༌རང༌ངི༌ ཡོ༌མ༌ ཡ༌ཀོབ༌བི༌ ཡས༌པ༌ ཆོགས༌ལ༌ བོརས༌།
GEN 48:14 ཡོ༌མ༌ ཆོགས༌ལ༌ ཡོད༌ཁན༌ ཨེཕ༌ར༌ཡིམ༌ བུ༌ཚ༌ ཆུ༌ངུན༌བོའེ༌ གོའེ༌ཀ༌ ཡ༌ཀོབ༌བི༌ ཁོ༌རང༌ངི༌ ལག༌པ༌ ཡས༌པ༌བོ༌ བོརས༌, ཡང༌ ཡས༌པ༌ ཆོགས༌ལ༌ ཡོད༌ཁན༌ མ༌ནས༌ས༌ བུ༌ཚ༌ ཆེན༌མོའེ༌ གོའེ༌ཀ༌ ཡ༌ཀོབ༌བི༌ ཁོ༌རང༌ངི༌ ལག༌པ༌ ཡོ༌མ༌བོ༌ བོརས༌།
GEN 48:15 ཏེ༌ནེ༌ ཡོ༌སེབ༌བ༌ ཅིན༌ལབས༌ ཏང༌ཨིན༌ ཟེརས༌, “ངའེ༌ མེ༌མེ༌ ཨབ༌ར༌ཧམ༌ དང༌ ཨ༌བ༌ ཨི༌སཱག༌གི༌ ཞབས༌ཏོག༌ ཞུ༌ཁན༌ནི༌ དཀོན༌མཆོག༌, ངའེ༌ མི༌ཚེ༌ གང༌པོའ༌ སྲུང༌སྐྱོབ༌ ཛད༌ཁན༌ནི༌ ངའེ༌ ལུག༌རྫི༌,
GEN 48:16 ང༌ ནོད༌པ༌ ཚང༌མ༌ནེ༌ སྐྱོབ༌བ༌ ཛད༌ཁན༌ནི༌ ཕོ༌ཉ༌, ཁོང༌ངི༌ འི༌ བུ༌ཚ༌གུན༌ལ༌ ཅིན༌ལབས༌ སལ༌ལ༌ ཛད༌ཤིག༌། འི༌ བུ༌ཚ༌གུན༌ གྱུད༌ཏེ༌ ཨབ༌ར༌ཧམ༌ དང༌ ཨི༌སཱག༌གི༌ ཚན༌ ཡང༌ ངའེ༌ མིང༌ ལུས༌ཤིག༌། ཁོང༌གུན༌ལ༌ ཕྲུ༌གུ༌ མང༌པོ༌ ཇོར༌ཏེ༌ ཇིག༌རྟེན༌ནི༌ཀ༌ ཁོང༌གུན༌ནི༌ མིར༌གྱུད༌ མང༌པོ༌ ཕེལ༌ཤིག༌།”
GEN 48:17 ཡོ༌སེབ༌བ༌ ཨ༌བའེ༌ ལག༌པ༌ ཡས༌པ༌བོ༌ ཨེཕ༌ར༌ཡིམ༌མི༌ གོའེ༌ཀ༌ བོར༌ཁན༌བོ༌ ཐོང༌ང༌ཅིག༌ ཁོ༌ མ༌ཐད༌ ཡང༌ ཁོའེ༌ ཨ༌བའེ༌ ལག༌པ༌ ཨེཕ༌ར༌ཡིམ༌མི༌ གོའེ༌ ཀ༌ནེ༌ ཐེན༌ཏེ༌ མ༌ནས༌སའེ༌ གོའེ༌ཀ༌ བོར༌ཅེས༌ ཅོས༌ཏེ༌
GEN 48:18 ཟེརས༌, “ཨ༌བ༌ལེ༌, བུ༌ཚ༌ ཆེན༌མོ༌ འི༌བོ༌ ཨིན༌ ཁོའེ༌ གོའེ༌ཀ༌ ཉེ༌རང༌ངི༌ ལག༌པ༌ ཡས༌པ༌བོ༌ བོར༌ར༌ ཛད༌།”
GEN 48:19 ཨིན༌ནའང༌ ཨ༌བའེ༌ མ༌བོརས༌ ཡང༌ ཟེརས༌, “ང༌ གྱུས༌ཡོད༌ བུ༌ཚ༌, ང༌ གྱུས༌ཡོད༌། མ༌ནས༌ས༌ མིར༌གྱུད༌གུན༌ནའང༌ ཀྲག༌པོ༌ གྱུར༌ཨིན༌། ཨིན༌ནའང༌ ཁོའེ༌ ནོ༌ ཁོའེ༌ སང༌ མང༌ང༌ ཀྲག༌ག༌ གྱུར༌ཏེ༌ ཁོའེ༌ མིར༌གྱུད༌གུན༌ གྱལ༌ཁམས༌ མང༌པོ༌ གྱུར༌ཨིན༌།”
GEN 48:20 ཁོའེ༌ ཁོང༌གུན༌ལ༌ ཏེ༌ ཞག༌ག༌ ཅིན༌ལབས༌ སལ༌ཏེ༌ ཟེརས༌, “ཨིས༌ར༌ཨེལ༌པ༌གུན༌ནི༌ ཅིན༌ལབས༌ ཏང༌ ཟ༌ནེ༌ ཁྱོ༌ཞའེ༌ མིང༌ ཀོལ༌ཏེ༌ ཟེར༌ཨིན༌, ‘དཀོན༌མཆོག༌གི༌ ཁྱོ༌རང༌གུན༌ ཨེཕ༌ར༌ཡིམ༌ དང༌ མ༌ནས༌ས༌ ཙོགས༌ གྱུར༌ཅུག༌ག༌ ཛད༌ཤིག༌།’” ཏེན༌ན༌ཟུག༌གི༌ ཡ༌ཀོབ༌བི༌ ཨེཕ༌ར༌ཡིམ༌མི༌ སང༌ མ༌ནས༌ས༌ ཁག༌ཅན༌ ཐེས༌།
GEN 48:21 ཏེ༌ནེ༌ ཡ༌ཀོབ༌བི༌ ཡོ༌སེབ༌བ༌ ཟེརས༌, “ང༌ ཤི༌ཀྱིས༌ ཨིན༌ནོག༌ ཨིན༌ནའང༌ དཀོན༌མཆོག༌ ཁྱོ༌རང༌ ཉམ༌པོ༌ ཞུགས༌ཏེ༌ ཁྱོ༌རང༌ ཁྱོ༌རང༌ངི༌ ཕ༌མེས༌པོའི༌ ས༌ཆ༌ ཀེ༌ནན༌ལ༌ ལོགས༌ཏེ༌ ཁྱེར༌ར༌ ཛད༌ཨིན༌།
GEN 48:22 ཁྱོ༌རང༌ངི༌ ཨ༌ཅོ༌གུན༌ནི༌ སང༌ ངའེ༌ ཁྱོ༌རང༌ང༌ ས༌ཆ༌ ཉི༌ལྡབ༌ ཏང༌ཨིན༌ ཀ༌བོ༌ ངའེ༌ ར༌འི༌ དང༌ ཞུ༌ ཉམ༌པོ༌ ཨ༌མོར༌པ༌གུན༌ནི༌ ཀ༌ནེ༌ ལེན༌ཏེ༌ ཨིན༌པིན༌།”
GEN 49:1 ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ བོད༌ཏེ༌ ཟེརས༌, “ངའ༌ ཁོར༌ཏེ༌ དུགས༌ཤིག༌, ངའེ༌ ཁྱོ༌རང༌གུན༌ ཉམ༌པོ༌ སྟིང༌ཞིན༌ ཇུང༌ཅེས༌ཅན༌གུན༌ ཤད༌ཨིན༌།”
GEN 49:2 “ཡ༌ཀོབ༌བི༌ བུ༌ཚ༌གུན༌, ཛོམས༌ཏེ༌ ཉོན༌, ཁྱོ༌ཞ༌གུན༌ནི༌ ཨ༌བ༌ ཨིས༌ར༌ཨེལ༌ལ༌ ཉོན༌།”
GEN 49:3 “རུ༌བེན༌ ཁྱོ༌རང༌ ངའེ༌ བུ༌ཚ༌ ཏང༌པོ༌, ངའེ༌ ཤུགས༌, ངའེ༌ ཁྱོག༌ཏོང༌ངི༌ ཤུགས༌སི༌ སྟགས༌ ཏང༌པོ༌, ཚང༌མའེ༌སང༌ སྤལ༌ཅན༌ དང༌ སྟོབས༌ཅན༌ ཨིན༌།
GEN 49:4 ཨིན༌ནའང༌ ཁྱོ༌རང༌ ཆུ༌ལོག༌ ཙོགས༌ལ༌ རང༌སེམས༌ཅུན༌ མ༌ཉན༌ཁན༌, ཏ༌ནེ༌ཕར༌ལ༌ ཁྱོ༌རང༌ ཚང༌མའེ༌སང༌ ཁག༌ཅན༌ མི༌ལུས༌ ཅིའ༌ཟེར༌ན༌ ཁྱོ༌རང༌ ངའེ༌ ན༌མ༌ ཉམ༌པོ༌ བྲེལ༌ཏེ༌ ངའེ༌ མལ༌ཙ༌ ཚི༌ཏུ༌ གྱུར༌ཅུགས༌ཏེ༌ ཨིན༌ནོག༌།”
GEN 49:5 “སི༌མི༌འོན༌ དང༌ ལི༌ཝི༌ སྤུན༌ལ༌ ཨིན༌ནོག༌། ཁོང༌གུན༌ནི༌ ཁོ༌རང༌གུན༌ནི༌ ར༌འི༌ ནོད༌སྐྱལ༌ ཏང༌ཅེས༌ལ༌ ཀོལ༌ལ༌ནོག༌།
GEN 49:6 ང༌ ཁོང༌གུན༌ནི༌ ཚོགས༌དུའི༌ ནང༌ང༌ ཛོམས༌ཏེ༌ ཁོང༌ངི༌ ཐབ༌ལྡིངས༌གུན༌ནི༌ ནང༌ང༌ དྲེས༌ ཅུག༌ག༌ མ༌ཛད༌ ཅིའ༌ཟེར༌ན༌ ཁོང༌གུན༌ནི༌ སྲོའེ༌ ནང༌ང༌ མི༌གུན༌ སདས༌ ཡང༌ ལང༌ཏོའེ༌ རྐང༌པའེ༌ གྱུས༌པ༌ ཅད༌ཏེ༌ སྟན༌མོ༌ ལྟས༌།
GEN 49:7 ཇིགས༌ནང༌ཅན༌, ངན༌པ༌ དང༌ རྩོག༌པོ༌ ཁོང༌གུན༌ནི༌ སྲོའ༌ ངན༌ ཕོག༌ཤིག༌། ཁོང༌གུན༌ནི༌ མིར༌གྱུད༌གུན༌ ཛོམས༌ཏེ༌ མ༌ལུས༌ས༌ ཨིས༌ར༌ཨེལ༌ལི༌ ས༌ཆ༌ གང༌པོའེ༌ ནང༌ང༌ ཡན༌ཏེ༌ ཆེན༌།”
GEN 49:8 “ཡ༌ཧུ༌དཱ༌ ཁྱོ༌རང༌ངི༌ གྲ༌འོ༌གུན༌ལ༌ ཕམ༌ཀལ༌ཨིན༌, ཁྱོ༌རང༌ངི༌ སྤུན༌ལ༌གུན༌ནི༌ ཁྱོ༌རང༌ང༌ སྟོད༌ཨིན༌ ཡང༌ ཁོང༌གུན༌ནི༌ ཁྱོ༌རང༌ངི༌ དུན༌ལ༌ གོ༌ སྒུ༌ཨིན༌
GEN 49:9 ངའེ༌ བུ༌ཚ༌ ཡ༌ཧུ༌དཱ༌ ཁྱོ༌རང༌ སིང༌གེ༌ ཕྲུ༌གུ༌ གྲོད༌པ༌ གྲངས༌ཏེ༌ ཚངས༌སི༌ ནང༌ང༌ ལོགས༌ཏེ༌ ཡོང༌ཁན༌ ཙོགས༌ ཨིན༌ནོག༌། ཡང༌ སིང༌གེ༌ རྐང༌ལག༌ རྐྱངས༌ཏེ༌ ཉིད༌ལོགས༌ཏེ༌ ཡོད༌ཁན༌ ཙོགས༌, སུའི༌ ཁོའ༌ ཉིད༌ཚད༌ཅེས༌སི༌ ཧམ༌པ༌ ཅོ༌ཨིན༌?
GEN 49:10 ཝང༌སྲུལ༌པ༌ ཏུས༌གྱུན༌ ཡ༌ཧུ༌དཱའེ༌ གྱུད༌ནེ༌ ཡོང༌ཨིན༌། གྱལ༌པོའེ༌ ཆག༌བེར༌, ཝང༌ཆ༌ ཡོད༌ཁན༌ནི༌ སྟགས༌པོ༌ ཁོང༌གུན༌ནི༌ ལག༌པའེ༌ ནང༌ང༌ ཐམས༌ཏེ༌ བོར༌ཨིན༌ ནམ༌ཚག༌པ༌ ཏེ༌བོའེ༌ དག༌པོ༌བོ༌ མི༌ཡོང༌། ཡང༌ ཁོང༌ང༌ ཇིག༌རྟེན༌པ༌ ཚང༌མའེ༌ རྩི༌ཝ༌ ཅོ༌ཨིན༌།
GEN 49:11 ཁོའེ༌ ཁོ༌རང༌ངི༌ བུང༌བུ༌ རྒུན༌ཚས༌སི༌ ནང༌ང༌, ཡང༌ ཀུ༌རུག༌ རྒུན༌ནི༌ ལྕང༌མ༌ གྱལ༌ཤོག༌ག༌ ཏག༌ཨིན༌། ཁོའེ༌ ཁོ༌རང༌ངི༌ ཀོས༌ལག༌གུན༌ རྒུན༌ཆང༌ངི༌ ནང༌ང༌ ཡང༌ ཀོས༌པོ༌ རྒུན༌ཆང༌ མར༌པོ༌ ཉམ༌པོ༌ ཁྲུ༌ཨིན༌།
GEN 49:12 ཁོའེ༌ མིག༌གུན༌ རྒུན༌ཆང༌ངི༌ སང༌ མང༌ང༌ ནག༌པོ༌ ཡང༌ ཁོའེ༌ སོ༌གུན༌ འོ༌མའེ༌ སང༌ མང༌ང༌ ཀར༌པོ༌ ཡོང༌ཨིན༌།”
GEN 49:13 “ཟེ༌བུ༌ལོན༌ ཚོའེ༌ ཐའ༌མ༌ ཚུགས༌ཏེ༌ གྲུ༌ཟིང༌གུན༌ བོར༌སའེ༌ ཇིགས༌ནང༌ མེད༌ཁན༌ནི༌ ནས༌ས༌ གྱུར༌ཨིན༌། ཁོའེ༌ ས༌ཆའ༌ སི༌དོན༌ ཚག༌པ༌ གྱས༌ཨིན༌།”
GEN 49:14 “ཨིས༌ས༌ཁར༌ མ༌ ཤེད༌ཅན༌ བུང༌བུ༌, རྒལ༌གུན༌ནི༌ པར༌ལ༌ སའེ༌ཀ༌ ངལ༌ཚོས༌ཏེ༌ དུག༌ཁན༌།
GEN 49:15 ངལ༌ཚོ༌སའེ༌ ས༌ཆ༌བོ༌ གྱལ༌ལ༌ ཡང༌ ལྡེ༌མོ༌ ཐོང༌ཏེ༌ ཁོའེ༌ ཁུ༌རུ༌ ཁུར༌ཅེས༌ལ༌ ཁོ༌རང༌ངི༌ སྤུང༌པ༌ སྒུས༌ ཡང༌ ཚེ༌ཡོག༌ གྱུར༌ཅེས༌ལ༌ ཐད༌།”
GEN 49:16 “ཨིས༌ར༌ཨེལ༌ལི༌ ཞན༌ཡང༌ མི༌སྡེ༌གུན༌ ཙོགས༌ལ༌ གྲེན༌ནི༌ ཁོ༌རང༌ངི༌ མི༌གུན༌ནི༌ཀ༌ ཝང༌སྲུལ༌ ཨིན༌།
GEN 49:17 གྲེན༌ གྱ༌ལམ༌མི༌ ཐའ༌མ༌ ཡོད༌ཁན༌ནི༌ རུལ༌, ལམ༌མི༌ ཐའ༌མའེ༌ དུག༌རུལ༌ ཙོགས༌, ཀ༌བོའེ༌ རྟའེ༌ རྐང༌པའེ༌ མོང༌ལོའ༌ ཐམས༌ཏེ༌ རྟའེ༌ཀ༌ ཞོན༌ཁན༌བོ༌ གྱབ༌ལོག༌ག༌ གྱེལ༌ཅུག༌ཨིན༌།”
GEN 49:18 “ཡ༌ཝ༌, ཉེ༌རང༌ངི༌ ཐར༌པའེ༌ ཕིའ༌ ངའ༌ སྲུངས༌ཏེ༌ ཡོད༌།”
GEN 49:19 “ཅག༌པའེ༌ སྡེ༌ གཱད༌ལ༌ སྤུང༌གོལ༌ ཅོ༌ཨིན༌། ཨིན༌ནའང༌ ཁོའེ༌ ཁོང༌གུན༌ནི༌ གྱབ༌གལ༌ལ༌ སྤུང༌གོལ༌ ཅོའ༌ཅིག༌ ཁོང༌གུན༌ ཤོར༌ཨིན༌ ཨང༌ ཁོའེ༌ ཏེད༌ཏེ༌ ཁྱེར༌ཨིན༌།”
GEN 49:20 “ཨ༌ཤེར༌ དུག༌སའེ༌ ས༌ཆའེ༌ཀ༌ སྟོན༌ཐོག༌ གྱལ༌ལ༌ སྨིན༌ཨིན༌། གྱལ༌པོ༌ ཟའ༌ཁན༌ནི༌ ཁར༌ཇི༌ ཞིམ༌པོ༌ ཁོའེ༌ རིག༌ཨིན༌།”
GEN 49:21 “ནཕ༌ཐལ༌ལི༌ རང༌ཝང༌ཅན༌ནི༌ ཤ༌ཝ༌ ཙོགས༌, ཀ༌བོའ༌ མ༌ ལྡེ༌མོ༌ ཕྲུ༌གུ༌གུན༌ སྐྱེའ༌ནོག༌།”
GEN 49:22 “ཡོ༌སེབ༌ ཁ༌ཟས༌ ཆགས༌ཁན༌ རྒུན༌ནི༌ ལྕང༌མ༌ ཟང༌པོ༌, ཁྱོ༌རང༌ངི༌ པུར༌གྱུད༌གུན༌ ཆུ༌མིག༌གི༌ དུན༌ལ༌ ཡོད༌ཁན༌ནི༌ རྒུན༌ནི༌ ལྕང༌མ༌ ཙོགས༌ ཀ༌བོའེ༌ ཡལ༌ག༌གུན༌ གྱས༌ཏེ༌ གྱང༌ངི༌ཀ༌ ཁྲིལ༌ལད༌།
GEN 49:23 དའ༌ དང༌ ཞུ༌ ཀོལ༌ཁན༌གུན༌ནི༌ ཁོའ༌ སྤུང༌གོལ༌ ཀྲག༌པོ༌ ཅོ༌ཨིན༌, ཡང༌ དའ༌ ཏང༌ཨིན༌ ཁོའ༌ ཏེད༌ཏེ༌ ཁྱེར༌ཨིན༌།
GEN 49:24 ཨིན༌ནའང༌ ཁྱོ༌རང༌ངི༌ ལག༌པ༌ ཤེད༌ཅན༌ནི༌ ནང༌ང༌ ཞུ༌ སྟན༌པོ༌ ཐམས༌ཏེ༌ བོར༌ཨིན༌། ཅིའ༌ཟེར༌ན༌ ངའེ༌ དཀོན༌མཆོག༌ ཀུན༌ཝང༌ངི༌ ཆག༌ ཁྱོ༌རང༌ངི༌ཀ༌ བོར༌ར༌ ཛད༌ཨིན༌, ཁོང༌ ནི༌ ལུག༌རྫི༌, ཨིས༌ར༌ཨེལ༌པ༌གུན༌ནི༌ བྲག༌ ཨིན༌ནོག༌།
GEN 49:25 ཁྱོ༌རང༌ངི༌ ཕ༌མེས༌པོའེ༌ དཀོན༌མཆོག༌གི༌ ཁྱོ༌རང༌ང༌ རོགས༌ ཛད༌ཤིག༌། དཀོན༌མཆོག༌ ཀུན༌ཝང༌ངི༌ ཁྱོ༌རང༌ང༌ ཅིན༌ལབས༌ སལ༌ཤིག༌། ནམ༌ཁའ༌ནེ༌ ཆར༌པ༌ དང༌ སའེ༌ ཐིལ༌ནེ༌ ཆུ༌, ཡང༌ སེམས༌ཅན༌ནི༌ ཁྱུ༌ དང༌ པུར༌གྱུད༌ མང༌པོའེ༌ ཅིན༌ལབས༌ སལ༌ཤིག༌།
GEN 49:26 ཁྱོ༌རང༌ང༌ དཀོན༌མཆོག༌གི༌ ཅིན༌ལབས༌གུན༌ སྔུན༌ཏུས༌སི༌ རི༌ དང༌ བྲག༌ གུན༌ནི༌ ཀ༌ནེ༌ ཐོབ༌ཁན༌ནི༌ ཕན༌ཐོགས༌སི༌ སང༌ ཀྲག༌ག༌ ཡོང༌ཅེས༌ ངའེ༌ ཨིད༌ཤེས༌ ཅོའད༌། ཡོ༌སེབ༌བི༌ གོ༌ དང༌ ཐོད༌པའེ༌ཀ༌ འི༌ ཅིན༌ལབས༌གུན༌ བབས༌ཤིག༌ ཅིའ༌ཟེར༌ན༌ ཁོ༌ ཁོའེ༌ ཨ༌ཅོ༌ནོ༌གུན༌ནི༌ ཕྲོ༌ནེ༌ གྱལ༌ལུ༌བོ༌ ཨིན༌ནོག༌།”
GEN 49:27 “བེན༌ཡཱ༌མིན༌ སྲན༌ཏྲེ༌ སྟོགས༌ཏེ༌ ཡོད༌ཁན༌ནི༌ ཤང༌ཀུ༌ ཙོགས༌ ཨིན༌ནོག༌, ང༌ཏོག༌ ཁོའེ༌ ཟའ༌ཅེས༌ལ༌ སེམས༌ཅན༌ སད༌ད༌ནོག༌ ཡང༌ ཕི༌ཏོག༌ ཏེ༌ སད༌ཁན༌ ཚང༌མ༌ བགོའ༌ནོག༌།”
GEN 49:28 ཁོང༌ ཚང༌མ༌ ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌གུན༌ ཨིན༌ནོག༌ ཡང༌ ཏེ༌གུན༌ ཁོང༌གུན༌ནི༌ ཨ༌བའེ༌ བུ༌ཚ༌ རེ༌རེའ༌ འོས༌པའ༌ ནང༌ཞིན༌ ཅིན༌ལབས༌ སལ༌ཁན༌བོ༌ ཨིན༌།
GEN 49:29 ཏེ༌ནེ༌ ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ལ༌ བཀའ༌ ཏངས༌ཏེ༌ ཟེརས༌, “ཏ༌ ངའ༌ ང༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམ༌ཅེས༌ ཨིན༌ནོག༌། ངའ༌ ང༌རང༌ངི༌ ཨ༌བ༌ དང༌ མེ༌མེ༌ ཉམ༌པོ༌, ཧེད༌པ༌ ཨེ༌ཕོ༌རོན༌ནི༌ ཞིང༌ངི༌ཀ༌ ཡོད༌ཁན༌ནི༌ བྲག༌ཕུགས༌སི༌ ནང༌ང༌ སུབ༌།
GEN 49:30 ཏེ༌བོ༌ ཀེ༌ནན༌ནི༌ ནང༌ང༌ མམ༌རེ༌ ཉེ༌མོའ༌ མེཁ༌ཕི༌ལའི༌ ཞིང༌ངི༌ བྲག༌ཕུག༌ ཀ༌བོ༌ ཨབ༌ར༌ཧམ༌མི༌ ཧེད༌པ༌ ཨེ༌ཕོ༌རོན༌ནི༌ ཀ༌ནེ༌ རོ༌ སུབ༌ཅེས༌སི༌ ཕིའ༌ ཉོས༌ཏེ༌ ཨིན༌པིན༌།
GEN 49:31 ཏེ༌ནང༌ང༌ ཨབ༌ར༌ཧམ༌ དང༌ ཁོང༌ངི༌ ན༌མ༌ སཱ༌ར༌ ཡང༌ ཨི༌སཱག༌ དང༌ ཁོའེ༌ ན༌མ༌ ར༌བེ༌ཀ༌ གུན༌ སུབས༌ཏེ༌ ཨིན༌པིན༌ ཡང༌ ཏེ༌ནང༌ང༌ ངའེ༌ ལི༌ཡ༌ སུབས༌ཏེ༌ ཨིན༌།
GEN 49:32 ཏེ༌ ཞིང༌ དང༌ བྲག༌ཕུགས༌ གུན༌ ཧེད༌པ༌གུན༌ནི༌ ཀ༌ནེ༌ ཉོས༌ཏེ༌ ཨིན༌པིན༌།”
GEN 49:33 ཡ༌ཀོབ༌བི༌ ཁོ༌རང༌ངི༌ བུ༌ཚ༌གུན༌ལ༌ ལབ༌ཞ༌ ཏང༌ ཚར༌ར༌ཅིག༌ ཁོ༌རང༌ མལ༌ཙེ༌ཀ༌ ཉལས༌ ཡང༌ སྟིང༌ཇུག༌གི༌ འུགས༌ ལེན༌ཏེ༌ ཁོ༌རང༌ངི༌ ཕ༌མེས༌པོ༌གུན༌ ཉམ༌པོ༌ ཛོམས༌།
GEN 50:1 ཡོ༌སེབ༌ ཁོ༌རང༌ངི༌ ཨ༌བ༌ ཁྲིལ༌ཏེ༌ ངུ༌ཨིན༌ ཁོའ༌ པུག༌ ཏངས༌།
GEN 50:2 ཏེ༌ནེ༌ ཡོ༌སེབ༌བི༌, ཁོའ༌ ཞབས༌ཏོག༌ ཅོ༌ཁན༌ནི༌ ཨམ༌ཅི༌གུན༌ལ༌ ཨ༌བའེ༌ ཟུགས༌པོ༌ མི༌ རུལ༌ཅེས༌སི༌ ཕིའ༌ སྨན༌ སྐུ༌ཅེས༌ལ༌ བཀའ༌ ཏངས༌།
GEN 50:3 ཏུས༌གྱུན༌ ཙོགས༌ལ༌ ཟུགས༌པོའ༌ སྨན༌ སྐུ༌ཅེས༌ལ༌ ཞག༌མ༌ ཞིབ༌ཅུ༌ གོར༌, ཡ༌ཀོབ༌བི༌ ཕིའ༌ ཨི༌ཇིབ༌པ༌ ཚང༌མའེ༌ ཞག༌པོ༌ རྡུན༌ཅུ༌ ཉ༌ངན༌ ཅོས༌།
GEN 50:4 ཉ༌ངན༌ནི༌ ཏུས༌པོ༌ བུད༌ད༌ཅིག༌ ཡོ༌སེབ༌བི༌ གྱལ༌པོའེ༌ འུ༌སྐྱོང༌གུན༌ལ༌ ཟེརས༌, “ང༌ ཐུག༌རྗེ༌ ཛད༌ཏེ༌ ཇུ༌ཇུ༌ འི༌ ལོན༌བོ༌ གྱལ༌པོའ༌ མོལ༌,
GEN 50:5 ‘ངའེ༌ ཨ༌བའེ༌ ངའ༌, ཀེ༌ནན༌ནི༌ ས༌ཆའེ༌ ནང༌ང༌ ཁོང༌རང༌ངི༌ ཕིའ༌ སྤུར༌ཁང༌ གྲལ༌གྲིག༌ ཅོས༌ཏེ༌ ཡོད༌ཁན༌བོའེ༌ ནང༌ང༌ ཁོང༌ སུབ༌ཅེས༌ལ༌ ནའ༌ ཁུར༌ཅུགས༌ཏེ༌ ཁ༌ཆད༌ ཅོ༌ཅུགས༌།’ ཏ༌ ང༌ ང༌རང༌ངི༌ ཨ༌བ༌ སུབ༌ཅེས༌ལ༌ ཆའ༌ ཅུག༌ག༌ ཛད༌, ཏེ༌ནེ༌ ང༌ ལོགས༌ཏེ༌ ཡོང༌ཨིན༌།”
GEN 50:6 གྱལ༌པོའེ༌ ལན༌ཏངས༌, “སོང༌ ཡང༌ ཁྱོ༌རང༌ངི༌ ཨ༌བ༌ སུབ༌ ཀ༌ཟུག༌ ཁྱོ༌རང༌ངི༌ ཁོང༌ང༌ ཁ༌ཆད༌ ཅོས༌ཏེ༌ ཨིན༌།”
GEN 50:7 ཏེ༌ནེ༌ ཡོ༌སེབ༌ ཁོ༌རང༌ངི༌ ཨ༌བ༌ སུབ༌བ༌ལ༌ སོང༌། གྱལ༌པོའེ༌ འུ༌སྐྱོང༌ ཚང༌མ༌ དང༌ ཨི༌ཇིབ༌པ༌ འུ༌སྐྱོང༌ ཚང༌མ༌ ཡོ༌སེབ༌ ཉམ༌པོ༌ སོང༌།
GEN 50:8 ཁོ༌ དང༌ ཁོའེ༌ སྤུན༌ལ༌གུན༌ནི༌ ནང༌ཚངས༌ ཚང༌མ༌ ཡང༌ ཁོང༌ངི༌ ཨ༌བའེ༌ ནང༌མི༌ ཚང༌མ༌ ཁོ༌ ཉམ༌པོ༌ སོང༌། ཁོང༌གུན༌ནི༌ ཕྲུ༌གུ༌གུན༌, ར༌ལུག༌ དང༌ བ༌ལང༌ངི༌ ཁྱུ༌གུན༌ གོ༌ཤེན༌ནི༌ ཡུལ༌ལ༌ བོརས༌།
GEN 50:9 ཤིང༌རྟ༌ དང༌ རྟའེ༌ཀ༌ ཞོན༌ཁན༌ནི༌ མི༌གུན༌ནའང༌ ཁོ༌ ཉམ༌པོ༌ སོང༌། མི༌ཚོགས༌ ཆེན༌མོ༌ཞིག༌ ཡོད༌པིན༌།
GEN 50:10 ཁོང༌གུན༌ ཡོར༌དཱན༌ ལྩངས༌པོ༌ ཤར༌ ཆོགས༌ལ༌ ཁུ༌ཡུས༌ སྐོར༌སའེ༌ ས༌ཆ༌ ཨ༌ཏད༌ལ༌ ལེབ༌བ༌ཅིག༌ ཁོང༌གུན༌ནི༌ ཤེད༌ཅན༌ ངུས༌ཏེ༌ ཉ༌ངན༌ ཅོས༌ ཡང༌ ཏེ༌རུ༌ ཡོ༌སེབ༌བི༌ ཞག༌པོ༌ རྡུན༌ ཨ༌བའེ༌ ཕིའ༌ ཉ༌ངན༌ ཅོས༌།
GEN 50:11 ཀེ༌ནན༌པ༌གུན༌ནི༌ ཨ༌ཏད༌ ཁུ༌ཡུས༌ སྐོར༌སའེ༌ ས༌ཆའེ༌ཀ༌ ཁོང༌གུན༌ནི༌ ཉ༌ངན༌ ཅོ༌ཨིན༌ ཐོང༌ཏེ༌ ཟེརས༌, “འི༌ ཏུས༌པོ༌ ཨི༌ཇིབ༌པ༌གུན༌ནི༌ ཕིའ༌ ཉ༌ངན༌ སྲན༌ཏྲེ༌ ཏུས༌ཤིག༌ ཨིན༌ནོག༌།” ཏེན༌ན༌བོའེ༌ ཞས༌ཏེ༌ ཡོར༌དཱན༌ ལྩངས༌པོའེ༌ ཉེ༌མོའ༌ ཡོད༌ཁན༌ ཏེ༌ ས༌ཆ༌བོའེ༌ མིང༌ང༌ ཨ༌བེལ༌ མིཟ༌རེམ༌ ཏགས༌།
GEN 50:12 ཏེ༌ནེ༌ ཡ༌ཀོབ༌བི༌ བུ༌ཚ༌གུན༌ནི༌ ཨ༌བའེ༌ བཀའ༌ ཏང༌ཁན༌ ནང༌ཞིན༌ ཅོས༌།
GEN 50:13 ཁོང༌གུན༌ནི༌ ཁོའེ༌ སྤུར༌ ཀེ༌ནན༌ལ༌ ཁྱེརས༌ ཡང༌ མམ༌རེའེ༌ ཉེ༌མོའ༌ མེཁ༌ཕི༌ལའི༌ ཞིང༌ངི༌ བྲག༌ཕུགས༌སི༌ ནང༌ང༌ སུབས༌ ཀ༌བོ༌ ཨབ༌ར༌ཧམ༌མི༌ ཧེད༌པ༌ ཨེ༌ཕོ༌རོན༌ནི༌ ཀ༌ནེ༌ རོ༌ སུབ༌ཅེས༌སི༌ ཕིའ༌ ཉོས༌ཏེ༌ ཨིན༌པིན༌།
GEN 50:14 ཨ༌བའེ༌ སྤུར༌ སུབ༌ ཚར༌ཏེ༌ སྟིང༌ནེ༌ ཡོ༌སེབ༌ ཨི༌ཇིབ༌བ༌ ལོགས༌ཏེ༌ སོང༌། ཁོའེ༌ སྤུན༌ལ༌གུན༌ དང༌ ཁོ༌ ཉམ༌པོ༌ ཡོངས༌ཏེ༌ ཡོད༌ཁན༌ ཚང༌མའང༌ ལོགས༌ཏེ༌ སོང༌།
GEN 50:15 ཡ༌ཀོབ༌ ཤིའ༌ཅིག༌ ཡོ༌སེབ༌བི༌ ཨ༌ཅོ༌གུན༌ནི༌ ཟེརས༌, “ཡོ༌སེབ༌བ༌ ང༌དང༌གུན༌ནི༌ཀ༌ ཏ༌རུང༌ངའང༌ སྲོ༌ ལུས༌ཏེ༌ ང༌དང༌གུན༌ནི༌ ཁོའ༌ ངན༌པ༌ ཅོ༌ཁན༌བོའེ༌ གྱབ༌གལ༌ལ༌ ལན༌ ཏང༌སྲིད༌ཅེས༌ ཨིན༌ནོག༌།”
GEN 50:16 ཏེ༌བོའེ༌ཕིའ༌ ཁོང༌གུན༌ནི༌ ཡོ༌སེབ༌བ༌ ལོན༌ ཀལས༌, “ང༌དང༌གུན༌ནི༌ ཨ༌བ༌ ཤི༌ སང༌ སྔུན༌ལ༌,
GEN 50:17 ཁོང༌ངི༌ ང༌ཞའ༌ ཉེ༌རང༌ང༌ འི༌བོ༌ ཟེར༌ཅེས༌ལ༌ མོལས༌, ‘ཇུ༌ཇུ༌ ཁྱོ༌རང༌ངི༌ ཨ༌ཅོ༌གུན༌ནི༌ ཁྱོ༌རང༌ང༌ ངན༌པ༌ ཅོས༌ཏེ༌ སྡིག༌པ༌ ཅོ༌ཁན༌བོའ༌ གོངས༌པ༌ ཏོང༌།’ ཏ༌ ཇུ༌ཇུ༌ ང༌ཞའ༌ ཉེ༌རང༌ངི༌ ཨ༌བའེ༌ དཀོན༌མཆོག༌གི༌ ཡོག༌པོ༌གུན༌ནི༌ སྡིག༌པ༌ ཅོ༌ཁན༌བོའ༌ གོངས༌པ༌ སལ༌ལ༌ ཛད༌།” ཏེ༌ ལོན༌བོ༌ ཚོར༌ཏེ༌ ཡོ༌སེབ༌ ངུས༌།
GEN 50:18 ཏེ༌ནེ༌ ཁོའེ༌ ཨ༌ཅོ༌གུན༌ ཡོངས༌ཏེ༌ ཡོ༌སེབ༌བི༌ དུན༌ལ༌ གྱེལ༌ཏེ༌ ཟེརས༌, “ང༌ཞའ༌ ཉེ༌རང༌ངི༌ ཚེ༌ཡོག༌གི༌ ཚུལ༌ལ༌ དུག༌ཨིན༌།”
GEN 50:19 ཨིན༌ནའང༌ ཡོ༌སེབ༌བི༌ ཁོང༌གུན༌ལ༌ ཟེརས༌, “ཇིགས༌ མ༌ཇིགས༌། ངའ༌ ཁྲིམས༌ཅད༌ ཏང༌ཁན༌ནི༌ དཀོན༌མཆོག༌ མན༌?
GEN 50:20 ཁྱོ༌ཞ༌གུན༌ནི༌ ངའེ༌ གྱབ༌གལ༌ལ༌ ངན༌པ༌ ཅོ༌ཅེས༌ ཅོས༌, ཨིན༌ནའང༌ དཀོན༌མཆོག༌གི༌ ཏེ༌བོ༌ གྱལ༌ལ༌ གྱུར༌ཅུག༌ག༌ ཛད༌ཏེ༌ མི༌ མང༌པོའེ༌ སྲོག༌ སྐྱོབ༌བ༌ ཛདས༌, ཀ༌ཟུག༌ དི༌རིང༌ ཇུང༌ཨིན༌ ཨིན༌ནོག༌།
GEN 50:21 ཁྱོ༌ཞའ༌ ཇིགས༌གོས༌ མེད༌པ༌ ཨིན༌ནོག༌། ངའེ༌ ཁྱོ༌ཞའ༌ དང༌ ཁྱོ༌ཞའེ༌ ཕྲུ༌གུ༌གུན༌ནི༌ སྒོས༌དོམ༌གུན༌ རིག༌ཨིན༌།” ཏེན༌ན༌ཟུག༌གི༌ ཡོ༌སེབ༌བི༌ ཁོང༌གུན༌ལ༌ སྤེ༌ར༌ ལྡེ༌མོ༌ ཏངས༌ཏེ༌ ལོ༌ཁྱེལ༌ ཅུགས༌།
GEN 50:22 ཡོ༌སེབ༌ ཁོའེ༌ ཨ༌བའེ༌ ནང༌མི༌ ཚང༌མ༌ ཉམ༌པོ༌ ཨི༌ཇིབ༌བི༌ ནང༌ང༌ ཁོའ༌ ལོ༌ གྱ༌དང༌རྕུ༌ ཆ༌ཆའ༌ ཚག༌པ༌ ལུས༌།
GEN 50:23 ཡོ༌སེབ༌ ཨེཕ༌ར༌ཡིམ༌མི༌ ཕྲུ༌གུ༌གུན༌ དང༌ ཚ༌འོ༌ གུན༌ ཐོང༌ཐོང༌ ཚག༌པ༌ སོན༌ཏེའ༌ ལུས༌། ཡོ༌སེབ༌བི༌ མ༌ནས༌ས༌ བུ༌ཚ༌ མ༌ཀིར༌རི༌ ཕྲུ༌གུ༌གུན༌ སོས༌བུའ༌ ལེནས༌།
GEN 50:24 ཏེ༌ནེ༌ ཡོ༌སེབ༌བི༌ ཁོ༌རང༌ངི༌ ཨ༌ཅོ༌ནོ༌གུན༌ལ༌ ཟེརས༌, “ང༌ ཤི༌ཅེས༌ ཨིན༌ནོག༌། ཨིན༌ནའང༌ དཀོན༌མཆོག༌གི༌ ཁྱོ༌ཞ༌གུན༌ལ༌ རོགས༌ ཛད༌ཏེ༌ ཁྱོ༌ཞ༌གུན༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌ གུན༌ལ༌ ཁ༌ཆད༌ ཛད༌ཁན༌ནི༌ ས༌ཆའེ༌ ནང༌ང༌ ཁྱེར༌ར༌ ཛད༌ཨིན༌།”
GEN 50:25 ཏེ༌ནེ༌ ཡོ༌སེབ༌བི༌ ཡ༌ཀོབ༌བི༌ བུ༌ཚ༌གུན༌ལ༌ ནའ༌ ཁུར༌ཅུགས༌ཏེ༌ ཟེརས༌, “དཀོན༌མཆོག༌གི༌ ཁྱོ༌ཞ༌གུན༌ འི༌ ས༌ཆ༌ནེ༌ ཕིངས༌ཏེ༌ ཁྱེར༌ར༌ ཛད༌ ཟ༌ནེ༌ ཁྱོ༌ཞ༌གུན༌ནི༌ ངའེ༌ རུས༌པ༌གུན༌ ཁྱོ༌ཞའ༌ ཉམ༌པོ༌ ཁྱེར༌།”
GEN 50:26 ཏེ༌ནེ༌ ཨི༌ཇིབ༌བི༌ ནང༌ང༌ ཡོ༌སེབ༌བ༌ ལོ༌ གྱ༌དང༌རྕུ༌ སོང༌ཏེ༌ ཀྲོངས༌། ཁོའེ༌ ཟུགས༌པོའ༌ སྨན༌ སྐུས༌ཏེ༌ སྤུར༌ སྒམ༌མི༌ ནང༌ང༌ བོརས༌།
EXO 1:1 འི༌གུན༌ ཨིས༌ར༌ཨེལ༌ ཡང༌ན༌ ཡ༌ཀོབ༌བི༌ བུ༌ཚ༌ ཁོང༌ ཉམ༌པོ༌ ཨི༌ཇིབ༌བ༌ ཆའ༌ཁན༌གུན༌ ཨིན༌ནོག༌, ཁོང༌ ཚང༌མའེ༌ ནང༌ཚངས༌ གུན༌ནའང༌ ཉམ༌པོ༌ ཡོད༌པིན༌།
EXO 1:2 རུ༌བེན༌, སི༌མེ༌འོན༌, ལི༌ཝི༌, ཡ༌ཧུ༌དཱ༌,
EXO 1:3 ཨིས༌ས༌ཁར༌, ཟེ༌བུ༌ལོན༌, བེན༌ཡཱ༌མིན༌,
EXO 1:4 དཱན༌, ནཕ༌ཐལ༌ལི༌, གཱད༌ དང༌ ཨ༌ཤེར༌ གུན༌ ཨིན༌པིན༌།
EXO 1:5 ཡ༌ཀོབ༌ གྱུད༌ཏེ༌ ཁོའེ༌ མིར༌གྱུད༌ ཚང༌མ༌ རྡུན༌ཅུ༌ ཡོད༌པིན༌, ཡོ༌སེབ༌ ཨི༌ཇིབ༌ ནང༌ང༌ སྔུན༌ལ༌ ཡོད༌ཏེ༌ ཨིན༌ནོག༌།
EXO 1:6 ཏ༌ ཡོ༌སེབ༌, ཁོའེ༌ ཨ༌ཅོ༌ནོ༌ དང༌ ཁོང༌གུན༌ནི༌ མི༌རབས༌ ཚང༌མ༌ ཤི༌།
EXO 1:7 ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཕྲུ༌གུ༌ ཇོར༌ ཡང༌ ཁོང༌གུན༌ མ༌མང༌པོ༌ ཕེལ༌ཏེ༌ ཨི༌ཇིབ༌ གང༌པོའེ༌ ནང༌ང༌ གང༌ ཡང༌ མ༌ ཤེད༌ཅན༌ གྱུར༌།
EXO 1:8 ཏེ༌ནེ༌ ཡོ༌སེབ༌བི༌ སྐོར༌ལ༌ ཅའང༌ གྱུས༌ མེད༌ཁན༌ གྱལ༌པོ༌ སོ༌མ༌ཞིག༌ ཨི༌ཇིབ༌བི༌ ཝང༌སྲུལ༌པ༌ གྱུར༌།
EXO 1:9 ཁོའེ༌ ཁོང༌རང༌ངི༌ མི༌གུན༌ལ༌ ཟེརས༌, “འི༌ ཨིས༌ར༌ཨེལ༌པ༌གུན༌ ང༌དང༌གུན༌ནི༌ སང༌ མང༌ང༌ དང༌ ཤེད༌ཅན༌ གྱུར༌ཏེ༌ དུག༌།
EXO 1:10 ཡོང༌ཤིག༌, ང༌དང༌གུན༌ནི༌ ཁོང༌གུན༌ མང༌པོ༌ མི༌ཕེལ༌ཅེས༌སི༌ ཐབས༌ ཙལ༌གོས༌, ཏེ༌མན༌ནེ༌ མག༌གི༌ ཏུས༌ལ༌ ཁོང༌གུན༌ གྲ༌འོ༌གུན༌ ཉམ༌པོ༌ ཛོམས༌ཏེ༌ ང༌དང༌ངི༌ གྱབ༌གལ༌ལ༌ མག༌ ཏངས༌ཏེ༌ འི༌ ཡུལ༌ནེ༌ བིང༌ཏེ༌ ཆའ༌ནོག༌།”
EXO 1:11 ཏེ༌བོའེ༌ཕིའ༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ ཝང༌ ཉམ༌པོ༌ ལས༌ ནགས༌ཅན༌ ཅོ༌ཅུག༌ཅེས༌ལ༌ སྤོན༌བོ༌གུན༌ སྐོས༌, ཀ༌གུན༌ནི༌ ཁོང༌གུན༌ལ༌ ཨི༌ཇིབ༌བི༌ གྱལ༌པོའེ༌ ཕིའ༌ གྲུ༌ སག༌སའེ༌ གྱལ༌ས༌ པི༌ཐོམ༌ དང༌ རམ༌སིས༌ གུན༌ རྩིག༌ཅུགས༌།
EXO 1:12 ཨིན༌ནའང༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ ཙམ༌ཤིག༌ མང༌ང༌ ནགས༌ སྟན༌ནའང༌ ཁོང༌གུན༌ མང༌ང༌ ཕེལ༌ཏེ༌ གྱས༌ཨིན༌ སོང༌། ཏེ༌བོའེ༌ ཕིའ༌ ཨི༌ཇིབ༌པ༌གུན༌ ཁོང༌གུན༌ལ༌ ཇིགས༌ཏེ༌
EXO 1:13 ཁོང༌གུན༌ལ༌ སྙིང༌རྗེ༌ མེད༌པ༌ ནགས༌ཅན༌ ལས༌ ཅོ༌ཅུགས༌།
EXO 1:14 ཁོང༌གུན༌ནི༌ ཨིས༌ར༌ཨེལ༌པ༌གུན༌ནི༌ མི༌ཚེ༌ མ༌ འུ༌ཐུགས༌ གྱུར༌ཅུགས༌། ཨི༌ཇིབ༌པ༌གུན༌ནི༌ ཁོང༌གུན༌ལ༌ ཝང༌ ཏངས༌ཏེ༌ པག༌བུ༌, ཀ༌ལག༌ དང༌ ཞིང༌ངི༌ ལས༌ རིགས༌ ཚང༌མ༌ ཅོ༌ཅུག༌གད༌པིན༌ ཡང༌ ལས༌ ཀགས༌པོ༌ ཅོའ༌ལ༌ ཏང༌ཁན༌ ཚང༌མའེ༌ ནང༌ང༌ ཁོང༌གུན༌ནི༌ སྙིང༌རྗེ༌ སྟན༌ན༌ མེད༌པིན༌།
EXO 1:15 ཏེ༌ནེ༌ ཨི༌ཇིབ༌བི༌ གྱལ༌པོའེ༌ ཕྲུ༌གུ༌ ཇོར༌ ཟ༌ནེ༌ རོགས༌ ཅོ༌ཁན༌ ཤིཕ༌རཧ༌ དང༌ པུ༌འཧ༌ ཨིབ༌རི༌པ༌ བུ༌མོ༌གུན༌ལ༌ བཀའ༌ ཏངས༌ཏེ༌ ཟེརས༌,
EXO 1:16 “ཁྱོ༌ཞའེ༌ ཨིབ༌རི༌པ༌ བུ༌མོ༌གུན༌ལ༌ ཕྲུ༌གུ༌ ཇོར༌ཏུས༌ རོགས༌ ཅོ༌ ཟ༌ནེ༌, ཀལ༌ཏེས༌ ཕྲུ༌གུ༌ བུ༌ཚ༌ ཨིན༌ན༌ སོད༌ ཨིན༌ནའང༌ བུ༌མོ༌གུན༌ སོན༌ཏེའ༌ བོར༌།”
EXO 1:17 ཨིན༌ནའང༌ ཕྲུ༌གུ༌ ཇོར༌ཏུས༌ རོགས༌ ཅོ༌ཁན༌གུན༌ དཀོན༌མཆོག༌ག༌ ཇིགས༌ཏེ༌ གྱལ༌པོའེ༌ ཁའ༌ མ༌ཉནས༌ ཡང༌ ཕྲུ༌གུ༌ བུ༌ཚ༌གུན༌ མ༌ སདས༌།
EXO 1:18 ཏེ༌ནེ༌ གྱལ༌པོའེ༌ ཕྲུ༌གུ༌ ཇོར༌ཏུས༌ རོགས༌ ཅོ༌ཁན༌ནི༌ བུ༌མོ༌གུན༌ བོད༌ཏེ༌ ཁྱོངས༌ ཡང༌ ཏྲིས༌, “ཁྱོ༌རང༌གུན༌ནི༌ འི༌བོ༌ ཅི༌ ཅོས༌ཏེ༌ ཨིན༌? ཕྲུ༌གུ༌ བུ༌ཚ༌གུན༌ ཅིའ༌ མ༌སད༌པིན༌?”
EXO 1:19 ཁོང༌གུན༌ནི༌ གྱལ༌པོ༌ ལན༌ཏངས༌, “ཨིབ༌རི༌པ༌ བུ༌མོ༌གུན༌ ཨི༌ཇིབ༌པ༌ བུ༌མོ༌གུན༌ ཙོགས༌ མེད༌ཏེ༌ ཨིན༌ནོག༌། ཁོང༌གུན༌ལ༌ ཕྲུ༌གུ༌ ལ༌མོའ༌ ཇོར༌དུག༌, ང༌ཞའ༌ ལེབ༌བི༌སང༌ སྔུན༌ལ༌ ཁོང༌གུན༌ལ༌ ཕྲུ༌གུ༌ ཇོར༌དུག༌།”
EXO 1:20 དཀོན༌མཆོག༌གི༌ ཏེ༌ བུ༌མོ༌གུན༌ལ༌ ཐུག༌རྗེ༌ ཛདས༌ ཡང༌ ཨིས༌ར༌ཨེལ༌པ༌གུན༌ མང༌ང༌ ཕེལ༌ཨིན༌ སོང༌ཏེ༌ ཤེད༌ཅན༌ གྱུར༌།
EXO 1:21 ཡང༌ ཕྲུ༌གུ༌ ཇོར༌ཏུས༌ རོགས༌ ཅོ༌ཁན༌ནི༌ བུ༌མོ༌གུན༌ དཀོན༌མཆོག༌ག༌ ཇིགས༌ཁན༌ ཡོད༌ པ༌སང༌ དཀོན༌མཆོག༌གི༌ ཁོང༌གུན༌ལའང༌ ཕྲུ༌གུ༌ སལ༌ལ༌ ཛདས༌།
EXO 1:22 ཏེ༌ནེ༌ གྱལ༌པོའེ༌ ཨི༌ཇིབ༌པ༌གུན༌ལ༌ བཀའ༌ ཏངས༌ཏེ༌ ཟེརས༌, “ཨིབ༌རི༌པ༌གུན༌ལ༌ སྐྱེ༌ཁན༌ བུ༌ཚ༌ ཚང༌མ༌ ནཱའེལ༌ ལྩངས༌པོའེ༌ ནང༌ང༌ ཕང༌གོས༌ ཨིན༌ནའང༌ བུ༌མོ༌ ཚང༌མ༌ སོན༌ཏེའ༌ བོར༌།”
EXO 2:1 ཏ༌ ལི༌ཝིའི༌ མི༌སྡེ༌ བུ༌ཚ༌ཞིག༌གི༌ ཏེན༌ན༌ མི༌སྡེ༌ བུ༌མོ༌ཞིག༌ ཉམ༌པོ༌ ན༌མ༌ ཅོས༌།
EXO 2:2 ཡང༌ བུ༌མོ༌ ཕན༌ཅེས༌མ༌ གྱུར༌ཏེ༌ བུ༌ཚ༌ཞིག༌ ཇོར༌། བུ༌ཚ༌བོ༌ ལྡེ༌མོ༌ ཕྲུ༌གུ༌ ཞིག༌ ཡོད༌པ༌ ཨ༌མའེ༌ ཕྲུ༌གུ༌བོ༌ ཟླ༌ཝ༌ སུམ༌ སྦས༌ཏེ༌ བོརས༌།
EXO 2:3 ཨིན༌ནའང༌ ཨ༌མའ༌ ཕྲུ༌གུ༌བོ༌ ཏེ༌སང༌ མང༌ང༌ སྦས༌ཏེ༌ བོར༌ མ༌ཉན༌ པ༌སང༌ ཁོའེ༌ པེཔ༌རུས༌ ཟེར༌ཁན༌ནི༌ སོག༌མའ༌ ལས༌ཁན༌ནི༌ པག༌ཙེ༌ ཁྱོངས༌ཏེ༌ ཆུ༌ ནང༌ཀུག༌ག༌ མི༌ཡོང༌ཅེས༌ལ༌ ཏར༌ཀོལ༌ སྐུས༌ ཡང༌ ཕྲུ༌གུ༌བོ༌ ཏེ༌ནང༌ང༌ གྱངས༌ཏེ༌ ནཱའེལ༌ ལྩངས༌པོའེ༌ ཐའ༌མའེ༌ ལྡམ༌བུའི༌ ཕྲོའ༌ བོརས༌།
EXO 2:4 ཕྲུ༌གུའི༌ སྲིང༌མོ༌ ཐག༌རིང༌ཞིག༌ནེ༌ ཁོའ༌ ཅི༌ ཆ༌རུག༌ ལྟེན༌ དུགས༌།
EXO 2:5 གྱལ༌པོའེ༌ བུ༌མོ༌ ཆུའ༌ཞུག༌ག༌ལ༌ ལྩངས༌པོ༌ ཆོགས༌ལ༌ བབས༌ཏེ༌ སོང༌ ཡང༌ ཁོའེ༌ ཡ༌ཏོ༌གུན༌ ལྩངས༌པོའེ༌ ཐའ༌མ༌ གྲུལ༌ཨིན༌ ཁོང༌ སྲུང༌ངད༌པིན༌། གྱལ༌མོའ༌ ལྡམ༌བུའི༌ ཕྲོའ༌ པག༌ཙེ༌ ཞིག༌ ཐོང༌ ཡང༌ ཡ༌ཏོ༌ཞིག༌ ཏེ༌བོ༌ ཁྱོང༌ང༌ལ༌ ལམ༌ ཅུགས༌།
EXO 2:6 ཁོའེ༌ ཏེ༌བོ༌ ཕེའ༌ཅིག༌ ཕྲུ༌གུ༌ བུ༌ཚ༌ཞིག༌ ཐོང༌། ཕྲུ༌གུ༌བོ༌ ངུ༌ཨིན༌ ཡོད༌པ༌ ཁོང༌ང༌ སྙིང༌རྗེ༌ སྐྱེས༌ཏེ༌ ཟེརས༌, “འི༌བོ༌ ཀ༌ནེའང༌ ཨིབ༌རི༌པ༌ ཞིག༌གི༌ ཕྲུ༌གུ༌ ཨིན༌ནོག༌།”
EXO 2:7 ཏེ༌ནེ༌ ཁོའེ༌ སྲིང༌མོའེ༌ གྱལ༌པོའེ༌ བུ༌མོའ༌ ཏྲིས༌, “ང༌ སོང༌ཏེ༌ ཕྲུ༌གུའ༌ འོ༌མ༌ སྟེར༌ཁན༌ནི༌ ཨིབ༌རི༌པ༌ བུ༌མོ༌ཞིག༌ ཉེ༌རང༌ངི༌ ཕིའ༌ ཙལ༌ཏེ༌ ཁྱོང༌ང༌?”
EXO 2:8 གྱལ༌མོའེ༌ ཟེརས༌, “སོང༌ ཡང༌ ཙོལ༌།” ཏེ༌ནེ༌ བུ༌མོ༌བོ༌ སོང༌ ཡང༌ ཕྲུ༌གུའི༌ ཨ༌མ༌ ཁྲིད༌ཏེ༌ ཁྱོངས༌།
EXO 2:9 གྱལ༌མོའེ༌ ཏེ༌ བུ༌མོ༌བོའ༌ ཟེརས༌, “འི༌ ཕྲུ༌གུ༌བོ༌ ཁྱེར༌ ཡང༌ ངའེ༌ ཕིའ༌ འོ༌མ༌ སྟེར༌ཏེ༌ སྟ༌སྟོག༌ ཅོས༌། ངའེ༌ ཁྱོ༌རང༌ང༌ ལ༌ཆ༌ ཏང༌ཨིན༌།” ཏེ༌ནེ༌ བུ༌མོའེ༌ ཕྲུ༌གུ༌ ཁྱེརས༌ ཡང༌ འོ༌མ༌ སྟེར༌ཏེ༌ ཁོའ༌ སྟ༌སྟོག༌ ཅོས༌།
EXO 2:10 ཕྲུ༌གུ༌ ཆེན༌མོ༌ ཆའ༌ཅིག༌ ཁོའེ༌ ཨ༌མའེ༌ ཁོ༌ གྱལ༌པོའེ༌ བུ༌མོ༌ ཡོད༌ས༌ ཁྱེརས༌ ཡང༌ ཕྲུ༌གུ༌ ཁོའེ༌ བུ༌ཚ༌ གྱུར༌། ཏེ༌ནེ༌ གྱལ༌མོའེ༌ ཟེརས༌, “ངའེ༌ ཁོ༌ ཆུའི༌ ནང༌ནེ༌ ཕིངས༌ཏེ༌ ཨིན༌ པ༌སང༌ ངའེ༌ ཁོའེ༌ མིང༌ང༌ མོ༌ཟེས༌ ཏག༌ཨིན༌།”
EXO 2:11 ལྡན༌ཏེ༌ སྟིང༌ནེ༌ མོ༌ཟེས༌ ཞག༌ཤིག༌ ཁོ༌རང༌ངི༌ མི༌ ཨིབ༌རི༌པ༌གུན༌ ཡོད༌ས༌ ཕི༌ལོག༌ག༌ སོང༌ ཡང༌ ཁོའ༌ ཁོང༌གུན༌ལ༌ ནགས༌ཅན༌ ལས༌ ཅོ༌ ཅུག༌ཁན༌བོ༌ ཐོང༌། ཁོའ༌ ཨི༌ཇིབ༌པ༌ ཞིག༌གི༌ ཁོ༌རང༌ངི༌ མི༌ ཨིབ༌རི༌པ༌ཞིག༌ག༌ རྡུང༌ཨིན༌ ཐོང༌།
EXO 2:12 མོ༌ཟེས༌སི༌ ཉེ༌ཁོར༌ ཚང༌མ༌ལ༌ ལྟས༌ ཡང༌ སུ༌ཞིག༌གའང༌ མ༌ཐོང༌པ༌ ཁོའེ༌ ཨི༌ཇིབ༌པ༌བོ༌ སད༌ཏེ༌ ཁོའེ༌ ཟུགས༌པོ༌ པེ༌མའེ༌ ནང༌ང༌ སྦས༌།
EXO 2:13 སྟིང༌མ༌ཞག༌པོ༌ ཁོ༌ ཡང༌སྐྱར༌ ཕི༌ལོག༌ག༌ སོང༌པ༌ ཁོའ༌ ཨིབ༌རི༌པ༌ མི༌ ཉིས༌ ནོལ༌ཨིན༌ ཐོང༌། མོ༌ཟེས༌སི༌ གལ༌ཏེ༌ ཡོད༌ཁན༌ནི༌ མི༌བོའ༌ ཟེརས༌, “ཅི༌ ཕིའ༌ ཁྱོ༌རང༌ངི༌ ཨིབ༌རི༌པ༌ རང༌ངི༌ ཕྲོ༌པ༌ རྡུང༌ངད༌?”
EXO 2:14 ཁོའེ༌ ལན༌ཏངས༌, “སུའི༌ ཁྱོ༌རང༌ ང༌ཞའེ༌ ཝང༌སྲུལ༌པ༌ དང༌ ཁྲིམས༌ཅད༌ཁན༌ལ༌ སྐོས༌? ཅི༌ ཁྱོ༌རང༌ངི༌ ཨི༌ཇིབ༌པ༌བོ༌ སད༌ད༌ ཙོགས༌ལ༌ ངའང༌ སད༌ཨིན༌ན༌?” ཏེ༌ནེ༌ མོ༌ཟེས༌ ཇིགས༌ ཡང༌ སམ༌, “ངའེ༌ ཅོ༌ཁན༌བོ༌ མི༌གུན༌ལ༌ གྱུས༌ སོང༌ཏེ༌ ཨིན༌ཏིག༌དུག༌།”
EXO 2:15 གྱལ༌པོའ༌ ཏེ༌བོ༌ ཚོར༌ར༌ཅིག༌ ཁོའེ༌ མོ༌ཟེས༌ སད༌ཅེས༌སི༌ རྩོན༌གྲུས༌ ཅོས༌, ཨིན༌ནའང༌ མོ༌ཟེས༌ གྱལ༌པོའེ༌ ཀ༌ནེ༌ ཤོར༌ཏེ༌ མི༌དིའན༌ནི༌ ས༌ཆའ༌ ལེབས༌ཏེ༌ ཁོ༌ ཆུ༌དོང༌ ཞིག༌གི༌ དུན༌ལ༌ སའི༌ཀ༌ དུགས༌།
EXO 2:16 ཏ༌ མི༌དིའན༌པ༌ བླ༌མ༌ཞིག༌ག༌ བུ༌མོ༌ རྡུན༌ ཡོད༌པིན༌། ཁོང༌གུན༌ ཁོ༌རང༌གུན༌ནི༌ ཨ༌བའེ༌ ར༌ལུག༌གུན༌ལ༌ ཆུ༌ ཏང༌ཅེས༌ལ༌ ཡོངས༌ ཡང༌ ཆུ༌ ཕིངས༌ཏེ༌ ཞོང༌པ༌གུན༌ སྐངས༌།
EXO 2:17 ཨིན༌ནའང༌ ཞན༌ ལུག༌རྫི༌ རིག༌ ཡོངས༌ཏེ༌ ཝང༌ ཉམ༌པོ༌ བུ༌མོ༌གུན༌ ཏེ༌ཀ༌ནེ༌ ཆ༌ཅུགས༌པ༌ མོ༌ཟེས༌ ཁོང༌གུན༌ལ༌ རོགས༌ ཅོའ༌ལ༌ ཡོངས༌ཏེ༌ ཁོང༌ངི༌ ར༌ལུག༌གུན༌ལ༌ ཆུ༌ ཏངས༌།
EXO 2:18 ཁོང༌གུན༌ ཨ༌བ༌ རི༌འུལ༌ ཡོད༌ས༌ ལོགས༌ཏེ༌ ལེབ༌བ༌ཅིག༌ ཁོའེ༌ ཏྲིས༌, “དི༌རིང༌ ཁྱོ༌ཞ༌གུན༌ འི༌ཟུག༌ གྱོགས༌པ༌ ལོགས༌ཏེ༌ ཀ༌ཟུག༌གི༌ ལེབ༌?”
EXO 2:19 ཁོང༌གུན༌ནི༌ ལན༌ཏངས༌, “ཨི༌ཇིབ༌པ༌ མི༌ཞིག༌གི༌ ལུག༌རྫི༌གུན༌ནི༌ ཀ༌ནེ༌ ང༌ཞའ༌ སྐྱོབས༌ ཡང༌ ཁོའེ༌ ཆུ༌ ཕིངས༌ཏེ༌ ར༌ལུག༌གུན༌ལ༌ ཏངས༌།”
EXO 2:20 ཨ༌བའེ༌ ཏྲིས༌, “ཁོ༌ ཀ༌རེ༌, ཁྱོ༌ཞའ༌ མི༌བོ༌ བོར༌ཏེ༌ ཅིའ༌ ཡོངས༌པིན༌? སོང༌ ཡང༌ ང༌དང༌གུན༌ ཉམ༌པོ༌ ཁར༌ཇི༌ ཟའ༌ལ༌ ཁོ༌ བོད༌ཏེ༌ ཁྱོང༌།”
EXO 2:21 མོ༌ཟེས༌སི༌ ཏེ༌རུ༌ རི༌འུལ༌ ཉམ༌པོ༌ དུག༌ཅེས༌ ཐག༌ཅདས༌། སྟིང༌ནེ༌ ཁོའེ༌ ཁོ༌རང༌ངི༌ བུ༌མོ༌ ཟི༌པོ༌ར༌ མོ༌ཟེས༌ལ༌ ན༌མ༌ ཏངས༌།
EXO 2:22 ཟི༌པོ༌ར༌ བུ༌ཚ༌ཞིག༌ སྐྱེས༌ ཡང༌ མོ༌ཟེས༌སི༌ ཟེརས༌, “འི༌ ས༌ཆ༌བོའེ༌ཀ༌ ང༌ ཞན༌ཡུལ༌ལི༌ མི༌ ཚུགས༌ཏེ༌ ཨིན༌ནོག༌།” ཏེ༌བོའེ༌ ཕིའ༌ ཁོའེ༌ བུ༌ཚའེ༌ མིང༌ང༌ གེར༌ཤོམ༌ ཏགས༌།
EXO 2:23 ལོ༌ བན༌ཞིག༌གི༌ སྟིང༌ནེ༌, ཨི༌ཇིབ༌བི༌ གྱལ༌པོ༌ ཤི༌ ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཏ༌རུང༌ངའང༌ ཨི༌ཇིབ༌པ༌གུན༌ནི༌ རྡུག༌ངལ༌ སྟན༌པ༌ ཁོང༌གུན༌ ཚེ༌ཡོག༌ནེ༌ ཐར༌ ཅུག༌ག༌ ཛད༌ཅེས༌ལ༌ ཁོང༌གུན༌ནི༌ སྙིང༌ནེ༌ མོས༌ལམ༌ ཞུའད༌པིན༌ ཡང༌ དཀོན༌མཆོག༌གི༌ ཁོང༌གུན༌ནི༌ མོས༌ལམ༌ སན༌ན༌ ཛདས༌།
EXO 2:24 དཀོན༌མཆོག༌གི༌ ཁོང༌གུན༌ནི༌ རྡུག༌པོའེ༌ སྐད༌གུན༌ སན༌ཏེ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌ གུན༌ ཉམ༌པོ༌ ཛད༌ཁན༌ནི༌ ཁོང༌རང༌ངི༌ ཆད༌དོན༌བོ༌ ཨིད༌ཏུ༌ ཡོངས༌།
EXO 2:25 ཨིས༌ར༌ཨེལ༌པ༌གུན༌ལ༌ ནགས༌བར༌དོ༌ ཐོང༌ཁན༌གུན༌ དཀོན༌མཆོག༌གི༌ ཟིགས༌ ཡང༌ ཁོང༌གུན༌ནི༌ཀ༌ སྙིང༌རྗེ༌ སྐྱེའ༌ ཛདས༌།
EXO 3:1 ཞག༌ཅིག༌ མོ༌ཟེས༌སི༌ ཁོའེ༌ ན༌མའེ༌ ཨ༌བ༌ མི༌དིའན༌པ༌ བླ༌མ༌ ཡེ༌ཐོརོའེ༌ ར༌ལུག༌གུན༌ ཚོ༌ ཟ༌ནེ༌ ཁོའེ༌ ར༌ལུག༌གུན༌ རི༌སྟོང༌ངི༌ འ༌ངོ༌ ཆོགས༌ལ༌ ཁྱེར༌པ༌ དཀོན༌མཆོག༌གི༌ རི༌ སི༌ནཱའི༌ ཟེར༌ས༌ ལེབ༌།
EXO 3:2 ཏེ༌རུ༌ ཁོའ༌ ལྕང༌མ༌ ཆུ༌ངུན༌ མེ༌ བར༌ཁན༌ནི༌ མེ༌ལྗབ༌བི༌ ནང༌ང༌ ཡ༌ཝའེ༌ ཕོ༌ཉ༌ ཇལ༌། ཆུ༌ངུན༌ ལྕང༌མ༌བོའ༌ མེ༌ བར༌ཨིན༌ ཡོད༌ནའང༌ ཏེ༌བོ༌ མེའ༌ ཞེན༌ན༌ མེད༌པིན༌།
EXO 3:3 མོ༌ཟེས༌སི༌ སམ༌, “ཅི༌ ཕིའ༌ ཏེ༌ ལྕང༌མ༌བོ༌ མེའ༌ ཞེན༌ན༌ མ༌ནོག༌, ང༌ ཏེ༌བོའ༌ ལྟའ༌ ཆ༌ཉིན༌རག༌།”
EXO 3:4 ཡ༌ཝའེ༌ མོ༌ཟེས༌ དུན༌ལ༌ ཡོང༌ང༌ལ༌ ཟིགས༌ས༌ཅིག༌, ལྕང༌མ༌ ཆུ༌ངུན༌ནི༌ སྐྱིལ༌ནེ༌ ཁོང༌ངི༌ མོལས༌, “མོ༌ཟེས༌། མོ༌ཟེས༌།” ཁོའེ༌ ལན༌ཏངས༌, “ང༌ འི༌ཀ༌ནེ༌ ཡོད༌ལེ༌།”
EXO 3:5 ཡ༌ཝའེ༌ མོལས༌, “ཏེ༌སང༌ ཉེ༌མོའ༌ མ༌ཡོང༌། ཁྱོ༌རང༌ངི༌ པ༌བུ༌ པུད༌ ཅིའ༌ཟེར༌ན༌ ཁྱོ༌རང༌ ལངས༌ཏེ༌ ཡོད༌ཁན༌ནི༌ ས༌ཀྱད༌པོ༌ ཏམ༌པ༌ཞིག༌ ཨིན༌།
EXO 3:6 ང༌ ནི༌ ཁྱོ༌རང༌ངི༌ ཨ༌བའེ༌ དཀོན༌མཆོག༌ ཡང༌ ཁྱོ༌རང༌ངི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བི༌ དཀོན༌མཆོག༌ ཨིན༌།” ཏེ༌ནེ༌ མོ༌ཟེས༌སི༌ ཁོ༌རང༌ངི༌ ལྡོང༌བོ༌ ཀབས༌ ཅིའ༌ཟེར༌ན༌ ཁོ༌ དཀོན༌མཆོག༌ག༌ ལྟའ༌ལ༌ ཇིགས༌།
EXO 3:7 ཡ༌ཝའེ༌ མོལས༌, “ཨི༌ཇིབ༌བི༌ ནང༌ང༌ ངའེ༌ མི༌གུན༌ལ༌ ནགས༌ སྲན༌ཏྲེ༌ སྟན༌ཁན༌བོ༌ ངའེ༌ ཐོང༌། ཚེ༌ཡོག༌ སྲུལ༌ཁན༌གུན༌ནི༌ ནགས༌ སྟན༌ཅེས༌པོའེ༌ སེམས༌ཚེར༌ ཉམ༌པོ༌ ཁོང༌གུན༌ནི༌ མོས༌ལམ༌ ཞུས༌པ༌ ངའེ༌ ཚོར༌ ཡང༌ ཁོང༌གུན༌ལ༌ རྡུག༌ངལ༌ ཐོང༌ཁན༌གུན༌ ང༌ གྱུས༌ཡོད༌།
EXO 3:8 ཏ༌ ཁོང༌གུན༌ ཨི༌ཇིབ༌པ༌གུན༌ནི༌ ཀ༌ནེ༌ སྐྱོབ༌ཅེས༌ལ༌ ང༌ ཡོག༌ག༌ བབས༌ཏེ༌ ཡོངས༌ཏེ༌ ཨིན༌ ཡང༌ ཁོང༌གུན༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཅུད༌ཅན༌, ཕལ༌ཅན༌, འོ༌མ༌ དང༌ རང༌རྩི༌ གྱུག༌ཁན༌ནི༌ ས༌ཆའེ༌ ནང༌ང༌ ཁྱེར༌ཨིན༌། ཀ༌རུ༌ ཀེ༌ནན༌པ༌, ཧེད༌པ༌, ཨ༌མོར༌པ༌, པེ༌རིཟ༌པ༌, ཧིཝ༌པ༌ དང༌ ཡེ༌བས༌པ༌ གུན༌ དུག༌གད༌།
EXO 3:9 ངའ༌ ང༌རང༌ངི༌ མི༌ ཨིས༌ར༌ཨེལ༌པ༌གུན༌ནི༌ མོས༌ལམ༌ ཚོར༌ ཡང༌ ངའེ༌ ཨི༌ཇིབ༌པ༌གུན༌ནི༌ ཁོང༌གུན༌ལ༌ གོབ༌ནོན༌ ཅོ༌ཁན༌བོ༌ ཐོང༌།
EXO 3:10 ཏ༌ སོང༌, ཨིས༌ར༌ཨེལ༌པ༌ ངའེ༌ མི༌གུན༌ ཨི༌ཇིབ༌ནེ༌ ཕིང༌ཏེ༌ ཁྱོང༌ཅེས༌ལ༌ ངའེ༌ ཁྱོ༌རང༌ ཨི༌ཇིབ༌བི༌ གྱལ༌པོའེ༌ཀ༌ ལམ༌ཅུག༌གད༌།”
EXO 3:11 ཨིན༌ནའང༌ མོ༌ཟེས༌སི༌ དཀོན༌མཆོག༌ག༌ ཟེརས༌, “གྱལ༌པོའེ༌ཀ༌ སོང༌ཏེ༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིང༌ཏེ༌ ཁྱོང༌ཁན༌ ང༌ སུ༌ ཨིན༌ནོག༌?”
EXO 3:12 དཀོན༌མཆོག༌གི༌ ལན༌སལས༌, “ང༌ ཁྱོ༌རང༌ ཉམ༌པོ༌ ཡོད༌། ཁྱོ༌རང༌ངི༌ མི༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ཅིག༌, ཁྱོ༌ཞ༌ ཚང༌མའེ༌ འིན༌ན༌ རི༌བོའི༌ཀ༌ དཀོན༌མཆོག༌ག༌ ཅོལ༌ཨིན༌། ངའེ༌ ཁྱོ༌རང༌ ཀལ༌ཁན༌ནི༌ སྟགས༌པོ༌ ཏེན༌ན༌བོ༌ ཨིན༌།”
EXO 3:13 ཨིན༌ནའང༌ མོ༌ཟེས༌སི༌ ཟེརས༌, “ང༌ ཨིས༌ར༌ཨེལ༌པ༌གུན༌ ཡོད༌ས༌ སོང༌ཏེ༌ ཁྱོ༌ཞའེ༌ ཕ༌མེས༌པོའེ༌ དཀོན༌མཆོག༌གི༌ ང༌ ཁྱོ༌ཞ༌ ཡོད༌ས༌ ལམ༌ཅུགས༌ ཟེར༌ན༌ ཁོང༌གུན༌ནི༌, ཁོང༌ངི༌ ཚན༌ ཅི༌ ཨིན༌ནོག༌ ཟེར༌ཏེ༌ ཏྲི༌སྲིད༌ཅེས༌ ཨིན༌ནོག༌? ཏེ༌ནེ༌ ངའེ༌ ཁོང༌གུན༌ལ༌ ཅི༌ ཟེར༌?”
EXO 3:14 དཀོན༌མཆོག༌གི༌ མོལས༌, “ང༌ ནི༌ ང༌ ཨིན༌ཁན༌བོ༌ ཨིན༌། ཁྱོ༌རང༌ངི༌ ཁོང༌གུན༌ལ༌ ཟེར༌གོས༌, ‘ང༌ ཨིན༌’ མོལ༌ཁན༌བོའེ༌ ང༌ ཁྱོ༌ཞ༌གུན༌ ཡོད༌ས༌ ལམ༌ཅུག༌ག༌ ཛདས༌།”
EXO 3:15 དཀོན༌མཆོག༌གི༌ འི༌བོའང༌ མོལས༌, “ཨིས༌ར༌ཨེལ༌པ༌གུན༌ལ༌ ཟེར༌, ཡ༌ཝ༌ ཁྱོ༌ཞ༌གུན༌ནི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བི༌ དཀོན༌མཆོག༌གི༌ ང༌ ཁྱོ༌ཞ༌གུན༌ ཡོད༌ས༌ ལམ༌ཅུག༌ག༌ ཛདས༌། ཏུས༌གྱུན༌ནི༌ ཕིའ༌ ཏེ༌བོ༌ ངའེ༌ མིང༌ ཨིན༌། མི༌རབས༌ནེ༌ མི༌རབས༌ ངའ༌ འིན༌ན༌ མིང༌བོ༌ ཉམ༌པོ༌ ཨིད༌ཏུ༌ ཅོ༌ཨིན༌།”
EXO 3:16 “སོང༌ ཡང༌ ཨིས༌ར༌ཨེལ༌པ༌ འུ༌སྐྱོང༌གུན༌ ལྡུས༌ཏེ༌ ཁོང༌གུན༌ལ༌ ཟེར༌, ‘ཡ༌ཝ༌ ཁྱོ༌ཞ༌གུན༌ནི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བི༌ དཀོན༌མཆོག༌ ངའ༌ ཇལ༌ཏེ༌ མོལ༌ལ༌རག༌, “ཨི༌ཇིབ༌པ༌གུན༌ནི༌ ཁྱོ༌ཞ༌གུན༌ལ༌ ཅོ༌ཨིན༌ ཡོད༌ཁན༌གུན༌ནི༌ཀ༌ ངའེ༌ གྱལ༌ལ༌ ནང༌སྟག༌ བོར༌པིན༌།
EXO 3:17 ངའེ༌ ཁྱོ༌ཞ༌གུན༌ ཨི༌ཇིབ༌བི༌ ཏེ༌ རྡུག༌ངལ༌ལི༌ ནང༌ནེ༌ ཕིངས༌ཏེ༌ ཀེ༌ནན༌པ༌, ཧེད༌པ༌, ཨ༌མོར༌པ༌, པེ༌རིཟ༌པ༌, ཧིཝ༌པ༌ དང༌ ཡེ༌བས༌པ༌ གུན༌ དུག༌སའེ༌ ས༌ཆ༌ ཁྱེར༌ཨིན༌ ཀ༌རུ༌ འོ༌མ༌ དང༌ རང༌རྩི༌ གྱུག༌ག༌ནོག༌།”’”
EXO 3:18 “ཨིས༌ར༌ཨེལ༌པའེ༌ འུ༌སྐྱོང༌གུན༌ནི༌ ཁྱོ༌རང༌ངི༌ ཟེར༌ཁན༌གུན༌ ཉན༌ཨིན༌། ཏེ༌ནེ༌ ཁྱོ༌རང༌ དང༌ ཁོང༌གུན༌ ཨི༌ཇིབ༌བི༌ གྱལ༌པོ༌ ཡོད༌ས༌ སོང༌ཏེ༌ ཟེར༌, ‘ང༌ཞའ༌ ཡ༌ཝ༌ ཨིབ༌རི༌པ༌གུན༌ནི༌ དཀོན༌མཆོག༌ ཇལ༌, ཡ༌ཝ༌ ང༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌ལ༌ ང༌ཞ༌གུན༌ ཞག༌ སུམ༌ རི༌སྟོང༌ངི༌ ནང༌ང༌ བེས༌ལ༌ ཆ༌ཅུག༌།’”
EXO 3:19 “ཨིན༌ནའང༌ ང༌ གྱུས༌ཡོད༌ ཝང༌ཅན༌ སྟོབས༌པོ༌ སྟན༌ཏེ༌ མ༌ནེ༌ ཨི༌ཇིབ༌བི༌ གྱལ༌པོའེ༌ ཁྱོ༌ཞ༌གུན༌ ཆ༌ མི༌ཅུག༌།
EXO 3:20 ཏེ༌བོའེ༌ཕིའ༌ ངའེ༌ ང༌རང༌ངི༌ ལག༌པ༌ རྐྱངས༌ཏེ༌ ཨི༌ཇིབ༌པ༌གུན༌ནི༌ ཕྲོའ༌ ངའེ༌ ལྟས༌ ཚང༌མ༌ སྟན༌ཏེ༌ ཁོང༌གུན༌ལ༌ ཆད༌པ༌ ཅད༌ཨིན༌། ཏེ༌སྟིང༌ནེ༌ ཁོའེ༌ ཁྱོ༌ཞ༌གུན༌ ཆ༌ཅུག༌ཨིན༌།
EXO 3:21 ངའེ༌ ཨི༌ཇིབ༌པ༌གུན༌ལ༌ ཁྱོ༌ཞའ༌ ཀུས༌པ༌ ཅོ༌ཅུགས༌ཏེ༌ ཁྱོ༌ཞ༌གུན༌ ཆ༌ ཟ༌ནེ༌ ལག༌པ༌ སྟོང༌ང༌ ཆ༌ མི༌ཅུག༌།
EXO 3:22 ཨིས༌ར༌ཨེལ༌མ༌ ཚང༌མའེ༌ ཁྱིམ༌ཚེས༌པ༌ ཨི༌ཇིབ༌མ༌ ཡང༌ ཁོང༌གུན༌ནི༌ ཁང༌པའེ༌ ནང༌ང༌ དུག༌ཁན༌ནི༌ བུ༌མོ༌གུན༌ལ༌, ‘སེར༌ དང༌ མུལ༌ལི༌ ཅ༌ལག༌ ཡང༌ ཀོས༌ལག༌ གུན༌ ཏོང༌’ ཟེར༌གོས༌། ཏེ༌གུན༌ ཁྱོ༌ཞའེ༌ བུ༌ཚ༌ དང༌ བུ༌མོ༌ གུན༌ལ༌ སྐོན༌ ཡ༌ ཏོག༌ ཡང༌ ཏེན༌ན༌ཟུག༌གི༌ ཁྱོ༌ཞའེ༌ ཨི༌ཇིབ༌པ༌གུན༌ནི༌ གྱུ༌ནོར༌ ཅོམས༌ཏེ༌ ཁྱེར༌ཨིན༌།”
EXO 4:1 ཨིན༌ནའང༌ མོ༌ཟེས༌སི༌ ཡང༌སྐྱར༌ ཟེརས༌, “ཀལ༌ཏེས༌ ཁོང༌གུན༌ནི༌ ‘ཁྱོ༌རང༌ང༌ ཡ༌ཝ༌ མ༌ ཇལ༌ལ༌ ཨིན༌ནོག༌’ ཟེར༌ཏེ༌ ངའེ༌ཀ༌ ཨིད༌ཤེས༌ མ༌ཅོ༌ན༌ ཡ༌ ངའེ༌ ཟེར༌ཁན༌ལ༌ མ༌ཉན༌ན༌?”
EXO 4:2 ཏེ༌ནེ༌ ཡ༌ཝའེ༌ ཁོའ༌ ཏྲིས༌, “ཁྱོ༌རང༌ངི༌ ལག༌པའེ༌ ནང༌ང༌ ཡོད༌ཁན༌བོ༌ ཅི༌ ཨིན༌?” མོ༌ཟེས༌སི༌ ལན༌ཏངས༌, “ལུག༌རྫི༌ བེར༌ཀ༌ ཨིན༌ལེ༌།”
EXO 4:3 ཡ༌ཝའེ༌ ཁོའ༌ མོལས༌, “ཏེ༌བོ༌ སའེ༌ཀ༌ ཕངས༌ ཏོང༌།” ཏེ༌ནེ༌ མོ༌ཟེས༌སི༌ བེར༌ཀ༌ སའེ༌ཀ༌ ཕངས༌པ༌ ཏེ༌བོ༌ རུལ༌ཞིག༌ག༌ གྱུར༌ ཡང༌ ཁོ༌ རུལ༌ནེ༌ ཐག༌རིང༌ང༌ ཤོར༌།
EXO 4:4 ཏེ༌ནེ༌ ཡ༌ཝའེ༌ ཁོའ༌ མོལས༌, “ལག༌པ༌ རྐྱངས༌ཏེ༌ རུལ༌བོ༌ རྔ༌མ༌ནེ༌ ཟུམ༌།” མོ༌ཟེས༌སི༌ ལག༌པ༌ རྐྱངས༌ཏེ༌ རུལ༌བོ༌ ཟུམས༌པ༌ ཏེ༌བོ༌ ཡང༌སྐྱར༌ ལུག༌རྫིའི༌ བེར༌ཀ༌ གྱུར༌།
EXO 4:5 ཡ༌ཝའེ༌ མོལས༌, “འི༌ ལྟས༌པོ༌ སྟོན༌ ཏེ༌ནེ༌ ཡ༌ཝ༌ ཁོང༌གུན༌ནི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌ གུན༌ནི༌ དཀོན༌མཆོག༌ ཁྱོ༌རང༌ང༌ ཇལ༌ཁན༌བོ༌ ཁོང༌གུན༌ནི༌ ཨིད༌ཤེས༌ ཅོ༌ཨིན༌།”
EXO 4:6 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ངི༌ ལག༌པ༌ ཁྱོ༌རང༌ངི༌ ཀོས༌སི༌ ནང༌ཀུག༌ག༌ ཏོང༌།” མོ༌ཟེས༌སི༌ ཁོ༌རང༌ངི༌ ལག༌པ༌ ཀོས༌སི༌ ནང༌ང༌ ཏངས༌ཏེ༌ ཕི༌ལོག༌ག༌ ཕིང༌ང༌ཅིག༌ ཁོའེ༌ ལག༌པ༌ མ༌ རྩོག༌པོ༌ ཛེ༌ནད༌ ཡོངས༌ཏེ༌ ཁ༌ ཙོགས༌ ཀར༌པོ༌ གྱུར༌ཏེ༌ ཡོད༌པིན༌།
EXO 4:7 ཡ༌ཝའེ༌ མོལས༌, “ཏ༌ ལག༌པ༌བོ༌ ལོགས༌ཏེ༌ ཀོས༌སི༌ ནང༌ང༌ ཏོང༌།” མོ༌ཟེས༌སི༌ ལག༌པ༌ ལོགས༌ཏེ༌ ནང༌ཀུག༌ག༌ ཏངས༌ཏེ༌ ཕིང༌ང༌ཅིག༌ ཏེ༌བོ༌ ཁོའེ༌ ཟུགས༌པོའེ༌ ཡང༌ ཡན༌ལག༌གུན༌ ཙོགས༌ལ༌ ཁྲངས༌པོ༌ གྱུར༌།
EXO 4:8 ཡ༌ཝའེ༌ མོ༌ཟེས༌ལ༌ མོལས༌, “ཀལ༌ཏེས༌ ཁོང༌གུན༌ནི༌ ཁྱོ༌རང༌ངི༌ཀ༌ ཨིད༌ མ༌ཤེས༌ན༌ ཡ༌ ལྟས༌ ཏང༌པོ༌བོའ༌ ནང༌སྟག༌ མ༌ཏང༌ན༌, ཁོང༌གུན༌ནི༌ ལྟས༌ ཉིས༌པ༌བོའ༌ ཨིད༌ཤེས༌ ཅོ༌སྲིད༌ཅེས༌ ཨིན༌ནོག༌།
EXO 4:9 ཨིན༌ནའང༌ ཀལ༌ཏེས༌ ཁོང༌གུན༌ནི༌ འི༌ ལྟས༌ ཉིས༌ཀོའ༌ ཨིད༌ མ༌ཅོ༌ན༌ ཡ༌ ཁྱོ༌རང༌ངི༌ ཟེར༌ཁན༌བོ༌ མ༌ཉན༌ན༌ ཏེ༌ནེ༌ ནཱའེལ༌ ལྩངས༌པོ༌ནེ༌ ཆུ༌ ཁུར༌ཏེ༌ ས༌ སྐམ༌པོའེ༌ཀ༌ ལུག༌། ཁྱོ༌རང༌ངི༌ ལྩངས༌པོའེ༌ ཆུ༌ ཁྱོང༌ཁན༌བོ༌ སའི༌ཀ༌ ཁྲག༌ གྱུར༌ཨིན༌།”
EXO 4:10 མོ༌ཟེས༌སི༌ ཡ༌ཝ༌ ཟེརས༌, “ཡ༌ཝ༌ལེ༌, སྤེ༌ར༌ ཏང༌ཅེས༌སི༌ ནང༌ང༌ ངའ༌ ཁས༌པ༌ མེད༌, བུད༌ཁན༌ནི༌ ཏུས༌སི༌ ནང༌ང༌ ཡང༌ དག༌ས༌ ཉེ༌རང༌ ཉམ༌པོ༌ སྤེ༌ར༌ ཏང༌ ཟ༌ནེའང༌། ངའེ༌ ལྕའེ༌ ལྡམས༌ཏེ༌ ངའ༌ ཟེར༌གོ༌ཤེས༌པོ༌ ཟེར༌ ཉན༌ན༌མེད༌།”
EXO 4:11 ཡ༌ཝའེ༌ ཁོའ༌ མོལས༌, “མིའ༌ ཁའ༌ སུའི༌ ཏང༌ཏེ༌ ཨིན༌ནོག༌? སུའི༌ མི༌ རྒུད༌ ཡ༌ ཧན༌གྲང༌ ཅོས༌? སུའི༌ ཁོའ༌ ཐོང༌ཅེས༌ལ༌ མིག༌ ཡ༌ ཞ༌ར༌ ཅོས༌? ཏེ༌བོ༌ ང༌, ཡ༌ཝའེ༌ ཅོས༌ཏེ༌ མ༌ནོག༌ག༌?
EXO 4:12 ཏ༌ སོང༌, ངའེ༌ ཁྱོ༌རང༌ང༌ སྤེ༌ར༌ ཏང༌ཅེས༌ལ༌ རོགས༌ ཅོ༌ཨིན༌ ཡང༌ ངའེ༌ ཁྱོ༌རང༌ང༌ ཟེར༌གོ༌ཤེས༌པོ༌ ལབ༌ཨིན༌།”
EXO 4:13 ཨིན༌ནའང༌ མོ༌ཟེས༌སི༌ ཡང༌སྐྱར༌ ཞུ༌ཝ༌ ཕུལས༌, “ཡ༌ཝ༌ལེ༌ ཇུ༌ཇུ༌ ཡང༌ སུ༌ཞིག༌ ལམ༌ཅུག༌ག༌ ཛད༌དའང༌།”
EXO 4:14 ཏེ༌ནེ༌ ཡ༌ཝའ༌ མོ༌ཟེས༌སི༌ཀ༌ ཐུགས༌སྲོ༌ སྐྱོད༌ཏེ༌ མོལས༌, “ཁྱོ༌རང༌ངི༌ ཨ༌ཅོ༌ ལི༌ཝི༌པ༌ ཨ༌རོན༌ནི༌ སྐོར༌ལ༌ ཅི༌ སམ༌བ༌ ཨིན༌? ཁོའ༌ སྤེ༌ར༌ གྱལ༌ལ༌ ཏང༌ཉན༌ཁན༌བོ༌ ང༌ གྱུས༌ཡོད༌, ཡང༌ དག༌ས༌ ཁོ༌ ཁྱོ༌རང༌ང༌ ཐུག༌ག༌ལ༌ ཡོང༌དུག༌། ཁྱོ༌རང༌ ཐུགས༌ཏེ༌ ཁོ༌ མ༌ཐད༌པོ༌ ཆེན༌།
EXO 4:15 ཁྱོ༌རང༌ངི༌ ཁོ༌ ཉམ༌པོ༌ སྤེ༌ར༌ ཏངས༌ཏེ༌ ཁོའ༌ ཟེར༌གོ༌ཤེས༌སི༌ སྤེ༌ར༌གུན༌ ཤོད༌། ངའེ༌ ཁྱོ༌ཞའ༌ སྤེ༌ར༌ ཏང༌ཅེས༌ལ༌ རོགས༌ ཅོས༌ཏེ༌ ཁྱོ༌ཞའ༌ ཅོ༌གོ༌ཤེས༌གུན༌ ལབ༌ཨིན༌།
EXO 4:16 ཨ༌རོན༌ནི༌ ཁྱོ༌རང༌ངི༌ ཚབས༌ ཅོས༌ཏེ༌ མི༌གུན༌ལ༌ སྤེ༌ར༌ ཏང༌ཨིན༌། ཁོ༌ ཁྱོ༌རང༌ངི༌ ཁའ༌ ཡང༌ ཁྱོ༌རང༌ ཁོའེ༌ ཕིའ༌ དཀོན༌མཆོག༌ ཙོགས༌ གྱུར༌ཨིན༌།
EXO 4:17 ཨིན༌ནའང༌ ལྟས༌གུན༌ སྟན༌ཅེས༌སི༌ ཕིའ༌ ཁྱོ༌རང༌ངི༌ ལུག༌རྫིའི༌ བེར༌ཀ༌བོ༌ ལག༌པའེ༌ ནང༌ང༌ ཁུར༌ཏེ༌ སོང༌།”
EXO 4:18 ཏེ༌ནེ༌ མོ༌ཟེས༌ ལོགས༌ཏེ༌ ཡེ༌ཐོརོ༌ ཁོ༌རང༌ངི༌ ན༌མའེ༌ ཨ༌བ༌ ཡོད༌ས༌ སོང༌ཏེ༌ ཟེརས༌, “ཇུ༌ཇུ༌ ངའ༌ ང༌རང༌ངི༌ སྤུན༌གུན༌ སོན༌ཏེའ༌ དུག༌ག༌ མི༌དུག༌ ལྟའ༌ལ༌ ཨི༌ཇིབ༌བ༌ ལོགས༌ཏེ༌ ཆ༌ཅུག༌ག༌ ཛད༌།” ཡེ༌ཐོརོའེ༌ ལན༌ཏངས༌, “ཞི༌དེ༌ ཉམ༌པོ༌ སོང༌།”
EXO 4:19 མོ༌ཟེས༌ལ༌ མི༌དི༌ཡའན༌ནི༌ ནང༌ང༌ ཡ༌ཝའེ༌ མོལས༌, “ཨི༌ཇིབ༌བ༌ ལོགས༌ཏེ༌ སོང༌ ཅིའ༌ཟེར༌ན༌ ཁྱོ༌རང༌ སད༌ཨིན༌ སམ༌ཁན༌ ཚང༌མ༌ ཤི༌ཏེ༌ མེད༌།”
EXO 4:20 ཏེ༌བོའེ༌ཕིའ༌ མོ༌ཟེས༌སི༌, ཁོ༌རང༌ངི༌ ན༌མ༌ དང༌ བུ༌ཚ༌གུན༌ བུང༌བུའི༌ཀ༌ སྐྱོནས༌ ཡང༌ ལོགས༌ཏེ༌ ཨི༌ཇིབ༌བི༌ ས༌ཆ༌ སོང༌། ཁོའེ༌ ལག༌པའེ༌ ནང༌ང༌ དཀོན༌མཆོག༌གི༌ མོལ༌ཁན༌ནི༌ བེར༌ཀ༌ ཁུར༌ཏེ༌ ཡོད༌པིན༌།
EXO 4:21 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ ཨི༌ཇིབ༌བ༌ ལོགས༌ཏེ༌ ལེབ༌བ༌ཅིག༌, གྱལ༌པོའེ༌ དུན༌ལ༌ ལྟས༌ ཚང༌མ༌ ལྟོན༌ ཀ༌གུན༌ ཅོ༌ཅེས༌ལ༌ ངའེ༌ ཁྱོ༌རང༌ང༌ ཝང༌ཆ༌ ཏངས༌ཏེ༌ ཨིན༌། ཨིན༌ནའང༌ ཁོའེ༌ མི༌གུན༌ ཆ༌ མི༌ཅུག༌ ཅིའ༌ཟེར༌ན༌ ངའེ༌ ཁོའེ༌ སྙིང༌སྐྱོང༌པོ༌ གྱུར༌ཅུག༌ཨིན༌།
EXO 4:22 ཏེ༌ནེ༌ ཁྱོ༌རང༌ངི༌ ཁོའ༌ ཟེར༌གོས༌, ‘ཡ༌ཝའེ༌ འི༌ཟུག༌ མོལས༌, ཨིས༌ར༌ཨེལ༌པ༌གུན༌ ངའེ༌ གོ༌མ༌ སྐྱེ༌ཁན༌ནི༌ བུ༌ཚ༌བོ༌ ཨིན༌།
EXO 4:23 ངའེ༌ ཁྱོ༌རང༌ང༌ ཟེར༌པིན༌, “ངའ༌ ཅོལ༌ཅེས༌ལ༌ ངའེ༌ བུ༌ཚ༌ ཆ༌ཅུག༌།” ཨིན༌ནའང༌ ཁྱོ༌རང༌ངི༌ ཁོ༌ ཆ༌ མ༌ཅུགས༌ པ༌སང༌ ངའེ༌ ཁྱོ༌རང༌ངི༌ གོ༌མའེ༌ བུ༌ཚ༌བོ༌ སད༌ཨིན༌།’”
EXO 4:24 ཨི༌ཇིབ༌བ༌ ཆ༌ ཟ༌ནེ༌ མོ༌ཟེས༌ དང༌ ཁོའེ༌ ནང༌ཚངས༌ ཚན༌ལ༌ དུགས༌ཏེ༌ ཡོད༌སའེ༌ ནས༌སའེ༌ཀ༌, ཡ༌ཝའ༌ མོ༌ཟེས༌སི༌ཀ༌ ཐུགས༌སྲོ༌ སྐྱོད༌ཏེ༌ ཡ༌ཝའེ༌ ཁོ༌ སད༌ཅེས༌ ཡོད༌པིན༌།
EXO 4:25 ཨིན༌ནའང༌ མོ༌ཟེས༌སི༌ ན༌མ༌ ཟི༌པོ༌རའེ༌ རྡོའ༌ སྲ༌མོ༌ ནོན༌པོ༌ཞིག༌ ཉམ༌པོ༌ ཁོ༌རང༌ངི༌ བུ༌ཚའ༌ སུན༌ནད༌ ཅོས༌ཏེ༌ ཏེ༌ ཅད༌ཁན༌ནི༌ པགས༌པ༌ མོ༌ཟེས༌སི༌ རྐང༌པ༌ ཐུག༌ཅུགས༌ཏེ༌ ཟེརས༌, “འི༌ ཁྲག༌ཕོ༌ཁན༌བོ༌ གྱུད༌ཏེ༌ ཁྱོ༌རང༌ ཡ༌ཝའེ༌ ཐུག༌སྲོ༌ ནེ༌ ཐར༌ཏེ༌ ཨིན༌ནོག༌། ”
EXO 4:26 ཏེ༌ནེ༌ མོ༌ཟེས༌ སོན༌ཏེའ༌ བོར༌ཏེ༌ ཡ༌ཝ༌ སྐྱོདས༌། ༼བུ༌མོའེ༌ “ཁྲག༌ཕོ༌ཁན༌བོ༌ གྱུད༌ཏེ༌ ཁྱོ༌རང༌ ངའེ༌ ཞིད༌མད༌ ཨིན༌” ཟེར༌ཅེས༌པོ༌ ནི༌ ཁོ༌རང༌ངི༌ བུ༌ཚ༌ སུན༌ནད༌ ཅོ༌ཁན༌བོའེ༌ སྐོར༌ལ༌ ཨིན༌ནོག༌།༽
EXO 4:27 ཡ༌ཝའེ༌ ཨ༌རོན༌ལ༌ མོལས༌, “མོ༌ཟེས༌ལ༌ ཐུག༌ག༌ལ༌ རི༌སྟོང༌ངི༌ ནང༌ང༌ སོང༌།” ཨ༌རོན༌ སོང༌ ཡང༌ དཀོན༌མཆོག༌གི༌ རིའི༌ཀ༌ མོ༌ཟེས༌ ཉམ༌པོ༌ ཐུག༌ ཡང༌ ཁོའ༌ པུག༌ ཏངས༌།
EXO 4:28 ཏེ༌ནེ༌ མོ༌ཟེས༌སི༌ ཁོ༌ ཨི༌ཇིབ༌བ༌ ཀལ༌ལ༌ ཛད༌ཁན༌ནི༌ ཡ༌ཝའེ༌ མོལ༌ཁན༌ ཚང༌མ༌ དང༌ ཁོའ༌ ཅོ༌ཅེས༌ལ༌ བཀའ༌ སལ༌ཁན༌ནི༌ ལྟས༌ ཚང༌མའེ༌ སྐོར༌ ཨ༌རོན༌ལ༌ ཤདས༌།
EXO 4:29 མོ༌ཟེས༌ དང༌ ཨ༌རོན༌ནི༌ ཨིས༌ར༌ཨེལ༌པའེ༌ སྤོན༌བོ༌ ཚང༌མ༌ བོད༌ཏེ༌ ཛོམ༌ཅུགས༌།
EXO 4:30 ཨ༌རོན༌ནི༌ ཁོང༌ ཚང༌མ༌ལ༌ ཡ༌ཝའེ༌ མོ༌ཟེས༌ལ༌ ཤད༌ད༌ ཛད༌ཁན༌གུན༌ ཤདས༌ ཡང༌ ཁོའེ༌ ཁོང༌གུན༌ནི༌ དུན༌ལ༌ ལྟས༌གུན༌ སྟནས༌།
EXO 4:31 ཏེ༌ནེ༌ ཨིས༌ར༌ཨེལ༌པ༌གུན༌ནི༌ ཡ༌ཝའེ༌ ཁོང༌གུན༌ནི༌ རྡུག༌ངལ༌གུན༌ ཟིགས༌ཏེ༌ ཁོང༌ངི༌ སྐོར༌ལ༌ ཚེར༌ཁ༌ ཛད༌ཁན༌བོ༌ ཚོར༌ཏེ༌ ཨིད༌ཤེས༌ ཅོས༌པ༌ ཁོང༌གུན༌ནི༌ ས༌ ཐུག༌ ཅུགས༌ཏེ༌ གོ༌ སྒུས༌ ཡང༌ ཡ༌ཝའ༌ ཅོལས༌།
EXO 5:1 ཏེ༌ སྟིང༌ནེ༌ མོ༌ཟེས༌ དང༌ ཨ༌རོན༌ ཨི༌ཇིབ༌བི༌ གྱལ༌པོ༌ ཡོད༌ས༌ སོང༌ཏེ༌ ཟེརས༌, “ཡ༌ཝ༌, ཨིས༌ར༌ཨེལ༌པའེ༌ དཀོན༌མཆོག༌གི༌ འི༌ཟུག༌ མོལས༌, ‘རི༌སྟོང༌ངི༌ ནང༌ང༌ ངའ༌ རྩི༌ཝ༌ ཅོས༌ཏེ༌ གའ༌སྟོན༌ རྩི༌ཅེས༌ལ༌ ངའེ༌ མི༌གུན༌ ཆ༌ཅུག༌།’”
EXO 5:2 གྱལ༌པོའེ༌ ཟེརས༌, “ཡ༌ཝ༌ སུ༌ ཨིན༌ནོག༌, ངའེ༌ ཁོའེ༌ ཁའ༌ཉན༌ཏེ༌ ཨིས༌ར༌ཨེལ༌པ༌གུན༌ ཅིའ༌ ཆ༌ཅུག༌ཨིན༌? ངའེ༌ ཡ༌ཝ༌ ཤེས༌ས༌མེད༌ ཡང༌ ངའེ༌ ཨིས༌ར༌ཨེལ༌པ༌གུན༌ ཆ༌ མི༌ཅུག༌།”
EXO 5:3 ཨིན༌ནའང༌ ཁོང༌གུན༌ནི༌ ལན༌ཏངས༌, “ཨིབ༌རི༌པ༌གུན༌ནི༌ དཀོན༌མཆོག༌ ང༌ཞའེ༌ ཇལ༌, ཏ༌ ཡ༌ཝ༌ ང༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌ལ༌ ང༌ཞ༌གུན༌ རི༌སྟོང༌ངི༌ ནང༌ང༌ ཞག༌ སུམ༌མི༌ བེས༌ལ༌ ཆ༌ཅུག༌། ཏེ༌ མན༌ན༌ ཁོང༌ངི༌ ང༌ཞ༌གུན༌ལ༌ ནད༌ རྩོག༌པོ༌ ཡ༌ ར༌འི༌ ཉམ༌པོ༌ ཤི༌ཅུག༌ཨིན༌།”
EXO 5:4 ཨིན༌ནའང༌ གྱལ༌པོའེ༌ ཟེརས༌, “མོ༌ཟེས༌ དང༌ ཨ༌རོན༌, ཅིའ༌ མི༌གུན༌ལ༌ ཁོ༌རང༌གུན༌ནི༌ ལས༌ ཅོ༌ཅུག༌ག༌ མེད༌? རང༌ངི༌ ལས༌ ཅོའ༌ལ༌ ལོགས༌ཏེ༌ སོང༌།
EXO 5:5 ལྟོས༌, འི༌ ས༌ཆའེ༌ ནང༌ང༌ ང༌ཞའེ༌སང༌ མང༌ང༌ ཁྱོ༌ཞ༌གུན༌ནི༌ མི༌ ཡོད༌ཏེ༌ ཨིན༌ནོག༌ ཡང༌ ཁྱོ༌རང༌ངི༌ ཁོང༌གུན༌ལ༌ ལས༌ ཅོ༌ཅེས༌ནེ༌ སྒག༌ ཉིན༌རག༌ག༌?”
EXO 5:6 ཏེན༌ན༌ ཞག༌ག༌ གྱལ༌པོའེ༌ ཨི༌ཇིབ༌པ༌ ཚེ༌ཡོག༌ སྲུལ༌ཁན༌ དང༌ ཨིས༌ར༌ཨེལ༌པ༌ ལས༌སྤོན༌ གུན༌ལ༌ བཀའ༌ ཏངས༌,
EXO 5:7 “སྔུན༌ ཙོགས༌ལ༌ ཨིས༌ར༌ཨེལ༌པ༌གུན༌ལ༌ པག༌བུ༌ ཅོ༌ཅེས༌ལ༌ ཕུག༌མ༌ མ༌ཏང༌། ཁོང༌རང༌གུན༌ལ༌ ཕུག༌མ༌ ཙལ༌ཏེ༌ པག༌བུ༌ ཅོ༌ཅུག༌།
EXO 5:8 ཨིན༌ནའང༌ ཁོང༌གུན༌ནི༌ པག༌བུ༌ སྔུན༌ ཙོགས༌ དྲན༌དྲ༌ ཡོང༌གོས༌, པག༌བུའི༌ རྩི༌རུག༌ ཉུ༌ངུན༌ མ༌ཅོ༌། ཁོང༌གུན༌ལ༌ ལས༌ ཅོ༌མ༌ལམ༌ པ༌སང༌ ཁོང༌གུན༌ནི༌ ཀུ༌ཅོ༌ ཏངས༌ཏེ༌ ‘དཀོན༌མཆོག༌ག༌ ཆོད༌པ༌ ཕུལ༌ལ༌ལ༌ ང༌ཞའ༌ ཆ༌ཅུག༌’ ཟེར༌ར༌ནོག༌།
EXO 5:9 ཟུན༌ཇན༌ སྤེ༌ར༌གུན༌ལ༌ ནང༌སྟག༌ ཏང༌ལོང༌ མི༌ཡོང༌ཅེས༌སི༌ ཕིའ༌ ཁོང༌གུན༌ལ༌ ལས༌ མ༌སྲན༌ཏྲེ༌ ཅོ༌ཅུག༌།”
EXO 5:10 ཏེ༌ནེ༌ ཚེ༌ཡོག༌ སྲུལ༌ཁན༌ དང༌ ཨིས༌ར༌ཨེལ༌པ༌ ལས༌སྤོན༌ གུན༌ ཕི༌ལོག༌ག༌ སོང༌ཏེ༌ མི༌གུན༌ལ༌ ཟེརས༌, “གྱལ༌པོའེ༌ མོལ༌ལ༌རག༌, ‘ངའེ༌ ཏན༌ནེ༌ པར༌ལ༌ ཁྱོ༌ཞ༌གུན༌ལ༌ ཕུག༌མ༌ མི༌ཏང༌།
EXO 5:11 སོང༌ ཡང༌ ཀ༌ནེ༌ ཐོབ༌ནའང༌ ཁྱོ༌ཞ༌གུན༌ནི༌ ཕུག༌མ༌ ཙལ༌ཏེ༌ སྔུན༌ ཙོགས༌ལ༌ དྲན༌དྲ༌ པག༌བུ༌ ཅོས༌།’”
EXO 5:12 ཏེ༌ནེ༌ ཨིས༌ར༌ཨེལ༌པ༌གུན༌ ཨི༌ཇིབ༌ གང༌པོའེ༌ ནང༌ང༌ ཡན༌ཏེ༌ ཕུག༌མ༌ ཙལ༌ལ༌ལ༌ སོང༌།
EXO 5:13 ཨི༌ཇིབ༌པ༌ ཚེ༌ཡོག༌ སྲུལ༌ཁན༌གུན༌ནི༌ ཁོང༌གུན༌ནི༌ཀ༌ ཝང༌ ཀོལ༌ཏེ༌ ཟེརས༌, “ཕུག༌མ༌ ཏང༌ ཟ༌ནེ༌ ཞག༌ག༌ པག༌བུ༌ ཅོ༌ཁན༌ དྲན༌དྲ༌ དག༌སའང༌ ཅོ༌གོས༌།”
EXO 5:14 ཡང༌ ཁོང༌གུན༌ནི༌ ཨིས༌ར༌ཨེལ༌པ༌ ལས༌སྤོན༌ལ༌ སྐོས༌ཁན༌ གུན༌ལ༌ རྡུངས༌ཏེ༌ ཏྲིའད༌པིན༌, “སྔུན༌ ཙོགས༌ལ༌ དའང༌ དང༌ དི༌རིང༌ ཁྱོ༌ཞ༌གུན༌ནི༌ པག༌བུ༌ དྲན༌དྲ༌ ཅིའ༌ མ༌ཅོའ༌ ཨིན༌ནོག༌?”
EXO 5:15 ཏེ༌ནེ༌ ཨིས༌ར༌ཨེལ༌པ༌ ལས༌སྤོན༌གུན༌ གྱལ༌པོ༌ ཡོད༌ས༌ སོང༌ཏེ༌ ཞུ༌ཝ༌ ཕུལས༌, “ཉེ༌རང༌ངི༌ ཡོག༌པོ༌གུན༌ལ༌ འི༌ཟུག༌ ནགས༌ ཅིའ༌ སྟན༌ན༌ ཛད༌དད༌?
EXO 5:16 ང༌ཞ༌གུན༌ལ༌ ཕུག༌མ༌ ཏང༌ང༌ མི༌དུག༌ ཨིན༌ནའང༌ ཚེ༌ཡོག༌ སྲུལ༌ཁན༌གུན༌ནི༌ ‘པག༌བུ༌ དྲན༌དྲ༌ ཅོས༌’ ཟེར༌ཏེ༌ ང༌ཞ༌གུན༌ལ༌ རྡུང༌དུག༌། ཨིན༌ནའང༌ ཏེ༌བོ༌ ང༌ཞའེ༌ སྐྱོན༌ མན༌ ཉེ༌རང༌ངི༌ མི༌གུན༌ནི༌ སྐྱོན༌ ཨིན༌ནོག༌།”
EXO 5:17 གྱལ༌པོའེ༌ ཟེརས༌, “ཁྱོ༌ཞ༌གུན༌ ལས༌མི༌ལམ༌ གྱུར༌ཏེ༌ ལས༌ ཅོ༌ཉིན༌མེད༌པ༌ ཁྱོ༌ཞ༌གུན༌ནི༌ ‘ང༌ཞའ༌ དཀོན༌མཆོག༌ག༌ ཆོད༌པ༌ ཕུལ༌ལ༌ ཆ༌ཅུག༌’ ཟེར༌ར༌ནོག༌།
EXO 5:18 ཏ༌ ལོགས༌ཏེ༌ ལས༌ ཅོའ༌ལ༌ སོང༌། ཁྱོ༌ཞ༌གུན༌ལ༌ ཕུག༌མ༌ མི༌ཏང༌ ཨིན༌ནའང༌ ཁྱོ༌ཞ༌གུན༌ནི༌ པག༌བུ༌ དྲན༌དྲ༌ ཅོ༌གོས༌།”
EXO 5:19 “པག༌བུའི༌ ཀྲངས༌ཀ༌ དྲན༌དྲ༌ ཡོང༌གོས༌” ཟེར༌ཏེ༌ བཀའ༌ ཏང༌ང༌ཅིག༌ ཨིས༌ར༌ཨེལ༌པ༌ ལས༌སྤོན༌གུན༌ལ༌ ནས༌ལུག༌ ཀགས༌པོ༌ གྱུར༌ཅེས༌པོ༌ ཧ༌གོ༌།
EXO 5:20 ཡང༌ ཁོང༌གུན༌ གྱལ༌པོའེ༌ ཁར༌ནེ༌ བིང༌ཏེ༌ ཆ༌ ཟ༌ནེ༌ མོ༌ཟེས༌ དང༌ ཨ༌རོན༌ ཁོང༌གུན༌ལ༌ ཐུག༌ག༌ སྲུངས༌ཏེ༌ ཡོད༌ཁན༌བོ༌ ཐོང༌།
EXO 5:21 ལས༌སྤོན༌གུན༌ནི༌ ཟེརས༌, “ཁྱོ༌ཞའེ༌ གྱལ༌པོ༌ དང༌ ཁོང༌ངི༌ སྤོན༌བོ༌གུན༌ལ༌ ང༌ཞའེ༌ཀ༌ སྲོ༌ ཡོང༌ཅུགས༌པ༌ ཡ༌ཝའེ༌ ཁྱོ༌ཞའ༌ ཁྲིམས༌ཅད༌ དང༌ ཆད༌པ༌ སལ༌ཤིག༌། ཁྱོ༌ཞའེ༌ ཁོང༌གུན༌ལ༌ ང༌ཞའ༌ སད༌ཅེས༌ལ༌ ཉད༌ ཐོབ༌ཅུགས༌ཏེ༌ ཨིན༌ནོག༌།”
EXO 5:22 ཏེ༌ནེ༌ མོ༌ཟེས༌ སོང༌ཏེ༌ ཡང༌སྐྱར༌ ཡ༌ཝ༌ མོས༌ལམ༌ ཞུས༌, “ཡ༌ཝ༌, ཉེ༌རང༌ངི༌ ཅིའ༌ རང༌ངི༌ མི༌གུན༌ལ༌ འི༌ ཙོགས༌སི༌ ནགས༌ སྟན༌ན༌ ཛད༌དད༌? ཅིའ༌ ཉེ༌རང༌ངི༌ ང༌ ཀལ༌ལ༌ ཛད༌པིན༌?
EXO 5:23 ཉེ༌རང༌ངི༌ མོལ༌ཁན༌གུན༌ གྱལ༌པོའ༌ ཟེར༌པ༌ནེ༌ ཕར༌ལ༌ ཁོའེ༌ ཉེ༌རང༌ངི༌ མི༌གུན༌ལ༌ མང༌ང༌ ནགས༌ སྟནས༌ ཡང༌ ཉེ༌རང༌ངི༌ ཁོང༌གུན༌ ཐར༌ཅུག༌ཅེས༌ལ༌ ཅའང༌ ཛད༌ད༌ མི༌དུག༌།”
EXO 6:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཏ༌ ངའེ༌ གྱལ༌པོའ༌ ཅོ༌ཅེས༌ཅན༌གུན༌ ཁྱོ༌རང༌ངི༌ ཐོང༌ཨིན༌། ངའེ༌ ཤེད༌ དང༌ ཁྱུད༌དི༌ ཞས༌ཏེ༌ ཁོའེ༌ ཁོང༌གུན༌ ཆ༌ཅུག༌ཨིན༌། ཏེན༌ན༌ ཁྱུད༌ དང༌ ཤེད༌པོའེ༌ ཁོའེ༌ ཁོང༌གུན༌ འི༌ ས༌ཀྱད༌ནེ༌ ཕིངས༌ཏེ༌ ཏང༌ཨིན༌།”
EXO 6:2 དཀོན༌མཆོག༌གི༌ མོ༌ཟེས༌ལ༌ མོལས༌, “ང༌ ནི༌ ཡ༌ཝ༌ ཨིན༌།
EXO 6:3 ང༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌ གུན༌ལ༌ དཀོན༌མཆོག༌ ཀུན༌ཝང༌ངི༌ ཚུལ༌ལ༌ སྔོན༌ཅུགས༌ཏེ༌ ཨིན༌། ཨིན༌ནའང༌ ངའེ༌ ཁོང༌གུན༌ལ༌ ང༌ ‘ཡ༌ཝའེ༌’ མིང༌ངི༌ ནང༌ང༌ སྔོན༌ མ༌ཅུགས༌པིན༌།
EXO 6:4 ངའེ༌ ཀེ༌ནན༌ནི༌ ས༌ཆ༌ ཁོང༌གུན༌ལ༌ ཏང༌ཅེས༌སི༌ ཆད༌དོན༌བོ༌ ཅོས༌པིན༌ ཀ༌རུ༌ ཁོང༌གུན༌ ཞན༌ཡུལ༌ལི༌ མི༌ ཚུལ༌ལ༌ དུག༌གད༌པིན༌།
EXO 6:5 ངའེ༌ ཨི༌ཇིབ༌པ༌གུན༌ནི༌ ཚེ༌ཡོག༌, ཨིས༌ར༌ཨེལ༌པ༌གུན༌ནི༌ རྡུག༌ངལ༌ལི༌ སྐད༌གུན༌ནའང༌ ཚོར༌ ཡང༌ ངའ༌ ངའེ༌ ཆད༌དོན༌ ཅོ༌ཁན༌བོ༌ ཨིད༌ཏུ༌ ཡོངས༌།”
EXO 6:6 “ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ལ༌ ཟེར༌, ‘ང༌ ཡ༌ཝ༌ ཨིན༌, ཡང༌ ངའེ༌ ཁྱོ༌ཞ༌གུན༌ ཨི༌ཇིབ༌པ༌གུན༌ནི༌ རྡུག༌ངལ༌ལི༌ ཡོག༌ནེ༌ ཕིངས༌ཏེ༌ ཁོང༌ངི༌ ཚེ༌ཡོག༌ནེ༌ ཐར༌ཅུག༌ཨིན༌། ངའེ༌ ཤེད༌ ཡང༌ ཁོང༌གུན༌ལ༌ ཆད༌པ༌ སྲན༌ཏྲེ༌ ཏང༌ཅེས༌ གྱུད༌ཏེ༌ ཁྱོ༌ཞ༌གུན༌ སྐྱོབ༌ཨིན༌།
EXO 6:7 ཁྱོ༌ཞ༌གུན༌ ང༌རང༌ངི༌ མི༌ ཡང༌ ང༌ ཁྱོ༌ཞ༌གུན༌ནི༌ དཀོན༌མཆོག༌ གྱུར༌ཨིན༌། ཏེ༌ནེ༌ ངའ༌, ཁྱོ༌ཞའ༌ ཨི༌ཇིབ༌པ༌གུན༌ནི༌ སྟན༌ཁན༌ནི༌ ནགས༌བར༌དོ༌ནེ༌ ཐར༌ཅུག༌ག༌ ཛད༌ཁན༌ནི༌ ཡ༌ཝ༌ ཁྱོ༌ཞའེ༌ དཀོན༌མཆོག༌ ཨིན༌ཁན༌ ཁྱོ༌ཞའ༌ ཧ༌གོ༌ཨིན༌།
EXO 6:8 ངའེ༌ ཁྱོ༌ཞ༌གུན༌ ཏེ༌ ས༌ཆའེ༌ ནང༌ང༌ ཁྱེར༌ཨིན༌ ཀ༌བོ༌ ངའེ༌ ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བ༌ ཏང༌ཅེས༌སི༌ ནའ༌ ཁུར༌པིན༌། ཏེ༌བོ༌ ཏུས༌གྱུན༌ནི༌ ཕིའ༌ ཁྱོ༌ཞའེ༌ གྱུ༌ནོར༌ གྱུར༌ཨིན༌, ང༌ ཡ༌ཝ༌ ཨིན༌།’”
EXO 6:9 མོ༌ཟེས༌སི༌ ཡ༌ཝའེ༌ མོལ༌ཁན༌གུན༌ ཨིས༌ར༌ཨེལ༌པ༌གུན༌ལ༌ ཤདས༌ ཨིན༌ནའང༌ ཁོང༌གུན༌ནི༌ མ༌ཉནས༌ ཅིའ༌ཟེར༌ན༌ ནགས༌ སྲན༌ཏྲེ༌ སྟན༌ཅེས༌པོའེ༌ ཁོང༌གུན༌ནི༌ སེམ༌སྟོབས༌ ཆགས༌ཏེ༌ ཡོད༌པིན༌།
EXO 6:10 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌,
EXO 6:11 “ཨི༌ཇིབ༌བི༌ གྱལ༌པོ༌ ཡོད༌ས༌ སོང༌ཏེ༌ ཨིས༌ར༌ཨེལ༌པ༌གུན༌ ཁོའེ༌ ཡུལ༌ནེ༌ ཆ༌ཅུག༌ ཟེར༌།”
EXO 6:12 ཨིན༌ནའང༌ མོ༌ཟེས༌སི༌ ཡ༌ཝའ༌ ཟེརས༌, “ང༌རང༌ངི༌ མི༌གུན༌ནི༌ ངའེ༌ ཁའ༌ ཉན༌ན༌ མི༌དུག༌། ཏེ༌ནེ༌ ང༌ སྤེ༌ར༌ ཏང༌ཁན༌ གྱལ༌ལ༌ མན༌ པ༌སང༌ གྱལ༌པོའེ༌ ངའེ༌ ཁའ༌ ཅིའ༌ ཉན༌ཨིན༌?”
EXO 6:13 ཨིན༌ནའང༌ ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ བཀའ༌ སལ༌ཏེ༌ མོལས༌, “ཨིས༌ར༌ཨེལ༌པ༌གུན༌ དང༌ གྱལ༌པོའ༌ ངའེ༌ ཁྱོ༌ཞའ༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིང༌ཏེ༌ ཁྱེར༌ཅེས༌སི༌ ཁག༌ གལ༌ཁན༌བོ༌ ཤོད༌།”
EXO 6:14 འི༌གུན༌ མོ༌ཟེས༌ དང༌ ཨ༌རོན༌ནི༌ ཕ༌མེས༌པོ༌གུན༌ ཨིན༌ནོག༌: ཨིས༌ར༌ཨེལ༌ལི༌ གོ༌བུ༌ བུ༌ཚ༌ རུ༌བེན༌ ནི༌ བུ༌ཚ༌གུན༌ ཧ༌ནོག༌, པ༌ལུ༌, ཧེཟ༌རོན༌ དང༌ ཀར༌མི༌ གུན༌ ཨིན༌། ཁོང༌གུན༌ནི༌ པུར༌གྱུད༌ རུ༌བེན༌ནི༌ མི༌སྡེ༌གུན༌ གྱུར༌།
EXO 6:15 སི༌མི༌འོན༌ནི༌ བུ༌ཚ༌གུན༌ ཡེ༌མའུལ༌, ཡ༌མིན༌, ཨོ༌ཧད༌, ཡ༌ཀིན༌, ཟོ༌ཧར༌ དང༌ ཤོལ༌, ཡང༌ ཤོལ༌ལི༌ ཨ༌མ༌ ཀེ༌ནན༌མ༌ ཨིན༌པིན༌། ཁོང༌གུན༌ནི༌ པུར༌གྱུད༌ སི༌མི༌འོན༌ནི༌ མི༌སྡེ༌གུན༌ གྱུར༌།
EXO 6:16 ཐོ༌ ཅོས༌ཏེ༌ ཡོད༌ཁན༌ ནང༌ཞིན༌ ལི༌ཝི༌ བུ༌ཚ༌གུན༌ གེར༌ཤོན༌, ཀོ༌ཧད༌ དང༌ མི༌ར༌རི༌ གུན༌ ཨིན༌པིན༌། ལི༌ཝི༌ ལོ༌ 137 ཚག༌པ༌ སོན༌ཏེའ༌ ལུས༌།
EXO 6:17 གེར༌ཤོན༌ནི༌ བུ༌ཚ༌གུན༌ ལིབ༌ནི༌ དང༌ ཤི༌མེའི༌ ཨིན༌ནོག༌། ཁོང༌གུན༌ འིན༌ན༌ མིང༌ ཡོད༌ཁན༌ནི༌ མི༌སྡེ༌གུན༌ནི༌ ཕ༌མེས༌པོ༌ ཨིན༌པིན༌།
EXO 6:18 ཀོ༌ཧད༌དི༌ བུ༌ཚ༌གུན༌ ཨམ༌རམ༌, ཨིཟ༌ཧར༌, ཧེབ༌རོན༌ དང༌ འུ༌ཟེལ༌ གུན༌ ཨིན༌ནོག༌། ཀོ༌ཧད༌ ལོ༌ 133 ཚག༌པ༌ སོན༌ཏེའ༌ ལུས༌།
EXO 6:19 མི༌ར༌རི༌ བུ༌ཚ༌གུན༌ མ༌ཧིལ༌ དང༌ མུ༌ཤི༌ ཨིན༌ནོག༌། ཐོ༌ ནང༌ཞིན༌ ཁོང༌གུན༌ ལི༌ཝི༌ མི༌སྡེ༌གུན༌ ཨིན༌ནོག༌།
EXO 6:20 ཨམ༌རམ༌མི༌ ཁོ༌རང༌ངི༌ ཨ༌བའེ༌ སྲིང༌མོ༌ ཡོ༌ཤེ༌བེད༌ ཉམ༌པོ༌ ན༌མ༌ ཅོས༌ ཡང༌ ཏེ༌ བུ༌མོའ༌ ཨ༌རོན༌ དང༌ མོ༌ཟེས༌ བུ༌ཚ༌གུན༌ ཇོར༌། ཨམ༌རམ༌ ལོ༌ 137 ཚག༌པ༌ སོན༌ཏེའ༌ ལུས༌།
EXO 6:21 ཨིཟ༌ཧར༌རི༌ བུ༌ཚ༌གུན༌ ཀོ༌རཧ༌, ནི༌ཕེག༌ དང༌ ཟིཀ༌རི༌ གུན༌ ཨིན༌ནོག༌།
EXO 6:22 འུ༌ཟེལ༌ལི༌ བུ༌ཚ༌གུན༌ མི༌ཤེལ༌, ཨེལ༌ཟ༌ཕན༌ དང༌ སིཐ༌རི༌ གུན༌ ཨིན༌ནོག༌།
EXO 6:23 ཨ༌རོན༌ ནི༌ ཨམ༌མི༌ན༌དབ༌བི༌ བུ༌མོ༌ ན༌ཧ༌ཤོན༌ནི༌ སྲིང༌མོ༌ ཨིལ༌ཤི༌བ༌ ཉམ༌པོ༌ ན༌མ༌ ཅོས༌། ཁོའ༌ བུ༌ཚ༌ ཞི༌ སྐྱེས༌, ཁོང༌གུན༌ ན༌དབ༌, ཨ༌བི༌ཧུ༌, ཨེ༌ལི༌འ༌ཟར༌ དང༌ ཨི༌ཐ༌མར༌ གུན༌ ཨིན༌ནོག༌།
EXO 6:24 ཀོ༌རཧའེ༌ བུ༌ཚ༌གུན༌ ཨ༌སིར༌, ཨེལ༌ཀ༌ནཧ༌ དང༌ ཨ༌བི༌ཨ༌སབ༌ གུན༌ ཨིན༌། ཁོང༌གུན༌ནི༌ པུར༌གྱུད༌ ནི༌ ཀོ༌རཧའེ༌ མི༌སྡེ༌གུན༌ ཨིན༌ནོག༌།
EXO 6:25 ཨ༌རོན༌ནི༌ བུ༌ཚ༌ ཨེ༌ལི༌འ༌ཟར༌རི༌ པུ༌ཀྲེལ༌ལི༌ བུ༌མོ༌ ཉམ༌པོ༌ ན༌མ༌ ཅོས༌ ཡང༌ ཁོའ༌ བུ༌ཚ༌ ཕི༌ནི༌ཧས༌ སྐྱེས༌། མི༌སྡེ༌ ནང༌ཞིན༌ ཁོང༌གུན༌ ལི༌ཝི༌ ནང༌ཚངས༌གུན༌ནི༌ གོ༌སྐྱོང༌གུན༌ ཨིན༌ནོག༌།
EXO 6:26 ཁོང༌གུན༌ ཏེན༌ན༌ ཨ༌རོན༌ དང༌ མོ༌ཟེས༌ ཨིན༌ནོག༌ ཀ༌གུན༌ལ༌ ཡ༌ཝའེ༌ མོལས༌, “ཨིས༌ར༌ཨེལ༌པ༌གུན༌ ཁོང༌གུན༌ནི༌ སྡེ༌ ནང༌ཞིན༌ ཨི༌ཇིབ༌ནེ༌ ཕིངས༌ཏེ༌ ཁྱེར༌།”
EXO 6:27 ཁོང༌གུན༌, ཨི༌ཇིབ༌བི༌ གྱལ༌པོའ༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱེར༌ཅེས༌སི༌ སྐོར༌ལ༌ ཟེར༌ཁན༌ནི༌ ཏེན༌ན༌ མོ༌ཟེས༌ དང༌ ཨ༌རོན༌ ཨིན༌ནོག༌།
EXO 6:28 ཡ༌ཝའེ༌ མོ༌ཟེས༌ལ༌ ཨི༌ཇིབ༌བི༌ ས༌ཆའེ༌ ནང༌ང༌ ཞལ༌ཏ༌ སལ༌ ཟ༌ནེ༌
EXO 6:29 ཁོང༌ངི༌ ཁོའ༌ མོལས༌, “ང༌ ཡ༌ཝ༌ ཨིན༌། ངའེ༌ ཁྱོ༌རང༌ང༌ ཟེར༌ཁན༌ ཚང༌མ༌ ཨི༌ཇིབ༌བི༌ གྱལ༌པོའ༌ ཤོད༌།”
EXO 6:30 ཨིན༌ནའང༌ མོ༌ཟེས༌སི༌ ཡ༌ཝའ༌ ཟེརས༌, “ངའ༌ ཏེ༌བོ༌ ཅོ༌ཉན༌ཅེས༌ མེ༌རག༌། ང༌ སྤེ༌ར༌ གྱལ༌ལ༌ ཏང༌ མ༌ཉན༌ཁན༌ ཞིག༌ག༌ གྱལ༌པོའེ༌ ཅིའ༌ ཉན༌ཨིན༌?”
EXO 7:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཁྱོ༌རང༌ གྱལ༌པོའེ༌ ཕིའ༌ དཀོན༌མཆོག༌ ཙོགས༌ ཡང༌ ཁྱོ༌རང༌ངི༌ ཨ༌ཅོ༌ ཨ༌རོན༌ ཁྱོ༌རང༌ངི༌ ཕིའ༌ ལུང༌སྟོན༌པ༌ ཙོགས༌ ཅོས༌ཏེ༌ ཨིན༌།
EXO 7:2 ངའེ༌ ཁྱོ༌རང༌ང༌ བཀའ༌ ཏང༌ཁན༌ ཚང༌མ༌ ཨ༌རོན༌ལ༌ ཤོད༌ ཡང༌ ཁོའེ༌ གྱལ༌པོའ༌ ཨིས༌ར༌ཨེལ༌པ༌གུན༌ ཁོའེ༌ ཡུལ༌ནེ༌ བིང༌ཏེ༌ ཆ༌ཅུག༌ཅེས༌ལ༌ ཟེར༌གོས༌།
EXO 7:3 ཨིན༌ནའང༌ ངའེ༌ གྱལ༌པོའེ༌ སྙིང༌ སྐྱོང༌པོ༌ གྱུར༌ཅུག༌ཨིན༌ ཡང༌ ངའེ༌ ཨི༌ཇིབ༌བི༌ ས༌ཆའེ༌ ནང༌ང༌ ཧ༌ལས༌ཤེས༌སི༌ སྟགས༌ དང༌ ལྟས༌ མང༌པོ༌ སྟན༌ཨིན༌།
EXO 7:4 ཏེ༌ནེའང༌ གྱལ༌པོའེ༌ ཁྱོ༌རང༌ངི༌ ཟེར༌ཁན༌བོ༌ མི༌ཉན༌། ཏེ༌ནེ༌ ངའེ༌ ཨི༌ཇིབ༌པ༌གུན༌ནི༌ཀ༌ ཀྲག༌པོ༌ ཆད༌པ༌གུན༌ གྱུད༌ཏེ༌ ང༌རང༌ངི༌ མི༌གུན༌ ཁོང༌གུན༌ནི༌ སྡེ༌ ནང༌ཞིན༌ ཨི༌ཇིབ༌བི༌ ས༌ཆའེ༌ ནང༌ནེ༌ ཕིང༌ཏེ༌ ཁྱེར༌ཨིན༌།
EXO 7:5 ངའེ༌ ང༌རང༌ངི༌ སྟོབས༌ཤུགས༌ཅན༌ནི༌ ལག༌པ༌ ཨི༌ཇིབ༌པ༌གུན༌ནི༌ གྱབ༌གལ༌ལ༌ རྐྱངས༌ཏེ༌ ཨིས༌ར༌ཨེལ༌པ༌གུན༌ ཕིངས༌ཏེ༌ ཁྱེར༌ར༌ཅིག༌ ང༌ ཡ༌ཝ༌ དཀོན༌མཆོག༌ ཨིན༌ཁན༌བོ༌ ཁོང༌གུན༌ནི༌ ཧ༌གོ༌ཨིན༌།”
EXO 7:6 ཏེ༌ནེ༌ མོ༌ཟེས༌ དང༌ ཨ༌རོན༌ནི༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོས༌།
EXO 7:7 གྱལ༌པོའ༌ ཏེ༌གུན༌ ཟེར༌ ཟ༌ནེ༌ མོ༌ཟེས༌ལ༌ ལོ༌ 80 ཡང༌ ཨ༌རོན༌ལ༌ ལོ༌ 83 ཆའད༌པིན༌།
EXO 7:8 ཏེ༌ནེ༌ ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ མོལས༌,
EXO 7:9 “གྱལ༌པོའེ༌ ལྟས༌ ལྟོན༌ ཟེར༌ར༌ཅིག༌, ཨ༌རོན༌ལ༌ ཟེར༌, ‘ཁྱོ༌རང༌ངི༌ བེར༌ཀ༌ ཁུར༌ཏེ༌ གྱལ༌པོའེ༌ དུན༌ལ༌ ཕོང༌ ཡང༌ ཏེ༌བོ༌ རུལ༌ལ༌ གྱུར༌ཨིན༌།’”
EXO 7:10 ཏེ༌ནེ༌ མོ༌ཟེས༌ དང༌ ཨ༌རོན༌ གྱལ༌པོ༌ ཡོད༌ས༌ སོང༌ཏེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོས༌། ཨ༌རོན༌ནི༌ ཁོ༌རང༌ངི༌ བེར༌ཀ༌ གྱལ༌པོ༌ དང༌ ཁོའེ༌ སྤོན༌བོ༌གུན༌ནི༌ དུན༌ལ༌ ཕངས༌པ༌ རུལ༌ལ༌ གྱུར༌།
EXO 7:11 ཏེ༌ནེ༌ གྱལ༌པོའེ༌ ཁོ༌རང༌ངི༌ མི༌ ཁས༌པ༌གུན༌ དང༌ སེམ༌ཉིད༌ལ༌ བོད༌ཁན༌གུན༌ བོད༌ཏེ༌ ཁྱོངས༌ ཡང༌ ཏེ༌ ཨི༌ཇིབ༌པ༌ ཆོས༌ངན༌ ཅོ༌ཁན༌གུན༌ནི༌ ཁོ༌རང༌གུན༌ནི༌ སང༌ཝའེ༌ ཁྱུད༌ གྱུད༌ཏེ༌ ཏེན༌ན༌ ཙོགས༌ ཅོས༌།
EXO 7:12 ཁོང༌ རེ༌རེ༌ བེར༌ཀ༌གུན༌ ཕངས༌པ༌ རུལ༌ལ༌ གྱུར༌། ཨིན༌ནའང༌ ཨ༌རོན༌ནི༌ བེར༌ཀ༌ རུལ༌ གྱུར༌ཁན༌བོའེ༌ ཁོང༌གུན༌ནི༌ བེར༌ཀ༌ རུལ༌ གྱུར༌ཁན༌གུན༌ ཟོས༌ ཏངས༌།
EXO 7:13 གྱལ༌པོའེ༌ སྙིང༌ ཏ༌རུང༌ངའང༌ སྐྱོང༌པོ༌ ལུས༌ ཡང༌ ཁོའེ༌ ཁོང༌གུན༌ནི༌ ཟེར༌ཁན༌གུན༌ལ༌ མ༌ཉནས༌ ཀ༌ཟུག༌ ཡ༌ཝའེ༌ མོལ༌ལ༌ ཛད༌ཏེ༌ ཨིན༌པིན༌།
EXO 7:14 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “གྱལ༌པོའེ༌ སྙིང༌ སྐྱོང༌པོ༌ ལུས༌ཏེ༌ ཁོའེ༌ ངའེ༌ མི༌གུན༌ ཆ༌ཅུག༌ག༌ མི༌དུག༌།
EXO 7:15 ང༌མོ༌ གྱལ༌པོ༌ ཐུར༌ལ༌ ལྩངས༌པོའ༌ ཆའ༌ ཟ༌ནེ༌ ཁོའ༌ ཐུག༌ཅེས༌ལ༌ ཁྱོ༌རང༌ ནཱའེལ༌ ལྩངས༌པོའེ༌ ཐའ༌མ༌ ལངས༌ཏེ༌ དུག༌ ཡང༌ རུལ༌ གྱུར༌ཁན༌ནི༌ བེར༌ཀ༌ ཁུར༌ཏེ༌ སོང༌།
EXO 7:16 ཁོའ༌ ཟེར༌ ‘ཡ༌ཝ༌, ཨིབ༌རི༌པའེ༌ དཀོན༌མཆོག༌གི༌ ང༌ ཁྱོ༌རང༌ང༌ འི༌བོ༌ ཟེར༌ར༌ལ༌ ལམ༌ཅུགས༌, “རི༌སྟོང༌ངི༌ ནང༌ང༌ ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།” དག༌ས༌ ཚག༌པ༌, ཁྱོ༌རང༌ངི༌ ཁོང༌ངི༌ མོལ༌ཁན༌བོའ༌ མ༌ཉན༌ན༌ ཨིན༌ནོག༌།
EXO 7:17 ཡ༌ཝའེ༌ འི༌ཟུག༌ མོལས༌, “ངའེ༌ ཁྱོ༌རང༌ང༌ ང༌ ཡ༌ཝ༌ ཨིན༌ཁན༌བོ༌ སྟན༌ཨིན༌།” ལྟོས༌, ངའེ༌ ལག༌པའེ༌ ནང༌ང༌ ཡོད༌ཁན༌ནི༌ བེར༌ཀ༌ ངའེ༌ ནཱའེལ༌ལི༌ ཆུའ༌ གྱབ༌ཨིན༌ ཡང༌ ལྩངས༌པོའེ༌ ཆུ༌ ཁྲག༌ག༌ གྱུར༌ཨིན༌།
EXO 7:18 ཏེ༌ནང༌ང༌ ཡོད༌ཁན༌ནི༌ ཉ༌གུན༌ ཤི༌ཨིན༌ ཡང༌ ལྩངས༌པོའེ༌ ནང༌ནེ༌ ཏྲི༌མ༌ རྩོག༌པོ༌ ཡོང༌ཨིན༌། ཨི༌ཇིབ༌པ༌གུན༌ནི༌ ནཱའེལ༌ལི༌ ཆུ༌ ཐུང༌ མི༌ཉན༌།’”
EXO 7:19 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ལ༌ ཟེར༌, ‘ཁྱོ༌རང༌ངི༌ བེར༌ཀ༌ ཁུར༌ཏེ༌ རང༌ངི༌ ལག༌པ༌ ཨི༌ཇིབ༌བི༌ ཆུ༌གུན༌ ཡང༌ན༌ ལྩངས༌པོ༌, ཡུ༌ར༌, ཟིང༌, ཡང༌ ཆུ༌ སགས༌ཏེ༌ བོར༌ས༌ ཚང༌མའེ༌ཀ༌ སྐྱོང༌’ ཡང༌ ཏེ༌ ཆུ༌ ཚང༌མ༌ ཁྲག༌ག༌ གྱུར༌ཨིན༌། ཨི༌ཇིབ༌བི༌ ཆུ༌ ཚང༌མ༌ ཁྲག༌ག༌ གྱུར༌ཨིན༌, ཤིང༌ དང༌ རྡོའེ༌ ཆུ༌སྣོད༌གུན༌ནི༌ ཆུ༌ གུན༌ནའང༌།”
EXO 7:20 མོ༌ཟེས༌ དང༌ ཨ༌རོན༌ནི༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོས༌། གྱལ༌པོ༌ དང༌ ཁོའེ༌ སྤོན༌བོ༌གུན༌ནི༌ དུན༌ལ༌ ཨ༌རོན༌ནི༌ ཁོ༌རང༌ངི༌ བེར༌ཀ༌ སྟགས༌ཏེ༌ ནཱའེལ༌ ལྩངས༌པོའ༌ གྱབས༌པ༌ ལྩངས༌པོའེ༌ ཆུ༌ གང༌པོ༌ ཁྲག༌ག༌ གྱུར༌།
EXO 7:21 ལྩངས༌པོའེ༌ ནང༌ང༌ ཡོད༌ཁན༌ནི༌ ཉ༌གུན༌ ཤི༌ ཡང༌ ཆུའི༌ ནང༌ནེ༌ ཏྲི༌མ༌ རྩོག༌པོ༌ ཡོངས༌ ཡང༌ ཨི༌ཇིབ༌པ༌གུན༌ནི༌ ཏེ༌ ཆུ༌གུན༌ ཐུང༌ མ༌ཉན༌། ཨི༌ཇིབ༌བི༌ ས༌ཆ༌ གང༌པོའེ༌ ནང༌ང༌ ཁྲག༌ གྱུག༌།
EXO 7:22 ཨིན༌ནའང༌ ཨི༌ཇིབ༌པ༌ ཆོས༌ངན༌ ཅོ༌ཁན༌གུན༌ནིའང༌ ཁོང༌རང༌གུན༌ནི༌ སང༌ཝའེ༌ ཁྱུད༌ གྱུད༌ཏེ༌ ཆུ༌གུན༌ ཁྲག༌ག༌ གྱུར༌ཅུགས༌, ཏེ༌བོའེ༌ཕིའ༌ གྱལ༌པོའེ༌ སྙིང༌ ཏ༌རུང༌ངའང༌ སྐྱོང༌པོ༌ ལུས༌ཏེ༌ ཁོའེ༌ མོ༌ཟེས༌ དང༌ ཨ༌རོན༌ནི༌ ཟེར༌ཁན༌བོའ༌ མ༌ཉནས༌ ཀ༌ཟུག༌ ཡ༌ཝའེ༌ མོལ༌ཏེ༌ ཨིན༌པིན༌།
EXO 7:23 གྱལ༌པོ༌ ཁོ༌རང༌ངི༌ ཁར༌ལ༌ ལོགས༌ཏེ༌ སོང༌ ཡང༌ འི༌ ཚང༌མའེ༌ཀ༌ སྣང༌ང༌ མ༌ཏངས༌།
EXO 7:24 ནཱའེལ༌ལི༌ ཆུ༌ ཐུང༌ མ༌ཉན༌ པ༌སང༌ ཨི༌ཇིབ༌པ༌ ཚང༌མའེ༌ ལྩངས༌པོའེ༌ ཉེ༌ཁོར༌རི༌ ས༌ཀྱད༌གུན༌ བྲུས༌ཏེ༌ ཐུང༌ཅེས༌སི༌ ཆུ༌ ཙལས༌།
EXO 7:25 ཡ༌ཝའེ༌ ནཱའེལ༌ལི༌ ཆུ༌ ཁྲག༌ག༌ གྱུར༌ཅུག༌ག༌ ཛད༌ཏེ༌ ཞག༌མ༌ རྡུན༌ བུད༌།
EXO 8:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “གྱལ༌པོ༌ ཡོད༌ས༌ སོང༌ ཡང༌ ཁོའ༌ ཟེར༌, ‘ཡ༌ཝའེ༌ འི༌ཟུག༌ མོལས༌, ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།
EXO 8:2 ཀལ༌ཏེས༌ ཁྱོ༌རང༌ངི༌ ཁོང༌གུན༌ ཆ༌ མ༌ཅུག༌ན༌ ངའེ༌ ཁྱོ༌རང༌ངི༌ ས༌ཆ༌ གང༌པོའེ༌ ནང༌ང༌ བལ༌པ༌ གང༌ཅུག༌ཨིན༌།
EXO 8:3 ནཱའེལ༌ ལྩངས༌པོ༌ བལ༌པའེ༌ གང༌ཨིན༌ ཡང༌ ཏེ༌གུན༌ ཆུའི༌ ནང༌ནེ༌ བིངས༌ཏེ༌ ཁྱོ༌རང༌ངི༌ ཁར༌ དང༌ ཁྱོ༌རང༌ ཉིད༌ལོག༌སའེ༌ ནང༌ དང༌ མལ༌ཙེ༌ ནང༌ང༌ ཡོང༌ཨིན༌། ཏེ༌གུན༌ ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ནི༌ ཁང༌པའེ༌ ནང༌ང༌ ཡང༌ ཁྱོ༌ཞའེ༌ ཁར༌ཇི༌ སྐོལ༌སའེ༌ ཐབ༌ དང༌ པག༌པའེ༌ རུ༌སའེ༌ ཞོང༌པ༌ གུན༌ནི༌ ནང༌ང༌ ཞུགས༌ཨིན༌།
EXO 8:4 བལ༌པ༌གུན༌ ཁྱོ༌རང༌, ཁྱོ༌རང༌ངི༌ སྤོན༌བོ༌ དང༌ མི༌གུན༌ནི༌ཀ༌ ལྕེབ༌ཨིན༌།’”
EXO 8:5 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ལ༌ ཟེར༌, ‘ཁྱོ༌རང༌ངི༌ ལག༌ག༌ ཡོད༌ཁན༌ནི༌ བེར༌ཀ༌ ཨི༌ཇིབ༌བི༌ ལྩངས༌པོ༌, ཡུ༌ར༌ དང༌ ཟིང༌ ཚང༌མའེ༌ཀ༌ རྐྱངས༌ཏེ༌ བལ༌པ༌གུན༌ ཨི༌ཇིབ༌བི༌ ས༌ཀྱད༌ གང༌པོའེ༌ ནང༌ང༌ གང༌ཅུག༌།’”
EXO 8:6 ཏེ༌ནེ༌ ཨ༌རོན༌ནི༌ ཁོ༌རང༌ངི༌ ལག༌པ༌ ཨི༌ཇིབ༌བི༌ ཆུ༌ ཚང༌མའེ༌ཀ༌ རྐྱངས༌པ༌ ཆུའི༌ ནང༌ནེ༌ བལ༌པ༌ བིང༌ཏེ༌ ཨི༌ཇིབ༌བི༌ ས༌ཀྱད༌ གང༌པོ༌ ཀབས༌།
EXO 8:7 ཨིན༌ནའང༌ ཆོས༌ངན༌ ཅོ༌ཁན༌གུན༌ནིའང༌ སང༌ཝའེ༌ ཁྱུད༌ ཀོལ༌ཏེ༌ ཏེན༌ན༌ ཙོགས༌ ཅོས༌། ཁོང༌གུན༌ནིའང༌ ཆུའི༌ ནང༌ནེ༌ བལ༌པ༌ ཨི༌ཇིབ༌བི༌ ས༌ཀྱད༌དི༌ཀ༌ བིང༌ཅུགས༌།
EXO 8:8 ཏེ༌ནེ༌ གྱལ༌པོའེ༌ མོ༌ཟེས༌ དང༌ ཨ༌རོན༌ལ༌ བོད༌ཏེ༌ ཟེརས༌, “ང༌ དང༌ ངའེ༌ མི༌གུན༌ནི༌ ཀ༌ནེ༌ བལ༌པ༌ ཚང༌མ༌ མེད༌ཁན༌ ཅོ༌ཅེས༌ལ༌ ཡ༌ཝ༌ མོས༌ལམ༌ ཞུས༌ ཏེ༌ནེ༌ ཁོང༌ང༌ ཆོད༌པ༌ ཕུལ༌ཅེས༌ལ༌ ངའེ༌ ཁྱོ༌ཞའེ༌ མི༌གུན༌ ཆ༌ཅུག༌ཨིན༌།”
EXO 8:9 མོ༌ཟེས༌སི༌ གྱལ༌པོའ༌ ཟེརས༌, “ཁྱོ༌རང༌ངི༌ ལྡམས༌ཁན༌ནི༌ ཏུས༌པོའེ༌ཀ༌ ངའེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ ཡང༌ ཁྱོ༌ཞའེ༌ ཁང༌པ༌གུན༌ནི༌ ནང༌ནེ༌ བལ༌པ༌གུན༌ མེད༌ཁན༌ ཆ༌ཅེས༌ལ༌ མོས༌ལམ༌ ཞུ༌ཨིན༌། ལྩངས༌པོ༌ ནཱའེལ༌ ཅིག༌པོའེ༌ ནང༌ང༌ ཏེ༌གུན༌ ལུས༌ཨིན༌།”
EXO 8:10 གྱལ༌པོའེ༌ ཟེརས༌, “ཐོ༌རེ༌ ཅོས༌།” མོ༌ཟེས༌སི༌ ལན༌ཏངས༌, “ཁྱོ༌རང༌ངི༌ ཟེར༌ཁན༌ ནང༌ཞིན༌ ཏེ༌བོ༌ གྲུབ༌ཨིན༌། ཏེ༌ནེ༌ ཁྱོ༌རང༌ང༌ ཡ༌ཝ༌ ང༌ཞའེ༌ དཀོན༌མཆོག༌ ཙོགས༌ སུའང༌ མེད༌ཁན༌བོ༌ ཧ༌གོ༌ཡིན༌།
EXO 8:11 བལ༌པ༌གུན༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ནི༌ ཁང༌པ༌གུན༌ནི༌ ནང༌ནེ༌ བིང༌ཏེ༌ ཆེན༌། ལྩངས༌པོ༌ ནཱའེལ༌ ཅིག༌པོའེ༌ ནང༌ང༌ ལུས༌ཨིན༌།”
EXO 8:12 མོ༌ཟེས༌ དང༌ ཨ༌རོན༌ གྱལ༌པོའེ༌ ཁར༌ནེ༌ བིང༌ཏེ༌ སོང༌ ཡང༌ མོ༌ཟེས༌སི༌ ཡ༌ཝ༌ བལ༌པ༌གུན༌ མེད༌ཁན༌ ཛད༌ཅེས༌ལ༌ མོས༌ལམ༌ ཞུས༌ ཀ༌གུན༌ ཁོང༌ངི༌ གྱལ༌པོའེ༌ ས༌ཆའེ༌ ནང༌ང༌ ཁྱོང༌ང༌ ཛདས༌།
EXO 8:13 ཡང༌ ཡ༌ཝའེ༌ མོ༌ཟེས༌སི༌ ཞུ༌ཝ༌ ཕུལ༌ཁན༌བོ༌ ཛདས༌། ཁང༌པ༌, ནང༌སྐོར༌ དང༌ ཞིང༌ གུན༌ནི༌ ནང༌ང༌ ཡོད༌ཁན༌ བལ༌པ༌ ཚང༌མ༌ ཤི༌།
EXO 8:14 མི༌གུན༌ནི༌ བལ༌པ༌ ཤི༌ཁན༌ ཚང༌མ༌ ལྡུས༌ཏེ༌ སྤུངས༌ ཡང༌ ཡུལ༌ གང༌པོའེ༌ ནང༌ང༌ ཏྲི༌ངན༌ གངས༌།
EXO 8:15 ཨིན༌ནའང༌ གྱལ༌པོའ༌ ཏེ༌ རྡུག༌ངལ༌བོ༌ མེད༌ཁན༌ ཆའ༌ ཐོང༌ང༌ཅིག༌ ཡ༌ཝའེ༌ མོལ༌ཁན༌ ནང༌ཞིན༌ ཁོའེ༌ སྙིང༌ ཡང༌སྐྱར༌ སྐྱོང༌པོ༌ གྱུར༌ཏེ༌ མོ༌ཟེས༌ དང༌ ཨ༌རོན༌ནི༌ ཟེར༌ཁན༌བོ༌ མ༌ཅོས༌།
EXO 8:16 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ལ༌ ཁོ༌རང༌ངི༌ བེར༌ཀ༌ སྟགས༌ཏེ༌ སའ༌ གྱབ༌ཅེས༌ལ༌ ཟེར༌། ཨི༌ཇིབ༌བི༌ ས༌ཆ༌ གང༌པོའེ༌ ཐལ༌བ༌གུན༌ སོ༌གའ༌ ཏབ༌ཁན༌ནི༌ བུ༌ཙིག༌ འུར༌ཁན༌ ཆུ༌ངུན༌གུན༌ལ༌ གྱུར༌ཨིན༌།”
EXO 8:17 མོ༌ཟེས༌ དང༌ ཨ༌རོན༌ནི༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོས༌། ཨ༌རོན༌ནི༌ ཁོ༌རང༌ངི༌ བེར༌ཀ༌ སྟགས༌ཏེ༌ སའེ༌ཀ༌ གྱབ༌བ༌ཅིག༌ མི༌གུན༌ དང༌ སེམས༌ཅན༌གུན༌ བུ༌ཙིག༌གི༌ ཀབས༌། ཨི༌ཇིབ༌བི༌ ས༌ཀྱད༌དི༌ ཐལ༌བ༌ ཚང༌མ༌ སོ༌གའ༌ ཏབ༌ཁན༌ནི༌ བུ༌ཙིག༌ འུར༌ཁན༌ ཆུ༌ངུན༌ལ༌ གྱུར༌།
EXO 8:18 གྱལ༌པོའེ༌ ཆོས༌ངན༌ ཅོ༌ཁན༌གུན༌ནིའང༌ ཁོ༌རང༌གུན༌ནི༌ སང༌ཝའེ༌ ཁྱུད༌ གྱུད༌ཏེ༌ ཏེན༌ན༌ ཙོགས༌ ཅོ༌ཅེས༌ ཅོས༌ ཨིན༌ནའང༌ ཅོ༌ མ༌ཉན༌། མི༌གུན༌ དང༌ སེམས༌ཅན༌ ཚང༌མ༌ སོ༌གའ༌ ཏབ༌ཁན༌ནི༌ བུ༌ཙིག༌གུན༌ནི༌ ཀབས༌།
EXO 8:19 ཆོས༌ངན༌ ཅོ༌ཁན༌གུན༌ནི༌ གྱལ༌པོའ༌ ཟེརས༌, “འི༌བོ༌ དཀོན༌མཆོག༌གི༌ ཛད༌ཏེ༌ ཨིན༌ནོག༌།” ཨིན༌ནའང༌ ཡ༌ཝའེ༌ མོལ༌ཁན༌ ནང༌ཞིན༌ གྱལ༌པོའེ༌ སྙིང༌ སྐྱོང༌པོ༌ ལུས༌ཏེ༌ ཁོའེ༌ ཁོང༌གུན༌ནི༌ ཟེར༌ཁན༌བོའ༌ མ༌ཉནས༌།
EXO 8:20 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ང༌མོ༌ གྱལ༌པོ༌ ལྩངས༌པོ༌ ནཱའེལ༌ལ༌ ཆ༌ ཟ༌ནེ༌ ཁྱོ༌རང༌ ལམ༌མི༌ཀ༌ ཁོའ༌ ཐུག༌ག༌ སོང༌ཏེ༌ ཟེར༌, ‘ཡ༌ཝའེ༌ འི༌ཟུག༌ མོལས༌, ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།
EXO 8:21 ཀལ༌ཏེས༌ ཁྱོ༌རང༌ངི༌ ཆ༌ མ༌ཅུག༌ན༌ ངའེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌, མི༌གུན༌ དང༌ ཁྱོ༌ཞའེ༌ ཁང༌པ༌གུན༌ནི༌ ནང༌ང༌ ར༌ངུ༌ མང༌པོ༌ ཀལ༌ཏེ༌ ཨི༌ཇིབ༌པ༌གུན༌ནི༌ ཁང༌པ༌ དང༌ ས༌ཀྱད༌ ཚང༌མ༌ ར༌ངུའི༌ ཚོགས༌གུན༌ གང༌ཨིན༌།’”
EXO 8:22 “‘ཨིན༌ནའང༌ ཏེ༌ ཞག༌ག༌ ངའེ༌ མི༌གུན༌ དུག༌སའེ༌ ནས༌ས༌ གོ༌ཤེན༌ སྐྱོབ༌ཨིན༌ ཏེ༌རུ༌ ར༌ངུའི༌ ཚོགས༌ ཅིག༌གའང༌ མི༌ཐོབ༌། ཏེ༌ནེ༌ ང༌ ཡ༌ཝ༌ ཁྱོ༌རང༌ངི༌ ས༌ཆའེ༌ ནང༌ང༌ ཡོད༌ཁན༌བོ༌ ཁྱོ༌རང༌ང༌ ཧ༌གོ༌ཡིན༌།
EXO 8:23 ངའེ༌ ང༌རང༌ངི༌ མི༌གུན༌ དང༌ ཁྱོ༌རང༌ངི༌ མི༌གུན༌ སོ༌སོ༌ ཕེ༌ཨིན༌། འི༌ ཧ༌ལས༌ཤེས༌སི༌ སྟགས༌པོ༌ ཐོ༌རེ༌ གྲུབ༌ཨིན༌།’”
EXO 8:24 ཡ༌ཝའེ༌ ཏེན༌ན༌ ཟུག༌ ཅོའ༌ ཛདས༌། ར༌ངུའི༌ ཚོགས༌ མང༌པོ༌ གྱལ༌པོའེ༌ ཁར༌ དང༌ ཁོའེ༌ སྤོན༌བོ༌གུན༌ནི༌ ཁང༌པ༌གུན༌ནི༌ ནང༌ང༌ གང༌ ཡང༌ ཨི༌ཇིབ༌བི༌ ས༌ཀྱད༌ གང༌པོ༌ ར༌ངུའི༌ ཀབ༌ཅེས༌པོའེ༌ ས༌ཀྱད༌ གང༌པོ༌ དོད༌མེད༌ ཆ༌ཅེས༌ གོ༌ཟུག༌།
EXO 8:25 གྱལ༌པོའེ༌ མོ༌ཟེས༌ དང༌ ཨ༌རོན༌ལ༌ བོད༌ཏེ༌ ཁྱོངས༌ ཡང༌ ཟེརས༌, “སོང༌ ཡང༌ ཁྱོ༌ཞའེ༌ དཀོན༌མཆོག༌ག༌ འིན༌ན༌ ནས༌སའེ༌ ནང༌ང༌ ཆོད༌པ༌ ཕུལ༌།”
EXO 8:26 ཨིན༌ནའང༌ མོ༌ཟེས༌སི༌ ལན༌ཏངས༌, “ཏེ༌ཟུག༌ ཅོ༌ན༌ གྲིག༌ཅེས༌ མ༌ནོག༌། ང༌ཞ༌རང༌ངི༌ ཡ༌ཝ༌ དཀོན༌མཆོག༌ག༌ ང༌ཞའེ༌ ཆོད༌པ༌ ཕུལ༌ཁན༌གུན༌ ཨི༌ཇིབ༌པ༌གུན༌ནི༌ ཚི༌ཏུ༌ ཐེའ༌ནོག༌ ཡང༌ ཁོང༌གུན༌ནི༌ དུན༌ལ༌ ཏེ༌ཟུག༌ ཅོ༌ན༌ ཁོང༌གུན༌ནི༌ ང༌ཞའ༌ རྡོའ༌ གྱབས༌ཏེ༌ མི༌སད༌ད༌?
EXO 8:27 ཡ༌ཝ༌ ང༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌སི༌ ཕིའ༌ ང༌ཞ༌གུན༌ ཞག༌མ༌ སུམ༌ རི༌སྟོང༌ངི༌ ནང༌ང༌ བེས༌ལ༌ ཆ༌གོས༌ ཀ༌ཟུག༌ ཁོང༌ངི༌ བཀའ༌ སལ༌ཏེ༌ ཡོད༌།”
EXO 8:28 གྱལ༌པོའེ༌ ཟེརས༌, “ངའེ༌ ཁྱོ༌རང༌གུན༌ རི༌སྟོང༌ང༌, ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཅེས༌སི༌ ཕིའ༌ ཆ༌ཅུག༌ཨིན༌ ཀལ༌ཏེས༌ ཁྱོ༌ཞའ༌ མ༌ ཐག༌རིང༌ང༌ མ༌ཆའ༌ན༌། ངའེ༌ ཕིའ༌ མོས༌ལམ༌ ཞུས༌།”
EXO 8:29 མོ༌ཟེས༌སི༌ ལན༌ཏངས༌, “ང༌ ཁྱོ༌རང༌ངི༌ ཁར༌ནེ༌ བིང༌ང༌ཅིག༌ ངའེ༌ ཡ༌ཝ༌ མོས༌ལམ༌ ཞུ༌ཨིན༌ ཡང༌ ཐོ༌རེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ནི༌ ཀ༌ནེ༌ ར༌ངུ༌གུན༌ མེད༌ཁན༌ ཆེན༌། ཨིན༌ནའང༌ ང༌ཞའ༌ ཡ༌ཝ༌ ཆོད༌པ༌ ཕུལ༌ཅེས༌ལ༌ ཆ༌ མ༌ཅུག༌ག༌ གྱལ༌པོའེ༌ ང༌ཞའ༌ ཡང༌སྐྱར༌ གོབ༌སྐོར༌ ཏང༌ མ༌གོས༌།”
EXO 8:30 ཏེ༌ནེ༌ མོ༌ཟེས༌ གྱལ༌པོའེ༌ ཁར༌ནེ༌ སོང༌ ཡང༌ ཡ༌ཝའ༌ མོས༌ལམ༌ ཞུས༌།
EXO 8:31 ཡ༌ཝའེ༌ མོ༌ཟེས༌སི༌ ཞུ༌ཁན༌ ནང༌ཞིན༌ ཅོའ༌ཛདས༌: གྱལ༌པོ༌, ཁོའེ༌ སྤོན༌བོ༌གུན༌ དང༌ མི༌གུན༌ནི༌ ཀ༌ནེ༌ ར༌ངུའི༌ ཚོགས༌གུན༌ མེད༌ཁན༌ ཛདས༌, ཅིག༌གའང༌ ལུས༌ཤུག༌ག༌ མ༌ཛདས༌།
EXO 8:32 ཨིན༌ནའང༌ ཡང༌སྐྱར༌ གྱལ༌པོའེ༌ སྙིང༌ སྐྱོང༌པོ༌ གྱུར༌ཏེ༌ ཨིས༌ར༌ཨེལ༌པ༌གུན༌ ཆ༌མ༌ཅུགས༌།
EXO 9:1 ཡ༌ཝའེ༌ མོ༌ཟེས༌ལ༌ མོལས༌, “གྱལ༌པོ༌ ཡོད༌ས༌ སོང༌ཏེ༌ ཟེར༌, ‘ཡ༌ཝ༌ ཨིབ༌རི༌པ༌གུན༌ནི༌ དཀོན༌མཆོག༌གི༌ འི༌ཟུག༌ མོལས༌, “ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།”
EXO 9:2 ཀལ༌ཏེས༌ ཁྱོ༌རང༌ངི༌ ཁོང༌གུན༌ ཏ༌རུང༌ངའང༌ ཆ༌ མ༌ཅུག༌ག༌ བོར༌ན༌,
EXO 9:3 ཁྱོ༌ཞའེ༌ སྲལ༌ཁན༌ནི༌ སེམས༌ཅན༌ རྟ༌གུན༌, བུང༌བུ༌གུན༌, རྔ༌བོང༌གུན༌, བ༌ལང༌གུན༌ དང༌ ར༌ལུག༌གུན༌ལ༌ ང༌ ཡ༌ཝའེ༌ ནད༌ རྩོག༌པོ༌ ཡོང༌ཅུགས༌ཏེ༌ ཤི༌ཅུག༌ཨིན༌།
EXO 9:4 ཨིན༌ནའང༌ ང༌ ཡ༌ཝའེ༌ ཨིས༌ར༌ཨེལ༌པ༌གུན༌ དང༌ ཨི༌ཇིབ༌པ༌གུན༌ནི༌ སྲལ༌ཁན༌ནི༌ སེམས༌ཅན༌གུན༌ལ༌ ཁྱད༌པར༌ ཅོས༌ཏེ༌, ཨིས༌ར༌ཨེལ༌པའེ༌ སེམས༌ཅན༌ ཅིག༌གའང༌ མི༌ཤི༌།’”
EXO 9:5 ཡ༌ཝའེ༌ ཏུས༌པོ༌ ལྡམ༌མ༌ ཛད༌ཏེ༌ མོལས༌, “ང༌ ཡ༌ཝའེ༌ ཏེ༌བོ༌ འི༌ ས༌ཆའེ༌ ནང༌ང༌ ཐོ༌རེ༌ ཅོ༌ཨིན༌།”
EXO 9:6 སྟིང༌མ༌ཞག༌པོ༌ ཡ༌ཝའེ༌ ཁོང༌ངི༌ མོལ༌ལ༌ ཛད༌ཁན༌བོ༌ ཅོའ༌ ཛདས༌། ཨི༌ཇིབ༌པ༌གུན༌ནི༌ སྲལ༌ཁན༌ནི༌ སེམས༌ཅན༌ ཚང༌མ༌ ཤི༌, ཨིན༌ནའང༌ ཨིས༌ར༌ཨེལ༌པ༌གུན༌ནི༌ སེམས༌ཅན༌ ཅིག༌གའང༌ མ༌ཤི༌།
EXO 9:7 གྱལ༌པོའེ༌ ཁོ༌རང༌ངི༌ མི༌གུན༌ ལྟའ༌ལ༌ ཀལས༌ ཡང༌ ཨིས༌ར༌ཨེལ༌པ༌གུན༌ནི༌ སྲལ༌ཁན༌ནི༌ སེམས༌ཅན༌ ཅིག༌གའང༌ མ༌ ཤི༌ཁན༌བོ༌ ཐོང༌། ཨིན༌ནའང༌ གྱལ༌པོའེ༌ སྙིང༌ སྐྱོང༌པོ༌ ལུས༌ཏེ༌ ཁོང༌གུན༌ ཆ༌ མ༌ཅུགས༌།
EXO 9:8 ཏེ༌ནེ༌ ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ མོལས༌, “ཁྱོ༌ཞའེ༌ མེ༌ ཏང༌སའེ༌ ཐབ༌བི༌ ནང༌ནེ༌ ལག༌པ༌ གང༌ངི༌ ཀོག༌ཐལ༌ ཁུར༌ཏེ༌ མོ༌ཟེས༌ལ༌ ཏེ༌བོ༌ གྱལ༌པོའེ༌ དུན༌ལ༌ ལུངས༌པའེ༌ ནང༌ང༌ ཡོག༌ཅུག༌།
EXO 9:9 ཏེ༌བོ༌ ཐལ༌བ༌ ཇམ༌པོ༌ གྱུར༌ཏེ༌ ཨི༌ཇིབ༌བི༌ ས༌ཆ༌ གང༌པོ༌ ཀབ༌ཨིན༌ ཡང༌ ཨི༌ཇིབ༌པ༌ མི༌ དང༌ ཁོང༌ངི༌ སེམས༌ཅན༌ ཚང༌མ༌ལ༌ ནག༌ གང༌ཁན༌ནི༌ བུར༌རུ༌ བིང༌ཅུག༌ཨིན༌།”
EXO 9:10 ཏེ༌ནེ༌ ཁོང༌གུན༌ནི༌ ཐབ༌བི༌ ནང༌ནེ༌ ཀོག༌ཐལ༌ ཁུར༌ཏེ༌ གྱལ༌པོའེ༌ དུན༌ལ༌ ལངས༌ཏེ༌ མོ༌ཟེས༌སི༌ ཏེ༌བོ༌ ལུངས༌པོའེ༌ ནང༌ང༌ ཡོགས༌ ཡང༌ ཨི༌ཇིབ༌པ༌ མི༌ དང༌ སེམས༌ཅན༌ གུན༌ལ༌ ནག༌ གང༌ཁན༌ནི༌ བུར༌རུ༌ བིང༌།
EXO 9:11 ཆོས༌ངན༌ ཅོ༌ཁན༌གུན༌ མོ༌ཟེས༌སི༌ དུན༌ལ༌ ཡོང༌མ༌ཉན༌ ཅིའ༌ཟེར༌ན༌ ཞན༌ཡང༌ ཨི༌ཇིབ༌པ༌ ཚང༌མ༌ ཙོགས༌ལ༌ ཁོང༌གུན༌ལའང༌ བུར༌རུ༌ བིང༌ཏེ༌ ཡོད༌པིན༌།
EXO 9:12 ཨིན༌ནའང༌ ཡ༌ཝའེ༌ གྱལ༌པོའེ༌ སྙིང༌སྐྱོང༌པོ༌ ཅོའ༌ཛདས༌ ཡང༌ ཁོའེ༌ མོ༌ཟེས༌ དང༌ ཨ༌རོན༌ནི༌ ཟེར༌ཁན༌བོའ༌ མ༌ཉནས༌ ཀ༌ཟུག༌ ཡ༌ཝའེ༌ མོལ༌ཏེ༌ ཨིན༌པིན༌།
EXO 9:13 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཐོ༌རེ༌ ང༌མོ༌ནེ༌ ལངས༌ཏེ༌ གྱལ༌པོ༌ ཡོད༌ས༌ སོང༌ ཡང༌ ཟེར༌, ‘ཡ༌ཝ༌ ཨིབ༌རི༌པ༌གུན༌ནི༌ དཀོན༌མཆོག༌གི༌ འི༌ཟུག༌ མོལས༌, ངའ༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།
EXO 9:14 ཏ༌ ངའེ༌ ཁྱོ༌རང༌, ཁྱོ༌རང༌ངི༌ སྤོན༌བོ༌གུན༌ དང༌ མི༌གུན༌ལ༌ སྔུན༌ནི༌སང༌ མང༌ང༌ སྲན༌ཏྲེ༌ ཆད༌པ༌ ཏང༌ཨིན༌། ཏེ༌ནེ༌ འི༌ ཇིག༌རྟེན༌ནི༌ ནང༌ང༌ ང༌ ཙོགས༌ སུའང༌ མེད༌ཁན༌བོ༌ ཁྱོ༌རང༌ངི༌ ཧ༌གོ༌ཨིན༌།
EXO 9:15 ངའེ༌ ང༌རང༌ངི༌ ལག༌པ༌ ཁྱུད༌ཅན༌ རྐྱངས༌པིན༌ན༌ ཁྱོ༌རང༌ དང༌ ཁྱོ༌རང༌ངི༌ མི༌གུན༌ ཤི༌ཏེ༌ འི༌ ཇིག༌རྟེན༌ནི༌ ཀ༌ནེ༌ མེད༌ཁན༌ སོང༌ཏེ༌ ཡོད༌གྲོ༌།
EXO 9:16 ཨིན༌ནའང༌ ངའེ༌ སྟོབས༌པོ༌ ཁྱོ༌རང༌ང༌ སྟན༌ཅེས༌ ཡང༌ ཇིག༌རྟེན༌ གང༌པོའེ༌ མི༌གུན༌ནི༌ ང༌ ཡ༌ཝ༌ དཀོན༌མཆོག༌ ཨིན༌ཁན༌བོ༌ ཤེ༌ཤེས༌སི༌ ཕིའ༌ ངའེ༌ ཁྱོ༌རང༌ སོན༌ཏེའ༌ བོར༌ཏེ༌ ཨིན༌།
EXO 9:17 ཁྱོ༌རང༌ངི༌ ཏ༌རུང༌ངའང༌ ངའེ༌ མི༌གུན༌ནི༌ གྱབ༌གལ༌ལ༌ ཝང༌ སྟན༌ཏེ༌ ཁོང༌གུན༌ ཆ༌ ཅུག༌ག༌ མི༌དུག༌།
EXO 9:18 ཏེ༌བོའེ༌ཕིའ༌ ཐོ༌རེ༌ འིན༌ན༌ ཏུས༌ལ༌ ངའེ༌ ཨི༌ཇིབ༌བི༌ གྱལ༌རབས༌སི༌ ནང༌ང༌ མེད༌ཁན༌ནི༌ སེ༌ར༌རུ༌ ཀྲག༌པོ༌ བབས༌ ཅུག༌ཨིན༌།
EXO 9:19 ཏ༌ ཕི༌ལོག༌ག༌ ཡོད༌ཁན༌ནི༌ སེམས༌ཅན༌ དང༌ ཞན༌ ནོར༌ ཚང༌མ༌ ནང༌ང༌ ཁྱོང༌ཅེས༌ལ༌ བཀའ༌ ཏོང༌ ཅིའ༌ཟེར༌ན༌ ཕི༌ལོག༌ག༌ ལུས༌ཁན༌ནི༌ མི༌ དང༌ སེམས༌ཅན༌ ཚང༌མའེ༌ཀ༌ སེ༌ར༌རུ༌ བབས༌ཏེ༌ ཁོང༌གུན༌ ཤི༌ཨིན༌།’”
EXO 9:20 ཡ༌ཝའེ༌ མོལ༌ཁན༌བོའ༌ ཇིགས༌ཁན༌ནི༌ གྱལ༌པོའེ༌ སྤོན༌བོ༌གུན༌ནི༌ ཁོ༌རང༌གུན༌ནི༌ ཡོག༌པོ༌གུན༌ དང༌ སེམས༌ཅན༌གུན༌ གྱོགས༌པ༌ ནང༌ཀུག༌ག༌ ཁྱོངས༌།
EXO 9:21 ཨིན༌ནའང༌ ཡ༌ཝའེ༌ མོལ༌ཁན༌བོའ༌ སྣང༌ང༌ མ༌ཏང༌ཁན༌གུན༌ནི༌ ཁོ༌རང༌གུན༌ནི༌ ཡོག༌པོ༌གུན༌ དང༌ སེམས༌ཅན༌གུན༌ ཕི༌ལོག༌ག༌ བོརས༌།
EXO 9:22 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌ “ཁྱོ༌རང༌ངི༌ ལག༌པ༌ ནམ༌ཁའ༌ ཆོགས༌ལ༌ སྐྱོང༌, ཏེ༌ནེ༌ ཨི༌ཇིབ༌བི༌ ས༌ཆ༌ གང༌པོའེ༌ཀ༌ སེ༌ར༌རུ༌ བབས༌ཨིན༌; ཡང༌ན༌ མི༌གུན༌, སེམས༌ཅན༌གུན༌ དང༌ ཞིང༌ངི༌ སྟོན༌ཐོག༌ གུན༌ནི༌ཀ༌།”
EXO 9:23 མོ༌ཟེས༌སི༌ ཁོ༌རང༌ངི༌ བེར༌ཀ༌ ནམ༌ཁའ༌ ཆོགས༌ལ༌ སྟག༌ག༌ཅིག༌ ཡ༌ཝའེ༌ བྲུག༌ལྡིར༌ ཅུག༌ཏེ༌ སེ༌ར༌རུ༌ བབས༌ ཅུག༌ག༌ ཛདས༌ ཡང༌ མེ༌ སའེ༌ཀ༌ བུད༌། ཏེ༌ནེ༌ ཡ༌ཝའེ༌ ཨི༌ཇིབ༌བི༌ ས༌ཆའེ༌ ནང༌ང༌ མ༌ མང༌པོ༌ སེ༌ར༌རུ༌ བབས༌ ཅུག༌ག༌ ཛདས༌།
EXO 9:24 སེར༌ར༌རུ༌ ཉམ༌པོ༌ མེ༌ སའེ༌ཀ༌ བུད༌། ཏེ༌ཙོགས༌སི༌ སེར༌ར༌རུ༌ དང༌ ལུང༌ཚུབ༌ ཀྲག༌པོ༌ ཨི༌ཇིབ༌བི༌ གྱལ༌རབས༌སི༌ ནང༌ང༌ དག༌ས༌ ཚོག༌པ༌ མ༌ཇུང༌ང༌ ཨིན༌པིན༌།
EXO 9:25 ཨི༌ཇིབ༌ གང༌པོའེ༌ ནང༌ང༌ སེར༌ར༌རུའི༌, ཕི༌ལོག༌ག༌ ཡོད༌ཁན༌ནི༌ མི༌གུན༌, སེམས༌ཅན༌གུན༌ དང༌ ཞིང༌ངི༌ སྟོན༌ཐོག༌ ཚང༌མ༌ ནན༌ཏེ༌ མེད༌ཁན༌ ཅོས༌ ཡང༌ ལྕང༌མ༌ ཚང༌མ༌ ཆགས༌།
EXO 9:26 ཨིས༌ར༌ཨེལ༌པ༌གུན༌ དུག༌སའེ༌ གོ༌ཤེན༌ ཡུལ༌ཁག༌ ཅིག༌པོའེ༌ ནང༌ང༌ སེ༌ར༌རུ༌ མ༌བབས༌།
EXO 9:27 གྱལ༌པོའེ༌ མོ༌ཟེས༌ དང༌ ཨ༌རོན༌ བོད༌ཏེ༌ ཁྱོངས༌ ཡང༌ ཟེརས༌, “འི༌ ལན༌ ངའེ༌ སྡིག༌པ༌ ཅོས༌ཏོག༌། ཡ༌ཝའེ༌ ཀྲང༌པོ༌ ཛད༌ཏེ༌ ཡང༌ ང༌ དང༌ ངའེ༌ མི༌གུན༌ནི༌ ནོར༌ཁྲུལ༌ ཅོས༌ཏེ༌ ཨིན༌ནོག༌།
EXO 9:28 ཇུ༌ཇུ༌ ཡ༌ཝ༌ མོས༌ལམ༌ ཞུས༌, ང༌ཞ༌གུན༌ནི༌ཀ༌ བྲུག༌ དང༌ སེ༌ར༌རུ༌ ཙམ༌ཐད༌ཐད༌ བབས༌། ངའེ༌ ཁྱོ༌ཞ༌གུན༌ ཆ༌ ཅུག༌ཨིན༌། ཏ༌ནེ༌ཕར༌ལ༌ ཁྱོ༌རང༌གུན༌ འི༌རུ༌ དུག༌གོས༌ མེད༌པ༌ ཨིན༌ནོག༌།”
EXO 9:29 མོ༌ཟེས༌སི༌ ལན༌ཏངས༌, “ང༌ གྱལ༌ས༌ནེ༌ བིང༌ཏེ༌ ཆའ༌ཅིག༌ ངའེ༌ ཡ༌ཝ༌ མོས༌ལམ༌ ཞུ༌ཅེས༌སི༌ ཕིའ༌ ང༌རང༌ངི༌ ལག༌པ༌ རྐྱང༌ཨིན༌། བྲུག༌ལྡིར༌ཅེས༌ མེད༌ཁན༌ ཆེན༌ ཡང༌ སེ༌ར༌རུ༌ མི༌བབས༌, ཏེ༌ནེ༌ ཁྱོ༌རང༌ང༌ ཇིག༌རྟེན༌, ཡ༌ཝའེ༌ ཨིན༌ཁན༌བོ༌ ཧ༌གོ༌ཨིན༌།
EXO 9:30 ཨིན༌ནའང༌ ང༌ གྱུས༌ཡོད༌ ཁྱོ༌རང༌ དང༌ ཁྱོ༌རང༌ངི༌ སྤོན༌བོ༌གུན༌ ཏ༌རུང༌ངའང༌ ཡ༌ཝ༌ དཀོན༌མཆོག༌ག༌ ཇིགས༌ས༌ མི༌དུག༌།”
EXO 9:31 ༼སེ༌ར༌རུའི༌ ཕེལེགས༌ མེན༌ཏོག༌ བར༌ཁན༌ དང༌ ནས༌སི༌ སྟོན༌ཐོག༌ སྨིན༌ཏེ༌ ཡོད༌ཁན༌གུན༌ མེད༌ཁན༌ ཅོས༌།
EXO 9:32 ཨིན༌ནའང༌ ཀྲོའེ༌ སྟོན༌ཐོག༌ག༌ ནོད༌སྐྱལ༌ མ༌སོང༌ ཅིའ༌ཟེར༌ན༌ ཏེ༌གུན༌ ཏ༌རུང༌ ཆུ༌ངུན༌ ཡོད༌པིན༌།༽
EXO 9:33 མོ༌ཟེས༌ གྱལ༌པོ༌ བོར༌ཏེ༌ གྱལ༌སའེ༌ ཕི༌ལོག༌ག༌ སོང༌ ཡང༌ ཡ༌ཝ༌ ཆོགས༌ལ༌ ཁོ༌རང༌ངི༌ ལག༌པ༌ སྟགས༌ཏེ༌ མོས༌ལམ༌ ཞུས༌། བྲུག༌ལྡིར༌ དང༌ སེ༌ར༌རུ༌ མེད༌ཁན༌ སོང༌ ཡང༌ ཇིག༌རྟེན༌ནི༌ཀ༌ སྲན༌ཏྲེ༌ ཆར༌པ༌ བབས༌ཤེས༌ ཆད༌།
EXO 9:34 གྱལ༌པོའ༌ ཆར༌པ༌, སེ༌ར༌རུ༌ དང༌ བྲུག༌ལྡིར༌ གུན༌ མེད༌ཁན༌ ཆའ༌ལ༌ ཐོང༌ང༌ཅིག༌ ཁོའེ༌ ཡང༌སྐྱར༌ སྡིག༌པ༌ ཅོས༌། ཁོ༌ དང༌ ཁོའེ༌ སྤོན༌བོ༌གུན༌ནི༌ སྙིང༌ ཏ༌རུང༌ངའང༌ སྐྱོང༌པོ༌ ལུས༌།
EXO 9:35 ཡ༌ཝའེ༌ མོ༌ཟེས༌ གྱུད༌ཏེ༌ ལུང༌སྟན༌ སལ༌ཁན༌ ནང༌ཞིན༌ གྱལ༌པོའེ༌ སྙིང༌ སྲན༌ཏྲེ༌ གྱུར༌ཏེ༌ ཁོའེ༌ ཨིས༌ར༌ཨེལ༌པ༌གུན༌ ཆ༌མ༌ཅུགས༌།
EXO 10:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “གྱལ༌པོ༌ ཡོད༌ས༌ ཡང༌སྐྱར༌ སོང༌, ངའེ༌ ཁོ༌ དང༌ ཁོའེ༌ སྤོན༌བོ༌གུན༌ནི༌ ཕྲོའ༌ ང༌རང༌ངི༌ ཧ༌ལས༌ཤེས༌སི༌ སྟགས༌གུན༌ སྟན༌ཅེས༌ལ༌ ངའེ༌ ཁོང༌གུན༌ནི༌ སྙིང༌ སྐྱོང༌པོ༌ གྱུར༌ཅུགས༌ཏེ༌ ཨིན༌།
EXO 10:2 ཏེ༌ནེ༌ ཁྱོ༌ཞའེ༌ ཕྲུ༌གུ༌གུན༌ དང༌ ཚ༌འོ༌ ཚ༌མོ༌ གུན༌ལ༌ ངའེ༌ ཨི༌ཇིབ༌པ༌གུན༌ སམ༌བ༌ མེད༌ཁན༌ གྱུར༌ཅུགས༌ཏེ༌ ཁོང༌གུན༌ལ༌ ཧ༌ལས༌ཤེས༌སི༌ སྟགས༌ སྟན༌ཁན༌གུན༌ ཁྱོ༌ཞ༌རང༌ངི༌ ཤད༌ཉན༌ཨིན༌ ཡང༌ ཁྱོ༌ཞའ༌ ཚང༌མའེ༌ ང༌ ཡ༌ཝ༌ ཨིན༌ཁན༌བོ༌ ཤེས༌ཨིན༌།”
EXO 10:3 ཏེ༌ནེ༌ མོ༌ཟེས༌ དང༌ ཨ༌རོན༌ གྱལ༌པོ༌ ཡོད༌ས༌ སོང༌ཏེ༌ ཁོའ༌ ཟེརས༌, “ཡ༌ཝ༌ ཨིབ༌རི༌པ༌གུན༌ནི༌ དཀོན༌མཆོག༌གི༌ འི༌ཟུག༌ མོལས༌, ‘ཏ༌རུང༌ ཙམ༌ཤིག༌ ཁྱོ༌རང༌ ངའེ༌ དུན༌ལ༌ བོལ༌མོ༌ མི༌གྱུར༌? ང༌ ཅོལ༌ཅེས༌ལ༌ ངའེ༌ མི༌གུན༌ ཆ༌ཅུག༌།
EXO 10:4 ཀལ༌ཏེས༌ ཁྱོ༌རང༌ངི༌ ཁོང༌གུན༌ ཆ༌ མ༌ཅུག༌ན༌, ཐོ༌རེ༌ ངའེ༌ ཁྱོ༌རང༌ངི༌ ཡུལ༌ལ༌ པར༌པར༌ཙེ༌ ཁྱོང༌ཨིན༌།
EXO 10:5 སུ༌ཞིག༌གིའང༌ ས༌ སྟོང༌པ༌ མི༌ཐོང༌ ཅིའ༌ཟེར༌ན༌ ཏེ༌གུན༌ནི༌ ས༌ཀྱད༌ གང༌པོ༌ ཀབ༌ཨིན༌། སེར༌ར༌རུའི༌ ཁྲེས༌ཏོར༌ མ༌ཅོའ༌ ལུས༌ཏེ༌ ཡོད༌ཁན༌ ཚང༌མ༌ མ༌ཚད༌ ཞིང༌ངི༌ཀ༌ ཡོད༌ཁན༌ནི༌ ལྕང༌མ༌ ཚང༌མའང༌ ཏེ༌གུན༌ནི༌ ཟེན༌།
EXO 10:6 ཏེ༌གུན༌ ཁྱོ༌རང༌ངི༌ ཁར༌, ཁྱོ༌རང༌ངི༌ སྤོན༌བོ༌ ཚང༌མ༌ དང༌ མི༌ ཚང༌མའེ༌ ཁང༌པ༌གུན༌ནི༌ ནང༌ང༌ གང༌ཨིན༌། ཁྱོ༌ཞའེ༌ ཕ༌མེས༌པོ༌གུན༌ འི༌ ས༌ཆའེ༌ ནང༌ང༌ ཚུགས༌པ༌ནེ༌ ཕར༌ལ༌ འི༌ཙོགས༌ མ༌ཐོང༌ང༌ ཨིན༌ནོག༌།’” ཏེ༌ནེ༌ མོ༌ཟེས༌ གྱལ༌པོའེ༌ དུན༌ནེ༌ སོང༌།
EXO 10:7 ཏ༌ གྱལ༌པོའེ༌ སྤོན༌བོ༌གུན༌ནི༌ ཁོའ༌ ཟེརས༌, “ཏ༌རོང༌ ཙམ༌ཤིག༌ འི༌ མི༌བོའ༌ ང༌ཞ༌གུན༌ལ༌ ནགས༌ སྟན༌ཅུག༌གད༌? ཨིས༌ར༌ཨེལ༌པ༌གུན༌ ཡ༌ཝ༌ ཁོང༌གུན༌ནི༌ དཀོན༌མཆོག༌ག༌ ཅོལ༌ཅེས༌ལ༌ ཆ༌ཅུག༌ག༌ ཛད༌། ཨི༌ཇིབ༌ ཁྲེས༌ཏོར༌ ཆའ༌ཁན༌བོ༌ ཉེ༌རང༌ངི༌ ཟིགས༌ས༌ མི༌དུག༌ག༌?”
EXO 10:8 ཏེ༌ནེ༌ མོ༌ཟེས༌ དང༌ ཨ༌རོན༌ གྱལ༌པོའེ༌ ཡོད༌ས༌ ཡང༌སྐྱར༌ ཁྱོངས༌ ཡང༌ ཁོའེ༌ ཟེརས༌, “ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཅོལ༌ཅེས༌ལ༌ སོང༌། ཨིན༌ནའང༌ ཁྱོ༌ཞའེ༌ ཕྲོ༌ནེ༌ སུ༌ ཆའད༌?”
EXO 10:9 མོ༌ཟེས༌སི༌ ལན༌ཏངས༌, “ང༌ཞའ༌ ཚང༌མ༌ ཆའད༌། ཕྲུ༌གུ༌གུན༌ དང༌ རྒད༌པོ༌གུན༌, བུ༌ཚ༌གུན༌ དང༌ བུ༌མོ༌གུན༌ ཡང༌ ང༌ཞའེ༌ ར༌ལུག༌ དང༌ ཞན༌ སེམས༌ཅན༌ནི༌ ཁྱུ༌ གུན༌ནའང༌ ཁྱེར༌ཨིན༌ ཅིའ༌ཟེར༌ན༌ ང༌ཞའ༌ ཚང༌མ༌ ཛོམ༌ཏེ༌ གའ༌སྟོན༌ རྩི༌ཨིན༌ ཡ༌ཝ༌ སྟོད༌པ༌ དང༌ ཆོད༌པ༌ ཕུལ༌གོས༌།”
EXO 10:10 གྱལ༌པོའེ༌ ཟེརས༌, “ངའེ༌ བུ༌མོ༌གུན༌ དང༌ ཕྲུ༌གུ༌གུན༌ ཁྱོ༌ཞའ༌ ཉམ༌པོ༌ མ༌ནེ༌ ཆ༌ མི༌ཅུག༌, ཅིའ༌ཟེར༌ན༌ ཁྱོ༌རང༌གུན༌ ལོག༌ཏེ༌ མི༌ཡོང༌ཅེས༌སི༌ ཅུས༌ངན༌ ལྡིངས༌ཁན༌བོ༌ ངའ༌ ཧ༌གོ༌།
EXO 10:11 ཆ༌ མི༌ཅུག༌། ཡ༌ཝ༌ ཆོད༌པ༌ ཕུལ༌ཏེ༌ ཅོལ༌གོ༌ཤེས༌ ཁག༌ཅན༌ ཨིན༌ན༌ བུ༌ཚ༌གུན༌ ཅིག༌པོ༌ སོང༌།” ཏེ༌ནེ༌ མོ༌ཟེས༌ དང༌ ཨ༌རོན༌ གྱལ༌པོའེ༌ དུན༌ནེ༌ ཁྱེརས༌།
EXO 10:12 ཡ༌ཝའེ༌ མོ༌ཟེས༌ལ༌ མོལས༌, “ཨི༌ཇིབ༌བི༌ ས༌ཆ༌ གང༌པོ༌ པར༌པར༌ཙེ༌ གང༌ཅེས༌ལ༌ ཁྱོ༌རང༌ངི༌ ལག༌པ༌ ཏེ༌ ས༌ཆའེ༌ཀ༌ སྐྱོང༌། ཞིང༌ངི༌ སྟོན༌ཐོག༌ སེར༌ར༌རུའི༌ ཁྲེས༌ཏོར༌ མ༌ཅོའ༌ ལུས༌ཏེ༌ ཡོད༌ཁན༌ དང༌ སྔོན༌པོ༌ ཡོད༌ཁན༌ ཚང༌མ༌ ཏེ༌གུན༌ནི༌ ཟེན༌།”
EXO 10:13 ཏེ༌ནེ༌ མོ༌ཟེས༌སི༌ ཁོ༌རང༌ངི༌ བེར༌ཀ༌ ཨི༌ཇིབ༌བི༌ཀ༌ རྐྱངས༌ ཡང༌ ཡ༌ཝའེ༌ ཏེ༌ ཉི༌མ༌ དང༌ ཚན༌ གང༌པོ༌ ཤར༌ ཆོགས༌ནེ༌ ལུངས༌པོ༌ ཡོང༌ ཅུག༌ག༌ ཛདས༌། ང༌མོ༌ ཆའ༌ཅིག༌ ལུངས༌པོའེ༌ པར༌པར༌ཙེ༌གུན༌ ཁྱོངས༌ཏེ༌ ཡོད༌པིན༌།
EXO 10:14 ཏེ༌གུན༌ ཡུལ༌ གང༌པོའེ༌ ནང༌ང༌ ཀ༌རུང༌ས༌ གང༌། དག༌ས༌ ཚག༌པ༌ མ༌ཐོང༌ཁན༌ ཡ༌ ཡོང༌ཅེས༌ཅན༌ནི༌ ཏུས༌སི༌ ནང༌ངའང༌ མ༌ནེ༌ མི༌ཐོང༌, ཏེ༌ཟམ༌ མང༌པོ༌ པར༌པར༌ཙེ༌ ནས༌ས༌ ཚང༌མ༌ གངས༌ཏེ༌ ཡོད༌པིན༌།
EXO 10:15 ཏེ༌གུན༌ གངས༌ཏེ༌ ས༌ཀྱད༌ ནག༌པོ༌ སོང༌། ཏེ༌གུན༌ནི༌ ལྕང༌མའེ༌ ཁ༌ཟས༌ དང༌ ཞིང༌ངི༌ སྟོན༌ཐོག༌ སེར༌ར༌རུའི༌ ཁྲེས༌ཏོར༌ མ༌ཅོའ༌ ལུས༌ཁན༌ ཚང༌མ༌ ཟོས༌། ཨི༌ཇིབ༌བི༌ ས༌ཆ༌ གང༌པོའེ༌ ནང༌ང༌ ལྕང༌མ༌ དང༌ ཞིང༌གུན༌ནི༌ཀ༌ སྔོན༌པོ༌ ཅིག༌གའང༌ མ༌ལུས༌།
EXO 10:16 ཏེ༌ནེ༌ གྱལ༌པོའེ༌ གྱོགས༌པ༌ མོ༌ཟེས༌ དང༌ ཨ༌རོན༌ བོད༌ཏེ༌ ཁྱོངས༌ ཡང༌ ཟེརས༌, “ངའེ༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌ དང༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོས༌ཏོག༌།
EXO 10:17 ཏ༌ འིན༌ན༌ ལན༌ ངའེ༌ སྡིག༌པ༌བོའ༌ ཤགས༌པ༌ ཏོང༌ ཡང༌ ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ངའེ༌ ཀ༌ནེ༌ ཤི༌ཅེས༌སི༌ འི༌ རྡུག༌ངལ༌བོ༌ ཐེན༌ན༌ ཛད༌ཅེས༌ལ༌ མོས༌ལམ༌ ཞུས༌།”
EXO 10:18 མོ༌ཟེས༌ གྱལ༌པོ༌ ཡོད༌ས༌ནེ༌ སོང༌ ཡང༌ ཡ༌ཝ༌ མོས༌ལམ༌ ཞུས༌།
EXO 10:19 ཡ༌ཝའེ༌ ནུབ༌ ཆོགས༌ནེ༌ ལུངས༌པོ༌ ཤེད༌ཅན༌ ཡོང༌ ཅུག༌ག༌ ཛདས༌ ཀ༌བོའེ༌ པར༌པར༌ཙེ༌གུན༌ ཚོ༌ མར༌པོའེ༌ ནང༌ང༌ ཁྱེརས༌། ཨི༌ཇིབ༌བི༌ ནང༌ང༌ པར༌པར༌ཙེ༌ ཅིག༌གའང༌ མ༌ལུས༌།
EXO 10:20 ཨིན༌ནའང༌ ཡ༌ཝའེ༌ གྱལ༌པོའེ༌ སྙིང༌ སྐྱོང༌པོ༌ ལུས༌ ཅུག༌ག༌ ཛདས༌ ཡང༌ ཁོའེ༌ ཨིས༌ར༌ཨེལ༌པ༌གུན༌ ཆ༌མ༌ཅུགས༌།
EXO 10:21 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ངི༌ ལག༌པ༌ ནམ༌ཁའ༌ ཆོགས༌ལ༌ སྐྱོང༌ ཡང༌ ཨི༌ཇིབ༌བི༌ ས༌ཆ༌ གང༌པོ༌ མུན༌གྲིག༌ ཆེན༌ ཏེ༌ཟམ༌ མུན༌ནག༌ ཀ༌བོ༌ ཁོང༌གུན༌ནི༌ ཚོར༌ ཐུབ༌ཨིན༌།”
EXO 10:22 ཏེ༌ནེ༌ མོ༌ཟེས༌སི༌ ཁོ༌རང༌ངི༌ ལག༌པ༌ ནམ༌ཁའ༌ ཆོགས༌ལ༌ སྟགས༌ ཡང༌ ཞག༌པོ༌ སུམ༌མི༌ ཕིའ༌ ཨི༌ཇིབ༌ གང༌པོ༌ ཇིགས༌པ༌ མུན༌ནག༌གི༌ ཀབས༌།
EXO 10:23 ཨི༌ཇིབ༌པ༌གུན༌ལ༌ ཐོང༌ མ༌ཐུབ༌ ཡང༌ ཁོང༌གུན༌ ཁང༌པ༌ནེ༌ ཕི༌ལོག༌ག༌ ཆའ༌ མ༌ཉན༌། ཨིན༌ནའང༌ ཨིས༌ར༌ཨེལ༌པ༌ ཚང༌མ༌ དུགས༌ཏེ༌ ཡོད༌སའེ༌ ས༌ཆའེ༌ ནང༌ང༌ འོད༌ ཡོད༌པིན༌།
EXO 10:24 གྱལ༌པོའེ༌ མོ༌ཟེས༌ བོད༌ཏེ༌ ཁྱོངས༌ ཡང༌ ཟེརས༌, “ཡ༌ཝའ༌ ཅོལ༌ལ༌ སོང༌། ཁྱོ༌ཞའེ༌ ན༌མ༌ དང༌ ཕྲུ༌གུ༌ ཚང༌མ༌ ཁྱོ༌ཞའ༌ ཉམ༌པོ༌ ཁྱེར༌ནའང༌ གྲིག༌། ཨིན༌ནའང༌ ཁྱོ༌ཞའེ༌ ར༌ལུག༌ དང༌ ཞན༌ སེམས༌ཅན༌ནི༌ ཁྱུ༌གུན༌ འིན༌ན༌རུ༌ བོར༌གོས༌།”
EXO 10:25 ཨིན༌ནའང༌ མོ༌ཟེས༌སི༌ ཟེརས༌, “ཡ༌ཝ༌ ང༌ཞའེ༌ དཀོན༌མཆོག༌ག༌ སྲོག༌ཆོད༌ དང༌ མེའ༌ སྲགས༌ཁན༌ནི༌ ཆོད༌པ༌ ཕུལ༌ཅེས༌སི༌ ཕིའ༌ ཉེ༌རང༌ངི༌ ང༌ཞའ༌ སེམས༌ཅན༌གུན༌ ཁྱེར༌ཅུག༌གོས༌།
EXO 10:26 ང༌ཞའེ༌ སེམས༌ཅན༌གུན༌ ཅིག༌གའང༌ མ༌བོར༌ར༌ ང༌ཞའ༌ ཉམ༌པོ༌ ཁྱེར༌གོས༌། ང༌ཞའེ༌ ཏེ༌གུན༌ནི༌ ནང༌ནེ༌ ཁ༌ཅིག༌ ཡ༌ཝ༌ ང༌ཞའེ༌ དཀོན༌མཆོག༌ག༌ ཆོད༌པ༌ ཕུལ༌ཨིན༌ ཡང༌ ཏེ༌རུ༌ ལེབ༌ཏེ༌ མ༌ནེ༌ ཆོད༌པ༌ ཕུལ༌ཅེས༌ཅན༌ནི༌ སེམས༌ཅན༌གུན༌ ང༌ཞའ༌ གྱུས༌ མི༌ཆ༌།”
EXO 10:27 ཨིན༌ནའང༌ ཡ༌ཝའེ༌ གྱལ༌པོའེ༌ སྙིང༌ སྐྱོང༌པོ༌ གྱུར༌ཅུག༌ག༌ ཛདས༌ ཡང༌ ཁོའེ༌ ཁོང༌གུན༌ ཆ༌ མ༌ཅུགས༌།
EXO 10:28 ཁོའེ༌ མོ༌ཟེས༌ལ༌ ཟེརས༌, “ང༌ནེ༌ ཐག༌རིང༌ང༌ སོང༌། ཡང༌སྐྱར༌ ཁྱོ༌རང༌ ངའེ༌ དུན༌ལ༌ མི༌ཡོང༌ཅེས༌ ཏན༌ཏན༌ ཅོས༌། ཁྱོ༌རང༌ངི༌ ལྡོང༌ ངའ༌ ཐོང༌ངི༌ ཞག༌ག༌ ཁྱོ༌རང༌ ཤི༌ཨིན༌།”
EXO 10:29 མོ༌ཟེས༌སི༌ ལན༌ཏངས༌, “ཉེ༌རང༌ངི༌ མོལ༌ཁན༌ ནང༌ཞིན༌, ངའ༌ ཉེ༌རང༌ངི༌ དུན༌ལ༌ ཡང༌སྐྱར༌ མ༌ནེ༌ མི༌ཡོང༌།”
EXO 11:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཨི༌ཇིབ༌བི༌ གྱལ༌པོ༌ དང༌ ཁོའེ༌ མི༌གུན༌ལ༌ ཏ༌རུང༌ ཆད༌པ༌ ཅིག༌ ཏང༌ཨིན༌། ཏེ༌སྟིང༌ནེ༌ ཁོའེ༌ ཁྱོ༌ཞ༌གུན༌ འི༌ཀ༌ནེ༌ ཆ༌ཅུག༌ཨིན༌། ཏན༌ཏན༌ ཁོའེ༌ ཁྱོ༌ཞ༌ ཚང༌མ༌ འི༌ ས༌ཆའེ༌ ནང༌ནེ༌ ཕིང༌ཏེ༌ ཏང༌ཨིན༌།
EXO 11:2 ཨིས༌ར༌ཨེལ༌པ༌ བུ༌མོ༌ དང༌ བུ༌ཚ༌ གུན༌ལ༌ ཁོ༌རང༌གུན༌ནི༌ ཨི༌ཇིབ༌པ༌ ཁྱིམ༌ཚེས༌པ༌གུན༌ལ༌ སེར༌ དང༌ མུལ༌ལི༌ ཅ༌ལག༌གུན༌ ཏོང༌ ཟེར༌ཅེས༌ལ༌ ཟེར༌།”
EXO 11:3 ༼ཡ༌ཝའེ༌ ཨི༌ཇིབ༌པ༌གུན༌ནི༌ ཨིས༌ར༌ཨེལ༌པ༌གུན༌ལ༌ ཀུས༌པ༌ ཡང༌ ཨི༌ཇིབ༌བི༌ སྤོན༌བོ༌གུན༌ དང༌ མི༌གུན༌ལ༌, མོ༌ཟེས༌ མི༌ མ༌ ཀྲག༌པོ༌ ཐེ༌ཅུག༌ག༌ ཛདས༌།༽
EXO 11:4 ཏེ༌ནེ༌ མོ༌ཟེས༌སི༌ གྱལ༌པོའ༌ ཟེརས༌, “ཡ༌ཝའེ༌ འི༌ཟུག༌ མོལས༌, ‘དི༌རིང༌ ཚན༌སྐྱིལ༌ ཟམ༌ཤིག༌ག༌ ང༌ ཨི༌ཇིབ༌ གྱུད༌ཏེ༌ ཆེན༌
EXO 11:5 ཡང༌ ཨི༌ཇིབ༌བི༌ ནང༌ང༌ བུ༌ཚ༌ གོ༌བུ༌ ཚང༌མ༌ ཤི༌ཨིན༌, གྱལ༌པོའེ༌ བུ༌ཚ༌ གོ༌བུ༌ ཁྲིས༌ ནོར༌སྐལ༌ལ༌ ཐོབ༌ཅེས༌ཅན༌ནེ༌ ཏངས༌ཏེ༌ ལག༌པའེ༌ རན༌ཐགས༌གི༌ཀ༌ ཡོད༌ཁན༌ནི༌ ཚེ༌ཡོག༌གི༌ བུ༌ཚ༌ གོ༌བུ༌ ཚག༌པ༌ ཡང༌ སེམས༌ཅན༌གུན༌ནི༌ གོ༌སྐྱེས༌ ཕོ༌ གུན༌ནའང༌ ཤི༌ཨིན༌།
EXO 11:6 ཨི༌ཇིབ༌ གང༌པོའེ༌ ནང༌ང༌ ངུ༌སྐད༌ སྲན༌ཏྲེ༌ ཚོར༌ཨིན༌ ཀ༌བོ༌ དག༌ས༌ ཚོག༌པ༌ མ༌ཚོར༌ཁན༌ ཡང༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ མི༌ ཚོར༌།
EXO 11:7 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཕྲོའ༌ ཏེ༌ཟམ༌ ཞི༌དེའེ༌ ཡོང༌ཨིན༌, ཁོང༌གུན༌ནི༌ ཁྱི༌གུན༌ནི༌ མི༌ ཡ༌ སེམས༌ཅན༌ ཞིག༌གའང༌ མི༌མུག༌།’ ཏེ༌ནེ༌ ང༌ ཡ༌ཝའེ༌ ཨི༌ཇིབ༌པ༌ དང༌ ཨིས༌ར༌ཨེལ༌པ༌ གུན༌ནི༌ ནང༌ང༌ ཁྱད༌ ཅོ༌ཁན༌བོ༌ ཁྱོ༌ཞ༌གུན༌ལ༌ གྱུས༌ཆེན༌།”
EXO 11:8 མོ༌ཟེས༌སི༌ ཟེརས༌, “ཁྱོ༌རང༌ངི༌ སྤོན༌བོ༌ ཚང༌མ༌ ཡོངས༌ཏེ༌ ང༌ ཆག༌ ཕུལ༌ཏེ༌ ཟེར༌ཨིན༌, ‘ཁྱོ༌རང༌ དང༌ ཁྱོ༌རང༌ངི༌ གྱབ༌ནེ༌ ཡོང༌ཁན༌ ཚང༌མ༌ ཁྲིད༌ཏེ༌ སོང༌།’ ཏེ༌སྟིང༌ནེ༌ ང༌ ཆེན༌།” ཏེ༌ནེ༌ སྲོ༌ སྲན༌ཏྲེ༌ ཉམ༌པོ༌ མོ༌ཟེས༌ གྱལ༌པོ༌ ཡོད༌ས༌ནེ༌ སོང༌།
EXO 11:9 ཡ༌ཝའེ༌ མོ༌ཟེས༌ལ༌ མོལ༌ཏེ༌ ཨིན༌པིན༌, “ཨི༌ཇིབ༌བི༌ ནང༌ང༌ ངའེ༌ ལྟས༌ མང༌ང༌ སྟན༌ཅེས༌སི༌ ཕིའ༌ གྱལ༌པོའེ༌ ཁྱོ༌རང༌ངི༌ ཟེར༌ཁན༌ལ༌ མི༌ཉན༌།”
EXO 11:10 མོ༌ཟེས༌ དང༌ ཨ༌རོན༌ནི༌ ལྟས༌གུན༌ གྱལ༌པོའེ༌ དུན༌ལ༌ སྟནས༌, ཨིན༌ནའང༌ ཡ༌ཝའེ༌ ཁོའེ༌ སྙིང༌སྐྱོང༌པོ༌ ཅོའ༌ ཛད༌ཅེས༌པོའེ༌ ཁོའེ༌ ཨིས༌ར༌ཨེལ༌པ༌གུན༌ ཁོ༌རང༌ངི༌ ཡུལ༌ནེ༌ ཆ༌ མ༌ཅུགས༌།
EXO 12:1 ཨི༌ཇིབ༌བི༌ ནང༌ང༌ ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ མོལས༌,
EXO 12:2 “ཏ༌ནེ༌ཕར༌ལ༌ ཁྱོ༌ཞ༌གུན༌ནི༌ ཕིའ༌ འི༌ ཟླ༌ཝ༌བོ༌ ལོའེ༌ ཟླ༌ཝ༌ ཏང༌པོ༌ གྱུར༌ཨིན༌།
EXO 12:3 ཨིས༌ར༌ཨེལ༌པ༌ ཚང༌མའ༌ ཟེར༌, ‘འི༌ ཟླ༌ཝའེ༌ ཞག༌ རྕུ༌པའེ༌ ཞག༌ག༌ ནང༌ཚངས༌ རེ༌རེའེ༌ སྲོག༌ཆོད༌དི༌ ཕིའ༌ ལུ༌གུ༌ ཡ༌ རི༌གུ༌ ལྡམ༌གོས༌།
EXO 12:4 ཀལ༌ཏེས༌ ནང༌ཚངས༌ ཆུ༌ངུན༌ ཡོད༌ཅེས༌པའེ༌ ལུ༌གུ༌ ཡ༌ རི༌གུའི༌ ཤ༌ གང༌པོ༌ ཟའ༌ མ༌ཉན༌ན༌, ཁོང༌རང༌གུན༌ནི༌ ཁྱིམ༌ཚེས༌པ༌ ཉམ༌པོ༌ ཛོམས༌ཏེ༌ བགོ༌གོས༌། ནང༌ཚངས༌སི༌ མི༌ རེ༌རེའེ༌ ཟའ༌ ཉན༌ཅེས༌སི༌ ཚད༌ ནང༌ཞིན༌ ལུ༌གུའི༌ ཤ༌བོ༌ བགོ༌གོས༌།
EXO 12:5 ཁྱོ༌ཞ༌གུན༌ནི༌ ལྡམ༌ཁན༌ནི༌ ལུ༌གུ༌ ཡ༌ རི༌གུ༌, ལོ༌ ཅིག༌ ཆའ༌ཁན༌ ཕོ༌ ཡང༌ སྐྱོན༌ མེད༌ཁན༌ ཡོང༌གོས༌།
EXO 12:6 ཏེན༌ན༌ ཟླ༌ཝའེ༌ ཞག༌ ཅུབ༌ཞི༌པ༌ ཚག༌པ༌ ཏེ༌ སེམས༌ཅན༌བོའ༌ སྟ༌སྟོག༌ ཅོ༌གོས༌། ཏེ༌ནེ༌ ཏེན༌ན༌ ཞག༌ག༌ ཉི༌མ༌ སྐྱོད༌ ཟ༌ནེ༌ ཨིས༌ར༌ཨེལ༌པ༌ ཚང༌མའེ༌ སེམས༌ཅན༌བོ༌ སད༌གོས༌།
EXO 12:7 ཁོང༌གུན༌ནི༌ ཏེ༌བོའེ༌ ཁྲག༌ ཙ༌པིག༌ ཁོ༌རང༌གུན༌ནི༌ ཟན༌ ཟའ༌སའེ༌ ཁང༌པའེ༌ སྒོའེ༌ རིབ༌ཞི༌ ཐའ༌མ༌ དང༌ སྟག༌ གུན༌ནི༌ཀ༌ སྐུ༌གོས༌།
EXO 12:8 ཏེན༌ན༌ ཚན༌ལ༌ ཤ༌བོ༌ མེ༌ཀ༌ སྲགས༌ཏེ༌ ཁན༌ཀྲེ༌ ཚ༌མིག༌ དང༌ སྐྱུར༌ མེད༌ཁན༌ནི༌ ཏ༌གི༌ ཉམ༌པོ༌ ཟ༌གོས༌།
EXO 12:9 ཤ༌བོ༌ ཤར༌ཞེན༌ ཡ༌ ཆུའི༌ ནང༌ང༌ ཙོས༌ཏེ༌ ཟའ༌ མ༌གོས༌ ཨིན༌ནའང༌ གོ༌, རྐང༌པ༌ དང༌ ནང༌ཆ༌ གུན༌ ཐེས༌ཏེ༌ ཤ༌ ཚང༌མ༌ མེའ༌ སྲགས༌ཏེ༌ ཟ༌གོས༌།
EXO 12:10 ཁྱོ༌ཞ༌གུན༌ནི༌ ཏེ༌ ནང༌ནེ༌ ཅའང༌ ང༌མོ༌ ཚོག༌པ༌ ལུས༌ཅུག༌ མ༌གོས༌, ཀལ༌ཏེས༌ ལུས༌ན༌ ཏེ༌བོ༌ མེ༌ ནང༌ང༌ སྲག༌གོས༌།
EXO 12:11 ཏེ༌གུན༌ ཟའ༌ ཟ༌ནེ༌ ཁྱོ༌རང༌གུན༌ ཀོས༌སི༌ སྐྱེ༌རགས༌ ལྡམས༌ཏེ༌, རྐང༌པའ༌ པ༌བུ༌ གོན༌ཏེ༌ ལག༌པའེ༌ ནང༌ང༌ གྲུལ༌ཅེས༌སི༌ བེར༌ཀ༌ ཁུར༌ཏེ༌ བེས༌ལ༌ ཆ༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ གྱོགས༌པ༌ ཟ༌གོས༌, ཏེ༌བོ༌ ཡ༌ཝ༌ གོམས༌ཏེ༌ སྐྱོད༌ཁན༌ནི༌ ཏུས༌ཆེན༌ ཨིན༌ནོག༌།’”
EXO 12:12 “ཏེན༌ན༌ ཚན༌ལ༌ ང༌ ཨི༌ཇིབ༌བི༌ ནས༌སའེ༌ ནང༌ང༌ སོང༌ཏེ༌ མི༌ དང༌ སེམས༌ཅན༌ གུན༌ནི༌ གོ༌སྐྱེས༌ བུ༌ཚ༌ ཚང༌མ༌ སད༌ཨིན༌ ཡང༌ ཨི༌ཇིབ༌པའེ༌ ལྷ༌ལྷ༌མོ༌ ཚང༌མ༌ལ༌ ཆད༌པ༌ ཏང༌ཨིན༌, ང༌ ཡ༌ཝ༌ ཨིན༌།
EXO 12:13 སྒོའེ༌ཀ༌ ཁྲག༌ སྐུ༌ཁན༌བོ༌ ཁྱོ༌ཞ༌གུན༌ དུག༌ཁན༌ནི༌ ཁང༌པའེ༌ སྟགས༌ ཨིན༌། ཁྲག༌ ཐོང༌ང༌ཅིག༌ ང༌ ཁྱོ༌ཞ༌གུན༌ནི༌ ཁང༌པ༌ གོམས༌ཏེ༌ ཆེན༌ ཡང༌ ཨི༌ཇིབ༌པ༌གུན༌ལ༌ ཏང༌ཅེས༌ཅན༌ནི༌ ཆད༌པ༌ ཁྱོ༌ཞ༌གུན༌ལ༌ མི༌ཏང༌།”
EXO 12:14 “ཁྱོ༌ཞ༌གུན༌ནི༌ ཡ༌ཝའེ༌ ཛད༌ཁན༌བོ༌ ཨིད༌ཏུ༌ ཅོ༌ཨིན༌ འི༌ ཞག༌པོ༌ མི༌རབས༌ནེ༌ མི༌རབས༌ ལོ༌ཞུང༌, ཏུས༌ཆེན༌ནི༌ ཚུལ༌ལ༌ རྩི༌གོས༌། འི༌བོ༌ ཏུས༌གྱུན༌ནི༌ ཕིའ༌ བཀའ༌ཁྲིམས༌ཤིག༌ ཨིན༌།
EXO 12:15 ཞག༌པོ༌ རྡུན༌ནི༌ ཕིའ༌ ཁྱོ༌ཞ༌གུན༌ སྐྱུར༌ མེད༌ཁན༌ནི༌ ཏ༌གི༌ ཟ༌གོས༌། ཞག༌ ཏང༌པོའེ༌ ཞག༌ག༌ ཁྱོ༌རང༌གུན༌ནི༌ ཁང༌པའེ༌ ནང༌ང༌ ཡོད༌ཁན༌ནི༌ སྐྱུར༌ ཚང༌མ༌ མེད༌ཁན༌ ཅོས༌། འི༌ ཞག༌ རྡུན༌ནི༌ རིངས༌ལ༌ སྐྱུར༌ ཡོད༌ཁན༌ནི༌ ཏ༌གི༌ ཟའ༌ཁན༌གུན༌ ཨིས༌ར༌ཨེལ༌པ༌ ཐེ༌མ༌གོས༌།
EXO 12:16 ཞག༌ ཏང༌པོ༌ དང༌ རྡུན༌པའེ༌ ཞག༌ག༌ ཁྱོ༌ཞ༌གུན༌ ཅོལ༌ཅེས༌ལ༌ ཛོམ༌གོས༌། ཏེ༌ ཞག༌གུན༌ལ༌ ཟའ༌ཅེས༌ལ༌ ཁར༌ཇི༌ གྲལ༌གྲིག༌ ཅོ༌ཅེས༌ མ༌སྟོག༌ ཞན༌ལས༌ ཅོ༌ མ༌གོས༌།”
EXO 12:17 “སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ རྩིས༌ ཅིའ༌ཟེར༌ན༌ འིན༌ན༌ ཞག༌ག༌ ངའེ༌ ཁྱོ༌ཞའེ༌ མི༌སྡེ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོངས༌པིན༌། ཁྱོ༌ཞ༌གུན༌ནི༌ འི༌ ཞག༌པོ༌ ཏུས༌ཆེན༌ནི༌ ཚུལ༌ལ༌ མི༌རབས༌ནེ༌ མི༌རབས༌ རྩིས༌།
EXO 12:18 ཟླ༌ཝ༌ ཏང༌པོའེ༌ ཞག༌ 14 པའེ༌ ཕི༌ཏོག༌ནེ༌ ཞག༌ 21 པའེ༌ ཕི༌ཏོག༌ ཚོག༌པ༌ ཁྱོ༌ཞ༌གུན༌ སྐྱུར༌ཅན༌ནི༌ ཏ༌གི༌ ཟའ༌ མ༌གོས༌།
EXO 12:19 ཞག༌པོ༌ རྡུན༌ནི༌ ཕིའ༌ ཁྱོ༌ཞའེ༌ ཁང༌པའེ༌ ནང༌ང༌ སྐྱུར༌ ཐོབ༌ མ༌གོས༌། ཀལ༌ཏེས༌ ཏེན༌ན༌ ཡུལ༌ལ༌ སྐྱེ༌ཁན༌ ཨིས༌ར༌ཨེལ༌པ༌ ཡ༌ ཞན༌ཡུལ༌པ༌, སུ༌ཞིག༌གི༌ སྐྱུར༌ ཡོད༌ཁན༌ནི༌ ཏ༌གི༌ ཟའ༌ན༌ ཁོ༌ ཨིས༌ར༌ཨེལ༌པ༌ ཐེ༌མ༌གོས༌།
EXO 12:20 ཏེ༌ ཏུས༌ལ༌ ཁྱོ༌ཞ༌གུན༌ སྐྱུར༌ ཡོད༌ཁན༌ནི༌ ཟན༌ ཟའ༌ མ༌གོས༌། ཁྱོ༌ཞ༌གུན༌ ཀ༌རུ༌ ཚུགས༌ཏེ༌ ཡོད༌ནའང༌ སྐྱུར༌ མེད༌ཁན༌ནི༌ ཏ༌གི༌ ཟའ༌ གོས༌།”
EXO 12:21 མོ༌ཟེས༌སི༌ ཨིས༌ར༌ཨེལ༌པ༌ སྤོན༌བོ༌ ཚང༌མ༌ བོད༌ཏེ༌ ཁྱོངས༌ ཡང༌ ཟེརས༌, “ནང༌ཚངས༌ རེ༌རེའེ༌ ལུ༌གུ༌ ཡ༌ རི༌གུ༌ ལྡོམ༌ ཡང༌ ཏེ༌བོ༌ སད༌ཏེ༌ དཀོན༌མཆོག༌ གོམས༌ཏེ༌ སྐྱོད༌ཁན༌ནི༌ ཏུས༌ཆེན༌ རྩིས༌།
EXO 12:22 ཧི༌སོབ༌བི༌ བུར༌སའེ༌ ཁག༌ཞིག༌ ཁྲག༌གི༌ ནང༌ང༌ ཅུགས༌ཏེ༌ ཁྱོ༌ཞའེ༌ སྒོའེ༌ རིབ༌ཞི༌ ཐའ༌མ༌ དང༌ སྟག༌ གུན༌ནི༌ཀ༌ སྐུས༌། ཁྱོ༌ཞའ༌ ཅིག༌གའང༌ ང༌མོ༌ ཚོག༌པ༌ ཁང༌པ༌ནེ༌ ཕི༌ལོག༌ག༌ མ༌ཆ༌།
EXO 12:23 ཡ༌ཝ༌ ཨི༌ཇིབ༌པ༌གུན༌ སད༌ད༌ལ༌ སྐྱོད༌ ཟ༌ནེ༌ ཁོང༌ངི༌ སྒོའེ༌ རིབ༌ཞི༌ ཐའ༌མ༌ དང༌ སྟག༌ གུན༌ནི༌ཀ༌ ཁྲག༌ ཟིགས༌ཏེ༌ ཁྱོ༌ཞ༌གུན༌ནི༌ ཁང༌པ༌ གོམས༌ཏེ༌ སྐྱོད༌ཨིན༌ ཡང༌ ཤི༌ཅུག༌ཁན༌ནི༌ ཕོ༌ཉ༌ ཁྱོ༌ཞའེ༌ ཁང༌པའེ༌ ནང༌ང༌ ཆ༌ཅུག༌ག༌ མ༌ཛད༌ད༌ ཁྱོ༌ཞ༌གུན༌ སྐྱོབ༌བ༌ ཛད༌ཨིན༌།”
EXO 12:24 “ཁྱོ༌ཞའ༌ དང༌ ཁྱོ༌ཞའེ༌ པུར༌གྱུད༌གུན༌ནི༌ ཏེ༌བོ༌ ཏུས༌ཆེན༌ནི༌ ཚུལ༌ལ༌ ཏུས༌གྱུན༌ རྩི༌གོས༌།
EXO 12:25 ཡ༌ཝའེ༌ ཞལ༌ཆད༌ ཛད༌ཁན༌ནི༌ ས༌ཆའེ༌ ནང༌ང༌ ཁྱོ༌ཞ༌གུན༌ ལེབས༌ཏེ༌ སྟིང༌ནེའང༌ ཁྱོ༌ཞ༌གུན༌ནི༌ འི༌ ཏུས༌ཆེན༌བོ༌ རྩི༌གོས༌།
EXO 12:26 ཁྱོ༌ཞའེ༌ ཕྲུ༌གུ༌གུན༌ནི༌ ‘འི༌ ཏུས༌ཆེན༌བོ༌ ཅི༌ ཨིན༌ནོག༌’ ཟེར༌ཏེ༌ ཏྲི༌ན༌,
EXO 12:27 ཁོང༌གུན༌ལ༌ ཤོད༌, ‘འི༌བོ༌ ཡ༌ཝའ༌ གོམས༌ཏེ༌ སྐྱོད༌ཁན༌ནི༌ ཏུས༌ཆེན༌ནི༌ སྲོག༌ཆོད༌པོ༌ ཨིན༌ནོག༌, ཅིའ༌ཟེར༌ན༌ ཁོང༌ངི༌ ཨི༌ཇིབ༌པ༌གུན༌ལ༌ ཆད༌པ༌ སལ༌ ཟ༌ནེ༌ ཨིས༌ར༌ཨེལ༌པ༌ ཨི༌ཇིབ༌བི༌ ནང༌ང༌ ཡོད༌ཁན༌གུན༌ནི༌ ཁང༌པའེ༌ ཀ༌ནེ༌ གོམས༌ཏེ༌ སྐྱོད༌།’” ཏེ༌ནེ༌ མི༌ཚང༌མའེ༌ ས༌ ཐུག༌ ཅུགས༌ཏེ༌ གོ༌ སྒུས༌ཏེ༌ ཡ༌ཝའ༌ ཅོལས༌།
EXO 12:28 ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ཅོས༌།
EXO 12:29 ཚན༌ སྐྱིལ༌ལ༌ ཡ༌ཝའེ༌ ཨི༌ཇིབ༌བི༌ ས༌ཆའེ༌ ནང༌ང༌ གོ༌སྐྱེས༌ བུ༌ཚ༌གུན༌ སད༌ད༌ ཛདས༌, ཁྲིས༌ ཐོབ༌ཅེས༌ཅན༌ནི༌ གྱལ༌པོའེ༌ བུ༌ཚ༌ནེ༌ ཏངས༌ཏེ༌ ཙོན༌པའེ༌ གོ༌སྐྱེས༌ བུ༌ཚ༌ ཚོག༌པ༌, ཡང༌ སྲལ༌ཁན༌ནི༌ སེམས༌ཅན༌གུན༌ནི༌ གོ༌སྐྱེས༌ ཕོ༌གུན༌ནའང༌ སད༌ད༌ ཛདས༌།
EXO 12:30 ཏེན༌ན༌ ཚན༌ལ༌ གྱལ༌པོ༌, ཁོའེ༌ སྤོན༌བོ༌གུན༌ དང༌ ཨི༌ཇིབ༌པ༌ ཚང༌མ༌ ལངས༌ ཡང༌ ཨི༌ཇིབ༌ གང༌པོའེ༌ ནང༌ང༌ ངུ༌སྐད༌ ཀྲག༌པོ༌ ཚོར༌ ཅིའ༌ཟེར༌ན༌ ཕྲུ༌གུ༌ མ༌ཤི༌ཁན༌ནི༌ ཁང༌པ༌ ཅིག༌གའང༌ མེད༌པིན༌།
EXO 12:31 ཏེན༌ན༌ ཚན༌ལ༌ གྱལ༌པོའེ༌ མོ༌ཟེས༌ དང༌ ཨ༌རོན༌ བོད༌ཏེ༌ ཁྱོངས༌ ཡང༌ ཟེརས༌, “ཁྱོ༌ཞའ༌ ཨིས༌ར༌ཨེལ༌པ༌གུན༌ ངའེ༌ ཡུལ༌ནེ༌ བིང༌ཏེ༌ སོང༌། ཁྱོ༌ཞའེ༌ ཟེར༌ཁན༌ ནང༌ཞིན༌ ཡ༌ཝའ༌ ཅོལ༌ལ༌ སོང༌།
EXO 12:32 ཁྱོ༌ཞའེ༌ ར༌ལུག༌ དང༌ ཞན༌ སེམས༌ཅན༌གུན༌ ཁྲིད༌ཏེ༌ ངའེ༌ ཡུལ༌ནེ༌ བིང༌ཏེ༌ སོང༌ ཡང༌ ངའང༌ ཅིན༌ལབས༌ སལ༌ཅེས༌ལ༌ མོས༌ལམ༌ ཞུས༌།”
EXO 12:33 ཨི༌ཇིབ༌པ༌གུན༌ནི༌ ཁོང༌གུན༌ལ༌ གྱོགས༌པ༌ ཁོང༌ངི༌ ཡུལ༌ནེ༌ ཆ༌ཅེས༌ལ༌ འུ༌ཙུག༌ ཏངས༌ཏེ༌ ཟེརས༌, “ཁྱོ༌ཞ༌གུན༌ མ༌ཆའ༌ན༌ ང༌ཞའ༌ ཚང༌མ༌ ཤིའ༌ནོག༌།”
EXO 12:34 ཏེ༌ནེ༌ ཨིས༌ར༌ཨེལ༌པ༌གུན༌ སྐྱུར༌ མ༌ཏང༌ཁན༌ནི༌ པག༌པའེ༌ ལག༌ཕིས༌སི༌ ནང༌ང༌ ཏུམས༌ཏེ༌ ལ༌གིན༌ནི༌ ནང༌ང༌ ཁོང༌རང༌གུན༌ནི༌ སྤུང༌པའེ༌ཀ༌ ཁུར༌ཏེ༌ སོང༌།
EXO 12:35 ཨིས༌ར༌ཨེལ༌པ༌གུན༌ནི༌ མོ༌ཟེས༌སི༌ མོལ༌ཁན༌ ནང༌ཞིན༌ ཨི༌ཇིབ༌པ༌གུན༌ལ༌ སེར༌ དང༌ མུལ༌ལི༌ ཅ༌ལག༌ དང༌ ཀོས༌ལག༌ གུན༌ ཏོང༌ ཟེརས༌།
EXO 12:36 ཡ༌ཝའེ༌ ཨིས༌ར༌ཨེལ༌པ༌གུན༌ལ༌ ཆོགས༌སྐྱོར༌ ཐོབ༌ཅུགས༌ཏེ༌ ཁོང༌གུན༌ནི༌ ཏོང༌ ཟེར༌ཁན༌ ཚང༌མ༌ ཨི༌ཇིབ༌པ༌གུན༌ནི༌ ཏངས༌། ཏེན༌ན༌ཟུག༌གི༌ ཁོང༌གུན༌ནི༌ ཨི༌ཇིབ༌པ༌གུན༌ནི༌ གྱུ༌ནོར༌གུན༌ ཁྱེརས༌།
EXO 12:37 ཨིས༌ར༌ཨེལ༌པ༌གུན༌ རམ༌སིས༌སི༌ གྱལ༌ས༌ནེ༌ སུ༌ཀོད༌དི༌ གྱལ༌ས༌ སོང༌། ལག༌ དྲུག༌གི༌ མི༌ གྲུལ༌ཏེ༌ སོང༌ ཏེ༌ནང༌ང༌ ཕྲུ༌གུ༌ དང༌ བུ༌མོ༌ གུན༌ མ༌ཐེའ༌ ཨིན༌པིན༌།
EXO 12:38 ཨིས༌ར༌ཨེལ༌པ༌ མན༌ཁན༌ནི༌ མི༌ མང༌པོ༌ ཁོང༌ ཉམ༌པོ༌ སོང༌, ར༌ལུག༌ དང༌ ཞན༌ སེམས༌ཅན༌ནི༌ ཁྱུ༌ མང༌པོའང༌ ཡོད༌པིན༌།
EXO 12:39 ཁོང༌གུན༌ནི༌ ཨི༌ཇིབ༌ནེ༌ ཁྱོང༌ཁན༌ནི༌ པག༌པའེ༌ སྐྱུར༌ མེད༌ཁན༌གུན༌ལ༌ ཏ༌གི༌ ཅོས༌། པག༌པའེ༌ ནང༌ང༌ སྐྱུར༌ མེད༌པིན༌ ཅིའ༌ཟེར༌ན༌ ཁོང༌གུན༌ ཨི༌ཇིབ༌ནེ༌ གྱོགས༌པ༌ བིང༌གོས༌པ༌ ཁོང༌གུན༌ལ༌ ཟན༌ གྲལ༌གྲིག༌ ཅོ༌ཅེས༌སི༌ ཏུས༌ མ༌ཐོབ༌།
EXO 12:40 ཨིས༌ར༌ཨེལ༌པ༌གུན༌ ཨི༌ཇིབ༌བི༌ ནང༌ང༌ ལོ༌ 430 དུགས༌ཏེ༌ ཨིན༌པིན༌།
EXO 12:41 ལོ༌ 430 སྟིང༌ཇུག༌གི༌ ཞག༌ག༌ ཡ༌ཝའེ༌ མི༌སྡེ༌ ཚང༌མ༌ ཨི༌ཇིབ༌ནེ༌ བིངས༌ཏེ༌ སོང༌།
EXO 12:42 ཏེ༌ ཚན༌ལ༌ ཡ༌ཝའེ༌ ཨིས༌ར༌ཨེལ༌པ༌གུན༌ སྐྱོབས༌ཏེ༌ ཨི༌ཇིབ༌ནེ༌ ཕིངས༌ཏེ༌ ཁྱེར༌ར༌ ཛདས༌། ཨིས༌ར༌ཨེལ༌པ༌ ཚང༌མའེ༌ མི༌རབས༌ནེ༌ མི༌རབས༌ ཁོང༌གུན༌ནི༌ ཕ༌མེས༌པོ༌གུན༌ ཡ༌ཝའེ༌ སྐྱོབས༌ཏེ༌ ཕིང༌ང༌ ཛད༌ཁན༌ནི༌ ཚན༌བོ༌ ཨིད༌ཏུ༌ ཅོ༌ཨིན༌ ལོ༌ཞུང༌ རྩི༌གོས༌།
EXO 12:43 ཡ༌ཝའེ༌ མོ༌ཟེས༌ དང༌ ཨ༌རོན༌ལ༌ མོལས༌, “འི༌གུན༌ པེ༌སག༌གི༌ ཏུས༌ཆེན༌ནི༌ ཁྲིམས༌གུན༌ ཨིན༌:” “ཞན༌ཡུལ༌ལི༌ མི༌ སུ༌ཞིག༌གའང༌ པེ༌སག༌གི༌ ཁར༌ཇི༌ ཟའ༌ མི༌ཆོག༌།
EXO 12:44 ཁྱོ༌ཞའེ༌ ཉོས༌ཁན༌ ཚེ༌ཡོག༌གུན༌ནི༌ ཀལ༌ཏེས༌ སུན༌ནད༌ ཅོས༌ཏེ༌ ཨིན༌ན༌ ཏེ༌བོ༌ ཟའ༌ནའང༌ གྲིག༌ཏེ༌ ཨིན༌ནོག༌།
EXO 12:45 སྐབ༌སྟོགས༌སི༌ ཕིའ༌ ཁྱོ༌ཞའེ༌ ཡུལ༌ལ༌ དུག༌ཁན༌ནི༌ མི༌ དང༌ ལ༌པ༌ གུན༌ནི༌ ཟའ༌ མི༌ཆོག༌།”
EXO 12:46 “ཤ༌བོ༌ ཁང༌པའེ༌ ནང༌ང༌ ཟ༌གོས༌ ཏེ༌བོ༌ ཁང༌པ༌ནེ༌ ཕི༌ལོག༌ག༌ ཁྱེར༌ མ༌གོས༌ ཡང༌ རུས༌པ༌ ཅིག༌གའང༌ ཅག༌ མ༌གོས༌།
EXO 12:47 ཨིས༌ར༌ཨེལ༌པ༌ མི༌ཚོགས༌ གང༌པོའེ༌ འི༌ གའ༌སྟོན༌ རྩི༌གོས༌།”
EXO 12:48 “ཨིན༌ནའང༌ ཡ༌ཝ༌ གོམས༌ཏེ༌ སྐྱོད༌ཁན༌ནི༌ གའ༌སྟོན༌ རྩིའ༌ ཐད༌ཁན༌ ཞན༌ཡུལ༌པ༌ ཁྱོ༌ཞ༌གུན༌ནི༌ ནང༌ཚངས༌སི༌ ནང༌ང༌ ཡོད༌ཁན༌ནི༌ བུ༌ཚ༌ ཚང༌མའ༌ སུན༌ནད༌ ཅོ༌གོས༌། ཏེ༌ནེ༌ ཁོང༌གུན༌ ཏེན༌ན༌རུ༌ སྐྱེ༌ཁན༌ ཨིས༌ར༌ཨེལ༌པ༌ ཙོགས༌ གྱུར༌ཏེ༌ གའ༌སྟོན༌ནི༌ ནང༌ང༌ ཐུས༌ནའང༌ གྲིག༌ཏེ༌ ཨིན༌ནོག༌། ཨིན༌ནའང༌ སུན༌ནད༌ མ༌ཅོ༌ཁན༌གུན༌ནི༌ ཏེ༌ ཤ༌ ཟའ༌ མི༌ཆོགས༌།
EXO 12:49 ཏེན༌ན༌ བཀའ༌ཁྲིམས༌གུན༌ ཏེ༌རུ༌ སྐྱེས༌ཁན༌ནི༌ ཨིས༌ར༌ཨེལ༌པ༌གུན༌ དང༌ ཁྱོ༌ཞའེ༌ ཕྲོའ༌ ཡོད༌ཁན༌ནི༌ ཞན༌ཡུལ༌ལི༌ མི༌གུན༌ནི༌ ཕིའང༌ ཨིན༌།”
EXO 12:50 མོ༌ཟེས༌ དང༌ ཨ༌རོན༌ལ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌ ཚང༌མའེ༌ ཅོས༌།
EXO 12:51 ཡང༌ ཏེན༌ན༌ ཞག༌ག༌ ཡ༌ཝའེ༌ ཨིས༌ར༌ཨེལ༌པ༌གུན༌ སྡེ༌ སྡེ༌ ནང༌ང༌ ཨི༌ཇིབ༌ནེ༌ ཕིང༌ཏེ༌ ཁྱོང༌ང༌ ཛདས༌།
EXO 13:1 ཡ༌ཝའེ༌ མོ༌ཟེས༌ལ༌ མོལས༌,
EXO 13:2 “གོ༌སྐྱེས༌ བུ༌ཚ༌ ཚང༌མ༌ ངའེ༌ ཕིའ༌ ཕེ༌གོས༌, ཨིས༌ར༌ཨེལ༌པ༌ མི༌ དང༌ སེམས༌ཅན༌ གུན༌ནི༌ གོ༌སྐྱེས༌ བུ༌ཚ༌ ཚང༌མ༌ ངའེ༌ ཨིན༌།”
EXO 13:3 ཏེ༌ནེ༌ མོ༌ཟེས༌སི༌ མི༌གུན༌ལ༌ ཟེརས༌, “ཁྱོ༌ཞ༌གུན༌ ཨི༌ཇིབ༌བི༌ ཚེ༌ཡོག༌ནེ༌ བིངས༌ཏེ༌ ཡོང༌ཁན༌ནི༌ འི༌ ཞག༌པོ༌ ཏུས༌གྱུན༌ ཨིད༌ཏུ༌ བོར༌ ཅིའ༌ཟེར༌ན༌ ཡ༌ཝའེ༌ ཁོང༌རང༌ངི༌ ཁྱུད༌ ཉམ༌པོ༌ ཁྱོ༌ཞ༌གུན༌ ཏེ༌ནང༌ནེ༌ ཕིངས༌ཏེ༌ ཁྱོང༌ང༌ ཛདས༌། སྐྱུར༌ ཡོད༌ཁན༌ ཟན༌ མ༌ཟའ༌།
EXO 13:4 དི༌རིང༌ ཨ༌བིབ༌ ཟླ༌ཝའེ༌ གོ༌མའེ༌ ཞག༌ག༌ ཁྱོ༌ཞ༌གུན༌ ཨི༌ཇིབ༌ནེ༌ བིངས༌ཏེ༌ ཆེན༌།
EXO 13:5 ཡ༌ཝའེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ འོ༌མ༌ དང༌ རང༌རྩི༌ གྱུག༌སའེ༌ ཀེ༌ནན༌པ༌གུན༌, ཧེད༌པ༌གུན༌, ཨ༌མོར༌པ༌གུན༌, ཧིཝ༌པ༌གུན༌ དང༌ ཡེ༌བས༌པ༌གུན༌ནི༌ ས༌ཆ༌ ཏང༌ཅེས༌ལ༌ ནའ༌ ཁུར༌ར༌ ཛད༌ཁན༌བོའེ༌ ནང༌ང༌ ཁྱེར༌ར༌ ཛད༌ད༌ཅིག༌ ཁྱོ༌ཞ༌གུན༌ནི༌ ལོ༌ཞུང༌ ཟླ༌ཝ༌ ཏང༌པོའེ༌ ནང༌ང༌ འི༌ གའ༌སྟོན༌བོ༌ རྩི༌གོས༌།
EXO 13:6 ཞག༌པོ༌ རྡུན༌ ཁྱོ༌ཞ༌གུན༌ནི༌ སྐྱུར༌ མེད༌ཁན༌ནི༌ ཏ༌གི༌ ཟ༌གོས༌ ཡང༌ ཞག༌མ༌ རྡུན༌པའེ༌ ཞག༌ག༌ ཡ༌ཝའེ༌ རྩི༌ཝའེ༌ ནང༌ང༌ གའ༌སྟོན༌ རྩིས༌།
EXO 13:7 ཏེ༌ ཞག༌མ༌ རྡུན༌ ཁྱོ༌ཞའ༌ སྐྱུར༌ མེད༌ཁན༌ནི༌ ཏ༌གི༌ ཟ༌གོས༌། ཁྱོ༌ཞའེ༌ ས༌ཆ༌ གང༌པོའེ༌ ནང༌ང༌ སྐྱུར༌ ཡོད༌ཁན༌ ཅི༌ཞིག༌གའང༌ ཡོང༌ མ༌གོས༌།”
EXO 13:8 “ཏེ༌ ཞག༌ག༌ ཁྱོ༌ཞའེ༌ ཁྱོ༌ཞ༌རང༌ངི༌ ཕྲུ༌གུ༌གུན༌ལ༌ ཤོད༌, ‘ང༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ ཟ༌ནེ༌ ཡ༌ཝའེ༌ ཛད༌ཁན༌བོ༌ ཨིད༌ཏུ༌ ཅོ༌ཨིན༌ ངའེ༌ འི༌ གའ༌སྟོན༌ རྩིའད༌།’
EXO 13:9 འི༌ གའ༌སྟོན༌ རྩི༌ཅེས༌པོ༌ ཁྱོ༌ཞ༌གུན༌ནི༌ ལག༌པ༌ དང༌ ཐོད༌པའེ༌ཀ༌ སྟགས༌ ཙོགས༌ ཨིན༌། ཏེ༌བོའེ༌ ཁྱོ༌ཞ༌གུན༌ ཡ༌ཝའེ༌ ཁོང༌རང༌ངི༌ ཁྱུད༌ཅན༌ ཆག༌གི༌ ཡོག༌ག༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌བོ༌ ཤད༌ཅེས༌ལ༌ ཨིད༌ཏུ༌ སྐུལ༌ཨིན༌།
EXO 13:10 འི༌ གའ༌སྟོན༌བོ༌ ལོ༌ཞུང༌ འིན༌ན༌ ཏུས༌ལ༌ རྩི༌གོས༌།”
EXO 13:11 “ཡ༌ཝའེ༌ ཁྱོ༌ཞའ༌ དང༌ ཁྱོ༌ཞའེ༌ ཕ༌མེས༌པོ༌གུན༌ལ༌ ནའ༌ ཁུར༌ར༌ ཛད༌ཁན༌ ནང༌ཞིན༌ ཁྱོ༌ཞའ༌ ཀེ༌ནན༌པ༌གུན༌ནི༌ ས༌ཆའེ༌ ནང༌ང༌ ཁྱོང༌ང༌ ཛད༌ཏེ༌ སྟིང༌ནེ༌
EXO 13:12 ཁྱོ༌ཞ༌གུན༌ནི༌ བུ༌ཚ༌ གོ༌སྐྱེས༌ དང༌ ཁྱོ༌ཞའེ༌ སེམས༌ཅན༌གུན༌ནི༌ གོ༌སྐྱེས༌ ཕོ༌ ཚང༌མ༌ ཡ༌ཝའ༌ ཕུལ༌གོས༌ ཅིའ༌ཟེར༌ན༌ ཁོང༌ ཚང༌མ༌ ཡ༌ཝའེ༌ ཨིན༌ནོག༌།
EXO 13:13 ཨིན༌ནའང༌ ཁྱོ༌རང༌གུན༌ནི༌ ཁོང༌ངི༌ ཀ༌ནེ༌ གོ༌སྐྱེས༌ བུང༌བུ༌ ཕོ༌ ཚང༌མ༌ ཏེ༌བོའེ༌ ཚབས༌ལ༌ ལུ༌གུ༌ ཞིག༌ ཆོད༌པ༌ ཕུལ༌ཏེ༌ ལོགས༌ཏེ༌ ཉོ༌ཉན༌ ཨིན༌། ཀལ༌ཏེས༌ ལོགས༌ཏེ༌ མ༌ཉོ༌ན༌ ཏེ༌བོའེ༌ ཇིང༌བ༌ ཅགས༌ཏེ༌ སོད༌། ཁྱོ༌ཞ༌གུན༌ནི༌ གོ༌སྐྱེས༌ ཕྲུ༌གུ༌ བུ༌ཚ༌ ཚང༌མ༌ ལོགས༌ཏེ༌ ཉོ༌གོས༌།”
EXO 13:14 “ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཁྱོ༌ཞའེ༌ ཕྲུ༌གུ༌གུན༌ནི༌ འི༌ ཏོན༌ ཅི༌ ཨིན༌ནོག༌ ཟེར༌ཏེ༌ ཏྲི༌ན༌, ཁྱོ༌ཞ༌གུན༌ནི༌ ཁོང༌གུན༌ལ༌ ཟེར༌, ‘ཡ༌ཝའ༌ ཁྱུད༌ཅན༌ནི༌ ང༌དང༌གུན༌ ཨི༌ཇིབ༌བི༌ ཚེ༌ཡོག༌ནེ༌ ཕིངས༌ཏེ༌ ཁྱོང༌ང༌ ཛད༌ཏེ༌ ཨིན༌ནོག༌།
EXO 13:15 ཨི༌ཇིབ༌བི༌ གྱལ༌པོའེ༌ སྙིང༌སྐྱོང༌པོ༌ གྱུར༌ཏེ༌ ང༌ཞ༌གུན༌ ཆ༌ མ༌ཅུག༌ ཟ༌ནེ༌ ཡ༌ཝའེ༌ ཨི༌ཇིབ༌པ༌གུན༌ནི༌ མི༌ དང༌ སེམས༌ཅན༌ནི༌ གོ༌སྐྱེས༌ བུ༌ཚ༌ ཚང༌མ༌ སད༌ད༌ ཛད༌། ཏེ༌ གྱུན༌ཚན༌ནི༌ ཕིའ༌ ང༌ཞའེ༌ སེམས༌ཅན༌ནི༌ གོ༌སྐྱེས༌ བུ༌ཚ༌ ཚང༌མ༌ ཡ༌ཝའ༌ ཕུལ༌ལད༌ ཨིན༌ནའང༌ ཡ༌ཝའེ༌ ཀ༌ནེ༌ ང༌ཞའེ༌ ང༌ཞ༌རང༌ངི༌ གོ༌སྐྱེས༌ བུ༌ཚ༌གུན༌ ལོགས༌ཏེ༌ ཉོ༌གོས༌།’
EXO 13:16 ཡ༌ཝའེ༌ ཁོང༌རང༌ངི༌ ཁྱུད༌ ཉམ༌པོ༌ ང༌དང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌བོ༌ ཨིད༌ཏུ༌ བོར༌ཅེས༌ལ༌ འི༌བོ༌ ང༌དང༌གུན༌ནི༌ ལག༌པ༌ དང༌ ཐོད༌པའི༌ཀ༌ སྟགས༌ ཙོགས༌ ཨིན༌ནོག༌།”
EXO 13:17 ཨི༌ཇིབ༌བི༌ གྱལ༌པོའེ༌ མི༌གུན༌ ཆ༌ཅུག༌ག༌ཅིག༌, དཀོན༌མཆོག༌གི༌ ཁོང༌གུན༌ ཕི༌ལིས༌ཏི༌པའེ༌ ས༌ཆའེ༌ ལམ༌ནེ༌ ཁྲིད༌ཏེ༌ ཁྱེར༌ར༌ མ༌ཛདས༌, ཞན༌ ཏེ༌ ལམ༌བོ༌ ཉེ༌ཤོག༌པོ༌ ཨིན༌པིན༌། དཀོན༌མཆོག༌གི༌ མོལས༌, “མག༌ ཏང༌གོས༌ན༌ མི༌གུན༌ནི༌ སམ༌བ༌ གྱུར༌ཏེ༌ ཁོང༌གུན༌ ལོགས༌ཏེ༌ ཨི༌ཇིབ༌བ༌ ཆ༌སྲིད༌ཅེས༌ ཨིན༌ནོག༌།”
EXO 13:18 ཏེ༌བོའེ༌ཕིའ༌ ཁོང༌ངི༌ ཁོང༌གུན༌ ཐང༌སྟོང༌ གྱུད༌ཏེ༌ ཚོ༌ མར༌པོ༌ ཆོགས༌ལ༌ ཁྱེར༌ར༌ ཛདས༌། ཨིས༌ར༌ཨེལ༌པ༌གུན༌ནི༌ མག༌ ཏང༌ཅེས༌ལ༌ ལག༌ཆ༌ ཁུར༌ཏེ༌ ཡོད༌པིན༌།
EXO 13:19 མོ༌ཟེས༌སི༌ ཡོ༌སེབ༌བི༌ རུས༌པ༌གུན༌ ཁུརས༌ ཅིའ༌ཟེར༌ན༌ ཡོ༌སེབ༌བི༌ ཨིས༌ར༌ཨེལ༌པ༌གུན༌ལ༌ ནའ༌ ཁུར༌ཅུགས༌ཏེ༌ ཟེརས༌, “དཀོན༌མཆོག༌གི༌ རོགས༌ ཛད༌ཏེ༌ ཁྱོ༌ཞའ༌ ཐར༌ཅུག༌ ཟ༌ནེ༌ ཁྱོ༌ཞའེ༌ ངའེ༌ རུས༌པ༌གུན༌ ཁྱོ༌ཞའ༌ ཉམ༌པོ༌ འི༌ ས༌ཆ༌ནེ༌ ཁྱེར༌གོས༌།”
EXO 13:20 སུ༌ཀོད༌ནེ༌ བིང༌ཏེ༌ ཨིས༌ར༌ཨེལ༌པ༌གུན༌ནི༌ ཐང༌སྟོང༌ངི༌ ཟུར༌ལ༌ ཨི༌ཐམ༌ ཟེར༌སའེ༌ ས༌ཆའེ༌ཀ༌ ཀུར༌ ཙུགས༌ཏེ༌ དུགས༌།
EXO 13:21 ཡ༌ཝའ༌ ཉི༌མའ༌ ལམ༌སྟན༌ཁན༌ སྲིན༌ནི༌ ཀ༌ཝ༌ ཡང༌ ཚན༌ལ༌ འོད༌ ཏང༌ཁན༌ མེའེ༌ ཀ༌ཝ༌ ཙོགས༌ལ༌ ཁོང༌གུན༌ནི༌ སྔུན༌སྔུན༌ལ༌ སྐྱོདས༌། ཏེ༌ནེ༌ ཁོང༌གུན༌ ཉི༌མ༌ དང༌ ཚན༌ ཉིས༌ཀོ༌ གྲུལ༌ཐུབ༌།
EXO 13:22 ཉི༌མ༌ སྲིན༌ དང༌ ཚན༌ལ༌ མེའེ༌ ཀ༌ཝ༌ ཏུས༌གྱུན༌ ཁོང༌གུན༌ ཉམ༌པོ༌ ལུས༌།
EXO 14:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌,
EXO 14:2 “ཨིས༌ར༌ཨེལ༌པ༌གུན༌ལ༌ ལོགས༌ཏེ༌ ཡོངས༌ཏེ༌ མིག༌དོལ༌ དང༌ ཚོའེ༌ པར༌ལ༌ པི༌ཧ༌ཧི༌རོཐ༌ གྲོང༌ཁྱེར༌རི༌ དུན༌ལ༌ ཀུར༌ ཙུགས༌ཏེ༌ དུག༌ ཟེར༌ ཀ༌བོ༌ བའལ༌ ཟེ༌ཕོན༌ གྲོང༌ཁྱེར༌རི༌ འ༌ངོ༌ ཆོགས༌ལ༌ ཡོད༌ཏེ༌ ཨིན༌ནོག༌།
EXO 14:3 གྱལ༌པོའེ༌ སམ༌ཨིན༌, ‘ཨིས༌ར༌ཨེལ༌པ༌གུན༌ ཐང༌སྟོང༌ངི༌ ནང༌ང༌ ཁད༌ཏེ༌ ཀ༌ངོའ༌ ཆ༌ཅེན༌ ཧ༌མ༌གོའ༌ ཁོར༌རད༌གྲོ༌།’
EXO 14:4 ངའེ༌ ཡང༌སྐྱར༌ ཁོའེ༌ སྙིང༌སྐྱོང༌པོ༌ ཅོ༌ཨིན༌ ཡང༌ ཁོའེ༌ ཁྱོ༌ཞ༌གུན༌ལ༌ རྡས༌ཏེ༌ ཁྱོང༌ཨིན༌, ཨིན༌ནའང༌ གྱལ༌པོ༌ དང༌ ཁོའེ༌ མག༌མི༌གུན༌ གྱུད༌ཏེ༌ ངའ༌ སྤལ༌ ཐོབ༌ཨིན༌ ཡང༌ ང༌ ཡ༌ཝ༌ ཨིན༌ཁན༌བོ༌ ཨི༌ཇིབ༌པ༌གུན༌ནི༌ ཤེས༌ཨིན༌།” ཨིས༌ར༌ཨེལ༌པ༌གུན༌ནི༌ ཁོང༌ངི༌ མོལ༌ཁན༌བོ༌ ཅོས༌།
EXO 14:5 ཨི༌ཇིབ༌བི༌ གྱལ༌པོའ༌ མི༌གུན༌ ཤོར༌ཏོག༌ ཟེར༌ཏེ༌ ཚོར༌ར༌ཅིག༌, ཁོ༌ དང༌ ཁོའེ༌ སྤོན༌བོ༌གུན༌ནི༌ སམ༌བ༌ གྱུར༌ཏེ༌ ཟེརས༌, “ང༌དང༌ངི༌ ཅི༌ ཅོས༌ཏེ༌ ཨིན༌ནོག༌? ང༌དང༌གུན༌ནི༌ ཨིས༌ར༌ཨེལ༌པ༌གུན༌ ཆ༌ཅུགས༌ཏེ༌ ང༌དང༌ངི༌ ཕིའ༌ ལས༌ ཅོ༌ཁན༌གུན༌ པུད༌ཏེ༌ ཨིན༌ནོག༌།”
EXO 14:6 ཏེ༌བོའེ༌ཕིའ༌ གྱལ༌པོའེ༌ ཁོ༌རང༌ངི༌ རྟ༌རེལ༌ གྲལ༌གྲིག༌ ཅོ༌ཅུགས༌ཏེ༌ མག༌མི༌གུན༌ ཁྲིད༌ཏེ༌ སོང༌།
EXO 14:7 ཁོའེ༌ ཚང༌མའེ༌སང༌ གྱལ༌ལ༌ རྟ༌རེལ༌ དྲུག༌རྒྱ༌ དང༌ ཨི༌ཇིབ༌བི༌ ཞན༌ རྟ༌རེལ༌ ཚང༌མ༌ ཁོང༌རང༌ ཉམ༌པོ༌ ཁྱེརས༌ ཀ༌གུན༌ནི༌ ནང༌ང༌ མག༌སྤོན༌ དང༌ ཞན༌ མག༌མི༌གུན༌ ཡོད༌པིན༌།
EXO 14:8 ཡ༌ཝའེ༌ གྱལ༌པོའེ༌ སྙིང༌སྐྱོང༌པོ༌ གྱུར༌ཅུག༌ག༌ ཛད༌ པ༌སང༌ ཁོའེ༌ ཨིས༌ར༌ཨེལ༌པ༌གུན༌ལ༌ རྡས༌ཏེ༌ ཁྱེརས༌ ཀ༌གུན༌ མ༌ ཧམ༌པ༌ ཉམ༌པོ༌ གྲུལ༌ཏེ༌ ཆའད༌པིན༌།
EXO 14:9 ཨི༌ཇིབ༌པ༌ རྟ༌རེལ༌ དང༌ རྟའེ༌ཀ༌ ཞོན༌ཁན༌ ཡང༌ མ༌ཞོན༌ཁན༌ནི༌ གྱལ༌པོའེ༌ མག༌མི༌ ཚང༌མའེ༌ ཨིས༌ར༌ཨེལ༌པ༌གུན༌ལ༌ རྡས༌ཏེ༌ ཁྱེརས༌ ཡང༌ བའལ༌ ཟེ༌ཕོན༌ གྲོང༌ཁྱེར༌རི༌ འ༌ངོ༌ ཆོགས༌ལ༌ ཚོའེ༌ ཐའ༌མ༌ པི༌ཧ༌ཧི༌རོཐ༌ གྲོང༌ཁྱེར༌རི༌ ཉེ༌མོའ༌ ཀུར༌ ཏངས༌ཏེ༌ དུག༌ཏེ༌ ཡོད༌སའེ༌ཀ༌ ཁོང༌གུན༌ ལེབ༌།
EXO 14:10 ཨིས༌ར༌ཨེལ༌པ༌གུན༌ནི༌ གྱལ༌པོ༌ དང༌ ཁོའེ༌ མག༌མི༌གུན༌ ཁོང༌གུན༌ ཆོགས༌ལ༌ ཡོང༌ང༌ ཐོང༌ང༌ཅིག༌ ཁོང༌གུན༌ སྲན༌ཏྲེ༌ ཇིགས༌ ཡང༌ ཡ༌ཝའ༌ རོགས༌ ཛད༌ཅེས༌ལ༌ ཞུས༌།
EXO 14:11 ཁོང༌གུན༌ནི༌ མོ༌ཟེས༌ལ༌ ཟེརས༌, “ང༌ཞ༌གུན༌ འི༌ ཐང༌སྟོང༌ངི༌ ནང༌ང༌ ཤི༌ཅུག༌ག༌ ཁྱོངས༌ཏེ༌ ཅི༌ ཨི༌ཇིབ༌བི༌ ནང༌ང༌ རོམ༌ཁང༌ངི༌ ས༌ཀྱད༌ མེད༌ཏེ༌ ཨིན༌ནོག༌ག༌? ཉེ༌རང༌ངི༌ ང༌ཞ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོངས༌ཏེ༌ ཅི༌ ཅོས༌ཏེ༌ ཨིན༌?
EXO 14:12 ང༌ཞའེ༌ ཟེར༌ར༌ མེ༌རག༌ག༌ ང༌ཞའ༌ ཨི༌ཇིབ༌པ༌གུན༌ནི༌ ཡོག༌པོ༌ ཅོ༌ཨིན༌ དུག༌ཅུག༌། འི༌ ཐང༌སྟོང༌ངི༌ ནང༌ང༌ ཤིའ༌སང༌ ཨི༌ཇིབ༌པ༌གུན༌ལ༌ ཞབས༌ཏོག༌ ཅོ༌ཨིན༌ དུགས༌པིན༌ན༌ གྱལ༌།”
EXO 14:13 མོ༌ཟེས༌སི༌ ཁོང༌གུན༌ལ༌ ལན༌ཏངས༌, “ཇིགས༌ མ༌ཇིགས༌, ཁྱོ༌ཞ༌གུན༌ནི༌ སེམ༌སྟོབས༌ ཅོས༌ཏེ༌, དི༌རིང༌ ཡ༌ཝའེ༌ ཁྱོ༌ཞ༌གུན༌ ཀ༌ཟུག༌གི༌ ཨི༌ཇིབ༌པ༌གུན༌ནི༌ ཀ༌ནེ༌ སྐྱོབ༌བ༌ ཛད༌དུག༌ ལྟོས༌། དི༌རིང༌ ཐོང༌ཁན༌ནི༌ ཨི༌ཇིབ༌པ༌གུན༌ ཁྱོ༌ཞ༌གུན༌ནི༌ ཡང༌སྐྱར༌ མ༌ནེ༌ མི༌ཐོང༌།
EXO 14:14 ཡ༌ཝའེ༌ ཁྱོ༌ཞ༌གུན༌ནི༌ ཕིའ༌ ནོལ༌ལ༌ ཛད༌ཨིན༌། ཁྱོ༌ཞ༌གུན༌ ཅུབ༌ཅད༌ཏེ༌ ཞི༌དེའེ༌ ཉམ༌པོ༌ དུག༌།”
EXO 14:15 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ངི༌ རོགས༌ ཅོ༌ཅེས༌ལ༌ ཅིའ༌ ཞུའད༌? མི༌གུན༌ལ༌ གྲུལ༌ཅེས༌ལ༌ ཟེར༌།
EXO 14:16 ཁྱོ༌རང༌ངི༌ བེར༌ཀ༌ སྟག༌ཏེ༌ རང༌ངི༌ ལག༌པ༌ ཚོའེ༌ཀ༌ སྐྱོང༌། ཏེ༌ནེ༌ ཆུ༌ བེ༌ཏེ༌ ཨིས༌ར༌ཨེལ༌པ༌གུན༌ ཚོའེ༌ སྐྱིལ༌ནེ༌ ས༌སྐམ༌པོའེ༌ ཀ༌ནེ༌ གྲུལ༌ཏེ༌ ཆེན༌།
EXO 14:17 ངའེ༌ ཨི༌ཇིབ༌པ༌གུན༌ནི༌ སྙིང༌སྐྱོང༌པོ༌ གྱུར༌ཅུགས༌ཏེ༌ ཁོང༌གུན༌ ཁྱོ༌ཞའེ༌ སྟིང༌རང༌ནེ༌ ཡོང༌ཅུག༌ཨིན༌, ཡང༌ གྱལ༌པོ༌ དང༌ ཁོའེ༌ མག༌མི༌, རྟ༌རེལ༌ དང༌ རྟའེ༌ཀ༌ ཞོན༌ཁན༌ དང༌ གྲུལ༌ཁན༌ ཚང༌མ༌ གྱུད༌ཏེ༌ ངའ༌ སྤལ༌ ཐོབ༌ཨིན༌།
EXO 14:18 གྱལ༌པོ༌, ཁོའེ༌ རྟ༌རེལ༌ དང༌ རྟའེ༌ཀ༌ ཞོན༌ཁན༌ གུན༌ གྱུད༌ཏེ༌ ངའ༌ སྤལ༌ ཐོབ༌བ༌ཅིག༌ ཨི༌ཇིབ༌པ༌གུན༌ནི༌ ང༌ ཡ༌ཝ༌ ཨིན༌ཁན༌བོ༌ ཤེས༌ཨིན༌།”
EXO 14:19 ཏེ༌ནེ༌ ཨིས༌ར༌ཨེལ༌པ༌གུན༌ནི༌ སྔུན༌སྔུན༌ལ༌ སྐྱོད༌ཁན༌ནི༌ དཀོན༌མཆོག༌གི༌ ཕོ༌ཉ༌བོ༌ ཁོང༌གུན༌ནི༌ ཇུག༌ག༌ སྐྱོད༌པ༌ སྲིན༌ནི༌ ཀ༌ཝ༌, དུན༌ནེ༌ སྐྱོད༌ཏེ༌ ཁོང༌གུན༌ནི༌ ཇུག༌ག༌
EXO 14:20 ཨི༌ཇིབ༌པ༌ མག༌མི༌གུན༌ དང༌ ཨིས༌ར༌ཨེལ༌པ༌གུན༌ནི༌ པར༌ལ༌ ཞུགས༌། སྲིན༌བོའེ༌ ཚན༌ གང༌པོ༌ ཨིས༌ར༌ཨེལ༌པ༌གུན༌ ཆོགས༌ལ༌ འོད༌ སལས༌ ཡང༌ ཨི༌ཇིབ༌པ༌གུན༌ ཆོགས༌ལ༌ མུན༌གྲིག༌ ཛདས༌། ཏེ༌བོའེ༌ཕིའ༌ ལྡལ༌དོ༌ ཉིས༌ཀོ༌ནེ༌ སུའང༌ ཅིག༌ དང༌ ཅིག༌གི༌ ཉེ༌མོའ༌ ཡོང༌ མ༌ཉན༌།
EXO 14:21 མོ༌ཟེས༌སི༌ ཁོ༌རང༌ངི༌ ལག༌པ༌ ཚོའེ༌ཀ༌ རྐྱངས༌ ཡང༌ ཡ༌ཝའེ༌ ཚན༌ གང༌པོ༌ ཤར༌ ཆོགས༌སི༌ ལུངས༌པོ༌ ཤེད༌ཅན༌ ཉམ༌པོ༌ ཚོའེ༌ ཆུ༌ གྱབ༌ལོག༌ག༌ ཁྱེར༌ར༌ ཛདས༌། གྱ༌ཚོ༌ བེ༌ཏེ༌ ས༌སྐམ༌པོ༌ བིང༌།
EXO 14:22 ཡང༌ ཨིས༌ར༌ཨེལ༌པ༌གུན༌ ས༌སྐམ༌པོའེ༌ ཀ༌ནེ༌ གྱ༌ཚོ༌ རྒལ༌ཏེ༌ སོང༌, ཁོང༌གུན༌ནི༌ ཆོགས༌ ཉིས༌ཀོའ༌ ཆུའི༌ རྩིག༌པ༌ ཡོད༌པིན༌།
EXO 14:23 ཨི༌ཇིབ༌པ༌གུན༌ནི༌ ཁོང༌གུན༌ལ༌ རྡས༌ཏེ༌ ཁྱོངས༌, གྱལ༌པོའེ༌ མག༌མི༌ རྟ༌ དང༌ རྟ༌རེལ༌ གུན༌ནི༌ཀ༌ ཞོན༌ཁན༌ ཚང༌མའ༌ ཚོའེ༌ ནང༌ང༌ ཁོང༌གུན༌ནི༌ གྱབ༌ནེ༌ ཡོངས༌།
EXO 14:24 ནམ༌ ལངས༌སི༌ སང༌ སྔུན༌ལ༌ ཡ༌ཝའེ༌ མེ༌ དང༌ སྲིན༌ནི༌ ཀ༌ཝའེ༌ ནང༌ནེ༌ ཐུར༌ལ༌ ཛིགས༌ཏེ༌ ཨི༌ཇིབ༌པ༌གུན༌ནི༌ ནང༌ང༌ ཇིགས༌ནང༌ དང༌ ཐེ༌ཚོམས༌ སྐྱེ༌ཅུག༌ག༌ ཛདས༌།
EXO 14:25 ཁོང༌ངི༌ ཁོང༌གུན༌ནི༌ རྟ༌རེལ༌ལི༌ ཁོར༌ལོ༌གུན༌ གད༌ཅུག༌ག༌ ཛདས༌པ༌ ཁོང༌གུན༌ལ༌ ཏེ༌གུན༌ སྲུལ༌ཅེས༌ལ༌ སྲན༌ཏྲེ༌ ནགས༌ ཐོང༌། ཨི༌ཇིབ༌པ༌གུན༌ནི༌ ཟེརས༌, “ང༌དང༌གུན༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ ཤོར༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཕིའ༌ ང༌དང༌གུན༌ནི༌ གྱབ༌གལ༌ལ༌ ཡ༌ཝའེ༌ ནོལ༌ལ༌ ཛད༌དུག༌།”
EXO 14:26 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ངི༌ ལག༌པ༌ ཚོའེ༌ཀ༌ སྐྱོང༌ ཏེ༌ནེ༌ ཆུ༌ ལོགས༌ཏེ༌ ཡོངས༌ཏེ༌ ཨི༌ཇིབ༌པ༌གུན༌, ཁོང༌གུན༌ནི༌ རྟ༌རེལ༌ དང༌ རྟའེ༌ཀ༌ ཞོན༌ཁན༌གུན༌ ཆུའི༌ ཀབ༌ཨིན༌།”
EXO 14:27 མོ༌ཟེས༌སི༌ ཁོ༌རང༌ངི༌ ལག༌པ༌ ཚོའེ༌ཀ༌ རྐྱངས༌ ཡང༌ ཉི༌མ༌ ཤར༌ ཟ༌ནེ༌ ཆུ༌ སྔུན༌ནི༌ མལ༌ལ༌ ལོགས༌ཏེ༌ སོང༌། ཨི༌ཇིབ༌པ༌གུན༌ནི༌ ཆུ༌ནེ༌ ཕི༌ལོག༌ག༌ ཤོར༌ཅེས༌སི༌ རྩོན༌གྲུས༌ ཅོས༌ ཨིན༌ནའང༌ ཡ༌ཝའེ༌ ཆུ༌ གྱབས༌ཏེ༌ ཁོང༌གུན༌ ཚོའེ༌ ནང༌ང༌ ནུབ༌ ཅུག༌ག༌ ཛདས༌།
EXO 14:28 ཆུ༌ ལོགས༌ཏེ༌ ཡོངས༌ ཡང༌ ཨིས༌ར༌ཨེལ༌པ༌གུན༌ནི༌ སྟིང༌རང༌ནེ༌ ཚོའེ༌ ནང༌ང༌ ཡོང༌ཁན༌ནི༌ གྱལ༌པོའེ༌ མག༌མི༌, རྟ༌རེལ༌ དང༌ རྟ༌ གུན༌ནི༌ཀ༌ ཞོན༌ཁན༌ ཡང༌ ཞན༌ ཚང༌མ༌ ཆུའི༌ ནང༌ང༌ ནུབ༌ཏེ༌ ཤི༌། ཁོང༌གུན༌ནི༌ ནང༌ནེ༌ ཅིག༌གའང༌ སོན༌ཏེའ༌ མ༌ལུས༌།
EXO 14:29 ཨིན༌ནའང༌ ཚོ༌ གྱུད༌ཏེ༌ ཨིས༌ར༌ཨེལ༌པ༌གུན༌ ས༌སྐམ༌པོའེ༌ ཀ༌ནེ༌ གྲུལ༌ཏེ༌ སོང༌, ཁོང༌གུན༌ནི༌ ཆོགས༌ ཉིས༌ཀོའ༌ ཆུའི༌ རྩིག༌པ༌ ཡོད༌པིན༌།
EXO 14:30 ཏེ༌ ཞག༌ག༌ ཡ༌ཝའེ༌ ཨིས༌ར༌ཨེལ༌པ༌གུན༌ ཨི༌ཇིབ༌པ༌གུན༌ནི༌ ཀ༌ནེ༌ སྐྱོབ༌བ༌ ཛདས༌, ཡང༌ ཨིས༌ར༌ཨེལ༌པ༌གུན༌ནི༌ ཨི༌ཇིབ༌པ༌ ཤི༌ཁན༌གུན༌ནི༌ རོ༌ ཚོའེ༌ ཐའ༌མའ༌ ཐོང༌།
EXO 14:31 ཨིས༌ར༌ཨེལ༌པ༌གུན༌ནི༌ ཡ༌ཝའེ༌ ཨི༌ཇིབ༌པ༌གུན༌ནི༌ གྱབ༌གལ༌ལ༌ ཁོང༌རང༌ངི༌ ཀྲག༌པོ༌ ཝང༌ ཀོལ༌ལ༌ ཐོང༌ཏེ༌ ཇིགས༌ དང༌ རྩི༌ཝའེ༌ ནང༌ང༌ ཁོང༌ དང༌ ཁོང༌ངི༌ ཞབས༌ཏོག༌པ༌ མོ༌ཟེས༌སི༌ཀ༌ ཏད༌པ༌ ཅོས༌།
EXO 15:1 ཏེ༌ནེ༌ མོ༌ཟེས༌ དང༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ སྟོད༌པ༌ ཕུལ༌ཨིན༌ ལུ༌ ཏངས༌: “ངའེ༌ ཡ༌ཝའ༌ སྟོད༌པའེ༌ ལུ༌ ཏང༌ངད༌ ཅིའ༌ཟེར༌ན༌ ཁོང༌ངི༌ གྱལ༌ཁ༌ སྤལ༌ཅན༌ ལེནས༌། ཁོང༌ངི༌ རྟ༌ དང༌ ཏེ༌ཀ༌ ཞོན༌ཁན༌ ཚང༌མ༌ ཚོའེ༌ ནང༌ང༌ ཕང༌ང༌ ཛདས༌།
EXO 15:2 ཡ༌ཝ༌ ནི༌ ངའེ༌ ཤེད༌ ཡང༌ ཁོང༌ང༌ ངའེ༌ སྟོད༌པའེ༌ ལུ༌ ཕུལ༌ཨིན༌, ཁོང༌ ངའེ༌ ཐར༌པ༌བོ༌ གྱུར༌ར༌ ཛདས༌, ཁོང༌ ངའེ༌ དཀོན༌མཆོག༌ ཡང༌ ངའེ༌ ཁོང༌ང༌ སྟོད༌པ༌ ཕུལ༌ལད༌, ངའེ༌ ཨ༌བའེ༌ དཀོན༌མཆོག༌, ངའེ༌ ཁོང༌ང༌ སྟོད༌པ༌ ཕུལ༌ཨིན༌།
EXO 15:3 ཁོང༌ མག༌མི༌ ཀྲག༌པོ༌ ཞུགས༌ཏེ༌, ཁོང༌ངི༌ ཚན༌ ཡ༌ཝ༌ ཨིན༌ནོག༌།
EXO 15:4 ཁོང༌ངི༌ གྱལ༌པོའེ༌ མག༌མི༌ དང༌ རྟ༌རེལ༌ གུན༌ ཚོའེ༌ ནང༌ང༌ ཕང༌ང༌ ཛདས༌། གྱལ༌པོའེ༌ མག༌མི༌ གྱལ༌ལ༌ ཚང༌མ༌ ཚོ༌ མར༌པོའེ༌ ནང༌ང༌ ནུབ༌ཅུག༌ག༌ ཛདས༌།
EXO 15:5 ཚོའེ༌ ཆུ༌ ཏིང༌ཅན༌ནི༌ ཁོང༌གུན༌ ཀབས༌, ཁོང༌གུན༌ རྡོའ༌ ཙོགས༌ལ༌ ཐིལ༌ལ༌ ནུབ༌།
EXO 15:6 ཡ༌ཝ༌ ཉེ༌རང༌ངི༌ ཆག༌ ཡས༌པ༌ མ༌ སྟོབས༌ཅན༌, ཡ༌ཝ༌, ཉེ༌རང༌ངི༌ ཆག༌ ཡས༌པའེ༌ གྲ༌འོ༌ ཚང༌མ༌ ཁྲེས༌ཏོར༌ ཅོའ༌ ཛདས༌།
EXO 15:7 ཉེ༌རང༌ངི༌ ཟིར༌རྗིད༌ ཀྲག༌པོའེ༌ ནང༌ང༌ ཉེ༌རང༌ངི༌ གྱབ༌གལ༌ལ༌ ནོལ༌ཁན༌གུན༌ལ༌ ཕམ༌ཀལ༌ལ༌ ཛདས༌། ཉེ༌རང༌ངི༌ ཐུགས༌སྲོའེ༌ ཁོང༌གུན༌ སོག༌མ༌ མེའ༌ སྲག༌ག༌ ཙོགས༌ལ༌ མེད༌ཁན༌ ཅོའ༌ ཛདས༌།
EXO 15:8 ཉེ༌རང༌ངི༌ འུགས༌ ཉམ༌པོ༌ ཕུ༌ སལ༌ཏེ༌ ཚོའེ༌ ཆུ༌ ལངས༌ཏེ༌ དུག༌ ཅུག༌ག༌ ཛདས༌། ཚོའེ༌ ཆུ༌ གྱུག༌ཁན༌བོ༌ རྩིག༌པ༌ ཙོགས༌ལ༌ ལངས༌ཏེ༌ དུག༌ ཅུག༌ག༌ ཛདས༌, ཚོ༌ ཏིང༌ཅན༌ནི༌ ནང༌ང༌ ཆུ༌ ཁྱགས༌པ༌ ཙོགས༌ སྲན༌ཏྲེ༌ གྱུར༌།”
EXO 15:9 “གྲ༌འོ༌གུན༌ནི༌ ཕོ༌སོ༌ ཅོས༌ཏེ༌ ཟེརས༌, ‘ང༌དང༌ ཁོང༌གུན༌ནི༌ སྟིང༌རང༌ནེ༌ སོང༌ཏེ༌ ཁོང༌གུན༌ ཟུམ༌ཨིན༌། ང༌དང༌གུན༌ནི༌ ཁོང༌གུན༌ནི༌ ནོར༌ ཅོམས༌ཏེ༌ ཁོང༌གུན༌ ཉམ༌པོ༌ ང༌དང༌ ཐད༌ཁན༌ ཅོ༌ཨིན༌། ང༌དང༌ངི༌ ར༌འི༌གུན༌ ཕིངས༌ཏེ༌ ང༌དང༌ངི༌ ལག༌པའེ༌ ཁོང༌གུན༌ མེད༌ཁན༌ ཅོ༌ཨིན༌།’
EXO 15:10 ཨིན༌ནའང༌ ཡ༌ཝ༌ ཉེ༌རང༌ངི༌ འུགས༌ ཉམ༌པོ༌ ཕུ༌ སལ༌ཏེ༌ ཚོའེ༌ ཆུའ༌ ཁོང༌གུན༌ ཀབ༌ ཅུག༌ག༌ ཛདས༌ ཡང༌ ཁོང༌གུན༌ གྱ༌ཚོའེ༌ ཐིལ༌ལ༌ རྡོའ༌ ཙོགས༌ལ༌ ནུབ༌།
EXO 15:11 ལྷ༌ལྷ༌མོ༌ ཚང༌མའེ༌ ཕྲོ༌ནེ༌ ཡ༌ཝ༌ ཉེ༌རང༌ ཙོགས༌ སུ༌ ཡོད༌གྲོ༌? ཏམ༌པའེ༌ ནང༌ང༌ ཟིར༌རྗིད༌ཅན༌, ཧ༌མི༌གོ༌ཅེས༌སི༌ སྤལ༌ཅན༌ དང༌ ཧ༌ལས༌ཤེས༌སི༌ ཛད༌པ༌ ཛད༌ཁན༌ ཉེ༌རང༌ ཙོགས༌ སུའང༌ མེད༌།
EXO 15:12 ཉེ༌རང༌ངི༌ ཤེད༌ཅན༌ ཆག༌ ཡས༌པ༌ རྐྱང༌ང༌ ཛདས༌ ཡང༌ ང༌དང༌ངི༌ གྲ༌འོ༌གུན༌ ས༌ཀྱད༌དི༌ སྨིད༌ཏངས༌།
EXO 15:13 ཉེ༌རང༌ངི༌ ཡ༌ཤ༌ སྟན༌པོའེ༌ ནང༌ང༌ ཉེ༌རང༌ངི༌ ཉོའ༌ ཛད༌ཁན༌ནི༌ མི༌གུན༌ ཁྲིད༌ད༌ ཛད༌ཨིན༌། སྟོབས༌ཤུགས༌ ཉམ༌པོ༌ ཉེ༌རང༌ངི༌ ཁོང༌གུན༌ལ༌ ལམ༌སྟན༌ ཛད༌ཏེ༌ ཉེ༌རང༌ངི༌ ཨིན༌ཁན༌ནི༌ ཏམ༌པ༌ ས༌ཆའེ༌ ནང༌ང༌ ཁྱེར༌ར༌ ཛད༌ཨིན༌།
EXO 15:14 གྱལ༌ཁམས༌གུན༌ནི༌ ཏེ༌གུན༌ ཚོར༌ཏེ༌ ཇིགས༌ཏེ༌ དར༌ཨིན༌། ཕི༌ལིས༌ཏི༌པ༌གུན༌ མ༌སྲན༌ཏྲེ༌ ཇིགས༌ཨིན༌།
EXO 15:15 ཨི༌དོམ༌མི༌ སྤོན༌བོ༌གུན༌ སྲན༌ཏྲེ༌ ཇིགས༌ཨིན༌། མོ༌འབ༌པའེ༌ སྤོན༌བོ༌གུན༌ ཇིགས༌ཏེ༌ དར༌ཨིན༌། ཀེ༌ནན༌པ༌གུན༌ནི༌ སྤོས༌པ༌ སྟོར༌ཏེ༌ མུན༌ཨིན༌།
EXO 15:16 ཡ༌ཝ༌ ཉེ༌རང༌ངི༌ ཤེད༌ གྱུད༌ཏེ༌ ཁོང༌གུན༌ནི༌ཀ༌ ཇིགས༌པ༌ དང༌ ཚབས༌ཤེས༌ ལེབ༌ཨིན༌། ཉེ༌རང༌ངི༌ ཁྱུད༌ཅན༌ ཆག༌གི༌ ཁོང༌གུན༌ རྡོའ༌ ཙོགས༌ འུགས༌མེད༌ གྱུར༌ཅུག༌ཨིན༌ ནམ༌ཚོག༌པ༌ ཉེ༌རང༌ངི༌ མི༌, ཚེ༌ཡོག༌ནེ༌ ཐར༌ ཅུག༌ག༌ ཛད༌ཁན༌གུན༌ ཏེ༌ གྱལ༌ཁམས༌གུན༌ གྱུད༌ཏེ༌ ཆ༌ མི༌ཚར༌།
EXO 15:17 ཉེ༌རང༌ངི༌ ཨིན༌ཁན༌ནི༌ རི༌ཀ༌ ཉེ༌རང༌ངི༌ ཁོང༌གུན༌ ཁྱོང༌ང༌ ཛད༌ཏེ༌ ཚུག༌ཤུག༌ག༌ ཛད༌ཨིན༌, ཡ༌ཝ༌, ཉེ༌རང༌ ནས༌ཤེས༌སི༌ ཕིའ༌ ཏེ༌ ས༌ཆ༌བོ༌ ཅོའ༌ ཛད༌ཏེ༌ ཨིན༌པིན༌, ཉེ༌རང༌ངི༌ རྩིག༌ག༌ ཛད༌ཁན༌ནི༌ ཏམ༌པའེ༌ ནས༌ས༌ ཞིག༌།
EXO 15:18 ཡ༌ཝའེ༌ ཏུས༌གྱུན༌ནེ༌གྱུན༌ ཝང༌ སྲུལ༌ལ༌ ཛད༌ཨིན༌།”
EXO 15:19 ཨིས༌ར༌ཨེལ༌པ༌གུན༌ ཚོའེ༌ ཞུང༌ནེ༌ ས༌སྐམ༌པོའེ༌ ཀ༌ནེ༌ གྲུལ༌ཏེ༌ སོང༌, ཨིན༌ནའང༌ གྱལ༌པོའེ༌ རྟ༌རེལ༌ དང༌ ཏེ༌ཀ༌ ཞོན༌ཁན༌གུན༌ ཚོའེ༌ ནང༌ང༌ ཆའ༌ཅིག༌ ཡ༌ཝའེ༌ ཆུ༌ མལ༌ལི༌ཀ༌ ལོགས༌ཏེ༌ ཁྱོང༌ང༌ ཛདས༌ ཡང༌ ཁོང༌གུན༌ ཆུའི༌ ནང༌ང༌ ནུབ༌།
EXO 15:20 ཨ༌རོན༌ནི༌ སྲིང༌མོ༌ ལུང༌སྟོན༌མ༌ མི༌རི༌ཨམ༌མི༌ ལག༌པའེ༌ ནང༌ང༌ དབ༌ ཁུརས༌, ཞན༌ བུ༌མོ༌ ཚང༌མ༌ ཁོའེ༌ སྟིང༌རང༌ནེ༌ དབ༌ ཁུར༌ཏེ༌ རྩེ༌ཨིན༌ སོང༌།
EXO 15:21 མི༌རི༌ཨམ༌མི༌ ལུ༌ ཏངས༌, “ཡ༌ཝའེ༌ ཕིའ༌ ལུ༌ ཏོང༌ ཅིའ༌ཟེར༌ན༌ ཁོང༌ངི༌ གྱལ༌ཁ༌ སྤལ༌ཅན༌ ལེན༌ཏེ༌ ཨིན༌ནོག༌། ཁོང༌ངི༌ རྟ༌རེལ༌ དང༌ ཏེ༌ཀ༌ ཞོན༌ཁན༌ ཚང༌མ༌ ཚོའེ༌ ནང༌ང༌ ཕང༌ང༌ ཛདས༌།”
EXO 15:22 ཏེ༌ནེ༌ མོ༌ཟེས༌སི༌ ཨིས༌ར༌ཨེལ༌པ༌གུན༌ ཚོ༌ མར༌པོ༌ནེ༌ ཁྲིད༌ཏེ༌ ཤུར༌ ཟེར༌སའེ༌ ཐང༌སྟོང༌ངི༌ ནང༌ང༌ སོང༌། ཁོང༌གུན༌ ཐང༌སྟོང༌ངི༌ ནང༌ང༌ གྲུལ༌ཨིན༌ ཞག༌པོ༌ སུམ༌ སོང༌ ཨིན༌ནའང༌ ཆུ༌མིག༌ ཅིག༌གའང༌ མ༌ཐོང༌།
EXO 15:23 མ༌རཧ༌ ཟེར༌ཁན༌ནི༌ ས༌ཆ༌ ལེབ༌བ༌ཅིག༌ ཏེ༌ ནས༌སའེ༌ ཆུ༌གུན༌ ཁན༌ཀྲེ༌ ཡོད༌པ༌ ཁོང༌གུན༌ ཐུང༌ མ༌ཉན༌། ༼ཏེན༌ན༌བོའེ༌ཕིའ༌ ཏེ༌ ས༌ཆ༌བོའ༌ མ༌རཧ༌ ཟེར༌རད༌པིན༌།༽
EXO 15:24 མི༌གུན༌ནི༌ མོ༌ཟེས༌ལ༌ སྐྱོན༌རྗོད༌ ཅོ༌ཨིན༌ ཟེརས༌, “ང༌ཞ༌གུན༌ནི༌ ཅི༌ ཐུང༌?”
EXO 15:25 མོ༌ཟེས༌སི༌ ཡ༌ཝའ༌ མོས༌ལམ༌ ཞུས༌པ༌ ཡ༌ཝའེ༌ ཁོའ༌ བེར༌ཀ༌ ཞིག༌ སྟན༌ན༌ ཛདས༌། མོ༌ཟེས༌སི༌ ཏེ༌བོ༌ ཆུའི༌ ནང༌ང༌ ཕངས༌ ཡང༌ ཆུའི༌ ཁན༌ཀྲེ༌ མེད༌ཁན༌ སོང༌ཏེ༌ ཐུང༌ཉན༌། ཏེ༌རུ༌ ཡ༌ཝའེ༌ ཁོང༌གུན༌ལ༌ བཀའ༌ཁྲིམས༌ཤིག༌ སལས༌ ཡང༌ ཁོང༌གུན༌ལ༌ ཚོད༌ལྟ༌ ཛདས༌།
EXO 15:26 ཁོང༌ངི༌ མོལས༌, “ཀལ༌ཏེས༌ ཁྱོ༌ཞ༌གུན༌ནི༌ ཡ༌ཝ༌ དཀོན༌མཆོག༌གི༌ མོལ༌ཁན༌ ཚང༌མ༌ ཁའ༌ཉན༌ཏེ༌ ཀྲང༌པོ༌བོ༌ ཅོས༌ཏེ༌, བཀའ༌རྒྱ༌ དང༌ བཀའ༌ཁྲིམས༌ ཚང༌མ༌ ནང༌སྟག༌ ཏང༌ན༌ ངའེ༌ ཨི༌ཇིབ༌པ༌གུན༌ནི༌ཀ༌ ཁྱོང༌ཁན༌ནི༌ ནད༌ ཅིག༌གའང༌ ཁྱོ༌ཞ༌གུན༌ལ༌ ཡོང༌ མི༌ཅུག༌, ཅིའ༌ཟེར༌ན༌ ང༌ ཡ༌ཝ༌, ཕན༌ཅུག༌ག༌ ཛད༌ཁན༌བོ༌ ཨིན༌།”
EXO 15:27 ཏེ༌ནེ༌ ཁོང༌གུན༌ ཨེ༌ལིམ༌མ༌ ལེབ༌, ཀ༌རུ༌ ཆུ༌མིག༌ རྕུག༌ཉིས༌ དང༌ ཁ༌སོར༌རི༌ ལྕང༌མ༌ རྡུན༌ཅུ༌ ཡོད༌པིན༌, ཏེ༌རུ༌ ཁོང༌གུན༌ནི༌ ཆུའི༌ དུན༌ལ༌ ཀུར༌ ཙུགས༌ཏེ༌ དུགས༌།
EXO 16:1 ཨེ༌ལིམ༌ནེ༌ ཨིས༌ར༌ཨེལ༌པའེ༌ སྡེ༌ ཚང༌མ༌ བིང༌ཏེ༌ ཨེ༌ལིམ༌ དང༌ སི༌ནཱའི༌ པར༌ལ༌ ཡོད༌ཁན༌ སིན༌ ཟེར༌སའེ༌ ཐང༌སྟོང༌ང༌ ལེབ༌, ཡང༌ ཏེ༌ ཞག༌པོ༌ ཁོང༌གུན༌ ཨི༌ཇིབ༌ནེ༌ བིང༌ཏེ༌ ཟླ༌ཝ༌ ཉིས༌པའེ༌ ཞག༌མ༌ 15 པ༌བོ༌ ཨིན༌པིན༌།
EXO 16:2 ཐང༌སྟོང༌ངི༌ ནང༌ང༌ ཁོང༌ ཚང༌མའེ༌ མོ༌ཟེས༌ དང༌ ཨ༌རོན༌ལ༌ མ༌བེབས༌ ཅོས༌ཏེ༌
EXO 16:3 ཟེརས༌, “ཡ༌ཝའེ༌ ང༌ཞ༌གུན༌ ཨི༌ཇིབ༌བི༌ ནང༌ང༌ སད༌ད༌ ཛད༌པིན༌ན༌ གྱལ༌, ཏེ༌རུ༌ ང༌ཞ༌གུན༌ལ༌ ཤ༌ ཟང༌བུ༌ སྐངས༌ཏེ༌ གྲོད༌པ༌ གྲང༌ཤེས༌སི༌ ཏ༌གི༌ ཡོད༌པིན༌། ཨིན༌ནའང༌ ཁྱོ༌ཞའེ༌ ང༌ཞ༌གུན༌ འི༌ ཐང༌སྟོང༌ངི༌ ནང༌ང༌ སྟོག༌རིའ༌ ཤི༌ཅུག༌ཅེས༌སི༌ ཕིའ༌ ཁྲིད༌ཏེ༌ ཁྱོངས༌།”
EXO 16:4 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཁྱོ༌ཞ༌གུན༌ནི༌ ཕིའ༌ ནམ༌ཁའ༌ནེ༌ ཆར༌པ༌ ཙོགས༌ལ༌ ཏ༌གི༌ ཕབ༌ཨིན༌། མི༌གུན༌ ཞག༌ཏང༌ ཕི༌ལོག༌ག༌ སོང༌ཏེ༌ ཏེན༌ན༌ ཞག༌གི༌ ཕིའ༌ ཏ༌གི༌ ཏུས༌ཏེ༌ ཁྱོང༌གོས༌། འིན༌ན༌ཟུག༌གི༌ ངའེ༌ ཁོང༌གུན༌ལ༌ ཚོད༌ལྟས༌ཏེ༌ ངའེ༌ ཟེར༌ཁན༌བོ༌ ཅོ༌ དུག༌ག༌ མི༌དུག༌ ལྟེན༌།
EXO 16:5 ཨིན༌ནའང༌ ཞག༌མ༌ དྲུག༌པའི༌ ཞག༌ག༌ ཁོང༌གུན༌ནི༌ ཉི༌ལྡབ༌ ཏ༌གི༌ ཏུས༌ཏེ༌ ཁྱོངས༌ཏེ༌ ཞག༌ ཉིས༌སི༌ ཕིའ༌ ཁར༌ཇི༌ གྲལ༌གྲིག༌ ཅོ༌གོས༌།”
EXO 16:6 ཏེ༌ནེ༌ མོ༌ཟེས༌ དང༌ ཨ༌རོན༌ནི༌ ཨིས༌ར༌ཨེལ༌པ༌ ཚང༌མ༌ལ༌ ཟེརས༌, “ཡ༌ཝའེ༌ ཁྱོ༌ཞ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌བོ༌ འིན༌ན༌ ཕི༌ཏོག༌ ཁྱོ༌ཞ༌གུན༌ལ༌ ཧ༌གོ༌ཡིན༌,
EXO 16:7 ཡང༌ ང༌མོ༌ ཁྱོ༌ཞ༌གུན༌ནི༌ ཡ༌ཝའེ༌ ཟིར༌རྗིད༌པོ༌ ཐོང༌ཨིན༌ ཅིའ༌ཟེར༌ན༌ ཁྱོ༌ཞ༌གུན༌ནི༌ ཁོང༌ངི༌ གྱབ༌གལ༌ལ༌ མ༌བེབས༌ ཅོ༌ཁན༌བོ༌ ཁོང༌ངི༌ སན༌ན༌ ཛད༌ཏེ༌ ཨིན༌ནོག༌། ང༌ཞའེ༌ གྱབ༌གལ༌ལ༌ མ༌བེབས༌ ཅོས༌ཏེ༌ ང༌ཞའ༌ སུ༌ ཨིན༌ནོག༌?”
EXO 16:8 ཏེ༌ནེ༌ མོ༌ཟེས༌སི༌ ཟེརས༌, “ཕི༌ཏོག༌ ཁྱོ༌ཞ༌གུན༌ལ༌ ཟའ༌ཅེས༌སི༌ ཕིའ༌ ཤ༌ ཡང༌ ང༌མོ༌ ཁྱོ༌ཞ༌གུན༌ལ༌ གོས༌ཁན༌ནི༌ ཏ༌གི༌ སལ༌ལ༌ཅིག༌ ཁོང༌ ཡ༌ཝ༌ ཨིན༌ཁན༌བོ༌ ཧ༌གོ༌ཨིན༌ ཅིའ༌ཟེར༌ན༌ ཁྱོ༌ཞའེ༌ ཁོང༌ངི༌ གྱབ༌གལ༌ལ༌ མ༌བེབས༌ ཅོ༌ཁན༌བོ༌ ཁོང༌ངི༌ སན༌ན༌ ཛདས༌། ང༌ཞའ༌ སུ༌ ཨིན༌ནོག༌? ཁྱོ༌ཞ༌གུན༌ནི༌ མ༌བེབས༌ ཅོ༌ཁན༌བོ༌ ང༌ཞའ༌ མན༌པ༌ ཡ༌ཝའེ༌ གྱབ༌གལ༌ལ༌ ཨིན༌ནོག༌།”
EXO 16:9 མོ༌ཟེས༌སི༌ ཨ༌རོན༌ལ༌ ཟེརས༌, “ཨིས༌ར༌ཨེལ༌ལི༌ སྡེ༌ གང༌པོའ༌ ཡ༌ཝའེ༌ དུན༌ལ༌ ཡོང༌ཅེས༌ལ༌ ཟེར༌ ཅིའ༌ཟེར༌ན༌ ཁོང༌ངི༌ ཁོང༌གུན༌ནི༌ མ༌བེབས༌ ཅོ༌ཁན༌བོ༌ སན༌ཏེ༌ ཨིན༌ནོག༌།”
EXO 16:10 ཨ༌རོན༌ནི༌ ཨིས༌ར༌ཨེལ༌ལི༌ སྡེ༌ གང༌པོའ༌ སྤེ༌ར༌ ཏང༌ ཟ༌ནེ༌ ཁོང༌གུན༌ནི༌ ཐང༌སྟོང༌ ཆོགས༌ལ༌ ལྟས༌པ༌ ཏེ༌རུ༌ ཁོང༌གུན༌ནི༌ སྲིན༌ནི༌ ནང༌ང༌ ཡ༌ཝའེ༌ ཟིར༌རྗིད༌ ཇལ༌།
EXO 16:11 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌,
EXO 16:12 “ངའེ༌ ཨིས༌ར༌ཨེལ༌པ༌གུན༌ནི༌ མ༌བེབས༌ ཅོ༌ཁན༌བོ༌ ཚོར༌། ཁོང༌གུན༌ལ༌ ཟེར༌, ‘ཞག༌ཏང༌ ཕི༌ཏོག༌ ཁྱོ༌ཞ༌གུན༌ལ༌ ཟའ༌ཅེས༌སི༌ ཕིའ༌ ཤ༌ ཡང༌ ཞག༌ཏང༌ ང༌མོ༌ ཁྱོ༌ཞ༌གུན༌ལ༌ སྒོས༌དོམ༌ ཡོད༌ཁན༌ནི༌ ཏ༌གི༌ ཐོབ༌ཨིན༌། ཏེ༌ནེ༌ ཁྱོ༌ཞ༌གུན༌ནི༌ ང༌ ཡ༌ཝ༌ ཁྱོ༌ཞའེ༌ དཀོན༌མཆོག༌ ཨིན༌ཁན༌བོ༌ ཤེས༌ཨིན༌།’”
EXO 16:13 ཏེ༌ ཕི༌ཏོག༌ ཅི༌པ༌ ཆུ༌ངུན༌ མང༌པོ༌ ཡོངས༌ཏེ༌ ཁོང༌གུན༌ དུག༌སའེ༌ ས༌ཆ༌ གངས༌ ཡང༌ ང༌མོ༌ ཁོང༌གུན༌ དུག༌སའེ༌ ས༌ཆ༌ གང༌པོ༌ ཟིལ༌པའེ༌ ཀབས༌།
EXO 16:14 ཟིལ༌པ༌ མེད༌ཁན༌ ཆའ༌ཅིག༌ ཐང༌སྟོང༌ངི༌ཀ༌ ཆུ༌ ཁྱགས༌ཁན༌ སྲ༌མོ༌ ཙོགས༌ཤིག༌ ལུས༌ཏེ༌ ཐོང༌།
EXO 16:15 ཨིས༌ར༌ཨེལ༌པ༌གུན༌ནི༌ ཏེ༌བོ༌ ཐོང༌ང༌ཅིག༌ ཅིག༌ དང༌ ཅིག༌ག༌ ཏྲིས༌, “འི༌བོ༌ ཅི༌ ཨིན༌ནོག༌?” ཅིའ༌ཟེར༌ན༌ ཁོང༌གུན༌ལ༌ ཏེ༌བོ༌ ཅི༌ ཨིན༌ མ༌ཤེས༌། མོ༌ཟེས༌སི༌ ཁོང༌གུན༌ལ༌ ཟེརས༌, “འི༌བོ༌ ཡ༌ཝའེ༌ ཁྱོ༌ཞའ༌ ཟའ༌ཅེས༌ལ༌ སལ༌ཁན༌ནི༌ ཏ༌གི༌བོ༌ ཨིན༌ནོག༌།
EXO 16:16 ཡ༌ཝའེ༌ འི༌ བཀའ༌བོ༌ སལས༌, ‘ཁྱོ༌ཞའ༌ རེ༌རེའེ༌ སྒོས༌དོམ༌ ནང༌ཞིན༌ ཏེ༌བོ༌ ཏུས༌ཏེ༌ ཁྱོང༌། ཁྱོ༌ཞའེ༌ ཀུར༌རི༌ ནང༌ང༌ དུག༌ཁན༌ རེ༌རེ༌ ཕིའ༌ ལི༌ཏྲར༌ ཉིས༌ ཏུས༌ཏེ༌ ཁྱོང༌།’”
EXO 16:17 ཡ༌ཝའེ༌ མོལ༌ཁན༌བོ༌ ཨིས༌ར༌ཨེལ༌པ༌གུན༌ནི༌ ཅོས༌, ཁ༌ཅིག༌གི༌ མང༌ང༌ ཡང༌ ཁ༌ཅིག༌གི༌ ཉུ༌ངུན༌ ཏུས༌།
EXO 16:18 ཁོང༌གུན༌ནི༌ ཏེ༌བོ༌ ཏབ༌བ༌ཅིག༌ མང༌ང༌ ཏུས༌ཁན༌གུན༌ནི༌ ལག༌ག༌ མང༌པོ༌ ཡང༌ ཉུ༌ངུན༌ ཏུས༌ཁན༌གུན༌ནི༌ ལག༌ག༌ ཉུ༌ངུན༌ མེད༌པིན༌། མི༌ རེ༌རེའེ༌ ལག༌ག༌ ཁོ༌རང༌ངི༌ སྒོས༌དོམ༌ དྲན༌དྲ༌ ཡོད༌པིན༌།
EXO 16:19 མོ༌ཟེས༌སི༌ ཁོང༌གུན༌ལ༌ ཟེརས༌, “སུ༌ཞིག༌གིའང༌ འི༌ ནང༌ནེ༌ ཐོ༌རེ༌ ཕིའ༌ བོར༌ མ༌གོས༌།”
EXO 16:20 ཨིན༌ནའང༌ ཁ༌ཅིག༌གི༌ མོ༌ཟེས༌སི༌ ཁའ༌ མ༌ཉན༌ན༌ ཏེ༌བོའེ༌ ནང༌ནེ༌ ཐེན༌ཏེ༌ ང༌མོ༌ ཚོད༌པ༌ བོརས༌པ༌ ཏེ༌བོའ༌ བུ༌ཙིག༌ ཏབས༌ཏེ༌ ཏེ༌བོའེ༌ ནང༌ནེ༌ ཏྲི༌མ༌ ཡོང༌ངད༌པིན༌། ཏེ༌ནེ༌ མོ༌ཟེས༌ལ༌ ཁོང༌གུན༌ནི༌ཀ༌ སྲོ༌ ཡོངས༌།
EXO 16:21 ཞག༌ཏང༌ ང༌ཏོག༌ མི༌ རེ༌རེའེ༌ ཁོ༌རང༌ང༌ སྒོས༌དོམ༌ ཡོད༌ཁན༌བོ༌ ཏུས༌ ཡང༌ ཉི༌མ༌ ཚན༌ཏེ༌ ཆའ༌ཅིག༌ ལུས༌ཏེ༌ ཡོད༌ཁན༌ ཚང༌མ༌ ཞུས༌ཏེ༌ སོང༌།
EXO 16:22 ཞག༌མ༌ དྲུག༌པའི༌ ཞག༌ག༌ ཁོང༌གུན༌ནི༌ ཉི༌ལྡབ༌ ཏུས༌, མི༌ རེ༌རེ༌ ཕིའ༌ ལི༌ཏྲར༌ ཞི༌། སྡེ༌ ཚང༌མའེ༌ འུ༌སྐྱོང༌གུན༌ནི༌ མོ༌ཟེས༌ལ༌ ཏེ༌གུན༌ནི༌ སྐོར༌ལ༌ ཤད༌ད༌ཅིག༌,
EXO 16:23 མོ༌ཟེས༌སི༌ ཁོང༌གུན༌ལ༌ ཟེརས༌, “ཡ༌ཝའེ༌ བཀའ༌ སལས༌, ‘ཐོ༌རེ༌ ངལ༌ཚོའེ༌ ཞག༌, ཡ༌ཝའེ༌ ཤབ༌བད༌ ཏམ༌པ༌ ཨིན༌ནོག༌། ཏེ༌བོའེ༌ཕིའ༌ ཁྱོ༌ཞ༌གུན༌ནི༌ དི༌རིང༌ ཏ༌གི༌ མང༌ང༌ སྲོག༌ ཡང༌ ཁར༌ཇི༌ མང༌ང༌ སྐོལ༌། ལུས༌ཁན༌གུན༌ ཐོ༌རེ༌ ཕིའ༌ བོར༌།’”
EXO 16:24 མོ༌ཟེས༌སི༌ ཟེར༌ཁན༌ ནང༌ཞིན༌ ཁོང༌གུན༌ནི༌ ལུས༌ཁན༌གུན༌ ཐོ༌རེ༌ ཕིའ༌ ཐེན༌ཏེ༌ བོརས༌ ཡང༌ ཏེ༌བོ༌ རུལ༌ཏེ༌ ཏྲི༌མ༌ མ༌ཡོངས༌ ཡ༌ བུ༌ཙིག༌ མ༌ ཏབས༌།
EXO 16:25 མོ༌ཟེས༌སི༌ ཟེརས༌, “ཏེ༌གུན༌ དི༌རིང༌ ཟོ༌ཤིག༌ ཅིའ༌ཟེར༌ན༌ དི༌རིང༌ ཡ༌ཝའ༌ རྩི༌ཝ༌ ཅོ༌ཅེས༌སི༌ ཤབ༌བད༌དི༌ ངལ༌ཚོའེ༌ ཞག༌ ཨིན༌ནོག༌ ཡང༌ ཁྱོ༌ཞ༌གུན༌ལ༌ ཕི༌ལོག༌ག༌ ཟའ༌ཅེས༌ མི༌ཐོབ༌།
EXO 16:26 ཁྱོ༌ཞ༌གུན༌ནི༌ ཞག༌མ༌ དྲུག༌ ཟའ༌ཅེས༌ ཏུས༌ཏེ༌ ཁྱོང༌ ཆོག༌ཨིན༌, ཨིན༌ནའང༌ ཞག༌མ༌ རྡུན༌པ༌, ཤབ༌བད༌དི༌ ངལ༌ཚོའེ༌ ཞག༌ག༌ ཏེ༌གུན༌ མི༌ཐོབ༌།”
EXO 16:27 ཞག༌མ༌ རྡུན༌པའེ༌ ཞག༌ག༌ མི༌ ཁ༌ཅིག༌ ཕི༌ལོག༌ག ཟའ༌ཅེས༌ ཏུ༌ཅེས༌ལ༌ སོང༌ ཨིན༌ནའང༌ ཁོང༌གུན༌ལ༌ ཅའང༌ མ༌ཐོབ༌།
EXO 16:28 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “ཏ༌རོང༌ ཙམ༌ཤིག༌ ཁྱོ༌ཞ༌གུན༌ནི༌ ངའེ༌ བཀའ༌ དང༌ ལབ༌ཞའ༌ གུན༌ལ༌ མི༌ཉན༌?
EXO 16:29 ཨིད༌ཏུ༌ བོར༌, ང༌ ཡ༌ཝའེ༌, ཁྱོ༌ཞ༌གུན༌ལ༌ ཤབ༌བད༌དི༌ ངལ༌ཚོའེ༌ ཞག༌ ཏངས༌ཏེ༌ ཨིན༌ ཏེན༌ན༌བོའེ༌ཕིའ༌ ཞག༌ དྲུག༌པའི༌ ཞག༌ག༌ ངའེ༌ ཁྱོ༌ཞ༌གུན༌ལ༌ ཞག༌མ༌ ཉིས༌སི༌ བོས༌ ཟའ༌ཅེས༌ ཏང༌ཨིན༌། ཞག༌མ༌ རྡུན༌པའེ༌ ཞག༌ག༌ ཁྱོ༌ཞའ༌ ཚང༌མ༌ ཀ༌རུ༌ ཡོད༌ནའང༌ ཏེན༌ན༌རུ༌ དུག༌གོས༌, སུ༌ཞིག༌གའང༌ ཕི༌ལོག༌ག༌ ཆ༌མ༌གོས༌།”
EXO 16:30 ཏེ༌བོའེ༌ཕིའ༌ མི༌གུན༌ ཞག༌མ༌ རྡུན༌པའེ༌ ཞག༌ག༌ ངལ༌ཚོས༌ཏེ༌ དུགས༌།
EXO 16:31 ཨིས༌ར༌ཨེལ༌པ༌གུན༌ནི༌ ཏེ༌ ཏ༌གི༌བོའ༌ མན༌ན༌ ཟེར༌རད༌པིན༌, འི༌བོ༌ ཨུ༌སུའི༌ ས༌འོན༌ ཙོགས༌ ཨིན༌ནའང༌ ཀར༌པོ༌ ཡང༌ བྲོད༌པོ༌ རང༌རྩིའ༌ ཅོས༌ཁན༌ནི༌ ཏ༌གི༌ སྲ༌མོ༌ ཙོགས༌ ཡོད༌པིན༌།
EXO 16:32 མོ༌ཟེས༌སི༌ ཟེརས༌, “ཡ༌ཝའེ༌ བཀའ༌ སལས༌, ‘ཁྱོ༌ཞའེ༌ པུར༌གྱུད༌གུན༌ལ༌ སྟན༌ཅེས༌སི༌ ཕིའ༌ ལི༌ཏྲར༌ ཉིས༌སི༌ མན༌ན༌ ཐེན༌ཏེ༌ བོར༌གོས༌། ཏེ༌ནེ༌ ངའེ༌ ཨི༌ཇིབ༌ནེ༌ ཕིངས༌ཏེ༌ ཐང༌སྟོང༌ངི༌ ནང༌ང༌ ཁྱོ༌ཞ༌གུན༌ལ༌ ཟའ༌ཅེས༌ལ༌ ཏང༌ཁན༌ནི༌ ཏ༌གི༌ ཁོང༌གུན༌ནི༌ ཐོང༌ཨིན༌།’”
EXO 16:33 མོ༌ཟེས༌སི༌ ཨ༌རོན༌ལ༌ ཟེརས༌, “ནོད༌ ཞིག༌ ཁྱོངས༌ཏེ༌ ཏེ༌ནང༌ང༌ ལི༌ཏྲར༌ ཉིས༌སི༌ མན༌ན༌ གྱོང༌ ཡང༌ ང༌དང༌ངི༌ པུར༌གྱུད༌གུན༌ནི༌ ཐོང༌ཅེས༌སི༌ ཕིའ༌ ལུས༌ཤེས༌ལ༌ ཡ༌ཝའེ༌ དུན༌ལ༌ བོར༌།”
EXO 16:34 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཨ༌རོན༌ནི༌ ཏེ༌བོ༌ སྟོར༌ མི༌སྟོར༌ཅེས༌ལ༌ ཆད༌དོན༌ནི༌ སྒམ༌མི༌ དུན༌ལ༌ བོརས༌།
EXO 16:35 ཁོང༌གུན༌ ཚུགས༌ཏེ༌ དུག༌སའེ༌ ས༌ཆ༌ ལེབ༌ལེབ༌ ཚོག༌པ༌ ཨིས༌ར༌ཨེལ༌པ༌གུན༌ ལོ༌ ཞིབ༌ཅུ༌ མན༌ན༌ ཟོས༌། ཀེ༌ནན༌ ཡུལ༌ལི༌ སན༌ཚམས༌ལ༌ ལེབ༌ལེབ༌ ཚག༌པ༌ ཁོང༌གུན༌ནི༌ མན༌ན༌ ཟོས༌།
EXO 16:36 ཁོང༌གུན༌ནི༌ ཏབ༌ཅེས༌ལ༌ ཀོལ༌ཁན༌ནི༌ ཚད༌པོའེ༌ ནང༌ང༌ ལི༌ཏྲར༌ ཉི༌ཤུ༌ ཆུད༌དད༌པིན༌།
EXO 17:1 ཨིས༌ར༌ཨེལ༌ལི༌ སྡེ༌ གང༌པོ༌ སིན༌ནི༌ ཐང༌སྟོང༌ནེ༌ བིང༌ཏེ༌ ཡ༌ཝའེ༌ བཀའ༌ ནང༌ཞིན༌ ས༌ཆ༌ ཅིག༌ནེ༌ ཅིག༌ག༌ སོང༌། ཁོང༌གུན༌ རེ༌ཕི༌དིམ༌ ཟེར༌སའེ༌ ས༌ཆའེ༌ ནང༌ང༌ ཀུར༌ ཙུགས༌ཏེ༌ དུགས༌, ཨིན༌ནའང༌ ཏེ༌རུ༌ མི༌གུན༌ལ༌ ཐུང༌ཅེས༌སི༌ ཕིའ༌ ཆུ༌ མེད༌པིན༌།
EXO 17:2 ཁོང༌གུན༌ནི༌ མོ༌ཟེས༌ལ༌ མ༌བེབས༌ ཅོས༌ཏེ༌ ཟེརས༌, “ང༌ཞ༌གུན༌ལ༌ ཐུང༌ཅེས༌སི༌ ཕིའ༌ ཆུ༌ ཏོང༌།” མོ༌ཟེས༌སི༌ ལན༌ཏངས༌, “ཅིའ༌ ཁྱོ༌ཞ༌གུན༌ནི༌ ངའ༌ མ༌བེབས༌ ཅོའད༌? ཅིའ༌ ཁྱོ༌ཞ༌གུན༌ནི༌ ཡ༌ཝའ༌ ཚོད༌ སྟད༌?”
EXO 17:3 ཨིན༌ནའང༌ མི༌གུན༌ སྲན༌ཏྲེ༌ སྐོམས༌ཏེ༌ ཡོད༌པིན༌ ཡང༌ མོ༌ཟེས༌ལ༌ མ༌བེབས༌ ཅོས༌ཏེ༌ ཟེརས༌, “ཁྱོ༌རང༌ངི༌ ང༌ཞ༌གུན༌ ཨི༌ཇིབ༌ནེ༌ ཕིངས༌ཏེ༌ འི༌ ཐང༌སྟོང༌ངི༌ ནང༌ང༌ ང༌ཞའ༌, ང༌ཞའེ༌ ཕྲུ༌གུ༌གུན༌ དང༌ སེམས༌ཅན༌གུན༌ སྐོམ༌རིའ༌ སད༌ད༌ལ༌ ཁྱོངས༌པིན༌ན༌?”
EXO 17:4 མོ༌ཟེས༌སི༌ ཡ༌ཝའ༌ མོས༌ལམ༌ ཞུས༌, “འི༌ མི༌གུན༌ ཉམ༌པོ༌ ངའེ༌ ཅི༌ ཅོ༌? ཁོང༌གུན༌ནི༌ ངའ༌ རྡོའ༌ གྱབས༌ཏེ༌ སད༌ཅེས༌ དུག༌ལེ༌།”
EXO 17:5 ཡ༌ཝའེ༌ མོ༌ཟེས༌ལ༌ མོལས༌, “ཨིས༌ར༌ཨེལ༌པའེ༌ སྤོན༌བོ༌ ཁ༌ཅིག༌ ཁྱོ༌རང༌ ཉམ༌པོ༌ ཁྲིད༌ཏེ༌ མི༌གུན༌ནི༌ སང༌ སྔུན༌སྔུན༌ལ༌ སོང༌, ཁྱོ༌རང༌ངི༌ ལག༌པའེ༌ ནང༌ང༌ ནཱའེལ༌ ལྩངས༌པོའ༌ གྱབས༌ཁན༌ནི༌ བེར༌ཀ༌བོ༌ ཁུར༌ཏེ༌ སོང༌།
EXO 17:6 ང༌ ཁྱོ༌རང༌ངི༌ དུན༌ལ༌ ཧོ༌རེབ༌བི༌ ཕོ༌ལོངས༌སི༌ཀ༌ དུག༌ཨིན༌། ཏེ༌ ཕོ༌ལོངས༌པོའ༌ བེར༌ཀ༌བོ༌ གྱོབ༌ ཡང༌ ཏེ༌ནང༌ནེ༌ མི༌གུན༌ ཐུང༌ཅེས༌སི༌ ཕིའ༌ ཆུ༌ བིང༌ཨིན༌།” མོ༌ཟེས༌སི༌ ཨིས༌ར༌ཨེལ༌ལི༌ སྤོན༌བོ༌གུན༌ནི༌ དུན༌ལ༌ ཏེན༌ན༌ ཟུག༌ ཅོས༌།
EXO 17:7 མོ༌ཟེས༌སི༌ ཏེ༌ ས༌ཆ༌བོའ༌ མ༌སཧ༌ དང༌ མེ༌རི༌བཧ༌ མིང༌ ཏགས༌ ཅིའ༌ཟེར༌ན༌ ཨིས༌ར༌ཨེལ༌པ༌གུན༌ནི༌ མོ༌ཟེས༌ལ༌ ཛིང༌མོ༌ ཏངས༌ ཡང༌ ཡ༌ཝའ༌ ཚོད༌ལྟས༌ཏེ༌ ཟེརས༌, “ཡ༌ཝ༌ ང༌དང༌གུན༌ ཉམ༌པོ༌ ཞུགས༌ཏེ༌ ཡོད༌ད༌ ཧེ༌?”
EXO 17:8 རེ༌ཕི༌དིམ༌མི༌ ས༌ཆའེ༌ཀ༌ ཨ༌མ༌ལིཀ༌པ༌གུན༌ནི༌ ཨིས༌ར༌ཨེལ༌པ༌གུན༌ནི༌ཀ༌ སྤུང༌གོལ༌ ཅོས༌།
EXO 17:9 མོ༌ཟེས༌སི༌ ཡོ༌ཤུའ༌ ཟེརས༌, “ང༌དང༌ངི༌ ཕྲོ༌ནེ༌ མི༌ ཁ༌ཅིག༌ ལྡམས༌ཏེ༌ ཨ༌མ༌ལིཀ༌པ༌གུན༌ལ༌ ནོལ༌ལ༌ སོང༌། ཐོ༌རེ༌ ང༌ བྲག༌གི༌ གོའེ༌ཀ༌ ལངས༌ཏེ༌ དཀོན༌མཆོག༌གི༌ བེར༌ཀ༌བོ༌ ང༌རང༌ངི༌ ལག༌པའེ༌ ནང༌ང༌ ཁུར༌ཏེ༌ དུག༌ཨིན༌།”
EXO 17:10 ཏེ༌ནེ༌ ཡོ༌ཤུའེ༌ མོ༌ཟེས༌སི༌ ཟེར༌ཁན༌ ནང༌ཞིན༌ ཨ༌མ༌ལིཀ༌པ༌གུན༌ལ༌ ནོལ༌ལ༌ སོང༌ ཡང༌ མོ༌ཟེས༌, ཨ༌རོན༌ དང༌ ཧུར༌ བྲག༌གི༌ གོའ༌ ཛགས༌ཏེ༌ སོང༌།
EXO 17:11 མོ༌ཟེས༌སི༌ ལག༌པ༌ ཀེན༌ལ༌ སྟགས༌ཏེ༌ བོརས༌ ཟ༌ནེ༌ ཨིས༌ར༌ཨེལ༌པ༌གུན༌ལ༌ གྱལ༌ཁ༌ ཐོབ༌, ཨིན༌ནའང༌ ཁོའེ༌ ལག༌པ༌ ཕབ༌བ༌ཅིག༌ ཨ༌མ༌ལིཀ༌པ༌གུན༌ལ༌ གྱལ༌ཁ༌ ཐོབ༌བད༌པིན༌།
EXO 17:12 མོ༌ཟེས༌སི༌ ལག༌པ༌ ངལ༌ལ༌ཅིག༌ ཨ༌རོན༌ དང༌ ཧུར༌རི༌ ཁོ༌ དུག༌ཅེས༌སི༌ ཕིའ༌ རྡོའ༌ ཞིག༌ ཁྱོངས༌ ཡང༌ ཁོང༌གུན༌ མོ༌ཟེས༌སི༌ ལྡོའ༌ དུགས༌ཏེ༌ ཁོའེ༌ ལག༌པ༌ ཉི༌མ༌ སྐྱོད༌སྐྱོད༌ ཚོག༌པ༌ སྟན༌པོ༌ སྟགས༌ཏེ༌ ལུས༌ཤེས༌ལ༌ ཐམས༌ཏེ༌ བོརས༌།
EXO 17:13 ཏེན༌ན༌ཟུག༌གི༌ ཡོ༌ཤུའེ༌ ར༌འི༌ ཉམ༌པོ༌ ཨ༌མ༌ལིཀ༌པ༌གུན༌ལ༌ ཕམ༌ཀལས༌།
EXO 17:14 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “འི༌ གྱལ༌ཁ༌ ཐོབ༌ཁན༌བོ༌ ཨིད༌ཏུ༌ ལུས༌ཤེས༌ལ༌ སྤེ༌ཆའེ༌ ནང༌ང༌ བྲིས༌ ཡང༌ ཡོ༌ཤུའ༌ ཚོར༌ཅུགས༌ཏེ༌ སིལ༌། ངའེ༌ ཨ༌མ༌ལིཀ༌པའེ༌ མིར༌གྱུད༌ འི༌ ཇིག༌རྟེན༌ནི༌ ཀ༌ནེ༌ པད༌ མེད༌ཁན༌ ཅོ༌ཨིན༌།”
EXO 17:15 མོ༌ཟེས༌སི༌ ཆོད༌ཁྲི༌ཞིག༌ རྩིགས༌ ཡང༌ ཏེ༌བོའ༌ “ངའ༌ གྱལ༌ཁའ༌ སལ༌ཁན༌ ཡ༌ཝ༌ ཨིན༌” ཟེར༌ཏེ༌ མིང༌ང༌ ཏགས༌།
EXO 17:16 ཁོའེ༌ ཟེརས༌ “ཡ༌ཝའེ༌ ཁྲིས༌ ཆོགས༌ལ༌ ལག༌པ༌གུན༌ ཀེན༌ལ༌ སྟགས༌ པ༌སང༌ མི༌རབས༌ནེ༌ མི༌རབས༌ ཡ༌ཝའེ༌ ཨ༌མ༌ལིཀ༌པ༌གུན༌ནི༌ གྱབ༌གལ༌ལ༌ ནོལ༌ལ༌ ཛད༌ཨིན༌།”
EXO 18:1 མི༌དིའན༌པ༌ བླ༌མ༌, མོ༌ཟེས༌སི༌ ན༌མའེ༌ ཨ༌བ༌ ཡེ༌ཐོརོའ༌ དཀོན༌མཆོག༌གི༌ མོ༌ཟེས༌ དང༌ ཨིས༌ར༌ཨེལ༌པ༌གུན༌ལ༌ ཛད༌ཁན༌ ཚང༌མ༌ དང༌ ཡ༌ཝའེ༌ ཁོང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌བོ༌ ཚོར༌།
EXO 18:2 མོ༌ཟེས༌སི༌ ཁོ༌རང༌ངི༌ ན༌མ༌ ཟི༌པོ༌ར༌ དང༌ བུ༌ཚ༌ ཉིས༌ཀོ༌ ཡེ༌ཐོརོ༌, ཁོའེ༌ ན༌མའེ༌ ཨ༌བ༌ ཡོད༌ས༌ ལོགས༌ཏེ༌ ལམ༌ཅུགས༌ཏེ༌ ཨིན༌པིན༌།
EXO 18:3 མོ༌ཟེས༌སི༌ བུ༌ཚ༌ ཅིག༌གི༌ མིང༌ གེར༌ཤོམ༌ ཏགས༌ ཅིའ༌ཟེར༌ན༌ ཁོའེ༌ ཟེརས༌, “ང༌ ཞན༌ཡུལ༌ལི༌ མི༌ ཞན༌མའེ༌ ནས༌སའེ༌ ནང༌ང༌ ཨིན༌ནོག༌།”
EXO 18:4 ཁོའེ༌ ཞན༌ བུ༌ཚ༌བོའེ༌ མིང༌ང༌ ཨེ༌ལི༌འ༌ཟར༌ ཏགས༌ ཅིའ༌ཟེར༌ན༌ ཁོའེ༌ ཟེརས༌, “ངའེ༌ ཨ༌བའེ༌ དཀོན༌མཆོག༌, ངའ༌ རོགས༌ ཛད༌ཁན༌བོ༌ ཨིན༌, ཁོང༌ངི༌ ང༌ ཨི༌ཇིབ༌བི༌ གྱལ༌པོའེ༌ ར༌འི༌ ནེ༌ སྐྱོབ༌བ༌ ཛདས༌།”
EXO 18:5 མོ༌ཟེས༌སི༌ ན༌མའེ༌ ཨ༌བ༌ ཡེ༌ཐོརོ༌, མོ༌ཟེས༌སི༌ ན༌མ༌ དང༌ བུ༌ཚ༌ ཉིས༌ཀོ༌ ཁོ༌ ཡོད༌ས༌ ཐང༌སྟོང༌ངི༌ ནང༌ང༌ ཡོངས༌ ཀ༌རུ༌ ཁོང༌གུན༌ ཏམ༌པའེ༌ རི༌ཀ༌ ཀུར༌ ཙུགས༌ཏེ༌ དུགས༌ཏེ༌ ཡོད༌པིན༌།
EXO 18:6 ཡེ༌ཐོརོའེ༌ མོ༌ཟེས༌ལ༌ ལོན༌ ཀལས༌, “ང༌ ཁྱོ༌རང༌ངི༌ ན༌མའེ༌ ཨ༌བ༌ ཁྱོ༌རང༌ངི༌ ན༌མ༌ དང༌ བུ༌ཚ༌གུན༌ ཉམ༌པོ༌ ཡོང༌ངད༌།”
EXO 18:7 མོ༌ཟེས༌, ཁོ༌རང༌ངི༌ ན༌མའེ༌ ཨ༌བའ༌ ཐུག༌ག༌ལ༌ སོང༌ཏེ༌ ཁོའེ༌ དུན༌ལ༌ སྒུས༌ཏེ༌ ཁོའ༌ པུག༌ ཏངས༌། ཁོང༌གུན༌ནི༌ ཅིག༌ དང༌ ཅིག༌ག༌ ཁམ༌ཟང༌ ཨིན༌ན༌ ཟེར༌ཏེ༌ ཏྲིས༌ ཡང༌ ཀུར༌རི༌ ནང༌ང༌ སོང༌།
EXO 18:8 མོ༌ཟེས༌སི༌ ཁོའེ༌ ན༌མའེ༌ ཨ༌བའ༌ ཨིས༌ར༌ཨེལ༌པ༌གུན༌ནི༌ ཕིའ༌ ཡ༌ཝའེ༌ ཨི༌ཇིབ༌བི༌ གྱལ༌པོ༌ དང༌ ཁོའེ༌ མི༌གུན༌ལ༌ ཛདས༌ཁན༌ ཚང༌མ༌ ཡང༌ ཁོང༌གུན༌ལ༌ ལམ༌མ༌ བར༌དོ༌ ཐོང༌ཁན༌ ཨིན༌ནའང༌ ཡ༌ཝའེ༌ ཁོང༌གུན༌ སྐྱོབ༌བ༌ ཛད༌ཁན༌ ཚང༌མ༌ ཤདས༌།
EXO 18:9 ཡ༌ཝའེ༌ ཨིས༌ར༌ཨེལ༌པ༌གུན༌ ཨི༌ཇིབ༌པ༌གུན༌ནི༌ ཀ༌ནེ༌ སྐྱོབས༌ཏེ༌ ཁོང༌གུན༌ལ༌ གྱལ༌ལ༌ ཛད༌ཁན༌ ཚང༌མ༌ ཚོར༌ར༌ཅིག༌ ཡེ༌ཐོརོ༌ མ༌སྲན༌ཏྲེ༌ ཐད༌ཏེ༌
EXO 18:10 ཟེརས༌, “ཡ༌ཝའ༌ སྟོད༌པ༌ ཕུལ༌, ཁོང༌ངི༌ ཁྱོ༌ཞའ༌ གྱལ༌པོ༌ དང༌ ཨི༌ཇིབ༌པ༌གུན༌ནི༌ ཀ༌ནེ༌ སྐྱོབ༌བ༌ ཛད༌ཏེ༌ ཨིན༌ནོག༌། ཡ༌ཝའེ༌ ཁོང༌རང༌ངི༌ མི༌གུན༌ ཨི༌ཇིབ༌པ༌གུན༌ནི༌ ཚེ༌ཡོག༌ནེ༌ ཕིང༌ང༌ ཛདས༌།
EXO 18:11 ཏ༌ ང༌ ཧ༌གོ༌, ཞན༌གུན༌ནི༌ ཅོལ༌ཁན༌ནི༌ ལྷ༌ལྷ༌མོ༌ ཚང༌མའེ༌ སང༌ ཡ༌ཝ༌ ཀྲག༌ག༌ ཞུགས༌ཏེ༌ ཨིན༌ནོག༌ ཅིའ༌ཟེར༌ན༌ ཁོང༌ངི༌ ཕོ༌སོ༌ཅན༌ནི༌ ཨི༌ཇིབ༌པ༌གུན༌ནི༌ ཝང༌ངི༌ ཡོག༌ནེ༌ ཨིས༌ར༌ཨེལ༌པ༌གུན༌ སྐྱོབ༌བ༌ ཛདས༌།”
EXO 18:12 ཏེ༌ནེ༌ ཡེ༌ཐོརོའེ༌ དཀོན༌མཆོག༌ག༌ ཕུལ༌ཅེས༌ལ༌ མེའ༌ སྲག༌ཅེས༌སི༌ ཆོད༌པ༌ དང༌ ཞན༌ཡང༌ ཆོད༌པ༌ གུན༌ ཁྱོངས༌ ཡང༌ དཀོན༌མཆོག༌གི༌ སྐུན༌དུན༌ལ༌, ཡེ༌ཐོརོ༌ ཉམ༌པོ༌ ཟན༌ ཟའ༌ཅེས༌ལ༌ ཨ༌རོན༌ དང༌ ཨིས༌ར༌ཨེལ༌པའེ༌ སྤོན༌བོ༌ ཚང༌མ༌ ཡོངས༌།
EXO 18:13 སྟིང༌མ༌ཞག༌པོ༌ མོ༌ཟེས༌ མི༌གུན༌ནི༌ ཛིང༌མོའ༌ ཤགས༌ ཅོ༌ཅེས༌ལ༌ དུགས༌ ཡང༌ ང༌མོ༌ནེ༌ ཕི༌ཏོག༌ ཚོག༌པ༌ མི༌གུན༌ ཁོའ༌ ཁོར༌ཏེ༌ ཐག༌ཅད༌དི༌ ཕིའ༌ སྲུངས༌།
EXO 18:14 ཡེ༌ཐོརོའེ༌ མོ༌ཟེས༌སི༌ མི༌གུན༌ནི༌ ཕིའ༌ ཅོ༌ཁན༌བོ༌ ཐོང༌ང༌ཅིག༌ ཁོའ༌ ཏྲིས༌, “ཁྱོ༌རང༌ངི༌ མི༌གུན༌ལ༌ ཅོ༌ཁན༌བོ༌ ཅི༌ ཨིན༌? ཅིའ༌ ཁྱོ༌རང༌ ཅིག༌པོའེ༌ འི༌ ཚང༌མ༌ ཅོའད༌? མི༌གུན༌ ང༌མོ༌ནེ༌ ཕི༌ཏོག༌ ཚོག༌པ༌ ཁྱོ༌རང༌ངི༌ ཐག༌ཅད༌དི༌ ཕིའ༌ སྲུངས༌ཏེ༌ དུག༌དུག༌།”
EXO 18:15 མོ༌ཟེས༌སི༌ ལན༌ཏངས༌, “ངའེ༌ ཏེ༌བོ༌ ཅོའད༌ ཅིའ༌ཟེར༌ན༌ མི༌གུན༌ ངའ༌ ཡོད༌ས༌ དཀོན༌མཆོག༌གི༌ ཐུགས༌དོད༌ ཧ༌གོ༌ཅེས༌སི༌ ཕིའ༌ ཡོང༌ང༌ནོག༌།
EXO 18:16 ཛིང༌མོ༌ ཆ༌ན༌ ཁོང༌གུན༌ ངའ༌ ཡོད༌ས༌ གལ༌ཁན༌ དང༌ མ༌གལ༌ཁན༌ ཕེ༌ཅེས༌སི༌ ཐག༌ཅད༌ ཉན༌ན༌ ཡོང༌ང༌ནོག༌ ཡང༌ ངའེ༌ ཁོང༌གུན༌ལ༌ དཀོན༌མཆོག༌གི༌ བཀའ༌ དང༌ ཁྲིམས༌ གུན༌ ཤད༌དད༌།”
EXO 18:17 ཏེ༌ནེ༌ ཡེ༌ཐོརོའེ༌ ཟེརས༌, “ཁྱོ༌རང༌ངི༌ འི༌ ལས༌ ཅོ༌ཚུལ༌བོ༌ སམ༌བ༌ཅན༌ ཤིག༌ མི༌དུག༌།
EXO 18:18 ཏུས༌ མང༌པོ༌ གོར༌ཅེས༌པོའེ༌ ཁྱོ༌རང༌ངི༌ རང༌ དང༌ མི༌གུན༌ འུ༌ཐུག༌ ཤུག༌དུག༌། འི༌ ལས༌པོ༌ མངས༌ཏེའང༌ ལྕིན༌ཏྲེ༌ ཡོད༌ཅེས༌པོའེ༌ ཁྱོ༌རང༌ ཅིག༌པོའེ༌ ཅོ༌ ཉན༌ཅེས༌ མ༌ནོག༌།
EXO 18:19 ཏ༌ ང༌ ཉོན༌ ངའེ༌ ཁྱོ༌རང༌ང༌ ལབ༌ཞ༌ ཏང༌ཨིན༌ ཡང༌ དཀོན༌མཆོག༌ ཁྱོ༌རང༌ ཉམ༌པོ༌ ཞུགས༌ཤིག༌། ཁྱོ༌རང༌ དཀོན༌མཆོག༌གི༌ དུན༌ལ༌ མི༌གུན༌ནི༌ ཚབས༌ ཅོས༌ཏེ༌ ཁོང༌གུན༌ནི༌ ཛིང༌མོ༌གུན༌ ཁོང༌ངི༌ཀ༌ ཁྱོང༌གོས༌།
EXO 18:20 ཁོང༌གུན༌ལ༌ དཀོན༌མཆོག༌གི༌ བཀའ༌ དང༌ ཁྲིམས༌ གུན༌ ཡང༌ ཁོང༌གུན༌ལ༌ མི༌ཚེ༌ ཀ༌ཟུག༌གི༌ ཕུད༌ཅེས༌ དང༌ ཁོང༌གུན༌ནི༌ ལས༌སི༌ ཁག༌གུན༌ ལོབ༌།
EXO 18:21 ཨིན༌ནའང༌ མི༌ ཚང༌མའེ༌ ཕྲོ༌ནེ༌ ཁྱོ༌རང༌ངི༌ ཇོན༌པོ༌ མི༌, དཀོན༌མཆོག༌ག༌ ཇིགས༌ཁན༌, ཨིད༌ཤེས༌ཅན༌ ཡང༌ ཕག༌སུབ༌བ༌ ནཕ༌རད༌ ཅོ༌ཁན༌ གུན༌ ལྡམས༌ཏེ༌ ཁོང༌གུན༌ སྟོང༌, གྱ༌, ལྔབ༌ཅུ༌, ཡང༌ རྕུ༌ མི༌སྡེ༌ གུན༌ནི༌ཀ༌ སྤོན༌བོའ སྐོས༌།
EXO 18:22 ནམ༌ སྒོས༌དོམ༌ ཆ༌ནའང༌ ཐག༌ཅད༌ ཅོ༌ཅེས༌ལ༌ ཁོང༌གུན༌ ཁྲིམ༌སྤོན༌ལ༌ སྐོས༌། ཁོང༌གུན༌ལ༌ ཛིང༌མོ༌ ཆུ༌ངུན༌ ཚང༌མའ༌ ཁོ༌རང༌གུན༌ལ༌ ཐག༌ཅད༌ ཏང༌ཅུག༌, ཨིན༌ནའང༌ ཛིང༌མོ༌ ཆེན༌མོ༌གུན༌ ཁྱོ༌རང༌ངི༌ཀ༌ ཁྱོང༌ཅུག༌། ཏེ༌བོའེ༌ ཁྱོ༌རང༌ངི༌ ལས༌ ལ༌མོ༌ ཆེན༌ ཅིའ༌ཟེར༌ན༌ ཁོང༌གུན༌ནི༌ ཁྱོ༌རང༌ངི༌ ལས༌སི༌ ལྕིད༌པོ༌ བགོ༌ཨིན༌།
EXO 18:23 དཀོན༌མཆོག༌གི༌ བཀའ༌ ནང༌ཞིན༌ ཁྱོ༌རང༌ངི༌ ཏེ༌བོ༌ ཅོ༌ན༌ ཁྱོ༌རང༌ང༌ སེམ༌སྟོབས༌ ཉམ༌པོ༌ ལས༌ ཅོ༌ཉན༌ཨིན༌ ཡང༌ མི༌ ཚང༌མ༌ སེམས༌སི༌ ནང༌ང༌ ཞི༌དེ༌ ཉམ༌པོ༌ ཁོ༌རང༌གུན༌ནི༌ ཁང༌པ༌ ཆེན༌།”
EXO 18:24 མོ༌ཟེས༌སི༌ ཡེ༌ཐོརོའེ༌ ལབ༌ཞ༌གུན༌ ཉན༌ཏེ༌ ལག༌ལེན༌ ཅོས༌།
EXO 18:25 ཨིས༌ར༌ཨེལ༌པ༌ ཚང༌མའེ༌ ནང༌ནེ༌ མི༌ ཇོན༌པོ༌གུན༌ ལྡམས༌ཏེ༌ ཁོང༌གུན༌ སྟོང༌, གྱ༌, ལྔབ༌ཅུ༌ དང༌ རྕུ༌ མི༌སྡེ༌ གུན༌ནི༌ཀ༌ སྤོན༌བོའ༌ སྐོས༌།
EXO 18:26 ནམ༌ སྒོས༌དོམ༌ ཆ༌ནའང༌ ཁོང༌གུན༌ནི༌ མི༌ཚང༌མའེ༌ ཕིའ༌ ཁྲིམ༌སྤོན༌ནི༌ ལས༌ ཅོས༌། ཛིང༌མོ༌ ཆེན༌མོ༌གུན༌ མོ༌ཟེས༌སི༌ཀ༌ ཁྱོངས༌ ཨིན༌ནའང༌ ཛིང༌མོ༌ ཆུ༌ངུན༌གུན༌ ཁོང༌རང༌གུན༌ནི༌ ཐག༌ཅད༌ ཏངས༌།
EXO 18:27 མོ༌ཟེས༌སི༌ ན༌མའེ༌ ཨ༌བ༌ ཡེ༌ཐོརོ༌ ཁོང༌རང༌ངི༌ ཁང༌པ༌ ལོགས༌ཏེ༌ ཆའ༌ཅིག༌ མོ༌ཟེས༌སི༌ ཁོའ༌ ཇུ༌ ཞུས༌ཏེ༌ ལམ༌ཅུགས༌།
EXO 19:1 ཨིས༌ར༌ཨེལ༌པ༌གུན༌ ཨི༌ཇིབ༌བི༌ ཡུལ༌ནེ༌ བིངས༌ཏེ༌ སྟིང༌ནེ༌ ཟླ༌ཝ༌ སུམ༌པའེ༌ གོ༌མའེ༌ ཞག༌ག༌ ཁོང༌གུན༌ སི༌ནཱའི༌ ཐང༌སྟོང༌ང༌ ལེབ༌།
EXO 19:2 ཨིས༌ར༌ཨེལ༌པ༌གུན༌ རེ༌ཕི༌དིམ༌ནེ༌ བིང༌ཏེ༌ སི༌ནཱའི༌ ཐང༌སྟོང༌ང༌ ལེབ༌ ཡང༌ ཏེ༌རུ༌ ཁོང༌གུན༌ནི༌ སི༌ནཱའི༌ རིའི༌ དུན༌ལ༌ ཀུར༌ ཙུགས༌ཏེ༌ དུགས༌།
EXO 19:3 མོ༌ཟེས༌ རིའི༌ཀ༌ ཀེན༌ལ༌ དཀོན༌མཆོག༌ག༌ ཐུག༌ག༌ལ༌ སོང༌། ཡ༌ཝའེ༌ ཁོའ༌ རི༌གོ༌ནེ༌ བོད༌ད༌ ཛད༌ཏེ༌ མོལས༌, “ཁྱོ༌རང༌ངི༌ ཨིས༌ར༌ཨེལ༌པ༌, ཡ༌ཀོབ༌བི༌ པུར༌གྱུད༌གུན༌ལ༌ འི༌བོ༌ ཟེར༌,
EXO 19:4 ‘ངའེ༌ ཨི༌ཇིབ༌པ༌གུན༌ལ༌ ཅོ༌ཁན༌གུན༌ ཁྱོ༌ཞའེ༌ ཐོང༌ཏེ༌ ཨིན༌ནོག༌། ལག༌གི༌ ཤོག༌པའེ༌ ནང༌ང༌ ཕྲུ༌གུ༌ ཁུར༌ཏེ༌ འུར༌ར༌ ཙོགས༌ལ༌ ངའེ༌ ཁྱོ༌ཞ༌གུན༌ ཁུར༌ཏེ༌ ང༌རང༌ངི༌ཀ༌ ཁྱོངས༌པིན༌།
EXO 19:5 ཏ༌ ཀལ༌ཏེས༌ ཁྱོ༌ཞའེ༌ ངའེ༌ ཁའ༌ཉན༌ཏེ༌ ང༌དང༌ངི༌ པར༌ལ༌ ཆད༌དོན༌ ཅོ༌ཁན༌གུན༌ བོར༌ན༌, ཇིག༌རྟེན༌ གང༌པོའེ༌ མི༌ ངའེ༌ ཨིན༌ཁན༌གུན༌ནི༌ ནང༌ནེ༌ ཁྱོ༌ཞའ༌ ཚང༌མའེ༌སང༌ མང༌ང༌ རིན༌ཅན༌བོ༌ གྱུར༌ཨིན༌།
EXO 19:6 ཡང༌ ཁྱོ༌ཞའ༌ ངའེ༌ བླ༌མ༌གུན༌ནི༌ གྱལ༌སྲིད༌ དང༌ ཏམ༌པ༌ གྱལ༌ཁམས༌པོ༌ གྱུར༌ཨིན༌།’ འི༌ སྤེ༌ར༌གུན༌ ཁྱོ༌རང༌ངི༌ ཨིས༌ར༌ཨེལ༌པ༌གུན༌ལ༌ ཤོད༌།”
EXO 19:7 ཏེ༌ནེ༌ མོ༌ཟེས༌ ལོགས༌ཏེ༌ སོང༌ ཡང༌ སྤོན༌བོ༌གུན༌ལ༌ བོད༌ཏེ༌ ཡ༌ཝའེ༌ ཤོད༌ མོལ༌ཁན༌ ཚང༌མ༌ ཁོང༌གུན༌ལ༌ ཤདས༌།
EXO 19:8 མི༌ཚང༌མ༌ ཅིག༌ སོང༌ཏེ༌ ལན༌ཏངས༌, “ཡ༌ཝའེ༌ མོལ༌ཁན༌ ཚང༌མ༌ ང༌ཞ༌གུན༌ནི༌ ཅོ༌ཨིན༌” ཡང༌ མོ༌ཟེས༌སི༌ འི༌ ལོན༌བོ༌ ཡ༌ཝའ༌ ཞུས༌།
EXO 19:9 ཡ༌ཝའེ༌ མོ༌ཟེས༌ལ༌ མོལས༌, “མི༌གུན༌ནི༌ ངའེ༌ ཁྱོ༌རང༌ ཉམ༌པོ༌ སྤེ༌ར༌ ཏང༌ཁན༌བོ༌ ཚོར༌ཅེས༌སི༌ ཕིའ༌ སྲིན༌ ཐུག༌མོ༌ཞིག༌གི༌ ནང༌ང༌ ང༌ ཁྱོ༌རང༌ངི༌ཀ༌ ཡོང༌ཨིན༌། ཏེ༌ནེ༌ ཁོང༌གུན༌ནི༌ ཁྱོ༌རང༌ངི༌ཀ༌ ཨིད༌ཤེས༌ ཅོ༌ཨིན༌།” ཏེ༌ནེ༌ མི༌གུན༌ནི༌ ཟེར༌ཁན༌གུན༌ མོ༌ཟེས༌སི༌ ཡ༌ཝའ༌ ཞུས༌།
EXO 19:10 ཡ༌ཝའེ༌ མོ༌ཟེས༌ལ༌ མོལས༌, “མི༌གུན༌ ཡོད༌ས༌ སོང༌ ཡང༌ དི༌རིང༌ དང༌ ཐོ༌རེ༌ ཁོ༌རང༌གུན༌ རྩང༌མ༌ ཅོ༌ཅུགས༌ཏེ༌ ཀོས༌ལག༌གུན༌ ཁྲུ༌ ཟེར༌།
EXO 19:11 ཞག༌ སུམ༌པའེ༌ ཞག༌ག༌ ཁོང༌གུན༌ གྲལ༌གྲིག༌ ཡོང༌གོས༌ ཅིའ༌ཟེར༌ན༌ ཏེ༌ ཞག༌ག༌ མི༌ ཚང༌མའེ༌ དུན༌ལ༌ ང༌ བབས༌ཏེ༌ སི༌ནཱའི༌ རིའི༌ཀ༌ ཡོང༌ཨིན༌།
EXO 19:12 རིའི༌ ལྡན༌ ཀྱིར༌སྐོར༌ཏེ༌ སྟགས༌ ཏོང༌ ཡང༌ ‘མི༌གུན༌ལ༌ ཏེ༌བོ༌ གོམས༌ཏེ༌ རིའི༌ཀ༌ མི༌ཆ༌ཅེས༌ ཡ༌ རིའ༌ ལག༌པ༌ མི༌རྩེ༌ཅེས༌ལ༌ ཟེར༌། ཀལ༌ཏེས༌ སུ༌ཞིག༌གི༌ རིའ༌ ལག༌པ༌ རྩེ༌ན༌ ཁོ༌ སད༌གོས༌།
EXO 19:13 སུ༌ཞིག༌གིའང༌ ཁོའ༌ ལག༌པ༌ རྩེ༌ མ༌གོས༌, ཁོའ༌ རྡོའ༌ གྱབས༌ཏེ༌ ཡ༌ དའ༌ ཏངས༌ཏེ༌ སད༌གོས༌། མི༌ ཨིན༌གྲོ༌ ཡ༌ སེམས༌ཅན༌ རིའ༌ ལག༌པ༌ རྩེས༌ཁན༌བོ༌ སད༌གོས༌།’ ཏུང༌བོ༌ རིང༌མོ༌ ཤེད༌ཅན༌ ཕུའ༌ཅིག༌ མི༌གུན༌ རིའི༌ཀ༌ ཡོང༌ནའང༌ གྲིག༌།”
EXO 19:14 ཏེ༌ནེ༌ མོ༌ཟེས༌ རི༌ནེ༌ བབས༌ཏེ༌ སོང༌ ཡང༌ མི༌གུན༌ལ༌ ཁོ༌རང༌གུན༌ རྩང༌མ༌ ཅོས༌ཏེ༌ ཁོང༌གུན༌ནི༌ ཀོས༌ལག༌གུན༌ ཁྲུ༌ཅུགས༌།
EXO 19:15 ཡང༌ མོ༌ཟེས༌སི༌ མི༌གུན༌ལ༌ ཟེརས༌, “ཁྱོ༌རང༌གུན༌ ཞག༌ སུམ༌པའེ༌ ཕིའ༌ གྲལ༌གྲིག༌ ཅོས༌ ཡང༌ འི༌ ཏུས༌ལ༌ ཞིད༌མད༌ ཉམ༌པོ༌ ལུས༌བྲེལ༌ ཅོ༌ མ༌གོས༌།”
EXO 19:16 ཞག༌མ༌ སུམ༌པའེ༌ ང༌མོ༌ བྲུག༌ལྡིར༌ ཡང༌ སྐམ༌ལག༌ བར༌, རི༌ཀ༌ སྲིན༌ ཐུག༌མོ༌ བབས༌ ཡང༌ མ༌ ཤེད༌ཅན༌ ཏུང༌ སྐད༌ ཚོར༌། ཀུར༌ ཙུག༌སའེ༌ ནས༌སའེ༌ ནང༌ང༌ ཡོད༌ཁན༌ མི༌ ཚང༌མ༌ ཇིགས༌ཏེ༌ དར༌།
EXO 19:17 ཏེ༌ནེ༌ མོ༌ཟེས༌སི༌ མི༌གུན༌ ཀུར༌ ཙུག༌སའེ༌ ནས༌ས༌ནེ༌ ཕིངས༌ཏེ༌ དཀོན༌མཆོག༌ ཉམ༌པོ༌ ཐུག༌ག༌ལ༌ ཁྱེརས༌། ཡང༌ ཁོང༌གུན༌ རིའི༌ ལྡན༌ནི༌ཀ༌ ལངས༌ཏེ༌ དུགས༌།
EXO 19:18 སི༌ནཱའི༌ རི༌ ཏུད༌པའེ༌ ཀབས༌ཏེ༌ ཡོད༌པིན༌ ཅིའ༌ཟེར༌ན༌ ཡ༌ཝ༌ མེའེ༌ ནང༌ང༌ ཏེ༌ཀ༌ བབས༌ཏེ༌ སྐྱོདས༌། མེ༌ ཀྲག༌པོ༌ བར༌ཁན༌ནི༌ ཏུད༌པ༌ ཙོགས༌ལ༌ ཏུད༌པ༌ ཀེན༌ལ༌ ཆའད༌པིན༌ ཡང༌ རི༌ གང༌པོ༌ མ༌སྲན༌ཏྲེ༌ སྐུལ༌ལ༌ ཛདས༌།
EXO 19:19 ཏུང༌ངི༌ སྐད༌པོ༌ མང༌ནེ༌ མང༌ང༌ ཤེད༌ཅན༌ སོང༌། ཏེ༌ནེ༌ མོ༌ཟེས༌སི༌ སྤེ༌ར༌ ཏངས༌ ཡང༌ དཀོན༌མཆོག༌གི༌ བྲུག༌ལྡིར༌ ཙོགས༌ ཤེད༌ཅན༌ སྐད༌དི༌ ནང༌ང༌ ལན༌སལས༌།
EXO 19:20 ཡ༌ཝ༌ སི༌ནཱའི༌ རི༌ གོའེ༌ཀ༌ བབས༌ཏེ༌ སྐྱོདས༌ ཡང༌ མོ༌ཟེས༌ལ༌ རི༌གོའ༌ ཡོང༌ཅེས༌ལ༌ མོལས༌། མོ༌ཟེས༌ རི༌ཀ༌ ཀེན༌ལ༌ སོང༌།
EXO 19:21 ཡ༌ཝའེ༌ ཁོའ༌ མོལས༌, “ཐུར༌ལ༌ བབས༌ཏེ༌ སོང༌ ཡང༌ མི༌གུན༌ལ༌ སྤང༌པུད༌ཏེ༌ ཟེར༌, ‘ཡ༌ཝ༌ དཀོན༌མཆོག༌ ལྟའ༌ཅེས༌ལ༌ སྟགས༌ ཏང༌ཁན༌བོ༌ གོམས༌ཏེ༌ མ༌ཡོང༌, ཀལ༌ཏེས༌ ཡོང༌ན༌ ཁྱོ༌ཞའ༌ མང༌པོ༌ ཤི༌ཨིན༌།
EXO 19:22 ང༌ ཡ༌ཝའེ༌ དུན༌ལ༌ ཡོང༌ཅེས༌ཅན༌ནི༌ བླ༌མ༌གུན༌ནའང༌ རྩང༌མ༌ ཅོ༌གོས༌, ཏེ༌ མ༌ནེ༌ ངའེ༌ ཁོང༌གུན༌ལ༌ ཆད༌པ༌ ཏང༌ཨིན༌།’”
EXO 19:23 མོ༌ཟེས༌སི༌ ཡ༌ཝའ༌ ཟེརས༌, “མི༌གུན༌ རི༌ཀ༌ ཡོང༌ མི༌ཆོགས༌ ཅིའ༌ཞུ༌ན༌ ཉེ༌རང༌ངི༌ ང༌ཞའ༌ རི༌བོ༌ ཏམ༌པ༌ རྩིས༌ཏེ༌ སྟགས༌ ཏང༌ཅེས༌ ཡང༌ ཏེ༌སང༌ ཐལ༌ཏེ༌ མི༌ ཡོང༌ཅེས༌ལ༌ བཀའ༌ སལས༌།”
EXO 19:24 ཡ༌ཝའེ༌ ལན༌སལས༌, “ཡོག༌ག༌ སོང༌ ཡང༌ ཨ༌རོན༌ ཁྲིད༌ཏེ༌ ཁྱོང༌། ཨིན༌ནའང༌ བླ༌མ༌གུན༌ ཡ༌ མི༌གུན༌, སྟགས༌ ཏང༌ཁན༌བོ༌ གོམས༌ཏེ༌ ཡ༌ཝ༌ ཡོད༌སའ༌ ཡོང༌ཅེས༌ ཅོ༌ མ༌གོས༌ ཏེ༌ཟུག༌ ཅོ༌ན༌ ངའེ༌ ཁོང༌གུན༌ལ༌ ཆད༌པ༌ ཏང༌ཨིན༌།”
EXO 19:25 ཏེ༌ནེ༌ མོ༌ཟེས༌ ཡོག༌ག༌ མི༌གུན༌ ཡོད༌ས༌ སོང༌ ཡང༌ ཁོང༌གུན༌ལ༌ ཡ༌ཝའེ༌ མོལ༌ཁན༌གུན༌ ཤདས༌།
EXO 20:1 དཀོན༌མཆོག༌གི༌ འི༌ ཞལ༌ཏ༌ ཚང༌མ༌ སལས༌,
EXO 20:2 “ཁྱོ༌ཞ༌གུན༌, ཨི༌ཇིབ༌བི༌ ནས༌སའེ༌ ནང༌ང༌ ཚེ༌ཡོག༌ག༌ ཡོད༌ཁན༌བོའེ༌ ནང༌ནེ༌ ཕིངས༌ཏེ༌ ཁྱོང༌ཁན༌ ང༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌ ཨིན༌།”
EXO 20:3 “ཁྱོ༌ཞའེ༌, ང༌ ཅིག༌པོ༌ མ༌ནེ༌ ཞན༌ སུའང༌ དཀོན༌མཆོག༌ རྩིས༌ཏེ༌ ཅོལ༌ མ༌གོས༌།”
EXO 20:4 “ཁྱོ༌ཞ༌གུན༌ནི༌ ནམ༌ཁའེ༌ ནང༌ང༌ ཡ༌ ཇིག༌རྟེན༌ནི༌ཀ༌ ཡ༌ ས༌ཀྱད༌དི༌ ཡོག༌ག༌ ཡ༌ ཚོའེ༌ ནང༌ང༌ ཡོད༌ཁན༌གུན༌ནི༌ ཟོས༌ཏེ༌ ནང༌ང༌ སྐུན༌དྲ༌ ཅོ༌ མ༌གོས༌།
EXO 20:5 ཏེ༌གུན༌ནི༌ དུན༌ལ༌ གོ༌ མ༌སྒུ༌ ཡ༌ ཏེ༌གུན༌ལ༌ མ༌ཅོལ༌ ཅིའ༌ཟེར༌ན༌ ང༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌ ཚིག༌རི༌ཅན༌ དཀོན༌མཆོག༌ ཨིན༌། ང༌ ཕངས༌ཏེ༌ སྡིག༌པ༌ ཅོ༌ཁན༌གུན༌ནི༌ མི༌རབས༌ སུམ༌པ༌ དང༌ ཞི༌པ༌ ཚག༌པའེ༌ ཕྲུ༌གུ༌གུན༌ལ༌ ངའེ༌ ཆད༌པ༌ ཏང༌ཨིན༌།
EXO 20:6 ཨིན༌ནའང༌ ངའ༌ ཅམས༌པ༌ ཅོས༌ཏེ༌ ངའེ༌ ཁྲིམས༌གུན༌ལ༌ ཁའ༌ ཉན༌ཁན༌གུན༌ནི༌ མི༌རབས༌ སྟོང༌ ཚག༌པ༌ ངའེ༌ གྱུར༌ཇ༌ མེད༌ཁན༌ནི༌ ཅམས༌པ༌ སྟན༌ཨིན༌།”
EXO 20:7 “ཁྱོ༌ཞ༌གུན༌ནི༌, ཡ༌ཝ༌ ཁྱོ༌ཞའེ༌ དཀོན༌མཆོག༌གི༌ ཚན༌ ཏོན༌མེད༌ལ༌ ཀོལ༌ མ༌གོས༌ ཅིའ༌ཟེར༌ན༌ ཡ༌ཝའེ༌ ཚན༌ ཏོན༌མེད༌ལ༌ ཀོལ༌ཁན༌གུན༌ལ༌ ཁོང༌ངི༌ སྐྱོན༌མེད༌ ཐེའ༌ མི༌ཛད༌།”
EXO 20:8 “ཤབ༌བད༌དི༌ ངལ༌ཚོའེ༌ ཞག༌ ཨིད༌ཏུ༌ ཅོས༌ཏེ༌ ཏེ༌བོ༌ ཏམ༌པ༌ བོར༌།
EXO 20:9 ཁྱོ༌ཞ༌གུན༌ནི༌ ཞག༌ དྲུག༌པོའེ༌ ནང༌ང༌ ལས༌ ཚང༌མ༌ ཅོ༌གོས༌,
EXO 20:10 ཨིན༌ནའང༌ ཞག༌ རྡུན༌པ༌བོ༌ ངལ༌ཚོའེ༌ ཞག༌ ཨིན༌ནོག༌ ཀ༌བོ༌ ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཏང༌གོས༌། ཏེ༌ ཞག༌ག༌ སུ༌ཞིག༌གིའང༌ ལས༌ ཅོ༌ མ༌གོས༌། ཁྱོ༌ཞ༌, ཁྱོ༌ཞའེ༌ བུ༌ཚ༌ ཡ༌ བུ༌མོ༌, ཁྱོ༌ཞའེ༌ ཚེ༌ཡོག༌ བུ༌ཚ༌ ཡ༌ བུ༌མོ༌གུན༌, ཁྱོ༌ཞའེ༌ སེམས༌ཅན༌གུན༌ ཡ༌ ཞན༌ཡུལ༌ལི༌ མི༌ ཁྱོ༌ཞ༌གུན༌ནི༌ ཡུལ༌ལ༌ དུག༌ཁན༌ ཚང༌མའེ༌ ལས༌ ཅོ༌ མ༌གོས༌།
EXO 20:11 ཞག༌ དྲུག༌གི༌ ནང༌ང༌ ཡ༌ཝའེ༌ ནམ༌ཁའ༌, ཇིག༌རྟེན༌, ཚོ༌ དང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཅོའ༌ ཛདས༌ ཨིན༌ནའང༌ ཞག༌ རྡུན༌པའེ༌ ཞག༌ག༌ ཁོང༌ ངལ༌ཚོའ༌ ཛདས༌། ཏེན༌ན༌བོའེ༌ཕིའ༌ ཡ༌ཝའེ༌ ཤབ༌བད༌དི༌ ཞག༌པོའ༌ ཅིན༌ལབས༌ སལ༌ཏེ༌ ཏམ༌པ༌ ཛདས༌།”
EXO 20:12 “རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌། ཏེ༌ནེ༌ ང༌ ཡ༌ཝ༌ ཁྱོ༌ཞའེ༌ དཀོན༌མཆོག༌གི༌ ཏང༌ཅེས༌ཅན༌ནི༌ ས༌ཆ༌བོའེ༌ ནང༌ང༌ ཁྱོ༌ཞ༌གུན༌ནི༌ མི༌ཚེ༌ རིང༌མོ༌ ཕུད༌ ཐུབ༌ཨིན༌།”
EXO 20:13 “མི༌ མ༌སད༌།”
EXO 20:14 “རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌།”
EXO 20:15 “རྐུན༌མ༌ མ༌རྐུ༌།”
EXO 20:16 “སུ༌ཞིག༌གི༌ གྱབ༌གལ༌ལ༌ སྤང༌པོ༌ ཟུན༌བ༌ མ༌ཏང༌།”
EXO 20:17 “ཞན༌མའེ༌ ཁང༌པའེ༌ ཕིའ༌ དོད༌པ༌ མ༌ཅོ༌། ཞན༌མའེ༌ ན༌མ༌, བུ༌ཚ༌ ཡ༌ བུ༌མོ༌ ཚེ༌ཡོག༌, ལང༌ཏོ༌ ཡ༌ བུང༌བུ༌, ཡ༌ ཞན༌མའེ༌ ཨིན༌ཁན༌ ཅི༌ཞིག༌གི༌ ཕིའ༌ དོད༌པ༌ མ༌ཅོ༌།”
EXO 20:18 མི༌གུན༌ནི༌, བྲུག༌ལྡིར༌ དང༌ སྐམ༌ལག༌ ཡང༌ ཏུང༌ངི༌ སྐད༌ ཀྲག༌པོ༌ དང༌ རི༌ནེ༌ ཏུད༌པ༌ བིང༌ང༌ ཐོང༌ང༌ཅིག༌ ཁོང༌གུན༌ ཇིགས༌ཏེ༌ དར༌ཨིན༌ ཐག༌རིང༌ང༌ ལངས༌ཏེ༌ དུགས༌
EXO 20:19 མི༌གུན༌ནི༌ མོ༌ཟེས༌ལ༌ ཟེརས༌, “ཉེ༌རང༌ངི༌ ང༌ཞ༌གུན༌ལ༌ སྤེ༌ར༌ སལ༌ན༌ ང༌ཞའེ༌ ཉན༌ཨིན༌། ཨིན༌ནའང༌ དཀོན༌མཆོག༌ག༌ ང༌ཞའ༌ ཞལ༌ཏ༌ མི༌སལ༌ཅེས༌ལ༌ ཞུ༌ཝ༌ ཕུལ༌, ཏེ༌མན༌ན༌ ང༌ཞ༌གུན༌ ཤིའ༌ནོག༌།”
EXO 20:20 མོ༌ཟེས༌སི༌ ལན༌ཏངས༌, “ཇིགས༌ མ༌ཇིགས༌། དཀོན༌མཆོག༌གི༌ ཇིགས༌སི༌ ནང༌ང༌ ཁྱོ༌ཞ༌གུན༌ནི༌ སྡིག༌པ༌ མི༌ཅོ༌ཅེས༌སི༌ ཕིའ༌ ཁོང༌ ཁྱོ༌ཞ༌གུན༌ལ༌ ཚོད༌ལྟ༌ ལེན༌ན༌ལ༌ སྐྱོད༌ཏེ༌ ཨིན༌ནོག༌།”
EXO 20:21 ཨིན༌ནའང༌ མི༌གུན༌ ཐག༌རིང༌ང༌ དུགས༌ ཡང༌ མོ༌ཟེས༌ སྲིན༌ ཐུག༌མོ༌ ནག༌པོའེ༌ དུན༌ལ༌ སོང༌ ཀ༌རུ༌ དཀོན༌མཆོག༌ ཞུགས༌ཏེ༌ ཡོད༌པིན༌།
EXO 20:22 ཡ༌ཝའེ༌ མོ༌ཟེས༌ལ༌ མོལས༌, “ཨིས༌ར༌ཨེལ༌པ༌གུན༌ལ༌ ཟེར༌, ‘ངའེ༌ ཁྱོ༌ཞའ༌ ནམ༌ཁའ༌ནེ༌ སྤེ༌ར༌ ཏང༌ཁན༌བོ༌ ཁྱོ༌ཞའེ༌ ཐོང༌ཏེ༌ ཨིན༌ནོག༌།
EXO 20:23 ངའེ༌ ཚབས༌ལ༌ ཅོལ༌ཅེས༌ལ༌ ཁྱོ༌ཞ༌གུན༌ནི༌ མུལ༌ དང༌ སེར༌རི༌ སྐུན༌དྲ༌གུན༌ ཅོ༌ མ༌གོས༌།’”
EXO 20:24 “‘ངའེ༌ ཕིའ༌ ཀ༌ལག༌གི༌ ཆོད༌ཁྲི༌ རྩིག༌ ཡང༌ ཏེ༌ཀ༌ ར༌ལུག༌ དང༌ བ༌ལང༌ མེའ༌ སྲོགས༌ཁན༌ནི༌ ཆོད༌པ༌ དང༌ ཞི༌དེ༌ ཆོད༌པ༌ ཕུལ༌། ངའེ༌ ཅོལ༌ ཟེརས༌སའེ༌ ནས༌སའེ༌ཀ༌ ངའ༌ ཅོལ༌གོས༌, ཏེ༌ཀ༌ ང༌ ཡོངས༌ཏེ༌ ཁྱོ༌ཞ༌གུན༌ལ༌ ཅིན༌ལབས༌ ཏང༌ཨིན༌།
EXO 20:25 ཀལ༌ཏེས༌ ཁྱོ༌ཞ༌གུན༌ནི༌ ངའེ༌ ཕིའ༌ རྡོའེ༌ ཆོད༌ཁྲི༌ རྩིག༌ན༌ རྡོའ༌ ལྡེ༌མོ༌ ཅགས༌ཁན༌ མ༌ཀོལ༌ ཅིའ༌ཟེར༌ན༌ ཁྱོ༌ཞའེ༌ རྡོའ༌ ཅག༌ག༌ལ༌ ལག༌ཆ༌ ཀོལ༌ལ༌ཅིག༌ ཏེ༌བོ༌ ཏམ༌པ༌ མི༌ ལུས༌།
EXO 20:26 སྲེས༌ཀ༌ ཡོད༌ཁན༌ནི༌ ཆོད༌ཁྲི༌ ཡོང༌ མ༌གོས༌ ཅིའ༌ཟེར༌ན༌ ཏེ༌ཀ༌ ཛགས༌ ཟ༌ནེ༌ མི༌གུན༌ནི༌ བླ༌མའེ༌ ཟུགས༌པོའེ༌ ཁག༌ མ༌ ཀབ༌ཁན༌བོ༌ ཐོང༌སྲིད༌ཅེས༌ ཨིན༌ནོག༌།’”
EXO 21:1 ཡ༌ཝའེ༌ མོ༌ཟེས༌ལ༌ མོལས༌, “འི༌ ཁྲིམས༌གུན༌ ཨིས༌ར༌ཨེལ༌པ༌གུན༌ལ༌ ཏོང༌།”
EXO 21:2 “ཀལ༌ཏེས༌ ཁྱོ༌ཞའེ༌ ཨིབ༌རི༌པ༌ ཚེ༌ཡོག༌ ཉོ༌ན༌ ཁོའེ༌ ཁྱོ༌ཞའེ༌ ཕིའ༌ ལོ༌ དྲུག༌ ལས༌ ཅོ༌གོས༌། ཨིན༌ནའང༌ ལོ༌ རྡུན༌པའེ༌ ནང༌ང༌ ཅའང༌ བུ༌ལོན༌ མེད༌པ༌ ཁོའ༌ རང༌ཝང༌ ཏང༌གོས༌།
EXO 21:3 ཀལ༌ཏེས༌ ཚེ༌ཡོག༌གི༌ ལས༌ གོ༌ཟུག༌ ཟ༌ནེ༌ ཁོ༌ ན༌མ༌ མ༌ཅོ༌ཁན༌ ཨིན༌ན༌ ཁོ༌རང༌ ཅིག༌པོའ༌ རང༌ཝང༌ ཏོང༌ ཨིན༌ནའང༌ ལས༌ གོ༌ཟུག༌ ཟ༌ནེ༌ ཁོའ༌ ན༌མ༌ ཡོད༌ན༌ ཁོང༌ ཉིས༌ཀོའ༌ རང༌ཝང༌ ཏང༌གོས༌།
EXO 21:4 ཀལ༌ཏེས༌ ཁོའེ༌ སྤོན༌བོའེ༌ ཁོའ༌ ན༌མ༌ ཅོ༌ཅུགས༌ཏེ༌ ཁོའ༌ ཕྲུ༌གུ༌ ཇོར༌ན༌, ཁོ༌རང༌ ཅིག༌པོ༌ མ༌ནེ༌ རང༌ཝང༌ མི༌ ཐོབ༌, ཁོའེ༌ ན༌མ༌ དང༌ ཕྲུ༌གུ༌གུན༌ སྤོན༌བོའེ༌ ཕིའ༌ ལས༌ ཅོ༌ཨིན༌ དུགས༌ གོས༌།”
EXO 21:5 “ཨིན༌ནའང༌ ཚེ༌ཡོག༌གི༌, ‘ངའེ༌ སྤོན༌བོ༌, ང༌རང༌ངི༌ ན༌མ༌ དང༌ ཕྲུ༌གུ༌ གུན༌ལ༌ ཅམས༌པ༌ ཅོའད༌ ཡང༌ ང༌ རང༌ཝང༌ གོས༌ས༌ མེད༌’ ཟེར༌ན༌
EXO 21:6 ཏེ༌ནེ༌ ཁོའེ༌ སྤོན༌བོའེ༌ ཁོ༌ ཏམ༌པ༌ ཀུར༌རི༌ དུན༌ལ༌ ཁྱེར༌ཏེ༌ སྒོའེ༌ཀ༌ དུག༌ཅུགས༌ཏེ༌ ལྕགས༌ ཙེབ༌ཙེབ༌ ཤིག༌ ཉམ༌པོ༌ ཁོའེ༌ ནམ༌ཅོག༌ག༌ བི༌ཡང༌ ཕུད༌གོས༌། ཏེ༌ནེ༌ ཁོ༌ མི༌ཚེ༌ གང༌པོའེ༌ ཕིའ༌ ཁོའེ༌ ཚེ༌ཡོག༌ གྱུར༌ཨིན༌།”
EXO 21:7 “ཀལ༌ཏེས༌ མི༌ཞིག༌གི༌ ཁོ༌རང༌ངི༌ བུ༌མོ༌བོ༌ ཚེ༌ཡོག༌ག༌ ཙོང༌ན༌, ཚེ༌ཡོག༌ བུ༌ཚ༌གུན༌ ཙོགས༌ལ༌ ཁོའ༌ རང༌ཝང༌ མ༌ཏང༌།
EXO 21:8 ཀལ༌ཏེས༌ སྤོན༌བོ༌ ཏེ༌ བུ༌མོ༌ བོར༌ཅེས༌ལ༌ ཐད༌ད༌ མེད༌ན༌ ཁོ༌ ཁོ༌རང༌ངི༌ ཨ༌བ༌ ལོགས༌ཏེ༌ ཙོང༌གོས༌། སྤོན༌བོའེ༌ ཁོའེ༌ ཨ༌བ༌ ཉམ༌པོ༌ ཅོ༌ཁན༌ནི༌ ཆད༌དོན༌ ཅགས༌ཏེ༌ བུ༌མོ༌བོ༌ ཞན༌མི༌ཞིག༌ག༌ ཙོང༌ མི༌ཆོག༌།
EXO 21:9 ཀལ༌ཏེས༌ སྤོན༌བོའེ༌ བུ༌མོ༌ ཉོ༌ཁན༌བོ༌ ཁོ༌རང༌ངི༌ བུ༌ཚ༌ ཏང༌ན༌ ཁོའེ༌ ཏེ༌ བུ༌མོ༌བོའ༌ རང༌ངི༌ བུ༌མོ༌ ཙོགས༌ ཐོབ༌ཏང༌ ཏང༌གོས༌།
EXO 21:10 ཀལ༌ཏེས༌ སྤོན༌བོའེ༌ ཞན༌ཡང༌ ན༌མ༌ ཁྱོང༌ན༌ ཏེ༌ནེ༌ ཁོའེ༌ གོ༌མའེ༌ ན༌མའ༌, སྔུན༌ལ༌ ཏང༌ཁན༌ ཙོགས༌ ཟའ༌ཅེས༌, ཀོས༌ལག༌ དང༌ ཐོབ༌ཏང༌གུན༌ ཏང༌གོས༌།
EXO 21:11 ཀལ༌ཏེས༌ ཁོའེ༌ བུ༌མོ༌བོའ༌ ཏེ༌ སུམ༌ཀོ༌ མ༌ཏང༌ན༌ ཏེ༌ནེ༌ པེ༌ནེ༌ ཅིག༌གའང༌ ཤལ༌གོས༌ མེད༌པ༌ ཁོའེ༌ བུ༌མོ༌བོའ༌ རང༌ཝང༌ ཏང༌གོས༌།”
EXO 21:12 “མིའ༌ རྡུངས༌ཏེ༌ སད༌ཁན༌ནི༌ མི༌བོ༌ སད༌གོས༌།
EXO 21:13 ཨིན༌ནའང༌ ཏེ༌བོ༌ མིང༌ནའང༌ མ༌ཅོའ༌ དཀོན༌མཆོག༌གི༌ ཇུང༌ཅུགས༌ཏེ༌ ཨིན༌ན༌ ཏེ༌ནེ༌ ཁོ༌ ངའེ༌ ལྡམས༌ཁན༌ནི༌ ས༌ཆའ༌ ཤོར༌ཏེ༌ ཆ༌གོས༌།
EXO 21:14 ཨིན༌ནའང༌ སུ༌ཞིག༌གི༌ ཅུས༌ངན༌ ལྡིངས༌ཏེ༌ སུ༌ཞིག༌ མིང༌ནའང༌ སད༌ན༌, ངའེ༌ ཆོད༌ཁྲིའི༌ ཀ༌ནེ༌ ཁོ༌ དྲུད༌ཏེ༌ ཁྱེར༌ ཡང༌ སོད༌།”
EXO 21:15 “ཨ༌བ༌ ཡ༌ ཨ༌མ༌ རྡུང༌ཁན༌ནི༌ མི༌བོ༌ སད༌གོས༌།”
EXO 21:16 “སུ༌ཞིག༌གི༌ སང༌ཝའེ༌ ནང༌ང༌ མི༌ཞིག༌ རྐུས༌ཏེ༌ ཁོ༌ ཙོང༌ ཚར༌ ཡ༌ མ༌ཚར༌ར༌ ཡོད༌ན༌, རྐུན༌མ༌བོ༌ ཐོབ༌བ༌ཅིག༌ ཁོ༌ སད༌གོས༌།”
EXO 21:17 “ཨ༌བ༌ ཡ༌ ཨ༌མ༌ རྔན༌ ཏབ༌ཁན༌ནི༌ མི༌བོ༌ སད༌གོས༌།”
EXO 21:18 “ཀལ༌ཏེས༌ ཛིང༌མོ༌ ཏང༌ ཟ༌ནེ༌ ཅིག༌པོའེ༌ ཅིག༌པོའ༌ རྡོའ༌ ཡ༌ མུལ༌ཁྲུག༌ གྱབ༌ན༌ ཨིན༌ནའང༌ མི༌བོ༌ ཤི༌ མ༌ཤིའ༌ མལ༌ཙེ༌ཀ༌ ལུས༌ཏེ༌
EXO 21:19 སྟིང༌ནེ༌ ཁོ༌ གྱལ༌ཏེ༌ ཕི༌ལོག༌ག༌ བེར༌ཀ༌ སྟེན༌ཏེ༌ གྲུལ༌ཉན༌ན༌ རྡུང༌ཁན༌བོའ༌ ཆད༌པ༌ མི༌ཕོག༌ ཨིན༌ནའང༌ ཕོག༌ཁན༌བོའེ༌ ཏུས༌ གོད༌ལ༌ ཆའ༌ཁན༌བོའེ༌ ཕིའ༌ ཁོའེ༌ རིན༌ ཤལ༌གོས༌ ཡང༌ ཁོ༌ སིང༌ གྱལ༌གྱལ༌ ཚག༌པ༌ ཁོའེ༌ སྟ༌སྟོག༌ ཅོ༌གོས༌།”
EXO 21:20 “ཀལ༌ཏེས༌ སུ༌ཞིག༌གི༌ ཁོ༌རང༌ངི༌ བུ༌ཚ༌ ཡ༌ བུ༌མོ༌ ཚེ༌ཡོག༌ག༌ བེར༌ཀ༌ ཉམ༌པོ༌ རྡུངས༌ཏེ༌ ཁོ༌ ཤི༌ན༌ ཏེ༌ནེ༌ དག༌པོ༌བོའ༌ ཆད༌པ༌ ཕོག༌གོས༌།
EXO 21:21 ཨིན༌ནའང༌ ཚེ༌ཡོག༌པོ༌ ཞག༌པོ༌ ཅིག༌ ཡ༌ ཉིས༌ སོན༌ཏེའ༌ ལུས༌ན༌ དག༌པོ༌བོའ༌ ཆད༌པ༌ མི༌ཕོག༌ ཅིའ༌ཟེར༌ན༌ ཡོག༌པོ༌ དག༌པོའེ༌ གྱུ༌ནོར༌ ཨིན༌ནོག༌ ཡང༌ ཏེ༌བོ༌ ཁོའེ༌ ཕིའ༌ ཀོད༌ཀ༌ ཨིན༌ནོག༌།”
EXO 21:22 “ཀལ༌ཏེས༌ བུ༌ཚ༌ ཉིས༌སི༌ ནོལ༌ཨིན༌ ཡོད༌ ཟ༌ནེ༌ བུ༌མོ༌ སྐྱེ༌ཅེས༌མ༌ ཞིག༌ག༌ ཕོག༌ཏེ༌ ཁོའེ༌ ཕྲུ༌གུ༌ ཤིགས༌ཏེ༌ ཨིན༌ནའང༌ སྲན༌ཏྲེ༌ མ༌སྐྱོན༌ སོང༌ཏེ༌ མེད༌ན༌, བུ༌མོའེ༌ མག༌པའེ༌ ཏོང༌ ཟེར༌ཁན༌ནི༌ པེ༌ནེ༌, ཁོའེ༌ ཁྲིམ༌སྤོན༌ནི༌ ཐག༌ཅད༌ཁན༌ ནང༌ཞིན༌ ཏང༌གོས༌།
EXO 21:23 ཨིན༌ནའང༌ མ༌སྐྱོན༌ སྲན༌ཏྲེ༌ ཆ༌ན༌ ཏེ༌ནེ༌ ཆད༌པ༌བོ༌ མ༌སྐྱོན༌བོ༌ནའང༌ ཟོབས༌ གོས༌, སྲོག༌གི༌ ཚབས༌ལ༌ སྲོག༌,
EXO 21:24 མིག༌གི༌ ཚབས༌ལ༌ མིག༌, སོ༌ ཚབས༌ལ༌ སོ༌, ལག༌པའེ༌ ཚབས༌ལ༌ ལག༌པ༌, རྐང༌པའེ༌ ཚབས༌ལ༌ རྐང༌པ༌,
EXO 21:25 མེའ༌ ཙིག༌ཁན༌ནི༌ ཚབས༌ལ༌ མེའ༌ ཙིག༌ཅུག༌ཅེས༌, མ༌ཁའེ༌ ཚབས༌ལ༌ མ༌ཁའ༌, ཕོག༌ཁན༌ནི༌ ཚབས༌ལ༌ ཕོག༌ཅུག༌ཅེས༌།”
EXO 21:26 “ཀལ༌ཏེས༌ སུ༌ཞིག༌གི༌ ཁོ༌རང༌ངི༌ བུ༌ཚ༌ ཡ༌ བུ༌མོ༌ ཚེ༌ཡོག༌གི༌ མིག༌ག༌ ཕོག༌ ཅུགས༌ཏེ༌ ཞ༌ར༌ གྱུར༌ན༌ ཏེ༌བོའེ༌ ཚབས༌ལ༌ ཁོའེ༌ ཚེ༌ཡོག༌པོའ༌ རང༌ཝང༌ ཏང༌གོས༌།
EXO 21:27 ཀལ༌ཏེས༌ ཁོའེ༌ བུ༌ཚ༌ ཡ༌ བུ༌མོ༌ ཚེ༌ཡོག༌གི༌ སོ༌ ཕུད༌ཏེ༌ ཡོད༌ན༌ ཏེ༌བོའེ༌ ཚབས༌ལ༌ ཁོའེ༌ ཡོག༌པོ༌བོའ༌ རང༌ཝང༌ ཏང༌གོས༌།”
EXO 21:28 “ཀལ༌ཏེས༌ ལང༌ཏོའེ༌ སུ༌ཞིག༌ག༌ ར༌ཅོ༌ གྱབས༌ཏེ༌ སད༌ན༌ ཏེ༌ ལང༌ཏོའ༌ རྡོའ༌ གྱབས༌ཏེ༌ སད༌གོས༌ ཡང༌ ཏེ༌བོའེ༌ ཤ༌ ཟའ༌ མ༌གོས༌ ཨིན༌ནའང༌ ཏེ༌བོའེ༌ དག༌པོའ༌ ཆད༌པ༌ མི༌ཕོག༌།
EXO 21:29 ཨིན༌ནའང༌ ལང༌ཏོའ༌ རྡུང༌ཅེས༌སི༌ ལོབས༌ ཡོད༌ན༌ ཡང༌ དག༌པོའ༌ སྤང༌པུད༌ཏེའང༌ ལང༌ཏོ༌ ལྡམས༌ཏེ༌ མ༌བོར༌ར༌ ཏེ༌བོའེ༌ མི༌ སད༌ན༌ ལང༌ཏོ༌བོའ༌ རྡོའ༌ གྱབས༌ཏེ༌ སོད༌ ཡང༌ དག༌པོ༌བོའང༌ སད༌གོས༌།
EXO 21:30 ཨིན༌ནའང༌ ལང༌ཏོའེ༌ སད༌ཁན༌ནི༌ ཉེན༌གྲུང༌གུན༌ནི༌ ཁོའེ༌ སྲོག༌གི༌ ཚབས༌ལ༌ པེ༌ནེ༌ ཏོང༌ ཟེར༌ན༌ ཏེ༌ནེ༌ དག༌པོའེ༌ ཏོང༌ ཟེར༌ཁན༌ནི༌ པེ༌ནེ༌ ཏངས༌ཏེ༌ ཁོ༌རང༌ངི༌ སྲོག༌ ཉོ༌གོས༌།
EXO 21:31 ཏེན༌ན༌ ལང༌ཏོའེ༌ སུ༌ཞིག༌གི༌ ཕྲུ༌གུ༌ སད༌ན༌ དག༌པོ༌བོའ༌ ཏེན༌ན༌ ཙོགས༌ ཆད༌པ༌ ཕོག༌གོས༌།
EXO 21:32 ཏེན༌ན༌ ལང༌ཏོའེ༌ བུ༌ཚ༌ ཡ༌ བུ༌མོ༌ ཚེ༌ཡོག༌ ཤིག༌ སད༌ན༌, ལང༌ཏོའེ༌ དག༌པོའེ༌ ཚེ༌ཡོག༌གི༌ དག༌པོའ༌ མུལ༌ལི༌ པེ༌ནེ༌ སུམ༌ཅུ༌ ཤལ༌གོས༌ ཡང༌ ལང༌ཏོའ༌ རྡོའ༌ གྱབས༌ཏེ༌ སད༌གོས༌།”
EXO 21:33 “སུ༌ཞིག༌གི༌ ས༌དོང༌ང༌ ཀབ༌ཁན༌བོ༌ ཐེན༌ན༌ ཡ༌ ཁོའེ༌ ས༌དོང༌ བྲུས༌ཏེ༌ ཁའ༌ མ༌ཀབ༌ཁན༌བོའེ༌ ནང༌ང༌ ལང༌ཏོ༌ ཡ༌ བུང༌བུ༌ བུད༌ན༌,
EXO 21:34 ས༌དོང༌ངི༌ དག༌པོའེ༌ སེམས༌ཅན༌བོའེ༌ ཚབས༌ལ༌ ཏེ༌བོའེ༌ དག༌པོའ༌ པེ༌ནེ༌ ཏང༌གོས༌, ཡང༌ སེམས༌ཅན༌ ཤི༌ཁན༌ནི༌ ཤ༌བོ༌ ཁོའེ༌ གྱུར༌ཨིན༌།”
EXO 21:35 “སུ༌ཞིག༌གི༌ ལང༌ཏོའེ༌ ཞན༌ཞིག༌གི༌ ལང༌ཏོ༌ སད༌ན༌, སོན༌ཏེའ༌ ཡོད༌ཁན༌ནི༌ ལང༌ཏོ༌ ཙོངས༌ཏེ༌ དག༌པོ༌ ཉིས༌ཀོའེ༌ པེ༌ནེ༌ དང༌ སེམས༌ཅན༌ ཤི༌ཁན༌ནི༌ ཤ༌ དྲན༌དྲའ༌ བགོ༌གོས༌།
EXO 21:36 ཨིན༌ནའང༌ ལང༌ཏོ༌བོའ༌ རྡུང༌ཅེས༌སི༌ ལོབས༌ ཡོད༌ཏེའང༌ དག༌པོའེ༌ ཏེ༌བོ༌ ལྡམས༌ཏེ༌ མ༌བོར༌ར༌ ཨིན༌ན༌, ལང༌ཏོ༌ ཤི༌ཁན༌ནི༌ དག༌པོའ༌ ཁོའེ༌ ཞན༌ ལང༌ཏོ༌ཞིག༌ ཏང༌གོས༌། ཨིན༌ནའང༌ སེམས༌ཅན༌ ཤི༌ཁན༌ནི༌ ཤའ༌ ཁོའེ༌ གྱུར༌ཨིན༌།”
EXO 22:1 ཡ༌ཝའེ༌ མོ༌ཟེས༌ལ༌ མོལས༌, “ཀལ༌ཏེས༌ སུ༌ཞིག༌གི༌ ལང༌ཏོ༌ ཡ༌ ལུག༌ རྐུས༌ཏེ༌ ཏེ༌བོ༌ ཙོང༌ ཡ༌ སད༌ན༌, ཁོའེ༌ ལང༌ཏོ༌ ཅིག༌གི༌ ཚབས༌ལ༌ ལང༌ཏོ༌ ལྔ༌ ཡང༌ ལུག༌ ཅིག༌གི༌ ཚབས༌ལ༌ ལུག༌ ཞི༌ ཏང༌གོས༌།
EXO 22:2 ཚན༌ལ༌ རྐུན༌མ༌ ཡོང༌ང༌ ཚོར༌ཏེ༌ རྐུན༌མ༌བོའ༌ བེར༌ཀ༌ གྱབས༌ཏེ༌ སད༌ན༌, མི༌ སད༌ཁན༌བོའེ༌ ཕིའ༌ ཁོ༌ ནོངས༌ཅན༌ ཐེ༌མ༌གོས༌།
EXO 22:3 ཨིན༌ནའང༌ ཏེ༌བོ༌ ཉི༌མ༌ ཤར༌ཏེ༌ སྟིང༌ནེ༌ ཇུང༌ན༌ ཏེ༌ནེ༌ མི༌ སད༌ཁན༌བོའེ༌ ཕིའ༌ ཁོ༌ ནོངས༌ཅན༌ ཐེ༌གོས༌། རྐུན༌མ༌ མ༌ཤི༌ན༌ ཁོའེ༌ རྐུ༌ཁན༌ནི༌ ནོར༌ ཚང༌མ༌ ཡ༌ རིན༌ གང༌པོ༌ ལོགས༌ཏེ༌ ཤལ༌གོས༌། ཨིན༌ནའང༌ ཁོའ༌ ནོར༌ ཡ༌ རིན༌ ལོགས༌ཏེ༌ ཤལ༌གྱུ༌ མེད༌ན༌ ཁོའེ༌ ཁོ༌རང༌ ཚེ༌ཡོག༌ག༌ ཙོངས༌ཏེ༌ རིན༌ ཤལ༌གོས༌།
EXO 22:4 ལང༌ཏོ༌ ཡ༌ ལུག༌ ཡ༌ བུང༌བུ༌, རྐུ༌ཁན༌བོ༌ སོན༌ཏེའ༌ ཐོབ༌ན༌, ཁོའེ༌ ཏེ༌བོའེ༌ཀ༌ ནན༌མ༌ ཏེ༌བོའེ༌ ཉི༌ལྡབ༌བོ༌ ལོག༌ཏེ༌ ཤལ༌གོས༌།”
EXO 22:5 “མི༌ཞིག༌གི༌ ཁོ༌རང༌ངི༌ ཞིང༌ངི༌ཀ༌ ཡ༌ རྒུན༌ཚས༌སི༌ ནང༌ང༌ ཙཱ༌ ཟའ༌ལ༌ ཕུད༌ཁན༌ སེམས༌ཅན༌གུན༌ བིང༌ཏེ༌ ཞན༌མའེ༌ སྟོན༌ཐོག༌གུན༌ ཟའ༌ན༌, ཁོའེ༌ ཁོ༌རང༌ངི༌ ཞིང༌ ཡ༌ རྒུན༌ཚས༌སི༌ སྟོན༌ཐོག༌ གྱལ༌ཤོག༌པོ༌ ཏེ༌ མི༌བོའ༌ ཚབས༌ལ༌ ཏང༌གོས༌།”
EXO 22:6 “སུ༌ཞིག༌གི༌ ཁོ༌རང༌ངི༌ ཞིང༌ངི༌ ཙཱ༌ངན༌ མེའ༌ ཏུག༌ ཟ༌ནེ༌ ཏེ༌བོ༌ ཞན༌མའེ༌ ཞིང༌ང༌ ཁྱེབས༌ཏེ༌ ཞིང༌ རྔས༌ཁན༌ ཡ༌ སྐྱེ༌ཨིན༌ ཡོད༌ཁན༌ གུན༌ མེའ༌ ཞེན༌ན༌, མེ༌ གོ༌ཟུག༌ ཅོ༌ཁན༌ནི༌ མི༌བོའེ༌ ཀོད༌ཀ༌ ཆའ༌ཁན༌ནི༌ མི༌བོའ༌ རིན༌ གང༌པོ༌ ཤལ༌གོས༌།”
EXO 22:7 “སུ༌ཞིག༌གི༌ ཁོ༌རང༌ངི༌ ཁྱིམ༌ཚེས༌པའེ༌ཀ༌ པེ༌ནེ༌ ཡ༌ རིན༌ཅན༌ ཅ༌ལག༌ ཅོལ༌ཏེ༌ བོར༌ཁན༌བོའ༌ རྐུན༌མ༌ ཤོར༌ཏེ༌ རྐུན༌མ༌བོ༌ ཐོབ༌ན༌ ཁོའེ༌ ཏེ༌བོའེ༌ ཉི༌ལྡབ༌ ལོགས༌ཏེ༌ ཤལ༌གོས༌།
EXO 22:8 ཨིན༌ནའང༌ རྐུན༌མ༌བོ༌ མ༌ཐོབ༌ན༌ ཁོའེ༌ ཏེ༌ ནོར༌བོ༌ ཁོ༌རང༌ངི༌ ཁྱིམ༌ཚེས༌པ༌བོའེ༌ རྐུས༌ཏོག༌ག༌ མ༌རྐུས༌ཏོག༌ ཐག༌ཅད༌ཅེས༌ལ༌ ཁྲིམ༌སྤོན༌གུན༌ནི༌ དུན༌ལ༌ ཁོའེ༌ ཁྱོང༌གོས༌།
EXO 22:9 ལང༌ཏོ༌, བུང༌བུ༌, ལུག༌, ཀོས༌ལག༌, ཡ༌ ཅི༌ཞིག༌ སྟོར༌ཁན༌བོའེ༌ དག༌པོ༌ ང༌ ཨིན༌ ཟེར༌ཏེ༌ ཛིང༌མོ༌ ཏང༌ཁན༌ནི༌ མི༌གུན༌ ཁྲིམ༌སྤོན༌གུན༌ནི༌ དུན༌ལ༌ ཁྱེར༌གོས༌། གལ༌ཅན༌ ཐེའ༌ ཛད༌ཁན༌བོའེ༌ ཞན༌མ༌བོའ༌ ཉི༌ལྡབ༌ ཤལ༌གོས༌།”
EXO 22:10 “སུ༌ཞིག༌གི༌ ཁོ༌རང༌ངི༌ ཁྱིམ༌ཚེས༌པ༌ བུང༌བུ༌, ལང༌ཏོ༌, ལུག༌ ཡ༌ ཞན༌ཡང༌ སེམས༌ཅན༌ སྟ༌སྟོག༌ ཅོ༌ཅེས༌ལ༌ ཏང༌ཁན༌བོ༌ ཤི༌ན༌ ཡ༌ མ༌སྐྱོན༌ ཆ༌ན༌ ཡ༌ སུའང༌ མ༌ཐོང༌ང༌ རྐུས༌ཏེ༌ ཁྱེར༌ན༌,
EXO 22:11 ཁྱིམ༌ཚེས༌པ༌བོ༌ ཡ༌ཝའེ༌ སྐུན༌དུན༌ལ༌ སོང༌ཏེ༌ ཏེ༌ སེམས༌ཅན༌གུན༌ ཁོའེ༌ མ༌ རྐུས༌པིན༌ ཟེར༌ཏེ༌ ནའ༌ ཁུར༌ཏེ༌ སྟིང༌ནེ༌ དག༌པོའེ༌ ཏེ༌བོའ༌ ཨིད༌ཤེས༌ ཅོ༌གོས༌ ཡང༌ ཁྱིམ༌ཚེས༌པ༌ ཏེ༌བོའེ༌ རིན༌ ཤལ༌ མི༌གོས༌།
EXO 22:12 ཨིན༌ནའང༌ སེམས༌ཅན༌བོ༌ རྐུས༌ཏེ༌ ཨིན༌ན༌, སྟ༌སྟོག༌ ཅོ༌ཅེས༌སི༌ ཁ༌ཆད༌ ཅོ༌ཁན༌བོའེ༌ སེམས༌ཅན༌ནི༌ དག༌པོའ༌ རིན༌ ཤལ༌གོས༌།
EXO 22:13 རིའི༌ སེམས༌ཅན༌ནི༌ སད༌ཏེ༌ ཨིན༌ན༌ སྟ༌སྟོག༌ ཅོ༌ཅེས༌སི༌ ཁ༌ཆད༌ ཅོ༌ཁན༌བོའེ༌ ལུས༌ཁན༌ནི༌ ཤའ༌ སྤང༌པོའེ༌ ཚུལ༌ལ༌ ཁྱོང༌གོས༌ ཡང༌ ཏེ༌བོའེ༌ རིན༌ ཤལ༌ མི༌གོས༌།”
EXO 22:14 “རང༌ངི༌ ཁྱིམ༌ཚེས༌པའེ༌ སེམས༌ཅན༌ སྐྱིས༌ཏེ༌ ཁྱོང༌ཁན༌བོའེ༌ དག༌པོ༌ དུན༌ལ༌ མེད༌ ཟ༌ནེ༌ ཏེ༌བོའ༌ མ༌སྐྱོན༌ ཡ༌ ཤི༌ན༌, ཁོའེ༌ དག༌པོའ༌ ཏེ༌བོའེ༌ རིན༌ གང༌པོ༌ ཤལ༌གོས༌།
EXO 22:15 ཨིན༌ནའང༌ སེམས༌ཅན༌ནི༌ དག༌པོ༌ ཡོད༌ས༌ ཏེ༌ཟུག༌ ཆ༌ན༌ ཁོའ༌ ཏེ༌བོའེ༌ རིན༌ ཤལ༌ མི༌གོས༌། ཏེ༌བོ༌ སྐྱི༌ ཟ༌ནེ༌ ལ༌ ཏང༌ཁན༌བོ༌ ཤི༌ཁན༌ ཡ༌ མ༌སྐྱོན༌ ཆའ༌ཁན༌ནི༌ རིན༌ ཨིན༌ནོག༌།”
EXO 22:16 “ཀལ༌ཏེས༌ མི༌ཞིག༌གི༌ ན༌མ༌ མ༌ཏྲིས༌ཁན༌ནི༌ བུ༌མོ༌ ལག༌པ༌ མ༌ཐུག༌ཁན༌ ཞིག༌ག༌ ལུས༌བྲེལ༌ ཅོ༌ཅེས༌སི༌ དོད༌པ༌ སྐྱེ༌ཅུགས༌ཏེ༌ ལུས༌བྲེལ༌ ཅོ༌ན༌ ཁོའེ༌ ཏེ༌ བུ༌མོ༌བོའ༌ ན༌མའེ༌ རིན༌ཐང༌ ཤལ༌ཏེ༌ ཁོ༌ ཉམ༌པོ༌ ན༌མ༌ ཅོ༌གོས༌།
EXO 22:17 ཨིན༌ནའང༌ བུ༌མོའེ༌ ཨ༌བ༌ ཁོའ༌ བུ༌མོ༌ ཏང༌ཅེས༌ལ༌ མ༌ཐད༌ནའང༌ ཁོའེ༌ ན༌མའེ༌ རིན༌ཐང༌ ལག༌པ༌ མ༌ཐུག༌ཁན༌ནི༌ བུ༌མོ༌ཞིག༌ག༌ ཤལ༌ཁན༌ དྲན༌དྲ༌ ཤལ༌གོས༌།”
EXO 22:18 “ཆོས༌ངན༌ ཅོ༌ཁན༌ནི༌ བུ༌མོ༌གུན༌ སོན༌ཏེའ༌ དུག༌ མི༌ཆོག༌།”
EXO 22:19 “སེམས༌ཅན༌ ཉམ༌པོ༌ ལུས༌བྲེལ༌ བོར༌ཁན༌གུན༌ སད༌གོས༌།”
EXO 22:20 “ཡ༌ཝ༌ མན༌པ༌ ལྷ༌ལྷ༌མོ༌ གུན༌ལ༌ ཆོད༌པ༌ ཕུལ༌ཁན༌གུན༌ སད༌གོས༌།”
EXO 22:21 “ཞན༌ཡུལ༌ལི༌ མི༌གུན༌ལ༌ ངན༌པ༌ ཡ༌ གོབ༌ནོན༌ མ༌ཅོ༌། ཨིད༌ཏུ༌ ཅོས༌, ཁྱོ༌ཞ༌གུན༌ནའང༌ ཨི༌ཇིབ༌བི༌ ནང༌ང༌ ཞན༌ཡུལ༌ལི༌ མི༌ ཨིན༌པིན༌།”
EXO 22:22 “མག༌པ༌ ཤི༌ཁན༌ནི༌ བུ༌མོ༌ ཡ༌ ཕ༌མ༌ མེད༌ཁན༌ནི༌ ཕྲུ༌གུ༌ གུན༌ལ༌ ངན༌པ༌ མ༌ཅོ༌།
EXO 22:23 ཀལ༌ཏེས༌ ངན༌པ༌ ཅོས༌ཏེ༌ ཁོང༌གུན༌ནི༌ རོགས༌སི༌ ཕིའ༌ ངའ༌ ཞུ༌ན༌ ངའེ༌ ཏན༌ཏན༌ ཁོང༌གུན༌ནི༌ མོས༌ལམ༌གུན༌ ཉན༌ཨིན༌,
EXO 22:24 ཡང༌ ངའེ༌ སྲོ༌ མེ༌ ཙོགས༌ལ༌ བར༌ཏེ༌ ཁྱོ༌ཞ༌གུན༌ ར༌འི༌ ཉམ༌པོ༌ སད༌ ཅུག༌ཨིན༌། ཏེ༌ནེ༌ ཁྱོ༌ཞ༌གུན༌ནི༌ ན༌མ༌ མག༌པ༌ མེད༌ཁན༌ ཡང༌ ཕྲུ༌གུ༌ གུན༌ ཨ༌བ༌ མེད༌ཁན༌ གྱུར༌ཨིན༌།”
EXO 22:25 “ཀལ༌ཏེས༌ ཁྱོ༌ཞ༌གུན༌ནི༌ སྒོས༌དོམ༌ ཡོད༌ཁན༌ནི༌ ངའེ༌ མི༌གུན༌ལ༌ པེ༌ནེ༌ སྐྱིས༌ཏེ༌ ཏང༌ན༌, པེ༌ནེ༌ སྐྱིས༌ཏེ༌ ཏང༌ཁན༌གུན༌ ཙོགས༌ལ༌ ཁོང༌གུན༌ནི༌ ཀ༌ནེ༌ ཕར༌ མ༌ལེན༌།
EXO 22:26 ཀལ༌ཏེས༌ ཁྱོ༌ཞའེ༌ ཁོང༌གུན༌ནི༌ ཀོས༌པོ༌ དམ༌ཆའེ༌ ཚུལ༌ལ༌ ཁྱེར༌ན༌ ཉི༌མ༌ སྐྱོད༌དི༌ སང༌ སྔུན༌ལ༌ ཏེ༌བོ༌ ཁོང༌གུན༌ལ༌ ལོགས༌ཏེ༌ ཏང༌གོས༌,
EXO 22:27 ཅིའ༌ཟེར༌ན༌ ཟུགས༌པོ༌ ཀབ༌ཅེས༌ལ༌ ཁོའ༌ ཏེན༌ན༌ ཀོས༌པོ༌ མ༌ནེ༌ མེད༌ཏེ༌ ཨིན༌ནོག༌། ཏེ༌ནེ༌ ཉིད༌ཏང༌ ཟ༌ནེ༌ ཁོ༌ ཅི༌ གོན༌ཨིན༌? ཀལ༌ཏེས༌ ཁོའ༌ ནགས༌ ཐོང༌ཏེ༌ ངའ༌ བོད༌ན༌ ངའེ༌ ཁོའེ༌ མོས༌ལམ༌ ཉན༌ཨིན༌, ང༌ ནི༌ སྙིང༌རྗེ༌ཅན༌ ཨིན༌།”
EXO 22:28 “ཁྱོ༌ཞའེ༌ དཀོན༌མཆོག༌ག༌ དད༌ལོག༌ མ༌ཅོ༌ ཡ༌ རང༌ངི༌ མི༌གུན༌ནི༌ སྤོན༌བོའ༌ རྔན༌ མ༌ཏབ༌།”
EXO 22:29 “ཁྱོ༌རང༌གུན༌ནི༌ གྲུ༌ནས༌, ཆང༌ དང༌ ཨོ༌ལིཝ༌ཝི༌ མར༌ནག༌ གུན༌ནི༌ ཆོད༌པ༌ ཕུལ༌གོ༌ཤེས༌སི༌ ཏུས༌པོའེ༌ཀ༌ ངའ༌ ཕུལ༌།” “ཁྱོ༌ཞ༌གུན༌ནི༌ གོ༌སྐྱེས༌ བུ༌ཚ༌གུན༌ ངའ༌ ཏོང༌།
EXO 22:30 ཏེན༌ན༌ ཙོགས༌ ཁྱོ༌ཞའེ༌ བ༌ལང༌ དང༌ ལུག༌ གུན༌ནི༌ གོ༌སྐྱེས༌ ཉམ༌པོ༌ ཅོས༌། ཏེ༌གུན༌ ཁོ༌རང༌ངི༌ ཨ༌མ༌ ཉམ༌པོ༌ ཞག༌མ༌ རྡུན༌ དུག༌ཅུག༌ ཨིན༌ནའང༌ ཞག༌མ༌ རྒྱད༌པའེ༌ ཞག༌ག༌ ཏེ༌བོ༌ ངའ༌ ཆོད༌པ༌ ཕུལ༌།
EXO 22:31 ཁྱོ༌ཞའ༌ ངའེ༌ མི༌ ཏམ༌པ༌གུན༌ ཨིན༌ པ༌སང༌ རིའི༌ སེམས༌ཅན༌ནི༌ སད༌ཁན༌ནི༌ ཤ༌ ཁྱོ༌ཞ༌གུན༌ནི༌ ཟའ༌ མ༌གོས༌, ཏེ༌བོ༌ ཁྱི༌གུན༌ལ༌ ཟའ༌ ཏོང༌།”
EXO 23:1 ཡ༌ཝའེ༌ མོ༌ཟེས༌ལ༌ མོལས༌, “ཟུན༌ཇན༌ སྤེ༌ར༌གུན༌ ཁྱེབས༌ མ༌ཅུག༌ ཡང༌ ངན༌པ༌ མིའ༌ རོགས༌ ཅོས༌ཏེ༌ ཟུས༌མའེ༌ སྤང༌པོ༌ མ༌ཏང༌།
EXO 23:2 ངན༌པ༌ ཅོ༌ཁན༌ནི༌ མི༌ཚོགས༌སི༌ སྟིང༌རང༌ནེ༌ མ༌ཆ༌། ཁྲིམས༌ཁུང༌ང༌ སྤང༌པོ༌ ཏང༌ ཟ༌ནེ༌ མི༌ཚོགས༌ ཉམ༌པོ༌ ཁའ༌ཆམས༌ཏེ༌ ཁྲིམ༌སྤོན༌ལ༌ འོས༌པ༌ མན༌ཁན༌ནི༌ ཐག༌ཅད༌ ཏང༌ མ༌ཅུག༌།
EXO 23:3 ཁྲིམས༌ཁུང༌ངི༌ ནང༌ང༌ ཉལ༌བ༌ཅན༌ ཞིག༌གི༌ ཤགས༌སི༌ ཐག༌ཅད༌ ཏང༌ ཟ༌ནེ༌ ཉལ༌བ༌ཅན༌ ཨིན༌ཅེས༌པོའེ༌ ཁོའ༌ ཆོགས༌ མ༌ཅོ༌།”
EXO 23:4 “ཀལ༌ཏེས༌ ཁྱོ༌ཞའེ༌ གྲ༌འོའེ༌ ལང༌ཏོ༌ ཡ༌ བུང༌བུ༌ གྲོལ༌ཏེ༌ ཁོར༌ཨིན༌ ཐོང༌ན༌ ཏེ༌བོ༌ ལོགས༌ཏེ༌ ཁོའེ༌ ཁང༌པ༌ ཁྱེར༌གོས༌།
EXO 23:5 ཀལ༌ཏེས༌ ཁྱོ༌ཞའ༌ ནཕ༌རད༌ ཅོ༌ཁན༌བོའེ༌ བུང༌བུ༌ རྒལ༌ལི༌ ནན༌ཏེ༌ གྱེལ༌ཏེ༌ ཐོང༌ན༌ ཏེ༌བོའ༌ སྣང༌མེད༌ མ༌ཅོའ༌, བུང༌བུ༌ ལང༌ཅེས༌ལ༌ ཁོའ༌ རོགས༌ ཅོ༌གོས༌།”
EXO 23:6 “ཁྲིམས༌ཁུང༌ངི༌ ནང༌ང༌ ཉལ༌བ༌ཅན༌ནི༌ ཤགས༌པོའ༌ འོས༌པའེ༌ ཐག༌ཅད༌ ཐོབ༌ཅེས༌ ཏན༌ཏན༌ ཅོ༌གོས༌།
EXO 23:7 ཟུས༌མ༌ སྐྱོན༌ མ༌ནེ༌ མི༌ཀལ༌ཅེས༌ ཏན༌ཏན༌ ཅོས༌, ཡང༌ ནོངས༌མེད༌ ཡ༌ ཀྲང༌པོ༌ མི༌ཞིག༌ག༌ ཤི༌ཅེས༌སི༌ ཁྲིམས༌ཅད༌ མ༌ཏང༌། ཏེ༌ཙོགས༌ ངན༌པ༌ ཅོ༌ཁན༌བོའ༌ ངའེ༌ ཤགས༌པ༌ མི༌ཏང༌།”
EXO 23:8 “ཕག༌སུབ༌ མ༌ལེན༌, ཅིའ༌ཟེར༌ན༌ ཏེ༌བོའེ༌ ཁྱོ༌རང༌ང༌ ཐོང༌ཁན༌བོ༌ སྣང༌མེད༌ ཅོ༌ཅུགས༌ཏེ༌ ཀྲང༌པོ༌ སྤང༌པོ༌ ཏང༌ཅེས༌པོའེ༌ ནང༌ང༌ གྱུར༌ཇ༌ ཁྱོང༌ ཅུག༌ག༌ནོག༌།”
EXO 23:9 “ཞན༌ཡུལ༌ལི༌ མི༌གུན༌ལ༌ གོབ༌ནོན༌ མ༌ཏང༌, ཏེ༌ཟུག༌ ཅོ༌ན༌ ཀ༌ཟུག༌ཤིག༌ ཡོང༌ཅེན༌ ཁྱོ༌ཞ༌གུན༌ལ༌ གྱུས༌ ཨིན༌ནོག༌ ཅིའ༌ཟེར༌ན༌ ཨི༌ཇིབ༌པ༌གུན༌ནི༌ ཁྱོ༌ཞའ༌ ཏེ༌ཙོགས༌ ཅོས༌ཏེ༌ ཨིན༌པིན༌།”
EXO 23:10 “ལོ༌ དྲུག༌ ཁྱོ༌ཞ༌གུན༌ནི༌ ས༌ཀྱད༌གུན༌ བད༌ཏེ༌ སྟོན༌ཐོག༌ ལྡུམ༌,
EXO 23:11 ཨིན༌ནའང༌ ལོ༌ རྡུན༌པའེ༌ ནང༌ང༌ ཏེ༌གུན༌ མ༌བད༌ད༌ བོར༌ ཏེ༌ནེ༌ ཏེ༌ཀ༌ སྐྱེས༌ཁན༌གུན༌ ཉལ༌བ༌ཅན༌གུན༌ནི༌ ཟའ༌ལ༌ ཁྱེར༌ཏེ༌ ལག༌ལུས༌པོ༌ རིའི༌ སེམས༌ཅན༌གུན༌ནི༌ ཟའ༌ཉན༌ཨིན༌། ཏེན༌ན༌ ཙོགས༌ ཁྱོ༌ཞ༌གུན༌ནི༌ རྒུན༌ཚས༌ དང༌ ཨོ༌ལིཝ༌ཝི༌ ལྕང༌མ༌གུན༌ ཉམ༌པོའང༌ ཅོས༌།”
EXO 23:12 “རྡུན༌ཞག༌གི༌ ཞག༌མ༌ དྲུག༌པོ༌ ལས༌ ཅོས༌ ཨིན༌ནའང༌ ཞག༌མ༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོ༌ གོས༌། ཏེ༌ནེ༌ ཁྱོ༌ཞའེ༌ ཚེ༌ཡོག༌གུན༌, ལས༌ལ༌ ཀོལ༌ཁན༌ནི༌ སེམས༌ཅན༌གུན༌ དང༌ ཞན༌ཡུལ༌ལི༌ མི༌གུན༌ ངལ༌ཚོས༌ཏེ༌ སྟོབས༌གུན༌ སོ༌ ཐུབ༌ཨིན༌།”
EXO 23:13 “ང༌ ཡ༌ཝའེ༌ ཁྱོ༌ཞ༌གུན༌ལ༌ ཟེར༌ཁན༌ ཚང༌མ༌ ཅོས༌། ལྷ༌ལྷ༌མོ༌ གུན༌ལ༌ མོས༌ལམ༌ མ༌ཞུ༌, ཏེ༌གུན༌ནི༌ མིང༌ངའང༌ མ༌ཁུར༌།”
EXO 23:14 “ལོ༌ ཅིག༌གི༌ ནང༌ང༌ ངའ༌ རྩི༌ཝ༌ ཅོ༌ཅེས༌ལ༌ ཏུས༌ཆེན༌ སུམ༌ རྩིས༌།
EXO 23:15 ཏང༌པོ༌, ངའེ༌ བཀའ༌ ཏང༌ཁན༌ ནང༌ཞིན༌ ཁྱོ༌ཞ༌གུན༌ ཨི༌ཇིབ༌ནེ༌ བིང༌ཏེ༌ ཡོང༌ཁན༌ནི༌ ཨ༌བིབ༌བི༌ ཟླ༌ཝའེ༌ ནང༌ང༌ ལྡམས༌ཁན༌ནི༌ ཏུས༌པོའེ༌ཀ༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ རྩིས༌། འི༌ ཏུས༌ ཞག༌ རྡུན༌ སྐྱུར༌ མེད༌ཁན༌ནི༌ ཏ༌གི༌ ཟོ༌།” “ལག༌པ༌ སྟོང༌པ༌ སུ༌ཞིག༌གའང༌ ངའེ༌ དུན༌ལ༌ མ༌ཡོང༌།”
EXO 23:16 “ཉིས༌པ༌; སྟོན༌ཐོག༌ རྔ༌ཅེས༌སི༌ ཏུས༌ཆེན༌ རྩིས༌, ཏེ༌ཏུས༌ ཁྱོ༌ཞ༌གུན༌ནི༌ གོ༌མའེ༌ སྟོན༌ཐོག༌ རྔ༌ཁན༌ནི༌ ཁག༌ཤིག༌ ངའ༌ ཕུལ༌གོས༌།” “སུམ༌པ༌; ལོའེ༌ སྟིང༌ཇུག༌གི༌ སྟོན༌ཐོག༌ ཚང༌མ༌ ནང༌ང༌ ལྡུམས༌ཏེ༌ ཁྱོང༌ཅེས༌སི༌ ཏུས༌ཆེན༌ རྩིས༌, ཀ༌བོའེ༌ ནང༌ང༌ རྒུན༌ དང༌ ཞན༌ ཤིང༌ཏོག༌ གུན༌ནའང༌ ཐེས༌ཏེ༌ ཨིན༌།”
EXO 23:17 “ལོའེ༌ ནང༌ང༌ ལན༌ སུམ༌ ཁྱོ༌ཞའེ༌ བུ༌ཚ༌ ཚང༌མ༌ ཡ༌ཝ༌ དཀོན༌མཆོག༌གི༌ དུན༌ལ༌ ཁོང༌ང༌ ཅོལ༌ཅེས༌ལ༌ ཛོམ༌གོས༌།”
EXO 23:18 “ངའ༌ སེམས༌ཅན༌ སྲོག༌ཆོད༌ལ༌ ཕུལ༌ ཟ༌ནེ༌ ཏེ༌བོ༌ ཉམ༌པོ༌ སྐྱུར༌ཅན༌ནི༌ ཏ༌གི༌ མ༌ཕུལ༌། སེམས༌ཅན༌ནི༌ ཚིལ༌ ཆོད༌པ༌ ཕུལ༌ཁན༌གུན༌ སྟིང༌མ༌ཞག༌གི༌ ང༌མོ༌ ཚོག༌པ༌ བོར༌ མ༌གོས༌།”
EXO 23:19 “ཁྱོ༌ཞའེ༌ ཏབ༌ཁན༌ནི༌ སྟོན༌ཐོག༌གི༌ གོ༌མའེ༌ བྲས༌བུ༌ གྱལ༌ཤོག༌པོ༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཆོད༌ཁང༌ང༌ ཁྱོང༌།” “རི༌གུའི༌ ཤ༌ ཏེ༌བོའེ༌ ཨ༌མའེ༌ འོ༌མའེ༌ ནང༌ང༌ མ༌ སྐོལ༌།”
EXO 23:20 “ངའེ༌ ཁྱོ༌ཞ༌གུན༌ནི༌ སྔུན༌སྔུན༌ལ༌ ཕོ༌ཉ༌ ཀལ༌ཨིན༌, ཁོའེ༌ བེས༌སི༌ ནང༌ང༌ ཁྱོ༌ཞ༌གུན༌ སྐྱོབས༌ཏེ༌ ངའེ༌ གྲལ༌གྲིག༌ ཅོ༌ཁན༌ནི༌ ནས༌སའེ༌ ནང༌ང༌ ཁྱེར༌ཨིན༌།
EXO 23:21 ནང༌སྟག༌ ཏངས༌ཏེ༌ ཁོའེ༌ ཁའ༌ཉོན༌། ཁོའེ༌ གྱབ༌གལ༌ལ༌ ངོ༌ལོག༌ མ༌ཅོ༌ ཅིའ༌ཟེར༌ན༌ ཁོ༌ ངའེ༌ ཚབས༌ ཨིན༌ ཡང༌ ཁོའེ༌ ཁྱོ༌ཞའེ༌ ངོ༌ལོག༌ ཅོ༌ཁན༌གུན༌ལ༌ ཤགས༌པ༌ མི༌ཏང༌།
EXO 23:22 ཀལ༌ཏེས༌ ཁྱོ༌ཞ༌གུན༌ནི༌ ཁོའེ༌ ཁའ༌ཉན༌ཏེ༌ ངའེ༌ བཀའ༌ ཏང༌ཁན༌ ཚང༌མ༌ ཅོ༌ན༌, ངའ༌ ཁྱོ༌ཞའེ༌ གྲ༌འོ༌གུན༌ནི༌ གྲ༌འོ༌ ཡང༌ ཁྱོ༌ཞའ༌ གྱབ༌གལ༌ ཅོ༌ཁན༌གུན༌ལ༌ ངའེ༌ གྱབ༌གལ༌ ཅོ༌ཨིན༌།
EXO 23:23 ངའེ༌ ཕོ༌ཉ༌ ཁྱོ༌ཞ༌གུན༌ནི༌ སྔུན༌སྔུན༌ལ༌ ཆེན༌ ཡང༌ ཁྱོ༌ཞ༌གུན༌ ཨ༌མོར༌པ༌, ཧེད༌པ༌, པེ༌རིཟ༌པ༌, ཀེ༌ནན༌པ༌, ཧིཝ༌པ༌, ཡང༌ ཡེ༌བས༌པ༌ གུན༌ནི༌ ས༌ཆའེ༌ ནང༌ང༌ ཁྱེར༌ཨིན༌ ཡང༌ ངའེ༌ ཁོང༌གུན༌ མེད༌ཁན༌ ཅོ༌ཨིན༌།
EXO 23:24 ཁོང༌ངི༌ སྐུན༌དྲ༌གུན༌ནི༌ དུན༌ལ༌ གོ༌ མ༌སྒུ༌ ཡ༌ ཏེ༌གུན༌ལ༌ ཅོལ༌ མ༌ཅོལ༌ ཡང༌ ཁོང༌གུན༌ནི༌ ཆོས༌ ཅོ༌ ཚུལ༌གུན༌ ལེན༌ མ༌ལེན༌། ཁོང༌གུན༌ནི༌ སྐུན༌དྲ༌གུན༌ ཁྲེས༌ཏོར༌ ཅོ༌གོས༌ ཡང༌ ཁོང༌གུན༌ནི༌ རྡོའེ༌ ཀ༌ཝ༌ ཏམ༌པ༌ ཐེ༌ཁན༌གུན༌ ཏུམ༌པ༌ ཏུམ༌པའེ༌ ནང༌ང༌ ཅོག༌།
EXO 23:25 ང༌ ཡ༌ཝ༌ ཁྱོ༌ཞའེ༌ དཀོན༌མཆོག༌ག༌ ཅོལ༌ ཡང༌ ངའེ༌ ཁྱོ༌ཞའེ༌ ཟའ༌ཅེས༌ དང༌ ཐུང༌ཅེས༌ གུན༌ནི༌ཀ༌ ཅིན༌ལབས༌ ཏང༌ཨིན༌ ཡང༌ ཁྱོ༌ཞ༌གུན༌ལ༌ ཟུ༌མོ༌ ཡོང༌ མི༌ཅུག༌།
EXO 23:26 ཁྱོ༌ཞའེ༌ ཡུལ༌ལ༌ བུ༌མོ༌ སུ༌ཞིག༌གིའང༌ ཕྲུ༌གུ༌ མི༌ཞིག༌ ཡ༌ ཕྲུ༌གུ༌ མ༌ཇོར༌ར༌ མི༌ལུས༌། ངའེ༌ ཁྱོ༌ཞ༌གུན༌ལ༌ མི༌ཚེ༌ རིང༌མོ༌ ཏང༌ཨིན༌།”
EXO 23:27 “ངའེ༌ ཁྱོ༌ཞའེ༌ སྔུན༌ལ༌ ཇིགས༌ནང༌ ཀལ༌ཏེ༌ ཁྱོ༌ཞ༌གུན༌ནི༌ གྱབ༌གལ༌ལ༌ ནོལ༌ཁན༌ནི༌ མི༌གུན༌ནི༌ ནང༌ང༌ ཐེ༌ཚོམས༌ སྐྱེ༌ཅུག༌ཨིན༌ ཡང༌ ངའེ༌ ཁྱོ༌ཞའེ༌ གྲ༌འོ༌གུན༌ ལོགས༌ཏེ༌ ཤོར༌ ཅུག༌ཨིན༌།
EXO 23:28 ངའེ༌ ཁྱོ༌ཞ༌གུན༌ནི༌ གྲ༌འོ༌ ཧིཝ༌པ༌, ཀེ༌ནན༌པ༌, ཧེད༌པ༌ གུན༌ལ༌ ཇིགས༌ནང༌ སྲན༌ཏྲེ༌ སྟན༌ཏེ༌ ཁྱོ༌ཞའེ༌ དུན༌ལ༌ ཁོང༌གུན༌ ཏེ༌ ས༌ཆའེ༌ ནང༌ནེ༌ ཕིང༌ཨིན༌།
EXO 23:29 ངའེ༌ ཁོང༌ ཚང༌མ༌ ལོ༌ ཅིག༌གི༌ ནང༌ང༌ ཕིངས༌ཏེ༌ མི༌ཏང༌, ཀལ༌ཏེས༌ ཏང༌ན༌ ས༌ཆ༌བོ༌ ཐང༌སྟོང༌ གྱུར༌ཏེ༌ རིའི༌ སེམས༌ཅན༌ མང༌པོ༌ ཕེལ༌ཏེ༌ ཁྱོ༌ཞའ༌ ཇིགས༌ནང༌ ཆེན༌།
EXO 23:30 ཁྱོ༌ཞ༌གུན༌ ཕེལ༌ཏེ༌ འི༌ ས༌ཆ༌ ཁྱོ༌ཞའེ༌ གྱུར༌གྱུར༌ ཚག༌པ༌ ངའེ༌ ཁོང༌གུན༌ ཉུ༌ངུན༌ ཉུ༌ངུན༌ ཅོས༌ཏེ༌ ཕིང༌ཨིན༌།”
EXO 23:31 “ངའེ༌ ཁྱོ༌ཞའེ༌ སན༌ཚམས༌གུན༌ ཚོ༌ མར༌པོ༌ནེ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཡང༌ རི༌སྟོང༌ནེ༌ ཡུཕ༌རེ༌ཀྲས༌སི༌ ལྩངས༌པོ༌ ཚོག༌པ༌ ཕེལ༌ ཅུག༌ཨིན༌། ངའེ༌ ཁྱོ༌ཞའེ༌ ལག༌ག༌ ཏེ༌ ས༌ཆའེ༌ ནང༌ང༌ ནས༌ཁན༌ནི༌ མི༌གུན༌ ཏང༌ཨིན༌ ཡང༌ ཁྱོ༌ཞའ༌ ཏེ༌ ནས༌སའེ༌ ནང༌ང༌ ཡོང༌ ཟ༌ནེ༌ ཁྱོ༌ཞའེ༌ ཁོང༌གུན༌ ཕིངས༌ཏེ༌ ཏང༌ཨིན༌།
EXO 23:32 ཁྱོ༌ཞའེ༌ ཁོང༌གུན༌ ཡ༌ ཁོང༌གུན༌ནི༌ ལྷ༌ལྷ༌མོ༌ གུན༌ ཉམ༌པོ༌ ཆད༌དོན༌ ཅོ༌ མ༌གོས༌།
EXO 23:33 ཁོང༌གུན༌ ཁྱོ༌ཞའེ༌ ཡུལ༌ལི༌ ནང༌ང༌ དུག༌ མ༌ཅུག༌, ཀལ༌ཏེས༌ དུག༌ཅུག༌ན༌ ཁོང༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ཅེས༌སི༌ ནང༌ང༌ ཁྱོ༌ཞའ༌ ཁད༌ཅུགས༌ཏེ༌ ངའེ༌ གྱབ༌གལ༌ལ༌ སྡིག༌པ༌ ཅོ༌ཅུག༌ཨིན༌།”
EXO 24:1 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌, ཨ༌རོན༌, ན༌དབ༌, ཨ༌བི༌ཧུ༌ དང༌ ཨིས༌ར༌ཨེལ༌ལི༌ སྤོན༌བོ༌ རྡུན༌ཅུ༌ ང༌ ཡོད༌ས༌ རིའི༌ཀ༌ ཀེན༌ལ༌ ཡོང༌། ཁྱོ༌ཞ༌གུན༌ ཐག༌རིང༌ང༌ དུགས༌ཏེ༌ ངའ༌ ཅོལ༌གོས༌།
EXO 24:2 མོ༌ཟེས༌ ཁྱོ༌རང༌ ཅིག༌པོ༌ ང༌ ཡ༌ཝའེ༌ ཉེ༌མོའ༌ ཡོང༌ནའང༌ གྲིག༌ ཨིན༌ནའང༌ ཞན༌གུན༌ ངའེ༌ ཉེ༌མོའ༌ ཡོང༌ མ༌གོས༌། རི༌ ཡོག༌ག༌ ཡོད༌ཁན༌ ཞན༌ མི༌གུན༌ རིའི༌ཀ༌ ཀེན༌ལ༌ ཡོང༌ མི༌ཆོགས༌།”
EXO 24:3 མོ༌ཟེས༌ ཐུར༌ལ༌ ཡོངས༌ཏེ༌ མི༌གུན༌ལ༌ ཡ༌ཝའེ༌ མོལ༌ཁན༌ ཚང༌མ༌ དང༌ ཁྲིམས༌གུན༌ ཤདས༌། ཏེ༌ནེ༌ མི༌ ཚང༌མའེ༌ སྐད༌ ཅིག༌གི༌ ནང༌ང༌ ལན༌ཏངས༌, “ང༌ཞའེ༌ ཡ༌ཝའེ༌ མོལ༌ཁན༌ ཚང༌མ༌ ཅོ༌ཨིན༌།”
EXO 24:4 མོ༌ཟེས༌སི༌ ཡ༌ཝའེ༌ མོལ༌ཁན༌ ཚང༌མ༌ བྲིས༌། ཐོ༌རེ༌ཟུག༌པོ༌ ང༌མོ༌ནེ༌ ཁོའེ༌ རིའི༌ དུན༌ལ༌ ཆོད༌ཁྲི༌ཞིག༌ རྩིགས༌ ཡང༌ ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌སི༌ ཕིའ༌ རྡོའ༌ རྕུག༌ཉིས༌ ཀ༌ཝ༌ ཙོགས༌ལ༌ ལངས༌།
EXO 24:5 ཏེ༌ནེ༌ ཁོའེ༌ ཞུ༌ནུ༌ ཁ༌ཅིག༌ ལྡམས༌ ཡང༌ ཁོང༌གུན༌ནི༌ མེའ༌ སྲག༌ཁན༌ནི༌ ཆོད༌པ༌ དང༌ ཞི༌དེ༌ ཐུན༌བྲེལ༌ལི༌ ཕིའ༌ ལོ༌ ཆུ༌ངུན༌ ལང༌ཏོ༌གུན༌ ཡ༌ཝའ༌ ཆོད༌པ༌ ཕུལས༌།
EXO 24:6 མོ༌ཟེས༌སི༌ སེམས༌ཅན༌ནི༌ ཁྲག༌ ཕེད༌པོ༌ ནོད༌དི༌ ནང༌ང༌ བོརས༌ ཡང༌ ཕེད༌པོ༌ ཆོད༌ཁྲི༌ཀ༌ ཡོགས༌།
EXO 24:7 ཏེ༌ནེ༌ ཁོའེ༌ ཆད༌དོན༌ནི༌ སྤེ༌ཆ༌ ཁུར༌ཏེ༌ མི༌གུན༌ནི༌ དུན༌ལ༌ སིལས༌། ཁོང༌གུན༌ནི༌ ཟེརས༌, “ང༌ཞ༌གུན༌ནི༌ ཡ༌ཝའེ༌ ཁའ༌ ཉན༌ཏེ༌ ཁོང༌ངི༌ མོལ༌ཁན༌ ཚང༌མ༌ ཅོ༌ཨིན༌།”
EXO 24:8 ཏེ༌ནེ༌ མོ༌ཟེས༌སི༌ ནོད༌དི༌ ནང༌ང༌ ཡོད༌ཁན༌ནི༌ ཁྲག༌པོ༌ ཁུར༌ཏེ༌ མི༌གུན༌ནི༌ཀ༌ ཐོར༌མ༌ ཏངས༌ ཡང༌ ཟེརས༌, “འི༌ ཁྲག༌པོ༌, ཆད༌དོན༌ སྟན༌པོ༌ ཅོ༌ཁན༌ནི༌ ཐེ༌ཙེ༌ ཨིན༌ ཀ༌བོ༌ ཡ༌ཝའེ༌ འི༌ ལབ༌ཞ༌གུན༌ སལ༌ཏེ༌ ཁྱོ༌ཞ༌གུན༌ ཉམ༌པོ༌ ཅོའ༌ ཛད༌ཏེ༌ ཨིན༌།”
EXO 24:9 མོ༌ཟེས༌, ཨ༌རོན༌, ན༌དབ༌, ཨ༌བི༌ཧུ༌ དང༌ ཨིས༌ར༌ཨེལ༌ལི༌ སྤོན༌བོ༌ རྡུན༌ཅུ༌ ཀེན༌ལ༌ རིའི༌ཀ༌ སོང༌
EXO 24:10 ཡང༌ ཁོང༌གུན༌ནི༌ ཨིས༌ར༌ཨེལ༌པའེ༌ དཀོན༌མཆོག༌ ཇལ༌། ཁོང༌ངི༌ ཞབས༌སི༌ ཡོག༌ག༌ རིན༌ཅན༌ རྡོའ༌ སྔོན༌པོ༌ ནི༌ལིམ༌ ཏིང༌ཁན༌ ཙོགས༌ ཀ༌བོ༌ ནམ༌ ཙོགས༌ སལ༌པོ༌ དུག༌པིན༌།
EXO 24:11 ཨིས༌ར༌ཨེལ༌ལི༌ སྤོན༌བོ༌གུན༌ནི༌ དཀོན༌མཆོག༌ ཇལ༌ ཨིན༌ནའང༌ ཁོང༌ངི༌ ཁོང༌གུན༌ལ༌ ནོད༌པ༌ སྐྱལ༌ལ༌ མ༌ཛདས༌ ཡང༌ ཁོང༌གུན༌ ཟེན༌, ཐུང༌ཨིན༌ ཡོད༌ ཟ༌ནེ༌ ཁོང༌ ཁོང༌གུན༌ ཉམ༌པོ༌ ཞུགས༌ཏེ༌ ཡོད༌པིན༌།
EXO 24:12 ཡ༌ཝའེ༌ མོ༌ཟེས༌ལ༌ མོལས༌, “ང༌ ཡོད༌ས༌ རིའི༌ཀ༌ ཀེན༌ལ༌ ཡོངས༌ཏེ༌ ཏེ༌ཀ༌ དུག༌, ངའེ༌ ཁྱོ༌རང༌ང༌ རྡོའ༌ ལེབ༌ལེབ༌ ཉིས༌སི༌ཀ༌ མི༌གུན༌ལ༌ ལབ༌ཞ༌ ཏང༌ཁན༌ནི༌ བཀའ༌ དང༌ ཁྲིམས༌གུན༌ བྲིས༌ཏེ༌ ཏང༌ཨིན༌།”
EXO 24:13 མོ༌ཟེས༌སི༌ ཁོའ༌ རོགས༌ཅོ༌ཁན༌ ཡོ༌ཤུའ༌ ཁྲིད༌ཏེ༌ ཀེན༌ལ༌ དཀོན༌མཆོག༌གི༌ རི༌ཀ༌ སོང༌།
EXO 24:14 མོ༌ཟེས༌སི༌ སྤོན༌བོ༌གུན༌ལ༌ ཟེརས༌, “ང༌ཞའ༌ ལོགས༌ཏེ༌ ཡོང༌ཡོང༌ ཚོག༌པ༌ ཁྱོ༌ཞ༌གུན༌ འི༌ཀ༌ སྲུངས༌ཏེ༌ དུག༌། ཨ༌རོན༌ དང༌ ཧུར༌ ཁྱོ༌ཞའ༌ ཉམ༌པོ༌ ཨིན༌ནོག༌ ཡང༌ ཛིང༌མོ༌ ཆ༌ན༌ ཁོང༌ ཉིས༌ཀོའ༌ ཐག༌ཅད༌ ཏང༌ཅུག༌།”
EXO 24:15 མོ༌ཟེས༌ ཀེན༌ལ༌ རི༌ཀ༌ སོང༌ ཡང༌ རི༌བོ༌ སྲིན༌ནི༌ ཀབས༌,
EXO 24:16 ཡང༌ ཡ༌ཝའེ༌ ཟིར༌རྗིད༌ སི༌ནཱའི༌ རི༌ཀ༌ བབས༌ས༌ ཛད༌ཏེ༌ ཞག༌ དྲུག༌ ཏེ༌བོ༌ སྲིན༌ནི༌ ཀབས༌ཏེ༌ ལུས༌ ཡང༌ ཞག༌ རྡུན༌པའེ༌ ཞག༌ག༌ སྲིན༌ནི༌ ནང༌ནེ༌ ཡ༌ཝའེ༌ མོ༌ཟེས༌ལ༌ བོད༌ད༌ ཛདས༌།
EXO 24:17 ཨིས༌ར༌ཨེལ༌པ༌གུན༌ལ༌ ཡ༌ཝའེ༌ ཟིར༌རྗིད༌པོ༌ རི༌གོའ༌ མེ༌ ཞེན༌ཁན༌ ཙོགས༌ ཐོང༌ངད༌པིན༌།
EXO 24:18 མོ༌ཟེས༌ ཀེན༌ལ༌ རི༌ཀ༌ སྲིན༌ནི༌ ནང༌ང༌ སོང༌ ཡང༌ ཏེ༌རུ༌ ཁོ༌ ཉི༌མ༌ ཞིབ༌ཅུ༌ དང༌ ཚན༌ ཞིབ༌ཅུ༌ དུགས༌།
EXO 25:1 ཡ༌ཝའེ༌ མོ༌ཟེས༌ལ༌ མོལས༌,
EXO 25:2 “ཨིས༌ར༌ཨེལ༌པ༌གུན༌ལ༌ ‘ངའ༌ ཆོད༌པ༌ ཕུལ༌ཅེས༌ ཁྱོང༌’ ཟེར༌། ཐད༌པོ༌ ཉམ༌པོ༌ ཆོད༌པ༌ ཕུལ༌ཅེས༌ལ༌ ཁྱོང༌ཁན༌ ཚང༌མ༌ ལེན༌།
EXO 25:3 མི༌གུན༌ནི༌ ཀ༌ནེ༌ འི༌ ཆོད༌པ༌གུན༌ ལེན༌: སེར༌, མུལ༌ དང༌ ར༌གན༌,
EXO 25:4 སྔོན༌པོ༌, སྔོ༌མར༌ ཡང༌ མར༌པོ༌ ནས༌མ༌ ཡང༌ གྱལ༌ལ༌ ཀུས༌པོ༌ རས༌ དང༌ ར༌མའེ༌ བལ༌,
EXO 25:5 རང༌ མར༌པོ༌ ཏང༌ཁན༌ནི༌ ལུག༌ཕོའེ༌ པགས༌པ༌ དང༌ ཀོའ༌ གྱལ༌ལ༌, ཨ༌ཀ༌ཤིའེ༌ ཤིང༌,
EXO 25:6 འོད༌དི༌ ཕིའ༌ ཨོ༌ལིཝ༌ཝི༌ མར༌ནག༌, ཁྲུས༌ཏང༌ཅེས༌སི༌ མར༌ནག༌ དང༌ ཏྲི༌ཞིམ༌ཅན༌ནི༌ སྤོས༌སི༌ ཕིའ༌ ཚ༌མིག༌གུན༌,
EXO 25:7 ཨེ༌ཕོད༌ དང༌ ཀྲང༌ང༌ ཀབ༌ཅེས༌སི༌ཀ༌ ཏག༌ཅེས༌ལ༌ ཨོ༌ནེཀས༌ དང༌ ཞན༌ ཁྲ༌རྡོའ༌ རིན༌ཅན༌གུན༌།”
EXO 25:8 “མི༌གུན༌ལ༌ ངའེ༌ ཕིའ༌ ཏམ༌པའེ༌ ཀུར༌ ཙེམ༌ཅུག༌, ཏེ༌ནེ༌ ང༌ ཁོང༌གུན༌ ཉམ༌པོ༌ དུག༌ཨིན༌།
EXO 25:9 ཀུར༌ དང༌ ཏེ༌ ནང༌ང༌ ཡོང༌གོ༌ཤེས༌སི༌ ཅ༌ལག༌ ཚང༌མ༌ ངའེ༌ ཁྱོ༌རང༌ང༌ སྟན༌ཅེས༌ཅན༌ ནང༌ཞིན༌ ཅོ༌གོས༌།”
EXO 25:10 “ཁོང༌གུན༌ལ༌ ཨ༌ཀ༌ཤིའེ༌ ཤིང༌ངི༌ སྒམ༌ཞིག༌ ཅོ༌ཅུག༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110, ཞང༌ དང༌ ཐོན༌བོ༌ སེན༌ཀྲི༌མི༌ཀྲར༌ 66 ཡོང༌གོས༌།
EXO 25:11 ཏེ༌བོའེ༌ ནང༌ཀུག༌ དང༌ ཕི༌ལོག༌ ཉིས༌ཀོ༌ སེར༌ ཉམ༌པོ༌ ཏུམ༌ ཡང༌ ཏེ༌བོའེ༌ ཐའ༌མ༌ ཚང༌མ༌ ཀིར༌ སྐོར༌ཏེ༌ ཅའང༌ མ༌དྲེས༌ཁན༌ སེར༌རི༌ ཐའ༌རིལ༌ ཏོང༌།
EXO 25:12 སེར༌རི༌ ཀྱི༌ལྡིར༌ ཞི༌ ཅོས༌ཏེ༌ ཏེ༌བོའེ༌ རྐང༌ ཞི༌ཀོའ༌ ཏག༌གོས༌, འི༌ངོ༌ ཆོགས༌ལ༌ ཉིས༌ ཡང༌ འ༌ངོ༌ ཆོགས༌ལ༌ ཉིས༌།
EXO 25:13 ཨ༌ཀ༌ཤིའེ༌ ཤིང༌ངི༌ ཀྲ༌ལུ༌ ཁྱོངས༌ཏེ༌ ཏེ༌གུན༌ སེར༌རི༌ ཏུམ༌,
EXO 25:14 ཡང༌ སྒམ༌བོ༌ ཁུར༌ཅེས༌ལ༌ ཀྲ༌ལུ༌གུན༌ ཏེ༌བོའེ༌ ཆོགས༌ ཉིས༌ཀོའ༌ ཡོད༌ཁན༌ནི༌ ཀྱི༌ལྡིར༌ གུན༌ནི༌ ནང༌ང༌ གྱུད༌།
EXO 25:15 ཀྲ༌ལུ༌གུན༌ ཀྱི༌ལྡིར༌གུན༌ནི༌ ནང༌ནེ༌ མ༌ཕིང༌ང༌ ཏེ༌གུན༌ནི༌ ནང༌ང༌ གྱུད༌ཏེ༌ བོར༌གོས༌།
EXO 25:16 ཏེ༌ནེ༌ ངའེ༌ བཀའ༌རྒྱ༌ རྕུ༌ རྡོའ༌ ལེབ༌ལེབ༌ གུན༌ནི༌ཀ༌ བྲིས༌ཏེ༌ ཏང༌ཅེས༌ཅན༌བོ༌ ཏེ༌ སྒམ༌མི༌ ནང༌ང༌ བོར༌།
EXO 25:17 སྒམ༌བོའ༌ ཅའང༌ མ༌དྲེས༌ཁན༌ སེར༌རི༌ ཁ༌ཅོད༌ ཅོས༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110 དང༌ ཞང༌བོ༌ སེན༌ཀྲི༌མི༌ཀྲར༌ 66 ཡོང༌གོས༌། ཏེ༌ ཁའ༌ལེབ༌པོའེ༌ཀ༌ མི༌གུན༌ནི༌ སྡིག༌པའ༌ ཤགས༌པའེ༌ ཕིའ༌ རིན༌ ཤལ༌ཨིན༌།
EXO 25:18 སྒམ༌མི༌ ཐུག༌རྗེ༌ ཁའ༌ལེབ༌པོའེ༌ ཁེ༌ཐོག༌གི༌ ཐའ༌མ༌ ཉིས༌ཀོའེ༌ཀ༌ སེར༌ རྡུངས༌ཏེ༌ ཆེ༌ར༌བེམ༌ ཉིས༌ ཅོས༌།
EXO 25:19 འི༌ངོ༌ ཐའ༌མ༌ ཅིག༌ ཡང༌ འ༌ངོ༌ ཐའ༌མ༌ ཅིག༌, ཏེ༌གུན༌ ཐུག༌རྗེ༌ ཁའ༌ལེབ༌པོའ༌ ཐུད༌ཏེ༌ ཅིག༌ ཡོང༌གོས༌།
EXO 25:20 ཆེ༌ར༌བེམ༌གུན༌ནི༌ ཤོག༌པ༌ ཀེན༌ལ༌ རྐྱངས༌ཏེ༌ ཐུག༌རྗེ༌ ཁའ༌ལེབ༌པོ༌ ཀབ༌གོས༌། ཏེ༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཐུག༌རྗེ༌ ཁའ༌ལེབ༌ ཆོགས༌ལ༌ གོ༌ སྒུས༌ཏེ༌ ཡོང༌གོས༌།
EXO 25:21 ཏེ༌ སྒམ༌མི༌ ནང༌ང༌ ངའེ༌ བཀའ༌རྒྱ༌ བྲིས༌ཏེ༌ ཏང༌ཅེས༌ཅན༌ནི༌ རྡོའ༌ ལེབ༌གུན༌ བོར༌ཏེ༌ ཐུག༌རྗེ༌ ཁའ༌ལེབ༌པོ༌ ཀོབ༌།
EXO 25:22 ཏེ༌ ཁེ༌ཐོག༌ག༌ ཁྱོ༌རང༌ང༌ ང༌ ཐུག༌ཨིན༌ ཡང༌ ཐུག༌རྗེ༌ ཁའ༌ལེབ༌པོའེ༌ཀ༌ ཡོད༌ཁན༌ནི༌ ཆེ༌ར༌བེམ༌ ཉིས༌ཀོའེ༌ པར༌ནེ༌ ངའེ༌ ཁྱོ༌རང༌ང༌ ཨིས༌ར༌ཨེལ༌པ༌གུན༌ནི༌ ཕིའ༌ ང༌རང༌ངི༌ བཀའ༌ཁྲིམས༌ ཚང༌མ༌ ཏང༌ཨིན༌།”
EXO 25:23 “ཨ༌ཀ༌ཤིའེ༌ ཤིང༌ངི༌ ཅོག༌ཙེ༌ ཞིག༌ ཅོས༌, ཀ༌བོའེ༌ རིང༌ སེན༌ཀྲི༌མི༌ཀྲར༌ 88, ཞང༌ སེན༌ཀྲི༌མི༌ཀྲར༌ 66 དང༌ ཐོན༌ སེན༌ཀྲི༌མི༌ཀྲར༌ 99 ཡོང༌གོས༌།
EXO 25:24 ཏེ༌བོ༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམ༌ ཡང༌ ཐའ༌མ༌ གུན༌ལ༌ སེར༌རི༌ ཐའ༌རིལ༌ ཏོང༌།
EXO 25:25 ཏེ༌བོའ༌ ཀིར༌ སྐོར༌ཏེ༌ སེན༌ཀྲི༌མི༌ཀྲར༌ 7 ཞང༌ངི༌ སྐྱོར༌ར༌ ཏོང༌ ཡང༌ ཏེ༌བོའེ༌ ཐའ༌མ༌ སེར༌རི༌ ཐའ༌རིལ༌ ཏོང༌།
EXO 25:26 སེར༌རི༌ ཀྱི༌ལྡིར༌ ཞི༌ ཅོས༌ ཡང༌ ཏེ༌གུན༌ རྐང༌གུན༌ ཡོད༌སའེ༌ ཀྲུ༌ ཞི༌ཀོའ༌ ཏོག༌།
EXO 25:27 ཏེ༌ ཀྱི༌ལྡིར༌གུན༌ སྐྱོར༌རེ༌ ཉེ༌མོའ༌ ཅོག༌ཙེ༌ ཁུར༌ཅེས༌སི༌ ཕིའ༌ ཀྲ༌ལུ༌གུན༌ གྱུད༌ཅེས༌ལ༌ ཏག༌གོས༌།
EXO 25:28 ཀྲ༌ལུ༌གུན༌ ཨ༌ཀ༌ཤིའེ༌ ཤིང༌ངི༌ ཡོང༌གོས༌ ཡང༌ ཏེ༌གུན༌ལ༌ སེར༌ ཏུམས༌ཏེ༌ ཏེ༌གུན༌ ཅོག༌ཙེ༌ ཁུར༌ཅེས༌ལ༌ ཀོལ༌གོས༌།
EXO 25:29 ངའ༌ རྒུན༌ཆང༌ངི༌ ཆོད༌པ༌ ཕུལ༌ཅེས༌སི༌ ཕིའ༌ ཐལ༌ལི༌, ཀོ༌རེ༌, གོར༌མོ༌ དང༌ ཞན༌ ནོད༌ གུན༌ ཅའང༌ མ༌དྲེས༌ཁན༌ སེར༌རི༌ ཅོ༌གོས༌།
EXO 25:30 ཆད༌དོན༌ནི༌ སྒམ༌མི༌ དུན༌ལ༌ ཅོག༌ཙེ༌ཀ༌ ཏུས༌གྱུན༌ ང༌ ཕུལ༌ཁན༌ནི༌ ཏམ༌པའེ༌ ཏ༌གི༌བོ༌ བོར༌གོས༌།”
EXO 25:31 “ཅའང༌ མ༌དྲེས༌ཁན༌ སེར༌རི༌ འོད༌སྟགས༌ ཅོས༌, ཏེ༌བོའེ༌ ཞབ༌ལྡན༌, རྐང༌གུན༌, མེན༌ཏོག༌ ཙོགས༌ ཀོ༌རེ༌གུན༌, པ༌ཏུམ༌ དང༌ མེན༌ཏོག༌ བར༌ཁན༌ གུན༌ སེར༌ ཅིག༌ཅིག༌ རྡུངས༌ཏེ༌ ཅོ༌གོས༌།
EXO 25:32 ཏེ༌བོའ༌ རྐང༌ དྲུག༌ ཡོང༌གོས༌, ཆོག༌ ཉིས༌ཀོའ༌ སུམ༌སུམ༌།
EXO 25:33 རྐང༌ རེ༌རེ༌ཀ༌ བ༌དམ༌མི༌ མེན༌ཏོག༌ བར༌ཁན༌ ཙོགས༌ སུམ༌སུམ༌ ཡང༌ པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ ཡོང༌གོས༌། ཏེན༌ན༌ ཙོགས༌ འོད༌སྟག༌གི༌ རྐང༌ དྲུག༌ཀོའེ༌ཀ༌ ཡོང༌གོས༌།
EXO 25:34 འོད༌སྟག༌གི༌ ཞུང༌སྐྱིལ༌ལི༌ རྐང༌བོའེ༌ཀ༌ བ༌དམ༌མི༌ མེན༌ཏོག༌ བར༌ཁན༌ ཙོགས༌ ཞི༌, པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ ཉམ༌པོ༌ ཡོང༌གོས༌།
EXO 25:35 ཞུང༌ངི༌ རྐང༌ངི༌ཀ༌ ཞན༌ རྐང༌གུན༌ ཐུད༌ཏེ༌ ཡོད༌ས༌ རེ༌རེ༌ ཡོག༌ག༌ པ༌ཏུམ༌ ཡོང༌གོས༌། ཏེ༌བོའེ༌ཕིའ༌ ཞུང༌ངི༌ རྐང༌ངི༌ ཀ༌ནེ༌ ཞན༌རྐང༌ དྲུག༌ རྐྱངས༌ཏེ༌ ཡོད༌ཏེ༌ ཨིན༌ནོག༌, ལྡལ༌དོ༌ ཉིས༌ཀོའེ༌ཀ༌ སུམ༌སུམ༌།
EXO 25:36 པ༌ཏུམ༌ དང༌ ཡལ༌ག༌ ཚང༌མ༌ ཐེས༌ཏེ༌ འོད༌སྟགས༌ གང༌པོ༌, ཅའང༌ མ༌དྲེས༌ཁན༌ནི༌ སེར༌ གྲོག༌གྲོག༌ ཅིག༌ཅིག༌ རྡུངས༌ཏེ༌ ཅོ༌གོས༌།”
EXO 25:37 “འོད༌སྟག༌གི༌ཀ༌ མར༌ནག༌ ལུགས༌ཏེ༌ འོད༌ ཏུག༌སའེ༌ ཀོ༌རེ༌ རྡུན༌ ཅོས༌ ཀ༌གུན༌ནི༌ ཏེ༌བོའེ༌ དུན༌ཆོགས༌ལ༌ འོད༌ ཏང༌ཨིན༌།
EXO 25:38 འོད༌དི༌ སར༌ ཅད༌ཅེས༌སི༌ ཅབ༌རྩེ༌ དང༌ བོ༌ཁན༌གུན༌ ལྡུ༌ཅེས༌སི༌ ཏ༌འོ༌གུན༌ ཅའང༌ མ༌དྲེས༌ཁན༌ སེར༌རི༌ ཅོ༌གོས༌།
EXO 25:39 འོད༌སྟགས༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌གུན༌ ཅོ༌ཅེས༌ལ༌ ཅའང༌ མ༌དྲེས༌ཁན༌ནི༌ སེར༌ ཀི༌ལོ༌ 35 ཀོལ༌གོས༌།
EXO 25:40 ཏེ༌གུན༌ ངའེ༌ ཁྱོ༌རང༌ང༌ རི༌ཀ༌ ལབ༌ཞའ༌ ཏང༌ཁན༌ ནང༌ཞིན༌ ཅོ༌ ཅུག༌ཅེས༌ ཏན༌ཏན༌ ཅོས༌།”
EXO 26:1 ཡ༌ཝའེ༌ མོ༌ཟེས༌ལ༌ མོལས༌, “ཏམ༌པ༌ ཀུར༌བོ༌ རས༌ ཀུས༌པོ༌ ཐགས༌ཁན༌ནི༌ ཡོ༌ལ༌ རྕུའ༌ ཅོས༌། སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཏེ༌གུན༌ནི༌ཀ༌ ལག༌པ༌ ཁས༌པ༌ མི༌གུན༌ལ༌ ཆེ༌ར༌བེམ༌མི༌ པར༌ སྲུལ༌ཅུག༌།
EXO 26:2 ཡོ༌ལ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 12 ཡང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོང༌གོས༌།
EXO 26:3 ཡོ༌ལ༌ ལྔ༌ལྔ༌ ཐུད༌ཏེ༌ ཆ༌ ཉིས༌ ཅོས༌།
EXO 26:4 རས༌ སྔོན༌པོའེ༌ གུག༌ ཅོས༌ཏེ༌ ཆ༌ ཉིས༌ཀོའེ༌ ཇུག༌གི༌ ཡོ༌ལའེ༌ ཟུར༌གུན༌ནི༌ཀ༌ ཏོག༌།
EXO 26:5 ཡོ༌ལའེ༌ ཆ༌ ཅིག༌པོའེ༌ཀ༌ གུག༌ ལྔབ༌ཅུ༌ དང༌ ཞན༌ ཆ༌ ཅིག༌པོའེ༌ཀའང༌ གུག༌ ལྔབ༌ཅུ༌ ཅོས༌། གུག༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཡོང༌གོས༌།
EXO 26:6 སེར༌ཀུག༌ ལྔབ༌ཅུ༌ ཅོས༌ཏེ༌ ཡོ༌ལ༌ ཉིས༌ཀོའེ༌ གུག༌གུན༌ ལྡོམ༌ ཏེ༌ནེ༌ ཏམ༌པ༌ ཀུར༌བོ༌ ཁག༌ཅིག༌ གྱུར༌ཨིན༌།”
EXO 26:7 “ཏམ༌པ༌ ཀུར༌ ཀབ༌ཅེས༌སི༌ ཕིའ༌ ར༌མའེ༌ སྤུའ༌ ཐགས༌ཁན༌ནི༌ ཡོ༌ལ༌ 11 ཅོས༌།
EXO 26:8 ཏེ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 13 དང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོང༌གོས༌།
EXO 26:9 ཡོ༌ལ༌ ལྔ༌བོ༌ ཅིག༌ ཅོས༌ཏེ༌ ཐུད༌, ཞན༌ ཡོ༌ལ༌ དྲུག༌ཀོ༌ ཡང༌ ཁག༌ ཅིག༌གི༌ ནང༌ང༌ ཐུད༌། ཁག༌ དྲུག༌པོའེ༌ ཡོ༌ལ༌བོ༌ ཀུར༌རི༌ དུན༌ལ༌ ཉི༌ལྟབ༌ ཅོས༌ཏེ༌ བོར༌།
EXO 26:10 ཆ༌ ཅིག༌པོའེ༌ ཇུག༌གི༌ ཡོ༌ལའེ༌ ཟུར༌རི༌ཀ༌ གུག༌ ལྔབ༌ཅུ༌ ཅོས༌ ཡང༌ ཞན༌ ཆ༌ ཅིག༌པོའེ༌ ཇུག༌གི༌ ཡོ༌ལའེ༌ ཟུར༌རི༌ཀའང༌ གུག༌ ལྔབ༌ཅུ༌ ཅོས༌།
EXO 26:11 ར༌གན༌ནི༌ ཀུག༌ཀུག༌ ལྔབ༌ཅུ༌ ཅོས༌ཏེ༌ གུག༌གུན༌ནི ནང༌ང༌ གྱུད༌ ཡང༌ ཀུར༌རི༌ ཁག༌ ཉིས༌པོ༌ ཅིག༌ ཅོས༌ཏེ༌ ཐུད༌།
EXO 26:12 ཀབ༌ཅེས༌ ཐེ༌བ༌ ལུས༌ཁན༌བོ༌ ཏམ༌པ༌ ཀུར༌རི༌ གྱབ༌པོའེ༌ཀ༌ ཆར༌ཆར༌ལ༌ བོར༌།
EXO 26:13 ཆོག༌ ཉིས༌ཀོའ༌ ཡོ༌ལ༌ མི༌ཀྲར༌ ཕེད༌ ཐེ༌བ༌ ལུས༌ཁན༌བོ༌ ཀུར༌ ཀབ༌ཅེས༌ལ༌ ཆར༌ཆར༌ལ༌ བོར༌།
EXO 26:14 ཏེ༌བོའ༌ ཀབ༌ཅེས༌ ལུག༌ཕོའེ༌ པགས༌པ༌ རང༌ མར༌པོ༌ ཏང༌ཁན༌ ཉམ༌པོ༌ ཡང༌ ཏེ༌བོའེ༌ ཁེ༌ཐོག༌ག༌ ཞན༌ ཀབ༌ཅེས༌ཤིག༌ སེམས༌ཅན༌ནི༌ གྱལ༌ལ༌ པགས༌པའ༌ ཅོ༌ཅུག༌།”
EXO 26:15 “ཏམ༌པ༌ ཀུར༌ ལང༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ རིབ༌ཞི༌ ཅོ༌ཅུག༌།
EXO 26:16 རིབ༌ཞི༌ རེ༌རེའེ༌ རིང༌བོ༌ མི༌ཀྲར༌ 4 དང༌ ཞང༌ མི༌ཀྲར༌ ཕེད༌ ཟམ༌ཤིག༌ ཡོང༌གོས༌།
EXO 26:17 རིབ༌ཞི༌ རེ༌རེའེ༌ ཁད༌ཅེས༌ལ༌ ཇུག༌པོ༌ ཞོགས༌ཏེ༌ ཟེར༌ ཙོགས༌ ཉིས༌ ཡོང༌གོས༌། ཏམ༌པ༌ ཀུར༌རི༌ རིབ༌ཞི༌ ཚང༌མ༌ ཙོགས༌ ཅོ༌གོས༌།
EXO 26:18 ཀུར༌རི༌ ལྷོ༌ ཆོགས༌ལ༌ རིབ༌ཞི༌ 20 ཅོས༌,
EXO 26:19 ཡང༌ རིབ༌ཞི༌གུན༌ ལང༌ཅེས༌ལ༌ མུལ༌ལི༌ ཞིབ༌ཅུ༌ ཅོ༌ཅུག༌། རིབ༌ཞི༌ རེ༌རེའ༌ ཞབ༌ལྡན༌ ཉིས༌, ཟེར༌ རེ༌རེ༌ ཡོག༌ག༌ ཞབ༌ལྡན༌ རེ༌རེ༌།
EXO 26:20 ཀུར༌རི༌ བྱང༌ ཆོགས༌ལའང༌ རིབ༌ཞི༌ 20 ཅོས༌,
EXO 26:21 ཡང༌ མུལ༌ལི༌ ཞབ༌ལྡན༌ ཞིབ༌ཅུ༌, རིབ༌ཞི༌ རེ༌རེ༌ ཡོག༌ག༌ ཞབ༌ལྡན༌ ཉིས༌།
EXO 26:22 ཀུར༌རི༌ གྱབ༌, ཡང༌ན༌ ནུབ༌ ཆོགས༌ལ༌ རིབ༌ཞི༌ 6 ཅོས༌,
EXO 26:23 ཡང༌ ཏམ༌པ༌ ཀུར༌རི༌ གྱབ༌ ཆོགས༌སི༌ ཀྲུ༌ ཉིས༌ཀོའེ༌ ཕིའ༌ ཐེ༌བ༌ རིབ༌ཞི༌ ཉིས༌ ཅོས༌།
EXO 26:24 ཀྲུའི༌ རིབ༌ཞི༌གུན༌ནི༌, ཡོག༌པོ༌ བེ༌ཏེ༌ ཨིན༌ནའང༌ ཁེ༌ཐོག༌པོ༌ སེར༌རི༌ ཀྱི༌ལྡིར༌ ཉམ༌པོ༌ ནང༌ཀུག༌གི༌ རིབ༌ཞིའ༌ ཐུད༌ཏེ༌ ཡོང༌གོས༌། ཏེན༌ན༌ ཙོགས༌ ཞན༌ ཀྲུའི༌ རིབ༌ཞིའི༌ ཉམ༌པོ༌ ཅོས༌།
EXO 26:25 ཏེ༌ནེ༌ རིབ༌ཞི༌ 8 དང༌ མུལ༌ལི༌ ཞབ༌ལྡན༌ 16 ཡོང༌གོས༌, རིབ༌ཞི༌ རེ༌རེའ༌ ཞབ༌ལྡན༌ ཉིས༌།”
EXO 26:26 “པ༌ར༌ཁ༌ ཏང༌ཅེས༌ལ༌ ཨ༌ཀ༌ཤིའེ༌ ཤིང༌ ཀོལ༌། ཏམ༌པ༌ ཀུར༌རི༌ ཆོགས༌ ཅིག༌གི༌ རིབ༌ཞིའི༌ ཕིའ༌ ལྔ༌,
EXO 26:27 ཞན༌ཆོགས༌ ཅིག༌གི༌ ཕིའ༌ ལྔ༌ ཡང༌ ནུབ༌ ཆོགས༌སི༌ རིབ༌ཞིའི༌ ཕིའ༌ ལྔ༌ ཀ༌བོ༌ ཏམ༌པ༌ ཀུར༌རི༌ གྱབ༌བོ༌ ཨིན༌།
EXO 26:28 ཞུང༌སྐྱིལ༌ལི༌ པར༌ཁའེ༌ ཀྲ༌ལུ༌བོ༌ ཀུར༌རི༌ གོ༌ནེ༌ ཇུག༌ ཚག༌པ༌ ལེབ༌གོས༌ ཀ༌བོ༌ རིབ༌ཞི༌ ཞུང༌སྐྱིལ༌ལི༌ཀ༌ ཡོད༌ཏེ༌ ཨིན༌ནོག༌།
EXO 26:29 རིབ༌ཞི༌གུན༌ སེར༌རི༌ ཀོབ༌ ཡང༌ པར༌ཁའེ༌ ཀྲ༌ལུ༌ གྱུད༌ཅེས༌སི༌ ཀྱི༌ལྡིར༌གུན༌ སེར༌རི༌ ཡོང༌གོས༌། ཡང༌ པ༌ར༌ཁ༌ ཏང༌ཅེས༌སི༌ ཀྲ༌ལུ༌གུན༌ལའང༌ སེར༌ ཏུམ༌།”
EXO 26:30 “ངའེ༌ རི༌ཀ༌ ཁྱོ༌རང༌ང༌ སྟན༌ཁན༌ ནང༌ཞིན༌ ཏམ༌པ༌ ཀུར༌བོ༌ ཙུག༌།”
EXO 26:31 “སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཡང༌ རས༌ ཐགས༌ཁན༌ ཀུས༌པོའེ༌ ཡོ༌ལ༌ ཅོས༌ ཀ༌བོའེ༌ཀ༌ ལག༌ཤེས༌ ཁས༌པ༌གུན༌ལ༌ ཆེ༌ར༌བེམ༌མི༌ པར༌ སྲུལ༌ཅུག༌།
EXO 26:32 ཨ༌ཀ༌ཤིའེ༌ ཤིང༌ངི༌ ཀ༌ཝ༌ སེར༌རི༌ ཏུམ༌ཁན༌ ཞི༌, མུལ༌ལི༌ ཞབ༌ལྡན༌ རེ༌རེ༌ཀ༌ ལངས༌ཏེ༌ སེར༌ཀུག༌ ཉམ༌པོ༌ ཏེ༌གུན༌ནི༌ཀ༌ ཡོ༌ལ༌བོ༌ ཏོག༌།
EXO 26:33 ཀུར༌རི༌ ཐོག༌གི༌ཀ༌ ཡོད༌ཁན༌ སེར༌ཀུག༌གུན༌ནི༌ཀ༌ ཡོ༌ལ༌བོ༌ ཆར༌ལ༌ ཏོང༌ ཡང༌ ཡོ༌ལའེ༌ གྱབ༌བ༌ ཆད༌དོན༌ནི༌ སྒམ༌བོ༌ བོར༌། ཡོ༌ལ༌བོའེ༌ ཏམ༌པའེ༌ ནས༌ས༌, ཚང༌མའེ༌ སང༌ ཏམ༌པའེ༌ ནས༌ས༌ནེ༌ སོ༌སོ༌ ཕེ༌ཨིན༌།
EXO 26:34 ཚང༌མའེ༌སང༌ ཏམ༌པ༌ ནས༌སའེ༌ ནང༌ང༌ ཡོད༌ཁན༌ ཆད༌དོན༌ནི༌ སྒམ༌བོའ༌ ཐུག༌རྗེ༌ ཁའ༌ལེབ༌པོ༌ ཀོབ༌།
EXO 26:35 ཡོ༌ལའེ༌ དུན༌ ཆོགས༌, ཏམ༌པའེ༌ ནས༌སའེ༌ བྱང༌ ཆོགས༌ལ༌ ཅོག༌ཙེ༌ ཡང༌ ལྷོ༌ ཆོགས༌ལ༌ འོད༌སྟག༌པོ༌ བོར༌།”
EXO 26:36 “ཀུར༌རི༌ ནང༌ང༌ ཞུག༌སའེ༌ སྒོའ༌ ཀབ༌ཅེས༌ལ༌ ཡོ༌ལ༌ རས༌ ཀུས༌པོ༌ ཉམ༌པོ༌ ཙེམས༌ཏེ༌ ཏེ༌བོའེ༌ཀ༌ མི༌ ལག༌ཤེས༌ ཁས༌པ༌གུན༌ལ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ལྡེ༌མོ༌ ཅོ༌ཅུག༌།
EXO 26:37 ཏེ༌ ཡོ༌ལ༌ ཨ༌ཀ༌ཤིའེ༌ ཤིང༌ང༌ ཞོག༌ཁན༌ནི༌ ཀ༌ཝ༌ སེར༌རི༌ ཏུམ༌ཁན༌ ལྔའེ༌ཀ༌ སེར༌ཀུག༌ ཉམ༌པོ༌ ཆར༌ལ༌ ཏོང༌ ཡང༌ ཀ༌ཝ༌གུན༌ ལང༌ཅེས༌ལ༌ ར༌གན༌ནི༌ ཞབ༌ལྡན༌ ལྔ༌ ཅོས༌།”
EXO 27:1 ཡ༌ཝའེ༌ མོ༌ཟེས༌ལ༌ མོལས༌, “ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ཞིག༌ ཅོས༌, ཏེ༌བོ༌ ཀྲུབ༌ཞི༌, རིན༌ དང༌ ཞང༌ མི༌ཀྲར༌ 2 ཡང༌ ཐོན༌བོ༌ མི༌ཀྲར༌ ཅིག༌ དང༌ ཕེད༌ ཟམ༌ཤིག༌ ཡོང༌གོས༌།
EXO 27:2 ཀྲུ༌ ཞི༌ཀོ༌ ཞོགས༌ཏེ༌ རཱ༌ཅོ༌ ཙོགས༌ ཙེབ༌ཙེབ༌ ཅོས༌། ཆོད༌ཁྲི༌ དང༌ རཱ༌ཅོ༌གུན༌ ཤིང༌ ཅིག༌གི༌ ཀ༌ནེ༌ སྐོས༌ཏེ༌ ཡོང༌གོས༌ ཡང༌ ཆོད༌ཁྲི༌ གང༌པོ༌ ར༌གན༌ ཉམ༌པོ༌ ཏུམ༌།
EXO 27:3 ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ ར༌གན༌ནི༌ ཅོས༌, ཀ༌བོ༌ ཀོག༌ཐལ༌ གྱང༌ཅེས༌སི༌ ནོད༌གུན༌, ཁྱེམ༌གུན༌, སྒོར༌མོ༌གུན༌, ཤ༌ ལོག༌ཅེས༌སི༌ མེ༌ལེན༌གུན༌ དང༌ མེ༌ ཏུག༌ཅེས༌སི༌ ཏ༌འོ༌གུན༌ ཨིན༌ནོག༌།
EXO 27:4 ཤིང༌ དང༌ སོལ༌ལ༌ བར༌ཨིན༌ ཡོད༌ཁན༌གུན༌ ཁད༌ཅེས༌ལ༌ ར༌གན༌ནི༌ ཀྲ༌མིག༌ ཅོས༌ ཡང༌ ཏེ༌བོའེ༌ ཀྲུ༌གུན༌ནི༌ཀ༌ ར༌གན༌ནི༌ ཀྱི༌ལྡིར༌ ཞི༌ ཏགས༌ཏེ༌
EXO 27:5 ཏེ༌བོ༌ ནང༌ལོག༌ག༌ ཆོད༌ཁྲིའ༌ ཀྱིར༌སྐོར༌ཏེ༌ ཀོང༌ང༌ ཏགས༌ཏེ༌ ཡོད༌ཁན༌ནི༌ ཡོག༌ག༌ བོར༌, ཕེད༌ ཞིག༌གི༌ཀ༌ ཏེ༌བོ༌ ཁད༌ཨིན༌།
EXO 27:6 ཆོད༌ཁྲི༌བོ༌ ཁུར༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ ཀྲ༌ལུ༌ ཞོགས༌ཏེ༌ ཅོས༌ ཡང༌ ཏེ༌བོའ༌ ར༌གན༌ ཏུམ༌།
EXO 27:7 ཏེ༌གུན༌ ཆོད༌ཁྲི༌ ལྡོ༌ ཉིས༌ཀོའ༌ ཡོད༌ཁན༌ནི༌ ཀྱི༌ལྡིར༌གུན༌ནི༌ ནང༌ང༌ ཁུར༌ཅེས༌ལ༌ གྱུད༌།
EXO 27:8 ཆོད༌ཁྲི༌བོ༌ ཤིང༌ལེབ༌ ཉམ༌པོ༌ སྟོང༌པ༌ སྒམ༌ ཙོགས༌ ཅོས༌། ཁྱོ༌རང༌ང༌ རིའི༌ཀ༌ སྟན༌ཁན༌ ནང༌ཞིན༌ ཏེ༌བོ༌ ཅོས༌།”
EXO 27:9 “ཏམ༌པ༌ ཀུར༌ལ༌ ནང༌སྐོར༌ ཅོས༌། ལྷོ༌ ཆོགས༌ལ༌ ཐགས༌ཁན༌ནི༌ རས༌ ཀུས༌པོའེ༌ ཡོ༌ལ༌ མི༌ཀྲར༌ 46 རིང༌མོ༌ ཅོས༌།
EXO 27:10 ཀ༌ཝ༌ ཉི༌ཤུ༌ དང༌ ཏེ༌གུན༌ ལང༌ཅེས༌ལ༌ ར༌གན༌ནི༌ ཞབ༌ལྡན༌ ཉི༌ཤུ༌ ཡང༌ ཀ༌ཝ༌གུན༌ནི༌ཀ༌ མུལ༌ལི༌ ཀུག༌ཀུག༌གུན༌ དང༌ ཀྱི༌ལྡིར༌གུན༌ ཅོས༌།
EXO 27:11 ཏེན༌ན༌ ཙོགས༌ བྱང༌ ཆོགས༌སི༌ སྐྱོར༌རེ༌ ཕིའང༌ ཀ༌ཝ༌ ཉི༌ཤུ༌, ར༌གན༌ནི༌ ཞབ༌ལྡན༌ ཉི༌ཤུ༌, མུལ༌ལི༌ ཀུག༌ཀུག༌གུན༌ དང༌, ཀྱི༌ལྡིར༌གུན༌ ཡང༌ མི༌ཀྲར༌ 44 རིང༌ངི༌ ཡོ༌ལ༌ ཅོས༌།”
EXO 27:12 “ནུབ༌ ཆོགས༌སི༌ སྐྱོར༌རེ༌ ཕིའ༌ མི༌ཀྲར༌ 22 རིང༌ངི༌ ཡོ༌ལ༌ ཅོས༌, ཀ༌བོ༌ ཞབ༌ལྡན༌ རྕུའི༌ཀ༌ ལངས༌ཁན༌ནི༌ ཀ༌ཝ༌ རྕུའི༌ཀ༌ ཆར༌ལ༌ ཏོང༌།
EXO 27:13 ཤར༌ ཆོགས༌སི༌ སྐྱོར༌ར༌ ཀ༌རུ༌ ནང༌ཀུག༌ག༌ ཞུག༌སའེ༌ སྒོ༌ ཡོད༌, ཏེ༌བོ༌ མི༌ཀྲར༌ 22 ཞང༌ཅན༌ ཡོང༌གོས༌།
EXO 27:14 སྒོའེ༌ ཆོགས༌ ཅིག༌པོའེ༌ཀ༌ ཞབ༌ལྡན༌ སུམ༌མི༌ཀ༌ ཀ༌ཝ༌ སུམ༌ ལངས༌ཏེ༌ མི༌ཀྲར༌ དྲུག༌ དང༌ ཕེད༌ ཟམ༌ཤིག༌ རིང༌ངི༌ ཡོ༌ལ༌ ཆར༌ལ༌ ཏོང༌།
EXO 27:15 སྒོའེ༌ འ༌ངོ༌ ཆོགས༌པོའང༌ ཞབ༌ལྡན༌ སུམ༌མི༌ཀ༌ ཀ༌ཝ༌ སུམ༌ ལངས༌ཏེ༌ མི༌ཀྲར༌ དྲུག༌ དང༌ ཕེད༌ ཟམ༌ཤིག༌ རིང༌ངི༌ ཡོ༌ལ༌ ཆར༌ལ༌ ཏོང༌།
EXO 27:16 ཞུག༌སའེ༌ སྒོའ༌ མི༌ཀྲར༌ 9 རིང༌ངི༌ ཡོ༌ལ༌ ཀ༌བོ༌ ཀུས༌པོ༌ རས༌སི༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ རི༌མོ༌ སྲུལ༌ཏེ༌ ཡོང༌གོས༌། ཡང༌ ཏེ༌བོ༌ ཞབ༌ལྡན༌ ཞི༌ཀ༌ ལངས༌ཁན༌ནི༌ ཀ༌ཝ༌ ཞི༌ཀ༌ ཆར༌ལ༌ ཏོང༌།
EXO 27:17 ནང༌སྐོར༌རི༌ སྐྱོར༌རེ༌ ཀ༌ཝ༌ ཚང༌མའེ༌ཀ༌ མུལ༌ལི༌ ཀྱི༌ལྡིར༌, མུལ༌ཀུག༌གུན༌ ཡང༌ ཀ༌ཝ༌ ལང༌ཅེས༌སི༌ ཞབ༌ལྡན༌གུན༌ ར༌གན༌ནི༌ ཡོང༌གོས༌།
EXO 27:18 སྐྱོར༌ར༌བོ༌ མི༌ཀྲར༌ 44 རིང༌, མི༌ཀྲར༌ 22 ཞང༌ དང༌ མི༌ཀྲར༌ 2 ཟམ༌ཤིག༌ ཐོན༌པོ༌ ཡོང༌གོས༌། ཡོ༌ལ༌གུན༌ ཐགས༌ཁན༌ནི༌ ཀུས༌པོ༌ རས༌སི༌ ཡང༌ ཞབ༌ལྡན༌གུན༌ ར༌གན༌ནི༌ ཡོང༌གོས༌།
EXO 27:19 ཏམ༌པ༌ ཀུར༌རི༌ ནང༌ང༌ ཀོལ༌ཁན༌ནི༌ ལག༌ཆ༌ ཚང༌མ༌ ཡང༌ ཀུར༌ དང༌ སྐྱོར༌རེ༌ པུར༌ཆ༌ ཚང༌མ༌ ར༌གན༌ནི༌ ཅོ༌གོས༌།”
EXO 27:20 “འོད༌གུན༌ ཏུས༌གྱུན༌ སྤར༌ཏེ༌ བོར༌ཅེས༌སི༌ ཕིའ༌ ཨིས༌ར༌ཨེལ༌པ༌གུན༌ལ༌ ཨོ༌ལིཝ༌ ཙིར༌ཁན༌ནི༌ མར༌ནག༌ ལག༌མོ༌ ཁྱོང༌ཅེས༌ལ༌ བཀའ༌ ཏོང༌།
EXO 27:21 ཡ༌ཝའ༌ ཐུག༌སའེ༌ ཀུར༌རི༌ ནང༌ང༌, ཆད༌དོན༌ནི༌ སྒམ༌མི༌ དུན༌ལ༌ ཡོད༌ཁན༌ནི༌ ཡོ༌ལའེ༌ དུན༌ ཆོགས༌ལ༌ འོད༌སྟག༌པོ༌ བོར༌། ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ཡ༌ཝའེ༌ སྐུན༌དུན༌ལ༌ ཏེ༌ འོད༌གུན༌ ཕི༌ཏོག༌ནེ༌ ང༌མོ༌ ཚོག༌པ༌ སྤར༌ཏེ༌ བོར༌གོས༌། ཨིས༌ར༌ཨེལ༌པ༌གུན༌ དང༌ ཁོང༌གུན༌ནི༌ པུར༌གྱུད༌ ཚང༌མའེ༌ ཏུས༌གྱུན༌ འི༌ ཁྲིམས༌པོ༌ ཁའ༌ཉན༌ གོས༌།”
EXO 28:1 ཡ༌ཝའེ༌ མོ༌ཟེས༌ལ༌ མོལས༌, “ཨིས༌ར༌ཨེལ༌པ༌གུན༌ནི༌ ཕྲོ༌ནེ༌ ཁྱོ༌རང༌ངི༌ ཨ༌ཅོ༌ ཨ༌རོན༌ དང༌ ཁོའེ༌ བུ༌ཚ༌ ན༌དབ༌, ཨ༌བི༌ཧུ༌, ཨེ༌ལི༌འ༌ཟར༌ དང༌ ཨི༌ཐ༌མར༌ གུན༌ བོད༌ཏེ༌ ངའ༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ཅེས༌ལ༌, ཁོང༌གུན༌ ལྡོམ༌།
EXO 28:2 ཁྱོ༌རང༌ངི༌ ཨ༌ཅོ༌ ཨ༌རོན༌ནི༌ ཕིའ༌ བླ༌མའེ༌ ཏམ༌པ༌ ཀོས༌ལག༌གུན༌ ཙེམ༌ཅུག༌, ཏེ༌བོའེ༌ ཁོའ༌ སྤལ༌ དང༌ རྩི༌ཝ༌ ཁྱོང༌ཨིན༌།
EXO 28:3 ངའེ༌ རིག༌པ༌ ཏང༌ཁན༌ནི༌ ལག༌ཁས༌པ༌གུན༌ལ༌ ཨ༌རོན༌ནི༌ ཕིའ༌ ཀོས༌ལག༌ ཙེམ༌ ཟེར༌ ཏེ༌བོའེ༌ ཁོ༌ ངའེ༌ ཕིའ༌ བླ༌མའེ༌ ཚུལ༌ལ༌ ཞབས༌ཏོག༌ ཞུའ༌ ལྡམས༌ཏེ༌ ཨིན༌ཁན༌བོ༌ སྟན༌ཨིན༌།
EXO 28:4 ཁོང༌གུན༌ནི༌ འི༌ ཀོས༌ལག༌གུན༌ ཙེམ༌གོས༌, ཀྲང༌ང༌ ཀབ༌ཅེས༌, ཨེ༌ཕོད༌, ཀོས༌ ཕུ༌ཏུང༌ མེད༌ཁན༌, ཐགས༌ཁན༌ནི༌ ཀོས༌, གོའ༌ སྲིལ༌ཅེས༌ དང༌ སྐྱེ༌རགས༌ གུན༌། ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ཕིའ༌ ཁོང༌གུན༌ནི༌ ཏེ༌ ཏམ༌པ༌ ཀོས༌ལག༌ ཚང༌མ༌ ཙེམ༌གོས༌, ཁོང༌གུན༌ནི༌ བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ ཟ༌ནེ༌ ཏེ༌གུན༌ གོན༌ཨིན༌།
EXO 28:5 ཁོང༌གུན༌ནི༌ སེར༌ཀུད༌, སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཡང༌ རས༌ ཀུས༌པོ༌ གུན༌ ཀོལ༌གོས༌།”
EXO 28:6 “རས༌ ཀུས༌པོའེ༌ཀ༌ སེར༌ཀུད༌ ཡང༌ སྔོན༌པོ༌, སྔོ༌མར༌, མར༌པོ༌ ནས༌མ༌ ཉམ༌པོ༌ ལག༌ཁས༌པ༌གུན༌ལ༌ ལག༌སྲུལ༌ ཏང༌ཅུགས༌ཏེ༌ ཨེ༌ཕོད༌ ཅོས༌།
EXO 28:7 ཏེ༌བོའེ༌ གྱབ༌ དང༌ དུན༌བོ༌ ཐུད༌ཅེས༌ལ༌ སྤུང༌པ༌ ཉིས༌ཀོའེ༌ཀ༌ རས༌སི༌ ཐུད༌ ཏོང༌།
EXO 28:8 སྐྱེ༌རག༌པོ༌ ཨེ༌ཕོད༌ དང༌ ཙོགས༌ ཀུས༌པོ༌ ཪས༌སི༌ཀ༌ སེར༌ཀུད༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཨེ༌ཕོད༌ ཉམ༌པོ༌ ཐུད༌གོས༌།”
EXO 28:9 “ཨོ༌ནེཀས༌ ཟེར༌ཁན༌ནི༌ ཁྲ༌རྡོའ༌ རིན༌ཅན༌ ཉིས༌སི༌ཀ༌ ཨིས༌ར༌ཨེལ༌ལི༌ བུ༌ཚ༌གུན༌ནི༌ མིང༌ སྐོས༌ཏེ༌ བྲིས༌།
EXO 28:10 མིང༌གུན༌ སྐྱེ༌ ཚིར༌ལ༌, ཁྲ༌རྡོའ༌ ཅིག༌པོའེ༌ཀ༌ དྲུག༌ དང༌ ཡང༌ ཅིག༌པོའེ༌ཀ༌ དྲུག༌ བྲིས༌།
EXO 28:11 ཁྲ༌ ཙོག༌ཁན༌གུན༌ནི༌ ཐེ༌ཙེ༌ སྐོའ༌ ཙོགས༌ལ༌ ཁྲ༌རྡོའ༌ ཉིས༌ཀོའེ༌ཀ༌ མིང༌གུན༌ སྐོས༌ཏེ༌ ཏེ༌བོ༌ སེར༌རི༌ རིབ༌ཞི༌ ནང༌ང༌ ཅུག༌།
EXO 28:12 ཨིས༌ར༌ཨེལ༌ལི༌ སྡེ༌ རྕུག༌ཉིས༌པོ༌ ཨིད༌ཏུ༌ ལུས༌ཤེས༌ལ༌ ཏེ༌གུན༌ ཨེ༌ཕོད༌དི༌ སྤུང༌པའེ༌ རས༌སི༌ཀ༌ ཏག༌ཅུག༌། ཨ༌རོན༌ནི༌ ཏེ༌ མིང༌གུན༌ ཁོ༌རང༌ངི༌ སྤུང༌པའེ༌ཀ༌ ཁུར༌ཏེ༌ ཁོང༌གུན༌ ཨིད༌ཏུ༌ བོར༌ར༌ ཛད༌ཅེས༌པོ༌ ཡ༌ཝའ༌ ཨིད༌ཏུ༌ སྐུལ༌ཨིན༌།
EXO 28:13 ཁྲ༌གུན༌ ཅུག༌ཅེས༌ལ༌ སེར༌རི༌ རིབ༌ཞི༌ ཉིས༌ ཅོས༌
EXO 28:14 ཡང༌ སེར༌ ལྕུས༌ཏེ༌ ཉག༌ཐག༌ ཐུ༌ངུན༌ ཉིས༌ ཅོས༌ཏེ༌ ཏེ༌གུན༌ ཁྲ༌ ཅུག༌ཁན༌ སེར༌རི༌ རིབ༌ཞི༌གུན༌ལ༌ ཐུད༌ཅུག༌།”
EXO 28:15 “ལག༌ཁས༌པ༌གུན༌ལ༌ ཀྲང༌ང༌ ཀབ༌ཅེས༌ ཅོ༌ཅུག༌ ཀ༌བོ༌ ཐག༌ཅད༌ ཏང༌ཅེས༌ལ༌ ཀོལ༌ཨིན༌། ཏེ༌བོ༌ ཨེ༌ཕོད༌ ཙོགས༌ ཀུས༌པོ༌ རས༌སི༌ཀ༌ སེར༌ཀུད༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཅོས༌།
EXO 28:16 ཏེ༌བོ༌ ཀྲུབ༌ཞི༌, ལྡོ༌ རེ༌རེ༌ སེན༌ཀྲི༌མི༌ཀྲར༌ 22 ཡང༌ ཉི༌ལྡབ༌ གི༌གུ༌ ཙོགས༌ ཡོང༌གོས༌།
EXO 28:17 ཏེ༌བོའེ༌ཀ༌ ཁྲ༌རྡོའ༌ རིན༌ཅན༌གུན༌ནི༌ ཀྲལ༌ཞི༌ ཅོས༌ ཡང༌ གོ༌མའེ༌ ཀྲལ༌ལི༌ ནང༌ང༌ རུ༌བི༌, ཏོ༌པཟ༌ དང༌ བེ༌རེལ༌;
EXO 28:18 ཀྲལ༌ ཉིས༌པའེ༌ ནང༌ང༌ ཏར༌ཀོའེས༌, ནི༌ལིམ༌ དང༌ ཨི༌མ༌རལད༌;
EXO 28:19 ཀྲལ༌ སུམ༌པའེ༌ ནང༌ང༌ ཇེ༌སིནཐ༌, ཨ༌གཏ༌ དང༌ ཨ༌མེ༌ཐིསཏ༌;
EXO 28:20 ཀྲལ༌ ཞི༌པའེ༌ ནང༌ང༌ ཀརི༌སོ༌ལཱེཏ༌, ཨོ༌ནེཀས༌ དང༌ ཇས༌པར༌ གུན༌ ཡོང༌གོས༌། ཏེ༌ ཚང༌མ༌ སེར༌རི༌ ནང༌ང༌ ཅུགས༌ཏེ༌ ཡོང༌གོས༌།
EXO 28:21 ཁྲ༌ ཙོག༌ཁན༌གུན༌ལ༌ ཏེ༌ ཁྲ༌རྡོའ༌གུན༌ནི༌ཀ༌ ཡ༌ཀོབ༌བི༌ བུ༌ཚ༌གུན༌ནི༌ མིང༌ ཐེ༌ཙེ༌ ཙོགས༌ལ༌ སྐོ༌ཅུག༌, ཀ༌གུན༌ ཨིས༌ར༌ཨེལ༌པའེ༌ སྡེ༌ རྕུག༌ཉིས༌པོ༌ ཨིན༌ནོག༌།”
EXO 28:22 “ཀྲང༌ང༌ ཀབ༌ཅེས༌པོ༌ ཨེ༌ཕོད༌ ཉམ༌པོ༌ ཐུད༌ཅེས༌ལ༌ སེར༌ ལྕུས༌ཏེ༌ ཉག༌ཐག༌ ཅོས༌།
EXO 28:23 སེར༌རི༌ ཀྱི༌ལྡིར༌ ཉིས༌ ཅོས༌ ཡང༌ ཏེ༌གུན༌ ཀྲང༌ང༌ ཀབ༌ཅེས༌པོའེ༌ སྟག༌གི༌ ཀྲུ༌ ཉིས༌ཀོའེ༌ཀ༌ ཏོག༌།
EXO 28:24 ཡང༌ སེར༌རི༌ ཉག༌ཐག༌ ཉིས༌ཀོའེ༌ ཇུག༌ རེ༌རེ༌ གྲང༌ང༌ གྱབ༌ཅེས༌སི༌ ཀྲུའི༌ ཀྱི༌ལྡིར༌ རེ༌རེ༌ཀ༌ ཏོག༌།
EXO 28:25 སེར༌རི༌ ཉག༌ཐག༌གི༌ ཞན༌ ཇུག༌པོ༌ ཨེ༌ཕོད༌དི༌ དུན༌ ཆོགས༌སི༌ སྤུང༌པའེ༌ཀ༌ ཁྲ༌ ཅུག༌ཁན༌ནི༌ སེར༌རི༌ རིབ༌ཞི༌ཀ༌ ཏོག༌།
EXO 28:26 སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཀྲང༌ང༌ ཀབ༌ཅེས༌པོའེ༌ ཡོག༌གི༌ ཀྲུ༌ ཉིས༌ཀོའེ༌ ཐིལ༌ལ༌ ཨེ༌ཕོད༌ ཆོགས༌ལ༌ ཏོག༌།
EXO 28:27 སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཨེ༌ཕོད༌དི༌ དུན༌ ཆོགས༌ལ༌ སྤུང༌པའེ༌ རས༌སི༌ ཇུག༌པོའེ༌ཀ༌ ཨེ༌ཕོད༌ དང༌ སྐྱེ༌རགས༌ ཐུད༌སའེ༌ སྟག༌པོའེ༌ཀ༌ ཏོག༌།
EXO 28:28 ཀྲང༌ང༌ ཀབ༌ཅེས༌སི༌ ཀྱི༌ལྡིར༌གུན༌ དང༌ ཨེ༌ཕོད༌དི༌ སྐྱེ༌རག༌གི༌ ཁེ༌ཐོག༌ག༌ ཡོད༌ཁན༌ནི༌ ཀྱི༌ལྡིར༌གུན༌ སྔོན༌པོ༌ རས༌སི༌ སྐྱེ༌རག༌ ཁྲ༌མོ༌ ཉམ༌པོ༌ ལྡོམ༌། ཏེ༌ནེ༌ ཀྲང༌ང༌ ཀབ༌ཅེས༌པོ༌ གྲུལ༌ མ༌གྲུལ༌ལ༌ ཨེ༌ཕོད༌ ཉམ༌པོ༌ སྟན༌པོ༌ ལུས༌ཨིན༌།”
EXO 28:29 “ཨ༌རོན༌ ཁོ༌རང༌ངི༌ སྙིང༌ངི༌ཀ༌ ཨིས༌ར༌ཨེལ༌པའེ༌ སྡེ༌གུན༌ནི༌ མིང༌ སྐོས༌ཁན༌ནི༌ ཀྲང༌ང༌ ཀབ༌ཅེས༌པོ༌ གོན༌ཏེ༌ ཏམ༌པ༌ ནས༌སའེ༌ ནང༌ང༌ ཆའ༌ཅིག༌ ང༌ ཡ༌ཝའ༌ ཁོང༌གུན༌ མི༌རྗེད༌ཅེས༌པོ༌ ཨིད༌ཏུ༌ སྐུལ༌ཨིན༌།
EXO 28:30 ཀྲང༌ང༌ ཀབ༌ཅེས༌པོའེ༌ ནང༌ཀུག༌ག༌ ཨུ༌རིམ༌ དང༌ ཐུ༌མིམ༌ གུན༌ གྱོང༌། ཨ༌རོན༌ ཡ༌ཝའེ༌ དུན༌ལ༌ ཏམ༌པའེ༌ ནས༌སའེ༌ ནང༌ང༌ ཆ༌ ཟ༌ནེ༌ ཏེ༌གུན༌ ཁོའེ༌ སྙིང༌ངི༌ དུན༌ལ༌ ལུས༌ཨིན༌། ཏེ༌ནེ༌ ཨ༌རོན༌ནི༌ ཏེ༌གུན༌ ཀོལ༌ཏེ༌ ཨིས༌ར༌ཨེལ༌པ༌གུན༌ནི༌ ཕིའ༌ ངའེ༌ ཐུག༌གོངས༌པོ༌ སྔོན༌ཅུག༌ཨིན༌།”
EXO 28:31 “ཨེ༌ཕོད༌དི༌ ཡོག༌ག༌ གོན༌ཅེས༌སི༌ ཀོས༌ གང༌པོ༌ སྔོན༌པོ༌ ཡོང༌གོས༌,
EXO 28:32 གོའེ༌ ཕིའ༌ བི༌ཡང༌ ཡོང༌གོས༌ ཡང༌ མི༌ཅད༌ཅེས༌སི༌ ཕིའ༌ ཏེ༌བོའེ༌ ཐའ༌མ༌ ལྟབས༌ཏེ༌ ཙེམ༌།
EXO 28:33 སེར༌རི༌ ཀྲི༌ལུ༌ དང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཨ༌ནར༌རི༌ ཟོས༌ཏ༌ ཅོས༌ཏེ༌ ཀོས༌སི༌ ཇུག༌གི༌ ཟུར༌རི༌ཀ༌ ཏོག༌།
EXO 28:34 ཀྲ༌ལུ༌ དང༌ ཨ༌ནར༌ གུན༌ སྤེལ༌ཏེ༌ ༼ཨ༌ནར༌ ཅིག༌ ཀྲི༌ལུ༌ ཅིག༌༽ ཀོས༌སི༌ ཇུག༌གི༌ ཟུར༌ ཀྱིར༌སྐོར༌ཏེ༌ ཏོག༌།
EXO 28:35 བླ༌མའེ༌ ཚུལ༌ལ༌ ཡ༌ཝ༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ནི༌ ཏེ༌བོ༌ གོན༌གོས༌། ཡ༌ཝའེ༌ སྐུན༌དུན༌ལ༌ ཏམ༌པའེ༌ ནས༌སའེ༌ ནང༌ང༌ ཆ༌ ཡ༌ བིང༌ ཟ༌ནེ༌ ཀྲ༌ལུའི༌ སྐད༌པོ༌ སན༌ཏེ༌ ཁོ༌ སད༌ད༌ མི༌ཛད༌།”
EXO 28:36 “ཅའང༌ མ༌དྲེས༌ཁན༌ནི༌ སེར༌ རྡུངས༌ཏེ༌ ལེབ༌ལེབ༌ ཀྲུབ༌ཞི༌ ཅོས༌ ཡང༌ ཏེ༌བོའེ༌ཀ༌ ‘ཡ༌ཝའེ༌ ཁོང༌རང༌ངི༌ ཕིའ༌ ཁོ༌ ཏམ༌པ༌ ཛདས༌’ སྐོས༌ཏེ༌ བྲིས༌།
EXO 28:37 ཏེ༌བོ༌ ཐོད༌དི༌ དུན༌ཆོགས༌ལ༌ ཟུར༌རི༌ཀ༌ སྔོན༌པོ༌ རས༌སི༌ སྐྱེ༌རགས༌ ཁྲ༌མོ༌ ཉམ༌པོ༌ ལྡོམ༌།
EXO 28:38 ཏེ༌བོ༌ ཨ༌རོན༌ནི༌ ཐོད༌པའེ༌ཀ༌ གོན༌གོས༌ ཏེ༌ནེ༌ ཁོའེ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཕུལ༌ཁན༌ནི༌ ཆོད༌པའེ༌ ནང༌ང༌ ནོར༌ཁྲུལ༌ ཆའ༌ཁན༌ནི༌ སྐྱོན༌གུན༌ ཁོའེ༌ ལེན༌ཨིན༌ ཡང༌ ང༌ ཡ༌ཝའེ༌ ཁོང༌གུན༌ནི༌ ཆོད༌པ༌ ཕུལ༌ཁན༌གུན༌ ཐད༌པོ༌ ཉམ༌པོ༌ ལེན༌ཨིན༌།”
EXO 28:39 “ཨ༌རོན༌ནི༌ ནང༌ཀུག༌གི༌ ཀོས༌ དང༌ ཐོད༌ གུན༌ ཐགས༌ཁན༌ནི༌ ཀུས༌པོ༌ རས༌སི༌ ཡོང༌གོས༌ ཡང༌ སྐྱེ༌རག༌པོའང༌ ལག༌སྲུལ༌ ཏངས༌ཏེ༌ ཡོང༌གོས༌།
EXO 28:40 ཨ༌རོན༌ནི༌ བུ༌ཚ༌གུན༌ནི༌ ཕིའ༌ ནང༌ཀུག༌གི༌ ཀོས༌, སྐྱེ༌རགས༌ དང༌ ཏི༌བི༌ གུན༌ ཅོས༌ ཀ༌བོའེ༌ ཁོང༌གུན༌ལ༌ སྤལ༌ དང༌ རྩི༌ཝ༌ ཁྱོང༌ཨིན༌།
EXO 28:41 འི༌ ཀོས༌ལག༌གུན༌ ཁྱོ༌རང༌ངི༌ ཨ༌ཅོ༌ ཨ༌རོན༌ དང༌ ཁོའེ༌ བུ༌ཚ༌ གུན༌ལ༌ སྐོན༌ ཡང༌ ཁོང༌གུན༌ནི༌ གོའེ༌ཀ༌ ཨོ༌ལིཝ༌ཝི༌ མར༌ནག༌ ལུགས༌ཏེ༌ བླ༌མའེ༌ ལས༌སི༌ ཕིའ༌ སྐོས༌། བླ༌མའེ༌ ཚུལ༌ལ༌ ང༌ ཞབས༌ཏོག༌ ཞུ༌ཅེས༌ལ༌ ཁོང༌གུན༌ སོ༌སོ༌ ཕེས༌།”
EXO 28:42 “ཁོང༌གུན༌ ཇང༌སྟོང༌ མེད༌ཅེས༌སི༌ ཕིའ༌ ནང༌ཀུག༌གི༌ ཀང༌ཙེ༌, ཀུས༌པོ༌ རས༌སི༌ ཙེམ༌ ཀ༌བོ༌ སྐྱེད༌པ༌ནེ༌ ཇང༌བར༌ ཚོག༌པ༌ ཡོང༌གོས༌།
EXO 28:43 ཡ༌ཝའ༌ ཐུག༌སའེ༌ ཀུར༌རི༌ ནང༌ང༌ ཆ༌ ཟ༌ནེ༌ ཡ༌ ཆོད༌ཁྲིའི༌ དུན༌ལ༌ ཏམ༌པའེ༌ ནས༌སའེ༌ ནང༌ང༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ཏེ༌ ཀོས༌ལག༌གུན༌ གོན༌གོས༌། ཏེ༌ཟུག༌ ཅོ༌ན༌ ཁོང༌གུན༌ལ༌ སྐྱོན༌ ཕོགས༌ཏེ༌ ཤི༌ མི༌ཤི༌། ཏེ༌ ཁྲིམས༌པོ༌ ཨ༌རོན༌ དང༌ ཁོའེ༌ པུར༌གྱུད༌གུན༌ནི༌ ཏུས༌གྱུན༌ ཁའ༌ཉན༌ གོས༌།”
EXO 29:1 ཡ༌ཝའེ༌ མོ༌ཟེས༌ལ༌ མོལས༌, “ཨ༌རོན༌ དང༌ ཁོའེ༌ བུ༌ཚ༌གུན༌ ཏམ༌པ༌ ཅོ༌ཅེས༌ལ༌ འི༌གུན༌ ཅོས༌, ཏེ༌ནེ༌ ཁོང༌གུན༌ནི༌ བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ཨིན༌། ལང༌ཏོ༌ ལོ༌ ཆུ༌ངུན༌ ཅིག༌ དང༌ ལུག༌ཕོ༌ ཉིས༌ ཁྱོང༌, ཏེ༌གུན༌ སྐྱོན༌མེད༌ཁན༌ ཡོང༌གོས༌།
EXO 29:2 པག༌ཕེ༌ གྱལ༌ཤོག༌ ཀོལ༌ཏེ༌ སྐྱུར༌ མེད༌ཁན༌ནི༌ ཏ༌གི༌ སྣ༌ སུམ༌ ཅོས༌ ཀ༌གུན༌ མར༌ ཡོད༌ཁན༌, མར༌ མེད༌ཁན༌ དང༌ མར༌ སྐུས༌ཁན༌ནི༌ ཏ༌གི༌ སྲ༌མོ༌།
EXO 29:3 ཏེ༌གུན༌ པག༌ཙེ༌ ནང༌ང༌ གྱོང༌ ཡང༌ ལང༌ཏོ༌ དང༌ ལུག༌ཕོ༌ ཉིས༌ཀོ༌ ཉམ༌པོ༌ ང༌ ཆོད༌པ༌ ཕུལ༌།
EXO 29:4 ཨ༌རོན༌ དང༌ ཁོའེ༌ བུ༌ཚ༌གུན༌ ཡ༌ཝའ༌ ཐུག༌སའེ༌ ཀུར༌རི༌ སྒོའེ༌ཀ༌ ཁྱོངས༌ཏེ༌ ཆུ༌ ཉམ༌པོ༌ ཁྲུས༌།
EXO 29:5 ཏེ༌ནེ༌ ཨ༌རོན༌ལ༌ བླ༌མའེ༌ ཀོས༌ལག༌, ནང༌ཀུག༌གི༌ ཀོས༌, ཨེ༌ཕོད༌དི༌ ཡོག༌གི༌ ཀོས༌, ཨེ༌ཕོད༌ དང༌ ཀྲང༌ང༌ ཀབ༌ཅེས༌ གུན༌ སྐོན༌། ཨེ༌ཕོད༌དི༌ སྐྱེ༌རག༌ ལག༌སྲུལ༌ ཏང༌ཁན༌བོ༌ ཉམ༌པོ༌ ཏེ༌བོ༌ ལྡོམ༌།
EXO 29:6 ཁོའེ༌ གོའེ༌ཀ༌ ཐོད༌ སྐོན༌ ཡང༌ ཏེ༌བོའེ༌ཀ༌ ཐོར༌ཤོག༌ ཏམ༌པ༌བོ༌ ཐོད༌པོའེ༌ཀ༌ ཏོག༌།
EXO 29:7 ཏེ༌ནེ༌ ཁོའེ༌ གོའེ༌ཀ༌ མར༌ ལུགས༌ཏེ༌ ཁོ༌ བླ༌མའེ༌ ལས༌སི༌ ཕིའ༌ སྐོས༌།
EXO 29:8 ཁོའེ༌ བུ༌ཚ༌གུན༌ ཁྱོང༌ ཡང༌ ཁོང༌གུན༌ལའང༌ ནང༌ཀུག༌གི༌ ཀོས༌པོ༌ སྐོན༌།
EXO 29:9 ཁོང༌གུན༌ནི༌ སྐྱེད༌པའེ༌ཀ༌ སྐྱེ༌རགས༌ ལྡོམ༌ ཡང༌ གོའེ༌ཀ༌ ཏི༌བི༌ སྐོནས༌། ཏེ༌ནེ༌ ཁྲིམས༌ ནང༌ཞིན༌ ཏུས༌གྱུན༌ནི༌ ཕིའ༌ ཞབས༌ཏོག༌ ཞུ༌ཅེས༌སི༌ བླ༌མའེ༌ ལས༌པོ༌ ཁོང༌གུན༌ནི༌ གྱུར༌ཨིན༌། ཏེན༌ན༌ཟུག༌གི༌ ཁྱོ༌རང༌ངི༌ ཨ༌རོན༌ དང༌ ཁོའེ༌ བུ༌ཚ༌གུན༌ སྐོ༌གོས༌།”
EXO 29:10 “ཡ༌ཝའ༌ ཐུག༌སའེ༌ ཀུར༌རི༌ སྒོའེ༌ དུན༌ལ༌ ལང༌ཏོ༌ ཁྱོངས༌ཏེ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏེ༌བོའེ༌ གོའེ༌ཀ༌ ལག༌པ༌ བོར༌ཅུག༌།
EXO 29:11 ཡ༌ཝའེ༌ དུན༌ལ༌ སྒོའེ༌ཀ༌ ལང༌ཏོའེ༌ སྐེ༌ ཅད༌ཏེ༌ སོད༌།
EXO 29:12 ལང༌ཏོའེ༌ ཁྲག༌ ཙ༌པིག༌ཞིག༌ ཁྱོ༌རང༌ངི༌ ཛི༌གུ༌ ཉམ༌པོ༌ ཆོད༌ཁྲི༌ ཀྲུའི༌ རི༌ཅོ༌གུན༌ལ༌ སྐུས༌ ཡང༌ ལུས༌ཁན༌ནི༌ ཁྲག༌པོ༌ ཆོད༌ཁྲིའི༌ མག༌ལྡན༌ནི༌ཀ༌ ལུག༌།
EXO 29:13 ཏེ༌ནེ༌ ནང༌ཆ༌གུན༌ ཀབས༌ཁན༌ནི༌ ཚིལ༌ ཚང༌མ༌, ཆིན༌པའེ༌ ཁག༌ གྱལ༌ཤོག༌པོ༌ ཡང༌ ཁལ༌མ༌ ཉིས༌ཀོ༌ ཚིལ༌ ཉམ༌པོ༌ སྲོག༌ཆོད༌ ཕུལ༌སའེ༌ ཆོད༌ཁྲི༌ཀ༌ མེའ༌ སྲོག༌།
EXO 29:14 ཨིན༌ནའང༌ ལང༌ཏོའེ༌ ཤ༌, པགས༌པ༌ དང༌ གྱུ༌མ༌གུན༌ ལྕ༌ ཉམ༌པོ༌ ཀུར༌ ཙུགས༌ཏེ༌ ཡོད༌སའེ༌ ཕི༌ལོག༌ག༌ མེའ༌ སྲོག༌། ཏེ༌བོ༌ སྡིག༌པའེ༌ ཕིའ༌ ཆོད༌པ༌ ཨིན༌།”
EXO 29:15 “ལུག༌ཕོ༌ ཅིག༌པོ༌ ཁྱོང༌ ཡང༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏེ༌བོའེ༌ གོའེ༌ཀ༌ ལག༌པ༌ བོར༌ཅུག༌།
EXO 29:16 ཏེ༌བོ༌ སོད༌ ཡང༌ ཏེ༌བོའེ༌ ཁྲག༌གི༌ ཐོར༌མ༌ ཆོད༌ཁྲིའི༌ ཆོགས༌ ཞི༌ཀོའེ༌ཀ༌ ཏོང༌།
EXO 29:17 ལུག༌གི༌ ཤ༌ ཏུམ༌པ༌ཏུམ༌པ༌ ཅོས༌ཏེ༌ ནང༌ཆ༌ དང༌ ཡན༌ལག༌ ཚང༌མ༌ ཁྲུས༌ ཡང༌ ཏེ༌གུན༌ གོ༌ དང༌ ཞན༌ ཁག༌གུན༌ ཉམ༌པོ༌ བོར༌།
EXO 29:18 ལུག༌ གང༌པོ༌ ཆོད༌ཁྲི༌ཀ༌ མེའ༌ སྲོག༌། ཏེ༌བོ༌ ཡ༌ཝའེ༌ ཕིའ༌ མེའ༌ སྲག༌ཁན༌ནི༌ ཆོད༌པ༌ ཡང༌ ཏེ༌བོའེ༌ ཏྲི༌མའེ༌ ང༌ ཡ༌ཝ༌ ཐད༌ ཅུག༌ཨིན༌།”
EXO 29:19 “ཞན༌ ལུག༌ཕོ༌ ཅིག༌པོ༌ ཁྱོང༌ ཡང༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏེ༌བོའེ༌ གོའེ༌ཀ༌ ལག༌པ༌ བོར༌ཅུག༌།
EXO 29:20 ཏེ༌བོ༌ སོད༌ ཡང༌ ཏེ༌བོའེ༌ ཁྲག༌ ཙ༌པིག༌ཞིག༌ ཁུར༌ཏེ༌ ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ནམ༌ཅོག༌ ཡས༌པ༌, ལག༌པ༌ དང༌ རྐང༌པ༌ ཡས༌པའེ༌ ཐེ༌པོ༌ གུན༌ནི༌ཀ༌ སྐུས༌ ཡང༌ ཆོད༌ཁྲིའི༌ ཆོགས༌ ཞི༌ཀོའེ༌ཀ༌ ལུས༌ཁན༌ནི༌ ཁྲག༌གི༌ ཐོར༌མ༌ ཏོང༌།
EXO 29:21 ཆོད༌ཁྲི༌ཀ༌ ཡོད༌ཁན༌ནི༌ ཁྲག༌ ཙ༌པིག༌ དང༌ མར༌ནག༌ ཙ༌པིག༌ ཁུར༌ཏེ༌ ཨ༌རོན༌ དང༌ ཁོའེ༌ བུ༌ཚ༌གུན༌ དང༌ ཁོང༌ ཚང༌མའེ༌ ཀོས༌ལག༌གུན༌ནི༌ཀ༌ ཐོར༌མ༌ ཏོང༌། ཏེ༌ནེ༌ ཁོ༌, ཁོའེ༌ བུ༌ཚ༌གུན༌ ཡང༌ ཁོང༌གུན༌ནི༌ ཀོས༌ལག༌གུན༌ ཏམ༌པ༌ གྱུར༌ཨིན༌།”
EXO 29:22 “འི༌ ལུག༌ཕོ༌ ཨ༌རོན༌ དང༌ ཁོའེ༌ བུ༌ཚ༌གུན༌ བླ༌མའ༌ སྐོས༌ཁན༌བོའེ༌ ཕིའ༌ ཨིན༌ པ༌སང༌ ཏེ༌བོའེ༌ རྔ༌མ༌ དང༌ ནང༌ཆ༌གུན༌ནི༌ ཚིལ༌, ཆིན༌པའེ༌ ཁག༌ གྱལ༌ཤོག༌, ཁལ༌མ༌ ཉིས༌ཀོ༌ ཚིལ༌ ཉམ༌པོ༌ ཡང༌ རྐང༌པ༌ ཡས༌པའེ༌ ཤ༌ ཁུར༌།
EXO 29:23 ཏེ༌ནེ༌ ང༌ ཡ༌ཝའ༌ ཕུལ༌ཁན༌ནི༌ སྐྱུར༌ མེད༌ཁན༌ནི༌ ཏ༌གི༌ པག༌ཙེ༌ ནང༌ནེ༌ མར༌ ཡོད༌ཁན༌ ཅིག༌, མར༌ མེད༌ཁན༌ ཅིག༌ དང༌ མར༌ སྐུས༌ཁན༌ནི༌ ཏ༌གི༌ སྲ༌མོ༌ ཅིག༌ ཁུར༌།
EXO 29:24 ཏེ༌ ཚང༌མ༌ ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ལག༌པའེ༌ ནང༌ང༌ ཏོང༌ ཡང༌ ཏེ༌བོ༌ ཡ༌ཝའེ༌ སྐུན༌དུན༌ལ༌ ལན༌ ཁ༌ཅིག༌ སྟགས༌ཏེ༌ ཕབ༌ཅུག༌། ཏེ༌བོ༌ ངའེ༌ ཕིའ༌ ཡུག༌ཁན༌ནི༌ ཆོད༌པ༌ གྱུར༌ཨིན༌།
EXO 29:25 ཏེ༌ནེ༌ ཏེ༌གུན༌ ཁོང༌གུན༌ནི༌ ལག༌ནེ༌ ཁྱེར༌ཏེ༌ ཆོད༌ཁྲི༌ཀ༌ ཞན༌ མེའ༌ སྲག༌ཁན༌ནི༌ ཆོད༌པ༌ ཉམ༌པོ༌ མེའ༌ སྲོག༌། ཏེ༌བོའེ༌ ཏྲི༌མའེ༌ ང༌ ཡ༌ཝ༌ ཐད༌ ཅུག༌ཨིན༌ ཡང༌ ཏེ༌བོ༌ ངའེ༌ ཕིའ༌ མེའ༌ སྲག༌ཁན༌ནི༌ ཆོད༌པ༌ ཨིན༌ནོག༌།
EXO 29:26 ཆོད༌པ༌ ཕུལ༌ཁན༌ ལུག༌ཕོ༌ ཉིས༌པ༌བོའེ༌ ཀྲང༌ཤ༌ ཁུར༌ ཡང༌ ཡ༌ཝའེ༌ སྐུན༌དུན༌ལ༌ ལན༌ ཁ༌ཅིག༌ སྟགས༌ཏེ༌ ཕབས༌ཏེ༌ ཡུག༌ཁན༌ནི༌ ཆོད༌པ༌ ཕུལ༌། ཏེ༌ནེ༌ ཤའེ༌ ཏེ༌ ཁག༌པོ༌ ཁྱོ༌ཞའེ༌ གྱུར༌ཨིན༌།”
EXO 29:27 “ཨ༌རོན༌ དང༌ ཁོའེ༌ བུ༌ཚ༌གུན༌ བླ༌མའེ༌ ལས༌སི༌ ཕིའ༌ སྐོ༌ ཟ༌ནེ༌ ལུག༌ཕོའེ༌ ཤ༌ ཕུལ༌ཁན༌གུན༌ ཕེས༌ཏེ༌ བོར༌, ཀ༌བོའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཡུག༌ཁན༌ནི༌ ལུག༌གི༌ ཀྲང༌ དང༌ སྟག༌ཁན༌ནི༌ རྐང༌པའེ༌ ཤ༌ གུན༌ ཐེས༌ཏེ༌ ཨིན༌ནོག༌།
EXO 29:28 དཀོན༌མཆོག༌ ཉམ༌པོ༌ ཞི༌དེ༌ བྲེལ༌ལི༌ ཕིའ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཆོད༌པ༌ ཕུལ༌ཁན༌ནི༌ ཤའེ༌ ཁག༌པོ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཏུས༌གྱུན༌ ཏང༌གོས༌།”
EXO 29:29 “ཨ༌རོན༌ ཤི༌ཏེ༌ སྟིང༌ནེ༌ ཏམ༌པའེ༌ ཀོས༌ལག༌གུན༌ ཁོའེ༌ བུ༌ཚ༌གུན༌ལ༌ སྟད༌གོས༌། ཁོང༌གུན༌ལ༌ ཏེ༌གུན༌ སྐོན༌ཏེ༌ ཁོང༌གུན༌ནི༌ གོའེ༌ཀ༌ མར༌ ལུགས༌ཏེ༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ཅེས༌ལ༌ སྐོས༌།
EXO 29:30 ཨ༌རོན༌ནི༌ ཚབས༌ལ༌ བླ༌མ༌ གྱུར༌ཁན༌ནི༌ ཁོའེ༌ བུ༌ཚ༌, ཡ༌ཝའ༌ ཐུག༌སའེ༌ ཀུར༌རི༌ ཏམ༌པ༌ ནས༌སའེ༌ ནང༌ང༌ ལུག༌སྲོལ༌གུན༌ ཅོ༌ཨིན༌ ཞག༌མ༌ རྡུན༌ དུག༌ ཟ༌ནེ༌ ཏེ༌ ཀོས༌ལག༌གུན༌ གོན༌གོས༌།”
EXO 29:31 “ཨ༌རོན༌ དང༌ ཁོའེ༌ བུ༌ཚ༌གུན༌ སྐོ༌ ཟ༌ནེ༌ ལུག༌ཕོའེ༌ ཤ༌ ཆོད༌པ༌ ཕུལ༌ཁན༌བོ༌ ཏམ༌པ༌ ཀུར༌རི༌ ནང༌སྐོར༌རི༌ ནས༌ས༌ ཞིག༌གི༌ཀ༌ ཁྱེར༌ཏེ༌ སྐོལ༌།
EXO 29:32 ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ལུག༌ཕོའེ༌ ཤ༌ དང༌ པག༌ཙེ༌ ནང༌ང༌ ཡོད༌ཁན༌ནི༌ ཏ༌གི༌ ཏམ༌པ༌ གུན༌ ཀུར༌རི༌ སྒོའེ༌ དུན༌ལ༌ ཟ༌གོས༌།
EXO 29:33 བླ༌མའེ༌ ལས༌སི༌ ཕིའ༌ སྐོ༌ ཟ༌ནེ༌ ཁོང༌གུན༌ནི༌ སྡིག༌པ༌གུན༌ནི༌ ཤགས༌པའེ༌ ཕིའ༌ ཆོད༌པ༌ ཏང༌ཁན༌ནི༌ ཤ༌ ཟ༌གོས༌། བླ༌མ༌གུན༌ མན༌པ༌ ཞན༌སུའིང༌ ཏེ༌གུན༌ ཟའ༌ མི༌ཆོག༌ ཅིའ༌ཟེར༌ན༌ ཏེ༌གུན༌ ཏམ༌པ༌ ཨིན༌ནོག༌།
EXO 29:34 ཀལ༌ཏེས༌ ཆོད༌པ༌ ཕུལ༌ཁན༌ནི༌ ཤ༌ ཡ༌ ཏ༌གི༌ ང༌མོ༌ ཚག༌པ༌ ལུས༌ན༌ ཏེ༌གུན༌ མེའ༌ སྲག༌གོས༌། ཏེ༌གུན༌ ཟའ༌ མི༌ཆོག༌ ཅིའ༌ཟེར༌ན༌ ཏེ༌བོ༌ ཏམ༌པ༌ ཨིན༌ནོག༌།”
EXO 29:35 “ངའེ༌ ཁྱོ༌རང༌ང༌ བཀའ༌ ཏང༌ཁན༌ ཚང༌མ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཅོས༌། ཁོང༌གུན༌ བླ༌མའེ༌ ལས༌ལ༌ སྐོ༌ཅེས༌སི༌ ལུག༌སྲོལ༌གུན༌ ཅོ༌ཅེས༌ལ༌ ཞག༌པོ༌ རྡུན༌ གོར༌ཨིན༌།
EXO 29:36 ཏེ༌ རྡུན༌ཞག༌པོའེ༌ ནང༌ང༌ སྡིག༌པ༌གུན༌ནི༌ ཤགས༌པའེ༌ ཕིའ༌ ཞག༌ཏང༌ ལང༌ཏོ༌ ཅིག༌ ཆོད༌པ༌ ཕུལ༌, ཆོད༌ཁྲི༌ རྩང༌མ༌ ཅོས༌ ཡང༌ ཨོ༌ལིཝ༌ཝི༌ མར༌ ལུགས༌ཏེ༌ ཏེ༌བོ༌ ཏམ༌པ༌ ཅོས༌།
EXO 29:37 ཆོད༌ཁྲི༌ ཏམ༌པ༌ ཅོ༌ཅེས༌ལ༌ ཞག༌མ༌ རྡུན༌ ཆོད༌པ༌ ཕུལ༌། ཏེ༌ནེ༌ ཏེ༌བོ༌ ཏེ༌ཟམ༌ ཏམ༌པ༌ གྱུར༌ཨིན༌ ཏེ༌བོའ༌ ལག༌པ༌ རྩེ༌ཁན༌ ཡ༌ ཐུག༌ཁན༌བོའང༌ ཏམ༌པ༌ གྱུར༌ཨིན༌།”
EXO 29:38 “ཞག༌ཏང༌ ཆོད༌ཁྲི༌ཀ༌ ལོ༌ ཅིག༌པ༌ ལུ༌གུ༌ ཉིས༌ ཆོད༌པ༌ ཕུལ༌།
EXO 29:39 ཅིག༌པོ༌ ང༌མོ༌, ཡང༌ ཅིག༌པོ༌ ཕི༌ཏོག༌།
EXO 29:40 ལུ༌གུ༌ ཏང༌པོ༌ ཉམ༌པོ༌ ཀྱི༌ལོ༌ ཅིག༌ གྱལ༌ལ༌ པག༌ཕེ༌ ནང༌ང༌ ལི༌ཀྲར༌ ཅིག༌གི༌ ཨོ༌ལིཝ༌ཝི༌ མར༌ནག༌ སྲེས༌ཁན༌ ཡང༌ རྒུན༌ཆང༌ ལི༌ཀྲར༌ ཅིག༌ ཆོད༌པའ༌ ཕུལ༌།
EXO 29:41 ལུ༌གུ༌ ཉིས༌པ༌བོ༌ ཕི༌ཏོག༌ ཆོད༌པ༌ ཕུལ༌ ཡང༌ ཏེ༌བོ༌ ཉམ༌པོ༌ ང༌ཏོག༌ ཕུལ༌ཁན༌ ཟམ༌ཞིག༌གི༌ པག༌ཕེ༌, ཨོ༌ལིཝ༌ཝི༌ མར༌ནག༌ དང༌ རྒུན༌ཆང༌ གུན༌ ཕུལ༌། ཏེ༌གུན༌ ང༌ ཡ༌ཝའེ༌ ཕིའ༌ ཆོད༌པ༌ མེའ༌སྲགས༌ཁན༌ ཡང༌ ཏེ༌བོའེ༌ ཏྲི༌མའེ༌ ང༌ ཡ༌ཝ༌ ཐད༌ ཅུག༌ཨིན༌།”
EXO 29:42 “མི༌རབས༌ནེ༌ མི༌རབས༌ འི༌ མེའ༌ སྲག༌ཁན༌ནི༌ ཆོད༌པ༌བོ༌ ཀུར༌རི༌ སྒོའེ༌ཀ༌ ཡ༌ཝའེ༌ དུན༌ལ༌ ཅད༌མ༌ཅུག༌ག༌ ཕུལ༌གོས༌། ཏེ༌ཀ༌ ང༌ ཁྱོ༌ཞའ༌ ཉམ༌པོ༌ ཐུགས༌ཏེ༌ ཁྱོ༌རང༌ང༌ སྤེ༌ར༌ ཏང༌ཨིན༌།
EXO 29:43 ཏེ༌ཀ༌ ང༌ ཨིས༌ར༌ཨེལ༌པ༌གུན༌ ཉམ༌པོ༌ ཐུག༌ཨིན༌ ཡང༌ ངའེ༌ སྤལ༌ ཏེ༌ཀ༌ ཡོད༌ཅེས༌པའེ༌ ཏེ༌ ནས༌ས༌བོ༌ ཏམ༌པ༌ ཅོ༌ཨིན༌།
EXO 29:44 ངའེ༌ ཀུར༌ དང༌ ཆོད༌ཁྲི༌ ཏམ༌པ༌ ཅོ༌ཨིན༌ ཡང༌ ངའེ༌ ཨ༌རོན༌ དང༌ ཁོའེ༌ བུ༌ཚ༌གུན༌ ཏམ༌པ༌ ཅོས༌ཏེ༌ བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ཅེས༌ལ༌ སྐོ༌ཨིན༌།
EXO 29:45 ང༌ ཨིས༌ར༌ཨེལ༌པ༌གུན༌ནི༌ ཕྲོའ༌ དུགས༌ཏེ༌ ཁོང༌གུན༌ནི༌ དཀོན༌མཆོག༌ གྱུར༌ཨིན༌།
EXO 29:46 ང༌ ཁོང༌གུན༌ནི༌ ཕྲོའ༌ དུག༌ཅེས༌ ཡང༌ ཁོང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ ང༌ ཡ༌ཝ༌ ཁོང༌གུན༌ནི༌ དཀོན༌མཆོག༌ ཨིན༌ཁན༌བོ༌ ཁོང༌གུན༌ནི༌ ཧ༌གོ༌ཨིན༌། ང༌ ཡ༌ཝ༌ ཁོང༌གུན༌ནི༌ དཀོན༌མཆོག༌ ཨིན༌།”
EXO 30:1 ཡ༌ཝའེ༌ མོ༌ཟེས༌ལ༌ མོལས༌, “སྤོས༌ ཏུག༌ཅེས༌སིི༌ ཕིའ༌ ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ ཅོས༌།
EXO 30:2 ཏེ༌བོ༌ ཀྲུབ༌ཞི༌, ལྡོ༌གུན༌ སེན༌ཀྲི༌མི༌ཀྲར༌ 45 ཡང༌ ཐོན༌བོ༌ སེན༌ཀྲི༌མི༌ཀྲར༌ 90 ཡོང༌གོས༌། ཏེ༌བོའེ༌ ཀྲུ༌ ཞི༌ཀོ༌ རཱ༌ཅོ༌ ཙོགས༌ ཙེབ༌ཙེབ༌ ཅོ༌གོས༌ ཡང༌ ཏེ༌གུན༌ ཆོད༌ཁྲི༌ ཉམ༌པོ༌ ཤིང༌ཅིག༌ག༌ ཞོག༌གོས༌།
EXO 30:3 ཆོད༌ཁྲི༌ གང༌པོ༌ ཡང༌ན༌ ཏེ༌བོའེ༌ ཐོག༌, ཆོག༌ ཞི༌ཀོ༌ དང༌ རཱ༌ཅོ༌ གུན༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམ༌ ཡང༌ ཏེ༌བོའེ༌ ཐའ༌མ༌ ཀྱིར༌སྐོར༌ཏེ༌ སེར༌རི༌ ཐའ༌རིལ༌ ཏོང༌།
EXO 30:4 སེར༌རི༌ ཀྱི༌ལྡིར༌ ཅོས༌ཏེ༌ ཆོགས༌ ཉིས༌ཀོའེ༌ཀ༌ སེར༌རི༌ ཐའ༌རིལ༌ ཏང༌ཁན༌ནི༌ ཡོག༌ག༌ ཏོག༌, ཏེ༌ནེ༌ ཏེ༌བོ༌ ཁུར༌ཅེས༌སི༌ ཀྲ༌ལུ༌ གུན༌ ཏེ༌ནང༌ང༌ གྱུད༌ ཉན༌ཨིན༌།
EXO 30:5 ཏེ༌ ཀྲ༌ལུ༌གུན༌ ཨ༌ཀ༌ཤིའེ༌ ཤིང༌, སེར༌ ཉམ༌པོ༌ ཏུམས༌ཏེ༌ ཡོང༌གོས༌།
EXO 30:6 ཆོད༌ཁྲི༌བོ༌ ཆད༌དོན༌ནི༌ སྒམ༌ དང༌ མི༌གུན༌ནི༌ སྡིག༌པའ༌ ཤགས༌པ༌ ཏང༌སའེ༌ སྒམ༌མི༌ ཁའ༌ལེབ༌, ང༌ ཁྱོ༌རང༌ ཉམ༌པོ༌ ཐུག༌སའེ༌ དུན༌ ཆོགས༌ལ༌ ཡོད༌ཁན༌ནི༌ ཡོ༌ལའེ༌ ཉེ༌མོའ༌ ཏམ༌པའེ༌ ནས༌སའེ༌ ནང༌ང༌ བོར༌།”
EXO 30:7 “ཞག༌ཏང༌ ང༌མོ༌ ཨ༌རོན༌ འོད༌སྟག༌གི༌ འོད༌གུན༌ནི༌ སྟ༌སྟོག༌ ཅོའ༌ ཆ༌ ཟ༌ནེ༌ ཁོའེ༌ ཏེ༌ ཆོད༌ཁྲི༌ཀ༌ ཏྲི༌ཞིམ༌ཅན༌ནི༌ སྤོས༌ དུག༌གོས༌།
EXO 30:8 ཕི༌ཏོག༌ འོད༌སྟག༌གུན༌ནི༌ འོད༌ སྤར༌ར༌ ཆ༌ ཟ༌ནེ༌ ཡ༌ཝའེ༌ སྐུན༌དུན༌ལ༌ ཁོའེ༌ ཆོད༌ཁྲི༌ཀ༌ སྤོས༌ དུག༌གོས༌། མི༌རབས༌ནེ༌ མི༌རབས༌ ཏེ༌བོ༌ ཅོ༌གོས༌།
EXO 30:9 འི༌ ཆོད༌ཁྲི༌ཀ༌ ཏམ༌པ༌ མན༌ཁན༌ནི༌ སྤོས༌ ཡ༌ ཞན༌ མེའ༌ སྲག༌ཁན༌ནི༌ ཆོད༌པ༌ ཡ༌ ཀྲོ༌ནས༌སི༌ ཆོད༌པ༌ གུན༌ མ༌ཕུལ༌ ཡང༌ ཏེ༌ཀ༌ རྒུན༌ཆང༌ངི༌ ཆོད༌པའང༌ མ༌ཕུལ༌།
EXO 30:10 ལོའེ༌ ནང༌ང༌ ལན༌ཅིག༌ ཨ༌རོན༌ནི༌ ཆོད༌ཁྲི༌ རྩང༌མ༌ ཅོ༌ཅེས༌ལ༌ མི༌གུན༌ནི༌ སྡིག༌པའེ༌ ཤགས༌པའེ༌ ཕིའ༌ ཆོད༌པ༌ ཕུལ༌ཁན༌ནི༌ ཁྲག༌ ཏེ༌བོའེ༌ རཱ༌ཅོ༌གུན༌ནི༌ཀ༌ སྐུ༌གོས༌། འི༌བོ༌ མི༌རབས༌ནེ༌ མི༌རབས༌ ཅོ༌གོས༌། ཡ༌ཝའེ༌ འི༌ ཆོད༌ཁྲི༌བོ༌ ཚང༌མའེ༌སང༌ ཏམ༌པ༌ ཐེའ༌ཛདས༌།”
EXO 30:11 ཡ༌ཝའེ༌ མོ༌ཟེས༌ལ༌ མོལས༌,
EXO 30:12 “ཁྱོ༌རང༌ངི༌ ཨིས༌ར༌ཨེལ༌པ༌གུན༌ནི༌ ཀྲངས༌ཀ༌ ལེན༌ ཟ༌ནེ༌ མི༌ རེ༌རེའེ༌ ཁོ༌རང༌ངི༌ མི༌ཚེ༌ ཕིའ༌ ཡ༌ཝའ༌ རིན༌ ཤལ༌གོས༌། ཏེ༌ནེ༌ མིང༌ ཅུག༌ ཟ༌ནེ༌ ཁོང༌གུན༌ནི༌ཀ༌ ཅའང༌ ནོད༌སྐྱལ༌ མི༌ཡོང།
EXO 30:13 མི༌ ཀྲངས༌སི༌ ནང༌ང༌ མིང༌ཆུད༌ཁན༌ རེ༌རེའེ༌ མུལ༌ གརམ༌ 5.5 ཟམ༌ཤིག༌ ཡ༌ཝའ༌ ཆོད༌པའེ༌ ཚུལ༌ལ༌ ཏང༌གོས༌, ཏེ༌བོ༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌ ནང༌ཞིན༌ ཡོང༌གོས༌།
EXO 30:14 ལོ༌ ཉི༌ཤུ༌ ཡང༌ ཏེ༌སང༌ མང༌ང༌ ཨིན༌ཁན༌ནི༌ མི༌ཚང༌མ༌, མི༌ ཀྲངས༌སི༌ ནང༌ང༌ རྩི༌གོས༌ ཡང༌ ཁོང༌གུན༌ནི༌ ཡ༌ཝའ༌ ཆོད༌པ༌བོ༌ ཕུལ༌གོས༌།
EXO 30:15 མི༌ཚེ༌ སྐྱོབ༌ཅེས༌ལ༌ རིན༌ ཤལ༌ཏེ༌ ཡ༌ཝའ༌ ཆོད༌པ༌ ཕུལ༌ ཟ༌ནེ༌ ཆུག༌པོ༌གུན༌ནི༌ མུལ༌ གརམ༌ 5.5 སང༌ མང༌ང༌ ཡང༌ ཉལ༌བ༌ཅན༌གུན༌ནི༌ ཏེ༌སང༌ ཉུ༌ངུན༌ ཏང༌ མ༌གོས༌།
EXO 30:16 ཨིས༌ར༌ཨེལ༌པ༌གུན༌ནི༌ ཀ༌ནེ༌ ཆོད༌པ༌ ཕུལ༌ཁན༌ནི༌ པེ༌ནེ༌ ཏམ༌པ༌ ཀུར༌རི༌ ཟོབ༌སྐྱོར༌ དང༌ ཞན༌ ལས༌གུན༌ནི༌ ཕིའ༌ ཀོལ༌གོས༌། ཏེ༌བོའེ༌ ཡ༌ཝའེ༌ སྐུན༌དུན༌ལ༌ ཁོང༌གུན༌ནི༌ མི༌ཚེའེ༌ ཕིའ༌ རིན༌ ཤལ༌ཁན༌བོ༌ ཁོང༌གུན༌ལ༌ ཨིད༌ཏུ༌ སྐུལ༌ཨིན༌།”
EXO 30:17 ཡ༌ཝའེ༌ མོ༌ཟེས༌ལ༌ མོལས༌,
EXO 30:18 “ར༌གན༌ནི༌ ལག༌པ༌ ཁྲུ༌ཅེས༌སི༌ ཞོང༌པ༌ ཡང༌ ཏེ༌བོ༌ བོར༌ཅེས༌པོའང༌ ར༌གན༌ནི༌ ཅོས༌། ཏེ༌བོ༌ ཏམ༌པ༌ ཀུར༌ དང༌ ཆོད༌པ༌ མེའ༌ སྲག༌སའེ༌ ཆོད༌ཁྲི༌ པར༌ལ༌ བོར༌ཏེ༌ ཆུ༌ སྐོང༌།
EXO 30:19 ཏེ༌ ཆུ༌ ཉམ༌པོ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ལག༌པ༌ དང༌ རྐང༌པ༌ གུན༌ ཁྲུ༌ཅུག༌།
EXO 30:20 ཤི༌ཅུག༌ག༌ མི༌ཛད༌ཅེས༌ལ༌ ཡ༌ཝའ༌ ཐུག༌སའེ༌ ཀུར༌རི༌ ནང༌ང༌ ཆའེ༌སང༌ སྔུན༌ལ༌ ཡང༌ ཡ༌ཝའེ༌ ཕིའ༌ ཆོད༌ཁྲི༌ཀ༌ ཆོད༌པ༌ ཕུལ༌ཏེ༌ མེའ༌ སྲག༌གི༌སང༌ སྔུན༌ལ༌ ཁོང༌གུན༌ནི༌ ཏེ༌ ཆུ༌ ཉམ༌པོ༌ ལག༌པ༌ ཁྲུ༌གོས༌།
EXO 30:21 ཤི༌ཅུག༌ག༌ མི༌ཛད༌ཅེས༌སི༌ ཕིའ༌ ཁོང༌གུན༌ནི༌ ལག༌པ༌ དང༌ རྐང༌པ༌ གུན༌ ཁྲུ༌གོས༌། འི༌ ཁྲིམས༌པོ༌ མི༌རབས༌ནེ༌ མི༌རབས༌ ཨ༌རོན༌ དང༌ ཁོའེ༌ པུར༌གྱུད༌གུན༌ནི༌ སྲུང༌གོས༌།”
EXO 30:22 ཡ༌ཝའེ༌ མོ༌ཟེས༌ལ༌ མོལས༌,
EXO 30:23 “འི༌ ཚ༌མིག༌ གྱལ༌ལ༌གུན༌ ཁྱོང༌, མའེར༌ ཟེར༌ཁན༌ནི༌ མར༌ ཀྱི༌ལོ༌ 6, ཏྲི༌ཞིམ༌ཅན༌ནི༌ དཱལ༌ཅིན༌ནི༌ ཀྱི༌ལོ༌ 3 དང༌ ཏྲི༌ཞིམ༌ཅན༌ནི༌ ལྡམ༌བུ༌ ཀྱི༌ལོ༌ 3,
EXO 30:24 ཀ༌སིའ༌ ཟེར༌ཁན༌ ཏྲི༌ཞིམ༌ཅན༌ནི༌ ཤིང༌ ཀྱི༌ལོ༌ 6 ཡང༌ ཨོ༌ལིཝ༌ཝི༌ མར༌ནག༌ ལི༌ཀྲར༌ ཞི༌། ཏེ༌གུན༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌ ནང༌ཞིན༌ ཡོང༌གོས༌།
EXO 30:25 ཏྲི༌ཞིམ༌ ཅོ༌ཁན༌ ཁས༌པ༌ མི༌ ཙོགས༌ལ༌ ཏེ༌གུན༌ སྲེས༌ཏེ༌ ཁྲུས༌ཏང༌ཅེས༌སི༌ ཏམ༌པའེ༌ མར༌ནག༌ ཅོས༌།
EXO 30:26 ཏེ༌བོ༌ ཡ༌ཝའ༌ ཐུག༌སའེ༌ ཀུར༌ དང༌ ཆད༌དོན༌ནི༌ སྒམ༌མི༌ཀ༌,
EXO 30:27 ཅོག༌ཙེ༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌, འོད༌སྟགས༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ དང༌ སྤོས༌ དུག༌སའེ༌ ཆོད༌ཁྲི༌,
EXO 30:28 ཆོད༌པ༌ མེའ༌ སྲག༌སའེ༌ ཆོད༌ཁྲི༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ས༌ གུན༌ ཏམ༌པ༌ ཅོ༌ཅེས༌ལ༌ ཡོག༌།
EXO 30:29 ཁྱོ༌རང༌ངི༌ ཅ༌ལག༌ ཚང༌མ༌ ཏེ༌ཟུག༌གི༌ རྩང༌མ༌ ཅོས༌ ཏེ༌ནེ༌ ཏེ༌གུན༌ ཏེ༌ཟམ༌ ཏམ༌པ༌ གྱུར༌ཨིན༌, ཏེ༌གུན༌ལ༌ ཐུག༌ཁན༌ གུན༌ ཏམ༌པ༌ གྱུར༌ཨིན༌།”
EXO 30:30 “བླ༌མའེ༌ ཚུལ༌ལ༌ ངའ༌ ཞབས༌ཏོག༌ ཞུ༌ཅེས༌སི༌ ཕིའ༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ མར༌ནག༌ ལུགས༌ཏེ༌ ཁྲུས༌ཏོང༌།
EXO 30:31 ཨིས༌ར༌ཨེལ༌པ༌གུན༌ལ༌ ཟེར༌, ‘འི༌ ཁྲུས༌ཏང༌ཅེས༌སི༌ ཏམ༌པའེ༌ མར༌བོ༌ ཡོང༌ཅེས༌ཅན༌ནི༌ མི༌རབས༌གུན༌ནི༌ ངའ༌ ཞབས༌ཏོག༌ ཞུ༌ཅེས༌སི༌ ནང༌ང༌ ཀོལ༌གོས༌།
EXO 30:32 འི༌བོ༌ ཨམ༌ མི༌ ཟུགས༌པོའ༌ ལུག༌ མ༌གོས༌ ཡང༌ ཁྱོ༌ཞའེ༌ ཏེ༌ ཚ༌མིག༌གུན༌ སྲེས༌ཏེ༌ ཏེན༌ན༌ ཙོགས༌ མར༌ ཅོ༌ མ༌གོས༌། ཏེ༌བོ༌ ཏམ༌པ༌ ཨིན༌ནོག༌ ཡང༌ ཁྱོ༌ཞེའང༌ ཏེ༌བོ༌ ཏམ༌པ༌ རྩི༌གོས༌།
EXO 30:33 སུ༌ཞིག༌གི༌ ཏེ༌ ཙོགས༌ ཏྲི༌ཞིམ༌མི༌ མར༌ ཅོ༌ན༌ ཡ༌ ཏེ༌བོ༌ བླ༌མ༌ མན༌ཁན༌ནི༌ མིའ༌ ཁྲུས༌ཏང༌ཅེས༌ལ༌ ཀོལ༌ན༌ ཏེ༌ མི༌བོ༌ ངའེ༌ མི༌གུན༌ནི༌ ཕྲོ༌ནེ༌ ཕིངས༌ཏོང༌།’”
EXO 30:34 ཡ༌ཝའེ༌ མོ༌ཟེས༌ལ༌ མོལས༌, “འི༌ ཏྲི༌ཞིམ༌ཅན༌ནི༌ ཚ༌མིག༌, ཡང༌ན༌ སྐྲག༌ཀྲེ༌, ཨོ༌ནའི༌ཅ༌, གལ༌བ༌ནམ༌ དང༌ ཅའང༌ མ༌དྲེས༌ཁན༌ནི༌ ཕརང༌ཀེན༌སེནས༌ གུན༌ ཁྱོང༌, ཏེ༌ ཚང༌མ༌ དྲན༌དྲའ༌ ཡོང༌གོས༌།
EXO 30:35 ཏྲི༌ཞིམ༌ ཅོ༌ཁན༌ ཁས༌པ༌ མི༌ ཙོགས༌ལ༌ ཏེ༌གུན༌ སྲེས༌ ཡང༌ ཚཱ༌ ཏབས༌ཏེ༌ ཏེ༌བོ༌ ལག༌མོ༌ དང༌ ཏམ༌པ༌ ཅོས༌།
EXO 30:36 ཏེ༌བོའེ༌ ནང༌ནེ༌ ཙ༌པིག༌ཤིག༌ ཇམ༌པོ༌ ཀྲལ༌ཏེ༌ ང༌ ཁྱོ༌རང༌ ཉམ༌པོ༌ ཐུག༌སའེ༌ ཏམ༌པ༌ ཀུར༌རི༌ ནང༌ང༌ ཆད༌དོན༌ནི༌ སྒམ༌མི༌ དུན༌ལ༌ བོར༌། ཁྱོ༌ཞའེ༌ ཏེ༌བོ༌ ཚང༌མའེ༌སང༌ ཏམ༌པ༌ རྩི༌གོས༌།
EXO 30:37 ཁྱོ༌ཞ༌རང༌ངི༌ ཕིའ༌ འི༌ ཙོགས༌ སྤོས༌ ཅོ༌ མ༌གོས༌། ཡ༌ཝའེ༌ ཕིའ༌ ཏེ༌བོ༌ ཏམ༌པ༌ རྩིས༌།
EXO 30:38 སུ༌ཞིག༌གི༌ ཏེ༌ ཙོགས༌ ཏྲི༌ཞིམ༌ ཅོས༌ཏེ༌ ཁོ༌རང༌ངི༌ ཕིའ༌ ཀོལ༌ན༌ ཁོ༌ ངའེ༌ མི༌གུན༌ནི༌ ཕྲོ༌ནེ༌ ཕིངས༌ཏོང༌།”
EXO 31:1 ཡ༌ཝའེ༌ མོ༌ཟེས༌ལ༌ མོལས༌,
EXO 31:2 “ངའེ༌ ཡ༌ཧུ༌དཱའེ༌ སྡེ༌ ནང༌ནེ༌ ཨུ༌རི༌ བུ༌ཚ༌, ཧུར༌རི༌ ཚ༌འོ༌ བེ༌ཟ༌ལེལ༌ ལྡམས༌ཏེ༌ ཨིན༌
EXO 31:3 ཡང༌ ཁོའེ༌ ནང༌ང༌ ངའེ༌ ཐུག༌ཉིད༌ སྐངས༌ཏེ༌ ཁོ༌ ཟོ༌ལས༌སི༌ རིགས༌ ཚང༌མའེ༌ ནང༌ང༌ ཁས༌པ༌, ཡང༌ ཁོའ༌ ཁྱུད༌ དང༌ རིག༌པ༌ ཏངས༌ཏེ༌ ཨིན༌།
EXO 31:4 སེར༌, མུལ༌ དང༌ ར༌གན༌ ཉམ༌པོ༌ མ༌ ཁས༌པ༌ རི༌མོ༌ སྲུལ༌ཁན༌,
EXO 31:5 ཁྲ༌རྡོའ༌ ཅད༌ཏེ༌ སེར༌རི༌ ནང༌ང༌ ཅུག༌ཅེས༌ ཡང༌ ཤིང༌ སྐོས༌ དང༌ ཟོ༌ལས༌སི༌ རིགས༌ ཚང༌མའེ༌ ནང༌ང༌ ཁས༌པ༌ ཅོས༌ཏེ༌ ཨིན༌།
EXO 31:6 ངའེ༌ དཱན༌ནི༌ སྡེ༌ ནང༌ནེ༌ ཨ༌ཧི༌ས༌མག༌གི༌ བུ༌ཚ༌ ཨོ༌ཧོ༌ལིའབ༌ ཁོའ༌ ཡ༌ཏོ༌ ཅོ༌ཅེས༌ལ༌ ལྡམས༌ཏེ༌ ཨིན༌, ཡང༌ ངའེ༌ བཀའ༌ ཏང༌ཁན༌ ནང༌ཞིན༌ ཅོ༌ཅེས༌ལ༌ ངའེ༌ ཞན༌ ལག༌ཤེས༌ ཚང༌མའ༌ ཁས༌པ༌ ལས༌ ཅོ༌ཅེས༌སི༌ ཁྱུད༌ ཏངས༌ཏེ༌ ཨིན༌།
EXO 31:7 ཡ༌ཝའ༌ ཐུག༌སའེ༌ ཀུར༌, ཆད༌དོན༌ནི༌ སྒམ༌ དང༌ ཏེ༌བོ༌ ཀབས༌ཁན༌ནི༌ ཐུག༌རྗེ༌ ཁའ༌ལེབ༌ ཡང༌ ཀུར༌རི༌ ནང༌ཀུག༌ག༌ ཡོད༌ཁན༌ནི༌ ཅ༌ལག༌ ཚང༌མ༌ ངའེ༌ བཀའ༌ ཏང༌ཁན༌ ནང༌ཞིན༌ ཅོ༌གོས༌:
EXO 31:8 ཡང༌ན༌ ཅོག༌ཙེ༌ དང༌ ཏེ༌ཀ༌ ཀོལ༌ཁན༌ ཚང༌མ༌, ཅའང༌ མ༌དྲེས༌ཁན༌ནི༌ སེར༌རི༌ འོད༌སྟགས༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌, སྤོས༌ དུག༌ཅེས༌སི༌ ཆོད༌ཁྲི༌,
EXO 31:9 ཆོད༌པ༌ མེའ༌ སྲག༌ཅེས༌སི༌ ཆོད༌ཁྲི༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌, ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ས༌,
EXO 31:10 ཀོས༌ལག༌ ཙེམས༌ཁན༌ ལྡེ༌མོ༌གུན༌ ཡང༌ན༌ ཨ༌རོན༌ བླ༌མའེ༌ ཕིའ༌ ཏམ༌པ༌ ཀོས༌ལག༌ དང༌ ཁོའེ༌ བུ༌ཚ༌གུན༌ནི༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ ཟ༌ནེ༌ གོན༌ཅེས༌སི༌ ཀོས༌ལག༌གུན༌,
EXO 31:11 ཏམ༌པ༌ ནས༌སའེ༌ ཕིའ༌ ཁྲུས༌ཏང༌ཅེས༌སི༌ མར༌ནག༌ དང༌ ཏྲི༌ཞིམ༌ཅན༌ནི༌ སྤོས༌། འི༌ ཚང༌མ༌ ངའེ༌ བཀའ༌ ཏང༌ཁན༌ ནང༌ཞིན༌ ཅོ༌གོས༌།”
EXO 31:12 ཡ༌ཝའེ༌ མོ༌ཟེས༌ལ༌ མོལས༌,
EXO 31:13 “ཨིས༌ར༌ཨེལ༌པ༌གུན༌ལ༌ ཟེར༌, ‘ཁྱོ༌ཞའེ༌ ངའེ༌ ཤབ༌བད༌, ངལ༌ཚོའེ༌ ཞག༌པོ༌ སྲུང༌གོས༌། ཡོང༌ཅེས༌ཅན༌ནི༌ མི༌རབས༌གུན༌ནི༌ ཕིའ༌ འི༌བོ༌ ཁྱོ༌ཞའ༌ དང༌ ངའེ༌ པར༌ལ༌ སྟགས༌ཤིག༌ ཨིན༌, ཏེ༌ནེ༌ ང༌ ཡ༌ཝའེ༌ ཁྱོ༌ཞའ༌ ཏམ༌པ༌ ཅོ༌ཅེས༌པོ༌ ཁྱོ༌ཞའེ༌ ཤེས༌ཨིན༌།’”
EXO 31:14 “ཁྱོ༌ཞའེ༌ ཤབ༌བད༌དི༌ ངལ༌ཚོའེ༌ ཞག༌ སྲུང༌གོས༌ ཅིའ༌ཟེར༌ན༌ ཏེ༌ ཞག༌པོ༌ ཁྱོ༌ཞའེ༌ ཕིའ༌ ཏམ༌པ༌ ཨིན༌། ཏེ༌ ཞག༌པོ༌ ཏམ༌པ༌ མ༌རྩི༌ཁན༌ནི༌ མི༌བོ༌ སད༌གོས༌, ཡང༌ ཏེ༌ ཞག༌ག༌ ལས༌ ཅོ༌ཁན༌གུན༌ ངའེ༌ མི༌གུན༌ནི༌ ཕྲོ༌ནེ༌ ཕིང༌གོས༌།
EXO 31:15 ཞག༌ དྲུག༌ ཁྱོ༌ཞ༌གུན༌ནི༌ ལས༌ ཅོས༌ ཨིན༌ནའང༌ ཞག༌ རྡུན༌པ༌བོ༌ ཡ༌ཝའེ༌ ཕིའ༌ ཏམ༌པ༌, ཤབ༌བད༌ ངལ༌ཚོའེ༌ ཞག༌ ཨིན༌། ཏེ༌ ཞག༌ག༌ ལས༌ ཅོ༌ཁན༌ནི༌ མི༌བོ༌ སད༌གོས༌།
EXO 31:16 ཨིས༌ར༌ཨེལ༌པ༌གུན༌ནི༌ མི༌རབས༌ནེ༌ མི༌རབས༌ འི༌ ཤབ༌བད༌དི༌ ཞག༌པོ༌ སྲུང༌གོས༌། འི༌ ཆད༌དོན༌བོ༌ ཁྱོ༌ཞའེ༌ ཏུས༌གྱུན༌ བོར༌གོས༌།
EXO 31:17 འི༌བོ༌ ཨིས༌ར༌ཨེལ༌པ༌གུན༌ དང༌ ངའེ༌ པར༌ལ༌ ཏུས༌གྱུན༌ ལུས༌ཤེས༌ཅན༌ནི༌ སྟགས༌ཤིག༌ ཨིན༌ ཅིའ༌ཟེར༌ན༌ ང༌ ཡ༌ཝའེ༌ ཞག༌པོ༌ དྲུག༌གི༌ ནང༌ང༌ ནམ༌ཁའ༌ དང༌ ཇིག༌རྟེན༌ ཅོས༌པིན༌, ཡང༌ ཞག༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོས༌པ༌ ངའེ༌ ནང༌ང༌ ཡང༌སྐྱར༌ སྟོབས༌ སོ༌མའེ༌ གང༌།”
EXO 31:18 ཡ༌ཝའེ༌ སི༌ནཱའི༌ རི༌ཀ༌ མོ༌ཟེས༌ ཉམ༌པོ༌ ཞལ༌ཏ༌ སལ༌ ཚར༌ར༌ཅིག༌, ཁོང༌ངི༌ ཁོའ༌ རྡོའ༌ ལེབ༌ལེབ༌ ཉིས༌ སལས༌ ཀ༌བོའེ༌ཀ༌ ཡ༌ཝ༌ ཁོང༌རང༌ངི༌ ཆག༌ ཉམ༌པོ༌ བཀའ༌རྒྱ༌གུན༌ བྲིའ༌ ཛད༌ཏེ༌ ཡོད༌པིན༌།
EXO 32:1 མོ༌ཟེས༌ རི༌ ཀ༌ནེ༌ ལོགས༌ཏེ༌ ཡོང༌ང༌ ཏུས༌ མང༌པོ༌ གོར༌པ༌ མི༌གུན༌ ཨ༌རོན༌ ཡོད༌ས༌ ཛོམས༌ཏེ༌ ཟེརས༌, “ཡོང༌, ང༌དང༌གུན༌ལ༌ ལམ༌སྟན༌ཁན༌ནི༌ ལྷ༌ལྷ༌མོ༌གུན༌ ཅོས༌། ཏེ༌ མི༌ མོ༌ཟེས༌, ང༌དང༌ ཨི༌ཇིབ༌ནེ༌ ཕིང༌ཏེ༌ ཁྱོང༌ཁན༌བོའ༌ ཅི༌ སོང༌ ང༌ཞའ༌ གྱུས༌མེད༌།”
EXO 32:2 ཨ༌རོན༌ནི༌ ཁོང༌གུན༌ལ༌ ཟེརས༌, “ཁྱོ༌ཞའེ༌ ན༌མ༌གུན༌, བུ༌ཚ༌གུན༌ དང༌ བུ༌མོ༌གུན༌ནི༌ ནམ༌ཅོག༌གི༌ སེར༌རི༌ ཨ༌ལོང༌གུན༌ ཕུད༌ཏེ༌ ངའ༌ ཁྱོང༌།”
EXO 32:3 ཏེ༌ནེ༌ མི༌ ཚང༌མའེ༌ ནམ༌ཅོག༌གི༌ སེར༌རི༌ ཨ༌ལོང༌གུན༌ ཕུད༌ཏེ༌ ཨ༌རོན༌ནི༌ཀ༌ ཁྱོངས༌།
EXO 32:4 ཁོའེ༌ ཁྱོང༌ཁན༌ནི༌ སེར༌གུན༌ ཞུ༌ ཅུགས༌ཏེ༌ བེ༌ཙོའེ༌ ཟོས༌ཏའེ༌ པར༌རི༌ ནང༌ང༌ ལུགས༌ཏེ༌ སྐུན༌དྲ༌ ཞིག༌ ཅོས༌། ཏེ༌ནེ༌ མི༌གུན༌ནི༌ ཟེརས༌, “ཨིས༌ར༌ཨེལ༌པ༌གུན༌, འི༌བོ༌ ང༌དང༌གུན༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཁྱོང༌ཁན༌ནི༌ དཀོན༌མཆོག༌ ཨིན༌ནོག༌།”
EXO 32:5 ཨ༌རོན༌ནི༌ ཏེ༌བོ༌ ཐོང༌ང༌ཅིག༌ སེར༌རི༌ བེ༌ཙོའེ༌ དུན༌ལ༌ ཆོད༌ཁྲི༌ཞིག༌ རྩིགས༌ཏེ༌ ཟེརས༌, “ཐོ༌རེ༌ ཡ༌ཝའ༌ རྩི༌ཝ༌ ཕུལ༌ཅེས༌སི༌ ཕིའ༌ གའ༌སྟོན༌ རྩི༌ཨིན༌།”
EXO 32:6 ཐོ༌རེ༌ ཟུག༌པོ༌ ང༌ཏོག༌ནེ༌ མི༌གུན༌ནི༌ མེའ༌ སྲག༌ཁན༌ནི༌ ཆོད༌པ༌ དང༌ ཞི༌དེ༌ ཆོད༌པ༌ གུན༌ ཕུལས༌། མི༌གུན༌ ཟའ༌ཅེས༌ དང༌ ཆང༌ ཐུང༌ཅེས༌ལ༌ སའེ༌ཀ༌ དུགས༌ ཡང༌ ལངས༌ཏེ༌ སྕོད༌པ༌ ངན༌པ༌ དང༌ ཁྲེལ༌མེད༌དི༌ ལས༌ ཅོ༌ཅེས༌ གོ༌ཟུག༌།
EXO 32:7 ཡ༌ཝའེ༌ མོ༌ཟེས༌ལ༌ མོལས༌, “དག༌ས༌རང༌ ཡོག༌ག༌ བབས༌ཏེ༌ སོང༌ ཅིའ༌ཟེར༌ན༌ ཁྱོ༌རང༌ངི༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ནི༌ མི༌གུན༌ ངན༌པ༌ གྱུར༌ཏེ༌ སྡིག༌པ༌ ཅོ༌རུག༌།
EXO 32:8 ཁོང༌གུན༌ནི༌ ངའེ༌ བཀའ༌ ཏང༌ཁན༌བོ༌ འི༌ཟམ༌ གྱོགས༌པ༌ རྗེད༌ཏེ༌ ཁོ༌རང༌གུན༌ནི༌ ཕིའ༌ བེ༌ཙོའེ༌ ཟོས༌ཏེ༌ ནང༌ང༌ སེར༌རི༌ སྐུན༌དྲ༌ ཅོས༌ཏེ༌ ཅོལ༌དུག༌ ཡང༌ ཏེ༌བོའ༌ ཆོད༌པ༌ ཕུལ༌ཏེ༌ ‘འི༌བོ༌ ང༌དང༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ནི༌ དཀོན༌མཆོག༌ ཨིན༌’ ཟེར༌དུག༌།”
EXO 32:9 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌, “འི༌ མི༌གུན༌ནི༌ སྙིང༌ ཙམ༌ཤིག༌གི༌ སྐྱོང༌པོ༌ ཨིན༌ཁན༌བོ༌ ངའེ༌ ཐོང༌།
EXO 32:10 ཏ༌ ངའེ༌ དུན༌ནེ༌ སོང༌, ང༌ ཁོང༌གུན༌ནི༌ཀ༌ སྲོ༌ སྲན༌ཏྲེ༌ ཡོང༌ཏེ༌ རག༌, ངའེ༌ ཁོང༌གུན༌ མེད༌ཁན༌ ཅོ༌ཨིན༌། ཏེ༌ནེ༌ ངའེ༌ ཁྱོ༌རང༌ངི༌ པུར༌གྱུད༌གུན༌ གྱལ༌ཁམས༌ ཀྲག༌པོ༌ ཞིག༌ གྱུར༌ཅུག༌ཨིན༌།”
EXO 32:11 ཨིན༌ནའང༌ མོ༌ཟེས༌སི༌ ཁོ༌རང༌ངི༌ དཀོན༌མཆོག༌ ཡ༌ཝའེ༌ ཐུགས༌སྲོ༌ ཞུ༌ཅུག༌ཅེས༌སི༌ རྩོན༌གྲུས༌ ཅོས༌ཏེ༌ ཟེརས༌, “ཡ༌ཝ༌ལེ༌, ཉེ༌རང༌ངི༌ སྟོབས༌ དང༌ ཝང༌ ཀྲག༌པོ༌ ཉམ༌པོ༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌ནི༌ ཉེ༌རང༌ངི༌ མི༌གུན༌ནི༌ཀ༌ ཅིའ༌ ཐུགས༌སྲོ༌ སྐྱོད༌དད༌?
EXO 32:12 ཅིའ༌ ཨི༌ཇིབ༌པ༌གུན༌ལ༌ ཟེར༌ཅུག༌ག༌ ཛད༌དད༌, ‘ངན༌པ༌ ཐབས༌ ཅོས༌ཏེ༌ ཁོའེ༌ ཁོ༌རང༌ངི༌ མི༌གུན༌ ཨི༌ཇིབ༌ནེ༌ ཕིང༌ཏེ༌ རི༌སྟོང༌ངི༌ ནང༌ང༌ སད༌ཏེ༌ མེད༌ཁན༌ ཅོའ༌ལ༌ ཁྱེར༌ཏེ༌ ཨིན༌ནོག༌?’ ཇུ༌ཇུ༌ ཐུགས༌སྲོ༌ སྐྱོད༌ད༌ མ༌ཛད༌། ཉེ༌རང༌ངི༌ ཐུགས༌སམ༌ གྱུར༌ར༌ ཛད༌ཏེ༌ ཉེ༌རང༌ངི༌ མི༌གུན༌ལ༌ ཆད༌པ༌ སལ༌ལ༌ མ༌ཛད༌།
EXO 32:13 ཉེ༌རང༌ངི༌ ཞབས༌ཏོག༌པ༌ ཨབ༌ར༌ཧམ༌, ཨི༌སཱག༌, དང༌ ཡ༌ཀོབ༌ གུན༌ལ༌ ཞལ༌ཆད༌ དང༌ ནའ༌ ཁུར༌ར༌ ཛད༌ཏེ༌, ‘ཁྱོ༌ཞའེ༌ མིར༌གྱུད༌ ནམ༌ཁའེ༌ སྐར༌མ༌ ཙོགས༌ མང༌པོ༌ ཡང༌ འི༌ ས༌ཀྱད༌ ཚང༌མ༌ ཁྱོ༌ཞའེ༌ པུར༌གྱུད༌གུན༌ལ༌ སལ༌ལ༌ ཛད༌ཏེ༌ ཏུས༌གྱུན༌ནི༌ ཕིའ༌ ཁོང༌གུན༌ནི༌ ནོར༌སྐལ༌ གྱུར༌ཨིན༌’ མོལ༌ཁན༌བོ༌ ཨིད༌ཏུ༌ ཛད༌།”
EXO 32:14 ཏེ༌ནེ༌ ཡ༌ཝའེ༌ ཁོང༌རང༌ངི༌ ཐུགས༌སམ༌ གྱུར༌ར༌ ཛད༌ཏེ༌ ཁོང༌རང༌ངི༌ མི༌གུན༌ལ༌ ཇིགས༌ནང༌ཅན༌ནི༌ ཆད༌པ༌ སལ༌ཨིན༌ མོལ༌ཁན༌བོ༌ ཅོའ༌ མ༌ཛདས༌།
EXO 32:15 མོ༌ཟེས༌སི༌ བཀའ༌རྒྱ༌ བྲིའ༌ཛད༌ཁན༌ནི༌ རྡོའེ༌ ལེབ༌ལེབ༌ ཉིས༌ཀོ༌ ལག༌པའེ༌ ནང༌ང༌ ཁུར༌ཏེ༌ རི༌ནེ༌ བབས༌ཏེ༌ ཡོངས༌། ཏེ༌གུན༌ནི༌ དུན༌ དང༌ གྱབ༌ ཉིས༌ཀོའེ༌ཀ༌ བྲིའ༌ཛད༌ཏེ༌ ཡོད༌པིན༌།
EXO 32:16 རྡོའ༌ ལེབ༌ལེབ༌ གུན༌ དཀོན༌མཆོག༌གི༌ ཆག༌ལས༌ ཡང༌ བྲིའ༌ ཛད༌ཁན༌བོ༌ དཀོན༌མཆོག༌གི༌ ཆག༌བྲིས༌ རྡོའེ༌ཀ༌ སྐོའ༌ ཛད༌ཏེ༌ ཨིན༌པིན༌།
EXO 32:17 ཡོ༌ཤུའ༌ མི༌གུན༌ནི༌ ཀུ༌ཅོ༌ ཏང༌ཨིན༌ ཚོར༌ར༌ཅིག༌ ཁོའེ༌ མོ༌ཟེས༌ལ༌ ཟེརས༌, “ཀུར༌ ཙུགས༌ཏེ༌ ཡོད༌ས༌ནེ༌ མག༌གི༌ སྐད༌ ཚོར༌ར༌རག༌།”
EXO 32:18 མོ༌ཟེས༌སི༌ ལན༌ཏངས༌, “འི༌བོ༌ གྱལ༌ཁའ༌ ཐོབ༌ཁན༌ནི༌ ཡ༌ མག༌ ཕམས༌ཁན༌ནི༌ སྐད༌ མ༌ནོག༌། ངའེ༌ ཚོར༌ཁན༌བོ༌ ནི༌ ལུ༌ ཏང༌ཁན༌ནི༌ སྐད༌ ཨིན༌རག༌།”
EXO 32:19 མོ༌ཟེས༌ ཀུར༌ ཙུགས༌ཏེ༌ ཡོད༌སའེ༌ ཉེ༌མོའ༌ ལེབས༌ཏེ༌ བེ༌ཙོའེ༌ སྐུན༌དྲ༌ དང༌ མི༌གུན༌ རྩེའ༌ ཐོང༌པ༌ ཁོའ༌ སྲོ༌ སྲན༌ཏྲེ༌ ཡོངས༌ ཡང༌ ལག༌པའེ༌ ནང༌ང༌ ཁུར༌ཏེ༌ ཡོད༌ཁན༌ནི༌ རྡོའ༌ ལེབ༌ལེབ༌གུན༌ རི༌ ཀ༌ནེ༌ ཡོག༌ག༌ གྱབས༌ ཏངས༌ ཡང༌ ཏེ༌གུན༌ ཆག༌།
EXO 32:20 ཏེ༌ནེ༌ ཁོའེ༌ བེ༌ཙོའེ༌ སྐུན༌དྲ༌ མེ༌ ནང༌ང༌ ཕངས༌ཏེ༌ ཞུ༌ ཅུགས༌། སྟིང༌ནེ༌ ཏེ༌བོ༌ ཐགས༌ཏེ༌ ཆུའི༌ ནང༌ང༌ སྲེས༌ ཡང༌ ཨིས༌ར༌ཨེལ༌པ༌གུན༌ལ༌ ཐུང༌ཅུགས༌།
EXO 32:21 ཁོའེ༌ ཨ༌རོན༌ལ༌ ཟེརས༌, “ཁྱོ༌རང༌ངི༌ འི༌ མི༌གུན༌ལ༌ འི༌ཟམ༌ ངན༌པ༌ སྡིག༌པ༌ ཅོ༌ཅུགས༌ཏེ༌ ཁོང༌གུན༌ནི༌ ཁྱོ༌རང༌ང༌ ཅི༌ ཅོས༌?”
EXO 32:22 ཨ༌རོན༌ནི༌ ལན༌ཏངས༌, “ངའེ༌ཀ༌ སྲོ༌ མ༌ཡོང༌། འི༌ མི༌གུན༌ལ༌ ཏུས༌གྱུན༌ ངན༌པ༌ ཅོ༌ཅེས༌སི༌ དོད༌པ༌ ཡོད༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌།
EXO 32:23 ཁོང༌གུན༌ནི༌ ང༌ ཟེར༌ར༌རག༌, ‘ང༌དང༌གུན༌ལ༌ ལམ༌སྟན༌ཁན༌ནི༌ དཀོན༌མཆོག༌ ཤིག༌ ཅོས༌། ཏེ༌ མི༌ མོ༌ཟེས༌, ང༌དང༌ ཨི༌ཇིབ༌ནེ༌ ཕིང༌ཏེ༌ ཁྱོང༌ཁན༌བོའ༌ ཅི༌ སོང༌ ང༌ཞའ༌ གྱུས༌མེད༌།’
EXO 32:24 ཏེ༌ནེ༌ ངའེ༌ ཁོང༌གུན༌ལ༌ ཟེར༌པིན༌, ‘ཁྱོ༌རང༌གུན༌ནི༌ སེར༌རི༌ གྱན༌ཆ༌གུན༌ ཕུད༌ཏེ༌ ཁྱོང༌’ ཡང༌ ཁོང༌གུན༌ནི༌ ཁྱོང༌ཁན༌ ཚང༌མ༌ ངའེ༌ མེའེ༌ ནང༌ང༌ ཕངས༌པ༌ འི༌ སེར༌རི༌ བེ༌ཙོ༌བོ༌ བིང༌།”
EXO 32:25 ཨ༌རོན༌ལ༌ མི༌གུན༌ ཅུན༌ མ༌ཉན༌ན༌ ཉོན༌བ༌ ཙོགས༌, གྲ༌འོ༌གུན༌ནི༌ ཕིའ༌ སྟན༌མོ༌ གྱུར༌ཏེ༌ ཡོད༌ཁན༌བོ༌ མོ༌ཟེས༌ལ༌ ཐོང༌།
EXO 32:26 ཏེ༌བོའེ༌ཕིའ༌ ཁོ༌ ཁོང༌གུན༌ ཚུགས༌ཏེ༌ ཡོད༌སའེ༌ སྒོའེ༌ཀ༌ ལངས༌ཏེ༌ ཟེརས༌, “ཡ༌ཝའེ༌ ཆོགས༌ལ༌ ཨིན༌ཁན༌གུན༌ ང༌ ཡོད༌ས༌ ཡོང༌” ཡང༌ ལི༌ཝི༌པ༌ ཚང༌མ༌ ཁོ༌ ཡོད༌ས༌ ཛོམ༌།
EXO 32:27 ཏེ༌ནེ༌ ཁོའེ༌ ཁོང༌གུན༌ལ༌ ཟེརས༌, “ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ མོལས༌, ‘ཁྱོ༌ཞ༌ རེ༌རེ༌ ར༌འི༌གུན༌ ལྡོའ༌ ཏགས༌ཏེ༌ ང༌དང༌ ཚུགས༌ཏེ༌ ཡོད༌སའེ༌ གོ༌ནེ༌ ཇུག༌ ཚག༌པ༌ སོང༌ཏེ༌ རང༌ངི༌ སྤུན༌, ཛ༌འོ༌ དང༌ ཁྱིམ༌ཚེས༌ གུན༌ སོད༌།’”
EXO 32:28 ལི༌ཝི༌པ༌གུན༌ནི༌ མོ༌ཟེས༌སི༌ བཀའ༌ ཏང༌ཁན༌བོ༌ ཅོས༌ ཡང༌ ཏེ༌ ཞག༌ག༌ མི༌ ཧ༌ལམ༌ སྟོང༌སུམ༌ ཤི༌།
EXO 32:29 མོ༌ཟེས༌སི༌ ལི༌ཝི༌པ༌གུན༌ལ༌ ཟེརས༌, “དི༌རིང༌ ཁྱོ༌རང༌གུན༌ནི༌ ཁྱོ༌ཞ༌རང༌ ཡ༌ཝའེ༌ ཞབས༌ཏོགས༌སི༌ འོས༌པ༌ ཅོས༌ཏེ༌ ཨིན༌ནོག༌ ཅིའ༌ཟེར༌ན༌ ཁྱོ༌ཞ༌གུན༌ནི༌ རང༌ངི༌ བུ༌ཚ༌གུན༌ དང༌ སྤུན༌ལ༌གུན༌ སདས༌ ཡང༌ ཡ༌ཝའེ༌ ཁྱོ༌ཞ༌གུན༌ལ༌ དི༌རིང༌ ཅིན༌ལབས༌ སལས༌།”
EXO 32:30 སྟིང༌མ༌ཞག༌པོ༌ མོ༌ཟེས༌སི༌ མི༌གུན༌ལ༌ ཟེརས༌, “ཁྱོ༌ཞ༌གུན༌ནི༌ སྡིག༌པ༌ ཆེན༌མོ༌ ཅོས༌ཏེ༌ ཨིན༌ནོག༌། ཨིན༌ནའང༌ ང༌ རི༌ཀ༌ ཡ༌ཝ༌ ཡོད༌ས༌ ཤགས༌པ༌ ཞུའ༌ ཆེན༌, ཅི༌གྱུས༌ ཁོང༌ངི༌ ཐུགས༌སམ༌ གྱུར༌ཏེ༌ ཁྱོ༌ཞའེ༌ སྡིག༌པ༌ ཤགས༌པ༌ སལ༌སྲིད༌ཅེས༌ ཨིན༌ནོག༌།”
EXO 32:31 ཏེ༌ནེ༌ མོ༌ཟེས༌ རི༌ཀ༌ ཡ༌ཝ༌ ཡོད༌ས༌ ལོགས༌ཏེ༌ སོང༌ ཡང༌ ཟེརས༌, “འི༌ མི༌གུན༌ནི༌ སེར༌རི༌ སྐུན༌དྲ༌ ཅོས༌ ཡང༌ ཏེ༌བོའ༌ ཅོལ༌ཏེ༌ སྡིག༌པ༌ ཆེན༌མོ༌ ཅོས༌ཏེ༌ ཨིན༌ནོག༌།
EXO 32:32 ཇུ༌ཇུ༌ ཁོང༌གུན༌ནི༌ སྡིག༌པ༌ ཤགས༌པ༌ སལ༌ལ༌ ཛད༌། ཨིན༌ནའང༌ མ༌ སལ༌ན༌ ཏེ༌ནེ༌ ཉེ༌རང༌ངི༌ མི༌གུན༌ནི༌ མིང༌ བྲིའ༌ ཛད༌ཁན༌ནི༌ སྤེ༌ཆའེ༌ ནང༌ནེ༌ ངའེ༌ མིང༌ ཐེན༌ན༌ ཛད༌།”
EXO 32:33 ཡ༌ཝའེ༌ ལན༌སལས༌, “ངའེ༌ གྱབ༌གལ༌ལ༌ སྡིག༌པ༌ ཅོ༌ཁན༌གུན༌ནི༌ མིང༌ ངའེ༌ སྤེ༌ཆའེ༌ ནང༌ནེ༌ ཐེན༌ཨིན༌།
EXO 32:34 ཏ༌ སོང༌ ཡང༌ མི༌གུན༌ ངའེ༌ ཤད༌ཁན༌ནི༌ ནས༌སའེ༌ ནང༌ང༌ ཁྲིད༌ ཡང༌ ངའེ༌ ཕོ༌ཉ༌ ཁྱོ༌རང༌ངི༌ སྔུན༌ལ༌ ཆེན༌། ཨིན༌ནའང༌ ཏུས༌པོ༌ ལེབ༌བ༌ཅིག༌ ངའེ༌ ཁོང༌གུན༌ནི༌ སྡིག༌པ༌ ཅོ༌ཁན༌བོའ༌ ཆད༌པ༌ ཏང༌ཨིན༌།”
EXO 32:35 ཡང༌ ཡ༌ཝའེ༌ མ༌ སད༌ཁན༌ནི༌ མི༌གུན༌ལ༌ ནད༌ རྩོག༌པོ༌ ཡོང༌ ཅུག༌ག༌ ཛདས༌ ཅིའ༌ཟེར༌ན༌ ཁོང༌གུན༌ནི༌ ཨ༌རོན༌ལ༌ སེར༌རི༌ བེ༌ཙོའེ༌ སྐུན༌དྲ༌ ཅོ༌ཅུགས༌ཏེ༌ ཨིན༌པིན༌།
EXO 33:1 ཡ༌ཝའེ༌ མོ༌ཟེས༌ལ༌ མོལས༌, “ཁྱོ༌རང༌ དང༌ ཁྱོ༌རང༌ངི༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ཁན༌ ཚང༌མ༌ འི༌ ས༌ཆ༌ནེ༌ བིང༌ཏེ༌ ངའེ༌ ཨབ༌ར༌ཧམ༌, ཨི༌སཱག༌, ཡ༌ཀོབ༌ གུན༌ལ༌ ‘ངའེ༌ ཁྱོ༌རང༌ངི༌ པུར༌གྱུད༌གུན༌ལ༌ ཏེ༌བོ༌ ཏང༌ཨིན༌’ ཟེར༌ཏེ༌ ཁ༌ཆད༌ ཅོ༌ཁན༌ནི༌ ས༌ཆ༌བོའ༌ སོང༌།
EXO 33:2 ངའེ༌ ཁྱོ༌རང༌ངི༌ སང༌ སྔུན༌ལ༌ ཕོ༌ཉ༌ ལམ༌ཅུགས༌ཏེ༌ ཀེ༌ནན༌པ༌, ཨ༌མོར༌པ༌, ཧེད༌པ༌, པེ༌རིཟ༌པ༌, ཧིཝ༌པ༌ ཡང༌ ཡེ༌བས༌པ༌ གུན༌ ཕིང༌ཨིན༌།
EXO 33:3 ཁྱོ༌ཞ༌གུན༌ འོ༌མ༌ དང༌ རང༌རྩི༌ གྱུག༌སའེ༌ ས༌ཆ༌ སོང༌། ཨིན༌ནའང༌ ང༌ ཁྱོ༌ཞ༌གུན༌ ཉམ༌པོ༌ མི༌ཡོང༌, ཁྱོ༌ཞ༌གུན༌ མི༌ མ༌སྐྱོང༌པོ༌ ཨིན༌ པ༌སང༌ ངའེ༌ ལམ༌བར༌ལ༌ ཁྱོ༌ཞའ༌ མེད༌ཁན༌ ཅོ༌སྲིད༌ཅེས༌ ཨིན༌ནོག༌།”
EXO 33:4 མི༌གུན༌ནི༌ ཏེ༌ སྤེ༌ར༌ སྐྱོང༌པོ༌ ཚོར༌ར༌ཅིག༌ ཁོང༌གུན༌ནི༌ ཉ༌ངན༌ ཅོས༌ཏེ༌ གྱན༌ཆ༌གུན༌ མ༌ཏགས༌
EXO 33:5 ཅིའ༌ཟེར༌ན༌ ཡ༌ཝའེ༌ མོ༌ཟེས༌ལ༌ མོལ༌ཏེ༌ ཨིན༌པིན༌, “ཨིས༌ར༌ཨེལ༌པ༌གུན༌ལ༌ ཟེར༌, ‘ཁྱོ༌ཞ༌གུན༌ མི༌ མ༌སྐྱོང༌པོ༌ ཨིན༌ནོག༌། ཀལ༌ཏེས༌ ང༌ ཁྱོ༌རང༌གུན༌ ཉམ༌པོ༌ ཏུས༌ ཙ༌པིག༌ཤིག༌གི༌ ཕིའ༌ ཆ༌ནའང༌ ངའེ༌ ཁྱོ༌ཞ༌གུན༌ མེད༌ཁན༌ ཅོ༌སྲིད༌ཅེས༌ ཨིན༌ནོག༌། ཏ༌ ཁྱོ༌ཞ༌གུན༌ནི༌ གྱན༌ཆ༌གུན༌ ཕུད༌ ཡང༌ ཁྱོ༌རང༌གུན༌ ཉམ༌པོ༌ ཅི༌ ཅོ༌གོ༌ཤེས༌པོ༌ ངའེ༌ ཐག༌ཅད༌ཨིན༌།’”
EXO 33:6 ཏེན༌ན༌བོའེ༌ཕིའ༌ སི༌ནཱའི༌ རི༌ཀ༌ ཨིས༌ར༌ཨེལ༌པ༌གུན༌ནི༌ གྱན༌ཆ༌གུན༌ ཕུད༌ཏེ༌ ཡང༌སྐྱར༌ མ༌ནེ༌ མ༌ཏགས༌།
EXO 33:7 ཏུས༌གྱུན༌ མོ༌ཟེས༌སི༌ ཀུར༌ ཙུགས༌ཏེ༌ དུག༌སའེ༌ ས༌ཆའེ༌ བན༌ཤིག༌ ཐག༌རིང༌ང༌ ཀུར༌ཞིག༌ ཙུགས༌ཏེ༌ ཏེ༌བོའ༌ ཡ༌ཝའ༌ ཐུག༌སའེ༌ ཀུར༌ ཟེར༌རད༌པིན༌། ཡང༌ ཡ༌ཝའ༌ ཏྲི༌ཝ༌ ཏྲི༌ཉིན༌ ཡོད༌ཁན༌གུན༌ ཀུར༌ ཙུགས༌ཏེ༌ ཡོད༌སའེ༌ ཕི༌ལོག༌ག༌ ཏམ༌པ༌ ཀུར༌རི༌ཀ༌ ཆའད༌པིན༌།
EXO 33:8 མོ༌ཟེས༌ ཏེ༌ ཀུར༌རི༌ ནང༌ང༌ ཆ༌ ཟ༌ནེ༌ མི༌གུན༌ རང༌རང༌ངི༌ ཀུར༌རི༌ སྒོའེ༌ཀ༌ ལངས༌ཏེ༌ མོ༌ཟེས༌ ཏེ༌ནང༌ཀུག༌ག༌ ཞུགས༌ ཞུགས༌ ཚོག༌པ༌ ལྟའད༌པིན༌།
EXO 33:9 མོ༌ཟེས༌ ཏེ༌ནང༌ང༌ ཞུགས༌ ཚར༌ར༌ཅིག༌ སྲིན༌ནི༌ ཀ༌ཝ༌ བབས༌ཏེ༌ ཀུར༌རི༌ སྒོའེ༌ཀ༌ དུག༌གད༌པིན༌ ཡང༌ ཡ༌ཝའེ༌ མོ༌ཟེས༌ལ༌ ཞལ༌ཏ༌ སལ༌ལད༌པིན༌།
EXO 33:10 མི༌གུན༌ནི༌ ཀུར༌རི༌ སྒོའེ༌ཀ༌ སྲིན༌ནི༌ ཀ༌ཝ༌ ཐོང༌ང༌ཅིག༌ ཁོང༌ ཚང༌མའེ༌ རང༌རང༌ངི༌ ཀུར༌རི༌ སྒོའེ༌ དུན༌ལ༌ ཆག༌ཕུལ༌ཏེ༌ ཡ༌ཝའ༌ ཅོལ༌ལད༌པིན༌།
EXO 33:11 ཛ༌འོ༌ དུན༌ལ༌ ཡོད༌ཏེ༌ སྤེ༌ར༌ ཏང༌ཁན༌ ཙོགས༌ལ༌ ཡ༌ཝའེ༌ མོ༌ཟེས༌ ཉམ༌པོ༌ ཞལ༌ཏ༌ སལ༌ལད༌པིན༌། ཏེ༌ སྟིང༌ནེ༌ མོ༌ཟེས༌ ཞན༌ ཀུར༌གུན༌ ཙུགས༌ཏེ༌ ཡོད༌སའ༌ ལོགས༌ཏེ༌ ཡོང༌ངད༌པིན༌, ཨིན༌ནའང༌ ཁོའ༌ རོགས༌ཅོ༌ཁན༌ ཡོ༌ཤུའ༌ ནུན༌ནི༌ བུ༌ཚ༌ ཡ༌ཝ༌ ཐུག༌སའེ༌ ཀུར༌རི༌ ནང༌ནེ༌ བིངས༌ཏེ༌ མ༌ཡོངས༌།
EXO 33:12 མོ༌ཟེས༌སི༌ ཡ༌ཝའ༌ ཟེརས༌, “ཉེ༌རང༌ངི༌ ངའ༌ མོལས༌, ‘འི༌ མི༌གུན༌ ངའེ༌ ཁ༌ཆད༌ ཅོ༌ཁན༌ནི༌ ས༌ཆ༌ ཁྱེར༌། ངའེ༌ ཁྱོ༌རང༌ གྱལ༌ལ༌ ཅོས༌ཏེ༌ ཤེས༌སད༌ ཡང༌ ཁྱོ༌རང༌ ཉམ༌པོ༌ ང༌ ཐད༌པོ༌ ཨིན༌།’ ཨིན༌ནའང༌ ཉེ༌རང༌ངི༌ སུ༌ ངའ༌ རོགས༌ ཅོའ༌ལ༌ ཀལ༌ལ༌ ཛད༌ཅེས༌པོ༌ སྔོན༌ཅུག༌ག༌ མ༌ཛདས༌།
EXO 33:13 ཀལ༌ཏེས༌ ཉེ༌རང༌ ང༌ ཉམ༌པོ༌ དེན༌བ༌ ཐད༌པོ༌ ཨིན༌ན༌ ཉེ༌རང༌ངི༌ ལམ༌མི༌ཀ༌ ངའ༌ ཁྲིད༌ད༌ ཛད༌ ཏེ༌ནེ༌ ངའེ༌ ཉེ༌རང༌ངི༌ ཐུག༌གོངས༌ ཤེས༌ཏེ༌ ངའེ༌ ཏུས༌གྱུན༌ ཉེ༌རང༌ ཐུགས༌ཐད༌ཅུག༌ ཉན༌ཨིན༌། ཨིད༌ཏུ༌ ཛད༌དའང༌, འི༌ གྱལ༌ཁམས༌པོ༌ ཉེ༌རང༌ངི༌ མི༌ ཨིན༌ནོག༌།”
EXO 33:14 ཡ༌ཝའེ༌ མོལས༌, “ང༌ ཁྱོ༌རང༌ ཉམ༌པོ༌ ཆེན༌ ཡང༌ ངའེ༌ ཁྱོ༌རང༌ངི༌ སྙིང༌ངི༌ ནང༌ང༌ ཞི༌དེ༌ ཏང༌ཨིན༌།”
EXO 33:15 མོ༌ཟེས༌སི༌ ལན༌ཏངས༌, “ཀལ༌ཏེས༌ ཉེ༌རང༌ ང༌ཞ༌གུན༌ ཉམ༌པོ༌ མ༌སྐྱོད༌ན༌ ང༌ཞའ༌, འི༌ ས༌ཆ༌ བོར༌ཏེ༌ ཆ༌ཅུག༌ག༌ མ༌ཛད༌།
EXO 33:16 ཀལ༌ཏེས༌ ཉེ༌རང༌ ང༌ཞ༌གུན༌ ཉམ༌པོ༌ མ༌སྐྱོད༌ན༌ ཉེ༌རང༌ ང༌ དང༌ ཉེ༌རང༌ངི༌ མི༌གུན༌ ཉམ༌པོ༌ ཐུག༌ཉེས༌ཁན༌ ཇིག༌རྟེན༌པ༌གུན༌ལ༌ ཀ༌ཟུག༌གི༌ ཧ༌གོ༌ཨིན༌། ཉེ༌རང༌ ང༌ཞ༌གུན༌ ཉམ༌པོ༌ སྐྱོད༌ན༌, ང༌ཞའ༌ ཇིག༌རྟེན༌ནི༌ ཞན༌ མི༌ ཚང༌མའེ༌ སང༌ སོ༌སོ༌ ཨིན༌ཁན༌བོ༌ ཧ༌གོ༌ཨིན༌།”
EXO 33:17 ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཁྱོ༌རང༌ངི༌ ཟེར༌ཁན༌བོ༌ ཅོ༌ཨིན༌ ཅིའ༌ཟེར༌ན༌ ངའེ༌ ཁྱོ༌རང༌ གྱལ༌ལ༌ ཅོས༌ཏེ༌ ཤེས༌སད༌ ཡང༌ ང༌ ཁྱོ༌རང༌ ཉམ༌པོ༌ ཐད༌པོ༌ ཨིན༌།”
EXO 33:18 ཏེ༌ནེ༌ མོ༌ཟེས༌སི༌ ཞུ༌ཝ༌ ཕུལས༌, “ཉེ༌རང༌ངི༌ སྤལ༌ ངའ༌ སྟན༌ན༌ ཛད༌དའང༌།”
EXO 33:19 ཡ༌ཝའེ༌ ལན༌སལས༌, “ངའེ༌ ང༌རང༌ངི༌ ཟང༌པོ༌ ཚང༌མ༌ ཁྱོ༌རང༌ངི༌ དུན༌ནེ༌ ཆ༌ཅུག༌ཨིན༌ ཡང༌ སལ༌པོ༌ ཅོས༌ཏེ༌ ཁྱོ༌རང༌ང༌ ངའེ༌ མིང༌ ཡ༌ཝ༌ ཨིན༌ཁན༌བོ༌ ཟེར༌ཨིན༌། སྙིང༌རྗེ༌ སྟན༌ན༌ ཐད༌ཁན༌གུན༌ལ༌ ངའེ༌ སྙིང༌རྗེ༌ སྟན༌ཨིན༌ ཐུག༌རྗེ༌ སྟན༌ན༌ ཐད༌ཁན༌གུན༌ལ༌ ངའེ༌ ཐུག༌རྗེ༌ སྟན༌ཨིན༌།
EXO 33:20 ཨིན༌ནའང༌ ཁྱོ༌རང༌ངི༌ ངའེ༌ ལྡོང༌ང༌ ལྟ༌ མི༌ཆོག༌ ཅིའ༌ཟེར༌ན༌ སུ༌ཞིག༌གའང༌ ངའེ༌ ལྡོང༌ ཐོང༌ཏེ༌ སྟིང༌ནེ༌ སོན༌ཏེའ༌ མི༌ལུས༌།”
EXO 33:21 ཡ༌ཝའེ༌ མོལས༌, “འི༌ཀ༌ ངའེ༌ དུན༌ལ༌ ཡོད༌ཁན༌ནི༌ བྲག༌གི༌ཀ༌ ཁྱོ༌རང༌ ལངས༌ཏེ༌ དུག༌།
EXO 33:22 ངའེ༌ ཟིར༌རྗིད༌ ཁྱོ༌རང༌ངི༌ དུན༌ནེ༌ ཆའ༌ཅིག༌ ངའེ༌ ཁྱོ༌རང༌ བྲག༌གི༌ པར༌ལ༌ བོར༌ཏེ༌ ང༌ ཏེ༌ཀ༌ནེ༌ ཆ༌ ཚར༌ཚར༌ ཚག༌པ༌ ང༌རང༌ངི༌ ལག༌པ༌ ཁྱོ༌རང༌ངི༌ ལྡོང༌ང༌ ཀབ༌ཨིན༌།
EXO 33:23 ཆ༌ ཚར༌ཏེ༌ སྟིང༌ནེ༌ ངའེ༌ ལག༌པ༌བོ༌ ཐེན༌ཨིན༌ ཡང༌ ཁྱོ༌རང༌ངི༌ ངའེ༌ གྱབ༌པོ༌ ཐོང༌ཨིན༌ ཨིན༌ནའང༌ ངའེ༌ ལྡོང༌ མི༌ཐོང༌།”
EXO 34:1 ཡ༌ཝའེ༌ མོ༌ཟེས༌ལ༌ མོལས༌, “གོ༌མའེ༌ ཙོགས༌ རྡོའ༌ ལེབ༌ལེབ༌ ཉིས༌ ཅོད༌, ཡང༌ ཁྱོ༌རང༌ངི༌ ཅག༌ཁན༌ སྔོན༌ནི༌ རྡོའ༌ ལེབ༌ལེབ༌གུན༌ནི༌ཀ༌ བྲིས༌ཁན༌ནི༌ ཚིགས༌གུན༌ ངའེ༌ འི༌གུན༌ནི༌ཀ༌ བྲི༌ཨིན༌།
EXO 34:2 ཐོ༌རེ༌ ང༌མོ༌ནེ༌ གྲལ༌གྲིག༌ ཅོས༌ཏེ༌ ཀེན༌ལ༌ སི༌ནཱའི༌ རིའི༌ གོའེ༌ཀ༌ ང༌ ཉམ༌པོ༌ ཐུག༌ག༌ལ༌ ཡོང༌།
EXO 34:3 སུ༌ཞིག༌གའང༌ ཁྱོ༌རང༌ ཉམ༌པོ༌ རི༌ཀ༌ ཡ༌ རིའི༌ དུན༌ལ༌ ཡོང༌ མ༌གོས༌, ཡང༌ ལུག༌ དང༌ བ༌ལང༌ གུན༌ རི༌ དུན༌ལ༌ ཚོའ༌ལ༌ ཁྱོང༌ མ༌གོས༌།”
EXO 34:4 ཏེ༌ནེ༌ མོ༌ཟེས༌སི༌ སྔུན༌མ༌ ཙོགས༌ རྡོའ༌ ལེབ༌ལེབ༌ ཉིས༌ ཅདས༌ ཡང༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཐོ༌རེ༌ཟུག༌པོ༌ ང༌མོ༌ནེ༌ ཏེ༌གུན༌ ཁུར༌ཏེ༌ ཁོ༌ སི༌ནཱའི༌ རི༌ཀ༌ སོང༌།
EXO 34:5 ཡ༌ཝ༌ སྲིན༌ནི༌ ནང༌ང༌ བབས༌ཏེ༌ སྐྱོདས༌, ཡང༌ ཁོ༌ ཉམ༌པོ༌ ཏེ༌རུ༌ ཞངས༌ཏེ༌ ཁོང༌རང༌ངི༌ ཚན༌ ཡ༌ཝ༌ ཨིན༌ཁན༌བོ༌ ཁོའ༌ ཤད༌ད༌ ཛདས༌།
EXO 34:6 མོ༌ཟེས༌སི༌ དུན༌ནེ༌ སྐྱོད༌ཨིན༌ ཡ༌ཝའེ༌ མོལས༌, “ཡ༌ཝ༌, ཡ༌ཝ༌, སྙིང༌རྗེ༌ དང༌ ཐུག༌རྗེ༌ གངས༌ཁན༌ དཀོན༌མཆོག༌, སྲོ༌ གྱོགས༌པ༌ མ༌ ཡོང༌ཁན༌, གྱུར༌ཇ༌ མེད༌ཁན༌ནི༌ ཅམས༌པ༌ སྟན༌ཁན༌ དང༌ ཨིད༌ཤེས༌ཅན༌།
EXO 34:7 ངའེ༌ མི༌རབས༌ སྟོང༌ ཚག༌པ༌ ཅམས༌པ༌ སྟན༌ཨིན༌ ཡང༌ ངན༌པ༌, ངོ༌ལོག༌ དང༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ ཏང༌ཨིན༌། ཨིན༌ནའང༌ ནོངས༌ཅན༌གུན༌ལ༌ ཆད༌པ༌ མ༌ཏང༌ང༌ མི༌བོར༌, ཁོང༌གུན༌ ཅིག༌པོའ༌ མན༌པ༌ ཁོང༌གུན༌ནི༌ ཕྲུ༌གུ༌གུན༌ དང༌ ཚ༌འོ༌ ཚ༌མོ༌ གུན༌, མི༌རབས༌ སུམ༌ ཡང༌ ཞི༌ ཚག༌པ༌ ཁོང༌གུན༌ནི༌ ཕ༌མེས༌པོའེ༌ ཅོ༌ཁན༌ནི༌ སྡིག༌པའེ༌ ཞས༌ཏེ༌ ཆད༌པ༌ ཕོག༌ཨིན༌།”
EXO 34:8 མོ༌ཟེས༌སི༌ གྱོགས༌པ༌ སའེ༌ཀ༌ གོ༌ སྒུས༌ཏེ༌ ཁོང༌ང༌ ཅོལས༌
EXO 34:9 ཡང༌ ཟེརས༌, “ཡ༌ཝ༌ལེ༌ ཀལ༌ཏེས༌ ཉེ༌རང༌ ངའེ༌ཀ༌ ཐུག༌ཉེས༌ས༌ ཛད༌དད༌ན༌, ཉེ༌རང༌ ང༌ཞའ༌ ཉམ༌པོ༌ སྐྱོད༌ད༌ ཛད༌། འི༌ མི༌གུན༌ སྐྱོང༌པོ༌ ཨིན༌ནའང༌ ང༌ཞ༌གུན༌ནི༌ ངན༌པ༌ དང༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛད༌ཏེ༌ ང༌ཞའ༌ ཉེ༌རང༌ངི༌ མིག༌སལ༌ལི༌ མི༌གུན༌ནི༌ ཚུལ༌ལ༌ ལེན༌ན༌ ཛད༌།”
EXO 34:10 ཡ༌ཝའེ༌ མོ༌ཟེས༌ལ༌ མོལས༌, “ངའེ༌ ཁྱོ༌ཞའ༌ ཉམ༌པོ༌ ཆད༌དོན༌ ཅོའད༌། ཇིག༌རྟེན༌ ཡ༌ གྱལ༌ཁམས༌ ཚང༌མའེ༌ ནང༌ང༌ སུ༌ཞིག༌གིའང༌ མ༌ཅོ༌ཁན༌ ཧ༌ལས༌ཤེས༌སི༌ ལྟས༌ རིག༌ ངའེ༌ ཨིས༌ར༌ཨེལ༌པ༌གུན༌ནི༌ དུན༌ལ༌ ཅོ༌ཨིན༌། ང༌ ཡ༌ཝའེ༌ ཁྱོ༌ཞའེ༌ ཕིའ༌ ཅོ༌ཁན༌ནི༌ ལས༌གུན༌ ཏེ༌ཟམ༌ ཧ༌ལས༌ཤེས༌ ཡོད༌ཁན༌བོ༌ མི༌ཚང༌མའེ༌ ཐོང༌ཨིན༌ ཀ༌གུན༌ནི༌ ཕྲོའ༌ ཁྱོ༌ཞའ༌ དུག༌གད༌།
EXO 34:11 དི༌རིང༌ ངའེ༌ ཁྱོ༌ཞ༌གུན༌ལ༌ བཀའ༌ ཏང༌ཁན༌གུན༌ ཅོས༌ ཡང༌ ངའེ༌ ཁྱོ༌ཞའེ༌ དུན༌ལ༌ འི༌ ནས༌སའེ༌ ནང༌ང༌ དུག༌ཁན༌ ཨ༌མོར༌པ༌, ཀེ༌ནན༌པ༌, ཧེད༌པ༌, པེ༌རིཟ༌པ༌, ཧིཝ༌པ༌ ཡང༌ ཡེ༌བས༌པ༌ གུན༌ ཕིང༌ཨིན༌།
EXO 34:12 ཁྱོ༌ཞའ༌ ཆ༌ཅེས༌ཅན༌ནི༌ ནས༌སའེ༌ མི༌གུན༌ ཉམ༌པོ༌ ཞི༌དེའེ༌ ཆད༌དོན༌ མ༌ཅོ༌, ཀལ༌ཏེས༌ ཅོ༌ན༌ ཁོང༌གུན༌ནི༌ ངན༌པ༌ མི༌ཚེ༌ ཕུད༌ཨིན༌ ཡོད༌ཁན༌བོའེ༌ ནང༌ང༌ ཁྱོ༌ཞ༌གུན༌ ཁད༌ད༌ནོག༌།
EXO 34:13 ཁོང༌གུན༌ནི༌ ཆོད༌ཁྲི༌གུན༌ ཤིག༌, ཁོང༌ངི༌ ཏམ༌པ༌ ཀ༌ཝ༌གུན༌ ཅོག༌ ཡང༌ ཨ༌ཤེ༌རཧ༌ ཟེར༌ཁན༌ནི༌ ཁོང༌གུན༌ནི༌ ལྷ༌མོའེ༌ རྡུང༌མ༌ ལངས༌ཁན༌གུན༌ མེད༌ཁན༌ ཅོས༌།
EXO 34:14 ཞན༌ ལྷ༌ལྷ༌མོ༌ གུན༌ལ༌ ཅོལ༌ མ༌ཅོལ༌ ཅིའ༌ཟེར༌ན༌ ང༌ ཡ༌ཝ༌ ཅིག༌པོ༌ མ༌ནེ༌ སུ༌ཞིག༌གའང༌ ཏེ༌ སྤལ༌ལི༌ འོས༌པ༌ མན༌།”
EXO 34:15 “ཏེ༌ ཡུལ༌ལི༌ མི༌གུན༌ ཉམ༌པོ༌ ཞི༌དེའེ༌ ཆད༌དོན༌ མ༌ཅོ༌ ཅིའ༌ཟེར༌ན༌ ཁོང༌གུན༌ནི༌ ཁོང༌རང༌གུན༌ནི༌ ལྷ༌ དང༌ ལྷ༌མོ༌ གུན༌ལ༌ ཅོལ༌ཏེ༌ སྲོག༌ཆོད༌ ཏང༌ཁན༌ནི༌ ཁར༌ཇི༌ ཁྱོ༌ཞའ༌ ཟའ༌ལ༌ བོད༌ན༌ ཁྱོ༌ཞའ༌ ཏེ༌བོ༌ ཟའ༌ལ༌ ཆ༌སྲིད༌ཅེས༌ ཨིན༌ནོག༌
EXO 34:16 ཡང༌ ཁྱོ༌ཞའེ༌ བུ༌ཚ༌གུན༌ནི༌ ཏེ༌ ཡུལ༌ལི༌ བུ༌མོ༌གུན༌ ཉམ༌པོ༌ བག༌མ༌ ཅོས༌ཏེ༌ ཁོང༌གུན༌ནི༌ ཁྱོ༌ཞའེ༌ བུ༌ཚ༌གུན༌ནི༌ སེམས༌ གྱུར༌ཅུགས༌ཏེ༌ ཁོང༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ ཅུག༌ཨིན༌།”
EXO 34:17 “ཁྱོ༌ཞ༌གུན༌ནི༌ ཁྱོ༌ཞ༌རང༌ངི༌ ཕིའ༌ སེར༌ ཡ༌ མུལ༌ ཡ༌ ཞན༌ ལྕགས༌ རིགས༌གུན༌ནི༌ སྐུན༌དྲ༌ ཅོ༌ མ༌གོས༌།”
EXO 34:18 “སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ རྩིས༌། ངའེ༌ ཁྱོ༌ཞ༌གུན༌ལ༌ བཀའ༌ ཏང༌ཁན༌ ནང༌ཞིན༌ ཨ༌བིབ༌བི༌ ཟླ༌ཝའེ༌ ནང༌ང༌ ཞག༌མ༌ རྡུན༌ སྐྱུར༌ མེད༌ཁན༌ནི༌ ཏ༌གི༌ ཟོ༌ ཅིའ༌ཟེར༌ན༌ འི༌ ཟླ༌ཝའེ༌ ནང༌ང༌ ཁྱོ༌ཞའ༌ ཨི༌ཇིབ༌ནེ༌ བིངས༌ཏེ༌ ཡོངས༌ཏེ༌ ཨིན༌པིན༌།”
EXO 34:19 “གོ༌སྐྱེས༌ བུ༌ཚ༌ ཚང༌མ༌ ངའེ༌ ཨིན༌, ཏེ༌ནང༌ང༌ ཁྱོ༌ཞའེ༌ སྲལ༌ཁན༌ནི༌ སེམས༌ཅན༌ ཚང༌མའེ༌ གོ༌སྐྱེས༌ ཕོ༌གུན༌ནའང༌ ཐེས༌ཏེ༌ ཨིན༌།
EXO 34:20 ལུ༌གུ༌ཞིག༌ ཚབས༌ལ༌ ཏངས༌ཏེ༌ གོ༌སྐྱེས༌ བུང༌བུ༌ ལོགས༌ཏེ༌ ཉོ༌ཉན༌ཨིན༌། ཀལ༌ཏེས༌ ལོགས༌ཏེ༌ མ༌ཉོ༌ན༌ ཏེ༌བོའེ༌ ཇིང༌བ༌ ཅགས༌ཏེ༌ སད༌ཏོང༌། ཁྱོ༌ཞའེ༌ གོ༌སྐྱེས༌ བུ༌ཚ༌ ཚང༌མ༌ ལོགས༌ཏེ༌ ཉོ༌གོས༌།” “ལག༌པ༌ སྟོང༌པ༌ སུ༌ཞིག༌གའང༌ ངའེ༌ དུན༌ལ༌ མ༌ཡོང༌།”
EXO 34:21 “ཁྱོ༌ཞའེ༌ ཞག༌མ༌ དྲུག༌ ལས༌ ཅོས༌ ཨིན༌ནའང༌ ཞག༌མ༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོ༌གོས༌། སྟོན༌ཐོག༌ ཏབ༌ཅེས༌ དང༌ རྔ༌ཅེས༌སི༌ ཏུས༌ལའང༌ ཏེ༌ བཀའ༌ཁྲིམས༌པོ༌ སྲུང༌གོས༌།
EXO 34:22 ཁྱོ༌ཞའེ༌ གོ༌མའེ༌ ཀྲོའེ༌ སྟོན༌ཐོག༌པོ༌ རྔའ༌ཅིག༌ རྔབ༌སའེ༌ ཏུས༌ཆེན༌ ཡང༌ སྟོན༌ལ༌ ཁྱོ༌ཞའེ༌ ཁ༌ཟས༌གུན༌ ལྡུམ༌ ཚར༌ར༌ཅིག༌ སྟོན༌ཐོག༌ ནང༌ང༌ ཁྱོང༌ཅེས༌སི༌ ཏུས༌ཆེན༌ རྩི༌གོས༌།
EXO 34:23 ལོའེ༌ ནང༌ང༌ ལན༌ སུམ༌ ཁྱོ༌ཞའེ༌ བུ༌ཚ༌ ཚང༌མ༌ ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ དུན༌ལ༌ ཁོང༌ང༌ ཅོལ༌ཅེས༌ལ༌ ཛོམ༌གོས༌།
EXO 34:24 ངའེ༌ ཁྱོ༌ཞའེ༌ དུན༌ལ༌ ཞན༌ ཡུལ༌ལི༌ མི༌གུན༌ ཐེན༌ཏེ༌ ཁྱོ༌ཞའེ༌ ས༌ཆའེ༌ སན༌ཚམས༌ སྐྱེད༌ཨིན༌ ཡང༌ ཡ༌ཝའེ༌ དུན༌ལ༌ ལོ༌ཞུང༌ ལན༌ སུམ༌ ཏུས༌ཆེན༌ རྩེའ༌ ཆ༌ ཟ༌ནེ༌ ཞན༌ གྱལ༌ཁམས༌གུན༌ནི༌ ཁྱོ༌ཞའེ༌ ས༌ཆའ༌ ཀོགས༌ཏེ༌ མི༌ཁྱེར༌།”
EXO 34:25 “ངའ༌ སེམས༌ཅན༌ སྲོག༌ཆོད༌ལ༌ ཕུལ༌ ཟ༌ནེ༌ ཏེ༌བོ༌ ཉམ༌པོ༌ སྐྱུར༌ཅན༌ནི༌ ཏ༌གི༌ མ༌ཕུལ༌ ཡང༌ པེ༌སག༌གི༌ ཏུས༌ཆེན༌ནི༌ ཕིའ༌ སད༌ཁན༌ནི༌ སེམས༌ཅན༌ནི༌ ཤའ༌ ཐོ༌རེ༌ ང༌མོ༌ ཚག༌པ༌ བོར༌ མ༌གོས༌།”
EXO 34:26 “ཁྱོ༌ཞའེ༌ ཏབ༌ཁན༌ནི༌ སྟོན༌ཐོག༌གི༌ གོ༌མའེ༌ བྲས༌བུ༌ གྱལ༌ཤོག༌པོ༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཆོད༌ཁང༌ང༌ ཁྱོང༌།” “རི༌གུའི༌ ཤ༌ ཏེ༌བོའེ༌ ཨ༌མའེ༌ འོ༌མའེ༌ ནང༌ང༌ མ༌ སྐོལ༌།”
EXO 34:27 ཡ༌ཝའེ༌ མོ༌ཟེས༌ལ༌ མོལས༌, “འི༌ ཚིགས༌གུན༌ བྲིས༌ ཅིའ༌ཟེར༌ན༌ འི༌ བཀའ༌ཁྲིམས༌གུན༌ གྱུད༌ཏེ༌ ངའེ༌ ཁྱོ༌རང༌ དང༌ ཨིས༌ར༌ཨེལ༌པ༌གུན༌ ཉམ༌པོ༌ ཆད༌དོན༌ ཅོའད༌།”
EXO 34:28 ཟའ༌ཅེས༌ ཡ༌ ཐུང༌ཅེས༌ མེད༌ད༌ ཉི༌མ༌ ཞིབ༌ཅུ༌ དང༌ ཚན༌ ཞིབ༌ཅུ༌ མོ༌ཟེས༌ རི༌ཀ༌ ཡ༌ཝ༌ ཉམ༌པོ༌ དུགས༌། ཁོའེ༌ རྡོའ༌ ལེབ༌ལེབ༌གུན༌ནི༌ཀ༌ ཆད༌དོན༌ནི༌ ཚིགས༌གུན༌ བྲིས༌ ཡང༌ན༌ བཀའ༌རྒྱ༌ རྕུ༌།
EXO 34:29 མོ༌ཟེས༌ བཀའ༌རྒྱ༌ རྕུ༌ བྲིའ༌ཛད༌ཁན༌ནི༌ རྡོའ༌ ལེབ༌ལེབ༌ ཉིས༌ཀོ༌ ཁུར༌ཏེ༌ སི༌ནཱའི༌ རི༌ནེ༌ བབས༌ཏེ༌ ཡོང༌ ཟ༌ནེ༌, ཡ༌ཝ༌ ཉམ༌པོ༌ སྤེ༌ར༌ ཏང༌ པ༌སང༌ ཁོའེ༌ ལྡོང༌ འོད༌ ཙོགས༌ ལྡང༌ཤན༌ ཡོད༌ཁན༌བོ༌ ཁོའ༌ གྱུས༌ མེད༌པིན༌།
EXO 34:30 ཨ༌རོན༌ དང༌ མི༌ཚང༌མའེ༌ མོ༌ཟེས༌ལ༌ ལྟའ༌ཅིག༌ ཁོའེ༌ ལྡོང༌ འོད༌ ཙོགས༌ ལྡང༌ཤན༌ ཐོང༌པ༌ ཁོང༌གུན༌ ཁོའེ༌ དུན༌ལ༌ ཆ༌ཅེས༌ལ༌ ཇིགས༌།
EXO 34:31 ཨིན༌ནའང༌ མོ༌ཟེས༌སི༌ ཁོང༌གུན༌ལ༌ བོདས༌པ༌ ཨ༌རོན༌ དང༌ ཨིས༌ར༌ཨེལ༌པའེ༌ སྤོན༌བོ༌ ཚང༌མ༌ ཁོ༌ ཡོད༌ས༌ སོང༌ ཡང༌ མོ༌ཟེས༌སི༌ ཁོང༌གུན༌ལ༌ སྤེ༌ར༌ ཏངས༌།
EXO 34:32 ཏེ༌ སྟིང༌ནེ༌ ཨིས༌ར༌ཨེལ༌པ༌ ཚང༌མ༌ ཁོའེ༌ དུན༌ལ༌ ཛོམ༌ ཡང༌ ཡ༌ཝའེ༌ སི༌ནཱའི༌ རི༌ཀ༌ ཁོའ༌ སལ༌ལ༌ ཛད༌ཁན༌ནི༌ བཀའ༌ཁྲིམས༌ ཚང༌མ༌ མོ༌ཟེས༌སི༌ ཁོང༌གུན༌ལ༌ ཏངས༌།
EXO 34:33 མོ༌ཟེས༌སི༌ ཁོང༌གུན༌ ཉམ༌པོ༌ སྤེ༌ར༌ ཏང༌ ཚར༌ར༌ཅིག༌ ཁོའེ༌ ཁོ༌རང༌ངི༌ ལྡོང༌བོ༌ རས༌ཤིག༌ ཉམ༌པོ༌ ཀབས༌།
EXO 34:34 མོ༌ཟེས༌ ཡ༌ཝ༌ ཐུག༌སའེ༌ ཀུར༌རི༌ ནང༌ང༌ ཁོང༌ ཉམ༌པོ༌ སྤེ༌ར༌ ཏང༌ང༌ ཆ༌ ཟ༌ནེ༌ ཁོའེ༌ ལྡོང༌ ཀབས༌ཁན༌ནི༌ རས༌པོ༌ ཐེན༌ནད༌པིན༌། ཕི༌ལོག༌ག༌ ཡོངས༌ཏེ༌ ཁོའེ༌ ཨིས༌ར༌ཨེལ༌པ༌གུན༌ལ༌ ཡ༌ཝའེ༌ བཀའ༌ སལ༌ཁན༌ ཚང༌མ༌ ཤད༌དད༌པིན༌
EXO 34:35 ཡང༌ ཁོའེ༌ ལྡོང༌ ལྡང༌ཤན༌བོ༌ ཁོང༌གུན༌ནི༌ ཐོང༌ངད༌པིན༌, ཏེ༌ནེ༌ མོ༌ཟེས༌ ཡང༌སྐྱར༌ ཡ༌ཝ༌ ཉམ༌པོ༌ སྤེ༌ར༌ ཏང༌ང༌ ཆ༌ཆ༌ ཚག༌པ༌ ཁོའེ༌ ལྡོང༌ ཀབས༌ཏེ༌ བོར༌རད༌པིན༌།
EXO 35:1 མོ༌ཟེས༌སི༌ ཨིས༌ར༌ཨེལ༌པ༌ ཚང༌མའ༌ ཛོམ༌ཅེས༌ལ༌ བོདས༌ ཡང༌ ཟེརས༌, “ཡ༌ཝའེ༌ ཁྱོ༌ཞའ༌, འི༌གུན༌ ཅོ༌ཅེས༌ལ༌ བཀའ༌ སལས༌།
EXO 35:2 ཁྱོ༌ཞ༌གུན༌ནི༌ ཞག༌མ༌ དྲུག༌ ལས༌ ཅོས༌ ཨིན༌ནའང༌ ཞག༌མ༌ རྡུན༌པའེ༌ ཞག༌ག༌ ལས༌ མ༌ཅོའ༌ ངལ༌ཚོས༌ ཅིའ༌ཟེར༌ན༌ ཏེ༌ ཞག༌པོ༌ ཏམ༌པ༌ ཨིན༌ ཡང༌ ཏེ༌བོ༌ ཡ༌ཝའེ༌ ཕིའ༌ ཏང༌གོས༌། ཏེ༌ ཞག༌ག༌ ལས༌ ཅོ༌ཁན༌གུན༌ སད༌གོས༌།
EXO 35:3 ཤབ༌བད༌དི༌ ཞག༌ག༌ ཁྱོ༌ཞ༌གུན༌ནི༌ ཁང༌པའེ༌ ནང༌ང༌ མེ༌ ཏུག༌ མ༌གོས༌།”
EXO 35:4 མོ༌ཟེས༌སི༌ ཨིས༌ར༌ཨེལ༌པ༌ ཚང༌མ༌ལ༌ མོལས༌, “ཡ༌ཝའེ༌ བཀའ༌ སལ༌ཁན༌བོ༌ འི༌གུན༌ ཨིན༌།
EXO 35:5 ཁྱོ༌ཞའ༌ ཡོད༌ཁན༌གུན༌ནི༌ ནང༌ནེ༌ ཁྱོ༌ཞའེ༌ ཡ༌ཝའེ༌ ཕིའ༌ ཆོད༌པ༌ ཕུལ༌། ཏང༌ང༌ ཐད༌ཁན༌གུན༌ནི༌ ཡ༌ཝའེ༌ ཕིའ༌ སེར༌, མུལ༌, དང༌ ར༌གན༌ནི༌ ཆོད༌པ༌ ཁྱོང༌,
EXO 35:6 སྔོན༌པོ༌, སྔོ༌མར༌ དང༌ མར༌པོ༌ ནས༌མ༌, གྱལ༌ལ༌ ཀུས༌པོ༌ རས༌ དང༌ ར༌མའེ༌ བལ༌,
EXO 35:7 རང༌ མར༌པོ༌ ཏང༌ཁན༌ནི༌ ལུག༌ཕོའེ༌ པགས༌པ༌ དང༌ ཀོའ༌ གྱལ༌ལ༌, ཨ༌ཀ༌ཤིའེ༌ ཤིང༌,
EXO 35:8 འོད༌དི༌ ཕིའ༌ ཨོ༌ལིཝ༌ཝི༌ མར༌ནག༌, ཁྲུས༌ཏང༌ཅེས༌སི༌ མར༌ནག༌ ཏང༌ ཏྲི༌ཞིམ༌ཅན༌ནི༌ སྤོས༌སི༌ ཕིའ༌ ཚ༌མིག༌གུན༌,
EXO 35:9 ཨེ༌ཕོད༌ དང༌ ཀྲང༌ང༌ ཀབ༌ཅེས༌སི༌ཀ༌ ཏག༌ཅེས༌ལ༌ ཨོ༌ནེཀས༌ དང༌ ཞན༌ ཁྲ༌རྡོའ༌ རིན༌ཅན༌གུན༌ ཁྱོང༌།”
EXO 35:10 “ཁྱོ༌ཞ༌གུན༌ནི༌ ཕྲོ༌ནེ༌ ལག༌ཁས༌པ༌གུན༌ ཡོངས༌ཏེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅི༌ཚང༌མ༌ ཅོས༌,
EXO 35:11 ཏེ༌གུན༌ ཏམ༌པ༌ ཀུར༌, ཏེ༌བོའ༌ ཀབ༌ཅེས༌, ཏེ༌བོའེ༌ ལྕག༌ཀུག༌གུན༌ དང༌ རིབ༌ཞི༌གུན༌, པ༌ར༌ཁ༌ ཏང༌ཅེས༌སི༌ ཀྲ༌ལུ༌གུན༌, ཀ༌ཝ༌གུན༌ དང༌ ཏེ༌གུན༌ ལང༌ཅེས༌སི༌ ཞབ༌ལྡན༌གུན༌,
EXO 35:12 ཆད༌དོན༌ནི༌ སྒམ༌ དང༌ ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌, ཐུག༌རྗེ༌ ཁའ༌ལེབ༌ ཡང༌ པར༌ ཕེ༌ཅེས༌ལ༌ ཡོ༌ལ༌,
EXO 35:13 ཅོག༌ཙེ༌, ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌ ཏང༌ ཏེ༌ཀ༌ ཀོལ༌ཅེས༌སི༌ ནོད༌ ཚང༌མ༌, དཀོན༌མཆོག༌ག༌ ཕུལ༌ཁན༌ནི༌ ཏམ༌པ༌ ཏ༌གི༌,
EXO 35:14 འོད༌དི༌ ཕིའ༌ འོད༌སྟགས༌ ཡང༌ ཏེ༌བོའེ༌ ལག༌ཆ༌གུན༌, འོད༌གུན༌ དང༌ ཏེ༌གུན༌ནི༌ ཕིའ༌ མར༌ནག༌,
EXO 35:15 སྤོས༌ དུག༌སའེ༌ ཆོད༌ཁྲི༌ ཡང༌ ཏེ༌བོ༌ ཁུར༌ཅེས༌སི༌ ཀྲ༌ལུ༌, ཁྲུས༌ཏང༌ཅེས༌སི༌ མར༌ནག༌, ཏྲི༌ཞིམ༌ཅན༌ནི༌ སྤོས༌, ཏམ༌པའེ༌ ཀུར༌རི༌ ནང༌ང༌ ཞུག༌སའེ༌ སྒོའེ༌ ཕིའ༌ ཡོ༌ལ༌,
EXO 35:16 ཆོད༌པ༌ མེའ༌ སྲག༌ཅེས༌སི༌ ཕིའ༌ ཆོད༌ཁྲི༌, ཏེ༌བོའེ༌ ར༌གན༌ནི༌ ཀྲ༌མིག༌, ཏེ༌བོ༌ ཁུར༌ཅེས༌སི༌ ཀྲ༌ལུ༌ དང༌ ཏེ༌བོའེ༌ ལག༌ཆ༌ ཚང༌མ༌ ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌སའེ༌ ཕོས༌སྟག༌,
EXO 35:17 ནང༌སྐོར༌རི༌ ཕིའ༌ ཡོ༌ལ༌, ཏེ༌བོའེ༌ ཀ༌ཝ༌ དང༌ ཞབ༌ལྡན༌ གུན༌, ཏེ༌ནང༌ང༌ ཞུག༌སའེ༌ སྒོའེ༌ ཕིའ༌ ཡོ༌ལ༌།
EXO 35:18 ཏམ༌པའེ༌ ཀུར༌ དང༌ ནང༌སྐོར༌རི༌ ཕིའ༌ ཕུར༌ཅ༌གུན༌ དང༌ ཐག༌པ༌གུན༌།
EXO 35:19 ཏམ༌པའེ༌ ཀུར༌རི༌ ནང༌ང༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ དང༌ ཁོའེ༌ བུ༌ཚ༌གུན༌ གོན༌ཅེས༌སི༌ ཀོས༌ལག༌ ཏམ༌པ༌ གུན༌།”
EXO 35:20 མོ༌ཟེས༌སི༌ སྤེ༌ར༌ ཟེར༌ ཚར༌ར༌ཅིག༌, ཨིས༌ར༌ཨེལ༌པ༌ ཚང༌མ༌ ཁོའེ༌ དུན༌ནེ༌ སོང༌
EXO 35:21 ཡང༌ སེམས༌སི༌ ཐིལ༌ནེ༌ ཐད༌ཁན༌གུན༌ནི༌ ཡ༌ཝའ༌ ཆོད༌པ༌ ཕུལས༌ ཡང༌ན༌ ཏམ༌པ༌ ཀུར༌, ཏེ༌ནང༌ང༌ སྒོས༌དོམ༌ ཡོད༌ཁན༌ དང༌ བླ༌མ༌གུན༌ནི༌ ཏམ༌པ༌ ཀོས༌ལག༌, ཏེ༌ ཚང༌མ༌ ཅོ༌ཅེས༌སི༌ ཕིའ༌ ཆོད༌པ༌ ཕུལས༌།
EXO 35:22 ཏང༌ང༌ ཐད༌ཁན༌ བུ༌ཚ༌ དང༌ བུ༌མོ༌ ཚང༌མའེ༌ སེར༌རི༌ གྱན༌ཆ༌ སྣ༌ཚོགས༌; ནམ༌ཅོག༌གི༌ ཨ༌ལི༌, སྐྱེ༌ཆ༌, སེར༌དུབ༌, ཀྲང༌ངི༌ཀ༌ ཏག༌ཅེས༌ དང༌ ཞན༌གུན༌ ཁྱོངས༌། ཁོང༌གུན༌ནི༌ རང༌ངི༌ སེར༌གུན༌ ཡ༌ཝའེ༌ སྐུན༌དུན༌ལ༌ ལན༌ ཁ༌ཅིག༌ སྟགས༌ ཡང༌ ཕབས༌།
EXO 35:23 སྔོན༌པོ༌, ཡ༌ སྔོ༌མར༌ ཡ༌ མར༌པོ༌ ནས༌མ༌ ཡ༌ ཀུས༌པོ༌ རས༌ ཡ༌ ར༌མའེ༌ སྤུ༌ ཡ༌ རང༌ མར༌པོ༌ ཏང༌ཁན༌ ལུག༌ཕོའེ༌ པགས༌པ༌ ཡ༌ ཀོའ༌ གྱལ༌ལ༌ ཡོད༌ཁན༌གུན༌ནི༌ ཏེ༌གུན༌ ཁྱོངས༌།
EXO 35:24 ཏང༌ ཉན༌ཁན༌གུན༌ནི༌ མུལ༌ ཡ༌ ར༌གན༌ནི༌ ཆོད༌པ༌ ཡ༌ཝའ༌ ཕུལས༌, ཡང༌ ཨ༌ཀ༌ཤིའེ༌ ཤིང༌ ཡོད༌ཁན༌གུན༌ནི༌ ཏེ༌གུན༌ ཏེ༌ ལས༌སི༌ ནང༌ང༌ ཀོལ༌ཅེས༌ལ༌ ཕུལས༌།
EXO 35:25 ལག༌ཤེས༌ ཁས༌པ༌ བུ༌མོ༌གུན༌ནི༌ རས༌ ཐགས༌ཁན༌ ཀུས༌པོ༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཁལ༌ཏེ༌ ཁྱོངས༌།
EXO 35:26 ཁས༌པ༌ ཡང༌ སྙིང༌ནེ༌ ཅོའ༌ལ༌ ཐད༌ཁན༌ བུ༌མོ༌གུན༌ནི༌ ར༌མའེ༌ སྤུ༌ ཁལ༌ཏེ༌ ནས༌མ༌ ཅོས༌།
EXO 35:27 སྤོན༌བོ༌གུན༌ནི༌ ཨོ༌ནེཀས༌ དང༌ ཞན༌ ཁྲ༌རྡོའ༌ གུན༌ ཨེ༌ཕོད༌ དང༌ ཀྲང༌ང༌ ཀབ༌ཅེས༌སི༌ཀ༌ ཅུག༌ཅེས༌ལ༌ ཁྱོངས༌།
EXO 35:28 ཁོང༌གུན༌ནི༌ འོད༌, ཁྲུས༌ཏང༌ཅེས༌ དང༌ ཏྲི༌ཞིམ༌ཅན༌ནི༌ སྤོས༌སི༌ ཕིའ༌ ཨོ༌ལིཝ༌ཝི༌ མར༌ནག༌ དང༌ ཚ༌མིག༌གུན༌ ཁྱོངས༌།
EXO 35:29 ཡ༌ཝའེ༌ མོ༌ཟེས༌ གྱུད༌ཏེ༌ བཀའ༌ སལ༌ཁན༌ནི༌ ལས༌གུན༌ ཅོ༌ཅེས༌སི༌ ཕིའ༌ ཨིས༌ར༌ཨེལ༌པ༌ ཚང༌མའེ༌ རང༌རང༌ ཐད༌ཁན༌ནི༌ ཆོད༌པ༌ ཐད༌པོ༌ ཉམ༌པོ༌ ཁྱོངས༌།
EXO 35:30 ཏེ༌ནེ༌ མོ༌ཟེས༌སི༌ ཨིས༌ར༌ཨེལ༌པ༌གུན༌ལ༌ ཟེརས༌, “ཡ༌ཝའེ༌ ཡ༌ཧུ༌དཱའེ༌ སྡེ༌ ནང༌ནེ༌ ཨུ༌རི༌ བུ༌ཚ༌, ཧུར༌རི༌ ཚ༌འོ༌ བེ༌ཟ༌ལེལ༌ ལྡམ༌མ༌ ཛདས༌,
EXO 35:31 ཡང༌ དཀོན༌མཆོག༌གི༌ ཁོའེ༌ ནང༌ང༌ ཁོང༌རང༌ངི༌ ཐུག༌ཉིད༌ སྐང༌ང༌ ཛད༌ཏེ༌ ཁོའ༌ ཟོ༌ལས༌ ཚང༌མའེ༌ ནང༌ང༌ ཁས༌པ༌, རིག༌པ༌ དང༌ ཁྱུད༌ སལས༌,
EXO 35:32 ཏེ༌གུན༌ སེར༌, མུལ༌ དང༌ ར༌གན༌ ཉམ༌པོ༌ ཁས༌པ༌ རི༌མོ༌ སྲུལ༌ཅེས༌,
EXO 35:33 ཁྲ༌རྡོའ༌ ཅད༌ཅེས༌, ཤིང༌ སྐོས༌ཏང༌ཅེས༌ ཡང༌ ཟོ༌ལས༌སི༌ ལས༌ སྣ༌ཚོགས༌ ཅོ༌ཅེས༌།
EXO 35:34 ཡ༌ཝའེ༌ ཁོ༌ དང༌ དཱན༌ནི༌ སྡེ༌ ནང༌ནེ༌ ཨ༌ཧི༌ས༌མག༌གི༌ བུ༌ཚ༌ ཨོ༌ཧོ༌ལིའབ༌ ཉིས༌ཀོའ༌, ཞན༌ཡང༌ ཟོ༌ལས༌པ༌གུན༌ལ༌ ལབ༌ཅེས༌སི༌ ཁྱུད༌ སལས༌།
EXO 35:35 ཡ༌ཝའེ༌ ཁོང༌གུན༌ལ༌, ཟོ༌ལས༌ སྣ༌ཚོགས༌ ཅོ༌ཁན༌, རི༌མོ༌ སྲུལ༌ཁན༌, ཀུས༌པོ༌ རས༌སི༌ཀ༌ ནས༌མ༌ སྔོན༌པོ༌, སྔོ༌མར༌ དང༌ མར༌པོ༌ ཉམ༌པོ༌ རི༌མོ༌ སྲུལ༌ཁན༌ ཡང༌ ཐགས༌ཐག༌ཁན༌ གུན༌ནི༌ ཅོ༌ཁན༌ནི༌ ལས༌ རིགས༌ ཚང༌མ༌ ཅོ༌ཅེས༌སི༌ ཁྱུད༌ སལས༌། ཁོང༌ ཉིས༌ཀོ༌ ཟོ༌ལས༌ དང༌ རི༌མོ༌ སྲུལ༌ཅེས༌སི༌ ནང༌ང༌ མ༌ ཁས༌པ༌ ཡོད༌པིན༌།”
EXO 36:1 མོ༌ཟེས༌སི༌ མི༌གུན༌ལ༌ ཟེརས༌, “ཡ༌ཝའེ༌ བེ༌ཟ༌ལེལ༌, ཨོ༌ཧོ༌ལིའབ༌ དང༌ ཞན༌ ཟོ༌ལས༌པ༌གུན༌ལ༌ ཏམ༌པའེ༌ ཀུར༌ ཅོ༌ཅེས༌སི༌ ནང༌ང༌ སྒོས༌དོམ༌མི༌ ལས༌གུན༌ ཅོ༌ཅེས༌ལ༌ ཧ༌གོ༌ དང༌ ཁྱུད༌ སལ༌ཏེ༌ ཨིན༌ནོག༌ ཡང༌ ཁོང༌གུན༌ནི༌ ཡ༌ཝའེ༌ བཀའ༌ ནང༌ཞིན༌ ལས༌ ཅོ༌གོས༌།”
EXO 36:2 མོ༌ཟེས༌སི༌ བེ༌ཟ༌ལེལ༌ དང༌ ཨོ༌ཧོ༌ལིའབ༌ ཡང༌ ཡ༌ཝའེ༌ ཁྱུད༌ སལ༌ཏེ༌ ལས༌ ཅོའ༌ལ༌ ཐད༌པོ༌ ཡོད༌ཁན༌ ཚང༌མ༌ལ༌ བོད༌ཏེ༌ ལས༌ གོ༌ཟུག༌ ཅོ༌ཅེས༌སི༌ ཕིའ༌ ཟེརས༌།
EXO 36:3 ཏམ༌པའེ༌ ཀུར༌ ཅོ༌ཅེས༌སི༌ ཕིའ༌ ཨིས༌ར༌ཨེལ༌པ༌གུན༌ནི༌ ཁྱོངས༌ཁན༌ནི༌ ཆོད༌པ༌ ཚང༌མ༌ མོ༌ཟེས༌སི༌ ཀ༌ནེ༌ ཁོང༌གུན༌ནི༌ ལེནས༌། མི༌གུན༌ནི༌ ཆད༌མ༌ཅུག༌ག༌ ཞག༌ཏང༌ ང༌མོ༌ ཆོད༌པ༌གུན༌ ཕུལ༌ཅེས༌ལ༌ ཁྱོང༌ངད༌པིན༌།
EXO 36:4 ཏེ༌ནེ༌ ཟོ༌ལས༌སི༌ ལས༌ སྣ༌ཚོགས༌ ཅོ༌ཨིན༌ ཡོད༌ཁན༌ནི༌ ཁས༌པ༌ མི༌ ཚང༌མ༌ སོང༌ཏེ༌
EXO 36:5 མོ༌ཟེས༌ལ༌ ཟེརས༌, “ཡ༌ཝའེ༌ བཀའ༌ སལ༌ཁན༌ནི༌ ལས༌སི༌ ནང༌ང༌ སྒོས༌དོམ༌ ཡོད༌ཁན༌ནི༌ སང༌ མང༌ང༌ མི༌གུན༌ནི༌ ཁྱོང༌དུག༌།”
EXO 36:6 ཏེ༌བོའེ༌ཕིའ༌ མོ༌ཟེས༌སི༌ མི༌ཚང༌མ༌ལ༌ ལོན༌ ཀལ༌ཏེ༌ ཟེརས༌, “བུ༌ཚ༌ དང༌ བུ༌མོ༌ གུན༌ ཏམ༌པའེ༌ ཀུར༌རི༌ ཕིའ༌ ཆོད༌པ༌ མ༌ཁྱོང༌ཤིག༌།” ཏེ༌ནེ༌ མི༌གུན༌ལ༌ ཆོད༌པ༌ ཁྱོང༌ ཚར༌ཁན༌བོའེ༌སང༌ མང༌ང༌ ཁྱོང༌ མ༌ཅུགས༌,
EXO 36:7 ཅིའ༌ཟེར༌ན༌ ཁྱོང༌ཚར༌ཁན༌ནི༌ ཆོད༌པ༌གུན༌, ལས༌ ཚང༌མ༌ ཅོ༌ཅེས༌ལ༌ སྒོས༌དོམ༌ ཡོད༌ཁན༌ནི༌ སང༌ མང༌ང༌ ཡོད༌པིན༌།
EXO 36:8 ཟོ༌ལས༌ལ༌ ཁས༌པ༌ ཚང༌མའེ༌ ཏམ༌པའེ༌ ཀུར༌བོ༌ ཐགས༌ཁན༌ནི༌ རས༌ ཀུས༌པོའེ༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཆེ༌ར༌བེམ༌མི༌ པར༌ སྲུལ༌ཏེ༌ ཡོ༌ལ༌ 10 ཉམ༌པོ༌ ཅོས༌།
EXO 36:9 ཏེ༌ ཡོ༌ལ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 12 ཡང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོད༌པིན༌།
EXO 36:10 ཁོང༌གུན༌ནི༌ ཡོ༌ལ༌ ལྔ༌བོ༌ ཙེམས༌ཏེ༌ ཆའ༌ཅིག༌ ཅོས༌, ཏེན༌ན༌ ཙོགས༌ ཞན༌ ལྔ༌བོ༌ ཉམ༌པོའང༌ ཅོས༌།
EXO 36:11 ཁོང༌གུན༌ནི༌ ཡོ༌ལའེ༌ ཆ༌ ཉིས༌ཀོའེ༌ ཟུར༌གུན༌ནི༌ཀ༌ རས༌ སྔོན༌པོའེ༌ གུག༌ ཅོས༌།
EXO 36:12 ཡོ༌ལའེ༌ ཆ༌ ཅིག༌པོའེ༌ཀ༌ གུག༌ ལྔབ༌ཅུ༌, ཡང༌ ཞན༌ ཆ༌ ཅིག༌པོའེ༌ཀའང༌ གུག༌ ལྔབ༌ཅུ༌ ཅོས༌། གུག༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཡོད༌པིན༌།
EXO 36:13 ཁོང༌གུན༌ནི༌ སེར༌ཀུག༌ ལྔབ༌ཅུ༌ ཅོས༌ཏེ༌ ཡོ༌ལའེ༌ ཆ༌ ཉིས༌ཀོ༌ ཐུད༌ཅེས༌སི༌ ཕིའ༌ ཀོལས༌། ཏེན༌ན༌ཟུག༌གི༌ ཀུར༌བོ༌ ཁག༌ཅིག༌ གྱུར༌།
EXO 36:14 ཏེ༌ནེ༌ ཁོང༌གུན༌ནི༌ ཏམ༌པའེ༌ ཀུར༌ལ༌ ཀབ༌ཅེས༌ ར༌མའེ༌ སྤུའེ༌ ཡོ༌ལ༌ ཅུག༌ཤིག༌ ཅོས༌།
EXO 36:15 ཏེ༌ ཚང༌མ༌ དྲན༌དྲ༌, རིང༌བོ༌ མི༌ཀྲར༌ 13.5 ཡང༌ ཞང༌བོ༌ མི༌ཀྲར༌ 2 ཟམ༌ཤིག༌ ཡོད༌པིན༌།
EXO 36:16 ཁོང༌གུན༌ནི༌ ཏེ༌ ལྔ༌བོ༌ ཙེམས༌ཏེ༌ ཆའ༌ཅིག༌ ཅོས༌། ཏེན༌ན༌ ཙོགས༌ ཞན༌ དྲུག༌པོ༌ ཙེམས༌ཏེ༌ ཆའ༌ཅིག༌ ཅོས༌།
EXO 36:17 ཁོང༌གུན༌ནི༌ ཆ༌ ཅིག༌གི༌ ཟུར༌རི༌ཀ༌ གུག༌ ལྔབ༌ཅུ༌ ཡང༌ ཆ༌ ཅིག༌པོའེ༌ ཟུར༌རི༌ཀའང༌ གུག༌ ལྔབ༌ཅུ༌ ཅོས༌།
EXO 36:18 ཁོང༌གུན༌ནི༌ ཏེ༌ ཆ༌ ཉིས༌ཀོ༌ ཐུད༌ཅེས༌སི༌ ཕིའ༌ ར༌གན༌ནི༌ ཀུག༌ཀུག༌ ལྔབ༌ཅུ༌ ཅོས༌, ཏེན༌ན༌ཟུག༌གི༌ ཀབ༌ཅེས༌པོ༌ ཁག༌ཅིག༌ གྱུར༌།
EXO 36:19 ཁོང༌གུན༌ནི༌ ཀུར༌ལ༌ ཀབ༌ཅེས༌པོ༌ ལུག༌ཕོའེ༌ པགས༌པ༌ རང༌ མར༌པོ༌ ཏང༌ཁན༌ ཉམ༌པོ༌ ཡང༌ ཏེ༌བོའེ༌ ཁེ༌ཐོག༌ག༌ ཞན༌ ཀབ༌ཅེས༌ཤིག༌ སེམས༌ཅན༌ནི༌ གྱལ༌ལ༌ པགས༌པའ༌ ཅོས༌།
EXO 36:20 ཁོང༌གུན༌ནི༌ ཏམ༌པའེ༌ ཀུར༌ ལང༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ རིབ༌ཞི༌ ཅོས༌།
EXO 36:21 རིབ༌ཞི༌ རེ༌རེ༌ རིང༌བོ༌ མི༌ཀྲར༌ 4.5 ཡང༌ ཞང༌བོ༌ སེན༌ཀྲི༌མི༌ཀྲར༌ 66 ཡོད༌པིན༌།
EXO 36:22 རིབ༌ཞི༌ རེ༌རེའེ༌ ཁད༌ཅེས༌ལ༌ ཇུག༌པོ༌ ཞོགས༌ཏེ༌ ཟེར༌ ཙོགས༌ ཉིས༌ ཅོས༌། ཏམ༌པ༌ ཀུར༌རི༌ རིབ༌ཞི༌ ཚང༌མ༌ ཙོགས༌ ཅོས༌།
EXO 36:23 ཁོང༌གུན༌ནི༌ ཏམ༌པའེ༌ ཀུར༌རི༌ ལྷོ༌ ཆོགས༌སི༌ ཕིའ༌ རིབ༌ཞི༌ ཉི༌ཤུ༌ ཅོས༌
EXO 36:24 ཡང༌ ཏེ༌གུན༌ ལང༌ཅེས༌ལ༌ མུལ༌ལི༌ ཞབ༌ལྡན༌ ཞིབ༌ཅུ༌, རིབ༌ཞི༌ ཅིག༌ག༌ ཞབ༌ལྡན༌ ཉིས༌, ཟེར༌ ཅིག༌གི༌ ཡོག༌ག༌ ཞབ༌ལྡན༌ ཅིག༌།
EXO 36:25 ཁོང༌གུན༌ནི༌ ཏམ༌པའེ༌ ཀུར༌རི༌ བྱང༌ ཆོགས༌ལ༌ རིབ༌ཞི༌ ཉི༌ཤུ༌
EXO 36:26 ཡང༌ མུལ༌ལི༌ ཞབ༌ལྡན༌ ཞིབ༌ཅུ༌ ཅོས༌, རིབ༌ཞི༌ རེ༌རེའེ༌ ཡོག༌ག༌ ཞབ༌ལྡན༌ ཉིས༌།
EXO 36:27 ཏམ༌པའེ༌ ཀུར༌རི༌ གྱབ༌, ནུབ༌ ཆོགས༌ལ༌ ཁོང༌གུན༌ནི༌ རིབ༌ཞི༌ དྲུག༌ ཅོས༌,
EXO 36:28 ཡང༌ རིབ༌ཞི༌ ཐེ༌བ༌ ཉིས༌ ཏམ༌པའེ༌ ཀུར༌རི༌ གྱབ༌བི༌ ཀྲུ༌གུན༌ནི༌ ཕིའ༌ ཅོས༌།
EXO 36:29 ཀྲུའི༌ རིབ༌ཞི༌གུན༌ ཡོག༌ནེ༌ བེ༌ཏེ༌ ཨིན༌ནའང༌ ཁེ༌ཐོག༌པོ༌ སེར༌རི༌ ཀྱི༌ལྡིར༌ ཉམ༌པོ༌ ཐུདས༌, ཏེ༌ རིབ༌ཞིའི༌ ཉིས༌ཀོ༌ ཙོགས༌ ཅོས༌།
EXO 36:30 ཏ༌ རིབ༌ཞི༌ 8 ཡང༌ མུལ༌ལི༌ ཞབ༌ལྡན༌ 16 ཡོད༌པིན༌, རིབ༌ཞི༌ རེ༌རེའེ༌ ཡོག༌ག༌ ཞབ༌ལྡན༌ ཉིས༌།
EXO 36:31 ཁོང༌གུན༌ནི༌ པ༌ར༌ཁ༌ ཏང༌ཅེས༌གུན༌ ཨ༌ཀ༌ཤིའེ༌ ཤིང༌ངི༌ ཅོས༌, ཏམ༌པའེ༌ ཀུར༌རི༌ འི༌ངོ༌ ཆོགས༌སི༌ རིབ༌ཞི༌ ཕིའ༌ ལྔ༌,
EXO 36:32 འ༌ངོ༌ ཆོགས༌སི༌ རིབ༌ཞི༌ ཕིའ༌ ལྔ༌ ཡང༌ ཏམ༌པ༌ ཀུར༌རི༌ གྱབ༌ ནུབ༌ ཆོགས༌སི༌ རིབ༌ཞི༌ ཕིའ༌ ལྔ༌།
EXO 36:33 ཞུང༌སྐྱིལ༌ལི༌ པར༌ཁའེ༌ ཀྲ༌ལུ༌བོ༌ ཀུར༌རི༌ གོ༌ནེ༌ ཇུག༌ ཚག༌པ༌ ལེབ༌ཅེས༌ ཅོས༌ ཀ༌བོ༌ རིབ༌ཞི༌ ཞུང༌སྐྱིལ༌ལི༌ཀ༌ ཡོད༌པིན༌།
EXO 36:34 ཁོང༌གུན༌ནི༌ རིབ༌ཞི༌གུན༌ སེར༌རི༌ ཏུམས༌ ཡང༌ ཏེ༌གུན༌ནི༌ཀ༌ པ༌ར༌ཁ༌ ཏང༌ཅེས༌སི༌ ཤིང༌གུན༌ གྱུད༌ཅེས༌ལ༌ སེར༌རི༌ ཀྱི༌ལྡིར༌ ཅོས༌། པ༌ར༌ཁ༌ ཏང༌ཅེས༌སི༌ ཤིང༌གུན༌ནའང༌ སེར༌རི༌ ཏུམས༌།
EXO 36:35 ཁོང༌གུན༌ནི༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཡང༌ རས༌ ཐགས༌ཁན༌ ཀུས༌པོའེ༌ ཡོ༌ལ༌ ཅོས༌ ཀ༌བོའེ༌ཀ༌ ལག༌ཤེས༌ ཁས༌པ༌གུན༌ནི༌ ཆེ༌ར༌བེམ༌མི༌ པར༌ སྲུལ༌ཏེ༌ ཡོད༌པིན༌།
EXO 36:36 ཁོང༌གུན༌ནི༌ ཡོ༌ལའེ༌ ཕིའ༌ སེར༌ཀུག༌ དང༌ ཨ༌ཀ༌ཤིའེ༌ ཤིང༌ངི༌ ཀ༌ཝ༌ ཞི༌ ཅོས༌ཏེ༌ སེར༌རི༌ ཏུམས༌ ཡང༌ ཏེ༌གུན༌ ལང༌ཅེས༌ལ༌ མུལ༌ལི༌ ཞབ༌ལྡན༌ ཞི༌ ཅོས༌།
EXO 36:37 ཀུར༌རི༌ ནང༌ང༌ ཆ༌ཅེས༌སི༌ སྒོའ༌ ཡོ༌ལ༌ རས༌ ཐགས༌ཁན༌ ཀུས༌པོའེ༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མའེ༌ རི༌མོ༌ སྲུལ༌ཏེ༌ ཅོས༌།
EXO 36:38 ཏེ༌བོའེ༌ ཕིའ༌ ཀ༌ཝ༌ ལྔ༌ དང༌ ཏེ༌གུན༌ནི༌ ལྕག༌ཀུག༌གུན༌ ཅོས༌ ཡང༌ ཏེ༌ ཀ༌ཝ༌གུན༌ནི༌ ཁེ༌ཐོག༌པོ༌ དང༌ ཏེ༌གུན༌ནི༌ ཀྱི༌ལྡིར༌གུན༌ སེར༌རི༌ ལྡུམ༌ ཨང༌ ཏེ༌གུན༌ ལང༌ཅེས༌ལ༌ ར༌གན༌ནི༌ ཞབ༌ལྡན༌ ལྔ༌ ཅོས༌།
EXO 37:1 བེ༌ཟ༌ལེལ༌ལི༌ ཨ༌ཀ༌ཤིའེ༌ ཤིང༌ང༌ ཆད༌དོན༌ནི༌ སྒམ༌བོ༌ ཅོས༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110, ཞང༌ དང༌ ཐོན༌ དྲན༌དྲའ༌ སེན༌ཀྲི༌མི༌ཀྲར༌ 66 ཡོད༌པིན༌།
EXO 37:2 ཁོའེ༌ ཏེ༌བོའེ༌ ནང༌ཀུག༌ དང༌ ཕི༌ལོག༌ ཉིས༌ཀོ༌ སེར༌རི༌ ཏུམས༌ ཡང༌ ཕི༌ལོག༌གི༌ ཟུར༌ལ༌ སེར༌རི༌ ཐའ༌རིལ༌ ཏངས༌།
EXO 37:3 ཁོའེ༌ སེར༌རི༌ ཀྱི༌ལྡིར༌ ཞི༌ ཅོས༌ ཡང༌ ཏེ༌གུན༌ ཏེ༌བོའེ༌ རྐང༌ ཞི༌ཀོའེ༌ཀ༌ ཏགས༌, ཆོག༌ རེ༌རེ༌ཀ༌ ཀྱི༌ལྡིར༌ ཉིས༌།
EXO 37:4 ཁོའེ༌ སྒམ༌བོ༌ ཁུར༌ཅེས༌ལ༌ ཨ༌ཀ༌ཤིའེ༌ ཤིང༌ངི༌ ཀྲ༌ལུའ༌ སེར༌ ཏུམས༌ཏེ༌
EXO 37:5 ཏེ༌བོའེ༌ ལྡ༌ལྡོ༌ ཉིས༌ཀོའ༌ ཡོད༌ཁན༌ནི༌ ཀྱི༌ལྡིར༌གུན༌ནི༌ ནང༌ང༌ ཏེ༌གུན༌ གྱུད༌།
EXO 37:6 ཁོའེ༌ ཏེ༌ སྒམ༌མ༌ མི༌གུན༌ནི༌ སྡིག༌པའ༌ ཤགས༌པ༌ སལ༌ཁན༌ སེར༌རི༌ ཁའ༌ལེབ༌ ཅོས༌, ཏེ༌བོའེ༌ རིང༌བོ༌ སེན༌ཀྲི༌མི༌ཀྲར༌ 110 ཡང༌ ཞང༌བོ༌ སེན༌ཀྲི༌མི༌ཀྲར༌ 66 ཡོད༌པིན༌།
EXO 37:7 ཁོའེ༌ ཏེ༌བོའེ༌ ཐའ༌མ༌ ཉིས༌ཀོའ༌ སེར༌ རྡུངས༌ཏེ༌ ཆེ༌ར༌བེམ༌ ཉིས༌ ཅོས༌།
EXO 37:8 འི༌ངོ༌ ཆོགས༌སི༌ ཐའ༌མ༌ ཅིག༌ ཡང༌ འ༌ངོ༌ ཆོགས༌སི༌ ཐའ༌མ༌ ཅིག༌, ཏེ༌གུན༌ ཐུག༌རྗེ༌ ཁའ༌ལེབ༌ ཉམ༌པོ༌ ཐུད༌ཏེ༌ སེར༌ ཅིག༌ཅིག༌ག༌ ཅོས༌ཏེ༌ ཡོད༌པིན༌།
EXO 37:9 ཆེ༌ར༌བེམ༌གུན༌ནི༌ ཤོག༌པ༌ ཀེན༌ལ༌ རྐྱངས༌ཏེ༌ ཐུག༌རྗེ༌ ཁའ༌ལེབ༌པོ༌ ཀབས༌ཏེ༌ ཡོད༌པིན༌། ཏེ༌གུན༌ ཅིག༌ དང༌ ཅིག༌ག༌ ལྟས༌ཏེ༌ ཐུག༌རྗེ༌ ཁའ༌ལེབ༌ ཆོགས༌ལ༌ གོ༌ སྒུས༌ཏེ༌ ཡོད༌པིན༌།
EXO 37:10 བེ༌ཟ༌ལེལ༌ལི༌ ཨ༌ཀ༌ཤིའེ༌ ཤིང༌ངི༌ ཅོག༌ཙེ༌ ཅོས༌ ཀ༌བོའེ༌ རིང༌བོ༌ སེན༌ཀྲི༌མི༌ཀྲར༌ 88, ཞང༌བོ༌ སེན༌ཀྲི༌མི༌ཀྲར༌ 44 དང༌ ཐོན༌བོ༌ སེན༌ཀྲི༌མི༌ཀྲར༌ 66 ཡོད༌པིན༌།
EXO 37:11 ཁོའེ༌ ཏེ༌བོ༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམས༌ ཡང༌ ཐའ༌མ༌ གུན༌ལ༌ སེར༌རི༌ ཐའ༌རིལ༌ ཏངས༌།
EXO 37:12 ཏེ༌བོའ༌ ཀིར༌ སྐོར༌ཏེ༌ སེན༌ཀྲི༌མི༌ཀྲར༌ 7 ཞང༌ངི༌ སྐྱོར༌ར༌ ཏངས༌ ཡང༌ ཏེ༌བོའེ༌ ཐའ༌མ༌ སེར༌རི༌ ཐའ༌རིལ༌ ཏངས༌།
EXO 37:13 སེར༌རི༌ ཀྱི༌ལྡིར༌ ཞི༌ ཅོས༌ ཡང༌ ཏེ༌གུན༌ ཀྲུ༌ ཞི༌ཀོའེ༌ རྐང༌ངི༌ཀ༌ ཏགས༌།
EXO 37:14 ཅོག༌ཙེ༌ ཁུར༌ཅེས༌སི༌ ཀྲ༌ལུ༌གུན༌ གྱུད༌ཅེས༌ལ༌ ཀྱི༌ལྡིར༌གུན༌ ཏེ༌བོའེ༌ ཐོག༌གི༌ ཟུར༌རི༌ དུན༌ལ༌ ཡོད༌པིན༌།
EXO 37:15 ཀྲ༌ལུ༌གུན༌ ཨ༌ཀ༌ཤིའེ༌ ཤིང༌ང༌ སེར༌ ཏུམས༌ཏེ༌ ཨིན༌པིན༌།
EXO 37:16 ཅོག༌ཙེ༌ཀ༌ ཀོལ༌ཅེས༌སི༌ ཅ༌ལག༌གུན༌ ཅའང༌ མ༌དྲེས༌ཁན༌ནི༌ སེར༌ལ༌ ཅོས༌། ཏེ༌གུན༌ ཐལ༌ལི༌, ཀོ༌རེ༌, སྒོར༌མོ༌ ཡང༌ རྒུན༌ཆང༌ངི༌ ཆོད༌པ༌ ལུག༌ཅེས༌སི༌ ནོད༌ གུན༌ ཨིན༌ནོག༌།
EXO 37:17 ཁོའེ༌ ཅའང༌ མ༌དྲེས༌ཁན༌ སེར༌རི༌ འོད༌སྟགས༌ ཅོས༌, ཏེ༌བོའེ༌ ཞབ༌ལྡན༌, རྐང༌གུན༌, མེན༌ཏོག༌ ཙོགས༌ ཀོ༌རེ༌གུན༌, པ༌ཏུམ༌ དང༌ མེན༌ཏོག༌ བར༌ཁན༌ གུན༌ སེར༌ ཅིག༌ཅིག༌ རྡུངས༌ཏེ༌ ཅོས༌།
EXO 37:18 ཏེ༌བོའ༌ རྐང༌ དྲུག༌ ཅོས༌, ལྡོ༌ རེ༌རེའ༌ རྐང༌ སུམ༌སུམ༌།
EXO 37:19 རྐང༌ རེ༌རེ༌ཀ༌ བ༌དམ༌མི༌ མེན༌ཏོག༌ བར༌ཁན༌ ཙོགས༌ སུམ༌སུམ༌ ཡང༌ པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ གུན༌ ཅོས༌། ཏེན༌ན༌ ཙོགས༌ འོད༌སྟག༌གི༌ རྐང༌ དྲུག༌པོའེ༌ཀ༌ ཅོས༌།
EXO 37:20 འོད༌སྟག༌གི༌ ཞུང༌སྐྱིལ༌ལི༌ རྐང༌ངི༌ཀ༌ བ༌དམ༌མི༌ མེ༌ཏོག༌ བར༌ཁན༌ ཙོགས༌ ཞི༌ ཡང༌ པ༌ཏུམ༌ དང༌ ཏེ༌བོ༌ ཀབས༌ཁན༌ནི༌ ལོ༌མ༌ གུན༌ ཅོས༌།
EXO 37:21 ཞུང༌ངི༌ རྐང༌ངི༌ཀ༌ ཞན༌ རྐང༌ ཆ༌ སུམ༌ཀོ༌ ཐུད༌ཏེ༌ ཡོད༌ས༌ རེ༌རེ༌ ཡོག༌ག༌ པ༌ཏུམ༌ ཅོས༌, ཏེ༌ ཚང༌མ༌ ཁོའེ༌ སེར༌ ཅིག༌ རྡུངས༌ཏེ༌ ཅོས༌,
EXO 37:22 པ༌ཏུམ༌ དང༌ རྐང༌ ཚང༌མ༌ འོད༌སྟགས༌ ཉམ༌པོ༌ སེར༌ ཅིག༌ཅིག༌ རྡུངས༌ཏེ༌ ཅོས༌།
EXO 37:23 ཁོའེ༌ འོད༌སྟག༌གི༌ ཕིའ༌ མར༌ནག༌ སྐང༌ཅེས༌ལ༌ ཀོ༌རེ༌ རྡུན༌, སར༌ ཀྲུམ༌ཅེས༌ དང༌ ཏེ༌བོའེ༌ ཏ༌བག༌ ཚང༌མ༌ ཅའང༌ མ༌དྲེས༌ཁན༌ནི༌ སེར༌ལ༌ ཅོས༌།
EXO 37:24 འོད༌སྟགས༌ དང༌ ཏེ༌བོའེ༌ ལག༌ཆ༌ ཚང༌མ༌ ཅོ༌ཅེས༌ལ༌ ཁོའེ༌ ཅའང༌ མ༌དྲེས༌ཁན༌ནི༌ སེར༌ ཀི༌ལོ༌ 35 ཀོལས༌།
EXO 37:25 ཁོའེ༌ སྤོས༌ ཏུག༌ཅེས༌སི༌ ཕིའ༌ ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ ཅོས༌། ཐོན༌བོ༌ སེན༌ཀྲི༌མི༌ཀྲར༌ 90 ཡང༌ ཏེ༌བོའེ༌ ཐོག༌པོ༌ ཀྲུབ༌ཞི༌, རིང༌ དང༌ ཞང༌ སེན༌ཀྲི༌མི༌ཀྲར༌ 45 ཡོད༌པིན༌། ཀྲུ༌ ཞི༌ཀོ༌ ཙེབ༌ཙེབ༌ ར༌ཅོ༌ ཙོགས༌, ཆོད༌ཁྲི༌ ཉམ༌པོ༌ ཨ༌ཀ༌ཤིའེ༌ ཤིང༌ ཅིག༌ཅིག༌ག༌ ཅོས༌།
EXO 37:26 ཁོའེ༌ ཆོད༌ཁྲི༌ གང༌པོ༌ ཡང༌ན༌ ཏེ༌བོའེ༌ ཐོག༌, ཆོག༌ ཞི༌ཀོ༌ དང༌ རཱ༌ཅོ༌ གུན༌ ཅའང༌ མ༌དྲེས༌ཁན༌ནི༌ སེར༌ ཉམ༌པོ༌ ཏུམས༌ ཡང༌ ཏེ༌བོའེ༌ ཐའ༌མ༌ ཀྱིར༌སྐོར༌ཏེ༌ སེར༌རི༌ ཐའ༌རིལ༌ ཏངས༌།
EXO 37:27 ཟུར༌རི༌ ཡོག༌ག༌ ཆོགས༌ ཉིས༌ཀོའེ༌ཀ༌ སེར༌རི༌ ཀྱི༌ལྡིར༌ ཉིས༌ཉིས༌ ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌ གྱུད༌ཅེས༌ལ༌ ཏགས༌།
EXO 37:28 ཁོའེ༌ ཀྲ༌ལུ༌གུན༌ ཨ༌ཀ༌ཤིའེ༌ ཤིང༌ང༌ ཅོས༌ཏེ༌ སེར༌ ཏུམས༌།
EXO 37:29 ཏྲི༌ཞིམ༌ ཅོ༌ཁན༌ནི༌ ལས༌ ཙོགས༌, ཁོང༌གུན༌ནི༌ ཁྲུས༌ཏང༌ཅེས༌སི༌ མར༌ནག༌ ཡང༌ ཏྲི༌ཞིམ༌ཅན༌ནི༌ སྤོས༌ གུན༌ ཅོས༌།
EXO 38:1 བེ༌ཟ༌ལེལ༌ དང༌ ཁོའ༌ ཡ༌ཏོ༌ ཅོ༌ཁན༌གུན༌ནི༌ ཆོད༌པ༌ མེའ༌ སྲག༌ཅེས༌སི༌ ཕིའ༌ ཨ༌ཀ༌ཤིའེ༌ ཤིང༌ངི༌ ཆོད༌ཁྲི༌ ཅོས༌། ཏེ༌བོ༌ ཀྲུབ༌ཞི༌, ལྡོ༌ རེ༌རེ༌ ཞང༌ མི༌ཀྲར༌ 2 དང༌ ཐོན༌བོ༌ མི༌ཀྲར༌ 1.5 ཟམ༌ཤིག༌ ཡོད༌པིན༌།
EXO 38:2 ཁོང༌གུན༌ནི༌ ཀྲུ༌ ཞི༌ཀོ༌ ཙེབ༌ཙེབ༌ ར༌ཅོ༌ ཙོགས༌ ཅོས༌། ཆོད༌ཁྲི༌ དང༌ ར༌ཅོ༌ གུན༌ ཤིང༌ཅིག༌ག༌ ཅོས༌ ཡང༌ ཆོད༌ཁྲི༌ གང༌པོའ༌ ར༌གན༌ ཏུམས༌།
EXO 38:3 ཆོད༌ཁྲི༌ཀ༌ ཀོལ༌ཁན༌ནི༌ ཅ༌ལག༌: ཀོག༌ཐལ༌ གྱང༌ཅེས༌སི༌ ནོད༌གུན༌, ཁྱེམ༌གུན༌, ཐོར༌མ༌ ཏང༌ཅེས༌སི༌ སྒོར༌མོ༌གུན༌, ཤ༌ ལོག༌ཅེས༌སི༌ མེ༌ལེན༌གུན༌ ཡང༌ མེ༌ ཕིང༌ཅེས༌སི༌ ཏ༌འོ༌གུན༌ ར༌གན༌ནི༌ ཅོས༌།
EXO 38:4 ཁོའེ༌ ར༌གན༌ནི༌ ཀྲ༌མིག༌ ཅོས༌ཏེ༌ ཏེ༌བོ༌ ཆོད༌ཁྲིའི༌ ནང༌ཀུག༌ག༌ ཕེད༌ ཟོད༌ ཅིག༌ག༌ ཏགས༌།
EXO 38:5 ཏེ༌བོ༌ ཁུར༌ཅེས༌སི༌ ཀྲ༌ལུ༌གུན༌ གྱུད༌ཅེས༌ལ༌ ཁོའེ༌ ར༌གན༌ནི༌ ཀྱི༌ལྡིར༌ ཞི༌ ཅོས༌ཏེ༌ ཀྲ༌མིག༌གི༌ ཀྲུ༌ ཞི༌ཀོའེ༌ཀ༌ ཕི༌ལོག༌ ཆོགས༌ལ༌ ཏགས༌།
EXO 38:6 ཏེ༌གུན༌ ཨ༌ཀ༌ཤིའེ༌ ཤིང༌ང༌ ཀྲ༌ལུ༌ ར༌གན༌ ཏུམས༌ཏེ༌ ཡོད༌པིན༌།
EXO 38:7 ཆོད༌ཁྲི༌ ཁུར༌ཅེས༌ལ༌ ཀྲ༌ལུ༌གུན༌ ཀྱི༌ལྡིར༌གུན༌ནི༌ ནང༌ང༌ གྱུདས༌, ཆོད༌ཁྲི༌བོ༌ སྤང༌ལེབ༌བ༌ ཅོས༌ཏེ༌ ཁོག༌སྟོང༌ ཡོད༌པིན༌།
EXO 38:8 ཡ༌ཝ༌ ཐུག༌སའེ༌ ཀུར༌རི༌ སྒོའེ༌ཀ༌ ལས༌ ཅོ༌ཁན༌ བུ༌མོ༌གུན༌ནི༌ ར༌གན༌ནི༌ མེ༌ལོང༌ ཕུལ༌ཁན༌གུན༌ ཉམ༌པོ༌ བེ༌ཟ༌ལེལ༌ལི༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ཅེས༌པོ༌ ཅོས༌།
EXO 38:9 ཏེ༌ནེ༌ བེ༌ཟ༌ལེལ༌ དང༌ ཁོའ༌ ཡ༌ཏོ༌ ཅོ༌ཁན༌གུན༌ནི༌ ཀུར༌རི༌ ནང༌སྐོར༌རི༌ ཕིའ༌ ཀུས༌པོ༌ ཐགས༌ཁན༌ནི༌ ཡོ༌ལ༌ ཅོས༌། ལྷོ༌ ཆོགས༌སི༌ ཡོ༌ལ༌ མི༌ཀྲར༌ 46 རིང༌མོ༌ ཡོད༌པིན༌,
EXO 38:10 ཏེ༌གུན༌ ཅར༌ཅེས༌ལ༌ ར༌གན༌ནི༌ ཀ༌ཝ༌ ཉི༌ཤུ༌ དང༌ ཞབ༌ལྡན༌ ཉི༌ཤུ༌ ཡང༌ མུལ༌ཀུག༌གུན༌ དང༌ མུལ༌ལི༌ ཀྱི༌ལྡིར༌གུན༌ ཅོས༌།
EXO 38:11 བྱང༌ ཆོགས༌སི༌ ཕིའང༌ ཏེན༌ན༌ ཙོགས༌ ཡོ༌ལ༌ མི༌ཀྲར༌ 46 རིང༌མོ༌, ར༌གན༌ནི༌ ཀ༌ཝ༌ ཉི༌ཤུ༌ དང༌ ཞབ༌ལྡན༌ ཉི༌ཤུ༌ ཡང༌ མུལ༌ལི༌ ཀུག༌ཀུག༌གུན༌ དང༌ ཀྱི༌ལྡིར༌གུན༌ ཅོས༌།
EXO 38:12 ཁོང༌གུན༌ནི༌ ནུབ༌ ཆོགས༌སི༌ ཡོ༌ལ༌ མི༌ཀྲར༌ 23 རིང༌མོ༌, ཀ༌ཝ༌ རྕུ༌ དང༌ ཞབ༌ལྡན༌ རྕུ༌ ཡང༌ ཀ༌ཝ༌གུན༌ནི༌ཀ༌ མུལ༌ཀུག༌ དང༌ མུལ༌ལི༌ ཀྱི༌ལྡིར༌གུན༌ ཅོས༌།
EXO 38:13 དུན༌ ཡང༌ན༌ ཤར༌ ཆོགས༌སི༌ ཡོ༌ལ༌ མི༌ཀྲར༌ 22 རིང༌མོ༌ ཡང༌ ནང༌ཀུག༌ག༌ ཞུག༌སའེ༌ སྒོ༌ ཅོས༌།
EXO 38:14 སྒོའེ༌ ཡས༌ ཆོགས༌སི༌ ཡོ༌ལ༌ མི༌ཀྲར༌ 6.5 ཟམ༌ཤིག༌ རིང༌མོ༌ ཡང༌ ཀ༌ཝ༌ སུམ༌ དང༌ ཞབ༌ལྡན༌ སུམ༌ ཅོས༌།
EXO 38:15 སྒོའེ༌ ཡོ༌མ༌ ཆོགས༌སི༌ ཡོ༌ལ༌ མི༌ཀྲར༌ 6.5 ཟམ༌ཤིག༌ རིང༌མོ༌ ཡང༌ ཀ༌ཝ༌ སུམ༌ དང༌ ཞབ༌ལྡན༌ སུམ༌ ཅོས༌།
EXO 38:16 ནང༌སྐོར༌རི༌ ཡོ༌ལ༌ ཚང༌མ༌ ཐགས༌ཁན༌ནི༌ རས༌ རིན༌ཅན༌ལ༌ ཅོས༌།
EXO 38:17 ཀ༌ཝ༌ ལང༌ཅེས༌སི༌ ཞབ༌ལྡན༌གུན༌ ར༌གན༌ལ༌ ཡང༌ ཀ༌ཝ༌གུན༌ནི༌ ལྕག༌ཀུག༌གུན༌ དང༌ ཀྱི༌ལྡིར༌གུན༌ མུལ༌ལ༌ ཅོས༌། ཀ༌ཝ༌གུན༌ནི༌ ཁེ༌ཐོག༌པོ༌ མུལ༌ ཏུམས༌ ཡང༌ ཏེ༌ཀ༌ མུལ༌ལི༌ ཀྱི༌ལྡིར༌གུན༌ ཏགས༌།
EXO 38:18 ནང༌སྐོར༌རི༌ ནང༌ང༌ ཞུག༌སའེ༌ ཡོ༌ལ༌ ཐགས༌ཁན༌ནི༌ རས༌རིན༌ཅན༌ནི༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཅོས༌། ཏེ༌བོའེ༌ རིང༌བོ༌ མི༌ཀྲར༌ 9 ཡང༌ ཐོན༌བོ༌ མི༌ཀྲར༌ 2 ཟམ༌ཤིག༌, ཀ༌ཟུག༌ ནང༌སྐོར༌རི༌ ཞན༌ ཡོ༌ལ༌གུན༌ ཡོད༌པིན༌།
EXO 38:19 ཏེ༌བོའ༌ ཀ༌ཝ༌ ཞི༌ དང༌ ར༌གན༌ནི༌ ཞབ༌ལྡན༌ ཞི༌ ཡང༌ མུལ༌ལི༌ ཀུག༌ཀུག༌གུན༌ དང༌ ཀྱི༌ལྡིར༌གུན༌, ཀ༌ཝ༌གུན༌ནི༌ ཁེ༌ཐོག༌པོ༌ མུལ༌ལི༌ ཏུམས༌ཏེ༌ ཡོད༌པིན༌།
EXO 38:20 ཏམ༌པ༌ ཀུར༌ དང༌ ནང༌སྐོར༌རི༌ ཡོ༌ལ༌གུན༌ནི༌ པུར༌ཆ༌ ཚང༌མ༌ ར༌གན༌ནི༌ ཅོས༌།
EXO 38:21 མོ༌ཟེས༌སི༌ བཀའ༌ ཏངས༌པ༌, ཏམ༌པ༌ ཀུར༌ ཅོ༌ཅེས༌ལ༌ ཀོལ༌ཁན༌ནི༌ གྱུ༌ ཚང༌མའེ༌ ཐོ༌ བླ༌མ༌ ཨ༌རོན༌ནི༌ བུ༌ཚ༌ ཨི༌ཐ༌མར༌རི༌ ལམ༌སྟན༌ ནང༌ཞིན༌ ལི༌ཝི༌པ༌གུན༌ནི༌ ཅོས༌།
EXO 38:22 ཡ༌ཧུ༌དཱའེ༌ སྡེ༌ ནང༌ནེ༌ ཧུར༌རི༌ ཚ༌འོ༌ ཨུ༌རི༌ བུ༌ཚ༌ བེ༌ཟ༌ལེལ༌ལི༌, ཡ༌ཝའེ༌ མོ༌ཟེས༌ལ༌ བཀའ༌ ཏང༌ཁན༌ ནང༌ཞིན༌ ཅི༌ཚང༌མ༌ ཅོས༌།
EXO 38:23 ཁོའ༌ རོགས༌ཅོ༌ཁན༌ ཨ༌ཧི༌ས༌མག༌གི༌ བུ༌ཚ༌ ཨོ༌ཧོ༌ལིའབ༌, དཱན༌ནི༌ སྡེ༌ ནང༌ནེ༌ ཨིན༌པིན༌, ཁོ༌ རི༌མོ༌, ཟོ༌ལས༌ལ༌ ཡང༌ རས༌ ཀུས༌པོའེ༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཁན༌ ཁས༌པ༌ ཞིག༌ ཨིན༌པིན༌།
EXO 38:24 ཡ༌ཝའ༌ མིག༌སལ༌ལི༌ ཆོད༌པ༌ ཕུལ༌ཁན༌ནི༌ ནང༌ནེ༌ སེར༌ ཀི༌ལོ༌ 1,000 ཏམ༌པའེ༌ ཀུར༌ ཅོ༌ཅེས༌སི༌ ལས༌སི༌ ནང༌ང༌ ཀོལས༌, ཏེ༌བོ༌ སྐར༌ཅེས༌ལ༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌པོ༌ ཀོལས༌།
EXO 38:25 མི༌ཀྲངས༌ རྩི༌ ཟ༌ནེ༌ མི༌གུན༌ནི༌ ཀ༌ནེ༌ མུལ༌ ཀི༌ལོ༌ 3,400 ལྡུས༌, ཏེ༌བོ༌ སྐར༌ཅེས༌ལ༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌པོ༌ ཀོལས༌།
EXO 38:26 ལོ༌ ཉི༌ཤུ༌ ཡང༌ ཉི༌ཤུའི༌ སང༌ མང༌ང༌ ཨིན༌ཁན༌ མི༌ རེ༌རེའེ༌ ཀ༌ནེ༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌པོ༌ ནང༌ཞིན༌ མུལ༌ གརམ༌ 5.5 ལེནས༌། ཁོང༌གུན༌ནི༌ ཀྲངས༌ཀ༌ 6,03,550 ཡོད༌པིན༌།
EXO 38:27 ཏམ༌པའེ༌ ཀུར༌རི༌ ཡོ༌ལའེ༌ ཕིའ༌ ཀ༌ཝ༌ ལང༌ཅེས༌སི༌ ཞབ༌ལྡན༌ རེ༌རེ༌ ཅོ༌ཅེས༌ལ༌ ཏམ༌པའེ༌ ཀུར༌རི༌ ནང༌ང༌ ཏབ༌བ༌ ཀོལ༌ཁན༌ནི༌ ཚད༌པོ༌ ནང༌ཞིན༌ མུལ༌ ཀི༌ལོ༌ 34 ཀོལས༌། ཀ༌ཝ༌ གྱའེ༌ ཕིའ༌ མུལ༌ ཀི༌ལོ༌ 3,400 ཀོལས༌།
EXO 38:28 ལུས༌ཁན༌ནི༌ མུལ༌ ཀི༌ལོ༌ 30 ཅ༌ཀུག༌གུན༌, ཀྱི༌ལྡིར༌གུན༌ དང༌ ཀ༌ཝ༌གུན༌ནི༌ ཁེ༌ཐོག༌པོ༌ ཏུམ༌ཅེས༌ལ༌ ཀོལས༌།
EXO 38:29 ཡ༌ཝའེ༌ ཕིའ༌ ཕུལ༌ཁན༌ནི༌ ར༌གན༌ ཀི༌ལོ༌ 2,425 ཡོད༌པིན༌།
EXO 38:30 ཏེ༌བོ༌ ཁོང༌གུན༌ནི༌ ཡ༌ཝ༌ ཐུག༌སའེ༌ ཀུར༌རི༌ ནང༌ང༌ ཞུག༌སའེ༌ སྒོའེ༌ ཞབ༌ལྡན༌, ཆོད༌ཁྲི༌, ཏེ༌བོའེ༌ ཀྲ༌མིག༌ དང༌ ཆོད༌ཁྲི༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌,
EXO 38:31 ནང༌སྐོར༌རི༌ ཀ༌ཝ༌གུན༌ དང༌ སྒོའེ༌ ཞབ༌ལྡན༌གུན༌ ཡང༌ ཏམ༌པའེ༌ ཀུར༌ དང༌ ནང༌སྐོར༌རི༌ པུར༌ཆ༌ ཚང༌མ༌ ཅོ༌ཅེས༌ལ༌ ཀོལས༌།
EXO 39:1 ཁོང༌གུན༌ནི༌, བླ༌མ༌གུན༌ནི༌ ཏམ༌པའེ༌ ཀུར༌རི༌ ནང༌ང༌ ཞབས༌ཏོག༌ ཞུ༌ ཟ༌ནེ༌ གོན༌ཅེས༌, སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཐགས༌ཁན༌ནི༌ ཀོས༌གུན༌ ཅོས༌། ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཁོང༌གུན༌ནི༌ ཨ༌རོན༌ནི༌ ཕིའ༌ བླ༌མའེ༌ ཀོས༌པོ༌ ཅོས༌།
EXO 39:2 ཁོང༌གུན༌ནི༌ ཨེ༌ཕོད༌, རས༌ རིན༌ཅན༌ནི༌ཀ༌ སེར༌ ཡང༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ སྲུལ༌ཏེ༌ ཅོས༌།
EXO 39:3 ཁོང༌གུན༌ནི༌ ལག༌ཤེས༌ ཁས༌པའེ༌ ལས༌, སེར༌ སྲ༌མོ༌ རྡུངས༌ཏེ༌ ཏེ༌བོ༌ སྐུད༌པ༌ ཙོགས༌ ཁྲ༌མོ༌ ཅད༌ཏེ༌ རས༌ རིན༌ཅན༌ནི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ ཅོས༌།
EXO 39:4 ཁོང༌གུན༌ནི༌ ཨེ༌ཕོད༌དི༌ གྱབ༌ དང༌ དུན༌ ཐུད༌ཅེས༌ལ༌ སྤུང༌པའེ༌ རས༌པོ༌ ཅོས༌།
EXO 39:5 ཁོང༌གུན༌ནི༌ ཨེ༌ཕོད༌དི༌ སྐྱེ༌རག༌པོའང༌ ཏེན༌ན༌ ཙོགས༌ རས༌ རིན༌ཅན༌ནི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ ཅོས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 39:6 ཁོང༌གུན༌ནི༌ ཨོ༌ནེཀས༌ ཁྲ༌རྡོ༌གུན༌ནི༌ཀ༌ ཡ༌ཀོབ༌བི༌ བུ༌ཚ༌ རྕུག༌ཉིས༌སི༌ མིང༌གུན༌ སྐོས༌ཏེ༌ སེར༌རི༌ རིབ༌ཞི༌ ནང༌ང༌ ཅུགས༌།
EXO 39:7 ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌ ཨིད༌ཏུ༌ བོར༌ཅེས༌ལ༌ ཏེ༌བོ༌ ཨེ༌ཕོད༌དི༌ སྤུང༌པའེ༌ རས༌སི༌ཀ༌ ཏགས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 39:8 ཁོང༌གུན༌ནི༌ ཀྲང༌ང༌ ཀབ༌ཅེས༌ ཅོས༌, ལག༌ཤེས༌ ཁས༌པའེ༌ ལས༌ ཙོགས༌། ཏེ༌བོ༌ ཨེ༌ཕོད༌ ཙོགས༌ རས༌ རིན༌ཅན༌ནི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ ཅོས༌།
EXO 39:9 ཏེ༌བོ༌ ཀྲུབ༌ཞི༌, རིང༌ དང༌ ཞང༌ སེན༌ཀྲི༌མི༌ཀྲར༌ 22 ཡང༌ ཉི༌ལྟབ༌ ཅོས༌།
EXO 39:10 ཁོང༌གུན༌ནི༌ ཏེ༌བོའེ༌ཀ༌ ཁྲ༌རྡོའ༌ རིན༌ཅན༌གུན༌ནི༌ ཀྲལ༌ཞི༌ ཅོས༌ ཡང༌ གོ༌མའེ༌ ཀྲལ༌ལི༌ ནང༌ང༌ རུ༌བི༌, ཏོ༌པཟ༌ དང༌ ཡུ༌;
EXO 39:11 ཀྲལ༌ ཉིས༌པའེ༌ ནང༌ང༌ ཏར༌ཀོའེས༌, ནི༌ལིམ༌ དང༌ ཨི༌མ༌རལད༌;
EXO 39:12 ཀྲལ༌ སུམ༌པའེ༌ ནང༌ང༌ ཇེ༌སིནཐ༌, ཨ༌གཏ༌ དང༌ ཨ༌མེ༌ཐིསཏ༌;
EXO 39:13 ཀྲལ༌ ཞི༌པའེ༌ ནང༌ང༌ ཀརི༌སོ༌ལཱེཏ༌, ཨོ༌ནེཀས༌ དང༌ ཇས༌པར༌ གུན༌། ཏེ༌ ཚང༌མ༌ སེར༌རི༌ རིབ༌ཞི༌ ནང༌ང༌ ཅུགས༌།
EXO 39:14 ཁྲ༌རྡོའ༌ རྕུག༌ཉིས༌པོའེ༌ཀ༌ ཡ༌ཀོབ༌བི༌ བུ༌ཚ༌ རྕུག༌ཉིས༌སི༌ མིང༌གུན༌ ཐེ༌ཙེ༌ ཙོགས༌ལ༌ སྐོས༌ ཀ༌གུན༌ ཨིས༌ར༌ཨེལ༌ལི༌ མི༌སྡེ༌ རྕུག༌ཉིས༌ ཨིན༌ནོག༌།
EXO 39:15 ཀྲང༌ང༌ ཀབ༌ཅེས༌པོ༌ ཨེ༌ཕོད༌ ཉམ༌པོ༌ ཐུད༌ཅེས༌ལ༌ ཅའང༌ མ༌དྲེས༌ཁན༌ནི༌ སེར༌, ཁྲ༌མོ༌ ལྕུས༌ཏེ༌ ཉག༌ཐག༌ ཅོས༌།
EXO 39:16 ཁོང༌གུན༌ནི༌ སེར༌རི༌ རིབ༌ཞི༌ དང༌ ཀྱི༌ལྡིར༌ ཉིས༌ ཅོས༌ ཡང༌ ཀྱི༌ལྡིར༌གུན༌ ཀྲང༌ང༌ ཀབ༌ཅེས༌པོའེ༌ སྟག༌གི༌ ཀྲུ༌ ཉིས༌ཀོའེ༌ཀ༌ ཏགས༌།
EXO 39:17 སེར༌རི༌ ཉག༌ཐག༌གུན༌ནི༌ ཇུག༌ཅིག༌པོ༌ ཀྲང༌ང༌ ཀབ༌ཅེས༌སི༌ ཀྱི༌ལྡིར༌ ཉིས༌ཀོའེ༌ཀ༌ ཏགས༌།
EXO 39:18 ཉག༌ཐག༌གི༌ ཞན༌ ཇུག༌པོ༌ ཨེ༌ཕོད༌དི༌ དུན༌ ཆོགས༌སི༌ སྤུང༌པའེ༌ཀ༌ ཁྲ༌ ཅུག༌ཁན༌ སེར༌རི༌ རིབ༌ཞི༌ཀ༌ ཏགས༌།
EXO 39:19 སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཀྲང༌ང༌ ཀབ༌ཅེས༌པོའེ༌ ཡོག༌གི༌ ཀྲུ༌ ཉིས༌ཀོའེ༌ ཐིལ༌ལ༌ ཨེ༌ཕོད༌ ཆོགས༌ལ༌ ཏགས༌།
EXO 39:20 ཁོང༌གུན༌ནི༌ སེར༌རི༌ ཀྱི༌ལྡིར༌ ཡང༌ ཉིས༌ ཅོས༌ཏེ༌ ཨེ༌ཕོད༌དི༌ དུན༌ ཆོགས༌ལ༌ སྤུང༌པའེ༌ རས༌སི༌ ཇུག༌པོའེ༌ཀ༌, ཨེ༌ཕོད༌ དང༌ སྐྱེ༌རག༌ ཐུད༌སའེ༌ སྟག༌པོའེ༌ཀ༌ ཏགས༌།
EXO 39:21 ཀྲང༌ང༌ ཀབ༌ཅེས༌སི༌ ཀྱི༌ལྡིར༌གུན༌ དང༌ ཨེ༌ཕོད༌དི༌ སྐྱེ༌རག༌གི༌ ཁེ༌ཐོག༌ག༌ ཡོད༌ཁན༌ནི༌ ཀྱི༌ལྡིར༌གུན༌ སྔོན༌པོ༌ རས༌ ཁྲ༌མོ༌ ཉམ༌པོ༌ ལྡམས༌། ཏེ༌ནེ༌ ཀྲང༌ང༌ ཀབ༌ཅེས༌པོ༌ གྲུལ༌ མ༌གྲུལ༌ལ༌ ཨེ༌ཕོད༌ ཉམ༌པོ༌ སྟན༌པོ༌ ལུས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 39:22 ཨེ༌ཕོད༌དི༌ ཡོག༌ག༌ གོན༌ཅེས༌སི༌ ཀོས༌པོ༌ ཐགས༌ཁན༌ནི༌ རས༌ སྔོན༌པོའ༌ ཙེམས༌,
EXO 39:23 གོ༌ ཕིང༌ཅེས༌སི༌ ཕིའ༌ ཏེ༌བོའེ༌ སྐྱིལ༌ལ༌ བི༌གའང༌ ཅོས༌ཏེ༌ མི༌ ཆད༌ཅེས༌ལ༌ ཐའ༌རིལ༌ ཏངས༌།
EXO 39:24 ཏེ༌བོའེ༌ ཡོག༌གི༌ ཟུར༌རི༌ཀ༌ སྔོན༌པོ༌, སྔོ༌མར༌ དང༌ མར༌པོ༌ ནས༌མ༌ ཉམ༌པོ༌ ཨ༌ནར༌རི༌ ཟོས༌ཏ༌ ཙོགས༌ ཅོས༌ཏེ༌ ཏགས༌།
EXO 39:25 ཡང༌ ཁོང༌གུན༌ནི༌ ཅའང༌ མ༌དྲེས༌ཁན༌ སེར༌རི༌ ཀྲི༌ལུ༌ ཅོས༌ཏེ༌ ཀོས༌སི༌ ཡོག༌གི༌ ཟུར༌རི༌ཀ༌ ཨ༌ནར༌གུན༌ནི༌ པར༌ལ༌ ཏགས༌།
EXO 39:26 ཞབས༌ཏོག༌ ཞུ༌ ཟ༌ནེ༌ བླ༌མ༌ གོན༌ཅེས༌, ཏེ༌ ཀོས༌སི༌ ཟུར༌ལ༌ ཀྲི༌ལུ༌ དང༌ ཨ༌ནར༌ གུན༌ སྤེལ༌ཏེ༌ ཏགས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 39:27 ཁོང༌གུན༌ནི༌ ཨ༌རོན༌ དང༌ ཁོའེ༌ བུ༌ཚ༌གུན༌ལ༌ ཐགས༌ཁན༌ནི༌ རས༌ གྱལ༌ལ༌ ཉམ༌པོ༌ ནང༌ཀུག༌གི༌ ཀོས༌,
EXO 39:28 རས༌ རིན༌ཅན༌ ཉམ༌པོ༌ གོའ༌ སྲིལ༌ཅེས༌སི༌ ཐོད༌, ཏི༌བི༌གུན༌ དང༌ ནང༌ཀུག༌ག༌ གོན༌ཅེས༌གུན༌ ཙེམས༌།
EXO 39:29 ཡང༌ ལག༌ཤེས༌ ཁས༌པ༌གུན༌ནི༌ ཀུས༌པོ༌ རས༌སི༌ཀ༌ སེར༌ དང༌ སྔོན༌པོ༌, སྔོ༌མར༌, མར༌པོ༌ ནས༌མ༌ སྲུལ༌ཏེ༌ སྐྱེ༌རགས༌གུན༌ ཅོས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལས༌།
EXO 39:30 ཁོང༌གུན༌ནི༌ ཅའང༌ མ༌དྲེས༌ཁན༌ནི༌ སེར༌ རྡུངས༌ཏེ༌ ལེབ༌ལེབ༌ ཀྲུབ༌ཞི༌, ཐོར༌ཤོག༌ ཏམ༌པ༌ ཅོས༌ཏེ༌ ཏེ༌ཀ༌ “ཡ༌ཝའེ༌ ཁོང༌རང༌ངི༌ ཕིའ༌ ཁོ༌ ཏམ༌པ༌ ཛདས༌” སྐོས༌ཏེ༌ བྲིས༌།
EXO 39:31 ཏེ༌བོ༌ ཐོད༌དི༌ དུན༌ལ༌ སྐྱེ༌རགས༌ ཁྲ༌མོ༌ སྔོན༌པོ༌ཞིག༌ ཉམ༌པོ༌ ལྡམས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 39:32 ཏ༌ ཡ༌ཝའ༌ ཐུག༌སའེ༌, ཏམ༌པ༌ ཀུར༌ ཅོ༌ཅེས༌སི༌ ལས༌ ཚང༌མ༌ གྲུབ༌། ཨིས༌ར༌ཨེལ༌པ༌གུན༌ནི༌ ཅི༌ཚང༌མ༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཅོས༌།
EXO 39:33 ཏེ༌ནེ༌ ཁོང༌གུན༌ནི༌ ཏམ༌པའེ༌ ཀུར༌བོ༌ མོ༌ཟེས༌སི༌ དུན༌ལ༌ ཁྱོངས༌, ཀུར༌ དང༌ ཏེ༌བོའེ༌ ཅ༌ལག༌ ཚང༌མ༌; ཅ༌ཀུག༌གུན༌, རིབ༌ཞི༌གུན༌, པ༌ར༌ཁ༌ ཏང༌ཅེས༌སི༌ ཀྲ༌ལུ༌གུན༌, ཀ༌ཝ༌གུན༌ ཡང༌ ཏེ༌བོའེ༌ ཞབ༌ལྡན༌གུན༌,
EXO 39:34 ལུག༌ཕོའེ༌ པགས༌པ༌ མར༌པོའེ༌ ཀབ༌ཅེས༌, གྱལ༌ལ༌ ཀོའེ༌ ཀབ༌ཅེས༌, ཡོ༌ལ༌,
EXO 39:35 ཀྲ༌ལུ༌གུན༌ ཉམ༌པོ༌ ཆད༌དོན༌ནི༌ སྒམ༌ དང༌ ཐུག༌རྗེ༌ ཁའ༌ལེབ༌,
EXO 39:36 ཅོག༌ཙེ༌ དང༌ ཏེ༌བོའེ༌ ཅ༌ལག༌ ཚང༌མ༌ ཡང༌ དཀོན༌མཆོག༌ག༌ ཕུལ༌ཁན༌ནི༌ ཏ༌གི༌,
EXO 39:37 སྐྱོང༌ཙེ༌གུན༌ ཉམ༌པོ༌ ཅའང༌ མ༌དྲེས༌ཁན༌ནི༌ སེར༌རི༌ འོད༌སྟགས༌ དང༌ ཏེ༌བོའེ༌ ཅ༌ལག༌ ཚང༌མ༌ ཡང༌ འོད༌དི༌ ཕིའ༌ མར༌ནག༌,
EXO 39:38 སེར༌རི༌ ཆོད༌ཁྲི༌, ཁྲུས༌ཏང༌ཅེས༌སི༌ མར༌ནག༌, ཏྲི༌ཞིམ༌ཅན༌ནི༌ སྤོས༌, ཀུར༌རི༌ ནང༌ང༌ ཞུག༌སའེ༌ སྒོའེ༌ ཡོ༌ལ༌,
EXO 39:39 ར༌གན༌ནི༌ ཀྲ༌མིག༌ ཉམ༌པོ༌ ར༌གན༌ནི༌ ཆོད༌ཁྲི༌, ཏེ༌བོའེ༌ ཀྲ༌ལུ༌གུན༌ ཡང༌ ཆོད༌ཁྲིའི༌ ཅ༌ལག༌ ཚང༌མ༌, ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ས༌,
EXO 39:40 ནང༌སྐོར༌རི༌ ཡོ༌ལ༌, ཏེ༌བོའེ༌ ཀ༌ཝ༌གུན༌ དང༌ ཞབ༌ལྡན༌གུན༌, ཏེ༌ནང༌ང༌ ཆ༌སའེ༌ སྒོའེ༌ ཡོ༌ལ༌, ཏེ༌བོའེ༌ ཐག༌པ༌ དང༌ པུར༌ཆ༌ གུན༌, ཡ༌ཝ༌ ཐུག༌སའེ༌, ཏམ༌པ༌ ཀུར༌རི༌ ནང༌ང༌ ཀོལ༌ཅེས༌སི༌ ཅ༌ལག༌ ཚང༌མ༌,
EXO 39:41 ཡང༌ ཏམ༌པའེ༌ ཀུར༌རི༌ ནང༌ང༌ བླ༌མའེ༌ ཚུལ༌ལ༌ ཞབས༌ཏོག༌ ཞུ༌ ཟ༌ནེ༌ ཨ༌རོན༌ དང༌ ཁོའེ༌ བུ༌ཚ༌གུན༌ གོན༌ཅེས༌སི༌ ཀོས༌ལག༌ ཏམ༌པ༌ གུན༌།
EXO 39:42 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ལས༌ ཚང༌མ༌ ཅོས༌།
EXO 39:43 ཁོང༌གུན༌ནི༌ ཏེ༌ ཚང༌མ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོ༌ཁན༌བོ༌ མོ༌ཟེས༌སི༌ ཐོང༌པ༌ ཁོའེ༌ ཁོང༌གུན༌ལ༌ ཅིན༌ལབས༌ ཏངས༌།
EXO 40:1 ཏེ༌ནེ༌ ཡ༌ཝའེ༌ མོ༌ཟེས༌ལ༌ མོལས༌,
EXO 40:2 “ཟླ༌ཝ༌ ཀྲང༌པོའེ༌ ཞག༌ཏང༌པོའེ༌ ཞག༌ག༌ ཡ༌ཝ༌ ཐུག༌སའེ༌, ཏམ༌པ༌ ཀུར༌བོ༌ ཙུག༌།
EXO 40:3 བཀའ༌རྒྱ༌ རྕུ༌ བྲིས༌ཁན༌ནི༌ རྡོའ༌ ལེབ༌ལེབ༌ གྱངས༌ཏེ༌ ཡོད༌ཁན༌ནི༌ ཆད༌དོན༌ནི༌ སྒམ༌བོ༌ ཏེ༌ ནང༌ང༌ བོར༌ ཡང༌ ཏེ༌བོའེ༌ དུན༌ལ༌ ཡོ༌ལ༌ ཏོང༌།
EXO 40:4 ཏེ༌ནེ༌ ཅོག༌ཙེ༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ ཚང༌མ༌ ཁྱོངས༌ཏེ༌ ཀུར༌རི༌ ཏམ༌པ༌ ནས༌སའེ༌ ནང༌ང༌ བོར༌, ཡང༌ འོད༌སྟགས༌ ཁྱོངས༌ཏེ༌ ཏེ༌ཀ༌ སྐྱོང༌ཙེ༌ གུན༌ རིག༌།
EXO 40:5 ཆད༌དོན༌ནི༌ སྒམ༌མི༌ ཡོ༌ལའེ༌ དུན༌ལ༌ སྤོས༌ དུག༌ཅེས༌སི༌ སེར༌རི༌ ཆོད༌ཁྲི༌ བོར༌ ཡང༌ ཏམ༌པའེ༌ ཀུར༌རི༌ ནང༌ང༌ ཆ༌སའེ༌ སྒོའེ༌ཀ༌ ཡོ༌ལ༌ ཏོང༌།”
EXO 40:6 “ཡ༌ཝ༌ ཐུག༌སའེ༌ ཏམ༌པ༌ ཀུར༌རི༌ ནང༌ང༌ ཆ༌སའེ༌ སྒོ༌ དུན༌ལ༌ ཆོད༌པ༌ མེའ༌ སྲག༌སའེ༌ ཆོད༌ཁྲི༌བོ༌ བོར༌,
EXO 40:7 ལག༌པ༌ ཁྲུ༌ཅེས༌སི༌ ཞོང༌པ༌ ཀུར༌ དང༌ ཏེ༌ ཆོད༌ཁྲི༌ པར༌ལ༌ བོར༌ཏེ༌ ཆུ༌ སྐོང༌།
EXO 40:8 ཀུར༌རི༌ ནང༌སྐོར༌རི༌ ཡོ༌ལ༌གུན༌ ཏོག༌ ཡང༌ ཏེ༌ནང༌ང༌ ཆ༌སའེ༌ སྒོའ༌ ཡོ༌ལ༌ ཏོང༌།”
EXO 40:9 “ཏེ༌ནེ༌ ཏམ༌པའེ༌ ཀུར༌ དང༌ ཏེ༌ནང༌ང༌ ཡོད༌ཁན༌ནི༌ ཅ༌ལག༌ ཚང༌མ༌ ཁྲུས༌ཏང༌ཅེས༌སི༌ མར༌ནག༌ ལུགས༌ཏེ༌ རྩང༌མ༌ ཅོས༌། ཏེ༌ནེ༌ ཏེ༌ ཚང༌མ༌ ཏམ༌པ༌ གྱུར༌ཨིན༌།
EXO 40:10 ཏེ༌ སྟིང༌ནེ༌ ཆོད༌པ༌ མེའ༌ སྲག༌སའེ༌ ཆོད༌ཁྲི༌ དང༌ ཏེ༌ཀ༌ ཀོལ༌ཅེས༌སི༌ ཅ༌ལག༌ གུན༌ནི༌ཀ༌ མར༌ ལུགས༌ཏེ༌ རྩང༌མ༌ ཅོས༌, ཏེ༌ནེ༌ ཏེ༌གུན༌ མ༌ ཏམ༌པ༌ གྱུར༌ཨིན༌།
EXO 40:11 ཡང༌ ལག༌པ༌ ཁྲུ༌ཅེས༌སི༌ ཞོང༌པ༌ དང༌ ཏེ༌བོ༌ བོར༌ཅེས༌པོའང༌ མར༌ ལུགས༌ཏེ༌ རྩང༌མ༌ ཅོས༌།”
EXO 40:12 “ཨ༌རོན༌ དང༌ ཁོའེ༌ བུ༌ཚ༌གུན༌ ཡ༌ཝ༌ ཐུག༌སའེ༌ ཀུར༌རི༌ སྒོའེ༌ཀ༌ ཁྱོངས༌ཏེ༌ ཁོང༌གུན༌ ཆུ༌ ཉམ༌པོ༌ ཁྲུས༌།
EXO 40:13 ཏེ༌ནེ༌ ཨ༌རོན༌ལ༌ བླ༌མའེ༌ ཀོས༌ལག༌ ཏམ༌པ༌ སྐོན༌ ཡང༌ བླ༌མའེ༌ ཚུལ༌ལ༌ ངའ༌ ཞབ༌ཞི༌ ཞུ༌ཅེས༌ལ༌ ཁོའ༌ མར༌ ལུགས༌ཏེ༌ སོ༌སོ༌ ཕེས༌།
EXO 40:14 ཁོའེ༌ བུ༌ཚ༌གུན༌ ཁྱོངས༌ཏེ༌ ཁོང༌གུན༌ལ༌ ནང༌ཀུག༌གི༌ ཀོས༌ ཏམ༌པ༌ སྐོན༌།
EXO 40:15 ཡང༌ བླ༌མའེ༌ ཚུལ༌ལ༌ ངའ༌ ཞབ༌ཞི༌ ཞུ༌ཅེས༌སི༌ ཕིའ༌ ཁོང༌གུན༌ནི༌ ཨ༌བ༌ ཙོགས༌ལ༌ མར༌ ལུགས༌ཏེ༌ ཁོང༌གུན༌ལ༌ ཁྲུས༌ཏོང༌། མར༌ ལུགས༌ཏེ༌ ཁྲུས༌ ཏང༌ཅེས༌པོའེ༌ ཁོང༌གུན༌ནི༌ མིར༌གྱུད༌ ཚང༌མའེ༌, བླ༌མའེ༌ ཚུལ༌ལ༌ ཞབས༌ཏོག༌ ཞུ༌ཨིན༌།”
EXO 40:16 ཡ༌ཝའེ༌ བཀའ༌ སལ༌ཁན༌ ནང༌ཞིན༌ མོ༌ཟེས༌སི༌ ཅི༌ ཚང༌མ༌ ཅོས༌།
EXO 40:17 ཏེ༌ནེ༌ ཨི༌ཇིབ༌ནེ༌ བིངས༌ཏེ༌ ལོ༌ ཉིས༌པའེ༌ ཟླ༌ཝ༌ ཏང༌པོའེ༌, ཞག༌ ཏང༌པོའེ༌ ཞག༌ག༌ ཁོང༌གུན༌ནི༌ ཏམ༌པ༌ ཀུར༌བོ༌ ཙུགས༌།
EXO 40:18 མོ༌ཟེས༌སི༌ ཏམ༌པའེ༌ ཀུར༌ ལང༌ ཟ༌ནེ༌ ཏེ༌བོའེ༌ ཞབ༌ལྡན༌གུན༌ ཏིངས༌, རིབ༌ཞི༌གུན༌ ལངས༌, པ༌ར༌ཁ༌གུན༌ ཐུདས༌ ཡང༌ ཀ༌ཝ༌གུན༌ ཙུགས༌།
EXO 40:19 ཏེ༌ནེ༌ ཐིལ༌ དང༌ ཁེ༌ཐོག༌གི༌ ཀབ༌ཅེས༌གུན༌ ཀྱངས༌ཏེ༌ ཏམ༌པའེ༌ ཀུར༌ལ༌ ཀབས༌, ཀ༌ཟུག༌ མོ༌ཟེས༌ལ༌ ཡ༌ཝའེ༌ བཀའ༌ སལ༌ཏེ༌ ཨིན༌པིན༌།
EXO 40:20 ཏེ༌ནེ༌ ཁོའེ༌ བཀའ༌རྒྱ༌ རྕུ༌ བྲིས༌ཁན༌ནི༌ རྡའ༌ ལེབ༌ལེབ༌གུན༌ ཆད༌དོན༌ནི༌ སྒམ༌མི༌ ནང༌ང༌ བོར༌ཏེ༌ ཀྲ༌ལུ༌གུན༌ ཀྱི༌ལྡིར༌རི༌ ནང༌ང༌ ཅུགས༌ ཡང༌ ཐུག༌རྗེ༌ ཁའ༌ལེབ༌པོ༌ ཀབས༌།
EXO 40:21 ཁོའེ༌ སྒམ༌བོ༌ ཏམ༌པའེ༌ ཀུར༌རི༌ ནང༌ང༌ ཁྱོངས༌ ཡང༌ སྒམ༌བོ༌ མི༌ཐོང༌ཅེས༌ལ༌ ཡོ༌ལ༌ ཏངས༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 40:22 ཁོའེ༌ ཅོག༌ཙེ༌ ཡ༌ཝ༌ ཐུག༌སའེ༌, ཏམ༌པ༌ ཀུར༌རི༌ ནང༌ང༌ བྱང༌ ཆོགས༌ལ༌ ཡོ༌ལའེ༌ ཕི༌ལོག༌ག༌ བོརས༌,
EXO 40:23 ཡང༌ ཏེ༌བོའེ༌ཀ༌ ཡ༌ཝའ༌ ཕུལ༌ཁན༌ནི༌ ཏ༌གི༌ བོརས༌, ཀ༌ཟུག༌ ཡ༌ཝའེ༌ ཁོའ༌ བཀའ༌ སལ༌ཏེ༌ ཨིན༌པིན༌།
EXO 40:24 ཁོའེ༌ འོད༌སྟག༌པོ༌ ཡ༌ཝ༌ ཐུག༌སའེ༌, ཏམ༌པ༌ ཀུར༌རི༌ ནང༌ང༌ ལྷོ༌ ཆོགས༌ལ༌ ཅོག༌ཙེའེ༌ འ༌ངོ༌ ཆོགས༌པོའེ༌ཀ༌ བོརས༌
EXO 40:25 ཡང༌ ཡ༌ཝའེ༌ དུན༌ལ༌ ཁོའེ༌ སྐྱོང༌ཙེ༌གུན༌ ཏུགས༌, ཀ༌ཟུག༌ ཡ༌ཝའེ༌ ཁོའ༌ བཀའ༌ སལ༌ཏེ༌ ཨིན༌པིན༌།
EXO 40:26 མོ༌ཟེས༌སི༌ སེར༌རི༌ ཆོད༌ཁྲི༌ ཡ༌ཝ༌ ཐུག༌སའེ༌ ཀུར༌རི༌ ནང༌ང༌ ཡོ༌ལའེ༌ དུན༌ལ༌ བོརས༌
EXO 40:27 ཡང༌ ཏེ༌ཀ༌ ཏྲི༌ཞིམ༌ཅན༌ནི༌ སྤོས༌ ཏུགས༌, ཀ༌ཟུག༌ ཡ༌ཝའེ༌ ཁོའ༌ བཀའ༌ སལ༌ཏེ༌ ཨིན༌པིན༌།
EXO 40:28 ཁོའེ༌ ཏམ༌པ༌ ཀུར༌རི༌ ནང༌ང༌ ཆ༌སའེ༌ སྒོའེ༌ ཡོ༌ལ༌ ཆར༌ལ༌ ཏགས༌།
EXO 40:29 ཁོའེ༌ ཏམ༌པ༌ ཀུར༌རི༌ ཕི༌ལོག༌ག༌ སྒོའེ༌ ཉེ༌མོའ༌ ཆོད༌པ༌ མེའ༌ སྲག༌སའེ༌ ཆོད༌ཁྲི༌བོ༌ བོརས༌, ཡང༌ ཏེ༌བོའེ༌ཀ༌ ཁོའེ༌ མེའ༌ སྲག༌ཅེས༌ དང༌ ཀྲོ༌ནས༌སི༌ ཆོད༌པ༌ ཕུལས༌, ཀ༌ཟུག༌ ཡ༌ཝའེ༌ ཁོའ༌ བཀའ༌ སལ༌ཏེ༌ ཨིན༌པིན༌།
EXO 40:30 ཁོའེ༌ ལག༌པ༌ ཁྲུ༌ཅེས༌སི༌ ཞོང༌པ༌ ཏམ༌པ༌ ཀུར༌ དང༌ ཆོད༌ཁྲི༌ པར༌ལ༌ བོརས༌ ཡང༌ ཏེ༌བོ༌ ཆུའི༌ སྐངས༌།
EXO 40:31 མོ༌ཟེས༌, ཨ༌རོན༌ དང༌ ཁོའེ༌ བུ༌ཚ༌གུན༌ནི༌ ལག༌པ༌ དང༌ རྐང༌པ༌ གུན༌ ཏེ༌ ནང༌ང༌ ཁྲུའད༌པིན༌།
EXO 40:32 ཡ༌ཝ༌ ཐུག༌སའེ༌ ཀུར༌རི༌ ནང༌ང༌ ཡ༌ ཆོད༌ཁྲི༌ཀ༌ ཆ༌ ཟ༌ནེ༌ ཁོང༌གུན༌ནི༌ ལག༌པ༌ དང༌ རྐང༌པ༌ གུན༌ ཁྲུའད༌པིན༌, ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།
EXO 40:33 མོ༌ཟེས༌སི༌ ཏམ༌པ༌ ཀུར༌རི༌ ནང༌སྐོར༌རི༌ རིབ༌ཞི༌གུན༌ ཙུགས༌ཏེ༌ ཏེ༌ནང༌ང༌ ཆོད༌ཁྲི༌ བོརས༌ ཡང༌ ནང༌ཀུག༌ག༌ ཆ༌སའེ༌ སྒོའེ༌ཀ༌ ཡོ༌ལ༌ ཏགས༌། ཏེ༌ནེ༌ ཁོའེ༌ ལས༌གུན༌ གྲུབ༌།
EXO 40:34 ཏེ༌ནེ༌ ཡ༌ཝ༌ ཐུག༌སའེ༌, ཏམ༌པ༌ ཀུར༌བོ༌ སྲིན༌ནི༌ ཀབས༌ ཡང༌ ཡ༌ཝའེ༌ ཟིར༌རྗིད༌ ཏེ༌བོའེ༌ ནང༌ང༌ གངས༌།
EXO 40:35 མོ༌ཟེས༌ ཡ༌ཝ༌ ཐུག༌སའེ༌ ཀུར༌རི༌ ནང༌ང༌ ཆ༌ མ༌ཉན༌ ཅིའ༌ཟེར༌ན༌ ཏམ༌པའེ༌ ཀུར༌ སྲིན༌ནི༌ ཀབས༌ཏེ༌ ཡ༌ཝའེ༌ ཟིར༌རྗིད༌ ཏེ༌བོའེ༌ ནང༌ང༌ གངས༌ཏེ༌ ཡོད༌པིན༌།
EXO 40:36 ཏམ༌པ༌ ཀུར༌རི༌ ཀ༌ནེ༌ སྲིན༌ ཐེན༌ན༌ ཛད༌ད༌ཅིག༌ ཨིས༌ར༌ཨེལ༌པ༌གུན༌ ཏེ༌ ནས༌ས༌ནེ༌ བེས༌ལ༌ བིང༌ངད༌པིན༌།
EXO 40:37 ཀལ༌ཏེས༌ སྲིན༌ ཐེན༌ན༌ མ༌ཛད༌ན༌ ཁོང༌གུན༌ སྲིན༌ ཐེན༌ཐེན༌ ཚོག༌པ༌ ཏེན༌ན༌ ནས༌སའེ༌ཀ༌ དུག༌གད༌པིན༌།
EXO 40:38 ཨིས༌ར༌ཨེལ༌པ༌གུན༌ནི༌ བེས༌ གང༌པོའེ༌ ནང༌ང༌ ཁོང༌ ཚང༌མའེ༌ མིག༌གི༌ དུན༌ལ༌, ཉི༌མའེ༌ ཏུས༌ལ༌ ཡ༌ཝའེ༌ སྲིན༌ ཏམ༌པའེ༌ ཀུར༌ལ༌ ཀབས༌ཏེ༌ ཡང༌ ཚན༌ནི༌ ཏུས༌ལ༌ སྲིན༌ནི༌ ནང༌ང༌ མེ༌ བར༌རད༌པིན༌།
JOS 1:1 ཡ༌ཝའེ༌ ཞབས༌ཏོག༌པ༌ མོ༌ཟེས༌ ཀྲོངས༌ཏེ༌ སྟིང༌ནེ༌, མོ༌ཟེས༌ལ༌ རོགས༌ཅོ༌ཁན༌ ནུན༌ནི༌ བུ༌ཚ༌ ཡོ༌ཤུའ༌ ཡ༌ཝའེ༌ མོལས༌,
JOS 1:2 “ངའ༌ ཞབས༌ཏོག༌ ཞུ༌ཁན༌ མོ༌ཟེས༌ ཤི༌ཏེ༌ མེད༌, ཏ༌ ཁྱོ༌རང༌ དང༌ ཨིས༌ར༌ཨེལ༌པ༌ ཚང༌མ༌ ཡོར༌དཱན༌ ལྩངས༌པོ༌ རྒལ༌ཅེས༌ལ༌ གྲལ༌གྲིག༌ ཅོས༌ ཡང༌ གོ༌ཁྲིད༌ ཅོས༌ཏེ༌ ཁྱོ༌ཞའ༌ ངའེ༌ ཏང༌ཅེས༌ཅན༌ནི༌ ས༌ཀྱད༌ལ༌ ཁོང༌གུན༌ ཁྱེར༌།
JOS 1:3 མོ༌ཟེས༌ལ༌ ཁ༌ཆད༌ ཅོ༌ཁན༌ ནང༌ཞིན༌, ངའེ༌ ཁྱོ༌ཞའེ༌ རྐང༌པ༌ བོར༌ཅེས༌ཅན༌ནི༌ ས༌ཀྱད༌ ཚང༌མ༌ ཁྱོ༌ཞའ༌ ཏང༌ཨིན༌།
JOS 1:4 ལྷོ༌ ཆོགས༌སི༌ ཐང༌སྟོང༌ ནེ༌ བྱང༌ ཆོགས༌སི༌ ལེ༌བ༌ནོན༌ནི༌ རི༌གུན༌ ཚོག༌པ༌ ཡང༌ ཤར༌ ཆོགས༌སི༌ ལྩངས༌པོ༌ ཆེན༌མོ༌ ཡུཕ༌རེ༌ཀྲས༌ ནེ༌ ནུབ༌ ཆོགས༌སི༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཁྱོ༌ཞའེ༌ ས༌ཀྱད༌ ཁྱེད༌ཨིན༌, ཏེ༌ ནང༌ང༌ ཧེད༌པ༌གུན༌ནི༌ ཡུལ༌ ཚང༌མ༌ ཐེས༌ཏེ༌ ཨིན༌ནོག༌།
JOS 1:5 ཡོ༌ཤུའ༌, ཁྱོ༌རང༌ངི༌ མི༌ཚེའེ༌ གང༌པོའེ༌ ནང༌ང༌ ཁྱོ༌རང༌ང༌ མག༌ ཏངས༌ཏེ༌ སུ༌ཞིག༌གིའང༌ ཕམ༌ཀལ༌ མི༌ཉན༌། མོ༌ཟེས༌ ཉམ༌པོ༌ དུག༌ག༌ ཙོགས༌ལ༌ ང༌ ཏུས༌གྱུན༌ ཁྱོ༌རང༌ ཉམ༌པོ༌ དུག༌ཨིན༌། ངའེ༌ ཁྱོ༌རང༌ མ༌ནེ༌ མི༌ཕང༌།”
JOS 1:6 “སེམས༌སི༌ ནང༌ང༌ ཤེད༌ཅན༌ གྱུར༌ཏེ༌ སྤོས༌པ༌ ལེན༌ ཅིའ༌ཟེར༌ན༌ ངའེ༌ ནའ༌ ཁུར༌ཏེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ ཏང༌ཅེས༌སི༌ ས༌ཆའེ༌ ནང༌ང༌ ཁྱོ༌རང༌ངི༌ གོ༌ཁྲིད༌ ཅོས༌ཏེ༌ འི༌ མི༌གུན༌ ཁྱེར༌ཅེས༌ ཨིན༌ནོག༌།
JOS 1:7 ཤེད༌ཅན༌ གྱུར༌ཏེ༌ སྤོས༌པ༌ ཀྲག༌པོ༌ ལེན༌། ངའེ༌ ཞབས༌ཏོག༌པ༌ མོ༌ཟེས༌སི༌ ཁྱོ༌རང༌ང༌ ཏངས༌ཁན༌ནི༌ ཁྲིམས༌ ཚང༌མ༌ ཁའ༌ཉན༌ཅེས༌ ཏན༌ཏན༌ ཅོས༌། ཏེ༌གུན༌ནེ༌ གྱུར༌ཏེ༌ ཡས༌པ༌ ཡ༌ ཡོ༌མ༌ མ༌ཆ༌ ཏེ༌ནེ༌ ཁྱོ༌རང༌ ཀ༌རུ༌ ཆ༌ནའང༌ ཁྲངས༌པོ༌ ལུས༌ཨིན༌།
JOS 1:8 མི༌གུན༌ ཛོམས༌ས༌ འི༌ ཁྲིམས༌སི༌ སྤེ༌ཆ༌ ཏུས༌གྱུན༌ ཁྱོ༌རང༌ངི༌ སིལ༌གོས༌། ཉིན༌ཚན༌ མེད༌པ༌ ཏེ༌གུན༌ ཇངས༌ཏེ༌ ཏེ༌ནང༌ང༌ བྲིས༌ཏེ༌ ཡོད༌ཁན༌ ཚང༌མ༌ ཁྱོ༌རང༌ངི༌ ཅོ༌ཅེས༌ལ༌ ནང༌ང༌ བོར༌། ཏེ༌ནེ༌ ཁྱོ༌རང༌ ཁྲངས༌པོ༌ ལུས༌ཏེ༌ ཡར༌གྱས༌ ཆེན༌།
JOS 1:9 ངའེ༌ ཁྱོ༌རང༌ང༌ བཀའ༌ ཏང༌ངད༌, ཤེད༌ཅན༌ གྱུར༌ཏེ༌ སྤོས༌པ༌ ལེན༌། ཇིགས༌ མ༌ཇིགས༌ ཡ༌ སེམ༌ཤུག༌ ཆག༌ མ༌ཅུག༌ ཅིའ༌ཟེར༌ན༌ ཡ༌ཝ༌ ཁྱོ༌རང༌ངི༌ དཀོན༌མཆོག༌ ཁྱོ༌རང༌ ཀ༌རུ༌ ཆ༌ནའང༌ ཉམ༌པོ༌ ཡོད༌།”
JOS 1:10 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པའེ༌ གོ༌སྐྱོང༌གུན༌ལ༌ བཀའ༌ ཏངས༌,
JOS 1:11 “ཀུར༌ ཙུག༌ཏེ༌ ཡོད༌སའེ༌ ནས༌ས༌ ཚང༌མ༌ སོང༌ཏེ༌ མི༌གུན༌ལ༌ ཟན༌ གྲལ༌གྲིག༌ ཅོ༌ཅེས༌ལ༌ ཟེར༌ ཅིའ༌ཟེར༌ན༌ ཞག༌ སུམ༌པའེ༌ ཞག༌ག༌ ང༌དང༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ང༌དང༌ང༌ སལ༌ཅེས༌ཅན༌ནི༌ ས༌ཀྱད༌པོ༌ ལེན༌ན༌ལ༌ ཆ༌ཅེས༌ ཨིན༌ནོག༌།”
JOS 1:12 ཏེ༌ནེ༌ ཡོ༌ཤུའེ༌ རུ༌བེན༌ དང༌ གཱད༌དི༌ སྡེ༌ གང༌པོ༌ ཡང༌ མ༌ནས༌སའེ༌ སྡེ༌ ཕེད༌པོའ༌ བོདས༌ ཡང༌ ཟེརས༌,
JOS 1:13 “ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁྱོ༌ཞའ༌ བཀའ༌ སལ༌ཁན༌བོ༌ ཨིད༌ཏུ༌ ཅོ༌ཤིག༌། ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ཁྱོ༌ཞའ༌ ཚུགས༌ཏེ༌ དུག༌ཅེས༌ལ༌ འི༌ ས༌ཀྱད༌པོ༌ སལ༌ལ༌ ཛད༌ཏེ༌ ཨིན༌ནོག༌།
JOS 1:14 ཁྱོ༌ཞའེ༌ ན༌མ༌, ཕྲུ༌གུ༌ དང༌ སེམས༌ཅན༌ ཚང༌མ༌ འི༌ཀ༌ མོ༌ཟེས༌སི༌ ཁྱོ༌ཞའ༌ སལ༌ཁན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ དུག༌ཅུག༌ ཨིན༌ནའང༌ ཁྱོ༌ཞའེ༌ མི༌ གྱལ༌ལ༌ ནོལ༌ཁན༌ ཚང༌མ༌ ཚོན༌ཆ༌ ཁུར༌ཏེ༌ ཡོར༌དཱན༌ ལྩངས༌པོའེ༌ འ༌ངོ༌ ཆོགས༌ལ༌ ཞན༌ སྡེ༌གུན༌ནི༌ སང༌ སྔུན༌ལ༌ སོང༌ཏེ༌ ཁྱོ༌ཞ༌རང༌ངི༌ སྤུན༌གུན༌ལ༌ རོགས༌ ཅོ༌གོས༌,
JOS 1:15 ནམ༌ཚོག༌པ༌ ཡ༌ཝའེ༌ ཁྱོ༌ཞའ༌ སལ༌ཁན༌ ཙོགས༌ ཁོང༌གུན༌ལ༌ ངལ༌ཚོ༌ མི༌སལ༌ ཡང༌ ནམ༌ཚོག༌པ༌ ཡ༌ཝ༌ དཀོན༌མཆོག༌གི༌ ཁོང༌གུན༌ལ༌ སལ༌ཅེས༌ཅན༌ནི༌ ས༌ཀྱད༌པོ༌ ཁོང༌གུན༌ནི༌ མི༌ལེན༌། ཏེ༌སྟིང༌ནེ༌ མོ༌ཟེས༌སི༌ ཁྱོ༌ཞའ༌ སལ༌ཁན༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ འི༌ ས༌ཆའེ༌ ནང༌ང༌ ཞི༌དེ༌ ཉམ༌པོ༌ དུག༌ག༌ ཁྱོ༌ཞའ༌ ལོགས༌ཏེ༌ ཆ༌ནའང༌ གྲིག༌།”
JOS 1:16 ཁོང༌གུན༌ནི༌ ཡོ༌ཤུའ༌ ལན༌ཏངས༌, “ཉེ༌རང༌ངི༌ ང༌ཞའ༌ བཀའ༌ སལ༌ཁན༌ ཚང༌མ༌ ང༌ཞའེ༌ ཅོ༌ཨིན༌ ཡང༌ ཉེ༌རང༌ངི༌ ང༌ཞའ༌ ཀ༌རུ༌ ལམ༌ཅུག༌ནའང༌ ང༌ཞ༌གུན༌ ཆེན༌།
JOS 1:17 ཏུས༌གྱུན༌ ང༌ཞ༌གུན༌ནི༌ མོ༌ཟེས༌སི༌ ཁའ༌ ཉན༌ན༌ ཙོགས༌ལ༌ ཉེ༌རང༌ངི༌ ཁའ༌ ཉན༌ཨིན༌ ཡང༌ མོ༌ཟེས༌ ཉམ༌པོ༌ ཞུག༌ས༌ ཙོགས༌ལ༌ ཡ༌ཝ༌ ཉེ༌རང༌ངི༌ དཀོན༌མཆོག༌ ཉེ༌རང༌ ཉམ༌པོ༌ ཞུགས༌ཤིག༌།
JOS 1:18 ཉེ༌རང༌ངི༌ བཀའ༌ ཏང༌ཁན༌གུན༌ལ༌ ཁའ༌ མ༌ཉན༌ན༌ ཉེ༌རང༌ངི༌ གོ༌ཁྲིད༌ ཅོ༌ཁན༌ནི༌ གྱབ༌གལ༌ ཅོ༌ཁན༌ ཚང༌མ༌ སད༌ཨིན༌། ཤེད༌ཅན༌ གྱུར༌ ཡང༌ སྤོས༌པ༌ ལེན༌།”
JOS 2:1 ཏེ༌ནེ༌ ཡོ༌ཤུའེ༌ སང༌ཝའེ༌ ཐོག༌ནེ༌ གྱལ༌སའེ༌ སྲུང༌སྐྱོབ༌ ལྟའ༌ལ༌ ཤིཏ༌ཏིམ༌ ནེ༌ མི༌ ཉིས༌ ཀལ༌ཏེ༌ ཟེརས༌, “ཡོར༌དཱན༌ ལྩངས༌པོའེ༌ འ༌ངོ༌ ཆོགས༌སི༌ ས༌ཀྱད༌, མིག༌སལ༌ལི༌ ཡེ༌རི༌ཀོའེ༌ ནང༌ང༌ སོང༌ཏེ༌ སྟག༌ཅད༌ ཅོས༌།” ཏེ༌ནེ༌ ཁོང༌ ཉིས༌ཀོ༌ སོང༌ ཡང༌ ཟུགས༌ཙོང༌མ༌ ར༌ཧབ༌བི༌ ཁང༌པའེ༌ ནང༌ང༌ ཏེ༌ ཚན༌བོ༌ དུགས༌།
JOS 2:2 ཨིན༌ནའང༌ ཡེ༌རི༌ཀོའེ༌ གྱལ༌པོའ༌ ཨིས༌ར༌ཨེལ༌པ༌ ཁ༌ཅིག༌ ཏེ༌ ཚན༌ལ༌ སང༌ཝའེ༌ ཐོག༌ནེ༌ ཁོའེ༌ ཡུལ༌ལ༌ སྟག༌ཅད༌ ཅོའ༌ ཡོང༌ཁན༌བོ༌ གྱུས༌སོང༌།
JOS 2:3 ཏེ༌ནེ༌ གྱལ༌པོའེ༌ ར༌ཧབ༌བ༌ ལོན༌ ཀལ༌ཏེ༌ ཟེརས༌, “ཁྱོ༌རང༌ངི༌ ཁང༌པའ༌ ཡོང༌ཁན༌ནི༌ མི༌གུན༌ ཁྲིད༌ཏེ༌ ཁྱོང༌ ཅིའ༌ཟེར༌ན༌ ཁོང༌གུན༌ སང༌ཝའེ༌ ཐོག༌ནེ༌ ང༌དང༌ངི༌ ཡུལ༌ལི༌ སྲུང༌སྐྱོབ༌ ཚང༌མ༌ གྱུས༌ ཅོའ༌ལ༌ ཡོངས༌ཏེ༌ ཨིན༌ནོག༌།”
JOS 2:4 ཨིན༌ནའང༌ ར༌ཧབ༌བི༌ མི༌ ཉིས༌ཀོ༌ སྦས༌ཏེ༌ བོརས༌། ཁོའེ༌ ལོན༌ ཁྱོང༌ཁན༌གུན༌ལ༌ ལན༌ཏངས༌, “འོ༌ན༌ མི༌ ཉིས༌ འི༌རུ༌ ཡོངས༌ ཨིན༌ནའང༌ ཁོང༌གུན༌ ཀ༌ནེ༌ ཡོངས༌ཏེ༌ ཨིན༌ ང༌ གྱུས༌མེད༌།
JOS 2:5 མུན༌ཅུ༌རུབ༌ཀྱིས༌ལ༌ གྱས༌སྒོ༌ ཅུག༌གི༌ སང༌ སྔུན༌ལ༌ ཁོང༌གུན༌ གྱལ༌ས༌ ནེ༌ བིང༌ཏེ༌ སོང༌། ཁོང༌གུན༌ ཀ༌ངོ༌ ཆོགས༌ལ༌ སོང༌ ང༌ གྱུས༌མེད༌, ཀལ༌ཏེས༌ ཉེ༌ཞའ༌ གྱོགས༌པ༌ ཆ༌ན༌ ཁོང༌གུན༌ ཟུམ༌ ཉན༌ཅེས༌ ཨིན༌ནོག༌།”
JOS 2:6 ༼བུ༌མོའེ༌ མི༌ ཉིས༌ཀོ༌ ཁང༌པའེ༌ ཁེ༌ཐོག༌ག༌ ཁྱེར༌ཏེ༌ ཐོག༌གི༌ཀ༌ ཏིངས༌ཏེ༌ ཡོད༌ཁན༌ རྩའེ༌ ཡོག༌ག༌ ཀབས༌ཏེ༌ བོརས༌།༽
JOS 2:7 གྱལ༌པོའེ༌ ལོན༌ ཁྱོང༌ཁན༌གུན༌ གྱལ༌ས༌ ནེ༌ བིང༌ཏེ༌ ཆ༌ ཚར༌ར༌ཅིག༌ གྱས༌སྒོ༌ ཅུགས༌། ཏེ༌ མི༌གུན༌ ཙལ༌ཨིན༌ ཁོང༌གུན༌ ལམ༌ གྱུད༌ཏེ༌ ཡོར༌དཱན༌ ལྩངས༌པོ༌, རྒལ༌ཏེ༌ ཆ༌སའེ༌ ནས༌ས༌ ཚག༌པ༌ སོང༌།
JOS 2:8 ལྟའ༌ ཡོང༌ཁན༌གུན༌ ཉིད༌ ཏང༌ངི༌ སང༌ སྔུན༌ལ༌, ར༌ཧབ༌ ཁོང༌གུན༌ ཡོད༌ས༌ སོང༌
JOS 2:9 ཡང༌ ཟེརས༌, “ཡ༌ཝའེ༌ འི༌ ས༌ཀྱད༌ ཁྱོ༌ཞའ༌ སལ༌ཏེ༌ ཁྱོ༌ཞ༌གུན༌ནི༌ ཇིགས༌ནང༌ ང༌ཞའེ༌ཀ༌ བབས༌ཏེ༌ ཨིན༌ཁན༌བོ༌ ང༌ གྱུས༌ཡོད༌། འི༌ ས༌ཆའེ༌ ནང༌ང༌ དུག༌ཁན༌ ཚང༌མ༌ ཁྱོ༌ཞ༌གུན༌ལ༌ མ༌ སྲན༌ཏྲེ༌ ཇིགས༌ཏེ༌ ཡོད༌།
JOS 2:10 ཡ༌ཝའེ༌ ཁྱོ༌ཞ༌གུན༌ ཨི༌ཇིབ༌ ནེ༌ བིངས༌ཏེ༌ ཡོང༌ ཟ༌ནེ༌ ཁྱོ༌ཞའེ༌ ཕིའ༌ ཚོ༌ མར༌པོའེ༌ ཆུ༌ སྐམས༌ཅུག༌ག༌ ཛད༌ཁན༌ ཡང༌ ཁྱོ༌ཞའེ༌ ཡོར༌དཱན༌ནི༌ ལྩངས༌པོའེ༌ ཤར༌ ཆོགས༌སི༌ ཨ༌མོར༌པ༌ གྱལ༌པོ༌ སི༌ཧོན༌ དང༌ ཨོག༌ ཡང༌ ཁོང༌གུན༌ནི༌ མི༌ ཚང༌མ༌ ཁྲེས༌ཏོར༌ ཅོ༌ཁན༌བོ༌ ང༌ཞ༌གུན༌ནི༌ ཚོར༌།
JOS 2:11 ཏེ༌གུན༌ ཚོར༌ཏེ༌ ང༌ཞའེ༌ སྙིང༌ ཇིགས༌པའེ༌ གངས༌ ཡང༌ ནོལ༌ཅེས༌སི༌ སྤོས༌པ༌ མེད༌ཁན༌ སོང༌ ཅིའ༌ཟེར༌ན༌ ཁྱོ༌ཞའེ༌ དཀོན༌མཆོག༌ ཡ༌ཝའེ༌ ནམ༌ཁའ༌ དང༌ ཇིག༌རྟེན༌ ཉིས༌ཀོའེ༌ཀ༌ ཝང༌ སྲུལ༌ལ༌ ཛད༌ད༌ནོག༌།
JOS 2:12 ངའེ༌ ཁྱོ༌ཞའ༌ སྙིང༌རྗེ༌ སྟན༌ པ༌སང༌ ཏ༌ ཁྱོ༌ཞའེ༌ ང༌ དང༌ ངའེ༌ ནང༌ཚངས༌ལ༌ སྙིང༌རྗེ༌ སྟན༌ཅེས༌, ཡ༌ཝའེ༌ ཚན༌ནི༌ ནང༌ང༌ ནའ༌ ཁུར༌ར༌ ཛད༌ ཡང༌ ཏན༌ཏན༌ ཆ༌ཅེས༌ལ༌ ང༌ སྟགས༌ཤིག༌ སལ༌།
JOS 2:13 ཁྱོ༌ཞ༌གུན༌ནི༌ ངའེ༌ ཨ༌བ༌ དང༌ ཨ༌མ༌, ངའེ༌ ཨ༌ཅོ༌ནོ༌ དང༌ ཨ༌ཅེ༌ ནོ༌མོ༌ ཡང༌ ཁོང༌གུན༌ནི༌ ནང༌ཚངས༌ སད༌ མ༌སད༌ད༌ སྐྱོབ༌ཅེས༌སི༌ ཁ༌ཆད༌ ཅོས༌།”
JOS 2:14 མི༌ ཉིས༌ཀོའེ༌ བུ༌མོ༌བོའ༌ ཟེརས༌, “ང༌ཞའེ༌ ཁྱོ༌ཞའ༌ མ༌སྐྱོབ༌ན༌, དཀོན༌མཆོག༌གི༌ ང༌ཞའེ༌ སྲོག༌ ལེན༌ཤིག༌། ཀལ༌ཏེས༌ ཁྱོ༌རང༌ངི༌ ང༌ཞ༌གུན༌ནི༌ ལས༌སི༌ ཐབ༌ལྡིངས༌པོ༌ སུའང༌ མ༌ཤད༌ན༌ ཡ༌ཝའེ༌ འི༌ ས༌ཀྱད༌པོ༌ ང༌ཞའ༌ སལ༌ལ༌ཅིག༌ ང༌ཞའ༌ ཁྱོ༌རང༌ ཉམ༌པོ༌ སྙིང༌རྗེ༌ཅན༌ དང༌ ཨིད༌ཤེས༌ཅན༌ ལུས༌ཨིན༌།”
JOS 2:15 ར༌ཧབ༌བི༌ ཁང༌པ༌ གྱལ༌སའེ༌ རྩིག༌པའེ༌ཀ༌ ཡོད༌ པ༌སང༌ ཁོའེ༌ ཀར༌ཁུང༌ ནེ༌ ཐག༌པ༌ ཏངས༌ཏེ༌ ཁོང༌གུན༌ གྱལ༌སའེ༌ ཕི༌ལོག༌ ཆོགས༌ལ༌ ཕབས༌།
JOS 2:16 བུ༌མོའེ༌ ཁོང༌གུན༌ལ༌ ཟེརས༌, “ཙལ༌ཁན༌གུན༌ལ༌ ཁྱོ༌ཞའ༌ མི༌ ཐོབ༌ཅེས༌སི༌ ཕིའ༌ རི༌ ཆོགས༌ལ༌ སོང༌ཏེ༌ ཞག༌མ༌ སུམ༌ ཨིབས༌ཏེ༌ དུག༌, ཙལ༌ཁན༌གུན༌ ལོགས༌ཏེ༌ ཡོང༌ང༌ཅིག༌ ཁྱོ༌ཞའ༌ ལོགས༌ཏེ༌ སོང༌ཤིག༌།”
JOS 2:17 ཁོང༌གུན༌ནི༌ བུ༌མོའ༌ ཟེརས༌, “ཀལ༌ཏེས༌ ཁྱོ༌རང༌ངི༌ ང༌ཞའེ༌ ཟེར༌ཁན༌བོ༌ མ༌ཅོ༌ན༌, ཁྱོ༌རང༌ང༌ ཅོ༌ཁན༌ནི༌ ཁ༌ཆད༌པོའེ༌ ཀ༌ནེ༌ ང༌ཞའ༌ བུད༌ཏེ༌ ཨིན༌།
JOS 2:18 ང༌ཞའ༌ འི༌ ས༌ཀྱད༌དི༌ ནང༌ང༌ ཡོང༌ ཟ༌ནེ༌ ཁྱོ༌རང༌ངི༌ ང༌ཞའ༌ ཕབས༌ཁན༌ནི༌ ཀར༌ཁུང༌ངི༌ཀ༌ འི༌ རས༌ མར༌པོ༌བོ༌ ཏགས༌ཏེ༌ ཁྱོ༌རང༌ངི༌ ཨ༌བ༌ དང༌ ཨ༌མ༌, ཨ༌ཅོ༌ནོ༌ ཡང༌ ཁྱོ༌རང༌ངི༌ ཉེན༌གྲུང༌ ཚང༌མ༌ ཁྱོ༌རང༌ངི༌ ཁང༌པའེ༌ ནང༌ང༌ ཁྱོང༌གོས༌།
JOS 2:19 ཀལ༌ཏེས༌ སུ༌ཞིག༌ ཕི༌ལོག༌ག༌ སོང༌ཏེ༌ ལམ༌མི༌ཀ༌ སད༌ན༌ ཏེ༌བོ༌ ང༌ཞའེ༌ སྐྱོན༌ མན༌, ཨིན༌ནའང༌ སུ༌ཞིག༌གི༌ འི༌ ཁང༌པའེ༌ ནང༌ང༌ ཡོད༌ཁན༌གུན༌ནི༌ཀ༌ ལག༌པ༌ རྐྱངས༌ཏེ༌ སད༌ན༌, ཏེ༌བོ༌ ཕིའ༌ ང༌ཞའ༌ ནོངས༌ཅན༌ གྱུར༌ཨིན༌།
JOS 2:20 ཁྱོ༌རང༌ངི༌ ང༌ཞའེ༌ ཐབ༌ལྡིངས༌གུན༌ ཤད༌ན༌, ཏེ༌ནེ༌ ང༌ཞ༌གུན༌ འི༌ ནའ༌ ཁུར༌ཁན༌བོའེ༌ ཀ༌ནེ༌ བུད༌ཏེ༌ ཨིན༌ནོག༌།”
JOS 2:21 བུ༌མོའེ༌ ལན༌ཏངས༌, “ཁྱོ༌ཞའེ༌ ཟེར༌ཁན༌བོ༌ ངའེ༌ ཅོ༌ཨིན༌།” ཁོའེ༌ ཁོང༌གུན༌ ལོགས༌ཏེ༌ ལམ༌ཅུགས༌ ཡང༌ རས༌ མར༌པོ༌བོ༌ ཀར༌ཁུང༌ངི༌ཀ༌ ཏགས༌།
JOS 2:22 ཙལ༌ཁན༌གུན༌ནི༌ ཀ༌རུང༌ས༌ ཙལ༌ཏེ༌ ཁོང༌གུན༌ མ༌ཐོབ༌བ༌ ལོགས༌ཏེ༌ ཆ༌ཆ༌ ཚག༌པ༌ ཨིས༌ར༌ཨེལ༌པ༌ ཉིས༌ཀོ༌ རི༌ ནང༌ང༌ ཨིབས༌ཏེ༌ ཞག༌མ༌ སུམ༌ དུགས༌།
JOS 2:23 ཏེ༌ནེ༌ ཁོང༌ ཉིས༌ཀོ༌ རི༌ནེ༌ བབས༌ཏེ༌ ཡོངས༌ ཡང༌ ཡོར༌དཱན༌ ལྩངས༌པོ༌ རྒལ༌ཏེ༌ ཡོ༌ཤུའ༌ ཡོད༌ས༌ སོང༌ ཡང༌ ཁོང༌གུན༌ ཉམ༌པོ༌ ཇུང༌ཁན༌ ཚང༌མ༌ ཁོའ༌ ཤདས༌།
JOS 2:24 ཁོང༌གུན༌ནི༌ ཟེརས༌, “ཏན༌ཏན༌ ཡ༌ཝའེ༌ ང༌དང༌གུན༌ལ༌ ཏེ༌ ས༌ཀྱད༌ གང༌པོ༌ སལ༌ཏེ༌ ཨིན༌ནོག༌ ཅིའ༌ཟེར༌ན༌ ཏེ༌རུ༌ དུག༌ཁན༌ མི༌ཚང༌མ༌ ང༌དང༌གུན༌ལ༌ མ༌སྲན༌ཏྲེ༌ ཇིགས༌ཏེ༌ དུག༌།”
JOS 3:1 ཐོ༌རེ༌ ཟུག༌པོ༌ ང༌མོ༌ ནེ༌ ཡོ༌ཤུའ༌ དང༌ ཨིས༌ར༌ཨེལ༌པ༌ ཚང༌མ༌ ཤིཏ༌ཏིམ༌ ནེ༌ བིང༌ཏེ༌ ཡོར༌དཱན༌ ལྩངས༌པོ༌ ཆོགས༌ལ༌ སོང༌ ཡང༌ ལྩངས༌པོ༌ རྒལ༌ལི༌ སང༌ སྔུན༌ལ༌ ཁོང༌གུན༌ ཏེ༌བོའེ༌ ཐའ༌མ༌ ཀུར༌ ཙུགས༌ཏེ༌ དུགས༌།
JOS 3:2 ཞག༌མ༌ སུམ༌མི༌ སྟིང༌ནེ༌ ཨིས༌ར༌ཨེལ༌པའེ༌ གོ༌སྐྱོང༌གུན༌ ཀུར༌ ཙུག༌སའེ༌ ནས༌ས༌ གང༌པོའེ༌ ནང༌ང༌ སོང༌ཏེ༌
JOS 3:3 མི༌གུན༌ལ༌ ལབ༌ཞ༌ ཏང༌ཨིན༌ ཟེརས༌, “ཁྱོ༌ཞ༌གུན༌ནི༌ ལི༌ཝི༌པ༌ བླ༌མ༌གུན༌ནི༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཆད༌དོན༌ནི༌ སྒམ༌ ཁུར༌ཏེ༌ ཆའ༌ ཐོང༌ང༌ཅིག༌ གྲལ༌གྲིག༌ ཅོས༌ཏེ༌ ཁྱོ༌ཞའ༌ ཁོང༌གུན༌ནི༌ སྟིང༌རང༌ནེ༌ ཆ༌གོས༌།
JOS 3:4 ཏེ༌ནེ༌ ཁྱོ༌ཞའ༌ ཆ༌ཅེས༌སི༌ ལམ༌བོ༌ ཤེས༌ཨིན༌ ཅིའ༌ཟེར༌ན༌ ང༌དང༌ འི༌ ལམ༌ ནེ༌ མ༌ནེ༌ མ༌ཆའ༌ ཨིན༌ནོག༌། ཨིན༌ནའང༌ ཁྱོ༌ཞའ༌ དང༌ ཆད༌དོན༌ནི༌ སྒམ༌མི༌ ནང༌ང༌ མི༌ཀྲར༌ 900 པར༌ བོར༌གོས༌, སྒམ༌མི༌ ཉེ༌མོའ༌ མི༌ ཡོང༌ཅེས༌ ཏན༌ཏན༌ ཅོས༌།”
JOS 3:5 ཏེ༌ནེ༌ ཡོ༌ཤུའེ༌ མི༌གུན༌ལ༌ ཟེརས༌, “ཁྱོ༌ཞ༌རང༌གུན༌ རྩང༌མ༌ ཅོས༌ ཅིའ༌ཟེར༌ན༌ ཐོ༌རེ༌ ཡ༌ཝའེ༌ ང༌དང༌གུན༌ནི༌ ཕྲོའ༌ ཧ༌ལས༌ཤེས༌སི༌ ཆག༌ལས༌ ཛད༌ཨིན༌།”
JOS 3:6 ང༌ཏོག༌ ཡོ༌ཤུའེ༌ བླ༌མ༌གུན༌ལ༌ ཟེརས༌, “ཆད༌དོན༌ནི༌ སྒམ༌ ཁུར༌ཏེ༌ མི༌གུན༌ནི༌ སང༌ སྔུན༌ལ༌ གྲུལ༌།” ཏེ༌ནེ༌ ཁོང༌གུན༌ནི༌ ཆད༌དོན༌ནི༌ སྒམ༌ ཁུར༌ཏེ༌ མི༌གུན༌ནི༌ སང༌ སྔུན༌ལ༌ སོང༌།
JOS 3:7 ཡ༌ཝའེ༌ ཡོ༌ཤུའ༌ མོལས༌, “དི༌རིང༌ ནེ༌ པར༌ལ༌ ངའེ༌ ཨིས༌ར༌ཨེལ༌པ༌ ཚང༌མའེ༌ ཕྲོའ༌ ཁྱོ༌རང༌ གོ༌སྐྱོང༌ ཀྲག༌པོ༌ཞིག༌ གྱུར༌ཅུག༌ཨིན༌, ཏེ༌ནེ༌ ཁོང༌གུན༌ལ༌ ང༌ མོ༌ཟེས༌ ཉམ༌པོ༌ ཡོད༌ད༌ ཙོགས༌ ཁྱོ༌རང༌ ཉམ༌པོའང༌ ཡོད༌ཁན༌བོ༌ ཧ༌གོ༌ཨིན༌།
JOS 3:8 ཆད༌དོན༌ནི༌ སྒམ༌ ཁུར༌ཁན༌ནི༌ བླ༌མ༌གུན༌ལ༌ ཟེར༌, ‘ཡོར༌དཱན༌ ལྩངས༌པོའེ༌ ཐའ༌མ༌ ལེབ༌བ༌ཅིག༌, ལྩངས༌པོའེ༌ ཆུའི༌ ནང༌ང༌ ཀོམ༌པ༌ ཁ༌ཅིག༌ སོང༌ ཡང༌ ཏེ༌ཀ༌ ལངས༌ཏེ༌ དུག༌།’”
JOS 3:9 ཡོ༌ཤུའེ༌ ཨིས༌ར༌ཨེལ༌པ༌གུན༌ལ༌ ཟེརས༌, “ཡོང༌, ཡ༌ཝ༌ ང༌དང༌ངི༌ དཀོན༌མཆོག༌གི༌ མོལ༌ཁན༌གུན༌ ངའེ༌ ཁྱོ༌ཞའ༌ ཤད༌ཨིན༌།
JOS 3:10 དི༌རིང༌ སོན༌པོ༌ དཀོན༌མཆོག༌ ང༌དང༌ ཉམ༌པོ༌ ཞུགས༌ཏེ༌ ཁོང༌ངི༌ ཀེ༌ནན༌པ༌, ཧེད༌པ༌, ཧིཝ༌པ༌, པེ༌རིཟ༌པ༌, གིར༌གཤ༌པ༌, ཨ༌མོར༌པ༌ དང༌ ཡེ༌བས༌པ༌ གུན༌ འི༌ ས༌ཆའེ༌ ནང༌ནེ༌ ཏན༌ཏན༌ ཕིང༌ང༌ ཛད༌ཅེས༌པོ༌ ང༌དང༌གུན༌ལ༌ ཧ༌གོ༌ཅེས༌ ཨིན༌ནོག༌།
JOS 3:11 ལྟོས༌། ཇིག༌རྟེན༌ གང༌པོའེ༌ཀ༌ ཝང༌སྲུལ༌ལ༌ ཛད༌ཁན༌ ཡ༌ཝའེ༌ ཆད༌དོན༌ནི༌ སྒམ༌མི༌ ང༌དང༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ འ༌ངོ༌ ཆོགས༌ལ༌ ཁྲིད༌ཏེ༌ ཁྱེར༌ར༌ ཛད༌ཨིན༌།
JOS 3:12 ཏ༌ ཨིས༌ར༌ཨེལ༌ལི༌ མི༌སྡེ༌གུན༌ ནེ༌ མི༌ རྕུག༌ཉིས༌ ལྡོམ༌ཤིག༌, སྡེ༌ རེ༌རེ༌ ནེ༌ མི༌ རེ༌རེ༌།
JOS 3:13 ཇིག༌རྟེན༌ གང༌པོའ༌ ཝང༌སྲུལ༌ལ༌ ཛད༌ཁན༌ནི༌ ཡ༌ཝའེ༌ སྒམ༌ ཁུར༌ཁན༌ བླ༌མ༌གུན༌ནི༌ རྐང༌པ༌ ཆུའ༌ ཐུག༌ག༌ཅིག༌ གྱེན༌ནེ༌ ཡོང༌ཁན༌ནི༌ ཆུ༌ གྱུག༌མ༌གྱུག༌ག༌ རྩིག༌པ༌ ཙོགས༌ལ༌ ལངས༌ཏེ༌ དུག༌ཨིན༌།”
JOS 3:14 ཏེ༌ནེ༌ མི༌གུན༌ ཡོར༌དཱན༌ ལྩངས༌པོ༌ རྒལ༌ཅེས༌ལ༌ ཀུར༌གུན༌ ལྡུམས༌ཏེ༌ བིང༌ ཡང༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ཁོང༌གུན༌ནི༌ སྔུན༌སྔུན༌ལ༌ སོང༌།
JOS 3:15 ༼ཏ༌ ཏེ༌ཏུས༌པོ༌ རྔབ༌སའེ༌ ཏུས༌ ཡང༌ ཡོར༌དཱན༌ ལྩངས༌པོའེ༌ ཆུ༌ ཕེལ༌ཏེ༌ ཐའ༌མ༌ནེ༌ ཐལ༌ཏེ༌ ཆའད༌པིན༌༽ ཨིན༌ནའང༌ ཆད༌དོན༌ནི༌ སྒམ༌ ཁུར༌ཁན༌ནི༌ བླ༌མ༌གུན༌ནི༌ རྐང༌པ༌ ལྩངས༌པོའེ༌ ཆུའ༌ ཐུག༌ག༌ཅིག༌,
JOS 3:16 གྱེན༌ནེ༌ ཡོང༌ཁན༌ནི༌ ཆུ༌ གྱུག༌མ༌གྱུག༌ག༌, མ༌ཐག༌རིང༌ང༌ ཡོད༌ཁན༌ ཟ༌རེ༌ཐན༌ནི༌ ཉེ༌མོའ༌ ཨ༌དམ༌མི༌ གྲོང༌ཁྱེར༌རི༌ ནང༌ང༌ རྩིག༌པ༌ ཙོགས༌ལ༌ ཁྱིལ༌ཏེ༌ དུགས༌ ཡང༌ ཐུར༌ལ༌ ཨ༌ར༌བཧའེ༌ ཚོ༌ ཡང༌ན༌ ཚོ༌རུལ༌ ཆོགས༌ལ༌ གྱུག༌ཁན༌ནི༌ ཆུ༌ ཆད༌། ཏེ༌ནེ༌ མི༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཡེ༌རི༌ཀོ༌ ཆོགས༌ལ༌ ཆ༌ཉན༌།
JOS 3:17 ས༌སྐམ༌པོའེ༌ ཀ༌ནེ༌ ཨིས༌ར༌ཨེལ༌པ༌ ཚང༌མ༌ ཡོར༌དཱན༌ ལྩངས༌པོ༌ རྒལ༌ཏེ༌ འ༌ངོ༌ ཆོགས༌ལ༌ ལེབ༌ལེབ༌ ཚག༌པ༌ ཡ༌ཝའེ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ལྩངས༌པོའེ༌ སྐྱིལ༌ལ༌ ས༌སྐམ༌པོའེ༌ཀ༌ ལངས༌ཏེ༌ དུགས༌།
JOS 4:1 མི༌ཚང༌མ༌ ཡོར༌དཱན༌ ལྩངས༌པོ༌ རྒལ༌ ཚར༌ར༌ཅིག༌ ཡ༌ཝའེ༌ ཡོ༌ཤུའ༌ མོལས༌,
JOS 4:2 “ཏ༌ མི༌ རྕུག༌ཉིས༌ ལྡོམ༌, སྡེ༌ རེ༌རེ༌ནེ༌ མི༌ རེ༌རེ༌,
JOS 4:3 ཡང༌ ཁོང༌གུན༌ལ༌, ‘བླ༌མ༌གུན༌ ལངས༌ཏེ༌ ཡོད༌སའེ༌ ཡོར༌དཱན༌ ལྩངས༌པོའེ༌ སྐྱིལ༌ནེ༌ རྡོའ༌ རྕུག༌ཉིས༌ ཁུར༌ཏེ༌ ང༌དང༌གུན༌ དི༌རིང༌ ཚན༌ལ༌ དུག༌སའེ༌ ནས༌སའེ༌ཀ༌ ཁྱོང༌’ ཟེར༌།”
JOS 4:4 ཏེ༌ནེ༌ ཡོ༌ཤུའེ༌ མི༌ རྕུག༌ཉིས༌, སྡེ༌ རེ༌རེ༌ནེ༌ མི༌ རེ༌རེ༌ ལྡམས༌ཁན༌གུན༌ བོད༌ཏེ༌ ཁྱོངས༌།
JOS 4:5 ཁོའེ༌ ཁོང༌གུན༌ལ༌ ཟེརས༌, “ཡོར༌དཱན༌ནི༌ སྐྱིལ༌ལ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཆད༌དོན༌ནི༌ སྒམ༌ ཡོད༌ས༌ སོང༌ཏེ༌ ཁྱོ༌ཞའ༌ རེ༌རེ༌ རྡོའ༌ རེ༌རེ༌ སྤུང༌པའེ༌ཀ༌ ཁུར༌ཏེ༌ ཁྱོང༌། ཨིས༌ར༌ཨེལ༌ལི༌ སྡེའེ༌ རེ༌རེའེ༌ ཕིའ༌ རྡའ༌ རེ༌རེ༌།
JOS 4:6 འི༌ རྡོའ༌གུན༌ནི༌ ཡ༌ཝའེ༌ ང༌དང༌ངི༌ ཕིའ༌ ཛད༌ཁན༌ ཚང༌མ༌ ཨིད༌ཏུ༌ སྐུལ༌ཨིན༌། མ༌ཡོངས༌པའེ༌ ཏུས༌སི༌ ནང༌ང༌ ནམ༌ ང༌དང༌ངི༌ ཕྲུ༌གུ༌གུན༌ནི༌, ‘འི༌ རྡོའ༌གུན༌ནི༌ ཏོན༌ ཅི༌ ཨིན༌ནོག༌?’ ཟེར༌ཏེ༌ ཏྲི༌ན༌,
JOS 4:7 ཁྱོ༌ཞའེ༌ ཁོང༌གུན༌ལ༌ ཟེར༌, ‘ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ ཡོར༌དཱན༌ ལྩངས༌པོ༌ གྱུག༌མ༌གྱུག༌ག༌ དུགས༌། བླ༌མ༌གུན༌ནི༌ ཆད༌དོན༌ནི༌ སྒམ༌ ཁུར༌ཏེ༌ ཆའ༌ཅིག༌ ལྩངས༌པོའེ༌ ཆུ༌ གྱུག༌མ༌གྱུག༌ག༌ དུགས༌། ཨིས༌ར༌ཨེལ༌པ༌གུན༌ནི༌ ཕིའ༌ འི༌ རྡོའ༌གུན༌ ཏུས༌གྱུན༌ ལུས༌ཤེས༌སི༌ དྲན༌སོའེ༌ སྟགས༌ཤིག༌ ཨིན༌ནོག༌།’”
JOS 4:8 ཡ༌ཝའེ༌ ཡོ༌ཤུའ༌ བཀའ༌ ཏང༌ཁན༌ ནང༌ཞིན༌ ཏེ༌ མི༌གུན༌ནི༌ ཡོར༌དཱན༌ ལྩངས༌པོའེ༌ སྐྱིལ༌ནེ༌ རྡོའ༌ རྕུག༌ཉིས༌, སྡེ༌ རེ༌རེ༌ ཕིའ༌ རྡའ༌ རེ༌རེ༌ ཁུར༌ཏེ༌ ཁོང༌གུན༌ ཚན༌ལ༌ དུག༌སའེ༌ ནས༌སའེ༌ཀ༌ ཁྱོངས༌ ཡང༌ ཏེ༌གུན༌ རྩིགས༌ཏེ༌ དྲན༌སོའེ༌ སྟགས༌ ཅོས༌།
JOS 4:9 ཡོར༌དཱན༌ ལྩངས༌པོའེ༌ སྐྱིལ༌ལ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ལངས༌ཏེ༌ དུག༌སའེ༌ཀ༌ ཡོ༌ཤུའེ༌ ཞན༌ རྡོའ༌ རྕུག༌ཉིས༌ སྤུངས༌། དག༌སའང༌ ཏེ༌གུན༌ ཏེན༌ན༌ ནས༌སའེ༌ཀ༌ ཡོད༌ཏེ༌ ཨིན༌ནོག༌།
JOS 4:10 ཡ༌ཝའེ༌ མོ༌ཟེས༌ གྱུད༌ཏེ༌ ཡོ༌ཤུའ༌ སལ༌ཁན༌ བཀའ༌ ཚང༌མ༌ གྲུབ༌གྲུབ༌ ཚག༌པ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ཡོར༌དཱན༌ ལྩངས༌པོའེ༌ སྐྱིལ༌ལ༌ ལངས༌ཏེ༌ དུགས༌། ཏེན༌ན༌ ཏུས༌ལ༌ མི༌གུན༌ ས༌སྐམ༌པོའེ༌ ཀ༌ནེ༌ གྱོགས༌པ༌ ལྩངས༌པོ༌ རྒལ༌ཏེ༌ སོང༌།
JOS 4:11 མི༌ ཚང༌མ༌ འ༌ངོ༌ ཆོགས༌ལ༌ ཁམ༌ཟང༌ ལེབས༌ཏེ༌ ལྟེན༌ཡོད༌ ཟ༌ནེ༌ ཡ༌ཝའེ༌ སྒམ༌ ཁུར༌ཁན༌ བླ༌མ༌གུན༌ནའང༌ འ༌ངོ༌ ཆོགས༌ལ༌ བིང༌ཏེ༌ ཡོངས༌།
JOS 4:12 མོ༌ཟེས༌སི༌ བཀའ༌ ནང༌ཞིན༌ རུ༌བེན༌ དང༌ གཱད༌ སྡེ༌ ཡང༌ མ༌ནས༌སའེ༌ སྡེ༌ ཕེད༌དི༌ མག༌མི༌གུན༌ མག༌ཆ༌ ཁུར༌ཏེ༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ཅོས༌ཏེ༌ ཡོར༌དཱན༌ ལྩངས༌པོ༌ རྒལ༌ཏེ༌ འ༌ངོ༌ ཆོགས༌ལ༌ ཡོངས༌།
JOS 4:13 མག༌ཆ༌ ཁུར༌ཁན༌ནི༌ མག༌མི༌ ནོལ༌ ཆོག༌ཆོག༌ ཡོད༌ཁན༌ ཧ༌ལམ༌ 40,000 ལྩངས༌པོ༌ རྒལ༌ཏེ༌ འ༌ངོ༌ ཆོགས༌ལ༌ ཡེ༌རི༌ཀོའེ༌ ཐང༌ང༌ སོང༌ ཡང༌ ཁོང༌གུན༌ ཉམ༌པོ༌ ཡ༌ཝ༌ ཞུགས༌ཏེ༌ ཡོད༌པིན༌།
JOS 4:14 ཏེན༌ན༌ ཞག༌ག༌ ཡ༌ཝའེ༌ ཨིས༌ར༌ཨེལ༌པ༌གུན༌ནི༌ དུན༌ལ༌ ཡོ༌ཤུའ༌ སྤལ༌ ཐོབ༌ཅུག༌ག༌ ཛདས༌། ཡང༌ ཁོང༌གུན༌ནི༌ ཡོ༌ཤུའ༌, མི༌ཚེའེ༌ གང༌པོ༌ རྩི༌ཝ༌ སྟནས༌ ཀ༌ཟུག༌ ཁོང༌གུན༌ནི༌ མོ༌ཟེས༌ལ༌ སྟན༌ཏེ༌ ཨིན༌པིན༌།
JOS 4:15 ཡ༌ཝའེ༌ ཡོ༌ཤུའ༌ མོལས༌,
JOS 4:16 “ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ལ༌ ལྩངས༌པོའེ༌ ནང༌ནེ༌ བིང༌ཏེ༌ ཡོང༌ཅེས༌ལ༌ བཀའ༌ ཏོང༌།”
JOS 4:17 ཏེ༌ནེ༌ ཡོ༌ཤུའེ༌ བླ༌མ༌གུན༌ལ༌ བིང༌ཏེ༌ ཡོང༌ཅེས༌ལ༌ བཀའ༌ ཏངས༌།
JOS 4:18 ཡ༌ཝའེ༌ ཆད༌དོན༌ནི༌ སྒམ༌ ཁུར༌ཁན༌ བླ༌མ༌གུན༌ ལྩངས༌པོ༌ ནང༌ནེ༌ ཕི༌ལོག༌ག༌ བིང༌ཏེ༌ ཡོངས༌ ཡང༌ ཁོང༌གུན༌ནི༌ རྐང༌པ༌ ལྩངས༌པོའེ༌ ཐའ༌མའེ༌ ས༌ཀྱད༌དི༌ཀ༌ བོར༌ར༌ཅིག༌ ཡོར༌དཱན༌ ལྩངས༌པོ༌ སྔུན༌མ༌ ཙོགས༌ལ༌ གྱུགས༌ ཡང༌ ཆུ༌ ཐའ༌མ༌ནེ༌ ཐལ༌ཏེ༌ སོང༌།
JOS 4:19 ཟླ༌ཝ༌ ཏང༌པོའེ༌ ཞག༌ 10 པའེ༌ ཞག༌ག༌ མི༌ཚང༌མ༌ ཡོར༌དཱན༌ནེ༌ སོང༌ཏེ༌ ཡེ༌རི༌ཀོའེ༌ ཤར༌ ཆོགས༌ལ༌ ཡོད༌ཁན༌ གིལ༌གལ༌ ནས༌སའེ༌ ནང༌ང༌ ཀུར༌ ཙུགས༌ཏེ༌ དུགས༌།
JOS 4:20 ཡོ༌ཤུའེ༌ ཡོར༌དཱན༌ ལྩངས༌པོའེ༌ ནང༌ནེ༌ ཁྱོང༌ཁན༌ རྡོའ༌ རྕུག༌ཉིས༌པོ༌ འིན༌ན༌ གིལ༌གལ༌ལི༌ ནས༌སའེ༌ཀ༌ རྩིགས༌ཏེ༌ བོརས༌།
JOS 4:21 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པ༌གུན༌ལ༌ ཟེརས༌, “མ༌ཡོངས༌པའེ༌ ཏུས༌སི༌ ནང༌ང༌ ཁྱོ༌ཞའེ༌ ཕྲུ༌གུ༌གུན༌ནི༌ ‘འི༌ རྡོའ༌ རྩིགས༌ཁན༌བོའེ༌ ཏོན༌ ཅི༌ ཨིན༌ནོག༌?’ ཟེར༌ཏེ༌ ཏྲི༌ན༌
JOS 4:22 ཁོང༌གུན༌ལ༌ ཨིས༌ར༌ཨེལ༌པ༌གུན༌ ས༌སྐམ༌པོའེ༌ ཀ༌ནེ༌ ཡོར༌དཱན༌ ལྩངས༌པོ༌ རྒལ༌ཏེ༌ ཡོངས༌ཁན༌བོ༌ ཤོད༌།
JOS 4:23 ང༌དང༌ ཚང༌མ༌ རྒལ༌ཏེ༌ ཆ༌ ཚར༌ཚར༌ ཚག༌པ༌ ང༌དང༌ངི༌ མིག༌གི༌ དུན༌ལ༌ ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ལྩངས༌པོ༌ སྐམ༌པོ༌ བོར༌ར༌ ཛདས༌། ཡ༌ཝའེ༌ ཡོར༌དཱན༌ ལྩངས༌པོ༌ སྐམ༌ ཤུག༌ག༌ ཛདས༌ ཀ༌ཟུག༌ ང༌དང༌ངི༌ ཕ༌མ༌གུན༌ནི༌ མིག༌གི༌ དུན༌ལ༌ ཁོང༌གུན༌ རྒལ༌ཏེ༌ ཆ༌ ཚར༌ཚར༌ ཡ༌ཝའེ༌ ཚོ༌ མར༌པོ༌ སྐམས༌ ཤུག༌ག༌ ཛདས༌།
JOS 4:24 ཇིག༌རྟེན༌པ༌ ཚང༌མའེ༌ ཁོང༌ སྟོབས༌ཤུགས༌ཅན༌ ཨིན༌ཁན༌བོ༌ ཧ༌གོ༌ཅེས༌ ཡང༌ ཏུས༌གྱུན༌ ཁྱོ༌ཞའེ༌ ཁོང༌ངི༌ ཇིགས༌སི༌ ནང༌ང༌ མི༌ཚེའེ༌ པུད༌ཅེས༌ལ༌ ཡ༌ཝའེ༌ ཏེ༌བོ༌ ཅོའ༌ ཛདས༌།”
JOS 5:1 ཏ༌ ཡོར༌དཱན༌ནི༌ ནུབ༌ ཆོགས༌ལ༌ ཡོད༌ཁན༌ ཨ༌མོར༌པའེ༌ གྱལ༌པོ༌ ཚང༌མའ༌ ཡང༌ ཚོའེ༌ ཐའ༌མ༌ དུག༌ཁན༌ ཀེ༌ནན༌པ༌ གྱལ༌པོ༌ ཚང༌མའེ༌, ཡ༌ཝའེ༌ ཡོར༌དཱན༌ ལྩངས༌པོ༌ སྐམས༌ཅུག༌ག༌ ཛད༌ཏེ༌ ཨིས༌ར༌ཨེལ༌པ༌གུན༌ རྒལ༌ཏེ༌ ཡོང༌ཁན༌བོ༌ ཚོར༌ར༌ཅིག༌ ཁོང༌གུན༌ མ༌ སྲན༌ཏྲེ༌ ཇིགས༌ ཡང༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ནོལ༌ཅེས༌སི༌ སྤོས༌པ༌ ཆགས༌།
JOS 5:2 ཏེན༌ན༌ ཏུས༌ལ༌ ཡ༌ཝའེ༌ ཡོ༌ཤུའ༌ མོལས༌, “རྡོའ༌ སྲ༌མོའེ༌ ཀྲི༌གུན༌ ཅོས༌ཏེ༌ ཨིས༌ར༌ཨེལ༌པ༌ མི༌རབས༌ ཉིས༌པའེ༌ བུ༌ཚ༌གུན༌ལ༌ སུན༌ནད༌ ཅོས༌།”
JOS 5:3 ཏེན༌ན༌བོའེ༌ཕིའ༌ ཡོ༌ཤུའེ༌ རྡོའ༌ སྲ༌མོའེ༌ ཀྲི༌གུན༌ ཅོས༌ཏེ༌ གི༌བེ༌འད༌ ཧ༌ར༌ལོད༌དི༌ ནང༌ང༌ ཨིས༌ར༌ཨེལ༌པ༌ བུ༌ཚ༌ ཚང༌མའ༌ སུན༌ནད༌ ཅོས༌།
JOS 5:4 ཁོང༌གུན༌ལ༌ སུན༌ནད༌ ཅོ༌ ཅུགས༌ ཅིའ༌ཟེར༌ན༌ ཨི༌ཇིབ༌ནེ༌ བིངས༌ཏེ༌ ཡོངས༌ཏེ༌ སྟིང༌ནེ༌ མག༌གི༌ ནང༌ང༌ ནོལ༌ ཉན༌ཅེས༌ཅན༌ བུ༌ཚ༌ ཚང༌མ༌ ཐང༌སྟོང༌ངི༌ ནང༌ང༌ ཤི༌ཏེ༌ ཨིན༌པིན༌།
JOS 5:5 ཨི༌ཇིབ༌ནེ༌ ཡོངས༌ཁན༌ བུ༌ཚ༌ ཚང༌མའ༌ སུན༌ནད༌ ཅོས༌ཏེ༌ ཨིན༌ནའང༌ ཐང༌སྟོང༌ང༌ བེས༌སི༌ ནང༌ང༌ ཡོད༌ཏུས༌ སྐྱེས༌ཁན༌ བུ༌ཚ༌ ཚང༌མའ༌ སུན༌ནད༌ མ༌ཅོའ༌ ཨིན༌པིན༌།
JOS 5:6 ཨིས༌ར༌ཨེལ༌པ༌གུན༌ ཐང༌སྟོང༌ངི༌ ནང༌ང༌ ལོ༌ ཞིབ༌ཅུ༌ ཁོར༌ཨིན༌ ལུས༌ ཡང༌ ཨི༌ཇིབ༌ནེ༌ བིངས༌ཏེ༌ ཡོང༌ཁན༌ མག༌གི༌ ནང༌ང༌ ནོལ༌ ཉན༌ཅེས༌ཅན༌ བུ༌ཚ༌ ཚང༌མ༌ ཡ༌ཝའེ༌ ཁའ༌ མི༌ཉན༌ཅེས༌པའེ༌ ཤི༌ ཅིའ༌ཟེར༌ན༌ ཡ༌ཝའེ༌ ང༌དང༌ངི༌ ཕ༌མེས༌པོ༌གུན༌ལ༌ འོ༌མ༌ དང༌ རང༌རྩི༌ གྱུག༌ཁན༌ནི༌ ས༌ཆའ༌ ང༌དང༌ང༌ སལ༌ཨིན༌ མོལ༌ཏེ༌ ཆད༌དོན༌ ཛད༌ཁན༌ནི༌ ཏེ༌ ས༌ཆའ༌, ཁོང༌གུན༌ལ༌ མི༌ཐོང༌ མོལ༌ཏེ༌ ཡ༌ཝའེ༌ ནའ༌ ཁུར༌ར༌ ཛདས༌།
JOS 5:7 ཏེ༌ ཁའ༌ མ༌ཉན༌ཁན༌གུན༌ནི༌ བུ༌ཚ༌གུན༌ལ༌ ཡོ༌ཤུའེ༌ སུན༌ནད༌ ཅོ༌ཅུགས༌། ཐང༌སྟོང༌ངི༌ ནང༌ང༌ བེས༌ལ༌ ཡོད༌ཏུས༌ ཁོང༌གུན༌ལ༌ སུན༌ནད༌ མ༌ཅོའ༌ ཨིན༌པིན༌།
JOS 5:8 བུ༌ཚ༌ ཚང༌མའ༌ སུན༌ནད༌ ཅོས༌ཏེ༌ སྟིང༌ནེ༌ ཁོང༌ ཚང༌མ༌ ཕན༌ཕན༌, ཏེན༌ན༌ ནས༌སའེ༌ཀ༌ ངལ༌ཚོས༌ཏེ༌ དུགས༌།
JOS 5:9 ཏེ༌ནེ༌ ཡ༌ཝའེ༌ ཡོ༌ཤུའ༌ མོལས༌, “ཨི༌ཇིབ༌བི༌ ནང༌ང༌ ཚེ༌ཡོག༌ག༌ དུག༌གོས༌ཁན༌ནི༌ ཁྲེལ༌བ༌བོ༌ དི༌རིང༌ ངའེ༌ ཁྱོ༌ཞའེ༌ ཀ༌ནེ༌ ཐེན༌ནད༌།” ཏེ༌བོའེ༌ཕིའ༌ ཏེ༌ ས༌ཀྱད༌པོའ༌ དག༌སའང༌ གིལ༌གལ༌ ཟེར༌ར༌ནོག༌།
JOS 5:10 ཏེན༌ན༌ ཟླ༌ཝའེ༌ ཞག༌ 14 པའེ༌ ཕི༌ཏོག༌ ཀུར༌ ཙུགས༌ཏེ༌ དུག༌ས༌ ཡེ༌རི༌ཀོའེ༌ སྤང༌ཐང༌ངི༌ གིལ༌གལ༌ ནས༌སའེ༌ ནང༌ང༌ ཨིས༌ར༌ཨེལ༌པ༌གུན༌ནི༌ པེ༌སག༌གི༌ ཏུས༌ཆེན༌ རྩིས༌།
JOS 5:11 སྟིང༌མ༌ ཞག༌ག༌ ཁོང༌གུན༌ནི༌ ཏེན༌ན༌ ས༌ཀྱད༌ནེ༌ སྨིན༌ཁན༌ སྙེ༌མ༌ སྲགས༌ཁན༌ དང༌ སྐྱུར༌ མེད༌ཁན༌ནི༌ ཏ༌གི༌ ཟོས༌།
JOS 5:12 ཨིས༌ར༌ཨེལ༌པ༌གུན༌ནི༌ ཏེ༌ ནས༌སའེ༌ སྟོན༌ཐོག༌ ཟའེ༌ ཞག༌ནེ༌ ཕར༌ལ༌ ནམ༌ཁའ༌ནེ༌ མན༌ན༌ མ༌བབས༌, ཁོང༌གུན༌ནི༌ ཏེ༌བོ༌ ཡང༌སྐྱར༌ མ༌ནེ༌ མ༌ཟོས༌། ཁོང༌གུན༌ནི༌ ཏེན༌ན༌ ས༌ཀྱད༌དི༌ ནང༌ང༌ སྨིན༌ཁན༌ སྟོན༌ཐོག༌ ཟོས༌།
JOS 5:13 ཡོ༌ཤུའ༌ ཡེ༌རི༌ཀོའེ༌ གྱལ༌སའེ༌ ཉེ༌མོའ༌ ཡོད༌ ཟ༌ནེ༌ ཁོའེ༌ ཀེན༌ལ༌ ལྟས༌པ༌ ཁོའ༌, ལག༌པའེ༌ ནང༌ང༌ ར༌འི༌ ཁུར༌ཁན༌ མི༌ཞིག༌ ཁོའེ༌ དུན༌ལ༌ ལངས༌ཏེ༌ ཐོང༌། ཡོ༌ཤུའ༌ ཁོ༌ ཡོད༌ས༌ སོང༌ཏེ༌ ཏྲིས༌, “ཁྱོ༌རང༌ ང༌ཞའེ༌ ཆོགས༌ལ༌ ཨིན༌ན༌ ཡ༌ གྲ༌འོའེ༌?”
JOS 5:14 མི༌བོའེ༌ ལན༌ཏངས༌, “སུའི༌ ཆོགས༌ལའང༌ མན༌། ང༌ ཡ༌ཝའེ༌ མག༌མི༌གུན༌ནི༌ སྤོན༌བོ༌ ཨིན༌།” ཏེ༌ནེ༌ ཡོ༌ཤུའེ༌ སྐུས༌པ༌ སྟན༌ཏེ༌ ཁོང༌ངི༌ ཞབས༌སི༌ དུན༌ལ༌ ཆག༌ཕུལས༌ ཡང༌ ཟེརས༌, “ངའེ༌ སྤོན༌བོ༌, ཉེ༌རང༌ངི༌ ཡོག༌པོའེ༌ ཕིའ༌ ཅི༌ ལོན༌ ཁྱོང༌ང༌ ཛད༌ཏེ༌ ཨིན༌?”
JOS 5:15 ཡ༌ཝའེ༌ མག༌མི༌ སྤོན༌བོའེ༌ ལན༌སལས༌, “ཁྱོ༌རང༌ངི༌ པ༌བུ༌ ཕུད༌ ཅིའ༌ཟེར༌ན༌ ཁྱོ༌རང༌ ལངས༌ཏེ༌ ཡོད༌སའེ༌ ནས༌ས༌ ཏམ༌པ༌ ཨིན༌།” ཡོ༌ཤུའེ༌ ཁོང༌ངི༌ མོལ༌ཁན༌བོ༌ ཅོས༌།
JOS 6:1 ཏ༌ ཡེ༌རི༌ཀོའེ༌ གྱལ༌སའེ༌ གྱས༌སྒོ༌ སྟན༌པོ༌ ཅུགས༌ཏེ༌ སུའང༌ གྱལ༌ས༌ནེ༌ ཕི༌ལོག༌ ཡ༌ ནང༌ང༌ ཆ༌ཡོང༌ མ༌ཏངས༌ ཅིའ༌ཟེར༌ན༌ ཁོང༌གུན༌ ཨིས༌ར༌ཨེལ༌པ༌གུན༌ལ༌ ཇིགས༌ཏེ༌ ཡོད༌པིན༌།
JOS 6:2 ཡ༌ཝའེ༌ ཡོ༌ཤུའ༌ མོལས༌, “ངའེ༌ ཡེ༌རི༌ཀོ༌ གྱལ༌ས༌, ཏེ༌བོའེ༌ གྱལ༌པོ༌ དང༌ མག༌མི༌གུན༌ ཁྱོ༌རང༌ངི༌ ལག༌ག༌ སྟད༌ཨིན༌།
JOS 6:3 ཁྱོ༌རང༌ དང༌ ཁྱོ༌རང༌ངི༌ མག༌མི༌ ཚང༌མའེ༌ ཞག༌མ༌ དྲུག༌, གྱལ༌སའ༌ ཞག༌ཏང༌ ལན༌ ཅིག༌ སྐོར༌ར༌ ཏོང༌།
JOS 6:4 བླ༌མ༌ རྡུན༌ལ༌ ར༌ཅོའེ༌ ཏུང༌ ཁུར༌ཏེ༌ ཆད༌དོན༌ནི༌ སྒམ༌མི༌ སྔུན༌ལ༌ གྲུལ༌ཅུག༌། ཞག༌ རྡུན༌པའེ༌ ཞག༌ག༌ བླ༌མ༌གུན༌ནི༌ ཏུང༌ ཕུ༌ཨིན༌ ཁྱོ༌ཞ༌གུན༌ནི༌ གྱལ༌སའ༌ ལན༌ རྡུན༌ སྐོར༌ར༌ ཏང༌གོས༌།
JOS 6:5 བླ༌མ༌གུན༌ནི༌ ཏུང༌སྐད༌ རིང༌མོ༌ ཕུའ༌ ཚོར༌ར༌ཅིག༌ ཁྱོ༌ཞའ༌ ཚང༌མའེ༌ ཀུ༌ཅོ༌ སྲན༌ཏྲེ༌ ཏང༌གོས༌། ཏེ༌ནེ༌ གྱལ༌སའེ༌ རྩིག༌པ༌ རྡིབས༌ཏེ༌ ཁྱོ༌ཞའ༌ ཚང༌མ༌ ནོལ༌ཅེས༌ལ༌ གྱལ༌སའེ༌ ནང༌ང༌ རྒྱུགས༌ཏེ༌ ཆ༌ཉན༌ཨིན༌།”
JOS 6:6 ཡོ༌ཤུའེ༌ བླ༌མ༌གུན༌ བོད༌ཏེ༌ ཁྱོངས༌ ཡང༌ ཟེརས༌, “ཡ༌ཝའེ༌ ཆད༌དོན༌ནི༌ སྒམ༌ ཁུར༌ ཡང༌ བླ༌མ༌ རྡུན༌ལ༌ ར༌ཅོའེ༌ ཏུང༌ ཁུར༌ཏེ༌ སྒམ༌མི༌ སྔུན༌ལ༌ གྲུལ༌ཅུག༌།”
JOS 6:7 ཏེ༌ནེ༌ ཁོའེ༌ མག༌མི༌གུན༌ལ༌ བཀའ༌ ཏངས༌, “ཚོན༌ཆ༌ ཁུར༌ཁན༌ནི༌ མག༌མི༌ ཁ༌ཅིག༌ ཡ༌ཝའེ༌ ཆད༌དོན༌ནི༌ སྒམ༌མི༌ སྔུན༌ལ༌ གྲུལ༌ ཅུག༌ཨིན༌ ཁོང༌གུན༌ནི༌ སྟིང༌རང༌ནེ༌ མག༌མི༌ ཚང༌མ༌ གྱང༌སྐོར༌རི༌ ཕི༌ལོག༌ནེ༌ གྱལ༌སའ༌ སྐོར༌ར༌ ཏང༌ཅུག༌།”
JOS 6:8 ཡོ༌ཤུའེ༌ མི༌གུན༌ལ༌ བཀའ༌ ཏངས༌ ཚར༌ར༌ཅིག༌, ཏུང༌ ཁུར༌ཁན༌ནི༌ བླ༌མ༌ རྡུན༌བོ༌ ཏུང༌ ཕུ༌ཨིན༌ གྲུལ༌ཅེས༌ གོ༌ཟུག༌ ཡང༌ ཡ༌ཝའེ༌ ཆད༌དོན༌ནི༌ སྒམ༌ ཁུར༌ཁན༌གུན༌ ཁོང༌གུན༌ནི༌ སྟིང༌རང༌ནེ༌ སོང༌།
JOS 6:9 ཚོན༌ཆ༌ ཁུར༌ཁན༌ནི༌ མག༌མི༌གུན༌ ཏུང༌ ཕུ༌ཁན༌ནི༌ བླ༌མ༌གུན༌ནི༌ སྔུན༌ལ༌ ཡང༌ ཞན༌ མག༌མི༌གུན༌ ཆད༌དོན༌ནི༌ སྒམ༌མི༌ གྱབ༌ནེ༌ གྲུལས༌། ཏུས༌ གང༌པོ༌ བླ༌མ༌གུན༌ནི༌ ཏུང༌ ཕུའད༌པིན༌།
JOS 6:10 ཡོ༌ཤུའེ༌ བཀའ༌ ཏངས༌, “ཀུ༌ཅོ༌ མ༌ཏང༌, སྤེ༌རའང༌ མ༌ཏང༌, ནམ༌ཚོག༌པ༌ ངའེ༌ ཁྱོ༌ཞ༌གུན༌ལ༌ ཀུ༌ཅོ༌ ཏང༌ཅེས༌ལ༌ མི༌ཟེར༌། ངའེ༌ ཟེར༌རི༌ ཞག༌ག༌ ཁྱོ༌ཞའེ༌ ཀུ༌ཅོ༌ ཏོང༌ཤིག༌།”
JOS 6:11 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཡ༌ཝའེ༌ ཆད༌དོན༌ནི༌ སྒམ༌ ཁུར༌ཏེ༌ གྱལ༌ས༌ སྐོར༌ར༌ ལན༌ཅིག༌ ཏང༌ཅུགས༌། ཏེ༌ སྟིང༌ནེ༌ ཚན༌ ཕུད༌ད༌ལ༌ ཚང༌མ༌ ཀུར༌ ཙུགས༌ཏེ༌ དུག༌ས༌ སོང༌།
JOS 6:12 ཐོ༌རེ༌ཟུག༌པོ༌ ཡོ༌ཤུའ༌ ང༌མོ༌ནེ༌ ལངས༌ ཡང༌ བླ༌མ༌གུན༌ནི༌ ཡང༌སྐྱར༌ ཡ༌ཝའེ༌ ཆད༌དོན༌ནི༌ སྒམ༌ ཁུརས༌།
JOS 6:13 ཏུང༌ ཁུར༌ཁན༌ བླ༌མ༌ རྡུན༌ཀོ༌ ཏུང༌ ཕུ༌ཨིན༌ ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ གྲུལས༌། ཡང༌སྐྱར༌ ཚོན༌ཆ༌ ཁུར༌ཁན༌ནི༌ མག༌མི༌གུན༌ ཏུང༌ ཁུར༌ཁན༌ནི༌ བླ༌མ༌གུན༌ནི༌ སྔུན༌ལ༌ ཡང༌ ཞན༌ མག༌མི༌གུན༌ ཡ༌ཝའེ༌ ཆད༌དོན༌ནི༌ སྒམ༌མི༌ གྱབ༌ནེ༌ གྲུལས༌། བླ༌མ༌གུན༌ནི༌ ཏུས༌ གང༌པོ༌ ཏུང༌ ཕུས༌།
JOS 6:14 ཞག༌ ཉིས༌པའེ༌ ཞག༌ག༌ ཁོང༌གུན༌ནི༌ གྱལ༌ས༌ སྐོར༌ར༌ ཏངས༌ ཡང༌ ཁོང༌རང༌གུན༌ དུག༌ས༌ ལོགས༌ཏེ༌ སོང༌། ཏེན༌ན༌ ཙོགས༌ ཁོང༌གུན༌ནི༌ ཞག༌པོ༌ དྲུག༌ ཅོས༌།
JOS 6:15 ཞག༌ རྡུན༌པའེ༌ ཞག༌ག༌ ཨིས༌ར༌ཨེལ༌པ༌གུན༌ ནམ༌ལངས༌ལ༌ ལངས༌ཏེ༌ སྔུན༌ ཙོགས༌ལ༌ གྱལ༌ས༌ སྐོར༌ར༌ ཏངས༌། ཨིན༌ནའང༌ ཏེ༌ ཞག༌ག༌ ཁོང༌གུན༌ནི༌ སྐོར༌ར༌ ལན༌ རྡུན༌ ཏངས༌།
JOS 6:16 ལན༌ རྡུན༌པའེ༌ཀ༌ བླ༌མ༌གུན༌ནི༌ ཏུང༌ རིང༌མོ༌ ཕུའ༌ཅིག༌ ཡོ༌ཤུའེ༌ མི༌གུན༌ལ༌ བཀའ༌ ཏངས༌ཏེ༌ ཟེརས༌, “ཀུ༌ཅོ༌ ཏོང༌ཤིག༌ ཅིའ༌ཟེར༌ན༌ ཡ༌ཝའེ༌ ང༌དང༌གུན༌ལ༌ གྱལ༌ས༌ སལ༌ལ༌ ཛད༌ཏེ༌ ཨིན༌ནོག༌།
JOS 6:17 ཡ༌ཝའ༌ ཆོད༌པའེ༌ ཚུལ༌ལ༌ གྱལ༌ས༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ ཁྲེས༌ཏོར༌ ཅོ༌གོས༌། ཟུགས༌ཙོང༌མ༌ ར༌ཧབ༌ དང༌ ཁོའེ༌ ནང༌ང༌ ཡོད༌ཁན༌ ཚང༌མ༌ སད༌ མ༌གོས༌ ཅིའ༌ཟེར༌ན༌ ཁོའེ༌ ང༌དང༌ངི༌ སང༌ཝའེ༌ ཐོག༌ནེ༌ ལྟའ༌ ཀལ༌ཁན༌ ཉིས༌ཀོ༌ སྐྱོབས༌།
JOS 6:18 ཁྲེས༌ཏོར༌ ཅོས༌ཏེ༌ ཡ༌ཝའ༌ ཕུལ༌ཁན༌ནི༌ ནང༌ནེ༌ ཅའང༌ མི༌ ཁྱེར༌ཅེས༌ ཏན༌ཏན༌ ཅོས༌ ཏེ༌མན༌ན༌ ཁྱོ༌ཞ༌རང༌ དང༌ ཨིས༌ར༌ཨེལ༌པ༌ ཚང༌མའེ༌ཀ༌ རྡུག༌ངལ༌ ཀྲག༌པོ༌ ཁྱོང༌ཨིན༌།
JOS 6:19 མུལ༌ དང༌ སེར༌ ཡང༌ ར༌གན༌ དང༌ ལྕགས༌སི༌ ཅ༌ལག༌ ཚང༌མ༌ ཏམ༌པ༌ ཨིན༌ པ༌སང༌ ཡ༌ཝའེ༌ ཨིན༌ནོག༌། ཏེ༌གུན༌ ཁོང༌ངི༌ བང༌ཛོད༌དི༌ ནང༌ང༌ ཁྱོང༌གོས༌།”
JOS 6:20 ཏུང༌ སྐད༌ རིང༌མོ༌ ཚོར༌ར༌ཅིག༌ མག༌མི༌གུན༌ནི༌ ཀུ༌ཅོ༌ སྲན༌ཏྲེ༌ ཏངས༌, ཧུན༌མེད༌ལ༌ ཡེ༌རི༌ཀོའེ༌ གྱང༌སྐོར༌ རྡིབས༌ཏེ༌ ཨིས༌ར༌ཨེལ༌པ༌ མག༌མི༌གུན༌ གྱལ༌སའེ༌ ནང༌ང༌ རྒྱུགས༌ཏེ༌ སོང༌ ཡང༌ ཏེ༌བོ༌ ང༌ཡོག༌ག༌ ཁྱོངས༌།
JOS 6:21 ཁོང༌གུན༌ནི༌ ར༌འི༌ ཉམ༌པོ༌ ཏེ༌ནང༌ང༌ ཡོད༌ཁན༌ བུ༌ཚ༌ དང༌ བུ༌མོ༌, ཞུ༌ནུ༌ དང༌ རྒད༌པོ༌, བ༌ལང༌, ལུག༌, ར༌མ༌ དང༌ བུང༌བུ༌ ཚང༌མ༌ སད༌ཏེ༌ མེད༌ཁན༌ ཅོས༌།
JOS 6:22 ཏེན༌ན༌ ཟ༌ནེ༌ ཡོ༌ཤུའེ༌ སང༌ཝའེ༌ ཐོག༌ནེ༌ ལྟའ༌ ཀལ༌ཁན༌ མི༌ ཉིས༌ཀོའ༌ ཟེརས༌, “ཁྱོ༌ཞའེ༌ ཁ༌ཆད༌ ནང༌ཞིན༌ ཟུགས༌ཙོང༌མའེ༌ ཁང༌པ༌ སོང༌ཏེ༌ ཁོ༌ དང༌ ཁོའེ༌ ནང༌ཚངས༌ གུན༌ ཕི༌ལོག༌ག༌ ཕིངས༌ཏེ༌ ཁྱོང༌།”
JOS 6:23 ཁོང༌ ཉིས༌ཀོ༌ སོང༌ཏེ༌ ར༌ཧབ༌, ཁོའེ༌ ཨ༌བ༌, ཨ༌མ༌, ཨ༌ཅོ༌ནོ༌ དང༌ ཉེན༌གྲུང༌, ཁོ༌ ཉམ༌པོ༌ ཡོད༌ཁན༌ ཚང༌མ༌ ཕིངས༌ཏེ༌ ཨིས༌ར༌ཨེལ༌པ༌གུན༌ དུགས༌སའེ༌ ཕི༌ལོག༌ག༌ ཁྱོངས༌།
JOS 6:24 ཏེ༌ནེ༌ ཨིས༌ར༌ཨེལ༌པ༌གུན༌ནི༌ གྱལ༌ས༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ མེའ༌ ཏུགས༌། མུལ༌, སེར༌, ར༌གན༌ དང༌ ལྕགས༌སི༌ ཅ༌ལག༌ ཚང༌མ༌ ཡ༌ཝའེ༌ བང༌ཛོད༌དི༌ ནང༌ང༌ བོརས༌།
JOS 6:25 ཨིན༌ནའང༌ ཡོ༌ཤུའེ༌ ཟུགས༌ཙོང༌མ༌ ར༌ཧབ༌ དང༌ ཁོའེ༌ ཉེན༌གྲུང༌གུན༌ མ༌ སདས༌ ཅིའ༌ཟེར༌ན༌ ཁོའེ༌ ཡེ༌རི༌ཀོའེ༌ ནང༌ང༌ སང༌ཝའེ༌ ཐོག༌ནེ༌ ལྟའ༌ ཀལ༌ཁན༌ མི༌གུན༌ སྐྱོབས༌ཏེ༌ ཨིན༌པིན༌ ཡང༌ ཏེ༌ བུ༌མོ༌ དི༌རིང༌ངའང༌ ཨིས༌ར༌ཨེལ༌པ༌གུན༌ནི༌ ཕྲོའ༌ དུག༌ཨིན༌ ཨིན༌ནོག༌།
JOS 6:26 ཏེ༌ཏུས༌ལ༌ ཡོ༌ཤུའེ༌ འི༌ཟུག༌ ཟེར༌ཏེ༌ སྤང༌ པུདས༌, “ཡེ༌རི༌ཀོའེ༌ གྱལ༌ས༌ ཡང༌སྐྱར༌ རྩིག༌ཅེས༌སི༌ རྩོན༌གྲུས༌ ཅོ༌ཁན༌གུན༌ལ༌ ཡ༌ཝའེ༌ ངན༌ ཕོག༌ཤིག༌།” “‘ཁོའེ༌ ཁོ༌རང༌ངི༌ བུ༌ཚ༌ གོ༌བུའི༌ སྲོག༌ རིན༌ ཤལ༌ཏེ༌ ཏེ༌བོའེ༌ མག༌ལྡན༌ ཏང༌ཨིན༌། ཡང༌ ཁོའེ༌ ཁོ༌རང༌ངི༌ བུ༌ཚ༌ ཆུང༌ཤོག༌གི༌ སྲོག༌ རིན༌ ཤལ༌ཏེ༌ ཏེ༌བོའེ༌ གྱས༌སྒོ༌ ཏག༌ཨིན༌།’”
JOS 6:27 ཡ༌ཝ༌ ཡོ༌ཤུའ༌ ཉམ༌པོ༌ ཞུགས༌ཏེ༌ ཡོད༌པིན༌ ཡང༌ ཁོ༌ ཏེ༌ ས༌ཀྱད༌ གང༌པོའེ༌ ནང༌ང༌ མིང༌ཅན༌ གྱུར༌།
JOS 7:1 ནོར༌ ཏམ༌པ༌གུན༌ ཡ༌ཝའ༌ ཕུལ༌ཅེས༌སི༌ བཀའ༌ ཏང༌ཁན༌བོ༌ ཁའ༌ ཉན༌ཅེས༌ལ༌ ཨིས༌ར༌ཨེལ༌པ༌གུན༌ ཁྲངས༌པོ༌ མ༌ལུས༌། ཟིམ༌རིའི༌ ཚ༌འོ༌, ཀར༌མི༌ བུ༌ཚ༌ ཨ༌ཀེན༌ནི༌ ཏེ༌ ཏམ༌པ༌ ནོར༌གུན༌ནི༌ ནང༌ནེ༌ ཁ༌ཅིག༌ རྐུས༌ཏེ༌ ཁྱེརས༌། ཏེ༌བོའེ༌ཕིའ༌ ཡ༌ཝའ༌ ཨིས༌ར༌ཨེལ༌པ༌གུན༌ནི༌ཀ༌ མ༌སྲན༌ཏྲེ༌ ཐུག༌སྲོ༌ སྐྱོདས༌། ཟིམ༌རི༌ ཟེ༌རཧའེ༌ པུར༌གྱུད༌ ཨིན༌པིན༌ ཡང༌ ཁོང༌གུན༌ ཡ༌ཧུ༌དཱའེ༌ མི༌སྡེ༌ནེ༌ ཨིན༌པིན༌།
JOS 7:2 ཡོ༌ཤུའེ༌ ཡེ༌རི༌ཀོ༌ནེ༌ མི༌ ཁ༌ཅིག༌ བེ༌ཐེལ༌ལི༌ ཤར༌ ཆོགས༌, བེཐ༌ ཨ༌ཝིན༌ནི༌ ཉེ༌མོའ༌ ཡོད༌ཁན༌ ཨའི༌ གྱལ༌སའེ༌ སྲུང༌སྐྱོབ༌གུན༌ གྱུས༌ ཅོའ༌ལ༌ སང༌ཝའེ༌ ཐོག༌ནེ༌ ལམ༌ཅུགས༌། ཏེ༌ནེ༌ ཁོང༌གུན༌ སོང༌།
JOS 7:3 ཁོང༌གུན༌ ལོགས༌ཏེ༌ ཡོངས༌ཏེ༌ ཡོ༌ཤུའ༌ ཟེརས༌, “ཨའི༌ གྱལ༌ས༌ སྤུང༌གོལ༌ ཅོ༌ཅེས༌ལ༌, མག༌མི༌ ཚང༌མ༌ ཀལ༌ཅེས༌སི༌ སྒོས༌དོམ༌ མི༌དུག༌། མག༌མི༌ ཚང༌མ༌ བར༌དོ༌ མ༌སྟན༌ན༌, སྟོང༌ ཉིས༌ ཡ༌ སུམ༌ ནོལ༌ལ༌ ཀལ༌ན༌ གྲིག༌ཅེས༌ དུག༌ ཅིའ༌ཟེར༌ན༌ ཏེ༌རུ༌ མི༌ ཉུ༌ངུན༌ཞིག༌ མ༌ནེ༌ མི༌དུག༌།”
JOS 7:4 ཏེ༌ནེ༌ མག༌མི༌ སྟོང༌སུམ༌ ནོལ༌ལ༌ སོང༌ ཨིན༌ནའང༌ ཨའི༌པ༌གུན༌ནི༌ ཁོང༌གུན༌ལ༌ ཕམ༌ སྲན༌ཏྲེ༌ ཀལས༌ ཡང༌ ཁོང༌གུན༌ ཏེ༌ཀ༌ནེ༌ ཤོར༌གོས༌།
JOS 7:5 ཁོང༌གུན༌ནི༌ གྱལ༌སའེ༌ གྱས༌སྒོའེ༌ ཕི༌ལོག༌ག༌ ཨིས༌ར༌ཨེལ༌པའེ༌ མག༌མི༌གུན༌ལ༌ རི༌ནེ༌ ཐུར༌ལ༌ ལུང༌པའེ༌ ནང༌ང༌ ཏེད༌ཏེ༌ ཁྱེརས༌ ཡང༌ མག༌མི༌ 36 སདས༌། ཏེ༌བོ༌ ཐོང༌ཏེ༌ ཨིས༌ར༌ཨེལ༌པ༌གུན༌ སྲན༌ཏྲེ༌ ཇིགས༌ ཡང༌ ཁོང༌གུན༌ནི༌ ནོལ༌ཅེས༌སི༌ སྤོས༌པ༌ ཆགས༌།
JOS 7:6 ཡོ༌ཤུའེ༌ ཁོང༌རང༌ངི༌ ཀོས༌ ཤགས༌ ཡང༌ ཁོང༌ དང༌ ཨིས༌ར༌ཨེལ༌པའེ༌ འུ༌སྐྱོང༌གུན༌ ཡ༌ཝའེ༌ ཆད༌དོན༌ནི༌ སྒམ༌མི༌ དུན༌ལ༌ སའེ༌ཀ༌ གྱེལ༌ཏེ༌ ཕི༌ཏོག༌ ཚོག༌པ༌ དུགས༌ ཡང༌ ཁོང༌རང༌གུན༌ནི༌ གོའེ༌ཀ༌ ཐལ༌བ༌ ཡོགས༌།
JOS 7:7 ཏེ༌ནེ༌ ཡོ༌ཤུའེ༌ ཟེརས༌, “ཡ༌ཝ༌ ཀུན༌ཝང༌ལེ༌, ཉེ༌རང༌ངི༌ ང༌ཞའ༌ ཨ༌མོར༌པ༌གུན༌ནི༌ ལག༌ག༌ སྟད༌ཏེ༌ སད༌ ཅུག༌ཅེས༌ལ༌ ང༌ཞ༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཁྱོང༌ང༌ ཛད༌ཏེ༌ ཨིན༌ན༌? ང༌ཞའ༌ འ༌ངོ༌ ཆོགས༌ལ༌ དུགས༌པིན༌ན༌ འི༌ཟུག༌ སོང༌ཏེ༌ མེད༌གྲོ༌།
JOS 7:8 ཡ༌ཝ༌ལེ༌ ང༌ཞའ༌ ཨིས༌ར༌ཨེལ༌པ༌གུན༌ གྲ༌འོ༌གུན༌ནི༌ ཀ༌ནེ༌ ཤོར༌ པ༌སང༌ ཏ༌ ངའེ༌ ཅི༌ ཟེར༌གོས༌?
JOS 7:9 ཀེ༌ནན༌པ༌གུན༌ དང༌ ཞན༌ འི༌རུ༌ དུག༌ཁན༌གུན༌ནི༌ འི༌བོ༌ ཚོར༌ར༌ཅིག༌, ཁོང༌གུན༌ནི༌ ང༌ཞ༌གུན༌ལ༌ ནོལ༌ཏེ༌ ང༌ཞའེ༌ མིང༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོ༌ཨིན༌། ཏེ༌ནེ༌ ཉེ༌རང༌ སྤལ༌ཅན༌ དང༌ སྟོབས༌ཅན༌ དཀོན༌མཆོག༌ ཞུགས༌ཁན༌ སྟན༌ན༌ ཛད༌ཅེས༌ལ༌ ཉེ༌རང༌ངི༌ ཅི༌ ཛད༌ཨིན༌?”
JOS 7:10 ཡ༌ཝའེ༌ ཡོ༌ཤུའ༌ མོལས༌, “ལོངས༌། ཁྱོ༌རང༌ སའེ༌ཀ༌ གྱེལ༌ཏེ༌ རྡུག༌པོ༌ ཅི༌ ཅོའད༌?
JOS 7:11 ཨིས༌ར༌ཨེལ༌པ༌གུན༌ནི༌ སྡིག༌པ༌ ཅོས༌ཏེ༌ ཨིན༌ནོག༌། ཁོང༌གུན༌ནི༌ ངའེ༌ ཟེར༌ཁན༌བོ༌ མ༌ཅོའ༌ ངའེ༌ ཆད༌དོན༌བོ༌ ཅགས༌། ཁོང༌གུན༌ནི༌ ངའ༌ ཕུལ༌ཁན༌ནི༌ ཏམ༌པ༌ ནོར༌ ཁ༌ཅིག༌ རྐུས༌ཏེ༌ ཁྱེརས༌ ཡང༌ ཏེ༌གུན༌ རྐུ༌ཅེས༌ མ༌ཚད༌ ཟུན༌ ཏངས༌ཏེ༌ ཁོང༌རང༌གུན༌ནི༌ གྱུ༌ནོར༌རི༌ ཕྲོའ༌ སྦས༌ཏེ༌ ཨིན༌ནོག༌།
JOS 7:12 ཏེན༌ན༌བོའེ༌ཕིའ༌ ཨིས༌ར༌ཨེལ༌པ༌གུན༌ གྲ༌འོ༌གུན༌ནི༌ ཀ༌ནེ༌ ཕམས༌ཏེ༌ ཤོར༌གོས༌། ཏ༌ ཨིས༌ར༌ཨེལ༌པ༌གུན༌ནི༌ ཁོང༌རང༌གུན༌ ཁྲེས༌ཏོར༌ ཆ༌ཅེས༌སི༌ ཕིའ༌ ལྡམས༌ཏེ༌ ཨིན༌ནོག༌། ནམ༌ཚོག༌པ༌ ཁྱོ༌རང༌ངི༌, ཁྱོ༌ཞའ༌ ཚི༌ཏུ༌ གྱུར༌ ཅུག༌ཁན༌གུན༌ ཁྲེས༌ཏོར༌ མི༌ཅོ༌ ང༌ ཁྱོ༌ཞ༌གུན༌ ཉམ༌པོ༌ མི༌དུག༌།”
JOS 7:13 “ལོངས༌, མི༌གུན༌ རྩང༌མ༌ ཅོས༌། ཁོང༌གུན༌ལ༌ ཁོང༌རང༌གུན༌ རྩང༌མ༌ ཅོ༌ཅེས༌ལ༌ བཀའ༌ ཏངས༌ཏེ༌ ཟེར༌, ‘ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌གི༌ མོལས༌, “ཝ༌ ཨིས༌ར༌ཨེལ༌པ༌གུན༌, ཁྱོ༌ཞའེ༌ ཕྲོའ༌ ངའ༌ ཕུལ༌གོ༌ཤེས༌ཅན༌ནི༌ ནོར༌གུན༌ དུག༌། ནམ༌ཚོག༌པ༌ ཏེ༌གུན༌ མེད༌ཁན༌ མི༌ ཅོ༌ ཁྱོ༌ཞའེ༌ ཁྱོ༌ཞ༌རང༌ངི༌ གྲ༌འོ༌གུན༌ལ༌ ཕམ༌ཀལ༌ མི༌ཉན༌།”’”
JOS 7:14 “ཐོ༌རེའེ༌ ང༌མོ༌ ཁྱོ༌ཞ༌གུན༌ རང༌རང༌ངི༌ མི༌སྡེ༌གུན༌ ཉམ༌པོ༌ ང༌ ཡོད༌ས༌ ཡོང༌གོས༌, ཡང༌ ངའེ༌ བོད༌ད༌ཅིག༌ མི༌སྡེ༌ ནང༌ནེ༌ མི༌རིགས༌ རེ༌རེ༌ དུན༌ལ༌ ཡོང༌གོས༌། ཡང༌ མི༌རིགས༌ ལྡམ༌ཁན༌བོའེ༌ ནང༌ནེ༌ ནང༌ཚངས༌ རེ༌རེ༌ དུན༌ལ༌ ཡོང༌གོས༌ ཡང༌ ནང༌ཚངས༌ ལྡམ༌ཁན༌བོའེ༌ ནང༌ནེ༌ མི༌ རེ༌རེ༌ དུན༌ལ༌ ཡོང༌གོས༌།
JOS 7:15 ང༌ ཕུལ༌ཁན༌ནི༌ ཏམ༌པ༌ ནོར༌ རྐུ༌ཁན༌ནི༌ མི༌ ཟུམ༌ཁན༌ ཡང༌ ཁོའེ༌ ཨིན༌ཁན༌ ཚང༌མ༌ མེའེ༌ ནང༌ང༌ སྲག༌གོས༌ ཅིའ༌ཟེར༌ན༌ ཁོའེ༌ ངའེ༌ ཆད༌དོན༌བོ༌ ཅགས༌ཏེ༌ ཨིས༌ར༌ཨེལ༌ལི༌ ནང༌ང༌ ཁྲེལ༌མེད༌དི༌ ལས༌ ཅོས༌ཏེ༌ ཨིན༌ནོག༌།”
JOS 7:16 ཐོ༌རེ༌ཟུག༌པོ༌ མ༌ ང༌མོ༌ནེ༌ ཡོ༌ཤུའེ༌ ཡ༌ཝའེ༌ སྐུན༌དུན༌ལ༌ ཨིས༌ར༌ཨེལ༌པ༌ ཚང༌མ༌ མི༌སྡེ༌ རེ༌རེ༌ ཅོས༌ཏེ༌ ཡོང༌ཅུགས༌ ཡང༌ ཡ༌ཧུ༌དཱའེ༌ སྡེ༌ ལྡམ༌མ༌ ཛདས༌།
JOS 7:17 ཏེ༌ནེ༌ ཡ༌ཧུ༌དཱའེ༌ སྡེའེ༌ ནང༌ནེ༌ མི༌རིགས༌ རེ༌རེ༌ དུན༌ལ༌ ཡོངས༌ ཡང༌ ཟེ༌རཧའེ༌ མི༌རིགས༌ ལྡམ༌མ༌ ཛདས༌། ཏེ༌ནེ༌ ཟེ༌རཧའེ༌ མི༌རིགས༌སི༌ ནང༌ཚངས༌ རེ༌རེ༌ དུན༌ལ༌ ཡོངས༌ ཡང༌ ཟིམ༌རིའི༌ ནང༌ཚངས༌ ལྡམ༌མ༌ ཛདས༌།
JOS 7:18 ཏེ༌ནེ༌ ཟིམ༌རིའི༌ ནང༌ཚངས༌སི༌ མི༌ རེ༌རེ༌ དུན༌ལ༌ ཡོངས༌ ཡང༌ ཨ༌ཀེན༌ ལྡམ༌མ༌ ཛདས༌།
JOS 7:19 ཏེ༌ནེ༌ ཡོ༌ཤུའེ༌ ཨ༌ཀེན༌ལ༌ ཟེརས༌, “ངའེ༌ བུ༌ཚ༌, རང༌ངི༌ སྡིག༌པ༌ ཅོ༌ཁན༌བོ༌ ཤད༌ཏེ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའ༌ སྤལ༌ ཁྱོང༌། ཁྱོ༌རང༌ངི༌ ཅོས༌ཁན༌བོ༌ སྦས༌ཏེ༌ མ༌བོར༌ར༌ ངའ༌ ཀྲང༌པོ༌ ཤོད༌།”
JOS 7:20 ཨ༌ཀེན༌ནི༌ ལན༌ཏངས༌, “འི༌བོ༌ དེན༌བ༌ ཨིན༌། ངའེ༌ ཡ༌ཝའ༌ ཨིས༌ར༌ཨེལ༌པའེ༌ དཀོན༌མཆོག༌གི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌།
JOS 7:21 ཅོམས༌ཏེ༌ ཁྱོང༌ཁན༌ནི༌ ནོར༌གུན༌ནི༌ ཕྲོའ༌ ངའེ༌ མུལ༌ ཀི༌ལོ༌ 2 སང༌ མང༌ང༌ ཞིག༌, ཀི༌ལོ༌ ཕེད༌དི༌ སེར༌རི༌ པག༌བུ༌ དང༌ བ༌བེ༌ལོན༌ནེ༌ ཨིན༌ཁན༌ ཀོས༌ ལྡེ༌མོ༌ ཐོང༌ང༌ཅིག༌, ངའ༌ ཏེ༌གུན༌ནི༌ དོད༌པ༌ ཡོངས༌པ༌ ངའེ༌ རྐུས༌པིན༌། ཏེ༌གུན༌ ངའེ༌ ང༌རང༌ངི༌ ཀུར༌རི༌ ནང༌ང༌ སའེ༌ ཐིལ༌ལ༌ སྦས༌ཏེ༌ ཡོད༌, ཚང༌མའེ༌ སང༌ ཐིལ༌ལ༌ མུལ༌།”
JOS 7:22 ཏེ༌ནེ༌ ཡོ༌ཤུའེ༌ མི༌ ཁ༌ཅིག༌ ཏེ༌གུན༌ ཙལ༌ལ༌ ལམ༌ཅུགས༌། ཁོང༌གུན༌ ཀུར༌རི༌ ནང༌ང༌ བང༌ཏངས༌ཏེ༌ སོང༌ ཡང༌ ཨ༌ཀེན༌ནི༌ ཟེར༌ཁན༌ ནང༌ཞིན༌ ཏེ༌རུ༌ སྦས༌ཏེ༌ ཡོད༌ཁན༌ནི༌ ནོར༌ ཚང༌མ༌ ཐོབ༌།
JOS 7:23 ཁོང༌གུན༌ནི༌ ཀུར༌རི༌ ནང༌ནེ༌ ཏེ༌ ནོར༌གུན༌ ཁྱོངས༌ ཡང༌ ཡོ༌ཤུའ༌ དང༌ ཨིས༌ར༌ཨེལ༌པ༌ ཚང༌མ༌ ཡོད༌ས༌ ཡ༌ཝའེ༌ སྐུན༌དུན༌ལ༌ སའེ༌ཀ༌ ཏིངས༌།
JOS 7:24 ཏེ༌ནེ༌ ཡོ༌ཤུའ༌ དང༌ ཨིས༌ར༌ཨེལ༌པ༌ ཚང༌མའེ༌ ཨ༌ཀེན༌, ཀོས༌, མུལ༌, སེར༌, ཁོའེ༌ བུ༌ཚ༌ དང༌ བུ༌མོ༌ གུན༌, བ༌ལང༌གུན༌, བུང༌བུ༌གུན༌, ལུག༌གུན༌, ར༌མ༌གུན༌, ཀུར༌ དང༌ ཁོའ༌ ཡོད༌ཁན༌ ཚང༌མ༌ ཨ༌ཁོར༌རི༌ ལུང༌པའེ༌ ནང༌ང༌ ཁྱེརས༌།
JOS 7:25 ཡོ༌ཤུའེ༌ ཨ༌ཀེན༌ལ༌ ཟེརས༌, “ཅིའ༌ ཁྱོ༌རང༌ངི༌ ང༌ཞ༌གུན༌ནི༌ཀ༌ རྡུག༌ངལ༌ ཁྱོངས༌པིན༌། ཏ༌ ཡ༌ཝའེ༌ ཁྱོ༌རང༌ངི༌ཀ༌ རྡུག༌ངལ༌ ཁྱོང༌ང༌ ཛད༌ཨིན༌།” ཏེ༌ནེ༌ ཨིས༌ར༌ཨེལ༌པ༌ ཚང༌མའེ༌ ཁོང༌ ཚང༌མ༌ལ༌ རྡོའ༌ གྱབས༌ཏེ༌ སདས༌ ཡང༌ ཏེ༌ ཚང༌མ༌ མེའ༌ སྲགས༌།
JOS 7:26 ཨིས༌ར༌ཨེལ༌པ༌གུན༌ནི༌ སྲགས༌ཁན༌ནི༌ སོལ༌ལེ༌ ཁེ༌ཐོག༌ག༌ རྡོའ༌ སྤུངས༌ ཀ༌བོ༌ དི༌རིང༌ངའང༌ ལུས༌ཏེ༌ ཡོད༌ཏེ༌ ཨིན༌ནོག༌། ཏེན༌ན༌བོའེ༌ ཕིའ༌ ཏེ༌ ས༌ཀྱད༌པོའ༌ རྡུག༌ངལ༌ལི༌ ལུང༌པ༌ ཟེར༌ར༌ནོག༌། ཏེ༌ནེ༌ ཡ༌ཝའེ༌ ཐུག༌སྲོ༌ ཁོང༌གུན༌ནི༌ཀ༌ བབས༌ཁན༌བོ༌ མེད༌ཁན༌ ཛདས༌།
JOS 8:1 ཏེ༌ནེ༌ ཡ༌ཝའེ༌ ཡོ༌ཤུའ༌ མོལས༌, “ཇིགས༌ མ༌ཇིགས༌ ཡང༌ སྤོས༌པ༌ མ༌ཆག༌། ཁྱོ༌རང༌ངི༌ མག༌མི༌ ཚང༌མ༌ ཁྲིད༌ཏེ༌ ཨའི༌ གྱལ༌ས༌ སྤུང༌གོལ༌ ཅོས༌ ཅིའ༌ཟེར༌ན༌ ངའེ༌ ཁྱོ༌རང༌ང༌ ཨའི༌ གྱལ༌པོ༌, ཁོའེ༌ མི༌གུན༌ དང༌ གྱལ༌ས༌ ཡང༌ ཁོའེ༌ ས༌ཀྱད༌གུན༌ ཏངས༌ཏེ༌ ཨིན༌།
JOS 8:2 ཡེ༌རི༌ཀོ༌ དང༌ ཏེ༌བོའེ༌ གྱལ༌པོའ༌ ཅོའ༌ ཙོགས༌, ཁྱོ༌རང༌ངི༌ འི༌གུན༌ནའང༌ ཁྲེས༌ཏོར༌ ཅོ༌ཨིན༌། ཨིན༌ནའང༌ ཅོམས༌ཁན༌ནི༌ ནོར༌ དང༌ སེམས༌ཅན༌གུན༌ ཁྱོ༌ཞ༌རང༌ངི༌ ཕིའ༌ བོར༌ནང༌ གྲིག༌། ཁོང༌གུན༌ལ༌ གྱུས༌ཆའ༌ མ༌ཅུག༌ག༌, གྱལ༌སའེ༌ གྱབ༌བ༌ ཨིབས༌ཏེ༌ ཡོད༌ཁན༌ མག༌མི༌གུན༌ལ༌ ཁོང༌གུན༌ནི༌ཀ༌ ཧུན༌མེད༌ལ༌ སྤུང༌གོལ༌ ཅོ༌ཅུག༌།”
JOS 8:3 ཏེ༌ནེ༌ ཡོ༌ཤུའ༌ དང༌ མག༌མི༌ ཚང༌མ༌ ཨའི༌ཀ༌ སྤུང༌གོལ༌ ཅོ༌ཅེས༌ལ༌ སོང༌། ཡོ༌ཤུའེ༌ ཚང༌མའེ༌སང༌ གྱལ༌ལ༌ མག༌གི༌ 30,000 ལྡམས༌ ཡང༌ ཁོང༌གུན༌ ཚན༌ལ༌ ལམ༌ཅུགས༌ཏེ༌
JOS 8:4 བཀའ༌ ཏངས༌, “གྱལ༌སའེ༌ གྱབ༌ ཆོགས༌ལ༌ ཨིབས༌ཏེ༌ དུག༌ ཨིན༌ནའང༌ མ༌ ཐག༌རིང༌ང༌ མ༌ཆ༌ སྤུང༌གོལ༌ ཅོ༌ཅེས༌ལ༌ ཤང༌ཅོས༌ཏེ༌ དུག༌ཤིག༌།
JOS 8:5 ང༌ དང༌ ང༌ ཉམ༌པོ༌ ཡོད༌ཁན༌ མག༌མི༌ ཚང༌མའེ༌ གྱལ༌སའེ༌ཀ༌ སྤུང༌གོལ༌ ཅོ༌ཨིན༌, སྔུན༌ ཙོགས༌ལ༌ ཨའི༌པ༌གུན༌ ནོལ༌ལ༌ ཡོང༌ང༌ཅིག༌ ང༌ཞ༌གུན༌ ཤོར༌ཨིན༌།
JOS 8:6 གྱལ༌ས༌ནེ༌ ཐག༌རིང༌ང༌ ལེབ༌ལེབ༌ ཚག༌པ༌ ང༌ཞའེ༌ ཁོང༌གུན༌ལ༌ ཏེད༌ཏེ༌ ཁྱོང༌ཅུག༌ཨིན༌ ཡང༌ ཁོང༌གུན༌ནི༌ ཟེར༌ཨིན༌, ‘སྔུན༌ ཙོགས༌ལ༌ ཨིས༌ར༌ཨེལ༌པ༌གུན༌ ང༌དང༌གུན༌ནི༌ ཀ༌ནེ༌ ཤོར༌ཏེ༌ ཨིན༌ནོག༌།’ ཏེ༌ནེ༌ ང༌ཞའ༌ ཤོར༌ ཟ༌ནེ༌
JOS 8:7 ཁྱོ༌ཞ༌གུན༌ ཨིབས༌ཏེ༌ ཡོད༌སའེ༌ ནས༌ས༌ནེ༌ བིངས༌ཏེ༌ ཡོང༌ ཡང༌ གྱལ༌ས༌ ང༌ཡོག༌ག༌ ལེན༌ ཅིའ༌ཟེར༌ན༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཏེ༌བོ༌ ང༌དང༌གུན༌ལ༌ སལ༌ཏེ༌ ཨིན༌།
JOS 8:8 གྱལ༌ས༌ ལེན༌ཏེ༌ སྟིང༌ནེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཏེ༌བོ༌ མེའ༌ སྲོག༌། ཁྱོ༌རང༌གུན༌ལ༌ འི༌བོ༌ ངའེ༌ བཀའ༌ ཨིན༌།”
JOS 8:9 ཏེ༌ནེ༌ ཡོ༌ཤུའེ༌ ཁོང༌གུན༌ ལམ༌ཅུགས༌, ཁོང༌གུན༌ ཨའི༌ ནུབ༌ ཆོགས༌ལ༌ བེ༌ཐེལ༌ དང༌ ཨའི༌ པར༌ལ༌ ཡོད༌ཁན༌ནི༌ ནས༌སའེ༌ ནང༌ང༌ ཨིབས༌ཏེ༌ དུགས༌། ཨིན༌ནའང༌ ཡོ༌ཤུའ༌ ཏེ༌ ཚན༌བོ༌ ཁོ༌རང༌ངི༌ མག༌མི༌གུན༌ ཉམ༌པོ༌ དུགས༌།
JOS 8:10 ཐོ༌རེ༌ཟུག༌པོ༌ ང༌མོ༌ནེ༌ ཡོ༌ཤུའེ༌ ཁོ༌རང༌ངི༌ མག༌མི༌གུན༌ ཛོམ༌ཅུགས༌ཏེ༌ ཁོ༌ དང༌ ཨིས༌ར༌ཨེལ༌པ༌ འུ༌སྐྱོང༌གུན༌ནི༌ གོ༌ཁྲིད༌ ཅོས༌ཏེ༌ ཨའི༌ ཆོགས༌ལ༌ སོང༌།
JOS 8:11 ཡོ༌ཤུའ༌ ཉམ༌པོ༌ ཡོད༌ཁན༌ མག༌མི༌ ཚང༌མ༌ གྲུལ༌ཏེ༌ གྱལ༌སའེ༌ ཉེ༌མོའ༌ ལེབ༌ཏེ༌ ཨའི༌ བྱང༌ ཆོགས༌ལ༌ ཀུར༌ ཙུགས༌ཏེ༌ དུགས༌། ཁོང༌གུན༌ དང༌ གྱལ༌སའེ༌ པར༌ལ༌ ལུང༌པ༌ཞིག༌ མན༌ནེ༌ མེད༌པིན༌།
JOS 8:12 ཏེ༌ ཚན༌ལ༌ ཡོ༌ཤུའེ༌ མག༌མི༌ 5,000 ལྡམས༌ཏེ༌ གྱལ༌སའེ༌ ནུབ༌ ཆོགས༌ལ༌ བེ༌ཐེལ༌ དང༌ ཨའི༌ པར༌ལ༌ ཨིབས༌ཏེ༌ དུག༌ཅུགས༌།
JOS 8:13 ཏེ༌ནེ༌ ཨིབས༌ཏེ༌ དུག༌ཁན༌ མག༌མི༌ གྱལ༌སའེ༌ ནུབ༌ ཆོགས༌ལ༌ ཡང༌ བྱང༌ ཆོགས༌ལ༌ ཞན༌ མག༌མི༌ ཚང༌མ༌ དུགས༌ ཨིན༌ནའང༌ ཏེན༌ན༌ ཚན༌ལ༌ ཡོ༌ཤུའ༌ ལུང༌པའེ༌ ནང༌ང༌ དུགས༌།
JOS 8:14 ཨའི༌ གྱལ༌པོའེ༌ ཨིས༌ར༌ཨེལ༌པ༌གུན༌ ཐོང༌ང༌ཅིག༌ ཁོ༌ དང༌ ཁོའེ༌ མག༌མི༌ ཚང༌མ༌ ང༌མོ༌ནེ༌ གྱོགས༌པ༌ ཡོར༌དཱན༌ ལུང༌པའེ༌ ནང༌ང༌ ཁོང༌གུན༌ལ༌ ནོལ༌ལ༌ སོང༌། ཨིན༌ནའང༌ གྱལ༌སའེ༌ གྱབ༌བ༌ སྤུང༌གོལ༌ ཅོའ༌ལ༌ མག༌མི༌ ཨིབས༌ཏེ༌ ཡོད༌ཁན༌བོ༌ ཁོང༌གུན༌ལ༌ གྱུས༌ མེད༌པིན༌།
JOS 8:15 ཕམས༌ཁན༌ནི༌ མག༌མི༌ ཙོགས༌ལ༌ ཡོ༌ཤུའ༌ དང༌ ཨིས༌ར༌ཨེལ༌པ༌ མག༌མི༌ ཚང༌མ༌ ཐང༌སྟོང༌ ཆོགས༌ལ༌ ཤོར༌།
JOS 8:16 ཨིས༌ར༌ཨེལ༌པ༌གུན༌ལ༌ ཏེད༌ཏེ༌ ཁྱེར༌ཅེས༌ལ༌ གྱལ༌སའེ༌ ནང༌ང༌ ཡོད༌ཁན༌ བུ༌ཚ༌ ཚང༌མ༌ བོདས༌, ཏེན༌ན༌ཟུག༌གི༌ ཁོང༌གུན༌ གྱལ༌ས༌ནེ༌ ཐག༌རིང༌ང༌ ཕིངས༌ཏེ༌ ཁྱེརས༌།
JOS 8:17 ཨའི༌ ཡ༌ བེ༌ཐེལ༌ལི༌ ནང༌ང༌ ཨིས༌ར༌ཨེལ༌པ༌གུན༌ལ༌ ཏེད༌ཏེ༌ མ༌ ཁྱེར༌ཁན༌ བུ༌ཚ༌ ཅིག༌གའང༌ ལུས༌ཏེ༌ མེད༌པིན༌། གྱལ༌སའེ༌ སྒོ༌ སང༌ ཕེས༌ཏེ༌ ཁོང༌ ཚང༌མའེ༌ ཨིས༌ར༌ཨེལ༌པ༌གུན༌ལ༌ ཏེད༌ཏེ༌ ཁྱེརས༌།
JOS 8:18 ཏེ༌ནེ༌ ཡ༌ཝའེ༌ ཡོ༌ཤུའ༌ མོལས༌, “ཁྱོ༌རང༌ངི༌ ལག༌ག༌ ཡོད༌ཁན༌ནི༌ རྡུང༌ ཨའི༌ ཆོགས༌ལ༌ སྟོག༌, ངའེ༌ གྱལ༌ས༌བོ༌ ཁྱོ༌རང༌ངི༌ ལག༌ག༌ ཏང༌ངད༌།” ཏེན༌ན༌བོའེ༌ ཕིའ༌ ཡོ༌ཤུའེ༌ ཁོ༌རང༌ངི༌ རྡུང༌ ཨའི༌ ཆོགས༌ལ༌ སྟགས༌།
JOS 8:19 ཡོ༌ཤུའེ༌ ཏེ༌ཟུག༌ ཅོའ༌ཅིག༌ ཨིབས༌ཏེ༌ ཡོད༌ཁན༌ནི༌ མག༌མི༌ ཚང༌མ༌ ཏེ༌ ནས༌ས༌ནེ༌ བིངས༌ཏེ༌ གྱལ༌སའེ༌ ནང༌ང༌ སོང༌ ཡང༌ ཏེ༌བོ༌ ང༌ཡོག༌ག༌ ལེན༌ཏེ༌ མེའ༌ ཏུགས༌།
JOS 8:20 ཨའི༌པ༌གུན༌ནི༌ གྱབ༌ ལོགས༌ཏེ༌ ལྟའ༌ཅིག༌ གྱལ༌སའེ༌ ནང༌ནེ༌ ཏུད༌པ༌ བིངས༌ཏེ༌ ནམ༌ཁའ༌ གངས༌ཁན༌བོ༌ ཐོང༌། ཨིན༌ནའང༌ ཁོང༌གུན༌ ཀ༌ངོ༌ ཆོགས༌ལའང༌ ཤོར༌ མ༌ཉན༌ ཅིའ༌ཟེར༌ན༌ ཨིས༌ར༌ཨེལ༌པ༌ ཐང༌སྟོང༌ ཆོགས༌ལ༌ ཤོར༌ཁན༌གུན༌ ཁོང༌ང༌ ཏེད༌ཅེས༌ལ༌ གྱབ༌ གྱུར༌ཏེ༌ ཡོངས༌།
JOS 8:21 ཨིབས༌ཏེ༌ ཡོད༌ཁན༌ནི༌ མག༌མི༌གུན༌ནི༌ གྱལ༌ས༌ ལེན༌ཏེ༌ ཏུད༌པ༌ བིང༌ཨིན༌ ཡོ༌ཤུའ༌ དང༌ ཨིས༌ར༌ཨེལ༌པ༌ ཚང༌མའེ༌ ཐོང༌ང༌ཅིག༌ ཁོང༌གུན༌ནི༌ གྱབ༌ ལོགས༌ཏེ༌ ཨའི༌པ༌ མག༌མི༌གུན༌ལ༌ སྤུང༌གོལ༌ ཅོས༌།
JOS 8:22 ཏེན༌ན༌ ཟ༌ནེ༌ གྱལ༌ས༌ ལེན༌ཁན༌ ཨིས༌ར༌ཨེལ༌པ༌གུན༌ བིང༌ཏེ༌ ཨའི༌པ༌ མག༌མི༌གུན༌ནི༌ གྱབ༌ནེ༌ ནོལ༌ལ༌ ཡོངས༌ པ༌སང༌ ཁོང༌གུན༌ ཨིས༌ར༌ཨེལ༌པ༌ མག༌མི༌གུན༌ནི༌ ཞུང༌ང༌ ཁད༌། ཨིས༌ར༌ཨེལ༌པ༌གུན༌ནི༌ ཁོང༌གུན༌ལ༌ སྤུང༌གོལ༌ ཅོས༌ ཡང༌ མི༌ ཅིག༌གའང༌ སོན༌ཏེའ༌ མ༌ལུས༌ ཡ༌ ཤོར༌ མ༌ཉན༌།
JOS 8:23 ཨིན༌ནའང༌ ཨའི༌ གྱལ༌པོ༌ ཅིག༌པོ༌ སོན༌ཏེའ༌ ཟུམས༌ཏེ༌ ཡོ༌ཤུའ༌ ཡོད༌ས༌ ཁྱོངས༌།
JOS 8:24 ཨིས༌ར༌ཨེལ༌པ༌གུན༌ནི༌ ཐང༌སྟོང༌ངི༌ ནང༌ང༌ ཏེད༌ཏེ༌ ཨའི༌པ༌ མག༌མི༌ ཚང༌མ༌ སད༌ ཚར༌ར༌ཅིག༌ ཁོང༌གུན༌ ལོགས༌ཏེ༌ གྱལ༌ས༌ སོང༌ ཡང༌ ཏེ༌ནང༌ང༌ ཡོད༌ཁན༌ ཚང༌མའང༌ སདས༌།
JOS 8:25 ཏེ༌ ཞག༌ག༌ ཨའི༌ ནང༌ང༌ དུག༌ཁན༌ ཚང༌མ༌, བུ༌ཚ༌ དང༌ བུ༌མོ༌ ཐེས༌ཏེ༌ མི༌ 12,000 ཤི༌།
JOS 8:26 ཨའི༌ ནང༌ང༌ དུག༌ཁན༌ ཚང༌མ༌ མེད༌ཁན༌ ཅོ༌ ཚར༌ཚར༌ ཡོ༌ཤུའེ༌ ཁོ༌རང༌ངི༌ རྡུང༌བོ༌ ཨའི༌ ཆོགས༌ལ༌ སྟགས༌ཏེ༌ བོརས༌།
JOS 8:27 ཡ༌ཝའེ༌ ཡོ༌ཤུའ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ སེམས༌ཅན༌ དང༌ ནོར༌ ཅོམས༌ཁན༌ ཚང༌མ༌ ཁོང༌རང༌གུན༌ནི༌ ཕིའ༌ བོརས༌།
JOS 8:28 ཏེ༌ནེ༌ ཡོ༌ཤུའེ༌ ཨའི༌ གྱལ༌ས༌ མེའ༌ སྲགས༌ ཡང༌ ཁྲེས༌ཏོར༌ ཅོས༌ཁན༌ནི༌ ལག༌ལུས༌གུན༌ སྤུངས༌ཏེ༌ བོརས༌ ཀ༌བོ༌ དག༌སའང༌ ཡོད༌ཏེ༌ ཨིན༌ནོག༌།
JOS 8:29 ཡོ༌ཤུའེ༌ ཨའི༌ གྱལ༌པོ༌ རྡུང༌མའེ༌ཀ༌ ཏགས༌ཏེ༌ ཕི༌ཏོག༌ ཚོག༌པ༌ བོརས༌། ཉི༌མ༌ སྐྱོད༌ད༌ཅིག༌ ཡོ༌ཤུའེ༌ ཨིས༌ར༌ཨེལ༌པ༌གུན༌ལ༌ ཁོའེ༌ རོ༌བོ༌ ཕབས༌ཏེ༌ གྱལ༌སའེ༌ གྱས༌སྒོའེ༌ ཕི༌ལོག༌ག༌ ཕངས༌ཏེ༌ ཏེ༌བོའེ༌ཀ༌ རྡོའ༌ སྤུངས༌ཏེ༌ ཀབ༌ཅེས༌ལ༌ བཀའ༌ ཏངས༌། ཏེ༌བོ༌ དག༌སའང༌ ཡོད༌ཏེ༌ ཨིན༌ནོག༌།
JOS 8:30 ཏེ༌ནེ༌ ཡ༌ཝའེ༌ ཞབས༌ཏོག༌ ཞུ༌ཁན༌ མོ༌ཟེས༌སི༌ ཨིས༌ར༌ཨེལ༌པ༌གུན༌ལ༌ བཀའ༌ སལ༌ཁན༌ ནང༌ཞིན༌ ཡོ༌ཤུའེ༌ ཨེ༌བལ༌ རི༌ཀ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ཕིའ༌ ཆོད༌ཁྲི༌ཞིག༌ རྩིགས༌། མོ༌ཟེས༌སི༌ བཀའ༌ཁྲིམས༌སི༌ ལྡེབ༌བི༌ ནང༌ང༌ བྲིས༌ཏེ༌ ཡོད༌ཁན༌ ནང༌ཞིན༌ ཁོའེ༌ ཏེ༌བོ༌ རྡོའ༌ མ༌ཅག༌ཁན༌ ཡང༌ན༌ ལྕགས༌སི༌ ལག༌ཆའ༌ མ༌ ཀོལ༌ཁན༌ནི༌ རྡོའ༌ ཉམ༌པོ༌ རྩིགས༌། ཏེ༌ ཆོད༌ཁྲི༌ཀ༌ ཁོང༌གུན༌ནི༌ མེའ༌ སྲོགས༌ཁན༌ནི༌ ཆོད༌པ༌ དང༌ ཞི༌དེ༌ ཆོད༌པ༌གུན༌ ཕུལས༌།
JOS 8:32 ཨིས༌ར༌ཨེལ༌པ༌གུན༌ནི༌ དུན༌ལ༌ ཡོ༌ཤུའེ༌ ཞན༌ རྡོ༌གུན༌ནི༌ཀ༌ ཡ༌ཝའེ༌ མོ༌ཟེས༌ལ༌ སལ༌ཁན༌ནི༌ བཀའ༌རྒྱ༌ གུན༌ བྲིས༌།
JOS 8:33 ཏེ༌ནེ༌ ཞན༌ཡུལ༌ དང༌ ཏེན༌ན༌རུ༌ སྐྱེས༌ཁན༌ ཨིས༌ར༌ཨེལ༌པ༌ ཚང༌མ༌, ཁོང༌གུན༌ནི༌ འུ༌སྐྱོང༌གུན༌, སྤོན༌བོ༌གུན༌ དང༌ ཁྲིམ༌སྤོན༌གུན༌, ཆད༌དོན༌ནི༌ སྒམ༌ ཁུར༌ཁན༌ནི༌ ལི༌ཝི༌པ༌ བླ༌མ༌གུན༌ ཁོང༌གུན༌ནི༌ དུན༌ཆོགས༌ལ༌ ཡང༌ ཁོང༌ ཚང༌མ༌ ཡ༌ཝའེ༌ ཆད༌དོན༌ནི༌ སྒམ༌མི༌ ལྡོ༌ ཉིས༌ཀོའ༌ ལངས༌ཏེ༌ དུགས༌, ཕེད༌པོ༌ གེ༌རི༌ཟིམ༌ རི༌ དུན༌ཆོགས༌ལ༌ ཡང༌ ཕེད༌པོ༌ ཨེ༌བལ༌ རི༌ དུན༌ཆོགས༌ལ༌ ལངས༌ཏེ༌ ཡོད༌པིན༌། ཀ༌ཟུག༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁོང༌གུན༌ལ༌ ལབ༌ཞ༌ སལ༌ཏེ༌ ཨིན༌པིན༌། བླ༌མ༌གུན༌ནི༌ ཡ༌ཝའེ༌ ཅིན༌ལབས༌པོ༌ མི༌མངས༌གུན༌ལ༌ ཏང༌ཅེས༌ལ༌ མོ༌ཟེས༌སི༌ ཏེ༌ ལབ༌ཞ༌བོ༌ སལས༌།
JOS 8:34 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཅིན༌ལབས༌ དང༌ ཆད༌པའེ༌ སྐྱོར༌, མོ༌ཟེས༌སི༌ བཀའ༌ཁྲིམས༌སི༌ ལྡེབ༌བི༌ ནང༌ང༌ བྲིས༌ཏེ༌ ཡོད༌ཁན༌ བཀའ༌ཁྲིམས༌སི༌ ཚིགས༌ ཚང༌མ༌ སིལས༌།
JOS 8:35 ཡོ༌ཤུའེ༌ ཨིས༌ར༌ཨེལ༌པ༌ བུ༌མོ༌ དང༌ ཕྲུ༌གུ༌ གུན༌ ཡང༌ ཞན༌ཡུལ༌ལི༌ མི༌གུན༌ ཐེས༌ཏེ༌ ཛོམས༌ཏེ༌ ཡོད༌ཁན༌ ཚང༌མའེ༌ དུན༌ལ༌, མོ༌ཟེས༌སི༌ བཀའ༌ཁྲིམས༌སི༌ ལྡེབ༌བི༌ ནང༌ང༌ ཡོད༌ཁན༌ ཚིགས༌ རེ༌རེ༌ ལུས༌ མ༌ཅུག༌ག༌ སིལས༌།
JOS 9:1 ཏ༌ ཡོར༌དཱན༌ ལྩངས༌པོའེ༌ ནུབ༌ ཆོགས༌སི༌ གྱལ༌པོ༌ ཚང༌མའེ༌ ཏེ༌ ཇུང༌ཁན༌གུན༌ ཚོར༌། ཁོང༌གུན༌ རི༌ ཡུལ༌གུན༌, ནུབ༌ ཆོགས༌སི༌ རི༌ ཡོག༌གི༌ ཡུལ༌ ཡང༌ མེ༌གྲི༌ཀྲེ༌རིའན༌ ཚོའེ༌ ཐའ༌མ༌, ལེ༌བ༌ནོན༌ནི༌ རི༌ ཚོག༌པ༌ དུག༌ཁན༌ ཧེད༌པ༌, ཨ༌མོར༌པ༌, ཀེ༌ནན༌པ༌, པེ༌རིཟ༌པ༌, ཧིཝ༌པ༌ དང༌ ཡེ༌བས༌པའེ༌ གྱལ༌པོ༌གུན༌ ཨིན༌ནོག༌།
JOS 9:2 ཏེ༌ གྱལ༌པོ༌ ཚང༌མ༌ ཡོ༌ཤུའ༌ དང༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ཅིག༌གྲིལ༌ སོང༌ཏེ༌ ནོལ༌ཅེས༌ལ༌ ཛོམས༌།
JOS 9:3 ཨིན༌ནའང༌ གི༌བེ༌འོན༌པ༌གུན༌ནི༌ ཡོ༌ཤུའེ༌ ཡེ༌རི༌ཀོ༌ དང༌ ཨའི༌ གྱལ༌ས༌གུན༌ལ༌ ཅོ༌ཁན༌བོ༌ ཚོར༌ར༌ཅིག༌
JOS 9:4 ཁོ༌རང༌གུན༌ སྐྱོབ༌ཅེས༌ལ༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ལ༌ གོབ༌སྐོར༌ ཏང༌ཅེས༌ ཐག༌ཅདས༌། ཁོང༌གུན༌ནི༌ ཡོ༌ཤུའེ༌ ཡོད༌ས༌ ཐུས༌མི༌གུན༌ ལམ༌ཅུགས༌, བུང༌བུ༌གུན༌ནི༌ཀ༌ གལ༌ ཉིང༌པ༌ དང༌ ཆང༌ངི༌ པགས༌པ༌ ལན༌བ༌ ཏབ༌ཁན༌གུན༌ ཀལས༌།
JOS 9:5 ཐུས༌མི༌གུན༌ནི༌ ལན༌བ༌ ཏབ༌ཁན༌ནི༌ པ༌བུ༌ དང༌ ཀོས༌ལག༌ ཆད༌ཁན༌ གོནས༌ ཡང༌ སྐམས༌ཏེ༌ ཧམ༌བོར༌ ཆགས༌ཁན༌ནི༌ ཏ༌གི༌གུན༌ ཁུརས༌།
JOS 9:6 ཁོང༌གུན༌ ཨིས༌ར༌ཨེལ༌པ༌གུན༌ ཀུར༌ ཙུགས༌ཏེ༌ དུག༌ས༌ གིལ༌གལ༌ལ༌ ལེབས༌ཏེ༌ ཡོ༌ཤུའ༌ དང༌ ཨིས༌ར༌ཨེལ༌པ༌གུན༌ལ༌ ཟེརས༌, “ང༌ཞ༌གུན༌ ས༌ཆ༌ མའ༌ ཐག༌རིང༌ནེ༌ ཉེ༌ཞ༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོ༌ཅེས༌ལ༌ ཞུ༌ཝ༌ ཁུར༌ཏེ༌ ཡོངས༌པིན༌།”
JOS 9:7 ཨིས༌ར༌ཨེལ༌པ༌གུན༌ནི༌ ཧིཝ༌པ༌ ཡང༌ན༌ གི༌བེ༌འོན༌པ༌གུན༌ལ༌ ཟེརས༌, “ཅི༌ གྱུས༌ ཁྱོ༌ཞ༌གུན༌ ང༌ཞའེ༌ ཉེ༌མོའ༌ དུག༌གད༌ གྲོ༌, ཏེ༌ནེ༌ ང༌ཞའེ༌ ཁྱོ༌ཞའ༌ ཉམ༌པོ༌ ཞི༌དེ༌ ཆད༌དོན༌ ཀ༌ཟུག༌གི༌ ཅོ༌ཨིན༌?”
JOS 9:8 ཁོང༌གུན༌ནི༌ ཟེརས༌, “ང༌ཞ༌གུན༌ ཁྱོ༌ཞའེ༌ ཡོག༌པོ༌ ཨིན༌།” ཨིན༌ནའང༌ ཡོ༌ཤུའེ༌ ཏྲིས༌, “ཁྱོ༌ཞ༌གུན༌ སུ༌ ཨིན༌ ཡང༌ ཀ༌ནེ༌ ཡོངས༌ཏེ༌ ཨིན༌?”
JOS 9:9 ཁོང༌གུན༌ནི༌ ལན༌ཏངས༌, “ཡ༌ཝའ༌ ཁྱོ༌ཞའེ༌ དཀོན༌མཆོག༌གི༌ གང༌ཤན༌ ཆག༌ལས༌ ཛད༌ཁན༌གུན༌ ཚོར༌ཏེ༌ ང༌ཞའ༌ ཉེ༌རང༌ངི༌ ཡོག༌པོ༌གུན༌ ས༌ཆ༌ མའ༌ ཐག༌རིང༌ནེ༌ ཡོངས༌ཏེ༌ ཨིན༌། ཡ༌ཝའེ༌ ཨི༌ཇིབ༌བི༌ ནང༌ང༌ ཁྱོ༌ཞའེ༌ ཕིའ༌ ཛད༌ཁན༌ ཚང༌མ༌ ང༌ཞ༌གུན༌ནི༌ ཚོར༌,
JOS 9:10 ཏེ༌ མ༌ཛད༌ ང༌ཞ༌གུན༌ནི༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ཨ༌མོར༌པའེ༌ གྱལ༌པོ༌, ཧེཤ༌བོན༌ནི༌ གྱལ༌པོ༌ སི༌ཧོན༌ དང༌ ཨཤ༌ཏ༌རོཐ༌ ནང༌ང༌ དུག༌ཁན༌ བ༌ཤན༌ནི༌ གྱལ༌པོ༌ ཨོག༌ ཉིས༌ཀོའ༌ ཛདས༌ཁན༌ ཚང༌མ༌ ཚོར༌།
JOS 9:11 ང༌ཞའེ༌ འུ༌སྐྱོང༌ དང༌ མི༌ཚང༌མའེ༌ ང༌ཞ༌གུན༌ལ༌ ཟེརས༌, ‘བེས༌སི༌ ཕིའ༌ ཟ༌གྱུ༌ ཁུར༌ཏེ༌ ཨིས༌ར༌ཨེལ༌པ༌གུན༌ལ༌ ཐུག༌ག༌ སོང༌ཏེ༌ ཟེར༌, “ང༌ཞའ༌ ཉེ༌རང༌ངི༌ ཡོག༌པོ༌གུན༌ ཨིན༌, ཇུ༌ཇུ༌ ང༌ཞའ༌ ཉམ༌པོ༌ ཞི༌དེའེ༌ ཆད༌དོན༌ ཅོའ༌ ཛད༌།”’
JOS 9:12 ང༌ཞ༌གུན༌ ཉེ༌རང༌ང༌ ཐུག༌ག༌ ཁང༌པ༌ནེ༌ བིང༌ ཟ༌ནེ༌ འི༌ ཏ༌གི༌གུན༌ ཚན༌ཏེ༌ ཡོད༌པིན༌ ཨིན༌ནའང༌ ཏ༌ ཟིགས༌སའང༌ འི༌གུན༌ སྐམས༌ཏེ༌ ཧམ༌བོར༌ ཆགས༌ཏེ༌ དུག༌།
JOS 9:13 ང༌ཞའེ༌ རྒུན༌ཆང༌ སྐང༌ ཟ༌ནེ༌ འི༌ སྐྱ༌པ༌གུན༌ སོ༌མ༌ ཡོད༌པིན༌ ཨིན༌ནའང༌ ཏ༌ འི༌གུན༌ ཉིང༌པ༌ སོང༌ཏེ༌ ཆད༌དུག༌ ཡང༌ ང༌ཞ༌གུན༌ནི༌ ཀོས༌ལག༌ དང༌ པ༌བུ༌ གུན༌ བེས༌ རིང༌མོའེ༌ ཞས༌ཏེ༌ ཆད༌ཏེ༌ ཨིན༌ནོག༌།”
JOS 9:14 ཨིས༌ར༌ཨེལ༌པ༌གུན༌ནི༌ ཁོང༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོ༌ཁན༌ནི༌ སྟགས༌ སྟན༌ཅེས༌ལ༌ ཏ༌གི༌ ཟོས༌ ཨིན༌ནའང༌ ཡ༌ཝའེ༌ ཐུག༌གོངས༌ ཏྲིའ༌ མ༌ ཛདས༌།
JOS 9:15 ཏེ༌ནེ༌ ཡོ༌ཤུའེ༌ ཁོང༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོས༌ཏེ༌ ཁོང༌གུན༌ མི༌ སད༌ཅེས༌ ཏན༌ཏན༌ ཅོས༌ ཡང༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ཏེན༌ན༌ ཙོགས༌ ཅོ༌ཅེས༌ལ༌ ནའ༌ ཁུརས༌།
JOS 9:16 ཆད༌དོན༌ ཅོས༌ཏེ༌ ཞག༌པོ༌ སུམ༌མི༌ སྟིང༌ནེ༌ ཁོང༌གུན༌ལ༌ ཏེ༌ མི༌གུན༌ ཁོང༌གུན༌ནི༌ ཉེ༌མོའ༌ དུག༌ཁན༌བོ༌ གྱུས༌སོང༌།
JOS 9:17 ཏེ༌བོ༌ ཏན༌ཏན༌ ཅོའ༌ལ༌ ཨིས༌ར༌ཨེལ༌པ༌གུན༌ ཏེན༌ན༌མལ༌ལ༌ བིང༌ ཡང༌ ཞག༌པོ༌ སུམ༌མི༌ ནང༌ང༌ ཁོང༌གུན༌ནི༌ གྱལ༌ས༌གུན༌ལ༌ ལེབ༌། ཏེ༌གུན༌ གི༌བེ༌འོན༌, ཀེ༌ཕི༌རཧ༌, བེ༌རོཐ༌ དང༌ ཀི༌རི༌འཐ༌ ཡེ༌རིམ༌ གྱལ༌ས༌གུན༌ ཨིན༌པིན༌།
JOS 9:18 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཁོང༌གུན༌ནི༌ཀ༌ སྤུང༌གོལ༌ མ༌ཅོས༌ ཅིའ༌ཟེར༌ན༌ ཨིས༌ར༌ཨེལ༌ལི༌ སྤོན༌བོ༌གུན༌ནི༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ནའ༌ ཁུར༌ཏེ༌ ཨིན༌པིན༌། ཏེ༌ནེ༌ ཨིས༌ར༌ཨེལ༌པ༌ ཚང༌མའེ༌, འུ༌སྐྱོང༌གུན༌ནི༌ གྱབ༌གལ༌ལ༌ ཟེར༌གྱུ༌ ཏངས༌།
JOS 9:19 སྤོན༌བོ༌གུན༌ནི༌ ཟེརས༌, “ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ཚན༌ནི༌ ནང༌ང༌ ང༌དང༌གུན༌ནི༌ ནའ༌ ཁུར༌ པ༌སང༌ ང༌དང༌ངི༌ ཁོང༌གུན༌ལ༌ ལག༌པ༌ རྩེ༌ མི༌ཉན༌།
JOS 9:20 ཨིན༌ནའང༌ ང༌དང༌གུན༌ནི༌ ནའ༌ ཁུར༌ཅེས༌པོའེ༌ དཀོན༌མཆོག༌གི༌ ཐུག༌སྲོ༌ ང༌དང༌གུན༌ནི༌ཀ༌ མི༌བབས༌ཤེས༌ལ༌ ང༌དང༌གུན༌ནི༌ ཁོང༌གུན༌ སོན༌ཏེའ༌ བོར༌གོས༌།
JOS 9:21 ཁོང༌གུན༌ སོན༌ཏེའ༌ བོར༌གོས༌།” ཏེ༌ནེ༌ ཨིས༌ར༌ཨེལ༌པ༌ ཚང༌མའེ༌ ཕིའ༌ ཁོང༌གུན༌ ཤིང༌ཅད༌ཁན༌ དང༌ ཆུ༌སྐྱེ༌ཁན༌ གུན༌ ཅོས༌། ཏེན༌ན༌ ཟུག༌གི༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ནའ༌ ཁུར༌ཁན༌བོ༌ མ༌ཅགས༌།
JOS 9:22 ཡོ༌ཤུའེ༌ གི༌བེ༌འོན༌པ༌གུན༌ བོད༌ཏེ༌ ཁྱོངས༌ ཡང༌ ཏྲིས༌, “ཅི༌ཕིའ༌ ཁྱོ༌ཞ༌གུན༌ནི༌ ཁྱོ༌ཞའ༌ ཐག༌རིང༌ ཡུལ༌ནེ༌ ཨིན༌ ཟེར༌ཏེ༌ ཟུན༌ ཏངས༌ཏེ༌ ང༌ཞའ༌ གོབ༌སྐོར༌པིན༌ ནམ༌ ཁྱོ༌ཞ༌གུན༌ ང༌ཞའེ༌ ཉེ༌མོའ༌ དུག༌ཨིན༌ ཨིན༌ནོག༌?
JOS 9:23 ཏ༌ ཁྱོ༌ཞ༌གུན༌ལ༌ ངན༌ ཕོགས༌ཏེ༌ ཁྱོ༌ཞ༌གུན༌ ང༌ཞའེ༌ ཚེ༌ཡོག༌ གྱུར༌ཏེ༌ ཏུས༌གྱུན༌ དཀོན༌མཆོག༌ག༌ ཅོལ༌སའེ༌ ཁང༌པའེ༌ ཕིའ༌ ཤིང༌ ཅད༌ཅེས༌ དང༌ ཆུ༌ སྐྱེ༌ཅེས༌སི༌ ལས༌གུན༌ ཅོ༌གོས༌ཨིན༌།”
JOS 9:24 ཁོང༌གུན༌ནི༌ ཡོ༌ཤུའ༌ ཟེརས༌, “ཡ༌ཝ༌ ཁྱོ༌ཞའེ༌ དཀོན༌མཆོག༌གི༌ ཁོང༌ངི༌ ཡོག༌པོ༌ མོ༌ཟེས༌ལ༌ འི༌ ས༌ཀྱད༌ གང༌པོ༌ ཁྱོ༌ཞའ༌ ཏང༌ཅེས༌ ཡང༌ ཏེ༌ ནང༌ང༌ དུག༌ཁན༌ མི༌ ཚང༌མ༌ སད༌ཅེས༌ལ༌ བཀའ༌ སལ༌ཏེ༌ ཡོད༌ཁན༌བོ༌ ཚོར༌ཏེ༌ ང༌ཞའ༌ མ༌སྲན༌ཏྲེ༌ ཇིགས༌ པ༌སང༌ ང༌ཞ༌རང༌ངི༌ སྲོག༌ སྐྱོབ༌ཅེས༌ལ༌ ང༌ཞའེ༌ ཏེ༌བོ༌ ཅོས༌པིན༌།
JOS 9:25 ཏ༌ ང༌ཞ༌གུན༌ ཁྱོ༌ཞ༌གུན༌ནི༌ ལག༌ག༌ ཨིན༌ནོག༌, ཁྱོ༌ཞའེ༌ འོས༌པ༌ སམ༌ཁན༌བོ༌ ང༌ཞ༌གུན༌ ཉམ༌པོ༌ ཅོའ༌ ཛད༌།”
JOS 9:26 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌པ༌གུན༌ལ༌ ཁོང༌གུན༌ སད༌ མ༌ཅུགས༌།
JOS 9:27 ཨིན༌ནའང༌ ཏེན༌ན༌ ཞག༌ག༌ ཁོའེ༌ གི༌བེ༌འོན༌པ༌གུན༌ ཡ༌ཝའེ༌ ལྡམ༌མ༌ ཛད༌ཅེས༌ཅན༌ནི༌ ནས༌སའེ༌ཀ༌ ཆོད༌ཁྲིའི༌ ཕིའ༌ ཡང༌ ཨིས༌ར༌ཨེལ༌པ༌གུན༌ནི༌ ཕིའ༌ ཤིང༌ཅད༌ཁན༌ དང༌ ཆུ༌སྐྱེ༌ཁན༌ གུན༌ ཅོས༌། ཁོང༌གུན༌ནི༌ ཏེན༌ན༌ ལས༌པོ༌ དི༌རིང༌ངའང༌ ཅོ༌ཨིན༌ ཨིན༌ནོག༌།
JOS 10:1 ཡོ༌ཤུའེ༌ ཡེ༌རི༌ཀོ༌ གྱལ༌ས༌ དང༌ ཏེ༌བོའེ༌ གྱལ༌པོའ༌ ཅོས༌ཁན༌ ཙོགས༌ ཨའི༌ དང༌ ཏེ༌བོའེ༌ གྱལ༌པོ༌ ང༌ཡོག༌ག༌ ཁྱོངས༌ཏེ༌ ཁྲེས༌ཏོར༌ ཅོ༌ཁན༌ ཡང༌ གི༌བེ༌འོན༌པ༌གུན༌ནི༌ ཨིས༌ར༌ཨེལ༌པ༌གུན༌ ཉམ༌པོ༌ ཞི༌དེའེ༌ ཆད༌དོན༌ ཅོས༌ཏེ༌ ཁོང༌གུན༌ནི༌ ཉེ༌མོའ༌ དུག༌ཁན༌གུན༌ ཡེ༌རུ༌ཤ༌ལེམ༌མི༌ གྱལ༌པོ༌ ཨ༌དོ༌ནི༌ཟེ༌དེག༌ག༌ ཚོར༌ར༌ཅིག༌,
JOS 10:2 ཁོ༌ དང༌ ཁོའེ༌ མི༌གུན༌ མ༌སྲན༌ཏྲེ༌ ཇིགས༌ ཅིའ༌ཟེར༌ན༌ གི༌བེ༌འོན༌ གྱལ༌པོ༌ མང༌པོའེ༌ཀ༌ ཝང༌སྲུལ༌ཁན༌ མ༌ གྱལ༌ས༌ ཁག༌ཅན༌, ཨའི༌ གྱལ༌ས༌ སང༌ ཆེའ༌ ཡང༌ གི༌བེ༌འོན༌པ༌ མག༌མི༌གུན༌ མ༌ ཀྲག༌པོ༌ ཡོད༌པིན༌།
JOS 10:3 ཏེ༌བོའེ༌ཕིའ༌ ཡེ༌རུ༌ཤ༌ལེམ༌མི༌ གྱལ༌པོ༌ ཨ༌དོ༌ནི༌ཟེ༌དེག༌གི༌ ཧེབ༌རོན༌ནི༌ གྱལ༌པོ༌ ཧོ༌ཧམ༌, ཡར༌མུཐ༌ཐི༌ གྱལ༌པོ༌ པི༌རམ༌, ལ༌ཀིཤ༌ཤི༌ གྱལ༌པོ༌ ཡ༌ཕིའ༌ དང༌ ཨེག༌ལོན༌ནི༌ གྱལ༌པོ༌ དེ༌བིར༌ གུན༌ལ༌ ལོན༌ ཀལ༌ཏེ༌ ཟེརས༌,
JOS 10:4 “ངའ༌ རོགས༌ ཅོས༌ཏེ༌ གི༌བེ༌འོན༌པ༌གུན༌ནི༌ གྱབ༌གལ༌ལ༌ ནོལ༌ལ༌ ཡོང༌ཤིག༌ ཅིའ༌ཟེར༌ན༌ ཁོང༌གུན༌ནི༌ ཡོ༌ཤུའ༌ དང༌ ཨིས༌ར༌ཨེལ༌པ༌གུན༌ ཉམ༌པོ༌ ཞི༌དེ༌ ཆད༌དོན༌ ཅོས༌ཏེ༌ ཨིན༌ནོག༌།”
JOS 10:5 ཏེ༌ནེ༌ ཨ༌མོར༌པའེ༌ གྱལ༌པོ༌ ལྔ༌, ཡེ༌རུ༌ཤ༌ལེམ༌, ཧེབ༌རོན༌, ཡར༌མུཐ༌, ལ༌ཀིཤ༌ དང༌ ཨེག༌ལོན༌ནི༌ གྱལ༌པོ༌གུན༌ ཅིག༌གྲིལ༌ སོང༌། ཁོང༌གུན༌ནི༌ མག༌མི༌ ཚང༌མ༌ ལྡུས༌ཏེ༌ གི༌བེ༌འོན༌ནི༌ གྱལ༌ས༌ སྐོར༌ཏེ༌ ཁོང༌གུན༌ནི༌ཀ༌ སྤུང༌གོལ༌ ཅོས༌།
JOS 10:6 གི༌བེ༌འོན༌པ༌གུན༌ནི༌ ཡོ༌ཤུའ༌ དུགས༌ཏེ༌ ཡོད༌ས༌ གིལ༌གལ༌ལ༌ ལོན༌ ཀལ༌ཏེ༌ ཟེརས༌, “ཉེ༌རང༌ངི༌ ཡོག༌པོ༌གུན༌ ཕང༌ང༌ མ༌ཛད༌། གྱོགས༌པ༌ ང༌ཞའ༌ རོགས༌ ཛད༌ད༌ སྐྱོད༌ཏེ༌ ང༌ཞ༌གུན༌ སྐྱོབ༌བ༌ ཛད༌ ཅིའ༌ཟེར༌ན༌ རི༌ ཡུལ༌ལ༌ དུག༌ཁན༌ ཨ༌མོར༌པའེ༌ གྱལ༌པོ༌ ཚང༌མ༌ ཛོམས༌ཏེ༌ ང༌ཞའེ༌ཀ༌ སྤུང༌གོལ༌ ཅོ༌ཅེས༌ དུག༌།”
JOS 10:7 ཏེ༌བོའེ༌ཕིའ༌ ཡོ༌ཤུའ༌ ཁོ༌རང༌ངི༌ མག༌མི༌ ཚང༌མ༌ ཀ༌བོའེ༌ ནང༌ང༌ ཁོའེ༌ ནོལ༌ཁན༌ ཀྲག༌པོ༌ ཚང༌མ༌ ཐེས༌ཏེ༌ གི༌བེ༌འོན༌པ༌གུན༌ལ༌ རོགས༌ ཅོའ༌ལ༌ གིལ༌གལ༌ནེ༌ བིང༌།
JOS 10:8 ཡ༌ཝའེ༌ ཡོ༌ཤུའ༌ མོལས༌, “ཁོང༌གུན༌ལ༌ མ༌ཇིགས༌ ཅིའ༌ཟེར༌ན༌ ངའེ༌ ཁོང༌གུན༌ ཁྱོ༌རང༌ངི༌ ལག༌ག༌ ཏངས༌ཏེ༌ ཨིན༌། ཁོང༌ ཅིག༌གིའང༌ ཁོ༌རང༌གུན༌ སྐྱོབ༌ མི༌ཉན༌།”
JOS 10:9 ཡོ༌ཤུའ༌ དང༌ མག༌མི༌གུན༌ གིལ༌གལ༌ནེ༌ ཚན༌ གང༌པོ༌ གྲུལ༌ཏེ༌ ཨ༌མོར༌པ༌གུན༌ནི༌ཀ༌ ཧུན༌མེད༌ལ༌ སྤུང༌གོལ༌ ཅོས༌།
JOS 10:10 ཡ༌ཝའེ༌, ཁོང༌གུན༌ནི༌ ནང༌ང༌ ཇིགས༌ནང༌ སྐྱེས༌ཏེ༌ ཧན༌གྲང༌ ཆ༌ཅུག༌ག༌ ཛད༌ཅེས༌པོའེ༌ གི༌བེ༌འོན༌ནི༌ ནང༌ང༌ ཨིས༌ར༌ཨེལ༌པ༌གུན༌ནི༌ ཁོང༌ མང༌པོ༌ སད༌ ཉན༌ཏེ༌ ཕམ༌ ཀྲག༌པོ༌ ཀལས༌། ཁོང༌གུན༌ནི༌ ཨ༌མོར༌པ༌གུན༌ལ༌ བེཐ༌ ཧོ༌རོན༌ནི༌ ལམ༌ནེ༌ ཏེད༌ཏེ༌ ཁྱེར༌ཏེ༌ ཨ༌ཟེ༌ཀཧ༌ དང༌ མཀ༌ཀེ༌དཧ༌ གྱལ༌ས༌གུན༌ལ༌ ལེབ༌ལེབ༌ ཚག༌པ༌ ཁོང༌གུན༌ སད༌ཅུག༌ག༌ ཛདས༌།
JOS 10:11 ཨ༌མོར༌པ༌གུན༌ བེཐ༌ ཧོ༌རོན༌ནི༌ ལམ༌ནེ༌ ཐུར༌ལ༌ ཤོར༌ ཟ༌ནེ༌ ཡ༌ཝའེ༌ ཨ༌ཟེ༌ཀཧ༌ ཚོག༌པ༌ ནམ༌ཁའ༌ནེ༌ ཇིགས༌ནང༌ཅན༌ནི༌ སེར༌ར༌རུ༌ མ༌ ཆེན༌མོ༌ ཕབ༌བ༌ ཛདས༌། ཨིས༌ར༌ཨེལ༌པ༌གུན༌ནི༌ ར༌འི༌ ཉམ༌པོ༌ སད༌ཁན༌ནི༌ སང༌ ཇིགས༌ནང༌ཅན༌ནི༌ སེར༌ར༌རུ༌ ཞས༌ཏེ༌ མང༌ང༌ ཤི༌།
JOS 10:12 ཡ༌ཝའེ༌ ཨ༌མོར༌པ༌གུན༌ནི༌ཀ༌ གྱལ༌ཁ༌ སལ༌ཁན༌ནི༌ ཞག༌གི༌ གོ༌ཟུག༌གི༌ཀ༌ ཨིས༌ར༌ཨེལ༌པ༌ ཚང༌མའེ༌ དུན༌ལ༌ ཡོ༌ཤུའེ༌ ཡ༌ཝའ༌ མོས༌ལམ༌ ཞུས༌ཏེ༌ ཟེརས༌, “ཉི༌མ༌ མ༌སྐྱོད༌ད༌ གི༌བེ༌འོན༌ནི༌ཀ༌ ལུས༌ཤུག༌ག༌ ཛད༌ཤིག༌། ཡང༌ ཨའི༌ཡ༌ལོན༌ ལུང༌པའེ༌ཀ༌ ལྫ༌ཝ༌ ལུས༌ཤུག༌ག༌ ཛད༌ཤིག༌།
JOS 10:13 ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ལ༌ གྲ༌འོ༌གུན༌ནི༌ཀ༌ གྱལ༌ཁ༌ ཐོབ༌ཐོབ༌ ཚོག༌པ༌ ཉི༌མ༌ གྲུལ༌ མ༌གྲུལ༌ལ༌ ཡང༌ ལྫ༌ཝ༌ ནས༌ས༌ ཅིག༌གི༌ཀ༌ དུགས༌།” འི༌ ཇུང༌ཁན༌ནི༌ སྐོར༌གུན༌ ཡ༌ཤར༌རི༌ ལྡེབ༌བི༌ ནང༌ང༌ བྲིས༌ཏེ༌ མི༌དུག༌ག༌། ཉི༌མ༌ ནམ༌ཁའེ༌ སྐྱིལ༌ལ༌ མ༌གྲུལ༌ལ༌ དུགས༌ཏེ༌ མ༌སྐྱོད༌ད༌ ཐེ༌བ༌ ཞག༌ཅིག༌ ལུས༌།
JOS 10:14 མོས༌ལམ༌ ཞུ༌ཁན༌བོའ༌ ཡ༌ཝའེ༌ ལན༌ སལ༌ལ༌ ཛད༌ཁན༌ནི༌ ཏེ༌ ཙོགས༌སི ཞག༌ དི༌རིང༌ ཚོགས༌པ༌ མ༌ནེ༌ མ༌ཇུང༌ ཡ༌ ཡོང༌ཅེས༌སི༌ ཏུས༌སི༌ ནང༌ངའང༌ མི༌ཇུང༌། དེན༌བའ༌, ཨིས༌ར༌ཨེལ༌པ༌གུན༌ནི༌ ཕིའ༌ ཡ༌ཝའེ༌ ནོལ༌ལ༌ ཛདས༌།
JOS 10:15 ཏེ༌ནེ༌ ཡོ༌ཤུའ༌ ཨིས༌ར༌ཨེལ༌པའེ༌ མག༌མི༌ ཚང༌མ༌ ཉམ༌པོ༌ ཁོ༌རང༌གུན༌ དུགས༌ཏེ༌ ཡོད༌ས༌ གིལ༌གལ༌ལ༌ ལོགས༌ཏེ༌ སོང༌།
JOS 10:16 ཏེན༌ན༌ ཟ༌ནེ༌ གྱལ༌པོ༌ ལྔ༌ཀོའང༌ ཤོར༌ཏེ༌ མཀ༌ཀེ༌དཧ༌ གྲོང༌ཁྱེར༌རི༌ བྲག༌ཕུགས༌སི༌ ནང༌ང༌ ཨིབས༌ཏེ༌ དུགས༌།
JOS 10:17 ཁོང༌གུན༌ མཀ༌ཀེ༌དཧ༌ གྲོང༌ཁྱེར༌རི༌ བྲག༌ཕུགས༌སི༌ ནང༌ང༌ ཨིབས༌ཏེ༌ དུགས༌ ཟེར༌ཏེ༌ ཡོ༌ཤུའ༌ ཚོར༌ར༌ཅིག༌
JOS 10:18 ཁོའེ༌ བཀའ༌ ཏངས༌, “བྲག༌ཕུགས༌སི༌ ཁའེ༌ཀ༌ རྡོའ༌ ཆེན༌མོ༌གུན༌ ཀབས༌ཏེ༌ ཏེ༌ཀ༌ སྲུང༌ཁན༌ མག༌མི༌ ཁ༌ཅིག༌ བོར༌།
JOS 10:19 ཏེ༌རུ༌ དུག༌ མ༌དུག༌ ཨིན༌ནའང༌ གྲ༌འོའེ༌ མག༌མི༌གུན༌ལ༌ ཏེད༌ཏེ༌ གྱབ༌ནེ༌ སྤུང༌གོལ༌ ཅོས༌། ཁོང༌གུན༌ལ༌ ལོགས༌ཏེ༌ ཁོང༌རང༌གུན༌ནི༌ གྲོང༌ཁྱེར༌ལ༌ ཆ༌ཅེས༌སི༌ སྐབས༌ མ༌ཏང༌ ཅིའ༌ཟེར༌ན༌ ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ཁོང༌གུན༌ ང༌དང༌གུན༌ནི༌ ལག༌ག༌ སྟད༌ཏེ༌ ཨིན༌ནོག༌།”
JOS 10:20 ཏེ༌བོའེ༌ཕིའ༌ ཡོ༌ཤུའ༌ དང༌ ཨིས༌ར༌ཨེལ༌པ༌གུན༌ནི༌ གྲ༌འོ༌ ཚང༌མ༌ སད༌ཏེ༌ མེད༌ཁན༌ ཅོས༌། ཨིན༌ནའང༌ གྱལ༌སའེ༌ གྱང༌སྐོར༌ སྟན༌པོའེ༌ ནང༌ང༌ ཞུགས༌ ཉན༌ཁན༌ ཉུ༌ངུན༌ཞིག༌ མ༌ཤིའ༌ ལུས༌།
JOS 10:21 ཨིས༌ར༌ཨེལ༌པའེ༌ མག༌མི༌གུན༌ མཀ༌ཀེ༌དཧ༌ ནང༌ང༌ ཡོ༌ཤུའ༌ ཡོད༌ས༌ ཁམ༌ཟང༌ ལོགས༌ཏེ༌ ཡོངས༌, ཏེ༌ནེ༌ ཕར༌ལ༌ ཨིས༌ར༌ཨེལ༌པའེ༌ གྲ༌འོ༌ སུ༌ཞིག༌གིའང༌ ཁོང༌གུན༌ནི༌ གྱབ༌གལ༌ལ༌ སྤེ༌ར༌ ཚིགས༌ ཅིག༌ ཟེར༌ཅེས༌སི༌ ཧམ༌པ༌ མ༌ཅོས༌།
JOS 10:22 ཡོ༌ཤུའེ༌ ཟེརས༌, “བྲག༌ཕུགས༌སི༌ ཁའ༌ ཀབས༌ཏེ༌ ཡོད༌ཁན༌ནི༌ རྡོའ༌གུན༌ ཐེན༌ཏེ༌ གྱལ༌པོ༌ ལྔ༌ཀོ༌ ང༌ ཡོད༌ས༌ ཁྱོང༌།”
JOS 10:23 ཏེ༌ནེ༌ ཁོང༌གུན༌ནི༌ ཡེ༌རུ༌ཤ༌ལེམ༌, ཧེབ༌རོན༌, ཡར༌མུཐ༌, ལ༌ཀིཤ༌ དང༌ ཨེག༌ལོན༌ནི༌ གྱལ༌པོ༌ ལྔ༌ཀོ༌ བྲག༌ཕུགས༌ནེ༌ ཕིངས༌ཏེ༌ ཁྱོངས༌།
JOS 10:24 ཁོང༌གུན༌ ཁྱོང༌ང༌ཅིག༌ ཡོ༌ཤུའེ༌ ཨིས༌ར༌ཨེལ༌པའེ༌ མག༌མི༌ ཚང༌མ༌ བོད༌ཏེ༌ ཁྱོངས༌ཏེ༌ མག༌མི༌ འུ༌སྐྱོང༌གུན༌ལ༌ ཟེརས༌, “ཡོང༌, གྱལ༌པོ༌གུན༌ནི༌ ཇིང༌བའེ༌ཀ༌ ཁྱོ༌ཞའེ༌ རྐང༌པ༌ བོར༌།” ཡང༌ ཁོང༌གུན༌ནི༌ ཡོ༌ཤུའེ༌ ཟེར༌ཁན༌བོ༌ ཅོས༌།
JOS 10:25 ཡོ༌ཤུའེ༌ ཁོང༌གུན༌ལ༌ ཟེརས༌, “ཇིགས༌ མ༌ ཇིགས༌ ཡང༌ སྤོས༌པ༌ མ༌ཆག༌། ཤེད༌ཅན༌ དང༌ སེམས༌ཤུགས༌ཅན༌ གྱུར༌། ང༌དང༌ངི༌ གྲ༌འོ༌ ཚང༌མ༌ ཉམ༌པོ༌ ཡ༌ཝའེ༌ འིན༌ན༌ ཙོགས༌ ཅོའ༌ ཛད༌ཨིན༌།”
JOS 10:26 ཏེ༌ནེ༌ ཡོ༌ཤུའེ༌ གྱལ༌པོ༌ ལྔ༌ཀོ༌ སད༌ཏེ༌ ཁོང༌གུན༌ནི༌ རོ༌ རྡུང༌མ༌ ལྔའེ༌ཀ༌ ཕི༌ཏོག༌ ཚོག༌པ༌ ཏགས༌ཏེ༌ བོརས༌།
JOS 10:27 ཉི༌མ༌ སྐྱོད༌ད༌ཅིག༌ གྱལ༌པོ༌གུན༌ནི༌ རོ༌ རྡུང༌མའེ༌ ཀ༌ནེ༌ ཕབས༌ཏེ༌ ཁོང༌གུན༌ ཨིབས༌ཏེ༌ དུག༌སའེ༌ བྲག༌ཕུགས༌སི༌ ནང༌ང༌ ཕང༌ཏེ༌ ཁའེ༌ཀ༌ རྡོའ༌ ཆེན༌མོ༌གུན༌ ཀབ༌ཅེས༌ལ༌ ཡོ༌ཤུའེ༌ བཀའ༌ ཏངས༌། ཁོང༌གུན༌ནི༌ རོ༌ ཏེ༌རུ༌ དག༌སའང༌ ཡོད༌ཏེ༌ ཨིན༌ནོག༌།
JOS 10:28 ཏེན༌ན༌ ཞག༌ག༌ ཡོ༌ཤུའེ༌ མཀ༌ཀེ༌དཧའེ༌ གྲོང༌ཁྱེར༌ ང༌ཡོག༌ག༌ ཁྱོངས༌ ཡང༌ ཏེ༌ནང༌ང༌ ཡོད༌ཁན༌ གྱལ༌པོ༌ ཐེས༌ཏེ༌ ཚང༌མ༌ མེད༌ཁན༌ ཅོས༌, སུ༌ཞིག༌གའང༌ སོན༌ཏེའ༌ མ༌བོརས༌། ཁོའེ༌ ཡེ༌རི༌ཀོའེ༌ གྱལ༌པོའ༌ ཅོ༌ཁན༌ ཙོགས༌ མཀ༌ཀེ༌དཧའེ༌ གྱལ༌པོ༌ ཉམ༌པོའང༌ ཅོས༌།
JOS 10:29 ཏེ༌ནེ༌ ཡོ༌ཤུའ༌ དང༌ ཨིས༌ར༌ཨེལ༌པའེ༌ མག༌མི༌ ཚང༌མ༌ མཀ༌ཀེ༌དཧའེ༌ གྲོང༌ཁྱེར༌ནེ༌ ལིབ༌ནཧ༌ གྱལ༌ས༌ སོང༌ཏེ༌ སྤུང༌གོལ༌ ཅོས༌།
JOS 10:30 ཡ༌ཝའེ༌ ཏེ༌ གྱལ༌ས༌ དང༌ གྱལ༌པོ༌ ཁོང༌གུན༌ནི༌ ལག༌ག༌ སལས༌། ཁོང༌གུན༌ནི༌ ཏེ༌ནང༌ང༌ ཡོད༌ཁན༌ ཚང༌མ༌ མེད༌ཁན༌ ཅོས༌, སུ༌ ཞིག༌གའང༌ སོན༌ཏེའ༌ མ༌བོརས༌། ཡོ༌ཤུའེ༌ ཡེ༌རི༌ཀོའེ༌ གྱལ༌པོའ༌ ཅོ༌ཁན༌ ཙོགས༌ ལིབ༌ནཧའེ༌ གྱལ༌པོ༌ ཉམ༌པོའང༌ ཅོས༌།
JOS 10:31 ལིབ༌ནཧ༌ ནེ༌ ཡོ༌ཤུའ༌ དང༌ ཨིས༌ར༌ཨེལ༌པའེ༌ མག༌མི༌ ཚང༌མ༌ ལ༌ཀིཤ༌ གྱལ༌ས༌ སོང༌ ཡང༌ ཏེ༌བོའ༌ མག༌མི༌ སྐོར༌ཏེ༌ སྤུང༌གོལ༌ ཅོས༌།
JOS 10:32 ཞག༌ ཉིས༌པའེ༌ ཞག༌ག༌, ཡ༌ཝའེ༌ ཁོང༌གུན༌ནི༌ ལག༌ག༌ ཏེ༌ གྱལ༌ས༌ སལ༌ལ༌ ཛདས༌། ཁོང༌གུན༌ནི༌ ཏེ༌ནང༌ང༌ ཡོད༌ཁན༌ ཚང༌མ༌ སདས༌ ཀ༌ཟུག༌ ཁོང༌ངི༌ ལིབ༌ནཧ༌ ཅོས༌།
JOS 10:33 ཏེ༌ཏུས༌ གེ༌ཟེར༌ གྱལ༌སའེ༌ གྱལ༌པོ༌ ཧོ༌རམ༌ ལ༌ཀིཤ༌ཤི༌ གྱལ༌པོའ༌ རོགས༌ ཅོ༌ཅེས༌ལ༌ ཁོང༌རང༌ངི༌ མག༌མི༌ ཁྲིད༌ཏེ༌ ཡོངས༌ ཨིན༌ནའང༌ ཡོ༌ཤུའེ༌ མག༌མི༌གུན༌ནི༌ ཁོ༌ དང༌ ཁོའེ༌ མག༌མི༌གུན༌ སད༌ཏེ༌ སུའང༌ སོན༌ཏེའ༌ མ༌བོརས༌།
JOS 10:34 ཏེ༌ནེ༌ ཡོ༌ཤུའ༌ དང༌ མག༌མི༌ ཚང༌མ༌ ཨེག༌ལོན༌ གྱལ༌ས༌ སོང༌ ཡང༌ ཏེ༌བོའ༌ མག༌མི༌ སྐོར༌ཏེ༌ སྤུང༌གོལ༌ ཅོས༌།
JOS 10:35 ཏེན༌ན༌ ཞག༌ག༌ ཁོང༌གུན༌ནི༌ ཏེ༌ གྱལ༌ས༌ ང༌ཡོག༌ག༌ ཁྱོངས༌ ཡང༌ ཏེ༌ནང༌ང༌ ཡོད༌ཁན༌ ཚང༌མ༌ སདས༌ ཀ༌ཟུག༌ ཁོང༌གུན༌ནི༌ ལ༌ཀིཤ༌ལ༌ ཅོས༌།
JOS 10:36 ཏེ༌ནེ༌ ཡོ༌ཤུའ༌ དང༌ ཨིས༌ར༌ཨེལ༌པ༌ མག༌མི༌ ཚང༌མ༌ ཨེག༌ལོན༌ ནེ༌ ཧེབ༌རོན༌ནི༌ གྱལ༌ས༌ སོང༌ཏེ༌ སྤུང༌གོལ༌ ཅོས༌།
JOS 10:37 ཁོང༌གུན༌ནི༌ གྱལ༌ས༌ དང༌ ཏེ༌ ཉེ༌ཁོར༌རི༌ གྲོང༌ཁྱེར༌ ཚང༌མ༌ ང༌ཡོག༌ག༌ ཁྱོངས༌ ཡང༌ གྱལ༌པོ༌ ཐེས༌ཏེ༌ ཏེ༌ནང༌ང༌ ཡོད༌ཁན༌ ཚང༌མ༌ སདས༌, སུའང༌ སོན༌ཏེའ༌ མ༌བོརས༌ ཀ༌ཟུག༌ ཁོང༌གུན༌ནི༌ ཨེག༌ལོན༌ལ༌ ཅོས༌།
JOS 10:38 ཏེ༌ནེ༌ ཡོ༌ཤུའ༌ དང༌ ཨིས༌ར༌ཨེལ༌པའེ༌ མག༌མི༌ ཚང༌མ༌ ལོགས༌ཏེ༌ ལྷོ༌ ཆོགས༌ལ༌ སོང༌ ཡང༌ དེ༌བིར༌ གྱལ༌སའེ༌ཀ༌ སྤུང༌གོལ༌ ཅོས༌།
JOS 10:39 ཁོང༌ངི༌ གྱལ༌ས༌, ཏེ༌བོའེ༌ གྱལ༌པོ༌ ཡང༌ ཏེ༌ ཉེ༌ཁོར༌རི༌ གྲོང༌སེབ༌གུན༌ ང༌ཡོག༌ག༌ ཁྱོངས༌ཏེ༌ ཏེ༌ནང༌ང༌ ཡོད༌ཁན༌ ཚང༌མ༌ མེད༌ཁན༌ ཅོས༌, སུ༌ཅིག༌གའང༌ སོན༌ཏེའ༌ མ༌བོརས༌། ཁོང༌ངི༌ ཧེབ༌རོན༌ དང༌ ལིབ༌ནཧ༌ ཡང༌ ཏེ༌གུན༌ནི༌ གྱལ༌པོའ༌ ཅོས༌ཁན༌ ཙོགས༌ དེ༌བིར༌ དང༌ ཏེ༌བོའེ༌ གྱལ༌པོ༌ ཉམ༌པོའང༌ ཅོས༌།
JOS 10:40 ཡོ༌ཤུའེ༌ ཡུལ༌ཇོངས༌ གང༌པོ༌ ང༌ཡོག༌ག༌ ཁྱོངས༌། ཏེ༌གུན༌ ནི༌ རི༌ ཡུལ༌གུན༌, ནེ༌གེཝ༌, ནུབ༌ ཆོགས༌སི༌ རི༌ ཡོག༌, རི༌ ཁྲེད༌དི༌ ཡུལ༌གུན༌ དང༌ གྱལ༌པོ༌གུན༌ ཨིན༌པིན༌, ཁོང༌ངི༌ མི༌ཅིག༌གའང༌ སོན༌ཏེའ༌ མ༌བོརས༌། ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ བཀའ༌ ནང༌ཞིན༌ ཁོང༌ངི༌ འུགས༌ ལེན༌ཁན༌ ཚང༌མ༌ སདས༌།
JOS 10:41 ཡོ༌ཤུའེ༌ ཀ༌དེཤ༌ བར༌ནེའ༌ནེ༌ ཏངས༌ཏེ༌ ག༌ཟ༌ ཡང༌ གོ༌ཤེན༌ནི༌ ཡུལ༌ ཚང༌མ༌ གི༌བེ༌འོན༌ ཚོག༌པ༌ ང༌ཡོག༌ག༌ ཁྱོངས༌།
JOS 10:42 འིན༌ན༌ ཏུས༌ལ༌ ཡོ༌ཤུའེ༌ ཏེ༌ གྱལ༌པོ༌ དང༌ ཁོང༌གུན༌ནི༌ ས༌ཀྱད༌ ཚང༌མ༌ ང༌ཡོག༌ག༌ ཁྱོངས༌ ཅིའ༌ཟེར༌ན༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌, ཁོང༌རང༌ངི༌ མི༌གུན༌ནི༌ ཕིའ༌ ནོལ༌ལ༌ ཛདས༌།
JOS 10:43 ཏེ༌ནེ༌ ཡོ༌ཤུའ༌ དང༌ ཨིས༌ར༌ཨེལ༌པའེ༌ མག༌མི༌ ཚང༌མ༌ ལོགས༌ཏེ༌ ཁོང༌གུན༌ ཀུར༌ ཙུགས༌ཏེ༌ དུག༌ས༌ གིལ༌གལ༌ལ༌ སོང༌།
JOS 11:1 ཧ༌ཟོར༌རི༌ གྱལ༌པོ༌ ཡ༌བིན༌ལ༌ ཨིས༌ར༌ཨེལ༌པ༌ གྱལ༌ཁ༌ ཐོབ༌ཁན༌ ཚང༌མའེ༌ ནས༌ཚུལ༌ ཚོར༌ར༌ཅིག༌ ཁོའེ༌ མ༌དོན༌ནི༌ གྱལ༌པོ༌ ཡོ༌བབ༌, ཤིམ༌རོན༌ནི༌ གྱལ༌པོ༌ དང༌ ཨཀ༌ཤཕ༌ཕི༌ གྱལ༌པོ༌,
JOS 11:2 བྱང༌ ཆོགས༌སི༌ རི༌ ཡུལ༌ལི༌ གྱལ༌པོ༌གུན༌, གཱ༌ལིལ༌ལི༌ ཚོའེ༌ ལྷོ༌ ཆོགས༌ དང༌ ནུབ༌ ཆོགས༌སི༌ རི༌ཡུལ༌ ཡོར༌དཱན༌ ལུང༌པའེ༌ གྱལ༌པོ༌གུན༌, ནུབ༌ ཆོགས༌སི༌ ན༌ཕོཐ༌ དོར༌རི༌ གྱལ༌པོ༌གུན༌,
JOS 11:3 ཀེ༌ནན༌ནི༌ ཤར༌ དང༌ ནུབ༌བི༌ གྱལ༌པོ༌གུན༌, རི༌ཡུལ༌ལི༌ ནང༌ང༌ ཡོད༌ཁན༌ ཨ༌མོར༌པ༌, ཧེད༌པ༌, པེ༌རིཟ༌པ༌ དང༌ ཡེ༌བས༌པ༌ ཡང༌ མིཟ༌པཧ༌ ཡུལ༌ཇོངས༌སི༌ ནང༌ང༌ རི༌ ཧེར༌མོན༌ནི༌ ཡོག༌ག༌ དུག༌ཁན༌ ཧིཝ༌པའེ༌ གྱལ༌པོ༌གུན༌ལ༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ནོལ༌ལ༌ ཡོང༌ཅེས༌ལ༌ ལོན༌ ཀལས༌།
JOS 11:4 ཏེ༌ གྱལ༌པོ༌ ཚང༌མ༌ མག༌མི༌, རྟ༌ དང༌ རྟ༌རེལ༌ མ༌མང༌པོ༌ ཉམ༌པོ༌ ནོལ༌ལ༌ ཡོངས༌། ཁོང༌གུན༌ནི༌ མག༌མི༌གུན༌ ཛོམ༌མ༌ཅིག༌ ཚོའེ༌ ཐའ༌མའེ༌ པེ༌མ༌ དང༌ ཙོགས༌ མ༌མང༌པོ༌ ཡོད༌པིན༌།
JOS 11:5 ཏེ༌ གྱལ༌པོ༌ ཚང༌མའེ༌ མག༌མི༌ ཛོམས༌ཏེ༌ ཨིས༌ར༌ཨེལ༌པ༌གུན༌ལ༌ ནོལ༌ཅེས༌ལ༌ མེ༌རོམ༌མི༌ ཆུའི༌ ཉེ༌མོའ༌ ཀུར༌ ཙུགས༌ཏེ༌ དུགས༌།
JOS 11:6 ཏེ༌ནེ༌ ཡ༌ཝའེ༌ ཡོ༌ཤུའ༌ མོལས༌, “ཁོང༌གུན༌ལ༌ མ༌ཇིགས༌ ཅིའ༌ཟེར༌ན༌ ཐོ༌རེ༌ འིན༌ན༌ ཏུས༌ལ༌ ངའེ༌ ཁོང༌ ཚང༌མ༌ ཨིས༌ར༌ཨེལ༌པ༌གུན༌ནི༌ ལག༌ག༌ སྟད༌ཏེ༌ སད༌ཨིན༌། ཁྱོ༌ཞའེ༌ ཁོང༌གུན༌ནི༌ རྟ༌གུན༌ ཞ༌འོ༌ ཅོས༌ཏེ༌ རྟ༌རེལ༌གུན༌ མེའ༌ སྲག༌གོས༌།”
JOS 11:7 ཏེ༌ནེ༌ ཡོ༌ཤུའ༌ དང༌ ཁོའེ༌ མག༌མི༌ ཚང༌མ༌ མེ༌རོམ༌མི༌ ཆུའི༌ ཉེ༌མོའ༌ སོང༌ཏེ༌ ཧུན༌མེད༌ལ༌ ཁོང༌གུན༌ནི༌ཀ༌ སྤུང༌གོལ༌ ཅོས༌།
JOS 11:8 ཡང༌ ཡ༌ཝའེ༌ ཁོང༌གུན༌ ཨིས༌ར༌ཨེལ༌པ༌གུན༌ནི༌ ལག༌ག༌ སྟདས༌། ཁོང༌གུན༌ནི༌ གྲ༌འོ༌གུན༌ལ༌ བྱང༌ ཆོགས༌སི༌ སི༌དོན༌ གྱལ༌ས༌ དང༌ མིས༌རེ༌ཕོཐ༌ མཱའིམ༌ ཡང༌ ཤར༌ ཆོགས༌ལ༌ མིཟ༌པཧ༌ ལུང༌པ༌ ཚོག༌པ༌ ཏེད༌ཏེ༌ ཁྱེརས༌ ཡང༌ ཁོང༌གུན༌ལ༌ ཕམ༌ཀལ༌ཏེ༌ ཁོང༌ ཅིག༌གའང༌ སོན༌ཏེའ༌ མ༌བོརས༌།
JOS 11:9 ཡ༌ཝའེ༌ མོལ༌ཁན༌ ནང༌ཞིན༌ ཡོ༌ཤུའེ༌ གྲ༌འོའེ༌ རྟ༌གུན༌ ཞ༌འོ༌ ཅོས༌ཏེ༌ རྟ༌རེལ༌གུན༌ མེའ༌ ཏུག༌ཅུགས༌།
JOS 11:10 ཏེ༌ནེ༌ ཡོ༌ཤུའ༌ དང༌ ཁོའེ༌ མག༌མི༌གུན༌ ལོགས༌ཏེ༌ ཧ༌ཟོར༌ལ༌ སོང༌ ཡང༌ ཏེ༌བོ༌ ང༌ཡོག༌ག༌ ཁྱོངས༌ཏེ༌ གྱལ༌པོ༌ སདས༌། ༼ཧ༌ཟོར༌རི༌ གྱལ༌པོའེ༌ ཏེ༌ གྱལ༌ཁམས༌ ཚང༌མའེ༌ཀ༌ ཝང༌སྲུལ༌ལད༌པིན༌།༽
JOS 11:11 ཨིས༌ར༌ཨེལ༌པ༌གུན༌ནི༌ གྱལ༌སའེ༌ ནང༌ང༌ ཡོད༌ཁན༌ ཚང༌མ༌ མེད༌ཁན༌ ཅོས༌, ཅིག༌གའང༌ སོན༌ཏེའ༌ མ༌བོརས༌, ཅིག༌གའང༌ མ༌ཕུདས༌ ཡང༌ ཡོ༌ཤུའེ༌ གྱལ༌ས༌བོ༌ མེའ༌ ཏུག༌ཅུགས༌།
JOS 11:12 ཡོ༌ཤུའེ༌ ཏེ༌ གྱལ༌པོ༌ ཚང༌མ༌ དང༌ ཁོང༌གུན༌ནི༌ གྱལ༌ས༌ ཚང༌མ༌ ང༌ཡོག༌ག༌ ལེནས༌ ཡང༌ ཁོང༌ ཚང༌མ༌ སད༌ཏེ༌ སིང༌ མེད༌ཁན༌ ཅོས༌ ཀ༌ཟུག༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ བཀའ༌ སལ༌ཏེ༌ ཨིན༌པིན༌།
JOS 11:13 ཨིན༌ནའང༌ ཡོ༌ཤུའེ༌ མེའ༌ ཏུག༌ཁན༌ ཧ༌ཟོར༌རི༌ གྱལ༌ས༌ ཅིག༌པོ༌ མ༌སྟོག༌ ཨིས༌ར༌ཨེལ༌པ༌གུན༌ནི༌ མག༌གི༌ ནང༌ང༌ ཤིག༌ཁན༌ གྱལ༌སའེ༌ རོ༌ཏོའི༌ཀ༌ རྩིགས༌ཏེ༌ ཡོད༌ཁན༌ ཞན༌ གྱལ༌ས༌གུན༌ མེའ༌ མ༌ ཏུགས༌།
JOS 11:14 ཨིས༌ར༌ཨེལ༌པ༌གུན༌ནི༌ ཏེ༌ གྱལ༌ས༌གུན༌ནེ༌ ཅོམས༌ཁན༌ནི༌ ཅ༌ལག༌ དང༌ ཀྲུད༌ཏྲོ༌ གུན༌ ཁོང༌རང༌གུན༌ནི༌ ཕིའ༌ ཁྱེརས༌། ཨིན༌ནའང༌ མི༌ཚང༌མ༌ སདས༌, ཅིག༌གའང༌ སོན༌ཏེའ༌ མ༌བོརས༌།
JOS 11:15 ཡ༌ཝའེ༌ ཁོང༌ངི༌ ཞབས༌ཏོག༌པ༌ མོ༌ཟེས༌ལ༌ བཀའ༌ སལ༌ཁན༌ ཙོགས༌ལ༌ མོ༌ཟེས༌སི༌ ཡོ༌ཤུའ༌ བཀའ༌ ཏངས༌ ཡང༌ ཡོ༌ཤུའེ༌ བཀའ༌ ནང༌ཞིན༌ ཅོས༌། ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ཚང༌མ༌ ཁོའེ༌ ཅའང༌ ལུས༌ མ༌ཅུག༌ག༌ ཅོས༌།
JOS 11:16 ཡོ༌ཤུའེ༌ ཡུལ༌ཇོངས༌ གང༌པོ༌ ཁོ༌རང༌ངི༌ ང༌ཡོག༌ག༌ ཁྱོངས༌, ཡང༌ན༌ རི༌ཡུལ༌, ནེ༌གེཝ༌ གང༌པོ༌, གོ༌ཤེན༌ནི༌ ནས༌ས༌ གང༌པོ༌, ནུབ༌ ཆོགས༌སི༌ རི༌ ཡུལ༌གུན༌, ཡོར༌དཱན༌ ལུང༌པ༌, ཨིས༌ར༌ཨེལ༌ལི༌ རི༌གུན༌ དང༌ གཱ༌ལིལ༌ལིའི༌ རི༌ ཡུལ༌གུན༌,
JOS 11:17 ཨིས༌ར༌ཨེལ༌ལི༌ ས༌ཀྱད༌ ཧ༌ལག༌གི༌ རི༌ནེ༌ ལྷོ༌ ཆོགས༌སི༌ རི༌ཡུལ༌ སེ༌འིར༌, ཧེར༌མོན༌ རི༌ ཡོག༌ག༌ ལེ༌བ༌ནོན༌ནི༌ ལུང༌པའེ༌ ནང༌ང༌ ཡོད༌ཁན༌ བའལ༌ གཱད༌ ཚག༌པ༌། ཡོ༌ཤུའེ༌ ཏེ༌ ཡུལ༌ གང༌པོ༌ ང༌ཡོག༌ག༌ ཁྱོངས༌ཏེ༌ ཏེ༌གུན༌ནི༌ གྱལ༌པོ༌ དང༌ མི༌ ཚང༌མ༌ སདས༌།
JOS 11:18 ཏེ༌ གྱལ༌པོ༌ ཚང༌མ༌ ཉམ༌པོ༌ ཏུས༌ མང༌པོ༌ ཞིག༌ ཡོ༌ཤུའེ༌ མག༌ ཏངས༌།
JOS 11:19 གི༌བེ༌འོན༌ནི༌ ནས༌སའེ༌ ནང༌ང༌ དུག༌ཁན༌ ཧེད༌པ༌གུན༌ མ༌སྟོག༌ ཞན༌ གྱལ༌ཁམས༌ སུའིང༌ ཨིས༌ར༌ཨེལ༌པ༌གུན༌ ཉམ༌པོ༌ ཞི༌དེ༌ ཆད༌དོན༌ མ༌ཅོས༌, ཁོང༌གུན༌ནི༌ མག༌ ཏངས༌ཏེ༌ ཏེ༌ ནས༌ས༌ ཚང༌མ༌ ང༌ཡོག༌ག༌ ལེནས༌།
JOS 11:20 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ སྙིང༌རྗེ༌ མ༌ནེ༌ མེད༌པ༌ ཁོང༌གུན༌ སིང༌ མེད༌ཁན༌ ཅོ༌ཅེས༌ལ༌ ཡ༌ཝའེ༌ ཁོང༌གུན༌ནི༌ སྙིང༌ སྐྱོང༌པོ༌ ཛད༌ཏེ༌ ཨིས༌ར༌ཨེལ༌པ༌གུན༌ ཉམ༌པོ༌ ནོལ༌ ཅུག༌ག༌ ཛདས༌།
JOS 11:21 ཏེན༌ན༌ ཏུས༌ལ༌ ཡོ༌ཤུའེ༌ མག༌མི༌གུན༌ནི༌ ཧེབ༌རོན༌, དེ༌བིར༌ དང༌ ཨ༌ནབ༌ གྱལ༌ས༌གུན༌ནི༌ ཉེ༌མོའ༌ རི༌ཡུལ༌ལི༌ ནང༌ང༌ དུག༌ཁན༌ ཨ༌ནཀ༌པ༌ ཚང༌མ༌ མ༌ཚད༌ ཡ༌ཧུ༌དཱ༌ དང༌ ཨིས༌ར༌ཨེལ༌ རི༌ཡུལ༌གུན༌ནི༌ ནང༌ང༌ དུག༌ཁན༌ ཚང༌མའང༌ སད༌ཏེ༌ མེད༌ཁན༌ ཅོས༌། ཡོ༌ཤུའེ༌ ཁོང༌གུན༌ དང༌ ཁོང༌གུན༌ནི༌ གྲོང༌ཁྱེར༌ ཚང༌མ༌ སིང༌ མེད༌ཁན༌ ཅོ༌ཅུགས༌།
JOS 11:22 ཕི༌ལིས༌ཏི༌པའེ༌ ནས༌ས༌ ག༌ཟ༌, གཱད༌, དང༌ ཨཤ༌དོད༌ གུན༌ནི༌ ནང༌ང༌ ལུས༌ཁན༌ ཁ༌ཅིག༌ མ༌སྟོགས༌ ཨིས༌ར༌ཨེལ༌པའེ༌ ས༌ཀྱད༌དི༌ ནང༌ང༌ ཁོང༌གུན༌ནི༌ ཨ༌ནཀ༌པ༌ ཅིག༌གའང༌ སོན༌ཏེའ༌ མ༌བོརས༌།
JOS 11:23 ཡོ༌ཤུའེ༌ ཏེ༌ ས༌ཆའ༌ གང༌པོ༌ ཁོ༌རང༌ངི༌ ཝང༌ངི༌ ཡོག༌ག༌ ཁྱོངས༌ ཀ༌ཟུག༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌, ཡང༌ ནོར༌སྐལ༌ལི༌ ཚུལ༌ལ༌ ཁོང༌ངི༌ ཏེ༌ ས༌ཀྱད༌པོ༌ ཨིས༌ར༌ཨེལ༌པའེ༌ མི༌སྡེ༌གུན༌ལ༌ བགོས༌ཏེ༌ ཏངས༌། ཏེ༌ སྟིང༌ནེ༌ ཏེ༌ ས༌ཆའེ༌ ནང༌ང༌ མག༌ ཏང༌ཅེས༌ མེད༌ཁན༌ སོང༌ཏེ༌ ཞི༌དེ༌ ལུས༌།
JOS 12:1 ཨིས༌ར༌ཨེལ༌པ༌གུན༌ནི༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ གྱལ༌པོ༌གུན༌ སད༌ཏེ༌ ཁོང༌གུན༌ནི༌ ས༌ཀྱད༌ ལེན༌ཏེ༌ ཨིན༌པིན༌, ཏེ༌བོ༌ ཨར༌ནོན༌ ལུང༌པ༌ ནེ༌ ཏངས༌ཏེ༌ ཧེར༌མོན༌ རི༌ ཚག༌པ༌ ཀ༌བོའེ༌ ནང༌ང༌ ཡོར༌དཱན༌ ལུང༌པའེ༌ ཤར༌ ཆོགས༌སི༌ ནས༌ས༌ ཚང༌མ༌ ཐེས༌ཏེ༌ ཨིན༌ནོག༌།
JOS 12:2 ཏེ༌ གྱལ༌པོ༌གུན༌: ཧེཤ༌བོན༌ནི༌ ནང༌ང༌ དུག༌ཁན༌ ཨ༌མོར༌པ༌ གྱལ༌པོ༌ སི༌ཧོན༌, ཁོའེ༌ གྱལ༌ཁམས༌གུན༌ནི༌ ནང༌ང༌ ཨར༌ནོན༌ ལུང༌པའེ༌ ཐའ༌མ༌ ཡོད༌ཁན༌ ཨ༌རོ༌འེར༌ ཐེས༌ཏེ༌ ཨིན༌ནོག༌, ཏེ༌བོ༌ ཨར༌ནོན༌ ལུང༌པའེ༌ སྐྱིལ༌ནེ༌ ཡབ༌བོག༌ ལྩངས༌པོ༌ ཚག༌པ༌ ཀ༌བོ༌ ཨེམ༌མོན༌པ༌གུན༌ནི༌ སན༌ཚམས༌ ཨིན༌པིན༌། འི༌ ཡུལ༌ཇོངས༌སི༌ ནང༌ང༌ གི༌ལེད༌དི༌ ལྷོ༌ ཆོགས༌སི༌ ཡུལ༌ ཕེད༌པོ༌ ཐེས༌ཏེ༌ ཨིན༌ནོག༌།
JOS 12:3 གྱལ༌པོ༌ སི༌ཧོན༌ནི༌ ཡོར༌དཱན༌ནི༌ ལུང༌པ༌ དང༌ ཤར༌ ཆོགས༌སི༌ ཡུལ༌ཇོངས༌གུན༌ནི༌ ནང༌ང༌ ཝང༌སྲུལ༌ ལད༌པིན༌, ཏེ༌བོ༌ བྱང༌ ཆོགས༌སི༌ གཱ༌ལིལ༌ལིའི༌ ཚོ༌ ནེ༌ ལྷོ༌ ཆོགས༌སི༌ ཚོ༌རུལ༌ ཚག༌པ༌ ཡང༌ བེཐ༌ ཡེ༌ཤི༌མོཐ༌ཐི༌ ལྷོ༌ ཆོགས༌ནེ༌ པིས༌གཧའེ༌ ཁྲེད༌ ཚག༌པ༌ ཨིན༌ནོག༌།
JOS 12:4 བ༌ཤན༌ནི༌ གྱལ༌པོ༌ ཨོག༌, རེ༌ཕ༌པ༌ མིར༌གྱུད༌དི༌ སྟིང༌ཇུག༌གི༌ མི༌ ཨིན༌པིན༌, ཁོའེ༌ ཨཤ༌ཏ༌རོཐ༌ དང༌ ཨེད༌རེའི༌ གྱལ༌ས༌གུན༌ནི༌ཀ༌ ཝང༌སྲུལ༌ལད༌པིན༌།
JOS 12:5 ཁོའེ༌ ཧེར༌མོན༌ རི༌ནེ༌ ཏངས༌ཏེ༌ བྱང༌ ཆོགས༌སི༌ ས༌ལ༌ཀཧ༌ ཚག༌པ༌, ཤར༌ལ༌ བ༌ཤན༌ གང༌པོ༌, ནུབ༌བ༌ གེ༌ཤུར༌ དང༌ མའ༌ཀཧའེ༌ སན༌ཚམས༌ ཚག༌པ༌, གི༌ལེད༌དི༌ བྱང༌ ཆོགས༌ ཕེད༌ ཡང༌ ཧེཤ༌བོན༌ནི༌ གྱལ༌པོ༌ སི༌ཧོན༌ནི༌ སན༌ཚམས༌ ཚོག༌པ༌ ཝང༌སྲུལ༌ལད༌པིན༌།
JOS 12:6 ཡ༌ཝའེ༌ ཞབས༌ཏོག༌པ༌ མོ༌ཟེས༌ དང༌ ཨིས༌ར༌ཨེལ༌པ༌གུན༌ནི༌ ཏེ༌ གྱལ༌པོ༌ ཉིས༌ཀོའ༌ ཕམ༌ཀལས༌ ཡང༌ མོ༌ཟེས༌སི༌ ཏེ༌ ས༌ཀྱད༌གུན༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌ས༌ མི༌སྡེ༌ ཕེད༌ གུན༌ལ༌ ནོར༌སྐལ༌ལི༌ ཚུལ༌ལ༌ བགོས༌ཏེ༌ ཏངས༌།
JOS 12:7 ཡོ༌ཤུའ༌ དང༌ ཨིས༌ར༌ཨེལ༌པ༌ མག༌མི༌གུན༌ནི༌ ཡོར༌དཱན༌ ལྩངས༌པོའེ༌ ནུབ༌ ཆོགས༌ལ༌ ཕམ༌ཀལ༌ཁན༌ནི༌ གྱལ༌པོ༌གུན༌ནི༌ མིང༌ངི༌ ཐོ༌ འི༌བོ༌ ཨིན༌ནོག༌། ལེ༌བ༌ནོན༌ནི༌ ལུང༌པའེ༌ བའལ༌ གཱད༌ནེ༌ ཏངས༌ཏེ༌ ཧ༌ལཀ༌ རི༌ ཚོག༌པ༌ ཀ༌བོ༌ སེ༌འིར༌ ཡུལ༌ཇོངས༌སི༌ ཉེ༌མོའ༌ ཨིན༌ནོག༌ ༼ཡོ༌ཤུའེ༌ ཏེ༌ ས༌ཀྱད༌ ཚང༌མ༌ ཨིས༌ར༌ཨེལ༌ལི༌ མི༌སྡེ༌ ལུས༌ཁན༌གུན༌ལ༌ ནོར༌སྐལ༌ལི༌ ཚུལ༌ལ༌ བགོས༌ཏེ༌ ཏངས༌།
JOS 12:8 ཏེ༌བོའེ༌ ནང༌ང༌ རི༌ཡུལ༌ དང༌ ནུབ༌ ཆོགས༌སི༌ རི༌ཡོག༌ གུན༌, ཡོར༌དཱན༌ནི༌ ལུང༌པ༌, རི༌ ཁྲེད༌གུན༌, ཡ༌ཧུ༌དཱའེ༌ ཐང༌སྟོང༌ དང༌ ནེ༌གེཝ༌ ཨིན༌པིན༌། འི༌ ཡུལ༌ཇོངས༌གུན༌ནི༌ ནང༌ང༌ ཧེད༌པ༌, ཨ༌མོར༌པ༌, ཀེ༌ནན༌པ༌, པེ༌རིཟ༌པ༌, ཧིཝ༌པ༌ དང༌ ཡེ༌བས༌པ༌ གུན༌ དུག༌གད༌པིན༌།༽ ཨིས༌ར༌ཨེལ༌པ༌གུན༌ནི༌ ཕམ༌ཀལ༌ཁན༌ནི༌ གྱལ༌པོ༌གུན༌ ནི༌,
JOS 12:9 ཡེ༌རི༌ཀོའེ༌ གྱལ༌པོ༌, བེ༌ཐེལ༌ལི༌ ཉེ༌མོའ༌ ཡོད༌ཁན༌ ཨའི༌ གྱལ༌པོ༌,
JOS 12:10 ཡེ༌རུ༌ཤ༌ལེམ༌མི༌ གྱལ༌པོ༌, ཧེབ༌རོན༌ནི༌ གྱལ༌པོ༌,
JOS 12:11 ཡར༌མུཐ༌ཐི༌ གྱལ༌པོ༌, ལ༌ཀིཤ༌ཤི༌ གྱལ༌པོ༌,
JOS 12:12 ཨེག༌ལོན༌ནི༌ གྱལ༌པོ༌, གེ༌ཟེར༌རི༌ གྱལ༌པོ༌,
JOS 12:13 དེ༌བིར༌རི༌ གྱལ༌པོ༌, གེ༌དེར༌རི༌ གྱལ༌པོ༌,
JOS 12:14 ཧོར༌མཧའེ༌ གྱལ༌པོ༌, ཨ༌རད༌དི༌ གྱལ༌པོ༌,
JOS 12:15 ལིབ༌ནཧའེ༌ གྱལ༌པོ༌, ཨ༌དུལ༌ལམ༌མི༌ གྱལ༌པོ༌,
JOS 12:16 མཀ༌ཀེ༌དཧའེ༌ གྱལ༌པོ༌, བེ༌ཐེལ༌ལི༌ གྱལ༌པོ༌,
JOS 12:17 ཏཔ༌པུ༌འཧའེ༌ གྱལ༌པོ༌, ཧེ༌ཕེར༌རི༌ གྱལ༌པོ༌,
JOS 12:18 ཨ༌ཕེཀ༌ཀི༌ གྱལ༌པོ༌, ལ༌ཤ༌རོན༌ནི༌ གྱལ༌པོ༌,
JOS 12:19 མ༌དོན༌ནི༌ གྱལ༌པོ༌, ཧ༌ཟོར༌རི༌ གྱལ༌པོ༌,
JOS 12:20 ཤིམ༌རོན༌ མེ༌རོན༌ནི༌ གྱལ༌པོ༌, ཨཀ༌ཤཕ༌ཕི༌ གྱལ༌པོ༌,
JOS 12:21 ཏའ༌ནག༌གི༌ གྱལ༌པོ༌, མེ༌གིད༌དོའེ༌ གྱལ༌པོ༌,
JOS 12:22 ཀེ༌དེཤ༌ཤི༌ གྱལ༌པོ༌, ཀར༌མེལ༌ལི༌ ནང༌ང༌ ཡོད༌ཁན༌ ཡོཀ༌ནེའམ༌མི༌ གྱལ༌པོ༌,
JOS 12:23 ནཕ༌ཕོཐ༌ དོར༌རི༌ ནང༌ང༌ ཡོད༌ཁན༌ དོར༌རི༌ གྱལ༌པོ༌, གིལ༌གལ༌ལི༌ ནང༌ང༌ ཡོད༌ཁན༌ གོ༌ཡིམ༌མི༌ གྱལ༌པོ༌
JOS 12:24 དང༌ ཏིར༌ཟཧཱི༌ གྱལ༌པོ༌ གུན༌ ཨིན༌པིན༌། ཚང༌མ༌ རྩི༌ན༌ ཨིས༌ར༌ཨེལ༌པའེ༌ མག༌མི༌གུན༌ནི༌ གྱལ༌པོ༌ 31 ཕམ༌ཀལས༌།
JOS 13:1 ཡོ༌ཤུའ༌ རྒད༌པོ༌ སོང༌ཏེ༌ ཡོད༌ ཟ༌ནེ༌ ཡ༌ཝའེ༌ ཁོའ༌ མོལས༌, “ཁྱོ༌རང༌ མ༌རྒད༌པོ༌ སོང༌ཏེ༌ ཨིན༌ནོག༌ ཨིན༌ནའང༌ ཏ༌རུང༌ ང༌ཡོག༌ག༌ ཁྱོང༌ཅེས༌ལ༌ ས༌ཀྱད༌ མང༌པོ༌ ལུས༌ཏེ༌ ཡོད༌།
JOS 13:2 ལུས༌ཁན༌ནི༌ ས༌ཀྱད༌གུན༌ ནི༌ ཕི༌ལིས༌ཏི༌ དང༌ གེ༌ཤུར༌རི༌ ཡུལ༌ཇོངས༌ ཚང༌མ༌,
JOS 13:3 ཨི༌ཇིབ༌བི༌ ཤར༌ ཆོགས༌སི༌ སན༌ཚམས༌སི༌ཀ༌ ཡོད༌ཁན༌ ཤི༌ཧོར༌རི༌ ཀྲོག༌པོ༌ ནེ༌ ཏངས༌ཏེ༌ བྱང༌ ཆོགས༌ལ༌ ཨེཀ༌རོན༌ནི༌ སན༌ཚམས༌ ཚོག༌པ༌, ༼ཏེ༌ནང༌ང༌ ཀེ༌ནན༌ནི༌ གྱལ༌ས༌ ལྔ༌ ག༌ཟ༌, ཨཤ༌དོད༌, ཨཤ༌ཀེ༌ལོན༌, གཱད༌ དང༌ ཨེཀ༌རོན༌, ཕི༌ལིས༌ཏི༌པའེ༌ ཝང༌སྲུལ༌པ༌གུན༌ནི༌ ཡོག༌ག༌ ཡོད༌ཁན༌གུན༌ ཐེས༌ཏེ༌ ཨིན༌ནོག༌༽, དང༌ ཨཝ༌པ༌གུན༌ནི༌ ས༌ཀྱད༌ ལྷོ༌ ཆོགས༌ལ༌ ཡོད༌ཁན༌གུན༌ ཨིན༌ནོག༌།
JOS 13:4 འི༌ ས༌ཀྱད༌ ཚང༌མ༌ ཏ༌རུང༌ ང༌ཡོག༌ག༌ མ༌ ཁྱོང༌ང༌ ཨིན༌ནོག༌, ཀེ༌ནན༌པ༌གུན༌ནི༌ ས༌ཀྱད༌ གང༌པོ༌ ཡང༌ན༌ སི༌དོན༌པ༌གུན༌ནི༌ ས༌ཀྱད༌ མེའེ༌རཧ༌ ནེ༌ ཨ༌ཕེཀ༌ ཚག༌པ༌ ཀ༌བོ༌ ཨ༌མོར༌པ༌གུན༌ནི༌ སན༌ཚམས༌སི༌ཀ༌ ཡོད༌ཏེ༌ ཨིན༌ནོག༌།
JOS 13:5 གི༌བལ༌པ༌གུན༌ནི༌ ས༌ཀྱད༌ དང༌ ཤར༌ ཆོགས༌ལ༌ ལེ༌བ༌ནོན༌ནི༌ རི༌ ཚང༌མ༌, ཡང༌ན༌ ཧེར༌མོན༌ རིའི༌ ཡོག༌ བའལ༌ གཱད༌ ནེ༌ ཏངས༌ཏེ༌ ལེ༌བོ༌ ཧ༌མཐ༌ ཚག༌པ༌,
JOS 13:6 རི༌ ཡུལ༌གུན༌ནི༌ ནང༌ང༌ དུག༌ཁན༌ ཚང༌མ༌, ལེ༌བ༌ནོན༌ ནེ༌ མིས༌རེ༌ཕོཐ༌ མཱའིམ༌ ཚག༌པ༌ ཀ༌བོའེ༌ ནང༌ང༌ སི༌དོན༌པ༌ ཚང༌མ༌ ཨིན༌ནོག༌།” ཏ༌རུང༌ ཡ༌ཝའེ༌ མོལས༌, “ཨིས༌ར༌ཨེལ༌པ༌གུན༌ནི༌ མིག༌གི༌ དུན༌ལ༌ ངའེ༌ ཁོང༌གུན༌ ཕིངས༌ཏེ༌ ཏང༌ཨིན༌། ངའེ༌ བཀའ༌ ཏང༌ཁན༌ ནང༌ཞིན༌ ཏེ༌ ས༌ཀྱད༌པོ༌ ཨིས༌ར༌ཨེལ༌པ༌གུན༌ལ༌ ནོར༌སྐལ༌ལི༌ ཚུལ༌ལ༌ ཏང༌ཅེས༌ ཏན༌ཏན༌ ཅོས༌།
JOS 13:7 ལུས༌ཁན༌ནི༌ ཨིས༌ར༌ཨེལ༌ལི༌ མི༌སྡེ༌ རྒུ༌ དང༌ མ༌ནས༌སའེ༌ མི༌སྡེ༌ ཕེད༌པོའ༌ ཏེ༌གུན༌ ནོར༌སྐལ༌ལི༌ ཚུལ༌ལ༌ བགོ༌གོས༌།”
JOS 13:8 མ༌ནས༌སའེ༌ ཞན༌ མི༌སྡེ༌ ཕེད༌ ཡང༌ རུ༌བེན༌ དང༌ གཱད༌དི༌ མི༌སྡེ༌ གུན༌ལ༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ས༌ཀྱད༌ ནོར༌སྐལ༌ལི༌ ཚུལ༌ལ༌ ཐོབ༌ ཀ༌བོ༌ སྔུན༌ལ༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁོང༌གུན༌ལ༌ བགོས༌ཏེ༌ ཏངས༌ཏེ༌ ཨིན༌པིན༌།
JOS 13:9 ཏེ༌ ས༌ཀྱད༌, ཨར༌ནོན༌ནི༌ ལུང༌པའེ༌ ཐའ༌མ༌ ཡོད༌ཁན༌ ཨ༌རོ༌འེར༌ ནེ༌ ཏངས༌ཏེ༌ མེ༌དི༌བའེ༌ ཐང༌ངི༌ སང༌ ཐག༌རིང༌ དི༌བོན༌ གྲོང༌ཁྱེར༌ ཚག༌པ༌ ཁྱེད༌ཏེ༌ ཨིན༌ནོག༌། ཏེ༌ ནང༌ང༌ ཨར༌ནོན༌ ལུང༌པའེ༌ སྐྱིལ༌ལ༌ ཡོད༌ཁན༌ནི༌ གྲོང༌ཁྱེར༌ ཐེས༌ཏེ༌ ཨིན༌ནོག༌།
JOS 13:10 ཏེ༌ ནང༌ང༌ ཨ༌མོར༌པའེ༌ གྱལ༌པོ༌ སི༌ཧོན༌ནི༌ གྲོང༌ཁྱེར༌ ཚང༌མ༌ ཐེས༌ཏེ༌ ཨིན༌ནོག༌, ཁོའེ༌ ཧེཤ༌བོན༌ གྱལ༌ས༌ནེ༌ ཝང༌སྲུལ༌ལད༌པིན༌ ཡང༌ ཁོའེ༌ གྱལ༌སྲིད༌ ཨེམ༌མོན༌པའེ༌ སན༌ཚམས༌ ཚོག༌པ༌ ཁྱེད༌ཏེ༌ ཡོད༌པིན༌།
JOS 13:11 ཏེ༌བོའེ༌ ནང༌ང༌ གི༌ལེད༌, གེ༌ཤུར༌ དང༌ མའ༌ཀཧ༌ ཡུལ༌ཇོངས༌གུན༌, ཧེར༌མོན༌ནི༌ རི༌ གང༌པོ༌, བ༌ཤན༌ གང༌པོ༌ ས༌ལ༌ཀཧ༌ ཚོག༌པ༌,
JOS 13:12 བ༌ཤན༌ནི༌ གྱལ༌པོ༌ ཨོག༌གི༌ ཡུལ༌ ཚང༌མ༌། ཁོའེ༌ ཨཤ༌ཏ༌རོཐ༌ དང༌ ཨེད༌རིའི༌ ནང༌ང༌ ཝང༌སྲུལ༌ལད༌པིན༌ ཡང༌ ཁོ༌ རེ༌ཕ༌པ༌ མིར༌གྱུད༌དི༌ སྟིང༌ཇུག༌གི༌ མི༌བོ༌ ཨིན༌པིན༌། མོ༌ཟེས༌སི༌ ཁོང༌གུན༌ལ༌ ཕམ༌ཀལ༌ཏེ༌ ཏེ༌ ས༌ཀྱད༌པོ༌ ལེན༌ཏེ༌ ཨིན༌པིན༌།
JOS 13:13 ཨིན༌ནའང༌ ཨིས༌ར༌ཨེལ༌པ༌གུན༌ནི༌ གེ༌ཤུར༌ དང༌ མའ༌ཀཧའེ༌ མི༌གུན༌ ཕིངས༌ཏེ༌ མ༌ཏངས༌། ཏེན༌ན༌བོའེ༌ཕིའ༌ ཨིས༌ར༌ཨེལ༌པ༌གུན༌ནི༌ ཕྲོའ༌ ཁོང༌གུན༌ དི༌རིང༌ངའང༌ དུག༌ཨིན༌ ཨིན༌ནོག༌།
JOS 13:14 མོ༌ཟེས༌སི༌ ལི༌ཝི༌ མི༌སྡེ༌ ཅིག༌པོའ༌ ས༌ཀྱད༌ བགོས༌ཏེ༌ མ༌ཏངས༌ ཅིའ༌ཟེར༌ན༌ ཆོད༌ཁྲི༌ཀ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའ༌ ཆོད༌པ༌ མེའ༌ སྲགས༌ཏེ༌ ཕུལ༌ཁན༌བོ༌ ཁོང༌གུན༌ནི༌ ནོར༌སྐལ༌ལི༌ ཚུལ༌ལ༌ བགོ༌ཅེས༌ལ༌ ཡ༌ཝའེ༌ མོལ༌ཏེ༌ ཨིན༌པིན༌།
JOS 13:15 མོ༌ཟེས༌སི༌ རུ༌བེན༌ནི༌ སྡེའ༌ མི༌རིགས༌ རེ༌རེའ༌ འི༌ ས༌ཀྱད༌གུན༌ ཏངས༌།
JOS 13:16 ཏེ༌ ས༌ཀྱད༌གུན༌ ཨར༌ནོན༌ནི༌ ལུང༌པའེ༌ ཐའ༌མའེ༌ ཨ༌རོ༌འེར༌ནེ༌ ཏངས༌ཏེ༌ མེ༌དི༌བའེ༌ ཐང༌ངི༌ སང༌ ཐག༌རིང༌, ཏེ༌ནང༌ང༌ ལུང༌པའེ༌ སྐྱིལ༌ལི༌ གྲོང༌ཁྱེར༌ ཐེས༌ཏེ༌ ཨིན༌ནོག༌།
JOS 13:17 ཏེ༌བོའེ༌ ནང༌ང༌ ཧེཤ༌བོན༌ ཡང༌ ཐང༌ངི༌ཀ༌ ཡོད༌ཁན༌ འི༌ གྲོང༌ཁྱེར༌ ཚང༌མ༌ ཐེས༌ཏེ༌ ཨིན༌ནོག༌ ཏེ༌གུན༌ དི༌བོན༌, བ༌མོཐ༌ བའལ༌, བེཐ༌ བའལ༌ མེ༌འོན༌,
JOS 13:18 ཡ༌ཧཟ༌, ཀེ༌དེ༌མོཐ༌, མེ༌ཕའཐ༌,
JOS 13:19 ཀི༌རིའ༌ཐ༌ཡེམ༌, སིབ༌མཧ༌, ལུང༌པའེ༌ རི༌ཀ༌ ཡོད༌ཁན༌ ཟེ༌རེཐ༌ ཤ༌ཧར༌,
JOS 13:20 བེཐ༌ པེ༌འོར༌, པིས༌གཧའེ༌ རི༌ ཁྲེད༌གུན༌ དང༌ བེཐ༌ ཡེ༌ཤི༌མོཐ༌ གུན༌ ཨིན༌ནོག༌།
JOS 13:21 རུ༌བེན༌པ༌གུན༌ནི༌ ས༌ཀྱད༌དི༌ ནང༌ང༌ ཐང༌ངི༌ཀ༌ ཡོད༌ཁན༌ནི༌ གྲོང༌ཁྱེར༌ ཚང༌མ༌ དང༌ སི༌ཧོན༌ནི༌ གྱལ༌ཁམས༌ གང༌པོ༌ ཐེས༌ཏེ༌ ཨིན༌ནོག༌། ཨ༌མོར༌པའེ༌ གྱལ༌པོ༌ སི༌ཧོན༌ནི༌ ཧེཤ༌བོན༌ ནེ༌ ཝང༌སྲུལ༌ལད༌པིན༌ ཡང༌ མོ༌ཟེས༌སི༌ ཁོ༌ དང༌ ཁོའེ༌ ང༌ཡོག༌ག༌ ཡོད༌ཁན༌ མི༌དིའན༌པ༌ སྤོན༌བོ༌ ཨེ༌ཝི༌, རེ༌ཀེམ༌, ཟུར༌, ཧུར༌ དང༌ རེ༌བ༌ གུན༌ལ༌ ཕམ༌ཀལ༌ཏེ༌ སདས༌།
JOS 13:22 ཨིས༌ར༌ཨེལ༌པའེ༌ སད༌ཁན༌གུན༌ནི༌ ཕྲོའ༌ བེ༌འོར༌རི༌ བུ༌ཚ༌ བ༌ལའམ༌ ཆོས༌ངན༌ ཅོ༌ཁན༌བོའང༌ ཐེས༌ཏེ༌ ཨིན༌ནོག༌།
JOS 13:23 རུ༌བེན༌ནི༌ མི༌སྡེ༌ ཕིའ༌ ནུབ༌ ཆོགས༌སི༌ སན༌ཚམས༌པོ༌ ཡོར༌དཱན༌ ལྩངས༌པོའེ༌ ཐའ༌མ༌ ཨིན༌པིན༌། ཏེ༌ ཡུལ༌ཇོངས༌སི༌ ནང༌ང༌ ཡོད༌ཁན༌ གྲོང༌ཁྱེར༌ དང༌ གྲོང༌སེབ༌ གུན༌ རུ༌བེན༌ནི༌ སྡེའེ༌ མི༌རིགས༌ རེ༌རེའ༌ ནོར༌སྐལ༌ལ༌ ཏངས༌ཏེ༌ ཨིན༌པིན༌།
JOS 13:24 མོ༌ཟེས༌སི༌ གཱད༌དི༌ སྡེ༌ མི༌རིགས༌ རེ༌རེའ༌ འི༌ ས༌ཀྱད༌གུན༌ ཏངས༌།
JOS 13:25 ཏེ༌ ས༌ཀྱད༌གུན༌ ཡ༌ཟེར༌, གི༌ལེད༌དི༌ གྲོང༌ཁྱེར༌ ཚང༌མ༌ དང༌ ཨེམ༌མོན༌པའེ༌ ས༌ཀྱད༌ ཕེད༌, རབ༌བཧའེ༌ ཤར༌ ཆོགས༌ལ༌ ཡོད༌ཁན༌ ཨ༌རོ༌འེར༌ གྲོང༌ཁྱེར༌ ཚོག༌པ༌,
JOS 13:26 ཧེཤ༌བོན༌ ནེ༌ ཏངས༌ཏེ༌ ར༌མཐ༌ མིཟ༌པཧ༌ དང༌ བེ༌ཏོ༌ནིམ༌ ཡང༌ མ༌ཧ༌ནཱའིམ༌ ནེ༌ ཏངས༌ཏེ༌ དེ༌བིར༌རི༌ ཡུལ༌ ཚོག༌པ༌ ཁྱེད༌ཏེ༌ ཡོད༌ཁན༌,
JOS 13:27 ཡང༌ ཡོར༌དཱན༌ ལུང༌པའེ༌ ནང༌ང༌ ཡོད༌ཁན༌ བེཐ༌ ཧ༌རམ༌, བེཐ༌ ནིམ༌རཧ༌, སུ༌ཀོད༌ དང༌ ཟ༌ཕོན༌ ཡང༌ ཧེཤ༌བོན༌ནི༌ གྱལ༌པོ༌ སི༌ཧོན༌ནི༌ ཝང༌སྲུལ༌ཁན༌ ས༌ཀྱད༌ ལུས༌ཁན༌གུན༌ ༼ཡང༌ན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ནེ༌ གཱ༌ལིལ༌ལིའི༌ ཚོ༌ ཚོག༌པ༌༽ ཨིན༌ནོག༌།
JOS 13:28 ཏེ༌ ཡུལ༌ཇོངས༌སི༌ ནང༌ང༌ ཡོད༌ཁན༌ གྲོང༌ཁྱེར༌ དང༌ གྲོང༌སེབ༌ གུན༌ གཱད༌དི༌ སྡེའེ༌ མི༌རིགས༌ རེ༌རེའ༌ ནོར༌སྐལ༌ལ༌ ཏངས༌ཏེ༌ ཨིན༌པིན༌།
JOS 13:29 མོ༌ཟེས༌སི༌ མ༌ནས༌སའེ༌ མི༌སྡེ༌ ཕེད༌དི༌ མི༌རིགས༌ རེ༌རེའ༌ འི༌ ས༌ཀྱད༌གུན༌ ཏངས༌།
JOS 13:30 ཏེ༌ ས༌ཀྱད༌གུན༌ ནི༌ མ༌ཧ༌ནཱའིམ༌ དང༌ བ༌ཤན༌ ཡུལ༌ཇོངས༌ གང༌པོ༌ ཀ༌བོ༌ གྱལ༌པོ༌ ཨོག༌གི༌ གྱལ༌ཁམས༌ གང༌པོ༌ ཨིན༌པིན༌, ཀ༌བོའེ༌ ནང༌ང༌ ཡཱའིར༌རི༌ ང༌ཡོག༌ག༌ ཁྱོང༌ཁན༌ གྲོང༌ཁྱེར༌ དྲུག༌ཅུ༌,
JOS 13:31 གི༌ལེད༌ ཡུལ༌ཇོངས༌སི༌ ཕེད༌ ཡང༌ གྱལ༌པོ༌ ཨོག༌གི༌ གྱལ༌ས༌ ཨཤ༌ཏ༌རོཐ༌ དང༌ ཨེད༌རིའི༌ གུན༌ ཨིན༌ནོག༌། ཏེ༌ ནས༌ས༌གུན༌ མ༌ནས༌སའེ༌ བུ༌ཚ༌ མ༌ཀིར༌རི༌ པུར༌གྱུད༌ ཕེད༌པོའེ༌ མི༌རིགས༌ རེ༌རེའ༌ ཏངས༌ཏེ༌ ཨིན༌པིན༌།
JOS 13:32 ཁོང༌གུན༌ ཡོར༌དཱན༌ ལྩངས༌པོའེ༌ འ༌ངོ༌ ཆོགས༌ ཡེ༌རི༌ཀོའེ༌ ཤར༌ ཆོགས༌ལ༌ མོ༌འབ༌བི༌ ཐང༌ངི༌ ནང༌ང༌ ཡོད༌ ཟ༌ནེ༌ འི༌ ས༌ཀྱད༌གུན༌ མོ༌ཟེས༌སི༌ ནོར༌སྐལ༌ལི༌ ཚུལ༌ལ༌ བགོས༌ཏེ༌ ཏངས༌ཏེ༌ ཨིན༌པིན༌།
JOS 13:33 ཨིན༌ནའང༌ མོ༌ཟེས༌སི༌ ལི༌ཝི༌ མི༌སྡེའ༌ ས༌ཀྱད༌ བགོས༌ཏེ༌ མ༌ཏངས༌ ཅིའ༌ཟེར༌ན༌ ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌ ཁོང༌རང༌ ཁོང༌གུན༌ནི༌ ནོར༌སྐལ༌ ཨིན༌ མོལ༌ཏེ༌ ཁ༌ཆད༌ ཛདས༌།
JOS 14:1 ཨིས༌ར༌ཨེལ༌ལི༌ ལུས༌ཏེ༌ ཡོད༌ཁན༌ནི༌ མི༌སྡེ༌གུན༌ལ༌ ཀེ༌ནན༌ནི༌ འི༌ ས༌ཀྱད༌གུན༌ ནོར༌སྐལ༌ལ༌ ཐོབ༌ ཀ༌བོ༌ བླ༌མ༌ ཨེ༌ལི༌འ༌ཟར༌, ནུན༌ནི༌ བུ༌ཚ༌ ཡོ༌ཤུའ༌ དང༌ སྡེ༌ ཚང༌མའེ༌ སྤོན༌བོ༌གུན༌ནི༌ ཁོང༌གུན༌ལ༌ བགོས༌ཏེ༌ ཏངས༌།
JOS 14:2 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ སྡེ༌ 9 དང༌ ཕེད༌པོའ༌ ནོར༌སྐལ༌ལི༌ ས༌ཀྱད༌ ཁོང༌གུན༌ནི༌ ཏག༌རིལ༌ གྱུད༌ཏེ༌ བགོས༌།
JOS 14:3 མོ༌ཟེས༌སི༌ སྡེ༌ ཉིས༌ དང༌ ཕེད༌པོའ༌ ས༌ཀྱད༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཏང༌ཏེ༌ ཨིན༌པིན༌ ཨིན༌ནའང༌ ཁོང༌ངི༌ ལི༌ཝི༌ མི༌སྡེའ༌ ས༌ཀྱད༌ མ༌ཏངས༌།
JOS 14:4 ཡོ༌སེབ༌བི༌ པུར༌གྱུད༌གུན༌ སྡེ༌ ཉིས༌ ཡོད༌པིན༌, མ༌ནས༌ས༌ དང༌ ཨེཕ༌ར༌ཡིམ༌། ལི༌ཝི༌པ༌གུན༌ལ༌ ས༌ཀྱད༌དི༌ སྐལ༌ལ༌ མ༌ཏངས༌ ཨིན༌ནའང༌ ཁོང༌གུན༌ལ༌ དུག༌སའེ༌ གྲོང༌ཁྱེར༌ དང༌ ཁོང༌གུན༌ནི༌ སེམས༌ཅན༌གུན༌ནི༌ རྩ༌ཁའེ༌ ཕིའ༌ ས༌ཀྱད༌ ཏངས༌།
JOS 14:5 ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ས༌ཀྱད༌གུན༌ བགོས༌།
JOS 14:6 ཀེ༌ནས༌པ༌ ཡེ༌ཕུན༌ནེཧའེ༌ བུ༌ཚ༌ ཀེ༌ལེབ༌, ཡ༌ཧུ༌དཱ༌ སྡེའེ༌ མི༌ ཁག༌ཅིག༌ ཉམ༌པོ༌ གིལ༌གལ༌ལི༌ ནང༌ང༌ ཡོ༌ཤུའ༌ ཡོད༌ས༌ ཡོངས༌ ཡང༌ ཁོའ༌ ཟེརས༌, “ཡ༌ཝའེ༌ ཀ༌དེཤ༌ བར༌ནེའ༌ ནང༌ང༌ ང༌དང༌ ཉིས༌ཀའེ༌ སྐོར༌ལ༌ དཀོན༌མཆོག༌གི༌ མི༌ མོ༌ཟེས༌ལ༌ མོལ༌ཁན༌བོ༌ ཨིད༌ཏུ༌ ཛད༌།
JOS 14:7 ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ང༌ ཀ༌དེཤ༌ བར༌ནེའ༌ནེ༌ ཀེ༌ནན༌ནི༌ ས༌ཀྱད༌པོ༌ ལྟའ༌ལ༌ ལམ༌ཅུག༌ ཟ༌ནེ༌ ང༌ ལོ༌ ཞིབ༌ཅུ༌ ཆའད༌པིན༌། ལོགས༌ཏེ༌ ཡོངས༌ཏེ༌ ངའེ༌ ཏེ༌ ནས༌སའེ༌ སྐོར༌ལ༌ ཀྲང༌པོ༌ ནས༌ཚུལ༌ ཤད༌པིན༌།
JOS 14:8 ཨིན༌ནའང༌ ངའེ༌ སྤུན༌ ང༌ ཉམ༌པོ༌ ཆའ༌ཁན༌གུན༌ནི༌, ཨིས༌ར༌ཨེལ༌པ༌གུན༌ནི༌ ནང༌ང༌ ཇིགས༌ནང༌ སྐྱེ༌ཅུགས༌། ཏེ༌ནེའང༌ ཡ༌ཝ༌ ངའེ༌ དཀོན༌མཆོག༌གི༌ འི༌ ནས༌ས༌ ང༌དང༌ང༌ སལ༌ལ༌ ཛད༌ཅེས༌པོའ༌ ངའེ༌ སྙིང༌ ཐག༌པ༌ནེ༌ ཨིད༌ཤེས༌ ཅོས༌པིན༌།
JOS 14:9 ཏེན༌ན༌ ཞག༌ག༌ མོ༌ཟེས༌སི༌ ངའ༌ ཁ༌ཆད༌ ཛད༌ཏེ༌ མོལས༌, ‘ཏེ༌ ནས༌ས༌ ལྟའ༌ ཆ༌ ཟ༌ནེ༌ ཁྱོ༌རང༌ངི༌ རྐང༌པ༌ བོར༌ཁན༌ ས༌ཀྱད༌ ཏུས༌གྱུན༌ནི༌ཕིའ༌ ཁྱོ༌རང༌ དང༌ ཁྱོ༌རང༌ངི༌ པུར༌གྱུད༌གུན༌ལ༌ ཐོབ༌ཅེས༌ཅན༌ནི༌ ནོར༌སྐལ༌བོ༌ ཨིན༌ ཅིའ༌ཟེར༌ན༌ ཁྱོ༌རང༌ངི༌ ཡ༌ཝ༌ ངའེ༌ དཀོན༌མཆོག༌གི༌ཀ༌ སྙིང༌ ཐག༌པ༌ནེ༌ ཨིད༌ཤེས༌ ཅོས༌།’”
JOS 14:10 “ཏ༌ ཉེ༌རང༌ངི༌ ཟིགས༌སའང༌ ཨིས༌ར༌ཨེལ༌པ༌གུན༌ ཐང༌སྟོང༌ངི༌ ནང༌ང༌ ཁོར༌ཨིན༌ ཡོད༌ཏུས༌ མོ༌ཟེས༌སི༌ ཁ༌ཆད༌ ཛད༌པ༌ནེ༌ དག༌ས༌ ཚག༌པ༌ ལོ༌ 45 ཡ༌ཝའེ༌ ང༌ སོན༌ཏེའ༌ བོར༌ར༌ ཛདས༌། དི༌རིང༌ ང༌ ལོ༌ 85 སོང༌ཏེ༌ ཨིན༌།
JOS 14:11 མོ༌ཟེས༌སི༌ ལམ༌ཅུག༌ ཟ༌ནེ༌ ཤེད༌ཅན༌ ཡོད༌ཁན༌ ཙོགས༌ ངའ༌ དག༌སའང༌ ཨིན༌, ཏེ༌ ཟ༌ནེ༌ ཙོགས༌ ཏ༌རུང༌ངའང༌ མག༌ ཏང༌ང༌ ཆ༌ཅེས༌སི༌ ཤེད༌ ངའེ༌ ནང༌ང༌ ཡོད༌།
JOS 14:12 ཏེ༌ ཞག༌ག༌ ཡ༌ཝའེ༌ ཁ༌ཆད༌ ཛད༌ཁན༌ནི༌ འི༌ རི༌ཡུལ༌བོ༌ ཏ༌ ངའ༌ སལ༌། ཏེ༌རུ༌ ཨ༌ནཀ༌པ༌གུན༌ གྱང༌སྐོར༌ ཐོན༌པོ༌ཅན༌ནི༌ གྱལ༌སའེ༌ ནང༌ང༌ དུག༌ཁན༌བོ༌ ཉེ༌རང༌ང༌ ཚོར༌ཏེ༌ ཨིན༌ནོག༌། ཨིན༌ནའང༌ ཡ༌ཝའེ༌ རོགས༌ ཉམ༌པོ༌ ངའེ༌ ཁོང༌གུན༌ ཏེ༌ ས༌ཀྱད༌ནེ༌ ཕིང༌ཨིན༌ ཀ༌ཟུག༌ ཡ༌ཝའེ༌ མོལ༌ལ༌ ཛདས༌།”
JOS 14:13 ཡོ༌ཤུའེ༌ ཀེ༌ལེབ༌བ༌ ཅིན༌ལབས༌ སལ༌ཅེས༌ལ༌ ཡ༌ཝའ༌ མོས༌ལམ༌ ཞུས༌ ཡང༌ ཧེབ༌རོན༌ནི༌ གྱལ༌ས༌ ཁོའ༌ ནོར༌སྐལ༌ལ༌ ཏངས༌།
JOS 14:14 ཏེ༌ནེ༌ ཕར༌ལ༌ ཧེབ༌རོན༌ ཀེ༌ལེབ༌བི༌ པུར༌གྱུད༌གུན༌ནི༌ ས༌ཀྱད༌ གྱུར༌ ཡང༌ དག༌སའང༌ ཨིན༌ནོག༌, ཅིའ༌ཟེར༌ན༌ ཁོའེ༌ སྙིང༌ ཐག༌པ༌ནེ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ཀ༌ ཨིད༌ཤེས༌ ཅོས༌།
JOS 14:15 ཀེ༌ལེབ༌བི༌ ཧེབ༌རོན༌ ལེན༌ནི༌སང༌ སྔུན༌ལ༌ ཏེ༌བོའ༌ ཨ༌ནཀ༌པའེ༌ སྤའ༌འོ༌ ཀྲག༌པོ༌ ཞིག༌གི༌ མིང༌ངི༌ གྱབ༌ནེ༌ ཀི༌རི༌འཐ༌ ཨར༌བའ༌ ཟེར༌རད༌པིན༌། ཏེ༌ནེ༌ ཕར༌ལ༌ ཏེ༌ ས༌ཀྱད༌དི༌ ནང༌ང༌ མག༌ མ༌ཆ༌ ཞི༌དེ༌ ལུས༌།
JOS 15:1 ཡ༌ཧུ༌དཱ༌ སྡེའེ༌ མིར༌གྱུད༌གུན༌ལ༌ ས༌ཀྱད༌ ཏངས༌ཁན༌བོ༌ ལྷོ༌ ཆོགས༌ལ༌ ཨི༌དོམ༌མི༌ སན༌ཚམས༌, ཟིན༌ནི༌ ཐང༌སྟོང༌ ཚོག༌པ༌ ཨིན༌པིན༌།
JOS 15:2 ཁོང༌གུན༌ནི༌ ལྷོ༌ ཆོགས༌སི༌ སན༌ཚམས༌པོ༌ ཚོ༌རུལ༌ལི༌ ལྷོ༌ ཆོགས༌སི༌ ཇུག༌ནེ༌ གོ༌ཟུགས༌ཏེ༌
JOS 15:3 སྡིག༌པ༌རཱ༌ཙེ༌ ལའེ༌ ལྷོ༌ ཆོགས༌ གྱུད༌ཏེ༌ ཟིན༌ནི༌ ཐང༌སྟོང༌ནེ༌ ཀ༌དེཤ༌ བར༌ནེའེ༌ ལྷོ༌ ཆོགས༌ ཡང༌ ཧེཟ༌རོན༌ གྱུད༌ཏེ༌ ཀེན༌ལ༌ ཨད༌དར༌ ཚོག༌པ༌ ལེབ༌ཏེ༌ ཀར༌ཀ༌ ཆོགས༌ལ༌ ཀྱོགས༌།
JOS 15:4 ཏེ༌ཀ༌ནེ༌ ཨཟ༌མོན༌ གྱུད༌ཏེ༌ ཨི༌ཇིབ༌བི༌ སན༌ཚམས༌སི༌ ཀྲོག༌པོའ༌ ཐུད༌ཏེ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ལེབ༌, ཏེ༌བོ༌ ཁོང༌གུན༌ནི༌ ལྷོ༌ ཆོགས༌སི༌ སན༌ཚམས༌ ཨིན༌པིན༌།
JOS 15:5 ཤར༌ ཆོགས༌སི༌ སན༌ཚམས༌པོ༌ རུལ༌ཁན༌ནི༌ ཚོ༌, ཡོར༌དཱན༌ ལྩངས༌པོའེ༌ ཁའ༌ ཚོག༌པ༌ ཨིན༌པིན༌། བྱང༌ ཆོགས༌སི༌ སན༌ཚམས༌པོ༌ རུལ༌ཁན༌ནི༌ ཚོ༌, ཡོར༌དཱན༌ ལྩངས༌པོའེ༌ ཁའེ༌ ཀ༌ནེ༌ གོ༌ཟུགས༌ཏེ༌
JOS 15:6 ཀེན༌ལ༌ བེཐ༌ ཧོག༌ལཧ༌ གྲོང༌ཁྱེར༌ ཚོག༌པ༌ ཡང༌ བེཐ༌ ཨ༌ར༌བཧ༌ གྲོང༌ཁྱེར༌རི༌ བྱང༌ ཆོགས༌ནེ༌ རུ༌བེན༌ནི༌ བུ༌ཚ༌ བོ༌ཧན༌ནི༌ རྡོའ༌ ཚག༌པ༌ ཨིན༌པིན༌།
JOS 15:7 ཏེ༌ནེ༌ ཨ༌ཁོར༌རི༌ ལུང༌པ༌ནེ༌ དེ༌བིར༌ ཚོག༌པ༌, བྱང༌ ཆོགས༌སི༌ གིལ༌གལ༌ གྱལ༌ས༌ ཆོགས༌ལ༌ ཀྱོགས༌ཏེ༌ ཀ༌བོ༌ ལུང༌པའེ༌ ལྷོ༌ ཆོགས༌ལ༌ ཨ༌གྲུམ༌མིམ༌ ཁྲེད༌དི༌ འ༌ངོ༌ ཆོགས༌ལ༌ ཡོད༌། ཏེ༌ཀ༌ནེ༌ སན༌ཚམས༌པོ༌ ཨེན༌ ཤེ༌མེཤ༌ ཆུ༌མིག༌ གྱུད༌ཏེ༌ ཨེན༌ རོ༌གེལ༌ ཚོག༌པ༌,
JOS 15:8 ཏེ༌ནེ༌ ཏེ༌བོ༌ བེན༌ ཧིན༌ནོམ༌མི༌ ལུང༌པ༌ གྱུད༌ཏེ༌, ཡེ༌བས༌ ཡང༌ན༌ ཡེ༌རུ༌ཤ༌ལེམ༌མི༌ གྱལ༌སའེ༌ ལྷོ༌ ཆོགས༌སི༌ ཁྲེད༌ གྱུད༌ཏེ༌ ཀེན༌ལ༌ ཧིན༌ནོམ༌མི༌ ལུང༌པའེ༌ ནུབ༌ ཆོགས༌སི༌ རིའི༌ གོ༌, རེ༌ཕ༌འིམ༌མི༌ ལུང༌པའེ༌ བྱང༌ ཆོགས༌སི༌ ཇུག༌ ཚོག༌པ༌ ཨིན༌པིན༌།
JOS 15:9 སན༌ཚམས༌པོ༌ ཏེ༌ རི༌གོ༌ནེ༌ ནེཕ༌ཏོ༌འཧའེ༌ ཆུ༌མིག༌ ཚོག༌པ༌ ཡང༌ ཏེ༌ཀ༌ནེ༌ ཨེ༌ཕོ༌རོན༌ རི༌ གྲོང༌ཁྱེར༌གུན༌ ཚོག༌པ༌། ཏེ༌ནེ༌ བའ༌ལཧ༌ ཆོགས༌ལ༌ ཀྱོགས༌ ཀ༌བོ༌ ཀི༌རི༌འཐ༌ ཡེ༌རིམ༌ ཨིན༌པིན༌།
JOS 15:10 བའ༌ལཧ༌ ནེ༌ ནུབ༌ ཆོགས༌ལ༌ ཀྱོགས༌ཏེ༌ སེ༌འིར༌ རི༌ གྱུད༌ཏེ༌ ཡེ༌རིམ༌ རི༌ བྱང༌ ཆོགས༌སི༌ ཁྲེད༌ ཚོག༌པ༌ ༼ཀ༌བོའ༌ དག༌ས༌ རི༌ ཀེ༌ས༌ལོན༌ ཟེར༌ར༌ནོག༌༽ ཡང༌ ཐུར༌ལ༌ བེཐ༌ ཤེ༌མེཤ༌ གྱལ༌ས༌ ནེ༌ ཏིམ༌ནཧ༌ གྱལ༌ས༌ ཚོག༌པ༌ ཨིན༌ནོག༌།
JOS 15:11 སན༌ཚམས༌པོ༌ ཨེཀ༌རོན༌ གྱལ༌སའེ༌ བྱང༌ ཆོགས༌སི༌ རི༌ ཁྲེད༌ ནེ༌ ཤིཀ༌ཀི༌རོན༌ གྲོང༌ཁྱེར༌ ཆོགས༌ལ༌ ཀྱོགས༌ ཡང༌ རི༌ བའ༌ལཧ༌ གྱུད༌ཏེ༌ ཡབ༌ནེལ༌ གྲོང༌ཁྱེར༌ ཚག༌པ༌ ལེབ༌ཏེ༌ མེ༌གྲི༌ཀྲེ༌རིའན༌ནི༌ ཚོའེ༌ཀ༌ ཚར༌།
JOS 15:12 ནུབ༌ ཆོགས༌སི༌ སན༌ཚམས༌པོ༌ མེ༌གྲི༌ཀྲེ༌རིའན༌ནི༌ ཚོའེ༌ ཐའ༌མ༌གུན༌ ཨིན༌ནོག༌། ཡ༌ཧུ༌དཱ༌ སྡེའེ༌ མི༌རིགས༌གུན༌ནི༌ སན༌ཚམས༌ ཏེ༌གུན༌ ཨིན༌ནོག༌།
JOS 15:13 ཡ༌ཝའེ༌ བཀའ༌ ནང༌ཞིན༌ ཡོ༌ཤུའེ༌ ཀེ༌ལེབ༌བ༌ ཡ༌ཧུ༌དཱ༌ མི༌སྡེའེ༌ ས༌ཀྱད༌དི༌ ཁག༌ཤིག༌ ཏངས༌། ཏེ༌བོ༌ ཀི༌རི༌འཐ༌ ཨར༌བའ༌ ཡང༌ན༌ ཧེབ༌རོན༌ གྱལ༌ས༌ ཨིན༌ནོག༌། ༼ཨར༌བའ༌ ཨ༌ནཀ༌པའེ༌ ཕ༌མེས༌པོ༌ ཞིག༌ ཨིན༌ནོག༌།༽
JOS 15:14 ཀེ༌ལེབ༌བི༌ ཧེབ༌རོན༌ནི༌ ནང༌ནེ༌ ཨ༌ནཀ༌པ༌ སྡེ༌ སུམ༌ ཕིངས༌, ཁོང༌གུན༌ ཨ༌ནཀ༌པའེ༌ པུར༌གྱུད༌ ཤེ༌ཤཱའི༌, ཨ༌ཧི༌མན༌ དང༌ ཏལ༌མཱའི༌ གུན༌ ཨིན༌པིན༌།
JOS 15:15 ཏེ༌ཀ༌ནེ༌ ཁོ༌ དེ༌བིར༌རི༌ གྱལ༌སའེ༌ ནང༌ང༌ དུག༌ཁན༌གུན༌ལ༌ ནོལ༌ལ༌ སོང༌ ༼ཏེ༌བོའ༌ སྔུན༌ལ༌ ཀི༌རི༌འཐ༌ སེ༌ཕེར༌ ཟེར༌རད༌པིན༌།༽
JOS 15:16 ཀེ༌ལེབ༌བི༌ ཟེརས༌, “ཀི༌རི༌འཐ༌ སེ༌ཕེར༌ལ༌ སྤུང༌གོལ༌ ཅོས༌ཏེ༌ ང༌ཡོག༌ག༌ ཁྱོང༌ཁན༌ནི༌ མི༌བོའ༌ ངའེ༌ ང༌རང༌ངི༌ བུ༌མོ༌ ཨཀ༌སཧ༌ ན༌མ༌ ཏང༌ཨིན༌།”
JOS 15:17 ཀེ༌ལེབ༌བི༌ ནོ༌ ཀེ༌ནཟ༌ཟི༌ བུ༌ཚ༌ ཨོཐ༌ནི༌འེལ༌ལི༌ ཏེ༌བོ༌ ང༌ཡོག༌ག༌ ཁྱོངས༌པ༌ ཀེ༌ལེབ༌བི༌ ཁོ༌རང༌ངི༌ བུ༌མོ༌ ཨཀ༌སཧ༌ ཁོའ༌ ན༌མ༌ ཏངས༌།
JOS 15:18 ན༌མ༌ ཅོས༌ཏེ༌ སྟིང༌ནེ༌ ཨོཐ༌ནི༌འེལ༌ལི༌ ཨཀ༌སཧ༌ ཨ༌བ༌ ཀེ༌ལེབ༌བ༌ ཞིང༌ ཏོང༌ ཟེར༌ ཅུགས༌། ཏེ༌ནེ༌ ཨཀ༌སཧ༌ ཁོ༌རང༌ངི༌ ཨ༌བའ༌ སྤེ༌ར༌ ཏང༌ང༌ སོང༌ ཡང༌ ཁོ༌ བུང༌བུའི༌ ཀ༌ནེ༌ བབ༌བ༌ཅིག༌ ཀེ༌ལེབ༌བི༌ ཏྲིས༌, “ངའེ༌ ཁྱོ༌རང༌ངི༌ ཕིའ༌ ཅི༌ ཅོ༌?”
JOS 15:19 ཁོའེ༌ ཟེརས༌, “ཉེ༌རང༌ངི༌ ནེ༌གེཝ༌ཝི༌ ས༌ཀྱད༌ ངའ༌ ཏངས༌ཏེ༌ ཨིན༌ནོག༌ ཏ༌ ཇུ༌ཇུ༌ ངའ༌ ཆུ༌མིག༌གི༌ ཆུའང༌ སལ༌ ལེ༌།” ཏེ༌ནེ༌ ཀེ༌ལེབ༌བི༌ ཁོའ༌ ཧེབ༌རོན༌ནི༌ ཉེ༌མོའ༌ ཡོད༌ཁན༌ སྟག༌ཡོག༌ ཉིས༌ཀའེ༌ ཆུ༌མིག༌གུན༌ ཏངས༌།
JOS 15:20 འི༌གུན༌ ཡ༌ཧུ༌དཱ༌ སྡེའེ༌ མི༌རིགས༌ རེ༌རེའ༌ ནོར༌སྐལ༌ལ༌ ཏང༌ཁན༌ནི༌ ས༌ཀྱད༌ ཨིན༌ནོག༌:
JOS 15:21 ཨི༌དོམ༌མི༌ སན༌ཚམས༌སི༌ ཉེ༌མོའ༌ ཚང༌མའེ༌སང༌ ལྷོ༌ ཆོགས༌སི༌ ཡ༌ཧུ༌དཱའེ༌ གྲོང༌ཁྱེར༌གུན༌ ནི༌ ཀབ༌ཟེའེལ༌, ཨེ༌དེར༌ དང༌ ཡ༌གུར༌,
JOS 15:22 ཀི༌ནཧ༌, དི༌མོ༌ནཧ༌, ཨ༌ད༌དཧ༌,
JOS 15:23 ཀེ༌དེཤ༌, ཧ༌ཟོར༌, ཨིཐ༌ནན༌,
JOS 15:24 ཟིཕ༌, ཏེ༌ལེམ༌, བེའ༌ལོཐ༌,
JOS 15:25 ཧ༌ཟོར༌ ཧ༌དཏ༌ཏཧ༌, ཀེ༌རི༌འོཐ༌ ཧེཟ༌རོན༌ ༼ཡང༌ན༌ ཧ༌ཟོར༌༽,
JOS 15:26 ཨ༌མམ༌, ཤེ༌མ༌, མོ༌ལ༌དཧ༌,
JOS 15:27 ཧ༌ཟར༌ གད༌དཧ༌, ཧེཤ༌མོན༌, བེཐ༌ པེ༌ལེཏ༌,
JOS 15:28 ཧ༌ཟར༌ ཤུ༌འལ༌, བེར༌ཤེ༌བ༌, བི༌ཟིའོ༌ཐི༌འཧ༌,
JOS 15:29 བའ༌ལཧ༌, ཨིམ༌, ཨེ༌ཟེམ༌,
JOS 15:30 ཨེལ༌ཀྲོ༌ལད༌, ཀེ༌སིལ༌, ཧོར༌མཧ༌,
JOS 15:31 ཟིག༌ལག༌, མད༌མན༌ནཧ༌, སན༌སན༌ནཧ༌,
JOS 15:32 ལེ༌བཱ༌འོཐ༌, ཤིལ༌ཧིམ༌, ཨའིན༌ དང༌ རིམ༌མོན༌ གྲོང༌ཁྱེར༌ གུན༌ ཨིན༌པིན༌། ལྡོམས༌ གྲོང༌ཁྱེར༌ 29 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:33 ནུབ༌ ཆོགས༌སི༌ རི༌ཡོག༌ག༌ ཡོད༌ཁན༌ནི༌ ཡ༌ཧུ༌དཱ༌ མི༌སྡེའེ༌ གྲོང༌ཁྱེར༌གུན༌ ནི༌ ཨེཤ༌ཏ༌འོལ༌, ཟོ༌རཧ༌, ཨཤ༌ནཧ༌,
JOS 15:34 ཟ༌ནོ༌འཧ༌, ཨེན༌ གན༌ནིམ༌, ཏཔ༌པུ༌འཧ༌, ཨེ༌ནམ༌,
JOS 15:35 ཡར༌མུཐ༌, ཨ༌དུལ༌ལམ༌, སོ༌ཀོཧ༌, ཨ༌ཟེ༌ཀ༌,
JOS 15:36 ཤའ༌ར༌འིམ༌, ཨ༌དི༌ཐ༌འིམ༌, གེ༌དེ༌རཧ༌ ཡ༌ གེ༌དེ༌རོ༌ཐཱ༌འིམ༌ གུན༌ ཨིན༌པིན༌། ལྡོམས༌ གྲོང༌ཁྱེར༌ 14 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:37 ཟེ༌ནན༌, ཧ༌ད༌ཤཧ༌, མིག༌དལ༌ གཱད༌,
JOS 15:38 དི༌ལེའན༌, མིཟ༌པཧ༌, ཡོཀ༌ཐེལ༌,
JOS 15:39 ལ༌ཀིཤ༌, བོཟ༌ཀཐ༌, ཨེག༌ལོན༌,
JOS 15:40 ཀབ༌བོན༌, ལཧ༌མས༌, ཀིཏ༌ལིཤ༌,
JOS 15:41 གེ༌དེ༌རོཐ༌, བེཐ༌ གྲ༌གོན༌, ནའམ༌མཧ༌ དང༌ མཀ༌ཀེ༌དཧ༌ གུན༌ནའང༌ ཨིན༌ནོག༌། ལྡོམས༌ གྲོང༌ཁྱེར༌ 16 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:42 ཏེ༌གུན༌ མ༌ཚད༌ ལིབ༌ནཧ༌, ཨེ༌ཐེར༌, ཨ༌ཤན༌,
JOS 15:43 ཨིཕ༌ཏཧ༌, ཨཤ༌ནཧ༌, ནེ༌ཟིབ༌,
JOS 15:44 ཀེའི༌ལཧ༌, ཨཀ༌ཟིབ༌ དང༌ མ༌རེ༌ཤཧ༌ གྲོང༌ཁྱེར༌ གུན༌ ཨིན༌ནོག༌། ལྡོམས༌ གྲོང༌ཁྱེར༌ 9 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:45 ཡ༌ཧུ༌དཱ༌ མི༌སྡེའེ༌ ཡུལ༌ཇོངས༌སི༌ ནང༌ང༌ ཨེཀ༌རོན༌ དང༌ ཏེ༌བོའ༌ ཐའ༌མའ༌ ཡོད༌ཁན༌ གྲོང༌ཁྱེར༌ དང༌ གྲོང༌སེབ༌གུན༌ ཨིན༌ནོག༌།
JOS 15:46 སན༌ཚམས༌པོ༌ ཨེཀ༌རོན༌ ནེ༌ ནུབ༌ ཆོགས༌ལ༌ ཁྱེད༌ཏེ༌ ཨཤ༌དོད༌དི༌ གྲོང༌ཁྱེར༌ དང༌ ཏེ༌བོའེ༌ ཉེ༌ཁོར༌རི༌ གྲོང༌སེབ༌གུན༌ ཐེས༌ཏེ༌ ཨིན༌ནོག༌།
JOS 15:47 ཨཤ༌དོད༌ དང༌ ཏེ༌བོའེ༌ ཉེ༌ཁོར༌ལ༌ ཚུགས༌ཏེ༌ ཡོད༌ཁན༌ དང༌ གྲོང༌སེབ༌གུན༌, ག༌ཟ༌ དང༌ ཏེ༌བོའེ༌ ཉེ༌ཁོར༌ལ༌ ཚུགས༌ཏེ༌ ཡོད༌ཁན༌གུན༌ དང༌ གྲོང༌སེབ༌གུན༌ ཀ༌བོ༌ ཐག༌རིང༌ ཨི༌ཇིབ༌བི༌ སན༌ཚམས༌སི༌ ཀྲོག༌པོ༌ དང༌ མེ༌གྲི༌ཀྲེ༌རིའན༌ནི༌ ཚོའེ༌ ཐའ༌མ༌ ཚག༌པ༌ ཨིན༌ནོག༌།
JOS 15:48 ཡང༌ རི༌ཡུལ༌ལི༌ ནང༌ང༌ ཡོད༌ཁན༌ ཤ༌མིར༌, ཡཏ༌ཏིར༌, སོ༌ཀོཧ༌
JOS 15:49 དན༌ནཧ༌, ཀི༌རི༌འཐ༌ སན༌ནཧ༌ ༼ཡང༌ན༌ དེ༌བིར༌༽,
JOS 15:50 ཨ༌ནབ༌, ཨེཤ༌ཏེ༌མོཧ༌, ཨ༌ནིམ༌,
JOS 15:51 གོ༌ཤེན༌, ཧོ༌ལོན༌ དང༌ གི༌ལོཧ༌ གྱལ༌ས༌གུན༌ ཨིན༌ནོག༌། ལྡོམས༌ གྲོང༌ཁྱེར༌ 11 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:52 ཨ༌རབ༌, དུ༌མཧ༌, ཨེ༌ཤན༌,
JOS 15:53 ཡ༌ནིམ༌, བེཐ༌ ཏཔ༌པུ༌འཧ༌, ཨ༌ཕེ༌ཀཧ༌,
JOS 15:54 ཧུམ༌ཏཧ༌, ཀི༌རི༌འཐ༌ ཨར༌བ༌ ༼ཡང༌ན༌ ཧེབ༌རོན༌༽ དང༌ ཟི༌འོར༌ གྲོང༌ཁྱེར༌གུན༌ ཨིན༌ནོག༌། ལྡོམས༌ གྲོང༌ཁྱེར༌ 9 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:55 འི༌གུན༌ མ༌ཚད༌ མ༌འོན༌, ཀར༌མེལ༌, ཟིཕ༌, ཡུཏ༌ཏཧ༌,
JOS 15:56 ཡེཟ༌རེ༌འེལ༌, ཡོཀ༌དེ༌འམ༌, ཟ༌ནོ༌འཧ༌,
JOS 15:57 ཀ༌འིན༌, གི༌བེའཧ༌ དང༌ ཏིམ༌ནཧ༌ གྲོང༌ཁྱེར༌གུན༌ ཨིན༌ནོག༌། ལྡོམས༌ གྲོང༌ཁྱེར༌ 10 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:58 ཧལ༌ཧུལ༌, བེཐ༌ ཟུར༌, གེ༌དོར༌,
JOS 15:59 མའ༌རཐ༌, བེཐ༌ ཨ༌ནོཐ༌ དང༌ ཨེལ༌ཀྲེ༌ཀོན༌ གྲོང༌ཁྱེར༌གུན༌ ཨིན༌ནོག༌། ལྡོམས༌ གྲོང༌ཁྱེར༌ 6 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:60 ཀི༌རི༌འཐ༌ བའལ༌ ༼ཡང༌ན༌ ཀི༌རི༌འཐ༌ ཡེ༌རིམ༌༽ དང༌ རབ༌བཧ༌ གྲོང༌ཁྱེར༌ ཉིས༌ཀོ༌ ཡང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:61 ཐང༌སྟོང༌ངི༌ ནང༌ང༌ བེཐ༌ ཨ༌ར༌བཧ༌, མིད༌དིན༌, སེ༌ཀ༌ཀཧ༌,
JOS 15:62 ནིབ༌ཤན༌, ཚའེ༌ གྱལ༌ས༌ དང༌ ཨེན༌ གི༌གྲི༌ གྲོང༌ཁྱེར༌གུན༌ ཨིན༌ནོག༌། ལྡོམས༌ གྲོང༌ཁྱེར༌ 6 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 15:63 ཨིན༌ནའང༌ ཡ༌ཧུ༌དཱ༌ མི༌སྡེའ༌ ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ དུག༌ཁན༌ནི༌ ཡེ༌བས༌པ༌གུན༌ ཕིང༌ མ༌ཉན༌། ཏེ༌བོའེ༌ཕིའ༌ ཁོང༌གུན༌ དག༌སའང༌ ཡ༌ཧུ༌དཱའེ༌ མི༌གུན༌ནི༌ ཕྲོའ༌ དུག༌ཨིན༌ ཡོད༌ཏེ༌ ཨིན༌ནོག༌།
JOS 16:1 ཡོ༌སེབ༌བི༌ པུར༌གྱུད༌གུན༌ལ༌ ཏངས༌ཁན༌ནི༌ ས༌ཀྱད༌ ཡེ༌རི༌ཀོའེ༌ ཆུ༌མིག༌ ཤར༌ ཆོགས༌ ཡོར༌དཱན༌ ལྩངས༌པོ༌ ནེ༌ གོ༌ཟུགས༌ཏེ༌ ཐང༌སྟོང༌ གྱུད༌ཏེ༌ ཀེན༌ལ༌ བེ༌ཐེལ༌ལི༌ རི༌ཡུལ༌ ཡང༌
JOS 16:2 བེ༌ཐེལ༌ ༼ཡང༌ན༌ ལུས༌༽ ནེ༌ ཨ༌ཏ༌རོཐ༌དི༌ ནང༌ང༌ ཡོད༌ཁན༌ ཨར༌ཀ༌པའེ༌ ཡུལ༌ ཚོག༌པ༌།
JOS 16:3 ཏེ༌ཀ༌ནེ༌ ནུབ༌ ཆོགས༌ ཐུར༌ལ༌ ཡཕ༌ལེཀྲ༌པའེ༌ ཡུལ༌ཇོངས༌, ཏེ༌ནེ༌ ཡོག༌གི༌ བེཐ༌ ཧོ༌རོན༌ ཏང༌ གེ༌ཟེར༌ ཚོག༌པ༌ ཡང༌ མེ༌གྲི༌ཀྲེ༌རིའན༌ནི༌ ཚོའེ༌ཀ༌ ཚར༌རད༌པིན༌།
JOS 16:4 ཏེ༌བོ༌ ཡོ༌སེབ༌བི༌ པུར༌གྱུད༌ མ༌ནས༌ས༌ དང༌ ཨེཕ༌ར༌ཡིམ༌ མི༌སྡེ༌གུན༌ནི༌ ནོར༌སྐལ༌ ཨིན༌ནོག༌།
JOS 16:5 འི༌གུན༌ ཨེཕ༌ར༌ཡིམ༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ ས༌ཀྱད༌ ཨིན༌ནོག༌, ཁོང༌གུན༌ནི༌ སན༌ཚམས༌ ཤར༌ ཆོགས༌སི༌ ཨ༌ཏ༌རོཐ༌ ཨད༌དར༌ ནེ༌ གོ༌ཟུགས༌ཏེ༌ ཀེན༌ལ༌ བེཐ༌ ཧོ༌རོན༌ ཆོགས༌ལ༌
JOS 16:6 མེ༌གྲི༌ཀྲེ༌རིའན༌ནི༌ ཚོ༌ ཚག༌པ༌, བྱང༌ ཆོགས༌སི༌ མིག༌མེ༌ཐཐ༌ནེ༌ ཤར༌ ཆོགས༌ལ༌ ཏའ༌ནཐ༌ ཤི༌ལོཧ༌ ཆོགས༌ལ༌ ཀྱོགས༌ཏེ༌ ཤར༌ ཆོགས༌སི༌ ཡ༌ནོ༌འཧ༌ ཚག༌པ༌,
JOS 16:7 ཡ༌ནོ༌འཧ༌ནེ༌ ཐུར༌ལ༌ ཨ༌ཏ༌རོཐ༌ དང༌ ནའ༌རཧ༌ ཆོགས༌ལ༌ ཡེ༌རི༌ཀོའ༌ ཐུགས༌ཏེ༌ ཡོར༌དཱན༌ ལྩངས༌པོ༌ ཚག༌པ༌,
JOS 16:8 སན༌ཚམས༌པོ༌ ཏཔ༌པུ༌འཧ༌ནེ༌ ནུབ༌ ཆོགས༌སི༌ ཀ༌ནཧ༌ ལུང༌པ༌ ཆོགས༌ལ༌ ཀྱོགས༌ཏེ༌ མེ༌གྲི༌ཀྲེ༌རིའན༌ནི༌ ཚོ༌ ཚག༌པ༌ ཨིན༌ནོག༌། ཏེ༌བོ༌ ཨེཕ༌ར༌ཡིམ༌མི༌ སྡེའེ༌ མི༌རིགས༌གུན༌ལ༌ ཏངས༌ཁན༌ནི༌ ནོར༌སྐལ༌ ཨིན༌ནོག༌།
JOS 16:9 ཏེ༌བོའེ༌ཀ༌ ནན༌མ༌ མ༌ནས༌ས༌ མི༌སྡེ༌ ནོར༌སྐལ༌ལི༌ ཕྲོའ༌ ཨེཕ༌ར༌ཡིམ༌ མི༌སྡེ༌ ཕིའ༌ ཐེན༌ཏེ༌ བོར༌ཁན༌ གྲོང༌ཁྱེར༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 16:10 ཁོང༌གུན༌ནི༌ གེ༌ཟེར༌རི༌ ནང༌ང༌ དུག༌ཁན༌ ཀེ༌ནན༌པ༌གུན༌ མ༌ ཕིངས༌། ཏེ༌བོའེ༌ཕིའ༌ ཀེ༌ནན༌པ༌གུན༌ དག༌སའང༌ ཨེཕ༌ར༌ཡིམ༌པ༌གུན༌ནི༌ ཕྲོའ༌ ཚེ༌ཡོག༌གི༌ ཚུལ༌ལ༌ དུག༌ཨིན༌ ཨིན༌ནོག༌།
JOS 17:1 ཡོ༌སེབ༌བི༌ བུ༌ཚ༌ གོ༌བུ༌ མ༌ནས༌སའེ༌ པུར༌གྱུད༌ ཕེད༌པོའ༌ ཏང༌ཁན༌ནི༌ ས༌ཀྱད༌ འི༌གུན༌ ཨིན༌ནོག༌། མ༌ནས༌སའེ༌ གོ༌བུ༌ བུ༌ཚ༌ མ༌ཀིར༌ གི༌ལེད༌པ༌གུན༌ནི༌ ཕ༌མེས༌པོ༌ ཨིན༌པིན༌། ཁོའེ༌ པུར༌གྱུད༌གུན༌ མག༌མི༌ ཐོང༌ངོམས༌ཅན༌ ཀྲག༌པོ༌ ཡོད༌ པ༌སང༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ནས༌ས༌ གི༌ལེད༌ དང༌ བ༌ཤན༌ ཁོང༌གུན༌ལ༌ ཏངས༌ཏེ༌ ཨིན༌པིན༌།
JOS 17:2 མ༌ནས༌སའེ༌ སྡེའེ༌ ནང༌ནེ༌ ལུས༌ཁན༌ ཨ༌བིའེ༌ཟེར༌, ཧེ༌ལེག༌, ཨས༌རི༌འེལ༌, ཤེ༌ཀེམ༌, ཧེ༌ཕེར༌ དང༌ ཤེ༌མི༌ད༌ མི༌རིགས༌གུན༌ལ༌ ཡོར༌དཱན༌ ལྩངས༌པོའེ༌ ནུབ༌ ཆོགས༌སི༌ ས༌ཀྱད༌པོ༌ ཏངས༌། ཁོང༌གུན༌ ཡོ༌སེབ༌བི༌ བུ༌ཚ༌ མ༌ནས༌སའེ༌ ཞན༌ བུ༌ཚ༌གུན༌ནི༌ པུར༌གྱུད༌ ཨིན༌ནོག༌།
JOS 17:3 མ༌ནས༌སའེ༌ བུ༌ཚ༌ མ༌ཀིར༌, མ༌ཀིར༌རི༌ བུ༌ཚ༌ གི༌ལེད༌, གི༌ལེད༌དི༌ བུ༌ཚ༌ ཧེ༌ཕེར༌, ཧེ༌ཕེར༌རི༌ བུ༌ཚ༌ ཟེ༌ལོ༌ཕེ༌ཧད༌ལ༌ ཕྲུ༌གུ༌ བུ༌མོ༌ མན༌ནེ༌ བུ༌ཚ༌ མེད༌པིན༌། ཁོང༌གུན༌ མཧ༌ལཧ༌, ནོ༌འཧ༌, ཧོག༌ལཧ༌, མིལ༌ཀ༌ དང༌ ཏིར༌ཟཧ༌ ཨིན༌པིན༌།
JOS 17:4 འི༌ བུ༌མོ༌ ཚང༌མ༌ བླ༌མ༌ ཨེ༌ལི༌འ༌ཟར༌, ནུན༌ནི༌ བུ༌ཚ༌ ཡོ༌ཤུའ༌ ཡང༌ ཨིས༌ར༌ཨེལ༌པའེ༌ སྤོན༌བོ༌གུན༌ ཡོད༌ས༌ སོང༌ཏེ༌ ཟེརས༌, “ཡ༌ཝའེ༌ མོ༌ཟེས༌ལ༌ ང༌ཞའ༌ ང༌ཞ༌རང༌ངི༌ མི༌སྡེའེ༌ ཕྲོའ༌ ས༌ཀྱད༌ ཏང༌ཅེས༌ལ༌ བཀའ༌ སལ༌ཏེ༌ ཨིན༌པིན༌།” ཏེ༌བོའེ༌ཕིའ༌ ཡོ༌ཤུའེ༌ ཁོང༌གུན༌ལ༌ ས༌ཀྱད༌ ཁོང༌རང༌གུན༌ནི༌ ཉེན༌གྲུང༌གུན༌ ཉམ༌པོ༌ ཏངས༌ ཀ༌ཟུག༌ ཡ༌ཝའེ༌ བཀའ༌ སལ༌ཏེ༌ ཨིན༌པིན༌།
JOS 17:5 མ༌ནས༌སའེ༌ མི༌སྡེའ༌ ཏང༌ཁན༌ནི༌ ས༌ཀྱད༌ ལྡོམས༌ ཁག༌ རྕུ༌ ཡོད༌པིན༌ ཀ༌བོའེ༌ ནང༌ང༌ ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ས༌ཀྱད༌ གི༌ལེད༌ དང༌ བ༌ཤན༌ མ༌ཐེའ༌ ཨིན༌ནོག༌
JOS 17:6 ཅིའ༌ཟེར༌ན༌ མ༌ནས༌སའེ༌ པུར༌གྱུད༌ བུ༌མོ༌གུན༌ལའང༌ བུ༌ཚ༌གུན༌ ཙོགས༌ ནོར༌སྐལ༌ ཐོབ༌། གི༌ལེད༌དི༌ ས༌ཀྱད༌གུན༌ མ༌ནས༌སའེ༌ ལུས༌ཁན༌ནི༌ པུར༌གྱུད༌གུན༌ལ༌ ཏངས༌།
JOS 17:7 མ༌ནས༌སའེ༌ སྡེ༌ ཏང༌ཁན༌ནི༌ ས༌ཀྱད༌ ཤེ༌ཀེམ༌མི༌ གྱལ༌སའེ༌ ཉེ༌མོའ༌ ཨ༌ཤེར༌ དང༌ མིག༌མེ༌ཐཐ༌ གྲོང༌ཁྱེར༌རི༌ པར༌ལ༌ ཡོད༌ཏེ༌ ཨིན༌ནོག༌ ཡང༌ སན༌ཚམས༌པོ༌ ལྷོ༌ ཆོགས༌ལ༌ ཏཔ༌པུ༌འཧའེ༌ ཆུ༌མིག༌ ཚག༌པ༌ ཨིན༌ནོག༌།
JOS 17:8 ༼ཏཔ༌པུ༌འཧའེ༌ ཉེ༌ཁོར༌རི༌ ས༌ཀྱད༌ མ༌ནས༌ས༌པ༌གུན༌ནི༌ ཨིན༌པིན༌ ཨིན༌ནའང༌ མ༌ནས༌ས༌པའེ༌ སན༌ཚམས༌སི༌ཀ༌ ཡོད༌ཁན༌ ཏཔ༌པུ༌འཧའེ༌ གྲོང༌ཁྱེར༌ ཨེཕ༌ར༌ཡིམ༌པ༌གུན༌ནི༌ ཨིན༌ནོག༌།༽
JOS 17:9 ཏཔ༌པུ༌འཧའེ༌ ཆུ༌མིག༌ ནེ༌ མ༌ནས༌སའེ༌ སན༌ཚམས༌ ཀ༌ནཧ༌ ལུང༌པ༌ གྱུད༌ཏེ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ ཨིན༌ནོག༌། ཨེཕ༌ར༌ཡིམ༌པའེ༌ ཨིན༌ཁན༌ ལུང༌པའེ༌ བྱང༌ ཆོགས༌སི༌ གྲོང༌ཁྱེར༌ མང༌པོ༌ ཞིག༌ མ༌ནས༌ས༌པའེ༌ ཡུལ༌ཇོངས༌སི༌ ནང༌ང༌ ཡོད༌པིན༌།
JOS 17:10 ལུང༌པའེ༌ ལྷོ༌ ཆོགས༌སི༌ ས༌ཀྱད༌ ཨེཕ༌ར༌ཡིམ༌པ༌གུན༌ནི༌ ཡང༌ ལུང༌པའེ༌ བྱང༌ ཆོགས༌སི༌ ས༌ཀྱད༌ མ༌ནས༌ས༌པ༌གུན༌ནི༌ ཨིན༌པིན༌། མ༌ནས༌ས༌པའེ༌ སན༌ཚམས༌ མེ༌གྲི༌ཀྲེ༌རིའན༌ནི༌ ཚོ༌, བྱང༌ ཆོགས༌ལ༌ ཨ༌ཤེར༌རི༌ སན༌ཚམས༌ དང༌ ཤར༌ ཆོགས༌ལ༌ ཨིས༌ས༌ཁར༌རི༌ སན༌ཚམས༌ ཚོག༌པ༌ ལེབ༌བད༌པིན༌།
JOS 17:11 ཨིས༌ས༌ཁར༌ དང༌ ཨ༌ཤེར༌ ཡུལ༌ཇོངས༌སི༌ ནང༌ང༌ ཡོད༌ཁན༌ བེཐ༌ ཤན༌, ཨིབ༌ལེ༌འམ༌, དོར༌ ༼གྱ༌ཚོའེ༌ ཐའ༌མ༌ ཡོད༌ཁན༌༽, ཨེན༌གྲོར༌, ཏའ༌ནག༌ དང༌ མེ༌གིད༌དོ༌ གྱལ༌ས༌གུན༌ དང༌ ཏེ༌གུན༌ནི༌ ཉེ༌ཁོར༌ལ༌ ཚུགས༌ཏེ༌ དུག༌ཁན༌གུན༌ མ༌ནས༌ས༌པ༌གུན༌ནི༌ ཨིན༌པིན༌།
JOS 17:12 ཨིན༌ནའང༌ མ༌ནས༌ས༌པ༌གུན༌ལ༌ ཏེ༌ གྲོང༌ཁྱེར༌གུན༌ནི༌ ནང༌ང༌ དུག༌ཁན༌ ཀེ༌ནན༌པ༌གུན༌ ཕིངས༌ཏེ༌ ཏེ༌བོ༌ ང༌ཡོག༌ག༌ ཁྱོང༌ མ༌ཉན༌།
JOS 17:13 སྟིང༌ནེ༌ ཨིས༌ར༌ཨེལ༌པ༌གུན༌ ཤེད༌ཅན༌ གྱུར༌ར༌ཅིག༌ ཁོང༌གུན༌ནི༌ ཀེ༌ནན༌པ༌གུན༌ ཚེ༌ཡོག༌ ཅོས༌ཏེ༌ བོརས༌ ཨིན༌ནའང༌ ཁོང༌གུན༌ ཏེ༌ ས༌ཀྱད༌ནེ༌ མ༌ ཕིངས༌།
JOS 17:14 ཡོ༌སེབ༌བི༌ པུར༌གྱུད༌གུན༌ནི༌ ཡོ༌ཤུའ༌ ཟེརས༌, “ཅི༌ཕིའ༌ ཉེ༌རང༌ངི༌ ང༌ཞ༌གུན༌ལ༌ ས༌ཀྱད༌དི༌ ཁག༌ཅིག༌ མ༌ནེ༌ མ༌ཏང༌ང༌ ཨིན༌? ཡ༌ཝའེ༌ ང༌ཞའ༌ ཅིན༌ལབས༌ སལ༌ལ༌ ཛད༌ཏེ༌ ང༌ཞ༌གུན༌ མ༌མང༌པོ༌ གྱུར༌ཏེ༌ ཨིན༌ནོག༌།”
JOS 17:15 ཡོ༌ཤུའེ༌ ལན༌ཏངས༌, “ཀལ༌ཏེས༌ ཁྱོ༌ཞའ༌ མང༌པོ༌ ཕེལ༌ཏེ༌ ཨེཕ༌ར༌ཡིམ༌མི༌ རི༌ཡུལ༌ ཁྱོ༌ཞ༌གུན༌ནི༌ ཕིའ༌ ཆུ༌ངུན༌ ཆའད༌ན༌ པེ༌རིཟ༌པ༌ དང༌ རེ༌ཕ༌པ༌ དུག༌སའེ༌ ནག༌ཚོགས༌ ཆད༌ཏེ༌ ཁྱོ༌ཞ༌རང༌ངི༌ ཕིའ༌ ས༌ཀྱད༌ ཅོས༌།”
JOS 17:16 ཡོ༌སེབ༌བི༌ པུར༌གྱུད༌གུན༌ནི༌ ལན༌ཏངས༌, “དེན༌བ༌ ཨེཕ༌ར༌ཡིམ༌མི༌ རི༌ཡུལ༌ ང༌ཞ༌གུན༌ནི༌ ཕིའ༌ ཆུ༌ངུན༌ སོང༌ཏེ༌ ཨིན༌ནོག༌ ཨིན༌ནའང༌ བེཐ༌ ཤན༌ དང༌ ཏེ༌བོའེ༌ ཉེ༌ཁོར༌ལ༌ ཚུགས༌ཏེ༌ དུག༌ཁན༌ ཡང༌ ཡེཟ༌རེ༌འེལ༌ལི༌ ལུང༌པའེ༌ ནང༌ང༌ དུག༌ཁན༌ ཀེ༌ནན༌པ༌ མག༌མི༌གུན༌ལ༌ ལྕགས༌སི༌ རྟ༌རེལ༌ ཡོད༌ པ༌སང༌ ཁོང༌གུན༌ མ༌ ཤེད༌ཅན༌ ཡོད༌ཏེ༌ ཨིན༌ནོག༌།”
JOS 17:17 ཏེ༌ནེ༌ ཡོ༌ཤུའེ༌ ཡོ༌སེབ༌བི༌ པུར༌གྱུད༌ ཨེཕ༌ར༌ཡིམ༌ དང༌ མ༌ནས༌སའེ༌ མི༌སྡེ༌གུན༌ལ༌ ཟེརས༌, “ཁྱོ༌ཞ༌གུན༌ མང༌པོ༌ དང༌ ཤེད༌ཅན༌ ཡོད༌ པ༌སང༌ ངའེ༌ ཁྱོ༌ཞའ༌ ས༌ཀྱད༌ ཁག༌ ཅིག༌གི༌ སང༌ མང༌ང༌ ཏང༌ཨིན༌།
JOS 17:18 རི༌ཡུལ༌ལི༌ ནག༌ཚོགས༌ ཁྱོ༌ཞའེ༌ ཨིན༌, ཙམ༌ཤིག༌ ཉན༌ན༌ ཆད༌ཏེ༌ ཁྱོ༌རང༌གུན༌ནི༌ ཕིའ༌ ས༌ཀྱད༌ ཅོས༌། ཀེ༌ནན༌པ༌གུན༌ལ༌ ལྕགས༌སི༌ རྟ༌རེལ༌ ཡང༌ ཤེད༌ཅན༌ ཡོད༌ནའང༌ ཁྱོ༌ཞའ༌ ཁོང༌གུན༌ ཏེ༌ ས༌ཀྱད༌ནེ༌ ཕིང༌ ཉན༌ཨིན༌།”
JOS 18:1 ཨིས༌ར༌ཨེལ༌པ༌ ཚང༌མ༌ ཤི༌ལོཧའེ༌ ནང༌ང༌ ཇོམས༌ ཡང༌ ཡ༌ཝའ༌ ཐུག༌སའེ༌ ཀུར༌བོ༌ ཏེ༌རུ༌ ཙུགས༌། ཁོང༌གུན༌ནི༌ ཁྱོང༌ཉན༌ཁན༌ནི༌ ས༌ཀྱད༌ ཚང༌མ༌ ཝང༌ངི༌ ཡོག༌ག༌ ཁྱོངས༌ཏེ༌ ཨིན༌ནའང༌
JOS 18:2 ཏ༌རོང༌ ནོར༌སྐལ༌ལི༌ ས༌ཀྱད༌ མ༌ཐོབ༌ཁན༌ མི༌སྡེ༌ རྡུན༌ ལུས༌ཏེ༌ ཡོད༌པིན༌།
JOS 18:3 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཟེརས༌, “ཡ༌ཝ༌ ཁྱོ༌ཞའེ༌ ཕ༌མེས༌པོ༌གུན༌ནི༌ དཀོན༌མཆོག༌གི༌ ཁྱོ༌ཞའ༌ སལ༌ཁན༌ནི༌ ས༌ཀྱད༌པོ༌ ང༌ཡོག༌ག༌ མ༌ ལེན༌ན༌ ཙམ༌ཞིག༌ སྲུངས༌ཏེ༌ དུག༌ཅེན༌?
JOS 18:4 མི༌སྡེ༌ རེ༌རེ༌ནེ༌ མི༌ སུམ༌སུམ༌ ལྡོམ༌, ཡང༌ ངའེ༌ ཁོང༌གུན༌ ལུས༌ཏེ༌ ཡོད༌ཁན༌ ས༌ཀྱད༌དི༌ སྟ༌སྟོག༌ ཅོ༌ཅེས༌ལ༌ ཀལ༌ཨིན༌ ཡང༌ ཁོང༌གུན༌ནི༌ ཁོང༌རང༌གུན༌ལ༌ ནོར༌སྐལ༌ལ༌ བགོས༌ཁན༌ནི༌ ས༌ཀྱད༌དི༌ སན༌ཚམས༌སི༌ ནག༌ཤ༌ ཅོས༌ཏེ༌ ངའེ༌ཀ༌ ཁྱོང༌གོས༌།
JOS 18:5 ཁྱོ༌ཞ༌གུན༌ནི༌ ས༌ཀྱད༌པོ༌ པོ༌ རྡུན༌ནི༌ ནང༌ང༌ བགོ༌གོས༌ ཀ༌བོའེ༌ ནང༌ང༌ ལྷོ༌ ཆོགས༌ལ༌ ཡོད༌ཁན༌ ཡ༌ཧུ༌དཱའེ༌ ས༌ཀྱད༌ ཡང༌ བྱང༌ ཆོགས༌ལ༌ ཡོད༌ཁན༌ ཡོ༌སེབ༌བི༌ ས༌ཀྱད༌ ཐེ༌མ༌གོས༌།
JOS 18:6 ཁྱོ༌ཞའེ༌ ས༌ཀྱད༌ པོ༌ རྡུན༌ནི༌ ནང༌ང༌ བགོས༌ཁན༌ནི༌ ནག༌ཤ༌ ངའ༌ ཁྱོང༌ ཏེ༌ནེ༌ ངའེ༌ ཡ༌ཝ༌ ང༌དང༌གུན༌ནི༌ དཀོན༌མཆོག༌གི༌ སྐུན༌དུན༌ལ༌ ཏག༌རིལ༌ ཏངས༌ཏེ༌ སྡེ༌ རེ༌རེའ༌ ཐོབ༌ཁན༌ནི༌ ས༌ཀྱད༌དི༌ ཁག༌པོ༌ ཏང༌ཨིན༌།
JOS 18:7 “ལི༌ཝི༌པ༌གུན༌ལ༌ ས༌ཀྱད༌ ནོར༌སྐལ༌ལ༌ མི༌ཐོབ༌ ཅིའ༌ཟེར༌ན༌ ཁོང༌གུན༌ནི༌ བླ༌མའེ༌ ཚུལ༌ལ༌ ཡ༌ཝའ༌ ཞབས༌ཏོག༌ ཞུ༌ཅེས༌པོ༌ ཁོང༌གུན༌ནི༌ ནོར༌སྐལ༌ ཨིན༌ནོག༌། ཡང༌ གཱད༌ དང༌ རུ༌བེན༌ནི༌ མི༌སྡེ༌གུན༌ ཡང༌ མ༌ནས༌ས༌ མི༌སྡེ༌ ཕེད༌པོའ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ནོར༌སྐལ༌ལི༌ ས༌ཀྱད༌ ཐོབ༌ཚར༌ཏེ༌ ཨིན༌ནོག༌, ཀ༌བོ༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཁོང༌གུན༌ལ༌ སལས༌།”
JOS 18:8 ཏེ༌ནེ༌ ས༌ཀྱད༌དི༌ ནག༌ཤ༌ ཅོའ༌ལ༌ མི༌གུན༌ ཆ༌ཅེས༌ གོ༌ཟུག༌ག༌ཅིག༌ ཡོ༌ཤུའེ༌ ཁོང༌གུན༌ལ༌ ཟེརས༌, “སོང༌ ཡང༌ ས༌ཀྱད༌དི༌ སྟ༌སྟོག༌ ཅོས༌ ཡང༌ ནག༌ཤ༌ ཅོས༌ཏེ༌ ཏེ༌བོའེ༌ སྐོར༌ལ༌ བྲིས༌ ཡང༌ ལོགས༌ཏེ༌ ཡོང༌ང༌ཅིག༌ ཏེ༌གུན༌ ངའེ༌ཀ༌ ཁྱོང༌། ངའེ༌ འི༌རུ༌ ཤི༌ལོཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཏག༌རིལ༌ ཏངས༌ཏེ༌ ཏེ༌གུན༌ བགོས༌ཏེ༌ ཏང༌ཨིན༌།”
JOS 18:9 མི༌གུན༌ སོང༌ཏེ༌ ཡུལ༌ གང༌པོ༌ ལྟས༌ ཡང༌ ཤོག༌རིལ༌ལི༌ཀ༌ ཏེ༌བོ༌ ཁག༌ རྡུན༌ནི༌ ནང༌ང༌ བགོས༌ཁན༌ནི༌ ནག༌ཤ༌ ཅོས༌ཏེ༌ གྲོང༌ཁྱེར༌ རེ༌རེ༌ མིང༌གུན༌ བྲིས༌, ཡང༌ ཡོ༌ཤུའ༌ ཡོད༌ས༌ ཤི༌ལོཧ༌ ལོགས༌ཏེ༌ སོང༌།
JOS 18:10 ཏེ༌ནེ༌ ཤི༌ལོཧའེ༌ ནང༌ང༌ ཡོ༌ཤུའེ༌ ཡ༌ཝའེ༌ སྐུན༌དུན༌ལ༌ ཏག༌རིལ༌ ཏངས༌ཏེ༌ སྡེ༌ རེ༌རེའ༌ ཐོབ༌ཁན༌ནི༌ ས༌ཀྱད༌དི༌ ཁག༌པོ༌ ཏངས༌།
JOS 18:11 ས༌ཀྱད༌དི༌ ཁག༌ ཏང༌པོ༌ བེན༌ཡཱ༌མིན༌ནི༌ སྡེའེ༌ མི༌རིགས༌གུན༌ལ༌ ཐོབ༌། ཡ༌ཧུ༌དཱ༌ དང༌ ཡོ༌སེབ༌བི༌ སྡེའ༌ ཏང༌ཁན༌ནི༌ ས༌ཀྱད༌དི༌ པར༌ལ༌ ཁོང༌གུན༌ནི༌ ཁག༌པོ༌ ཡོད༌པིན༌།
JOS 18:12 བེན༌ཡཱ༌མིན༌པའེ༌ བྱང༌ ཆོགས༌སི༌ སན༌ཚམས༌པོ༌ ཡོར༌དཱན༌ ལྩངས༌པོ༌ནེ༌ གོ༌ཟུགས༌ཏེ༌ བྱང༌ ཆོགས༌སི༌ ཡེ༌རི༌ཀོའེ༌ ཁྲེད༌ གྱུད༌ཏེ༌ ནུབ༌ ཆོགས༌སི༌ རི༌ ཡུལ༌གུན༌ དང༌ བེཐ༌ ཨེ༌ཝན༌ནི༌ ཐང༌སྟོང༌ ཚག༌པ༌།
JOS 18:13 ཏེ༌ཀ༌ནེ༌ ལྷོ༌ ཆོགས༌ལ༌ ལུཟ༌སི༌ ཁྲེད༌ ༼ཡང༌ན༌ བེ༌ཐེལ༌༽ གྱུད༌ཏེ༌ ཐུར༌ལ༌ རི༌ཀ༌ ཡོད༌ཁན༌ ཨ༌ཏ༌རོཐ༌ ཨད༌དར༌ ཚག༌པ༌ ལེབ༌, ཀ༌བོ༌ ཡོག༌གི༌ བེཐ༌ ཧོ༌རོན༌ནི༌ ལྷོ༌ ཆོགས༌ལ༌ ཨིན༌ནོག༌།
JOS 18:14 ཏེ༌ནེ༌ སན༌ཚམས༌པོ༌ ཀྱོགས༌ཏེ༌ ལྷོ༌ ཆོགས༌ལ༌, བེཐ༌ ཧོ༌རོན༌ ཐོང༌ཁན༌ནི༌ རི༌ ལྷོ༌ ཆོགས༌སི༌ ཟུར༌ གྱུད༌ཏེ༌ ཡ༌ཧུ༌དཱའེ༌ སྡེའེ༌ ཨིན༌ཁན༌ ཀི༌རི༌འཐ༌ བའལ༌ ༼ཡང༌ན༌ ཀི༌རི༌འཐ༌ ཡེ༌རིམ༌༽ གྲོང༌ཁྱེར༌ ཚག༌པ༌ ལེབ༌། འི༌གུན༌ ནུབ༌ ཆོགས༌སི༌ སན༌ཚམས༌ ཨིན༌ནོག༌།
JOS 18:15 ལྷོ༌ ཆོགས༌སི༌ སན༌ཚམས༌, ནུབ༌ ཆོགས༌སི༌ ཀི༌རི༌འཐ༌ ཡེ༌རིམ༌ནེ༌ གོ༌ཟུགས༌ཏེ༌ ནེཕ༌ཏོ༌འཧའེ༌ ཆུ༌མིག༌ ཚོག༌པ༌,
JOS 18:16 ཡང༌ ཐུར༌ལ༌ རི༌ཡོག༌, བེན༌ ཧིན༌ནོམ༌མི༌ ལུང༌པ༌ ལྟས༌ཏེ༌ རེ༌ཕ༌འིམ༌མི༌ ལུང༌པའེ༌ བྱང༌ ཆོགས༌ ཚག༌པ༌, ཏེ༌ནེ༌ ཐུར༌ལ༌ ཧིན༌ནོམ༌མི༌ ལུང༌པ༌ ཆོགས༌ལ༌, ཡེ༌བས༌པ༌གུན༌ནི༌ གྱལ༌སའེ༌ ལྷོ༌ ཆོགས༌སི༌ ཁྲེད༌ གྱུད༌ཏེ༌ ཨེན༌ རོ༌གེལ༌ ཚག༌པ༌ ལེབ༌།
JOS 18:17 ཏེ༌ཀ༌ནེ༌ ཨེན༌ ཤེ༌མེཤ༌, བྱང༌ ཆོགས༌ལ༌ ཀྱོགས༌ཏེ༌ གེ༌ལི༌ལོཐ༌ལ༌ ལེབ༌ ཀ༌བོ༌ ཨ༌དུམ༌མིམ༌ ལའེ༌ འ༌ངོ༌ ཆོགས༌ལ༌ ཨིན༌ནོག༌། ཏེ༌ནེ༌ ཏེ༌བོ༌ ཐུར༌ལ༌ རུ༌བེན༌ནི༌ བུ༌ཚ༌ བོ༌ཧན༌ནི༌ རྡོའ༌ ཚོག༌པ༌ ལེབ༌།
JOS 18:18 ཏེ༌ཀ༌ནེ༌ ཏེ༌བོ༌ བེཐ༌ ཨ༌ར༌བཧའེ༌ བྱང༌ ཆོགས༌སི༌ ཁྲེད༌ གྱུད༌ཏེ༌ ཐུར༌ལ༌ ལུང༌པའེ༌ ནང༌ང༌,
JOS 18:19 ཡང༌ བེཐ༌ ཧོག༌ལཧའེ༌ བྱང༌ ཆོགས༌སི༌ ཁྲེད༌ གྱུད༌ཏེ༌ ཚོ༌རུལ༌ལི༌ བྱང༌ ཆོགས༌སི༌ ཐའ༌མ༌ ཚག༌པ༌ ལེབ༌ ཀ༌བོ༌ ལྷོ༌ ཆོགས༌སི༌ ཡོར༌དཱན༌ ལྩངས༌པོའེ༌ ཁའ༌ ཨིན༌ནོག༌། ཏེ༌གུན༌ ལྷོ༌ ཆོགས༌སི༌ སན༌ཚམས༌གུན༌ ཨིན༌ནོག༌།
JOS 18:20 ཤར༌ ཆོགས༌སི༌ སན༌ཚམས༌ ཡོར༌དཱན༌ ལྩངས༌པོ༌ ཨིན༌ནོག༌། ཏེ༌གུན༌ བེན༌ཡཱ༌མིན༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ ས༌ཀྱད༌དི༌ སན༌ཚམས༌གུན༌ ཨིན༌ནོག༌།
JOS 18:21 བེན༌ཡཱ༌མིན༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ གྲོང༌ཁྱེར༌གུན༌ འི༌གུན༌ ཨིན༌། ཡེ༌རི༌ཀོ༌, བེཐ༌ ཧོག༌ལཧ༌, ཨེ༌མེག༌ ཀེ༌ཟིཟ༌,
JOS 18:22 བེཐ༌ ཨ༌ར༌བཧ༌, ཟེ༌མ༌ར༌འིམ༌, བེ༌ཐེལ༌,
JOS 18:23 ཨཝ༌ཝིམ༌, པ༌རཧ༌, ཨོཕ༌རཧ༌,
JOS 18:24 ཀེ༌ཕར༌ ཨམ༌མོ༌ནི༌, ཨོཕ༌ནི༌ དང༌ གེ༌བ༌, གྲོང༌ཁྱེར༌ རྕུག༌ཉིས༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 18:25 ཡང༌ གི༌བེ༌འོན༌, ར༌མཧ༌, བེ༌རོཐ༌,
JOS 18:26 མིཟ༌པཧ༌, ཀེ༌ཕི༌རཧ༌, མོ༌ཟཧ༌,
JOS 18:27 རེ༌ཀེམ༌, འིར༌པེལ༌, ཏ༌ར༌ལཧ༌,
JOS 18:28 ཟི༌ལཧ༌, ཧཱའེ༌ལེབ༌, ཡེ༌བས༌པའེ༌ གྱལ༌ས༌ ༼ཡང༌ན༌ ཡེ༌རུ༌ཤ༌ལེམ༌༽, གི༌བེའཧ༌ དང༌ ཀི༌རི༌འཐ༌, གྲོང༌ཁྱེར༌ ཅུབ༌ཞི༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌། ཏེ༌གུན༌ བེན༌ཡཱ༌མིན༌ནི༌ སྡེའེ༌ མི༌རིགས༌གུན༌ནི༌ ནོར༌སྐལ༌གུན༌ ཨིན༌ནོག༌།
JOS 19:1 ཏག༌རིལ༌ གྱུད༌ཏེ༌ ལྡམ༌མ༌ ཛད༌ཁན༌ནི༌ ས༌ཀྱད༌དི༌ ཁག༌ ཉིས༌པ༌ སི༌མི༌འོན༌ནི༌ སྡེའེ༌ མི༌རིགས༌གུན༌ལ༌ ཐོབ༌། ཁོང༌གུན༌ནི༌ ས༌ཀྱད༌ ཡ༌ཧུ༌དཱའེ༌ མི༌སྡེའེ༌ ས༌ཀྱད༌གུན༌ནི༌ སྐོར༌ཏེ༌ ཡོད༌པིན༌།
JOS 19:2 སི༌མི༌འོན༌ནི༌ མི༌སྡེའེ༌ ས༌ཀྱད༌གུན༌ ནི༌ བེར༌ཤེ༌བ༌ ༼ཡང༌ན༌ ཤེ༌བ༌༽, མོ༌ལ༌དཧ༌,
JOS 19:3 ཧ༌ཟར༌ ཤུ༌འལ༌, བ༌ལཧ༌, ཨེ༌ཟེམ༌,
JOS 19:4 ཨེལ༌ཀྲོ༌ལད༌, བེ༌ཐུལ༌, ཧོར༌མཧ༌,
JOS 19:5 ཟིག༌ལག༌, བེཐ༌ མར༌ཀ༌བོཐ༌, ཧ༌ཟར༌ སུ༌སཧ༌,
JOS 19:6 བེཐ༌ ལེ༌བཱ༌འོཐ༌ དང༌ ཤ༌རུ༌ཧེན༌, གྲོང༌ཁྱེར༌ 13 དང༌ ཏེ༌གུན༌ནི༌ ཉེ༌ཁོར༌ལ༌ ཡོད༌ཁན༌ནི༌ གྲོང༌སེབ༌གུན༌ ཨིན༌ནོག༌།
JOS 19:7 ཨའིན༌, རིམ༌མོན༌, ཨེ༌ཐེར༌ དང༌ ཨ༌ཤན༌། གྲོང༌ཁྱེར༌ ཞི༌ དང༌ ཏེ༌གུན༌ནི༌ གྲོང༌སེབ༌གུན༌།
JOS 19:8 ཡང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌, ཐག༌རིང༌ ལྷོ༌ ཆོགས༌སི༌ བའ༌ལཐ༌ བེར༌ ཚག༌པ༌ ཨིན༌ནོག༌ ཀ༌བོའ༌ ནེ༌གེཝ༌ཝི༌ ར༌མཧ༌ཧའང༌ ཟེར༌ར༌ནོག༌། ཏེ༌གུན༌ སི༌མི༌འོན༌ནི༌ སྡེའེ༌ མི༌རིགས༌གུན༌ལ༌ ཐོབ༌ཁན༌ནི༌ ས༌ཀྱད༌གུན༌ ཨིན༌ནོག༌།
JOS 19:9 ཁོང༌གུན༌ལ༌ ཐོབ༌ཁན༌ནི༌ ས༌ཀྱད༌གུན༌ ཡ༌ཧུ༌དཱའེ༌ མི༌སྡེའ༌ ཏངས༌ཁན༌ནི༌ ས༌ཀྱད༌དི༌ ཕྲོའ༌ ཡོད༌ཏེ༌ ཨིན༌ནོག༌ ཅིའ༌ཟེར༌ན༌ ཡ༌ཧུ༌དཱའེ༌ མི༌སྡེའ༌ ཏང༌ཁན༌ནི༌ ཁག༌པོ༌ ཁོང༌གུན༌ནི༌ སྒོས༌དོམ༌མི༌ སང༌ མང༌ང༌ ཡོད༌པིན༌། ཏེ༌བོའེ༌ཕིའ༌ སི༌མི༌འོན༌ནི༌ སྡེའེ༌ མི༌རིགས༌གུན༌ལ༌ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ནེ༌ ས༌ཀྱད༌དི༌ ནོར༌སྐལ༌ ཐོབས༌ཏེ༌ ཨིན༌ནོག༌།
JOS 19:10 ཏག༌རིལ༌ གྱུད༌ཏེ༌ ལྡམ༌མ༌ ཛད༌ཁན༌ནི༌ ས༌ཀྱད༌དི༌ ཁག༌ སུམ༌པ༌བོ༌ ཟེ༌བུ༌ལོན༌ནི༌ སྡེའེ༌ མི༌རིགས༌གུན༌ལ༌ ཐོབ༌། ཟེ༌བུ༌ལོན༌ནི༌ སྡེའེ༌ སན༌ཚམས༌ ས༌རིད༌ གྱལ༌ས༌ ཚག༌པ༌ ལེབ༌བད༌པིན༌།
JOS 19:11 ནུབ༌ ཆོགས༌ལ༌ མ༌ར༌ལཧ༌ གྱལ༌ས༌ནེ༌ དབ༌བེ༌ཤེཐ༌ གྱལ༌ས༌ ཐུགས༌ཏེ༌ ཡོཀ༌ནེའམ༌མི༌ ཉེ༌མོའ༌ ཡོད༌ཁན༌ ལུང༌པ༌ ཚོག༌པ༌།
JOS 19:12 ས༌རིད༌ནེ༌ ཤར༌ ཆོགས༌ ཉི༌མ༌ ཤར༌སའ༌ ཀྱོགས༌ཏེ༌ ཀིས༌ལོཐ༌ ཏྲ༌བོར༌རི༌ ཡུལ༌ཇོངས༌ ཚག༌པ༌, ཏེ༌ཀ༌ནེ༌ ད༌བེ༌རཐ༌ ཡང༌ ཡ༌ཕིའ༌ ཚོག༌པ༌ ལེབ༌།
JOS 19:13 ཏེ༌ནེ༌ ཏེ༌བོ༌ ཤར༌ ཆོགས༌ལ༌ གཱད༌ ཧེ༌ཕེར༌ དང༌ ཨེཐ༌ ཀ༌ཟིན༌ གྱུད༌ཏེ༌ རིམ༌མོན༌ ཚག༌པ༌ ཡང༌ ནེའཧ༌ ཆོགས༌ལ༌ ཀྱོགས༌།
JOS 19:14 ཁོང༌གུན༌ནི༌ བྱང༌ ཆོགས༌སི༌ སན༌ཚམས༌པོ༌ ཧན༌ན༌ཐོན༌ གྱུད༌ཏེ༌ ཨིཕ༌ཏཧ༌ ཨེལ༌ ལུང༌པ༌ ཚོག༌པ༌ ལེབ༌།
JOS 19:15 ཀཏ༌ཏཐ༌, ན༌ཧ༌ལལ༌, ཤིམ༌རོན༌, ཨི༌ད༌ལཧ༌ དང༌ བེད༌ལེ༌ཧེམ༌, གྲོང༌ཁྱེར༌ 12 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཏེ༌ནང༌ང༌ ཐེས༌ཏེ༌ ཨིན༌ནོག༌།
JOS 19:16 ཟེ༌བུ༌ལོན༌ནི༌ སྡེའེ༌ མི༌རིགས༌གུན༌ལ༌ ཐོབ༌ཁན༌ནི༌ ས༌ཀྱད༌དི༌ ནང༌ང༌ ཏེ༌ གྲོང༌ཁྱེར༌གུན༌ དང༌ ཏེ༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 19:17 ཏག༌རིལ༌ གྱུད༌ཏེ༌ ལྡམ༌མ༌ ཛད༌ཁན༌ནི༌ ས༌ཀྱད༌དི༌ ཁག༌ ཞི༌པ༌བོ༌ ཨིས༌ས༌ཁར༌རི༌ སྡེའེ༌ མི༌རིགས༌གུན༌ལ༌ ཐོབ༌།
JOS 19:18 ཁོང༌གུན༌ནི༌ ཡུལ༌ཇོངས༌སི༌ ནང༌ང༌ འི༌ གྲོང༌ཁྱེར༌གུན༌ ཨིན༌ནོག༌, ཡེཟ༌རེ༌འེལ༌, ཀེ༌སུལ༌ལོཐ༌, ཤུ༌ནེམ༌,
JOS 19:19 ཧ༌ཕ༌རཱའིམ༌, ཤི༌འོན༌, ཨ༌ན༌ཧ༌རཐ༌,
JOS 19:20 རབ༌བིཐ༌, ཀི༌ཤི༌འོན༌, ཨེ༌བེཟ༌,
JOS 19:21 རེ༌མེཐ༌, ཨེན༌ གན༌ནིམ༌, ཨེན༌ ཧད༌དཧ༌ དང༌ བེཐ༌ པཟ༌ཟེཟ༌།
JOS 19:22 སན༌ཚམས༌པོ༌ ཏྲ༌བོར༌, ཤ༌ཧ༌ཟུ༌མཧ༌ དང༌ བེཐ༌ ཤེ༌མེཤ༌ གུན༌ལ༌ ཐུགས༌ཏེ༌ ཡོར༌དཱན༌ ལྩངས༌པོའེ༌ཀ༌ ཚར༌རད༌པིན༌། གྲོང༌ཁྱེར༌ 16 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 19:23 ཏེ༌ གྲོང༌ཁྱེར༌གུན༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིས༌ས༌ཁར༌རི༌ སྡེའེ༌ མི༌རིགས༌གུན༌ལ༌ ཐོབ༌ཁན༌ནི༌ ནོར༌སྐལ༌ ཨིན༌ནོག༌།
JOS 19:24 ཏག༌རིལ༌ གྱུད༌ཏེ༌ ལྡམ༌མ༌ ཛད༌ཁན༌ནི༌ ས༌ཀྱད༌དི༌ ཁག༌ ལྔ༌པ༌བོ༌ ཨ༌ཤེར༌རི༌ སྡེའེ༌ མི༌རིགས༌གུན༌ལ༌ ཐོབ༌།
JOS 19:25 ཁོང༌གུན༌ནི༌ ཡུལ༌ཇོངས༌སི༌ ནང༌ང༌ འི༌ གྲོང༌ཁྱེར༌གུན༌ ཨིན༌ནོག༌། ཧེལ༌ཀཐ༌, ཧ༌ལི༌, བེ༌ཏེན༌, ཨཀ༌ཤཕ༌,
JOS 19:26 ཨལ༌ལམ༌མེ༌ལེཆ༌, ཨ༌མད༌ དང༌ མི༌ཤལ༌། ནུབ༌ ཆོགས༌སི༌ སན༌ཚམས༌ ཀར༌མེལ༌ དང༌ ཤི༌ཧོར༌ ལིབ༌ནཐ༌ལ༌ ཐུགས༌ཏེ༌
JOS 19:27 ཤར༌ ཆོགས༌ལ༌ བེཐ༌ གྲ༌གོན༌ ཆོགས༌ལ༌ ཀྱོགས༌ཏེ༌ ཐག༌རིང༌ ཨིཕ༌ཏཧ༌ ཨེལ༌ལི༌ ལུང༌པའེ༌ ཟེ༌བུ༌ལོན༌ ཚོག༌པ༌ ལེབ༌། ཏེ༌ཀ༌ནེ༌ ཀ༌བུལ༌, ཡོ༌མ༌ ཆོགས༌ལ༌ བོར༌ཏེ༌ བྱང༌ ཆོགས༌ལ༌ བེཐ༌ ཨེ༌མེག༌ དང༌ ནེའི༌ཨེལ༌ ཚོག༌པ༌།
JOS 19:28 ཡང༌ ཨབ༌གྲོན༌, རེ༌ཧོབ༌, ཧམ༌མོན༌, ཀ༌ནཧ༌ ཡང༌ ཐག༌རིང༌ ཁག༌ཅན༌ གྱལ༌ས༌ སི༌དོན༌ ཚོག༌པ༌།
JOS 19:29 ཏེ༌ནེ༌ ར༌མཧ༌ ཆོགས༌ལ༌ ཀྱོགས༌ཏེ༌ གྱང༌སྐོར༌ ཐོན༌པོ༌ ཏང༌ཁན༌ནི༌ ཏཱ༌ཡིར༌རི༌ གྱལ༌ས༌ ཚག༌པ༌ ལེབ༌ཏེ༌ ཧོ༌སཧ༌ ཆོགས༌ལ༌ ཀྱོགས༌ ཡང༌ མེ༌གྲི༌ཀྲེ༌རིའན༌ནི༌ ཚོ༌ ཡོད༌ས༌ ལེབ༌། ཁོང༌གུན༌ནི༌ ཡུལ༌ཇོངས༌སི༌ ནང༌ང༌ མ༌ཧ༌བལ༌, ཨཀ༌ཟིབ༌,
JOS 19:30 ཨུམ༌མཧ༌, ཨ༌ཕེཀ༌ དང༌ རེ༌ཧོབ༌ གྲོང༌ཁྱེར༌གུན༌ ཨིན༌ནོག༌། གྲོང༌ཁྱེར༌ 22 དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌།
JOS 19:31 ཨ༌ཤེར༌རི༌ སྡེའེ༌ མི༌རིགས༌གུན༌ལ༌ ཐོབ༌ཁན༌ནི༌ ནོར༌སྐལ༌ལི༌ ནང༌ང༌ ཏེ༌ གྲོང༌ཁྱེར༌གུན༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 19:32 ཏག༌རིལ༌ གྱུད༌ཏེ༌ ལྡམ༌མ༌ ཛད༌ཁན༌ནི༌ ས༌ཀྱད༌དི༌ ཁག༌ དྲུག༌པ༌བོ༌ ནཕ༌ཐལ༌ལི༌ སྡེའེ༌ མི༌རིགས༌གུན༌ལ༌ ཐོབ༌།
JOS 19:33 ཁོང༌གུན༌ནི༌ སན༌ཚམས༌པོ༌ ཧེ༌ལེཕ༌ཕི༌ ཉེ༌མོའ༌ ཟའ༌ནན༌ནིམ༌མི༌ ནང༌ང༌ ཡོད༌ཁན༌ འོག༌གི༌ ལྕང༌མ༌ནེ༌ ཨ༌ད༌མི༌ ནེ༌ཀེབ༌ དང༌ ཡབ༌ནེལ༌ གྱུད༌ཏེ༌ ལཀ༌ཀུམ༌ ཚོག༌པ༌ ལེབ༌ཏེ༌ ཡོར༌དཱན༌ནི༌ ལྩངས༌པོའེ༌ཀ༌ ཚར༌རད༌པིན༌།
JOS 19:34 ནུབ༌ ཆོགས༌སི༌ སན༌ཚམས༌ ཨཟ༌ནོཐ༌ ཏྲ༌བོར༌ནེ༌ ཧུཀ༌ཀོཀ༌ ཚག༌པ༌ ཡང༌ ལྷོ༌ ཆོགས༌ལ༌ ཟེ༌བུ༌ལོན༌ནི༌ སན༌ཚམས༌, ནུབ༌ ཆོགས༌ལ༌ ཨ༌ཤེར༌རི༌ སན༌ཚམས༌ དང༌ ཤར༌ ཆོགས༌ལ༌ ཡོར༌དཱན༌ ལྩངས༌པོའ༌ ཐུག༌གད༌པིན༌།
JOS 19:35 གྱང༌སྐོར༌ ཐོན༌པོའེ༌ ནང༌ང༌ ཡོད༌ཁན༌ གྱལ༌ས༌གུན༌ ནི༌ ཟིད༌དིམ༌, ཟེར༌, ཧམ༌མཐ༌, རཀ༌ཀཐ༌, ཀིན༌ནེ༌རེཐ༌,
JOS 19:36 ཨད༌མཧ༌, ར༌མཧ༌, ཧ༌ཟོར༌,
JOS 19:37 ཀེ༌དེཤ༌, ཨེད༌རེའི༌, ཨེན༌ ཧ༌ཟོར༌,
JOS 19:38 ཨི༌རོན༌, མིག༌དལ༌ ཨེལ༌, ཧོ༌རེམ༌, བེཐ༌ ཨ༌ནཐ༌ དང༌ བེཐ༌ ཤེ༌མེཤ༌ གུན༌ ཨིན༌ནོག༌། གྲོང༌ཁྱེར༌ 19 དང༌ ཏེ༌གུན༌ནི༌ ཉེ༌ཁོར༌ལ༌ ཡོད༌ཁན༌ནི༌ གྲོང༌སེབ༌གུན༌།
JOS 19:39 ནཕ༌ཐལ༌ལི༌ སྡེའེ༌ མི༌རིགས༌གུན༌ལ༌ ཏངས༌ཁན༌ནི༌ ས༌ཀྱད༌དི༌ ནང༌ང༌ ཏེ༌ གྲོང༌ཁྱེར༌གུན༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 19:40 ཏག༌རིལ༌ གྱུད༌ཏེ༌ ལྡམ༌མ༌ ཛད༌ཁན༌ནི༌ ས༌ཀྱད༌དི༌ ཁག༌ རྡུན༌པ༌བོ༌ དཱན༌ནི༌ སྡེའེ༌ མི༌རིགས༌གུན༌ལ༌ ཐོབ༌།
JOS 19:41 ཁོང༌གུན༌ལ༌ ཏངས༌ཁན༌ནི༌ ས༌ཀྱད༌དི༌ ནང༌ང༌ འི༌ གྲོང༌ཁྱེར༌གུན༌ ཨིན༌ནོག༌, ཟོ༌རཧ༌, ཨེཤ༌ཏ༌འོལ༌, ཨིར༌ ཤེ༌མེཤ༌,
JOS 19:42 ཤའ༌ལབ༌བིན༌, ཨའི༌ཡ༌ལོན༌, ཨིཐ༌ལཧ༌,
JOS 19:43 ཨེ༌ལོན༌, ཏིམ༌ནཧ༌, ཨེཀ༌རོན༌,
JOS 19:44 ཨེལ༌ཏེ༌ཀེཧ༌, གིབ༌བེ༌ཐོན༌, བའ༌ལཐ༌,
JOS 19:45 ཡེ༌ཧུད༌, བེ༌ནེ༌ བེ༌རཀ༌, གཱད༌ རིམ༌མོན༌,
JOS 19:46 མེ༌ཡར༌ཀོན༌, རཀ༌ཀོན༌ དང༌ ཡོཔ༌པའེ༌ འ༌ངོ༌ ཆོགས༌ལ༌ ཡོད༌ཁན༌ནི༌ ཡུལ༌གུན༌ ཨིན༌ནོག༌།
JOS 19:47 ཨིན༌ནའང༌ དཱན༌ནི༌ མི༌སྡེའ༌ ཏེ༌ ས༌ཀྱད༌ ལེན༌ཅེས༌ལ༌ ཀགས༌པོ༌ སོང༌ ཏེ༌བོའེ༌ཕིའ༌ ཁོང༌གུན༌ནི༌ ལེ༌ཤེམ༌མི༌ གྲོང༌ཁྱེར༌ལ༌ སྤུང༌གོལ༌ ཅོས༌ ཡང༌ ཏེ༌ ནང༌ང༌ དུག༌ཁན༌ ཚང༌མ༌ སད༌ཏེ༌ ང༌ཡོག༌ག༌ ཁྱོངས༌ཏེ༌ ཏེ༌ ནས༌སའེ༌ ནང༌ང༌ ཚུགས༌ཏེ༌ དུགས༌ ཡང༌ ཁོང༌རང༌གུན༌ནི༌ ཕ༌མེས༌པོའེ༌ མིང༌ངི༌ གྱབ༌ནེ༌ ཏེ༌བོའ༌ དཱན༌ མིང༌ང༌ ཏགས༌།
JOS 19:48 དཱན༌ནི༌ སྡེའེ༌ མི༌རིགས༌གུན༌ལ༌ ཏང༌ཁན༌ནི༌ ནོར༌སྐལ༌ལི༌ ནང༌ང༌ ཏེ༌ གྲོང༌ཁྱེར༌གུན༌ དང༌ ཏེ༌གུན༌ནི༌ ཉེ༌ཁོར༌རི༌ གྲོང༌སེབ༌གུན༌ ཨིན༌ནོག༌།
JOS 19:49 མི༌སྡེ༌གུན༌ནི༌ པར༌ལ༌ ས༌ཀྱད༌ གང༌པོ༌ བགོ༌ ཚར༌ཏེ༌ སྟིང༌ནེ༌, ཨིས༌ར༌ཨེལ༌པ༌གུན༌ནི༌ ནུན༌ནི༌ བུ༌ཚ༌ ཡོ༌ཤུའ༌ ཁོང༌རང༌གུན༌ནི༌ ཕྲོའ༌ ས༌ཀྱད༌དི༌ ནོར༌སྐལ༌ ཏངས༌།
JOS 19:50 ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཁོང༌གུན༌ནི༌ ཡོ༌ཤུའ༌ ཁོའེ༌ ཏོང༌ ཟེར༌ཁན༌ནི༌ གྲོང༌ཁྱེར༌ ཏངས༌། ཡོ༌ཤུའེ༌ ཨེཕ༌ར༌ཡིམ༌མི༌ རི༌ཡུལ༌ ཏིམ༌ནཐ༌ སེ༌རཧ༌ ལྡམས༌ ཡང༌ གྲོང༌ཁྱེར༌བོ༌ ཡང༌སྐྱར༌ རྩིགས༌ཏེ༌ ཏེ༌རུ༌ དུགས༌།
JOS 19:51 བླ༌མ༌ ཨེ༌ལི༌འ༌ཟར༌, ནུན༌ནི༌ བུ༌ཚ༌ ཡོ༌ཤུའ༌ དང༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ནོར༌སྐལ༌ལི༌ ཚུལ༌ལ༌ ཤི༌ལོཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཁོང༌ ཐུག༌སའེ༌ ཀུར༌རི༌ སྒོའེ༌ཀ༌ གྱན༌ གྱབས༌ཏེ༌ ཏངས༌ཁན༌ནི༌ ས༌ཀྱད༌, ཏེ༌ ཚང༌མ༌ ཨིན༌ནོག༌། ཏེ༌ནེ༌ ས༌ཀྱད༌ བགོས༌ཏེ༌ ཏང༌ཅེས༌པོ༌ ཚར༌།
JOS 20:1 ཡ༌ཝའེ༌ ཡོ༌ཤུའ༌ མོལས༌,
JOS 20:2 “ཏ༌ ཨིས༌ར༌ཨེལ༌པ༌གུན༌ལ༌ སྐྱབ༌སའེ༌ གྱལ༌ས༌གུན༌ ལྡམ༌ཅེས༌ལ༌ ཟེར༌ ཀ༌ཟུག༌ ངའེ༌ མོ༌ཟེས༌ལ༌ ལབས༌ཏེ༌ ཨིན༌པིན༌,
JOS 20:3 ཅིའ༌ཟེར༌ན༌ ཀལ༌ཏེས༌ མི༌ཞིག༌གི༌ མིང༌ནའང༌ མན༌པ༌ ཡ༌ སྐྱེན༌ངན༌ནི༌ ཞས༌ཏེ༌ མི༌ཞིག༌ སད༌ན༌ ཁོང༌གུན༌ ཏེ༌ གྱལ༌ས༌ ཤོར༌ཏེ༌ མི༌ སད༌ཁན༌ནི༌ ལན༌ ལེན༌ན༌ ཐད༌ཁན༌གུན༌ནི༌ ཀ༌ནེ༌ སྐྱོབ༌ ཉན༌ཨིན༌།”
JOS 20:4 “ཏེ༌ གྱལ༌ས༌ ཤོར༌ཁན༌ནི༌ མི༌བོ༌ གྱལ༌སའེ༌ སྒོའེ༌ དུན༌ལ༌ ལངས༌ཏེ༌ ཏེ༌ གྱལ༌སའེ༌ འུ༌སྐྱོང༌གུན༌ནི༌ དུན༌ལ༌ རང༌ངི༌ ཅོ༌ཁན༌བོ༌ ཤད༌གོས༌། ཏེ༌ནེ༌ ཁོང༌གུན༌ནི༌ ཁོ༌ གྱལ༌སའེ༌ ནང༌ང༌ ཡོང༌ཅུགས༌ཏེ༌ ཁོང༌གུན༌ནི༌ ཕྲོའ༌ ཁོའ༌ དུག༌སའེ༌ ནས༌ས༌ ཏང༌གོས༌།
JOS 20:5 ཀལ༌ཏེས༌ ཤི༌ཁན༌ནི༌ ཉེན༌གྲུང༌ ཁྲག༌ལན༌ ལེན༌ན༌ ཡོང༌ན༌ འུ༌སྐྱོང༌གུན༌ནི༌ ཏེ༌ མི༌བོ༌ ཁོང༌གུན༌ལ༌ སྟད༌ མ༌གོས༌ ཅིའ༌ཟེར༌ན༌ ཁོའེ༌ མིང༌ནའང༌ ཡ༌ ཁོན༌ ཡོད༌ཏེ༌ མི༌བོ༌ སད༌ཏེ༌ མ༌ནོག༌།
JOS 20:6 ཨིན༌ནའང༌ ཏེ༌ མི༌བོ༌ ཏེ༌ ཡུལ༌ལི༌ ཐུས༌མི༌གུན༌ནི༌ ཤགས༌ ཅད༌ཅད༌ ཡང༌ ཏེ༌ ཏུས༌ལ༌ ཞབས༌ཏོག༌ ཞུ༌ཁན༌ བླ༌མ༌ ཆེན༌མོ༌ ཤི༌ཤི༌ ཚོག༌པ༌ ཏེན༌ན༌ གྱལ༌སའེ༌ ནང༌ང༌ དུག༌གོས༌། ཏེ༌སྟིང༌ནེ༌ ཁོ༌ ཤོར༌ཏེ༌ ཡོང༌ཁན༌ ཁོ༌རང༌ངི༌ གྲོང༌ཁྱེར༌ལ༌ ལོགས༌ཏེ༌ ཆ༌ནའང༌ གྲིག༌ཏེ༌ ཨིན༌ནོག༌།”
JOS 20:7 ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ནི༌ ནཕ༌ཐལ༌ལི༌ རི༌ཡུལ༌ལི༌ ནང༌ང༌ ཡོད༌ཁན༌ གཱ༌ལིལ༌ལི༌ ཡུལ༌ ཀེ༌དེཤ༌, ཨེཕ༌ར༌ཡིམ༌མི༌ རི༌ཡུལ༌ལི༌ ནང༌ང༌ ཡོད༌ཁན༌ ཤེ༌ཀེམ༌ དང༌ ཡ༌ཧུ༌དཱའེ༌ རི༌ཡུལ༌ལི༌ ནང༌ང༌ ཡོད༌ཁན༌ ཀི༌རི༌འཐ༌ ཨར༌བ༌ ༼ཡང༌ན༌ ཧེབ༌རོན༌༽ གྱལ༌ས༌གུན༌ ལྡམས༌།
JOS 20:8 ཁོང༌གུན༌ནི༌ ཡོར༌དཱན༌ ལྩངས༌པོའེ༌ ཤར༌ ཆོགས༌ ཡེ༌རི༌ཀོའེ༌ ཉེ༌མོའ༌ རུ༌བེན༌ནི༌ མི༌སྡེའེ༌ ཐང༌སྟོང༌ངི༌ ནང༌ང༌ ཡོད༌ཁན༌ བེ༌ཟེར༌, གཱད༌དི༌ མི༌སྡེའེ༌ གི༌ལེད༌དི༌ ནང༌ང༌ ཡོད༌ཁན༌ ར༌མོཐ༌ ཡང༌ མ༌ནས༌ས༌ མི༌སྡེའེ༌ བ༌ཤན༌ནི༌ ནང༌ང༌ ཡོད༌ཁན༌ གོ༌ལན༌ གྱལ༌ས༌གུན༌ ལྡམས༌།
JOS 20:9 ཨིས༌ར༌ཨེལ༌པ༌གུན༌ ཡ༌ ཁོང༌གུན༌ ཉམ༌པོ༌ དུག༌ཁན༌ ཞན༌ཡུལ༌ལི༌ མི༌ སུ༌ཞིག༌གི༌ མིང༌ནའང༌ མན༌པ༌ ཡ༌ སྐྱེན༌ངན༌ནི༌ ཞས༌ཏེ༌ མི༌ སད༌ཁན༌གུན༌ འི༌ གྱལ༌ས༌གུན༌ནི༌ ནང༌ང༌ ཤོར༌ཏེ༌ མི༌ སད༌ཁན༌ནི༌ ལན༌ ལེན༌ན༌ ཐད༌ཁན༌གུན༌ནི༌ ཀ༌ནེ༌ སྐྱོབ༌ ཉན༌ཨིན༌། ཏེ༌རུ༌ འུ༌སྐྱོང༌གུན༌ལ༌ ཁོའེ༌ ཤགས༌སི༌ ཐག༌ཅད༌ཏེ༌ མ༌ནེ༌ ལན༌ ལེན༌ན༌ ཐད༌ཁན༌གུན༌ནི༌ ཁོའ༌ སད༌ མི༌ཆོགས༌།
JOS 21:1 ཀེ༌ནན༌ནི༌ ས༌ཀྱད༌ ཤི༌ལོཧའེ༌ ནང༌ང༌ བླ༌མ༌ ཨེ༌ལི༌འ༌ཟར༌, ནུན༌ནི༌ བུ༌ཚའེ༌ ཡོ༌ཤུའ༌ དང༌ ཞན༌ ཨིས༌ར༌ཨེལ༌པའེ༌ འུ༌སྐྱོང༌གུན༌ ཡོད༌ས༌ ལི༌ཝི༌ མི༌སྡེའེ༌ འུ༌སྐྱོང༌གུན༌ ཡོངས༌ཏེ༌ ཟེརས༌, “ང༌ཞ༌གུན༌ལ༌ དུག༌སའེ༌ གྲོང༌ཁྱེར༌ དང༌ ང༌ཞའེ༌ སེམས༌ཅན༌གུན༌ནི༌ ཕིའ༌ རྩཱ༌ཁའེ༌ ས༌ཀྱད༌ སལ༌ཅེས༌ལ༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཏེ༌ ཨིན༌པིན༌།”
JOS 21:3 ཏེ༌ནེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཨིས༌ར༌ཨེལ༌པ༌གུན༌ནི༌ ལི༌ཝི༌པ༌གུན༌ལ༌ འི༌ གྲོང༌ཁྱེར༌གུན༌ དང༌ རྩཱ༌ཁའེ༌ ས༌ཀྱད༌གུན༌, ཁོང༌རང༌གུན༌ནི༌ ནོར༌སྐལ༌ལི༌ ས༌ཀྱད༌གུན༌ནི༌ ནང༌ནེ༌ ཏངས༌།
JOS 21:4 ལི༌ཝི༌ མི༌སྡེའེ༌ ཨ༌རོན༌ནི༌ པུར༌གྱུད༌ ཀོ༌ཧཐ༌ཐི༌ མི༌རིགས༌གུན༌ལ༌ ཡ༌ཧུ༌དཱའ༌, སི༌མི༌འོན༌ དང༌ བེན༌ཡཱ༌མིན༌ནི༌ མི༌སྡེ༌གུན༌ནི༌ སྐལ༌ལེ༌ ནང༌ནེ༌ གྲོང༌ཁྱེར༌ 13 ཏངས༌།
JOS 21:5 ལུས༌ཁན༌ནི༌ ཀོ༌ཧཐ༌ཐི༌ མི༌རིགས༌གུན༌ལ༌ ཨེཕ༌ར༌ཡིམ༌ དང༌ དཱན༌ མི༌སྡེ༌ ཡང༌ མ༌ནས༌ས༌ མི༌སྡེ༌ ཕེད༌དི༌ སྐལ༌ལེ༌ ནང༌ནེ༌ གྲོང༌ཁྱེར༌ རྕུ༌ ཏངས༌།
JOS 21:6 གེར༌ཤོན༌ནི༌ མི༌རིགས༌གུན༌ལ༌ ཨིས༌ས༌ཁར༌, ཨ༌ཤེར༌ དང༌ ནཕ༌ཐལ༌ལི༌ མི༌སྡེ༌གུན༌ ཡང༌ བ༌ཤན༌ནི༌ ནང༌ང༌ ཡོད༌ཁན༌ མ༌ནས༌ས༌ མི༌སྡེ༌ ཕེད༌དི༌ སྐལ༌ལེ༌ ནང༌ནེ༌ གྲོང༌ཁྱེར༌ 13 ཏངས༌།
JOS 21:7 མི༌ར༌རི༌ མི༌རིགས༌གུན༌ལ༌ རུ༌བེན༌, གཱད༌ དང༌ ཟེ༌བུ༌ལོན༌ མི༌སྡེའེ༌ སྐལ༌ལེ༌ ནང༌ནེ༌ གྲོང༌ཁྱེར༌ 12 ཏངས༌།
JOS 21:8 ཨིས༌ར༌ཨེལ༌པ༌གུན༌ནི༌ ཡ༌ཝའེ༌ མོ༌ཟེས༌ལ༌ བཀའ༌ སལ༌ཁན༌ ནང༌ཞིན༌ ཏེ༌ གྲོང༌ཁྱེར༌ དང༌ རྩཱ༌ཁའེ༌ ས༌ཀྱད༌གུན༌ ཏག༌རིལ༌ ཏངས༌ཏེ༌ ལི༌ཝི༌པ༌གུན༌ལ༌ ཏངས༌།
JOS 21:9 ཨིས༌ར༌ཨེལ༌པ༌གུན༌ནི༌ ཡ༌ཧུ༌དཱ༌ དང༌ སི༌མི༌འོན༌ནི༌ མི༌སྡེ༌གུན༌ནི༌ ནང༌ནེ༌ འི༌ གྲོང༌ཁྱེར༌གུན༌ ཏངས༌
JOS 21:10 ཏག༌རིལ༌ ཏང༌པོའེ༌ ནང༌ཞིན༌ ལྡམ༌ཁན༌ནི༌ ས༌ཀྱད༌གུན༌ ལི༌ཝི༌ མི༌སྡེའེ༌ ཨ༌རོན༌ནི༌ པུར༌གྱུད༌ ཀོ༌ཧཐ༌ཐི༌ མི༌རིགས༌གུན༌ལ༌ ཏངས༌།
JOS 21:11 ཁོང༌གུན༌ལ༌ ཡ༌ཧུ༌དཱའེ༌ རི༌ཡུལ༌ལི༌ ནང༌ང༌ ཀི༌རི༌འཐ༌ ཨར༌བ༌ ༼ཡང༌ན༌ ཧེབ༌རོན༌༽ དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌ གུན༌ ཏངས༌། ༼ཨར༌བ༌ ནི༌ ཨ༌ནཀ༌པའེ༌ ཕ༌མེས༌པོ༌ ཨིན༌པིན༌།༽
JOS 21:12 ཨིན༌ནའང༌ ཏེ༌ གྱལ༌སའེ༌ ཞིང༌ དང༌ ཉེ༌ཁོར༌རི༌ གྲོང༌སེབ༌གུན༌ ཡེ༌ཕུན༌ནེཧའེ༌ བུ༌ཚ༌ ཀེ༌ལེབ༌བ༌ ནོར༌སྐལ༌ལ༌ ཏངས༌ཏེ༌ ཨིན༌པིན༌།
JOS 21:13 ཏེ༌ནེ༌ ཨ༌རོན༌ བླ༌མའེ༌ པུར༌གྱུད༌གུན༌ལ༌ ཧེབ༌རོན༌ གྱལ༌ས༌ ༼སྐྱེན༌ངན༌ནི༌ ནང༌ང༌ མི༌ སད༌ཁན༌གུན༌ སྐྱོབ༌སའེ༌ གྱལ༌ས༌༽, ལིབ༌ནཧ༌,
JOS 21:14 ཡཏ༌ཏིར༌, ཨེཤ༌ཏེ༌མོའ༌,
JOS 21:15 ཧོ༌ལོན༌, དེ༌བིར༌,
JOS 21:16 ཨའིན༌, ཡུཏ༌ཏཧ༌ དང༌ བེཐ༌ ཤེ༌མེཤ༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ཏངས༌། ཏེ༌ མི༌སྡེ༌ ཉིས༌ཀོའེ༌ ནང༌ནེ༌ གྲོང༌ཁྱེར༌ རྒུ༌།
JOS 21:17 ཁོང༌གུན༌ལ༌ བེན༌ཡཱ༌མིན༌ནི༌ མི༌སྡེའེ༌ སྐལ༌ལེ༌ ནང༌ནེ༌ གི༌བེ༌འོན༌, གེ༌བ༌,
JOS 21:18 ཨ༌ན༌ཐོཐ༌ དང༌ ཨལ༌མོན༌, གྲོང༌ཁྱེར༌ ཞི༌ དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌།
JOS 21:19 ཚང༌མ༌ རྩི༌ན༌ གྲོང༌ཁྱེར༌ 13 དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ཨ༌རོན༌ནི༌ པུར༌གྱུད༌ བླ༌མ༌གུན༌ལ༌ ཏངས༌།
JOS 21:20 ལུས༌ཁན༌ནི༌ ཀོ༌ཧཐ༌ཐི༌ མི༌རིགས༌གུན༌ལ༌ ཨེཕ༌ར༌ཡིམ༌མི༌ མི༌སྡེའེ༌ སྐལ༌ལེ༌ ནང༌ནེ༌ ས༌ཀྱད༌ ཏངས༌ཏེ༌ ཨིན༌པིན༌།
JOS 21:21 ཨེཕ༌ར༌ཡིམ༌ རི༌ཡུལ༌ལི༌ ནང༌ནེ༌, ཤེ༌ཀེམ༌ ༼སྐྱེན༌ངན༌ནི༌ ནང༌ང༌ མི༌ སད༌ཁན༌གུན༌ སྐྱོབ༌སའེ༌ གྱལ༌ས༌༽, གེ༌ཟེར༌,
JOS 21:22 ཀིབ༌ཟ༌འིམ༌ དང༌ བེཐ༌ ཧོ༌རོན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ ཞི༌།
JOS 21:23 ཏེ༌བོའེ༌ཀ༌ ནན༌མ༌ དཱན༌ནི༌ མི༌སྡེའེ༌ སྐལ༌ལེ༌ ནང༌ནེ༌ ཁོང༌གུན༌ལ༌ ཨེལ༌ཏེ༌ཀེཧ༌, གིབ༌བེ༌ཐོན༌,
JOS 21:24 ཨའི༌ཡ༌ལོན༌ དང༌ གཱད༌ རིམ༌མོན༌ གྲོང༌ཁྱེར༌གུན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ ཞི༌།
JOS 21:25 མ༌ནས༌ས༌ མི༌སྡེ༌ ཕེད༌དི༌ སྐལ༌ལེ༌ ནང༌ནེ༌ ཁོང༌གུན༌ལ༌ ཏའ༌ནག༌ དང༌ གཱད༌ རིམ༌མོན༌, གྲོང༌ཁྱེར༌ ཉིས༌ དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌།
JOS 21:26 ཏེ༌ གྲོང༌ཁྱེར༌ རྕུ༌ དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ལུས༌ཁན༌ནི༌ ཀོ༌ཧཐ༌ཐི༌ མི༌རིགས༌གུན༌ལ༌ ཏངས༌།
JOS 21:27 ལི༌ཝི༌ མི༌སྡེའེ༌ གེར༌ཤོན༌ནི༌ མི༌རིགས༌གུན༌ལ༌ མ༌ནས༌ས༌ མི༌སྡེ༌ ཕེད༌དི༌ སྐལ༌ལེ༌ ནང༌ནེ༌ བ༌ཤན༌ནི༌ ནང༌ང༌ ཡོད༌ཁན༌ གོ༌ལན༌ ༼སྐྱེན༌ངན༌ནི༌ ནང༌ང༌ མི༌ སད༌ཁན༌གུན༌ སྐྱོབ༌སའེ༌ གྱལ༌ས༌༽ དང༌ བེ༌ཨེཤ༌ཏེ༌རཧ༌ གྲོང༌ཁྱེར༌ ཉིས༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ཏངས༌།
JOS 21:28 ཨིས༌ས༌ཁར༌རི༌ མི༌སྡེའེ༌ སྐལ༌ལེ༌ ནང༌ནེ༌ ཀི༌ཤི༌འོན༌, ད༌བེ༌རཐ༌,
JOS 21:29 ཡར༌མུཐ༌, དང༌ ཨེན༌ གན༌ནིམ༌ གྲོང༌ཁྱེར༌གུན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ ཞི༌ ཏངས༌།
JOS 21:30 ཨ༌ཤེར༌རི༌ མི༌སྡེའེ༌ སྐལ༌ལེ༌ ནང༌ནེ༌ མི༌ཤལ༌, ཨབ༌གྲོན༌,
JOS 21:31 ཧེལ༌ཀཐ༌ དང༌ རེ༌ཧོབ༌ གྲོང༌ཁྱེར༌གུན༌ ཡང༌ ཏེ༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ ཞི༌ ཏངས༌།
JOS 21:32 ནཕ༌ཐལ༌ལི༌ མི༌སྡེའེ༌ སྐལ༌ལེ༌ ནང༌ནེ༌ གཱ༌ལིལ༌ལི༌ ནང༌ང༌ ཡོད༌ཁན༌ ཀེ༌དེཤ༌ ༼སྐྱེན༌ངན༌ནི༌ ནང༌ང༌ མི༌ སད༌ཁན༌གུན༌ སྐྱོབ༌སའེ༌ གྱལ༌ས༌༽, ཧམ༌མོཐ༌ དོར༌ དང༌ ཀར༌ཏན༌ གྲོང༌ཁྱེར༌གུན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ སུམ༌ ཏངས༌།
JOS 21:33 ཚང༌མ༌ རྩི༌ན༌ གྲོང༌ཁྱེར༌ 13 དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ གེར༌ཤོན༌ནི༌ མི༌རིགས༌གུན༌ལ༌ ཏངས༌།
JOS 21:34 ལི༌ཝི༌པ༌ ལུས༌ཏེ༌ ཡོད༌ཁན༌ མི༌ར༌རི༌འི༌ མི༌རིགས༌གུན༌ལ༌ ཟེ༌བུ༌ལོན༌ནི༌ མི༌སྡེ༌ སྐལ༌ལེ༌ ནང༌ནེ༌ ཡོཀ༌ནེའམ༌, ཀར༌ཏཧ༌,
JOS 21:35 དིམ༌ནཧ༌ དང༌ ན༌ཧ༌ལལ༌ གྲོང༌ཁྱེར༌གུན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ཏངས༌, ལྡོམས༌ གྲོང༌ཁྱེར༌ ཞི༌།
JOS 21:36 རུ༌བེན༌ནི༌ མི༌སྡེའེ༌ སྐལ༌ལེ༌ ནང༌ནེ༌ བེ༌ཟེར༌, ཡ༌ཧཟ༌,
JOS 21:37 ཀེ༌དེ༌མོཐ༌ དང༌ མེ༌ཕའཐ༌ གྲོང༌ཁྱེར༌གུན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ ཞི༌ ཏངས༌།
JOS 21:38 གཱད༌དི༌ མི༌སྡེའེ༌ སྐལ༌ལེ༌ ནང༌ནེ༌ གི༌ལེད༌དི༌ ནང༌ང༌ ཡོད༌ཁན༌ ར༌མོཐ༌ ༼སྐྱེན༌ངན༌ནི༌ ནང༌ང༌ མི༌ སད༌ཁན༌གུན༌ སྐྱོབ༌སའེ༌ གྱལ༌ས༌༽, མ༌ཧ༌ནཱའིམ༌,
JOS 21:39 ཧེཤ༌བོན༌ དང༌ ཡ༌ཟེར༌ གྲོང༌ཁྱེར༌གུན༌ ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌, ལྡོམས༌ གྲོང༌ཁྱེར༌ ཞི༌ ཏངས༌།
JOS 21:40 ཚང༌མ༌ རྩི༌ན༌ ལི༌ཝི༌ མི༌སྡེའེ༌ ལུས༌ཁན༌ མི༌ར༌རི༌འི༌ མི༌རིགས༌གུན༌ལ༌ གྲོང༌ཁྱེར༌ 12 ཏངས༌།
JOS 21:41 ཨིས༌ར༌ཨེལ༌ལི༌ ཡུལ༌ཇོངས༌སི༌ ནང༌ནེ༌ ལི༌ཝི༌པ༌གུན༌ལ༌ ལྡོམས༌ གྲོང༌ཁྱེར༌ 48 ཡང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ཏངས༌ཏེ༌ ཨིན༌པིན༌།
JOS 21:42 འི༌ གྲོང༌ཁྱེར༌ ཚང༌མ༌ དང༌ ཉེ༌ཁོར༌རི༌ རྩཱ༌ཁའེ༌ ས༌ཀྱད༌གུན༌ ཏངས༌ཏེ༌ ཨིན༌པིན༌།
JOS 21:43 ཏེ༌ནེ༌ ཡ༌ཝའེ༌ ཨིས༌ར༌ཨེལ༌པའེ༌ ཕ༌མེས༌པོ༌གུན༌ལ༌ སལ༌ཅེས༌ལ༌ ནའ༌ ཁུར༌ར༌ ཛད༌ཁན༌ནི༌ ས༌ཀྱད༌ གང༌པོ༌ སལ༌ལ༌ ཛདས༌། ཁོང༌གུན༌ནི༌ ཏེ༌གུན༌ ཝང༌ངའི༌ ཡོག༌ག༌ ཁྱོངས༌ཏེ༌ ཏེ༌རུ༌ ཚུགས༌ཏེ༌ དུགས༌།
JOS 21:44 ཡ༌ཝའེ༌ ཁོང༌གུན༌ནི༌ ཕ༌མེས༌པོ༌གུན༌ལ༌ ནའ༌ ཁུར༌ར༌ ཛད༌ཁན༌ ནང༌ཞིན༌ ཆོགས༌ ཚང༌མ༌ནེ༌ ཁོང༌གུན༌ལ༌ ཞི༌དེ༌ སལ༌ལ༌ ཛདས༌། གྲ༌འོ༌ ཅིག༌གའང༌ ཁོང༌གུན༌ནི༌ གྱབ༌གལ༌ལ༌ ལངས༌ མ༌ཉནས༌ ཅིའ༌ཟེར༌ན༌ ཡ༌ཝའེ༌ ཁོང༌ངི༌ གྲ༌འོ༌གུན༌ ཁོང༌གུན༌ནི༌ ལག༌ག༌ སྟད༌ད༌ ཛད༌ཏེ༌ ཨིན༌པིན༌།
JOS 21:45 ཡ༌ཝའེ༌ ཨིས༌ར༌ཨེལ༌པ༌གུན༌ལ༌ ཛད༌ཁན༌ནི༌ ཞལ༌ཆད༌ ཟང༌པོ༌གུན༌ནི༌ ནང༌ནེ༌ ཅིག༌གའང༌ མ༌གྲུབ༌བ༌ མ༌ལུས༌། ཁོང༌ངི༌ མོལ༌ཁན༌ ཚང༌མ༌ གྲུབ༌།
JOS 22:1 ཏེ༌ནེ༌ ཡོ༌ཤུའེ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌པོའ༌ བོད༌ཏེ༌
JOS 22:2 ཁོང༌གུན༌ལ༌ ཟེརས༌, “ཁྱོ༌ཞ༌གུན༌ནི༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ བཀའ༌ སལ༌ཁན༌ ཚང༌མ༌ ཅོས༌ ཡང༌ ངའེ༌ ཟེར༌ཁན༌ ཚང༌མ༌ ཁའ༌ཉནས༌།
JOS 22:3 ཏུས༌ མ༌ རིང༌མོ༌ དི༌རིང༌ ཚོག༌པ༌ ཁྱོ༌ཞའེ༌ ཁྱོ༌ཞ༌རང༌ངི༌ སྤུན༌གུན༌ལ༌ རོགས༌ ཅོས༌ཏེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ བཀའ༌ སལ༌ཁན༌གུན༌ ཁའ༌ཉནས༌།
JOS 22:4 ཏ༌ ང༌དང༌གུན༌ནི༌ དཀོན༌མཆོག༌ ཡ༌ཝའེ༌ ཞལ༌ཆད༌ ནང༌ཞིན༌ ཁྱོ༌ཞའེ༌ སྤུན༌གུན༌ལ༌ ཞི༌དེ༌ སལ༌ པ༌སང༌ ཡ༌ཝའེ༌ ཞབས༌ཏོག༌པ༌ མོ༌ཟེས༌སི༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཁྱོ༌ཞའ༌ སལ༌ཁན༌ ནས༌ས༌, ཁྱོ༌ཞ༌རང༌ངི༌ ཁང༌པ༌ ལོགས༌ཏེ༌ སོང༌།
JOS 22:5 ཨིན༌ནའང༌ མོ༌ཟེས༌སི༌ སལ༌ཁན༌ནི༌ བཀའ༌ཁྲིམས༌གུན༌ དང༌ བཀའ༌རྒྱ༌གུན༌ལ༌ སྲུང༌ཅེས༌ ཏན༌ཏན༌ ཅོས༌། ང༌དང༌གུན༌ནི༌ དཀོན༌མཆོག༌ ཡ༌ཝའ༌ ཅམས༌པ༌ ཅོ༌, ཁོང༌ངི༌ སྟན༌ན༌ ཛད༌ཁན༌ནི༌ ལམ༌མི༌ཀ༌ གྲུལ༌, ཁོང༌ངི༌ བཀའ༌གུན༌ལ༌ ཁའ༌ ཉོན༌, ཁོང༌ང༌ སྟན༌པོ༌ ཐམས༌ཏེ༌ དུག༌ ཡང༌ སྙིང༌ གང༌པོ༌ དང༌ སེམས༌ གང༌པོ༌ནེ༌ ཁྱོ༌ཞའེ༌ ཁོང༌ང༌ ཞབས༌ཏོག༌ ཞུས༌།”
JOS 22:6 ཏེ༌ནེ༌ ཡོ༌ཤུའེ༌ ཁོང༌གུན༌ལ༌ ཅིན༌ལབས༌ སལ༌ཏེ༌ ཁོང༌གུན༌ ལམ༌ཅུགས༌ ཡང༌ ཁོང༌གུན༌ ཁང༌པ༌ ལོགས༌ཏེ༌ སོང༌།
JOS 22:7 ༼མོ༌ཟེས༌སི༌ མ༌ནས༌སའེ༌ མི༌སྡེ༌ ཕེད༌པོའ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཡོད༌ཁན༌ བ༌ཤན༌ནི༌ ས༌ཀྱད༌ ཡང༌ ཞན༌ ཕེད༌པོའ༌ ཡོར༌དཱན༌ནི༌ ནུབ༌ ཆོགས༌ལ༌ ས༌ཀྱད༌ ཏངས༌ཏེ༌ ཨིན༌པིན༌༽ ཡོ༌ཤུའེ༌ ཁོང༌གུན༌ ལོགས༌ཏེ༌ ལམ༌ཅུག༌ ཟ༌ནེ༌ ཁོང༌གུན༌ལ༌ ཅིན༌ལབས༌ སལ༌ཏེ༌
JOS 22:8 ཟེརས༌, “ཁྱོ༌ཞ༌གུན༌ ཁང༌པ༌ གྱུ༌ནོར༌ མང༌པོ༌ ཉམ༌པོ༌ ལོགས༌ཏེ༌ སོང༌, སེམས༌ཅན༌ནི༌ ཁྱུ༌ མང༌པོ༌, མུལ༌, སེར༌, ར༌གན༌, ལྕགས༌ ཡང༌ ཀོས༌ལག༌ མང༌པོ༌, གྲ༌འོ༌གུན༌ནི༌ ཀ༌ནེ༌ ཅོམས༌ཏེ༌ ཁྱོང༌ཁན༌ནི༌ གྱུ༌ནོར༌གུན༌ ཁྱོ༌ཞའེ༌ ཉེན༌གྲུང༌གུན༌ ཉམ༌པོ༌ བགོས༌།”
JOS 22:9 ཏེ༌ནེ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌པོའ༌ ཞན༌ ཨིས༌ར༌ཨེལ༌པ༌གུན༌ ཀེ༌ནན༌ནི༌ ནས༌ས༌ ཤི༌ལོཧའ༌ བོར༌ཏེ༌ ཁོང༌རང༌གུན༌ནི༌ ས༌ཀྱད༌ གི༌ལེད༌ལ༌ ལོགས༌ཏེ༌ སོང༌ ཀ༌བོ༌ མོ༌ཟེས༌ གྱུད༌ཏེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཁོང༌གུན༌ལ༌ ཐོབ༌ཏེ༌ ཨིན༌པིན༌།
JOS 22:10 ཁོང༌གུན༌ ཀེ༌ནན༌ནི༌ ནང༌ང༌ ཡོར༌དཱན༌ ལྩངས༌པོའེ༌ ཉེ༌མོའ༌ ཡོད༌ཁན༌ གེ༌ལི༌ལོཐ༌ ནས༌སའེ༌ཀ༌ ལེབ༌བ༌ཅིག༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌ གུན༌ནི༌ ཡོར༌དཱན༌ ལྩངས༌པོའེ༌ དུན༌ལ༌ ཆོད༌ཁྲི༌ ཆེན༌མོ༌ ཞིག༌ རྩིགས༌།
JOS 22:11 ཏེ༌ནེ༌ ཞན༌ ཨིས༌ར༌ཨེལ༌པ༌གུན༌ལ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌ གུན༌ནི༌ ཡོར༌དཱན༌ ལྩངས༌པོའེ༌ ནུབ༌ ཆོགས༌ ཀེ༌ནན༌ནི༌ ས༌ཀྱད༌དི༌ ཐའ༌མ༌ གེ༌ལི༌ལོཐ༌ཐི༌ ནང༌ང༌ ཆོད༌ཁྲི༌ རྩིགས༌ཁན༌བོ༌ ཚོར༌ར༌ཅིག༌
JOS 22:12 ཨིས༌ར༌ཨེལ༌པ༌ ཚང༌མ༌ ཤི༌ལོཧའེ༌ ནང༌ང༌ ཛོམས༌ཏེ༌ ཁོང༌གུན༌ནི༌ གྱབ༌གལ༌ལ༌ མག༌ ཏང༌ཅེས༌སི༌ གྲལ༌གྲིག༌ ཅོས༌།
JOS 22:13 ཁོང༌གུན༌ནི༌ བླ༌མ༌ ཨེ༌ལི༌འ༌ཟར༌རི༌ བུ༌ཚ༌ ཕི༌ནི༌ཧས༌སི༌ གོ༌ཁྲིད༌ ཅོས༌ཏེ༌ ཐུས༌མི༌གུན༌ རུ༌བེན༌, གཱད༌ དང༌ མ༌ནས༌སའེ༌ མི༌སྡེ༌ ཕེད༌ གུན༌ལ༌ སྤེ༌ར༌ ཏང༌ང༌ ལམ༌ཅུགས༌།
JOS 22:14 འི༌ ཐུས༌མི༌གུན༌ནི༌ ནང༌ང༌ ཨིས༌ར༌ཨེལ༌པའེ༌ སྤོན༌བོ༌ རྕུ༌, མི༌སྡེ༌ རེ༌རེ༌ ནེ༌ མི༌ རེ༌རེ༌, ཁོང༌གུན༌ རང༌རང༌ངི༌ མི༌རིགས༌སི༌ ནང༌ང༌ ནང༌ཚངས༌སི༌ གོ༌སྐྱོང༌ ཨིན༌པིན༌།
JOS 22:15 ཁོང༌གུན༌ གི༌ལེད༌དི༌ ནས༌ས༌ ལེབས༌ཏེ༌ རུ༌བེན༌ དང༌ གཱད༌དི༌ མི༌སྡེ༌ ཡང༌ མ༌ནས༌སའེ༌ མི༌སྡེ༌ ཕེད༌ གུན༌ལ༌ ཟེརས༌,
JOS 22:16 “ཡ༌ཝའེ༌ ཆོས༌ཚོགས༌ ཚང༌མའེ༌ ཏྲི༌དུག༌, ‘ཁྱོ༌ཞའེ༌ ཨིས༌ར༌ཨེལ༌ལི༌ དཀོན༌མཆོག༌གི༌ཀ༌ ཏད༌པ༌ ཕངས༌ཏེ༌ ཁོང༌ང༌ གྱབ༌གལ༌ ཅོས༌ཏེ༌ འི༌ ཆོད༌ཁྲི༌ ཅིའ༌ རྩིགས༌ཏེ༌ ཨིན༌?
JOS 22:17 པེ༌འོར༌རི༌ ནང༌ང༌ ང༌དང༌གུན༌ནི༌ ཅོ༌ཁན༌ནི༌ སྡིག༌པ༌ ཐའ༌ཐད༌ མ༌ནོག༌ག༌? ཡ༌ཝའེ༌ མི༌གུན༌ནི༌ཀ༌ ཏེ༌ ནད༌པོ༌ ཡོངས༌ཏེའང༌, དི༌རིང༌ ཚག༌པ༌ ང༌དང༌གུན༌ ཏེ༌ སྡིག༌པ༌ནེ༌ ལག༌མོ༌ མ༌ཆ༌ ཨིན༌ནོག༌།
JOS 22:18 ཁྱོ༌ཞ༌གུན༌ དི༌རིང༌ ཡ༌ཝ༌ ནེ༌ ཐག༌རིང༌ང༌ ཤོར༌ཏེ༌ ཨིན༌ན༌?’” “དི༌རིང༌ ཁྱོ༌ཞ༌གུན༌ནི༌ ཡ༌ཝའེ༌ གྱབ༌གལ༌ ཅོ༌ན༌ ཐོ༌རེ༌ ཁོང༌ ང༌དང༌ ཚང༌མའེ༌ཀ༌ ཐུག༌སྲོ༌ སྐྱོད༌ཨིན༌།
JOS 22:19 ཁྱོ༌ཞའ༌ ཐོབ༌ཁན༌ནི༌ ས༌ཀྱད༌ ཏམ༌པ༌ མན༌ན༌ ཡ༌ཝའེ༌ ཀུར༌ ཡོད༌སའེ༌ ཁོང༌ངི༌ ས༌ཀྱད༌ ཆོགས༌ལ༌ ཡོང༌ ཡང༌ ང༌ཞའེ༌ ཕྲོའ༌ ཁྱོ༌ཞའེ༌ སྐལ༌ལའེ༌ ས༌ཀྱད༌ ལེན༌། ཨིན༌ནའང༌ ཡ༌ཝ༌ ང༌དང༌ངི༌ དཀོན༌མཆོག༌ ཅིག༌པོའེ༌ ཆོད༌ཁྲི༌ མན༌པ༌ ཞན༌ ཡང༌ ཆོད༌ཁྲི༌ རྩིགས༌ཏེ༌ ཡ༌ཝ༌ ཡ༌ ང༌ཞ༌གུན༌ནི༌ གྱབ༌གལ༌ མ༌ཅོ༌།
JOS 22:20 ཟེ༌རཧའེ༌ བུ༌ཚ༌ ཨ༌ཀེན༌ནི༌ ཡ༌ཝའ༌ ཕུལ༌ཅེས༌སི༌ ཅ༌ལག༌གུན༌ནི༌ ནང༌ནེ༌ སྐུས༌ཏེ༌ སྡིག༌པ༌ ཅོ༌ཅེས༌པའེ༌ ཡ༌ཝའེ༌ ཐུག༌སྲོ༌ ཨིས༌ར༌ཨེལ༌ གང༌པོའེ༌ཀ༌ མ༌བབས༌ས༌? ཁོའེ༌ སྡིག༌པའེ༌ ཞས༌ཏེ༌ ཁོ༌རང༌ ཅིག༌པོ༌ མན༌པ༌ ཞན༌ ཨིས༌ར༌ཨེལ༌པ༌གུན༌ནའང༌ ཤི༌།”
JOS 22:21 ཏེ༌ནེ༌ རུ༌བེན༌, གཱད༌ དང༌ མ༌ནས༌སའེ༌ མི༌སྡེ༌ ཕེད༌པོའེ༌ ཨིས༌ར༌ཨེལ༌པའེ༌ མི༌རིགས༌གུན༌ནི༌ གོ༌སྐྱོང༌གུན༌ལ༌ ལན༌ཏངས༌,
JOS 22:22 “ཡ༌ཝ༌, དཀོན༌མཆོག༌ ཀུན༌ཝང༌། ཡ༌ཝ༌, དཀོན༌མཆོག༌ ཀུན༌ཝང༌། ཁོང༌ངི༌ ཁྱེན༌ན༌ ཛད༌ད༌ནོག༌ ཡང༌ ཨིས༌ར༌ཨེལ༌པ༌གུན༌ལའང༌ གྱུས༌ ཆ༌གོས༌། ང༌ཞ༌གུན༌ནི༌ འི༌ ཆོད༌ཁྲི༌ རྩིགས༌ཏེ༌ ཡ༌ཝའེ༌ གྱབ༌གལ༌ ཅོས༌ཏེ༌ ཨིན༌ན༌ ང༌ཞ༌གུན༌ སད༌ནའང༌ གྲིག༌།
JOS 22:23 ཀལ༌ཏེས༌ ང༌ཞའེ༌ ཡ༌ཝ༌ ནེ༌ ཐག༌རིང༌ང༌ ཆ༌ཅེས༌ལ༌ ང༌ཞ༌རང༌ངི༌ ཕིའ༌ མེའ༌ སྲག༌ཅེས༌ ཡ༌ གྲུའི༌ ཡ༌ ཞི༌དེ༌ ཆོད༌པ༌ ཕུལ༌ཅེས༌སི༌ ཕིའ༌ འི༌ ཆོད༌ཁྲི༌ རྩིགས༌ཏེ༌ ཨིན༌ན༌ ཡ༌ཝ༌ ཁོང༌རང༌ངི༌ ང༌ཞ༌གུན༌ལ༌ ཆད༌པ༌ སལ༌ལ༌ ཛད༌ཤིག༌།
JOS 22:24 མན༌། ང༌ཞའེ༌ ཏེ༌བོ༌ ཅོས༌པིན༌ ཅིའ༌ཟེར༌ན༌ ང༌ཞ༌གུན༌ ཇིགས༌ས༌ རག༌, ཞག༌ཤིག༌ ཁྱོ༌ཞའེ༌ པུར༌གྱུད༌གུན༌ནི༌ ཟེར༌ སྲིད༌ཅེས༌ ཨིན༌ནོག༌, ‘ང༌ཞའེ༌ ཅོལ༌ཁན༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའ༌ ཁྱོ༌ཞ༌གུན༌ནི༌ ཆོད༌པ༌ ཕུལ༌ མི༌ ཆོགས༌།
JOS 22:25 ཡ༌ཝའེ༌ ཡོར༌དཱན༌ ལྩངས༌པོ༌ ང༌ཞ༌གུན༌ དང༌ ཁྱོ༌ཞའ༌ རུ༌བེན༌ དང༌ གཱད༌དི༌ མིར༌གྱུད༌གུན༌ནི༌ པར༌ལ༌ སན༌ཚམས༌ ཅོའ༌ཛདས༌, ཁྱོ༌ཞ༌གུན༌ནི༌ ཡ༌ཝའ༌ ཅོལ༌ མི༌ ཆོགས༌།’ ཏེ༌ཟུག༌ ཟེར༌ཏེ༌ ཁྱོ༌ཞའེ༌ པུར༌གྱུད༌གུན༌ནི༌ ང༌ཞའེ༌ པུར༌གྱུད༌གུན༌ལ༌ ཡ༌ཝའ༌ ཅོལ༌ཅེས༌ སྒག༌ སྲིད༌ཅེས༌ ཨིན༌ནོག༌།”
JOS 22:26 “ཏེ༌ གྱུན༌ཚན༌ནི༌ ཕིའ༌ ང༌ཞ༌གུན༌ནི༌ ཆོད༌ཁྲི༌ རྩིགས༌པིན༌། ཆོད༌པ༌ མེའ༌ སྲག༌ཅེས༌ ཡ༌ སྲོག༌ཆོད༌ ཕུལ༌ཅེས༌སི༌ ཕིའ༌ མ༌རྩིགས༌པིན༌།
JOS 22:27 འི༌བོ༌ ང༌ཞའ༌ དང༌ ཁྱོ༌ཞའ༌ ཡང༌ ང༌དང༌གུན༌ནི༌ པུར༌གྱུད༌ གུན༌ནི༌ ཕིའ༌, ང༌ཞ༌གུན༌ནི༌ མེའ༌ སྲག༌ཅེས༌, སྲོག༌ཆོད༌ དང༌ ཞི༌དེའེ༌ ཆོད༌པ༌ གུན༌ ཡ༌ཝའེ༌ ཏམ༌པ༌ ཀུར༌ ཡོད༌ས༌ ཅིག༌པོའེ༌ཀ༌ ཕུལ༌ཏེ༌ ཁོང༌ང༌ ཅོལ༌ཅེས༌སི༌ སྤང༌པོ༌ཞིག༌ ཨིན༌ནོག༌། ཏེ༌ནེ༌ ཁྱོ༌ཞའེ༌ པུར༌གྱུད༌གུན༌ནི༌ ང༌ཞའེ༌ པུར༌གྱུད༌གུན༌ལ༌, ‘ཁྱོ༌ཞའ༌ ཡ༌ཝའེ༌ མི༌གུན༌ མན༌’ ཟེར༌ མི༌ཉན༌།”
JOS 22:28 “ཀལ༌ཏེས༌ ཁོང༌གུན༌ནི༌ ཏེ༌ཟུག༌ ཟེར༌ན༌ ང༌ཞའེ༌ པུར༌གྱུད༌གུན༌ནི༌ ཟེར༌ཉན༌ཨིན༌, ‘ལྟོས༌, ང༌ཞའེ༌ ཕ༌མེས༌པོ༌གུན༌ནི༌ རྩིགས༌ཁན༌ནི༌ ཆོད༌ཁྲི༌ ཡ༌ཝའེ༌ ཆོད༌ཁྲི༌ ཙོགས༌ དུག༌, ཡང༌ ཏེ༌བོ༌ སྲག༌ཅེས༌ ཡ༌ སྲོག༌ཆོད༌དི༌ ཆོད༌པ༌ ཕུལ༌ལ༌ མན༌པ༌ ང༌ཞའ༌ དང༌ ཁྱོ༌ཞའ༌ ཉིས༌ཀོ༌ ཡ༌ཝའེ༌ ཨིན༌ཁན༌ནི༌ སྤང༌པོ༌ ཏང༌ང༌ནོག༌།’
JOS 22:29 ཡ༌ཝའེ༌ གྱབ༌གལ༌ ང༌ཞ༌གུན༌ནི༌ མན༌ནེ༌ མི༌ཅོ༌ ཡང༌ མེའ༌ སྲག༌ཅེས༌, སྲོག༌ཆོད༌ དང༌ ཞི༌དེའེ༌ ཆོད༌པ༌ གུན༌ ཕུལ༌ཅེས༌སི༌ ཆོད༌ཁྲི༌ རྩིགས༌ཏེ༌ ང༌ཞའ༌ ཁོང༌ནེ༌ ཐག༌རིང༌ང༌ མན༌ནེ༌ མི༌ཆ༌། ཏེ༌གུན༌ ཕུལ༌སའེ༌ ནས༌ས༌ ཡ༌ཝའེ༌ ཏམ༌པ༌ ཀུར༌རི༌ དུན༌ལ༌ ཡོད༌ཁན༌ནི༌ ཆོད༌ཁྲི༌ ཅིག༌པོ༌ ཨིན༌ནོག༌།”
JOS 22:30 རུ༌བེན༌, གཱད༌ དང༌ མ༌ནས༌ས༌ མི༌སྡེ༌ ཕེད༌ གུན༌ནི༌ ཟེར༌ཁན༌བོ༌ བླ༌མ༌ ཕི༌ནི༌ཧས༌ དང༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ཚོར༌ར༌ཅིག༌ ཁོང༌གུན༌ ཐད༌པོ༌ སོང༌།
JOS 22:31 ཨེ༌ལི༌འ༌ཟར༌རི༌ བུ༌ཚ༌ བླ༌མ༌ ཕི༌ནི༌ཧས༌སི༌ ཁོང༌གུན༌ལ༌ ལན༌ཏངས༌, “ཡ༌ཝ༌ ང༌དང༌གུན༌ནི༌ ཕྲོའ༌ ཞུགས༌ཏེ༌ ཨིན༌ཁན༌བོ༌ དི༌རིང༌ ང༌དང༌གུན༌ལ༌ ཧ༌གོ༌ ཅིའ༌ཟེར༌ན༌ ཁྱོ༌ཞའེ༌ ཡ༌ཝའེ༌ གྱབ༌གལ༌ལ༌ འི༌ ལས༌པོ༌ མ༌ཅོའ༌ ཨིན༌ནོག༌ ཀ༌ཟུག༌ ང༌ཞའེ༌ སམ༌། ཁྱོ༌ཞའེ༌ དཀོན༌མཆོག༌གི༌ ཆད༌པ༌ནེ༌ ཨིས༌ར༌ཨེལ༌པ༌གུན༌ སྐྱོབས༌ཏེ༌ ཨིན༌ནོག༌།”
JOS 22:32 ཏེ༌ནེ༌ བླ༌མ༌ ཕི༌ནི༌ཧས༌ དང༌ སྤོན༌བོ༌གུན༌ རུ༌བེན༌ དང༌ གཱད༌དི༌ མི༌སྡེ༌གུན༌ གི༌ལེད༌དི༌ ནང༌ང༌ བོར༌ཏེ༌ ཀེ༌ནན༌ནི༌ ས༌ཀྱད༌ལ༌ ལོགས༌ཏེ༌ སོང༌ ཡང༌ ཨིས༌ར༌ཨེལ༌པ༌གུན༌ལ༌ ཇུང༌ཁན༌གུན༌ ཤདས༌།
JOS 22:33 ཨིས༌ར༌ཨེལ༌པ༌ ཚང༌མ༌ ཐད༌པོ༌ སོང༌ཏེ༌ དཀོན༌མཆོག༌ག༌ སྟོད༌པ༌ ཕུལས༌ ཡང༌ རུ༌བེན༌ དང༌ གཱད༌པ༌གུན༌ནི༌ གྱབ༌གལ༌ལ༌ མག༌ ཏངས༌ཏེ༌ ཁོང༌གུན༌ནི༌ ནས༌ས༌ མེད༌ཁན༌ ཅོ༌ཅེས༌སི༌ སྤེ༌ར༌ མ༌ཏངས༌།
JOS 22:34 རུ༌བེན༌ དང༌ གཱད༌པ༌གུན༌ནི༌ ཆོད༌ཁྲི༌བོའ༌ “སྤང༌པོ༌” མིང༌ ཏགས༌ཏེ༌ ཟེརས༌, “འི༌བོ༌ ང༌ཞའ༌ དང༌ ཁོང༌གུན༌ནི༌ པར༌ལ༌ ཡ༌ཝ༌ ང༌ཞ༌གུན༌ནི༌ དཀོན༌མཆོག༌ ཞུགས༌ཁན༌ནི༌ སྤང༌པོ༌ ཨིན༌།”
JOS 23:1 ཡ༌ཝའེ༌ ཨིས༌ར༌ཨེལ༌པ༌གུན༌ལ༌ ཁོང༌གུན༌ནི༌ གྲ༌འོ༌ ཚང༌མའེ༌ ཀ༌ནེ༌ ཞི༌དེ༌ སལ༌ཏེ༌ ལོ༌ མང༌པོའེ༌ སྟིང༌ནེ༌, ཡོ༌ཤུའ༌ མ༌རྒད༌པོ༌ སོང༌ཏེ༌ ཡོད༌པིན༌།
JOS 23:2 ཁོང༌ངི༌ ཨིས༌ར༌ཨེལ༌པའེ༌ སྤོན༌བོ༌, འུ༌སྐྱོང༌, ཁྲིམ༌སྤོན༌ དང༌ མག༌མི༌ སྤོན༌བོ༌ ཚང༌མ༌ བོདས༌ ཡང༌ ཟེརས༌, “ང༌ ལོ༌ མང༌པོ༌ སོང༌ཏེ༌ སྲན༌ཏྲེ༌ སྒས༌ཏེ༌ ཨིན༌ནོག༌
JOS 23:3 ཡ༌ཝའེ༌ ཁྱོ༌ཞ༌གུན༌ནི༌ ཏོན༌ལ༌ གྱལ༌ཁམས༌ ཚང༌མ༌ ཉམ༌པོ༌ ཛད༌ཁན༌བོ༌ ཁྱོ༌ཞ༌གུན༌ནི༌ ཐོང༌ཏེ༌ ཨིན༌ནོག༌། ང༌དང༌ངི༌ གྲ༌འོ༌གུན༌ལ༌ ནོལ༌ལ༌ ཛད༌ཁན༌བོ༌ ཡ༌ཝ༌ ང༌དང༌གུན༌ནི༌ དཀོན༌མཆོག༌ ཞུགས༌ཏེ༌ ཨིན༌།
JOS 23:4 ངའེ༌ ཁྱོ༌ཞ༌གུན༌ལ༌ ནོར༌སྐལ༌ལི༌ ཚུལ༌ལ༌ ཤར༌ ཆོགས༌སི༌ ཡོར༌དཱན༌ ལྩངས༌པོ༌ནེ༌ ཏངས༌ཏེ༌ ནུབ༌ ཆོགས༌ལ༌ མེ༌གྲི༌ཀྲེ༌རིའན༌ནི༌ ཚོ༌ ཚོག༌པ༌ བགོས༌ཏེ༌ ཏང༌ཁན༌ནི༌ ས༌ཀྱད༌ ང༌ཡོག༌ག༌ ཁྱོང༌ཁན༌ ཡང༌ མ༌ ཁྱོང༌ཁན༌ ཚང༌མ༌ ལྟོས༌།
JOS 23:5 ཏེ༌ ས༌ཀྱད༌ ཚང༌མ༌ ཁྱོ༌ཞའེ༌ གྱུར༌ཨིན༌ ཅིའ༌ཟེར༌ན༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཏེ༌ ནང༌ང༌ དུག༌ཁན༌ ཚང༌མ༌ ཕིང༌ང༌ ཛད༌ཨིན༌། ཡ༌ཝ༌ ང༌དང༌ངི༌ དཀོན༌མཆོག༌གི༌ ཞལ༌ཆད༌ ཛད༌ཁན༌ ནང༌ཞིན༌ ཁྱོ༌ཞ༌གུན༌ནི༌ ཏེ༌ ས༌ཀྱད༌གུན༌ ལེན༌ཨིན༌།”
JOS 23:6 “མོ༌ཟེས༌སི༌ ཁྲིམས༌སི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ ཚང༌མ༌ ཁའ༌ ཉན༌ཅེས༌ ཏན༌ཏན༌ ཅོས༌, ཏེ༌གུན༌ནེ༌ གྱུར༌ཏེ༌ ཡས༌པ༌ ཡ༌ ཡོ༌མ༌ མ༌ཆ༌།
JOS 23:7 འི༌ ས༌ཀྱད༌དི༌ ནང༌ང༌ དུག༌ཁན༌ མི༌གུན༌ ཉམ༌པོ༌ བྲེལ༌ མི༌བོར༌ཅེས༌ ཏན༌ཏན༌ ཅོས༌ཏེ༌ ཁོང༌གུན༌ནི༌ ལྷ༌ལྷ༌མོ༌ གུན༌ནི༌ མིང༌ ཡ༌ ཏེ༌གུན༌ནི༌ མིང༌ངི༌ ནང༌ང༌ ནའ༌ མ༌ཁུར༌ ཡང༌ ཏེ༌གུན༌ལ༌ ཞབས༌ཏོག༌ མ༌ཞུ༌ ཡ༌ ཅོལ༌ མ༌ཅོལ༌།
JOS 23:8 ཨིན༌ནའང༌ ཡ༌ཝ༌ ང༌དང༌ངི༌ དཀོན༌མཆོག༌ག༌ སྟན༌པོ༌ ཐམས༌ཏེ༌ དུག༌ ཀ༌ཟུག༌ ཁྱོ༌ཞ༌གུན༌ནི༌ དག༌ས༌ ཚག༌པ༌ ཅོ༌ཨིན༌ ཨིན༌ནོག༌།”
JOS 23:9 “ཡ༌ཝའེ༌ གྱལ༌ཁག༌ ཝང༌ཅན༌ དང༌ ཤུགས༌ཅན༌ ཚང༌མ༌ ཁྱོ༌ཞ༌གུན༌ནི༌ ཕིའ༌ ཕིངས༌ཏེ༌ ཁྱོ༌ཞའ༌ ཏང༌ང༌ ཛདས༌། དག༌ས༌ ཚག༌པ༌ ཁྱོ༌ཞའེ༌ གྱབ༌གལ༌ལ༌ གྱལ༌ཁམས༌ ཅིག༌གའང༌ ལངས༌ མ༌ཉན༌ན༌ ཨིན༌ནོག༌།
JOS 23:10 མག༌གི༌ ནང༌ང༌ ཁྱོ༌ཞའ༌ རེ༌རེའེ༌ གྲ༌འོ༌ སྟོང༌ ཤོར༌ ཅུག༌ཨིན༌ ཅིའ༌ཟེར༌ན༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཁྱོ༌ཞའེ༌ ཏོན༌ལ༌ ནོལ༌ལ༌ ཛད༌ཨིན༌ ཀ༌ཟུག༌ ཁོང༌ངི༌ ཞལ༌ཆད༌ ཛད༌ཏེ༌ ཨིན༌པིན༌།
JOS 23:11 ཏེ༌བོའེ༌ཕིའ༌ ཡ༌ཝ༌ ཁྱོ༌ཞ༌རང༌ངི༌ དཀོན༌མཆོག༌ག༌ ཅམས༌པ༌ ཅོ༌ཅེས༌ ཏན༌ཏན༌ ཅོས༌།”
JOS 23:12 “ཨིན༌ནའང༌ ཀལ༌ཏེས༌ ཁྱོ༌ཞའ༌ ཁོང༌ནེ༌ གྱུར༌ཏེ༌ འི༌ གྱལ༌ཁམས༌སི༌ མི༌ མ༌ཕིང༌ང༌ ལུས༌ཁན༌གུན༌ནི༌ ལུག༌སྲོལ༌ ཡང༌ ཁོང༌གུན༌ ཉམ༌པོ༌ ན༌མ༌ ཅོས༌ཏེ༌ བྲེལ༌ བོར༌ན༌,
JOS 23:13 ཏེ༌ནེ༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཁྱོ༌ཞའེ༌ ཕིའ༌ ཁོང༌གུན༌ འི༌ ས༌ཀྱད༌དི༌ ནང༌ནེ༌ ཕིང༌ང༌ མི༌ ཛད༌ཅེས༌པོ༌ སལ༌པོ༌ ཧ༌གོ༌གོས༌ མ༌ཚད༌ ཁོང༌གུན༌ ཁྱོ༌ཞའ༌ ཁད༌ཅེས༌སི༌ སྙི༌འུ༌, ཁྱོ༌ཞའེ༌ གྱབ༌བ༌ ཕོག༌ཁན༌ ལྟལ༌ཅགས༌ ཡང༌ ཁྱོ༌ཞའེ༌ མིག༌གི༌ ནང༌ང༌ ཙེར༌མང༌ ཙོགས༌ གྱུར༌ཨིན༌ ཡང༌ ཡ༌ཝ༌ ང༌དང༌ངི༌ དཀོན༌མཆོག༌གི༌ ཁྱོ༌ཞའ༌ སལ༌ཁན༌ནི༌ འི༌ ས༌ཀྱད༌ ཟང༌པོའེ༌ ནང༌ནེ༌ ཁྱོ༌ཞ༌གུན༌ ཕིང༌ང༌ ཛད༌ཨིན༌།”
JOS 23:14 “ཏ༌ ང༌ ཤི༌ཅེས༌སི༌ ཏུས༌ ལེབ༌ཏེ༌ ཨིན༌ནོག༌། ཁྱོ༌ཞ༌གུན༌ལ༌ སྙིང༌ནེ༌ ཧ༌གོ༌ཏེ༌ ཨིན༌ནོག༌ ང༌དང༌ངི༌ དཀོན༌མཆོག༌ ཡ༌ཝའེ༌ ཞལ༌ཆད༌ ཛད༌ཁན༌ ཟང༌པོ༌ ཅིག༌གའང༌ དྲན༌དྲའ༌ མ༌གྲུབ༌བ༌ མ༌ལུས༌། ཚང༌མ༌ དྲན༌དྲའ༌ གྲུབ༌ཏེ༌ ཨིན༌ནོག༌།
JOS 23:15 ཨིན༌ནའང༌ ཡ༌ཝ༌ ཁྱོ༌ཞ༌གུན༌ནི༌ དཀོན༌མཆོག༌གི༌ ཞལ༌ཆད༌ ཛད༌ཁན༌ ཚང༌མ༌ དྲན༌དྲའ༌ གྲུབ༌བ༌ ཙོགས༌ལ༌ ཁོང༌ངི༌ ཁྱོ༌ཞ༌གུན༌ནི༌ཀ༌ ངན༌པ༌ ཚང༌མ༌ ཇུང༌ཅེས༌སི༌ སྤང༌པུད༌ད༌ ཛད༌ཁན༌གུན༌ནའང༌ དྲན༌དྲའ༌ གྲུབ༌ཨིན༌ ནམ༌ཚག༌པ༌ དཀོན༌མཆོག༌གི༌ ཁྱོ༌ཞའ༌ སལ༌ཁན༌ནི༌ འི༌ ས༌ཀྱད༌ ཟང༌པོའེ༌ ནང༌ནེ༌ ཁྱོ༌ཞ༌གུན༌ མེད༌ཁན༌ མི༌ཛད༌།
JOS 23:16 ཀལ༌ཏེས༌ ཡ༌ཝའེ༌ བཀའ༌ སལ༌ཁན༌གུན༌ ཅགས༌ཏེ༌ ཁྱོ༌ཞ༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ ཡ༌ ཞབས༌ཏོག༌ ཞུས༌ཏེ༌ ཁོང༌གུན༌ལ༌ ཆག༌ ཕུལ༌ན༌ ཁོང༌ངི༌ ཐུག༌ སྲོ༌ ཁྱོ༌ཞ༌གུན༌ནི༌ཀ༌ ཀྲག༌པོ༌ མེ༌ བར༌ཁན༌ ཙོགས༌ བབས༌ཨིན༌ ཡང༌ ཁྱོ༌ཞ༌གུན༌ ཁོང༌ངི༌ སལ༌ཁན༌ནི༌ འི༌ ས༌ཀྱད༌ ཟང༌པོ༌ ནང༌ནེ༌ མ༌ གྱོགས༌པ༌ མེད༌ཁན༌ ཆེན༌།”
JOS 24:1 ཏེ༌ནེ༌ ཡོ༌ཤུའེ༌ ཨིས༌ར༌ཨེལ༌ལི༌ མི༌སྡེ༌ ཚང༌མ༌ ཤེ༌ཀེམ༌མི༌ ནང༌ང༌ ཛོམ༌ཅུགས༌། ཁོང༌ངི༌ འུ༌སྐྱོང༌གུན༌, སྤོན༌བོ༌གུན༌, ཁྲིམ༌སྤོན༌གུན༌ དང༌ མག༌གི༌ སྤོན༌བོ༌གུན༌ལ༌ ཡ༌ཝའེ༌ སྐུན༌དུན༌ལ༌ ཛོམ༌ཅེས༌ལ༌ ཟེརས༌ ཡང༌ ཁོང༌གུན༌ ཡོངས༌།
JOS 24:2 ཏེ༌ནེ༌ ཡོ༌ཤུའེ༌ མི༌ ཚང༌མ༌ལ༌ ཟེརས༌, “ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ མོལས༌, ‘ཏུས༌ མང༌པོའེ༌ སྔུན༌ལ༌ ཨབ༌ར༌ཧམ༌ དང༌ ན༌ཧོར༌རི༌ ཨ༌བ༌ ཏི༌རཧ༌ ཐེས༌ཏེ༌ ཁྱོ༌ཞའེ༌ ཕ༌མེས༌པོ༌གུན༌ ཡུཕ༌རེ༌ཀྲས༌སི༌ ལྩངས༌པོའེ༌ ཤར༌ ཆོགས༌ལ༌ དུག༌གད༌པིན༌ ཡང༌ ཁོང༌གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ལད༌པིན༌།
JOS 24:3 ཨིན༌ནའང༌ ངའེ༌ ཁྱོ༌ཞའེ༌ ཕ༌མེས༌པོ༌ ཨབ༌ར༌ཧམ༌ ཡུཕ༌རེ༌ཀྲས༌སི༌ ཤར༌ ཆོགས༌ནེ༌ ཀེ༌ནན༌ནི༌ ས༌ཀྱད༌དི༌ ནང༌ང༌ ཁྱོངས༌པིན༌། ངའེ༌ ཁོའ༌, ཁོའེ༌ བུ༌ཚ༌ ཨི༌སཱག༌ གྱུད༌ཏེ༌ པུར༌གྱུད༌ མང༌པོ༌ ཏངས༌པིན༌།
JOS 24:4 ངའེ༌ ཨི༌སཱག༌ག༌ ཡ༌ཀོབ༌ དང༌ ཨི༌སུ༌ བུ༌ཚ༌གུན༌ ཏངས༌པིན༌། ངའེ༌ ཨི༌སུའ༌ སེ༌འིར༌རི༌ རི༌ཡུལ༌ ཏངས༌པིན༌ ཨིན༌ནའང༌ ཡ༌ཀོབ༌ དང༌ ཁོའེ༌ ཕྲུ༌གུ༌ གུན༌ ཐུར༌ལ༌ ཨི༌ཇིབ༌བ༌ སོང༌།’”
JOS 24:5 “‘ཏེ༌ནེ༌ ངའེ༌ མོ༌ཟེས༌ དང༌ ཨ༌རོན༌ ལམ༌ཅུགས༌པིན༌ ཡང༌ ངའེ༌ ཨི༌ཇིབ༌པ༌གུན༌ལ༌ རྡུག༌ངལ༌ སྲན༌ཏྲེ༌ སྟན༌ཏེ༌ ཁྱོ༌ཞ༌གུན༌ ཏེ༌ནང༌ནེ༌ ཕིངས༌ཏེ༌ ཁྱོངས༌པིན༌།
JOS 24:6 ཁྱོ༌ཞའེ༌ ཕ༌མེས༌པོ༌གུན༌ ཚོ༌ མར༌པོའེ༌ཀ༌ ལེབ༌བ༌ཅིག༌ ཨི༌ཇིབ༌པ༌གུན༌ནི༌ རྟ༌ དང༌ ཤིང༌རྟ༌ སྲུལ༌ཁན༌ མག༌མི༌གུན༌ནི༌ ཁོང༌གུན༌ལ༌ ཏེ༌རུ༌ ཏེད༌ཏེ༌ ཁྱོངས༌།
JOS 24:7 ཨིན༌ནའང༌ ཁོང༌གུན༌ནི༌ ཡ༌ཝའ༌ རོགས༌ ཛད༌ཅེས༌ལ༌ ཞུས༌ ཡང༌ ངའེ༌ ཨིས༌ར༌ཨེལ༌པ༌ དང༌ ཨི༌ཇིབ༌པ༌ གུན༌ནི༌ པར༌ལ༌ མུན༌གྲིག༌ ཅོས༌པིན༌། ངའེ༌ ཨི༌ཇིབ༌པ༌གུན༌ ཚོའེ༌ ཆུ༌ ཉམ༌པོ༌ ཀབས༌པིན༌། ངའེ༌ ཨི༌ཇིབ༌པ༌གུན༌ལ༌ ཅོ༌ཁན༌བོ༌ ཁྱོ༌ཞའེ༌ མིག༌ནེ༌ ཐོང༌ཏེ༌ ཨིན༌ནོག༌། ཏེ༌སྟིང༌ནེ༌ ཁྱོ༌ཞ༌གུན༌ ཐང༌སྟོང༌ངི༌ ནང༌ང༌ ལོ༌ མང༌པོ༌ དུགས༌ཏེ༌ ཨིན༌པིན༌།’”
JOS 24:8 “‘ཏེ༌ནེ༌ ངའེ༌ ཁྱོ༌ཞ༌གུན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཡོད༌ཁན༌ ཨ༌མོར༌པ༌གུན༌ནི༌ ས༌ཀྱད༌དི༌ ནང༌ང༌ ཁྱོངས༌པིན༌། ཁོང༌གུན༌ནི༌ ཁྱོ༌ཞའེ༌ གྱབ༌གལ༌ལ༌ ནོལས༌ ཨིན༌ནའང༌ ངའེ༌ ཁོང༌གུན༌ ཁྱོ༌ཞའེ༌ དུན༌ལ༌ མེད༌ཁན༌ ཅོས༌པིན༌ ཡང༌ ཁྱོ༌ཞའེ༌ ཁོང༌གུན༌ནི༌ ས༌ཀྱད༌ ང༌ཡོག༌ག༌ ཁྱོངས༌།
JOS 24:9 ཏེ༌ནེ༌ ཟིཔ༌པོར༌རི༌ བུ༌ཚ༌, མོ༌འབ༌བི༌ གྱལ༌པོ༌ བ༌ལག༌གི༌ ཨིས༌ར༌ཨེལ༌པའེ༌ གྱབ༌གལ༌ལ༌ མག༌ ཏང༌ཅེས༌ གྲལ༌གྲིག༌ ཅོས༌། ཁོའེ༌ ཁྱོ༌ཞ༌གུན༌ལ༌ ངན༌ ཏབ༌ཅེས༌སི༌ ཕིའ༌ བེ༌འོར༌རི༌ བུ༌ཚ༌ བ༌ལའམ༌ བོད༌ཏེ༌ ཁྱོངས༌།
JOS 24:10 ཨིན༌ནའང༌ ངའེ༌ བ༌ལའམ༌མི༌ ཞུ༌ཝ༌ མ༌ཉན༌པིན༌ མ༌ཚད༌ ངའེ༌ ཁོའ༌ ཁྱོ༌ཞའ༌ ཅིན༌ལབས༌ ཏང༌ ཅུགས༌པིན༌ ཡང༌ ཏེན༌ན༌ ཟུག༌གི༌ ངའེ༌ ཁྱོ༌ཞ༌གུན༌ བ༌ལག༌ནེ༌ ཐར༌ཅུགས༌པིན༌།’”
JOS 24:11 “‘ཏེ༌ནེ༌ ཁྱོ༌ཞ༌གུན༌ ཡོར༌དཱན༌ ལྩངས༌པོ༌ རྒལ༌ཏེ༌ ཡེ༌རི༌ཀོའ༌ ལེབ༌བ༌ཅིག༌ ཡེ༌རི༌ཀོའེ༌ ནང༌ང༌ དུག༌ཁན༌གུན༌ནི༌ ཁྱོ༌ཞའེ༌ གྱབ༌གལ༌ལ༌ ནོལས༌། ཨ༌མོར༌པ༌, པེ༌རིཟ༌པ༌, ཀེ༌ནན༌པ༌, ཧེད༌པ༌, གིར༌གཤ༌པ༌, ཧིཝ༌པ༌ དང༌ ཡེ༌བས༌པ༌ གུན༌ནིའང༌ ཏེན༌ན༌ ཙོགས༌ ཅོས༌ ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཁོང༌གུན༌ནི༌ ཀ༌ནེ༌ གྱལ༌ཁ༌ ཏངས༌པིན༌།
JOS 24:12 ཡང༌ ཁྱོ༌ཞ༌གུན༌ནི༌ སང༌ སྔུན༌ལ༌ ཇིགས༌ནང༌ ཀལ༌ཏེ༌ ངའེ༌ ཨ༌མོར༌པའེ༌ གྱལ༌པོ༌ ཉིས༌ཀོ༌ ཕིངས༌ཏེ༌ ཏངས༌པིན༌། ཁྱོ༌ཞའེ༌ ར༌འི༌ དང༌ ཞུ༌ གུན༌ གྱུད༌ཏེ༌ ཁྱོ༌ཞའ༌ གྱལ༌ཁ༌ ཐོབས༌ཏེ༌ མན༌པིན༌།
JOS 24:13 ཁྱོ༌ཞའེ༌ མ༌བད༌ཁན༌ནི༌ ས༌ཀྱད༌ ཡང༌ ཁྱོ༌ཞའེ༌ མ༌ རྩིག༌ཁན༌ནི༌ གྱལ༌ས༌ ངའེ༌ ཁྱོ༌ཞ༌གུན༌ལ༌ ཏངས༌པིན༌ ཡང༌ ཏེ༌རུ༌ ཁྱོ༌ཞའ༌ དུགས༌ཏེ༌ ཁྱོ༌ཞའེ༌ མ༌བད༌ཁན༌ནི༌ རྒུན༌ཚས༌ དང༌ ཨོ༌ལིཝ༌ཝི༌ ཚས༌ གུན༌ནེ༌ ཟོས༌།’”
JOS 24:14 ཏེ༌ནེ༌ ཡོ༌ཤུའེ༌ མི༌གུན༌ལ༌ ཟེརས༌, “ཏ༌ ཡ༌ཝའེ༌ ཇིགས༌སི༌ ནང༌ང༌ ཨིད༌ཤེས༌ ཉམ༌པོ༌ ཁོང༌ང༌ སྙིང༌ནེ༌ ཅོལ༌ཏེ༌ ཞབས༌ཏོག༌ ཞུས༌། ཁྱོ༌ཞའེ༌ ཕ༌མེས༌པོ༌གུན༌ ཨི༌ཇིབ༌ ཡང༌ ཡུཕ༌རེ༌ཀྲས༌ ལྩངས༌པོའེ༌ ཤར༌ ཆོགས༌ལ༌ དུག༌ ཟ༌ནེ༌ ཁོང༌གུན༌ནི༌ ཅོལ༌ཁན༌ནི༌ སྐུན༌དྲ༌གུན༌ ཕངས༌ཏེ༌ ཡ༌ཝའ༌ ཅིག༌པོའ༌ ཞབས༌ཏོག༌ ཞུས༌།
JOS 24:15 ཨིན༌ནའང༌ ཀལ༌ཏེས༌ ཁྱོ༌ཞའེ༌ ཡ༌ཝའ༌ ཞབས༌ཏོག༌ མི༌ཞུ༌ སམ༌ན༌ ཏེ༌ནེ༌ དི༌རིང༌རང༌ ཁྱོ༌ཞ༌གུན༌ནི༌ སུའ༌ ཞབས༌ཏོག༌ ཞུ༌ཅེན༌ ཏེ༌བོ༌ ལྡོམ༌, ཁྱོ༌ཞའེ༌ ཕ༌མེས༌པོ༌གུན༌ནི༌ ཡུཕ༌རེ༌ཀྲས༌སི༌ ཤར༌ ཆོགས༌ལ༌ ཞབས༌ཏོག༌ ཞུ༌ཁན༌ ལྷ༌ལྷ༌མོ༌ གུན༌ ཡ༌ ཨ༌མོར༌པ༌གུན༌ནི༌ ལྷ༌ལྷ༌མོ༌ གུན༌, ཀ༌གུན༌ནི༌ ས༌ཀྱད༌དི༌ ནང༌ང༌ དག༌ས༌ ཁྱོ༌ཞ༌གུན༌ དུག༌ཨིན༌ ཨིན༌ནོག༌། ཨིན༌ནའང༌ ང༌ དང༌ ངའེ༌ ནང༌ཚངས༌གུན༌ནི༌ ཡ༌ཝའ༌ ཅོལ༌ཏེ༌ ཞབས༌ཏོག༌ ཞུ༌ཨིན༌།”
JOS 24:16 མི༌གུན༌ནི༌ ལན༌ཏངས༌, “ང༌ཞའེ༌ ཡ༌ཝ༌ སྤངས༌ཏེ༌ ཞན༌མའེ༌ ལྷ༌ལྷ༌མོ༌ གུན༌ལ༌ ཞབས༌ཏོག༌ མན༌ནེ༌ མི༌ཞུ༌,
JOS 24:17 ཅིའ༌ཟེར༌ན༌ ཡ༌ཝ༌ ང༌དང༌གུན༌ནི༌ དཀོན༌མཆོག༌གི༌ ང༌དང༌ དང༌ ང༌དང༌ངི༌ ཕ༌མེས༌པོ༌གུན༌ ཨི༌ཇིབ༌བི༌ ཚེ༌ཡོག༌ནེ༌ ཐར༌ ཅུག༌ག༌ ཛད༌ཏེ༌ ཧ༌ལས༌ཤེས༌སི༌ སྟགས༌གུན༌ ང༌དང༌གུན༌ནི༌ མིག༌གི༌ དུན༌ལ༌ སྟན༌ན༌ ཛདས༌། ཁོང༌ངི༌ ང༌དང༌གུན༌ བེས༌ གང༌པོའེ༌ ནང༌ང༌ ཡང༌ གྱལ༌ཁམས༌ ཚང༌མ༌ གྱུད༌ཏེ༌ ཆ༌ ཟ༌ནེ༌ སྐྱོབས༌ཏེ༌ བོར༌ར༌ ཛདས༌།
JOS 24:18 ཡ༌ཝའེ༌ ཨ༌མོར༌པ༌གུན༌ ཐེས༌ཏེ༌ འི༌ ས༌ཀྱད༌དི༌ ནང༌ང༌ དུག༌ཁན༌ ཞན༌ གྱལ༌ཁམས༌སི༌ མི༌གུན༌ ཕིང༌ང༌ ཛདས༌། ཏེན༌ན༌བོའེ༌ཕིའ༌ ང༌ཞ༌གུན༌ནིའང༌ ཡ༌ཝ༌ ཅོལ༌ཏེ༌ ཞབས༌ཏོག༌ ཞུ༌ཨིན༌ ཅིའ༌ཟེར༌ན༌ ཁོང༌ ཅིག༌པོ༌ ང༌ཞ༌གུན༌ནི༌ དཀོན༌མཆོག༌ ཞུགས༌ཏེ༌ ཨིན༌།”
JOS 24:19 ཏེ༌ནེ༌ ཡོ༌ཤུའེ༌ མི༌གུན༌ལ༌ ཟེརས༌, “ཡ༌ཝའ༌ ཞབས༌ཏོག༌ ཞུ༌ཅེས༌ ལ༌མོ༌ཞིག༌ མ༌ནོག༌ ཅིའ༌ཟེར༌ན༌ ཁོང༌ ཏམ༌པ༌ དང༌ ཚིག༌རི༌ཅན༌ དཀོན༌མཆོག༌ ཞུགས༌ཏེ༌ ཨིན༌ནོག༌། ཁྱོ༌ཞའེ༌ ཁོང༌ང༌ གྱབ༌གལ༌ ཡང༌ སྡིག༌པ༌ ཅོ༌ན༌ ཁོང༌ངི༌ ཤགས༌པ༌ སལ༌ལ༌ མི༌ཛད༌།
JOS 24:20 ཁོང༌ངི༌ ཁྱོ༌ཞའེ༌ ཕིའ༌ ཆག༌ལས༌ ཟང༌པོ༌ ཛད༌ཏེ༌ ཨིན༌ནའང༌, ཀལ༌ཏེས༌ ཁྱོ༌ཞའེ༌ ཡ༌ཝའ༌ ཕངས༌ཏེ༌ ཞན༌ མི༌གུན༌ནི༌ ཅོལ༌ཁན༌ ལྷ༌ལྷ༌མོ༌ གུན༌ལ༌ ཞབས༌ཏོག༌ ཞུ༌ན༌ ཡ༌ཝའེ༌ ཁྱོ༌ཞ༌གུན༌ནི༌ གྱབ༌གལ༌ ཛད༌ཏེ༌ ཁྱོ༌ཞ༌གུན༌ མེད༌ཁན༌ ཛད༌ཨིན༌།”
JOS 24:21 ཨིན༌ནའང༌ མི༌གུན༌ནི༌ ཡོ༌ཤུའ༌ ལན༌ཏངས༌, “མན༌ ང༌ཞ༌གུན༌ནི༌ ཡ༌ཝ༌ ཅིག༌པོའ༌ ཅོལ༌ཏེ༌ ཞབས༌ཏོག༌ ཞུ༌ཨིན༌།”
JOS 24:22 ཏེ༌ནེ༌ ཡོ༌ཤུའེ༌ ཟེརས༌, “ཁྱོ༌ཞའེ༌ ཡ༌ཝའ༌ ཞབས༌ཏོག༌ ཞུ༌ཅེས༌སི༌ ཐག༌ཅད༌ཁན༌ནི༌ སྤང༌པོ༌ ཁྱོ༌ཞ༌རང༌ ཨིན༌ནོག༌།” ཁོང༌གུན༌ནི༌ ལན༌ཏངས༌, “འོ༌ན༌, ཏེ༌བོའེ༌ སྤང༌པོ༌ ང༌ཞ༌རང༌ ཨིན༌།”
JOS 24:23 ཡོ༌ཤུའེ༌ ཟེརས༌, “ཏེ༌ནེ༌ ཁྱོ༌ཞ༌གུན༌ནི༌ ཕྲོའ༌ ཡོད༌ཁན༌ནི༌ སྐུན༌དྲ༌གུན༌ ཕངས༌ཏེ༌ མེད༌ཁན༌ ཅོས༌ ཡང༌ ཁྱོ༌ཞའེ༌ སྙིང༌གུན༌ ཡ༌ཝ༌ ཨིས༌ར༌ཨེལ༌པའེ༌ དཀོན༌མཆོག༌ ཆོགས༌ལ༌ སྟན༌པོ༌ ཅོས༌།”
JOS 24:24 མི༌གུན༌ནི༌ ཡོ༌ཤུའ༌ ཟེརས༌, “ང༌ཞ༌གུན༌ནི༌ ཡ༌ཝའ༌ ང༌ཞའེ༌ དཀོན༌མཆོག༌ག༌ ཅོལ༌ཏེ༌ ཞབས༌ཏོག༌ ཞུ༌ཨིན༌ ཡང༌ ཁོང༌ ཅིག༌པོའེ༌ ཁའ༌ ཉན༌ཨིན༌།”
JOS 24:25 ཏེ༌ནེ༌ ཡོ༌ཤུའེ༌ ཏེན༌ན༌ ཞག༌ག༌ ཤེ༌ཀེམ༌མི༌ ནང༌ང༌ མི༌གུན༌ དང༌ ཡ༌ཝའེ༌ པར༌ལ༌ ཆད༌དོན༌ ཅོས༌། ཡོ༌ཤུའེ༌ ཁོང༌གུན༌ནི༌ ཕིའ༌ ཏེ༌ ཁྲིམས༌ དང༌ བཀའ༌ཁྲིམས༌ ཚང༌མ༌ བྲིས༌།
JOS 24:26 ཡོ༌ཤུའེ༌ འི༌ ཚང༌མ༌ ཁྲིམས༌སི༌ སྤེ༌ཆའེ༌ ནང༌ང༌ བྲིས༌། ཁོང༌ངི༌ རྡོའ༌ ཆེན༌མོ༌ ཞིག༌ ཡ༌ཝའེ༌ ཏམ༌པ༌ ཀུར༌རི༌ དུན༌ལ༌ ཡོད༌ཁན༌ ཨོག༌གི༌ ལྕང༌མ༌ ཆེན༌མོའེ༌ ཡོག༌ག༌ བོརས༌།
JOS 24:27 ཡང༌ ཁོང༌ངི༌ མི༌ ཚང༌མའ༌ ཟེརས༌, “འི༌ རྡོའ༌བོའེ༌ ཡ༌ཝའེ༌ ང༌དང༌གུན༌ལ༌ མོལ༌ཁན༌ ཚང༌མ༌ ཚོར༌ཏེ༌ ཨིན༌ནོག༌། ཀལ༌ཏེས༌ ཁྱོ༌ཞ༌གུན༌ ཡ༌ཝའ༌ ཅོ༌ཁན༌ནི༌ ཁ༌ཆད༌གུན༌ནི༌ ནང༌ང༌ ཨིད༌ཤེས༌ཅན༌ མ༌ལུས༌ན༌ འི༌བོ༌ ཁྱོ༌ཞ༌གུན༌ནི༌ གྱབ༌གལ༌ལ༌ སྤང༌པོ༌ ཨིན༌ནོག༌།”
JOS 24:28 ཏེ༌ནེ༌ ཡོ༌ཤུའེ༌ མི༌ ཚང༌མ༌ ལོགས༌ཏེ༌ ཁོང༌གུན༌ལ༌ ནོར༌སྐལ༌ལ༌ ཐོབ༌ཁན༌ནི༌ ས༌ཀྱད༌གུན༌ལ༌ ལམ༌ཅུགས༌།
JOS 24:29 ཏེ༌བོའེ༌ སྟིང༌ནེ༌ ཡ༌ཝའ༌ ཞབས༌ཏོག༌ ཞུ༌ཁན༌ ནུན༌ནི༌ བུ༌ཚ༌ ཡོ༌ཤུའ༌ ཀྲོངས༌, ཁོང༌ང༌ ལོ༌ 110 ཆའད༌པིན༌།
JOS 24:30 ཨིས༌ར༌ཨེལ༌པ༌གུན༌ནི༌ ཡོ༌ཤུའ༌ ནོར༌སྐལ༌ལ༌ ཐོབ༌ཁན༌ནི༌ ས༌ཀྱད༌, གའཤ༌ཤི༌ རི༌ བྱང༌ ཆོགས༌ལ༌ ཨེཕ༌ར༌ཡིམ༌མི༌ རི༌ཡུལ༌ ཏིམ༌ནཐ༌ སེ༌རཧའེ༌ ནང༌ང༌ ཁོང༌ངི༌ སྤུར༌ སུབས༌།
JOS 24:31 ཨིས༌ར༌ཨེལ༌པ༌གུན༌ནི༌ ཡོ༌ཤུའེ༌ མི༌ཚེའེ༌ གང༌པོ༌ ཡང༌ ཁོང༌ངི༌ སྟིང༌ནེ༌ ཞན༌ འུ༌སྐྱོང༌གུན༌ནི༌ ཏུས༌ལ༌ ཡ༌ཝའ༌ ཅོལ༌ཏེ༌ ཞབས༌ཏོག༌ ཞུས༌། ཏེ༌ འུ༌སྐྱོང༌གུན༌ལ༌ ཡ༌ཝའེ༌ ཨིས༌ར༌ཨེལ༌པ༌གུན༌ནི༌ ཕིའ༌ ཛད༌ཁན༌ ཚང༌མའེ༌ ཐོང༌ངོམས༌ ཡོད༌པིན༌།
JOS 24:32 ཨིས༌ར༌ཨེལ༌པ༌གུན༌ནི༌ ཨི༌ཇིབ༌ནེ༌ ཁྱོངས༌ཁན༌ནི༌ ཡོ༌སེབ༌བི༌ རུས༌པ༌ ཤེ༌ཀེམ༌མི༌ ནང༌ང༌ སུབས༌, ཏེ༌བོ༌ ཡ༌ཀོབ༌བི༌ ཧ༌མོར༌རི༌ བུ༌ཚ༌གུན༌ནི༌ ཀ༌ནེ༌ མུལ༌ལི༌ པེ༌ནེ༌ གྱ༌ ཏངས༌ཏེ༌ ཉོས༌ཏེ༌ ཨིན༌པིན༌། ཡོ༌སེབ༌བི༌ པུར༌གྱུད༌གུན༌ལ༌ ནོར༌སྐལ༌ལ༌ ཏང༌ཁན༌ནི༌ ས༌ཀྱད༌དི༌ ནང༌ང༌ ཏེ༌ ས༌ཀྱད༌པོ༌ ཡོད༌ཏེ༌ ཨིན༌ནོག༌།
JOS 24:33 ཨ༌རོན༌ནི༌ བུ༌ཚ༌ ཨེ༌ལི༌འ༌ཟར༌རའང༌ ཀྲོངས༌། ཁོང༌ངི༌ སྤུར༌ ཨེཕ༌ར༌ཡིམ༌མི༌ རི༌ཡུལ༌ལི༌ ནང༌ང༌ སུབས༌ ཀ༌བོ༌ ཁོའེ༌ བུ༌ཚ༌ ཕི༌ནི༌ཧས༌ལ༌ ཏང༌ཁན༌ གི༌བེའཧའེ༌ གྲོང༌ཁྱེར༌རི༌ ནང༌ང༌ ཡོད༌པིན༌།
JDG 1:1 ཡོ༌ཤུའ༌ ཀྲོངས༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཏྲིའ༌ ཛདས༌, “ཀེ༌ནན༌པ༌གུན༌ལ༌ སྤུང༌གོལ༌ ཅོའ༌ལ༌ གོ༌མ༌ ཀ༌ སྡེའེ༌ མི༌གུན༌ ཆ༌ལེ༌?”
JDG 1:2 ཡ༌ཝའེ༌ ལན༌ སལས༌, “ཡ༌ཧུ༌དཱའེ༌ མི༌སྡེ༌ ཆ༌གོས༌ ཅིའ༌ཟེར༌ན༌ ངའེ༌ ཁོང༌གུན༌ནི༌ ལག༌ག༌ ཏེ༌ ས༌ཀྱད༌པོ༌ ཏངས༌ཏེ༌ ཨིན༌།”
JDG 1:3 ཏེ༌ནེ༌ ཡ༌ཧུ༌དཱ༌པ༌གུན༌ནི༌ ཁོང༌ངི༌ སྤུན༌ལ༌ སི༌མི༌འོན༌པ༌གུན༌ལ༌ ཟེརས༌, “ང༌ཞའ༌ སལ༌ཁན༌ནི༌ ས༌ཀྱད༌ ཀེན༌ལ༌ ཡོངས༌ཏེ༌ ཀེ༌ནན༌པ༌གུན༌ལ༌ ནོལ༌ཅེས༌ལ༌ ང༌ཞའ༌ རོགས༌ ཅོས༌, ཏེ༌ནེ༌ ང༌ཞེའང༌ ཁྱོ༌ཞའ༌ ཏེན༌ན༌ ཙོགས༌ལ༌ རོགས༌ ཅོ༌ཨིན༌།” ཏེ༌བོའེ༌ཕིའ༌ སི༌མི༌འོན༌པ༌གུན༌ ཡ༌ཧུ༌དཱ༌པ༌གུན༌ལ༌ རོགས༌ ཅོའ༌ ཡོངས༌།
JDG 1:4 ཡ༌ཧུ༌དཱ༌པ༌གུན༌ནི༌ སྤུང༌གོལ༌ ཅོའ༌ཅིག༌ ཡ༌ཝའེ༌ ཀེ༌ནན༌པ༌གུན༌ དང༌ པེ༌རིཟ༌པ༌གུན༌ ཁོང༌གུན༌ནི༌ ལག༌ག༌ སལས༌ ཡང༌ ཁོང༌གུན༌ནི༌ བེ༌ཟེག༌གི༌ གྲོང༌ཁྱེར༌རི༌ ནང༌ང༌ གྲ༌འོ༌ 10,000 སདས༌།
JDG 1:5 བེ༌ཟེག༌གི༌ ནང༌ང༌ ཡ༌ཧུ༌དཱ༌པ༌གུན༌ལ༌ གྱལ༌པོ༌ ཨ༌དོ༌ནི༌ བེ༌ཟེག༌ ཐོང༌ ཡང༌ ཁོ༌ དང༌ ཁོའེ༌ མག༌མི༌གུན༌ལ༌ ནོལ༌ཏེ༌ ཀེ༌ནན༌པ༌ དང༌ པེ༌རིཟ༌པ༌ གུན༌ལ༌ ཕམ༌ཀལས༌།
JDG 1:6 གྱལ༌པོ༌ ཨ༌དོ༌ནི༌ བེ༌ཟེག༌ ཤོར༌ ཨིན༌ནའང༌ ཁོང༌གུན༌ནི༌ ཁོའ༌ ཏེད༌ཏེ༌ ཁྱེར༌ཏེ༌ ཟུམས༌ ཡང༌ ཁོའེ༌ ལག༌པ༌ དང༌ རྐང༌པའེ༌ ཐེ༌བོ༌གུན༌ ཅདས༌།
JDG 1:7 ཨ༌དོ༌ནི༌ བེ༌ཟེག༌གི༌ ཟེརས༌, “ཏུས༌ཤིག༌ག༌ ངའེ༌ གྱལ༌པོ༌ 70 ལག༌པ༌ དང༌ རྐང༌པའེ༌ ཐེ༌བོ༌གུན༌ ཅད༌པིན༌ ཡང༌ ངའེ༌ ཅོག༌ཙེའེ༌ ཡོག༌ག༌ བུད༌ཁན༌གུན༌ ཁོང༌གུན༌ནི༌ ཟའད༌པིན༌། ཏ༌ དཀོན༌མཆོག༌གི༌ ངའེ༌ ཅོ༌ཁན༌བོའ༌ ལན༌སལ༌ཏེ༌ ཨིན༌ནོག༌།” ཡ༌ཧུ༌དཱ༌པ༌གུན༌ནི༌ ཁོ༌ ཡེ༌རུ༌ཤ༌ལེམ༌མ༌ ཁྲིད༌ཏེ༌ ཁྱེརས༌ ཡང༌ ཁོ༌ ཏེ༌རུ༌ ཤི༌།
JDG 1:8 ཡ༌ཧུ༌དཱ༌པ༌གུན༌ནི༌ ཡེ༌རུ༌ཤ༌ལེམ༌མི༌ཀའང༌ སྤུང༌གོལ༌ ཅོས༌ཏེ༌ ང༌ཡོག༌ག༌ ཁྱོངས༌། ཏེ༌ ནང༌ང༌ དུག༌ཁན༌ མི༌ཚང༌མ༌ སདས༌ ཡང༌ གྱལ༌སའ༌ མེ༌ ཏུགས༌།
JDG 1:9 ཏེ༌ སྟིང༌ནེ༌ ཁོང༌གུན༌ ཐུར༌ལ༌ རི༌ ཡུལ༌, ནེ༌གེཝ༌ དང༌ ནུབ༌ ཆོགས༌སི༌ ཕལ༌ཅན༌ ས༌ཀྱད༌དི༌ ནང༌ང༌ དུག༌ཁན༌ ཀེ༌ནན༌པ༌གུན༌ལ༌ ནོལ༌ལ༌ སོང༌།
JDG 1:10 ཏེ༌ནེ༌ ཡ༌ཧུ༌དཱ༌པ༌གུན༌ ཧེབ༌རོན༌ནི༌ ༼ཀ༌བོའ༌ ཀི༌རི༌འཐ༌ ཨར༌བ༌ ཟེར༌རད༌པིན༌༽ ཀེ༌ནན༌པ༌གུན༌ལ༌ ནོལ༌ལ༌ སོང༌ཏེ༌ ཤེ༌ཤཱའི༌, ཨ༌ཧི༌མན༌ དང༌ ཏལ༌མཱའི༌ པུར༌གྱུད༌གུན༌ལ༌ ཕམ༌ཀལས༌།
JDG 1:11 ཏེ༌ཀ༌ནེ༌ ཁོང༌གུན༌ དེ༌བིར༌རི༌ གྱལ༌སའེ༌ ནང༌ང༌ དུག༌ཁན༌གུན༌ལ༌ ནོལ༌ལ༌ སོང༌ ༼ཀ༌བོའ༌ ཀི༌རི༌འཐ༌ སེ༌ཕེར༌ ཟེར༌རད༌པིན༌༽།
JDG 1:12 ཀེ༌ལེབ༌བི༌ ཟེརས༌, “ཀི༌རི༌འཐ༌ སེ༌ཕེར༌ལ༌ སྤུང༌གོལ༌ ཅོས༌ཏེ༌ ང༌ཡོག༌ག༌ ཁྱོང༌ཁན༌ནི༌ མི༌བོའ༌ ངའེ༌ ང༌རང༌ངི༌ བུ༌མོ༌ ཨཀ༌སཧ༌ ན༌མ༌ ཏང༌ཨིན༌།”
JDG 1:13 ཀེ༌ལེབ༌བི༌ ནོ༌ ཀི༌ནཟ༌སི༌ བུ༌ཚ༌ ཨོཐ༌ནི༌འེལ༌ལི༌ ཏེ༌ ཡུལ༌བོ༌ ང༌ཡོག༌ག༌ ཁྱོངས༌། ཏེ༌བོའེ༌ཕིའ༌ ཀེ༌ལེབ༌བི༌ ཁོ༌རང༌ངི༌ བུ༌མོ༌ ཨཀ༌སཧ༌ ཁོའ༌ ན༌མ༌ ཏངས༌།
JDG 1:14 ན༌མ༌ ཅོས༌ཏེ༌ སྟིང༌ནེ༌ ཨོཐ༌ནི༌འེལ༌ལི༌ ཨཀ༌སཧ༌ ཁོའེ༌ ཨ༌བ༌ ཀེ༌ལེབ༌བ༌ ཞིང༌ ཏོང༌ ཟེར༌ ཅུགས༌། ཏེ༌ནེ༌ ཨཀ༌སཧ༌ ཁོ༌རང༌ངི༌ ཨ༌བའ༌ སྤེ༌ར༌ ཏང༌ང༌ སོང༌ ཡང༌ ཁོ༌ བུང༌བུའི༌ ཀ༌ནེ༌ བབ༌བ༌ཅིག༌ ཀེ༌ལེབ༌བི༌ ཏྲིས༌, “ངའེ༌ ཁྱོ༌རང༌ངི༌ ཕིའ༌ ཅི༌ ཅོ༌?”
JDG 1:15 ཁོའེ༌ ཟེརས༌, “ཉེ༌རང༌ངི༌ ནེ༌གེཝ༌ཝི༌ ས༌ཀྱད༌ ངའ༌ ཏངས༌ཏེ༌ ཨིན༌ནོག༌ ཏ༌ ཇུ༌ཇུ༌ ངའ༌ ཆུ༌མིག༌གི༌ ཆུའང༌ སལ༌ ལེ༌།” ཏེ༌ནེ༌ ཀེ༌ལེབ༌བི༌ ཁོའ༌ སྟག༌ཡོག༌ ཉིས༌ཀའེ༌ ཆུ༌མིག༌གུན༌ ཏངས༌།
JDG 1:16 ཡ༌ཧུ༌དཱ༌པ༌གུན༌ དང༌ མོ༌ཟེས༌སི༌ ན༌མའེ༌ ཨ༌བའེ༌ པུར༌གྱུད༌ ཀེན༌པ༌གུན༌ ཁ༌སོར༌རི༌ ལྕང༌མའེ༌ གྱལ༌ས༌ ཡེ༌རི༌ཀོ༌ནེ༌ བིང༌ཏེ༌ ནེ༌གེཝ༌ ཐང༌སྟོང༌ངི༌ ནང༌ང༌ ཨ༌རད༌དི༌ ཉེ༌མོའ༌ ཨ༌མ༌ལིཀ༌པ༌གུན༌ནི༌ ཕྲོའ༌ དུག༌ག༌ སོང༌།
JDG 1:17 ཏེ༌ནེ༌ ཡ༌ཧུ༌དཱ༌པ༌གུན༌ སི༌མི༌འོན༌པ༌གུན༌ ཉམ༌པོ༌ ཟེ༌ཕཐ༌ལ༌ དུག༌ཁན༌ནི༌ ཀེ༌ནན༌པ༌གུན༌ལ༌ ནོལ༌ལ༌ སོང༌ ཡང༌ ཏེ༌ གྱལ༌སའེ༌ ནང༌ང༌ དུག༌ཁན༌ ཚང༌མ༌ སདས༌། ཏེ༌བོའེ༌ཕིའ༌ ཏེ༌ གྱལ༌སའེ༌ མིང༌ང༌ ཧོར༌མཧ༌ ཏགས༌།
JDG 1:18 ཡ༌ཧུ༌དཱ༌པ༌གུན༌ནི༌ ག༌ཟ༌, ཨཤ༌ཀེ༌ལོན༌ དང༌ ཨེཀ༌རོན༌ནི༌ གྱལ༌ས༌གུན༌ དང༌ ཏེ༌ ཉེ༌ཁོར༌རི༌ ས༌ཀྱད༌གུན༌ ནའང༌ ང༌ཡོག༌ག༌ ཁྱོངས༌།
JDG 1:19 ཡ༌ཧུ༌དཱ༌པ༌གུན༌ ཉམ༌པོ༌ ཡ༌ཝའ༌ ཞུགས༌ཏེ༌ ཡོད༌པིན༌། ཁོང༌གུན༌ནི༌ རི༌ ཡུལ༌གུན༌ ཝང༌ངི༌ ཡོག༌ག༌ ཁྱོངས༌ ཨིན༌ནའང༌ སྤང༌ཐང༌ངི༌ ནང༌ང༌ དུག༌ཁན༌ནི༌ མི༌གུན༌ ཕིང༌ཅེས༌ལ༌ ཁྲངས༌པོ༌ མ༌ལུས༌ ཅིའ༌ཟེར༌ན༌ ཁོང༌གུན༌ནི༌ གྲ༌འོའེ༌ མག༌མི༌ ལག༌ག༌ ཚོན༌ཆ༌ གྱས༌པ༌ སྤེར༌ན༌ ལྕགས༌སི༌ རྟ༌རེལ༌གུན༌ ཡོད༌པིན༌།
JDG 1:20 མོ༌ཟེས༌སི༌ ཁ༌ཆད༌ ཅོ༌ཁན༌ ནང༌ཞིན༌ ཧེབ༌རོན༌ནི༌ གྱལ༌ས༌ ཀེ༌ལེབ༌བ༌ ཏངས༌ ཡང༌ ཁོའེ༌ ཏེ༌རུ༌ དུག༌ཁན༌ ཨ༌ནཀ༌ཀི༌ བུ༌ཚ༌ སུམ༌མི༌ པུར༌གྱུད༌གུན༌ ཕིངས༌ཏེ༌ ཏངས༌།
JDG 1:21 བེན༌ཡཱ༌མིན༌ནི༌ མི༌སྡེའེ༌ ཡེ༌རུ༌ཤ༌ལེམ༌མི༌ ནང༌ང༌ དུག༌ཁན༌ ཡེ༌བས༌པ༌གུན༌ ཕིངས༌ཏེ༌ མ༌ཏངས༌ པ༌སང༌ དི༌རིང༌ངའང༌ ཡེ༌བས༌པ༌གུན༌ ཡེ༌རུ༌ཤ༌ལེམ༌མི༌ ནང༌ང༌ བེན༌ཡཱ༌མིན༌པ༌གུན༌ ཉམ༌པོ༌ དུག༌ཨིན༌ ཨིན༌ནོག༌།
JDG 1:22 ཡོ༌སེབ༌བི༌ པུར༌གྱུད༌གུན༌ བེ༌ཐེལ༌ལི༌ གྱལ༌ས༌ སྤུང༌གོལ༌ ཅོ༌ཅེས༌ལ༌ སོང༌ ཡང༌ ཡ༌ཝའེ༌ ཁོང༌གུན༌ལ༌ རོགས༌ ཛདས༌།
JDG 1:23 བེ༌ཐེལ༌ གྱལ༌སའེ༌ ༼ཀ༌བོའ༌ ལུཟ༌ ཟེར༌རད༌པིན༌༽ སྲུང༌སྐྱོབ༌གུན༌ ཤེད༌ཅན༌ དུག༌ག༌ ཡ༌ འུ༌ཐུགས༌, ལྟའ༌ལ༌ ཁོང༌གུན༌ནི༌ མི༌ ཁ༌ཅིག༌ སང༌ཝའེ༌ ཐོག༌ནེ༌ ལམ༌ཅུག༌།
JDG 1:24 ལྟའ༌ ཆའ༌ཁན༌གུན༌ལ༌ མི༌ཞིག༌ གྱལ༌སའེ༌ ནང༌ནེ༌ བིངས༌ཏེ༌ ཡོང༌ང༌ ཐོང༌ ཡང༌ ཁོའ༌ ཟེརས༌, “གྱལ༌སའེ༌ ནང༌ང༌ སང༌ཝའེ༌ ཐོག༌ནེ༌ ཆ༌སའེ༌ ལམ༌ ང༌ཞའ༌ སྟན༌ན༌ ང༌ཞའེ༌ ཁྱོ༌རང༌ངི༌ སྲོག༌ སྐྱོབ༌ཨིན༌།”
JDG 1:25 ཏེ༌ནེ༌ ཁོའེ༌ ཁོང༌གུན༌ལ༌ གྱལ༌སའེ༌ ནང༌ཀུག༌ག༌ ཆ༌སའེ༌ ལམ༌ སྟནས༌ ཡང༌ ཡོ༌སེབ༌བི༌ པུར༌གྱུད༌གུན༌ནི༌ ཁོ༌ དང༌ ཁོའེ༌ ནང༌ཚང༌གུན༌ མ༌སྟོག༌ ཏེ༌ གྱལ༌སའེ༌ ཞན༌ མི༌ ཚང༌མ༌ སདས༌།
JDG 1:26 སྟིང༌ནེ༌ ཏེ༌ མི༌བོ༌ བིང༌ཏེ༌ ཧེད༌པ༌གུན༌ནི༌ ས༌ཀྱད༌ལ༌ དུག༌ག༌ སོང༌ ཡང༌ ཏེ༌རུ༌ ཁོའེ༌ གྱལ༌ས༌ ཞིག༌ རྩིགས༌ཏེ༌ ཏེ༌བོའེ༌ མིང༌ང༌ ལུཟ༌ ཏགས༌ ཀ༌བོ༌ དི༌རིང༌ངའང༌ ཟེར༌ར༌ནོག༌།
JDG 1:27 བེཐ༌ ཤན༌, ཏའ༌ནག༌, དོར༌, ཨིབ༌ལེ༌འམ༌, མེ༌གིད༌དོ༌ གྱལ༌ས༌གུན༌ ཡང༌ ཏེ༌གུན༌ནི༌ ཉེ༌ཁོར༌ལ༌ ཚུགས༌ཏེ༌ ཡོད༌ཁན༌ ཚང༌མ༌ མ༌ནས༌སའེ༌ མི༌སྡེ༌ ཕིངས༌ཏེ༌ མ༌ཏངས༌ ཅིའ༌ཟེར༌ན༌ ཀེ༌ནན༌པ༌གུན༌ བིང༌ཏེ༌ མ༌ཆའ༌ ཏེན༌ན༌ ནས༌སའེ༌ ནང༌ང༌ རངས༌ཏེ༌ དུགས༌།
JDG 1:28 ཨིས༌ར༌ཨེལ༌པ༌གུན༌ནི༌ ཀྲངས༌ཀ༌ གྱས༌ཏེ༌ སྟོབས༌ཅན༌ གྱུར༌ནའང༌ ཁོང༌གུན༌ནི༌ ཀེ༌ནན༌པ༌ ཚང༌མ༌ ཕིངས༌ཏེ༌ མ༌ཏང༌ང༌ ཁོང༌གུན༌ལ༌ ཝང༌ ཉམ༌པོ༌ ཚེ༌ ཡོག༌གི༌ ལས༌ ཅོ༌ཅུགས༌།
JDG 1:29 ཨེཕ༌ར༌ཡིམ༌ མི༌སྡེའེ༌ གེ༌ཟེར༌ གྱལ༌སའེ༌ ནང༌ང༌ དུག༌ཁན༌ ཀེ༌ནན༌པ༌གུན༌ ཕིངས༌ཏེ༌ མ༌ཏངས༌ ཏེ༌བོའེ༌ཕིའ༌ ཏེ༌རུ༌ ཀེ༌ནན༌པ༌གུན༌ ཁོང༌གུན༌ནི༌ ཕྲོའ༌ དུགས༌།
JDG 1:30 ཟེ༌བུ༌ལོན༌ མི༌སྡེའེ༌ ཀི༌ཀྲོན༌ དང༌ ན༌ཧ༌ལོལ༌ གྱལ༌སའེ༌ ནང༌ང༌ དུག༌ཁན༌གུན༌ ཕིངས༌ཏེ༌ མ༌ཏངས༌ པ༌སང༌ ཀེ༌ནན༌པ༌གུན༌ ཁོང༌གུན༌ནི༌ ཕྲོའ༌ དུག༌ཨིན༌ ཨིན༌ནོག༌། ཟེ༌བུ༌ལོན༌པ༌གུན༌ནི༌ ཁོང༌གུན༌ལ༌ ཝང༌ ཉམ༌པོ༌ ཚེ༌ ཡོག༌གི༌ ལས༌ ཅོ༌ཅུགས༌།
JDG 1:31 ཨཀ༌ཀོ༌, སི༌དོན༌, ཨཧ༌ལབ༌, ཨཀ༌ཟིབ༌, ཧེལ༌བཧ༌, ཨ༌ཕེཀ༌ དང༌ རེ༌ཧོབ༌ གྱལ༌ས༌གུན༌ནི༌ ནང༌ང༌ དུག༌ཁན༌གུན༌ ཨ༌ཤེར༌ མི༌སྡེ༌ ཕིངས༌ཏེ༌ མ༌ཏངས༌
JDG 1:32 མ༌ཚད༌ ཨ༌ཤེར༌པ༌གུན༌ ཏེ༌ ནས༌སའེ༌ ནང༌ང༌ ཝང༌སྲུལ༌ཁན༌ ཀེ༌ནན༌པ༌གུན༌ནི༌ ཕྲོའ༌ སོང༌ཏེ༌ དུགས༌། ཨ༌ཤེར༌པ༌གུན༌ནི༌ ཁོང༌གུན༌ ཕིངས༌ཏེ༌ མ༌ཏངས༌།
JDG 1:33 ཏེན༌ན༌ ཙོགས༌ལ༌ ནཕ༌ཐལ༌ལི༌ མི༌སྡེའེ༌ བེཐ༌ ཤེ༌མེཤ༌ ཡ༌ བེཐ༌ ཨ༌ནཐ༌ གྱལ༌སའེ༌ ནང༌ང༌ དུག༌ཁན༌གུན༌ ཕིངས༌ཏེ༌ མ༌ཏངས༌ མ༌ཚད༌ ཏེ༌ ས༌ཀྱད༌དི༌ ནང༌ང༌ ཝང༌སྲུལ༌ཁན༌ ཀེ༌ནན༌པ༌གུན༌ནི༌ ཕྲོའ༌ སོང༌ཏེ༌ དུགས༌། ནཕ༌ཐལ༌ལི༌པ༌གུན༌ནི༌ བེཐ༌ ཤེ༌མེཤ༌ ཡ༌ བེཐ༌ ཨ༌ནཐ༌ཐི༌ ནང༌ང༌ དུག༌ཁན༌གུན༌ལ༌ ཝང༌ ཉམ༌པོ༌ ཚེ༌ཡོག༌གི༌ ལས༌ ཅོ༌ཅུགས༌།
JDG 1:34 ཨ༌མོར༌པ༌གུན༌ནི༌ དཱན༌པ༌གུན༌ ཐང༌ངི༌ ནང༌ང༌ དུག༌ མ༌ཅུག༌ག༌ ཝང༌ ཉམ༌པོ༌ རི༌ཡུལ༌ ཆོགས༌ལ༌ བོརས༌།
JDG 1:35 ཨ༌མོར༌པ༌གུན༌ བིང༌ཏེ༌ མ༌ཆའ༌ ཧེ༌རེས༌སི༌ རི༌, ཨའི༌ཡ༌ལོན༌ དང༌ ཤའལ༌བིམ༌ གུན༌ནི༌ ནང༌ང༌ རངས༌ཏེ༌ དུགས༌ ཨིན༌ནའང༌ ཡོ༌སེབ༌བི༌ པུར༌གྱུད༌གུན༌ནི༌ ཀྲངས༌ཀ༌ གྱས༌ཏེ༌ ཤེད༌ཅན༌ གྱུར༌ར༌ཅིག༌ ཁོང༌གུན༌ནི༌ ཨ༌མོར༌པ༌གུན༌ལ༌ ཝང༌ ཉམ༌པོ༌ ཚེ༌ཡོག༌གི༌ ལས༌ ཅོ༌ཅུགས༌།
JDG 1:36 ཨ༌མོར༌པའེ༌ སན༌ཚམས༌ སྡིག༌པ༌རཱ༌ཙེ༌ ལ༌ནེ༌ ཏངས༌ཏེ༌ སེ༌ལ༌ ཡང༌ ཏེ༌སང༌ ཀེན༌ ཚག༌པ༌ ཨིན༌པིན༌།
JDG 2:1 ཡ༌ཝའེ༌ ཕོ༌ཉ༌ གིལ༌གལ༌ནེ༌ ཀེན༌ལ༌ བོ༌ཀིམ༌མ༌ སྐྱོད༌ཏེ༌ ཨིས༌ར༌ཨེལ༌པ༌གུན༌ལ༌ མོལས༌, “ངའེ༌ ཁྱོ༌ཞའེ༌ ཕ༌མེས༌པོ༌གུན༌ ཨི༌ཇིབ༌ནེ༌ ཕིངས༌ཏེ༌ ཁོང༌གུན༌ལ༌ ཏང༌ཅེས༌ལ༌ ནའ༌ ཁུར༌ཁན༌ནི༌ འི༌ ས༌ཀྱད༌དི༌ ནང༌ང༌ ཁྱོ༌ཞ༌གུན༌ ཁྱོངས༌པིན༌། ངའེ༌ ཟེར༌པིན༌, ‘ངའེ༌ ཁྱོ༌ཞ༌གུན༌ ཉམ༌པོ༌ ཅོ༌ཁན༌ནི༌ ང༌རང༌ངི༌ ཆད༌དོན༌ མ༌ནེ༌ མི༌ཅག༌།
JDG 2:2 ཁྱོ༌ཞ༌གུན༌ནི༌ འི༌ ས༌ཀྱད༌དི༌ ནང༌ང༌ དུག༌ཁན༌གུན༌ ཉམ༌པོ༌ ཆད༌དོན༌ མ༌ཅོ༌ ཡང༌ ཁོང༌གུན༌ནི༌ ཆོད༌ཁྲི༌གུན༌ ཤིག༌གོས༌།’ ཨིན༌ནའང༌ ཁྱོ༌ཞ༌གུན༌ནི༌ ངའེ༌ ཁའ༌ མ༌ཉན༌ན༌ ཅི༌ ཅོས༌ཏེ༌ ཨིན༌?
JDG 2:3 ངའེ༌ འི༌བོའང༌ ཟེར༌པིན༌, འི༌ ས༌ཀྱད༌དི༌ ནང༌ང༌ དུག༌ཁན༌གུན༌ ངའེ༌ ཕིངས༌ཏེ༌ མི༌ཏང༌། ཁོང༌གུན༌ ཁྱོ༌ཞ༌གུན༌ནི༌ ཕྲོའ༌ ཚེར༌མངས༌ ཙོགས༌ ཡང༌ ཁོང༌གུན༌ནི༌ ལྷ༌ལྷ༌མོ༌གུན༌ལ༌ ཅོལ༌ཅེས༌པོ༌ ཁྱོ༌ཞའེ༌ ཕིའ༌ ཚོད༌ལྟ༌ གྱུར༌ཨིན༌།”
JDG 2:4 ཡ༌ཝའེ༌ ཕོ༌ཉའེ༌ ཨིས༌ར༌ཨེལ༌པ༌གུན༌ལ༌ ཏེ༌གུན༌ མོལ༌ ཚར༌ར༌ཅིག༌, མི༌གུན༌ ཤེད༌ནང༌ ངུས༌།
JDG 2:5 ཁོང༌གུན༌ནི༌ ཏེ༌ ས༌ཀྱད༌པོའ༌ བོ༌ཀིམ༌ མིང༌ ཏགས༌ ཡང༌ ཁོང༌གུན༌ནི༌ ཏེ༌རུ༌ ཡ༌ཝའ༌ ཆོད༌པ༌གུན༌ ཕུལས༌།
JDG 2:6 ཡོ༌ཤུའེ༌ ཨིས༌ར༌ཨེལ༌པ༌གུན༌ ལོགས༌ཏེ༌ ལམ༌ཅུག༌གི༌ ཏུས༌ལ༌ མི༌སྡེ༌ རེ༌རེ༌ ཁོ༌རང༌གུན༌ལ༌ ནོར༌སྐལ༌ལ༌ ཐོབ༌ཁན༌ནི༌ ས༌ཀྱད༌ལ༌ སོང༌།
JDG 2:7 ཡོ༌ཤུའེ༌ མི༌ཚེ༌ ཏང༌ ཁོང༌ངི༌ སྟིང༌ནེ༌ སོན༌ཏེའ༌ ལུས༌ཁན༌ འུ༌སྐྱོང༌གུན༌ནི༌ ཏུས༌ གང༌པོ༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཅོལ༌ཏེ༌ ཞབས༌ཏོག༌ ཞུས༌། ཡ༌ཝའེ༌ ཨིས༌ར༌ཨེལ༌པ༌གུན༌ནི༌ ཕིའ༌ ཧ༌ལས༌ཤེས༌སི༌ ཛད༌པ༌ ཛད༌ཁན༌གུན༌ ཏེ༌ འུ༌སྐྱོང༌ ཚང༌མའེ༌ ཐོང༌ཏེ༌ ཨིན༌པིན༌།
JDG 2:8 ཡ༌ཝའ༌ ཞབས༌ཏོག༌ ཞུ༌ཁན༌ ནུན༌ནི༌ བུ༌ཚ༌ ཡོ༌ཤུའ༌ ཤི༌ ཟ༌ནེ༌ ལོ༌ 110 ཆའད༌པིན༌ །
JDG 2:9 ཁོང༌གུན༌ནི༌ ཡོ༌ཤུའེ༌ སྤུར༌ ཁོའ༌ ནོར༌སྐལ༌ལ༌ ཐོབ༌ཁན༌ ཏིམ༌ནཐ༌ ཧེ༌རེས༌སི༌ ནང༌ང༌ སུབས༌། ཏེ༌ ནས༌ས༌བོ༌ གའཤ༌ རི༌ བྱང༌ ཆོགས༌ལ༌ ཨེཕ༌ར༌ཡིམ༌པའེ༌ རི༌ཡུལ༌ལི༌ ནང༌ང༌ ཡོད༌པིན༌།
JDG 2:10 ཏེ༌ མི༌རབས༌པོ༌ ཤི༌ཏེ༌ མི༌རབས༌ སོ༌མ༌ཞིག༌ ལྡནས༌། ཁོང༌གུན༌ལ༌ ཡ༌ཝ༌ ཡ༌ ཁོང༌ངི༌ ཨིས༌ར༌ཨེལ༌པ༌གུན༌ནི༌ ཕིའ༌ ཛད༌ཁན༌གུན༌ གྱུས༌ མེད༌པིན༌།
JDG 2:11 ཏེ༌ནེ༌ ཨིས༌ར༌ཨེལ༌པ༌གུན༌ནི༌ ཡ༌ཝ༌ དཀོན༌མཆོག༌གི༌ སྐུན༌དུན༌ལ༌ ངན༌པ༌ ཅོས༌ ཡང༌ བའལ༌ ཟེར༌ཁན༌ནི༌ སྐུན༌དྲ༌གུན༌ལ༌ ཅོལས༌།
JDG 2:12 ཁོང༌གུན༌ནི༌ ཕ༌མེས༌པོ༌གུན༌ ཨི༌ཇིབ༌ནེ༌ ཕིངས༌ཏེ༌ ཁྱོང༌ང༌ ཛད༌ཁན༌ དཀོན༌མཆོག༌ ཡ༌ཝ༌ ཁོང༌གུན༌ནི༌ ཕངས༌། ཁོང༌གུན༌ནི༌ ཉེ༌ཁོར༌ལ༌ དུག༌ཁན༌གུན༌ནི༌ ལྷ༌ལྷ༌མོ༌གུན༌ལ༌ ཅོལས༌ ཡང༌ ཞབས༌ཏོག༌ ཞུས༌ཏེ༌ ཡ༌ཝའ༌ ཐུག༌སྲོ༌ སྐྱོད༌ཅུག༌ག༌ ཛདས༌།
JDG 2:13 ཅིའ༌ཟེར༌ན༌ ཁོང༌གུན༌ནི༌ ཡ༌ཝ༌ ཕངས༌ཏེ༌ བའལ༌ དང༌ ཨཤ༌ཏོ༌རེཐ༌ སྐུན༌དྲ༌གུན༌ལ༌ ཅོལས༌།
JDG 2:14 ཡ༌ཝའེ༌ ཐུག༌སྲོ༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ཡོད༌ཅེས༌པོའེ༌ ཁོང༌ངི༌ ཁོང༌གུན༌ ཀོག༌ཅོམ༌ ཏང༌ཁན༌གུན༌ནི༌ ལག༌ག༌ སྟདས༌ ཀ༌གུན༌ནི༌ ཁོང༌གུན༌ནི༌ ནོར༌གུན༌ ཅོམས༌ཏེ༌ ཁྱེརས༌། ཡ༌ཝའེ༌ ཁོང༌གུན༌ ཆོགས༌ ཚང༌མ༌ནེ༌ གྲ༌འོ༌གུན༌ནི༌ ལག༌ག༌ སྟདས༌ ཡང༌ ཁོང༌གུན༌ལ༌ ཏེ༌ སྤུང༌གོལ༌གུན༌ནེ༌ ཁོ༌རང༌གུན༌ སྐྱོབ༌ མ༌ཉན༌།
JDG 2:15 ཏུས༌གྱུན༌ ཨིས༌ར༌ཨེལ༌པ༌གུན༌ མག༌ག༌ ཆ༌ ཟ༌ནེ༌ ཡ༌ཝའེ༌ ཁོང༌གུན༌ནི༌ གྱབ༌གལ༌ ཛད༌ཏེ༌ ཁོང༌གུན༌ ཕམ༌ ཅུག༌ག༌ ཛདས༌ ཀ༌ཟུག༌ ཁོང༌ངི༌ ནའ༌ ཁུར༌ར༌ ཛད༌ཏེ༌ ཨིན༌པིན༌། ཁོང༌གུན༌ མ༌སྲན༌ཏྲེ༌ རྡུག༌ངལ༌ལི༌ ནང༌ང༌ ཡོད༌པིན༌།
JDG 2:16 ཏེ༌ནེ༌ ཏེ༌ སྤུང༌གོལ༌ ཅོ༌ཁན༌གུན༌ནི༌ ཀ༌ནེ༌ ཨིས༌ར༌ཨེལ༌པ༌གུན༌ ཐར༌ཅུག༌ཅེས༌སི༌ ཕིའ༌ ཡ༌ཝའེ༌ ཁོང༌གུན༌ སྐྱོབ༌ཁན༌ནི༌ གོ༌ཁྲིད༌ རིག༌ ལྡམ༌མ༌ ཛདས༌།
JDG 2:17 ཏེ༌ནེའང༌ ཨིས༌ར༌ཨེལ༌པ༌གུན༌ནི༌ ཏེ༌ གོ༌ཁྲིད༌གུན༌ནི༌ ཁའ༌ མ༌ཉན༌ན༌ ཡ༌ཝ༌ ཕངས༌ཏེ༌ ལྷ༌ལྷ༌མོ༌གུན༌ལ༌ ཅོལས༌། ཁོང༌གུན༌ནི༌ ཕ༌མེས༌པོ༌གུན༌ ཡ༌ཝའེ༌ བཀའ༌ ཁའ༌ཉན༌ཏེ༌ གྲུལ༌ཁན༌ནི༌ ལམ༌མི༌ ཀ༌ནེ༌ ཁོང༌གུན༌ གྱོགས༌པ༌ གྱུར༌ཏེ༌ སོང༌།
JDG 2:18 ཁོང༌གུན༌ནི༌ ཕྲོ༌ནེ༌ ཡ༌ཝའེ༌ སྐྱོབ༌ཁན༌ གོ༌ཁྲིད༌ ལྡམ༌མ༌ ཛད༌ཏེ༌ སྟིང༌ནེ༌ ཁོ༌ ཤི༌ཤི༌ ཚག༌པ༌ ཡ༌ཝ༌ ཁོ༌ ཉམ༌པོ༌ ཞུགས༌ཏེ༌ ཨིས༌ར༌ཨེལ༌པ༌གུན༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛདས༌། རྡུག༌ངལ༌ལི༌ ནན༌ཏེ༌ སྙིང༌ཤུགས༌ ཏངས༌ པ༌སང༌ ཁོང༌གུན༌ནི༌ཀ༌ ཡ༌ཝའ༌ སྙིང༌རྗེ༌ སྐྱེའ༌ ཛདས༌།
JDG 2:19 ཨིན༌ནའང༌ སྐྱོབ༌ཁན༌ནི༌ གོ༌ཁྲིད༌ ཤིའ༌ཅིག༌ མི༌གུན༌ ཁོང༌རང༌གུན༌ནི༌ ངན༌པ༌ མི༌ཚེ༌ ནང༌ང༌ ལོགས༌ཏེ༌ སོང༌ ཡང༌ ཁོ༌རང༌གུན༌ནི༌ ཕ༌མེས༌པོ༌གུན༌ནི༌ སང༌ མང༌ང༌ ངན༌པ༌ ཅོས༌། ཁོང༌གུན༌ནི༌ ལྷ༌ལྷ༌མོ༌གུན༌ནི༌ ཁའ༌ ཉན༌ཏེ༌ ཁོང༌གུན༌ལ༌ ཞབས༌ཏོག༌ ཞུས༌ཏེ༌ ཅོལས༌། ཁོང༌གུན༌ སྙིང༌སྐྱོང༌པོ༌ ཡང༌ ཏེ༌ ལས༌ ངན༌པ༌གུན༌ ཕང༌ཅེས༌ལ༌ མ༌ཐད༌།
JDG 2:20 ཏེ༌བོའེ༌ཕིའ༌ ཡ༌ཝ༌ ཨིས༌ར༌ཨེལ༌པ༌གུན༌ནི༌ཀ༌ མ༌སྲན༌ཏྲེ༌ ཐུག༌སྲོ༌ སྐྱོད༌ཏེ༌ མོལས༌, “འི༌ མི༌གུན༌ནི༌ ཁོང༌གུན༌ནི༌ ཕ༌མེས༌པོ༌གུན༌ནི༌ ང༌ ཉམ༌པོ༌ ཅོ༌ཁན༌ ཆད༌དོན༌བོ༌ ཅགས༌ཏེ༌ ཁའ༌ མ༌ཉན༌ པ༌སང༌,
JDG 2:21 ཡོ༌ཤུའེ༌ ཤི༌ སང༌ སྔུན༌ལ༌ ང༌ཡོག༌ག༌ མ༌ཁྱོང༌ཁན༌ནི༌ གྱལ༌ཁག༌གུན༌ནི༌ ནང༌ནེ༌ མི༌གུན༌ ངའེ༌ ཕིངས༌ཏེ༌ མི༌ཏང༌།
JDG 2:22 ཁོང༌གུན༌ནི༌ ཕ༌མེས༌པོ༌གུན༌ གྲུལ༌ལ༌ ཙོགས༌ལ༌ ཨིས༌ར༌ཨེལ༌པ༌གུན༌ ཡ༌ཝའེ༌ ལམ༌མི༌ཀ༌ གྲུལ༌ དུག༌ག༌ མི༌དུག༌ ཚོད༌ ལྟ༌ཅེས༌ལ༌ ངའེ༌ འི༌ མི༌གུན༌ ཀོལ༌ཨིན༌།”
JDG 2:23 ཏེ༌བོའེ༌ཕིའ༌ ཡ༌ཝའེ༌ ཏེ༌ གྱལ༌ཁག༌གི༌ མི༌གུན༌ ཏེན༌ན༌རུ༌ བོར༌ར༌ ཛད༌། ཁོང༌ངི༌ ཏེན༌ན༌མལ༌ལ༌ ཁོང༌གུན༌ ཕིང༌ང༌ ཛད༌ཏེ༌ ཡོ༌ཤུའེ༌ ལག༌ག༌ ཏང༌ང༌ མ༌ཛདས༌།
JDG 3:1 ཀེ༌ནན༌ནི༌ ནང༌ང༌ མག༌གི༌ ཐོང༌ངོམས༌ མ༌ཆའ༌ཁན༌ ཨིས༌ར༌ཨེལ༌པ༌གུན༌ལ༌ ཚོད༌ ལྟ༌ཅེས༌ལ༌ འི༌ གྱལ༌ཁམས༌གུན༌ ཡ༌ཝའེ༌ ཏེ༌ ནས༌སའེ༌ ནང༌ང༌ བོར༌ར༌ ཛདས༌།
JDG 3:2 མག༌གི༌ ཐོང༌ངོམས༌ མེད༌ཁན༌ ཨིས༌ར༌ཨེལ༌ལི༌ པུར༌གྱུད༌གུན༌ལ༌ མག༌གི༌ ནང༌ང༌ ནོལ༌ཅེས༌ ལབ༌ཅེས༌ལ༌ ཁོང༌ངི༌ ཏེ༌བོ༌ ཅོའ༌ ཛདས༌།
JDG 3:3 ཏེ༌ གྱལ༌ཁམས༌གུན༌ ཕི༌ལིས༌ཏི༌ ནང༌ང༌ ཝང༌སྲུལ༌ཁན༌ རྔ༌, ཀེ༌ནན༌པ༌ ཚང༌མ༌, སི༌དོན༌པ༌ ཚང༌མ༌ ཡང༌ བའལ༌ ཧེར༌མོན༌ རི༌ནེ༌ ལེ༌བོ༌ ཧ༌མཐ༌ ཚག༌པ༌ ལེ༌བ༌ནོན༌ རི༌གུན༌ནི༌ཀ༌ དུག༌ཁན༌ནི༌ ཧིཝ༌པ༌ ཚང༌མ༌ ཨིན༌པིན༌།
JDG 3:4 ཏེ༌ མི༌གུན༌ ཨིས༌ར༌ཨེལ༌པ༌གུན༌ལ༌ ཚོད༌ ལྟ༌ཅེས༌ ཡང༌ན༌ ཡ༌ཝའེ༌ ཁོང༌གུན༌ནི༌ ཕ༌མེས༌པོ༌གུན༌ལ༌ མོ༌ཟེས༌ གྱུད༌ཏེ༌ སལ༌ཁན༌ བཀའ༌གུན༌ལ༌ ཁའ༌ ཉན༌དུག༌ག༌ མི༌དུག༌ ལྟ༌ཅེས༌ལ༌ བོར༌ར༌ ཛད༌ཏེ༌ ཨིན༌པིན༌།
JDG 3:5 ཨིས༌ར༌ཨེལ༌པ༌གུན༌ ཀེ༌ནན༌པ༌, ཧེད༌པ༌, ཨ༌མོར༌པ༌, པེ༌རིཟ༌པ༌, ཧིཝ༌པ༌, དང༌ ཡེ༌བས༌པ༌ གུན༌ནི༌ ཕྲོའ༌ དུགས༌ཏེ༌
JDG 3:6 ཨིས༌ར༌ཨེལ༌པའེ༌ བུ༌ཚ༌གུན༌ནི༌ ཁོང༌གུན༌ནི༌ བུ༌མོ༌གུན༌ ཉམ༌པོ༌ བག༌སྟོན༌ ཅོས༌ ཡང༌ ཨིས༌ར༌ཨེལ༌པ༌ བུ༌མོ༌གུན༌ ཁོང༌གུན༌ནི༌ བུ༌ཚ༌གུན༌ལ༌ བག༌མའ༌ ཏངས༌ མ༌ཚད༌ ཨིས༌ར༌ཨེལ༌པ༌གུན༌ནི༌ ཁོང༌གུན༌ནི༌ ལྷ༌ལྷ༌མོ༌གུན༌ལ༌ ཅོལས༌།
JDG 3:7 ཨིས༌ར༌ཨེལ༌པ༌གུན༌ནི༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌། ཁོང༌གུན༌ནི༌ ཁོ༌རང༌གུན༌ནི༌ དཀོན༌མཆོག༌ ཡ༌ཝ༌ རྗེད༌ཏེ༌ བའལ༌ དང༌ ཨ༌ཤེ༌རཧའེ༌ སྐུན༌དྲ༌གུན༌ལ༌ ཅོལས༌།
JDG 3:8 ཏེ༌ནེ༌ ཡ༌ཝའ༌ ཨིས༌ར༌ཨེལ༌པ༌གུན༌ནི༌ཀ༌ ཐུགས༌སྲོའེ༌ སྲན༌ཏྲེ༌ སྐྱོད༌ པ༌སང༌ ཁོང༌ངི༌ ཁོང༌གུན༌ ཨ༌རམ༌ ན༌ཧ༌རཱ༌འིམ༌མི༌ གྱལ༌པོ༌ ཀུ༌ཤན༌ རི༌ཤ༌ཐཱ༌འིམ༌མི༌ ལག༌ག༌ སྟད༌ད༌ ཛདས༌ ཡང༌ ཁོང༌གུན༌ ཏེ༌ གྱལ༌པོའེ༌ ང༌ཡོག༌ག༌ ལོ༌ རྒྱད༌ ལུས༌།
JDG 3:9 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཡ༌ཝ༌ དཀོན༌མཆོག༌ག༌ རོགས༌ ཛད༌ཅེས༌ལ༌ མོས༌ལམ༌ ཞུས༌པ༌ ཁོང༌ངི༌ ཀེ༌ལེབ༌བི༌ ནོ༌ ཀེ༌ནཟ༌ཟི༌ བུ༌ཚ༌ ཨོཐ༌ནི༌འེལ༌ ཐར༌ཅུག༌ཁན༌བོ༌ ལམ༌ཅུག༌ག༌ ཛད༌ཏེ༌ ཁོང༌གུན༌ སྐྱོབ༌བ༌ ཛདས༌།
JDG 3:10 ཡ༌ཝའེ༌ ཐུག༌ཉིད༌ ཨོཐ༌ནི༌འེལ༌ལི༌ ནང༌ང༌ སྐྱོད༌ཏེ༌ ཁོ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌ཏེ༌ མག༌ ཏང༌ང༌ སོང༌། ཡ༌ཝའེ༌ ཨ༌རམ༌མི༌ གྱལ༌པོ༌ ཀུ༌ཤན༌ རི༌ཤ༌ཐཱ༌འིམ༌ ཨོཐ༌ནི༌འེལ༌ལི༌ ལག༌ག༌ སལས༌ ཡང༌ ཁོའ༌ གྱལ༌ཁ༌ ཐོབ༌།
JDG 3:11 ཏེ༌ནེ༌ ཀེ༌ནཟ༌ཟི༌ བུ༌ཚ༌ ཨོཐ༌ནི༌འེལ༌ ཤི༌ཤི༌ ཚག༌པ༌ ཏེ༌ ནས༌སའེ༌ ནང༌ང༌ ལོ༌ 40 ཞི༌དེ༌ ལུས༌།
JDG 3:12 ཨིས༌ར༌ཨེལ༌པ༌གུན༌ནི༌ ཡང༌སྐྱར༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌ ཡང༌ ཁོང༌གུན༌ནི༌ ངན༌པ༌ ཅོ༌ཅེས༌པའེ༌ ཡ༌ཝའེ༌ མོ༌འབ༌བི༌ གྱལ༌པོ༌ ཨེག༌ལོན༌ལ༌ ཁོང༌གུན༌ནི༌ཀ༌ ཝང༌སྲུལ༌ ཅུགས༌།
JDG 3:13 ཨེག༌ལོན༌ནི༌ ཨེམ༌མོན༌པ༌ དང༌ ཨ༌མ༌ལིཀ༌པ༌ གུན༌ནི༌ རོགས༌ ཉམ༌པོ༌ ཨིས༌ར༌ཨེལ༌པ༌གུན༌ལ༌ ནོལ༌ཏེ༌ ཁ༌སོར༌རི༌ ལྕང༌མའེ༌ གྱལ༌ས༌ ཡང༌ན༌ ཡེ༌རི༌ཀོ༌ ང༌ཡོག༌ག༌ ལེནས༌།
JDG 3:14 ཡང༌ ཁོང༌གུན༌ མོ༌འབ༌བི༌ གྱལ༌པོ༌ ཨེག༌ལོན༌ནི༌ ཝང༌སྲུལ༌ལི༌ ཡོག༌ག༌ ལོ༌ 18 ལུས༌།
JDG 3:15 ཡང༌སྐྱར༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ རོགས༌ ཛད༌ཅེས༌ལ༌ མོས༌ལམ༌ ཞུས༌པ༌ ཡ༌ཝའེ༌ ཁོང༌གུན༌ སྐྱོབ༌ཅེས༌སི༌ ཕིའ༌ བེན༌ཡཱ༌མིན༌ནི༌ སྡེ༌ནེ༌ ལག༌པ༌ ཡོ༌མ༌ ཀོལ༌ཁན༌ གེ༌རཱ༌རི༌ བུ༌ཚ༌ ཨི༌ཧུད༌ ཐར༌ཅུག༌ཁན༌བོ༌ ལྡམ༌མ༌ ཛདས༌། ཨིས༌ར༌ཨེལ༌པ༌གུན༌ནི༌ ཁོ༌ མོ༌འབ༌བི༌ གྱལ༌པོ༌ ཨེག༌ལོན༌ནི༌ཀ༌ ཁྲལ༌ལི༌ པེ༌ནེ༌ ཀལ༌ཏེ༌ ལམ༌ཅུགས༌།
JDG 3:16 ཨི༌ཧུད༌དི༌ མི༌ཀྲར༌ ཕེད༌ ཟམ༌ཤིག༌ རིང༌མོ༌ ཟུར༌ ཉིས༌ཅན༌ནི༌ ར༌འི༌ ཅོས༌ཏེ༌ ཏེ༌བོ༌ ཀོས༌ལག༌གི༌ ནང༌ཀུག༌ག༌ ཁོང༌རང༌ངི༌ རྐང༌པ༌ ཡས༌པའེ༌ ཤལ༌དིག༌གི༌ཀ༌ ཏགས༌།
JDG 3:17 ཁོའེ༌ མོ༌འབ༌བི༌ གྱལ༌པོ༌ ཨེག༌ལོན༌ལ༌ ཁྲལ༌ལི༌ པེ༌ནེ༌ ཕུལས༌, མོ༌འབ༌བི༌ གྱལ༌པོ༌ མ༌ རོམ༌པོ༌ ཡོད༌པིན༌།
JDG 3:18 ཁྲལ༌ལི༌ པེ༌ནེ༌ ཕུལ༌ ཚར༌ཏེ༌ སྟིང༌ནེ༌ ཨི༌ཧུད༌ དང༌ པེ༌ནེ༌ ཁུར༌ཁན༌ནི༌ ཞན༌ མི༌གུན༌ ལོགས༌ཏེ༌ སོང༌།
JDG 3:19 ཨིན༌ནའང༌ གིལ༌གལ༌ལི༌ ཉེ༌མོའ༌ ཡོད༌ཁན༌ རྡོའེ༌ སྐུན༌དྲའེ༌ཀ༌ ལེབ༌བ༌ཅིག༌ ཨི༌ཧུད༌ ཨེག༌ལོན༌ ཡོད༌ས༌ ཅིག༌པོ༌ ལོགས༌ཏེ༌ ཡོངས༌ ཡང༌ ཁོའ༌ ཟེརས༌, “གྱལ༌པོ༌, ངའ༌ ཉེ༌རང༌ངི༌ ཕིའ༌ སང༌ཝའེ༌ ལོན༌ཞིག༌ ཡོད༌།” གྱལ༌པོའེ༌ ཁོ༌རང༌ངི༌ ཞབ༌ཤི༌གུན༌ལ༌ བཀའ༌ ཏངས༌ཏེ༌ ཟེརས༌, "ཕི༌ལོག༌ག༌ སོང༌" ཡང༌ ཁོང༌གུན༌ སོང༌།
JDG 3:20 ཏེ༌ནེ༌ ཡར༌ ཏུས༌སི༌ ཁར༌རི༌ ཁེ༌ཐོག༌གི༌ ནང༌ང༌ གྱལ༌པོ༌ ཨེག༌ལོན༌ ཅིག༌པོ༌ ཡོད༌ས༌ ཨི༌ཧུད༌ ཁོའེ༌ ཉེ༌མོའ༌ སོང༌ཏེ༌ “ངའ༌ ཉེ༌རང༌ངི༌ ཕིའ༌ དཀོན༌མཆོག༌གི༌ ཆོགས༌ནེ༌ ལོན༌ཞིག༌ ཡོད༌” ཟེར༌ར༌ཅིག༌ གྱལ༌པོ༌ ཁོ༌རང༌ངི༌ ཁྲིས༌སི༌ ཀ༌ནེ༌ ལངས༌།
JDG 3:21 ཏེན༌ན༌མལ༌ལ༌ ཨི༌ཧུད༌དི༌ ལག༌པ༌ ཡོ༌མ༌ ཉམ༌པོ༌ ཁོ༌རང༌ངི༌ རྐང༌པ༌ ཡས༌པའེ༌ ཤལ༌དིག༌གི༌ཀ༌ ཏགས༌ཏེ༌ ཡོད༌ཁན༌ནི༌ ར༌འི༌བོ༌ ཕིངས༌ཏེ༌ གྱལ༌པོའེ༌ གྲོད༌པའེ༌ ནང༌ང༌ ཙུགས༌།
JDG 3:22 ལུང༌ ཐེས༌ཏེ༌ ར༌འི༌ གང༌པོ༌ གྱལ༌པོའེ༌ ཚིལ༌ལི༌ ནང༌ང༌ ནུབ༌ཏེ༌ ར༌འི༌ གོ༌ གྱབ༌ནེ༌ བིང༌, ཨི༌ཧུད༌དི༌ ར༌འི༌ མ༌ ཕིངས༌ ཡང༌ གྱལ༌པོའེ༌ གྱུ༌མ༌ ཆད༌ཏེ༌ ཏེ༌ ནང༌ང༌ ཡོད༌ཁན༌གུན༌ ཕི༌ལོག༌ག༌ བིང༌།
JDG 3:23 ཏེ༌ནེ༌ ཨི༌ཧུད༌དི༌ ཁེ༌ཐོག༌གི༌ ནང༌ངི༌ སྒོ༌གུན༌ སྲན༌ཏྲེ༌ ཅུགས༌ཏེ༌ ཁོ༌ ཡབས༌སི༌ ཀ༌ནེ༌ བིང༌ཏེ༌ ཤོར༌།
JDG 3:24 ཨི༌ཧུད༌ ཤོར༌ཏེ༌ སྟིང༌ནེ༌ གྱལ༌པོའེ༌ ཞབ༌ཤི༌གུན༌ ཡོངས༌ ཡང༌ ཁེ༌ཐོག༌གི༌ ནང༌ངི༌ སྒོ༌གུན༌ ཅུགས༌ཁན༌བོ༌ ཐོང༌ང༌ཅིག༌ ཁོང༌གུན༌ནི༌ གྱལ༌པོ༌ དེ༌ཆོད༌དི༌ ནང༌ང༌ ཡོད༌ཏེ༌ ཨིན༌ནོག༌ སམ༌།
JDG 3:25 ཁོང༌གུན༌ ངལ༌ངལ༌ སྲུངས༌ཏེ༌ དུགས༌ཏེའང༌ གྱལ༌པོ༌ བིངས༌ཏེ༌ མ༌ཡོངས༌། ཏེ༌ནེ༌ ཁོང༌གུན༌ནི༌ ཀུ༌ལིག༌ ཁྱོངས༌ཏེ༌ སྒོ༌གུན༌ ཕེའ༌ཅིག༌ ཁོང༌གུན༌ནི༌ ཁོ༌རང༌གུན༌ནི༌ སྤོན༌བོ༌ སའེ༌ཀ༌ གྱེལ༌ཏེ༌ ཤི༌ཁན༌བོ༌ ཐོང༌།
JDG 3:26 ཞབ༌ཤི༌གུན༌ སྲུངས༌ཏེ༌ ཡོད༌ ཟ༌ནེ༌ ཨི༌ཧུད༌ ཤོར༌ ཡང༌ རྡོའེ༌ སྐུན༌དྲ༌གུན༌ནི༌ དུན༌ནེ༌ སོང༌ཏེ༌ སེའི༌རཧ༌ ཆོགས༌ལ༌ ཤོར༌།
JDG 3:27 ཨི༌ཧུད༌ ཨེཕ༌ར༌ཡིམ༌མི༌ རི༌ཡུལ༌ སེའི༌རཧ༌ ལེབ༌བ༌ཅིག༌ ཁོའེ༌ ཏུང༌ ཕུས༌ ཡང༌ གོ༌ཁྲིད༌ ཅོས༌ཏེ༌ ཨིས༌ར༌ཨེལ༌པ༌གུན༌ ཐུར༌ལ༌ ཡོར༌དཱན༌ ལྩངས༌པོ༌ ཆོགས༌ལ༌ ཁྱེརས༌།
JDG 3:28 ཨི༌ཧུད༌དི༌ ཟེརས༌, “ངའེ༌ སྟིང༌རང༌ནེ༌ ཡོང༌ཤིག༌ ཅིའ༌ཟེར༌ན༌ ཡ༌ཝའེ༌ ང༌དང༌ངི༌ གྲ༌འོ༌ མོ༌འབ༌པ༌གུན༌ ང༌དང༌ངི༌ ལག༌ག༌ སལ༌ལ༌ ཛད༌ཏེ༌ ཨིན༌ནོག༌།” ཏེ༌བོའེ༌ཕིའ༌ ཁོང༌གུན༌ ཁོའེ༌ སྟིང༌རང༌ནེ༌ སོང༌ ཡང༌ ཡོར༌དཱན༌ ལྩངས༌པོ༌ རྒལ༌ ཉན༌སའེ༌ ནས༌ས༌ ཏེལ༌མོ༌, མོ༌འབ༌བ༌ ཆ༌སའེ༌ ལམ༌གུན༌ ང༌ཡོག༌ག༌ ཁྱོངས༌ ཡང༌ མོ༌འབ༌པ༌ ཅིག༌གའང༌ ལྩངས༌པོ༌ གལ༌ཏེ༌ ཡོང༌ མ༌ ཅུགས༌།
JDG 3:29 ཏེ༌ ཞག༌ག༌ ཁོང༌གུན༌ནི༌ མོ༌འབ༌པ༌ མག༌མི༌ ཀྲག༌པོ༌ དང༌ ཤེད༌ཅན༌ སྟོང༌ རྕུ༌ ཟམ༌ཤིག༌ སདས༌, སུ༌ཅིག༌གའང༌ ཤོར༌ཏེ༌ ཆ༌ མ༌ཅུགས༌།
JDG 3:30 ཏེན༌ན༌ ཞག༌ག༌ ཨིས༌ར༌ཨེལ༌པ༌གུན༌ནི༌ མོ༌འབ༌ ང༌ཡོག༌ག༌ ཁྱོངས༌ ཡང༌ ཏེ༌ ནས༌སའེ༌ ནང༌ང༌ ལོ༌ 80 ཞི༌དེ༌ ལུས༌།
JDG 3:31 ཨི༌ཧུད༌དི༌ སྟིང༌ནེ༌ ཨ༌ནཐ༌ཐི༌ བུ༌ཚ༌ ཤམ༌གར༌རིའང༌ ཨིས༌ར༌ཨེལ༌པ༌གུན༌ ཐར༌ཅུགས༌། ཁོའེ༌ སེམས༌ཅན༌ལ༌ ལམ༌ སྟན༌ན༌ ཀོལ༌ཁན༌ནི༌ བེར༌ཀ༌ ཉམ༌པོ༌ ཕི༌ལིས༌ཏི༌པ༌ 600 སད༌ཏེ༌ ཨིན༌པིན༌།
JDG 4:1 ཨི༌ཧུད༌ ཤི༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ནི༌ ཡང༌སྐྱར༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌།
JDG 4:2 ཏེ༌ནེ༌ ཡ༌ཝའེ༌ ཁོང༌གུན༌ ཀེ༌ནན༌པ༌ ཧ༌ཟོར༌རི༌ གྱལ༌པོ༌ ཡ༌བིན༌ནི༌ ལག༌ག༌ སྟདས༌། སི༌སེ༌ར༌ ཡ༌བིན༌ནི༌ མག༌མི༌ མག༌སྤོན༌ ཨིན༌པིན༌, ཁོ༌ ཧ༌རོ༌ཤེཐ༌ ཧག༌གོ༌ཡིམ༌མི༌ ནང༌ང༌ དུག༌གད༌པིན༌།
JDG 4:3 སི༌སེ༌རའེ༌ ལག༌ག༌ ལྕགས༌སི༌ རྟ༌རེལ༌ 900 ཡོད༌པིན༌ ཡང༌ ཁོའེ༌ ཨིས༌ར༌ཨེལ༌པ༌གུན༌ནི༌ཀ༌ ལོ༌ ཉི༌ཤུ༌ སྙིང༌རྗེ༌ མེད༌པ༌ ཝང༌སྲུལ༌པ༌ ཁོང༌གུན༌ནི༌ ཡ༌ཝ༌ དཀོན༌མཆོག༌ག༌ རོགས༌ ཛད༌ཅེས༌ལ༌ མོས༌ལམ༌ ཞུས༌།
JDG 4:4 ཏེ༌ཏུས༌ལ༌ ལཔ༌པི༌དོཐ༌དི༌ ན༌མ༌ དྲེབ༌རཧ༌ དཀོན༌མཆོག༌གི༌ ལོན༌ ཁྱོང༌ཁན༌ ལུང༌སྟོན༌མ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ཨིན༌པིན༌།
JDG 4:5 ཁོའེ༌ ཨེཕ༌ར༌ཡིམ༌མི༌ རི༌ཡུལ༌ ར༌མཧ༌ དང༌ བེ༌ཐེལ༌ལི༌ པར༌ལ༌ ཡོད༌ཁན༌ ཁ༌སོར༌རི༌ ལྕང༌མ༌ ཀ༌བོའ༌ དྲེབ༌རཧའེ༌ ལྕང༌མའང༌ ཟེར༌རད༌པིན༌ ཏེ༌བོའེ༌ ཡོག༌ག༌ དུགས༌ཏེ༌ ཨིས༌ར༌ཨེལ༌པ༌ ཛིང༌མོ༌ ཏངས༌ཏེ༌ ཁོའེ༌ཀ༌ ཡོང༌ཁན༌གུན༌ལ༌ ཐག༌ཅད༌ ཏང༌ངད༌པིན༌།
JDG 4:6 ཞག༌ཤིག༌ དྲེབ༌རཧའེ༌ ནཕ༌ཐལ༌ལིའི༌ ས༌ཀྱད༌ ཀེ༌དེཤ༌ཤི༌ ནང༌ང༌ དུག༌ཁན༌ ཨ༌བི༌ནོ༌འམ༌མི༌ བུ༌ཚ༌ བ༌རག༌ བོད༌ཏེ༌ ཁྱོངས༌ ཡང༌ ཁོའེ༌ ཟེརས༌, “ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཡ༌ཝའེ༌ ཁྱོ༌རང༌ང༌ བཀའ༌ སལས༌, ‘ནཕ༌ཐལ༌ལི༌ དང༌ ཟེ༌བུ༌ལོན༌ སྡེ༌ནེ༌ མག༌མི༌ སྟོང༌ རྕུ༌ ཁྲིད༌ཏེ༌ ཏྲ༌བོར༌རི༌ རི༌ཀ༌ སོང༌།
JDG 4:7 ངའེ༌ ཡ༌བིན༌ནི༌ མག༌སྤོན༌ སི༌སེ༌ར༌, རྟ༌རེལ༌ དང༌ མག༌མི༌ གུན༌ ཁྲིད༌ཏེ༌ ཀི༌ཤོན༌ནི༌ ལྩངས༌པོའེ༌ཀ༌ ཡོང༌ཅུག༌ཨིན༌ ཡང༌ ངའེ༌ ཁོང༌ ཚང༌མ༌ ཁྱོ༌རང༌ངི༌ ལག༌ག༌ ཏང༌ཨིན༌།’”
JDG 4:8 བ༌རག༌གི༌ དྲེབ༌རཧ༌ ཟེརས༌, “ཉེ༌རང༌ ང༌ ཉམ༌པོ༌ སྐྱོད༌ཏེ༌ མ༌ནེ༌ ངའ༌ མི༌ཆ༌།”
JDG 4:9 དྲེབ༌རཧའེ༌ ལན༌ཏངས༌, “ཏན༌ཏན༌ ང༌ ཁྱོ༌རང༌ ཉམ༌པོ༌ ཆེན༌ ཨིན༌ནའང༌ ཁྱོ༌རང༌ངི༌ ཏེ༌ཟུག༌ ཟེར༌ཏེ༌ ཡ༌ཝའེ༌ཀ༌ ཨིད༌ཤེས༌ མ༌ཅོས༌ པ༌སང༌ འི༌ གྱལ༌ཁའེ༌ རྩི༌ཝ༌ ཁྱོ༌རང༌ང༌ མི༌ཐོབ༌ ཅིའ༌ཟེར༌ན༌ ཡ༌ཝའེ༌ སི༌སེ༌ར༌ བུ༌མོ༌ ཞིག༌གི༌ ལག༌ག༌ སྟད༌ད༌ ཛད༌ཨིན༌།” ཏེ༌ནེ༌ དྲེབ༌རཧ༌ བ༌རག༌ ཉམ༌པོ༌ ཀེ༌དེཤ༌ལ༌ སོང༌།
JDG 4:10 ཀ༌དེཤ༌སི༌ ནང༌ང༌ བ༌རག༌གི༌ ཟེ༌བུ༌ལོན༌ དང༌ ནཕ༌ཐལ༌ལི༌ སྡེ༌གུན༌ བོད༌ཏེ༌ ཁྱོངས༌ ཡང༌ མག༌མི༌ སྟོང༌ རྕུ༌ ཁོ༌ ཉམ༌པོ༌ སོང༌། དྲེབ༌རཧའང༌ ཁོ༌ ཉམ༌པོ༌ ཡོད༌པིན༌།
JDG 4:11 ཏ༌ མོ༌ཟེས༌སི༌ ན༌མའེ༌ མིང༌བོ༌ ཧོ༌བབ༌བི༌ མིར༌གྱུད༌ ཀེན༌པ༌ ཧེ༌བེར༌ ཁོ༌རང༌ངི༌ མི༌སྡེ༌ ཕྲོ༌ནེ༌ བེ༌ཏེ༌ ཀེ༌དེཤ༌ཤི༌ ཉེ༌མོའ༌ ཟའ༌ནན༌ནིམ༌མི༌ ཨོག༌ ལྕང༌མའེ༌ དུན༌ལ༌ ཀུར༌ ཙུགས༌ཏེ༌ དུགས༌།
JDG 4:12 ཨ༌བི༌ནོ༌འམ༌མི༌ བུ༌ཚ༌ བ༌རག༌ རི༌ ཏྲ༌བོར༌ལ༌ ཆའ༌ཁན༌བོ༌ སི༌སེ༌རའ༌ ཚོར༌ར༌ཅིག༌,
JDG 4:13 ཁོའེ༌ ཁོ༌རང༌ངི༌ ལྕགས༌སི༌ རྟ༌རེལ༌ 900 དང༌ མག༌མི༌ ཚང༌མ༌ ཛོམ༌ཅུགས༌ཏེ༌ ཧ༌རོ༌ཤེཐ༌ ཧག༌གོ༌ཡིམ༌ ནེ༌ ཀི༌ཤོན༌ནི༌ ལྩངས༌པོ༌ ཆོགས༌ལ༌ སོང༌།
JDG 4:14 ཏེ༌ནེ༌ དྲེབ༌རཧའེ༌ བ༌རག༌ག༌ ཟེརས༌, “གྲལ༌གྲིག༌ ཅོས༌། དི༌རིང༌ འིན༌ན༌ ཞག༌ག༌, ཡ༌ཝའེ༌ ཁྱོ༌ཞ༌གུན༌ནི༌ ལག༌ག༌ སི༌སེ༌རའེ༌ མག༌མི༌ ཚང༌མ༌ སྟད༌ད༌ ཛད༌ཨིན༌ ཅིའ༌ཟེར༌ན༌ ཡ༌ཝ༌ སྔུན༌ལ༌ སྐྱོད༌ཏེ༌ ཁྱོ༌ཞའེ༌ ཕིའ༌ ལམ༌ གྲལ༌གྲིག༌ ཛད༌ཨིན༌།” ཏེ༌ནེ༌ བ༌རག༌ ཁོ༌རང༌ངི༌ མག༌མི༌ སྟོང༌ རྕུ༌ ཉམ༌པོ༌ ཏྲ༌བོར༌རི༌ ནེ༌ ཐུར༌ལ༌ མག༌ ཏང༌ང༌ སོང༌།
JDG 4:15 བ༌རག༌གི༌ སྤུང༌གོལ༌ ཅོའ༌ཅིག༌ ཡ༌ཝའེ༌ སི༌སེ༌ར༌, ཁོའེ༌ རྟ༌རེལ༌ སྲུལ༌ཁན༌ དང༌ མག༌མི༌ ཚང༌མའེ༌ ནང༌ང༌ ཐེ༌ཚོམས༌ དང༌ ཇིགས༌ནང༌ སྐྱེ༌ཅུག༌ག༌ ཛདས༌། སི༌སེ༌ར༌ ཁོ༌རང༌ངི༌ རྟ༌རེལ༌ལི༌ ནང༌ནེ༌ བབས༌ཏེ༌ ཤོར༌།
JDG 4:16 ཏེ༌ནེ༌ བ༌རག༌གི༌ གྲ༌འོའེ༌ རྟ༌རེལ༌གུན༌ དང༌ ཞན༌ མག༌མི༌གུན༌ལ༌ ཧ༌རོ༌ཤེཐ༌ ཧག༌གོ༌ཡིམ༌ ཚོག༌པ༌ ཏེད༌ཏེ༌ ཁྱེརས༌ ཡང༌ སི༌སེ༌རའེ༌ མག༌མི༌ ཚང༌མ༌ སདས༌, ཅིག༌གའང༌ སོན༌ཏེའ༌ མ༌བོརས༌།
JDG 4:17 སི༌སེ༌ར༌ ཀེན༌པ༌ ཧེ༌བེར༌རི༌ ན༌མ༌ ཡ༌འེལ༌ལི༌ ཀུར༌ ཡོད༌ས༌ ཤོར༌ཏེ༌ སོང༌ ཅིའ༌ཟེར༌ན༌ ཧ༌ཟོར༌རི༌ གྱལ༌པོ༌ ཡ༌བིན༌ ཉམ༌པོ༌ ཧེ༌བེར༌རི༌ ནང༌ཚངས༌སི༌ བྲེལ༌ ཉེ༌མོ༌ ཡོད༌པིན༌།
JDG 4:18 ཡ༌འེལ༌ སི༌སེ༌ར༌ ཐུག༌ག༌ལ༌ བིང༌ཏེ༌ ཁོའ༌ ཟེརས༌, “ཀུར༌རི༌ ནང༌ང༌ སྐྱོད༌ སྤོན༌བོ༌ལེ༌, ནང༌ཀུག༌ག༌ སྐྱོད༌, ཇིགས༌ས༌ མ༌ཛད༌།” ཏེ༌ནེ༌ ཁོ༌ ཀུར༌རི༌ ནང༌ང༌ ཡོངས༌ ཡང༌ བུ༌མོའེ༌ ཁོའེ༌ཀ༌ ཙ༌ཟར༌ཤིག༌ ཀབས༌།
JDG 4:19 སི༌སེ༌རའེ༌ ཟེརས༌, “ང༌ སྐོམས༌ས༌ རག༌, ཇུ༌ཇུ༌ ཐུང༌ཅེས༌ལ༌ ཆུ༌ཞིག༌ སལ༌།” ཏེ༌ནེ༌ བུ༌མོའེ༌ ཁོའ༌ འོ༌མ༌ གྱངས༌ཁན༌ནི༌ ཀོའེ༌ སྒི༌གུ༌ ཕེས༌ཏེ༌ འོ༌མ༌ ལུགས༌ ཡང༌ ཐུང༌ང༌ ཏངས༌ཏེ༌ སྟིང༌ནེ༌ ཡང༌སྐྱར༌ ཁོའ༌ ཙ༌ཟར༌ ཀབས༌།
JDG 4:20 ཁོའེ༌ ཏེ༌ བུ༌མོའ༌ ཟེརས༌, “ཀུར༌རི༌ སྒོའེ༌ དུན༌ལ༌ ལངས༌ཏེ༌ དུག༌, ཀལ༌ཏེས༌ སུ༌ཞིག༌ ཡོངས༌ཏེ༌ ཁྱོ༌རང༌ང༌ ‘ཀུར༌རི༌ ནང༌ང༌ སུ༌ ཡོད༌?’ ཟེར༌ཏེ༌ ཏྲི༌ན༌ ‘སུའང༌ མེད༌’ ཟེར༌།”
JDG 4:21 སི༌སེ༌ར༌ མ༌སྲན༌ཏྲེ༌ ངལ༌ཏེ༌ ཡོད༌ པ༌སང༌ ཉིད༌ལ༌ སོང༌, ཏེན༌ན༌ ཏུས༌ ཀུར༌རི༌ པུར༌ཆ༌ དང༌ ཐོའ༌ ཁུར༌ཏེ༌ ཡ༌འེལ༌ ཀུ༌ལེའ༌ སོང༌ཏེ༌ ཁོའེ༌ ཐོད༌པའེ༌ ལྡོ༌ནེ༌ པུར༌ཆ༌ གྱབས༌པ༌ འ༌ངོ༌ ཆོགས༌ལ༌ བིང༌ཏེ༌ སའེ༌ ནང༌ང༌ ཟུག༌ ཡང༌ ཁོ༌ ཤི༌།
JDG 4:22 བ༌རག༌ སི༌སེ༌ར༌ ཙལ༌ཨིན༌ ཡོང༌ང༌ཅིག༌ ཡ༌འེལ༌ ཁོའ༌ ཐུག༌ག༌ལ༌ བིང༌ཏེ༌ ཟེརས༌, “སྐྱོད༌ ངའེ༌ ཉེ༌རང༌ངི༌ ཙལ༌ཁན༌ནི༌ མི༌བོ༌ སྟན༌ཨིན༌།” ཏེ༌ནེ༌ ཁོ༌ བུ༌མོ༌ ཉམ༌པོ༌ ཀུར༌རི༌ ནང༌ང༌ སོང༌ ཡང༌ སི༌སེ༌རའེ༌ ཐོད༌པའེ༌ ལྡོ༌ནེ༌ ཀུར༌རི༌ པུར༌ཆ༌ ཟུགས༌ཏེ༌ ཁོ༌ ཤི༌ཁན༌བོ༌ ཐོང༌།
JDG 4:23 ཏེ༌ ཞག༌ག༌ ཨིས༌ར༌ཨེལ༌པ༌གུན༌ནི༌ དུན༌ལ༌ དཀོན༌མཆོག༌གི༌ ཀེ༌ནན༌པ༌ གྱལ༌པོ༌ ཡ༌བིན༌ལ༌ ཕམ༌ཀལ༌ལ༌ ཛདས༌།
JDG 4:24 ཡང༌ གྱལ༌པོ༌ ཡ༌བིན༌ནི༌ གྱབ༌གལ༌ལ༌ ཨིས༌ར༌ཨེལ༌པ༌གུན༌ ཤེད༌ཅན༌ གྱུར༌ཨིན༌ སོང༌ ནམ༌ཚག༌པ༌ ཁོང༌གུན༌ནི༌ གྱལ༌པོ༌ དང༌ ཁོའེ༌ མི༌ ཚང༌མ༌ སད༌ཏེ༌ མེད༌ཁན༌ མ༌ཅོས༌།
JDG 5:1 ཏེན༌ན༌ ཞག༌ག༌ དྲེབ༌རཧ༌ དང༌ ཨ༌བི༌ནོ༌འམ༌མི༌ བུ༌ཚ༌ བ༌རག༌གི༌ འི༌ སྟོད༌པའེ༌ ལུ༌ ཏངས༌,
JDG 5:2 “ཡ༌ཝའ༌ སྟོད༌པ༌ ཕུལ༌ལད༌། ཨིས༌ར༌ཨེལ༌པའེ༌ གོ༌ཁྲིད༌གུན༌ནི༌ ཁག༌ ཀལ༌ཁན༌བོ༌ ཅོའ༌ཅིག༌ མི༌གུན༌ ཐད༌པོ༌ ཉམ༌པོ༌ ཁོང༌གུན༌ནི༌ གྱབ༌ནེ༌ གྲུལས༌,
JDG 5:3 གྱལ༌པོ༌གུན༌ ཉོན༌ཤིག༌, ཝང༌སྲུལ༌ཁན༌གུན༌ ནང༌སྟག༌ ཏོང༌ཤིག༌, ངའེ༌ ཡ༌ཝའེ༌ ཕིའ༌ ལུ༌ ཏང༌ངད༌, ངའེ༌ ཡ༌ཝའ༌ ལུ༌ཡངས༌ ཕུལ༌ལད༌, ཁོང༌ ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཞུགས༌ཏེ༌ ཨིན༌།
JDG 5:4 ཡ༌ཝ༌ལེ༌ ཉེ༌རང༌ སེ༌འིར༌ནེ༌ བིངས༌ཏེ༌ ཨི༌དོམ༌མི༌ ཡུལ༌ཇོངས༌ རྒལ༌ཏེ༌ སྐྱོད༌ད༌ཅིག༌ ཇིག༌རྟེན༌ དར༌ ཡང༌ ནམ༌ཁའེ༌ ཆུ༌ ལུགས༌ སྲིན༌གུན༌ནི༌ ནང༌ནེ༌ ཆར༌པ༌ བབས༌།
JDG 5:5 རི༌ སི༌ནཱའི༌ ཙོགས༌ལ༌, ཡ༌ཝ༌ ཉེ༌རང༌ངི༌ རི༌གུན༌ སྲུག༌ག༌ ཛདས༌། ང༌ཞའ༌ ཨིས༌ར༌ཨེལ༌པའེ༌ ཡ༌ཝ༌ དཀོན༌མཆོག༌, ཉེ༌རང༌ངི༌ རི༌གུན༌ སྐུལ༌ལ༌ ཛདས༌།
JDG 5:6 ཨ༌ནཐ༌ཐི༌ བུ༌ཚ༌ ཤམ༌གར༌ དང༌ ཡ༌འེལ༌ གུན༌ནི༌ ཝང༌སྲུལ༌ལི༌ ཏུས༌, མི༌གུན༌ དང༌ ཚོང༌པ༌གུན༌ གྱ༌ལམ༌གུན༌ནེ༌ གྲུལ༌ཅེས༌ ཇིགས༌ནང༌ཅན༌ ཡོད༌པ༌, ཁོང༌གུན༌ གྱབ༌ལམ༌ ཀགས༌པོ༌གུན༌ནེ༌ གྲུལ༌གོས༌།
JDG 5:7 ཨིས༌ར༌ཨེལ༌པ༌གུན༌ནི༌ གྲོང༌སེབ༌བི༌ ནང༌ང༌ དུག༌ཅེས༌ ཕངས༌། ནམ༌ ཚག༌པ༌ ང༌, དྲེབ༌རཧ༌ ཁོང༌གུན༌ནི༌ ཨ༌མ༌ ཙོགས༌ལ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌ཏེ༌ ཁོང༌གུན༌ སྐྱོབ༌ མ༌སྐྱོབས༌།
JDG 5:8 ཨིས༌ར༌ཨེལ༌པ༌གུན༌ནི༌ སོ༌མ༌ ལྷ༌ལྷ༌མོ༌གུན༌ ལྡམ༌མ༌ཅིག༌, གྱལ༌སའེ༌ གྱས༌སྒོ༌ གུན༌ནི༌ཀ༌ མག༌ ལེབ༌, ཡང༌ ཨིས༌ར༌ཨེལ༌ལི༌ མག༌མི༌ སྟོང༌ ཞིབ༌ཅུའི༌ ལག༌ག༌, དུང༌ ཡ༌ ཀྲང༌ང༌ཀབ༌ཅེས༌ མག༌ཆ༌ ཅིག༌གའང༌ མེད༌པིན༌།
JDG 5:9 ངའེ༌ སྙིང༌ ཨིས༌ར༌ཨེལ༌ལི༌ མག༌སྤོན༌གུན༌ ཉམ༌པོ༌ ཡོད༌ ཀ༌གུན༌ ཐད༌པོ༌ ཉམ༌པོ༌ མག༌གི༌ ནང༌ང༌ ནོལ༌ལ༌ ཡོངས༌། ཡ༌ཝའ༌ སྟོད༌པ༌ ཕུལ༌།
JDG 5:10 བུང༌བུ༌ ཀར༌པོའེ༌ཀ༌ གྱབ༌ཆ༌ ཀྲག༌པོ༌ སྟད༌ཏེ༌ ཞོན༌ཁན༌གུན༌, ཡང༌ གྱ༌ལམ༌ནེ༌ གྲུལ༌ཁན༌གུན༌ ནང༌སྟག༌ ཏངས༌ཏེ༌
JDG 5:11 གྲོང༌ཁྱེར༌རི༌ ཆུ༌དོང༌ ཡོད༌ས༌ ཛོམས༌ཏེ༌ ལུ༌ ཏང༌ཁན༌གུན༌ལ༌ ཉོན༌ཤིག༌། ཁོང༌གུན༌ནི༌ ཡ༌ཝའེ༌ ཀྲང༌པོ༌ ཆག༌ལས༌གུན༌ ཤད༌ཏེ༌ ཨིན༌ནོག༌ ནམ༌ ཁོང༌ངི༌ ཨིས༌ར༌ཨེལ༌པ༌ ནོལ༌ཁན༌ ཀྲག༌པོ༌གུན༌ལ༌ གྱལ༌ཁ༌ སལས༌། ཏེ༌ནེ༌ ཡ༌ཝའེ༌ མི༌གུན༌ ཐུར༌ལ༌ གྱལ༌སའེ༌ གྱས༌སྒོ༌གུན༌ ཚོག༌པ༌ སོང༌།
JDG 5:12 ལོངས༌, དྲེབ༌རཧ༌, ལོངས༌; ལངས༌ཏེ༌ ལུ༌ ཏོང༌། ལོངས༌ བ༌རག༌, ཨ༌བི༌ནོ༌འམ༌མི༌ བུ༌ཚ༌ ལངས༌ཏེ༌ གྲ༌འོ༌ ཚང༌མ༌ ཟུམས༌ཏེ༌ ཁྱོང༌།
JDG 5:13 ཏེ༌ནེ༌ མག༌གི༌ ནང༌ང༌ སོན༌ཏེའ༌ ལུས༌ཁན༌གུན༌ ཐུར༌ལ༌ ཁོང༌གུན༌ སྐྱོབ༌ཁན༌ནི༌ གོ༌ཁྲིད༌གུན༌ ཉམ༌པོ༌ ཡོངས༌། ཡ༌ཝའེ༌ མི༌གུན༌ ཁོང༌ངི༌ ཕིའ༌ ཀྲག༌པོ༌ ནོལ༌ཁན༌གུན༌ནི༌ གྱབ༌གལ༌ལ༌ ནོལ༌ལ༌ ཡོངས༌།
JDG 5:14 ཏུས༌ཤིག༌ག༌ ཨ༌མ༌ལིཀ༌པ༌གུན༌ནི༌ ཨིན༌ཁན༌ ས༌ཀྱད༌ ཨེཕ༌ར༌ཡིམ༌ནེ༌ ཁ༌ཅིག༌ ཡོངས༌ ཁོང༌གུན༌ནི༌ སྟིང༌རང༌ནེ༌ བེན༌ཡཱ༌མིན༌པ༌གུན༌ནའང༌ ཡོངས༌། མ༌ཀིར༌རི༌ནེ༌ མག༌སྤོན༌གུན༌ ཡོངས༌། ཟེ༌བུ༌ལོན༌ནི༌ སྡེ༌ནེ༌ ཆག༌བེར༌ ཡོད༌ཁན༌ མག༌སྤོན༌གུན༌ ཡོངས༌།
JDG 5:15 ཨིས༌ས༌ཁར༌ སྡེའེ༌ འུ༌སྐྱོང༌གུན༌, ང༌ དང༌ བ༌རག༌ ཉམ༌པོ༌ ཡོད༌པིན༌། ཁོང༌གུན༌ བ༌རག༌གི༌ གྱབ༌ནེ༌ ལུང༌པའེ༌ ནང༌ང༌ གྱུགས༌ཏེ༌ སོང༌, ཨིན༌ནའང༌ རུ༌བེན༌ནི༌ མི༌སྡེ༌ ང༌ཞའ༌ ཉམ༌པོ༌ ཡོང༌ཅེས༌ལ༌ ཐེ༌ཚོམས༌ ཅོས༌།
JDG 5:16 ཁྱོ༌ཞའ༌ ལུག༌ར༌ ཡོད༌ས༌ ཅི༌ཕིའ༌ དུགས༌པིན༌? ཅི༌ ལུག༌རྫི༌གུན༌ནི༌ ལུག༌གུན༌ ཀག༌ག༌ལ༌ བོད༌ཁན༌བོ༌ ཉན༌ན༌ དུགས༌པིན༌ན༌? རུ༌བེན༌ནི༌ མི༌སྡེ༌ ང༌ཞའ༌ ཉམ༌པོ༌ ཡོང༌ཅེས༌ལ༌ ཐེ༌ཚོམས༌ ཅོས༌།
JDG 5:17 གི༌ལེད༌པ༌གུན༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ དུགས༌། ཡང༌ གྲེན༌ནི༌ མི༌སྡེ༌ ཁོ༌རང༌གུན༌ནི༌ གྲུ༌ཟིང༌གུན༌ནི༌ དུན༌ལ༌ དུགས༌། ཨ༌ཤེར༌ མི༌སྡེ༌ ཚོའེ༌ ཐའ༌མ༌ ཡོད༌ཁན༌ ཁོ༌རང༌གུན༌ནི༌ ཁང༌པའེ༌ ནང༌ནེ༌ མ༌བིངས༌།
JDG 5:18 ཨིན༌ནའང༌ ཟེ༌བུ༌ལོན༌ མི༌སྡེ༌ ཁོང༌གུན༌ནི༌ སྲོག༌ ཇིགས༌པའེ༌ ནང༌ང༌ ཏངས༌ཏེ༌ ནོལ༌ལ༌ ཡོངས༌། ནཕ༌ཐལ༌ལི༌ མི༌སྡེའང༌ ཏེན༌ན༌ ཙོགས༌ ཅོས༌།
JDG 5:19 ཏའ༌ནག༌གི༌ ནང༌ང༌ མེ༌གིད༌དོའེ༌ ཆུ༌མིག༌གི༌ ཉེ༌མོའ༌ ཀེ༌ནན༌པ༌ གྱལ༌པོ༌གུན༌ མག༌ཏང༌ང༌ ཡོངས༌ ཨིན༌ནའང༌ ཁོང༌གུན༌ལ༌ མུལ༌ ཡ༌ ནོར༌ ཅོམས༌ཁན༌ ཅའང༌ ཁྱེར༌ མ༌ཉན༌།
JDG 5:20 ནམ༌ཁའེ༌ སྐར༌མ༌གུན༌ནི༌ ནོལས༌, རང༌ ལམ༌མི༌ ནང༌ང༌ གྲུལ༌ཁན༌ སྐར༌མ༌གུན༌ནི༌ སི༌སེ༌རའེ༌ གྱབ༌གལ༌ལ༌ ནོལས༌།
JDG 5:21 ཀི༌ཤོན༌ནི༌ ལྩངས༌པོའེ༌ ཁོང༌གུན༌ ཁུར༌ཏེ༌ ཁྱེརས༌, སྔུན༌མའེ༌ ཏུས༌སི༌ ཁྱུད༌ཅན༌ ལྩངས༌པོ༌ ཀི༌ཤོན༌། ནོལ༌ ངའེ༌ སེམས༌, སེམས༌ཤུགས༌ ཉམ༌པོ༌ ནོལ༌།
JDG 5:22 ཏེ༌ནེ༌ སི༌སེ༌རའེ༌ རྟ༌གུན༌ནི༌ རྐང༌པའེ༌ སྐད༌དི༌ ས༌ཀྱད༌ སྐུལས༌། རྟ༌ ཀྲག༌པོའེ༌ མག༌མི༌གུན༌ གྱུགས༌ཏེ༌ ཡོངས༌།
JDG 5:23 ཡ༌ཝའེ༌ ཕོ༌ཉའེ༌ མོལས༌, ‘མེ༌རོཟ༌པ༌གུན༌ལ༌ ངན༌ ཕོག༌ཤིག༌། ཁོང༌གུན༌ལ༌ ངན༌ རྩོག༌པོ༌ ཕོག༌ཤིག༌ ཅིའ༌ཟེར༌ན༌ ཁོང༌གུན༌ ཡ༌ཝའ༌ རོགས༌ ཅོའ༌ལ༌ མ༌ཡོངས༌ ཀེ༌ནན༌པ༌ མག༌མི༌ ཀྲག༌པོ༌གུན༌ལ༌ ནོལ༌ལ༌ མ༌ཡོངས༌།’
JDG 5:24 ཚང༌མའེ༌ སང༌ ཅིན༌ལབས༌ཅན༌ བུ༌མོ༌, ཀེ༌ནན༌པ༌ ཧེ༌བེར༌རི༌ ན༌མ༌ ཡ༌འེལ༌ ཨིན༌། ཀུར༌རི༌ ནང༌ང༌ དུག༌ཁན༌ནི༌ བུ༌མོ༌གུན༌ནི༌ ཕྲོ༌ནེ༌ ཁོ༌ ཚང༌མའེ༌ སང༌ ཅིན༌ལབས༌ཅན༌ ཨིན༌།
JDG 5:25 སི༌སེ༌རའེ༌ ཆུ༌ ཏོང༌ ཟེརས༌ ཨིན༌ནའང༌ ཁོའེ༌ འོ༌མ༌ ཏངས༌, སྐུ༌ཁྲགས༌གུན༌ལ༌ ཏང༌ཅེས༌སི༌ ཕོ༌ཀྲོའེ༌ ནང༌ང༌ བུ༌མོའེ༌ ཁོའ༌ ཞོ༌ ཁྱོངས༌།
JDG 5:26 བུ༌མོའེ༌ ལག༌པ༌ ཡོ༌མའེ༌ ནང༌ང༌ ཀུར༌རི༌ པུར༌ཆ༌ ཡང༌ ཡས༌པའེ༌ ནང༌ང༌ ལག༌ཤེས༌པའེ༌ ཐོའ༌ ཁུརས༌། ཁོའེ༌ སི༌སེ༌རའེ༌ གོ༌ ཅགས༌, ཁོའེ༌ སི༌སེ༌རའེ༌ ཐོད༌པའེ༌ ལྡོ༌ནེ༌ པུར༌ཆ༌ གྱབས༌ཏེ༌ ཁོ༌ སདས༌།
JDG 5:27 སི༌སེ༌ར༌ ཏེ༌ བུ༌མོའེ༌ རྐང༌པའེ༌ཀ༌ བུད༌, ཁོའེ༌ རྐང༌པའེ༌ཀ༌ གྱེལ༌ཏེ༌ ཤི༌, གྱེལ༌སའེ༌ ཏེན༌ན༌ ནས༌སའེ༌ཀ༌ ཁོ༌ ཤི༌།
JDG 5:28 སི༌སེ༌རའེ༌ ཨ༌མའེ༌ ཀར༌ཁུང༌ནེ༌ ལྟེན༌ ཁོ༌ ལོགས༌ཏེ༌ ཡོང༌ཅེས༌ལ༌ སྲུངས༌ཏེ༌ ཟེརས༌, ‘ཁོའེ༌ རྟ༌རེལ༌ ལེབ༌ཅེས༌ལ༌ འི༌ཟམ༌ ཏུས༌རིང༌མོ༌ ཅིའ༌ གོར༌? ཁོའེ༌ རྟ༌རེལ༌ལི༌ སྐད༌ ང༌ ཅིའ༌ ཚོར༌ར༌ མ༌ནོག༌?’
JDG 5:29 ཁོའེ༌ ཞབ༌ཤི༌ བུ༌མོ༌གུན༌ནི༌ ཕྲོ༌ནེ༌ ཤེས༌རབས༌ཅན༌བོའེ༌ ལན༌ཏངས༌, ཏན༌ཏན༌ ཁོའེ༌ འི༌ སྤེ༌ར༌གུན༌ ལྡབས༌ཏེ༌ ཁོ༌རང༌ང༌ སེམས༌སོ༌ ཏང༌དུག༌།
JDG 5:30 ‘ཁོང༌གུན༌ནི༌ ཅོམས༌ཁན༌ནི༌ ནོར༌གུན༌ བགོ༌ཨིན༌ ཡོད༌གྲོ༌, མག༌མི༌ རེ༌རེའ༌ བུ༌མོ༌ ཅིག༌ ཡ༌ ཉིས༌། སི༌སེ༌རའེ༌ ཕིའ༌ ཚོན༌དོག༌ཅན༌ དང༌ ཚེམ༌སྲུལ༌ ཏང༌ཁན༌ནི༌ ཀོས༌ལག༌གུན༌, ངའེ༌ ཕིའང༌ ཚེམ༌སྲུལ༌ ཏང༌ཁན༌ནི༌ ཀོས༌ ཁྱོང༌ཨིན༌། ཏེ༌ ཚང༌མ༌ ཅོམས༌ཁན༌ནི༌ ནོར༌གུན༌ ཨིན༌ནོག༌།
JDG 5:31 ཡ༌ཝ༌ལེ༌, ཉེ༌རང༌ངི༌ གྲ༌འོ༌ ཚང༌མ༌ སི༌སེ༌ར༌ ཙོགས༌ལ༌ ཤི༌ཤིག༌། ཨིན༌ནའང༌ ཉེ༌རང༌ང༌ ཅམས༌པ༌ ཅོ༌ཁན༌གུན༌ ཤེད༌ཅན༌ གྱུར༌ཏེ༌ ཉི༌མ༌ ཙོགས༌ལ༌ ཤར༌ཤིག༌།” ཏེ༌ནེ༌ ཏེ༌ ནས༌སའེ༌ ནང༌ང༌ ལོ༌ 40 ཞི༌དེ༌ ལུས༌།
JDG 6:1 ཡང༌སྐྱར༌ ཨིས༌ར༌ཨེལ༌པ༌གུན༌ནི༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌ ཡང༌ ཡ༌ཝའེ༌ ལོ༌ རྡུན༌ནི༌ ཕིའ༌ ཁོང༌གུན༌ མི༌དིའན༌པ༌གུན༌ནི༌ ལག༌ག༌ སྟད༌ད༌ ཛདས༌།
JDG 6:2 མི༌དིའན༌པ༌གུན༌ནི༌ ཨིས༌ར༌ཨེལ༌པ༌གུན༌ལ༌ ནགས༌ སྲན༌ཏྲེ༌ སྟན༌ པ༌སང༌ ཁོང༌གུན༌ རི༌, བྲག༌ཕུགས༌ ཡང༌ ཇིགས༌ནང༌ མེད༌སའེ༌ ས༌ཀྱད༌གུན༌ནི༌ ནང༌ང༌ ཨིབ༌སའེ༌ ནས༌ས༌ ཅོས༌།
JDG 6:3 ཨིས༌ར༌ཨེལ༌པ༌གུན༌ནི༌ སྟོན༌ཐོག༌ ཏབ༌བ༌ཅིག༌ མི༌དིའན༌པ༌, ཨ༌མ༌ལིཀ༌པ༌ ཡང༌ ཤར༌ ཆོགས༌སི༌ མི༌གུན༌ནི༌ ཁོང༌གུན༌ལ༌ སྤུང༌གོལ༌ ཅོས༌ཏེ༌
JDG 6:4 ཏེ༌རུ༌ ཀུར༌ ཙུགས༌ཏེ༌ དུགས༌ཏེ༌ ག༌ཟ༌ ཚོག༌པ༌ ཁོང༌གུན༌ནི༌ སྟོན༌ཐོག༌གུན༌ མེད༌ཁན༌ ཅོའད༌པིན༌། ཁོང༌གུན༌ནི༌ ལུག༌, བ༌ལང༌ དང༌ བུང༌བུ༌ ཚང༌མའང༌ ཁྱེར༌ཏེ༌ ཨིས༌ར༌ཨེལ༌པ༌གུན༌ནི༌ ཕིའ༌ ཟའ༌ཅེས༌ ཅའང༌ ལུས༌ཤུག༌ག༌ མེད༌པིན༌།
JDG 6:5 ཁོང༌གུན༌ ཁོང༌རང༌གུན༌ནི༌ སེམས༌ཅན༌ དང༌ ཀུར༌གུན༌ ཉམ༌པོ༌ པར༌པར༌ཙེ༌ ཚོགས༌ ཙོགས༌ལ༌ མ༌མང༌པོ༌ ཡོང༌ངད༌པིན༌། མི༌གུན༌ དང༌ རྔ༌བོང༌གུན༌ རྩི༌ མི༌ཉན༌ཅེས༌ མང༌པོ༌ ཡོངས༌ཏེ༌ ཏེ༌ ནས༌ས༌ སྟོང༌པ༌ ཆ༌ཆ༌ དུག༌གད༌པིན༌།
JDG 6:6 མི༌དིའན༌པ༌གུན༌ནི༌ ཨིས༌ར༌ཨེལ༌པ༌གུན༌ མ༌ ཉལ༌བ༌ཅན༌ གྱུར༌ཅུགས༌ཏེ༌ ཁོང༌གུན༌ལ༌ རྡུག༌པོ༌ ཐོང༌ ཅུགས༌ པ༌སང༌ ཁོང༌གུན༌ནི༌ ཡ༌ཝའ༌ རོགས༌ ཅོའ༌ ཛད༌ཅེས༌ལ༌ མོས༌ལམ༌ ཞུས༌།
JDG 6:7 མི༌དིའན༌པ༌གུན༌ནི༌ ཞས༌ཏེ༌ ཁོང༌གུན༌ནི༌ ཡ༌ཝའ༌ མོས༌ལམ༌ ཞུའ༌ཅིག༌,
JDG 6:8 ཁོང༌ངི༌ ཁོང༌གུན༌ནི༌ཀ༌ ལུང༌སྟོན༌པ༌ཞིག༌ ཀལ༌ལ༌ ཛདས༌ ཡང༌ ཁོའེ༌ ཟེརས༌, “ཨིས༌ར༌ཨེལ༌ལི༌ དཀོན༌མཆོག༌ ཡ༌ཝའེ༌ འི༌ཟུག༌ མོལ༌ལ༌རག༌, ‘ངའེ༌ ཁྱོ༌ཞའེ༌ ཕ༌མེས༌པོ༌གུན༌ ཚེ༌ཡོག༌ག༌ ཡོད༌ཁན༌ ཨི༌ཇིབ༌བི༌ ནས༌ས༌ནེ༌ ཕིངས༌ཏེ༌ ཁྱོངས༌པིན༌།
JDG 6:9 ཨི༌ཇིབ༌པ༌གུན༌ ཐེས༌ཏེ༌ ཞན༌ ཁྱོ༌ཞའ༌ ནགས༌ སྟན༌ཁན༌ ཚང༌མའེ༌ ཀ༌ནེ༌ ངའེ༌ ཁྱོ༌རང༌གུན༌ སྐྱོབས༌ཏེ༌ ཁྱོངས༌པིན༌། ངའེ༌ ཁྱོ༌ཞའེ༌ གྲ༌འོ༌གུན༌ ཕིངས༌ཏེ༌ ཁོང༌གུན༌ནི༌ ས༌ཀྱད༌ ཁྱོ༌ཞའ༌ ཏངས༌པིན༌།
JDG 6:10 ངའེ༌ ཁྱོ༌ཞ༌གུན༌ལ༌ ཟེར༌པིན༌, ‘ང༌ ཁྱོ༌ཞ༌གུན༌ནི༌ དཀོན༌མཆོག༌ ཡ༌ཝ༌ ཡང༌ ཁྱོ༌ཞའེ༌ ཨ༌མོར༌པ༌གུན༌ནི༌ ལྷ༌ལྷ༌མོ༌གུན༌ལ༌ ཅོལ༌ མ༌གོས༌, ཀ༌གུན༌ནི༌ ས༌ཀྱད༌དི༌ ནང༌ང༌ ཁྱོ༌ཞའ༌ དུག༌ཨིན༌ ཨིན༌ནོག༌།’ ཨིན༌ནའང༌ ཁྱོ༌ཞ༌གུན༌ནི༌ ངའེ༌ ཁའ༌ མ༌ཉནས༌།”
JDG 6:11 ཡ༌ཝའེ༌ ཕོ༌ཉ༌ སྐྱོདས༌ཏེ༌ ཨོཕ༌རཧ༌ ནང༌ང༌ ཨ༌བིའེ༌ཟེར༌པ༌ ཡོ༌འཤ༌ཤི༌ ཨིན༌ཁན༌ ཨོག༌གི༌ ལྕང༌མ༌ ཆེན༌མོའེ༌ ཡོག༌ག༌ ཞུགས༌། ཏེ༌ཀ༌ མི༌དིའན༌པ༌གུན༌ནི༌ ཀ༌ནེ༌ ཨིབས༌ཏེ༌ ཡོ༌འཤ༌ཤི༌ བུ༌ཚ༌ གི༌དི༌འོན༌ནི༌ རྒུན༌ཆང༌ ཙིར༌སའེ༌ ནང༌ང༌ སྙེ༌མ༌ དུངས༌ཏེ༌ གྲོ༌ ཕིང༌ངད༌པིན༌།
JDG 6:12 ཡ༌ཝའེ༌ ཕོ༌ཉའ༌ ཁོ༌ ཡོད༌ས༌ སྐྱོད༌ཏེ༌ མོལས༌, “ནོལ༌ཁན༌ ཀྲག༌པོ༌ གི༌དི༌འོན༌, ཡ༌ཝ༌ ཁྱོ༌རང༌ ཉམ༌པོ༌ ཡོད༌།”
JDG 6:13 གི༌དི༌འོན༌ནི༌ ལན༌ཏངས༌, “སྤོན༌བོ༌ལེ༌ ཀལ༌ཏེས༌ ཡ༌ཝ༌ ང༌ཞའ༌ ཉམ༌པོ༌ ཡོད༌ན༌ ང༌ཞ༌གུན༌ནི༌ཀ༌ འི༌ ཚང༌མ༌ ཅིའ༌ ཇུངས༌ཏེ༌ ཨིན༌ནོག༌? ‘ཡ༌ཝའེ༌ ང༌དང༌གུན༌ ཨི༌ཇིབ༌བི༌ ནང༌ནེ༌ ཕིངས༌ཏེ༌ མ༌ཁྱོངས༌ས༌’ ཟེར༌ཏེ༌ ང༌ཞའེ༌ ཕ༌མེས༌པོ༌གུན༌ནི༌ ཤད༌ཁན༌ ཁོང༌ངི༌ ཧ༌ལས༌ཤེས༌སི༌ ཛད༌པ༌གུན༌ ཀ༌རུ༌ སོང༌? ཨིན༌ནའང༌ ཏ༌ ཡ༌ཝའེ༌ ང༌ཞའ༌ ཕང༌ང༌ ཛད༌ཏེ༌ མི༌དིའན༌པ༌གུན༌ནི༌ ལག༌ག༌ སྟད༌ད༌ ཛདས༌།”
JDG 6:14 ཏེ༌ནེ༌ ཡ༌ཝ༌ ཁོ༌ ཆོགས༌ལ༌ གྱུར༌ར༌ ཛད༌ཏེ༌ མོལས༌, “ངའེ༌ ཁྱོ༌རང༌ ཀལ༌ཏེ༌ མ༌ནོག༌ག༌? སོང༌, ཁོ༌རང༌ང༌ ཡོད༌ཁན༌ནི༌ ཤེད༌ ཀོལ༌ཏེ༌ མི༌དིའན༌པ༌གུན༌ནི༌ ལག༌ནེ༌ ཨིས༌ར༌ཨེལ༌པ༌གུན༌ སྐྱོབས༌ཏེ༌ ཁྱོང༌།”
JDG 6:15 ཨིན༌ནའང༌ གི༌དི༌འོན༌ནི༌ ཟེརས༌, “ཡ༌ཝ༌ལེ༌, ཀ༌ཟུག༌གི༌ ངའེ༌ ཨིས༌ར༌ཨེལ༌པ༌གུན༌ སྐྱོབ༌ཨིན༌? མ༌ནས༌སའེ༌ མི༌སྡེ༌ གང༌པོའེ༌ ནང༌ནེ༌ ང༌ཞའེ༌ མི༌རིགས༌པོ༌ ཚང༌མའེ༌སང༌ ཤེད༌མེད༌ ཡང༌ ངའེ༌ ནང༌ཚངས༌སི༌ ནང༌ནེ༌ ང༌ ཆུང༌ཤོག༌ རྩིས༌མེད༌པོ༌ ཨིན༌།”
JDG 6:16 ཡ༌ཝའེ༌ ཁོའ༌ མོལས༌, “ཨིན༌ནའང༌ ང༌ ཁྱོ༌རང༌ ཉམ༌པོ༌ ཡོད༌ ཡང༌ ཁྱོ༌རང༌ངི༌ མི༌དིའན༌པ༌ ཚང༌མའ༌ ཕམ༌ཀལ༌ཏེ༌ མེད༌ཁན༌ ཅོ༌ཨིན༌།”
JDG 6:17 གི༌དི༌འོན༌ནི༌ ལན༌ཏངས༌, “ཀལ༌ཏེས༌ ཉེ༌རང༌ ངའེ༌ཀ༌ དེན༌བའ༌ ཐུག༌ཉེས༌ན༌, ཡ༌ཝའེ༌ ཞལ༌ཏ༌ སལ༌ཁན༌བོ༌ དེན༌བ༌ ཨིན༌ཁན༌ནི༌ སྟགས༌ཤིག༌ ངའ༌ སྟན༌ན༌ ཛད༌།
JDG 6:18 ངའེ༌ ཉེ༌རང༌ང༌ ཕུལ༌ཅེས༌སི༌ ཆོད༌པ༌ ཁྱོང༌ཁྱོང༌ ཚག༌པ༌ ཉེ༌རང༌ སྐྱོད༌ མ༌སྐྱོད༌ད༌ འི༌ཀ༌ ཞུགས༌ལེ༌།” ཁོང༌ངི༌ ལན༌སལས༌, “ཁྱོ༌རང༌ ལོགས༌ཏེ༌ ཡོང༌ཡོང༌ ཚག༌པ༌ ང༌ འིན༌ནི༌ཀ༌ དུག༌ཨིན༌།”
JDG 6:19 གི༌དི༌འོན༌ གྱོགས༌པ༌ ཁང༌པ༌ སོང༌ཏེ༌ ར༌མ༌ ཆུ༌ངུན༌ནི༌ ཤ༌ སྐོལས༌ ཡང༌ གི༌གུ༌ ཆེན༌མོ༌ གང༌ངི༌ པག༌པའེ༌ ཁྱོངས༌ཏེ༌ སྐྱུར༌ མེད༌ཁན༌ནི༌ ཏ༌གི༌ ཅོས༌། ཏེ༌ནེ༌ ཁོའེ༌ ཤ༌ པག༌ཙེ༌ ནང༌ང༌ ཡང༌ ཤ༌ཁུའ༌ ཟང༌བུའི༌ ནང༌ང༌ གྱངས༌ཏེ༌ ཁྱོངས༌ ཡང༌ ལྕང༌མ༌ ཆེན༌མོའེ༌ ཡོག༌ག༌ ཞུགས༌ཁན༌ནི༌ ཕོ༌ཉའ༌ ཆོད༌པ༌ ཕུལས༌།
JDG 6:20 དཀོན༌མཆོག༌གི༌ ཕོ༌ཉའེ༌ ཁོའ༌ མོལས༌, “ཤ༌ དང༌ སྐྱུར༌ མེད༌ཁན༌ནི༌ ཏ༌གི༌ འི༌ ཕོ༌ལོངས༌སི༌ཀ༌ བོར༌ཏེ༌ ཤ༌ཁུའ༌ ཏེ༌བོའེ༌ ཁེ༌ཐོག༌ག༌ ལུག༌།” ཡང༌ གི༌དི༌འོན༌ནི༌ ཁོང༌ངི༌ མོལ༌ཁན༌བོ༌ ཅོས༌།
JDG 6:21 ཡ༌ཝའེ༌ ཕོ༌ཉའེ༌ ཁོང༌རང༌ངི༌ ཆག༌ག༌ ནམས༌ཁན༌ནི༌ བེར༌ཀའེ༌ གོ༌ ཤ༌ དང༌ ཏ༌གིའ༌ ཐུག༌ ཅུག༌ག༌ ཛད༌ད༌ཅིག༌ ཕོ༌ལོངས༌སི༌ ནང༌ནེ༌ མེ༌ བིང༌ཏེ༌ ཟན༌ ཚང༌མ༌ མེའ༌ སྲག༌ཏེ༌ མེད༌ཁན༌ ཛདས༌ ཡང༌ ཡ༌ཝའེ༌ ཕོ༌ཉ༌ ཏེ༌ཀ༌ནེ༌ སྟོར༌།
JDG 6:22 གི༌དི༌འོན༌ལ༌ ཁོང༌ ཡ༌ཝའེ༌ ཕོ༌ཉ༌ ཨིན༌ཁན༌བོ༌ ཧ༌གོའ༌ཅིག༌ ཁོའེ༌ ཟེརས༌, “ཡ༌ཝ༌ ཀུན༌ཝང༌ལེ༌། ཝའོ༌, ངའེ༌ ཡ༌ཝའེ༌ ཕོ༌ཉ༌ ང༌རང༌ངི༌ མིག༌ནེ༌ ཇལ༌།”
JDG 6:23 ཨིན༌ནའང༌ ཡ༌ཝའེ༌ ལན༌སལས༌, “ཇིགས༌ མ༌ཇིགས༌, ཞི༌དེ༌ ཉམ༌པོ༌ དུག༌། ཁྱོ༌རང༌ ཤི༌ མི༌ཤི༌།”
JDG 6:24 ཏེ༌ནེ༌ གི༌དི༌འོན༌ནི༌ ཏེ༌ཀ༌ ཡ༌ཝའེ༌ ཕིའ༌ ཆོད༌ཁྲི༌ཞིག༌ རྩིགས༌ ཡང༌ ཏེ༌བོའ༌ ‘ཡ༌ཝ༌ ཞི༌དེ༌ཅན༌’ མིང༌ང༌ ཏགས༌། ཏེ༌ ཆོད༌ཁྲི༌ དི༌རིང༌ངའང༌ ཨ༌བིའེ༌ཟེར༌པ༌གུན༌ནི༌ ནས༌ས༌ ཨོཕ༌རཧའེ༌ ནང༌ང༌ ཡོད༌ཏེ༌ ཨིན༌ནོག༌།
JDG 6:25 ཏེན༌ན༌ ཚན༌ལ༌ ཡ༌ཝའེ༌ གི༌དི༌འོན༌ལ༌ མོལས༌, “ཁྱོ༌རང༌ངི༌ ཨ༌བའེ༌ བ༌ལང༌ངི༌ ཁྱུའི༌ ནང༌ནེ༌ ལོ༌ རྡུན༌ ཆའ༌ཁན༌ནི༌ ལང༌ཏོ༌ ཉིས༌པ༌བོ༌ ཁྱོང༌། ཁྱོ༌རང༌ངི༌ ཨ༌བའེ༌ བའལ༌ལ༌ ཅོལ༌ཅེས༌སི༌ ཕིའ༌ རྩིག༌ཁན༌ནི༌ ཆོད༌ཁྲི༌ ཤིག༌ ཡང༌ ཏེ༌བོའེ༌ དུན༌ལ༌ ཨ༌ཤེ༌རཧ༌ ལྷ༌མོའེ༌ ཕིའ༌ ལངས༌ཁན༌ནི༌ རྡུང༌མ༌བོ༌ ཏུམ༌པ༌ཏུམ༌པའེ༌ ནང༌ང༌ ཅོད༌།
JDG 6:26 ཏེ༌ནེ༌ འི༌ རིའི༌ གོའེ༌ཀ༌ ང༌ ཁྱོ༌ཞའེ༌ དཀོན༌མཆོག༌ ཡ༌ཝའེ༌ ཕིའ༌ རྡོའ༌གུན༌ རིགས༌ཏེ༌ ཆོད༌ཁྲི༌ཞིག༌ རྩིགས༌། ཨ༌ཤེ༌རཧའེ༌ རྡུང༌མ༌ ཅད༌ཁན༌ནི༌ ཤིང༌ ཀོལ༌ཏེ༌ ཏེ༌ ཆོད༌ཁྲི༌ཀ༌ ལང༌ཏོ༌ ཉིས༌པའེ༌ ཤ༌ མེའ༌ སྲགས༌ཏེ༌ ཆོད༌པའ༌ ཕུལ༌།”
JDG 6:27 ཏེ༌ནེ༌ གི༌དི༌འོན༌ནི༌ ཁོ༌རང༌ངི༌ ཡོག༌པོ༌ རྕུ༌ ཁྲིད༌ཏེ༌ ཡ༌ཝའེ༌ བཀའ༌ སལ༌ཁན༌ ནང༌ཞིན༌ ཅོས༌། ཨིན༌ནའང༌ ཁོ༌རང༌ངི༌ ནང༌ཚངས༌ དང༌ གྲོང༌ཁྱེར༌རི༌ མི༌གུན༌ལ༌ ཇིགས༌ པ༌སང༌ ཁོའེ༌ ཏེ༌བོ༌ ཚན༌ལ༌ ཅོས༌།
JDG 6:28 ཐོ༌རེ༌ཟུག༌པོ༌ ང༌མོ༌ གྲོང༌ཁྱེར༌རི༌ མི༌གུན༌ལ༌ བའལ༌ལི༌ ཆོད༌ཁྲི༌ ཤིགས༌ཏེ༌ ཏེ༌བོའེ༌ དུན༌ལ༌ ཡོད༌ཁན༌ནི༌ ཨ༌ཤེ༌རཧའེ༌ རྡུང༌མ༌ ཅད༌ཏེ༌ ཏེ༌ ནས༌སའེ༌ཀ༌ ཆོད༌ཁྲི༌ སོ༌མ༌ཞིག༌ རྩིགས༌ཏེ༌ ལང༌ཏོ༌ ཉིས༌པ༌ ཆོད༌པ༌ ཕུལ༌ཁན༌ནི༌ རོ༌ཏོ༌གུན༌ ཐོང༌།
JDG 6:29 མི༌གུན༌ནི༌ ཅིག༌ དང༌ ཅིག༌ག༌ ཟེརས༌, “འི༌བོ༌ སུའི༌ ཅོས༌ཧེ༌?” ཡང༌ ཉེ༌ཁོར༌ལ༌ ཞིབ༌སལ༌ ཅོས༌ཏེ༌ སྟག༌ཅད༌ ཅོས༌པ༌ ཁོང༌གུན༌ལ༌ ཡོ༌འཤ༌ཤི༌ བུ༌ཚ༌ གི༌དི༌འོན༌ནི༌ ཅོས༌ཁན༌བོ༌ ཧ༌གོ༌།
JDG 6:30 གྲོང༌ཁྱེར༌རི༌ མི༌གུན༌ནི༌ ཡོ༌འཤ༌ལ༌ ཟེརས༌, “ཁྱོ༌རང༌ངི༌ བུ༌ཚ༌ ཕིངས༌ཏེ༌ ཁྱོང༌, ཁོ༌ སད༌གོས༌ ཅིའ༌ཟེར༌ན༌ ཁོའེ༌ བའལ༌ལི༌ ཆོད༌ཁྲི༌ ཤིགས༌ཏེ༌ ཏེ༌ དུན༌ལ༌ ཡོད༌ཁན༌ ཨ༌ཤར༌རི༌ རྡུང༌མ༌ ཅད༌ཏེ༌ ཨིན༌ནོག༌།”
JDG 6:31 ཨིན༌ནའང༌ སྲོ༌ ཡོངས༌ཁན༌ནི༌ མི༌གུན༌ལ༌ ཡོ༌འཤ༌ཤི༌ ཟེརས༌, “ཅི༌ཕིའ༌ ཁྱོ༌རང༌གུན༌ནི༌ བའལ༌ སྐྱོབ༌བད༌? ཅིའ༌ ཁྱོ༌ཞ༌གུན༌ནི༌ བའལ༌ལི༌ ཕིའ༌ ནོལ༌ལད༌? བའལ༌ལ༌ ཆོགས༌སྐྱོར༌ ཅོས༌ཏེ༌ ནོལ༌ཁན༌ནི༌ མི༌ ང༌མོ༌ ཚོག༌པ༌ སོན༌ཏེའ༌ མི༌ལུས༌། ཀལ༌ཏེས༌ བའལ༌ དེན༌བའེ༌ ལྷ༌ ཨིན༌ན༌ ཁོའེ༌ ཆོད༌ཁྲི༌ ཤིག༌ཁན༌གུན༌ལ༌ ཆད༌པ༌ ཏངས༌ཏེ༌ ཁོ༌རང༌ སྐྱོབ༌ཨིན༌།”
JDG 6:32 ཏེ༌ ཏུས༌ནེ༌ ཕར༌ལ༌ གི༌དི༌འོན༌ལ༌ ཡེ༌རུབ༌བའལ༌ མིང༌ང༌ ཏགས༌ ཀ༌བོའེ༌ དོན༌ནི༌ “བའལ༌ལ༌ ཁོ༌རང༌ སྐྱོབ༌ཅུག༌” ཨིན༌ནོག༌ ཅིའ༌ཟེར༌ན༌ ཤིག༌ཁན༌ནི༌ ཆོད༌ཁྲི༌ ཁོའེ༌ ཨིན༌ནོག༌།
JDG 6:33 ཏ༌ མི༌དིའན༌པ༌, ཨ༌མ༌ལིཀ༌པ༌ ཡང༌ ཤར༌ ཆོགས༌སི༌ ཞན༌ མི༌ ཚང༌མ༌ ཐུན༌བྲེལ༌ སོང༌ཏེ༌ ཨིས༌ར༌ཨེལ༌པ༌གུན༌ལ༌ ནོལ༌ལ༌ ཡོར༌དཱན༌ ལྩངས༌པོ༌ རྒལ༌ཏེ༌ ཡེཟ༌རེ༌འེལ༌ལི༌ ལུང༌པའེ༌ ནང༌ང༌ ཀུར༌ ཙུགས༌ཏེ༌ དུགས༌།
JDG 6:34 ཏེ༌ནེ༌ ཡ༌ཝའེ༌ ཐུག༌ཉིད༌ གི༌དི༌འོན༌ནི༌ཀ༌ བབས༌པ༌ ཁོའེ༌ ཨ༌བིའེ༌ཟེར༌པ༌གུན༌ལ༌ ཁོའེ༌ གྱབ༌ནེ༌ ནོལ༌ལ༌ ཡོང༌ཅེས༌ལ༌ ཏུང༌ ཕུས༌ཏེ༌ བོདས༌།
JDG 6:35 ཁོའེ༌ མ༌ནས༌ས༌, ཨ༌ཤེར༌, ཟེ༌བུ༌ལོན༌ དང༌ ནཕ༌ཐལ༌ལི༌ མི༌སྡེ༌གུན༌ལ༌ ལོན༌ ཀལ༌ཏེ༌ བོདས༌ ཡང༌ ཁོང༌ངི༌ མག༌མི༌ ཚང༌མ༌ རོགས༌ ཅོ༌ཅེས༌ལ༌ ཡོངས༌།
JDG 6:36 ཏེ༌ནེ༌ གི༌དི༌འོན༌ནི༌ དཀོན༌མཆོག༌ག༌ མོལས༌, “ཉེ༌རང༌ངི༌ ཞལ༌ཆད༌ ནང༌ཞིན༌ ཀལ༌ཏེས༌ ཉེ༌རང༌ངི༌ ང༌ གྱུད༌ཏེ༌ ཨིས༌ར༌ཨེལ༌པ༌གུན༌ སྐྱོབ༌བ༌ ཛད༌ཅེས༌ ཨིན༌ན༌,
JDG 6:37 དི༌རིང༌ ཚན༌ལ༌ ངའེ༌ ཁུ༌ཡུས༌ སྐོར༌སའེ༌ ནས༌སའེ༌ཀ༌ ལུག༌གི༌ བལ༌ བོར༌ཨིན༌, ང༌མོ༌ བལ༌ ཟིལ༌པའེ༌ ལོན༌པ༌ ཨིན༌ནའང༌ ས༌ཀྱད༌པོ༌ སྐམ༌པོ༌ ཡོད༌ན༌ ཏེ༌ནེ༌ ཉེ༌རང༌ངི༌ ཞལ༌ཆད༌ ནང༌ཞིན༌ ང༌ གྱུད༌ཏེ༌ ཨིས༌ར༌ཨེལ༌པ༌གུན༌ སྐྱོབ༌བ༌ ཛད༌ཅེས༌པོ༌ ང༌ ཧ༌གོ༌ཨིན༌།”
JDG 6:38 ཡང༌ ཏེན༌ན༌བོ༌ ཇུང༌། ང༌མོ༌ གི༌དི༌འོན༌ ལངས༌ཏེ༌ བལ༌བོ༌ ཙིར༌ར༌ཅིག༌ གོར༌མོ༌ གང༌ངི༌ ཆུ༌ ཕིངས༌།
JDG 6:39 ཏེ༌ནེ༌ གི༌དི༌འོན༌ནི༌ དཀོན༌མཆོག༌ག༌ མོལས༌, “ཇུ༌ཇུ༌ ངའེ༌ཀ༌ ཐུག༌སྲོ༌ མ༌སྐྱོད༌། ཡང༌སྐྱར༌ སྟགས༌ཤིག༌ སྟན༌ན༌ ཛད༌ཅེས༌ལ༌ ང༌ ཞུ༌ཝ༌ ཕུལ༌ཅུག༌། འི༌ ལན༌ བལ༌ སྐམ༌པོ༌ ཨིན༌ནའང༌ ས༌ཀྱད༌ ལོན༌པ༌ ལུ༌ ཤུག༌ག༌ ཛད༌།
JDG 6:40 ཏེན༌ན༌ ཚན༌ལ༌ དཀོན༌མཆོག༌གི༌ གི༌དི༌འོན༌ནི༌ ཟེར༌ཁན༌བོ༌ ཛདས༌། ང༌མོ༌ བལ༌ སྐམ༌པོ༌ ཡང༌ ས༌ཀྱད༌ ཟིལ༌པའེ༌ ཀབས༌ཏེ༌ ཡོད༌པིན༌།
JDG 7:1 ཡེ༌རུབ༌བའལ༌ ཡང༌ན༌ གི༌དི༌འོན༌ དང༌ ཁོའེ༌ མག༌མི༌གུན༌ ང༌མོ༌ནེ༌ ལངས༌ཏེ༌ ཐག༌རིང༌ ཧེ༌རོད༌ ཟེར༌ཁན༌ནི༌ ཆུ༌མིག༌ ཚོག༌པ༌ སོང༌། ཁོང༌གུན༌ནི༌ བྱང༌ ཆོགས༌ལ༌ རི༌ མོ༌རེཧའེ༌ ཉེ༌མོའ༌ ལུང༌པའེ༌ ནང༌ང༌ མི༌དིའན༌པ༌ མག༌མི༌གུན༌ ཀུར༌ ཙུགས༌ཏེ༌ དུགས༌ཏེ༌ ཡོད༌པིན༌།
JDG 7:2 ཡ༌ཝའེ༌ གི༌དི༌འོན༌ལ༌ མོལས༌, “ངའེ༌ མི༌དིའན༌པ༌གུན༌ ཁྱོ༌རང༌ངི༌ ལག༌ག༌ སྟད༌ཨིན༌ ཨིན༌ནའང༌ ཁྱོ༌རང༌ ཉམ༌པོ༌ མག༌མི༌ མངས༌ཏེའང༌ མང༌པོ༌ ཡོད༌ པ༌སང༌ ཨིས༌ར༌ཨེལ༌པ༌གུན༌ནི༌ ཕོ༌སོ༌ ཅོས༌ཏེ༌ ཁོང༌རང༌གུན༌ནི༌ ཁྱུད༌ གྱུད༌ཏེ༌ གྱལ༌ཁ༌ ཐོབ༌ ཟེར༌སྲིད༌ཅེས༌ ཨིན༌ནོག༌།
JDG 7:3 ཏེ༌བོའེ༌ཕིའ༌ ‘སེམས༌ཤུག༌ ཆགས༌ཁན༌ ཡ༌ ཇིགས༌ཁན༌ མི༌གུན༌ རི༌ གི༌ལེད༌ནེ༌ ལོགས༌ཏེ༌ ཁང༌པ༌ ཆ༌ནའང༌ གྲིག༌’ ཟེར༌།” ཏེ༌ནེ༌ ཁོང༌གུན༌ནི༌ ནང༌ནེ༌ 22,000 ཁང༌པ༌ ལོགས༌ཏེ༌ སོང༌ ཡང༌ 10,000 མན༌ནེ༌ མ༌ལུས༌།
JDG 7:4 ཨིན༌ནའང༌ ཡ༌ཝའེ༌ གི༌དི༌འོན༌ལ༌ མོལས༌, “ཏ༌རུང༌ངའང༌ མག༌མི༌ མངས༌ཏེའང༌ མང༌པོ༌ དུག༌། ཁོང༌གུན༌ ཐུར༌ལ༌ ཆུ༌མིག༌ ཡོད༌ས༌ ཁྱེར༌ ཡང༌ ངའེ༌ ཏེ༌རུ༌ ཁྱོ༌རང༌ ཉམ༌པོ༌ ནོལ༌ལ༌ ཆ༌ཅེས༌ཅན༌ དང༌ མི༌ཆ༌ཅེས༌ཅན༌ གུན༌ ཕེ༌ཨིན༌།”
JDG 7:5 ཏེ༌ནེ༌ གི༌དི༌འོན༌ནི༌ མག༌མི༌གུན༌ ཐུར༌ལ༌ ཆུ༌མིག༌ ཡོད༌ས༌ ཁྱེརས༌ ཡང༌ ཡ༌ཝའེ༌ ཁོའ༌ མོལས༌, “ལག༌པའེ༌ ནང༌ང༌ ཆུ༌ ཁྱོངས༌ཏེ༌ ཁྱི༌ ཙོགས༌ལ༌ ལྕེ༌ ཉམ༌པོ༌ ཆུ༌ ཐུང༌ཁན༌གུན༌ དང༌ པིག༌མོ༌ ཙུགས༌ཏེ༌ ཁའ༌ ཉམ༌པོ༌ ཆུ༌ ཐུང༌ཁན༌གུན༌ སོ༌སོ༌ ཕེས༌།”
JDG 7:6 མི༌ 300 ཁོང༌རང༌གུན༌ནི༌ ལག༌པའེ༌ ནང༌ང༌ ཆུ༌ ཁྱོངས༌ཏེ༌ ཐུངས༌ ཨིན༌ནའང༌ ཞན༌ གུན༌ནི༌ པིག༌མོ༌ ཙུགས༌ཏེ༌ ཁའ༌ ཉམ༌པོ༌ ཆུ༌ ཐུངས༌།
JDG 7:7 ཡ༌ཝའེ༌ གི༌དི༌འོན༌ལ༌ མོལས༌, “འི༌ མི༌ 300, ཁྱི༌ ཙོགས༌ལ༌ ལྕེ༌ ཉམ༌པོ༌ ཆུ༌ ཐུང༌ཁན༌གུན༌ གྱུད༌ཏེ༌ ངའེ༌ ཁྱོ༌ཞའ༌ ཐར༌ཅུགས༌ཏེ༌ མི༌དིའན༌པ༌གུན༌ནི༌ཀ༌ གྱལ༌ཁ༌ ཐོབ༌ཅུག༌ཨིན༌། ཏ༌ ཞན༌ ཚང༌མ༌ ཁང༌པ༌ ལོགས༌ཏེ༌ ལམ༌ཅུག༌།”
JDG 7:8 ཏེ༌ནེ༌ གི༌དི༌འོན༌ནི༌ ཏེ༌ མག༌མི༌ 300 མ༌སྟོགས༌ ཞན༌ ཚང༌མ༌ ལོགས༌ཏེ༌ ལམ༌ཅུགས༌ ཡང༌ ལྡམ༌ཁན༌ནི༌ མག༌མི༌ སུམ༌གྱའེ༌ ཁོ༌རང༌གུན༌ནི༌ ཕིའ༌ ཁར༌ཇི༌ དང༌ ར༌ཅོའེ༌ ཏུང༌ གུན༌ ཁུརས༌། ཏ༌ ཁོང༌གུན༌ནི༌ ཡོག༌ག༌ ལུང༌པའེ༌ ནང༌ང༌ མི༌དིའན༌པ༌གུན༌ ཀུར༌ ཙུགས༌ཏེ༌ དུགས༌ཏེ༌ ཡོད༌པིན༌།
JDG 7:9 ཏེ༌ ཚན༌ལ༌ ཡ༌ཝའེ༌ གི༌དི༌འོན༌ལ༌ མོལས༌, “ལོངས༌, ཐུར༌ལ༌ མི༌དིའན༌པ༌གུན༌ དུགས༌ཏེ༌ ཡོད༌ས༌ སྤུང༌གོལ༌ ཅོའ༌ལ༌ སོང༌ ཅིའ༌ཟེར༌ན༌ ངའེ༌ ཁྱོ༌ཞ༌གུན༌ནི༌ ལག༌ག༌ ཁོང༌གུན༌ སྟད༌ཨིན༌།
JDG 7:10 ཨིན༌ནའང༌ ཀལ༌ཏེས༌ ཁྱོ༌རང༌ སྤུང༌གོལ༌ ཅོ༌ཅེས༌ལ༌ ཇིགས༌སད༌ན༌, ཁྱོ༌རང༌ ཁྱོ༌རང༌ངི༌ ཡ༌ཏོ༌ པུ༌རཧ༌ ཉམ༌པོ༌ ཐུར༌ལ༌ ཀུར༌གུན༌ ཡོད༌ས༌ སོང༌ཏེ༌
JDG 7:11 མི༌དིའན༌པ༌གུན༌ནི༌ ཟེར༌ཨིན༌ ཡོད༌ཁན༌གུན༌ ཉོན༌། ཏེ༌གུན༌ ཚོར༌ཏེ༌ ཁྱོ༌རང༌ང༌ སྤོས༌པ༌ སྐྱེས༌ཏེ༌ སྤུང༌གོལ༌ ཅོ༌ཅེས༌ལ༌ མི༌ཚབས༌།” ཏེ༌ནེ༌ གི༌དི༌འོན༌ པུ༌རཧ༌ ཁྲིད༌ཏེ༌ ཐུར༌ལ༌ གྲ༌འོ༌གུན༌ ཀུར༌ ཙུགས༌ཏེ༌ དུག༌སའེ༌ ཉེ༌མོའ༌ སོང༌།
JDG 7:12 པར༌པར༌ཙེ༌ ཚོགས༌ ཙོགས༌ལ༌ མི༌དིའན༌པ༌, ཨ༌མ༌ལིཀ༌པ༌ ཡང༌ ཤར༌ ཆོགས༌སི༌ མི༌ ཚང༌མ༌ ལུང༌པའེ༌ ནང༌ང༌ ཛོམས༌ཏེ༌ ཁོང༌གུན༌ནི༌ རྔ༌བོང༌གུན༌ ཚོའེ༌ ཐའ༌མའེ༌ པེ༌མ༌ ཙོགས༌ རྩི༌ མི༌ཉན༌ཅེས༌ ཡོད༌པིན༌།
JDG 7:13 གི༌དི༌འོན༌ ལེབ༌ ཟ༌ནེ༌ མག༌མི༌ཞིག༌གི༌ ཁོ༌རང༌ངི༌ ཕྲོ༌པའ༌ ཁོ༌རང༌ངི༌ ཉི༌ལམ༌ ཤད༌ཨིན༌ ཟེར༌རད༌པིན༌, “ང༌ ཉི༌ལམ༌ཞིག༌ ཐོང༌, ནས༌སི༌ ཏ༌གི༌ ཀིར༌ཀིར༌ ཆེན༌མོ༌ཞིག༌ མི༌དིའན༌པ༌གུན༌ དུགས༌སའེ༌ ནས༌སའེ༌ ནང༌ང༌ རི༌ལིག༌ག༌ ཡོངས༌ཏེ༌ ཏེ༌ཟམ༌ ཤེད༌ ཉམ༌པོ༌ ཀུར༌ལ༌ ཕོག༌པ༌ ཀུར༌བོ༌ གོའེ༌ཀ༌ ལོགས༌ ཡང༌ ལྡིབས༌།”
JDG 7:14 ཁོའེ༌ ཕྲོ༌པའེ༌ ལན༌ཏངས༌, “ཏེ༌བོའེ༌ ཏོན༌ ཨིས༌ར༌ཨེལ༌པ༌ ཡོ༌འཤ༌ཤི༌ བུ༌ཚ༌ གི༌དི༌འོན༌ནི༌ ང༌དང༌གུན༌ལ༌ སྤུང༌གོལ༌ ཅོ༌ཅེས༌པོ༌ ཨིན༌ནོག༌། དཀོན༌མཆོག༌གི༌ མི༌དིའན༌པ༌ དང༌ ཞན༌ ཚང༌མ༌ ཁོའེ༌ ལག༌ག༌ སལ༌ཏེ༌ ཨིན༌ནོག༌།”
JDG 7:15 གི༌དི༌འོན༌ལ༌ ཉི༌ལམ༌ དང༌ ཏེ༌བོའེ༌ ཏོན༌ ཤད༌ཁན༌བོ༌ ཚོར༌ར༌ཅིག༌ ཁོའེ༌ པུག༌དོང༌ ཙུགས༌ཏེ༌ གོ༌ སྒུས༌ ཡང༌ ཡ༌ཝའ༌ ཅོལས༌། ཏེ༌ནེ༌ ཁོ༌ ཨིས༌ར༌ཨེལ༌པ༌གུན༌ དུགས༌ཏེ༌ ཡོད༌ས༌ ལོགས༌ཏེ༌ སོང༌ ཡང༌ ཁོང༌གུན༌ལ༌ བོད༌ཏེ༌ ཟེརས༌, “ལོང༌ཤིག༌། ཡ༌ཝའེ༌ ཁྱོ༌ཞའེ༌ ལག༌ག༌ མི༌དིའན༌པ༌ དང༌ ཞན༌ ཚང༌མ༌ སལ༌ཏེ༌ ཨིན༌ནོག༌།”
JDG 7:16 ཁོའེ༌ མི༌ སུམ༌གྱ༌བོ༌ སྡེ༌ སུམ༌མི༌ ནང༌ང༌ བགོས༌ ཡང༌ མི༌ རེ༌རེའ༌ ར༌ཅོའེ༌ ཏུང༌ དང༌ འོད༌ ཡོད༌ཁན༌ནི༌ ཟ༌མ༌ ཏངས༌།
JDG 7:17 ཡང༌ གི༌དི༌འོན༌ནི༌ ཁོང༌གུན༌ལ༌ ཟེརས༌, “ཁྱོ༌ཞ༌གུན༌ནི༌ ང༌ ལྟེན༌ དུག༌། ང༌ གྲ༌འོ༌གུན༌ དུག༌སའེ༌ ཀུར༌རི༌ དུན༌ལ༌ ལེབ༌བ༌ཅིག༌ ངའེ༌ ཅོ༌ཁན༌ ཙོགས༌ ཅོས༌།
JDG 7:18 ང༌ དང༌ ང༌ ཉམ༌པོ༌ ཡོད༌ཁན༌ ཚང༌མའེ༌ ཏུང༌ ཕུའ༌ཅིག༌ ཁྱོ༌ཞའ༌ ཀུར༌གུན༌ ཡོད༌སའེ༌ ནས༌ས༌ སྐོར༌ཏེ༌ ཡོད༌ཁན༌ ཚང༌མེའང༌ ཏུང༌ ཕུས༌ཏེ༌ ‘ཡ༌ཝ༌ དང༌ གི༌དི༌འོན༌ནི༌ ཕིའ༌’ ཟེར༌ཏེ༌ ཀུ༌ཅོ༌ ཏོང༌།”
JDG 7:19 ཚན༌ སྐྱིལ༌ལི༌ སང༌ སྔུན༌ལ༌, སྲུང༌ཁན༌གུན༌ སྤོས༌ཏེ༌ སྟིང༌ནེ༌ གི༌དི༌འོན༌ དང༌ ཁོ༌ ཉམ༌པོ༌ ཡོད༌ཁན༌ མག༌མི༌ 100 མི༌དིའན༌པའེ༌ ཀུར༌གུན༌ནི༌ དུན༌ལ༌ ལེབ༌བ༌ཅིག༌ ཁོང༌གུན༌ནི༌ ཏུང༌ ཕུས༌ཏེ༌ ཟ༌མ༌གུན༌ ཅགས༌།
JDG 7:20 ཏེ༌ནེ༌ ཞན༌ སྡེ༌ གུན༌ནིའང༌ ཏུང༌ ཕུས༌ ཡང༌ ཟ༌མ༌གུན༌ ཅགས༌། ཁོང༌གུན༌ནི༌ ལག༌པ༌ ཡོ༌མའེ༌ ནང༌ང༌ འོད༌ ཡང༌ ཡས༌པའེ༌ ནང༌ང༌ ཏུང༌ ཁུར༌ཏེ༌ ཀུ༌ཅོ༌ ཏངས༌ཏེ༌ ཟེརས༌, “ཡ༌ཝ༌ དང༌ གི༌དི༌འོན༌ནི༌ ཕིའ༌ ང༌ཞའེ༌ ར༌འི༌གུན༌ ཀོལ༌ལད༌།”
JDG 7:21 གི༌དི༌འོན༌ནི༌ མག༌མི༌ ཀུར༌གུན༌ ཡོད༌སའེ༌ ནས༌ས༌ གང༌པོ༌ སྐོར༌ཏེ༌ ཁོང༌རང༌གུན༌ནི༌ ནས༌སའེ༌ཀ༌ སྟན༌པོ༌ དུགས༌ ཡང༌ མི༌དིའན༌པ༌ ཚང༌མ༌ ཐེ༌ཚོམས༌སི༌ ནང༌ང༌ ཀུ༌ཅོ༌ ཏང༌ཨིན༌ ཤོར༌ཏེ༌ སོང༌།
JDG 7:22 ཨིས༌ར༌ཨེལ༌པ༌ སུམ༌ གྱའེ༌ ཏུང༌གུན༌ ཕུའ༌ཅིག༌ ཡ༌ཝའེ༌ མི༌དིའན༌པའེ༌ མག༌མི༌ ཁོ༌རང༌ ཅིག༌ དང༌ ཅིག༌གི༌ གྱབ༌གལ༌ལ༌ ནོལ༌ཏེ༌ ར༌འི༌ ཉམ༌པོ༌ སད༌ ཅུག༌ག༌ ཛདས༌། མ༌ ཤི༌ཁན༌གུན༌ ཟེ༌རེ༌རཧ༌ ཆོགས༌ལ༌ བེཐ༌ ཤིཏ༌ཏཧ༌, ཐག༌རིང༌ ཏབ༌བཐ༌ཐི༌ ཉེ༌མོའ༌ ཨ༌བེལ༌ མེ༌ཧོ༌ལཧའེ༌ སན༌ཚམས༌ ཚོག༌པ༌ ཤོར༌ཏེ༌ སོང༌།
JDG 7:23 ཏེ༌ནེ༌ གི༌དི༌འོན༌ནི༌ མ༌ནས༌ས༌, ནཕ༌ཐལ༌ལི༌ དང༌ ཨ༌ཤེར༌ སྡེ༌གུན༌ནི༌ མག༌མི༌གུན༌ བོདས༌ ཡང༌ ཁོང༌གུན༌ནི༌ མི༌དིའན༌པ༌གུན༌ལ༌ ཏེད༌ཏེ༌ ཁྱེརས༌།
JDG 7:24 གི༌དི༌འོན༌ནི༌ ཨེཕ༌ར༌ཡིམ༌པའེ༌ རི༌ཡུལ༌ གང༌པོའེ༌ ནང༌ང༌ ལོན༌ ཀལ༌ཏེ༌ ཟེརས༌, “ཐུར༌ལ༌ བབས༌ཏེ༌ མི༌དིའན༌པ༌གུན༌ལ༌ ནོལ༌ལ༌ ཐག༌རིང༌ བེཐ༌ བ༌རཧ༌ ཚག༌པ༌ ཡོངས༌ཏེ༌ ཡོར༌དཱན༌ ལྩངས༌པོ༌ རྒལ༌ཏེ༌ ཆ༌སའེ༌ ནས༌ས༌ ཚང༌མ༌ ཀོའག༌ཤིག༌།” ཏེ༌བོའེ༌ཕིའ༌ ཨེཕ༌ར༌ཡིམ༌པ༌ ཚང༌མ༌ ཡོངས༌ཏེ༌ ཐག༌རིང༌ བེཐ༌ བ༌རཧ༌ ཚག༌པའེ༌ ནས༌ས༌གུན༌ ཀགས༌།
JDG 7:25 ཁོང༌གུན༌ནི༌ མི༌དིའན༌པའེ༌ མག༌སྤོན༌ ཨོ༌རེབ༌ དང༌ ཟེའེབ༌ ཉིས༌ཀོ༌ ཟུམས༌ཏེ༌ ཨོ༌རེབ༌ ཨོ༌རེབ༌བི༌ རྡོའེ༌ཀ༌ ཡང༌ ཟེའེབ༌ ཟེའེབ༌བི༌ རྒུན༌ཆང༌ ཙིར༌སའེ༌ ནས༌སའེ༌ཀ༌ སདས༌། ཁོང༌གུན༌ནི༌ མི༌དིའན༌པ༌གུན༌ལ༌ ཏེད༌ཏེ༌ ཁྱེརས༌ ཡང༌ ཡོར༌དཱན༌ ལྩངས༌པོའེ༌ དུན༌ལ༌ དུགས༌ཏེ༌ ཡོད༌ཁན༌ གི༌དི༌འོན༌ལ༌ ཨོ༌རེབ༌ དང༌ ཟེའེབ༌ ཉིས༌ཀོའེ༌ གོ༌ ཁྱོངས༌།
JDG 8:1 ཏེ༌ནེ༌ ཨེཕ༌ར༌ཡིམ༌པ༌གུན༌ནི༌ གི༌དི༌འོན༌ལ༌ ཏྲིས༌, “ཉེ༌རང༌ངི༌ ང༌ཞའ༌ ཉམ༌པོ༌ ཏེ༌ཟུག༌ ཅིའ༌ ཅོས༌པིན༌? མི༌དིའན༌པ༌གུན༌ལ༌ ནོལ༌ལ༌ ཆ༌ ཟ༌ནེ༌ ཉེ༌རང༌ངི༌ ང༌ཞ༌གུན༌ལ༌ ཅིའ༌ མ༌བོད༌པིན༌?” ཁོང༌གུན༌ནི༌ སྲོ༌ ཉམ༌པོ༌ གི༌དི༌འོན༌ལ༌ སྐྱོན༌རྗོད༌ སྲན༌ཏྲེ༌ ཅོས༌།
JDG 8:2 ཨིན༌ནའང༌ གི༌དི༌འོན༌ནི༌ ལན༌ཏངས༌, “ཁྱོ༌ཞ༌གུན༌ནི༌ ཅོ༌ཁན༌བོ༌ ཉམ༌པོ༌ ལྡུར༌ན༌ ངའེ༌ ཅའང༌ མ༌ཅོའ༌ ཨིན༌ནོག༌། ང༌ཞའ༌ ཨ༌བིའེ༌ཟེར༌པ༌གུན༌ནི༌ སྟོན༌ཐོག༌ གང༌པོ༌ རྔ༌ཁན༌བོའེ༌ སང༌ ཁྱོ༌ཞའ༌ ཨེཕ༌ར༌ཡིམ༌པ༌གུན༌ནི༌ ལུས༌ཁན༌ནི༌ སྟོན༌ཐོག༌ ལྡུམ༌ཁན༌བོ༌ མང༌ང༌ རིན༌ཅན༌ མ༌ནོག༌ག༌?
JDG 8:3 དཀོན༌མཆོག༌གི༌ ཨོ༌རེབ༌ དང༌ ཟེའེབ༌ མི༌དིའན༌པ༌ མག༌སྤོན༌གུན༌ ཁྱོ༌ཞའེ༌ ལག༌ག༌ སལས༌། ཁྱོ༌ཞ༌གུན༌ནི༌ ཅོ༌ཁན༌བོ༌ ཉམ༌པོ༌ ལྡུར༌ན༌, ངའེ༌ ཅའང༌ མ༌ཅོའ༌ ཨིན༌ནོག༌།” ཏེ༌བོ༌ ཚོར༌ར༌ཅིག༌ ཨེཕ༌ར༌ཡིམ༌པ༌གུན༌ནི༌ སྲོ༌ ཞུ༌ཏེ༌ མེད༌ཁན༌ སོང༌།
JDG 8:4 གི༌དི༌འོན༌ དང༌ ཁོའེ༌ མི༌ 300 ངལ༌ཏེ༌ ཡོད༌ནའང༌ ཡོར༌དཱན༌ ལྩངས༌པོ༌ རྒལ༌ཏེ༌ གྲ༌འོ༌གུན༌ལ༌ ཏེད༌ཏེ༌ ཁྱེརས༌།
JDG 8:5 ཁོང༌གུན༌ སུ༌ཀོད༌ལ༌ ལེབ༌བ༌ཅིག༌ གི༌དི༌འོན༌ནི༌ གྲོང༌ཁྱེར༌པ༌གུན༌ལ༌ ཟེརས༌, “ཇུ༌ཇུ༌ ངའེ༌ མི༌གུན༌ལ༌ ཟའ༌ཅེས༌ལ༌ ཟན༌ སལ༌, ཁོང༌གུན༌ མ༌སྲན༌ཏྲེ༌ ངལ༌ཏེ༌ ཡོད༌། ང༌ཞའེ༌ མི༌དིའན༌པའེ༌ གྱལ༌པོ༌ ཟེ༌བཧ༌ དང༌ ཟལ༌མུན༌ན༌ གུན༌ལ༌ ཏེད༌ཏེ༌ ཁྱེར༌ཅེས༌ཨིན༌།”
JDG 8:6 ཨིན༌ནའང༌ སུ༌ཀོད༌དི༌ སྤོན༌བོ༌གུན༌ནི༌ ལན༌ཏངས༌, “ང༌ཞའེ༌ ཁྱོ༌རང༌ངི༌ མག༌མི༌གུན༌ལ༌ ཟའ༌ཅེས༌ལ༌ ཟན༌ ཏང༌ཅེས༌, ཅི༌ ཁྱོ༌རང༌ངི༌ ཟེ༌བཧ༌ དང༌ ཟལ༌མུན༌ན༌ ཟུམས༌ཏེ༌ ཁྱོངས༌པིན༌ན༌?”
JDG 8:7 ཏེ༌ནེ༌ གི༌དི༌འོན༌ནི༌ ཟེརས༌, “ཡ༌ཝའེ༌ ང༌ཞའ༌ ཟེ༌བཧ༌ དང༌ ཟལ༌མུན༌ནའེ༌ཀ༌ གྱལ༌ཁ༌ སལ༌ལ༌ཅིག༌ ང༌ཞའ༌ ལོགས༌ཏེ༌ ཡོང༌ཏེ༌ ཁྱོ༌ཞའ༌ ཤ༌རྗེན༌ ཅོས༌ཏེ༌ ཐང༌ངི༌ ཚེར༌མང༌ དང༌ སེ༌ཡའ༌ མེན༌ཏོག༌གི༌ སྐང༌ ཉམ༌པོ༌ ཆད༌པ༌ ཏང༌ཨིན༌།”
JDG 8:8 ཏེ༌ཀ༌ནེ༌ གི༌དི༌འོན༌ ཀེན༌ལ༌ པེ༌ནིལ༌ལ༌ སོང༌ ཡང༌ ཁོང༌གུན༌ལའང༌ ཟའ༌ཅེས༌ལ༌ ཟན༌ ཏོང༌ ཟེརས༌། ཁོང༌གུན༌ནིའང༌ སུ༌ཀོད༌པ༌གུན༌ ཙོགས༌ ལན༌ཏངས༌།
JDG 8:9 ཁོའེ༌ པེ༌ནིལ༌པ༌གུན༌ལ༌ ཟེརས༌, “གྱལ༌ཁ༌ ཐོབ༌ཏེ༌ སྟིང༌ནེ༌ ང༌ ཡོངས༌ཏེ༌ འི༌ པི༌འུ༌ ཁྲེས༌ཏོར༌ ཅོ༌ཨིན༌།”
JDG 8:10 ཏ༌ ཤར༌ ཆོགས༌སི༌ མག༌མི༌ 1,20,000 ཤི༌, ཨིན༌ནའང༌ མ༌ཤིའ༌ ལུས༌ཁན༌ 15,000 ཀཪ༌ཀོར༌ གྲོང༌ཁྱེར༌རི༌ ནང༌ང༌ ཟེ༌བཧ༌ དང༌ ཟལ༌མུན༌ན༌ ཉམ༌པོ༌ ཡོད༌པིན༌།
JDG 8:11 ནོ༌བཧ༌ དང༌ ཡོག༌བེ༌ཧཧ༌ གྲོང༌སེབ༌གུན༌ནི༌ ཤར༌ཆོགས༌, རེ༌བོ༌ ཁུར༌ཁན༌གུན༌ གྲུལ༌སའེ༌ ལམ༌ནེ༌ གི༌དི༌འོན༌ སོང༌ ཡང༌ ཧུན༌མེད༌ལ༌ མི༌དིའན༌པའེ༌ མག༌མི༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཁོང༌གུན༌ ཧ༌ལས༌ཤུགས༌།
JDG 8:12 མི༌དིའན༌པའེ༌ གྱལ༌པོ༌ ཟེ༌བཧ༌ དང༌ ཟལ༌མུན༌ན༌ གུན༌ ཤོར༌ཏེ༌ སོང༌ ཨིན༌ནའང༌ གི༌དི༌འོན༌ནི༌ ཁོང༌གུན༌ལ༌ ཏེད༌ཏེ༌ ཁྱེརས༌ ཡང༌ ཁོང༌གུན༌ ཟུམས༌། ཏེ༌ནེ༌ མག༌མི༌ ཚང༌མའེ༌ ནང༌ང༌ ཇིགས༌ནང༌ སྐྱེས༌ཏེ༌ ཧན༌གྲང༌ སོང༌།
JDG 8:13 གི༌དི༌འོན༌ ཧེ༌རེས༌སི༌ ལ༌ གྱུད༌ཏེ༌ ལོགས༌ཏེ༌ ཡོངས༌།
JDG 8:14 ཏེ༌རུ༌ ཁོའེ༌ སུ༌ཀོད༌པ༌ ཞུ༌ནུ༌ ཞིག༌ ཟུམས༌ཏེ༌ གྲོང༌ཁྱེར༌རི༌ སྤོན༌བོ༌ དང༌ འུ༌སྐྱོང༌ 77 ནི༌ མིང༌གུན༌ བྲི༌ཅུགས༌།
JDG 8:15 ཏེ༌ནེ༌ གི༌དི༌འོན༌ སོང༌ཏེ༌ སུ༌ཀོད༌པ༌གུན༌ལ༌ ཟེརས༌, “ཟེ༌བཧ༌ དང༌ ཟལ༌མུན༌ན༌ འི༌ཀ༌ནེ༌, ངའ༌ མ༌བེབས༌ ཅོས༌ཏེ༌ ཁྱོ༌རང༌གུན༌ནི༌ ཟེརས༌, ‘ང༌ཞའེ༌ ཁྱོ༌རང༌ངི༌ ངལ༌ཏེ༌ ཡོད༌ཁན༌ མག༌མི༌གུན༌ལ༌ ཟའ༌ཅེས༌ ཅིའ༌ ཏང༌ཨིན༌, ཅི༌ ཁྱོ༌རང༌ངི༌ ཟེ༌བཧ༌ དང༌ ཟལ༌མུན༌ན༌ ཟུམས༌ཏེ༌ ཁྱོངས༌པིན༌ན༌?’”
JDG 8:16 གི༌དི༌འོན༌ནི༌ གྲོང༌ཁྱེར༌རི༌ འུ༌སྐྱོང༌ དང༌ སྤོན༌བོ༌ གུན༌ ཁྱེརས༌ ཡང༌ ཁོང༌གུན༌ལ༌ ཐང༌སྟོང༌ངི༌ ཚེར༌མངས༌ དང༌ སེ༌ཡའ༌ མེན༌ཏོག༌གི༌ སྐང༌ ཉམ༌པོ༌ ཆད༌པ༌ ཏངས༌།
JDG 8:17 ཁོའེ༌ པེ༌ནིལ༌ལི༌ པི༌འུའང༌ ཤིགས༌ཏེ༌ གྲོང༌ཁྱེར༌རི༌ ནང༌ང༌ དུག༌ཁན༌ནི༌ བུ༌ཚ༌ ཚང༌མ༌ སདས༌།
JDG 8:18 ཏེ༌ནེ༌ གི༌དི༌འོན༌ནི༌ ཟེ༌བཧ༌ དང༌ ཟལ༌མུན༌ན༌ ཏྲིས༌, “ཏྲ༌བོར༌རི༌ ནང༌ང༌ ཀ༌ཟུག༌ མི༌རིག༌ ཁྱོ༌རང༌གུན༌ནི༌ སད༌པིན༌?” ཁོང༌གུན༌ནི༌ ལན༌ཏངས༌, “ཉེ༌རང༌ ཙོགས༌ མི༌ རིག༌། ཁོང༌ ཚང༌མ༌ གྱལ༌པོའེ༌ བུ༌ཚ༌ ཙོགས༌ ཐོང༌ དུག༌པིན༌།”
JDG 8:19 གི༌དི༌འོན༌ནི༌ ལན༌ཏངས༌, “ཁོང༌གུན༌ ངའེ༌ སྤུན༌ལ༌, ངའེ༌ ཨ༌མའེ༌ བུ༌ཚ༌གུན༌ ཨིན༌པིན༌། ཡ༌ཝ༌ སོན༌པོའེ༌ ཚན༌ནི༌ ནང༌ང༌ ཀལ༌ཏེས༌ ཁྱོ༌རང༌གུན༌ནི༌ ཁོང༌གུན༌ མ༌སད༌པིན༌ན༌ ངའེ༌ ཁྱོ༌རང༌གུན༌ མ༌སད༌ད༌ ཡོད༌གྲོ༌།”
JDG 8:20 གི༌དི༌འོན༌ནི༌ ཁོ༌རང༌ངི༌ བུ༌ཚ༌ ཆེ༌ཤོག༌ ཡེ༌ཐེར༌ ཆོགས༌ལ༌ ལྟས༌ཏེ༌ ཟེརས༌, “ཁོང༌གུན༌ སོད༌” ཨིན༌ནའང༌ ཡེ༌ཐེར༌ ཞུ༌ནུ༌ཞིག༌ ཨིན༌ཅེས༌པའེ༌ ཁོ༌ ཇིགས༌ཏེ༌ ཁོ༌རང༌ངི༌ ར༌འི༌ མ༌ ཕིངས༌།
JDG 8:21 ཏེ༌ནེ༌ ཟེ༌བཧ༌ དང༌ ཟལ༌མུན༌ནའེ༌ གི༌དི༌འོན༌ལ༌ ཟེརས༌, “བུ༌ཚའེ༌ ལས༌པོ༌ ཕྲུ༌གུ༌ཞིག༌ག༌ ཅིའ༌ སྟད༌དད༌? ལོངས༌། ཁྱོ༌རང༌ རང༌ངི༌ ང༌ཞའ༌ སོད༌།” ཏེ༌ནེ༌ གི༌དི༌འོན༌ནི༌ ཁོང༌ ཉིས༌ཀོ༌ སདས༌ ཡང༌ ཁོང༌ངི༌ རྔ༌བོང༌གུན༌ནི༌ ཇིང༌བའེ༌ཀ༌ ཏགས༌ཏེ༌ ཡོད༌ཁན༌ནི༌ སེར༌རི༌ གྱན༌ཆ༌གུན༌ པུད༌ཏེ༌ ཁྱེརས༌།
JDG 8:22 ཏེ༌ནེ༌ ཨིས༌ར༌ཨེལ༌པ༌གུན༌ནི༌ གི༌དི༌འོན༌ལ༌ ཟེརས༌, “ང༌ཞའེ༌ སྤོན༌བོ༌ གྱུར༌། ཉེ༌རང༌, ཉེ༌རང༌ངི༌ བུ༌ཚ༌ དང༌ ཚ༌འོ༌ གུན༌ནི༌ ང༌ཞ༌གུན༌ནི༌ཀ༌ ཝང༌སྲུལ༌ གོས༌ ཅིའ༌ཟེར༌ན༌ ཉེ༌རང༌ངི༌ ང༌ཞའ༌ མི༌དིའན༌པ༌གུན༌ནི༌ ཀ༌ནེ༌ སྐྱོབས༌ཏེ༌ ཨིན༌ནོག༌།”
JDG 8:23 ཨིན༌ནའང༌ གི༌དི༌འོན༌ནི༌ ལན༌ཏངས༌, “ང༌ དང༌ ངའེ༌ བུ༌ཚ༌གུན༌ནི༌ ཁྱོ༌ཞའེ༌ཀ༌ ཝང༌ མི༌སྲུལ༌། ཡ༌ཝའེ༌ ཁྱོ༌ཞ༌གུན༌ནི༌ཀ༌ ཝང༌སྲུལ༌ཨིན༌།
JDG 8:24 ཨིན༌ནའང༌ ངའ༌ ཞུ༌ཝ༌ཞིག༌ ཡོད༌, ཁྱོ༌ཞའ༌ རེ༌རེའེ༌ ཅོམས༌ཁན༌ནི༌ གྱུ༌ནོར༌ ཁྱོ༌ཞའེ༌ ཁག༌གི༌ ནང༌ནེ༌ ངའ༌ ནམ༌ཅོག༌གི༌ ཨ༌ལི༌ ཅིག༌ ཏོང༌།” ༼མི༌དིའན༌པ༌གུན༌ ཨིཤ༌མ༌ཨེལ༌ལི༌ གྱུད༌ནེ༌ ཨིན༌ཅེས༌པའེ༌ སེར༌རི༌ ནམ༌ཅོག༌གི༌ ཨ༌ལི༌ ཏག༌གད༌པིན༌།༽
JDG 8:25 ཁོང༌གུན༌ནི༌ ལན༌ཏངས༌, “ཐད༌པོ༌ ཉམ༌པོ༌ ཏང༌ཨིན༌།” ཁོང༌གུན༌ནི༌ རས༌ཤིག༌ ཏིངས༌ ཡང༌ མི༌ རེ༌རེའེ༌ ཅོམས༌ཁན༌ནི༌ གྱུ༌ནོར༌ ཁོ༌རང༌གུན༌ནི༌ ཁག༌གི༌ ནང༌ནེ༌ སེར༌རི༌ ནམ༌ཅོག༌གི༌ ཨ༌ལི༌ ཅིག༌ ཕངས༌།
JDG 8:26 ལྡུམས༌ཁན༌ནི༌ སེར༌རི༌ ནམ༌ཅོག༌གི༌ ཨ༌ལི༌ ལྕིད༌པོ༌ ཀི༌ལོ༌ 19.5 ཡོད༌པིན༌། ཏེ༌བོའེ༌ ནང༌ང༌ མི༌དིའན༌ནི༌ གྱལ༌པོ༌གུན༌ནི༌ གྱན༌ཆ༌ དང༌ ཀོས༌ལག༌ ཡང༌ ཁོང༌ངི༌ རྔ༌བོང༌གུན༌ནི༌ ཀ༌ནེ༌ པུད༌ཏེ༌ ཁྱོང༌ཁན༌ནི༌ གྱན༌ཆ༌གུན༌ མ༌ཐེའ༌ ཨིན༌ནོག༌།
JDG 8:27 གི༌དི༌འོན༌ནི༌ ཏེ༌ སེར༌ ཉམ༌པོ༌ ཏམ༌པ༌ ཨེ༌ཕོད༌ ཡང༌ན༌ སྟུད༌ཏུང༌ ཞིག༌ ཅོས༌ཏེ༌ ཁོ༌རང༌ངི༌ གྲོང༌ཁྱེར༌ ཨོཕ༌རཧ༌ ནང༌ང༌ བོརས༌། ཨིས༌ར༌ཨེལ༌པ༌ ཚང༌མའེ༌ ཏེ༌བོའ༌ ཅོལ༌ཅེས༌ གོ༌ཟུག༌ ཡང༌ གི༌དི༌འོན༌ དང༌ ཁོའེ༌ ནང༌ཚ ངས༌ ཚང༌མའང༌ ཡ༌ཝ༌ དཀོན༌མཆོག༌ག༌ མ༌ཅོལ༌ལ༌ ཏེ༌བོའ༌ ཅོལ༌ཅེས༌སི༌ ནང༌ང༌ ཁད༌།
JDG 8:28 ཏེན༌ན༌ ཟུག༌གི༌ ཨིས༌ར༌ཨེལ༌པ༌གུན༌ནི༌ མི༌དིའན༌པ༌གུན༌ ང༌ཡོག༌ག༌ ཁྱོངས༌། མི༌དིའན༌པ༌གུན༌ ཤེད༌ཅན༌ གྱུར༌ཏེ༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ མ༌ནེ༌ ནོལ༌ མ༌ཐུབ༌། གི༌དི༌འོན༌ སོན༌ཏེའ༌ ཡོད༌ཏུས༌ ལོ༌ 40 ཏེ༌ ནས༌སའེ༌ ནང༌ང༌ ཞི༌དེ༌ ལུས༌།
JDG 8:29 ཡོ༌འཤ༌ཤི༌ བུ༌ཚ༌ གི༌དི༌འོན༌ ལོགས༌ཏེ༌ ཁང༌པ༌ མི༌ཚེ༌ པུད༌ད༌ སོང༌།
JDG 8:30 ཁོ༌ བུ༌ཚ༌ རྡུན༌ཅུའི༌ ཨ༌བ༌ གྱུར༌ ཅིའ༌ཟེར༌ན༌ ཁོའ༌ ན༌མ༌ མང༌པོ༌ ཡོད༌པིན༌།
JDG 8:31 ཤེ༌ཀེམ༌མི༌ ནང༌ང༌ ཁོའེ༌ ཚེ༌ཡོག༌ ན༌མའ༌ བུ༌ཚ༌ཞིག༌ སྐྱེས༌ ཀ༌བོའེ༌ མིང༌ང༌ ཁོའེ༌ ཨ༌བི༌མེ༌ལེག༌ ཏགས༌།
JDG 8:32 གི༌དི༌འོན༌ རྒད༌པོ༌ སོང༌ཏེ༌ ཤི༌ ཡང༌ ཁོའེ༌ སྤུར༌ ཨོཕ༌རཧ༌ ནང༌ང༌ ཨ༌བིའེ༌ཟེར༌རི༌ གྱུད༌ཟིན༌ ཡོ༌འཤ༌ ཁོ༌རང༌ངི༌ ཨ༌བའེ༌ སྤུར༌ཁང༌ངི༌ ནང༌ང༌ སུབས༌།
JDG 8:33 གི༌དི༌འོན༌ ཤི༌ཏེ༌, ཏུས༌ མང༌པོ༌ མ༌ཆ༌ ཨིས༌ར༌ཨེལ༌པ༌གུན༌ནི༌ བའལ༌ ཟེར༌ཁན༌ནི༌ སྐུན༌དྲ༌གུན༌ལ༌ ཅོལ༌ཅེས༌ གོ༌ཟུག༌། ཁོང༌གུན༌ནི༌ བའལ༌ བེ༌རིཐ༌ ལྷ༌ ཅོས༌ཏེ༌
JDG 8:34 ཆོགས༌ ཚང༌མ༌ནེ༌ ཡོང༌ཁན༌ནི༌ གྲ༌འོ༌གུན༌ནི༌ ཀ༌ནེ༌ སྐྱོབ༌བ༌ ཛད༌ཁན༌ནི༌ ཁོ༌རང༌གུན༌ནི༌ དཀོན༌མཆོག༌ ཡ༌ཝ༌ རྗེདས༌།
JDG 8:35 ཁོང༌གུན༌ནི༌ ཡེ༌རུབ༌བའལ༌ ཡང༌ན༌ གི༌དི༌འོན༌ནི༌, ཁོང༌གུན༌ནི༌ ཕིའ༌ ཟང༌པོ༌ ལས༌ ཅོ༌ཁན༌ ཚང༌མ༌ རྗེད༌ཏེ༌ ཁོའེ༌ ནང༌ཚངས༌ལ༌ ཆོགས༌སྐྱོར༌ མ༌ཅོས༌།
JDG 9:1 ཞག༌ཤིག༌ གི༌དི༌འོན༌ནི༌ བུ༌ཚ༌ ཨ༌བི༌མེ༌ལེག༌ ཤེ༌ཀེམ༌མ༌ ཁོའེ༌ ཨ༌མའེ༌ མིང༌བོ༌གུན༌ལ༌ ཐུག༌ག༌ སོང༌ ཡང༌ ཁོང༌གུན༌ དང༌ ཁོའེ༌ ཨ༌མའེ༌ ཉེན༌ ཚང༌མ༌ ཟེརས༌,
JDG 9:2 “ཤེ༌ཀེམ༌མི༌ འུ༌སྐྱོང༌ ཚང༌མ༌ ཏྲིས༌, ‘ཁྱོ༌ཞ༌གུན༌ནི༌ཀ༌ གི༌དི༌འོན༌ནི༌ བུ༌ཚ༌ 70 ཝང༌ སྲུལ༌ན༌ གྱལ༌ཅེས༌ རག༌ག༌ ཡ༌ མི༌ ཅིག༌གི༌?’ ང༌ ཁྱོ༌ཞའེ༌ ཤ༌ཁྲག༌ ཨིན༌ཁན༌བོ༌ ཨིད༌ཏུ༌ བོར༌།”
JDG 9:3 ཏེ༌ནེ༌ ཨ༌བི༌མེ༌ལེག༌གི༌ ཨ༌ཞང༌གུན༌ནི༌ ཁོའེ༌ ཟེར༌ཁན༌ ཚང༌མ༌ ཤེ༌ཀེམ༌མི༌ འུ༌སྐྱོང༌གུན༌ལ༌ ཤདས༌ ཡང༌ ཁོང༌གུན༌ནི༌ ཨ༌བི༌མེ༌ལེག༌ག༌ ཆོགས༌སྐྱོར༌ ཅོ༌ཅེས༌ ཐག༌ཅད༌ཏེ༌ ཟེརས༌, “ཁོ༌ ང༌དང༌གུན༌ནི༌ ཉེན༌གྲུང༌ ཨིན༌ནོག༌།”
JDG 9:4 ཁོང༌གུན༌ནི༌ བའལ༌ བེ༌རིཐ༌ཐི༌ ཆོད༌ཁང༌ངི༌ ནང༌ནེ༌ མུལ༌ལི༌ པེ༌ནེ༌ 70 ཁོའ༌ ཏངས༌ ཡང༌ ཁོའེ༌ ཏེ༌བོ༌ ཁྲིམས༌མེད༌དི༌ མི༌གུན༌ ཁོའེ༌ སྟིང༌རང༌ནེ༌ ཁྱོང༌ཅེས༌ལ༌ ཀོལས༌།
JDG 9:5 ཁོ༌ ཁོ༌རང༌ངི༌ ཨ༌བའེ༌ ཁང༌པ༌ ཨོཕ༌རཧ༌ སོང༌ཏེ༌ ཕོ༌ལོངས༌ ཅིག༌གི༌ཀ༌ གི༌དི༌འོན༌ནི༌ བུ༌ཚ༌ ཁོ༌རང༌ངི༌ ཨ༌ཅོ༌ནོ༌ 70 སདས༌། ཨིན༌ནའང༌ གི༌དི༌འོན༌ནི༌ བུ༌ཚ༌ ཆུང༌ཤོག༌ ཡོ༌ཐམ༌ ཨིབས༌ཏེ༌ ཤོརས༌།
JDG 9:6 ཏེ༌ནེ༌ ཤེ༌ཀེམ༌པ༌ དང༌ བེཐ༌ མིལ༌ལོ༌པ༌ ཚང༌མ༌ ཤེ༌ཀེམ༌མི༌ རྡོའེ༌ཀ༌ ཨོག༌ ལྕང༌མའེ༌ དུན༌ལ༌ ཛོམས༌ཏེ༌ ཨ༌བི༌མེ༌ལེག༌ ཁོང༌གུན༌ནི༌ གྱལ༌པོའ༌ སྐོས༌།
JDG 9:7 ཏེ༌བོའེ༌ སྐོར༌ལ༌ ཡོ༌ཐམ༌མའ༌ ཚོར༌ར༌ཅིག༌ ཁོ༌ གེ༌རི༌ཟིམ༌ རི༌ གོའ༌ ཛགས༌ ཡང༌ ཀུ༌ཅོ༌ ཏངས༌ཏེ༌ ཟེརས༌, “ཤེ༌ཀེམ༌པ༌གུན༌ ངའེ༌ སྤེ༌ར༌ ཉོན༌ཤིག༌, ཏེ༌ནེ༌ དཀོན༌མཆོག༌གི༌ ཁྱོ༌ཞ༌གུན༌ལ༌ སན༌ སྲིད༌ཅེས༌ ཨིན༌ནོག༌།
JDG 9:8 ཞག༌ཤིག༌ ལྕང༌མ༌གུན༌ནི༌ གྱལ༌པོ༌ ལྡམ༌ཅེས༌ ཐག༌ཅད༌། གོ༌མ༌ ཏེ༌གུན༌ནི༌ ཨོ༌ལི༌ཝིའི༌ ལྕང༌མ༌ ཟེརས༌, ‘ང༌ཞ༌གུན༌ནི༌ གྱལ༌པོ༌ གྱུར༌།’
JDG 9:9 ཨིན༌ནའང༌ ཨོ༌ལི༌ཝིའི༌ ལྕང༌མེའེ༌ ཟེརས༌, ‘ཁྱོ༌ཞ༌གུན༌ནི༌ཀ༌ ཝང༌སྲུལ༌ཅེས༌ལ༌ ཅི༌ ངའེ༌ ལྷ༌ལྷ༌མོ༌ དང༌ མི༌ གུན༌ལ༌ རྩི༌ཝ༌ ཏང༌ཁན༌ནི༌ ཨོ༌ལི༌ཝིའི༌ མར༌ནག༌ ཕིང༌ཅེས༌པོ༌ ཕང༌ང༌?’”
JDG 9:10 “ཏེ༌ནེ༌ ཏེ༌གུན༌ནི༌ ཕིག༌གི༌ ལྕང༌མ༌ ཟེརས༌, ‘ང༌ཞ༌གུན༌ནི༌ གྱལ༌པོ༌ གྱུར༌།’
JDG 9:11 ཨིན༌ནའང༌ ཕིག༌གི༌ ལྕང༌མའེ༌ ཟེརས༌, ‘ཁྱོ༌ཞ༌གུན༌ནི༌ཀ༌ ཝང༌སྲུལ༌ཅེས༌ལ༌ ཅི༌ ངའེ༌ ང༌རང༌ངི༌ ཁ༌ཟས༌ ངར༌མོ༌ དང༌ ཞིམ༌པོ༌ ཆག༌ཤེས༌པོ༌ ཕང༌ང༌?’”
JDG 9:12 “ཏེ༌ནེ༌ ཏེ༌གུན༌ནི༌ རྒུན༌ནི༌ ལྕང༌མ༌ ཟེརས༌, ‘ང༌ཞ༌གུན༌ནི༌ གྱལ༌པོ༌ གྱུར༌།’
JDG 9:13 ཨིན༌ནའང༌ རྒུན༌ནི༌ ལྕང༌མའེ༌ ཟེརས༌, ‘ཁྱོ༌ཞ༌གུན༌ནི༌ཀ༌ ཝང༌སྲུལ༌ཅེས༌ལ༌ ཅི༌ ངའེ༌ ལྷ༌ལྷ༌མོ༌ དང༌ མི༌ གུན༌ ཐད༌ ཅུག༌ཁན༌ནི༌ རྒུན༌ཆང༌ ཕིང༌ཅེས༌པོ༌ ཕང༌ང༌?’”
JDG 9:14 “ཏེ༌ནེ༌ ཏེ༌གུན༌ནི༌ སྟིང༌ཇུག༌ག༌ ཚེར༌མང༌ངི༌ ལྕང༌མ༌ ཟེརས༌, ‘སྐྱོད༌ ཡང༌ ང༌ཞ༌གུན༌ནི༌ གྱལ༌པོ༌ གྱུར༌།’”
JDG 9:15 “ཚེར༌མང༌ངི༌ ལྕང༌མ༌གུན༌ལ༌ ལན༌ཏངས༌, ‘ཀལ༌ཏེས༌ ཁྱོ༌ཞའེ༌ དེན༌བའ༌ ང༌ གྱལ༌པོ༌ ཅོའ༌ ཐད༌དད༌ན༌, ཡོང༌ ངའེ༌ ཡལ༌གའེ༌ ཡོག༌ག༌ སྲུང༌སྐྱོབ༌ ལེན༌, ཀལ༌ཏེས༌ མ༌ལེན༌ན༌ ངའེ༌ ནང༌ནེ༌ མེ༌ བིང༌ཏེ༌ ལེ༌བ༌ནོན༌ནི༌ སི༌གྲར༌ ལྕང༌མ༌གུན༌ མེད༌ཁན༌ ཆ༌ཤིག༌།’”
JDG 9:16 ཡོ༌ཐམ༌མི༌ ཏ༌རུང༌ངའང༌ ཟེརས༌, “ཅི༌ ཁྱོ༌ཞ༌གུན༌ནི༌ ཀྲང༌པོ༌ དང༌ སྙིང༌ ལག༌མོ༌ ཉམ༌པོ༌ ཨ༌བི༌མེ༌ལེག༌ ཁྱོ༌ཞའེ༌ གྱལ༌པོ༌ སྐོས༌ཏེ༌ ཨིན༌ན༌? ཅི༌ ཁྱོ༌ཞ༌གུན༌ནི༌ གི༌དི༌འོན༌ དང༌ ཁོང༌ངི༌ ནང༌ཚངས༌ ཉམ༌པོ༌ འོས༌པ༌ ཅོས༌ཏེ༌ ཨིན༌ན༌ ཡང༌ ཁོང༌ང༌ ཁྱོ༌ཞ༌གུན༌ནི༌ འོས༌པ༌ ཨིན༌ཁན༌བོ༌ ཏངས༌ཏེ༌ ཨིན༌ན༌?
JDG 9:17 ངའེ༌ ཨ༌བའེ༌ ཁོང༌རང༌ངི༌ སྲོག༌ ཇིགས༌པའེ༌ ནང༌ང༌ ཏངས༌ཏེ༌ ཁྱོ༌ཞ༌གུན༌ནི༌ ཕིའ༌ ནོལས༌ ཡང༌ མི༌དིའན༌པ༌གུན༌ནི༌ ཀ༌ནེ༌ ཁྱོ༌ཞའ༌ ཐར༌ཅུགས༌།
JDG 9:18 ཨིན༌ནའང༌ དི༌རིང༌ ཁྱོ༌ཞ༌གུན༌ནི༌ ངའེ༌ ཨ༌བ༌ དང༌ ཁོང༌ངི༌ ནང༌ཚངས༌གུན༌ནི༌ གྱབ༌གལ༌ལ༌ ངོ༌ལོག༌ ཅོས༌ཏེ༌ ཁོང༌ངི༌ བུ༌ཚ༌ 70 ཕོ༌ལོངས༌ ཅིག༌གི༌ཀ༌ སདས༌ ཡང༌ ཁྱོ༌ཞ༌གུན༌ནི༌ ཉེན༌གྲུང༌ ཨིན༌ཅེས༌པོའེ༌ ཁོང༌ངི༌ ཚེ༌ཡོག༌ ན༌མའེ༌ བུ༌ཚ༌ ཨ༌བི༌མེ༌ལེག༌ གྱལ༌པོའ༌ ལྡམས༌།
JDG 9:19 ཀལ༌ཏེས༌ དི༌རིང༌ ཁྱོ༌ཞ༌གུན༌ནི༌ གི༌དི༌འོན༌ དང༌ ཁོའེ༌ ནང༌ཚངས༌གུན༌ལ༌ སྙིང༌ ཀྲང༌པོ༌ནེ༌ རྩི༌ཝ༌ ཏངས༌ཏེ༌ ཨ༌བི༌མེ༌ལེག༌ གྱལ༌པོའ༌ ལྡམས༌ཏེ༌ ཨིན༌ན༌ ཁྱོ༌ཞའེ༌ ཁོའ༌ ཡང༌ ཁོའེ༌ ཁྱོ༌ཞའ༌ ཐད༌པོ༌ དང༌ གའ༌མོ༌ ཁྱོང༌ཤིག༌།
JDG 9:20 ཨིན༌ནའང༌ ཏེ༌ཟུག༌ མན༌ན༌ ཏེ༌ནེ༌ ཨ༌བི༌མེ༌ལེག༌གི༌ ནང༌ནེ༌ མེ༌ བིང༌ཏེ༌ ཤེ༌ཀེམ༌ དང༌ བེཐ༌ མིལ༌ལོ༌པ༌ ཚང༌མ༌ མེད༌ཁན༌ ཆ༌ཤིག༌ ཡང༌ ཁྱོ༌ཞའེ༌ ནང༌ནེ༌ མེ༌ བིང༌ཏེ༌ ཁོ༌ མེད༌ཁན༌ ཆ༌ཤིག༌།”
JDG 9:21 ཏེ༌ནེ༌ ཡོ༌ཐམ༌ ཁོ༌རང༌ངི༌ ཨ༌ཅོ༌ ཨ༌བི༌མེ༌ལེག༌ག༌ ཇིགས༌ པ༌སང༌ ཁོ༌ ཤོར༌ཏེ༌ བེར༌རི༌ ནས༌སའེ༌ ནང༌ང༌ དུགས༌།
JDG 9:22 ཨིས༌ར༌ཨེལ༌པ༌གུན༌ནི༌ཀ༌ ཨ༌བི༌མེ༌ལེག༌གི༌ ཝང༌སྲུལ༌ཏེ༌ ལོ༌ སུམ༌ ཆའ༌ཅིག༌,
JDG 9:23 དཀོན༌མཆོག༌གི༌ ངན༌པའེ༌ སེམས༌ཉིད༌ ཀལ༌ལ༌ ཛད༌ཏེ༌ ཨ༌བི༌མེ༌ལེག༌ དང༌ ཤེ༌ཀེམ༌པ༌ གུན༌ནི༌ པར༌ལ༌ དྲའ༌ལངས༌ ཅུག༌ག༌ ཛདས༌པ༌ ཁོང༌གུན༌ནི༌ ཨ༌བི༌མེ༌ལེག༌ག༌ ངོ༌ལོག༌ ཅོས༌།
JDG 9:24 དཀོན༌མཆོག༌གི༌ ཏེ༌བོ༌ ཨ༌བི༌མེ༌ལེག༌གི༌ གི༌དི༌འོན༌ནི༌ བུ༌ཚ༌ 70 སད༌ཅེས༌ ཡང༌ ཤེ༌ཀེམ༌པ༌གུན༌ནི༌ ཁོའ༌ ཏེ༌བོའེ༌ ནང༌ང༌ རོགས༌ ཅོ༌ཅེས༌ལ༌ ཆད༌པ༌ སལ༌ཏེ༌ ཨིན༌པིན༌།
JDG 9:25 ཨ༌བི༌མེ༌ལེག༌ སད༌ཅེས༌ལ༌ ཤེ༌ཀེམ༌པ༌ འུ༌སྐྱོང༌གུན༌ནི༌ ཀལ༌ཁན༌ནི༌ མི༌གུན༌ རི༌ ནང༌ང༌ ཨིབས༌ཏེ༌ དུགས༌ ཡང༌ ཁོང༌གུན༌ནི༌ ཏེ༌ ལམ༌ནེ༌ གྲུལ༌ཁན༌གུན༌ནའང༌ ཅོམ༌མད༌པིན༌། ཨིན༌ནའང༌ ཨ༌བི༌མེ༌ལེག༌ག༌ ཏེ༌བོའེ༌ སྐོར༌ལ༌ ཚོར༌།
JDG 9:26 ཏ༌ ཨེ༌བེད༌དི༌ བུ༌ཚ༌ གའལ༌ ཁོ༌རང༌ངི༌ ཨ༌ཅོ༌ནོ༌གུན༌ ཉམ༌པོ༌ ཤེ༌ཀེམ༌མ༌ དུག༌ག༌ ཡོངས༌ ཡང༌ ཤེ༌ཀེམ༌པ༌གུན༌ནི༌ ཁོའ༌ ལོ༌ཁྱེལ༌ ཅོའད༌པིན༌།
JDG 9:27 ཤེ༌ཀེམ༌པ༌གུན༌ནི༌ རྒུན༌ནི༌ སྟོན༌ཐོག༌ ལྡུམས༌ཏེ༌ རྒུན༌ཆང༌ ཙིར༌ཏེ༌ སྟིང༌ནེ༌ ཁོ༌རང༌གུན༌ནི༌ ལྷའེ༌ ཆོད༌ཁང༌ངི༌ ནང༌ང༌ ཏུས༌ཆེན༌ རྩིའད༌པིན༌། ཏེ༌ཏུས༌ ཁོང༌གུན༌ནི༌ ཆང༌ ཐུང༌ཨིན༌ ཟན༌ཟེན༌ ཨ༌བི༌མེ༌ལེག༌ག༌ ངན༌ ཏབས༌།
JDG 9:28 ཏེ༌ནེ༌ གའལ༌ལི༌ ཟེརས༌, “ཨ༌བི༌མེ༌ལེག༌ སུ༌ ཨིན༌ནོག༌ ཡང༌ ང༌དང༌ ཤེ༌ཀེམ༌པ༌གུན༌ནི༌ ཁོའ༌ ཞབས༌ཏོག༌ ཅིའ༌ ཞུ༌ཨིན༌? ཁོ༌ གི༌དི༌འོན༌ནི༌ བུ༌ཚ༌ ཡང༌ ཟེ༌བུལ༌ ཁོའེ༌ ལྡམས༌ཁན༌ནི༌ སྤོན༌བོ༌ མ༌ནོག༌ག༌? ང༌དང༌ངི༌ ཤེ༌ཀེམ༌པ༌གུན༌ནི༌ ཨ༌བ༌ ཧ༌མོར༌རི༌ བུ༌ཚ༌གུན༌ལ༌ ཞབས༌ཏོག༌ ཞུ༌གོས༌, ཨ༌བི༌མེ༌ལེག༌ག༌ ཞབས༌ཏོག༌ ཅིའ༌ ཞུ༌ཨིན༌?
JDG 9:29 ཀལ༌ཏེས༌ ངའ༌ ཝང༌ཆ༌ ཡོད༌པིན༌ན༌ ངའེ༌ ཨ༌བི༌མེ༌ལེག༌ ཕིངས༌ཏེ༌ ཏང༌ཅེས༌རག༌། ངའེ༌ ཁོའ༌ ཟེར༌ཨིན༌, ‘མག༌མི༌ གྲལ༌གྲིག༌ ཅོས༌ཏེ༌ ནོལ༌ལ༌ ཡོང༌།’”
JDG 9:30 ཨིན༌ནའང༌ གྱལ༌སའེ༌ ཀའ༌ལོན༌ ཟེ༌བུལ༌ལ༌ གའལ༌ལི༌ ཟེར༌ཁན༌གུན༌ ཚོར༌ར༌ཅིག༌ ཁོའ༌ སྲོ༌ སྲན༌ཏྲེ༌ ཡོངས༌།
JDG 9:31 ཁོའེ༌ ཨ༌རུ༌མཧའེ༌ ནང༌ང༌ ཨ༌བི༌མེ༌ལེག༌ག༌ ལོན༌ ཀལ༌ཏེ༌ ཟེརས༌, “ཤེ༌ཀེམ༌མི༌ ནང༌ང༌ དུག༌ག༌ ཡོངས༌ཁན༌ ཨེ༌བེད༌དི༌ བུ༌ཚ༌ གའལ༌ དང༌ ཁོའེ༌ ཨ༌ཅོ༌ནོ༌གུན༌ནི༌ གྱལ༌སའེ༌ མི༌གུན༌ལ༌ ཉེ༌རང༌ངི༌ གྱབ༌གལ༌ ཅོ༌ཅེས༌ལ༌ ཕུགས༌ ཏང༌དུག༌།
JDG 9:32 ཉེ༌རང༌ མག༌མི༌ ཉམ༌པོ༌ ཚན༌ལ༌ སྐྱོད༌ཏེ༌ ཞིང༌ངི༌ ནང༌ང༌ ཨིབས༌ཏེ༌ ཞུགས༌།
JDG 9:33 ང༌མོ༌ ཉི༌མ༌ ཤར༌ར༌ཅིག༌ གྱལ༌ས༌ སྤུང༌གོལ༌ ཅོས༌ཏེ༌ གའལ༌ དང༌ ཁོ༌ ཉམ༌པོ༌ ཡོད༌ཁན༌གུན༌ ཉེ༌རང༌ང༌ ནོལ༌ལ༌ ཡོང༌ང༌ཅིག༌ ཉེ༌རང༌ངི༌ ཁོང༌གུན༌ ཉམ༌པོ༌ ཉེ༌རང༌ ཐད༌ཁན༌བོ༌ ཅོས༌།”
JDG 9:34 ཏེ༌ནེ༌ ཨ༌བི༌མེ༌ལེག༌ དང༌ ཁོའེ༌ མག༌མི༌ ཚང༌མ༌ ཚན༌ལ༌ སོང༌ ཡང༌ སྡེ༌ ཞི༌ ནང༌ང༌ བགོས༌ཏེ༌ ཤེ༌ཀེམ༌མི༌ ཉེ༌མོའ༌ ཞིང༌ངི༌ ནང༌ང༌ ཨིབས༌ཏེ༌ དུགས༌།
JDG 9:35 ང༌མོ༌ གའལ༌ གྱལ༌སའེ༌ སྒོའེ༌ཀ༌ ལངས༌ཏེ༌ ཡོད༌ ཟ༌ནེ༌ ཨ༌བི༌མེ༌ལེག༌ དང༌ ཁོའེ༌ མག༌མི༌གུན༌ ཨིབ༌སའེ༌ ནས༌ས༌ནེ༌ བིང༌ཏེ༌ ཡོངས༌།
JDG 9:36 གའལ༌ལི༌ ཁོང༌གུན༌ ཐོང༌ང༌ཅིག༌ ཁོའེ༌ ཟེ༌བུལ༌ལ༌ ཟེརས༌, “ལྟོས༌སའང༌, རི༌ནེ༌ ཐུར༌ལ༌ མི༌གུན༌ ཡོང༌ང༌ལ༌།” ཟེ༌བུལ༌ལི༌ ལན༌ཏངས༌, “མ༌ནོག༌, ཁོ༌རང༌ང༌ རི༌ ཀྲིབ༌ཀྱག༌གུན༌ མི༌ ཙོགས༌ ཐོང༌ཏེ༌ ཨིན༌ནོག༌།”
JDG 9:37 ཨིན༌ནའང༌ ཡང༌སྐྱར༌ གའལ༌ལི༌ ཟེརས༌, “ལྟོས༌སའང༌, རི༌ནེ༌ ཐུར༌ལ༌ མི༌གུན༌ ཡོང༌དུག༌ ཡང༌ མཱོ༌ཏབ༌ཁན༌གུན༌ དུག༌སའེ༌ ཨོག༌གི༌ ལྕང༌མའེ༌ ཆོགས༌ནེ༌ ཞན༌ སྡེ༌ཞིག༌ ཡོང༌ང༌ལ༌།”
JDG 9:38 ཏེ༌ནེ༌ ཟེ༌བུལ༌ལི༌ ཁོ༌ ཟེརས༌, “ཏ༌ ཁྱོ༌རང༌ངི༌ ཨ༌བི༌མེ༌ལེག༌ སུ༌ ཨིན༌ནོག༌ ཡང༌ ང༌དང༌གུན༌ནི༌ ཁོའ༌ ཞབས༌ཏོག༌ ཅིའ༌ ཞུ༌ཨིན༌ ཟེར༌ཏེ༌ སྤེ༌ར༌ ཆེན༌མོ༌ ཏང༌ཁན༌བོ༌ ཀ༌རེ༌? ཁྱོ༌རང༌ངི༌ སྨད༌གྲ༌ ཏང༌ཁན༌ནི༌ མི༌གུན༌, ཁོང༌གུན༌ མ༌ནོག༌ག༌? ཕི༌ལོག༌ག༌ སོང༌ཏེ༌ ཁོང༌གུན༌ལ༌ ནོལ༌།”
JDG 9:39 ཏེ༌ནེ༌ གའལ༌ལི༌ གོ༌ཁྲིད༌ ཅོས༌ཏེ༌ ཤེ༌ཀེམ༌པ༌གུན༌ ཨ༌བི༌མེ༌ལེག༌གི༌ གྱབ༌གལ༌ལ༌ ནོལ༌ལ༌ སོང༌།
JDG 9:40 ཨ༌བི༌མེ༌ལེག༌གི༌ མག༌མི༌ ཏེད༌ཏེ༌ ཁྱོངས༌པ༌ གའལ༌ དང༌ ཁོའེ༌ མི༌གུན༌ ཤོར༌ ཡང༌ གྱལ༌སའེ༌ གྱས༌སྒོ༌ ནང༌ཀུག༌ག༌ ལེབ༌བི༌སང༌ སྔུན༌ལ༌ ཤེ༌ཀེམ༌པ༌ མང༌པོ༌ མ༌སྐྱོན༌ སོང༌ཏེ༌ ཤི༌།
JDG 9:41 ཨ༌བི༌མེ༌ལེག༌ ལོགས༌ཏེ༌ ཨ༌རུ༌མཧ༌ སོང༌ ཡང༌ ཟེ༌བུལ༌ལི༌ གའལ༌ དང༌ ཁོའེ༌ ཨ༌ཅོ༌ནོ༌ གུན༌ ཤེ༌ཀེམ༌ནེ༌ ཕིངས༌ཏེ༌ ཏངས༌།
JDG 9:42 སྟིང༌མ༌ ཞག༌པོ༌ ཤེ༌ཀེམ༌པ༌གུན༌ བིང༌ཏེ༌ ཞིང༌ངི༌ཀ༌ ལས༌ ཅོའ༌ལ༌ སོང༌, ཡང༌ ཨ༌བི༌མེ༌ལེག༌ག༌ ཏེ༌བོའེ༌ སྐོར༌ལ༌ ཚོར༌།
JDG 9:43 ཁོའེ༌ ཁོ༌རང༌ངི༌ མག༌མི༌གུན༌ སྡེ༌ སུམ༌མི༌ ནང༌ང༌ བགོས༌ ཡང༌ ཞིང༌ངི༌ ནང༌ང༌ ཨིབས༌ཏེ༌ དུགས༌། མི༌གུན༌ གྱལ༌ས༌ནེ༌ ཕི༌ལོག༌ག༌ བིང༌ཏེ༌ ཡོང༌ང༌ཅིག༌ ཁོང༌གུན༌ ཨིབས༌ཏེ༌ ཡོད༌ས༌ནེ༌ བིང༌ཏེ༌ མི༌གུན༌ནི༌ཀ༌ སྤུང༌གོལ༌ ཅོས༌།
JDG 9:44 ཨ༌བི༌མེ༌ལེག༌ ཉམ༌པོ༌ ཡོད༌ཁན༌ནི༌ སྡེ༌བོ༌ གྱུགས༌ཏེ༌ སོང༌ ཡང༌ གྱལ༌སའེ༌ སྒོ༌ སྒགས༌ཏེ༌ སུའང༌ ནང༌ཀུག༌ག༌ ཆ༌ མ༌ཅུགས༌། ཞན༌ སྡེ༌ ཉིས༌ཀོའེ༌ ཞིང༌གུན༌ནི༌ ནང༌ང༌ ཡོད༌ཁན༌ མི༌གུན༌ སདས༌།
JDG 9:45 ཨ༌བི༌མེ༌ལེག༌གི༌ མག༌མི༌ ཉི༌མ༌ གང༌པོ༌ ནོལས༌ ཡང༌ གྱལ༌ས༌ ང༌ཡོག༌ག༌ ཁྱོངས༌ཏེ༌ མི༌གུན༌ སདས༌། ཁང༌པ༌ ཚང༌མ༌ ཤིགས༌ཏེ༌ སྟོན༌ཐོག༌ ཏབ༌སའེ༌ ས༌ཀྱད༌ གང༌པོའ༌ ཚཱ༌ ཡོགས༌།
JDG 9:46 ཤེ༌ཀེམ༌མི༌ སྟན༌པོ༌ ནས༌སའེ༌ ནང༌ང༌ དུག༌ཁན༌ འུ༌སྐྱོང༌གུན༌ནི༌ ཏེ༌བོ༌ ཚོར༌ར༌ཅིག༌ ཁོང༌གུན༌ ཤོར༌ཏེ༌ ཨེལ༌ བེ༌རིཐ༌ཐི༌ ཆོད༌ཁང༌ངི༌ ཐིལ༌ལ༌ ཨིབ༌སའེ༌ ནས༌སའེ༌ ནང༌ང༌ དུགས༌།
JDG 9:47 ཨ༌བི༌མེ༌ལེག༌ག༌ ཁོང༌གུན༌ ཆོད༌ཁང༌ངི༌ ནང༌ང༌ ཡོད༌ཁན༌བོ༌ ཚོར༌ར༌ཅིག༌,
JDG 9:48 ཁོ༌ ཁོ༌རང༌ངི༌ མག༌མི༌གུན༌ ཉམ༌པོ༌ ཟལ༌མོན༌ རིའ༌ སོང༌ ཡང༌ ཁོའེ༌ སྟ༌རི༌ ཁུར༌ཏེ༌ ལྕང༌མའེ༌ ཡལ༌ག༌ ཁ༌ཅིག༌ ཅད༌ཏེ༌ ཁོ༌རང༌ངི༌ སྤུང༌པའེ༌ཀ༌ ཁུརས༌། ཁོའེ༌ ཁོ༌རང༌ངི༌ མི༌གུན༌ལ༌ ཟེརས༌, “གྱོགས༌པ༌, ངའེ༌ ཅོ༌ཁན༌ ཙོགས༌ ཅོས༌།”
JDG 9:49 ཏེ༌ནེ༌ མག༌མི༌ ཚང༌མའེ༌ ཡལ༌ག༌ ཁུར༌ཏེ༌ ཨ༌བི༌མེ༌ལེག༌གི༌ སྟིང༌རང༌ནེ༌ སོང༌། ཁོང༌གུན༌ནི༌ ཡལ༌ག༌གུན༌ ཆོད༌ཁང༌ངི༌ སྒོ༌ དང༌ རྩིག༌པའེ༌ཀ༌ སྤུངས༌ཏེ༌ མེ༌ ཏུགས༌། ཏེ༌ནེ༌ ཤེ༌ཀེམ༌མི༌ སྟན༌པོ༌ ནས༌སའེ༌ ནང༌ང༌ དུག༌ཁན༌ བུ༌ཚ༌ དང༌ བུ༌མོ༌ ཧ༌ལམ༌ 1,000 ཤི༌།
JDG 9:50 ཏེ༌ སྟིང༌ནེ༌ ཨ༌བི༌མེ༌ལེག༌གི༌ ཐེ༌བེཟ༌ གྲོང༌ཁྱེར༌ལ༌ སྤུང༌གོལ༌ ཅོས༌ཏེ༌ ང༌ཡོག༌ག༌ ཁྱོངས༌།
JDG 9:51 ཨིན༌ནའང༌ གྲོང༌ཁྱེར༌རི༌ ནང༌ང༌ ཨིབ༌སའེ༌ པི༌འུ༌ སྟན༌པོ༌ ཡོད༌ཁན༌བོའེ༌ ནང༌ང༌ བུ༌ཚ༌ དང༌ བུ༌མོ༌ ཡང༌ འུ༌སྐྱོང༌ ཐེས༌ཏེ༌ གྲོང༌ཁྱེར༌རི༌ མི༌ ཚང༌མ༌ ཤོར༌། ཁོང༌གུན༌ནི༌ ཏེ༌བོའ༌ ནང༌ཀུག༌ནེ༌ ཀུ༌ལིག༌ ཅུགས༌ཏེ༌ པི༌འུའི༌ ཐོག༌གི༌ཀ༌ སོང༌ཏེ༌ དུགས༌།
JDG 9:52 ཨ༌བི༌མེ༌ལེག༌གི༌ ཏེ༌ པི༌འུའ༌ སྤུང༌གོལ༌ ཅོས༌ཏེ༌ ཏེ༌ནང༌ང༌ ཆ༌སའེ༌ སྒོའ༌ མེའ༌ ཐུག༌ཅེས༌ གྲལ༌གྲིག༌ ཅོས༌།
JDG 9:53 ཐོག༌གི༌ཀ༌ ཡོད༌ཁན༌ནི༌ བུ༌མོ༌ཞིག༌གི༌ ལག༌ཐག༌གི༌ རྡོའ༌ ཡོག༌ག༌ ཕངས༌པ༌ ཨ༌བི༌མེ༌ལེག༌གི༌ གོའ༌ ཕོག༌ཏེ༌ ཁོའེ༌ གོའེ༌ རུས༌པ༌ ཅགས༌།
JDG 9:54 ཨ༌བི༌མེ༌ལེག༌གི༌ ཁོ༌རང༌ངི༌ མག༌ཆ༌ ཁུར༌ཁན༌བོའ༌ ཟེརས༌, “བུ༌མོ༌ཞིག༌གི༌ ངའ༌ སད༌ཏོག༌ མི༌ ཟེར༌ཅེས༌ལ༌ ཁྱོ༌རང༌ངི༌ ར༌འི༌ ཕིང༌ཏེ༌ ང༌ སོད༌།” ཏེ༌ནེ༌ ཁོའེ༌ ཨ༌བི༌མེ༌ལེག༌ག༌ ར༌འི༌ ཙུགས༌ ཡང༌ ཁོ༌ ཤི༌།
JDG 9:55 ཨ༌བི༌མེ༌ལེག༌གི༌ མག༌མི༌གུན༌ནི༌ ཁོ༌ ཤི༌ཁན༌བོ༌ ཐོང༌ང༌ཅིག༌ ཁོང༌གུན༌ ལོགས༌ཏེ༌ ཁོང༌རང༌གུན༌ནི༌ ཁང༌པ༌ སོང༌།
JDG 9:56 ཏེན༌ན༌ ཟུག༌གི༌ དཀོན༌མཆོག༌གི༌ ཨ༌བི༌མེ༌ལེག༌གི༌ ཁོ༌རང༌ངི༌ ཨ༌ཅོ༌ནོ༌ 70 སད༌ཏེ༌ ཁོ༌རང༌ངི༌ ཨ༌བའེ༌ གྱབ༌གལ༌ལ༌ ངན༌པ༌ ཅོ༌ཁན༌བོའ༌ ལན༌ སལས༌།
JDG 9:57 དཀོན༌མཆོག༌གི༌ ཤེ༌ཀེམ༌པ༌གུན༌ནི༌ ངན༌པ༌ ཅོ༌ཁན༌བོའང༌ ཆད༌པ༌ སལས༌། གི༌དི༌འོན༌ནི༌ བུ༌ཚ༌ ཡོ༌ཐམ༌མི༌ ངན༌ ཏབ༌ཁན༌བོ༌ དྲན༌དྲའ༌ གྲུབ༌།
JDG 10:1 ཨ༌བི༌མེ༌ལེག༌ ཤི༌ཏེ༌ སྟིང༌ནེ༌ གྲོ༌གྲོའེ༌ ཚ༌འོ༌ ཕུ༌འཧའེ༌ བུ༌ཚ༌ ཏོ༌ལཱ༌ ཨིས༌ར༌ཨེལ༌པ༌གུན༌ ཐར༌ཅུག༌ཁན༌བོ༌ གྱུར༌། ཁོ༌ ཨིས༌ས༌ཁར༌ མི༌སྡེ༌ནེ༌ ཨིན༌པིན༌ ཡང༌ ཨེཕ༌ར༌ཡིམ༌མི༌ རི༌ཡུལ༌ལི༌ ནང༌ང༌ ཡོད༌ཁན༌ ཤ༌མིར༌རི༌ གྲོང༌ཁྱེར༌རི༌ ནང༌ང༌ དུག༌གད༌པིན༌།
JDG 10:2 ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ལོ༌ 23 ཅོས༌ཏེ༌ སྟིང༌ནེ༌ ཁོ༌ ཤི༌ ཡང༌ ཁོའེ༌ སྤུར༌ ཤ༌མིར༌རི༌ ནང༌ང༌ སུབས༌།
JDG 10:3 ཏོ༌ལཱའེ༌ སྟིང༌ནེ༌ གི༌ལེད༌པ༌ ཡ༌འིར༌རི༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 22 ཅོས༌།
JDG 10:4 ཁོའ༌ བུ༌ཚ༌ སུམ༌ཅུ༌ ཡོད༌པིན༌, ཡང༌ ཁོང༌གུན༌ རང༌རང༌ངི༌ བུང༌བུའི༌ཀ༌ ཞོན༌ཏེ༌ གྲུལ༌ལད༌པིན༌། ཁོང༌གུན༌ནི༌ ཝང༌ངི༌ ཡོག༌ག༌ གི༌ལེད༌ ཡུལ༌ཇོངས༌སི༌ གྲོང༌ཁྱེར༌ 30 ཡོད༌པིན༌ ཀ༌གུན༌ལ༌ དག༌སའང༌ ཡ༌འིར༌རི༌ གྲོང༌ཁྱེར༌ ཟེར༌ར༌ནོག༌།
JDG 10:5 ཡ༌འིར༌ ཤི༌ ཡང༌ ཁོའེ༌ སྤུར༌ ཀ༌མོན༌ གྲོང༌ཁྱེར༌རི༌ ནང༌ང༌ སུབས༌།
JDG 10:6 ཡང༌སྐྱར༌ ཨིས༌ར༌ཨེལ༌པ༌གུན༌ནི༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌། ཁོང༌གུན༌ནི༌ བའལ༌ དང༌ ཨཤ༌ཏོ༌རེཐ༌ སྐུན༌དྲ༌གུན༌ལ༌ ཡང༌ ཨ༌རམ༌པ༌, སི༌དོན༌པ༌, མོ༌འབ༌པ༌, ཨེམ༌མོན༌པ༌ དང༌ ཕི༌ལིས༌ཏི༌པ༌ གུན༌ནི༌ ལྷ༌ལྷ༌མོ༌ གུན༌ལ༌ ཅོལ༌ཏེ༌ ཞབས༌ཏོག༌ ཞུས༌། ཁོང༌གུན༌ནི༌ ཡ༌ཝའ༌ ཅོལ༌ཅེས༌ ཕངས༌།
JDG 10:7 ཨིས༌ར༌ཨེལ༌པ༌གུན༌ནི༌ཀ༌ ཡ༌ཝའ༌ ཐུག༌སྲོ༌ སྐྱོདས༌ ཡང༌ ཁོང༌ངི༌ ཕི༌ལིས༌ཏི༌པ༌ དང༌ ཨེམ༌མོན༌པ༌ གུན༌ལ༌ ཁོང༌གུན༌ནི༌ཀ༌ གྱལ༌ཁའ༌ སལས༌།
JDG 10:8 ཡ༌འིར༌ ཤི༌ཁན༌ནི༌ ཏེན༌ན༌ ལོའེ༌ ནང༌ང༌ གྲ༌འོ༌གུན༌ནི༌ ཨིས༌ར༌ཨེལ༌པ༌གུན༌ནི༌ཀ༌ སྙིང༌རྗེ༌ མེད༌པ༌ ཝང༌སྲུལ༌ཏེ༌ ནགས༌ སྲན༌ཏྲེ༌ སྟནས༌། ཡོར༌དཱན༌ནི༌ ལྩངས༌པོའེ༌ ཤར༌ཆོགས༌ལ༌ ཡོད༌ཁན༌ ཨ༌མོར༌པའེ༌ ས༌ཀྱད༌, གི༌ལེད༌ ཡུལ༌ཇོངས༌སི༌ ནང༌ང༌ ཁོང༌གུན༌ནི༌ ཨིས༌ར༌ཨེལ༌པ༌ ཚང༌མའེ༌ཀ༌ ལོ༌ 18 ཝང༌སྲུལས༌།
JDG 10:9 ཨེམ༌མོན༌པ༌གུན༌ནི༌ ཡོར༌དཱན༌ ལྩངས༌པོ༌ རྒལ༌ཏེ༌ ནུབ༌ ཆོགས༌ལ༌ ཡ༌ཧུ༌དཱ༌པ༌, བེན༌ཡཱ༌མིན༌པ༌ དང༌ ཨེཕ༌ར༌ཡིམ༌པ༌ གུན༌ལ༌ སྤུང༌གོལ༌ ཅོས༌ ཡང༌ ཨིས༌ར༌ཨེལ༌པ༌གུན༌ལ༌ རྡུག༌ངལ༌ ཀྲག༌པོ༌ ཐོང༌།
JDG 10:10 ཏེ༌ནེ༌ ཁོང༌གུན༌ནི༌ ཡ༌ཝའ༌ རོགས༌ ཅོའ༌ ཛད༌ཅེས༌ལ༌ མོས༌ལམ༌ ཞུས༌ཏེ༌ ཟེརས༌, “ང༌ཞ༌གུན༌ནི༌ ཉེ༌རང༌ ཕངས༌ཏེ༌ བའལ༌ལི༌ སྐུན༌དྲ༌གུན༌ལ༌ ཅོལ༌ཏེ༌ ཉེ༌རང༌ངི༌ སྐུན༌དུན༌ལ༌ སྡིག༌པ༌ ཅོས༌ཏེ༌ ཨིན༌ནོག༌།”
JDG 10:11 ཡ༌ཝའེ༌ ལན༌སལས༌, “ཅི༌ ངའེ༌ ཁྱོ༌ཞ༌གུན༌ ཨི༌ཇིབ༌པ༌, ཨ༌མོར༌པ༌, ཨེམ༌མོན༌པ༌, ཕི༌ལིས༌ཏི༌པ༌,
JDG 10:12 སི༌དོན༌པ༌, ཨ༌མ༌ལིཀ༌པ༌ དང༌ མ༌འོན༌པ༌ གུན༌ནི༌ རྡུག༌ངལ༌ ཀྲག༌པོ༌ སྟནས༌ ཟ༌ནེ༌ རོགས༌ ཅོའ༌ལ༌ མོས༌ལམ༌ ཞུའ༌ཅིག༌ ངའེ༌ ཁྱོ༌ཞའ༌ ཁོང༌གུན༌ནི༌ ལག༌ནེ༌ སྐྱོབས༌ཏེ༌ མ༌ ཁྱོངས༌ས༌?”
JDG 10:13 ཏེ༌ནེའང༌ ཁྱོ༌རང༌གུན༌ནི༌ ང༌ ཕངས༌ཏེ༌ ཞན༌ཡང༌ ལྷ༌ལྷ༌མོ༌ གུན༌ལ༌ ཅོལ༌ཏེ༌ ཞབས༌ཏོག༌ ཞུས༌ ཏེ༌བོའེ༌ཕིའ༌ ཏ༌ ངའེ༌ ཁྱོ༌རང༌གུན༌ མི༌ སྐྱོབ༌།
JDG 10:14 སོང༌ ཡང༌ ཁྱོ༌རང༌གུན༌ནི༌ ལྡམ༌ཁན༌ནི༌ ལྷ༌ལྷ༌མོ༌གུན༌ལ༌ རོགས༌ ཅོ༌ཅེས༌ལ༌ བོད༌། ཁྱོ༌ཞའ༌ རྡུག༌ངལ༌ལི༌ ནང༌ནེ༌ ཏེ༌གུན༌ལ༌ སྐྱོབ༌ ཅུག༌ཤིག༌།”
JDG 10:15 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཡ༌ཝའ༌ མོས༌ལམ༌ ཞུས༌, “ང༌ཞའེ༌ སྡིག༌པ༌ ཅོས༌ཏེ༌ ཨིན༌ནོག༌། འོས༌པ༌ ཨིན༌ཁན༌ནི༌ ཆད༌པ༌ ཉེ༌རང༌ངི༌ ང༌ཞའ༌ སལ༌ལ༌ ཛད༌། ཨིན༌ནའང༌ ཇུ༌ཇུ༌ དག༌ས༌ ང༌ཞ༌གུན༌ ཐར༌ཅུག༌ག༌ ཛད༌”
JDG 10:16 ཨིས༌ར༌ཨེལ༌པ༌གུན༌ནི༌ སྐུན༌དྲ༌གུན༌ མེད༌ཁན༌ ཅོས༌ཏེ༌ ཡ༌ཝའ༌ དཀོན༌མཆོག༌ག༌ ཅོལས༌། ཁོང༌གུན༌ལ༌ རྡུག༌ངལ༌ སྲན༌ཏྲེ༌ ཐོང༌ཨིན༌ ཡོད༌ཁན༌བོ༌ ཡ༌ཝ༌ དཀོན༌མཆོག༌ག༌ ཟིགས༌ མ༌ཐུབ༌ པ༌སང༌ ཁོང༌ང༌ ཁོང༌གུན༌ནི༌ཀ༌ སྙིང༌རྗེ༌ སྐྱེས༌།
JDG 10:17 ཨེམ༌མོན༌པའེ༌ མག༌མི༌གུན༌ གི༌ལེད༌དི༌ ནང༌ང༌ ཛོམས༌ཏེ༌ ཡོད༌ཏུས༌ ཨིས༌ར༌ཨེལ༌པའེ༌ མག༌མི༌གུན༌ མིཟ༌པཧའེ༌ ནང༌ང༌ ཀུར༌ ཙུགས༌ཏེ༌ དུགས༌ཏེ༌ ཡོད༌པིན༌།
JDG 10:18 གི༌ལེད༌དི༌ ནང༌ང༌ ཡོད༌ཁན༌ནི༌ ཨིས༌ར༌ཨེལ༌པའེ༌ སྤོན༌བོ༌གུན༌ནི༌ ཅིག༌ དང༌ ཅིག༌ག༌ ཟེརས༌, “ཨེམ༌མོན༌པ༌གུན༌ནི༌ གྱབ༌གལ༌ལ༌ སྤུང༌གོལ༌ ཅོ༌ཅེས༌ལ༌ གོ༌ཁྲིད༌ ཅོ༌ཁན༌བོ༌ ང༌ཞའ༌ ཚང༌མའེ༌ཀ༌ ཝང༌སྲུལ༌པ༌ གྱུར༌ཨིན༌།”
JDG 11:1 ཏ༌ གི༌ལེད༌པ༌ ཡེཕ༌ཐཧ༌, མག༌ ཏང༌ཁན༌ ཀྲག༌པོ༌ ཨིན༌པིན༌། ཁོའེ༌ ཨ༌བ༌ གི༌ལེད༌ ཡང༌ ཨ༌མ༌ ཟུགས༌ཙོང༌མ༌ཞིག༌ ཨིན༌པིན༌།
JDG 11:2 ཨིན༌ནའང༌ གི༌ལེད༌ལ༌ ཁོ༌རང༌ངི༌ ན༌མ༌ གྱུད༌ཏེ༌ ཞན༌ བུ༌ཚ༌གུན༌ ཇོར༌། ཏེ༌ བུ༌ཚ༌གུན༌ ལྡན༌ཏེ༌ སྟིང༌ནེ༌ ཁོང༌གུན༌ནི༌ ཡེཕ༌ཐཧ༌ ཁང༌པ༌ནེ༌ ཕིངས༌ཏེ༌ ཟེརས༌, “ང༌ཞའེ༌ ཁྱོ༌རང༌ང༌ ཨ༌བའེ༌ ནོར༌སྐལ༌ ཅའང༌ མི༌ཏང༌ ཅིའ༌ཟེར༌ན༌ ཁྱོ༌རང༌ ཟུགས༌ཙོང༌མའེ༌ བུ༌ཚ༌, ང༌ཞའེ༌ ཨ༌མའེ༌ ཕྲུ༌གུ༌ མ༌ནོག༌།”
JDG 11:3 ཏེ༌ནེ༌ ཡེཕ༌ཐཧ༌ ཁོ༌རང༌ངི༌ ཨ༌ཅོ༌ནོ༌གུན༌ནེ༌ ཤོར༌ཏེ༌ ཏོབ༌ ནས༌སའེ༌ ནང༌ང༌ དུགས༌, ཏེ༌རུ༌ ཁྲིམས༌ མ༌སྲུང༌ཁན༌ནི༌ མི༌ བན༌ཤིག༌ ཁོའེ༌ གྱབ༌ནེ༌ ཡོངས༌ ཡང༌ ཁོའེ༌ ཕྲོ༌པ༌ གྱུར༌།
JDG 11:4 ཏུས༌ བན༌ཤིག༌གི༌ སྟིང༌ནེ༌ ཨེམ༌མོན༌པ༌གུན༌ནི༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ མག༌ ཏངས༌།
JDG 11:5 གི༌ལེད༌པའེ༌ འུ༌སྐྱོང༌གུན༌ ཏོབ༌བ༌ ཡེཕ༌ཐཧ༌ ཡོད༌ས༌ སོང༌ཏེ༌ ཟེརས༌,
JDG 11:6 “ཡོང༌, ང༌ཞ༌གུན༌ནི༌ མག༌སྤོན༌ གྱུར༌ཏེ༌ ཨེམ༌མོན༌པ༌གུན༌ལ༌ མག༌ ཏང༌ཅེས༌ལ༌ ང༌ཞའ༌ རོགས༌ ཅོས༌།”
JDG 11:7 ཨིན༌ནའང༌ ཡེཕ༌ཐཧའེ༌ ཁོང༌གུན༌ལ༌ ཟེརས༌, “ཁྱོ༌ཞ༌གུན༌ནི༌ ངའ༌ ནཕ༌རད༌ ཅོས༌ཏེ༌ ང༌ ང༌རང༌ངི༌ ཨ༌བའེ༌ ཁང༌པ༌ནེ༌ ཕིངས༌ཏེ༌ མ༌ཏངས༌པིན༌ན༌? ཏ༌ ཀགས༌པོ༌ ཐོང༌ང༌ཅིག༌ ཅི༌ཕིའ༌ ཁྱོ༌རང༌གུན༌ ངའེ༌ཀ༌ ཡོངས༌ཏེ༌ ཨིན༌?”
JDG 11:8 འུ༌སྐྱོང༌གུན༌ནི༌ ལན༌ཏངས༌, “ང༌ཞའ༌ ཁྱོ༌རང༌ངི༌ རོགས༌ གོས༌སད༌། ཀལ༌ཏེས༌ ཁྱོ༌རང༌ངི༌ ང༌ཞའ༌ ཨེམ༌མོན༌པའེ༌ གྱབ༌གལ༌ལ༌ མག༌ ཏང༌ཅེས༌ལ༌ རོགས༌ ཅོ༌ན༌ ང༌ཞའེ༌ གི༌ལེད༌དི༌ ནང༌ང༌ དུག༌ཁན༌ ཚང༌མའེ༌ཀ༌ ཁྱོ༌རང༌ ཝང༌སྲུལ༌པ༌ སྐོ༌ཨིན༌།”
JDG 11:9 ཡེཕ༌ཐཧའེ༌ ལན༌ཏངས༌, “ཀལ༌ཏེས༌ ང༌ ཁྱོ༌ཞ༌གུན༌ལ༌ རོགས༌ ཅོའ༌ ཡོངས༌ཏེ༌ ཡ༌ཝ༌ དཀོན༌མཆོག༌གི༌ ངའ༌ ཨེམ༌མོན༌པ༌གུན༌ནི༌ཀ༌ གྱལ༌ཁ༌ སལ༌ན༌, དེན༌བའ༌ ཁྱོ༌ཞ༌གུན༌ནི༌ ངའ༌ ཁྱོ༌ཞའེ༌ འུ༌སྐྱོང༌ ལྡམ༌ ཨིན༌ན༌?”
JDG 11:10 འུ༌སྐྱོང༌གུན༌ནི༌ ལན༌ཏངས༌, “ཡ༌ཝ༌ སྤང༌པོ༌ ཞུགས༌ཏེ༌ ཨིན༌, ཏན༌ཏན༌ ཁྱོ༌རང༌ངི༌ ཟེར༌ཁན༌བོ༌ ང༌ཞའེ༌ ཅོ༌ཨིན༌།”
JDG 11:11 ཏེ༌ནེ༌ ཡེཕ༌ཐཧ༌ གི༌ལེད༌པ༌ འུ༌སྐྱོང༌གུན༌ ཉམ༌པོ༌ སོང༌, ཡང༌ ཁོང༌གུན༌ནི༌ ཁོ༌ ཁོང༌གུན༌ནི༌ཀ༌ འུ༌སྐྱོང༌ དང༌ མག༌མིའི༌ སྤོན༌བོའ༌ སྐོས༌། མིཟ༌པཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཡེཕ༌ཐཧའེ༌ ཟེར༌ཁན༌གུན༌ ཡང༌སྐྱར༌ ལྡབས༌ཏེ༌ ཟེརས༌།
JDG 11:12 ཏེ༌ནེ༌ ཡེཕ༌ཐཧའེ༌ ཨེམ༌མོན༌པ༌གུན༌ནི༌ གྱལ༌པོའ༌ ལོན༌ ཀལ༌ཏེ༌ ཏྲིས༌, “ང༌ཞའ༌ ནོལ༌ལ༌ ཡོང༌ཅེས༌ ང༌ཞའེ༌ ཁྱོ༌ཞའེ༌ གྱབ༌གལ༌ལ༌ ཅི༌ ཅོས༌?”
JDG 11:13 ཨེམ༌མོན༌ནི༌ གྱལ༌པོའེ༌ ཡེཕ༌ཐཧའེ༌ ལོན༌ ཁྱོང༌ཁན༌གུན༌ལ༌ ཟེརས༌, “ཨི༌ཇིབ༌ནེ༌ ཡོངས༌ཏེ༌ སྟིང༌ནེ༌ ཨིས༌ར༌ཨེལ༌པ༌གུན༌ ཨར༌ནོན༌ ལྩངས༌པོ༌ ནེ༌ ཡབ༌བོག༌ ལྩངས༌པོ༌ ཚོག༌པ༌, ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ངའེ༌ ས༌ཀྱད༌ གང༌པོ༌ ཀོགས༌ཏེ༌ ཁྱེརས༌། ཏ༌ ཞི༌དེ༌ ཉམ༌པོ༌ ཏེ༌ ས༌ཀྱད༌གུན༌ ལོགས༌ཏེ༌ ཏོང༌།”
JDG 11:14 ཡེཕ༌ཐཧའེ༌ ལོན༌ཁྱེར༌ཁན༌གུན༌ ཨེམ༌མོན༌པའེ༌ གྱལ༌པོའེ༌ཀ༌ ལོགས༌ཏེ༌ ལམ༌ཅུགས༌,
JDG 11:15 ཁོང༌གུན༌ནི༌ ཟེརས༌, “ཡེཕ༌ཐཧའེ༌ ཟེར༌དུག༌, ‘ཨིས༌ར༌ཨེལ༌པ༌གུན༌ནི༌ མོ༌འབ༌ ཡ༌ ཨེམ༌མོན༌པའེ༌ ས༌ཀྱད༌ ཀོགས༌ཏེ༌ མ༌ཁྱེར༌ར༌ ཨིན༌ནོག༌།
JDG 11:16 ཨིན༌ནའང༌ ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ བིང༌ཏེ༌ ཐང༌སྟོང༌ གྱུད༌ཏེ༌ ཚོ༌ མར༌པོ༌ རྒལ༌ཏེ༌ ཀ༌དེཤ༌ལ༌ ལེབ༌ ཟ༌ནེ༌,
JDG 11:17 ཁོང༌གུན༌ནི༌ ཨི༌དོམ༌པའེ༌ གྱལ༌པོའ༌ ལོན༌ ཀལ༌ཏེ༌ ཟེརས༌, “ཁྱོ༌ཞའེ༌ ས༌ཀྱད༌ གྱུད༌ཏེ༌ ང༌ཞའ༌ ཆ༌ཅེས༌ལ༌ གོངས༌པ༌ སལ༌།” ཨིན༌ནའང༌ ཁོང༌གུན༌ནི༌ ཆ༌ མ༌ཅུགས༌། ཏེ༌ནེ༌ ཨིས༌ར༌ཨེལ༌པ༌གུན༌ནི༌ མོ༌འབ༌བི༌ གྱལ༌པོའ༌ ཏེན༌ན༌ ཙོགས༌ ཞུ༌ཝ༌ ཕུལས༌ ཨིན༌ནའང༌ ཁོང༌ངིའང༌ ཁོང༌གུན༌ ཆ༌ མ༌ཅུགས༌། ཏེ༌བོའེ༌ཕིའ༌ ཨིས༌ར༌ཨེལ༌པ༌གུན༌ ཀ༌དེཤ༌སི༌ ནང༌ང༌ དུགས༌།’”
JDG 11:18 “སྟིང༌ནེ༌ ཁོང༌གུན༌ ཐང༌སྟོང༌ གྱུད༌ཏེ༌ ཨི༌དོམ༌ དང༌ མོ༌འབ༌ ཡུལ༌གུན༌ནི༌ ཐའ༌མ༌ནེ༌ སོང༌ ཡང༌ མོ༌འབ༌བི༌ ཤར༌ ཆོགས༌སི༌ སན༌ཚམས༌ ཨར༌ནོན༌ ལྩངས༌པོའེ༌ འ༌ངོ༌ ཆོགས༌ལ༌ ཀུར༌ ཙུགས༌ཏེ༌ དུགས༌། ཁོང༌གུན༌ ཨར༌ནོན༌ ལྩངས༌པོ༌ རྒལ༌ཏེ༌ མོ༌འབ༌ ཡུལ༌ཇོངས༌སི༌ ནང༌ང༌ མན༌ནེ༌ མ༌སོང༌།”
JDG 11:19 “ཏེ༌ནེ༌ ཨིས༌ར༌ཨེལ༌པ༌གུན༌ནི༌ ཧེཤ༌བོན༌ གྱལ༌སའེ༌ ནང༌ང༌ དུག༌ཁན༌ ཨ༌མོར༌པའེ༌ གྱལ༌པོ༌ སི༌ཧོན༌ལ༌ ཁོང༌གུན༌ ཁོང༌ངི༌ ས༌ཀྱད༌ གྱུད༌ཏེ༌ ཆ༌ཅུག༌ཅེས༌ལ༌ གོངས༌པ༌ སལ༌ ཞུས༌།
JDG 11:20 ཨིན༌ནའང༌ གྱལ༌པོ༌ སི༌ཧོན༌ལ༌ ཨིས༌ར༌ཨེལ༌པ༌གུན༌ ཁོའེ༌ ས༌ཀྱད༌ གྱུད༌ཏེ༌ ཆ༌ཅེས༌པོའ༌ ཨིད༌ཤེས༌ མ༌ཅོས༌པ༌ ཁོའེ༌ ཡ༌ཧཟ༌ཟི༌ ནང༌ང༌ ཁོ༌རང༌ངི༌ མག༌མི༌གུན༌ བོད༌ཏེ༌ ཁོང༌གུན༌ནི༌ཀ༌ སྤུང༌གོལ༌ ཅོས༌།”
JDG 11:21 “ཨིན༌ནའང༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ གྱལ༌པོ༌ སི༌ཧོན༌ དང༌ ཁོང༌ངི༌ མག༌མི༌ ཚང༌མ༌ ཨིས༌ར༌ཨེལ༌པ༌གུན༌ནི༌ ལག༌ག༌ སལས༌ ཡང༌ ཁོང༌གུན༌ནི༌ ཏེ༌ ཡུལ༌ཇོངས༌སི༌ ནང༌ང༌ དུག༌ཁན༌ ཨ༌མོར༌པ༌གུན༌ནི༌ ས༌ཀྱད༌ གང༌པོ༌,
JDG 11:22 ལྷོ༌ ཆོགས༌སི༌ ཨར༌ནོན༌ ལྩངས༌པོ༌ནེ༌ བྱང༌ ཆོགས༌སི༌ ཡབ༌བོག༌ ལྩངས༌པོ༌ ཚོག༌པ༌ ཡང༌ ཤར༌ ཆོགས༌སི༌ ཐང༌སྟོང༌ནེ༌ ནུབ༌ ཆོགས༌སི༌ ཡོར༌དཱན༌ ལྩངས༌པོ༌ ཚོག༌པ༌ ང༌ཡོག༌ག༌ ཁྱོངས༌།”
JDG 11:23 “ཏ༌ ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ཨ༌མོར༌པ༌གུན༌ནི༌ ས༌ཀྱད༌ ཨིས༌ར༌ཨེལ༌པ༌གུན༌ལ༌ སལ༌ལ༌ ཛད༌ པ༌སང༌ ཏེ༌ནེ༌ ཅིའ༌ ང༌ཞའེ༌ འི༌གུན༌ ཁྱོ༌ཞའ༌ ལོགས༌ཏེ༌ ཏང༌ཨིན༌?
JDG 11:24 ཁྱོ༌ཞའེ༌ ལྷ༌ ཀེ༌མོཤ༌ཤི༌ ཏང༌ཁན༌བོ༌ ཁྱོ༌ཞ༌གུན༌ནི༌ མི༌ལེན༌ན༌? ཡ༌ཝ༌ དཀོན༌མཆོག༌གི༌ ང༌ཞའ༌ སལ༌ཁན༌བོ༌ ང༌ཞའེ༌ བོར༌ཨིན༌།
JDG 11:25 ཅི༌ ཁྱོ༌ཞའ༌ མོ༌འབ༌བི༌ གྱལ༌པོ༌ ཟིཔ༌པོར༌རི༌ བུ༌ཚ༌ བ༌ལག༌གི༌ སང༌ ཇིགས༌ས༌ ཨིན༌ན༌? ཅི༌ ཁོའེ༌ ས༌ཀྱད༌དི༌ ཛིང༌མོའེ༌ ཕིའ༌ ཨིས༌ར༌ཨེལ༌པའེ༌ གྱབ༌གལ༌ལ༌ ཁྲིམས༌ ཙུགས༌ས༌? ཅི༌ ཁོང༌གུན༌ནི༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ མག༌ ཏངས༌ས༌?
JDG 11:26 ཨིས༌ར༌ཨེལ༌པ༌གུན༌ ལོ༌ 300 ནེ༌ ཕར༌ལ༌ ཧེཤ༌བོན༌, ཨ༌རོ༌འེར༌ དང༌ ཏེ༌བོའེ༌ ཉེ༌ཁོར༌རི༌ ནས༌ས༌ ཡང༌ ཨར༌ནོན༌ ལྩངས༌པོའེ༌ གྲོང༌ཁྱེར༌ ཚང༌མའེ༌ ནང༌ང༌ དུགས༌ཏེ༌ ཨིན༌ནོག༌། ཏེ༌ཏུས༌ གང༌པོ༌ ཁྱོ༌ཞ༌གུན༌ནི༌ འི༌ ས༌ཀྱད༌གུན༌ ལོགས༌ཏེ༌ ཅིའ༌ མ༌ ཁྱེར༌པིན༌?
JDG 11:27 ངའེ༌ ཁྱོ༌ཞའ༌ ནོར༌ཁྲུལ༌ མ༌ཅོས༌པིན༌ ཨིན༌ནའང༌ ཁྱོ༌ཞ༌གུན༌ ང༌ཞའ༌ སྤུང༌གོལ༌ ཅོའ༌ལ༌ ཡོངས༌ཏེ༌ ནོར༌ཁྲུལ༌ ཅོས༌ཏེ༌ ཨིན༌ནོག༌། དི༌རིང༌ ཨིས༌ར༌ཨེལ༌པ༌ ཡ༌ ཨེམ༌མོན༌པ༌ ཉིས༌ཀོའེ༌ ནང༌ནེ༌ སུ༌ ཀྲང༌པོ༌ ཨིན༌ ནམ༌ཁའ༌ ཞུགས༌ཁན༌ནི༌ ཁྲིམ༌སྤོན༌ ཡ༌ཝའེ༌ ཐག༌ཅད༌ ཛད༌ཤིག༌།”
JDG 11:28 ཨིན༌ནའང༌ ཨེམ༌མོན༌པའེ༌ གྱལ༌པོའེ༌ ཡེཕ༌ཐཧའེ༌ ལོན༌ ཀལ༌ཁན༌བོའ༌ ནང༌སྟག༌ མ༌ཏངས༌།
JDG 11:29 ཏེ༌ནེ༌ ཡེཕ༌ཐཧའེ༌ ནང༌ང༌ ཡ༌ཝའེ༌ ཐུག༌ཉིད༌ གངས༌ ཡང༌ ཁོ༌ གི༌ལེད༌ དང༌ མ༌ནས༌སའེ༌ ཡུལ༌ཇོངས༌ གྱུད༌ཏེ༌ སོང༌ཏེ༌ གི༌ལེད༌དི༌ མིཟ༌པཧ༌ གྱལ༌སའེ༌ ནང༌ང༌ མག༌མི༌གུན༌ ཛོམ༌ཅུགས༌ཏེ༌ ཨེམ༌མོན༌པ༌གུན༌ལ༌ ནོལ༌ལ༌ སོང༌།
JDG 11:30 ཡང༌ ཡེཕ༌ཐཧའེ༌ ནའ༌ ཁུར༌ཏེ༌ ཡ༌ཝའ༌ ཟེརས༌, “ཀལ༌ཏེས༌ ཉེ༌རང༌ངི༌ ངའ༌ ཨེམ༌མོན༌པ༌གུན༌ནི༌ཀ༌ གྱལ༌ཁ༌ སལ༌ན༌
JDG 11:31 ང༌ ལོགས༌ཏེ༌ ཆ༌ ཟ༌ནེ༌ ངའེ༌ ཁང༌པའེ༌ ནང༌ནེ༌ གོ༌མ༌རང༌ ངའ༌ ཐུག༌ག༌ ཡོང༌ཁན༌བོ༌ ངའེ༌ མེའ༌ སྲགས༌ཏེ༌ ཉེ༌རང༌ང༌ ཆོད༌པ༌ ཕུལ༌ཨིན༌།”
JDG 11:32 ཏེ༌ནེ༌ ཡེཕ༌ཐཧ༌ མག༌མི༌གུན༌ ཉམ༌པོ༌ ཨེམ༌མོན༌པ༌གུན༌ལ༌ ནོལ༌ལ༌ སོང༌ ཡང༌ ཡ༌ཝའེ༌ ཁོའ༌ ཁོང༌གུན༌ནི༌ཀ༌ གྱལ༌ཁ༌ སལས༌།
JDG 11:33 ཁོའེ༌ ཨ༌རོ༌འེར༌ནེ༌ ཏངས༌ཏེ༌ མིན༌ནིཐ༌, ཐག༌རིང༌ ཨ༌བེལ༌ ཀེ༌ར༌མིམ༌ ཚོག༌པ༌ ཨེམ༌མོན༌པའེ༌ གྲོང༌ཁྱེར༌ ཉི༌ཤུ༌ ཁྲེས༌ཏོར༌ ཅོས༌། ཏེན༌ན༌ ཟུག༌གི༌ ཨིས༌ར༌ཨེལ༌པ༌གུན༌ནི༌ ཨེམ༌མོན༌པ༌གུན༌ལ༌ ཕམ༌ཀལས༌།
JDG 11:34 མིཟ༌པཧའ༌ ཡེཕ༌ཐཧ༌ ཁོ༌རང༌ངི༌ ཁང༌པ༌ ལོགས༌ཏེ༌ ལེབ༌བ༌ཅིག༌ ཁོའེ༌ བུ༌མོ༌ ཀྲམ༌བུ༌རིན༌ རྡུང༌ཨིན༌ རྩེས༌ ཏང༌ཨིན༌ ཁོའ༌ ཐུག༌ག༌ལ༌ བིངས༌ཏེ༌ ཡོངས༌། ཁོ༌ ཁོའེ༌ ཕྲུ༌གུ༌ ཅིག༌ཅིག༌པོ༌ ཨིན༌པིན༌། ཏེན༌ན༌ བུ༌མོ༌བོ༌ མན༌ནེ༌ ཁོའ༌ ཞན༌ ཕྲུ༌གུ༌ མེད༌པིན༌།
JDG 11:35 བུ༌མོ༌ ཐོང༌ང༌ཅིག༌ ཁོའེ༌ ཁོ༌རང༌ངི༌ ཀོས༌ ཤགས༌ ཡང༌ སེམ༌རྡུག༌ ཉམ༌པོ༌ ཟེརས༌, “ཨོ༌, ངའེ༌ བུ༌མོ༌། ཁྱོ༌རང༌ངི༌ ང༌ སེམ༌རྡུག༌ དང༌ རྡུག༌པོ༌ སྲན༌ཏྲེ༌ ཁྱོངས༌ ཅིའ༌ཟེར༌ན༌ ངའེ༌ ཡ༌ཝའ༌ ནའ༌ ཁུར༌པིན༌ ཡང༌ ཏེ༌བོ༌ ཅག༌ ཉན༌ཅེས༌ མེད༌།”
JDG 11:36 བུ༌མོའེ༌ ཟེརས༌, “ཨ༌བ༌ལེ༌, ཉེ༌རང༌ངི༌ ཡ༌ཝ༌ ཉམ༌པོ༌ ནའ༌ ཁུར༌ར༌ ཛད༌ཏེ༌ ཨིན༌ནོག༌། ཡ༌ཝའེ༌ ཉེ༌རང༌ང༌ ཨེམ༌མོན༌པ༌གུན༌ནི༌ཀ༌ གྱལ༌ཁ༌ སལ༌ལ༌ ཛད༌པ༌ ཏ༌ ཉེ༌རང༌ངི༌ ཁ༌ཆད༌ ཛད༌ཁན༌བོ༌ ང༌ ཉམ༌པོ༌ ཅོས༌།
JDG 11:37 ཨིན༌ནའང༌ ངའེ༌ ཞུ༌ཝ༌ ཅིག༌ཅིག༌པོ༌ ང༌ སལ༌ལེ༌། ང༌ རི༌ ཡུལ༌གུན༌ལ༌ ཁོར༌ཏེ༌ ང༌རང༌ངི༌ ཛ༌མོ༌གུན༌ ཉམ༌པོ༌ རྡུག༌པོ༌ ཅོ༌ཅེས༌ལ༌ ཟླ༌ཝ༌ ཉིས༌ སལ༌ལ༌ ཛད༌ ཅིའ༌ཟེར༌ན༌ ངའ༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌སི༌ སྐབས༌ མེད༌ཏེ༌ ཨིན༌ནོག༌།”
JDG 11:38 ཡེཕ༌ཐཧའེ༌ ཟེརས༌, “ཁྱོ༌རང༌ ཆ༌ནའང༌ གྲིག༌།” ཡང༌ ཁོའེ༌ བུ༌མོ༌ ཟླ༌ཝ༌ ཉིས༌སི༌ ཕིའ༌ ཆ༌ཅུགས༌། བུ༌མོ༌ དང༌ ཁོའེ༌ ཛ༌མོ༌གུན༌ རི༌ཡུལ༌གུན༌ལ༌ སོང༌ ཡང༌ རྡུག༌པོ༌ ཅོས༌ ཅིའ༌ཟེར༌ན༌ ཁོའ༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌སི༌ སྐབས༌ མེད༌ཏེ༌ ཨིན༌ནོག༌།
JDG 11:39 ཟླ༌ཝ༌ ཉིས༌སི༌ སྟིང༌ནེ༌ བུ༌མོ༌ ལོགས༌ཏེ༌ ཁང༌པ༌ ཡོང༌ང༌ཅིག༌ ཨ༌བའེ༌ ནའ༌ ཁུར༌ཁན༌ ནང༌ཞིན༌ ཁོ༌ ཉམ༌པོ༌ ཅོས༌། ཏེ༌ བུ༌མོའ༌ ན༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌སི༌ སྐབས༌ མ༌ཐོབ༌བ༌ ཤི༌། ཏེ༌བོའེ༌ ཞས༌ཏེ༌ ཨིས༌ར༌ཨེལ༌ལི༌ ནང༌ང༌ ལུག༌སྲོལ༌ཞིག༌ གོ༌ཟུག༌།
JDG 11:40 གི༌ལེད༌པ༌ ཡེཕ༌ཐཧའེ༌ བུ༌མོའེ༌ དྲན༌སོའེ༌ ནང༌ང༌ ཨིས༌ར༌ཨེལ༌པ༌ བུ༌མོ༌ ན༌ཆུང༌གུན༌ ལོ༌ཞུང༌ ཞག༌པོ༌ ཞིའི༌ ཕིའ༌ རི༌ཡུལ༌ལ༌ དུག༌ག༌ ཆའད༌པིན༌།
JDG 12:1 ཏེ༌ནེ༌ ཨེཕ༌ར༌ཡིམ༌པའེ༌ བུ༌ཚ༌གུན༌ ཛོམས༌ཏེ༌ ཡོར༌དཱན༌ ལྩངས༌པོ༌ རྒལ༌ཏེ༌ ཟ༌ཕོན༌ ཆོགས༌ལ༌ སོང༌ ཡང༌ ཡེཕ༌ཐཧའ༌ ཟེརས༌, “ཨེམ༌མོན༌པ༌གུན༌ལ༌ ནོལ༌ལ༌ ཆ༌ ཟ༌ནེ༌ ཁྱོ༌རང༌ངི༌ རོགས༌ ཅོ༌ཅེས༌ལ༌ ང༌ཞའ༌ ཅིའ༌ མ༌བོད༌པིན༌? ང༌ཞའེ༌ ཁྱོ༌ཞའ༌ རགས༌ཏེ༌ ཁྱོ༌ཞའེ༌ ཁང༌པ༌གུན༌ མེའ༌ ཏུག༌ཨིན༌།”
JDG 12:2 ཡེཕ༌ཐཧའེ༌ ལན༌ཏངས༌, “ཨེམ༌མོན༌པ༌གུན༌ནི༌ ང༌ཞའ༌ སྲན༌ཏྲེ༌ གོབ༌ནོན༌ ཅོ༌ ཟ༌ནེ༌ ངའེ༌ ཁྱོ༌ཞའ༌ རོགས༌ ཅོ༌ཅེས༌ལ༌ བོད༌པིན༌ ཨིན༌ནའང༌ ཁྱོ༌ཞའ༌ ང༌ཞའ༌ སྐྱོབ༌བ༌ མ༌ཡོངས༌།
JDG 12:3 ཁྱོ༌ཞའ༌ རོགས༌ ཅོའ༌ལ༌ མི༌ཡོང༌ཅེས༌པོ༌ ཧ༌གོའ༌ཅིག༌, ངའེ༌ ང༌རང༌ངི༌ སྲོག༌ ཇིགས༌པའེ༌ ནང༌ང༌ ཏངས༌ཏེ༌ ཨེམ༌མོན༌པ༌གུན༌ལ༌ ནོལ༌ལ༌ སོང༌པིན༌ ཡང༌ ཡ༌ཝའེ༌ ངའ༌ ཁོང༌གུན༌ནི༌ཀ༌ གྱལ༌ཁ༌ སལ༌ལ༌ ཛདས༌། ཏ༌ དི༌རིང༌ ཁྱོ༌ཞའ༌ ང༌ཞ༌གུན༌ལ༌ ནོལ༌ལ༌ ཅི༌ཕིའ༌ ཡོངས༌ཏེ༌ ཨིན༌?”
JDG 12:4 “ཁྱོ༌ཞའ༌ ཨེཕ༌ར༌ཡིམ༌ དང༌ མ༌ནས༌ས༌ སྡེ༌གུན༌ནེ༌ ཤོར༌ཏེ༌ ཆའ༌ཁན༌གུན༌ ཨིན༌ནོག༌” ཟེར༌ཏེ༌ ཨེཕ༌ར༌ཡིམ༌པ༌གུན༌ནི༌ གི༌ལེད༌པ༌གུན༌ལ༌ མ༌བེབས༌ ཅོས༌པ༌ ཡེཕ༌ཐཧའེ༌ གི༌ལེད༌པ༌ ཚང༌མ༌ ཛོམ༌ཅུགས༌ཏེ༌ ཁོང༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཕམ༌ཀལས༌།
JDG 12:5 ཡོར༌དཱན༌ ལྩངས༌པོ༌ རྒལ༌ ཉན༌སའེ༌ ནས༌ས༌ ཏེལ༌མོ༌ ཚང༌མ༌ གི༌ལེད༌པ༌གུན༌ནི༌ ང༌ཡོག༌ག༌ ཁྱོངས༌། ཨེཕ༌ར༌ཡིམ༌པ༌ སོན༌ཏེའ༌ ལུས༌ཁན༌གུན༌ ཆུ༌ རྒལ༌ཏེ༌ ཆ༌ཅེས༌ལ༌ ཡོང༌ང༌ཅིག༌ གི༌ལེད༌པ༌གུན༌ནི༌ ཁོང༌གུན༌ལ༌ “ཁྱོ༌ཞའ༌ ཨེཕ༌ར༌ཡིམ༌པ༌ ཨིན༌ན༌” ཟེར༌ཏེ༌ ཏྲིའད༌པིན༌? ཀལ༌ཏེས༌ ཁོང༌གུན༌ནི༌ མན༌ ཟེར༌ན༌,
JDG 12:6 གི༌ལེད༌པ༌གུན༌ནི༌ ཁོང༌གུན༌ལ༌ “ཤིབ༌བོ༌ལེཐ༌” ཟེར༌ ཅུག༌གད༌པིན༌ ཀལ༌ཏེས༌ ཁོང༌གུན༌ནི༌ “སིབ༌བོ༌ལེཐ༌” ཟེར༌ན༌ ཁོང༌གུན༌ནི༌ ཁོང༌གུན༌ ཏེན༌ནེ༌ཀ༌ སད༌དད༌པིན༌ ཅིའ༌ཟེར༌ན༌ ཨེཕ༌ར༌ཡིམ༌པ༌གུན༌ལ༌ ཏེ༌ ཚིགས༌པོ༌ སལ༌པོ༌ ཟེར༌ ཉན༌ན༌ མེད༌པིན༌། ཏེན༌ན༌ ཞག༌ག༌ ཁོང༌གུན༌ནི༌ ཨེཕ༌ར༌ཡིམ༌པ༌ 42,000 སདས༌།
JDG 12:7 ཡེཕ༌ཐཧའེ༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ལོ༌ 6 ཅོས༌། ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ གི༌ལེད༌དི༌ ནང༌ང༌ ཡོད༌ཁན༌ ཁོའེ༌ གྲོང༌ཁྱེར༌རི༌ ནང༌ང༌ སུབས༌།
JDG 12:8 ཡེཕ༌ཐཧའེ༌ སྟིང༌ནེ༌ བེད༌ལེ༌ཧེམ༌པ༌ ཨིབ༌ཟན༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌།
JDG 12:9 ཁོའ༌ བུ༌ཚ༌ 30 དང༌ བུ༌མོ༌ 30 ཡོད༌པིན༌། ཁོའེ༌ ཁོ༌རང༌ངི༌ སྡེ༌ནེ༌ མན༌ཁན༌གུན༌ལ༌ ཁོ༌རང༌ངི༌ བུ༌མོ༌གུན༌ ན༌མ༌ ཏངས༌ ཡང༌ ཁོ༌རང༌ངི༌ སྡེ༌ནེ༌ མན༌ཁན༌ བུ༌མོ༌གུན༌ ཁོ༌རང༌ངི༌ བུ༌ཚ༌གུན༌ལ༌ ན༌མའ༌ ཁྱོངས༌། ཨིབ༌ཟན༌ནི༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 7 ཅོས༌།
JDG 12:10 ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ བེད༌ལེ༌ཧེམ༌མི༌ ནང༌ང༌ སུབས༌།
JDG 12:11 ཨིབ༌ཟན༌ནི༌ སྟིང༌ནེ༌ ཟེ༌བུ༌ལོན༌ནི༌ སྡེ༌ནེ༌ ཨིན༌ཁན༌ ཨེ༌ལོན༌ནི༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 10 ཅོས༌།
JDG 12:12 ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ ཟེ༌བུ༌ལོན༌པའེ༌ ནས༌ས༌ ཨའི༌ཡ༌ལོན༌ནི༌ ནང༌ང༌ སུབས༌།
JDG 12:13 ཨེ༌ལོན༌ ཤི༌ཏེ༌ སྟིང༌ནེ༌ ཕི༌ར༌ཐོན༌པ༌ ཧིལ༌ལེལ༌ལི༌ བུ༌ཚ༌ ཨབ༌དོན༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ གྱུར༌།
JDG 12:14 ཁོའ༌ བུ༌ཚ༌ 40 དང༌ ཚ༌འོ༌ 30 ཡོད༌པིན༌, ཁོང༌ རེ༌རེའ༌ ཞོན༌ཏེ༌ གྲུལ༌ཅེས༌ལ༌ བུང༌བུ༌ རེ༌རེ༌ ཡོད༌པིན༌། ཁོའེ༌ ཨིས༌ར༌ཨེལ༌པ༌གུན༌ལ༌ གོ༌ཁྲིད༌ ལོ༌ 8 ཅོས༌།
JDG 12:15 ཁོ༌ ཤི༌ཏེ༌ སྟིང༌ནེ༌ ཁོའེ༌ སྤུར༌ ཨེཕ༌ར༌ཡིམ༌པའེ༌ ནས༌ས༌ ཕི༌ར༌ཐོན༌ནི༌ ནང༌ང༌ སུབས༌ ཀ༌བོ༌ ཨ༌མ༌ལིཀ༌པ༌གུན༌ནི༌ རི༌ཡུལ༌ ཨིན༌པིན༌།
JDG 13:1 ཡང༌སྐྱར༌ ཨིས༌ར༌ཨེལ༌པ༌གུན༌ནི༌ དཀོན༌མཆོག༌ ཡ༌ཝའེ༌ སྐུན༌དུན༌ལ༌ ངན༌པ༌ ཅོས༌། ཏེ༌བོའེ༌ཕིའ༌ ཡ༌ཝའེ༌ ཁོང༌གུན༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ད༌ ཛདས༌, ཁོང༌གུན༌ནི༌ ཨིས༌ར༌ཨེལ༌པ༌གུན༌ནི༌ཀ༌ ལོ༌ 40 ཝང༌ སྲུལ༌ཏེ༌ ཁོང༌གུན༌ལ༌ ནགས༌ སྟནས༌།
JDG 13:2 ཏེ༌ཏུས༌ལ༌ ཟོ༌རཧ༌ གྲོང༌ཁྱེར༌རི༌ དཱན༌ནི༌ མི༌སྡེ༌ནེ༌ མ༌ནོ༌འཧ༌ ཟེར༌ཁན༌ མི༌ཞིག༌ ཡོད༌པིན༌། ཁོའེ༌ ན༌མའ༌ ཕྲུ༌གུ༌ ཇོར༌ མ༌ཐུབ༌པ༌ ཁོང༌གུན༌ལ༌ ཕྲུ༌གུ༌ མེད༌པིན༌།
JDG 13:3 མ༌ནོ༌འཧའེ༌ ན༌མའ༌ ཡ༌ཝའེ༌ ཕོ༌ཉ༌ ཇལ༌ཏེ༌ མོལས༌, “ཁོ༌རང༌ང༌ ཕྲུ༌གུ༌ ཇོར༌ མ༌ཐུབ༌བ༌ ཨིན༌ནོག༌ ཨིན༌ནའང༌ ཏ༌ ཁྱོ༌རང༌ སྐྱེ༌ཅེས༌མ༌ གྱུར༌ཏེ༌ ཁོ༌རང༌ང༌ བུ༌ཚ༌ཞིག༌ ཇོར༌ཨིན༌།
JDG 13:4 ཏ༌ ནང༌སྟག༌ ཅོས༌ཏེ༌ ཁྱོ༌རང༌ རྒུན༌ དང༌ ཞན༌ ར༌རོས༌ཤེས༌ ཆང༌གུན༌ ཐུང༌ མ༌གོས༌ ཡང༌ རྩང༌མ༌ མན༌ཁན༌ནི༌ ཟན༌ ཟའ༌ མ༌གོས༌།
JDG 13:5 ཁྱོ༌རང༌ སྐྱེ༌ཅེས༌མ༌ གྱུར༌ཏེ༌ ཁྱོ༌རང༌ང༌ བུ༌ཚ༌ཞིག༌ ཇོར༌ཨིན༌། ཁོའེ༌ སྲ༌ མ༌ནེ༌ མ༌ བྲག༌ ཅིའ༌ཟེར༌ན༌ ཁོ༌ ན༌ཟི༌རཱའིགྲ༌ ཡང༌ན༌ ཁོ༌ སྐྱེས༌པ༌ནེ༌ ཕར༌ལ༌ དཀོན༌མཆོག༌གི༌ ཕིའ༌ ལྡམས༌ཁན༌ ཡང༌ ཁོའེ༌ ཨིས༌ར༌ཨེལ༌པ༌གུན༌ ཕི༌ལིས༌ཏི༌པ༌གུན༌ནི༌ ཀ༌ནེ༌ ཐར༌ཅུག༌ཨིན༌།”
JDG 13:6 ཏེ༌ནེ༌ བུ༌མོ༌ ཁོ༌རང༌ངི༌ མག༌པ༌ ཡོད༌ས༌ སོང༌ཏེ༌ ཟེརས༌, “ང༌ ཡོད༌ས༌ དཀོན༌མཆོག༌གི༌ མི༌ཞིག༌ སྐྱོདས༌། ཁོང༌ དཀོན༌མཆོག༌གི༌ ཕོ༌ཉ༌ ཙོགས༌, ཁྱུད༌ཅན༌ ཇིགས༌པོ༌ ཐོང༌དུག༌པིན༌། ངའེ༌ ཁོང༌ང༌ ཀ༌ནེ༌ སྐྱོད༌པིན༌ ཟེར༌ཏེ༌ མ༌ ཏྲིས༌པིན༌ ཡང༌ ཁོང༌ངི༌ ཁོ༌རང༌ངི༌ ཚན༌ ཤད༌ད༌ མ༌ ཛདས༌།
JDG 13:7 ཨིན༌ནའང༌ ཁོང༌ངི༌ ང༌ མོལ༌ལ༌རག༌, ‘ཁྱོ༌རང༌ སྐྱེ༌ཅེས༌མ༌ གྱུར༌ཏེ༌ ཁྱོ༌རང༌ང༌ བུ༌ཚ༌ཞིག༌ ཇོར༌ཨིན༌། ཁྱོ༌རང༌ རྒུན༌ དང༌ ཞན༌ ར༌རོས༌ཤེས༌ ཆང༌གུན༌ ཐུང༌ མ༌གོས༌ ཡང༌ རྩང༌མ༌ མན༌ཁན༌ནི༌ ཟན༌ ཟའ༌ མ༌གོས༌ ཅིའ༌ཟེར༌ན༌ ཁོ༌ ན༌ཟི༌རཱའིགྲ༌ ཡང༌ན༌ སྐྱེས༌པ༌ནེ༌ ཤི༌ཤི༌ ཚག༌པ༌ དཀོན༌མཆོག༌གི༌ ཕིའ༌ ལྡམས༌ཁན༌ ཨིན༌ནོག༌།’”
JDG 13:8 ཏེ༌ནེ༌ མ༌ནོ༌འཧའེ༌ ཡ༌ཝའ༌ མོས༌ལམ༌ ཞུས༌, “ཡ༌ཝ༌ལེ༌ ཇུ༌ཇུ༌ ང༌ཞའ༌ ཇོར༌ཅེས༌ཅན༌ནི༌ བུ༌ཚ༌ ལྡན༌ཅུག༌ཅེས༌སི༌ སྐོར༌ལ༌ ལབ༌ཞ༌ སལ༌ཅེས༌ལ༌ ཉེ༌རང༌ངི༌ ཀལ༌ལ༌ ཛད༌ཁན༌ནི༌ དཀོན༌མཆོག༌གི༌ མི༌བོ༌ ཡང༌སྐྱར༌ ལམ༌ཅུག༌ག༌ ཛད༌ལེ༌།”
JDG 13:9 དཀོན༌མཆོག༌གི༌ མ༌ནོ༌འཧའེ༌ མོས༌ལམ༌མ༌ ལན༌སལས༌ ཡང༌ ཁོའེ༌ ན༌མ༌ ཞིང༌ངི༌ཀ༌ ཡོད༌ ཟ༌ནེ༌ དཀོན༌མཆོག༌གི༌ ཕོ༌ཉ༌ ཡང༌སྐྱར༌ ཇལ༌ ཨིན༌ནའང༌ ཁོའེ༌ མག༌པ༌ མ༌ནོ༌འཧ༌ ཁོ༌ ཉམ༌པོ༌ མེད༌པིན༌།
JDG 13:10 ཁོ༌ གྱོགས༌པ༌ སོང༌ཏེ༌ ཁོ༌རང༌ངི༌ མག༌པ༌ ཟེརས༌, “ཞག༌ ཁ༌ཅིག༌གི༌ སྔུན༌ལ༌ ངའ༌ ཐོང༌ཁན༌ནི༌ མི༌བོ༌ ཡང༌སྐྱར༌ སྐྱོད༌ཏེ༌ དུག༌།”
JDG 13:11 མ༌ནོ༌འཧ༌ ཁོ༌རང༌ངི༌ ན༌མ༌ ཉམ༌པོ༌ བང༌ ཏངས༌ཏེ༌ སོང༌ ཡང༌ ཏྲིས༌, “ངའེ༌ ན༌མ༌ ཞལ༌ཏ༌ སལ༌ཁན༌ནི༌ མི༌བོ༌ ཉེ༌རང༌ ཨིན༌ན༌?” ཁོང༌ངི༌ ལན༌སལས༌, “ང༌ ཨིན༌།”
JDG 13:12 ཏེ༌ནེ༌ མ༌ནོ༌འཧའེ༌ ཁོང༌ང༌ ཏྲིས༌, “ཉེ༌རང༌ངི༌ མོལ༌ཁན༌བོ༌ དྲན༌དྲའ༌ གྲུབ༌བ༌ཅིག༌, མི༌ཚེའེ༌ ཕུད༌ཅེས༌ དང༌ ལས༌ ཅོ༌ཅེས༌སི༌ ནང༌ང༌ ཁོའེ༌ ཀ༌ཟུག༌ ཁྲིམས༌ ཁའ༌ ཉན༌གོས༌?”
JDG 13:13 ཡ༌ཝའེ༌ ཕོ༌ཉའེ༌ ལན༌སལས༌, “ངའེ༌ ཁྱོ༌རང༌ངི༌ ན༌མའ༌ ལབ༌ཞ༌ ཏང༌ཁན༌གུན༌ ཅོ༌ ཅུག༌ཅེས༌ ཏན༌ཏན༌ ཅོས༌།
JDG 13:14 ཁོ༌ རྒྱུན༌ ཡ༌ བ༌ཤོ༌ ཟ༌མ༌གོས༌, རྒུན༌ དང༌ ཞན༌ ར༌རོས༌ཤེས༌ ཆང༌གུན༌ ཐུང༌ མ༌གོས༌ ཡང༌ རྩང༌མ༌ མན༌ཁན༌ནི༌ ཟན༌ ཟའ༌ མ༌གོས༌། ངའེ༌ ལབ༌ཞ༌ ཏང༌ཁན༌ ཚང༌མ༌ ཁོའེ༌ ཅོ༌གོས༌།”
JDG 13:15 ཏེ༌ནེ༌ མ༌ནོ༌འཧའེ༌ ཡ༌ཝའེ༌ ཕོ༌ཉའ༌ ཟེརས༌, “ཇུ༌ཇུ༌ ང༌ཞའེ༌ ར༌མ༌ ཆུ༌ངུན༌ནི༌ ཤ༌ སྐོལ༌ཏེ༌ ཁྱོང༌ཁྱོང༌ ཚོག༌པ༌ ཉེ༌རང༌ འི༌ཀ༌ ཞུགས༌།”
JDG 13:16 ཡ༌ཝའེ༌ ཕོ༌ཉའེ༌ ལན༌སལས༌, “ང༌ དུག༌ཨིན༌། ཨིན༌ནའང༌ ཁྱོ༌རང༌ངི༌ ཁྱོང༌ཁན༌ནི༌ ཁར༌ཇི༌ ངའེ༌ མི༌ཟ༌། ཏེ༌སང༌ཏ༌ ཁྱོ༌རང༌ངི༌ མེའ༌ སྲག༌ཅེས༌སི༌ ཆོད༌པ༌ གྲལ༌གྲིག༌ ཅོས༌ཏེ༌ ཡ༌ཝའ༌ ཕུལ༌ཉན༌ཅེས༌ ཨིན༌ནོག༌།” ༼ཁོང༌ ཡ༌ཝའེ༌ ཕོ༌ཉ༌ ཨིན༌ཁན༌བོ༌ མ༌ནོ༌འཧ༌ ངོ༌ མ༌ཤེས༌།༽
JDG 13:17 ཏེ༌ནེ༌ ཁོའེ༌ ཕོ༌ཉ༌ ཏྲིས༌, “ཉེ༌རང༌ངི༌ ཚན༌ལ༌ ཅི༌ ཞུ༌ཅེན༌? ཅིའ༌ཟེར༌ན༌ ཉེ༌རང༌ངི༌ མོལ༌ཁན༌བོ༌ གྲུབ༌བ༌ཅིག༌ ང༌ཞའེ༌ ཉེ༌རང༌ང༌ རྩི༌ཝ༌ ཕུལ༌ ཉན༌ཨིན༌།”
JDG 13:18 ཡ༌ཝའེ༌ ཕོ༌ཉའེ༌ ལན༌སལས༌, “ཁྱོ༌རང༌ངི༌ ངའེ༌ མིང༌ ཅིའ༌ ཏྲིས༌ཏེ༌ ཨིན༌? ངའེ༌ མིང༌ངི༌ ཏོན༌ ཁྱོ༌རང༌གུན༌ལ༌ ཧ༌གོ༌ མི༌ ཐུབ༌།”
JDG 13:19 ཏེ༌ནེ༌ མ༌ནོ༌འཧའེ༌ ར༌མ༌ ཆུ༌ངུན༌ དང༌ གྲུ༌ ཁྱོངས༌ ཡང༌ ཕོ༌ལོངས༌སི༌ཀ༌ མེའ༌ སྲགས༌ཏེ༌ ཡ༌ཝའ༌ ཆོད༌པ༌ ཕུལས༌། མ༌ནོ༌འཧ༌ དང༌ ཁོའེ༌ ན༌མ༌ ལྟས༌ཏེ༌ ཡོད༌ ཟ༌ནེ༌ ཡ༌ཝའེ༌ ཕོ༌ཉའེ༌ ཧ༌ལས༌ཤེས༌སི༌ ཆག༌ལས༌ ཛདས༌།
JDG 13:20 ཏེ༌ ཆོད༌ཁྲི༌ ཀ༌ནེ༌ མེ༌ལྗབ༌ བིངས༌ཏེ༌ ཀེན༌ལ༌ ཆ༌ ཟ༌ནེ༌ ཡ༌ཝའེ༌ ཕོ༌ཉ༌ ཏེ༌ མེའེ༌ ནང༌ང༌ ནམ༌ཁའ༌ སྐྱོདས༌། མ༌ནོ༌འཧ༌ དང༌ ཁོའེ༌ ན༌མའེ༌ ཏེ༌བོ༌ ཐོང༌ང༌ཅིག༌ རྩི༌ཝ༌ དང༌ ཇིགས༌སི༌ ནང༌ང༌ སའེ༌ཀ༌ གྱེལ༌ཏེ༌ ཆག༌ཕུལས༌།
JDG 13:21 ཡ༌ཝའེ༌ ཕོ༌ཉ༌ ཏེ༌ མེའེ༌ ནང༌ང༌ ནམ༌ཁའ༌ སྐྱོད༌ཏེ༌ ཡང༌སྐྱར༌ མ༌ཐོང༌ པ༌སང༌ མ༌ནོ༌འཧ༌ ཁོང༌ ཡ༌ཝ༌ ཞུགས༌ཁན༌བོ༌ ཧ༌གོ༌།
JDG 13:22 ཡང༌ ཁོའེ༌ ཁོ༌རང༌ངི༌ ན༌མ༌ ཟེརས༌, “ང༌དང༌གུན༌ ཤིའ༌ནོག༌ ཅིའ༌ཟེར༌ན༌ ང༌དང༌ངི༌ དཀོན༌མཆོག༌ ཇལ༌ཏེ༌ ཨིན༌ནོག༌།”
JDG 13:23 ཨིན༌ནའང༌ ཁོའེ༌ ན༌མའེ༌ ཟེརས༌, “ཀལ༌ཏེས༌ ཡ༌ཝའེ༌ ང༌དང༌གུན༌ སད༌ད༌ ཛད༌ཅེས༌ ཨིན༌པིན༌ན༌, ཁོང༌ངི༌ ང༌དང༌ངི༌ མེའ༌ སྲག༌ཁན༌ དང༌ གྲུའི༌ ཆོད༌པ༌ མ༌ ནམས༌ས༌ ཡོད༌གྲོ༌ ཡང༌ ཁོང༌ངི༌ ང༌དང༌ང༌ འི༌ ཚང༌མ༌ སྟན༌ན༌ ཡང༌ མོལ༌ལ༌ ཛད༌ཏེ༌ མེད༌གྲོ༌།”
JDG 13:24 ཁོའ༌ བུ༌ཚ༌ ཞིག༌ ཇོར༌ ཡང༌ ཁོའེ༌ མིང༌ང༌ སམ༌སོན༌ ཏགས༌། བུ༌ཚ༌བོ༌ ལྡན༌ཨིན༌ སོང༌ ཡང༌ ཡ༌ཝའེ༌ ཁོའ༌ ཅིན༌ལབས༌ སལས༌།
JDG 13:25 ཟོ༌རཧ༌ དང༌ ཨེཤ༌ཏ༌འོལ༌ གྲོང༌ཁྱེར༌གུན༌ནི༌ པར༌ལ༌ ཡོད༌ཁན༌ མ༌ཧ༌ནེཧ༌ དཱན༌ ནས༌སའེ༌ ནང༌ང༌ ཁོ༌ དུག༌ ཟ༌ནེ༌ ཡ༌ཝའེ༌ ཐུག༌ཉིད༌དི༌ ཁོའེ༌ ནང༌ང༌ ཆག༌ལས༌ ཛད༌ཅེས༌ གོ༌ཟུག༌།
JDG 14:1 ཞག༌ཤིག༌ སམ༌སོན༌ ཏིམ༌ནཧའེ༌ ནང༌ང༌ ཡོད༌ཏུས༌ ཁོའ༌ ཕི༌ལིས༌ཏི༌པ༌ བུ༌མོ༌ཞིག༌ ལྡེ༌མོ༌ ཐོང༌།
JDG 14:2 ཁོ༌ ལོགས༌ཏེ༌ ཁང༌པ༌ ལེབ༌བ༌ཅིག༌ ཁོའེ༌ ཁོ༌རང༌ངི༌ ཕ༌མ༌གུན༌ལ༌ ཟེརས༌, “ཏིམ༌ནཧའེ༌ ནང༌ང༌ ངའ༌ ཕི༌ལིས༌ཏི༌པ༌ བུ༌མོ༌ཞིག༌ ལྡེ༌མོ༌ ཐོང༌, ཁོ༌ ང༌ ན༌མའ༌ ཁྱོང༌ང༌ ཛད༌།”
JDG 14:3 ཁོའེ༌ ཨ༌བ༌ དང༌ ཨ༌མའེ༌ ལན༌ཏངས༌, “ཅི༌ ང༌དང༌ངི༌ སྡེ༌ ཡ༌ ཨིས༌ར༌ཨེལ༌ གང༌པོའེ༌ ནང༌ང༌ ཁྱོ༌རང༌ ཐད༌ཁན༌ནི༌ བུ༌མོ༌ ཅིག༌གའང༌ མི༌དུག༌ག༌? ཅིའ༌ ཁྱོ༌རང༌ ཡ༌ཝའ༌ མ༌ཅོལ༌ཁན༌ ཕི༌ལིས༌ཏི༌པ༌གུན༌ནི༌ ཕྲོའ༌ ན༌མ༌ ཙལ༌ལ༌ སོང༌པིན༌?” ཨིན༌ནའང༌ སམ༌སོན༌ནི༌ ཁོ༌རང༌ངི༌ ཨ༌བའ༌ ཟེརས༌, “ཏེན༌ན༌ བུ༌མོ༌བོ༌ ངའ༌ ན༌མ༌ ཁྱོང༌། ང༌ ཁོའ༌ ཐད༌ད༌ རག༌།”
JDG 14:4 ༼ཁོའེ༌ ཨ༌བ༌ དང༌ ཨ༌མ༌ འི༌བོ༌ ཡ༌ཝའེ༌ ཛད༌ཏེ༌ ཨིན༌ཁན༌བོ༌ ཧ༌ མ༌གོ༌, ཡ༌ཝའེ༌ ཨིས༌ར༌ཨེལ༌པ༌གུན༌ནི༌ཀ༌ ཝང༌ སྲུལ༌ཁན༌ ཕི༌ལིས༌ཏི༌པ༌གུན༌ལ༌ སམ༌སོན༌ གྱུད༌ཏེ༌ ནོལ༌ཅེས༌ལ༌ སྐབས༌ ཙལ༌ལ༌ ཛད༌ཏེ༌ ཨིན༌པིན༌།༽
JDG 14:5 སམ༌སོན༌ དང༌ ཁོའེ༌ ཕ༌མ༌གུན༌ ཐུར༌ལ༌ ཏིམ༌ནཧའ༌ ཆ༌ ཟ༌ནེ༌ ཏིམ༌ནཧའེ༌ རྒུན༌ཚས༌སི༌ དུན༌ལ༌ ལེབ༌བ༌ཅིག༌ ཧུན༌མེད༌ལ༌ ལྡན༌ཁན༌ སིང༌གེ༌ཞིག༌ སམ༌སོན༌ ཆོགས༌ལ༌ བང༌ ཁྱོངས༌།
JDG 14:6 ཏེ༌ནེ༌ ཁོ༌ ཡ༌ཝའེ༌ ཐུག༌ཉིད༌དི༌ ཤེད༌དི༌ གངས༌ཏེ༌ ཁོའེ༌ ཁོ༌རང༌ངི༌ ལག༌པ༌ ཉམ༌པོ༌ སིང༌གེ༌ ཁག༌ ཉིས༌སི༌ ནང༌ང༌ ཤགས༌ ཏངས༌། རི༌གུ༌ཞིག༌ ཤག༌ག༌ ཙོགས༌ལ༌ ཁོའེ༌ ཏེ༌བོ༌ མ༌ ལ༌མོ༌ ཉམ༌པོ༌ ཅོས༌། ཨིན༌ནའང༌ ཁོའེ༌ ཅོ༌ཁན༌བོ༌ ཁོ༌རང༌ངི༌ ཨ༌བ༌ ཡ༌ ཨ༌མ༌ མ༌ཤདས༌།
JDG 14:7 སམ༌སོན༌ ཏིམ༌ནཧའེ༌ ནང༌ང༌ ལེབ༌བ༌ཅིག༌ ཁོའེ༌ བུ༌མོ༌བོ༌ ཉམ༌པོ༌ སྤེ༌ར༌ ཏངས༌ ཡང༌ ཁོ༌ ཏེ༌ བུ༌མོའེ༌ཀ༌ སྲན༌ཏྲེ༌ ཐད༌།
JDG 14:8 ཏུས༌ བན༌ཤིག༌གི༌ སྟིང༌ནེ༌ སམ༌སོན༌ ཏིམ༌ནཧའ༌ བག༌སྟོན༌ ཅོའ༌ལ༌ ཡོང༌ ཟ༌ནེ༌ ལམ༌བར༌ལ༌ ཁོ༌, ཁོའེ༌ སད༌ཁན༌ནི༌ སིང༌གེ༌བོའ༌ ལྟའ༌ལ༌ སོང༌ ཡང༌ ཏེ༌ ནང༌ང༌ བུང༌ང༌གུན༌ནི༌ རང༌རྩི༌ རྩགས༌ཏེ༌ ཡོད༌ཁན༌བོ༌ ཐོང༌།
JDG 14:9 ཁོའེ༌ ཁོ༌རང༌ངི༌ ལག༌པ༌ ཉམ༌པོ༌ རང༌རྩི༌ ཁྱོངས༌ཏེ༌ གྲུལ༌ཨིན༌ ཟོས༌ ཡང༌ ཁོའེ༌ ཁོ༌རང༌ངི༌ ཨ༌བ༌ དང༌ ཨ༌མ༌ ཏངས༌པ༌ ཁོང༌གུན༌ནིའང༌ ཟོས༌། ཨིན༌ནའང༌ ཁོའེ༌ ཁོང༌གུན༌ལ༌ རང༌རྩི༌ སིང༌གེ༌ རོའེ༌ ནང༌ནེ༌ ཁྱོངས༌ཏེ༌ ཨིན༌ཁན༌བོ༌ མ༌ཤདས༌ །
JDG 14:10 སམ༌སོན༌ནི༌ ཨ༌བ༌ ཁོའེ༌ ན༌མའེ༌ ཁང༌པ༌ སོང༌ ཡང༌ སམ༌སོན༌ནི༌ ལུག༌སྲོལ༌ ནང༌ཞིན༌ ཏིམ༌ནཧའེ༌ ནང༌ང༌ ཞུ༌ནུ༌ བུ༌ཚ༌གུན༌ལ༌ གྲོན༌ ཏངས༌།
JDG 14:11 ཏིམ༌ནཧ༌པ༌གུན༌ནི ཏེ༌ གྲོན༌ནི༌ ནང༌ང༌ ཐུས༌ཏེ༌ ཁོའ༌ ཕྲོ༌པ༌ ཅོ༌ཅེས༌ལ༌ ཞུ༌ནུ༌ 30 ལྡམས༌།
JDG 14:12 སམ༌སོན༌ནི༌ ཁོང༌གུན༌ལ༌ ཟེརས༌, “ངའེ༌ ཁྱོ༌ཞའ༌ ཚོད༌ལེན༌ཞིག༌ ཏྲི༌ཨིན༌། ཀལ༌ཏེས༌ གྲོན༌ནི༌ ཞག༌པོ༌ རྡུན༌ནི༌ ནང༌ང༌ ཁྱོ༌ཞའེ༌ ཏེ༌བོའ༌ ལན༌ཏང༌ ཉན༌ན༌ ངའེ༌ ཁྱོ༌ཞ༌གུན༌ལ༌ ཀོས༌ ཇམ༌པོ༌ རིན༌ཅན༌ 30 དང༌ གའ༌སྟོན༌ལ༌ གོན༌ཅེས༌སི༌ ཀོས༌ལག༌ 30 ཏང༌ཨིན༌།
JDG 14:13 ཨིན༌ནའང༌ ཁྱོ༌ཞའ༌ ལན༌ ཏང༌ མ༌ཉན༌ན༌ ཁྱོ༌ཞའེ༌ ངའ༌ ཀོས༌ ཇམ༌པོ༌ རིན༌ཅན༌ 30 དང༌ གའ༌སྟོན༌ལ༌ གོན༌ཅེས༌སི༌ ཀོས༌ལག༌ 30 ཏང༌གོས༌།” ཁོང༌གུན༌ནི༌ ཟེརས༌, “ཁྲིག༌ རག༌། ཚོད༌ལེན༌བོ༌ ཤོད༌, ང༌ཞའེ༌ ཉན༌ཨིན༌།”
JDG 14:14 ཏེ༌ནེ༌ ཁོའེ༌ ཟེརས༌, “ཟའ༌ཁན༌ནི༌ ནང༌ནེ༌ ཟའ༌ཅེས༌ ཤིག༌། ཤེད༌ཅན༌ནི༌ ནང༌ནེ༌ ངར༌མོ༌ བིང༌།” ཞག༌མ༌ སུམ༌ ཁོང༌གུན༌ནི༌ ཏེ༌བོ༌ སེལ༌ཅེས༌སི༌ རྩོན༌གྲུས༌ ཅོས༌།
JDG 14:15 ཞག༌མ༌ ཞི༌པའེ༌ ཞག༌ག༌ ཁོང༌གུན༌ནི༌ སམ༌སོན༌ལ༌ ན༌མ༌ ཏྲིས༌ཁན༌ནི༌ བུ༌མོའ༌ ཟེརས༌, “གོབ༌སྐོར༌ཏེ༌ ཁྱོ༌རང༌ངི༌ མག༌པ༌ ཚོད༌ལེན༌ནི༌ ལན༌བོ༌ ཏྲིས༌ ཏེ༌མན༌ན༌ ང༌ཞའེ༌ ཁྱོ༌རང༌ དང༌ ཁྱོ༌རང༌ངི༌ ཨ༌བའེ༌ ནང༌ཚངས༌ མེའ༌ ཏུགས༌ཏེ༌ སད༌ཨིན༌། ཁྱོ༌རང༌ངི༌ ང༌ཞ༌གུན༌ བག༌སྟོན༌ནི༌ ནང༌ང༌ ཅོམ༌ཅེས༌ལ༌ བོད༌ པིན༌ན༌?”
JDG 14:16 ཏེ༌ནེ༌ སམ༌སོན༌ནི༌ ན༌མ༌ ཏྲིས༌ཁན༌ནི༌ བུ༌མོ༌ ངུ༌ཨིན༌ ཁོ༌ ཡོད༌ས༌ ཡོངས༌ཏེ༌ ཟེརས༌, “ཁྱོ༌རང༌ངི༌ ང༌ ཅེས༌པ༌ མ༌ཅོའ༌, ནཕ༌རད༌ ཅོས༌ཏེ༌ ཨིན༌ནོག༌། ཁྱོ༌རང༌ངི༌ ངའེ༌ མི༌གུན༌ལ༌ ཚོད༌ལེན༌ཞིག༌ ཏྲིས༌ཏོག༌ ཨིན༌ནའང༌ ཁྱོ༌རང༌ངི༌ ངའ༌ ཏེ༌བོའེ༌ ལན༌ མ༌ཤདས༌།” ཁོའེ༌ ལན༌ཏངས༌, “ངའེ༌ ང༌རང༌ངི༌ ཨ༌བ༌ ཡ༌ ཨ༌མ༌ ཏེ༌བོའེ༌ ལན༌ མ༌ཤདས༌པིན༌། ཏེ༌ནེ༌ ངའེ༌ ཁྱོ༌རང༌ང༌ ཅིའ༌ ཤད༌ཨིན༌།”
JDG 14:17 ཏེ༌ནེ༌ བུ༌མོ༌ གའ༌སྟོན༌ནི༌ ཞག༌ རྡུན༌བོ༌ ངུ༌ཨིན༌ དུགས༌། ཞག༌མ༌ རྡུན༌པའེ༌ ཞག༌ག༌ སམ༌སོན༌ནི༌ ཁོའ༌ ལན༌བོ༌ ཤདས༌ ཅིའ༌ཟེར༌ན༌ ཁོའེ༌ ཞག༌ཏང༌ ཏྲི༌ཨིན༌ དུགས༌ཏེ༌ ཁོའ༌ སྣང༌ང༌ཚེར༌ ཅུགས༌། ཏེ༌ནེ༌ བུ༌མོའེ༌ ཚོད༌ལེན༌ནི༌ ཏོན༌བོ༌ ཞུ༌ནུ༌ གུན༌ལ༌ ཤདས༌།
JDG 14:18 ཞག༌མ༌ རྡུན༌པའེ༌ ཞག༌ག༌ ཉི༌མ༌ སྐྱོད༌དི༌ སང༌ སྔུན༌ལ༌, གྲོང༌ཁྱེར༌རི༌ ཞུ༌ནུ༌གུན༌ སམ༌སོན༌ ཡོད༌ས༌ ཡོངས༌ཏེ༌ ཟེརས༌, “རང༌རྩི༌ སང༌ ངར༌མོ༌ ཅི༌ ཡོད༌? སིང༌གེ༌ སང༌ ཤེད༌ཅན༌ སུ༌ ཨིན༌?” སམ༌སོན༌ནི༌ ཁོང༌གུན༌ལ༌ ཟེརས༌, “ཀལ༌ཏེས༌ ཁྱོ༌རང༌གུན༌ནི༌ ངའེ༌ ན༌མ༌ ཇིགས༌ནང༌ མ༌སྟན༌པིན༌ན༌ ཁྱོ༌ཞའ༌ འི༌བོའེ༌ ལན༌ མ༌ ཐོབ༌བ༌ ཡོད༌གྲོ༌།”
JDG 14:19 ཏེ༌ནེ༌ ཡ༌ཝའེ༌ ཐུག༌ཉིད༌དི༌ ཤེད༌དི༌ གངས༌ཏེ༌ ཁོ༌ ཐུར༌ལ༌ ཨཤ༌ཀེ༌ལོན༌ གྲོང༌ཁྱེར༌ལ༌ སོང༌ཏེ༌ བུ༌ཚ༌ སུམ༌ཅུ༌ སདས༌ ཡང༌ ཁོང༌གུན༌ གོན༌ཏེ༌ ཡོད༌ཁན༌གུན༌ པུད༌ཏེ༌ ཁྱོངས༌ ཡང༌ ཚོད༌ལེན༌ནི༌ ཏོན༌ ཤད༌ཁན༌ནི༌ ཞུ༌ནུ༌གུན༌ལ༌ ཁོང༌གུན༌ནི༌ ཀོས༌གུན༌ ཏངས༌། ཨིན༌ནའང༌ སམ༌སོན༌ལ༌ སྲན༌ཏྲེ༌ སྲོ༌ ཡོངས༌ ཡང༌ ཁོ༌ ཁོ༌རང༌ངི༌ ཨ༌བའེ༌ ཁང༌པ༌ ལོགས༌ཏེ༌ སོང༌།
JDG 14:20 ཡང༌ སམ༌སོན༌ལ༌ ན༌མ༌ ཏྲིས༌ཁན༌ནི༌ བུ༌མོ༌ ཁོའེ༌ ཛ༌འོ༌ ཉེ༌མོ༌བོའ༌ ན༌མ༌ ཏངས༌།
JDG 15:1 སྟིང༌ནེ༌ ཀྲོའེ༌ རྔབ༌སའེ༌ ཏུས༌ལ༌ སམ༌སོན༌ནི༌ ལོ༌ ཆུ༌ངུན༌ ར༌མ༌ཞིག༌ ཁུར༌ཏེ༌ ཁོའ༌ ན༌མ༌ ཏྲི༌ཁན༌ནི༌ བུ༌མོའ༌ ཐུག༌ག༌ ཏིམ༌ནཧ༌ སོང༌། ཁོའེ༌ ཟེརས༌, “ང༌ ང༌རང༌ངི༌ ན༌མ༌ ཏྲི༌ཁན༌ནི༌ བུ༌མོའེ༌ ནང༌ང༌ ཆའད༌།” ཨིན༌ནའང༌ བུ༌མོའེ༌ ཨ༌བའེ༌ ཁོ༌ ཆ༌མ༌ཅུགས༌།
JDG 15:2 ཁོའེ༌ སམ༌སོན༌ལ༌ ཟེརས༌, “ངའེ༌ སམ༌, ཁྱོ༌རང༌ང༌ སྲོ༌ ཡོངས༌ཏེ༌ ཁོའ༌ ནཕ༌རད༌ ཅོའ༌ནོག༌། ཏེ༌བོའེ༌ཕིའ༌ ངའེ༌ ཁྱོ༌རང༌ངི༌ ཛ༌འོ༌ ཉེ༌མོ༌བོའ༌ ཁོ༌ ན༌མ༌ ཏངས༌པིན༌། ཨིན༌ནའང༌ ལྟོས༌སའང༌ ཁོའེ༌ ནོ༌མོ༌ ཁོའེ༌ སང༌ མང༌ང༌ ལྡེ༌མོ༌ དུག༌, ཁོ༌ ཉམ༌པོ༌ ན༌མ༌ ཅོས༌།”
JDG 15:3 སམ༌སོན༌ནི༌ ཟེརས༌, “ཏ༌ འི༌ལན༌, ངའ༌ ཁྱོ༌ཞའ༌ ཕི༌ལིས༌ཏི༌པ༌གུན༌ལ༌ ནོད༌པ༌ ཏང༌ཅེས༌ལ༌ ཏོན༌ཚན༌ ཡོད༌ཏེ༌ ཨིན༌ནོག༌།”
JDG 15:4 ཏེ༌ནེ༌ ཁོ༌ ཕི༌ལོག༌ག༌ སོང༌ ཡང༌ ཝ༌ཙེ༌ 300 ཟུམས༌ ཡང༌ ཆ༌ ཅོས༌ཏེ༌ ཏེ༌གུན༌ནི༌ ང༌མ༌ ལྡམས༌། ང༌མ༌གུན༌ནི༌ཀ༌ པམ༌བར༌ ཏགས༌ཏེ༌
JDG 15:5 མེ༌ ཏུགས༌། ཏེ༌ནེ༌ ཝ༌ཙེ༌གུན༌ ཕི༌ལིས༌ཏི༌པ༌གུན༌ནི༌ ཀྲོའེ༌ ཞིང༌གུན༌ནི༌ ནང༌ང༌ བང༌ཏངས༌པ༌ རྔས༌ཁན༌ དང༌ མ༌ རྔས༌ཁན༌ ཞིང༌ ཡང༌ རྒྱུན༌ དང༌ ཨོ༌ལིཝ༌ཝི༌ ཚས༌ ཚང༌མ༌ མེ༌ ཞེན༌ཏེ༌ མེད༌ཁན༌ སོང༌།”
JDG 15:6 ཕི༌ལིས༌ཏི༌པ༌གུན༌ནི༌ ཏྲིས༌, “འི༌བོ༌ སུའི༌ ཅོས༌?” “ཏིམ༌ནཧ༌པ༌ སམ༌སོན༌ནི༌ ན༌མ༌ ཏྲི༌ཁན༌ནི༌ བུ༌མོའེ༌ ཨ༌བའེ༌ ཁོའེ༌ བུ༌མོ༌ སམ༌སོན༌ནི༌ ཛ༌འོ༌ ཉེ༌མོ༌བོའ༌ ན༌མའ༌ ཏངས༌ པ༌སང༌ ཁོའེ༌ ཅོས༌” ཟེར༌ཏེ༌ ཤདས༌། ཏེ༌ནེ༌ ཕི༌ལིས༌ཏི༌པ༌གུན༌ སོང༌ཏེ༌ ཏེ༌ བུ༌མོ༌ དང༌ ཁོའེ༌ ཨ༌བ༌ མེའ༌ སྲགས༌ཏེ༌ སདས༌།
JDG 15:7 ཁོང༌གུན༌ནི༌ ཏེ༌ཟུག༌ ཅོས༌ པ༌སང༌ སམ༌སོན༌ནི༌ ཟེརས༌, “ཁྱོ༌རང༌གུན༌ནི༌ ཅོ༌ཁན༌བོའ༌ ལན༌ཏངས༌ཏེ༌ མ༌ནེ༌ ང༌ ངལ༌ མི༌ཚོ༌།”
JDG 15:8 ཏེ༌བོའེ༌ཕིའ༌ ཁོའེ༌ ཕི༌ལིས༌ཏི༌པ༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཁོང༌ མང༌པོ༌ སྙིང༌རྗེ༌ མེད༌པ༌ སདས༌། ཏེ༌ནེ༌ ཁོ༌ སོང༌ཏེ༌ ཨེ༌ཏམ༌མི༌ རི༌ བྲག༌ཕུགས༌སི༌ ནང༌ང༌ དུགས༌།
JDG 15:9 ཕི༌ལིས༌ཏི༌པ༌གུན༌ ཀེན༌ལ༌ སོང༌ཏེ༌ ཡ༌ཧུ༌དཱའེ༌ ནང༌ང༌ ལེ༌ཧིའི༌ གྲོང༌ཁྱེར༌རི༌ ཉེ༌ཁོར༌ལ༌ ཀུར༌ ཙུགས༌ཏེ༌ དུགས༌།
JDG 15:10 ཡ༌ཧུ༌དཱ༌པ༌གུན༌ནི༌ ཁོང༌གུན༌ལ༌ ཏྲིས༌, “ཁྱོ༌ཞའ༌ ང༌ཞ༌གུན༌ནི༌ཀ༌ སྤུང༌གོལ༌ ཅོའ༌ལ༌ ཅིའ༌ ཡོངས༌ཏེ༌ ཨིན༌?” ཕི༌ལིས༌ཏི༌པ༌གུན༌ནི༌ ལན༌ཏངས༌, “ང༌ཞ༌གུན༌ནི༌ སམ༌སོན༌ ཟུམས༌ཏེ༌ ཁོའེ༌ ང༌ཞའ༌ ཅོ༌ཁན༌ ཙོགས༌ ཁོའ༌ ཅོའ༌ལ༌ ཡོངས༌ཏེ༌ ཨིན༌།”
JDG 15:11 ཏེ༌ནེ༌ ཡ༌ཧུ༌དཱ༌པ༌ མི༌ སྟོང༌ སུམ༌ ཐུར༌ལ༌ ཨེ༌ཏམ༌མི༌ རི༌ བྲག༌ཕུགས༌སི༌ ནས༌ས༌ སོང༌ཏེ༌ སམ༌སོན༌ལ༌ ཟེརས༌, “ཕི༌ལིས༌ཏི༌པ༌གུན༌ནི༌ ང༌དང༌གུན༌ནི༌ཀ༌ ཝང༌སྲུལ༌ཅེས༌པོ༌ ཁྱོ༌རང༌ང༌ ཧ༌ མ༌གོའ༌ ཨིན༌ན༌? ཁྱོ༌རང༌ངི༌ ང༌ཞ༌གུན༌ལ༌ འི༌ཟུག༌ ཅིའ༌ ཅོས༌ཏེ༌ ཨིན༌?” སམ༌སོན༌ནི༌ ལན༌ཏངས༌, “ཁོང༌གུན༌ནི༌ ངའ༌ ཅོས༌ཁན༌བོ༌ ཙོགས༌ ངའེ༌ ཁོང༌གུན༌ལ༌ ཅོས༌པིན༌།”
JDG 15:12 ཨིན༌ནའང༌ ཡ༌ཧུ༌དཱ༌པ༌གུན༌ནི༌ ཁོའ༌ ཟེརས༌, “ང༌ཞའ༌ འི༌རུ༌ ཁྱོ༌རང༌ ལྡམས༌ཏེ༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ད༌ལ༌ ཡོངས༌པིན༌།” སམ༌སོན༌ནི༌ ཟེརས༌, “ཁྱོ༌ཞ༌རང༌ངི༌ ང༌ མི༌སད༌ ཟེར༌ཏེ༌ ནའ༌ ཁུར༌།”
JDG 15:13 ཁོང༌གུན༌ནི༌ ལན༌ཏངས༌, “ང༌ཞའེ༌ ཁྱོ༌རང༌ མི༌སད༌ ཨིན༌ནའང༌ ལྡམས༌ཏེ༌ ཕི༌ལིས༌ཏི༌པ༌གུན༌ནི༌ ལག༌ག༌ སྟད༌ཨིན༌།” ཏེ༌ནེ༌ ཁོང༌གུན༌ནི༌ ཁོ༌ ཐག༌པ༌ སོ༌མ༌ ཉིས༌ ཉམ༌པོ༌ ལྡམས༌ ཡང༌ ཁོ༌ བྲག༌ཕུགས༌ནེ༌ ཕིངས༌ཏེ༌ ཁྱེརས༌།
JDG 15:14 སམ༌སོན༌ ལེ༌ཧི༌ གྲོང༌ཁྱེར༌རི༌ ཉེ༌མོའ༌ ལེབ༌བ༌ཅིག༌ ཕི༌ལིས༌ཏི༌པ༌གུན༌ གྱལ༌ཁའ༌ ཐོབ༌ཁན༌ནི༌ ཀུ༌ཅོ༌ ཏང༌ཨིན༌ ཡོངས༌། ཨིན༌ནའང༌ ཡ༌ཝའེ༌ ཐུག༌ཉིད༌དི༌ ཤེད༌དི༌ གངས༌ཏེ༌ ཁོའེ༌ ལྡམས༌ཁན༌ནི༌ ཐག༌པ༌ སོ༌མ༌བོ༌ རུལ༌ཁན༌ནི༌ ཐག༌པ༌ ཉིང༌པ༌ ཙོགས༌ལ༌ ལ༌མོ༌ ཉམ༌པོ༌ ཅདས༌།
JDG 15:15 ཡང༌ ཁོའེ༌ ཉེ༌ཐུབ༌རང༌ ཤི༌ཁན༌ བུང༌བུའི༌ གྲམ༌པའེ༌ རུས༌པ༌ ཁུར༌ཏེ༌ ཕི༌ལིས༌ཏི༌པ༌ སྟོང༌ཅིག༌ སདས༌།
JDG 15:16 ཏེ༌ནེ༌ སམ༌སོན༌ནི༌ ཟེརས༌, “བུང༌བུའི༌ གྲམ༌པའེ༌ རུས༌པ༌ ཉམ༌པོ༌ ངའེ༌ ཁོང༌གུན༌ནི༌ རོ༌གུན༌ སྤུངས༌པིན༌། བུང༌བུའི༌ གྲམ༌པའེ༌ རུས༌པ༌ ཉམ༌པོ༌ ངའེ༌ མི༌ སྟོང༌ཅིག༌ སད༌པིན༌།”
JDG 15:17 ཏེ༌བོ༌ ཟེར༌ ཚར༌ཏེ༌ སྟིང༌ནེ༌ ཁོའེ༌ གྲམ༌པའེ༌ རུས༌པ༌བོ༌ ཐག༌རིང༌ང༌ ཕངས༌། ཏེ༌ ས༌ཀྱད༌པོའ༌ གྲམ༌པའེ༌ རུས༌པའེ༌ རི༌ ཟེར༌ཏེ༌ མིང༌ ཐོགས༌།
JDG 15:18 སམ༌སོན༌ མ༌སྲན༌ཏྲེ༌ སྐོམས༌ཏེ༌ ཡོད༌པ༌ ཁོའེ༌ ཡ༌ཝའ༌ ཞུས༌, “ཉེ༌རང༌ངི༌, ཉེ༌རང༌ངི༌ ཡོག༌པོའ༌ གྱལ༌ཁ༌ ཀྲག༌པོ༌ སལ༌ལ༌ ཛདས༌། ཏ༌ ང༌ སྐོམས༌ཏེ༌ ཤི༌ ཅུག༌ག༌ ཛད༌ཏེ༌ ཡ༌ཝའ༌ མ༌ཅོལ༌ཁན༌ འི༌ ཕི༌ལིས༌ཏི༌པ༌གུན༌ནི༌ ལག༌ག༌ ང༌ སལ༌ལ༌ ཛད༌ཅེས༌ ཨིན༌ན༌?”
JDG 15:19 ཏེ༌ནེ༌ དཀོན༌མཆོག༌གི༌ ལེ༌ཧི༌ ས༌ཀྱད༌ ཁོ༌ ཡོད༌སའེ༌ཀ༌ ཆུ༌ བིང༌ ཅུག༌ག༌ ཛདས༌། སམ༌སོན༌ ཆུ༌ ཐུངས༌ ཡང༌ ཁོའེ༌ ཟུགས༌པོའེ༌ ནང༌ང༌ ཡང༌སྐྱར༌ སྟོབས༌ སྐྱེས༌། ཏེ༌ནེ༌ ཁོའེ༌ ཏེ༌ ཆུ༌མིག༌པོའ༌ “བོད༌ཁན༌ནི༌ ཆུ༌མིག༌” ཟེར༌ཏེ༌ མིང༌ ཏགས༌ ཡང༌ ཏེ༌བོ༌ དག༌སའང༌ ལེ༌ཧི༌ ནང༌ང༌ ཡོད༌ཏེ༌ ཨིན༌ནོག༌།
JDG 15:20 སམ༌སོན༌ནི༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ལོ༌ 20 ཅོས༌། ཏེ༌ཏུས༌ ཕི༌ལིས༌ཏི༌པ༌གུན༌ནི༌ ཏེ༌ ནས༌སའེ༌ ནང༌ང༌ ཝང༌སྲུལ༌ལད༌པིན༌།
JDG 16:1 ཞག༌ཤིག༌ སམ༌སོན༌ ག༌ཟ༌ གྲོང༌ཁྱེར༌ལ༌ སོང༌, ཏེ༌རུ༌ ཁོའ༌ ཟུགས༌ཙོང༌མ༌ཞིག༌ ཐུག༌ ཡང༌ ཏེ༌ ཚན༌བོ༌ སམ༌སོན༌ ཁོ༌ ཉམ༌པོ༌ དུག༌ག༌ལ༌ སོང༌།
JDG 16:2 སམ༌སོན༌ ཏེ༌རུ༌ ཡོད༌ཁན༌བོ༌ ག༌ཟ༌པ༌གུན༌ལ༌ ཚོར༌ པ༌སང༌ ཁོང༌གུན༌ནི༌ ཏེ༌ ནས༌སའ༌ ཐའ༌ སྐོར༌ཏེ༌ ཚན༌ གང༌པོ༌ གྱལ༌སའེ༌ སྒོའེ༌ཀ༌ སྲུང༌ཏེ༌ དུགས༌། ཚན༌ལ༌ སྲུངས༌ཏེ༌ ཡོད༌ ཟ༌ནེ༌ ཁོང༌གུན༌ནི༌ ཟེརས༌, “ནམ༌ ལངས༌ས༌ཅིག༌ ང༌དང༌གུན༌ནི༌ ཁོ༌ སད༌ཨིན༌།”
JDG 16:3 ཨིན༌ནའང༌ སམ༌སོན༌ ཏེ༌རུ༌, ཚན༌ ཕེད༌ ཚོག༌པ༌ མ༌ནེ༌ མ༌དུགས༌། ཚན༌ ཕེད༌ལ༌ ཁོ༌ སོང༌ཏེ༌ གྱལ༌སའེ༌ གྱས༌སྒོའེ༌ ཀ༌ཝ༌ ཉིས༌ཀོ༌ ཐམས༌ཏེ༌ རིབ༌ཞི༌ རགས༌ཏེ༌ ཀོགས༌ ཡང༌ སྤུང༌པའེ༌ཀ༌ ཁུར༌ཏེ༌ ཧེབ༌རོན༌ནི༌ དུན༌ ཆོགས༌ལ༌ ཡོད༌ཁན༌ནི༌ རི༌ གོའེ༌ཀ༌ ཁྱེརས༌།
JDG 16:4 ཏུས༌ བན༌ཞིག༌གི༌ སྟིང༌ནེ༌ སོ༌རེག༌ ལུང༌པའེ༌ ནང༌ང༌ དུག༌ཁན༌ བུ༌མོ༌ དེ༌ལཱེ༌ལཧ༌ལ༌ སམ༌སོན༌ སྲན༌ཏྲེ༌ ཐད༌དད༌པིན༌།
JDG 16:5 ཕི༌ལིས༌ཏི༌པའེ༌ ཝང༌སྲུལ༌པ༌གུན༌ ཏེ༌ བུ༌མོ༌ ཡོད༌ས༌ སོང༌ཏེ༌ ཟེརས༌, “ཀལ༌ཏེས༌ ཁྱོ༌རང༌ངི༌ ལུས༌ཏེ༌ སམ༌སོན༌ནི༌ ཤེད༌དི༌ སང༌ཝ༌ ཡང༌ ང༌ཞའ༌ ཏེ༌ཀ༌ ཝང༌ ཅོ༌ཉན༌ཅེས༌པོ༌ གྱུས༌ཅོ༌ན༌, ང༌ཞའ༌ རེ༌རེ༌ ཁྱོ༌རང༌ང༌ མུལ༌ལི༌ པེ༌ནེ༌ 1,100 ཏང༌ཨིན༌། ཏེ༌ནེ༌ ང༌ཞ༌གུན༌ནི༌ ཁོ༌ ལྡམས༌ཏེ༌ ཝང༌ངི༌ ཡོག༌ག༌ ཁྱོང༌ཨིན༌།”
JDG 16:6 དེ༌ལཱེ༌ལཧའེ༌ སམ༌སོན༌ལ༌ ཟེརས༌, “ཉེ༌རང༌ངི༌ ཤེད༌ ཀྲག༌པོ༌ ཡང༌ ཉེ༌རང༌ ལྡམས༌ཏེ༌ ཝང༌ངི༌ ཡོག༌ག༌ ཁྱོང༌ ཉན༌ཅེས༌སི༌ སང༌ཝ༌བོ༌ ང༌ ཤོད༌དའང།”
JDG 16:7 སམ༌སོན༌ནི༌ ལན༌ཏངས༌, “ཀལ༌ཏེས༌ ངའ༌ ཞུའི༌ སྐུད༌པ༌ ལོན༌པ༌ རྡུན༌ ཉམ༌པོ༌ ལྡམ༌ན༌, ང༌ ཞན༌གུན༌ ཙོགས༌ ཤེད༌མེད༌ གྱུར༌ཨིན༌།”
JDG 16:8 ཏེ༌ནེ༌ ཕི༌ལིས༌ཏི༌པའེ༌ ཝང༌སྲུལ༌པ༌གུན༌ནི༌ བུ༌མོ༌བོའ༌ ཞུའི༌ སྐུད༌པ༌ ལོན༌པ༌ རྡུན༌ ཏངས༌ ཡང༌ ཁོའེ༌ ཏེ༌གུན༌ ཉམ༌པོ༌ སམ༌སོན༌ ལྡམས༌།
JDG 16:9 ཁོའེ༌ ཁང༌པའེ༌ ནང༌ང༌ མི༌གུན༌ ཨིབས༌ཏེ༌ ཡོད༌པིན༌། ཁོའེ༌ སམ༌སོན༌ལ༌ བོད༌ཏེ༌ ཟེརས༌, “སམ༌སོན༌, ཕི༌ལིས༌ཏི༌པ༌གུན༌ ཁྱོ༌རང༌ ཟུམ༌མ༌ ཡོངས༌ཏེ༌ དུག༌།” ཨིན༌ནའང༌ ཁོའེ༌ ཏེ༌ ཀོའེ༌ སྐུད༌པ༌གུན༌ མེའ༌ ཚིག༌ཏེ༌ ཆད༌ཁན༌ ཙོགས༌ལ༌ མ༌ ལ༌མོ༌ ཉམ༌པོ༌ ཅདས༌། ཏེ༌བོའེ༌ཕིའ༌ ཁོའེ༌ ཤེད༌དི༌ སང༌ཝ༌བོ༌ གྱུས༌ མ༌སོང༌།
JDG 16:10 ཏེ༌ནེ༌ དེ༌ལཱེ༌ལཧའེ༌ སམ༌སོན༌ལ༌ ཟེརས༌, “ཁྱོ༌རང༌ངི༌ ཟུན༌ ཏངས༌ཏེ༌ ང༌ བུང༌བུ༌ ཅོས༌, ཤོད༌དའང༌ ཀ༌ཟུག༌གི༌ ཁྱོ༌རང༌ སྟན༌པོ༌ ཅོས༌ཏེ༌ ལྡམ༌ ཉན༌ཨིན༌།”
JDG 16:11 ཁོའེ༌ ཟེརས༌, “ཀལ༌ཏེས༌ ངའ༌ མ༌ནེ༌ མ༌ ཀོལ༌ཁན༌ ཐག༌པ༌ སོ༌མ༌ ཉམ༌པོ༌ ལྡམ༌ན༌ ང༌ ཞན༌གུན༌ ཙོགས༌ ཤེད༌མེད༌ གྱུར༌ཨིན༌།”
JDG 16:12 ཏེ༌ནེ༌ དེ༌ལཱེ༌ལཧའེ༌ ཐག༌པ༌ སོ༌མ༌ ཁྱོངས༌ཏེ༌ ཁོ༌ སྟན༌པོ༌ ཅོས༌ཏེ༌ ལྡམས༌། ཁོའེ༌ ཁང༌པའེ༌ ནང༌ང༌ མི༌གུན༌ ཨིབས༌ཏེ༌ ཡོད༌པིན༌། ཁོའེ༌ སམ༌སོན༌ལ༌ བོད༌ཏེ༌ ཟེརས༌, “སམ༌སོན༌, ཕི༌ལིས༌ཏི༌པ༌གུན༌ ཁྱོ༌རང༌ ཟུམ༌མ༌ ཡོངས༌ཏེ༌ དུག༌།” ཨིན༌ནའང༌ སམ༌སོན༌ནི༌ ལག༌པའ༌ ལྡམས༌ཏེ༌ ཡོད༌ཁན༌ནི༌ ཐག༌པ༌བོ༌ སྐུད༌པ༌ ཙོགས༌ལ༌ ཅདས༌།
JDG 16:13 དེ༌ལཱེ༌ལཧའེ༌ སམ༌སོན༌ལ༌ ཟེརས༌, “ཁྱོ༌རང༌ངི༌ ཟུན༌ ཏངས༌ཏེ༌ དག༌ས༌ ཚོག༌པ༌ ངའ༌ བུང༌བུ༌ ཅོས༌། ཤོད༌དའང༌ ཀ༌ཟུག༌གི༌ ངའེ༌ ཁྱོ༌རང༌ ལྡམ༌ ཉན༌ཨིན༌།” ཁོའེ༌ ལན༌ཏངས༌, “ཀལ༌ཏེས༌ ཁྱོ༌རང༌ངི༌ ངའེ༌ སྲའེ༌ ཏུམ༌པ༌ རྡུན༌ ཁྲི༌ཤའེ༌ ནང༌ང༌ ཐགས༌ཏེ༌ པུར༌ཆ༌ གྱབ༌ན༌, ང༌ ཞན༌གུན༌ ཙོགས༌ ཤེད༌མེད༌ གྱུར༌ཨིན༌།” ཏེ༌ནེ༌ དེ༌ལཱེ༌ལཧའེ༌ སམ༌སོན༌ ཉིད༌ལོགས༌ཏེ༌ ཡོད༌ ཟ༌ནེ༌ ཁོའེ༌ སྲའེ༌ ཏུམ༌པ༌ རྡུན༌ ཁྲི༌ཤའེ༌ ནང༌ང༌ ཐགས༌
JDG 16:14 ཡང༌ པུར༌ཆ༌ གྱབས༌ཏེ༌ སྟན༌པོ༌ ཅོས༌། ཡང༌སྐྱར༌ ཁོའ༌ ཟེརས༌, “སམ༌སོན༌ ཕི༌ལིས༌ཏི༌པ༌གུན༌ ཁྱོ༌རང༌ ཟུམ༌མ༌ ཡོངས༌ཏེ༌ དུག༌།” ཁོའེ༌ ཉིད༌ཚད༌ ཡང༌ པུར༌ཆ༌ དང༌ ཁྲི༌ཤ༌ ཉིས༌ཀོ༌ ཐགས༌ཁན༌ནི༌ སྲའ༌ ཉམ༌པོ༌ ཕུད༌ཏེ༌ ཁྱོངས༌།
JDG 16:15 ཏེ༌ནེ༌ བུ༌མོའེ༌ ཁོའ༌ ཟེརས༌, “ཁྱོ༌རང༌ངི༌ ང༌ ཅེས༌པ༌ ཅོའད༌ ཟེར༌ཏེ༌ ཀ༌ཟུག༌གི༌ ཟེར༌རད༌ ཀལ༌ཏེས༌ ཁྱོ༌རང༌ངི༌ ངའེ༌ཀ༌ ལོ༌ཁྱེལ༌ ཅོའ༌ མེད༌ན༌? ཁྱོ༌རང༌ངི༌ ཤེད༌ ཀྲག༌པོའེ༌ སང༌ཝ༌བོ༌ མ༌ཤད༌ད༌ ཁྱོ༌རང༌ངི༌ ང༌ ལན༌ སུམ༌པ༌ བུང༌བུ༌ ཅོས༌ཏེ༌ ཨིན༌ནོག༌།”
JDG 16:16 ཏེ༌ནེ༌ བུ༌མོའེ༌ ཞག༌ཏང༌ ཏེན༌ན༌བོ༌ ཏྲི༌ཨིན༌ དུགས༌ཏེ༌ ཁོའ༌ མ༌ སྲན༌ཏྲེ༌ སྣང༌ང༌ ཚེར༌ ཅུགས༌།
JDG 16:17 ཏེ༌བོའེ༌ཕིའ༌ ཁོའེ༌ བུ༌མོའ༌ སང༌ཝ༌བོ༌ ཤདས༌, “ང༌ སྐྱེས༌པ༌ནེ༌ ཕར༌ལ༌ ན༌ཟི༌རཱའིགྲ༌ ཡང༌ན༌ དཀོན༌མཆོག༌གི༌ ཕིའ༌ ལྡམས༌ཁན༌ ཨིན༌ཅེས༌པའེ༌ ངའེ༌ སྲའ༌ མ༌ནེ༌ མ༌ བྲག༌ག༌ ཨིན༌། ཀལ༌ཏེས༌ ངའེ༌ སྲའ༌ བྲག༌ན༌, ངའེ༌ ཤེད༌པོ༌ ངའེ༌ ནང༌ནེ༌ བིང༌ཏེ༌ ཆེན༌ ཡང༌ ང༌ ཞན༌གུན༌ ཙོགས༌ ཤེད༌མེད༌ གྱུར༌ཨིན༌།”
JDG 16:18 ཁོའེ༌ ཟེར༌ཁན༌བོའ༌ དེ༌ལཱེ༌ལཧ༌ དེན༌ཤེས༌ ཡང༌ ཕི༌ལིས༌ཏི༌པའེ༌ ཝང༌སྲུལ༌པ༌གུན༌ལ༌ ལོན༌ ཀལས༌, “ཡང༌ ལན༌ཅིག༌ ལོགས༌ཏེ༌ སྐྱོད༌, ཁོའེ༌ ང༌ ཅི༌ཚང༌མ༌ ཤད༌ད༌རག༌།” ཏེ༌ནེ༌ ཕི༌ལིས༌ཏི༌པའེ༌ ཝང༌སྲུལ༌པ༌གུན༌ མུལ༌ ཁུར༌ཏེ༌ ཡོངས༌།
JDG 16:19 བུ༌མོའེ༌ ཁོ༌རང༌ངི༌ པང༌ངི༌ཀ༌ ཁོ༌ ཉིད༌ལ༌ ཏངས༌ ཡང༌ མི༌ཞིག༌ བོད༌ཏེ༌ ཁོའེ༌ སྲའ༌ ཏུམ༌པ༌ རྡུན༌བོ༌ བྲག༌ ཅུགས༌། ཏེན༌ན༌ ཟུག༌གི༌ སམ༌སོན༌ ཤེད༌མེད༌ གྱུར༌ཅུགས༌ ཡང༌ ཁོའེ༌ ཤེད༌པོ༌ ཁོ༌ ཕངས༌ཏེ༌ སོང༌།
JDG 16:20 ཏེ༌ནེ༌ བུ༌མོ༌བོའེ༌ ཟེརས༌, “སམ༌སོན༌, ཕི༌ལིས༌ཏི༌པ༌གུན༌ ཁྱོ༌རང༌ ཟུམ༌མ༌ ཡོངས༌ཏེ༌ དུག༌།” ཁོའ༌ ཉིད༌ཚད༌ ཡང༌ སམ༌, “སྔུན༌ ཙོགས༌ལ༌ ངའེ༌ ཐག༌པ༌གུན༌ ཅད༌ཏེ༌ ང༌རང༌ སྐྱོབ༌ཨིན༌ ཨིན༌ནའང༌ ཡ༌ཝའ༌ ཁོ༌ ཕངས༌ཏེ༌ སྐྱོད༌ཁན༌བོ༌ ཁོའ༌ གྱུས༌ མེད༌པིན༌།
JDG 16:21 ཏེ༌ནེ༌ ཕི༌ལིས༌ཏི༌པ༌གུན༌ནི༌ ཁོ༌ ཟུམས༌ཏེ༌ ཁོའེ༌ མིག༌གུན༌ བྲུས༌ཏེ༌ ཕིངས༌ ཡང༌ ཁོ༌ ཐུར༌ལ༌ ག༌ཟ༌ གྲོང༌ཁྱེར༌ལ༌ ཁྱེརས༌། ཏེ༌རུ༌ ཙོན༌ཁང༌ངི༌ ནང༌ང༌ ཁོའ༌ ལྕག༌ཐག༌ ཏགས༌ཏེ༌ གྲུ༌ ཐག༌ཅེས༌སི༌ རན༌ཐག༌ སྐོར༌ ཅུག༌གད༌པིན༌།
JDG 16:22 ཨིན༌ནའང༌ ཁོའེ༌ སྲའ༌ ཡང༌སྐྱར༌ སྐྱེས༌།
JDG 16:23 ཏ༌ ཕི༌ལིས༌ཏི༌པའེ༌ ཝང༌སྲུལ༌པ༌གུན༌ ཁོང༌གུན༌ནི༌ ལྷ༌ གྲ༌གོན༌ལ༌ ཆོད༌པ༌ ཕུལ༌ཏེ༌ གའ༌སྟོན༌ རྩི༌ཅེས༌ལ༌ ཛོམས༌ ཡང༌ ཟེརས༌, “ང༌དང༌ངི༌ ལྷའེ༌ ང༌དང༌གུན༌ནི༌ གྲ༌འོ༌ སམ༌སོན༌ ང༌དང༌ངི༌ ལག༌ག༌ སལ༌ཏེ༌ ཨིན༌ནོག༌།”
JDG 16:24 སམ༌སོན༌ ཐོང༌ང༌ཅིག༌ མི༌གུན༌ནི༌ ཁོང༌རང༌གུན༌ནི༌ ལྷ༌ སྟོད༌པ༌ ཕུལ༌ཏེ༌ ཟེརས༌, “ང༌ཞའེ༌ ལྷའེ༌ ང༌ཞ༌གུན༌ནི༌ གྲ༌འོ༌ ང༌ཞ༌གུན༌ནི༌ ལག༌ག༌ སལ༌ཏེ༌ ཨིན༌ནོག༌། ཁོའེ༌ ང༌དང༌གུན༌ནི༌ སྟོན༌ཐོག༌ ཚང༌མ༌ མེད༌ཁན༌ ཅོས༌ ཡང༌ ང༌དང༌ མང༌པོ༌ སདས༌།”
JDG 16:25 ཁོང༌གུན༌ནི༌ སྐྱིད༌པོ༌ ཅོ༌ཨིན༌ ར༌རོས༌ཏེ༌ ཡོད༌ ཟ༌ནེ༌ ཀུ༌ཅོ༌ ཏངས༌ཏེ༌ ཟེརས༌, “ང༌དང༌གུན༌ལ༌ སེམས༌སྐྱིད༌ ཁྱོང༌ཅེས༌སི༌ ཕིའ༌ སམ༌སོན༌ ཙོན༌ནེ༌ ཕིངས༌ཏེ༌ ཁྱོང༌།” ཏེ༌ནེ༌ ཁོང༌གུན༌ནི༌ སམ༌སོན༌ ཙོན༌ཁང༌ནེ༌ ཕིངས༌ཏེ༌ ཁྱོངས༌ ཡང༌ ཁོང༌གུན༌ནི༌ ཟེར༌ཁན༌གུན༌ ཁོའ༌ ཅོ༌ཅུགས༌ཏེ༌ སེམས༌སྐྱིད༌ ལེནས༌། ཏེ༌ནེ༌ ཁོང༌གུན༌ནི༌ སམ༌སོན༌ ཀ༌ཝ༌གུན༌ནི༌ པར༌ལ༌ ལངས༌ཏེ༌ བོར༌།
JDG 16:26 སམ༌སོན༌ནི༌ ཁོའེ༌ ལག༌པ༌ ཟུམས༌ཏེ༌ ཡོད༌ཁན༌བོའ༌ ཟེརས༌, “ཆོད༌ཁང༌ངི༌ ལྕིད༌ ཁུར༌ཁན༌ ཀ༌ཝ༌ ཁག༌ཅན༌གུན༌ནི༌ཀ༌ ངའེ༌ ལག༌པ༌ བོར༌ ང༌ ཏེ༌ཀ༌ སྟེན༌ཏེ༌ ངལ༌ཚོ༌ ཨིན༌།”
JDG 16:27 ཏ༌ ཆོད༌ཁང༌ བུ༌ཚ༌ དང༌ བུ༌མོ༌ མང༌པོའེ༌ གངས༌ཏེ༌ ཡོད༌པིན༌, ཏེ༌ ཕྲོའ༌ ཕི༌ལིས༌ཏི༌པའེ༌ ཝང༌སྲུལ༌པ༌ ཚང༌མ༌ ཡང༌ ཐོག༌གི༌ཀ༌ ཡོད༌ཁན༌ ཧ༌ལམ༌ བུ༌ཚ༌ དང༌ བུ༌མོ༌ སྟོང༌ སུམ༌མི༌ སམ༌སོན༌ལ༌ ཁོང༌གུན༌ ཐད༌ཁན༌ ཅོ༌ཅུགས༌ཏེ༌ སེམས༌སྐྱིད༌ ལེན༌ཁན༌བོ༌ ལྟའད༌པིན༌།
JDG 16:28 སམ༌སོན༌ནི༌ ཡ༌ཝའ༌ མོས༌ལམ༌ ཞུས༌, “ནམ༌ཁའེ༌ གྱལ༌པོ༌ ཡ༌ཝ༌ལེ༌ ང༌ ཨིད༌ཏུ༌ ཛད༌། དཀོན༌མཆོག༌ལེ༌ ཇུ༌ཇུ༌ ངའ༌ ཡང༌ ལན༌ཅིག༌ ཤེད༌སྟོབས༌ སལ༌ལ༌ ཛད༌། འིན༌ན༌ ལན༌ཅིག༌ ཕི༌ལིས༌ཏི༌པ༌གུན༌ནི༌ ངའེ༌ མིག༌གུན༌ བྲུས༌ཁན༌ནི༌ ཕིའ༌ ངའ༌ ལན༌ ཏང༌ཅུག༌ག༌ ཛད༌།”
JDG 16:29 ཏེ༌ནེ༌ སམ༌སོན༌ནི༌ ཆོད༌ཁང༌ངི༌ ཞུང༌སྐྱིལ༌ལི༌ ཀ༌ཝ༌ ཉིས༌ཀོའེ༌ཀ༌ ལག༌པ༌ བོརས༌, ཡས༌པ༌ ཅིག༌གི༌ཀ༌ ཡང༌ ཡོ༌མ༌ ཅིག༌ག༌,
JDG 16:30 ཡང༌ ཟེརས༌ “ང༌ ཕི༌ལིས༌ཏི༌པ༌གུན༌ ཉམ༌པོ༌ ཤི༌ཅུག༌ག༌ ཛད༌།” ཏེ༌ནེ༌ ཤེད༌ གང༌པོ༌ ཉམ༌པོ༌ ཁོའེ༌ ཀ༌ཝ༌གུན༌ ཕུལས༌། ཆོད༌ཁང༌ ཞིགས༌ཏེ༌ སྤོན༌བོ༌གུན༌ དང༌ ཏེ༌བོའེ༌ ནང༌ང༌ ཡོད༌ཁན༌ནི༌ མི༌ཚང༌མའེ༌ཀ༌ ཐོག༌ ལྡིབས༌། ཏེ༌ཟུག༌གི༌ ཁོའེ༌ ཁོ༌རང༌ སོན༌ཏེའ༌ ཡོད༌དི༌ ཏུས༌སི༌ སང༌ མང༌ང༌ མི༌ ཁོ༌ ཤི༌ ཟ༌ནེ༌ སདས༌།
JDG 16:31 ཁོའེ༌ ཨ༌བའེ༌ ནང༌ཚངས༌ ཚང༌མ༌ དང༌ ཁོའེ༌ ཨ༌ཅོ༌ནོ༌གུན༌ ཁོའེ༌ སྤུར༌ ཁྱོང༌ང༌ལ༌ ག༌ཟ༌ སོང༌། ཁོང༌གུན༌ནི༌ ཁོའེ༌ སྤུར༌ ཁྱོངས༌ཏེ༌ ཁོའེ༌ ཨ༌བ༌ མ༌ནོ༌འཧའེ༌ སྤུར༌ཁང༌ངི༌ ནང༌ང༌ སུབས༌ ཀ༌བོ༌ ཟོ༌རཧ༌ དང༌ ཨེཤ༌ཏ༌འོལ༌ གྲོང༌ཁྱེར༌གུན༌ནི༌ པར༌ལ༌ ཡོད༌པིན༌། སམ༌སོན༌ནི༌ ཨིས༌ར༌ཨེལ༌པ༌གུན༌ནི༌ གོ༌ཁྲིད༌ ལོ༌ 20 ཅོས༌།
JDG 17:1 ཏ༌ ཨེཕ༌ར༌ཡིམ༌མི༌ རི༌ཡུལ༌ལ༌ དུག༌ཁན༌ མི༌ཀཧ༌ ཟེར༌ཁན༌ནི༌ མི༌ ཞིག༌ ཡོད༌པིན༌,
JDG 17:2 ཁོའེ༌ ཁོ༌རང༌ངི༌ ཨ༌མ༌ ཟེརས༌, “ཉེ༌རང༌ངི༌ ཀ༌ནེ༌ མུལ༌ལི༌ པེ༌ནེ༌ 1,100 རྐུས༌ཏེ༌ ཁྱེར༌ཁན༌བོའ༌ ཉེ༌རང༌ངི༌ ངན༌ ཏབ༌ཁན༌བོ༌ ངའེ༌ ཚོར༌། ཏེ༌ པེ༌ནེ༌ ངའེ༌ རྐུས༌པིན༌, ཏ༌ ངའེ༌ ཉེ༌རང༌ང༌ ལོགས༌ཏེ༌ ཏང༌ཨིན༌།” ཁོའེ༌ ཨ༌མའེ༌ ཟེརས༌, “འི༌བོ༌ ཤད༌ཅེས༌སི༌ ཕིའ༌ ཡ༌ཝའེ༌ ཁྱོ༌རང༌ང༌ ཅིན༌ལབས༌ སལ༌ཤིག༌།”
JDG 17:3 བུ༌ཚའེ༌ པེ༌ནེ༌ ལོགས༌ཏེ༌ ཏང༌ང༌ཅིག༌ ཨ༌མའེ༌ ཟེརས༌, “ཁྱོ༌རང༌ངི༌ པེ༌ནེ༌ ལོགས༌ཏེ༌ ཏང༌ཁན༌ནི༌ ལས༌པོའ༌ རྩི༌ཝ༌ ཏངས༌ཏེ༌ ངའེ༌ འི༌ པེ༌ནེ༌ ཁག༌ཤིག༌ ཡ༌ཝའ༌ ཕུལ༌ཏེ༌ ཁྱོ༌རང༌ངི༌ ཕིའ༌ སྐུན༌དྲ༌ཞིག༌ ཞང༌ཅེས༌ལ༌ ཀོལ༌ཨིན༌།”
JDG 17:4 ཏེ༌ནེ༌ བུ༌ཚའེ༌ ལོགས༌ཏེ༌ ཏང༌ཁན༌ནི༌ པེ༌ནེ༌བོའེ༌ ནང༌ནེ༌ ཨ༌མའེ༌ མུལ༌ལི༌ པེ༌ནེ༌ 200 མུལ༌ལས༌ ཅོ༌ཁན༌ལ༌ ཏངས༌། ཁོའེ༌ ཏེ༌གུན༌ ཉམ༌པོ༌ སྐུན༌དྲ༌ཞིག༌ ཅོས༌ཏེ༌ མི༌ཀཧ༌ ཏངས༌ ཡང༌ ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ བོརས༌།
JDG 17:5 ཏ༌ མི༌ཀཧ༌ ཆོས༌ ཅོ༌སའེ༌ ནས༌ས༌ཞིག༌ ཡོད༌པིན༌། ཁོའེ༌ ཞན༌ སྐུན༌དྲ༌ རིག༌ ཞངས༌, ཨེ༌ཕོད༌ ཡང༌ན༌ ཏམ༌པ༌ སྟུད༌ཏུང༌ ཙེམས༌ ཡང༌ ཁོ༌རང༌ངི༌ བུ༌ཚ༌ ཅིག༌ བླ༌མ༌ སྐོས༌།
JDG 17:6 ཏེ༌ ཏུས༌ ཨིས༌ར༌ཨེལ༌པ༌གུན༌ལ༌ གྱལ༌པོ༌ མེད༌པིན༌, ཚང༌མའེ༌ རང༌རང༌ ཐད༌ཁན༌བོ༌ ཅོའད༌པིན༌།
JDG 17:7 ཞག༌ཤིག༌ ཡ༌ཧུ༌དཱའེ༌ མི༌སྡེ༌ ཕྲོའ༌ བེད༌ལེ༌ཧེམ༌མ༌ དུག༌ཁན༌ ལི༌ཝི༌པ༌ ཞུ༌ནུ༌ཞིག༌,
JDG 17:8 བེད༌ལེ༌ཧེམ༌ནེ༌ བིང༌ཏེ༌ ནས༌ཏེ༌ དུག༌ཅེས༌ལ༌ ཞན༌ ས༌ཆ༌ཞིག༌ ཙལ༌ཨིན༌ སོང༌། བེས༌སི༌ ནང༌ང༌ ཁོ༌ ཨེཕ༌ར༌ཡིམ༌མི༌ རི༌ཡུལ༌ལ༌ དུག༌ཁན༌ མི༌ཀཧའེ༌ ཁང༌པ༌ ལེབ༌།
JDG 17:9 མི༌ཀཧའེ༌ ཁོའ༌ ཏྲིས༌, “ཁྱོ༌རང༌ ཀ༌ནེ༌ ཨིན༌?” ཁོའེ༌ ལན༌ཏངས༌, “ང༌ ཡ༌ཧུ༌དཱའེ༌ ཡུལ༌ཇོངས༌ བེད༌ལེ༌ཧེམ༌ནེ༌ ལི༌ཝི༌པ༌ ཞིག༌ ཨིན༌ ཡང༌ ངའེ༌ ནས༌ཏེ༌ དུག༌ཅེས༌ལ༌ ས༌ཀྱད༌ ཞིག༌ ཙལ༌ལད༌།”
JDG 17:10 མི༌ཀཧའེ༌ ཟེརས༌, “ཁྱོ༌རང༌ འི༌རུ༌ ང༌ ཉམ༌པོ༌ དུགས༌ཏེ༌ ངའེ༌ བླ༌མ༌ དང༌ ང༌ ལབ༌ཞ༌ ཏང༌ཁན༌བོ༌ གྱུར༌། ཀོས༌ལག༌ དང༌ ཁར༌ཇི༌ མ༌ཐེའ༌ ངའེ༌ ཁྱོ༌རང༌ང༌ ལོའེ༌ ལ༌ཆ༌ མུལ༌ལི༌ པེ༌ནེ༌ རྕུ༌ ཏང༌ཨིན༌།”
JDG 17:11 ཏེ༌ནེ༌ ལི༌ཝི༌པ༌ ཞུ༌ནུ༌ ཏེ༌རུ༌ དུགས༌ ཡང༌ མི༌ཀཧའེ༌ ཕིའ༌ ཁོ༌ ཁོ༌རང༌ངི༌ བུ༌ཚ༌ཅིག༌ ཙོགས༌ ཨིན༌པིན༌།
JDG 17:12 མི༌ཀཧའེ༌ ཁོ༌རང༌ངི༌ ཕིའ༌ ལི༌ཝི༌པ༌ ཞུ༌ནུ༌ བླ༌མ༌ སྐོས༌ ཡང༌ ཁོ༌ མི༌ཀཧའེ༌ ཁང༌པའེ༌ ནང༌ང༌ དུགས༌།
JDG 17:13 མི༌ཀཧའེ༌ ཟེརས༌, “ཏ༌ ངའེ༌ ལི༌ཝི༌པ༌ ཞིག༌ བླ༌མ༌ སྐོས༌ པ༌སང༌ ཡ༌ཝའེ༌ ང༌ ཅིན༌ལབས༌ སལ༌ལ༌ ཛད༌ཨིན༌།”
JDG 18:1 ཏེ༌ཏུས༌ ཨིས༌ར༌ཨེལ༌པ༌གུན༌ལ༌ གྱལ༌པོ༌ མེད༌པིན༌། དཱན༌པ༌ མི༌སྡེའེ༌ ཚུགས༌ཏེ༌ དུག༌ཅེས༌ལ༌ ས༌ཀྱད༌ཞིག༌ ཙལ༌ལད༌པིན༌ ཅིའ༌ཟེར༌ན༌ ཞན༌ ཨིས༌ར༌ཨེལ༌པའེ༌ མི༌སྡེ༌གུན༌ནི༌ ནོར༌སྐལ༌ལ༌ ཐོབ༌ཁན༌ནི༌ ས༌ཆ༌ ང༌ཡོག༌ག༌ ལེན༌ ཚར༌ཏེ༌ ཨིན༌ནའང༌ དཱན༌པ༌ མི༌སྡེའེ༌ ཏ༌རུང༌ ཁོ༌རང༌གུན༌ནི༌ ས༌ཆ༌ ང༌ཡོག༌ག༌ ལེན༌ མ༌ཉན༌ན༌ ཨིན༌པིན༌།
JDG 18:2 དཱན༌པ༌གུན༌ནི༌ ཟོ༌རཧ༌ དང༌ ཨེཤ༌ཏ༌འོལ༌ གྲོང༌ཁྱེར༌པ༌ མག༌མི༌ ཀྲག༌པོ༌ ལྔ༌ སང༌ཝའེ༌ ཐོག༌ནེ༌ ས༌ཀྱད༌གུན༌ལ༌ ལྟའ༌ལ༌ ལམ༌ཅུགས༌ཏེ༌ ཟེརས༌, “སོང༌, ང༌དང༌ དུག༌ཅེས༌ལ༌ ས༌ཀྱད༌ཞིག༌ ལྟོས༌།” མི༌གུན༌ ཨེཕ༌ར༌ཡིམ༌མི༌ རི༌ཡུལ༌ལི༌ ནང༌ང༌ མི༌ཀཧའེ༌ ཁང༌པ༌ ལེབ༌ ཡང༌ ཏེ༌རུ༌ ཁོང༌གུན༌ནི༌ ཚན༌བོ༌ ཕུདས༌།
JDG 18:3 ཁོང༌གུན༌ མི༌ཀཧའེ༌ ཁང༌པའེ༌ ནང༌ང༌ ཡོད༌ ཟ༌ནེ༌ ཁོང༌གུན༌ལ༌ སྤེ༌ར༌ ཏང༌ཚུལ༌བོའེ༌ ཀ༌ནེ༌ ཞུ༌ནུ༌བོ༌ ལི༌ཝི༌པ༌ ཨིན༌ཁན༌ ཤེས༌། ཁོང༌གུན༌ ཁོ༌ ཡོད༌ས༌ སོང༌ཏེ༌ ཏྲིས༌, “ཁྱོ༌རང༌ འི༌རུ༌ སུའི༌ ཁྱོངས༌? འི༌ ས༌ཆའེ༌ ནང༌ང༌ ཁྱོ༌རང༌ ཅི༌ ཅོའད༌? ཁྱོ༌རང༌ འི༌རུ༌ ཅི༌ཕིའ༌ ཡོངས༌པིན༌?”
JDG 18:4 མི༌ཀཧའེ༌ ཁོའེ༌ ཕིའ༌ ཅོ༌ཁན༌གུན༌ ཁོའེ༌ ཁོང༌གུན༌ལ༌ ཤདས༌ ཡང༌ ཟེརས༌, “ཁོའེ༌ ང༌ ལ༌ཆ༌ ཏངས༌ཏེ༌ བླ༌མའེ༌ ལས༌ ཅོ༌ཅེས༌ལ༌ སྐོས༌།”
JDG 18:5 ཏེ༌ནེ༌ ཁོང༌གུན༌ནི༌ ཁོའ༌ ཟེརས༌, “ཇུ༌ཇུ༌ ང༌ཞ༌གུན༌ནི༌ བེས༌པོ༌ ཁྲངས༌པོ༌ ལུས༌སོག༌ག༌ མི༌ ལུས༌སོག༌ མོལ༌ཏེ༌ དཀོན༌མཆོག༌ག༌ ཏྲིའ༌ ཛད༌།”
JDG 18:6 བླ༌མའེ༌ ཁོང༌གུན༌ལ༌ ལན༌སལས༌, “ཞི༌དེ༌ ཉམ༌པོ༌ སོང༌། ཁྱོ༌ཞའེ༌ བེས༌པོའ༌ ཡ༌ཝའེ༌ ཆོགས༌སྐྱོར༌ ཛད༌ཨིན༌།”
JDG 18:7 ཏེ༌ནེ༌ མི༌ ལྔ༌ཀོ༌ ཏེ༌ནེ༌ བིང༌ ཡང༌ ལཱ༌འིཤ༌ གྲོང༌ཁྱེར༌ལ༌ ལེབ༌། ཁོང༌གུན༌ནི༌ ཏེ༌རུ༌ དུག༌ཁན༌ནི༌ མི༌གུན༌ སི༌དོན༌པ༌ ཙོགས༌, སྤུང༌གོལ༌ལི༌ ཇིགས༌ནང༌ མེད༌པ༌ ཞི༌དེ༌ ནང༌ང༌ དུག༌ཁན༌, ཁོང༌གུན༌ནི༌ ས༌ཆའེ༌ ནང༌ང༌ ཅི༌ཚང༌མ༌ སྨིན༌ པ༌སང༌ ཁོང༌གུན༌ སྐྱིད༌པོ༌ དང༌ ཆུག༌པོ༌, ཁོང༌གུན༌ སི༌དོན༌པ༌གུན༌ནེ༌ མ༌ ཐག༌རིང༌ ཡང༌ ཉེ༌ཁོར༌རི༌ ཞན༌ གྱལ༌ཁམས༌གུན༌ ཉམ༌པོ༌ བྲེལ༌བྲུགས༌ མེད༌ཁན༌བོ༌ ཐོང༌།
JDG 18:8 མི༌ ལྔ༌ཀོ༌ ཟོ༌རཧ༌ དང༌ ཨེཤ༌ཏ༌འོལ༌ལ༌ ལོགས༌ཏེ༌ ལེབ༌བ༌ཅིག༌ ཁོང༌ངི༌ ཉེན༌གྲུང༌གུན༌ནི༌ ཁོང༌གུན༌ལ༌ ཏྲིས༌, “ཁྱོ༌ཞ༌གུན༌ལ༌ ཅི༌ གྱུས༌སོང༌?”
JDG 18:9 ཁོང༌གུན༌ནི༌ ལན༌ཏངས༌, “ཡོང༌ཤིག༌, ཁོང༌གུན༌ལ༌ སྤུང༌གོལ༌ ཅོ༌ཨིན༌། ཏེ༌ ས༌ཀྱད༌ མ༌ གྱལ༌ལ༌ ཡོད༌ཁན༌བོ༌ ང༌ཞ༌གུན༌ནི༌ ཐོང༌། ང༌དང༌གུན༌ ཅི༌ཕིའ༌ སྲུངས༌ཏེ༌ ཨིན༌? ཐེ༌ཚོམས༌ མ༌ཅོ༌, སྤུང༌གོལ༌ ཅོས༌ཏེ༌ ང༌ཡོག༌ག༌ ལེན༌ཨིན༌།
JDG 18:10 ཏེ༌རུ༌ ལེབ༌བ༌ཅིག༌ ཁྱོ༌ཞའེ༌ ཁོང༌གུན༌ སྤུང༌གོལ༌ལི༌ ཇིགས༌ནང༌ མེད༌པ༌ དུག༌ཁན༌བོ༌ ཐོང༌ཨིན༌། དཀོན༌མཆོག༌གི༌ མ༌ གྱ༌ཤན༌ དང༌ ཅའང༌ སྒོས༌དོམ༌ མེད༌ཁན༌ནི༌ ཏེ༌ ས༌ཀྱད༌པོ༌ ང༌དང༌གུན༌ནི༌ ལག༌ག༌ སལ༌ཏེ༌ ཨིན༌ནོག༌།”
JDG 18:11 ཏེ༌ནེ༌ དཱན༌ནི༌ མི༌སྡེའེ༌ ནང༌ནེ༌ མག༌མི༌ 600 མག༌གི༌ ཕིའ༌ གྲལ༌གྲིག༌ ཅོས༌ཏེ༌ ཟོ༌རཧ༌ དང༌ ཨེཤ༌ཏ༌འོལ༌ནེ༌ བིང༌།
JDG 18:12 ལམ༌བར༌ལ༌ ཁོང༌གུན༌ནི༌ ཡ༌ཧུ༌དཱའེ༌ ཡུལ༌ཇོངས༌ ཀི༌རི༌འཐ༌ ཡེ༌རིམ༌མི༌ ཉེ༌མོའ༌ ཀུར༌ ཙུགས༌ཏེ༌ དུགས༌། ཏེན༌ན༌བོའེ༌ ཞས༌ཏེ༌ ཀི༌རི༌འཐ༌ ཡེ༌རིམ༌མི༌ ནུབ༌ ཆོགས༌སི༌ ས༌ཀྱད༌པོའ༌ དག༌སའང༌ མ༌ཧ༌ནེཧ༌ དཱན༌ ཟེར༌ར༌ནོག༌།
JDG 18:13 ཏེ༌ཀ༌ནེ༌ ཁོང༌གུན༌ ཨེཕ༌ར༌ཡིམ༌མི༌ རི༌ཡུལ༌ལ༌ སོང༌ ཡང༌ མི༌ཀཧའེ༌ ཁང༌པའེ༌ ཉེ༌མོའ༌ ལེབ༌།
JDG 18:14 ཏེ༌ནེ༌ ལཱ༌འིཤ༌ ས༌ཀྱད༌དི༌ ནང༌ང༌ སང༌ཝ༌ ཐོག༌ནེ༌ ལྟ༌ ཆའ༌ཁན༌ནི༌ མི༌ ལྔ༌ཀོའེ༌ ཁོ༌རང༌གུན༌ནི༌ ཕྲོ༌པ༌གུན༌ལ༌ ཟེརས༌, “འི༌ ཁང༌པ༌ ཅིག༌གི༌ ནང༌ང༌ ཨེ༌ཕོད༌, ལྷ༌ལྷ༌མོ༌གུན༌, ཤིང༌ང༌ སྐོས༌ཏེ༌ མུལ༌ ཏུམས༌ཁན༌ནི༌ སྐུན༌དྲ༌ ཡོད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཡོད༌ད༌? ཏ༌ ཅོ༌གོ༌ཤེས༌པོ༌ ང༌དང༌གུན༌ལ༌ གྱུས༌ཨིན༌ནོག༌།”
JDG 18:15 ཏེ༌ནེ༌ ཁོང༌གུན༌ མི༌ཀཧའེ༌ ཁང༌པ༌ ཆོགས༌ལ༌ སོང༌ ཀ༌རུ༌ ལི༌ཝི༌པ༌ ཞུན༌ནུ༌ དུག༌གད༌པིན༌ ཡང༌ ཁོའ༌ ཇུ༌ ཞུས༌།
JDG 18:16 དཱན༌པ༌ མག༌ཆ༌ གོན༌ཁན༌ནི༌ མག༌མི༌ 600 ཏེ༌ ཁང༌པའེ༌ གྱས༌སྒོའེ༌ཀ༌ ལངས༌ཏེ༌ དུགས༌།
JDG 18:17 བླ༌མ༌ དང༌ ལག༌ཆ༌ ཁུར༌ཏེ༌ ཡོད༌ཁན༌ནི༌ མག༌མི༌ 600 སྒོའེ༌ཀ༌ དུགས༌ཏེ༌ ཡོད༌ ཟ༌ནེ༌ སང༌ཝའེ༌ ཐོག༌ནེ༌ ས༌ཆའ༌ ལྟ༌ ཆའ༌ཁན༌ནི༌ མི༌ ལྔ༌ཀོ༌ ནང༌ཀུག༌ག༌ སོང༌ཏེ༌ ཤིང༌ང༌ སྐོས༌ཏེ༌ མུལ༌ ཏུམས༌ཁན༌ནི༌ སྐུན༌དྲ༌, ཨེ༌ཕོད༌ དང༌ ལྷ༌ལྷ༌མོ༌གུན༌ ཁུར༌ཏེ༌ ཁྱོངས༌།
JDG 18:18 མི༌ ལྔ༌ཀོ༌ མི༌ཀཧའེ༌ ཁང༌པའེ༌ ནང༌ང༌ སོང༌ཏེ༌ ཤིང༌ང༌ སྐོས༌ཏེ༌ མུལ༌ ཏུམས༌ཁན༌ནི༌ སྐུན༌དྲ༌, ཨེ༌ཕོད༌ དང༌ ལྷ༌ལྷ༌མོ༌གུན༌ ཁུར༌ཏེ༌ ཁྱོང༌ ཟ༌ནེ༌ བླ༌མའེ༌ ཁོང༌གུན༌ལ༌ ཟེརས༌, “ཁྱོ༌རང༌གུན༌ནི༌ ཅི༌ ཅོའད༌?”
JDG 18:19 ཁོང༌གུན༌ནི༌ ཁོའ༌ ལན༌ཏངས༌, “ཅུབ༌ ཅོད༌། སྤེ༌ར༌ ཅིག༌གའང༌ མ༌ཟེར༌། ང༌ཞ༌གུན༌ ཉམ༌པོ༌ ཡོངས༌ཏེ༌ ང༌ཞའེ༌ བླ༌མ༌ དང༌ ང༌ཞའ༌ ལབ༌ཞ༌ ཏང༌ཁན༌བོ༌ གྱུར༌, མི༌ ཅིག༌གི༌ བླ༌མ༌ སང༌ ཨིས༌ར༌ཨེལ༌པ༌ མི༌སྡེ༌ དང༌ མི༌རིགས༌གུན༌ནི༌ བླ༌མ༌ ཅོ༌ན༌ མི༌གྱལ༌ལ༌?”
JDG 18:20 བླ༌མ༌ ཁོང༌གུན༌ ཉམ༌པོ༌ ཆའ༌ལ༌ ཐད༌། ཨེ༌ཕོད༌, ལྷ༌ལྷ༌མོ༌གུན༌ དང༌ སྐོས༌ཁན༌ནི༌ སྐུ༌ ཁུར༌ཏེ༌ ཁོ༌ མག༌མི༌གུན༌ ཉམ༌པོ༌ སོང༌།
JDG 18:21 ཤེད༌མེད༌ མི༌གུན༌, སེམས༌ཅན༌གུན༌ དང༌ ནོར༌གུན༌ དུན༌ལ༌ ཏངས༌ཏེ༌ དཱན༌པ༌གུན༌ནི༌ བེས༌ ཡང༌སྐྱར༌ གོ༌ཟུག༌།
JDG 18:22 ཁོང༌གུན༌ མི༌ཀཧའེ༌ ཁང༌པ༌ནེ༌ བན༌ཤིག༌ ཐག༌རིང༌ང༌ སོང༌ ཚར༌ར༌ཅིག༌ མི༌ཀཧའེ༌ ཁོའེ༌ ཉེ༌ཁོར༌ལ༌ དུག༌ཁན༌ མི༌གུན༌ བོད༌ཏེ༌ དཱན༌པ༌གུན༌ལ༌ ཏེད༌ཏེ༌ ཁྱེརས༌།
JDG 18:23 ཁོང༌གུན༌ནི༌ ཀུ༌ཅོ༌ ཏངས༌ཏེ༌ བོད༌ད༌ཅིག༌ དཱན༌པ༌གུན༌ནི༌ གྱབ༌ལོགས༌ཏེ༌ ལྟས༌ ཡང༌ ཟེརས༌, “ཁྱོ༌རང༌ངི༌ འི༌ མི༌གུན༌ ང༌ཞའ༌ ནོལ༌ལ༌ལ༌ བོད༌ཏེ༌ ཅི༌ སམ༌མ༌རག༌?”
JDG 18:24 མི༌ཀཧའེ༌ ལན༌ཏངས༌, “ངའེ༌ ཅོ༌ཁན༌ནི༌ ལྷ༌ལྷ༌མོ༌གུན༌ དང༌ ངའེ༌ བླ༌མ༌ ཁྱོ༌ཞའེ༌ ཀོགས༌ཏེ༌ ཁྱེརས༌ པ༌སང༌ ངའེ༌ ལག༌ག༌ ཅའང༌ ལུས༌ཏེ༌ མེད༌། ཏེ༌ནེ༌ ཁྱོ༌རང༌ང༌ ཅི༌ སོང༌ ཟེར༌ཏེ༌ ཁྱོ༌ཞའེ༌ ཅིའ༌ ཏྲིའད༌?”
JDG 18:25 དཱན༌པ༌གུན༌ནི༌ ལན༌ཏངས༌, “རང༌ངི༌ ལྕེའ༌ ཉ༌ར༌ གྱོབ༌, ཏེ༌ མན༌ན༌ ང༌ཞའེ༌ ཕྲོ༌ནེ༌ སྲོན༌ཇན༌ མི༌གུན༌ནི༌ ཁྱོ༌ཞའ༌ སྤུང༌གོལ༌ ཅོས༌ཏེ༌ ཁྱོ༌རང༌ དང༌ ཁྱོ༌རང༌ངི༌ ནང༌མི༌གུན༌ སད༌ཨིན༌།”
JDG 18:26 ཏེ༌ནེ༌ དཱན༌པ༌གུན༌ ཁོང༌གུན༌ ཆེན༌ ཡོད༌ཁན༌ནི༌ ལམ༌ནེ༌ སོང༌ ཡང༌ མི༌ཀཧ༌ ཁོང༌གུན༌ མ༌ ཤེད༌ཅན༌ ཡོད༌ཁན༌བོ༌ ཧ༌གོ༌ པ༌སང༌ ཁོ༌ ལོགས༌ཏེ༌ ཁོ༌རང༌ངི༌ ཁང༌པ༌ སོང༌།
JDG 18:27 ཏེ༌ ཟུག༌གི༌ ཁོང༌གུན༌ནི༌ མི༌ཀཧའེ༌ སྐུན༌དྲ༌གུན༌ དང༌ ཁོའེ༌ བླ༌མ༌ ཁྲིད༌ཏེ༌ ཞི༌དེ༌ དང༌ ཇིགས༌ནང༌ མེད༌ད༌ དུག༌ཁན༌ ལཱ༌འིཤ༌པ༌གུན༌ལ༌ སྤུང༌གོལ༌ ཅོས༌ཏེ༌ ཁོང༌གུན༌ ར༌འི༌ ཉམ༌པོ༌ སདས༌ ཡང༌ གྱལ༌ས༌ མེའ༌ སྲག༌ཏེ༌ མེད༌ཁན༌ ཅོས༌།
JDG 18:28 ཁོང༌གུན༌ སྐྱོབ༌བ༌ སུའང༌ མ༌ཡོངས༌ ཅིའ༌ཟེར༌ན༌ ཁོང༌གུན༌ སི༌དོན༌ནེ༌ མ༌ ཐག༌རིང༌ང༌ དུག༌གད༌པིན༌ ཡང༌ ཉེ༌མོ༌ ཡོད༌ཁན༌ ཞན༌གུན༌ ཉམ༌པོ༌ ཁོང༌གུན༌ནི༌ བྲེལ༌ མེད༌པིན༌། ཏེ༌ གྱལ༌ས༌ བེཐ༌ རེ༌ཧོབ༌ ལུང༌པའེ༌ ནང༌ང༌ ཡོད༌ཏེ༌ ཨིན༌ནོག༌། དཱན༌པ༌གུན༌ནི༌ ཡང༌སྐྱར༌ གྱལ༌ས༌ རྩིགས༌ ཡང༌ ཏེ༌རུ༌ ཚུགས༌ཏེ༌ དུགས༌།
JDG 18:29 སྔུན༌ལ༌ ཏེ༌ གྱལ༌ས༌ ལཱ༌འིཤ༌ ཟེར༌ནའང༌ དཱན༌པ༌གུན༌ནི༌ ཏེ༌བོའ༌ ཁོང༌རང༌གུན༌ནི༌ ཕ༌མེས༌པོ༌ ཨིས༌ར༌ཨེལ༌ ཡང༌ན༌ ཡ༌ཀོབ༌བི༌ བུ༌ཚ༌ དཱན༌ མིང༌ང༌ ཏགས༌།
JDG 18:30 ཏེ༌རུ༌ དཱན༌པ༌གུན༌ནི༌ སྐུན༌དྲའ༌ ཅོལས༌ ཡང༌ མོ༌ཟེས༌སི༌ ཚ༌འོ༌ གེར༌ཤོམ༌མི༌ བུ༌ཚ༌ ཡོ༌ན༌ཐན༌ ཁོ༌རང༌གུན༌ནི༌ བླ༌མ༌ སྐོས༌ ཡང༌ ཨིས༌ར༌ཨེལ༌པ༌གུན༌ ཨ༌སི༌རི༌ཡཱ༌ ཟུམས༌ཏེ༌ ཁྱེར༌ཁྱེར༌ ཚག༌པ༌ ཁོའེ༌ བུ༌ཚ༌གུན༌ དཱན༌པ༌གུན༌ནི༌ བླ༌མ༌ ཨིན༌པིན༌།
JDG 18:31 དཀོན༌མཆོག༌ག༌ ཅོལ༌སའེ༌ ཏམ༌པའེ༌ ཀུར༌ ཤི༌ལོཧའེ༌ ནང༌ང༌ ཡོད༌ཏེའང༌ ཁོང༌གུན༌ནི༌ མི༌ཀཧའེ༌ ཅོ༌ཁན༌ནི༌ སྐུན༌དྲའ༌ ཅོལ༌ལད༌པིན༌།
JDG 19:1 ཏེ༌ ཏུས༌ ཨིས༌ར༌ཨེལ༌ལི༌ ནང༌ང༌ གྱལ༌པོ༌ མེད༌པིན༌། ཏ༌ ཨེཕ༌ར༌ཡིམ༌མི༌ རི༌ཡུལ༌ལི༌ གམ༌ཡུལ༌ལི༌ ནང༌ང༌ དུག༌ཁན༌ ལི༌ཝི༌པ༌ མི༌ཞིག༌གི༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌ནེ༌ ཚེ༌ཡོག༌ ན༌མ༌ ཁྱོངས༌།
JDG 19:2 ཨིན༌ནའང༌ ཏེ༌ བུ༌མོའ༌ ཁོའེ༌ཀ༌ སྲོ༌ ཡོངས༌པ༌ ཁོ༌ ཕངས༌ཏེ༌ བེད༌ལེ༌ཧེམ༌མ༌ ཁོ༌རང༌ངི༌ ཨ༌བའེ༌ ཁང༌པ༌ ལོགས༌ཏེ༌ སོང༌། ཁོ༌ ཏེ༌རུ༌ དུགས༌ཏེ༌ ཟླ༌ཝ༌ ཞི༌ སོང༌
JDG 19:3 ཏེ༌ནེ༌ ཁོའེ༌ མག༌པ༌ ཁོའ༌ ཧ༌གོ༌ཅུགས༌ཏེ༌ ལོགས༌ཏེ༌ ཁྱོང༌ང༌ བེད༌ལེ༌ཧེམ༌མ༌ སོང༌། ཁོ༌ ཉམ༌པོ༌ ཡོག༌པོ༌ དང༌ བུང༌བུ༌ ཉིས༌ ཡོད༌པིན༌། བུ༌མོའེ༌ ཁོ༌ ཁོ༌རང༌ངི༌ ཨ༌བའེ༌ ཁང༌པའེ༌ ནང༌ང༌ ཁྲིད༌ཏེ༌ ཁྱེརས༌ ཡང༌ ཁོ༌ ཐོང༌ང༌ཅིག༌ ཨ༌བའེ༌ མ༌ཐད༌པོ༌ ཉམ༌པོ༌ ཁོའ༌ གའ༌སུས༌ ཞུས༌།
JDG 19:4 ཁོའེ༌ ན༌མའེ༌ ཨ༌བའེ༌ ཁོའ༌ ཞག༌ ཁ༌ཅིག༌ དུགས༌ཅེས༌ལ༌ ཟེར༌པ༌ ཁོ༌ ཨ༌བ༌ ཉམ༌པོ༌ ཟའ༌ཨིན༌, ཐུང༌ཨིན༌ ཏེ༌རུ༌ ཉིད༌ལོགས༌ཏེ༌ ཞག༌མ༌ སུམ༌ དུགས༌།
JDG 19:5 ཞག༌ ཞི༌པའེ༌ ཞག༌ག༌ ཁོང༌གུན༌ ང༌མོ༌ནེ༌ ལངས༌ ཡང༌ ལོགས༌ཏེ༌ ཆ༌ཅེས༌ལ༌ གྲལ༌གྲིག༌ ཅོས༌, ཨིན༌ནའང༌ ཨ༌བའེ༌ ཁོ༌རང༌ངི༌ བུ༌མོའེ༌ མག༌པ༌ ཟེརས༌, “ཟན༌ ཟོས༌ཏེ༌ ཀྲོད༌པ༌ བྲངས༌ ཅུག༌ཏེ༌ སོང༌།”
JDG 19:6 ཏེ༌ནེ༌ ཁོང༌ ཉིས༌ཀོ༌ ཟའ༌ཅེས༌ དང༌ ཐུང༌ཅེས༌ལ༌ སའེ༌ཀ༌ དུགས༌། བུ༌མོའེ༌ ཨ༌བའེ༌ ཟེརས༌, “དི༌རིང༌ ཚན༌བོ༌ དུག༌ཏེ༌ སྐྱིད༌པོ༌ ཅོའ༌ ཛད༌།”
JDG 19:7 ཡང༌ ཁོ༌ ཆ༌ཅེས༌ལ༌ ལངས༌ས༌ཅིག༌ ཁོའེ༌ ན༌མའེ༌ ཨ༌བའེ༌ ཁོའ༌ དུག༌ཅེས༌ལ༌ རང༌གྱལ༌ ཏངས༌པ༌ ཁོ༌ ཏེ༌ ཚན༌བོ༌ ཏེ༌རུ༌ དུགས༌།
JDG 19:8 ཞག༌ ལྔ༌པའི༌ ཞག༌ག༌ ང༌མོ༌ནེ༌ ཁོ༌ ཆ༌ཅེས༌ལ༌ ལངས༌ས༌ཅིག༌ བུ༌མོའེ༌ ཨ༌བའེ༌ ཟེརས༌, “ཟན༌ ཟོས༌ཏེ༌ ཀྲོད༌པ༌ བྲངས༌ ཅུག༌ཏེ༌ ཉིང༌གུང༌ ཚོག༌པ༌ སྲུང༌།” ཁོང༌ ཉིས༌ཀོ༌ དུགས༌ཏེ༌ ཟོས༌།
JDG 19:9 ཏེ༌ནེ༌ ཁོ༌ ཁོ༌རང༌ངི༌ ཚེ༌ཡོག༌ ན༌མ༌ དང༌ ཡོག༌པོ༌ ཉམ༌པོ༌ ཆ༌ཅེས༌ལ༌ ལངས༌ས༌ཅིག༌ ཁོའེ༌ ན༌མའེ༌ ཨ༌བའེ༌ ཁོའ༌ ཟེརས༌, “ལྟོས༌སའང༌ ཕི༌ཏོག༌ ཆ༌ ཚར༌ཏོག༌, ཚན༌བོ༌ འི༌རུ༌ དུག༌། ཉི༌མ༌ བུད༌ ཚར༌ཀྱིས༌ དུག༌, དུགས༌ཏེ༌ སྐྱིད༌པོ༌ ཅོས༌། ཐོ༌རེ༌ ང༌མོ༌ནེ༌ ལངས༌ཏེ༌ ཁྱོ༌རང༌ ཁང༌པ༌ ལོགས༌ཏེ༌ སོང༌།”
JDG 19:10 ཨིན༌ནའང༌ ཡང༌ ཚན༌ཞིག༌ དུག༌ཉིན༌ མེད༌པ༌ ཁོ༌ ཁོ༌རང༌ངི༌ གྱབ༌ཆ༌ སྟད༌ཁན༌ནི༌ བུང༌བུ༌ ཉིས༌ཀོ༌ དང༌ ན༌མ༌ ཁྲིད༌ཏེ༌ ཡེ༌བས༌ ཡང༌ན༌ ཡེ༌རུ༌ཤ༌ལེམ༌ ཆོགས༌ལ༌ བིངས༌།
JDG 19:11 ཁོང༌གུན༌ ཡེ༌བས༌སི༌ གྱལ༌སའེ༌ ཉེ༌མོའ༌ ལེབ༌བ༌ཅིག༌ མུན༌གྲིག༌ ཆ༌ཀྱིས༌ ཡོད༌པིན༌། ཡོག༌པོའེ༌ ཁོ༌རང༌ངི༌ སྤོན༌བོའ༌ ཟེརས༌, “སྐྱོད༌, ཡེ༌བས༌པའེ༌ གྱལ༌སའེ༌ ནང༌ང༌ ཚན༌བོ༌ དུག༌ཨིན༌།”
JDG 19:12 སྤོན༌བོའེ༌ ལན༌ཏངས༌, “མན༌ ཨིས༌ར༌ཨེལ༌པ༌ མན༌ཁན༌ ཞན༌མི༌གུན༌ནི༌ གྱལ༌སའེ༌ ནང༌ང༌ ང༌དང༌ མི༌ དུག༌། ང༌དང༌གུན༌ གི༌བེའཧ༌ ནང༌ང༌ དུག༌ག༌ ཆེན༌།
JDG 19:13 ཡོང༌, ང༌དང༌གུན༌ གི༌བེའཧ༌ ཡ༌ ར༌མཧ༌ ལེབ༌ཅེས༌སི༌ རྩོན༌གྲུས༌ ཅོ༌ཨིན༌ ཡང༌ ཏེ༌ ཉིས༌ཀོའེ༌ ནང༌ནེ༌ ཅིག༌པོའེ༌ ནང༌ང༌ ང༌དང༌ངི༌ ཚན༌བོ༌ པུད༌ཨིན༌།”
JDG 19:14 ཏེ༌ནེ༌ ཁོང༌གུན༌ སོང༌ ཡང༌ ཁོང༌གུན༌ བེན༌ཡཱ༌མིན༌པ༌གུན༌ དུག༌སའེ༌ གི༌བེའཧ༌ ཉེ༌མོའ༌ ལེབ༌བ༌ཅིག༌ ཉི༌མ༌ སྐྱོད༌།
JDG 19:15 ཏེ༌རུ༌ ཚན༌བོ༌ དུག༌ཅེས༌ལ༌ ཁོང༌གུན༌ གྱལ༌སའེ༌ སྐྱིལ༌ལ༌ ཡོད༌ཁན༌ ཁྲོམས༌སི༌ ནང༌ང༌ སོང༌ཏེ༌ དུགས༌། ཨིན༌ནའང༌ སུ༌ཞིག༌གིའང༌ ཁོང༌གུན༌ ཁོ༌རང༌ངི༌ ཁང༌པའེ༌ ནང༌ང༌ ཚན༌བོ༌ དུག༌ཅེས༌ལ༌ མ༌ཁྱེརས༌།
JDG 19:16 ཏེན༌ན༌ ཕི༌ཏོག༌ ཨེཕ༌ར༌ཡིམ༌མི༌ རི༌ཡུལ༌པ༌ གི༌བེའཧ༌ ནང༌ང༌ དུག༌ཁན༌ མི༌རྒད༌པོ༌ ཞིག༌ ཞིང༌ངི༌ཀ༌ ལས༌ ཅོས༌ཏེ༌ ལོགས༌ཏེ༌ ཡོང༌ངད༌པིན༌།
JDG 19:17 ཁོའ༌ གྱལ༌སའེ༌ སྐྱིལ༌ལ༌ ཁྲོམས༌སི༌ ནང༌ང༌ བེས༌པ༌ རིག༌ ཐོང༌ང༌ཅིག༌ ཁོའེ༌ ཁོང༌གུན༌ལ༌ ཏྲིས༌, “ཁྱོ༌ཞའ༌ ཀ༌རུ༌ ཆ༌ཅེན༌ ཡང༌ ཀ༌ནེ༌ ཡོངས༌པིན༌?”
JDG 19:18 བུ༌ཚའེ༌ ལན༌ཏངས༌, “ང༌ཞ༌གུན༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌ནེ༌ ཡོངས༌པིན༌ ཡང༌ ཨེཕ༌ར༌ཡིམ༌ རི༌ཡུལ༌ལི༌ གམ༌ཡུལ༌ལ༌ ཆ༌ཅེས༌ ཨིན༌ ཀ༌རུ༌ ང༌ དུག༌གད༌། ཡང༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌མ༌ སོང༌པིན༌ ཡང༌ དག༌ས༌ ང༌ ཡ༌ཝ༌ ཅོལ༌སའེ༌ ནས༌ས༌ ཆ༌ཅེས༌ ཨིན༌། ཨིན༌ནའང༌ སུ༌ཞིག༌གིའང༌ ང༌ ཁོ༌རང༌གུན༌ནི༌ ཁང༌པའེ༌ ནང༌ང༌ མ༌ཁྱེརས༌།
JDG 19:19 ང༌ཞའེ༌ ལག༌ག༌ ང༌ཞའ༌ རང༌ངི༌ བུང༌བུའི༌ ཕིའ༌ ཕུག༌མ༌ དང༌ རྩའ༌ ཡང༌ ང༌རང༌, བུ༌མོ༌ དང༌ ངའེ༌ ཡོག༌པོའེ༌ ཕིའ༌ ཏ༌གི༌ དང༌ རྒུན༌ཆང༌ ཡོད༌། ང༌ཞ༌གུན༌ལ༌ ཅའང༌ སྒོས༌དོམ༌ མེད༌།”
JDG 19:20 མི༌རྒད༌པོའེ༌ ཟེརས༌, “ཉེ༌ཞའ༌ ངའེ༌ ཁང༌པའེ༌ ནང༌ང༌ གའ༌སུས༌ ཞུའད༌། ཉེ༌ཞའ༌ སྒོས༌དོམ༌ ཡོད༌ཁན༌གུན༌ ངའེ༌ ཏང༌ཨིན༌, གྱལ༌སའེ༌ ཁྲོམས༌སི༌ ནང༌ང༌ ཚན༌ ཕུད༌ད༌ མ༌ཛད༌།”
JDG 19:21 ཏེ༌ནེ༌ ཁོའེ༌ ཁོང༌གུན༌ ཁོ༌རང༌ངི༌ ཁང༌པ༌ ཁྱེརས༌ ཡང༌ བུང༌བུ༌གུན༌ལ༌ རྩའ༌ ཏངས༌། ཁོང༌རང༌གུན༌ནི༌ རྐང༌པ༌ ཁྲུས༌ཏེ༌ སྟིང༌ནེ༌ ཁོང༌གུན༌ནི༌ ཟན༌ ཟོས༌ ཡང༌ ཐུངས༌།
JDG 19:22 ཁོང༌གུན༌ནི༌ ཟེན༌ ཐུང༌ཨིན༌ སྐྱིད༌པོ༌ ཅོ༌ ཟ༌ནེ༌ གྱལ༌སའེ༌ བུ༌ཚ༌ ངན༌པ༌གུན༌ནི༌ ཁང༌པའ༌ སྐོར༌ཏེ༌ སྒོ༌ སྲན༌ཏྲེ༌ རྡུང༌ཨིན༌ ཁང༌པའེ༌ དག༌པོ༌ མི༌རྒད༌པོ༌བོའ༌ ཀུ༌ཅོ༌ ཏངས༌ཏེ༌ ཟེརས༌, “ཁྱོ༌རང༌ངི༌ ཁང༌པའ༌ ཁྱོང༌ཁན༌ བེས༌པ༌ བུ༌ཚ༌ ཉམ༌པོ༌ ང༌ཞའ༌ ལུས༌བྲེལ༌ ཅོ༌ཉན༌ཅེས༌ལ༌ ཁོ༌ ཕི༌ལོག༌ག༌ ཕིངས༌ཏེ༌ ཁྱོང༌།”
JDG 19:23 ཁང༌པའེ༌ དག༌པོ༌བོ༌ ཕི༌ལོག༌ག༌ སོང༌ཏེ༌ ཁོང༌གུན༌ལ༌ ཟེརས༌, “མན༌, ངའེ༌ ཛ༌འོ༌གུན༌ འི༌ཟུག༌ ངན༌པ༌ ལས༌ མ༌ཅོ༌ཤིག༌། ཁོ༌ ངའེ༌ གྲོན༌པོ༌ ཨིན༌ནོག༌, ཇུ༌ཇུ༌ ཏེ༌ཟུག༌ ཁྲེལ༌མེད༌དི༌ ལས༌ མ༌ཅོ༌ཤིག༌།
JDG 19:24 ལྟོས༌, བུ༌ཚ༌ ལག༌པ༌ མ༌ཐུག༌ཁན༌ ངའེ༌ བུ༌མོ༌ དང༌ ཁོའེ༌ ཚེ༌ཡོག༌ ན༌མ༌ འི༌ཀ༌ནེ༌, ངའེ༌ ཁོང༌གུན༌ ཕི༌ལོག༌ག༌ ཕིངས༌ཏེ༌ ཁྱོང༌ཨིན༌ ཡང༌ ཁོང༌གུན༌ ཉམ༌པོ༌ ཁྱོ༌ཞའེ༌ ཅི༌ ཅོ༌ཨིན༌ སམ༌ནའང༌ ཅོས༌ ཨིན༌ནའང༌ འི༌ བུ༌ཚ༌ ཉམ༌པོ༌ ཏེ༌ཟུག༌ ཁྲེལ༌མེད༌དི༌ ལས༌ མ༌ཅོ༌།”
JDG 19:25 ཁོང༌གུན༌ནི༌ ཁོའེ༌ ཟེར༌ཁན༌བོའ༌ མ༌ཉནས༌། ཏེ༌ནེ༌ ལི༌ཝི༌པ༌བོའེ༌ ཁོ༌རང༌ངི༌ ཚེ༌ཡོག༌ ན༌མ༌ ཁོང༌གུན༌ ཡོད༌ས༌ ཕི༌ལོག༌ག༌ ཕིངས༌ཏངས༌ ཡང༌ ཁོང༌གུན༌ནི༌ ཚན༌ གང༌པོ༌ བུ༌མོ༌ ཉམ༌པོ༌ ལུས༌བྲེལ༌ དང༌ ངན༌པ༌ ཅོས༌ཏེ༌ ནམ༌ལངས༌ལ༌ ཁོ༌ ཆ༌ཅུགས༌།
JDG 19:26 བུ༌མོ༌ ཁོའེ༌ སྤོན༌བོ༌ དུག༌སའེ༌ ཁང༌པ༌ ལོགས༌ཏེ༌ སོང༌ ཨིན༌ནའང༌ སྒོའེ༌ཀ༌ གྱེལ༌པ༌ ཏེ༌ཀ༌ ཉི༌མ༌ ཤར༌ཤར༌ ཚག༌པ༌ ལུས༌།
JDG 19:27 ང༌མོ༌ ཁོའེ༌ སྤོན༌བོ༌ ལངས༌ཏེ༌ ཁང༌པའ༌ ཆ༌ཅེས༌ལ༌ སྒོ༌ ཕེའ༌ཅིག༌ ཁོའ༌ ཁོ༌རང༌ངི༌ ཚེ༌ཡོག༌ ན༌མ༌ སྒོ༌ཐེམས༌སི༌ཀ༌ ལག༌པ༌ ཐམས༌ཏེ༌ གྱེལ༌ཏེ༌ ཡོད༌ཁན༌བོ༌ ཐོང༌།
JDG 19:28 ཁོའེ༌ བུ༌མོའ༌ ཟེརས༌, “ལོངས༌, ང༌དང༌ ཆེན༌།” ཨིན༌ནའང༌ ལན༌ མ༌ཐོབ༌པ༌ ཁོའེ༌ བུ༌མོའེ༌ རོ༌ ཁོ༌རང༌ངི༌ བུང༌བུའི༌ཀ༌ ཀལ༌ཏེ༌ ཁང༌པ༌ སོང༌།
JDG 19:29 ཁང༌པ༌ ལེབ༌བ༌ཅིག༌ ཁོའེ༌ ཁོ༌རང༌ངི༌ ཚེ༌ཡོག༌ ན༌མའེ༌ རོ༌ ཀྲི༌ ཉམ༌པོ༌ ཏུམ༌པ༌ རྕུག༌ཉིས༌སི༌ ནང༌ང༌ ཅདས༌ ཡང༌ ཨིས༌ར༌ཨེལ༌པའེ༌ མི༌སྡེ༌ རེ༌རེའ༌ ཀལས༌།
JDG 19:30 ཏེ༌བོ༌ ཐོང༌ཁན༌ ཚང༌མའེ༌ ཟེརས༌, “ཨིས༌ར༌ཨེལ༌པ༌གུན༌ ཨི༌ཇིབ༌ནེ༌ བིངས༌ཏེ༌ ཡོངས༌པ༌ནེ༌ དག༌ས༌ ཚོག༌པ༌ འི༌ ཙོགས༌ཤིག༌ མ༌ནེ༌ མ༌ཐོང༌ ཡ༌ མ༌ཚོར༌། འི༌བོའེ༌ སྐོར༌ལ༌ སམ༌བ༌ སྲན༌ཏྲེ༌ ཏངས༌ཏེ༌ ཐག༌ཅོད༌ཤིག༌ ང༌དང༌གུན༌ནི༌ ཅི༌ ཅོ༌གོས༌?”
JDG 20:1 ཏེ༌ནེ༌ བྱང༌ ཆོགས༌སི༌ གྱལ༌ས༌ དཱན༌ནེ༌ ཏངས༌ཏེ༌ ལྷོ༌ ཆོགས༌སི༌ གྱལ༌ས༌ བེར༌ཤེ༌བ༌ ཚོག༌པ༌ ཡང༌ ཤར༌ ཆོགས༌སི༌ གི༌ལེད༌དི༌ ཡུལ༌ཇོངས༌ནེ༌ ཨིས༌ར༌ཨེལ༌པ༌ ཚང༌མ༌ བིངས༌ ཡང༌ ཅིག༌གྲིལ༌ སོང༌ཏེ༌ མིཟ༌པཧའེ༌ ནང༌ང༌ ཡ༌ཝའེ༌ སྐུན༌དུན༌ལ༌ ཛོམས༌།
JDG 20:2 དཀོན༌མཆོག༌གི༌ མི༌གུན༌ ཛོམས༌ཏེ༌ ཡོད༌ས༌ ཨིས༌ར༌ཨེལ༌ལི༌ མི༌སྡེ༌ 11པོའེ༌ སྤོན༌བོ༌གུན༌ ཁོང༌རང༌གུན༌ནི༌ ནས༌སའེ༌ཀ༌ དུགས༌, ཏེ༌རུ༌ ར༌འི༌ ཁུར༌ཁན༌ མག༌མི༌ 400,000 ཡོད༌པིན༌།
JDG 20:3 ༼བེན༌ཡཱ༌མིན༌པ༌གུན༌ལ༌ ཞན༌ ཨིས༌ར༌ཨེལ༌པ༌གུན༌ ཀེན༌ལ༌ མིཟ༌པཧའ༌ སོང༌ཁན༌བོ༌ ཚོར༌།༽ ཨིས༌ར༌ཨེལ༌པ༌གུན༌ནི༌ ཟེརས༌, “འི༌ ནས༌ལུག༌ ངན༌པ༌བོ༌ ཀ༌ཟུག༌གི༌ ཇུང༌ ང༌ཞའ༌ ཤོད༌དའང?”
JDG 20:4 ཏེ༌ནེ༌ སད༌ཁན༌ནི༌ བུ༌མོའེ༌ མག༌པ༌ ལི༌ཝི༌པ༌བོའེ༌ ཁོང༌གུན༌ལ༌ ཟེརས༌, “ང༌ དང༌ ངའེ༌ ཚེ༌ཡོག༌ ན༌མ༌ ཉིས༌ཀོ༌ བེན༌ཡཱ༌མིན༌ནི༌ ཡུལ༌ཇོངས༌ གི༌བེའཧ༌ ནང༌ང༌ ཚན༌བོ༌ དུག༌ག༌ལ༌ སོང༌པིན༌།
JDG 20:5 ཚན༌ནི༌ ཏུས༌ལ༌ གི༌བེའཧ༌པ༌ བུ༌ཚ༌གུན༌ ཡོངས༌ཏེ༌ ང༌ཞའ༌ དུག༌སའེ༌ ཁང༌པ༌ ཐའ༌ སྐོརས༌། ང༌ སད༌ཅེས༌ ཅོས༌ ཡང༌ ཚན༌ གང༌པོ༌ ངའེ༌ ཚེ༌ཡོག༌ ན༌མ༌ ཝང༌ ཉམ༌པོ༌ ལུས༌བྲེལ༌ ཅོས༌པ༌ ཁོ༌ ཤི༌།
JDG 20:6 ཨིས༌ར༌ཨེལ༌ལི༌ ནང༌ང༌ ཏེ༌ཙོགས༌ ཁྲེལ༌མེད༌དི༌ ལས༌ ཅོ༌ཁན༌བོ༌ གྱུས༌ ཆ༌ཅེས༌ལ༌ ངའེ༌ ང༌རང༌ངི༌ ཚེ༌ཡོག༌ ན༌མའེ༌ རོ༌ ཁྱོངས༌ཏེ༌ ཏུམ༌པ༌ 12 ནང༌ང༌ ཅད༌ཏེ༌ ཁྱོ༌ཞའེ༌ མི༌སྡེ༌ རེ༌རེའ༌ ཀལ༌པིན༌།
JDG 20:7 ཏ༌ ཏེ༌བོའེ༌ སྐོར༌ལ༌ ཅི༌ ཅོ༌གོས༌ཤེས༌པོ༌ ཁྱོ༌ཞའ༌ ཨིས༌ར༌ཨེལ༌པ༌ ཚང༌མའེ༌ ཐག༌ཅོད༌།”
JDG 20:8 མི༌ ཚང༌མ༌ ཅིག༌གྲིལ༌ སོང༌ཏེ༌ ཟེརས༌, “ང༌དང༌ སུའང༌ ཁང༌པ༌ མི༌ཆ༌། ང༌དང༌ སུ༌ཞིག༌གའང༌ རང༌ངི༌ ཁང༌པ༌ ལོགས༌ཏེ༌ མི༌ཆ༌།
JDG 20:9 ཨིན༌ནའང༌ ཏ༌ གི༌བེའཧ༌པ༌གུན༌ལ༌ ང༌དང༌ངི༌ འི༌བོ༌ ཅོ༌ཨིན༌། ཏག༌རིལ༌ ཏངས༌ཏེ༌ བིང༌ཁན༌ ནང༌ཞིན༌ ང༌དང༌གུན༌ནི༌ ཁོང༌གུན༌ནི༌ཀ༌ སྤུང༌གོལ༌ ཅོ༌ཨིན༌།
JDG 20:10 ང༌དང༌གུན༌ནི༌ ཨིས༌ར༌ཨེལ༌པ༌ མག༌མི༌ ཚང༌མའེ༌ ནང༌ནེ༌ རྕུ༌ཁག༌པོ༌, ཁར༌ཇི༌ གྲལ༌གྲིག༌ ཅོ༌ཅེས༌ལ༌ སྐོས༌ཏེ༌ ཞན༌ ཚང༌མ༌, ཨིས༌ར༌ཨེལ༌ལི༌ ནང༌ང༌ ཏེ༌ཟུག༌ ཁྲེལ༌མེད༌དི༌ ལས༌ ཅོ༌ཅེས༌སི༌ ཕིའ༌ བེན༌ཡཱ༌མིན༌ ཡུལ༌ཇོངས༌སི༌ གི༌བེའཧ༌པ༌གུན༌ལ༌ འོས༌པ༌ ཨིན༌ཁན༌ནི༌ ཆད༌པ༌ ཏང༌ང༌ ཆེན༌།”
JDG 20:11 ཏེ༌ནེ༌ ཨིས༌ར༌ཨེལ༌པ༌ ཚང༌མ༌ ཛོམས༌ ཡང༌ ཏེ༌ གྱལ༌སའེ༌ གྱབ༌གལ༌ལ༌ ཅིག༌གྲིལ༌ སོང༌།
JDG 20:12 ཨིས༌ར༌ཨེལ༌ལི༌ མི༌སྡེ༌གུན༌ནི༌ བེན༌ཡཱ༌མིན༌ནི༌ མི༌སྡེའེ༌ གང༌པོའེ༌ ནང༌ང༌ མི༌གུན༌ ལམ༌ཅུགས༌ཏེ༌ ཏྲིས༌, “ཁྱོ༌ཞ༌གུན༌ནི༌ ཕྲོའ༌ མི༌ངན༌པ༌ ཁ༌ཅིག༌གི༌ ཁྲེལ༌མེད༌ ལས༌ ཅོས༌ཁན༌བོ༌ ཁྱོ༌ཞའ༌ གྱུས༌ ཡོད༌ད༌?
JDG 20:13 ཏ༌ གི༌བེའཧ༌པ༌ ཏེ༌ མི༌ངན༌གུན༌ ང༌ཞའེ༌ ལག༌ག༌ སྟོད༌ ཏེ༌ནེ༌ ང༌ཞ༌གུན༌ནི༌ ཁོང༌གུན༌ སད༌ཏེ༌ ཨིས༌ར༌ཨེལ༌ལི༌ ནང༌ང༌ ཅོ༌ཁན༌ནི༌ ངན༌པ༌ མེད༌ཁན༌ ཅོ༌ཨིན༌།” ཨིན༌ནའང༌ ཁོང༌གུན༌ནི༌ ཟེར༌ཁན༌བོའ༌ བེན༌ཡཱ༌མིན༌པ༌གུན༌ནི༌ མ༌ཉེནས༌།
JDG 20:14 གྲོང༌ཁྱེར༌གུན༌ནེ༌ བེན༌ཡཱ༌མིན༌པ༌གུན༌ ཡོངས༌ཏེ༌ གི༌བེའཧ༌ ནང༌ང༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ ནོལ༌ལ༌ལ༌ ཛོམས༌།
JDG 20:15 ཏེན༌ན༌ ཞག༌ག༌ བེན༌ཡཱ༌མིན༌པ༌གུན༌ནི༌ གྲོང༌ཁྱེར༌གུན༌ནེ༌ ར༌འི༌ སྲུལ༌ ཉན༌ཁན༌ མི༌ 26,000 མག༌མི༌ ནང༌ང༌ ཅུགས༌ ཀ༌གུན༌ གི༌བེའཧ༌ ནང༌ང༌ དུག༌ཁན༌ མག༌མི༌ གྱལ༌ཤོག༌ 700 གུན༌ནི༌ཀ༌ ནན༌མ༌ ཨིན༌པིན༌།
JDG 20:16 ཏེ༌ མག༌མི༌ ཚང༌མའེ༌ ཕྲོའ༌ ལག༌པ༌ ཡོ༌མ༌ ཀོལ༌ཁན༌ མག༌མི༌ 700 ཡོད༌པིན༌། ཁོང༌གུན༌ནི༌ སྲའེ༌ སྲལ༌ཉག༌ག༌ ཡུག༌དོ༌ ཏང༌ན༌ མ༌ཕོག༌ག༌ ལུས༌ས༌ མེད༌པིན༌།
JDG 20:17 བེན༌ཡཱ༌མིན༌པ༌གུན༌ མ༌ཐེའ༌ ཨིས༌ར༌ཨེལ༌པ༌གུན༌ལ༌ ར༌འི༌ ཁུར༌ཁན༌ ཐོང༌ངོམས༌ཅན༌ མག༌མི༌ 400,000 ཡོད༌པིན༌།
JDG 20:18 དཀོན༌མཆོག༌ག༌ ཅོལ༌སའེ༌ ནས༌ས༌ བེ༌ཐེལ༌ལ༌ སོང༌ཏེ༌ ཨིས༌ར༌ཨེལ༌པ༌གུན༌ནི༌ ཁོང༌ང༌ ཏྲིའ༌ཛདས༌, “བེན༌ཡཱ༌མིན༌པ༌གུན༌ལ༌ ནོལ༌ལ༌ ང༌ཞ༌གུན༌ནི༌ ནང༌ནེ༌ གོ༌མ༌ སུ༌ ཆ༌ལེ༌?” ཡ༌ཝའེ༌ ལན༌སལས༌, “གོ༌མ༌ ཡ༌ཧུ༌དཱ༌པ༌གུན༌ ཆ༌གོས༌།”
JDG 20:19 ཐོ༌རེ༌ཟུག༌པོ༌ ང༌མོ༌ ཨིས༌ར༌ཨེལ༌པ༌གུན༌ སོང༌ཏེ༌ གི༌བེའཧ༌ ཉེ༌མོའ༌ ཀུར༌ ཙུགས༌ཏེ༌ དུགས༌།
JDG 20:20 ཨིས༌ར༌ཨེལ༌པ༌གུན༌ གི༌བེའཧ༌ སོང༌ཏེ༌ བེན༌ཡཱ༌མིན༌པ༌གུན༌ལ༌ མག༌ ཏང༌ཅེས༌ལ༌ གྲལ༌གྲིག༌ ཅོས༌ཏེ༌ རང༌རང༌ངི༌ ནས༌ས༌ ཐམས༌ཏེ༌ དུགས༌།
JDG 20:21 བེན༌ཡཱ༌མིན༌པ༌གུན༌ གྱལ༌ས༌ནེ༌ བིང༌ཏེ༌ ཡོངས༌ ཡང༌ ཏེན༌ན༌ ཞག༌ག༌ མག༌ཐང༌ངི༌ཀ༌ ཁོང༌གུན༌ནི༌ ཨིས༌ར༌ཨེལ༌པའེ༌ མག༌མི༌ 22,000 སདས༌།
JDG 20:22 ཏེ༌ནེ༌ ཨིས༌ར༌ཨེལ༌པ༌གུན༌ ཡ༌ཝ༌ ཅོལ༌སའེ༌ ནས༌ས༌ སོང༌ཏེ༌ ཕི༌ཏོག༌ ཚོག༌པ༌ ངུ༌ཨིན༌ རྡུག༌པོ༌ ཅོས༌ ཡང༌ ཁོང༌ང༌ ཏྲིའ༌ ཛདས༌, “ང༌ཞའ༌ ང༌ཞའེ༌ སྤུན༌ བེན༌ཡཱ༌མིན༌པ༌གུན༌ལ༌ མག༌ ཏང༌ང༌ ཡང༌སྐྱར༌ ཆ༌ལེ༌?” ཡ༌ཝའེ༌ ལན༌སལས༌, “སོང༌, ཁོང༌གུན༌ལ༌ ནོལ༌ལ༌ ཡང༌སྐྱར༌ སོང༌།” ཞག༌ ཉིས༌པའེ༌ ཞག༌ག༌ ཨིས༌ར༌ཨེལ༌པ༌གུན༌ནི༌ ཅིག༌ ཏང༌ ཅིག༌ག༌ སྤོས༌པ༌ ཏངས༌ཏེ༌ ཡང༌སྐྱར༌ ནོལ༌ཅེས༌ལ༌ རང༌རང༌ངི༌ ནས༌ས༌ ལེནས༌།
JDG 20:24 ཨིས༌ར༌ཨེལ༌པ༌གུན༌ ལན༌ ཉིས༌པ༌ བེན༌ཡཱ༌མིན༌པ༌གུན༌ནི༌ གྱབ༌གལ༌ལ༌ ནོལ༌ལ༌ བིང༌།
JDG 20:25 གི༌བེའཧ༌ ནེ༌ བིང༌ཏེ༌ བེན༌ཡཱ༌མིན༌པ༌གུན༌ ནོལ༌ལ༌ ཡོངས༌ ཡང༌ འི༌ ལན༌ ཁོང༌གུན༌ནི༌ ཨིས༌ར༌ཨེལ༌པ༌ ར༌འི༌ ཁུར༌ཁན༌ ཐོང༌ངོམས༌ཅན༌ མག༌མི༌ 18,000 སདས༌།
JDG 20:26 ཏེ༌ནེ༌ ཨིས༌ར༌ཨེལ༌པ༌ ཚང༌མ༌ བེ༌ཐེལ༌ལ༌ སོང༌ཏེ༌ ཡ༌ཝའེ༌ སྐུན༌དུན༌ལ༌ ངུས༌། ཏེ༌ ཞག༌ག༌ ཕི༌ཏོག༌ ཚོག༌པ༌ ཁོང༌གུན༌ ཉེ༌ནས༌ལ༌ དུགས༌ཏེ༌ མེའ༌ སྲག༌ཅེས༌སི༌ ཆོད༌པ༌ དང༌ ཞི༌དེ༌ ཐུན༌བྲེལ༌ལི༌ ཆོད༌པ༌ ཕུལས༌།
JDG 20:27 ཨིས༌ར༌ཨེལ༌པ༌གུན༌ནི༌ ཡ༌ཝའ༌ ཏྲིའ༌ ཛདས༌, ༼ཏེ༌ ཏུས༌ལ༌ དཀོན༌མཆོག༌གི༌ ཆད༌དོན༌ནི༌ སྒམ༌བོ༌ བེ༌ཐེལ༌ལི༌ ནང༌ང༌ ཡོད༌པིན༌,
JDG 20:28 ཡང༌ ཨ༌རོན༌ནི༌ ཚ༌འོ༌ ཨེ༌ལི༌འ༌ཟར༌རི༌ བུ༌ཚ༌ ཕི༌ནི༌ཧས༌ བླ༌མ༌ ཨིན༌པིན༌༽ “ང༌ཞའ༌ ང༌ཞའེ༌ སྤུན༌ བེན༌ཡཱ༌མིན༌པ༌གུན༌ལ༌ ཡང༌སྐྱར༌ མག༌ ཏང༌ང༌ ཆ༌ ཡ༌ མ༌ཆ༌ ལེ༌?” ཡ༌ཝའེ༌ ལན༌སལས༌, “སོང༌, ཐོ༌རེ༌ ཁོང༌གུན༌ ངའེ༌ ཁྱོ༌ཞའེ༌ ལག༌ག༌ སྟད༌ཨིན༌།”
JDG 20:29 ཨིས༌ར༌ཨེལ༌པ༌ མག༌མི༌ 10,000 སྤུང༌གོལ༌ ཅོ༌ཅེས༌ལ༌ གི༌བེའཧ༌ གྱལ༌སའེ༌ ཉེ༌ཁོར༌ལ༌ ཨིབས༌ཏེ༌ དུགས༌།
JDG 20:30 ཞག༌ སུམ༌པའེ༌ ཞག༌ག༌ ཨིས༌ར༌ཨེལ༌ལི༌ ཞན༌ མག༌མི༌གུན༌ བེན༌ཡཱ༌མིན༌པ༌གུན༌ལ༌ ནོལ༌ལ༌ སོང༌ཏེ༌ སྔུན༌ ཙོགས༌ལ༌ ནོལ༌ཅེས༌ལ༌ གྲལ༌གྲིག༌ ཅོས༌ཏེ༌ རང༌རང༌ངི༌ ནས༌ས༌ ཟུམས༌།
JDG 20:31 བེན༌ཡཱ༌མིན༌པ༌གུན༌ ནོལ༌ལ༌ བིང༌ཏེ༌ ཁོང༌གུན༌ལ༌ ཏེད༌ཏེ༌ ཁྱེར༌ པ༌སང༌ གྱལ༌ས༌ནེ༌ ཐག༌རིང༌ང༌ ལེབ༌། སྔུན༌ ཙོགས༌ལ༌ ཁོང༌གུན༌ནི༌ ཨིས༌ར༌ཨེལ༌པ༌ མང༌པོའ༌ མ༌སྐྱོན༌ ཅོས༌པ༌ ཧ༌ལམ༌ མི༌ 30 ཐང༌སྟོང༌ ཡང༌ བེ༌ཐེལ༌ དང༌ གི༌བེའཧ༌ ཆ༌སའེ༌ ལམ༌གུན༌ནི༌ཀ༌ ཤི༌།
JDG 20:32 བེན༌ཡཱ༌མིན༌པ༌གུན༌ནི༌ ཟེརས༌ “སྔུན༌ ཙོགས༌ལ༌ ང༌དང༌ངི༌ ཁོང༌གུན༌ལ༌ ཕམ༌ཀལ༌ཏེ༌ ཨིན༌ནོག༌” ཏེན༌ན༌ ཏུས༌ལ༌ ཨིས༌ར༌ཨེལ༌པ༌གུན༌ནི༌ ཟེརས༌, “ཁོང༌གུན༌ གྱལ༌ས༌ནེ༌ ཐག༌རིང༌ང༌ ལམ༌ ཆོགས༌ལ༌ ཁྱེར༌ཅེས༌སི༌ ཕིའ༌ ང༌དང༌གུན༌ ལོགས༌ཏེ༌ ཤོར༌ཨིན༌།”
JDG 20:33 ཨིས༌ར༌ཨེལ༌པ༌ ཚང༌མ༌ ཤོར༌ཏེ༌ བའལ༌ ཏ༌མར༌ལ༌ ལེབ༌བ༌ཅིག༌ ནོལ༌ཅེས༌ལ༌ རང༌རང༌ངི༌ ནས༌ས༌ ཐམས༌ཏེ༌ དུགས༌, ཏེ༌ནེ༌ གི༌བེའཧ༌ ནུབ༌ ཆོགས༌ལ༌ ཨིབས༌ཏེ༌ ཡོད༌ཁན༌ ཨིས༌ར༌ཨེལ༌པ༌གུན༌ བིང༌ ཡང༌ གྱུགས༌ཏེ༌ ནོལ༌ལ༌ ཡོངས༌།
JDG 20:34 ཨིས༌ར༌ཨེལ༌ལི༌ ནོལ༌ཁན༌ ཀྲག༌པོ༌ མག༌མི༌ 10,000 འི༌ གི༌བེའཧ༌པ༌གུན༌ལ༌ དུན༌ ཆོགས༌ནེ༌ སྤུང༌གོལ༌ ཅོས༌། མག༌ མ༌ སྲན༌ཏྲེ༌ སོང༌ ཡང༌ ཁོང༌ང༌ ཕམ༌ སྲན༌ཏྲེ༌ ཕོག༌ཅེས༌པོ༌ བེན༌ཡཱ༌མིན༌པ༌གུན༌ལ༌ ཧ༌ མ༌གོ༌།
JDG 20:35 ཡ༌ཝའེ༌ ཁོང༌གུན༌ལ༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ ཕམ༌ཀལ༌ལ༌ ཛདས༌ ཡང༌ ཏེན༌ན༌ ཞག༌ག༌ ཁོང༌གུན༌ནི༌ རའི༌ ཀོལ༌ཁན༌ ཐོང༌ངོམས༌ཅན༌ བེན༌ཡཱ༌མིན༌པ༌ མག༌མི༌ 25,100 སདས༌།
JDG 20:36 ཏེ༌ནེ༌ ཁོང༌གུན༌ ཕམ༌ཁན༌བོ༌ བེན༌ཡཱ༌མིན༌པ༌གུན༌ནི༌ ཧ༌གོ༌། ཨིས༌ར༌ཨེལ༌པའེ༌ ཞན༌ མག༌མི༌གུན༌ལ༌ གི༌བེའཧ༌ ཉེ༌ཁོར༌ལ༌ ཨིབས༌ཏེ༌ ཡོད༌ཁན༌ མག༌མི༌གུན༌ནི༌ ནང༌ང༌ ལོ༌ཁྱེལ༌ སྟན༌པོ༌ ཡོད༌ པ༌སང༌ བེན༌ཡཱ༌མིན༌པ༌གུན༌ལ༌ ནོལ༌ཅེས༌ ཕངས༌ཏེ༌ ཁོང༌གུན༌ ཤོར༌།
JDG 20:37 ཏེ༌ནེ༌ ཨིབས༌ཏེ༌ ཡོད༌ཁན༌ མག༌མི༌གུན༌ གྱུགས༌ཏེ༌ སོང༌ ཡང༌ གི༌བེའཧ༌པ༌གུན༌ནི༌ཀ༌ སྤུང༌གོལ༌ ཅོས༌ཏེ༌ གྱལ༌སའེ༌ ནང༌ང༌ ཡོད༌ཁན༌ ཚང༌མ༌ ར༌འི༌ ཉམ༌པོ༌ སདས༌།
JDG 20:38 ཏ༌ ཨིས༌ར༌ཨེལ༌པ༌ ཨིབས༌ཏེ༌ ཡོད༌ཁན༌གུན༌ནི༌ ཞན༌ མག༌མི༌གུན༌ལ༌ གྱལ༌སའེ༌ ནང༌ནེ༌ ཏུད༌པ༌ བིང༌ཨིན༌ ཐོང༌ང༌ཅིག༌ སྤུང༌གོལ༌ ཅོས༌ ཟེར༌ཏེ༌ ཡོད༌པིན༌།
JDG 20:39 ཏུད༌པ༌ བིང༌ཨིན༌ ཐོང༌ང༌ཅིག༌ ཨིས༌ར༌ཨེལ༌པ༌གུན༌ནི༌ ལོགས༌ཏེ༌ སྤུང༌གོལ༌ ཅོས༌། བེན༌ཡཱ༌མིན༌པ༌གུན༌ནི༌ ཨིས༌ར༌ཨེལ༌པ༌ ཧ༌ལམ༌ 30 སདས༌ ཡང༌ ཟེརས༌, “སྔུན༌ ཙོགས༌ལ༌ ང༌དང༌ངི༌ ཁོང༌གུན༌ལ༌ ཕམ༌ཀལ༌ཏེ༌ ཨིན༌ནོག༌།”
JDG 20:40 ཨིན༌ནའང༌ བེན༌ཡཱ༌མིན༌པ༌གུན༌ནི༌ ལོགས༌ཏེ༌ ལྟའ༌ཅིག༌ ཁོང༌གུན༌ལ༌ གྱལ༌ས༌ གང༌པོའེ༌ ནང༌ནེ༌ ཏུད༌པ༌ ཀེན༌ལ༌ ནམ༌ཁའ༌ ཆེན༌ ཡོད༌ཁན༌བོའ༌ ཐོང༌།
JDG 20:41 ཏེ༌ནེ༌ ཨིས༌ར༌ཨེལ༌པ༌གུན༌ ཁོང༌གུན༌ལ༌ ནོལ༌ཅེས༌ལ༌ གྱབ༌ གྱུར༌ར༌ཅིག༌ བེན༌ཡཱ༌མིན༌པ༌གུན༌ལ༌ ཁོང༌གུན༌ནི༌ཀ༌ རྐྱེན༌ངན༌ ལེབ༌ཁན༌བོ༌ ཧ༌གོ༌ ཡང༌ ཁོང༌གུན༌ སྲན༌ཏྲེ༌ ཇིགས༌།
JDG 20:42 ཏེ༌བོའེ༌ཕིའ༌ ཁོང༌གུན༌ ཨིས༌ར༌ཨེལ༌པ༌གུན༌ནི༌ དུན༌ནེ༌ ཐང༌སྟོང༌ ཆོགས༌ལ༌ ཤོར༌ཅེས༌ ཅོས༌ ཨིན༌ནའང༌ ཁོང༌གུན༌ ཤོར༌ མ༌ཉན༌། ཡང༌ ཨིས༌ར༌ཨེལ༌པ༌ གྱལ༌སའེ༌ ནང༌ནེ༌ བིངས༌ཏེ༌ ཡོང༌ཁན༌གུན༌ནི༌ ཁོང༌གུན༌ སདས༌།
JDG 20:43 ཁོང༌གུན༌ནི༌ བེན༌ཡཱ༌མིན༌པ༌གུན༌ལ༌ སྐོརས༌ ཡང༌ གི༌བེའཧའེ༌ ཤར༌ ཆོགས༌སི༌ ནས༌ས༌ ཚག༌པ༌ ཏེད༌ཏེ༌ ཁྱེར༌ཏེ༌ ལ༌མོ༌ ཉམ༌པོ༌ ཁོང༌གུན༌ སདས༌།
JDG 20:44 བེན༌ཡཱ༌མིན༌པ༌ 18,000 ཤི༌, ཁོང༌ ཚང༌མ༌ སྤོས༌པ༌ ཉམ༌པོ༌ ནོལ༌ཁན༌ ཀྲག༌པོ༌ ཨིན༌པིན༌།
JDG 20:45 ལུས༌ཁན༌གུན༌ རིམ༌མོན༌ནི༌ བྲག༌ ཡོད༌ས༌ རི༌སྟོང༌ ཆོགས༌ལ༌ ཤོར༌, ཨིས༌ར༌ཨེལ༌པ༌གུན༌ནི༌ ལམ༌ནེ༌ ཤོར༌ཁན༌ མི༌ 5,000 སདས༌ ཡང༌ བེན༌ཡཱ༌མིན༌པ༌གུན༌ལ༌ གི༌དོམ༌ ཚོག༌པ༌ ཏེད༌ཏེ༌ ཁྱེར༌ཏེ༌ 2,000 སདས༌།
JDG 20:46 ཏེ༌ ཞག༌ག༌ བེན༌ཡཱ༌མིན༌པ༌ ར༌འི༌ སྲུལ༌ཁན༌ མག༌མི༌ 25,000 ཤི༌, ཁོང༌ ཚང༌མ༌ སྤོས༌པ༌ ཉམ༌པོ༌ ནོལ༌ཁན༌ ཀྲག༌པོ༌ ཨིན༌པིན༌།
JDG 20:47 ཨིན༌ནའང༌ བེན༌ཡཱ༌མིན༌པ༌ 600 རིམ༌མོན༌ནི༌ བྲག༌ ཡོད༌སའེ༌ ནས༌ས༌ ཤོར༌ ཡང༌ ཏེ༌རུ༌ ཟླ༌ཝ༌ ཞི༌ དུགས༌།
JDG 20:48 ཨིས༌ར༌ཨེལ༌པ༌གུན༌ བེན༌ཡཱ༌མིན༌ ཡུལ༌ཇོངས༌ལ༌ ལོགས༌ཏེ༌ སོང༌ ཡང༌ སེམས༌ཅན༌ ཐེས༌ཏེ༌ གྲོང༌ཁྱེར༌གུན༌ནི༌ ནང༌ང༌ ཡོད༌ཁན༌ ཚང༌མ༌ ར༌འི༌ ཉམ༌པོ༌ སདས༌ ཡང༌ ཅ༌ལག༌ ཚང༌མ༌ ཁྲེས༌ཏོར༌ ཅོས༌། ཁོང༌གུན༌ ཆའ༌ཁན༌ནི༌ གྲོང༌ཁྱེར༌ ཚང༌མ༌ ཁོང༌གུན༌ནི༌ མེའ༌ ཏུགས༌།
JDG 21:1 “ང༌དང༌གུན༌ནི༌ ནང༌ནེ༌ སུ༌ཞིག༌གིའང༌ ང༌དང༌ངི༌ བུ༌མོ༌ བེན༌ཡཱ༌མིན༌པ༌གུན༌ལ༌ ན༌མ༌ མི༌ཏང༌” ཟེར༌ཏེ༌ ཨིས༌ར༌ཨེལ༌པ༌གུན༌ནི༌ མིཟ༌པཧའེ༌ ནང༌ང༌ ནའ༌ ཁུར༌ཏེ༌ ཨིན༌པིན༌།
JDG 21:2 ཁོང༌གུན༌ བེ༌ཐེལ༌ལ༌ སོང༌ཏེ༌ དཀོན༌མཆོག༌གི༌ སྐུན༌དུན༌ལ༌ ཕི༌ཏོག༌ ཚོག༌པ༌ སྲན༌ཏྲེ༌ ངུ༌ཨིན༌ ཞུས༌,
JDG 21:3 “ཨིས༌ར༌ཨེལ༌ལི༌ དཀོན༌མཆོག༌ ཡ༌ཝ༌ལེ༌, ང༌ཞ༌གུན༌ནི༌ཀ༌ འི༌བོ༌ ཅི༌ ཇུངས༌ཏེ༌ ཨིན༌ནོག༌? དི༌རིང༌ ཨིས༌ར༌ཨེལ༌པ༌གུན༌ནི༌ ཕྲོ༌ནེ༌ སྡེ༌ ཅིག༌ སྟོར༌ཏེ༌ ཨིན༌ནོག༌?”
JDG 21:4 ཐོ༌རེ༌ཟུག༌པོ༌ ང༌མོ༌ མི༌གུན༌ནི༌ ཆོད༌ཁྲི༌ཞིག༌ རྩིགས༌ ཡང༌ ཏེ༌ཀ༌ མེའ༌ སྲག༌ཅེས༌སི༌ ཆོད༌པ༌ དང༌ ཐུན༌བྲེལ༌ལི༌ ཆོད༌པ༌ ཕུལས༌།
JDG 21:5 ཏེ༌ནེ༌ ཨིས༌ར༌ཨེལ༌པ༌གུན༌ནི༌ ཏྲིས༌, “ཡ༌ཝའེ༌ སྐུན༌དུན༌ལ༌ ཨིས༌ར༌ཨེལ༌པའེ༌ སྡེ༌ ཚང༌མའེ༌ ནང༌ནེ༌ ཀ༌བོ༌ མ༌ཛོམ༌མ༌ ཨིན༌ནོག༌?” ཅིའ༌ཟེར༌ན༌ ཡ༌ཝའེ༌ སྐུན༌དུན༌ལ༌ མ༌ཛོམ༌ཁན༌གུན༌ སད༌ཨིན༌ ཟེར༌ཏེ༌ ཁོང༌གུན༌ནི༌ མིཟ༌པཧའེ༌ ནང༌ང༌ ནའ༌ ཁུར༌ཏེ༌ ཨིན༌པིན༌།
JDG 21:6 ཏ༌ ཨིས༌ར༌ཨེལ༌པ༌གུན༌ནི༌ ཁོང༌རང༌གུན༌ནི༌ སྤུན༌ བེན༌ཡཱ༌མིན༌པ༌གུན༌ནི༌ ཕིའ༌ ཉ༌ངན༌ ཅོས༌ཏེ༌ ཟེརས༌, “དི༌རིང༌ ཨིས༌ར༌ཨེལ༌པ༌གུན༌ནི༌ ནང༌ནེ༌ མི༌སྡེ༌ ཅིག༌ མེད༌ཁན༌ སོང༌ཏེ༌ ཨིན༌ནོག༌།
JDG 21:7 ཏ༌ ལུས༌ཏེ༌ ཡོད༌ཁན༌ བེན༌ཡཱ༌མིན༌པ༌གུན༌ནི༌ ཕིའ༌ ན༌མ༌ ཀ༌ནེ༌ ཙལ༌ཨིན༌ ཅིའ༌ཟེར༌ན༌ ང༌དང༌གུན༌ནི༌ ང༌དང༌ངི༌ བུ༌མོ༌གུན༌ ཁོང༌གུན༌ལ༌ ན༌མ༌ མི༌ཏང༌ ཟེར༌ཏེ༌ ཡ༌ཝའེ༌ སྐུན༌དུན༌ལ༌ ནའ༌ ཁུར༌ཏེ༌ ཨིན༌ནོག༌།”
JDG 21:8 ཏེ༌ནེ༌ ཁོང༌གུན༌ནི༌ ཏྲིས༌, “ཡ༌ཝའེ༌ སྐུན༌དུན༌ལ༌ ཨིས༌ར༌ཨེལ༌པའེ༌ སྡེ༌ ཚང༌མའེ༌ ནང༌ནེ༌ ཀ༌བོ༌ མ༌ཛོམ༌མ༌ ཨིན༌ནོག༌?” ཀུར༌ ཙུགས༌ཏེ༌ ཛོམས༌ཏེ༌ ཡོད༌ས༌ ཡ༌བེཤ༌ གི༌ལེད༌ནེ༌ སུ༌ཞིག༌གའང༌ མ༌ཡོང༌ཁན༌བོ༌ ཁོང༌གུན༌ལ༌ གྱུས༌སོང༌
JDG 21:9 ཅིའ༌ཟེར༌ན༌ མི༌ རྩིས༌ ཏང༌ ཟ༌ནེ༌ ཡ༌བེཤ༌ གི༌ལེད༌ནེ༌ སུའང༌ ཏེ༌རུ༌ ཡོངས༌ཏེ༌ མེད༌པིན༌།
JDG 21:10 ཏེ༌བོའེ༌ཕིའ༌ ཛོམས༌ཏེ༌ ཡོད༌ཁན༌གུན༌ནི༌ ཁོང༌གུན༌ནི༌ ཕྲོ༌ནེ༌ ནོལ༌ཁན༌ ཀྲག༌པོ༌ 12,000 ལབ༌ཞ༌ ཏངས༌ཏེ༌ བུ༌མོ༌ དང༌ ཕྲུ༌གུ༌གུན༌ ཐེས༌ཏེ༌ ཡ༌བེཤ༌ གི༌ལེད༌དི༌ ནང༌ང༌ དུག༌ཁན༌གུན༌ ར༌འི༌ ཉམ༌པོ༌ སད༌ཅེས༌ལ༌ ལམ༌ཅུག༌
JDG 21:11 ཡང༌ ཟེརས༌, “ཁྱོ༌ཞ༌གུན༌ནི༌ འི༌བོ༌ ཅོ༌གོས༌, བུ༌ཚ༌ དང༌ ན༌མ༌ ཅོ༌ཁན༌ནི༌ བུ༌མོ༌ ཚང༌མ༌ སོད༌ ཨིན༌ནའང༌ ན༌མ༌ མ༌ཅོ༌ཁན༌ བུ༌མོ༌གུན༌ མ༌སད༌ད༌ སོན༌ཏེའ༌ བོར༌།”
JDG 21:12 ཁོང༌གུན༌ལ༌ ཡ༌བེཤ༌ གི༌ལེད༌དི༌ ནང༌ང༌ དུག༌ཁན༌གུན༌ནི༌ ཕྲོའ༌ བུ༌ཚ༌ ཉམ༌པོ༌ ལུས༌བྲེལ༌ མ༌ཅོ༌ཁན༌ནི༌ ན༌ཆུང༌ 400 ཐོབ༌ ཡང༌ ཁོང༌གུན༌ནི༌ ཏེ༌ བུ༌མོ༌གུན༌ ཀེ༌ནན༌ ཡུལ༌ཇོངས༌སི༌ ཤི༌ལོཧའེ༌ ནང༌ང༌ ཀུར༌ ཙུགས༌ཏེ༌ དུགས༌ས༌ ཁྲིད༌ཏེ༌ ཁྱོངས༌།
JDG 21:13 ཏེ༌རུ༌ ཛོམས༌ཏེ༌ ཡོད༌ཁན༌ ཚང༌མའེ༌ རིམ༌མོན༌ནི༌ བྲག༌གི༌ ནས༌སའ༌ བེན༌ཡཱ༌མིན༌པ༌གུན༌ལ༌ ཞི༌དེ༌ ཐུན༌བྲེལ༌ ཅོ༌ཅེས༌ལ༌ ལོན༌ ཀལས༌།
JDG 21:14 ཏེ༌ནེ༌ བེན༌ཡཱ༌མིན༌པ༌གུན༌ ལོགས༌ཏེ༌ ཡོངས༌ ཡང༌ ཨིས༌ར༌ཨེལ༌པ༌གུན༌ནི༌ ཡ༌བེཤ༌ གི༌ལེད༌ནེ༌ མ༌ སད༌ད༌ ཁྱོང༌ཁན༌ ན༌ཅུང༌གུན༌ ཁོང༌གུན༌ལ༌ ན༌མ༌ ཏངས༌། ཨིན༌ནའང༌ ཁོང༌ ཚང༌མའེ༌ ཕིའ༌ དྲན༌དྲ༌ མ༌སོང༌།
JDG 21:15 ཡ༌ཝའེ༌ ཨིས༌ར༌ཨེལ༌ལི༌ མི༌སྡེ༌གུན༌ནི༌ ནང༌ང༌ པར༌ ཕེའ༌ ཛད༌ པ༌སང༌ ཁོང༌གུན༌ནི༌ བེན༌ཡཱ༌མིན༌པ༌གུན༌ནི༌ ཕིའ༌ ཉ༌ངན༌ ཅོས༌།
JDG 21:16 ཡང༌ ཛོམས༌ཏེ༌ ཡོད༌ཁན༌ནི༌ འུ༌སྐྱོང༌གུན༌ནི༌ ཟེརས༌, “བེན༌ཡཱ༌མིན༌པ༌ བུ༌མོ༌ ཚང༌མ༌ སད༌ པ༌སང༌ ཏ༌ ལུས༌ཁན༌ འི༌ བུ༌ཚ༌གུན༌ནི༌ ཕིའ༌ ང༌དང༌ངི༌ ན༌མ༌ ཀ༌ནེ༌ ཁྱོང༌ཨིན༌?
JDG 21:17 ཨིས༌ར༌ཨེལ༌པའེ༌ མི༌སྡེ༌ ཅིག༌གའང༌ སྟོར༌ མི༌སྟོར༌ཅེས༌ལ༌ བེན༌ཡཱ༌མིན༌པ༌ སོན༌ཏེའ༌ ལུས༌ཁན༌གུན༌ལ༌ པུར༌གྱུད༌ ཡོང༌གོས༌།
JDG 21:18 ‘བེན༌ཡཱ༌མིན༌པ༌གུན༌ལ༌ བུ༌མོ༌ ན༌མ༌ ཏང༌ཁན༌གུན༌ལ༌ ངན༌ ཕོག༌ཤིག༌’ ཟེར༌ཏེ༌ ང༌དང༌ ཨིས༌ར༌ཨེལ༌པ༌གུན༌ནི༌ ནའ༌ ཁུར༌ཏེ༌ ཨིན༌ པ༌སང༌ ང༌དང༌གུན༌ནི༌ ཁོང༌གུན༌ལ༌ ང༌དང༌ངི༌ བུ༌མོ༌གུན༌ ན༌མ༌ ཏང༌ མི༌ཉན༌།
JDG 21:19 ཨིན༌ནའང༌ ལྟོས༌སའང༌, བེ༌ཐེལ༌ལི༌ བྱང༌ ཆོགས༌ ཡང༌ བེ༌ཐེལ༌ནེ༌ ཤེ༌ཀེམ༌མ༌ ཆའ༌ཁན༌ ཤར༌ ཆོགས༌སི༌ ལམ༌ ཡང༌ ལེ༌བོ༌ནཧའེ༌ ལྷོ༌ ཆོགས༌ལ༌ ཡོད༌ཁན༌ ཤི༌ལོཧའེ༌ ནང༌ང༌ ཡ༌ཝའེ༌ ཕིའ༌ ལོ༌ཞུང༌ རྩི༌ཁན༌ གའ༌སྟོན༌ དག༌ས༌ རྩི༌ཨིན༌ ཨིན༌ནོག༌།”
JDG 21:20 ཏེ༌ནེ༌ ཁོང༌གུན༌ནི༌ བེན༌ཡཱ༌མིན༌པ༌གུན༌ལ༌ ལབ༌ཞ༌ ཏངས༌ཏེ༌ ཟེརས༌, “སོང༌ ཡང༌ རྒུན༌ཚས༌གུན༌ནི༌ ནང༌ང༌ ཨིབས༌ཏེ༌ སྲུང༌
JDG 21:21 ཡང༌ ལྟོས༌། ཤི༌ལོཧ༌པ༌ བུ༌མོ༌གུན༌ རྩེས༌སི༌ ནང༌ང༌ ཁག༌ ལེན༌ན༌ལ༌ བིངས༌ཏེ༌ ཡོང༌ང༌ཅིག༌, རྒུན༌ཚས༌སི༌ ནང༌ནེ༌ གྱོགས༌པ༌ བིང༌ཏེ༌ ཁྱོ༌ཞའེ༌ ཤི༌ལོཧ༌པ༌ བུ༌མོ༌ རེ༌རེ༌ ཟུམས༌ཏེ༌ ན༌མ༌ ཅོའ༌ལ༌ ཁྱོང༌ ཡང༌ བེན༌ཡཱ༌མིན༌ནི༌ ས༌ཆ༌ སོང༌།
JDG 21:22 ཀལ༌ཏེས༌ ཁོང༌གུན༌ནི༌ ཨ༌བ༌ ཡ༌ ཨ༌ཅོ༌ནོ༌ ང༌ཞ༌གུན༌ནི༌ཀ༌ སྐྱོན༌རྗོད༌ ཅོའ༌ ཡོང༌ན༌ ང༌ཞའེ༌ ཟེར༌ཨིན༌, ‘ཁོང༌གུན༌ལ༌ རོགས༌ ཅོས༌ཏེ༌ ང༌ཞ༌གུན༌ལ༌ ཐུག༌རྗེ༌ ཛད༌ ཅིའ༌ཟེར༌ན༌ མག༌གི༌ ནང༌ང༌ ང༌ཞའ༌ ཁོང༌ ཚང༌མའེ༌ ཕིའ༌ ན༌མ༌ མ༌ཐོབ༌ ཡང༌ ཁྱོ༌ཞ༌གུན༌ནི༌ རང༌ངི༌ བུ༌མོ༌ ཁོང༌གུན༌ལ༌ ན༌མ༌ མ༌ཏངས༌ པ༌སང༌ ཁྱོ༌ཞའ༌ ནའ༌ ཁུར༌ཁན༌བོ༌ ཅག༌ཅེས༌སི༌ ནང༌ང༌ མ༌གལ༌ལ༌ ཨིན༌ནོག༌།’”
JDG 21:23 ཏེ༌ནེ༌ བེན༌ཡཱ༌མིན༌པ༌གུན༌ནི༌ ལབ༌ཞ༌ ཏང༌ཁན༌ ནང༌ཞིན༌ ཅོས༌, བུ༌མོ༌གུན༌ རྩེ༌ཨིན༌ ཡོད༌ ཟ༌ནེ༌ ཁོང༌ རེ༌རེ༌ བུ༌མོ༌ རེ༌རེ༌ ཟུམས༌ཏེ༌ ན༌མ༌ ཅོའ༌ལ༌ ཁྱོངས༌། ཁོང༌གུན༌ ཁོང༌རང༌གུན༌ལ༌ ནོར༌སྐལ༌ལ༌ ཐོབ༌ཁན༌ནི༌ ས༌ཀྱད༌ལ༌ ལོགས༌ཏེ༌ སོང༌ ཡང༌ གྲོང༌ཁྱེར༌བོ༌ ཡང༌སྐྱར༌ རྩིགས༌ཏེ༌ ཏེ༌རུ༌ ཚུགས༌ཏེ༌ དུགས༌།
JDG 21:24 ཏེ༌ནེ༌ ཨིས༌ར༌ཨེལ༌པ༌གུན༌ ཏེ༌ ནས༌ས༌ནེ༌ ལོགས༌ཏེ༌ ཁང༌པ༌ ནོར༌སྐལ༌ལ༌ ཐོབ༌ཁན༌ནི༌ ས༌ཀྱད༌ ཁོང༌རང༌གུན༌ནི༌ མི༌སྡེ༌ དང༌ མི༌རིགས༌གུན༌ ཡོད༌ས༌ སོང༌།
JDG 21:25 ཏེ༌ ཏུས༌ ཨིས༌ར༌ཨེལ༌པ༌གུན༌ལ༌ གྱལ༌པོ༌ མེད༌པིན༌, ཚང༌མའེ༌ རང༌རང༌ ཐད༌ཁན༌བོ༌ ཅོའད༌པིན༌།
RUT 1:1 ཨིས༌ར༌ཨེལ༌ལི༌ ནང༌ང༌ སྐྱོབ༌ཁན༌ གོ༌ཁྲིད༌གུན༌ནི༌ ཝང༌སྲུལ༌ལི༌ ཏུས༌ མུ༌གེ༌ ཇུང༌, ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌པ༌ མི༌ཞིག༌ ཁོང༌རང༌ངི༌ ན༌མ༌ དང༌ བུ༌ཚ༌ ཉིས༌ཀོ༌ ཁྲིད༌ཏེ༌ མོ༌འབ༌བི༌ ཡུལ༌ལ༌ དུག༌ག༌ལ༌ སོང༌།
RUT 1:2 ཏེ༌ མི༌བོའེ༌ མིང༌ ཨེ༌ལི༌མེ༌ལེག༌ ཨིན༌པིན༌, ཁོའེ༌ ན༌མ༌ ནཱའོ༌མི༌ ཡང༌ མཧ༌ལོན༌ དང༌ ཀི༌ལི༌འོན༌ ཁོའེ༌ བུ༌ཚ༌གུན༌ ཨིན༌པིན༌། ཁོང༌གུན༌ ཡ༌ཧུ༌དཱའེ༌ ཡུལ༌ཇོངས༌སི༌ བེད༌ལེ༌ཧེམ༌ནེ༌ ཨེ༌ཕ༌རེད༌ མིར༌གྱུད༌ནེ༌ ཨིན༌པིན༌ ཡང༌ ཁོང༌གུན༌ མོ༌འབ༌བ༌ སོང༌ཏེ༌ ཏེ༌རུ༌ ཚུགས༌ཏེ༌ དུགས༌།
RUT 1:3 ཏེ༌རུ༌ ནཱའོ༌མི༌ མག༌པ༌ ཨེ༌ལི༌མེ༌ལེག༌ ཤི༌ ཡང༌ ཁོ༌ དང༌ ཁོའེ༌ བུ༌ཚ༌ ཉིས༌ཀོ༌ ལུས༌།
RUT 1:4 བུ༌ཚ༌ ཉིས༌ཀོའེ༌ མོ༌འབ༌མ༌ བུ༌མོ༌ ཨོར༌པཧ༌ ཏང༌ རུཐ༌ ཉམ༌པོ༌ བག༌སྟོན༌ ཅོས༌། ཁོང༌གུན༌ ཧ༌ལམ༌ ལོ༌ རྕུ༌ ཏེ༌རུ༌ དུགས༌ཏེ༌ སྟིང༌ནེ༌,
RUT 1:5 མཧ༌ལོན༌ དང༌ ཀི༌ལི༌འོན༌ ཉིས༌ཀོའང༌ ཤི༌, བུ༌ཚ༌ ཉིས༌ཀོ༌ དང༌ མག༌པ༌ ཤི༌པ༌ ནཱའོ༌མི༌ ཅིག༌པོ༌ ལུས༌།
RUT 1:6 ཏེ༌ནེ༌ ཡ༌ཧུ༌དཱའེ༌ ནང༌ང༌ ཡ༌ཝའེ༌ ཁོང༌རང༌ངི༌ མི༌གུན༌ལ༌ ཅིན༌ལབས༌ སལ༌ཏེ༌ སྟོན༌ཐོག༌ གྱལ༌ལ༌ སལ༌ཁན༌བོ༌ མོ༌འབ༌བི༌ ནང༌ང༌ ནཱའོ༌མིའ༌ ཚོར༌ར༌ཅིག༌ ཁོ༌ དང༌ ཁོའེ༌ བུ༌ཚ༌གུན༌ནི༌ ན༌མ༌ མོ༌འབ༌ནེ༌ བིང༌ཏེ༌ ནཱའོ༌མིའི༌ ཡུལ༌ལ༌ ཆ༌ཅེས༌ གྲལ༌གྲིག༌ ཅོས༌།
RUT 1:7 ནཱའོ༌མི༌ ཁོ༌རང༌ངི༌ བུ༌ཚ༌གུན༌ནི༌ ན༌མ༌ ཁྲིད༌ཏེ༌ ཁོང༌གུན༌ དུག༌ཁན༌ནི༌ ཡུལ༌ནེ༌ བིངས༌ཏེ༌ ཡ༌ཧུ༌དཱ༌ ཆོགས༌ལ༌ ཆ༌སའེ༌ ལམ༌ནེ༌ སོང༌།
RUT 1:8 ཨིན༌ནའང༌ ཁོའེ༌ ཁོ༌རང༌ངི༌ བུ༌ཚ༌གུན༌ནི༌ ན༌མ༌ ཟེརས༌, “ཁྱོ༌ཞའ༌ ལོགས༌ཏེ༌ ཁྱོ༌ཞ༌རང༌ངི༌ ཨ༌མའེ༌ ཁང༌པ༌ སོང༌ཤིག༌། ཁྱོ༌ཞའེ༌ ངའ༌ དང༌ ཤི༌ཁན༌གུན༌ལ༌ བཀའ༌དྲིན༌ སྟན༌ པ༌སང༌ ཡ༌ཝའེ༌ ཁྱོ༌ཞའ༌ ཐུག༌རྗེ༌ ཛད༌ཤིག༌།
RUT 1:9 ཡ༌ཝའེ༌ ཁྱོ༌ཞའ༌ ཡང༌སྐྱར༌ མག༌པ༌ སལ༌ཏེ༌ ཁྱོ༌ཞའ༌ ཁྱོ༌ཞ༌རང༌ངི༌ ཁང༌པའེ༌ ནང༌ང༌ སྲུང༌སྐྱོབ༌ ཛད༌ཤིག༌།” ཏེ༌ནེ༌ ཁོའེ༌ ཁོང༌གུན༌ལ༌ ཇུ༌ ཟེར༌ཏེ༌ པུག༌ ཏངས༌ ཡང༌ ཁོང༌གུན༌ སྲན༌ཏྲེ༌ ངུས༌།
RUT 1:10 བུ༌མོ༌གུན༌ནི༌ ཟེརས༌, “མན༌། ང༌ཞའ༌ ཉེ༌རང༌ ཉམ༌པོ༌ ཉེ༌རང༌ངི༌ མི༌གུན༌ ཡོད༌ས༌ ཡོང༌ཨིན༌།”
RUT 1:11 ཨིན༌ནའང༌ ནཱའོ༌མིའི༌ ལན༌ཏངས༌ “ངའེ༌ བུ༌མོ༌གུན༌, ཁང༌པའ༌ ལོགས༌ཏེ༌ སོང༌། ཁྱོ༌ཞའ༌ ང༌ ཉམ༌པོ༌ ཅིའ༌ ཆ༌ཉིན༌རག༌? ཁྱོ༌ཞའེ༌ བག༌སྟོན༌ ཅོ༌ཉན༌ཅེས༌ལ༌ ཅི༌ ང༌ ཞན༌ཡང༌ བུ༌ཚ༌ ཇོར༌ཨིན༌ན༌?
RUT 1:12 མན༌ ངའེ༌ བུ༌མོ༌གུན༌, ཁྱོ༌ཞའ༌ ལོགས༌ཏེ༌ ཁྱོ༌ཞ༌རང༌ངི༌ ཁང༌པ༌ སོང༌, ང༌ ཡང༌སྐྱར༌ བག༌སྟོན༌ ཅོ༌ཅེས༌ལ༌ མ༌ རྒད༌མོ༌ སོང༌ཏེ༌ ཨིན༌ནོག༌། ཀལ༌ཏེས༌ ཏེ༌བོ༌ ཇུངས༌ཏེ༌ ང༌ དི༌རིང༌ ཚན༌ལ༌ ན༌མ༌ ཅོས༌ཏེ༌ བུ༌ཚ༌གུན༌ ཇོར༌ ནའང༌,
RUT 1:13 ཁྱོ༌ཞའ༌ ཁོང༌གུན༌ ལྡན༌ལྡན༌ སྲུངས༌ཏེ༌ དུག༌ཨིན༌ན༌? ཅི༌ ཁྱོ༌ཞའ༌ ཁོང༌གུན༌ནི༌ ཕིའ༌ ན༌མ༌ མ༌ཅོའ༌ དུག༌ཨིན༌ན༌? མན༌, མ༌ནེ༌ མན༌། ངའེ༌ བུ༌མོ༌གུན༌ འི༌བོ༌ ཁྱོ༌ཞ༌གུན༌ནི༌ སང༌ ངའེ༌ ཕིའ༌ མང༌ང༌ སྐྱོ༌མོ༌ ཨིན༌ནོག༌ ཅིའ༌ཟེར༌ན༌ ཡ༌ཝའེ༌ ངའ༌ ཐུག༌རྗེ༌ སྟན༌ན༌ མ༌ཛད༌ད༌ ཨིན༌ནོག༌།”
RUT 1:14 ཡང༌སྐྱར༌ ཁོང༌གུན༌ སྲན༌ཏྲེ༌ ངུས༌། ཏེ༌ནེ༌ ཨོར༌པཧའེ༌ ཁོ༌རང༌ངི༌ མག༌པའེ༌ ཨ༌མ༌ པུག༌ ཏངས༌ ཡང༌ ཇུ༌ ཟེར༌ཏེ༌ ལོགས༌ཏེ༌ སོང༌ ཨིན༌ནའང༌ རུཐ༌ ནཱའོ༌མིའ༌ ཐམས༌ཏེ༌ དུགས༌།
RUT 1:15 ནཱའོ༌མིའི༌ ཁོའ༌ ཟེརས༌, “ལྟོས༌, ཁྱོ༌རང༌ངི༌ མག༌པའེ༌ ནོའེ༌ ན༌མ༌ ཁོ༌རང༌ངི༌ མི༌གུན༌ དང༌ ལྷ༌ལྷ༌མོ༌ གུན༌ནི༌ཀ༌ ལོགས༌ཏེ༌ ཆའ༌ལ༌, ཁྱོ༌རང༌ངའང༌ ཁོ༌ ཉམ༌པོ༌ ལོགས༌ཏེ༌ སོང༌།”
RUT 1:16 ཨིན༌ནའང༌ རུཐ༌ཐི༌ ལན༌ཏངས༌, “ངའ༌ ཉེ༌རང༌ ཕངས༌ཏེ༌ ལོགས༌ཏེ༌ ཆ༌ཅེས༌ལ༌ འུ༌ཙུག༌ མ༌སལ༌། ཉེ༌རང༌ ཀ༌རུ༌ སྐྱོད༌ནའང༌ ང༌ ཆེན༌ ཡང༌ ཉེ༌རང༌ ཀ༌རུ༌ ཞུགས༌ནའང༌ ང༌ དུག༌ཨིན༌། ཉེ༌རང༌ངི༌ མི༌ ངའེ༌ མི༌ ཡང༌ ཉེ༌རང༌ངི༌ དཀོན༌མཆོག༌ ངའེ༌ དཀོན༌མཆོག༌ ཨིན༌།
RUT 1:17 ཉེ༌རང༌ ཀ༌རུ༌ ཀྲོངས༌ན༌ ང༌ ཏེན༌ན༌རུ༌ ཤི༌ཨིན༌ ཡང༌ ཏེན༌ན༌རུ༌ སུབ༌ཨིན༌། ཤི༌ཅེས༌ མ༌སྟོག༌ ཞན༌ ཅི༌ཞིག༌གིའང༌ ང༌དང༌ ཉིས༌ཀོ༌ ཕེ༌ན༌ ཡ༌ཝའེ༌ ངའ༌ སྲན༌ཏྲེ༌ ཆད༌པ༌ སལ༌ཤིག༌།”
RUT 1:18 རུཐ༌ ལོགས༌ཏེ༌ མ༌ཆ༌ རངས༌ཏེ༌ དུག༌ཅེས༌པོ༌ ནཱའོ༌མིའ༌ ཧ༌གོའ༌ཅིག༌ ཁོའེ༌ ཡང༌ ཅའང༌ མ༌ཟེརས༌།
RUT 1:19 ཏེ༌ནེ༌ ཁོང༌ ཉིས༌ཀོའེ༌ བེས༌ གོ༌ཟུགས༌ཏེ༌ བེད༌ལེ༌ཧེམ༌ ཆོགས༌ལ༌ སོང༌། ཁོང༌གུན༌ ཏེ༌རུ༌ ལེབ༌བ༌ཅིག༌ གྲོང༌ཁྱེར༌ གང༌པོ༌ ཁོང༌གུན༌ ལོགས༌ཏེ༌ ཡོང༌ང༌ ཐོང༌ཏེ༌ སྲན༌ཏྲེ༌ ཧ༌ལས༌ ཡང༌ ཟེརས༌, “ཅི༌ འི༌བོ༌ ཏན༌ཏན༌ ནཱའོ༌མི༌ ཨིན༌ནོག༌ག༌?”
RUT 1:20 ནཱའོ༌མི༌ ལན༌ཏངས༌, “ངའ༌ ནཱའོ༌མི༌ མ༌ཟེར༌ར༌ མ༌ར༌ ཟེར༌ཤིག༌ ཅིའ༌ཟེར༌ན༌ ཀུན༌ཝང༌ དཀོན༌མཆོག༌གི༌ ངའེ༌ མི༌ཚེའེ༌ མ༌ སྐྱོ༌མོ༌ ཅོའ༌ཛདས༌།
RUT 1:21 ཆ༌ ཟ༌ནེ༌ ངའེ༌ ལག༌ག༌ ཅི༌ཚང༌མ༌ ཡོད༌པིན༌ ཨིན༌ནའང༌ ཡ༌ཝའེ༌ ངའ༌ ལོགས༌ཏེ༌ ཁང༌པའ༌ ལག༌པ༌ སྟོང༌པ༌ ཁྱོང༌ང༌ ཛདས༌། ངའ༌ ནཱའོ༌མི༌ ཅིའ༌ ཟེར༌ཨིན༌ ནམ༌ ཡ༌ཝའེ༌ ངའ༌ རྡུག༌ངལ༌ སལ༌ཏེ༌ ཀུན༌ཝང༌ དཀོན༌མཆོག༌གི༌ ངའ༌ རྡུག༌པོ༌ ཇུང༌ཅུག༌ག༌ ཛདས༌།”
RUT 1:22 ཏེན༌ན༌ ཟུག༌གི༌ ནཱའོ༌མི༌ མོ༌འབ༌ནེ༌ ལོགས༌ཏེ༌ ཡོངས༌ ཡང༌ ཁོ༌ ཉམ༌པོ༌ ཁོ༌རང༌ངི༌ བུ༌ཚའེ༌ ན༌མ༌ མོ༌འབ༌མ༌ རུཐ༌ ཡོད༌པིན༌། ཁོང༌གུན༌ བེད༌ལེ༌ཧེམ༌མ༌ ལེབ༌ ཟ༌ནེ༌ ནས༌སི༌ སྟོན༌ཐོག༌ རྔ༌ཅེས༌ གོ༌ཟུགས༌ཏེ༌ ཡོད༌པིན༌།
RUT 2:1 ཏ༌ བེད༌ལེ༌ཧེམ༌མི༌ ནང༌ང༌ ཆུག༌པོ༌ རྩི༌ཝ༌ཅན༌ བོ༌འཟ༌ ཟེར༌ཁན༌ མི༌ཞིག༌ ཡོད༌པིན༌, ཁོ༌ ནཱའོ༌མིའི༌ མག༌པ༌ ཨེ༌ལི༌མེ༌ལེག༌གི༌ ཉེན༌གྲུང༌ ཨིན༌པིན༌།
RUT 2:2 ཞག༌ཤིག༌ མོ༌འབ༌པ༌ རུཐ༌ཐི༌ ནཱའོ༌མིའ༌ ཟེརས༌, “ཀའ༌ཀྲིན༌ སྟན༌ཏེ༌ ཏུ༌ཅུག༌ཁན༌ནི༌ མི༌ ཞིང༌ངི༌ཀ༌, ལུས༌ཏེ༌ ཡོད༌ཁན༌ནི༌ སྟོན༌ཐོག༌ ཏུས༌ཏེ༌ ཁྱོང༌ང༌ལ༌ ང༌ ཆ༌ཅུག༌ག༌ ཛད༌།” ནཱའོ༌མིའི༌ ལན༌ཏངས༌, “ངའེ༌ བུ༌མོ༌ སོང༌།”
RUT 2:3 ཏེ༌ནེ༌ རུཐ༌, སྟོན༌ཐོག༌ རྔ༌ཁན༌གུན༌ནི༌ གྱབ༌ནེ༌ སོང༌ཏེ༌ ལུས༌ཁན༌ནི༌ སྟོན༌ཐོག༌ ཏུ༌ཅེས༌ གོ༌ཟུག༌། ཏེ༌ ཞིང༌ ཁོའེ༌ མག༌པའེ༌ ཨ༌བ༌ ཨེ༌ལི༌མེ༌ལེག༌གི༌ ཉེན༌གྲུང༌ བོ༌འཟ༌སི༌ ཨིན༌ཁན༌བོ༌ ཁོའ༌ གྱུས༌མེད༌པིན༌།
RUT 2:4 ཁོ༌ ཏེ༌རུ༌ ཡོད༌ ཟ༌ནེ༌ བོ༌འཟ༌ བེད༌ལེ༌ཧེམ༌ནེ༌ ལེབ༌ ཡང༌ སྟོན༌ཐོག༌ རྔ༌ཁན༌གུན༌ལ༌ ལོན༌སྲུལ༌ཏེ༌ ཟེརས༌, “ཡ༌ཝ༌ དཀོན༌མཆོག༌ ཁྱོ༌ཞའ༌ ཉམ༌པོ༌ ཞུགས༌ཤིག༌།” ཁོང༌གུན༌ནི༌ ལན༌ཏངས༌, “ཡ༌ཝའེ༌ ཉེ༌རང༌ང༌ ཅིན༌ལབས༌ སལ༌ཤིག༌།”
RUT 2:5 ཏེ༌ནེ༌ བོ༌འཟ༌སི༌ ཞིང༌ རྔ༌ཁན༌གུན༌ནི༌ ཁག༌ཁུར༌པ༌ བོད༌ཏེ༌ ཏྲིས༌, “འ༌ ན༌ཆུང༌བོ༌ སུའི༌ བུ༌མོ༌ ཨིན༌ནོག༌?”
RUT 2:6 ཁག༌ཁུར༌པ༌བོའེ༌ ལན༌ཏངས༌, “མོ༌འབ༌ནེ༌ ནཱའོ༌མི༌ ལོགས༌ཏེ༌ ཡོང༌ ཟ༌ནེ༌ འི༌ ན༌ཆུང༌བོ༌ ཁོ༌ ཉམ༌པོ༌ ཡོངས༌།
RUT 2:7 ‘ཞིང༌ རྔ༌ཁན༌གུན༌ནི༌ གྱབ༌ནེ༌ སོང༌ཏེ༌ སྟོན༌ཐོག༌ ལུས༌ཁན༌གུན༌ ཏུ༌ཅུག༌ག༌ཛད༌’ ཟེར༌ཏེ༌ ཁོའེ༌ ངའ༌ ཏྲིའ༌རག༌། ཁོ༌ ང༌མོ༌ནེ༌ ཕར༌ལ༌ ལས༌ ཅོ༌ཨིན༌ དུགས༌ཏེ༌ སིལ༌ལི༌ ནང༌ང༌ ངལ༌ སྲིབ༌ཅིག༌ མ༌ནེ༌ མ༌ ཚོས༌།”
RUT 2:8 ཏེ༌ནེ༌ བོ༌འཟ༌སི༌ རུཐ༌ལ༌ ཟེརས༌, “ཉོན༌ ངའེ༌ བུ༌མོ༌, ཁྱོ༌རང༌ སྟོན༌ཐོག༌ ལུས༌ཁན༌ ཏུའ༌ལ༌ ཞན༌མའེ༌ ཞིང༌ངི༌ཀ༌ མ༌ཆ༌, འིན༌ནེ༌ཀ༌ ང༌ཞ༌གུན༌ ཡོད༌ས༌ དུག༌། ངའེ༌ ལས༌ ཅོ༌ཁན༌ ན༌ཆུང༌གུན༌ ཉམ༌པོ༌ དུག༌།
RUT 2:9 བུ༌ཚ༌གུན༌ནི༌ ཞིང༌ངི༌ ཀ༌ཁག༌པོ༌ རྔ༌རུག༌ ལྟོས༌ ཡང༌ ཁོང༌གུན༌ནི༌ སྟིང༌རང༌ནེ༌ ན༌ཆུང༌གུན༌ ཉམ༌པོ༌ སོང༌། ཁྱོ༌རང༌ང༌ ལག༌པ༌ རྩེས༌ཏེ༌ ངན༌པ༌ མི༌ཅོ༌ཅེས༌ལ༌ ངའེ༌ བུ༌ཚ༌གུན༌ལ༌ བཀའ༌ ཏངས༌པིན༌། ཡང༌ ཁྱོ༌རང༌ སྐོམས༌ ཟ༌ནེ༌ ལས༌ ཅོ༌ཁན༌གུན༌ནི༌ སྐངས༌ཁན༌ནི༌ རྫའ༌མེ༌ ནང༌ནེ༌ ཆུ༌ ཕིངས༌ཏེ༌ ཐུང༌།”
RUT 2:10 ཏེ༌ནེ༌ རུཐ༌ ཁོའེ༌ རྐང༌པའེ༌ དུན༌ལ༌ གྱེལ༌ཏེ༌ ཟེརས༌, “ང༌ ཞན༌ཡུལ༌ལི༌ མིའ༌ འི༌ཟམ༌ ཐུག༌རྗེ༌ སྟན༌ན༌ ཛད༌ཏེ༌ ངའེ༌ ཉེ༌རང༌ང༌ ཕིའ༌ ཅི༌ ཅོས༌?”
RUT 2:11 བོ༌འཟ༌སི༌ ལན༌ཏངས༌, “ཁྱོ༌རང༌ངི༌ མག༌པ༌ ཀྲོངས༌པ༌ ནེ༌ ཕར༌ལ༌ ཁྱོ༌རང༌ངི༌ རང༌ངི༌ མག༌པའེ༌ ཨ༌མའེ༌ ཕིའ༌ ཅོ༌ཁན༌ ཚང༌མ༌ ངའ༌ གྱུས༌སོང༌, ཁྱོ༌རང༌ རང༌ངི༌ ཨ༌བ༌, ཨ༌མ༌ དང༌ རང༌ཡུལ༌ ཕངས༌ཏེ༌ འི༌རུ༌ མི༌ མ༌ཤེས༌ཁན༌གུན༌ ཉམ༌པོ༌ དུག༌ག༌ ཡོངས༌།
RUT 2:12 ཁྱོ༌རང༌ངི༌ ཅོས༌ཁན༌ ལས༌གུན༌ནི༌ ཕིའ༌ ཡ༌ཝའེ༌ ཁྱོ༌རང༌ང༌ ཅིན༌ལབས༌ སལ༌ཤིག༌། ཨིས༌ར༌ཨེལ༌པའེ༌ དཀོན༌མཆོག༌ ཡ༌ཝའེ༌ ནང༌ང༌ ཁྱོ༌རང༌ངི༌ སྲུང༌སྐྱོབ༌ ལེན༌ པ༌སང༌ ཁྱོ༌རང༌ང༌ ཁོང༌ངི༌ སོལ༌རས༌ སལ༌ལ༌ ཛད༌ཤིག༌།”
RUT 2:13 ཁོའེ༌ ལན༌ཏངས༌, “སྤོན༌བོ༌ལེ༌, ཉེ༌རང༌ངི༌ ཆོགས༌སྐྱོར༌ ང༌ ཉམ༌པོ༌ ཏ༌རུང༌ངའང༌ ལུས༌ཤིག༌། ངའ༌ ཉེ༌རང༌ངི༌ ལས༌ ཅོ༌ཁན༌ མན༌ནའང༌ ཉེ༌རང༌ངི༌ ངའ༌ ཉམ༌པོ༌ སྤེ༌ར༌ ཟང༌པོ༌ ཏངས༌ཏེ༌ ང༌ ཞི༌དེ༌ སལས༌།”
RUT 2:14 ཁར༌ཇི༌ ཟའ༌ཅེས༌སི༌ ཏུས༌ ལེབ༌བ༌ཅིག༌ བོ༌འཟ༌སི༌ རུཐ༌ལ༌ བོད༌ཏེ༌ ཟེརས༌, “འི༌རུ༌ ཡོང༌ ཡང༌ ཏ༌གི༌ ལེན༌ཏེ༌ རྒུན༌ཆང༌ སྐྱུར༌མོའེ༌ ནང༌ང༌ སྤགས༌ཏེ༌ ཟོ༌།” ཏེ༌ནེ༌ ཁོ༌ སྟོན༌ཐོག༌ རྔོ༌ཁན༌གུན༌ ཉམ༌པོ༌ དུགས༌ ཡང༌ བོ༌འཟ༌སི༌ ཁོའ༌ རྔོ༌ཁན༌ནི༌ གྲུ༌ ཟའ༌ལ༌ ཏངས༌། ཁོ༌ ཟའ༌ ཉན༌ཁན༌བོ༌ ཟོས༌ ཡང༌ ལག༌མ༌ ལུས༌ཁན༌བོ༌ ཐེན༌ཏེ༌ བོརས༌།
RUT 2:15 རུཐ༌ སྟོན༌ཐོག༌ ཏུའ༌ལ༌ ཆའ༌ཅིག༌ བོ༌འཟ༌སི༌ ཁོ༌རང༌ངི༌ མི༌གུན༌ལ༌ ཟེརས༌, “ཁོའེ༌ སྟོན༌ཐོག༌ རྔ༌ཁན༌ནི༌ དུན༌ནེ༌ ཏུ༌ནའང༌ ཁོའ༌ ཅའང༌ མ༌ཟེར༌ཤིག༌།
RUT 2:16 མ༌ཚད༌ ལྡམས༌ཁན༌ནི༌ སྟོན༌ཐོག༌གི༌ ནང༌ནེ༌ ཁག༌རིག༌ བིངས༌ཏེ༌ ཁོའ༌ ཏུ༌ཅེས༌ལ༌ བོར༌ཤིག༌, ཁོའ༌ ཁའ༌ མ༌ སྐྱེའ༌ ཏེ༌ ཚང༌མ༌ ཏུ༌ཅུག༌།”
RUT 2:17 ཏེ༌བོའེ༌ཕིའ༌ རུཐ༌ཐི༌ ཏེ༌རུ༌ ཕི༌ཏོག༌ ཚག༌པ༌ སྟོན༌ཐོག༌ ཏུས༌ ཡང༌ གྲུ༌ ཕིང༌ཅེས༌ལ༌ ཏེ༌གུན༌ རྡུང༌ང༌ཅིག༌ ཧ༌ལམ༌ ཀི༌ལོ༌ རྕུག༌ཤིག༌གི༌ གྲུ༌ བིང༌།
RUT 2:18 ཏེ༌བོ༌ ཁུར༌ཏེ༌ ཁོ༌ གྲོང༌ཁྱེར༌ལ༌ ལོགས༌ཏེ༌ སོང༌ ཡང༌ ཁོ༌རང༌ངི༌ མག༌པའེ༌ ཨ༌མའ༌ སྟནས༌། རྔོ༌ཁན༌ནི༌ གྲུ༌ ཟོས༌ཏེ༌ ལུས༌ཁན༌ ཐེན༌ཏེ༌ བོར༌ཁན༌བོ༌ རུཐ༌ཐི༌ ཁོ༌རང༌ངི༌ མག༌པའེ༌ ཨ༌མའ༌ ཏངས༌།
RUT 2:19 ནཱའོ༌མིའི༌ ཁོའ༌ ཏྲིས༌, “དི༌རིང༌ ཁྱོ༌རང༌ངི༌ སྟོན༌ཐོག༌ ལུས༌ཁན༌ སུའི༌ ཞིང༌ངི༌ཀ༌ ཏུས༌པིན༌? ཁྱོ༌རང༌ངི༌ ཀ༌རུ༌ ལས༌ ཅོས༌པིན༌? ཁྱོ༌རང༌ང༌ ཀའ༌ཀྲིན༌ སྟན༌ཁན༌ མི༌བོའ༌ ཡ༌ཝའེ༌ ཅིན༌ལབས༌ སལ༌ལ༌ ཛད༌ཤིག༌།” ཏེ༌ནེ༌ རུཐ༌ཐི༌ ཁོ༌རང༌ངི༌ མག༌པའེ༌ ཨ༌མའ༌ ཁོའེ༌ སྟོན༌ཐོག༌ ཏུ༌ཁན༌ དག༌པོའེ༌ སྐོར༌ལ༌ ཤདས༌, “དི༌རིང༌ ངའེ༌ ལས༌ ཅོ༌ཁན༌ དག༌པོའེ༌ མིང༌ང༌ བོ༌འཟ༌ ཟེར༌དུག༌།”
RUT 2:20 ནཱའོ༌མིའི༌ ཁོ༌རང༌ངི༌ བུ༌ཚའེ༌ ན༌མ༌ ཟེརས༌, “ཡ༌ཝའེ༌ ཁོའ༌ ཅིན༌ལབས༌ སལ༌ཤིག༌། ཁོའེ༌ ང༌དང༌ སོན༌ཏེའ༌ ཡོད༌ཁན༌ དང༌ ཤི༌ཁན༌ ཚང༌མའ༌ ཐུག༌རྗེ༌ སྟན༌ཏེ༌ ཨིན༌ནོག༌། ཏེ༌ མི༌བོ༌ ཀགས༌པོའེ༌ ཏུས༌ལ༌ ང༌དང༌ངི༌ ནང༌ཚངས༌ལ༌ སྟ༌སྟོག༌ ཅོ༌ཁན༌ ང༌དང༌ངི༌ ཉེན༌གྲུང༌ ཉེ༌མོ༌ཞིག༌ ཨིན༌ནོག༌།”
RUT 2:21 ཏེ༌ནེ༌ རུཐ༌ཐི༌ ཟེརས༌, “ཁོང༌ངི༌ ངའ༌ ཟེར༌ར༌རག༌, ‘ངའེ༌ སྟོན༌ཐོག༌ ཚང༌མ༌ རྔ༌ ཚར༌ཚར༌ ཁྱོ༌རང༌ ངའེ༌ སྟོན༌ཐོག༌ རྔོ༌ཁན༌གུན༌ ཉམ༌པོ༌ དུག༌།’”
RUT 2:22 ནཱའོ༌མི༌ རུཐ༌ལ༌ ཟེརས༌, “ངའེ༌ བུ༌མོ༌, ཁོའེ༌ ཟེར༌ཁན༌བོ༌ ཅོས༌། ཁོའེ༌ ལས༌ ཅོ༌ཁན༌ བུ༌མོ༌གུན༌ ཉམ༌པོ༌ ཁོའེ༌ ཞིང༌ངི༌ཀ༌ དུག༌, ཏེ༌མན༌ན༌ ཞན༌མའེ༌ ཞིང༌ངི༌ཀ༌ ལས༌ ཅོ༌ཁན༌གུན༌ནི༌ ཁྱོ༌རང༌ང༌ ལག༌པ༌ རྩེས༌ཏེ༌ ངན༌པ༌ ཅོ༌སྲིད༌ཅེས༌ ཨིན༌ནོག༌།”
RUT 2:23 ཏེ༌བོའེ༌ཕིའ༌ རུཐ༌ བོ༌འཟ༌སི༌ ཞིང༌ངི༌ཀ༌ བུ༌མོ༌གུན༌ ཉམ༌པོ༌ ཀྲོ༌ནས༌ ཉིས༌ཀོའེ༌ སྟོན༌ཐོག༌ རྔ༌ ཚར༌ཚར༌ སྟོན༌ཐོག༌ ལུས༌ཁན༌གུན༌ ཏུས༌ ཡང༌ ཏེ༌ཏུས༌ གང༌པོ༌ ཁོ༌ ཁོ༌རང༌ངི༌ མག༌པའེ༌ ཨ༌མ༌ ཉམ༌པོ༌ དུགས༌།
RUT 3:1 ཞག༌ཤིག༌ ནཱའོ༌མིའི༌ རུཐ༌ལ༌ ཟེརས༌, “ངའེ༌ བུ༌མོ༌, ཁྱོ༌རང༌ང༌ སྟ༌སྟོག༌ ཅོ༌ཁན༌ ངའེ༌ ཁྱོ༌རང༌ངི༌ ཕིའ༌ མག༌པ༌ ཞིག༌ ཙལ༌གོས༌།
RUT 3:2 བོ༌འཟ༌ ང༌དང༌ངི༌ ཉེན༌གྲུང༌ ཉེ༌མོ༌ ཡང༌ ཁོའེ༌ ཁྱོ༌རང༌ང༌ ལས༌ཅོ༌ཁན༌ བུ༌མོ༌གུན༌ ཉམ༌པོ༌ སྟོན༌ཐོག༌ བུད༌ཁན༌ ཏུ༌ ཅུགས༌ཏེ༌ ཀའ༌ཀྲིན༌ ཅོས༌ཏེ༌ ཨིན༌ནོག༌། དི༌རིང༌ ཚན༌ལ༌ ཁོ༌ ནས༌སི༌ འོངས༌ཅར༌ཨིན༌ ཡུལ༌ཐག༌ག༌ ཡོད༌ཏེ༌ ཨིན༌ནོག༌།
RUT 3:3 ཏ༌ ངའེ༌ ཟེར༌ཁན༌བོ༌ ཅོས༌, ཆུའ༌ ཞུགས༌ཏེ༌ ཏྲི༌ཞིམ༌ ལུག༌ ཡང༌ ཀོས༌ལག༌ ཚང༌མའེ༌སང༌ ལྡེ༌མོ༌བོ༌ གོན༌ཏེ༌ བོ༌འཟ༌ ཡོད༌ས༌ ཡུལ༌ཐག༌ག༌ སོང༌ ཨིན༌ནའང༌ ཁོ༌ ཟའ༌ ཐུང༌ ཚར༌ཚར༌ ཁྱོ༌རང༌ ཏེ༌རུ༌ ཡོད༌ཁན༌བོ༌ གྱུས༌ ཆ༌ མ༌ཅུག༌།
RUT 3:4 ཁོ༌ ཉིད༌ལོག༌ག༌ ཆའ༌ཅིག༌, ཁོ༌ ཉིད༌ལོག༌སའེ༌ ནས༌ས༌བོ༌ སྟན༌པོ༌ ཨིད༌ཏུ༌ ཅོས༌། ཏེ༌ནེ༌ སོང༌ཏེ༌ ཁོ༌ གོན༌ཁན༌ནི༌ མལ༌ཙ༌ རྐང༌པའེ༌ ཀ༌ནེ༌ ཐེན༌ཏེ༌ ཁོའེ༌ རྐང༌པའེ༌ དུན༌ལ༌ ཉལ༌ཏེ༌ དུག༌། ཁོའེ༌ ཁྱོ༌རང༌ང༌ ཅོ༌གོས༌ཤེས༌པོ༌ ཤད༌ཨིན༌།”
RUT 3:5 རུཐ༌ཐི༌ ལན༌ཏངས༌, “ཉེ༌རང༌ངི༌ མོལ༌ཁན༌ ཚང༌མ༌ ངའེ༌ ཅོ༌ཨིན༌།”
RUT 3:6 ཏེ༌ནེ༌ ཁོ༌ ཐུར༌ལ༌ ཡུལ༌ཐག༌ག༌ སོང༌ ཡང༌ ཁོ༌རང༌ངི༌ མག༌པའེ༌ ཨ༌མའེ༌ ལབ༌ཞ༌ ཏང༌ཁན༌བོ༌ ཅོས༌།
RUT 3:7 བོ༌འཟ༌ ཟའ༌ ཐུང༌ ཚར༌ཏེ༌ སེམས༌ ཐད༌པོའེ༌ ནང༌ང༌ ཡོད༌པིན༌། ཏེ༌ནེ༌ ཁོ༌ གྲུའི༌ ལབ༌ཙེ༌ སྤུངས༌ཏེ༌ ཡོད༌སའེ༌ ཇུག༌ག༌ སོང༌ཏེ༌ ཉིད༌ལོགས༌། རུཐ༌ ཀུ༌ལེའ༌ སྐད༌ མ༌ཕིང༌ང༌ སོང༌ཏེ༌ ཁོའེ༌ རྐང༌པའེ༌ ཀ༌ནེ༌ མལ༌ཙ༌ ཐེནས༌ ཡང༌ ཏེ༌ཀ༌ ཉལ༌ཏེ༌ དུགས༌།
RUT 3:8 ཚན༌སྐྱིལ༌ ཞིག༌ག༌ ཧུན༌མེད༌ལ༌ བོ༌འཟ༌སི༌ ཉིད༌ཚད༌ ཡང༌ བུ༌མོ༌ཞིག༌ ཁོའེ༌ རྐང༌པའེ༌ དུན༌ལ༌ ཉིད༌ལོགས༌ཏེ༌ ཡོད༌ཁན༌བོ༌ ཐོང༌ཏེ༌ ཧ༌ལས༌།
RUT 3:9 ཁོའེ༌ ཏྲིས༌, “ཉེ༌རང༌ སུ༌ ཨིན༌།” ཁོའེ༌ ལན༌ཏངས༌, “ང༌ ཉེ༌རང༌ངི༌ ཞབ༌ཤི༌ རུཐ༌ ཨིན༌། ཉེ༌རང༌ ངའེ༌ མག༌པའེ༌ ཉེན༌གྲུང༌ ཉེ༌མོ༌ ཡང༌ ཀགས༌པོའེ༌ ཏུས༌ལ༌ ང༌ཞའེ༌ ནང༌ཚངས༌ལ༌ སྟ༌སྟོག༌ ཅོ༌ཁན༌ ཨིན༌ པ༌སང༌ ཉེ༌རང༌ངི༌ མལ༌ཙ༌ རྐྱངས༌ཏེ༌ ངའ༌ ཀབ༌བ༌ ཛད༌། ”
RUT 3:10 བོ༌འཟ༌སི༌ ཟེརས༌, “ངའེ༌ བུ༌མོ༌, ཡ༌ཝའེ༌ ཁྱོ༌རང༌ང༌ ཅིན༌ལབས༌ སལ༌ཤིག༌། ཁྱོ༌རང༌ངི༌ ན༌མ༌ ཅོ༌ཅེས༌ལ༌ ཆུག༌པོ༌ ཡ༌ ཉལ༌བ༌ཅན༌ ཞུ༌ནུ༌ བུ༌ཚ༌ མ༌ ཙལ༌ལ༌ ང༌ ཡོད༌ས༌ ཡོངས༌ཏེ༌ ཁྱོ༌རང༌ངི༌ སྔུན༌ནི༌ སང༌ དག༌ས༌ མང༌ང༌ རང༌ངི༌ ནང༌ཚངས༌སི༌ ཕིའ༌ དད༌ སྟན༌ཏེ༌ ཨིན༌ནོག༌།
RUT 3:11 ཏ༌ ཚེར༌ མ༌ཚེར༌ ངའེ༌ བུ༌མོ༌, ཁྱོ༌རང༌ངི༌ ཟེར༌ཁན༌ ཚང༌མ༌ ངའེ༌ ཅོ༌ཨིན༌། ཁྱོ༌རང༌ སྕོད༌ལམ༌ ཟང༌པོ༌ཅན༌ནི༌ བུ༌མོ༌ ཨིན༌ཁན༌བོ༌ གྲོང༌ཁྱེར༌རི༌ མི༌ ཚང༌མ༌ གྱུས༌ ཨིན༌ནོག༌།
RUT 3:12 ང༌ ཁྱོ༌རང༌ངི༌ མག༌པའེ༌ ཉེན༌གྲུང༌ ཉེ༌མོ༌ ཨིན༌ཁན༌བོ༌ ཀྲང༌པོ༌ ཨིན༌ནོག༌ ཨིན༌ནའང༌ ངའེ༌ སང༌ མང༌ང༌ ཁྱོ༌རང༌ང༌ ཉེ༌མོ༌ ཉེན༌གྲུང༌ ཞན༌ མི༌ཞིག༌ ཡོད༌།
RUT 3:13 དི༌རིང༌ ཚན༌བོ༌ འི༌རུ༌ དུག༌ ཡང༌ ང༌མོ༌ ངའེ༌ ཁོའ༌ སྤེ༌ར༌ ཏངས༌ཏེ༌ ཏྲི༌ཨིན༌ ཀལ༌ཏེས༌ ཁོའེ༌ ཁྱོ༌རང༌ང༌ སྟ༌སྟོག༌ ཅོ༌ཅེས༌སི༌ ཁག༌པོ༌ ལེན༌ན༌ གྱལ༌ལ༌ རག༌ ཨིན༌ནའང༌ ཁོ༌ ཏེ༌བོ༌ ཅོའ༌ ཐད༌ད༌ མེད༌ན༌ ཏེ༌ནེ༌ ཡ༌ཝ༌ སོན༌པོའེ༌ ཚན༌ནི༌ ནང༌ང༌ ངའེ༌ ཏེ༌ ཁག༌པོ༌ ལེན༌ཨིན༌། ཏ༌ ང༌མོ༌ ཚོག༌པ༌ འི༌རུ༌ ཉིད༌ལོགས༌ཏེ༌ དུག༌།”
RUT 3:14 ཏེ༌ནེ༌ རུཐ༌ བོ༌འཟ༌སི༌ རྐང༌པའེ༌ དུན༌ལ༌ ང༌མོ༌ ཚོག༌པ༌ ཉལ༌ཏེ༌ དུགས༌ ཨིན༌ནའང༌ ནམ༌ ལངས༌ཏེ༌ མི༌ངོ༌ཤེས༌སི༌སང༌ སྔུན༌ལ༌ ཁོ༌ ལངས༌ཏེ༌ སོང༌ ཅིའ༌ཟེར༌ན༌ བོ༌འཟ༌སི༌ ཟེར༌ཏེ༌ ཨིན༌པིན༌ “འི༌ ཡུལ༌ཐག༌ག༌ བུ༌མོ༌ ཡོང༌ཁན༌བོ༌ སུའང༌ གྱུས༌ ཆ༌མ༌གོས༌།”
RUT 3:15 བོ༌འཟ༌སི༌ ཁོའ༌ ཟེརས༌, “ཁྱོ༌རང༌ གོན༌ཁན༌ནི༌ ཙ༌ཟར༌བོ༌ ཁྱོངས༌ཏེ༌ ཟུམ༌།” ཁོའེ༌ ཏེ༌ ནང༌ང༌ ཀི༌ལོ༌ 24 ནས༌ ལུགས༌ ཡང༌ བུ༌མོའེ༌ གྱབ༌བ༌ ཀལས༌། ཏེ༌ནེ༌ བོ༌འཟ༌ གྲོང༌ཁྱེར༌ལ༌ ལོགས༌ཏེ༌ སོང༌།
RUT 3:16 རུཐ༌ ལོགས༌ཏེ༌ ཁོ༌རང༌ངི༌ མག༌པའེ༌ ཨ༌མ༌ ཡོད༌ས༌ ལེབ༌བ༌ཅིག༌ ནཱའོ༌མིའི༌ ཁོའ༌ ཏྲིས༌, “ཅི༌ སོང༌, ངའེ༌ བུ༌མོ༌།” བོ༌འཟ༌སི༌ ཁོའ༌ ཟེར༌ཁན༌ ཚང༌མ༌ རུཐ༌ཐི༌ ནཱའོ༌མིའ༌ ཤདས༌
RUT 3:17 ཡང༌ ཟེརས༌, “‘ཁྱོ༌རང༌ངི༌ མག༌པའེ༌ ཨ༌མ༌ ཡོད༌ས༌ ལག༌སྟོང༌ང༌ མ༌ཆའ༌’ ཟེར༌ཨིན༌ ཁོང༌ངི༌ ངའ༌ ནས༌ ཀི༌ལོ༌ 24 ཏངས༌།”
RUT 3:18 ཏེ༌ནེ༌ ནཱའོ༌མིའི༌ ཁོའ༌ ཟེརས༌, “ངའེ༌ བུ༌མོ༌, ཟོད༌པ༌ ཉམ༌པོ༌ ཅི༌ ཆ༌རུག༌ ལྟོས༌། འི༌ ནས༌ལུག༌པོ༌ དི༌རིང༌ སེལ༌ཏེ༌ མན༌ནེ༌ ཁོ༌ ངལ༌ མི༌ཚོ༌།”
RUT 4:1 བོ༌འཟ༌ གྲོང༌ཁྱེར༌རི༌ གྱས༌སྒོའེ༌ཀ༌ སོང༌ཏེ༌ དུགས༌། རུཐ༌ལ༌ ཤད༌ཁན༌ནི༌ ནཱའོ༌མིའི༌ མག༌པའེ༌ ཉེན༌གྲུང༌ ཉེ༌མོ༌ ཏེ༌རུ༌ ཡོང༌ང༌ཅིག༌ བོ༌འཟ༌སི༌ ཁོའ༌ ཟེརས༌, “འི༌ཀ༌ ཡོངས༌ཏེ༌ སའེ༌ཀ༌ དུག༌, ང༌ ཁྱོ༌རང༌ ཉམ༌པོ༌ སྤེ༌ར༌ ཏང༌གོ༌ཤེས༌ ཡོད༌།” ཁོང༌གུན༌ སའི༌ཀ༌ དུགས༌།
RUT 4:2 ཏེ༌ནེ༌ བོ༌འཟ༌སི༌ གྲོང༌ཁྱེར༌རི༌ འུ༌སྐྱོང༌ རྕུ༌ ཁོའེ༌ ཞུ༌ཝ༌ ཕུལ༌ཏེ༌ ཡོང༌ཁན༌གུན༌ལ༌ སའེ༌ཀ༌ ཞུགས༌ ཟེརས༌ ཡང༌ ཁོང༌གུན༌ དུགས༌།
RUT 4:3 བོ༌འཟ༌སི༌ ནཱའོ༌མིའི༌ མག༌པའེ༌ ཉེན༌གྲུང༌ ཉེ༌མོ༌བོའ༌ ཟེརས༌, “མོ༌འབ༌ནེ༌ ལོགས༌ཏེ༌ ཡོང༌ཁན༌ནི༌ ནཱའོ༌མིའི༌ ང༌དང༌ངི༌ ཉེན༌གྲུང༌ ཨེ༌ལི༌མེ༌ལེག༌གི༌ ས༌ཀྱད༌པོ༌ ཙོང༌དུག༌།
RUT 4:4 ངའེ༌ ཏེ༌བོའེ༌ སྐོར༌ལ༌ ཤད༌ཏེ༌ ཁྱོ༌རང༌ང༌ ཏེ༌བོ༌ ཉོ༌ཅེས༌སི༌ སྐབས༌ ཏང༌ཨིན༌ སམ༌ ཀལ༌ཏེས༌ ཁྱོ༌རང༌ ཐད༌དད༌ན༌ འི༌ འུ༌སྐྱོང༌གུན༌ནི༌ དུན༌ལ༌ ཏེ༌བོ༌ ཉོ༌གོས༌ ཨིན༌ནའང༌ ཐད༌ད༌ མེད༌ན༌ དག༌ས༌ ངའ༌ ཟེར༌ ཅིའ༌ཟེར༌ན༌ ཁྱོ༌རང༌ངི༌ སྟིང༌ནེ༌ ཏེ༌བོ༌ ཉོ༌ཅེས༌སི༌ ཁག༌ ང༌ ཕོག༌ག༌ནོག༌།” མི༌བོའེ༌ ལན༌ཏངས༌, “ངའེ༌ ཏེ༌བོ༌ ཉོ༌ཨིན༌།”
RUT 4:5 ཏེ༌ནེ༌ བོ༌འཟ༌སི༌ ཁོའ༌ ཟེརས༌, “ཁྱོ༌རང༌ངི༌ ནཱའོ༌མི༌ ཀ༌ནེ༌ ས༌ཀྱད༌ ཉོ༌ན༌, མག༌པ༌ ཀྲོངས༌ཁན༌ མོ༌འབ༌མ༌ རུཐ༌ ཉམ༌པོའང༌ ཁྱོ༌རང༌ངི༌ ན༌མ༌ ཅོ༌གོས༌ ཅིའ༌ཟེར༌ན༌ ཤི༌ཁན༌ནི༌ ས༌ཀྱད༌ དང༌ མིར༌གྱུད༌ ལུས༌ཤེས༌ལ༌ ཁོའ༌ ཕྲུ༌གུ༌ ཇོར༌གོས༌།”
RUT 4:6 ཏེ༌བོ༌ ཚོར༌ར༌ཅིག༌ ཉེན༌གྲུང༌ བུ༌ཚའེ༌ ཟེརས༌, “ཏེ༌ཟུག༌ ཨིན༌ན༌ ངའེ༌ ཏེ༌ ས༌ཀྱད༌པོ༌ མི༌ ཉོ༌ ཅིའ༌ཟེར༌ན༌ ཏེ༌བོ༌ ངའེ༌ ཕྲུ༌གུ༌གུན༌ལ༌ ནོར༌སྐལ༌ལ༌ ཐོབ༌ཅེས༌ མེ༌རག༌། ཉེ༌རང༌ངི༌ ས༌ཀྱད༌པོ༌ ཉོའ༌ ཛད༌, ཏེ༌བོ༌ ངའེ༌ མི༌ཉོ༌།”
RUT 4:7 ༼ཏ༌ ཏེ༌ ཏུས༌ལ༌ ས༌ཀྱད༌ ཉོ༌ཅེས༌ ཡ༌ ཙོང༌ཅེས༌ སྟན༌པོ༌ ཅོ༌ཅེས༌ལ༌, ཅིག༌པོའེ༌ ཞན༌ ཅིག༌པོའ༌ རང༌ངི༌ པ༌བུ༌ ཕུད༌ཏེ༌ ཏང༌ངད༌པིན༌། ཏེན༌ན༌ ཟུག༌གི༌ ཨིས༌ར༌ཨེལ༌ལི༌ ནང༌ང༌ ཁྲིམས༌ ནང༌ཞིན༌ ཚོང༌ལེན༌གུན༌ ཐག༌ ཅད༌དད༌པིན༌།༽
RUT 4:8 ཏེ༌བོའེ༌ཕིའ༌ ཉེན༌གྲུང༌ ཉེ༌མོ༌བོའེ༌ ཁོ༌རང༌ངི༌ པ༌བུ༌ པུད༌ཏེ༌ བོ༌འཟ༌ལ༌ ཏངས༌ ཡང༌ ཟེརས༌, “ཉེ༌རང༌ངི༌ ས༌ཀྱད༌པོ༌ ཉོའ༌ ཛད༌།”
RUT 4:9 ཏེ༌ནེ༌ བོ༌འཟ༌སི༌ ཏེ༌རུ༌ ཡོད༌ཁན༌ འུ༌སྐྱོང༌གུན༌ དང༌ མི༌གུན༌ལ༌ ཟེརས༌, “དི༌རིང༌ ཨེ༌ལི༌མེ༌ལེག༌, ཀི༌ལི༌འོན༌ དང༌ མཧ༌ལོན༌ གུན༌ནི༌ ཨིན༌ཁན༌ ཅི༌ཚང༌མ༌ ནཱའོ༌མིའི༌ ཀ༌ནེ༌ ངའེ༌ ཉོས༌ཁན༌ནི༌ སྤང༌པོ༌ ཁྱོ༌ཞ༌གུན༌ ཨིན༌།
RUT 4:10 ཤི༌ཁན༌ནི༌ ས༌ཀྱད༌ དང༌ མིར༌གྱུད༌ ལུས༌ཤེས༌ ཡང༌ ཁོའེ༌ ཕྲུ༌གུ༌གུན༌ལ༌ ཁོའེ༌ གྱུ༌ནོར༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ མོ༌འབ༌མ༌ མཧ༌ལོན༌ ཀྲོངས༌ཁན༌ནི༌ ན༌མ༌ རུཐ༌ ཉམ༌པོ༌ ངའེ༌ བག༌སྟོན༌ ཅོད༌། འི༌བོའེ༌ སྤང༌པོ༌ དི༌རིང༌ ཁྱོ༌ཞའ༌ ཚང༌མ༌ ཨིན༌ནོག༌།”
RUT 4:11 ཏེ༌ནེ༌ གྱས༌སྒོའེ༌ དུན༌ལ༌ ཡོད༌ཁན༌ནི༌ འུ༌སྐྱོང༌གུན༌ དང༌ མི༌ཚང༌མའེ༌ ལན༌ཏངས༌, “ང༌ཞ༌གུན༌ སྤང༌པོ༌ ཨིན༌། ཡ༌ཝའེ༌ ཉེ༌རང༌ངི༌ ཁང༌པའ༌ ཡོང༌ཁན༌ནི༌ བུ༌མོ༌བོ༌ རེ༌ཅལ༌ དང༌ ལི༌ཡ༌ ཙོགས༌ ཛད༌ཤིག༌, ཁོང༌གུན༌ གྱུད༌ཏེ༌ ཨིས༌ར༌ཨེལ༌ལི༌ མིར༌གྱུད༌ ཚང༌མ༌ ཇུངས༌ཏེ༌ ཨིན༌ནོག༌། ཨེཕ༌ར༌ཐཧ༌ མི༌རིགས༌སི༌ ནང༌ང༌ ཉེ༌རང༌ ཅི༌ས༌ཐོག༌ནེ༌ ཆུག༌པོ༌ གྱུར༌ཏེ༌ བེད༌ལེ༌ཧེམ༌མི༌ ནང༌ང༌ མིང༌ཅན༌ གྱུར༌ཤིག༌།
RUT 4:12 ཡང༌ འི༌ ན༌ཆུང༌ གྱུད༌ཏེ༌ ཡ༌ཝའེ༌ ཉེ༌རང༌ང༌ པུར༌གྱུད༌ སལ༌ཁན༌གུན༌, ཏ༌མར༌ལ༌ སྐྱེ༌ཁན༌ ཡ༌ཧུ༌དཱའེ༌ བུ༌ཚ༌ པེ༌རེཟ༌ ཙོགས༌ ཡོང༌ཤིག༌།”
RUT 4:13 ཏེ༌ནེ༌ བོ༌འཟ༌སི༌ རུཐ༌ ཁོ༌རང༌ངི༌ ཁང༌པའ༌ ཁྱེརས༌ ཡང༌ ཁོ༌ ཁོའེ༌ ན༌མ༌ གྱུར༌། ཁོང༌ ཉིས༌ཀོ༌ ཛོམས༌ཏེ༌ ཡ༌ཝའེ༌ རུཐ༌ སྐྱེ༌ཅེས༌མ༌ཞིག༌ གྱུར༌ཅུག༌ག༌ ཛདས༌ ཡང༌ ཁོའ༌ བུ༌ཚ༌ཞིག༌ ཇོར༌།
RUT 4:14 ཏེ༌ནེ༌ གྲོང༌ཁྱེར༌རི༌ བུ༌མོ༌གུན༌ནི༌ ནཱའོ༌མིའ༌ ཟེརས༌, “ཡ༌ཝའ༌ སྟོད༌པ༌། ཁོང༌ངི༌ ཁྱོ༌རང༌ང༌ གྱུད༌ཟིན༌ སྐྱོབ༌ཁན༌ བུ༌ཚ༌ཞིག༌ སལ༌ལ༌ ཛད༌ཏེ༌ ཨིན༌ནོག༌། ཨིས༌ར༌ཨེལ༌ལི༌ ནང༌ང༌ ཁོ༌ མིང༌ཅན༌ གྱུར༌ཤིག༌།
RUT 4:15 ཁོའེ༌ ཉེ༌རང༌ངི༌ མི༌ཚེ༌ སོས༌ཏེ༌ རྒད༌པོའེ༌ ཏུས༌ལ༌ ཉེ༌རང༌ང༌ སྟ༌སྟོག༌ ཅོ༌ཨིན༌ ཅིའ༌ཟེར༌ན༌ བུ༌ཚ༌ རྡུན༌ནི༌ སང༌ མང༌ང༌ ཉེ༌རང༌ང༌ ཅེས༌པ༌ ཅོ༌ཁན༌ ཉེ༌རང༌ངི༌ བུ༌ཚའེ༌ ན༌མའ༌ ཏེ༌ བུ༌ཚ༌ ཇོར༌ཏེ༌ ཨིན༌ནོག༌།”
RUT 4:16 ཏེ༌ནེ༌ ནཱའོ༌མིའི༌ ཕྲུ༌གུ༌བོ༌ པང༌ང༌ ཁུར༌ཏེ༌ ཁོའ༌ སྟ༌སྟོག༌ ཅོས༌།
RUT 4:17 ཁྱིམ༌ཚེས༌པའེ༌ བུ༌མོ༌གུན༌ནི༌ ཟེརས༌, “ཏ༌ འི༌ བུ༌ཚ༌ ནཱའོ༌མི༌ ཚ༌འོ༌ ཨིན༌ནོག༌།” ཡང༌ ཁོང༌གུན༌ནི༌ ཏེ༌ ཕྲུ༌གུ༌བོའེ༌ མིང༌ང༌ ཨོ༌བེད༌ ཏགས༌། ཁོང༌ ཡེ༌ཤེའེ༌ ཨ༌བ༌ གྱུར༌ ཡང༌ ཡེ༌ཤེའ༌ དཱ༌བིད༌དི༌ ཨ༌བ༌ ཨིན༌ནོག༌།
RUT 4:18 པེ༌རེཟ༌སི༌ པུར༌གྱུད༌གུན༌ནི༌ ཐོ༌ འི༌བོ༌ ཨིན༌། པེ༌རེཟ༌ ཧེཟ༌རོན༌ ནི༌ ཨ༌བ༌,
RUT 4:19 ཧེཟ༌རོན༌ རམ༌མི༌ ཨ༌བ༌, རམ༌ ཨམ༌མི༌ན༌དབ༌བི༌ ཨ༌བ༌,
RUT 4:20 ཨམ༌མི༌ན༌དབ༌ ནཧ༌ཤོན༌ནི༌ ཨ༌བ༌, ནཧ༌ཤོན༌ སལ༌མོན༌ནི༌ ཨ༌བ༌,
RUT 4:21 སལ༌མོན༌ བོ༌འཟ༌སི༌ ཨ༌བ༌, བོ༌འཟ༌ ཨོ༌བེད༌དི༌ ཨ༌བ༌,
RUT 4:22 ཨོ༌བེད༌ ཡེ༌ཤེའེ༌ ཨ༌བ༌, ཡེ༌ཤེ༌ དཱ༌བིད༌དི༌ ཨ༌བ༌ ཨིན༌པིན༌།
DAN 1:1 ཡ༌ཧུ༌དཱ༌པའེ༌ གྱལ༌པོ༌ ཡ༌ཧོའ༌ཀིམ༌མི༌ ཝང༌སྲུལ༌ལི༌ ལོ༌ སུམ༌པའེ༌ ནང༌ང༌ བ༌བེ༌ལོན༌ནི༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཡེ༌རུ༌ཤ༌ལེམ༌མི༌ཀ༌ སྤུང༌གོལ༌ ཅོས༌ཏེ༌ གྱལ༌སའ༌ མག༌མི༌ སྐོར༌ཏེ༌ བོརས༌།
DAN 1:2 ཡ༌ཝའེ༌ ཡ༌ཧུ༌དཱ༌པའེ༌ གྱལ༌པོ༌ ཡ༌ཧོའ༌ཀིམ༌ དང༌ དཀོན༌མཆོག༌གི༌ ཆོད༌ཁང༌ངི༌ ཅ༌ལག༌ ཁ༌ཅིག༌ ཁོའེ༌ ལག༌ག༌ སྟདས༌ ཡང༌ ནེ༌བུ༌ཀཱ༌ནེ༌ཟཱར༌རི༌ ཏེ༌ ཅ༌ལག༌གུན༌ བ༌བེ༌ལོན༌ནི༌ ནང༌ང༌ ཁོ༌རང༌ངི༌ ལྷའེ༌ ཆོད༌ཁང༌ངི༌ བང༌ཛོད༌དི༌ ནང༌ང༌ བོརས༌།
DAN 1:3 ཏེ༌ནེ༌ གྱལ༌པོའེ༌ ཁོ༌རང༌ངི༌ ལོན༌པོ༌ རྩད༌ཅན༌ ཨཤ༌ཕེ༌ནེས༌ལ༌ ཟེརས༌, “ཨིས༌ར༌ཨེལ༌པ༌གུན༌ནི༌ ཕྲོ༌ནེ༌ གྱལ༌གྱུད༌ ཡང༌ ཀྲག༌ཞན༌ ཁ༌ཅིག༌ ཁར༌ལ༌ ཁྱོང༌།
DAN 1:4 ཁོང༌གུན༌ ཞུ༌ནུ༌, ཟུགས༌སི༌ ཐོག༌ནེ༌ སྐྱོན༌ མེད༌ཁན༌, ངམ༌ཤན༌, ཤེས༌རབས༌ དང༌ རིག༌པ༌ཅན༌, ལོབ༌ཇོང༌ གྱལ༌ལ༌ ལེན༌ཁན༌, གྱོགས༌པ༌ ཧ༌གོ༌ཁན༌, གྱལ༌པོའ༌ ཞབས༌ཏོག༌ ཞུ༌ཅེས༌ལ༌ ཇོན༌པོ༌ ཡོང༌གོས༌། ཁོང༌གུན༌ལ༌ བ༌བེ༌ལོན༌པའེ༌ སྤེ༌ཆ༌ སྣ༌ཚོགས༌ སིལ༌ཅེས༌ དང༌ སྐད༌ ལབ༌གོས༌།
DAN 1:5 ཁོང༌གུན༌ནི༌ ཕིའ༌ ཞག༌ཏང༌ ཚད༌ ནང༌ཞིན༌ ཁར༌ཇི༌ དང༌ རྒུན༌ཆང༌ གྱལ༌པོའེ༌ ཁར༌ནེ༌ ཏོང༌ ཡང༌ ལོ༌ སུམ༌ ལོབ༌ཇོང༌ ལེན༌ཏེ༌ སྟིང༌ནེ༌ ཁོང༌གུན༌ནི༌ གྱལ༌པོའ༌ ཞབས༌ཏོག༌ ཞུ༌ཅེས༌ གོ༌ཟུག༌ ཅོ༌ཨིན༌།”
DAN 1:6 ཁོང༌གུན༌ནི༌ ཕྲོའ༌ ཡ༌ཧུ༌དཱ༌པ༌ དཱ༌ནི༌ཨེལ༌, ཧ༌ན༌ནཱི༌ཡཱ༌, མི༌ཤཱེལ༌ དང༌ ཨ༌ཟར༌ཡཱ༌ གུན༌ ཡོད༌པིན༌།
DAN 1:7 གྱལ༌པོའེ༌ ལོན༌པོ༌ རྩད༌ཅན༌ནི༌ ཏེ༌ ཁྱོག༌ཏོང༌གུན༌ནི༌ མིང༌ སྤོས༌ཏེ༌ དཱ༌ནི༌ཨེལ༌ལ༌ བེལ༌ཏེ༌ཤ༌ཟར༌, ཧ༌ན༌ནཱི༌ཡཱ༌ ཤཱད༌རག༌, མི༌ཤཱེལ༌ལ༌ མེ༌ཤཱག༌ དང༌ ཨ༌ཟར༌ཡཱ༌ ཨ༌བེད༌ནི༌གོ༌ ཏགས༌།
DAN 1:8 ཨིན༌ནའང༌ དཱ༌ནི༌ཨེལ༌ལི༌ གྱལ༌པོའེ༌ ཟན༌ དང༌ རྒུན༌ཆང༌ ཐུངས༌ཏེ༌ ཁོ༌རང༌ ཚི༌ཏུ༌ མི༌ཅོ༌ཅེས༌ སྟན༌པོ༌ ཐག༌ཅདས༌ ཡང༌ ཏེ༌ ཚི༌ཏུ༌ ཅོ༌ཁན༌ནི༌ ཟན༌ ཡང༌ རྒུན༌ཆང༌ མི༌ཐུང༌ཅེས༌ལ༌ ཁོའ༌ གོངས༌པ༌ སལ༌ ཟེར༌ཏེ༌ ཁོའེ༌ ལོན༌པོ༌ རྩད༌ཅན༌ལ༌ ཞུ༌ཝ༌ ཕུལས༌།
DAN 1:9 ཡང༌ དཀོན༌མཆོག༌གི༌ ཏེ༌ ལོན༌པོའ༌ དཱ༌ནི༌ཨེལ༌ལི༌ཀ༌ སྙིང༌རྗེ༌ སྐྱེས༌ཏེ༌ ཆོགས༌སྐྱོར༌ ཅོ༌ཅུག༌ག༌ ཛདས༌,
DAN 1:10 ཨིན༌ནའང༌ ལོན༌པོའེ༌ དཱ༌ནི༌ཨེལ༌ལ༌ ཟེརས༌, “ཁྱོ༌ཞའ༌ འི༌གུན༌ ཟའ༌ དང༌ ཐུང༌ ཅུག༌ཅེས༌ལ༌ ངའ༌ བཀའ༌ ཏང༌ཁན༌ ངའེ༌ གཙོ༌བོ༌ གྱལ༌པོའ༌ ངའ༌ ཇིགས༌ས༌ རག༌, ཅིའ༌ཟེར༌ན༌ གྱལ༌པོའེ༌ ཁྱོ༌ཞའ༌ དང༌ ལོ༌ ཅིག༌པོའེ༌ ཞན༌ ཞུ༌ནུ༌གུན༌ནི༌ སང༌ ཁྱོ༌ཞའ༌ རིད༌པ༌ ཐོང༌ན༌, ཁོང༌ངི༌ ང༌ ཆད༌པ༌ སལ༌ཏེ༌ ངའེ༌ གོ༌ ཅད༌ཅུག༌ ཨིན༌།”
DAN 1:11 ཏེ༌ནེ༌ ལོན༌པོ༌ རྩད༌ཅན༌ནི༌ དཱ༌ནི༌ཨེལ༌, ཧ༌ན༌ནཱི༌ཡཱ༌, མི༌ཤཱེལ༌, དང༌ ཨ༌ཟར༌ཡཱ༌ སྲུང༌ང༌ སྐོས༌ཁན༌ནི༌ མི༌བོའ༌ དཱ༌ནི༌ཨེལ༌ལི༌ ཟེརས༌,
DAN 1:12 “ཞག༌པོ༌ རྕུ༌, ང༌ཞའ༌ ཆུ༌ དང༌ ཚོད༌མ༌ ཟའ༌ལ༌ ཏངས༌ཏེ༌ ལྟའ༌ ཛད༌།
DAN 1:13 ཞག༌པོ༌ རྕུའི༌ སྟིང༌ནེ༌ གྱལ༌པོའེ༌ ཁར༌ཇི༌ ཟའ༌ཁན༌ནི༌ ཞུ༌ནུ༌གུན༌ ཉམ༌པོ༌ ང༌ཞའ༌ ལྡུར༌ར༌ ཛད༌, ཏེ༌ནེ༌ ཉེ༌རང༌ང༌ ཐོང༌ཁན༌ ནང༌ཞིན༌ ཐག༌ཅད༌ད༌ ཛད༌།”
DAN 1:14 ཁོའེ༌ ཏེ༌བོའ༌ ཁའ༌ཆམས༌ཏེ༌ ཞག༌པོ༌ རྕུ༌ སྟག༌ཅད༌ ཅོས༌།
DAN 1:15 ཞག༌པོ༌ རྕུའི༌ སྟིང༌ནེ༌ ཁོང༌གུན༌ནི༌ ཟུགས༌པོ༌, གྱལ༌པོའེ༌ ཁར༌ཇི༌ ཟའ༌ཁན༌ནི༌ ཞུ༌ནུ༌གུན༌ནི༌ སང༌ མང༌ང༌ ཁྲངས༌པོ༌ དང༌ ཤེད༌ཅན༌ ཐོང༌ངད༌པིན༌།
DAN 1:16 ཏེ༌ནེ༌ སྲུང༌ཁན༌ནི༌ མི༌བོའེ༌ ཁོང༌གུན༌ལ༌ གྱལ༌པོའེ༌ ཁར༌ཇི༌ དང༌ རྒུན༌ཆང༌ གུན༌ནི༌ ཚབས༌ལ༌ ཁོང༌གུན༌ལ༌ ཚོད༌མ༌ ཟའ༌ལ༌ ཏངས༌།
DAN 1:17 དཀོན༌མཆོག༌གི༌ ཁོང༌ ཞི༌ཀོའ༌ སྤེ༌ཆ༌ སྣ༌ཚོགས༌ ཚང༌མ༌ སིལ༌ཅེས༌སི༌ ཤེས༌རབས༌ དང༌ རིག༌པ༌ སལ༌ལ༌ ཛདས༌། དཱ༌ནི༌ཨེལ༌ལ༌ ཞལ༌ཟིགས༌ དང༌ ཉི༌ལམ༌ སྣ༌ཚོགས༌ ཚང༌མའེ༌ ཏོན༌ ཧ༌གོ༌ཅེས༌སི༌ ཁྱུད༌ སལ༌ལ༌ ཛདས༌།
DAN 1:18 ཏེ༌ནེ༌ ལོབ༌ཇོང༌ངི༌ ལོ༌ སུམ༌ ཚར༌ར༌ཅིག༌ ལོན༌པོ༌ རྩད༌ཅན༌ནི༌ ཁོང༌ ཚང༌མ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ དུན༌ལ༌ ཁྱེརས༌།
DAN 1:19 ཡང༌ གྱལ༌པོའེ༌ ཁོང༌གུན༌ ཉམ༌པོ༌ སྤེ༌ར༌ ཏངས༌། དཱ༌ནི༌ཨེལ༌, ཧ༌ན༌ནཱི༌ཡཱ༌, མི༌ཤཱེལ༌, དང༌ ཨ༌ཟར༌ཡཱ༌ ཞི༌ཀོ༌ ཙོགས༌ ཤེས༌རབས༌ཅན༌ སུའང༌ མ༌བིང༌, ཏེན༌ན༌བོའེ༌ཕིའ༌ ཁོང༌གུན༌ གྱལ༌པོའེ༌ ཞབས༌ཏོག༌གི༌ ལས༌སི༌ ནང༌ང༌ སྐོས༌།
DAN 1:20 ཤེས༌རབས༌ དང༌ རིག༌པ༌ ཚང༌མའེ༌ སྐོར༌ལ༌ གྱལ༌པོའེ༌ ཏྲི༌ཝ༌ ཏྲི༌ཁན༌ནི༌ ལན༌, གྱལ༌སྲིད༌ གང༌པོའེ༌ མོ༌ ཏབ༌ཁན༌ དང༌ ཤི༌ཁན༌ནི༌ སེམས༌ཉིད༌ བོད༌ཁན༌ ཚང༌མའེ༌ སང༌ ཁོང༌གུན༌ནི༌ རྕུ༌ལྡབ༌ གྱལ༌ལ༌ ཏང༌ངད༌པིན༌།
DAN 1:21 ཡང༌ དཱ༌ནི༌ཨེལ༌ གྱལ༌པོ༌ སཱའི༌རས༌སི༌ ཝང༌སྲུལ༌ལི༌ ལོ༌ ཏང༌པོ༌ ཚག༌པ༌ གྱལ༌པོའེ༌ ལས༌གུན༌ ཅོ༌ཨིན༌ ཏེ༌རུ༌ ལུས༌།
DAN 2:1 ནེ༌བུ༌ཀཱ༌ནེ༌ཟཱར༌རི༌ ཝང༌སྲུལ༌ལི༌ ལོ༌ ཉིས༌པའེ༌ ནང༌ང༌ གྱལ༌པོའ༌ མིན༌དྲ༌ ཉི༌ལམ༌ཞིག༌ ཐོང༌ ཀ༌བོའེ༌ ཁོའེ༌ སེམས༌ལ༌ ནགས༌ སྲན༌ཏྲེ༌ སྟན༌པ༌ ཁོའ༌ ཉིད༌ མ༌ ཡོངས༌།
DAN 2:2 ཏེ༌ནེ༌ གྱལ༌པོའེ༌ ཉི༌ལམ༌ ཐོང༌ཁན༌བོ༌ ཤད༌ཅེས༌ལ༌ ཁོ༌རང༌ངི༌ མོ༌ ཏབ༌ཁན༌, ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌མ༌ རྩི༌ཁན༌ དང༌ ཆོས༌ངན༌ ཅོ༌ཁན༌ གུན༌ བོདས༌། ཁོང༌ ཚང༌མ༌ ཡོངས༌ཏེ༌ གྱལ༌པོའེ༌ དུན༌ལ༌ ལངས༌ཏེ༌ དུག༌ག༌ཅིག༌,
DAN 2:3 གྱལ༌པོའེ༌ ཁོང༌གུན༌ལ༌ ཟེརས༌, “ང༌ ངའེ༌ སེམས༌ལ༌ ནགས༌ སྲན༌ཏྲེ༌ སྟན༌ཁན༌ནི༌ ཉི༌ལམ༌ཞིག༌ ཐོང༌, ངའ༌ ཏེ༌བོའེ༌ ཏོན༌བོ༌ ཧ༌གོ༌ ཉིན༌ རག༌།”
DAN 2:4 ཏེ༌ནེ༌ སྐར༌མ༌ རྩི༌ཁན༌གུན༌ནི༌ ཨ༌རམ༌པའེ༌ སྐད༌དི༌ ནང༌ང༌ གྱལ༌པོའ༌ ལན༌ཏངས༌, “གྱལ༌པོ༌ སྐུན༌དུན༌ནི༌ སྐུ༌ཚེ༌ རིང༌ཤིག༌། ཉེ༌རང༌ངི༌ ཞབ༌ཤི༌གུན༌ལ༌ ཉི༌ལམ༌བོ༌ ཤད༌ད༌ ཛད༌ ཏེ༌ནེ༌ ང༌ཞའེ༌ ཏེ༌བོའེ༌ ཏོན༌བོ༌ ཤད༌ཨིན༌།”
DAN 2:5 ཨིན༌ནའང༌ གྱལ༌པོའེ༌ ཁོང༌གུན༌ལ༌ ཟེརས༌, “ཀལ༌ཏེས༌ ཁྱོ༌རང༌གུན༌ནི༌ ངའེ༌ ཉི༌ལམ༌ དང༌ ཏེ༌བོའེ༌ ཏོན༌བོ༌ མ༌ཤད༌ན༌ ངའེ༌ ཁྱོ༌ཞ༌གུན༌ ཏུམ༌པ༌ ཏུམ༌པའེ༌ ནང༌ང༌ ཅད༌ཏེ༌ ཁྱོ༌ཞའེ༌ ཁང༌པ༌ ཤིགས༌ཏེ༌ མེད༌ཁན༌ ཅོ༌ཅེས༌པོ༌ ངའེ༌ ཐག༌ཅད༌ ཏན༌ཏན༌ ཨིན༌།
DAN 2:6 ཨིན༌ནའང༌ ཉི༌ལམ༌ དང༌ ཏེ༌བོའེ༌ ཏོན༌ ཤད༌ཁན༌བོའ༌ ངའེ༌ སོལ༌རས༌ དང༌ རྩི༌ཝ༌ ཀྲག༌པོ༌ ཏང༌ཨིན༌། ཏེ༌བོའེ༌ཕིའ༌ ཉི༌ལམ༌ དང༌ ཏེ༌བོའེ༌ ཏོན༌བོ༌ ངའ༌ ཤོད༌།”
DAN 2:7 ཁོང༌གུན༌ནི༌ ཡང༌སྐྱར༌ ཟེརས༌, “གྱལ༌པོ༌ ཉེ༌རང༌ངི༌ ཞབ༌ཤི༌གུན༌ལ༌ ཉི༌ལམ༌བོ༌ ཤད༌ད༌ ཛད༌ ཏེ༌ནེ༌ ང༌ཞའེ༌ ཏེ༌བོའེ༌ ཏོན༌བོ༌ ཤད༌ཨིན༌།”
DAN 2:8 གྱལ༌པོའེ༌ ལན༌ཏངས༌, “ང༌ གྱུས༌ཡོད༌ ཁྱོ༌ཞ༌གུན༌ནི༌ ཏུས༌ ཕུད༌ཨིན༌ ཨིན༌ནོག༌ ཅིའ༌ཟེར༌ན༌ ངའེ༌ ཟེར༌ཁན༌བོ༌ ཏན༌ཏན༌ ཁྱོ༌ཞའ༌ ཉམ༌པོ༌ ཅོ༌ཅེས༌ ཁྱོ༌ཞའ༌ གྱུས༌ཨིན༌ནོག༌།
DAN 2:9 ཁྱོ༌ཞའེ༌ ཉི༌ལམ༌ མ༌ཤད༌ན༌ ཁྱོ༌ཞའ༌ ཚང༌མ༌ ཆད༌པ༌ ཕོག༌ཅེས༌ ཏན༌ཏན༌ ཨིན༌ནོག༌། ང༌ གོབ༌སྐོར༌ཅེས༌ལ༌ ཁའ༌ ཆམས༌ཏེ༌ ཁྱོ༌ཞའེ༌ ངའེ༌ སམ༌བའེ༌ ནང༌ང༌ གྱུར༌ཇ༌ ཡོང༌ང༌ནོག༌ སམ༌མ༌ རག༌ག༌? ཏ༌ ཉི༌ལམ༌བོ༌ ཤོད༌ ཏེ༌ནེ༌ ཏེ༌བོའེ༌ ཏོན༌ ཤད༌ཁན༌བོའེ༌ཀ༌ ང༌ དེན༌ ཤེས༌ཤེས༌ རག༌།”
DAN 2:10 ཏེ༌ནེ༌ སྐར༌རྩིས༌ ཏང༌ཁན༌གུན༌ནི༌ གྱལ༌པོའ༌ ལན༌ ཏངས༌, “ཇིག༌རྟེན༌ནི༌ ནང༌ང༌ སུའང༌ ཉེ༌རང༌ངི༌ ཉི༌ལམ༌ ཤད༌ མི༌ ཉན༌། ཀྲག༌པོ༌ ཡ༌ ཝང༌ཅན༌ གྱལ༌པོ༌ སུ༌ཞིག༌གིའང༌ ཁོ༌རང༌ངི༌ མོ༌ ཏབ༌ཁན༌ ཡ༌ ཤི༌ཁན༌ནི༌ སེམས༌ཉིད༌ བོད༌ཁན༌ ཡ༌ སྐར༌རྩིས༌ ཏང༌ཁན༌ གུན༌ལ༌ འི༌ ཙོགས༌སི༌ ཏྲི༌ཝ༌ མ༌ནེ༌ མ༌ ཏྲིའ༌ ཡོད༌གྲོ༌།
DAN 2:11 གྱལ༌པོ༌ ཉེ༌རང༌ངི༌ ཏྲི༌ཝ༌བོ༌ མ༌ ཀགས༌པོ༌ཞིག༌ ཨིན༌ནོག༌། ལྷ༌ལྷ༌མོ༌གུན༌ མན༌པ༌ ཞན༌ སུའང༌ ཏེ༌བོ༌ ཤད༌ མི༌ཐུབ༌ ཨིན༌ནའང༌ ལྷ༌ལྷ༌མོ༌གུན༌ མི༌ ཕྲོའ༌ དུག༌ག༌ མ༌ནོག༌།”
DAN 2:12 ཏེ༌བོའེ༌ ཞས༌ཏེ༌ གྱལ༌པོའ༌ མ༌ སྲན༌ཏྲེ༌ སྲོ༌ ཡོངས༌ ཡང༌ ཁོའེ༌ བ༌བེ༌ལོན༌ནི༌ ནང༌ང༌ ཁོང༌གུན༌ ཙོགས༌ ཤེས༌རབ༌ཅན༌ མི༌ ཚང༌མ༌ སད༌ཅེས༌ལ༌ བཀའ༌ ཏངས༌།
DAN 2:13 ཏེ༌ནེ༌ གྱལ༌པོའེ༌ བཀའ༌ ནང༌ཞིན༌ ཤེས༌རབ༌ཅན༌ མི༌ ཚང༌མ༌ སད༌ཅེས༌སི༌ བཀའ༌རྒྱ༌ སྤེལས༌ ཡང༌ མག༌མི༌གུན༌ནི༌ དཱ༌ནི༌ཨེལ༌ དང༌ ཁོའེ༌ ཛ༌འོ༌གུན༌ སད༌ཅེས༌ལ༌ ཙལས༌།
DAN 2:14 གྱལ༌པོ༌ སྲུང༌ཁན༌ནི༌ མག༌མི༌ འུ༌སྐྱོང༌ ཨ༌རི༌འོཅ༌ ཁོང༌གུན༌ སད༌ད༌ ཡོང༌ང༌ཅིག༌ དཱ༌ནི༌ཨེལ༌ལི༌ མ༌ ཤེས༌རབས༌ དང༌ རིག༌པ༌ ཉམ༌པོ༌ ཁོའ༌ ཏྲིས༌,
DAN 2:15 “གྱལ༌པོའེ༌ འི༌ཙོགས༌ སྙིང༌རྗེ༌ མེད༌ཁན༌ནི༌ བཀའ༌ ཅིའ༌ སལ༌ཏེ༌ ཨིན༌ནོག༌?” ཏེ༌ནེ༌ ཨ༌རི༌འོཅ༌ཅི༌ ཁོའ༌ ཏེ༌བོའེ༌ སྐོར༌ ཞིབ༌སལ༌ ཅོས༌ཏེ༌ ཤདས༌།
DAN 2:16 ཏེ༌བོ༌ ཚོར༌ར༌ཅིག༌ དཱ༌ནི༌ཨེལ༌ གྱལ༌པོ༌ ཡོད༌ས༌ སོང༌ཏེ༌ ཁོའེ༌ ཉི༌ལམ༌མི༌ ཏོན༌བོ༌ ཤད༌ཅེས༌ལ༌ ཁོའ༌ ཏུས༌ སལ༌ ཞུས༌།
DAN 2:17 ཏེ༌ནེ༌ དཱ༌ནི༌ཨེལ༌ ལོགས༌ཏེ༌ ཁང༌པ༌ སོང༌ ཡང༌ ཁོ༌རང༌ངི༌ ཛ༌འོ༌ ཧ༌ན༌ནཱི༌ཡཱ༌, མི༌ཤཱེལ༌ དང༌ ཨ༌ཟར༌ཡཱ༌ གུན༌ལ༌ ཏེ༌ ཚང༌མ༌ ཤདས༌
DAN 2:18 ཡང༌ བ༌བེ༌ལོན༌པ༌ ཤེས༌རབས༌ཅན༌ མི༌གུན༌ ཐེས༌ཏེ༌ ཁོང༌ ཚང༌མ༌ མི༌སད༌ཅེས༌ལ༌ ནམ༌ཁའེ༌ དཀོན༌མཆོག༌ག༌ ཁོང༌གུན༌ལ༌ སྙིང༌རྗེ༌ ཛད༌ཏེ༌ ཏེ༌ སང༌ཝའེ༌ ཉི༌ལམ༌ དང༌ ཏེ༌བོའེ༌ ཏོན༌ སྔོན༌ཅུག༌ག༌ ཛད༌ཅེས༌ལ༌ མོས༌ལམ༌ ཞུས༌ ཟེརས༌།
DAN 2:19 ཚན༌ལ༌ ཞལ༌ཟིགས༌སི༌ ནང༌ང༌ དཀོན༌མཆོག༌གི༌ དཱ༌ནི༌ཨེལ༌ལ༌ ཉི༌ལམ༌ དང༌ ཏེ༌བོའེ༌ ཏོན༌བོ༌ སྔོན༌ཅུག༌ག༌ ཛདས༌ ཡང༌ ཁོའེ༌ ནམ༌ཁའེ༌ དཀོན༌མཆོག༌ག༌ སྟོད༌པ༌ ཕུལ༌ཏེ༌ ཟེརས༌,
DAN 2:20 “དཀོན༌མཆོག༌གི༌ ཚན༌ལ༌ ཏུས༌གྱུན༌ནེ༌གྱུན༌ སྟོད༌པ༌ ཕུལ༌, ཤེས༌རབས༌ དང༌ ཁྱུད༌ ཁོང༌ངི༌ ཨིན༌ནོག༌།
DAN 2:21 ཁོང༌ང༌ ནམ༌ལ༌ དང༌ ཏུས༌ གྱུར༌ ཐུབ༌བ༌ནོག༌། གྱལ༌པོ༌གུན༌ སྟག༌ཅེས༌ དང༌ ཕབ༌ཅེས༌ ཁོང༌ངི༌ ཛད༌ད༌ནོག༌། ཁོང༌ངི༌ མི༌ ཁས༌པ༌གུན༌ལ༌ ཤེས༌རབས༌, དང༌ ཧ༌གོའ༌ ཐད༌ཁན༌གུན༌ལ༌ རིག༌པ༌ སལ༌ལ༌ནོག༌།
DAN 2:22 ཁོང༌ངི༌ ཏིང༌ཅན༌ སྦས༌ཏེ༌ བོར༌ཁན༌གུན༌ སྔོན༌ཅུག༌ག༌ ཛད༌ད༌ནོག༌། མུན༌གྲིག༌གི༌ ནང༌ང༌ ཡོད༌ཁན༌གུན༌ ཁོང༌ངི༌ ཁྱེན༌ན༌ ཛད༌ད༌ནོག༌ ཅིའ༌ཞུ༌ན༌ ཁོང༌ངི༌ ནང༌ང༌ འོད༌ ནས༌ཏེ༌ ཡོད༌ཏེ༌ ཨིན༌ནོག༌།
DAN 2:23 ངའེ༌ ཕ༌མེས༌པོ༌གུན༌ནི༌ དཀོན༌མཆོག༌ལེ༌ ཉེ༌རང༌ང༌ ངའེ༌ སྟོད༌པ༌ ཕུལ༌ཏེ༌ ཐུག༌རྗེ༌ཆེ༌ ཞུའད༌། ཉེ༌རང༌ངི༌ ང༌ ཤེས༌རབས༌ དང༌ སྟོབས༌ སལ༌ལ༌ ཛདས༌། ང༌ཞའེ༌ ཏྲིའ༌ ཛད༌ཁན༌བོ༌ ཉེ༌རང༌ངི༌ ངའ༌ སྔོན༌ཅུག༌ག༌ ཛདས༌། ཉེ༌རང༌ངི༌ གྱལ༌པོའེ༌ ཉི༌ལམ༌བོ༌ ང༌ཞའ༌ ཤད༌ད༌ ཛདས༌།”
DAN 2:24 ཏེ༌ནེ༌ དཱ༌ནི༌ཨེལ༌, བ༌བེ༌ལོན༌པ༌ ཤེས༌རབས༌ཅན༌ མི༌གུན༌ སད༌ཅེས༌ལ༌ གྱལ༌པོའེ༌ སྐོས༌ཁན༌ ཨ༌རི༌འོཅ༌ ཡོད༌ས༌ སོང༌ཏེ༌ ཟེརས༌, “བ༌བེ༌ལོན༌པ༌ ཤེས༌རབས༌ཅན༌ མི༌གུན༌ སད༌ད༌ མ༌ཛད༌, ང༌ གྱལ༌པོ༌ ཡོད༌ས༌ ཁྱེར༌ ཡང༌ ངའེ༌ ཁོང༌ངི༌ ཉི༌ལམ༌མི༌ ཏོན༌བོ༌ ཤད༌ཨིན༌།”
DAN 2:25 ཨ༌རི༌འོཅ༌ཅི༌ ཁོ༌ ཏེན༌ན༌མལ༌ལ༌ གྱལ༌པོ༌ ཡོད༌ས༌ ཁྱེརས༌ ཡང༌ ཟེརས༌, “ཡ༌ཧུ༌དཱ༌པ༌ ཟུམས༌ཏེ༌ ཁྱོང༌ཁན༌གུན༌ནི༌ ཕྲོ༌ནེ༌ ངའ༌ ཉེ༌རང༌ངི༌ ཉི༌ལམ༌མི༌ ཏོན༌ ཤད༌ ཉན༌ཁན༌ མི༌ཞིག༌ ཐོབ༌།”
DAN 2:26 གྱལ༌པོའེ༌ བེལ༌ཏེ༌ཤ༌ཟར༌ ཟེར༌ཁན༌ དཱ༌ནི༌ཨེལ༌ལ༌ ཏྲིས༌, “ཁྱོ༌རང༌ང༌ ངའ༌ ཐོང༌ཁན༌ནི༌ ཉི༌ལམ༌བོ༌ ཤད༌ཏེ༌ ཏེ༌བོའེ༌ ཏོན༌ གྱུར༌ ཉན༌ཅེས༌ རག༌ག༌?”
DAN 2:27 དཱ༌ནི༌ཨེལ༌ལི༌ ལན༌ ཏངས༌, “ཤེས༌རབ༌ཅན༌ མི༌ ཡ༌ ཆོས༌ངན༌ ཅོ༌ཁན༌ ཡ༌ སྐར༌མ༌ རྩི༌ཁན༌ ཡ༌ ཤི༌ཁན༌ནི༌ སེམས༌ཉིད༌ བོད༌ཁན༌ སུ༌ཞིག༌གའང༌ གྱལ༌པོའེ༌ ཉི༌ལམ༌མི༌ སང༌ཝ༌བོ༌ ཤད༌ མི༌ཉན༌,
DAN 2:28 ཨིན༌ནའང༌ ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌གི༌ སང༌ཝ༌བོ༌ ཤད༌ ཐུབ༌བ༌ནོག༌། ཁོང༌ངི༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ལ༌ ཡོང༌ཅེས༌ཅན༌ནི༌ ཏུས༌སི༌ སྐོར༌ལ༌ ཤད༌ད༌ ཛད༌ཏེ༌ ཨིན༌ནོག༌། ཉེ༌རང༌ ཉིད༌ལོགས༌ཏེ༌ ཡོད༌ ཟ༌ནེ༌ ཐོང༌ཁན༌ནི༌ ཉི༌ལམ༌བོ༌ ནི༌:”
DAN 2:29 “ཉེ༌རང༌ ཉིད༌ལོགས༌ཏེ༌ ཡོད༌ ཟ༌ནེ༌ ཉེ༌རང༌ངི༌ སམ༌བ༌ ཡོང༌ཅེས༌ཅན༌ནི༌ ཏུས༌སི༌ ཆོགས༌ལ༌ སོང༌ཏེ༌ སང༌ཝ༌ སྔོན༌ཅུག༌ག༌ ཛད༌ཁན༌ དཀོན༌མཆོག༌གི༌ ཉེ༌རང༌ང༌ ཇུང༌ཅེས༌ཅན༌གུན༌ སྟན༌ན༌ ཛད༌ཏེ༌ ཨིན༌ནོག༌།
DAN 2:30 ཞན༌ ཚང༌མའེ༌ སང༌ ཤེས༌རབས༌ཅན༌ ཨིན༌ཅེས༌པོའེ༌ ང༌ འི༌ སང༌ཝའེ༌ ཉི༌ལམ༌མི༌ ཏོན༌ ཤེས༌ཏེ༌ མ༌ནོག༌ ཨིན༌ནའང༌ དཀོན༌མཆོག༌གི༌ ཉེ༌རང༌ང༌ འི༌ ཉི༌ལམ༌ ཐོང༌ཁན༌ནི༌ ཏོན༌ དང༌ ཏེ༌བོའེ༌ སྐོར༌ལ༌ ཉེ༌རང༌ངི༌ སམ༌ཁན༌བོ༌ ཧ༌གོ༌ཅུག༌ག༌ ཛད༌ཅེས༌པོ༌ ཨིན༌ནོག༌།”
DAN 2:31 “ཉི༌ལམ༌མི༌ ནང༌ང༌ གྱལ༌པོ༌ ཉེ༌རང༌, མ༌ ཆེན༌མོ༌, ལྡང༌ཤན༌, མ༌ ཧ༌ལས༌ཤེས༌ དང༌ ཇིགས༌ནང༌ཅན༌ནི༌ སྐུན༌དྲ༌ ཞིག༌གི༌ དུན༌ལ༌ ལངས༌ཏེ༌ དུག༌པིན༌།
DAN 2:32 ཏེ༌ སྐུན༌དྲའེ༌ གོ༌ ཅའང༌ མ༌དྲེས༌ཁན༌ སེར༌རི༌ དྲང༌ དང༌ ལག༌པ༌གུན༌ མུལ༌ལི༌, ཀྲོད༌པ༌ དང༌ རྐང༌པའེ༌ ཤལ༌དིག༌ ཟངས༌སི༌,
DAN 2:33 རྐང༌གུན༌ ལྕགས༌སི༌ ཡང༌ རྐང༌པ༌ ཉིས༌ཀོ༌ ལྕགས༌ དང༌ མར༌ཀ༌ལག༌ དྲེས༌ཁན༌ནི༌ ཅོས༌ཏེ༌ དུག༌པིན༌།
DAN 2:34 ཉེ༌རང༌ངི༌ ཟིགས༌ཨིན༌ ཡོད༌ ཟ༌ནེ༌ མི༌ ལག༌པ༌ནེ༌ མ༌ཅད༌ཁན༌ ཕོ༌ལོངས༌ བུད༌ཏེ༌ མར༌ཀ༌ལག༌ དང༌ ལྕགས༌ལ༌ ཅོ༌ཁན༌ནི༌ སྐུན༌དྲའེ༌ རྐང༌པ༌ ཕོག༌ཏེ༌ ཏེ༌གུན༌ ཁྲེས༌ཏོར༌ ཅོས༌།
DAN 2:35 ཏེ༌ནེ༌ སྐུན༌དྲའ༌ གང༌པོ༌ གྱེལ༌ཏེ༌ སེར༌, མུལ༌ དང༌ ལྕགས༌ ཚང༌མ༌ ཁྲེས༌ཏོར༌ སོང༌ ཡང༌ ཡར༌རི༌ ཏུས༌ལ༌ ཡུལ༌ཐག༌ག༌ ཡོད༌ཁན༌ནི༌ ཕུག༌མ༌ ཙོགས༌ལ༌ ལུངས༌པོའེ༌ ཐག༌རིང༌ང༌ ཁྱེར༌ཏེ༌ ཏེ༌བོ༌ ཡོད༌ཁན༌ནི༌ མལ༌ལའང༌ མ༌ལུས༌ ཨིན༌ནའང༌ སྐུན༌དྲའ༌ ཕོག༌ཁན༌ནི༌ རྡོའ༌བོ༌ རི༌ ཆེན༌མོ༌ཞིག༌ གྱུར༌ཏེ༌ ཇིག༌རྟེན༌ གང༌པོ༌ གང༌།”
DAN 2:36 “ཏེ༌བོ༌ ཉེ༌རང༌ངི༌ ཉི༌ལམ༌བོ༌ ཨིན༌པིན༌, ཏ༌ ངའེ༌ གྱལ༌པོའ༌ ཏེ༌བོའེ༌ ཏོན༌བོ༌ ཤད༌ཨིན༌།
DAN 2:37 གྱལ༌པོ༌ལེ༌, ཉེ༌རང༌ ཚང༌མའེ༌ སང༌ ཀྲག༌པོ༌ གྱལ༌པོ༌, ནམ༌ཁའེ༌ དཀོན༌མཆོག༌གི༌ ཉེ༌རང༌ང༌ གྱལ༌སྲིད༌, ཁྱུད༌, ཝང༌ དང༌ རྩི༌ཝ༌ སལ༌ཏེ༌ ཨིན༌ནོག༌།
DAN 2:38 ཁོང༌ངི༌ ཇིག༌རྟེན༌ གང༌པོའེ༌ མི༌, ནམ༌ཁའེ༌ ཅ༌ དང༌ ནག༌ཚོགས༌སི༌ སེམས༌ཅན༌ ཚང༌མ༌ ཉེ༌རང༌ངི༌ ཆག༌ག༌ སལ༌ལ༌ ཛད༌ཏེ༌ ཉེ༌རང༌ ཏེ༌ ཚང༌མའེ༌ཀ༌ ཝང༌ སྲུལ༌ཁན༌བོ༌ ཛདས༌། ཉེ༌རང༌ སེར༌རི༌ གོ༌ ཨིན༌ནོག༌།”
DAN 2:39 “ཨིན༌ནའང༌ ཉེ༌རང༌ངི༌ སྟིང༌ནེ༌ ཉེ༌རང༌ངི༌ སང༌ འུ༌ཐུག༌ ཡོད༌ཁན༌ གྱལ༌སྲིད༌ ཞག༌གི༌ ཉེ༌རང༌ངི༌ ནས༌ས༌ ལེན༌ཨིན༌། ཏེ༌ སྟིང༌ནེ༌ ཟངས༌སི༌ ཨིན༌ཁན༌ གྱལ༌སྲིད༌ སུམ༌པའེ༌ ཇིག༌རྟེན༌ གང༌པོའེ༌ཀ༌ ཝང༌ སྲུལ༌ཨིན༌།
DAN 2:40 སྟིང༌ཇུག༌པོའེ༌ཀ༌ ལྕགས༌ ཙོགས༌ སྲན༌ཏྲེ༌ ཡོད༌ཁན༌ གྱལ༌སྲིད༌ ཞི༌པ༌ བིང༌ཨིན༌། ལྕགས༌སི༌ ཞན༌ ཅ༌ལག༌གུན༌ ཁྲེས༌ཏོར༌ ཅོའ༌ ཙོགས༌ལ༌ ཏེ༌ གྱལ༌སྲིད༌པོའེ༌ ཞན༌ གྱལ༌སྲིད༌ ཚང༌མ༌ ཅགས༌ཏེ༌ ཁྲེས༌ཏོར༌ ཅོ༌ཨིན༌།
DAN 2:41 ཉེ༌རང༌ངི༌ ཐོང༌ཁན༌ མར༌ཀ༌ལག༌ དང༌ ལྕགས༌ དྲེས༌ཁན༌ནི༌ རྐང༌པ༌གུན༌ ཙོགས༌ལ༌ ཏེ༌ གྱལ༌སྲིད༌པོའ༌ པོ༌བུད༌ཏེ༌ ཅིག༌གྲིལ༌ མེད༌ཁན༌ ཆེན༌ ཨིན༌ནའང༌ མར༌ཀ༌ལག༌ དང༌ ལྕགས༌ དྲེས༌ཁན༌ ཙོགས༌ལ༌ ཏེ༌གུན༌ནི༌ ནང༌ང༌ ལྕགས༌ ཙོགས༌ ཤེད༌ ཙ༌པིག༌ ཡོང༌ཨིན༌།
DAN 2:42 ལྕགས༌ དང༌ མར༌ཀ༌ལག༌ དྲེས༌ཁན༌ ཀང༌པ༌ ཙོགས༌ལ༌ ཏེ༌ གྱལ༌སྲིད༌དི༌ ཁག༌ ཁ༌ཅིག༌ ཤེད༌ཅན༌ ཡང༌ ཁག༌ ཁ༌ཅིག༌ ཆག༌ ཆོག༌ཆོག༌ ཡོང༌ཨིན༌།
DAN 2:43 ལྕགས༌ དང༌ མར༌ཀ༌ལག༌ དྲེས༌ཁན༌ ཙོགས༌ལ༌ ཏེ༌ གྱལ༌སྲིད༌དི༌ ནང༌ང༌ མི༌ སྣ༌ཙོགས༌ དྲེས༌ཏེ༌ ཅིག༌གྲིལ༌ མི༌ ལུས༌ ཀ༌ཟུག༌ ལྕགས༌ དང༌ མར༌ཀ༌ལག༌ གྱལ༌ལ༌ དྲེས༌ས༌ མ༌ནོག༌།”
DAN 2:44 “ཏེ༌ གྱལ༌པོ༌གུན༌ནི༌ ཝང༌སྲུལ༌ལི༌ ཏུས༌ལ༌ ནམ༌ཁའེ༌ དཀོན༌མཆོག༌གི༌, མ༌ནེ༌ ཤིག༌ མི༌ ཉན༌ཅེས༌ ཡ༌ སུའང༌ ང༌ཡོག༌ག༌ ཁྱོང༌ མི༌ཉན༌ཁན༌ གྱལ༌སྲིད༌ཞིག༌ ཙུག༌ག༌ ཛད༌ཨིན༌། ཏེ༌ གྱལ༌སྲིད༌དི༌ ཞན༌ གྱལ༌སྲིད༌གུན༌ མེད༌ཁན༌ ཅོས༌ཏེ༌ ཁོང༌རང༌ངི༌ གྱལ༌སྲིད༌པོ༌ ཏུས༌གྱུན༌ནི༌ཕིའ༌ ཙུག༌ག༌ ཛད༌ཨིན༌།
DAN 2:45 མི༌ ལག༌པ༌ ཉམ༌པོ༌ མ༌ ཅག༌ཁན༌ རིའི༌ རྡོའ༌ བུད༌ཁན༌བོའེ༌ ལྕགས༌, མར༌ཀ༌ལག༌, ཟངས༌, མུལ༌ དང༌ སེར༌ གུན༌ ཁྲེས༌ཏོར༌ ཅོ༌ཁན༌ནི༌ ཏོན༌བོ༌ ཏེ༌བོ༌ ཨིན༌ནོག༌།” “ཀྲག༌པོ༌ དཀོན༌མཆོག༌གི༌ གྱལ༌པོ༌ ཉེ༌རང༌ང༌, མ༌ཡོངས༌པའེ༌ ཏུས༌སི༌ ནང༌ང༌ ཇུང༌ཅེས༌པོ༌ སྟན༌ན༌ ཛད༌ཏེ༌ ཨིན༌ནོག༌། འི༌བོ༌ ཏན༌ཏན༌ལ༌ ཉེ༌རང༌ངི༌ ཉི༌ལམ༌ ཡང༌ ཏེ༌བོའེ༌ ཏོན༌ ཨིད༌ཤེས༌ ཐུབ༌བ༌ ཨིན༌ནོག༌།”
DAN 2:46 ཏེ༌ནེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ དཱ༌ནི༌ཨེལ༌ལི༌ དུན༌ལ༌ གྱེལ༌ཏེ༌ ཁོའ༌ རྩི༌ཝ༌ སྟནས༌ ཡང༌ ཁོའེ༌ ཕིའ༌ ཆོད༌པ༌ དང༌ སྤོས༌ ཁྱོང༌ཅེས༌ལ༌ བཀའ༌ ཏངས༌།
DAN 2:47 གྱལ༌པོའེ༌ དཱ༌ནི༌ཨེལ༌ལ༌ ཟེརས༌, “ཏན༌ཏན༌ ཁྱོ༌རང༌ངི༌ དཀོན༌མཆོག༌ ནི༌, ལྷ༌ལྷ༌མོ༌གུན༌ནི༌ དཀོན༌མཆོག༌ ཡང༌ གྱལ༌པོ༌གུན༌ནི༌ གཙོ༌བོ༌ དང༌ སང༌ཝའེ༌ ནང༌ང༌ ཇུང༌ཅེས༌གུན༌ སྔོན༌ཅུག༌ག༌ ཛད༌ཁན༌ ཞུགས༌ཏེ༌ ཨིན༌ནོག༌ ཅིའ༌ཟེར༌ན༌ ཁྱོ༌རང༌ང༌ འི༌ སང༌ཝ༌བོ༌ ཤད༌ཉན༌།
DAN 2:48 ཏེ༌ནེ༌ གྱལ༌པོའེ༌ དཱ༌ནི༌ཨེལ༌ ཁར༌རི༌ ནང༌ང༌ ཀོ༌ས༌ ཐོན༌པོའེ༌ཀ༌ སྐོས༌ ཡང༌ ཁོའ༌ སོལ༌རས༌ མང༌པོ༌ ཏངས༌། གྱལ༌པོའེ༌ ཁོ༌ བ༌བེ༌ལོན༌ནི༌ ཡུལ༌ཇོངས༌ གང༌པོའེ༌ཀ༌ ཝང༌ སྲུལ༌པ༌ ཅོས༌ ཡང༌ ཁོ༌ ཤེས༌རབ༌ཅན༌ མི༌ ཚང༌མའེ༌ཀ༌ གོ༌སྐྱོང༌ང༌ སྐོས༌།
DAN 2:49 ཏེ༌བོ༌ མན༌པ༌ དཱ༌ནི༌ཨེལ༌ལི༌ ཞུ༌ཝ༌ ནང༌ཞིན༌ གྱལ༌པོའེ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ བ༌བེ༌ལོན༌ནི༌ ཡུལ༌ཇོངས༌སི༌ ཝང༌སྲུལ༌པ༌ ཅོས༌ ཨིན༌ནའང༌ དཱ༌ནི༌ཨེལ༌ ཁར༌རི༌ ནང༌ང༌ དུགས༌ཏེ༌ གྱལ༌པོའེ༌ ཕིའ༌ ལས༌ ཅོའད༌པིན༌།
DAN 3:1 གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ སེར༌རི༌ སྐུན༌དྲ༌ མི༌ཀྲར༌ 27 ཐོན༌པོ༌ ཡང༌ མི༌ཀྲར༌ 3 ཟམ༌ཤིག༌ ཞང༌ཅན༌ ཞང༌ཅུགས༌ཏེ༌ བ༌བེ༌ལོན༌ ཡུལ༌ཇོངས༌སི༌ དུ༌རའེ༌ ཐང༌ངི༌ཀ༌ ལངས༌ཏེ༌ བོརས༌།
DAN 3:2 ཏེ༌ནེ༌ གྱལ༌པོའེ༌ ཀོ༌ས༌ ཐོན༌པོའེ༌ ཀའ༌ལོན༌གུན༌, ཞན༌ སྤོན༌བོ༌གུན༌, ལོན༌པོ༌གུན༌, ཁ༌དའ༌ ཏང༌ཁན༌གུན༌, བང༌ཛོད༌དི༌ ལོན༌པོ༌གུན༌, ཁྲིམ༌སྤོན༌ རྩད༌ཅན༌གུན༌ དང༌ ཞན༌ ཁྲིམ༌སྤོན༌གུན༌, ཡུལ༌ཇོངས༌གུན༌ནི༌ འུ༌སྐྱོང༌ ཚང༌མ༌, ཏེ༌ སྐུན༌དྲའ༌ ཅོལ༌ཅེས༌ གོ༌ཟུག༌ ཅོ༌ཅེས༌སི༌ གའ༌སྟོན༌ རྩི༌ཅེས༌ལ༌ བོདས༌།
DAN 3:3 ཏེ༌བོའེ༌ཕིའ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཞང༌ཅུག༌ཁན༌ནི༌ སྐུན༌དྲའ༌ ཅོལ༌ཅེས༌སི༌ གའ༌སྟོན༌ རྩིའ༌ལ༌ ཝང༌སྲུལ༌པ༌ ཚང༌མ༌ ཛོམས༌ ཡང༌ ཏེ༌བོའེ༌ དུན༌ལ༌ ལངས༌ཏེ༌ དུགས༌།
DAN 3:4 ཏེ༌ནེ༌ གྱལ༌པོའེ༌ ཁྱབ༌གྲགས༌ ཅོ༌ཁན༌བོའེ༌ སྐད༌ ཆེན༌མོའེ༌ ནང༌ང༌ ཟེརས༌, “གྱལ༌ཁམས༌, སྐད༌ དང༌ མི༌ ཚང༌མ༌, གྱལ༌པོའེ༌ བཀའ༌ སལ༌དུག༌,
DAN 3:5 ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ ཕུའ༌ ཚོར༌ར༌ཅིག༌ ཁྱོ༌ཞ༌གུན༌ སའེ༌ཀ༌ གྱེལ༌ཏེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཆག༌ཕུལ༌ གོས༌།
DAN 3:6 ཆག༌ མ༌ ཕུལ༌ཁན༌གུན༌ ཏེན༌ན༌མལ༌ལ༌ མེ༌ ཀྲག༌པོ༌ བར༌ཨིན༌ ཡོད༌ཁན༌ནི༌ དོང༌ངི༌ ནང༌ང༌ ཕང༌ཨིན༌།”
DAN 3:7 ཏེ༌ནེ༌ ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ནི༌ སྐད༌ ཚོར༌ར༌ཅིག༌ གྱལ༌ཁམས༌, སྐད༌ དང༌ མི༌ ཚང༌མ༌ སའེ༌ཀ༌ གྱེལ༌ཏེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཆག༌ཕུལས༌།
DAN 3:8 ཨིན༌ནའང༌ སྐར༌རྩིས༌ ཏང༌ཁན༌ ཁ༌ཅིག༌ གྱལ༌པོའེ༌ཀ༌ སོང༌ཏེ༌ ཡ༌ཧུ༌དཱ༌པ༌གུན༌ནི༌ སྐོར༌ལ༌ མ༌བེབས༌ ཅོས༌།
DAN 3:9 ཁོང༌གུན༌ནི༌ གྱལ༌པོའ༌ ཟེརས༌, “གྱལ༌པོའེ༌ སྐུ༌ཚེ༌ རིང༌ཤིག༌།
DAN 3:10 ཉེ༌རང༌ངི༌ ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ནི༌ སྐད༌ ཚོར༌ར༌ཅིག༌ མི༌ཚང༌མ༌ སའེ༌ཀ༌ གྱེལ༌ཏེ༌ ཉེ༌རང༌ངི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཆག༌ཕུལ༌
DAN 3:11 ཡང༌ ཆག༌ མ༌ ཕུལ༌ཁན༌གུན༌ མེ༌ ཀྲག༌པོ༌ བར༌ཨིན༌ ཡོད༌ཁན༌ནི༌ དོང༌ངི༌ ནང༌ང༌ ཕང༌ཨིན༌ མོལ༌ཏེ༌ བཀའ༌ སལས༌།
DAN 3:12 ཨིན༌ནའང༌ ཉེ༌རང༌ངི༌ བ༌བེ༌ལོན༌ནི༌ ཡུལ༌ཇོངས༌སི༌ ནང༌ང༌ ཝང༌སྲུལ༌པ༌ ཛདས༌ཁན༌ ཡ༌ཧུ༌ད༌པ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ ཉེ༌རང༌ངི༌ མོལ༌ཁན༌བོའ༌ ནང༌སྟག༌ མ༌ཏང༌ང༌, ཉེ༌རང༌ངི༌ ལྷ༌ལྷ༌མོ༌གུན༌ནི༌ ཞབས༌ཏོག༌ མ༌ཞུའ༌ ཡང༌ ཉེ༌རང༌ངི༌ ཞང༌ཅུག༌ཁན༌ སེར༌རི༌ སྐུན༌དྲ༌ ཅོལ༌ཏེ༌ ཆག༌ མ༌ཕུལས༌།”
DAN 3:13 ཏེ༌བོ༌ ཚོར༌ར༌ཅིག༌ གྱལ༌པོའ༌ མ༌སྲན༌ཏྲེ༌ སྲོ༌ ཡོངས༌ ཡང༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ལ༌ བོདས༌ ཡང༌ ཁོང༌གུན༌ ཡོང༌ང༌ཅིག༌
DAN 3:14 གྱལ༌པོའེ༌ ཁོང༌གུན༌ལ༌ ཏྲིས༌, “ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌, ཁྱོ༌ཞའེ༌ ངའེ༌ ལྷ༌ལྷ༌མོ༌གུན༌ནི༌ ཞབས༌ཏོག༌ མ༌ཞུའ༌ ཡང༌ ངའེ༌ ཞང༌ཅུག༌ཁན༌ སེར༌རི༌ སྐུན༌དྲའ༌ ཆག༌ མ༌ཕུལ༌ཁན༌བོ༌ ཀྲང༌པོ༌ ཨིན༌ནོག༌ག༌?
DAN 3:15 ངའེ༌ ཁྱོ༌ཞའ༌ སྐབས༌ ཅིག༌ ཏང༌ཨིན༌ ཏུང༌, ལིང༌བུ༌, སུར༌ན༌, ཏར༌ཅན༌ནི༌ རོལ༌མོ༌, ཧརྦ༌ དང༌ ཞན༌ རོལ༌མོ༌ གུན༌ནི༌ སྐད༌ ཚོར༌ར༌ཅིག༌, སྐུན༌དྲའ༌ ཆག༌ཕུལ༌ཏེ༌ ཅོལ༌ན༌ གྱལ༌ལ༌ ཆེན༌, མ༌ ཅོལ༌ན༌ ངའེ༌ ཁྱོ༌ཞའ༌ ཏེན༌ན༌མལ༌ལ༌ མེ༌ ཀྲག༌པོ༌ བར༌ཨིན༌ ཡོད༌ཁན༌ནི༌ དོང༌ངི༌ ནང༌ང༌ ཕང༌ ཅུག༌ཨིན༌། ཏེ༌ནེ༌ ཁྱོ༌ཞའ༌ ངའེ༌ ལག༌ནེ༌ ཀ༌ ལྷ༌ལྷ༌མོ༌བོ༌ སྐྱོབ༌ ཐུབ༌ཨིན༌?”
DAN 3:16 ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ ལན༌ ཏངས༌, “ཀྱེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ ལེ༌, ང༌ཞའེ༌ ང༌ཞ༌རང༌ སྐྱོན༌མེད༌ སྟན༌ཅེས༌སི༌ རྩོན༌གྲུས༌ མི༌ཅོ༌།
DAN 3:17 ཀལ༌ཏེས༌ ང༌ཞའ༌ མེ༌ ནང༌ང༌ ཕང༌ང༌ ཛད༌ན༌, ང༌ཞའེ༌ ཞབས༌ཏོག༌ ཞུ༌ཁན༌ནི༌ དཀོན༌མཆོག༌གི༌ ང༌ཞའ༌ སྐྱོབ༌ ཐུབ༌ཨིན༌། ཁོང༌ངི༌ ང༌ཞའ༌ ཉེ༌རང༌ངི༌ ལག༌པ༌ནེ༌ སྐྱོབ༌བ༌ ཛད༌ཨིན༌།
DAN 3:18 ཁོང༌ངི༌ སྐྱོབ༌བ༌ མ༌ཛད༌ནའང༌ ཉེ༌རང༌ང༌ འི༌བོ༌ གྱུས༌ ཆ༌གོས༌, ང༌ཞའེ༌ ཉེ༌རང༌ངི༌ ལྷ༌ལྷ༌མོ༌གུན༌ལ༌ ཞབས༌ཏོག༌ ཡ༌ ཉེ༌རང༌ངི༌ ཞང༌ཅུག༌ཁན༌ སེར༌རི༌ སྐུན༌དྲའ༌ མན༌ནེ༌ ཆག༌ མི༌ཕུལ༌།
DAN 3:19 ཏེ༌ནེ༌ གྱལ༌པོའ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ཀ༌ མ༌སྲན༌ཏྲེ༌ སྲོ༌ ཡོངས༌ ཡང༌ ཁོང༌གུན༌ནི༌ ཆོགས༌ལ༌ ཁོའེ༌ སེམས༌ གྱུར༌ཏེ༌ མེ༌བོ༌ རྡུན༌ ལྡབ༌ ཚན༌ཏེ༌ ཅོ༌ཅེས༌ལ༌ ཟེརས༌།
DAN 3:20 གྱལ༌པོའེ༌ ཁོ༌རང༌ངི༌ ཚང༌མའེ༌ སང༌ ཤེད༌ཅན༌ མག༌མི༌ ཁ༌ཅིག༌ག༌ ཁོང༌གུན༌ ལྡམས༌ཏེ༌ ཏེ༌ ནང༌ང༌ ཕང༌ཅེས༌ལ༌ བཀའ༌ ཏངས༌།
DAN 3:21 ཏེ༌ནེ༌ མག༌མི༌གུན༌ནི༌ ཀོས༌, ཀང༌ཙེ༌, ཏི༌བི༌ དང༌ ཞན༌ ཀོས༌ལག༌ གུན༌ གོན༌གོན༌པ༌ ཁོང༌གུན༌ ལྡམས༌ཏེ༌ མེ༌ ནང༌ང༌ ཕངས༌།
DAN 3:22 གྱལ༌པོའ༌ མ༌ སྲན༌ཏྲེ༌ སྲོ༌ ཡོངས༌ཏེ༌ མེ༌བོ༌ ཏེ༌ཟམ༌ ཚན༌ཏེ༌ ཅོ༌ཅེས༌ལ༌ བཀའ༌ ཏངས༌ པ༌སང༌ ཁོང༌གུན༌ མེ༌ ནང༌ང༌ ཕང༌ཁན༌ནི༌ མག༌མི༌གུན༌ མེའ༌ ཞེན༌ཏེ༌ ཤི༌།
DAN 3:23 ཏེ༌ མི༌ སུམ༌ཀོ༌ སྟན༌པོ༌ ལྡམས༌ཏེ༌ ཀྲག༌པོ༌ མེ༌ ནང༌ང༌ ཕངས༌།
DAN 3:24 ཏེ༌ནེ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌ ཧེ༌རཱན༌ སོང༌ཏེ༌ ཆོམས༌ ཡང༌ ཁོ༌རང༌ངི༌ ཁ༌དའ༌ ཏང༌ཁན༌གུན༌ལ༌ ཏྲིས༌, “ང༌དང༌ངི༌ མེ༌ ནང༌ང༌ མི༌ སུམ༌ ལྡམས༌ཏེ༌ མ༌ཕངས༌ པིན༌ན༌?” ཁོང༌གུན༌ནི༌ ལན༌ ཏངས༌, “ཏན༌ཏན༌ ཕངས༌པིན༌ ལེ༌།”
DAN 3:25 གྱལ༌པོའེ༌ ཟེརས༌, “ལྟོས༌སའང༌། མེ༌ ནང༌ང༌ མ༌ལྡམ༌ཁན༌ དང༌ མེ༌ མ༌ཚིག༌ཁན༌ མི༌ ཞི༌ གྲུལ༌ལ༌ལ༌ ཡང༌ ཞི༌པ༌བོ༌ ཕོ༌ཉ༌ ཙོགས༌ཤིག༌ དུག༌།”
DAN 3:26 ཏེ༌ནེ༌ གྱལ༌པོ༌ མེ༌ དོང༌ངི༌ ཁའེ༌ དུན༌ལ༌ སོང༌ཏེ༌ ཟེརས༌, “ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌, དཀོན༌མཆོག༌ ཀུན༌ཝང༌ངི༌ ཞབས༌ཏོག༌པ༌གུན༌ བིང༌ཏེ༌ ཡོང༌།” ཏེ༌ནེ༌ ཁོང༌གུན༌ མེ༌ ནང༌ནེ༌ བིང༌ཏེ༌ ཡོངས༌།
DAN 3:27 ཀོ༌ས༌ ཐོན༌པོའེ༌ ཀའ༌ལོན༌གུན༌, ཞན༌ སྤོན༌བོ༌གུན༌, ལོན༌པོ༌གུན༌, ཁ༌དའ༌ ཏང༌ཁན༌གུན༌, བང༌ཛོད༌དི༌ ལོན༌པོ༌གུན༌, ཁྲིམ༌སྤོན༌ རྩད༌ཅན༌གུན༌, ཁྲིམ༌སྤོན༌གུན༌ དང༌ ཡུལ༌ཇོངས༌གུན༌ནི༌ འུ༌སྐྱོང༌ ཚང༌མ༌ ཁོང༌གུན༌ལ༌ ཁོར༌ཏེ༌ ལྟས༌། མེ༌ ཁོང༌གུན༌ནི༌ ཟུགས༌པོའ༌ ཅའང༌ ནོད༌པ༌ མ༌ཏང༌ང༌ མ༌ཚད༌ སྲའེ༌ སྲལ༌ཉག༌ ཅིག༌ ཡ༌ ཀོས༌ལག༌ མེའ༌ མ༌ཚིག༌ག༌ ཡང༌ ཁོང༌གུན༌ལ༌ ཏུད༌པའེ༌ ཏྲི༌མའང༌ མེད༌པིན༌།
DAN 3:28 གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཟེརས༌, “ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ དཀོན༌མཆོག༌ག༌ སྟོད༌པ༌ ཕུལ༌། ཁོང༌ངི༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛད༌ཏེ༌ ཁོང༌ང༌ ཨིད༌ཤེས༌ ཅོ༌ཁན༌ནི༌ ཁོང༌ངི༌ ཞབས༌ཏོག༌པ༌གུན༌ སྐྱོབ༌བ༌ ཛདས༌། ཁོང༌གུན༌ནི༌ གྱལ༌པོའེ༌ བཀའ༌ ཁའ༌ མ༌ཉན༌ན༌ ཁོ༌རང༌གུན༌ནི༌ དཀོན༌མཆོག༌ མ༌སྟོག༌ ཞན༌ཞིག༌ག༌ ཅོལ༌ལི༌སང༌ ཤི༌ཅེས༌ལ༌ ཐད༌།
DAN 3:29 གྱལ༌ཁམས༌, སྐད༌ དང༌ མི༌ ཚང༌མའེ༌ ཕྲོ༌ནེ༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ནི༌ དཀོན༌མཆོག༌གི༌ གྱབ༌གལ༌ལ༌ ཟེར༌ཁན༌གུན༌ ཏུམ༌པ༌ ཏུམ༌པའེ༌ ནང༌ང༌ ཅད༌ཏེ༌ ཁོང༌གུན༌ནི༌ ཁང༌པ༌ ཤིགས༌ཏེ༌ མེད༌ཁན༌ ཅོ༌ཅེས༌ལ༌ ངའེ༌ བཀའ༌ ཏང༌ངད༌ ཅིའ༌ཟེར༌ན༌ ཞན༌ ལྷ༌ལྷ༌མོ༌ སུ༌ཞིག༌གའང༌ འི༌ ཙོགས༌ལ༌ སྐྱོབ༌ མི༌ཉན༌།”
DAN 3:30 ཏེ༌ནེ༌ གྱལ༌པོའེ༌ བ༌བེ༌ལོན༌ནི༌ ཡུལ༌ཇོངས༌སི༌ ནང༌ང༌ ཤཱད༌རག༌, མེ༌ཤཱག༌ དང༌ ཨ༌བེད༌ནི༌གོ༌ གུན༌ ཀོ༌ས༌ ཆེན༌མོའེ༌ཀ༌ སྟགས༌།
DAN 4:1 གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཇིག༌རྟེན༌ གང༌པོའེ༌ གྱལ༌ཁམས༌, སྐད༌ དང༌ མི༌ ཚང༌མ༌ལ༌ འི༌ ལོན༌བོ༌ ཀལས༌, “ཞི༌དེ༌ དང༌ ཡར༌གྱས༌ ཇུང༌ཤིག༌།
DAN 4:2 ཀུན༌ཝང༌ དཀོན༌མཆོག༌གི༌ ངའ༌ ཧ༌ལས༌ཤེས༌སི༌ ལྟས༌ དང༌ སྟགས༌ སྟན༌ན༌ ཛད༌ཁན༌བོ༌ ཁྱོ༌ཞའ༌ ཤད༌ ཉིན༌རག༌།
DAN 4:3 ཁོང༌ངི༌ སྟགས༌གུན༌ ཀྲག༌པོ༌ ཡང༌ ཁོང༌ངི༌ ལྟས༌གུན༌ ཁྱུད༌ཅན༌ ཨིན༌ནོག༌། ཁོང༌ངི༌ གྱལ༌སྲིད༌ ཐའ༌ མེད༌ཁན༌ ཡང༌ ཁོང༌ངི༌ ཝང༌སྲུལ༌ མི༌རབས༌ནེ༌ མི༌རབས༌ ལུས༌ཨིན༌།”
DAN 4:4 “ང༌ ནེ༌བུ༌ཀཱ༌ནེ༌ཟཱར༌ ང༌རང༌ངི༌ ཁར༌རི༌ ནང༌ང༌ སྐྱིད༌པོ༌ དང༌ ཚིམས༌ཏེ༌ ཡོད༌ཏུས༌
DAN 4:5 ངའ༌ ཇིགས༌ནང༌ཅན༌ནི༌ ཉི༌ལམ༌ཞིག༌ ཐོང༌། མལ༌ཙེ༌ཀ༌ ཉལ༌ཏེ༌ ཡོད༌ ཟ༌ནེ༌ ངའ༌ ཇིགས༌ནང༌ཅན༌ནི༌ ཞལ༌ཟིགས༌ཤིག༌ ཐོང༌།
DAN 4:6 ཏེ༌ནེ༌ ཏེ༌ ཉི༌ལམ༌མི༌ ཏོན༌ ཤད༌ཅེས༌ལ༌ བ༌བེ༌ལོན༌ནི༌ ཤེས༌རབ༌ཅན༌ མི༌ ཚང༌མ༌ བོད༌ཅེས༌ལ༌ ངའེ༌ བཀའ༌ ཏངས༌པིན༌།
DAN 4:7 མོ༌ ཏབ༌ཁན༌, ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌རྩིས༌ཏང༌ཁན༌ ཏང༌ མ༌ཡོངས༌པའེ༌ ཏུས༌སི༌ སྐོར༌ལ༌ ཤད༌ཁན༌ ཚང༌མ༌ ཡོང༌ང༌ཅིག༌ ངའེ༌ ཉི༌ལམ༌བོ༌ ཤད༌པིན༌ ཨིན༌ནའང༌ ཁོང༌གུན༌ལ༌ ཏེ༌བོའེ༌ ཏོན༌ ཤད༌ མ༌ཉན༌།
DAN 4:8 སྟིང༌ཇུག༌པའེ༌ཀ༌ དཱ༌ནི༌ཨེལ༌ ཡོངས༌ ཡང༌ ངའེ༌ ཁོའ༌ ཉི༌ལམ༌བོ༌ ཤད༌པིན༌། ༼ངའེ༌ ལྷ༌ལྷ༌མོ༌གུན༌ནི༌ མིང༌ངི༌ གྱབ༌ནེ༌ ངའེ༌ ཁོའ༌ བེལ༌ཏེ༌ཤ༌ཟར༌ ཟེར༌རད༌པིན༌ ཡང༌ ཁོའེ༌ ནང༌ང༌ ཏམ༌པ༌ ལྷ༌ལྷ༌མོ༌གུན༌ནི༌ ཐུག༌ཉིད༌ ཡོད༌ཏེ༌ ཨིན༌ནོག༌།༽”
DAN 4:9 “ངའེ༌ ཟེར༌པིན༌, ‘ཆོས༌ངན༌ ཅོ༌ཁན༌གུན༌ནི༌ འུ༌སྐྱོང༌ བེལ༌ཏེ༌ཤ༌ཟར༌, ཏམ༌པ༌ ལྷ༌ལྷ༌མོ༌གུན༌ནི༌ ཐུག༌ཉིད༌ ཁྱོ༌རང༌ངི༌ ནང༌ང༌ ཡོད༌ཁན༌བོ༌ ང༌ གྱུས༌ཡོད༌། སང༌ཝ༌ ཅི༌ཞིག༌གའང༌ ཁྱོ༌རང༌ངི༌ ཕིའ༌ ཀགས༌པོ༌ མ༌ནོག༌། ང༌ འི༌ ཉི༌ལམ༌བོ༌ ཐོང༌, འི༌བོའེ༌ ཏོན༌ ངའ༌ ཤོད༌དའང༌།
DAN 4:10 མལ༌ཙའེ༌ ནང༌ང༌ ཡོད༌ཏུས༌ ངའ༌ འི༌ ཉི༌ལམ༌བོ༌ ཐོང༌, ཇིགས༌རྟེན༌ནི༌ ཞུང༌སྐྱིལ༌ལ༌ མ༌ ཆེན༌མོ༌ ལྕང༌མ༌ཞིག༌ དུག༌པིན༌།
DAN 4:11 ཏེ༌ ལྕང༌མ༌བོ༌ ལྡན༌ཨིན༌ སོང༌ཏེ༌ མ༌ ཤེད༌ཅན༌ གྱུར༌ཏེ༌ ནམ༌མ༌ ཐུགས༌ ཡང༌ ཇིག༌རྟེན༌ གང༌པོའེ༌ མི༌གུན༌ནི༌ ཐོང༌ངད༌པིན༌།
DAN 4:12 ཏེ༌བོའེ༌ ལོ༌མ༌གུན༌ མ༌ ལྡེ༌མོ༌ ཡང༌ ཚང༌མའ༌ གབ༌ཅེས༌ ཁ༌ཟས༌ མ༌མང༌པོ༌ ཆགས༌ཏེ༌ དུག༌པིན༌། ནམ༌མི༌ ཅ༌གུན༌ནི༌ ཏེ༌བོའེ༌ ཡལ༌ག༌གུན༌ནི༌ ནང༌ང༌ ཚངས༌ སགས༌ཏེ༌ ནག༌ཚོགས༌སི༌ སེམས༌ཅན༌གུན༌ ཏེ༌བོའེ༌ ཡོག༌ག༌ དུག༌དུག༌པིན༌། ཇིག༌རྟེན༌ནི༌ སྲོག༌ ཡོད༌ཁན༌ ཚང༌མའ༌ ཏེ༌ ལྕང༌མའེ༌ ཀ༌ནེ༌ ཟན༌ ཟ༌དུག༌པིན༌།’”
DAN 4:13 “མལ༌ཙའེ༌ཀ༌ ཉི༌ལམ༌མི༌ ནང༌ང༌ ལོན༌ ཁྱོང༌ཁན༌ ཏམ༌པ༌བོ༌ ནམ༌ཁའ༌ནེ༌ བབས༌ཏེ༌ སྐྱོད༌ཨིན༌ ང༌ ཐོང༌།
DAN 4:14 ཁོང༌ངི༌ ཤེད༌ནའང༌ མོལས༌, ‘ལྕང༌མ༌བོ༌ ཅོད༌ ཡང༌ ཡལ༌ག༌གུན༌ རྒོར༌, ལོ༌མ༌གུན༌ ཅད༌ཏེ༌ ཁ༌ཟས༌གུན༌ ཡོག༌། ཏེ༌བོའེ༌ ཡོག༌ག༌ ཡོད༌ཁན༌ནི༌ སེམས༌ཅན༌གུན༌ དང༌ ཡལ༌གའེ༌ཀ༌ ཡོད༌ཁན༌ནི༌ ཅ༌གུན༌ ཤོར༌ ཅུག༌།
DAN 4:15 ཨིན༌ནའང༌ ཏེ༌བོའེ༌ ལྡིམས༌པོ༌ ལྕགས༌ དང༌ ར༌གན༌ནི༌ ཏར༌ ཉམ༌པོ༌ ལྡམས༌ཏེ༌ པ༌ཀྲག༌གུན༌ སའེ༌ ནང༌ང༌ རྩའ༌ སྔོན༌པོའེ༌ སྐོར༌ཏེ༌ བོར༌།’” “‘ནམ༌ཁའེ༌ ཟིལ༌པའེ༌ ཆུའ༌ ཁོ༌ ཕོག༌ཅུག༌ ཡང༌ ནག༌ཚོགས༌སི༌ སེམས༌ཅན༌ དང༌ ཞིང༌ངི༌ རྩའེ༌ ཕྲོའ༌ ཁོ༌ དུག༌ཅུག༌།
DAN 4:16 ལོ༌ རྡུན༌ ཚར༌ཚར༌ ཁོའ༌ མི༌ ལྡད༌པའེ༌ ཚབས༌ལ༌ སེམས༌ཅན༌ནི༌ ལྡད༌པ༌ ཡོད༌ ཅུག༌།’”
DAN 4:17 “‘ཐག༌ཅད༌ ཛད༌ཁན༌བོ༌ ལོན༌ ཁྱོང༌ཁན༌གུན༌ནི༌ ཤད༌ད༌ ཛདས༌, ཏམ༌པ༌ ཞུགས༌ཁན༌གུན༌ནི༌ ཁོང༌ངི༌ ཁྲིམས༌ཅད༌བོ༌ ཤད༌ད༌ ཛདས༌། ཀུན༌ཝང༌ དཀོན༌མཆོག༌གི༌ ཇིག༌རྟེན༌ནི༌ གྱལ༌སྲིད༌ ཚང༌མའེ༌ཀ༌ ཝང༌སྲུལ༌ལ༌ ཛད༌ཅེས༌པོ༌ མི༌ཚང༌མ༌ལ༌ ཧོ༌གོ༌ཅུག༌ཅེས༌ལ༌ ཏེ༌བོ༌ ཛདས༌། ཁོང༌ངི༌ ཏེ༌གུན༌ ཁོང༌ ཐུགས༌ཐད༌ཁན༌བོའ༌ སལ༌ལ༌ ཛད༌ད༌ནོག༌ ཏེ༌ནང༌ང༌ སེམས༌པས༌མོ༌ཅན༌གུན༌ ཐེས༌ཏེ༌ ཨིན༌ནོག༌།’”
DAN 4:18 “བེལ༌ཏེ༌ཤ༌ཟར༌, ཏེ༌ ཉི༌ལམ༌བོ༌ ང༌ ནེ༌བུ༌ཀཱ༌ནེ༌ཟཱར༌ལ༌ ཐོང༌། ཏ༌ ཏེ༌བོའེ༌ ཏོན༌ ཤོད༌དའང༌ ཅིའ༌ཟེར༌ན༌ ངའེ༌ གྱལ༌སྲིད༌ གང༌པོའེ༌ ཤེས༌རབ༌ཅན༌ མི༌ ཅིག༌གའང༌ ཏེ༌བོའེ༌ ཏོན༌ ཤད༌ མ༌ཉན༌། ཨིན༌ནའང༌ ཁྱོ༌རང༌ང༌ ཤད༌ ཉན༌ཨིན༌ ཅིའ༌ཟེར༌ན༌ ཏམ༌པ༌ ལྷ༌ལྷ༌མོ༌གུན༌ནི༌ ཐུག༌ཉིད༌ ཁྱོ༌རང༌ངི༌ ནང༌ང༌ ཡོད༌ཏེ༌ ཨིན༌ནོག༌།”
DAN 4:19 ཏེ༌ནེ༌ ཏུས༌ བན༌ཤིག༌གི༌ ཕིའ༌ དཱ༌ནི༌ཨེལ༌ ཐེ༌ཚོམས༌ སོང༌ ཡང༌ ཉི༌ལམ༌མི༌ ཏོན༌བོ༌ སམས༌ཏེ༌ ཁོའེ༌ སེམས༌ལ༌ སྲན༌ཏྲེ༌ བར༌དོ༌ ཐོང༌། ཏེ༌ནེ༌ གྱལ༌པོའེ༌ ཟེརས༌, “བེལ༌ཏེ༌ཤ༌ཟར༌, ཉི༌ལམ༌ ཡ༌ ཏེ༌བོའེ༌ ཏོན༌བོ༌ སམས༌ཏེ༌ ཁྱོ༌རང༌ངི༌ སེམས༌ལ༌ ནགས༌ མ༌སྟན༌།” ཁོའེ༌ ལན༌ ཏངས༌, “སྤོན༌བོ༌ ལེ༌, ཉི༌ལམ༌བོ༌ ཉེ༌རང༌ མན༌པ༌ ཉེ༌རང༌ངི༌ གྲ༌འོ༌གུན༌ ཡང༌ ཏེ༌བོའེ༌ ཏོན༌བོ༌ ཉེ༌རང༌ང༌ གྱབ༌གལ༌ ཅོ༌ཁན༌གུན༌ལ༌ ཇུང༌ཤིག༌པིའང༌།
DAN 4:20 ཉེ༌རང༌ང༌ ཐོང༌ཁན༌ནི༌ ལྕང༌མ༌ ལྡན༌ཏེ༌ ཤེད༌ཅན༌ གྱུར༌ ཡང༌ ཇིག༌རྟེན༌ནི༌ མི༌ ཚང༌མའེ༌ ཐོང༌ཅེས༌སི༌ ཕིའ༌ ཏེ༌བོའེ༌ གོ༌ ནམ༌མ༌ ཐུག༌,
DAN 4:21 ཏེ༌བོའེ༌ ལོ༌མ༌གུན༌ མ༌ ལྡེ༌མོ༌, ཏེ༌བོའེ༌ཀ༌ ཚང༌མའ༌ གབ༌ཅེས༌ ཁ༌ཟས༌ མ༌མང༌པོ༌ ཆགས༌ཏེ༌ ནམ༌མི༌ ཅ༌གུན༌ནི༌ ཏེ༌བོའེ༌ ཡལ༌ག༌གུན༌ནི༌ ནང༌ང༌ ཚངས༌ སགས༌ཏེ༌ ནག༌ཚོགས༌སི༌ སེམས༌ཅན༌གུན༌ ཏེ༌བོའེ༌ ཡོག༌ག༌ དུག༌དུག༌པིན༌།
DAN 4:22 གྱལ༌པོ༌ལེ༌ ཏེ༌ ལྕང༌མ༌བོ༌ ཉེ༌རང༌ ཨིན༌ནོག༌། ཉེ༌རང༌ ཀྲག༌པོ༌ དང༌ ཤེད༌ཅན༌ ཡང༌ ཉེ༌རང༌ངི༌ སྤལ༌ ནམ༌ཁའ༌ ཚོག༌པ༌ ལེབ༌ཏེ༌ ཇིག༌རྟེན༌ གང༌པོའ༌ ཉེ༌རང༌ངི༌ ཝང༌སྲུལ༌ལ༌ནོག༌།”
DAN 4:23 “གྱལ༌པོ༌ ཉེ༌རང༌ང༌ ལོན༌ ཁྱོང༌ཁན༌ ཏམ༌པ༌བོ༌ ནམ༌ཁའ༌ནེ༌ ཡོག༌ག༌ ཡོང༌ཨིན༌ ཐོང༌ ཡང༌ ཁོང༌ངི༌ མོལས༌, ‘ལྕང༌མ༌ ཅད༌ཏེ༌ མེད༌ཁན༌ ཅོས༌ ཨིན༌ནའང༌ ལྡིམས༌པོ༌ བོར༌ཏེ༌ ལྕགས༌ དང༌ ར༌གན༌ནི༌ ཏར༌ ཉམ༌པོ༌ ལྡོམ༌ ཡང༌ རྩའ༌ སྔོན༌པོའེ༌ སྐོར༌ཏེ༌ པ༌ཀྲག༌ སའེ༌ ནང༌ང༌ བོར༌། ནམ༌ཁའེ༌ ཟིལ༌པའེ༌ ཆུ༌ ཁོའ༌ ཕོག༌ཅུག༌ ཡང༌ ཁོ༌ ལོ༌ རྡུན༌ ནག༌ཚོགས༌སི༌ སེམས༌ཅན༌ ཉམ༌པོ༌ དུག༌ཅུག༌།’”
DAN 4:24 “གྱལ༌པོ༌ ཁྱེན༌ ཉི༌ལམ༌མི༌ ཏོན༌བོ༌ ནི༌, ཀུན༌ཝང༌ དཀོན༌མཆོག༌གི༌ ཐག༌ཅད༌ ཛད༌ཁན༌བོ༌ ཉེ༌རང༌ངི༌ཀ༌ ཇུང༌ཅེས༌ ཨིན༌ནོག༌།
DAN 4:25 ཉེ༌རང༌ མི༌གུན༌ནི༌ ཕྲོ༌ནེ༌ བིང༌ཏེ༌ སེམས༌ཅན༌གུན༌ ཉམ༌པོ༌ དུག༌ཨིན༌, རྩའ༌ ཟེན༌ ཡང༌ ནམ༌ཁའེ༌ ཟིལ༌པའེ༌ ཆུ༌ ཉེ༌རང༌ང༌ ཕོག༌ཨིན༌། ཀུན༌ཝང༌ དཀོན༌མཆོག༌ གྱལ༌སྲིད༌ ཚང༌མའེ༌ཀ༌ ཝང༌སྲུལ༌ལ༌ ཛད༌ཁན༌ ཡང༌ ཏེ༌བོ༌ ཁོང༌རང༌ ཐུགས༌ཐད༌ཁན༌བོའ༌ སལ༌ལ༌ ཛད༌ཅེས༌པོ༌, ཉེ༌རང༌ངི༌ ལོ༌ རྡུན༌ནི༌ སྟིང༌ནེ༌ མན༌ནེ༌ ཁས༌ལེན༌ མི༌ཅོ༌།
DAN 4:26 ལྕང༌མའེ༌ ལྡིམས༌ དང༌ པ༌ཀྲག༌ བོར༌ཅེས༌ལ༌ བཀའ༌ སལ༌ཁན༌ནི༌ ཏོན༌ནི༌ ཉེ༌རང༌ངི༌ དཀོན༌མཆོག༌ ཀུན༌ཝང༌ ཞུགས༌ཁན༌བོ༌ ཁས༌ལེན༌ ཅོའ༌ཅིག༌ ཉེ༌རང༌ང༌ ཉེ༌རང༌ངི༌ གྱལ༌སྲིད༌ ལོགས༌ཏེ༌ ཐོབ༌ཅེས༌པོ༌ ཨིན༌ནོག༌།
DAN 4:27 གྱལ༌པོ༌ ནེ༌བུ༌ཀཱ༌ནེ༌ཟཱར༌ ཁྱེན༌, ངའེ༌ ལབ༌ཞའ༌ ཉན༌ན༌ ཛད༌, སྡིག༌པ༌ ཅོ༌ཅེས༌ ཕངས༌ཏེ༌ ཀྲང༌པོ༌ ཅོའ༌ ཛད༌། ངན༌པའེ༌ སྕོད༌པ༌ ཕངས༌ཏེ༌ ཉལ༌བ༌ཅན༌གུན༌ལ༌ སྙིང༌རྗེ༌ སྟན༌ན༌ ཛད༌། ཅི༌པ༌ཏ༌ ཉེ༌རང༌ངི༌ འི༌ སྐྱིད༌པོ༌ མི༌ཚེ༌བོ༌ ཡུན༌རིངས༌ ལུས༌ སྲིད༌ཅེས༌ ཨིན༌ནོག༌།”
DAN 4:28 གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ཀ༌ ཏེ༌ ཚང༌མ༌ ཇུང༌།
DAN 4:29 ཟླ༌ 12 སྟིང༌ནེ༌ གྱལ༌པོ༌ བ༌བེ༌ལོན༌ནི༌ ཁར༌རི༌ ཐོག༌གི༌ཀ༌ གྲུལ༌ཨིན༌ ཡོད༌ ཟ༌ནེ༌
DAN 4:30 ཁོའེ༌ ཟེརས༌, “ང༌ དུག༌སའེ༌ འི༌ བ༌བེ༌ལོན༌ནི༌ གྱལ༌སའ༌ ཇིགས༌པོ༌ ངའེ༌ རྩིགས༌ཏེ༌ མ༌ནོག༌ག༌? ཏེ༌བོ༌ ངའེ༌ སྤེལ༌ དང༌ ཁྱུད༌ སྟན༌ཅེས༌ལ༌ ཅོས༌ཏེ༌ མ༌ནོག༌ག༌?”
DAN 4:31 ཏེ༌ སྤེ༌ར༌གུན༌ ཁོའེ༌ ཁའ༌ནེ༌ བིང༌ མ༌ཚར༌ར༌ ནམ༌ཁའ༌ནེ༌ སྐད༌ཅིག༌གི༌ མོལས༌, “གྱལ༌པོ༌ ནེ༌བུ༌ཀཱ༌ནེ༌ཟཱར༌ འི༌ བཀའ༌བོ༌ ཁྱོ༌རང༌ངི༌ ཕིའ༌ ཨིན༌, གྱལ༌པོའེ༌ ཝང༌བོ༌ ངའེ༌ ཁྱོ༌རང༌ངི༌ ཀ༌ནེ༌ ཁྱེར༌རད༌།
DAN 4:32 ཁྱོ༌རང༌ མི༌གུན༌ནི༌ ཕྲོ༌ནེ༌ ཕིངས༌ཏེ༌ ནག༌ཚོགས༌སི༌ སེམས༌ཅན༌ནི༌ ཕྲོའ༌ དུག༌ཨིན༌ ཡང༌ བ༌ལང༌ ཙོགས༌ལ༌ རྩའ༌ ཟེན༌། ཀུན༌ཝང༌ དཀོན༌མཆོག༌ གྱལ༌སྲིད༌ ཚང༌མའེ༌ཀ༌ ཝང༌སྲུལ༌ལ༌ ཛད༌ཁན༌ ཡང༌ ཏེ༌བོ༌ ཁོང༌རང༌ ཐུགས༌ཐད༌ཁན༌བོའ༌ སལ༌ལ༌ ཛད༌ཅེས༌པོ༌ ཁས༌ལེན༌ ཅོ༌ཅོ༌ ལོ༌ རྡུན༌ ཁྱོ༌རང༌ ཏེ༌ ཙོགས༌ལ༌ དུག༌ཨིན༌།”
DAN 4:33 ཏེན༌ན༌མལ༌ལ༌ ནེ༌བུ༌ཀཱ༌ནེ༌ཟཱར༌རི༌ སྐོར༌ལ༌ མོལ༌ཁན༌ ཚང༌མ༌ དྲན༌དྲའ༌ གྲུབ༌། ཁོ༌ མི༌གུན༌ནི༌ ཕྲོ༌ནེ༌ ཕིངས༌ཏེ༌ བ༌ལང༌ ཙོགས༌ལ༌ རྩའ༌ ཟོས༌། ཁོའེ༌ སྲའ༌ ལག༌གི༌ ཤོག༌པ༌ ཙོགས༌ རིང༌མོ༌ ཡང༌ སེན༌མོ༌ ཅའེ༌ སེན༌མོ༌ ཙོགས༌ གྱུར༌གྱུར༌ ཚོག༌པ༌ ཁོའེ༌ ཟུགས༌པོའ༌ ནམ༌ཁའེ༌ ཟིལ༌པའེ༌ ཆུ༌ ཕོག༌།
DAN 4:34 “ཏེ༌ ཏུས༌པོ༌ བུད༌ཏེ༌ སྟིང༌ནེ༌ ང༌ ནེ༌བུ༌ཀཱ༌ནེ༌ཟཱར༌རི༌ ནམ༌ཁའེ༌ ཆོགས༌ལ༌ ལྟས༌པིན༌ ཡང༌ ངའེ༌ ལྡད༌པ༌ ཁྱོར༌ཁན༌བོ༌ གྱལ༌། ཏེ༌ནེ༌ ངའེ༌, ཀུན༌ཝང༌ དཀོན༌མཆོག༌ག༌ སྟོད༌པ༌ ཕུལ༌པིན༌། ཏུས༌གྱུན༌ སོན༌པོ༌ དཀོན༌མཆོག༌ག༌ ངའེ༌ རྩི༌ཝ༌ དང༌ སྤལ༌ ཕུལ༌པིན༌། ཁོང༌ངི༌ གྱལ༌སྲིད༌ ཐའ༌མེད༌ཁན༌ནི༌ གྱལ༌སྲིད༌, ཡང༌ ཁོང༌ངི༌ གྱལ༌སྲིད༌ མི༌རབས༌ནེ༌ མི༌རབས༌ ལུས༌ཨིན༌།
DAN 4:35 ཁོང༌ངི༌ སྐུན༌དུན༌ལ༌ ཇིག༌རྟེན༌པ༌ ཚང༌མ༌ ཅའང༌ མ༌ནོག༌། ཇིག༌རྟེན༌ནི༌ མི༌ དང༌ ནམ༌ཁའེ༌ ཝང༌གུན༌ ཉམ༌པོ༌ ཁོང༌ངི༌ ཁོང༌རང༌ ཐད༌ཁན༌ ཛད༌ད༌ནོག༌། སུ༌ཞིག༌གའང༌ ཁོང༌ངི༌ ཆག༌ ལྡམས༌ཏེ༌ བོར༌ མི༌ཉན༌ ཡ༌ འི༌བོ༌ ཅི༌ ཛད༌ཏེ༌ ཨིན༌ ཟེར༌ མི༌ཉན༌?”
DAN 4:36 “ཏེན༌ན༌ ཏུས༌ལ༌ ངའེ༌ ལྡད༌པ༌ ཁྱོར༌ཁན༌བོ༌ གྱལ༌ ཡང༌ ངའ༌ སྤལ༌, རྩི༌ཝ༌ དང༌ གྱལ༌སྲིད༌ གུན༌ ལོགས༌ཏེ༌ ཐོབ༌། ངའ༌ ཁ༌དའ༌ ཏང༌ཁན༌ དང༌ ངའེ༌ ལོན༌པོ༌ གུན༌ནི༌ ང༌ ཙལ༌དུག༌པིན༌། ང༌ ང༌རང༌ངི༌ ཁྲིས༌སི༌ཀ༌ སྟགས༌ ཡང༌ ང༌ སྔུན༌ནི༌ སང༌ ཀྲག༌ག༌ གྱུར༌།
DAN 4:37 ཏ༌ ང༌ ནེ༌བུ༌ཀཱ༌ནེ༌ཟཱར༌རི༌ ནམ༌ཁའེ༌ གྱལ༌པོའ༌ སྟོད༌པ༌, ཀུས༌པ༌ དང༌ སྤལ༌ ཕུལ༌ལད༌ ཅིའ༌ཞུ༌ན༌ ཁོང༌ངི༌ ཆག༌ལས༌ ཚང༌མ༌ ཀྲང༌པོ༌ ཨིན༌ནོག༌ ཡང༌ ཁོང༌ངི༌ ཐག༌ཅད༌ ཚང༌མ༌ འོས༌པ༌ཅན༌ ཨིན༌ནོག༌། ཀྲག༌པོ༌ ཚོར༌ཁན༌གུན༌ ཁོང༌ངི༌ པས༌མོ༌ ཛད༌ད༌ནོག༌།”
DAN 5:1 གྱལ༌པོ༌ བེལ༌ཤའེ༌ཟར༌རི༌ ཁོ༌རང༌ངི༌ 1000 ལོན༌པོ༌གུན༌ལ༌ གྲོན༌ ཀྲག༌པོ༌ ཏངས༌ཏེ༌ ཁོང༌གུན༌ ཉམ༌པོ༌ རྒུན༌ཆང༌ ཐུངས༌།
DAN 5:2 གྱལ༌པོ༌ ར༌རོས༌ པ༌སང༌ ཁོ༌རང༌, ཁོའེ༌ ན༌མ༌གུན༌, ཚེ༌ཡོག༌ ན༌མ༌གུན༌ ཡང༌ ལོན༌པོ༌གུན༌ ཆང༌ ཐུང༌ཅེས༌སི༌ ཕིའ༌ ཁོའེ༌ ཨ༌བ༌ ནེ༌བུ༌ཀཱ༌ནེ༌ཟཱར༌རི༌ ཡེ༌རུ༌ཤ༌ལེམ༌མི༌ ཆོད༌ཁང༌ནེ༌ ཁྱོང༌ཁན༌ནི༌ སེར༌ དང༌ མུལ༌ལི༌ ཀོ༌རེ༌གུན༌ ཁྱོང༌ཅེས༌ལ༌ གྱལ༌པོའེ༌ བཀའ༌ ཏངས༌།
DAN 5:3 ཏེ༌ནེ༌ ཞབ༌ཤི༌གུན༌ནི༌ ཡེ༌རུ༌ཤ༌ལེམ༌མི༌ དཀོན༌མཆོག༌གི༌ ཆོད༌ཁང༌ནེ༌ ཁྱོང༌ཁན༌ནི༌ སེར༌རི༌ ཀོ༌རེ༌གུན༌ ཁྱོངས༌ ཡང༌ གྱལ༌པོ༌, ཁོའེ༌ ན༌མ༌གུན༌ དང༌ ལོན༌པོ༌གུན༌ནི༌ ཏེ༌ནང༌ང༌ རྒུན༌ཆང༌ ཐུངས༌།
DAN 5:4 ཆང༌ ཐུང༌ཨིན༌ ཁོང༌གུན༌ནི༌ སེར༌, མུལ༌, ར༌གན༌, ལྕགས༌, ཤིང༌ དང༌ རྡོའ༌ ཅོ༌ཁན༌ ཁོ༌རང༌གུན༌ནི༌ ལྷ༌ལྷ༌མོ༌གུན༌ལ༌ སྟོད༌པ༌ ཕུལས༌།
DAN 5:5 ཧུན༌མེད༌ལ༌ ལག༌པ༌ཞིག༌ སྔོན༌ཏེ༌ འོད༌སྟག༌གི༌ དུན༌ལ༌ ཁར༌རི༌ རྩིག༌པའེ༌ཀ༌ བྲིའ༌ ཛདས༌། གྱལ༌པོའེ༌ ཏེ༌ ལག༌པའེ༌ བྲི༌ཨིན༌ ཡོད༌ཁན༌བོའ༌ ལྟའད༌པིན༌།
DAN 5:6 ཁོའེ༌ ལྡོང༌ སེར༌པོ༌ གྱུརས༌ ཡང༌ ཁོ༌ མ༌ སྲན༌ཏྲེ༌ ཇིགས༌ཏེ༌ ཁོའེ༌ པིག༌མོ༌ དང༌ སྐང༌གུན༌ དར༌ཨིན༌ གྱལ༌པོ༌ སའེ༌ཀ༌ མ༌ཁད༌།
DAN 5:7 གྱལ༌པོའེ༌ ཁོ༌རང༌ངི༌ ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌རྩིས༌ ཏང༌ཁན༌ དང༌ མ༌ཡོངས༌པའེ༌ ཏུས༌སི༌ སྐོར༌ལ༌ ཤད༌ཁན༌ ཚང༌མ༌ ཀུ༌ཅོ༌ ཏངས༌ཏེ༌ བོདས༌། གྱལ༌པོའེ༌ ཏེ༌ ཤེས༌རབས༌ཅན༌ མི༌གུན༌ལ༌ ཟེརས༌, “འི༌ བྲིས༌ཁན༌བོ༌ སིལ༌ཏེ༌ ཏེ༌བོའེ༌ ཏོན༌ ཤད༌ཁན༌བོའ༌ ངའེ༌ གྱལ༌པོ༌ ཙོགས༌སི༌ ཀོས༌ སྐོན༌ཏེ༌ སེར༌རི༌ ཉག༌ཐག༌ སྐྱེའ༌ སྐར༌ཨིན༌ ཡང༌ ཁོའ༌ གྱལ༌སྲིད༌དི༌ ནང༌ང༌ ཐོ༌ཤོག༌ ཀོ༌ས༌ སུམ༌པ༌བོ༌ ཏང༌ཨིན༌།”
DAN 5:8 གྱལ༌པོའེ༌ ཤེས༌རབ༌ཅན༌ མི༌ ཚང༌མ༌ ཡོངས༌ ཨིན༌ནའང༌ ཁོང༌གུན༌ལ༌ ཏེ༌ བྲིའ༌ ཛད༌ཁན༌བོ༌ སིལ༌ ཡ༌ ཏེ༌བོའེ༌ ཏོན༌ ཤད༌ མ༌ཉན༌།
DAN 5:9 ཏེ༌ནེ༌ གྱལ༌པོ༌ བེལ༌ཤའེ༌ཟར༌ མ༌ སྲན༌ཏྲེ༌ ཇིགས༌ཏེ༌ ཁོང༌ངི༌ ལྡོང༌ མང༌ང༌ སེར༌པོ༌ གྱུར༌། ཁོང༌ངི༌ ལོན༌པོ༌གུན༌ ཐེ༌ཚོམས༌ སོང༌ཏེ༌ ཅི༌ ཅོ༌ཅེས༌པོ༌ ཧ༌མ༌གོ༌།
DAN 5:10 གྱལ༌པོ༌ དང༌ ལོན༌པོ༌ གུན༌ནི༌ སྐད༌ ཚོར༌ཏེ༌ ཨ༌མ༌ གྱལ༌མོ༌ གྲོན༌ ཏང༌སའེ༌ ནང༌ང༌ ཡོངས༌ཏེ༌ ཟེརས༌, “གྱལ༌པོའེ༌ སྐུ༌ཚེ༌ སྟན༌ཤིག༌། ཇིགས༌ཏེ༌ སེར༌པོ༌ ཆའ༌ མ༌ཛད༌།
DAN 5:11 ཉེ༌རང༌ངི༌ གྱལ༌སྲིད༌དི༌ ནང༌ང༌ ཏམ༌པ༌ ལྷ༌ལྷ༌མོ༌གུན༌ནི༌ ཐུག༌ཉིད༌ ཡོད༌ཁན༌ མི༌ཞིག༌ ཡོད༌། ཉེ༌རང༌ངི༌ ཨ༌བ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཏུས༌ལ༌ ཁོ༌ ལྷ༌ལྷ༌མོ༌གུན༌ ཙོགས༌ ཤེས༌རབས༌ཅན༌, རིག༌པ༌ཅན༌ དང༌ ཁས༌པ༌ ཡོད༌ཁན༌བོ༌ ཐོང༌ཏེ༌ ཁོའ༌ མོ༌ ཏབ༌ཁན༌, ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌རྩིས༌ཏང༌ཁན༌ ཏང༌ མ༌ཡོངས༌པའེ༌ ཏུས༌སི༌ སྐོར༌ལ༌ ཤད༌ཁན༌ གུན༌ནི༌ འུ༌སྐྱོང༌ང༌ སྐོས༌།
DAN 5:12 ཏེ༌ མི༌ དཱ༌ནི༌ཨེལ༌ལ༌ གྱལ༌པོའེ༌ བེལ༌ཏེ༌ཤ༌ཟར༌ ཟེར༌རད༌པིན༌, ཁོ༌ མ༌ ཤེས༌རབས༌ཅན༌, རིག༌པ༌ཅན༌ དང༌ ཁས༌པ༌ ཡོད༌ཁན༌བོ༌ གྱུས༌སོང༌ ཡང༌ ཁོའ༌ ཉི༌ལམ༌མི༌ ཏོན༌, སྐ༌ལས༌ ཀགས༌པོ༌ ཡང༌ ཚོད༌ལེན༌ གུན༌ སེལ༌ ཉན༌ནད༌པིན༌། དཱ༌ནི༌ཨེལ༌ལ༌ བོད༌ཏེ༌ འི༌ བྲིའ༌ ཛད༌ཁན༌ནི༌ ཏོན༌བོ༌ ཤད༌ ཅུག༌།”
DAN 5:13 ཏེ༌ནེ༌ དཱ༌ནི༌ཨེལ༌ གྱལ༌པོའེ༌ དུན༌ལ༌ ཁྱོངས༌ ཡང༌ ཁོའེ༌ ཟེརས༌, “ཁྱོ༌རང༌ ངའེ༌ ཨ༌བ༌ གྱལ༌པོའེ༌ ཡ༌ཧུ༌དཱ༌ནེ༌ ཟུམས༌ཏེ༌ ཁྱོང༌ཁན༌ དཱ༌ནི༌ཨེལ༌ ཨིན༌ན༌?
DAN 5:14 ཁྱོ༌རང༌ངི༌ ནང༌ང༌ ལྷ༌ལྷ༌མོ༌གུན༌ནི༌ ཐུག༌ཉིད༌ གངས༌ཏེ༌ ཁྱོ༌རང༌ མ༌ རིག༌པ༌ཅན༌, ཤེས༌རབས༌ཅན༌ དང༌ ཁས༌པ༌ ཡོད༌ཁན༌བོ༌ ངའེ༌ ཚོར༌།
DAN 5:15 ངའེ༌ མི༌ ཤེས༌རབ༌ཅན༌ དང༌ སྐར༌རྩིས༌ ཏང༌ཁན༌ གུན༌ལ༌ བོད༌པིན༌ ཨིན༌ནའང༌ ཁོང༌གུན༌ལ༌ འི༌བོའེ༌ ཏོན༌ ཤད༌ མ༌ཉན༌།
DAN 5:16 ཁྱོ༌རང༌ང༌ ཉི༌ལམ༌མི༌ ཏོན༌ དང༌ སྐ༌ལས༌ ཀགས༌པོ༌གུན༌ སེལ༌ ཉན༌དུག༌ ཟེར༌ཏེ༌ ངའ༌ ཚོར༌། ཀལ༌ཏེས༌ ཁྱོ༌རང༌ངི༌ འི༌ བྲིས༌ཁན༌བོ༌ སིལ༌ཏེ༌ ཏེ༌བོའེ༌ ཏོན༌བོ༌ ཤད༌ན༌ ངའེ༌ ཁྱོ༌རང༌ང༌ གྱལ༌པོ༌ ཙོགས༌སི༌ ཀོས༌ སྐོན༌ཏེ༌ སེར༌རི༌ ཉག༌ཐག༌ སྐྱེའ༌ སྐར༌ཨིན༌ ཡང༌ གྱལ༌སྲིད༌དི༌ ནང༌ང༌ ཐོ༌ཤོག༌ ཀོ༌ས༌ སུམ༌པ༌ ཏང༌ཨིན༌།”
DAN 5:17 ཏེ༌ནེ༌ དཱ༌ནི༌ཨེལ༌ལི༌ གྱལ༌པོའ༌ ལན༌ཏངས༌, “སོལ༌རས༌གུན༌ ཉེ༌རང༌ངི༌ བོར༌ར༌ ཛད༌ ཡ༌ ཞན༌ཞིག༌ག༌ སལ༌ལ༌ ཛད༌ ཨིན༌ནའང༌ ངའེ༌ ཉེ༌རང༌ང༌ འི༌ བྲིས༌ཁན༌བོ༌ སིལ༌ཏེ༌ ཏེ༌བོའེ༌ ཏོན༌བོ༌ ཤད༌ཨིན༌།
DAN 5:18 “གྱལ༌པོ༌ ཁྱེན༌, ཀུན༌ཝང༌ དཀོན༌མཆོག༌གི༌, ཉེ༌རང༌ངི༌ ཨ༌བ༌ ནེ༌བུ༌ཀཱ༌ནེ༌ཟཱར༌ལ༌ ཝང༌, ཁྱུད༌, སྤལ༌ དང༌ རྩི༌ཝ༌ སལ༌ལ༌ ཛདས༌།
DAN 5:19 ཁོའ༌ ཀོ༌ས༌ ཇིགས༌པོ༌ སལ༌ལ༌ ཛད༌ཅེས༌པོའེ༌ གྱལ༌ཁམས༌, སྐད༌ དང༌ མི༌ ཚང༌མ༌ ཁོང༌ང༌ ཇིགས༌ཏེ༌ དར༌རད༌པིན༌། གྱལ༌པོའེ༌ སད༌ ཉིན༌ གྲོ༌ཁན༌གུན༌ སད༌དད༌པིན༌, པུད༌ད༌ ཐད༌ཁན༌གུན༌ པུད༌དད༌པིན༌, སྟག༌ག༌ ཐད༌ཁན༌གུན༌ སྟག༌གད༌པིན༌ ཡང༌ ཕབ༌བ༌ ཐད༌ཁན༌གུན༌ ཕབ༌བད༌པིན༌།
DAN 5:20 ཨིན༌ནའང༌ ཁོའེ༌ སྙིང༌ ཕོ༌སོ༌ཅན༌ སྐྱོང༌པོ༌ གྱུར༌ར༌ཅིག༌, དཀོན༌མཆོག༌གི༌ ཁོ༌ གྱལ༌པོའེ༌ ཁྲིས༌སི༌ ཀ༌ནེ༌ ཕབས༌ཏེ༌ ཁོའེ༌ སྤལ༌བོ༌ མེད༌ཁན༌ ཛདས༌།
DAN 5:21 ཁོ༌ མི༌གུན༌ནི༌ ཕྲོ༌ནེ༌ ཕིངས༌ཏེ༌ ཁོའ༌ སེམས༌ཅན༌ནི༌ ལྡད༌པ༌ སལས༌། ཁོ༌ ནག༌ཚོགས༌སི༌ བུང༌བུ༌གུན༌ ཉམ༌པོ༌ དུགས༌ཏེ༌ བ༌ལང༌ ཙོགས༌ལ༌ རྩའ༌ ཟོས༌ ཡང༌ ཁོའེ༌ ཟུགས༌པོའ༌ ཟིལ༌པའེ༌ ཆུ༌ ཕོག༌ ནམ༌ ཚག༌པ༌ ཁོའེ༌ ཀུན༌ཝང༌ དཀོན༌མཆོག༌གི༌ ཇིག༌རྟེན༌ནི༌ གྱལ༌སྲིད༌ ཚང༌མའེ༌ཀ༌ ཝང༌སྲུལ༌ལ༌ ཛད༌ཅེས༌ ཡང༌ ཁོང༌ ཐུགས༌ཐད༌ཁན༌བོ༌ ཏེ༌གུན༌ནི༌ཀ༌ ཝང༌སྲུལ༌པ༌ སྐོའ༌ ཛད༌ཅེས༌པོ༌ ཁས༌ལེན༌ མ༌ཅོས༌།”
DAN 5:22 “ཨིན༌ནའང༌ ཁོང༌ངི༌ བུ༌ཚ༌ བེལ༌ཤའེ༌ཟར༌ ཉེ༌རང༌ང༌ ཏེ༌གུན༌ གྱུས༌ཡོད༌ཏེའང༌ པས༌མོ༌ མ༌གྱུར༌།
DAN 5:23 མ༌ཚད༌ ཉེ༌རང༌ངི༌ ནམ༌ཁའེ༌ གཙོ༌བོ༌ དཀོན༌མཆོག༌གི༌ གྱབ༌གལ༌ ཅོས༌ཏེ༌ ཁོང༌ངི༌ ཆོད༌ཁང༌ངི༌ ཏམ༌པ༌ ཀོ༌རེ༌གུན༌ ཁྱོངས༌ཏེ༌ ཉེ༌རང༌, ཉེ༌རང༌ངི༌ ན༌མ༌གུན༌, ཚེ༌ཡོག༌ ན༌མ༌གུན༌ ཡང༌ ལོན༌པོ༌གུན༌ལ༌ རྒུན༌ཆང༌ ཐུང༌ཅེས༌ལ༌ ཏངས༌། ཉེ༌རང༌ངི༌ མ༌ཐོང༌ཁན༌, མ༌ཚོར༌ཁན༌ དང༌ ཧ༌མ༌གོ༌ཁན༌ སེར༌, མུལ༌, ར༌གན༌, ལྕགས༌, ཤིང༌ དང༌ རྡོའེ༌ སྐུན༌དྲའ༌གུན༌ལ༌ སྟོད༌པ༌ ཕུལས༌ ཨིན༌ནའང༌ ཉེ༌རང༌ངི༌ སྲོག༌ དང༌ ཉེ༌རང༌ངི༌ མི༌ཚེ༌ ནང༌ང༌ ཅོ༌ཅེས༌ཅན༌ ཚང༌མའེ༌ཀ༌ ཝང༌ ཡོད༌ཁན༌ དཀོན༌མཆོག༌ག༌ ཉེ༌རང༌ངི༌ རྩི༌ཝ༌ མ༌སལས༌།
DAN 5:24 ཏེ༌བོའེ༌ཕིའ༌ ཁོང༌ངི༌ བྲི༌ཅེས༌ལ༌ འི༌ ལག༌པ༌ ཀལ༌ལ༌ ཛདས༌།
DAN 5:25 ཏེ༌ བྲིས༌ཁན༌བོ༌ འི༌བོ༌ ཨིན༌ནོག༌: མེ༌ནེ༌, མེ༌ནེ༌, ཏེ༌ཀེལ༌, པར༌སིན༌།
DAN 5:26 མེ༌ནེ༌ ཏོན༌ ནི༌ དཀོན༌མཆོག༌གི༌ ཉེ༌རང༌ངི༌ ཝང༌སྲུལ༌ལི༌ ཞག༌པོ༌ རྩིའ༌ ཛད༌ཏེ༌ མེད༌ཁན༌ ཅོའ༌ ཛད༌ཨིན༌།
DAN 5:27 ཏེ༌ཀེལ༌ལི༌ ཏོན༌ ནི༌ ཉེ༌རང༌ སྐར༌ར༌ ཛདས༌ ཨིན༌ནའང༌ མ༌ ཡང༌མོ༌ བིང༌།
DAN 5:28 པར༌སིན༌ནི༌ ཏོན༌ ནི༌ ཉེ༌རང༌ངི༌ གྱལ༌སྲིད༌ལ༌ ཁག༌ པུད༌ཏེ༌ མེ༌དིའ༌པ༌ དང༌ པར༌ཤིའ༌པ༌ གུན༌ལ༌ ཏང༌ཨིན༌།”
DAN 5:29 ཏེ༌ནེ༌ བེལ༌ཤའེ༌ཟར༌རི༌ བཀའ༌ ནང༌ཞིན༌ དཱ༌ནི༌ཨེལ༌ལ༌ གྱལ༌པོ༌ ཙོགས༌ ཀོས༌ སྐོན༌ཏེ༌ སྐྱེའ༌ སེར༌རི༌ ཉག༌ཐག༌ སྐརས༌ ཡང༌ ཁོའ༌ གྱལ༌སྲིད༌དི༌ ནང༌ང༌ ཐོ༌ཤོག༌ ཀོ༌ས༌ སུམ༌པའེ༌ཀ༌ སྐོས༌།
DAN 5:30 ཏེན༌ན༌ ཚན༌ལ༌ གྲ༌འོ༌གུན༌ནི༌ བ༌བེ༌ལོན༌ནི༌ གྱལ༌པོ༌ བེལ༌ཤའེ༌ཟར༌ སད༌ཏེ༌
DAN 5:31 མེ༌དིའ༌པ༌ གྲ༌རི༌ཡས༌སི༌ གྱལ༌སྲིད༌པོ༌ ང༌ཡོག༌ག༌ ལེནས༌། ཏེ༌ ཏུས༌ གྲ༌རི༌ཡས༌ལ༌ ལོ༌ 62 ཆའད༌པིན༌།
DAN 6:1 གྱལ༌པོ༌ གྲ༌རི༌ཡས༌སི༌ ཁོ༌རང༌ངི༌ གྱལ༌སྲིད༌པོ༌ ཡུལ༌ཇོངས༌ 120 ནང༌ང༌ བགོས༌ ཡང༌ ཏེ༌ རེ༌རེ༌ཀ༌ ཝང༌ སྲུལ༌ཁན༌ནི༌ ཀའ༌ལོན༌ སྐོས༌།
DAN 6:2 ཏེ༌ ཀའ༌ལོན༌གུན༌ནི༌ གྱལ༌པོའེ༌ ཕན༌ཐོགས༌སི༌ ཕིའ༌ ལས༌ ཅོ༌ཅེས༌ ཏན༌ཏན༌ ཅོ༌ཅེས༌ལ༌ གྱལ༌པོའེ༌ ལྟའ༌ཁན༌ནི༌ མི༌ སུམ༌ སྐོས༌, དཱ༌ནི༌ཨེལ༌ ཁོང༌གུན༌ནི༌ ནང༌ནེ༌ ཅིག༌ ཨིན༌པིན༌།
DAN 6:3 ཏུས༌ ཉུ༌ངུན༌ ཞིག༌གི༌ ནང༌ང༌ དཱ༌ནི༌ཨེལ༌ལི༌ ལས༌ མ༌ གྱལ༌ལ༌ ཅོས༌ཏེ༌ ཁོ༌རང༌ངི༌ ཕྲོ༌པ༌གུན༌ དང༌ ཀའ༌ལོན༌གུན༌ནི༌ སང༌ མང༌ང༌ ཇོན༌པོ༌ ཨིན༌ཁན༌བོ༌ སྟནས༌ ཏེ༌བོའེ༌ཕིའ༌ གྱལ༌པོའེ༌ ཁོ༌ གྱལ༌སྲིད༌ གང༌པོའེ༌ཀ༌ འུ༌སྐྱོང༌ང༌ སྐོ༌ཅེས༌ ཐག༌ཅདས༌།
DAN 6:4 ཏེ༌བོའེ༌ ཞས༌ཏེ༌ ཁོའེ༌ ཕྲོ༌པ༌ ཉིས༌ཀོ༌ དང༌ ཀའ༌ལོན༌གུན༌ནི༌ དཱ༌ནི༌ཨེལ༌ལི༌ ལས༌སི༌ ནང༌ང༌ སྐྱོན༌ ཙལས༌ ཨིན༌ནའང༌ ཁོང༌གུན༌ལ༌ ཅའང༌ མ༌ཐོབ༌ ཅིའ༌ཟེར༌ན༌ དཱ༌ནི༌ཨེལ༌ ཨིད༌ཤེས༌ཅན༌, ཁོ༌རང༌ངི༌ ལས༌ལ༌ སྣང༌མེད༌ མ༌ཅོ༌ཁན༌ ཡང༌ ཕག༌སུབ༌བི༌ པེ༌ནེ༌ མ༌ནེ༌ ལེན༌ན༌ མེད༌པིན༌།
DAN 6:5 སྟིང༌ཇུག༌ག༌ ཁོང༌གུན༌ནི༌ ཟེརས༌, “ཁོའེ༌ ཁོ༌རང༌ངི༌ དཀོན༌མཆོག༌གི༌ ཁྲིམས༌ མི༌ཅག༌ཅེས༌ མ༌སྟོག༌ ང༌དང༌ང༌ འི༌ མི༌བོའེ༌ ནང༌ང༌ ཅའང༌ སྐྱོན༌ མི༌ ཐོབ༌།”
DAN 6:6 ཏེ༌བོའེ༌ཕིའ༌ ཁོའེ༌ ཕྲོ༌པ༌ ཉིས༌ཀོ༌ དང༌ ཀའ༌ལོན༌གུན༌ གྱལ༌པོའེ༌ཀ༌ སོང༌ཏེ༌ ཟེརས༌, “གྱལ༌པོ༌ གྲ༌རི༌ཡས༌སི༌ སྐུ༌ཚེ༌ སྟན༌ཤིག༌།
DAN 6:7 ང༌ཞའ༌, ཉེ༌རང༌ངི༌ ལས༌གུན༌ལ༌ ལྟའ༌ཁན༌, ཀའ༌ལོན༌གུན༌, ཁ༌དའ༌ ཏང༌ཁན༌གུན༌ དང༌ སྤོན༌བོ༌ ཚང༌མ༌ ཁའ༌ ཆམས༌ཏེ༌ གྱལ༌པོའ༌ བཀའ༌ཁྲིམས༌ ཤིག༌ སལ༌ཅེས༌ལ༌ ཞུ༌ཝ༌ ཕུལ༌ལད༌། ཡོང༌ཅེས༌ཅན༌ནི༌ ཞག༌ སུམ༌ཅུའི༌ ནང༌ང༌ སུ༌ཞིག༌གི༌ ཉེ༌རང༌ མན༌པ༌ ཞན༌ མི༌ ཡ༌ ལྷ༌ལྷ༌མོ༌ སུ༌ཞིག༌ག༌ ཅོལ༌ན༌ ཏེ༌ མི༌བོ༌ སིང༌གེ༌ དོང༌ངི༌ ནང༌ང༌ ཕང༌ཅེས༌སི༌ བཀའ༌ སལ༌ལ༌ ཛད༌།
DAN 6:8 གྱལ༌པོ༌ ཁྱེན༌, ཏེ༌ ཁྲིམས༌པོ༌ བྲི༌ཅེས༌ལ༌ བཀའ༌ སལ༌ ཏེ༌ནེ༌ ཏེ༌བོའ༌ སུ༌ཞིག༌གིའང༌ གྱབ༌གལ༌ ཅོ༌མི༌ཉན༌ ཡང༌ མེ༌དིའ༌པ༌ དང༌ པར༌ཤིའ༌པ༌ གུན༌ནི༌ ཁྲིམས༌ ནང༌ཞིན༌ སུ༌ཞིག༌གིའང༌ ཏེ༌བོ༌ གྱུར༌ མི༌ཉན༌།”
DAN 6:9 ཏེ༌ནེ༌ གྱལ༌པོ༌ གྲ༌རི༌ཡས༌སི༌ ཏེ༌ ཁྲིམས༌པོ༌ བྲི༌ ཅུགས༌།
DAN 6:10 དཱ༌ནི༌ཨེལ༌ལ༌ གྱལ༌པོའེ༌ བཀའ༌ ཁྲིམས༌པོ༌ གྱུས༌ ཡོད༌ཏེའང༌ ཁོ༌ ཁོ༌རང༌ངི༌ ཁང༌པའེ༌ ཡེ༌རུ༌ཤ༌ལེམ༌ ཆོགས༌ལ༌ ཀར༌ཁུང༌ ཡོད༌ཁན༌ ཁེ༌ཐོག༌གི༌ ནང༌ང༌ སོང༌ ཡང༌ ཏུས༌གྱུན༌ ཙོགས༌ལ༌ ཞག༌ཏང༌ ལན༌ སུམ༌ པིག༌དོང༌ ཙུགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌ མོས༌ལམ༌ ཞུའད༌པིན༌།
DAN 6:11 ཏེ༌ནེ༌ ཁྲིམས༌ བྲི༌ ཅུག༌ཁན༌ནི༌ མི༌གུན༌ དཱ༌ནི༌ཨེལ༌ལི༌ ཁང༌པ༌ སོང༌ ཡང༌ ཁོའེ༌ དཀོན༌མཆོག༌ག༌ རོགས༌ ཛད༌ཅེས༌ལ༌ མོས༌ལམ༌ ཞུ༌ཨིན༌ ཐོང༌།
DAN 6:12 ཁོང༌གུན༌ གྱལ༌པོ༌ ཡོད༌ས༌ སོང༌ཏེ༌ ཁྲིམས༌པོ༌ ཨིད༌ཏུ༌ སྐུལས༌, “ཡོང༌ཅེས༌ཅན༌ནི༌ ཞག༌ སུམ༌ཅུའི༌ ནང༌ང༌ ཉེ༌རང༌ མན༌པ༌ ཞན༌ མི༌ ཡ༌ ལྷ༌ལྷ༌མོ༌ སུ༌ཞིག༌ག༌ ཅོལ༌ན༌ ཏེ༌ མི༌བོ༌ སིང༌གེ༌ དོང༌ངི༌ ནང༌ང༌ ཕང༌ཅེས༌སི༌ བཀའ༌ སལ༌ལ༌ མ༌ཛད༌པིན༌ན༌?” གྱལ༌པོའེ༌ ལན༌ཏངས༌, “ཁྲིམས༌པོ༌ སྟན༌པོ༌ ཨིན༌། མེ༌དིའ༌པ༌ དང༌ པར༌ཤིའ༌པ༌ གུན༌ནི༌ ཁྲིམས༌ ནང༌ཞིན༌ ཏེ༌བོ༌ སུའང༌ གྱུར༌ མི༌ཉན༌།”
DAN 6:13 ཏེ༌ནེ༌ ཁོང༌གུན༌ནི༌ གྱལ༌པོའ༌ ཟེརས༌, “ཡ༌ཧུ༌དཱ༌ནེ༌ ཁྱོང༌ཁན༌ནི༌ མི༌ དཱ༌ནི༌ཨེལ༌ལི༌ ཉེ༌རང༌ དང༌ ཉེ༌རང༌ངི༌ ཁྲིམས༌པོ༌ ཁའ༌ མ༌ཉན༌ན༌ ཞག༌ཏང༌ ལན༌ སུམ༌ ཁོ༌རང༌ངི༌ དཀོན༌མཆོག༌ག༌ མོས༌ལམ༌ ཞུ༌དུག༌།”
DAN 6:14 ཏེ༌བོ༌ ཚོར༌ར༌ཅིག༌ གྱལ༌པོའ༌ སྲན༌ཏྲེ༌ ཚེར༌ཁ༌ ཡོངས༌ ཡང༌ ཁོང༌ངི༌ ཉི༌མ༌ སྐྱོད༌ སྐྱོད༌ ཚག༌པ༌ དཱ༌ནི༌ཨེལ༌ སྐྱོབ༌ཅེས༌སི༌ རྩོན༌གྲུས༌ སྲན༌ཏྲེ༌ ཅོས༌།
DAN 6:15 ཏེ༌ནེ༌ ཏེ༌ མི༌གུན༌ གྱལ༌པོ༌ ཡོད༌ས༌ སོང༌ཏེ༌ ཟེརས༌, “གྱལ༌པོ༌ ལེ༌, ཨིད༌ཏུ༌ ཛད༌, མེ༌དིའ༌པ༌ དང༌ པར༌ཤིའ༌པ༌ གུན༌ནི༌ ཁྲིམས༌ ནང༌ཞིན༌ གྱལ༌པོའེ༌ སལ༌ཁན༌ནི༌ བཀའ༌ཁྲིམས༌ གྱུར༌ མི༌ཉན༌།”
DAN 6:16 ཏེ༌བོའེ༌ཕིའ༌ གྱལ༌པོའེ༌ བཀའ༌ ཏངས༌ ཡང༌ ཁོང༌གུན༌ནི༌ དཱ༌ནི༌ཨེལ༌ ཁྱོངས༌ཏེ༌ སིང༌གེ༌ དོང༌ངི༌ ནང༌ང༌ ཕངས༌། གྱལ༌པོའེ༌ དཱ༌ནི༌ཨེལ༌ལ༌ ཟེརས༌, “ཁྱོ༌རང༌ངི༌ ཨིད༌ཤེས༌ ཅོས༌ཏེ༌ ཞབས༌ཏོག༌ ཞུ༌ཁན༌ དཀོན༌མཆོག༌གི༌ ཁྱོ༌རང༌ སྐྱོབ༌བ༌ ཛད༌ཤིག༌།”
DAN 6:17 རྡོའ༌ རིལ༌ཏེ༌ དོང༌ངི༌ ཁའེ༌ཀ༌ ཀབས༌ ཡང༌ སུའང༌ དཱ༌ནི༌ཨེལ༌ སྐྱོབ༌ མི༌ཉན༌ཅེས༌ལ༌ གྱལ༌པོ༌ ཏང༌ ལོན༌པོ༌གུན༌ནི༌ ཐེ༌ཙེ༌ ཏེ༌ཀ༌ ཏངས༌།
DAN 6:18 ཏེ༌ནེ༌ གྱལ༌པོ༌ ཁར༌ལ༌ སོང༌ཏེ༌ ཏེ༌ ཚན༌བོ༌ ཟན༌ མ༌ཟོས༌ ཡང༌ སྐྱིད༌པོ༌ མ༌ཅོས༌ ཡང༌ ཁོའ༌ ཉིད༌དའང༌ མ༌ཡོངས༌།
DAN 6:19 ང༌མོ༌ ནམ༌ལངས༌ས༌ཅིག༌ གྱལ༌པོ༌ ལངས༌ཏེ༌ གྱོགས༌པ༌ སིང༌གེ༌ དོང༌ ཡོད༌ས༌ སོང༌།
DAN 6:20 དུན༌ལ༌ ལེབ༌བ༌ཅིག༌ ཁོང༌ངི༌ དཱ༌ནི༌ཨེལ༌ལ༌ བོད༌ཏེ༌ སེམས༌ཚེར༌ ཉམ༌པོ༌ ཟེརས༌, “ཨིད༌ཤེས༌ ཅོས༌ཏེ༌ དཀོན༌མཆོག༌ སོན༌པོའ༌ ཞབས༌ཏོག༌ ཞུ༌ཁན༌ དཱ༌ནི༌ཨེལ༌, སིང༌གེ༌གུན༌ནི༌ ཀ༌ནེ༌ ཁོང༌ང༌ ཁྱོ༌རང༌ སྐྱོབ༌ཐུབ༌བ༌?”
DAN 6:21 དཱ༌ནི༌ཨེལ༌ལི༌ ལན༌ ཏངས༌, “གྱལ༌པོའེ༌ སྐུ༌ཚེ༌ སྟན༌ཤིག༌།
DAN 6:22 ངའེ༌ དཀོན༌མཆོག༌གི༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛད༌ཏེ༌ སིང༌གེ༌གུན༌ནི༌ ཁའ༌ ལྡམ༌མ༌ ཛདས༌། ཏེ༌གུན༌ནི༌ ང༌ ཅའང༌ ནོད༌པ༌ མ༌ཏངས༌ ཅིའ༌ཟེར༌ན༌ ཁོང༌ངི༌ སྐུན༌དུན༌ལ༌ ང༌ ནོངས༌མེད༌ ཨིན༌པིན༌ ཡང༌ ངའེ༌, གྱལ༌པོ༌ ཉེ༌རང༌ངའང༌ ངན༌པ༌ མ༌ ཅོས༌པིན༌།”
DAN 6:23 གྱལ༌པོ༌ མ༌སྲན༌ཏྲེ༌ ཐད༌ ཡང༌ དཱ༌ནི༌ཨེལ༌ དོང༌ནེ༌ ཕིང༌ཅེས༌ལ༌ བཀའ༌ ཏངས༌། དོང༌ནེ༌ ཕིང༌ང༌ཅིག༌ དཱ༌ནི༌ཨེལ༌ལི༌ ཟུགས༌པོའ༌ ཅའང༌ མ༌སྐྱོན༌ སོང༌ཏེ༌ མེད༌པིན༌ ཅིའ༌ཟེར༌ན༌ ཁོའེ༌ ཁོ༌རང༌ངི༌ དཀོན༌མཆོག༌གི༌ཀ༌ ཨིད༌ཤེས༌ ཅོས༌།
DAN 6:24 གྱལ༌པོའེ༌ བཀའ༌ ནང༌ཞིན༌, ན༌མ༌ དང༌ ཕྲུ༌གུ༌གུན༌ ཐེས༌ཏེ༌ དཱ༌ནི༌ཨེལ༌ལ༌ སེམས༌ངན༌ ཉམ༌པོ༌ གྱབ༌གལ༌ ཅོ༌ཁན༌གུན༌ ཁྱོངས༌ཏེ༌ སིང༌གེ༌ དོང༌ངི༌ ནང༌ང༌ ཕངས༌། དོང༌ངི༌ སའེ༌ཀ༌ ལེབ༌བི༌ སང༌ སྔུན༌ལ༌ སིང༌གེ༌གུན༌ ཁོང༌གུན༌ནི༌ཀ༌ ཆོམས༌ ཡང༌ ཤ༌ ཟོས༌ཏེ༌ རུས༌པ༌ ཚང༌མ༌ ཅགས༌།
DAN 6:25 ཏེ༌ནེ༌ གྱལ༌པོ༌ གྲ༌རི༌ཡས༌སི༌ གྱལ༌ཁམས༌, སྐད༌ དང༌ མི༌ ཚང༌མ༌ བྲིས༌, “ཁྱོ༌ཞའ༌ ཡར༌གྱས༌ ཀྲག༌པོ༌ ཆ༌ཤིག༌།
DAN 6:26 ངའེ༌ བཀའ༌ ཏང༌ངད༌, གྱལ༌སྲིད༌ གང༌པོའེ༌ མི༌ ཚང༌མའེ༌ དཱ༌ནི༌ཨེལ༌ལི༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ མི༌ཚེ༌ ཕུད༌གོས༌ ཅིའ༌ཟེར༌ན༌ ཁོང༌ སོན༌པོ༌ དཀོན༌མཆོག༌, ཁོང༌ ཏུས༌གྱུན༌ ཞུགས༌ཁན༌, ཁོང༌ངི༌ གྱལ༌སྲིད༌ མ༌ནེ༌ མི༌ཞིག༌ ཡང༌ ཁོང༌ངི༌ ཝང༌སྲུལ༌ལ༌ ཐའ༌མ༌ མེད༌ཏེ༌ ཨིན༌ནོག༌།
DAN 6:27 ཁོང༌ངི༌ ཁོང༌རང༌ངི༌ མི༌གུན༌ སྐྱོབ༌ཅེས༌ དང༌ ཐར༌ཅུག༌ག༌ ཛད༌ད༌ནོག༌, ཁོང༌ངི༌ ནམ༌ཁའ༌ དང༌ ས༌ཞི༌ཀ༌ སྟགས༌ དང༌ ལྟས༌ གུན༌ ཛད༌ད༌ནོག༌། ཁོང༌ངི༌ དཱ༌ནི༌ཨེལ༌ ཤེད༌ཅན༌ སིང༌གེ༌གུན༌ནི༌ ཀ༌ནེ༌ སྐྱོབ༌བ༌ ཛདས༌།”
DAN 6:28 པར༌ཤིའ༌པ༌ གྱལ༌པོ༌ གྲ༌རི༌ཡས༌ དང༌ སཱེ༌རས༌སི༌ ཝང༌སྲུལ༌ལི༌ ཏུས༌ལ༌ དཱ༌ནི༌ཨེལ༌ མ༌ ཁྲངས༌པོ༌ ལུས༌ཏེ༌ ཡར༌གྱས༌ ཅོས༌།
DAN 7:1 བ༌བེ༌ལོན༌ནི༌ གྱལ༌པོ༌ བེལ༌ཤའེ༌ཟར༌རི༌ ཝང༌སྲུལ༌ལི༌ གོ༌མའེ༌ ལོའེ༌ ནང༌ང༌ དཱ༌ནི༌ཨེལ༌ལ༌ ཉི༌ལམ༌ཞིག༌ ཐོང༌། ཁོ༌ མལ༌ཙའེ༌ཀ༌ ཡོད༌ ཟ༌ནེ༌ ཁོའ༌ ཞལ༌ཟིགས༌ཤིག༌ ཐོང༌ ཡང༌ ཁོའེ༌ ཏེ༌ ནང༌ང༌ ཐོང༌ཁན༌གུན༌ བྲིས༌།
DAN 7:2 དཱ༌ནི༌ཨེལ༌ལི༌ བྲིས༌, “ཚན༌ལ༌ ངའ༌ ཐོང༌ཁན༌ནི༌ ཉི༌ལམ༌མི༌ ནང༌ང༌, ཆོགས༌ ཞི༌ཀོ༌ནེ༌ ལུངས༌པོ༌ ཀྲག༌པོ༌ ཡོངས༌ཏེ༌ གྱ༌ཚོའེ༌ ཆུ༌ སྲན༌ཏྲེ༌ སྲུག༌ དུག༌པིན༌།
DAN 7:3 གྱ༌ཚོའེ༌ ནང༌ནེ༌ ཇིགས༌ནང༌ཅན༌ནི༌ སེམས༌ཅན༌ ཞི༌ བིངས༌ཏེ༌ ཡོངས༌ ཡང༌ ཏེ༌གུན༌ སོ༌སོ༌, ཅིག༌གའང༌ ཙོགས༌ མི༌དུག༌པིན༌།”
DAN 7:4 “སེམས༌ཅན༌ ཏང༌པོ༌ ལག༌གི༌ ཤོག༌པ༌ ཡོད༌ཁན༌ སིང༌གེ༌ ཙོགས༌ དུག༌པིན༌། ངའེ༌ ལྟེན༌ ཡོད༌ཏུས༌ ཏེ༌བོའེ༌ ཤོག༌པ༌ ཀོགས༌ཏེ༌ ཕེས༌ ཡང༌ ཏེ༌བོ༌ མི༌ ཙོགས༌ལ༌ གྱབ༌བི༌ ཀང༌པའེ༌ཀ༌ ལངས༌ཏེ༌ དུག༌ཅུགས༌། ཏེ༌བོའ༌ མི༌ ལྡད༌པ༌ ཏངས༌།”
DAN 7:5 “སེམས༌ཅན༌ ཉིས༌པ༌ དྲེན༌མོ༌ ཙོགས༌, པིག༌མོའེ༌ཀ༌ ལངས༌ཏེ༌ སོའེ༌ པར༌ལ༌ རྩིབ༌མའེ༌ རུས༌པ༌ སུམ༌ ཁུར༌ཏེ༌ དུག༌པིན༌ ཡང༌ སྐད༌ཅིག༌གི༌ ཏེ༌བོའ༌, ‘ལོངས༌, མི༌ མང༌པོ༌ སད༌ཏེ༌ ཟའ༌ ཉན༌ཁན༌ ཟོ༌’ ཟེར༌ཁན༌བོ༌ ངའ༌ ཚོར༌།”
DAN 7:6 “ལྟེན༌ ཡོད༌ཏུས༌ སེམས༌ཅན༌ སུམ༌པ༌ བིང༌ཏེ༌ ཡོངས༌ ཡང༌ ཏེ༌བོ༌ ཤན༌ ཙོགས༌ དུག༌། ཏེ༌ སེམས༌ཅན༌ནི༌ གྱབ༌པོའེ༌ཀ༌ ཅི༌པའེ༌ ཤོག༌པ༌ ཞི༌ དང༌ གོ༌ ཞི༌ དུག༌ ཡང༌ ཏེ༌བོའ༌ ཝང༌སྲུལ༌ཅེས༌སི༌ ཝང༌ཆ༌ ཏངས༌།”
DAN 7:7 “ཏེ༌ནེ༌ ངའ༌ སེམས༌ཅན༌ ཞི༌པ༌ ཐོང༌། ཏེ༌བོ༌ མ༌ ཇིགས༌ནང༌ཅན༌ དང༌ ཇིགས༌པ༌ ཡང༌ མ༌ ཤེད༌ཅན༌ དུག༌པིན༌། ཏེ༌བོའ༌ ལྕགས༌སི༌ སོ༌ ཆེན༌མོ༌ ཀ༌བོའེ༌ ཅི༌ཚང༌མ༌ ཅད༌ཏེ༌ སྟུབས༌ཏེ༌ ཟོས༌ཏེ༌ ལུས༌ཁན༌བོ༌ ཀང༌པའེ༌ ཐིལ༌ལ༌ ཉེས༌ཏེ༌ མེད༌ཁན༌ ཅོ༌ དུག༌པིན༌། ཞི༌པ༌བོ༌ ཞན༌གུན༌ནི༌ སང༌ སོ༌སོ༌, ཏེ༌བོའ༌ རཱ༌ཅོ༌ རྕུ༌ དུག༌པིན༌།”
DAN 7:8 “ཏེ༌ རཱ༌ཅོ༌གུན༌ནི༌ སྐོར༌ལ༌ སམ༌བ༌ ཏང༌ཨིན༌ ཡོད༌ཏུས༌ ཏེ༌གུན༌ནི༌ ཕྲོ༌ནེ༌ ཡང༌ རཱ༌ཅོ༌ ཆུ༌ངུན༌ཞིག༌ བིང༌ཏེ༌ སྔུན༌ནི༌ རཱ༌ཅོ༌ སུམ༌བོ༌ པ༌ཀྲག༌ནེ༌ མེད༌ཁན༌ ཅོས༌། རཱ༌ཅོ༌ ཆུ༌ངུན༌བོའ༌ མི༌ ཙོགས༌སི༌ མིག༌ ཡང༌ ཕོ༌སོ༌ཅན༌ནི༌ སྤེ༌ར༌ ཏང༌ཁན༌ནི༌ ཁའ༌ དུག༌པིན༌།”
DAN 7:9 “ལྟེན༌ ཡོད༌ཏུས༌, ཁྲིས༌གུན༌ ནས༌སའེ༌ཀ༌ བོརས༌ ཡང༌ ཏུས༌གྱུན༌ སོན༌པོ༌ ཞུགས༌ཁན༌བོ༌ ཁོང༌རང༌ངི༌ ཁྲིས༌སི༌ཀ༌ ཞུགས༌། ཁོང༌ངི༌ ནམ༌ཟ༌ ཁ༌ ཙོགས༌ ཀར༌པོ༌, ཁོང༌ངི༌ ཨུ༌སྲ༌ བལ༌ ཙོགས༌ ཀར༌པོ༌, ཁོང༌ངི༌ ཁྲིས༌ མེའེ༌ མེལ༌ཇབ༌ ཡང༌ ཏེ༌བོའེ༌ ཁོར༌ལོ༌གུན༌ མེའ༌ཞེན༌ དུག༌པིན༌།
DAN 7:10 ཁོང༌ངི༌ ནང༌ནེ༌ མེ༌ ལྩངས༌པོ༌ བིངས༌ཏེ༌ གྱུག༌དུག༌པིན༌། སྟོང༌ཁྲག༌ ཕོ༌ཉ༌གུན༌ནི༌ ཁོང༌ང༌ ཞབ༌ཞི༌ ཞུ༌ དུག༌པིན༌ ཡང༌ བུམ༌ཁྲག༌ མང༌པོའེ༌ ཁོང༌ང༌ ཁོར༌ཏེ༌ དུག༌པིན༌། ཁྲིམས༌ཁུང༌ངི༌ ལས༌ གོ༌ཟུག༌ ཡང༌ སྤེ༌ཆ༌གུན༌ ཕེས༌།”
DAN 7:11 “ངའ༌ རཱ༌ཅོ༌ ཆུ༌ངུན༌ནི༌ ཕོ༌སོ༌ཅན༌ནི༌ སྤེ༌རའ༌ ཏང༌ཅེས༌པའེ༌ ངའེ༌ ཏེ༌བོའ༌ ལྟེན༌ དུགས༌པིན༌། ཏེ༌ ཇིགས༌ནང༌ཅན༌ནི༌ སེམས༌ཅན༌བོ༌ སད༌ཏེ༌ ཁོའེ༌ ཟུགས༌པོ༌ མེ༌ ནང༌ང༌ ཕངས༌ཏེ༌ མེད༌ཁན༌ ཅོ༌ཅོ༌ ང༌ ལྟེན༌ དུགས༌པིན༌།
DAN 7:12 ཞན༌ ཇིགས༌ནང༌ཅན༌ནི༌ སེམས༌ཅན༌ སུམ༌ཀོའེ༌ ཝང༌ཆ༌གུན༌ ཀོགས༌ཏེ༌ ཁྱོངས༌ ཨིན༌ནའང༌ ཏེ༌གུན༌ ཏུས༌ བན༌ཤིག༌ སོན༌ཏེའ༌ བོར༌ར༌ ཛད༌།”
DAN 7:13 “ཏེ༌ ཚན༌ལ༌ ཞལ༌ཟིགས༌སི༌ ནང༌ང༌ ངའ༌ མི༌རིགས༌སི༌བུ༌ ཙོགས༌ཤིག༌ ནམ༌ཁའ༌ནེ༌ སྲིན༌གུན༌ནི༌ ནང༌ང༌ སྐྱོད༌ཨིན༌ ཐོང༌། ཁོང༌ ཏུས༌གྱུན༌ སོན༌པོ༌ ཞུགས༌ཁན༌བོའེ༌ཀ༌ སྐྱོདས༌ ཡང༌ ཁོང༌ ཁོང༌ངི༌ སྐུན༌དུན༌ལ༌ ཁྱེར༌ར༌ ཛདས༌།
DAN 7:14 གྱལ༌ཁམས༌, སྐད༌ དང༌ མི༌ ཚང༌མའེ༌ ཅོལ༌ཅེས༌སི༌ ཕིའ༌ ཁོང༌ངི༌ མི༌རིགས༌སི༌བུའ༌ ཝང༌ཆ༌, སྤལ༌ དང༌ གྱལ༌པོའེ༌ ཝང༌ཆ༌ སལ༌ལ༌ ཛདས༌། ཁོང༌ངི༌ ཝང༌སྲུལ༌ ཏུས༌གྱུན༌ ལུས༌ཨིན༌, མེད༌ཁན༌ མི༌ཆ༌ ཡང༌ ཁོང༌ངི༌ གྱལ༌སྲིད༌ མེད༌ཁན༌ མ༌ནེ༌ ཅོ༌ མི༌ཉན༌།”
DAN 7:15 “ང༌ དཱ༌ནི༌ཨེལ༌ལ༌ སེམས༌ཉིད༌དི༌ ནང༌ང༌ མ༌སྲན༌ཏྲེ༌ ནགས༌ ཐོང༌ ཡང༌ ཞལ༌ཟིགས༌སི༌ ངའེ༌ སེམས༌ལ༌ རྡུག༌ངལ༌ ཐོང༌ ཅུགས༌།
DAN 7:16 ཏེ༌ཀ༌ ཞུགས༌ཏེ༌ ཡོད༌ཁན༌ ཕོ༌ཉ༌ ཅིག༌གི༌ དུན༌ལ༌ ངའ༌ སོང༌ཏེ༌ འི༌ ཚང༌མའེ༌ ཏོན༌ ཏྲིས༌པིན༌། “ཁོང༌ངི༌ ང༌ ཏེ༌གུན༌ནི༌ ཏོན༌ ཤད༌ད༌ ཛདས༌,
DAN 7:17 ‘ཇིགས༌ནང༌ཅན༌ནི༌ སེམས༌ཅན༌ ཞི༌ ནི༌ ཇིག༌རྟེན༌ནི༌ཀ༌ ཇུང༌ཅེས༌ཅན༌ གྱལ༌སྲིད༌ ཞི༌ ཨིན༌ནོག༌།
DAN 7:18 ཨིན༌ནའང༌ ཀུན༌ཝང༌ དཀོན༌མཆོག༌གི༌ ཏམ༌པ༌ མི༌གུན༌ལ༌ ཁོ༌རང༌གུན༌ནི༌ གྱལ༌སྲིད༌ ཏང༌ཨིན༌ ཡང༌ ཏེ༌བོ༌ ཁོང༌གུན༌ནི༌ ལག༌ག༌ ཏུས༌གྱུན༌ནེ༌གྱུན༌ ལུས༌ཨིན༌, འོ༌ན༌ ཏུས༌གྱུན༌ནེ༌གྱུན༌།’”
DAN 7:19 “ཏེ༌ནེ༌ ང༌ སེམས༌ཅན༌ ཞི༌པ༌ ཀ༌བོ༌ ཞན༌གུན༌ནི༌ སང༌ སོ༌སོ༌, མ༌ ཇིགས༌ནང༌ཅན༌, ལྕགས༌སི༌ སོ༌ དང༌ ཀང༌པའེ༌ སེན༌མོ༌གུན༌ ཟངས༌སི༌ ཡོད༌ཁན༌བོའེ༌ ཏོན༌བོ༌ ཧ༌གོ༌ཉིན༌ ཡོད༌པིན༌། ཏེ༌བོའེ༌ ཅི༌ཚང༌མ༌ ཅད༌ཏེ༌ སྟུབས༌ཏེ༌ ཟོས༌ཏེ༌ ལུས༌ཁན༌བོ༌ ཀང༌པའེ༌ ཐིལ༌ལ༌ ཉེས༌ཏེ༌ མེད༌ཁན༌ ཅོ༌ དུག༌པིན༌།
DAN 7:20 ཏེ༌བོའེ༌ གོའེ༌ཀ༌ ཡོད༌ཁན༌ རཱ༌ཅོ༌ རྕུ༌ ཡང༌ ར༌ཅོ༌ ཆུ༌ངུན༌ བིང༌ཏེ༌ ཞན༌ རཱ༌ཅོ༌ སུམ༌ མེད༌ཁན༌ ཅོ༌ཁན༌, མི༌ མིག༌ ཙོགས༌ དང༌ ཕོ༌སོ༌ཅན༌ནི༌ སྤེ༌ར༌ ཏང༌ཁན༌ནི༌ ཏོན༌བོའང༌ ངའ༌ ཧ༌གོ༌ཉིན༌ ཡོད༌པིན༌། ཏེ༌བོ༌ ཞན༌གུན༌ནི༌ སང༌ མང༌ང༌ ཇིགས༌ནང༌ཅན༌ ཡོད༌པིན༌།
DAN 7:21 ལྟེན༌ ཡོད༌ཏུས༌ ཏེ༌ རཱ༌ཅོའེ༌ དཀོན༌མཆོག༌གི༌ ཏམ༌པ༌ མི༌གུན༌ ཉམ༌པོ༌ མག༌ ཏངས༌ཏེ༌ ཁོང༌གུན༌ལ༌ ཕམ༌ ཀལ༌ལད༌པིན༌,
DAN 7:22 ནམ༌ ཚོག༌པ༌ ཏུས༌གྱུན༌ སོན༌པོ༌ ཞུགས༌ཁན༌བོ༌ སྐྱོད༌ཏེ༌ ཀུན༌ཝང༌ དཀོན༌མཆོག༌གི༌ ཏམ༌པ༌ མི༌གུན༌ནི༌ ཆོག༌སྐྱོར༌ལ༌ ཐག༌ཅད༌ མ༌སལས༌། ཏེ༌ནེ༌ ཁོང༌གུན༌ནི༌ གྱལ༌སྲིད༌ ལེན༌ཅེས༌སི༌ ཏུས༌པོ༌ ལེབ༌།”
DAN 7:23 “ཁོང༌ངི༌ ང༌ ཏོན༌བོ༌ ཤད༌ད༌ ཛདས༌, ‘སེམས༌ཅན༌ ཞི༌པ༌ ཇིག༌རྟེན༌ནི༌ཀ༌ ཇུང༌ཅེས༌ཅན༌ གྱལ༌སྲིད༌ ཞི༌པ༌བོ༌ ཨིན༌ནོག༌། ཏེ༌བོ༌ ཞན༌ གྱལ༌སྲིད༌གུན༌ནི༌ སང༌ སོ༌སོ༌ ཡང༌ ཏེ༌བོའེ༌ ཇིག༌རྟེན༌ གང༌པོ༌ ཅད༌ཏེ༌ སྟུབས༌ཏེ༌ མེད༌ཁན༌ ཅོ༌ཨིན༌།
DAN 7:24 རཱ༌ཅོ༌ རྕུ༌བོ༌ ཏེ༌ གྱལ༌སྲིད༌དི༌ ནང༌ནེ༌ བིང༌ཁན༌ གྱལ༌པོ༌ རྕུ༌ ཨིན༌ནོག༌། ཁོང༌གུན༌ནི༌ སྟིང༌ནེ༌ ཞན༌ གྱལ༌པོ༌ སོ༌སོ༌ཞིག༌ བིང༌ཨིན༌ ཀ༌བོའེ༌ ཁོང༌གུན༌ནི༌ ཕྲོ༌ནེ༌ སུམ༌མ༌ ཕམ༌ཀལ༌ཏེ༌ མེད༌ཁན༌ ཅོ༌ཨིན༌།
DAN 7:25 ཀུན༌ཝང༌ དཀོན༌མཆོག༌གི༌ གྱབ༌གལ༌ལ༌ ཟེར༌ཏེ༌ ཁོའེ༌ ཁོང༌ངི༌ ཏམ༌པ༌ མི༌གུན༌ལ༌ ནགས༌ སྟན༌ཨིན༌ ཡང༌ ལྡམ༌མ༌ ཛད༌ཁན༌ནི༌ ཏུས༌ དང༌ ཁྲིམས༌ གུན༌ གྱུར༌ཅེས༌སི༌ རྩོན༌གྲུས༌ ཅོ༌ཨིན༌། ཏམ༌པ༌ མི༌གུན༌ ཁོའེ༌ ལག༌ག༌ སྟད༌ད༌ ཛད༌ཨིན༌ ཡང༌ ཁོའེ༌ ཁོང༌གུན༌ ལོ༌ སུམ༌ ནང༌ ཕེད༌ ཁོ༌རང༌ངི༌ ཝང༌ངི༌ ཡོག༌ག༌ བོར༌ཨིན༌།’”
DAN 7:26 “‘ཨིན༌ནའང༌ ནམ༌ཁའེ༌ ཁྲིམས༌ཁུང༌ ཙུགས༌ཏེ༌ ཁོའེ༌ ཀ༌ནེ༌ ཝང༌བོ༌ ཁྱེར༌ཏེ༌ ཏུས༌གྱུན༌ནི༌ ཕིའ༌ མེད༌ཁན༌ ཅོ༌ཨིན༌།
DAN 7:27 ཏེ༌ནེ༌ ནམ༌ཁའེ༌ ཡོག༌ག༌ ཡོད༌ཁན༌ གྱལ༌སྲིད༌གུན༌ནི༌ ཝང༌, ཁྱུད༌ དང༌ སྟོབས༌ ཚང༌མ༌, ཀུན༌ཝང༌ དཀོན༌མཆོག༌གི༌ ཏམ༌པ༌ མི༌གུན༌ནི༌ ལག༌ག༌ སལ༌ལ༌ ཛད༌ཨིན༌། ཁོང༌ངི༌ གྱལ༌སྲིད༌ ཏུས༌གྱུན༌ནེ༌གྱུན༌ ལུས༌ཨིན༌ ཡང༌ ཝང༌སྲུལ༌པ༌ ཚང༌མའེ༌ ཁོང༌ངི༌ ཁའ༌ཉན༌ཏེ༌ ཁོང༌ང༌ ཞབས༌ཏོག༌ ཞུ༌ཨིན༌།’”
DAN 7:28 “ཞལ༌ཟིགས༌པོའེ༌ ནང༌ང༌ ངའ༌ ཏེན༌ན༌བོ༌ ཐོང༌། ང༌, དཱ༌ནི༌ཨེལ༌ལི༌ སེམས༌ལ༌ སྲན༌ཏྲེ༌ ནགས༌ ཐོང༌ ཡང༌ ངའེ༌ ལྡོང༌ སེར༌པོ༌ གྱུར༌ ཨིན༌ནའང༌ ངའེ༌ ཏེ༌ ཞལ༌ཟིགས༌པོ༌ སུའང༌ མ༌ཤད༌པིན༌།”
DAN 8:1 གྱལ༌པོ༌ བེལ༌ཤའེ༌ཟར༌རི༌ ཝང༌སྲུལ༌ལི༌ ལོ༌ སུམ༌པའེ༌ ནང༌ང༌ ང༌, དཱ༌ནི༌ཨེལ༌ལ༌ ཡང༌སྐྱར༌ ཞལ༌ཟིགས༌ཤིག༌ ཐོང༌།
DAN 8:2 ཏེ༌ ཞལ༌ཟིགས༌པོའེ༌ ནང༌ང༌ ང༌ ཨེ༌ལམ༌ ཡུལ༌ཇོངས༌སི༌ གྱང༌སྐོར༌ ཐོན༌པོ༌ ཡོད༌སའེ༌ གྱལ༌ས༌ སུ༌སཱའེ༌ ནང༌ང༌ ཨུ༌ལཱའེ༌ ཡུ༌རའེ༌ ཐའ༌མའ༌ ལངས༌ཏེ༌ དུག༌པིན༌།
DAN 8:3 ངའེ༌ ཀེན༌ལ༌ ལྟའ༌ཅིག༌ ངའ༌ རཱ༌ཅོ༌ རིང༌མོ༌ ཉིས༌ ཡོད༌ཁན༌ ལུག༌ཕོ༌ཞིག༌ ཡུ༌རའེ༌ ཐའ༌མའ༌ ལངས༌ཏེ༌ ཐོང༌། སྟིང༌ནེ༌ སྐྱེ༌ཁན༌ནི༌ རཱ༌ཅོ༌ སྔུན༌ལ༌ སྐྱེ༌ཁན༌བོའེ༌ སང༌ རིང༌ང༌ དུག༌པིན༌།
DAN 8:4 ལུག༌ཕོ༌བོའེ༌ ནུབ༌, བྱང༌ དང༌ ལྷོ༌ ཆོགས༌ ཚང༌མ༌ ནོལ༌ཅེས༌ལ༌ གྱུགས༌ ཡང༌ ཁོའེ༌ དུན༌ལ༌ སེམས༌ཅན༌ ཅིག༌གའང༌ ལངས༌ མ༌ཉན༌ ཡ༌ མ༌སྐྱོན༌ ཆ༌ཅེས༌ནེ༌ སྐྱོབ༌ མ༌ཉན༌། ཏེ༌ ལུག༌ཕོ༌བོའེ༌ ཁོ༌རང༌ ཐད༌ཁན༌བོ༌ ཅོས༌ ཡང༌ ཀྲག༌པོ༌ གྱུར༌།
DAN 8:5 ངའེ༌ ཏེ༌བོ༌ ལྟེན༌ ཡོད༌ ཟ༌ནེ༌ ཧུན༌མེད༌ལ༌ མིག༌གུན༌ནི༌ པར༌ལ༌ རཱ༌ཅོ༌ ཆེན༌མོ༌ ཡོད༌ཁན༌ནི༌ ར༌བོ༌ཞིག༌ ནུབ༌ ཆོགས༌ནེ༌ བིང༌ཏེ༌ རྐང༌པ༌ སའ༌ མ༌ཐུག༌ཁན༌ ཙོགས༌ འི༌ཟམ༌ གྱོགས༌པ༌ ཇིག༌རྟེན༌ གང༌པོའེ༌ཀ༌ བང༌ཏང༌ཨིན༌ ཐོང༌།
DAN 8:6 ཁོ༌ ངའ༌ ཡུ༌རའེ༌ དུན༌ལ༌ ལངས༌ཏེ༌ ཐོང༌ཁན༌ རཱ༌ཅོ༌ ཉིས༌ ཡོད༌ཁན༌ནི༌ ལུག༌ཕོ༌ ཡོད༌ས༌ གྱུགས༌ཏེ༌ སོང༌།
DAN 8:7 ར༌བོའེ༌ ལུག༌ཕོ༌བོའ༌ གོ༌ཙུག༌ སྲན༌ཏྲེ༌ ཏངས༌ཏེ༌ ཁོའེ༌ རཱ༌ཅོ༌ ཉིས༌ཀོ༌ ཅགས༌། ལུག༌ཕོ༌ ཤེད༌མེད༌ གྱུར༌ཏེ༌ ར༌བོའེ༌ གྱབ༌གལ༌ལ༌ ནོལ༌ མ༌ཉན༌། ར༌བོའེ༌ ལུག༌ཕོ༌ སའེ༌ཀ༌ ལྡབས༌ཏེ༌ ཁོ༌རང༌ངི༌ ཀང༌པའེ༌ ཡོག༌ག༌ ནནས༌ ཡང༌ སུའང༌ ཁོ༌ ར༌བོའེ༌ ཀ༌ནེ༌ སྐྱོབ༌ མ༌ཉན༌།
DAN 8:8 ར༌བོ༌ མ༌ ཤེད༌ཅན༌ གྱུར༌ ཡང༌ ཁོའེ༌ ཝང༌སྲུལ༌བོ༌ ཚང༌མའེ༌ སང༌ ཤེད༌ཅན༌ ཡོད༌དི༌ ཏུས༌ལ༌ ཁོའེ༌ རཱ༌ཅོ༌ ཆག༌། ཏེ༌བོའེ༌ ཚབས༌ལ༌ ཇིག༌རྟེན༌ནི༌ ཆོགས༌ ཞི༌ཀོ༌ ཆོགས༌ལ༌ ཆའ༌ཁན༌ནི༌ རཱ༌ཅོ༌ ཤེད༌ཅན༌ ཆེན༌མོ༌ ཞི༌ སྐྱེས༌།
DAN 8:9 ཏེན༌ན༌ ཅིག༌གི༌ ནང༌ནེ༌ ཡང༌ རཱ༌ཅོ༌ ཆུ༌ངུན༌ཞིག༌ བིང༌ ཀ༌བོ༌ ཤར༌ དང༌ ནུབ༌ ཡང༌ ལྡེ༌མོ༌ ས༌ཀྱད༌ ཡང༌ན༌ ཨིས༌ར༌ཨེལ༌ གུན༌ ཆོགས༌ལ༌ མ༌ ཤེད༌ཅན༌ གྱུར༌།
DAN 8:10 ཏེ༌བོའེ༌ ཤེད༌པོ༌ ནམ༌ཁའ༌ ཚག༌པ༌ ལེབ༌ ཡང༌ ཁོའེ༌ ནམ༌ཁའེ༌ མག༌མི༌ དང༌ སྐར༌མ༌ ཁ༌ཅིག༌ ཇིག༌རྟེན༌ནི༌ཀ༌ ཕངས༌ཏེ༌ ཀང༌པའེ༌ ཡོག༌ག༌ ནནས༌།
DAN 8:11 ཁོའེ༌ ནམ༌ཁའེ༌ མག༌མི༌ གྱལ༌ལུའི༌ སང༌ ཁོ༌རང༌ ཀྲག༌ག༌ ཐེས༌ཏེ༌ ཁོང༌ང༌ ཕུལ༌ཁན༌ནི༌ ཆོད༌པ༌གུན༌ ཕུལ༌ མ༌ཅུགས༌ ཡང༌ ཆོད༌ཁང༌ངི༌ ནས༌ས༌ ཚི༌ཏུ༌ གྱུར༌ཅུགས༌།
DAN 8:12 ཏེ༌བོའེ༌ ཞས༌ཏེ༌ ནམ༌ཁའེ༌ མག༌མི༌གུན༌ ཁོའེ༌ ལག༌ག༌ སྟད༌ཏེ༌ ཆོད༌པ༌གུན༌ ཁོའ༌ ཕུལ༌ཅུག༌ག༌ ཛདས༌། ཁོ༌ ཅི༌ ཚང༌མའེ༌ ནང༌ང༌ ཡར༌གྱས༌ ཅོ༌ཨིན༌ སོང༌ཏེ༌ ཀྲང༌པོ༌ ལས༌གུན༌ མེད༌ཁན༌ ཅོས༌།
DAN 8:13 ཏེ༌ནེ༌ ང༌ ཏམ༌པ༌ ཕོ༌ཉ༌ ཉིས༌སི༌ ཞལ༌ཏ༌ སལ༌ཨིན༌ ཚོར༌། ཁོང༌ ཅིག༌པོའེ༌ ཞན༌ ཅིག༌པོའ༌ མོལས༌, “འི༌ ཞལ༌ཟིགས༌པོ༌ གྲུབ༌ཅེས༌ལ༌ ཏུས༌ ཙམ༌ཤིག༌ གོར༌ཅེས༌ ཨིན༌ནོག༌? ནམ༌ ཚག༌པ༌ དཀོན༌མཆོག༌ག༌ གྱབ༌གལ༌ ཅོ༌ཁན༌བོའེ༌ ཆོད༌ཁང༌ངི༌ ནང༌ང༌ ཚི༌ཏུ༌ བོར༌ཏེ༌ བླ༌མ༌གུན༌ལ༌ ཆོད༌པ༌ ཕུལ༌ མི༌ཅུག༌? ཁོའེ༌ ནམ༌ཁའེ༌ མག༌མི༌གུན༌ ཀང༌པའེ༌ ཡོག༌ག༌ བོར༌ཏེ༌ ཆོད༌ཁང༌ ཁོའེ༌ ཝང༌ངི༌ ཡོག༌ག༌ ནམ༌ ཚོག༌པ༌ ལུས༌ཨིན༌?”
DAN 8:14 ཞན༌ ཏམ༌པ༌ ཕོ༌ཉ༌བོའེ༌ མོལས༌, “2,300 ང༌མོ༌ དང༌ ཕི༌ཏོག༌གི༌ སྟིང༌ནེ༌ ཆོད༌ཁང༌ ཡང༌སྐྱར༌ ཏམ༌པ༌ ཛད༌ཨིན༌།”
DAN 8:15 ང༌, དཱ༌ནི༌ཨེལ༌ལི༌ ཞལ༌ཟིགས༌པོ༌ ཧ༌གོ༌ཅེས༌སི༌ རྩོན༌གྲུས༌ ཅོ༌ཨིན༌ ཡོད༌ ཟ༌ནེ༌ ངའེ༌ དུན༌ལ༌ མི༌ ཙོགས༌ ཐོང༌ཁན༌ནི༌ ཕོ༌ཉ༌ཞིག༌ ཞངས༌ཏེ༌ ཞུགས༌།
DAN 8:16 ཡང༌ ངའ༌ ཨུ༌ལཱའེ༌ ཡུ༌རའེ༌ ནང༌ནེ༌, “གྱེབ༌རི༌ཨེལ༌ འི༌ མི༌བོའ༌ ཞལ༌ཟིགས༌སི༌ ཏོན༌བོ༌ ཤོད༌” མོལ༌ཨིན༌ ཚོར༌།
DAN 8:17 ཁོང༌ ངའེ༌ དུན༌ལ༌ སྐྱོད༌ ཟ༌ནེ༌ ང༌ སྲན༌ཏྲེ༌ ཇིགས༌ཏེ༌ སའེ༌ཀ༌ གྱེལ༌ ཨིན༌ནའང༌ ཁོང༌ངི༌ ང༌ མོལས༌, “མིའི༌ ཕྲུ༌གུ༌, འི༌ ཞལ༌ཟིགས༌ ཐའ༌མའེ༌ ཏུས༌སི༌ སྐོར༌ལ༌ ཨིན༌ཁན༌ ཁོ༌རང༌ང༌ ཧ༌གོ༌ གོས༌།”
DAN 8:18 ཁོང༌ངི༌ ཞལ༌ཏ༌ སལ༌ ཟ༌ནེ༌ ང༌ མུན༌ཏེ༌ སའེ༌ཀ༌ གྱེལ༌། ཏེ༌ནེ༌ ཁོང༌ངི༌ ཆག༌རྩེའ༌ ཛད༌ཏེ༌ ང༌ ལང༌ཅེས༌ལ༌ རོགས༌ ཛདས༌།
DAN 8:19 ཁོང༌ངི༌ མོལས༌, “དཀོན༌མཆོག༌ག༌ ཐུག༌སྲོ༌ སྐྱོད༌དི༌ ཏུས༌ལ༌ ཇུང༌ཅེས༌ཅན༌གུན༌ ངའེ༌ ཁྱོ༌རང༌ང༌ ཤད༌ཨིན༌། འི༌གུན༌ ཇིག༌རྟེན༌ནི༌ ཐའ༌མའེ༌ ཏུས༌ལ༌ ཇུང༌ཨིན༌།
DAN 8:20 རཱ༌ཅོ༌ ཉིས༌ ཡོད༌ཁན༌ནི༌ ལུག༌ཕོ༌ ནི༌ མེ༌དིའ༌པ༌ དང༌ པར༌ཤིའ༌པ༌ གྱལ༌པོ༌གུན༌ ཨིན༌ནོག༌།
DAN 8:21 ར༌བོ༌ གརིས༌སི༌ གྱལ༌སྲིད༌ ཡང༌ ཁོའེ༌ མིག༌གུན༌ནི༌ པར༌རི༌ རཱ༌ཅོ༌ གྱལ༌པོ༌ ཏང༌པོ༌བོ༌ ཨིན༌ནོག༌།
DAN 8:22 ཏེ༌བོའེ༌ ཚབས༌ལ༌ རཱ༌ཅོ༌ ཞི༌ སྐྱེ༌ཁན༌ནི༌ ཏོན༌བོ༌, ཏེ༌ གྱལ༌སྲིད༌པོའ༌ ཁག༌ ཞི༌ བུད༌ཅེས༌ ཨིན༌ནའང༌ ཁོང༌ ཅིག༌གའང༌ གྱལ༌པོ༌ ཏང༌པོ༌ ཙོགས༌ ཀྲག༌པོ༌ མི༌ཡོང།
DAN 8:23 ཏེ༌ ཝང༌སྲུལ༌ལི༌ སྟིང༌ཇུག༌གི༌ ཏུས༌ ནམ༌ ངན༌པ༌ ཚད༌ནེ༌ ཐལ༌ཏེ༌ གྱས༌ས༌ཅིག༌ གོབ༌སྐོར༌ཁན༌, ཕོ༌སོ༌ཅན༌ མ༌ ངན༌པ༌ གྱལ༌པོ༌ཞིག༌ བིང༌ཨིན༌།
DAN 8:24 ཁོ༌ མ༌ ཤེད༌ཅན༌ གྱུར༌ཨིན༌ ཨིན༌ནའང༌ ཁོ༌རང༌ངི༌ ཁྱུད༌དི༌ ཞས༌ཏེ༌ མི༌གྱུར༌། ཁོའེ༌ གྱལ༌སྲིད༌ མང༌པོ༌ ཁྲེས༌ཏོར༌ ཅོ༌ཨིན༌ ཡང༌ ཁོའེ༌ ཅོ༌ཁན༌ནི༌ ལས༌ ཚང༌མའེ༌ ནང༌ང༌ ཁོ༌ ཁྲངས༌པོ༌ ལུས༌ཨིན༌། ཁོའེ༌ ཤེད༌ཅན༌ མི༌གུན༌ དང༌ དཀོན༌མཆོག༌གི༌ ཏམ༌པ༌ མི༌གུན༌ མེད༌ཁན༌ ཅོ༌ཨིན༌།
DAN 8:25 ཁོའེ༌ ངན༌པ༌ ཏར༌ ཅུགས༌ཏེ༌ ཁོ༌ མ༌ ཕོ༌སོ༌ཅན༌ གྱུར༌ཨིན༌། ཞི༌དེ༌ ཡོད༌དི༌ ཏུས༌ ཧུན༌མེད༌ལ༌ ཁོའེ༌ མི༌མང༌པོ༌ སད༌ཏེ༌ གྱལ༌པོ༌གུན༌ནི༌ གྱལ༌པོའ༌ གྱབ༌གལ༌ ཅོ༌ཨིན༌། ཨིན༌ནའང༌ མི༌ ཤེད༌ གྱུད༌ཏེ༌ མན༌པ༌ དཀོན༌མཆོག༌ ཁོང༌རང༌ངི༌ ཁོ༌ མེད༌ཁན༌ ཛད༌ཨིན༌།”
DAN 8:26 “ང༌མོ༌ དང༌ ཕི༌ཏོག༌གི༌ ཞལ༌ཟིགས༌ ཐོང༌ཁན༌བོ༌ ཀྲང༌པོ༌ ཨིན༌ནོག༌ ཨིན༌ནའང༌ ཏེ༌བོ༌ ཏུས༌རིང༌མོའེ༌ སྟིང༌ནེ༌ མན༌ནེ༌ ཇུང༌ཅེས༌ མན༌ པ༌སང༌ ཏེ༌བོ༌ སང༌ཝའེ༌ ནང༌ང༌ བོར༌།”
DAN 8:27 ང༌, དཱ༌ནི༌ཨེལ༌ མ༌ སྲན༌ཏྲེ༌ ངལ༌ ཡང༌ ཞག༌ ཁ༌ཅིག༌ ཟུ༌མོ༌ ཡོངས༌ཏེ༌ ལུས༌། ཟུ༌མོ༌ གྱལ༌ཏེ༌ སྟིང༌ནེ༌ ངའེ༌ ཡང༌སྐྱར༌ གྱལ༌པོའེ༌ ཞབ༌ཞི༌ ཞུ༌ཅེས༌ གོ༌ཟུག༌ ཅོས༌པིན༌། ཏེ༌ ཞལ༌ཟིགས༌པོའེ༌ ང༌ ཧ༌ལས༌ཏེ༌ ཐེ༌ཚོམས༌ ཆ༌ཅུགས༌ ཡང༌ ཏེ༌བོ༌ ངའེ༌ ཧ༌གོ༌ནེ༌ ཐལ༌ཏེ༌ དུག༌པིན༌།
DAN 9:1 བ༌བེ༌ལོན༌ནི༌ ནང༌ང༌ ཟེརཀ༌སེས༌སི༌ བུ༌ཚ༌ མེ༌དིའ༌པ༌ གྲ༌རི༌ཡས༌ གྱལ༌པོའེ༌ ཝང༌སྲུལ༌ལི༌ གོ༌མའེ༌ ལོའེ༌ ནང༌ང༌
DAN 9:2 ལུང༌སྟོན༌པ༌ ཡེ༌རེམ༌ཡཱའི༌ གྱུད༌ཏེ༌ ཡ༌ཝ༌ དཀོན༌མཆོག༌གི༌ སལ༌ཁན༌ བཀའ༌ ནང༌ཞིན༌ ཡེ༌རུ༌ཤ༌ལེམ༌ ཁྲེས༌ཏོར༌ སོང༌ཏེ༌ ལོ༌ རྡུན༌ཅུ༌ སྟོང༌པ༌ ལུས༌ཤེས༌པོ༌ ང༌ དཱ༌ནི༌ཨེལ༌ལ༌ ཧ༌གོ༌།
DAN 9:3 ཏེ༌ནེ༌ ངའེ༌ ཉེ༌ནས༌ བོར༌ཏེ༌, ཕ༌ཙའ༌ གོན༌ཏེ༌ ཀོག༌ཐལ༌ ཡོགས༌ཏེ༌ ཡ༌ཝ༌ དཀོན༌མཆོག༌ག༌ ཞུ༌ཝ༌ ཕུལ༌ཨིན༌ མོས༌ལམ༌ ཞུས༌པིན༌།
DAN 9:4 ངའེ༌ མོས༌ལམ༌ ཞུ༌ཨིན༌ ང༌ཞའེ༌ སྡིག༌པ༌ ཅོ༌ཁན༌གུན༌ ཡ༌ཝའ༌ ཤད༌ཏེ༌ ཟེར༌པིན༌, “གཙོ༌བོ༌ལེ༌ ཉེ༌རང༌ ཀྲག༌པོ༌ དང༌ ཁྱུད༌ཅན༌, ཆད༌དོན༌ ཛད༌ཁན༌ནི༌ ནང༌ང༌ ཨིད༌ཤེས༌ཅན༌ ཡང༌ ཉེ༌རང༌ངི༌ བཀའ༌རྒྱ༌ ཁའ༌ཉན༌ཏེ༌ ཉེ༌རང༌ང༌ ཡ༌ཤ༌ ཅོ༌ཁན༌གུན༌ལ༌ ཉེ༌རང༌ངི༌ ཏུས༌གྱུན༌ ཡ༌ཤ༌ ཛད༌ཅེས༌ ཁ༌ཆད༌ ཛད༌དུག༌།
DAN 9:5 ང༌ཞའེ༌ སྡིག༌པ༌ དང༌ ངན༌པ༌ ཡང༌ ཉེ༌རང༌ངི༌ གྱབ༌གལ༌ ཅོས༌ཏེ༌ ཉེ༌རང༌ངི༌ བཀའ༌ ཏང༌ ཁྲིམས༌ གུན༌ ཕངས༌ཏེ༌ ཨིན༌ནོག༌།
DAN 9:6 ཉེ༌རང༌ངི༌ ལུང༌སྟོན༌པ༌གུན༌ གྱུད༌ཏེ༌ ང༌ཞའེ༌ གྱལ༌པོ༌, གྱལ༌ལུ༌, ཕ༌མེས༌པོ༌ དང༌ མི༌ ཚང༌མ༌ལ༌ མོལ༌ལ༌ ཛད༌ཁན༌ ཚང༌མ༌ ང༌ཞའེ༌ མ༌ཉནས༌།”
DAN 9:7 “གཙོ༌བོ༌ ཉེ༌རང༌ངི༌ ཐག༌ཅད༌ ཀྲང༌པོ༌ ཨིན༌ནའང༌ ཉེ༌རང༌ ཉམ༌པོ༌ ཨིད༌ཤེས༌ཅན༌ མི༌དུག༌ཅེས༌པའེ༌ འི༌ཏུས༌ལ༌ ང༌ཞའ༌ ཡ༌ཧུ༌དཱ༌པ༌, ཡེ༌རུ༌ཤ༌ལེམ༌པ༌ དང༌ ཨིས༌ར༌ཨེལ༌པ༌ ཚང༌མ༌, ཉེ༌མོ༌ དང༌ ཐག༌རིང༌ ཡང༌ ང༌ཞའ༌ ཕེའ༌ ཛད༌ཁན༌ནི༌ ཡུལ༌ ཚང༌མའེ༌ ནང༌ང༌ ཁྲེལ༌བ༌ སོང༌ཏེ༌ ཨིན༌ནོག༌།
DAN 9:8 གཙོ༌བོ༌ལེ༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོ༌ཅེས༌པའེ༌ ང༌ཞའ༌, ང༌ཞའེ༌ གྱལ༌པོ༌, གྱལ༌ལུ༌ དང༌ ཕ༌མེས༌པོ༌ ཚང༌མ༌ ཁྲེལ༌བའེ༌ གང༌ཏེ༌ ཨིན༌ནོག༌།
DAN 9:9 ང༌ཞའེ༌ ཉེ༌རང༌ངི༌ གྱབ༌གལ༌ ཅོ༌ནའང༌ གཙོ༌བོ༌ ང༌ཞའེ༌ དཀོན༌མཆོག༌ ཉེ༌རང༌ སྙིང༌རྗེའེ༌ དང༌ ཤགས༌པ༌ ཛད༌ཁན༌ ཞུགས༌ཏེ༌ ཨིན༌ནོག༌།
DAN 9:10 ཡ༌ཝ༌ ང༌ཞའེ༌ དཀོན༌མཆོག༌ ཉེ༌རང༌ངི༌ ཁའ༌ ང༌ཞའེ༌ མ༌ཉན༌ན༌ ཡང༌ ཉེ༌རང༌ངི༌ ལུང༌སྟོན༌པ༌གུན༌ གྱུད༌ཏེ༌ སལ༌ཁན༌ནི༌ ཁྲིམས༌གུན༌ མ༌ སྲུང༌ང༌ ཨིན༌ནོག༌།
DAN 9:11 ཨིས༌ར༌ཨེལ༌པ༌ ཚང༌མའེ༌ ཉེ༌རང༌ངི༌ ཁྲིམས༌ ཅགས༌ཏེ༌ ཉེ༌རང༌ནེ༌ ཐག༌རིང༌ང༌ སོང༌ཏེ༌ ཉེ༌རང༌ངི༌ ཁའ༌ མ༌ཉན༌ན༌ ཨིན༌ནོག༌།” “ཏེ༌བོའེ༌ཕིའ༌ ཉེ༌རང༌ངི༌ ཞབས༌ཏོག༌པ༌ མོ༌ཟེས༌སི༌ ཁྲིམས༌སི༌ ནང༌ང༌ བྲིས༌ཁན༌ནི༌ ངན༌ དང༌ ཆད༌པ༌ གུན༌ ང༌ཞའེ༌ཀ༌ བབས༌ཏེ༌ ཨིན༌ནོག༌ ཅིའ༌ཟེར༌ན༌ ང༌ཞའེ༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌།
DAN 9:12 ཉེ༌རང༌ངི༌ ང༌ཞའེ༌ ཝང༌སྲུལ༌པ༌ དང༌ ང༌ཞ༌གུན༌ནི༌ཀ༌ ཆད༌པ༌ ཀྲག༌པོ༌ སལ༌ཏེ༌ ཉེ༌རང༌ངི༌ ང༌ཞའེ༌ གྱབ༌གལ༌ལ༌ མོལ༌ཁན༌བོ༌ གྲུབ༌ཅུག༌ག༌ ཛད༌ཏེ༌ ཨིན༌ནོག༌། ཡེ༌རུ༌ཤ༌ལེམ༌མི༌ གྱལ༌སའ༌ ཛད༌ཁན༌ ཙོགས༌ ནམ༌ཁའེ༌ ཡོག༌ག༌ ཡོད༌ཁན༌ ཀ༌རུའང༌ མ༌ ཛདས༌།
DAN 9:13 མོ༌ཟེས༌སི༌ ཁྲིམས༌སི༌ ནང༌ང༌ བྲིས༌ཁན༌ ནང༌ཞིན༌ ཏེ༌ རྡུག༌ངལ༌ ཚང༌མ༌ ང༌ཞའེ༌ཀ༌ བབས༌ཏེ༌ ཨིན༌ནོག༌ ཏེ༌ནེའང༌ ང༌ཞའེ༌ སྡིག༌པ༌གུན༌ ཕངས༌ཏེ༌ ཉེ༌རང༌ ཆོགས༌ལ༌ སེམས༌ གྱུར༌ཏེ༌ ཉེ༌རང༌ངི༌ ཀྲང༌པོ༌ ལམ༌མི༌ཀ༌ མ༌གྲུལས༌།
DAN 9:14 ཏེན༌ན༌བོའེ༌ཕིའ༌ ཡ༌ཝ༌ ཉེ༌རང༌ངི༌ གྲལ༌གྲིག༌ ཛད༌ཁན༌ ཀྲག༌པོ༌ རྡུག༌ངལ༌ ང༌ཞའེ༌ཀ༌ ཁྱོང༌ང༌ ཛདས༌ ཅིའ༌ཟེར༌ན༌ དཀོན༌མཆོག༌གི༌ འོས༌པ༌ ཨིན༌ཁན༌བོ༌ ཛད༌ད༌ནོག༌ ཨིན༌ནའང༌ ང༌ཞའེ༌ ཁོང༌ངི༌ ཁའ༌ མ༌ཉན༌ན༌ ཨིན༌ནོག༌།”
DAN 9:15 “ཏ༌ གཙོ༌བོ༌ ང༌ཞའེ༌ དཀོན༌མཆོག༌, ཉེ༌རང༌ངི༌ ཨི༌ཇིབ༌ནེ༌ ཉེ༌རང༌ངི༌ མི༌གུན༌ ཁྱུད༌ ཀྲག༌པོ༌ ཉམ༌པོ༌ ཕིངས༌ཏེ༌ ཁྱོང༌ང༌ ཛད༌ཏེ༌ ཉེ༌རང༌ངི༌ ཚན༌ ཀྲག༌པོ༌ ཏུས༌གྱུན༌ ལུས༌ཤུག༌ག༌ ཛདས༌ ཨིན༌ནའང༌ ང༌ཞ༌གུན༌ ངན༌པ༌ དང༌ སྡིག༌པའེ༌ གངས༌ཏེ༌ ཡོད༌ཏེ༌ ཨིན༌ནོག༌།
DAN 9:16 གཙོ༌བོ༌ལེ༌ ཉེ༌རང༌ངི༌ ཨིད༌ཤེས༌ཅན༌ སྙིང༌རྗེ༌ ནང༌ང༌ ཉེ༌རང༌ངི༌ ཐུག༌སྲོ༌ སྲན༌ཏྲེ༌ དང༌ ཆད༌པ༌ གུན༌ ཡེ༌རུ༌ཤ༌ལེམ༌, ཉེ༌རང༌ངི༌ ཏམ༌པ༌ གྱལ༌སའེ༌ ཀ༌ནེ༌ ཐེན༌ན༌ ཛད༌། ང༌ཞའ༌ དང༌ ང༌ཞའེ༌ ཕ༌མེས༌པོ༌གུན༌ནི༌ སྡིག༌པ༌ ཅོས༌ཏེ༌ ཡེ༌རུ༌ཤ༌ལེམ༌མི༌ གྱལ༌ས༌ དང༌ ཉེ༌རང༌ངི༌ མི༌གུན༌ལ༌ ཉེ༌ཁོར༌རི༌ གྱལ༌ཁམས༌གུན༌ནི༌ ཚིག༌ ཏང༌ང༌ནོག༌།”
DAN 9:17 “ཏ༌ ང༌ཞའེ༌ དཀོན༌མཆོག༌, ངའེ༌ མོས༌ལམ༌ དང༌ ཞུ༌ཝ༌ གུན༌ སན༌ན༌ ཛད༌། ཉེ༌རང༌ངི༌ ཏོན༌ལ༌ གཙོ༌བོ༌ལེ༌, ཁྲེས༌ཏོར༌ ཆའ༌ཁན༌ནི༌ ཉེ༌རང༌ངི༌ ཆོད༌ཁང༌ངི༌ཀ༌ ཡང༌སྐྱར༌ ཐུག༌རྗེ༌ ཟིགས༌ས༌ ཛད༌།
DAN 9:18 ང༌ཞའེ༌ དཀོན༌མཆོག༌, གུའ༌ཛད༌ཏེ༌ ཉན༌ན༌ ཛད༌དའང༌; མིག༌ ཕེའ༌ ཛད༌ཏེ༌ ཉེ༌རང༌ངི༌ ཚན༌ ནམས༌ཁན༌ནི༌ གྱལ༌ས༌ ཞིག༌ཁན༌བོའ༌ ཟིགས༌སའང༌། ང༌ཞ༌གུན༌ ཀྲང༌པོ༌ ཨིན༌ཅེས༌པའེ༌ མན༌པ༌ ཉེ༌རང༌ངི༌ སྙིང༌རྗེ༌ ཀྲག༌པོའེ༌ ཞས༌ཏེ༌ ངའེ༌ ཞུ༌ཝ༌ ཕུལ༌ལད༌།
DAN 9:19 གཙོ༌བོ༌ལེ༌, གཙོ༌བོ༌ལེ༌ ཤགས༌པ༌ ཛད༌དའང༌། གཙོ༌བོ༌ལེ༌ ཉན༌ན༌ ཛད༌ཏེ༌ ལག༌ལེན༌ ཛད༌དའང༌། ཉེ༌རང༌ངི༌ ཏོན༌ལ༌ གཙོ༌བོ༌ལེ༌, གོར༌ ཅུག༌ག༌ མ༌ཛད༌ ཅིའ༌ཟེར༌ན༌ ཉེ༌རང༌ངི༌ གྱལ༌ས༌ དང༌ མི༌གུན༌ནི༌ ཉེ༌རང༌ངི༌ ཚན༌ ནམས༌ཏེ༌ ཨིན༌ནོག༌།”
DAN 9:20 ངའེ༌ མོས༌ལམ༌ ཞུ༌ཨིན༌ ང༌རང༌ དང༌ ཨིས༌ར༌ཨེལ༌པ༌གུན༌ནི༌ སྡིག༌པ༌གུན༌ ཤད༌ཨིན༌ ཡ༌ཝ༌ དཀོན༌མཆོག༌ག༌ ཏམ༌པའེ༌ རིའི༌ཀ༌ ཁོང༌ངི༌ ཆོད༌ཁང༌ངི༌ ཕིའ༌ ཞུ༌ཝའ༌ ཕུལ༌ཨིན༌ ཡོད༌ ཟ༌ནེ༌
DAN 9:21 སྔོན༌ནི༌ ལྟས༌སི༌ ནང༌ང༌ ངའ༌ ཇལ༌ཁན༌ ཕོ༌ཉ༌ གབ༌རི༌ཨེལ༌, ཕི༌ཏོག༌གི༌ ཆོད༌པ༌ ཕུལ༌ཅེས༌སི༌ ཏུས༌ལ༌ ང༌ ཡོད༌ས༌ སྐྱོདས༌།
DAN 9:22 ཁོང༌ངི༌ ང༌ མོལ༌ལ༌ རག༌, “དཱ༌ནི༌ཨེལ༌ ང༌ དཀོན༌མཆོག༌གི༌ ལུང༌སྟོན༌པ༌ ཡེ༌རེམ༌ཡཱའི༌ སལ༌ཁན༌ནི༌ ལོན༌བོའེ༌ ཏོན༌ སལ༌པོ༌ ཅོས༌ཏེ༌ ཁྱོ༌རང༌ང༌ ཧ༌གོ༌ ཅུག༌ག༌ ཡོངས༌པིན༌།
DAN 9:23 ཁྱོ༌རང༌ངི༌ མོས༌ལམ༌ ཞུ༌ཅེས༌ གོ༌ཟུག༌ག༌ཅིག༌ བཀའ༌ཞིག༌ སལས༌། ང༌ ཏེ༌བོ༌ ཁྱོ༌རང༌ང༌ ཤད༌ད༌ ཡོངས༌པིན༌ ཅིའ༌ཟེར༌ན༌ ཁྱོ༌རང༌ དཀོན༌མཆོག༌གི༌ ཕིའ༌ མ༌ རིན༌ཅན༌ ཨིན༌ནོག༌། ཏེ༌བོའེ༌ཕིའ༌ ལོན༌བོ༌ ཉོན༌ ཡང༌ ཡེ༌རེམ༌ཡཱའི༌ སལ༌ཁན༌ནི༌ ལོན༌བོ༌ ཧ༌གོ༌།”
DAN 9:24 “ཁྱོ༌རང༌ངི༌ མི༌གུན༌ དང༌ ཏམ༌པ༌ གྱལ༌སའེ༌ དཀོན༌མཆོག༌ག༌ གྱབ༌གལ༌ ཅོ༌ཅེས༌ མེད༌ཁན༌ ཆ༌ཅེས༌, ཁོང༌གུན༌ནི༌ སྡིག༌པའེ༌ སྐྱོན༌ མེད༌ཁན༌ ཅོས༌ཏེ༌ རྩང༌མ༌ ཅོ༌ཅེས༌, ཐའ༌མེད༌པའེ༌ ཀྲང༌པོ༌ ཁྱོང༌ཅེས༌, ཡེ༌རེམ༌ཡཱའི༌ ལུང༌སྟན༌པོ༌ དྲན༌དྲའ༌ གྲུབ༌བ༌ ཛད༌ཅེས༌ ཡང༌ ཚང༌མའེ༌ སང༌ ཏམ༌པ༌ ནས༌ས༌ རྩང༌མ༌ ཛད༌ཅེས༌ལ༌ ལོ༌ རྡུན༌ཅུ༌ ལྡབ༌ རྡུན༌ གོར༌ཅེས༌ ཐག༌ཅད༌ ཛདས༌།
DAN 9:25 ཏ༌ ཉོན༌ ཡང༌ ཧ༌གོ༌། ཡེ༌རུ༌ཤ༌ལེམ༌མི༌ གྱལ༌ས༌ ཡང༌སྐྱར༌ རྩིག༌ཅེས༌ལ༌ བཀའ༌ ཏངས༌ཏེ༌ སྟིང༌ནེ༌ ལྡམ༌མ༌ ཛད༌ཁན༌ ཝང༌སྲུལ༌པ༌ སྐྱོད༌ཅེས༌ལ༌ རྡུན༌ ལྡབ༌ རྡུན༌ དང༌ དྲུག༌ཅུ༌རག༌ཉིས༌ ལྡབ༌ རྡུན༌ ལོ༌ གོར༌ཨིན༌། ཏུས༌ ཀགས༌པོ༌ ཡོད༌ནའང༌ ལམ༌གུན༌ དང༌ སྲུང༌སྐྱོབ༌ སྟན༌པོ༌ཅན༌ ཡེ༌རུ༌ཤ༌ལེམ༌ ཡང༌སྐྱར༌ རྩིག༌ཨིན༌།”
DAN 9:26 དྲུག༌ཅུ༌རག༌ཉིས༌ ལྡབ༌ རྡུན༌ ལོའེ༌ སྟིང༌ནེ༌ ལྡམ༌མ༌ ཛད༌ཁན༌བོ༌ སད༌ཏེ༌ ཅའང༌མི༌ཏང༌ ཡང༌ ཡོང༌ཅེས༌ཅན༌ ཝང༌སྲུལ༌པའེ༌ མི༌གུན༌ནི༌ ཏམ༌པ༌ གྱལ༌ས༌ དང༌ ཆོད༌ཁང༌ མེད༌ཁན༌ ཅོ༌ཨིན༌། སྟིང༌ཇུག༌པོ༌ མ༌ གྱོགས༌པ༌ ཆུ༌ལོག༌ ཙོགས༌ལ༌ ཡོང༌ཨིན༌: དཀོན༌མཆོག༌གི༌ བཀའ༌ སལ༌ཁན༌ ནང༌ཞིན༌ ཏེ༌བོ༌ མག༌ དང༌ ཁྲེས༌ཏོར༌ ཅོ༌ཅེས༌སི༌ གོ༌ཟུག༌པོ༌ ཨིན༌ནོག༌།
DAN 9:27 ཝང༌སྲུལ༌ཁན༌བོའེ༌ མི༌གུན༌ ཉམ༌པོ༌ ལོ༌ རྡུན༌ནི༌ ཕིའ༌ ཆད༌དོན༌ ཅོ༌ཨིན༌ ཨིན༌ནའང༌ ཏེ༌ ཏུས༌པོ༌ ཕེད༌ ཆའ༌ཅིག༌ ཁོའེ༌ ཆོད༌པ༌ དང༌ བུལ༌དུད༌ ཕུལ༌ཅེས༌ལ༌ སྒག༌ཞའ༌ ཏངས༌ཏེ༌ ཆོད༌ཁང༌ངི༌ ཏམ༌པ༌ ནས༌སའེ༌ཀ༌ ཁམ༌ལོག༌ ཚི༌ཏུ༌ ཅོ༌ཁན༌བོ༌ བོར༌ཨིན༌ ཡང༌ ཏེ༌བོ༌ ཏེན༌ནེ༌ཀ༌ ལུས༌ཨིན༌ ནམ༌ཚག༌པ༌ དཀོན༌མཆོག༌གི༌ ཏེ༌ ཝང༌སྲུལ༌ཁན༌བོ༌ མེད༌ཁན༌ མི༌ཛད༌།”
DAN 10:1 པར༌ཤིའ༌པ༌ གྱལ༌པོ༌ སཱེ༌རས༌སི༌ ཝང༌སྲུལ༌ལི༌ ལོ༌ སུམ༌པའེ༌ ནང༌ང༌ བེལ༌ཏེ༌ཤ༌ཟར ཡང༌ན༌ དཱ༌ནི༌ཨེལ༌ལ༌ དཀོན༌མཆོག༌གི༌ ཆོགས༌ནེ༌ ལོན༌ཞིག༌ ཐོབ༌། ཏེ༌ ནང༌ང༌ མོལ༌ཁན༌གུན༌ ཀྲང༌པོ༌ ཡང༌ ཏེ༌བོ༌ མག༌ ཀྲག༌པོ༌ ཞིག༌གི༌ སྐོར༌ ཨིན༌པིན༌། ཏེ༌ ལོན༌བོ༌ ཁོའ༌ ཞལ༌ཟིགས༌ཤིག༌ གྱུད༌ཏེ༌ ཧ༌གོ༌ཅུག༌ག༌ ཛདས༌།
DAN 10:2 ཏེ༌ ཏུས༌ ང༌ དཱ༌ནི༌ཨེལ༌ལི༌ རྡུན༌ཞག༌ སུམ༌ རྡུག༌པོ༌ ཅོས༌པིན༌།
DAN 10:3 ཏེ༌ ཏུས༌ གང༌པོ༌ ངའེ༌ ཟན༌ ཞིམ༌པོ༌ མ༌ ཟའ༌, ཤ༌ ཡ༌ རྒུན༌ཆང༌ ཁའ༌ མ༌ ཏུག༌ག༌ ཡང༌ མར༌ མ༌ སྐུའ༌ དུགས༌པིན༌།
DAN 10:4 ཟླ༌ཝ༌ ཏང༌པོའེ༌ ཞག༌ 24 པའེ༌ ཞག༌ག༌ ངའ༌ ལྩངས༌པོ༌ ཀྲག༌པོ༌ ཏྲེག༌རིས༌སི༌ ཐའ༌མ༌ ལངས༌ཏེ༌ ཡོད༌ ཟ༌ནེ༌
DAN 10:5 ཀེན༌ལ༌ ལྟའ༌ཅིག༌ ངའ༌ ངའེ༌ དུན༌ལ༌ རས༌ རིན༌ཅན༌ནི༌ ཀོས༌ གོན༌ཁན༌ མི༌ཞིག༌ ཐོང༌ ཡང༌ ཁོང༌ངི༌ སྐྱེད༌པ༌ ཅའང༌ མ༌ གྲེས༌ཁན༌ སེར༌རི༌ སྐྱེ༌རག༌ ཅིངས༌ཏེ༌ དུག༌པིན༌།
DAN 10:6 ཁོང༌ངི༌ ཟུགས༌པོ༌ ཁྲ༌ རིན༌ཅན༌ ཙོགས༌, ལྡོང༌ སྐམ༌ལག༌ བར༌ཁན༌ ཙོགས༌, མིག༌ མེའེ༌ པམ༌བར༌ ཙོགས༌, རྐང༌ལག༌གུན༌ རྩི༌ ཏང༌ཁན༌ནི༌ ཟངས༌ ཙོགས༌ ཡང༌ སྐད༌ མི༌མངས༌སི༌ སྐད༌ ཙོགས༌ རག༌པིན༌།
DAN 10:7 ང༌ དཱ༌ནི༌ཨེལ༌ ཅིག༌པོའ༌ ཏེ༌ ལྟས༌པོ༌ ཐོང༌, ང༌ ཉམ༌པོ༌ ཡོད༌ཁན༌གུན༌ལ༌ ཏེ༌བོ༌ མ༌ ཐོང༌ ཨིན༌ནའང༌ ཁོང༌གུན༌ མ༌སྲན༌ཏྲེ༌ ཇིགས༌ཏེ༌ ཤོར༌ ཡང༌ ཨིབས༌།
DAN 10:8 ཏེ༌བོའེ༌ཕིའ༌ ཏེ༌ ཞལ༌ཟིགས༌ ཀྲག༌པོའ༌ ལྟའ༌ལ༌ ང༌ ཅིག༌པོ༌ ལུས༌། ང༌ ཤེད༌མེད༌ གྱུར༌, ངའེ༌ ལྡོང༌ སེར༌པོ༌ སོང༌ ཡང༌ ངའེ༌ ནང༌ང༌ ཤེད༌ ལུས༌ཏེ༌ མེ༌རག༌པིན༌།
DAN 10:9 ཏེ༌ནེ༌ ང༌ ཁོང༌ངི༌ མོལ༌ཨིན༌ ཚོར༌ ཡང༌ ངའེ༌ ཁོང༌ང༌ ཉན༌པིན༌། ངའ༌ ཉིད༌ ལྕིན༌ཏྲེ༌ ཡོངས༌ཏེ༌ གྱེལ༌ ཡང༌ ངའེ༌ ལྡོང༌ སའ༌ ཐུག༌།
DAN 10:10 ཏེན༌ན༌ ཏུས༌, ཆག༌ཤིག༌གི༌ ཐམས༌ཏེ༌ ངའ༌ ལག༌པ༌ དང༌ པིག༌མོའེ༌ཀ༌ ལང༌ང༌ ཛདས༌ ཨིན༌ནའང༌ ང༌ དར༌རད༌པིན༌།
DAN 10:11 ཁོང༌ངི༌ མོལས༌, “དཱ༌ནི༌ཨེལ༌ དཀོན༌མཆོག༌གི༌ སྐུན༌དུན༌ལ༌ ཁྱོ༌རང༌ རིན༌ཅན༌ ཨིན༌ནོག༌། ངའ༌ ཁྱོ༌རང༌ ཡོད༌ས༌ ཀལ༌ཏེ༌ ཨིན༌ནོག༌ ཏེ༌བོའེ༌ཕིའ༌ ལངས༌ཏེ༌ ངའེ༌ ཟེར༌ཅེས༌ཅན༌བོའ༌ གྱལ༌ལ༌ ཅོས༌ཏེ༌ ཉོན༌།” ཁོང༌ངི༌ ཏེ༌ཟུག༌ མོལ༌ལ༌ཅིག༌ ངའ༌ དར༌ཨིན༌ ལངས༌པིན༌།
DAN 10:12 ཏེ༌ནེ༌ ཁོང༌ངི༌ མོལས༌, “ཇིགས༌ མ༌ ཇིགས༌, དཱ༌ནི༌ཨེལ༌། གོ༌མའེ༌ ཞག༌ག༌ ཁྱོ༌རང༌ངི༌ དཀོན༌མཆོག༌གི༌ སྐུན༌དུན༌ལ༌ བོལ༌མོ༌ གྱུར༌ཏེ༌ ཧ༌གོ༌ཅེས༌ལ༌ མོས༌ལམ༌ ཞུ༌ཁན༌གུན༌, ཁོང༌ངི༌ སན༌ན༌ ཛད༌ཏེ༌ ཏེ༌བོའེ༌ ལན༌ལ༌ ང༌ ཀལ༌ལ༌ ཛདས༌།
DAN 10:13 ཨིན༌ནའང༌ པར༌ཤིའ༌པའེ༌ གྱལ༌སྲིད༌ སྐྱོབ༌ཁན༌ནི༌ ངན༌པ༌ ཕོ༌ཉའེ༌ ཞག༌ 21 ང༌ སྒགས༌ཏེ༌ བོརས༌། ཏེ༌ནེ༌ མའེ༌ཀལ༌, ཕོ༌ཉ༌གུན༌ནི༌ འུ༌སྐྱོང༌ ཅིག༌ ངའ༌ རོགས༌ ཛད༌ད༌ སྐྱོད༌ ཅིའ༌ཟེར༌ན༌ ང༌ ཏེ༌རུ༌ ཏེ༌ ངན༌པ༌ ཕོ༌ཉའེ༌ སྒགས༌ཏེ༌ བོརས༌།
DAN 10:14 ཏ༌ ཁྱོ༌རང༌ང༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཁྱོ༌རང༌ངི༌ མི༌གུན༌ ཉམ༌པོ༌ ཇུང༌ཅེས༌ཅན༌བོ༌ ཤད༌ད༌ལ༌ ང༌ ཡོངས༌པིན༌། འི༌ ཞལ༌ཟིགས༌པོ༌ མ༌ཡོངས༌པའེ༌ ཏུས༌སི༌ སྐོར༌ལ༌ ཨིན༌ནོག༌།”
DAN 10:15 ཁོང༌ངི༌ ཏེ༌གུན༌ མོལ༌ ཟ༌ནེ༌ ངའེ༌ གོ༌ སྒུས༌ཏེ༌ ས༌ ལྟས༌པིན༌ ཡང༌ ངའ༌ ཅའང༌ ཟེར༌ མ༌ ཉན༌།
DAN 10:16 ཏེ༌ནེ༌ མི༌ ཙོགས༌ ཐོང༌ཁན༌བོའེ༌ ངའེ༌ ཁལ༌པག༌ག༌ ཆག༌ རྩེའ༌ ཛདས༌ ཡང༌ ངའ༌ སྤེ༌ར༌ ཏང༌ཉན༌། ངའེ༌ དུན༌ལ༌ ཞངས༌ཏེ༌ ཡོད༌ཁན༌བོའ༌ ངའེ༌ ཟེར༌པིན༌, “ཞལ༌ཟིགས༌པོའེ༌ ཞས༌ཏེ༌ ངའ༌ རྡུག༌ངལ༌ སྲན༌ཏྲེ༌ ཐོང༌པ༌ ངའེ༌ གཙོ༌བོ༌, ངའེ༌ ནང༌ང༌ ཤེད༌ ལུས༌ཏེ༌ མེ༌རག༌།
DAN 10:17 ངའེ༌ གཙོ༌བོ༌, ཉེ༌རང༌ངི༌ ཡོག༌པོ༌ ང༌ ཙོགས༌ཤིག༌གི༌ ཉེ༌རང༌ང༌ སྤེ༌ར༌ ཏང༌ཅེས༌སི༌ ཧམ༌པ༌ ཀ༌ཟུག༌གི༌ ཅོ༌ཨིན༌? ངའེ༌ ཤེད༌པོ༌ མེད༌ཁན༌ སོང༌ཏེ༌ ང༌ འུགས༌ ལེན༌ཅེས༌ལའང༌ ཀགས༌པོ༌ ཆའ༌རག༌།”
DAN 10:18 མི༌ ཙོགས༌ ཐོང༌ཁན༌བོའེ༌ ཡང༌སྐྱར༌ ང༌ ཐམས༌ས༌ ཛད༌ཏེ༌ ངའ༌ ཤེད༌ སལས༌།
DAN 10:19 ཁོང༌ངི༌ མོལས༌, “དཀོན༌མཆོག༌གི༌ སྐུན༌དུན༌ལ༌ རིན༌ཅན༌ མི༌, ཇིགས༌ མ༌ ཇིགས༌, ཤེད༌ཅན༌ གྱུར༌།” ཁོང༌ངི༌ ཞལ༌ཏ༌ སལ༌ལ༌ཅིག༌ ང༌ ཤེད༌ཅན༌ གྱུར༌ཏེ༌ ངའེ༌ ཟེར༌པིན༌, “མོལ༌ལ༌ ཛད༌ གཙོ༌བོ༌ལེ༌ ཅིའ༌ཟེར༌ན༌ ཉེ༌རང༌ངི༌ ང༌ ཤེད༌ སལ༌ལ༌ ཛདས༌།”
DAN 10:20 ཁོང༌ངི༌ མོལས༌, “ཁྱོ༌རང༌ ཡོད༌ས༌ ང༌ ཅི༌ཕིའ༌ ཡོངས༌, གྱུས༌ ཡོད༌ད༌? ངའ༌ པར༌ཤིའ༌པའེ༌ གྱལ༌སྲིད༌ སྐྱོབ༌ཁན༌ ངན༌པ༌ ཕོ༌ཉ༌ ཉམ༌པོ༌ ནོལ༌ལ༌ ལོགས༌ཏེ༌ ཡོང༌ཨིན༌ ཡང༌ ཁོའ༌ ཕམ༌ཀལ༌ཏེ༌ ང༌ ཆའ༌ཅིག༌ གི༌རིས༌པའེ༌ གྱལ༌སྲིད༌ སྐྱོབ༌ཁན༌ ངན༌པ༌ ཕོ༌ཉ༌ ཡོང༌ཨིན༌།
DAN 10:21 ཨིན༌ནའང༌ ཁྱོ༌རང༌ང༌ ཀྲང༌པོ༌ སྤེ༌ཆའེ༌ ནང༌ང༌ བྲིས༌ཁན༌བོ༌ ཤད༌ཨིན༌། ༼ཏེ༌གུན༌ནི༌ གྱབ༌གལ༌ལ༌ ཨིས༌ར༌ཨེལ༌པ༌གུན༌ སྐྱོབ༌ཁན༌ནི༌ ཕོ༌ཉ༌ མའེ༌ཀལ༌ ཅིག༌པོའེ༌ ངའ༌ རོགས༌ ཅོའ༌ནོག༌།”
DAN 11:1 “གྲ༌རི༌ཡས༌ མེ༌དིའ༌པ༌ གྱལ༌པོའེ༌ ཝང༌སྲུལ༌ལི༌ གོ༌མའེ༌ ལོའེ༌ ཏུས༌ ངའེ༌ ཕོ༌ཉའེ༌ འུ༌སྐྱོང༌ ཅིག༌ མའེ༌ཀལ༌ལ༌ རོགས༌ ཅོས༌ཏེ༌ སྐྱོབས༌པིན༌།༽”
DAN 11:2 “ཏ༌ ངའེ༌ ཁྱོ༌རང༌ང༌ ཀྲང༌པོ༌བོ༌ སྔོན༌ ཅུག༌ཨིན༌། པར༌ཤིའ༌པ༌ ཞན༌ གྱལ༌པོ༌ སུམ༌མི༌ ཝང༌ སྲུལ༌ཨིན༌, ཏེ༌སྟིང༌ནེ༌ ཁོང༌ ཚང༌མའེ༌ སང༌ མང༌ང༌ ཆུག༌པོ༌ གྱལ༌པོ༌ ཞི༌པ༌ ཡོང༌ཨིན༌། ཁོ༌རང༌ངི༌ གྱུ༌ནོར༌ གྱུད༌ཏེ༌ ཁོ༌ ཝང༌ཅན༌ གྱུར༌ར༌ཅིག༌ ཁོའེ༌ ཞན༌ གྱལ༌པོ༌ ཚང༌མ༌ གརིས༌སི༌ གྱལ༌པོའེ༌ གྱབ༌གལ༌ ཅོ༌ཅེས༌ལ༌ ལང༌ཅུག༌ཨིན༌།
DAN 11:3 ཏེ༌ནེ༌ ཁྱུད༌ཅན༌ གྱལ༌པོ༌ཞིག༌ བིང༌ཏེ༌ ཝང༌ ཀྲག༌པོ༌ སྲུལ༌ཏེ༌ ཁོ༌རང༌ ཐད༌ཁན༌ ཅོ༌ཨིན༌།
DAN 11:4 ཝང༌སྲུལ༌ ཀྲག༌པོ༌ ཡོད༌དི༌ ཏུས༌ ཁོ༌ ཤི༌ཨིན༌ ཡང༌ ཁོའེ༌ གྱལ༌སྲིད༌ལ༌ པོ༌བུད༌ཏེ༌ ཁག༌ ཞི༌ གྱུར༌ཨིན༌། གྱལ༌པོའེ༌ པུར༌གྱུད༌གུན༌ནི༌ ཝང༌ མི༌སྲུལ༌ ཡ༌ ཁོ༌ ཙོགས༌ ཁྱུད༌ཅན༌ མི༌ཡོང༌ ཅིའ༌ཟེར༌ན༌ ཁོའེ༌ གྱལ༌སྲིད༌པོ༌ པ༌ཀྲག༌ནེ༌ ཕུད༌ཏེ༌ ཞན༌གུན༌ལ༌ ཏང༌ཨིན༌།
DAN 11:5 ཨི༌ཇིབ༌བི༌ གྱལ༌པོ༌ ཤེད༌ཅན༌ གྱུར༌ཨིན༌ ཨིན༌ནའང༌ ཁོའེ༌ མག༌སྤོན༌ ཅིག༌ཅིག༌ ཁོའེ༌ སང༌ ཁྱུད༌ཅན༌ གྱུར༌ཏེ༌ ཁོ༌རང༌ངི༌ གྱལ༌སྲིད༌དི༌ཀ༌ ཝང༌ ཀྲག༌པོ༌ སྲུལ༌ཨིན༌།
DAN 11:6 ལོ༌ ཁ༌ཅིག༌གི༌ སྟིང༌ནེ༌ སི༌རི༌ཡཱ༌ དང༌ ཨི༌ཇིབ༌བི༌ གྱལ༌པོ༌ གུན༌ནི༌ ཅིག༌ དང༌ ཅིག༌ག༌ རོགས༌ ཅོ༌ཅེས༌ལ༌ ཆད༌དོན༌ ཅོས༌ཏེ༌ ཨི༌ཇིབ༌བི༌ གྱལ༌པོའེ༌ ཁོ༌རང༌ངི༌ བུ༌མོ༌ སི༌རི༌ཡཱའེ༌ གྱལ༌པོའ༌ ན༌མ༌ ཏང༌ཨིན༌ ཨིན༌ནའང༌ ཆད༌དོན༌བོ༌ ཁྲངས༌པོ༌ མི༌ལུས༌ ཅིའ༌ཟེར༌ན༌ བུ༌མོ༌, ཁོའེ༌ མག༌པ༌, ཕྲུ༌གུ༌ དང༌ ཁོའ༌ ཆོགས༌སྐྱོར༌ ཅོ༌ཁན༌གུན༌ ཕིངས༌ཏེ༌ ཏང༌ཨིན༌།”
DAN 11:7 “ཁོའེ༌ གྱུད༌དི༌ ནང༌ནེ༌ བུ༌ཚ༌ ཅིག༌ ཨི༌ཇིབ༌བི༌ གྱལ༌པོ༌ གྱུར༌ཨིན༌ ཡང༌ ཁོའེ༌ མག༌མིའི༌ སི༌རི༌ཡཱའེ༌ གྱལ༌པོའ༌ མག༌ ཏངས༌ཏེ༌ ཕམ༌ཀལ༌ཨིན༌།
DAN 11:8 ཁོ༌ ལོགས༌ཏེ༌ ཡོང༌ ཟ༌ནེ༌ ཁོའེ༌ ཁོང༌གུན༌ནི༌ ལྷ༌ལྷ༌མོའེ༌ སྐུན༌དྲ༌གུན༌ ཡང༌ སེར༌ དང༌ མུལ༌ལི༌ ཅ༌ལག༌གུན༌ ཁུར༌ཏེ༌ ཨི༌ཇིབ༌བ༌ ཁྱོང༌ཨིན༌། ཁོའེ༌ སི༌རི༌ཡཱའེ༌ གྱལ༌པོ༌ ལོ༌ ཁ༌ཅིག༌གི༌ ཕིའ༌ ཅིག༌པོ༌ བོར༌ཨིན༌།
DAN 11:9 ཏེ༌ སྟིང༌ནེ༌ སི༌རི༌ཡཱའེ༌ གྱལ༌པོའེ༌ ཨི༌ཇིབ༌བི༌ གྱལ༌སྲིད༌དི༌ཀ༌ སྤུང༌གོལ༌ ཅོ༌ཨིན༌ ཨིན༌ནའང༌ ཁོ༌རང༌ངི༌ ཡུལ༌ལ༌ གྱོགས༌པ༌ ལོགས༌ཏེ༌ ཆ༌གོས༌ཨིན༌།
DAN 11:10 སི༌རི༌ཡཱའེ༌ གྱལ༌པོའེ༌ བུ༌ཚ༌གུན༌ནི༌ མག༌མི༌ མང༌པོ༌ ཛོམས༌ ཅུགས༌ཏེ༌ མག༌ ཏང༌ཅེས༌ལ༌ གྲལ༌གྲིག༌ ཅོ༌ཨིན༌། ཁོའེ༌ མག༌མི༌ མ༌མང༌པོ༌ ཨིས༌ར༌ཨེལ༌ གང༌པོའེ༌ ནང༌ང༌ ཆུ༌ལོག༌ ཡོང༌ཁན༌ ཙོགས༌ལ༌ ཕེལ༌ཏེ༌ ཨི༌ཇིབ༌བི༌ གྱལ༌པོའེ༌ གྱལ༌སའེ༌ གྱང༌སྐོར༌ ཚོག༌པ༌ ལེབ༌ཨིན༌།”
DAN 11:11 ཏེ༌ནེ༌ ཨི༌ཇིབ༌བི༌ གྱལ༌པོའ༌ སྲོ༌ སྲན༌ཏྲེ༌ ཡོངས༌ཏེ༌ སི༌རི༌ཡཱའེ༌ གྱལ༌པོའ༌ མག༌ ཏང༌ང༌ བིང༌ཨིན༌། ཁོའེ༌ གྱབ༌གལ༌ལ༌ སི༌རི༌ཡཱའེ༌ གྱལ༌པོའེ༌ མག༌མི༌ མ༌ མང༌པོའེ༌ ནོལ༌ཨིན༌ ཨིན༌ནའང༌ ཨི༌ཇིབ༌བི༌ གྱལ༌པོའེ༌ ཁོང༌གུན༌ལ༌ ཕམ༌ ཀལ༌ཨིན༌།
DAN 11:12 ཏེ༌ཟམ༌ མང༌པོ༌ མག༌མི༌ ཟུམས༌ཏེ༌ ཕམ༌ཀལ༌ པ༌སང༌ ཨི༌ཇིབ༌བི༌ གྱལ༌པོ༌ མ༌ ཕོ༌སོ༌ཅན༌ གྱུར༌ཏེ༌ སྟོང༌ཁྲག༌གི༌ ནང༌ང༌ མག༌མི༌གུན༌ སད༌ཨིན༌ ཨིན༌ནའང༌ ཁོའེ༌ གྱལ༌ཁ༌བོ༌ ཏུས༌རིང༌མོ༌ མི༌ ལུས༌
DAN 11:13 ཅིའ༌ཟེར༌ན༌ ལོ༌ ཁ༌ཅིག༌གི༌ སྟིང༌ནེ༌ སི༌རི༌ཡཱའེ༌ གྱལ༌པོ༌ སྔུན༌ནི༌ སང༌ མང༌ང༌ མག༌མི༌ དང༌ ཚོན༌ཆ༌ ཉམ༌པོ༌ ཡང༌སྐྱར༌ མག༌ཏང༌ང༌ ཡོང༌ཨིན༌།”
DAN 11:14 “ཏེ༌ ཏུས༌ལ༌ ཨི༌ཇིབ༌བི༌ གྱལ༌པོའེ༌ གྱབ༌གལ༌ལ༌ ཞན༌ མང༌པོ༌ ལང༌ཨིན༌། ཞལ༌ཟིགས༌པོ༌ དྲན༌དྲའ༌ གྲུབ༌ཅེས༌ལ༌ ཏེ༌ནང༌ང༌ ཁྱོ༌རང༌ངི༌ མི༌གུན༌ནི༌ ཕྲོ༌ནེ༌ སྲོན༌ཇན༌ ནོལ༌ལ༌ ཐད༌ཁན༌ མང༌པོ༌ ཐེས༌ཏེ༌ ཨིན༌ནོག༌ ཨིན༌ནའང༌ ཁོང༌གུན༌ ཁྲངས༌པོ༌ མི༌ ལུས༌།
DAN 11:15 ཏེ༌ཏུས༌ལ༌ སི༌རི༌ཡཱའེ༌ གྱལ༌པོ༌ ཡོངས༌ཏེ༌ ཨི༌ཇིབ༌བི༌ གྱལ༌སའེ༌ ནང༌ང༌ ཞུག༌ཅེས༌ལ༌ ལམ༌ ཁྲེད༌ཁྲེད༌ རྩིགས༌ཏེ༌ ཏེ༌བོ༌ ང༌ཡོག༌ག༌ ལེན༌ཨིན༌། ཨི༌ཇིབ༌པ༌ མག༌མི༌གུན༌ལ༌ ཏེ༌བོ༌ སྒག༌ མི༌ཐུབ༌, མག༌མི༌ ཀྲག༌ཤོག༌ གུན༌ནའང༌ ཁོང༌གུན༌ནི༌ གྱབ༌གལ༌ལ༌ ནོལ༌ མི༌ཐུབ༌།
DAN 11:16 སྤུང༌གོལ༌ ཅོ༌ཁན༌གུན༌ནི༌ ཁོ༌རང༌གུན༌ ཐད༌ཁན༌ ཅོ༌ཨིན༌, སུའང༌ ཁོང༌གུན༌ནི༌ གྱབ༌གལ༌ལ༌ ནོལ༌ མི༌ཐུབ༌། ཁོ༌ ཨིས༌ར༌ཨེལ༌ལི༌ ས༌ཀྱད༌ ལྡེ༌མོའེ༌ ནང༌ང༌ ཚུགས༌ཏེ༌ ཏེ༌བོ༌ མེད༌ཁན༌ ཅོ༌ཅེས༌སི༌ ཝང༌ ཁོའ༌ ཡོད༌ཏེ༌ ཨིན༌ནོག༌།
DAN 11:17 ཁོའེ༌ ཁོ༌རང༌ངི༌ གྱལ༌སྲིད༌ གང༌པོའེ༌ མག༌མི༌ ཉམ༌པོ༌ སྤུང༌གོལ༌ ཅོས༌ཏེ༌ གོབ༌སྐོར༌ཅེས༌ལ༌ ཨི༌ཇིབ༌བི༌ གྱལ༌པོ༌ ཉམ༌པོ༌ ཐུན༌བྲེལ༌ ཅོ༌ཅེས༌སི༌ ཐབ༌ལྡིངས༌། ཁོའེ༌ ཨི༌ཇིབ༌བི༌ གྱལ༌སྲིད༌ མེད༌ཁན༌ ཅོ༌ཅེས༌ལ༌ ཁོ༌རང༌ངི༌ བུ༌མོ༌ ཁོའ༌ ན༌མ༌ ཏང༌ཨིན༌ ཨིན༌ནའང༌ ཏེ༌ ཐབས༌པོ༌ ཁྲངས༌པོ༌ མི༌ལུས༌།
DAN 11:18 ཏེ༌ནེ༌ སི༌རི༌ཡཱའེ༌ གྱལ༌པོའེ༌ གྱ༌ཚོའེ༌ ཐའ༌མའེ༌ ཡུལ༌གུན༌ལ༌ སྤུང༌གོལ༌ ཅོས༌ཏེ༌ གྱལ༌སའ༌ མང༌པོ༌ ང༌ཡོག༌ག༌ ཁྱོང༌ཨིན༌ ཨིན༌ནའང༌ མག༌མི༌ འུ༌སྐྱོང༌ཞིག༌གི༌ ཁོའ༌ ཕམ༌ཀལ༌ཏེ༌ ཁོའེ༌ ཕོ༌སོ༌བོ༌ མེད༌ཁན༌ ཅོ༌ཨིན༌ ཡང༌ ཞན༌གུན༌ལ༌ ཁོའེ༌ ཅོ༌ཁན༌ ཙོགས༌ ཁོའ༌ ཅོས༌ཏེ༌ ཁྲེལ༌བ༌ སྟན༌ཨིན༌།
DAN 11:19 ཏེ༌ནེ༌ སི༌རི༌ཡཱའེ༌ གྱལ༌པོ༌ ཁོ༌རང༌ངི༌ ཡུལ༌ལ༌ གྱང༌སྐོར༌ ཐོན༌པོ༌ ཡོད༌སའེ༌ ཁོ༌རང༌ངི༌ གྱལ༌ས༌ ལོགས༌ཏེ༌ ཆེན༌ ཨིན༌ནའང༌ ཁོའ༌ མག༌གི༌ ནང༌ང༌ ཕམ༌ ཀལ༌ཏེ༌ སད༌ཨིན༌།”
DAN 11:20 “ཁོའེ༌ སྟིང༌ནེ༌ ཡོང༌ཁན༌ནི༌ གྱལ༌པོའེ༌ ཁོ༌རང༌ངི༌ གྱལ༌སྲིད༌དི༌ སྤལ༌གུན༌ ལུས༌ཤུག༌ཅེས༌ལ༌ མི༌གུན༌ནི༌ཀ༌ ཁྲལ༌ ལྕིན༌ཏྲེ༌ ཀལ༌ཨིན༌། ཏུས༌ ཉུ༌ངུན༌ ཞིག༌གི༌ སྟིང༌ནེ༌ ཁོ༌ ཤི༌ཨིན༌ ཨིན༌ནའང༌ མག༌ ཡ༌ ཛིང༌མོའེ༌ ཞས༌ཏེ༌ མི༌ཤི༌།”
DAN 11:21 “ཁོའེ༌ སྟིང༌ནེ༌ གྱལ༌པོ༌ གྱུར༌ཁན༌བོ༌ གྱལ༌གྱུད༌ནེ༌ མན༌ཁན༌ ངན༌པ༌ མི༌ཞིག༌ ཡོང༌ཨིན༌། ཞི༌དེ༌ ཡོད༌ཏུས༌ མི༌གུན༌ལ༌ ཁས༌པ༌ ཉམ༌པོ༌ སྐྱོན༌ ཀོལ༌ཏེ༌ ཁོ༌ གྱལ༌པོ༌ གྱུར༌ཨིན༌།
DAN 11:22 ཏེ༌ནེ༌ ཁོའེ༌ མག༌མི༌གུན༌ནི༌ ཁོའ༌ གྱབ༌གལ༌ ཅོ༌ཁན༌ནི༌ མག༌མི༌གུན༌ སད༌ཨིན༌། ཁོང༌གུན༌ནི༌ དཀོན༌མཆོག༌གི༌ བླ༌མ༌ ཆེན༌མོའང༌ སད༌ཨིན༌།
DAN 11:23 ཁོའེ༌ གོབ༌སྐོར༌ར༌ལ༌ ཞན༌ ཝང༌སྲུལ༌པ༌གུན༌ ཉམ༌པོ༌ ཐུན༌བྲེལ༌ལི༌ ཁ༌ཆད༌ ཅོ༌ཨིན༌། ཁོའ༌ ཆོགས༌སྐྱོར༌ ཅོ༌ཁན༌ ཉུང༌ངུན༌ཞིག༌ མ༌ནེ༌ མེད༌ནའང༌ ཁོ༌ མ༌ ཤེད༌ཅན༌ ཝང༌ སྲུལ༌པ༌ གྱུར༌ཨིན༌།
DAN 11:24 ཆུག༌པོ༌ ཡུལ༌གུན༌ནི༌ ནང༌ང༌ ཞི༌དེ༌ དང༌ ཡར༌གྱས༌ ཡོད༌ཏུས༌ ཏེ༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཁོའེ༌ ཕ༌མེས༌པོ༌གུན༌ ཁྲངས༌པོ༌ མ༌ ལུས༌ཁན༌ནི༌ ལས༌གུན༌ གྲུབ༌ཅུག༌ཨིན༌། མག༌གི༌ ནང༌ང༌ ཕམ༌ཀལ༌ཁན༌གུན༌ནི༌ ཀ༌ནེ༌ ཅོམས༌ཁན༌ གྱུ༌ནོར༌ དང༌ ས༌ཀྱད༌གུན༌ ཁོའ༌ ཆོགས༌སྐྱོར༌ ཅོ༌ཁན༌གུན༌ལ༌ བགོས༌ཏེ༌ ཏང༌ཨིན༌ ཡང༌ ཁོའེ༌ གྱལ༌ས༌གུན༌ ཁྲེས༌ཏོར༌ ཅོ༌ཅེས༌ལ༌ ཐབས༌ལྡིང༌ཨིན༌། ཨིན༌ནའང༌ ཁོའེ༌ ཝང༌སྲུལ༌ལི༌ ཏུས༌ རིང༌མོ༌ མི༌ལུས༌།
DAN 11:25 ཨི༌ཇིབ༌བི༌ གྱལ༌པོའ༌ སྤུང༌གོལ༌ ཅོ༌ཅེས༌ལ༌ ཁོའེ༌ སྟོབས༌ དང༌ སྤོས༌པ༌ ཉམ༌པོ༌ མག༌མི༌ ཆེན༌མོ༌ ལྡུམ༌ཨིན༌། ཨི༌ཇིབ༌བི༌ གྱལ༌པོའེ༌ མ༌ སྟོབས༌ཅན༌ མག༌མི༌ མང༌པོ༌ ཉམ༌པོ༌ ནོལ༌ཅེས༌ལ༌ གྲལ༌གྲིག༌ ཅོ༌ཨིན༌ ཨིན༌ནའང༌ ཁོའེ༌ གྱབ༌གལ༌ལ༌ ཅུས༌ངན༌གུན༌ ལྡིང༌ཅེས༌པོའེ༌ ཁོའ༌ གྱལ༌ཁའ༌ མི༌ཐོབ༌།
DAN 11:26 གྱལ༌པོ༌ ཉམ༌པོ༌ ཟན༌ ཟའ༌ཁན༌གུན༌ནི༌ ཁོ༌ མེད༌ཁན༌ ཅོ༌ཅེས༌སི༌ རྩོན༌གྲུས༌ ཅོ༌ཨིན༌། ཁོའེ༌ མག༌མིའ༌ ཕམ༌ ཀྲག༌པོ༌ ཀལ༌ཏེ༌ མག༌གི༌ ནང༌ང༌ མང༌པོ༌ ཤི༌ཨིན༌།
DAN 11:27 ངན༌ སེམས༌ཅན༌ནི༌ གྱལ༌པོ༌ ཉིས༌ཀོ༌ ཅོག༌ཙེ༌ ཅིག༌གི༌ཀ༌ དུགས༌ཏེ༌ ཟན༌ ཟེན༌ ཅིག༌ དང༌ ཅིག༌ག༌ ཟུན༌ ཏང༌ཨིན༌ ཨིན༌ནའང༌ ཏེ༌བོ༌ ཁྲངས༌པོ༌ མི༌ལུས༌ ཅིའ༌ཟེར༌ན༌ ལྡམ༌མ༌ ཛད༌ཁན༌ནི༌ ཏུས༌སི༌ཀ༌ ཁོང༌གུན༌ནི༌ ཐའ༌མ༌ ལེབ༌ཨིན༌།
DAN 11:28 སི༌རི༌ཡཱའེ༌ གྱལ༌པོ༌ གྱུ༌ནོར༌ མང༌པོ༌ ཉམ༌པོ༌ ཁོ༌རང༌ངི༌ ཡུལ༌ལ༌ ལོགས༌ཏེ༌ ཆེན༌ ཡོད༌ ཟ༌ནེ༌ ཁའེ༌ སེམས༌སི༌ ནང༌ང༌ དཀོན༌མཆོག༌གི༌ ཆད༌དོན༌ ཁ༌ ཉན༌ཁན༌ ཏམ༌པ༌ མི༌གུན༌ནི༌ ཆོགས༌ལ༌ ངན༌པ༌ ལངས༌ཏེ༌ ཁོའེ༌ ཁོང༌གུན༌ལ༌ ནོད༌པ༌ མང༌པོ༌ སྐྱལ༌ཨིན༌།”
DAN 11:29 “ལྡམས༌ཁན༌ནི༌ ཏུས༌སི༌ཀ༌ ཁོའེ༌ ཡང༌སྐྱར༌ ཨི༌ཇིབ༌བ༌ སྤུང༌གོལ༌ ཅོ༌ཨིན༌ ཨིན༌ནའང༌ འི༌ཏུས༌ ཇུག༌བྲས༌པོ༌ སྔུན༌ནི༌ སང༌ སོ༌སོ༌ ཡོང༌ཨིན༌།
DAN 11:30 རོམ༌མི༌ མག༌གི༌ གྲུ༌ཟིང༌གུན༌ནི༌ ཁོའེ༌ གྱབ༌གལ༌ ཅོ༌ཅེས༌པའེ༌ ཁོའེ༌ སེམ༌སྟོབས༌ ཆག༌ཨིན༌། ཏེ༌བོའེ༌ཕིའ༌ ཁོའེ༌ དཀོན༌མཆོག༌གི༌ ཆད༌དོན༌ ཁ༌ ཉན༌ཁན༌ནི༌ ཏམ༌པ༌ མི༌གུན༌ནི༌ གྱབ༌གལ༌ལ༌ ཁོ༌རང༌ངི༌ སྲོ༌ སྲུག༌ཨིན༌། ཁོའེ༌ དཀོན༌མཆོག༌གི༌ ཏམ༌པ༌ ཆད༌དོན༌ ཕང༌ཁན༌གུན༌ལ༌ རྩི༌ཝ༌ ཏང༌ཨིན༌།”
DAN 11:31 “ཁོའེ༌ མག༌མི༌གུན༌ནི༌ ཏམ༌པ༌ ཆོད༌ཁང༌ ང༌ཡོག༌ག༌ ཁྱོངས༌ཏེ༌ ཏེ༌བོ༌ ཚི༌ཏུ༌ ཅོ༌ཨིན༌། ཞག༌ཏང༌ངི༌ ཆོད༌པ༌ ཕུལ༌ཅེས༌གུན༌ སྒག༌ཨིན༌ ཡང༌ ཏེ༌ ནང༌ང༌ ཁམ༌ལོག༌ ཚི༌ཏུ༌ ཅོ༌ཁན༌བོ༌ བོར༌ཏེ༌ ཆོད༌ཁང༌ ཚི༌ཏུ༌ གྱུར༌ ཅུག༌ཨིན༌།
DAN 11:32 ཁོའེ༌ སྐྱོན༌ ཀོལ༌ཏེ༌ ཏད༌པ༌ ཕང༌ཁན༌གུན༌ ཁོ༌རང༌ངི༌ ཆོགས༌ལ༌ ཁྱོངས༌ཏེ༌ ཁོ༌ ཐད༌ཁན༌བོ༌ ཅོ༌ཅུག༌ཨིན༌ ཨིན༌ནའང༌ དཀོན༌མཆོག༌ ཤེས༌ཁན༌གུན༌ ཏད༌པའེ༌ ནང༌ང༌ སྟན༌པོ༌ དུགས༌ཏེ༌ ཁོའེ༌ གྱབ༌ནེ༌ མི༌ཆ༌།”
DAN 11:33 “ཤེས༌རབས༌ཅན༌གུན༌ནི༌ མང༌པོའ༌ ལབ༌ཞ༌ ཏང༌ཨིན༌ ཨིན༌ནའང༌ ཏུས༌ ཉུ༌ངུན༌ཞིག༌གི༌ ཕིའ༌ ཁོང༌གུན༌ ར༌འི༌ ཉམ༌པོ༌ སད༌ཨིན༌ ཡ༌ མེའ༌ སྲག༌ཨིན༌ ཡ༌ ཁོང༌གུན༌ ཅོམ༌ཨིན༌ ཡ༌ ཙོན༌ཁང༌ངི༌ ནང༌ང༌ ཀག༌ཨིན༌།
DAN 11:34 ཁོང༌གུན༌ལ༌ རྡུག༌ངལ༌ ཐོང༌ ཟ༌ནེ༌ ཁོང༌ང༌ རོགས༌ ཙ༌པིག༌ ཐོབ༌ཨིན༌ ཨིན༌ནའང༌ ཁོང༌གུན༌ནི༌ ཕྲོ༌ནེ༌ ཁ༌ཅིག༌གི༌ དོད༌པ༌ ངན༌པ༌ ཉམ༌པོ༌ རོགས༌ ཅོ༌ཨིན༌།
DAN 11:35 ཞན༌ མང༌པོ༌ ཏམ༌པ༌ གྱུར༌ཅེས༌སི༌ ཕིའ༌ ཐའ༌མའེ༌ ཏུས༌ ཚོག༌པ༌ ཤེས༌རབས༌ཅན༌ ཁ༌ཅིག༌ ཤི༌ གོས༌ཨིན༌ ཅིའ༌ཟེར༌ན༌ ལྡམས༌ཁན༌ནི༌ ཏུས༌ ལེབ༌ཅེས༌ ཨིན༌ནོག༌།”
DAN 11:36 “ཏེ༌ནེ༌ སི༌རི༌ཡཱའེ༌ གྱལ༌པོའེ༌ ཁོ༌རང༌ ཐད༌ཁན༌ ཅོ༌ཨིན༌། ཁོའེ༌ ཁོ༌རང༌ང༌ སྤལ༌ ཏངས༌ཏེ༌ ཁོ༌རང༌ ལྷ༌ལྷ༌མོ༌ ཚང༌མའེ༌ སང༌ ཀྲག༌ག༌ ཐེན༌ ཡང༌ ཀུན༌ཝང༌ དཀོན༌མཆོག༌གའང༌ དད༌ལོག༌ ཞུ༌ཨིན༌། དཀོན༌མཆོག༌གི༌ ཆད༌པའེ༌ ཏུས༌ ལེབ༌ལེབ༌ ཚག༌པ༌ ཁོའེ༌ ཡར༌གྱས༌ ཅོ༌ཨིན༌ ཅིའ༌ཟེར༌ན༌ དཀོན༌མཆོག༌གི༌ ཐབས༌ལྡིང༌ང༌ ཛད༌ཁན༌བོ༌ གྲུབ༌གོས༌།
DAN 11:37 གྱལ༌པོའེ༌ ཁོ༌རང༌ངི༌ ཕ༌མེས༌པོ༌གུན༌ནི༌ ལྷ༌ལྷ༌མོ༌ ཡ༌ བུ༌མོ༌གུན༌ནི༌ ཅམས༌པ༌ ཅོ༌ཁན༌ ལྷ༌ ཡ༌ ཞན༌ ལྷ༌ལྷ༌མོ༌གུན༌ལ༌ རྩི༌ཝ༌ མི༌ཏང༌ ཅིའ༌ཟེར༌ན༌ ཁོའེ༌ ཁོ༌རང༌ ཁོང༌ ཚང༌མའེ༌ སང༌ ཀྲག༌པོ༌ ཐེས༌ཏེ༌ ཕོ༌སོ༌ ཅོའ༌ནོག༌།
DAN 11:38 ཏེ༌གུན༌ནི༌ ཚབས༌ལ༌ ཁོའེ༌ གྱང༌སྐོར༌ ཐོན༌པོའེ༌ གྱལ༌ས༌ སྐྱོབ༌ཁན༌ནི༌ ལྷའ༌ རྩི༌ཝ༌ ཏང༌ཨིན༌ ཡང༌ ཁོའེ༌ ཕ༌མེས༌པོ༌གུན༌ནི༌ མ༌ཤེས༌ཁན༌ནི༌ ལྷའ༌ སེར༌, མུལ༌, གྱན༌ཆ༌ དང༌ ཞན༌ རིན༌ཅན༌ སྐྱེས༌གུན༌ ཕུལ༌ཏེ༌ རྩི༌ཝ༌ ཏང༌ཨིན༌།
DAN 11:39 ཞན༌ ལྷ༌ལྷ༌མོའེ༌ རོགས༌ ལེན༌ཏེ༌ ཁོའེ༌ གྱང༌སྐོར༌ ཐོན༌པོ༌ཅན༌ནི༌ གྱལ༌ས༌གུན༌ནི༌ཀ༌ སྤུང༌གོལ༌ ཅོ༌ཨིན༌ ཡང༌ ཁོའེ༌ ཆོགས༌པ༌གུན༌ལ༌ རྩི༌ཝ༌ ཀྲག༌པོ༌ ཏངས༌ཏེ༌ ཁོང༌གུན༌ ཝང༌སྲུལ༌པ༌ སྐོ༌ཨིན༌། ཁོང༌གུན༌ལ༌ རྔན༌པའེ༌ ཚུལ༌ལ༌ ས༌ཀྱད༌གུན༌ བགོས༌ཏེ༌ ཏང༌ཨིན༌།”
DAN 11:40 “སྟིང༌ཇུག༌གི༌ ཏུས༌ལ༌ ཨི༌ཇིབ༌བི༌ གྱལ༌པོའེ༌ སི༌རི༌ཡཱའེ༌ གྱལ༌པོའ༌ མག༌ ཏང༌ཨིན༌ ཨིན༌ནའང༌ ཁོའེ༌ རྟ༌རེལ༌ དང༌ རྟའེ༌ཀ༌ ཞོན༌ཁན༌ ཡང༌ མག༌གི༌ གྲུ༌ཟིང༌ མང༌པོ༌ ཉམ༌པོ༌ ཨི༌ཇིབ༌བི༌ གྱལ༌པོའ༌ སྤུང༌གོལ༌ ཀྲག༌པོ༌ ཅོ༌ཨིན༌། ཆུ༌ལོག༌ ཡོང༌ང༌ ཙོགས༌ལ༌ ཁོ༌ གྱལ༌ས༌ མང༌པོའེ༌ ནང༌ང༌ ཞུགས༌ཏེ༌ མི༌གུན༌ སད༌ཨིན༌།
DAN 11:41 ཁོའེ༌ ལྡེ༌མོ༌ ནས༌ས༌ ཨིས༌ར༌ཨེལ༌ལི༌ཀའང༌ སྤུང༌གོལ༌ ཅོ༌ཨིན༌། གྱལ༌ཁམས༌ མང༌པོ༌ མེད༌ཁན༌ ཆེན༌ ཨིན༌ནའང༌ ཨི༌དོམ༌པ༌ དང༌ མོ༌འབ༌པ༌ ཡང༌ ཨ༌མོན༌པའེ༌ འུ༌སྐྱོང༌གུན༌ ཤོར༌ ཉན༌ཨིན༌།
DAN 11:42 ཁོའེ༌ ཡུལ༌ མང༌པོ༌ ང༌ཡོག༌ག༌ ཁྱོང༌ཨིན༌, ཨི༌ཇིབ༌པ༌གུན༌ནའང༌ ཁོའེ༌ ཀ༌ནེ༌ མི༌ ཐར༌།
DAN 11:43 ཁོའེ༌ ཨི༌ཇིབ༌བི༌ སེར༌, མུལ༌ དང༌ ཞན༌ གྱུ༌ནོར༌ ཚང༌མ༌ ཁོ༌རང༌ངི༌ ཝང༌ངི༌ ཡོག༌ག༌ ལེན༌ཨིན༌། ལི༌བི༌ཡན༌པ༌ དང༌ ཨི༌ཐིའོ༌པིའ༌པ༌ ཁོའེ༌ ཝང༌སྲུལ༌ལི༌ ཡོག༌ག༌ ཡོང༌ཨིན༌།
DAN 11:44 ཨིན༌ནའང༌ ཤར༌ ཆོགས༌ དང༌ བྱང༌ ཆོགས༌ནེ༌ འུ༌ཡ༌ གྱུགས༌ཏེ༌ ཁོ༌ ཇིགས༌ཅུགས༌ ཡང༌ ཁོ༌ སྲོ༌ སྲན༌ཏྲེ༌ ནང༌ང༌ ཁྲེས༌ཏོར༌ ཅོའ༌ བིངས༌ ཡང༌ ངན༌པའེ༌ ཚུལ༌ལ༌ མི༌ མང༌པོ༌ སད༌ཨིན༌།
DAN 11:45 ཁོའེ༌ གྱལ༌པོའེ༌ ཀུར༌བོ༌ མེ༌གྲི༌ཏྲེ༌རི༌ཡན༌ ཚོ༌ དང༌ ཡེ༌རུ༌ཤ༌ལེམ༌མི༌ ཏམ༌པ༌ ཆོད༌ཁང༌ རྩིགས༌ཁན༌ནི༌ རི༌ པར༌ལ༌ ཙུག༌ཨིན༌། ཨིན༌ནའང༌ ཁོ༌ མེད༌ཁན༌ ཆ༌ཅེས༌སི༌ ཏུས༌པོ༌ ལེབ༌ཨིན༌ ཡང༌ ཁོའ༌ སུའིང༌ རོགས༌ མི༌ཅོ༌།”
DAN 12:1 “ཏེ༌ཏུས༌, ཁྱོ༌རང༌ངི༌ མི༌གུན༌ སྐྱོབ༌ཁན༌ ཕོ༌ཉ༌ འུ༌སྐྱོང༌ མའེ༌ཀལ༌ སྐྱོད༌ཨིན༌། ཇིག༌རྟེན༌ ཞང༌ང༌ ཛད༌པ༌ནེ༌ ཕར༌ལ༌ མ༌ཇུང༌ཁན༌ནི༌ རྡུག༌ངལ༌ལི༌ ཏུས༌ ཇུང༌ཨིན༌། ཨིན༌ནའང༌ དཀོན༌མཆོག༌གི༌ སྤེ༌ཆའེ༌ ནང༌ང༌ མིང༌ བྲིའ༌ ཛད༌ཁན༌ ཁྱོ༌རང༌ངི༌ མི༌གུན༌ སྐྱོབ༌བ༌ ཛད༌ཨིན༌།
DAN 12:2 སྔུན༌ལ༌ ཤི༌ཏེ༌ སུབས༌ཁན༌ མ༌ མང༌པོ༌ སོན༌ཏེའ༌ ལང༌ང༌ ཛད༌ཨིན༌, ཁ༌ཅིག༌ ཐའ༌མེད༌པའེ༌ མི༌ཚེའེ༌ ནང༌ང༌ ཡང༌ ཁ༌ཅིག༌ ཁྲེལ༌བ༌ ཉམ༌པོ༌ ཐའ༌མེད༌པའེ༌ ཉལ༌ཝའེ༌ ནང༌ང༌ ལང༌ཨིན༌།
DAN 12:3 ཤེས༌རབས༌ཅན༌གུན༌ ནམ༌ཁའེ༌ འོད༌ ཙོགས༌ ལྡང༌ཤན༌ ཡང༌ མི༌གུན༌ ཀྲང༌པོ༌ ཆོགས༌ལ༌ ཁྲིད༌ཁན༌ མང༌པོ༌ སྐར༌མ༌ ཙོགས༌ལ༌ ཏུས༌གྱུན༌ བར༌ཨིན༌།
DAN 12:4 ཨིན༌ནའང༌ དཱ༌ནི༌ཨེལ༌ ཁྱོ༌རང༌ངི༌ འི༌ སྤེ༌ར༌གུན༌ བྲིས༌ ཡང༌ སྲིལ༌ཏེ༌ ཐེ༌ཙེ༌ གྱབས༌ཏེ༌ ཐའ༌མའེ༌ ཏུས༌ ཚོག༌པ༌ བོར༌། མི༌མང༌པོ༌ འི༌ངོ༌ འ༌ངོ༌ ཚང༌མ༌ལ༌ ཆེན༌ ཡང༌ ཁོང༌གུན༌ལ༌ ལས༌ མང༌པོ༌ ལོབས༌ཏེ༌ རིག༌པའེ༌ ནང༌ང༌ གྱས༌ཨིན༌།”
DAN 12:5 “ཏེ༌ནེ༌ ང༌ དཱ༌ནི༌ཨེལ༌ལི༌ ལྟས༌པ༌, ངའ༌ ལྩངས༌པོའེ༌ ཐའ༌མ༌ ཉིས༌ཀོའེ༌ཀ༌ ཡང༌ ཕོ༌ཉ༌ ཉིས༌ ཞངས༌ཏེ༌ ཐོང༌།
DAN 12:6 ཕོ༌ཉ༌ ཅིག༌པོའེ༌ རས༌ ཀུས༌པོའེ༌ ཀོས༌ གོན༌ཁན༌, ལྩངས༌པོའེ༌ ཆུའི༌ ཁེ༌ཐོག༌ག༌ ཡོད༌ཁན༌བོའ༌ མོལས༌, “འི༌ ཇིགས༌ནང༌ དང༌ ཧ༌ལས༌ཤེས༌སི༌ ལྟས༌གུན༌ ཇུང༌ཅེས༌ལ༌ ཏུས༌ ཙམ༌ཤིག༌ གོར༌ཨིན༌?”
DAN 12:7 རས༌ ཀུས༌པོའེ༌ ཀོས༌ གོན༌ཁན༌, ལྩངས༌པོའེ༌ ཆུའི༌ ཁེ༌ཐོག༌ག༌ ཡོད༌ཁན༌བོའེ༌ ཁོང༌རང༌ངི༌ ཆག༌ ཉིས༌ཀོ༌ ནམ༌ཁའ༌ སྟགས༌ཏེ༌ ཏུས༌གྱུན༌ སོན༌པོ༌ ཞུགས༌ཁན༌ནི༌ ཚན༌ནི༌ ནང༌ང༌ ནའ༌ ཁུར༌ཏེ༌ མོལས༌, “ཏེ༌བོ༌ ལོ༌ སུམ༌ དང༌ ཕེད༌། རྡུག༌ངལ༌ སྟན༌ཁན༌གུན༌ནི༌ གྱབ༌གལ༌ལ༌ དཀོན༌མཆོག༌གི༌ ཏམ༌པ༌ མི༌གུན༌ནི༌ སྟོབས༌ དང༌ ཁྱུད༌ ཚང༌མ༌ མེད༌ཁན༌ ཆའ༌ཅིག༌, འི༌ ཚང༌མ༌ གྲུབ༌ཨིན༌།”
DAN 12:8 ངའེ༌ ཁོང༌ངི༌ མོལ༌ཁན༌བོ༌ ཚོར༌ ཨིན༌ནའང༌ ཧ༌མ༌གོ༌། ཏེ༌བོའེ༌ཕིའ༌ ངའེ༌ ཏྲིས༌པིན༌, “གཙོ༌བོ༌ལེ༌, འི༌གུན༌ནི༌ ཇུག༌བྲས༌པོ༌ ཀ༌ཟུག༌ཤིག༌ ཡོང༌ཨིན༌?”
DAN 12:9 ཁོང༌ངི༌ ལན༌ སལས༌, “དཱ༌ནི༌ཨེལ༌ ཁྱོ༌རང༌ ཞི༌དེ༌ ཉམ༌པོ༌ སོང༌ ཡང༌ འི༌ ཚང༌མ༌ ཐའ༌མའེ༌ ཏུས༌ ཚོག༌པ༌ ཐེ༌ཙེ༌ གྱབས༌ཏེ༌ སང༌ཝའེ༌ ནང༌ང༌ བོར༌།
DAN 12:10 མི༌མང༌པོ༌ ཁྲུས༌ཏེ༌ རྩང༌མ༌ ཅོས༌ཏེ༌ ལག༌མོ༌ ཀར༌པོ༌ ཅོ༌ཨིན༌ ཨིན༌ནའང༌ ངན༌པ༌གུན༌ནི༌ ཏ༌རུང༌ངའང༌ ངན༌པ༌ ཅོ༌ཅེས༌ མི༌ཕང༌། ངན༌པ༌གུན༌ལ༌ ཧ༌མི༌གོ༌ ཨིན༌ནའང༌ ཤེས༌རབས༌ཅན༌གུན༌ལ༌ ཧ༌གོ༌ཨིན༌།”
DAN 12:11 ཞག༌ཏང༌ངི༌ ཆོད༌པ༌ ཕུལ༌ཅེས༌གུན༌ སྒགས༌ཏེ༌ ཏེ༌ ཁམ༌ལོག༌ ཚི༌ཏུ༌ ཅོ༌ཁན༌བོ༌ ཆོད༌ཁང༌ངི༌ ནང༌ང༌ བོར༌ཏེ༌ ཞག༌ 1,290 ཆེན༌།
DAN 12:12 ཞག༌ 1,335 སྟིང༌ཇུག༌ ཚོག༌པ༌ སྲུངས༌ཏེ༌ དུག༌ཁན༌གུན༌ ཅིན༌ལབས༌ཅན༌ ཨིན༌།”
DAN 12:13 “ཏེ༌བོའེ༌ཕིའ༌ སོན༌ཏེའ༌ ལུས༌ལུས༌ ཁྱོ༌རང༌ངི༌ ཏད༌པ༌ དཀོན༌མཆོག༌གི༌ཀ༌ སྟན༌པོ༌ བོར༌། ཁྱོ༌རང༌ ཤི༌ཨིན༌ ཨིན༌ནའང༌ ཐའ༌མའེ༌ ཏུས༌ལ༌ ཐེན༌ཏེ༌ བོར༌ཁན༌ནི༌ ནོར༌སྐལ༌ ལེན༌ཅེས༌ལ༌ ཁྱོ༌རང༌ སོན༌ཏེའ༌ ལང༌ཨིན༌།”
MAT 1:1 འི༌བོ༌ ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཕ༌མེས༌པོ༌གུན༌ནི༌ ཐོ༌ཨིན༌, ཁོང༌ གྱལ༌པོ༌ དཱ༌བིད༌ དང༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌།
MAT 1:2 ཨབ༌ར༌ཧམ༌ ནི༌ ཨི༌སཱག༌གི༌ ཨ༌བ༌ ཨིན༌པིན༌། ཨི༌སཱག༌ ནི༌ ཡ༌ཀོབ༌བི༌ ཨ༌བ༌ ཨིན༌པིན༌། ཡ༌ཀོབ༌ ནི༌ ཡ༌ཧུ༌དཱ༌ དང༌ ཁོའེ༌ ཨ༌ཅོ༌ནོ༌ ཚང༌མའེ༌ ཨ༌བ༌ ཨིན༌པིན༌།
MAT 1:3 ཡ༌ཧུ༌དཱ༌ ནི༌ ཕེ༌རེས༌ དང༌ ཟེ༌རཧ༌ གུན༌ནི༌ ཨ༌བ༌, ཡང༌ ཁོང༌གུན༌ནི༌ ཨ༌མ༌ ནི༌ ཐ༌མར༌ ཨིན༌པིན༌། ཕེ༌རེས༌ ནི༌ ཧེས༌རོན༌ནི༌ ཨ༌བ༌ ཨིན༌པིན༌། ཧེས༌རོན༌ ནི༌ རམ༌མི༌ ཨ༌བ༌ ཨིན༌པིན༌།
MAT 1:4 རམ༌ ནི༌ ཨམ༌མི༌ན༌དབ༌བི༌ ཨ༌བ༌ ཨིན༌པིན༌། ཨམ༌མི༌ན༌དབ༌ ནི༌ ན༌ཧ༌ཤོན༌ནི༌ ཨ༌བ༌ ཨིན༌པིན༌། ན༌ཧ༌ཤོན༌ ནི༌ སལ༌མོན༌ནི༌ ཨ༌བ༌ ཨིན༌པིན༌།
MAT 1:5 སལ༌མོན༌ ནི༌ བོ༌ཨཟ༌ཟི༌ ཨ༌བ༌, ཡང༌ ཁོའེ༌ ཨ༌མ༌ ནི༌ ར༌ཧབ༌ ཨིན༌པིན༌། བོ༌ཨཟ༌ ནི༌ ཨོ༌བེད༌དི༌ ཨ༌བ༌, ཡང༌ ཁོའེ༌ ཨ༌མ༌ ནི༌ རུཐ༌ ཨིན༌པིན༌། ཨོ༌བེད༌ ནི༌ ཡེ༌ཤེའེ༌ ཨ༌བ༌ ཨིན༌པིན༌།
MAT 1:6 ཡེ༌ཤེ༌ ནི༌ གྱལ༌པོ༌ དཱ༌བིད༌དི༌ ཨ༌བ༌ ཨིན༌པིན༌། དཱ༌བིད༌ ནི༌ སོ༌ལོ༌མོན༌ནི༌ ཨ༌བ༌, ཡང༌ ཁོའེ༌ ཨ༌མ༌ ནི༌ ཨུ༌རི༌ཡཱཧ༌ཧའེ༌ ན༌མ༌ བད༌ཤི༌བ༌ ཨིན༌པིན༌།
MAT 1:7 སོ༌ལོ༌མོན༌ ནི༌ རེ༌ཧབ༌བོ༌འམ༌མི༌ ཨ༌བ༌ ཨིན༌པིན༌། རེ༌ཧབ༌བོ༌འམ༌ ནི༌ ཨ༌བི༌ཡཱའེ༌ ཨ༌བ༌ ཨིན༌པིན༌། ཨ༌བི༌ཡཱ༌ ནི༌ ཨ༌སའེ༌ ཨ༌བ༌ ཨིན༌པིན༌།
MAT 1:8 ཨ༌ས༌ ནི༌ ཡེ༌ཧོ༌ཤ༌ཕད༌དི༌ ཨ༌བ༌ ཨིན༌པིན༌། ཡེ༌ཧོ༌ཤ༌ཕད༌ ནི༌ ཡེ༌ཧོ༌རམ༌མི༌ ཨ༌བ༌ ཨིན༌པིན༌། ཡེ༌ཧོ༌རམ༌ ནི༌ ཨུཟ༌ཟི༌ཡཱའི༌ ཨ༌བ༌ ཨིན༌པིན༌།
MAT 1:9 ཨུཟ༌ཟི༌ཡཱ༌ ནི༌ ཡོ༌ཐམ༌མི༌ ཨ༌བ༌ ཨིན༌པིན༌། ཡོ༌ཐམ༌ ནི༌ ཨ༌ཧ༌ཟིའི༌ ཨ༌བ༌ ཨིན༌པིན༌། ཨ༌ཧ༌ཟི༌ ནི༌ ཧི༌ཟི༌ཀི༌ཡའི༌ ཨ༌བ༌ ཨིན༌པིན༌།
MAT 1:10 ཧི༌ཟི༌ཀི༌ཡ༌ ནི༌ མ༌ན༌ཤེའེ༌ ཨ༌བ༌ ཨིན༌པིན༌། མ༌ན༌ཤེ༌ ནི༌ ཨ༌མོན༌ནི༌ ཨ༌བ༌ ཨིན༌པིན༌། ཨ༌མོན༌ ནི༌ ཡོ༌ཤི༌ཡཱའི༌ ཨ༌བ༌ ཨིན༌པིན༌།
MAT 1:11 ཡང༌ མག༌གི༌ སྟིང༌ནེ༌ ཡ༌ཧུ༌དཱ༌པ༌གུན༌ བ༌བེ༌ལོན༌ལ༌ ཁྱེར༌རི༌ ཏུས༌ ཡོ༌ཤི༌ཡཱ༌ ནི༌ ཡེ༌ཀོ༌ནི༌ཡཱ༌ དང༌ ཁོའེ༌ ཨ༌ཅོ༌ནོ༌གུན༌ནི༌ མེ༌མེ༌ གྱུར༌།
MAT 1:12 བ༌བེ༌ལོན༌ལ༌ ཁྱེར༌ཏེ༌ སྟིང༌ནེ༌ ཡེ༌ཀོ༌ནི༌ཡཱ༌ ནི༌ ཤའལ༌ཏི༌ཡེལ༌ལི༌ ཨ༌བ༌ ཨིན༌པིན༌། ཤའལ༌ཏི༌ཡེལ༌ ནི༌ ཟེ༌རུཔ༌བ༌བེལ༌ལི༌ མེ༌མེ༌ ཨིན༌པིན༌།
MAT 1:13 ཟེ༌རུཔ༌བ༌བེལ༌ ནི༌ ཨ༌བི༌ཧུད༌དི༌ ཨ༌བ༌ ཨིན༌པིན༌། ཨ༌བི༌ཧུད༌ ནི༌ ཨེ༌ལི༌ཡ༌ཀིམ༌མི༌ ཨ༌བ༌ ཨིན༌པིན༌། ཨེ༌ལི༌ཡ༌ཀིམ༌ ནི༌ ཨ༌ཟོར༌རི༌ ཨ༌བ༌ ཨིན༌པིན༌།
MAT 1:14 ཨ༌ཟོར༌ ནི༌ ཟ༌དོག༌གི༌ ཨ༌བ༌ ཨིན༌པིན༌། ཟ༌དོག༌ ནི༌ ཨ༌ཀིམ༌མི༌ ཨ༌བ༌ ཨིན༌པིན༌། ཨ༌ཀིམ༌ ནི༌ ཨེ༌ལི༌ཧུད༌དི༌ ཨ༌བ༌ ཨིན༌པིན༌།
MAT 1:15 ཨེ༌ལི༌ཧུད༌ ནི༌ ཨེ༌ལི༌འ༌ཟར༌རི༌ ཨ༌བ༌ ཨིན༌པིན༌། ཨེ༌ལི༌འ༌ཟར༌ ནི༌ མད༌ཐན༌ནི༌ ཨ༌བ༌ ཨིན༌པིན༌། མད༌ཐན༌ ནི༌ ཡ༌ཀོབ༌བི༌ ཨ༌བ༌ ཨིན༌པིན༌།
MAT 1:16 ཡ༌ཀོབ༌ ནི༌ ཡོ༌སེབ༌བི༌ ཨ༌བ༌ ཡང༌ ཡོ༌སེབ༌བི༌ ན༌མ༌ ནི༌ མིར༌ཡམ༌ ཨིན༌པིན༌, ཁོའ༌ ཡེ༌ཤུ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ལྟམས༌།
MAT 1:17 ལྡུས༌ཏེ༌ ཟེར༌ན༌ ཨབ༌ར༌ཧམ༌ནེ༌ གྱལ༌པོ༌ དཱ༌བིད༌དི༌ པར༌ལ༌ མི༌རབས༌ 14, ཡང༌ གྱལ༌པོ༌ དཱ༌བིད༌དི༌ ཏུས༌ནེ༌ ཡ༌ཧུ༌དཱ༌པ༌གུན༌ བ༌བེ༌ལོན༌ནི༌ ཡུལ༌ལ༌ ཁྱེར༌ཁྱེར༌ ཚག༌པ༌ མི༌རབས༌ 14, ཡང༌ ཡ༌ཧུ༌དཱ༌པ༌གུན༌ བ༌བེ༌ལོན༌ལ༌ ཁྱེར༌ཁན༌ནི༌ ཏུས༌ནེ༌ མ༌ཤི༌ཀའེ༌ ཏུས༌ ཚག༌པ༌ མི༌རབས༌ 14 ཡོད༌ཏེ༌ ཨིན༌ནོག༌།
MAT 1:18 གཙོ༌བོ༌ ཡེ༌ཤུ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ ཁྲུང༌ ཚུལ༌ ནི༌ འི༌ཟུག༌གི༌ ཇུངས༌ཏེ༌ ཨིན༌པིན༌, ཁོང༌ངི༌ ཨ༌མ༌ མིར༌ཡམ༌ ཡོ༌སེབ༌བ༌ ན༌མ༌ ཏྲིས༌ཏེ༌ ཨིན༌པིན༌། ཨིན༌ནའང༌ ཁོང༌གུན༌ ཛོམས༌ཏེ༌ ཉམ༌པོ༌ དུག༌གི༌ སང༌ སྔུན༌ལ༌ ཏམ༌པའེ༌ ཐུག༌ཉིད༌དི༌ མིར༌ཡམ༌ སྐྱེ༌ཅེས༌མ༌ཞིག༌ གྱུར༌ཅུགས༌།
MAT 1:19 ཁོ༌ ན༌མ༌ ཏྲི༌ཁན༌ ཡོ༌སེབ༌, མི༌ ཀྲང༌པོ༌ཞིག༌ ཨིན༌པ༌, མིར༌ཡམ༌མ༌ མི༌གུན༌ནི༌ དུན༌ལ༌ ཁྲེལ༌བ༌ ཆ༌ མི༌ཅུག༌ སམས༌ཏེ༌, ཁོ༌རང༌ངི༌ སམ༌བའེ༌ ནང༌ང༌ སང༌ཝའེ༌ ཐོག༌ནེ༌ མིར༌ཡམ༌ ཉམ༌པོ༌ ན༌མ༌ མི༌ཅོ༌ སམས༌ཏེ༌ ཐག༌ཅདས༌།
MAT 1:20 ཏེ༌ཟུག༌ ཐག༌ཅད༌ཏེ༌ སྟིང༌ནེ༌, ཡོ༌སེབ༌བི༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཕོ༌ཉའེ༌ འི༌ཟུག༌ མོལ༌ཨིན༌ ཇལ༌, “གྱལ༌པོ༌ དཱ༌བིད༌དི༌ པུར༌གྱུད༌ ཡོ༌སེབ༌, མིར༌ཡམ༌མ༌ ན༌མ༌ ཅོས༌ཏེ༌ ཁྱེར༌ཅེས༌ལ༌ ཇིགས༌ མ༌ཇིགས༌, མིར༌ཡམ༌མི༌ ནང༌ང༌ ཆགས༌ཁན༌ནི༌ ཕྲུ༌གུ༌བོ༌ ཏམ༌པའེ༌ ཐུག༌ཉིད༌དི༌ ཞས༌ཏེ༌ ཨིན༌།
MAT 1:21 མིར༌ཡམ༌མ༌ བུ༌ཚ༌ཞིག༌ སྐྱེ༌ཨིན༌, ཡང༌ ཁྱོ༌རང༌ངི༌ ཁོང༌ངི༌ ཚན༌ལ༌ ཡེ༌ཤུ༌ ཏག༌གོས༌ ཅིའ༌ཟེར༌ན༌ ཁོང༌ངི༌ ཁོང༌རང༌ངི༌ མི༌གུན༌ ཁོང༌གུན༌ནི༌ སྡིག༌པའེ༌ ཀ༌ནེ༌ སྐྱོབ༌བ༌ ཛད༌ཨིན༌།”
MAT 1:22 ལུང༌སྟོན༌པ༌ ཡེ༌ཤ༌ཡཱ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌ ཚང༌མ༌ གྲུབ༌ཅེས༌སི༌ ཕིའ༌ ཏེ༌ ཚང༌མ༌ ཇུངས༌ཏེ༌ ཨིན༌ནོག༌། ཡེ༌ཤ༌ཡཱའེ༌ བྲིས༌ཁན༌བོ༌ ནི༌,
MAT 1:23 “ལྟོས༌ ན༌ཆུང༌, བུ༌ཚ༌ ཉམ༌པོ༌ བྲེལ༌ མ༌ཆའ༌ཁན༌ ཞིག༌གི༌ ནང༌ང༌ ཕྲུ༌གུ༌ ཆགས༌ཏེ༌ བུ༌ཚ༌ཞིག༌ ཇོར༌ཨིན༌, ཡང༌ ཁོང༌ངི༌ ཚན༌ལ༌ ཨེམ༌མ༌ནུ༌ཨེལ༌ ཞུ༌ཨིན༌ , ཀ༌བོའེ༌ ཏོན༌ཏག༌པོ༌ ནི༌ ‘དཀོན༌མཆོག༌ ང༌དང༌ ཉམ༌པོ༌’ ཨིན༌ནོག༌།”
MAT 1:24 ཡོ༌སེབ༌བ༌ ཉིད༌ཚད༌ད༌ཅིག༌, གཙོ༌བོའེ༌ ཕོ༌ཉའེ༌ མོལ༌ཁན༌ ནང༌ཞིན༌ མིར༌ཡམ༌ ཉམ༌པོ༌ ན༌མ༌ ཅོས༌ཏེ༌ ཁོ༌རང༌ངི༌ ཁང༌པ༌ ཁྱོངས༌།
MAT 1:25 ཨིན༌ནའང༌ སྲས༌པོ༌ ཇོར༌ཇོར༌ ཚོག༌པ༌ ཡོ༌སེབ༌བི༌ མིར༌ཡམ༌ ཉམ༌པོ༌ ལུས༌བྲེལ༌ མ༌ནེ༌ མ༌བོརས༌, ཡང༌ སྲས༌པོའེ༌ ཚན༌ལ༌ ཡོ༌སེབ༌བི༌ ཡེ༌ཤུ༌ ཏག༌ག༌ ཛདས༌།
MAT 2:1 ཧེ༌རོད༌ གྱལ༌པོ༌ ཨིན༌ ཟ༌ནེ༌, ཡ༌ཧུ༌དཱའེ༌ ཡུལ༌ལི༌ བེད༌ལེ༌ཧེམ༌མི༌ ནང༌ང༌ ཡེ༌ཤུ༌ སྐུ༌ ལྟམས༌། ཏེ༌ཏུས༌ལ༌ ཤར༌ ཆོགས༌ནེ༌ ཤེས༌རབས༌ཅན༌ སྐར༌མ༌ སིལ༌ཁན༌ནི༌ མི༌ ཁ༌ཅིག༌ ཡེ༌རུ༌ཤ༌ལེམ༌མི༌ གྱལ༌ས༌ ཡོངས༌ཏེ༌
MAT 2:2 ཏྲིས༌, “ཡ༌ཧུ༌དཱ༌པའེ༌ གྱལ༌པོ༌ ལྟམས༌ཁན༌བོ༌ ཀ༌ནེ༌ དུག༌? ང༌ཞའ༌ ཁོང༌ངི༌ སྐར༌མ༌ ཤར༌ ཆོགས༌ལ༌ ཐོང༌པ༌, ཁོང༌ ཇལ༌ལ༌ ཡོངས༌པིན༌།”
MAT 2:3 ཏེ༌ སྤེ༌ར༌བོ༌ ཚོར༌ར༌ཅིག༌, གྱལ༌པོ༌ ཧེ༌རོད༌ ཧ༌ལས༌ཏེ༌ ཇིགས༌ ཡང༌ ཡེ༌རུ༌ཤ༌ལེམ༌པ༌ ཚང༌མའང༌།
MAT 2:4 གྱལ༌པོ༌ ཧེ༌རོད༌དི༌ བླ༌མ༌ འུ༌སྐྱོང༌ དང༌ ཆོས༌ཁྲིམས༌ལ༌ ཁས༌པ༌ ཚང༌མ༌ བོད༌ཏེ༌ “དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཀ༌རུ༌ ཁྲུངས༌ཤེས༌ དུག༌” ཟེར༌ཏེ༌ ཏྲིས༌།
MAT 2:5 ཁོང༌གུན༌ནི༌ ལན༌ཏངས༌, “ཡ༌ཧུ༌དཱའེ༌ གྲོང༌ཁྱེར༌ བེད༌ལེ༌ཧེམ༌མ༌: ཀ༌ཟུག༌ ལུང༌སྟོན༌པ༌ མི༌ཀའི༌ དཀོན༌མཆོག༌གི༌ མོལ༌ལ༌ ཛད༌ཁན༌བོ༌ བྲིའ༌ ཛད༌ཏེ༌ ཨིན༌ནོག༌,
MAT 2:6 ‘ཡ༌ཧུ༌དཱའེ༌ གྲོང༌ཁྱེར༌ བེད༌ལེ༌ཧེམ༌, ཡ༌ཧུ༌དཱ༌པའེ༌ ཡུལ༌ཇོངས༌སི༌ ནང༌ང༌ ཁྱོ༌ཞའེ༌ གྲོང༌ཁྱེར༌ ཆུ༌ངུན༌བོའང༌, གྲོང༌ཁྱེར༌ མ༌ ཁག༌ཅན༌ཞིག༌ གྱུར༌ཨིན༌, ཅིའ༌ཟེར༌ན༌ ཁྱོ༌ཞའེ༌ ཕྲོ༌ནེ༌ ཏེ༌ཟུག༌ ཝང༌སྲུལ༌པ༌ཞིག༌ ཡོང༌ཨིན༌, ཀ༌བོའེ༌ ཨིས༌ར༌ཨེལ༌པ༌ ངའེ༌ མི༌གུན༌ལ༌ ལུག༌རྫི༌ ཚུལ༌ལ༌ སྟ༌སྟོག༌ ཅོ༌ཨིན༌།’”
MAT 2:7 ཏེ༌ནེ༌ ཧེ༌རོད༌དི༌ ཤར༌ ཆོགས༌སི༌ ཤེས༌རབས༌ཅན༌གུན༌ སུའང༌ གྱུས༌ཆའ༌ མ༌ཅུག༌ག༌ ཅིག༌པོ༌ བོད༌ཏེ༌ སྐར༌མ༌ གོ༌མ༌རང༌ ཐོང༌ཁན༌ནི༌ ཏུས༌པོ༌ གྱུས༌ཅོས༌།
MAT 2:8 ཁོའེ༌ ཁོང༌གུན༌ བེད༌ལེ༌ཧེམ༌མ༌ ལམ༌ཅུགས༌ཏེ༌ ཟེརས༌, “སོང༌, ཞིབ༌སལ༌ ཅོས༌ཏེ༌ ཕྲུ༌གུ༌བོ༌ ཙོལ༌, ཡང༌ ཁོང༌ ཐོབ༌བ༌ཅིག༌ ལོགས༌ཏེ༌ ཡོངས༌ཏེ༌ ངའ༌ ཤོད༌, ཅིའ༌ཟེར༌ན༌ ངའ༌ ཁོང༌ ཇལ༌ལ༌ སོང༌ཏེ༌ ཁོང༌ང༌ ཅོལ༌ཨིན༌།”
MAT 2:9 གྱལ༌པོའེ༌ སྤེ༌ར༌ ཟེར༌ཁན༌གུན༌ ཉན༌ཏེ༌ སྟིང༌ནེ༌, ཁོང༌གུན༌ ཤར༌ ཆོགས༌ལ༌ ཐོང༌ཁན༌ནི༌ སྐར༌མའེ༌ གྱབ༌ནེ༌ སོང༌, ཀ༌བོ༌ ཕྲུ༌གུ༌ ཡོད༌སའེ༌ ནས༌སའེ༌ཀ༌ ལེབ༌བ༌ཅིག༌, ནམ༌ཁའེ༌ ནང༌ང༌ གྲུལ༌ མ༌གྲུལ༌ལ༌ དུགས༌།
MAT 2:10 སྐར༌མ༌བོ༌ གྲུལ༌ མ༌གྲུལ༌ལ༌ དུགས༌ཏེ༌ ཐོང༌ང༌ཅིག༌, ཁོང༌གུན༌ནི༌ སེམས༌ ཐད༌པོའེ༌ གངས༌།
MAT 2:11 ཁང༌པའེ༌ ནང༌ང༌ ཆའ༌ཅིག༌, ཁོང༌གུན༌ནི༌ ཕྲུ༌གུ༌ ཁོང༌རང༌ངི༌ ཨ༌མ༌ མིར༌ཡམ༌ ཉམ༌པོ༌ ཐོང༌, ཡང༌ ཁོང༌གུན༌ནི༌ པིག༌དོང༌ ཙུགས༌ཏེ༌ ཆག༌ཕུལས༌། ཏེ༌ནེ༌ སྟེར༌སྒམ༌གུན༌ ཕེས༌ཏེ༌ སེར༌, ཕརང༌ཀེན༌སེནས༌ དང༌ མའེར༌ ཟེར༌ཁན༌ནི༌ ཏྲི༌ཞིམ༌ཅན༌ནི༌ སྤོས༌ དང༌ མར༌རི༌ སྐྱེས༌གུན༌ ཁོང༌ང༌ ཕུལས༌།
MAT 2:12 ཡང༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཁོང༌གུན༌ལ༌ གྱལ༌པོ༌ ཧེ༌རོད༌ ཡོད༌ས༌ ལོགས༌ཏེ༌ མི༌ཆ༌ཅེས༌ལ༌ སྤང༌པུད༌པ༌, ལམ༌ སོ༌སོ༌ཞིག༌ནེ༌ རང༌ཡུལ༌ལ༌ ལོགས༌ཏེ༌ སོང༌།
MAT 2:13 ཤེས༌རབས༌ཅན༌གུན༌ ལོགས༌ཏེ༌ ཆའ༌ཅིག༌, དཀོན༌མཆོག༌གི༌ ཕོ༌ཉ༌ཞིག༌ ཡོ༌སེབ༌བི༌ ཉི༌ལམ༌མི༌ ནང༌ང༌ མོལ༌ཨིན༌ ཇལ༌, “ལོངས༌, ཕྲུ༌གུ༌ དང༌ ཁོང༌ངི༌ ཨ༌མའ༌ ཨི༌ཇིབ༌བི༌ ཡུལ༌ཇོངས༌ལ༌ ཁྲིད༌ཏེ༌ ཤོར༌། ཡང༌ ནམ༌ཚོག༌པ༌ ངའེ༌ མི༌ཟེར༌ ཏེ༌ཏེ༌ཚོག༌པ༌ ཏེ༌རུ༌ དུག༌, ཅིའ༌ཟེར༌ན༌ གྱལ༌པོ༌ ཧེ༌རོད༌དི༌ འི༌ ཕྲུ༌གུ༌བོ༌ སད༌ཅེས༌ལ༌ ཙལ༌ཨིན༌།”
MAT 2:14 ཡོ༌སེབ༌ ལངས༌ཏེ༌ ཕྲུ༌གུ༌ དང༌ ཕྲུ༌གུའི༌ ཨ༌མ༌ མིར༌ཡམ༌ ཉིས༌ཀོ༌ ཁྲིད༌ཏེ༌ ཏེན༌ན༌ ཚན༌ལ༌ ཨི༌ཇིབ༌བི༌ ཡུལ༌ལ༌ ཤོར༌ཏེ༌ སོང༌,
MAT 2:15 ཀ༌རུ༌ ཁོང༌གུན༌ གྱལ༌པོ༌ ཧེ༌རོད༌ ཤི༌ཤི༌ ཚོག༌པ༌ ཞུགས༌། ཀ༌ཟུག༌གི༌ དཀོན༌མཆོག༌གི༌ ལུང༌སྟོན༌པ༌ གྱུད༌ཏེ༌, “ངའེ༌ ཨི༌ཇིབ༌ ཡུལ༌ནེ༌ ཕི༌ལོག༌ག༌ ང༌རང༌ངི༌ བུ༌ཚ༌ བོད༌པིན༌” མོལ༌ཏེ༌ ཡོད༌ཁན༌བོ༌ དྲན༌དྲ༌ གྲུབ༌།
MAT 2:16 གྱལ༌པོ༌ ཧེ༌རོད༌དི༌ ཤེས༌རབས༌ཅན༌གུན༌ནི༌ གོབ༌སྐོར༌ ཏང༌ཁན༌བོ༌ ཧ༌གོ༌པ༌ མ༌སྲན༌ཏྲེ༌ སྲོ༌ ཡོངས༌། ཁོའེ༌ བེད༌ལེ༌ཧེམ༌ དང༌ ཏེ༌ ཉེ༌ཁོར༌རི༌ ཡུལ༌ལི༌ ནང༌ང༌ ཡོད༌ཁན༌ནི༌ བུ༌ཚ༌ ལོ༌ ཉིས༌ ཡང༌ ཏེ༌སང༌ ཆུང༌ང༌ ཚང༌མ༌ སོད༌ ཟེར༌ཏེ༌ བཀའ༌ ཏངས༌, ཀ༌བོ༌ ཤེས༌རབས༌ཅན༌གུན༌ནི༌ ཏང༌པོ༌རང༌ སྐར༌མ༌བོ༌ ཐོང༌ ཟེར༌ཁན༌ནི༌ ཏུས༌ ནང༌ཞིན༌ ཨིན༌པིན༌།
MAT 2:17 ཏེ༌ནེ༌ ལུང༌སྟོན༌པ༌ ཡེ༌རེམ༌ཡཱ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌གུན༌ གྲུབ༌། ཏེ༌བོ༌ ནི༌,
MAT 2:18 “ར༌མཧའེ༌ ཡུལ༌ནེ༌ སྐད༌ ཚོར༌ཨིན༌, ངུ༌ཨིན༌ ཡང༌ རྡུག༌པོ༌ ཅོ༌ཨིན༌། རེ༌ཅལ༌ལི༌ པུར༌གྱུད༌ རང༌ངི༌ ཕྲུ༌གུ༌གུན༌ནི༌ ཕིའ༌ ངུ༌ཨིན༌, ཨིན༌ནའང༌ སེམས༌སོ༌ མི༌གོས༌, ཅིའ༌ཟེར༌ན༌ ཕྲུ༌གུ༌གུན༌ ཤི༌ཏེ༌ མེད༌།”
MAT 2:19 གྱལ༌པོ༌ ཧེ༌རོད༌ ཤི༌ཏེ༌ སྟིང༌ནེ༌, ཡོ༌སེབ༌ ཨི༌ཇིབ༌བི༌ ཡུལ༌ལ༌ ཡོད༌དི༌ ཏུས༌ལ༌ ཁོའ༌ ཉི༌ལམ༌མི༌ ནང༌ང༌ དཀོན༌མཆོག༌གི༌ ཕོ༌ཉ༌ཞིག༌གི༌ མོལས༌,
MAT 2:20 “ལོངས༌, ཕྲུ༌གུ༌ དང༌ ཁོང༌ངི༌ ཨ༌མ༌ ཁྲིད༌ཏེ༌ ཨིས༌ར༌ཨེལ༌ལི༌ ཡུལ༌ལ༌ སོང༌ ཅིའ༌ཟེར༌ན༌ ཕྲུ༌གུ༌ སད༌ད༌ལ༌ ཙལ༌ཁན༌གུན༌ ཤི༌ཏེ༌ མེད༌།”
MAT 2:21 ཏེ༌བོའེ༌ཕིའ༌ ཡོ༌སེབ༌ ལངས༌ཏེ༌ ཕྲུ༌གུ༌ དང༌ ཨ༌མ༌ ཁྲིད༌ཏེ༌ ཨིས༌ར༌ཨེལ༌ལི༌ ཡུལ༌ལ༌ ལོགས༌ཏེ༌ སོང༌།
MAT 2:22 ཨིན༌ནའང༌ ཡོ༌སེབ༌བ༌ ཧེ༌རོད༌དི༌ ཚབས༌ལ༌ ཁོའེ༌ བུ༌ཚ༌ ཨར༌ཁེ༌ལཱིས༌ ཡ༌ཧུ༌དཱའེ༌ གྱལ༌པོ༌ ཅོ༌ཁན༌བོ༌ ཚོར༌ར༌ཅིག༌, ཁོ༌ ཡ༌ཧུ༌དཱའེ༌ ཡུལ༌ཇོངས༌ལ༌ ལོགས༌ཏེ༌ ཆ༌ཅེས༌ལ༌ ཇིགས༌། ཁོའ༌ ཉི༌ལམ༌མི༌ ནང༌ང༌ སྤང༌པུད༌ད༌ ཛད༌ པ༌སང༌ གཱ༌ལིལ༌ལིའི༌ ཡུལ༌ཇོངས༌ལ༌ སོང༌།
MAT 2:23 ཁོང༌གུན༌ སོང༌ཏེ༌ ན༌ཙ༌རེད༌ ཟེར༌ཁན༌ནི༌ གྲོང༌ཁྱེར༌རི༌ ནང༌ང༌ དུགས༌། ཏེན༌ན༌བོའེ༌ཕིའ༌ སྔུན༌མའེ༌ ལུང༌སྟོན༌པ༌གུན༌ནི༌ ཁོང༌ངི༌ སྐོར༌ལ༌ “ཁོང༌ང༌ ན༌ཙ༌རེད༌པ༌ ཞུའ༌ཨིན༌” མོལ༌ཁན༌བོ༌ དྲན༌དྲ༌ གྲུབ༌།
MAT 3:1 ལོ༌ མང༌པོའེ༌ སྟིང༌ནེ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ ཆོས༌ཤད༌ཅེས༌ གོ༌ཟུགས༌, ཁོང༌ངི༌ ཡ༌ཧུ༌དཱའེ༌ རི༌སྟོང༌ངི༌ ནང༌ང༌ མི༌གུན༌ལ༌ ཆོས༌ཤད༌ཨིན༌
MAT 3:2 མོལས༌, “ནམ༌ཁའེ༌ གྱལ༌སྲིད༌ ཉེ༌མོའ༌ ལེབས༌ཏེ༌ ཨིན༌ནོག༌, གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ སེམས༌ གྱུར༌ཤིག༌།”
MAT 3:3 ལུང༌སྟོན༌པ༌ ཡེ༌ཤ༌ཡཱའེ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ སྐོར༌ལ༌ མོལ༌དུག༌, “རི༌སྟོང༌ངི༌ ནང༌ང༌ སྐད༌ ཆེན༌མོ༌ཞིག༌གི༌ མོལ༌ཨིན༌, ‘གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོས༌, ཡང༌ ཁོང༌ངི༌ ཕེབས༌ལམ༌བོ༌ ཀྲང༌པོ༌ ཅོས༌།’”
MAT 3:4 ཡོ༌ཧཱ༌ནན༌ནི༌ རྔ༌བོང༌ངི༌ བལ༌ལ༌ ཐགས༌ཁན༌ནི༌ ཀོས༌ དང༌ སྐེད༌པ༌ ཀོའེ༌ སྐྱེ༌རགས༌ ཅིང༌ངད༌པིན༌། ཁོང༌ངི༌ ཁར༌ཇི༌ ནི༌ པར༌པར༌ཙེ༌ དང༌ རི༌སྟོང༌ངི༌ རང༌རྩི༌ ཨིན༌པིན༌།
MAT 3:5 ཏེ༌ཏུས༌ ཡེ༌རུ༌ཤ༌ལེམ༌, ཡ༌ཧུ༌དཱ༌ གང༌པོ༌ དང༌ ཡོར༌དཱན༌ ལུང༌པ༌ གང༌པོའེ༌ མི༌གུན༌ ཁོང༌ང༌ ལྟ༌ཅེས༌ དང༌ ཉན༌ན༌ལ༌ སོང༌།
MAT 3:6 ཁོང༌གུན༌ནི༌ རང༌རང༌ངི༌ སྡིག༌པའེ༌ ལས༌གུན༌ མི༌གུན༌ནི༌ དུན༌ལ༌ ཤདས༌ པ༌སང༌ ཡོ༌ཧཱ༌ནན༌ནི༌ ཁོང༌གུན༌ལ༌ ཡོར༌དཱན༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌།
MAT 3:7 ཨིན༌ནའང༌ ཕ༌རུ༌ཤི༌པ༌ དང༌ སད༌དུ༌ཀི༌པ༌ མང༌པོ༌ཞིག༌ ཁྲུས༌ལེན༌ན༌ ཡོང༌ཨིན༌ ཟིགས༌ཏེ༌ ཡོ༌ཧཱ༌ནན༌ནི༌ མོལས༌, “ཁྱོ༌ཞའ༌ ཏུག༌རུལ༌ལི༌ པུར༌གྱུད༌གུན༌, ཡོང༌ཅེས༌ཅན༌ནི༌ དཀོན༌མཆོག༌གི༌ ཆད༌པ༌ནེ༌ ཤོར༌ ཟེར༌ཏེ༌ ཁྱོ༌ཞའ༌ སྤང༌ སུའི༌ ཕུདས༌།
MAT 3:8 སྡིག༌པ༌ ཅོ༌ཅེས༌ སྤངས༌ཏེ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ནི༌ བྲས༌བུ༌ སྨིན༌ཅུག༌།
MAT 3:9 ཡང༌ ཁྱོ༌ཞའེ༌ མ༌སམ༌ཤིག༌ ‘ང༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ པ༌སང༌ ཐར༌ཨིན༌།’ ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ འི༌ རྡོའ༌གུན༌ནི༌ ནང༌ནེ༌ ཨབ༌ར༌ཧམ༌མི༌ ཕིའ༌ པུར༌གྱུད༌ ཛད༌ཉན༌ཨིན༌།
MAT 3:10 ཤང༌ ཅོ༌ཤིག༌། སྟ༌རི༌ ནི༌ ལྕང༌མ༌གུན༌ནི༌ རྩའི༌ཀ༌ གྱབ༌ཆོག༌ཆོག༌ དུག༌, བྲས༌བུ༌ ཟང༌པོ༌ མ༌སྨིན༌ཁན༌ནི༌ ལྕང༌མ༌ ཚང༌མ༌ ཅད༌ཏེ༌ མེའེ༌ ནང༌ང༌ ཕང༌ཨིན༌།”
MAT 3:11 “ངའེ༌ ཁྱོ༌ཞའ༌ གྱོད༌པ༌ ཅོས༌ཏེ༌ དཀོན༌མཆོག༌གི༌ ཆོགས༌ལ༌ སེམས༌ གྱུར༌ཅེས༌ལ༌ ཆུའི༌ཁྲུས༌ ཏང༌ངད༌། ཨིན༌ནའང༌ ངའེ༌ སྟིང༌ནེ༌ སྐྱོད༌ཅེས༌ཅན༌, ཁོང༌ ངའེ༌ སང༌ མང༌ང༌ ཝང༌ཅན༌, ཡང༌ ང༌ ནི༌ ཞབ༌ཤི༌ ཙོགས༌ལ༌ ཁོང༌ངི༌ ཞབ༌པུལ༌ ཁུར༌ཅེས༌སི༌ འོས༌པ༌ མེད༌། ཁོང༌ངི༌ ཏམ༌པའེ༌ ཐུག༌ཉིད༌ དང༌ མེའེ༌ ཁྲུས༌སལ༌ཨིན༌།
MAT 3:12 ཞིང༌བད༌པའེ༌ ཡུལ༌ཐག༌ག༌ ཟར༌ ཉམ༌པོ༌, ཀྲོ༌ དང༌ ཕུག༌མ༌ ཕེས༌ཏེ༌ ཀྲོ༌ ཁོ༌རང༌ངི༌ བང༌ངེ༌ ནང༌ང༌ ཡང༌ ཕུག༌མ༌ མེའེ༌ ནང༌ང༌ སྲག༌ག༌ ཙོགས༌ལ༌ ཁོང༌ངིའང༌ ཁོང༌རང༌ངི༌ མི༌གུན༌ དང༌ མི༌ ངན༌པ༌གུན༌ སོ༌སོའ༌ ཕེའ༌ ཛད༌ཨིན༌།”
MAT 3:13 ཏེ༌ནེ༌ གཙོ༌བོ༌ ཡེ༌ཤུ༌ གཱ༌ལིལ༌ལི༌ ཡུལ༌ཇོངས༌ནེ༌ ཡོར༌དཱན༌ ལྩངས༌པོའ༌ ཡོ༌ཧཱ༌ནན༌ནེ༌ ཁྲུས༌ལེན༌ན༌ལ༌ སྐྱོདས༌།
MAT 3:14 ཨིན༌ནའང༌ ཡོ༌ཧཱ༌ནན༌ནི༌ ཡེ༌ཤུའ༌ ཁྲུས༌ ལེན༌ཅེས༌ནེ༌ སྒག༌ཅེས༌སི༌ རྩོན༌གྲུས༌ ཅོ༌ཨིན༌ མོལས༌, “ངའ༌ ཉེ༌རང༌ངི༌ ཁྲུས༌སལ༌ གོ༌ཤེས༌ ཨིན༌ནོག༌། ཏེ༌ནེ༌ ཉེ༌རང༌ ངའེ༌ཀ༌ ཁྲུས༌ ལེན༌ན༌ ཅིའ༌ སྐྱོད༌ཏེ༌ ཨིན༌?”
MAT 3:15 ཡེ༌ཤུའི༌ ཡོ༌ཧཱ༌ནན༌ལ༌ མོལས༌, “དག༌ས༌ ང༌ ཁྲུས༌ལེན༌ཅུག༌ ཅིའ༌ཟེར༌ན༌ འི༌ཟུག༌ ཅོ༌ཅེས༌པོའེ༌ ང༌དང༌ངི༌ དཀོན༌མཆོག༌གི༌ ཐུག༌གོངས༌ གྲུབ༌ ཅུག༌ག༌ནོག༌།” ཏེ༌ནེ༌ ཡོ༌ཧཱ༌ནན༌ ཁོང༌ང༌ ཁྲུས༌སལ༌ཅེས༌ལ༌ ཐད༌།
MAT 3:16 ཁྲུས༌ ནམས༌ཏེ༌ ཡེ༌ཤུ༌ ཆུའི༌ ནང༌ནེ༌ བིང༌ང༌ཅིག༌, ནམ༌ཁའ༌ བེ༌ཏེ༌, ཕུར༌གོན༌ཞིག༌གི༌ ཚུལ༌ལ༌ དཀོན༌མཆོག༌གི༌ ཐུག༌ཉིད༌ བབས༌ཏེ༌ ཁོང༌ངི༌ཀ༌ ཞུགས༌ས༌ ཛདས༌།
MAT 3:17 ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, “འི༌བོ༌ ནི༌ ངའེ༌ ཅེས༌པའེ༌ བུ༌ཚ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།”
MAT 4:1 ཏེ༌ནེ༌ རྡུད༌གུན༌ནི༌ གོ༌བའ༌ ཚོད༌ལྟ༌ ཅུག༌ཅེས༌ལ༌ དཀོན༌མཆོག༌གི༌ ཐུག༌ཉིད༌དི༌ ཡེ༌ཤུ༌ རི༌སྟོང༌ངི༌ ནང༌ང༌ ཁྱེར༌ར༌ ཛདས༌།
MAT 4:2 ཚན༌ཉིན༌ ཞིབ༌ཅུ༌ དོན༌ཏང༌ མ༌དོན༌ན༌ རོ༌ཟཱ༌ ཞུགས༌པ༌ ཡེ༌ཤུ༌ རིམས༌ཏེ༌ ཡོད༌པིན༌།
MAT 4:3 ཚོད༌ལྡ༌ཁན༌ནི༌ ཤེ༌ཏན༌ ཁོང༌ངི༌ དུན༌ལ༌ ཡོངས༌ཏེ༌ ཟེརས༌, “ཀལ༌ཏེས༌ ཉེ༌རང༌ དཀོན༌མཆོག༌གི༌ སྲས༌ ཨིན༌ན༌ འི༌ རྡོའ༌གུན༌ ཏ༌གི༌ གྱུར༌ཅེས༌ལ༌ བཀའ༌ སལ༌?”
MAT 4:4 གཙོ༌བོ༌ ཡེ༌ཤུའི༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘མི༌ ཏ༌གི༌ ཅིག༌པོའེ༌ སོན༌ཏེའ༌ མི༌ལུས༌ ཨིན༌ནའང༌ དཀོན༌མཆོག༌གི༌ ཞལ༌ནེ༌ བིང༌ང༌ ཛད༌ཁན༌ནི༌ ཞལ༌ཏ༌ རེ༌རེའེ༌ ཁའ༌ ཉན༌ཅེས༌ནེ༌ སོན༌ཏེའ༌ ལུས༌ཨིན༌།’”
MAT 4:5 ཏེ༌ནེ༌ ཁོའེ༌ ཡེ༌ཤུ༌ ཏམ༌པའེ༌ གྱལ༌ས༌ ཡེ༌རུ༌ཤ༌ལེམ༌མ༌ ཁྲིད༌ཏེ༌ ཁྱེརས༌ ཡང༌ ཆོད༌ཁང༌ངི༌ གོ༌ལིང༌ང༌ ཁྱེར༌ཏེ༌
MAT 4:6 ཁོང༌ང༌ ཟེརས༌, “ཀལ༌ཏེས༌ ཉེ༌རང༌ དཀོན༌མཆོག༌གི༌ སྲས༌ ཨིན༌ན༌ འི༌ཀ༌ནེ༌ ཐུར༌ལ༌ ལྕེབ༌བའང༌ ཅིའ༌ཟེར༌ན༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌ ‘ཁྱོ༌རང༌ སྐྱོབ༌ཅེས༌ལ༌ དཀོན༌མཆོག༌གི༌ ཕོ༌ཉ༌གུན༌ལ༌ བཀའ༌ སལ༌ཨིན༌། ཁྱོ༌རང༌ངི༌ རྐང༌པའང༌ རྡོའེ༌ཀ༌ ཕོག༌ མི༌ཅུག༌ཅེས༌སི༌ ཕིའ༌, ཕོ༌ཉ༌གུན༌ནི༌ ལག༌པ༌ རྐྱངས༌ཏེ༌ ཁྱོ༌རང༌ ཟུམ༌མ༌ ཛད༌ཨིན༌།’”
MAT 4:7 ཡེ༌ཤུའི༌ ཁོའ༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ འི༌བོའང༌ མོལ༌དུག༌། ‘གཙོ༌བོ༌ ཁྱོ༌ཞ༌རང༌ངི༌ དཀོན༌མཆོག༌ག༌ ཚོད༌ མ༌ལྟའ༌།’ ”
MAT 4:8 ཡང༌སྐྱར༌ རྡུད༌དི༌ གོ༌བའེ༌ ཁོང༌ རི༌ ཐོན༌པོ༌ཞིག༌གི༌ཀ༌ ཁྱེར༌ཏེ༌ ཇིག༌རྟེན༌ནི༌ གྱལ༌སྲིད༌ ཚང༌མ༌ དང༌ ཏེ༌གུན༌ནི༌ སྤལ༌ སྟན༌ཏེ༌,
MAT 4:9 ཟེརས༌, “ཀལ༌ཏེས༌ ཁྱོ༌རང༌ངི༌ ང༌ ཆག༌ཕུལ༌ཏེ༌ ཅོལ༌ན༌, ངའེ༌ ཁྱོ༌རང༌ང༌ འི༌ ཚང༌མ༌ ཏང༌ཨིན༌།”
MAT 4:10 ཡེ༌ཤུའི༌ ཁོའ༌ མོལས༌, “ཤེ༌ཏན༌ ཁྱོ༌རང༌ འི༌ཀ༌ནེ༌ སོང༌, ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘ཁྱོ༌ཞའེ༌, ཁྱོ༌ཞ༌རང༌ངི༌ གཙོ༌བོ༌ དཀོན༌མཆོག༌ག༌ ཅོལ༌གོས༌ ཡང༌ ཁོང༌ ཅིག༌པོའ༌ ཞབས༌ཏོག༌ ཞུ༌གོས༌།’”
MAT 4:11 ཏེ༌ནེ༌ རྡུད༌གུན༌ནི༌ གོ༌བ༌ ཁོང༌ནེ༌ བེ༌ཏེ༌ སོང༌ ཡང༌ དཀོན༌མཆོག༌གི༌ ཕོ༌ཉ༌གུན༌ སྐྱོད༌ཏེ༌ ཁོང༌ང༌ ཞབས༌ཏོག༌ ཞུས༌།
MAT 4:12 ཡོ༌ཧཱ༌ནན༌ ཟུམས༌ཏེ༌ ཙོན༌ཁང༌ང༌ ཀགས༌ཁན༌བོ༌ གཙོ༌བོ༌ ཡེ༌ཤུའི༌ སན༌ན༌ཅིག༌, ཁོང༌ གཱ༌ལིལ༌ལིའི༌ ཡུལ༌ཇོངས༌ལ༌ ལོགས༌ཏེ༌ སྐྱོད༌ད༌ ཛདས༌།
MAT 4:13 ན༌ཙ༌རེད༌དི༌ གྲོང༌ཁྱེར༌ལ༌ མ༌ཞུགས༌ས༌, ཚོའེ༌ དུན༌ལ༌ ཡོད༌ཁན༌ ཟེ༌བུ༌ལོན༌ དང༌ ནབ༌ཐལ༌ལིའི༌ ཡུལ༌ཇོངས༌སི༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོད༌ཏེ༌ ཞུགས༌ས༌ ཛདས༌།
MAT 4:14 སྔུན༌མའེ༌ ལུང༌སྟོན༌པ༌ ཡེ༌ཤ༌ཡཱ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌བོ༌ དྲན༌དྲ༌ གྲུབ༌ཐུབ༌ཅེས༌སི༌ ཕིའ༌ ཡེ༌ཤུའི༌ ཏེ༌ ཚང༌མ༌ ཅོའ༌ ཛདས༌། ཡེ༌ཤ༌ཡཱའེ༌ བྲིའ༌ ཛད༌ཏེ༌ དུག༌,
MAT 4:15 “ཟེ༌བུ༌ལོན༌ དང༌ ནཕ༌ཐལ༌ལི༌ ཡུལ༌གུན༌, ཚོའེ༌ ལམ༌མི༌ཀ༌ ཡོར༌དཱན༌ ལྩངས༌པོའེ༌ ཕར༌ཀ༌, གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ དུག༌ཁན༌ ཡ༌ཧུ༌དཱ༌པ༌ མན༌ཁན༌,
MAT 4:16 མུན༌པའེ༌ ནང༌ང༌ དུག༌ཁན༌གུན༌ལ༌ འོད༌ ལྡང༌ཤན༌ཞིག༌ ཐོང༌ཨིན༌། ཤིན༌ ཡུལ༌ མུན༌པའེ༌ ནང༌ང༌ དུག༌ཁན༌གུན༌ལ༌ ཉི༌མ༌ ཤར༌ཏེ༌ འོད༌ ཕོག༌ཨིན༌། ”
MAT 4:17 ཏེན༌ན༌ ཏུས༌ནེ༌ ཕར༌ལ༌ ཡེ༌ཤུའི༌ ཆོས༌ཤད༌ཅེས༌ གོ༌ཟུག༌ ཛདས༌, “ནམ༌ཁའེ༌ གྱལ༌སྲིད༌ ཉེ༌མོ༌ ཨིན༌ནོག༌, གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ སེམས༌ གྱུར༌ཤིག༌།”
MAT 4:18 གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ནེ༌ ཞབ༌གྲུལ༌ ཛད༌ཨིན༌ ཡོད༌ཏུས༌, ཁོང༌ངི༌ ཨ༌ཅོ༌ནོ༌ ཉིས༌, ཤི༌མོན༌ ཀ༌བོའ༌ པི༌ཏྲར༌རའང༌ ཟེར༌རད༌ ཡང༌ ཁོའེ༌ ནོ༌ ཨེན༌གྲིའུ༌ ཟིགས༌། ཁོང༌གུན༌ནི༌ ཚོའེ༌ ནང༌ང༌ ཉ༌དོལ༌ ཕང༌ངད༌པིན༌ ཅིའ༌ཟེར༌ན༌ ཁོང༌གུན༌ ཉ༌ ཟུམ༌ཁན༌ ཨིན༌པིན༌།
MAT 4:19 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ གྱབ༌ནེ༌ ཡོངས༌ཏེ༌ ངའེ༌ ལོབ༌ཕྲུགས༌ གྱུར༌, ཏ༌ནེ༌ཕར༌ལ༌ ངའེ༌ ཁྱོ༌ཞ༌གུན༌ལ༌ ཉའེ༌ ཚབས༌ལ༌ མི༌གུན༌ ཟུམ༌ཅེས༌ ལབ༌ཨིན༌།”
MAT 4:20 ཏེན༌ན༌མལ༌ལ༌ ཉ༌དོལ༌ སྤངས༌ཏེ༌ ཁོང༌གུན༌ ཡེ༌ཤུའི༌ གྱབ༌ནེ༌ བྲངས༌།
MAT 4:21 ཡེ༌ཤུ༌ ཏེ༌ཀ༌ནེ༌ སྐྱོད༌ ཟ༌ནེ༌ ཨ༌ཅོ༌ནོ༌ ཉིས༌, ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཟིགས༌, ཁོང༌གུན༌ནི༌ ཨ༌བ༌ ཉམ༌པོ༌, གྲུ༌ཟིང༌ངི༌ ནང༌ང༌ ཁོ༌རང༌གུན༌ནི༌ ཉ༌དོལ༌ གྲལ༌གྲིག༌ ཅོའད༌པིན༌, ཡེ༌ཤུའི༌ ཁོང༌གུན༌ལ༌ བོད༌ད༌ ཛདས༌།
MAT 4:22 ཏེན༌ན༌མལ༌ལ༌ ཡ༌ཀོབ༌ དང༌ ཡོ༌ཧཱ༌ནན༌ནི༌ གྲུ༌ཟིང༌ དང༌ ཨ༌བ༌ བོར༌ཏེ༌ གཙོ༌བོ༌ ཡེ༌ཤུའི༌ གྱབ༌ནེ༌ བྲངས༌།
MAT 4:23 གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ གང༌པོའེ༌ ནང༌ང༌ སྐྱོདས༌, ཁོང༌ངི༌ དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ཨིན༌, ནམ༌ཁའེ༌ གྱལ༌སྲིད༌དི༌ གའ༌མོའེ༌ ནས༌ཚུལ༌བོ༌ ཤད༌ད༌ ཛདས༌, ཡང༌ ཟུ༌མོ༌ དང༌ ནད༌ ཚང༌མ༌ནེ༌ མི༌གུན༌ ཕན༌ཅུག༌ག༌ ཛདས༌།
MAT 4:24 ཁོང༌ མིང༌ཅན༌ནི༌ ནས༌ཚུལ༌བོ༌ ཐག༌རིང༌ སི༌རི༌ཡཱ༌ ཡུལ༌ཇོངས༌ ཚོག༌པ༌ ཁྱེབས༌ པ༌སང༌ མི༌གུན༌ནི༌ ཟུ༌མོ༌ མིན༌དྲ༌ མིན༌དྲ༌ ཡོངས༌ཁན༌ནི༌ ནད༌པ༌གུན༌ ཁྱོངས༌: སྤེར༌ན༌ ན༌ཚ༌ མ༌སྲན༌ཏྲེ༌, རྡུད༌ ཞུགས༌ཁན༌, མིར༌གི༌ ཡོང༌ཁན༌ དང༌, ཟའ༌ཕོག༌ཁན༌ གུན༌, ཏེ༌ ནད༌པ༌ ཚང༌མ༌ གཙོ༌བོ༌ ཡེ༌ཤུའི༌ གྱལ༌ཅུག༌ག༌ ཛདས༌།
MAT 4:25 གཱ༌ལིལ༌ལི༌, གྱལ༌ས༌ རྕུ༌ ཟེར༌ས༌, ཡེ༌རུ༌ཤ༌ལེམ༌, ཡ༌ཧུ༌དཱ༌ དང༌ ཡོར༌དཱན༌ ལྩངས༌པོའེ༌ ཉེ༌ཁོར༌ནེ༌ མི༌ མང༌པོ༌ གཙོ༌བོ༌ ཡེ༌ཤུའི༌ སྟིང༌རང༌ནེ༌ ཡོངས༌།
MAT 5:1 མི༌ཚོགས༌ ཆེན༌མོ༌ ཛོམ༌ཨིན༌ ཟིགས༌ས༌ཅིག༌, གཙོ༌བོ༌ ཡེ༌ཤུ༌ རི༌ཀ༌ ཀེན༌ལ༌ སྐྱོད༌ཏེ༌ ཞུགས༌ས༌ ཛདས༌། ཏེ༌ནེ༌ ཁོང༌ངི༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌།
MAT 5:2 ཡེ༌ཤུའི༌ ཁོང༌གུན༌ལ༌ ལབ༌ཞ༌ སལ༌ཅེས༌ གོ༌ཟུག༌ ཛད༌ཏེ༌ མོལས༌,
MAT 5:3 “དཀོན༌མཆོག༌ནེ༌ རོགས༌ ཙལ༌ཁན༌གུན༌ ཅིན༌ལབས༌ཅན༌ ཨིན༌, ཅིའ༌ཟེར༌ན༌ ཁོང༌གུན༌ལ༌ ནམ༌ཁའེ༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།
MAT 5:4 སེམས༌སི༌ ནང༌ང༌ རྡུག༌པོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ སེམས༌སོ༌ སལ༌ལ༌ ཛད༌ཨིན༌།
MAT 5:5 པས༌མོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁོང༌གུན༌ལ༌ ཇིག༌རྟེན༌ གང༌པོ༌ ནོར༌སྐལ༌ལ༌ ཐོབ༌ཨིན༌།
MAT 5:6 ཀྲང༌པོ༌ ཐེའ༌ ཛད༌ཅེས༌ལ༌ སྟོགས༌ཨིན༌ སྐོམས༌ཨིན༌ ཡོད༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁོང༌གུན༌ ཚིམ༌ཤུག༌ག༌ ཛད༌ཨིན༌།
MAT 5:7 ཞན༌མའ༌ སྙིང༌རྗེ༌ སྟན༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁོང༌གུན༌ལ༌ སྙིང༌རྗེ༌ སྟན༌ན༌ ཛད༌ཨིན༌།
MAT 5:8 སེམས༌ ལག༌མོ༌ ཡོད༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌ ཇལ༌ཨིན༌།
MAT 5:9 ཐུན༌བྲེལ༌ ཁྱོང༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁོང༌གུན༌ལ༌ དཀོན༌མཆོག༌གི༌ ཕྲུ༌གུ༌ མོལ༌ཨིན༌།
MAT 5:10 ལམ༌ ཀྲང༌པོའེ༌ཀ༌ གྲུལ༌ཅེས༌པོའེ༌ རྡུག༌ངལ༌ ཐོང༌ཁན༌གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁོང༌གུན༌ལ༌ ནམ༌ཁའེ༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།”
MAT 5:11 “ངའ༌ ཏད༌པ༌ ཅོ༌ཅེས༌པོའེ༌, ཞན༌མ༌གུན༌ནི༌ ཁྲེལ༌ ཅུགས༌ཏེ༌ ནགས༌བར༌དོ༌ ཡང༌ ཟུན༌བ༌ ཏམ༌ངན༌ སྣ༌ཙོགས༌ ཕོག༌ཁན༌གུན༌ ཅིན༌ལབས༌ཅན༌ ཨིན༌།
MAT 5:12 གའ༌མོ༌ དང༌ ཐད༌པོ༌ ཅོ༌ཤིག༌, ཅིའ༌ཟེར༌ན༌ ནམ༌ཁའེ༌ ནང༌ང༌ ཁྱོ༌ཞའ༌ སོལ༌རས༌ ཀྲག༌པོ༌ ཡོད༌, ཁོང༌གུན༌ནི༌ ཁྱོ༌ཞའེ༌ སང༌ སྔུན༌ལ༌ ཡོངས༌ཁན༌ དཀོན༌མཆོག༌གི༌ ལུང༌སྟོན༌པ༌གུན༌ལའང༌ ཏེན༌ན༌ ཙོགས༌ ནགས༌བར༌དོ༌ སྟན༌ཏེ༌ ཨིན༌པིན༌།”
MAT 5:13 གཙོ༌བོ༌ ཡེ༌ཤུའི༌ མོལས༌, “ཇིག༌རྟེན༌པ༌གུན༌ནི༌ ཕིའ༌ ཁྱོ༌ཞ༌གུན༌ ཚཱ༌ ཨིན༌། ཨིན༌ནའང༌ ཀལ༌ཏེས༌ ཚཱའེ༌ བྲོད༌པོ༌ ཡོལ༌ན༌ ཏེ༌བོ༌ ཀ༌ཟུག༌གི༌ ལོགས༌ཏེ༌ ཁྱོང༌ཨིན༌? ཏེ༌བོ༌ ཕི༌ལོག༌ག༌ ཕངས༌ཏེ༌ མི༌གུན༌ནི༌ རྐང༌པའེ༌ ཡོག༌ག༌ ནན༌ཅེས༌ མ༌ནེ༌ ཡང༌ ཅའང༌ ཕན༌ཐོགས༌ མེད༌ཀྱག༌།”
MAT 5:14 “ཇིག༌རྟེན༌པ༌གུན༌ནི༌ ཕིའ༌ ཁྱོ༌ཞའ༌ འོད༌ ཨིན༌ནོག༌, རི༌ཀ༌ ཡོད༌ཁན༌ནི༌ གྱལ༌ས༌ ཀབ༌ མི༌ཉན༌ཅེས༌ ཙོགས༌།
MAT 5:15 མི༌གུན༌ནི༌ འོད༌ ཏུགས༌ཏེ༌ གོར༌མོའེ༌ ཡོག༌ག༌ མ༌བོར༌ར༌ ནང༌ང༌ ཡོད༌ཁན༌ ཚང༌མའ༌ ཐོང༌ཅེས༌ལ༌ འོད༌སྟག༌གི༌ཀ༌ བོར༌ཨིན༌།
MAT 5:16 ཏེན༌ན༌ ཙོགས༌ལ༌ ཁྱོ༌ཞའེ༌ ལས༌ ཟང༌པོ༌གུན༌ ཐོང༌ཏེ༌ མི༌གུན༌ནི༌ ཁྱོ༌ཞའེ༌ ནམ༌ཁའ༌ ཞུགས༌ཁན༌ནི༌ ཡབ༌ དཀོན༌མཆོག༌ག༌ སྟོད༌པ༌ ཕུལ༌ཅེས༌སི༌ ཕིའ༌ ཁྱོ༌ཞའེ༌ འོད༌དི༌ ལྡངས༌པོ༌ ཁོང༌གུན༌ནི༌ཀ༌ ཕོག༌ཅུག༌ཤིག༌།”
MAT 5:17 གཙོ༌བོ༌ ཡེ༌ཤུའི༌ མོལས༌, “ང༌ མོ༌ཟེས༌སི༌ བཀའ༌ཁྲིམས༌ ཡ༌ ལུང༌སྟོན༌པ༌གུན༌ནི༌ ལབ༌ཞ༌གུན༌ མེད༌ཁན༌ ཅོའ༌ ཡོང༌ཏེ༌ ཨིན༌ནོག༌ མ༌སམ༌། ཏེ༌གུན༌ མེད༌ཁན༌ མ༌ཅོའ༌ གྲུབ༌ ཅུག༌ག༌ལ༌ ཡོངས༌པིན༌།
MAT 5:18 ངའེ༌ དེན༌བ༌ ཟེར༌རད༌ ནམ༌ཁའ༌ དང༌ ས༌ ཉིས༌ཀོ༌ སྟོར༌རི༌ སང༌ སྔུན༌ལ༌ དཀོན༌མཆོག༌གི༌ བཀའ༌ཁྲིམས༌སི༌ ཨི༌གེ༌ ཡ༌ ཚིག༌ཅིག༌གའང༌ མ༌སྟོར༌ར༌ ཏེ༌ ཚང༌མ༌ དྲན༌དྲ༌ གྲུབ༌ཨིན༌།
MAT 5:19 ཀལ༌ཏེས༌ སུ༌ཞིག༌གི༌ དཀོན༌མཆོག༌གི༌ བཀའ༌རྒྱ༌ ཚང༌མའེ༌སང༌ ཆུ༌ངུན༌ཞིག༌གའང༌ ཅག༌ན༌ ཡང༌ ཏེན༌ན༌ ཙོགས༌ ཞན༌མ༌གུན༌ལ༌ ལབ༌བད༌ན༌ ཏེ༌ མི༌བོའ༌ ནམ༌ཁའེ༌ གྱལ༌སྲིད༌དི༌ ནང༌ང༌ ཚང༌མའེ༌སང༌ རིན༌མེད༌ རྩི༌ཨིན༌། ཨིན༌ནའང༌ ཀལ༌ཏེས༌ སུ༌ཞིག༌གི༌ བཀའ༌ སྲུངས༌ཏེ༌ ཞན༌མ༌ ཏེ༌ཙོགས༌ ཅོ༌ཅེས༌ ལབ༌བད༌ན༌ ཏེ༌ མི༌བོའ༌ ནམ༌ཁའེ༌ གྱལ༌སྲིད༌དི༌ ནང༌ང༌ རིན༌ཅན༌ རྩི༌ཨིན༌།”
MAT 5:20 “ཏ༌ ངའེ༌ ཟེར༌རད༌, ཀལ༌ཏེས༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ནི༌ མི༌ཚེ༌ ཀྲང༌པོ༌ཞིག༌ ཕུད༌ཁན༌བོའེ༌ སང༌ ཁྱོ༌ཞའེ༌ མི༌ཚེ༌ ཕུད༌ཁན༌བོ༌ མང༌ང༌ ཀྲང༌པོ༌ཞིག༌ མེད༌ན༌ ནམ༌ཁའེ༌ གྱལ༌སྲིད༌དི༌ ནང༌ང༌ ཁྱོ༌ཞ༌གུན༌ མ༌ནེ༌ ཞུགས༌ མི༌ཉན༌།”
MAT 5:21 གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ལ༌ མོལ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། ‘མི༌ མ༌སད༌, མི༌ སད༌ཁན༌གུན༌ལ༌ ཁྲིམས༌ཅད༌ ཕོག༌ཨིན༌།’
MAT 5:22 ཨིན༌ནའང༌ ངའེ༌ ཟེར༌རད༌ རང༌ངི༌ སྤུན༌ལ༌ སྲོ༌ ཅོ༌ཁན༌བོའང༌ ཁྲིམས༌ཅད༌ ཕོག༌ཨིན༌། ཡང༌ རང༌ངི༌ སྤུན༌ལ༌ སྨད༌གྲ༌ ཏང༌ཁན༌བོའང༌ ཁྲིམས༌ཁུང༌ང༌ ཁྱོང༌ཨིན༌། ཀལ༌ཏེས༌ ‘ཁྱོ༌རང༌ངི༌ སྤུན༌ཞིག༌ག༌ བུང༌བུ༌ སམ༌མེད༌ ཨིན༌ནོག༌’ ཟེར༌ན༌ ཁྱོ༌རང༌ང༌ ཉལ༌ཝའེ༌ མེ༌ ཆད༌པ༌ ཕོག༌ཅེས༌སི༌ ཇིགས༌པ༌ ཨིན༌ནོག༌།”
MAT 5:23 “ཏེ༌བོའེ༌ཕིའ༌ ཆོད༌ཁྲི༌ཀ༌ ཆོད༌པ༌ ཕུལ༌ལི༌ ཏུས༌, ཀལ༌ཏེས༌ རང༌ངི༌ སྤུན༌ཞིག༌གི༌ གྱབ༌གལ༌ལ༌ ངན༌པ༌ ཅོས༌ཁན༌བོ༌ ཁྱོ༌རང༌ང༌ ཨིད༌ཏུ༌ ཡོང༌ན༌,
MAT 5:24 ཆོད༌ཁྲིའི༌ དུན༌ལ༌ ཆོད༌པ༌ བོར༌ཏེ༌ གོ༌མ༌ རང༌ངི༌ སྤུན༌ ཉམ༌པོ༌ ཐུན༌བྲེལ༌ ཅོས༌, ཏེ༌ནེ༌ སོང༌ཏེ༌ ཆོད༌པ༌ ཕུལ༌།”
MAT 5:25 “ཁྱོ༌རང༌ང༌ ཉད༌ཀལ༌ཏེ༌ ཁྲིམས༌ཁུང༌ང༌ ཁྱེར༌ཁན༌བོ༌ ཉམ༌པོ༌ ཏེ༌རུ༌ ལེབ༌བི༌ སང༌ སྔུན༌ལ༌ ལམ༌མ༌ གྱོགས༌པ༌ ནང༌གྲིག༌ ཅོས༌། ཏེ༌ མན༌ན༌ ཁོའེ༌ ཁྱོ༌རང༌ ཁྲིམ༌སྤོན༌ལ༌ སྟད༌སྲིད༌ཅེས༌ ཨིན༌ནོག༌, ཡང༌ ཁྲིམ༌སྤོན༌ནི༌ ཁྲིམས༌ཁུང༌ངི༌ མག༌སྤོན༌ལ༌ སྟད༌ཏེ༌ ཁྱོ༌རང༌ ཙོན༌ཁང༌ང༌ ཀག༌ཨིན༌།
MAT 5:26 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌རང༌ ཙོན༌ཁང༌ནེ༌ ཏེ༌ཏེ༌ཚོག༌པ༌ མི༌ཕུད༌ ནམ༌ཚོག༌པ༌ ཁྱོ༌རང༌ངི༌ ཆད༌པའེ༌ པེ༌ནེ༌ ཚང༌མ༌ མི༌ཤལ༌།”
MAT 5:27 གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ མོལ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌, ‘རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌།’
MAT 5:28 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, བུ༌མོའ༌ ལུས༌བྲེལ༌ལི༌ དོད༌པ༌ ཉམ༌པོ༌ ལྟའ༌ཁན༌བོའེ༌, ཁོ༌རང༌ངི༌ སྙིང༌ངི༌ ནང༌ང༌ ཁོ༌རང༌ངི༌ ཞིད༌མད༌ མན༌ཁན༌ནི༌ ཏེ༌ བུ༌མོ༌ ཉམ༌པོ༌ ལུས༌བྲེལ༌ ཅོས༌ཏེ༌ ཨིན༌ནོག༌།
MAT 5:29 ཀལ༌ཏེས༌ ཁྱོ༌རང༌ངི༌ མིག༌ ཡས༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཏེ༌ མིག༌པོ༌ བྲུས༌ཏེ༌ ཕངས༌ཏོང༌, ལུས༌ གང༌པོ༌ ཉལ༌ཝའེ༌ ནང༌ང༌ ཕང༌ངི༌ སང༌ ལུས༌སི༌ ཁག༌ཅིག༌ མེད༌ཁན༌ ཆ༌ན༌ གྱལ༌།
MAT 5:30 ཡང༌ ཀལ༌ཏེས༌ ཁྱོ༌རང༌ངི༌ ལག༌པ༌ ཡས༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཏེ༌ ལག༌པ༌ ཅད༌ཏེ༌ ཕངས༌ཏོང༌, ལུས༌ གང༌པོ༌ ཉལ༌ཝའེ༌ ནང༌ང༌ ཕང༌ངི༌ སང༌ ལུས༌སི༌ ཁག༌ཅིག༌ མེད༌ཁན༌ ཆ༌ན༌ གྱལ༌།”
MAT 5:31 གཙོ༌བོ༌ ཡེ༌ཤུའི༌ མོལས༌, “ཁྱོ༌ཞའེ༌ འི༌བོ༌ ཚོར༌ཏེ༌ ཨིན༌ནོག༌, ‘ན༌མ༌ ཅད༌ཁན༌ནི༌ བུ༌ཚའེ༌ ཁོ༌རང༌ངི༌ ན༌མ༌ ཅད༌ཁན༌བོའ༌ ཅད༌ཁན༌ནི༌ ལག༌ཁྱེར༌ ཏང༌གོས༌།’
MAT 5:32 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, རང༌ངི༌ ཞིད༌མད༌ མན༌ཁན༌ ཉམ༌པོ༌ ལུས༌བྲེལ༌ ཅོ༌ཅེས༌སི༌ ནས༌ལུག༌ མ༌སྟོགས༌, སུ༌ཞིག༌གི༌ ཁོ༌རང༌ངི༌ ན༌མ༌ ཅད༌ན༌, ཁོའེ༌ ཏེ༌ བུ༌མོ༌བོའ༌ ལོག༌ཡེམ༌ ཅོ༌ཅུགས༌ཏེ༌ ཨིན༌ནོག༌། ཡང༌ ཏེ༌ བུ༌མོ༌ ཉམ༌པོ༌ ན༌མ༌ ཅོ༌ཁན༌བོའེང༌ ལོག༌ཡེམ༌ ཅོས༌ཏེ༌ ཨིན༌ནོག༌།”
MAT 5:33 གཙོ༌བོ༌ ཡེ༌ཤུའི༌ མོལས༌, “ང༌དང༌ངི༌ ཕ༌མེས༌པོ༌གུན༌ལ༌ འི༌ ཟེར༌ཁན༌བོའང༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌། ནའ༌ ཁུར༌ཁན༌བོ༌ མ༌ཅག༌, ཨིན༌ནའང༌ ཁྱོ༌ཞའེ༌ གཙོ༌བོ༌ ཉམ༌པོ༌ ནའ༌ ཁུར༌ཁན༌བོ༌ གྲུབ༌ཅུག༌།
MAT 5:34 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ནའ༌ མ༌ནེ༌ མ༌ཁུར༌ཤིག༌, ནམ༌ཁའེ༌ ནའ༌ མ༌ཁུར༌ ཅིའ༌ཟེར༌ན༌ ནམ༌ཁའ༌ ནི༌ དཀོན༌མཆོག༌གི༌ ཞུགས༌ཁྲིས༌ ཨིན༌,
MAT 5:35 ཡ༌ ཇིག༌རྟེན༌ནི༌ ནའ༌ མ༌ཁུར༌ ཅིའ༌ཟེར༌ན༌ ཇིག༌རྟེན༌ནི༌ཀ༌ དཀོན༌མཆོག༌གི༌ ཞབས༌ བོར༌ར༌ ཛད༌ད༌ནོག༌, ཡ༌ ཡེ༌རུ༌ཤ༌ལེམ༌མི༌ ནའ༌ མ༌ཁུར༌ ཅིའ༌ཟེར༌ན༌ ཡེ༌རུ༌ཤ༌ལེམ༌ ནི༌ ཀྲག༌པོ༌ གྱལ༌པོའེ༌ གྱལ༌ས༌ ཨིན༌།
MAT 5:36 རང༌ངི༌ གོའི༌ ནའ༌ མ༌ཁུར༌ ཅིའ༌ཟེར༌ན༌ ཁྱོ༌ཞའ༌ ཁྱོ༌ཞའེ༌ སྲ༌ ཅིག༌གའང༌ ཀར༌པོ༌ ཡ༌ ནག༌པོ༌ ཅོ༌ཉན༌ན༌ མ༌ནོག༌།
MAT 5:37 ཁྱོ༌ཞའེ༌ ལན༌བོ༌ ཨིན༌ན༌ ཨིན༌ ཡ༌ མན༌ན༌ མན༌ ཟེར༌ ཅིའ༌ཟེར༌ན༌ འི༌གུན༌ནི༌ སང༌ ཐལ༌ཏེ༌ ཅི༌ཞིག༌ ཟེར༌ནའང༌ ཤེ༌ཏན༌ ངན༌པ༌ནེ༌ ཇུང༌ང༌ནོག༌།”
MAT 5:38 གཙོ༌བོ༌ ཡེ༌ཤུའི༌ མོལས༌, “ཁྱོ༌ཞའེ༌ འི༌བོའང༌ ཚོར༌ཏེ༌ ཨིན༌ནོག༌, ཆད༌པ༌ སྐྱོན༌བོ༌ནའང༌ ཟོབ༌གོས༌, ‘མིག༌གི༌ ལན༌ལ༌ མིག༌, སོའི༌ ལན༌ལ༌ སོ༌’,
MAT 5:39 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ཁྱོ༌ཞའ༌ ངན༌པ༌ ཅོ༌ཁན༌བོའ༌ ཏེན༌ན༌ ཙོགས༌ ལན༌ མ༌ཏང༌ཤིག༌། ཀལ༌ཏེས༌ སུ༌ཞིག༌གི༌ གྲམ༌པ༌ ཡས༌པའ༌ གྲམ༌ལྕགས༌ ཏང༌ན༌, གྲམ༌པ༌ ཡོ༌མའང༌ གྲམ༌ལྕགས༌ ལེན༌ན༌ལ༌ སྟོན༌།
MAT 5:40 ཀལ༌ཏེས༌ སུ༌ཞིག༌གི༌ ཁྱོ༌རང༌ང༌ སྐྱོན༌ ཀལ༌ཏེ༌ ཁྲིམས༌ཁུང༌ང༌ ཁྱེར༌ཏེ༌ ཆད༌པའེ༌ ཚུལ༌ལ༌ ཁྱོ༌རང༌ངི༌ ཀྲི༌ལེན༌བོ༌ ཏོང༌ ཟེར༌ན༌ རང༌ངི༌ ཀོས༌པོའང༌ ཏངས༌ཏོང༌།
MAT 5:41 ཀལ༌ཏེས༌ སུ༌ཞིག༌གི༌ ཁྱོ༌ཞའ༌ ཀི༌ལོ༌མི༌ཀྲར༌ ཅིག༌ ཝང༌ ཏངས༌ཏེ༌ གྲུལ༌ཅུག༌ན༌, ཁོ༌ ཉམ༌པོ༌ ཀི༌ལོ༌མི༌ཀྲར༌ ཉིས༌ གྲུལ༌ཏོང༌།
MAT 5:42 ཏོང༌ ཟེར༌ཁན༌བོའ༌ ཏངས༌ཏོང༌, ཁྱོ༌ཞའེ༌ཀ༌ སྐྱིའ༌ ཡོང༌ཁན༌བོའ༌ ལག༌སྟོང༌ང༌ ལམ༌མ༌ཅུག༌།”
MAT 5:43 གཙོ༌བོ༌ ཡེ༌ཤུའི༌ མོལས༌, “ཁྱོ༌ཞ༌གུན༌ནི༌ འི༌བོ༌ ཚོར༌ཏེ༌ ཨིན༌ནོག༌, ‘ཁྱིམ༌ཚེས༌པ༌ ཅམས༌པ༌ ཡང༌ གྲ༌འོ༌གུན༌ལ༌ ནཕ༌རད༌ ཅོས༌།’
MAT 5:44 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, གྲ༌འོ༌གུན༌ལ༌ ཅམས༌པ༌ ཅོས༌ ཡང༌ ཁྱོ༌ཞའ༌ ནགས༌བར༌དོ༌ སྟན༌ཁན༌གུན༌ནི༌ ཕིའ༌ མོས༌ལམ༌ ཏོབ༌,
MAT 5:45 ཏེ༌ཟུག༌ ཅོ༌ན༌ ཁྱོ༌ཞའ༌, ནམ༌ཁའ༌ ཞུགས༌ཁན༌ནི༌ ཡབ༌བི༌ ལམ༌མི༌ཀ༌ གྲུལ༌ལ༌ནོག༌། ཉི༌མའེ༌ འོད༌ དང༌ ཆར༌པ༌ གུན༌ དཀོན༌མཆོག༌གི༌ ཟང༌ངན༌ མ༌ཕེའ༌ མི༌ཚང༌མ༌ལ༌ སལ༌ལ༌ནོག༌།
MAT 5:46 ཀལ༌ཏེས༌ ཁྱོ༌ཞའ༌ ཅམས༌པ༌ ཅོ༌ཁན༌གུན༌ལ༌ ཁྱོ༌ཞའེ༌ ཅམས༌པ༌ ཅོ༌ན༌, ཁྱོ༌ཞའ༌ སོལ༌རས༌ ཅིའ༌ ཐོབ༌ཨིན༌? གོབ༌སྐོར༌ ཏང༌ཁན༌ནི༌ ཁྲལ༌ནེན༌ཁན༌གུན༌ནིའང༌ ཏེ༌ཟུག༌ ཅོའ༌ནོག༌།
MAT 5:47 ཀལ༌ཏེས༌ ཁྱོ༌ཞའེ༌ སྤུན༌ལ༌ ཅིག༌པོའ༌ ལོན༌ སྲུལ༌ན༌, ཞན༌མ༌གུན༌ནི༌ སང༌ ཁྱོ༌ཞའེ༌ མང༌ང༌ཞིག༌ ཅི༌ ཅོས༌ཏེ༌ ཨིན༌? ཞན༌ ཆོས༌ལུག༌གི༌ མི༌གུན༌ནིའང༌ ཏེ༌ཟུག༌ ཅོའ༌ མ༌ནོག༌ག༌?
MAT 5:48 ཏེ༌བོའེ༌ཕིའ༌ ཁྱོ༌ཞའེ༌ ནམ༌ཁའེ༌ ཡབ༌, ཕུན༌སུམ༌ཚོགས༌པ༌ ཞུགས༌ཁན༌ ཙོགས༌ལ༌ ཁྱོ༌ཞའང༌ ཕུན༌སུམ༌ཚོགས༌པ༌ ཡོང༌གོས༌།”
MAT 6:1 གཙོ༌བོ༌ ཡེ༌ཤུའི༌ མོལས༌, “མི༌གུན༌ལ༌ སྟན༌ཅེས༌སི༌ ཕིའ༌ ལས༌ ཟང༌པོ༌ མ༌ཅོ༌། ཏེ༌ཟུག༌ ཅོ༌ན༌ ནམ༌ཁའེ༌ ནང༌ང༌ ཞུགས༌ཁན༌ ཁྱོ༌ཞའེ༌ ཡབ༌ནེ༌ སོལ༌རས༌ ཅའང༌ མི༌ཐོབ༌།
MAT 6:2 སྒོས༌དོམ༌ ཡོད༌ཁན༌གུན༌ལ༌ ཅིན༌བ༌ ཏང༌ ཟ༌ནེ༌ དུ༌ཁང༌ དང༌ ལམ༌ གུན༌ལ༌ ཏུང༌ མ༌ཕུ༌ཤིག༌, ཀ༌ཟུག༌ མི༌གུན༌ནི༌ སྟོད༌པ༌ ཐོབ༌ཅེས༌ལ༌ ཁ༌ཆོས༌པ༌གུན༌ནི༌ ཅོའད༌། ངའེ༌ དེན༌བ༌ ཟེར༌རད༌, ཁོང༌གུན༌ལ༌ སོལ༌རས༌ གང༌པོ༌ ཐོབ༌ཏེ༌ ཨིན༌།
MAT 6:3 ཨིན༌ནའང༌ ཅིན༌བ༌ ཏང༌ ཟ༌ནེ༌ རང༌ངི༌ ལག༌པ༌ ཡོ༌མའ༌ ལག༌པ༌ ཡས༌པའེ༌ ཅི༌ ཅོའད༌ གྱུས༌ ཆ༌ མ༌ཅུག༌ཤིག༌།
MAT 6:4 ཅིན༌བ༌ སངས༌ཏེ༌ ཏང༌ན༌, ཏེ༌ནེ༌ ཁྱོ༌ཞའེ༌ ནམ༌ཁའེ༌ ཡབ༌བི༌ སང༌ཝའེ༌ ནང༌ང༌ ཁྱོ༌ཞའེ༌ ལས༌ ཅོ༌ཁན༌བོ༌ ཟིགས༌ཏེ༌ སོལ༌རས༌ སལ༌ཨིན༌།”
MAT 6:5 གཙོ༌བོ༌ ཡེ༌ཤུའི༌ མོལས༌, “མོས༌ལམ༌ ཞུ༌ ཟ༌ནེ༌, ཁ༌ཆོས༌པ༌གུན༌ ཙོགས༌ ཡོང༌ མ༌གོས༌ ཅིའ༌ཟེར༌ན༌ ཁོང༌གུན༌ དུ༌ཁང༌ དང༌ སྲང༌ངི༌ ཀྲུའི༌ཀ༌ ལངས༌ཏེ༌ མིའ༌ ཐོང༌ཅུགས༌ཏེ༌ མོས༌ལམ༌ ཏབ༌བ༌ལ༌ ཐད༌ད༌ནོག༌། ངའེ༌ ཁྱོ༌ཞའ༌ དེན༌བ༌ ཟེར༌རད༌ ཏེ༌ ཁ༌ཆོས༌པ༌གུན༌ལ༌ སོལ༌རས༌ གང༌པོ༌ ཐོབ༌ཏེ༌ ཨིན༌།
MAT 6:6 མོས༌ལམ༌ ཏབ༌ ཟ༌ནེ༌, རང༌ངི༌ ནང༌ང༌ སོང༌ཏེ༌ སྒོ༌ ཅུགས༌ཏེ༌ སང༌ཝའེ༌ ཐོག༌ནེ༌ རང༌ངི༌ ནམ༌ཁའེ༌ ཡབ༌བ༌ མོས༌ལམ༌ ཞུ༌ཤིག༌། ཏེ༌ནེ༌ ཁྱོ༌ཞའེ༌ སང༌ཝའེ༌ ནང༌ང༌ ཅོ༌ཁན༌ནི༌ ལས༌གུན༌ ཟིགས༌ཏེ༌ ཁྱོ༌ཞའེ༌ ནམ༌ཁའེ༌ ཡབ༌བི༌ ཁྱོ༌ཞའ༌ སོལ༌རས༌ སལ༌ཨིན༌།”
MAT 6:7 “ཁྱོ༌ཞའེ༌ མོས༌ལམ༌ ཞུ༌ ཟ༌ནེ༌, ཏོན༌མེད༌དི༌ ཚིགས༌གུན༌ ཟེར༌ཨིན༌ ཞན༌ ཆོས༌ལུག༌གི༌ མི༌གུན༌ ཙོགས༌ མ༌ཅོ༌, ཅིའ༌ཟེར༌ན༌ ཁོང༌གུན༌ནི༌ སམ༌མ༌ནོག༌ མོས༌ལམ༌ རིང༌མོ༌ ཞུ༌ཅེས༌པོའེ༌ དཀོན༌མཆོག༌གི༌ ཁོང༌གུན༌ནི༌ མོས༌ལམ༌བོ༌ སན༌ཨིན༌།
MAT 6:8 ཁོང༌གུན༌ ཙོགས༌ མ༌ཅོ༌, ཅིའ༌ཟེར༌ན༌ ཞུའི༌ སང༌ སྔུན༌ལ༌ ཁྱོ༌ཞའེ༌ སྒོས༌དོམ༌གུན༌ ནམ༌ཁའེ༌ ཡབ༌བི༌ ཁྱེན༌ན༌ ཛད༌ད༌ནོག༌།
MAT 6:9 ཁྱོ༌ཞའེ༌ མོས༌ལམ༌ འི༌ཙོགས༌ལ༌ ཞུས༌, ‘ནམ༌ཁའ༌ ཞུགས༌ཁན༌ནི༌ ང༌ཞའེ༌ ཡབ༌, ཉེ༌རང༌ངི༌ ཚན༌ ཏམ༌པའ༌ མི༌ ཐམས༌ཅད༌དི༌ རྩི༌ཝ༌ ཅོ༌ཤིག༌།
MAT 6:10 ཉེ༌རང༌ངི༌ གྱལ༌སྲིད༌ གྱོགས༌པ༌ ལེབ༌ཤིག༌། ཉེ༌རང༌ངི༌ ཐུག༌གོངས༌ ནམ༌ཁའེ༌ ནང༌ང༌ གྲུབ༌བ༌ ཙོགས༌ལ༌, འི༌ ཇིག༌རྟེན༌ནི༌ཀའང༌ གྲུབ༌ཤིག༌།
MAT 6:11 དི༌རིང༌ ང༌ཞའ༌ སྒོས༌དོམ༌མི༌ ཁར༌ཇི༌ སལ༌ལ༌ ཛད༌།
MAT 6:12 ང༌ཞའེ༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ སལ༌ལ༌ ཛད༌, ཀ༌ཟུག༌གི༌ ང༌ཞའེ༌ གྱབ༌གལ༌ལ༌ སྡིག༌པ༌ ཅོ༌ཁན༌གུན༌ལ༌ ང༌ཞེའང༌ ཤགས༌པ༌ ཏངས༌པིན༌།
MAT 6:13 ཚོད༌ལྟའེ༌ ཏུས༌ལ༌ སྡིག༌པ༌ ཅོ༌ཅེས༌ནེ༌ ང༌ཞའ༌ སྐྱོབ༌བ༌ཛད༌, ཡང༌ ངན༌པ༌ ཤེ༌ཏན༌ནེ༌ ང༌ཞའ༌ ཐར༌ ཅུག༌ག༌ ཛད༌།’”
MAT 6:14 ཡེ༌ཤུའི༌ མོལས༌, “ཀལ༌ཏེས༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ ཏང༌ན༌, ཁྱོ༌ཞ༌གུན༌ནི༌ ནམ༌ཁའེ༌ ཡབ༌བིའང༌ ཁྱོ༌ཞ༌གུན༌ལ༌ ཤགས༌པ༌ སལ༌ལ༌ ཛད༌ཨིན༌།
MAT 6:15 ཨིན༌ནའང༌ ཀལ༌ཏེས༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ མ༌ཏང༌ན༌, ཁྱོ༌ཞ༌གུན༌ནི༌ ནམ༌ཁའེ༌ ཡབ༌བི༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ སལ༌ལ༌ མི༌ཛད༌།”
MAT 6:16 “ཁྱོ༌ཞ༌གུན༌ ཉེ༌ནས༌ལ༌ དུག༌ ཟ༌ནེ༌, རྡུག༌པོ༌ མ༌ཅོ༌, ཀ༌ཟུག༌ ཁ༌ཆོས༌པ༌གུན༌ནི༌ ཁོ༌རང༌གུན༌ནི༌ ལྡོང༌བོ༌ སྡིག༌པ༌ཞིག༌ ཅོས༌ཏེ༌ ཉེ༌ནས༌ལ༌ དུག༌ཁན༌བོ༌ མི༌གུན༌ལ༌ སྔོན༌ ཅུག༌ག༌ནོག༌། ངའེ༌ ཁྱོ༌ཞ༌གུན༌ལ༌ དེན༌བ༌ ཟེར༌རད༌, ཏེ༌ ཁ༌ཆོས༌པ༌གུན༌ལ༌ སོལ༌རས༌ གང༌པོ༌ ཐོབ༌ཚར༌ཏེ༌ ཨིན༌།
MAT 6:17 ཨིན༌ནའང༌ ཁྱོ༌ཞ༌གུན༌ ཉེ༌ནས༌ལ༌ དུག༌ ཟ༌ནེ༌ སྲ༌ མར༌ སྐུས༌ཏེ༌ ལྡོང༌ ཁྲུས༌ཏེ༌ དུག༌ཤིག༌།
MAT 6:18 ཁྱོ༌ཞའ༌ ཉེ༌ནས༌ལ༌ དུག༌ཁན༌བོ༌ སུའིང༌ མ༌ཇལ༌ཁན༌ནི༌ ཁྱོ༌ཞའེ༌ ཡབ༌ མ༌སྟོགས༌ ཡང༌སུ༌ཞིག༌གའང༌ མི༌ཤེ༌ཤེས༌ལ༌ ཏེ༌ ཙོགས༌ ཅོ༌ཤིག༌། ཡབ༌ དཀོན༌མཆོག༌གི༌ ཁྱོ༌ཞའེ༌ སང༌ཝའེ༌ ནང༌ང༌ ཅོ༌ཁན༌བོ༌ ཟིགས༌ཏེ༌ སོལ༌རས༌ སལ༌ལ༌ ཛད༌ཨིན༌།”
MAT 6:19 “ཁྱོ༌ཞ༌རང༌ངི༌ ཕིའ༌ ཇིག༌རྟེན༌ནི༌ཀ༌ ནོར༌གུན༌ མ༌སག༌ཤིག༌། ཏེ༌གུན༌ མུག༌པའེ༌ ཟའ༌ཅེས༌ དང༌ ཡའ༌ ཡོང༌ཅེས༌ མ༌ཚད༌ རྐུན༌མ༌ ཡོངས༌ཏེ༌ རྐུ༌ཨིན༌།
MAT 6:20 ཨིན༌ནའང༌ ཁྱོ༌ཞ༌རང༌ངི༌ ཕིའ༌ ནམ༌ཁའེ༌ ནང༌ང༌ ནོར༌ སོག༌ཤིག༌, ཏེ༌རུ༌ མུག༌པའེ༌ མི༌ཟའ༌ ཡང༌ ཡའ༌ མི༌ཡོང༌ མ༌ཚད༌ རྐུན༌མིའང༌ མི༌རྐུ༌།
MAT 6:21 ཁྱོ༌ཞའེ༌ ནོར༌ ཡོད༌ས༌ ཁྱོ༌ཞའེ༌ སྙིང༌ངའང༌ ཆགས༌ཨིན༌།”
MAT 6:22 “མིག༌ ནི༌ ཟུགས༌སི༌ འོད༌པོ༌ ཨིན༌། མིག༌པོ༌ ཁམ༌ཟང༌ ཡོད༌ན༌ ཁྱོ༌ཞའེ༌ ལུས༌ གང༌པོ༌ འོད༌དི༌ གང༌ཨིན༌།
MAT 6:23 ཨིན༌ནའང༌ ཀལ༌ཏེས༌ མིག༌པོ༌ ཁམ༌ཟང༌ མེད༌ན༌, ཁྱོ༌ཞའེ༌ ལུས༌ གང༌པོ༌ མུན༌གྲིག༌གི༌ གང༌ཨིན༌། ཀལ༌ཏེས༌ ཁྱོ༌ཞའེ༌ ཁྱོ༌ཞ༌རང༌ངི༌ སེམས༌སི༌ ནང༌ང༌ དཀོན༌མཆོག༌གི༌ འོད༌ ཡོད༌ སམ༌ཁན༌བོ༌ ངོས༌པོའ༌ མུན༌གྲིག༌ ཨིན༌ན༌ ཏེ༌ནེ༌ ཏེ༌ མུན༌གྲིག༌པོ༌ ཙམ༌ཤིག༌ ཇིགས༌ནང༌ཅན༌ མི༌ཡོང༌།”
MAT 6:24 “སུ༌ཞིག༌གིའང༌ སྤོན༌བོ༌ ཉིས༌སི༌ ཞབས༌ཏོག༌ ཞུ༌ མི༌ཉན༌, ཅིག༌པོའ༌ ནཕ༌རད༌ ཡང༌ ཅིག༌པོའ༌ ཅེས༌པ༌ ཅོའ༌ནོག༌, ཡ༌ ཅིག༌པོའ༌ སྙིང༌ནེ༌ ཞབས༌ཏོག༌ ཞུ༌ཨིན༌ ཡང༌ ཅིག༌པོའ༌ མ༌ཐད༌ད༌ ཞབས༌ཏོག༌ ཞུའ༌ནོག༌། ཏེན༌ན༌ ཙོགས༌ལ༌ དཀོན༌མཆོག༌ དང༌ ནོར༌ ཉིས༌ཀོའ༌ ཞབས༌ཏོག༌ ཞུ༌ མི༌ཉན༌།”
MAT 6:25 “ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, ཅི༌ ཟེན༌, ཅི༌ ཐུང༌ཨིན༌ ཡ༌ ཟུགས༌ལ༌ ཅི༌ གོན༌ཨིན༌ སམས༌ཏེ༌ རང༌ངི༌ མི༌ཚེའེ༌ ཕིའ༌ ཚེར༌ མ༌ཚེར༌། ཟན༌ནི༌ སང༌ སྲོག༌པོ༌ ཡང༌ ཀོས༌སི༌ སང༌ ལུས༌པོ༌ ཁག༌ཆེའ༌ མ༌ནོག༌ག༌?
MAT 6:26 ནམ༌མི༌ ཅ༌གུན༌ལ༌ ལྟོས༌སའང༌, ཏེ༌གུན༌ནི༌ ཞིང༌ ཏབ༌བ༌ ཡ༌ ཞིང༌ རྔའ༌ ཡ༌ བང༌ངེ༌ ནང༌ང༌ ཀྲོ༌ སག༌ག༌ མི༌དུག༌, ཨིན༌ནའང༌ ཁྱོ༌ཞའེ༌ ནམ༌ཁའེ༌ ཡབ༌བི༌ ཏེ༌གུན༌ལ༌ ཟན༌ སལ༌ལ༌ ཛད༌དུག༌། ཏེ༌གུན༌ནི༌ སང༌ ཁྱོ༌ཞའ༌ མང༌ང༌ རིན༌ མི༌ཆེའ༌?
MAT 6:27 ཁྱོ༌ཞའ༌ སུ༌ཞིག༌གི༌ ཚེར༌ཁ༌ ཅོས༌ཏེ༌ ཁྱོ༌ཞའེ༌ མི༌ཚེ༌ ནང༌ང༌ ཆུ༌ཚོད༌ ཅིག༌ སྐྱེད༌ ཐུབ༌ཨིན༌ན༌?”
MAT 6:28 “ཀོས༌ལག༌གི༌ ཕིའ༌ ཅིའ༌ ཚེར༌རད༌? སྤང༌ཐང༌ངི༌ མེན༌ཏོག༌གུན༌ ཀ༌ཟུག༌གི༌ ལྡན༌དུག༌ ལྟོས༌ཤིག༌, ཏེ༌གུན༌ནི༌ ལས༌ ཅོའ༌ ཡ༌ བལ༌ ཁལ༌ཏེ༌ ཀོས༌ ཐག༌ག༌ མི༌དུག༌།
MAT 6:29 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, གྱལ༌པོ༌ སོ༌ལོ༌མོན༌, ཁོ༌རང༌ངི༌ སྤལ༌ལི༌ ནང༌ང༌ མ༌ཀྲག༌པོ༌ ཀོས༌ལག༌ གོན༌ནའང༌ ཏེ༌ མེན༌ཏོག༌གུན༌ ཙོགས༌ ལྡེ༌མོ༌ དང༌ ཛེས༌པོ༌ ཐོང༌ང༌ མེད༌པིན༌།
MAT 6:30 ཀལ༌ཏེས༌ དཀོན༌མཆོག༌གི༌ དི༌རིང༌ ཡོད༌ཁན༌ ཐོ༌རེ༌ མེའ༌ སྲག༌ག༌ ཕང༌ཅེས༌ཅན༌ནི༌ སྤང༌ཐང༌ངི༌ མེན༌ཏོག༌གུན༌ལ༌ ཏེ༌ཙོགས༌སི༌ ཀོས༌ལག༌ སྐོན༌ ཐུབ༌བད༌ན༌, ཏད༌ཆུང༌ཅན༌གུན༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཏེ༌གུན༌ནི༌ སང༌ ཀོས༌ལག༌ ཀྲག༌པོ༌ སྐོན༌ན༌ མི༌ཛད༌ད༌?”
MAT 6:31 “ཏེ༌བོའེ༌ཕིའ༌ ‘ང༌དང༌ ཅི༌ ཟེན༌ ཡ༌ ང༌དང༌ ཅི༌ ཐུང༌ཨིན༌ ཡ༌ ང༌དང༌ ཅི༌ གོན༌ཨིན༌’ ཟེར༌ཏེ༌ ཚེར༌ཁ༌ མ༌ཅོ༌།
MAT 6:32 ཞན༌ ཆོས༌ལུག༌གི༌ མི༌གུན༌ ཏེ༌ ཚང༌མའེ༌ སྟིང༌རང༌ནེ༌ བང༌ཏང༌ང༌ནོག༌, ཡང༌ ཁྱོ༌ཞའེ༌ ནམ༌ཁའེ༌ ཡབ༌བི༌ ཁྱོ༌ཞའེ༌ ཏེ༌ཙོགས༌ སྒོས༌དོམ༌གུན༌ ཁྱེན༌ན༌ ཛད༌ད༌ནོག༌།
MAT 6:33 ཨིན༌ནའང༌ གོ༌མ༌ ཁྱོ༌ཞ༌གུན༌ དཀོན༌མཆོག༌གི༌ གྱལ༌སྲིད༌ དང༌ མི༌ཚེ༌ ཀྲང༌པོ༌ ཕུད༌ཅེས༌སི༌ སྟིང༌རང༌ནེ༌ བང༌ཏོང༌ཤིག༌, ཏེ༌ནེ༌ ཁོང༌ངི༌ ཏེ༌ཀ༌ ནན༌ཏེ༌ ཁྱོ༌ཞའེ༌ ཞན༌ སྒོས༌དོམ༌གུན༌ནའང༌ སལ༌ལ༌ ཛད༌ཨིན༌།”
MAT 6:34 “ཐོ༌རེ༌ ཕིའ༌ དི༌རིང༌ ཚེར༌ཁ༌ མ༌ཅོ༌ཤིག༌ ཅིའ༌ཟེར༌ན༌ ཐོ༌རེ༌ ཇུང༌ཅེས༌སི༌ ཚེར༌ཁ༌གུན༌ནི༌ སྐོར༌ལ༌ སམ༌བ༌ ཐོ༌རེ༌ ཏང༌ཉན༌ན༌ནོག༌། དི༌རིང༌ངི༌ ཚེར༌ཁ༌ དི༌རིང༌ངི༌ ཕིའ༌ ཙམ༌ ཐའ༌ཐད༌ཨིན༌ནོག༌།”
MAT 7:1 གཙོ༌བོ༌ ཡེ༌ཤུའི༌ མོལས༌, “ཁྱོ༌ཞའེ༌ ཞན༌མའ༌ སྐྱོན༌རྗོད༌ མ༌ཅོ༌ ཏེ༌ནེ༌ ཁྱོ༌ཞའང༌ སྐྱོན༌རྗོད༌ མི༌ཛད༌།
MAT 7:2 ཀ༌ཟུག༌ ཚུལ༌ལ༌ ཁྱོ༌ཞའེ༌ ཞན༌མ༌ སྐྱོན༌རྗོད༌ ཅོས༌ ཏེན༌ན༌ ཚུལ༌ལ༌ ཁྱོ༌ཞའང༌ སྐྱོན༌རྗོད༌ ཛད༌ཨིན༌, ཁྱོ༌ཞའེ༌ ཀོལ༌ཁན༌ནི༌ ཏབ༌ཟའ༌བོ༌ ཁྱོ༌ཞ༌གུན༌ནི༌ ཕིའང༌ ཀོལ༌ལ༌ ཛད༌ཨིན༌།”
MAT 7:3 “ཁྱོ༌ཞའེ༌ རང༌ངི༌ མིག༌གི༌ ནང༌ང༌ ཡོད༌ཁན༌ནི༌ རྡུང༌མ༌བོའ༌ ནང༌སྟག༌ ཅོའ༌ མེད༌ན༌ ཏེ༌ནེ༌ སྤུན༌ནི༌ མིག༌གི༌ སྣང༌ང༌ ཡོད༌ཁན༌ནི༌ ཤིང༌ཟེལ༌བོའ༌ ཅིའ༌ ལྟའད༌?
MAT 7:4 ཁྱོ༌རང༌ངི༌ སྤུན༌ལ༌, ངའེ༌ ཁྱོ༌རང༌ངི༌ མིག༌གི༌ ནང༌ནེ༌ ཤིང༌ཟེལ༌བོ༌ ཕིང༌ཨིན༌ ཟེར༌ཅེས༌སི༌ ཧམ༌པ༌ ཀ༌ཟུག༌གི༌ ཅོའད༌, ནམ༌ ཁྱོ༌རང༌ རང༌ངི༌ མིག༌གི༌ ནང༌ང༌ རྡུང༌མ༌བོ༌ ཡོད༌།
MAT 7:5 ཁྱོ༌ཞའ༌ ཁ༌ཆོས༌པ༌གུན༌, སྔུན༌ལ༌ རང༌ངི༌ མིག༌གི༌ རྡུང༌མ༌བོ༌ ཕིང༌, ཏེ༌ནེ༌ སྤུན༌ནི༌ མིག༌གི༌ ནང༌ནེ༌ ཤིང༌ཟེལ༌བོ༌ ཕིང༌ང༌ལ༌ ཁྱོ༌ཞའ༌ སལ༌པོ༌ ཅོས༌ཏེ༌ ཐོང༌ ཐུབ༌ཨིན༌།”
MAT 7:6 “ཏམ༌པ༌ ཨིན༌ཁན༌བོ༌ ཁྱི༌གུན༌ལ༌ མ༌ཏང༌ ཀལ༌ཏེས༌ ཏང༌ན༌ ཏེ༌གུན༌ ཁྱོ༌ཞ༌ ཆོགས༌ལ༌ གྱུར༌ཏེ༌ སྲན༌ཏྲེ༌ ཐམས༌ཨིན༌། མུ༌ཏིག༌ རིན༌ཅན༌ ཕག༌གུན༌ནི༌ དུན༌ལ༌ མ༌ཕང༌ ཀལ༌ཏེས༌ ཕང༌ན༌ ཕག༌གུན༌ནི༌ ཏེ༌བོ༌ རྐང༌པའེ༌ ཡོག༌ག༌ ནན༌ཏེ༌ གྲུལ༌ཨིན༌།”
MAT 7:7 གཙོ༌བོ༌ ཡེ༌ཤུའི༌ མོལས༌, “ཞུ༌ཨིན༌ དུག༌ ཁྱོ༌ཞའ༌ སལ༌ལ༌ ཛད༌ཨིན༌, ཙལ༌ཨིན༌ དུག༌ ཁྱོ༌ཞའ༌ ཐོབ༌ཅུག༌ག༌ ཛད༌ཨིན༌, སྒོ༌ རྡུང༌ཨིན༌ དུག༌ ཕེའ༌ ཛད༌ཨིན༌།
MAT 7:8 ཞུ༌ཁན༌ ཚང༌མ༌ལ༌ སལ༌ལ༌ ཛད༌ཨིན༌, ཙལ༌ཁན༌ ཚང༌མ༌ལ༌ ཐོབ༌ཨིན༌, ཡང༌ སྒོ༌ རྡུང༌ཁན༌ ཚང༌མ༌ལ༌ ཕེའ༌ ཛད༌ཨིན༌།
MAT 7:9 ཁྱོ༌ཞའ༌ སུ༌ཞིག༌གི༌, རང༌ངི༌ བུ༌ཚའེ༌ ཏ༌གི༌ ཏོང༌ ཟེར༌ན༌ རྡོའ༌ ཏང༌ཨིན༌ན༌?
MAT 7:10 ཡ༌ ཕྲུ༌གུའི༌ ཉ༌ ཏོང༌ ཟེར༌ན༌, རུལ༌ ཏང༌ཨིན༌ན༌?
MAT 7:11 ཁྱོ༌ཞ༌གུན༌ སྡིག༌ཅན༌ ཨིན༌ཨིན༌ནའང༌ རང༌ངི༌ ཕྲུ༌གུའ༌ ཕན༌ཐོགས༌ཅན༌ ཏང༌ཅེས༌པོ༌ ཤེས༌ན༌ ཏེ༌ནེ༌ ཁྱོ༌ཞའེ༌ ནམ༌ཁའ༌ ཞུགས༌ཁན༌ནི༌ ཡབ༌བི༌ ཁོང༌ང༌ ཞུ༌ཝ༌ ཞུ༌ཁན༌གུན༌ལ༌ མང༌ང༌ མི༌སལ༌ལ༌?”
MAT 7:12 “ཅི༌ཚང༌མའེ༌ ནང༌ང༌ ཀ༌ཟུག༌ ཞན༌མའེ༌ ཁྱོ༌ཞའ༌ ཅོ༌གོས༌ སམ༌ཁན༌ ཙོགས༌ ཁྱོ༌ཞ༌གུན༌ནིའང༌ ཞན༌མ༌གུན༌ལ༌ ཅོས༌, ཏེན༌ན༌བོའེ༌ བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ བྲིས༌ཁན༌གུན༌ གྲུབ༌ཏེ༌ ཨིན༌ནོག༌།”
MAT 7:13 “གྱས༌སྒོ༌ ཕྲ༌མོ༌ནེ༌ ཞུགས༌ཤིག༌ ཅིའ༌ཟེར༌ན༌ ཉལ༌ཝའེ༌ ཆོགས༌ལ༌ ཆའ༌ཁན༌ནི༌ གྱས༌སྒོ༌ ཞང༌ཅན༌ དང༌ ལམ༌ ནི༌ གྲུལ༌ཅེས༌ལ༌ ལ༌མོ༌ ཡོད༌ཏེ༌ ཨིན༌ནོག༌ ཡང༌ ཏེ༌ནང༌ང༌ མི༌ མང༌པོ༌ ཞུགས༌ཏེ༌ ཆའ༌ནོག༌།
MAT 7:14 ཨིན༌ནའང༌ ཐའ༌མེད༌པའེ༌ མི༌ཚེའེ༌ ཆོགས༌ལ༌ ཁྲིད༌ཁན༌ནི༌ གྱས༌སྒོ༌ ཕྲ༌མོ༌ ཡང༌ ལམ༌ ནི༌ ཀགས༌པོ༌ ཡོད༌ཏེ༌ ཨིན༌ནོག༌, ཙལ༌ཁན༌ནི༌ མི༌ ཉུ༌ངུན༌ཞིག༌ག༌ མ༌ནེ༌ ཏེ༌ ལམ༌བོ༌ མི༌ཐོབ༌།”
MAT 7:15 “ལུང༌སྟོན༌པ༌ ཟུས༌མ༌གུན༌ནི༌ ཀ༌ནེ༌ ཤང༌ ཅོ༌ཤིག༌, ནོད༌པ༌ མི༌སྐྱལ༌ཁན༌ནི༌ ལུ༌གུའ༌ ཟུས༌ཏེ༌ ཁོང༌གུན༌ ཁྱོ༌ཞའེ༌ ཕྲོའ༌ ཡོང༌ཨིན༌, ཨིན༌ནའང༌ སེམས༌སི༌ ནང༌ང༌ ཁོང༌གུན༌ ནོད༌སྐྱལ༌ ཇིགས༌ནང༌ཅན༌ནི༌ ཤང༌ཀུ༌ ཙོགས༌ ཡོད༌ཏེ༌ ཨིན༌ནོག༌།
MAT 7:16 ཁོང༌གུན༌ནི༌ བྲས༌བུ༌ གྱུད༌ཏེ༌ ཁྱོ༌ཞའེ༌ ཁོང༌གུན༌ ཤེས༌ཨིན༌། ཁྱོ༌ཞ༌གུན༌ནི༌ ཅི༌ སམ༌མ༌རག༌, ཁྱོ༌ཞའེ༌ ཚེར༌མང༌ངི༌ ཀ༌ནེ༌ རྒུན༌ནི༌ ཁ༌ཟས༌ ཡ༌ ལྗང༌ཙེར༌རི༌ ཀ༌ནེ༌ ཕིག༌གི༌ ཁ༌ཟས༌ ཏུ༌ཉན༌ཨིན༌ན༌?
MAT 7:17 ཏེན༌ན༌ ཙོགས༌ལ༌ ལྕང༌མ༌ ཟང༌པོ༌ཞིག༌ག༌ བྲས༌བུ༌ ཟང༌པོ༌ ཆགས༌ས༌ནོག༌ ཡང༌ ལྕང༌མ༌ ངན༌པ༌ཞིག༌ག༌ བྲས༌བུ༌ ངན༌པ༌།
MAT 7:18 ལྕང༌མ༌ ཟང༌པོའ༌ བྲས༌བུ༌ ངན༌པ༌ མི༌ཆགས༌ ཡང༌ ལྕང༌མ༌ ངན༌པའ༌ བྲས༌བུ༌ ཟང༌པོ༌ མི༌ཆགས༌།
MAT 7:19 བྲས༌བུ༌ ཟང༌པོ༌ མ༌སྨིན༌ཁན༌ནི༌ ལྕང༌མ༌, ཅད༌ཏེ༌ མེའ༌ ཏབ༌བ༌ ཛད༌ཨིན༌།
MAT 7:20 ཁོང༌གུན༌ནི༌ བྲས༌བུ༌ གྱུད༌ཏེ༌ ཁྱོ༌ཞའེ༌ ཁོང༌གུན༌ ཤེས༌ཨིན༌།”
MAT 7:21 “ངའ༌, ‘གཙོ༌བོ༌ལེ༌, གཙོ༌བོ༌ལེ༌,’ ཟེར༌ཁན༌གུན༌ནི༌ ནང༌ནེ༌ ཚང༌མ༌ ནམ༌ཁའེ༌ གྱལ༌སྲིད༌དི༌ ནང༌ང༌ ཆ༌ མི༌ཉན༌, ནམ༌ཁའ༌ ཞུགས༌ཁན༌ནི༌ ངའེ༌ ཡབ༌བི༌ ཐུག༌གོངས༌ གྲུབ༌ཅུག༌ཁན༌གུན༌ ཅིག༌པོ༌ ཆ༌ཉན༌ཨིན༌།
MAT 7:22 དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ མི༌ མང༌པོའེ༌ ངའ༌ ཟེར༌ཨིན༌, ‘གཙོ༌བོ༌ལེ༌, གཙོ༌བོ༌ལེ༌, ང༌ཞའེ༌ ཉེ༌རང༌ངི༌ ཚན༌ནི༌ ནང༌ང༌ ལུང༌སྟན༌ ཤད༌པིན༌, མི༌གུན༌ནི༌ ནང༌ནེ༌ རྡུད༌གུན༌ ཕིངས༌པིན༌, ཡང༌ ཧ༌ལས༌ཤེས༌སི༌ ཛད༌པ༌ མང༌པོ༌ སྟན༌པིན༌།’
MAT 7:23 ཏེ༌ནེ༌ ངའེ༌ ཁོང༌གུན༌ལ༌ ཟེར༌ཨིན༌, ‘ངའེ༌ ཁྱོ༌ཞའ༌ ཤེས༌ས༌མེད༌, ལས༌ ངན༌པ༌ ཅོ༌ཁན༌གུན༌ ངའེ༌ ཀ༌ནེ༌ ཐག༌རིང༌ང༌ སོང༌།’”
MAT 7:24 “ངའེ༌ སྤེ༌ར༌གུན༌ ཉན༌ཏེ༌ ཏེ༌ཀ༌ ལག༌ལེན༌ ཅོ༌ཁན༌ ཚང༌མ༌, ཁོ༌རང༌ངི༌ ཁང༌པ༌ བྲག༌གི༌ཀ༌ རྩིག༌ཁན༌ནི༌ རྩིག༌སྤོན༌ ཁས༌པ༌ ཙོགས༌ ཨིན༌།
MAT 7:25 ཆར༌པ༌ བབས༌ཏེ༌, ཆུ༌ལོག༌ དང༌ ལུངས༌པོ༌ ཤེད༌ཅན༌ ཡོང༌ཏེ༌ ཁང༌པའ༌ ཕོག༌ནའང༌, ཏེ༌བོ༌ རྡིབ༌ མི༌ རྡིབ༌ ཅིའ༌ཟེར༌ན༌ ཏེ༌བོ༌ བྲག༌གི༌ཀ༌ རྩིགས༌ཏེ༌ ཨིན༌ནོག༌།
MAT 7:26 ངའེ༌ ཟེར༌ཁན༌གུན༌ ཚོར༌ཏེ༌ ལག༌ལེན༌ མ༌ཅོ༌ཁན༌ ཚང༌མ༌, ཁོ༌རང༌ངི༌ ཁང༌པ༌ པེ༌མའེ༌ཀ༌ རྩིག༌ཁན༌ ལྡད༌པ༌ མེད༌ཁན༌ མི༌ ཙོགས༌ ཨིན༌།
MAT 7:27 ཆར༌པ༌ བབས༌ཏེ༌ ཆུ༌ལོག༌ དང༌ ལུངས༌པོ༌ ཤེད༌ཅན༌ ཡོངས༌ཏེ༌ ཁང༌པ༌ ཕོག༌ན༌ ཏེ༌བོ༌ རྡིབས༌ཏེ༌ པད༌ མེད༌ཁན༌ ཆེན༌།”
MAT 7:28 ཡེ༌ཤུའི༌ ཏེ༌ ཚང༌མ༌ མོལ༌ ཚར༌ར༌ཅིག༌, མི༌མངས༌གུན༌ ཁོང༌ངི༌ ལབ༌ཞ༌གུན༌ནི༌ཀ༌ ཧ༌ལས༌,
MAT 7:29 ཅིའ༌ཟེར༌ན༌ ཁོང༌ངི༌ ལབ༌ཞ༌གུན༌ ཆོས༌ཁྲིམས༌ལ༌ ཁས༌པ༌གུན༌ ཙོགས༌ མེད༌པ༌, ཝང༌ཆ༌ ཉམ༌པོ༌ སལ༌ལད༌པིན༌།
MAT 8:1 གཙོ༌བོ༌ ཡེ༌ཤུ༌ རི༌ནེ༌ ཡོག༌ག༌ བབས༌ཏེ༌ སྐྱོད༌ ཟ༌ནེ༌, མི༌ཚོགས༌ ཆེན༌མོ༌ཞིག༌ ཁོང༌ངི༌ སྟིང༌རང༌ནེ༌ ཡོངས༌།
MAT 8:2 ཛེ༌ནད༌ཅན༌ནི༌ མི༌ཞིག༌ གཙོ༌བོའེ༌ དུན༌ལ༌ ཡོངས༌ ཡང༌ པིག༌དོང༌ ཙུགས༌ཏེ༌ ཟེརས༌, “གཙོ༌བོ༌ལེ༌, ཉེ༌རང༌ ཐུགས༌ཐད༌ན༌ ང༌ གྱལ༌ཅུགས༌ཏེ༌ རྩང༌མ༌ ཛད༌ ཉན༌ན༌ནོག༌།”
MAT 8:3 ཡེ༌ཤུའི༌ ཆག༌ རྐྱངས༌ཏེ༌ ཁོའ༌ ཐུག༌ཅུག༌ག༌ ཛད༌ཏེ༌ མོལས༌, “ང༌ ཁྱོ༌རང༌ གྱལ༌ ཅུག༌ཏེ༌ རྩང༌མ༌ ཅོའ༌ ཐད༌ད༌རག༌”, ཏེན༌ན༌མལ༌ལ༌ ཛེ༌ནད༌པོ༌ མེད༌ཁན༌ སོང༌།
MAT 8:4 ཏེ༌ནེ༌ ཡེ༌ཤུའི༌ ཏེ༌ མི༌བོའ༌ མོལས༌, “སུའང༌ མ༌ཤད༌, ཨིན༌ནའང༌ སོང༌ཏེ༌ རང༌ངི༌ ཟུགས༌པོ༌ བླ༌མ༌ སྟོན༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ སལ༌ཁན༌ ནང༌ཞིན༌ དཀོན༌མཆོག༌ག༌ ཆོད༌པ༌ ཕུལ༌, ཏེ༌བོ༌ མི༌གུན༌ལ༌ ཁྱོ༌རང༌ རྩང༌མ༌ ཆའ༌ཁན༌ནི༌ སྤང༌པོ༌ ཨིན༌།”
MAT 8:5 གཙོ༌བོ༌ ཡེ༌ཤུ༌ ཀ༌ཕར༌ན༌ཧུམ༌མི༌ གྲོང༌ཁྱེར༌རི༌ ནང༌ང༌ ཅབ༌ ལེབ༌བ༌ཅིག༌, རོམ༌མི༌ མག༌མི༌གྱའེ༌ སྤོན༌བོ༌ཞིག༌ ཁོང༌ངི༌ དུན༌ལ༌ ཡོངས༌ཏེ༌ རོགས༌ ཛད༌ཅེས༌ལ༌ ཞུས༌,
MAT 8:6 “གཙོ༌བོ༌ལེ༌, ངའེ༌ ཡོག༌པོའ༌ ཟའ༌ཕོག༌ཏེ༌ ཁང༌པའ༌ ཟུ༌མོ༌ སྲན༌ཏྲེ༌ ཡོང༌ཨིན༌ ཡོད༌།”
MAT 8:7 ཡེ༌ཤུའི༌ མོལས༌, “ང༌ ཡོངས༌ཏེ༌ ཁོ༌ ཕན༌ཅུག༌ཨིན༌།”
MAT 8:8 མག༌མི༌གྱའེ༌ སྤོན༌བོའེ༌ ཟེརས༌, “གཙོ༌བོ༌ལེ༌, ཉེ༌རང༌ ངའེ༌ ཁང༌པ༌ སྐྱོད༌ཅེས༌སི༌ འོས༌པ༌ ངའ༌ མན༌། ཨིན༌ནའང༌ ཉེ༌རང༌ངི༌ བཀའ༌ སལ༌ན༌ ངའེ༌ ཡོག༌པོ༌ ཕན༌ཨིན༌།
MAT 8:9 ཝང༌ཆའེ༌ ཡོག༌ག༌ ངའང༌ དུག༌གད༌ ཡང༌ ངའེ༌ ཝང༌ཆའེ༌ ཡོག༌ག༌ མག༌མི༌གུན༌ ཡོད༌། ངའེ༌ ཅིག༌ག༌ ‘སོང༌’ ཟེར༌ན༌ ཆའ༌ནོག༌ ཡང༌ ཅིག༌ག༌ ‘ཡོང༌’ ཟེར༌ན༌ ཡོང༌ང༌ནོག༌, ཡང༌ ངའེ༌ ཡོག༌པོའ༌ ‘འི༌ ལས༌པོ༌ ཅོས༌’ ཟེར༌ན༌ ཅོའ༌ནོག༌།”
MAT 8:10 ཡེ༌ཤུའི༌ ཏེ༌བོ༌ སན༌ན༌ཅིག༌ ཧ༌ལས༌ཏེ༌ ཁོང༌ང༌ བྲངས༌ཏེ༌ ཡོང༌ཁན༌ནི༌ མི༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བའ༌ ཟེར༌རད༌, ཨིས༌ར༌ཨེལ༌ལི༌ ནང༌ང༌ ང༌ འི༌ཙོགས༌སི༌ ཏད༌པ༌ཅན༌ཞིག༌ མ༌ནེ༌ མ༌ཐོབ༌།
MAT 8:11 ངའེ༌ ཁྱོ༌ཞའ༌ ཟེར༌རད༌, ཡ༌ཧུ༌དཱ༌པ༌ མན༌ཁན༌ མང༌པོ༌ ཤར༌ དང༌ ནུབ༌ནེ༌ ཡོངས༌ཏེ༌, ནམ༌ཁའེ༌ གྱལ༌སྲིད༌དི༌ ནང༌ང༌ དོན༌ཏང༌ངི༌ ཕིའ༌ ང༌དང༌ངི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌, ཡ༌ཀོབ༌ ཉམ༌པོ༌ རང༌ངི༌ ནས༌སའེ༌ཀ༌ དུག༌ཨིན༌།
MAT 8:12 ཨིན༌ནའང༌ ཨིས༌ར༌ཨེལ༌པ༌ ཀ༌གུན༌ནི༌ ཕིའ༌ ནམ༌ཁའེ༌ གྱལ༌སྲིད༌པོ༌ གྲལ༌གྲིག༌ ཅོའ༌ ཛད༌ཏེ༌ ཨིན༌པིན༌ ཁོང༌གུན༌ ཕི༌ལོག༌ག༌ མུན༌གྲིག༌གི༌ ནང༌ང༌ ཕང༌ང༌ ཛད༌ཨིན༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།”
MAT 8:13 ཏེ༌ནེ༌ ཡེ༌ཤུའི༌ མག༌མི༌གྱའེ༌ སྤོན༌བོའ༌ མོལ༌ལ༌ ཛདས༌, “སོང༌, ཁྱོ༌རང༌ངི༌ ཏད༌པ༌ ཅོ༌ཁན༌ ནང༌ཞིན༌ ཁྱོ༌རང༌ངི༌ ཡོག༌པོ༌ གྱལ༌ཨིན༌།” ཡེ༌ཤུའི༌ མོལ༌ཁན༌ནི༌ ཏེན༌ན༌ ཏུས༌ཚོད༌པོའེ༌ཀ༌ ཡོག༌པོའེ༌ ཟུ༌མོ༌ གྱལས༌།
MAT 8:14 གཙོ༌བོ༌ ཡེ༌ཤུ༌ པི༌ཏྲར༌རི༌ ཁང༌པ༌ སྐྱོད༌ད༌ཅིག༌, ཁོང༌ངི༌ པི༌ཏྲར༌རི༌ ན༌མའེ༌ ཨ༌མ༌ ཚད༌ ཡོངས༌ཏེ༌ མལ༌ཙའེ༌ ནང༌ང༌ དུགས༌ཏེ༌ ཟིགས༌།
MAT 8:15 ཡེ༌ཤུའི༌ ཁོའེ༌ ལག༌པའ༌ ཆག༌ཐུག༌ག༌ ཛད༌ པ༌སང༌ ཚད༌པོ༌ མེད༌ཁན༌ སོང༌, ཁོ༌ ལངས༌ཏེ༌ ཁོང༌ང༌ ཞབས༌ཏོག༌ ཞུས༌།
MAT 8:16 ཏེན༌ན༌ ཕི༌ཏོག༌ མི༌གུན༌ནི༌ རྡུད༌ ཞུགས༌ཁན༌ མང༌པོ༌ ཁོང༌ ཡོད༌ས༌ ཁྲིད༌ཏེ༌ ཁྱོངས༌, ཁོང༌ངི༌ “བིང༌” མོལ༌ཏེ༌ བཀའ༌ སལ༌ པ༌སང༌ རྡུད༌གུན༌ བིངས༌ ཡང༌ ཟུ༌མོ༌ ཡོད༌ཁན༌ ཚང༌མ༌ ཕན༌ཅུག༌ག༌ ཛདས༌།
MAT 8:17 མ༌ཤི༌ཀའེ༌ སྐོར༌ལ༌ ལུང༌སྟོན༌པ༌ ཡེ༌ཤ༌ཡཱའེ༌ བྲིའ༌ ཛད༌ཁན༌བོ༌ དྲན༌དྲ༌ གྲུབ༌ཅེས༌ལ༌ ཡེ༌ཤུའི༌ ཏེ༌གུན༌ ཛདས༌། ཡེ༌ཤ༌ཡཱའེ༌ བྲིའ༌ ཛད༌ཁན༌བོ༌ ནི༌, “ཁོང༌ངི༌ ང༌དང༌ ནད༌ནེ༌ སྐྱོབ༌བ༌ ཛདས༌, ཡང༌ ཟུ༌མོ༌ནེ༌ ཕན༌ཅུག༌ག༌ ཛདས༌། ”
MAT 8:18 གཙོ༌བོ༌ ཡེ༌ཤུའི༌, ཁོང༌ང༌ སྐོར༌ཁན༌ནི༌ མི༌ཚོགས༌པོ༌ ཟིགས༌ས༌ཅིག༌, ཁོང༌རང༌ངི༌ ལོབ༌ཕྲུགས༌གུན༌ལ༌ ཚོའེ༌ ཕར༌ཀ༌ ཆ༌ཅེས༌ལ༌ བཀའ༌ སལ༌ལ༌ ཛདས༌།
MAT 8:19 ཆོས༌ཁྲིམས༌ལ༌ ཁས༌པ༌ཞིག༌ ཡོངས༌ཏེ༌ ཟེརས༌, “ལོབ༌བོན༌ལེ༌, ཉེ༌རང༌ ཀ༌རུ༌ སྐྱོད༌ནའང༌ ང༌ ཉེ༌རང༌ང༌ བྲངས༌ཏེ༌ ཡོང༌ཨིན༌།”
MAT 8:20 ཡེ༌ཤུའི༌ ལན༌སལས༌, “ཝ༌ཙེའི༌ ཝ༌ཚངས༌ དང༌, ནམ༌ཁའེ༌ ཅ༌ ཅ༌ཚངས༌ ཡོད༌ཏེ༌ ཨིན༌ནོག༌, ཨིན༌ནའང༌ ང༌ མི༌རིགས༌སི༌བུའ༌ གོ༌ བོར༌ཏེ༌ ངལ༌ཚོ༌ཅེས༌སི༌ ནས༌སའང༌ མེད༌།”
MAT 8:21 ཞན༌ ལོབ༌ཕྲུགས༌ཞིག༌གི༌ ཟེརས༌, “གཙོ༌བོ༌ལེ༌, སྔུན༌ལ༌ ང༌ ཁང༌པ༌ སོང༌ཏེ༌ ང༌རང༌ངི༌ ཨ༌བ༌ ཤི༌ཏེ༌ སུབ༌ཅེས༌སི༌ ཕིའ༌ གྲལ༌གྲིག༌ ཅོ༌ཅེས༌ལ༌ གོངས༌པ༌ སལ༌།”
MAT 8:22 ཡེ༌ཤུའི༌ མོལས༌, “ངའེ༌ སྟིང༌རང༌ནེ༌ བྲོངས༌, ཡང༌ སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ལ༌ ཁོ༌རང༌གུན༌ནི༌ ཤི༌ཁན༌གུན༌ སུབ༌ཅུག༌།”
MAT 8:23 ཏེ༌ནེ༌ གཙོ༌བོ༌ ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛདས༌ ཡང༌ ལོབ༌ཕྲུགས༌གུན༌ ཁོང༌ ཉམ༌པོ༌ སོང༌།
MAT 8:24 ཧུན༌མེད༌ལ༌ ནམ༌ཚུབས༌ཏེ༌ ཚོའེ༌ ནང༌ང༌ ལུང༌རག༌ ཀྲག༌པོ༌ ཡོང༌ཅེས༌པོའེ༌ ཆུལ༌བག༌ གྲུ༌ཟིང༌ངི༌ ནང༌ང༌ ལེབ༌ནའང༌, ཡེ༌ཤུ༌ ནལ༌ཟིམས༌ཏེ༌ ཡོད༌པིན༌།
MAT 8:25 ལོབ༌ཕྲུགས༌གུན༌ སོང༌ཏེ༌ ཡེ༌ཤུའ༌ ཉིད༌ཚད༌ད༌ ཛད༌ཏེ༌ ཟེརས༌, “གཙོ༌བོ༌ལེ༌, གཙོ༌བོ༌ལེ༌, ང༌ཞ༌གུན༌ ཆུའི༌ ནང༌ང༌ ནུབ༌ཏེ༌ ཤི༌ཅེས༌ དུག༌། སྐྱོབ༌བ༌ ཛད༌དའང༌།”
MAT 8:26 ཡེ༌ཤུའི༌ ལན༌སལས༌, “ཏད༌པ༌ ཆུ༌ངུན༌ཅན༌, ཅིའ༌ ཇིགས༌སད༌?” ཁོང༌ ཞངས༌ཏེ༌, ལུང༌རག༌ དང༌ ཆུལ༌བག༌ གུན༌ལ༌ ཁའ༌སྐྱེའ༌ ཛད༌པ༌ ཏེན༌ན༌མལ༌ལ༌ ཏེ༌གུན༌ མེད༌ཁན༌ སོང༌ཏེ༌ ཚོའེ༌ ནང༌ང༌ པད༌ ཞི༌དེ༌ ཇུང༌།
MAT 8:27 ཁོང༌གུན༌ ཧ༌ལས༌ཏེ༌ ཟེརས༌, “ཁོང༌ ཀ༌ཟུག༌ མི༌ཞིག༌ ཨིན༌ཧེ༌? ལུངས༌པོ༌ དང༌ ཆུལ༌བག༌ གུན༌ནིའང༌ ཁོང༌ངི༌ ཁའ༌ ཉན༌དུག༌།”
MAT 8:28 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཚོའེ༌ ཕར༌ཀ༌, ག༌ད༌རཱའེ༌ ཡུལ༌ཇོངས༌ལ༌ ལེབ༌བ༌ཅིག༌, སྤུར༌ཁང༌ངི༌ ནས༌ས༌ནེ༌ བིངས༌ཏེ༌ ཡོང༌ཨིན༌ ཡོད༌ཁན༌ རྡུད༌ ཞུགས༌ཁན༌ ཉིས༌ ཡེ༌ཤུའ༌ ཐུག༌། ཁོང༌གུན༌ མ༌ ནོད༌སྐྱལ༌ ཇིགས༌ནང༌ཅན༌ ཡོད༌ཅེས༌པོའེ༌ སུ༌ཞིག༌གའང༌ ཏེ༌ ལམ༌ནེ༌ ཆ༌ཐུབ༌བ༌ མེད༌པིན༌།
MAT 8:29 ཁོང༌གུན༌ནི༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌, “དཀོན༌མཆོག༌གི༌ སྲས༌ ཉེ༌རང༌ ང༌ཞའེ༌ ལས༌སི༌ ནང༌ང༌ ཅིའ༌ དྲེས༌སད༌? དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཁྲིམས༌ཅད༌དི༌ ཏུས༌པོའེ༌ སང༌ སྔུན༌ལ༌ ང༌ཞའ༌ ནགས༌ སྟན༌ན༌ལ༌ སྐྱོད༌པིན༌ན༌?”
MAT 8:30 ཁོང༌གུན༌ ཡོད༌སའེ༌ སང༌ ཙ༌པིག༌ ཐག༌རིང༌ང༌ ཕག༌གི༌ ཁྱུ༌ ཆེན༌མོ༌ཞིག༌ རྩཱ༌ ཟེན༌ ཡོད༌པིན༌།
MAT 8:31 རྡུད༌གུན༌ནི༌ ཡེ༌ཤུའ༌ ཇུ༌ཇུ༌ ཞུ༌ཨིན༌ ཟེརས༌, “ཀལ༌ཏེས༌ ཉེ༌རང༌ངི༌ ང༌ཞའ༌ ཁོང༌གུན༌ནི༌ ནང༌ནེ༌ ཕིང༌ན༌, ང༌ཞའ༌ འ༌ ཕག༌གུན༌ནི༌ ནང༌ང༌ ཆ༌ཅུག༌ག༌ ཛད༌།”
MAT 8:32 ཡེ༌ཤུའི༌ ཁོང༌གུན༌ལ༌ “སོང༌ཤིག༌” མོལ༌པ༌, ཏེ༌གུན༌ བིང༌ཏེ༌ ཕག༌གུན༌ནི༌ ནང༌ང༌ ཞུགས༌ས༌ཅིག༌, ཕག༌གི༌ ཁྱུ༌ གང༌པོ༌ རི༌ནེ༌ ཐུར༌ལ༌ ཚོའེ༌ ཆོགས༌ལ༌ གྱུགས༌པ༌ ཆུའི༌ ནང༌ང༌ ནུབ༌ཏེ༌ ཤི༌།
MAT 8:33 ཕག༌ཚོ༌ཁན༌གུན༌ གྲོང༌ཁྱེར༌ལ༌ བང༌ཏངས༌ཏེ༌ སོང༌, ཡང༌ རྡུད༌ ཞུགས༌ཁན༌ནི༌ མི༌གུན༌ལ༌ ཇུང༌ཁན༌ ཚང༌མ༌ ཤདས༌།
MAT 8:34 ཏེ༌ནེ༌ གྲོང༌ཁྱེར༌པ༌ ཚང༌མ༌ ཡེ༌ཤུ༌ ཇལ༌ལ༌ ཡོངས༌, ཡང༌ ཡེ༌ཤུ༌ ཇལ༌ལ༌ཅིག༌, ཁོང༌གུན༌ སྲན༌ཏྲེ༌ ཇིགས༌ པ༌སང༌ ཁོང༌ང༌, ཁོང༌གུན༌ནི༌ ཡུལ༌ནེ༌ བིང༌ཏེ༌ སྐྱོད༌ ཇུ༌ཇུ༌ ཟེརས༌།
MAT 9:1 གཙོ༌བོ༌ ཡེ༌ཤུ༌ གྲུ༌ཟིང༌ང༌ ཞོན༌ཏེ༌ ཚོའེ༌ ཕར༌ཀ༌ ཁོང༌རང༌ངི༌ གྲོང༌ཁྱེར༌ལ༌ སྐྱོད༌ད༌ ཛདས༌།
MAT 9:2 ཏེ༌རུ༌ མི༌ ཁ༌ཅིག༌གི༌ ཟའ༌ཕོག༌ཁན༌ཞིག༌ མལ༌ཙའེ༌ཀ༌ ཁུར༌ཏེ༌ ཡེ༌ཤུ༌ ཡོད༌ས༌ ཁྱོངས༌། ཁོང༌གུན༌ནི༌ མི༌བོ༌ གྱལ༌ཅུག༌ཅེས༌སི༌ ཏད༌པ༌ ཅོ༌ཁན༌བོ༌ ཡེ༌ཤུའི༌ ཟིགས༌ཏེ༌ ཁོང༌ངི༌ ཟའ༌ཕོག༌ཁན༌བོའ༌ མོལས༌, “བུ༌ཚ༌ སེམས༌དེ༌ ཅོས༌, ངའེ༌ ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏང༌ངད༌།”
MAT 9:3 ཏེ༌བོ༌ ཚོར༌ར༌ཅིག༌ ཆོས༌ཁྲིམས༌ལ༌ ཁས༌པ༌ ཁ༌ཅིག༌གི༌ སེམས༌སི༌ ནང༌ང༌ སམས༌, “འི༌ མི༌བོའེ༌ དད༌ལོག༌ ཅོས༌།”
MAT 9:4 ཁོང༌གུན༌ནི༌ སམ༌ཁན༌བོ༌ ཡེ༌ཤུའི༌ ཁྱེན༌ཏེ༌ མོལས༌, “ཁྱོ༌ཞའེ༌ ཁྱོ༌ཞ༌རང༌ངི༌ སེམས༌སི༌ ནང༌ང༌ སེམས༌ངན༌ ཅིའ༌ སམ༌མད༌།
MAT 9:5 ཅི༌ སམ༌མ༌རག༌, ‘ཁྱོ༌རང༌ངི༌ སྡིག༌པའ༌ ཤགས༌པ༌ ཏངས༌ཏེ༌ ཨིན༌’ ཟེར༌ཅེས༌པོ༌ ལ༌མོ༌ ཨིན༌ནོག༌ག༌ ཡ༌ ‘ལངས༌ཏེ༌ གྲུལ༌’ ཟེར༌ཅེས༌པོ༌?
MAT 9:6 ཨིན༌ནའང༌ མི༌རིགས༌སི༌བུའ༌ ཇིག༌རྟེན༌ནི༌ཀ༌ སྡིག༌པའ༌ ཤགས༌པ༌ ཏང༌ཅེས༌སི༌ ཝང༌ཆའ༌ ཡོད༌ཁན༌བོ༌ ཁྱོ༌ཞའ༌ སྟན༌ཨིན༌” ཏེ༌ནེ༌ ཡེ༌ཤུའི༌ ཟའ༌ཕོག༌ཁན༌བོའ༌ མོལས༌, “ལོངས༌, རང༌ངི༌ མལ༌ཙ༌ ཁུར༌ཏེ༌ ཁང༌པ༌ སོང༌།”
MAT 9:7 ཁོ༌ ལངས༌ ཡང༌ ཁང༌པའ༌ སོང༌།
MAT 9:8 མི༌ཚོགས༌སི༌ ཏེ༌བོ༌ ཐོང༌ང༌ཅིག༌, རྩི༌ཝ༌ དང༌ ཇིགས༌སི༌ ནང༌ང༌, མིའ༌ འི༌ཙོགས༌སི༌ ཝང༌ཆའ༌ སལ༌ལ༌ ཛད༌ཅེས༌ལ༌ དཀོན༌མཆོག༌ག༌ སྟོད༌པ༌ ཕུལས༌།
MAT 9:9 གཙོ༌བོ༌ ཡེ༌ཤུ༌ ཏེ༌ཀ༌ནེ༌ སྐྱོད༌ཨིན༌ ཡོད༌ ཟ༌ནེ༌, མད༌ཐཱ༌ ཁྲལ༌ནེན༌སའེ༌ ནས༌སའེ༌ཀ༌ དུགས༌ཏེ༌ ཡོད༌ད༌ ཟིགས༌ ཡང༌ ཁོང༌ངི༌ ཁོའ༌ མོལས༌, “ངའེ༌ སྟིང༌རང༌ནེ༌ བྲོངས༌།” ཁོ༌ ལངས༌ཏེ༌ ཡེ༌ཤུའི༌ སྟིང༌རང༌ནེ༌ བྲངས༌།
MAT 9:10 སྟིང༌ནེ༌ ཡེ༌ཤུ༌ མད༌ཐཱའེ༌ ཁང༌པ༌ གོང༌ཟན༌ དོན༌ན༌ལ༌ སྐྱོད༌ཏེ༌ ཡོད༌ཏུས༌, ཁྲལ༌ལེན༌ཁན༌ དང༌ ཞན༌ སྡིག༌ཅན༌ མི༌ མང༌པོའང༌ ཡེ༌ཤུ༌ དང༌ ལོབ༌ཕྲུགས༌གུན༌ ཉམ༌པོ༌ ཁར༌ཇི༌ ཟའ༌ལ༌ ཡོངས༌ཏེ༌ ཡོད༌པིན༌།
MAT 9:11 ཕ༌རུ༌ཤི༌པ༌གུན༌ནི༌ ཏེ༌བོ༌ ཐོང༌ང༌ཅིག༌, ཁོང༌གུན༌ནི༌ ཡེ༌ཤུའི༌ ལོབ༌ཕྲུགས༌གུན༌ལ༌ ཏྲིས༌, “ཁྱོ༌ཞའེ༌ ལོབ༌བོན༌, ཁྲལ༌ལེན༌ཁན༌ དང༌ སྡིག༌ཅན༌ མི༌གུན༌ ཉམ༌པོ༌ ཅིའ༌ དོན༌ཏང༌ དོན༌ན༌ནོག༌?”
MAT 9:12 ཡེ༌ཤུའི༌ ཏེ༌བོ༌ སན༌ན༌ཅིག༌, ཁོང༌ངི༌ མོལས༌, “ཟུ༌མོ༌ ཡོང༌ཁན༌ཞིག༌ག༌ མ༌ནེ༌ ཁམ༌ཟང༌ མི༌ཞིག༌ག༌ ཨམ༌ཆི༌ གོས༌ས༌ མ༌ནོག༌།
MAT 9:13 སོང༌ ཡང༌ དཀོན༌མཆོག༌གི༌, ‘ཆོད༌པ༌ ཕུལ༌ཅེས༌ མན༌པ༌, ཅིག༌ དང༌ ཅིག༌ག༌ སྙིང༌རྗེ༌ སྟན༌ཅེས༌པོ༌ ངའེ༌ དོད༌པ༌ ཨིན༌ ’ མོལ༌ཁན༌ནི༌ ཏོན༌བོ༌ ཅི༌ ཨིན༌ ཧ༌གོ༌ཅེས༌སི༌ རྩོན༌གྲུས༌ ཅོས༌། ཁྱོ༌ཞ༌ ཀྲང༌པོ༌ ཨིན༌ སམ༌ཁན༌གུན༌ལ༌ མན༌པ༌, སྡིག༌ཅན༌གུན༌ལ༌ བོད༌ད༌ ངའ༌ ཡོངས༌པིན༌།”
MAT 9:14 ཏེ༌ནེ༌ ཡོ༌ཧཱ༌ནན༌ནི༌ ལོབ༌ཕྲུགས༌གུན༌ གཙོ༌བོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཁོང༌ང༌ ཏྲིས༌, “ང༌ཞའ༌ དང༌ ཕ༌རུ༌ཤི༌པ༌གུན༌ ཉེ༌ནས༌ལ༌ ལན༌ མང༌པོ༌ དུག༌གད༌, ཨིན༌ནའང༌ ཉེ༌རང༌ངི༌ ལོབ༌ཕྲུགས༌གུན༌ ཅིའ༌ ཉེ༌ནས༌ལ༌ དུག༌ག༌ མ༌ནོག༌?”
MAT 9:15 ཡེ༌ཤུའི༌ ལན༌སལས༌, “བག༌སྟོན༌ནི༌ ནང༌ང༌ མག༌པ༌ ཉམ༌པོ༌ ཡོད༌ ཟ༌ནེ༌ ཁོའེ༌ གྲོན༌པོ༌གུན༌ནི༌ རྡུག༌པོ༌ ཅོ༌ཨིན༌ན༌? མི༌ཅོ༌། ཏུས༌པོ༌ ལེབ༌ཨིན༌ ནམ༌ མག༌པ༌ གྲོན༌པོ༌གུན༌ནེ༌ ཕེས༌ཏེ༌ ཁྱེར༌ཨིན༌, ཏེ༌ནེ༌ ཁོང༌གུན༌ནི༌ རྡུག༌པོ༌ ཅོས༌ཏེ༌ ཉེ༌ནས༌ལ༌ དུག༌ཨིན༌།”
MAT 9:16 “སུ༌ཞིག༌གིའང༌ ཀོས༌ལག༌ སྙིང༌པ༌ཞིག༌ག༌ ལྷན༌བ༌ སོ༌མ༌ ཏབ༌བ༌ མ༌ནོག༌, ཀལ༌ཏེས༌ ཏབ༌ན༌ ཀོས༌ ཁྲུའ༌ཅིག༌ ལྷན༌བ༌ སོ༌མ༌བོ༌ ཁོངས༌ཏེ༌ ཀོས༌ ཆད༌ཁན༌བོ༌ མང༌ང༌ ཐུའ༌ ཅོའ༌ནོག༌།”
MAT 9:17 “ཏེན༌ན༌ ཙོགས༌ལ༌ ཆང༌ སོ༌མ༌ པགས༌པའེ༌ སྐྱ༌པ༌ སྙིང༌པའེ༌ ནང༌ང༌ མི༌ལུག༌། ཀལ༌ཏེས༌ ལུག༌ན༌ ཆང༌བོའ༌ སྐྱུར༌ ལངས༌ཏེ༌ པགས༌པའེ༌ སྐྱ༌པ༌ བོས༌ཏེ༌ ཆད༌ཨིན༌, ཆང༌ བོ༌ཏེ༌ སྐྱ༌པའང༌ དོད༌མེད༌ ཆེན༌། ཨིན༌ནའང༌ ཆང༌ སོ༌མ༌ པགས༌པའེ༌ སྐྱ༌པ༌ སོ༌མའེ༌ ནང༌ང༌ ལུག༌ན༌ ཆང༌ དང༌ པགས༌པ༌ ཉིས༌ཀོ༌ སྐྱོབ༌ཨིན༌།”
MAT 9:18 གཙོ༌བོ༌ ཡེ༌ཤུའི༌ ཏེ༌གུན༌ མོལ༌ཨིན༌ ཡོད༌ཏུས༌, ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌ཞིག༌ ཡོངས༌ཏེ༌ པིག༌དོང༌ ཙུགས༌ཏེ༌ ཁོང༌ང༌ ཟེརས༌, “ངའེ༌ བུ༌མོ༌ དག༌ས༌རང༌ ཤི༌, ཨིན༌ནའང༌ ཉེ༌རང༌ སྐྱོད༌ཏེ༌ ཉེ༌རང༌ངི༌ ཆག༌ ཁོའེ༌ཀ༌ བོར༌ར༌ ཛད༌ན༌, ཁོ༌ སོན༌ཨིན༌།”
MAT 9:19 ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཞངས༌ཏེ༌ འུ༌སྐྱོང༌ ཉམ༌པོ༌ སྐྱོད༌ད༌ ཛདས༌།
MAT 9:20 ཏེན༌ན༌ ཏུས༌ལ༌ བུད༌ཁན༌ནི༌ ལོ༌ རྕུག༌ཉིས༌ནེ༌ ཕར༌ལ༌ ཏུས༌གྱུན༌ ཟུགས༌པོ༌ ཞིག༌ཅེས༌སི༌ ཟུ༌མོ༌ ཡོད༌ཁན༌ནི༌ བུ༌མོ༌ཞིག༌ ཡེ༌ཤུའི༌ གྱབ༌ནེ༌ ཡོངས༌ཏེ༌ ཁོང༌ངི༌ ནམ༌ཟའེ༌ གྲུ༌ཞིག༌ག༌ ལག༌པ༌ ཏུགས༌།
MAT 9:21 ཁོའེ༌ ཁོ༌རང༌ངི༌ སེམས༌སི༌ ནང༌ང༌ སམ༌, “ཀལ༌ཏེས༌ ཁོང༌ངི༌ ནམ༌ཟའ༌ ལག༌པ༌ ཐུག༌ན༌ ངའེ༌ ཟུ༌མོ༌ གྱལ༌ལ༌ནོག༌།”
MAT 9:22 ཡེ༌ཤུའི༌ གྱབ༌ལོག༌ག༌ ཟིགས༌ཏེ༌ བུ༌མོའ༌ མོལས༌, “བུ༌མོ༌, སེམས༌ཏེ༌ ཅོས༌། ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌”, ཏེན༌ན༌མལ༌ལ༌ ཁོའེ༌ ཟུ༌མོ༌ གྱལ༌།
MAT 9:23 ཡེ༌ཤུ༌ འུ༌སྐྱོང༌ངི༌ ཁང༌པའེ༌ ནང༌ང༌ སྐྱོད༌ད༌ཅིག༌ ལིང༌བུ༌ ཕུ༌ཁན༌གུན༌ནི༌ ཉ༌ངན༌ནི༌ ཉགས༌ ཕུ༌ཨིན༌ ཡང༌ མི༌གུན༌ ཀུ༌ཅོ༌ ཏང༌ཨིན༌ ངུ༌ཨིན༌ ཟིགས༌།
MAT 9:24 ཡེ༌ཤུའི༌ ཁོང༌གུན༌ལ༌ མོལས༌, “བིང༌ཏེ༌ སོང༌, བུ༌མོ༌བོ༌ མ༌ཤིའ༌ ཉིད༌ལོགས༌ཏེ༌ ཨིན༌”, ཨིན༌ནའང༌ ཁོང༌གུན༌ནི༌ ཁྲེལ༌གོད༌ ཏངས༌།
MAT 9:25 ཁོང༌གུན༌ ཕི༌ལོག༌ག༌ ཕིངས༌ཏེ༌ སྟིང༌ནེ༌ ཡེ༌ཤུ༌ བུ༌མོ༌ ཡོད༌སའེ༌ ནང༌ང༌ སྐྱོད༌ཏེ༌, ཁོའེ༌ ལག༌པའ༌ ཐམས༌ས༌ཅིག༌, བུ༌མོའ༌ སྲོག༌ ལོགས༌ཏེ༌ ཐོབ༌ ཡང༌ ཀོའག༌ ལངས༌།
MAT 9:26 ཡང༌ ཏེ༌ ནས༌ཚུལ༌བོ༌ ཡུལ༌ གང༌པོའེ༌ ནང༌ང༌ ཕེལ༌།
MAT 9:27 བུ༌མོའེ༌ ཁང༌པ༌ནེ༌ གཙོ༌བོ༌ ཡེ༌ཤུ༌ བིང༌ཏེ༌ སྐྱོད༌ ཟ༌ནེ༌, ཞ༌ར༌ ཉིས༌ ཁོང༌ངི༌ སྟིང༌རང༌ནེ༌ ཡོངས༌ཏེ༌ ཀུ༌ཅོ༌ ཏང༌ཨིན༌ ཟེརས༌, “གྱལ༌པོ༌ དཱ༌བིད༌དི༌ པུར༌གྱུད༌ ང༌ཞའེ༌ཀ༌ སྙིང༌རྗེ༌ ཛད༌།”
MAT 9:28 ཡེ༌ཤུ༌ ཁང༌པའེ༌ ནང༌ང༌ སྐྱོད༌ད༌ཅིག༌, ཞ༌ར༌ ཉིས༌ཀོ༌ ཁོང༌ ཡོད༌ས༌ ཡོངས༌། ཁོང༌ངི༌ མོལས༌, “ངའེ༌ ཁྱོ༌ཞའ༌ ཕན༌ཅུག༌ ཉན༌ཨིན༌ སམ༌ཏེ༌ ཨིད༌ཤེས༌ ཅོའད༌ད༌?” ཁོང༌ ཉིས༌ཀོའེ༌ ཟེརས༌, “ང༌ཞའེ༌ ཨིད༌ཤེས༌ ཅོའད༌།”
MAT 9:29 ཏེ༌ནེ༌ ཡེ༌ཤུའི༌ ཁོང༌གུན༌ནི༌ མིག༌གི༌ཀ༌ ཆག༌ རྩེའ༌ ཛད༌ཏེ༌ མོལས༌, “ཁྱོ༌ཞའ༌ ཨིད༌ཤེས༌ ཡོད༌ཁན༌ ནང༌ཞིན༌ གྲུབ༌ཤིག༌།”
MAT 9:30 ཁོང༌གུན༌ནི༌ མིག༌ གྱལ༌ཏེ༌ ཐོང༌ཐུབ༌ ཡང༌ ཡེ༌ཤུའི༌ ཁོང༌གུན༌ལ༌, “འི༌བོའེ༌ སྐོར༌ལ༌ སུའང༌ མ༌ཤད༌” མོལ༌ཏེ༌ སྤང༌ པུད༌ད༌ ཛདས༌།
MAT 9:31 ཨིན༌ནའང༌ ཁོང༌གུན༌ ཕི༌ལོག༌ག༌ སོང༌ཏེ༌ ཡུལ༌ཇོངས༌ གང༌པོའེ༌ ནང༌ང༌ ཡེ༌ཤུའི༌ ཁོང༌གུན༌ལ༌ ཛད༌ཁན༌ནི༌ ནས༌ཚུལ༌བོ༌ ཕེལ༌ཅུགས༌།
MAT 9:32 ཁོང༌ ཉིས༌ཀོ༌ ཆའ༌ ཚར༌ར༌ཅིག༌, རྡུད༌ ཞུགས༌ཁན༌ ཧན༌གྲང༌ཞིག༌ ཡེ༌ཤུ༌ ཡོད༌ས༌ ཁྱོངས༌,
MAT 9:33 ཡང༌ རྡུད༌པོ༌ ཕིང༌ང༌ཅིག༌, ཧན༌གྲང༌བོའེ༌ སྤེ༌ར༌ ཏངས༌། མི༌ཚོགས༌ ཧ༌ལས༌ཏེ༌ ཟེརས༌, “ཨིས༌ར༌ཨེལ༌ལི༌ ནང༌ང༌ འི༌ཙོག༌ཤིག༌ མ༌ནེ༌ མ༌ཐོང༌།”
MAT 9:34 ཨིན༌ནའང༌ ཕ༌རུ༌ཤི༌པ༌གུན༌ནི༌ ཟེརས༌, “རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།”
MAT 9:35 གཙོ༌བོ༌ ཡེ༌ཤུ༌ གྲོང༌ཁྱེར༌ དང༌ གམ༌ཡུལ༌ ཚང༌མ༌ལ༌ སྐྱོད༌ཏེ༌, དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ཨིན༌ ནམ༌ཁའེ༌ གྱལ༌སྲིད༌དི༌ གའ༌མོའེ༌ ནས༌ཚུལ༌བོ༌ ཤད༌ད༌ ཛདས༌, ཡང༌ ཟུ༌མོ༌ དང༌ ནད༌ ཚང༌མ༌ ཕན༌ཅུག༌ག༌ ཛདས༌།
MAT 9:36 ཁོང༌ངི༌ མི༌ཚོགས༌པོ༌ ཟིགས༌ས༌ཅིག༌, ཁོང༌གུན༌ནི༌ཀ༌ སྙིང༌རྗེ༌ སྐྱེས༌ ཅིའ༌ཟེར༌ན༌ ཁོང༌གུན༌ ནགས༌ ཐོང༌ཁན༌ ཡང༌ རོགས༌ མ༌ཐོབ༌ཁན༌, ལུག༌རྫི༌ མེད༌ཁན༌ནི༌ ལུག༌ ཙོགས༌ ཡོད༌པིན༌།
MAT 9:37 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “སྟོན༌ཐོག༌ མང༌པོ༌ཞིག༌ རྔ༌ ཆོག༌ཆོག༌ དུག༌, ཨིན༌ནའང༌ སྟོན༌ཐོག༌ རྔ༌ཁན༌ནི༌ ལས༌མི༌ མ༌ ཉུ༌ངུན༌ཞིག༌ མ༌ནེ༌ མི༌དུག༌།
MAT 9:38 ཏེ༌བོའེ༌ཕིའ༌ སྟོན༌ཐོག༌གི༌ དག༌པོ༌ དཀོན༌མཆོག༌ག༌ སྟོན༌ཐོག༌ རྔ༌ཁན༌ནི༌ ལས༌མི༌ མང༌ང༌ ཀལ༌ལ༌ ཛད༌ཅེས༌ལ༌ ཞུ༌ཝ༌ ཕུལ༌།”
MAT 10:1 གཙོ༌བོ༌ ཡེ༌ཤུའི༌ ལོབ༌ཕྲུགས༌ རྕུག༌ཉིས༌པོའ༌ བོད༌ད༌ ཛད༌ཏེ༌, ཁོང༌གུན༌ལ༌ རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌ ཕིང༌ཅེས༌ དང༌ ནད༌ དང༌ ཟུ༌མོའེ༌ རིགས༌ ཚང༌མ༌ གྱལ༌ཅུག༌ཅེས༌སི༌ ཝང༌ཆ༌ སལ༌ལ༌ ཛདས༌།
MAT 10:2 སྐུ༌ཚབས༌ རྕུག༌ཉིས༌སི༌ མིང༌གུན༌, ཏང༌པོ༌ ཤི༌མོན༌ ༼ཀ༌བོའ༌ པི༌ཏྲར༌རའང༌ ཟེར༌རད༌༽, ཡང༌ ཁོའེ༌ ནོ༌ ཨེན༌གྲིའུ༌, ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཁོའེ༌ ནོ༌ ཡོ༌ཧཱ༌ནན༌,
MAT 10:3 ཕི༌ལིབ༌, བར༌ཐོལ༌མཱ༌, ཐོ༌མཱས༌, ཁྲལ༌ལེན༌ཁན༌ མད༌ཐཱ༌, ཨལ༌ཕི༌འུས༌སི༌ བུ༌ཚ༌ ཡ༌ཀོབ༌, ཐད༌དཱ༌འུས༌,
MAT 10:4 ཤི༌མོན༌ ༼ཡུལ༌དད༌ཅན༌༽ དང༌ ཡུ༌དཱ༌ ཀར༌ཡོད༌པ༌, ཁོའེ༌ ཡེ༌ཤུའ༌ སྟིང༌ནེ༌ ངོ༌ལོག༌ ཅོས༌།
MAT 10:5 གཙོ༌བོ༌ ཡེ༌ཤུའི༌ སྐུ༌ཚབས༌ རྕུག༌ཉིས༌པོའ༌ འི༌ ལབ༌ཞ༌གུན༌ སལ༌ལ༌ ཛད༌ཏེ༌ ལམ༌ཅུག༌ག༌ ཛདས༌, “ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ མ༌ཆའ༌ ཡ༌ ས༌མར༌རི༌ཡཱའེ༌ གྲོང༌ཁྱེར༌གུན༌ནི༌ ནང༌ང༌ མ༌ཞུགས༌,
MAT 10:6 དཀོན༌མཆོག༌གི༌ སྟོར༌ཁན༌ནི༌ ལུག༌, ཨིས༌ར༌ཨེལ༌པ༌གུན༌ནི༌ཀ༌ སོང༌།
MAT 10:7 ཁྱོ༌ཞ༌ ཆའ༌ ཟ༌ནེ༌ ‘ནམ༌ཁའེ༌ གྱལ༌སྲིད༌ ཉེ༌མོའ༌ དུག༌’ ཟེར༌ཨིན༌ ལོན༌ ཟང༌པོ༌བོ༌ ཤོད༌།
MAT 10:8 ཡང༌ ནད༌པ༌གུན༌ གྱལ༌ཅུག༌, ཤི༌ཁན༌གུན༌ སོན༌ཅུག༌, ཛེ༌ནད༌ ཡོང༌ཁན༌གུན༌ གྱལ༌ཅུགས༌ཏེ༌ རྩང༌མ༌ ཅོས༌, རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌གུན༌ ཕིང༌། ཏེ༌ ཝང༌ཆ༌ ཁྱོ༌ཞ༌གུན༌ལ༌ ཆོན༌ལ༌ ཐོབས༌ཏེ༌ ཨིན༌ པ༌སང༌ ལས༌གུན༌ ཆོན༌ལ༌ ཅོས༌།
MAT 10:9 བེས༌ལ༌ ཆ༌ ཟ༌ནེ༌ ཁོ༌མགས༌སི༌ ནང༌ང༌ སེར༌ ཡ༌ མུལ༌ ཡ༌ ར༌གན༌ནི༌ པེ༌ནེ༌,
MAT 10:10 ཡ༌ ཇོ༌ལ༌ ཡ༌ ཀོས༌ལག༌ ཐེ༌བ༌ ཡ༌ པ༌བུ༌ ཡ༌ གྲུལ༌ཅེས༌སི༌ ཕིའ༌ བེར༌ཀ༌ མ༌ཁུར༌ ཅིའ༌ཟེར༌ན༌ ལས༌ ཅོ༌ཁན༌གུན༌ལ༌ སྒོས༌དོམ༌གུན༌ ཐོབ༌ཅེས༌ འོས༌པ༌ ཨིན༌ནོག༌།”
MAT 10:11 “གྲོང༌ཁྱེར༌ དང༌ གམ༌ཡུལ༌ ཀ༌རུ༌ ལེབ༌ནའང༌, ཐད༌པོ༌ ཉམ༌པོ༌ གའ༌སུས༌ ཞུ༌ཁན༌ཞིག༌ ཙལ༌ཏེ༌ ཏེ༌ གྲོང༌ཁྱེར༌ནེ༌ ཆ༌ཆ༌ ཚག༌པ༌ ཁོའེ༌ ཁང༌པའེ༌ ནང༌ང༌ དུག༌།
MAT 10:12 ཏེ༌ ཁང༌པའེ༌ ནང༌ང༌ ཞུགས༌ ཟ༌ནེ༌ དཀོན༌མཆོག༌ག༌ ཁོང༌གུན༌ལ༌ ཞི༌དེ༌ ཅིན༌ལབས༌ སལ༌ཅེས༌ལ༌ ཞུས༌།
MAT 10:13 ཀལ༌ཏེས༌ ཁོང༌གུན༌ ཏེ༌བོའེ༌ འོས༌པ༌ ཡོད༌ན༌ དཀོན༌མཆོག༌གི༌ ཞི༌དེ༌ སལ༌ལ༌ ཛད༌ཨིན༌, ཨིན༌ནའང༌ འོས༌པ༌ མེད༌ན༌ ཏེ༌ ཞི༌དེ༌བོ༌ ཁྱོ༌ཞའ༌ ལོགས༌ཏེ༌ ལེབ༌ཨིན༌།
MAT 10:14 ཀལ༌ཏེས༌ ཁང༌པ༌ ཡ༌ གྲོང༌ཁྱེར༌ཞིག༌གི༌ ནང༌ང༌ སུ༌ཞིག༌གིའང༌ ཁྱོ༌ཞའ༌ གའ༌སུས༌ མ༌ཅོ༌ན༌ ཡ༌ ཁྱོ༌ཞའེ༌ ཟེར༌ཁན༌བོའ༌ མ༌ཉན༌ན༌, ཏེ༌ གྲོང༌ཁྱེར༌ ཡ༌ ཁང༌པ༌ནེ༌ བིང༌ ཟ༌ནེ༌ རང༌ངི༌ པ༌བུའི༌ ཐལ༌བ༌ སྲུག༌།
MAT 10:15 ངའེ༌ ཁྱོ༌ཞའ༌ དེན༌བ༌ ཟེར༌རད༌ དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌, སོ༌དོམ༌ དང༌ ག༌མོ༌ར༌ གྲོང༌ཁྱེར༌རི༌ མི༌ངན༌པ༌གུན༌ནི༌ སང༌ ཏེ༌ གྲོང༌ཁྱེར༌རི༌ མི༌གུན༌ལ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌།”
MAT 10:16 གཙོ༌བོ༌ ཡེ༌ཤུའི༌ མོལས༌, “ངའེ༌ ཁྱོ༌ཞའ༌ ཤང༌ཀུའི༌ ཕྲོའ༌ ལུག༌ ཙོགས༌ལ༌ ལམ༌ཅུག༌གད༌། ཏེ༌བོའེ༌ཕིའ༌ རུལ༌ ཙོགས༌ ཁས༌པ༌ དང༌ ནོད༌པ༌ མ༌ཏང༌ཁན༌ ཕུར༌གོན༌ ཙོགས༌ གྱུར༌།
MAT 10:17 མི༌གུན༌ནི༌ ཀ༌ནེ༌ ཤང༌ ཅོས༌ཏེ༌ དུག༌, ཅིའ༌ཟེར༌ན༌ ཁྱོ༌ཞའ༌ ཏེན༌ན༌ ཡུལ༌ལི༌ ཝང༌སྲུལ༌པ༌གུན༌ནི༌ ལག༌ག༌ སྟད༌ཏེ༌ དུ༌ཁང༌གུན༌ནི༌ ནང༌ང༌ ཁྱོ༌ཞའ༌ རྟལ༌ལྕག༌ གྱབ༌ཅུག༌ཨིན༌།
MAT 10:18 ངའེ༌ཀ༌ ཏད༌པ༌ ཡོད༌ཅེས༌པོའེ༌ ཁྲིམས༌ཅད༌ད༌ལ༌ ཀའ༌ལོན༌ དང༌ གྱལ༌པོ༌ གུན༌ནི༌ཀ༌ ཁྱོ༌ཞའ༌ ཁྱེར༌ཨིན༌། ཏེ༌ཏུས༌ ཁྱོ༌ཞའ༌ ངའ༌ སུ༌ ཨིན༌ཁན༌བོའེ༌ སྤང༌པོ༌ ཝང༌སྲུལ༌པ༌ དང༌ ཏད༌པ༌ མེད༌ཁན༌ གུན༌ལ༌ ཏང༌ཅེས༌སི༌ སྐབས༌ ཐོབ༌ཨིན༌།
MAT 10:19 ཁོང༌གུན༌ནི༌ ཁྱོ༌ཞ༌ ཝང༌སྲུལ༌པའེ༌ ལག༌ག༌ སྟད༌ད༌ཅིག༌, ཅི༌ ཟེར༌ཨིན༌ ཡ༌ ཀ༌ཟུག༌གི༌ ཟེར༌ཨིན༌ སམ༌ཏེ༌ ཚེར༌ མ༌ཚེར༌, ཅིའ༌ཟེར༌ན༌ ཏེན༌ན༌ ཏུས༌ལ༌ ཁྱོ༌ཞའ༌ རེ༌རེའ༌ ཟེར༌ཅེས༌སི༌ ཚིགས༌གུན༌ སལ༌ལ༌ ཛད༌ཨིན༌།
MAT 10:20 ཏེ༌ཏུས༌ སྤེ༌ར༌ ཟེར༌ཁན༌བོ༌ ཁྱོ༌ཞའ༌ མན༌པ༌ ཁྱོ༌ཞའེ༌ ནང༌ང༌ ཡོད༌ཁན༌ནི༌ ཡབ༌ དཀོན༌མཆོག༌གི༌ ཐུག༌ཉིད༌དི༌ ཁྱོ༌ཞའ༌ གྱུད༌ཏེ༌ མོལ༌ལ༌ནོག༌།”
MAT 10:21 “ཨ༌ཅོ༌གུན༌ནི༌ ནོ༌གུན༌ལ༌ ཡང༌ ཨ༌བའེ༌ བུ༌ཚའ༌ ཡང༌ ཕྲུ༌གུའི༌ ཕ༌མ༌གུན༌ལ༌ ངོ༌ལོག༌ ཅོས༌ཏེ༌ སད༌ཅུག༌ཨིན༌།
MAT 10:22 ཁྱོ༌ཞའ༌ ངའེ༌ཀ༌ ཏད༌པ༌ ཡོད༌ཅེས༌པོའེ༌ མི༌ཚང༌མའེ༌ ཁྱོ༌ཞ༌གུན༌ལ༌ ནཕ༌རད༌ ཅོའ༌ནོག༌། ཨིན༌ནའང༌ ཐའ༌མ༌ ཚོག༌པ༌ ཏད༌པའེ༌ ནང༌ང༌ སྟན༌པོ༌ ལུས༌ཁན༌གུན༌ལ༌ དཀོན༌མཆོག༌གི༌ ཐའ༌མེད༌པའེ༌ མི༌ཚེ༌ སལ༌ཨིན༌།
MAT 10:23 ཡུལ༌ཞིག༌གི༌ ནང༌ང༌ ཁྱོ༌ཞའ༌ ནགས༌བར༌དོ༌ སྟན༌ན༌ ཡང༌ ཡུལ༌ཞིག༌ག༌ ཤོར༌ཏེ༌ སོང༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, ཨིས༌ར༌ཨེལ༌ལི༌ གྲོང༌ཁྱེར༌ ཚང༌མའེ༌ ནང༌ང༌ ཁྱོ༌ཞའ༌ ལས༌ ཅོ༌ཚར༌རི༌ སང༌ སྔུན༌ལ༌ མི༌རིགས༌སི༌བུ༌ ལོགས༌ཏེ༌ ཡོང༌ཨིན༌།”
MAT 10:24 ཡེ༌ཤུའི༌ མོལས༌, “ལོབ༌ཕྲུགས༌ ལོབ༌བོན༌ནི༌ སང༌ ཆེའ༌, ཡང༌ ཡོག༌པོ༌ སྤོན༌བོའེ༌ སང༌ ཆེའ༌ མ༌ནོག༌།
MAT 10:25 ཨིན༌ནའང༌ ལོབ༌ཕྲུགས༌ ལོབ༌བོན༌ ཙོགས༌ ཡང༌ ཡོག༌པོ༌ སྤོན༌བོ༌ ཙོགས༌ གྱུར༌ཉན༌ན༌ནོག༌། ཀལ༌ཏེས༌ ངའ༌ སྤོན༌བོ༌ ཨིན༌ ཨིན༌ནའང༌ ངའ༌ བེལ༌ཟེ༌བུལ༌ ཡང༌ན༌ རྡུད༌དི༌ གོ༌བ༌ ཟེར༌རད༌ན༌, ཏེ༌ནེ༌ ཁྱོ༌ཞའ༌ ངའེ༌ ལོབ༌ཕྲུགས༌ ཨིན༌ཅེས༌པོའེ༌ མང༌ང༌ ངན༌པ༌ མི༌ཟེར༌ར༌?”
MAT 10:26 “ཁྱོ༌ཞའ༌ ཇིགས༌ནང༌ སྟན༌ཁན༌གུན༌ལ༌ མ༌ཇིགས༌, ཅིའ༌ཟེར༌ན༌ ཏུས༌པོ༌ ལེབ༌ཨིན༌ ནམ༌ དཀོན༌མཆོག༌གི༌ ཀབས༌ཏེ༌ བོར༌ཁན༌ ཚང༌མ༌ ཕིང༌ང༌ ཛད༌ཨིན༌ ཡ༌ སྦས༌ཏེ༌ བོར༌ཁན༌ ཚང༌མ༌ མི༌གུན༌ལ༌ སྔོན༌ ཅུག༌ག༌ ཛད༌ཨིན༌།
MAT 10:27 ངའེ༌ ཁྱོ༌ཞ༌གུན༌ལ༌ མུན༌གྲིག༌གི༌ ནང༌ང༌ ཤད༌ཁན༌གུན༌ ཉི༌མའེ༌ འོད༌དི༌ ནང༌ང༌ ཤོད༌, ཁྱོ༌ཞའེ༌ ནམ༌ཅོག༌གི༌ ནང༌ང༌ ཤུབས༌ཏེ༌ ངའེ༌ ཤད༌ཁན༌གུན༌ ཁང༌པའེ༌ ཁེ༌ཐོག༌ནེ༌ ཀུ༌ཅོ༌ ཏངས༌ཏེ༌ ཤོད༌།”
MAT 10:28 “སེམས༌ཉིད༌ མན༌པ༌ ལུས༌ ཅིག༌པོ༌ སད༌ ཉན༌ཁན༌གུན༌ལ༌ མ༌ཇིགས༌, ཨིན༌ནའང༌ ཉལ༌ཝའེ༌ ནང༌ང༌ ཕངས༌ཏེ༌ ལུས༌ དང༌ སེམས༌ཉིད༌ ཉིས༌ཀོ༌ མེད༌ཁན༌ ཛད༌ཉན༌ཁན༌ནི༌ དཀོན༌མཆོག༌ག༌ ཇིགས༌།
MAT 10:29 ཅི༌པ༌ ཉིས༌ པེན༌ཆུང༌ ཅིག༌ག༌ ཙོང༌ང༌ མི༌དུག༌ག༌? ཨིན༌ནའང༌ ནམ༌ཚོག༌པ༌ ནམ༌ཁའེ༌ ཡབ༌བི༌ གོངས༌པ༌ མི༌སལ༌ ཅི༌པ༌ ཅིག༌གའང༌ སའེ༌ཀ༌ མི༌བུད༌།
MAT 10:30 ཁྱོ༌ཞའེ༌ གོའེ༌ཀ༌ ཡོད༌ཁན༌ནི༌ སྲའེ༌ ཀྲངས༌ཀའང༌ ཁོང༌ངི༌ ཁྱེན༌ན༌ ཛད༌ད༌ནོག༌།
MAT 10:31 ཏེན༌ན༌བོའེ༌ཕིའ༌ ཇིགས༌ མ༌ཇིགས༌, དཀོན༌མཆོག༌གི༌ སྐུན༌དུན༌ལ༌ ཅི༌པ༌ མང༌པོའེ༌ སང༌ ཁྱོ༌ཞའ༌ ཅིག༌ མང༌ང༌ རིན༌ཆེའ༌ ཨིན༌ནོག༌།”
MAT 10:32 “མི༌གུན༌ནི༌ དུན༌ལ༌, ‘ཡེ༌ཤུ༌ ངའེ༌ གཙོ༌བོ༌ ཨིན༌’ ཟེར༌ཁན༌ ཚང༌མའ༌ ངེའང༌ ངའེ༌ ཡབ༌ ནམ༌ཁའེ༌ ནང༌ང༌ ཞུགས༌ཁན༌ནི༌ སྐུན༌དུན༌ལ༌ ཁོང༌གུན༌ ངའེ༌ དེན༌བའེ༌ ལོབ༌ཕྲུགས༌ ཨིན༌ ཟེར༌ཨིན༌།
MAT 10:33 ཨིན༌ནའང༌ མི༌གུན༌ནི༌ དུན༌ལ༌ ངའ༌ མི༌ཤེས༌ཟུན༌ ཏང༌ཁན༌ ཚང༌མའ༌ ངེའང༌ ངའེ༌ ཡབ༌ ནམ༌ཁའེ༌ ནང༌ང༌ ཞུགས༌ཁན༌ནི༌ སྐུན༌དུན༌ལ༌ ཁོང༌གུན༌ མི༌ཤེས༌ ཟེར༌ཨིན༌།”
MAT 10:34 “ཁྱོ༌ཞའེ༌ ང༌ ཇིག༌རྟེན༌ནི༌ཀ༌ ཞི༌དེ༌ ཁྱོང༌ང༌ ཡོངས༌ཏེ༌ ཨིན༌ནོག༌ མ༌སམ༌། ང༌ ཞི༌དེ༌ མན༌པ༌ ནོལ༌ཅུག༌ག༌ལ༌ ཡོངས༌ཏེ༌ ཨིན༌,
MAT 10:35 ཅིའ༌ཟེར༌ན༌, ངའ༌ ཏད༌པ༌ ཅོ༌ཅེས༌པོའེ༌ ‘བུ༌ཚའེ༌ རང༌ངི༌ ཨ༌བའ༌ ངོ༌ལོག༌ ཅོ༌ཨིན༌, ཡང༌ བུ༌མོའེ༌ རང༌ངི༌ ཨ༌མའ༌ ངོ༌ལོག༌ ཅོ༌ཨིན༌, ཡང༌ བུ༌ཚའེ༌ ན༌མའེ༌ རང༌ངི༌ མག༌པའེ༌ ཨ༌མའ༌ ངོ༌ལོག༌ ཅོ༌ཨིན༌,
MAT 10:36 མི༌ཞིག༌གི༌ གྲ༌འོ༌, ཁོ༌རང༌ངི༌ ནང༌མི༌གུན༌ གྱུར༌ཨིན༌།’”
MAT 10:37 “རང༌ངི༌ ཨ༌བ༌ ཡ༌ ཨ༌མའ༌ ངའེ༌ སང༌ མང༌ང༌ ཡ༌ཤ༌ ཅོ༌ཁན༌བོ༌ ངའེ༌ ལོབ༌ཕྲུགས༌ གྱུར༌ཅེས༌སི༌ འོས༌པ༌ མན༌, ཡང༌ རང༌ངི༌ བུ༌ཚ༌ ཡ༌ བུ༌མོའ༌ ངའེ༌ སང༌ མང༌ང༌ ཡ༌ཤ༌ ཅོ༌ཁན༌བོ༌ ངའེ༌ ལོབ༌ཕྲུགས༌ གྱུར༌ཅེས༌སི༌ འོས༌པ༌ མན༌།
MAT 10:38 རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའེ༌ སྟིང༌ནེ༌ མ༌བྲངས༌ཁན༌བོ༌ ངའེ༌ ལོབ༌ཕྲུགས༌ གྱུར༌ཅེས༌སི༌ འོས༌པ༌ མན༌།
MAT 10:39 རང༌སྲོག༌ ཐམས༌ཏེ༌ དུག༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ལ༌ དེན༌བའེ༌ མི༌ཚེ༌བོ༌ ཐོབ༌ཨིན༌།”
MAT 10:40 “ཁྱོ༌ཞའ༌ གའ༌སུས༌ ཅོ༌ཁན༌གུན༌ནི༌ ངའ༌ གའ༌སུས༌ ཅོས༌ཏེ༌ ཨིན༌ནོག༌, ཡང༌ ངའ༌ གའ༌སུས༌ ཅོ༌ཁན༌གུན༌ནི༌, ང༌ ཀལ༌ལ༌ ཛད༌ཁན༌བོའ༌ གའ༌སུས༌ ཞུས༌ཏེ༌ ཨིན༌ནོག༌།
MAT 10:41 དཀོན༌མཆོག༌གི༌ བཀའ༌ ཤད༌ཁན༌ ཨིན༌ཅེས༌པོའེ༌ ལུང༌སྟོན༌པ༌ གའ༌སུས༌ ཞུ༌ཁན༌གུན༌ལ༌ ལུང༌སྟོན༌པ༌ ཐོབ༌ཁན༌ ཙོགས༌ སོལ༌རས༌ ཐོབ༌ཨིན༌། ཡང༌ ཀྲང༌པོ༌ ཨིན༌ཅེས༌པོའེ༌ མི༌ཞིག༌ག༌ གའ༌སུས༌ ཞུ༌ཁན༌གུན༌ལ༌ མི༌ ཀྲང༌པོ༌ཞིག༌ག༌ ཐོབ༌ཁན༌ ཙོགས༌ སོལ༌རས༌ ཐོབ༌ཨིན༌།
MAT 10:42 ངའེ༌ ཁྱོ༌ཞའ༌ དེན༌བ༌ ཟེར༌རད༌ ངའེ༌ ལོབ༌ཕྲུགས༌ ཉམ༌ཤུང༌ཞིག༌ག༌ ཆུ༌ གྲང༌མོ༌ ཀོ༌རེ༌ གང༌ ཏང༌ཁན༌གུན༌ལ༌ ཏན༌ཏན༌ལ༌ སོལ༌རས༌ སལ༌ལ༌ ཛད༌ཨིན༌།”
MAT 11:1 གཙོ༌བོ༌ ཡེ༌ཤུའི༌ ལོབ༌ཕྲུགས༌ རྕུག༌ཉིས༌ལ༌ ལབ༌ཞ༌ སལ༌ ཚར༌ཏེ༌ སྟིང༌ནེ༌, ཁོང༌ ཏེ༌ཀ༌ནེ༌ ལབ༌ཞ༌ སལ༌ཅེས༌ དང༌ ཆོས༌ཤད༌ཅེས༌ལ༌ གཱ༌ལིལ༌ལིའི༌ ཡུལ༌ཇོངས༌སི༌ གྲོང༌ཁྱེར༌གུན༌ལ༌ སྐྱོདས༌།
MAT 11:2 ཡོ༌ཧཱ༌ནན༌ནི༌ ཙོན༌ཁང༌ངི༌ ནང༌ང༌, མ༌ཤི༌ཀའེ༌ ཧ༌ལས༌ཤེས༌སི༌ ཛད༌པ༌ ཛད༌ཁན༌གུན༌ ཚོར༌ར༌ཅིག༌, ཁོང༌རང༌ངི༌ ལོབ༌ཕྲུགས༌གུན༌ ཡེ༌ཤུ༌ ཡོད༌ས༌, འི༌ ཏྲི༌ཝ༌བོ༌ ཏྲིའ༌ལ༌ ལམ༌ཅུགས༌,
MAT 11:3 “ལུང༌སྟོན༌པ༌གུན༌ནི༌ སྐྱོད༌ཨིན༌ མོལ༌ཁན༌ མ༌ཤི༌ཀ༌ ཉེ༌རང༌ ཞུགས༌ཏེ༌ ཨིན༌ན༌ ཡ༌ ང༌ཞའ༌ ཡང༌ཞིག༌ག༌ སྲུང༌?”
MAT 11:4 ཡེ༌ཤུའི༌ ལན༌སལས༌, “ལོགས༌ཏེ༌ སོང༌ ཡང༌ ཁྱོ༌ཞའེ༌ ཚོར༌ཁན༌ དང༌ ཐོང༌ཁན༌གུན༌ ཡོ༌ཧཱ༌ནན༌ལ༌ ཤོད༌།
MAT 11:5 ཞ༌ར༌གུན༌ལ༌ ཐོང༌, ཞ༌འོ༌གུན༌ གྲུལས༌, ཛེ༌ནད༌ཅན༌གུན༌ གྱལ༌ཏེ༌ རྩང༌མ༌ སོང༌, མ༌ཚོར༌ཁན༌གུན༌ནི༌ ཚོར༌, ཤི༌ཁན༌གུན༌ སོན༌ཏེའ༌ ལངས༌, ཡང༌ ཉལ༌བ༌ཅན༌གུན༌ལ༌ གའ༌མོའེ༌ ནས༌ཚུལ༌ ཤདས༌།
MAT 11:6 ཁོའ༌ ཤོད༌, ངའེ༌ ཅོ༌ཁན༌གུན༌ནི༌ ཞས༌ཏེ༌ ངའ༌ མ༌ཕང༌ཁན༌གུན༌ལ༌ ཅིན༌ལབས༌ སལ༌ལ༌ ཛད༌ཨིན༌།”
MAT 11:7 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ ལོགས༌ཏེ༌ ཆའ༌ཅིག༌, ཡེ༌ཤུའི༌ མི༌ཚོགས༌ལ༌ ཡོ༌ཧཱ༌ནན༌ནི༌ སྐོར༌ལ༌ མོལ༌ཅེས༌ གོ༌ཟུག༌, “ཁྱོ༌ཞའ༌ རི༌སྟོང༌ངི༌ ནང༌ང༌ ཀ༌ཟུག༌ མི༌ཞིག༌ག༌ ལྟའ༌ལ༌ སོང༌པིན༌? ཆུའི༌ ཐའ༌མའེ༌ ལྡམ༌བུ༌ ལུངས༌པོའེ༌ སྐུལ༌ལ༌ ཙོགས༌ལ༌, ལབ༌ཞའེ༌ ནང༌ང༌ ཏུས༌གྱུན༌ གྱུར༌ཇ༌ ཁྱོང༌ཁན༌ ཞིག༌ག༌?
MAT 11:8 ཀལ༌ཏེས༌ མན༌ན༌ ཁྱོ༌ཞ༌གུན༌ ཅི༌ ལྟའ༌ལ༌ སོང༌པིན༌? མི༌ ཀོས༌ལག༌ ཇམ༌པོ༌ དང༌ རིན༌ཅན༌ གོན༌ཁན༌ཞིག༌ ཁྱོ༌ཞ༌གུན༌ནི༌ ཐོང༌ང༌? མ༌ཐོང༌། ཀོས༌ རིན༌ཅན༌ གོན༌ཁན༌གུན༌ གྱལ༌པོའེ༌ ཁར༌ལ༌ དུག༌ག༌ནོག༌།
MAT 11:9 ཁྱོ༌ཞའ༌ ལུང༌སྟོན༌པ༌ཞིག༌ག༌ ལྟའ༌ལ༌ སོང༌པིན༌ན༌? འོ༌ན༌, ཁོ༌ ལུང༌སྟོན༌པ༌ སང༌ ཀྲག༌ག༌ཞིག༌ ཨིན༌།
MAT 11:10 ཏམ༌པའེ༌ སུང༌རབས༌སི༌ ནང༌ང༌ ཁོའེ༌ སྐོར༌ལ༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ལྟོས༌, ཁྱོ༌རང༌ངི༌ སང༌ སྔུན༌ལ༌ ངའེ༌ ང༌རང༌ངི༌ ལོན༌ཁྱེར༌ཁན༌བོ༌ ཀལ༌ཨིན༌། ཁོའེ༌ ཁྱོ༌རང༌ངི༌ ཕིའ༌ ལམ༌ གྲལ༌གྲིག༌ ཅོ༌ཨིན༌།’”
MAT 11:11 “ངའེ༌ ཁྱོ༌ཞའ༌ དེན༌བ༌ ཟེར༌རད༌, དག༌ས༌ ཚོག༌པ༌ སྐྱེས༌ཁན༌ མི༌གུན༌ནི༌ ནང༌ནེ༌ ཡོ༌ཧཱ༌ནན༌ ཁྲུས༌སལ༌ཁན༌ནི༌ སང༌ ཀྲག༌ག༌ཞིག༌ སུའང༌ མེད༌པ༌ ཨིན༌ནོག༌, ཨིན༌ནའང༌ ནམ༌ཁའེ༌ གྱལ༌སྲིད༌དི༌ ནང༌ང༌ ཆུང༌ཤོག༌པོ༌ ཡོ༌ཧཱ༌ནན༌ནི༌ སང༌ ཀྲག༌ག༌ ཨིན༌།
MAT 11:12 ཁྲུས༌སལ༌ཁན༌ ཡོ༌ཧཱ༌ནན༌ནི༌ ཆོས༌ཤད༌ཅེས༌ གོ༌ཟུགས༌པ༌ནེ༌ དག༌ས༌ ཚོག༌པ༌ དཀོན༌མཆོག༌གི༌ ཝང༌ ཉམ༌པོ༌ ཁོང༌རང༌ངི༌ གྱལ༌སྲིད༌པོ༌ གྱས༌ཤུག༌ག༌ ཛད༌ཨིན༌ ཨིན༌ནོག༌, ཨིན༌ནའང༌ ནོད༌སྐྱལ༌ མི༌ ངན༌པ༌གུན༌ནི༌ ཏེ༌བོའེ༌ གྱབ༌གལ༌ལ༌ ནོལ༌ཨིན༌ ཨིན༌ནོག༌།
MAT 11:13 ཡོ༌ཧཱ༌ནན༌ ཡོང༌ངི༌ སང༌ སྔུན༌ལ༌ ནམ༌ཁའེ༌ གྱལ༌སྲིད༌དི༌ སྐོར༌ལ༌ བཀའ༌ཁྲིམས༌སི༌ སྤེ༌ཆ༌ དང༌ ལུང༌སྟོན༌པ༌ ཚང༌མའེ༌ ལུང༌སྟན༌ ཤད༌ད༌ ཛདས༌།
MAT 11:14 ཀལ༌ཏེས༌ ངའེ༌ ཟེར༌ཅེས༌པོའ༌ ཨིད༌ཤེས༌ ཅོའ༌ ཐད༌ན༌, ཡོ༌ཧཱ༌ནན༌ ནི༌ ཨེ༌ལི༌ཡཱ༌ ཨིན༌ ཀ༌བོ༌ ལུང༌སྟོན༌པ༌གུན༌ནི༌ ཡོང༌ཨིན༌ མོལ༌ཏེ༌ ཨིན༌པིན༌།
MAT 11:15 ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།”
MAT 11:16 “ངའེ༌ འི༌ མི༌རབས༌པོ༌ སུ༌ ཉམ༌པོ༌ ལྡུར༌? ཁྲོམས༌སི༌ ནང༌ང༌ དུག༌ཁན༌ནི༌ ཕྲུ༌གུ༌གུན༌ ཙོགས༌ ཀ༌གུན༌ནི༌ ཛ༌འོ༌གུན༌ལ༌ བོད༌ཨིན༌ ཟེར༌དུག༌,
MAT 11:17 ‘ང༌ཞའེ༌ ལིང༌བུ༌ ཕུས༌ཏེའང༌ ཁྱོ༌ཞའ༌ མ༌རྩེས༌། ང༌ཞའེ༌ ཤད༌པ༌ ཏང༌ ཟ༌ནེ༌ ཁྱོ༌ཞའེ༌ ཉ༌ངན༌ མ༌ཅོས༌།’”
MAT 11:18 “ཏེན༌ན༌ ཙོགས༌ལ༌ ཡོ༌ཧཱ༌ནན༌ ཡོངས༌ཏེ༌ ཟན༌ མ༌ཟོས༌ ཡ༌ ཆང༌ མ༌ཐུངས༌པ༌ མི༌གུན༌ནི༌ ‘ཁོའེ༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌’ ཟེརས༌།
MAT 11:19 མི༌རིགས༌སི༌བུ༌ ཡོང༌ཏེ༌ ཟན༌ ཟོས༌ཏེ༌ ཆང༌ ཐུངས༌པ༌, ཁྱོ༌ཞའེ༌ ‘ཁོ༌ མུག༌ཞུགས༌ དང༌ ར༌རོས༌ཏེ༌ དུག༌ཁན༌ ཡང༌ ཁྲལ༌ལེན༌ཁན༌ དང༌ སྡིག༌ཅན༌ གུན༌ནི༌ ཛ༌འོ༌ ཨིན༌ནོག༌’ ཟེརས༌། ཨིན༌ནའང༌ ང༌ཞའ༌ ཤེས༌རབས༌སི༌ ལམ༌མི༌ཀ༌ གྲུལ༌ཁན༌བོ༌ ང༌ཞའེ༌ ལས༌སི༌ བྲས༌བུའི༌ སྟན༌ཨིན༌།”
MAT 11:20 ཏེ༌ནེ༌ གཙོ༌བོ༌ ཡེ༌ཤུའི༌ ཁོང༌ངི༌ ཧ༌ལས༌ཤེས༌སི༌ ཛད༌པ༌ མང༌པོ༌ སྟན༌ན༌ ཛད༌ཁན༌ནི༌ གྱལ༌ས༌གུན༌ནི༌ གྱབ༌གལ༌ལ༌ མོལས༌, ཅིའ༌ཟེར༌ན༌ ཏེ༌ནང༌ང༌ ཡོད༌ཁན༌གུན༌ནི༌ སྡིག༌པ༌ སྤངས༌ཏེ༌ གྱོད༌པ༌ མ༌ཅོས༌།
MAT 11:21 “ཀོ༌ར༌ཟིན༌པ༌ དང༌ བེད༌སའི༌ད༌པ༌ གུན༌ ཁྱོ༌ཞ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌། ཀལ༌ཏེས༌ ཁྱོ༌ཞའེ༌ ནང༌ང༌ སྟན༌ཁན༌ནི༌ ཛད༌པ༌གུན༌, ཏཱ༌ཡིར༌ དང༌ སི༌དོན༌ གྲོང༌ཁྱེར༌ ངན༌པ༌གུན༌ནི༌ ནང༌ང༌ སྟན༌པིན༌ན༌, ཁོང༌གུན༌ནི༌ སྡིག༌པ༌ སྤངས༌ཏེ༌ གྱོད༌པ༌ ཅོས༌ཏེ༌ ཕ༌ཙའ༌ གོན༌ཏེ༌, ཀོག༌ཐལ༌ ཡོག༌ཨིན༌ རྡུག༌པོ༌ ཅོས༌ཏེ༌ ཡོད༌གྲོ༌།
MAT 11:22 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌ དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌, ཏཱ༌ཡིར༌ དང༌ སི༌དོན༌པ༌ གྲོང༌ཁྱེར༌རི༌ མི༌གུན༌ནི༌ སང༌ ཁྱོ༌ཞའ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌།”
MAT 11:23 “ཝ༌ ཀ༌ཕར༌ན༌ཧུམ༌པ༌གུན༌ ཅི༌ ཁྱོ༌ཞའ༌ རྩི༌ཝ༌ ཏངས༌ཏེ༌ ནམ༌ཁའ༌ ཁྱེར༌ར༌ ཛད༌ཨིན༌ སམ༌མ༌ རག༌ག༌? མ༌ནེ༌ མི༌ཐེན༌། ཁྱོ༌ཞ༌གུན༌ ཉལ༌ཝའེ༌ ནང༌ང༌ ཕང༌ང༌ ཛད༌ཨིན༌། ཀལ༌ཏེས༌ ཁྱོ༌ཞ༌གུན༌ལ༌ སྟན༌ན༌ ཛད༌ཁན༌ནི༌ ཛད༌པ༌གུན༌ སོ༌དོམ༌པ༌ མི༌ངན༌གུན༌ལ༌ སྟན༌པིན༌ན༌ གྱོད༌པ༌ ཅོས༌ཏེ༌ ཁོང༌གུན༌ དག༌ས༌ ཚོག༌པ༌ འི༌ ཇིག༌རྟེན༌ནི༌ཀ༌ ལུས༌ཏེ༌ ཡོད༌གྲོ༌།
MAT 11:24 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌, སོ༌དོམ༌ གྲོང༌ཁྱེར༌རི༌ མི༌གུན༌ནི༌ སང༌ ཁྱོ༌ཞའ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌།”
MAT 11:25 ཏེན༌ན༌ ཏུས༌ལ༌ གཙོ༌བོ༌ ཡེ༌ཤུའི༌ མོས༌ལམ༌ ཞུ༌ཨིན༌ མོལས༌, “ངའེ༌ ཡབ༌ ནམ༌ཁའ༌ དང༌ ཇིག༌རྟེན༌ནི༌ གཙོ༌བོ༌ལེ༌, ངའེ༌ ཉེ༌རང༌ང༌ སྟོད༌པ༌ ཕུལ༌ལད༌ ཅིའ༌ཟེར༌ན༌ ཉེ༌རང༌ངི༌ ཀྲང༌པོ༌ ལམ༌བོ༌ ཁས༌པ༌ དང༌ ཡོན༌ཏན༌ཅན༌གུན༌ནེ༌ སྦས༌ཏེ༌, ཕྲུ༌གུ༌ ཙོགས༌ ཡོད༌ཁན༌གུན༌ལ༌ སྔོན༌ ཅུག༌ག༌ ཛདས༌།
MAT 11:26 འོ༌ན༌ ཡབ༌ལེ༌ ཏེ༌ཟུག༌ ཛད༌ཅེས༌པོའ༌ ཉེ༌རང༌ ཐུགས༌ཐད༌།”
MAT 11:27 “ངའེ༌ ཡབ༌ དཀོན༌མཆོག༌གི༌ ཝང༌ཆ༌ ཚང༌མ༌ ངའ༌ སྟད༌ད༌ ཛད༌ཏེ༌ ཨིན༌། ཡབ༌བི༌ མ༌ནེ༌ ཞན༌སུའིང༌ བུ༌ཚ༌ ངོ༌ མི༌ཤེས༌, ཡང༌ བུ༌ཚའེ༌ མ༌ནེ༌ ཞན༌སུའང༌ ཡབ༌ ངོ༌ མི༌ཤེས༌, ཨིན༌ནའང༌ ངའེ༌ ལྡམ༌ཁན༌གུན༌ལ༌ ཡབ༌ སྔོན༌ཅུག༌ཨིན༌།”
MAT 11:28 “སེམས༌སི༌ ནང༌ང༌ ངལ༌ཁན༌ དང༌ ཁུར༌རུ༌ ལྕིན༌ཏྲེ༌ ཁུར༌ཁན༌ ཚང༌མ༌ ང༌ ཡོད༌ས༌ ཡོང༌, ཡང༌ ངའེ༌ ཁྱོ༌ཞའ༌ ངལ༌ཚོ༌ ཏང༌ཨིན༌།
MAT 11:29 ངའེ༌ ཉ༌ཤིང༌བོ༌ ཁུར༌ ཡང༌ ངའེ༌ ཀ༌ནེ༌ ལོབ༌ ཅིའ༌ཟེར༌ན༌ ང༌ ནི༌ སེམས༌སི༌ ནང༌ང༌ བོལ༌མོ༌ དང༌ ཉམ༌ཤུང༌ ཨིན༌, ཡང༌ ཁྱོ༌ཞ༌གུན༌ནི༌ སེམས༌ལ༌ ངལ༌ཚོ༌ ཐོབ༌ཨིན༌།
MAT 11:30 ངའེ༌ ཉ༌ཤིང༌བོ༌ ཁུར༌ར༌ལ༌ ལ༌མོ༌ ཡང༌ ངའེ༌ ཁུ༌རུ༌བོ༌ ཡང༌མོ༌ ཡོད༌།”
MAT 12:1 ཏེན༌ན༌ ཏུས༌ཤིག༌ག༌ གཙོ༌བོ༌ ཡེ༌ཤུ༌ ཤབ༌བད༌དི༌ ངལ༌ཚོའེ༌ ཞག༌ག༌ ཞིང༌ གྱུད༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ སྟོགས༌ཏེ༌ ཡོད༌པ༌ ཞིང༌ངི༌ སྙེ༌མ༌ ཅད༌ཏེ༌ ཟའ༌ཅེས༌ གོ༌ཟུག༌།
MAT 12:2 ཏེ༌བོ༌ ཐོང༌ཏེ༌ ཕ༌རུ༌ཤི༌པ༌ ཁ༌ཅིག༌གི༌ ཡེ༌ཤུའ༌ ཟེརས༌, “ཁྱོ༌རང༌ངི༌ ལོབ༌ཕྲུགས༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོས༌ཏེ༌ ཆོས༌ཁྲིམས༌ ཅགས༌ཏེ༌ ཨིན༌ནོག༌།”
MAT 12:3 ཡེ༌ཤུའི༌ ལན༌སལས༌, “དཱ༌བིད༌ དང༌ ཁོའེ༌ ཕྲོ༌པ༌གུན༌ སྟོགས༌ཏེ༌ ཡོད༌ ཟ༌ནེ༌ ཅི༌ ཅོས༌ ཏམ༌པའེ༌ སུང༌རབས༌སི༌ ནང༌ནེ༌ ཁྱོ༌ཞའེ༌ མ༌སིལ༌པིན༌ན༌?
MAT 12:4 དཱ༌བིད༌ དཀོན༌མཆོག༌གི༌ ཀུར༌རི༌ ནང༌ང༌ ཆོད༌པ༌ ཕུལ༌སའེ༌ཀ༌ སོང༌, ཡང༌ ཁོ༌ དང༌ ཁོའེ༌ ཕྲོ༌པ༌གུན༌ནི༌ ཏམ༌པའེ༌ ཏ༌གི༌ ཟོས༌ཏེ༌ ཆོས༌ཁྲིམས༌ ཅགས༌, ཏེ༌བོ༌ ཡ༌ཧུ༌དཱ༌པའེ༌ བླ༌མའ༌ མ༌ནེ༌ ཟའ༌ཆོག༌ག༌ མེད༌པིན༌།
MAT 12:5 ཡ༌ ཆོས༌ཁྲིམས༌སི༌ ནང༌ང༌ མ༌སིལ༌པིན༌ན༌, ཆོད༌ཁང༌ངི༌ ནང༌ང༌ བླ༌མའེ༌ ཆོད༌པ༌ ཕུལ༌ཅེས༌སི༌ ལས༌ ཅོས༌ཏེ༌ ཤབ༌བད༌དི༌ ཞག༌གི༌ ཁྲིམས༌ ཅག༌ནའང༌ དཀོན༌མཆོག༌གི༌ དུན༌ལ༌ ཁོང༌གུན༌ ནོངས༌མེད༌ ཨིན༌ནོག༌།
MAT 12:6 ངའེ༌ ཁྱོ༌ཞའ༌ ཟེར༌རད༌, ཆོད༌ཁང༌ངི༌ སང༌ ཀྲག༌ག༌ཞིག༌ འི༌ཀ༌ ཡོད༌།
MAT 12:7 ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལས༌, ‘ངའེ༌ དོད༌པ༌ ནི༌ ངའ༌ ཆོད༌པ༌ ཕུལ༌ཅེས༌ མན༌པ༌ ཞན༌མ༌ སྙིང༌རྗེ༌ སྟན༌ཅེས༌པོ༌ ཨིན༌། ’ ཀལ༌ཏེས༌ ཏེ༌བོ༌ ཁྱོ༌ཞ༌གུན༌ལ༌ ཧ༌གོ༌ཏེ༌ ཨིན༌པིན༌ན༌ ཏེ༌ནེ༌ ཁྱོ༌ཞའེ༌ ནོངས༌མེད༌གུན༌ལ༌ སྐྱོན༌ ཀལ༌ཏེ༌ མེད༌གྲོ༌།
MAT 12:8 ཅིའ༌ཟེར༌ན༌ མི༌རིགས༌སི༌བུའ ཤབ༌བད༌དི༌ ངལ༌ཚོའེ༌ ཞག༌ག༌ ཅི༌ ཅོ༌ ཆོགས༌ ཡ༌ མི༌ཆོགས༌ ཟེར༌ཅེས༌སི༌ ཝང༌ཆ༌ ཡོད༌།”
MAT 12:9 གཙོ༌བོ༌ ཡེ༌ཤུ༌ ཏེ༌ཀ༌ནེ༌ དུ༌ཁང༌ང༌ སྐྱོདས༌,
MAT 12:10 ཏེ༌རུ༌ ལག༌པ༌ ཁོངས༌ཏེ༌ ཀོལ༌ མ༌ཉན༌ཁན༌ནི༌ མི༌ཞིག༌ ཡོད༌པིན༌། ཕ༌རུ༌ཤི༌པ༌གུན༌ནི༌ ཡེ༌ཤུའ༌ སྐྱོན༌ ཀལ༌ཅེས༌ལ༌ ཁོང༌གུན༌ནི༌ འི༌ ཏྲི༌ཝ༌བོ༌ ཏྲིས༌, “ཆོས༌ཁྲིམས༌ ནང༌ཞིན༌ ཤབ༌བད༌དི༌ ངལ༌ཚོའེ༌ ཞག༌ག༌ མི༌ཞིག༌ གྱལ༌ཅུག༌ན༌ གྲིག༌ཏེ༌ ཨིན༌ནོག༌ག༌?”
MAT 12:11 ཡེ༌ཤུའི༌ ཁོང༌གུན༌ལ༌ མོལས༌, “ཀལ༌ཏེས༌ ཁྱོ༌ཞའ༌ ཅིག༌གི༌ ལུག༌ཞིག༌ ཤབ༌བད༌དི༌ ཞག༌ག༌ ས༌དོང༌ངི༌ ནང༌ང༌ བུད༌ན༌, ཁྱོ༌ཞའེ༌ ལུག༌པོ༌ ཟུམས༌ཏེ༌ ཕིང༌ མི༌ ཕིང༌ང༌?
MAT 12:12 ལུག༌གི༌ སང༌ མི༌ མངས༌ཏེའང༌ རིན༌ཆེའ༌ མ༌ནོག༌ག༌། ཏེ༌བོའེ༌ཕིའ༌ ཆོས༌ཁྲིམས༌ ནང༌ཞིན༌ ཤབ༌བད༌དི༌ ཞག༌ག༌ ལས༌ ཟང༌པོ༌ ཅོ༌ ཆོག༌ག༌ནོག༌།”
MAT 12:13 ཏེ༌ནེ༌ ཡེ༌ཤུའི༌ ལག༌པ༌ ཁོངས༌ཁན༌བོའ༌ མོལས༌, “ལག༌པ༌ རྐྱོང༌” ཡང༌ ཁོའེ༌ ལག༌པ༌ རྐྱངས༌པ༌ ཏེ༌བོ༌ སིང༌ གྱལ༌ཏེ༌ ཞན༌ ལག༌པ༌བོ༌ ཙོགས༌ ཤེད༌ཅན༌ གྱུར༌།
MAT 12:14 ཨིན༌ནའང༌ ཕ༌རུ༌ཤི༌པ༌གུན༌ ཕི༌ལོག༌ག༌ སོང༌ཏེ༌, ཡེ༌ཤུ༌ སད༌ཅེས༌སི༌ ཐབས༌ ངན༌པ༌ ལྡིངས༌།
MAT 12:15 གཙོ༌བོ༌ ཡེ༌ཤུའི༌ ཁོང༌གུན༌ནི༌ ཐབས༌ལྡིང༌ཁན༌བོ༌ ཁྱེན༌ པ༌སང༌, ཏེ༌ཀ༌ནེ༌ སྐྱོདས༌། མི༌ཚོགས༌ ཆེན༌མོ༌ཞིག༌ ཁོང༌ང༌ བྲངས༌ཏེ༌ ཡོངས༌, ཡང༌ ཏེ༌ ཕྲོའ༌ ཡོད༌ཁན༌ནི༌ ནད༌པ༌ ཚང༌མ༌ ཁོང༌ངི༌ གྱལ༌ཅུག༌ག༌ ཛདས༌།
MAT 12:16 ཁོང༌ངི༌ གྱལ༌ཅུག༌ཁན༌གུན༌ལ༌ ཁོང༌ངི༌ ཛད༌ཁན༌བོ༌ སུའང༌ མ༌ཤད༌ མོལ༌ཏེ༌ བཀའ༌ སལས༌།
MAT 12:17 ལུང༌སྟོན༌པ༌ ཡེ༌ཤ༌ཡཱ༌ གྱུད༌ཏེ༌ མོལ༌ཁན༌ ཚང༌མ༌ གྲུབ༌ ཅུག༌ག༌ ཛད༌ཅེས༌ལ༌ ཁོང༌ངི༌ ཏེ༌ཟུག༌ ཅོའ༌ ཛདས༌།
MAT 12:18 དཀོན༌མཆོག༌གི༌ མོལས༌, “ངའེ༌ ལྡམས༌ཁན༌ནི༌ ཞབས༌ཏོག༌པ༌ ལྟོས༌, ཚང༌མའེ༌སང༌ མང༌ང༌ ཁོའ༌ ངའེ༌ ཅེས༌པ༌ ཅོའད༌, ཡང༌ ཁོའེ༌ ང༌ ཐད༌པོ༌ ཆ༌ཅུག༌དུག༌། ཁོའ༌ ངའེ༌ ང༌རང༌ངི༌ ཐུག༌ཉིད༌ ཏང༌ཨིན༌། སྡིག༌ཅན༌གུན༌ལ༌ ཆད༌པ༌ ཡང༌ ཀྲང༌པོ༌གུན༌ལ༌ སོལ༌རས༌ ཐོབ༌ཅེས༌, ཁོའེ༌ གྱལ༌ཁམས༌གུན༌ལ༌ ཤད༌ད༌ ཛད༌ཨིན༌།
MAT 12:19 ཁོའེ༌ ཛིང༌མོ༌ ཡ༌ ཀུ༌ཅོ༌ མི༌ཏང༌, ཁྲོམས༌སི༌ ནང༌ང༌ སུ༌ཞིག༌གིའང༌ ཁོའེ༌ ཀུ༌ཅོའེ༌ སྐད༌ མི༌ཚོར༌།
MAT 12:20 ཁོའེ༌ ན༌ཁན༌ནི༌ ལྡམ༌བུ༌ མི༌ཅག༌ ཡ༌ ཤི༌ཀྱི༌ ཡོད༌ཁན༌ནི༌ འོད༌ མི༌སད༌ ཏེན༌ན༌ ཙོགས༌ལ༌ ཁོའེ༌ ཏད༌པའེ༌ ནང༌ང༌ ཉམ༌ཤུང༌གུན༌ལ༌ ཀྲང༌པོ༌ ཁྲིམས༌ཅད༌དི༌ གྱལ༌ཁའ༌ ཁྱོང༌ཁྱོང༌ཚོག༌པ༌ སྐྱོབ༌ཏེ༌ བོར༌ར༌ ཛད༌ཨིན༌།
MAT 12:21 གྱལ༌ཁམས༌གུན༌ནི༌ ཁོའེ༌ཀ༌ ཨིད༌ཤེས༌ ཅོས༌ཏེ༌ ཁོང༌གུན༌ སྐྱོབ༌ཅེས༌སི༌ རེ༌ཝ༌ བོར༌ཨིན༌།”
MAT 12:22 ཏེ༌ནེ༌ མི༌ ཁ༌ཅིག༌གི༌ རྡུད༌ ཞུགས༌ཁན༌, ཧན༌གྲང༌ དང༌ ཞ༌ར༌ ཡོད༌ཁན༌ནི༌ མི༌ཞིག༌ གཙོ༌བོ༌ ཡེ༌ཤུ༌ ཡོད༌ས༌ ཁྱོངས༌། ཁོའ༌ སྤེ༌ར༌ ཏང༌ཅུག༌ཅེས༌ དང༌ ཐོང༌ཅུག༌ཅེས༌སི༌ ཐུགས༌དོད༌ ཡེ༌ཤུའ༌ ཡོད༌ པ༌སང༌ ཁོང༌ངི༌ ཁོ༌ ཕན༌ཅུག༌ག༌ ཛདས༌།
MAT 12:23 མི༌ཚང༌མ༌ ཧ༌ལས༌ཏེ༌ ཟེརས༌, “འི༌ མི༌བོ༌ གྱལ༌པོ༌ དཱ༌བིད༌དི༌ པུར༌གྱུད༌ མན༌ན༌ཧེ༌ ཀ༌བོའ༌ ང༌དང༌གུན༌ སྲུངས༌ཏེ༌ ཡོད༌?”
MAT 12:24 ཨིན༌ནའང༌ ཕ༌རུ༌ཤི༌པ༌གུན༌ནི༌ ཏེ༌བོ༌ ཚོར༌ར༌ཅིག༌ ཟེརས༌, “བེལ༌ཟེ༌བུལ༌ རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།”
MAT 12:25 ཁོང༌གུན༌ནི༌ སམ༌བ༌ ངན༌པ༌བོ༌ ཡེ༌ཤུའི༌ ཁྱེན༌ཏེ༌ མོལས༌, “གྱལ༌སྲིད༌དི༌ ནང༌ང༌ ཡོད༌ཁན༌གུན༌ ཐུན༌ཏེ༌ མ༌དུག༌ན༌ ཏེ༌བོ༌ མེད༌ཁན༌ ཆེན༌, ཡང༌ གྱལ༌ས༌ ཡ༌ ནང༌ཚངས༌ཞིག༌གི༌ མི༌གུན༌ ནོལ༌ཨིན༌ དུག༌ན༌ ཏེ༌གུན༌ མེད༌ཁན༌ ཆེན༌།
MAT 12:26 ཀལ༌ཏེས༌ ཤེ༌ཏན༌ནི༌ ཤེ༌ཏན༌ ཕིང༌ན༌, ཁོའེ༌ ཁོ༌རང༌ངི༌ གྱབ༌གལ༌ལ༌ ནོལ༌ཏེ༌ ཨིན༌ནོག༌, ཏེ༌ནེ༌ ཁོའེ༌ གྱལ༌སྲིད༌པོ༌ ཀ༌ཟུག༌གི༌ ལུས༌ཨིན༌?
MAT 12:27 ཡང༌ ཀལ༌ཏེས༌ ངའེ༌ རྡུད༌དི༌ གོ༌བ༌ བེལ༌ཟེ༌བུལ༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའེ༌ ལོབ༌ཕྲུགས༌གུན༌ནི༌ སུ༌ གྱུད༌ཏེ༌ རྡུད༌གུན༌ ཕིང༌ང༌ནོག༌? ཏེ༌བོའེ༌ཕིའ༌ ཁོང༌གུན༌ནི༌ ཁྱོ༌ཞའེ༌ ཟེར༌ཁན༌བོའ༌ སྐྱོན༌རྗོད༌ ཅོ༌ཨིན༌།
MAT 12:28 ཨིན༌ནའང༌ ཀལ༌ཏེས༌ ངའེ༌ དཀོན༌མཆོག༌གི༌ ཐུག༌ཉིད༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའེ༌ཀ༌ ནམ༌ཁའེ༌ གྱལ༌སྲིད༌ ལེབ༌ ཚར༌ཏེ༌ ཨིན༌།
MAT 12:29 སུའང༌ མི༌ ཤེད༌ཅན༌ཞིག༌གི༌ ཁང༌པའེ༌ ནང༌ང༌ ཞུགས༌ཏེ༌ ཁོའེ༌ ནོར༌ རྐུ༌ མི༌ཉན༌ ནམ༌ཚོག༌པ༌ ཁོའེ༌ སྔུན༌ལ༌ མི༌ ཤེད༌ཅན༌བོ༌ ལྡམ༌ མི༌ལྡམ༌, ཏེ༌ནེ༌ ཁོའེ༌ ཁང༌པའེ༌ ནང༌ང༌ ཡོད༌ཁན༌ནི༌ ནོར༌གུན༌ རྐུ༌ཉན༌ཨིན༌།”
MAT 12:30 “ངའེ༌ ཆོགས༌ལ༌ མན༌ཁན༌གུན༌ནི༌ ངའ༌ གྱབ༌གལ༌ལ༌ ཅོའ༌ནོག༌, ཡང༌ ང༌ ཉམ༌པོ༌ ལས༌ ཅོས༌ཏེ༌ བྲས༌བུ༌ མ༌ལྡུམ༌ཁན༌གུན༌ནི༌, ངའེ༌ ལས༌སི༌ བྲས༌བུ༌ ཡན༌ཅུག༌ག༌ནོག༌།
MAT 12:31 ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, མི༌གུན༌ནི༌ སྡིག༌པ༌ ཅོ༌ཁན༌ དང༌ དཀོན༌མཆོག༌ག༌ དད༌ལོག༌ ཞུ༌ཁན༌ ཚང༌མ༌ ཤགས༌པ༌ སལ༌ལ༌ ཛད༌ཨིན༌, ཨིན༌ནའང༌ ཏམ༌པའེ༌ ཐུག༌ཉིད༌ལ༌ དད༌ལོག༌ ཞུ༌ཁན༌གུན༌ལ༌ ཤགས༌པ༌ མ༌ནེ༌ སལ༌ལ༌ མི༌ཛད༌
MAT 12:32 ཡང༌ མི༌རིགས༌སི༌བུའི༌ གྱབ༌གལ༌ལ༌ ཟེར༌ཁན༌གུན༌ལ༌ ཤགས༌པ༌ སལ༌ལ༌ ཛད༌ཨིན༌, ཨིན༌ནའང༌ ཏམ༌པའེ༌ ཐུག༌ཉིད༌དི༌ གྱབ༌གལ༌ལ༌ ཟེར༌ཁན༌གུན༌ལ༌ འི༌ མི༌ཚེའེ༌ མ༌ཚད༌ ཡོང༌ཅེས༌ཅན༌ནི༌ མི༌ཚེའེ༌ ནང༌ངའང༌ ཤགས༌པ༌ མ༌ནེ༌ མི༌སལ༌།”
MAT 12:33 “ལྕང༌མ༌ ཟང༌པོ༌ ཨིན༌ན༌ ཏེ༌བོའ༌ ཁ༌ཟས༌ ཟང༌པོ༌ ཆགས༌ཨིན༌, ཡ༌ ལྕང༌མ༌ ངན༌པ༌ ཨིན༌ན༌ ཏེ༌བོའ༌ ཁ༌ཟས༌ ངན༌པ༌ ཆགས༌ཨིན༌། ལྕང༌མ༌ ཏེ༌བོའེ༌ བྲས༌བུའི༌ ཀ༌ནེ༌ ཤེས༌ས༌ནོག༌།
MAT 12:34 ཁྱོ༌རང༌ ཕ༌རུ༌ཤི༌པ༌, ཏུག༌རུལ༌ལི༌ ཕྲུ༌གུ༌གུན༌, ཁྱོ༌ཞ༌ ངན༌པ༌ ཨིན༌ཨིན༌ཞིག༌ ཀ༌ཟུག༌གི༌ སྤེ༌ར༌ ཟང༌པོ༌ ཏང༌ཨིན༌? སྙིང༌ གངས༌ཏེ༌ ལུད༌ཁན༌བོ༌ ཁའ༌ནེ༌ བིང༌ང༌ནོག༌།
MAT 12:35 མི༌ ཟང༌པོའེ༌ སེམས༌ ཟང༌པོའེ༌ བང༌ཛོད༌ནེ༌ བྲས༌བུ༌ ཟང༌པོ༌ སྨིན༌ན༌ནོག༌, ཡང༌ མི༌ ངན༌པའེ༌ སེམས༌ ངན༌པའེ༌ བང༌ཛོད༌ནེ༌ བྲས༌བུ༌ ངན༌པ༌ སྨིན༌ན༌ནོག༌།
MAT 12:36 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ ཁྱོ༌ཞའེ༌ སྣང༌མེད༌ ཅོས༌ཏེ༌ སྤེ༌ར༌ ཟེར༌ཁན༌ རེ༌རེ༌ ཏོན༌ དཀོན༌མཆོག༌གི༌ སྐུན༌དུན༌ལ༌ ཤད༌གོས༌ཨིན༌།
MAT 12:37 ཅིའ༌ཟེར༌ན༌ ཁྱོ༌ཞའེ༌ སྤེ༌ར༌ ཟེར༌ཁན༌གུན༌ནི༌ ཁྱོ༌ཞའ༌ ནོངས༌མེད༌ ཡ༌ ནོངས༌ཅན༌ ཡོད༌ཁན༌བོ༌ སྟན༌ཨིན༌།”
MAT 12:38 ཏེ༌ནེ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཅིག༌གི༌ ཡེ༌ཤུའ༌ ཟེརས༌, “ལོབ༌བོན༌ལེ༌, ང༌ཞའ༌ ཉེ༌རང༌ངི༌ ཀ༌ནེ༌ ནམ༌ཁའེ༌ སྟགས༌ཤིག༌ ལྟ༌ཉིན༌རག༌, ཀ༌བོའེ༌ ཉེ༌རང༌ང༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཨིན༌།”
MAT 12:39 ཁོང༌ངི༌ ཁོང༌གུན༌ལ༌ ལན༌སལས༌, “མི༌རབས༌ ངན༌པ༌ དང༌ དཀོན༌མཆོག༌ག༌ ཨིད༌ཤེས༌ མེད༌ཁན༌གུན༌ནི༌ ནམ༌ཁའེ༌ སྟགས༌ སྟོན༌ ཟེར༌ར༌ནོག༌། ཨིན༌ནའང༌ ལུང༌སྟོན༌པ༌ ཡོ༌ནཱའེ༌ སྟགས༌པོ༌ མ༌ནེ༌ ཁོང༌གུན༌ལ༌ ཡང༌སྟགས༌ཤིག༌ མི༌སྟན༌།
MAT 12:40 ཀ༌ཟུག༌གི༌ ལུང༌སྟོན༌པ༌ ཡོ༌ནཱ༌ ཉི༌མ༌ སུམ༌ དང༌ ཚན༌ སུམ༌ ཆུའི༌ སེམས༌ཅན༌ མ༌ ཆེན༌མོ༌ཞིག༌གི༌ གྲོད༌པའེ༌ ནང༌ང༌ ལུས༌ཁན༌ ཙོགས༌ལ༌ མི༌རིགས༌སི༌བུའང༌ ཉི༌མ༌ སུམ༌ དང༌ ཚན༌ སུམ༌ སའེ༌ ནང༌ང༌ ལུས༌ཨིན༌།”
MAT 12:41 “དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ནི༌ནེ༌ཝ༌པ༌གུན༌ནི༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ནཱའེ༌ ཆོས༌ཤད༌ཁན༌བོ༌ ཉན༌ཏེ༌, གྱོད༌པ༌ ཅོས༌, ལྟོས༌སའང༌ ཡོ༌ནཱ༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།
MAT 12:42 ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ལྷོ༌ ཆོགས༌སི༌ གྱལ༌མོའེ༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོ༌ གྱལ༌པོ༌ སོ༌ལོ༌མོན༌ནི༌ ཤེས༌རབས༌སི༌ སྤེ༌ར༌གུན༌ ཉན༌ན༌ལ༌ ས༌ཆ༌ མ༌ ཐག༌རིང༌ནེ༌ ཡོངས༌, ལྟོས༌སའང༌ སོ༌ལོ༌མོན༌ནི༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།”
MAT 12:43 “མི༌ཞིག༌གི༌ ནང༌ནེ༌ གོང༌པོ༌ བིང༌ཏེ༌ སྟིང༌ནེ༌, གོང༌པོའེ༌ ཆུ༌ མེད༌ས༌ རི༌སྟོང༌ངི༌ ནང༌ང༌ ཁོར༌ཨིན༌ ངལ༌ཚོས༌སེ༌ ནས༌ས༌ ཙལ༌ཏེའང༌ མ༌ཐོབ༌ པ༌སང༌,
MAT 12:44 ཁོའེ༌ ཁོ༌རང༌ང༌ ཟེར༌ར༌ནོག༌, ‘ང༌ བིང༌ཏེ༌ ཡོང༌ཁན༌ནི༌ ཏེན༌ན༌ མིའི༌ ནང༌ང༌ ལོགས༌ཏེ༌ ཆེན༌།’ ཏེ༌རུ༌ ལེབ༌བ༌ཅིག༌, ཏེ༌ ནས༌ས༌བོ༌ སྟོང༌པ༌ དང༌ ལག༌མོ༌ ལྡུས༌ཏེ༌ ཅི༌ཚང༌མ༌ རང༌རང༌ངི༌ མལ༌ལ༌ བོར༌ཏེ༌ ཐོང༌།
MAT 12:45 ཏེ༌ནེ༌ ཁོ༌ སོང༌ཏེ༌ ཁོ༌རང༌ངི༌ སང༌ མང༌ང༌ ངན༌པ༌ ཞན༌ གོང༌པོ༌ རྡུན༌ ཁོ༌རང༌ ཉམ༌པོ༌ ཁྲིད༌ཏེ༌ ཁྱོངས༌ ཡང༌ ཏེན༌ན༌ ནས༌སའེ༌ ནང༌ང༌ དུགས༌, ཏེ༌ནེ༌ ཏེ༌ མི༌བོའེ༌ ནས༌ལུག༌པོ༌ སྔུན༌ནི༌ སང༌ ཐུའ༌ སོང༌།” “འི༌ མི༌རབས༌ ངན༌པ༌གུན༌ལའང༌ ཏེན༌ན༌ ཙོགས༌ ཇིགས༌ནང༌ཅན༌ནི༌ ནས༌ལུག༌ ཤར༌ཨིན༌།”
MAT 12:46 གཙོ༌བོ༌ ཡེ༌ཤུའི༌ མི༌ཚོགས༌ལ༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ཁོང༌ངི༌ ཨ༌མ༌ དང༌ ནོ༌གུན༌ ཡོངས༌ཏེ༌, ཁོང༌ང༌ སྤེ༌ར༌ ཏང༌ཅེས༌ལ༌ ཁོང༌གུན༌ ཁང༌པའེ༌ ཕི༌ལོག༌ག༌ སྲུངས༌ཏེ༌ དུགས༌།
MAT 12:47 མི༌ཞིག༌གི༌ ཁོང༌ང༌ ཟེརས༌, “ཉེ༌རང༌ངི༌ ཨ༌མ༌ དང༌ ནོ༌གུན༌ ཉེ༌རང༌ང༌ སྤེ༌ར༌ ཏང༌ཅེས༌ལ༌ ཕི༌ལོག༌ག༌ སྲུང༌ཏེ༌ དུག༌།”
MAT 12:48 ཡེ༌ཤུའི༌ ཁོའ༌ ལན༌སལས༌, “སུ༌ ཨིན༌ནོག༌ ངའེ༌ ཨ༌མ༌ དང༌ ནོ༌གུན༌།”
MAT 12:49 ལོབ༌ཕྲུགས༌གུན༌ ཆོགས༌ལ༌ ཛི༌གུ༌ ཙུགས༌ཏེ༌, “འི༌གུན༌ ངའེ༌ ཨ༌མ༌ དང༌ ནོ༌གུན༌ ཨིན༌།
MAT 12:50 ངའེ༌ ཡབ༌ དཀོན༌མཆོག༌ ནམ༌ཁའེ༌ ནང༌ང༌ ཞུགས༌ཏེ༌ ཡོད༌ཁན༌ནི༌ ཐུག༌གོངས༌ ནང༌ཞིན༌ ཅོ༌ཁན༌གུན༌ ངའེ༌ ཨ༌མ༌ དང༌ མིང༌སྲིང༌ གུན༌ ཨིན༌།”
MAT 13:1 ཏེན༌ན༌ ཞག༌ག༌ གཙོ༌བོ༌ ཡེ༌ཤུ༌ ཁང༌པ༌ནེ༌ བིང༌ང༌ ཛད༌ཏེ༌ ཚོའེ༌ ཐའ༌མ༌ ཞུགས༌།
MAT 13:2 ཁོང༌ ཡོད༌ས༌ མི༌ཚོགས༌ མངས༌ཏེའང༌ མང༌པོ༌ ཛོམ༌པ༌ ཁོང༌ གྲུ༌ཟིང༌ངི༌ ནང༌ང༌ ཞོན༌ཏེ༌ ཞུགས༌, ཡང༌ མི༌ ཚང༌མ༌ ཚོའེ༌ ཐའ༌མ༌ དུགས༌།
MAT 13:3 ཏེ༌ནེ༌ ཁོང༌ངི༌ མི༌གུན༌ལ༌ རུངས༌ གྱུད༌ཏེ༌ ལབ༌ཞ༌ མང༌པོ༌ སལ༌ལ༌ ཛད༌ཏེ༌ མོལས༌, “ཉོན༌ཤིག༌, ཞིང༌བད༌པ༌ཞིག༌ ས༌འོན༌ ཏབ༌བ༌ལ༌ སོང༌།
MAT 13:4 ཞིང༌ང༌ ས༌འོན༌ ཏབ༌ ཟ༌ནེ༌ ཁ༌ཅིག༌ ལམ༌མི༌ཀ༌ བུད༌, ཅི༌པ༌ ཡོངས༌ཏེ༌ ཏེ༌གུན༌ ཟོས༌།
MAT 13:5 ས༌འོན༌ ཁ༌ཅིག༌ ས༌ མང༌པོ༌ མེད༌སའེ༌ བྲག༌གི༌ཀ༌ བུད༌, ས༌ མང༌པོ༌ མེད༌ཅེས༌པོའེ༌ ས༌འོན༌བོ༌ གྱོགས༌པ༌ སྐྱེས༌།
MAT 13:6 ཨིན༌ནའང༌ ཉི༌མའེ༌ ཚད༌དི༌ ཞས༌ཏེ༌ ཞིང༌ སྐྱེ༌ཁན༌བོ༌ ཚིག༌, ཡང༌ པ༌ཀྲག༌ ཏིང༌ཅན༌ མེད༌ པ༌སང༌, ཏེ༌བོ༌ སྐམས༌ཏེ༌ ཤི༌།
MAT 13:7 ས༌འོན༌ ཁ༌ཅིག༌ ཚེར༌མང༌ངི༌ ཕྲོའ༌ བུད༌, ཡང༌ ཚེར༌མང༌ སྐྱེས༌ཏེ༌ ནན༌པ༌, ཞིང༌བོ༌ ལྡན༌ མ༌ཐུབ༌།
MAT 13:8 ཞན༌ ས༌འོན༌གུན༌ ས༌ གྱལ༌ལ༌ ཡོད༌སའེ༌ ཞིང༌ངི༌ཀ༌ བུད༌པ༌, སྟོན༌ཐོག༌ སྨིན༌, ཀ༌བོ༌ ས༌འོན༌ ཏབ༌ཁན༌ནི༌ སང༌ 30, 60, ཡང༌ 100 གྱུར༌ སྨིན༌།
MAT 13:9 ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།”
MAT 13:10 ལོབ༌ཕྲུགས༌གུན༌ ཡོངས༌ཏེ༌ ཁོང༌ང༌ ཏྲིས༌, “ཉེ༌རང༌ངི༌ མི༌གུན༌ལ༌ རུངས༌ གྱུད༌ཏེ༌ ལབ༌ཞ༌ ཅིའ༌ སལ༌ལ༌ ཛད༌དད༌།”
MAT 13:11 ཡེ༌ཤུའི༌ ལན༌སལས༌, “ནམ༌ཁའེ༌ གྱལ༌སྲིད༌དི༌ སང༌ཝ༌གུན༌ ཧ༌གོ༌ཅེས༌སི༌ སྐབས༌ ཁྱོ༌ཞ༌གུན༌ལ༌ སལ༌ལ༌ ཛད༌ཏེ༌ ཨིན༌ནོག༌, ཨིན༌ནའང༌ ཁོང༌གུན༌ལ༌ མ༌སལས༌།
MAT 13:12 ངའེ༌ ལབ༌ཞ༌ ཉན༌ཁན༌གུན༌ལ༌ མང༌ང༌ ཧ༌གོ༌ཅུག༌ག༌ ཛད༌ཨིན༌, མ༌ཚད༌ ཁོང༌ངི༌ ནང༌ནེ༌ ལུད༌ཏེ༌ ཆེན༌ ཨིན༌ནའང༌ མ༌ཉན༌ཁན༌གུན༌ནི༌ ནང༌ནེ༌ ཧ༌གོ༌ཏེ༌ ཡོད༌ཁན༌བོའང༌ ཁྱེར༌ར༌ ཛད༌ཨིན༌།
MAT 13:13 ངའེ༌ རུངས༌ གྱུད༌ཏེ༌ ཤད༌ཅེས༌སི༌ ཏོན༌བོ༌ ནི༌ འི༌བོ༌ ཨིན༌, ཁོང༌གུན༌ནི༌ ལྟ༌དུག༌ ཨིན༌ནའང༌ ཁོང༌གུན༌ལ༌ དེན༌བ༌ ཐོང༌ང༌ མི༌དུག༌, ཉན༌དུག༌ ཨིན༌ནའང༌ ཁོང༌གུན༌ལ༌ ཚོར༌ར༌ ཡ༌ ཧ༌གོ༌ ཐུབ༌བ༌ མི༌དུག༌།
MAT 13:14 ཏེ༌བོའེ༌ ཡེ༌ཤ༌ཡཱ༌ ལུང༌སྟོན༌པའེ༌ མ༌འོང༌ ལུང༌སྟན༌བོ༌ གྲུབ༌ཏེ༌ ཨིན༌ནོག༌, ཀ༌བོ༌ ‘ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌, ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌།
MAT 13:15 ཅིའ༌ཟེར༌ན༌ ཁོང༌གུན༌ནི༌ སྙིང༌ སྐྱོང༌པོ༌ གྱུར༌ཏེ༌ དུག༌། ནམ༌ཅོག༌གུན༌ སྒགས༌ཏེ༌ མིག༌གུན༌ ཙུམས༌ཏེ༌ དུག༌ ཏེ༌ མ༌ནེ༌ ཁོང༌གུན༌ནི༌ ནམ༌ཅོག༌ནེ༌ ཚོར༌ཏེ༌ མིག༌གུན༌ནེ༌ ཐོང༌ཏེ༌, ཁོང༌གུན༌ནི༌ སྙིང༌ནེ༌ ང༌ སུ༌ ཨིན༌ཁན༌བོ༌ ཧ༌གོ༌ཏེ༌ ང༌ ཆོགས༌ལ༌ སེམས༌ གྱུར༌ཏེ༌, ངའེ༌ ཁོང༌གུན༌ ཕན༌ཅུགས༌ཏེ༌ ཡོད༌གྲོ༌།’”
MAT 13:16 “ཨིན༌ནའང༌ ཁྱོ༌ཞའེ༌ མིག༌ དང༌ ནམ༌ཅོག༌ གུན༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁྱོ༌ཞའེ༌ མིག༌གི༌ ཐོང༌ང༌ནོག༌ ཡང༌ ནམ༌ཅོག༌གི༌ ཚོར༌ར༌ནོག༌།
MAT 13:17 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞ༌གུན༌ལ༌ ཐོང༌ཁན༌ དང༌ ཚོར༌ཁན༌ གུན༌, སྔུན༌མའེ༌ ལུང༌སྟོན༌པ༌ དང༌ མི༌ ཀྲང༌པོ༌ མང༌པོ༌ཞིག༌གི༌ ཐོང༌ཅེས༌ དང༌ ཚོར༌ཅེས༌སི༌ དོད༌པ༌ ཡོད༌ནའང༌ མ༌ཐོང༌ང༌ ཡང༌ མ༌ཚོར༌ར༌ ཨིན༌པིན༌།”
MAT 13:18 “ཏ༌ ཞིང༌བད༌པའེ༌ ས༌འོན༌ ཏབ༌ཁན༌ནི༌ རུངས༌སི༌ ཏོན༌བོ༌ ཉོན༌།
MAT 13:19 ལམ༌མ༌ ས༌འོན༌ བུད༌ཁན༌གུན༌ ནི༌ ནམ༌ཁའེ༌ གྱལ༌སྲིད༌དི༌ བཀའ༌ ཚོར༌ཏེའང༌ ཧ༌མ༌གོ༌ཁན༌གུན༌ ཨིན༌ནོག༌ ཅིའ༌ཟེར༌ན༌ ཤེ༌ཏན༌ ཡོངས༌ཏེ༌ ཁོང༌གུན༌ནི༌ སྙིང༌ངི༌ ནང༌ང༌ ཏབ༌ཁན༌བོ༌ ཀོགས༌ཏེ༌ ཁྱེར༌ར༌ནོག༌།
MAT 13:20 བྲག༌གི༌ཀ༌ ས༌འོན༌ བུད༌ཁན༌བོ༌ ནི༌ ནམ༌ཁའེ༌ གྱལ༌སྲིད༌དི༌ བཀའ༌ ཚོར༌ར༌ཅིག༌ ཐད༌པོ༌ ཉམ༌པོ༌ ཏད༌པ༌ ཅོ༌ཁན༌གུན༌ ཨིན༌ནོག༌།
MAT 13:21 ཨིན༌ནའང༌ ཏེ༌བོའ༌ པ༌ཀྲག༌ ཏིང༌ཅན༌ མེད༌ པ༌སང༌ ཏུས༌ཡུན༌རིང༌ མི༌ལུས༌། ཁོང༌གུན༌ནི༌ བཀའེ༌ ནང༌ང༌ ཏད༌པ༌ ཅོ༌ཅེས༌པོའེ༌ ནགས༌ དང༌ བར༌དོ༌ ཐོང༌ང༌ཅིག༌ ཏད༌པ༌ ཕང༌ཨིན༌།
MAT 13:22 ཚེར༌མངས༌སི༌ ཕྲོའ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌, ཨིན༌ནའང༌ མི༌ཚེའེ༌ ཚེར༌ཁ༌ ཡང༌ ནོར༌རི༌ དོད༌པ༌ གུན༌ནི༌ ནན༌ཅེས༌པོའེ༌ ཏེ༌བོའ༌ བྲས༌བུ༌ སྨིན༌ན༌ མ༌ནོག༌།
MAT 13:23 ཨིན༌ནའང༌ ས༌ ཟང༌པོའེ༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཉན༌ཏེ༌ ཧ༌གོ༌ཁན༌གུན༌ ཨིན༌ནོག༌ ཡང༌ ཁོང༌གུན༌ལ༌ བྲས༌བུ༌, ས༌འོན༌ ཏབ༌ཁན༌བོའེ༌ སང༌ 30, 60, ཡང༌ 100 གྱུར༌ སྨིན༌ན༌ནོག༌།”
MAT 13:24 གཙོ༌བོ༌ ཡེ༌ཤུའི༌ ཡང༌ རུངས༌ཤིག༌ ཤད༌ད༌ ཛདས༌, “ནམ༌ཁའེ༌ གྱལ༌སྲིད༌ ནི༌ ཞིང༌བད༌པའེ༌ ཁོ༌རང༌ངི༌ ཞིང༌ང༌ ས༌འོན༌ ཟང༌པོ༌ ཏབ༌ཁན༌ ཙོགས༌ ཨིན༌།
MAT 13:25 ཚན༌ལ༌ ཚང༌མ༌ ཉིད༌ལོགས༌ཏེ༌ ཡོད༌ཏུས༌, ཁོའེ༌ གྲ༌འོ༌ ཡོངས༌ཏེ༌ ཀྲོ༌ ཏབ༌ཁན༌ནི༌ ཕྲོའ༌ ཙཱ༌ངན༌ནི༌ ས༌འོན༌ ཏབས༌ ཡང༌ སོང༌།
MAT 13:26 ཞིང༌ ལྡན༌ཏེ༌ སྙེ༌མ༌ བིང༌ང༌ཅིག༌ ཙཱ༌ངན༌ནའང༌ ཏེ༌ཕྲོའ༌ སྐྱེ༌ཁན༌བོ༌ ཐོང༌།”
MAT 13:27 “ལས༌མི༌གུན༌ ཡོངས༌ཏེ༌ སྤོན༌བོའ༌ ཟེརས༌, ‘ཉེ༌རང༌ངི༌ ཞིང༌ང༌ ས༌འོན༌ ཟང༌པོ༌ ཏབ༌བ༌ མ༌ཛད༌པིན༌ན༌? ཏེ༌ནེ༌ ཙཱ༌ངན༌ ཀ༌ཟུག༌གི༌ སྐྱེས༌ཏེ༌ ཨིན༌ཧེ༌?’”
MAT 13:28 “སྤོན༌བོའེ༌ ཟེརས༌, ‘གྲ༌འོའེ༌ ཏབས༌ཏེ༌ ཨིན༌ནོག༌།’ ལས༌མི༌གུན༌ནི༌ ཁོའ༌ ཟེརས༌, ‘ང༌ཞའ༌ སོང༌ཏེ༌ ཙཱ༌ངན༌པ༌གུན༌ ཕུད༌ཏེ༌ ཕང༌ང༌?’”
MAT 13:29 “ཁོའེ༌ ལན༌ཏངས༌, ‘མ༌ཆ༌, ཙཱ༌ངན༌པ༌ ཉམ༌པོ༌ གྲོའང༌ བུད༌ཏེ༌ ཡོང༌སྲིད༌ཅེས༌ ཨིན༌ནོག༌།
MAT 13:30 རྔབ༌ས༌ ཏང༌ཏང༌ ཚག༌པ༌ ཉིས༌ཀོ༌ ཉམ༌པོ༌ སྐྱེ༌ཅུག༌, ཏེ༌ཏུས༌ལ༌ ངའེ༌ རྔ༌ཁན༌གུན༌ལ༌ ཟེར༌ཨིན༌, སྔུན༌ལ༌ ཙཱ༌ངན༌པ༌ ཏུས༌ཏེ༌ མེའ༌ སྲག༌ག༌ལ༌ ལྡོམ༌, ཏེ༌ནེ༌ ཀྲོ༌གུན༌ བང༌ངེ༌ ནང༌ང༌ ཁྱེར༌།’”
MAT 13:31 གཙོ༌བོ༌ ཡེ༌ཤུའི༌ ཡང༌ རུངས༌ཤིག༌ ཤད༌ད༌ ཛདས༌, “ནམ༌ཁའེ༌ གྱལ༌སྲིད༌ ནི༌ ཉུང༌སྐར༌རི༌ ས༌འོན༌ ཙོགས༌ ཨིན༌ནོག༌ ཀ༌བོ༌ མི༌ཞིག༌གི༌ ཁོ༌རང༌ངི༌ ཞིང༌ང༌ ཏབ༌བ༌ལ༌ ཁྱེརས༌།
MAT 13:32 ས༌འོན༌གུན༌ནི༌ ཕྲོ༌ནེ༌ ཏེ༌བོ༌ ཚང༌མའེ༌སང༌ ཆུ༌ངུན༌ ཨིན༌ནའང༌, ལྡན༌ ཚར༌ར༌ཅིག༌ ཚས༌སི༌ ནང༌ང༌ ཚང༌མའེ༌སང༌ ཆེན༌མོ༌ ལྕང༌མ༌ གྱུར༌, ཡང༌ ནམ༌ཁའེ༌ ཅ༌གུན༌ ཡོངས༌ཏེ༌ ཏེ༌བོའེ༌ ཡལ༌གེ༌ཀ༌ ཚངས༌ ཅོས༌།”
MAT 13:33 ཁོང༌ངི༌ ཡང༌ རུངས༌ཤིག༌ ཤད༌ད༌ ཛདས༌, “ནམ༌ཁའེ༌ གྱལ༌སྲིད༌ ནི༌ སྐྱུར༌ ཙོགས༌ ཨིན༌, ཀ༌བོ༌ བུ༌མོའེ༌, ཕེ༌ མང༌པོའེ༌ ནང༌ང༌ སྲེས༌ཏེ༌ རུས༌པ༌ སྐྱུར༌བོ༌ པག༌པའེ༌ གང༌པོའེ༌ ནང༌ང༌ ཁྱེད༌།”
MAT 13:34 ཡེ༌ཤུའི༌ མི༌ཚོགས༌ལ༌ ལབ༌ཞ༌ སལ༌ ཟ༌ནེ༌ ཏུས༌གྱུན༌ རུངས༌ ཀོལ༌ལ༌ ཛད༌དད༌པིན༌། ཁོང༌ངི༌ རུངས༌ གྱུད༌ཏེ༌ མ༌སྟོགས༌ ཅི༌ ལབ༌ཞ༌ཞིག༌གའང༌ སལ༌ལ༌ མེད༌པིན༌།
MAT 13:35 ཏེ༌བོའེ༌ ལུང༌སྟོན༌པ༌ གྱུད༌ཏེ༌ སྔུན༌ལ༌ མོལ༌ཁན༌གུན༌ དྲན༌དྲ༌ གྲུབ༌ཏེ༌ ཨིན༌, “ངའེ༌ མི༌གུན༌ལ༌ རུངས༌ གྱུད༌ཏེ༌ སྤེ༌ར༌ ཏང༌ཨིན༌། ཡང༌ ཇིག༌རྟེན༌ ཆགས༌པ༌ནེ༌ ཕར༌ལ༌ སངས༌ཏེ༌ ཡོད༌ཁན༌གུན༌ ཤད༌ཨིན༌།”
MAT 13:36 ཏེ༌ནེ༌ གཙོ༌བོ༌ ཡེ༌ཤུ༌ མི༌ཚོགས༌པོ༌ ཕི༌ལོག༌ག༌ བོར༌ཏེ༌ ཁང༌པའེ༌ ནང༌ང༌ སྐྱོདས༌། ཁོང༌ངི༌ ལོབ༌ཕྲུགས༌གུན༌ ཡོངས༌ཏེ༌ ཁོང༌ང༌ ཟེརས༌, “ཙཱ༌ངན༌ནི༌ རུངས༌སི༌ ཏོན༌བོ༌ ང༌ཞའ༌ ཧ༌གོ༌ཅུག༌ག༌ ཛད༌དའང༌།”
MAT 13:37 ཁོང༌ངི༌ མོལས༌, “ས༌འོན༌ ཟང༌པོ༌ ཏབ༌ཁན༌བོ༌, མི༌རིགས༌སི༌བུ༌ ཨིན༌།
MAT 13:38 ཞིང༌བོ༌ ཇིག༌རྟེན༌, ས༌འོན༌ ཟང༌པོ༌ ནམ༌ཁའེ༌ གྱལ༌སྲིད༌དི༌ མི༌གུན༌, ཡང༌ ཙཱ༌ངན༌བོ༌ ངན༌པ༌ ཤེ༌ཏན༌ནི༌ མི༌གུན༌ ཨིན༌ནོག༌།
MAT 13:39 ཙཱ༌ངན༌ ཏབ༌ཁན༌ནི༌ གྲ༌འོ༌ ནི༌ རྡུད༌གུན༌ནི༌ གོ༌བ༌, རྔབ༌ས༌ ནི༌ ཐའ༌མའེ༌ ཏུས༌ ཡང༌ རྔ༌ཁན༌གུན༌ ནི༌ ཕོ༌ཉ༌གུན༌ ཨིན༌ནོག༌།”
MAT 13:40 “ཐའ༌མའེ༌ ཏུས༌ལ༌ ཙཱ༌ངན༌ ཏུས༌ཏེ༌ མེའ༌ སྲག༌ཁན༌ ཙོགས༌ ཇུང༌ཨིན༌།
MAT 13:41 མི༌རིགས༌སི༌བུའི༌ ཁོ༌རང༌ངི༌ ཕོ༌ཉ༌གུན༌ ཀལ༌ཨིན༌, ཡང༌ ཁོང༌གུན༌ནི༌ ཁོའེ༌ གྱལ༌སྲིད༌དི༌ ནང༌ནེ༌ སྡིག༌པའེ༌ གྱུ༌ ཚང༌མ༌ དང༌ ངན༌པ༌ ཅོ༌ཁན༌ ཚང༌མ༌ ཕིང༌ཨིན༌།
MAT 13:42 ཡང༌ ཕོ༌ཉ༌གུན༌ནི༌ ཁོང༌ ཚང༌མ༌ ཉལ༌ཝའེ༌ མེའེ༌ ནང༌ང༌ ཕང༌ཨིན༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།
MAT 13:43 ཏེ༌ནེ༌ མི༌ ཀྲང༌པོ༌གུན༌ ཁོང༌གུན༌ནི༌ ནམ༌ཁའེ༌ ཡབ༌བི༌ གྱལ༌སྲིད༌དི༌ ནང༌ང༌ ཉི༌མ༌ ཙོགས༌ལ༌ ལྡང༌ཤན༌ བར༌ཨིན༌། ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།”
MAT 13:44 “ནམ༌ཁའེ༌ གྱལ༌སྲིད༌ ནི༌ ཞིང༌ངི༌ ནང༌ང༌ སྦས༌ཏེ༌ ཡོད༌ཁན༌ནི༌ གྱུ༌ནོར༌ རིན༌ཅན༌ ཙོགས༌ ཨིན༌། མི༌ཞིག༌ག༌ ཏེ༌བོ༌ ཐོབ༌བ༌ཅིག༌ ཐད༌ཏེ༌ ཏེན༌ན༌ ཞིང༌ངི༌ ནང༌ང༌ ཡང༌སྐྱར༌ སྦས༌, ཏེ༌ནེ༌ ཁོ༌ སོང༌ཏེ༌ ཡོད༌ཁན༌ནི༌ ནོར༌ ཚང༌མ༌ ཙོངས༌ ཡང༌ ཏེ༌ ཞིང༌བོ༌ ཉོས༌།”
MAT 13:45 “ནམ༌ཁའེ༌ གྱལ༌སྲིད༌ ནི༌ ཚོང༌པའེ༌ ཙལ༌ཁན༌ནི༌ མུ༌ཏིག༌ ལག༌མོ༌ རིན༌ཅན༌གུན༌ ཙོགས༌ ཨིན༌།
MAT 13:46 མུ༌ཏིག༌ རིན༌ཅན༌ ཐོབ༌བ༌ཅིག༌ ཁོ༌ སོང༌ཏེ༌ ཁོ༌རང༌ངི༌ གྱུ༌ནོར༌ ཚང༌མ༌ ཙོངས༌ཏེ༌, ཏེ༌བོ༌ ཉོས༌།”
MAT 13:47 གཙོ༌བོ༌ ཡེ༌ཤུའི༌ མོལས༌, “ནམ༌ཁའེ༌ གྱལ༌སྲིད༌ ནི༌ གྱ༌ཚོའེ༌ ནང༌ང༌ ཉ༌རིགས༌ སྣ༌ཚོགས༌ ཟུམ༌མ༌ལ༌ ཕང༌ཁན༌ནི༌ ཉ༌དོལ༌ ཙོགས༌ ཨིན༌།
MAT 13:48 ཉ༌དོལ༌བོ༌ གང༌ང༌ཅིག༌ ཚོའེ༌ ཐའ༌མ༌ དྲུད༌ཏེ༌ ཁྱེར༌ཨིན༌, སའེ༌ཀ༌ དུགས༌ཏེ༌ ཉ༌ གྱལ༌ལ༌གུན༌ པག༌ཙེ༌ ནང༌ང༌ གྱངས༌ ཡང༌ གྱལ༌ལ༌ མེད༌ཁན༌གུན༌ ཕངས༌།
MAT 13:49 ཏེན༌ན༌ ཙོགས༌ ཐའ༌མའེ༌ ཏུས༌ལ༌ ཇུང༌ཨིན༌, ཕོ༌ཉ༌གུན༌ སྐྱོད༌ཏེ༌ མི༌ ཀྲང༌པོ༌གུན༌ནི༌ ཕྲོ༌ནེ༌ ངན༌པ༌གུན༌ ཕེའ༌ ཛད༌ཏེ༌,
MAT 13:50 ཁོང༌གུན༌ ཉལ༌ཝའེ༌ མེའེ༌ ནང༌ང༌ ཕང༌ཨིན༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།”
MAT 13:51 ཡེ༌ཤུའི༌ ཁོང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “འི༌ ཚང༌མ༌ ཁྱོ༌ཞའེ༌ ཧ༌གོའ༌?” ཁོང༌གུན༌ནི༌ ལན༌ཏངས༌, “ཧ༌གོ༌ལེ༌།”
MAT 13:52 ཡེ༌ཤུའི༌ ཁོང༌གུན༌ལ༌ མོལས༌, “ཆོས༌ཁྲིམས༌ ལབ༌ཁན༌, ནམ༌ཁའེ༌ གྱལ༌སྲིད༌དི༌ ལོབ༌ཕྲུགས༌ གྱུར༌ཁན༌ ཚང༌མ༌ ཁང༌པའེ༌ ཁང༌དག༌ ཙོགས༌ ཨིན༌, ཀ༌བོའེ༌ བང༌ཛོད༌དི༌ ནང༌ནེ༌ རིན༌ཅན༌ ནོར༌ སོ༌མ༌ དང༌ སྙིང༌པ༌ ཉིས༌ཀོ༌ ཕིངས༌ཏེ༌ ཁྱོང༌ང༌ནོག༌།”
MAT 13:53 གཙོ༌བོ༌ ཡེ༌ཤུའི༌ རུངས༌གུན༌ ཤད༌ ཚར༌ར༌ཅིག༌ ཁོང༌ ཏེ༌ཀ༌ནེ༌ སྐྱོདས༌།
MAT 13:54 ཁོང༌རང༌ངི༌ གྲོང༌ཁྱེར༌ལ༌ སྐྱོད༌ཏེ༌ དུ༌ཁང༌ངི༌ ནང༌ང༌ མི༌གུན༌ལ༌ ལབ༌ཞ༌ སལ༌ཅེས༌ གོ༌ཟུགས༌། མི༌གུན༌ ཧ༌ལས༌ཏེ༌ ཏྲིས༌, “འི༌ མི༌བོའ༌ ཤེས༌རབས༌ དང༌ ཛད༌པ༌གུན༌ སྟན༌ཅེས༌སི༌ ཁྱུད༌ ཀ༌ནེ༌ ཐོབ༌ཀྱག༌?
MAT 13:55 ཁོ༌ ཤིང༌ཁན༌བོའེ༌ བུ༌ཚ༌ མ༌ནོག༌ག༌? ཁོའེ༌ ཨ༌མ༌ མིར༌ཡམ༌ ཡང༌ ཡ༌ཀོབ༌, ཡོ༌སེབ༌, ཤི༌མོན༌ དང༌ ཡུ༌དཱ༌ གུན༌ ཁོའེ༌ ནོ༌ མ༌ནོག༌ག༌?
MAT 13:56 ཁོའེ༌ སྲིང༌མོ༌ ཚང༌མ༌ ང༌དང༌གུན༌ ཉམ༌པོ༌ མེད༌ད༌? ཏེ༌ནེ༌ འི༌ མི༌བོའ༌ ཏེ༌ ཁྱུད༌གུན༌ ཀ༌ནེ༌ ཐོབ༌ཀྱག༌?”
MAT 13:57 ཁོང༌གུན༌ ཚིག༌ཅེས༌པོའེ༌ ཁོང༌ངི༌ཀ༌ ཏད༌པ༌ མ༌ཅོས༌། ཡེ༌ཤུའི༌ ཁོང༌གུན༌ལ༌ མོལས༌, “ལུང༌སྟོན༌པ༌ཞིག༌ག༌ ཁོ༌རང༌ངི༌ ཡུལ༌ ཡང༌ ཁོ༌རང༌ངི༌ ནང༌ཚངས༌སི༌ ནང༌ང༌ མ༌ནེ༌, ཞན༌ ཀ༌རུང༌ས༌ རྩི༌ཝ༌ ཅོ༌རུག༌།”
MAT 13:58 ཁོང༌གུན༌ནི༌ ཏད༌པ༌ མི༌ཅོ༌ཅེས༌པོའེ༌ ཞས༌ཏེ༌, ཡེ༌ཤུའི༌ ཏེ༌རུ༌ ཧ༌ལས༌ཤེས༌སི༌ ཛད༌པ༌ མང༌པོ༌ སྟན༌ན༌ མ༌ཛདས༌།
MAT 14:1 ཏེན༌ན༌ ཏུས༌ལ༌ ཀའ༌ལོན༌ ཧེ༌རོད༌ལ༌ གཙོ༌བོ༌ ཡེ༌ཤུའི༌ ཆག༌ལས༌གུན༌ནི༌ སྐོར༌ལ༌ ཚོར༌ཏེ༌
MAT 14:2 ཁོའེ༌, ཁོའ༌ ཁད༌ད༌ ཏང༌ཁན༌གུན༌ལ༌ ཟེརས༌, “འི༌ མི༌བོ༌ ཁྲུས༌སལ༌ཁན༌ ཡོ༌ཧཱ༌ནན༌ ཨིན༌ནོག༌, ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌ ཁོང༌ང༌ ཛད༌པ༌ སྟན༌ཅེས༌སི༌ ཁྱུད༌ ཡོད༌ཏེ༌ ཨིན༌ནོག༌།”
MAT 14:3 ཧེ༌རོད༌དི༌ ཡོ༌ཧཱ༌ནན༌ ཟུམས༌ཏེ༌ ལྕག༌ཐག༌ག༌ ཏགས༌ཏེ༌ ཙོན༌ཁང༌ང༌ ཀག༌ཅུགས༌ཏེ༌ ཨིན༌པིན༌། ཁོའེ༌ ཏེ༌བོ༌ ཁོ༌རང༌ངི༌ ཨ༌ཅོ༌ ཕི༌ལིབ༌བི༌ ན༌མ༌ ཧེ༌རོ༌དཱིས༌སི༌ ཕིའ༌ ཅོས༌,
MAT 14:4 ཅིའ༌ཟེར༌ན༌ ཡོ༌ཧཱ༌ནན༌ནི༌ ཧེ༌རོད༌ལ༌ མོལ༌ལད༌པིན༌, “ཁྱོ༌རང༌ངི༌ ཨ༌ཅོའེ༌ ན༌མ༌ ཉམ༌པོ༌ ན༌མ༌ ཅོ༌ཅེས༌པོ༌ དཀོན༌མཆོག༌གི༌ ཁྲིམས༌སི༌ གྱབ༌གལ༌ ཨིན༌ནོག༌།”
MAT 14:5 ཧེ༌རོད༌ལ༌ ཡོ༌ཧཱ༌ནན༌ སད༌ཉིན༌ ཡོད༌པིན༌, ཨིན༌ནའང༌ མི༌ཚོགས༌ལ༌ ཇིགས༌སད༌པིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ལ༌ ལུང༌སྟོན༌པ༌ རྩིའད༌པིན༌།
MAT 14:6 ཨིན༌ནའང༌ ཧེ༌རོད༌དི༌ སྐྱེ༌ཞག༌གི༌ ཞག༌ག༌, གྲོན༌པོ༌གུན༌ནི༌ དུན༌ལ༌ ཧེ༌རོ༌དཱིས༌སི༌ བུ༌མོའེ༌ རྩེས༌ཏང༌ཏེ༌ ཧེ༌རོད༌ སྲན༌ཏྲེ༌ ཐད༌ ཅུགས༌པ༌,
MAT 14:7 ཁོའེ༌ བུ༌མོའ༌ ཅི༌ གོས༌ནའང༌ ཏང༌ཨིན༌ ཟེར༌ཏེ༌ ནའ༌ ཁུརས༌།
MAT 14:8 བུ༌མོའེ༌ ཨ༌མའེ༌ ཟེར༌ཁན༌ ནང༌ཞིན༌, “ངའ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ གོ༌ ཐལ༌ལི༌ཞིག༌གི༌ཀ༌ སལ༌” ཟེརས༌།
MAT 14:9 གྱལ༌པོ༌ ཚེར༌ ཨིན༌ནའང༌ གྲོན༌པོ༌གུན༌ནི༌ དུན༌ལ༌ ནའ༌ ཁུར༌ཁན༌བོའེ༌ ཞས༌ཏེ༌ བུ༌མོའ༌ གོས༌ཁན༌བོ༌ ཏོང༌ ཟེར༌ཏེ༌ བཀའ༌ ཏངས༌།
MAT 14:10 ཏེ༌ནེ༌ ཙོན༌ཁང༌ངི༌ ནང༌ང༌ ཡོ༌ཧཱ༌ནན༌ནི༌ གོ༌ ཅད༌ཏེ༌
MAT 14:11 ཐལ༌ལི༌ཀ༌ ཁྱོངས༌ཏེ༌ ཧེ༌རོ༌དཱིས༌སི༌ བུ༌མོའ༌ ཏངས༌། བུ༌མོའེ༌ ཏེ༌བོ༌ ཁོ༌རང༌ངི༌ ཨ༌མ༌ ཡོད༌ས༌ ཁྱོངས༌།
MAT 14:12 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ ཡོངས༌ཏེ༌ ཁོང༌ངི༌ སྤུར༌བོ༌ ཁྱེར༌ཏེ༌ སུབས༌། ཏེ༌ནེ༌ ཁོང༌གུན༌ སོང༌ཏེ༌ ཡེ༌ཤུའ༌ ཤདས༌།
MAT 14:13 གཙོ༌བོ༌ ཡེ༌ཤུའི༌ ཏེ༌ ཇུང༌ཁན༌བོ༌ སན༌ན༌ཅིག༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ གྲུ༌ཟིང༌ཞིག༌གི༌ ནང༌ང༌ ཞོན༌ཏེ༌ སུའང༌ མེད༌སའེ༌ ནས༌ས༌ཞིག༌ག༌ སྐྱོདས༌། མི༌ཚོགས༌སི༌ ཏེ༌བོ༌ ཚོར༌ར༌ཅིག༌ གྲོང༌ཁྱེར༌གུན༌ནེ༌ བིང༌ཏེ༌ ཡེ༌ཤུ༌ སྐྱོད༌སའེ༌ ནས༌ས༌ གྲུལ༌ཏེ༌ སོང༌།
MAT 14:14 གྲུ༌ཟིང༌ནེ༌ བབས༌ཏེ༌ ཡེ༌ཤུའི༌ མི༌ཚོགས༌ ཆེན༌མོ༌ ཟིགས༌ས༌ཅིག༌, ཁོང༌ང༌ ཁོང༌གུན༌ནི༌ཀ༌ སྙིང༌རྗེ༌ སྐྱེའ༌ ཛད༌ཏེ༌ ནད༌པ༌གུན༌ གྱལ༌ཅུག༌ག༌ ཛདས༌།
MAT 14:15 ཉི༌མ༌ སྐྱོད༌ད༌ཅིག༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌ཏེ༌ ཟེརས༌, “གམ༌ཡུལ༌གུན༌ལ༌ སོང༌ཏེ༌ ཁོ༌རང༌གུན༌ནི༌ ཕིའ༌ ཟན༌ ཉོ༌ཅེས༌ལ༌ མི༌ཚོགས༌པོ༌ ལམ༌ཅུག༌ག༌ ཛད༌དའང༌ ཅིའ༌ཟེར༌ན༌ ང༌དང༌གུན༌ ཅའང༌ མེད༌སའེ༌ རི༌སྟོང༌ངི༌ ནང༌ང༌ ཨིན༌ནོག༌ ཡང༌ མུན༌ཅུའང༌ རུབ༌ཀྱིས༌ དུག༌།”
MAT 14:16 ཡེ༌ཤུའི༌ ལན༌སལས༌, “ཁོང༌གུན༌ ཆ༌གོས༌ མེད༌། ཁྱོ༌ཞའེ༌ ཁོང༌གུན༌ལ༌ ཟའ༌ཅེས༌ ཏོང༌།”
MAT 14:17 ཁོང༌གུན༌ནི༌ ཟེརས༌, “ང༌ཞའེ༌ ལག༌ག༌ ཏ༌གི༌ ལྔ༌ དང༌ ཉ༌ ཉིས༌ མ༌ནེ༌ མེད༌།”
MAT 14:18 ཡེ༌ཤུའི༌ མོལས༌ “ཏེ༌གུན༌ ངའེ༌ཀ༌ ཁྱོང༌།”
MAT 14:19 ཏེ༌ནེ༌ མི༌ཚོགས༌པོའ༌ རྩའི༌ཀ༌ དུག༌ཅེས༌ལ༌ མོལས༌། ཏ༌གི༌ ལྔ༌ དང༌ ཉ༌ ཉིས༌པོ༌ ཆག༌ག༌ ནམས༌ ཡང༌ ནམ༌ཁའ༌ ཟིགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཏ༌གི༌ ཅགས༌ཏེ༌ མི༌ཚོགས༌ལ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལ༌ལ༌ ཛདས༌།
MAT 14:20 ཁོང༌ ཚང༌མ༌ གྲང༌གྲང༌ ཟོས༌ ཡང༌ ལོབ༌ཕྲུགས༌གུན༌ནི༌ ལག༌ལུས༌གུན༌ ལྡུས༌པ༌ པག༌ཙེ༌ རྕུག༌ཉིས༌ གང༌།
MAT 14:21 བུ༌མོ༌ དང༌ ཕྲུ༌གུ༌གུན༌ མ༌ཐེའ༌ སྟོང༌ལྔ༌ ཟམ༌ཤིག༌ ཏེ༌རུ༌ ཟན༌ ཟའ༌ཁན༌ ཡོད༌པིན༌།
MAT 14:22 ཏེན༌ན༌མལ༌ལ༌ གཙོ༌བོ༌ ཡེ༌ཤུའི༌ མི༌ཚོགས༌པོ༌ ལོགས༌ཏེ༌ ལམ༌ཅུག༌ག༌ ཛད༌ ཟ༌ནེ༌ ཁོང༌ངི༌ ལོབ༌ཕྲུགས༌གུན༌ ཁོང༌རང༌ངི༌ སང༌ སྔུན༌ལ༌ གྲུ༌ཟིང༌ངི༌ ནང༌ང༌ ཚོའེ༌ འ༌ངོ༌ ཆོགས༌ལ༌ ལམ༌ཅུག༌ག༌ ཛདས༌།
MAT 14:23 མི༌ཚོགས༌ ལོག༌ཏེ༌ ལམ༌ཅུག༌ ཚར༌ར༌ཅིག༌ ཡེ༌ཤུ༌ ཅིག༌པོ༌ རི༌ཀ༌ མོས༌ལམ༌ ཞུའ༌ སྐྱོདས༌། ཁོང༌ ཏེ༌རུ༌ ཅིག༌པོ༌ ཡོད༌དི༌ ཏུས༌ མུན༌ཅུ༌རུབ༌།
MAT 14:24 ཏེན༌ན༌ ཏུས༌ལ༌ གྲུ༌ཟིང༌བོ༌ ས༌ཀྱད༌ནེ༌ ཐག༌རིང༌ང༌ ལེབས༌ཏེ༌ ཡོད༌ ཟ༌ནེ༌, དུན༌ནེ༌ ལུངས༌པོ༌ ཀྲག༌པོ༌ ཡོངས༌པ༌ ཆུལ༌བག༌ གྲུ༌ཟིང༌ང༌ གྱབས༌།
MAT 14:25 ཧ༌ལམ༌ ང༌ཏོག༌ ཆུ༌ཚོད༌ སུམ༌པ༌ཞིག༌གི༌ཀ༌ ཡེ༌ཤུ༌ ཚོའེ༌ ཀ༌ནེ༌ གྲུལ༌ཨིན༌ ལོབ༌ཕྲུགས༌གུན༌ ཡོད༌ས༌ སྐྱོདས༌།
MAT 14:26 ལོབ༌ཕྲུགས༌གུན༌ནི༌ ཡེ༌ཤུ༌ ཚོའེ༌ ཀ༌ནེ༌ ཞབ༌གྲུལ༌ལ༌ སྐྱོད༌ཨིན༌ ཐོང༌ང༌ཅིག༌ མ༌སྲན༌ཏྲེ༌ ཇིགས༌ཏེ༌, ཀུ༌ཅོ༌ ཏང༌ཨིན༌, “ཤིན༌དྲེ༌ ཨིན༌ནོག༌” ཟེརས༌།
MAT 14:27 ཨིན༌ནའང༌ ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ མོལས༌, “ཇིགས༌ མ༌ཇིགས༌ ང༌ ཨིན༌། ཧམ༌པ༌ ཅོས༌།”
MAT 14:28 པི༌ཏྲར༌རི༌ ལན༌ཏངས༌, “གཙོ༌བོ༌ ཉེ༌རང༌ ཨིན༌ན༌ ངའ༌ ཆུའི༌ཀ༌ གྲུལ༌ཏེ༌ ཉེ༌རང༌ ཡོད༌ས༌ ཡོང༌ མོལ༌ལའང༌།”
MAT 14:29 ཡེ༌ཤུའི༌, “ཡོང༌” མོལས༌། པི༌ཏྲར༌ གྲུ༌ཟིང༌ནེ༌ བབས༌ཏེ༌ ཆུའི༌ཀ༌ གྲུལ༌ཨིན༌ ཡེ༌ཤུ༌ ཡོད༌ས༌ སོང༌།
MAT 14:30 ཨིན༌ནའང༌ ལུངས༌པོ༌ སྲན༌ཏྲེ༌ དང༌ ཆུལ༌བག༌ ཐོང༌ང༌ཅིག༌ ཁོ༌ ཇིགས༌ ཡང༌ ནུབ༌ཅེས༌ གོ༌ཟུག༌པ༌ ཀུ༌ཅོ༌ ཏངས༌ཏེ༌ ཟེརས༌, “གཙོ༌བོ༌ལེ༌, ང༌ སྐྱོབ༌བ༌ ཛད༌།”
MAT 14:31 ཏེན༌ན༌མལ༌ལ༌ ཡེ༌ཤུའི༌ ཆག༌ རྐྱང༌ང༌ ཛད༌ཏེ༌ ཁོ༌ ཟུམས༌, “ཏད༌པ༌ ཆུ༌ངུན༌ ཡོད༌ཁན༌ ཁྱོ༌རང༌ངི༌ ཐེ༌ཚོམས༌ ཅིའ༌ ཅོའད༌” མོལས༌།
MAT 14:32 ཁོང༌ ཉིས༌ཀོ༌ གྲུ༌ཟིང༌ངི༌ ནང༌ང༌ ཞོན༌ན༌ཅིག༌ ལུངས༌པོ༌བོ༌ ཆད༌།
MAT 14:33 གྲུ༌ཟིང༌ངི༌ ནང༌ང༌ ཡོད༌ཁན༌གུན༌ནི༌ ཁོང༌ང༌ ཅོལ༌ཨིན༌ ཟེརས༌, “དེན༌བ༌, ཉེ༌རང༌ དཀོན༌མཆོག༌གི༌ སྲས༌ ཨིན༌ནོག༌།”
MAT 14:34 ཁོང༌གུན༌ ཚོའེ༌ འ༌ངོ༌ ཆོགས༌ལ༌ སྐྱོདས༌ ཡང༌ ཆུའི༌ ཐའ༌མ༌ གེ༌ནེ༌ས༌རེད༌དི༌ གྲོང༌ཁྱེར༌ལ༌ ལེབ༌།
MAT 14:35 ཏེ༌ གྲོང༌ཁྱེར༌པ༌གུན༌ནི༌ ཡེ༌ཤུ༌ ཨིན༌ཁན༌བོ༌ ངོ༌ཤེས༌པ༌ ཉེ༌ཁོར༌རི༌ ནས༌ས༌ ཚང༌མ༌ལ༌ ཡེ༌ཤུ༌ སྐྱོད༌ཏེ༌ དུག༌ ཟེར༌ཏེ༌ ལོན༌ ཀལས༌། མི༌གུན༌ནི༌ ཟུ༌མོ༌ ཡོད༌ཁན༌ ཚང༌མ༌ ཁོང༌ ཡོད༌ས༌ ཁྱོངས༌།
MAT 14:36 ཁོང༌གུན༌ནི༌ ཟུ༌མོ༌ ཡོད༌ཁན༌གུན༌ལ༌ ཡེ༌ཤུའི༌ ནམ༌ཟའེ༌ ཀྲུ༌ཞིག༌ག༌ ལག༌པ༌ རྩེ༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌, ཡང༌ ཁོང༌ངི༌ ནམ༌ཟའ༌ ལག༌པ༌ རྩེ༌ཁན༌ ཚང༌མ༌ ཕན༌།
MAT 15:1 ཏེ༌ནེ༌ ཕ༌རུ༌ཤི༌པ༌ དང༌ ཆོས༌ཁྲིམས༌ལ༌ ཁས༌པ༌ ཁ༌ཅིག༌ ཡེ༌རུ༌ཤ༌ལེམ༌མི༌ གྱལ༌ས༌ནེ༌ གཙོ༌བོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌,
MAT 15:2 “ཉེ༌རང༌ངི༌ ལོབ༌ཕྲུགས༌གུན༌ནི༌ ང༌དང༌ངི༌ ཕ༌མེས༌པོའེ༌ ལུག༌སྲོལ༌ ཅིའ༌ ཅག༌ག༌ནོག༌? ཁོང༌གུན༌ནི༌ ཟན༌ ཟའེ༌ སང༌ སྔུན༌ལ༌ ལག༌པ༌ ཁྲུའ༌ མི༌དུག༌།”
MAT 15:3 ཡེ༌ཤུའི༌ ཁོང༌གུན༌ལ༌ ལན༌སལས༌, “ཁྱོ༌ཞའེ༌ ཁྱོ༌ཞ༌རང༌ངི༌ ལམ༌ལུག༌སྲོལ༌ སྲུང༌ཅེས༌ལ༌ དཀོན༌མཆོག༌གི༌ བཀའ༌ ཅིའ༌ ཅག༌གད༌?
MAT 15:4 སྤེར༌ན༌ དཀོན༌མཆོག༌གི༌ མོལ༌ཏེ༌ ཨིན༌ནོག༌, ‘རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌,’ ཡང༌ ‘རང༌ངི༌ ཨ༌བ༌ ཡ༌ ཨ༌མའ༌ ངན༌ ཏབ༌ཁན༌གུན༌ སད༌གོས༌།’
MAT 15:5 ཨིན༌ནའང༌ ཁྱོ༌ཞའེ༌ མི༌གུན༌ལ༌ ཁོ༌རང༌ངི༌ ཨ༌བ༌ ཡ༌ ཨ༌མའ༌, ‘ངའེ༌ ཉེ༌རང༌ང༌ རོགས༌ ཅོ༌གོ༌ཤེས༌པོ༌ དཀོན༌མཆོག༌ག༌ ཕུལ༌ཨིན༌ ཟེར༌ཏེ༌ ཞལ༌ཆད༌ ཅོས༌ཏེ༌ ཨིན༌ ཟེར༌ཅེས༌ ལབ༌དུག༌།’
MAT 15:6 ཏེ༌ཟུག༌ ཅོ༌ཅེས༌ནེ༌ ཁྱོ༌ཞ༌གུན༌ནི༌ ཁོང༌གུན༌ལ༌ རང༌ངི༌ ཨ༌བ༌ ཡ༌ ཨ༌མའ༌ རྩི༌ཝ༌ ཅོ༌ མ༌ཅུག༌ག༌ ཨིན༌ནོག༌, ཏེན༌ན༌བོའེ༌ཕིའ༌ ཁྱོ༌ཞ༌རང༌ངི༌ ལམ༌ལུག༌སྲོལ༌ སྲུང༌ཅེས༌སི༌ ནང༌ང༌ ཁྱོ༌ཞའེ༌ དཀོན༌མཆོག༌གི༌ བཀའ༌ ཅགས༌ཏེ༌ ཨིན༌ནོག༌།
MAT 15:7 ཁ༌ཆོས༌པ༌ ཁྱོ༌ཞའེ༌ སྐོར༌ལ༌ དཀོན༌མཆོག༌གི༌ ཡེ༌ཤ༌ཡཱ༌ གྱུད༌ཏེ༌ མ༌འོང༌ ལུང༌སྟན༌ སལ༌ཁན༌བོ༌ དེན༌བ༌ ཨིན༌ནོག༌, ཀ༌བོའེ༌ ནང༌ང༌,
MAT 15:8 ‘འི༌ མི༌གུན༌ནི༌ ཁའ༌ནེ༌ ངའ༌ རྩི༌ཝ༌ ཅོ༌ནའང༌ ཁོང༌གུན༌ནི༌ སྙིང༌གུན༌ ང༌ནེ༌ ཐག༌རིང༌ དུག༌།
MAT 15:9 ཁོང༌གུན༌ནི༌ ངའ༌ ཅོལ༌ཅེས༌པོ༌ ཕན༌མི༌ཐོགས༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌གི༌ བཀའ༌ཁྲིམས༌སི༌ ཚབས༌ལ༌ ཁོང༌རང༌གུན༌ནི༌ ཅོ༌ཁན༌ནི༌ ཁྲིམས༌གུན༌ ལབ༌དུག༌།’”
MAT 15:10 ཡེ༌ཤུའི༌ མི༌ཚོགས༌ལ༌ བོད༌ད༌ ཛད༌ཏེ༌ མོལས༌, “ངའེ༌ ཟེར༌ཁན༌བོ༌ ཉན༌ཏེ༌ ཧ༌གོ༌ཅེས༌སི༌ རྩོན༌གྲུས༌ ཅོས༌།
MAT 15:11 ཁའེ༌ ནང༌ང༌ ཆའ༌ཁན༌གུན༌ནི༌ མི༌ ཚི༌ཏུ༌ གྱུར༌ཅུག༌ག༌ མ༌ནོག༌, ཨིན༌ནའང༌ ཁའེ༌ ནང༌ནེ༌ སྤེ༌ར༌ ངན༌པ༌ བིང༌ཁན༌བོའེ༌ ཚི༌ཏུ༌ གྱུར༌ ཅུག༌ག༌ནོག༌།”
MAT 15:12 ཏེ༌ནེ༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌ཏེ༌ ཟེརས༌, “ཉེ༌རང༌ངི༌ མོལ༌ཁན༌བོའེ༌ ཕ༌རུ༌ཤི༌པ༌གུན༌ མ༌སྲན༌ཏྲེ༌ ཁྲེལ༌བ༌ ཆ༌ཅུག༌ཁན༌བོ༌ ཉེ༌རང༌ངི༌ ཁྱེན༌ན༌?”
MAT 15:13 ཡེ༌ཤུའི༌ ལན༌སལས༌, “ངའེ༌ ནམ༌ཁའེ༌ ཡབ༌བི༌ མ༌ཙུག༌ཁན༌ནི༌ ལྕང༌མ༌གུན༌ པ༌ཀྲག༌ནེ༌ ཕུད༌ད༌ ཛད༌ཨིན༌།
MAT 15:14 ཚེར༌ཁའ༌ མ༌ཅོ༌, ཏེ༌ ཕ༌རུ༌ཤི༌པ༌གུན༌ ཞ༌རའ༌ ལམ༌སྟན༌ཁན༌ནི༌ ཞ༌ར༌གུན༌ ཨིན༌ནོག༌, ཀལ༌ཏེས༌ ཞ༌ར༌ཞིག༌གི༌ ཞ༌ར༌ཞིག༌ག༌ ལམ༌སྟན༌ན༌ ཉིས༌ཀོ༌ ས༌དོང༌ངི༌ ནང༌ང༌ བུད༌ཨིན༌།”
MAT 15:15 པི༌ཏྲར༌རི༌ ཟེརས༌, “ང༌ཞ༌གུན༌ལ༌ ཏེ༌ རུངས༌པོ༌ ཧ༌གོ༌ཅུག༌ག༌ ཛད༌དའང༌།”
MAT 15:16 ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌, “ཏ༌རུང༌ངའང༌ ཁྱོ༌ཞའ༌ ཧ༌མ༌གོའ༌?
MAT 15:17 ཐོང༌ང༌ མི༌དུག༌ག༌, ཁའ༌ནེ༌ ཟའ༌ཁན༌ནི༌ ཟན༌བོ༌ གྲོད༌པའེ༌ ནང༌ང༌ ལེབས༌ཏེ༌ ཟུགས༌པོ༌ནེ༌ ཕི༌ལོག༌ག༌ བིང༌ང༌ནོག༌?
MAT 15:18 ཨིན༌ནའང༌ ཁའ༌ནེ༌ བིང༌ཁན༌ སྤེ༌ར༌ སེམས༌སི༌ ནང༌ནེ༌ བིང༌ཏེ༌ མི༌གུན༌ ཚི༌ཏུ༌ གྱུར༌ ཅུག༌ག༌ནོག༌།
MAT 15:19 ཅིའ༌ཟེར༌ན༌ སམ༌བ༌ ངན༌པ༌, མི༌ སད༌ཅེས༌, རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌, ལུས༌བྲེལ༌ ངན༌པ༌, རྐུ༌ཅེས༌, ཁྲིམས༌ཁུང༌ང༌ ཟུན༌བ༌ སྤང༌པོ༌ ཏང༌ཅེས༌ དང༌ ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌ གུན༌ སེམས༌སི༌ ནང༌ནེ༌ བིང༌ང༌ནོག༌།
MAT 15:20 ཏེ༌ ཚང༌མའེ༌ མི༌གུན༌ ཚི༌ཏུ༌ གྱུར༌ ཅུག༌ག༌ནོག༌, ཨིན༌ནའང༌ ལག༌པ༌ མ༌ཁྲུའ༌ ཟན༌ ཟའ༌ཅེས༌པོའེ༌ མི༌ ཚི༌ཏུ༌ གྱུར༌ཅུག༌ག༌ མ༌ནོག༌།”
MAT 15:21 ཏེ༌ཀ༌ནེ༌ བིང༌ཏེ༌ གཙོ༌བོ༌ ཡེ༌ཤུ༌ ཏཱ༌ཡིར༌ དང༌ སི༌དོན༌ནི༌ གྱལ༌ས༌གུན༌ལ༌ སྐྱོདས༌།
MAT 15:22 ཏེ༌ ཡུལ༌ཇོངས༌སི༌ ཀེ༌ནན༌མ༌ བུ༌མོ༌ཞིག༌ ཁོང༌ ཡོད༌ས༌ ཡོངས༌ཏེ༌ ཀུ༌ཅོ༌ ཏང༌ཨིན༌ ཟེརས༌, “གྱལ༌པོ༌ དཱ༌བིད༌དི༌ པུར༌གྱུད༌ གཙོ༌བོ༌ལེ༌, ངའེ༌ཀ༌ སྙིང༌རྗེ༌ ཛད༌། ངའེ༌ བུ༌མོའེ༌ ནང༌ང༌ རྡུད༌ ཞུགས༌ཏེ༌ ནགས༌ སྲན༌ཏྲེ༌ སྟན༌དུག༌།”
MAT 15:23 ཡེ༌ཤུའི༌ ཅའང༌ མ༌མོལས༌། ལོབ༌ཕྲུགས༌གུན༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, “ཇུ༌ཇུ༌ འི༌ བུ༌མོ༌བོ༌ ལོགས༌ཏེ༌ ལམ༌ཅུག༌ག༌ ཛད༌དའང༌ ཅིའ༌ཟེར༌ན༌ ཁོ༌ ཀུ༌ཅོ༌ ཏང༌ཨིན༌ ང༌དང༌གུན༌ནི༌ གྱབ༌ནེ༌ ཡོང༌དུག༌།”
MAT 15:24 ཡེ༌ཤུའི༌ ཏེ༌ བུ༌མོ༌བོའ༌ ལན༌སལས༌, “ང༌ དཀོན༌མཆོག༌གི༌ ལུག༌ སྟོར༌ཁན༌ ཨིས༌ར༌ཨེལ༌པ༌གུན༌ ཅིག༌པོའེ༌ ཕིའ༌ ཀལ༌ལ༌ ཛད༌ཏེ༌ ཨིན༌།”
MAT 15:25 ཁོ༌ ཁོང༌ངི༌ དུན༌ལ༌ ཡོངས༌ཏེ༌ པིག༌དོང༌ ཙུགས༌ཏེ༌ ཟེརས༌, “གཙོ༌བོ༌ལེ༌, ངའ༌ རོགས༌ ཅོའ༌ ཛད༌དའང༌།”
MAT 15:26 ཡེ༌ཤུའི༌ མོལས༌, “ཕྲུ༌གུའི༌ ཏ༌གི༌བོ༌ ལེན༌ཏེ༌ ཁྱིའ༌ ཕང༌ན༌ མ༌གྲིག༌ག༌ ཨིན༌ནོག༌།”
MAT 15:27 ཁོའེ༌ ལན༌ཏངས༌, “དེན༌བ༌ ཨིན༌ནོག༌ གཙོ༌བོ༌ལེ༌, ཨིན༌ནའང༌ ཁང༌དག༌གི༌ ཅོག༌ཙེ༌ ཀ༌ནེ༌ ཁར༌ཇི༌ བུད༌ཁན༌གུན༌ ཁྱི༌ ཆུ༌ངུན༌གུན༌ནིའང༌ ཟའ༌དུག༌།”
MAT 15:28 ཡེ༌ཤུའི༌ ལན༌སལས༌, “བུ༌མོ༌, ཁྱོ༌རང༌ང༌ ཏད༌པ༌ ཀྲག༌པོ༌ དུག༌། ཁྱོ༌རང༌ངི༌ དོད༌པ༌ ཅོ༌ཁན༌བོ༌ གྲུབ༌ཤིག༌།” ཏེན༌ན༌ ཏུས༌ཚོད༌པོའེ༌ཀ༌ རྡུད༌ བིང༌ཏེ༌ སོང༌ ཡང༌ ཁོའེ༌ བུ༌མོ༌ ཕན༌།
MAT 15:29 གཙོ༌བོ༌ ཡེ༌ཤུ༌ ཏེ༌ཀ༌ནེ༌ ཞངས༌ཏེ༌ གཱ༌ལིལ༌ལིའི༌ ཚོའེ༌ ཐའ༌མ༌ གྱུད༌ཏེ༌ ཀེན༌ལ༌ རི༌ཞིག༌གི༌ཀ༌ སྐྱོད༌ཏེ༌ ཞུགས༌ས༌ ཛདས༌།
MAT 15:30 ཏེ༌རུ༌ ཞ༌འོ༌, ཞ༌ར༌, ཧན༌གྲང༌, ལུས༌སྐྱོན༌བ༌ དང༌ ཞན༌ མང༌པོ༌ ཁྲིད༌ཏེ༌ མི༌ཚོགས༌ ཆེན༌མོ༌ཞིག༌ ཡེ༌ཤུའི༌ དུན༌ལ༌ ཛོམས༌, ཡང༌ ཁོང༌ངི༌ ཁོང༌གུན༌ ཕན༌ཅུག༌ག༌ ཛདས༌།
MAT 15:31 ཧན༌གྲང༌གུན༌ནི༌ སྤེ༌ར༌ ཏང༌ཅེས༌, ཁོངས༌ཁན༌གུན༌ ཁྲངས༌པོ༌ སོང༌ཏེ༌, ཞ༌འོ༌གུན༌ གྲུལ༌ཅེས༌ ཡང༌ ཞ༌ར༌གུན༌ལ༌ ཐོང༌ཅེས༌ མི༌གུན༌ནི༌ ཐོང༌ང༌ཅིག༌ ཁོང༌གུན༌ ཧ༌ལས༌ཏེ༌ ཨིས༌ར༌ཨེལ༌ལི༌ དཀོན༌མཆོག༌ག༌ སྟོད༌པ༌ ཕུལས༌།
MAT 15:32 གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ བོད༌ད༌ ཛད༌ཏེ༌ མོལས༌, “འི༌ མི༌གུན༌ ང༌ ཉམ༌པོ༌ དུགས༌ཏེ༌ ཞག༌མ༌ སུམ༌ སོང༌ ཡང༌ ཟའ༌ཅེས༌ལ༌ ཅའང༌ མེད༌ པ༌སང༌, ང༌ སྙིང༌རྗེའ༌ སྐྱེའ༌རག༌། ངའེ༌ ཁོང༌གུན༌ སྟོག༌རིའ༌ ལམ༌ཅུག༌ཉིན༌ མེ༌རག༌ ཅིའ༌ཟེར༌ན༌ ཁོང༌གུན༌ ལམ༌མ༌ གོ༌ཡོང༌ ཁོར༌ཏེ༌ གྱེལ༌ སྲིད༌ཅེས༌ ཨིན༌ནོག༌།”
MAT 15:33 ཁོང༌ངི༌ ལོབ༌ཕྲུགས༌གུན༌ནི༌ ལན༌ཏངས༌, “ང༌དང༌ང༌ འི༌ མི༌ཚོགས༌ ཆེན༌མོའ༌ ཏང༌ཅེས༌སི༌ ཏ༌གི༌ འི༌ རི༌སྟོང༌ངི༌ ནང༌ང༌ ཀ༌ནེ༌ ཐོབ༌ཨིན༌?”
MAT 15:34 ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌, “ང༌དང༌ངི༌ ལག༌ག༌ ཏ༌གི༌ ཙམ༌ ཡོད༌?” ཁོང༌གུན༌ནི༌ ལན༌ཏངས༌, “ཏ༌གི༌ རྡུན༌ ཡང༌ ཉ༌ ཆུ༌ངུན༌ ཁ༌ཅིག༌ ཡོད༌ལེ༌།”
MAT 15:35 ཡེ༌ཤུའི༌ མི༌ཚོགས༌པོའ༌ སའེ༌ཀ༌ དུག༌ཅེས༌ལ༌ མོལས༌།
MAT 15:36 ཁོང༌ངི༌ ཏ༌གི༌ རྡུན༌ དང༌ ཉ༌གུན༌ ནམས༌ས༌ ཛད༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཡང༌ ཏེ༌གུན༌ ཅགས༌ཏེ༌ ལོབ༌ཕྲུགས༌གུན༌ལ༌ སལས༌, ཡང༌ ཁོང༌གུན༌ནི༌ མི༌ཚོགས༌ལ༌ བགོས༌ཏེ༌ ཏངས༌།
MAT 15:37 ཁོང༌ ཚང༌མའེ༌ ཚིམས༌ཚིམས༌ ཟོས༌། སྟིང༌ནེ༌ ལོབ༌ཕྲུགས༌གུན༌ནི༌ ལག༌མ༌ ལུས༌ཁན༌ནི༌ ཏ༌གི༌གུན༌ དུམས༌པ༌ པག༌ཙེ༌ ཆེན༌མོ༌ རྡུན༌ གང༌།
MAT 15:38 བུ༌མོ༌ དང༌ ཕྲུ༌གུ༌གུན༌ མ༌ཐེའ༌ ཁར༌ཇི༌ ཟའ༌ཁན༌ནི༌ མི༌ སྟོང༌ཞི༌ ཡོད༌པིན༌།
MAT 15:39 མི༌ཚོགས༌ ལོགས༌ཏེ༌ ལམ༌ཅུག༌ག༌ ཛད༌ཏེ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ ཞོན༌ཏེ༌ མ༌ག༌དན༌ནི༌ ཡུལ༌ཇོངས༌ལ༌ སྐྱོདས༌།
MAT 16:1 ཕ༌རུ༌ཤི༌པ༌གུན༌ དང༌ སད༌དུ༌ཀི༌པ༌གུན༌ ཡོངས༌ཏེ༌ གཙོ༌བོ༌ ཡེ༌ཤུའ༌ ཚོད༌ལྟས༌ཏེ༌ ཁོང༌ང༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཅེས༌ལ༌ ནམ༌ཁའ༌ནེ༌ སྟགས༌ཤིག༌ སྟོན༌ ཟེརས༌།
MAT 16:2 ཁོང༌ངི༌ ལན༌སལས༌, “ཕི༌ཏོག༌ ནམ༌ མར༌པོ༌ ཡོད༌ད༌ ཐོང༌ཏེ༌ ཁྱོ༌ཞའེ༌ ཐོ༌རེ༌ ནམ༌ལ༌ གྱལ༌ལ༌ ཡོང༌ང༌ནོག༌ ཟེར༌དུག༌,
MAT 16:3 ཡང༌ ང༌ཏོག༌ སྲིན༌ནག༌ གངས༌ཏེ༌ ནམ༌ཚུབས༌ཏེ༌ ཐོང༌ན༌, དི༌རིང༌ ལུང༌རག༌ དང༌ ཆར༌པ༌ ཏང༌ང༌ནོག༌ ཟེར༌དུག༌། ཁྱོ༌ཞ༌གུན༌ནི༌ ནམ༌ཁའེ༌ ནང༌ང༌ ཇུང༌ཁན༌ནི༌ ནམ༌ལའེ༌ སྟགས༌གུན༌ ཤད༌ཉན༌དུག༌, ཨིན༌ནའང༌ ཁྱོ༌ཞ༌གུན༌ནི༌ འི༌ཏུས༌སི༌ སྟགས༌གུན༌ ཅིའ༌ ཤད༌ཉན༌ན༌ མེ༌རག༌།
MAT 16:4 མི༌རབས༌ ངན༌པ༌ དང༌ དཀོན༌མཆོག༌ག༌ ཨིད༌ཤེས༌ མེད༌ཁན༌གུན༌ནི༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌། ཨིན༌ནའང༌ ལུང༌སྟོན༌པ༌ ཡོ༌ནཱའེ༌ སྟགས༌པོ༌ མ༌ནེ༌ ཡང༌སྟགས༌ཤིག༌ མི༌སྟན༌།” ཏེ༌ནེ༌ ཁོང༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཏེ༌ཀ༌ནེ༌ སྐྱོདས༌།
MAT 16:5 ཚོའེ༌ ཕར༌ཀའ༌ ལེབ༌བ༌ཅིག༌ ལོབ༌ཕྲུགས༌གུན༌ལ༌ ཏ༌གི༌ ཁུར༌ར༌ལ༌ རྗེད༌ཁན༌བོ༌ ཨིད༌ཏུ༌ ཡོངས༌།
MAT 16:6 གཙོ༌བོ༌ ཡེ༌ཤུའི༌ ཁོང༌གུན༌ལ༌ མོལས༌, “ཕ༌རུ༌ཤི༌པ༌ དང༌ སད༌དུ༌ཀི༌པའེ༌ སྐྱུར༌ནེ༌ ཤང༌ ཅོས༌།”
MAT 16:7 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “ང༌དང༌ངི༌ ཏ༌གི༌ ཁུར༌ཏེ༌ མེད༌པ༌ ཁོང༌ངི༌ ཏེ༌བོ༌ མོལ༌ཏེ༌ ཨིན༌ནོག༌ག༌?”
MAT 16:8 ཡེ༌ཤུའི༌ ཏེ༌བོ༌ ཁྱེན༌ཏེ༌ ཏྲིའ༌ ཛདས༌, “ཁྱོ༌ཞའ༌ ཏད༌པ༌ ཆུ༌ངུན༌གུན༌, ཏ༌གི༌ མེད༌ཁན༌ནི༌ སྐོར༌ལ༌ ཁྱོ༌ཞ༌གུན༌ནི༌ ཅིའ༌ སྤེ༌ར༌ ཏང༌ངད༌?
MAT 16:9 ཏ༌རུང༌ངའང༌ ཁྱོ༌ཞ༌གུན༌ལ༌ ཧ༌མ༌གོའ༌? ཨིད༌ཏུ༌ མེ༌རག༌ག༌ ཏ༌གི༌ ལྔ༌ནེ༌ མི༌ སྟོང༌ལྔ༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌,
MAT 16:10 ཡ༌ ཏ༌གི༌ རྡུན༌ནེ༌ མི༌ སྟོང༌ཞི༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌?
MAT 16:11 ངའེ༌ ཏ༌གི༌ སྐོར༌ལ༌ སྤེ༌ར༌ ཏངས༌ཏེ༌ མན༌ཁན༌བོ༌ ཁྱོ༌ཞའེ༌ ཅིའ༌ ཧ༌གོའ༌ མེ༌རག༌? ཨིན༌ནའང༌ ཕ༌རུ༌ཤི༌པ༌ དང༌ སད༌དུ༌ཀི༌པའེ༌ སྐྱུར༌རི༌ ཀ༌ནེ༌ ཤང༌ ཅོས༌།”
MAT 16:12 ཏེ༌ནེ༌ ཁོང༌གུན༌ལ༌ ཏ༌གི༌ ཅོ༌ཅེས༌ལ༌ ཀོལ༌ཁན༌ནི༌ སྐྱུར༌རི༌ སྐོར༌ མན༌པ༌, ཕ༌རུ༌ཤི༌པ༌ དང༌ སད༌དུ༌ཀི༌པའེ༌ ལབ༌ཞ༌གུན༌ནེ༌ ཤང༌ ཅོ༌ཅེས༌ལ༌ ཞུ༌ཁན༌བོ༌ ཧ༌གོ༌།
MAT 16:13 གཙོ༌བོ༌ ཡེ༌ཤུ༌ ཀཱེ༌སར༌རིའ༌ ཕི༌ལི༌པི༌ ཡུལ༌ཇོངས༌ལ༌ ལེབ༌བ༌ཅིག༌, ཁོང༌ངི༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “མི༌གུན༌ནི༌ མི༌རིགས༌སི༌བུ༌ སུ༌ ཨིན༌ནོག༌ ཟེར༌དུག༌?”
MAT 16:14 ཁོང༌གུན༌ནི༌ ལན༌ཏངས༌, “ཁ༌ཅིག༌གི༌ ཁྲུས༌སལ༌ཁན༌ ཡོ༌ཧཱ༌ནན༌, ཁ༌ཅིག༌གི༌ ལུང༌སྟོན༌པ༌ ཨེ༌ལི༌ཡཱ༌ ཡང༌ ཞན༌མ༌གུན༌ནི༌ ལུང༌སྟོན༌པ༌ ཡེ༌རེམ༌ཡཱ༌ ཡ༌ ལུང༌སྟོན༌པ༌གུན༌ནི༌ ཕྲོ༌ནེ༌ ཅིག༌ཅིག༌ ཞུགས༌ཏེ༌ ཨིན༌ནོག༌ ཟེར༌དུག༌།”
MAT 16:15 “ཨིན༌ནའང༌ ཁྱོ༌ཞའེ༌ ཅི༌ སམ༌མ༌རག༌?” ཡེ༌ཤུའི༌ ཏྲིའ༌ ཛདས༌, “ང༌ སུ༌ ཨིན༌ནོག༌?”
MAT 16:16 ཤི༌མོན༌ པི༌ཏྲར༌རི༌ ལན༌ཏངས༌, “ཉེ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, སོན༌པོ༌ དཀོན༌མཆོག༌གི༌ སྲས༌ ཨིན༌ནོག༌།”
MAT 16:17 ཡེ༌ཤུའི༌ མོལས༌, “ཡོ༌ནཱའེ༌ བུ༌ཚ༌ ཤི༌མོན༌ ཁྱོ༌རང༌ ཅིན༌ལབས༌ཅན༌ ཨིན༌ནོག༌། ཏེ༌བོ༌ ཁྱོ༌རང༌ང༌ མིའི༌ ཆོགས༌ནེ༌ མན༌པ༌ ངའེ༌ ནམ༌ཁའེ༌ ཡབ༌བི༌ སྔོན༌ཅུག༌ག༌ ཛད༌ཏེ༌ ཨིན༌།
MAT 16:18 ངའེ༌ ཁྱོ༌རང༌ང༌ ཟེར༌རད༌, ཁྱོ༌རང༌ པི༌ཏྲར༌ ཨིན༌ནོག༌, ཡང༌ འི༌ བྲག༌གི༌ཀ༌ ངའེ༌ ང༌རང༌ངི༌ ཆོས༌ཚོགས༌ རྩིག༌ཨིན༌། ཤེ༌ཏན༌ནི༌ ཝང༌ངའི༌ ངའེ༌ ཆོས༌ཚོགས༌ལ༌ ཕམ༌ཀལ༌ མ༌ནེ༌ མི༌ཉན༌།
MAT 16:19 ནམ༌ཁའེ༌ གྱལ༌སྲིད༌དི༌ ཀུ༌ལིག༌གུན༌ ངའེ༌ ཁྱོ༌རང༌ང༌ ཏང༌ཨིན༌། ཇིག༌རྟེན༌ནི༌ཀ༌ ཁྱོ༌རང༌ངི༌ གོངས༌པ༌ མ༌ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ མི༌ཛད༌, ཡང༌ ཇིག༌རྟེན༌ནི༌ཀ༌ ཁྱོ༌རང༌ངི༌ གོངས༌པ༌ ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ ཛད༌ཨིན༌།”
MAT 16:20 ཏེ༌ནེ༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཁོང༌ མ༌ཤི༌ཀ༌ ཨིན༌ཁན༌བོ༌ སུའང༌ མ༌ཤད༌ མོལ༌ཏེ༌ བཀའ༌ སལས༌།
MAT 16:21 ཏེ༌ནེ༌ཕར༌ལ༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌, ཁོང༌ ཡེ༌རུ༌ཤ༌ལེམ༌མ༌ སོང༌ཏེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ རྡུག༌ངལ༌ མང༌པོ༌ སྟན༌ཏེ༌ སད༌ཅེས༌ ཡང༌ ཞག༌ སུམ༌པའེ༌ ཞག༌ག༌ སོན༌པོ༌ ལང༌ཅེས༌སི༌ སྐོར༌གུན༌ ཧ༌གོ༌ཅུག༌ཅེས༌ གོ༌ཟུག༌ ཛདས༌།
MAT 16:22 པི༌ཏྲར༌རི༌ ཁོང༌ སོ༌སོའ༌ ཁྱེར༌ཏེ༌ ཁའ༌སྐྱེས༌ ཡང༌ ཟེརས༌, “གཙོ༌བོ༌ལེ༌, ཏེ༌ཟུག༌ དཀོན༌མཆོག༌གི༌ ཆ༌ཅུག༌ག༌ མི༌ཛད༌། ཉེ༌རང༌ང༌ འི༌ཙོགས༌ མ༌ནེ༌ ཆའ༌ མ༌གོས༌།”
MAT 16:23 ཡེ༌ཤུའི༌ པི༌ཏྲར༌ ཆོགས༌ལ༌ ཟིགས༌ཏེ༌ མོལས༌, “ཤེ༌ཏན༌, ང༌ནེ༌ ཐག༌རིང༌ང༌ སོང༌། ཁྱོ༌རང༌ངི༌ ངའ༌ སྒག༌གྱབ༌ ཅུག༌ག༌ནོག༌། ཁྱོ༌རང༌ངི༌ སམ༌ཚུལ༌ དཀོན༌མཆོག༌གི༌ ཆོགས༌ནེ༌ མན༌པ༌, མིའི༌ ཆོགས༌ནེ༌ ཨིན༌ནོག༌།”
MAT 16:24 ཏེ༌ནེ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ངའེ༌ སྟིང༌རང༌ནེ༌ ཡོང༌ང༌ ཐད༌ཁན༌གུན༌, རང༌དོད༌ ཕངས༌ཏེ༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའ༌ བྲངས༌གོས༌།
MAT 16:25 རང༌སྲོག༌ སྐྱོབ༌ཉིན༌ ཡོད༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ལ༌ དེན༌བའེ༌ མི༌ཚེ༌བོ༌ ཐོབ༌ཨིན༌།
MAT 16:26 མི༌ཞིག༌ག༌ ཇིག༌རྟེན༌ གང༌པོ༌ ཐོབ༌ཏེའང༌ རང༌ངི༌ ཐའ༌མེད༌པའེ༌ མི༌ཚེ༌ སྐྱལ༌ན༌ ཅི༌ ཕན༌ཐོགས༌, ཡ༌ ཏེ༌བོའེ༌ ཚབས༌ལ༌ མི༌ཞིག༌གི༌ ཅི༌ ཏང༌ཉན༌ཨིན༌?
MAT 16:27 མི༌རིགས༌སི༌བུ༌ ནམ༌ཁའེ༌ ཡབ༌བི༌ ཟིར༌རྗིད༌དི༌ ནང༌ང༌ ཁོང༌ངི༌ ཕོ༌ཉ༌ ཉམ༌པོ༌ ཡོངས༌ཏེ༌, མི༌ རེ༌རེའ༌ རང༌རང༌ངི༌ ལས༌ ནང༌ཞིན༌ སོལ༌རས༌ ཏང༌ཨིན༌།
MAT 16:28 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ཀ༌ ཡོད༌ཁན༌ ཁ༌ཅིག༌གི༌ མི༌རིགས༌སི༌བུ༌ ཁོ༌རང༌ངི༌ གྱལ༌སྲིད༌དི༌ ནང༌ང༌ སྐྱོད༌ཅེས༌པོ༌ ཐོང༌ཏེ༌ མ༌ནེ༌ མི༌ཤི༌།”
MAT 17:1 ཞག༌ དྲུག༌གི༌ སྟིང༌ནེ༌, གཙོ༌བོ༌ ཡེ༌ཤུའི༌ པི༌ཏྲར༌, ཡ༌ཀོབ༌ དང༌ ཁོའེ༌ ནོ༌ ཡོ༌ཧཱ༌ནན༌ ཁྲིད༌ཏེ༌ སུའང༌ མེད༌ས༌ རི༌ ཐོན༌པོ༌ཞིག༌གི༌ཀ༌ སྐྱོདས༌།
MAT 17:2 ཏེ༌རུ༌ ཁོང༌གུན༌ནི༌ དུན༌ལ༌ ཡེ༌ཤུའི༌ སྐུ༌ཟུགས༌ གང༌པོ༌ གྱུར༌ཏེ༌, ཁོང༌ངི༌ ཞལ༌དོང༌ ཉི༌མའེ༌ ཟེར༌ ཙོགས༌ ཡང༌ ཁོང༌ངི༌ ནམ༌ཟ༌ ཀར༌པོ༌ ལྡང༌ཤན༌ གྱུར༌།
MAT 17:3 ཧུན༌མེད༌ལ༌ ཁོང༌གུན༌ནི༌ ལུང༌སྟོན༌པ༌ མོ༌ཟེས༌ དང༌ ཨེ༌ལི༌ཡཱའེ༌ ཡེ༌ཤུ༌ ཉམ༌པོ༌ ཞལ༌ཏ༌ སལ༌ཨིན༌ ཇལ༌།
MAT 17:4 པི༌ཏྲར༌རི༌ ཡེ༌ཤུའ༌ ཟེརས༌, “གཙོ༌བོ༌ལེ༌, ང༌ཞའ༌ འི༌ཀ༌ ཡོད༌ཅེས༌པོ༌ མ༌གྱལ༌ལ༌ སོང༌། ཀལ༌ཏེས༌ ཉེ༌རང༌ ཐུགས༌ཐད༌ན༌ ངའེ༌ ཞུགས༌ས༌ སུམ༌ རྩིག༌ཨིན༌, ཉེ༌རང༌ངི༌ ཕིའ༌ ཅིག༌, མོ༌ཟེས༌སི༌ ཕིའ༌ ཅིག༌, ཡང༌ ཨེ༌ལི༌ཡཱའེ༌ ཕིའ༌ ཅིག༌།”
MAT 17:5 ཁོའེ༌ ཏེ༌གུན༌ ཟེར༌ཨིན༌ ཡོད༌ ཟ༌ནེ༌, སྲིན༌ ལྡང༌ཤན༌ཞིག༌གི༌ ཁོང༌གུན༌ ཀབས༌ ཡང༌ སྲིན༌ནི༌ ནང༌ནེ༌ སུང༌སྐད༌ཅིག༌གི༌ མོལས༌, “འི༌བོ༌ ངའེ༌ ཅེས༌པའེ༌ བུ༌ཚ༌ ཨིན༌, ཁོ༌ ཉམ༌པོ༌ ང༌ མ༌སྲན༌ཏྲེ༌ ཐད༌པོ༌ ཨིན༌, ཁོའེ༌ ཟེར༌ཁན༌གུན༌ལ༌ ཉོན༌།”
MAT 17:6 ཏེ༌བོ༌ ཚོར༌ར༌ཅིག༌ ལོབ༌ཕྲུགས༌གུན༌ མ༌སྲན༌ཏྲེ༌ ཇིགས༌ཏེ༌ ཁལ༌བུག༌ག༌ གྱེལ༌།
MAT 17:7 ཨིན༌ནའང༌ ཡེ༌ཤུ༌ སྐྱོད༌ཏེ༌ ཁོང༌གུན༌ལ༌ ཆག༌ཐུག༌ག༌ ཛད༌ཏེ༌ མོལས༌, “ལོང༌ཤིག༌ ཇིགས༌ མ༌ཇིགས༌།”
MAT 17:8 ཁོང༌གུན༌ནི༌ གོ༌ སྟགས༌ཏེ༌ ལྟའ༌ཅིག༌ ཡེ༌ཤུ༌ ཅིག༌པོ༌ མ༌ནེ༌ མ༌ཐོང༌།
MAT 17:9 རི༌ནེ༌ བབས༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཡེ༌ཤུའི༌ ཁོང༌གུན༌ལ༌ བཀའ༌ སལས༌, “མི༌རིགས༌སི༌བུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ མ༌ནེ༌, ཁྱོ༌ཞའ༌ ཐོང༌ཁན༌བོ༌ སུའང༌ མ༌ཤད༌།”
MAT 17:10 ལོབ༌ཕྲུགས༌གུན༌ནི༌ ཁོང༌ང༌ ཏྲིས༌, “ཏེ༌ནེ༌ ཆོས༌ཁྲིམས༌ལ༌ ཁས༌པ༌གུན༌ནི༌ མ༌ཤི༌ཀ༌ སྐྱོད༌དི༌ སང༌ སྔུན༌ལ༌ ལུང༌སྟོན༌པ༌ ཨེ༌ལི༌ཡཱ༌ སྐྱོད༌གོས༌ ཅིའ༌ ཟེར༌ཏེ༌ ཨིན༌ནོག༌།”
MAT 17:11 ཡེ༌ཤུའི༌ ལན༌སལས༌, “ཏན༌ཏན༌ལ༌, ཅི༌ཚང༌མ༌ གྲལ༌གྲིག༌ ཅོ༌ཅེས༌ལ༌ ཨེ༌ལི༌ཡཱ༌ སྔུན༌ལ༌ ཡོང༌གོས༌།
MAT 17:12 ངའེ༌ ཁྱོ༌ཞའ༌ ཟེར༌རད༌, ཨེ༌ལི༌ཡཱ༌ ཡོང༌ ཚར༌ཏེ༌ ཨིན༌, ཨིན༌ནའང༌ ཁོང༌གུན༌ནི༌ ཁོ༌ ངོ༌མ༌ཤེས༌ ཡང༌ ཁོ༌ ཉམ༌པོ༌ ཅོ༌ཨིན༌ སམ༌ཁན༌ ཚང༌མ༌ ཅོས༌། ཏེན༌ན༌ ཙོགས༌ལ༌ མི༌རིགས༌སི༌བུའང༌ ཁོང༌གུན༌ནི༌ ལག༌ནེ༌ རྡུག༌ངལ༌ ཉོང༌གོས༌ཨིན༌།”
MAT 17:13 ཏེ༌ནེ༌ ཡེ༌ཤུའི༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ སྐོར༌ལ༌ མོལ༌ཏེ༌ ཨིན༌ཁན༌བོ༌ ལོབ༌ཕྲུགས༌གུན༌ལ༌ ཧ༌གོ༌།
MAT 17:14 ཁོང༌གུན༌ རི༌ནེ༌ བབས༌ཏེ༌ མི༌ཚོགས༌ ཡོད༌ས༌ སྐྱོད༌ད༌ཅིག༌, མི༌ཞིག༌ ཡེ༌ཤུའི༌ དུན༌ལ༌ ཡོངས༌ཏེ༌ པིག༌དོང༌ ཙུགས༌ཏེ༌
MAT 17:15 ཞུས༌, “གཙོ༌བོ༌ལེ༌, ངའེ༌ བུ༌ཚའེ༌ཀ༌ སྙིང༌རྗེ༌ ཛད༌དའང༌ ཇུ༌ཇུ༌། ཁོ༌ གྱེལ༌ཏེ༌ ཟུགས༌པོ༌ གང༌པོ༌ དར༌ཨིན༌ ནགས༌ སྲན༌ཏྲེ༌ ཐོང༌དུག༌། ལན༌ མང༌པོ༌ ཁོ༌ མེ༌ ཡང༌ ཆུའི༌ ནང༌ང༌ གྱེལ༌།
MAT 17:16 ཉེ༌རང༌ངི༌ ལོབ༌ཕྲུགས༌གུན༌ ཡོད༌ས༌ ཁྱོངས༌པིན༌ ཨིན༌ནའང༌ ཁོང༌གུན༌ནི༌ ཁོའ༌ ཕན༌ཅུག༌ མ༌ཉན༌།”
MAT 17:17 ཡེ༌ཤུའི༌ མོལས༌, “ཏད༌པ༌ མེད༌ཁན༌ དང༌ མི༌རབས༌ ངན༌པ༌, ནམ༌ཚོག༌པ༌ ང༌ ཁྱོ༌ཞ༌གུན༌ ཉམ༌པོ༌ དུག༌? ནམ༌ཚོག༌པ༌ ངའེ༌ ཁྱོ༌རང༌གུན༌ལ༌ སྲན༌གོས༌? བུ༌ཚ༌བོ༌ འི༌ཀ༌ ང༌ ཡོད༌ས༌ ཁྱོང༌།”
MAT 17:18 ཡེ༌ཤུའི༌ རྡུད༌པོའ༌ ཁའ༌སྐྱེའ༌ ཛད༌པ༌ ཁོ༌ ཕྲུ༌གུའི༌ ནང༌ནེ༌ བིང༌ཏེ༌ སོང༌ ཡང༌ ཏེན༌ན༌མལ༌ལ༌ ཕྲུ༌གུ༌བོ༌ གྱལ༌།
MAT 17:19 ཏེ༌ནེ༌ ལོབ༌ཕྲུགས༌གུན༌ ཡེ༌ཤུ༌ ཡོད༌ས༌ ཡོངས༌ཏེ༌ སུའང༌ ཚོར༌ མ༌ཅུག༌ག༌ ཏྲིས༌, “ང༌ཞ༌གུན༌ལ༌ རྡུད༌པོ༌ ཅིའ༌ ཕིང༌ མ༌ཉན༌ན༌ ཨིན༌ནོག༌?”
MAT 17:20 ཁོང༌ངི༌ ལན༌སལས༌, “ཅིའ༌ཟེར༌ན༌ ཁྱོ༌ཞའ༌ དཀོན༌མཆོག༌གི༌ ནང༌ང༌ ཏད༌པ༌ མངས༌ཏེའང༌ ཆུ༌ངུན༌ ཡོད༌ཏེ༌ ཨིན༌ནོག༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, ཀལ༌ཏེས༌ ཁྱོ༌ཞའ༌ ཉུང༌སྐར༌རི༌ ས༌འོན༌ ཆུ༌ངུན༌ ཟམ༌ཤིག༌གི༌ ཏད༌པ༌ ཡོད༌ན༌ འི༌ རི༌བོ༌ འི༌ཀ༌ནེ༌ འ༌ཀ༌ སོང༌ ཟེར༌ན༌ ཆེན༌, ཡང༌ ཁྱོ༌ཞ༌གུན༌ལ༌ ཅོ༌ མི༌ཉན༌ཅེས༌ ཅའང༌ མི༌ཡོང༌།”
MAT 17:21 
MAT 17:22 ལོབ༌ཕྲུགས༌ རྕུག༌ཉིས༌པོ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ ཛོམ༌ཏེ༌ ཡོད༌ཏུས༌, ཁོང༌གུན༌ལ༌ ཡེ༌ཤུའི༌ མོལས༌, “མི༌རིགས༌སི༌བུའ༌ ངོ༌ལོག༌ ཅོས༌ཏེ༌ གྲ༌འོ༌གུན༌ནི༌ ལག༌ག༌ སྟད༌ཨིན༌
MAT 17:23 ཁོང༌གུན༌ནི༌ ཁོ༌ སད༌ཨིན༌ ཡང༌ ཞག༌ སུམ༌པའེ༌ ཞག༌ག༌ སོན༌ཏེའ༌ ལངས༌ཤུག༌ག༌ ཛད༌ཨིན༌།” ལོབ༌ཕྲུགས༌གུན༌ནི༌ སེམས༌ ཚེར༌ཁའེ༌ གངས༌།
MAT 17:24 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཀ༌ཕར༌ན༌ཧུམ༌མི༌ གྱལ༌ས༌ ལེབ༌བ༌ཅིག༌, ཆོད༌ཁང༌ངི༌ ཁྲལ༌ ལྡུ༌ཁན༌བོ༌ པི༌ཏྲར༌ ཡོད༌ས༌ ཡོངས༌ཏེ༌ ཏྲིས༌, “ཁྱོ༌རང༌ངི༌ ལོབ༌བོན༌ནི༌ ཆོད༌ཁང༌ངི༌ ཕིའ༌ ཁྲལ༌ ཤལ༌ལ༌ མ༌ནོག༌ག༌?”
MAT 17:25 པི༌ཏྲར༌རི༌ ཟེརས༌, “ཤལ༌ལ༌ ཛད༌ད༌ནོག༌།” པི༌ཏྲར༌ ནང༌ང༌ ཡོང༌ང༌ཅིག༌ ཁོའེ༌ ཟེར༌རི༌ སང༌ སྔུན༌ལ༌ ཡེ༌ཤུའི༌ ཏྲིའ༌ ཛདས༌, “ཤི༌མོན༌, ཅི༌ སམ༌མ༌རག༌? ཇིག༌རྟེན༌ནི༌ གྱལ༌པོ༌གུན༌ནི༌ ཁྲལ༌ སུའི༌ ཀ༌ནེ༌ ལེན༌དུག༌, ཁོ༌རང༌ངི༌ ཕྲུ༌གུ༌ ཀ༌ནེ༌ ལེན༌དུག༌ག༌ ཡ༌ ཞན༌མའེ༌ ཀ༌ནེ༌?”
MAT 17:26 པི༌ཏྲར༌རི༌ ལན༌ཏངས༌, “ཞན༌མ༌གུན༌ནི༌ ཀ༌ནེ༌།” ཡེ༌ཤུའི༌ མོལས༌, “ཏེ༌ནེ༌ ཕྲུ༌གུ༌གུན༌ནི༌ ཁྲལ༌ ཤལ༌ མ༌གོས༌།
MAT 17:27 ཨིན༌ནའང༌ ཁོང༌གུན༌ལ༌ ང༌ཏི༌ཀ༌ སྲོ༌ མི༌ཡོང༌ཅེས༌སི༌ ཕིའ༌ ཚོའ༌ སོང༌ཏེ༌ ཉ༌ཀུག༌ ཏོང༌, ཡང༌ ཉ༌ གོ༌མ༌ ཟུམ༌ཁན༌བོའེ༌ ཁའ༌ ཕེས༌, ཏེ༌ནང༌ང༌ ཁྱོ༌རང༌ང༌ མུལ༌ལི༌ པེ༌ནེ༌ཞིག༌ ཐོབ༌ཨིན༌། ཏེ༌བོ༌ ཁྱེར༌ཏེ༌ ང༌དང༌ ཉིས༌ཀོའེ༌ ཁྲལ༌ ཁོང༌གུན༌ལ༌ ཤོལ༌།”
MAT 18:1 ཏེ༌ཏུས༌ ལོབ༌ཕྲུགས༌གུན༌ གཙོ༌བོ༌ ཡེ༌ཤུའི༌ཀ༌ ཡོངས༌ཏེ༌ ཏྲིས༌, “ནམ༌ཁའེ༌ གྱལ༌སྲིད༌དི༌ ནང༌ང༌ ཀྲག༌ཤོག༌ སུ༌ ཨིན༌ནོག༌?”
MAT 18:2 ཡེ༌ཤུའི༌ ཕྲུ༌གུ༌ ཆུ༌ངུན༌ཞིག༌ག༌ བོད༌ཏེ༌ ཁོང༌གུན༌ནི༌ སྐྱིལ༌ལ༌ ལང༌ཅུག༌ག༌ ཛདས༌།
MAT 18:3 ཁོང༌ངི༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, གྱོད༌པ༌ ཅོས༌ཏེ༌ ཁྱོ༌ཞའེ༌ སེམས༌ ཕྲུ༌གུ༌ ཆུ༌ངུན༌ ཙོགས༌ གྱུར༌ཏེ༌ མ༌ནེ༌ ཁྱོ༌ཞ༌ ནམ༌ཁའེ༌ གྱལ༌སྲིད༌དི༌ ནང༌ང༌ མ༌ནེ༌ ཞུགས༌ མི༌ཉན༌།
MAT 18:4 ཏེ༌བོའེ༌ཕིའ༌ ཕྲུ༌གུ༌ ཙོགས༌ལ༌ པས༌མོ༌ གྱུར༌ཁན༌གུན༌ ནམ༌ཁའེ༌ གྱལ༌སྲིད༌དི༌ ནང༌ང༌ ཆེ༌ཤོག༌པོ༌ ཨིན༌།”
MAT 18:5 “ངའེ༌ མིང༌ངི༌ ནང༌ང༌ སུ༌ཞིག༌གི༌ འི༌ ཕྲུ༌གུ༌ ཙོགས༌ཤིག༌ག༌ གའ༌སུས༌ ཅོ༌ན༌ ངའ༌ གའ༌སུས༌ ཅོས༌ཏེ༌ ཨིན༌,
MAT 18:6 ཨིན༌ནའང༌ ང༌ ཏད༌པ༌ ཅོ༌ཁན༌ འི༌ ཆུ༌ངུན༌གུན༌ནི༌ ནང༌ནེ༌ ཅིག༌ག༌ སྡིག༌པ༌ ཅོ༌ཅུག༌གི༌ སང༌ ཁོ༌རང༌ངི༌ སྐྱེའ༌ རན༌ཐག༌གི༌ རྡོའ༌ ཆེན༌མོ༌ ཏགས༌ཏེ༌, གྱ༌ཚོའེ༌ ནང༌ང༌ ནུབས༌ཏེ༌ ཤི༌ན༌ གྱལ༌།”
MAT 18:7 “སྡིག༌པའེ༌ ནང༌ང༌ གྱེལ༌ཅུག༌ཁན༌ ཇིག༌རྟེན༌པ༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཏེ༌བོ༌ ཏན༌ཏན༌ ཇུང༌ཨིན༌, ཨིན༌ནའང༌ ཏེ༌བོ༌ ཇུང༌ཅུག༌ཁན༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌།
MAT 18:8 ཀལ༌ཏེས༌ ཁྱོ༌རང༌ངི༌ ལག༌པ༌ ཡ༌ རྐང༌པའེ༌ སྡིག༌པ༌ ཅོ༌ཅུག༌གད༌ན༌, ཅད༌ཏེ༌ ཕངས༌ཏོང༌, ལག༌པ༌ ཉིས༌ དང༌ རྐང༌པ༌ ཉིས༌ ཡོད༌ཏེ༌ ཉལ༌ཝའེ༌ ནང༌ང༌ ཕང༌ཅུག༌གི༌ སང༌, ལག༌པ༌ ཅིག༌ དང༌ རྐང༌པ༌ ཅིག༌ ཉམ༌པོ༌ ཐའ༌མེད༌པའེ༌ མི༌ཚེའེ༌ ནང༌ང༌ ཆ༌ན༌ གྱལ༌།
MAT 18:9 ཡང༌ ཀལ༌ཏེས༌ ཁྱོ༌རང༌ངི༌ མིག༌གི༌ སྡིག༌པ༌ ཅོ༌ཅུག༌ན༌, ཏེ༌བོ༌ བྲུས༌ཏེ༌ ཕངས༌ཏོང༌། མིག༌ ཉིས༌ ཡོད༌ཏེ༌ ཉལ༌ཝའེ༌ ནང༌ང༌ ཕང༌ཅུག༌གི༌ སང༌, མིག༌ ཅིག༌ ཉམ༌པོ༌ ཐའ༌མེད༌པའེ༌ མི༌ཚེའེ༌ ནང༌ང༌ ཆ༌ན༌ གྱལ༌།”
MAT 18:10 “འི༌ ཕྲུ༌གུ༌ ཆུ༌ངུན༌གུན༌ ཅིག༌གའང༌ རིན༌མེད༌དི༌ མིག༌ ཉམ༌པོ༌ མ༌ལྟའ༌། ངའེ༌ ཁྱོ༌ཞའ༌ ཟེར༌རད༌, ཁོང༌གུན༌ སྐྱོབ༌ཁན༌ནི༌ ཕོ༌ཉའ༌ ངའེ༌ ནམ༌ཁའེ༌ ཡབ༌བི༌ དུན༌ལ༌ ཏུས༌གྱུན༌ ཞུགས༌ཏེ༌ ཁོང༌ངི༌ ནས༌ཚུལ༌ ཤད༌ད༌ནོག༌།”
MAT 18:11 
MAT 18:12 གཙོ༌བོ༌ ཡེ༌ཤུའི༌ མོལས༌, “ཅི༌ སམ༌མ༌རག༌? མི༌ཞིག༌ག༌ ལུག༌ གྱ༌ ཡོད༌ཁན༌བོའེ༌ ནང༌ནེ༌ ལུག༌ ཅིག༌ སྟོར༌ན༌, ཞན༌ གུབ༌ཅུ༌ གོར༌གུ༌བོ༌ རིའ༌ བོར༌ཏེ༌ སྟོར༌ཁན༌ནི༌ ལུག༌ ཅིག༌པོ༌ མི༌ཙལ༌ལ༌?
MAT 18:13 ངའེ༌ ཁྱོ༌ཞའ༌ དེན༌བ༌ ཟེར༌རད༌ ཀལ༌ཏེས༌ ལུག༌ སྟོར༌ཁན༌བོ༌ ཐོབ༌ན༌, མ༌སྟོར༌ཁན༌ནི༌ ལུག༌ གུབ༌ཅུ༌ གོར༌གུའི༌ སང༌ འི༌ སྟོར༌ཏེ༌ ཐོབ༌ཁན༌ནི༌ ལུག༌ ཅིག༌པོའེ༌ ཕིའ༌ ཁོ༌ མང༌ང༌ ཐད༌པོ༌ ཆེན༌།
MAT 18:14 ཏེན༌ན༌ ཙོགས༌ལ༌ ཁྱོ༌ཞའེ༌ ནམ༌ཁའེ༌ ཡབ༌, ཏད༌པ༌ ཡོད༌ཁན༌ འི༌ ཆུ༌ངུན༌གུན༌ནི༌ ནང༌ནེ༌ ཅིག༌གའང༌ སྟོར༌ཅེས༌ལ༌ ཐུགས༌ཐད༌ད༌ མ༌ནོག༌།”
MAT 18:15 “ཀལ༌ཏེས༌ ཏད༌པ༌ཅན༌ སྤུན༌ཞིག༌གི༌ ཁྱོ༌རང༌ངི༌ གྱབ༌གལ༌ལ༌ སྡིག༌པ༌ ཅོ༌ན༌, ཁོ༌ ཡོད༌ས༌ ཅིག༌པོ༌ སོང༌ཏེ༌ ཁོའེ༌ སྐྱོན༌བོ༌ སྟོན༌། ཀལ༌ཏེས༌ ཁོའེ༌ ཁྱོ༌རང༌ངི༌ ཟེར༌ཁན༌བོ༌ ཉན༌ཏེ༌ གྱོད༌པ༌ ཅོ༌ན༌, ཁྱོ༌རང༌ང༌ ཁྱོ༌རང༌ངི༌ སྤོན༌བོ༌ ཡང༌སྐྱར༌ ལོགས༌ཏེ༌ ཐོབ༌ཏེ༌ ཨིན༌ནོག༌།
MAT 18:16 ཨིན༌ནའང༌ ཀལ༌ཏེས༌ ཁོའེ༌ ཁྱོ༌རང༌ངི༌ ཟེར༌ཁན༌གུན༌ མ༌ཉན༌ན༌ ‘ཟེར༌ཁན༌གུན༌ མི༌ ཉིས༌ ཡ༌ སུམ༌མི༌ སྤང༌པོ༌ ཏངས༌ཏེ༌ ཏན༌ཏན༌ ཅོ༌ཅེས༌ལ༌ ’ ཁྱོ༌རང༌ངི༌ ཏད༌པ༌ཅན༌ སྤུན༌ ཅིག༌ ཡ༌ ཉིས༌ ཁྲིད༌ཏེ༌ ཁྱེར༌།
MAT 18:17 ཀལ༌ཏེས༌ ཁོའེ༌ ཏེ༌ སྤང༌པོ༌གུན༌ལ༌ མ༌ཉན༌ན༌, ཏེ༌ནེ༌ ཆོས༌ཚོགས༌ལ༌ ཤོད༌, ཡང༌ ཀལ༌ཏེས༌ ཁོའེ༌ ཆོས༌ཚོགས༌ལའང༌ མ༌ཉན༌ན༌, ཏེ༌ནེ༌ ཁོའ༌ ཁྲལ༌ནེན༌ཁན༌ དང༌ ཞན༌ ཏད༌པ༌ མེད༌ཁན༌གུན༌ ཙོགས༌ རྩི༌ཤིག༌།”
MAT 18:18 “ངའེ༌ ཁྱོ༌ཞའ༌ དེན༌བ༌ ཟེར༌རད༌ ཇིག༌རྟེན༌ནི༌ཀ༌ ཁྱོ༌ཞའེ༌ གོངས༌པ༌ མ༌ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ མི༌ཛད༌, ཡང༌ ཇིག༌རྟེན༌ནི༌ཀ༌ ཁྱོ༌ཞའེ༌ གོངས༌པ༌ ཏང༌ཁན༌བོའ༌ ནམ༌ཁའེ༌ དཀོན༌མཆོག༌གིའང༌ གོངས༌པ༌ སལ༌ལ༌ ཛད༌ཨིན༌།”
MAT 18:19 “ཡང༌སྐྱར༌ ངའེ༌ ཁྱོ༌ཞ༌གུན༌ལ༌ ཟེར༌རད༌, ཀལ༌ཏེས༌ ཇིག༌རྟེན༌ནི༌ཀ༌ ཏད༌པ༌ཅན༌ ཉིས༌ ཞུ༌ཝ༌ ཕུལ༌ཅེས༌ལ༌ ཅི༌ཞིག༌གི༌ཀ༌ ཁའ༌ཆམས༌ན༌, ཏེ༌བོ༌ ངའེ༌ ནམ༌ཁའེ༌ ཡབ༌བི༌ ཁྱོ༌ཞའེ༌ ཕིའ༌ ཅོའ༌ ཛད༌ཨིན༌།
MAT 18:20 ཅིའ༌ཟེར༌ན༌ ཀ༌རུ༌ ངའེ༌ མིང༌ ཁུར༌ཁན༌ ཉིས༌ ཡ༌ སུམ༌ ཛོམ༌མད༌ ང༌ ཏེ༌རུ༌ ཁོང༌གུན༌ ཉམ༌པོ༌ ཡོད༌།”
MAT 18:21 ཏེ༌ནེ༌ པི༌ཏྲར༌ གཙོ༌བོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌, “གཙོ༌བོ༌ལེ༌, ཀལ༌ཏེས༌ ངའེ༌ སྤུན༌ཞིག༌གི༌ ངའེ༌ གྱབ༌གལ༌ལ༌ སྡིག༌པ༌ ཅོ༌ན༌, ཏེ༌ནེ༌ ལན༌ ཙམ༌ ངའེ༌ ཁོའ༌ ཤགས༌པ༌ ཏང༌གོས༌? ལན༌ རྡུན༌ ཏང༌ན༌ གྲིག༌ག༌ ལེ༌?”
MAT 18:22 ཡེ༌ཤུའི༌ ལན༌སལས༌, “ངའེ༌ ཁྱོ༌རང༌ང༌ ཟེར༌རད༌, ལན༌ རྡུན༌ མན༌པ༌ རྡུན༌ཅུ༌པ༌ ལན༌ རྡུན༌ ཏོང༌།”
MAT 18:23 “སྤེར༌ན༌ ནམ༌ཁའེ༌ གྱལ༌སྲིད༌ ནི༌, ཁོ༌རང༌ངི༌ ཡོག༌པོ༌གུན༌ནི༌ ཀ༌ནེ༌ རྩི༌རུག༌ ལེན༌ཅེས༌ལ༌ ཐག༌ཅད༌ཁན༌ནི༌ གྱལ༌པོ༌ ཙོགས༌ ཨིན༌།
MAT 18:24 རྩི༌རུག༌ ལེན༌ཅེས༌ གོ༌ཟུག༌ག༌ཅིག༌, གྱལ༌པོའེ༌ དུན༌ལ༌ ཀ༌རོར༌ མང༌པོའེ༌ པེ༌ནེ༌ བུ༌ལོན༌ ཡོད༌ཁན༌ནི༌ མི༌ཞིག༌ ཁྱོངས༌།
MAT 18:25 བུ༌ལོན༌ ཤལ༌གྱུ༌ མེད༌ པ༌སང༌ གྱལ༌པོའེ༌ ཏེ༌ མི༌བོ༌, ཁོའེ༌ ན༌མ༌ དང༌ ཕྲུ༌གུ༌གུན༌ ཡང༌ ནོར༌ ཡོད༌ཁན༌ ཚང༌མ༌ ཙོངས༌ཏེ༌, བུ༌ལོན༌ ཤལ༌ཅེས༌ལ༌ བཀའ༌ ཏངས༌།”
MAT 18:26 “ཡོག༌པོ༌ གྱལ༌པོའེ༌ དུན༌ལ༌ གྱེལ༌ཏེ༌ ཇུ༌ཇུ༌, ‘ངའ༌ ཉམ༌པོ༌ ཟོད༌པ༌ ཛད༌, གྱགས༌པ༌ ངའེ༌ བུ༌ལོན༌ གང༌པོ༌ ལོགས༌ཏེ༌ ཕུལ༌ཨིན༌’, ཟེར༌ཏེ༌ ཞུ༌ཝ༌ ཕུལས༌།
MAT 18:27 གྱལ༌པོའ༌ སྙིང༌རྗེ༌ སྐྱེས༌, ཡང༌ ཁོའེ༌ བུ༌ལོན༌བོ༌ མེད༌ཁན༌ ཅོས༌ཏེ༌ ཁོ༌ ཆ༌ཅུགས༌།”
MAT 18:28 “ཨིན༌ནའང༌ ཡོག༌པོ༌ ཕི༌ལོག༌ག༌ སོང༌ཏེ༌ སྟིང༌ནེ༌ པེ༌ནེ༌ ཉུ༌ངུན༌ སྟོན༌ ཁ༌ཅིག༌ བུ༌ལོན༌ལ༌ ཏང༌ཁན༌ནི༌ ཁོའེ༌ ཕྲོ༌པ༌ ཡོག༌པོའེ༌ཀ༌ སོང༌, ཡང༌ ཁོ༌ ཟུམས༌ཏེ༌ སྐྱེ༌ ལྡམས༌ཏེ༌, ‘ངའེ༌ བུ༌ལོན༌ ལོགས༌ཏེ༌ ཏོང༌’ ཟེརས༌།”
MAT 18:29 “ཁོའེ༌ ཕྲོ༌པ༌ ཡོག༌པོའེ༌ སའེ༌ཀ༌ གྱེལ༌ཏེ༌ ཇུ༌ཇུ༌, ‘ངའ༌ ཉམ༌པོ༌ ཟོད༌པ༌ ཛད༌ གྱགས༌པ༌ ངའེ༌ བུ༌ལོན༌ ལོགས༌ཏེ༌ ཕུལ༌ཨིན༌’ ཟེར༌ཏེ༌ ཞུ༌ཝ༌ ཕུལས༌།
MAT 18:30 ཨིན༌ནའང༌ ཁོའེ༌ ཞུ༌ཝ༌བོ༌ མ༌ཉནས༌ མ༌ཚད༌ བུ༌ལོན༌ ཤལ༌ཤལ༌ ཚོག༌པ༌ ཁོ༌ ཙོན༌ཁང༌ང༌ ཀག༌ཅུགས༌།”
MAT 18:31 “ཞན༌ ཡོག༌པོ༌ ཕྲོ༌པ༌གུན༌ལ༌ ཏེ༌བོ༌ ཐོང༌ཏེ༌ སྲོ༌ སྲན༌ཏྲེ༌ ཡོངས༌, ཡང༌ གྱལ༌པོ༌ ཡོད༌ས༌ སོང༌ཏེ༌ ཇུང༌ཁན༌ ཚང༌མ༌ ཤདས༌།
MAT 18:32 ཏེ༌ནེ༌ གྱལ༌པོའེ༌ ཡོག༌པོ༌ སྙིང༌རྗེ༌ མེད༌ཁན༌བོ༌ བོད༌ཏེ༌ ཁྱོངས༌ ཡང༌ ཁོའ༌ ཟེརས༌, ‘ཡོག༌པོ༌ ངན༌པ༌ ཁྱོད༌, ཁྱོ༌རང༌ངི༌ ང༌ ཇུ༌ཇུ༌ ཞུས༌པ༌ སྙིང༌རྗེ༌ སྐྱེས༌ཏེ༌, ངའེ༌ ཁྱོ༌རང༌ངི༌ བུ༌ལོན༌ ཚང༌མ༌ མེད༌ཁན༌ ཅོས༌པིན༌།
MAT 18:33 ངའ༌ ཁྱོ༌རང༌ངི༌ཀ༌ སྙིང༌རྗེ༌ སྐྱེའ༌ ཙོགས༌ལ༌, ཁྱོ༌རང༌ངའང༌ ཁྱོ༌རང༌ངི༌ ཕྲོ༌པའེ༌ཀ༌ སྙིང༌རྗེ༌ སྐྱེ༌ མ༌གོས༌ས༌?’
MAT 18:34 གྱལ༌པོའ༌ སྲོ༌ ཡོངས༌ཏེ༌, བུ༌ལོན༌ གང༌པོ༌ ཤལ༌ཤལ༌ ཚོག༌པ༌ ཁོ༌ ཙོན༌ཁང༌ང༌ ཀགས༌ཏེ༌ ནགས༌ སྟན༌ན༌ལ༌ བཀའ༌ ཏངས༌།”
MAT 18:35 “ཀལ༌ཏེས༌ ཁྱོ༌ཞའེ༌ ཁྱོ༌ཞ༌རང༌ངི༌ སྤུན༌ལ༌ སྙིང༌ནེ༌ ཤགས༌པ༌ མ༌ཏང༌ན༌ ངའེ༌ ནམ༌ཁའེ༌ ཡབ༌བིའང༌ ཁྱོ༌ཞ༌ རེ༌རེ༌ ཉམ༌པོ༌ ཏེན༌ན༌ ཙོགས༌ ཅོ༌ཨིན༌།”
MAT 19:1 ལབ༌ཞ༌ སལ༌ ཚར༌ཏེ༌ སྟིང༌ནེ༌, གཙོ༌བོ༌ ཡེ༌ཤུ༌ གཱ༌ལིལ༌ལི༌ནེ༌ ཡོར༌དཱན༌ ལྩངས༌པོའེ༌ ཕར༌ཀ༌ ཡ༌ཧུ༌དཱ༌ ཡུལ༌ཇོངས༌ལ༌ སྐྱོདས༌།
MAT 19:2 མི༌ཚོགས༌ ཆེན༌མོ༌ ཁོང༌ངི༌ སྟིང༌རང༌ནེ༌ ཡོངས༌ ཡང༌ ཁོང༌ངི༌ ཟུ༌མོ༌ ཡོད༌ཁན༌གུན༌ ཕན༌ཅུག༌ག༌ ཛདས༌།
MAT 19:3 ཚོད༌ལྟ༌ཅེས༌ལ༌ ཕ༌རུ༌ཤི༌པ༌ ཁ༌ཅིག༌ ཁོང༌ ཡོད༌ས༌ ཡོངས༌ཏེ༌ ཏྲིས༌, “གྱུན༌ཚན༌ ཆུ༌ངུན༌ ཡོད༌གྲོ༌ ཡ༌ ཆེན༌མོ༌, བུ༌ཚ༌ཞིག༌ག༌ ཁྲིམས༌ ནང༌ཞིན༌ ཁོ༌རང༌ངི༌ ན༌མ༌ ཅད༌ ཆོག༌ག༌ནོག༌ག༌?”
MAT 19:4 ཡེ༌ཤུའི༌ ལན༌སལས༌, “ཁྱོ༌ཞའེ༌ ཏམ༌པའེ༌ སུང༌རབས༌སི༌ ནང༌ནེ༌ མ༌སིལ༌པིན༌ན༌? ‘གོ༌ཟུག༌གི༌ཀ༌ དཀོན༌མཆོག༌གི༌ ཇིག༌རྟེན༌ ཛད༌ ཟ༌ནེ༌ བུ༌ཚ༌ དང༌ བུ༌མོ༌ ཛད༌ཏེ༌,’
MAT 19:5 མོལས༌, ‘ཏེན༌ན༌ གྱུན༌ཚན༌བོའེ༌ ཕིའ༌ བུ༌ཚ༌ ཁོ༌རང༌ངི༌ ཨ༌བ༌ དང༌ ཨ༌མ༌ནེ༌ བེ༌ཏེ༌ ཁོ༌རང༌ངི༌ ན༌མ༌ ཉམ༌པོ༌ ཛོམས༌ཏེ༌ ཁོང༌ ཉིས༌ཀོ༌ ཟུགས༌པོ༌ ཅིག༌ གྱུར༌ར༌ནོག༌། ’
MAT 19:6 ཏ༌ ཁོང༌གུན༌ ཉིས༌ མན༌པ༌ ཅིག༌ ཨིན༌ནོག༌། ཏེ༌བོའེ༌ཕིའ༌ དཀོན༌མཆོག༌གི༌ ཅིག༌ ཛད༌ཁན༌བོ༌ སུ༌ཞིག༌གའང༌ ཕེ༌ མ༌ཅུག༌།”
MAT 19:7 ཏེ༌ནེ༌ ཕ༌རུ༌ཤི༌པ༌གུན༌ནི༌ ཁོང༌ང༌ ཏྲིས༌, “ཏེ༌བོ༌ ཨིན༌ན༌, ན༌མ༌ ཅད༌ན༌, ན༌མའ༌ ཅད༌ཁན༌ནི༌ ལག༌ཁྱེར༌ ཁོའ༌ ཏོང༌ ཟེར༌ཏེ༌ ཅི༌ཕིའ༌ མོ༌ཟེས༌སི༌ བཀའ༌ སལ༌ཏེ༌ ཨིན༌ནོག༌?”
MAT 19:8 ཡེ༌ཤུའི༌ ལན༌སལས༌, “ཁྱོ༌ཞའེ༌ ཕ༌མེས༌པོ༌གུན༌ནི༌ སྙིང༌ སྐྱོང༌པོ༌ ཡོད༌ཅེས༌པོའེ༌ མོ༌ཟེས༌སི༌ ཁྱོ༌ཞའ༌ ན༌མ༌ ཅད༌ཅེས༌ལ༌ གོངས༌པ༌ ཏངས༌, ཨིན༌ནའང༌ གོ༌ཟུག༌གི༌ཀ༌ ཏེ༌ཟུག༌ མེད༌པིན༌།
MAT 19:9 ངའེ༌ ཁྱོ༌ཞ༌གུན༌ལ༌ ཟེར༌རད༌, རང༌ངི༌ ཞིད༌མད༌ མན༌ཁན༌ ཉམ༌པོ༌ ལུས༌བྲེལ༌ ཅོ༌ཅེས༌སི༌ ནས༌ལུག༌ མ༌སྟོགས༌, སུ༌ཞིག༌གི༌ ཁོ༌རང༌ངི༌ ན༌མ༌ ཅད༌ཏེ༌ ཞན༌ བུ༌མོ༌ཞིག༌ ཉམ༌པོ༌ ན༌མ༌ ཅོ༌ན༌ ཁོའེ༌ ལོག༌ཡེམ༌ ཅོས༌ཏེ༌ ཨིན༌ནོག༌།”
MAT 19:10 ལོབ༌ཕྲུགས༌གུན༌ནི༌ ཡེ༌ཤུའ༌ ཟེརས༌, “ཀལ༌ཏེས༌ ན༌མ༌ དང༌ མག༌པའེ༌ ནང༌ང༌ ཏེ༌ཟུག༌ ནས༌ལུག༌ ཆ༌ན༌ ན༌མ༌ མ༌ཅོ༌ན༌ གྱལ༌ཅེས༌ རག༌།”
MAT 19:11 ཡེ༌ཤུའི༌ མོལས༌, “དཀོན༌མཆོག༌གི༌ བག༌མ༌ མ༌ཅོའ༌ དུག༌ཅེས༌སི༌ ཁྱུད༌ སལ༌ལ༌ ཛད༌ཁན༌གུན༌ མ༌སྟོགས༌, ཚང༌མ༌ལ༌ ཁྱོ༌ཞའེ༌ ཟེར༌ཁན༌ནི༌ མི༌ཚེ༌ ཕུད༌ཉན༌ན༌ མ༌ནོག༌།
MAT 19:12 སྤེར༌ན༌ བུ༌ཚ༌ ཁ༌ཅིག༌, སྐྱེས༌པ༌ནེ༌ ཕར༌ལ༌ ཨ༌བ༌ གྱུར༌ཅེས༌སི༌ ཁྱུད༌ མེད༌ཁན༌, ཡང༌ ཁ༌ཅིག༌ག༌ མི༌གུན༌ནི༌ ཨ༌བ༌ གྱུར༌ཅེས༌སི༌ ཁྱུད༌པོ༌ མེད༌ཁན༌ ཅོས༌པ༌, ཡང༌ ཁ༌ཅིག༌གི༌ ནམ༌ཁའེ༌ གྱལ༌སྲིད༌ལ༌ ཞབས༌ཏོག༌ ཞུ༌ཅེས༌སི༌ ཕིའ༌ ན༌མ༌ ཅོའ༌ མ༌ནོག༌། སུ༌ཞིག༌ག༌ འི༌ ཙོགས༌སི༌ མི༌ཚེ༌ ཕུད༌ཉན༌ན༌ ཕུད༌ཤིག༌།”
MAT 19:13 ཏེ༌ནེ༌ ཕ༌མ༌གུན༌ནི༌ ཕྲུ༌གུ༌ ཆུ༌ངུན༌གུན༌ གཙོ༌བོ༌ ཡེ༌ཤུའི༌ ཆག༌ བོར༌ར༌ ཛད༌ཏེ༌ མོས༌ལམ༌ ཞུ༌ཅེས༌ལ༌ ཁོང༌ ཡོད༌ས༌ ཁྱོངས༌། ཨིན༌ནའང༌ ཁོང༌ངི༌ ལོབ༌ཕྲུགས༌གུན༌ནི༌ ཕ༌མ༌གུན༌ལ༌ ཡེ༌ཤུའ༌ འོབ༌གྱལ༌ སྟན༌ པ༌སང༌ ཁའ༌སྐྱེས༌།
MAT 19:14 ཡེ༌ཤུའི༌ མོལས༌, “ཕྲུ༌གུ༌ ཆུ༌ངུན༌གུན༌ སྒག༌ མ༌སྒག༌ག༌ ང༌ ཡོད༌ས༌ ཡོང༌ཅུག༌ འི༌ཙོགས༌གུན༌ནི༌ ཕིའ༌ ནམ༌ཁའེ༌ གྱལ༌སྲིད༌པོ༌ ཨིན༌།”
MAT 19:15 ཁོང༌གུན༌ནི༌ཀ༌ ཆག༌ བོར༌ར༌ ཛད༌ཏེ༌ ཅིན༌ལབས༌ སལ༌ལ༌ ཛདས༌, ཏེ༌ནེ༌ ཡེ༌ཤུ༌ ཏེ༌ཀ༌ནེ༌ སྐྱོདས༌།
MAT 19:16 མི༌ཞིག༌ གཙོ༌བོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, “ལོབ༌བོན༌ལེ༌, ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཕིའ༌ ངའེ༌ ཟང༌པོ༌ ལས༌ ཅི༌ ཅོ༌གོས༌?”
MAT 19:17 ཁོང༌ངི༌ ཁོའ༌ མོལས༌, “ཟང༌པོ༌ ཅི༌ ཨིན༌ ཟེར༌ཏེ༌ ངའ༌ ཅིའ༌ ཏྲིའད༌། དཀོན༌མཆོག༌ ཅིག༌པོ༌ མ༌སྟོག༌ སུའང༌ ཟང༌པོ༌ མན༌། ཀལ༌ཏེས༌ ཁྱོ༌རང༌ང༌ ཐའ༌མེད༌པའེ༌ མི༌ཚེ༌ གོས༌ཨིན༌ ཡོད༌ན༌, ཏེ༌ནེ༌ དཀོན༌མཆོག༌གི༌ བཀའ༌རྒྱ༌གུན༌ སྲུང༌།”
MAT 19:18 ཁོའེ༌ ཡེ༌ཤུའ༌ ཏྲིས༌, “ཀ༌གུན༌?” ཡེ༌ཤུའི༌ ལན༌སལས༌, “‘མི༌ མ༌སད༌, རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌, རྐུ༌མ༌རྐུ༌, སྤང༌པོ༌ ཟུན༌བ༌ མ༌ཏང༌,
MAT 19:19 རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌,’ ཡང༌ ‘རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པ༌ ཅམས༌པ༌ ཅོས༌།’”
MAT 19:20 ཞོན༌ནུའི༌ ཡེ༌ཤུའ༌ ཟེརས༌, “ཏེ༌ ཚང༌མ༌ ངའེ༌ ཅོའད༌ལེ༌, ཏེ༌ཀ༌ ཐེ༌བ༌ ངའེ༌ ཅི༌ ཅོ༌གོས༌?”
MAT 19:21 ཡེ༌ཤུའི༌ མོལས༌, “ཀལ༌ཏེས༌ ཁྱོ༌རང༌ ཕུན༌སུམ༌ཚོགས༌པ༌ཞིག༌ གྱུར༌ཉིན༌ ཡོད༌ན༌, སོང༌ ཡང༌ ཁྱོ༌རང༌ངི༌ གྱུ༌ནོར༌གུན༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏོང༌, ནམ༌ཁའེ༌ ནང༌ང༌ ཁྱོ༌རང༌ང༌ བང༌ཛོད༌ ཐོབ༌ཨིན༌། ཏེ༌ནེ༌ ཡོངས༌ཏེ༌ ངའེ༌ གྱབ༌ནེ༌ བྲོངས༌།”
MAT 19:22 ཏེ༌བོ༌ ཚོར༌ར༌ཅིག༌, ཁོའ༌ ཚེར༌ཁའ༌ ཡོངས༌ཏེ༌ སོང༌ ཅིའ༌ཟེར༌ན༌ ཁོ༌ མ༌ཆུག༌པོ༌ ཡོད༌པིན༌།
MAT 19:23 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “ངའེ༌ དེན༌བ༌ ཟེར༌རད༌, མི༌ ཆུག༌པོ༌ ནམ༌ཁའེ༌ གྱལ༌སྲིད༌དི༌ ནང༌ང༌ ལེབ༌ཅེས༌ མ༌ ཀགས༌པོ༌ ཨིན༌ནོག༌།
MAT 19:24 ཡང༌སྐྱར༌ ངའེ༌ ཁྱོ༌ཞའ༌ ཟེར༌རད༌ མི༌ ཆུག༌པོ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌སི༌ སང༌ ཁབ༌བི༌ མིག༌ནེ༌ རྔ༌བོང༌ བིང༌ཅེས༌པོ༌ ལ༌མོ༌ ཆེན༌།”
MAT 19:25 ཏེ༌བོ༌ ཚོར༌ར༌ཅིག༌ ལོབ༌ཕྲུགས༌གུན༌ མ༌ཧ༌ལས༌ཏེ༌ ཏྲིས༌, “ཏེ༌ནེ༌ སུའ༌ ཐར༌པ༌ ཐོབ༌ཨིན༌?”
MAT 19:26 ཡེ༌ཤུའི༌ ཁོང༌གུན༌ལ༌ ཟིགས༌ཏེ༌ མོལས༌, “འི༌བོ༌ མིའ༌ ཅོ༌ མ༌ནེ༌ མི༌ཉན༌, ཨིན༌ནའང༌ དཀོན༌མཆོག༌ག༌ ཅི༌ཚང༌མ༌ ཛད༌ ཉན༌ན༌ནོག༌།”
MAT 19:27 པི༌ཏྲར༌རི༌ ཡེ༌ཤུའ༌ ཟེརས༌, “ང༌ཞའེ༌ ཅི༌ཚང༌མ༌ ཕངས༌ཏེ༌, ཉེ༌རང༌ང༌ བྲངས༌པིན༌། ང༌ཞའ༌ སོལ༌རས༌ ཅི༌ ཐོབ༌ཨིན༌?”
MAT 19:28 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, དཀོན༌མཆོག༌གི༌ ཅི༌ཚང༌མ༌ ཡང༌སྐྱར༌ སོ༌མ༌ ཅོའ༌ ཛད༌ཅེས༌ ཡང༌ མི༌རིགས༌སི༌བུ༌ ཟིར༌རྗིད༌ཅན༌ནི༌ ཁྲིས༌སི༌ཀ༌ དུག༌ ཟ༌ནེ༌ ངའེ༌ སྟིང༌རང༌ནེ༌ བྲངས༌ཁན༌ ཁྱོ༌ཞ༌གུན༌ནའང༌ ཨིས༌ར༌ཨེལ༌ལི༌ སྡེ༌ རྕུག༌ཉིས༌སི༌ཀ༌ ཝང༌སྲུལ༌ཅེས༌ལ༌ ཁྲིས༌ རྕུག༌ཉིས༌སི༌ཀ༌ དུག༌ཨིན༌།
MAT 19:29 ངའེ༌ ཏོན༌ལ༌ ཁང༌པ༌ ཡ༌ ཨ༌ཅོ༌ནོ༌ ཡ༌ ཨ༌ཅེ༌ ནོ༌མོ༌ ཡ༌ ཨ༌བ༌ ཡ༌ ཨ༌མ༌ ཡ༌ ཕྲུ༌གུ༌ ཡ༌ ཞིང༌ ཕངས༌ཁན༌ ཚང༌མ༌ལ༌ ཏེ༌གུན༌ནི༌ གྱ༌ལྡབ༌ མ༌ཚད༌ ཐའ༌མེད༌པའེ༌ མི༌ཚེའང༌ ཐོབ༌ཨིན༌།
MAT 19:30 ཨིན༌ནའང༌ དག༌ས༌ གོའ༌ ཡོད༌ཁན༌ མང༌པོ༌ སྟིང༌ཇུག༌ག༌ ལུས༌ཨིན༌ ཡང༌ དག༌ས༌ སྟིང༌ཇུག༌གི༌ཀ༌ ཡོད༌ཁན༌ མང༌པོ༌ གོའ༌ ལེབ༌ཨིན༌།”
MAT 20:1 གཙོ༌བོ༌ ཡེ༌ཤུའི༌ མོལས༌, “ནམ༌ཁའེ༌ གྱལ༌སྲིད༌ ནི༌ རྒུན༌ཚས༌སི༌ དག༌པོ༌ ང༌མོ༌ནེ༌ རྒུན༌ཚས༌སི༌ ནང༌ང༌ ལས༌ ཅོ༌ཅེས༌ལ༌ ལ༌པ༌ ཙལ༌ལ༌ བིང༌ཁན༌ ཙོགས༌ ཨིན༌།
MAT 20:2 ལ༌པ༌གུན༌ལ༌ ཉི༌མ༌ཅིག༌གི༌ ལ༌ ཏང༌ཅེས༌ ཁའ༌ཆམས༌ཏེ༌ རྒུན༌ཚས༌སི༌ ནང༌ང༌ ལས༌ ཅོའ༌ ལམ༌ཅུགས༌།”
MAT 20:3 “ཧ༌ལམ༌ ཆུ༌ཚོད༌ རྒུ༌པ༌ཞིག༌གི༌ཀ༌ དག༌པོ༌ ཕི༌ལོག༌ག༌ བིང༌ཏེ༌ སོང༌, ཡང༌ ཁྲོམས༌སི༌ ནང༌ང༌ ལས༌ མ༌ཐོབ༌ཁན༌ནི༌ ཞན༌ ལ༌པ༌གུན༌ ཐོང༌ཏེ༌
MAT 20:4 ཁོང༌གུན༌ལ༌ ཟེརས༌, ‘ཁྱོ༌ཞ༌གུན༌ནའང༌ ངའེ༌ རྒུན༌ཚས༌སི༌ ནང༌ང༌ ལས༌ ཅོའ༌ སོང༌, འོས༌པ༌ ཨིན༌ཁན༌ནི༌ ལ༌ཆ༌ ངའེ༌ ཏང༌ཨིན༌།’
MAT 20:5 ཏེ༌ནེ༌ ཁོང༌གུན༌ ལས༌ ཅོའ༌ལ༌ སོང༌། ཆུ༌ཚོད༌ རྕུག༌ཉིས༌ དང༌ སུམ༌པའེ༌ཀ༌ དག༌པོ༌ ཡང༌སྐྱར༌ ཕི༌ལོག༌ག༌ སོང༌ཏེ༌, ཏེན༌ན༌ ཙོགས༌ ཅོས༌།”
MAT 20:6 “ཕི༌ཏོག༌ ཆུ༌ཚོད༌ ལྔ༌པའེ༌ཀ༌ དག༌པོ༌ ཡང༌སྐྱར༌ ཕི༌ལོག༌ག༌ བིང༌ཏེ༌ སོང༌, ཏེ༌རུ༌ ལས༌ མ༌ཐོབ༌ཁན༌ནི༌ ལ༌པ༌གུན༌ དུགས༌ཏེ༌ ཡོད༌ད༌ ཐོང༌ཏེ༌ ཁོང༌གུན༌ལ༌ ཏྲིས༌, ‘ཁྱོ༌ཞའ༌ ཉི༌མ༌ ཚེ༌རེ༌ ལས༌ མ༌ཅོའ༌ འི༌ཀ༌ དུགས༌ཏེ༌ ཅི༌ ཅོས༌ཏེ༌ ཨིན༌?’”
MAT 20:7 “ཁོང༌གུན༌ནི༌ ལན༌ཏངས༌, ‘ང༌ཞའ༌ ལས༌ ཅོའ༌ལ༌ སུའིང༌ མ༌ཁྱེརས༌།’” “རྒུན༌ཚས༌སི༌ དག༌པོའེ༌ ཟེརས༌, ‘ཁྱོ༌ཞ༌གུན༌ནའང༌ སོང༌ཏེ༌ ངའེ༌ རྒུན༌ཚས༌སི༌ ནང༌ང༌ ལས༌ ཅོས༌།’”
MAT 20:8 “ཕི༌ཏོག༌ རྒུན༌ཚས༌སི༌ དག༌པོའེ༌ ཆག༌ཟོད༌ལ༌ ཟེརས༌, ‘ལ༌པ༌གུན༌ལ༌ བོད༌ཏེ༌ སྟིང༌ཇུག༌ག༌ ཁྱོང༌ཁན༌གུན༌ནེ༌ གོ༌ཟུགས༌ཏེ༌ གོ༌མ༌ ཁྱོང༌ཁན༌གུན༌ ཙུགས༌པ༌ ལ༌ཆ༌ ཏོང༌།’
MAT 20:9 ཆུ༌ཚོད༌ ལྔ༌པའེ༌ཀ༌ ལས༌ ཅོའ༌ལ༌ ཁྱོང༌ཁན༌གུན༌ལ༌ ཉི༌མ༌ ཅིག༌གི༌ ལ༌ཆ༌ ཐོབ༌ པ༌སང༌
MAT 20:10 གོ༌ཟུག༌གི༌ཀ༌ ལས༌ ཅོའ༌ ཁྱོང༌ཁན༌གུན༌ ལ༌ཆའ༌ ལེན༌ན༌ ལེབ༌བ༌ཅིག༌ ཞན༌གུན༌ནི༌ སང༌ མང༌ང༌ ཐོབ༌བ༌ནོག༌ སམ༌། ཨིན༌ནའང༌ ཁོང༌གུན༌ལའང༌ ཉི༌མ༌ ཅིག༌གི༌ ཉིན༌ལ༌ མ༌ནེ༌ མ༌ཐོབ༌།
MAT 20:11 ལ༌ཆའ༌ ཐོབ༌པ༌ཅིག༌ ཁོང༌གུན༌ནི༌ མ༌བེབས༌ ཅོས༌ཏེ༌ དག༌པོའ༌ ཟེརས༌,
MAT 20:12 ‘ཆུ༌ཚོད༌ ཅིག༌ མ༌ནེ༌ ལས༌ མ༌ཅོ༌ཁན༌གུན༌ལའང༌ ཉེ༌རང༌ངི༌ ང༌ཞའ༌, ཉི༌མའེ༌ ཚད༌དི༌ ནང༌ང༌ ནགས༌ ཐོང༌ཨིན༌ ཉི༌མ༌ ཚེ༌རེ༌ ལས༌ ཅོ༌ཁན༌གུན༌ ཙོགས༌ ལ༌ཆའ༌ ཏངས༌།’”
MAT 20:13 “ཨིན༌ནའང༌ དག༌པོའེ༌ ལན༌ཏངས༌ཏེ༌ ཁོང༌ ཅིག༌ག༌ ཟེརས༌, ‘ཛ༌འོ༌ལེ༌, ངའེ༌ ཁྱོ༌རང༌ ཉམ༌པོ༌ མི༌འོས༌པ༌ མ༌ཅོས༌པིན༌། ཁྱོ༌རང༌ངི༌ ཉིན༌ལ༌, ལས༌ ཅོ༌ཅེས༌སི༌ ཁ༌ཆད༌ མ༌ཅོས༌པིན༌ན༌?
MAT 20:14 རང༌ངི༌ པེ༌ནེ༌ ཁུར༌ཏེ༌ སོང༌། སྟིང༌ཇུག༌གི༌ ལས༌མི༌གུན༌ལའང༌ ཁྱོ༌རང༌ དྲན༌དྲ༌ ལ༌ཆ༌ ཏང༌ཅེས༌ ང༌རང༌ངི༌ དོད༌པ༌ ཨིན༌པིན༌།
MAT 20:15 ངའེ༌ ང༌རང༌ངི༌ པེ༌ནེའ༌ ཅི༌ ཅོ༌ནའང༌ ང༌རང༌ མི༌ཐད༌ད༌? ཡ༌ ངའེ༌ སྙིང༌ ཕེས༌ཏེ༌ ཏངས༌ པ༌སང༌ ཚིག༌ཅེས༌ ཡོང༌ང༌ རག༌ག༌?’”
MAT 20:16 “ཏེན༌ན༌བོའེ༌ཕིའ༌ དག༌ས༌ གོའ༌ ཡོད༌ཁན༌གུན༌ སྟིང༌ཇུག༌ག༌ ལུས༌ཨིན༌ ཡང༌ དག༌ས༌ སྟིང༌ཇུག༌གི༌ཀ༌ ཡོད༌ཁན༌གུན༌ གོའ༌ ལེབ༌ཨིན༌།”
MAT 20:17 གཙོ༌བོ༌ ཡེ༌ཤུ༌ ཀེན༌ལ༌ ཡེ༌རུ༌ཤ༌ལེམ༌མ༌ སྐྱོད༌ཨིན༌ ཡོད༌ཏུས༌ ལོབ༌ཕྲུགས༌ རྕུག༌ཉིས༌པོ༌ སོ༌སོ༌ ཁྱེར༌ཏེ༌ མོལས༌,
MAT 20:18 “ཉོན༌ཤིག༌, ང༌དང༌གུན༌ ཀེན༌ལ༌ ཡེ༌རུ༌ཤ༌ལེམ༌མ༌ ཆ༌ཅེས༌ ཨིན༌ནོག༌, མི༌རིགས༌སི༌བུ༌ བླ༌མ༌ འུ༌སྐྱོང༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ལག༌ག༌ སྟད༌ཨིན༌, ཡང༌ ཁོང༌གུན༌ནི༌ ཁོའ༌ ཤི༌ཅེས༌སི༌ ཆད༌པ༌ ཅད༌ཏེ༌
MAT 20:19 ཡ༌ཧུ༌དཱ༌པ༌ མན༌ཁན༌གུན༌ནི༌ ལག༌ག༌ སྟད༌ཨིན༌། ཏེ༌ནེ༌ ཁོང༌གུན༌ནི༌ ཁོའ༌ ཁྲེལ༌བ༌ སྟན༌ཏེ༌, རྟལ༌ལྕག༌ གྱབས༌ཏེ༌ རྐྱང༌ཤིང༌ངི༌ཀ༌ རྐྱང༌ཏེ༌ སད༌ཨིན༌, ཡང༌ ཞག༌ སུམ༌པའེ༌ ཞག༌ག༌ སོན༌ཏེའ༌ ལངས༌ཤུག༌ག༌ ཛད༌ཨིན༌།”
MAT 20:20 ཏེ༌ནེ༌ ཟེ༌བེད༌དིའི༌ ན༌མ༌, ཡ༌ཀོབ༌ དང༌ ཡོ༌ཧཱ༌ནན༌ནི༌ ཨ༌མ༌, ཁོང༌གུན༌ ཉམ༌པོ༌ གཙོ༌བོ༌ ཡེ༌ཤུའི༌ སྐུ༌དུན༌ལ༌ ཡོངས༌ ཡང༌ པིག༌དོང༌ ཙུགས༌ཏེ༌ ཁོའེ༌ཀ༌ ཀའ༌ཀྲིན༌ ཛད༌ཅེས༌ལ༌ ཟེརས༌།
MAT 20:21 ཡེ༌ཤུའི༌ ཁོའ༌ མོལས༌, “ཉེ༌རང༌ང༌ ཅི༌ གོས༌སད༌?” ཁོའེ༌ ཟེརས༌, “ཉེ༌རང༌ངི༌ གྱལ༌སྲིད༌དི༌ ནང༌ང༌ ངའེ༌ བུ༌ཚ༌ ཉིས༌ཀོ༌ ཉེ༌རང༌ངི༌ ཆག༌ ཡས༌པ༌ དང༌ ཡོ༌མའེ༌ རྩི༌ཝ༌ཅན༌ ཀོ༌སའེ༌ཀ༌ དུག༌ ཅུག༌ག༌ ཛད༌ལེ༌།”
MAT 20:22 ཡེ༌ཤུའི༌ ཁོང༌གུན༌ལ༌ ལན༌སལས༌, “ཁྱོ༌ཞའེ༌ ཞུ༌ཝ༌ ཕུལ༌ཁན༌བོ༌ ཁྱོ༌ཞའ༌ ཧ༌མ༌གོའ༌ ཨིན༌ནོག༌, ང༌ ཐུང༌ཅེས༌ཅན༌ནི༌ རྡུག༌ངལ༌ལི༌ ཀོ༌རེ༌བོ༌ ཁྱོ༌ཞའེ༌ ཐུང༌ཉན༌ཅེས༌ རག༌ག༌?” ཁོང༌གུན༌ནི༌ ཟེརས༌, “ཉན༌ཅེས༌རག༌ལེ༌།”
MAT 20:23 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ནི༌ ཏན༌ཏན༌ལ༌ ངའེ༌ རྡུག༌ངལ༌ལི༌ ཀོ༌རེ༌ ནང༌ནེ༌ ཐུང༌ཨིན༌, ཨིན༌ནའང༌ ངའེ༌ ཡས༌པ༌ དང༌ ཡོ༌མའེ༌ཀ༌ དུག༌ཅུག༌ཅེས༌སི༌ ཝང༌ཆ༌ ངའ༌ མེད༌། ངའེ༌ ཡབ༌བི༌ ཏེ༌ ནས༌ས༌གུན༌ ཁོང༌ངི༌ ལྡམ༌མ༌ ཛད༌ཁན༌གུན༌ནི༌ ཕིའ༌ གྲལ༌གྲིག༌ ཛད༌ཏེ༌ ཨིན༌།”
MAT 20:24 ཏེ༌བོ༌ ཚོར༌ར༌ཅིག༌, ཞན༌ ལོབ༌ཕྲུགས༌ རྕུ༌བོའ༌ ཁོང༌ ཉིས༌ཀོའེ༌ཀ༌ སྲོ༌ ཡོངས༌།
MAT 20:25 ཡེ༌ཤུའི༌ ཁོང༌ ཚང༌མའ༌ བོད༌ད༌ ཛད༌ཏེ༌ མོལས༌, “ཁྱོ༌ཞའ༌ གྱུས༌མེད༌ད༌? ཡ༌ཧུ༌དཱ༌པ༌ མན༌ཁན༌ ཝང༌སྲུལ༌པ༌གུན༌ནི༌ ཁོ༌རང༌ངི༌ ཡུལ༌མི༌གུན༌ནི༌ཀ༌ སྙིང༌རྗེ༌ མེད༌པ༌ ཝང༌སྲུལ༌ལ༌ནོག༌, ཡང༌ ཁོང༌གུན༌ནི༌ ལོན༌པོ༌གུན༌ནིའང༌ མི༌གུན༌ལ༌ སྲན༌ཏྲེ༌ ནགས༌ སྟན༌ཨིན༌ ཝང༌སྲུལ༌ལ༌ནོག༌།
MAT 20:26 ཁྱོ༌ཞའེ༌ ནང༌ང༌ ཏེ༌ཙོགས༌ ཡོང༌ མ༌གོས༌། ཁྱོ༌ཞའེ༌ ཕྲོ༌ནེ༌ ཀྲག༌པོ༌ གྱུར༌ཉིན༌ ཡོད༌ཁན༌བོ༌ ཞན༌མ༌གུན༌ནི༌ ཡོག༌པོ༌ གྱུར༌གོས༌,
MAT 20:27 ཡང༌ ཁྱོ༌ཞའེ༌ ཕྲོ༌ནེ༌ གོའ༌ ལེབ༌ཉིན༌ ཡོད༌ཁན༌བོ༌ ཞན༌གུན༌ནི༌ ཚེ༌ཡོག༌ གྱུར༌གོས༌།
MAT 20:28 ཀ༌ཟུག༌ མི༌རིགས༌སི༌བུ༌ ཞབས༌ཏོག༌ ཞུ༌ཅུག༌ཅེས༌ལ༌ མན༌པ༌ ཞབས༌ཏོག༌ ཞུའ༌ལ༌ ཡོངས༌པིན༌, ཡང༌ མི༌ མང༌པོའེ༌ སྲོག༌རིན༌ ཤལ༌ཅེས༌ལ༌ ཁོང༌རང༌ངི༌ སྲོག༌ ཏང༌ཨིན༌།”
MAT 20:29 ཡེ༌རི༌ཀོ༌ གྲོང༌ཁྱེར༌ནེ༌ གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ བིང༌ཏེ༌ སྐྱོད༌ ཟ༌ནེ༌, མི༌ཚོགས༌ ཆེན༌མོ༌ཞིག༌ ཁོང༌ངི༌ སྟིང༌རང༌ནེ༌ ཡོངས༌།
MAT 20:30 ལམ༌མི༌ ཐའ༌མའེ༌ཀ༌ ཡོད༌ཁན༌ནི༌ ཞ༌ར༌ ཉིས༌སི༌ ཡེ༌ཤུ༌ ཏེ༌ཀ༌ནེ༌ སྐྱོད༌དུག༌ ཟེར༌ཏེ༌ ཚོར༌ར༌ཅིག༌ ཀུ༌ཅོ༌ ཏང༌ཨིན༌ ཟེརས༌, “གཙོ༌བོ༌, གྱལ༌པོ༌ དཱ༌བིད༌དི༌ པུར༌གྱུད༌, ང༌ཞའེ༌ཀ༌ སྙིང༌རྗེ༌ ཛད༌།”
MAT 20:31 མི༌ཚོགས༌སི༌ ཞ༌ར༌ ཉིས༌ཀོའ༌ ཁའ༌སྐྱེས༌ཏེ༌ ཅུབ༌ཅོད༌ ཟེརས༌། ཨིན༌ནའང༌ ཁོང༌གུན༌ནི༌ མང༌ང༌ ཀུ༌ཅོ༌ ཏངས༌ཏེ༌ ཟེརས༌, “གྱལ༌པོ༌ དཱ༌བིད༌དི༌ པུར༌གྱུད༌, ང༌ཞའེ༌ཀ༌ སྙིང༌རྗེ༌ ཛད༌དའང༌།”
MAT 20:32 ཡེ༌ཤུ༌ སྲུང༌ང༌ ཛདས༌ ཡང༌ ཁོང༌གུན༌ལ༌ བོད༌ཏེ༌ ཏྲིའ༌ ཛདས༌, “ངའེ༌ ཁྱོ༌ཞའེ༌ ཕིའ༌ ཅི༌ ཅོ༌?”
MAT 20:33 ཁོང༌གུན༌ནི༌ ཟེརས༌, “གཙོ༌བོ༌ལེ༌, ང༌ཞའ༌ ཐོང༌ཅེས༌སི༌ ཁྱུད༌པོ༌ སལ༌ལའང༌།”
MAT 20:34 ཡེ༌ཤུའ༌ ཁོང༌ངི༌ཀ༌ སྙིང༌རྗེ༌ སྐྱེས༌ཏེ༌ ཁོང༌གུན༌ནི༌ མིག༌གི༌ཀ༌ ཆག༌ རྩེའ༌ ཛདས༌, ཏེན༌ན༌མལ༌ལ༌ ཁོང༌གུན༌ལ༌ ཐོང༌ཐུབ༌ ཡང༌ ཁོང༌གུན༌ ཡེ༌ཤུའ༌ བྲངས༌ཏེ༌ སོང༌།
MAT 21:1 ཡེ༌རུ༌ཤ༌ལེམ༌མི༌ གྱལ༌སའེ༌ ཉེ༌མོའ༌ ཨོ༌ལིཝ༌ཝི༌ རི༌ཀ༌ ཡོད༌ཁན༌ བེད༌ཕ༌གེའེ༌ གྲོང༌སེབ༌བ༌ ལེབ༌ཀྱིས༌ ཡོད༌ད༌ཅིག༌, གཙོ༌བོ༌ ཡེ༌ཤུའི༌ ལོབ༌ཕྲུགས༌ ཉིས༌ སྔུན༌ལ༌ ལམ༌ཅུག༌ག༌ ཛད༌ཏེ༌
MAT 21:2 མོལས༌, “འ༌ གྲོང༌སེབ༌བི༌ ནང༌ང༌ སོང༌, ཏེ༌རུ༌ ལེབ༌བ༌ཅིག༌ བུང༌བུ༌ཞིག༌ ཁོ༌རང༌ངི༌ བུང༌སར༌ ཉམ༌པོ༌ ཏགས༌ཏེ༌ ཐོང༌ཅེན༌། ཏེ༌གུན༌ ཀྲོལ༌ཏེ༌ ང༌ ཡོད༌ས༌ ཁྱོང༌།
MAT 21:3 ཀལ༌ཏེས༌ སུ༌ཞིག༌གི༌ ཅི༌ ཅོའད༌ ཟེར༌ཏེ༌ ཏྲི༌ན༌, ‘གཙོ༌བོའ༌ སྒོས༌དོམ༌ དུག༌’ ཟེར༌། ཏེན༌ན༌མལ༌ལ༌ ཁོའེ༌ ཁྱོ༌ཞའ༌ ཏེ༌གུན༌ ཁྱེར༌ ཅུག༌ག༌ནོག༌།”
MAT 21:4 ལུང༌སྟོན༌པ༌ གྱུད༌ཏེ༌ དཀོན༌མཆོག༌གི༌ མོལ༌ཁན༌བོ༌ དྲན༌དྲ༌ གྲུབ༌ཅེས༌སི༌ ཕིའ༌, ཏེ༌བོ༌ ཇུངས༌ཏེ༌ ཨིན༌ནོག༌,
MAT 21:5 “ཡེ༌རུ༌ཤ༌ལེམ༌པ༌གུན༌ལ༌ ཟེར༌, ‘ལྟོས༌སའང༌, ཁྱོ༌ཞའེ༌ གྱལ༌པོ༌ ཁྱོ༌ཞའ༌ ཡོད༌ས༌ ཡོང༌དུག༌, ཁོང༌ ནི༌ ཉམ༌ཤུང༌, བུང༌སར༌རི༌ཀ༌ ཞོན༌ཏེ༌ ཡོང༌དུག༌།’”
MAT 21:6 ལོབ༌ཕྲུགས༌གུན༌ སོང༌ཏེ༌ ཡེ༌ཤུའི༌ བཀའ༌ སལ༌ཁན༌ ནང༌ཞིན༌ ཅོས༌།
MAT 21:7 ཏེ༌ནེ༌ ཁོང༌གུན༌ནི༌ བུང༌བུ༌ དང༌ བུང༌སར༌བོ༌ ཁྱོངས༌ཏེ༌ ཁོང༌རང༌གུན༌ནི༌ ཀོས༌ ཏེ༌གུན༌ནི༌ཀ༌ སྡདས༌ ཡང༌ ཡེ༌ཤུ༌ བུང༌སར༌རི༌ཀ༌ ཞོན༌ན༌ ཛདས༌།
MAT 21:8 མི༌ཚོགས༌སི༌ ནང༌ནེ༌ མང༌ཆེའ༌བོའེ༌ རང༌རང༌ངི༌ ཀོས༌ ཡེ༌ཤུ༌ སྐྱོད༌སའེ༌ ལམ༌མི༌ཀ༌ ཏིངས༌ ཡང༌ ཞན༌གུན༌ནི༌ ལྕང༌མའེ༌ ཡལ༌ག༌ ཅད༌ཏེ༌ ཏིངས༌།
MAT 21:9 ཡེ༌ཤུའི༌ དུན༌ནེ༌ གྲུལ༌ཁན༌ ཡང༌ གྱབ༌ནེ༌ ཡོང༌ཁན༌ནི༌ མི༌ཚོགས༌སི༌ ཀུ༌ཅོ༌ ཏང༌ཨིན༌ ཟེརས༌, “གྱལ༌པོ༌ དཱ༌བིད༌དི༌ པུར༌གྱུད༌དི༌ ཕིའ༌ དཀོན༌མཆོག༌ག༌ སྟོད༌པ༌ ཕུལ༌, གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌། ནམ༌ཁའ༌ ཞུགས༌ཁན༌ནི༌ དཀོན༌མཆོག༌ག༌ སྟོད༌པ༌ ཕུལ༌།”
MAT 21:10 ཡེ༌རུ༌ཤ༌ལེམ༌མི༌ ནང༌ཀུག༌ག༌ ལེབ༌བ༌ཅིག༌, གྱལ༌ས༌ གང༌པོའེ༌ ནང༌ང༌ ཧི༌ལིངས༌ ཤོར༌ ཡང༌ མི༌གུན༌ནི༌ ཅིག༌ དང༌ ཅིག༌ག༌ ཏྲིས༌, “འི༌ མི༌བོ༌ སུ༌ ཨིན༌ནོག༌།”
MAT 21:11 ཡེ༌ཤུ༌ ཉམ༌པོ༌ ཡོད༌ཁན༌ནི༌ མི༌ཚོགས༌སི༌ ལན༌ཏངས༌, “ཁོང༌ ནི༌ ལུང༌སྟོན༌པ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ ན༌ཙ༌རེད༌ནེ༌ ཨིན༌ནོག༌།”
MAT 21:12 གཙོ༌བོ༌ ཡེ༌ཤུ༌, ཆོད༌ཁང༌ང༌ སྐྱོད༌ཏེ༌ སྲོག༌ཆོད༌ལ༌ ཕུལ༌ཅེས༌སི༌ སེམས༌ཅན༌ ཙོང༌ཁན༌ དང༌ ཉོ༌ཁན༌ གུན༌ ཕིང༌ང༌ ཛདས༌། པེ༌ནེ༌ ཞེབ༌ཁན༌ནི༌ ཅོག༌ཙེ༌གུན༌ དང༌ ཕུར༌གོན༌ ཙོང༌ཁན༌ནི༌ ཕོས༌སྟག༌གུན༌ ལོག༌ག༌ ཛདས༌།
MAT 21:13 ཡེ༌ཤུའི༌ ཁོང༌གུན༌ལ༌ མོལས༌, “ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ངའེ༌ ཁང༌པའ༌ མོས༌ལམ༌ ཞུས༌སའེ༌ ཁང༌པ༌ ཟེར༌ཨིན༌,’ ཨིན༌ནའང༌ ‘ཁྱོ༌ཞ༌གུན༌ནི༌ ཏེ༌བོ༌ ཅག༌པ༌གུན༌ནི༌ བའོ༌ ཅོས༌ཏེ༌ དུག༌།’”
MAT 21:14 ཆོད༌ཁང༌ངི༌ ནང༌ང༌ ཡེ༌ཤུ༌ ཡོད༌ས༌ ཞ༌ར༌ དང༌ ཞ༌འོ༌ གུན༌ ཡོངས༌པ༌ ཁོང༌ངི༌ ཁོང༌གུན༌ ཕན༌ཅུག༌ག༌ ཛདས༌།
MAT 21:15 ཨིན༌ནའང༌ བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཡེ༌ཤུའི༌ ཧ༌ལས༌སི༌ ཛད༌པ༌ ཛད༌ཁན༌ ཡང༌ ཕྲུ༌གུ༌གུན༌ནི༌ ཆོད༌ཁང༌ངི༌ ནང༌ང༌, “གྱལ༌པོ༌ དཱ༌བིད༌དི༌ པུར༌གྱུད༌དི༌ ཕིའ༌ དཀོན༌མཆོག༌ག༌ སྟོད༌པ༌ ཕུལ༌” ཟེར༌ཨིན༌ ཀུ༌ཅོ༌ ཏང༌ང༌ ཐོང༌པ༌, ཁོང༌གུན༌ལ༌ མ༌སྲན༌ཏྲེ༌ སྲོ༌ ཡོངས༌།
MAT 21:16 ཁོང༌གུན༌ནི༌ ཡེ༌ཤུའ༌ ཏྲིས༌, “ཁྱོ༌རང༌ང༌ ཚོར༌ར༌, འི༌ ཕྲུ༌གུ༌གུན༌ནི༌ ཅི༌ ཟེར༌ར༌རག༌?” ཡེ༌ཤུའི༌ ལན༌སལས༌, “ཚོར༌། ཏམ༌པའེ༌ སུང༌རབས༌སི༌ ནང༌ང༌ ‘དཀོན༌མཆོག༌གི༌ ཁོང༌རང༌ང༌ སྟོད༌པ༌ ཏང༌ཅེས༌ལ༌ འོམ༌ཐུང༌ དང༌ ཞན༌ ཕྲུ༌གུ༌གུན༌ གྲལ༌གྲིག༌ ཛདས༌’ བྲིའ༌ ཛད༌ཁན༌བོ༌ ཁྱོ༌ཞའེ༌ མ༌སིལ༌པིན༌ན༌?”
MAT 21:17 ཏེ༌ སྟིང༌ནེ༌ ཡེ༌ཤུ༌ བེད༌ཐཱ༌ནི༌ གྲོང༌སེབ༌བ༌ སྐྱོདས༌ ཡང༌ ཚན༌ལ༌ ཏེ༌རུ༌ ཞུགས༌།
MAT 21:18 ང༌ཏོག༌ང༌མོ༌ནེ༌ གྱལ༌ས༌ ལོགས༌ཏེ༌ སྐྱོད༌ཨིན༌ ཡོད༌ ཟ༌ནེ༌ ལམ༌མ༌ ཡེ༌ཤུ༌ སྟོགས༌ས༌ ཛདས༌།
MAT 21:19 ལམ༌མི༌ ཐའ༌མ༌ ཁོང༌ངི༌ ཕིག༌ ཁ༌ཟས༌སི༌ ལྕང༌མ༌ཞིག༌ ཟིགས༌, ཁོང༌ ཏེ༌ ལྕང༌མ༌ ཡོད༌ས༌ སྐྱོདས༌ ཨིན༌ནའང༌ ཏེ༌ཀ༌ ལོ༌མ༌ མ༌ནེ༌ ཁ༌ཟས༌ མེད༌ཁན༌བོ༌ ཟིགས༌པ༌ ཁོང༌ངི༌ ལྕང༌མའ༌ མོལས༌, “ཁྱོ༌རང༌ང༌ ཡང༌སྐྱར༌ ཁ༌ཟས༌ མ༌ནེ༌ མི༌ཆགས༌།” ཏེན༌ན༌མལ༌ལ༌ ལྕང༌མ༌བོ༌ སྐམས༌།
MAT 21:20 ཕིག༌གི༌ ཁ༌ཟས༌སི༌ ལྕང༌མ༌ སྐམས༌ས༌ལ༌ ཐོང༌ཏེ༌ ལོབ༌ཕྲུགས༌གུན༌ ཧ༌ལས༌ ཡང༌ ཡེ༌ཤུའ༌ ཏྲིས༌, “འི༌ཟམ༌ གྱོགས༌པ༌ ཕིག༌གི༌ ལྕང༌མ༌བོ༌ ཀ༌ཟུག༌གི༌ སྐམས༌ཏེ༌ ཨིན༌ནོག༌?”
MAT 21:21 ཡེ༌ཤུའི༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, ཀལ༌ཏེས༌ ཐེ༌ཚོམས༌ མེད༌པ༌ དཀོན༌མཆོག༌ག༌ ཏད༌པ༌ ཅོ༌ན༌, ཁྱོ༌ཞའེ༌, ངའེ༌ ཕིག༌གི༌ ལྕང༌མའ༌ ཅོ༌ཁན༌བོ༌ མ༌ཚད༌ འི༌ རི༌བོའང༌, ‘སོང༌, ཁྱོ༌རང༌ གྱ༌ཚོའེ༌ ནང༌ང༌ ཕོང༌’ ཟེར༌ན༌ ཏེ༌བོ༌ ཅོའ༌ ཛད༌ཨིན༌།
MAT 21:22 ཀལ༌ཏེས༌ ཏད༌པ༌ ཅོས༌ཏེ༌ ཁྱོ༌ཞའེ༌ མོས༌ལམ༌མི༌ ནང༌ང༌ ཅི༌ཞིག༌ ཞུ༌ནའང༌ ཁྱོ༌ཞ༌གུན༌ལ༌ ཐོབ༌ཨིན༌།”
MAT 21:23 གཙོ༌བོ༌ ཡེ༌ཤུ༌ ཆོད༌ཁང༌ངི༌ ནང༌ང༌ སྐྱོདས༌ ཡང༌ ལབ༌ཞ༌ སལ༌ཨིན༌ ཡོད༌ཏུས༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཡོངས༌ཏེ༌ ཏྲིས༌, “ཀ༌ ཝང༌ཆ༌ ཉམ༌པོ༌ ཁྱོ༌རང༌ངི༌ འི༌གུན༌ ཅོའད༌ ཡང༌ ཁྱོ༌རང༌ང༌ འི༌ ཝང༌ཆ༌ སུའི༌ ཏངས༌?”
MAT 21:24 ཡེ༌ཤུའི༌ ཁོང༌གུན༌ལ༌ མོལས༌, “ངེའང༌ ཁྱོ༌ཞ༌གུན༌ལ༌ ཏྲི༌ཝ༌ཞིག༌ ཏྲི༌ཨིན༌, ཀལ༌ཏེས༌ ཁྱོ༌ཞའེ༌ ལན༌ཏང༌ན༌, ཏེ༌ནེ༌ ངེའང༌ ཀ༌ ཝང༌ཆ༌ གྱུད༌ཏེ༌ འི༌གུན༌ ཅོའད༌ ཁྱོ༌ཞའ༌ ཤད༌ཨིན༌།”
MAT 21:25 “ཡོ༌ཧཱ༌ནན༌ལ༌ ཁྲུས༌སལ༌ཅེས༌སི༌ ཝང༌ཆ༌ དཀོན༌མཆོག༌གི༌ ཆོགས༌ནེ༌ ཐོབ༌ཏེ༌ ཨིན༌ནོག༌ག༌ ཡ༌ མི༌ ཆོགས༌ནེ༌?” ཁོང༌གུན༌ནི༌ ཁོ༌རང༌གུན༌ནི༌ ཕྲོའ༌ སྤེ༌ར༌ ཏངས༌ཏེ༌ ཟེརས༌, “ཀལ༌ཏེས༌ ‘དཀོན༌མཆོག༌གི༌ ཆོགས༌ནེ༌ ཨིན༌ནོག༌’ ཟེར༌ན༌ ཁོའེ༌ ང༌དང༌ང༌, ‘ཁྱོ༌ཞའེ༌ ཁོའེ༌ཀ༌ ཨིད༌ཤེས༌ ཅིའ༌ མ༌ཅོས༌པིན༌’ ཟེར༌ཨིན༌།
MAT 21:26 ཨིན༌ནའང༌ ཀལ༌ཏེས༌ ‘མིའི༌ ཆོགས༌ནེ༌ ཨིན༌ནོག༌’ ཟེར༌ན༌, མི༌ཚོགས༌ལ༌ སྲོ༌ ཡོང༌ཨིན༌, ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ལ༌ ལུང༌སྟོན༌པ༌ རྩིའད༌པིན༌།”
MAT 21:27 ཏེ༌བོའེ༌ཕིའ༌ ཁོང༌གུན༌ནི༌ ཡེ༌ཤུའ༌ ལན༌ཏངས༌, “ང༌ཞའ༌ གྱུས༌མེད༌།” ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ངེའང༌ མི༌ཤད༌, སུའི༌ ཝང༌ཆའེ༌ ནང༌ང༌ ངའེ༌ འི༌གུན༌ ཅོའད༌།”
MAT 21:28 གཙོ༌བོ༌ ཡེ༌ཤུའི༌ མོལས༌, “ཁྱོ༌ཞའེ༌ ཅི༌ སམ༌མ༌རག༌? མི༌ཞིག༌ག༌ བུ༌ཚ༌ ཉིས༌ ཡོད༌པིན༌། ཁོ༌ བུ༌ཚ༌ ཆེན༌མོ༌ ཡོད༌ས༌ སོང༌ཏེ༌ ཟེརས༌, ‘བུ༌ཚ༌, ཁྱོ༌རང༌ དི༌རིང༌ རྒུན༌ཚས༌སི༌ ནང༌ང༌ ལས༌ ཅོའ༌ལ༌ སོང༌།’
MAT 21:29 ཁོའེ༌ ཟེརས༌, ‘ང༌ ཆ༌མེད༌’ ཨིན༌ནའང༌ སྟིང༌ནེ༌ སེམ༌བ༌ གྱུར༌ཏེ༌ ལས༌ ཅོའ༌ སོང༌།
MAT 21:30 ཏེ༌ནེ༌ ཨ༌བ༌ བུ༌ཚ༌ ཆུ༌ངུན༌ ཡོད༌ས༌ སོང༌ཏེ༌ ཏེན༌ན༌ ཙོགས༌ ཟེརས༌པ༌ ཁོའེ༌, ‘འོ༌ ཨ༌བ༌ལེ༌ ང༌ ཆེན༌’ ཟེརས༌ ཨིན༌ནའང༌ མ༌སོང༌།”
MAT 21:31 “ཁོང༌ ཉིས༌ཀོའེ༌ ནང༌ནེ༌ ཨ༌བའེ༌ ཁའ༌ སུའི༌ ཉནས༌?” ཁོང༌གུན༌ནི༌ ཟེརས༌, “བུ༌ཚ༌ ཆེན༌མོའེ༌།” ཡེ༌ཤུའི༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྲལ༌ནེན༌ཁན༌གུན༌ དང༌ ཟུགས༌ཙོང༌མ༌གུན༌ ཁྱོ༌ཞའེ༌ སང༌ སྔུན༌ལ༌ ནམ༌ཁའེ༌ གྱལ༌སྲིད༌དི༌ ནང༌ང༌ ལེབ༌ཨིན༌ ཨིན༌ནོག༌།
MAT 21:32 ཀྲང༌པོ༌ མི༌ཚེ༌ ཕུད༌ཅེས༌སི༌ ལམ༌སྟན༌ན༌ལ༌ ཡོ༌ཧཱ༌ནན༌ ཁྱོ༌ཞའ༌ ཡོད༌ས༌ ཡོངས༌ཏེའང༌, ཁྱོ༌ཞ༌གུན༌ནི༌ ཏད༌པ༌ མ༌ཅོས༌, ཨིན༌ནའང༌ ཁྲལ༌ནེན༌ཁན༌གུན༌ དང༌ ཟུགས༌ཙོང༌མ༌གུན༌ནི༌ ཏད༌པ༌ ཅོས༌། ཁྱོ༌ཞའེ༌ ཏེ༌གུན༌ ཐོང༌ཏེའང༌ ཁོའེ༌ ལོན༌བོའེ༌ ནང༌ང༌ ཏད༌པ༌ ཅོས༌ཏེ༌ གྱོད༌པ༌ མ༌ཅོས༌།”
MAT 21:33 གཙོ༌བོ༌ ཡེ༌ཤུའི༌ མོལས༌, “ཡང༌ རུངས༌ཤིག༌ ཉོན༌, ཞིང༌ངི༌ དག༌པོའེ༌ ཁོ༌རང༌ངི༌ ཞིང༌ང༌ རྒུན༌ ལྕང༌མ༌ ཙུགས༌ཏེ༌ གྱང༌སྐོར༌ ཏངས༌། རྒུན༌ ཙིར༌སའེ༌ ནས༌ས༌ བྲུས༌, ཡང༌ རྒུན༌ཚས༌ལ༌ ལྟ༌ཅེས༌སི༌ ཕིའ༌ པི༌འུ༌ རྩིགས༌། ཏེ༌ནེ༌ རྒུན༌ཚས༌པོ༌ ཞན༌ ཞིང༌བད༌པ༌གུན༌ལ༌ ཤས༌ལ༌ ཏང༌ཏེ༌ ཁོ༌རང༌ ཞན༌ཡུལ༌ཞིག༌ག༌ དུག༌ག༌ སོང༌།
MAT 21:34 སྟོན༌ཐོག༌གི༌ ཏུས༌པོ༌ ཉེ༌མོའ༌ ལེབ༌བ༌ཅིག༌, དག༌པོའེ༌ ཤིང༌ཏོག༌གི༌ སྐལ༌ལ༌ ལེན༌ན༌ལ༌ ཁོ༌རང༌ངི༌ ཡོག༌པོ༌གུན༌ ཤས༌ལ༌ ཏང༌ཁན༌གུན༌ནི༌ཀ༌ ལམ༌ཅུགས༌།
MAT 21:35 ཤས༌པ༌གུན༌ནི༌ ཡོག༌པོ༌གུན༌ ཟུམས༌ཏེ༌, ཅིག༌ག༌ རྡུངས༌, ཅིག༌ སདས༌, ཡང༌ ཅིག༌ག༌ རྡོའ༌ གྱབས༌།
MAT 21:36 ཏེ༌ནེ༌ དག༌པོའེ༌ སྔུན༌ནི༌ སང༌ མང༌ང༌ ཡོག༌པོ༌ ལམ༌ཅུགས༌, ཨིན༌ནའང༌ ཁོང༌གུན༌ནི༌ ཁོང༌གུན༌ལའང༌ ཏེན༌ན༌ ཙོགས༌ ངན༌པ༌ ཅོས༌།”
MAT 21:37 “སྟིང༌ཇུག༌པོའེ༌ཀ༌ ཁོའེ༌ ཁོ༌རང༌ངི༌ བུ༌ཚ༌ ལམ༌ཅུགས༌ཏེ༌, ‘ཁོང༌གུན༌ནི༌ ཏན༌ཏན༌ལ༌ ངའེ༌ བུ༌ཚའ༌ རྩི༌ཝ༌ ཅོའ༌ནོག༌’ སམ༌།”
MAT 21:38 “ཨིན༌ནའང༌ ཤས༌པ༌གུན༌ནི༌ བུ༌ཚ༌ ཐོང༌ང༌ཅིག༌, ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, ‘འི༌ ཞིང༌ ནོར༌སྐལ༌ལ༌ ཐོབ༌ཅེས༌ཅན༌བོ༌ ཡོང༌ང༌ལ༌, ཡོང༌ཤིག༌, ཁོ༌ སད༌ཏེ༌ ང༌དང༌ངི༌ ཁོའེ༌ ནོར༌སྐལ༌བོ༌ ཀོག༌ཨིན༌།’
MAT 21:39 ཏེ༌བོའེ༌ཕིའ༌ ཁོང༌གུན༌ནི༌ ཁོ༌ ཟུམས༌ཏེ༌ རྒུན༌ཚས༌ནེ༌ ཕི༌ལོག༌ག༌ ཕིངས༌ཏེ༌ སདས༌།”
MAT 21:40 ཡེ༌ཤུའི༌ ཡ༌ཧུ༌དཱ༌པའེ༌ སྤོན༌བོ༌གུན༌ལ༌ ཏྲིའ༌ ཛདས༌, “ཏ༌ རྒུན༌ཚས༌སི༌ དག༌པོ༌ ཡོང༌ང༌ཅིག༌, ཁོའེ༌ ཤས༌པ༌གུན༌ལ༌ ཅི༌ ཅོ༌ཨིན༌?”
MAT 21:41 ཁོང༌གུན༌ནི༌ ལན༌ཏངས༌, “ཁོའེ༌ ཏེ༌ མི༌ངན༌གུན༌ལ༌ ནགས༌ སྲན༌ཏྲེ༌ སྟན༌ཏེ༌ སད༌ཨིན༌ ཡང༌ རྒུན༌ཚས༌པོ༌ ཁོའ༌ སྟོན༌ཐོག༌གི༌ སྐ༌ལ༌ ཏང༌ཁན༌ནི༌ ཞན༌ ཞིང༌བད༌པ༌ རིག༌ག༌ ཤས༌ལ༌ ཏང༌ཨིན༌།”
MAT 21:42 ཡེ༌ཤུའི༌ ཁོང༌གུན༌ལ༌ མོལས༌, “ཏམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ ཡོད༌ཁན༌བོ༌ ཁྱོ༌ཞའེ༌ མ༌སིལ༌པིན༌ན༌? ‘ཀ༌ རྡོའ༌བོ༌ ཁང༌པ༌ རྩིག༌ཁན༌གུན༌ནི༌ ཕན༌མི༌ཐོགས༌ ཐེས༌, ཏེན༌ན༌ རྡོའ༌བོ༌ ཁང༌པའེ༌ ཀྲུ༌རྡོའ༌བོ༌ གྱུར༌ ཀ༌བོ༌ ཚང༌མའེ༌སང༌ ཁག༌ཅན༌ རྡོའ༌བོ༌ ཨིན༌ནོག༌། འི༌བོ༌ གཙོ༌བོའེ༌ ཅོའ༌ ཛད༌ཏེ༌ ཨིན༌ནོག༌, ཏེ༌བོ༌ ཐོང༌ཏེ༌ ང༌དང༌ མ༌ ཧ༌ལས༌ཨིན༌།’”
MAT 21:43 “ཏེ༌བོའེ༌ཕིའ༌ ངའེ༌ ཁྱོ༌རང༌གུན༌ལ༌ ཟེར༌རད༌, ཏ༌ ནམ༌ཁའེ༌ གྱལ༌སྲིད༌དི༌ ནང༌ང༌ ལེབ༌ཅེས༌སི༌ སྐབས༌ ཁྱོ༌ཞ༌གུན༌ནི༌ ཀ༌ནེ༌ ཁྱེར༌ར༌ ཛད༌ཏེ༌ ནམ༌ཁའེ༌ གྱལ༌སྲིད༌དི༌ བྲས༌བུ༌ ཟང༌པོ༌ སྐྱེ༌ཁན༌ མི༌གུན༌ལ༌ སལ༌ལ༌ ཛད༌ཨིན༌།
MAT 21:44 ཏེ༌ རྡོའེ༌ཀ༌ སྒག༌གྱབ༌ཁན༌གུན༌ ཏུམ༌པ༌ཏུམ༌པའེ༌ ནང༌ང༌ ཆག༌ཨིན༌, ཨིན༌ནའང༌ ཏེ༌ རྡོའ༌བོ༌ ཁོང༌གུན༌ནི༌ཀ༌ བུད༌ན༌, ཁོང༌གུན༌ མེད༌ཁན༌ ཆེན༌། ”
MAT 21:45 བླ༌མ༌ འུ༌སྐྱོང༌གུན༌ དང༌ ཕ༌རུ༌ཤི༌པ༌གུན༌ནི༌ རུངས༌པོ༌ ཚོར༌ར༌ཅིག༌, ཡེ༌ཤུའི༌ ཁོང༌གུན༌ནི༌ སྐོར༌ལ༌ མོལ༌ཁན༌བོ༌ ཧ༌གོ༌།
MAT 21:46 ཁོང༌གུན༌ལ༌ ཡེ༌ཤུ༌ ཟུམ༌ཅེས༌སི༌ དོད༌པ༌ ཡོད༌པིན༌, ཨིན༌ནའང༌ ཁོང༌གུན༌ མི༌གུན༌ལ༌ ཇིགས༌ ཅིའ༌ཟེར༌ན༌ མི༌གུན༌ནི༌ ཡེ༌ཤུའ༌ ལུང༌སྟོན༌པ༌ རྩིའད༌པིན༌།
MAT 22:1 གཙོ༌བོ༌ ཡེ༌ཤུའི༌ ཆོས༌སི༌ འུ༌སྐྱོང༌གུན༌ལ༌ ཡང༌སྐྱར༌ རུངས༌ གྱུད༌ཏེ༌ ལབ༌ཞ༌ སལས༌,
MAT 22:2 “ནམ༌ཁའེ༌ གྱལ༌སྲིད༌ ནི༌ གྱལ༌པོའེ༌ ཁོ༌རང༌ངི༌ བུ༌ཚའེ༌ བག༌སྟོན༌ནི༌ ཕིའ༌ དོན༌ཏང༌ གྲལ༌གྲིག༌ ཅོ༌ཁན༌ ཙོགས༌ ཨིན༌།
MAT 22:3 བག༌སྟོན༌ལ༌ བོད༌ཏེ༌ ཡོད༌ཁན༌གུན༌ལ༌ ཡོང༌ ཟེར༌ཏེ༌ བོད༌ད༌ལ༌ གྱལ༌པོའེ༌ ཁོ༌རང༌ངི༌ ཡོག༌པོ༌གུན༌ ལམ༌ཅུགས༌, ཨིན༌ནའང༌ ཁོང༌གུན༌ ཡོང༌ང༌ལ༌ མ༌ཐད༌།”
MAT 22:4 “གྱལ༌པོའེ༌ ཡང༌སྐྱར༌ ཞན༌ ཡོག༌པོ༌གུན༌ བོད༌ད༌ལ༌ ལམ༌ཅུགས༌ཏེ༌ ཟེརས༌, ‘བག༌སྟོན༌ལ༌ བོད༌ཁན༌གུན༌ལ༌, ངའེ༌ དོན༌ཏང༌ གྲལ༌གྲིག༌ ཅོ༌ ཚར༌, ལང༌ཏོ༌ དང༌ བ༌ལང༌ གྱགས༌པ༌ གུན༌ སད༌ཏེ༌ ཅི༌ཚང༌མ༌ གྲུབ༌ ཚར༌, བག༌སྟོན༌ནི༌ དོན༌ཏང༌ང༌ ཡོང༌ཤིག༌’ ཟེར༌།
MAT 22:5 ཨིན༌ནའང༌ ཁོང༌གུན༌ནི༌ ཏེ༌བོའ༌ ནང༌སྟག༌ མ༌ཏང༌ང༌, ཁ༌ཅིག༌ ཞིང༌ང༌ སོང༌, ཁ༌ཅིག༌ ཚོང༌ང༌ སོང༌།
MAT 22:6 ཞན༌ ལུས༌ཁན༌གུན༌ནི༌ ཡོག༌པོ༌གུན༌ ཟུམས༌ཏེ༌ ཁོང༌ ཉམ༌པོ༌ ངན༌པ༌ ཅོས༌ཏེ༌ སད༌།”
MAT 22:7 “གྱལ༌པོའ༌ སྲོ༌ མ༌སྲན༌ཏྲེ༌ ཡོངས༌, ཡང༌ ཁོ༌རང༌ངི༌ མག༌མི༌ ལམ༌ཅུགས༌ཏེ༌, ཏེ༌ མི༌ སད༌གུན༌ མེད༌ཁན༌ ཅོས༌ ཡང༌ ཁོང༌གུན༌ནི༌ གྱལ༌ས༌ མེའ༌ སྲགས༌།
MAT 22:8 ཏེ༌ནེ༌ ཁོ༌རང༌ངི༌ ཡོག༌པོ༌གུན༌ལ༌ ཟེརས༌, ‘བག༌སྟོན༌ནི༌ དོན༌ཏང༌ གྲལ༌གྲིག༌ ཅོ༌ཚར༌, ཨིན༌ནའང༌ ངའེ༌ བོད༌ཁན༌གུན༌ ཏེ༌ནང༌ང༌ ཐུ༌ཤེས༌ འོས༌པ༌ མི༌དུག༌།
MAT 22:9 སོང༌ཏེ༌ ལམ༌གུན༌ནི༌ཀ༌ ཡོད༌ཁན༌ ཚང༌མ༌ བག༌སྟོན༌ནི༌ གྲོན༌ལ༌ ཡོང༌ ཟེར༌ཏེ༌ བོད༌།’
MAT 22:10 གྱལ༌པོའེ༌ ཡོག༌པོ༌གུན༌ ལམ༌གུན༌ལ༌ སོང༌ཏེ༌ ཏེ༌ཀ༌ ཡོད༌ཁན༌ ཟང༌པོ༌ དང༌ ངན༌པ༌ མི༌ཚང༌མ༌ ལྡུམས༌ཏེ༌ ཁྱོངས༌པ༌, བག༌སྟོན༌ནི༌ ཁང༌པ༌ གྲོན༌པོའེ༌ གང༌།”
MAT 22:11 “ཨིན༌ནའང༌ གྱལ༌པོ༌ གྲོན༌པོ༌གུན༌ལ༌ ཐུག༌ག༌ལ༌ ཡོང༌ང༌ཅིག༌, བག༌སྟོན༌ནང༌ ཟོབས༌པའེ༌ ཀོས༌ལག༌ མ༌གོན༌ཁན༌ཞིག༌ ཐོང༌ཏེ༌,
MAT 22:12 ཁོའེ༌ ཟེརས༌, ‘ཛ༌འོ༌ལེ༌, ཁྱོ༌རང༌ ཟབ༌ མ༌ཟབ༌བ༌ བག༌སྟོན༌ལ༌ ཀ༌ཟུག༌གི༌ ཡོངས༌པིན༌?’ ཁོའ༌ ཅའང༌ ལན༌ཏང༌ མ༌ཉན༌།
MAT 22:13 ཏེ༌ནེ༌ གྱལ༌པོའེ༌ ཁོ༌རང༌ངི༌ ཡ༌ཏོ༌གུན༌ལ༌ ཟེརས༌, ‘འི༌ མི༌བོའེ༌ རྐང༌ལག༌གུན༌ ལྡམས༌ཏེ༌, ཕི༌ལོག༌ག༌ མུན༌གྲིག༌གི༌ ནང༌ང༌ ཕོང༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།’”
MAT 22:14 ཡེ༌ཤུའི༌ མོལས༌, “ནམ༌ཁའེ༌ གྱལ༌སྲིད༌དི༌ ནང༌ང༌ མང༌པོའ༌ བོད༌ད༌ ཛདས༌, ཨིན༌ནའང༌ ཉུ༌ངུན༌ཞིག༌ མ༌ནེ༌ ལྡམ༌མ༌ མ༌ཛདས༌།”
MAT 22:15 ཏེ༌ནེ༌ ཕ༌རུ༌ཤི༌པ༌གུན༌ ཏེ༌ཀ༌ནེ༌ སོང༌ ཡང༌ ཁོང༌གུན༌ནི༌ གཙོ༌བོ༌ ཡེ༌ཤུའི༌ མོལ༌ཁན༌ནི༌ སྤེ༌ར༌རིག༌ གྱུད༌ཏེ༌ ཁོང༌ ཁད༌ཅུག༌ཅེས༌ལ༌ གྲབས༌ ཅོས༌ཏེ༌
MAT 22:16 ཁོ༌རང༌གུན༌ནི༌ ལོབ༌ཕྲུགས༌གུན༌ གྱལ༌པོ༌ ཧེ༌རོད༌དི༌ ཆོགས༌པ༌གུན༌ ཉམ༌པོ༌ ཡེ༌ཤུའི༌ཀ༌ འི༌ཟུག༌ ཟེར༌ཅེས༌ལ༌ ལམ༌ཅུགས༌, “ལོབ༌བོན༌ལེ༌, ཉེ༌རང༌ ཀྲང༌པོ༌ ཛད༌ཁན༌བོ༌ ང༌ཞའ༌ གྱུས༌ཡོད༌, ཡང༌ ཉེ༌རང༌ངི༌ ཀྲང༌པོ༌ ཉམ༌པོ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌ ལབ༌བ༌ ཛད༌ད༌ནོག༌། ཉེ༌རང༌ངི༌ མི༌ ནང༌ང༌ ཡ༌ཕེས༌ ཛད༌ད༌ མ༌ནོག༌ ཅིའ༌ཟེར༌ན༌ ཉེ༌རང༌ངི༌ ཁོང༌གུན༌ སུ༌ ཨིན༌ཁན༌བོའེ༌ཀ༌ སྣང༌ང༌ ཛད༌ད༌ མ༌ནོག༌།
MAT 22:17 མོལ༌ལ༌ ཛད༌དའང༌ ཉེ༌རང༌ངི༌ ཐུགས༌སམ༌ ཅི༌ ཨིན༌? རོམ༌མི༌ གྱལ༌པོའ༌ ཁྲལ༌ ཤལ༌ཅེས༌པོ༌ འོས༌པ༌ ཨིན༌ནོག༌ག༌ ཡ༌ མ༌ནོག༌?”
MAT 22:18 ཨིན༌ནའང༌ ཡེ༌ཤུའི༌ ཁོང༌གུན༌ནི༌ ཅུས༌ངན༌ ཁྱེན༌ཏེ༌ མོལས༌, “ཁ༌ཆོས༌པ༌གུན༌ ཅིའ༌ ང༌ སྤེ༌རའེ༌ ནང༌ང༌ སྐར༌ཅེས༌སི༌ རྩོན༌གྲུས༌ ཅོའད༌?
MAT 22:19 ཁྲལ༌ལ༌ ཏང༌ཁན༌ནི༌ པེ༌ནེ༌ཞིག༌ ངའ༌ སྟོན༌ནའང༌།” ཁོང༌གུན༌ནི༌ ཡེ༌ཤུའ༌ རོམ༌པའེ༌ མུལ༌ལི༌ པེ༌ནེ༌ཞིག༌ སྟནས༌།
MAT 22:20 ཡེ༌ཤུའི༌ ཁོང༌གུན༌ལ༌ མོལས༌, “འི༌ པེ༌ནེ༌ཀ༌ ཡོད༌ཁན༌ནི༌ པར༌ དང༌ མིང༌ སུའི༌ ཨིན༌ནོག༌?”
MAT 22:21 ཁོང༌གུན༌ནི༌ ལན༌ཏངས༌, “རོམ༌མི༌ གྱལ༌པོའེ༌།” ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, “གྱལ༌པོའེ༌ ཨིན༌ཁན༌བོ༌ གྱལ༌པོའ༌ ཏོང༌ ཡང༌ དཀོན༌མཆོག༌གི༌ ཨིན༌ཁན༌བོ༌ དཀོན༌མཆོག༌ག༌ ཕུལ༌།”
MAT 22:22 ཁོང༌གུན༌ནི༌ ཏེ༌བོ༌ ཚོར༌ར༌ཅིག༌, ཧ༌ལས༌ཏེ༌ ཡེ༌ཤུ༌ བོར༌ཏེ༌ ཏེ༌ཀ༌ནེ༌ སོང༌།
MAT 22:23 ཏེན༌ན༌ ཞག༌ག༌, ཤི༌ཁན༌གུན༌ སོན༌ཏེའ༌ ལང༌ང༌ མ༌ནོག༌ ཟེར༌ཁན༌ནི༌ སད༌དུ༌ཀི༌པ༌གུན༌ ཡེ༌ཤུ༌ ཡོད༌ས༌ ཏྲི༌ཝ༌ཞིག༌ ཏྲིའ༌ལ༌ ཡོངས༌ཏེ༌ ཟེརས༌
MAT 22:24 “ལོབ༌བོན༌ལེ༌ མོ༌ཟེས༌སི༌ མོལ༌ཏེ༌ ཨིན༌པིན༌, ‘ཀལ༌ཏེས༌ བུ༌ཚ༌ཞིག༌ ཕྲུ༌གུ༌ མེད༌པ༌ ཤི༌ན༌, ཨ༌ཅོ༌ ཡ༌ ནོའེ༌ ཁོའེ༌ མིར༌གྱུད༌ ལུས༌ཤེས༌སི༌ ཕིའ༌ ཤི༌ཁན༌ནི༌ ན༌མ༌ ཉམ༌པོ༌ བག༌སྟོན༌ ཅོས༌ཏེ༌ ཕྲུ༌གུ༌ ཇོར༌ཅུག༌ གོས༌།’
MAT 22:25 ཏ༌ ཨ༌ཅོ༌ནོ༌ རྡུན༌ ཡོད༌པིན༌, ཏང༌པོ༌བོའེ༌ ན༌མ༌ ཅོས༌, ཡང༌ ཕྲུ༌གུ༌ མེད༌པ༌ ཤི༌, ཁོའེ༌ ནོའེ༌ ཏེ༌ བུ༌མོའ༌ ན༌མ༌ ཅོས༌
MAT 22:26 ཏེན༌ན༌ ཙོགས༌ ཉིས༌པ༌ དང༌ སུམ༌པ༌ དང༌ རྡུན༌པའ༌ ཚག༌པ༌ སོང༌།
MAT 22:27 སྟིང༌ཇུག༌ག༌ བུ༌མོ༌བོའང༌ ཤི༌།
MAT 22:28 བུ༌མོ༌བོའེ༌ ཁོང༌ ཚང༌མ༌ ཉམ༌པོ༌ ན༌མ༌ ཅོས༌པ༌, ཤི༌ཁན༌གུན༌ སོན༌ཏེའ༌ ལང༌ངི༌ ཏུས༌ལ༌ ཁོ༌ ཁོང༌གུན༌ནི༌ ནང༌ནེ༌ སུའི༌ ན༌མ༌ གྱུར༌ཨིན༌?”
MAT 22:29 ཡེ༌ཤུའི༌ མོལས༌, “ཁྱོ༌ཞའེ༌ ནོར༌ཁྲུལ༌བོ༌ ནི༌ ཁྱོ༌ཞ༌གུན༌ལ༌ དཀོན༌མཆོག༌གི༌ སྟོབས༌ ཡ༌ ཏམ༌པའེ༌ སུང༌རབས༌པོ༌ ཧ༌མ༌གོའ༌ ཨིན༌ནོག༌།
MAT 22:30 དཀོན༌མཆོག༌གི༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ ཟ༌ནེ༌, ཁོང༌གུན༌ནི༌ ན༌མ༌ མི༌ཅོ༌ ཡ༌ བག༌མ༌ མི༌ཏང༌, ཁོང༌གུན༌ ནམ༌ཁའེ༌ ཕོ༌ཉ༌ ཙོགས༌ གྱུར༌ཨིན༌།”
MAT 22:31 “ཨིན༌ནའང༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཅེས༌སི༌ སྐོར༌ལ༌ ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ཁན༌བོ༌ ཁྱོ༌ཞའེ༌ མ༌སིལ༌པིན༌ན༌?
MAT 22:32 ཏེ༌བོ༌ ནི༌, ‘ང༌ ནི༌ ཨབ༌ར༌ཧམ༌མི༌ དཀོན༌མཆོག༌, ཨི༌སཱག༌གི༌ དཀོན༌མཆོག༌ དང༌ ཡ༌ཀོབ༌བི༌ དཀོན༌མཆོག༌ ཨིན༌།’ ཁོང༌ ནི༌ ཤི༌ཁན༌གུན༌ནི༌ དཀོན༌མཆོག༌ མན༌པ༌, སོན༌པོ༌གུན༌ནི༌ དཀོན༌མཆོག༌ ཨིན༌ནོག༌།”
MAT 22:33 ཏེ༌གུན༌ ཚོར༌ར༌ཅིག༌ མི༌ཚོགས༌ ཁོང༌ངི༌ ལབ༌ཞ༌གུན༌ནི༌ཀ༌ ཧ༌ལས༌།
MAT 22:34 སད༌དུ༌ཀི༌པ༌གུན༌ནི༌ གཙོ༌བོ༌ ཡེ༌ཤུའི༌ མོལ༌ཁན༌བོའ༌ ལན༌ཏང༌ མ༌ཉན༌པ༌ ཕ༌རུ༌ཤི༌པ༌གུན༌ ཛོམས༌།
MAT 22:35 ཁོང༌གུན༌ནི༌ ནང༌ནེ༌ ཆོས༌ཁྲིམས༌ལ༌ ཁས༌པ༌ཞིག༌གི༌ ཡེ༌ཤུའ༌ ཚོད༌ལྟ༌ཅེས༌ལ༌ འི༌ ཏྲི༌ཝ༌བོ༌ ཏྲིས༌,
MAT 22:36 “ལོབ༌བོན༌ལེ༌, བཀའ༌ཁྲིམས༌སི༌ ནང༌ནེ༌ ཀ༌ བཀའ༌རྒྱ༌བོ༌ ཚང༌མའེ༌སང༌ ཁག༌ཅན༌ ཨིན༌ནོག༌?”
MAT 22:37 ཡེ༌ཤུའི༌ མོལས༌, “‘གཙོ༌བོ༌ ཁྱོ༌ཞའེ༌ དཀོན༌མཆོག༌ག༌ སྙིང༌ གང༌པོ༌, སེམས༌ གང༌པོ༌, དང༌ སམ༌བ༌ གང༌པོ༌ནེ༌ ཅེས༌པ༌ ཅོས༌།’
MAT 22:38 ཏེ༌བོ༌ ནི༌ བཀའ༌རྒྱ༌ མ༌ ཁག༌ཅན༌ དང༌ ཀྲག༌ཤོག༌པོ༌ ཨིན༌།
MAT 22:39 ཏེན༌ན༌ ཙོགས༌ལ༌ བཀའ༌རྒྱ༌ ཁག༌ཅན༌ ཉིས༌པ༌བོ༌ ནི༌, ‘རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པ༌ ཅམས༌པ༌ ཅོས༌།’
MAT 22:40 མོ༌ཟེས༌སི༌ བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ སྤེ༌ཆའེ༌ ནང༌ང༌ བྲིས༌ཁན༌གུན༌ ཏེ༌ བཀའ༌རྒྱ༌ ཉིས༌ཀོའེ༌ ནང༌ང༌ ཚང༌ཏེ༌ ཨིན༌ནོག༌།”
MAT 22:41 ཕ༌རུ༌ཤི༌པ༌གུན༌ ཛོམས༌ཏེ༌ ཡོད༌ཏུས༌, ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌,
MAT 22:42 “དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ སྐོར༌ལ༌ ཁྱོ༌ཞའེ༌ ཅི༌ སམ༌མ༌རག༌? ཁོ༌ སུའི༌ པུར༌གྱུད༌ ཨིན༌ནོག༌?” ཁོང༌གུན༌ནི༌ ལན༌ཏངས༌, “གྱལ༌པོ༌ དཱ༌བིད༌དི༌ པུར༌གྱུད༌ ཨིན༌ནོག༌།”
MAT 22:43 ཡེ༌ཤུའི༌ ཁོང༌གུན༌ལ༌ མོལས༌, “དཱ༌བིད༌དི༌ མ༌ཤི༌ཀའ༌, ཏམ༌པའེ༌ ཐུག༌ཉིད༌ གྱུད༌ཏེ༌ གཙོ༌བོ༌ ཅི༌ཕིའ༌ ཟེར༌ཏེ༌ ཨིན༌ནོག༌? དཱ༌བིད༌དི༌ ཟེརས༌,
MAT 22:44 ‘དཀོན༌མཆོག༌གི༌ ངའེ༌ གཙོ༌བོའ༌ མོལས༌, ངའེ༌ ཁྱོ༌རང༌ངི༌ གྲ༌འོ༌ ཚང༌མ༌, ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌, ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།’
MAT 22:45 ཀལ༌ཏེས༌ དཱ༌བིད༌དི༌ མ༌ཤི༌ཀའ༌ ‘གཙོ༌བོ༌’ ཟེར༌རད༌ན༌, ཏེ༌ནེ༌ ཀ༌ཟུག༌གི༌ མ༌ཤི༌ཀ༌ ཁོའེ༌ པུར༌གྱུད༌ ཨིན༌ནོག༌?”
MAT 22:46 སུ༌ཞིག༌གའང༌ ལན༌ཏང༌ མ༌ཉན༌, མ༌ཚད༌ ཏེ༌ ཞག༌ནེ༌ ཕར༌ལ༌ སུ༌ཞིག༌གིའང༌ ཁོང༌ང༌ ཏྲི༌ཝ༌ ཏྲི༌ཅེས༌སི༌ ཧམ༌པ༌ མ༌ཅོས༌།
MAT 23:1 གཙོ༌བོ༌ ཡེ༌ཤུའི༌ མི༌ཚོགས༌ དང༌ ཁོང༌ངི༌ ལོབ༌ཕྲུགས༌གུན༌ལ༌ མོལས༌,
MAT 23:2 “ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ལ༌, མོ༌ཟེས༌སི༌ ཁྲིམས༌གུན༌ ཡ༌ཧུ༌དཱ༌པ༌གུན༌ལ༌ ཧ༌གོ༌ཅུག༌ཅེས༌སི༌ ཝང༌ཆ༌ ཡོད༌ཏེ༌ ཨིན༌ནོག༌།
MAT 23:3 ཏེ༌བོའེ༌ཕིའ༌ ཁོང༌གུན༌ནི༌ ཁྱོ༌ཞའ༌ ལབ༌ཁན༌གུན༌ ཁའ༌ཉན༌ཏེ༌ ཅོ༌ཤིག༌། ཨིན༌ནའང༌ ཁོང༌གུན༌ནི༌ ཅོ༌ཁན༌ ཙོགས༌པོ༌ ཁྱོ༌ཞ༌གུན༌ནི༌ མ༌ཅོ༌ཤིག༌ ཅིའ༌ཟེར༌ན༌ ཁོང༌གུན༌ནི༌ ལབ༌ཁན༌བོ༌ ཁོ༌རང༌གུན༌ནི༌ ལག༌ལེན༌ ཅོའ༌ མ༌ནོག༌།
MAT 23:4 ཆོས༌ཁྲིམས༌སི༌ ཁུ༌རུ༌ ལྕིན༌ཏྲེ༌ ཞན༌མའེ༌ གྱབ༌བ༌ ཀལ༌ཅེས༌ལ༌ ཁོང༌གུན༌ ཐད༌ད༌ནོག༌, ཨིན༌ནའང༌ ཡ༌ཏོ༌ ཅོ༌ཅེས༌ལ༌ ཁོ༌རང༌གུན༌ནི༌ ཛི༌གུ༌ སྐུ༌ལའང༌ ཐད༌ད༌ མ༌ནོག༌།”
MAT 23:5 “ཁོང༌གུན༌ནི༌ ལས༌ ཅོ༌ཁན༌ ཚང༌མ༌ མི༌གུན༌ལ༌ སྟན༌ཅེས༌སི༌ ཕིའ༌ ཅོའ༌ནོག༌, སྤེར༌ན༌ ཁོང༌གུན༌ནི༌ ཐོད༌པ༌ དང༌ ལག༌པའེ༌ཀ༌ ལྡམས༌ཁན༌ ཆོས༌ བྲིས༌ཁན༌གུན༌ ཞང༌ཅན༌ དང༌ ཤན༌ཏབ༌བི༌ རུ༌གུན༌ རིང༌མོ༌ ཅོའ༌ནོག༌།
MAT 23:6 གྲོན༌ནི༌ ནང༌ང༌ གྲལ༌གོ༌ ཡང༌ དུ༌ཁང༌ངི༌ ནང༌ང༌ རྩི༌ཝ༌ཅན༌ནི༌ ནས༌ས༌ ཙལ༌ལ༌ནོག༌།
MAT 23:7 ཁྲོམས༌སི༌ ནང༌ང༌ མི༌གུན༌ནི༌ ཀ༌ནེ༌ རྩི༌ཝ༌ ཐོབ༌ཅེས༌ དང༌ ལོབ༌བོན༌ ཟེར༌ཏེ༌ བོད༌ད༌ལ༌ ཐད༌ད༌ནོག༌།”
MAT 23:8 “ཨིན༌ནའང༌ ཁྱོ༌ཞ༌གུན༌ལ༌ ‘རབ༌བི༌’ ཟེར༌ མ༌ཅུག༌ ཅིའ༌ཟེར༌ན༌ ཁྱོ༌ཞའ༌ ལོབ༌བོན༌ ཅིག༌ཅིག༌ མ༌ནེ༌ མེད༌, ཡང༌ ཁྱོ༌ཞའ༌ ཚང༌མ༌ སྤུན༌ ཨིན༌ནོག༌།
MAT 23:9 ཡང༌ ཇིག༌རྟེན༌ནི༌ཀ༌ སུའང༌ ‘ཡབ༌’ མ༌ཟེར༌, ཅིའ༌ཟེར༌ན༌ ནམ༌ཁའ༌ ཞུགས༌ཁན༌བོ༌ ནི༌ ཁྱོ༌ཞ༌གུན༌ནི༌ ཡབ༌ ཅིག༌པོ༌ ཨིན༌།
MAT 23:10 ཡ༌ ཁྱོ༌ཞ༌གུན༌ལ༌ ‘ལོབ༌བོན༌’ ཟེར༌ མ༌ཅུག༌ ཅིའ༌ཟེར༌ན༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཅིག༌པོ༌ ནི༌ ཁྱོ༌ཞ༌གུན༌ནི༌ ལོབ༌བོན༌ ཨིན༌།
MAT 23:11 ཁྱོ༌ཞ༌གུན༌ནི༌ ཕྲོ༌ནེ༌ ཀྲག༌ཤོག༌ གྱུར༌ཉིན༌ ཡོད༌ཁན༌བོ༌ ཞན༌གུན༌ནི༌ ཡོག༌པོ༌ གྱུར༌གོས༌།
MAT 23:12 ཀྲག༌པོ༌ སྟན༌ཁན༌གུན༌ལ༌ པས༌མོ༌ ཅོའ༌ ཛད༌ཨིན༌ ཡང༌ ཁོ༌རང༌ པས༌མོ༌ བོར༌ཁན༌གུན༌ལ༌ རྩི༌ཝ༌ སལ༌ལ༌ ཛད༌ཨིན༌།”
MAT 23:13 “ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཆོས༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ མི༌གུན༌ལ༌ ནམ༌ཁའེ༌ གྱལ༌སྲིད༌དི༌ སྒོ༌ ཅུག༌དུག༌, ཁྱོ༌ཞ༌རང༌གུན༌ ཏེ༌ནང༌ང༌ ཆ༌ མི༌དུག༌ མ༌ཚད༌ ཏེ༌ནང༌ང༌ ཆ༌ཅེས༌སི༌ རྩོན༌གྲུས༌ ཅོ༌ཁན༌གུན༌ལའང༌ ཆ༌ཅུག༌ག༌ མི༌དུག༌།”
MAT 23:14 
MAT 23:15 “ཁྱོ༌ཞའ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌། མི༌ ཅིག༌ ལོབ༌ཕྲུགས༌ ཅོ༌ཅེས༌ལ༌ ཁྱོ༌ཞའ༌ ས༌ཀྱད༌ དང༌ ཚོ༌ མང༌པོ༌ རྒལ༌ཏེ༌ ཆ༌དུག༌། ལོབ༌ཕྲུགས༌ གྱུར༌ ཚར༌ར༌ཅིག༌, ཁོང༌གུན༌ ཁྱོ༌ཞ༌རང༌ངི༌ སང༌ ཉི༌ལྡབ༌ ཐུའ༌ གྱུར༌ཅུག༌དུག༌།”
MAT 23:16 “ལམ༌སྟན༌པ༌ ཞ༌ར༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞ༌གུན༌ནི༌ ཟེར༌དུག༌, ཆོད༌ཁང༌ངི༌ ནའ༌ སྐྱལ༌ཁན༌གུན༌ལ༌ ཅའང༌ མི༌སྟོ༌, ཨིན༌ནའང༌ ཆོད༌ཁང༌ངི༌ ནང༌ང༌ ཡོད༌ཁན༌ནི༌ སེར༌རི༌ ནའ༌ སྐྱལ༌ཁན༌གུན༌ལ༌ ཏེ༌ ནའ༌ སྐྱལ༌ཁན༌བོ༌ ཅོ༌གོས༌ཨིན༌།
MAT 23:17 ཞ༌ར༌, སམ༌བ༌ མེད༌ཁན༌གུན༌ སེར༌བོ༌ ཀྲག༌ག༌ ཨིན༌ནོག༌ག༌ ཡ༌ ཆོད༌ཁང༌ ཀ༌བོའེ༌ ཏེ༌ སེར༌པོ༌ ཏམ༌པ༌ ཅོའད༌?
MAT 23:18 ཁྱོ༌ཞ༌གུན༌ནི༌ ཟེར༌དུག༌, ཆོད༌ཁྲི༌ ནའ༌ སྐྱལ༌ཁན༌གུན༌ལ༌ ཅའང༌ མི༌སྟོ༌, ཨིན༌ནའང༌ ཆོད༌ཁྲི༌ཀ༌ ཡོད༌ཁན༌ནི༌ ཆོད༌པའེ༌ ནའ༌ སྐྱལ༌ཁན༌གུན༌ལ༌ ཏེ༌ ནའ༌ སྐྱལ༌ཁན༌བོ༌ ཅོ༌གོས༌ཨིན༌།
MAT 23:19 ཞ༌ར༌གུན༌, ཆོད༌པ༌ ཀྲག༌ག༌ ཨིན༌ནོག༌ག༌ ཡ༌ ཆོད༌ཁྲི༌ ཀ༌བོའེ༌ ཆོད༌པ༌བོ༌ ཏམ༌པ༌ ཅོའད༌?
MAT 23:20 ཏེ༌ནེ༌ ཆོད༌ཁྲི༌ ནའ༌ སྐྱལ༌ཁན༌གུན༌ནི༌ ཆོད༌ཁྲི༌ དང༌ ཆོད༌ཁྲི༌ཀ༌ ཡོད༌ཁན༌ ཚང༌མའེ༌ ནའ༌ སྐྱལ༌ཏེ༌ ཨིན༌ནོག༌།
MAT 23:21 ཡང༌ ཆོད༌ཁང༌ངི༌ ནའ༌ སྐྱལ༌ཁན༌གུན༌ནི༌ ཆོད༌ཁང༌ དང༌ ཆོད༌ཁང༌ངི༌ ནང༌ང༌ ནས༌ས༌ ཛད༌ཁན༌བོའེ༌ ནའ༌ སྐྱལ༌ཏེ༌ ཨིན༌ནོག༌།
MAT 23:22 ཡང༌ ནམ༌ཁའེ༌ ནའ༌ སྐྱལ༌ཁན༌གུན༌ནི༌ དཀོན༌མཆོག༌གི༌ ཞུགས༌ཁྲིས༌ དང༌ ཏེ༌ཀ༌ ཞུགས༌ཏེ༌ ཡོད༌ཁན༌ནི༌ དཀོན༌མཆོག༌གི༌ ནའ༌ སྐྱལ༌ཏེ༌ ཨིན༌ནོག༌།”
MAT 23:23 “ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཆོས༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞ༌གུན༌ནི༌ ཚ༌མིག༌གི༌ ཚས༌སི༌ ཀ༌ནེ༌ ཡོང༌གོ༌ ཆུང༌ཤོག༌གི༌ ནང༌ནེའང༌ རྕུ༌ཁག༌བོ༌ ཕུལ༌དུག༌པ༌, ཨིན༌ནའང༌ མོ༌ཟེས༌སི༌ མ༌ ཁག༌ཅན༌ བཀའ༌ཁྲིམས༌གུན༌ལ༌ སྣང༌མེད༌ ཅོ༌རུག༌ སྤེར༌ན༌ འོས༌པའེ༌ ཁྲིམས༌ཅད༌, སྙིང༌རྗེ༌ དང༌ ཨིད༌ཤེས༌ཅན༌ནི༌ མི༌ཚེ༌ ཕུད༌ཅེས༌། ཁྱོ༌ཞའེ༌ ཏེ༌ བཀའ༌ཁྲིམས༌གུན༌ལ༌ སྣང༌ང༌ ཅོ༌ཅེས༌ མ༌ཚད༌ ཡོང༌གོའེ༌ རྕུ༌ཁག༌པོའང༌ དཀོན༌མཆོག༌ག༌ ཕུལ༌གོས༌།
MAT 23:24 ཆོས༌སི༌ ལམ༌སྟན༌ཁན༌ ཞ༌ར༌གུན༌, ཁྱོ༌ཞའེ༌ ཆུ༌ ཐུང༌ངི༌ སང༌ སྔུན༌ལ༌ ཏེ༌ནང༌ནེ༌ ཚི༌ཏུ༌ ཅོ༌ཁན༌ནི༌ བུ༌ཙིག༌ ཆུ༌ངུན༌བོ༌ ཕིང༌དུག༌ ཨིན༌ནའང༌ སྔ༌བོང༌བོ༌ སྨིད༌ཏང༌དུག༌།”
MAT 23:25 “ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཆོས༌པ༌ གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཀོ༌རེ༌ དང༌ ཐལ༌ལི༌ ཕི༌ལོག༌པོ༌ ལག༌མོ༌ ཅོ༌རུག༌, ཨིན༌ནའང༌ ཁྱོ༌ཞའེ༌ ནང༌ཀུག༌པོ༌ ནབ༌སེམས༌ དང༌ རང༌དོད༌དི༌ གངས༌ཏེ༌ དུག༌།
MAT 23:26 ཕ༌རུ༌ཤི༌པ༌ ཞ༌ར༌གུན༌, གོ༌མ༌ ཀོ༌རེ༌ དང༌ ཐལ༌ལི༌ ནང༌ཀུག༌པོ༌ ལག༌མོ༌ ཅོས༌སའང༌, ཏེ༌ནེ༌ ཕི༌ལོག༌པོའང༌ ལག༌མོ༌ ཆེན༌།”
MAT 23:27 “ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཆོས༌པ༌ གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞ༌གུན༌ ཀར༌ཙི༌ སྐུས༌ཁན༌ནི༌ རོམ༌ཁང༌ ཙོགས༌ ཨིན༌ནོག༌, ཀ༌བོ༌ ཕི༌ལོག༌ནེ༌ ལྡེ༌མོ༌ ཐོང༌ནའང༌ ནང༌ཀུག༌པོ༌ རོའེ༌ རུས༌པ༌ དང༌ ཚི༌ཏུའི༌ རིགས༌ ཚང༌མ༌ གངས༌ཏེ༌ ཡོད༌ཏེ༌ ཨིན༌ནོག༌།
MAT 23:28 ཏེན༌ན༌ ཙོགས༌ལ༌ ཁྱོ༌ཞའ༌ ཕི༌ལོག༌ནེ༌ མི༌གུན༌ལ༌ ཀྲང༌པོ༌ ཐོང༌ནའང༌ ཁྱོ༌ཞའེ༌ ནང༌ཀུག༌པོ༌ ཁ༌ཆོས༌ དང༌ ངན༌པ༌ གུན༌ནི༌ གངས༌ཏེ༌ ཡོད༌ཏེ༌ ཨིན༌ནོག༌།”
MAT 23:29 “ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཁ༌ཆོས༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ ལུང༌སྟོན༌པ༌གུན༌ནི༌ སྤུར༌ཁང༌ རྩིག༌དུག༌, ཡང༌ མི༌ ཀྲང༌པོ༌གུན༌ནི༌ སྤུར༌ཁང༌ང༌ རྩི༌སྲུལ༌ཏེ༌ ལྡེ༌མོ༌ ཅོ༌རུག༌།
MAT 23:30 ཡང༌ ཁྱོ༌ཞའེ༌ ཟེར༌དུག༌, ཀལ༌ཏེས༌ ང༌ཞའ༌ ང༌ཞའེ༌ ཕ༌མེས༌པོ༌གུན༌ནི༌ ཏུས༌ལ༌ ཡོད༌པིན༌ན༌, ལུང༌སྟོན༌པ༌གུན༌ སད༌ཅེས༌སི༌ ནང༌ང༌ ང༌ཞའ༌ དྲེས༌ཏེ༌ མེད༌གྲོ༌།”
MAT 23:31 “ཁྱོ༌ཞའེ༌ ཟེར༌ཁན༌བོའེ༌ ཁྱོ༌ཞའ༌ ལུང༌སྟོན༌པ༌གུན༌ སད༌ཁན༌ནི༌ པུར༌གྱུད༌ ཨིན༌ཁན༌བོའེ༌ སྤང༌པོ༌ ཏང༌ང༌ནོག༌།
MAT 23:32 ཏ༌ སོང༌ཏེ༌ ཁྱོ༌ཞའེ༌ ཕ༌མེས༌པོ༌གུན༌ནི༌ གོ༌ཟུག༌ ཅོ༌ཁན༌ནི༌ ལས༌ངན༌བོ༌ གྲུབ༌ཅུག༌།
MAT 23:33 རུལ༌གུན༌, ཁྱོ༌ཞའ༌ ཏུག༌རུལ༌ལི༌ གྱུད༌གུན༌, ཉལ༌ཝའེ༌ ཆད༌པ༌ནེ༌ ཀ༌ཟུག༌གི༌ ཁྱོ༌ཞའ༌ ཐར༌ཐུབ༌ཨིན༌?”
MAT 23:34 “ཏེ༌བོའེ༌ཕིའ༌ ཁྱོ༌ཞའེ༌ཀ༌ ངའེ༌ ལུང༌སྟོན༌པ༌གུན༌, ཤེས༌རབས༌ཅན༌གུན༌ དང༌ ལོབ༌བོན༌གུན༌ ཀལ༌ཨིན༌། ཡང༌ ཁོང༌གུན༌ ཙལ༌ལ༌ གྲོང༌ཁྱེར༌ནེ༌ གྲོང༌ཁྱེར༌ལ༌ སོང༌ཏེ༌ ཁྱོ༌ཞའེ༌ ཁ༌ཅིག༌ རྐྱང༌ཤིང༌ང༌ རྐྱངས༌ཏེ༌ སད༌ཨིན༌, ཁ༌ཅིག༌ག༌ དུ༌ཁང༌ངི༌ ནང༌ང༌ རྟལ༌ལྕག༌ གྱབ༌ཨིན༌།
MAT 23:35 ཏེ༌བོའེ༌ ཞས༌ཏེ༌ ཇིག༌རྟེན༌ ཆགས༌པ༌ནེ༌ ཕར༌ལ༌ མི༌ ཀྲང༌པོ༌ ཚང༌མའེ༌ སྲོག༌ ལེན༌ཁན༌ནི༌ ཉད༌གལ༌བོ༌ ཁྱོ༌ཞ༌གུན༌ནི༌ཀ༌ ཕོག༌ཨིན༌, ཨ༌བེལ༌ མི༌ ཀྲང༌པོ༌ སད༌ཁན༌ནེ༌ ཏངས༌ཏེ༌ ཆོད༌ཁང༌ དང༌ ཆོད༌ཁྲིའི༌ པར༌ལ༌ སད༌ཁན༌ནི༌ བ༌རག༌ཡཱའི༌ བུ༌ཚ༌ ཟ༌ཀ༌རི༌ཡཱའེ༌ ཚག༌པ༌།
MAT 23:36 ངའེ༌ དེན༌བ༌ ཟེར༌རད༌, ཏེ༌ ཇུང༌ཁན༌ ཚང༌མའེ༌ ཆད༌པ༌བོ༌ འི༌ མི༌རབས༌པོའེ༌ཀ༌ ཕོག༌ཨིན༌།”
MAT 23:37 གཙོ༌བོ༌ ཡེ༌ཤུའི༌ མོལས༌, “ཡེ༌རུ༌ཤ༌ལེམ༌པ༌, ཡེ༌རུ༌ཤ༌ལེམ༌པ༌, ལུང༌སྟོན༌པ༌གུན༌ སད༌ཁན༌ ཡང༌ ཁྱོ༌ཞའེ༌ཀ༌ ལམ༌ཅུག༌ག༌ ཛད༌ཁན༌གུན༌ལ༌ རྡོའ༌ གྱབས༌ཏེ༌ སད༌ཁན༌གུན༌, ཅ༌མོའེ༌ རང༌ངི༌ ཅབ༌ཕྲུག༌གུན༌ སྐྱོབ༌ཅེས༌ལ༌ ཤོག༌པའེ༌ ཡོག༌ག༌ ལྡུའ༌ ཙོགས༌ལ༌, ངེའང༌ ཁྱོ༌ཞའ༌ ལན༌ མང༌པོ༌ ལྡུ༌ཅེས༌སི༌ དོད༌པ༌ ཅོས༌པིན༌, ཨིན༌ནའང༌ ཁྱོ༌ཞའེ༌ ངའ༌ ཅོ༌ མ༌ཅུགས༌།
MAT 23:38 ཏ༌ ལྟོས༌, ནས༌ཏེ༌ ཡོད༌ཁན༌བོ༌ བིང༌ཏེ༌ སྐྱོད༌པ༌ ཁྱོ༌ཞའེ༌ ཆོད༌ཁང༌ སྟོང༌པ༌ ཨིན༌ནོག༌།
MAT 23:39 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞའ༌ ང༌ ཡང༌སྐྱར༌ མི༌ཐོང༌, ནམ༌ཚོག༌པ༌ ཁྱོ༌ཞའེ༌ ‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌ ཨིན༌ ’ མི༌ཟེར༌།”
MAT 24:1 གཙོ༌བོ༌ ཡེ༌ཤུ༌ ཆོད༌ཁང༌ནེ༌ བིང༌ཏེ༌ སྐྱོད༌ཨིན༌ ཡོད༌ ཟ༌ནེ༌ ཁོང༌ ཡོད༌ས༌ ལོབ༌ཕྲུགས༌གུན༌ ཡོངས༌ཏེ༌ ཆོད༌ཁང༌ ཧ༌ལས༌ཤེས༌ རྩིགས༌ཏེ༌ ཡོད༌ཁན༌བོ༌ ཡེ༌ཤུའ༌ སྟན༌ན༌ ཛདས༌།
MAT 24:2 ཡེ༌ཤུའི༌ ཁོང༌གུན༌ལ༌ མོལས༌, “འི༌ ཚང༌མ༌ ཁྱོ༌ཞའ༌ ཐོང༌དུག༌ག༌? ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།”
MAT 24:3 ཨོ༌ལིཝ༌ཝི༌ རི༌ཀ༌ ཡེ༌ཤུ༌ ཞུགས༌ཏེ༌ ཡོད༌ ཟ༌ནེ༌, ལོབ༌ཕྲུགས༌གུན༌ ཁོང༌ ཅིག༌པོ༌ ཡོད༌ས༌ ཡོངས༌ཏེ༌ ཏྲིས༌, “ང༌ཞའ༌ ཤད༌ད༌ ཛད༌དའང༌ ཏེ༌བོ༌ ནམ༌ ཇུང༌ཨིན༌། ཉེ༌རང༌ ཇིག༌རྟེན༌ནི༌ཀ༌ ལོགས༌ཏེ༌ སྐྱོད༌ཅེས༌ ཡང༌ ཏུས༌སི༌ ཐའ༌མའེ༌ སྟགས༌པོ༌ ཀ༌ཟུག༌ རིག༌ ཡོང༌ཨིན༌?”
MAT 24:4 ཡེ༌ཤུའི༌ ལན༌སལས༌, “སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌,
MAT 24:5 ཅིའ༌ཟེར༌ན༌ ངའེ༌ མིང༌ ཁུར༌ཏེ༌ ‘ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌’ ཟེར༌ཁན༌ མང༌པོ༌ཞིག༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌།
MAT 24:6 ཡང༌ ཁྱོ༌ཞ༌གུན༌ནི༌ མག༌ དང༌ མག༌གི༌ སྐོར༌ལ༌ འུ༌ཡ༌གུན༌ ཚོར༌ར༌ཅིག༌, ཇིགས༌ མ༌ཇིག༌ཤིག༌; ཏེ༌གུན༌ ཇུང༌གོས༌, ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌།
MAT 24:7 གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌། ནས༌ས༌ མང༌པོའེ༌ ནང༌ང༌ མུ༌གེ༌ དང༌ སང༌གུལ༌ ཡོང༌ཨིན༌།
MAT 24:8 ཨིན༌ནའང༌ ཏེ༌ ཚང༌མ༌ ནི༌ ཕྲུ༌གུ༌ སྐྱེ༌ཅེས༌སི༌ གོ༌ཟུག༌གི༌ ཟུག༌ཟེར༌བོ༌ ཙོགས༌ ཨིན༌།”
MAT 24:9 “ཏེ༌ནེ༌ ཁྱོ༌ཞའ༌ རྡུག༌ངལ༌ སྟན༌ཅེས༌ལ༌ སྟད༌ཏེ༌ སད༌ཨིན༌། ཁྱོ༌ཞའེ༌ ངའེ༌ ནང༌ང༌ ཏད༌པ༌ ཅོ༌ཅེས༌པོའེ༌ གྱལ༌ཁམས༌ ཚང༌མའེ༌ མི༌གུན༌ནི༌ ཁྱོ༌ཞ༌གུན༌ལ༌ ནཕ༌རད༌ ཅོ༌ཨིན༌།
MAT 24:10 ཏེ༌ཏུས༌ལ༌ མི༌ མང༌པོའེ༌ ངའེ༌ ནང༌ང༌ ཏད༌པ༌ ཅོ༌ཁན༌བོ༌ ཕང༌ཨིན༌ ཡང༌ ཁོ༌རང༌ ཅིག༌ དང༌ ཅིག༌ག༌ ནཕ༌རད༌ ཅོས༌ཏེ༌ གྲ༌འོའེ༌ ལག༌ག༌ སྟད༌ཨིན༌།
MAT 24:11 ཟུས༌མའེ༌ ལུང༌སྟོན༌པ༌ མང༌པོ༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌།
MAT 24:12 ཇིག༌རྟེན༌ནི༌ ནང༌ང༌ ངན༌སེམས༌ གྱས༌ཤེས༌པོའེ༌ མང༌པོ༌ཞིག༌གི༌ དཀོན༌མཆོག༌ དང༌ མི༌གུན༌ནི༌ ཕིའ༌ ཡ༌ཤ༌བོ༌ ཉམས༌ཨིན༌།
MAT 24:13 ཨིན༌ནའང༌ ཐའ༌མ༌ ཚོག༌པ༌ ངའེ༌ཀ༌ ཏད༌པ༌ སྟན༌པོ༌ བོར༌ཁན༌གུན༌ ཐར༌ཨིན༌།
MAT 24:14 གྱལ༌ཁམས༌ ཚང༌མའེ༌ མི༌གུན༌ནི༌ ཚོར༌ཅེས༌སི༌ ཕིའ༌ ཇིག༌རྟེན༌ གང༌པོའེ༌ ནང༌ང༌ ནམ༌ཁའེ༌ གྱལ༌སྲིད༌དི༌ གའ༌མོའེ༌ ནས༌ཚུལ༌བོ༌ ཤད༌ཨིན༌, ཏེ༌ནེ༌ ཏུས༌སི༌ ཐའ༌མ༌ ལེབ༌ཨིན༌།”
MAT 24:15 “ཁྱོ༌ཞའེ༌, ལུང༌སྟོན༌པ༌ དཱ༌ནི༌ཨེལ༌ལི༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌ ‘ཁམ༌ལོག༌ ཚི༌ཏུ༌ ཅོ༌ཁན༌བོ༌ ’ ཏམ༌པའེ༌ ཆོད༌ཁང༌ངི༌ ནང༌ང༌ ཐོང༌ང༌ཅིག༌, ༼སིལ༌ཁན༌གུན༌ནི༌ ངའེ༌ ཟེར༌ཅེས༌ཅན༌གུན༌ནི༌ཀ༌ སྣང༌ང༌ ཏོང༌༽
MAT 24:16 ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌།
MAT 24:17 ཁང༌པའེ༌ ཁེ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌།
MAT 24:18 ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཀོས༌ ཁྱོང༌ང༌ལ༌ མ༌ཆ༌།
MAT 24:19 ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌།
MAT 24:20 ཁྱོ༌ཞའ༌ ཤོར༌ཅེས༌སི༌ ཏུས༌པོ༌ དགུན༌ཏུས༌ ཡ༌ ཤབ༌བད༌དི༌ ངལ༌ཚོའེ༌ ཞག༌ག༌ མི༌ཇུང༌ཅེས༌ལ༌ མོས༌ལམ༌ ཞུས༌།
MAT 24:21 ཏེ༌ཏུས༌ལ༌ འི༌ཟམ༌ རྡུག༌ངལ༌ ཀྲག༌པོ༌ ཇུང༌ཨིན༌, ཀ༌བོ༌ ཇིག༌རྟེན༌ ཛད༌པ༌ནེ༌ ཕར༌ལ༌ དག༌ས༌ ཚག༌པ༌ མ༌ཇུང༌ང༌ ཨིན༌ནོག༌ ཡང༌ སྟིང༌ཞིན༌ནའང༌ མི༌ཇུང༌།
MAT 24:22 ཀལ༌ཏེས༌ ཏེ༌ཏུས༌པོ༌ ཉུ༌ངུན༌ མ༌ཛད༌པིན༌ན༌ སུ༌ཞིག༌གའང༌ སོན༌ཏེའ༌ ལུས༌ཏེ༌ མེད༌གྲོ༌, ཨིན༌ནའང༌ ལྡམ༌མ༌ ཛད༌ཁན༌གུན༌ནི༌ ཏོན༌ལ༌ ཏེ༌ཏུས༌པོ༌ ཉུ༌ངུན༌ ཅོའ༌ ཛདས༌།”
MAT 24:23 “ཏེ༌ཏུས༌ལ༌ ཀལ༌ཏེས༌ སུ༌ཞིག༌གི༌ ཁྱོ༌ཞའ༌, ‘ལྟོས༌ཤིག༌ མ༌ཤི༌ཀ༌ འི༌ཀ༌ནེ༌’ ཡ༌ ‘འ༌ཀ༌ནེ༌ ཞུགས༌ཏེ༌ དུག༌’ ཟེར༌ན༌ ཨིད༌ཤེས༌ མ༌ཅོ༌།
MAT 24:24 ཅིའ༌ཟེར༌ན༌ མ༌ཤི༌ཀ༌ ཟུས༌མ༌ དང༌ ལུང༌སྟོན༌པ༌ ཟུས༌མ༌ གུན༌ ཡོངས༌ཏེ༌ ཧ༌ལས༌སི༌ ཛད༌པ༌ དང༌ ལྟས༌གུན༌ སྟན༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལའང༌ གོབ༌སྐོར༌ ཏང༌ཅེས༌སི༌ རྩོན༌གྲུས༌ ཅོ༌ཨིན༌ ཨིན༌ནའང༌ ཏང༌ མི༌ཉན༌།
MAT 24:25 ཤང༌ ཅོས༌, ཏུས༌པོ༌ ལེབ༌བི༌ སང༌ སྔུན༌ལ༌ ངའེ༌ ཁྱོ༌ཞའ༌ ཤད༌ཏེ༌ ཨིན༌།”
MAT 24:26 “ཀལ༌ཏེས༌ སུ༌ཞིག༌གི༌ ‘མ༌ཤི༌ཀ༌ འ༌ རི༌སྟོང༌ངི༌ ནང༌ང༌ དུག༌’ ཟེར༌ན༌ མ༌ཆ༌, ཡ༌ ‘ཁོང༌ འ༌ ནང༌ནེ༌ དུག༌’ ཟེར༌ན༌ ཨིད༌ཤེས༌ མ༌ཅོ༌།
MAT 24:27 སྐམ༌ལག༌གི༌ འོད༌ ནམ༌ཁའེ༌ ནང༌ང༌ ཤར༌ནེ༌ ནུབ༌ ཚག༌པ༌ ཁྱེབས༌ས༌ ཙོགས༌, མི༌རིགས༌སི༌བུ༌ ལོགས༌ཏེ༌ ཡོང༌ ཟ༌ནེའང༌ ཆེན༌།
MAT 24:28 རོ༌ ཡོད༌ས༌ ཤ༌ ཟའ༌ཁན༌ནི༌ ཅ༌གུན༌ ཁོར༌ར༌ནོག༌། ༼ཁྱོ༌ཞའེ༌ ཏེ༌ སྟགས༌གུན༌ ཇུང༌ང༌ ཐོང༌ང༌ཅིག༌ ཐའ༌མའེ༌ ཏུས༌ ལེབ༌ཅེས༌པོ༌ ཁྱོ༌ཞའ༌ ཧ༌གོ༌གོས༌།༽”
MAT 24:29 “ཏེ༌ཏུས༌སི༌ རྡུག༌ངལ༌ལི༌ ཅབ༌ སྟིང༌ནེ༌, ‘ཉི༌མ༌ མུན༌གྲིག༌ གྱུར༌ཨིན༌, ཟླ༌ཝའེ༌ འོད༌ མི༌ཏང༌ ནམ༌ནེ༌ སྐར༌མ༌གུན༌ བུད༌ཨིན༌ ཡང༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཨིན༌།’”
MAT 24:30 “ཏེ༌ནེ༌ མི༌རིགས༌སི༌བུ༌ ཡོང༌ཅེས༌སི༌ སྟགས༌ ནམ༌མི༌ ནང༌ང༌ ཇུངས༌པ༌ ཇིག༌རྟེན༌ནི༌ གྱལ༌ཁམས༌ ཚང༌མའེ༌ མི༌གུན༌ནི༌ ཉ༌ངན༌ ཅོ༌ཨིན༌། ཏེ༌ནེ༌ ཁོང༌གུན༌ནི༌ མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌ སྲིན༌ནི༌ཀ༌ དུགས༌ཏེ༌ ཡོང༌ང༌ ཐོང༌ཨིན༌།
MAT 24:31 ཏུང༌སྐད༌ ཆེན༌མོ༌ ཕུའ༌ཅིག༌ ཁོའེ༌, ཕོ༌ཉ༌གུན༌ ཇིག༌རྟེན༌ གང༌པོའེ༌ ནང༌ནེ༌ ཁོང༌རང༌ངི༌ ལྡམ༌ཁན༌གུན༌ ལྡུ༌ཅེས༌ལ༌ ཀལ༌ཨིན༌།”
MAT 24:32 “ཕིག༌ ཁ༌ཟས༌སི༌ ལྕང༌མའེ༌ ཀ༌ནེ༌ ལབ༌ཞ༌ ལེན༌ནའང༌; ཏེ༌བོའེ༌ ཡལ༌ག༌ སྔོན༌པོ༌ སོང༌ཏེ༌ ལོ༌མ༌ སོ༌མ༌ བིང༌ང༌ཅིག༌, ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌།
MAT 24:33 ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌ ཚང༌མ༌ ཐོང༌ང༌ཅིག༌, ང༌ ལོགས༌ཏེ༌ ཡོང༌ཅེས༌སི༌ ཏུས༌ ཉེ༌མོ༌, སྒོའེ༌ དུན༌ལ༌ ལེབས༌ཏེ༌ ཡོད༌ཁན༌བོ༌ ཁྱོ༌ཞ༌གུན༌ནི༌ ཤེས༌ཨིན༌།
MAT 24:34 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ ཇུང༌ཨིན༌།
MAT 24:35 ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།”
MAT 24:36 “ཏེ༌ ཚང༌མ༌ ཇུང༌ཅེས༌སི༌ ཞག༌ ཡ༌ ཏུས༌ཚོད༌པོ༌ དཀོན༌མཆོག༌ ཡབ༌ ཅིག༌པོའ༌ མ༌ནེ༌ ཡང༌ སུའང༌ གྱུས༌མེད༌, ནམ༌ཁའེ༌ ཕོ༌ཉ༌ ཡ༌ བུ༌ཚའང༌།”
MAT 24:37 “མི༌ ཀྲང༌པོ༌ ནོ༌ཨའེ༌ ཏུས༌ལ༌ ཇུང༌ཁན༌ ཙོགས༌ མི༌རིགས༌སི༌བུ༌ ཡོང༌ངི༌ ཏུས༌ལའང༌ ཇུང༌ཨིན༌།
MAT 24:38 ཇིག༌རྟེན༌ནི༌ཀ༌ ཆུ༌ལོག༌ ཡོང༌ངི༌ སང༌ སྔུན༌ལ༌, ནོ༌ཨ༌ གྲུ༌ཟིང༌ངི༌ ནང༌ང༌ ཆ༌ཆ༌ ཚག༌པ༌ མི༌གུན༌ ཟེན༌ དང༌ ཐུང༌ཨིན༌, ན༌མ༌ ཅོ༌ཨིན༌ དང༌ བག༌མ༌ ཏང༌ཨིན༌ དུགས༌།
MAT 24:39 ཆུ༌ལོག༌ ཡོངས༌ཏེ༌ ཁོང༌ ཚང༌མ༌ ཁྱེར༌ཏེ༌ ཤི༌ཤི༌ ཚོག༌པ༌ ཁོང༌གུན༌ལ༌ ཏེ༌ ཇུང༌ཅེས༌པོ༌ གྱུས༌ ཅའང༌ མེད༌པིན༌, ཏེན༌ན༌ ཙོགས༌ མི༌རིགས༌སི༌བུ༌ ཡོང༌ ཟ༌ནེའང༌ ཇུང༌ཨིན༌།”
MAT 24:40 “ཞིང༌ངི༌ཀ༌ ཡོད༌ཁན༌ མི༌ ཉིས༌སི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌།
MAT 24:41 རང༌ཐག༌གི༌ཀ༌ ཀྲོ༌ ཐག༌ཨིན༌ ཡོད༌ཁན༌ བུ༌མོ༌ ཉིས༌སི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌།”
MAT 24:42 “ཏེ༌བོའེ༌ཕིའ༌ ཤང༌ ཅོས༌, ཅིའ༌ཟེར༌ན༌ ཁྱོ༌ཞ༌གུན༌ལ༌ ཁྱོ༌ཞའེ༌ གཙོ༌བོ༌ ཡོང༌ཅེས༌སི༌ ཞག༌པོ༌ གྱུས༌མེད༌ཏེ༌ ཨིན༌ནོག༌།
MAT 24:43 ཨིན༌ནའང༌ འི༌བོ༌ ཧ༌གོ༌ཤིག༌, ཀལ༌ཏེས༌ ཚན༌ལ༌ རྐུན༌མ༌ ཡོང༌ཅེས༌སི༌ ཏུས༌ཚོད༌པོ༌ ཁང༌དག༌ག༌ གྱུས༌ཡོད༌པིན༌ན༌, ཁོ༌ སྲུངས༌ཏེ༌ དུགས༌ཏེ༌ ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ རྐུན༌མ༌ ཞུགས༌ མི༌ཅུག༌།
MAT 24:44 ཏེན༌ན༌བོའེ༌ཕིའ༌ ཁྱོ༌ཞའ༌ ཏུས༌གྱུན༌ གྲལ༌གྲིག༌ དུག༌གོས༌ ཅིའ༌ཟེར༌ན༌ ཁྱོ༌ཞ༌གུན༌ནི༌ རེ༌ཝ༌ མེད༌དི༌ ཏུས༌ལ༌ མི༌རིགས༌སི༌བུ༌ ཡོང༌སྲིད༌ཅེས༌ ཨིན༌ནོག༌།”
MAT 24:45 “སྤོན༌བོའེ༌ ཁོ༌རང༌ངི༌ ཁང༌པའེ༌ སྟ༌སྟོག༌ དང༌ ཞན༌ ཡོག༌པོ༌གུན༌ལ༌ ཏུས༌སི༌ཀ༌ ཞག༌ཏང༌ངི༌ ཁར༌ཇི༌ ཏང༌ཅེས༌སི༌ ཕིའ༌ སྐོས༌ཁན༌ ཨིད༌ཤེས༌ཅན༌ དང༌ ཤེས༌རབས༌ཅན༌ནི༌ ཡོག༌པོ༌ སུ༌ ཨིན༌ནོག༌?
MAT 24:46 སྤོན༌བོ༌ ལོགས༌ཏེ༌ ཡོང༌ང༌ཅིག༌ ཡོག༌པོ༌བོའེ༌ ཁོའེ༌ སྐོས༌ཁན༌ནི༌ ལས༌པོ༌ ཅོ༌ཨིན༌ ཐོང༌ན༌ ཁོའ༌ སོལ༌རས༌ ཏང༌ཨིན༌།
MAT 24:47 ངའེ༌ ཁྱོ༌ཞའ༌ དེན༌བ༌ ཟེར༌རད༌, སྤོན༌བོའེ༌, ཁོ༌རང༌ངི༌ ནོར༌ ཚང༌མ༌ སྟ༌སྟོག༌ ཅོ༌ཅེས༌སི༌ ཁག༌པོ༌ ཁོའ༌ ཏང༌ཨིན༌།
MAT 24:48 ཨིན༌ནའང༌ ཡོག༌པོ༌བོ༌ ངན༌པ༌ ཨིན༌ན༌ ཁོའེ༌, ‘ངའེ༌ སྤོན༌བོ༌ ཏུས༌ཡུན༌རིང༌ ལོགས༌ཏེ༌ མི༌ཡོང༌’ སམས༌ཏེ༌
MAT 24:49 ཁོ༌རང༌ངི༌ ཕྲོ༌པ༌ ཡོག༌པོ༌གུན༌ལ༌ རྡུང༌ཅེས༌ གོ༌ཟུག༌ ཅོས༌ཏེ༌, ར༌རོས༌ཁན༌གུན༌ ཉམ༌པོ༌ ཟེན༌ ཆང༌ ཐུང༌ཨིན༌ དུག༌ཨིན༌།
MAT 24:50 ཁོའེ༌ རེ༌ཝ༌ མི༌ཅོའེ༌ ཞག༌ག༌ ཡང༌ ཁོའ༌ གྱུས༌མེད༌དི༌ ཏུས༌ཚོད༌པོའེ༌ཀ༌ སྤོན༌བོ༌ ཡོངས༌ཏེ༌
MAT 24:51 ཁོ༌ ཏུམ༌པ༌ཏུམ༌པའེ༌ ནང༌ང༌ སྟུབས༌ཏེ༌ ཁ༌ཆོས༌པ༌གུན༌ ཉམ༌པོ༌ བོར༌ཨིན༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།”
MAT 25:1 གཙོ༌བོ༌ ཡེ༌ཤུའི༌ མོལས༌, “ནམ༌ཁའེ༌ གྱལ༌སྲིད༌ ནི༌ སྐྱོང༌ཙེ༌ ཁུར༌ཏེ༌ མག༌པའ༌ སུས༌ཏེ༌ ཆའ༌ཁན༌ནི༌ ན༌ཆུང༌ རྕུ༌ ཙོགས༌ ཨིན༌།
MAT 25:2 ཁོང༌གུན༌ནི༌ ནང༌ང༌ སམ༌མེད༌ ལྔ༌ དང༌ སམ༌བ༌ཅན༌ ལྔ༌ ཡོད༌པིན༌།
MAT 25:3 སམ༌མེད༌ ལྔ༌ཀོའེ༌ སྐྱོང༌ཙེ༌ཏ༌ ཁུརས༌, ཨིན༌ནའང༌ སྐྱོང༌ཙེ༌ ནང༌ང༌ ནན༌ཅེས༌སི༌ ཕིའ༌ ཐེ༌བ༌ མར༌ནག༌ ཁུར༌ར༌ལ༌ རྗེད༌།
MAT 25:4 སམ༌བ༌ཅན༌གུན༌ནི༌ སྐྱོང༌ཙེ༌ ཉམ༌པོ༌ སྐྱོང༌ཙེ༌ ནང༌ང༌ ནན༌ཅེས༌སི༌ ཕིའ༌ ཐེ༌བ༌ མར༌ནག༌གའང༌ ཁུརས༌།
MAT 25:5 མག༌པ༌ ལེབ༌བ༌ལ༌ ཏུས༌ མང༌པོ༌ གོར༌པ༌ ཁོང༌ ཚང༌མ༌ ངལ༌ཏེ༌ ཉིད༌ལ༌ སོང༌།”
MAT 25:6 “ཚན༌ཕེད༌ཤིག༌ག༌ ‘མག༌པ༌ ལེབ༌དུག༌, ཐུག༌ག༌ལ༌ ཡོང༌ཤིག༌’ ཟེར༌ཏེ༌ སྐད༌ ཚོར༌།
MAT 25:7 ན༌ཆུང༌ ཚང༌མ༌ ལངས༌ཏེ༌ འོད༌གུན༌ སལ༌པོ༌ ཅོས༌།
MAT 25:8 སམ༌མེད༌ ལྔ༌ཀོའེ༌ སམ༌བ༌ཅན༌ ལྔ༌ཀོའ༌ ཟེར༌, ‘ང༌ཞའེ༌ འོད༌པོ༌ ཤི༌རུག༌པ༌ ཇུ༌ཇུ༌ ང༌ཞའ༌ མར༌ནག༌ ཙ༌པིག༌ ཏོང༌ངའང༌།’”
MAT 25:9 “ཁོང༌གུན༌ནི༌ ཟེརས༌, ‘ཏང༌ང༌མེད༌། ང༌ཞའེ༌ ཁྱོ༌ཞའ༌ ཏང༌ན༌ ང༌དང༌ ཚང༌མ༌ལ༌ ཉུ༌ངུན༌ ཆེན༌, ཏེ༌སང༌ མར༌ནག༌ ཙོང༌ཁན༌ནི༌ཀ༌ སོང༌ཏེ༌ ཁྱོ༌ཞ༌རང༌ངི༌ ཕིའ༌ ཉོས༌།’
MAT 25:10 ཁོང༌གུན༌ མར༌ནག༌ ཉོའ༌ལ༌ སོང༌ཏེ༌ མེད༌ ཟ༌ནེ༌ མག༌པ༌ ལེབ༌། གྲལ༌གྲིག༌ ཡོད༌ཁན༌ ན༌ཆུང༌གུན༌ མག༌པ༌ ཉམ༌པོ༌ བག༌སྟོན༌ནི༌ གྲོན༌ལ༌ སོང༌ ཡང༌ སྒོ༌བོ༌ ཅུགས༌།”
MAT 25:11 “སྟིང༌ནེ༌ ཞན༌ ལྔ༌ཀོའང༌ ཡོངས༌ཏེ༌ མག༌པའ༌ ཟེརས༌, ‘ཨ༌ཅོ༌ལེ༌, ཨ༌ཅོ༌ལེ༌, ང༌ཞའེ༌ ཕིའ༌ སྒོ༌ ཕེའ༌ཛད༌དའང༌’
MAT 25:12 ཨིན༌ནའང༌ ཁོའེ༌ ལན༌ཏངས༌, ‘ངའེ༌ དེན༌བ༌ ཟེར༌རད༌, ངའེ༌ ཁྱོ༌ཞའ༌ ཤེས༌ས༌མེད༌།’”
MAT 25:13 ཡེ༌ཤུའི༌ མོལས༌, “མི༌རིགས༌སི༌བུ༌ ཀ༌ཞག༌ དང༌ ཏུས༌ཚོད༌དི༌ཀ༌ ལོགས༌ཏེ༌ ཡོང༌ཅེས༌པོ༌, ཁྱོ༌ཞའ༌ གྱུས༌མེད༌པ༌ ཤང༌ ཅོས༌།”
MAT 25:14 གཙོ༌བོ༌ ཡེ༌ཤུའི༌ མོལས༌, “ནམ༌ཁའེ༌ གྱལ༌སྲིད༌ ནི༌ བེས༌ལ༌ ཆེ༌ སང༌ སྔུན༌ལ༌ མི༌ཞིག༌གི༌ ཁོ༌རང༌ངི༌ ཡོག༌པོ༌གུན༌ བོད༌ཏེ༌ ནོར༌ སྟད༌ཁན༌ ཙོགས༌ ཨིན༌།
MAT 25:15 ཁོའེ༌ ཡོག༌པོ༌ རེ༌རེའ༌ ཁྱུད༌ ནང༌ཞིན༌ མུལ༌ལི༌ པེ༌ནེ༌ སྐངས༌ཁན༌ནི༌ གི༌གུ༌, ཏང༌པོ༌བོའ༌ ལྔ༌, ཉིས༌པ༌བོའ༌ ཉིས༌, ཡང༌ སུམ༌པ༌བོའ༌ ཅིག༌ ཏངས༌ཏེ༌ ཁོ༌རང༌ བེས༌ལ༌ སོང༌།”
MAT 25:16 “མུལ༌ལི༌ པེ༌ནེ༌ གི༌གུ༌ ལྔ༌ ཐོབ༌ཁན༌བོའེ༌ ཏེན༌ན༌མལ༌ལ༌ སོང༌ཏེ༌, པེ༌ནེ༌བོ༌ ལས༌སི༌ ནང༌ང༌ ཏངས༌པ༌ ཐེ༌བ༌ གི༌གུ༌ ལྔ༌ ཇོར༌།
MAT 25:17 ཏེན༌ན༌ ཙོགས༌ གི༌གུ༌ ཉིས༌ ཐོབ༌ཁན༌བོའང༌ ཐེ༌བ༌ གི༌གུ༌ ཉིས༌ ཇོར༌།
MAT 25:18 ཨིན༌ནའང༌ གི༌གུ༌ ཅིག༌ ཐོབ༌ཁན༌བོའེ༌ སའ༌ བྲུས༌ཏེ༌ སྤོན༌བོའེ༌ པེ༌ནེ༌ ཏངས༌ཁན༌བོ༌ སྦས༌ཏེ༌ བོརས༌།”
MAT 25:19 “ཏུས༌ མང༌པོའེ༌ སྟིང༌ནེ༌ སྤོན༌བོ༌ ལོགས༌ཏེ༌ ཡོངས༌ ཡང༌ ཡོག༌པོ༌ སུམ༌ཀོའེ༌ ཀ༌ནེ༌ རྩི༌རུག༌ ལེནས༌།
MAT 25:20 གི༌གུ༌ ལྔ༌ སྐངས༌ཏེ༌ མུལ༌ ཐོབ༌ཁན༌བོའེ༌ ཡང༌ ཐེ༌བ༌ གི༌གུ༌ ལྔ༌ ཁྱོངས༌ཏེ༌ ཟེརས༌, ‘སྤོན༌བོ༌ལེ༌ ཉེ༌རང༌ངི༌ ངའ༌ གི༌གུ༌ ལྔ༌ སལས༌, ཟིགས༌སའང༌ ང༌ ཐེ༌བ༌ ལྔ༌ ཇོར༌།’”
MAT 25:21 “སྤོན༌བོའེ༌ ཟེརས༌, ‘གྱལ༌ལ༌ ཅོས༌, ཡོག༌པོ༌ ཟང༌པོ༌ དང༌ ཨིད༌ཤེས༌ཅན༌, ཁྱོ༌རང༌ ཉུ༌ངུན༌ཞིག༌གི༌ ནང༌ང༌ ཨིད༌ཤེས༌ཅན༌ ལུས༌པ༌, ངའེ༌ ཁྱོ༌རང༌ང༌ ནོར༌ མང༌པོའེ༌ཀ༌ ཝང༌ཆ༌ ཏང༌ཨིན༌, ཡོང༌ ང༌ ཉམ༌པོ༌ གའ༌མོ༌ ཅོས༌།’”
MAT 25:22 “གི༌གུ༌ ཉིས༌ སྐངས༌ཏེ༌ མུལ༌ ཐོབ༌ཁན༌བོའེ༌ ཟེརས༌, ‘སྤོན༌བོ༌ལེ༌ ཉེ༌རང༌ངི༌ ང༌ གི༌གུ༌ ཉིས༌ སལས༌, ཟིགས༌སའང༌ ངའ༌ ཐེ༌བ༌ གི༌གུ༌ ཉིས༌ ཇོར༌།’”
MAT 25:23 “སྤོན༌བོའེ༌ ཟེརས༌, ‘མ༌ གྱལ༌ལ༌ སོང༌, ཡོག༌པོ༌ ཟང༌པོ༌ དང༌ ཨིད༌ཤེས༌ཅན༌, ཁྱོ༌རང༌ངི༌ ཉུ༌ངུན༌ཞིག༌གི༌ ནང༌ང༌ ཀྲང༌པོ༌ ཅོས༌པ༌, ངའེ༌ ཁྱོ༌རང༌ང༌ ནོར༌ མང༌པོའེ༌ཀ༌ ཝང༌ཆ༌ ཏང༌ཨིན༌, ཡོང༌ ང༌ ཉམ༌པོ༌ གའ༌མོ༌ ཅོས༌།’”
MAT 25:24 “ཏེ༌ནེ༌ གི༌གུ༌ ཅིག༌ སྐངས༌ཏེ༌ མུལ༌ ཐོབ༌ཁན༌བོའེ༌ ཟེརས༌, ‘སྤོན༌བོ༌ལེ༌, ཉེ༌རང༌ སྙིང༌རྗེ༌ མེད༌ཁན༌, ཁོ༌རང༌ངི༌ མ༌ཏབ༌ཁན༌ནི༌ ས༌ཀྱད༌དི༌ ཀ༌ནེ༌ རྔ༌ཁན༌ དང༌ ས༌འོན༌ མ༌ཡོག༌ཁན༌ནི༌ ས༌ཀྱད༌དི༌ ཀ༌ནེ༌ ལྡུ༌ཁན༌ ཨིན༌ཁན༌བོ༌ ང༌ གྱུས༌ཡོད༌ པ༌སང༌
MAT 25:25 ང༌ ཉེ༌རང༌ང༌ ཇིགས༌ཏེ༌, ཉེ༌རང༌ངི༌ མུལ༌ལི༌ པེ༌ནེ༌ གི༌གུ༌ སའེ༌ ཡོག༌ག༌ སྦས༌ཏེ༌ བོར༌པིན༌, ཉེ༌རང༌ངི༌ པེ༌ནེ༌བོ༌ ལོགས༌ཏེ༌ ནམས༌།’”
MAT 25:26 “སྤོན༌བོའེ༌ ཟེརས༌, ‘ཡོག༌པོ༌ ངན༌པ༌, ལས༌མི༌ལམ༌། ང༌ ང༌རང༌ངི༌ མ༌ཏབ༌ཁན༌ནི༌ ས༌ཀྱད༌དི༌ ཀ༌ནེ༌ རྔ༌ཁན༌ དང༌ ངའེ༌ ས༌འོན༌ མ༌ཡོག༌ཁན༌ནི༌ ས༌ཀྱད༌དི༌ ཀ༌ནེ༌ ལྡུ༌ཁན༌ ཨིན༌ཁན༌བོ༌ ཁྱོ༌རང༌ང༌ གྱུས༌ཡོད༌ཏེའང༌,
MAT 25:27 ཁྱོ༌རང༌ངི༌ ངའེ༌ པེ༌ནེ༌བོ༌ མུལ༌ཛོད༌ཁང༌ངི༌ ནང༌ང༌ ཅི༌ཕིའ༌ མ༌ཏངས༌པིན༌? ཀལ༌ཏེས༌ ཏངས༌པིན༌ན༌, ང༌ ཡོངས༌ཏེ༌ ཕར༌ཉམ༌པོ༌ ང༌རི༌ པེ༌ནེ༌ ལེན༌ཏེ༌ ཡོད༌གྲོ༌།’”
MAT 25:28 “སྤོན༌བོའེ༌ ཟེརས༌, ‘ཁོའེ༌ ཀ༌ནེ༌ གི༌གུ༌ སྐངས༌ཁན༌ནི༌ པེ༌ནེ༌བོ༌ ལེན༌ཏེ༌ གི༌གུ༌ རྕུ༌ ཡོད༌ཁན༌བོའ༌ ཏོང༌།
MAT 25:29 ཏངས༌ཁན༌བོ༌ གྱལ༌ལ༌ ཅོས༌ཏེ༌ ཀོལ༌ཁན༌གུན༌ལ༌ མང༌ང༌ ཏང༌ཅེས༌ མ༌ཚད༌ ཁོང༌ངི༌ ནང༌ནེ༌ ལུད༌ཏེ༌ ཆེན༌, ཨིན༌ནའང༌ མ༌ཀོལ༌ཁན༌གུན༌ནི༌ ཀ༌ནེ༌ ཉུ༌ངུན༌ ཡོད༌ཁན༌བོའང༌ ཁྱེར༌ཨིན༌།
MAT 25:30 འི༌ ཕན༌མི༌ཐོགས༌སི༌ ཡོག༌པོ༌ ཕི༌ལོག༌ག༌ མུན༌གྲིག༌གི༌ ནང༌ང༌ ཕོང༌, ཏེ༌རུ༌ ནགས༌ སྲན༌ཏྲེ༌ ཞས༌ཏེ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།’”
MAT 25:31 གཙོ༌བོ༌ ཡེ༌ཤུའི༌ མོལས༌, “མི༌རིགས༌སི༌བུ༌ ཟིར༌རྗིད༌དི༌ ནང༌ང༌ ཕོ༌ཉ༌ ཚང༌མ༌ ཉམ༌པོ༌ ཡོང༌ངི༌ ཏུས༌, ཁོ༌ གྱལ༌པོའེ༌ ཚུལ༌ལ༌ ཁོ༌རང༌ངི༌ ཟིར༌རྗིད༌དི༌ ཁྲིས༌སི༌ཀ༌ དུག༌ཨིན༌།
MAT 25:32 གྱལ༌ཁམས༌ ཚང༌མའེ༌ མི༌གུན༌ ཁོའེ༌ དུན༌ལ༌ ལྡུས༌ཨིན༌, ལུག༌རྫི༌ ར༌མའེ༌ ཕྲོ༌ནེ༌ ལུག༌གུན༌ ཕེའ༌ ཙོགས༌ལ༌ ཁོའེ༌ མི༌གུན༌ སོ༌སོ༌ ཕེ༌ཨིན༌།
MAT 25:33 ཁོའེ༌ ཡས༌པ༌ ཆོགས༌ལ༌ ལུག༌ དང༌ ཡོ༌མ༌ ཆོགས༌ལ༌ ར༌མ༌ གུན༌ བོར༌ཨིན༌།”
MAT 25:34 “ཏེ༌ནེ༌ གྱལ༌པོའེ༌ ཡས༌ལ༌ ཡོད༌ཁན༌གུན༌ལ༌ ཟེར༌ཨིན༌ ངའེ༌ ཡབ༌བི༌ ཅིན༌ལབས༌ སལ༌ཁན༌གུན༌, ཁྱོ༌ཞའེ༌ ནོར༌སྐལ༌ ནམ༌ཁའེ༌ གྱལ༌སྲིད༌པོ༌ ལེན༌ན༌ལ༌ ཡོང༌, ཀ༌བོ༌ ཁྱོ༌ཞའེ༌ ཕིའ༌ ཇིག༌རྟེན༌ ཛད༌པ༌ནེ༌ ཕར༌ལ༌ གྲལ༌གྲིག༌ ཛད༌ཏེ༌ ཨིན༌།
MAT 25:35 ང༌ སྟོགས༌ ཟ༌ནེ༌ ཁྱོ༌ཞའེ༌ ཟན༌ ཏངས༌ ཡང༌ ང༌ སྐོམས༌ ཟ༌ནེ༌ ཁྱོ༌ཞའེ༌ ཐུང༌ཅེས༌ ཏངས༌, ངོ༌མ༌ཤེས༌ནའང༌ ངའ༌ ཁྱོ༌ཞའེ༌ ཁང༌པའེ༌ ནང༌ང༌ གའ༌སུས༌ ཞུས༌།
MAT 25:36 ང༌ ལྗེར༌ཉལ༌ལ༌ ཡོད༌ ཟ༌ནེ༌ ཀོས༌ལག༌ སྐོནས༌, ང༌ ཟུ༌མོ༌ ཡོད༌ ཟ༌ནེ༌ སྟ༌སྟོག༌ ཅོས༌, ཡང༌ ང༌ ཙོན༌ཁང༌ང༌ ཡོད༌ ཟ༌ནེ༌ ཐུག༌ག༌ལ༌ ཡོངས༌།”
MAT 25:37 “ཏེ༌ནེ༌ ཏེ༌ མི༌ ཀྲང༌པོ༌གུན༌ནི༌ ཟེར༌ཨིན༌, ‘གཙོ༌བོ༌ལེ༌, ནམ༌ ཉེ༌རང༌ སྟོག༌རིའ༌ ཐོང༌ཏེ༌ ང༌ཞའེ༌ ཁར༌ཇི༌ ཏངས༌ ཡ༌ སྐོམ༌ས༌ ཐོང༌ཏེ༌ ཐུང༌ཅེས༌ ཏངས༌?
MAT 25:38 ནམ༌ ཉེ༌རང༌ ང༌ཞའེ༌ ཐོང༌ཏེ༌ ངོ༌མ༌ཤེས༌ནའང༌ ཁང༌པའེ༌ ནང༌ང༌ གའ༌སུས༌ ཞུས༌, ཡ༌ ལྗེར༌ཉལ༌ལ༌ ཐོང༌ཏེ༌ ཀོས༌ལག༌ སྐོནས༌?
MAT 25:39 ཡང༌ ཟུ༌མོ༌ ཡ༌ ཙོན༌ཁང༌ང༌ ཡོད༌ད༌ ཐོང༌ཏེ༌ ནམ༌ ཐུག༌ག༌ལ༌ ཡོངས༌?’”
MAT 25:40 “ཏེ༌ནེ༌ གྱལ༌པོའེ༌ ཟེར༌ཨིན༌, ‘ངའེ༌ ཁྱོ༌ཞའ༌ དེན༌བ༌ ཟེར༌རད༌ ཁྱོ༌ཞའེ༌ ངའེ༌ སྤུན༌ འུ༌ཐུགས༌ ཆུང༌ཤོག༌ ཅིག༌ག༌ ཅོས༌ཁན༌གུན༌ ངའ༌ ཅོས༌ཏེ༌ ཨིན༌།’”
MAT 25:41 “ཏེ༌ནེ༌ ཡོ༌མ༌ ཆོགས༌ལ༌ ཡོད༌ཁན༌གུན༌ལ༌ ཟེར༌ཨིན༌, ‘རྔན༌ ཕོག༌ཁན༌, ཁྱོ༌ཞ༌གུན༌ ང༌ནེ༌ ཐག༌རིང༌ང༌ མ༌ནེ༌ མི༌ཤི༌ཅེས༌སི༌ མེའེ༌ ནང༌ང༌ སོང༌ ཀ༌བོ༌ ཤེ༌ཏན༌ དང༌ ཁོའེ༌ ཕོ༌ཉ༌ ངན༌པ༌གུན༌ནི༌ ཕིའ༌ ཅོའ༌ ཛད༌ཏེ༌ ཨིན༌།
MAT 25:42 ང༌ སྟོགས༌ ཟ༌ནེ༌ ཁྱོ༌ཞའེ༌ ཟའ༌ཅེས༌ལ༌ ཅའང༌ མ༌ཏངས༌, ང༌ སྐོམས༌ ཟ༌ནེ༌ ཐུང༌ཅེས༌ལ༌ ཅའང༌ མ༌ཏངས༌།
MAT 25:43 ཁྱོ༌ཞའེ༌ ང༌ ངོ༌མ༌ཤེས༌ ཟ༌ནེ༌ ཁང༌པའེ༌ ནང༌ང༌ གའ༌སུས༌ མ༌ཞུས༌, ལྗེར༌ཉལ༌ ཡོད༌ ཟ༌ནེ༌ ཀོས༌ལག༌ མ༌སྐོནས༌, ཟུ༌མོ༌ ཡ༌ ཙོན༌ཁང༌ང༌ ཡོད༌ ཟ༌ནེ༌ ང༌ སྟ༌སྟོག༌ མ༌ཅོས༌།’”
MAT 25:44 “ཁོང༌གུན༌ནི༌ ལན༌ཏང༌ཨིན༌, ‘གཙོ༌བོ༌ལེ༌, ནམ༌ ང༌ཞའ༌ ཉེ༌རང༌ སྟོག༌རིའ༌, སྐོམས༌རིའ༌, ངོ༌མ༌ཤེས༌ས༌, ཡ༌ ལྗེར༌ཉལ༌ལ༌, ཡ༌ ཟུ༌མོ༌, ཡ༌ ཙོན༌ཁང༌ང༌ ཡོད༌ད༌ ཐོང༌ཏེ༌ ཉེ༌རང༌ང༌ རོགས༌ མ༌ཅོས༌?’”
MAT 25:45 “ཏེ༌ནེ༌ གྱལ༌པོའེ༌ ཟེར༌ཨིན༌, ‘ངའེ༌ ཁྱོ༌ཞའ༌ དེན༌བ༌ ཟེར༌རད༌, ངའེ༌ སྤུན༌ འུ༌ཐུགས༌ ཆུང༌ཤོག༌ ཅིག༌ག༌ ཡ༌ཏོ༌ མ༌ཅོས༌པ༌, ངའ༌ མ༌ཅོའ༌ཨིན༌།’”
MAT 25:46 “ཁོང༌གུན༌ ཐའ༌མེད༌པའེ༌ ཆད༌པའེ༌ ནང༌ང༌ ཁྱེར༌ཨིན༌ ཨིན༌ནའང༌ མི༌ ཀྲང༌པོ༌གུན༌ ཐའ༌མེད༌པའེ༌ མི༌ཚེ༌ ནང༌ང༌ ཆེན༌།”
MAT 26:1 གཙོ༌བོ༌ ཡེ༌ཤུའི༌ ཏེ༌ ཚང༌མ༌ མོལ༌ ཚར༌ཏེ༌ སྟིང༌ནེ༌ ཁོང༌ངི༌ ལོབ༌ཕྲུགས༌གུན༌ལ༌ མོལས༌,
MAT 26:2 “ཞག༌མ༌ ཉིས༌སི༌ སྟིང༌ནེ༌ པེ༌སག༌གི༌ ཏུས༌ཆེན༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌, ཡང༌ ཏེ༌ ཞག༌ག༌ མི༌རིགས༌སི༌བུ༌ གྲ༌འོའེ༌ ལག༌ག༌ རྐྱང༌ཤིང༌ངི༌ཀ༌ རྐྱང༌ང༌ལ༌ སྟད༌ཨིན༌།”
MAT 26:3 ཏེ༌ནེ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ ཆེན༌མོ༌ ཀ༌ཡ༌ཕཱས༌ ཟེར༌ཁན༌ནི༌ ཕོ༌གྲང༌ངི༌ ནང༌ང༌ ཛོམས༌ཏེ༌
MAT 26:4 སང༌ཝའེ༌ ནང༌ང༌ ཡེ༌ཤུ༌ ཟུམས༌ཏེ༌ སད༌ཅེས༌སི༌ ཅུས༌ངན༌ ལྡིངས༌།
MAT 26:5 ཨིན༌ནའང༌ ཁོང༌གུན༌ནི༌ ཟེརས༌, “པེ༌སག༌གི༌ ཏུས༌ཆེན༌ནི༌ ཏུས༌ལ༌ མི༌ཟུམ༌ ཅིའ༌ཟེར༌ན༌ མི༌ཚོགས༌ལ༌ སྲོ༌ ཡོངས༌ཏེ༌ ཧི༌ལིངས༌ ཕིང༌སྲིད༌ཅེས༌ ཨིན༌ནོག༌།”
MAT 26:6 གཙོ༌བོ༌ ཡེ༌ཤུ༌ བེད༌ཐཱ༌ནི༌ གྲོང༌སེབ༌བ༌ ཛེ༌ནད༌ནེ༌ ཕན༌ཁན༌ ཤི༌མོན༌ནི༌ ཁང༌པའེ༌ ནང༌ང༌
MAT 26:7 ཅོག༌ཙེ༌ཀ༌ སྟེན༌ཏེ༌ ཡོད༌ཏུས༌, ཀའ༌ཡོལ༌ལི༌ ནོད༌ ཏྲི༌ཞིམ༌མི༌ མར༌ ཀུས༌པོ༌ སྐངས༌ཏེ༌ ཁུར༌ཁན༌ནི༌ བུ༌མོ༌ཞིག༌ ཡོངས༌ ཡང༌ ཏྲི༌ཞིམ༌བོ༌ ཁོང༌ངི༌ ཨུའི༌ཀ༌ ལུགས༌།
MAT 26:8 ཏེ༌བོ༌ ཐོང༌ང༌ཅིག༌ ལོབ༌ཕྲུགས༌གུན༌ལ༌ སྲོ༌ ཡོངས༌ཏེ༌, ཅིག༌ དང༌ ཅིག༌ག༌ ཟེརས༌, “ཅིའ༌ ཏེ༌བོ༌ གོད༌ལ༌ ཏངས༌ཏེ༌ ཨིན༌ནོག༌?
MAT 26:9 འི༌ ཏྲི༌ཞིམ༌མི༌ མར༌བོ༌ རིན༌ ཆེན༌མོ༌ཞིག༌ག༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏང༌ཤིག༌པིའང༌།”
MAT 26:10 ཡེ༌ཤུའི༌ ཏེ༌བོ༌ ཁྱེན༌ཏེ༌ ཁོང༌གུན༌ལ༌ མོལས༌, “ཁྱོ༌ཞའེ༌ འི༌ བུ༌མོའེ༌ སེམས༌ལ༌ ཅིའ༌ ནགས༌ སྟན༌ནད༌? ཁོའེ༌ ངའེ༌ ཕིའ༌ ལས༌ ཟང༌པོ༌ ཅོས༌ཏེ༌ ཨིན༌ནོག༌།
MAT 26:11 ཉལ༌བ༌ཅན༌གུན༌ ཏུས༌གྱུན༌ ཁྱོ༌ཞའ༌ ཉམ༌པོ༌ ལུས༌ཨིན༌, ཨིན༌ནའང༌ ང༌ ཁྱོ༌ཞའ༌ ཉམ༌པོ༌ ཏུས༌གྱུན༌ མི༌ལུས༌།
MAT 26:12 ཁོའེ༌ ངའེ༌ ཟུགས༌པོའ༌ ཏྲི༌ཞིམ༌ ལུགས༌ཏེ༌ ངའེ༌ ཟུགས༌པོ༌ སྤུར༌ཁང༌ང༌ ཁྱེར༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཨིན༌ནོག༌།
MAT 26:13 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཇིག༌རྟེན༌ གང༌པོའེ༌ ནང༌ང༌ ཀ༌རུ༌ གའ༌མོའེ༌ ནས༌ཚུལ༌ ཤད༌ནའང༌ འི༌ བུ༌མོ༌བོའེ༌ ངའ༌ ཅོས༌ཁན༌བོའང༌ ཤད༌ཏེ༌ ཁོ༌ ཨིད༌ཏུ༌ ཅོ༌ཨིན༌།”
MAT 26:14 ཏེ༌ནེ༌ ལོབ༌ཕྲུགས༌ རྕུག༌ཉིས༌སི༌ ནང༌ནེ༌ ཀར༌ཡོད༌པ༌ ཡུ༌དཱ༌ ཟེར༌ཁན༌བོ༌ བླ༌མ༌ འུ༌སྐྱོང༌གུན༌ ཡོད༌ས༌ སོང༌ཏེ༌
MAT 26:15 ཏྲིས༌, “ཀལ༌ཏེས༌ ངའེ༌ ཡེ༌ཤུ༌ ཁྱོ༌ཞ༌གུན༌ལ༌ སྟད༌ན༌, ངའ༌ ཅི༌ ཏང༌ཨིན༌?” ཁོང༌གུན༌ནི༌ ཁོའ༌ མུལ༌ལི༌ པེ༌ནེ༌ སུམ༌ཅུ༌ ཏངས༌།
MAT 26:16 ཏེན༌ན༌ ཏུས༌ནེ༌ ཕར༌ལ༌ ཡུ༌དཱའེ༌ ཡེ༌ཤུ༌ སྟད༌ཅེས༌སི༌ སྐབས༌ ཙལ༌ཅེས༌ གོ༌ཟུགས༌།
MAT 26:17 སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ནི༌ གོ༌མའེ༌ ཞག༌ག༌, ལོབ༌ཕྲུགས༌གུན༌ གཙོ༌བོ༌ ཡེ༌ཤུའི༌ཀ༌ ཡོངས༌ཏེ༌ ཏྲིས༌, “ང༌ཞའེ༌ ཉེ༌རང༌ དོན༌ཅེས༌སི༌ ཕིའ༌ པེ༌སག༌གི༌ དོན༌ཏང༌ ཀ༌རུ༌ གྲལ༌གྲིག༌ ཅོ༌ལེ༌།”
MAT 26:18 ཁོང༌ངི༌ མོལས༌, “ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ངའེ༌ ཟེར༌ཁན༌ནི༌ མི༌བོའེ༌ཀ༌ སོང༌ཏེ༌ ཁོའ༌ ཟེར༌, ‘ལོབ༌བོན༌ནི༌ ཟེར༌དུག༌ ངའེ༌ ཕིའ༌ ལྡམ༌མ༌ ཛད༌ཁན༌ནི༌ ཏུས༌པོ༌ ཉེ༌མོ༌ དུག༌། ང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཁྱོ༌རང༌ངི༌ ཁང༌པའེ༌ ནང༌ང༌ ངའ༌ པེ༌སག༌གི༌ དོན༌ཏང༌ ཟེན༌།’”
MAT 26:19 ཏེ༌ནེ༌ ལོབ༌ཕྲུགས༌གུན༌ནི༌ ཡེ༌ཤུའི༌ མོལ༌ཁན༌ ནང༌ཞིན༌ པེ༌སག༌གི༌ དོན༌ཏང༌ངི༌ གྲལ༌གྲིག༌ ཅོས༌།
MAT 26:20 ཕི༌ཏོག༌ ཆའ༌ཅིག༌ ལོབ༌ཕྲུགས༌ རྕུག༌ཉིས༌ ཉམ༌པོ༌ ཡེ༌ཤུ༌ ཅོག༌ཙེ༌ཀ༌ སྟེན༌ཏེ༌
MAT 26:21 དོན༌ཏང༌ དོན༌ཨིན༌ ཡོད༌ཏུས༌, ཁོང༌ངི༌ ལོབ༌ཕྲུགས༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌ ཁྱོ༌ཞའེ༌ ནང༌ནེ༌ ཅིག༌ཅིག༌གི༌ ངའ༌ ངོ༌ལོག༌ ཅོ༌ཨིན༌།”
MAT 26:22 ཁོང༌གུན༌ མ༌སྲན༌ཏྲེ༌ ཚེར༌ཏེ༌ ཁོང༌ང༌ ཅིག༌གི༌ སྟིང༌ནེ༌ ཅིག༌གི༌ ཏྲིས༌, “གཙོ༌བོ༌ལེ༌, ཏན༌ཏན༌ ང༌ཏ༌ མན༌གྲོ༌?”
MAT 26:23 ཡེ༌ཤུའི༌ ལན༌སལས༌, “ང༌ ཉམ༌པོ༌ ད༌བེན༌ ཅིག༌གི༌ ནང༌ནེ༌ ཟའ༌ཁན༌བོའེ༌ ངའ༌ གྲ༌འོའེ༌ ལག༌ག༌ སྟད༌ཨིན༌།
MAT 26:24 ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཡོད༌ཁན༌ ནང༌ཞིན༌ མི༌རིགས༌སི༌བུ༌ ཤི༌གོས༌, ཨིན༌ནའང༌ མི༌རིགས༌སི༌བུ༌ གྲ༌འོའེ༌ ལག༌ག༌ སྟད༌ཁན༌ནི༌ མི༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཏེ༌ སང༌ཏ༌ ཁོ༌ མ༌སྐྱེས༌པིན༌ན༌ ཁོའེ༌ ཕིའ༌ གྱལ༌ལ༌ ཡོད༌གྲོ༌།”
MAT 26:25 ཏེ༌ནེ༌ ཡེ༌ཤུ༌ གྲ༌འོའེ༌ ལག༌ག༌ སྟད༌ཅེས༌ཅན༌ནི༌ ཡུ༌དཱའེ༌ ཟེརས༌, “ལོབ༌བོན༌ལེ༌ ཏན༌ཏན༌ ང༌ཏ༌ མན༌གྲོ༌།” ཡེ༌ཤུའི༌ མོལས༌, “འོ༌ན༌ ཁྱོ༌རང༌ ཨིན༌།”
MAT 26:26 ཁོང༌གུན༌ དོན༌ཏང༌ དོན༌ཨིན༌ ཡོད༌ཏུས༌, ཡེ༌ཤུའི༌ ཏ༌གི༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཅག༌ག༌ ཛདས༌ ཡང༌ ལོབ༌ཕྲུགས༌གུན༌ལ༌ སལ༌ཨིན༌ མོལས༌, “འི༌བོ༌ ངའེ༌ ཟུགས༌པོ༌ ཨིན༌, ལེན༌ཏེ༌ ཟོ༌།”
MAT 26:27 ཏེ༌ནེ༌ དོན༌སྐྱོག༌པོ༌ ནམས༌ ཡང༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཁོང༌གུན༌ལ༌ སལ༌ཨིན༌ མོལས༌, “ཁྱོ༌ཞའ༌ ཚང༌མའེ༌ འི༌ ནང༌ནེ༌ ཐུང༌
MAT 26:28 འི༌བོ༌ ངའེ༌ ཁྲག༌ ཨིན༌ ཀ༌བོའེ༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ ཆད༌དོན༌བོ༌ ཏན༌ཏན༌ ཛད༌ད༌ནོག༌, ཡང༌ མི༌ མང༌པོའེ༌ སྡིག༌པའེ༌ ཕིའ༌ སྲོག༌ཆོད༌དི༌ ཚུལ༌ལ༌ ཕོས༌།
MAT 26:29 ངའེ༌ ཁྱོ༌ཞའ༌ ཟེར༌རད༌, འི༌ རྒུན༌ཆང༌བོ༌ ཁྱོ༌ཞ༌གུན༌ ཉམ༌པོ༌ ངའེ༌ ཡང༌སྐྱར༌ མི༌ཐུང༌ ནམ༌ཚོག༌པ༌ ང༌རང༌ངི༌ ཡབ༌བི༌ གྱལ༌སྲིད༌དི༌ ནང༌ང༌ འི༌བོའ༌ སོ༌མ༌ ཏོན༌ཏག༌ མི༌སལ༌།”
MAT 26:30 ཁོང༌གུན༌ནི༌ དཀོན༌མཆོག༌ག༌ སྟོད༌པའེ༌ ལུ༌ ཕུལ༌ ཚར༌ར༌ཅིག༌, ཁོང༌གུན༌ ཨོ༌ལིཝ༌ཝི༌ རིའ༌ སྐྱོདས༌།
MAT 26:31 ཏེ༌ནེ༌ གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “དི༌རིང༌ ཚན༌ལ༌ ཁྱོ༌ཞའ༌ ཚང༌མའེ༌ ངའ༌ ཕངས༌ཏེ༌ ཆེན༌ ཅིའ༌ཟེར༌ན༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ངའེ༌ ལུག༌རྫི༌བོ༌ སད༌ཅུག༌ཨིན༌, ཡང༌ ལུག༌ཁྱུའི༌ ལུག༌གུན༌ ཡན༌ཏེ༌ ཆེན༌།’
MAT 26:32 ཨིན༌ནའང༌ སོན༌ཏེའ༌ ལང༌ང༌ ཛད༌ཏེ༌ སྟིང༌ནེ༌ ང༌ ཁྱོ༌ཞའེ༌ སང༌ སྔུན༌ལ༌ གཱ༌ལིལ༌ལིའི༌ ཡུལ༌ཇོངས༌ལ༌ ཆེན༌།”
MAT 26:33 པི༌ཏྲར༌རི༌ ལན༌ཏངས༌, “ཚང༌མའེ༌ ཉེ༌རང༌ ཕང༌ནའང༌, ངའེ༌ ཉེ༌རང༌ མ༌ནེ༌ མི༌ཕང༌།”
MAT 26:34 ཡེ༌ཤུའི༌ མོལས༌, “ངའེ༌ ཁྱོ༌རང༌ང༌ དེན༌བ༌ ཟེར༌རད༌ འིན༌ན༌ ཚན༌ལ༌ ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།”
MAT 26:35 པི༌ཏྲར༌རི༌ འུ༌ཙུག༌ ཏངས༌ཏེ༌ ཟེརས༌, “ངའ༌ ཉེ༌རང༌ ཉམ༌པོ༌ ཤི༌གོས༌ནའང༌, ངའེ༌ ཉེ༌རང༌ མི༌ཤེས༌ཟུན༌ མ༌ནེ༌ མི༌ཏང༌།” ཏེན༌ན༌ ཙོགས༌ ཞན༌ ལོབ༌ཕྲུགས༌ ཚང༌མེའང༌ ཟེརས༌།
MAT 26:36 ཏེ༌ནེ༌ གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ གེད༌ཤེ༌མ༌ནེ༌ ཟེར༌སའེ༌ ནས༌ས༌ སྐྱོདས༌ ཡང༌ ཁོང༌ངི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ འི༌ཀ༌ དུག༌, ང༌ འ༌ཀ༌ མོས༌ལམ༌ ཞུའ༌ ཆའད༌”
MAT 26:37 ཁོང༌ངི༌ པི༌ཏྲར༌ ཡང༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཉིས༌ཀོ༌, ཁོང༌རང༌ ཉམ༌པོ༌ ཁྱེར༌ར༌ ཛདས༌, ཡེ༌ཤུའ༌ ཐུགས༌ཚེར༌ སྐྱོད༌ཏེ༌ ཁོང༌ ཚབས༌ས༌ ཛདས༌།
MAT 26:38 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ སེམས༌ལ༌ ཚེར༌ཁ༌ མ༌སྲན༌ཏྲེ༌ ཤི༌ཅེས༌ ཙོགས༌ རག༌། ང༌ ཉམ༌པོ༌ ཤང༌ ཅོས༌ཏེ༌ འི༌ཀ༌ དུག༌།”
MAT 26:39 ཡེ༌ཤུ༌ ཁོང༌གུན༌ནི༌ སང༌ ཙ༌པིག༌ ཐག༌རིང༌ང༌ སྐྱོད༌ཏེ༌, གྱེལ༌ཏེ༌ ཞལ༌དོང༌ སའ༌ ཕབས༌ཏེ༌, མོས༌ལམ༌ ཞུ༌ཨིན༌ མོལས༌, “ངའེ༌ ཡབ༌ལེ༌, ཞན༌ ཐབས༌ཤིག༌ ཡོད༌ན༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཀ༌ནེ༌ ཐེན༌ན༌ ཛད༌དའང༌, ཨིན༌ནའང༌ ངའེ༌ དོད༌པ༌ ནང༌ཞིན༌ མན༌པ༌, ཉེ༌རང༌ངི༌ ཐུག༌གོངས༌ ནང༌ཞིན༌ ཅོའ༌ ཛད༌།”
MAT 26:40 ཏེ༌ནེ༌ ཡེ༌ཤུ༌ ལོགས༌ཏེ༌ སྐྱོདས༌ ཡང༌ ཁོང༌ ཚང༌ཀོ༌ ཉིད༌ལ༌ སོང༌ཏེ༌ ཟིགས༌། ཁོང༌ངི༌ པི༌ཏྲར༌ལ༌ མོལས༌, “ཆུ༌ཚོད༌ ཅིག༌གའང༌ ང༌ ཉམ༌པོ༌ ཉིད༌ མ༌ཏང༌ང༌ དུག༌མ༌ཉན༌ན༌?
MAT 26:41 ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ ཉིད༌ མ༌ཏང༌ང༌ མོས༌ལམ༌ ཞུས༌། སེམས༌ཉིད༌དི༌ དོད༌པ༌ སྡིག༌པའེ༌ ནང༌ང༌ མི༌གྱེལ༌ཅེས༌ ཡོད༌ནའང༌ ཟུགས༌པོ༌ འུ༌ཐུགས༌ ཡོད༌ཏེ༌ ཨིན༌ནོག༌།”
MAT 26:42 ལན༌ ཉིས༌པ༌ ཁོང༌ ཙ༌པིག༌ ཐག༌རིང༌ང༌ སྐྱོད༌ཏེ༌ མོས༌ལམ༌ ཞུའ༌ ཛདས༌, “ངའེ༌ ཡབ༌ལེ༌, ཀལ༌ཏེས༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཐུངས༌ཏེ༌ མ༌ནེ༌ ཐེན༌ ཉན༌ཅེས༌ མེད༌ན༌, ཉེ༌རང༌ངི༌ ཐུག༌གོངས༌ ནང༌ཞིན༌ གྲུབ༌ཤིག༌།”
MAT 26:43 ཁོང༌ ལོགས༌ཏེ༌ སྐྱོད༌ད༌ཅིག༌, ཡང༌སྐྱར༌ ལོབ༌ཕྲུགས༌ ཚང༌ཀོ༌ ཉིད༌ལ༌ སོང༌ཏེ༌ ཟིགས༌ ཅིའ༌ཟེར༌ན༌ ཁོང༌གུན༌ སྲན༌ཏྲེ༌ ངལ༌ཏེ༌ ཡོད༌པིན༌།
MAT 26:44 ལོབ༌ཕྲུགས༌གུན༌ ཡང༌སྐྱར༌ བོར༌ཏེ༌ ཁོང༌ ཙ༌པིག༌ ཐག༌རིང༌ང༌ སྐྱོད༌ཏེ༌ ལན༌ སུམ༌པ༌ སྔུན༌མ༌ ཙོགས༌ལ༌ མོས༌ལམ༌ ཞུའ༌ ཛདས༌།
MAT 26:45 ཏེ༌ནེ༌ ཁོང༌ ལོབ༌ཕྲུགས༌གུན༌ ཡོད༌ས༌ ལོགས༌ཏེ༌ སྐྱོད༌ཏེ༌ མོལས༌, “ཏ༌རུང༌ངའང༌ ཁྱོ༌ཞའ༌ ཉིད༌ ཏང༌ཨིན༌ ངལ༌ཚོའ༌ད༌? ལྟོས༌, མི༌རིགས༌སི༌བུའ༌ ངོ༌ལོག༌ ཅོས༌ཏེ༌ སྡིག༌ཅན༌གུན༌ནི༌ ལག༌ག༌ སྟད༌ཅེས༌སི༌ ཏུས༌ཚོད༌པོ༌ ལེབ༌ ཚར༌།
MAT 26:46 ལོངས༌, ང༌དང༌གུན༌ ཆེན༌། ལྟོས༌, ངའ༌ ངོ༌ལོག༌ ཅོ༌ཁན༌བོ༌ ཡོང༌ང༌ལ༌།”
MAT 26:47 གཙོ༌བོ༌ ཡེ༌ཤུའི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ལོབ༌ཕྲུགས༌ རྕུག༌ཉིས༌པོའེ༌ ནང༌ནེ༌ ཡུ༌དཱ༌ ཏེ༌ཀ༌ ལེབ༌, ཁོ༌ ཉམ༌པོ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཀལ༌ཁན༌ནི༌ མི༌ མང༌པོ༌ ར༌འི༌ དང༌ བེར༌ཀ༌ ཁུར༌ཏེ༌ ཡོངས༌།
MAT 26:48 ངོ༌ལོག༌ ཅོ༌ཁན༌བོའེ༌ ཁོང༌གུན༌ལ༌ ཡེ༌ཤུ༌ ཟུམ༌མ༌ལ༌ རྡ༌ཞིག༌ ཏང༌ཨིན༌, “ངའེ༌ པུག༌ ཏང༌ཁན༌ནི༌ མི༌བོ༌ ཁྱོ༌ཞའེ༌ ཟུམ༌” ཟེརས༌།
MAT 26:49 ཏེན༌ན༌མལ༌ལ༌ ཡུ༌དཱ༌ ཡེ༌ཤུ༌ ཡོད༌ས༌ ཡོངས༌ཏེ༌, “ལོབ༌བོན༌ལེ༌, ཇུ༌ལེ༌” ཟེར༌ཏེ༌ པུག༌ ཏངས༌།
MAT 26:50 ཡེ༌ཤུའི༌ ཁོའ༌ མོལས༌, “ཛ༌འོ༌, ཁྱོ༌རང༌ ཅོའ༌ལ༌ ཡོངས༌ཁན༌བོ༌ ཅོས༌།” ཏེ༌ནེ༌ ཁོང༌གུན༌ ཡོངས༌ཏེ༌ ཡེ༌ཤུ༌ ཟུམས༌ ཡང༌ ལྕག༌ཐག༌ ཉམ༌པོ༌ ཏགས༌།
MAT 26:51 ཧུན༌མེད༌ལ༌ ལོབ༌ཕྲུགས༌ ཅིག༌གི༌ ཁོ༌རང༌ངི༌ ར༌འི༌ ཕིངས༌ཏེ༌ བླ༌མ༌ ཆེན༌མོའེ༌ ཡོག༌པོའ༌ གྱབས༌ཏེ༌ ཁོའེ༌ ནམ༌ཅོག༌པོ༌ ཅད༌ཏངས༌།
MAT 26:52 ཡེ༌ཤུའི༌ ཁོའ༌ མོལས༌, “ར༌འི༌ ཤུབས༌སི༌ ནང༌ང༌ གྱོང༌ ཅིའ༌ཟེར༌ན༌ ར༌འི༌ ཀོལ༌ཁན༌ ཚང༌མ༌ ར༌འི༌ ཀ༌ནེ༌ ཤི༌ཨིན༌།
MAT 26:53 ཁྱོ༌རང༌ངི༌ ཅི༌ སམ༌, ཀལ༌ཏེས༌ ངའེ༌ ང༌རང༌ངི༌ ཡབ༌བ༌ ཞུ༌ན༌ ཏེན༌ན༌མལ༌ལ༌ ཕོ༌ཉའེ༌ མག༌མི༌ ཀྲངས༌ མེད༌ཤིག༌ ངའ༌ སྐྱོབ༌བ༌ ཀལ༌ལ༌ མི༌ཛད༌ད༌?
MAT 26:54 ཨིན༌ནའང༌ ཀལ༌ཏེས༌ ཏེ༌བོ༌ ངའེ༌ ཅོ༌ན༌, ཏེ༌ནེ༌ ཏམ༌པའེ༌ སུང༌རབས༌སི༌ ནང༌ང༌ འི༌གུན༌ ངའེ༌ཀ༌ ཇུང༌གོས༌ མོལ༌ཁན༌བོ༌ ཀ༌ཟུག༌གི༌ དྲན༌དྲ༌ གྲུབ༌ཨིན༌།”
MAT 26:55 ཏེ༌ནེ༌ ཡེ༌ཤུའི༌ ཁོང༌ ཟུམ༌ཁན༌གུན༌ལ༌ མོལས༌, “ར༌འི༌ དང༌ བེར༌ཀ༌ ཁུར༌ཏེ༌ ང༌ ཟུམ༌མ༌ ཡོངས༌ཏེ༌ ཅི༌ ང༌ ཅག༌པ༌ ཨིན༌ནོག༌ག༌? ཆོད༌ཁང༌ངི༌ ནང༌ང༌ ཞག༌ཏང༌ ངའེ༌ ལབ༌ཞ༌ ཏང༌ ཟ༌ནེ༌ ཁྱོ༌ཞའེ༌ ང༌ ཅིའ༌ མ༌ཟུམས༌པིན༌?
MAT 26:56 ཨིན༌ནའང༌ ཏམ༌པའེ༌ སུང༌རབས༌སི༌ ནང༌ང༌ ལུང༌སྟོན༌པའེ༌ བྲིས༌ཁན༌གུན༌ གྲུབ༌ཅེས༌སི༌ ཕིའ༌ འི༌ ཚང༌མ༌ ཇུང༌གོས༌།” ཏེ༌ནེ༌ ཁོང༌ ཕངས༌ཏེ༌ ལོབ༌ཕྲུགས༌ ཚང༌མ༌ ཤོར༌།
MAT 26:57 གཙོ༌བོ༌ ཡེ༌ཤུ༌ ཟུམ༌ཁན༌གུན༌ནི༌, ཁོང༌ བླ༌མ༌ ཆེན༌མོ༌ ཀ༌ཡ༌ཕཱས༌སི༌ཀ༌ ཁྱེརས༌, ཀ༌རུ༌ ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཛོམས༌ཏེ༌ ཡོད༌པིན༌།
MAT 26:58 ཨིན༌ནའང༌ པི༌ཏྲར༌ བླ༌མ༌ ཆེན༌མོའེ༌ ཕོ༌གྲང༌ངི༌ གྱང༌སྐོར༌ ཚོག༌པ༌ ཐག༌རིང༌ཞིག༌ནེ༌ ཁོང༌ངི༌ གྱབ༌ནེ༌ སོང༌ ཡང༌ ནང༌ཀུག༌ག༌ སོང༌ཏེ༌ ཡེ༌ཤུའ༌ ཅི༌ ཅོ༌རུག༌ ལྟའ༌ལ༌ སྲུང༌ཁན༌གུན༌ ཉམ༌པོ༌ སའེ༌ཀ༌ དུགས༌།
MAT 26:59 བླ༌མ༌ ཆེན༌མོ༌ དང༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཚང༌མའེ༌ ཡེ༌ཤུ༌ སད༌ཉན༌ཅེས༌སི༌ ཟུན༌ནི༌ སྤང༌པོ༌ ཙལས༌།
MAT 26:60 མི༌ མང༌པོའེ༌ ཟུན༌ནི༌ སྤང༌པོ༌ ཏང༌ནའང༌ ཁོང༌ སད༌ཉན༌ཅེས༌སི༌ སྤང༌པོ༌ཞིག༌ མ༌ཐོབ༌། སྟིང༌ཇུག༌ག༌ མི༌ ཉིས༌ ཡོངས༌ཏེ༌
MAT 26:61 ཟེརས༌, “འི༌ མི༌བོའེ༌ ཟེར༌ར༌རག༌པིན༌, ‘ངའེ༌ དཀོན༌མཆོག༌གི༌ ཆོད༌ཁང༌ ཤིགས༌ཏེ༌, ཞག༌ སུམ༌མི༌ ནང༌ང༌ ཡང༌སྐྱར༌ རྩིག༌ཉན༌ཨིན༌།’”
MAT 26:62 ཏེ༌ནེ༌ བླ༌མ༌ ཆེན༌མོ༌ ལངས༌ཏེ༌ ཡེ༌ཤུའ༌ ཟེརས༌, “ཁྱོ༌རང༌ངི༌ གྱབ༌གལ༌ལ༌ སྤང༌པོ༌ ཏང༌ཁན༌གུན༌ལ༌ ལན༌ཏང༌ང༌ མེད༌ད༌? རང༌ སྐྱོབ༌ཅེས༌སི༌ ཕིའ༌ ཁྱོ༌རང༌ང༌ ཟེར༌ཅེས༌ མེད༌ད༌?”
MAT 26:63 ཨིན༌ནའང༌ ཡེ༌ཤུ༌ ཅུབ༌ཅད༌ཏེ༌ ཞུགས༌། ཏེ༌ནེ༌ བླ༌མ༌ ཆེན༌མོའེ༌ ཟེརས༌, “ངའེ༌ ཁྱོ༌རང༌ང༌ དཀོན༌མཆོག༌ སོན༌པོའེ༌ ནའ༌ ཀལ༌ལད༌, ང༌ཞའ༌ ཤོད༌དའང༌ ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌, དཀོན༌མཆོག༌གི༌ སྲས༌ ཨིན༌ན༌?”
MAT 26:64 ཡེ༌ཤུའི༌ མོལས༌, “འོ༌ན༌ ཉེ༌རང༌ངི༌ ཟེར༌ཁན༌བོ༌ ཨིན༌, ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, མ༌འོངས༌པའེ༌ ཏུས༌སི༌ ནང༌ང༌ མི༌རིགས༌སི༌བུ༌ ཀུན༌ཝང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ དུགས༌ཏེ༌, ཡང༌ ནམ༌ཁའེ༌ སྲིན༌ནི༌ཀ༌ ཞོན༌ཏེ༌ ཡོང༌ང༌ ཁྱོ༌ཞའེ༌ ཐོང༌ཨིན༌།”
MAT 26:65 ཏེ༌ནེ༌ བླ༌མ༌ ཆེན༌མོ༌ ཁོ༌རང༌ངི༌ ཀོས༌པོ༌ ཤགས༌ ཡང༌ ཟེརས༌, “ཁོའེ༌ དཀོན༌མཆོག༌ག༌ དད༌ལོག༌ ཅོས༌ཏེ༌ ཨིན༌ནོག༌། ང༌དང༌ང༌ འི༌ སང༌ མང༌ང༌ སྤང༌པོ༌ ཅི༌ གོས༌ཨིན༌? ཁོའེ༌ དད༌ལོག༌ ཅོ༌ཁན༌བོ༌ དག༌ས༌རང༌ ཁྱོ༌ཞའེ༌ ཚོར༌ཏེ༌ ཨིན༌ནོག༌།
MAT 26:66 ཁྱོ༌ཞའེ༌ ཅི༌ ཐག༌ཅད༌དད༌?” ཁོང༌གུན༌ནི༌ ལན༌ཏངས༌, “ཁོ༌ སད༌གོ༌ཤེས༌སི༌ འོས༌པ༌ ཨིན༌ནོག༌།”
MAT 26:67 ཏེ༌ནེ༌ ཁོང༌གུན༌ནི༌ ཁོང༌ངི༌ ཞལ༌དོང༌ངི༌ཀ༌ ཐུ༌ གྱབས༌ཏེ༌ མུལ༌ཁྲུག༌ ཅོས༌ཏེ༌ རྡུངས༌ ཡང༌ ཞན༌གུན༌ནི༌ ཁོང༌ང༌ གྲམ༌ལྕགས༌ དང༌
MAT 26:68 ཧབ༌གོད༌ ཏང༌ཨིན༌ ཟེརས༌, “ལྡམ༌མ༌ ཛད༌ཁན༌ནི༌ མ༌ཤི༌ཀ༌ ང༌ཞའ༌ ལུང༌སྟན༌ སལ༌ལའང༌, ཁྱོ༌རང༌ང༌ རྡུང༌ཁན༌བོ༌ སུ༌ ཨིན༌ནོག༌?”
MAT 26:69 པི༌ཏྲར༌ ཕི༌ལོག༌ག༌ ཕོ༌གྲང༌ངི༌ ཚོམས༌སི༌ ནང༌ང༌ དུགས༌ཏེ༌ ཡོད༌ ཟ༌ནེ༌, ཡོག༌མོ༌ཞིག༌ ཁོ༌ ཡོད༌ས༌ ཡོངས༌ཏེ༌ ཟེརས༌, “གཱ༌ལིལ༌ལི༌པ༌ ཡེ༌ཤུ༌ ཉམ༌པོ༌ ཁྱོ༌རང༌ངའང༌ མེད༌པིན༌ན༌?”
MAT 26:70 ཨིན༌ནའང༌ ཁོའེ༌ ཁོང༌ ཚང༌མའེ༌ དུན༌ལ༌ ཟུན༌ ཏངས༌ཏེ༌ ཟེརས༌, “ཁྱོ༌རང༌ངི༌ ཅི༌ ཟེར༌ཏེ༌ ཨིན༌ ངའ༌ ཧ༌གོའ༌ མེ༌རག༌།”
MAT 26:71 ཏེ༌ནེ༌ ཁོ༌ གྱས༌སྒོའེ༌ཀ༌ སོང༌, ཏེ༌རུ༌ ཞན༌ ཡོག༌མོ༌ཞིག༌གི༌ ཁོ༌ ཐོང༌ཏེ༌ ཉེ༌ཁོར༌ལ༌ ཡོད༌ཁན༌གུན༌ལ༌ ཟེརས༌, “འི༌ མི༌བོ༌ ན༌ཙ༌རེད༌པ༌ ཡེ༌ཤུ༌ ཉམ༌པོ༌ དུག༌པིན༌།”
MAT 26:72 ཁོའེ༌ ཡང༌སྐྱར༌ མི༌ཤེས༌ཟུན༌ ཏང༌ཨིན༌ ནའ༌ སྐྱལ༌ཏེ༌ ཟེརས༌, “ཏེ༌ མི༌བོ༌ ངའེ༌ ཤེས༌ས༌མེད༌།”
MAT 26:73 ཙ༌པིག༌ཤིག༌གི༌ སྟིང༌ནེ༌ ཏེ༌ཀ༌ ལངས༌ཏེ༌ ཡོད༌ཁན༌གུན༌ པི༌ཏྲར༌ ཡོད༌ས༌ སོང༌ཏེ༌ ཟེརས༌, “ཏན༌ཏན༌ ཁྱོ༌རང༌ ཁོའེ༌ ཕྲོ༌པ༌གུན༌ནི༌ ནང༌ནེ༌ ཅིག༌ ཨིན༌ནོག༌ ཅིའ༌ཟེར༌ན༌ ཁྱོ༌རང༌ངི༌ སྤེ༌ར༌ ཏང༌ཚུལ༌བོ༌ གཱ༌ལིལ༌ལི༌པ༌ ཙོགས༌ རག༌།”
MAT 26:74 པི༌ཏྲར༌རི༌ ཁོ༌ ངན༌ ཕོག༌ཤིག༌ ཟེར༌ཨིན༌ ནའ༌ སྐྱལ༌ཏེ༌ ཟེརས༌, “ངའེ༌ ཏེ༌ མི༌བོ༌ ཤེས༌ས༌མེད༌།” ཏེན༌ན༌མལ༌ལ༌ ཅ༌པོའེ༌ སྐད༌ ཏངས༌།
MAT 26:75 ཏེ༌ནེ༌ པི༌ཏྲར༌ལ༌ ཡེ༌ཤུའི༌, “ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌” མོལ༌ཁན༌བོ༌ ཨིད༌ཏུ༌ ཡོངས༌, ཡང༌ ཁོ༌ ཕི༌ལོག༌ག༌ སོང༌ཏེ༌ མ༌སྲན༌ཏྲེ༌ ངུས༌།
MAT 27:1 ང༌ཏོག༌ ང༌མོ༌ནེ༌, བླ༌མ༌ འུ༌སྐྱོང༌ ཚང༌མ༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ གཙོ༌བོ༌ ཡེ༌ཤུ༌ སད༌གོས༌ ཟེར༌ཏེ༌ ཐག༌ཅདས༌།
MAT 27:2 ཁོང༌གུན༌ནི༌ ཁོང༌ངི༌ ཆག༌ ལྡམས༌ཏེ༌ ཀའ༌ལོན༌ པི༌ལ༌ཏུའི༌ ལག༌ག༌ སྟད༌ད༌ ཁྱེརས༌།
MAT 27:3 ངོ༌ལོག༌ ཅོ༌ཁན༌ནི༌ ཡུ༌དཱའེ༌ གཙོ༌བོ༌ ཡེ༌ཤུའ༌ སད༌ཅེས༌སི༌ ཆད༌པ༌ ཕོག༌ག༌ ཐོང༌ཏེ༌ ཁོའེ༌ ཅོ༌ཁན༌བོའེ༌ཀ༌ ཚེར༌ཁའ༌ ཡོངས༌ཏེ༌ མུལ༌ལི༌ པེ༌ནེ༌ སུམ༌ཅུ༌བོ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ལོགས༌ཏེ༌ ཁྱེརས༌,
MAT 27:4 ཡང༌ ཁོའེ༌ ཟེརས༌, “ངའེ༌ ནོངས༌མེད༌ཁན༌ཞིག༌ག༌ ངོ༌ལོག༌ ཅོས༌ཏེ༌ སྡིག༌པ༌ ཅོས༌ཏོག༌།” ཁོང༌གུན༌ནི༌ ཟེརས༌, “ང༌ཞའེ༌ ཅིའ༌ ཚེར༌ཁའ༌ ཅོ༌ཨིན༌། ཏེ༌བོའ༌ ཚེར༌ཁའ༌ ཁོ༌རང༌ངི༌ ཅོས༌།”
MAT 27:5 ཏེ༌ནེ༌ ཡུ༌དཱའེ༌ ཆོད༌ཁང༌ངི༌ ནང༌ང༌ མུལ༌ལི༌ པེ༌ནེ༌གུན༌ ཕངས༌ ཡང༌ ཕི༌ལོག༌ག༌ སོང༌ཏེ༌ ཨོག༌སྐིལ༌ལི༌ག༌ ཞུགས༌།
MAT 27:6 བླ༌མ༌ འུ༌སྐྱོང༌གུན༌ནི༌ མུལ༌ལི༌ པེ༌ནེ༌གུན༌ ཏུས༌ཏེ༌ ཟེརས༌, “འི༌ པེ༌ནེ༌ ཁྲག༌རིན༌ ཨིན༌ པ༌སང༌, ཆོད༌ཁང༌ངི༌ བང༌ཛོད༌དི༌ ནང༌ང༌ བོར༌ཅེས༌པོ༌ ཁྲིམས༌ ནང༌ཞིན༌ གལ༌ཏེ༌ ཨིན༌ནོག༌”
MAT 27:7 ཁོང༌གུན༌ནི༌ ཏེ༌ པེ༌ནེ༌བོའ༌ ཟ༌མ༌ ཅོ༌ཁན༌ནི༌ ཞིང༌བོ༌ ཉོས༌ཏེ༌ ཞན༌ཡུལ༌ལི༌ མི༌གུན༌ ཤི༌ན༌ སུབ༌ཅེས༌སི༌ ཕིའ༌ ནས༌ས༌ ཅོ༌ཅེས༌ལ༌ ཐག༌ཅདས༌།
MAT 27:8 ཏེན༌ན༌ གྱུན༌ཚན༌བོའེ༌ ཕིའ༌ དག༌སའང༌ ཏེ༌ ཞིང༌བོའ༌ ཁྲག༌གི༌ ཞིང༌ ཟེར༌ར༌ནོག༌།
MAT 27:9 སྔུན༌མའེ༌ ལུང༌སྟོན༌པ༌ ཡེ༌རེམ༌ཡཱའི༌ མོལ༌ཁན༌བོ༌ དྲན༌དྲ༌ གྲུབ༌ཏེ༌ ཨིན༌ནོག༌, ཁོང༌ངི༌ མོལས༌, “ཨིས༌ར༌ཨེལ༌པ༌གུན༌ནི༌ སྲོག༌ རིན༌ ཅད༌ཁན༌ནི༌ མུལ༌ལི༌ པེ༌ནེ༌ སུམ༌ཅུ༌ ཁུར༌ཏེ༌
MAT 27:10 ཟ༌མ༌ ཅོ༌ཁན༌ནི༌ ཞིང༌བོ༌ ཉོས༌། ཀ༌ཟུག༌ གཙོ༌བོ༌ དཀོན༌མཆོག༌གི༌ ངའ༌ བཀའ༌ སལ༌ལ༌ ཛདས༌།”
MAT 27:11 གཙོ༌བོ༌ ཡེ༌ཤུ༌ པི༌ལ༌ཏུའི༌ དུན༌ལ༌ ཞངས༌ཏེ༌ ཡོད༌ ཏུས༌ ཁོའེ༌ ཁོང༌ང༌ ཏྲིས༌, “ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌?” ཡེ༌ཤུའི༌ ལན༌སལས༌, “ཨིན༌, ཉེ༌རང༌ངི༌ ཟེར༌ཁན༌བོ༌ ཨིན༌།”
MAT 27:12 བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཁོང༌ང༌ ཉད༌ ཀལ༌ ཟ༌ནེ༌ ཁོང༌ངི༌ ཅའང༌ ལན༌སལ༌ལ༌ མ༌ཛདས༌།
MAT 27:13 ཏེ༌ནེ༌ པི༌ལ༌ཏུའི༌ ཁོང༌ང༌ ཏྲིས༌, “ཁོང༌གུན༌ནི༌ སྐྱོན༌ མང༌པོ༌ ཀལ༌ཁན༌བོ༌ ཁྱོ༌རང༌ང༌ ཚོར༌ར༌ མེ༌རག༌ག༌?”
MAT 27:14 ཁོང༌ངི༌ སྐྱོན༌ ཀལ༌ཁན༌ ཅིག༌གའང༌ ལན༌ མ༌སལ༌པ༌, ཀའ༌ལོན༌ མ༌སྲན༌ཏྲེ༌ ཧ༌ལས༌།
MAT 27:15 ལུག༌སྲོལ༌ ནང༌ཞིན༌ པེ༌སག༌གི༌ ཏུས༌ཆེན༌ནི༌ ཏུས༌ལ༌, ཀའ༌ལོན༌ནི༌ མི༌ཚོགས༌སི༌ ལྡམ༌ཁན༌ནི༌ ཙོན༌པ༌ ཅིག༌ ཕུད༌དད༌པིན༌།
MAT 27:16 ཏེ༌ཏུས༌ལ༌ ལས༌ངན༌ ཅོས༌ཏེ༌ མིང༌ཅན༌ གྱུར༌ཁན༌ བཱ༌ར༌བས༌ ཙོན༌པ༌ཞིག༌ ཡོད༌པིན༌།
MAT 27:17 མི༌ཚོགས༌ ཛོམ༌མ༌ཅིག༌, པི༌ལ༌ཏུའི༌ ཁོང༌གུན༌ལ༌ ཏྲིས༌, “བཱ༌ར༌བས༌ ཡ༌ ཡེ༌ཤུ༌ ཀ༌བོའ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཟེར༌རད༌, ཁོང༌ ཉིས༌ཀོའེ༌ ནང༌ནེ༌ ཕུད༌ད༌ལ༌ ཁྱོ༌ཞའེ༌ ཀ༌བོ༌ ལྡམ༌མད༌?”
MAT 27:18 ༼བླ༌མ༌ འུ༌སྐྱོང༌གུན༌ ཡེ༌ཤུའི༌ཀ༌ ཚིག༌ཅེས༌པོའེ༌ ཁོང༌ ཁོའེ༌ ལག༌ག༌ སྟད༌ཁན༌བོ༌ པི༌ལ༌ཏུའ༌ གྱུས༌སོང༌།༽
MAT 27:19 པི༌ལ༌ཏུ༌ ཁྲིམ༌སྤོན༌ནི༌ ཁྲིས༌སི༌ཀ༌ དུགས༌ཏེ༌ ཡོད༌ ཟ༌ནེ༌, ཁོའེ༌ ན༌མའེ༌ འི༌ ལོན༌བོ༌ ཀལས༌, “ཏེ༌ མི༌ ནོངས༌མེད༌པོའ༌ ཁྲིམས༌ཅད༌ཅེས༌སི༌ ནང༌ང༌ དྲེས༌ མ༌དྲེས༌ ཅིའ༌ཟེར༌ན༌ དའང༌ངི༌ ཚན༌ལ༌ ཁོའེ༌ སྐོར༌ལ༌ ཇིགས༌ནང༌ཅན༌ ཉི༌ལམ༌ ཐོང༌ཅེས༌པོའེ༌ ངའ༌ རྡུག༌ངལ༌ ཆེན༌མོ༌ ཐོང༌།”
MAT 27:20 ཨིན༌ནའང༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ བཱ༌ར༌བས༌ ཕུད༌ཅེས༌ དང༌ ཡེ༌ཤུ༌ སད༌ཅུག༌ཅེས༌སི༌ ཕིའ༌ མི༌ཚོགས༌ལ༌ ཀའ༌ལོན༌ལ༌ ཞུ༌ཝ༌ ཕུལ༌ཅུག༌ཅེས༌སི༌ ཕིའ༌ ལྕེ༌ ཀོལ༌ཏེ༌ ཁའ༌ཆམས༌ ཅུགས༌།
MAT 27:21 ཀའ༌ལོན༌ནི༌ ཡང༌སྐྱར༌ མི༌ཚོགས༌ལ༌ ཏྲིས༌, “ཁོང༌ ཉིས༌ཀོའེ༌ ནང༌ནེ༌ ངའེ༌ ཁྱོ༌ཞའེ༌ ཕིའ༌ སུ༌ ཕུད༌?” མི༌ཚོགས༌སི༌ ལན༌ཏངས༌, “བཱ༌ར༌བས༌ ཕུད༌ད༌ ཛད༌།”
MAT 27:22 པི༌ལ༌ཏུའི༌ ཏྲིས༌, “ཏེ༌ནེ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, ཡེ༌ཤུའ༌ ངའེ༌ ཅི༌ ཅོ༌?” མི༌ཚོགས༌སི༌ ལན༌ཏངས༌, “ཁོ༌ རྐྱང༌ཤིང༌ང༌ རྐྱོང༌།”
MAT 27:23 པི༌ལ༌ཏུའི༌ ཏྲིས༌, “ཅི༌ཕིའ༌, ཁོའེ༌ ཁྲིམས༌སི༌ གྱབ༌གལ༌ ཅི༌ ཅོས༌ཏོག༌?” ཨིན༌ནའང༌ མི༌ཚོགས༌སི༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌, “རྐྱང༌ཤིང༌ངི༌ཀ༌ རྐྱོང༌།”
MAT 27:24 པི༌ལ༌ཏུའི༌ མི༌ཚོགས༌སི༌ ནང༌ང༌ གྱུར༌ཇ༌ ཁྱོང༌ མི༌ཉན༌ནོག༌ སམ༌ མ༌ཚད༌ ཁོང༌གུན༌ལ༌ སྲོ༌ ཡོངས༌ཏེ༌ ཧི༌ལིངས༌ ཕིང༌ཅེས༌ གོ༌ཟུགས༌པ༌ ཁོའེ༌ མི༌ཚོགས༌སི༌ དུན༌ལ༌ ཆུ༌ ཁྱོངས༌ཏེ༌ ཁོ༌རང༌ངི༌ ལག༌པ༌ ཁྲུས༌ ཡང༌ ཟེརས༌, “འི༌ མི༌བོ༌ སད༌ཅེས༌སི༌ ནང༌ང༌ ང༌ ནོངས༌མེད༌ ཨིན༌, འི༌བོའེ༌ ཕིའ༌ ཁྱོ༌ཞའ༌ ནོངས༌ཅན༌ ཨིན༌ནོག༌།”
MAT 27:25 མི༌ཚོགས༌སི༌ ཟེརས༌, “ཁོ༌ སད༌ཅེས༌སི༌ ཉད༌གལ༌བོ༌ ང༌ཞའ༌ དང༌ ང༌ཞའེ༌ ཕྲུ༌གུ༌གུན༌ལ༌ ཕོག༌ཤིག༌།”
MAT 27:26 ཏེ༌ནེ༌ ཁོང༌གུན༌ནི༌ ཕིའ༌ པི༌ལ༌ཏུའི༌ བཱ༌ར༌བས༌ ཙོན༌ཁང༌ནེ༌ ཕུད༌ཅུགས༌ ཡང༌ ཡེ༌ཤུའ༌ རྟལ༌ལྕག༌ གྱབ༌ཏེ༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ མག༌མི༌གུན༌ལ༌ སྟདས༌།
MAT 27:27 ཏེ༌ནེ༌ ཀའ༌ལོན༌ནི༌ མག༌མི༌གུན༌ནི༌, ཀའ༌ལོན༌ནི༌ ཁར༌རི༌ མག༌མི༌ ཛོམས༌སེ༌ ནས༌སའེ༌ ནང༌ང༌ གཙོ༌བོ༌ ཡེ༌ཤུ༌ ཁྱེར༌ཏེ༌ མག༌ཚོགས༌ གང༌པོ༌ ཁོང༌ང༌ ཁོར༌ཏེ༌ དུགས༌།
MAT 27:28 ཁོང༌གུན༌ནི༌ ཁོང༌ངི༌ ནམ༌ཟའ༌ ཕུད༌ཏེ༌, གྱལ༌པོ༌ གོན༌ཁན༌ ཙོགས༌སི༌ ནམ༌ཟའ༌ མར༌པོ༌ཞིག༌ སྐོནས༌,
MAT 27:29 ཡང༌ ཚེར༌མའེ༌ ཐོར༌ཤོག༌ སླས༌ཏེ༌ ཁོང༌ངི༌ ཨུའ༌ སྐོནས༌། ཁོང༌ངི༌ ཆག༌ ཡས༌པའེ༌ ནང༌ང༌ སྙུག༌བེར༌ཞིག༌ ཀལས༌ ཡང༌ ཁོང༌ངི༌ དུན༌ལ༌ པིག༌དོང༌ ཙུགས༌ཏེ༌ ཁོང༌ང༌ ཚིག༌པ༌ སྲག༌ཨིན༌ ཟེརས༌, “ཡ༌ཧུ༌དཱ༌པའེ༌ གྱལ༌པོའ༌ ཆག༌ཚལ༌།”
MAT 27:30 ཐུ༌ གྱབ༌, སྙུག༌བེར༌བོ༌ ཁུར༌ཏེ༌ ཁོང༌ངི༌ ཨུའ༌ ལན༌ མང༌པོ༌ གྱབས༌།
MAT 27:31 ཚིག༌པ༌ སྲགས༌ཏེ༌ སྟིང༌ནེ༌ ཁོང༌གུན༌ནི༌ གྱལ༌པོའེ༌ ནམ༌ཟའ༌ མར༌པོ༌བོ༌ ཕུད༌ཏེ༌, ཡེ༌ཤུའ༌ ཁོང༌རང༌ངི༌ ནམ༌ཟའ༌བོ༌ སྐོནས༌། ཏེ༌ནེ༌ ཁོང༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ ཁྱེརས༌།
MAT 27:32 ཁོང༌གུན༌ནི༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མི༌ གྱལ༌ས༌ནེ༌ ཕིངས༌ཏེ༌ ཁྲིད༌ཏེ༌ ཁྱེར༌ ཟ༌ནེ༌ ཀི༌རིན༌པ༌ ཤི༌མོན༌ ཐུག༌, ཡང༌ མག༌མི༌གུན༌ནི༌ ཁོའ༌ ཝང༌ ཏངས༌ཏེ༌ ཡེ༌ཤུའི༌ རྐྱང༌ཤིང༌ ཁུར༌ཅུགས༌།
MAT 27:33 ཁོང༌གུན༌ གོལ༌གོ༌ཐཱ༌ ༼ཀ༌བོའེ༌ ཏོན༌ཏག༌པོ༌ གོའི༌ རུས༌པའེ༌ ས༌ཀྱད༌༽ ཟེར༌ཁན༌ནི༌ ནས༌སའེ༌ཀ༌ ལེབ༌།
MAT 27:34 ཏེ༌རུ༌ ཁོང༌གུན༌ནི༌ ཡེ༌ཤུའ༌ གལ༌ སྲེས༌ཁན༌ནི༌ རྒུན༌ཆང༌ དོན༌ཅེས༌ལ༌ ཕུལས༌, ཨིན༌ནའང༌ ཁོང༌ངི༌ ཏེ༌བོ༌ ཉངས༌ཏེ༌ དོན༌ན༌ མ༌ཛདས༌།
MAT 27:35 ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ ཚར༌ར༌ཅིག༌, ཁོང༌ངི༌ ནམ༌ཟའ༌ བགོས༌ཏེ༌ སུའ༌ ཐོབ༌དུག༌ ལྟ༌ཅེས༌ལ༌ ཆོ༌ལོ༌ རིལས༌།
MAT 27:36 ཡང༌ མག༌མི༌གུན༌ སའེ༌ཀ༌ དུགས༌ཏེ༌ ཡེ༌ཤུ༌ སྲུངས༌།
MAT 27:37 ཁོང༌ངི༌ ཨུའི༌ སྟག༌ག༌ ཉད༌གལ༌ ཀལ༌ཁན༌ནི༌ སྟགས༌པོའེ༌ཀ༌ འི༌བོ༌ ཡེ༌ཤུ༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ བྲིས༌ཏེ༌ ཡོད༌པིན༌།
MAT 27:38 ཅག༌པ༌ ཉིས༌ ཁོང༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌, ཅིག༌པོ༌ ཁོང༌ངི༌ ཡས༌པ༌ ཡང༌ ཅིག༌པོ༌ ཡོ༌མའ༌།
MAT 27:39 ཏེ༌ ནས༌ས༌ གྱུད༌ཏེ༌ གྲུལ༌ཁན༌གུན༌ནི༌ གོ༌ ཡུག༌ཏེ༌ སྨད༌གྲ༌ ཏང༌ཨིན༌ ཟེརས༌,
MAT 27:40 “ཆོད༌ཁང༌ ཤིགས༌ཏེ༌ ཞག༌ སུམ༌མི༌ ནང༌ང༌ རྩིག༌ཨིན༌ ཟེར༌ཁན༌ ཁྱོད༌, ཀལ༌ཏེས༌ དཀོན༌མཆོག༌གི༌ སྲས༌ ཨིན༌ན༌ རྐྱང༌ཤིང༌ངི༌ ཀ༌ནེ༌ ཡོག༌ག༌ བབས༌ཏེ༌ རང༌ སྐྱོབ༌བའང༌།”
MAT 27:41 ཏེན༌ན༌ ཙོགས༌ལ༌ བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནིའང༌ ཁོང༌ང༌ ཚིག༌པ༌ སྲག༌ཨིན༌ ཟེརས༌,
MAT 27:42 “ཁོའེ༌ ཞན༌མ༌གུན༌ སྐྱོབས༌, ཨིན༌ནའང༌ ཁོ༌རང༌ སྐྱོབ༌ཉན༌ན༌ མི༌དུག༌། ཨིས༌ར༌ཨེལ༌པའེ༌ གྱལ༌པོ༌ རྐྱང༌ཤིང༌ངི༌ ཀ༌ནེ༌ དག༌ས༌ བབས༌ཏེ༌ ཡོང༌ན༌, ང༌ཞའེ༌ ཏད༌པ༌ ཅོ༌ཨིན༌།
MAT 27:43 དཀོན༌མཆོག༌ག༌ ཨིད༌ཤེས༌ ཅོས༌ཏེ༌ ཁོའེ༌ ཟེར༌རད༌པིན༌, ‘ང༌ དཀོན༌མཆོག༌གི༌ སྲས༌ ཨིན༌’, ཏ༌ སྟེན༌བ༌ དཀོན༌མཆོག༌གི༌ ཁོ༌ སྐྱོབ༌བ༌ཛད༌ དུག༌ག༌?”
MAT 27:44 ཏེན༌ན༌ ཙོགས༌ལ༌ ཁོང༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌ཁན༌ ཅག༌པ༌གུན༌ནིའང༌ ཁོང༌ང༌ ཚིག༌ ཏངས༌།
MAT 27:45 ཉིང༌གུང༌ནེ༌ ཆུ༌ཚོད༌ སུམ༌པ༌ ཚག༌པ༌ ཡུལ༌ གང༌པོ༌ མུན༌གྲིག༌ སོང༌།
MAT 27:46 ཆུ༌ཚོད༌ སུམ༌པ༌ ཟོད༌ཤིག༌ག༌ ཡེ༌ཤུའི༌ ཨིབ༌རི༌པའེ༌ སྐད༌དི༌ ནང༌ང༌ ཀུ༌ཅོ༌ སྲན༌ཏྲེ༌ སལ༌ཨིན༌ མོལས༌, “ཨེ༌ལོའི༌ ཨེ༌ལོའི༌ ལེ༌མ༌ ས༌བའཅ༌ཐ༌ནི༌” ཀ༌བོའེ༌ ཏོན༌ཏག༌པོ༌, “ངའེ༌ དཀོན༌མཆོག༌, ངའེ༌ དཀོན༌མཆོག༌, ཉེ༌རང༌ངི༌ ངའ༌ ཅིའ༌ ཕང༌ང༌ ཛད༌ཏེ༌ ཨིན༌?”
MAT 27:47 ཏེ༌ཀ༌ ཡོད༌ཁན༌གུན༌ནི༌ ནང༌ནེ༌ ཁ༌ཅིག༌གི༌ ཏེ༌བོ༌ ཚོར༌ར༌ཅིག༌ ཟེརས༌, “ཁོའེ༌ ལུང༌སྟོན༌པ༌ ཨེ༌ལི༌ཡཱ༌ བོད༌ད༌རག༌།”
MAT 27:48 ཏེན༌ན༌མལ༌ལ༌ ཁོང༌གུན༌ནི༌ ཕྲོ༌ནེ༌ ཅིག༌ བང༌ཏངས༌ཏེ༌ རས༌བལ༌ཞིག༌ རྒུན༌ཆང༌ སྐྱུར༌མོའེ༌ ནང༌ང༌ ཅུགས༌ ཡང༌ བེར༌ཀའེ༌ཀ༌ སྐྱོན༌ཏེ༌ ཡེ༌ཤུའ༌ དོན༌ཅེས༌ལ༌ ཏངས༌།
MAT 27:49 ཞན༌གུན༌ནི༌ ཟེརས༌, “དུག༌ཅུག༌གའང༌། ལུང༌སྟོན༌པ༌ ཨེ༌ལི༌ཡཱའ༌ ཁོ༌ སྐྱོབ༌བ༌ལ༌ སྐྱོད༌དུག༌ག༌ སྟེན༌བ༌།”
MAT 27:50 ཡེ༌ཤུའི༌ ཡང༌སྐྱར༌ སྐད༌ ཆེན༌མོ༌ ཉམ༌པོ༌ ཀུ༌ཅོ༌ སལ༌ཏེ༌ རང༌ངི༌ སྐུ༌སྲོག༌པོ༌ སལས༌།
MAT 27:51 ཏེན༌ན༌ ཟ༌ནེ༌ ཆོད༌ཁང༌ངི༌ ཡོ༌ལ༌ གོ༌ནེ༌ ཇུག༌ ཚོག༌པ༌ ཁག༌ཉིས༌སི༌ ནང༌ང༌ ཆད༌།
MAT 27:52 རོམ༌ཁང༌གུན༌ བེ༌ཏེ༌ ཤི༌ཁན༌ནི༌ མི༌ ཏམ༌པ༌ མང༌པོ༌ སོན༌ཏེའ༌ ལང༌ང༌ ཛདས༌།
MAT 27:53 ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ སྟིང༌ནེ༌ རོམ༌ཁང༌ནེ༌ བིངས༌ཏེ༌ ཡོང༌ཁན༌གུན༌ ཏམ༌པའེ༌ ཡེ༌རུ༌ཤ༌ལེམ༌མི༌ གྱལ༌ས༌ སོང༌ ཡང༌ མི༌ མང༌པོ༌ཞིག༌ག༌ ཐོང༌།
MAT 27:54 ཡེ༌ཤུ༌ སྲུང༌ཏེ༌ ཡོད༌ཁན༌ མག༌མི༌གྱའེ༌ སྤོན༌བོ༌ དང༌ ཞན༌ མག༌མི༌གུན༌ནི༌, སང༌གུལ༌ དང༌ ཇུང༌ཁན༌ ཚང༌མ༌ ཐོང༌ཏེ༌ མ༌སྲན༌ཏྲེ༌ ཇིགས༌ ཡང༌ ཟེརས༌, “འི༌ མི༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏན༌ཏན༌ ཨིན༌ནོག༌།”
MAT 27:55 ཐག༌རིང༌ཞིག༌ནེ༌ བུ༌མོ༌ མང༌པོའེ༌ ཡེ༌ཤུ༌ ཀྲོང༌ཤེས༌པོ༌ ལྟེན༌ ཡོད༌པིན༌, ཁོང༌གུན༌ནི༌ ཡེ༌ཤུའི༌ སྒོས༌དོམ༌གུན༌ རིགས༌ཏེ༌ ཞབ༌ཤི༌ ཞུ༌ཨིན༌ ཁོང༌ ཉམ༌པོ༌ གཱ༌ལིལ༌ལི༌ནེ༌ པར༌ལ༌ ཡོངས༌ཏེ༌ ཨིན༌པིན༌།
MAT 27:56 ཁོང༌གུན༌ནི༌ ཕྲོའ༌ མིར༌ཡམ༌ མག༌དལ༌ལ༌མ༌, ཡོ༌སེབ༌ དང༌ ཁོའེ༌ ནོ༌ ཡ༌ཀོབ༌བི༌ ཨ༌མ༌ མིར༌ཡམ༌ དང༌ ཟེ༌བེད༌དིའི༌ བུ༌ཚའ༌ གུན༌ནི༌ ཨ༌མ༌ ཡོད༌པིན༌།
MAT 27:57 མུན༌ཅུ༌རུབ༌ཀྱིས༌ ཡོད༌ ཟ༌ནེ༌ ཡོ༌སེབ༌ ཟེར༌ཁན༌ ཨ༌རི༌མ༌ཐཱ༌པ༌ མི༌ ཆུག༌པོ༌ཞིག༌ ཏེ༌རུ༌ ཡོངས༌, ཁོའང༌ ཡེ༌ཤུའི༌ ལོབ༌ཕྲུགས༌ཞིག༌ ཨིན༌པིན༌།
MAT 27:58 ཁོ༌ པི༌ལ༌ཏུའི༌ཀ༌ སོང༌ཏེ༌, ཁོའ༌ ཡེ༌ཤུའི༌ སྤུར༌ སལ༌ ཟེར༌ཏེ༌ ཞུ༌ཝ༌ ཕུལས༌, ཏེ༌ནེ༌ པི༌ལ༌ཏུའི༌ ཏེ༌བོ༌ ཁོའ༌ ཏོང༌ ཟེར༌ཏེ༌ བཀའ༌ ཏངས༌།
MAT 27:59 ཡོ༌སེབ༌བི༌ ཡེ༌ཤུའི༌ སྤུར༌ ཁྱེར༌ཏེ༌ རས༌ ལག༌མོ༌ ཀུས༌པོའེ༌ ནང༌ང༌ ཏུམས༌ཏེ༌
MAT 27:60 བྲག༌གི༌ ནང༌ང༌ ཁོ༌རང༌ངི༌ ཕིའ༌ སྐོས༌ཏེ༌ ཡོད༌ཁན༌ནི༌ སོ༌མ༌ སྤུར༌ཁང༌བོའེ༌ ནང༌ང༌ ཡེ༌ཤུའི༌ སྤུར༌ བོརས༌ ཡང༌ སྤུར༌ཁང༌ངི༌ ཁའེ༌ཀ༌ ཁར༌རྡོ༌ ཆེན༌མོ༌ཞིག༌ རིལ༌ཏེ༌ ཁོ༌ སོང༌།
MAT 27:61 མག༌དལ༌ལ༌མ༌ མིར༌ཡམ༌ དང༌ ཞན༌ མིར༌ཡམ༌ གུན༌ སྤུར༌ཁང༌ངི༌ འ༌ངོ༌ ཆོགས༌ལ༌ དུགས༌ཏེ༌ ཡོད༌པིན༌།
MAT 27:62 ཐོ༌རེ༌ཟུག༌པོ༌ ཤབ༌བད༌དི༌ ཞག༌ག༌, བླ༌མ༌ འུ༌སྐྱོང༌གུན༌ དང༌ ཕ༌རུ༌ཤི༌པ༌གུན༌ པི༌ལ༌ཏུ༌ ཡོད༌ས༌ སོང༌།
MAT 27:63 ཁོང༌གུན༌ནི༌ ཟེརས༌, “སྤོན༌བོ༌ལེ༌, ཏེ༌ གོབ༌སྐོར༌ཁན༌བོའེ༌ སོན༌ཏེའ༌ ཡོད༌ཏུས༌ ཁོའེ༌, ‘ཞག༌ སུམ༌མི༌ སྟིང༌ནེ༌ ང༌ སོན༌ཏེའ༌ ལང༌ཨིན༌’ ཟེར༌ཁན༌བོ༌ ང༌ཞའ༌ ཨིད༌ཏུ༌རག༌།
MAT 27:64 ཏེ༌བོའེ༌ཕིའ༌ ཞག༌ སུམ༌ ཚག༌པའ༌ ཁོའེ༌ རོམ༌ཁང༌ང༌ སྲུང༌ཁན༌ རིག༌ བོར༌ར༌ ཛད༌, ཏེ༌ མ༌ནེ༌ ཁོའེ༌ ལོབ༌ཕྲུགས༌གུན༌ ཡོངས༌ཏེ༌ རོ༌བོ༌ སྐུས༌ཏེ༌ ཁྱེར༌ཏེ༌ མི༌གུན༌ལ༌ ཁོ༌ ཤི༌ཁན༌གུན༌ནི༌ ཕྲོ༌ནེ༌ ལངས༌ ཟེར༌སྲིད༌ཅེས༌ ཨིན༌ནོག༌། ཏེ༌ནེ༌ ང༌དང༌གུན༌ནི༌ ཕིའ༌ སྟིང༌ཇུག༌གི༌ གོབ༌སྐོར༌བོ༌ སྔུན༌མའེ༌ སང༌ མང༌ང༌ ཐུའ༌ ཡོང༌ཨིན༌།”
MAT 27:65 པི༌ལ༌ཏུའི༌ ཟེརས༌, “མག༌མི༌གུན༌ ཁྱེར༌ཏེ༌ ཙམ༌ཐུབ༌ ཉན༌ནའང༌ སྟན༌པོ༌ ཅོས༌ཏེ༌ སྲུང༌ཅུག༌།”
MAT 27:66 ཏེ༌ནེ༌ ཁོང༌གུན༌ སོང༌ཏེ༌ སྤུར༌ཁང༌བོ༌ སྟན༌པོ༌ ཅོས༌ཏེ༌ སྒོའེ༌ཀ༌ ཐེ༌ཙེ༌ གྱབས༌, ཡང༌ མག༌མི༌གུན༌ སྲུང༌ང༌ བོརས༌།
MAT 28:1 ཤབ༌བད༌, ངལ༌ཚོའེ༌ ཞག༌གི༌ སྟིང༌ནེ༌ ཟ༌ཉི༌མའེ༌ ཞག༌ག༌ ང༌ཏོག༌ ཉི༌མ༌ ཤར༌ཀིས༌ལ༌, མག༌དལ༌ལ༌མ༌ མིར༌ཡམ༌ དང༌ ཞན༌ མིར༌ཡམ༌ཞིག༌ སྤུར༌ཁང༌ང༌ ལྟའ༌ལ༌ སོང༌།
MAT 28:2 ཧུན༌མེད༌ལ༌ སང༌གུལ༌ མ༌ ཆེན༌མོ༌ཞིག༌ ཡོངས༌ ཅིའ༌ཟེར༌ན༌ དཀོན༌མཆོག༌གི༌ ཕོ༌ཉ༌ ནམ༌ཁའ༌ནེ༌ བབས༌ཏེ༌ སྤུར༌ཁང༌ངི༌ སྒོའེ༌ ཀ༌ནེ༌ ཁར༌རྡོ༌ རིལ༌ཏེ༌, ཏེ༌ཀ༌ ཞུགས༌།
MAT 28:3 ཁོང༌ངི༌ ཞལ༌དོང༌ སྐམ༌ལག༌ ཙོགས༌ལ༌ ལྡང༌ཤན༌ ཡང༌ ནམ༌ཟའ༌ ཁའ༌ ཙོགས༌ ཀར༌པོ༌ ཡོད༌པིན༌།
MAT 28:4 ཁོང༌ ཐོང༌ཏེ༌ སྲུང༌ཨིན༌ ཡོད༌ཁན༌ མག༌མི༌གུན༌ མ༌སྲན༌ཏྲེ༌ ཇིགས༌ཏེ༌ དར༌ཨིན༌ སའེ༌ཀ༌ གྱེལ༌ཏེ༌ ཤི༌ཁན༌ ཙོགས༌ གྱུར༌།
MAT 28:5 ཕོ༌ཉའེ༌ བུ༌མོ༌ ཉིས༌ཀོའ༌ མོལས༌, “ཇིགས༌ མ༌ཇིགས༌, ཁྱོ༌ཞའེ༌ རྐྱང༌ཤིང༌ངི༌ཀ༌ རྐྱངས༌ཁན༌ ཡེ༌ཤུའ༌ ཙལ༌ཁན༌བོ༌ ང༌ གྱུས༌ཡོད༌།
MAT 28:6 ཁོང༌ འི༌ཀ༌ མེད༌; ཁོང༌ངི༌ མོལ༌ཁན༌ ནང༌ཞིན༌ ཁོང༌ སོན༌ཏེའ༌ ཞངས༌ཏེ༌ ཨིན༌། ཡོངས༌ཏེ༌ ཁོང༌ངི༌ སྤུར༌ བོར༌སའེ༌ ནས༌ས༌ ལྟོས༌།
MAT 28:7 ཏེ༌ནེ༌ གྱོགས༌པ༌ སོང༌ཏེ༌ ཁོང༌ངི༌ ལོབ༌ཕྲུགས༌གུན༌ལ༌ ཤོད༌, ‘ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌, ཁྱོ༌ཞའེ༌ སང༌ སྔུན༌ལ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ སྐྱོད༌ཨིན༌། ཏེ༌རུ༌ ཁྱོ༌ཞ༌གུན༌ལ༌ ཁོང༌ ཇལ༌ཨིན༌།’ ངའེ༌ ཤད༌ཁན༌གུན༌ ཨིད༌ཏུ༌ བོར༌།”
MAT 28:8 ཏེ༌ནེ༌ བུ༌མོ༌གུན༌ ཇིགས༌ནང༌ ཐད༌ཏེ༌ གའ༌མོ༌ ཉམ༌པོ༌ སྤུར༌ཁང༌ནེ༌ བང༌ཏང༌ཨིན༌ ཁོང༌ངི༌ ལོབ༌ཕྲུགས༌གུན༌ལ༌ ཤད༌ད༌ལ༌ སོང༌།
MAT 28:9 ཁོང༌ ཉིས༌ཀོ༌ ཆེན༌ ཡོད༌ ཟ༌ནེ༌ ཧུན༌མེད༌ལ༌ ཡེ༌ཤུ༌ ཁོང༌གུན༌ནི༌ དུན༌ལ༌ ཇལ༌ཏེ༌, “ཇུ༌ལེ༌” མོལས༌། ཁོང༌གུན༌ ཡེ༌ཤུའི༌ དུན༌ལ༌ སོང༌ ཡང༌ ཁོང༌ངི༌ ཞབས༌ལ༌ ཐམས༌ཏེ༌ ཆག༌ཕུལས༌།
MAT 28:10 ཡེ༌ཤུའི༌ ཁོང༌གུན༌ལ༌ མོལས༌, “ཇིགས༌ མ༌ཇིགས༌། སོང༌ཏེ༌ ངའེ༌ སྤུན༌གུན༌ལ༌, གཱ༌ལིལ༌ལིའ༌ སོང༌ ཟེར༌ ཡང༌ ཁོང༌གུན༌ནི༌ ངའ༌ ཏེ༌རུ༌ ཐོང༌ཨིན༌།”
MAT 28:11 བུ༌མོ༌ ཉིས༌ཀོ༌ ཆེན༌ ཡོད༌ ཟ༌ནེ༌, མག༌མི༌ སྲུང༌ཁན༌ ཁ༌ཅིག༌ ཡེ༌རུ༌ཤ༌ལེམ༌མི༌ གྱལ༌སའ༌ ཡོངས༌ཏེ༌ ཇུང༌ཁན༌ ཚང༌མ༌ བླ༌མ༌ འུ༌སྐྱོང༌གུན༌ལ༌ ཤདས༌།
MAT 28:12 བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཛོམས༌ཏེ༌ མག༌མི༌གུན༌ལ༌ པེ༌ནེ༌ མང༌པོ༌ ཏངས༌ཏེ༌ ཟུན༌ ཏང༌ཅུག༌ཅེས༌སི༌ ཐབ༌ལྡིངས༌།
MAT 28:13 ཁོང༌གུན༌ནི༌ མག༌མི༌གུན༌ལ༌ ཟེརས༌, “ཁྱོ༌ཞའེ༌, ‘ཚན༌ལ༌ ང༌ཞའ༌ ཉིད༌ལ༌ སོང༌ཏེ༌ ཡོད༌ ཟ༌ནེ༌ ཁོའེ༌ ལོབ༌ཕྲུགས༌གུན༌ ཡོངས༌ཏེ༌ རོ༌ རྐུས༌ཏེ༌ ཁྱེར༌ཏོག༌’ ཟེར༌གོས༌།
MAT 28:14 ཀལ༌ཏེས༌ ཏེ༌བོ༌ ཀའ༌ལོན༌ནི༌ ཚོར༌ན༌, ང༌ཞའེ༌ སྐྱོབས༌ཏེ༌ ཁྱོ༌ཞའ༌ ཆད༌པ༌ ཕོག༌ མི༌ཅུག༌།”
MAT 28:15 ཏེ༌ནེ༌ མག༌མི༌གུན༌ནི༌ པེ༌ནེ༌ ལེན༌ཏེ༌ ཁོང༌གུན༌ནི༌ ཟེར༌ཁན༌ ནང༌ཞིན༌ ཅོས༌ པ༌སང༌, ཡ༌ཧུ༌དཱ༌པའེ༌ ཕྲོའ༌ དི༌རིང༌ ཚོག༌པའང༌ ཏེ༌ སྤེ༌ར༌བོ༌ ཁྱེབས༌ཨིན༌ ཨིན༌ནོག༌།
MAT 28:16 ཏེ༌ནེ༌ གཱ༌ལིལ༌ལིའི༌ ནང༌ང༌ ཡེ༌ཤུའི༌ སོང༌ མོལ༌ཁན༌ནི༌ རི༌ཀ༌ ལོབ༌ཕྲུགས༌ ཅུག༌ཤིག༌པོ༌ སོང༌།
MAT 28:17 ཁོང༌གུན༌ནི༌ ཡེ༌ཤུ༌ ཇལ༌ལ༌ཅིག༌ ཆག༌ཕུལས༌, ཨིན༌ནའང༌ ཁ༌ཅིག༌གི༌ ༼ཁོང༌ ཡེ༌ཤུ༌ ཨིན༌ན༌ཧེ༌ སམས༌ཏེ༌༽ ཐེ༌ཚོམས༌ ཅོས༌།
MAT 28:18 ཡེ༌ཤུ༌ ཁོང༌གུན༌ ཡོད༌ས༌ སྐྱོད༌ཏེ༌ མོལས༌, “ནམ༌ཁའ༌ དང༌ ཇིག༌རྟེན༌ནི༌ ནང༌ང༌ ཡོད༌ཁན༌ ཚང༌མའེ༌ཀ༌ ཝང༌ཆ༌ གང༌པོ༌ ང༌ སལ༌ལ༌ ཛད༌ཏེ༌ ཨིན༌།
MAT 28:19 ཏེ༌བོའེ༌ཕིའ༌ གྱལ༌ཁམས༌ ཚང༌མའེ༌ ནང༌ང༌ སོང༌ཏེ༌ མི༌གུན༌ ངའེ༌ ལོབ༌ཕྲུགས༌ གྱུར༌ཅུག༌ཅེས༌ལ༌ རྩོན༌གྲུས༌ ཅོས༌ཏེ༌ ཁོང༌གུན༌ལ༌ ཡབ༌, སྲས༌ དང༌ ཏམ༌པའེ༌ ཐུག༌ཉིད༌དི༌ ཚན༌ནི༌ ནང༌ང༌ ཁྲུས༌ ཏོང༌།
MAT 28:20 ཡང༌ ངའེ༌ ཁྱོ༌ཞའ༌ ཏང༌ཁན༌ནི༌ བཀའ༌ ཚང༌མ༌ ཁའ༌ཉན༌ཅེས༌ལ༌ ཁོང༌གུན༌ལ༌ ལབ༌ཞ༌ ཏོང༌, ཡང༌ ང༌ ཏུས༌སི༌ ཐའ༌མ༌ ཚོག༌པའང༌ ཁྱོ༌ཞའ༌ ཉམ༌པོ༌ ཏུས༌གྱུན༌ དུག༌ཅེས༌པོ༌ ཨིད༌ཏུ༌ བོར༌།”
MAR 1:1 འི༌བོ༌ ནི༌ དཀོན༌མཆོག༌གི༌ སྲས༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌བོ༌ ཨིན༌ནོག༌། འི༌བོའེ༌ གོ༌ཟུག༌ ནི༌,
MAR 1:2 ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆའེ༌ ནང༌ང༌ བྲིའ༌ ཛད༌ཁན༌ ནང༌ཞིན༌ དཀོན༌མཆོག༌གི༌ མོལས༌, “ལྟོས༌, ཁྱོ༌རང༌ངི༌ སང༌ སྔུན༌ལ༌ ངའེ༌ ང༌རང༌ངི༌ ལོན༌ཁྱེར༌ཁན༌བོ༌ ཀལ༌ཨིན༌། ཁོའེ༌ ཁྱོ༌རང༌ངི༌ ཕིའ༌ ལམ༌ གྲལ༌གྲིག༌ ཅོ༌ཨིན༌།”
MAR 1:3 “ཁོའེ༌ རི༌སྟོང༌ངི༌ ནང༌ང༌ ཀུ༌ཅོ༌ ཏང༌ཨིན༌ མི༌གུན༌ལ༌ ཟེར༌ཨིན༌, ‘གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོས༌, ཡང༌ ཁོང༌ངི༌ ཕེབས༌ལམ༌བོ༌ ཀྲང༌པོ༌ ཅོས༌།’”
MAR 1:4 ཁྲུས༌སལ༌ཁན༌ ཡོ༌ཧཱ༌ནན༌ སྐྱོད༌ཏེ༌ རི༌སྟོང༌ངི༌ ནང༌ང༌ མི༌གུན༌ལ༌ ཤགས༌པ༌ ཐོབ༌ཅེས༌སི༌ ཕིའ༌ སྡིག༌པ༌ ཅོ༌ཁན༌གུན༌ནི༌ཀ༌ གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ ཆོས༌ཤདས༌།
MAR 1:5 ཡེ༌རུ༌ཤ༌ལེམ༌མི༌ གྱལ༌སའེ༌ མི༌གུན༌ ཐེས༌ཏེ༌ ཡ༌ཧུ༌དཱའེ༌ ཡུལ༌མི༌ གང༌པོ༌ བིངས༌ཏེ༌ ཡོ༌ཧཱ༌ནན༌ལ༌ ལྟ༌ཅེས༌ དང༌ ཉན༌ན༌ལ༌ སོང༌། ཁོང༌གུན༌ནི༌ རང༌རང༌ངི༌ སྡིག༌པའེ༌ ལས༌གུན༌ མི༌གུན༌ནི༌ དུན༌ལ༌ ཤདས༌ པ༌སང༌ ཡོ༌ཧཱ༌ནན༌ནི༌ ཁོང༌གུན༌ལ༌ ཡོར༌དཱན༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌།
MAR 1:6 ཡོ༌ཧཱ༌ནན༌ནི༌ རྔ༌བོང༌ངི༌ བལ༌ལ༌ ཐགས༌ཁན༌ནི༌ ཀོས༌ དང༌, སྐེད༌པ༌ ཀོའེ༌ སྐྱེ༌རགས༌ ཅིང༌ངད༌པིན༌, ཡང༌ པར༌པར༌ཙེ༌ དང༌ རི༌སྟོང༌ངི༌ རང༌རྩི༌ ཟའད༌པིན༌།
MAR 1:7 ཡོ༌ཧཱ༌ནན༌ནི༌ ཁྱབ༌གྲགས༌ ཅོས༌, “ངའེ༌ སྟིང༌ནེ༌ སྐྱོད༌ཅེས༌ཅན༌བོ༌, ངའེ༌ སང༌ མང༌ང༌ ཝང༌ཅན༌, ཡང༌ ཞབ༌ཤི༌ ཙོགས༌ལ༌ ངའ༌ སྒུས༌ཏེ༌ ཁོང༌ངི༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌།
MAR 1:8 ངའེ༌ ཁྱོ༌ཞ༌གུན༌ལ༌ ཆུ༌ ཉམ༌པོ༌ ཁྲུས༌ ཏང༌ངད༌, ཨིན༌ནའང༌ ཁོང༌ངི༌, ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌ ཉམ༌པོ༌ ཁྲུས༌སལ༌ཨིན༌།”
MAR 1:9 ཞག༌ཤིག༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ན༌ཙ༌རེད༌ གྲོང༌ཁྱེར༌ནེ༌ སྐྱོདས༌, ཡང༌ ཡོ༌ཧཱ༌ནན༌ནི༌ ཁོང༌ང༌ ཡོར༌དཱན༌ནི༌ ལྩངས༌པོའེ༌ ནང༌ང༌ ཁྲུས༌སལ༌ལ༌ ཛདས༌།
MAR 1:10 ཡེ༌ཤུ༌ ཆུའི༌ ནང༌ནེ༌ བིང༌ང༌ཅིག༌, ཁོང༌ང༌ ནམ༌ཁའ༌ བེ༌ཏེ༌ ཏམ༌པའེ༌ ཐུག༌ཉིད༌ ཁོང༌ངི༌ཀ༌ ཕུར༌གོན༌ཞིག༌གི༌ ཚུལ༌ལ༌ བབས༌ཨིན༌ ཟིགས༌།
MAR 1:11 ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, “ཁྱོ༌རང༌ ངའེ༌ བུ༌ཚ༌ ཅེས༌པ༌བོ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།”
MAR 1:12 ཏེན༌ན༌མལ༌ལ༌ དཀོན༌མཆོག༌གི༌ ཐུག༌ཉིད༌དི༌ གཙོ༌བོ༌ ཡེ༌ཤུ༌ རི༌སྟོང༌ངི༌ ནང༌ང༌ ཁྱེར༌ར༌ ཛདས༌།
MAR 1:13 ཀ༌རུ༌ ཤེ༌ཏན༌ནི༌, ཞག༌ 40 ཡེ༌ཤུ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌སི༌ རྩོན༌གྲུས༌ ཅོས༌། ཏེ༌ཏུས༌ ཁོང༌ རིའི༌ སེམས༌ཅན༌གུན༌ནི༌ ཕྲོའ༌ ཡོད༌ ཟ༌ནེ༌, དཀོན༌མཆོག༌གི༌ ཕོ༌ཉ༌གུན༌ནི༌ ཁོང༌ང༌ ཞབས༌ཏོག༌ ཞུའ༌ ཛདས༌།
MAR 1:14 ཡོ༌ཧཱ༌ནན༌ ཟུམས༌ཏེ༌ ཙོན༌ཁང༌ངི༌ ནང༌ང༌ ཀགས༌ཏེ༌ སྟིང༌ནེ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ སྐྱོད༌ད༌ ཛད༌ཏེ༌ དཀོན༌མཆོག༌གི༌ གའ༌མོའེ༌ ནས༌ཚུལ༌བོ༌ ཤད༌ད༌ ཛདས༌།
MAR 1:15 ཡེ༌ཤུའི༌ མོལས༌, “ཞལ༌ཆད༌ ཛད༌ཁན༌ནི༌ ཏུས༌པོ༌ ལེབས༌ཏེ༌ ཨིན༌ནོག༌། དཀོན༌མཆོག༌གི༌ གྱལ༌སྲིད༌ ཉེ༌མོ༌ ཨིན༌ནོག༌། ཏེ༌བོའེ༌ཕིའ༌ གྱོད༌པ༌ ཅོས༌ཏེ༌ རང༌རང༌ངི༌ སྡིག༌པ༌གུན༌ ཕངས༌ཏེ༌ གའ༌མོའེ༌ ནས༌ཚུལ༌ལི༌ ནང༌ང༌ ཏད༌པ༌ ཅོས༌།”
MAR 1:16 གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ནེ༌ ཞབ༌གྲུལ༌ ཛད༌ཨིན༌ ཡོད༌ཏུས༌, ཁོང༌ངི༌ ཤི༌མོན༌ དང༌ ཁོའེ༌ ནོ༌ ཨེན༌གྲིའུ༌ ཚོའེ༌ ནང༌ང༌ ཉ༌དོལ༌ ཕང༌ཨིན༌ ཟིགས༌, ཅིའ༌ཟེར༌ན༌ ཁོང༌གུན༌ ཉ༌ ཟུམ༌ཁན༌ ཨིན༌པིན༌།
MAR 1:17 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ གྱབ༌ནེ༌ ཡོངས༌ཏེ༌ ངའེ༌ ལོབ༌ཕྲུགས༌ གྱུར༌, ཏ༌ནེ༌ཕར༌ལ༌ ངའེ༌ ཁྱོ༌ཞ༌གུན༌ལ༌ ཉའེ༌ ཚབས༌ལ༌ མི༌གུན༌ ཟུམ༌ཅེས༌ ལབ༌ཨིན༌།”
MAR 1:18 ཏེན༌ན༌མལ༌ལ༌ ཉ༌དོལ༌ སྤངས༌ཏེ༌ ཁོང༌གུན༌ ཡེ༌ཤུའི༌ གྱབ༌ནེ༌ བྲངས༌།
MAR 1:19 ཏེ༌ཀ༌ནེ༌ ཙ༌པིག༌ ཐག༌རིང༌ང༌ སྐྱོད༌ད༌ཅིག༌, ཡེ༌ཤུའི༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཟིགས༌། ཁོང༌གུན༌ནི༌ གྲུ༌ཟིང༌ངི༌ ནང༌ང༌ ཁོ༌རང༌གུན༌ནི༌ ཉ༌དོལ༌ གྲལ༌གྲིག༌ ཅོའད༌པིན༌།
MAR 1:20 ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ བོད༌ད༌ ཛདས༌, ཡང༌ ཁོང༌གུན༌ ཁོ༌རང༌གུན༌ནི༌ ཨ༌བ༌ ཟེ༌བེད༌དི༌ ལ༌པ༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ བོར༌ཏེ༌ ཡེ༌ཤུའི༌ གྱབ༌ནེ༌ བྲངས༌།
MAR 1:21 གཙོ༌བོ༌ ཡེ༌ཤུ༌ དང༌ ཁོང༌ངི༌ ཕྲོ༌པ༌གུན༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོདས༌། ཤབ༌བད༌དི༌ ངལ༌ཚོའེ༌ ཞག༌པོ༌ ལེབ༌བ༌ཅིག༌, ཁོང༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ སྐྱོད༌ཏེ༌ ཆོས༌ཤད༌ཅེས༌ གོ༌ཟུགས༌།
MAR 1:22 མི༌གུན༌ ཁོང༌ངི༌ ལབ༌ཞ༌གུན༌ནི༌ཀ༌ ཧ༌ལས༌, ཅིའ༌ཟེར༌ན༌ ཁོང༌ངི༌ ལབ༌ཞ༌གུན༌ ཆོས༌ཁྲིམས༌ལ༌ ཁས༌པ༌གུན༌ ཙོགས༌ མེད༌པ༌, ཝང༌ཆ༌ ཉམ༌པོ༌ སལ༌ལད༌པིན༌།
MAR 1:23 དུ༌ཁང༌ངི༌ ནང༌ང༌ གོང༌པོ༌ ཞུགས༌ཁན༌ནི༌ མི༌ཞིག༌གི༌ ཧུན༌མེད༌ལ༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌,
MAR 1:24 “ན༌ཙ༌རེད༌པ༌ ཡེ༌ཤུ༌, ཉེ༌རང༌ང༌ ང༌ཞ༌གུན༌ནི༌ ཀ༌ནེ༌ ཅི༌ གོས༌སད༌? ཉེ༌རང༌ ང༌ཞ༌གུན༌ མེད༌ཁན༌ ཅོའ༌ལ༌ སྐྱོད༌ཏེ༌ ཨིན༌ན༌? ཉེ༌རང༌ སུ༌ ཞུགས༌ཏེ༌ ཨིན༌ཁན༌བོ༌ ངའ༌ གྱུས༌ཡོད༌། ཉེ༌རང༌ དཀོན༌མཆོག༌གི༌ ཏམ༌པ༌བོ༌ ཞུགས༌ཏེ༌ ཨིན༌ནོག༌།”
MAR 1:25 ཨིན༌ནའང༌ ཡེ༌ཤུའི༌ ཁོའ༌ ཁའ༌སྐྱེའ༌ ཛད༌ཏེ༌ མོལས༌, “ཅུབ༌ཅོད༌, ཁོའེ༌ ནང༌ནེ༌ བིང༌ཏེ༌ ཡོང༌།”
MAR 1:26 ཏེན༌ན༌མལ༌ལ༌, གོང༌པོ༌བོའེ༌ ཏེ༌ མི༌བོ༌ མ༌སྲན༌ཏྲེ༌ སྲུགས༌, ཡང༌ ཀུ༌ཅོ༌ ཏང༌ཨིན༌ ཁོའེ༌ ནང༌ནེ༌ བིང༌ཏེ༌ སོང༌།
MAR 1:27 མི༌ཚང༌མ༌ སྲན༌ཏྲེ༌ ཧ༌ལས༌ཏེ༌ ཅིག༌ དང༌ ཅིག༌ག༌ ཏྲིས༌, “འི༌བོ༌ ཀ༌ཟུག༌ཤིག༌ ཨིན༌ནོག༌? སོ༌མ༌ ལབ༌ཞ༌ ཝང༌ཆ༌ ཡོད༌ཁན༌ཞིག༌། ཁོའེ༌ བཀའ༌ ཏང༌ཁན༌བོའ༌ གོང༌པོ༌གུན༌ནིའང༌ ཁའ༌ ཉན༌དུག༌།”
MAR 1:28 ཁོང༌ངི༌ སྐོར༌ལ༌ ནས༌ཚུལ༌བོ༌ གཱ༌ལིལ༌ལིའི༌ ཡུལ༌ཇོངས༌ གང༌པོའེ༌ ནང༌ང༌ གྱོགས༌པ༌ ཕེལ༌།
MAR 1:29 གཙོ༌བོ༌ ཡེ༌ཤུ༌ ཡ༌ཀོབ༌ དང༌ ཡོ༌ཧཱ༌ནན༌ གུན༌ ཉམ༌པོ༌ དུ༌ཁང༌ནེ༌ བིང༌ཏེ༌ ཁོང༌ངི༌ ལོབ༌ཕྲུགས༌ ཤི༌མོན༌ དང༌ ཁོའེ༌ ནོ༌ ཨེན༌གྲིའུ༌འི༌ ཁང༌པ༌ སྐྱོདས༌།
MAR 1:30 ཁོང༌གུན༌ནི༌ ཡེ༌ཤུའ༌ ཤི༌མོན༌ནི༌ ན༌མའེ༌ ཨ༌མ༌ ཚད༌ ཡོངས༌ཏེ༌ མལ༌ཙའེ༌ ནང༌ང༌ ཡོད༌ཁན༌བོའེ༌ སྐོར༌ལ༌ ཤདས༌,
MAR 1:31 ཡེ༌ཤུ༌ ཨ༌མ༌ ཡོད༌ས༌ སྐྱོད༌ཏེ༌ ཁོའེ༌ ལག༌པ༌ ཟུམས༌ཏེ༌ ཁོའ༌ ལང༌ཅེས༌ལ༌ རོགས༌ ཛདས༌། ཏེ༌ནེ༌ ཁོའེ༌ ཚད༌པོ༌ མེད༌ཁན༌ སོང༌, ཡང༌ ཁོའེ༌ ཁོང༌གུན༌ལ༌ ཞབས༌ཏོག༌ ཞུས༌།
MAR 1:32 ཏེན༌ན༌ ཕི༌ཏོག༌ ཉི༌མ༌ སྐྱོད༌ ཚར༌ཏེ༌ སྟིང༌ནེ༌, མི༌གུན༌ནི༌ ཟུ༌མོ༌ ཡོད༌ཁན༌ དང༌ རྡུད༌ ཞུགས༌ཁན༌ ཚང༌མ༌ ཡེ༌ཤུ༌ ཡོད༌ས༌ ཁྱོངས༌།
MAR 1:33 གྲོང༌ཁྱེར༌རི༌ མི༌ གང༌པོ༌ སྒོའེ༌ དུན༌ལ༌ ཛོམས༌།
MAR 1:34 ཟུ༌མོ༌ སྣ༌ཚོགས༌ ཡོངས༌ཁན༌ མང༌པོ༌ ཡེ༌ཤུའི༌ ཕན༌ཅུག༌ག༌ ཛདས༌, ཡང༌ རྡུད༌ ཞུགས༌ཁན༌ མང༌པོའེ༌ ནང༌ནེ༌ རྡུད༌ ཕིང༌ང༌ ཛདས༌, ཨིན༌ནའང༌ ཁོང༌ངི༌, རྡུད༌གུན༌ལ༌ སྤེ༌ར༌ ཏང༌ ཅུག༌ག༌ མ༌ཛདས༌, ཅིའ༌ཟེར༌ན༌ ཏེ༌གུན༌ནི༌ ཁོང༌ སུ༌ ཞུགས༌ཏེ༌ ཨིན༌ཁན༌བོ༌ ཤེས༌སད༌པིན༌།
MAR 1:35 སྟིང༌མ༌ཞག༌གི༌ ང༌ཏོག༌ ནམ༌ལངས༌སི༌ སང༌ སྔུན༌ལ༌, གཙོ༌བོ༌ ཡེ༌ཤུ༌ ཞངས༌ས༌ ཛད༌ཏེ༌ སུའང༌ མེད༌སའེ༌ ནས༌ས༌ཞིག༌ག༌ མོས༌ལམ༌ ཞུའ༌ལ༌ སྐྱོདས༌།
MAR 1:36 ཤི༌མོན༌ དང༌ ཁོའེ༌ ཕྲོ༌པ༌གུན༌ ཁོང༌ ཙལ༌ལ༌ སོང༌།
MAR 1:37 ཁོང༌ ཐོབ༌བ༌ཅིག༌ ཁོང༌གུན༌ནི༌ ཟེརས༌, “ཚང༌མའེ༌ ཉེ༌རང༌ ཙལ༌དུག༌།”
MAR 1:38 ཨིན༌ནའང༌ ཡེ༌ཤུའི༌ ལན༌སལས༌, “ང༌དང༌གུན༌ ཉེ༌ཁོར༌རི༌ ཞན༌ཡང༌ གྲོང༌ཁྱེར༌གུན༌ལ༌ ཆེན༌ ཡང༌ ངའེ༌ ཁོང༌གུན༌ལའང༌ ཆོས༌ཤད༌ཨིན༌། ཏེན༌ན༌ གྱུན༌ཚན༌བོའེ༌ ཕིའ༌ ངའ༌ ཡོངས༌ཏེ༌ ཨིན༌།”
MAR 1:39 ཏེ༌བོའེ༌ཕིའ༌ ཁོང༌ གཱ༌ལིལ༌ལིའི༌ ཡུལ༌ཇོངས༌ གང༌པོའེ༌ དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ཨིན༌, རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌གུན༌ ཕིང༌ཨིན༌ སྐྱོདས༌།
MAR 1:40 ཛེ༌ནད༌ཅན༌ནི༌ མི༌ཞིག༌ གཙོ༌བོ༌ ཡེ༌ཤུའི༌ དུན༌ལ༌ ཡོངས༌ ཡང༌ པིག༌དོང༌ ཙུགས༌ཏེ༌ ཇུ༌ཇུ༌ ཞུ༌ཨིན༌ ཟེརས༌, “ཉེ༌རང༌ ཐུགས༌ཐད༌ན༌ ང༌ གྱལ༌ཅུགས༌ཏེ༌ རྩང༌མ༌ ཛད༌ ཉན༌ན༌ནོག༌།”
MAR 1:41 སྙིང༌རྗེ༌ གངས༌ཏེ༌ ཡོད༌ཅེས༌པོའེ༌, ཡེ༌ཤུའི༌ ཆག༌ རྐྱངས༌ཏེ༌ ཁོའ༌ ཐུག༌ཅུག༌ག༌ ཛད༌ཏེ༌ མོལས༌, “ང༌ ཁྱོ༌རང༌ གྱལ༌ ཅུག༌ཏེ༌ རྩང༌མ༌ ཅོའ༌ ཐད༌ད༌རག༌།”
MAR 1:42 ཏེན༌ན༌མལ༌ལ༌ ཛེ༌ནད༌ པགས༌པའེ༌ ནད༌པོ༌ མེད༌ཁན༌ སོང༌ ཡང༌ མི༌བོ༌ ཕན༌།
MAR 1:43 ཡེ༌ཤུའི༌ ཁོ༌ ལོགས༌ཏེ༌ ལམ༌ཅུག༌ག༌ ཛད༌ ཟ༌ནེ༌, སྤང༌ པུད༌ཨིན༌ མོལ༌ལ༌ ཛདས༌,
MAR 1:44 “སུའང༌ མ༌ཤད༌, ཨིན༌ནའང༌ སོང༌ཏེ༌ རང༌ངི༌ ཟུགས༌པོ༌ བླ༌མ༌ སྟོན༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ སལ༌ཁན༌ ནང༌ཞིན༌ དཀོན༌མཆོག༌ག༌ ཆོད༌པ༌ ཕུལ༌, ཏེ༌བོ༌ མི༌གུན༌ལ༌ ཁྱོ༌རང༌ རྩང༌མ༌ ཆའ༌ཁན༌ནི༌ སྤང༌པོ༌ ཨིན༌།”
MAR 1:45 ཨིན༌ནའང༌ ཁོ༌ སོང༌ཏེ༌ ཁོའ༌ ཇུང༌ཁན༌གུན༌ མི༌ཚང༌མ༌ལ༌ ཤད༌ཨིན༌ ནས༌ཚུལ༌བོ༌ ཁྱེབས༌ཤུགས༌, ཏེ༌བོའེ༌ ཞས༌ཏེ༌ ཁོང༌ མི༌གུན༌ལ༌ ཐོང༌ཅུགས༌ཏེ༌ ཀ༌ཟུག༌ གྲོང༌ཁྱེར༌ཞིག༌གི༌ ནང༌ངའང༌ སྐྱོད༌ མ༌ཉན༌། ཁོང༌ མི༌ མེད༌སའེ༌ ནས༌སའེ༌ ནང༌ང༌ ཞུགས༌, ཏེ༌ནེའང༌ མི༌གུན༌ ཀ༌རུང༌ས༌ནེ༌ ཁོང༌ ཡོད༌ས༌ ཡོངས༌།
MAR 2:1 ཞག༌ ཁ༌ཅིག༌གི༌ སྟིང༌ནེ༌ ཡེ༌ཤུ༌ ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ ལོགས༌ཏེ༌ སྐྱོད༌ད༌ཅིག༌, ཁོང༌ ཁང༌པ༌ ལོགས༌ཏེ༌ སྐྱོད༌ཁན༌ནི༌ ནས༌ཚུལ༌བོ༌ གྱོགས༌པ༌ ཕེལ༌
MAR 2:2 ཡང༌ འི༌ཟམ༌ མི༌ མང༌པོ༌ ཛོམ༌, ཁོང༌ངི༌ ཁང༌པ༌ མ༌ཚད༌ སྒོའེ༌ ཕི༌ལོག༌གའང༌ ནས༌ས༌ སྟོང༌པ༌ མ༌ལུས༌། ཁོང༌ངི༌ མི༌གུན༌ལ༌ དཀོན༌མཆོག༌གི༌ བཀའ༌ ཤད༌ད༌ ཛདས༌ ཟ༌ནེ༌
MAR 2:3 མི༌གུན༌ནི༌ ཟའ༌ཕོག༌ཁན༌ཞིག༌ ཁོང༌ ཡོད༌ས༌ ཁྱོངས༌, ཁོ༌ མིང༌གོ༌ ཞི༌ མལ༌ཙའེ༌ཀ༌ ཁུར༌ཏེ༌ ཡོད༌པིན༌།
MAR 2:4 མི༌ཚོགས༌སི༌ ཞས༌ཏེ༌, ཁོང༌གུན༌ལ༌ ཁོ༌ ཡེ༌ཤུ༌ ཡོད༌ས༌ ཁྱོང༌ མ༌ཉན༌། ཁོང༌གུན༌ ཁང༌པའེ༌ ཁེ༌ཐོག༌ག༌ སོང༌ཏེ༌ ཡེ༌ཤུ༌ ཞུགས༌ཏེ༌ ཡོད༌སའེ༌ ཁ༌དྲང༌ང༌ ཧོལ༌ཏོར༌ པུད༌ཏེ༌ མལ༌ཙའ༌ ཉམ༌པོ༌ ཁོ༌ ཡེ༌ཤུའི༌ དུན༌ལ༌ ཕབས༌།
MAR 2:5 ཁོང༌གུན༌ནི༌ མི༌བོ༌ གྱལ༌ཅུག༌ཅེས༌སི༌ ཏད༌པ༌ ཅོ༌ཁན༌བོ༌ ཡེ༌ཤུའི༌ ཟིགས༌ཏེ༌ ཁོང༌ངི༌ ཟའ༌ཕོག༌ཁན༌བོའ༌ མོལས༌, “བུ༌ཚ༌, ངའེ༌ ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏང༌ངད༌།”
MAR 2:6 ཏེ༌ཀ༌ དུགས༌ཏེ༌ ཡོད༌ཁན༌ནི༌ ཆོས༌ཁྲིམས༌ལ༌ ཁས༌པ༌ ཁ༌ཅིག༌གི༌ སེམས༌སི༌ ནང༌ང༌ སམས༌,
MAR 2:7 “ཁོའེ༌ ཏེ༌ཟུག༌ ཅིའ༌ ཟེར༌ར༌ནོག༌? ཁོའེ༌ དད༌ལོག༌ ཅོས༌ཏེ༌ ཨིན༌ནོག༌། དཀོན༌མཆོག༌ མ༌སྟོག༌ སུའ༌ སྡིག༌པ༌ ཤགས༌པ༌ སལ༌ ཉན༌ཨིན༌།”
MAR 2:8 ཏེན༌ན༌མལ༌ལ༌ ཁོང༌གུན༌ནི༌ སེམས༌སི༌ ནང༌ང༌ སམ༌ཁན༌བོ༌ ཡེ༌ཤུའི༌ ཁྱེན༌ཏེ༌ ཁོང༌གུན༌ལ༌ མོལས༌, “ཁྱོ༌ཞའེ༌ ཁྱོ༌ཞ༌རང༌ངི༌ སེམས༌སི༌ ནང༌ང༌ འི༌ཟུག༌ ཅིའ༌ སམ༌མད༌?
MAR 2:9 ཟའ༌ཕོག༌ཁན༌བོའ༌, ‘ཁྱོ༌རང༌ངི༌ སྡིག༌པའ༌ ཤགས༌པ༌ ཏངས༌ཏེ༌ ཨིན༌’ ཟེར༌ཅེས༌པོ༌ ལ༌མོ༌ ཨིན༌ནོག༌ག༌ ཡ༌ ‘ལངས༌ཏེ༌ ཁྱོ༌རང༌ངི༌ མལ༌ཙ༌ ཁུར༌ཏེ༌ གྲུལ༌’ ཟེར༌ཅེས༌པོ༌?
MAR 2:10 ཨིན༌ནའང༌ མི༌རིགས༌སི༌བུའ༌ ཇིག༌རྟེན༌ནི༌ཀ༌ སྡིག༌པའ༌ ཤགས༌པ༌ ཏང༌ཅེས༌སི༌ ཝང༌ཆའ༌ ཡོད༌ཁན༌བོ༌ ཁྱོ༌ཞའ༌ སྟན༌ཨིན༌” ཏེ༌ནེ༌ ཡེ༌ཤུའི༌ ཟའ༌ཕོག༌ཁན༌བོའ༌ མོལས༌,
MAR 2:11 “ངའེ༌ ཁྱོ༌རང༌ང༌ ཟེར༌རད༌, ལོངས༌, རང༌ངི༌ མལ༌ཙ༌ ཁུར༌ཏེ༌ ཁང༌པ༌ སོང༌།”
MAR 2:12 ཏེན༌ན༌མལ༌ལ༌ མི༌ ལྟའ༌ཁན༌ ཚང༌མའེ༌ དུན༌ལ༌ ཁོ༌ ལངས༌ཏེ༌ ཁོ༌རང༌ངི༌ མལ༌ཙ༌བོ༌ ཁུརས༌ ཡང༌ གྲུལ༌ཏེ༌ སོང༌། ཁོང༌ ཚང༌མ༌ ཧ༌ལས༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌, “ང༌ཞ༌གུན༌ལ༌, འི༌ ཙོགས༌ཤིག༌ མ༌ནེ༌ མ༌ཐོང༌།”
MAR 2:13 ཏེ༌ནེ༌ ཡང༌སྐྱར༌ གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཚོའེ༌ ཐའ༌མ༌ སྐྱོདས༌, ཡང༌ ཁོང༌ ཡོད༌ས༌ ཡོང༌ཁན༌ནི༌ མི༌ཚོགས༌གུན༌ལ༌ ཆོས༌ཤད༌ད༌ ཛདས༌།
MAR 2:14 ཁོང༌ ཞབ༌གྲུལ༌ལ༌ སྐྱོད༌ ཟ༌ནེ༌ ཁོང༌ངི༌ ཨལ༌ཕི༌འུས༌སི༌ བུ༌ཚ༌ ལི༌ཝི༌, ཁྲལ༌ནེན༌སའེ༌ ནས༌སའེ༌ཀ༌ དུགས༌ཏེ༌ ཡོད༌ད༌ ཟིགས༌ ཡང༌ ཁོང༌ངི༌ ཁོའ༌ མོལས༌, “ངའེ༌ སྟིང༌རང༌ནེ༌ བྲོངས༌།” ཁོ༌ ལངས༌ཏེ༌ ཡེ༌ཤུའི༌ སྟིང༌རང༌ནེ༌ བྲངས༌།
MAR 2:15 སྟིང༌ནེ༌ ཡེ༌ཤུ༌ ལི༌ཝིའི༌ ཁང༌པ༌ གོང༌ཟན༌ དོན༌ན༌ལ༌ སྐྱོདས༌, ཁྲལ༌ལེན༌ཁན༌ དང༌ ཞན༌ སྡིག༌ཅན༌ མི༌ མང༌པོའང༌ ཡེ༌ཤུ༌ དང༌ ལོབ༌ཕྲུགས༌གུན༌ ཉམ༌པོ༌ ཁར༌ཇི༌ ཟའ༌ལ༌ ཡོད༌པིན༌ ༼ཡེ༌ཤུའི༌ སྟིང༌རང༌ནེ༌ བྲངས༌ཁན༌ མང༌ཆེའ༌ ཏེ༌ཙོགས༌སི༌ མི༌གུན༌ ཨིན༌པིན༌།༽
MAR 2:16 ཕ༌རུ༌ཤི༌པ༌ ཆོས༌ཁྲིམས༌ལ༌ ཁས༌པ༌གུན༌ནི༌, ཡེ༌ཤུ༌ ཁྲལ༌ནེན༌ཁན༌ དང༌ སྡིག༌ཅན༌ གུན༌ ཉམ༌པོ༌ དོན༌ཏང༌ དོན༌ཨིན༌ ཐོང༌ང༌ཅིག༌, ཁོང༌ངི༌ ལོབ༌ཕྲུགས༌གུན༌ལ༌ ཏྲིས༌, “ཁོང༌ ཁྲལ༌ལེན༌ཁན༌ དང༌ སྡིག༌ཅན༌ མི༌གུན༌ ཉམ༌པོ༌ ཅིའ༌ དོན༌ཏང༌ དོན༌ན༌ནོག༌?”
MAR 2:17 ཡེ༌ཤུའི༌ ཏེ༌བོ༌ སན༌ན༌ཅིག༌ ཁོང༌གུན༌ལ༌ མོལས༌, “ཟུ༌མོ༌ ཡོང༌ཁན༌ཞིག༌ག༌ མ༌ནེ༌ ཁམ༌ཟང༌ མི༌ཞིག༌ག༌ ཨམ༌ཆི༌ གོས༌ས༌ མ༌ནོག༌། ངའ༌ ཁྱོ༌ཞ༌ ཀྲང༌པོ༌ ཨིན༌ སམ༌ཁན༌གུན༌ལ༌ མན༌པ༌, སྡིག༌ཅན༌གུན༌ལ༌ བོད༌ད༌ ཡོངས༌པིན༌།”
MAR 2:18 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཕ༌རུ༌ཤི༌པ༌གུན༌ ཉེ༌ནས༌ལ༌ དུགས༌ཏེ༌ ཡོད༌དི༌ ཏུས༌ཤིག༌ག༌, མི༌ ཁ༌ཅིག༌, ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌, “ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཕ༌རུ༌ཤི༌པ༌གུན༌ ཉེ༌ནས༌ལ༌ དུག༌དུག༌, ཨིན༌ནའང༌ ཉེ༌རང༌ངི༌ ལོབ༌ཕྲུགས༌གུན༌ ཅིའ༌ ཉེ༌ནས༌ལ༌ དུག༌ག༌ མ༌ནོག༌?”
MAR 2:19 ཡེ༌ཤུའི༌ ལན༌སལས༌, “བག༌སྟོན༌ནི༌ ནང༌ང༌ མག༌པ༌ ཉམ༌པོ༌ ཡོད༌ ཟ༌ནེ༌ ཁོའེ༌ གྲོན༌པོ༌གུན༌ ཉེ༌ནས༌ལ༌ དུག༌ཨིན༌ན༌? མི༌དུག༌།
MAR 2:20 ཨིན༌ནའང༌ ཏུས༌པོ༌ ལེབ༌ཨིན༌ ནམ༌ མག༌པ༌ གྲོན༌པོ༌གུན༌ནེ༌ ཕེས༌ཏེ༌ ཁྱེར༌ཨིན༌, ཏེ༌ནེ༌ ཁོང༌གུན༌ནི༌ རྡུག༌པོ༌ ཅོས༌ཏེ༌ ཉེ༌ནས༌ལ༌ དུག༌ཨིན༌།”
MAR 2:21 “སུ༌ཞིག༌གིའང༌ ཀོས༌ལག༌ སྙིང༌པ༌ཞིག༌ག༌ ལྷན༌བ༌ སོ༌མ༌ ཏབ༌བ༌ མ༌ནོག༌, ཀལ༌ཏེས༌ ཏབ༌ན༌ ཀོས༌ ཁྲུའ༌ཅིག༌ ལྷན༌བ༌ སོ༌མ༌བོ༌ ཁོངས༌ཏེ༌ ཀོས༌ ཆད༌ཁན༌བོ༌ མང༌ང༌ ཐུའ༌ ཅོའ༌ནོག༌།”
MAR 2:22 “ཏེན༌ན༌ ཙོགས༌ལ༌ ཆང༌ སོ༌མ༌ པགས༌པའེ༌ སྐྱ༌པ༌ སྙིང༌པའེ༌ ནང༌ང༌ མི༌ལུག༌། ཀལ༌ཏེས༌ ལུག༌ན༌ ཆང༌བོའ༌ སྐྱུར༌ ལངས༌ཏེ༌ པགས༌པའེ༌ སྐྱ༌པ༌ བོས༌ཏེ༌ ཆད༌ཨིན༌, ཆང༌ བོ༌ཏེ༌ སྐྱ༌པའང༌ དོད༌མེད༌ ཆེན༌། ཆང༌ སོ༌མ༌ པགས༌པའེ༌ སྐྱ༌པ༌ སོ༌མའེ༌ ནང༌ང༌ ལུག༌ཨིན༌།”
MAR 2:23 གཙོ༌བོ༌ ཡེ༌ཤུ༌ ཤབ༌བད༌དི༌ ངལ༌ཚོའེ༌ ཞག༌ག༌ ཞིང༌ གྱུད༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ ཁོང༌ ཉམ༌པོ༌ གྲུལ༌ལད༌པིན༌། ཁོང༌གུན༌ནི༌ ཞིང༌ངི༌ སྙེ༌མ༌ ཅད༌ཅེས༌ གོ༌ཟུག༌།
MAR 2:24 ཕ༌རུ༌ཤི༌པ༌གུན༌ནི༌ ཡེ༌ཤུའ༌ ཟེརས༌, “ལྟོས༌སའང༌ ཁོང༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོས༌ཏེ༌ ཅིའ༌ ཆོས༌ཁྲིམས༌ ཅག༌ག༌ནོག༌?”
MAR 2:25 ཡེ༌ཤུའི༌ ལན༌སལས༌, “དཱ༌བིད༌ དང༌ ཁོའེ༌ ཕྲོ༌པ༌གུན༌ སྟོགས༌ཏེ༌ ཡང༌ སྒོས༌དོམ༌མི༌ ནང༌ང༌ ཡོད༌ ཟ༌ནེ༌ ཅི༌ ཅོས༌ ཏམ༌པའེ༌ སུང༌རབས༌སི༌ ནང༌ནེ༌ ཁྱོ༌ཞའེ༌ མ༌ནེ༌ མ༌སིལ༌པིན༌ན༌?
MAR 2:26 ཨ༌བི༌འ༌ཐར༌ ཡ༌ཧུ༌དཱ༌པའེ༌ བླ༌མ༌ ཆེན༌མོ༌ འིན༌ནི༌ ཏུས༌, དཱ༌བིད༌ དཀོན༌མཆོག༌གི༌ ཀུར༌རི༌ ནང༌ང༌ ཆོད༌པ༌ ཕུལ༌སའེ༌ཀ༌ སོང༌ཏེ༌ ཏམ༌པའེ༌ ཏ༌གི༌ ཟོས༌, ཏེ༌བོ༌ ཡ༌ཧུ༌དཱ༌པའེ༌ བླ༌མའ༌ མ༌ནེ༌ ཟའ༌ཆོག༌ག༌ མེད༌པིན༌, ཡང༌ ཁོའེ༌, ཕྲོ༌པ༌གུན༌ལའང༌ ཏངས༌།”
MAR 2:27 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “མི༌ ངལ༌ཚོའེ༌ ཞག༌པོའེ༌ ཕན༌ཐོགས༌སི༌ ཕིའ༌ མན༌པ༌, ངལ༌ཚོའེ༌ ཞག༌པོ༌ མིའི༌ ཕན༌ཐོགས༌སི༌ ཕིའ༌ ཅོའ༌ ཛདས༌།
MAR 2:28 ཏེན༌ན༌བོའེ༌ཕིའ༌ མི༌རིགས༌སི༌བུའ ཤབ༌བད༌དི༌ ངལ༌ཚོའེ༌ ཞག༌ག༌ ཅི༌ ཅོ༌ ཆོགས༌ ཡ༌ མི༌ཆོགས༌ ཟེར༌ཅེས༌སི༌ ཝང༌ཆ༌ ཡོད༌།”
MAR 3:1 གཙོ༌བོ༌ ཡེ༌ཤུ༌ དུ༌ཁང༌ང༌ ཡང༌སྐྱར༌ སྐྱོདས༌, ཏེ༌རུ༌ ལག༌པ༌ ཁོངས༌ཏེ༌ ཀོལ༌ མ༌ཉན༌ཁན༌ནི༌ མི༌ཞིག༌ ཡོད༌པིན༌།
MAR 3:2 ཡེ༌ཤུའི༌ ཁོ༌ གྱལ༌ཅུག༌ན༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོ༌ཅེས༌པོའ༌ སྐྱོན༌ ཀལ༌ཅེས༌ལ༌ ཕ༌རུ༌ཤི༌པ༌གུན༌ནི༌ ཁོང༌ང༌ གྱལ༌ལ༌ ཅོས༌ཏེ༌ སྟེན༌དུགས༌།
MAR 3:3 ལག༌པ༌ ཁོངས༌ཁན༌ནི༌ མི༌བོའ༌ ཡེ༌ཤུའི༌ མོལས༌, “ཡོང༌ ཡང༌ ཚང༌མའེ༌ དུན༌ལ༌ ལོངས༌།”
MAR 3:4 ཏེ༌ནེ༌ ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “ཆོས༌ཁྲིམས༌ ནང༌ཞིན༌ ཤབ༌བད༌དི༌ ཞག༌ག༌ ལས༌ ཟང༌པོ༌ ཅོ༌ ཆོག༌ག༌ནོག༌ག༌ ཡ༌ ངན༌པ༌, སྲོག༌ སྐྱོབ༌ ཆོག༌ག༌ནོག༌ག༌ ཡ༌ སད༌?” ཨིན༌ནའང༌ ཁོང༌གུན༌ནི༌ ཁོང༌ང༌ ལན༌ མ༌ཏངས༌།
MAR 3:5 ཡེ༌ཤུའི༌ ཐུགས༌སྲོའེ༌ ནང༌ང༌ ཁོང༌ རེ༌རེའ༌ ཟིགས༌, ཡང༌ ཁོང༌གུན༌ནི༌ སྙིང༌ སྐྱོང༌པོ༌ ཟིགས༌ཏེ༌ ཁོང༌ང༌ མ༌སྲན༌ཏྲེ༌ ཐུགས༌ཚེར༌ སྐྱོདས༌། ཁོང༌ངི༌ ལག༌པ༌ ཁོངས༌ཁན༌བོའ༌ མོལས༌, “ལག༌པ༌ རྐྱོང༌” ཡང༌ ཁོའེ༌ ལག༌པ༌ རྐྱངས༌པ༌ ཏེ༌བོ༌ སིང༌ གྱལ༌།
MAR 3:6 ཏེ༌ནེ༌ ཕ༌རུ༌ཤི༌པ༌གུན༌ ཕི༌ལོག༌ག༌ སོང༌ཏེ༌, གྱལ༌པོ༌ ཧེ༌རོད༌དི༌ ཆོགས༌པ༌གུན༌ ཉམ༌པོ༌ ཡེ༌ཤུ༌ སད༌ཅེས༌སི༌ ཐབས༌ ངན༌པ༌ ལྡིངས༌།
MAR 3:7 གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ ཚོའེ༌ ཆོགས༌ལ༌ སྐྱོདས༌, ཡང༌ གཱ༌ལིལ༌ལི༌ནེ༌ མི༌ཚོགས༌ ཆེན༌མོ༌ཞིག༌ ཁོང༌ངི༌ སྟིང༌རང༌ནེ༌ ཡོངས༌།
MAR 3:8 ཡེ༌ཤུའི༌ ཛད༌ཁན༌ ཚང༌མའེ༌ སྐོར༌ལ༌ ཚོར༌པ༌, ཏེ༌ མི༌ཚོགས༌པོ༌ ཡ༌ཧུ༌དཱ༌ ཡུལ༌ཇོངས༌, ཡེ༌རུ༌ཤ༌ལེམ༌མི༌ གྱལ༌ས༌, ཨི༌དུ༌མེའ༌, ཡོར༌དཱན༌ ལྩངས༌པོའེ༌ ཤར༌ ཆོགས༌སི༌ ས༌ཆ༌གུན༌, ཡང༌ བྱང༌ ཆོགས༌སི༌ ཐག༌རིང༌ངི༌ ནས༌ས༌ ཏཱ༌ཡིར༌ དང༌ སི༌དོན༌ གྱལ༌ས༌ གུན༌ནེ༌ ཡོངས༌ཏེ༌ ཨིན༌པིན༌།
MAR 3:9 མི༌ཚོགས༌སི༌ ཁོང༌ ནན༌ མི༌ནན༌ཅེས༌སི༌ ཕིའ༌ ཡེ༌ཤུའི༌ ཁོང༌ངི༌ ལོབ༌ཕྲུགས༌གུན༌ལ༌ གྲུ༌ཟིང༌ཞིག༌ གྲལ༌གྲིག༌ ཅོ༌ཅེས༌ལ༌ མོལས༌།
MAR 3:10 ཁོང༌ངི༌ མི༌ མང༌པོ༌ ཕན༌ཅུག༌ག༌ ཛད༌ཅེས༌པོའེ༌, ཟུ༌མོ༌ ཡོང༌ཁན༌ ཚང༌མའེ༌ ཁོང༌ང༌ ལག༌པ༌ ཐུག༌ཅེས༌ལ༌ ནན༌ཏེ༌ ཁྱོང༌ངད༌པིན༌།
MAR 3:11 ཡང༌ གོང༌པོ༌གུན༌ནི༌ ཁོང༌ ཇལ༌ལ༌ཅིག༌, ཁོང༌གུན༌ ཞུགས༌ཏེ༌ ཡོད༌ཁན༌ནི༌ མི༌གུན༌ ཡེ༌ཤུའི༌ སྐུན༌དུན༌ལ༌ སའ༌ གྱབས༌ཏེ༌ ཀུ༌ཅོ༌ ཏང༌ཨིན༌ ཟེརས༌, “ཉེ༌རང༌ དཀོན༌མཆོག༌གི༌ སྲས༌ ཞུགས༌ཏེ༌ ཨིན༌ནོག༌།”
MAR 3:12 ཨིན༌ནའང༌ ཡེ༌ཤུའི༌ གོང༌པོ༌གུན༌ལ༌ ཁོང༌ སུ༌ ཞུགས༌ཏེ༌ ཨིན༌ཁན༌བོ༌ མི༌ཤད༌ཅེས༌ལ༌ བཀའ༌ སལ༌ལ༌ ཛདས༌།
MAR 3:13 ཏེ༌བོའེ༌ སྟིང༌ནེ༌ གཙོ༌བོ༌ ཡེ༌ཤུ༌ རི༌ཞིག༌གི༌ཀ༌ སྐྱོད༌ཏེ༌ ཁོང༌ངི༌ ལྡམ༌མ༌ ཛད༌ཁན༌གུན༌ལ༌ བོད༌ད༌ ཛདས༌, ཡང༌ ཁོང༌གུན༌ ཁོང༌ ཡོད༌ས༌ ཡོངས༌།
MAR 3:14 ཁོང༌ངི༌ བོད༌ད༌ ཛད༌ཁན༌ རྕུག༌ཉིས༌པོ༌ ཁོང༌རང༌ངི༌ སྐུ༌ཚབས༌ལ༌ སྐོའ༌ ཛདས༌། ཁོང༌གུན༌ནི༌ ཁོང༌ང༌ ཕྲོ༌པ༌ ཅོ༌ཅེས༌ ཡང༌ ཁོང༌ངི༌ ཁོང༌གུན༌ ཆོས༌ཤད༌ཅེས༌ལ༌ ལམ༌ཅུག༌ག༌ ཛད༌ཨིན༌,
MAR 3:15 ཡང༌ ཁོང༌གུན༌ལ༌ རྡུད༌གུན༌ ཕིང༌ཅེས༌སི༌ ཝང༌ཆ༌ སལ༌ལ༌ ཛདས༌།
MAR 3:16 ཁོང༌ངི༌ སྐོའ༌ ཛད༌ཁན༌ནི༌ སྐུ༌ཚབས༌ རྕུག༌ཉིས༌པོ༌ ནི༌, ཤི༌མོན༌ ༼ཡེ༌ཤུའི༌ ཁོའེ༌ མིང༌ང༌ པི༌ཏྲར༌ ཏག༌ག༌ ཛདས༌༽,
MAR 3:17 ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཁོའེ༌ ནོ༌ ཡོ༌ཧཱ༌ནན༌ ༼ཁོང༌ ཉིས༌ཀོ༌ སྲོན༌ཇན༌ ཡོད༌པ༌, ཡེ༌ཤུའི༌ ཁོང༌གུན༌ལ༌ “བོ༌ཡ༌ནེར༌གེ༌” ཡང༌ན༌ “བྲུག༌ལྡིར༌རི༌ བུ༌ཚ༌གུན༌” མིང༌ ཏག༌ག༌ ཛདས༌།༽
MAR 3:18 ཨེན༌གྲིའུ༌, ཕི༌ལིབ༌, བར༌ཐོལ༌མཱ༌, མད༌ཐཱ༌, ཐོ༌མཱས༌, ཨལ༌ཕི༌འུས༌སི༌ བུ༌ཚ༌ ཡ༌ཀོབ༌, ཐད༌དཱ༌འུས༌, ཤི༌མོན༌ ༼ཡུལ༌དད༌ཅན༌༽,
MAR 3:19 དང༌ ཡུ༌དཱ༌ ཀར༌ཡོད༌པ༌ ཀ༌བོའེ༌ གཙོ༌བོ༌ ཡེ༌ཤུའ༌ སྟིང༌ནེ༌ ངོ༌ལོག༌ ཅོས༌།
MAR 3:20 ཏེ༌ནེ༌ གཙོ༌བོ༌ ཡེ༌ཤུ༌ ཁང༌པ༌ཞིག༌གི༌ ནང༌ང༌ སྐྱོདས༌། མི༌ཚོགས༌ ཛོམ༌ཅེས༌ གོ༌ཟུགས༌པ༌, ཁོང༌ དང༌ ཁོང༌ངི༌ ལོབ༌ཕྲུགས༌གུན༌ལ༌ ཟན༌ནའང༌ ཟའ༌ཅེས༌སི༌ ཏུས༌ མ༌ཐོབ༌།
MAR 3:21 ཏེ༌ ཚང༌མ༌ ཡེ༌ཤུའི༌ ནང༌མི༌གུན༌ལ༌ ཚོར༌ར༌ཅིག༌, ཁོང༌གུན༌ ཡེ༌ཤུ༌ ཁང༌པ༌ ཁྲིད༌ཏེ༌ ཁྱེར༌ཅེས༌ལ༌ ཡོངས༌, ཅིའ༌ཟེར༌ན༌ མི༌གུན༌ནི༌, “ཁོང༌ སྙོས༌ཏེ༌ ཨིན༌ནོག༌” ཟེར༌རད༌པིན༌།
MAR 3:22 ཨིན༌ནའང༌ ཡེ༌རུ༌ཤ༌ལེམ༌ གྱལ༌ས༌ནེ༌ ཡོངས༌ཁན༌ནི༌ ཆོས༌ཁྲིམས༌ལ༌ ཁས༌པ༌གུན༌ནི༌ ཟེརས༌, “ཁོའེ༌ ནང༌ང༌ བེལ༌ཟེ༌བུལ༌ ཞུགས༌ཏེ༌ ཨིན༌ནོག༌། ཏེ༌ རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།”
MAR 3:23 ཡེ༌ཤུའི༌ ཁོང༌གུན༌ལ༌ བོད༌ད༌ ཛད༌ཏེ༌ སྤེ༌ སལ༌ཨིན༌ ལན༌སལ༌ལ༌ ཛདས༌, “ཀ༌ཟུག༌གི༌ ཤེ༌ཏན༌ནི༌ ཤེ༌ཏན༌ ཁོ༌རང༌ ཕིང༌ ཉན༌ན༌ནོག༌?
MAR 3:24 ཀལ༌ཏེས༌ གྱལ༌སྲིད༌དི༌ ནང༌ང༌ ཡོད༌ཁན༌གུན༌ ཐུན༌ཏེ༌ མ༌དུག༌ན༌ ཏེ༌བོ༌ ཁྲངས༌པོ༌ མི༌ལུས༌།
MAR 3:25 ཀལ༌ཏེས༌ ནང༌ཚངས༌ཞིག༌གི༌ མི༌གུན༌ ནོལ༌ཨིན༌ དུག༌ན༌ ཁོང༌གུན༌ནི༌ ནང༌ང༌ ཐུན༌བྲེལ༌ མི༌ལུས༌།
MAR 3:26 ཀལ༌ཏེས༌ ཤེ༌ཏན༌ནི༌ ཁོ༌རང༌ངི༌ གྱབ༌གལ༌ལ༌ ནོལ༌ཏེ༌ པོ༌པུད༌ན༌ ཁོའེ༌ ཀ༌ཟུག༌གི༌ ཝང༌སྲུལ༌ཨིན༌? ཁོ༌ མེད༌ཁན༌ ཆ༌ཅེས༌སི༌ ཏུས༌པོ༌ ལེབས༌ཏེ༌ ཨིན༌།
MAR 3:27 ང༌ ཡང༌ སྤེ༌ཞིག༌ ཏང༌ཅུག༌, སུའང༌ མི༌ ཤེད༌ཅན༌ཞིག༌གི༌ ཁང༌པའེ༌ ནང༌ང༌ ཞུགས༌ཏེ༌ ཁོའེ༌ ནོར༌ རྐུ༌ མི༌ཉན༌ ནམ༌ཚོག༌པ༌ ཁོའེ༌ སྔུན༌ལ༌ མི༌ ཤེད༌ཅན༌བོ༌ ལྡམ༌ མི༌ལྡམ༌, ཏེ༌ནེ༌ ཁོའེ༌ ཁང༌པའེ༌ ནང༌ང༌ ཡོད༌ཁན༌ནི༌ ནོར༌གུན༌ རྐུ༌ཉན༌ཨིན༌།”
MAR 3:28 “ངའེ༌ ཁྱོ༌ཞའ༌ དེན༌བ༌ ཟེར༌རད༌, མི༌གུན༌ནི༌ སྡིག༌པ༌ ཅོ༌ཁན༌ དང༌ དཀོན༌མཆོག༌ག༌ དད༌ལོག༌ ཞུ༌ཁན༌ ཚང༌མ༌ ཤགས༌པ༌ སལ༌ལ༌ ཛད༌ཨིན༌,
MAR 3:29 ཨིན༌ནའང༌ ཏམ༌པའེ༌ ཐུག༌ཉིད༌ལ༌ དད༌ལོག༌ ཞུ༌ཁན༌གུན༌ལ༌ ཤགས༌པ༌ མ༌ནེ༌ སལ༌ལ༌ མི༌ཛད༌; ཐའ༌མེད༌པའེ༌ སྡིག༌པ༌ ཅོ༌ཅེས༌སི༌ ནོངས༌ཅན༌ ཁོ༌ ཨིན༌ནོག༌།”
MAR 3:30 ཁོང༌ངི༌ ཁོང༌གུན༌ལ༌ ཏེ༌བོ༌ མོལ༌ལ༌ ཛདས༌ ཅིའ༌ཟེར༌ན༌, ཁོང༌གུན༌ནི༌ “ཡེ༌ཤུའི༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌” ཟེར༌རད༌པིན༌།
MAR 3:31 ཏེ༌ནེ༌ གཙོ༌བོ༌ ཡེ༌ཤུའི༌ ཨ༌མ༌ དང༌ ནོ༌གུན༌ ཡོངས༌, ཡང༌ ཕི༌ལོག༌ག༌ དུགས༌ཏེ༌ མི༌ཞིག༌ ཁོང༌ང༌ བོད༌ད༌ལ༌ ཀལས༌།
MAR 3:32 ཡེ༌ཤུའ༌ སྐོར༌ཏེ༌ ཡོད༌ཁན༌ནི༌ མི༌ཚོགས༌སི༌ ཟེརས༌, “ཉེ༌རང༌ངི༌ ཨ༌མ༌ དང༌ ནོ༌གུན༌ ཉེ༌རང༌ ཙལ༌ཨིན༌ ཕི༌ལོག༌ག༌ དུག༌།”
MAR 3:33 ཡེ༌ཤུའི༌ ལན༌སལས༌, “སུ༌ ཨིན༌ནོག༌ ངའེ༌ ཨ༌མ༌ དང༌ ནོ༌གུན༌?”
MAR 3:34 ཏེ༌ནེ༌ ཁོང༌ངི༌ ཁོང༌ང༌ སྐོར༌ཏེ༌ ཡོད༌ཁན༌གུན༌ལ༌ ཟིགས༌ཏེ༌ མོལས༌, “ངའེ༌ ཨ༌མ༌ དང༌ ནོ༌གུན༌ འི༌གུན༌ ཨིན༌།
MAR 3:35 ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌གི༌ ཐུག༌གོངས༌ ནང༌ཞིན༌ ཅོ༌ཁན༌གུན༌ ངའེ༌ ཨ༌མ༌ དང༌ མིང༌སྲིང༌ གུན༌ ཨིན༌།”
MAR 4:1 ཡང༌སྐྱར༌ གཙོ༌བོ༌ ཡེ༌ཤུའི༌ གཱ༌ལིལ༌ལིའི༌ ཚོའེ༌ ཐའ༌མའ༌ ལབ༌ཞ༌ སལ༌ཅེས༌ གོ༌ཟུག༌ ཛདས༌། ཁོང༌ ཡོད༌ས༌ མི༌ཚོགས༌ མངས༌ཏེའང༌ མང༌པོ༌ ཛོམ༌པ༌ ཁོང༌ གྲུ༌ཟིང༌ངི༌ ནང༌ང༌ ཞོན༌ཏེ༌ ཞུགས༌, ཡང༌ མི༌ ཚང༌མ༌ ཚོའེ༌ ཐའ༌མ༌ དུགས༌།
MAR 4:2 ཁོང༌ངི༌ མི༌གུན༌ལ༌ རུངས༌ གྱུད༌ཏེ༌ ལབ༌ཞ༌ མང༌པོ༌ སལ༌ལ༌ ཛད༌ཏེ༌ མོལས༌,
MAR 4:3 “ཉོན༌ཤིག༌, ཞིང༌བད༌པ༌ཞིག༌ ས༌འོན༌ ཏབ༌བ༌ལ༌ སོང༌།
MAR 4:4 ཞིང༌ང༌ ས༌འོན༌ ཏབ༌ ཟ༌ནེ༌ ཁ༌ཅིག༌ ལམ༌མི༌ཀ༌ བུད༌, ཅི༌པ༌ ཡོངས༌ཏེ༌ ཏེ༌གུན༌ ཟོས༌།
MAR 4:5 ཁ༌ཅིག༌ ས༌ མང༌པོ༌ མེད༌སའེ༌ བྲག༌གི༌ཀ༌ བུད༌, ས༌ མང༌པོ༌ མེད༌ཅེས༌པོའེ༌ ས༌འོན༌བོ༌ གྱོགས༌པ༌ སྐྱེས༌།
MAR 4:6 ཨིན༌ནའང༌ ཉི༌མའེ༌ ཚད༌དི༌ ཞས༌ཏེ༌, ཞིང༌ སྐྱེ༌ཁན༌བོ༌ ཚིག༌, ཡང༌ པ༌ཀྲག༌ ཏིང༌ཅན༌ མེད༌ པ༌སང༌, ཏེ༌བོ༌ སྐམས༌ཏེ༌ ཤི༌།
MAR 4:7 ས༌འོན༌ ཁ༌ཅིག༌ ཚེར༌མང༌ངི༌ ཕྲོའ༌ བུད༌, ཡང༌ ཚེར༌མང༌ སྐྱེས༌ཏེ༌ ནན༌པ༌, ཞིང༌བོ༌ ལྡན༌ མ༌ཐུབ༌, ཏེ༌བོའེ༌ ཞས༌ཏེ༌ ཀྲོ༌ མ༌སྨིནས༌།
MAR 4:8 ཞན༌ ས༌འོན༌གུན༌ ས༌ གྱལ༌ལ༌ ཡོད༌སའེ༌ ཞིང༌ངི༌ཀ༌ བུད༌པ༌, ཏེ༌གུན༌ སྐྱེས༌ཏེ༌ ལྡན༌ཏེ༌ སྟོན༌ཐོགས༌ སྨིན༌, ཀ༌བོ༌ ས༌འོན༌ ཏབ༌ཁན༌ ནི༌ 30, 60, མ༌ཚད༌ 100 གྱུར༌རའང༌ སྨིན༌།”
MAR 4:9 ཏེ༌ནེ༌ ཁོང༌ངི༌ མོལས༌, “ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།”
MAR 4:10 སྟིང༌ནེ༌ ཡེ༌ཤུ༌ ཅིག༌པོ༌ ཡོད༌ ཟ༌ནེ༌, ཁོང༌ང༌ སྐོར༌ཏེ༌ ཡོད༌ཁན༌ནི༌ ཁོང༌ངི༌ ལོབ༌ཕྲུགས༌ རྕུག༌ཉིས༌ དང༌ ཞན༌གུན༌ནི༌ ཁོང༌ངི༌ ཤད༌ད༌ ཛད༌ཁན༌ནི༌ རུངས༌སི༌ ཏོན༌ཏག༌པོ༌ ཏྲིས༌།
MAR 4:11 ཁོང༌ངི༌ ལན༌སལ༌ལ༌ ཛདས༌, “དཀོན༌མཆོག༌གི༌ གྱལ༌སྲིད༌དི༌ སང༌ཝ༌གུན༌ ཧ༌གོ༌ཅེས༌སི༌ སྐབས༌ ཁྱོ༌ཞ༌གུན༌ལ༌ སལ༌ལ༌ ཛད༌ཏེ༌ ཨིན༌ནོག༌། ཨིན༌ནའང༌ དཀོན༌མཆོག༌གི༌ གྱལ༌སྲིད༌དི༌ ཕི༌ལོག༌ག༌ ཡོད༌ཁན༌གུན༌ལ༌ ངའེ༌, ཅི༌ཚང༌མ༌ རུངས༌ གྱུད༌ཏེ༌ ཤད༌དད༌།
MAR 4:12 ཏམ༌པའེ༌ སུང༌རབས༌སི༌ ནང༌ང༌ བྲིས༌ཁན༌བོ༌ དྲན༌དྲ༌ གྲུབ༌ཅེས༌ལ༌ ངའེ༌ ཏེ༌བོ༌ ཅོའད༌། ཏེ༌བོ༌ ནི༌, ‘ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌། ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌, ཏེ༌ མ༌ནེ༌ ཁོང༌གུན༌ནི༌ སེམས༌ ངའེ༌ ཆོགས༌ལ༌ གྱུར༌ཏེ༌ ཁོང༌ངི༌ སྡིག༌པ༌གུན༌ལ༌ ཤགས༌པ༌ ཐོབ༌ཏེ༌ ཡོད༌གྲོ༌།’”
MAR 4:13 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ཀལ༌ཏེས༌ ཁྱོ༌ཞ༌གུན༌ལ༌ འི༌ རུངས༌པོའེ༌ ཏོན༌ཏག༌པོ༌ ཧ༌མ༌གོ༌ན༌, ཏེ༌ནེ༌ ཞན༌ཡང༌ རུངས༌ ཚང༌མའེ༌ ཏོག༌ཏག༌གུན༌ ཀ༌ཟུག༌གི༌ ཧ༌གོ༌ཨིན༌?
MAR 4:14 ཞིང༌བད༌པའེ༌ ས༌འོན༌ ཏབ༌ཅེས༌པོ༌ ནི༌, དཀོན༌མཆོག༌གི༌ བཀའ༌ ཤད༌ཅེས༌པོ༌ ཨིན༌ནོག༌།
MAR 4:15 ལམ༌མི༌ཀ༌ ས༌འོན༌ བུད༌ཁན༌གུན༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌, ཨིན༌ནའང༌ ཤེ༌ཏན༌ ཡོངས༌ཏེ༌ ཁོང༌གུན༌ནི༌ སྙིང༌ངི༌ ནང༌ང༌ ཏབ༌ཁན༌བོ༌ ཀོགས༌ཏེ༌ ཁྱེར༌ར༌ནོག༌།
MAR 4:16 བྲག༌གི༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ གྱལ༌སྲིད༌དི༌ བཀའ༌ ཚོར༌ར༌ཅིག༌ ཐད༌པོ༌ ཉམ༌པོ༌ ཏད༌པ༌ ཅོ༌ཁན༌གུན༌ ཨིན༌ནོག༌།
MAR 4:17 ཨིན༌ནའང༌ ཏེ༌བོའ༌ པ༌ཀྲག༌ ཏིང༌ཅན༌ མེད༌ པ༌སང༌ ཏུས༌ཡུན༌རིང༌ མི༌ལུས༌། ཁོང༌གུན༌ནི༌ བཀའེ༌ ནང༌ང༌ ཏད༌པ༌ ཅོ༌ཅེས༌པོའེ༌ ནགས༌ དང༌ བར༌དོ༌ ཐོང༌ང༌ཅིག༌ ཏད༌པ༌ ཕང༌ཨིན༌།
MAR 4:18 ཚེར༌མངས༌སི༌ ཕྲོའ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌,
MAR 4:19 ཨིན༌ནའང༌ མི༌ཚེའེ༌ ཚེར༌ཁ༌ ཡང༌ ནོར༌ དང༌ ཇིག༌རྟེན༌ནི༌ ཞན༌ དོད༌པ༌ གུན༌ནི༌ ནན༌ཅེས༌པོའེ༌ ཏེ༌བོའ༌ བྲས༌བུ༌ སྨིན༌ན༌ མ༌ནོག༌།
MAR 4:20 ས༌ ཟང༌པོའེ༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཉན༌ཏེ༌ ཏད༌པ༌ ཅོ༌ཁན༌གུན༌ ཨིན༌ནོག༌, ཁོང༌གུན༌ལ༌ བྲས༌བུ༌, ས༌འོན༌ ཏབ༌ཁན༌བོའེ༌ སང༌ 30, 60, ཡང༌ 100 གྱུར༌ སྨིན༌ན༌ནོག༌།”
MAR 4:21 ཏེ༌ནེ༌ གཙོ༌བོ༌ ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌, “ཅི༌ ཁྱོ༌ཞའེ༌ འོད༌ ཏུགས༌ཏེ༌ གོར༌མོ༌ ཡ༌ ཉལ༌ཁྲི༌ ཡོག༌ག༌ བོར༌ཨིན༌ན༌? འོད༌པོ༌ འོད༌སྟག༌གི༌ཀ༌ མི༌བོར༌ར༌?
MAR 4:22 སྦས༌ཏེ༌ བོར༌ཁན༌ ཚང༌མ༌ ཞག༌ཤིག༌ སྔོན༌ཅུག༌ག༌ ཛད༌ཨིན༌, ཡང༌ ཀབས༌ཏེ༌ བོར༌ཁན༌ ཚང༌མ༌ ཕི༌ལོག༌ག༌ ཕིང༌ང༌ ཛད༌ཨིན༌།
MAR 4:23 ཀལ༌ཏེས༌ ནམ༌ཅོག༌ ཡོད༌ན༌ ངའེ༌ ཟེར༌ཁན༌ལ༌ ཉོན༌ཤིག༌།”
MAR 4:24 ཁོང༌ངི༌ མོལས༌, “ཁྱོ༌ཞའེ༌ ཚོར༌ཁན༌གུན༌ལ༌ ནང༌སྟག༌ གྱལ༌ལ༌ ཏོང༌ཤིག༌། ཁྱོ༌ཞའེ༌ ཀོལ༌ཁན༌ནི༌ ཏབ༌ཟའ༌བོ༌ ཁྱོ༌ཞ༌གུན༌ནི༌ ཕིའང༌ ཀོལ༌ལ༌ ཛད༌ཨིན༌, ཡང༌ ཏེ༌སང༌ མང༌ང༌ སལ༌ཨིན༌།
MAR 4:25 ངའེ༌ ལབ༌ཞ༌ ཉན༌ཁན༌གུན༌ལ༌ མང༌ང༌ ཧ༌གོ༌ཅུག༌ག༌ ཛད༌ཨིན༌, ཨིན༌ནའང༌ མ༌ཉན༌ཁན༌གུན༌ནི༌ ནང༌ནེ༌ ཧ༌གོ༌ཏེ༌ ཡོད༌ཁན༌བོའང༌ ཁྱེར༌ར༌ ཛད༌ཨིན༌།”
MAR 4:26 གཙོ༌བོ༌ ཡེ༌ཤུའི༌ འི༌བོའང༌ མོལས༌, “དཀོན༌མཆོག༌གི༌ གྱལ༌སྲིད༌ ནི༌, ས༌འོན༌ ཞིང༌ང༌ ཡོག༌ཁན༌ནི༌ ཞིང༌བད༌པ༌ཞིག༌ ཙོགས༌ ཨིན༌ནོག༌།
MAR 4:27 ཁོ༌ ཉིད༌ ཏངས༌ཏེ༌ ཡ༌ ལངས༌ཏེ༌ ཡོད༌གྲོ༌, ཉིན༌ཚན༌ མེད༌པ༌ ས༌འོན༌བོ༌ སྐྱེས༌ཏེ༌ ལྡན༌ན༌ནོག༌, ཨིན༌ནའང༌ ཏེ༌བོ༌ ཀ༌ཟུག༌གི༌ ལྡན༌ནད༌, ཁོའ༌ ཅའང༌ གྱུས༌ མེད༌ཀྱག༌།
MAR 4:28 ས༌ ཁོ༌རང༌ངི༌ ས༌འོན༌ སྐྱེ༌ཅུགས༌ཏེ༌ ཞིང༌ ལྡན༌ཏེ༌ སྙེ༌མའེ༌ གོ༌ བིང༌ཏེ༌ བྲུ༌ གང༌ཅུག༌ག༌ནོག༌།
MAR 4:29 ཀྲོ༌ ཚོས༌ས༌ཅིག༌, ཞིང༌བད༌པ༌བོ༌ ཡོངས༌ཏེ༌ ཟོ༌ར༌ ཉམ༌པོ༌ ཏེ༌བོ༌ རྔའ༌ནོག༌ ཅིའ༌ཟེར༌ན༌, རྔབ༌སའེ༌ ཏུས༌པོ༌ ལེབས༌ཏེ༌ ཨིན༌ནོག༌།”
MAR 4:30 གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ གྱལ༌སྲིད༌པོ༌ ངའེ༌ ཁྱོ༌ཞའ༌ ཀ༌ཟུག༌གི༌ ཧ༌གོ༌ཅུག༌? ཏེ༌བོ༌ ཧ༌གོ༌ཅུག༌ཅེས༌སི༌ ཕིའ༌ ངའེ༌ ཀ༌རུངས༌པོ༌ ཀོལ༌?
MAR 4:31 ཏེ༌བོ༌ ནི༌, ཉུང༌སྐར༌རི༌ ས༌འོན༌ ཚང༌མའེ༌སང༌ ཆུ༌ངུན༌ སའེ༌ ནང༌ང༌ ཏབ༌ཁན༌བོ༌ ཙོགས༌ ཨིན༌ནོག༌།
MAR 4:32 ཨིན༌ནའང༌, ཏབ༌བ༌ཅིག༌ ལྡན༌ཏེ༌ ཚས༌སི༌ ནང༌ང༌ ཚང༌མའེ༌སང༌ ཆེན༌མོ༌ ལྕང༌མ༌ གྱུར༌ཨིན༌, ཡང༌ ཡལ༌ག༌གུན༌ འི༌ཟམ༌ ཆེན༌མོ༌ ཆེན༌ ནམ༌ཁའེ༌ ཅ༌གུན༌ནི༌ ཏེ༌བོའེ༌ སིལ༌ལི༌ ནང༌ང༌ ཚངས༌ ཅོ༌ཨིན༌།”
MAR 4:33 ཡེ༌ཤུའི༌ ཏེན༌ན༌ ཙོགས༌སི༌ རུངས༌ མང༌པོ༌ ཀོལ༌ཏེ༌ མི༌གུན༌ནི༌ ཧ༌གོ༌ཅེས༌སི༌ ཁྱུད༌ ཚག༌པ༌ དཀོན༌མཆོག༌གི༌ བཀའ༌ ཤད༌ད༌ ཛདས༌།
MAR 4:34 ཁོང༌ངི༌ རུངས༌ གྱུད༌ཏེ༌ མ༌སྟོགས༌ ཅི༌ ལབ༌ཞ༌ཞིག༌གའང༌ སལ༌ལ༌ མེད༌པིན༌, ཨིན༌ནའང༌ ཁོང༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཅིག༌པོ༌ ཡོད༌ ཟ༌ནེ༌, ཁོང༌ངི༌ རུངས༌ ཚང༌མའེ༌ ཏོན༌བོ༌ ཧ༌གོ༌ཅུག༌ག༌ ཛད༌དད༌པིན༌།
MAR 4:35 ཕི༌ཏོག༌ ལེབ༌བ༌ཅིག༌, གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ང༌དང༌ ཚོའེ༌ ཕར༌ཀ༌ ཆེན༌།”
MAR 4:36 མི༌ཚོགས༌པོ༌ བོར༌ཏེ༌ ཁོང༌གུན༌ ཡེ༌ཤུ༌ ཉམ༌པོ༌ གྲུ༌ཟིང༌ངི༌ ནང༌ང༌ ཞོན༌ཏེ༌ སོང༌། ཞན༌ གྲུ༌ཟིང༌གུན༌ནའང༌ ཁོང༌ངི༌ གྱབ༌ནེ༌ ཡོངས༌།
MAR 4:37 ཧུན༌མེད༌ལ༌ ནམ༌ཚུབས༌ཏེ༌ ལུང༌རག༌ ཀྲག༌པོ༌ ཡོངས༌, ཡང༌ ཆུལ༌བག༌ གྲུ༌ཟིང༌ངི༌ ནང༌ང༌ ལེབས༌ཏེ༌ ཏེ༌བོ༌ ནུབ༌ཅེས༌ སོང༌།
MAR 4:38 ཡེ༌ཤུ༌ གྲུ༌ཟིང༌ངི༌ ཇུག༌ག༌ ཉས༌སི༌ཀ༌ ཨུ༌ ཕབས༌ཏེ༌ ནལ༌ཟིམས༌ཏེ༌ ཡོད༌པིན༌། ལོབ༌ཕྲུགས༌གུན༌ནི༌ ཁོང༌ང༌ ཉིད༌ཚད༌ད༌ ཛད༌ཏེ༌ ཟེརས༌, “ལོབ༌བོན༌ལེ༌, ང༌ཞའ༌ ཆུའི༌ ནང༌ང༌ ནུབ༌ཅེས༌ དུག༌, སྐྱོབ༌བ༌ ཛད༌ད༌ མེད༌ད༌?”
MAR 4:39 ཡེ༌ཤུ༌ ཞངས༌ཏེ༌ ལུངས༌པོའ༌ ཁའ༌སྐྱེས༌ཏེ༌ ཆུལ༌བག༌གུན༌ལ༌ མོལས༌, “ཅུབ༌ཅོད༌, ཀུ༌ཅོ༌ མ༌ཏང༌།” ཏེ༌ནེ༌ ལུང༌རག༌ མེད༌ཁན༌ སོང༌ཏེ༌ ཚོའེ༌ ནང༌ང༌ པད༌ ཞི༌དེ༌ ཇུང༌།
MAR 4:40 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “ཅིའ༌ ཇིགས༌སད༌? ཁྱོ༌ཞ༌གུན༌ལ༌ ངའེ༌ཀ༌ ཏ༌རུང༌ངའང༌ ཏད༌པ༌ མེད༌པ༌ ཨིན༌ན༌?”
MAR 4:41 ལོབ༌ཕྲུགས༌གུན༌ སྲན༌ཏྲེ༌ ཇིགས༌ཏེ༌ ཅིག༌ དང༌ ཅིག༌ག༌ ཏྲིས༌, “ཁོང༌ སུ༌ ཨིན༌ནོག༌? ལུངས༌པོ༌ དང༌ ཆུལ༌བག༌ གུན༌ནིའང༌ ཁོང༌ངི༌ ཁའ༌ ཉན༌དུག༌།”
MAR 5:1 ཁོང༌གུན༌ ཚོའེ༌ ཕར༌ཀའ༌, ག༌ད༌རཱའེ༌ ཡུལ༌ཇོངས༌ལ༌ སྐྱོདས༌།
MAR 5:2 གཙོ༌བོ༌ ཡེ༌ཤུ༌ གྲུ༌ཟིང༌ནེ༌ བིང༌ང༌ ཛད༌ད༌ཅིག༌, རྡུད༌ ཞུགས༌ཁན༌ ཞིག༌ ཁོང༌ ཇལ༌ལ༌ལ༌ རོམ༌ཁང༌ངི༌ ནས༌ས༌ནེ༌ བིངས༌ཏེ༌ ཡོངས༌།
MAR 5:3 ཁོ༌ རོམ༌ཁང༌གུན༌ནི༌ ནང༌ང༌ དུག༌གད༌པིན༌, སུ༌ཞིག༌གའང༌ ཁོ༌ ལྡམས༌ཏེ༌ བོར༌ མ༌ཉན༌ན༌ ཨིན༌པིན༌, ལྕག༌ཐག༌ ཉམ༌པོའང༌།
MAR 5:4 ལན༌ མང༌པོ༌ཞིག༌ ཁོའེ༌ རྐང༌ལག༌གུན༌ ལྕག༌ཐག༌ ཉམ༌པོ༌ ཏགས༌ཏེ༌ བོར༌ནའང༌ ཁོའེ༌ ལྕག༌ཐག༌ ཅད༌ཏེ༌ ཕངས༌, སུ༌ཞིག༌གའང༌ ཁོ༌ ལྡམས༌ཏེ༌ བོར༌ཅེས༌སི༌ ཤེད༌ མེད༌པིན༌།
MAR 5:5 ཉིན༌ཚན༌ མེད༌པ༌ ཁོ༌ རི༌ དང༌ རོམ༌ཁང༌གུན༌ནི༌ ཕྲོའ༌ ཁོར༌ཨིན༌, ཀུ༌ཅོ༌ ཏང༌ཨིན༌, རྡོའ༌ ནོན༌པོ༌ ཉམ༌པོ༌ རང༌ངི༌ ཟུགས༌པའེ༌ ཤ༌གུན༌ ཅད༌དད༌པིན༌།
MAR 5:6 ཁོའེ༌ ཐག༌རིང༌ནེ༌ ཡེ༌ཤུ༌ ཇལ༌ལ༌ཅིག༌, བང༌ཏངས༌ཏེ༌ ཁོང༌ངི༌ དུན༌ལ༌ ཁོ༌རང༌ངི༌ པིག༌དོང༌ ཙུགས༌།
MAR 5:7 ཁོའེ༌ ནང༌ང༌ ཞུགས༌ཁན༌ནི༌ རྡུད༌པོའེ༌ ཀུ༌ཅོ༌ ཤེད༌ཅན༌ ཏངས༌ཏེ༌ ཟེརས༌, “ཡེ༌ཤུ༌ དཀོན༌མཆོག༌ ཀུན༌ཝང༌ངི༌ སྲས༌ ཉེ༌རང༌ ངའེ༌ ལས༌སི༌ ནང༌ང༌ ཅིའ༌ དྲེས༌སད༌? ང༌ ནགས༌ མི༌སྟན༌ཅེས༌ལ༌, དཀོན༌མཆོག༌གི༌ ཚན༌ནི༌ ནང༌ང༌ ནའ༌ ཁུར༌ར༌ ཛད༌།”
MAR 5:8 ཅིའ༌ཟེར༌ན༌ ཡེ༌ཤུའི༌ ཁོའ༌, “རྡུད༌, ཁྱོ༌རང༌ འི༌ མི༌བོའེ༌ ནང༌ནེ༌ བིང༌ཏེ༌ ཡོང༌” མོལ༌ལ༌ ཛད༌ཏེ༌ ཨིན༌པིན༌།
MAR 5:9 ཏེ༌ནེ༌ ཡེ༌ཤུའི༌ ཁོའ༌ ཏྲིའ༌ ཛདས༌, “ཁྱོ༌རང༌ངི༌ མིང༌ང༌ ཅི༌ ཨིན༌?” ཁོའེ༌ ལན༌ཏངས༌, “ངའེ༌ མིང༌ང༌ རྡུད༌ཚོགས༌ ཨིན༌, ཅིའ༌ཟེར༌ན༌ ང༌ཞའ༌ མང༌པོ༌ཞིག༌ འི༌ མི༌བོའེ༌ ནང༌ང༌ ནས༌ཏེ༌ ཡོད༌།”
MAR 5:10 ཏེ༌ནེ༌ ཁོའེ༌ ཡེ༌ཤུའ༌ ཁོང༌གུན༌ འི༌ གྱལ༌ཁག༌ནེ༌ ཐག༌རིང༌ང༌ མི༌ཕིང༌ཅེས༌ལ༌ ཇུ༌ཇུ༌ ཞུ༌ཨིན༌ ཡང༌ནེ༌ ཡང༌ ཞུ༌ཝ༌ ཕུལས༌།
MAR 5:11 རི༌ ཉེ༌མོ༌ཞིག༌གི༌ཀ༌ ཕག༌གི༌ ཁྱུ༌ ཆེན༌མོ༌ཞིག༌ རྩཱ༌ ཟེན༌ ཡོད༌པིན༌།
MAR 5:12 རྡུད༌གུན༌ནི༌ ཡེ༌ཤུའ༌ ཇུ༌ཇུ༌ ཞུ༌ཨིན༌ ཟེརས༌, “ང༌ཞའ༌ འ༌ ཕག༌གུན༌ནི༌ ནང༌ང༌ ཀལ༌ལ༌ ཛད༌, ང༌ཞའ༌ ཏེ༌གུན༌ནི༌ ནང༌ང༌ ཆ༌ཅུག༌ག༌ ཛད༌།”
MAR 5:13 ཡེ༌ཤུའི༌ གོངས༌པ༌ སལ༌ལ༌ ཛད༌པ༌, རྡུད༌གུན༌ བིང༌ཏེ༌ ཕག༌གུན༌ནི༌ ནང༌ང༌ ཞུགས༌། ཏེ༌ ཕག༌གི༌ ཁྱུ༌ ཧ༌ལམ༌ 2,000 ཞིག༌, རི༌ནེ༌ ཐུར༌ལ༌ བང༌ཏངས༌ཏེ༌ ཚོའེ༌ ནང༌ང༌ བུད༌ ཡང༌ ཆུའི༌ ནང༌ང༌ ནུབ༌ཏེ༌ ཤི༌།
MAR 5:14 ཕག༌ཚོ༌ཁན༌གུན༌ གྲོང༌ཁྱེར༌ དང༌ ཉེ༌ཁོར༌རི༌ ནས༌ས༌གུན༌ལ༌ བང༌ཏངས༌ཏེ༌ སོང༌ ཡང༌ ཇུང༌ཁན༌ ཚང༌མ༌ ཤདས༌, མི༌གུན༌ ཇུང༌ཁན༌གུན༌ ལྟའ༌ལ༌ སོང༌།
MAR 5:15 ཁོང༌གུན༌ ཡེ༌ཤུ༌ ཡོད༌ས༌ ལེབ༌བ༌ཅིག༌, རྡུད༌ ཚོགས༌ ཞུགས༌ཁན༌ནི༌ མི༌བོ༌, ཀོས༌ལག༌ གོན༌ཏེ༌ སྙོ༌ མ༌སྙོའ༌ ཏེ༌ཀ༌ དུགས༌ཏེ༌ ཐོང༌པ༌ ཁོང༌གུན༌ ཇིགས༌།
MAR 5:16 ཏེ༌ ཚང༌མ༌ ཐོང༌ཁན༌གུན༌ནི༌ རྡུད༌གུན༌ ཞུགས༌ཁན༌ནི༌ མི༌ དང༌ ཕག༌གུན༌ལ༌ ཇུང༌ཁན༌ནི༌ སྐོར༌བོ༌ མི༌གུན༌ལ༌ ཞིབ༌སལ༌ ཅོས༌ཏེ༌ ཤདས༌།
MAR 5:17 ཏེ༌ནེ༌ མི༌གུན༌ནི༌ ཡེ༌ཤུའ༌, ཁོང༌གུན༌ནི༌ ཡུལ༌ནེ༌ བིང༌ཏེ༌ སྐྱོད༌ ཇུ༌ཇུ༌ ཟེརས༌།
MAR 5:18 ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛད༌ ཟ༌ནེ༌ སྔུན༌ལ༌ རྡུད༌གུན༌ ཞུགས༌ཏེ༌ ཡོད༌ཁན༌ནི༌ མི༌བོའེ༌ ཡེ༌ཤུའ༌, ཁོ༌ ཁོང༌ ཉམ༌པོ༌ ཡོང༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌།
MAR 5:19 ཨིན༌ནའང༌ ཡེ༌ཤུའི༌ ཁོ༌ ཡོང༌ མ༌ཅུགས༌ ཡང༌ མོལས༌, “ཁང༌པ༌ ཁྱོ༌རང༌ངི༌ ནང༌མི༌གུན༌ ཡོད༌ས༌ སོང༌ཏེ༌, གཙོ༌བོའེ༌ ཁྱོ༌རང༌ངི༌ ཕིའ༌ ཛད༌ཁན༌ ཚང༌མ༌ དང༌ ཁྱོ༌རང༌ངི༌ཀ༌ ཁོང༌ངི༌ ཙམ༌ཤིག༌གི༌ སྙིང༌རྗེ༌ སྟན༌ན༌ ཛད༌ཁན༌བོ༌ ཤོད༌།”
MAR 5:20 ཏེ༌ནེ༌ ཁོ༌ ཏེ༌ཀ༌ནེ༌ སོང༌ཏེ༌ གྱལ༌ས༌ རྕུ༌ ཡོད༌ཁན༌ནི༌ གྱལ༌ཁག༌གི༌ ནང༌ང༌ ཡེ༌ཤུའི༌ ཁོའ༌ ཛད༌ཁན༌ ཚང༌མ༌ ཤདས༌, ཡང༌ ཁོའེ༌ ཤད༌ཁན༌གུན༌ ཚོར༌ཏེ༌ མི༌གུན༌ ཧ༌ལས༌།
MAR 5:21 གཙོ༌བོ༌ ཡེ༌ཤུ༌ ཡང༌སྐྱར༌ གྲུ༌ཟིང༌ངི༌ ནང༌ང༌ ཚོའེ༌ འ༌ངོ༌ ཆོགས༌སི༌ ཕར༌ཀ༌ ལེབ༌བ༌ཅིག༌, ཚོའེ༌ ཐའ༌མ༌ ཡོད༌ ཟ༌ནེ༌ མི༌ཚོགས༌ ཆེན༌མོ༌ཞིག༌ ཛོམས༌ཏེ༌ ཁོང༌ང༌ ཁོར༌ཏེ༌ དུགས༌།
MAR 5:22 ཏེ༌ནེ༌ ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌ ཡའེ༌རས༌ ཟེར༌ཁན༌བོ༌ ཏེ༌རུ༌ ཡོངས༌། ཡེ༌ཤུ༌ ཇལ༌ལ༌ཅིག༌, ཁོ༌ ཁོང༌ངི༌ ཞབས༌སི༌ དུན༌ལ༌ གྱེལ༌ཏེ༌
MAR 5:23 སྙིང༌ནེ༌ ཇུ༌ཇུ༌ ཞུ༌ཨིན༌ ཟེརས༌, “ངའེ༌ བུ༌མོ༌ ཆུ༌ངུན༌བོ༌ ཤི༌ཀྱིས༌ དུག༌། ཇུ༌ཇུ༌ སྐྱོད༌ཏེ༌ ཉེ༌རང༌ངི༌ ཆག༌ ཁོའེ༌ཀ༌ བོར༌ར༌ ཛད༌ན༌ ཁོ༌ ཕན༌ཏེ༌ སོན༌ཨིན༌།”
MAR 5:24 ཡེ༌ཤུ༌ ཁོ༌ ཉམ༌པོ༌ སྐྱོད༌ད༌ ཛདས༌། མི༌ཚོགས༌ ཆེན༌མོ༌, ཁོང༌ངི༌ སྟིང༌རང༌ནེ༌ ཡོངས༌ཏེ༌ ཁོང༌ང༌ ནན༌ཏེ༌ ཁྱོངས༌།
MAR 5:25 བུད༌ཁན༌ནི༌ ལོ༌ རྕུག༌ཉིས༌ནེ༌ ཕར༌ལ༌ ཏུས༌གྱུན༌ ཟུགས༌པོ༌ ཞིག༌ཅེས༌སི༌ ཟུ༌མོ༌ ཡོངས༌ཁན༌ནི༌ བུ༌མོ༌ཞིག༌ མི༌ཚོགས༌སི༌ ཕྲོའ༌ ཡོད༌པིན༌།
MAR 5:26 ཨམ༌ཆི༌གུན༌ནི༌ སྟ༌སྟོག༌གི༌ ནང༌ང༌ ནགས༌ མང༌པོ༌ ཐོང༌ཏེ༌ ཁོ༌རང༌ངི༌ པེ༌ནེ༌ ཚང༌མ༌ སྐྱགས༌ཏེའང༌, ཁོ༌ གྱལ༌ལ༌ ཆ༌ཅེས༌སི༌ སང༌ མང༌ང༌ ཐུའ༌ སོང༌ཏེ༌ ཡོད༌པིན༌།
MAR 5:27 ཁོའ༌ ཡེ༌ཤུའི༌ སྐོར༌ལ༌ ཚོར༌པ༌, མི༌ཚོགས༌སི༌ ནང༌ང༌ ཁོང༌ངི༌ གྱབ༌ནེ༌ ཡོངས༌ཏེ༌ ཁོང༌ངི༌ ནམ༌ཟའ༌ ལག༌པ༌ ཏུགས༌།
MAR 5:28 ཅིའ༌ཟེར༌ན༌ ཁོའེ༌ ཁོ༌རང༌ངི༌ སེམས༌སི༌ ནང༌ང༌ སམ༌, “ཀལ༌ཏེས༌ ཁོང༌ངི༌ ནམ༌ཟའ༌ ལག༌པ༌ ཐུག༌ན༌ ངའེ༌ ཟུ༌མོ༌ གྱལ༌ལ༌ནོག༌”
MAR 5:29 ཏེན༌ན༌མལ༌ལ༌ ཁྲག༌པོ༌ ཆད༌ཏེ༌ རྩོག༌པོ༌ ཟུ༌མོ༌ནེ༌ ཕན༌ཁན༌བོ༌ ཁོའ༌ གྱུས༌སོང༌།
MAR 5:30 ཏེན༌ན༌ ཏུས༌ལ༌, ཁོང༌ངི༌ ནང༌ནེ༌ ཕན༌ཅུག༌ཁན༌ནི༌ སྟོབས༌ བིངས༌ཏེ༌ ཆའ༌ཁན༌བོ༌ ཡེ༌ཤུའི༌ ཁྱེན༌། ཁོང༌ངི༌ འི༌ངོ༌ འ༌ངོ༌ གྱུར༌ཨིན༌ མི༌ཚོགས༌ལ༌ ཟིགས༌ཏེ༌ ཏྲིས༌, “སུའི༌ ངའེ༌ ཀོས༌ལག༌ག༌ ལག༌པ༌ ཏུགས༌?”
MAR 5:31 ཁོང༌ངི༌ ལོབ༌ཕྲུགས༌གུན༌ནི༌ ཁོང༌ང༌ ཟེརས༌, “མི༌ཚོགས༌སི༌ ནན༌ཨིན༌ ཕུལ༌ཨིན༌ ཁྱོང༌ཅེས༌པོ༌ ཉེ༌རང༌ངི༌ ཟིགས༌ས༌ནོག༌, ཏེ༌ནེ༌ ཉེ༌རང༌ངི༌ སུའི༌ ངའ༌ ལག༌པ༌ ཏུགས༌ མོལ༌ཏེ༌ ཅིའ༌ ཏྲིའ༌ ཛད༌ད༌?”
MAR 5:32 ཨིན༌ནའང༌ ལག༌པ༌ ཏུགས༌ཁན༌བོའ༌ ཟིག༌ཤེས༌ལ༌ ཁོང༌ངི༌ འི༌ངོ༌ འ༌ངོའ༌ ཟིགས༌ཨིན༌ ཞུགས༌།
MAR 5:33 ཏེ༌ནེ༌ བུ༌མོ༌བོའེ༌ ཁོ༌རང༌ང༌ ཇུང༌ཁན༌གུན༌ གྱུས༌ཡོད༌པ༌, ཇིགས༌ཨིན༌ ཏར༌ཨིན༌ ཡེ༌ཤུའི༌ དུན༌ལ༌ ཡོངས༌ཏེ༌ ཁོང༌ངི༌ ཞབས༌སི༌ཀ༌ གྱེལས༌ ཡང༌ ཁོང༌ང༌ ཅི༌ཚང༌མ༌ ཀྲང༌པོ༌ ཤདས༌།
MAR 5:34 ཡེ༌ཤུའི༌ ཁོའ༌ མོལས༌, “བུ༌མོ༌ ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌། ཞི༌དེའེ༌ ཉམ༌པོ༌ སོང༌, ཁྱོ༌རང༌ངི༌ རྡུག༌ངལ༌བོ༌ མེད༌ཁན༌ སོང༌ཏེ༌ ཨིན༌ནོག༌།”
MAR 5:35 ཁོང༌ངི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌, དུ༌ཁང༌ངི༌ འུ༌སྐྱོང༌ ཡའེ༌རས༌སི༌ ཁང༌པ༌ནེ༌ མི༌ ཁ༌ཅིག༌ ཡོངས༌ཏེ༌ ཁོའ༌ ཟེརས༌, “ཉེ༌རང༌ངི༌ བུ༌མོ༌བོ༌ ཤི༌, ཏ༌ ལོབ༌བོན༌ལེའ༌ འོབ༌གྱལ༌ སྟན༌ན༌ མ༌ཛད༌།”
MAR 5:36 ཨིན༌ནའང༌ ཡེ༌ཤུའི༌ ཁོང༌གུན༌ནི༌ ཟེར༌ཁན༌བོའ༌ སྣང༌ང༌ མ༌སལ༌ལ༌ ཡའེ༌རས༌ལ༌ མོལས༌, “ཇིགས༌ མ༌ཇིགས༌། ཏད༌པ༌ རང༌ ཅོས༌།”
MAR 5:37 ཏེ༌ནེ༌ ཡེ༌ཤུའི༌ པི༌ཏྲར༌, ཡ༌ཀོབ༌ དང༌, ཁོའེ༌ ནོ༌ ཡོ༌ཧཱ༌ནན༌ མ༌སྟོགས༌ ཞན༌སུ༌ཞིག༌གའང༌ ཁོང༌ ཉམ༌པོ༌ ཡོང༌ ཅུག༌ག༌ མ༌ཛདས༌།
MAR 5:38 ཁོང༌གུན༌ དུ༌ཁང༌ངི༌ འུ༌སྐྱོང༌ངི༌ ཁང༌པ༌ ལེབ༌བ༌ཅིག༌, ཀུ༌ཅོ༌ ཏང༌ཨིན༌, ངུ༌ཨིན༌ མི༌ མང༌པོ༌ཞིག༌གི༌ ཧི༌ལིངས༌ ཏང༌ང༌ ཡེ༌ཤུའི༌ ཟིགས༌།
MAR 5:39 ཁོང༌ ནང༌ཀུག༌ག༌ སྐྱོད༌ཏེ༌, “ཅི༌ཕིའ༌ ངུ༌ཨིན༌ ཧི༌ལིངས༌ ཏང༌ངད༌? ཕྲུ༌གུ༌བོ༌ མ༌ཤིའ༌ ཉིད༌ལོགས༌ཏེ༌ ཨིན༌” མོལ༌པ༌
MAR 5:40 ཁོང༌གུན༌ནི༌ ཁྲེལ༌གོད༌ ཏངས༌། ཡེ༌ཤུའི༌ ཁོང༌ ཚང༌མ༌ ཁང༌པ༌ནེ༌ ཕི༌ལོག༌ག༌ བིངས༌ཏེ༌ བུ༌མོའེ༌ ཕ༌མ༌ དང༌, ཁོང༌རང༌ངི༌ ལོབ༌ཕྲུགས༌ སུམ༌ཀོ༌ ཁྲིད༌ཏེ༌ བུ༌མོ༌ ཡོད༌སའེ༌ ནང༌ང༌ སྐྱོདས༌
MAR 5:41 ཡང༌ བུ༌མོའེ༌ ལག༌པ༌ ཐམས༌ས༌ ཛད༌ཏེ༌ ཁོའ༌ མོལས༌, “ཏ༌ལི༌ཐའ༌ ཀོའམ༌” ཀ༌བོའེ༌ ཏོན༌ཏག༌པོ༌ “བུ༌མོ༌ ཆུ༌ངུན༌ ལོངས༌” ཟེར༌ར༌ནོག༌།
MAR 5:42 ཏེན༌ན༌མལ༌ལ༌ ལོ༌ རྕུག༌ཉིས༌ ཆའ༌ཁན༌ནི༌ བུ༌མོ༌བོ༌ ཀོའག༌ ལངས༌ཏེ༌ གྲུལས༌། ཏེ༌བོ༌ ཐོང༌ཏེ༌ ཁོང༌གུན༌ མ༌སྲན༌ཏྲེ༌ ཧ༌ལས༌།
MAR 5:43 ཇུང༌ཁན༌བོ༌ སུའང༌ མི༌ཤད༌ཅེས༌ལ༌ ཡེ༌ཤུའི༌ ཁོང༌གུན༌ལ༌ བཀའ༌ སལས༌, ཡང༌ ཁོང༌གུན༌ལ༌ བུ༌མོ༌བོའ༌ ཅི༌ཏོང༌ཤིག༌ ཟའ༌ ཏང༌ཅེས༌ལ༌ མོལས༌།
MAR 6:1 གཙོ༌བོ༌ ཡེ༌ཤུ༌ ཏེ༌ཀ༌ནེ༌ ལོབ༌ཕྲུགས༌གུན༌ ཉམ༌པོ༌ ཁོང༌རང༌ངི༌ གྲོང༌ཁྱེར༌ ན༌ཙ༌རེད༌ལ༌ སྐྱོདས༌།
MAR 6:2 ཤབ༌བད༌ ངལ༌ཚོའེ༌ ཞག༌ག༌, ཁོང༌ངི༌ དུ༌ཁང༌ངི༌ ནང༌ང༌ ལབ༌ཞ༌ སལ༌ཅེས༌ གོ༌ཟུག༌, ཡང༌ ཁོང༌ང༌ ཚོར༌ཁན༌ མང༌པོའེ༌ ཧ༌ལས༌ཏེ༌ ཏྲིས༌, “འི༌ མི༌བོའ༌ འི༌ ཚང༌མ༌ ཀ༌ནེ༌ ཐོབ༌ཀྱག༌? ཁོའ༌ འི༌ཙོགས༌ ཤེས༌རབས༌ སུའི༌ ཏངས༌ཀྱག༌? ཀ༌ཟུག༌གི༌ ཁོའེ༌ འི༌ཙོགས༌ ཧ༌ལས༌ཤེས༌སི༌ ཛད༌པ༌གུན༌ སྟན༌ན༌ནོག༌?
MAR 6:3 ཁོ༌ ཤིང༌ཁན༌བོ༌ མ༌ནོག༌ག༌? ཁོ༌ མིར༌ཡམ༌མི༌ བུ༌ཚ༌ ཡང༌ ཡ༌ཀོབ༌, ཡོ༌སེབ༌, ཡུ༌དཱ༌ དང༌, ཤི༌མོན༌ གུན༌ནི༌ ཨ༌ཅོ༌ མ༌ནོག༌ག༌? ཁོའེ༌ སྲིང༌མོ༌གུན༌ འི༌ཀ༌ ང༌དང༌གུན༌ ཉམ༌པོ༌ མེད༌ད༌?” ཁོང༌གུན༌ ཚིག༌ཅེས༌པོའེ༌ ཁོང༌ངི༌ཀ༌ ཏད༌པ༌ མ༌ཅོས༌།
MAR 6:4 ཡེ༌ཤུའི༌ ཁོང༌གུན༌ལ༌ མོལས༌, “ལུང༌སྟོན༌པ༌ཞིག༌ག༌ ཁོ༌རང༌ངི༌ གྲོང༌ཁྱེར༌, ཉེན༌གྲུང༌ དང༌ ཁོ༌རང༌ངི༌ ནང༌ཚངས༌སི༌ ནང༌ང༌ མ༌ནེ༌, ཞན༌ ཀ༌རུང༌ས༌ རྩི༌ཝ༌ ཅོ༌རུག༌།”
MAR 6:5 ཁོང༌གུན༌ནི༌ ཏད༌པ༌ མི༌ཅོ༌ཅེས༌པོའེ༌ ཞས༌ཏེ༌, ཁོང༌ངི༌ ཁོང༌གུན༌ནི༌ ཕྲོའ༌ ཟུ༌མོ༌ ཡོང༌ཁན༌ ཁ༌ཅིག༌གི༌ཀ༌ ཁོང༌རང༌ངི༌ ཆག༌ བོར༌ཏེ༌ ཕན༌ཅུག༌ག༌ ཛད༌ཅེས༌ མ༌སྟོགས༌, ཞན༌ཡང༌ ཅའང༌ ཧ༌ལས༌སི༌ ཛད༌པ༌ སྟན༌ན༌ མ༌ཛདས༌།
MAR 6:6 ཡང༌ ཁོང༌གུན༌ནི༌ ཏད༌པ༌ མེད༌ཅེས༌པོ༌ ཟིགས༌ཏེ༌ ཁོང༌ ཧ༌ལས༌། 6:6-13 ཏེ༌ནེ༌ ཡེ༌ཤུ༌ ལབ༌ཞ༌ སལ༌ལ༌ལ༌ གམ༌ཡུལ༌ ཅིག༌ནེ༌ ཅིག༌ག༌ སྐྱོདས༌།
MAR 6:7 ཁོང༌ངི༌ ལོབ༌ཕྲུགས༌ རྕུག༌ཉིས༌པོའ༌ བོད༌ད༌ ཛདས༌, ཡང༌ ཉིས༌ཉིས༌ ཅོས༌ཏེ༌ རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌ ཕིང༌ཅེས༌སི༌ ཝང༌ཆ༌ སལ༌ལ༌ ཛད༌ཏེ༌ ཁོང༌གུན༌ ལམ༌ཅུག༌ག༌ ཛདས༌།
MAR 6:8 ཁོང༌ངི༌ ཁོང༌གུན༌ལ༌ ལབ༌ཞའ༌ སལ༌ཏེ༌ མོལས༌, “ཁྱོ༌རང༌གུན༌ནི༌ བེས༌སི༌ ཕིའ༌ གྲུལ༌ཅེས༌སི༌ བེར༌ཀ༌ མ༌སྟོགས༌, ཁར༌ཇི༌, ཇོ༌ལ༌ དང༌ ཁོ༌མགས༌སི༌ ནང༌ང༌ པེ༌ནེ༌ མ༌ཁུར༌།
MAR 6:9 པ༌བུ༌ གོན༌ ཨིན༌ནའང༌ ཀོས༌ལག༌ སྤོ༌ཅེས༌ མ༌ཁུར༌།”
MAR 6:10 “ཁྱོ༌ཞའ༌ དུག༌ས༌ ཏང༌ཁན༌ནི༌ ཏེན༌ན༌ ཁང༌པའེ༌ ནང༌ང༌ དུག༌ ནམ༌ ཚོག༌པ༌ ཏེ༌ གྲོང༌ཁྱེར༌ནེ༌ བིང༌ཏེ༌ མི༌ཆའ༌།
MAR 6:11 ཀལ༌ཏེས༌ གྲོང༌ཁྱེར༌ཞིག༌གི༌ ནང༌ང༌ སུ༌ཞིག༌གིའང༌ ཁྱོ༌ཞའ༌ གའ༌སུས༌ མ༌ཅོ༌ན༌, ཡ༌ ཁྱོ༌ཞའེ༌ ཟེར༌ཁན༌བོའ༌ མ༌ཉན༌ན༌, ཏེ༌ནེ༌ བིང༌ཏེ༌ ཆ༌ ཟ༌ནེ༌, རང༌ངི༌ པ༌བུའི༌ ཐལ༌བ༌ སྲུགས༌ཏེ༌ ཁོང༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཁན༌བོ༌ སྟོན༌།”
MAR 6:12 ཏེ༌ནེ༌ ཁོང༌གུན༌ སྐྱོད༌ཏེ༌ མི༌གུན༌ལ༌ སྡིག༌པའེ༌ ཀ༌ནེ༌ གྱོད༌པ༌ ཅོས༌ཏེ༌ དཀོན༌མཆོག༌གི༌ ཆོགས༌ལ༌ སེམས༌ གྱུར༌ཅེས༌ལ༌ ཆོས༌ཤདས༌།
MAR 6:13 ཁོང༌གུན༌ནི༌ རྡུད༌ མང༌པོ༌ ཕིངས༌ཏེ༌ ཟུ༌མོ༌ ཡོང༌ཁན༌ མང༌པོ༌ཞིག༌ག༌ ཨོ༌ལིཝ༌ཝི༌ མར༌ སྐུས༌ཏེ༌ ཕན༌ཅུགས༌།
MAR 6:14 གཙོ༌བོ༌ ཡེ༌ཤུའི༌ ཚན༌ མིང༌ཅན༌ གྱུར༌ཅེས༌པོའེ༌ གྱལ༌པོ༌ ཧེ༌རོད༌དི༌ ཁོང༌ངི༌ སྐོར༌ལ༌ ཚོར༌། ཁ༌ཅིག༌གི༌ ཟེར༌རད༌པིན༌, “ཁྲུས༌སལ༌ཁན༌ ཡོ༌ཧཱ༌ནན༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌ ཁོང༌ང༌ ཛད༌པ༌ སྟན༌ཅེས༌སི༌ ཁྱུད༌ ཡོད༌ཏེ༌ ཨིན༌ནོག༌།”
MAR 6:15 ཞན༌གུན༌ནི༌ ཟེརས༌, “ཁོང༌ ནི༌ ལུང༌སྟོན༌པ༌ ཨེ༌ལི༌ཡཱ༌ ཨིན༌ནོག༌།” ཡང༌ ཞན༌གུན༌ནི༌, “སྔུན༌མའེ༌ ལུང༌སྟོན༌པ༌ ཙོགས༌ལ༌ ཁོང༌ ལུང༌སྟོན༌པ༌ཞིག༌ ཨིན༌ནོག༌།”
MAR 6:16 ཏེ༌གུན༌ ཚོར༌ར༌ཅིག༌, ཧེ༌རོད༌དི༌ ཟེརས༌, “ངའེ༌ གོ༌ ཅད༌ཅུག༌ཁན༌ནི༌ ཡོ༌ཧཱ༌ནན༌, ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཨིན༌ནོག༌།”
MAR 6:17 ཧེ༌རོད༌དི༌ ཡོ༌ཧཱ༌ནན༌ ཟུམས༌ཏེ༌ ལྕག༌ཐག༌ག༌ ཏགས༌ཏེ༌ ཙོན༌ཁང༌ང༌ ཀག༌ཅེས༌ལ༌ བཀའ༌ ཏངས༌ཏེ༌ ཨིན༌པིན༌། ཁོའེ༌ ཏེ༌བོ༌ ཁོ༌རང༌ངི༌ ནོ༌ ཕི༌ལིབ༌བི༌ ན༌མ༌ ཧེ༌རོ༌དཱིས༌སི༌ ཕིའ༌ ཅོས༌, ཧེ༌རོད༌དི༌ ཁོ༌ ཉམ༌པོ༌ ན༌མ༌ ཅོས༌ཏེ༌ ཨིན༌པིན༌།
MAR 6:18 ཡོ༌ཧཱ༌ནན༌ནི༌ ཧེ༌རོད༌ལ༌ མོལ༌ལད༌པིན༌, “ཁྱོ༌རང༌ངི༌ ནོའེ༌ ན༌མ༌ ཉམ༌པོ༌ ན༌མ༌ ཅོ༌ཅེས༌པོ༌ དཀོན༌མཆོག༌གི༌ ཁྲིམས༌སི༌ གྱབ༌གལ༌ ཨིན༌ནོག༌།”
MAR 6:19 ཧེ༌རོ༌དཱིས༌སི༌ ཡོ༌ཧཱ༌ནན༌ལ༌ ནཕ༌རད༌ ཅོས༌ཏེ༌ ཁོང༌ སད༌ཉིན༌ ཡོད༌པིན༌, ཨིན༌ནའང༌ ཁོའ༌ ཅའང༌ ཅོ༌ མ༌ཉན༌,
MAR 6:20 ཅིའ༌ཟེར༌ན༌ ཧེ༌རོད༌དི༌ ཡོ༌ཧཱ༌ནན༌ མི༌ ཟང༌པོ༌ དང༌ ཏམ༌པ༌ ཨིན༌ཁན༌བོ༌ ཤེས༌པ༌, རྩི༌ཝ༌ དང༌ ཇིགས༌སི༌ ནང༌ང༌ ཁོང༌ སྐྱོབས༌ཏེ༌ བོརས༌། ཡོ༌ཧཱ༌ནན༌ནི༌ མོལ༌ཁན༌གུན༌ ཉན༌ ཟ༌ནེ༌, གྱལ༌པོ༌ ཧེ༌རོད༌ལ༌ སེམས༌སི༌ ནང༌ང༌ མི༌དེ༌ཅེས༌ ཡོང༌ནའང༌ ཁོ༌ ཡོ༌ཧཱ༌ནན༌ནི༌ མོལ༌ཁན༌གུན༌ ཉན༌ཅེས༌ལ༌ ཐད༌དད༌པིན༌།
MAR 6:21 ཨིན༌ནའང༌ གྱལ༌པོ༌ ཧེ༌རོད༌དི༌ སྐྱེ༌ཞག༌གི༌ ཞག༌ག༌ ཧེ༌རོ༌དཱིས༌ལ༌ སྐབས༌ ཐོབ༌། ཏེ༌ ཞག༌ག༌ ཧེ༌རོད༌དི༌ ཁོ༌རང༌ངི༌ ལས༌མི༌ འུ༌སྐྱོང༌, མག༌མི༌ སྤོན༌བོ༌གུན༌ དང༌, གཱ༌ལིལ༌ལིའི༌ སྤོན༌བོ༌གུན༌ གྲོན༌ལ༌ བོད༌ཏེ༌ ཡོད༌པིན༌།
MAR 6:22 ཧེ༌རོ༌དཱིས༌སི༌ བུ༌མོ༌ ཡོངས༌ཏེ༌ རྩེས༌ མ༌ ལྡེ༌མོ༌ ཏངས༌པ༌, ཧེ༌རོད༌ དང༌ ཁོང༌ངི༌ གྲོན༌པོ༌གུན༌ སྲན༌ཏྲེ༌ ཐད༌། གྱལ༌པོའེ༌ བུ༌མོ༌བོའ༌ ཟེརས༌, “ཁྱོ༌རང༌ང༌ དོད༌པ༌ ཡོད༌ཁན༌བོ༌ ངའ༌ ཤོད༌, ཡང༌ ངའེ༌ ཏེ༌བོ༌ ཁྱོ༌རང༌ང༌ ཏང༌ཨིན༌།”
MAR 6:23 ཁོའེ༌ ནའ༌ ཁུར༌ཏེ༌ ཟེརས༌, “ཁྱོ༌རང༌ངི༌ ཅི༌ཞིག༌ ཏོང༌ ཟེར༌ནའང༌, ངའེ༌ ཏང༌ཨིན༌, ངའེ༌ གྱལ༌སྲིད༌དི༌ ཕེད༌པོའང༌།”
MAR 6:24 ཁོ༌ ཕི༌ལོག༌ག༌ སོང༌ཏེ༌ ཁོ༌རང༌ངི༌ ཨ༌མ༌ ཏྲིས༌, “ངའེ༌ ཅི༌ ཏོང༌ ཟེར༌།” ཨ༌མའེ༌ ཁོའ༌ ཟེརས༌, “ཁྲུས༌སལ༌ཁན༌ ཡོ༌ཧཱ༌ནན༌ནི༌ གོ༌ ཏོང༌ ཟེར༌།”
MAR 6:25 ཏེན༌ན༌མལ༌ལ༌ བུ༌མོ༌ གྱལ༌པོ༌ ཡོད༌ས༌ གྱོགས༌པ༌ སོང༌ཏེ༌ ཟེརས༌, “དག༌ས༌རང༌ ངའ༌ ཁྲུས༌སལ༌ཁན༌ ཡོ༌ཧཱ༌ནན༌ནི༌ གོ༌ ཐལ༌ལི༌ཞིག༌གི༌ཀ༌ གོས༌སད༌།”
MAR 6:26 གྱལ༌པོ༌ མ༌སྲན༌ཏྲེ༌ ཚེར༌ ཨིན༌ནའང༌ གྲོན༌པོ༌གུན༌ནི༌ དུན༌ལ༌ ནའ༌ ཁུར༌ཁན༌བོའེ༌ ཞས༌ཏེ༌, ཁོའེ༌ བུ༌མོའ༌ མན༌ ཟེར༌ མ༌ཉན༌།
MAR 6:27 ཏེ༌ནེ༌ ཁོའེ༌ ཏེན༌ན༌མལ༌ལ༌ མི༌ སད༌ཅེས༌སི༌ ལས༌ ཅོ༌ཁན༌ནི༌ མི༌བོ༌ ཙོན༌ཁང༌ང༌ ཡོ༌ཧཱ༌ནན༌ནི༌ གོ༌ ཁྱོང༌ཅེས༌ལ༌ ལམ༌ཅུགས༌། ཁོ༌ སོང༌ཏེ༌ ཙོན༌ཁང༌ངི༌ ནང༌ང༌ ཡོ༌ཧཱ༌ནན༌ནི༌ གོ༌ ཅདས༌།
MAR 6:28 ཁོའེ༌ ཁོང༌ངི༌ གོ༌བོ༌ ཐལ༌ལི༌ཞིག༌གི༌ཀ༌ ཁྱོངས༌ཏེ༌, བུ༌མོ༌བོའ༌ ཏངས༌, ཏེ༌ནེ༌ ཁོའེ༌ ཁོ༌རང༌ངི༌ ཨ༌མ༌ ཏངས༌།
MAR 6:29 ཏེ༌བོ༌ ཚོར༌ར༌ཅིག༌, ཡོ༌ཧཱ༌ནན༌ནི༌ ལོབ༌ཕྲུགས༌གུན༌ ཡོངས༌ཏེ༌ ཁོང༌ངི༌ སྤུར༌བོ༌ ཁྱེར༌ཏེ༌ སྤུར༌ཁང༌ངི༌ ནང༌ང༌ བོརས༌།
MAR 6:30 སྐུ༌ཚབས༌གུན༌ གཙོ༌བོ༌ ཡེ༌ཤུ༌ ཡོད༌ས༌ ལོགས༌ཏེ༌ ཡོངས༌, ཡང༌ ཁོང༌གུན༌ནི༌ ཅོས༌ཁན༌ དང༌ ལབ༌ཁན༌ ཚང༌མའེ༌ སྐོར༌ལ༌ ཤདས༌།
MAR 6:31 མི༌ མང༌པོ༌ ཆེན༌ ཡོང༌ཨིན༌ དུགས༌པ༌, ཡེ༌ཤུ༌ དང༌ ཁོང༌ངི༌ སྐུ༌ཚབས༌གུན༌ལ༌ ངལ༌ཚོས༌ཏེ༌ དོན༌ཏང༌ དོན༌ཅེས༌སི༌ ཏུས༌ མ༌ཐོབ༌། ཏེ༌བོའེ༌ཕིའ༌ ཡེ༌ཤུའི༌ མོལས༌, “ཡོང༌ཤིག༌ ང༌དང༌རང༌ སུའང༌ མེད༌སའེ༌ ནས༌ས༌ཞིག༌ག༌ སོང༌ཏེ༌ ངལ༌ཚོ༌ ཨིན༌།”
MAR 6:32 ཏེ༌ནེ༌ ཁོང༌གུན༌ གྲུ༌ཟིང༌ཞིག༌གི༌ ནང༌ང༌ ཞོན༌ཏེ༌ སུའང༌ མེད༌སའེ༌ ནས༌ས༌ཞིག༌ག༌ སྐྱོདས༌།
MAR 6:33 ཨིན༌ནའང༌ མི༌ མང༌པོ༌ཞིག༌གི༌ ཁོང༌གུན༌ ཏེ༌ཀ༌ནེ༌ སྐྱོད༌ད༌ལ༌ ཐོང༌ ཡང༌ ངོ༌ཤེས༌། གྱ༌ཚོའེ༌ ཐའ༌མ༌ ཡོད༌ཁན༌ནི༌ གྲོང༌ཁྱེར༌ ཚང༌མ༌ནེ༌ མི༌གུན༌ བང༌ཏང༌ཨིན༌ སོང༌ཏེ༌ ཁོང༌གུན༌ནི༌ སང༌ སྔུན༌ལ༌ ཏེ༌ ནས༌སའེ༌ཀ༌ ལེབ༌།
MAR 6:34 གྲུ༌ཟིང༌ནེ༌ བབས༌ཏེ༌ ཡེ༌ཤུའི༌ མི༌ཚོགས༌ ཆེན༌མོ༌ ཟིགས༌ས༌ཅིག༌, ཁོང༌ང༌ ཁོང༌གུན༌ནི༌ཀ༌ སྙིང༌རྗེ༌ སྐྱེའ༌ ཛདས༌ ཅིའ༌ཟེར༌ན༌ ཁོང༌གུན༌ ལུག༌རྫི༌ མེད༌ཁན༌ནི༌ ལུག༌ ཙོགས༌ ཡོད༌པིན༌། ཡང༌ ཁོང༌ངི༌ ཁོང༌གུན༌ལ༌ ལབ༌ཞ༌ མང༌པོ༌ སལ༌ཅེས༌ གོ༌ཟུགས༌།
MAR 6:35 ཉི༌མ༌ གོར༌གོར༌ལ༌ ཡེ༌ཤུའི༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌ཏེ༌ ཟེརས༌, “ང༌དང༌གུན༌ ཅའང༌ མེད༌སའེ༌ རི༌སྟོང༌ངི༌ ནང༌ང༌ ཨིན༌ནོག༌ ཡང༌ མུན༌ཅུའང༌ རུབ༌ཀྱིས༌ དུག༌།
MAR 6:36 ཉེ༌ཁོར༌རི༌ ནས༌ས༌ དང༌ གམ༌ཡུལ༌གུན༌ལ༌ སོང༌ཏེ༌ ཁོ༌རང༌གུན༌ནི༌ ཕིའ༌ ཟན༌ ཉོ༌ཅེས༌ལ༌ མི༌ཚོགས༌པོ༌ ལམ༌ཅུག༌ག༌ ཛད༌དའང༌།”
MAR 6:37 ཨིན༌ནའང༌ ཡེ༌ཤུའི༌ མོལས༌, “ཁྱོ༌ཞའེ༌ ཁོང༌གུན༌ལ༌ ཟའ༌ཅེས༌ ཏོང༌།” ཁོང༌གུན༌ནི༌ ལན༌ཏངས༌, “འི༌ མི༌ཚང༌མ༌ ཁར༌ཇི༌ ཏང༌ཅེས༌སི༌ ཕིའ༌ ཟླ༌ཝ༌ 8 དི༌ ལ༌ཆ༌ དྲན༌དྲའེ༌ པེ༌ནེ༌ གོས༌སོག༌། ང༌ཞའ༌ སོང༌ཏེ༌ ཏེ༌ཟམ༌ཤིག༌གི༌ པེ༌ནེ༌ སྐྱགས༌ཏེ༌ ཁོང༌གུན༌ལ༌ ཁར༌ཇི༌ ཟའ༌ཅེས༌ ཉོའ༌?”
MAR 6:38 ཁོང༌ངི༌ ཏྲིའ༌ ཛདས༌, “ཁྱོ༌ཞའེ༌ ལག༌ག༌ ཏ༌གི༌ ཙམ༌ ཡོད༌། སོང༌ཏེ༌ ལྟོས༌?” ཁོང༌གུན༌ སོང༌ཏེ༌ ལྟས༌ ཡང༌ ཟེརས༌, “ཏ༌གི༌ ལྔ༌ དང༌ ཉ༌ ཉིས༌ དུག༌ལེ༌།”
MAR 6:39 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ལ༌ མི༌གུན༌ སྡེ༌སྡེ༌ ཅོས༌ཏེ༌ རྩཱ༌ སྔོན༌པོའེ༌ཀ༌ དུག༌ཅུག༌ཅེས༌སི༌ ཕིའ༌ མོལས༌།
MAR 6:40 མི༌གུན༌ 50 ཡ༌ 100 སྡེ༌ ཅོས༌ཏེ༌ སའེ༌ཀ༌ དུགས༌།
MAR 6:41 ཡེ༌ཤུའི༌ ཏ༌གི༌ ལྔ༌ དང༌ ཉ༌ ཉིས༌པོ༌ ཆག༌ག༌ ནམས༌ ཡང༌ ནམ༌ཁའ༌ ཟིགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཏ༌གི༌ ཅགས༌ཏེ༌ མི༌ཚོགས༌ལ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལ༌ལ༌ ཛདས༌། ཏེན༌ན༌ ཙོགས༌ལ༌ ཁོང༌ངི༌ ཉ༌བོའང༌ བགོས༌ཏེ༌ ཁོང༌ ཚང༌མ༌ལ༌ སལ༌ལ༌ ཛདས༌།
MAR 6:42 ཁོང༌ ཚང༌མ༌ གྲང༌གྲང༌ ཟོས༌
MAR 6:43 ཡང༌ ལོབ༌ཕྲུགས༌གུན༌ནི༌ ཏ༌གི༌ དང༌ ཉའེ༌ ལག༌ལུས༌གུན༌ ལྡུས༌པ༌ པག༌ཙེ༌ རྕུག༌ཉིས༌ གང༌།
MAR 6:44 ཏ༌གི༌ དང༌ ཉ༌ ཟའ༌ཁན༌གུན༌ནི༌ ཕྲོའ༌ ལྡན༌ཁན༌ནི༌ བུ༌ཚའ༌ སྟོང༌ལྔ༌ ཡོད༌པིན༌།
MAR 6:45 ཏེན༌ན༌མལ༌ལ༌ གཙོ༌བོ༌ ཡེ༌ཤུའི༌ མི༌ཚོགས༌པོ༌ ལོགས༌ཏེ༌ ལམ༌ཅུག༌ག༌ ཛད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ ཁོང༌རང༌ངི༌ སང༌ སྔུན༌ལ༌ གྲུ༌ཟིང༌ངི༌ ནང༌ང༌ ཚོའེ༌ འ༌ངོ༌ ཆོགས༌ལ༌ བེད༌སེ༌དཱའེ༌ གྲོང༌ཁྱེར༌ལ༌ ལམ༌ཅུག༌ག༌ ཛདས༌།
MAR 6:46 མི༌ཚོགས༌ སོང༌ཚར༌ཏེ༌ སྟིང༌ནེ༌ ཁོང༌ རི༌ཀ༌ མོས༌ལམ༌ ཞུའ༌ སྐྱོདས༌།
MAR 6:47 མུན༌ཅུ༌རུབ༌བ༌ཅིག༌ ལོབ༌ཕྲུགས༌གུན༌ གྲུ༌ཟིང༌ངི༌ ནང༌ང༌ ཚོའེ༌ སྐྱིལ༌ལ༌, ཡང༌ ཡེ༌ཤུ༌ རི༌ཀ༌ ཅིག༌པོ༌ ཡོད༌པིན༌།
MAR 6:48 དུན༌ནེ༌ ལུངས༌པོ༌ ཀྲག༌པོ༌ ཡོངས༌པ༌ ཁོང༌གུན༌ལ༌ གྲུ༌ཟིང༌ སྲུལ༌ཅེས༌ལ༌ ནགས༌ མང༌པོ༌ ཐོང༌ཨིན༌ ཡོད༌ཁན༌བོ༌ ཡེ༌ཤུའི༌ ཟིགས༌། ཧ༌ལམ༌ ང༌ཏོག༌ ཆུ༌ཚོད༌ སུམ༌པ༌ཞིག༌གི༌ཀ༌ ཡེ༌ཤུ༌ ཚོའེ༌ ཀ༌ནེ༌ ཞབ༌གྲུལ༌ལ༌ ཁོང༌གུན༌ནི༌ ཆོགས༌ལ༌ སྐྱོདས༌, ཡང༌ ཁོང༌གུན༌ནི༌ ལྡོ༌ཆོགས༌ནེ༌ སྐྱོད༌ཅེས༌ ཡོད༌པིན༌
MAR 6:49 ཁོང༌གུན༌ནི༌ ཡེ༌ཤུ༌ ཚོའེ༌ ཀ༌ནེ༌ ཞབ༌གྲུལ༌ལ༌ སྐྱོད༌ཨིན༌ ཐོང༌ང༌ཅིག༌, ཤིན༌དྲེ༌ ཨིན༌ནོག༌ སམས༌ཏེ༌ ཀུ༌ཅོ༌ ཏངས༌།
MAR 6:50 ཡེ༌ཤུ༌ ཐོང༌ང༌ཅིག༌, ཁོང༌ ཚང༌མ༌ མ༌སྲན༌ཏྲེ༌ ཇིགས༌། ཏེན༌ན༌མལ༌ལ༌ ཡེ༌ཤུའི༌ ཁོང༌གུན༌ལ༌ མོལས༌, “ཇིགས༌ མ༌ཇིགས༌ ང༌ ཨིན༌, ཧམ༌པ༌ ཅོས༌།”
MAR 6:51 ཏེ༌ནེ༌ ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛདས༌, ཡང༌ ལུངས༌པོ༌བོ༌ ཆད༌། ཁོང༌ ཚང༌མ༌ པད༌ ཧ༌ལས༌།
MAR 6:52 ཁོང༌གུན༌ལ༌ ཡེ༌ཤུའི༌ ཏ༌གི༌ ཉམ༌པོ༌ ཛད༌པ༌ ཛད༌ཁན༌བོ༌ ཐོང༌ཏེའང༌ ཁོང༌ སུ༌ ཞུགས༌ཏེ༌ ཨིན༌ཁན༌བོ༌ ཏ༌རུང༌ངའང༌ ཧ༌མ༌གོའ༌, ཁོང༌ངི༌ སྙིང༌གུན༌ མ༌ སྐྱོང༌པོ༌ ཡོད༌པིན༌།
MAR 6:53 ཁོང༌གུན༌ ཚོའེ༌ འ༌ངོ༌ ཆོགས༌ལ༌ སྐྱོདས༌ ཡང༌ ཆུའི༌ ཐའ༌མ༌ གེ༌ནེ༌ས༌རེད༌དི༌ གྲོང༌ཁྱེར༌ལ༌ ལེབ༌བ༌ཅིག༌ གྲུ༌ཟིང༌བོ༌ ལྡམས༌།
MAR 6:54 གྲུ༌ཟིང༌ནེ༌ ཕི༌ལོག༌ག༌ བིང༌ང༌ཅིག༌, མི༌གུན༌ནི༌ ཡེ༌ཤུ༌ ཨིན༌ཁན༌བོ༌ ངོ༌ཤེས༌།
MAR 6:55 ཁོང༌གུན༌ ཡུལ༌ཇོངས༌ གང༌པོའེ༌ ནང༌ང༌ བང༌ཏང༌ཨིན༌ སོང༌ཏེ༌ ཟུ༌མོ༌ ཡོད༌ཁན༌གུན༌ མལ༌ཙའེ༌ཀ༌ ཁུར༌ཏེ༌ ཡེ༌ཤུ༌ ཞུགས༌ཏེ༌ དུག༌ ཟེརས༌སའེ༌ ནས༌སའེ༌ཀ༌ ཁྱོངས༌།
MAR 6:56 ཁོང༌ གམ༌ཡུལ༌, གྲོང༌ཁྱེར༌ ཡ༌ གྲོང༌སེབ༌ ཀ༌རུ༌ སྐྱོད༌ནའང༌ མི༌གུན༌ནི༌ ཟུ༌མོ༌ ཡོད༌ཁན༌གུན༌, ཁྲོམས༌སི༌ ནང༌ང༌ ཕི༌ལོག༌ག༌ ཕིངས༌ཏེ༌ ཁྱོངས༌། ཁོང༌གུན༌ནི༌ ཟུ༌མོ༌ ཡོད༌ཁན༌གུན༌ལ༌ ཡེ༌ཤུའི༌ ནམ༌ཟའེ༌ ཀྲུ༌ཞིག༌ག༌ ལག༌པ༌ རྩེ༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌, ཡང༌ ཁོང༌ངི༌ ནམ༌ཟའ༌ ལག༌པ༌ རྩེ༌ཁན༌ ཚང༌མ༌ ཕན༌།
MAR 7:1 ཡེ༌རུ༌ཤ༌ལེམ༌མི༌ གྱལ༌ས༌ནེ༌ ཡོངས༌ཁན༌ནི༌ ཕ༌རུ༌ཤི༌པ༌ དང༌ ཆོས༌ཁྲིམས༌ལ༌ ཁས༌པ༌ ཁ༌ཅིག༌ གཙོ༌བོ༌ ཡེ༌ཤུ༌ ཡོད༌ས༌ ཛོམས༌།
MAR 7:2 ཁོང༌གུན༌ནི༌ ཡེ༌ཤུའི༌ ལོབ༌ཕྲུགས༌ ཁ༌ཅིག༌གི༌ ཁར༌ཇི༌ ཟའེ༌ སང༌ སྔུན༌ལ༌ ཡ༌ཧུ༌དཱ༌པའེ༌ ལུག༌སྲོལ༌ ནང༌ཞིན༌ ལག༌པ༌ མ༌ཁྲུ༌ཁན༌བོ༌ ཐོང༌།
MAR 7:3 ༼ཡ༌ཧུ༌དཱ༌པ༌, མིག༌སལ༌ལི༌ ཕ༌རུ༌ཤི༌པ༌གུན༌ནི༌, ཁོ༌རང༌གུན༌ནི༌ ཕ༌མེས༌པོའེ༌ ལུག༌སྲོལ༌ ནང༌ཞིན༌ ལག༌པ༌ ཁྲུས༌ཏེ༌ མ༌ནེ༌ ཟན༌ ཟའ༌མེད༌པིན༌།
MAR 7:4 ཁོང༌གུན༌ ཁྲོམས༌ནེ༌ ཡོངས༌ཏེ༌, ཁོ༌རང༌གུན༌ནི༌ ལུག༌སྲོལ༌ ནང༌ཞིན༌ ལག༌པ༌ ཁྲུས༌ཏེ༌ མ༌ནེ༌, ཟན༌ ཟའ༌མེད༌པིན༌། ཁོང༌གུན༌ནི༌ ཡང༌ ལུག༌སྲོལ༌ མང༌པོ༌ཞིག༌ སྲུང༌ངད༌པིན༌ སྤེར༌ན༌, ཀོ༌རེ༌, ཆུ༌ནོད༌ དང༌ ཁྲ༌གུ༌ ཁྲུ༌ཅེས༌གུན༌།༽
MAR 7:5 ཏེ༌བོའེ༌ཕིའ༌ ཕ༌རུ༌ཤི༌པ༌ དང༌ ཆོས༌ཁྲིམས༌ལ༌ ཁས༌པ༌ གུན༌ནི༌ ཡེ༌ཤུའ༌ ཏྲིས༌, “ཉེ༌རང༌ངི༌ ལོབ༌ཕྲུགས༌གུན༌ནི༌ ལག༌པ༌ ཚི༌ཏུ༌ ཉམ༌པོ༌ ཟན༌ ཟོས༌ཏེ༌ ཅིའ༌ ང༌དང༌ངི༌ ཕ༌མེས༌པོའེ༌ ལམ༌ ལུག༌སྲོལ༌ལི༌ཀ༌ གྲུལ༌ལ༌ མ༌ནོག༌?”
MAR 7:6 ཡེ༌ཤུའི༌ ལན༌སལ༌ལ༌ ཛདས༌, “ཁ༌ཆོས༌པ༌ ཁྱོ༌ཞའེ༌ སྐོར༌ལ༌ དཀོན༌མཆོག༌གི༌ ཡེ༌ཤ༌ཡཱ༌ གྱུད༌ཏེ༌ ལུང༌སྟན༌ སལ༌ཁན༌བོ༌ དེན༌བ༌ ཨིན༌ནོག༌, ཀ༌བོའེ༌ ནང༌ང༌, ‘འི༌ མི༌གུན༌ནི༌ ཁའ༌ནེ༌ ངའ༌ རྩི༌ཝ༌ ཅོ༌ནའང༌ ཁོང༌གུན༌ནི༌ སྙིང༌གུན༌ ང༌ནེ༌ ཐག༌རིང༌ དུག༌།
MAR 7:7 ཁོང༌གུན༌ནི༌ ངའ༌ ཅོལ༌ཅེས༌པོ༌ ཕན༌མི༌ཐོགས༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌གི༌ བཀའ༌ཁྲིམས༌སི༌ ཚབས༌ལ༌ ཁོང༌རང༌གུན༌ནི༌ ཅོ༌ཁན༌ནི༌ ཁྲིམས༌གུན༌ ལབ༌དུག༌།’
MAR 7:8 ཁྱོ༌ཞ༌གུན༌ནི༌, དཀོན༌མཆོག༌གི༌ བཀའ༌ཁྲིམས༌ སྣང༌མེད༌ ཅོས༌ཏེ༌ ཏེ༌བོའེ༌ ཚབས༌ལ༌ ཁྱོ༌ཞ༌རང༌ངི༌ ལུག༌སྲོལ༌གུན༌ སྲུང༌དུག༌།”
MAR 7:9 ཏེ༌ནེ༌ ཡེ༌ཤུའི༌ མོལས༌, “ཁྱོ༌ཞའེ༌, ཁྱོ༌ཞ༌རང༌ངི༌ ལམ༌ལུག༌སྲོལ༌ སྲུང༌ཅེས༌ལ༌ ཐབས༌ ཁས༌པ༌ ཉམ༌པོ༌ དཀོན༌མཆོག༌གི༌ བཀའ༌ཁྲིམས༌གུན༌ ཕང༌དུག༌།
MAR 7:10 སྤེར༌ན༌ མོ༌ཟེས༌སི༌ ཟེརས༌, ‘རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌,’ ཡང༌ ‘རང༌ངི༌ ཨ༌བ༌ ཡ༌ ཨ༌མའ༌ ངན༌ ཏབ༌ཁན༌གུན༌ སད༌གོས༌།’
MAR 7:11 ཨིན༌ནའང༌ ཁྱོ༌ཞའེ༌ མི༌གུན༌ལ༌ ཁོ༌རང༌ངི༌ ཨ༌བ༌ ཡ༌ ཨ༌མའ༌, ‘ངའེ༌ ཉེ༌རང༌ང༌ རོགས༌ ཅོ༌གོ༌ཤེས༌པོ༌ ཀོར༌བན༌ ༼ཡང༌ན༌ དཀོན༌མཆོག༌ག༌ ཕུལ༌ཨིན༌ ཟེར༌ཏེ༌ ཞལ༌ཆད༌༽ ཅོས༌ཏེ༌ ཨིན༌ ཟེར༌ཅེས༌ ལབ༌དུག༌།’
MAR 7:12 ཏེ༌ཟུག༌ ཅོ༌ཅེས༌ནེ༌ ཁྱོ༌ཞ༌གུན༌ནི༌ ཁོང༌གུན༌ལ༌ རང༌ངི༌ ཨ༌བ༌ ཡ༌ ཨ༌མའ༌ རོགས༌ ཅོ༌ མ༌ཅུག༌ག༌ ཨིན༌ནོག༌,
MAR 7:13 ཏེན༌ན༌བོའེ༌ཕིའ༌ ཁྱོ༌ཞ༌རང༌ངི༌ ལམ༌ལུག༌སྲོལ༌ སྲུང༌ཅེས༌སི༌ ནང༌ང༌ ཁྱོ༌ཞའེ༌ དཀོན༌མཆོག༌གི༌ བཀའ༌ ཅག༌ཅེས༌ མ༌ཚད༌ ཞན༌ ཏེ༌ཙོགས༌སི༌ ལས༌ མང༌པོ༌ ཅོའ༌ནོག༌།”
MAR 7:14 ཏེ༌ནེ༌ ཡེ༌ཤུའི༌ མི༌ཚོགས༌ལ༌ བོད༌ད༌ ཛད༌ཏེ༌ མོལས༌, “ཁྱོ༌ཞའ༌ ཚང༌མའེ༌, ངའེ༌ ཟེར༌ཁན༌བོ༌ ཉན༌ཏེ༌ ཧ༌གོ༌ཅེས༌སི༌ རྩོན༌གྲུས༌ ཅོས༌།
MAR 7:15 ཕི༌ལོག༌ནེ༌ ཟུགས༌པོའེ༌ ནང༌ང༌ ཆའ༌ཁན༌གུན༌ནི༌, ཁྱོ༌ཞའ༌ ཚི༌ཏུ༌ གྱུར༌ཅུག༌ག༌ མ༌ནོག༌, ཨིན༌ནའང༌ ཁྱོ༌ཞ༌གུན༌ནི༌ སེམས༌ནེ༌ བིང༌ཁན༌བོའེ༌, ཁྱོ༌ཞ༌གུན༌ ཚི༌ཏུ༌ གྱུར༌ ཅུག༌ག༌ནོག༌།”
MAR 7:16 
MAR 7:17 ཏེ༌ནེ༌ ཡེ༌ཤུ༌ མི༌ཚོགས༌ནེ༌ བེ༌ཏེ༌ ཁང༌པ༌ཞིག༌གི༌ ནང༌ང༌ སྐྱོདས༌, ཁོང༌ངི༌ ལོབ༌ཕྲུགས༌གུན༌ནི༌ ཁོང༌ང༌, སྤེ༌ སལ༌ཁན༌བོ༌ ཧ༌གོ༌ཅུག༌ཅེས༌ལ༌ ཟེརས༌།
MAR 7:18 ཁོང༌ངི༌ ཏྲིའ༌ ཛདས༌, “ཁྱོ༌ཞའ༌ ཧ༌མ༌གོའ༌? ཐོང༌ང༌ མི༌དུག༌ག༌, ཁྱོ༌ཞའེ༌ ཟའ༌ཁན༌ནི༌ ཁར༌ཇི༌བོའེ༌ ཁྱོ༌ཞ༌གུན༌ ཚི༌ཏུ༌ གྱུར༌ཅུག༌ག༌ མ༌ནོག༌,
MAR 7:19 ཁར༌ཇི༌ ཁྱོ༌ཞའེ༌ སྙིང༌ངི༌ ནང༌ང༌ མ༌ཆའ༌ གྲོད༌པའེ༌ ནང༌ང༌ ལེབས༌ཏེ༌ ཟུགས༌པོ༌ནེ༌ ཕི༌ལོག༌ག༌ བིང༌ང༌ནོག༌།” ༼ཏེ༌ཟུག༌ མོལ༌ཅེས༌པོའེ༌ ཡེ༌ཤུའི༌ ཟའ༌ཅེས༌སི༌ རིགས༌ ཚང༌མ༌ རྩང༌མ༌ ཨིན༌ཁན༌བོ༌, ཧ༌གོ༌ཅུག༌ག༌ ཛདས༌།༽
MAR 7:20 ཁོང༌ངི༌ མོལས༌, “ཁྱོ༌ཞའེ༌ ནང༌ནེ༌ བིང༌ཁན༌བོའེ༌ ཁྱོ༌ཞ༌གུན༌ ཚི༌ཏུ༌ གྱུར༌ ཅུག༌ག༌ནོག༌,
MAR 7:21 ཅིའ༌ཟེར༌ན༌ མི༌ཞིག༌གི༌ སེམས༌ནེ༌ སམ༌བ༌ ངན༌པ༌, ལུས༌བྲེལ༌ ངན༌པ༌, རྐུ༌ཅེས༌, མི༌ སད༌ཅེས༌,
MAR 7:22 རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ ཅོ༌ཅེས༌, ནབས༌, ངན༌སེམས༌, གོབ༌སྐོར༌ཅེས༌, ཏུས༌གྱུན༌ ལུས༌བྲེལ༌ ངན༌པའེ༌ དོད༌པ༌, ཚིག༌ཅེས༌, ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌, ཕོ༌སོ༌ དང༌ སམ༌བ༌ མེད༌ཁན༌ གུན༌ བིང༌ང༌ནོག༌།
MAR 7:23 ཏེ༌ ཚང༌མ༌ ནང༌ཀུག༌ནེ༌ བིངས༌ཏེ༌ ཁྱོ༌ཞ༌གུན༌ ཚི༌ཏུ༌ གྱུར༌ ཅུག༌ག༌ནོག༌།”
MAR 7:24 ཏེ༌ཀ༌ནེ༌ བིང༌ཏེ༌ གཙོ༌བོ༌ ཡེ༌ཤུ༌ ཏཱ༌ཡིར༌ གྱལ༌སའེ༌ ཆོགས༌ལ༌ སྐྱོདས༌། ཁོང༌ ཞུགས༌ཏེ༌ ཡོད༌སའེ༌ ཁང༌པ༌བོ༌ སུ༌ཞིག༌གའང༌ གྱུས༌ ཆ༌ཅུག༌ཉིན༌ མེད༌པིན༌, ཨིན༌ནའང༌ ཏེ༌བོ༌ སང༌ཝའེ༌ ནང༌ང༌ བོར༌ མ༌ཉན༌།
MAR 7:25 རྡུད༌ ཞུགས༌ཏེ༌ ཡོད༌ཁན༌ བུ༌མོ༌ ཆུ༌ངུན༌ནི༌ ཨ༌མའ༌ ཡེ༌ཤུ༌ སྐྱོད༌ཏེ༌ དུག༌ ཟེར༌ཏེ༌ ཚོར༌ར༌ཅིག༌, ཁོ༌ ཡོངས༌ཏེ༌ ཁོང༌ངི༌ ཞབས༌སི༌ དུན༌ལ༌ གྱེལ༌ཏེ༌
MAR 7:26 ཁོའེ༌ ཕྲུ༌གུའི༌ ནང༌ནེ༌ རྡུད༌པོ༌ ཕིང༌ང༌ ཛད༌ཅེས༌ལ༌ ཇུ༌ཇུ༌ ཞུ༌ཨིན༌ ཁོང༌ང༌ ཞུ༌ཝ༌ ཕུལས༌། ཁོ༌ སི༌རི༌ཡཱའེ༌ ཡུལ༌ཇོངས༌སི༌ ཕོ༌ནི༌ཤི༌འེ༌ གྱལ༌སའེ༌ ནང༌ང༌ སྐྱེས༌ཏེ༌ ཡ༌ཧུ༌དཱ༌པ༌ མན༌པིན༌།
MAR 7:27 ཡེ༌ཤུའི༌ ཁོའ༌ མོལས༌, “གོ༌མ༌ ངའེ༌ དཀོན༌མཆོག༌གི༌ ཕྲུ༌གུ༌, ཨིས༌ར༌ཨེལ༌པ༌གུན༌ལ༌ གྲང༌གྲངས༌ ཟའ༌ཅུག༌ གོས༌། ཕྲུ༌གུའི༌ ཏ༌གི༌བོ༌ ལེན༌ཏེ༌ ཁྱིའ༌ ཕང༌ན༌ མ༌གྲིག༌ག༌ ཨིན༌ནོག༌།”
MAR 7:28 ཁོའེ༌ ལན༌ཏངས༌, “དེན༌བ༌ ཨིན༌ནོག༌ གཙོ༌བོ༌ལེ༌, ཨིན༌ནའང༌ ཕྲུ༌གུ༌གུན༌ནི༌ ཁར༌ཇི༌ བུད༌ཁན༌གུན༌ ཅོག༌ཙེ༌ ཡོག༌ག༌ ཡོད༌ཁན༌ནི༌ ཁྱི༌ ཆུ༌ངུན༌གུན༌ནིའང༌ ཟའ༌དུག༌།”
MAR 7:29 ཁོང༌ངི༌ མོལས༌, “ཏ༌ ཁང༌པ༌ སོང༌, ཁྱོ༌རང༌ངི༌ ལན༌ གྱལ༌ལ༌ ཏང༌ཅེས༌པོའེ༌, རྡུད༌ ཁྱོ༌རང༌ངི༌ བུ༌མོའེ༌ ནང༌ནེ༌ བིང༌ཏེ༌ མེད༌།”
MAR 7:30 ཁོ༌ ཁང༌པ༌ ལེབ༌བ༌ཅིག༌, ཁོའེ༌ བུ༌མོ༌ ཆུ༌ངུན༌བོ༌ མལ༌ཙའེ༌ཀ༌ ཉལ༌ཏེ༌ རྡུད༌ བིངས༌ཏེ༌ མེད༌ཁན༌བོ༌ ཐོང༌།
MAR 7:31 གཙོ༌བོ༌ ཡེ༌ཤུ༌ ཏཱ༌ཡིར༌ནེ༌ བིངས༌ཏེ༌ སི༌དོན༌ ཡུལ༌ཇོངས༌ གྱུད༌ཏེ༌ གྱལ༌ས༌ རྕུའི༌ ཡུལ༌ཇོངས༌སི༌ ནང༌ང༌ གཱ༌ལིལ༌ལིའི༌ ཚོ༌ ཆོགས༌ལ༌ སྐྱོདས༌།
MAR 7:32 མི༌ ཁ༌ཅིག༌གི༌ མ༌ཚོར༌ཁན༌ དང༌ སྤེ༌ར༌ སལ༌པོ༌ ཏང༌ མ༌ཉན༌ཁན༌ནི༌ མི༌ཞིག༌ ཁོང༌ ཡོད༌ས༌ ཁྱོངས༌, ཡང༌ ཡེ༌ཤུའ༌ ཇུ༌ཇུ༌ ཞུ༌ཨིན༌ ཁོང༌ངི༌ ཆག༌ ཁོའེ༌ཀ༌ བོར༌ར༌ ཛད༌ཅེས༌ལ༌ ཞུ༌ཝ༌ ཕུལས༌།
MAR 7:33 ཡེ༌ཤུའི༌ མི༌བོ༌ མི༌ཚོགས༌ནེ༌ འ༌ཟམ༌མ༌ ཁྱེར༌ར༌ ཛད༌ཏེ༌ ཁོང༌རང༌ངི༌ ཛི༌གུ༌གུན༌ ཁོའེ༌ ནམ༌ཅོག༌གུན༌ནི༌ ནང༌ང༌ ཅུགས༌, ཏེ༌སྟིང༌ནེ༌ ཁོང༌རང༌ངི༌ ཛི༌གུ༌གུན༌ནི༌ཀ༌ ཐུ༌མག༌ གྱབས༌ཏེ༌ ཁོའེ༌ ལྕེའ༌ ཐུག༌ཅུག༌ག༌ ཛདས༌།
MAR 7:34 ཏེ༌ནེ༌ ཁོང༌ངི༌ ཀེན༌ལ༌ ནམ༌ཁའ༌ ཟིགས༌ཏེ༌ སྙིང༌ཤུགས༌ ཉམ༌པོ༌ མོལས༌, “ཨེ༌ཕ༌ཐའ༌” ཀ༌བོའེ༌ ཏོན༌ཏག༌པོ༌ “བེ༌ཤིག༌” ཨིན༌ནོག༌།
MAR 7:35 ཏེན༌ན༌མལ༌ལ༌ མི༌བོའ༌ གྱལ༌ལ༌ ཅོས༌ཏེ༌ ཚོར༌ ཡང༌ ཁོའེ༌ ལྕེ༌བོ༌ གྲོལ༌ཏེ༌ ཁོའ༌ སྤེ༌ར༌ སལ༌པོ༌ ཏང༌ཉན༌།
MAR 7:36 ཡེ༌ཤུའི༌ མི༌ཚོགས༌ལ༌ སུའང༌ མི༌ཤད༌ཅེས༌ལ༌ བཀའ༌ སལས༌། ཙམ༌ཤིག༌ མང༌ང༌ ཁོང༌ངི༌ མི༌ཤད༌ཅེས༌ལ༌ མོལ༌ནའང༌ མི༌གུན༌ནི༌ མང༌ང༌ མང༌པོ༌ ནས༌ཚུལ༌བོ༌ ཕེལ༌ཅུགས༌།
MAR 7:37 མི༌གུན༌ མ༌སྲན༌ཏྲེ༌ ཧ༌ལས༌ཏེ༌ ཟེརས༌, “ཁོང༌ངི༌ ཅི༌ ཛད༌ནའང༌ ཧ༌ལས༌ཤེས༌ ཡོང༌དུག༌། ཁོང༌ངི༌, མ༌ཚོར༌ཁན༌ལ༌ ཚོར༌ཅུག༌ཅེས༌ དང༌ སྤེ༌ར༌ ཏང༌ མ༌ཉན༌ཁན༌ལ༌ སྤེ༌ར༌ ཏང༌ཅུག༌ག༌ ཛད༌དུག༌།”
MAR 8:1 ཧ༌ལམ༌ ཏེན༌ན༌ཏུས༌ཤིག༌ག༌ ཞན༌ཡང༌ མི༌ཚོགས༌ ཆེན༌མོ༌ཞིག༌ ཛོམས༌, མི༌གུན༌ལ༌ ཟ༌གྱུ༌ མེད༌པ༌, གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ བོད༌ད༌ ཛད༌ཏེ༌ མོལས༌,
MAR 8:2 “འི༌ མི༌གུན༌ ང༌ ཉམ༌པོ༌ དུགས༌ཏེ༌ ཞག༌མ༌ སུམ༌ སོང༌ ཡང༌ ཟའ༌ཅེས༌ལ༌ ཅའང༌ མེད༌ པ༌སང༌, ང༌ སྙིང༌རྗེའ༌ སྐྱེའ༌རག༌།
MAR 8:3 ཀལ༌ཏེས༌ ངའེ༌ ཁོང༌གུན༌ ཁང༌པ༌ སྟོག༌རིའ༌ ལམ༌ཅུག༌ན༌, ཁོང༌གུན༌ ལམ༌བར༌ལ༌ གོ༌ཡོང༌ ཁོར༌ཏེ༌ གྱེལ༌ཨིན༌, ཅིའ༌ཟེར༌ན༌ ཁོང༌གུན༌ནི༌ ཕྲོའ༌ མ༌ ཐག༌རིང༌ནེ༌ ཡོངས༌ཁན༌ ཁ༌ཅིག༌གའང༌ ཡོད༌ཏེ༌ ཨིན༌ནོག༌།”
MAR 8:4 ཁོང༌ངི༌ ལོབ༌ཕྲུགས༌གུན༌ནི༌ ལན༌ཏངས༌, “ང༌དང༌ང༌ འི༌ མི༌གུན༌ལ༌ ཏང༌ཅེས༌སི༌ ཕིའ༌ ཏ༌གི༌ འི༌ རི༌སྟོང༌ངི༌ ནང༌ང༌ ཀ༌ནེ༌ ཐོབ༌ཨིན༌?”
MAR 8:5 ཡེ༌ཤུའི༌ ཁོང༌གུན༌ལ༌ ཏྲིའ༌ ཛདས༌, “ང༌དང༌ངི༌ ལག༌ག༌ ཏ༌གི༌ ཙམ༌ ཡོད༌།” ཁོང༌གུན༌ནི༌ ལན༌ཏངས༌, “ཏ༌གི༌ རྡུན༌ ཡོད༌ལེ༌།”
MAR 8:6 ཏེ༌ནེ༌ ཡེ༌ཤུའི༌ མི༌ཚོགས༌པོའ༌ སའེ༌ཀ༌ དུག༌ཅེས༌ལ༌ མོལས༌། ཁོང༌ངི༌ ཏ༌གི༌ རྡུན༌བོ༌ ནམས༌ས༌ ཛད༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཡང༌ ཏེ༌གུན༌ ཅགས༌ཏེ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལས༌, ཡང༌ ཁོང༌གུན༌ནི༌ མི༌ཚོགས༌ལ༌ བགོས༌ཏེ༌ ཏངས༌།
MAR 8:7 ཁོང༌གུན༌ནི༌ ལག༌ག༌ ཉ༌ ཆུ༌ངུན༌ ཁ༌ཅིག༌གའང༌ ཡོད༌པིན༌, ཡེ༌ཤུའི༌ ཏེ༌གུན༌ནི༌ ཕིའང༌ ཐུག༌རྗེ༌ཆེ༌ ཞུས༌ཏེ༌ ཁོང༌རང༌ངི༌ ལོབ༌ཕྲུགས༌གུན༌ལ༌ བགོས༌ཏེ༌ ཏང༌ཅེས༌སི༌ ཕིའ༌ མོལ༌ལ༌ ཛདས༌།
MAR 8:8 ཁོང༌གུན༌ནི༌ ཚིམས༌ཚིམས༌ ཟོས༌། སྟིང༌ནེ༌ ལོབ༌ཕྲུགས༌གུན༌ནི༌ ལག༌མ༌ ལུས༌ཁན༌ནི༌ ཏ༌གི༌གུན༌ དུམས༌པ༌ པག༌ཙེ༌ ཆེན༌མོ༌ རྡུན༌ གང༌།
MAR 8:9 ཏེ༌ མི༌ཚོགས༌སི༌ ནང༌ང༌ མི༌ 4,000 ཟམ༌ཤིག༌ ཡོད༌པིན༌། མི༌གུན༌ ཁང༌པ༌ ལོགས༌ཏེ༌ ལམ༌ཅུག༌ག༌ ཛད༌ཏེ༌
MAR 8:10 ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ གྲུ༌ཟིང༌ངི༌ ནང༌ང༌ ཞོན༌ཏེ༌ དལ༌མ༌ནུ༌ཐ༌ ཡུལ༌ཇོངས༌ལ༌ སྐྱོདས༌།
MAR 8:11 ཕ༌རུ༌ཤི༌པ༌གུན༌ ཡོངས༌ཏེ༌ གཙོ༌བོ༌ ཡེ༌ཤུའ༌ ཚོད༌ལྟས༌ཏེ༌ ཁོང༌ང༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཅེས༌ལ༌ ནམ༌ཁའ༌ནེ༌ སྟགས༌ཤིག༌ སྟོན༌ ཟེར༌ཏེ༌ འུ༌ཙུག༌ ཏངས༌།
MAR 8:12 ཏེ༌བོ༌ སན༌ན༌ཅིག༌ ཁོང༌ངི༌ སྙིང༌ཤུགས༌ ཏངས༌ཏེ༌ མོལས༌, “ཅི༌ཕིའ༌ འི༌ མི༌རབས༌པོའེ༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌? ངའེ༌ ཁྱོ༌ཞའ༌ དེན༌བ༌ ཟེར༌རད༌, ངའེ༌ འི༌ མི༌རབས༌པོའ༌ ཏེ༌ཙོགས༌ སྟགས༌ཤིག༌ མ༌ནེ༌ མི༌སྟན༌།”
MAR 8:13 ཏེ༌ནེ༌ ཁོང༌གུན༌ བོར༌ཏེ༌ ཁོང༌ ཚོའེ༌ འ༌ངོ༌ ཆོགས༌ལ༌ གྲུ༌ཟིང༌ངི༌ ནང༌ང༌ ཞོན༌ཏེ༌ སྐྱོད༌ད༌ ཛདས༌།
MAR 8:14 ལོབ༌ཕྲུགས༌གུན༌ལ༌ ཏ༌གི༌ ཁུར༌ར༌ལ༌ རྗེད༌, གྲུ༌ཟིང༌ངི༌ ནང༌ང༌ ཁོང༌གུན༌ནི༌ ལག༌ག༌ ཏ༌གི༌ ཅིག༌ མ༌ནེ༌ མེད༌པིན༌།
MAR 8:15 གཙོ༌བོ༌ ཡེ༌ཤུའི༌ ཁོང༌གུན༌ལ༌ སྤང༌པུད༌ད༌ ཛད༌ཏེ༌ མོལས༌, “ཕ༌རུ༌ཤི༌པ༌གུན༌ དང༌ ཧེ༌རོད༌དི༌ སྐྱུར༌ནེ༌ ཤང༌ ཅོས༌།”
MAR 8:16 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “ང༌དང༌ངི༌ ཏ༌གི༌ ཁུར༌ཏེ༌ མེད༌པ༌, ཁོང༌ངི༌ ཏེ༌བོ༌ མོལ༌ཏེ༌ ཨིན༌ནོག༌ག༌?”
MAR 8:17 ཡེ༌ཤུའི༌ ཏེ༌བོ༌ ཁྱེན༌ཏེ༌ ཏྲིའ༌ ཛདས༌, “ཏ༌གི༌ མེད༌ཁན༌ནི༌ སྐོར༌ལ༌ ཁྱོ༌ཞ༌གུན༌ནི༌ ཅིའ༌ སྤེ༌ར༌ ཏང༌ངད༌? ཏ༌རུང༌ངའང༌, ཁྱོ༌ཞ༌གུན༌ལ༌ མ༌ཐོང༌ང༌ ཡ༌ ཧ༌མ༌གོའ༌? ཁྱོ༌ཞ༌གུན༌ནི༌ སྙིང༌ ཏེ༌ཙམ༌ སྐྱོང༌པོ༌ ཨིན༌ན༌?
MAR 8:18 ཁྱོ༌ཞ༌གུན༌ལ༌ མིག༌ ཡོད༌ཏེའང༌ ཐོང༌ཐུབ༌བ༌ མེ༌རག༌ག༌?, ནམ༌ཅོག༌ ཡོད༌ཏེའང༌, ཚོར༌ཐུབ༌བ༌ མེ༌རག༌ག༌? ཅི༌ ཁྱོ༌ཞ༌གུན༌ལ༌ ཅའང༌ ཨིད༌ཏུ༌ མེ༌རག༌ག༌?
MAR 8:19 ངའེ༌ ཏ༌གི༌ ལྔ༌ནེ༌ མི༌ སྟོང༌ལྔ༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌?” ཁོང༌གུན༌ནི༌ ཟེརས༌, “རྕུག༌ཉིས༌ལེ༌།”
MAR 8:20 “ཡང༌ ཏ༌གི༌ རྡུན༌ནེ༌ མི༌ སྟོང༌ཞི༌ གྲངས༌ཅུགས༌ཏེ༌ ལུས༌ཁན༌ནི༌ ཏ༌གི༌ ཁྱོ༌ཞའེ༌ ལྡུས༌པ༌ པག༌ཙེ༌ ཙམ༌ གང༌?” ཁོང༌གུན༌ནི༌ ཟེརས༌, “རྡུན༌ལེ༌།”
MAR 8:21 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “ཏེ༌ནེ༌ ཏ༌རུང༌ངའང༌ ཁྱོ༌ཞ༌གུན༌ལ༌ ཧ༌གོའ༌ མེ༌རག༌ག༌?”
MAR 8:22 ཁོང༌གུན༌ བེད༌སའི༌ད༌ གྲོང༌ཁྱེར༌ལ༌ ལེབ༌བ༌ཅིག༌, མི༌ ཁ༌ཅིག༌གི༌ ཞ༌ར༌ཞིག༌ ཡེ༌ཤུ༌ ཡོད༌ས༌ ཁྱོངས༌, ཡང༌ ཇུ༌ཇུ༌ ཞུ༌ཨིན༌ ཁོའ༌ ཆག༌ རྩེའ༌ ཛད༌ཅེས༌ལ༌ ཞུ༌ཝ༌ ཕུལས༌།
MAR 8:23 ཡེ༌ཤུའི༌ ཞ༌ར༌བོའ༌ ལག༌པ༌ ཐམས༌ཏེ༌ གྲོང༌ཁྱེར༌ནེ༌ ཕི༌ལོག༌ག༌ ཁྱེར༌ར༌ ཛདས༌། ཁོའེ༌ མིག༌གི༌ཀ༌ ཐུ༌མག༌ གྱབས༌ཏེ༌ ཁོང༌རང༌ངི༌ ཆག༌ ཁོའེ༌ཀ༌ བོར༌ཏེ༌ ཏྲིའ༌ ཛདས༌, “ཁྱོ༌རང༌ང༌ ཅི༌ཏོང༌ཤིག༌ ཐོང༌དུག༌ག༌?”
MAR 8:24 ཁོའེ༌ འ༌ངོ༌ འི༌ངོའ༌ ལྟས༌ ཡང༌ ཟེརས༌, “ངའ༌ མི༌གུན༌ ཐོང༌དུག༌ལེ༌, ཨིན༌ནའང༌ སལ༌པོ༌ མན༌པ༌, ལྕང༌མ༌ གྲུལ༌ཁན༌ ཙོགས༌རིག༌།”
MAR 8:25 ཡེ༌ཤུའི༌ ཡང༌སྐྱར༌ ཁོང༌རང༌ངི༌ ཆག༌ ཁོའེ༌ མིག༌གུན༌ནི༌ཀ༌ བོར༌ར༌ ཛདས༌། ཏེ༌ནེ༌ ཁོའེ༌ མིག༌གུན༌ བེ༌ཏེ༌ ཁོའ༌ ཐོང༌ཅེས༌སི༌ ཁྱུད༌པོ༌ ལོགས༌ཏེ༌ ཐོབ༌, ཡང༌ ཁོའ༌ ཅི༌ཚང༌མ༌ སལ༌པོ༌ ཅོས༌ཏེ༌ ཐོང༌།
MAR 8:26 ཁོ༌ ཁང༌པ༌ ལམ༌ཅུག༌ག༌ ཛད༌ཨིན༌ ཡེ༌ཤུའི༌ མོལས༌, “ཁྱོ༌རང༌ ལོགས༌ཏེ༌ ཆ༌ ཟ༌ནེ༌, གྲོང༌ཁྱེར༌རི༌ ནང༌ང༌ མ༌ཆ༌།”
MAR 8:27 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ གཱ༌ལིལ༌ལི༌ནེ༌ ཀཱེ༌སར༌རིའ༌ ཕི༌ལི༌པི༌ ཉེ༌ཁོར༌རི༌ གྲོང༌སེབ༌གུན༌ལ༌ སྐྱོདས༌། ཁོང༌གུན༌ སྐྱོད༌ ཟ༌ནེ༌ ལམ༌མ༌ ཁོང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “མི༌གུན༌ནི༌ ང༌ སུ༌ ཨིན༌ནོག༌ ཟེར༌དུག༌?”
MAR 8:28 ཁོང༌གུན༌ནི༌ ལན༌ཏངས༌, “ཁ༌ཅིག༌གི༌ ཁྲུས༌སལ༌ཁན༌ ཡོ༌ཧཱ༌ནན༌, ཁ༌ཅིག༌གི༌ ལུང༌སྟོན༌པ༌ ཨེ༌ལི༌ཡཱ༌, ཡང༌ ཞན༌མ༌གུན༌ནི༌ ལུང༌སྟོན༌པ༌གུན༌ནི༌ ཕྲོ༌ནེ༌ ཅིག༌ཅིག༌ ཞུགས༌ཏེ༌ ཨིན༌ནོག༌ ཟེར༌དུག༌།”
MAR 8:29 ཏེ༌ནེ༌ ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “ཨིན༌ནའང༌ ཁྱོ༌ཞའེ༌ ང༌ སུ༌ ཨིན༌ནོག༌ ཟེར༌རད༌?” པི༌ཏྲར༌རི༌ ལན༌ཏངས༌, “ཉེ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཞུགས༌ཏེ༌ ཨིན༌ནོག༌།”
MAR 8:30 ཨིན༌ནའང༌ ཡེ༌ཤུའི༌ ཁོང༌གུན༌ལ༌ ཁོང༌ངི༌ སྐོར༌ལ༌ སུའང༌ མ༌ཤད༌ མོལ༌ཏེ༌ བཀའ༌ སལས༌།
MAR 8:31 ཏེ༌ནེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཀ༌ནེ༌ མི༌རིགས༌སི༌བུའ༌ རྡུག༌ངལ༌ མང༌པོ༌ ཉོངས༌ཏེ༌ སད༌གོ༌ཤེས༌ ཡང༌ ཞག༌ སུམ༌མི༌ སྟིང༌ནེ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ཅེས༌སི༌ སྐོར༌གུན༌ གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ ལབ༌ཅེས༌ གོ༌ཟུག༌ ཛདས༌།
MAR 8:32 ཏེ༌བོའེ༌ སྐོར༌ལ༌ ཁོང༌ངི༌ སལ༌པོ༌ ཅོས༌ཏེ༌ ཤད༌ད༌ ཛད༌པ༌, པི༌ཏྲར༌རི༌ ཁོང༌ སོ༌སོའ༌ ཁྱེར༌ཏེ༌ ཁའ༌སྐྱེས༌།
MAR 8:33 ཨིན༌ནའང༌ ཡེ༌ཤུ༌ གྱུར༌ར༌ ཛད༌ཏེ༌ ལོབ༌ཕྲུགས༌གུན༌ལ༌ ཟིགས༌ཨིན༌ པི༌ཏྲར༌ལ༌ ཁའ༌སྐྱེའ༌ ཛད༌ཨིན༌ མོལས༌, “ཤེ༌ཏན༌, ང༌ནེ༌ ཐག༌རིང༌ང༌ སོང༌། ཁྱོ༌རང༌ངི༌ སམ༌ཚུལ༌ དཀོན༌མཆོག༌གི༌ ཆོགས༌ནེ༌ མན༌པ༌, མིའི༌ ཆོགས༌ནེ༌ ཨིན༌ནོག༌།”
MAR 8:34 ཏེ༌ནེ༌ མི༌ཚོགས༌ དང༌ ལོབ༌ཕྲུགས༌གུན༌ལ༌ ཁོང༌ ཡོད༌ས༌ ཛོམ༌ཅེས༌ལ༌ བོད༌ད༌ ཛདས༌ ཡང༌ མོལས༌, “ངའེ༌ སྟིང༌རང༌ནེ༌ ཡོང༌ང༌ ཐད༌ཁན༌གུན༌, རང༌དོད༌ ཕངས༌ཏེ༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའ༌ བྲངས༌གོས༌།
MAR 8:35 རང༌སྲོག༌ སྐྱོབ༌ཉིན༌ ཡོད༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ང༌ དང༌ གའ༌མོའེ༌ ནས༌ཚུལ༌ལི༌ ཏོན༌ལ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ནི༌ དེན༌བའེ༌ མི༌ཚེ༌བོ༌ སྐྱོབ༌ཨིན༌།
MAR 8:36 མི༌ཞིག༌ག༌ ཇིག༌རྟེན༌ གང༌པོ༌ ཐོབ༌ཏེའང༌ རང༌ངི༌ ཐའ༌མེད༌པའེ༌ མི༌ཚེ༌ སྐྱལ༌ན༌ ཅི༌ ཕན༌ཐོགས༌?
MAR 8:37 ཡ༌ ཏེ༌བོའེ༌ ཚབས༌ལ༌ མི༌ཞིག༌གི༌ ཅི༌ ཏང༌ཉན༌ཨིན༌?
MAR 8:38 འི༌ མི༌རབས༌ དཀོན༌མཆོག༌གི༌ གྱབ༌ནེ༌ གྲུལ༌ཅེས༌ ཕངས༌ཁན༌ དང༌ སྡིག༌ཅན༌ གུན༌ནི༌ ཕྲོའ༌ ཀལ༌ཏེས༌ སུ༌ཞིག༌གི༌ ང༌ དང༌ ངའེ༌ ལབ༌ཞའེ༌ སྤང༌པོ༌ ཏང༌ཅེས༌ལ༌ ཁྲེལ༌བ༌ ཚོར༌ན༌, ང༌ མི༌རིགས༌སི༌བུ༌ ང༌རང༌ངི༌ ཡབ༌བི༌ ཟིར༌རྗིད༌དི༌ ནང༌ང༌ ཏམ༌པའེ༌ ཕོ༌ཉ༌གུན༌ ཉམ༌པོ༌ ལོགས༌ཏེ༌ ཡོང༌ ཟ༌ནེ༌, ངའང༌ ཁོའེ༌ཀ༌ ཁྲེལ༌བ༌ ཚོར༌ཨིན༌།”
MAR 9:1 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ཀ༌ ཡོད༌ཁན༌ ཁ༌ཅིག༌གི༌ དཀོན༌མཆོག༌གི༌ གྱལ༌སྲིད༌ ཝང༌ངི༌ ནང༌ང༌ སྐྱོད༌ཅེས༌པོ༌ ཐོང༌ཏེ༌ མ༌ནེ༌ མི༌ཤི༌།”
MAR 9:2 ཞག༌ དྲུག༌གི༌ སྟིང༌ནེ༌ གཙོ༌བོ༌ ཡེ༌ཤུའི༌ པི༌ཏྲར༌, ཡ༌ཀོབ༌ དང༌ ཡོ༌ཧཱ༌ནན༌ གུན༌ ཁྲིད༌ཏེ༌ སུའང༌ མེད༌ས༌ རི༌ ཐོན༌པོ༌ཞིག༌གི༌ཀ༌ སྐྱོདས༌། ཏེ༌རུ༌ ཁོང༌གུན༌ནི༌ དུན༌ལ༌ ཡེ༌ཤུའི༌ སྐུ༌ཟུགས༌ གང༌པོ༌ གྱུར༌ཏེ༌
MAR 9:3 ཁོང༌ངི༌ ནམ༌ཟའ༌ ལྟ༌མི༌ཉན༌ཅེས༌ འོད༌ཅན༌ ཀར༌པོ༌ གྱུར༌, ཇིག༌རྟེན༌ནི༌ ཀར༌པོ༌ ཅོ༌ཅེས༌སི༌ ཟས༌ ཅིག༌གིའང༌ ཏེ༌ཙོགས༌ ཀར༌པོ༌ ཅོ༌ མི༌ཉན༌།
MAR 9:4 ཏེ༌ནེ༌ ཁོང༌གུན༌ནི༌ ལུང༌སྟོན༌པ༌ མོ༌ཟེས༌ དང༌ ཨེ༌ལི༌ཡཱའེ༌ ཡེ༌ཤུ༌ ཉམ༌པོ༌ ཞལ༌ཏ༌ སལ༌ཨིན༌ ཇལ༌།
MAR 9:5 པི༌ཏྲར༌རི༌ ཡེ༌ཤུའ༌ ཟེརས༌, “ལོབ༌བོན༌ལེ༌ ང༌ཞའ༌ འི༌ཀ༌ ཡོད༌ཅེས༌པོ༌ མ༌གྱལ༌ལ༌ སོང༌། ང༌ཞའེ༌ ཞུགས༌ས༌ སུམ༌ རྩིག༌ཨིན༌, ཉེ༌རང༌ངི༌ ཕིའ༌ ཅིག༌, མོ༌ཟེས༌སི༌ ཕིའ༌ ཅིག༌, ཡང༌ ཨེ༌ལི༌ཡཱའེ༌ ཕིའ༌ ཅིག༌།”
MAR 9:6 ཁོའ༌ ཅི༌ ཟེར༌གོ༌ཤེས༌པོ༌ ཧ༌མ༌གོ༌པ༌, ཁོའེ༌ ཏེ༌བོ༌ ཟེརས༌, ཁོང༌གུན༌ མ༌སྲན༌ཏྲེ༌ ཇིགས༌ཏེ༌ ཡོད༌པིན༌།
MAR 9:7 ཏེ༌ནེ༌ ཁོང༌གུན༌ སྲིན༌ནི༌ ཀབས༌, ཡང༌ སྲིན༌ནི༌ ནང༌ནེ༌ སུང༌སྐད༌ཅིག༌གི༌ མོལས༌, “འི༌བོ༌ ངའེ༌ ཅེས༌པའེ༌ བུ༌ཚ༌ ཨིན༌, ཁོའེ༌ ཟེར༌ཁན༌གུན༌ལ༌ ཉོན༌།”
MAR 9:8 ཧུན༌མེད༌ལ༌, ཁོང༌གུན༌ནི༌ ཐའ༌ཐོ༌ཐའ༌མའ༌ ལྟའ༌ཅིག༌ ཡེ༌ཤུ༌ ཅིག༌པོ༌ མ༌ནེ༌ མོ༌ཟེས༌ དང༌ ཨེ༌ལི༌ཡཱའ༌ མ༌ཐོང༌།
MAR 9:9 རི༌ནེ༌ བབས༌ཏེ༌ སྐྱོད༌ཨིན༌ ཡོད༌ ཟ༌ནེ༌ ཡེ༌ཤུའི༌ ཁོང༌གུན༌ལ༌ མི༌རིགས༌སི༌བུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ མ༌ནེ༌ ཁོང༌གུན༌ནི༌ ཐོང༌ཁན༌བོ༌ སུའང༌ མི༌ཤད༌ཅེས༌ལ༌ བཀའ༌ སལས༌།
MAR 9:10 ཏེ༌བོའེ༌ཕིའ༌ ཁོང༌གུན༌ནི༌ ཏེ༌གུན༌ སུ༌ཞིག༌གའང༌ མ༌ཤད༌ད༌ སང༌ཝའེ༌ ནང༌ང༌ བོརས༌ ཨིན༌ནའང༌ ཁོང༌རང༌ ཅིག༌ དང༌ ཅིག༌ག༌ ཏྲིས༌, “‘ཤི༌ཁན༌གུན༌ནི༌ ཕྲོ༌ནེ༌ ལངས༌ཤེས༌པོ༌’ ཅི༌ མོལ༌ཏེ༌ ཨིན༌ཧེ༌?”
MAR 9:11 ཏེ༌ནེ༌ ཁོང༌གུན༌ནི༌ ཡེ༌ཤུའ༌ ཏྲིས༌, “ཆོས༌ཁྲིམས༌ལ༌ ཁས༌པ༌གུན༌ནི༌ མ༌ཤི༌ཀ༌ སྐྱོད༌དི༌ སང༌ སྔུན༌ལ༌ ལུང༌སྟོན༌པ༌ ཨེ༌ལི༌ཡཱ༌ སྐྱོད༌གོས༌ ཅིའ༌ ཟེར༌ཏེ༌ ཨིན༌ནོག༌?”
MAR 9:12 ཡེ༌ཤུའི༌ ལན༌སལས༌, “ཏན༌ཏན༌ལ༌, ཅི༌ཚང༌མ༌ གྲལ༌གྲིག༌ ཅོ༌ཅེས༌ལ༌ ཨེ༌ལི༌ཡཱ༌ སྔུན༌ལ༌ ཡོང༌གོས༌། ཏེ༌ནེ༌ ཅི༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ལ༌ནོག༌, ‘མི༌རིགས༌སི༌བུའ༌ རྡུག༌ངལ༌ ཐོང༌ཏེ༌ རིན༌མེད༌ ཅོས༌ཏེ༌ ཕང༌གོས༌’?
MAR 9:13 ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, ཨེ༌ལི༌ཡཱ༌ ཡོང༌ ཚར༌ཏེ༌ ཨིན༌, ཁོང༌གུན༌ནི༌ ཁོ༌ ཉམ༌པོ༌ ཅོ༌ཨིན༌ སམ༌ཁན༌ ཚང༌མ༌ ཅོས༌, ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ ཁོའེ༌ སྐོར༌ལ༌ བྲིའ༌ཛད༌ཏེ༌ ཡོད༌།”
MAR 9:14 ཁོང༌གུན༌ རི༌ནེ༌ བབས༌ཏེ༌ སྐྱོད༌ད༌ཅིག༌, མི༌ཚོགས༌ ཆེན༌མོ༌ཞིག༌གི༌ ཞན༌ ལོབ༌ཕྲུགས༌གུན༌ལ༌ སྐོར༌ཏེ༌ ཡང༌ ཆོས༌ཁྲིམས༌ལ༌ ཁས༌པ༌ ཁ༌ཅིག༌གི༌ ཁོང༌གུན༌ ཉམ༌པོ༌ ཟེར༌ཟེར༌ ཏང༌ཨིན༌ ཟིགས༌།
MAR 9:15 མི༌ཚོགས༌ གང༌པོའེ༌ ཡེ༌ཤུ༌ ཇལ༌ལ༌ཅིག༌, ཁོང༌གུན༌ སྲན༌ཏྲེ༌ ཐད༌ཏེ༌ ཧན༌གྲང༌ སོང༌ ཡང༌ བང༌ཏང༌ཨིན༌ ཁོང༌ང༌ ཐུག༌ག༌ལ༌ སོང༌།
MAR 9:16 ཡེ༌ཤུའི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “ཁྱོ༌ཞའེ༌ ཁོང༌གུན༌ ཉམ༌པོ༌ ཅི༌ སྐོར༌ལ༌ ཟེར༌ཟེར༌ ཏང༌ངད༌པིན༌།”
MAR 9:17 མི༌ཚོགས༌སི༌ ཕྲོ༌ནེ༌ མི༌ཞིག༌གི༌ ལན༌ཏངས༌, “ལོབ༌བོན༌ལེ༌ ངའེ༌ ང༌རང༌ངི༌ བུ༌ཚ༌ རྡུད༌ ཞུགས༌ཏེ༌ སྤེ༌ར༌ ཏང༌མ༌ཉན༌ཁན༌བོ༌ ཉེ༌རང༌ངི༌ཀ༌ ཁྱོངས༌པིན༌།
MAR 9:18 རྡུད༌པོ༌ ཁོའེ༌ ནང༌ང༌ ཞུགས༌ས༌ཅིག༌ ཁོའེ༌, ཁོ༌ སའེ༌ཀ༌ གྱབ༌དུག༌ ཡང༌ ཁའ༌ནེ༌ སྦོའ༌ བིང༌ཨིན༌ སོ༌ སྲིགས༌ཏེ༌ ཟུགས༌པོ༌ སྲན༌ཏྲེ༌ གྱུར༌དུག༌། ངའེ༌ ཉེ༌རང༌ངི༌ ལོབ༌ཕྲུགས༌གུན༌ལ༌ རྡུད༌པོ༌ ཕིང༌ཅེས༌ལ༌ ཞུ༌ཝ༌ ཕུལ༌པིན༌, ཨིན༌ནའང༌ ཁོང༌གུན༌ལ༌ ཏེ༌བོ༌ ཕིང༌ མ༌ཉན༌།”
MAR 9:19 ཡེ༌ཤུའི༌ མོལས༌, “ཏད༌པ༌ མེད༌ཁན༌ནི༌ མི༌རབས༌, ནམ༌ཚོག༌པ༌ ང༌ ཁྱོ༌ཞ༌གུན༌ ཉམ༌པོ༌ དུག༌? ནམ༌ཚོག༌པ༌ ངའེ༌ ཁྱོ༌རང༌གུན༌ལ༌ སྲན༌གོས༌? བུ༌ཚ༌བོ༌ ང༌ ཡོད༌ས༌ ཁྱོང༌།”
MAR 9:20 ཏེ༌ནེ༌ ཁོང༌གུན༌ནི༌ བུ༌ཚ༌བོ༌ ཁྱོངས༌། ཡེ༌ཤུ༌ ཐོང༌ང༌ཅིག༌, རྡུད༌པོའེ༌ ཕྲུ༌གུའི༌ ཟུགས༌པོ༌ མ༌སྲན༌ཏྲེ༌ སྲུགས༌, ཡང༌ ཁོ༌ སའེ༌ཀ༌ གྱེལ༌། ཟུགས༌པོ༌ འི༌ངོ༌ འ༌ངོའ༌ རིལ༌ཨིན༌ ཁོའེ༌ ཁའེ༌ ནང༌ནེ༌ སྦོའ༌ བིང༌།
MAR 9:21 ཡེ༌ཤུའི༌ ཕྲུ༌གུའི༌ ཨ༌བའ༌ ཏྲིའ༌ ཛདས༌, “ཁོའ༌ འི༌ ཟུ༌མོ༌བོ༌ ནམ༌ནེ༌ ཕར༌ལ༌ ཡོད༌པིན༌?” ཁོའེ༌ ལན༌ཏངས༌, “ཁོ༌ ཕྲུ༌གུ༌ ཆུ༌ངུན༌ ཡོད༌ ཟ༌ནེ༌ ཕར༌ལ༌།
MAR 9:22 རྡུད༌དི༌ ཁོ༌ ལན༌ མང༌པོ༌ སད༌ཅེས༌སི༌ ཕིའ༌ མེ༌ དང༌ ཆུའི༌ ནང༌ང༌ ཕངས༌, ཀལ༌ཏེས༌ ཉེ༌རང༌ང༌ ཅི༌ཏོང༌ཤིག༌ ཛད༌ཉན༌ཅེས༌ ཡོད༌ན༌ སྙིང༌རྗེ༌ ཛད༌ཏེ༌ ང༌ཞའ༌ རོགས༌ ཅོའ༌ ཛད༌།”
MAR 9:23 ཡེ༌ཤུའི༌ ཁོའ༌ མོལས༌, “ཅིའ༌ ཟེར༌རད༌ ‘ཀལ༌ཏེས༌ ཉེ༌རང༌ང༌ ཉན༌ན༌?’ ངའེ༌ཀ༌ ཨིད༌ཤེས༌ ཅོ༌ཁན༌གུན༌ནི༌ ཕིའ༌ ངའ༌ ཅི༌ཚང༌མ༌ ཅོ༌ཐུབ༌ཅེས༌ ཡོད༌།”
MAR 9:24 ཏེན༌ན༌མལ༌ལ༌ ཕྲུ༌གུའི༌ ཨ༌བའེ༌ ཀུ༌ཅོ༌ ཏངས༌ཏེ༌ ཟེརས༌, “ངའེ༌ ཏད༌པ༌ ཅོའད༌, ངའེ༌ ཏད༌པ༌བོ༌ ལྡན༌ཅུག༌ག༌ ཛད༌ཏེ༌ སྟན༌པོ༌ གྱུར༌ཅེས༌སི༌ ནང༌ང༌ རོགས༌ ཛད༌དའང༌།”
MAR 9:25 ཡེ༌ཤུའི༌ མི༌ཚོགས༌ བང༌ཏང༌ཨིན༌ ཁོང༌ ཡོད༌ས༌ ཡོང༌ང༌ ཟིགས༌ས༌ཅིག༌, རྡུད༌པོའ༌ ཁའ༌སྐྱེའ༌ ཛད༌ཏེ༌ མོལས༌, “ཚོར༌ མི༌ཅུག༌ཁན༌ དང༌ སྤེ༌ར༌ ཏང༌ མི༌ཅུག༌ཁན༌ནི༌ རྡུད༌, ངའེ༌ ཁྱོ༌རང༌ང༌ འི༌ ཕྲུ༌གུའི༌ ནང༌ནེ༌ བིངས༌ཏེ༌ ཡང༌སྐྱར༌ ཁོའེ༌ ནང༌ང༌ མ༌ནེ༌ མི༌ཆ༌ཅེས༌ལ༌ བཀའ༌ ཏང༌ངད༌།”
MAR 9:26 ཏེ༌ནེ༌ རྡུད༌པོའེ༌ ཀུ༌ཅོ༌ ཏངས༌ཏེ༌ བུ༌ཚའེ༌ ཟུགས༌པོ༌ མ༌སྲན༌ཏྲེ༌ སྲུག༌ཨིན༌ སའ༌ གྱབས༌ ཡང༌ ཁོའེ༌ ནང༌ནེ༌ བིངས༌ཏེ༌ ཡོངས༌། བུ༌ཚ༌བོ༌ ཤི༌ཁན༌ ཙོགས༌ ཐོང༌ ཡང༌ མི༌ མང༌ཆེའེ༌, “ཁོ༌ ཤི༌ཏེ༌ ཨིན༌ནོག༌” ཟེརས༌།
MAR 9:27 ཨིན༌ནའང༌ ཡེ༌ཤུའི༌ ཆག༌ རྐྱང༌ང༌ ཛད༌ཏེ༌ བུ༌ཚ༌བོའ༌ ལང༌ཅེས༌ལ༌ རོགས༌ ཛདས༌, ཡང༌ ཁོ༌ ཀོའག༌ ལངས༌།
MAR 9:28 སྟིང༌ནེ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཁང༌པའེ༌ ནང༌ང༌ ཅིག༌པོ༌ ཡོད༌ ཟ༌ནེ༌, ཁོང༌གུན༌ནི༌ ཡེ༌ཤུའ༌ ཏྲིས༌, “ང༌ཞ༌གུན༌ལ༌ རྡུད༌པོ༌ ཅིའ༌ ཕིང༌ མ༌ཉན༌ན༌ ཨིན༌ནོག༌?”
MAR 9:29 ཁོང༌ངི༌ ཁོང༌གུན༌ལ༌ མོལས༌, “འི༌ ཙོགས༌སི༌ རྡུད༌གུན༌, མོས༌ལམ༌ ཅིག༌པོ༌ གྱུད༌ཏེ༌ ཕིང༌ ཉན༌ན༌ནོག༌།”
MAR 9:30 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌, ཏེ༌ ནས༌ས༌ནེ༌ བིངས༌ཏེ༌ གཱ༌ལིལ༌ལིའི༌ ཡུལ༌ཇོངས༌ གྱུད༌ཏེ༌ སྐྱོདས༌། ཡེ༌ཤུའི༌ ཁོང༌ ཡོད༌སའེ༌ ནས༌ས༌ སུའང༌ གྱུས༌ ཆ༌ཅུག༌ཉིན༌ མེད༌པིན༌,
MAR 9:31 ཅིའ༌ཞུ༌ན༌ ཁོང༌ངི༌ ཁོང༌རང༌ངི༌ ལོབ༌ཕྲུགས༌གུན༌ལ༌ ལབ༌ཞ༌ སལ༌ཅེས༌ ཨིན༌པིན༌། ཁོང༌ངི༌ ཁོང༌གུན༌ལ༌ མོལས༌, “མི༌རིགས༌སི༌བུའ༌ ངོ༌ལོག༌ ཅོས༌ཏེ༌ གྲ༌འོ༌གུན༌ནི༌ ལག༌ག༌ སྟད༌ཨིན༌། ཁོང༌གུན༌ནི༌ ཁོ༌ སད༌ཨིན༌, ཡང༌ ཞག༌མ༌ སུམ༌མི༌ སྟིང༌ནེ༌ སོན༌ཏེའ༌ ལངས༌ཤུག༌ག༌ ཛད༌ཨིན༌།”
MAR 9:32 ཁོང༌གུན༌ལ༌ ཁོང༌ངི༌ མོལ༌ཁན༌བོ༌ ཧ༌མ༌གོ༌, ཨིན༌ནའང༌ ཁོང༌གུན༌ལ༌ ཏེ༌བོའེ༌ ཏོན༌བོ༌ ཏྲི༌ཅེས༌སི༌ ཧམ༌པ༌ མ༌ཡོངས༌།
MAR 9:33 ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ ལེབས༌ཏེ༌ ཁང༌པ༌ཞིག༌གི༌ ནང༌ང༌ དུགས༌ཏེ༌ ཡོད༌ཏུས༌, ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “ང༌དང༌གུན༌ གྲུལ༌ཏེ༌ ཡོང༌ ཟ༌ནེ༌, ཁྱོ༌ཞ༌གུན༌ནི༌ ཅི༌ སྐོར༌ལ༌ ཟེར༌ཟེར༌ ཏང༌ངད༌པིན༌?”
MAR 9:34 ཨིན༌ནའང༌ ཁོང༌གུན༌ནི༌ ལན༌ མ༌ཏངས༌, ཅིའ༌ཟེར༌ན༌ ཁོང༌གུན༌ནི༌ ཁོ༌རང༌གུན༌ནི༌ ཕྲོ༌ནེ༌ ཀྲག༌ཤོག༌ སུ༌ ཨིན༌ཁན༌བོའེ༌ སྐོར༌ལ༌ ཟེར༌ཟེར༌ ཏང༌ངད༌པིན༌།
MAR 9:35 ཁོང༌ སའེ༌ཀ༌ ཞུགས༌ཏེ༌ ལོབ༌ཕྲུགས༌ རྕུག༌ཉིས༌པོའ༌ ཁོང༌རང༌ ཡོད༌ས༌ བོད༌ད༌ ཛདས༌ ཡང༌ མོལས༌, “ཚང༌མའེ༌སང༌ གོ༌ཤོག༌པོ༌ གྱུར༌ཉིན༌ ཡོད༌ཁན༌གུན༌ ཚང༌མའེ༌སང༌ སྟིང༌ཇུག༌པོ༌ ཡང༌ ཚང༌མའེ༌ ཡོག༌པོ༌ གྱུར༌གོས༌།”
MAR 9:36 ཕྲུ༌གུ༌ ཆུ༌ངུན༌ཞིག༌ ཁྱོངས༌ཏེ༌ ཁོང༌གུན༌ནི༌ སྐྱིལ༌ལ༌ ལང༌ཅུག༌ག༌ ཛདས༌། ཡེ༌ཤུའི༌ ཕྲུ༌གུ༌བོ༌ ཁུར༌ར༌ ཛདས༌ཏེ༌ ཁོང༌གུན༌ལ༌ མོལས༌,
MAR 9:37 “ངའེ༌ མིང༌ངི༌ ནང༌ང༌ སུ༌ཞིག༌གི༌ འི༌ ཕྲུ༌གུ༌ ཆུ༌ངུན༌ཞིག༌ག༌ གའ༌སུས༌ ཅོ༌ན༌ ངའ༌ གའ༌སུས༌ ཅོས༌ཏེ༌ ཨིན༌, ཡང༌ སུ༌ཞིག༌གི༌ ངའ༌ གའ༌སུས༌ ཅོ༌ན༌, ཁོའེ༌ ངའ༌ ཅིག༌པོའ༌ མན༌པ༌, ང༌ ཀལ༌ལ༌ ཛད༌ཁན༌ནི༌ ཡབ༌བའང༌ གའ༌སུས༌ ཞུས༌ཏེ༌ ཨིན༌ནོག༌།”
MAR 9:38 ཡོ༌ཧཱ༌ནན༌ནི༌ ཟེརས༌, “ལོབ༌བོན༌ལེ༌ མི༌ཞིག༌གི༌ ཉེ༌རང༌ངི༌ ཚན༌ ཁུར༌ཏེ༌ རྡུད༌ ཕིང༌ང༌ ང༌ཞའེ༌ ཐོང༌, ཡང༌ ང༌ཞའེ༌ ཁོའ༌ ཏེ༌བོ༌ མ༌ཅོ༌ ཟེར༌པིན༌ ཅིའ༌ཟེར༌ན༌ ཁོ༌ ང༌དང༌ངི༌ ཕྲོ༌པ༌ མན༌པིན༌།”
MAR 9:39 ཡེ༌ཤུའི༌ མོལས༌, “ཁོའ༌ སྒག༌ མ༌སྒག༌, ངའེ༌ མིང༌ ཁྱུད༌ཅན༌ ཀོལ༌ཏེ༌ ལྟས༌ སྟན༌ཏེ༌ སྟིང༌ནེ༌ ཁོའ༌ ངའེ༌ སྐོར༌ལ༌ སྤེ༌ར༌ ངན༌པ༌ ཟེར༌ མི༌ཉན༌།
MAR 9:40 ང༌དང༌ངི༌ གྱབ༌གལ༌ མ༌ཅོ༌ཁན༌གུན༌ ང༌དང༌གུན༌ནི༌ ཆོགས༌པ༌ ཨིན༌ནོག༌།
MAR 9:41 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞའ༌ མ༌ཤི༌ཀའེ༌ ཨིན༌ཅེས༌པོའེ༌ ཆུ༌ ཀོ༌རེ༌ གང༌ ཏང༌ཁན༌གུན༌ལ༌ ཏན༌ཏན༌ལ༌ སོལ༌རས༌ སལ༌ལ༌ ཛད༌ཨིན༌།”
MAR 9:42 “ཨིན༌ནའང༌ ང༌ ཏད༌པ༌ ཅོ༌ཁན༌ འི༌ ཆུ༌ངུན༌གུན༌ནི༌ ནང༌ནེ༌ ཅིག༌ག༌ སྡིག༌པ༌ ཅོ༌ཅུག༌གི༌ སང༌ ཁོ༌རང༌ངི༌ སྐྱེའ༌ རན༌ཐག༌གི༌ རྡོའ༌ ཆེན༌མོ༌ ཏགས༌ཏེ༌ གྱ༌ཚོའེ༌ ནང༌ང༌ ཕང༌ན༌ གྱལ༌།
MAR 9:43 ཀལ༌ཏེས༌ ཁྱོ༌རང༌ངི༌ ལག༌པའེ༌ ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌, ཅད༌ཏེ༌ ཕངས༌ཏོང༌། ལག༌པ༌ ཉིས༌ ཡོད༌ཏེ༌ ཉལ༌ཝའེ༌ མེའེ༌, མ༌ནེ༌ མ༌ཤི༌ཁན༌ནི༌ ནང༌ང༌ ཕང༌ཅུག༌གི༌ སང༌, ལག༌པ༌ ཅིག༌ ཉམ༌པོ༌ ཐའ༌མེད༌པའེ༌ མི༌ཚེའེ༌ ནང༌ང༌ ཆ༌ན༌ གྱལ༌།
MAR 9:44 
MAR 9:45 ཀལ༌ཏེས༌ ཁྱོ༌རང༌ངི༌ རྐང༌པའེ༌, ཁྱོ༌རང༌ང༌ སྡིག༌པ༌ ཅོ༌ཅུག༌གད༌ན༌ ཏེ༌བོ༌ ཅད༌ཏོང༌། རྐང༌པ༌ ཉིས༌ ཡོད༌ཏེ༌ ཉལ༌ཝའེ༌ ནང༌ང༌ ཕང༌ཅུག༌གི༌ སང༌ རྐང༌པ༌ ཅིག༌ ཉམ༌པོ༌ ཐའ༌མེད༌པའེ༌ མི༌ཚེའེ༌ ནང༌ང༌ ཆ༌ན༌ གྱལ༌།
MAR 9:46 
MAR 9:47 ཡང༌ ཀལ༌ཏེས༌ ཁྱོ༌རང༌ངི༌ མིག༌གི༌ སྡིག༌པ༌ ཅོ༌ཅུག༌ན༌, ཏེ༌བོ༌ བྲུས༌ཏོང༌། མིག༌ ཉིས༌ ཡོད༌ཏེ༌ ཉལ༌ཝའེ༌ ནང༌ང༌ ཕང༌ཅུག༌གི༌ སང༌, མིག༌ ཅིག༌ ཉམ༌པོ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཆ༌ན༌ གྱལ༌།
MAR 9:48 ‘ཉལ༌ཝའེ༌ ནང༌ང༌ ཤའ༌ ཟའ༌ཁན༌ནི༌ བུ༌ཙིག༌གུན༌ མ༌ནེ༌ མི༌ཤི༌, ཡང༌ མེ༌བོ༌ ཏུས༌གྱུན༌ བར༌ཨིན༌ དུག༌ག༌ནོག༌།’”
MAR 9:49 “ཚཱ༌ ཉམ༌པོ༌ ཆོད༌པ༌ ལག༌མོ༌ ཅོའ༌ ཙོགས༌ལ༌, ངའེ༌ ནང༌ང༌ ཏད༌པ༌ ཅོ༌ཁན༌ ཚང༌མའ༌, མེ༌ གྱུད༌ཏེ༌ ལག༌མོ༌ ཅོ༌ཨིན༌།
MAR 9:50 ཚཱ༌ ཕན༌ཐོགས༌ཅན༌ ཨིན༌ནོག༌, ཨིན༌ནའང༌ ཀལ༌ཏེས༌ ཚཱའེ༌ བྲོད༌པོ༌ ཡོལ༌ན༌ ཏེ༌བོ༌ ཁྱོ༌ཞའེ༌ ཀ༌ཟུག༌གི༌ ལོགས༌ཏེ༌ ཁྱོང༌ཨིན༌? ཁྱོ༌ཞའེ༌ མི༌ཚེ༌བོ༌ ཚཱ༌ ཙོགས༌ལ༌ བྲོད༌ཅན༌ ཡོང༌གོས༌, ཡང༌ ཅིག༌ དང༌ ཅིག༌གི༌ ནང༌ང༌ ཞི༌དེ༌ ཉམ༌པོ༌ དུག༌།”
MAR 10:1 གཙོ༌བོ༌ ཡེ༌ཤུ༌ ཀ༌ཕར༌ན༌ཧུམ༌ནེ༌ བིང༌ཏེ༌ ཡ༌ཧུ༌དཱའེ༌ ཡུལ༌ཇོངས༌ དང༌ ཡོར༌དཱན༌ ལྩངས༌པོའེ༌ ཕར༌ཀ༌ སྐྱོདས༌། ཡང༌སྐྱར༌ མི༌ཚོགས༌ ཁོང༌ ཡོད༌ས༌ ཛོམས༌, ཡང༌ ལོབས༌ ནང༌ཞིན༌ ཁོང༌ངི༌ ཁོང༌གུན༌ལ༌ ལབ༌བ༌ ཛདས༌།
MAR 10:2 ཚོད༌ལྟ༌ཅེས༌ལ༌ ཕ༌རུ༌ཤི༌པ༌ ཁ༌ཅིག༌ ཁོང༌ ཡོད༌ས༌ ཡོངས༌ཏེ༌ ཏྲིས༌, “བུ༌ཚ༌ཞིག༌ག༌ ཁྲིམས༌ ནང༌ཞིན༌ ཁོ༌རང༌ངི༌ ན༌མ༌ ཅད༌ ཆོག༌ག༌ནོག༌ག༌?”
MAR 10:3 ཡེ༌ཤུའི༌ ལན༌སལ༌ལ༌ ཛདས༌, “ན༌མ༌ ཅད༌ཅས༌སི༌ སྐོར༌ལ༌ ལུང༌སྟོན༌པ༌ མོ༌ཟེས༌སི༌ ཁྲིམས༌སི༌ ནང༌ང༌ ཅི༌ བྲིས༌ཏེ༌ དུག༌?”
MAR 10:4 ཁོང༌གུན༌ནི༌ ལན༌ཏངས༌, “མོ༌ཟེས༌སི༌ ན༌མའ༌ ཅད༌ཁན༌ནི༌ ལག༌ཁྱེར༌ ཏངས༌ཏེ༌ བུ༌ཚ༌ཞིག༌ག༌ ན༌མ༌ ཅད༌ཅེས༌སི༌ གོངས༌པ༌ སལ༌དུག༌།”
MAR 10:5 ཨིན༌ནའང༌ ཡེ༌ཤུའི༌ ལན༌སལས༌, “མོ༌ཟེས༌སི༌ འི༌ ཁྲིམས༌པོ༌ ཁྱོ༌ཞའེ༌ ཕ༌མེས༌པོ༌གུན༌ནི༌ སྙིང༌ སྐྱོང༌པོ༌ ཡོད༌ཅེས༌པོའེ༌ བྲིས༌ཏེ༌ ཨིན༌ནོག༌།
MAR 10:6 ཨིན༌ནའང༌ ‘གོ༌ཟུག༌གི༌ཀ༌ ཅི༌ཚང༌མ༌ ཛད༌ ཟ༌ནེ༌, དཀོན༌མཆོག༌གི༌ བུ༌ཚ༌ དང༌ བུ༌མོ༌ ཅོའ༌ ཛདས༌།’
MAR 10:7 ‘ཏེན༌ན༌ གྱུན༌ཚན༌བོའེ༌ ཕིའ༌ བུ༌ཚ༌ ཁོ༌རང༌ངི༌ ཨ༌བ༌ དང༌ ཨ༌མ༌ནེ༌ བེ༌ཏེ༌ ཁོ༌རང༌ངི༌ ན༌མ༌ ཉམ༌པོ༌ ཛོམས༌ཏེ༌
MAR 10:8 ཁོང༌ ཉིས༌ཀོ༌ ཟུགས༌པོ༌ ཅིག༌ གྱུར༌ར༌ནོག༌’ ཏ༌ ཁོང༌གུན༌ ཉིས༌ མན༌པ༌ ཅིག༌ ཨིན༌ནོག༌།
MAR 10:9 ཏེ༌བོའེ༌ཕིའ༌ དཀོན༌མཆོག༌གི༌ ཅིག༌ ཛད༌ཁན༌བོ༌ སུ༌ཞིག༌གའང༌ ཕེ༌ མ༌ཅུག༌།”
MAR 10:10 ཡེ༌ཤུ༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཁང༌པའེ༌ ནང༌ང༌ ཞུགས༌ཏེ༌ ཡོད༌ཏུས༌, ཁོང༌གུན༌ནི༌ ཁོང༌ང༌ ཏེ༌བོའེ༌ སྐོར༌ལ༌ ཏྲིས༌།
MAR 10:11 ཁོང༌ངི༌ ཁོང༌གུན༌ལ༌ མོལས༌, “ཁོ༌རང༌ངི༌ ན༌མ༌ ཅད༌ཏེ༌ ཞན༌ བུ༌མོ༌ཞིག༌ ཉམ༌པོ༌ ན༌མ༌ ཅོ༌ཁན༌བོའེ༌ ཁོ༌རང༌ངི༌ ན༌མའེ༌ གྱབ༌གལ༌ལ༌ ལོག༌ཡེམ༌ ཅོས༌ཏེ༌ ཨིན༌ནོག༌
MAR 10:12 ཡང༌ ཀལ༌ཏེས༌ བུ༌མོ༌ཞིག༌གི༌ ཁོ༌རང༌ངི༌ མག༌པ༌ ཅད༌ཏེ༌ ཞན༌ཞིག༌ ཉམ༌པོ༌ བག༌མ༌ ཅོ༌ན༌, ཁོའེ༌ ལོག༌ཡེམ༌ ཅོས༌ཏེ༌ ཨིན༌ནོག༌།”
MAR 10:13 ཕ༌མ༌གུན༌ནི༌ ཕྲུ༌གུ༌ ཆུ༌ངུན༌གུན༌ གཙོ༌བོ༌ ཡེ༌ཤུའི༌ ཆག༌རྩེའ༌ ཛད༌ཏེ༌ ཅིན༌ལབས༌ སལ༌ཅེས༌ལ༌ ཁྱོངས༌། ཨིན༌ནའང༌ ཁོང༌ངི༌ ལོབ༌ཕྲུགས༌གུན༌ནི༌ ཕ༌མ༌གུན༌ལ༌ ཡེ༌ཤུའ༌ འོབ༌གྱལ༌ སྟན༌ པ༌སང༌ ཁའ༌སྐྱེས༌།
MAR 10:14 ཏེ༌བོ༌ ཟིགས༌ཏེ༌ ཡེ༌ཤུའ༌ ཐུགས༌སྲོ༌ སྐྱོདས༌ ཡང༌ ཁོང༌གུན༌ལ༌ མོལས༌, “ཕྲུ༌གུ༌ ཆུ༌ངུན༌གུན༌ སྒག༌ མ༌སྒག༌ག༌ ང༌ ཡོད༌ས༌ ཡོང༌ཅུག༌, འི༌ཙོགས༌གུན༌ནི༌ ཕིའ༌ དཀོན༌མཆོག༌གི༌ གྱལ༌སྲིད༌པོ༌ ཨིན༌།
MAR 10:15 ངའེ༌ ཁྱོ༌ཞའ༌ དེན༌བ༌ ཟེར༌རད༌ དཀོན༌མཆོག༌གི༌ གྱལ༌སྲིད༌, ཕྲུ༌གུ༌ ཆུ༌ངུན༌གུན༌ ཙོགས༌ལ༌ ལེན༌ཏེ༌ མ༌ནེ༌ ཏེ༌ནང༌ང༌ ཞུགས༌ མི༌ཉན༌།”
MAR 10:16 ཏེ༌ནེ༌ ཁོང༌ངི༌ ཕྲུ༌གུ༌གུན༌ ཁོང༌རང༌ངི༌ དུན༌ལ༌ ཁྱོང༌ང༌ ཛདས༌, ཡང༌ ཁོང༌གུན༌ནི༌ཀ༌ ཆག༌ བོར༌ར༌ ཛད༌ཏེ༌ ཅིན༌ལབས༌ སལ༌ལ༌ ཛདས༌།
MAR 10:17 གཙོ༌བོ༌ ཡེ༌ཤུ༌ ལམ༌ནེ༌ སྐྱོད༌ ཟ༌ནེ༌, མི༌ཞིག༌ བང༌ཏང༌ཨིན༌ ཡོངས༌ཏེ༌ ཁོང༌ངི༌ དུན༌ལ༌ པིག༌དོང༌ ཙུགས༌ཏེ༌ ཏྲིས༌, “ལོབ༌བོན༌ ཟང༌པོ༌ལེ༌, ཐའ༌མེད༌པའེ༌ མི༌ཚེ༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ ངའེ༌ ཅི༌ ཅོ༌གོས༌?”
MAR 10:18 ཡེ༌ཤུའི༌ ཏྲིའ༌ ཛདས༌, “ཅི༌ཕིའ༌ ཁྱོ༌རང༌ངི༌ ངའ༌ ཟང༌པོ༌ ཟེར༌རད༌? དཀོན༌མཆོག༌ ཅིག༌པོ༌ མ༌སྟོག༌ སུའང༌ ཟང༌པོ༌ མན༌།”
MAR 10:19 ཏེ༌ནེ༌ ཡེ༌ཤུའི༌ ཁོའེ༌ ཏྲི༌ཝའ༌ ལན༌སལས༌, “ཁྱོ༌རང༌ང༌ བཀའ༌རྒྱ༌གུན༌ ཤེས༌ས༌ནོག༌; ‘མི༌ མ༌སད༌, རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌, རྐུ༌མ༌རྐུ༌, སྤང༌པོ༌ ཟུན༌བ༌ མ༌ཏང༌, གོབ༌སྐོར༌ཏེ༌ པེ༌ནེ༌ མ༌ཁྱེར༌, ཨ༌བ༌ དང༌ ཨ༌མའ༌ རྩི༌ཝ༌ ཅོས༌ །’”
MAR 10:20 ཁོའེ༌ ལན༌ཏངས༌, “ལོབ༌བོན༌ལེ༌, ཏེ༌ ཚང༌མ༌ ངའེ༌ ཆུང༌ཏུས༌ནེ༌ ཕར༌ལ༌ སྲུངས༌ཏེ༌ ཨིན༌།”
MAR 10:21 ཡེ༌ཤུའི༌ ཁོའ༌ ཟིགས༌ཏེ༌ ཁོའེ༌ཀ༌ ཅམས༌པ༌ སྐྱེས༌ ཡང༌ མོལས༌, “ཏ༌རུང༌ ཁྱོ༌རང༌ང༌ ཅོ༌གོ༌ཤེས༌ ཅིག༌ ལུས༌ཏེ༌ དུག༌། སོང༌ ཡང༌ ཁྱོ༌རང༌ངི༌ གྱུ༌ནོར༌ ཚང༌མ༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏོང༌, ནམ༌ཁའེ༌ ནང༌ང༌ ཁྱོ༌རང༌ང༌ བང༌ཛོད༌ ཐོབ༌ཨིན༌། ཏེ༌ནེ༌ ཡོངས༌ཏེ༌ ངའེ༌ གྱབ༌ནེ༌ བྲོངས༌།”
MAR 10:22 ཏེ༌བོ༌ ཚོར༌ར༌ཅིག༌ ཁོའེ༌ གོ༌ སྒུས༌ ཡང༌ ཚེར༌ཁའ༌ ཡོངས༌ཏེ༌ སོང༌, ཅིའ༌ཟེར༌ན༌ ཁོ༌ མ༌ཆུག༌པོ༌ ཡོད༌པིན༌།
MAR 10:23 ཡེ༌ཤུའི༌ ཁོང༌ང༌ སྐོར༌ཁན༌ནི༌ མི༌ཚོགས༌ལ༌ ཟིགས༌ ཡང༌ ལོབ༌ཕྲུགས༌གུན༌ལ༌ མོལས༌, “ཆུག༌པོ༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌ ཙམ༌ཤིག༌གི༌ ཀགས༌པོ༌ མ༌ནོག༌།”
MAR 10:24 ཏེ༌བོ༌ ཚོར༌ཏེ༌ ཁོང༌གུན༌ མ༌ ཧ༌ལས༌། ཨིན༌ནའང༌ ཡེ༌ཤུའི༌ ཡང༌སྐྱར༌ མོལས༌, “ཅེས༌པའེ༌ ཕྲུ༌གུ༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌ མ༌ ཀགས༌པོ༌ ཨིན༌ནོག༌།
MAR 10:25 མི༌ ཆུག༌པོ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌སི༌ སང༌ ཁབ༌བི༌ མིག༌ནེ༌ རྔ༌བོང༌ བིང༌ཅེས༌པོ༌, ལ༌མོ༌ ཆེན༌།”
MAR 10:26 ལོབ༌ཕྲུགས༌གུན༌ མང༌ང༌ ཧ༌ལས༌ཏེ༌ ཏྲིས༌, “ཏེ༌ནེ༌ སུའ༌ ཐར༌པ༌ ཐོབ༌ཨིན༌།”
MAR 10:27 ཡེ༌ཤུའི༌ ཁོང༌གུན༌ལ༌ ཟིགས༌ཏེ༌ མོལས༌, “འི༌བོ༌ མིའ༌ ཅོ༌ མ༌ནེ༌ མི༌ཉན༌, ཨིན༌ནའང༌ དཀོན༌མཆོག༌ག༌ ཅི༌ཚང༌མ༌ ཛད༌ ཉན༌ན༌ནོག༌།”
MAR 10:28 པི༌ཏྲར༌རི༌ ཡེ༌ཤུའ༌ ཟེརས༌, “ང༌ཞའེ༌ ཅི༌ཚང༌མ༌ ཕངས༌ཏེ༌, ཉེ༌རང༌ང༌ བྲངས༌ཏེ༌ ཨིན༌།”
MAR 10:29 ཡེ༌ཤུའི༌ ལན༌སལས༌, “ངའེ༌ དེན༌བ༌ ཟེར༌རད༌, ངའ༌ ཡ༌ གའ༌མོའེ༌ ནས༌ཚུལ༌ལི༌ ཏོན༌ལ༌ ཁང༌པ༌ ཡ༌ ཨ༌ཅོ༌ནོ༌ ཡ༌ ཨ༌ཅེ༌ ནོ༌མོ༌ ཡ༌ ཨ༌བ༌ ཡ༌ ཨ༌མ༌ ཡ༌ ཕྲུ༌གུ༌ ཡ༌ ཞིང༌ ཕངས༌ཁན༌ ཚང༌མ༌ལ༌
MAR 10:30 འིན༌ན༌ མི༌ཚེ༌ ནང༌ང༌, ཁང༌པ༌, ཨ༌ཅོ༌ནོ༌, ཨ༌ཅེ༌ ནོ༌མོ༌, ཨ༌བ༌, ཨ༌མ༌, ཕྲུ༌གུ༌, ཞིང༌ གུན༌ནི༌ གྱ༌ལྡབ༌ མ༌ཚད༌ དཀོན༌མཆོག༌གི༌ གྱལ༌སྲིད༌དི༌ ཏུས༌ལ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌ ཨིན༌ནའང༌ ཇིག༌རྟེན༌པ༌གུན༌ནི༌ ནགས༌བར༌དོ༌ སྟན༌ཨིན༌།
MAR 10:31 དག༌ས༌ གོའ༌ ཡོད༌ཁན༌ མང༌པོ༌ སྟིང༌ཇུག༌ག༌ ལུས༌ཨིན༌ ཡང༌ དག༌ས༌ སྟིང༌ཇུག༌གི༌ཀ༌ ཡོད༌ཁན༌ མང༌པོ༌ གོའ༌ ལེབ༌ཨིན༌།”
MAR 10:32 གཙོ༌བོ༌ ཡེ༌ཤུའི༌ གོ༌ ཛད༌ཏེ༌ ཁོང༌གུན༌ ཀེན༌ལ༌ ཡེ༌རུ༌ཤ༌ལེམ༌མི༌ གྱལ༌ས༌ སྐྱོད༌ཨིན༌ ཡོད༌པ༌ ལོབ༌ཕྲུགས༌གུན༌ ཧ༌ལས༌ ཡང༌ ཁོང༌ངི༌ གྱབ༌ནེ༌ བྲངས༌ཏེ༌ ཡོང༌ཁན༌གུན༌ ཇིགས༌སད༌པིན༌། ཡེ༌ཤུའི༌, ཁོང༌རང༌ངི༌ ལོབ༌ཕྲུགས༌ རྕུག༌ཉིས༌པོ༌ སོ༌སོ༌ ཁྱེར༌ཏེ༌ ཁོང༌ ཉམ༌པོ༌ ཇུང༌ཅེས༌གུན༌ ཤད༌ད༌ ཛདས༌,
MAR 10:33 “ཉོན༌ཤིག༌, ང༌དང༌གུན༌ ཀེན༌ལ༌ ཡེ༌རུ༌ཤ༌ལེམ༌མ༌ ཆ༌ཅེས༌ ཨིན༌ནོག༌, མི༌རིགས༌སི༌བུ༌ བླ༌མ༌ འུ༌སྐྱོང༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ལག༌ག༌ སྟད༌ཨིན༌ ཡང༌ ཁོང༌གུན༌ནི༌ ཁོའ༌ ཤི༌ཅེས༌སི༌ ཆད༌པ༌ ཅད༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ལག༌ག༌ སྟད༌ཨིན༌།
MAR 10:34 ཏེ༌ནེ༌ ཁོང༌གུན༌ནི༌ ཁོའ༌ ཁྲེལ༌བ༌ སྟན༌ཏེ༌, ཆིལ༌མག༌ དང༌ རྟལ༌ལྕག༌ གྱབས༌ཏེ༌ སད༌ཨིན༌, ཨིན༌ནའང༌ ཞག༌མ༌ སུམ༌མི༌ སྟིང༌ནེ༌ ཡང༌སྐྱར༌ སོན༌ཏེའ༌ ལང༌ཨིན༌།”
MAR 10:35 ཏེ༌ནེ༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, “ལོབ༌བོན༌ལེ༌, ཉེ༌རང༌ངི༌ ང༌ཞའེ༌ ཞུ༌ཝ༌ ཞུ༌ཅེས༌པོ༌ ཅོའ༌ ཛད༌དའང༌།”
MAR 10:36 ཁོང༌ངི༌ ཏྲིའ༌ ཛདས༌, “ཁྱོ༌ཞའེ༌ ཕིའ༌ ངའེ༌ ཅི༌ ཅོ༌?”
MAR 10:37 ཁོང༌གུན༌ནི༌ ལན༌ཏངས༌, “ཉེ༌རང༌ ཉེ༌རང༌ངི༌ ཟིར༌རྗིད༌ཅན༌ནི༌ ཞུགས༌ཁྲིས༌སི༌ཀ༌ ཞུགས༌ ཟ༌ནེ༌, ང༌ཞའ༌ ཉེ༌རང༌ངི༌ ཆག༌ ཡས༌པ༌ དང༌ ཡོ༌མའེ༌ རྩི༌ཝ༌ཅན༌ ཀོ༌སའེ༌ཀ༌ དུག༌ ཅུག༌ག༌ ཛད༌ལེ༌།”
MAR 10:38 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའེ༌ ཞུ༌ཝ༌ ཕུལ༌ཁན༌བོ༌ ཁྱོ༌ཞའ༌ ཧ༌མ༌གོའ༌ ཨིན༌ནོག༌, ང༌ ཐུང༌ཅེས༌ཅན༌ནི༌ རྡུག༌ངལ༌ལི༌ ཀོ༌རེ༌བོ༌ ཁྱོ༌ཞའེ༌ ཐུང༌ཉན༌ཅེས༌ རག༌ག༌ ཡ༌ རྡུག༌ངལ༌ལི༌ ཁྲུས༌ ངའེ༌ ལེན༌ཅེས༌ཅན༌བོ༌ ཁྱོ༌ཞའེ༌ ལེན༌ ཉན༌ཅེས༌ རག༌ག༌?”
MAR 10:39 ཁོང༌གུན༌ནི༌ ཟེརས༌, “ཉན༌ཅེས༌རག༌ལེ༌།” ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ནི༌ ཏན༌ཏན༌ལ༌ ངའེ༌ རྡུག༌ངལ༌ལི༌ ཀོ༌རེ༌ ནང༌ནེ༌ ཐུང༌ཨིན༌ ཡང༌ རྡུག༌ངལ༌ལི༌ ཁྲུས༌ ངའེ༌ ལེན༌ཅེས༌ཅན༌བོ༌ ཉམ༌པོ༌ ཁྱོ༌ཞའེ༌ ཁྲུས༌ལེན༌ཨིན༌།
MAR 10:40 ཨིན༌ནའང༌ ངའེ༌ ཡས༌པ༌ དང༌ ཡོ༌མའེ༌ཀ༌ དུག༌ཅུག༌ཅེས༌སི༌ ཝང༌ཆ༌ ངའ༌ མེད༌། དཀོན༌མཆོག༌གི༌ ཏེ༌ ནས༌ས༌གུན༌ ལྡམ༌མ༌ ཛད༌ཁན༌གུན༌ནི༌ ཕིའ༌ གྲལ༌གྲིག༌ ཛད༌ཏེ༌ ཨིན༌།”
MAR 10:41 ཏེ༌བོ༌ ཚོར༌ར༌ཅིག༌, ཞན༌ ལོབ༌ཕྲུགས༌ རྕུ༌བོའ༌ ཡ༌ཀོབ༌ དང༌ ཡོ༌ཧཱ༌ནན༌ནི༌ཀ༌ སྲོ༌ ཡོངས༌།
MAR 10:42 ཡེ༌ཤུའི༌ ཁོང༌ ཚང༌མའ༌ བོད༌ད༌ ཛད༌ཏེ༌ མོལས༌, “ཁྱོ༌ཞའ༌ གྱུས༌མེད༌ད༌? ཡ༌ཧུ༌དཱ༌པ༌ མན༌ཁན༌ ཝང༌སྲུལ༌པ༌གུན༌ནི༌ ཁོ༌རང༌ངི༌ ཡུལ༌མི༌གུན༌ནི༌ཀ༌ སྙིང༌རྗེ༌ མེད༌པ༌ ཝང༌སྲུལ༌ལ༌ནོག༌, ཡང༌ ཁོང༌གུན༌ནི༌ ལོན༌པོ༌གུན༌ནིའང༌ མི༌གུན༌ལ༌ སྲན༌ཏྲེ༌ ནགས༌ སྟན༌ཨིན༌ ཝང༌སྲུལ༌ལ༌ནོག༌།
MAR 10:43 ཁྱོ༌ཞའེ༌ ནང༌ང༌ ཏེ༌ཙོགས༌ ཡོང༌ མ༌གོས༌། ཁྱོ༌ཞའེ༌ ཕྲོ༌ནེ༌ ཀྲག༌པོ༌ གྱུར༌ཉིན༌ ཡོད༌ཁན༌བོ༌ ཞན༌མ༌གུན༌ནི༌ ཡོག༌པོ༌ གྱུར༌གོས༌,
MAR 10:44 ཡང༌ ཁྱོ༌ཞའེ༌ ཕྲོ༌ནེ༌ གོའ༌ ལེབ༌ཉིན༌ ཡོད༌ཁན༌བོ༌ ཞན༌ ཚང༌མའེ༌ ཚེ༌ཡོག༌ གྱུར༌གོས༌།
MAR 10:45 ཀ༌ཟུག༌ མི༌རིགས༌སི༌བུ༌ ཞབས༌ཏོག༌ ཞུ༌ཅུག༌ཅེས༌ལ༌ མན༌པ༌ ཞབས༌ཏོག༌ ཞུའ༌ལ༌ ཡོངས༌པིན༌, ཡང༌ མི༌ མང༌པོའེ༌ སྲོག༌རིན༌ ཤལ༌ཅེས༌ལ༌ ཁོའེ༌ རང༌སྲོག༌ ཏང༌ཨིན༌།”
MAR 10:46 ཁོང༌གུན༌ ཡེ༌རི༌ཀོའེ༌ གྲོང༌ཁྱེར༌ལ༌ ལེབ༌། གཙོ༌བོ༌ ཡེ༌ཤུ༌, ཁོང༌ངི༌ ལོབ༌ཕྲུགས༌གུན༌ དང༌ མི༌ཚོགས༌ ཆེན༌མོ༌ཞིག༌ ཡེ༌རི༌ཀོ༌ནེ༌ བིངས༌ཏེ༌ སྐྱོད༌ ཟ༌ནེ༌, ཏི༌མ༌འུས༌སི༌ བུ༌ཚ༌ བར༌ཏི༌མུས༌ ཞ༌ར༌བོ༌ ལམ༌མི༌ ཐའ༌མ༌ ལྩང༌ང༌ལ༌ དུགས༌ཏེ༌ ཡོད༌པིན༌།
MAR 10:47 བར༌ཏི༌མུས༌སི༌ ན༌ཙ༌རེད༌པ༌ ཡེ༌ཤུ༌ སྐྱོད༌ཨིན༌ ཨིན༌ནོག༌ ཟེར༌ཏེ༌ ཚོར༌ར༌ཅིག༌, ཁོའེ༌ ཀུ༌ཅོ༌ ཏང༌ཅེས༌ གོ༌ཟུགས༌ཏེ༌ ཟེརས༌, “ཡེ༌ཤུ༌, གྱལ༌པོ༌ དཱ༌བིད༌དི༌ པུར༌གྱུད༌ ངའེ༌ཀ༌ སྙིང༌རྗེ༌ ཛད༌།”
MAR 10:48 མི༌ མང༌པོའེ༌ ཁོའ༌ ཁའ༌སྐྱེས༌ཏེ༌ ཅུབ༌ཅོད༌ ཟེརས༌, ཨིན༌ནའང༌ ཁོའེ༌ མང༌ང༌ ཀུ༌ཅོ༌ ཏངས༌ཏེ༌ ཟེརས༌, “གྱལ༌པོ༌ དཱ༌བིད༌དི༌ པུར༌གྱུད༌, ངའེ༌ཀ༌ སྙིང༌རྗེ༌ ཛད༌དའང༌།”
MAR 10:49 ཡེ༌ཤུ༌ སྲུང༌ང༌ ཛདས༌ ཡང༌ མོལས༌, “ཁོའ༌ འི༌ཀ༌ བོད༌།” ཏེ༌ནེ༌ ཁོང༌གུན༌ནི༌ ཞ༌ར༌བོའ༌ བོད༌ཏེ༌ ཟེརས༌, “ཐད༌པོ༌ ཅོས༌, ལོངས༌, ཁོང༌ངི༌ ཁྱོ༌རང༌ང༌ བོད༌ད༌ ཛད༌དུག༌།”
MAR 10:50 བར༌ཏི༌མུས༌སི༌ ཁོ༌རང༌ངི༌ ཀོས༌པོ༌ ཐའ༌མ༌ ཕངས༌, ཆོམས༌ཏེ༌ ཁོ༌རང༌ངི༌ རྐང༌པའེ༌ཀ༌ ལངས༌ ཡང༌ ཡེ༌ཤུ༌ ཡོད༌ས༌ ཡོངས༌།
MAR 10:51 ཡེ༌ཤུའི༌ ཁོའ༌ ཏྲིའ༌ ཛདས༌, “ངའེ༌ ཁྱོ༌རང༌ངི༌ ཕིའ༌ ཅི༌ ཅོ༌?” ཞ༌ར༌བོའེ༌ ཟེརས༌, “ལོབ༌བོན༌ལེ༌, ངའ༌ ཡང༌སྐྱར༌ ཐོང༌ ཅུག༌ག༌ ཛད༌།”
MAR 10:52 ཡེ༌ཤུའི༌ ཁོའ༌ མོལས༌, “སོང༌ ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌།” ཏེན༌ན༌མལ༌ལ༌ ཁོའ༌ ཐོང༌ཐུབ༌, ཡང༌ ཁོ༌ ཏེན༌ན༌ ལམ༌ནེ༌ ཡེ༌ཤུའ༌ བྲངས༌ཏེ༌ སོང༌།
MAR 11:1 ཡེ༌རུ༌ཤ༌ལེམ༌མི༌ གྱལ༌སའེ༌ ཉེ༌མོའ༌ ཨོ༌ལིཝ༌ཝི༌ རི༌ཀ༌ ཡོད༌ཁན༌ བེད༌ཕ༌གེ༌ དང༌ བེད༌ཐཱ༌ནི༌ གྲོང༌སེབ༌གུན༌ལ༌ ལེབ༌ཀྱིས༌ ཡོད༌ད༌ཅིག༌, གཙོ༌བོ༌ ཡེ༌ཤུའི༌ ལོབ༌ཕྲུགས༌ ཉིས༌ སྔུན༌ལ༌ ལམ༌ཅུག༌ག༌ ཛད༌ཏེ༌
MAR 11:2 མོལས༌, “འ༌ གྲོང༌སེབ༌བི༌ ནང༌ང༌ སོང༌, ཏེ༌རུ༌ ལེབ༌བ༌ཅིག༌, སུའང༌ མ༌ཞོན༌ཁན༌ནི༌ བུང༌སར༌ཞིག༌ ཏགས༌ཏེ༌ ཐོང༌ཅེན༌, ཏེ༌བོ༌ ཀྲོལ༌ཏེ༌ འི༌རུ༌ ཁྱོང༌།
MAR 11:3 ཀལ༌ཏེས༌ སུ༌ཞིག༌གི༌ ཁྱོ༌ཞ༌གུན༌ལ༌, ‘ཅི༌ ཅོའད༌’ ཟེར༌ཏེ༌ ཏྲི༌ན༌ ‘གཙོ༌བོའ༌ སྒོས༌དོམ༌ དུག༌ ཡང༌ གྱོགས༌པ༌ ལོགས༌ཏེ༌ ཁྱོང༌ཨིན༌’ ཟེར༌།”
MAR 11:4 ཁོང༌གུན༌ སོང༌ ཡང༌ བུང༌སར༌བོ༌ སྲང༌ངི༌ཀ༌ སྒོའེ༌ ཕི༌ལོག༌ག༌ ཏགས༌ཏེ༌ ཡོད༌ཁན༌བོ༌ ཐོང༌། ཁོང༌གུན༌ནི༌ ཏེ༌བོ༌ ཀྲོལ༌ ཟ༌ནེ༌
MAR 11:5 ཏེ༌ཀ༌ ལངས༌ཏེ༌ ཡོད༌ཁན༌ནི༌ མི༌ ཁ༌ཅིག༌གི༌ ཏྲིས༌, “ཁྱོ༌ཞ༌གུན༌ནི༌ བུང༌སར༌བོ༌ ཀྲོལ༌ཏེ༌ ཅི༌ ཅོས༌ཏེ༌ ཨིན༌?”
MAR 11:6 ཡེ༌ཤུའི༌ བཀའ༌ སལ༌ཁན༌ ནང༌ཞིན༌ ཁོང༌གུན༌ནི༌ ལན༌ཏངས༌པ༌, ཁོང༌གུན༌ལ༌ བུང༌སར༌བོ༌ ཁྱེར༌ཅུགས༌།
MAR 11:7 ཏེ༌ནེ༌ ཁོང༌གུན༌ནི༌ བུང༌སར༌བོ༌ ཡེ༌ཤུ༌ ཡོད༌ས༌ ཁྱོངས༌ཏེ༌ ཁོང༌རང༌གུན༌ནི༌ ཀོས༌ ཏེ༌བོའ༌ སྟདས༌ ཡང༌ ཡེ༌ཤུ༌ ཏེ༌བོའེ༌ཀ༌ ཞོན༌ན༌ ཛདས༌།
MAR 11:8 མི༌ མང༌པོ༌ཞིག༌གི༌ རང༌རང༌ངི༌ ཀོས༌ ཡེ༌ཤུ༌ སྐྱོད༌སའེ༌ ལམ༌མི༌ཀ༌ ཏིངས༌, ཡང༌ ཞན༌གུན༌ནི༌ ཞིང༌ངི༌ ཐའ༌མའ༌ ཡོད༌ཁན༌ནི༌ ལྕང༌མའེ༌ ཡལ༌ག༌ ཅད༌ཏེ༌ ཏིངས༌།
MAR 11:9 ཡེ༌ཤུའི༌ དུན༌ནེ༌ གྲུལ༌ཁན༌ ཡང༌ གྱབ༌ནེ༌ ཡོང༌ཁན༌ གུན༌ནི༌ ཀུ༌ཅོ༌ ཏང༌ཨིན༌ ཟེརས༌། “དཀོན༌མཆོག༌ག༌ སྟོད༌པ༌ ཕུལ༌། ‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌།’
MAR 11:10 ང༌དང༌གུན༌ནི༌ ཕ༌མེས༌པོ༌ དཱ༌བིད༌དི༌ ཡོང༌ཅེས༌ཅན༌ནི༌ གྱལ༌སྲིད༌ལ༌ ཅིན༌ལབས༌ སལ༌ཤིག༌། ནམ༌ཁའེ༌ ཐོ༌ཤོག༌ག༌ ཞུགས༌ཁན༌ནི༌ དཀོན༌མཆོག༌ག༌ སྟོད༌པ༌ ཕུལ༌།”
MAR 11:11 ཡེ༌རུ༌ཤ༌ལེམ༌མི༌ ནང༌ཀུག༌ག༌ ལེབ༌བ༌ཅིག༌ ཡེ༌ཤུ༌ ཆོད༌ཁང༌ངི༌ ནང༌ང༌ སྐྱོདས༌། ཁོང༌ངི༌ ཀ༌རུང༌ས༌ ཟིགས༌, ཨིན༌ནའང༌ ཕི༌ཏོག༌ གོར༌ཏེ༌ ཨིན༌ པ༌སང༌, ཁོང༌ ལོབ༌ཕྲུགས༌ རྕུག༌ཉིས༌ ཉམ༌པོ༌ བེད༌ཐཱ༌ནིའ༌ ལོགས༌ཏེ༌ སྐྱོདས༌།
MAR 11:12 སྟིང༌མ༌ཞག༌གི༌ ང༌མོ༌, ཁོང༌གུན༌ བེད༌ཐཱ༌ནི༌ནེ༌ སྐྱོད༌ ཟ༌ནེ༌ གཙོ༌བོ༌ ཡེ༌ཤུ༌ སྟོགས༌ས༌ ཛདས༌།
MAR 11:13 ཁོང༌ངི༌ འ༌ཟམ༌ཤིག༌ག༌ ཕིག༌ ཁ༌ཟས༌སི༌ ལྕང༌མ༌ ལོ༌མའེ༌ གངས༌ཏེ༌ ཡོད༌ཁན༌ཞིག༌ ཟིགས༌, ཏེ༌ཀ༌ ཁ༌ཟས༌ ཡོད༌གྲོ༌ སམས༌ཏེ༌ ཟིགས༌ས༌ལ༌ སྐྱོདས༌། ཨིན༌ནའང༌ དུན༌ལ༌ ལེབ༌བ༌ཅིག༌, ཁོང༌ངི༌ ལོ༌མ༌ མ༌ནེ༌ ཁ༌ཟས༌ མ༌ཟིགས༌, ཅིའ༌ཟེར༌ན༌ ཁ༌ཟས༌ སྨིན༌ཅེས༌སི༌ ཏུས༌པོ༌ མ༌ལེབ༌བ༌ ཨིན༌པིན༌།
MAR 11:14 ཏེ༌ནེ༌ ཁོང༌ངི༌ ལྕང༌མའ༌ མོལས༌, “ཏ༌ནེ༌ཕར༌ལ༌ སུ༌ཞིག༌གིའང༌, ཁྱོ༌རང༌ངི༌ ཀ༌ནེ༌ ཁ༌ཟས༌ མི༌ཟ༌” ཡང༌ ཁོང༌ངི༌ མོལ༌ཁན༌བོ༌ ལོབ༌ཕྲུགས༌གུན༌ནི༌ ཚོར༌།
MAR 11:15 ཁོང༌གུན༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོདས༌, ཏེ༌རུ༌ ལེབ༌བ༌ཅིག༌ ཡེ༌ཤུ༌, ཆོད༌ཁང༌ང༌ སྐྱོད༌ཏེ༌ སྲོག༌ཆོད༌ལ༌ ཕུལ༌ཅེས༌སི༌ སེམས༌ཅན༌ ཙོང༌ཁན༌ དང༌ ཉོ༌ཁན༌ གུན༌ ཕིང༌ཅེས༌ གོ༌ཟུག༌ ཛདས༌། པེ༌ནེ༌ ཞེབ༌ཁན༌ནི༌ ཅོག༌ཙེ༌གུན༌ དང༌ ཕུར༌གོན༌ ཙོང༌ཁན༌ནི༌ ཕོས༌སྟག༌གུན༌ ལོག༌ག༌ ཛདས༌,
MAR 11:16 ཡང༌ ཁོང༌ངི༌ ཆོད༌ཁང༌ངི༌ ནང༌ང༌ ཚོང༌ངི༌ ཅ༌ལག༌ འ༌ངོ༌ འི༌ངོ༌ ཁྱེར༌ཁན༌ ཚང༌མ༌ སྒག༌ག༌ ཛདས༌།
MAR 11:17 ཡེ༌ཤུའི༌ ཁོང༌གུན༌ལ༌ མོལས༌, “ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ངའེ༌ ཁང༌པའ༌ གྱལ༌ཁམས༌ ཚང༌མའེ༌ མི༌གུན༌ནི༌ མོས༌ལམ༌ ཞུས༌སའེ༌ ཁང༌པ༌ ཟེར༌ཨིན༌,’ ཨིན༌ནའང༌ ‘ཁྱོ༌ཞ༌གུན༌ནི༌ ཏེ༌བོ༌ ཅག༌པ༌གུན༌ནི༌ བའོ༌ ཅོས༌ཏེ༌ དུག༌།’”
MAR 11:18 བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌, ཡེ༌ཤུའི༌ ཛད༌ཁན༌བོ༌ ཚོར༌ར༌ཅིག༌, ཁོང༌གུན༌ནི༌ ཁོང༌ སད༌ཅེས༌སི༌ ཐབས༌ ཙལ༌ཅེས༌ གོ༌ཟུགས༌། ཨིན༌ནའང༌ ཁོང༌གུན༌ ཁོང༌ང༌ ཇིགས༌སད༌པིན༌, ཅིའ༌ཟེར༌ན༌ ཡེ༌ཤུའི༌ ཤེས༌རབས༌ཅན༌ནི༌ ལབ༌ཞ༌ སལ༌ཁན༌བོའེ༌ཀ༌ མི༌ཚོགས༌ གང༌པོ༌ ཧ༌ལས༌ཏེ༌ ཡོད༌པིན༌།
MAR 11:19 ཕི༌ཏོག༌ ལེབ༌བ༌ཅིག༌, ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ གྱལ༌ས༌ནེ༌ བིངས༌ཏེ༌ སྐྱོདས༌།
MAR 11:20 སྟིང༌མ༌ཞག༌ག༌ ང༌མོ༌, ཁོང༌གུན༌ ཡེ༌ཤུའི༌ ངན༌ ཏབ༌བ༌ ཛད༌ཁན༌ནི༌ ཕིག༌གི༌ ལྕང༌མའེ༌ དུན༌ནེ༌ ཆའ༌ཅིག༌, ལོབ༌ཕྲུགས༌གུན༌ནི༌ ཏེ༌བོ༌ པ༌ཀྲག༌ནེ༌ ཕར༌ལ༌ སྐམས༌ཏེ༌ ཐོང༌།
MAR 11:21 ཡེ༌ཤུའི༌ མོལ༌ལ༌ ཛད༌ཁན༌བོ༌, པི༌ཏྲར༌ལ༌ ཨིད༌ཏུ༌ ཡོངས༌ཏེ༌ ཁོང༌ང༌ ཟེརས༌, “ལོབ༌བོན༌ལེ༌ ཟིགས༌སའང༌, ཉེ༌རང༌ངི༌ ངན༌ ཏབ༌བ༌ ཛད༌ཁན༌ནི༌ ཕིག༌གི༌ ལྕང༌མ༌བོ༌ སྐམས༌ཏོག༌།”
MAR 11:22 ཡེ༌ཤུའི༌ ལན༌སལས༌, “དཀོན༌མཆོག༌གི༌ ནང༌ང༌ ཏད༌པ༌ ཅོས༌།
MAR 11:23 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཀལ༌ཏེས༌ ཁྱོ༌ཞའེ༌ འི༌ རི༌བོའ༌, ‘སོང༌ ཡང༌ ཁྱོ༌རང༌ ཚོའེ༌ ནང༌ང༌ ཕོང༌’ ཟེར༌ན༌, ཡང༌ སྙིང༌ངི༌ ནང༌ང༌ ཐེ༌ཚོམས༌ མ༌ཅོའ༌ ཟེར༌ཁན༌བོ༌ གྲུབ༌བ༌ནོག༌ སམས༌ཏེ༌ ཏད༌པ༌ ཅོ༌ན༌, ཏེ༌བོ༌ ཁྱོ༌ཞའེ༌ ཕིའ༌ ཅོའ༌ ཛད༌ཨིན༌།
MAR 11:24 ངའེ༌ ཁྱོ༌ཞ༌གུན༌ལ༌ ཟེར༌རད༌, ཁྱོ༌ཞའེ༌ མོས༌ལམ༌མི༌ ནང༌ང༌ ཅི༌ཞིག༌ ཞུ༌ནའང༌ ཏེ༌བོ༌ ཐོབ༌ཚར༌ཏེ༌ ཨིན༌ སམས༌ཏེ༌ ཏད༌པ༌ ཅོ༌ན༌, ཏེ༌བོ༌ ཁྱོ༌ཞ༌གུན༌ལ༌ ཐོབ༌ཨིན༌།
MAR 11:25 ཨིན༌ནའང༌ ཁྱོ༌ཞ༌གུན༌ནི༌ མོས༌ལམ༌ ཞུའི༌ སང༌ སྔུན༌ལ༌, གོ༌མ༌ ཁྱོ༌ཞའེ༌ གྱབ༌གལ༌ལ༌ ངན༌པ༌ ཅོས༌ཏེ༌ ཡོད༌ཁན༌གུན༌ལ༌ ཤགས༌པ༌ ཏོང༌ཤིག༌། ཏེ༌ནེ༌ ནམ༌ཁའེ༌ ནང༌ང༌ ཞུགས༌ཁན༌ནི༌ ཁྱོ༌ཞའེ༌ ཡབ༌བི༌, ཁྱོ༌ཞ༌གུན༌ནི༌ སྡིག༌པ༌གུན༌ལའང༌ ཤགས༌པ༌ སལ༌ལ༌ ཛད༌ཨིན༌།”
MAR 11:26 
MAR 11:27 ཡང༌སྐྱར༌ ཁོང༌གུན༌ ཡེ༌རུ༌ཤ༌ལེམ༌མི༌ ནང༌ང༌ ལེབ༌, ཡེ༌ཤུ༌ ཆོད༌ཁང༌ངི༌ གྱང༌སྐོར༌རི༌ ནང༌ང༌, ཞབ༌གྲུལ༌ལ༌ སྐྱོད༌ ཟ༌ནེ༌ བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཁོང༌ ཡོད༌ས༌ ཡོངས༌ཏེ༌
MAR 11:28 ཏྲིས༌, “ཀ༌ ཝང༌ཆ༌ ཉམ༌པོ༌ ཁྱོ༌རང༌ངི༌ འི༌གུན༌ ཅོའད༌ ཡང༌ ཁྱོ༌རང༌ང༌ འི༌ ཝང༌ཆ༌ སུའི༌ ཏངས༌?”
MAR 11:29 ཡེ༌ཤུའི༌ ཁོང༌གུན༌ལ༌ མོལས༌, “ངེའང༌ ཁྱོ༌ཞ༌གུན༌ལ༌ ཏྲི༌ཝ༌ཞིག༌ ཏྲི༌ཨིན༌, ཀལ༌ཏེས༌ ཁྱོ༌ཞའེ༌ ལན༌ཏང༌ན༌, ཏེ༌ནེ༌ ངེའང༌ ཀ༌ ཝང༌ཆ༌ གྱུད༌ཏེ༌ འི༌གུན༌ ཅོའད༌ ཁྱོ༌ཞའ༌ ཤད༌ཨིན༌།
MAR 11:30 ངའ༌ ཤོད༌དའང༌, ཡོ༌ཧཱ༌ནན༌ལ༌ ཁྲུས༌སལ༌ཅེས༌སི༌ ཝང༌ཆ༌ དཀོན༌མཆོག༌གི༌ ཆོགས༌ནེ༌ ཐོབ༌ཏེ༌ ཨིན༌ནོག༌ག༌ ཡ༌ མི༌ ཆོགས༌ནེ༌?”
MAR 11:31 ཁོང༌གུན༌ནི༌ ཁོ༌རང༌གུན༌ནི༌ ཕྲོའ༌ སྤེ༌ར༌ ཏངས༌ཏེ༌ ཟེརས༌, “ཀལ༌ཏེས༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ ཟེར༌ན༌ ཁོའེ༌ ང༌དང༌ང༌, ཁྱོ༌ཞའེ༌ ཁོའེ༌ཀ༌ ཨིད༌ཤེས༌ ཅིའ༌ མ༌ཅོས༌པིན༌ ཟེར༌ཨིན༌?
MAR 11:32 ཨིན༌ནའང༌ ང༌དང༌ངི༌ མིའི༌ ཆོགས༌ནེ༌ ཨིན༌ནོག༌ ཟེར༌ཅེས༌སི༌ ཧམ༌པ༌ ཅོའ༌ད༌?” ༼ཁོང༌གུན༌ མི༌ཚོགས༌ལ༌ ཇིགས༌སད༌པིན༌, ཅིའ༌ཟེར༌ན༌ མི༌ཚང༌མའེ༌ ཡོ༌ཧཱ༌ནན༌ལ༌ ལུང༌སྟོན༌པ༌ རྩིའད༌པིན༌།༽
MAR 11:33 ཏེ༌བོའེ༌ཕིའ༌ ཁོང༌གུན༌ནི༌ ཡེ༌ཤུའ༌ ལན༌ཏངས༌, “ང༌ཞའ༌ གྱུས༌མེད༌།” ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ངེའང༌ མི༌ཤད༌, སུའི༌ ཝང༌ཆའེ༌ ནང༌ང༌ ངའེ༌ འི༌གུན༌ ཅོའད༌།”
MAR 12:1 ཏེ༌ནེ༌ གཙོ༌བོ༌ ཡེ༌ཤུའི༌ ཁོང༌གུན༌ལ༌ རུངས༌གུན༌ གྱུད༌ཏེ༌ ལབ༌ཅེས༌ གོ༌ཟུག༌ ཛདས༌, “མི༌ཞིག༌གི༌ ཁོ༌རང༌ངི༌ ཞིང༌ང༌ རྒུན༌ ཙུགས༌ཏེ༌ གྱང༌སྐོར༌ ཏངས༌། རྒུན༌ ཙིར༌སའེ༌ ནས༌ས༌ བྲུས༌, ཡང༌ རྒུན༌ཚས༌ལ༌ ལྟ༌ཅེས༌སི༌ ཕིའ༌ པི༌འུ༌ རྩིགས༌། ཏེ༌ནེ༌ རྒུན༌ཚས༌པོ༌ ཞན༌ ཞིང༌བད༌པ༌གུན༌ལ༌ ཤས༌ལ༌ ཏང༌ཏེ༌ ཁོ༌རང༌ ཞན༌ཡུལ༌ཞིག༌ག༌ དུག༌ག༌ སོང༌།
MAR 12:2 སྟོན༌ཐོག༌གི༌ ཏུས༌ལ༌ ཤིང༌ཏོག༌གི༌ སྐལ༌ལ༌ ལེན༌ན༌ལ༌ ཁོའེ༌ ཁོ༌རང༌ངི༌ ཡོག༌པོ༌ཞིག༌ ཤས༌ལ༌ ཏང༌ཁན༌གུན༌ནི༌ཀ༌ ལམ༌ཅུགས༌།
MAR 12:3 ཨིན༌ནའང༌ ཁོང༌གུན༌ནི༌ ཡོག༌པོ༌བོ༌ ཟུམས༌ཏེ༌ རྡུངས༌, ཡང༌ ཁོ༌ ལག༌སྟོང༌ང༌ ལོགས༌ཏེ༌ ལམ༌ཅུགས༌།
MAR 12:4 ཞིང༌ངི༌ དག༌པོའེ༌ ཞན༌ཡང༌ ཡོག༌པོ༌ཞིག༌ ལམ༌ཅུགས༌, ཨིན༌ནའང༌ ཁོང༌གུན༌ནི༌ ཁོའེ༌ གོ༌ རྡུངས༌ ཡང༌ ཁྲེལ༌བ༌ སྟནས༌།
MAR 12:5 ཞན༌ཡང༌ ཡོག༌པོ༌ ལམ༌ཅུག༌ཁན༌བོ༌ སདས༌། ཁོའེ༌ ཞན༌ ཡོག༌པོ༌ མང༌པོ༌ ལམ༌ཅུག༌ཁན༌གུན༌ནའང༌ ཏེན༌ན༌ ཙོགས༌ ཅོས༌, ཁ༌ཅིག༌ག༌ རྡུངས༌, ཡང༌ ཁ༌ཅིག༌ སདས༌།
MAR 12:6 ཏ༌ ལམ༌ཅུག༌ག༌ལ༌ ཅིག༌ཅིག༌ ལུས༌ཏེ༌ ཡོད༌པིན༌, ཁོ༌རང༌ངི༌ ཅེས༌པ༌ ཅོ༌ཁན༌ནི༌ བུ༌ཚ༌། སྟིང༌ཇུག༌ག༌ ཞིང༌ དག༌པོའེ༌ ཁོ༌ ལམ༌ཅུགས༌ཏེ༌, ‘ཁོང༌གུན༌ནི༌ ཏན༌ཏན༌ལ༌ ངའེ༌ བུ༌ཚའ༌ རྩི༌ཝ༌ ཅོའ༌ནོག༌’ སམ༌།”
MAR 12:7 “ཨིན༌ནའང༌ ཤས༌པ༌གུན༌ནི༌ ཅིག༌ དང༌ ཅིག༌ག༌ ཟེརས༌, ‘འི༌ ཞིང༌ ནོར༌སྐལ༌ལ༌ ཐོབ༌ཅེས༌ཅན༌བོ༌ ཡོང༌ང༌ལ༌, ཡོང༌ཤིག༌, ཁོ༌ སད༌ཨིན༌ ཏེ༌ནེ༌ ཁོའེ༌ ནོར༌སྐལ༌བོ༌ ང༌དང༌ང༌ ཐོབ༌ཨིན༌།’
MAR 12:8 ཏེ༌བོའེ༌ཕིའ༌ ཁོང༌གུན༌ནི༌ ཁོ༌ ཟུམས༌ཏེ༌ སདས༌, ཡང༌ ཁོའེ༌ ཟུགས༌པོ༌བོ༌ རྒུན༌ཚས༌ནེ༌ ཕི༌ལོག༌ག༌ ཕངས༌ཏངས༌།”
MAR 12:9 ཡེ༌ཤུའི༌ ཏྲིའ༌ ཛདས༌, “ཏེ༌ནེ༌ རྒུན༌ཚས༌སི༌ དག༌པོའེ༌ ཅི༌ ཅོ༌ཨིན༌? ཁོ༌ ཡོངས༌ཏེ༌, ཤས༌པ༌གུན༌ སད༌ཨིན༌, ཡང༌ རྒུན༌ཚས༌པོ༌ ཞན༌ ཞིང༌བད༌པ༌ རིག༌ག༌ ཤས༌ལ༌ ཏང༌ཨིན༌།
MAR 12:10 ཅི༌ ཁྱོ༌ཞ༌གུན༌ནི༌ ཏམ༌པའེ༌ སུང༌རབས༌སི༌ ནང༌ནེ༌ འི༌བོ༌ མ༌སིལ༌པིན༌ན༌? ‘ཀ༌ རྡོའ༌བོ༌ ཁང༌པ༌ རྩིག༌ཁན༌གུན༌ནི༌ ཕན༌མི༌ཐོགས༌ ཐེས༌, ཏེན༌ན༌ རྡོའ༌བོ༌ ཁང༌པའེ༌ ཀྲུ༌རྡོའ༌བོ༌ གྱུར༌ ཀ༌བོ༌ ཚང༌མའེ༌སང༌ ཁག༌ཅན༌ རྡོའ༌བོ༌ ཨིན༌ནོག༌།
MAR 12:11 འི༌བོ༌ གཙོ༌བོའེ༌ ཅོའ༌ ཛད༌ཏེ༌ ཨིན༌ནོག༌, ཏེ༌བོ༌ ཐོང༌ཏེ༌ ང༌དང༌ ཧ༌ལས༌ཨིན༌།’”
MAR 12:12 བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌, ཡེ༌ཤུ༌ ཟུམ༌ཅེས༌སི༌ དོད༌པ༌ ཡོད༌པིན༌, ཅིའ༌ཟེར༌ན༌ རུངས༌པོ༌ ཁོང༌གུན༌ནི༌ གྱབ༌གལ༌ལ༌ ཤད༌ཏེ༌ ཨིན༌ཁན༌བོ༌ ཧ༌གོ༌། ཨིན༌ནའང༌ ཁོང༌གུན༌ མི༌ཚོགས༌ ཆེན༌མོའ༌ ཇིགས༌ཤེས༌པའེ༌ ཡེ༌ཤུ༌ བོར༌ཏེ༌ ཏེ༌ཀ༌ནེ༌ སོང༌།
MAR 12:13 སྟིང༌ནེ༌ འུ༌སྐྱོང༌གུན༌ནི༌, ཕ༌རུ༌ཤི༌པ༌ ཁ༌ཅིག༌ དང༌ ཧེ༌རོད༌དི༌ ཆོགས༌པ༌ ཁ༌ཅིག༌ གཙོ༌བོ༌ ཡེ༌ཤུའི༌ མོལ༌ཁན༌ནི༌ སྤེ༌ར༌རིག༌ གྱུད༌ཏེ༌ ཁོང༌ ཁད༌ཅུག༌ཅེས༌ལ༌ ལམ༌ཅུགས༌།
MAR 12:14 ཁོང༌གུན༌ ཡོངས༌ཏེ༌ ཁོང༌ང༌ ཟེརས༌, “ལོབ༌བོན༌ལེ༌, ཉེ༌རང༌ ཀྲང༌པོ༌ ཛད༌ཁན༌བོ༌ ང༌ཞའ༌ གྱུས༌ཡོད༌། ཉེ༌རང༌ངི༌ མི༌ ནང༌ང༌ ཡ༌ཕེས༌ ཛད༌ད༌ མ༌ནོག༌ ཅིའ༌ཟེར༌ན༌ ཉེ༌རང༌ངི༌ ཁོང༌གུན༌ སུ༌ ཨིན༌ཁན༌བོའེ༌ཀ༌ སྣང༌ང༌ མ༌ཛད༌ད༌ ཀྲང༌པོ༌ ཉམ༌པོ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌ ལབ༌བ༌ ཛད༌ད༌ནོག༌། རོམ༌མི༌ གྱལ༌པོའ༌ ཁྲལ༌ ཤལ༌ཅེས༌པོ༌ འོས༌པ༌ ཨིན༌ནོག༌ག༌ ཡ༌ མ༌ནོག༌?
MAR 12:15 ང༌ཞ༌གུན༌ནི༌ ཁྲལ༌ ཤལ༌གོས༌ས༌ ཡ༌ མ༌གོས༌?” ཁོང༌གུན༌ནི༌ ཁ༌ཆོས༌ ཅོ༌ཁན༌བོ༌ ཁྱེན༌ཏེ༌ ཡེ༌ཤུའི༌ མོལས༌, “ཅིའ༌ ང༌ སྤེ༌རའེ༌ ནང༌ང༌ སྐར༌ཅེས༌སི༌ རྩོན༌གྲུས༌ ཅོའད༌? རོམ༌པའེ༌ མུལ༌ལི༌ པེ༌ནེ༌ཞིག༌ ཁྱོངས༌ཏེ༌ ངའ༌ སྟོན༌ནའང༌།”
MAR 12:16 ཁོང༌གུན༌ནི༌ པེ༌ནེ༌ཞིག༌ ཁྱོངས༌, ཡང༌ ཁོང༌ངི༌ ཏྲིའ༌ ཛདས༌, “འི༌ པེ༌ནེ༌ཀ༌ ཡོད༌ཁན༌ནི༌ པར༌ དང༌ མིང༌ སུའི༌ ཨིན༌ནོག༌?” ཁོང༌གུན༌ནི༌ ལན༌ཏངས༌, “རོམ༌མི༌ གྱལ༌པོའེ༌།”
MAR 12:17 ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, “གྱལ༌པོའེ༌ ཨིན༌ཁན༌བོ༌ གྱལ༌པོའ༌ ཏོང༌ ཡང༌ དཀོན༌མཆོག༌གི༌ ཨིན༌ཁན༌བོ༌ དཀོན༌མཆོག༌ག༌ ཕུལ༌།” ཁོང༌ངི༌ ལན༌ སལ༌ཁན༌བོའེ༌ཀ༌, ཁོང༌གུན༌ མ༌སྲན༌ཏྲེ༌ ཧ༌ལས༌།
MAR 12:18 ཏེ༌ནེ༌ ཤི༌ཁན༌གུན༌ སོན༌ཏེའ༌ ལང༌ང༌ མ༌ནོག༌ ཟེར༌ཁན༌ནི༌ སད༌དུ༌ཀི༌པ༌གུན༌ ཡེ༌ཤུ༌ ཡོད༌ས༌ ཏྲི༌ཝ༌ཞིག༌ ཏྲིའ༌ལ༌ ཡོངས༌ ཡང༌ ཟེརས༌,
MAR 12:19 “ལོབ༌བོན༌ལེ༌ མོ༌ཟེས༌སི༌ ང༌དང༌གུན༌ལ༌ ཁྲིམས༌ཤིག༌ སལ༌ལ༌ ཛད༌ཏེ༌ དུག༌, ‘ཀལ༌ཏེས༌ བུ༌ཚ༌ཞིག༌ ཕྲུ༌གུ༌ མེད༌པ༌ ཤི༌ན༌, ཨ༌ཅོ༌ ཡ༌ ནོའེ༌ ཁོའེ༌ མིར༌གྱུད༌ ལུས༌ཤེས༌སི༌ ཕིའ༌ ཤི༌ཁན༌ནི༌ ན༌མ༌ ཉམ༌པོ༌ བག༌སྟོན༌ ཅོས༌ཏེ༌ ཕྲུ༌གུ༌ ཇོར༌ཅུག༌ གོས༌།’
MAR 12:20 ཏ༌ ཨ༌ཅོ༌ནོ༌ རྡུན༌ ཡོད༌པིན༌, ཨ༌ཅོ༌ ཆེ༌ཤོག༌པོའེ༌ བག༌མ༌ ཅོས༌, ཡང༌ ཕྲུ༌གུ༌ མེད༌པ༌ ཤི༌།
MAR 12:21 ཏེ༌ནེ༌ ནོ༌ ཉིས༌པ༌བོའེ༌, ཏེན༌ན༌ བུ༌མོ༌ ཉམ༌པོ༌ ན༌མ༌ ཅོས༌, ཨིན༌ནའང༌ ཁོའང༌ ཕྲུ༌གུ༌ མེད༌པ༌ ཤི༌། ཏེན༌ན༌ ཙོགས༌ སུམ༌པ༌བོ༌ ཉམ༌པོ༌ སོང༌
MAR 12:22 མ༌ཚད༌ ཁོང༌ རྡུན༌ཀོ༌ ཕྲུ༌གུ༌ མེད༌པ༌ ཤི༌, ཡང༌ སྟིང༌ཇུག༌ག༌ བུ༌མོ༌བོའང༌ ཤི༌།
MAR 12:23 བུ༌མོ༌བོའེ༌ ཁོང༌ རྡུན༌ཀོ༌ ཉམ༌པོ༌ ན༌མ༌ ཅོས༌པ༌, ཤི༌ཁན༌གུན༌ སོན༌ཏེའ༌ ལང༌ངི༌ ཏུས༌ལ༌ ཁོ༌ ཁོང༌གུན༌ནི༌ ནང༌ནེ༌ སུའི༌ ན༌མ༌ གྱུར༌ཨིན༌?”
MAR 12:24 ཡེ༌ཤུའི༌ མོལས༌, “ཁྱོ༌ཞའེ༌ ནོར༌ཁྲུལ༌བོ༌ ནི༌ ཁྱོ༌ཞ༌གུན༌ལ༌ དཀོན༌མཆོག༌གི༌ སྟོབས༌ ཡ༌ ཏམ༌པའེ༌ སུང༌རབས༌པོ༌ ཧ༌མ༌གོའ༌ ཨིན༌ནོག༌།
MAR 12:25 དཀོན༌མཆོག༌གི༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ ཟ༌ནེ༌, ཁོང༌གུན༌ནི༌ ན༌མ༌ མི༌ཅོ༌ ཡ༌ བག༌མ༌ མི༌ཏང༌, ཁོང༌གུན༌ ནམ༌ཁའེ༌ ཕོ༌ཉ༌ ཙོགས༌ གྱུར༌ཨིན༌།”
MAR 12:26 “ཨིན༌ནའང༌ ཤི༌ཁན༌གུན༌ སོན༌ཏེའ༌ ལང༌ཅེས༌སི༌ སྐོར༌བོ༌, ཁྱོ༌ཞ༌གུན༌ནི༌ མོ༌ཟེས༌སི༌ བྲིས༌ཏེ༌ ཡོད༌ཁན༌ནི༌ སྤེ༌ཆའེ༌ ནང༌ང༌ མ༌སིལ༌པིན༌ན༌? ལྕང༌མ༌ ཆུ༌ངུན༌ མེའ༌ བར༌ཁན༌ནི༌ རུངས༌སི༌ ནང༌ང༌ དཀོན༌མཆོག༌གི༌ མོ༌ཟེས༌ལ༌ མོལ༌ལ༌ ཛདས༌, ‘ང༌ ནི༌, ཨབ༌ར༌ཧམ༌མི༌ དཀོན༌མཆོག༌, ཨི༌སཱག༌གི༌ དཀོན༌མཆོག༌ དང༌ ཡ༌ཀོབ༌བི༌ དཀོན༌མཆོག༌ ཨིན༌ །’
MAR 12:27 ཁོང༌ ནི༌ ཤི༌ཁན༌གུན༌ནི༌ དཀོན༌མཆོག༌ མན༌པ༌, སོན༌པོ༌གུན༌ནི༌ དཀོན༌མཆོག༌ ཨིན༌ནོག༌། ཁྱོ༌ཞ༌གུན༌ནི༌ ནོར༌ཁྲུལ༌ ཆེན༌མོ༌ ཅོས༌ཏེ༌ ཨིན༌ནོག༌།”
MAR 12:28 གྲོས༌དུར༌ལ༌ ཉན༌ཨིན༌, ཏེ༌རུ༌ ཆོས༌ཁྲིམས༌ལ༌ ཁས༌པ༌ཞིག༌ ཡོད༌པིན༌། གཙོ༌བོ༌ ཡེ༌ཤུའི༌ ལན༌ གྱལ༌ལ༌ སལ༌ཁན༌བོ༌ ཚོར༌ཏེ༌ ཁོའེ༌ ཡེ༌ཤུའ༌ ཏྲིས༌, “བཀའ༌རྒྱ༌ ཚང༌མའེ༌ ནང༌ནེ༌ ཀ༌བོ༌ ཚང༌མའེ༌སང༌ ཁག༌ཅན༌ ཨིན༌ནོག༌?”
MAR 12:29 ཡེ༌ཤུའི༌ ལན༌སལས༌, “ཚང༌མའེ༌སང༌ བཀའ༌རྒྱ༌ ཁག༌ཅན༌བོ༌ ནི༌ འི༌བོ༌ ཨིན༌ནོག༌ ‘ཉོན༌ ཝ༌ ཨིས༌ར༌ཨེལ༌པ༌གུན༌, གཙོ༌བོ༌ ང༌དང༌གུན༌ནི༌ དཀོན༌མཆོག༌, གཙོ༌བོ༌ ཅིག༌ཅིག༌ ཞུགས༌ཏེ༌ ཨིན༌ནོག༌།
MAR 12:30 གཙོ༌བོ༌ ཁྱོ༌ཞའེ༌ དཀོན༌མཆོག༌ག༌ སྙིང༌ གང༌པོ༌, སེམས༌ གང༌པོ༌, སམ༌བ༌ གང༌པོ༌ དང༌ སྟོབས༌ གང༌པོ༌ནེ༌ ཅེས༌པ༌ ཅོས༌།’
MAR 12:31 ཉིས༌པ༌བོ༌, ‘རང༌ང༌ ཅེས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པ༌ ཅམས༌པ༌ ཅོས༌,’ འི༌གུན༌ནི༌ སང༌ ཆེའ༌ ཞན༌ཡང༌ བཀའ༌རྒྱ༌ཞིག༌ མེད༌།”
MAR 12:32 ཆོས༌ཁྲིམས༌ལ༌ ཁས༌པ༌བོའེ༌ ལན༌ཏངས༌, “གྱལ༌ལ༌ མོལས༌ ལོབ༌བོན༌ལེ༌, ཉེ༌རང༌ངི༌ དཀོན༌མཆོག༌ ཅིག༌ཅིག༌ མ༌ནེ༌, ཞན༌ཡང༌ མེད༌ཏེ༌ ཨིན༌ནོག༌ མོལ༌ཅེས༌པོ༌ ཀྲང༌པོ༌ མོལ༌ཏེ༌ ཨིན༌ནོག༌།
MAR 12:33 མེ༌ ནང༌ང༌ ཆོད༌པ༌ དང༌ སྲོག༌གི༌ ཆོད༌པ༌ ཚང༌མ༌ ཕུལ༌ཅེས༌སི༌ སང༌ མང༌ང༌ ཁག༌ཅན༌ དཀོན༌མཆོག༌ག༌ སྙིང༌ གང༌པོ༌, ཧ༌གོ༌ གང༌པོ༌ དང༌ སྟོབས༌ གང༌པོ༌ནེ༌ ཅམས༌པ༌ ཅོ༌ཅེས༌ མ༌ཚད༌ རང༌ང༌ ཅེས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པ༌ ཅམས༌པ༌ ཅོ༌གོ༌ཤེས༌པོ༌ ཨིན༌ནོག༌།”
MAR 12:34 ཁོའེ༌ མ༌ ཤེས༌རབས༌ཅན༌ནི༌ ལན༌ཏང༌ཁན༌བོ༌ ཁྱེན༌ན༌ ཛད༌ཏེ༌ ཡེ༌ཤུའི༌ ཁོའ༌ མོལས༌, “ཁྱོ༌རང༌ དཀོན༌མཆོག༌གི༌ གྱལ༌སྲིད༌ནེ༌ ཐག༌རིང༌ང༌ མི༌དུག༌།” ཏེ༌ ཞག༌ནེ༌ ཕར༌ལ༌ སུ༌ཞིག༌གིའང༌ ཁོང༌ང༌ ཏྲི༌ཝ༌ ཏྲི༌ཅེས༌སི༌ ཧམ༌པ༌ མ༌ཅོས༌།
MAR 12:35 གཙོ༌བོ༌ ཡེ༌ཤུའི༌ མི༌གུན༌ལ༌ ཆོད༌ཁང༌ངི༌ ནང༌ང༌ ལབ༌ཞ༌ སལ༌ ཟ༌ནེ༌, ཁོང༌ངི༌ ཏྲིའ༌ ཛདས༌, “ཆོས༌ཁྲིམས༌ལ༌ ཁས༌པ༌གུན༌ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, གྱལ༌པོ༌ དཱ༌བིད༌དི༌ པུར༌གྱུད༌ ཨིན༌ནོག༌ ཀ༌ཟུག༌གི༌ ཟེར༌ར༌ནོག༌?
MAR 12:36 དཱ༌བིད༌ ཁོ༌རང༌ངི༌, ཏམ༌པའེ༌ ཐུག༌ཉིད༌ གྱུད༌ཏེ༌ འི༌ཟུག༌ ཟེརས༌, ‘དཀོན༌མཆོག༌གི༌ ངའེ༌ གཙོ༌བོའ༌ མོལས༌, ངའེ༌ ཁྱོ༌རང༌ངི༌ གྲ༌འོ༌ ཚང༌མ༌, ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌, ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།’”
MAR 12:37 “ཀལ༌ཏེས༌ དཱ༌བིད༌དི༌ མ༌ཤི༌ཀའ༌ ‘གཙོ༌བོ༌’ ཟེར༌རད༌ན༌, ཏེ༌ནེ༌ ཀ༌ཟུག༌གི༌ མ༌ཤི༌ཀ༌ ཁོའེ༌ པུར༌གྱུད༌ ཨིན༌ནོག༌?” མི༌ཚོགས༌ ཆེན༌མོའེ༌ ཁོང༌ང༌ ཐད༌པོ༌ ཉམ༌པོ༌ ཉན༌ནད༌པིན༌།
MAR 12:38 ལབ༌ཞ༌ སལ༌ ཟ༌ནེ༌ ཡེ༌ཤུའི༌ མོལས༌, “ཆོས༌ཁྲིམས༌ལ༌ ཁས༌པ༌གུན༌ནི༌ ཀ༌ནེ༌ ཤང༌ ཅོས༌། ཁོང༌གུན༌ ཆོས༌སི༌ ཀོས༌ལག༌ ཐུལ༌ཅན༌ གོན༌ཏེ༌ གྲུལ༌ལ༌ལ༌, ཡང༌ ཁྲོམས༌སི༌ ནང༌ང༌ མི༌གུན༌ནི༌ ཀ༌ནེ༌ རྩི༌ཝ༌ ཐོབ༌ཅེས༌ལ༌ ཐད༌ད༌ནོག༌།
MAR 12:39 དུ༌ཁང༌ངི༌ ནང༌ང༌ རྩི༌ཝ༌ཅན༌ནི༌ ནས༌སའེ༌ཀ༌ ཡང༌ གྲོན༌ནི༌ ནང༌ང༌ གྲལ༌གོའ༌ དུག༌ག༌ལ༌ ཐད༌ད༌ནོག༌།
MAR 12:40 ཨ༌ནེ༌མ༌རང༌མོ༌གུན༌ལ༌ གོབ༌སྐོར༌ཏེ༌ ཁོང༌ངི༌ ཁང༌པ༌གུན༌ ཁྱེར༌ཅེས༌, ཡང༌ མི༌གུན༌ལ༌ སྟན༌ཅེས༌སི༌ ཕིའ༌ མོས༌ལམ༌ རིང༌མོ༌ ཞུ༌དུག༌། ཏེ༌བོའེ༌ ཞས༌ཏེ༌ ཁོང༌གུན༌ལ༌ ཆད༌པ༌ སྲན༌ཏྲེ༌ ཕོག༌ཨིན༌།”
MAR 12:41 ཆོད༌ཁང༌ངི༌ ནང༌ང༌ གཙོ༌བོ༌ ཡེ༌ཤུ༌ པེ༌ནེ༌ ལྡུ༌ཅེས༌སི༌ སྒམ༌མི༌ དུན༌ལ༌ སའེ༌ཀ༌ ཞུགས༌ཏེ༌ ཏེ༌ནང༌ང༌ པེ༌ནེ༌ ཕུལ༌ཁན༌ནི༌ མི༌ཚོགས༌ལ༌ ཟིགས༌སད༌པིན༌། མི༌ ཆུག༌པོ༌ མང༌པོའེ༌ པེ༌ནེ༌ མང༌པོ༌ ཕུལས༌།
MAR 12:42 ཉལ༌བ༌ཅན༌ ཨ༌ནེ༌མ༌རང༌མོ༌ཞིག༌ ཡོངས༌ཏེ༌ ཟངས༌སི༌ པེ༌ནེ༌ ཉིས༌ ཕུལས༌, ཀ༌བོ༌ རིན༌ཐང༌ མ༌ ཉུ༌ངུན༌ཅན༌ ཨིན༌པིན༌།
MAR 12:43 ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ བོད༌ད༌ ཛདས༌ཏེ༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ ཨ༌ནེ༌མ༌རང༌མོ༌ ཉལ༌བ༌ཅན༌བོའེ༌ བུལ༌ལྡུས༌སི༌ སྒམ༌མི༌ ནང༌ང༌ པེ༌ནེ༌ ཞན༌ ཚང༌མའེ༌ སང༌ མང༌ང༌ ཕུལས༌,
MAR 12:44 ཁོང༌ ཚང༌མའེ༌ ཁོ༌རང༌གུན༌ལ༌ མང༌པོ༌ ཡོད༌ཁན༌ནི༌ ནང༌ནེ༌ ཉུ༌ངུན༌ཞིག༌ ཏངས༌, ཨིན༌ནའང༌ འི༌ ཨ༌ནེ༌མ༌རང༌མོ༌བོའེ༌ ཉལ༌བ༌ཅན༌ ཨིན༌ཏེའང༌ ཁོ༌ སོན༌ཏེའ༌ ལུས༌ཤེས༌སི༌ སྒོས༌དོམ༌ ཡོད༌ཁན༌ ཚང༌མ༌ ཏངས༌།”
MAR 13:1 གཙོ༌བོ༌ ཡེ༌ཤུ༌ ཆོད༌ཁང༌ནེ༌ བིང༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌ ཅིག༌གི༌ ཟེརས༌, “ལོབ༌བོན༌ལེ༌ འི༌ ཧ༌ལས༌ཤེས༌སི༌ ཆོད༌ཁང༌ང༌ ཟིགས༌སའང༌, ཙམ༌ཤིག༌གི༌ ཆེན༌མོ༌ རྡོའ༌གུན༌ རྩིག༌ཅེས༌ལ༌ ཀོལ༌ཏེ༌ ཨིན༌ནོག༌།”
MAR 13:2 ཡེ༌ཤུའི༌ ལན༌སལས༌, “ཁྱོ༌ཞ༌གུན༌ནི༌ འི༌ ཆོད༌ཁང༌ ཧ༌ལས༌ཤེས༌ རྩིགས༌ཁན༌བོ༌ ཐོང༌དུག༌ག༌? འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།”
MAR 13:3 ཆོད༌ཁང༌ངི༌ འ༌ངོ༌ ཆོགས༌སི༌ ལུང༌པའེ༌ ཨོ༌ལིཝ༌ཝི༌ རི༌ཀ༌ ཡེ༌ཤུ༌ ཞུགས༌ཏེ༌ ཡོད༌ ཟ༌ནེ༌, པི༌ཏྲར༌, ཡ༌ཀོབ༌, ཁོའེ༌ ནོ༌ ཡོ༌ཧཱ༌ནན༌ དང༌ ཨེན༌གྲིའུ༌ གུན༌ སུའང༌ གྱུས༌ཆའ༌ མ༌ཅུག༌ག༌ ཡེ༌ཤུ༌ ཡོད༌ས༌ ཡོངས༌ཏེ༌ ཏྲིས༌,
MAR 13:4 “ང༌ཞའ༌ ཤད༌ད༌ ཛད༌དའང༌ ཏེ༌བོ༌ ནམ༌ ཇུང༌ཨིན༌, ཡང༌ ཏེ༌ ཚང༌མ༌ དྲན༌དྲ༌ གྲུབ༌ཅེས༌སི༌ སྟགས༌གུན༌ ཀ༌ཟུག༌ རིག༌ ཡོང༌ཨིན༌?”
MAR 13:5 ཡེ༌ཤུའི༌ ཁོང༌གུན༌ལ༌ མོལས༌, “སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌,
MAR 13:6 ཅིའ༌ཟེར༌ན༌ ‘ངའེ༌ མིང༌ ཁུར༌ཏེ༌ ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌’ ཟེར༌ཁན༌ མང༌པོ༌ཞིག༌ ཡོངས༌ཏེ༌ མི༌ མང༌པོའ༌ གོབ༌སྐོར༌ ཏང༌ཨིན༌།
MAR 13:7 ཁྱོ༌ཞ༌གུན༌ནི༌ མག༌ དང༌ མག༌གི༌ སྐོར༌ལ༌ འུ༌ཡ༌གུན༌ ཚོར༌ར༌ཅིག༌, ཇིགས༌ མ༌ཇིག༌ཤིག༌; ཏེ༌གུན༌ ཇུང༌གོས༌, ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌།
MAR 13:8 གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌། ནས༌ས༌ མང༌པོའེ༌ ནང༌ང༌ མུ༌གེ༌ དང༌ སང༌གུལ༌ ཡོང༌ཨིན༌། ཨིན༌ནའང༌ ཏེ༌གུན༌ ནི༌ ཕྲུ༌གུ༌ སྐྱེ༌ཅེས༌སི༌ གོ༌ཟུག༌གི༌ ཟུག༌ཟེར༌བོ༌ ཙོགས༌ ཨིན༌།”
MAR 13:9 “ཏེ༌ཏུས༌ལ༌ ཁྱོ༌ཞ༌གུན༌ ཤང༌ ཅོས༌ཏེ༌ དུག༌། ཁྱོ༌ཞ༌གུན༌ ཏེན༌ན༌ ཡུལ༌ལི༌ ཝང༌སྲུལ༌པ༌གུན༌ནི༌ ལག༌ག༌ སྟད༌ཏེ༌ དུ༌ཁང༌གུན༌ནི༌ ནང༌ང༌ ཁྱོ༌ཞའ༌ རྟལ༌ལྕག༌ གྱབ༌ཅུག༌ཨིན༌། ངའེ༌ཀ༌ ཏད༌པ༌ ཡོད༌ཅེས༌པོའེ༌ ཁྲིམས༌ཅད༌ད༌ལ༌ ཀའ༌ལོན༌ དང༌ གྱལ༌པོ༌ གུན༌ནི༌ཀ༌ ཁྱོ༌ཞའ༌ ཁྱེར༌ཨིན༌, ཏེ༌ཏུས༌ ཁྱོ༌ཞའ༌ ངའ༌ སུ༌ ཨིན༌ཁན༌བོའེ༌ སྤང༌པོ༌ ཁོང༌གུན༌ལ༌ ཏང༌ཅེས༌སི༌ སྐབས༌ ཐོབ༌ཨིན༌།
MAR 13:10 ཐའ༌མའེ༌ ཏུས༌ ལེབ༌བི༌ སང༌ སྔུན༌ལ༌, གའ༌མོའེ༌ ནས༌ཚུལ༌བོ༌ གྱལ༌ཁམས༌ ཚང༌མ༌ལ༌ ཤད༌གོས༌།
MAR 13:11 ཁྱོ༌ཞ༌གུན༌ ཟུམས༌ཏེ༌ ཁྲིམས༌ཅད༌ཅེས༌ལ༌ ཁྱོང༌ང༌ཅིག༌, ཅི༌ ཟེར༌ཨིན༌ སམས༌ཏེ༌ སྔུན༌ལ༌ ཚེར༌ མ༌ཚེར༌། ཏེན༌ན༌ ཏུས༌ལ༌, ཁྱོ༌ཞའ༌ ཅི༌ ཟེར༌ཅེས༌ལ༌ སལ༌ལ༌ ཛད༌ནའང༌, ཏེན༌ན༌བོ༌ ཟེར༌, ཅིའ༌ཟེར༌ན༌ སྤེ༌ར༌ ཏང༌ཁན༌བོ༌ ཁྱོ༌ཞ༌གུན༌ མན༌པ༌, ཏམ༌པའེ༌ ཐུག༌ཉིད༌ ཨིན༌ནོག༌།”
MAR 13:12 “ཨ༌ཅོ༌གུན༌ནི༌ ནོ༌གུན༌ལ༌ ཡང༌ ཨ༌བའེ༌ བུ༌ཚའ༌ ཡང༌ ཕྲུ༌གུའི༌ ཕ༌མ༌གུན༌ལ༌ ངོ༌ལོག༌ ཅོས༌ཏེ༌ སད༌ཅུག༌ཨིན༌།
MAR 13:13 ངའེ༌ཀ༌ ཏད༌པ༌ ཅོ༌ཅེས༌པོའེ༌ མི༌ཚང༌མའེ༌ ཁྱོ༌ཞ༌གུན༌ལ༌ ནཕ༌རད༌ ཅོའ༌ནོག༌, ཨིན༌ནའང༌ ཐའ༌མ༌ ཚོག༌པ༌ ངའེ༌ཀ༌ ཏད༌པ༌ སྟན༌པོ༌ བོར༌ཁན༌གུན༌ ཐར༌ཨིན༌།”
MAR 13:14 “ནམ༌ ‘ཁམ༌ལོག༌ ཚི༌ཏུ༌ ཅོ༌ཁན༌བོ༌’ ཏམ༌པའེ༌ ཆོད༌ཁང༌ངི༌ ནང༌ང༌ ཡོད༌ཅེས༌པོ༌ འོས༌པ༌ མན༌ཨིན༌ནའང༌ བོར༌ཏེ༌ ཐོང༌ང༌ཅིག༌ ༼སིལ༌ཁན༌གུན༌ནི༌ ངའེ༌ ཟེར༌ཅེས༌ཅན༌གུན༌ནི༌ཀ༌ སྣང༌ང༌ ཏོང༌༽ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌།
MAR 13:15 ཁང༌པའེ༌ ཁེ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌།
MAR 13:16 ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཀོས༌ ཁྱོང༌ང༌ལ༌ མ༌ཆ༌།
MAR 13:17 ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌།
MAR 13:18 འི༌གུན༌ དགུན༌ཏུས༌ལ༌ མི༌ཇུང༌ཅེས༌ལ༌ མོས༌ལམ༌ ཞུས༌,
MAR 13:19 ཅིའ༌ཟེར༌ན༌ ཏེ༌ཏུས༌ལ༌ འི༌ཟམ༌ རྡུག༌ངལ༌ ཀྲག༌པོ༌ ཇུང༌ཨིན༌, ཀ༌བོ༌ དཀོན༌མཆོག༌གི༌ ཇིག༌རྟེན༌ ཛད༌པ༌ནེ༌ ཕར༌ལ༌ དག༌ས༌ ཚག༌པ༌ མ༌ཇུང༌ང༌ ཨིན༌ནོག༌ ཡང༌ སྟིང༌ཞིན༌ནའང༌ མི༌ཇུང༌།
MAR 13:20 ཀལ༌ཏེས༌ གཙོ༌བོ༌ དཀོན༌མཆོག༌གི༌ ཏེ༌ཏུས༌པོ༌ ཉུ༌ངུན༌ མ༌ཛད༌པིན༌ན༌ སུ༌ཞིག༌གའང༌ སོན༌ཏེའ༌ ལུས༌ཏེ༌ མེད༌གྲོ༌, ཨིན༌ནའང༌ ཁོང༌ངི༌ ལྡམ༌མ༌ ཛད༌ཁན༌གུན༌ནི༌ ཏོན༌ལ༌, ཏེ༌ཏུས༌པོ༌ ཉུ༌ངུན༌ ཅོའ༌ ཛདས༌།”
MAR 13:21 “ཏེ༌ཏུས༌ལ༌ ཀལ༌ཏེས༌ སུ༌ཞིག༌གི༌ ཁྱོ༌ཞའ༌, ‘ལྟོས༌ཤིག༌ མ༌ཤི༌ཀ༌ འི༌ཀ༌ནེ༌ ཡ༌ འ༌ཀ༌ནེ༌ ཞུགས༌ཏེ༌ དུག༌’ ཟེར༌ན༌ ཨིད༌ཤེས༌ མ༌ཅོ༌།
MAR 13:22 ཅིའ༌ཟེར༌ན༌ ཟུས༌མ༌ མ༌ཤི༌ཀ༌ དང༌ ཟུས༌མ༌ ལུང༌སྟོན༌པ༌གུན༌ ཡོངས༌ཏེ༌ ཛད༌པ༌ དང༌ ལྟས༌གུན༌ སྟན༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལའང༌ གོབ༌སྐོར༌ ཏང༌ཅེས༌སི༌ རྩོན༌གྲུས༌ ཅོ༌ཨིན༌ ཨིན༌ནའང༌ ཏང༌ མི༌ཉན༌།
MAR 13:23 ཤང༌ ཅོས༌, ཏུས༌པོ༌ ལེབ༌བི༌ སང༌ སྔུན༌ལ༌ ངའེ༌ ཁྱོ༌ཞའ༌ ཅི༌ཚང༌མ༌ ཤད༌ཏེ༌ ཨིན༌།”
MAR 13:24 “ཏེ༌ཏུས༌ལ༌, རྡུག༌ངལ༌ལི༌ སྟིང༌ནེ༌ ‘ཉི༌མ༌ མུན༌གྲིག༌ གྱུར༌ཨིན༌, ཟླ༌ཝའེ༌ འོད༌ མི༌ཏང༌
MAR 13:25 ནམ༌ནེ༌ སྐར༌མ༌གུན༌ བུད༌ཨིན༌ ཡང༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཨིན༌།’”
MAR 13:26 “ཏེ༌ནེ༌ མི༌ཚང༌མའེ༌, མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌ སྲིན༌ནི༌ཀ༌ ཞོན༌ཏེ༌ ཡོང༌ང༌ ཐོང༌ཨིན༌།
MAR 13:27 ཡང༌ ཁོའེ༌, ཕོ༌ཉ༌གུན༌ ཇིག༌རྟེན༌ གང༌པོའེ༌ ནང༌ནེ༌ ཁོ༌རང༌ངི༌ ལྡམ༌ཁན༌གུན༌ ལྡུ༌ཅེས༌ལ༌ ཀལ༌ཨིན༌།”
MAR 13:28 “ཕིག༌ ཁ༌ཟས༌སི༌ ལྕང༌མའེ༌ ཀ༌ནེ༌ ལབ༌ཞ༌ ལེན༌ནའང༌; ཏེ༌བོའེ༌ ཡལ༌ག༌ སྔོན༌པོ༌ སོང༌ཏེ༌ ལོ༌མ༌ སོ༌མ༌ བིང༌ང༌ཅིག༌, ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌།
MAR 13:29 ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌གུན༌ ཐོང༌ང༌ཅིག༌, ང༌ ལོགས༌ཏེ༌ ཡོང༌ཅེས༌སི༌ ཏུས༌ ཉེ༌མོ༌, སྒོའེ༌ དུན༌ལ༌ ལེབས༌ཏེ༌ ཡོད༌ཁན༌བོ༌ ཁྱོ༌ཞ༌གུན༌ནི༌ ཤེས༌ཨིན༌།
MAR 13:30 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ ཇུང༌ཨིན༌།
MAR 13:31 ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།”
MAR 13:32 “ཏེ༌ ཚང༌མ༌ ཇུང༌ཅེས༌སི༌ ཞག༌ ཡ༌ ཏུས༌ཚོད༌པོ༌ དཀོན༌མཆོག༌ ཡབ༌ ཅིག༌པོའ༌ མ༌ནེ༌ ཡང༌ སུའང༌ གྱུས༌མེད༌, ནམ༌ཁའེ༌ ཕོ༌ཉ༌ ཡ༌ བུ༌ཚའང༌།
MAR 13:33 ཏེ༌ཏུས༌པོ༌ ཁྱོ༌ཞ༌གུན༌ལ༌ གྱུས༌མེད༌ པ༌སང༌, ཉིད༌ མ༌ཏང༌ང༌ ཤང༌ ཅོས༌ཏེ༌ དུག༌།”
MAR 13:34 “ཏེ༌བོ༌ ནི༌ མི༌ཞིག༌ ས༌ཆ༌ ཐག༌རིང༌ཞིག༌ག༌ བེས༌ལ༌ ཆའ༌ཁན༌ ཙོགས༌ ཨིན༌ནོག༌། ཁང༌པ༌ནེ༌ བིང༌ངི༌ སང༌ སྔུན༌ལ༌ ཁོའེ༌ ཡོག༌པོ༌གུན༌ལ༌ རང༌རང༌ངི༌ ལས༌ ཅོ༌ཅེས༌ལ༌ ཁག༌ ཀལ༌ཏེ༌ སྒོ༌ སྲུང༌པ༌བོའ༌ ཤང༌ ཅོས༌ཏེ༌ ཁོ༌ ལོགས༌ཏེ༌ ཡོང༌ཅེས༌ལ༌ སྲུངས༌ཏེ༌ དུག༌ ཟེར༌ར༌ནོག༌།
MAR 13:35 ཏེ༌བོའེ༌ཕིའ༌ ཤང༌ ཅོས༌, ཅིའ༌ཟེར༌ན༌ ཁང༌དག༌ ཕི༌ཏོག༌, ཚན༌ནི༌ སྐྱིལ༌, ནམ༌ལངས༌སི༌ སང༌ སྔུན༌ལ༌, ཡ༌ ཉི༌མ༌ ཤར༌ཏེ༌ སྟིང༌ནེ༌, ནམ༌ ལོགས༌ཏེ༌ ཡོང༌ཨིན༌ ཁྱོ༌ཞ༌གུན༌ལ༌ གྱུས༌མེད༌ཏེ༌ ཨིན༌ནོག༌།
MAR 13:36 ཀལ༌ཏེས༌ ཁོ༌ ཧུན༌མེད༌ལ༌ ལེབ༌ན༌, ཁྱོ༌ཞ༌གུན༌ ཉིད༌ལོགས༌ཏེ༌ ཡོད༌ཁན༌བོ༌ ཐོང༌ མ༌གོས༌།
MAR 13:37 ངའེ༌ ཁྱོ༌ཞ༌གུན༌ལ༌ ཟེར༌ཁན༌བོ༌ ཚང༌མ༌ལ༌ ཟེར༌རད༌; ཤང༌ ཅོ༌ཤིག༌།”
MAR 14:1 ཞག༌མ༌ ཉིས༌སི༌ སྟིང༌ནེ༌ པེ༌སག༌ དང༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ ལེབ༌ཅེས༌ ཨིན༌པིན༌ ཡང༌ བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ སང༌ཝའེ༌ ཐོག༌ནེ༌ གཙོ༌བོ༌ ཡེ༌ཤུ༌ ཟུམས༌ཏེ༌ སད༌ཅེས༌སི༌ སྐབས༌ ཙལ༌ལད༌པིན༌།
MAR 14:2 ཨིན༌ནའང༌ ཁོང༌གུན༌ནི༌ ཟེརས༌, “པེ༌སག༌གི༌ ཏུས༌ཆེན༌ནི༌ ཏུས༌ལ༌ མི༌ཟུམ༌ ཅིའ༌ཟེར༌ན༌ མི༌ཚོགས༌ལ༌ སྲོ༌ ཡོངས༌ཏེ༌ ཧི༌ལིངས༌ ཕིང༌སྲིད༌ཅེས༌ ཨིན༌ནོག༌།”
MAR 14:3 ཡེ༌ཤུ༌ བེད༌ཐཱ༌ནི༌ གྲོང༌སེབ༌བ༌ ཛེ༌ནད༌ནེ༌ ཕན༌ཁན༌ ཤི༌མོན༌ནི༌ ཁང༌པའེ༌ ནང༌ང༌ ཅོག༌ཙེ༌ཀ༌ སྟེན༌ཏེ༌ ཡོད༌ཏུས༌, ཀའ༌ཡོལ༌ལི༌ ནོད༌ ཏྲི༌ཞིམ༌མི༌ མར༌ ཀུས༌པོ༌ སྐངས༌ཏེ༌ ཁུར༌ཁན༌ནི༌ བུ༌མོ༌ཞིག༌ ཡོངས༌, ཡང༌ ནོད༌པོ༌ ཅགས༌ཏེ༌ ཏྲི༌ཞིམ༌བོ༌ ཁོང༌ངི༌ ཨུའི༌ཀ༌ ལུགས༌།
MAR 14:4 ཏེ༌ཀ༌ ཡོད༌ཁན༌ ཁ༌ཅིག༌ག༌ སྲོ༌ ཡོངས༌ཏེ༌ ཅིག༌ དང༌ ཅིག༌ག༌ ཟེརས༌, “ཅིའ༌ འི༌ཙོགས༌སི༌ ཏྲི༌ཞིམ༌ རིན༌ཅན༌བོ༌ གོད༌ལ༌ ཏངས༌ཏེ༌ ཨིན༌ནོག༌?
MAR 14:5 འི༌བོ༌ ལོ༌ ཅིག༌གི༌ ལ༌ཆ༌ ཟམ༌ཤིག༌ག༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏང༌ཤིག༌པིའང༌།” ཁོང༌གུན༌ནི༌ བུ༌མོ༌བོའ༌ མ༌སྲན༌ཏྲེ༌ ཁའ༌སྐྱེས༌།
MAR 14:6 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, “བོར༌རའང༌, ཁོའ༌ ཅིའ༌ ཁའ༌ སྐྱེའད༌? ཁོའེ༌ ངའེ༌ ཕིའ༌ ལས༌ ཟང༌པོ༌ ཅོས༌ཏེ༌ ཨིན༌ནོག༌།
MAR 14:7 ཉལ༌བ༌ཅན༌གུན༌ ཏུས༌གྱུན༌ ཁྱོ༌ཞའ༌ ཉམ༌པོ༌ ལུས༌ཨིན༌, ཡང༌ ཁྱོ༌ཞ༌གུན༌ནི༌ ནམ༌ ཅོ༌ཨིན༌ སམ༌ནའང༌ ཁོང༌གུན༌ལ༌ རོགས༌ ཅོ༌ ཉན༌ཨིན༌། ཨིན༌ནའང༌ ང༌ ཁྱོ༌ཞའ༌ ཉམ༌པོ༌ ཏུས༌གྱུན༌ མི༌ལུས༌།
MAR 14:8 ཁོའེ༌ ཁོ༌རང༌ང༌ ཉན༌ཁན༌བོ༌ ཅོས༌ཏེ༌ ཨིན༌ནོག༌, ཁོའེ༌ ཏུས༌སི༌ སང༌ སྔུན༌ལ༌ ངའེ༌ ཟུགས༌པོའ༌ ཏྲི༌ཞིམ༌ ལུགས༌ཏེ༌ ངའེ༌ ཟུགས༌པོ༌ སྤུར༌ཁང༌ང༌ ཁྱེར༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཨིན༌ནོག༌།
MAR 14:9 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཇིག༌རྟེན༌ གང༌པོའེ༌ ནང༌ང༌ ཀ༌རུ༌ གའ༌མོའེ༌ ནས༌ཚུལ༌ ཤད༌ནའང༌ འི༌ བུ༌མོ༌བོའེ༌ ངའ༌ ཅོས༌ཁན༌བོའང༌ ཤད༌ཏེ༌ ཁོ༌ ཨིད༌ཏུ༌ ཅོ༌ཨིན༌།”
MAR 14:10 ཏེ༌ནེ༌ ལོབ༌ཕྲུགས༌ རྕུག༌ཉིས༌སི༌ ནང༌ནེ༌ ཅིག༌, ཀར༌ཡོད༌པ༌ ཡུ༌དཱ༌ བླ༌མ༌ འུ༌སྐྱོང༌གུན༌ ཡོད༌ས༌ སོང༌ཏེ༌ གཙོ༌བོ༌ ཡེ༌ཤུའ༌ ངོ༌ལོག༌ ཅོས༌ཏེ༌ ཁོང༌གུན༌ནི༌ ལག༌ག༌ སྟད༌ཅེས༌ལ༌ ཐབ༌ལྡིངས༌།
MAR 14:11 ཏེ༌བོ༌ ཚོར༌ཏེ༌ ཁོང༌གུན༌ མ༌སྲན༌ཏྲེ༌ ཐད༌, ཡང༌ ཁོའ༌ པེ༌ནེ༌ ཏང༌ཅེས༌སི༌ ཁ༌ཆད༌ ཅོས༌། ཏེ༌ནེ༌ ཁོའེ༌ ཡེ༌ཤུ༌ སྟད༌ཅེས༌སི༌ སྐབས༌ ཙལ༌ཅེས༌ གོ༌ཟུགས༌།
MAR 14:12 སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ནི༌ གོ༌མའེ༌ ཞག༌, ནམ༌ པེ༌སག༌གི༌ ལུ༌གུ༌བོ༌ སྲོག༌ཆོད༌ལ༌ ཕུལ༌ལད༌, གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ནི༌ ཁོང༌ང༌ ཏྲིས༌, “ང༌ཞའ༌ སོང༌ཏེ༌ ཉེ༌རང༌ དོན༌ཅེས༌སི༌ ཕིའ༌ པེ༌སག༌གི༌ དོན༌ཏང༌ ཀ༌རུ༌ གྲལ༌གྲིག༌ ཅོ༌ལེ༌?”
MAR 14:13 ཏེ༌ནེ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌ ཉིས༌ ཡེ༌རུ༌ཤ༌ལེམ༌མ༌ ལམ༌ཅུག༌ག༌ ཛད༌ཨིན༌ མོལས༌, “གྱལ༌སའེ༌ ནང༌ང༌ སོང༌, ཏེ༌རུ༌ ཆུ༌ཀར༌ ཁུར༌ཁན༌ནི༌ མི༌ཞིག༌ ཁྱོ༌ཞ༌གུན༌ལ༌ ཐུག༌ཅེན༌, ཁོའེ༌ སྟིང༌རང༌ནེ༌ སོང༌།
MAR 14:14 ཁོ༌ ཞུགས༌ཏེ༌ ཆ༌སའེ༌ ཁང༌པའེ༌ ཁང༌དག༌པོའ༌ ཟེར༌ ‘ལོབ༌བོན༌ནི༌ ཏྲིའ༌རག༌, གྲོན༌པོ༌ ཞུག༌སའེ༌ ནང༌བོ༌ ཀ༌ནེ༌ ཡོད༌, ཏེ༌རུ༌ ངའེ༌ ང༌རང༌ངི༌ ལོབ༌ཕྲུགས༌གུན༌ ཉམ༌པོ༌ པེ༌སག༌གི༌ དོན༌ཏང༌ ཟེན༌?’
MAR 14:15 ཁོའེ༌ ཁྱོ༌ཞའ༌ སྟང༌ཐོག༌ག༌ གྲལ༌གྲིག༌ ཅོས༌ཁན༌ནི༌ ནང༌ ཆེན༌མོ༌ཞིག༌ སྟན༌ཅེན༌, ང༌དང༌གུན༌ནི༌ ཕིའ༌ ཏེ༌རུ༌ དོན༌ཏང༌ངི༌ གྲལ༌གྲིག༌ ཅོས༌།”
MAR 14:16 ལོབ༌ཕྲུགས༌གུན༌ གྱལ༌སའེ༌ ནང༌ང༌ སོང༌, ཡང༌ ཅི༌ཚང༌མ༌ ཡེ༌ཤུའི༌ མོལ༌ཁན༌ ནང༌ཞིན༌ ཐོང༌། ཁོང༌གུན༌ནི༌ ཏེ༌རུ༌ པེ༌སག༌གི༌ དོན༌ཏང༌ངི༌ གྲལ༌གྲིག༌ ཅོས༌།
MAR 14:17 ཕི༌ཏོག༌ ཆའ༌ཅིག༌ ཡེ༌ཤུ༌ ལོབ༌ཕྲུགས༌ རྕུག༌ཉིས༌ ཉམ༌པོ༌ ཏེ༌རུ༌ ལེབ༌།
MAR 14:18 ཁོང༌གུན༌ ཅོག༌ཙེ༌ཀ༌ དོན༌ཏང༌ དོན༌ཨིན༌ ཡོད༌ཏུས༌ ཡེ༌ཤུའི༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ཀ༌ ང༌ ཉམ༌པོ༌ ཟེན༌ ཡོད༌ཁན༌གུན༌ནི༌ ནང༌ནེ༌ ཅིག༌ཅིག༌གི༌ ངའ༌ ངོ༌ལོག༌ ཅོ༌ཨིན༌།”
MAR 14:19 ཁོང༌གུན༌ མ༌སྲན༌ཏྲེ༌ ཚེར༌ཏེ༌ ཡེ༌ཤུའ༌ ཅིག༌གི༌ སྟིང༌ནེ༌ ཅིག༌གི༌ ཏྲིས༌, “ཏན༌ཏན༌ ང༌ཏ༌ མན༌གྲོ༌?”
MAR 14:20 ཁོང༌ངི༌ ལན༌སལས༌, “ང༌ ཉམ༌པོ༌ ད༌བེན༌ ཅིག༌གི༌ ནང༌ནེ༌ ཟའ༌ཁན༌ ཁྱོ༌ཞའ༌ རྕུག༌ཉིས༌པོའེ༌ ནང༌ནེ༌ ཅིག༌ ཨིན༌།
MAR 14:21 ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཡོད༌ཁན༌ ནང༌ཞིན༌ མི༌རིགས༌སི༌བུ༌ ཤི༌གོས༌, ཨིན༌ནའང༌ མི༌རིགས༌སི༌བུ༌ གྲ༌འོའེ༌ ལག༌ག༌ སྟད༌ཁན༌ནི༌ མི༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཏེ༌ སང༌ཏ༌ ཁོ༌ མ༌སྐྱེས༌པིན༌ན༌ ཁོའེ༌ ཕིའ༌ གྱལ༌ལ༌ ཡོད༌གྲོ༌།”
MAR 14:22 ཁོང༌གུན༌ དོན༌ཏང༌ དོན༌ཨིན༌ ཡོད༌ཏུས༌, ཡེ༌ཤུའི༌ ཏ༌གི༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཅག༌ག༌ ཛདས༌ ཡང༌ ལོབ༌ཕྲུགས༌གུན༌ལ༌ སལ༌ཨིན༌ མོལས༌, “འི༌བོ༌ ངའེ༌ ཟུགས༌པོ༌ ཨིན༌, ལེན༌ཏེ༌ ཟོ༌།”
MAR 14:23 ཏེ༌ནེ༌ དོན༌སྐྱོག༌པོ༌ ནམས༌ ཡང༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཁོང༌གུན༌ལ༌ སལས༌ ཡང༌ ཁོང༌ ཚང༌མའེ༌ ཏེ༌ནང༌ནེ༌ ཐུངས༌།
MAR 14:24 ཁོང༌ངི༌ ཁོང༌གུན༌ལ༌ མོལས༌, “འི༌བོ༌ ངའེ༌ ཁྲག༌ ཨིན༌ ཀ༌བོའེ༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ ཆད༌དོན༌བོ༌ ཏན༌ཏན༌ ཛད༌ད༌ནོག༌, ཡང༌ མི༌ མང༌པོའེ༌ ཕིའ༌ སྲོག༌ཆོད༌དི༌ ཚུལ༌ལ༌ ཕོས༌།
MAR 14:25 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ རྒུན༌ཆང༌བོ༌ ངའེ༌ ཡང༌སྐྱར༌ མི༌ཐུང༌ ནམ༌ཚོག༌པ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ འི༌བོའ༌ སོ༌མ༌ ཏོན༌ཏག༌ མི༌སལ༌།”
MAR 14:26 ཁོང༌གུན༌ནི༌ དཀོན༌མཆོག༌ག༌ སྟོད༌པའེ༌ ལུ༌ ཕུལ༌ ཚར༌ར༌ཅིག༌, ཁོང༌གུན༌ ཨོ༌ལིཝ༌ཝི༌ རིའ༌ སྐྱོདས༌།
MAR 14:27 ཏེ༌ནེ༌ གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “ཁྱོ༌ཞའ༌ ཚང༌མའེ༌ ངའ༌ ཕངས༌ཏེ༌ ཆེན༌, ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ངའེ༌ ལུག༌རྫི༌བོ༌ སད༌ཅུག༌ཨིན༌ ཡང༌ ལུག༌གུན༌ ཡན༌ཏེ༌ ཆེན༌’
MAR 14:28 ཨིན༌ནའང༌ སོན༌ཏེའ༌ ལང༌ང༌ ཛད༌ཏེ༌ སྟིང༌ནེ༌ ང༌ ཁྱོ༌ཞའེ༌ སང༌ སྔུན༌ལ༌ གཱ༌ལིལ༌ལིའི༌ ཡུལ༌ཇོངས༌ལ༌ ཆེན༌།”
MAR 14:29 པི༌ཏྲར༌རི༌ ཟེརས༌, “ཚང༌མའེ༌ ཉེ༌རང༌ ཕང༌ནའང༌, ངའེ༌ མ༌ནེ༌ མི༌ཕང༌།”
MAR 14:30 ཡེ༌ཤུའི༌ ལན༌སལས༌, “ངའེ༌ ཁྱོ༌རང༌ང༌ དེན༌བ༌ ཟེར༌རད༌, འིན༌ན༌ ཚན༌ལ༌ ཅ༌པོའེ༌ ཅ༌སྐད༌ ལན༌ ཉིས༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།”
MAR 14:31 པི༌ཏྲར༌རི༌ འུ༌ཙུག༌ ཏངས༌ཏེ༌ ཟེརས༌, “ངའ༌ ཉེ༌རང༌ ཉམ༌པོ༌ ཤི༌གོས༌ནའང༌, ངའེ༌ ཉེ༌རང༌ མི༌ཤེས༌ཟུན༌ མ༌ནེ༌ མི༌ཏང༌།” ཏེན༌ན༌ ཙོགས༌ ཞན༌ ཚང༌མེའང༌ ཟེརས༌།
MAR 14:32 ཁོང༌གུན༌ གེད༌ཤེ༌མ༌ནེ༌ ཟེར༌སའེ༌ ནས༌ས༌ སྐྱོདས༌, ཡང༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ང༌ སོང༌ཏེ༌ མོས༌ལམ༌ ཞུ༌ ཟ༌ནེ༌ ཁྱོ༌ཞ༌གུན༌ འི༌ཀ༌ དུག༌།”
MAR 14:33 ཁོང༌ངི༌ པི༌ཏྲར༌, ཡ༌ཀོབ༌ དང༌ ཡོ༌ཧཱ༌ནན༌ གུན༌ ཁོང༌རང༌ ཉམ༌པོ༌ ཁྱེར༌ར༌ ཛདས༌, ཡང༌ ཡེ༌ཤུའ༌ ཐུགས༌ཚེར༌ སྐྱོད༌ཏེ༌ ཁོང༌ ཚབས༌ས༌ ཛདས༌།
MAR 14:34 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ སེམས༌ལ༌ ཚེར༌ཁ༌ མ༌སྲན༌ཏྲེ༌ ཤི༌ཅེས༌ ཙོགས༌ རག༌། ཤན༌ ཅོས༌ཏེ༌ འི༌ཀ༌ དུག༌།”
MAR 14:35 ཁོང༌ ཙ༌པིག༌ཤིག༌ ཐག༌རིང༌ང༌ སྐྱོདས༌ ཡང༌ སའེ༌ཀ༌ གྱེལ༌ཏེ༌, ཀལ༌ཏེས༌ ཉན༌ན༌ ཁོང༌ངི༌ ཀ༌ནེ༌ འི༌ རྡུག༌ངལ༌ལི༌ ཏུས༌པོ༌ ཐེན༌ན༌ ཛད༌ མོལ༌ཨིན༌ མོས༌ལམ༌ ཞུའ༌ ཛདས༌།
MAR 14:36 ཁོང༌ངི༌ མོལས༌, “ཨ༌བ༌, ངའེ༌ ཡབ༌ལེ༌, ཉེ༌རང༌ང༌ ཅི༌ཚང༌མ༌ ཛད༌ ཉན༌ན༌ནོག༌། ཐུག༌རྗེ༌ ཛད༌ཏེ༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཀ༌ནེ༌ ཐེན༌ན༌ ཛད༌དའང༌, ཨིན༌ནའང༌ ངའེ༌ དོད༌པ༌ ནང༌ཞིན༌ མན༌པ༌, ཉེ༌རང༌ངི༌ ཐུག༌གོངས༌ ནང༌ཞིན༌ ཅོའ༌ ཛད༌།”
MAR 14:37 ཏེ༌ནེ༌ ཡེ༌ཤུ༌ ལོགས༌ཏེ༌ སྐྱོདས༌ ཡང༌ ཁོང༌ ཚང༌ཀོ༌ ཉིད༌ལ༌ སོང༌ཏེ༌ ཟིགས༌། ཁོང༌ངི༌ པི༌ཏྲར༌ལ༌ མོལས༌, “ཤི༌མོན༌ ཁྱོ༌རང༌ ཉིད༌ལ༌ སོང༌ཏེ༌ ཨིན༌ན༌? ཆུ༌ཚོད༌ ཅིག༌གའང༌ ང༌ ཉམ༌པོ༌ ཉིད༌ མ༌ཏང༌ང༌ དུག༌མ༌ཉན༌ན༌?
MAR 14:38 ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ ཉིད༌ མ༌ཏང༌ང༌ མོས༌ལམ༌ ཞུས༌། སེམས༌ཉིད༌དི༌ དོད༌པ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཡོད༌ནའང༌ ཟུགས༌པོ༌ འུ༌ཐུགས༌ ཡོད༌ཏེ༌ ཨིན༌ནོག༌།”
MAR 14:39 ཡང༌སྐྱར༌ ཙ༌པིག༌ ཐག༌རིང༌ང༌ སྐྱོད༌ཏེ༌ ཡེ༌ཤུའི༌ ཏེན༌ན༌ ཙོགས༌ མོས༌ལམ༌ ཞུའ༌ ཛདས༌།
MAR 14:40 ཁོང༌ ལོགས༌ཏེ༌ སྐྱོད༌ད༌ཅིག༌, ཡང༌སྐྱར༌ ལོབ༌ཕྲུགས༌ ཚང༌ཀོ༌ ཉིད༌ལ༌ སོང༌ཏེ༌ ཟིགས༌ ཅིའ༌ཟེར༌ན༌ ཁོང༌གུན༌ སྲན༌ཏྲེ༌ ངལ༌ཏེ༌ ཡོད༌པིན༌, ཡང༌ ཁྲེལ༌ཏེ༌ ཁོང༌གུན༌ནི༌ ཡེ༌ཤུའ༌ ཅའང༌ ཟེར༌ མ༌ཉན༌།
MAR 14:41 ཡེ༌ཤུ༌ ལན༌ སུམ༌པ༌ ལོགས༌ཏེ༌ སྐྱོད༌ད༌ཅིག༌, ཁོང༌ངི༌ མོལས༌, “ཏ༌རུང༌ངའང༌ ཁྱོ༌ཞའ༌ ཉིད༌ ཏང༌ཨིན༌ ངལ༌ཚོའ༌ད༌? ཏ༌ གྲིག༌། ལྟོས༌, མི༌རིགས༌སི༌བུའ༌ ངོ༌ལོག༌ ཅོས༌ཏེ༌ སྡིག༌ཅན༌གུན༌ནི༌ ལག༌ག༌ སྟད༌ཅེས༌སི༌ ཏུས༌ཚོད༌པོ༌ ལེབ༌ ཚར༌།
MAR 14:42 ལོངས༌, ང༌དང༌གུན༌ ཆེན༌། ལྟོས༌, ངའ༌ ངོ༌ལོག༌ ཅོ༌ཁན༌བོ༌ ཡོང༌ང༌ལ༌།”
MAR 14:43 གཙོ༌བོ༌ ཡེ༌ཤུའི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ལོབ༌ཕྲུགས༌ རྕུག༌ཉིས༌པོའེ༌ ནང༌ནེ༌ ཡུ༌དཱ༌ ཏེ༌ཀ༌ ལེབ༌, ཁོ༌ ཉམ༌པོ༌ བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཀལ༌ཁན༌ནི༌ མི༌ཚོགས༌, ར༌འི༌ དང༌ བེར༌ཀ༌ ཁུར༌ཏེ༌ ཡོངས༌།
MAR 14:44 ངོ༌ལོག༌ ཅོ༌ཁན༌བོའེ༌ ཁོང༌གུན༌ལ༌ ཡེ༌ཤུ༌ ཟུམ༌མ༌ལ༌ རྡ༌ཞིག༌ ཏང༌ཨིན༌, “ངའེ༌ པུག༌ ཏང༌ཁན༌ནི༌ མི༌བོ༌ ཁྱོ༌ཞའེ༌ ཟུམས༌ཏེ༌ སྟན༌པོ༌ ཅོས༌ཏེ༌ ཁྲིད༌ཏེ༌ ཁྱེར༌” ཟེརས༌།
MAR 14:45 ཏེན༌ན༌མལ༌ལ༌ ཡུ༌དཱ༌ ཡེ༌ཤུ༌ ཡོད༌ས༌ སོང༌ཏེ༌, “ལོབ༌བོན༌ལེ༌” ཟེར༌ཏེ༌ པུག༌ ཏངས༌།
MAR 14:46 ཏེ༌ནེ༌ ཞན༌མ༌གུན༌ནི༌ ཡེ༌ཤུ༌ ཟུམས༌ཏེ༌ ལྕག༌ཐག༌ ཉམ༌པོ༌ ཏགས༌།
MAR 14:47 ཨིན༌ནའང༌ ཡེ༌ཤུའི༌ དུན༌ལ༌ ཡོད༌ཁན༌ ཅིག༌གི༌, ར༌འི༌ ཕིངས༌ཏེ༌ བླ༌མ༌ ཆེན༌མོའེ༌ ཡོག༌པོའ༌ གྱབས༌ཏེ༌ ཁོའེ༌ ནམ༌ཅོག༌པོ༌ ཅད༌ཏངས༌།
MAR 14:48 ཡེ༌ཤུའི༌ ཁོང༌གུན༌ལ༌ མོལས༌, “ར༌འི༌ དང༌ བེར༌ཀ༌ ཁུར༌ཏེ༌ ང༌ ཟུམ༌མ༌ ཡོངས༌ཏེ༌ ཅི༌ ང༌ ཅག༌པ༌ ཨིན༌ནོག༌ག༌?
MAR 14:49 ཆོད༌ཁང༌ངི༌ ནང༌ང༌ ཞག༌ཏང༌ ངའེ༌ ལབ༌ཞ༌ ཏང༌ ཟ༌ནེ༌ ཁྱོ༌ཞའེ༌ ང༌ ཅིའ༌ མ༌ཟུམས༌པིན༌? ཨིན༌ནའང༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌བོ༌ དྲན༌དྲ༌ གྲུབ༌གོས༌།”
MAR 14:50 ཏེ༌ནེ༌ ཡེ༌ཤུ༌ ཕངས༌ཏེ༌ ལོབ༌ཕྲུགས༌ ཚང༌མ༌ ཤོར༌།
MAR 14:51 ཀུས༌པོ༌ རས༌སི༌ ཀོས༌ ཅིག༌པོ༌ གོན༌ཁན༌ནི༌ ཁྱོག༌ཏོང༌ཞིག༌ ཁོང༌ངི༌ གྱབ༌ནེ༌ ཡོང༌ངད༌པིན༌, མི༌ཚོགས༌སི༌ ཁོ༌ ཟུམ༌ཅེས༌ ཅོས༌པ༌,
MAR 14:52 ཀོས༌པོ༌ ཕངས༌ཏེ༌ ཁོ༌ ལྗེར༌ཉལ༌ལ༌ ཤོར༌ཏེ༌ སོང༌།
MAR 14:53 ཁོང༌གུན༌ནི༌ ཡེ༌ཤུ༌ བླ༌མ༌ ཆེན༌མོ༌ ཡོད༌ས༌ ཁྱེརས༌, ཀ༌རུ༌ བླ༌མ༌ འུ༌སྐྱོང༌ ཚང༌མ༌, ཡ༌ཧུ༌དཱ༌པའེ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ ཛོམས༌ཏེ༌ ཡོད༌པིན༌།
MAR 14:54 པི༌ཏྲར༌ བླ༌མ༌ ཆེན༌མོའེ༌ ཕོ༌གྲང༌ངི༌ གྱང༌སྐོར༌རི༌ ནང༌ཀུག༌ ཚོག༌པ༌ ཐག༌རིང༌ཞིག༌ནེ༌ ཁོང༌ངི༌ གྱབ༌ནེ༌ ཡོངས༌། ཏེ༌རུ༌ ཁོ༌ སྲུང༌ཁན༌གུན༌ ཉམ༌པོ༌ མེའ༌ སྲོ༌ཨིན༌ དུགས༌།
MAR 14:55 བླ༌མ༌ ཆེན༌མོ༌ དང༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཚང༌མའེ༌, ཡེ༌ཤུ༌ སད༌ཉན༌ཅེས༌སི༌ སྤང༌པོ༌ ཙལས༌, ཨིན༌ནའང༌ ཁོང༌གུན༌ལ༌ སུའང༌ མ༌ཐོབ༌།
MAR 14:56 ཁོང༌ངི༌ གྱབ༌གལ༌ལ༌ མི༌ མང༌པོའེ༌ ཟུན༌ནི༌ སྤང༌པོ༌ ཏངས༌, ཨིན༌ནའང༌ ཁོང༌གུན༌ནི༌ སྤང༌པོ༌ ཏང༌ཁན༌གུན༌ ཟོབས༌ མ༌ཟོབས༌།
MAR 14:57 སྟིང༌ཇུག༌ག༌ ཁ༌ཅིག༌ ལངས༌ཏེ༌ ཡེ༌ཤུའི༌ གྱབ༌གལ༌ལ༌ ཟུན༌ནི༌ སྤང༌པོ༌ ཏང༌ཨིན༌ནའང༌ ཟེརས༌,
MAR 14:58 “ཁོའེ༌ ཟེར༌ར༌རག༌པིན༌ ‘ངའེ༌, འི༌ ཆོད༌ཁང༌ མིའི༌ ལག༌པ༌ནེ༌ རྩིག༌ཁན༌བོ༌ ཤིགས༌ཏེ༌ ཞག༌ སུམ༌མི༌ ནང༌ང༌ མིའི༌ ལག༌པ༌ནེ༌ མ༌རྩིག༌ཁན༌ ཞན༌ཡང༌ཞིག༌ རྩིག༌ཨིན༌།’”
MAR 14:59 ཨིན༌ནའང༌ ཁོང༌གུན༌ནི༌ སྤང༌པོ༌ ཏང༌ཁན༌གུན༌ནའང༌ ཟོབས༌ མ༌ཟོབས༌།
MAR 14:60 ཏེ༌ནེ༌ ཚང༌མའེ༌ དུན༌ལ༌ བླ༌མ༌ ཆེན༌མོ༌ ལངས༌ཏེ༌ ཡེ༌ཤུའ༌ ཏྲིས༌, “ཁྱོ༌རང༌ངི༌ གྱབ༌གལ༌ལ༌ སྤང༌པོ༌ ཏང༌ཁན༌གུན༌ལ༌ ལན༌ཏང༌ང༌ མེད༌ད༌? རང༌ སྐྱོབ༌ཅེས༌སི༌ ཕིའ༌ ཁྱོ༌རང༌ང༌ ཟེར༌ཅེས༌ མེད༌ད༌?”
MAR 14:61 ཨིན༌ནའང༌ ཡེ༌ཤུའི༌ ལན༌ མ༌སལ༌ལ༌ ཅུབ༌ཅད༌ཏེ༌ ཞུགས༌། ཏེ༌ནེ༌ བླ༌མ༌ ཆེན༌མོའེ༌ ཁོང༌ང༌ ཡང༌སྐྱར༌ ཏྲིས༌, “ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌, དཀོན༌མཆོག༌གི༌ སྲས༌ ཨིན༌ན༌?”
MAR 14:62 ཡེ༌ཤུའི༌ མོལས༌, “ང༌ ཨིན༌, ཡང༌ མི༌རིགས༌སི༌བུ༌ ཀུན༌ཝང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ དུགས༌ཏེ༌, ཡང༌ ནམ༌ཁའེ༌ སྲིན༌ནི༌ཀ༌ ཞོན༌ཏེ༌ ཡོང༌ང༌ ཁྱོ༌ཞའེ༌ ཐོང༌ཨིན༌།”
MAR 14:63 ཏེ༌ནེ༌ བླ༌མ༌ ཆེན༌མོ༌ ལངས༌ཏེ༌ ཁོ༌རང༌ངི༌ ཀོས༌པོ༌ ཤགས༌ ཡང༌ ཟེརས༌, “ང༌དང༌ང༌ འི༌ སང༌ མང༌ང༌ སྤང༌པོ༌ ཅི༌ གོས༌ཨིན༌?
MAR 14:64 ཁོའེ༌ དད༌ལོག༌ ཅོ༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། ཁྱོ༌ཞའེ༌ ཅི༌ ཐག༌ཅད༌དད༌?” ཁོང༌ ཚང༌མའེ༌ ཁོ༌ སད༌གོ༌ཤེས༌སི༌ འོས༌པ༌ ཨིན༌ནོག༌ ཟེར༌ཏེ༌ ཐག༌ཅདས༌།
MAR 14:65 ཏེ༌ནེ༌ ཁོང༌ ཁ༌ཅིག༌གི༌ ཡེ༌ཤུའ༌ ཐུ༌ གྱབ༌ཅེས༌ གོ༌ཟུག༌ ཡང༌ ཁོང༌ངི༌ མིག༌, ལག༌ཕིས༌ ཉམ༌པོ༌ ཀབས༌ཏེ༌ ཁོང༌ང༌ མུལ༌ཁྲུག༌ ཅོས༌ཏེ༌ རྡུང༌ཨིན༌ ཧབ༌གོད༌ ཏང༌ཨིན༌ ཟེརས༌, “ལུང༌སྟན༌ སལ༌ལའང༌ ཁྱོ༌རང༌ང༌ རྡུང༌ཁན༌བོ༌ སུ༌ ཨིན༌ནོག༌?” ཡང༌ སྲུང༌ཁན༌གུན༌ནིའང༌ ཁྱེར༌ཏེ༌ ཁོང༌ང༌ རྡུངས༌།
MAR 14:66 པི༌ཏྲར༌ ཕོ༌གྲང༌ངི༌ ཚོམས༌སི༌ ནང༌ང༌ ཡོད༌ ཟ༌ནེ༌ བླ༌མ༌ ཆེན༌མོའེ༌ ཡོག༌མོ༌ཞིག༌ ཡོངས༌།
MAR 14:67 པི༌ཏྲར༌ མེའ༌ སྲོ༌ཨིན༌ དུགས༌ཏེ༌ ཐོང༌ང༌ཅིག༌ ཡོག༌མོ༌བོའེ༌ ཁོའ༌ ཞིབ༌ཅ༌ ཅོས༌ཏེ༌ ལྟས༌ ཡང༌ ཟེརས༌, “ཁྱོ༌རང༌ངའང༌ ན༌ཙ༌རེད༌པ༌ ཡེ༌ཤུ༌ ཉམ༌པོ༌ དུག༌པིན༌།”
MAR 14:68 ཨིན༌ནའང༌ པི༌ཏྲར༌རི༌ མི༌ཤེས༌ཟུན༌ ཏང༌ཨིན༌ ཟེརས༌, “ཁྱོ༌རང༌ངི༌ ཅི༌ ཟེར༌ཏེ༌ ཨིན༌ ངའ༌ ཧ༌གོའ༌ ཡ༌ ཤེས༌ས༌ མེ༌རག༌།” ཁོ༌ ཚོམས༌སི༌ སྒོའེ༌ དུན༌ལ༌ སོང༌ཏེ༌ དུགས༌, ཏེ༌ནེ༌ ཅ༌པོའེ༌ ཅ༌སྐད༌ ཏངས༌།
MAR 14:69 ཡོག༌མོ༌བོའེ༌ པི༌ཏྲར༌ ཏེ༌ཀ༌ ཐོང༌ང༌ཅིག༌, ཁོའེ༌ ཏེ༌ཀ༌ ཡོད༌ཁན༌ ཞན༌མ༌གུན༌ལ༌ ཡང༌སྐྱར༌ ཟེརས༌, “ཁོང༌གུན༌ནི༌ ཕྲོ༌ནེ༌ ཅིག༌ འི༌ མི༌བོའང༌ ཨིན༌ནོག༌།”
MAR 14:70 ཨིན༌ནའང༌ པི༌ཏྲར༌རི༌ ཡང༌སྐྱར༌ མི༌ཤེས༌ཟུན༌ ཏངས༌། ཙ༌པིག༌ཤིག༌གི༌ སྟིང༌ནེ༌ ཏེ༌ཀ༌ ལངས༌ཏེ༌ ཡོད༌ཁན༌ ཞན༌ཡང༌ ཁ༌ཅིག༌གི༌ པི༌ཏྲར༌ལ༌ ཟེརས༌, “ཏན༌ཏན༌ ཁྱོ༌རང༌ ཁོའེ༌ ཕྲོ༌པ༌གུན༌ནི༌ ནང༌ནེ༌ ཅིག༌ ཨིན༌ནོག༌, ཅིའ༌ཟེར༌ན༌ ཁྱོ༌རང༌ངའང༌ གཱ༌ལིལ༌ལི༌པ༌ ཨིན༌ནོག༌།”
MAR 14:71 པི༌ཏྲར༌རི༌ ཁོའ༌ ངན༌ ཕོག༌ཤིག༌ ཟེར༌ཨིན༌ ནའ༌ སྐྱལ༌ཏེ༌ ཟེརས༌, “ཁྱོ༌རང༌གུན༌ནི༌ སྤེ༌ར༌ ཏང༌ཁན༌ནི༌ མི༌བོ༌ ངའེ༌ ཤེས༌ས༌མེད༌།”
MAR 14:72 ཏེན༌ན༌མལ༌ལ༌ ལན༌ ཉིས༌པ༌ ཅ༌པོའེ༌ སྐད༌ ཏངས༌། ཏེ༌ནེ༌ པི༌ཏྲར༌ལ༌ ཡེ༌ཤུའི༌, “ཅ༌པོའེ༌ ཅ༌སྐད༌ ཉིས༌པ༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌” མོལ༌ཁན༌བོ༌ ཨིད༌ཏུ༌ ཡོངས༌, ཡང༌ ཁོའེ༌ སེམས༌ ཆགས༌ཏེ༌ ཁོ༌ ངུས༌།
MAR 15:1 ང༌ཏོག༌ མ༌ ང༌མོ༌ནེ༌ བླ༌མ༌ འུ༌སྐྱོང༌གུན༌, ཡ༌ཧུ༌དཱ༌པའེ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ གང༌པོའེ༌ གཙོ༌བོ༌ ཡེ༌ཤུ༌ སད༌ཅེས༌ལ༌ ཐག༌ཅདས༌། ཁོང༌གུན༌ནི༌ ཁོང༌ངི༌ ཆག༌ ལྡམས༌ཏེ༌ ཀའ༌ལོན༌ པི༌ལ༌ཏུའི༌ ལག༌ག༌ སྟད༌ད༌ ཁྱེརས༌།
MAR 15:2 པི༌ལ༌ཏུའི༌ ཡེ༌ཤུའ༌ ཏྲིས༌, “ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌?” ཡེ༌ཤུའི༌ ལན༌སལས༌, “ཨིན༌, ཉེ༌རང༌ངི༌ ཟེར༌ཁན༌བོ༌ ཨིན༌།”
MAR 15:3 ཏེ༌ནེ༌ བླ༌མ༌ འུ༌སྐྱོང༌གུན༌ནི༌ ཁོང༌ངི༌ གྱབ༌གལ༌ལ༌ ཉད༌གལ༌ མང༌པོ༌ ཀལས༌།
MAR 15:4 པི༌ལ༌ཏུའི༌ ཡང༌སྐྱར༌ ཁོང༌ང༌ ཏྲིས༌, “ཁྱོ༌རང༌ངི༌ ཁོང༌གུན༌ལ༌ ལན༌ཏང༌ང༌ མེད༌ད༌? ལྟོས༌སའང༌! ཁྱོ༌རང༌ངི༌ གྱབ༌གལ༌ལ༌ ཁོང༌གུན༌ནི༌ ཙམ༌ཤིག༌གི༌ སྐྱོན༌རྗོད༌ ཅོ༌རུག༌?”
MAR 15:5 ཨིན༌ནའང༌ ཡེ༌ཤུའི༌ ཅའང༌ ལན༌ མ༌སལ༌པ༌, པི༌ལ༌ཏུ༌ ཧ༌ལས༌།
MAR 15:6 ལུག༌སྲོལ༌ ནང༌ཞིན༌ པེ༌སག༌གི༌ ཏུས༌ཆེན༌ནི༌ ཏུས༌ལ༌, ཀའ༌ལོན༌ནི༌ མི༌གུན༌ནི༌ ཞུ༌ཝ༌ ནང༌ཞིན༌ ཙོན༌པ༌ ཅིག༌ ཕུད༌དད༌པིན༌།
MAR 15:7 ཏེ༌ཏུས༌ལ༌ རོམ༌མི༌ ཞུང༌ངི༌ གྱབ༌གལ༌ལ༌ ངོ༌ལོག༌ ཅོས༌ཏེ༌ མི༌ སད༌ཁན༌ བཱ༌ར༌བས༌ དང༌ ཁོའེ༌ ཕྲོ༌པ༌གུན༌ ཙོན༌ཁང༌ངི༌ ནང༌ང༌ ཡོད༌པིན༌།
MAR 15:8 མི༌ཚོགས༌ པི༌ལ༌ཏུ༌ ཡོད༌ས༌ ཡོངས༌ཏེ༌ ཁོའ༌ ཏུས༌གྱུན༌ ཙོགས༌ལ༌ ཙོན༌པ༌ཞིག༌ ཕུད༌ཅེས༌སི༌ ཕིའ༌ ཟེརས༌།
MAR 15:9 པི༌ལ༌ཏུའི༌ ཏྲིས༌, “ཁྱོ༌ཞའེ༌ ཕིའ༌ ངའེ༌ ཡ༌ཧུ༌དཱ༌པའེ༌ གྱལ༌པོ༌བོ༌ ཕུད༌ད༌?”
MAR 15:10 ༼བླ༌མ༌ འུ༌སྐྱོང༌གུན༌ ཡེ༌ཤུའི༌ཀ༌ ཚིག༌ཅེས༌པོའེ༌, ཁོང༌ ཁོའེ༌ ལག༌ག༌ སྟད༌ཁན༌བོ༌ པི༌ལ༌ཏུའ༌ གྱུས༌སོང༌།༽
MAR 15:11 ཨིན༌ནའང༌ བླ༌མ༌ འུ༌སྐྱོང༌གུན༌ནི༌ མི༌ཚོགས༌ལ༌ ལྕེ༌ ཀོལ༌ཏེ༌ ཡེ༌ཤུའི༌ ཚབས༌ལ༌ བཱ༌ར༌བས༌ ཕུད༌ཅེས༌སི༌ ཕིའ༌ པི༌ལ༌ཏུའ༌ ཞུ༌ཝ༌ ཕུལ༌ཅུགས༌།
MAR 15:12 པི༌ལ༌ཏུའི༌ ཁོང༌གུན༌ལ༌ ཏྲིས༌, “ཏེ༌ནེ༌ ངའེ༌ ཁྱོ༌ཞ༌གུན༌ནི༌ ཡ༌ཧུ༌དཱའེ༌ གྱལ༌པོ༌ ཟེར༌ཁན༌ནི༌ མི༌བོའ༌ ཅི༌ ཅོ༌?”
MAR 15:13 ཁོང༌གུན༌ནི༌ ཀུ༌ཅོ༌ ཏང༌ཨིན༌ ལན༌ཏངས༌, “ཁོ༌ རྐྱང༌ཤིང༌ང༌ རྐྱོང༌།”
MAR 15:14 པི༌ལ༌ཏུའི༌ ཏྲིས༌, “ཅི༌ཕིའ༌, ཁོའེ༌ ཁྲིམས༌སི༌ གྱབ༌གལ༌ ཅི༌ ཅོས༌ཏོག༌?” ཨིན༌ནའང༌ མི༌ཚོགས༌སི༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌, “ཁོ༌ རྐྱང༌ཤིང༌ངི༌ཀ༌ རྐྱོང༌།”
MAR 15:15 མི༌ཚོགས༌པོ༌ ཐད༌ཅུགས༌ཏེ༌ པི༌ལ༌ཏུའི༌ ཁོང༌གུན༌ནི༌ ཕིའ༌ བཱ༌ར༌བས༌ ཙོན༌ཁང༌ནེ༌ ཕུད༌ཅུགས༌ ཡང༌ ཡེ༌ཤུའ༌ རྟལ༌ལྕག༌ གྱབ༌ཏེ༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ མག༌མི༌ གུན༌ལ༌ སྟདས༌།
MAR 15:16 མག༌མི༌གུན༌ནི༌ ཀའ༌ལོན༌ནི༌ ཁར༌, ཀ༌བོའ༌ པརའ༌ཏོ༌རི༌འུམ༌ ཟེར༌རད༌, ཏེ༌ ནང༌ང༌ གཙོ༌བོ༌ ཡེ༌ཤུ༌ ཁྱེར༌ཏེ༌ མག༌ཚོགས༌ གང༌པོའ༌ ཛོམ༌ཅེས༌ལ༌ བོདས༌།
MAR 15:17 ཁོང༌གུན༌ནི༌ ཁོང༌ང༌ གྱལ༌པོ༌ གོན༌ཁན༌ ཙོགས༌སི༌ ནམ༌ཟའ༌ མར༌པོ༌ཞིག༌ སྐོནས༌, ཡང༌ ཚེར༌མའེ༌ ཐོར༌ཤོག༌ སླས༌ཏེ༌ ཁོང༌ངི༌ ཨུའ༌ སྐོནས༌།
MAR 15:18 ཁོང༌གུན༌ནི༌ ཁོང༌ང༌ ཚིག༌པ༌ སྲག༌ཨིན༌ ཟེརས༌, “ཡ༌ཧུ༌དཱ༌པའེ༌ གྱལ༌པོའ༌ ཆག༌ཚལ༌།”
MAR 15:19 ཁོང༌གུན༌ནི༌ ཁོང༌ངི༌ ཨུའ༌ བེར༌ཀ༌ ཉམ༌པོ༌ ལན༌ མང༌པོ༌ རྡུངས༌ཏེ༌ ཁོང༌ང༌ ཆིལ༌མག༌ གྱབས༌, ཡང༌ ཡེ༌ཤུའི༌ དུན༌ལ༌ པིག༌མོའེ༌ཀ༌ གྱེལ༌ཏེ༌ ཁོང༌ང༌ ཆག༌ཕུལ༌ ཟུན༌ཏངས༌།
MAR 15:20 ཚིག༌པ༌ སྲགས༌ཏེ༌ སྟིང༌ནེ༌ ཁོང༌གུན༌ནི༌ ནམ༌ཟའ༌ མར༌པོ༌བོ༌ ཕུད༌ཏེ༌, ཡེ༌ཤུའ༌ ཁོང༌རང༌ངི༌ ནམ༌ཟའ༌བོ༌ སྐོནས༌། ཏེ༌ནེ༌ ཁོང༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ ཁྱེརས༌།
MAR 15:21 གཙོ༌བོ༌ ཡེ༌ཤུ༌ ཁྲིད༌ཏེ༌ ཁྱེར༌ ཟ༌ནེ༌ ཨ༌ལེག༌ཟན༌དེར༌ དང༌ རུ༌ཕུས༌སི༌ ཨ༌བ༌, ཀི༌རིན༌པ༌ ཤི༌མོན༌ གམ༌ཡུལ༌ནེ༌ གྱལ༌སའེ༌ ནང༌ང༌ ཡོང༌ངད༌པིན༌ ཡང༌ མག༌མི༌གུན༌ནི༌ ཁོའ༌ ཝང༌ ཏངས༌ཏེ༌ ཡེ༌ཤུའི༌ རྐྱང༌ཤིང༌ ཁུར༌ཅུགས༌།
MAR 15:22 ཁོང༌གུན༌ནི༌ ཡེ༌ཤུ༌ གོལ༌གོ༌ཐཱ༌ ༼ཀ༌བོའེ༌ ཏོན༌ཏག༌པོ༌ “གོའི༌ རུས༌པའེ༌ ས༌ཀྱད༌”༽ ཟེར༌ཁན༌ནི༌ ནས༌སའེ༌ཀ༌ ཁྱེརས༌།
MAR 15:23 ཏེ༌ནེ༌ ཁོང༌གུན༌ནི༌ ཡེ༌ཤུའ༌ མའེར༌ ཟེར༌ཁན༌ནི༌ སྨན༌ རྒུན༌ཆང༌ངི༌ ནང༌ང༌ སྲེས༌ཏེ༌ ཏངས༌, ཨིན༌ནའང༌ ཁོང༌ངི༌ ཏེ༌བོ༌ དོན༌ན༌ མ༌ཛདས༌།
MAR 15:24 ཁོང༌གུན༌ནི༌ ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ ཡང༌ ཁོང༌ངི༌ ནམ༌ཟའ༌ བགོས༌ཏེ༌ སུའ༌ ཐོབ༌དུག༌ ལྟ༌ཅེས༌ལ༌ ཆོ༌ལོ༌ རིལས༌།
MAR 15:25 ཡེ༌ཤུ༌ རྐྱང༌ཤིང༌ངི༌ཀ༌ རྐྱང༌ ཟ༌ནེ༌, ང༌ཏོག༌གི༌ ཆུ༌ཚོད༌ རྒུ༌པ༌ ཆའད༌པིན༌།
MAR 15:26 ཁོང༌ངི༌ ཨུའི༌ སྟག༌ག༌ ཉད༌གལ༌ ཀལ༌ཁན༌ནི༌ སྟགས༌པོའེ༌ཀ༌ “ཡ༌ཧུ༌དཱ༌པའེ༌ གྱལ༌པོ༌” བྲིས༌ཏེ༌ ཡོད༌པིན༌།
MAR 15:27 ཅག༌པ༌ ཉིས༌ ཁོང༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌, ཅིག༌པོ༌ ཁོང༌ངི༌ ཡས༌པ༌ ཡང༌ ཅིག༌པོ༌ ཡོ༌མའ༌།
MAR 15:28 
MAR 15:29 ཏེ༌ ནས༌ས༌ གྱུད༌ཏེ༌ གྲུལ༌ཁན༌གུན༌ནི༌ གོ༌ ཡུག༌ཏེ༌ སྨད༌གྲ༌ ཏང༌ཨིན༌ ཟེརས༌, “ཆོད༌ཁང༌ ཤིགས༌ཏེ༌ ཞག༌ སུམ༌མི༌ ནང༌ང༌ རྩིག༌ཨིན༌ ཟེར༌ཁན༌ ཁྱོད༌,
MAR 15:30 རྐྱང༌ཤིང༌ངི༌ ཀ༌ནེ༌ ཡོག༌ག༌ བབས༌ཏེ༌ རང༌ སྐྱོབ༌བའང༌།”
MAR 15:31 ཏེན༌ན༌ ཙོགས༌ལ༌ བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནིའང༌ ཁོང༌ང༌ ཚིག༌པ༌ སྲག༌ཨིན༌ ཟེརས༌, “ཁོའེ༌ ཞན༌མ༌གུན༌ སྐྱོབས༌, ཨིན༌ནའང༌ ཁོ༌རང༌ སྐྱོབ༌ཉན༌ན༌ མི༌དུག༌།
MAR 15:32 འི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, ཨིས༌ར༌ཨེལ༌པའེ༌ གྱལ༌པོ༌, རྐྱང༌ཤིང༌ངི༌ ཀ༌ནེ༌ དག༌ས༌ བབས༌ཏེ༌ ཡོང༌ན༌, ང༌ཞའེ༌ ཐོང༌ཏེ༌ ཏད༌པ༌ ཅོ༌ཨིན༌།” ཡེ༌ཤུ༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌ཁན༌གུན༌ནིའང༌ ཁོང༌ང༌ ཚིག༌ ཏངས༌།
MAR 15:33 ཉིང༌གུང༌ནེ༌ ཆུ༌ཚོད༌ སུམ༌པ༌ ཚག༌པ༌ ཡུལ༌ གང༌པོ༌ མུན༌གྲིག༌ སོང༌།
MAR 15:34 ཏེ༌ནེ༌ ཆུ༌ཚོད༌ སུམ༌པའེ༌ཀ༌ ཡེ༌ཤུའི༌ སུང༌སྐད༌ ཆེན༌མོའེ༌ ནང༌ང༌ བོད༌ད༌ ཛདས༌, “ཨེ༌ལོའི༌, ཨེ༌ལོའི༌, ལེ༌མ༌ ས༌བའཅ༌ཐ༌ནི༌?” ཀ༌བོའེ༌ ཏོན༌ཏག༌པོ༌ “ངའེ༌ དཀོན༌མཆོག༌ ངའེ༌ དཀོན༌མཆོག༌ ཉེ༌རང༌ངི༌ ངའ༌ ཅིའ༌ ཕང༌ང༌ ཛད༌ཏེ༌ ཨིན༌?” མོལ༌ཏེ༌ ཨིན༌ནོག༌།
MAR 15:35 ཏེ༌ཀ༌ ཡོད༌ཁན༌གུན༌ནི༌ ནང༌ནེ༌ ཁ༌ཅིག༌གི༌ ཏེ༌བོ༌ ཚོར༌ར༌ཅིག༌ ཟེརས༌, “ཉོན༌ཤིག༌གའང༌ ཁོའེ༌ ལུང༌སྟོན༌པ༌ ཨེ༌ལི༌ཡཱ༌ བོད༌ད༌རག༌།”
MAR 15:36 ཁོང༌གུན༌ནི༌ ཕྲོ༌ནེ༌ ཅིག༌ བང༌ཏངས༌ཏེ༌ སོང༌ ཡང༌ རས༌བལ༌ཞིག༌ རྒུན༌ཆང༌ སྐྱུར༌མོའེ༌ ནང༌ང༌ ཅུགས༌ཏེ༌ བེར༌ཀའེ༌ཀ༌ སྐྱོན༌ཏེ༌ ཡེ༌ཤུའ༌ དོན༌ཅེས༌ལ༌ ཏངས༌། ཞན༌ཅིག༌གི༌ ཟེརས༌, “དུག༌ཅུག༌གའང༌། ལུང༌སྟོན༌པ༌ ཨེ༌ལི༌ཡཱའ༌ ཁོ༌ སྐྱོབ༌བ༌ལ༌ སྐྱོད༌དུག༌ག༌ སྟེན༌བ༌།”
MAR 15:37 ཏེ༌ནེ༌ ཡེ༌ཤུའི༌ སྐད༌ ཆེན༌མོ༌ ཉམ༌པོ༌ ཀུ༌ཅོ༌ སལ༌ཏེ༌ སྟིང༌ཇུག༌གི༌ འུགས༌པོ༌ ནེན༌ན༌ ཛདས༌ ཡང༌ ཀྲོངས༌།
MAR 15:38 ཏེན༌ན༌ ཏུས༌ལ༌ ཆོད༌ཁང༌ངི༌ ཡོ༌ལ༌ ཐུག༌མོ༌བོ༌ གོ༌ནེ༌ ཇུག༌ ཚོག༌པ༌ ཁག༌ཉིས༌སི༌ ནང༌ང༌ ཆད༌།
MAR 15:39 ཡེ༌ཤུའི༌ དུན༌ལ༌ ཡོད༌ཁན༌ནི༌ མག༌མི༌གྱའེ༌ སྤོན༌བོའེ༌ ཁོང༌ ཀྲོངས༌ཚུལ༌བོ༌ ཐོང༌ཏེ༌ ཟེརས༌, “འི༌ མི༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏན༌ཏན༌ ཨིན༌ནོག༌།”
MAR 15:40 ཐག༌རིང༌ཞིག༌ནེ༌ བུ༌མོ༌ ཁ༌ཅིག༌གི༌ ཡེ༌ཤུ༌ ཀྲོང༌ཤེས༌པོ༌ ལྟེན༌ ཡོད༌པིན༌། ཁོང༌གུན༌ནི༌ ཕྲོའ༌ མིར༌ཡམ༌ མག༌དལ༌ལ༌མ༌, ཡོ༌སེབ༌ དང༌ ཁོའེ༌ ནོ༌ ཡ༌ཀོབ༌བི༌ ཨ༌མ༌ མིར༌ཡམ༌ དང༌ ས༌ལོ༌མི༌ གུན༌ ཡོད༌པིན༌།
MAR 15:41 གཱ༌ལིལ༌ལིའི༌ ནང༌ང༌ ཁོང༌གུན༌ ཡེ༌ཤུའི༌ གྱབ༌ནེ༌ གྲུལ༌ཏེ༌ ཁོང༌ངི༌ སྒོས༌དོམ༌གུན༌ རིགས༌ཏེ༌ ཞབ༌ཤི༌ ཞུའད༌པིན༌། ཁོང༌ ཉམ༌པོ༌ ཡེ༌རུ༌ཤ༌ལེམ༌མ༌ ཡོང༌ཁན༌ནི༌ བུ༌མོ༌ མང༌པོ༌ཞིག༌གའང༌ ཏེ༌རུ༌ ཡོད༌པིན༌།
MAR 15:42 ཟ༌པ༌སང༌ངི༌ ཞག༌ ༼ཡང༌ན༌ ཤབ༌བད༌དི༌ ངལ༌ཚོའེ༌ ཞག༌གི༌ སང༌ སྔུན༌མའེ༌ ཞག༌པོ༌༽, གྲལ༌གྲིག༌གི༌ ཞག༌ ཨིན༌པིན༌, མུན༌ཅུ༌རུབ༌ཀྱིས༌ ཡོད༌ ཟ༌ནེ༌,
MAR 15:43 ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཁག༌ཅན༌ ཨིན༌ཁན༌ ཨ༌རི༌མ༌ཐཱ༌པ༌ ཡོ༌སེབ༌, ཀ༌བོ༌ དཀོན༌མཆོག༌གི༌ གྱལ༌སྲིད༌ ལེབ༌ཅེས༌ལ༌ སྲུངས༌ཏེ༌ ཡོད༌པིན༌, ཁོའེ༌ ཧམ༌པ༌ ཅོས༌ཏེ༌ པི༌ལ༌ཏུའི༌ཀ༌ སོང༌ཏེ༌ ཁོའ༌ གཙོ༌བོ༌ ཡེ༌ཤུའི༌ སྤུར༌ སལ༌ ཟེར༌ཏེ༌ ཞུ༌ཝ༌ ཕུལས༌།
MAR 15:44 ཡེ༌ཤུ༌ ཀྲོང༌ཚར༌ཁན༌བོ༌ ཚོར༌ཏེ༌ པི༌ལ༌ཏུ༌ ཧ༌ལས༌, ཡང༌ མག༌མི༌གྱའེ༌ སྤོན༌བོ༌ བོད༌ཏེ༌ ཡེ༌ཤུ༌ ཀྲོངས༌ ཚར༌ཏོག༌ག༌ ཟེར༌ཏེ༌ ཏྲིས༌།
MAR 15:45 ཁོའེ༌ ཀ༌ནེ༌ ཡེ༌ཤུ༌ ཀྲོངས༌ཚར༌ཁན༌བོ༌ ཚོར༌ཏེ༌ སྟིང༌ནེ༌, པི༌ལ༌ཏུའི༌ ཡོ༌སེབ༌བ༌ ཁོང༌ངི༌ སྤུར༌བོ༌ ཁྱེར༌ཅེས༌ལ༌ གོངས༌པ༌ ཏངས༌།
MAR 15:46 ཏེ༌ནེ༌ ཡོ༌སེབ༌བི༌ རས༌ ཀུས༌པོ༌ ཁྱོངས༌ ཡང༌ ཡེ༌ཤུའི༌ སྤུར༌བོ༌ རྐྱང༌ཤིང༌ངི༌ ཀ༌ནེ༌ ཕབས༌ཏེ༌ ཏེ༌ནང༌ང༌ ཏུམས༌, ཡང༌ བྲག༌གི༌ ནང༌ང༌ སྐོས༌ཏེ༌ ཡོད༌ཁན༌ནི༌ སྤུར༌ཁང༌ཞིག༌གི༌ ནང༌ང༌ བོརས༌། ཏེ༌ནེ༌ ཁོའེ༌ སྤུར༌ཁང༌ངི༌ ཁའེ༌ཀ༌ ཁར༌རྡོ༌ ཆེན༌མོ༌ཞིག༌ རིལ༌ཏེ༌ ཀབས༌།
MAR 15:47 མག༌དལ༌ལ༌མ༌ མིར༌ཡམ༌ དང༌ ཡོ༌སེབ༌བི༌ ཨ༌མ༌ མིར༌ཡམ༌མི༌ ཡེ༌ཤུའི༌ སྤུར༌ བོར༌ར༌ ཛད༌ཁན༌ནི༌ ནས༌ས༌བོ༌ ཐོང༌།
MAR 16:1 ཟ༌སྤེན༌བའེ༌ ཕི༌ཏོག༌ ཤབ༌བད༌དི༌ ཞག༌པོ༌ ཚར༌ར༌ཅིག༌, མིར༌ཡམ༌ མག༌དལ༌ལ༌མ༌, མིར༌ཡམ༌ ཡ༌ཀོབ༌བི༌ ཨ༌མ༌ དང༌ ས༌ལོ༌མི༌ གུན༌ ཡེ༌ཤུའི༌ སྤུར༌ལ༌ སྐུ༌ཅེས༌སི༌ ཕིའ༌ ཏྲི༌ཞིམ༌ཅན༌ནི༌ མར༌ དང༌ མར༌ནག༌ ཉོའ༌ སོང༌།
MAR 16:2 ཟ༌ཉི༌མའེ༌ ཞག༌ག༌ ང༌ཏོག༌ ང༌མོ༌ ཉི༌མ༌ ཤར༌ར༌ཅིག༌, ཁོང༌གུན༌ ཡེ༌ཤུའི༌ སྤུར༌ཁང༌ང༌ སོང༌།
MAR 16:3 ཆེན༌ ཡོད༌ ཟ༌ནེ༌ ཁོང༌གུན༌ནི༌ ཅིག༌ དང༌ ཅིག༌ག༌ ཏྲིས༌, “སྤུར༌ཁང༌ངི༌ ཁའ༌ ཀབས༌ཏེ༌ ཡོད༌ཁན༌ནི༌ ཁར༌རྡོ༌བོ༌ ང༌དང༌ངི༌ ཕིའ༌ སུའི༌ རིལ༌ཨིན༌?”
MAR 16:4 ཏེ༌ཀ༌ ལེབ༌བ༌ཅིག༌ ཁོང༌གུན༌ནི༌ ཁར༌རྡོ༌བོ༌ རིལ༌ཚར༌ཏེ༌ ཐོང༌།
MAR 16:5 སྤུར༌ཁང༌ངི༌ ནང༌ང༌ ཞུགས༌ས༌ཅིག༌, ཁོང༌གུན༌ནི༌ ཡས༌པའེ༌ཀ༌ ཀོས༌ལག༌ ཀར༌པོ༌ གོན༌ཁན༌ནི༌ ཁྱོག༌ཏོང༌ཞིག༌ དུགས༌ཏེ༌ ཐོང༌པ༌, མ༌སྲན༌ཏྲེ༌ ཇིགས༌།
MAR 16:6 ཨིན༌ནའང༌ ཁོང༌གུན༌ལ༌ མོལས༌, “ཇིགས༌ མ༌ཇིགས༌, ཁྱོ༌ཞའེ༌ རྐྱང༌ཤིང༌ངི༌ཀ༌ རྐྱངས༌ཁན༌ ན༌ཙ༌རེད༌པ༌ ཡེ༌ཤུ༌ ཙལ༌ལ༌ནོག༌། ཁོང༌ སོན༌ཏེའ༌ ཞངས༌ཏེ༌ འི༌ཀ༌ མེད༌། ཁོང༌ངི༌ སྤུར༌ བོར༌སའེ༌ ནས༌ས༌ ལྟོས༌།
MAR 16:7 ཏ༌ སོང༌ཏེ༌ ཁོང༌ངི༌ ལོབ༌ཕྲུགས༌གུན༌ དང༌ པི༌ཏྲར༌ལ༌ ཤོད༌, ‘ཡེ༌ཤུ༌ ཁྱོ༌ཞ༌གུན༌ནི༌ སང༌ སྔུན༌ལ༌ གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ སྐྱོད༌ཨིན༌། ཏེ༌རུ༌ ཁྱོ༌ཞ༌གུན༌ལ༌ ཁོང༌ ཇལ༌ཨིན༌, ཀ༌ཟུག༌ ཁོང༌ངི༌ སྔུན༌ལ༌ མོལ༌ལ༌ ཛདས༌།’”
MAR 16:8 བུ༌མོ༌གུན༌ ཇིགས༌ཏེ༌ དར༌ཨིན༌ ཐེ༌ཚོམས༌ ཉམ༌པོ༌ སྤུར༌ཁང༌ནེ༌ གྱུགས༌ཏེ༌ སོང༌། ཐོང༌ཁན༌ ཚང༌མ༌ སུ༌ཞིག༌གའང༌ མ༌ཤདས༌, ཅིའ༌ཟེར༌ན༌ ཁོང༌གུན༌ སྲན༌ཏྲེ༌ ཇིགས༌ཏེ༌ ཡོད༌པིན༌།
MAR 16:9 གཙོ༌བོ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཟ༌ཉི༌མའེ༌ ཞག༌ག༌ ང༌མོ༌ནེ༌, ཁོང༌རང༌ གོ༌མ༌ སྔོན༌ ཅུག༌ག༌ ཛད༌ཁན༌བོ༌ ཁོང༌ངི༌ རྡུད༌ རྡུན༌ ཕིང༌ང༌ ཛད༌ཁན༌ནི༌ བུ༌མོ༌ མིར༌ཡམ༌ མག༌དལ༌ལ༌མ༌ ཨིན༌པིན༌།
MAR 16:10 ཁོ༌ སོང༌ཏེ༌ ཁོའ༌ ཐོང༌ཁན༌ ཚང༌མ༌ རྡུག༌པོ༌ ཅོ༌ཨིན༌ ངུ༌ཨིན༌ ཡོད༌ཁན༌ནི༌ ལོབ༌ཕྲུགས༌གུན༌ལ༌ ཤདས༌།
MAR 16:11 ཨིན༌ནའང༌ ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ དུག༌, ཡང༌ ཁོའེ༌ ཐོང༌ ཟེར༌ཁན༌བོའ༌ ཁོང༌གུན༌ནི༌ ཨིད༌ཤེས༌ མ༌ཅོས༌།
MAR 16:12 ཏེ༌བོའེ༌ སྟིང༌ནེ༌ ཡེ༌ཤུའི༌ ཨིབས༌ སོ༌སོ༌ཞིག༌གི༌ ནང༌ང༌ ཁོང༌རང༌, ཡེ༌རུ༌ཤ༌ལེམ༌ གྱལ༌སའེ༌ ཕི༌ལོག༌ནེ༌ གྲུལ༌ཏེ༌ ཆེན༌ ཡོད༌ཁན༌ནི༌ ལོབ༌ཕྲུགས༌ ཉིས༌ལ༌ སྔོན༌ ཅུག༌ག༌ ཛདས༌།
MAR 16:13 ཁོང༌ ཉིས༌ཀོ༌ ཞན༌ཡང༌ ལོབ༌ཕྲུགས༌གུན༌ལ༌ ཤད༌ད༌ལ༌ ལོགས༌ཏེ༌ སོང༌; ཨིན༌ནའང༌ ཁོང༌གུན༌ནི༌ ཁོང༌ངི༌ ཤད༌ཁན༌བོའ༌ དེན༌ མ༌ཤེས༌།
MAR 16:14 ཏེ༌ སྟིང༌ནེ༌ ལོབ༌ཕྲུགས༌ ཅུག༌ཤིག༌པོ༌ ཟན༌ཟེན༌ ཡོད༌ ཟ༌ནེ༌, ཡེ༌ཤུའི༌ ཁོང༌རང༌ ཁོང༌གུན༌ལ༌ སྔོན༌ ཅུག༌ག༌ ཛདས༌, ཡང༌ ཁོང༌གུན༌ནི༌ ཏད༌པ༌ མི༌ཅོ༌ཅེས༌ དང༌ སྙིང༌ སྐྱོང༌པོ༌ ཅོས༌ཏེ༌ ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ ཐོང༌ཁན༌ནི༌ མི༌གུན༌ནི༌ཀ༌ ཨིད༌ཤེས༌ མི༌ཅོ༌ཅེས༌པོའེ༌ཀ༌ ཁོང༌གུན༌ལ༌ ཁའ༌སྐྱེའ༌ ཛདས༌།
MAR 16:15 ཡེ༌ཤུའི༌ ཁོང༌གུན༌ལ༌ མོལས༌, “ཇིག༌རྟེན༌ གང༌པོའེ༌ ནང༌ང༌ སོང༌ཏེ༌ མི༌ཚང༌མ༌ལ༌ གའ༌མོའེ༌ ནས༌ཚུལ༌བོ༌ ཤོད༌།
MAR 16:16 ཏད༌པ༌ ཅོས༌ཏེ༌ ཁྲུས༌ལེན༌ཁན༌གུན༌ སྐྱོབ༌ཨིན༌། ཨིན༌ནའང༌ ཏད༌པ༌ མ༌ཅོ༌ཁན༌གུན༌ལ༌ ཉལ༌ཝའེ༌ ཆད༌པ༌ ཕོག༌ཨིན༌།
MAR 16:17 ཏད༌པ༌ ཅོ༌ཁན༌གུན༌ནི༌ འི༌ ལྟས༌གུན༌ སྟན༌ཨིན༌: ཁོང༌གུན༌ནི༌ ངའེ༌ ཝང༌ངི༌ ནང༌ང༌ རྡུད༌གུན༌ ཕིང༌ཨིན༌, མ༌ཤེས༌ཁན༌ནི༌ སྐད༌གུན༌ནི༌ ནང༌ང༌ སྤེ༌ར༌ ཏང༌ཨིན༌,
MAR 16:18 རུལ༌གུན༌ ལག༌པའེ༌ ནང༌ང༌ ལེན༌ཨིན༌, ཏུག༌ ཐུང༌ནའང༌ ཁོང༌གུན༌ལ༌ ཅའང༌ ནོད༌པ༌ མི༌ཡོང༌, ཁོང༌གུན༌ནི༌ ལག༌པ༌ བོར༌ཁན༌ནི༌ ནད༌པ༌གུན༌ ཕན༌ཨིན༌།”
MAR 16:19 གཙོ༌བོ༌ ཡེ༌ཤུའི༌ ཁོང༌གུན༌ལ༌ ཞལ༌ཏ༌ སལ༌ཚར༌ཏེ༌ སྟིང༌ནེ༌ ཁོང༌ ནམ༌ཁའ༌ ལེན༌ན༌ ཛདས༌, ཡང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ ཞུགས༌ས༌ ཛདས༌།
MAR 16:20 ལོབ༌ཕྲུགས༌གུན༌ ཀ༌རུང༌ས༌ སོང༌ཏེ༌ གའ༌མོའེ༌ ནས༌ཚུལ༌ ཤདས༌, ཡང༌ གཙོ༌བོའེ༌ ཁོང༌གུན༌ནི༌ ལྟས༌ སྟན༌ཁན༌གུན༌ གྱུད༌ཏེ༌ ཁོང༌གུན༌ནི༌ ཤད༌ཁན༌བོ༌ ཀྲང༌པོ༌ ཨིན༌ཁན༌ ཏན༌ཏན༌ ཛདས༌།
LUK 1:1 ཅེས༌པའེ༌ ཐེའུ༌ཕེ༌ལུས༌, གོ༌མའེ༌ ལོབ༌ཕྲུགས༌གུན༌ནི༌ དུན༌ལ༌ གཙོ༌བོ༌ ཡེ༌ཤུའི༌ མི༌ཚེའེ༌ ནང༌ང༌ ཇུང༌ཁན༌གུན༌ མི༌ མང༌པོའེ༌ དུམས༌ཏེ༌ ཚིར༌ ནང༌ཞིན༌ བྲི༌ཅེས༌སི༌ རྩོན༌གྲུས༌ ཅོས༌ཏེ༌ ཨིན༌ནོག༌།
LUK 1:2 གོ༌མའེ༌ ལོབ༌ཕྲུགས༌གུན༌ནི༌ མིག༌ནེ༌ ཐོང༌ཏེ༌ ང༌ཞའ༌ ཤད༌ཁན༌གུན༌ ཁོང༌གུན༌ནི༌ བྲིས༌ཏེ༌ ཨིན༌ནོག༌།
LUK 1:3 གོ༌ཟུག༌ནེ༌ པར༌ལ༌ ཅི༌ཚང༌མའ༌ གྱལ༌ལ༌ ཅོས༌ཏེ༌ རྩར༌ཅོད༌ ཏངས༌ཏེ༌ ངེའང༌ ཇུང༌ཁན༌གུན༌ ཚིར༌ ནང༌ཞིན༌, མ༌ རྩི༌ཝ༌ཅན༌ ཐེའུ༌ཕེ༌ལུས༌ ཉེ༌རང༌ངི༌ ཕིའ༌ བྲི༌ཅེས༌ ཐག༌ཅད༌པིན༌།
LUK 1:4 ཉེ༌རང༌ང༌ ཡེ༌ཤུའི༌ སྐོར༌ལ༌ ལབ༌ཞ༌ ཐོབ༌ཁན༌གུན༌ ཀྲང༌པོ༌ ཨིན༌ཁན༌བོ༌ ཏན༌ཏན༌ ཅོ༌ཅེས༌སི༌ ཕིའ༌ ངའེ༌ བྲིའད༌།
LUK 1:5 ཧེ༌རོད༌, ཡ༌ཧུ༌དཱ༌ ཡུལ༌ཇོངས༌སི༌ གྱལ༌པོ༌ ཨིན༌ཏུས༌, ཟ༌ཀ༌རི༌ཡཱ༌ བླ༌མ༌གུན༌ནི༌ སྡེ༌ ཨ༌བི༌ཡཱའེ༌ ཟེར༌ཁན༌བོའེ༌ ཐུས༌མི༌ བླ༌མ༌ཞིག༌ ཨིན༌པིན༌། ཨ༌བི༌ཡཱའེ༌, བླ༌མ༌ ཆེན༌མོ༌ ཨ༌རོན༌ནི༌ པུར༌གྱུད༌ ཨིན༌པིན༌, ཡང༌ ཟ༌ཀ༌རི༌ཡཱའེ༌ ན༌མ༌ ཨེ༌ལི༌ས༌བེད༌དའང༌ ཨ༌རོན༌ནི༌ གྱུད༌ནེ༌ ཨིན༌པིན༌།
LUK 1:6 ཟ༌ཀ༌རི༌ཡཱ༌ དང༌ ཨེ༌ལི༌ས༌བེད༌ ཉིས༌ཀོ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ མི༌རིག༌ ཨིན༌པིན༌ ཅིའ༌ཟེར༌ན༌, ཁོང༌གུན༌ནི༌ གཙོ༌བོ༌ དཀོན༌མཆོག༌གི༌ བཀའ༌རྒྱ༌ དང༌ ཁྲིམས༌ ཚང༌མའ༌ སྲུང༌ཅེས༌ལ༌ སྣང༌ང༌ གྱལ༌ལ༌ ཏང༌ངད༌པིན༌།
LUK 1:7 ཨིན༌ནའང༌ ཁོང༌གུན༌ལ༌ ཕྲུ༌གུ༌ མེད༌པིན༌ ཅིའ༌ཟེར༌ན༌ ཨེ༌ལི༌ས༌བེད༌ལ༌ ཕྲུ༌གུ༌ མ༌ཇོར༌ར༌, ཁོང༌གུན༌ སྒས༌ཏེ༌ ཡོད༌པིན༌།
LUK 1:8 ཟ༌ཀ༌རི༌ཡཱ༌ ཡོད༌ཁན༌ནི༌ བླ༌མའེ༌ ཁག༌པའེ༌ ཆོད༌ཁང༌ངི༌ ནང༌ང༌ ཞབས༌ཏོག༌ ཞུ༌ཅེས༌སི༌ ཁྲལ༌ ཨིན༌ ཟ༌ནེ༌ ཟ༌ཀ༌རི༌ཡཱའེ༌ ཆོད༌ཁང༌ངི༌ ནང༌ང༌ དཀོན༌མཆོག༌གི༌ སྐུན༌དུན༌ལ༌ ཞབས༌ཏོག༌ ཞུའད༌པིན༌།
LUK 1:9 བླ༌མ༌གུན༌ནི༌ ལུག༌སྲོལ༌ ནང༌ཞིན༌ གྱན༌ གྱབས༌ཏེ༌ དཀོན༌མཆོག༌གི༌ ཆོད༌ཁང༌ངི༌ ནང༌ང༌ སྤོས༌ དུག༌ཅེས༌ལ༌ ཟ༌ཀ༌རི༌ཡཱའེ༌ མིང༌ བིང༌།
LUK 1:10 ཁོའེ༌ སྤོས༌ དུག༌ཨིན༌ ཡོད༌ ཟ༌ནེ༌ མི༌ཚོགས༌པོ༌ ཕི༌ལོག༌ག༌ དུགས༌ཏེ༌ མོས༌ལམ༌ ཞུའད༌པིན༌།
LUK 1:11 ཏེ༌ནེ༌ ཟ༌ཀ༌རི༌ཡཱ༌ གཙོ༌བོའེ༌ ཕོ༌ཉ༌ཞིག༌ སྤོས༌ དུག༌ཁན༌ནི༌ ཆོད༌ཁྲིའི༌ ཡས༌ ཆོགས༌ལ༌ ཞངས༌ཏེ༌ ཇལ༌།
LUK 1:12 ཟ༌ཀ༌རི༌ཡཱའེ༌ ཕོ༌ཉ༌བོ༌ ཇལ༌ལ༌ཅིག༌ ཁོ༌ དྲོགས༌ཏེ༌ སྲན༌ཏྲེ༌ ཇིགས༌།
LUK 1:13 ཨིན༌ནའང༌ ཕོ༌ཉའེ༌ ཁོའ༌ མོལས༌, “ཟ༌ཀ༌རི༌ཡཱ༌, ཇིགས༌ མ༌ཇིགས༌། དཀོན༌མཆོག༌གི༌ ཁྱོ༌རང༌ངི༌ མོས༌ལམ༌ སན༌ན༌ ཛདས༌། ཁྱོ༌རང༌ངི༌ ན༌མ༌ ཨེ༌ལི༌ས༌བེད༌ལ༌ བུ༌ཚ༌ཞིག༌ ཇོར༌ཨིན༌ ཡང༌ ཁྱོ༌རང༌ངི༌ ཁོའེ༌ མིང༌ང༌ ཡོ༌ཧཱ༌ནན༌ ཏོག༌།
LUK 1:14 ཁོའེ༌ ཁྱོ༌རང༌ང༌ གའ༌མོ༌ དང༌ སྐྱིད༌པོ༌ ཁྱོང༌ཨིན༌ ཡང༌ ཁོ༌ སྐྱེ༌ཅེས༌པོའེ༌ མི༌ མང༌པོའེ༌ གའ༌མོ༌ ཅོ༌ཨིན༌,
LUK 1:15 ཅིའ༌ཟེར༌ན༌ གཙོ༌བོ༌ དཀོན༌མཆོག༌གི༌ སྐུན༌དུན༌ལ༌ ཁོ༌ མ༌ ཁག༌ཅན༌ གྱུར༌ཨིན༌། ཁོའེ༌ ཆང༌ ཡ༌ ཞན༌ ར༌རོ༌ཤེས༌གུན༌ ཐུང༌ མ༌གོས༌། སྐྱེས༌ སང༌ སྔུན༌ལ༌ ཁོ༌ ཨ༌མའེ༌ ཅང༌ཁོག༌ག༌ ཡོད༌ ཟ༌ནེའང༌ ཏམ༌པའེ༌ ཐུག༌ཉིད༌དི༌ གང༌ཨིན༌།
LUK 1:16 ཁོའེ༌ ཨིས༌ར༌ཨེལ༌པ༌ མང༌པོ༌ གཙོ༌བོ༌ ཁོང༌གུན༌ནི༌ དཀོན༌མཆོག༌གི༌ཀ༌ ལོགས༌ཏེ༌ ཁྱོང༌ཨིན༌།
LUK 1:17 ལུང༌སྟོན༌པ༌ ཨེ༌ལི༌ཡཱའ༌ ཙོགས༌སི༌ སེམས༌ཉིད༌ དང༌ ཝང༌ ཉམ༌པོ༌ ཁོ༌ གཙོ༌བོའེ༌ སྔུན༌ལ༌ སོང༌ཏེ༌, ཨ༌བ༌ དང༌ ཕྲུ༌གུ༌ གུན༌ནི༌ ནང༌ང༌ ཐུན༌བྲེལ༌ ཆ༌ཅུག༌ཨིན༌, ཡང༌ ཁའ༌ མི༌ཉན༌ཁན༌གུན༌ དཀོན༌མཆོག༌གི༌ སྕོད༌ལམ༌མི༌ ནང༌ང༌ གྲུལ༌ཁན༌གུན༌ནི༌ ཤེས༌རབས༌གུན༌ལ༌ ཉན༌ཅུགས༌ཏེ༌ གཙོ༌བོ༌ སྐྱོད༌ཅེས༌སི༌ ཏུས༌སི༌ ཕིའ༌ མི༌གུན༌ གྲལ༌གྲིག༌ ཅོ༌ཨིན༌།”
LUK 1:18 ཏེ༌ནེ༌ ཟ༌ཀ༌རི༌ཡཱའེ༌ ཕོ༌ཉའ༌ ཟེརས༌, “ཉེ༌རང༌ངི༌ མོལ༌ཁན༌གུན༌ ཏན༌ཏན༌ ཇུང༌ཅེས༌པོ༌ ངའེ༌ ཀ༌ཟུག༌གི༌ ཨིད༌ཤེས༌ ཨིན༌ ཅིའ༌ཟེར༌ན༌ ང༌ སྒས༌ ཡང༌ ངའེ༌ ན༌མའེ༌ ལོའང༌ ཆེན༌མོ༌ ཨིན༌ནོག༌།”
LUK 1:19 ཕོ༌ཉའེ༌ མོལས༌, “ངའ༌ གབ༌རི༌ཨེལ༌, དཀོན༌མཆོག༌གི༌ སྐུན༌དུན༌ལ༌ ལངས༌ཏེ༌ དུག༌ཁན༌ ཡང༌ ཁྱོ༌རང༌ང༌ འི༌ ལོན༌ ཟང༌པོ༌བོ༌ ཤད༌ད༌ལ༌ ཀལ༌ལ༌ ཛད༌ཏེ༌ ཨིན༌།
LUK 1:20 ཨིན༌ནའང༌ ཁྱོ༌རང༌ངི༌ ངའེ༌ ཟེར༌ཁན༌གུན༌ ཨིད༌ མ༌ཤེས༌པ༌, ཁྱོ༌རང༌ངི༌ བུ༌ཚ༌ སྐྱེ༌སྐྱེ༌ ཚོག༌པ༌ ཁྱོ༌རང༌ ཧན༌གྲང༌ གྱུར༌ཏེ༌ སྤེ༌ར༌ ཏང༌ མི༌ཉན༌, ཅིའ༌ཟེར༌ན༌ ངའེ༌ ཟེར༌ཁན༌གུན༌ ལྡམ༌མ༌ ཛད༌ཁན༌ནི༌ ཏུས༌སི༌ཀ༌ དྲན༌དྲའ༌ གྲུབ༌ཨིན༌།”
LUK 1:21 ཏེན༌ན༌ ཟ༌ནེ༌ ཕི༌ལོག༌ག༌ སྲུངས༌ཏེ༌ ཡོད༌ཁན༌གུན༌ནི༌ ཟ༌ཀ༌རི༌ཡཱ༌ ཆོད༌ཁང༌ངི༌ ནང༌ང༌ ཅི༌ཕིའ༌ མང༌པོ༌ གོར༌ར༌ནོག༌ སམ༌།
LUK 1:22 ཟ༌ཀ༌རི༌ཡཱ༌ ཕི༌ལོག༌ག༌ བིང༌ང༌ཅིག༌ སྤེ༌ར༌ ཏང༌ མ༌ཉན༌། ཁོའ༌ ཆོད༌ཁང༌ངི༌ ནང༌ང༌ ཞལ༌ཟིགས༌ ཐོང༌ཁན༌བོ༌ ཁོང༌གུན༌ལ༌ ཧ༌གོ༌, ཅིའ༌ཟེར༌ན༌ སྤེ༌ར༌ ཏང༌ མ༌ཉན༌པ༌ ཁོའེ༌ ལག༌པ༌ ཉམ༌པོ༌ སྟགས༌ ཅོས༌།
LUK 1:23 བླ༌མའེ༌ ཞབས༌ཏོག༌ ཞུ༌ཅེས༌སི༌ ཏུས༌ ཚར༌ར༌ཅིག༌, ཁོ༌ ཁང༌པའ༌ ལོགས༌ཏེ༌ སོང༌།
LUK 1:24 ཏུས༌བན༌ཤིག༌གི༌ སྟིང༌ནེ༌ ཁོའེ༌ ན༌མ༌ ཨེ༌ལི༌ས༌བེད༌ ཕན༌ཅེས༌མ༌ གྱུར༌, ཡང༌ ཁོ༌ ཟླ༌ཝ༌ ལྔ༌ ཚག༌པ༌ སུའང༌ མ༌ཐུག༌ག༌ ཁང༌པ༌ དུགས༌།
LUK 1:25 ཨེ༌ལི༌ས༌བེད༌དི༌ ཟེརས༌, “ང༌ ཕྲུ༌གུ༌ མི༌ཇོར༌ཅེས༌སི༌ ཁྲེལ༌བ༌བོ༌ མི༌གུན༌ནི༌ དུན༌ལ༌ མེད༌ཁན༌ ཛད༌ཏེ༌ གཙོ༌བོ༌ དཀོན༌མཆོག༌གི༌ ངའེ༌ཀ༌ ཙམ༌ཤིག༌གི༌ ཐུག༌རྗེ༌ ཛད༌ཏེ༌ ཨིན༌ནོག༌།”
LUK 1:26 ཨེ༌ལི༌ས༌བེད༌ སྐྱེ༌ཅེས༌ མ༌གྱུར༌ཏེ༌ ཟླ༌ཝ༌ དྲུག༌པའེ༌ ནང༌ང༌ དཀོན༌མཆོག༌གི༌ ཕོ༌ཉ༌ གབ༌རི༌ཨེལ༌, གཱ༌ལིལ༌ལིའི༌ ཡུལ༌ཇོངས༌སི༌ གྲོང༌ཁྱེར༌ ན༌ཙ༌རེད༌ལ༌,
LUK 1:27 མིར༌ཡམ༌ ཟེར༌ཁན༌ནི༌ རྩང༌མ༌ ན༌ཆུང༌ཞིག༌ ཡོད༌ས༌ ཀལ༌ལ༌ ཛདས༌། ཁོ༌ གྱལ༌པོ༌ དཱ༌བིད༌དི༌ པུར༌གྱུད༌ ཡོ༌སེབ༌ ཟེར༌ཁན༌བོའ༌ ན༌མའ༌ ཏྲིས༌ཏེ༌ ཨིན༌པིན༌།
LUK 1:28 ཕོ༌ཉ༌ མིར༌ཡམ༌ ཡོད༌ས༌ སྐྱོད༌ཏེ༌ མོལས༌, “ཇུ༌ལེ༌, ཅིན༌ལབས༌ཅན༌ནི༌ བུ༌མོ༌, གཙོ༌བོ༌ དཀོན༌མཆོག༌ ཁྱོ༌རང༌ ཉམ༌པོ༌ ཡོད༌།”
LUK 1:29 མིར༌ཡམ༌མི༌ ཕོ༌ཉའེ༌ མོལ༌ཁན༌གུན༌ ཚོར༌ར༌ཅིག༌, ཁོའེ༌ སེམས༌ ཐེ༌ཚོམས༌ སོང༌ཏེ༌ འི༌ མོལ༌ཁན༌གུན༌ནི༌ ཏོན༌ ཅི༌ ཨིན༌ཧེ༌ སམ༌།
LUK 1:30 ཨིན༌ནའང༌ ཕོ༌ཉའེ༌ མོལས༌, “མིར༌ཡམ༌, ཇིགས༌ མ༌ཇིགས༌, དཀོན༌མཆོག༌གི༌ ཁྱོ༌རང༌ང༌ ཐུག༌རྗེ༌ ཛད༌ཏེ༌ ཨིན༌ནོག༌།
LUK 1:31 ཕན༌ཅེས༌མ༌ གྱུར༌ཏེ༌ ཁྱོ༌རང༌ང༌ སྲས༌ཤིག༌ ལྟམས༌ཨིན༌ ཡང༌ ཁྱོ༌རང༌ངི༌ ཁོང༌ངི༌ ཚན༌ལ༌ ཡེ༌ཤུ༌ ཏོག༌།
LUK 1:32 ཁོང༌ ནི༌ མ༌ ཀྲག༌པོ༌ ཞུགས༌ཏེ༌ ཁོང༌ང༌ ཀུན༌ཝང༌ དཀོན༌མཆོག༌གི༌ སྲས༌ ཞུ༌ཨིན༌། གཙོ༌བོ༌ དཀོན༌མཆོག༌གི༌ ཁོང༌ང༌, ཁོང༌རང༌ངི༌ ཕ༌མེས༌པོ༌ གྱལ༌པོ༌ དཱ༌བིད༌དི༌ ཞུགས༌ཁྲིས༌ སལ༌ཨིན༌།
LUK 1:33 ཁོང༌ངི༌ ཨིས༌ར༌ཨེལ༌ལི༌ མིར༌གྱུད༌དི༌ཀ༌ ཏུས༌གྱུན༌ ཝང༌སྲུལ༌ལ༌ ཛད༌ཨིན༌། ཁོང༌ངི༌ གྱལ༌སྲིད༌དི༌ ཐའ༌མ༌ མ༌ནེ༌ མི༌ཡོང༌།”
LUK 1:34 མིར༌ཡམ༌མི༌ ཕོ༌ཉའ༌ ཟེརས༌, “ང༌ བུ༌ཚ༌ ཉམ༌པོ༌ བྲེལ༌ མ༌ཆའ༌ཁན༌ནི༌ ན༌ཆུང༌ཞིག༌ ཨིན༌པ༌ ཏེ༌བོ༌ ཀ༌ཟུག༌གི༌ གྲུབ༌ ཐུབ༌ཨིན༌?”
LUK 1:35 ཕོ༌ཉའེ༌ ལན༌སལས༌, “ཏམ༌པའེ༌ ཐུག༌ཉིད༌ ཁྱོ༌རང༌ངི༌ཀ༌ བབས༌ཏེ༌ ཀུན༌ཝང༌ དཀོན༌མཆོག༌གི༌ ཤེད༌དི༌ ཀྲིབ༌ཀྱག༌ ཙོགས༌ལ༌ ཁྱོ༌རང༌ ཀབ༌བ༌ ཛད༌ཨིན༌། ཏེན༌ན༌བོའེ༌ཕིའ༌ ཁྱོ༌རང༌ང༌ ལྟམས༌ཁན༌ནི༌ ཏམ༌པ༌ ཕྲུ༌གུ༌བོའ༌ དཀོན༌མཆོག༌གི༌ སྲས༌ ཞུ༌ཨིན༌།
LUK 1:36 སྒས༌ཏེ༌ ཡོད༌ཁན༌ ཁྱོ༌རང༌ངི༌ ཉེན༌ ཨེ༌ལི༌ས༌བེད༌དའང༌ ཕྲུ༌གུ༌ ཇོར༌ཅེས༌ ཡོད༌། ཁོའ༌ ཕྲུ༌གུ༌ ཇོར༌མ༌ཉན༌ཁན༌ ཟེར༌ནའང༌ ཁོ༌ ཕན༌ཅེས༌མ༌ གྱུར༌ཏེ༌ ཟླ༌ཝ༌ དྲུག༌པོའེ༌ ནང༌ང༌ ཨིན༌།
LUK 1:37 ཅིའ༌ཟེར༌ན༌ དཀོན༌མཆོག༌ག༌ ཛད༌ མི༌ཉན༌ཅེས༌ ཅའང༌ མེད༌ཀྱག༌།”
LUK 1:38 ཏེ༌ནེ༌ མིར༌ཡམ༌མི༌ ཟེརས༌, “ང༌ གཙོ༌བོ༌ དཀོན༌མཆོག༌གི༌ ཞབས༌ཏོག༌མ༌ ཨིན༌། ཉེ༌རང༌ངི༌ མོལ༌ཁན༌ ནང༌ཞིན༌ གྲུབ༌ཤིག༌།” ཏེ༌ནེ༌ ཁོ༌ བོར༌ཏེ༌ ཏེ༌ཀ༌ནེ༌ ཕོ༌ཉ༌ སྐྱོདས༌།
LUK 1:39 ཏེན༌ན༌ སྟིང༌ནེ༌ མིར༌ཡམ༌མི༌ གྲལ༌གྲིག༌ ཅོས༌ཏེ༌, ཡ༌ཧུ༌དཱའེ༌ རི༌ ཡུལ༌ལི༌ ནང༌ང༌ གྲོང༌ཁྱེར༌ཞིག༌ག༌ གྱོགས༌པ༌ སོང༌,
LUK 1:40 ཏེ༌རུ༌ ཟ༌ཀ༌རི༌ཡཱ༌ དང༌ ཨེ༌ལི༌ས༌བེད༌དི༌ ཁང༌པའ༌ ལེབས༌ཏེ༌ ཁོའེ༌ ཨེ༌ལི༌ས༌བེད༌ལ༌ “ཇུ༌” ཟེརས༌།
LUK 1:41 ཨེ༌ལི༌ས༌བེད༌ལ༌ མིར༌ཡམ༌མི༌ ཇུ༌ ཟེར༌ར༌ ཚོར༌ར༌ཅིག༌, ཁོའེ༌ ཅང༌ཁོག༌ག༌ ཡོད༌ཁན༌ནི༌ ཕྲུ༌གུ༌བོ༌ ཕར༌ ཡང༌ ཨེ༌ལི༌ས༌བེད༌ ཏམ༌པའེ༌ ཐུག༌ཉིད༌དི༌ གང༌།
LUK 1:42 ཨེ༌ལི༌ས༌བེད༌དི༌ མིར༌ཡམ༌མའ༌ ཤེད༌ནའང༌ ཟེརས༌, “བུ༌མོ༌གུན༌ནི༌ ནང༌ནེ༌ དཀོན༌མཆོག༌གི༌ ཉེ༌རང༌ང༌ ཅིན༌ལབས༌ སལ༌ལ༌ ཛདས༌། ཉེ༌རང༌ང༌ ཇོར༌ཅེས༌ཅན༌ནི༌ སྲས༌པོའང༌ ཅིན༌ལབས༌ཅན༌ ཨིན༌།
LUK 1:43 ང༌ ཡོད༌ས༌ ངའེ༌ གཙོ༌བོའེ༌ ཨ༌མ༌ སྐྱོད༌ཏེ༌ ང༌ ཙམ༌ཤིག༌གི༌ རྩི༌ཝ༌ སལ༌ལ༌ ཛད༌ཏེ༌ ཨིན༌ནོག༌།
LUK 1:44 ཉེ༌རང༌ངི༌ ཇུ༌ མོལ༌ལ༌ ཚོར༌ར༌ཅིག༌ ངའེ༌ ཅང༌ཁོག༌ག༌ ཡོད༌ཁན༌ནི༌ ཕྲུ༌གུ༌བོ༌ ཐད༌ཏེ༌ ཕར༌།
LUK 1:45 ཉེ༌རང༌ ཅིན༌ལབས༌ཅན༌ ཨིན༌ནོག༌ ཅིའ༌ཟེར༌ན༌ གཙོ༌བོའེ༌ མོལ༌ཁན༌བོ༌ དྲན༌དྲ༌ གྲུབ༌ཅུག༌ག༌ ཛད༌ཅེས༌པོའ༌ ཉེ༌རང༌ངི༌ ཨིད༌ཤེས༌ ཅོས༌།”
LUK 1:46 ཡང༌ མིར༌ཡམ༌མི༌ ཟེརས༌, “ངའེ༌ སེམས༌སི༌ ཐིལ༌ནེ༌ གཙོ༌བོ༌ དཀོན༌མཆོག༌ག༌ སྟོད༌པ༌ ཕུལ༌ལད༌,
LUK 1:47 ཡང༌ ངའེ༌ སེམས༌ཉིད༌དི༌ གའ༌མོ༌ ཅོའད༌, ཅིའ༌ཞུ༌ན༌ ཁོང༌ ངའ༌ སྐྱོབ༌བ༌ ཛད༌ཁན༌ནི༌ དཀོན༌མཆོག༌ ཨིན༌།
LUK 1:48 ཁོང༌ངི༌ ཁོང༌རང༌ངི༌ ཉམ༌ཤུང༌ ཞབས༌ཏོག༌པ༌ ཐུག༌རྗེ༌ སྟན༌ཏེ༌ སྣང༌ང༌ ཛདས༌། ཏ༌ནེ༌ཕར༌ལ༌ མི༌རབས༌ ཚང༌མའེ༌ ངའ༌ ཅིན༌ལབས༌ཅན༌ ཟེར༌ཨིན༌།
LUK 1:49 ཅིའ༌ཟེར༌ན༌ ངའེ༌ ཕིའ༌ ཀུན༌ཝང༌ དཀོན༌མཆོག༌གི༌ ཆག༌ལས༌ གངས༌ཅན༌ ཛདས༌། ཁོང༌ངི༌ ཚན༌ ཏམ༌པ༌ ཨིན༌།
LUK 1:50 ཁོང༌ང༌ རྩི༌ཝ༌ དང༌ ཇིགས༌སི༌ ནང༌ང༌ གྲུལ༌ཁན༌གུན༌ ཉམ༌པོ༌, ཁོང༌ངི༌ སྙིང༌རྗེ༌ མི༌རབས༌ནེ༌ མི༌རབས༌ ལུས༌ཨིན༌།
LUK 1:51 ཁོང༌ངི༌ ཁོང༌རང༌ངི༌ སྟོབས༌ཅན༌ནི༌ ཆག༌ རྐྱང༌ང༌ ཛད༌ཏེ༌ ཕོ༌སོ༌ཅན༌གུན༌ ཡན༌ཅུག༌ག༌ ཛདས༌།
LUK 1:52 ཁོང༌ངི༌ ཝང༌སྲུལ༌པ༌གུན༌ ཁྲིས༌སི༌ ཀ༌ནེ༌ ཕབ༌བ༌ ཛདས༌, ཨིན༌ནའང༌ ཉམས༌ཆུང༌གུན༌ སྟག༌ག༌ ཛདས༌།
LUK 1:53 ཁོང༌ངི༌ སྟོགས༌ཁན༌གུན༌ ཚིམ༌ ཅུག༌ག༌ ཛདས༌, ཨིན༌ནའང༌ ཆུག༌པོ༌གུན༌ སྟོང༌པ༌ ལོགས༌ཏེ༌ སལས༌།
LUK 1:54 ཁོང༌ངི༌ སྙིང༌རྗེ༌ ཛད༌ཅེས༌པོ༌ རྗེད༌ད༌ མ༌ཛད༌ད༌ ཁོང༌རང༌ངི༌ ཡོག༌པོ༌ ཨིས༌ར༌ཨེལ༌པ༌གུན༌ལ༌ རོགས༌ ཛདས༌།
LUK 1:55 ཅིའ༌ཟེར༌ན༌ ཁོང༌ངི༌ ཨབ༌ར༌ཧམ༌ དང༌ ཁོའེ༌ པུར༌གྱུད༌, ང༌དང༌ངི༌ ཕ༌མེས༌པོ༌གུན༌ལ༌ ཏེ༌ ཐའ༌མེད༌པའེ༌ ཞལ༌ཆད༌པོ༌ ཛདས༌།”
LUK 1:56 མིར༌ཡམ༌ ཨེ༌ལི༌ས༌བེད༌ ཉམ༌པོ༌ ཟླ༌ཝ༌ སུམ༌ ཟམ༌ཤིག༌ དུགས༌ཏེ༌ སྟིང༌ནེ༌ ཁོ༌རང༌ངི༌ ཁང༌པའ༌ ན༌ཙ༌རེད༌ལ༌ ལོགས༌ཏེ༌ སོང༌།
LUK 1:57 ཨེ༌ལི༌ས༌བེད༌ལ༌ ཕྲུ༌གུ༌ ཇོར༌ཅེས༌སི༌ ཏུས༌ ལེབ༌བ༌ཅིག༌ ཁོའ༌ བུ༌ཚ༌ཞིག༌ ཇོར༌།
LUK 1:58 ཉེན༌གྲུང༌ དང༌ ཁྱིམ༌ཚེས༌པ༌ གུན༌ནི༌ ཨེ༌ལི༌ས༌བེད༌ལ༌ གཙོ༌བོའེ༌ སྙིང༌རྗེ༌ ཆེན༌མོ༌ ཛད༌ཁན༌བོ༌ ཚོར༌ཏེ༌, ཁོང༌གུན༌ནི༌ ཁོ༌ ཉམ༌པོ༌ གའ༌མོ༌ ཅོས༌།
LUK 1:59 ཞག༌ རྒྱད༌པའེ༌ ཞག༌ག༌ ཁོང༌གུན༌ ཕྲུ༌གུ༌བོའ༌ སུན༌ནད༌ ཅོ༌ཅེས༌ལ༌ ཛོམ༌ཏེ༌, ཨ༌བའེ༌ མིང༌ ཙོགས༌ལ༌ ཕྲུ༌གུའང༌ ཟ༌ཀ༌རི༌ཡཱ༌ མིང༌ ཏག༌ཅེས༌ ཅོས༌།
LUK 1:60 ཨིན༌ནའང༌ ཁོའེ༌ ཨ༌མའེ༌ ཟེརས༌, “མན༌ ཁོའེ༌ མིང༌ང༌ ཡོ༌ཧཱ༌ནན༌ ཏག༌གོས༌།”
LUK 1:61 ཁོང༌གུན༌ནི༌ ཁོའ༌ ཟེརས༌, “ཁྱོ༌ཞའེ༌ གྱུད༌དི༌ ནང༌ནེ༌ འི༌ མིང༌བོ༌ སུའང༌ མེད༌།”
LUK 1:62 ཏེ༌ནེ༌ ཁོང༌གུན༌ནི༌ ལག༌པ༌ ཉམ༌པོ༌ སྟགས༌ ཅོ༌ཨིན༌ ཁོའེ༌ ཨ༌བའ༌ ཁོའེ༌ མིང༌ ཅི༌ ཏག༌ཉིན༌རག༌ ཟེར༌ཏེ༌ ཏྲིས༌།
LUK 1:63 ཟ༌ཀ༌རི༌ཡཱའེ༌ སྟགས༌ ཅོ༌ཨིན༌ ལག༌ཤིང༌ཞིག༌ ཏོང༌ ཟེརས༌ ཡང༌ ཁོའེ༌ ཏེ༌ཀ༌, “ཁོའེ༌ མིང༌ང༌ ཡོ༌ཧཱ༌ནན༌ ཏོག༌” བྲིས༌པ༌ ཁོང༌ ཚང༌མ༌ ཧ༌ལས༌།
LUK 1:64 ཏེན༌ན༌མལ༌ལ༌ ཁོའ༌ ཡང༌སྐྱར༌ སྤེ༌ར༌ ཏང༌ཉན༌ ཡང༌ ཁོའེ༌ དཀོན༌མཆོག༌ག༌ སྟོད༌པ༌ ཕུལས༌།
LUK 1:65 ཏེ༌གུན༌ ཚོར༌ཏེ༌ ཁྱིམ༌ཚེས༌པ༌གུན༌ དཀོན༌མཆོག༌གི༌ ཇིགས༌སི༌ གང༌, ཡང༌ ཡ༌ཧུ༌དཱའེ༌ རི༌ ཡུལ༌ གང༌པོའེ༌ ནང༌ང༌ ཏེ༌ ཇུང༌ཁན༌གུན༌ནི༌ ནས༌ཚུལ༌བོ༌ ཕེལ༌།
LUK 1:66 ཏེ༌ ནས༌ཚུལ༌ ཚོར༌ཁན༌ ཚང༌མའེ༌ གཙོ༌བོའེ༌ ཁོའེ༌ཀ༌ ཆག༌ བོར༌ཏེ༌ ཅིན༌ལབས༌ སལ༌ཁན༌བོ༌ ཧ༌གོ༌ཏེ༌ ཁོ༌རང༌ ཅིག༌ དང༌ ཅིག༌ག༌ ཏྲིས༌, “ལྡན༌ཏེ༌ འི༌ ཕྲུ༌གུ༌བོ༌ ཅི༌ཞིག༌ གྱུར༌ཨིན༌ཧེ༌?”
LUK 1:67 ཏེ༌ནེ༌ ཨ༌བ༌ ཟ༌ཀ༌རི༌ཡཱ༌ ཏམ༌པའེ༌ ཐུག༌ཉིད༌དི༌ གངས༌ཏེ༌ ལུང༌སྟན༌ ཤདས༌,
LUK 1:68 “ཨིས༌ར༌ཨེལ༌ལི༌ གཙོ༌བོ༌ དཀོན༌མཆོག༌ག༌ སྟོད༌པ༌ ཕུལ༌ ཅིའ༌ཞུ༌ན༌ ཁོང༌ སྐྱོད༌ཏེ༌ ཁོང༌རང༌ངི༌ མི༌གུན༌ ཐར༌ ཅུག༌ག༌ ཛདས༌།
LUK 1:69 སྔུན༌མའེ༌ ལུང༌སྟོན༌པ༌ ཏམ༌པ༌གུན༌ གྱུད༌ཏེ༌ དཀོན༌མཆོག༌གི༌ མོལ༌ཁན༌ ནང༌ཞིན༌, ང༌དང༌ངི༌ ཕིའ༌ ཁོང༌ངི༌ ཞབས༌ཏོག༌པ༌ གྱལ༌པོ༌ དཱ༌བིད༌དི༌ པུར༌གྱུད༌ནེ༌ ཁྱུད༌ཅན༌ སྐྱབ༌གོན༌ཞིག༌ ཀལ༌ལ༌ ཛདས༌,
LUK 1:71 ཏ༌ གྲ༌འོ༌ དང༌ ནཕ༌རད༌ ཅོ༌ཁན༌ ཚང༌མ༌ནེ༌ ང༌དང༌གུན༌ སྐྱོབ༌བ༌ ཛད༌ཨིན༌།
LUK 1:72 དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ལ༌ ཏམ༌པ༌ ཆད༌དོན༌ ཛད༌ཁན༌བོ༌ ཨིད༌ཏུ༌ བོར༌ར༌ ཛད༌ཏེ༌ ཁོང༌གུན༌ནི༌ཀ༌ སྙིང༌རྗེ༌ ཛདས༌།
LUK 1:73 ཁོང༌ངི༌ ང༌དང༌ངི༌ ཕ༌མེས༌པོ༌ ཨབ༌ར༌ཧམ༌ ཉམ༌པོ༌ ནའ༌ ཁུར༌ར༌ ཛད༌ཏེ༌ ཏེ༌ ཆད༌དོན༌བོ༌ ཛདས༌།
LUK 1:74 ང༌དང༌གུན༌ ང༌དང༌གུན༌ནི༌ གྲ༌འོའེ༌ ལག༌ནེ༌ ཐར༌ཅུག༌ ཛདས༌ ཏ༌ ང༌དང༌གུན༌ནི༌ མི༌ཚེ༌ གང༌པོ༌ ཇིགས༌ནང༌ མེད༌པ༌ ཏམ༌པ༌ དང༌ ཀྲང༌པོའེ༌ ནང༌ང༌ དཀོན༌མཆོག༌ག༌ ཞབས༌ཏོག༌ ཞུ༌ཉན༌ཨིན༌།
LUK 1:76 ངའེ༌ བུ༌ཚ༌, ཁྱོ༌རང༌ང༌ ཀུན༌ཝང༌ དཀོན༌མཆོག༌གི༌ ལུང༌སྟོན༌པ༌ ཟེར༌ཨིན༌ ཁྱོ༌རང༌ གཙོ༌བོའེ༌ སང༌ སྔུན༌ལ༌ སོང༌ཏེ༌, ཁོང༌ སྐྱོད༌ཅེས༌ལ༌ གྲལ༌གྲིག༌ ཅོ༌ཨིན༌།
LUK 1:77 མི༌གུན༌ནི༌ སྡིག༌པ༌གུན༌ལ༌ ཤགས༌པ༌ ཛད༌ཅེས༌པོ༌ གྱུད༌ཏེ༌ ཁྱོ༌རང༌ངི༌ གཙོ༌བོའེ༌ མི༌གུན༌ལ༌ ཐར༌པ༌ ཐོབ༌ཅེས༌སི༌ ལམ༌བོ༌ སྟན༌ཨིན༌།
LUK 1:78 དཀོན༌མཆོག༌གི༌ ཅམས༌པ༌ གངས༌ཁན༌ནི༌ སྙིང༌རྗེ༌ གྱུད༌ཏེ༌ ཁོང༌ངི༌ མ༌ཤི༌ཀ༌ ང༌མོའེ༌ འོད༌ ལྡང༌ཤན༌བོ༌ ང༌དང༌གུན༌ནི༌ཀ༌ ཤར༌ ཅུག༌ག༌ ཛད༌ཨིན༌།
LUK 1:79 སེམས༌ཉིད༌དི༌ མུན༌གྲིག༌ དང༌ ཤི༌ཅེས༌སི༌ ཇིགས༌ནང༌ངི༌ ནང༌ང༌ ཡོད༌ཁན༌གུན༌ལ༌ འོད༌ ཤར༌ ཅུག༌ག༌ ཛད༌ཏེ༌ ང༌དང༌གུན༌ ཞི༌དེ༌ ལམ༌མི༌ཀ༌ ཁྱོང༌ང༌ ཛད༌ཨིན༌།”
LUK 1:80 ཏེ༌ནེ༌ ཡོ༌ཧཱ༌ནན༌ ལྡན༌ཏེ༌ ཐུག༌ཉིད༌དི༌ ནང༌ང༌ ཤེད༌ཅན༌ སོང༌། ཨིས༌ར༌ཨེལ༌པ༌གུན༌ལ༌ ཆོས༌ཤད༌ཅེས༌ གོ༌ཟུག༌ ཅོ༌ཅོ༌ ཚོག༌པ༌ ཁོང༌ རི༌སྟོང༌ངི༌ ནང༌ང༌ ཞུགས༌།
LUK 2:1 ཏེ༌ཏུས༌ལ༌ རོམ༌མི༌ གྱལ༌པོ༌ ཨའུ༌གུས༌དུས༌སི༌ རོམ༌ གྱལ༌སྲིད༌དི༌ ཡོག༌ག༌ ཡོད༌ཁན༌ནི༌ ཡུལ༌ ཚང༌མའེ༌ མི༌ཀྲངས༌ རྩི༌ཅེས༌ལ༌ བཀའ༌ ཏངས༌།
LUK 2:2 ༼ཀྱི༌རི༌ནི༌འུས༌ སི༌རི༌ཡཱ༌ ཡུལ༌ཇོངས༌སི༌ ཀའ༌ལོན༌ འིན༌ནི༌ ཏུས༌ལ༌, འི༌ མི༌ཀྲངས༌ རྩི༌ཅེས༌པོ༌ ཏང༌པོ༌རང༌ ཨིན༌པིན༌༽
LUK 2:3 ཡང༌ མི༌ཚང༌མ༌ མིང༌ ཅུག༌ཅེས༌ལ༌ རང༌རང༌ངི༌ ཕ༌མེས༌པོའེ༌ ཡུལ༌ལ༌ སོང༌།
LUK 2:4 ཡོ༌སེབ༌ གྱལ༌པོ༌ དཱ༌བིད༌དི༌ པུར༌གྱུད༌ནེ༌ ཨིན༌པ༌, ཁོའང༌ གཱ༌ལིལ༌ལི༌ ཡུལ༌ཇོངས༌སི༌ ན༌ཙ༌རེད༌ གྲོང༌ཁྱེར༌ནེ༌, ཡ༌ཧུ༌དཱ༌ ཡུལ༌ཇོངས༌སི༌ དཱ༌བིད༌དི༌ གྲོང༌ཁྱེར༌ བེད༌ལེ༌ཧེམ༌མ༌ སོང༌།
LUK 2:5 ཡོ༌སེབ༌བི༌ ན༌མའ༌ ཏྲིས༌ཏེ༌ ཨིན༌ཁན༌ནི༌ མིར༌ཡམ༌, ཀ༌བོའ༌ ཕྲུ༌གུ༌ ཇོར༌ཅེས༌ ཡོད༌པིན༌, ཁོ༌ ཉམ༌པོ༌ མིང༌ ཅུག༌ག༌ལ༌ ཁྱེརས༌།
LUK 2:6 ཏེ༌རུ༌ ཡོད༌ཏུས༌, ཕྲུ༌གུ༌ ཇོར༌ཅེས༌སི༌ ཏུས༌པོ༌ ལེབ༌།
LUK 2:7 ཡང༌ མིར༌ཡམ༌མ༌ གོ༌མ༌ ཕྲུ༌གུ༌, བུ༌ཚ༌ཞིག༌ ལྟམས༌། ཁོའེ༌ ཕྲུ༌གུ༌ རས༌སི༌ ནང༌ང༌ ཏུམས༌ཏེ༌ བྲེས༌སི༌ ནང༌ང༌ བོརས༌, ཅིའ༌ཟེར༌ན༌ ཁོང༌གུན༌ལ༌ བྲང༌ས༌ དུག༌སའེ༌ ནང༌ མ༌ཐོབ༌བ༌ ཨིན༌པིན༌།
LUK 2:8 ཏེ༌ ཚན༌ལ༌, ཉེ༌ཁོར༌རི༌ ཐང༌ཞིག༌གི༌ཀ༌ ལུག༌རྫི༌གུན༌ དུགས༌ཏེ༌ ཁོང༌རང༌ངི༌ ལུག༌གུན༌ སྲུང༌ངད༌པིན༌།
LUK 2:9 གཙོ༌བོའེ༌ ཕོ༌ཉ༌ཞིག༌ ཁོང༌གུན༌ནི༌ ཇལ༌, ཡང༌ གཙོ༌བོའེ༌ ཟིར༌རྗིད༌དི༌ ཁོང༌གུན༌ ཡོད༌སའེ༌ ཉེ༌ཁོར༌རི༌ ནས༌ས༌ འོད༌ཅན༌ གྱུར༌པ༌, ཁོང༌གུན༌ སྲན༌ཏྲེ༌ ཇིགས༌།
LUK 2:10 ཨིན༌ནའང༌ ཕོ༌ཉའེ༌ ཁོང༌གུན༌ལ༌ མོལས༌, “མ༌ཇིགས༌ཤིག༌, ངའེ༌ མི༌ཚང༌མ༌ལ༌ མ༌ གའ༌མོ༌ ཁྱོང༌ཅེས༌ཅན༌ནི༌ གའ༌མོའེ༌ ནས༌ཚུལ༌ ཤད༌དད༌།
LUK 2:11 དི༌རིང༌ ཁྱོ༌ཞའེ༌ ཕ༌མེས༌པོའེ༌ གྱལ༌པོ༌ དཱ༌བིད༌དི༌ གྲོང༌ཁྱེར༌རི༌ ནང༌ང༌ སྐྱབ༌གོན༌བོ༌ ཁྲུངས༌ཏེ༌ ཨིན༌། ཁོང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, གཙོ༌བོ༌བོ༌ ཨིན༌།
LUK 2:12 ཡང༌ ཏེ༌བོའེ༌ སྟགས༌པོ༌ ནི༌ ཁྱོ༌ཞ༌གུན༌ལ༌ ཕྲུ༌གུ༌ཞིག༌ རས༌སི༌ ནང༌ང༌ ཏུམས༌ཏེ༌, བྲེས༌སི༌ ནང༌ང༌ ཉལ༌ཏེ༌ ཐོང༌ཨིན༌།”
LUK 2:13 ཧུན༌མེད༌ལ༌ ནམ༌ཁའེ༌ ཕོ༌ཉའེ༌ ཚོགས༌ ཆེན༌མོ༌ཞིག༌ སྔོན༌ཏེ༌, ཏེ༌ ཕོ༌ཉ༌ ཉམ༌པོ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ མོལས༌,
LUK 2:14 “དཀོན༌མཆོག༌ ཉམ༌པོ༌ ནམ༌ཁའེ༌ ཐོ༌ཤོག༌ག༌ ཞུགས༌ཏེ༌ ཡོད༌ཁན༌གུན༌ནི༌ ཁོང༌ང༌ སྟོད༌པ༌ ཕུལ༌, ཡང༌ དཀོན༌མཆོག༌ ཐུགས༌ཐད༌ད༌ ཛད༌ཁན༌ནི༌ ཇིག༌རྟེན༌པ༌གུན༌ནི༌ཀ༌ ཞི༌དེ༌ ཇུང༌།”
LUK 2:15 ཁོང༌གུན༌ བོར༌ཏེ༌ ཕོ༌ཉ༌གུན༌ ནམ༌ཁའ༌ ལོགས༌ཏེ༌ སྐྱོད༌ད༌ཅིག༌, ལུག༌རྫི༌གུན༌ནི༌ ཅིག༌ དང༌ ཅིག༌ག༌ ཟེརས༌, “ཏ༌ གཙོ༌བོའེ༌ ང༌དང༌ང༌ མོལ༌ཁན༌ ཇུང༌ཁན༌གུན༌ ལྟའ༌ལ༌ ང༌དང༌ བེད༌ལེ༌ཧེམ༌མ༌ ཆེན༌།”
LUK 2:16 ཏེ༌ནེ༌ ཁོང༌གུན༌ གྱོགས༌པ༌ སོང༌ཏེ༌, མིར༌ཡམ༌, ཡོ༌སེབ༌ དང༌ བྲེས༌སི༌ ནང༌ང༌ ཉལ༌ཁན༌ ཕྲུ༌གུ༌བོ༌ ཇལ༌།
LUK 2:17 ཕྲུ༌གུ༌ ཇལ༌ཏེ༌ སྟིང༌ནེ༌ ལུག༌རྫི༌གུན༌ནི༌ ཕྲུ༌གུའི༌ སྐོར༌ལ༌ མོལ༌ཁན༌ནི༌ ནས༌ཚུལ༌བོ༌ ཚང༌མ༌ལ༌ ཤདས༌།
LUK 2:18 ལུག༌རྫི༌གུན༌ནི༌ ཤད༌ཁན༌གུན༌ ཚོར༌ཁན༌ནི༌ མི༌ ཚང༌མ༌ ཧ༌ལས༌།
LUK 2:19 ཨིན༌ནའང༌ མིར༌ཡམ༌མི༌ ཇུང༌ཁན༌ ཚང༌མ༌ སྙིང༌ངི༌ ནང༌ང༌ ཁུར༌ཏེ༌ ཡང༌ ཏེ༌ ཚང༌མའེ༌ སྐོར༌ལ༌ སམ༌བ༌ ཏང༌ཨིན༌ དུགས༌།
LUK 2:20 ལུག༌རྫི༌གུན༌ནི༌ ཚོར༌ཁན༌ དང༌ ཐོང༌ཁན༌ ཚང༌མའེ༌ ཕིའ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ལོགས༌ཏེ༌ སོང༌, ཅིའ༌ཟེར༌ན༌ ཏེ༌གུན༌ ཕོ༌ཉའེ༌ མོལ༌ཁན༌ ནང༌ཞིན༌ དྲན༌དྲའ༌ ཡོད༌པིན༌།
LUK 2:21 ཞག༌ རྒྱད༌པའེ༌ ཞག༌ག༌, ནམ༌ ཕྲུ༌གུའ༌ སུན༌ནད༌ ཅོ༌ཅེས༌སི༌ ཏུས༌ ཨིན༌པིན༌, ཕྲུ༌གུའི༌ ཚན༌ལ༌ ཡེ༌ཤུ༌ ཏགས༌, ཀ༌ཟུག༌ ཕྲུ༌གུ༌ མིར༌ཡམ༌མི༌ ཅང༌ཁོག༌ག༌ ཆགས༌སི༌ སང༌ སྔུན༌ལ༌ ཕོ༌ཉའེ༌, ཏེ༌ མིང༌བོ༌ ཏག༌ག༌ ཛད༌ཅེས༌ལ༌ མོལ༌ཏེ༌ ཨིན༌པིན༌།
LUK 2:22 ལུང༌སྟོན༌པ༌ མོ༌ཟེས༌སི༌ བཀའ༌ཁྲིམས༌ ནང༌ཞིན༌ ཕྲུ༌གུ༌ སྐྱེས༌ཏེ༌ སྟིང༌ནེ༌ ཨ༌མ༌ རྩང༌མ༌ ཆ༌ཅེས༌སི༌ ཏུས༌ ཚང༌ང༌ཅིག༌, ཡོ༌སེབ༌ དང༌ མིར༌ཡམ༌མི༌ ཕྲུ༌གུ༌བོ༌ གཙོ༌བོ༌ དཀོན༌མཆོག༌གི༌ ཨིན༌ཁན༌ སྟན༌ཅེས༌སི༌ ཕིའ༌ ཡེ༌རུ༌ཤ༌ལེམ༌མི༌ ཆོད༌ཁང༌ང༌ ཁྱེརས༌།
LUK 2:23 ༼གཙོ༌བོའེ༌ བཀའ༌ཁྲིམས༌སི༌ ནང༌ང༌ བྲིས༌ཏེ༌ དུག༌, “བུ༌ཚ༌ གོ༌བུ༌ ཚང༌མ༌ གཙོ༌བོའ༌ སྟད༌ཁན༌བོ༌ སྟན༌གོས༌།”༽
LUK 2:24 གཙོ༌བོའེ༌ བཀའ༌ཁྲིམས༌ ནང༌ཞིན༌, “ཕུར༌གོན༌ ཀར༌པོ༌ ཆའ༌ཅིག༌ ཡ༌ ཕུར༌གོན༌ནི༌ ཕྲུ༌གུ༌ ཉིས༌” ཁོང༌གུན༌ནི༌ སྲོག༌ཆོད༌ལ༌ ཕུལས༌།
LUK 2:25 ཏེན༌ན༌ ཏུས༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཤི༌མི༌འོན༌ ཏད༌པ༌ཅན༌ དང༌ ཀྲང༌པོ༌ མི༌ཞིག༌, ཨིས༌ར༌ཨེལ༌པ༌གུན༌ལ༌ ཐར༌པ༌ ཁྱོང༌ཁན༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ སྐྱོད༌ཅེས༌ལ༌ སྲུངས༌ཏེ༌ ཡོད༌པིན༌། ཡང༌ ཏམ༌པའེ༌ ཐུག༌ཉིད༌ ཁོ༌ ཉམ༌པོ༌ ཡོད༌པིན༌།
LUK 2:26 ཏམ༌པའེ༌ ཐུག༌ཉིད༌དི༌ ཁོའ༌ ནམ༌ཚོག༌པ༌ ཁོའེ༌ གཙོ༌བོ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མི༌ཇལ༌ ཏེ༌ཏེ༌ཚོག༌པ༌ ཁོ༌ མི༌ཤི༌ མོལ༌ཏེ༌ སྔོན༌ ཅུག༌ག༌ ཛདས༌།
LUK 2:27 ཏམ༌པའེ༌ ཐུག༌ཉིད༌དི༌ ཤི༌མི༌འོན༌ ཆོད༌ཁང༌ང༌ ཁྱེར༌ར༌ ཛདས༌། བཀའ༌ཁྲིམས༌སི༌ ལུག༌སྲོལ༌ ནང༌ཞིན༌ ཕྲུ༌གུའ༌ ཅོ༌གོ༌ཤེས༌པོ༌ ཅོའ༌ལ༌ ཕ༌མའེ༌ ཡེ༌ཤུ༌ ཆོད༌ཁང༌ང༌ ཁྱོང༌ང༌ཅིག༌,
LUK 2:28 ཤི༌མི༌འོན༌ནི༌ ཕྲུ༌གུ༌ ལག༌པའེ༌ ནང༌ང༌ ཁུར༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌,
LUK 2:29 “གཙོ༌བོ༌ ཀུན༌ཝང༌, ཉེ༌རང༌ངི༌ ཞལ༌ཆད༌ ཛད༌ཁན༌བོ༌ གྲུབ༌ པ༌སང༌, ཉེ༌རང༌ངི༌ ཞབས༌ཏོག༌པ༌ ཞི༌དེ༌ ཉམ༌པོ༌ ཤི༌ཅེས༌ལ༌ གོངས༌པ༌ སལ༌།
LUK 2:30 ངའེ༌ མིག༌ནེ༌ ཉེ༌རང༌ངི༌ ཐར༌པ༌བོ༌ ཇལ༌,
LUK 2:31 ཀ༌བོ༌ མི༌ ཚང༌མའེ༌ ཕིའ༌ ཉེ༌རང༌ངི༌ གྲལ༌གྲིག༌ ཛད༌ཏེ༌ ཨིན༌།
LUK 2:32 ཁོང༌ ནི༌ ཡ༌ཧུ༌དཱ༌པ༌ མན༌ཁན༌གུན༌ལ༌ དཀོན༌མཆོག༌ སྔོན༌ཅུག༌ཁན༌ནི༌ འོད༌ ཨིན༌, ཡང༌ ཉེ༌རང༌ངི༌ མི༌ ཨིས༌ར༌ཨེལ༌པ༌གུན༌ནི༌ སྤལ༌བོ༌ ཨིན༌།”
LUK 2:33 ཁོང༌ངི༌ སྐོར༌ལ༌ མོལ༌ཁན༌གུན༌ ཚོར༌ཏེ༌ ཕྲུ༌གུའི༌ ཨ༌བ༌ དང༌ ཨ༌མ༌ ཧ༌ལས༌།
LUK 2:34 ཏེ༌ནེ༌ ཤི༌མི༌འོན༌ནི༌ ཁོང༌གུན༌ལ༌ ཅིན༌ལབས༌ སལ༌ཏེ༌, ཨ༌མ༌ མིར༌ཡམ༌མ༌ མོལས༌, “དཀོན༌མཆོག༌གི༌ ཐབ༌ལྡིངས༌ ནང༌ཞིན༌ འི༌ ཕྲུ༌གུ༌བོ༌ གྱུད༌ཏེ༌ ཨིས༌ར༌ཨེལ༌པ༌ མང༌པོ༌ཞིག༌ གྱེལ༌ཅེས༌ ཡང༌ མང༌པོ༌ཞིག༌ག༌ ཐར༌པ༌ ཐོབ༌ཨིན༌། ཁོང༌ དཀོན༌མཆོག༌གི༌ ཆོགས༌ནེ༌ ཨིན༌ཁན༌བོ༌ མི༌གུན༌ལ༌ ཧ༌གོ༌ཏེའང༌ མང༌པོའེ༌ ཁོང༌ང༌ གྱབ༌གལ༌ ཅོ༌ཨིན༌།
LUK 2:35 ཏེ༌བོའེ༌ ཞས༌ཏེ༌ མི༌ མང༌པོའེ༌ སྙིང༌ངི༌ ཐིལ༌ལི༌ སམ༌ཚུལ༌གུན༌ སྔོན༌ཅུག༌ག༌ ཛད༌ཨིན༌ ཡང༌ ཁྱོ༌རང༌ངི༌ སེམས༌ལའང༌ ར༌འི༌ ཟུག༌ཁན༌ ཙོགས༌ ཚེར༌ཁ༌ ཡོང༌ཨིན༌།”
LUK 2:36 ཨ༌ཤེར༌རི༌ སྡེ༌ནེ༌ ཨིན༌ཁན༌ནི༌ ཕ༌ནུ༌འེལ༌ལི༌ བུ༌མོ༌ ཨན༌ནཱ༌, མ༌ རྒད༌མོ༌ ལུང༌སྟོན༌མ༌ཞིག༌ ཡོད༌པིན༌། ན༌མ༌ ཅོས༌ཏེ༌ ལོ༌ རྡུན༌ནི༌ སྟིང༌ནེ༌ ཁོའེ༌ མག༌པ༌ ཤི༌།
LUK 2:37 ཨ༌ནེ༌མ༌རང༌མོ༌ གྱུར༌ཏེ༌ སྟིང༌ནེ༌ ཁོའེ༌ ཡང༌སྐྱར༌ ན༌མ༌ མ༌ཅོས༌། ཁོ༌ ཆོད༌ཁང༌ནེ༌ མ༌ནེ༌ མ༌བིང༌ང༌, ཚན༌ དང༌ ཉི༌མ༌ དཀོན༌མཆོག༌ག༌ ཅོལ༌ཨིན༌, ཉེ༌ནས༌ ༼ཡང༌ན༌ རོ༌ཟཱ༌༽ དུགས༌ཏེ༌ མོས༌ལམ༌ ཞུའད༌པིན༌། ཏ༌ ཁོའ༌ ལོ༌ 84 ཆའད༌པིན༌,
LUK 2:38 ཤི༌མི༌འོན༌ནི༌ ཡོ༌སེབ༌ དང༌ མིར༌ཡམ༌མ༌ སྤེ༌ར༌ ཏངས༌ས༌ ཁོ༌ ཡོངས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཁོའེ༌ ཡེ༌རུ༌ཤ༌ལེམ༌པ༌གུན༌ལ༌ ཐར༌པ༌ ཐོབ༌ཅེས༌ལ༌ སྲུངས༌ཏེ༌ ཡོད༌ཁན༌ ཚང༌མ༌ལ༌ ཕྲུ༌གུ༌བོའེ༌ སྐོར༌ལ༌ ཤདས༌།
LUK 2:39 གཙོ༌བོའེ༌ བཀའ༌ཁྲིམས༌སི༌ སྒོས༌དོམ༌ ནང༌ཞིན༌ ཅོ༌ ཚར༌ར༌ཅིག༌ ཡོ༌སེབ༌ དང༌ མིར༌ཡམ༌ གཱ༌ལིལ༌ལིའི༌ ཡུལ༌ཇོངས༌, ཁོ༌རང༌གུན༌ནི༌ གྲོང༌ཁྱེར༌ ན༌ཙ༌རེད༌ལ༌ ལོགས༌ཏེ༌ སྐྱོདས༌།
LUK 2:40 ཡང༌ ཕྲུ༌གུ༌ ལྡན༌ཏེ༌ ཤེད༌ཅན༌ གྱུར༌། ཁོང༌ ཤེས༌རབས༌སི༌ གངས༌ཏེ༌ དཀོན༌མཆོག༌གི༌ ཐུག༌རྗེ༌ ཁོང༌ངི༌ཀ༌ ཡོད༌པིན༌།
LUK 2:41 གཙོ༌བོ༌ ཡེ༌ཤུའི༌ ཕ༌མ༌ ལོ༌ཞུང༌ པེ༌སག༌གི༌ ཏུས༌ཆེན༌ རྩིའ༌ལ༌ ཡེ༌རུ༌ཤ༌ལེམ༌མ༌ སྐྱོད༌དད༌པིན༌།
LUK 2:42 ཡེ༌ཤུའ༌ གུང༌ལོ༌ རྕུག༌ཉིས༌ ཆ༌ ཟ༌ནེ༌ ལུག༌སྲོལ༌ ནང༌ཞིན༌ ཁོང༌གུན༌ ཡེ༌རུ༌ཤ༌ལེམ༌ གྱལ༌ས༌ ཏུས༌ཆེན༌ རྩིའ༌ སྐྱོདས༌།
LUK 2:43 ཏུས༌ཆེན༌ རྩི༌ ཚར༌ཏེ༌ ཁོང༌གུན༌ རང༌ཡུལ༌ལ༌ ལོག༌ཏེ༌ ཆའ༌ ཟ༌ནེ༌ བུ༌ཚ༌ ཡེ༌ཤུ༌ ཕ༌མ༌ ཉམ༌པོ༌ མ༌ཆའ༌ ཡེ༌རུ༌ཤ༌ལེམ༌མ༌ ཞུགས༌, ཨིན༌ནའང༌ ཁོང༌ངི༌ ཕ༌མའ༌ ཏེ༌བོ༌ གྱུས༌ མ༌སོང༌།
LUK 2:44 ཁོང༌གུན༌ནི༌ ཡེ༌ཤུ༌ ཕྲོ༌པ༌གུན༌ ཉམ༌པོ༌ ཡོད༌གྲོ༌ སམ༌ཏེ༌ ཞག༌ཅིག༌གི༌ ལམ༌ གྲུལ༌ཏེ༌ སྟིང༌ནེ༌ ཉེན༌ དང༌ ཛ༌འོ༌ གུན༌ནི༌ ཕྲོའ༌ ཕྲུ༌གུ༌བོ༌ ཙལ༌ཅེས༌ གོ༌ཟུག༌།
LUK 2:45 མ༌ཐོབ༌ པ༌སང༌ ཡེ༌རུ༌ཤ༌ལེམ༌མ༌ ལོག༌ཏེ༌ ཁོང༌ ཙལ༌ལ༌ སོང༌།
LUK 2:46 ཞག༌ སུམ༌པའེ༌ ཞག༌ག༌ ཁོང༌ ཆོད༌ཁང༌ངི༌ ནང༌ང༌ ཆོས༌ ཤད༌ཁན༌ནི༌ གེར༌གན༌གུན༌ནི༌ ཕྲོའ༌ ཞུགས༌ཏེ༌ ཁོང༌གུན༌ལ༌ ཉན༌ཨིན༌ ཏྲི༌ཝ༌ ཏྲི༌ཨིན༌ ཐོང༌།
LUK 2:47 ཁོང༌ངི༌ མོལ༌ལ༌ ཚོར༌ཁན༌ ཚང༌མ༌ ཁོང༌ངི༌ རིག༌པ༌ དང༌ ཁས༌པ༌ ལན༌ སལ༌ཁན༌བོའེ༌ཀ༌ ཧ༌ལས༌།
LUK 2:48 ཁོང༌གུན༌ ཉམ༌པོ༌ ཡེ༌ཤུ༌ ཐོང༌ང༌ཅིག༌ ཕ༌མ༌ ཧ༌ལས༌ ཡང༌ ཨ༌མའེ༌ ཁོང༌ང༌ ཟེརས༌, “བུ༌ཚ༌, ཁྱོ༌རང༌ངི༌ ང༌ཞའ༌ འི༌ཟུག༌ ཅིའ༌ ཅོས༌པིན༌། ཁྱོ༌རང༌ངི༌ ཨ༌བ༌ དང༌ ངའེ༌ ཚེར༌ཁའ༌ ཉམ༌པོ༌ ཁྱོ༌རང༌ ཙལ༌པིན༌།”
LUK 2:49 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའེ༌ ཅི༌ཕིའ༌ ངའ༌ ཙལ༌པིན༌། ངའེ༌ ཡབ༌བི༌ ཁང༌པའེ༌ ནང༌ང༌ ང༌ དུག༌གོ༌ཤེས༌པོ༌ གྱུས༌མེད༌ད༌?”
LUK 2:50 ཨིན༌ནའང༌ ཁོང༌ངི༌ མོལ༌ཁན༌བོ༌ ཕ༌མའ༌ ཧ༌མ༌གོ༌།
LUK 2:51 ཏེ༌ནེ༌ ཡེ༌ཤུ༌ ཁོང༌གུན༌ ཉམ༌པོ༌ ན༌ཙ༌རེད༌ལ༌ ལོགས༌ཏེ༌ སྐྱོདས༌, ཡང༌ ཕ༌མའེ༌ ཁའ༌ཉན༌ན༌ ཛདས༌། ཁོང༌ངི༌ ཨ༌མའེ༌ ཇུང༌ཁན༌ ཚང༌མ༌ རིན༌ཅན༌ ཅོས༌ཏེ༌ ཁོ༌རང༌ངི༌ སེམས༌སི༌ ནང༌ང༌ ཁུར༌ཏེ༌ དུགས༌།
LUK 2:52 ཡེ༌ཤུ༌ ཤེས༌རབས༌ དང༌ སྐུ༌ཟུགས༌སི༌ ནང༌ང༌ ལྡན༌ན༌ ཛདས༌, ཁོང༌ང༌ མི༌གུན༌ནེ༌ རྩི༌ཝ༌ ཡང༌ དཀོན༌མཆོག༌ ཁོང༌ངི༌ཀ༌ ཐུག༌ཉེས༌ས༌ ཛདས༌།
LUK 3:1 རོམ༌མི༌ གྱལ༌པོ༌ ཏི༌བིར༌ཡུས༌སི༌ ཝང༌སྲུལ༌ལི༌ ལོ༌ 15 པ༌, ནམ༌ པོན༌ཏིའུ༌ པི༌ལ༌ཏུ༌ ཡ༌ཧུ༌དཱ༌ ཡུལ༌ཇོངས༌སི༌ ཀའ༌ལོན༌, ཧེ༌རོད༌ གཱ༌ལིལ༌ལི༌ ཡུལ༌ཇོངས༌སི༌ ལོན༌པོ༌, ཁོའེ༌ ཨ༌ཅོ༌ ཕི༌ལིབ༌ ཨི༌ཏུ༌ར༌ཡཱ༌ དང༌ ཏྲ༌གོ༌ནི༌ཏིས༌ ཡུལ༌ཇོངས༌སི༌ ལོན༌པོ༌, ལི༌སན༌ཡས༌ ཨ༌བི༌ལེ༌ནེ༌ ཡུལ༌ཇོངས༌སི༌ ལོན༌པོ༌
LUK 3:2 ཡང༌ ཨན༌ནཱས༌ དང༌ ཀ༌ཡ༌ཕཱས༌ བླ༌མ༌ ཆེན༌མོའེ༌ ཀོ༌སའེ༌ཀ༌ ཡོད༌དི༌ ཏུས༌ རི༌སྟོང༌ངི༌ ནང༌ང༌ དཀོན༌མཆོག༌གི༌ བཀའ༌ ཟ༌ཀ༌རི༌ཡཱའེ༌ བུ༌ཚའ༌ ཡོ༌ཧཱ༌ནན༌ལ༌ ཀལ༌ལ༌ ཛདས༌།
LUK 3:3 ཡོར༌དཱན༌ ལྩངས༌པོའེ༌ ཉེ༌ཁོར༌རི༌ ཡུལ༌ ཚང༌མ༌ལ༌ ཡོ༌ཧཱ༌ནན༌ སྐྱོད༌ཏེ༌ ཤགས༌པ༌ ཐོབ༌ཅེས༌སི༌ ཕིའ༌ སྡིག༌པ༌ ཅོ༌ཁན༌གུན༌ནི༌ཀ༌ གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ ཆོས༌ཤདས༌།
LUK 3:4 ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆའེ༌ ནང༌ང༌ ཡོ༌ཧཱ༌ནན༌ནི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌, “རི༌སྟོང༌ངི༌ ནང༌ང༌ སྐད༌ ཆེན༌མོ༌ཞིག༌གི༌ མོལ༌ཨིན༌, ‘གཙོ༌བོ༌ ཕེབ༌ཤེས༌ལ༌ གྲལ༌གྲིག༌ ཅོ༌ཤིག༌, ཡང༌ ཁོང༌ངི༌ ཕེབས༌ལམ༌བོ༌ ཀྲང༌པོ༌ ཅོ༌ཤིག༌།
LUK 3:5 ལུང༌པ༌ ཚང༌མ༌ སྐང༌ང༌ ཛད༌ཨིན༌། ཡང༌ རི༌ ཆེན༌མོ༌ དང༌ ཆུ༌ངུན༌གུན༌ མ༌མོ༌ ཛད༌ཨིན༌། ལམ༌ ཀྱག༌ཀྱོག༌གུན༌ སྲོང༌, ཡང༌ གང༌ཧོབས༌གུན༌ སྙོམས༌ཏེ༌ ཏིང༌ཏིང༌ ཅོ༌ཤིག༌།
LUK 3:6 ཡང༌ མི༌ཚང༌མའེ༌ དཀོན༌མཆོག༌གི༌ ཐར༌ལམ༌བོ༌ ཇལ༌ཨིན༌།’”
LUK 3:7 ཡོ༌ཧཱ༌ནན༌ནི༌ ཁྲུས༌ལེན༌ན༌ ཡོང༌ཁན༌ནི༌ མི༌ཚོགས༌ལ༌ མོལས༌, “ཁྱོ༌ཞའ༌ ཏུག༌རུལ༌ལི༌ པུར༌གྱུད༌གུན༌, ཡོང༌ཅེས༌ཅན༌ནི༌ དཀོན༌མཆོག༌གི༌ ཆད༌པ༌ནེ༌ ཤོར༌ ཟེར༌ཏེ༌ ཁྱོ༌ཞའ༌ སྤང༌ སུའི༌ ཕུདས༌?
LUK 3:8 སྡིག༌པ༌ ཅོ༌ཅེས༌ སྤངས༌ཏེ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ནི༌ བྲས༌བུ༌ སྨིན༌ཅུག༌། ཡང༌ རང༌ དང༌ རང༌ང༌ མ༌ཟེར༌, ‘ང༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ པ༌སང༌ ཐར༌ཨིན༌།’ ངའེ༌ ཁྱོ༌ཞ༌གུན༌ལ༌ ཟེར༌རད༌, དཀོན༌མཆོག༌གི༌ འི༌ རྡོའ༌གུན༌ནི༌ ནང༌ནེ༌ ཨབ༌ར༌ཧམ༌མི༌ ཕིའ༌ པུར༌གྱུད༌ ཛད༌ཉན༌ཨིན༌།
LUK 3:9 ཤང༌ ཅོ༌ཤིག༌, སྟ༌རི༌ ནི༌ ལྕང༌མ༌གུན༌ནི༌ རྩའི༌ཀ༌ གྱབ༌ཆོག༌ཆོག༌ དུག༌, བྲས༌བུ༌ ཟང༌པོ༌ མ༌སྨིན༌ཁན༌ནི༌ ལྕང༌མ༌ ཚང༌མ༌ ཅད༌ཏེ༌ མེའེ༌ ནང༌ང༌ ཕང༌ཨིན༌།”
LUK 3:10 མི༌ཚོགས༌པོའེ༌ ཡོ༌ཧཱ༌ནན༌ལ༌ ཏྲིས༌, “ཏ༌ ང༌ཞ༌གུན༌ནི༌ ཅི༌ ཅོ༌གོས༌?”
LUK 3:11 ཡོ༌ཧཱ༌ནན༌ནི༌ ཁོང༌གུན༌ལ༌ མོལས༌, “ཀོས༌ ཉིས༌ ཡོད༌ཁན༌གུན༌ནི༌ ཅིག༌པོ༌ མེད༌ཁན༌གུན༌ལ༌ ཏོང༌ ཡང༌ ཟན༌ ཡོད༌ཁན༌གུན༌ནི༌ མེད༌ཁན༌གུན༌ལ༌ བགོས༌ཏེ༌ ཏོང༌།”
LUK 3:12 ཁྲལ༌ལེན༌ཁན༌གུན༌ནའང༌ ཁྲུས༌ལེན༌ན༌ ཡོངས༌ཏེ༌ ཏྲིས༌, “ལོབ༌བོན༌ལེ༌ ང༌ཞ༌གུན༌ནི༌ ཅི༌ ཅོ༌གོས༌?”
LUK 3:13 ཁོང༌ངི༌ ཁོང༌གུན༌ལ༌ མོལས༌, “ལེན༌གོ༌ཤེས༌སི༌ སང༌ ཐལ༌ཏེ༌ ཁྲལ༌ མ༌ལེན༌།”
LUK 3:14 ཏེ༌ནེ༌ མག༌མི༌ ཁ༌ཅིག༌གི༌ ཡོ༌ཧཱ༌ནན༌ལ༌ ཏྲིས༌, “ང༌ཞ༌གུན༌ནི༌ ཅི༌ ཅོ༌གོས༌?” ཁོང༌ངི༌ ཁོང༌གུན༌ལ༌ མོལས༌, “ཇིགས༌ནང༌ སྟན༌ཏེ༌ ཡ༌ ཟུན༌ནི༌ ཉད༌གལ༌ ཀལ༌ཏེ༌ སུ༌ཞིག༌གི༌ ཀ༌ནེ༌ པེ༌ནེ༌ མ༌ལེན༌། རང༌ང༌ ཕོགས༌ ཐོབ༌ཁན༌བོའེ༌ཀ༌ ཚིམས༌ཏེ༌ དུག༌།”
LUK 3:15 མི༌གུན༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ སྐྱོད༌ཅེས༌ལ༌ སྲུངས༌ཏེ༌ ཡོད༌ པ༌སང༌ ཁོང༌གུན༌ནི༌ ཡོ༌ཧཱ༌ནན༌ ཁོང༌རང༌ མ༌ཤི༌ཀ༌ ཨིན༌ མན༌ན༌ཧེ༌ སམ༌མད༌པིན༌།
LUK 3:16 ཡོ༌ཧཱ༌ནན༌ནི༌ མི༌གུན༌ལ༌ མོལས༌, “ངའེ༌ ཁྱོ༌ཞའ༌ ཆུའི༌ཁྲུས༌ ཏང༌ངད༌། ཨིན༌ནའང༌ ངའེ༌ སྟིང༌ནེ༌ སྐྱོད༌ཅེས༌ཅན༌བོ༌, ངའེ༌ སང༌ མང༌ང༌ ཝང༌ཅན༌, ཡང༌ ངའ༌ ཞབ༌ཤི༌ ཙོགས༌ལ༌ ཁོང༌ངི༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌། ཁོང༌ངི༌ ཏམ༌པའེ༌ ཐུག༌ཉིད༌ དང༌ མེའེ༌ ཁྲུས༌སལ༌ཨིན༌།
LUK 3:17 ཞིང༌བད༌པའེ༌ ཡུལ༌ཐག༌ག༌ ཟར༌ ཉམ༌པོ༌, ཀྲོ༌ དང༌ ཕུག༌མ༌ ཕེས༌ཏེ༌ ཀྲོ༌ ཁོ༌རང༌ངི༌ བང༌ངེ༌ ནང༌ང༌ ཡང༌ ཕུག༌མ༌ མེའེ༌ ནང༌ང༌ སྲག༌ག༌ ཙོགས༌ལ༌ ཁོང༌ངིའང༌ ཁོང༌རང༌ངི༌ མི༌གུན༌ དང༌ མི༌ ངན༌པ༌གུན༌ སོ༌སོའ༌ ཕེའ༌ ཛད༌ཨིན༌།”
LUK 3:18 ཡོ༌ཧཱ༌ནན༌ནི༌ མི༌གུན༌ལ༌ ཏེ༌ཙོགས༌ མང༌པོ༌ སྤང༌པུད༌ ཨིན༌ནའང༌ གའ༌མོའེ༌ ནས༌ཚུལ༌བོ༌ ཤདས༌།
LUK 3:19 ཨིན༌ནའང༌ ཡོ༌ཧཱ༌ནན༌ནི༌ ཀའ༌ལོན༌ ཧེ༌རོད༌ལ༌, ཨ༌ཅོའེ༌ ན༌མ༌ ཧེ༌རོ༌དཱིས༌ ཉམ༌པོ༌ ན༌མ༌ ཅོ༌ཅེས༌ དང༌ ཞན༌ ལས༌ངན༌ ཅོ༌ཁན༌ ཚང༌མའེ༌ ཕིའ༌ སྐྱོན༌རྗོད༌ ཅོའ༌ ཛདས༌,
LUK 3:20 ཏེ༌ མ༌ཚད༌ ཧེ༌རོད༌དི༌ ཡོ༌ཧཱ༌ནན༌ ཙོན༌ལ༌ ཀགས༌ཏེ༌ སྡིག༌པ༌ ཅོས༌།
LUK 3:21 མི༌ཚང༌མའེ༌ ཁྲུས༌ལེན༌ ཟ༌ནེ༌ གཙོ༌བོ༌ ཡེ༌ཤུའིང༌ ཁྲུས༌ལེན༌ན༌ ཛདས༌། ཁོང༌ངི༌ མོས༌ལམ༌ ཞུའ༌ ཛད༌ ཟ༌ནེ༌ ནམ༌ཁའ༌ བེ༌ཏེ༌
LUK 3:22 ཏམ༌པའེ༌ ཐུག༌ཉིད༌ ཕུར༌གོན༌ ཙོགས༌ལ༌ ཁོང༌ངི༌ཀ༌ བབས༌། ཡང༌ ནམ༌ཁའ༌ནེ༌ སུང༌སྐད༌ཤིག༌གི༌ མོལས༌, “ཁྱོ༌རང༌ ངའེ༌ བུ༌ཚ༌ ཅེས༌པ༌བོ༌ ཨིན༌, ཁྱོ༌རང༌ ཉམ༌པོ༌ ངའ༌ མ༌སྲན༌ཏྲེ༌ ཐད༌པོ༌ ཨིན༌།”
LUK 3:23 ཡེ༌ཤུའི༌ དཀོན༌མཆོག༌གི༌ ཞབས༌ཏོག༌ ཛད༌ཅེས༌ གོ༌ཟུག༌ ཟ༌ནེ༌ ཁོང༌ངི༌ གུང༌ལོ༌ སུམ༌ཅུ༌ ཟམ༌ ཆའད༌པིན༌། མི༌གུན༌ནི༌ ཡེ༌ཤུ༌ ཡོ༌སེབ༌བི༌ བུ༌ཚ༌ ཨིན༌ནོག༌ སམ༌མད༌པིན༌། ཡོ༌སེབ༌ ནི༌ ཧེ༌ལིའི༌ བུ༌ཚ༌ ཨིན༌པིན༌།
LUK 3:24 ཧེ༌ལི༌ ནི༌ མད༌ཐད༌དི༌ བུ༌ཚ༌, མད༌ཐད༌ ནི༌ ལི༌ཝིའི༌ བུ༌ཚ༌, ལི༌ཝི༌ ནི༌ མེལ༌ཀིའི༌ བུ༌ཚ༌, མེལ༌ཀི༌ ནི༌ ཡན༌ནཱ༌ཡིའི༌ བུ༌ཚ༌, ཡན༌ནཱ༌ཡི༌ ནི༌ ཡོ༌སེབ༌བི༌ བུ༌ཚ༌ ཨིན༌པིན༌།
LUK 3:25 ཡོ༌སེབ༌ ནི༌ མད༌ཏ༌ཐི༌ཡཱའི༌ བུ༌ཚ༌ མད༌ཏ༌ཐི༌ཡཱ༌ ནི༌ ཨ༌མོས༌སི༌ བུ༌ཚ༌, ཨ༌མོས༌ ནི༌ ན༌ཧུམ༌མི༌ བུ༌ཚ༌, ན༌ཧུམ༌ ནི༌ ཨེས༌ལིའི༌ བུ༌ཚ༌, ཨེས༌ལི༌ ནི༌ ནག༌གཱ༌ཡིའི༌ བུ༌ཚ༌ ཨིན༌པིན༌།
LUK 3:26 ནག༌གཱ༌ཡི༌ ནི༌ མཱ༌འད༌དི༌ བུ༌ཚ༌, མཱ༌འད༌ ནི༌ མད༌ཏ༌ཐི༌ཡཱའི༌ བུ༌ཚ༌, མད༌ཏ༌ཐི༌ཡཱ༌ ནི༌ སེ༌མེ༌འིན༌ནི༌ བུ༌ཚ༌, སེ༌མེ༌འིན༌ ནི༌ ཡོ༌སེག༌གི༌ བུ༌ཚ༌, ཡོ༌སེག༌ ནི༌ ཡུ༌དཱའེ༌ བུ༌ཚ༌ ཨིན༌པིན༌།
LUK 3:27 ཡུ༌དཱ༌ ནི༌ ཡོ༌འན༌ནན༌ནི༌ བུ༌ཚ༌, ཡོ༌འན༌ནན༌ ནི༌ རེ༌སཱའི༌ བུ༌ཚ༌, རེ༌སཱ༌ ནི༌ ཟེ༌རུཔ༌བ༌བེལ༌ལི༌ བུ༌ཚ༌, ཟེ༌རུཔ༌བ༌བེལ༌ ནི༌ ཤའལ༌ཏི༌ཡེལ༌ལི༌ བུ༌ཚ༌, ཤའལ༌ཏི༌ཡེལ༌ ནི༌ ནེ༌རིའི༌ བུ༌ཚ༌ ཨིན༌པིན༌།
LUK 3:28 ནེ༌རི༌ ནི༌ མེལ༌ཀིའི༌ བུ༌ཚ༌, མེལ༌ཀི༌ ནི༌ ཨད༌དིའི༌ བུ༌ཚ༌, ཨད༌དི༌ ནི༌ ཀོ༌སམ༌མི༌ བུ༌ཚ༌, ཀོ༌སམ༌ ནི༌ ཨེལ༌མ༌དཱམ༌མི༌ བུ༌ཚ༌, ཨེལ༌མ༌དཱམ༌ ནི༌ ཨེར༌རི༌ བུ༌ཚ༌ ཨིན༌པིན༌།
LUK 3:29 ཨེར༌ ནི༌ ཡོ༌ཤུའེ༌ བུ༌ཚ༌, ཡོ༌ཤུའ༌ ནི༌ ཨེ༌ལི༌འེ༌ཟེར༌རི༌ བུ༌ཚ༌, ཨེ༌ལི༌འེ༌ཟེར༌ ནི༌ ཡོ༌རེམ༌མི༌ བུ༌ཚ༌, ཡོ༌རེམ༌ ནི༌ མད༌ཐད༌དི༌ བུ༌ཚ༌, མད༌ཐད༌ ནི༌ ལི༌ཝིའི༌ བུ༌ཚ༌ ཨིན༌པིན༌།
LUK 3:30 ལི༌ཝི༌ ནི༌ ཤི༌མི༌འོན༌ནི༌ བུ༌ཚ༌, ཤི༌མི༌འོན༌ ནི༌ ཡ༌ཧུ༌དཱའེ༌ བུ༌ཚ༌, ཡ༌ཧུ༌དཱ༌ ནི༌ ཡོ༌སེབ༌བི༌ བུ༌ཚ༌, ཡོ༌སེབ༌ ནི༌ ཡོ༌ནམ༌མི༌ བུ༌ཚ༌, ཡོ༌ནམ༌ ནི༌ ཨེ༌ལི༌ཡ༌ཀིམ༌མི༌ བུ༌ཚ༌ ཨིན༌པིན༌།
LUK 3:31 ཨེ༌ལི༌ཡ༌ཀིམ༌ ནི༌ མེ༌ལེ༌འེ༌ བུ༌ཚ༌, མེ༌ལེ༌འ༌ ནི༌ མེན༌ན༌ནི༌ བུ༌ཚ༌, མེན༌ན༌ ནི༌ མད༌ཏ༌ཐཱའི༌ བུ༌ཚ༌, མད༌ཏ༌ཐཱ༌ ནི༌ ན༌ཐན༌ནི༌ བུ༌ཚ༌, ན༌ཐན༌ ནི༌ དཱ༌བིད༌དི༌ བུ༌ཚ༌ ཨིན༌པིན༌།
LUK 3:32 དཱ༌བིད༌ ནི༌ ཡེ༌ཤེའེ༌ བུ༌ཚ༌, ཡེ༌ཤེ༌ ནི༌ ཨོ༌བེད༌དི༌ བུ༌ཚ༌, ཨོ༌བེད༌ ནི༌ བོ༌ཨཟ༌ཟི༌ བུ༌ཚ༌, བོ༌ཨཟ༌ ནི༌ སལ༌མོན༌ནི༌ བུ༌ཚ༌, སལ༌མོན༌ ནི༌ ན༌ཧ༌ཤོན༌ནི༌ བུ༌ཚ༌ ཨིན༌པིན༌།
LUK 3:33 ན༌ཧ༌ཤོན༌ ནི༌ ཨམ༌མི༌ན༌དབ༌བི༌ བུ༌ཚ༌, ཨམ༌མི༌ན༌དབ༌ ནི༌ ཨད༌མིན༌ནི༌ བུ༌ཚ༌, ཨད༌མིན༌ ནི༌ ཨར༌ནིའི༌ བུ༌ཚ༌, ཨར༌ནི༌ ནི༌ ཧེས༌རོན༌ནི༌ བུ༌ཚ༌, ཧེས༌རོན༌ ནི༌ ཕེ༌རེས༌སི༌ བུ༌ཚ༌, ཕེ༌རེས༌ ནི༌ ཡ༌ཧུ༌དཱའེ༌ བུ༌ཚ༌ ཨིན༌པིན༌།
LUK 3:34 ཡ༌ཧུ༌དཱ༌ ནི༌ ཡ༌ཀོབ༌བི༌ བུ༌ཚ༌, ཡ༌ཀོབ༌ ནི༌ ཨི༌སཱག༌གི༌ བུ༌ཚ༌, ཨི༌སཱག༌ ནི༌ ཨབ༌ར༌ཧམ༌མི༌ བུ༌ཚ༌ ཨབ༌ར༌ཧམ༌ ནི༌ ཏི༌རཧའེ༌ བུ༌ཚ༌, ཏི༌རཧ༌ ནི༌ ན༌ཧོར༌རི༌ བུ༌ཚ༌ ཨིན༌པིན༌།
LUK 3:35 ན༌ཧོར༌ ནི༌ སེ༌རུག༌གི༌ བུ༌ཚ༌, སེ༌རུག༌ ནི༌ རེ༌འུའི༌ བུ༌ཚ༌, རེ༌འུ༌ ནི༌ ཕེ༌ལེག༌གི༌ བུ༌ཚ༌, པེ༌ལེག༌ ནི༌ ཨེ༌བེར༌རི༌ བུ༌ཚ༌, ཨེ༌བེར༌ ནི༌ ཤེ༌ལག༌གི༌ བུ༌ཚ༌ ཨིན༌པིན༌།
LUK 3:36 ཤེ༌ལག༌ ནི༌ ཀེ༌ནན༌ནི༌ བུ༌ཚ༌, ཀེ༌ནན༌ ནི༌ ཨར༌པག༌ཤཱད༌དི༌ བུ༌ཚ༌, ཨར༌པག༌ཤཱད༌ ནི༌ ཤེམ༌མི༌ བུ༌ཚ༌, ཤེམ༌ ནི༌ ནོ༌ཨའེ༌ བུ༌ཚ༌, ནོ༌ཨ༌ ནི༌ ལ༌མེག༌གི༌ བུ༌ཚ༌ ཨིན༌པིན༌།
LUK 3:37 ལ༌མེག༌ ནི༌ མ༌ཐུ༌ཤེ༌ལག༌གི༌ བུ༌ཚ༌, མ༌ཐུ༌ཤེ༌ལག༌ ནི༌ ཨེ༌ནོག༌གི༌ བུ༌ཚ༌, ཨེ༌ནོག༌ ནི༌ ཡེ༌རེད༌དེ༌ བུ༌ཚ༌, ཡེ༌རེད༌ ནི༌ མ༌ཧ༌ལ༌ལེལ༌ལི༌ བུ༌ཚ༌, མ༌ཧ༌ལ༌ལེལ༌ ནི༌ ཀེ༌ནན༌ནི༌ བུ༌ཚ༌ ཨིན༌པིན༌།
LUK 3:38 ཀེ༌ནན༌ ནི༌ ཨེ༌ནོཤ༌ཤི༌ བུ༌ཚ༌, ཨེ༌ནོཤ༌ ནི༌ སེད༌དི༌ བུ༌ཚ༌, སེད༌ ནི༌ ཨ༌དམ༌མི༌ བུ༌ཚ༌, ཡང༌ ཨ༌དམ༌ ནི༌ དཀོན༌མཆོག༌གི༌ ཛད༌ཁན༌ནི༌ མི༌བོ༌ ཨིན༌པིན༌།
LUK 4:1 གཙོ༌བོ༌ ཡེ༌ཤུ༌ ཏམ༌པའེ༌ ཐུག༌ཉིད༌དི༌ གངས༌ཏེ༌ ཡོར༌དཱན༌ ལྩངས༌པོ༌ནེ༌ ལོགས༌ཏེ༌ སྐྱོདས༌, ཡང༌ ཏམ༌པའེ༌ ཐུག༌ཉིད༌དི༌ ཁོང༌ རི༌སྟོང༌ངི༌ ནང༌ང༌ ཁྱེར༌ར༌ ཛདས༌།
LUK 4:2 ཚན༌ཉིན༌ ཞིབ༌ཅུ༌ རྡུད༌གུན༌ནི༌ གོ༌བའེ༌ ཡེ༌ཤུ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌ལ༌ རྩོན༌གྲུས༌ ཅོས༌། ཏེ༌ཏུས༌ གང༌པོ༌ ཁོང༌ དོན༌ཏང༌ ཅའང༌ མ༌དོན༌པ༌ སྟིང༌ཇུག༌པའེ༌ཀ༌ ཁོང༌ རིམས༌།
LUK 4:3 རྡུད༌གུན༌ནི༌ གོ༌བ༌བོའེ༌ ཁོང༌ང༌ ཟེརས༌, “ཀལ༌ཏེས༌ ཉེ༌རང༌ དཀོན༌མཆོག༌གི༌ སྲས༌ ཨིན༌ན༌ འི༌ རྡོའ༌གུན༌ ཏ༌གི༌ གྱུར༌ཅེས༌ལ༌ བཀའ༌ སལ༌?”
LUK 4:4 ཡེ༌ཤུའི༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘མི༌ ཏ༌གི༌ ཅིག༌པོའེ༌ སོན༌ཏེའ༌ མི༌ལུས༌།’”
LUK 4:5 རྡུད༌གུན༌ནི༌ གོ༌བའེ༌ ཁོང༌ ནས༌ས༌ ཐོན༌པོ༌ཞིག༌གི༌ཀ༌ ཁྱེར༌ཏེ༌ ཁོང༌ང༌ ཇིག༌རྟེན༌ནི༌ གྱལ༌སྲིད༌ ཚང༌མ༌ སྲིབ༌ཅིག༌གི༌ ནང༌ང༌ སྟན༌ཏེ༌,
LUK 4:6 ཁོའེ༌ ཡེ༌ཤུའ༌ ཟེརས༌, “ངའེ༌ ཁྱོ༌རང༌ང༌ འི༌གུན༌ནི༌ སྤལ༌ དང༌ ཝང༌ཆའ༌ ཚང༌མ༌ ཏང༌ཨིན༌, ཅིའ༌ཟེར༌ན༌ ཏེ༌གུན༌ ངའ༌ ཏངས༌ཏེ༌ ཨིན༌པ༌ ངའེ༌, ང༌རང༌ ཐད༌ཁན༌བོའ༌ ཏང༌ཨིན༌།
LUK 4:7 ཀལ༌ཏེས༌ ཁྱོ༌རང༌ངི༌ ང༌ ཆག༌ཕུལ༌ཏེ༌ ཅོལ༌ན༌ ངའེ༌ ཁྱོ༌རང༌ང༌ འི༌ ཚང༌མ༌ ཏང༌ཨིན༌།”
LUK 4:8 ཡེ༌ཤུའི༌ ཁོའ༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘ཁྱོ༌ཞའེ༌, ཁྱོ༌ཞ༌རང༌ངི༌ གཙོ༌བོ༌ དཀོན༌མཆོག༌ག༌ ཅོལ༌གོས༌། ཡང༌ ཁོང༌ ཅིག༌པོའ༌ ཞབས༌ཏོག༌ ཞུ༌གོས༌།’”
LUK 4:9 ཏེ༌ནེ༌ རྡུད༌གུན༌ནི༌ གོ༌བའེ༌ ཡེ༌ཤུ༌ ཡེ༌རུ༌ཤ༌ལེམ༌མི༌ གྱལ༌ས༌ ཁྲིད༌ཏེ༌ ཁྱེརས༌ ཡང༌ ཆོད༌ཁང༌ངི༌ གོ༌ལིང༌ང༌ ཁྱེར༌ཏེ༌ ཟེརས༌, “ཀལ༌ཏེས༌ ཉེ༌རང༌ དཀོན༌མཆོག༌གི༌ སྲས༌ ཨིན༌ན༌ འི༌ཀ༌ནེ༌ ཐུར༌ལ༌ ལྕེབ༌བའང༌
LUK 4:10 ཅིའ༌ཟེར༌ན༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ དུག༌, ‘ཁྱོ༌རང༌ སྐྱོབ༌ཅེས༌ལ༌ དཀོན༌མཆོག༌གི༌ ཕོ༌ཉ༌གུན༌ལ༌ བཀའ༌ སལ༌ཨིན༌,
LUK 4:11 ཁྱོ༌རང༌ངི༌ རྐང༌པའང༌ རྡོའེ༌ཀ༌ ཕོག༌ མི༌ཅུག༌ཅེས༌སི༌ ཕིའ༌ ཕོ༌ཉ༌གུན༌ནི༌ ལག༌པ༌ རྐྱངས༌ཏེ༌ ཁྱོ༌རང༌ ཟུམ༌མ༌ ཛད༌ཨིན༌།’”
LUK 4:12 ཡེ༌ཤུའི༌ ཁོའ༌ ལན༌སལས༌, “ཏམ༌པའེ༌ སུང༌རབས༌སི༌ ནང༌ང༌ འི༌བོའང༌ མོལ༌དུག༌, ‘གཙོ༌བོ༌ ཁྱོ༌ཞ༌རང༌ངི༌ དཀོན༌མཆོག༌ག༌ ཚོད༌ མ༌ལྟའ༌།’”
LUK 4:13 རྡུད༌གུན༌ནི༌ གོ༌བའེ༌ ཡེ༌ཤུའ༌ ཚོད༌ལྟའ༌ ཚར༌ར༌ཅིག༌ ཁོའ༌ ཡང༌སྐབས༌ ཐོབ༌ཐོབ༌ ཚག༌པ༌ ཁོང༌ནེ༌ བེ༌ཏེ༌ སོང༌།
LUK 4:14 ཏེ༌ནེ༌ གཙོ༌བོ༌ ཡེ༌ཤུ༌ ཏམ༌པའེ༌ ཐུག༌ཉིད༌དི༌ སྟོབས༌སི༌ གངས༌ཏེ༌, གཱ༌ལིལ༌ལིའི༌ ཡུལ༌ཇོངས༌ལ༌ ལོགས༌ཏེ༌ སྐྱོདས༌ ཡང༌ ཁོང༌ངི༌ སྐོར༌ལ༌ ནས༌ཚུལ༌ ཡུལ༌ཇོངས༌ གང༌པོའེ༌ ནང༌ང༌ ཕེལ༌།
LUK 4:15 ཁོང༌ངི༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ཅེས༌ གོ༌ཟུག༌ ཛདས༌ ཡང༌ ཚང༌མའེ༌ ཁོང༌ངའ༌ སྟོད༌པ༌ ཕུལས༌།
LUK 4:16 ཡེ༌ཤུ༌ ན༌ཙ༌རེད༌དི༌ གྲོང༌ཁྱེར༌ལ༌ སྐྱོདས༌ ཀ༌རུ༌ ཁོང༌ ལྡན༌ཏེ༌ ཨིན༌པིན༌ ཡང༌ ཁོང༌རང༌ངི༌ ལོབས༌ ནང༌ཞིན༌ ཤབ༌བད༌ ངལ༌ཚོའེ༌ ཞག༌ག༌ དུ༌ཁང༌ངི༌ ནང༌ང༌ སྐྱོདས༌, ཡང༌ ཏམ༌པའེ༌ སུང༌རབས༌སི༌ ནང༌ནེ༌ སིལ༌ལ༌ ཛད༌ཅེས༌ལ༌ ཞངས༌།
LUK 4:17 ཡེ༌ཤ༌ཡཱའེ༌ ལུང༌སྟོན༌པའེ༌ བྲིས༌ཁན༌ནི༌ སྤེ༌ཆ༌ ཁོང༌ངི༌ ལག༌ག༌ ཏངས༌ ཡང༌ སྤེ༌ཆ༌ ཕེས༌ཏེ༌ ཙལ༌ལ༌ ཛད༌ཁན༌བོ༌ ཐོབ༌, ཏེ༌བོ༌ ནི༌,
LUK 4:18 “གཙོ༌བོ༌ དཀོན༌མཆོག༌གི༌ ཐུག༌ཉིད༌ ངའེ༌ཀ༌ ནས༌, ཅིའ༌ཟེར༌ན༌ ཁོང༌ངི༌ ང༌ ཉམ༌ཤུང༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌ལ༌ སྐོའ༌ ཛདས༌། ཙོན༌པ༌གུན༌ལ༌ ཐར༌པ༌ ཐོབ༌ཅེས༌, ཞ༌ར༌གུན༌ལ༌ ཐོང༌ཅེས༌, རྡུག༌ངལ༌ལི༌ ནང༌ང༌ ཡོད༌ཁན༌གུན༌ ཕུད༌ཅེས༌ ཡང༌ གཙོ༌བོ༌ དཀོན༌མཆོག༌གི༌ ཁོང༌རང༌ངི༌ མི༌གུན༌ནི༌ཀ༌ ཐུག༌རྗེ༌ ཛད༌ཅེས༌སི༌ ཏུས༌ ལེབ༌ཁན༌བོ༌ ཁྱབ༌གྲགས༌ ཅོ༌ཅེས༌ལ༌ ཁོང༌ངི༌ ང༌ ཀལ༌ལ༌ ཛདས༌། ”
LUK 4:20 ཁོང༌ངི༌ སྤེ༌ཆ༌ སིལ༌ ཚར༌ར༌ཅིག༌, སྲིལ༌ཏེ༌ དུ༌ཁང༌ངི༌ རོགས༌ ཅོ༌ཁན༌བོའ༌ སལ༌ཏེ༌ སའེ༌ཀ༌ ཞུགས༌། དུ༌ཁང༌ངི༌ ནང༌ང༌ ཛོམས༌ཏེ༌ ཡོད༌ཁན༌ ཚང༌མའེ༌ ཁོང༌ང༌ ལྟས༌ཏེ༌ དུགས༌།
LUK 4:21 ཁོང༌ངི༌ ཁོང༌གུན༌ལ༌ མོལས༌, “ཏམ༌པའེ༌ སུང༌རབས༌སི༌ ནང༌ནེ༌ དག༌ས༌ ཁྱོ༌ཞའེ༌ ཚོར༌ཁན༌གུན༌, དི༌རིང༌ དྲན༌དྲ༌ གྲུབ༌ཏེ༌ ཨིན༌ནོག༌།”
LUK 4:22 ཚང༌མའེ༌ ཁོང༌ང༌ སྟོད༌པ༌ ཏངས༌ ཡང༌ ཁོང༌ངི༌ ཁས༌པ༌ དང༌ ལག༌མོ༌ ཞལ༌ཏ༌གུན༌ ཚོར༌ཏེ༌ ཚང༌མ༌ ཧ༌ལས༌ ཡང༌ ཟེརས༌, “ཁོ༌ ཡོ༌སེབ༌བི༌ བུ༌ཚའ༌ མ༌ནོག༌ག༌?”
LUK 4:23 ཡེ༌ཤུའི༌ ཁོང༌གུན༌ལ༌ མོལས༌, “ཏན༌ཏན༌ལ༌ ཁྱོ༌ཞའེ༌ འི༌ ཏམ༌སྤེ༌བོ༌ ངའ༌ ཟེར༌ཨིན༌, ‘ཨམ༌ཆི༌ རང༌ ཕན༌ཅུག༌གའང༌, ཀ༌ཕར༌ན༌ཧུམ༌མི༌ གྲོང༌ཁྱེར༌རི༌ ནང༌ང༌ ཅོ༌ཁན༌ནི༌ ལས༌ ང༌ཞའེ༌ ཚོར༌ཁན༌གུན༌ ཙོགས༌ རང༌ངི༌ ཡུལ༌ལི༌ ནང༌ང༌ ཅོས༌སའང༌།’
LUK 4:24 ངའེ༌ ཁྱོ༌ཞའ༌ དེན༌བ༌ ཟེར༌རད༌, ལུང༌སྟོན༌པ༌ཞིག༌ག༌ ཁོ༌རང༌ངི༌ གྲོང༌ཁྱེར༌རི༌ ནང༌ང༌ རྩི༌ཝ༌ མི༌ཐོབ༌།”
LUK 4:25 “ལུང༌སྟོན༌པ༌ ཨེ༌ལི༌ཡཱའེ༌ ཏུས༌ལ༌ ལོ༌ སུམ༌ནང༌ཕད༌ ཆར༌པ༌ མ༌བབས༌ས༌ ཡུལ༌ གང༌པོའེ༌ ནང༌ང༌ མུ༌གེ༌ ཀྲག༌པོ༌ ཇུང༌ངི༌ ཏུས༌ལ༌ ཨིས༌ར༌ཨེལ༌ལི༌ ཡུལ༌ལི༌ ནང༌ང༌ ཨ༌ནེ༌མ༌རང༌མོ༌ མང༌པོ༌ ཡོད༌ཁན༌བོ༌ ཏན༌ཏན༌ ཨིན༌ནོག༌།
LUK 4:26 ཨིན༌ནའང༌ དཀོན༌མཆོག༌གི༌ ལུང༌སྟོན༌པ༌ ཨེ༌ལི༌ཡཱ༌ ཁོང༌ སུ༌ཞིག༌གི༌ཀའང༌ ཀལ༌ལ༌ མ༌ཛད༌ད༌, ཡ༌ཧུ༌དཱ༌པ༌ མན༌ཁན༌ སི༌དོན༌ ཡུལ༌ཇོངས༌སི༌ ཟ༌རེ༌པད༌ ཡུལ༌ལི༌ ནང༌ང༌ དུག༌ཁན༌ནི༌ ཨ༌ནེ༌མ༌རང༌མོ༌བོའེ༌ཀ༌ ཀལ༌ལ༌ ཛདས༌།
LUK 4:27 ཡང༌ ལུང༌སྟོན༌པ༌ ཨེ༌ལི༌ཤའེ༌ ཏུས༌ལའང༌ ཨིས༌ར༌ཨེལ༌ལི༌ ནང༌ང༌ ཛེ༌ནད༌ཅན༌ནི༌ མི༌ མང༌པོ༌ ཡོད༌ཁན༌ནི༌ ཕྲོ༌ནེ༌ ཅིག༌གའང༌ ཕན༌ཅུག༌ག༌ མ༌ཛད༌ད༌ སི༌རི༌ཡཱ༌པ༌ ནཱའ༌མན༌ ཅིག༌པོ༌ ཕན༌ཅུག༌ག༌ ཛད༌ཏེ༌ རྩང༌མ༌ ཛདས༌།”
LUK 4:28 ཏེ༌བོ༌ ཚོར༌ཏེ༌ དུ༌ཁང༌ངི༌ ནང༌ང༌ ཡོད༌ཁན༌ ཚང༌མ༌ལ༌ སྲོ༌ སྲན༌ཏྲེ༌ ཡོངས༌།
LUK 4:29 ཁོང༌གུན༌ ལངས༌ཏེ༌ ཡེ༌ཤུ༌ གྲོང༌ཁྱེར༌ནེ༌ ཕིངས༌ཏེ༌ གྲོང༌ཁྱེར༌བོ༌ ཚུགས༌ཏེ༌ ཡོད༌ཁན༌ནི༌ རི༌ ཟུར༌ནེ༌ ཕང༌ཅེས༌ལ༌ ཁོང༌ ཁྱེརས༌།
LUK 4:30 ཨིན༌ནའང༌ ཁོང༌ ཁོང༌གུན༌ནི༌ ཕྲོ༌ནེ༌ བིང༌ཏེ༌ སྐྱོདས༌།
LUK 4:31 ཏེ༌ནེ༌ གཙོ༌བོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌སི༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོདས༌ ཡང༌ ཤབ༌བད༌དི༌ ངལ༌ཚོའེ༌ ཞག༌ག༌ མི༌མངས༌ལ༌ ལབ༌ཞ༌ སལ༌ཅེས༌ གོ༌ཟུགས༌།
LUK 4:32 ཁོང༌གུན༌ ཡེ༌ཤུའི༌ ལབ༌ཞ༌གུན༌ནི༌ཀ༌ ཧ༌ལས༌, ཅིའ༌ཟེར༌ན༌ ཁོང༌ངི༌ ཝང༌ཆ༌ ཉམ༌པོ༌ མོལ༌ལ༌ ཛད༌དད༌པིན༌།
LUK 4:33 དུ༌ཁང༌ངི༌ ནང༌ང༌ རྡུད༌ ཞུགས༌ཁན༌ནི༌ མི༌ཞིག༌ ཡོད༌པིན༌། ཁོའེ༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཟེརས༌,
LUK 4:34 “ན༌ཙ༌རེད༌པ༌ ཡེ༌ཤུ༌, ཉེ༌རང༌ང༌ ང༌ཞ༌གུན༌ནི༌ ཀ༌ནེ༌ ཅི༌ གོས༌སད༌? ཉེ༌རང༌ ང༌ཞ༌གུན༌ མེད༌ཁན༌ ཅོའ༌ལ༌ སྐྱོད༌ཏེ༌ ཨིན༌ན༌? ཉེ༌རང༌ སུ༌ ཞུགས༌ཏེ༌ ཨིན༌ཁན༌བོ༌ ངའ༌ གྱུས༌ཡོད༌། ཉེ༌རང༌ དཀོན༌མཆོག༌གི༌ ཏམ༌པ༌བོ༌ ཞུགས༌ཏེ༌ ཨིན༌ནོག༌།”
LUK 4:35 ཡེ༌ཤུའི༌ ཁོའ༌ ཁའ༌སྐྱེའ༌ ཛད༌ཏེ༌ མོལས༌, “ཅུབ༌ཅོད༌ ཁོའེ༌ ནང༌ནེ༌ བིང༌ཏེ༌ ཡོང༌།” ཏེན༌ན༌མལ༌ལ༌ རྡུད༌པོའེ༌ མི༌གུན༌ནི༌ དུན༌ལ༌ ཏེ༌ མི༌བོ༌ ས༌ རྡབས༌ཏེ༌ ནོད༌པ༌ མ༌སྐྱལ༌ལ༌ ཁོའེ༌ ནང༌ནེ༌ བིང༌ཏེ༌ སོང༌།
LUK 4:36 མི༌ཚང༌མ༌ ཧ༌ལས༌ཏེ༌ ཅིག༌ དང༌ ཅིག༌ག༌ ཟེརས༌, “འི༌ མི༌བོའེ༌ ཙམ༌ཤིག༌གི༌ ཁྱུད༌ དང༌ ཝང༌ཆའ༌ ཉམ༌པོ༌ ཟེར༌དུག༌, ཁོའེ༌ བཀའ༌ ཏང༌ཁན༌བོའ༌ རྡུད༌གུན༌ནིའང༌ ཁའ༌ ཉན༌ཏེ༌ བིང༌ཏེ༌ ཡོང༌དུག༌།”
LUK 4:37 ཡང༌ ཁོང༌ངི༌ སྐོར༌ལ༌ ནས༌ཚུལ༌བོ༌ ཡུལ༌ཇོངས༌ གང༌པོའ༌ ཕེལ༌།
LUK 4:38 གཙོ༌བོ༌ ཡེ༌ཤུ༌ དུ༌ཁང༌ནེ༌ བིང༌ཏེ༌ ཤི༌མོན༌ པི༌ཏྲར༌རི༌ ཁང༌པ༌ སྐྱོདས༌། ཤི༌མོན༌ནི༌ ན༌མའེ༌ ཨ༌མ༌ ཚད༌ སྲན༌ཏྲེ༌ ཡོངས༌ཏེ༌ ཡོད༌པིན༌ ཡང༌ ཁོང༌གུན༌ནི༌ ཡེ༌ཤུའ༌ ཁོའ༌ རོགས༌ ཛད༌ཅེས༌ལ༌ ཞུས༌པ༌
LUK 4:39 ཁོང༌ ཁོའེ༌ མལ༌ཙའེ༌ དུན༌ལ༌ ཞངས༌ཏེ༌ ཚད༌པོའ༌ ཁའ༌སྐྱེའ༌ཅིག༌ ཚད༌པོ༌ མེད༌ཁན༌ སོང༌, ཏེན༌ན༌མལ༌ལ༌ ཁོ༌ ལངས༌ཏེ༌ ཁོང༌གུན༌ལ༌ ཞབས༌ཏོག༌ ཞུས༌།
LUK 4:40 ཉི༌མ༌ ནུབ༌ཨིན༌ ཡོད༌ ཟ༌ནེ༌ མི༌གུན༌ནི༌ ཟུ༌མོ༌ སྣ༌ཚོགས༌ ཡོད༌ཁན༌ ཚང༌མ༌ ཡེ༌ཤུ༌ ཡོད༌ས༌ ཁྱོངས༌, ཡང༌ ཁོང༌ངི༌ རེ༌རེ༌ཀ༌ ཆག༌ བོར༌ར༌ ཛད༌ཏེ༌, ཁོང༌གུན༌ གྱལ༌ཅུག༌ག༌ ཛདས༌།
LUK 4:41 ཁོང༌ མང༌པོའེ༌ ནང༌ནེ༌ རྡུད༌གུན༌ བིངས༌ཏེ༌ ཡོང༌ ཟ༌ནེ༌ ཀུ༌ཅོ༌ ཏང༌ཨིན༌ ཟེརས༌, “ཉེ༌རང༌ དཀོན༌མཆོག༌གི༌ སྲས༌ ཨིན༌ནོག༌།” ཨིན༌ནའང༌ ཡེ༌ཤུའི༌ ཏེ༌གུན༌ལ༌ ཁའ༌སྐྱེས༌ཏེ༌ སྤེ༌ར༌ ཟེར༌ མ༌ཅུགས༌ ཅིའ༌ཟེར༌ན༌ ཏེ༌གུན༌ནི༌ ཁོང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ ཤེས༌སད༌པིན༌།
LUK 4:42 ནམ༌ལངས༌ས༌ཅིག༌ ཡེ༌ཤུ༌ ཡང༌སུའང༌ མེད༌སའེ༌ ནས༌ས༌ཞིག༌ག༌ སྐྱོདས༌། མི༌ཚོགས༌སི༌ ཁོང༌ ཙལ༌ལད༌པིན༌ ཡང༌ ཁོང༌ ཐོབ༌བ༌ཅིག༌ ཁོང༌གུན༌ནི༌ ཡེ༌ཤུའ༌ ཇུ༌ཇུ༌ ཞུ༌ཨིན༌ ཁོང༌གུན༌ བོར༌ཏེ༌ མི༌སྐྱོད༌ཅེས༌ལ༌ ཟེརས༌།
LUK 4:43 ཁོང༌ངི༌ ཁོང༌གུན༌ལ༌ མོལས༌, “ངའ༌ ཞན༌ གྲོང༌ཁྱེར༌གུན༌ནི༌ ནང༌ངའང༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌གོས༌། ཏེན༌ན༌ གྱུན༌ཚན༌བོའེ༌ ཕིའ༌ དཀོན༌མཆོག༌གི༌ ང༌ ཀལ༌ལ༌ ཛད༌ཏེ༌ ཨིན༌།”
LUK 4:44 ཏེ༌ནེ༌ ཁོང༌ངི༌ ཡ༌ཧུ༌དཱའེ༌ ཡུལ༌ཇོངས༌ གང༌པོའེ༌ ནང༌ང༌ སྐྱོད༌ཏེ༌ དུ༌ཁང༌གུན༌ནི༌ ནང༌ང༌ ལབ༌ཞ༌ སལ༌ལད༌པིན༌།
LUK 5:1 ཞག༌ཤིག༌ གཙོ༌བོ༌ ཡེ༌ཤུ༌ གེ༌ནེ༌ས༌རེད༌ ཚོའེ༌ ཐའ༌མ༌ ཞངས༌ཏེ༌ ཡོད༌ཏུས༌, དཀོན༌མཆོག༌གི༌ བཀའ༌ ཉན༌ཅེས༌ལ༌ ཁོང༌ང༌ མི༌ཚོགས༌ ཆེན༌མོ༌ཞིག༌གི༌ སྐོར༌ཏེ༌ ནན༌ཨིན༌ ཁྱོང༌ངད༌པིན༌།
LUK 5:2 ཁོང༌ངི༌ གྲུ༌ཟིང༌ ཉིས༌ ཚོའེ༌ ཐའ༌མ༌ བོར༌ཏེ༌ ཟིགས༌, ཉ༌པ༌གུན༌ ཏེ༌ནང༌ནེ༌ བིངས༌ཏེ༌ ཉ༌དོལ༌གུན༌ ཁྲུ༌འད༌པིན༌།
LUK 5:3 ཤི༌མོན༌ པི༌ཏྲར༌རི༌ ཨིན༌ཁན༌ནི༌ གྲུ༌ཟིང༌བོའེ༌ ནང༌ང༌ སྐྱོད༌ཏེ༌ ཡེ༌ཤུའི༌ ཁོའ༌ གྲུ༌ཟིང༌བོ༌ ཐའ༌མ༌ནེ༌ ཙ༌པིག༌ ཆུའི༌ ནང༌ང༌ ཁྱེར༌ཅེས༌ལ༌ མོལས༌ ཡང༌ གྲུ༌ཟིང༌ངི༌ཀ༌ ཞུགས༌ཏེ༌ མི༌ཚོགས༌ལ༌ ལབ༌ཞ༌ སལས༌།
LUK 5:4 ལབ༌ཞ༌ སལ༌ ཚར༌ར༌ཅིག༌ ཁོང༌ངི༌ ཤི༌མོན༌ལ༌ མོལས༌, “ཆུ༌ ཀོན༌དྲོ༌ ཡོད༌ས༌ གྲུ༌ཟིང༌ ཁྱེར༌ཏེ༌ ཉ༌ ཟུམ༌ཅེས༌ལ༌ ཉ༌དོལ༌བོ༌ ཕོང༌།”
LUK 5:5 ཤི༌མོན༌ནི༌ ཁོང༌ང༌ ཟེརས༌, “སྤོན༌བོ༌ལེ༌, ང༌ཞའེ༌ ཚན༌ གང༌པོ༌ རྩོན༌གྲུས༌ སྲན༌ཏྲེ༌ ཅོས༌ཏེའང༌ ཉ༌ ཅིག༌གའང༌ མ༌ཁད༌། ཨིན༌ནའང༌ ཉེ༌རང༌ངི༌ མོལ༌ པ༌སང༌ ངའེ༌ ཉ༌དོལ༌ ཕང༌ཨིན༌།”
LUK 5:6 ཡང༌ ཁོང༌གུན༌ནི༌ ཏེ༌ཟུག༌ ཅོའ༌ཅིག༌, ཉ༌ མ༌མང༌པོ༌ ཁད༌ཏེ༌ ཁོང༌གུན༌ནི༌ ཉ༌དོལ༌ ཆད༌ཀྱིས༌ སོང༌།
LUK 5:7 ཞན༌ གྲུ༌ཟིང༌ངི༌ ནང༌ང༌ ཡོད༌ཁན༌ ཕྲོ༌པ༌གུན༌ལ༌ ལག༌པ༌ ཡུགས༌ཏེ༌ རོགས༌ ཅོའ༌ལ༌ ཡོང༌ ཟེརས༌། ཁོང༌གུན༌ ཡོངས༌ཏེ༌ གྲུ༌ཟིང༌ ཉིས༌ཀོ༌ ཆུའི༌ ནང༌ང༌ ནུབ༌ཀྱིས༌ ཆ༌ཆ༌ ཚོག༌པ༌ ཉའེ༌ སྐངས༌།
LUK 5:8 ཏེ༌བོ༌ ཐོང༌ང༌ཅིག༌ ཤི༌མོན༌ པི༌ཏྲར༌ ཡེ༌ཤུའི༌ དུན༌ལ༌ གྱེལ༌ཏེ༌ ཟེརས༌, “གཙོ༌བོ༌, ང༌ནེ༌ ཐག༌རིང༌ང༌ སྐྱོད༌ ང༌ སྡིག༌ཅན༌ཞིག༌ ཨིན༌།”
LUK 5:9 ཅིའ༌ཟེར༌ན༌ ཁོ༌ དང༌ ཁོའེ༌ ཕྲོ༌པ༌གུན༌ ཉ༌ ཁད༌ཁན༌ནི༌ ཛད༌པ༌བོ༌ ཐོང༌ཏེ༌ མ༌ ཧ༌ལས༌
LUK 5:10 ཡང༌ ཤི༌མོན༌ནི༌ ཚོང༌པ༌ ཕྲོ༌པ༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ནའང༌ ཧ༌ལས༌། ཡེ༌ཤུའི༌ ཤི༌མོན༌ལ༌ མོལས༌, “མ༌ཇིགས༌ཤིག༌, ཏ༌ནེ༌ཕར༌ལ༌ ཁྱོ༌ཞའེ༌ ཉའེ༌ ཚབས༌ལ༌ མི༌གུན༌ ཟུམ༌ཡིན༌།”
LUK 5:11 ཏེ༌ནེ༌ ཁོང༌གུན༌ནི༌ གྲུ༌ཟིང༌གུན༌ ཐའ༌མ༌ ཁྱོངས༌ ཡང༌ ཅི༌ཚང༌མ༌ ཕངས༌ཏེ༌ ཡེ༌ཤུའི༌ གྱབ༌ནེ༌ བྲངས༌།
LUK 5:12 གཙོ༌བོ༌ ཡེ༌ཤུ༌ གྲོང༌ཁྱེར༌ཞིག༌གི༌ ནང༌ང༌ ཡོད༌ཏུས༌ ཏེ༌རུ༌ ཟུགས༌པོ༌ གང༌པོའ༌ ཛེ༌ནད༌ ཡོད༌ཁན༌ནི༌ མི༌ཞིག༌ ཡོད༌པིན༌། ཁོའེ༌ ཡེ༌ཤུ༌ ཇལ༌ལ༌ཅིག༌, སའེ༌ཀ༌ གྱེལ༌ཏེ༌ ཇུ༌ཇུ༌ ཞུ༌ཨིན༌ ཟེརས༌, “གཙོ༌བོ༌ལེ༌, ཉེ༌རང༌ ཐུགས༌ཐད༌ན༌ ང༌ གྱལ༌ཅུགས༌ཏེ༌ རྩང༌མ༌ ཛད༌ ཉན༌ན༌ནོག༌།”
LUK 5:13 ཡེ༌ཤུའི༌ ཆག༌ རྐྱངས༌ཏེ༌ ཁོའ༌ ཐུག༌ཅུག༌ག༌ ཛད༌ཏེ༌ མོལས༌, “ང༌ ཁྱོ༌རང༌ གྱལ༌ ཅུག༌ཏེ༌ རྩང༌མ༌ ཅོའ༌ ཐད༌ད༌རག༌།” ཏེན༌ན༌མལ༌ལ༌ ཛེ༌ནད༌པོ༌ མེད༌ཁན༌ སོང༌།
LUK 5:14 ཏེ༌ནེ༌ ཁོང༌ངི༌ ཁོའ༌ བཀའ༌ སལས༌, “སུའང༌ མ༌ཤད༌, ཨིན༌ནའང༌ སོང༌ཏེ༌ རང༌ངི༌ ཟུགས༌པོ༌ བླ༌མ༌ སྟོན༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ སལ༌ཁན༌ ནང༌ཞིན༌ དཀོན༌མཆོག༌ག༌ ཆོད༌པ༌ ཕུལ༌, ཏེ༌བོ༌ མི༌གུན༌ལ༌ ཁྱོ༌རང༌ རྩང༌མ༌ ཆའ༌ཁན༌ནི༌ སྤང༌པོ༌ ཨིན༌།”
LUK 5:15 ཨིན༌ནའང༌ ཁོང༌ངི༌ སྐོར༌ལ༌ ནས༌ཚུལ༌བོ༌ མང༌ང༌ ཕེལ༌། ཏེ༌བོའེ༌ ཞས༌ཏེ༌ མི༌ཚོགས༌གུན༌ ཁོང༌ང༌ ཉན༌ཅེས༌ དང༌ ནད༌ནེ༌ ཕན༌ཅེས༌ལ༌ ཁོང༌ ཡོད༌ས༌ ཡོངས༌།
LUK 5:16 ཨིན༌ནའང༌ ཡེ༌ཤུ༌ ཡང༌ནེ༌ ཡང༌ མོས༌ལམ༌ ཞུའ༌ལ༌ སུའང༌ མེད༌སའེ༌ ནས༌ས༌ སྐྱོད༌དད༌པིན༌།
LUK 5:17 ཞག༌ཤིག༌ གཙོ༌བོ༌ ཡེ༌ཤུའི༌ ལབ༌ཞ༌ སལ༌ལ༌ ཛད༌ ཟ༌ནེ༌ གཱ༌ལིལ༌ལི༌ དང༌ ཡ༌ཧུ༌དཱའེ༌ གམ༌ཡུལ༌ ཚང༌མ༌ དང༌ ཡེ༌རུ༌ཤ༌ལེམ༌ གྱལ༌ས༌ནེ༌ ཡོངས༌ཁན༌ནི༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ ཏེ༌རུ༌ སའེ༌ཀ༌ དུགས༌ཏེ༌ ཡོད༌པིན༌, ཡང༌ ཕན༌ཅུག༌ཅེས༌སི༌ དཀོན༌མཆོག༌གི༌ སྟོབས༌ ཡེ༌ཤུ༌ ཉམ༌པོ༌ ཡོད༌པིན༌།
LUK 5:18 ཏེ༌ནེ༌ མི༌ ཁ༌ཅིག༌གི༌ ཟའ༌ཕོག༌ཁན༌ཞིག༌ མལ༌ཙའེ༌ཀ༌ ཁུར༌ཏེ༌ ཁྱོངས༌ ཡང༌ ཁང༌པའེ༌ ནང༌ང༌ ཡེ༌ཤུ༌ ཡོད༌ས༌ ཁྱེར༌ཅེས༌སི༌ རྩོན༌གྲུས༌ ཅོས༌།
LUK 5:19 མི༌ཚོགས༌སི༌ ཞས༌ཏེ༌ ཁོང༌གུན༌ལ༌ ཁོ༌ ནང༌ཀུག༌ག༌ ཁྱེར༌ མ༌ཉན༌། ཁོང༌གུན༌ ཁང༌པའེ༌ ཁེ༌ཐོག༌ག༌ སོང༌ཏེ༌ ཐོགས༌ས༌ ཀོགས༌ཏེ༌ མལ༌ཙའ༌ ཉམ༌པོ༌ ཁོ༌ མི༌ཚོགས༌སི༌ ཞུང༌ང༌ ཡེ༌ཤུའི༌ དུན༌ལ༌ ཕབས༌།
LUK 5:20 ཁོང༌གུན༌ནི༌ མི༌བོ༌ གྱལ༌ཅུག༌ཅེས༌སི༌ ཏད༌པ༌ ཅོ༌ཁན༌བོ༌ ཡེ༌ཤུའི༌ ཟིགས༌ཏེ༌ ཁོང༌ངི༌ ཟའ༌ཕོག༌ཁན༌བོའ༌ མོལས༌, “ཛ༌འོ༌, ངའེ༌ ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏང༌ངད༌།”
LUK 5:21 ཏེ༌ནེ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ནི༌ སེམས༌སི༌ ནང༌ང༌ སམས༌, “དད༌ལོག༌ ཞུ༌ཁན༌ནི༌ འི༌ མི༌བོ༌ སུ༌ ཨིན༌ནོག༌། དཀོན༌མཆོག༌ མ༌སྟོག༌ སུའ༌ སྡིག༌པ༌ ཤགས༌པ༌ སལ༌ ཉན༌ཨིན༌།”
LUK 5:22 ཁོང༌གུན༌ནི༌ སམ༌ཁན༌བོ༌ ཡེ༌ཤུའི༌ ཁྱེན༌ཏེ༌ ཏྲིའ༌ ཛདས༌, “ཁྱོ༌ཞའེ༌ ཁྱོ༌ཞ༌རང༌ངི༌ སེམས༌སི༌ ནང༌ང༌ འི༌ཟུག༌ ཅིའ༌ སམ༌མད༌?
LUK 5:23 ཅི༌ སམ༌མ༌རག༌, ‘ཁྱོ༌རང༌ངི༌ སྡིག༌པའ༌ ཤགས༌པ༌ ཏངས༌ཏེ༌ ཨིན༌’ ཟེར༌ཅེས༌པོ༌ ལ༌མོ༌ ཨིན༌ནོག༌ག༌ ཡ༌ ‘ལངས༌ཏེ༌ གྲུལ༌’ ཟེར༌ཅེས༌པོ༌?
LUK 5:24 ཨིན༌ནའང༌ མི༌རིགས༌སི༌བུའ༌ ཇིག༌རྟེན༌ནི༌ཀ༌ སྡིག༌པའ༌ ཤགས༌པ༌ ཏང༌ཅེས༌སི༌ ཝང༌ཆའ༌ ཡོད༌ཁན༌བོ༌ ངའེ༌ ཁྱོ༌ཞའ༌ སྟན༌ཨིན༌།” ཏེ༌ནེ༌ ཡེ༌ཤུའི༌ ཟའ༌ཕོག༌ཁན༌བོའ༌ མོལས༌, “ངའེ༌ ཁྱོ༌རང༌ ཟེར༌རད༌, ལོངས༌, རང༌ངི༌ མལ༌ཙ༌ ཁུར༌ཏེ༌ ཁང༌པ༌ སོང༌།”
LUK 5:25 ཏེན༌ན༌མལ༌ལ༌ ཁོང༌གུན༌ནི༌ དུན༌ལ༌ ཁོ༌ ལངས༌ཏེ༌ ཁོ༌རང༌ ཉལ༌ཁན༌ནི༌ མལ༌ཙ༌བོ༌ ཁུར༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཁང༌པ༌ སོང༌།
LUK 5:26 མི༌ཚང༌མ༌ ཧ༌ལས༌ཏེ༌ དཀོན༌མཆོག༌ག༌ སྟོད༌པ༌ ཕུལས༌, ཡང༌ རྩི༌ཝ༌ དང༌ ཇིགས༌སི༌ ནང༌ང༌ ཟེརས༌, “དི༌རིང༌ ང༌དང༌གུན༌ནི༌ ཧ༌ལས༌ཤེས༌སི༌ ཆག༌ལས༌ ཐོང༌།”
LUK 5:27 ཏེ༌ སྟིང༌ནེ༌ གཙོ༌བོ༌ ཡེ༌ཤུ༌ ཕི༌ལོག༌ག༌ སྐྱོདས༌ ཡང༌ ལི༌ཝི༌ ཟེར༌ཁན༌བོ༌ ཁྲལ༌ནེན༌སའེ༌ ནས༌སའེ༌ཀ༌ དུགས༌ཏེ༌ ཡོད༌ད༌ ཟིགས༌ ཡང༌ ཁོང༌ངི༌ ཁོའ༌ མོལས༌, “ངའེ༌ སྟིང༌རང༌ནེ༌ བྲོངས༌།”
LUK 5:28 ཁོ༌ ལངས༌ ཡང༌ ཅི༌ཚང༌མ༌ ཕངས༌ཏེ༌ ཡེ༌ཤུའི༌ སྟིང༌རང༌ནེ༌ བྲངས༌།
LUK 5:29 ཏེ༌ནེ༌ ལི༌ཝི༌ ཡེ༌ཤུའི༌ ཕིའ༌ ཁོ༌རང༌ངི༌ ཁང༌པ༌ གྲོན༌ ཆེན༌མོ༌ཞིག༌ ཏངས༌། ཁྲལ༌ལེན༌ཁན༌ དང༌ ཞན༌, མི༌ཚོགས༌ ཆེན༌མོ༌ཞིག༌གི༌ ཁོང༌གུན༌ ཉམ༌པོ༌ ཁར༌ཇི༌ ཟའད༌པིན༌།
LUK 5:30 ཨིན༌ནའང༌ ཕ༌རུ༌ཤི༌པ༌གུན༌ དང༌ ཏེན༌ན༌ སྡེ༌ ཆོས༌ཁྲིམས༌ལ༌ ཁས༌པ༌གུན༌ནི༌ ཡེ༌ཤུའི༌ ལོབ༌ཕྲུགས༌གུན༌ལ༌ སྐྱོན༌རྗོད༌ ཅོ༌ཨིན༌ ཟེརས༌, “ཁྱོ༌ཞའེ༌ ཁྲལ༌ལེན༌ཁན༌ དང༌ སྡིག༌ཅན༌ མི༌གུན༌ ཉམ༌པོ༌ ཅིའ༌ ཟའད༌ ཡང༌ ཐུང༌ངད༌?”
LUK 5:31 ཡེ༌ཤུའི༌ ཁོང༌གུན༌ལ༌ ལན༌སལས༌, “ཟུ༌མོ༌ ཡོང༌ཁན༌ཞིག༌ག༌ མ༌ནེ༌ ཁམ༌ཟང༌ མི༌ཞིག༌ག༌ ཨམ༌ཆི༌ གོས༌ས༌ མ༌ནོག༌།
LUK 5:32 ངའ༌ ཁྱོ༌ཞ༌ ཀྲང༌པོ༌ ཨིན༌ སམ༌ཁན༌གུན༌ལ༌ མན༌པ༌, སྡིག༌ཅན༌གུན༌ལ༌ གྱོད༌པ༌ ཅོ༌ཅེས༌ལ༌ བོད༌ད༌ ཡོངས༌པིན༌།”
LUK 5:33 ཏེ༌ནེ༌ ཁོང༌གུན༌ནི༌ ཡེ༌ཤུའ༌ ཟེརས༌, “ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཕ༌རུ༌ཤི༌པའེ༌ ལོབ༌ཕྲུགས༌གུན༌ ལན༌ མང༌པོ༌ ཉེ༌ནས༌ལ༌ དུགས༌ཏེ༌ མོས༌ལམ༌ ཞུ༌རུག༌, ཨིན༌ནའང༌ ཉེ༌རང༌ངི༌ ལོབ༌ཕྲུགས༌གུན༌ ཏུས༌གྱུན༌ ཟེན༌ ཐུང༌ཨིན༌ ཅིའ༌ དུག༌ག༌ནོག༌?”
LUK 5:34 ཡེ༌ཤུའི༌ ལན༌སལས༌, “བག༌སྟོན༌ནི༌ ནང༌ང༌ མག༌པ༌ ཉམ༌པོ༌ ཡོད༌ ཟ༌ནེ༌ ཁོའེ༌ གྲོན༌པོ༌གུན༌ ཉེ༌ནས༌ལ༌ དུག༌ཨིན༌ན༌? མི༌དུག༌།
LUK 5:35 ཨིན༌ནའང༌ ཏུས༌པོ༌ ལེབ༌ཨིན༌ ནམ༌ མག༌པ༌ གྲོན༌པོ༌གུན༌ནེ༌ ཕེས༌ཏེ༌ ཁྱེར༌ཨིན༌, ཏེ༌ནེ༌ ཁོང༌གུན༌ནི༌ རྡུག༌པོ༌ ཅོས༌ཏེ༌ ཉེ༌ནས༌ལ༌ དུག༌ཨིན༌།”
LUK 5:36 ཡེ༌ཤུའི༌ འི༌ རུངས༌པོ༌ ཤད༌ད༌ ཛདས༌, “སུ༌ཞིག༌གིའང༌ ཀོས༌ལག༌ སོ༌མ༌ ཅད༌ཏེ༌ སྙིང༌པའེ༌ཀ༌ ལྷན༌བ༌ ཏབ༌བ༌ མ༌ནོག༌, ཀལ༌ཏེས༌ ཏབ༌ན༌ ཀོས༌ལག༌ སོ༌མ༌བོ༌ ཆད༌ཨིན༌ ཡང༌ ལམ༌བ༌ སོ༌མ༌བོ༌ སྙིང༌པའེ༌ཀ༌ མི༌ཟོབས༌།”
LUK 5:37 “ཏེན༌ན༌ ཙོགས༌ལ༌ ཆང༌ སོ༌མ༌ པགས༌པའེ༌ སྐྱ༌པ༌ སྙིང༌པའེ༌ ནང༌ང༌ མི༌ལུག༌། ཀལ༌ཏེས༌ ལུག༌ན༌ ཆང༌བོའ༌ སྐྱུར༌ ལངས༌ཏེ༌ པགས༌པའེ༌ སྐྱ༌པ༌ བོས༌ཏེ༌ ཆད༌ཨིན༌, ཆང༌ བོ༌ཏེ༌ སྐྱ༌པའང༌ དོད༌མེད༌ ཆེན༌།
LUK 5:38 ཆང༌ སོ༌མ༌ སྐྱ༌པ༌ སོ༌མའེ༌ ནང༌ང༌ གྱང༌གོས༌།
LUK 5:39 ཡང༌ ཆང༌ སྙིང༌པ༌ ཐུངས༌ཏེ༌ སྟིང༌ནེ༌ སུ༌ཞིག༌གིའང༌ སོ༌མ༌ ཐུང༌ཨིན༌ གྲོའ༌ མ༌ནོག༌། ‘ཆང༌ སྙིང༌པ༌ བྲོད༌ཅན༌ རག༌’ ཟེར༌ཨིན༌།”
LUK 6:1 གཙོ༌བོ༌ ཡེ༌ཤུ༌ ཤབ༌བད༌དི༌ ངལ༌ཚོའེ༌ ཞག༌ག༌ ཞིང༌ གྱུད༌ཏེ༌ སྐྱོད༌ཨིན༌ ཡོད༌ ཟ༌ནེ༌, ཁོང༌ངི༌ ལོབ༌ཕྲུགས༌གུན༌ནི༌ ཞིང༌ངི༌ སྙེ༌མ༌ ཅད༌ཏེ༌ ལག༌པའེ༌ཀ༌ སྙེས༌ཏེ༌ ཟོས༌།
LUK 6:2 ཕ༌རུ༌ཤི༌པ༌ ཁ༌ཅིག༌གི༌ ཏྲིས༌, “ཁྱོ༌ཞ༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ལས༌ ཅོས༌ཏེ༌ ཅིའ༌ ཆོས༌ཁྲིམས༌ ཅག༌གད༌?”
LUK 6:3 ཡེ༌ཤུའི༌ ཁོང༌གུན༌ལ༌ ལན༌སལས༌, “དཱ༌བིད༌ དང༌ ཁོའེ༌ ཕྲོ༌པ༌གུན༌ སྟོགས༌ཏེ༌ ཡོད༌ ཟ༌ནེ༌ ཅི༌ ཅོས༌ ཏམ༌པའེ༌ སུང༌རབས༌སི༌ ནང༌ནེ༌ ཁྱོ༌ཞའེ༌ མ༌ནེ༌ མ༌སིལ༌པིན༌ན༌?
LUK 6:4 དཱ༌བིད༌ དཀོན༌མཆོག༌གི༌ ཀུར༌རི༌ ནང༌ང༌ ཆོད༌པ༌ ཕུལ༌སའེ༌ཀ༌ སོང༌ཏེ༌ ཏམ༌པའེ༌ ཏ༌གི༌ ཁུར༌ཏེ༌ ཟོས༌, ཏེ༌བོ༌ ཡ༌ཧུ༌དཱ༌པའེ༌ བླ༌མའ༌ མ༌ནེ༌ ཟའ༌ཆོག༌ག༌ མེད༌པིན༌, ཡང༌ ཁོའེ༌, ཕྲོ༌པ༌གུན༌ལའང༌ ཏངས༌།”
LUK 6:5 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “མི༌རིགས༌སི༌བུའ ཤབ༌བད༌དི༌ ངལ༌ཚོའེ༌ ཞག༌ག༌ ཅི༌ ཅོ༌ ཆོགས༌ ཡ༌ མི༌ཆོགས༌ ཟེར༌ཅེས༌སི༌ ཝང༌ཆ༌ ཡོད༌།”
LUK 6:6 ཞན༌ ཤབ༌བད༌དི༌ ཞག༌ཤིག༌ག༌ ཡེ༌ཤུ༌ དུ༌ཁང༌ང༌ སྐྱོད༌ཏེ༌ ལབ༌ཞ༌ སལས༌, ཏེ༌རུ༌ ལག༌པ༌ ཡས༌པ༌ ཁོངས༌ཏེ༌ ཀོལ༌ མ༌ཉན༌ཁན༌ནི༌ མི༌ཞིག༌ ཡོད༌པིན༌།
LUK 6:7 ཡེ༌ཤུའི༌ ཁོ༌ གྱལ༌ཅུག༌ན༌ ཤབ༌བད༌དི༌ ཞག༌ག༌ ལས༌ ཅོ༌ཅེས༌པོའ༌ སྐྱོན༌ ཀལ༌ཅེས༌ལ༌ ཆོས༌ཁྲིམས༌ལ༌ ཁས༌པ༌གུན༌ དང༌ ཕ༌རུ༌ཤི༌པ༌གུན༌ནི༌ ཁོང༌ང༌ གྱལ༌ལ༌ ཅོས༌ཏེ༌ སྟེན༌དུགས༌།
LUK 6:8 ཁོང༌གུན༌ནི༌ སམ༌བ༌བོ༌ ཁྱེན༌ཏེའང༌ ལག༌པ༌ ཁོངས༌ཁན༌ནི༌ མི༌བོའ༌ ཡེ༌ཤུའི༌ མོལས༌, “ཡོང༌ ཡང༌ ཚང༌མའེ༌ དུན༌ལ༌ ལོངས༌།” ཏེ༌ནེ༌ ཁོ༌ ཡོངས༌ཏེ༌ ལངས༌ཏེ༌ དུགས༌།
LUK 6:9 ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ ཏྲིའད༌, ཆོས༌ཁྲིམས༌ ནང༌ཞིན༌ ཤབ༌བད༌དི༌ ཞག༌ག༌ ལས༌ ཟང༌པོ༌ ཅོ༌ ཆོག༌ག༌ནོག༌ག༌ ཡ༌ ངན༌པ༌, སྲོག༌ སྐྱོབ༌ ཆོག༌ག༌ནོག༌ག༌ ཡ༌ སད༌?”
LUK 6:10 ཡེ༌ཤུའི༌ ཨུ༌ གྱུར༌ཨིན༌ ཁོང༌ རེ༌རེའ༌ ཟིགས༌, ཏེ༌ནེ༌ ལག༌པ༌ ཁོངས༌ཁན༌བོའ༌ མོལས༌, “ལག༌པ༌ རྐྱོང༌” ཡང༌ ཁོའེ༌ ལག༌པ༌ རྐྱངས༌པ༌ ཏེ༌བོ༌ སིང༌ གྱལ༌།
LUK 6:11 ཨིན༌ནའང༌ ཁོང༌གུན༌ལ༌ སྲོ༌ སྲན༌ཏྲེ༌ ཡོངས༌ཏེ༌ ཡེ༌ཤུ༌ ཉམ༌པོ༌ ཅི༌ ཅོ༌ཨིན༌ ཟེར༌ཏེ༌ ཁོ༌རང༌གུན༌ནི༌ ནང༌ང༌ གྲབས༌ ཅོ༌ཅེས༌ གོ༌ཟུག༌།
LUK 6:12 ཞག༌ཤིག༌ གཙོ༌བོ༌ ཡེ༌ཤུ༌ མོས༌ལམ༌ ཞུའ༌ལ༌ རི༌ཞིག༌གི༌ཀ༌ སྐྱོདས༌, ཡང༌ ཚན༌ གང༌པོ༌ དཀོན༌མཆོག༌ག༌ མོས༌ལམ༌ ཞུས༌།
LUK 6:13 ང༌ཏོག༌ ཆའ༌ཅིག༌ ལོབ༌ཕྲུགས༌གུན༌ བོད༌ད༌ ཛདས༌ ཡང༌ ཁོང༌གུན༌ནི༌ ཕྲོ༌ནེ༌ རྕུག༌ཉིས༌ ལྡམ༌མ༌ ཛད༌ཏེ༌ ཁོང༌གུན༌ སྐུ༌ཚབས༌ལ༌ སྐོའ༌ ཛདས༌།
LUK 6:14 སྐུ༌ཚབས༌ རྕུག༌ཉིས༌པོའེ༌ མིང༌གུན༌, ཤི༌མོན༌ ༼ཡེ༌ཤུའི༌ ཁོའེ༌ མིང༌ང༌ པི༌ཏྲར༌ ཏག༌ག༌ ཛདས༌༽, ཁོའེ༌ ནོ༌ ཨེན༌གྲིའུ༌, ཡ༌ཀོབ༌, ཡོ༌ཧཱ༌ནན༌, ཕི༌ལིབ༌, བར༌ཐོལ༌མཱ༌,
LUK 6:15 མད༌ཐཱ༌, ཐོ༌མཱས༌ དང༌ ཨལ༌ཕི༌འུས༌སི༌ བུ༌ཚ༌ ཡ༌ཀོབ༌, ཤི༌མོན༌ ༼ཁོའ༌ ཡུལ༌དད༌ཅན༌ ཟེར༌རད༌པིན༌༽,
LUK 6:16 ཡུ༌དཱ༌ ཡ༌ཀོབ༌བི༌ བུ༌ཚ༌ དང༌ ཡུ༌དཱ༌ ཀར༌ཡོད༌པ༌ ཀ༌བོའེ༌ གཙོ༌བོ༌ ཡེ༌ཤུའ༌ སྟིང༌ནེ༌ ངོ༌ལོག༌ ཅོས༌།
LUK 6:17 གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ རི༌ནེ༌ བབས༌ཏེ༌ ནས༌ས༌ ཉོམ༌ཤིག༌ ཕལ༌ཅན༌ཞིག༌གི༌ཀ༌ ཞུགས༌། ཏེ༌ཀ༌ ཁོང༌ངི༌ ལོབ༌ཕྲུགས༌ མང༌པོ༌ དང༌ ཡ༌ཧུ༌དཱ༌ ཡུལ༌ཇོངས༌, ཡེ༌རུ༌ཤ༌ལེམ༌ གྱལ༌ས༌ ཡང༌ གྱ༌ཚོའེ༌ ཐའ༌མ༌ ཡོད༌ཁན༌ནི༌ ཏཱ༌ཡིར༌ དང༌ སི༌དོན༌ གྱལ༌ས༌གུན༌ནེ༌ ཡོངས༌ཁན༌ནི༌ མི༌ཚོགས༌ ཆེན༌མོ༌ ཛོམ༌ཏེ༌ ཡོད༌པིན༌།
LUK 6:18 ཁོང༌གུན༌ ཡེ༌ཤུ༌ ཡོད༌ས༌ ཁོང༌ངི༌ ལབ༌ཞ༌ ཉན༌ཅེས༌ ཡང༌ ཁོང༌རང༌གུན༌ནི༌ ནད༌ གྱལ༌ཅུག༌ག༌ལ༌ ཡོངས༌, ཡང༌ གོང༌པོ༌ ཞུགས༌ཏེ༌ ཡོད༌ཁན༌གུན༌ནའང༌ ཡེ༌ཤུའི༌ ཕན༌ཅུག༌ག༌ ཛདས༌།
LUK 6:19 མི༌ཚང༌མའེ༌ ཡེ༌ཤུའ༌ ལག༌པ༌ ཐུག༌ཅེས༌སི༌ རྩོན༌གྲུས༌ ཅོའད༌པིན༌ ཅིའ༌ཟེར༌ན༌ ཁོང༌ངི༌ ནང༌ནེ༌ ཕན༌ཅུག༌ཅེས༌སི༌ སྟོབས༌ བིངས༌ཏེ༌ ནད༌པ༌ ཚང༌མ༌ གྱལ༌ཅུག༌ག༌ ཛདས༌།
LUK 6:20 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ལ༌ ཟིགས༌ཏེ༌ མོལས༌, “ཉལ༌བ༌ཅན༌ ཁྱོ༌ཞའ༌ ཅིན༌ལབས༌ཅན༌ ཨིན༌, ཅིའ༌ཟེར༌ན༌ ཁྱོ༌ཞའ༌ དཀོན༌མཆོག༌གི༌ གྱལ༌སྲིད༌ ནོར༌སྐལ༌ལ༌ ཐོབ༌ཨིན༌།
LUK 6:21 དག༌ས༌ སྟོགས༌ཁན༌གུན༌ ཁྱོ༌ཞའ༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁྱོ༌ཞ༌གུན༌ ཚིམ༌ཤུག༌ག༌ ཛད༌ཨིན༌། དག༌ས༌ ངུ༌ཁན༌གུན༌ ཁྱོ༌ཞའ༌ ཅིན༌ལབས༌ཅན༌ ཨིན༌ ཅིའ༌ཟེར༌ན༌ ཁྱོ༌ཞ༌གུན༌ གོད༌ཨིན༌།
LUK 6:22 མི༌རིགས༌སི༌བུའ༌ ཏད༌པ༌ ཅོ༌ཅེས༌པོའེ༌ མི༌གུན༌ནི༌ ནཕ༌རད༌ ཅོས༌ཏེ༌, ཁྲེལ༌ ཅུགས༌ཏེ༌ ཕྲོའ༌ མ༌སྲེའ༌ ངན༌པ༌ ཐེ༌ཁན༌གུན༌ ཁྱོ༌ཞའ༌ ཅིན༌ལབས༌ཅན༌ ཨིན༌།
LUK 6:23 ཏེ༌ཟུག༌ ཇུང༌ང༌ཅིག༌ ཐད༌པོ༌ ཅོས༌ཏེ༌ ཆོམས༌, ཅིའ༌ཟེར༌ན༌ ནམ༌ཁའེ༌ ནང༌ང༌ ཁྱོ༌ཞའ༌ སོལ༌རས༌ ཀྲག༌པོ༌ ཡོད༌། ཏེན༌ན༌ ཙོགས༌ ངན༌པ༌ ཁོང༌ངི༌ ཕ༌མེས༌པོ༌གུན༌ནིའང༌ དཀོན༌མཆོག༌གི༌ ལུང༌སྟོན༌པ༌གུན༌ ཉམ༌པོ༌ ཅོས༌པིན༌,
LUK 6:24 ཨིན༌ནའང༌ ཁྱོ༌ཞའ༌ ཆུག༌པོ༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌ ཁྱོ༌ཞ༌གུན༌ལ༌ སྐྱིད༌པོ༌ ཐོབ༌ ཚར༌ཏེ༌ ཨིན༌།
LUK 6:25 དག༌ས༌ གྲོད༌པ༌ གྲངས༌ཁན༌གུན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌ ཁྱོ༌ཞའ༌ སྟོག༌རི༌ སྲན༌ཏྲེ༌ ཐོང༌ཨིན༌། དག༌ས༌ གོད༌ཁན༌གུན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌, ཁྱོ༌ཞ༌གུན༌ལ༌ རྡུག༌པོ༌ དང༌ ངུ༌ཅེས༌ ཡོང༌ཨིན༌།
LUK 6:26 མི༌ཚང༌མའེ༌ སྟོད༌པ༌ ཏང༌ཁན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌ ཁོང༌གུན༌ནི༌ ཕ༌མེས༌པོ༌གུན༌ནིའང༌ ཟུས༌མའེ༌ ལུང༌སྟོན༌པ༌གུན༌ལ༌ སྟོད༌པ༌ ཏངས༌ཏེ༌ ཨིན༌པིན༌།”
LUK 6:27 “ཨིན༌ནའང༌ ངའེ༌ ཁྱོ༌ཞའ༌ ཉན༌ཁན༌གུན༌ལ༌ ཟེར༌རད༌, གྲ༌འོ༌གུན༌ལ༌ ཅམས༌པ༌ ཡང༌ ཁྱོ༌ཞའ༌ ནཕ༌རད༌ ཅོ༌ཁན༌གུན༌ལ༌ ཟང༌པོ༌ ཅོས༌,
LUK 6:28 ཁྱོ༌ཞའ༌ ངན༌ ཏབས༌ཁན༌གུན༌ལ༌ ཅིན༌ལབས༌ ཏོང༌ ཡང༌ ཁྱོ༌ཞའ༌ ངན༌པ༌ ཅོ༌ཁན༌གུན༌ནི༌ ཕིའ༌ མོས༌ལམ༌ ཏོབ༌།
LUK 6:29 ཀལ༌ཏེས༌ སུ༌ཞིག༌གི༌ ཁྱོ༌ཞའེ༌ གྲམ༌པ༌ ཡས༌པའ༌ གྲམ༌ལྕགས༌ ཏང༌ན༌, གྲམ༌པ༌ ཡོ༌མའང༌ གྲམ༌ལྕགས༌ ལེན༌ན༌ལ༌ སྟོན༌། ཀལ༌ཏེས༌ སུ༌ཞིག༌གི༌ ཁྱོ༌ཞའེ༌ ཀོས༌པོ༌ ཀོགས༌ཏེ༌ ཁྱེར༌ན༌ ཁོའ༌ ཀ༌མིས༌པོའང༌ ཁྱེར༌ཅེས༌ནེ༌ སྒག༌ མ༌སྒག༌།
LUK 6:30 ཏོང༌ ཟེར༌ཁན༌ ཚང༌མ༌ལ༌ ཏོང༌, ཡང༌ མི༌འོས༌པ༌ ཅོས༌ཏེ༌ ཁྱོ༌ཞའེ༌ ནོར༌ ཁྱེར༌ཁན༌བོའ༌ ལོགས༌ཏེ༌ ཁྱོང༌ མ༌ཟེར༌།
LUK 6:31 ཞན༌མའེ༌ ཁྱོ༌ཞའ༌ ཅོ༌གོས༌ སམ༌ཁན༌ ཙོགས༌ ཁྱོ༌ཞ༌གུན༌ནིའང༌ ཞན༌མ༌གུན༌ལ༌ ཅོས༌།”
LUK 6:32 “ཀལ༌ཏེས༌ ཁྱོ༌ཞའ༌ ཅམས༌པ༌ ཅོ༌ཁན༌གུན༌ལ༌ ཁྱོ༌ཞའེ༌ ཅམས༌པ༌ ཅོ༌ན༌, ཁྱོ༌ཞའ༌ ཅི༌ ཕན༌ཐོགས༌ ཐོབ༌ཨིན༌། སྡིག༌ཅན༌གུན༌ནིའང༌ ཁོང༌ང༌ ཅམས༌པ༌ ཅོ༌ཁན༌གུན༌ལ༌ ཅམས༌པ༌ ཅོའ༌ནོག༌།
LUK 6:33 ཡང༌ ཀལ༌ཏེས༌ ཁྱོ༌ཞའེ༌ ཁྱོ༌ཞའ༌ ཟང༌པོ༌ ཅོ༌ཁན༌གུན༌ལ༌ ཟང༌པོ༌ ཅོ༌ན༌ ཁྱོ༌ཞའ༌ ཅི༌ ཕན༌ཐོགས༌ ཐོབ༌ཨིན༌། མི༌ སྡིག༌ཅན༌གུན༌ནིའང༌ ཏེ༌ཟུག༌ ཅོའ༌ནོག༌།
LUK 6:34 ཡང༌ ཀལ༌ཏེས༌ ཁྱོ༌ཞའེ༌ ལོགས༌ཏེ༌ ཐོབ༌ཅེས༌སི༌ རེ༌ཝའ༌ ཡོད༌ཁན༌གུན༌ལ༌ སྐྱིས༌ཏེ༌ ཏང༌ན༌, ཁྱོ༌ཞའ༌ ཅི༌ ཕན༌ཐོགས༌ ཐོབ༌ཨིན༌། མི༌ སྡིག༌ཅན༌གུན༌ནིའང༌ སྡིག༌ཅན༌གུན༌ལ༌ སྐྱིས༌ཏེ༌ གང༌པོ༌ ལོགས༌ཏེ༌ ཐོབ༌ཅེས༌སི༌ རེ༌ཝའ༌ བོར༌ར༌ནོག༌།”
LUK 6:35 “ཨིན༌ནའང༌ ཁྱོ༌ཞའེ༌ གྲ༌འོ༌གུན༌ལ༌ ཅམས༌པ༌ དང༌ ཟང༌པོ༌ ཅོས༌ ཡང༌ ལོགས༌ཏེ༌ ཐོབ༌ཅེས༌སི༌ སམ༌བ༌ མ༌ཏང༌ང༌ ཁོང༌གུན༌ལ༌ སྐྱིས༌། ཏེ༌ནེ༌ ཁྱོ༌ཞའ༌ སོལ༌རས༌ ཆེན༌མོ༌ ཐོབ༌ཨིན༌ ཡང༌ ཁྱོ༌ཞ༌གུན༌ ཀུན༌ཝང༌ དཀོན༌མཆོག༌གི༌ ཕྲུ༌གུ༌གུན༌ གྱུར༌ཨིན༌ ཅིའ༌ཟེར༌ན༌ ཁོང༌ངི༌, ཀའ༌ཀྲིན༌ མི༌ཀྲན༌ཁན༌ དང༌ མི༌ངན༌པ༌ ཚང༌མ༌ལ༌ ཐུག༌རྗེ༌ ཟིག༌ས༌ནོག༌།
LUK 6:36 ཁྱོ༌ཞའེ༌ ནམ༌ཁའེ༌ ཡབ༌ སྙིང༌རྗེ༌ཅན༌ ཞུགས༌ཁན༌ ཙོགས༌ལ༌ ཁྱོ༌ཞའང༌ སྙིང༌རྗེ༌ཅན༌ གྱུར༌།”
LUK 6:37 “ཁྱོ༌ཞའེ༌ ཞན༌མའ༌ སྐྱོན༌རྗོད༌ མ༌ཅོ༌ ཏེ༌ནེ༌ ཁྱོ༌ཞའང༌ སྐྱོན༌རྗོད༌ མི༌ཛད༌། ཞན༌མའ༌ ཉལ༌ཝའེ༌ ནང༌ང༌ ལེབ༌ཅེས༌སི༌ འོས༌པ༌ དུག༌ མ༌ཟེར༌, ཏེ༌ནེ༌ ཁྱོ༌ཞའང༌ ཉལ༌ཝའེ༌ ཆད༌པ༌ མི༌ཕོག༌། ཤགས༌པ༌ ཏོང༌ ཏེ༌ནེ༌ ཁྱོ༌ཞའང༌ ཤགས༌པ༌ སལ༌ལ༌ ཛད༌ཨིན༌།
LUK 6:38 ཞན༌མ༌ ཏོང༌, ཏེ༌ནེ༌ ཁྱོ༌ཞའང༌ སལ༌ལ༌ ཛད༌ཨིན༌, ཏེ༌བོ༌ ཏབ༌ཅེས༌སི༌ ནོད༌དི༌ ནང༌ང༌ ནན༌ཏེ༌ སྐངས༌ཏེ༌ ལུད༌ཨིན༌ དཀོན༌མཆོག༌གི༌ སེམས༌སངས༌ཏེ༌ ཁྱོ༌ཞའེ༌ ཐོའེ༌ ནང༌ང༌ སལ༌ཨིན༌། ཁྱོ༌ཞའེ༌ ཀོལ༌ཁན༌ནི༌ ཏབ༌ཟའ༌བོ༌ ཁྱོ༌ཞ༌གུན༌ནི༌ ཕིའང༌ ཀོལ༌ལ༌ ཛད༌ཨིན༌།”
LUK 6:39 ཁོང༌གུན༌ལ༌ རུངས༌ གྱུད༌ཏེ༌ ཡེ༌ཤུའི༌ མོལས༌, “ཞ༌ར༌ཞིག༌གི༌ ཞ༌རའ༌ ལམ༌སྟན༌ ཉན༌ཨིན༌ན༌? ཉིས༌ཀ༌ ས༌དོང༌ངི༌ ནང༌ང༌ མི༌གྱེལ༌ལའ༌?
LUK 6:40 ལོབ༌ཕྲུགས༌ ལོབ༌བོན༌ནི༌ སང༌ ཆེའ༌ མ༌ནོག༌, ཨིན༌ནའང༌ ལོབ༌བོན༌ནེ༌ ལོབ༌ཇོང༌ ཐར༌ཁྱེལ༌ ཐོབས༌ཏེ༌ སྟིང༌ནེ༌ ལོབ༌ཕྲུག༌གའང༌ ཁོ༌ ཙོགས༌ གྱུར༌ཨིན༌།”
LUK 6:41 “ཁྱོ༌ཞའེ༌ རང༌ངི༌ མིག༌གི༌ ནང༌ང༌ ཡོད༌ཁན༌ནི༌ རྡུང༌མ༌བོའ༌ ནང༌སྟག༌ ཅོའ༌ མེད༌ན༌ ཏེ༌ནེ༌ སྤུན༌ནི༌ མིག༌གི༌ ནང༌ང༌ ཡོད༌ཁན༌ནི༌ ཤིང༌ཟེལ༌བོའ༌ ཅིའ༌ ལྟའད༌?
LUK 6:42 ཁྱོ༌རང༌ངི༌ སྤུན༌ལ༌, ‘ངའེ༌ ཁྱོ༌རང༌ངི༌ མིག༌གི༌ ནང༌ནེ༌ ཤིང༌ཟེལ༌བོ༌ ཕིང༌ཨིན༌’ ཟེར༌ཅེས༌སི༌ ཧམ༌པ༌ ཀ༌ཟུག༌གི༌ ཅོའད༌, ནམ༌ ཁྱོ༌རང༌ རང༌ངི༌ མིག༌གི༌ ནང༌ང༌ ཡོད༌ཁན༌ནི༌ རྡུང༌མ༌བོ༌ ཁྱོ༌རང༌ང༌ ཐོང༌ང༌ མི༌དུག༌། ཁྱོ༌ཞའ༌ ཁ༌ཆོས༌པ༌གུན༌, སྔུན༌ལ༌ རང༌ངི༌ མིག༌གི༌ རྡུང༌མ༌བོ༌ ཕིང༌, ཏེ༌ནེ༌ སྤུན༌ནི༌ མིག༌གི༌ ནང༌ནེ༌ ཤིང༌ཟེལ༌བོ༌ ཕིང༌ང༌ལ༌ ཁྱོ༌ཞའ༌ སལ༌པོ༌ ཅོས༌ཏེ༌ ཐོང༌ ཐུབ༌ཨིན༌།”
LUK 6:43 “ལྕང༌མ༌ ཟང༌པོ༌ཞིག༌ག༌ བྲས༌བུ༌ ངན༌པ༌ མི༌ཆགས༌ ཡང༌ ལྕང༌མ༌ ངན༌པ༌ཞིག༌ག༌ བྲས༌བུ༌ ཟང༌པོ༌ མི༌ཆགས༌།
LUK 6:44 ལྕང༌མའེ༌ རིགས༌པོ༌ ཏེ༌བོའེ༌ བྲས༌བུའི༌ ཀ༌ནེ༌ ཤེས༌ས༌ནོག༌། ཚེར༌མང༌ངི༌ ཀ༌ནེ༌ ཕིག༌གི༌ ཁ༌ཟས༌ ཡ༌ ལྕང༌ཚེར༌རི༌ ཀ༌ནེ༌ རྒུན༌ནི༌ ཁ༌ཟས༌ མི༌ཏུ༌།
LUK 6:45 མི༌ ཟང༌པོའེ༌ སེམས༌ ཟང༌པོའེ༌ བང༌ཛོད༌ནེ༌ བྲས༌བུ༌ ཟང༌པོ༌ སྨིན༌ན༌ནོག༌, ཡང༌ མི༌ ངན༌པའེ༌ སེམས༌ ངན༌པའེ༌ བང༌ཛོད༌ནེ༌ བྲས༌བུ༌ ངན༌པ༌ སྨིན༌ན༌ནོག༌། སྙིང༌ གངས༌ཏེ༌ ལུད༌ཁན༌བོ༌ ཁའ༌ནེ༌ བིང༌ང༌ནོག༌།”
LUK 6:46 “ཁྱོ༌ཞའེ༌ ང༌ གཙོ༌བོ༌ལེ༌ གཙོ༌བོ༌ལེ༌ ཅིའ༌ ཟེར༌རད༌, ནམ༌ ཁྱོ༌ཞའེ༌ ངའེ༌ ཟེར༌ཁན༌གུན༌ ཅོའ༌ མི༌དུག༌?
LUK 6:47 ངའེ༌ཀ༌ ཡོངས༌ཏེ༌ ངའེ༌ སྤེ༌ར༌གུན༌ ཉན༌ཏེ༌ ཏེ༌ཀ༌ ལག༌ལེན༌ ཅོ༌ཁན༌བོ༌ ཀ༌ཟུག༌ མི༌ཞིག༌ ཨིན༌ ངའེ༌ ཁྱོ༌ཞའ༌ སྟན༌ཨིན༌།
LUK 6:48 ཁོ༌, ཁང༌པ༌ རྩིག༌ཅེས༌ལ༌ ཀོན༌དྲོ༌ བྲུས༌ཏེ༌ བྲག༌གི༌ཀ༌ མག༌ལྡན༌ ཏང༌ཁན༌ནི༌ མི༌ ཙོགས༌ ཨིན༌། ཆུ༌ལོག༌ ཡོངས༌ཏེ༌ ཁང༌པ༌ སྲན༌ཏྲེ༌ ཕོག༌ནའང༌ ཞིག༌ མ༌ཞིག༌ ཅིའ༌ཟེར༌ན༌ ཏེ༌བོ༌ སྟན༌པོ༌ རྩིགས༌ཏེ༌ ཡོད༌པིན༌།
LUK 6:49 ངའེ༌ ཟེར༌ཁན༌གུན༌ ཚོར༌ཏེ༌ ལག༌ལེན༌ མ༌ཅོ༌ཁན༌བོ༌, མག༌ལྡན༌ མ༌ཏང༌ང༌ ཁང༌པ༌ སའེ༌ཀ༌ རྩིགས༌ཁན༌ ཙོགས༌ ཨིན༌། ཆུ༌ལོག༌གི༌ ཆུ༌ ཕོག༌ག༌ཅིག༌ ཁང༌པ༌བོ༌ རྡིབས༌ཏེ༌ པད༌ མེད༌ཁན༌ ཆེན༌།”
LUK 7:1 མི༌གུན༌ལ༌ ལབ༌ཞ༌ ཚང༌མ༌ སལ༌ ཚར༌ར༌ཅིག༌, གཙོ༌བོ༌ ཡེ༌ཤུ༌ ཀ༌ཕར༌ན༌ཧུམ༌མི༌ གྲོང༌ཁྱེར༌ལ༌ སྐྱོདས༌།
LUK 7:2 ཏེ༌རུ༌ རོམ༌པ༌ མག༌མི༌གྱའེ༌ སྤོན༌བོའེ༌, མ༌ ཅེས༌པ༌ ཅོ༌ཁན༌ནི༌ ཡོག༌པོ༌ཞིག༌ག༌ ཟུ༌མོ༌ སྲན༌ཏྲེ༌ ཡོངས༌ཏེ༌ ཤི༌ཀྱིས༌ ཡོད༌པིན༌།
LUK 7:3 མག༌མི༌ སྤོན༌བོའ༌ ཡེ༌ཤུའི༌ སྐོར༌ལ༌ ཚོར༌ར༌ཅིག༌, སྐྱོད༌ཏེ༌ ཡོག༌པོ༌བོ༌ ཕན༌ཅུག༌ག༌ ཛད༌ཅེས༌སི༌ ཞུ༌ཝའ༌ ཕུལ༌ཅེས༌ལ༌ ཡ༌ཧུ༌དཱ༌པའེ༌ སྤོན༌བོ༌ ཁ༌ཅིག༌ ཡེ༌ཤུ༌ ཡོད༌ས༌ ལམ༌ཅུགས༌།
LUK 7:4 ཁོང༌གུན༌ ཡེ༌ཤུ༌ ཡོད༌ས༌ ཡོངས༌ ཡང༌ སྙིང༌ནེ༌ ཞུ༌ཝའ༌ སྲན༌ཏྲེ༌ ཕུལ༌ཏེ༌ ཟེརས༌, “འི༌ མི༌བོ༌ ཉེ༌རང༌ངི༌ རོགས༌ ཛད༌ཅེས༌སི༌ འོས༌པ༌ ཨིན༌
LUK 7:5 ཅིའ༌ཟེར༌ན༌ ཁོའེ༌ ང༌དང༌ངི༌ མི༌གུན༌ལ༌ ཅམས༌པ༌ ཅོས༌ཏེ༌ ང༌དང༌ངི༌ དུ༌ཁང༌བོ༌ རྩིག༌ག༌ལ༌ རོགས༌ ཅོས༌ཏེ༌ ཨིན༌།”
LUK 7:6 ཏེ༌ནེ༌ ཡེ༌ཤུ༌ ཁོང༌གུན༌ ཉམ༌པོ༌ སྐྱོདས༌། ཁང༌པའེ༌ ཉེ༌མོའ༌ ལེབས༌ཏེ༌ ཡོད༌ ཟ༌ནེ༌, མག༌མི༌གྱའེ༌ སྤོན༌བོའེ༌ ཁོ༌རང༌ངི༌ ཛ༌འོ༌གུན༌ ཡེ༌ཤུའ༌ འི༌ཟུག༌ ཟེར༌ཅེས༌ལ༌ ཀལས༌, “གཙོ༌བོ༌ འོབ༌གྱལ༌ མ༌ཛད༌, ཉེ༌རང༌ ངའེ༌ ཁང༌པ༌ སྐྱོད༌ཅེས༌སི༌ འོས༌པ༌ ངའ༌ མན༌།
LUK 7:7 ཏེན༌ན༌ གྱུན༌ཚན༌བོའེ༌ ཕིའ༌ ངའ༌ ཉེ༌རང༌ངི༌ དུན༌ལ༌ ཇལ༌ཅེས༌པོའང༌ འོས༌པ༌ མ༌ཚོར༌། ཨིན༌ནའང༌ ཉེ༌རང༌ངི༌ བཀའ༌ སལ༌ན༌, ངའེ༌ ཡོག༌པོ༌ ཕན༌ཨིན༌
LUK 7:8 ཝང༌ཆའེ༌ ཡོག༌ག༌ ངའང༌ དུག༌གད༌ ཡང༌ ངའེ༌ ཝང༌ཆའེ༌ ཡོག༌ག༌ མག༌མི༌གུན༌ ཡོད༌། ངའེ༌ ཅིག༌ག༌ སོང༌ ཟེར༌ན༌ ཆའ༌ནོག༌ ཡང༌ ཅིག༌ག༌ ཡོང༌ ཟེར༌ན༌ ཡོང༌ང༌ནོག༌, ཡང༌ ངའེ༌ ཡོག༌པོའ༌ འི༌ ལས༌པོ༌ ཅོས༌ ཟེར༌ན༌ ཅོའ༌ནོག༌།”
LUK 7:9 ཡེ༌ཤུའི༌ ཏེ༌བོ༌ སན༌ན༌ཅིག༌, ཧ༌ལས༌ཏེ༌ ཁོང༌ང༌ བྲངས༌ཏེ༌ ཡོང༌ཁན༌ནི༌ མི༌ཚོགས༌ ཆོགས༌ལ༌ གྱུར༌ཏེ༌ མོལས༌, “ངའེ༌ ཁྱོ༌ཞའ༌ ཟེར༌རད༌, ཨིས༌ར༌ཨེལ༌ལི༌ ནང༌ངའང༌ ང༌ འི༌ཙོགས༌སི༌ ཏད༌པ༌ཅན༌ཞིག༌ མ༌ནེ༌ མ༌ཐོབ༌།”
LUK 7:10 ཏེ༌ནེ༌ ལམ༌ཅུག༌ཁན༌ནི༌ མི༌གུན༌ ཁང༌པ༌ ལོག༌ཏེ༌ ལེབ༌བ༌ཅིག༌, ཡོག༌པོ༌བོའ༌ ཟུ༌མོ༌ གྱལ༌ཏེ༌ ཐོང༌།
LUK 7:11 སྟིང༌མ༌ ཞག༌ག༌ གཙོ༌བོ༌ ཡེ༌ཤུ༌ ནཱ༌ཡིན༌ གྲོང༌ཁྱེར༌ལ༌ སྐྱོདས༌, ཡང༌ ཁོང༌ངི༌ ལོབ༌ཕྲུགས༌ དང༌ མི༌ཚོགས༌ ཆེན༌མོ༌ཞིག༌ ཁོང༌ ཉམ༌པོ༌ སོང༌།
LUK 7:12 གྲོང༌ཁྱེར༌རི༌ གྱས༌སྒོའེ༌ ཉེ༌མོ༌ ལེབ༌བ༌ཅིག༌ ཨ༌ནེ༌མ༌རང༌མོ༌ཞིག༌གི༌ བུ༌ཚའ༌ ཅིག༌ཅིག༌པོ༌ ཤི༌ཁན༌ནི༌ རོ༌ ཕི༌ལོག༌ག༌ ཕིངས༌ཏེ༌ ཁྱོང༌ངད༌པིན༌ ཡང༌ ཏེ༌ གྲོང༌ཁྱེར༌རི༌ མི༌ཚོགས༌ ཆེན༌མོ༌ ཁོ༌ ཉམ༌པོ༌ ཡོད༌པིན༌།
LUK 7:13 ཡེ༌ཤུའི༌ བུ༌མོ༌བོ༌ ཟིགས༌ས༌ཅིག༌, སྙིང༌རྗེ༌ སྐྱེས༌ཏེ༌ ཁོའ༌ མོལས༌, “ངུ༌ མ༌ངུ༌།”
LUK 7:14 ཏེ༌ནེ༌ རོ༌སྒམ༌མི༌ དུན༌ལ༌ སྐྱོད༌ཏེ༌ ཆག༌རྩེའ༌ ཛདས༌, སྤུར༌ ཁུར༌ཁན༌གུན༌ གྲུལ༌ མ༌གྲུལ༌ལ༌ དུགས༌། ཁོང༌ངི༌ མོལས༌, “ཁྱོག༌ཏོང༌ ཁྱོ༌རང༌ང༌ ངའེ༌ ཟེར༌རད༌, ལོངས༌།”
LUK 7:15 ཤི༌ཁན༌བོ༌ ལངས༌ཏེ༌ སྤེ༌ར༌ ཏང༌ཅེས༌ གོ༌ཟུག༌ ཡང༌ ཡེ༌ཤུའི༌ ཁོ༌ ཁོ༌རང༌ངི༌ ཨ༌མ༌ སྟད༌ད༌ ཛདས༌།
LUK 7:16 མི༌ཚང༌མའེ༌ རྩི༌ཝ༌ དང༌ ཇིགས༌སི༌ ནང༌ང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌, “ལུང༌སྟོན༌པ༌ ཀྲག༌པོ༌ཞིག༌ ང༌དང༌ངི༌ ཕྲོའ༌ སྐྱོད༌ཏེ༌ ཨིན༌ནོག༌། དཀོན༌མཆོག༌ ང༌དང༌ངི༌ མི༌གུན༌ལ༌ རོགས༌ ཛད༌ད༌ལ༌ སྐྱོད༌ཏེ༌ ཨིན༌ནོག༌།”
LUK 7:17 ཏེ༌ ནས༌ཚུལ༌བོ༌ ཡ༌ཧུ༌དཱའེ༌ ཡུལ༌ཇོངས༌ གང༌པོ༌ དང༌ ཉེ༌ཁོར༌རི༌ ཡུལ༌ ཚང༌མའེ༌ ནང༌ང༌ ཁྱེབས༌།
LUK 7:18 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ནི༌ ཁོང༌ང༌ གཙོ༌བོ༌ ཡེ༌ཤུའི༌ ཛད༌ཁན༌ ཚང༌མ༌ ཤདས༌པ༌, ལོབ༌ཕྲུགས༌ ཉིས༌ བོད༌ཏེ༌,
LUK 7:19 ཡེ༌ཤུ༌ ཡོད༌ས༌ འི༌ ཏྲི༌ཝ༌བོ༌ ཏྲིའ༌ལ༌ ལམ༌ཅུགས༌, “ལུང༌སྟོན༌པ༌གུན༌ནི༌ སྐྱོད༌ཨིན༌ མོལ༌ཁན༌ མ༌ཤི༌ཀ༌ ཉེ༌རང༌ ཞུགས༌ཏེ༌ ཨིན༌ན༌ ཡ༌ ང༌ཞའ༌ ཡང༌ཞིག༌ག༌ སྲུང༌?”
LUK 7:20 ཁོང༌གུན༌ ཡེ༌ཤུ༌ ཡོད༌ས༌ ལེབ༌བ༌ཅིག༌ ཟེརས༌, “ཡོ༌ཧཱ༌ནན༌ ཁྲུས༌སལ༌ཁན༌ནི༌ ང༌ཞའ༌ འི༌བོ༌ ཏྲིའ༌ལ༌ ཀལས༌, ‘ལུང༌སྟོན༌པ༌གུན༌ནི༌ སྐྱོད༌ཨིན༌ མོལ༌ཁན༌ མ༌ཤི༌ཀ༌ ཉེ༌རང༌ ཞུགས༌ཏེ༌ ཨིན༌ན༌ ཡ༌ ང༌ཞའ༌ ཡང༌ཞིག༌ག༌ སྲུང༌?’”
LUK 7:21 ཏེན༌ན༌ ཏུས༌ལ༌ ཡེ༌ཤུའི༌ ནད༌ ཡོང༌ཁན༌, ཟུ༌མོ༌ ཡོད༌ཁན༌ མང༌པོ༌ ཕན༌ཅུགས༌, གོང༌པོ༌ ཞུགས༌ཁན༌ མང༌པོ༌ ཕིང༌ང༌ ཛདས༌ ཡང༌ ཞ༌ར༌ མང༌པོའ༌ མིག༌ནེ༌ ཐོང༌ ཅུག༌ག༌ ཛདས༌།
LUK 7:22 ཡེ༌ཤུའི༌ ལོན༌ ཁྱོང༌ཁན༌གུན༌ལ༌ ལན༌སལས༌, “ལོགས༌ཏེ༌ སོང༌ ཡང༌ ཁྱོ༌ཞའེ༌ ཐོང༌ཁན༌ དང༌ ཚོར༌ཁན༌ གུན༌ ཡོ༌ཧཱ༌ནན༌ལ༌ ཤོད༌། ཞ༌ར༌གུན༌ལ༌ ཐོང༌, ཞ༌འོ༌གུན༌ གྲུལས༌, ཛེ༌ནད༌ཅན༌གུན༌ གྱལ༌ཏེ༌ རྩང༌མ༌ སོང༌, མ༌ཚོར༌ཁན༌གུན༌ནི༌ ཚོར༌, ཤི༌ཁན༌གུན༌ སོན༌ཏེའ༌ ལངས༌, ཡང༌ ཉལ༌བ༌ཅན༌གུན༌ལ༌ གའ༌མོའེ༌ ནས༌ཚུལ༌ ཤདས༌།
LUK 7:23 ཁོའ༌ ཤོད༌, ངའེ༌ ཅོ༌ཁན༌གུན༌ནི༌ ཞས༌ཏེ༌ ངའ༌ མ༌ཕང༌ཁན༌གུན༌ལ༌ ཅིན༌ལབས༌ སལ༌ལ༌ ཛད༌ཨིན༌།”
LUK 7:24 ཡོ༌ཧཱ༌ནན༌ནི༌ ལོན༌ ཁྱོང༌ཁན༌གུན༌ ལོགས༌ཏེ༌ ཆ༌ ཚར༌ར༌ཅིག༌, ཡེ༌ཤུའི༌ མི༌ཚོགས༌ལ༌ ཡོ༌ཧཱ༌ནན༌ནི༌ སྐོར༌ལ༌ མོལ༌ཅེས༌ གོ༌ཟུག༌, “ཁྱོ༌ཞའ༌ རི༌སྟོང༌ངི༌ ནང༌ང༌ ཀ༌ཟུག༌ མི༌ཞིག༌ག༌ ལྟའ༌ལ༌ སོང༌པིན༌? ཆུའི༌ ཐའ༌མའེ༌ ལྡམ༌བུ༌ ལུངས༌པོའེ༌ སྐུལ༌ལ༌ ཙོགས༌ལ༌, ལབ༌ཞའེ༌ ནང༌ང༌ ཏུས༌གྱུན༌ གྱུར༌ཇ༌ ཁྱོང༌ཁན༌ ཞིག༌ག༌?
LUK 7:25 ཀལ༌ཏེས༌ མན༌ན༌ ཁྱོ༌ཞ༌གུན༌ ཅི༌ ལྟའ༌ལ༌ སོང༌པིན༌? མི༌ ཀོས༌ལག༌ ཇམ༌པོ༌ དང༌ རིན༌ཅན༌ གོན༌ཁན༌ཞིག༌ ཁྱོ༌ཞ༌གུན༌ནི༌ ཐོང༌ང༌? མ༌ཐོང༌། ཀོས༌ རིན༌ཅན༌ གོན༌ཁན༌ དང༌ རིན༌ཅན༌ ཅ༌ལག༌ ཀོལ༌ཨིན༌ མི༌ཚེ༌ ཕུད༌ཁན༌གུན༌ གྱལ༌པོའེ༌ ཁར༌ལ༌ དུག༌ག༌ནོག༌།
LUK 7:26 ཁྱོ༌ཞའ༌ ལུང༌སྟོན༌པ༌ཞིག༌ག༌ ལྟའ༌ལ༌ སོང༌པིན༌ན༌? འོ༌ན༌, ཁོ༌ ལུང༌སྟོན༌པ༌ སང༌ ཀྲག༌ག༌ཞིག༌ ཨིན༌།
LUK 7:27 ཏམ༌པའེ༌ སུང༌རབས༌སི༌ ནང༌ང༌ ཁོའེ༌ སྐོར༌ལ༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ལྟོས༌, ཁྱོ༌རང༌ངི༌ སང༌ སྔུན༌ལ༌ ངའེ༌ ང༌རང༌ངི༌ ལོན༌ཁྱེར༌ཁན༌བོ༌ ཀལ༌ཨིན༌། ཁོའེ༌ ཁྱོ༌རང༌ངི༌ ཕིའ༌ ལམ༌ གྲལ༌གྲིག༌ ཅོ༌ཨིན༌།’
LUK 7:28 ངའེ༌ ཁྱོ༌ཞའ༌ ཟེར༌རད༌, དག༌ས༌ ཚོག༌པ༌ སྐྱེས༌ཁན༌ མི༌གུན༌ནི༌ ནང༌ནེ༌ ཡོ༌ཧཱ༌ནན༌ནི༌ སང༌ ཀྲག༌ག༌ཞིག༌ སུའང༌ མེད༌པ༌ ཨིན༌ནོག༌, ཨིན༌ནའང༌ ནམ༌ཁའེ༌ གྱལ༌སྲིད༌དི༌ ནང༌ང༌ ཆུང༌ཤོག༌པོ༌ ཡོ༌ཧཱ༌ནན༌ནི༌ སང༌ ཀྲག༌ག༌ ཨིན༌།”
LUK 7:29 ༼ཁྲལ༌ནེན༌ཁན༌གུན༌ནའང༌ ཐེས༌ཏེ༌ ཡེ༌ཤུའི༌ མོལ༌ཁན༌གུན༌ ཚོར༌ཁན༌ ཚང༌མའེ༌, དཀོན༌མཆོག༌གི༌ བཀའ༌ དེན༌བ༌ ཨིན༌ནོག༌ ཟེརས༌ ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ནི༌ སལ༌ཁན༌ནི༌ ཁྲུས༌ ལེན༌ཏེ༌ ཨིན༌པིན༌།
LUK 7:30 ཨིན༌ནའང༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཡོ༌ཧཱ༌ནན༌ནེ༌ ཁྲུས༌ མ༌ལེན༌ན༌ ཁོ༌རང༌གུན༌ནི༌ ཕིའ༌ དཀོན༌མཆོག༌གི༌ ཐུགས༌དོད༌པོ༌ ཕངས༌།༽
LUK 7:31 ཡེ༌ཤུའི༌ མོལས༌, “ངའེ༌ འི༌ མི༌རབས༌པོ༌ སུ༌ ཉམ༌པོ༌ ལྡུར༌? ཁོང༌གུན༌ སུ༌ ཙོགས༌ ཨིན༌ནོག༌?
LUK 7:32 ཁྲོམས༌སི༌ ནང༌ང༌ དུག༌ཁན༌ནི༌ ཕྲུ༌གུ༌གུན༌ ཙོགས༌ ཀ༌གུན༌ནི༌ ཅིག༌ དང༌ ཅིག༌ག༌ བོད༌ཨིན༌ ཟེར༌དུག༌, ‘ང༌ཞའེ༌ ལིང༌བུ༌ ཕུས༌ཏེའང༌ ཁྱོ༌ཞའ༌ མ༌རྩེས༌། ང༌ཞའེ༌ ཤད༌པ༌ ཏང༌ ཟ༌ནེ༌ ཁྱོ༌ཞའ༌ མ༌ངུས༌།’”
LUK 7:33 “ཏེན༌ན༌ ཙོགས༌ལ༌ ཡོ༌ཧཱ༌ནན༌ ཁྲུས༌སལ༌ཁན༌ ཡོངས༌ཏེ༌ ཟན༌ མ༌ཟོས༌ ཡ༌ ཆང༌ མ༌ཐུངས༌པ༌ ཁྱོ༌ཞའེ༌ ‘ཁོའེ༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌’ ཟེརས༌།
LUK 7:34 མི༌རིགས༌སི༌བུ༌ ཡོང༌ཏེ༌ ཟན༌ ཟོས༌ཏེ༌ ཆང༌ ཐུངས༌པ༌, ཁྱོ༌ཞའེ༌ ‘ཁོ༌ མུག༌ཞུགས༌ དང༌ ར༌རོས༌ཏེ༌ དུག༌ཁན༌ ཡང༌ ཁྲལ༌ལེན༌ཁན༌ དང༌ སྡིག༌ཅན༌ གུན༌ནི༌ ཛ༌འོ༌ ཨིན༌ནོག༌’ ཟེརས༌།
LUK 7:35 ཨིན༌ནའང༌ ང༌ཞའ༌ ཤེས༌རབས༌སི༌ ལམ༌མི༌ཀ༌ གྲུལ༌ཁན༌བོ༌ ཤེས༌རབས༌ཅན༌ ཚང༌མ༌ ཤེས༌ས༌ནོག༌།”
LUK 7:36 ཏེ༌ནེ༌ ཕ༌རུ༌ཤི༌པ༌ཞིག༌གི༌ གཙོ༌བོ༌ ཡེ༌ཤུའ༌ ཁོའེ༌ ཁང༌པ༌ དོན༌ཏང༌ང༌ བོད༌པ༌, ཡེ༌ཤུ༌ ཁོའེ༌ ཁང༌པ༌ སྐྱོད༌ཏེ༌ དོན༌ཏང༌ དོན༌ན༌ལ༌ ཅོག༌ཙེ༌ དུན༌ལ༌ ཞུགས༌།
LUK 7:37 ཏེ༌ གྲོང༌ཁྱེར༌རི༌ ནང༌ང༌ སྕོད༌ལམ༌ ངན༌པ༌ ཡོད༌ཁན༌ནི༌ བུ༌མོ༌ཞིག༌ག༌ ཡེ༌ཤུ༌ ཕ༌རུ༌ཤི༌པའེ༌ ཁང༌པ༌ དོན༌ཏང༌ དོན༌ན༌ ཞུགས༌ཏེ༌ ཡོད༌ཁན༌བོ༌ ཚོར༌ར༌ཅིག༌, ཁོ༌ ཀའ༌ཡོལ༌ལི༌ ནོད༌ ཏྲི༌ཞིམ༌མི༌ མར༌ནག༌ ཀུས༌པོ༌ སྐངས༌ཁན༌ ཁུར༌ཏེ༌ ཡོངས༌།
LUK 7:38 ཡེ༌ཤུའི༌ གྱབ༌བ༌ ཁོང༌ངི༌ ཞབས༌སི༌ དུན༌ལ༌ པིག༌དོང༌ ཙུགས༌ཏེ༌ ངུ༌ཨིན༌ནའང༌ ཆི༌མ༌ ཉམ༌པོ༌ ཁོང༌ངི༌ ཞབས༌ ལོན༌པ༌ ཅོས༌ཏེ༌ ཁོ༌རང༌ངི༌ སྲ༌ ཉམ༌པོ༌ ཕི༌ཨིན༌, པུག༌ ཏང༌ཨིན༌, ཁོའེ༌ ཏྲི༌ཞིམ༌ཅན༌ནི༌ མར༌ནག༌ ལུགས༌།
LUK 7:39 ཡེ༌ཤུ༌ དོན༌ཏང༌ང༌ བོད༌ཁན༌ནི༌ ཕ༌རུ༌ཤི༌པ༌བོའེ༌ ཏེ༌གུན༌ ཐོང༌ཏེ༌, “ཀལ༌ཏེས༌ ཁོང༌ ལུང༌སྟོན༌པ༌ཞིག༌ ཨིན༌ན༌, ཁོང༌ང༌ ལག༌པ༌ རྩེ༌ཨིན༌ ཡོད༌ཁན༌ནི༌ བུ༌མོ༌བོ༌ སྡིག༌ཅན༌ཞིག༌ ཨིན༌ཁན༌ ཤེས༌གོས༌” སམ༌།
LUK 7:40 ཁོའེ༌ སམ༌ཨིན༌ ཡོད༌ཁན༌བོའ༌ ཡེ༌ཤུའི༌ ལན༌སལས༌, “ཤི༌མོན༌ ངའེ༌ ཁྱོ༌རང༌ང༌ ཅིག༌ ཟེར༌ཨིན༌།” ཁོའེ༌ ཟེརས༌, “ལོབ༌བོན༌ལེ༌ མོལ༌ལ༌ ཛད༌།”
LUK 7:41 “བུ༌ལོན༌ ཏང༌ཁན༌ཞིག༌གི༌ མི༌ ཉིས༌ལ༌ པེ༌ནེ༌ བུ༌ལོན༌ ཏངས༌, ཅིག༌པོའ༌ ཞག༌ ལྔབ༌གྱའེ༌ ལ༌ཆ༌ ཟམ༌ཤིག༌ ཡང༌ ཅིག༌པོའ༌ ཞག༌ ལྔབ༌ཅུའི༌ ལ༌ཆ༌ ཟམ༌ཤིག༌།
LUK 7:42 ཁོང༌ ཉིས༌ཀོའ༌ བུ༌ལོན༌ ལོགས༌ཏེ༌ ཤལ༌ མ༌ཉན༌ པ༌སང༌ བུ༌ལོན༌ ཏང༌ཁན༌བོའེ༌ ཁོང༌གུན༌ནི༌ བུ༌ལོན༌བོ༌ ཕུད༌ཏངས༌། ཏ༌ ཁོང༌གུན༌ནི༌ ནང༌ནེ༌ སུའི༌ བུ༌ལོན༌ ཏང༌ཁན༌བོའ༌ མང༌ང༌ ཅེས༌པ༌ ཅོ༌ཨིན༌།”
LUK 7:43 ཤི༌མོན༌ནི༌ ཟེརས༌, “ངའེ༌ སམ༌མ༌རག༌ བུ༌ལོན༌ མང༌ང༌ ཕུད༌ཁན༌བོའེ༌།” ཡེ༌ཤུའི༌ མོལས༌, “ཁྱོ༌རང༌ངི༌ ཀྲང༌པོ༌ ཟེརས༌།”
LUK 7:44 ཏེ༌ནེ༌ བུ༌མོ༌བོ༌ ཆོགས༌ལ༌ ཟིགས༌ཏེ༌ ཡེ༌ཤུའི༌ ཤི༌མོན༌ལ༌ མོལས༌, “འི༌ བུ༌མོ༌ ཐོང༌ངའ༌? ང༌ ཁྱོ༌རང༌ངི༌ ཁང༌པ༌ ཡོངས༌ཏེའང༌ ཁྱོ༌རང༌ངི༌ ངའེ༌ རྐང༌པ༌ ཁྲུའ༌ལ༌ ཆུ༌ མ༌ཏངས༌, ཨིན༌ནའང༌ འི༌ བུ༌མོ༌བོའེ༌ ངའེ༌ རྐང༌པ༌ ཁོ༌རང༌ངི༌ ཆི༌མ༌ ཉམ༌པོ༌ ཁྲུས༌ཏེ༌ སྲའ༌ ཉམ༌པོ༌ ཕིས༌།
LUK 7:45 ཁྱོ༌རང༌ངི༌ ངའ༌ པུག༌ མ༌ཏངས༌ ཨིན༌ནའང༌ འི༌ བུ༌མོ༌བོའེ༌ ང༌ ནང༌ང༌ ཡོངས༌པ༌ནེ༌ ཕར༌ལ༌ ངའེ༌ རྐང༌པའ༌ པུག༌ ཏང༌ཨིན༌ དུགས༌།
LUK 7:46 ཁྱོ༌རང༌ངི༌ ངའེ༌ གོའ༌ མར༌ནག༌ མ༌སྐུས༌ ཨིན༌ནའང༌ འི༌ བུ༌མོའེ༌ ཏྲི༌ཞིམ༌བོ༌ ངའེ༌ རྐང༌པའེ༌ཀ༌ ལུགས༌།”
LUK 7:47 “ངའེ༌ ཁྱོ༌རང༌ང༌ ཟེར༌རད༌, འི༌ བུ༌མོའེ༌ སྡིག༌པ༌ ཅོ༌ཁན༌ མང༌པོའ༌ ཤགས༌པ༌ ཏངས༌པ༌, ཁོའེ༌ ཅེས༌པ༌ མང༌པོ༌ ཅོས༌། ཨིན༌ནའང༌ སྡིག༌པ༌ ཉུ༌ངུན༌ ཅོ༌ཁན༌ནི༌ སྡིག༌པ༌ ཤགས༌པ༌ ཏང༌ཁན༌བོའེ༌ ཅམས༌པ༌ ཉུ༌ངུན༌ ཅོས༌།”
LUK 7:48 ཏེ༌ནེ༌ ཡེ༌ཤུའི༌ བུ༌མོ༌བོའ༌ མོལས༌, “ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏངས༌ཏེ༌ ཨིན༌།”
LUK 7:49 ཞན༌ གྲོན༌པོ༌གུན༌ནི༌ ཁོ༌རང༌ ཅིག༌ དང༌ ཅིག༌ག༌ ཟེརས༌, “སྡིག༌པ༌ ཤགས༌པ༌ ཏང༌ཅེས༌སི༌ ཧམ༌པ༌ ཅོ༌ཁན༌ནི༌ འི༌ མི༌བོ༌ སུ༌ ཨིན༌ནོག༌།”
LUK 7:50 ཡེ༌ཤུའི༌ བུ༌མོ༌བོའ༌ མོལས༌, “ཁྱོ༌རང༌ངི༌ ཏད༌པའེ༌ ཁྱོ༌རང༌ སྐྱོབས༌ཏེ༌ ཨིན༌། ཏ༌ སོང༌ དཀོན༌མཆོག༌གི༌ ཞི༌དེ༌ ཁོ༌རང༌ ཉམ༌པོ༌ ལུས༌ཨིན༌།”
LUK 8:1 སྟིང༌མ༌ ཞག༌ག༌ གཙོ༌བོ༌ ཡེ༌ཤུ༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌ཅེས༌ལ༌ གྲོང༌ཁྱེར༌ དང༌ གམ༌ཡུལ༌ ཅིག༌ནེ༌ ཅིག༌ག༌ སྐྱོདས༌, ཡང༌ ཁོང༌ ཉམ༌པོ༌ ལོབ༌ཕྲུགས༌ རྕུག༌ཉིས༌པོ༌ ཡང༌
LUK 8:2 རྡུད༌ ཞུགས༌ཁན༌ དང༌ ནད༌ གུན༌ནེ༌ གྱལ༌ཅུག༌ག༌ ཛད༌ཁན༌ནི༌ བུ༌མོ༌ ཁ༌ཅིག༌ ཡོད༌པིན༌: རྡུད༌ རྡུན༌ ཕིང༌ང༌ ཛད༌ཁན༌ནི༌ མིར༌ཡམ༌ མག༌དལ༌ལ༌མ༌,
LUK 8:3 ཧེ༌རོད༌དི༌ ཆག༌ཟོད༌ ཀུ༌ཟཱའེ༌ ན༌མ༌ ཡོ༌འན༌ནཱ༌, སུ༌སན༌ནཱ༌ དང༌ ཡང༌ བུ༌མོ༌ མང༌པོ༌། ཁོང༌གུན༌ནི༌ རང༌ངི༌ ནོར༌ གྱུད༌ཏེ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌ རྕུག༌ཉིས༌པོའེ༌ སྒོས༌དོམ༌གུན༌ རིག༌གད༌པིན༌།
LUK 8:4 གྲོང༌ཁྱེར༌ སོ༌སོ༌ནེ༌ མི༌གུན༌ ཡོང༌ཏེ༌ གཙོ༌བོ༌ ཡེ༌ཤུ༌ ཡོད༌ས༌ མི༌ཆོགས༌ ཆེན༌མོ༌ ཛོམ༌ཨིན༌ ཡོད༌ ཟ༌ནེ༌ ཁོང༌ངི༌ འི༌ རུངས༌པོ༌ ཤད༌ད༌ ཛདས༌,
LUK 8:5 “ཞིང༌བད༌པ༌ཞིག༌ ས༌འོན༌ ཏབ༌བ༌ལ༌ སོང༌། ཞིང༌ང༌ ས༌འོན༌ ཏབ༌ ཟ༌ནེ༌ ཁ༌ཅིག༌ ལམ༌མི༌ཀ༌ བུད༌, ཏེ༌གུན༌ མིའི༌ རྐང༌པའེ༌ ནནས༌ ཡང༌ ཅི༌པ༌ ཡོངས༌ཏེ༌ ཟོས༌།
LUK 8:6 ས༌འོན༌ ཁ༌ཅིག༌ བྲག༌གི༌ཀ༌ བུད༌ ཡང༌ སྐྱེའ༌ཅིག༌, སའེ༌ ནང༌ང༌ ཧུས༌ མེད༌པ༌ སྐམས༌ཏེ༌ ཤི༌།
LUK 8:7 ས༌འོན༌ ཁ༌ཅིག༌ ཚེར༌མང༌ངི༌ ཕྲོའ༌ བུད༌ ཡང༌ ས༌འོན༌ ཉམ༌པོ༌ ཚེར༌མང༌ སྐྱེས༌ཏེ༌ ནན༌པ༌ ཞིང༌བོ༌ ལྡན༌ མ༌ཐུབ༌།
LUK 8:8 ཞན༌ ས༌འོན༌གུན༌ ས༌ གྱལ༌ལ༌ ཡོད༌སའེ༌ ཞིང༌ངི༌ཀ༌ བུད༌པ༌, སྐྱེས༌ཏེ༌ སྟོན༌ཐོག༌ སྨིན༌, ཀ༌བོ༌ ས༌འོན༌ ཏབ༌ཁན༌ ནི༌ 100 གྱུར༌ སྨིན༌།” ཏེ༌བོ༌ མོལ༌ ཚར༌ར༌ཅིག༌ ཁོང༌ངི༌ ཤེད༌ནའང༌ མོལས༌, “ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།”
LUK 8:9 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ནི༌ ཁོང༌ངི༌ ཤད༌ད༌ ཛད༌ཁན༌ནི༌ རུངས༌སི༌ ཏོན༌བོ༌ ཁོང༌ང༌ ཏྲིས༌།
LUK 8:10 ཁོང༌ངི༌ ཁོང༌གུན༌ལ༌ མོལས༌, “དཀོན༌མཆོག༌གི༌ གྱལ༌སྲིད༌དི༌ སང༌ཝ༌གུན༌ ཁྱོ༌ཞའ༌ ཧ༌གོ༌ཅེས༌ལ༌ གོངས༌པ༌ སལ༌ལ༌ ཛད༌ཏེ༌ ཨིན༌ནོག༌, ཨིན༌ནའང༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌བོ༌ དྲན༌དྲ༌ གྲུབ༌ཅེས༌ལ༌ ངའེ༌ ཞན༌གུན༌ལ༌ རུངས༌ གྱུད༌ཏེ༌ ཤད༌དད༌, ཏེ༌བོ༌ ནི༌, ‘ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌, ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌།’”
LUK 8:11 “ཏེ༌ རུངས༌སི༌ ཏོན༌ ནི༌ འི༌བོ༌ ཨིན༌, ས༌འོན༌བོ༌ ནི༌ དཀོན༌མཆོག༌གི༌ བཀའ༌ ཨིན༌།
LUK 8:12 ལམ༌མི༌ཀ༌ ས༌འོན༌ བུད༌ཁན༌གུན༌ ནི༌ དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌, ཨིན༌ནའང༌ ཏད༌པ༌ ཅོས༌ཏེ༌ ཐར༌པ༌ མི༌ཐོབ༌ཅེས༌ལ༌ ཤེ༌ཏན༌ ཡོངས༌ཏེ༌ ཁོང༌གུན༌ནི༌ སྙིང༌ངི༌ ནང༌ནེ༌ ཏེ༌བོ༌ ཀོགས༌ཏེ༌ ཁྱེར༌ར༌ནོག༌།
LUK 8:13 བྲག༌གི༌ཀ༌ ས༌འོན༌ བུད༌ཁན༌བོ༌ ནི༌ དཀོན༌མཆོག༌གི༌ བཀའ༌ ཚོར༌ར༌ཅིག༌ ཐད༌པོ༌ ཉམ༌པོ༌ ཏད༌པ༌ ཅོ༌ཁན༌གུན༌ ཨིན༌ནོག༌། ཏེ༌བོའ༌ པ༌ཀྲག༌ ཏིང༌ཅན༌ མེད༌ པ༌སང༌ ཁོང༌གུན༌ནི༌ ཏུས༌ ཉུ༌ངུན༌ཞིག༌གི༌ ཕིའ༌ ཏད༌པ༌ ཅོ༌རུག༌, ཡང༌ ཚོད༌ལྟའེ༌ ཏུས༌ལ༌ ཏད༌པ༌ ཕང༌ཨིན༌།
LUK 8:14 ཚེར༌མངས༌སི༌ ཕྲོའ༌ བུད༌ཁན༌ནི༌ ས༌འོན༌གུན༌ ནི༌, དཀོན༌མཆོག༌གི༌ བཀའ༌ ཚོར༌ཁན༌གུན༌ ཨིན༌ནོག༌ ཨིན༌ནའང༌ མི༌ཚེ༌ ཚེར༌ཁ༌, གྱུ༌ནོར༌ དང༌ སྐྱིད༌པོ༌ གུན༌ནི༌ ནན༌ཏེ༌ ཁོང༌གུན༌ནི༌ ཏད༌པ༌ ལྡན༌ན༌ མ༌ནོག༌།
LUK 8:15 ཨིན༌ནའང༌ ས༌ ཟང༌པོའེ༌ཀ༌ ས༌འོན༌ བུད༌ཁན༌བོ༌ ནི༌ སྙིང༌ ཟང༌པོ༌ དང༌ ཀྲང༌པོ༌ ཉམ༌པོ༌ དཀོན༌མཆོག༌གི༌ བཀའ༌ ཉན༌ཁན༌གུན༌ ཨིན༌ནོག༌ ཡང༌ ཟོད༌པ༌ ཉམ༌པོ༌ ཏེ༌བོ༌ སྟན༌པོ༌ ཐམས༌ཏེ༌ དུགས༌པ༌ བྲས༌བུ༌ མང༌པོ༌ སྨིན༌ན༌ནོག༌།”
LUK 8:16 “མི༌གུན༌ནི༌ འོད༌ ཏུགས༌ཏེ༌ གོར༌མོའེ༌ ཡོག༌ག༌ སྦས༌ཏེ༌ ཡ༌ ཉལ༌ཁྲི༌ ཡོག༌ག༌ མ༌བོར༌ར༌ ནང༌ང༌ ཡོང༌ཁན༌གུན༌ནི༌ ཏེ༌བོའེ༌ ལྡངས༌སི༌ ནང༌ང༌ ཐོང༌ཅེས༌ལ༌ འོད༌སྟག༌གི༌ཀ༌ བོར༌ཨིན༌།
LUK 8:17 སྦས༌ཏེ༌ བོར༌ཁན༌ ཚང༌མ༌ ཕི༌ལོག༌ག༌ ཕིང༌ང༌ ཛད༌ཨིན༌, ཡང༌ ཀབས༌ཏེ༌ བོར༌ཁན༌ ཚང༌མ༌ འོད༌དི༌ ནང༌ང༌ ཁྱོང༌ང༌ ཛད༌ཏེ༌ ཚང༌མ༌ སྔོན༌ཅུག༌ག༌ ཛད༌ཨིན༌།”
LUK 8:18 “ཏེ༌བོའེ༌ཕིའ༌ ཁྱོ༌ཞའེ༌ ཉན༌ཚུལ༌བོའེ༌ཀ༌ སྣང༌ང༌ ཏོང༌། ངའེ༌ ལབ༌ཞ༌ ཉན༌ཁན༌གུན༌ལ༌ མང༌ང༌ ཧ༌གོ༌ཅུག༌ག༌ ཛད༌ཨིན༌, ཨིན༌ནའང༌ མ༌ཉན༌ཁན༌གུན༌ནེ༌ ཧ༌གོ༌ཏེ༌ ཨིན༌ སམ༌ཁན༌བོའང༌ ཁྱེར༌ར༌ ཛད༌ཨིན༌།”
LUK 8:19 ཏེ༌ནེ༌ གཙོ༌བོ༌ ཡེ༌ཤུའི༌ ཨ༌མ༌ དང༌ ནོ༌གུན༌ ཁོང༌ ཐུག༌ག༌ ཡོངས༌, ཨིན༌ནའང༌ མི༌ཚོགས༌ ཆེན༌མོ༌ ཡོད༌ཅེས༌པོའེ༌ ཁོང༌ངི༌ དུན༌ལ༌ ལེབ༌ མ༌ཐུབ༌།
LUK 8:20 མི༌ཞིག༌གི༌ ཁོང༌ང༌ ཟེརས༌, “ཉེ༌རང༌ངི༌ ཨ༌མ༌ དང༌ ནོ༌གུན༌ ཉེ༌རང༌ ཐུག༌ག༌ ཕི༌ལོག༌ག༌ སྲུང༌ཏེ༌ དུག༌།”
LUK 8:21 ཡེ༌ཤུའི༌ ལན༌སལས༌, “དཀོན༌མཆོག༌གི༌ བཀའ༌ ཉན༌ཏེ༌ ལག༌ལེན༌ ཅོ༌ཁན༌གུན༌ ངའེ༌ ཨ༌མ༌ དང༌ ནོ༌གུན༌ ཨིན༌།”
LUK 8:22 ཞག༌ཤིག༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ང༌དང༌ ཚོའེ༌ ཕར༌ཀ༌ ཆེན༌།” ཏེ༌ནེ༌ ཁོང༌གུན༌ གྲུ༌ཟིང༌ཞིག༌གི༌ ནང༌ང༌ ཞོན༌ཏེ༌ སྐྱོདས༌།
LUK 8:23 གྲུ༌ཟིང༌ངི༌ ནང༌ང༌ ཆའ༌ ཟ༌ནེ༌ ཡེ༌ཤུ༌ ནལ༌ལ༌ སྐྱོདས༌། ནམ༌ཚུབས༌ཏེ༌ ཚོའེ༌ ནང༌ང༌ ལུང༌རག༌ ཀྲག༌པོ༌ ཡོངས༌ཏེ༌ གྲུ༌ཟིང༌ ཆུའི༌ གངས༌ཏེ༌ ནུབ༌ཅེས༌སི༌ ཇིགས༌ནང༌ ཡོད༌པིན༌།
LUK 8:24 ལོབ༌ཕྲུགས༌གུན༌ སོང༌ཏེ༌ ཡེ༌ཤུའི༌ ཉིད༌ཚད༌ད༌ ཛད༌ཏེ༌ ཟེརས༌, “སྤོན༌བོ༌ལེ༌, སྤོན༌བོ༌ལེ༌, ང༌ཞ༌གུན༌ ཆུའི༌ ནང༌ང༌ ནུབ༌ཏེ༌ ཤི༌ཅེས༌ དུག༌།” ཁོང༌ ཞངས༌ཏེ༌ ལུང༌རག༌ དང༌ ཆུལ༌བག༌ གུན༌ལ༌ ཁའ༌སྐྱེའ༌ ཛདས༌, ཏེན༌ན༌མལ༌ལ༌ ཏེ༌གུན༌ མེད༌ཁན༌ སོང༌ཏེ༌ ཞི༌དེ༌ ཇུང༌།
LUK 8:25 ཁོང༌ངི༌ ཁོང༌གུན༌ལ༌ མོལས༌, “ཁྱོ༌ཞའེ༌ ཏད༌པ༌ ཀ༌རུ༌ སོང༌།” ལོབ༌ཕྲུགས༌གུན༌ ཇིགས༌ཨིན༌ ཧ༌ལས༌ཏེ༌ ཅིག༌ དང༌ ཅིག༌ག༌ ཟེརས༌, “ཁོང༌ སུ༌ ཨིན༌ནོག༌? ཁོང༌ངི༌ བཀའ༌ སལ༌ལ༌ཅིག༌ ལུངས༌པོ༌ དང༌ ཚོའིང༌ ཁའ༌ ཉན༌དུག༌།”
LUK 8:26 ཏེ༌ནེ༌ ཁོང༌གུན༌ གྲུ༌ཟིང༌ངི༌ ནང༌ང༌ གཱ༌ལིལ༌ལི༌ ཡུལ༌ཇོངས༌ནེ༌ ཚོའེ༌ ཕར༌ཀ༌ ཡོད༌ཁན༌ནི༌ ག༌ད༌རཱའེ༌ ཡུལ༌ཇོངས༌ལ༌ ལེབ༌།
LUK 8:27 གཙོ༌བོ༌ ཡེ༌ཤུ༌ གྲུ༌ཟིང༌ནེ༌ བིང༌ང༌ ཛད༌ད༌ཅིག༌, ཏེན༌ན༌ གྲོང༌ཁྱེར༌རི༌ མི༌, རྡུད༌ ཞུགས༌ཁན༌ ཞིག༌ ཁོང༌ ཇལ༌ལ༌ལ༌ ཡོངས༌། ཁོ༌ ཏུས༌ མང༌པོ༌ཞིག༌ནེ༌ ཕར༌ལ༌ ཁང༌པ༌ མ༌དུག༌ག༌ རོམ༌ཁང༌གུན༌ནི༌ ནང༌ང༌ ལྗེར༌ཉལ༌ལ༌ དུག༌གད༌པིན༌།
LUK 8:28 ཁོའེ༌ ཡེ༌ཤུ༌ ཇལ༌ལ༌ཅིག༌ ཀུ༌ཅོ༌ སྲན༌ཏྲེ༌ ཏང༌ཨིན༌ ཡེ༌ཤུའི༌ ཞབས༌སི༌ དུན༌ལ༌ གྱེལ༌ཏེ༌ ཟེརས༌, “ཡེ༌ཤུ༌ དཀོན༌མཆོག༌ ཀུན༌ཝང༌ངི༌ སྲས༌, ཉེ༌རང༌ ངའེ༌ ལས༌སི༌ ནང༌ང༌ ཅིའ༌ དྲེས༌སད༌? ཇུ༌ཇུ༌ ང༌ ནགས༌ སྟན༌ན༌ མ༌ཛད༌”
LUK 8:29 ཅིའ༌ཟེར༌ན༌ ཡེ༌ཤུའི༌ རྡུད༌པོའ༌, མི༌བོའེ༌ ནང༌ནེ༌ བིང༌ཏེ༌ ཡོང༌ མོལ༌ཏེ༌ བཀའ༌ སལས༌། ༼མི༌བོའེ༌ རྐང༌ལག༌ ལྕག༌ཐགས༌ ཉམ༌པོ༌ ཅིངས༌ཏེ༌ སྲུང༌ཁན༌ དུགས༌ཏེའང༌ རྡུད༌པོའེ༌ ལན༌ མང༌པོ༌ ཁོའེ༌ཀ༌ ཝང༌ སྲུལ༌ཏེ༌ ལྕག༌ཐགས༌ ཅགས༌ཏེ༌ ཁོ༌ རི༌སྟོང༌ང༌ ཁྱེར༌རད༌པིན༌།༽
LUK 8:30 ཡེ༌ཤུའི༌ ཁོའ༌ ཏྲིའ༌ ཛདས༌, “ཁྱོ༌རང༌ངི༌ མིང༌ ཅི༌ ཨིན༌།” ཁོའེ༌ ལན༌ཏངས༌, “རྡུད༌ཚོགས༌” ཅིའ༌ཟེར༌ན༌ མི༌བོའེ༌ ནང༌ང༌ རྡུད༌ མང༌པོ༌ ཞུགས༌ཏེ༌ ཡོད༌པིན༌།
LUK 8:31 ཡང༌ ཏེ༌གུན༌ནི༌ ལན༌ མང༌པོ༌ ཡེ༌ཤུའ༌ ཁོང༌གུན༌ ཐའ༌ མ༌ནེ༌ མེད༌ཁན༌ནི༌ ས༌དོང༌ ཏིང༌ཅན༌ནི༌ ནང༌ང༌ ཕང༌ང༌ མི༌ཛད༌ཅེས༌ལ༌ ཇུ༌ཇུ༌ ཞུས༌།
LUK 8:32 ཏེ༌རུ༌ རི༌ཀ༌ ཕག༌གི༌ ཁྱུ༌ ཆེན༌མོ༌ཞིག༌ རྩཱ༌ ཟེན༌ ཡོད༌པིན༌། རྡུད༌གུན༌ནི༌ ཡེ༌ཤུའ༌ ཇུ༌ཇུ༌ ཞུས༌ཏེ༌ ཁོང༌གུན༌ ཏེ༌ ཕག༌གུན༌ནི༌ ནང༌ང༌ ཆ༌ཅུག༌ག༌ ཛད༌ཅེས༌ལ༌ ཟེརས༌, ཡེ༌ཤུའི༌ ཏེ༌གུན༌ལ༌ གོངས༌པ༌ སལ༌ལ༌ ཛདས༌།
LUK 8:33 ཏེ༌ནེ༌ རྡུད༌གུན༌ མི༌བོའེ༌ ནང༌ནེ༌ བིང༌ཏེ༌ ཕག༌གུན༌ནི༌ ནང༌ང༌ ཞུགས༌། ཡང༌ ཕག༌གི༌ ཁྱུ༌ རི༌ནེ༌ ཐུར༌ལ༌ བང༌ཏངས༌ཏེ༌ ཚོའེ༌ ནང༌ང༌ བུད༌ ཡང༌ ཆུའི༌ ནང༌ང༌ ནུབ༌ཏེ༌ ཤི༌།
LUK 8:34 ཕག༌ཚོ༌ཁན༌གུན༌ནི༌ ཇུང༌ཁན༌གུན༌ ཐོང༌ང༌ཅིག༌, གྲོང༌ཁྱེར༌ དང༌ ཉེ༌ཁོར༌རི༌ ནས༌ས༌གུན༌ལ༌ བང༌ཏངས༌ཏེ༌ སོང༌ ཡང༌ ཏེ༌གུན༌ ཤདས༌།
LUK 8:35 ཏེ༌ནེ༌ ཇུང༌ཁན༌གུན༌ ལྟའ༌ལ༌ མི༌གུན༌ སོང༌, ཡེ༌ཤུ༌ ཡོད༌ས༌ ལེབ༌བ༌ཅིག༌, རྡུད༌གུན༌ ཕིང༌ཁན༌ནི༌ མི༌བོ༌ ཡེ༌ཤུའི༌ ཞབས༌སི༌ དུན༌ལ༌ ཀོས༌ལག༌ གོན༌ཏེ༌ སྙོ༌ མ༌སྙོའ༌ དུགས༌ཏེ༌ ཐོང༌པ༌ ཁོང༌གུན༌ ཇིགས༌།
LUK 8:36 ཏེ༌ ཚང༌མ༌ ཐོང༌ཁན༌གུན༌ནི༌ རྡུད༌གུན༌ ཞུགས༌ཁན༌ནི༌ མི༌བོ༌ ཡེ༌ཤུའི༌ ཀ༌ཟུག༌གི༌ གྱལ༌ཅུག༌ག༌ ཛདས༌ཁན༌བོ༌ མི༌གུན༌ལ༌ ཞིབ༌སལ༌ ཅོས༌ཏེ༌ ཤདས༌།
LUK 8:37 ག༌ད༌རཱ༌ ཡུལ༌ཇོངས༌སི༌ མི༌ཚང༌མ༌ མ༌སྲན༌ཏྲེ༌ ཇིགས༌པ༌, ཁོང༌གུན༌ནི༌ ཡེ༌ཤུའ༌ ཁོང༌གུན༌ནི༌ ཡུལ༌ནེ༌ བིང༌ཏེ༌ སྐྱོད༌ ཟེརས༌། ཏེ༌ནེ༌ ཡེ༌ཤུ༌ དང༌ ལོབ༌ཕྲུགས༌གུན༌ གྲུ༌ཟིང༌ང༌ ཞོན༌ཏེ༌ ལོགས༌ཏེ༌ སྐྱོདས༌།
LUK 8:38 རྡུད༌གུན༌ ཕིང༌ཁན༌ནི༌ མི༌བོའེ༌ ཡེ༌ཤུའ༌, ཁོ༌ ཁོང༌ ཉམ༌པོ༌ ཡོང༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌, ཨིན༌ནའང༌ ཡེ༌ཤུའི༌ ཁོ༌ ལོགས༌ཏེ༌ ལམ༌ཅུག༌ག༌ ཛད༌ཏེ༌ མོལས༌,
LUK 8:39 “ཁང༌པ༌ ལོགས༌ཏེ༌ སོང༌, ཡང༌ མི༌ཚང༌མ༌ལ༌ ཁྱོ༌རང༌ངི༌ ཕིའ༌ དཀོན༌མཆོག༌གི༌ ཛད༌ཁན༌ ཚང༌མ༌ ཤོད༌།” ཏེ༌ནེ༌ ཁོ༌ སོང༌ཏེ༌ གྲོང༌ཁྱེར༌ གང༌པོའེ༌ ནང༌ང༌ ཡེ༌ཤུའི༌ ཁོའེ༌ ཕིའ༌ ཛད༌ཁན༌ ཚང༌མ༌ ཤདས༌།
LUK 8:40 ཚོའེ༌ འ༌ངོ༌ ཆོགས༌སི༌ ཕར༌ཀ༌ ལེབ༌བ༌ཅིག༌ མི༌ཚོགས༌ ཆེན༌མོ༌ཞིག༌གི༌ ཡེ༌ཤུའ༌ གའ༌སུས༌ ཞུས༌ ཅིའ༌ཟེར༌ན༌ ཁོང༌གུན༌ ཁོང༌ སྐྱོད༌ཅེས༌ལ༌ སྲུངས༌ཏེ༌ ཡོད༌པིན༌།
LUK 8:41 ཏེ༌ནེ༌ ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌ ཡའེ༌རས༌ ཟེར༌ཁན༌བོ༌ ཡོངས༌ཏེ༌ ཡེ༌ཤུའི༌ ཞབས༌སི༌ དུན༌ལ༌ གྱེལ༌ཏེ༌ ཇུ༌ཇུ༌ ཞུ༌ཨིན༌ ཁོའེ༌ ཁང༌པ༌ སྐྱོད༌ཅེས༌ལ༌ ཟེརས༌,
LUK 8:42 ཅིའ༌ཟེར༌ན༌ ཧ༌ལམ༌ ལོ༌ རྕུག༌ཉིས༌ ཆའ༌ཁན༌ནི༌ ཁོའེ༌ བུ༌མོ༌ ཅིག༌ཅིག༌པོ༌ ཤི༌ཀྱིས༌ ཡོད༌པིན༌། ཡེ༌ཤུ༌ ཁོ༌ ཉམ༌པོ༌ སྐྱོད༌ ཟ༌ནེ༌ མི༌ཚོགས༌ ཆེན༌མོའེ༌ ཁོང༌ང༌ ནན༌ཏེ༌ ཁྱོངས༌,
LUK 8:43 བུད༌ཁན༌ནི༌ ལོ༌ རྕུག༌ཉིས༌ནེ༌ ཕར༌ལ༌ ཏུས༌གྱུན༌ ཟུགས༌པོ༌ ཞིག༌ཅེས༌སི༌ ཟུ༌མོ༌ ཡོངས༌ཁན༌ནི༌ བུ༌མོ༌ཞིག༌ མི༌ཚོགས༌སི༌ ཕྲོའ༌ ཡོད༌པིན༌། སུ༌ཞིག༌གའང༌ ཁོ༌ ནད༌པོ༌ནེ༌ ཕན༌ཅུག༌ མ༌ཉན༌།
LUK 8:44 ཁོ༌ ཡེ༌ཤུའི༌ གྱབ༌ནེ༌ ཡོངས༌ཏེ༌ ཁོང༌ངི༌ ནམ༌ཟའེ༌ གྲུ༌ཞིག༌ག༌ ལག༌པ༌ ཏུག༌ག༌ཅིག༌, ཁོའེ༌ ཁྲག༌པོ༌ ཆད༌།
LUK 8:45 ཡེ༌ཤུའི༌ མོལས༌, “ངའ༌ སུའི༌ ལག༌པ༌ ཏུགས༌།” མི༌ཚང༌མའེ༌ ལག༌པ༌ མ༌ཏུགས༌པིན༌ ཟེརས༌, ཏེ༌ནེ༌ པི༌ཏྲར༌རི༌ ཟེརས༌, “སྤོན༌བོ༌ལེ༌, མི༌ཚོགས༌སི༌ ཉེ༌རང༌ ནན༌ཨིན༌ ཕུལ༌ཨིན༌ ཁྱོང༌དུག༌།”
LUK 8:46 ཨིན༌ནའང༌ ཡེ༌ཤུའི༌ མོལས༌, “སུ༌ཞིག༌གི༌ ང༌ ལག༌པ༌ ཏུགས༌ ཅིའ༌ཟེར༌ན༌ ངའེ༌ ནང༌ནེ༌ ཕན༌ཅུག༌ཁན༌ནི༌ སྟོབས༌ བིང༌ཏེ༌ ཆའ༌ཁན༌བོ༌ ང༌ ཚོར༌།”
LUK 8:47 ཏེ༌ནེ༌ བུ༌མོ༌བོའེ༌ ཏེ༌བོ༌ སྦས༌ཏེ༌ བོར༌ མི༌ཉན༌ན༌ནོག༌ སམ༌ཏེ༌, དར༌ཨིན༌ ཡེ༌ཤུའི༌ དུན༌ལ༌ ཡོངས༌ཏེ༌ ཁོང༌ངི༌ ཞབས༌སི༌ཀ༌ གྱེལས༌། མི༌ཚང༌མའེ༌ དུན༌ལ༌ ཁོའེ༌ ཡེ༌ཤུའ༌ ལག༌པ༌ ཅིའ༌ རྩེས༌པིན༌ ཡང༌ ལག༌པ༌ ཏུག༌ག༌ཅིག༌ ཏེན༌ན༌མལ༌ལ༌ ཁོའེ༌ ཟུ༌མོ༌ ཕན༌ཁན༌བོ༌ ཤདས༌།
LUK 8:48 ཏེ༌ནེ༌ ཡེ༌ཤུའི༌ ཁོའ༌ མོལས༌, “བུ༌མོ༌ ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌། ཞི༌དེའེ༌ ཉམ༌པོ༌ སོང༌།”
LUK 8:49 ཁོང༌ངི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌, དུ༌ཁང༌ངི༌ འུ༌སྐྱོང༌ ཡའེ༌རས༌སི༌ ཁང༌པ༌ནེ༌ མི༌ཞིག༌ ཡོངས༌ཏེ༌ ཁོའ༌ ཟེརས༌, “ཉེ༌རང༌ངི༌ བུ༌མོ༌བོ༌ ཤི༌། ཏ༌ ལོབ༌བོན༌ལེའ༌ འོབ༌གྱལ༌ སྟན༌ན༌ མ༌ཛད༌།”
LUK 8:50 ཏེ༌བོ༌ ཚོར༌ར༌ཅིག༌, ཡེ༌ཤུའི༌ ཡའེ༌རས༌ལ༌ མོལས༌, “ཇིགས༌ མ༌ཇིགས༌, ཏད༌པ༌ རང༌ ཅོས༌ ཁྱོ༌རང༌ངི༌ བུ༌མོ༌ གྱལ༌ཨིན༌།”
LUK 8:51 ཡེ༌ཤུ༌ ཡའེ༌རས༌སི༌ ཁང༌པ༌ ལེབ༌བ༌ཅིག༌, པི༌ཏྲར༌, ཡ༌ཀོབ༌, ཡོ༌ཧཱ༌ནན༌ དང༌ བུ༌མོའེ༌ ཕ༌མ༌ མ༌སྟོགས༌ ཞན༌སུ༌ཞིག༌གའང༌ ཁོང༌ ཉམ༌པོ༌ ཡོང༌ ཅུག༌ག༌ མ༌ཛདས༌།
LUK 8:52 ཏེན༌ན༌ ཏུས༌ལ༌ མི༌ཚང༌མ༌ ངུ༌ཨིན༌ ཉ༌ངན༌ ཅོའད༌པིན༌, ཡེ༌ཤུའི༌ ཁོང༌གུན༌ལ༌ མོལས༌, “མ༌ངུ༌, ཁོ༌ མ༌ཤིའ༌ ཉིད༌ལོགས༌ཏེ༌ ཨིན༌།”
LUK 8:53 ཁོང༌གུན༌ནི༌ ཁྲེལ༌གོད༌ ཏངས༌ ཅིའ༌ཟེར༌ན༌ ཁོང༌གུན༌ལ༌ བུ༌མོ༌ ཤི༌ཏེ༌ ཨིན༌ཁན༌ གྱུས༌ཡོད༌པིན༌།
LUK 8:54 ཨིན༌ནའང༌ ཡེ༌ཤུའི༌ བུ༌མོའེ༌ ལག༌པ༌ ཐམས༌ས༌ ཛད༌ཏེ༌ ཁོའ༌ མོལས༌, “ངའེ༌ ཕྲུ༌གུ༌, ལོངས༌།”
LUK 8:55 ཏེན༌ན༌མལ༌ལ༌ བུ༌མོའེ༌ སེམས༌ཉིད༌ ལོགས༌ཏེ༌ ཡོངས༌པ༌ ཁོ༌ ཀོའག༌ ལངས༌ ཡང༌ ཡེ༌ཤུའི༌ ཁོང༌གུན༌ལ༌ བུ༌མོ༌བོའ༌ ཅི༌ཏོང༌ཤིག༌ ཟའ༌ ཏང༌ཅེས༌ལ༌ མོལས༌།
LUK 8:56 ཕ༌མ༌གུན༌ མ༌སྲན༌ཏྲེ༌ ཧ༌ལས༌ ཨིན༌ནའང༌ ཡེ༌ཤུའི༌ ཁོང༌གུན༌ལ༌ ཇུང༌ཁན༌བོ༌ སུའང༌ མི༌ཤད༌ཅེས༌ལ༌ བཀའ༌ སལས༌།
LUK 9:1 གཙོ༌བོ༌ ཡེ༌ཤུའི༌ ལོབ༌ཕྲུགས༌ རྕུག༌ཉིས༌པོའ༌ བོད༌ད༌ ཛད༌ཏེ༌ རྡུད༌ ཞུགས༌ཁན༌གུན༌ནི༌ ནང༌ནེ༌ རྡུད༌ ཚང༌མ༌ ཕིང༌ཅེས༌ དང༌ ནད༌ ཕན༌ཅུག༌ཅེས༌སི༌ ཁྱུད༌ དང༌ ཝང༌ཆ༌ སལ༌ལ༌ ཛདས༌།
LUK 9:2 ཡང༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌ཅེས༌ དང༌ ཟུ༌མོ༌ ཡོང༌ཁན༌གུན༌ ཕན༌ཅུག༌ཅེས༌ལ༌ ཏེ༌ཀ༌ནེ༌ ལམ༌ཅུག༌ག༌ ཛདས༌།
LUK 9:3 ཁོང༌གུན༌ལ༌ མོལས༌, “ཁྱོ༌རང༌གུན༌ནི༌ བེས༌སི༌ ཕིའ༌ གྲུལ༌ཅེས༌སི༌ བེར༌ཀ༌, ཡ༌ ཇོ༌ལ༌, ཡ༌ ཁར༌ཇི༌ ཡ༌ པེ༌ནེ༌ ཡ༌ ཀོས༌ལག༌ ཐེ༌བ༌ མ༌ཁུར༌།
LUK 9:4 ཁྱོ༌ཞའ༌ དུག༌ས༌ ཏང༌ཁན༌ནི༌ ཏེན༌ན༌ ཁང༌པའེ༌ ནང༌ང༌ དུག༌ ནམ༌ ཚོག༌པ༌ ཏེ༌ གྲོང༌ཁྱེར༌ནེ༌ བིང༌ཏེ༌ མི༌ཆའ༌།
LUK 9:5 ཀལ༌ཏེས༌ གྲོང༌ཁྱེར༌ཞིག༌གི༌ ནང༌ང༌ སུ༌ཞིག༌གིའང༌ ཁྱོ༌ཞའ༌ གའ༌སུས༌ མ༌ཅོ༌ན༌, ཏེ༌ གྲོང༌ཁྱེར༌ནེ༌ བིང༌ཏེ༌ ཆའ༌ ཟ༌ནེ༌ རང༌ངི༌ པ༌བུའི༌ ཐལ༌བ༌ སྲུགས༌ཏེ༌ ཁོང༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཁན༌བོ༌ སྟོན༌།”
LUK 9:6 ཁོང༌གུན༌ གམ༌ཡུལ༌ནེ༌ གམ༌ཡུལ༌ལ༌ སྐྱོད༌ཏེ༌ ཀ༌རུང༌ས༌ གའ༌མོའེ༌ ནས༌ཚུལ༌ ཤདས༌ ཡང༌ ཟུ༌མོ༌ ཡོང༌ཁན༌གུན༌ ཕན༌ཅུག༌ག༌ ཛདས༌།
LUK 9:7 ཀའ༌ལོན༌ ཧེ༌རོད༌ལ༌ ཡེ༌ཤུའི༌ ཛད༌ཁན༌ ཚང༌མ༌ ཚོར༌པ༌ ཐ༌མ༌ཐེ༌ཚོམས༌ སོང༌ ཅིའ༌ཟེར༌ན༌ ཁ༌ཅིག༌གི༌ ཡོ༌ཧཱ༌ནན༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཨིན༌ནོག༌ ཟེར༌རད༌པིན༌།
LUK 9:8 ཞན༌ ཁ༌ཅིག༌གི༌ སྔུན༌མའེ༌ ལུང༌སྟོན༌པ༌ ཨེ༌ལི༌ཡཱ༌ སྔོན༌ཏེ༌ ཨིན༌ནོག༌ ཡང༌ ཁ༌ཅིག༌གི༌ སྔུན༌མའེ༌ ལུང༌སྟོན༌པ༌གུན༌ནི༌ ཕྲོ༌ནེ༌ ཅིག༌ སོན༌ཏེའ༌ ལངས༌ཏེ༌ ཨིན༌ནོག༌ ཟེརས༌།
LUK 9:9 ཧེ༌རོད༌དི༌ ཟེརས༌, “ངའེ༌ ཡོ༌ཧཱ༌ནན༌ནི༌ གོ༌ ཅད༌ཅུགས༌ཏེ༌ ཨིན༌པིན༌། ཏེ༌ནེ༌ འི༌བོ༌ སུ༌ ཨིན༌ནོག༌ ཀ༌བོའེ༌ སྐོར༌ལ༌ ང༌ ཧ༌ལས༌ཤེས༌སི༌ སྤེ༌ར༌གུན༌ ཚོར༌ཨིན༌ ཨིན༌ནོག༌” ཡང༌ ཁོའེ༌ ཡེ༌ཤུ༌ ཐོང༌ཅེས༌སི༌ སྐབ༌ཞིག༌ ཙལ༌ལད༌པིན༌།
LUK 9:10 གཙོ༌བོ༌ ཡེ༌ཤུའི༌ སྐུ༌ཚབས༌གུན༌ ལོག༌ཏེ༌ ཡོངས༌ཏེ༌ ཁོང༌གུན༌ནི༌ ཅོས༌ཁན༌ ཚང༌མའེ༌ སྐོར༌ལ༌ ཤདས༌, ཡང༌ ཡེ༌ཤུའི༌ ཁོང༌གུན༌ ཅིག༌པོ༌ ཁྲིད༌ཏེ༌ བེད༌སའི༌ད༌ ཟེར༌ཁན༌ནི༌ གྲོང༌ཁྱེར༌ལ༌ སྐྱོདས༌།
LUK 9:11 ཨིན༌ནའང༌ མི༌ཚོགས༌ལ༌ ཏེ༌བོ༌ གྱུས༌སོང༌ཏེ༌ ཁོང༌ངི༌ སྟིང༌རང༌ནེ༌ བྲངས༌ཏེ༌ སོང༌། ཡེ༌ཤུའི༌ ཁོང༌གུན༌ལ༌ གའ༌སུས༌ ཞུས༌ཏེ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ད༌ ཛདས༌ ཡང༌ ཁོང༌ངི༌ ཟུ༌མོ༌ ཡོངས༌ཏེ༌ ཡོད༌ཁན༌གུན༌ ཕན༌ཅུག༌ག༌ ཛདས༌།
LUK 9:12 ཉི༌མ༌ གོར༌གོར༌ལ༌, ལོབ༌ཕྲུགས༌ རྕུག༌ཉིས༌པོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, “ཉེ༌ཁོར༌རི༌ ནས༌ས༌ དང༌ གམ༌ཡུལ༌གུན༌ལ༌ སོང༌ཏེ༌ ཁོ༌རང༌གུན༌ནི༌ ཕིའ༌ ཟན༌ ཉོ༌ཅེས༌ ཡང༌ དུག༌ས༌ ཙལ༌ཅེས༌ལ༌ མི༌ཚོགས༌པོ༌ ལམ༌ཅུག༌ག༌ ཛད༌དའང༌ ཅིའ༌ཟེར༌ན༌ ང༌དང༌གུན༌ ཅའང༌ མེད༌སའེ༌ རི༌སྟོང༌ངི༌ ནང༌ང༌ ཨིན༌ནོག༌།”
LUK 9:13 ཡེ༌ཤུའི༌ མོལས༌, “ཁྱོ༌ཞའེ༌ ཁོང༌གུན༌ལ༌ ཟའ༌ཅེས༌ ཏོང༌།” ཁོང༌གུན༌ནི༌ ལན༌ཏངས༌, “ང༌ཞའ༌ འི༌ མི༌ཚོགས༌ལ༌ གབ༌ཅེས༌སི༌ ཟན༌ ཉོའ༌ སོང༌ཏེ༌ མ༌ནེ༌, ང༌ཞའེ༌ ལག༌ག༌ ཏ༌གི༌ ལྔ༌ དང༌ ཉ༌ ཉིས༌ མ༌ནེ༌ མེད༌”
LUK 9:14 ཏེ༌རུ༌ ཡོད༌ཁན༌ནི༌ བུ༌ཚ༌གུན༌ ནི༌ ཀྲངས༌ཀ༌ སྟོང༌ལྔ༌ ཟམ༌ཤིག༌ ཡོད༌པིན༌། ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “ཏ༌ ཚང༌མ༌ ཧ༌ལམ༌ ལྔབ༌ཅུ༌ ལྔབ༌ཅུའི༌ སྡེ༌ ཅོས༌ཏེ༌ དུག༌ཅུག༌།”
LUK 9:15 ཏེ༌ནེ༌ ཁོང༌ངི༌ མོལ༌ཁན༌ ནང༌ཞིན༌ ཁོང༌གུན༌ནི༌ མི༌ཚང༌མ༌ དུག༌ཅུགས༌།
LUK 9:16 ཡེ༌ཤུའི༌ ཏ༌གི༌ ལྔ༌ དང༌ ཉ༌ ཉིས༌པོ༌ ཆག༌ག༌ ནམས༌ ཡང༌ ནམ༌ཁའ༌ ཟིགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌, ཏ༌གི༌ ཅགས༌ཏེ༌ མི༌ཚོགས༌ལ༌ བགོ༌ཅེས༌སི༌ ཕིའ༌ ལོབ༌ཕྲུགས༌གུན༌ལ༌ སལ༌ལ༌ ཛདས༌།
LUK 9:17 ཁོང༌ ཚང༌མ༌ གྲང༌གྲང༌ ཟོས༌ ཡང༌ ལོབ༌ཕྲུགས༌གུན༌ནི༌ ལག༌ལུས༌གུན༌ ལྡུས༌པ༌ པག༌ཙེ༌ རྕུག༌ཉིས༌ གང༌།
LUK 9:18 ཞག༌ཤིག༌ གཙོ༌བོ༌ ཡེ༌ཤུ༌ ཅིག༌པོ༌ མོས༌ལམ༌ ཞུའ༌ སྐྱོདས༌ ཁོང༌ངི༌ ལོབ༌ཕྲུགས༌གུན༌ ཁོང༌ངི༌ ཉེ༌མོའ༌ ཡོད༌པིན༌, ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “མི༌གུན༌ནི༌ ང༌ སུ༌ ཨིན༌ནོག༌ ཟེར༌དུག༌?”
LUK 9:19 ཁོང༌གུན༌ནི༌ ལན༌ཏངས༌, “ཁ༌ཅིག༌གི༌ ཁྲུས༌སལ༌ཁན༌ ཡོ༌ཧཱ༌ནན༌, ཁ༌ཅིག༌གི༌ ལུང༌སྟོན༌པ༌ ཨེ༌ལི༌ཡཱ༌, ཡང༌ ཞན༌མ༌གུན༌ནི༌ ལུང༌སྟོན༌པ༌ ཤི༌ཁན༌གུན༌ནི༌ ཕྲོ༌ནེ༌ ཅིག༌ཅིག༌ སོང༌ཏེའ༌ ལངས༌ཏེ༌ ཨིན༌ནོག༌ ཟེར༌དུག༌།”
LUK 9:20 ཡེ༌ཤུའི༌ མོལས༌, “ཁྱོ༌ཞའེ༌ ང༌ སུ༌ ཨིན༌ནོག༌ ཟེར༌རད༌།” པི༌ཏྲར༌རི༌ ལན༌ཏངས༌, “ཉེ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཞུགས༌ཏེ༌ ཨིན༌ནོག༌།”
LUK 9:21 ཡེ༌ཤུའི༌ ཁོང༌གུན༌ལ༌ ཏེ༌ སྤེ༌ར༌གུན༌ སུའང༌ མི༌ཤད༌ཅེས༌ལ༌ བཀའ༌ སལས༌།
LUK 9:22 ཁོང༌ངི༌ མོལས༌, “ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཀ༌ནེ༌ མི༌རིགས༌སི༌བུའ༌ རྡུག༌ངལ༌ མང༌པོ༌ ཉོངས༌ཏེ༌ ཤི༌གོ༌ཤེས༌ ཡང༌ ཞག༌ སུམ༌པའེ༌ ཞག༌ག༌ སོན༌པོ༌ ལང༌ཨིན༌།”
LUK 9:23 ཏེ༌ནེ༌ ཁོང༌ངི༌ ཁོང༌ ཚང༌མ༌ལ༌ མོལས༌, “ངའེ༌ སྟིང༌རང༌ནེ༌ ཡོང༌ང༌ ཐད༌ཁན༌གུན༌, རང༌དོད༌ ཕངས༌ཏེ༌ ཞག༌ཏང༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའ༌ བྲངས༌གོས༌།
LUK 9:24 རང༌སྲོག༌ སྐྱོབ༌ཉིན༌ ཡོད༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ནི༌ དེན༌བའེ༌ མི༌ཚེ༌བོ༌ སྐྱོབ༌ཨིན༌།
LUK 9:25 མི༌ཞིག༌ག༌ ཇིག༌རྟེན༌ གང༌པོ༌ ཐོབ༌ཏེའང༌ རང༌ངི༌ དེན༌བའེ༌ མི༌ཚེ༌ སྐྱལ༌ན༌ ཅི༌ ཕན༌ཐོགས༌།
LUK 9:26 ཀལ༌ཏེས༌ སུ༌ཞིག༌གི༌ ང༌ དང༌ ངའེ༌ ལབ༌ཞའེ༌ སྤང༌པོ༌ ཏང༌ཅེས༌ལ༌ ཁྲེལ༌བ༌ ཚོར༌ན༌, ང༌ མི༌རིགས༌སི༌བུ༌ ང༌རང༌ངི༌ ཟིར༌རྗིད༌ དང༌ ཡབ༌བི༌ ཟིར༌རྗིད༌དི༌ ནང༌ང༌ ཏམ༌པའེ༌ ཕོ༌ཉ༌གུན༌ ཉམ༌པོ༌ ལོགས༌ཏེ༌ ཡོང༌ ཟ༌ནེ༌, ངེའང༌ ཁོའེ༌ཀ༌ ཁྲེལ༌བ༌ ཚོར༌ཨིན༌།
LUK 9:27 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ཀ༌ ཡོད༌ཁན༌ ཁ༌ཅིག༌གི༌ དཀོན༌མཆོག༌གི༌ གྱལ༌སྲིད༌ ཐོང༌ཏེ༌ མ༌ནེ༌ མི༌ཤི༌།”
LUK 9:28 ཏེ༌གུན༌ མོལ༌ཏེ༌ ཧ༌ལམ༌ ཞག༌ རྒྱད༌དི༌ སྟིང༌ནེ༌ ཡེ༌ཤུའི༌ པི༌ཏྲར༌, ཡོ༌ཧཱ༌ནན༌ དང༌ ཡ༌ཀོབ༌ ཁྲིད༌ཏེ༌ རི༌ཞིག༌གི༌ཀ༌ མོས༌ལམ༌ ཞུའ༌ལ༌ སྐྱོདས༌།
LUK 9:29 མོས༌ལམ༌ ཞུ༌ཨིན༌ ཡོད༌ ཟ༌ནེ༌ ཁོང༌ངི༌ ཞལ༌དོང༌ངི༌ ནང༌ང༌ གྱུར༌ཇ༌ ཡོངས༌, ཡང༌ ཁོང༌ངི༌ ནམ༌ཟའ༌ ལྟ༌མི༌ཉན༌ཅེས༌ འོད༌ཅན༌ ཀར༌པོ༌ གྱུར༌།
LUK 9:30 ཧུན༌མེད༌ལ༌ ཁོང༌གུན༌ནི༌ མི༌ ཉིས༌, མོ༌ཟེས༌ དང༌ ཨེ༌ལི༌ཡཱའེ༌ ཡེ༌ཤུ༌ ཉམ༌པོ༌ ཞལ༌ཏ༌ སལ༌ཨིན༌ ཇལ༌།
LUK 9:31 ཟིར༌རྗིད༌དི༌ ནང༌ང༌ ཁོང༌གུན༌ནི༌ ཡེ༌ཤུ༌ ཇིག༌རྟེན༌ནེ༌ སྐྱོད༌ཅེས༌སི༌ སྐོར༌ལ༌ མོལ༌ལ༌ ཛད༌ཨིན༌ ཚོར༌, ཀ༌བོ༌ ཡེ༌རུ༌ཤ༌ལེམ༌མི༌ ནང༌ང༌ ཁོང༌ངི༌ གྱོགས༌པ༌ གྲུབ༌ཅུག༌ག༌ ཛད༌ཨིན༌།
LUK 9:32 པི༌ཏྲར༌ དང༌ ཁོའེ༌ ཕྲོ༌པ༌གུན༌ ཉིད༌ལ༌ ཆེན༌ ཡོད༌པིན༌, ཨིན༌ནའང༌ ཉིད༌ ཚད༌ད༌ཅིག༌ ཁོང༌གུན༌ནི༌ ཡེ༌ཤུའི༌ ཟིར༌རྗིད༌ དང༌ ཁོང༌ ཉམ༌པོ༌ ཞངས༌ཏེ༌ ཡོད༌ཁན༌ནི༌ མི༌ ཉིས༌ཀོ༌ ཇལ༌།
LUK 9:33 ཡང༌ མོ༌ཟེས༌ དང༌ ཨེ༌ལི༌ཡཱ༌ ཡེ༌ཤུ༌ནེ༌ བེ༌ཏེ༌ སྐྱོད༌ ཟ༌ནེ༌ པི༌ཏྲར༌རི༌ ཡེ༌ཤུའ༌ ཟེརས༌, “སྤོན༌བོ༌ལེ༌, ང༌ཞའ༌ འི༌ཀ༌ ཡོད༌ཅེས༌པོ༌ གྱལ༌ལ༌ སོང༌། ང༌ཞའེ༌ ཞུགས༌ས༌ སུམ༌ རྩིག༌ཨིན༌, ཉེ༌རང༌ངི༌ ཕིའ༌ ཅིག༌, མོ༌ཟེས༌སི༌ ཕིའ༌ ཅིག༌, ཡང༌ ཨེ༌ལི༌ཡཱའེ༌ ཕིའ༌ ཅིག༌།” ཁོའ༌ ཅི༌ ཟེར༌གོ༌ཤེས༌པོ༌ ཧ༌མ༌གོ༌པ༌, ཁོའེ༌ ཏེ༌བོ༌ ཟེརས༌།
LUK 9:34 ཁོའེ༌ ཏེ༌གུན༌ ཟེར༌ཨིན༌ ཡོད༌ ཟ༌ནེ༌ སྲིན༌ཞིག༌ བབས༌ཏེ༌ ཁོང༌གུན༌ ཀབས༌, སྲིན༌ནི༌ ཀབ༌ཨིན༌ ཡོད༌ ཟ༌ནེ༌ ཁོང༌གུན༌ སྲན༌ཏྲེ༌ ཇིགས༌།
LUK 9:35 ཏེ༌ནེ༌ སྲིན༌ནི༌ ནང༌ནེ༌ སུང༌སྐད༌ཅིག༌གི༌ མོལས༌, “འི༌བོ༌ ངའེ༌ སྲས༌ ང༌རང༌ངི༌ ལྡམ༌ཁན༌བོ༌ ཨིན༌, ཁོའེ༌ ཟེར༌ཁན༌གུན༌ལ༌ ཉོན༌།”
LUK 9:36 སུང༌སྐད༌པོ༌ ཚར༌ར༌ཅིག༌, ཁོང༌གུན༌ནི༌ ཡེ༌ཤུ༌ ཅིག༌པོ༌ མ༌སྟོགས༌ སུའང༌ མ༌ཇལ༌། ལོབ༌ཕྲུགས༌གུན༌ནི༌ ཐོང༌ཁན༌ དང༌ ཚོར༌ཁན༌གུན༌ ཏེ༌ཏུས༌ལ༌ སུའང༌ མ༌ཤད༌ད༌ སངས༌ཏེ༌ བོརས༌།
LUK 9:37 སྟིང༌མ༌ཞག༌ག༌ ཁོང༌གུན༌ རི༌ནེ༌ བབས༌ཏེ༌ སྐྱོད༌ད༌ཅིག༌, མི༌ཚོགས༌ ཆེན༌མོ༌ཞིག༌ ཡེ༌ཤུ༌ ཐུག༌ག༌ལ༌ ཡོངས༌།
LUK 9:38 མི༌ཚོགས༌སི༌ ཕྲོ༌ནེ༌ མི༌ཞིག༌གི༌ ཀུ༌ཅོ༌ ཏང༌ཨིན༌ ཟེརས༌, “ལོབ༌བོན༌ལེ༌, ཇུ༌ཇུ༌ ངའེ༌ བུ༌ཚ༌ ཕན༌ཅུག༌ག༌ ཛད༌དའང༌, ཁོ༌ ངའེ༌ ཕྲུ༌གུའ༌ ཅིག༌ཅིག༌པོ༌ ཨིན༌།
LUK 9:39 རྡུད༌པོ༌ ངའེ༌ བུ༌ཚའེ༌ ནང༌ང༌ ཞུགས༌ས༌ཅིག༌ ཁོའེ༌ ཀུ༌ཅོ༌ སྲན༌ཏྲེ༌ ཏང༌དུག༌ ཡང༌ ཁོ༌ ས༌ གྱབས༌ཏེ༌ ཟུགས༌པོ༌ གང༌པོ༌ དར༌ཨིན༌ ཁའ༌ནེ༌ སྦོའ༌ བིང༌དུག༌། ཏུས༌ མང༌ཆེའ༌ རྡུད༌པོ༌ ཁོའེ༌ ནང༌ང༌ དུགས༌ཏེ༌ ཁོའ༌ ནགས༌ སྲན༌ཏྲེ༌ སྟན༌དུག༌།
LUK 9:40 ཉེ༌རང༌ངི༌ ལོབ༌ཕྲུགས༌གུན༌ལ༌ རྡུད༌པོ༌ ཕིང༌ ཇུ༌ཇུ༌ ཟེར༌ཏེ༌ ཞུ༌ཝ༌ ཕུལ༌པིན༌ ཨིན༌ནའང༌ ཁོང༌གུན༌ལ༌ ཏེ༌བོ༌ ཕིང༌ མ༌ཉན༌།”
LUK 9:41 ཡེ༌ཤུའི༌ མོལས༌, “ཏད༌པ༌ མེད༌ཁན༌ དང༌ མི༌རབས༌ ངན༌པ༌, ནམ༌ཚོག༌པ༌ ང༌ ཁྱོ༌ཞ༌གུན༌ ཉམ༌པོ༌ དུག༌? ནམ༌ཚོག༌པ༌ ངའེ༌ ཁྱོ༌རང༌གུན༌ལ༌ སྲན༌གོས༌? ཁྱོ༌རང༌ངི༌ བུ༌ཚ༌བོ༌ འི༌ཀ༌ ཁྱོང༌།”
LUK 9:42 བུ༌ཚ༌བོ༌ ཡོང༌ ཟ༌ནེ༌ རྡུད༌པོའེ༌ ཁོ༌ ས༌ གྱབས༌ཏེ༌ ཟུགས༌པོ༌བོ༌ དར༌ཨིན༌ ལུས༌། ཨིན༌ནའང༌ ཡེ༌ཤུའི༌ རྡུད༌པོའ༌ ཁའ༌སྐྱེའ༌ ཛད༌ཏེ༌ བུ༌ཚ༌བོ༌ ཕན༌ཅུག༌ག༌ ཛདས༌ ཡང༌ ཁོ༌ ཁོ༌རང༌ངི༌ ཨ༌བའ༌ སྟདས༌།
LUK 9:43 ཁོང༌ ཚང༌མ༌ དཀོན༌མཆོག༌གི༌ ཆག༌ལས༌ ཇིགས༌པོ༌ ཐོང༌ཏེ༌ ཧ༌ལས༌། མི༌ཚང༌མའེ༌ ཡེ༌ཤུའི༌ ཛད༌ཁན༌ ཚང༌མ༌ ཧ༌ལས༌ཏེ༌ ལྟེན༌ ཡོད༌ ཟ༌ནེ༌, ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌,
LUK 9:44 “ངའེ༌ ཟེར༌ཅེས༌ཅན༌བོའ༌ གྱལ༌ལ༌ ཅོས༌ཏེ༌ ཉོན༌: མི༌རིགས༌སི༌བུའ༌ ངོ༌ལོག༌ ཅོས༌ཏེ༌ གྲ༌འོ༌གུན༌ནི༌ ལག༌ག༌ སྟད༌ཨིན༌།”
LUK 9:45 ཨིན༌ནའང༌ ཁོང༌གུན༌ལ༌ ཡེ༌ཤུའི༌ མོལ༌ཁན༌བོ༌ ཧ༌མ༌གོ༌ ཅིའ༌ཟེར༌ན༌ ཏེ༌གུན༌ སང༌ཝའེ༌ ནང༌ང༌ བོར༌ར༌ ཛད༌ཏེ༌ ཨིན༌པིན༌, ཡང༌ ཁོང༌གུན༌ལ༌ ཏེ༌བོའེ༌ ཏོན༌བོ༌ ཏྲི༌ཅེས༌སི༌ ཧམ༌པ༌ མ༌ཡོངས༌།
LUK 9:46 ལོབ༌ཕྲུགས༌གུན༌ནི༌ ནང༌ང༌ ཁོ༌རང༌གུན༌ནི༌ ཕྲོ༌ནེ༌ ཀྲག༌ཤོག༌ སུ༌ ཨིན༌ ཟེར༌ཨིན༌ ཟེར༌ཟེར༌ གོ༌ཟུག༌།
LUK 9:47 གཙོ༌བོ༌ ཡེ༌ཤུའི༌ ཁོང༌གུན༌ནི༌ སམ༌བ༌ ཁྱེན༌པ༌ ཁོང༌ངི༌ ཕྲུ༌གུ༌ ཆུ༌ངུན༌ཞིག༌ ཁྱོངས༌ཏེ༌ ཁོང༌རང༌ངི༌ ལྡོའ༌ ལང༌ཅུག༌ག༌ ཛདས༌།
LUK 9:48 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ མིང༌ངི༌ ནང༌ང༌ སུ༌ཞིག༌གི༌ འི༌ ཕྲུ༌གུ༌ ཙོགས༌ཤིག༌ག༌ གའ༌སུས༌ ཅོ༌ན༌ ངའ༌ གའ༌སུས༌ ཅོས༌ཏེ༌ ཨིན༌ ཡང༌ སུ༌ཞིག༌གི༌ ངའ༌ གའ༌སུས༌ ཅོ༌ན༌ ང༌ ཀལ༌ལ༌ ཛད༌ཁན༌ནི༌ ཡབ༌བ༌ གའ༌སུས༌ ཞུས༌ཏེ༌ ཨིན༌། ཁྱོ༌ཞའེ༌ ཕྲོ༌ནེ༌ ཆུང༌ཤོག༌པོ༌ ཀྲག༌ཤོག༌ ཨིན༌།”
LUK 9:49 ཡོ༌ཧཱ༌ནན༌ནི༌ ཟེརས༌, “གཙོ༌བོ༌, མི༌ཞིག༌གི༌ ཉེ༌རང༌ངི༌ ཚན༌ ཁུར༌ཏེ༌ རྡུད༌ ཕིང༌ང༌ ང༌ཞའེ༌ ཐོང༌, ཡང༌ ང༌ཞའེ༌ ཁོའ༌ ཏེ༌བོ༌ ཅོ༌ མི༌ཅུག༌ཅེས༌སི༌ རྩོན༌གྲུས༌ ཅོས༌པིན༌ ཅིའ༌ཟེར༌ན༌ ཁོ༌ ང༌དང༌ངི༌ ཕྲོ༌པ༌ མན༌པིན༌།”
LUK 9:50 ཨིན༌ནའང༌ ཡེ༌ཤུའི༌ མོལས༌, “ཁོའ༌ སྒག༌ མ༌སྒག༌, སུ༌ཞིག༌གི༌ ཁྱོ༌ཞའེ༌ གྱབ༌གལ༌ མ༌ཅོ༌ན༌ ཁོ༌ ཁྱོ༌ཞའེ༌ ཆོགས༌ལ༌ ཨིན༌ནོག༌།”
LUK 9:51 གཙོ༌བོ༌ ཡེ༌ཤུ༌ ནམ༌ཁའ༌ ལེན༌ཅེས༌སི༌ ཏུས༌ ཉེ༌མོ༌ ལེབ༌པ༌ སེམས༌སི༌ ནང༌ང༌ ཐེ༌ཚོམས༌ མ༌ཛད༌ད༌ ཁོང༌ ཡེ༌རུ༌ཤ༌ལེམ༌ ཆོགས༌ལ༌ སྐྱོད༌ད༌ ཛདས༌།
LUK 9:52 ཁོང༌ངི༌ ལོན༌ ཁྱེར༌ཁན༌ ཁག༌ཅིག༌ སྔུན༌ལ༌ ལམ༌ཅུག༌ག༌ ཛདས༌, ཆེན༌ ཡོད༌ ཟ༌ནེ༌ ཁོང༌གུན༌ ས༌མར༌རི༌ཡཱ༌ ཡུལ༌ཇོངས༌སི༌ གམ༌ཡུལ༌ཞིག༌ག༌ སོང༌ཏེ༌ ཡེ༌ཤུ༌ མི༌གུན༌ ཉམ༌པོ༌ ཐུག༌ཅེས༌ལ༌ གྲལ༌གྲིག༌ ཅོས༌།
LUK 9:53 ཨིན༌ནའང༌ ཏེ༌ གམ༌ཡུལ༌པ༌གུན༌ནི༌ ཁོང༌ང༌ གའ༌སུས༌ མ༌ཞུས༌ ཅིའ༌ཟེར༌ན༌ ཁོང༌ ཡེ༌རུ༌ཤ༌ལེམ༌མ༌ སྐྱོད༌ད༌ ཛད༌ཅེས༌པོ༌ ཁོང༌གུན༌ལ༌ གྱུས༌སོང༌།
LUK 9:54 ཁོང༌ངི༌ ལོབ༌ཕྲུགས༌ ཡ༌ཀོབ༌ དང༌ ཡོ༌ཧཱ༌ནན༌ནི༌ ཏེ༌བོ༌ ཐོང༌ང༌ཅིག༌ ཟེརས༌, “གཙོ༌བོ༌, ཉེ༌རང༌ ཐུགས༌ཐད༌ན༌ ང༌ཞའེ༌ ནམ༌ཁའ༌ནེ༌ མེ༌ བབས༌ཏེ༌ ཁོང༌གུན༌ མེད༌ཁན༌ ཅོ༌ཅེས༌ལ༌ བཀའ༌ ཏང༌ངའ༌?”
LUK 9:55 ཨིན༌ནའང༌ ཡེ༌ཤུའི༌ ཁོང༌ ཆོགས༌ལ༌ གྱུར༌ར༌ ཛད༌ཏེ༌ ཁའ༌སྐྱེའ༌ ཛདས༌།
LUK 9:56 ཏེ༌ནེ༌ ཁོང༌གུན༌ ཞན༌ གམ༌ཡུལ༌ཞིག༌ག༌ སྐྱོདས༌།
LUK 9:57 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ལམ༌ནེ༌ སྐྱོད༌ ཟ༌ནེ༌ མི༌ཞིག༌གི༌ ཡེ༌ཤུའ༌ ཟེརས༌, “ཉེ༌རང༌ ཀ༌རུ༌ སྐྱོད༌ནའང༌ ང༌ ཉེ༌རང༌ང༌ བྲངས༌ཏེ༌ ཡོང༌ཨིན༌།”
LUK 9:58 ཡེ༌ཤུའི༌ ལན༌སལས༌, “ཝ༌ཙེའ༌ ཝ༌ཚངས༌ དང༌, ནམ༌ཁའེ༌ ཅ༌ ཅ༌ཚངས༌ ཡོད༌ཏེ༌ ཨིན༌ནོག༌, ཨིན༌ནའང༌ ང༌ མི༌རིགས༌སི༌བུའ༌ གོ༌ བོར༌ཏེ༌ ངལ༌ཚོ༌ཅེས༌སི༌ ནས༌སའང༌ མེད༌།”
LUK 9:59 ཡེ༌ཤུའི༌ ཞན༌ མི༌ཞིག༌ག༌ མོལས༌, “ངའེ༌ སྟིང༌རང༌ནེ༌ བྲོངས༌”, ཨིན༌ནའང༌ ཁོའེ༌ ཟེརས༌, “གཙོ༌བོ༌ལེ༌, སྔུན༌ལ༌ ང༌ ཁང༌པ༌ སོང༌ཏེ༌ ང༌རང༌ངི༌ ཨ༌བ༌ ཤི༌ཏེ༌ སུབ༌ཅེས༌སི༌ ཕིའ༌ གྲལ༌གྲིག༌ ཅོ༌ཅེས༌ལ༌ གོངས༌པ༌ སལ༌།”
LUK 9:60 ཡེ༌ཤུའི༌ ཁོའ༌ མོལས༌, “སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ལ༌ ཁོ༌རང༌གུན༌ནི༌ ཤི༌ཁན༌གུན༌ སུབ༌ཅུག༌, ཨིན༌ནའང༌ ཁྱོ༌རང༌ སོང༌ཏེ༌ མི༌གུན༌ལ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤོད༌།”
LUK 9:61 ཡང༌ མི༌ཞིག༌གི༌ ཟེརས༌, “གཙོ༌བོ༌, ང༌ ཉེ༌རང༌ངི༌ སྟིང༌རང༌ནེ༌ བྲངས༌ཨིན༌, ཨིན༌ནའང༌ སྔུན༌ལ༌ ང༌ ངའེ༌ ནང༌ཚངས༌ལ༌ ཇུ༌ ཟེར༌ར༌ལ༌ ཆ༌ཅུག༌ག༌ ཛད༌།”
LUK 9:62 ཡེ༌ཤུའི༌ ཁོའ༌ མོལས༌, “ཤོལ༌ལ༌ ཐམས༌ཏེ༌ གྱབ༌བ༌ ལྟའ༌ཁན༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཞབ༌ཤི༌ ཞུའ༌ཅེས༌སི༌ འོས༌པ༌ མན༌།”
LUK 10:1 ཏེ༌ སྟིང༌ནེ༌ གཙོ༌བོའེ༌ ཞན༌ ལོབ༌ཕྲུགས༌ རྡུན༌ཅུ༌དོན༌ཉིས༌ ལྡམ༌མ༌ ཛདས༌ ཡང༌ ཁོང༌གུན༌ ཉིས༌ཉིས༌ ཅོས༌ཏེ༌ ཁོང༌ངི༌ སང༌ སྔུན༌ལ༌ ཁོང༌ སྐྱོད༌ཅེས༌ཅན༌ནི༌ གྲོང༌ཁྱེར༌ དང༌ ནས༌ས༌ ཚང༌མ༌ལ༌ ཀལ༌ལ༌ ཛདས༌།
LUK 10:2 ཡེ༌ཤུའི༌ ཁོང༌གུན༌ལ༌ མོལས༌, “སྟོན༌ཐོག༌ མང༌པོ༌ཞིག༌ རྔ༌ ཆོག༌ཆོག༌ དུག༌, ཨིན༌ནའང༌ སྟོན༌ཐོག༌ རྔ༌ཁན༌ནི༌ ལས༌མི༌ མ༌ ཉུ༌ངུན༌ཞིག༌ མ༌ནེ༌ མི༌དུག༌། ཏེ༌བོའེ༌ཕིའ༌ སྟོན༌ཐོག༌གི༌ དག༌པོ༌ དཀོན༌མཆོག༌ག༌ སྟོན༌ཐོག༌ རྔ༌ཁན༌ནི༌ ལས༌མི༌ མང༌ང༌ ཀལ༌ལ༌ ཛད༌ཅེས༌ལ༌ ཞུ༌ཝ༌ ཕུལ༌།
LUK 10:3 ཏ༌ སོང༌ ངའེ༌ ཁྱོ༌ཞའ༌ ཤང༌ཀུའི༌ ཕྲོའ༌ ལུ༌གུ༌ ཙོགས༌ལ༌ ལམ༌ཅུག༌གད༌།
LUK 10:4 ཁོ༌མགས༌ ཡ༌ ཇོ༌ལ༌ ཡ༌ པ༌བུ༌ མ༌ཁུར༌, ཡང༌ ལམ༌མ༌ མི༌གུན༌ལ༌ ལོན༌སྲུལ༌ཨིན༌ དུགས༌ཏེ༌ ཏུས༌ གོད༌ལ༌ མ༌ཏང༌།”
LUK 10:5 “ཁྱོ༌ཞ༌ ཁང༌པ༌ཞིག༌གི༌ ནང༌ང༌ ཆའ༌ཅིག༌ གོ༌མ༌རང༌ ཟེར༌, ‘དཀོན༌མཆོག༌གི༌ ཞི༌དེ༌ ཏེ༌ ཁང༌པ༌བོའ༌ སལ༌ཤིག༌།’
LUK 10:6 ཏེ༌ ཁང༌པའེ༌ ནང༌ང༌ ཞི༌དེ༌ཅན༌ མི༌ཞིག༌ ཡོད༌ན༌, དཀོན༌མཆོག༌གི༌ ཞི༌དེ༌ ཁོའ༌ སལ༌ཨིན༌། ཀལ༌ཏེས༌ མེད༌ན༌, ཏེ༌ ཞི༌དེ༌བོ༌ ཁྱོ༌ཞའ༌ ལོགས༌ཏེ༌ ལེབ༌ཨིན༌།
LUK 10:7 ཁྱོ༌ཞའ༌ ཅི༌ ཏང༌ཁན༌བོ༌ ཟེན༌ ཐུང༌ཨིན༌ ཏེན༌ན༌ ཁང༌པའེ༌ ནང༌ང༌ དུག༌, ཅིའ༌ཟེར༌ན༌ ལས༌ ཅོ༌ཁན༌ནི༌ མིའ༌ ལ༌ཆའ༌ ཐོབ༌ཅེས༌ འོས༌པ༌ ཨིན༌ནོག༌། ཁང༌པ༌ ཅིག༌ནེ༌ ཅིག༌ག༌ གྲུལ༌ཨིན༌ མི༌དུག༌།”
LUK 10:8 “གྲོང༌ཁྱེར༌ཞིག༌ག༌ ལེབ༌བ༌ཅིག༌ ཁྱོ༌ཞའ༌ གའ༌སུས༌ ཅོ༌ན༌ ཁོང༌གུན༌ནི༌ ཏང༌ཁན༌ནི༌ ཟན༌གུན༌ ཟོ༌།
LUK 10:9 ཏེ༌རུ༌ ཡོད༌ཁན༌ནི༌ ནད༌པ༌གུན༌ ཕན༌ཅུག༌ ཡང༌ ཁོང༌གུན༌ལ༌, ‘དཀོན༌མཆོག༌གི༌ གྱལ༌སྲིད༌ ཁྱོ༌ཞའེ༌ ཉེ༌མོ༌ ཨིན༌ནོག༌’ ཟེར༌ཏེ༌ ཤོད༌།
LUK 10:10 ཨིན༌ནའང༌ གྲོང༌ཁྱེར༌ཞིག༌གི༌ ནང༌ང༌ ལེབས༌ཏེ༌ སུ༌ཞིག༌གིའང༌ ཁྱོ༌ཞ༌ གའ༌སུས༌ མ༌ཅོ༌ན༌, ཏེ༌ གྲོང༌ཁྱེར༌རི༌ ལམ༌མི༌ཀ༌ སོང༌ ཡང༌ ཟེར༌,
LUK 10:11 ‘ང༌ཞའེ༌ པ༌བུའ༌ ཇར༌ཁན༌ནི༌ ཁྱོ༌ཞའེ༌ གྲོང༌ཁྱེར༌རི༌ ཐལ༌བ༌བོའང༌ ཕིས༌ཏེ༌ ང༌ཞའེ༌ ཁྱོ༌ཞ༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཏེ༌ ཨིན༌ཁན༌བོ༌ སྟན༌ནད༌། ཏེ༌ནེའང༌ འི༌བོ༌ ཧ༌གོ༌གོས༌: དཀོན༌མཆོག༌གི༌ གྱལ༌སྲིད༌ ཉེ༌མོ༌ ཨིན༌ནོག༌།’
LUK 10:12 ངའེ༌ ཁྱོ༌ཞའ༌ ཟེར༌རད༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཞག༌ག༌, སོ༌དོམ༌ གྲོང༌ཁྱེར༌རི༌ མི༌ངན༌པ༌གུན༌ནི༌ སང༌ ཏེ༌ གྲོང༌ཁྱེར༌རི༌ མི༌གུན༌ལ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌།”
LUK 10:13 “ཀོ༌ར༌ཟིན༌པ༌ དང༌ བེད༌སའི༌ད༌པ༌ གུན༌ ཁྱོ༌ཞ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌། ཀལ༌ཏེས༌ ཁྱོ༌ཞའེ༌ ནང༌ང༌ སྟན༌ཁན༌ནི༌ ཛད༌པ༌གུན༌, ཏཱ༌ཡིར༌ དང༌ སི༌དོན༌ གྲོང༌ཁྱེར༌ ངན༌པ༌གུན༌ནི༌ ནང༌ང༌ སྟན༌པིན༌ན༌, ཁོང༌གུན༌ནི༌ སྡིག༌པ༌ སྤངས༌ཏེ༌ གྱོད༌པ༌ ཅོས༌ཏེ༌ ཕ༌ཙའ༌ གོན༌ཏེ༌, ཀོག༌ཐལ༌ ཡོག༌ཨིན༌ རྡུག༌པོ༌ ཅོས༌ཏེ༌ ཡོད༌གྲོ༌།
LUK 10:14 ཨིན༌ནའང༌ དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌, ཏཱ༌ཡིར༌ དང༌ སི༌དོན༌པ༌ གྲོང༌ཁྱེར༌རི༌ མི༌ངན༌པ༌གུན༌ནི༌ སང༌ ཁྱོ༌ཞའ༌ ཆད༌པ༌ མང༌ང༌ སྲན༌ཏྲེ༌ ཕོག༌ཨིན༌།
LUK 10:15 ཝ༌ ཀ༌ཕར༌ན༌ཧུམ༌པ༌གུན༌ ཁྱོ༌ཞའ༌, རྩི༌ཝ༌ ཏངས༌ཏེ༌ ནམ༌ཁའ༌ ཁྱེར༌ར༌ ཛད༌ཨིན༌ སམ༌མ༌ རག༌ག༌? མ༌ནེ༌ མི༌ཁྱེར༌། ཁྱོ༌ཞ༌གུན༌ ཉལ༌ཝའེ༌ ནང༌ང༌ ཕང༌ང༌ ཛད༌ཨིན༌།”
LUK 10:16 ཡེ༌ཤུའི༌ ཁོང༌ངི༌ ལོབ༌ཕྲུགས༌གུན༌ལ༌ མོལས༌, “ཁྱོ༌ཞའེ༌ ལོན༌ ཉན༌ཁན༌གུན༌ནི༌ ངའང༌ ཉན༌ཏེ༌ ཨིན༌ནོག༌, ཡང༌ ཁྱོ༌ཞའེ༌ ལོན༌ མ༌ཉན༌ཁན༌གུན༌ནི༌ ངའང༌ མ༌ཉན༌ན༌ ཨིན༌ནོག༌། ང༌ མ༌ཉན༌ཁན༌གུན༌ནི༌ ང༌ ཀལ༌ལ༌ ཛད༌ཁན༌བོའ༌ མ༌ཉན༌ན༌ ཨིན༌ནོག༌།”
LUK 10:17 ཏེ༌ནེ༌ རྡུན༌ཅུ༌དོན༌ཉིས༌པོ༌ སྐྱིད༌པོ༌ ཉམ༌པོ༌ ལོགས༌ཏེ༌ ལེབས༌ཏེ༌ ཟེརས༌, “གཙོ༌བོ༌, ཉེ༌རང༌ངི༌ ཚན༌ནི༌ ནང༌ང༌, རྡུད༌ ཚང༌མེའང༌ ང༌ཞའེ༌ ཁའ༌ཉནས༌།”
LUK 10:18 ཡེ༌ཤུའི༌ ཁོང༌གུན༌ལ༌ མོལས༌, “ཤེ༌ཏན༌ སྐམ༌ལག༌ ཙོགས༌ལ༌ ནམ༌ཁའེ༌ ནང༌ནེ༌ བུད༌ད༌ལ༌ ངའེ༌ ཐོང༌།
LUK 10:19 ལྟོས༌, ངའེ༌ ཁྱོ༌ཞ༌གུན༌ལ༌ རུལ༌ དང༌ སྡིག༌པ༌རཱ༌ཙེ༌ གུན༌ རྐང༌ཡོག༌ག༌ ནན༌ཅེས༌སི༌ ཝང༌ ཡང༌ ང༌དང༌གུན༌ནི༌ གྲ༌འོ༌ ཤེ༌ཏན༌ནི༌ ཝང༌ ཚང༌མ༌ མེད༌ཁན༌ ཅོ༌ཅེས༌སི༌ ཁྱུད༌དའང༌ ཏངས༌ཏེ༌ ཨིན༌ ཡང༌ ཁྱོ༌ཞ༌གུན༌ལ༌ སུ༌ཞིག༌གིའང༌ ནོད༌སྐྱལ༌ མི༌ཉན༌།
LUK 10:20 རྡུད༌གུན༌ ཁྱོ༌ཞའེ༌ ཁའ༌ ཉན༌ཁན༌བོའེ༌ཀ༌ གའ༌མོ༌ མ༌ཅོ༌, ཨིན༌ནའང༌ ཁྱོ༌ཞ༌གུན༌ནི༌ མིང༌ ནམ༌ཁའེ༌ ནང༌ང༌ བྲིས༌ཏེ༌ ཨིན༌ཁན༌བོའེ༌ཀ༌ གའ༌མོ༌ ཅོས༌།”
LUK 10:21 ཏེན༌ན༌ ཏུས༌ལ༌ གཙོ༌བོ༌ ཡེ༌ཤུ༌ ཏམ༌པའེ༌ ཐུག༌ཉིད༌ གྱུད༌ཏེ༌ གའ༌མོའེ༌ གངས༌ཏེ༌ མོལས༌, “ངའེ༌ ཡབ༌ ནམ༌ཁའ༌ དང༌ ཇིག༌རྟེན༌ནི༌ གཙོ༌བོ༌ལེ༌, ངའེ༌ ཉེ༌རང༌ང༌ སྟོད༌པ༌ ཕུལ༌ལད༌ ཅིའ༌ཟེར༌ན༌ ཉེ༌རང༌ངི༌ ཀྲང༌པོ༌ ལམ༌བོ༌ ཁས༌པ༌ དང༌ ཡོན༌ཏན༌ཅན༌གུན༌ནེ༌ སྦས༌ཏེ༌, ཕྲུ༌གུ༌ ཙོགས༌ ཡོད༌ཁན༌གུན༌ལ༌ སྔོན༌ ཅུག༌ག༌ ཛདས༌། འོ༌ན༌ ཡབ༌ལེ༌ ཏེ༌ཟུག༌ ཛད༌ཅེས༌པོའ༌ ཉེ༌རང༌ ཐུགས༌ཐད༌།”
LUK 10:22 “ངའེ༌ ཡབ༌ དཀོན༌མཆོག༌གི༌ ཝང༌ཆ༌ ཚང༌མ༌ ངའ༌ སྟད༌ད༌ ཛད༌ཏེ༌ ཨིན༌། ཡབ༌བི༌ མ༌ནེ༌ ཞན༌སུའིང༌ བུ༌ཚ༌ ངོ༌ མི༌ཤེས༌, ཡང༌ བུ༌ཚའེ༌ མ༌ནེ༌ ཞན༌སུའིང༌ ཡབ༌ ངོ༌ མི༌ཤེས༌, ཨིན༌ནའང༌ ངའེ༌ ལྡམས༌ཁན༌གུན༌ལ༌ ཡབ༌ སྔོན༌ཅུག༌ཨིན༌།”
LUK 10:23 ཏེ༌ནེ༌ ལོབ༌ཕྲུགས༌གུན༌ ཆོགས༌ལ༌ གྱུར༌ཏེ༌ ཞན༌མ༌གུན༌ལ༌ ཚོར༌ མ༌ཅུག༌ག༌ མོལས༌, “ངའེ༌ ཅོ༌ཁན༌གུན༌ ཐོང༌ཁན༌ནི༌ ཁྱོ༌ཞའེ༌ མིག༌གུན༌ ཅིན༌ལབས༌ཅན༌ ཨིན༌།
LUK 10:24 ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞ༌གུན༌ལ༌ ཐོང༌ཁན༌ དང༌ ཚོར༌ཁན༌ གུན༌, སྔུན༌མའེ༌ ལུང༌སྟོན༌པ༌ དང༌ གྱལ༌པོ༌ མང༌པོ༌ཞིག༌གི༌ ཐོང༌ཅེས༌ དང༌ ཚོར༌ཅེས༌སི༌ དོད༌པ༌ ཡོད༌ནའང༌ མ༌ཐོང༌ང༌ ཡང༌ མ༌ཚོར༌ར༌ ཨིན༌པིན༌།”
LUK 10:25 ཆོས༌ཁྲིམས༌ལ༌ ཁས༌པ༌ཞིག༌ ལངས༌ཏེ༌ གཙོ༌བོ༌ ཡེ༌ཤུའ༌ ཚོད༌ལྟ༌ཅེས༌ལ༌ ཏྲིས༌, “ལོབ༌བོན༌ལེ༌, ཐའ༌མེད༌པའེ༌ མི༌ཚེ༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ ངའེ༌ ཅི༌ ཅོ༌གོས༌?”
LUK 10:26 ཡེ༌ཤུའི༌ ཁོའ༌ མོལས༌, “བཀའ༌ཁྲིམས༌སི༌ སྤེ༌ཆ༌གུན༌ནི༌ ནང༌ང༌ ཅི༌ བྲིའ༌ ཛད༌ཏེ༌ དུག༌། ཁྱོ༌རང༌ངི༌ ཏེ༌གུན༌ནི༌ ནང༌ནེ༌ ཅི༌ ཧ༌གོ༌?”
LUK 10:27 ཁོའེ༌ ལན༌ཏངས༌, “གཙོ༌བོ༌ དཀོན༌མཆོག༌ག༌ སྙིང༌ གང༌པོ༌, སེམས༌ གང༌པོ༌, སྟོབས༌ གང༌པོ༌ དང༌ སམ༌བ༌ གང༌པོ༌ནེ༌ ཅམས༌པ༌ ཅོས༌ , ཡང༌ རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌།”
LUK 10:28 ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ལན༌ ཀྲང༌པོ༌ ཏངས༌། ཏ༌ ཏེན༌ན༌ ཙོགས༌ ཅོ༌ན༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།”
LUK 10:29 ཁོའེ༌ ཁོ༌རང༌ ཤེས༌རབས༌ཅན༌ ཨིན༌ཁན༌བོ༌ སྟན༌ཅེས༌ལ༌ ཡེ༌ཤུའ༌ ཏྲིས༌, “ངའེ༌ ཁྱིམ༌ཚེས༌ སུ༌ ཨིན༌ནོག༌?”
LUK 10:30 ཡེ༌ཤུའི༌ རུངས༌ གྱུད༌ཏེ༌ ལན༌སལས༌, “ཡ༌ཧུ༌དཱ༌པ༌ཞིག༌ ཡེ༌རུ༌ཤ༌ལེམ༌ནེ༌ ཐུར༌ལ༌ ཡེ༌རི༌ཀོའ༌ སོང༌, ཁོའ༌ ལམ༌མ༌ ཅག༌པའེ༌ སྤུང༌གོལ༌ ཅོས༌ཏེ༌ ལྗེར༌ཉལ༌ ཅོས༌ ཡང༌ ཁོའ༌ སྲན༌ཏྲེ༌ རྡུངས༌ཏེ༌ ཤི༌ཅེས༌ལ༌ བོརས༌།
LUK 10:31 ཏེན༌ན༌ ལམ༌ནེ༌ ཡ༌ཧུ༌དཱ༌པའེ༌ བླ༌མ༌ཞིག༌ སོང༌, ཡང༌ ཁོ༌ ཐོང༌ང༌ཅིག༌ རོགས༌ ཅོའེ༌ སང༌ ཁོ༌ ལམ༌མི༌ འ༌ངོ༌ ཆོགས༌ནེ༌ སོང༌།
LUK 10:32 ཏེན༌ན༌ ཙོགས༌ལ༌ ཆོད༌ཁང༌ངི༌ ནང༌ང༌ ཞབས༌ཏོག༌ ཞུ༌ཁན༌ ལི༌ཝི༌ཞིག༌ ཏེ༌ཀ༌ ལེབས༌ཏེ༌ ཁོ༌ ཐོང༌ང༌ཅིག༌ ཁོའང༌ ལམ༌མི༌ འ༌ངོ༌ ཆོགས༌ནེ༌ སོང༌།”
LUK 10:33 “ཨིན༌ནའང༌ ས༌མར༌རི༌ཡཱ༌པ༌ བེས༌པ༌ཞིག༌ ཏེ༌ཀ༌ ལེབ༌ ཡང༌ ཁོའེ༌ ཕོག༌ཁན༌ནི༌ མི༌བོ༌ ཐོང༌ང༌ཅིག༌ ཁོའེ༌ཀ༌ སྙིང༌རྗེ༌ སྐྱེས༌།
LUK 10:34 ཁོའེ༌ དུན༌ལ༌ སོང༌ཏེ༌ མ༌ཁའ༌གུན༌ གྱལ༌ཅེས༌ལ༌ མར༌ནག༌ དང༌ རྒུན༌ཆང༌ ལུགས༌ཏེ༌ རས༌ ལག༌མོ༌ སྲིལས༌། ཏེ༌ནེ༌ ཁོ༌རང༌ངི༌ བུང༌བུའི༌ཀ༌ སྐྱོན༌ཏེ༌ བེས༌ཁང༌ང༌ ཁྱེར༌ཏེ༌ ཁོའ༌ སྟ༌སྟོག༌ ཅོས༌།
LUK 10:35 སྟིང༌མ༌ཞག༌པོ༌ ཁོའེ༌ བེས༌ཁང༌ སྲུལ༌ཁན༌བོའ༌ མུལ༌ལི༌ པེ༌ནེ༌ ཉིས༌ ཏངས༌ཏེ༌, ‘འི༌ མི༌བོའ༌ སྟ༌སྟོག༌ ཅོས༌, འི༌ སང༌ མང༌ང༌ ཆ༌ན༌ ང༌ ལོགས༌ཏེ༌ ཡོང༌ང༌ཅིག༌ ཁྱོ༌རང༌ང༌ ཏང༌ཨིན༌’ ཟེརས༌།”
LUK 10:36 “ཏེ༌ སུམ༌མི༌ ཕྲོ༌ནེ༌ ཅག༌པའེ༌ སྤུང༌གོལ༌ ཅོ༌ཁན༌ མི༌བོའེ༌ ཁྱིམ༌ཚེས༌པ༌བོ༌ ཁྱོ༌རང༌ངི༌ སུ༌ ཨིན༌ནོག༌ སམ༌མ༌རག༌?”
LUK 10:37 ཆོས༌ཁྲིམས༌ལ༌ ཁས༌པ༌བོའེ༌ ལན༌ཏངས༌, “ཁོའ༌ སྙིང༌རྗེ༌ སྟན༌ཁན༌བོ༌།” ཡེ༌ཤུའི༌ ཁོའ༌ མོལས༌, “སོང༌ཏེ༌ ཏེན༌ན༌ ཙོགས༌ ཅོས༌།”
LUK 10:38 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ ཡེ༌རུ༌ཤ༌ལེམ༌མ༌ སྐྱོད༌ ཟ༌ནེ༌ གམ༌ཡུལ༌ཞིག༌ག༌ ལེབ༌, ཏེ༌རུ༌ མར༌ཐཱ༌ ཟེར༌ཁན༌ནི༌ བུ༌མོ༌ཞིག༌གི༌ ཁོང༌ང༌ ཁོ༌རང༌ངི༌ ཁང༌པའ༌ གའ༌སུས༌ ཞུས༌།
LUK 10:39 ཁོའེ༌ ནོ༌མོ༌ མིར༌ཡམ༌ གཙོ༌བོའེ༌ ཞབས༌སི༌ དུན༌ལ༌ དུགས༌ཏེ༌ ཁོང༌ངི༌ ལབ༌ཞ༌གུན༌ལ༌ ཉན༌ནད༌པིན༌།
LUK 10:40 ཨིན༌ནའང༌ ཡེ༌ཤུའ༌ དོན༌ཏང༌ གྱས༌པ༌ གྲལ༌གྲིག༌ ཅོ༌ཅེས༌སི༌ ནང༌ང༌ མར༌ཐཱ༌ ཨེལ༌ཏེ༌ ལུས༌། ཁོ༌ ཡེ༌ཤུ༌ ཡོད༌ས༌ ཡོངས༌ཏེ༌ ཟེརས༌, “གཙོ༌བོ༌ལེ༌, ངའེ༌ ནོ༌མོའེ༌ ང༌རང༌ ཅིག༌པོའ༌ ལས༌ ཚང༌མ༌ ཅོ༌ ཅུག༌ཁན༌བོའ༌ སྣང༌ང༌ སལ༌ལ༌ མེད༌ད༌? ཁོའ༌ ངའ༌ ཡ༌ཏོ༌ ཅོས༌ མོལ༌ལའང༌།”
LUK 10:41 ཨིན༌ནའང༌ གཙོ༌བོའེ༌ ཁོའ༌ མོལས༌, “མར༌ཐཱ༌, མར༌ཐཱ༌, ཏེ༌ ལས༌ མང༌པོའེ༌ ཕིའ༌ ཁྱོ༌རང༌ངི༌ ཚེར༌ཁ༌ ཅོས༌ཏེ༌ ཁྱོ༌རང༌ ཨེལ༌དུག༌།
LUK 10:42 ཨིན༌ནའང༌ ལས༌ ཅིག༌ཅིག༌ ནི༌ ཁག༌ཅན༌ ཨིན༌ ཡང༌ མིར༌ཡམ༌མི༌ ཏེ༌བོ༌ ལྡམས༌ཏེ༌ ཨིན༌ནོག༌, ཁོའེ༌ ཀ༌ནེ༌ ཏེ༌བོ༌ སུའང༌ ཀོགས༌ཏེ༌ ཁྱེར༌ མི༌ཉན༌།”
LUK 11:1 ཞག༌ཤིག༌ ཡེ༌ཤུའི༌ ནས༌ས༌ཞིག༌གི༌ཀ༌ མོས༌ལམ༌ ཞུའད༌པིན༌, མོས༌ལམ༌ ཞུ༌ ཚར༌ར༌ཅིག༌ ལོབ༌ཕྲུགས༌ ཅིག༌གི༌ ཁོང༌ང༌ ཟེརས༌, “གཙོ༌བོ༌ལེ༌, ང༌ཞའ༌ མོས༌ལམ༌ ཞུ༌ཅེས༌ ལབ༌བ༌ ཛད༌དའང༌ ཀ༌ཟུག༌ ཡོ༌ཧཱ༌ནན༌ནི༌ ཁོ༌རང༌ངི༌ ལོབ༌ཕྲུགས༌གུན༌ལ༌ ལབ༌བ༌ ཛདས༌།”
LUK 11:2 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའེ༌ མོས༌ལམ༌ ཞུ༌ ཟ༌ནེ༌ འི༌ཟུག༌ ཟེར༌, ‘ཡབ༌ལེ༌, ཉེ༌རང༌ངི༌ ཚན༌ ཏམ༌པའ༌ མི༌ ཐམས༌ཅད༌དི༌ རྩི༌ཝ༌ ཅོ༌ཤིག༌། ཉེ༌རང༌ངི༌ གྱལ༌སྲིད༌ གྱོགས༌པ༌ ལེབ༌ཤིག༌།
LUK 11:3 ཞག༌ཏང༌ ང༌ཞའ༌ སྒོས༌དོམ༌མི༌ ཁར༌ཇི༌ སལ༌ལ༌ ཛད༌།
LUK 11:4 ང༌ཞའེ༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ སལ༌ལ༌ ཛད༌, ཅིའ༌ཞུ༌ན༌ ང༌ཞའེ༌ གྱབ༌གལ༌ལ༌ སྡིག༌པ༌ ཅོ༌ཁན༌ ཚང༌མ༌ལ༌ ང༌ཞེའང༌ ཤགས༌པ༌ ཏང༌ངད༌། ཚོད༌ལྟའེ༌ ཏུས༌ལ༌ སྡིག༌པ༌ ཅོ༌ཅེས༌ནེ༌ ང༌ཞའ༌ སྐྱོབ༌བ༌ཛད༌།’”
LUK 11:5 ཏེ༌ནེ༌ ཁོང༌ངི༌ ཁོང༌གུན༌ལ༌ རུང༌ཞིག༌ ཤད༌ད༌ ཛདས༌, “ཁྱོ༌ཞ༌ ཅིག༌, ཁོ༌རང༌ངི༌ ཛ༌འོའེ༌ ཁང༌པ༌ ཚན༌ཕེད༌ལ༌ སོང༌ཏེ༌ ཟེར༌ན༌ ‘ཛ༌འོ༌ ཇུ༌ཇུ༌ ང༌ ཏ༌གི༌ སུམ༌ སྐྱིས༌ཏེ༌ ཏོང༌ངའང༌, བེས༌སི༌ ནང༌ང༌ ཡོད༌ཁན༌ནི༌ ངའེ༌ ཛ༌འོ༌ཞིག༌ ཡོངས༌པ༌ ངའ༌ ཁོའ༌ ཟའ༌ལ༌ ཏང༌ཅེས༌ ཅའང༌ མེད༌།’
LUK 11:7 ཏེ༌ནེ༌ ནང༌ཀུག༌ནེ༌ ཟེརས༌, ‘ང༌ ནགས༌ མ༌སྟན༌། སྒོ༌ ཅུག༌ཚར༌ ཡང༌ ང༌ དང༌ ངའེ༌ ཕྲུ༌གུ༌གུན༌ མལ༌ཙའེ༌ ནང༌ང༌ ཞུགས༌ཚར༌། ངའེ༌ ཁྱོ༌རང༌ང༌ རོགས༌ ཅོ༌ཉན༌ཅེས༌ མེ༌རག༌།’
LUK 11:8 ངའེ༌ ཁྱོ༌ཞའ༌ ཟེར༌རད༌, ཛ༌འོ༌ ཨིན༌ཅེས༌པོའེ༌ ཁོའེ༌ ལངས༌ཏེ༌ ཏ༌གི༌ མ༌ཏང༌ང༌, ཁོའེ༌ ཁྲེལ༌ མེད༌པ༌ ཏོང༌ ཟེར༌ཨིན༌ དུགས༌ པ༌སང༌ ཁོ༌ ལངས༌ཏེ༌ ཁོའ༌ སྒོས༌དོམ༌ ཡོད༌ཁན༌བོ༌ ཏང༌ཨིན༌།”
LUK 11:9 “ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, ཞུ༌ཨིན༌ དུག༌ ཁྱོ༌ཞའ༌ སལ༌ལ༌ ཛད༌ཨིན༌, ཙལ༌ཨིན༌ དུག༌ ཁྱོ༌ཞའ༌ ཐོབ༌ཅུག༌ག༌ ཛད༌ཨིན༌, སྒོ༌ རྡུང༌ཨིན༌ དུག༌ ཕེའ༌ ཛད༌ཨིན༌།
LUK 11:10 ཞུ༌ཁན༌ ཚང༌མ༌ལ༌ སལ༌ལ༌ ཛད༌ཨིན༌, ཙལ༌ཁན༌ ཚང༌མ༌ལ༌ ཐོབ༌ཨིན༌, ཡང༌ སྒོ༌ རྡུང༌ཁན༌ ཚང༌མ༌ལ༌ ཕེའ༌ ཛད༌ཨིན༌།”
LUK 11:11 “ཁྱོ༌ཞ༌གུན༌ནི༌ ཕྲོ༌ནེ༌ ཀ༌ ཨ༌བ༌བོའེ༌ རང༌ངི༌ བུ༌ཚའེ༌ ཉ༌ ཏོང༌ ཟེར༌ན༌ རུལ༌ ཏང༌ཨིན༌ན༌?
LUK 11:12 ཡ༌ ཕྲུ༌གུའི༌ ཁྲུལ༌ ཏོང༌ ཟེར༌ན༌ ཁོའ༌ སྡིག༌པ༌རཱ༌ཙེ༌ ཏང༌ཨིན༌ན༌?
LUK 11:13 ཁྱོ༌ཞ༌གུན༌ སྡིག༌ཅན༌ ཨིན༌ཨིན༌ནའང༌ རང༌ངི༌ ཕྲུ༌གུའ༌ ཕན༌ཐོགས༌ཅན༌ ཏང༌ཅེས༌ ཤེས༌སད༌ན༌, ཁྱོ༌ཞའེ༌ ནམ༌ཁའ༌ ཞུགས༌ཁན༌ནི༌ ཡབ༌བི༌ ཁོང༌ང༌ ཞུ༌ཝ༌ ཞུ༌ཁན༌གུན༌ལ༌ མང༌ང༌ ཕན༌ཐོགས༌ཅན༌ ཏམ༌པའེ༌ ཐུག༌ཉིད༌ མི༌སལ༌ལ༌?”
LUK 11:14 གཙོ༌བོ༌ ཡེ༌ཤུའི༌ མི༌ ཧན༌གྲང༌ཞིག༌ནེ༌ རྡུད༌ ཕིང༌ང༌ ཛདས༌། རྡུད༌པོ༌ བིང༌ང༌ཅིག༌, ཧན༌གྲང༌བོའེ༌ སྤེ༌ར༌ ཏངས༌, ཡང༌ མི༌ཚོགས༌པོ༌ ཧ༌ལས༌།
LUK 11:15 ཨིན༌ནའང༌ ཁོང༌ ཁ༌ཅིག༌གི༌ ཟེརས༌, “བེལ༌ཟེ༌བུལ༌ རྡུད༌གུན༌ནི༌ གོ༌བའེ༌ ཁོའ༌ རྡུད༌གུན༌ ཕིང༌ཅེས༌སི༌ ཁྱུད༌ ཏངས༌ཏེ༌ ཨིན༌ནོག༌།”
LUK 11:16 ཞན༌ ཁ༌ཅིག༌གི༌ ཁོང༌ང༌ ཚོད༌ལྟས༌ཏེ༌ དཀོན༌མཆོག༌གི༌ ཝང༌ཆ༌ སལ༌ཁན༌བོ༌ ཏན༌ཏན༌ ཅོ༌ཅེས༌ལ༌ ནམ༌ཁའ༌ནེ༌ སྟགས༌ཤིག༌ སྟོན༌ ཟེརས༌།
LUK 11:17 ཁོང༌གུན༌ནི༌ སམ༌བ༌ ངན༌པ༌བོ༌ ཡེ༌ཤུའི༌ ཁྱེན༌ཏེ༌ མོལས༌, “གྱལ༌སྲིད༌དི༌ ནང༌ང༌ ཡོད༌ཁན༌གུན༌ ཐུན༌ཏེ༌ མ༌དུག༌ན༌ ཏེ༌བོ༌ མེད༌ཁན༌ ཆེན༌, ཡང༌ ནང༌ཚངས༌ཞིག༌གི༌ མི༌གུན༌ ནོལ༌ཨིན༌ དུག༌ན༌ ཏེ༌བོ༌ ཞིག༌ཨིན༌།
LUK 11:18 ཀལ༌ཏེས༌ ཤེ༌ཏན༌ནི༌ ཁོ༌རང༌ང༌ ནོལ༌ལད༌ན༌, ཏེ༌ནེ༌ ཁོའེ༌ གྱལ༌སྲིད༌པོ༌ ཀ༌ཟུག༌གི༌ ལུས༌ཨིན༌? ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ ཁྱོ༌ཞའེ༌, ངའེ༌ རྡུད༌དི༌ གོ༌བ༌ བེལ༌ཟེ༌བུལ༌ གྱུད༌ཏེ༌ རྡུད༌གུན༌ ཕིང༌དུག༌ ཟེར༌ར༌ནོག༌།
LUK 11:19 ཀལ༌ཏེས༌ ངའེ༌ རྡུད༌དི༌ གོ༌བ༌ བེལ༌ཟེ༌བུལ༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའ༌ བྲངས༌ཁན༌གུན༌ནི༌ སུ༌ གྱུད༌ཏེ༌ རྡུད༌གུན༌ ཕིང༌ང༌ནོག༌? ཏེ༌བོའེ༌ཕིའ༌ ཁོང༌གུན༌ནི༌ ཁྱོ༌ཞའེ༌ ཟེར༌ཁན༌བོའ༌ སྐྱོན༌རྗོད༌ ཅོ༌ཨིན༌།
LUK 11:20 ཨིན༌ནའང༌ ཀལ༌ཏེས༌ ངའེ༌ དཀོན༌མཆོག༌གི༌ ཁྱུད༌ གྱུད༌ཏེ༌ རྡུད༌གུན༌ ཕིང༌ངད༌ན༌ ཏེ༌ནེ༌ ཁྱོ༌ཞའེ༌ཀ༌ ནམ༌ཁའེ༌ གྱལ༌སྲིད༌ ལེབ༌ ཚར༌ཏེ༌ ཨིན༌།
LUK 11:21 མི༌ ཤེད༌ཅན༌ཞིག༌གི༌ ལག༌ཆ༌ ཁུར༌ཏེ༌ རང༌ངི༌ ཁར༌ སྲུང༌ན༌ ཁོའེ༌ ནོར༌གུན༌ རྐུ༌ མི༌ཉན༌།
LUK 11:22 ཨིན༌ནའང༌ ཁོའེ༌ སང༌ ཤེད༌ ཆེའ༌ཞིག༌གི༌ ཁོའ༌ ནོལ༌ཏེ༌ ཕམ༌ཀལ༌ཏེ༌ ཁོ༌ སྐྱོབ༌ཅེས༌ལ༌ ལོ༌ཁྱེལ༌ ཡོད༌ཁན༌ནི༌ ལག༌ཆ༌གུན༌ ཀོགས༌ཏེ༌ ཁོའེ༌ ནོར༌གུན༌ ཁྱེར༌ཨིན༌།”
LUK 11:23 “ངའེ༌ ཆོགས༌ལ༌ མན༌ཁན༌གུན༌ནི༌ ངའ༌ གྱབ༌གལ༌ ཅོའ༌ནོག༌, ཡང༌ ང༌ ཉམ༌པོ༌ ལས༌ ཅོས༌ཏེ༌ བྲས༌བུ༌ མ༌ལྡུམ༌ཁན༌གུན༌ནི༌, ངའེ༌ ལས༌སི༌ བྲས༌བུ༌ ཡན༌ཅུག༌ག༌ནོག༌།”
LUK 11:24 “མི༌ཞིག༌གི༌ ནང༌ནེ༌ གོང༌པོ༌ བིང༌ཏེ༌ སྟིང༌ནེ༌, གོང༌པོའེ༌ ཆུ༌ མེད༌ས༌ རི༌སྟོང༌ངི༌ ནང༌ང༌ ཁོར༌ཨིན༌ ངལ༌ཚོས༌སེ༌ ནས༌ས༌ ཙལ༌ཏེའང༌ མ༌ཐོབ༌ པ༌སང༌, ཁོའེ༌ ཁོ༌རང༌ང༌ ཟེར༌ར༌ནོག༌, ‘ང༌ བིང༌ཏེ༌ ཡོང༌ཁན༌ནི༌ ཏེན༌ན༌ མི༌བོའེ༌ ནང༌ང༌ ལོགས༌ཏེ༌ ཆེན༌།’
LUK 11:25 ཏེ༌རུ༌ ལེབ༌བ༌ཅིག༌, ཏེ༌ ནས༌ས༌བོ༌ ལག༌མོ༌ ལྡུས༌ཏེ༌ ཅི༌ཚང༌མ༌ རང༌རང༌ངི༌ མལ༌ལ༌ བོར༌ཏེ༌ ཐོང༌།
LUK 11:26 ཏེ༌ནེ༌ ཁོ༌ སོང༌ཏེ༌ ཁོ༌རང༌ངི༌ སང༌ མང༌ང༌ ངན༌པ༌ ཞན༌ གོང༌པོ༌ རྡུན༌ ཁྲིད༌ཏེ༌ ཁྱོངས༌ ཡང༌ ཏེན༌ན༌ ནས༌སའེ༌ ནང༌ང༌ དུགས༌། ཏེ༌ནེ༌ ཏེ༌ མི༌བོའེ༌ ནས༌ལུག༌པོ༌ སྔུན༌ནི༌ སང༌ ཐུའ༌ སོང༌།”
LUK 11:27 ཡེ༌ཤུའི༌ འི༌ ཞལ༌ཏ༌གུན༌ མོལ༌ཨིན༌ ཡོད༌ ཟ༌ནེ༌ མི༌ཚོགས༌སི༌ ཕྲོ༌ནེ༌ བུ༌མོ༌ཅིག༌གི༌ ཀུ༌ཅོ༌ ཏང༌ཨིན༌ ཟེརས༌, “ཉེ༌རང༌ ལྟམས༌ཁན༌ ཡང༌ ཉེ༌རང༌ང༌ པི༌བི༌ ཏང༌ཁན༌ནི༌ ཨ༌མ༌ ཅིན༌ལབས༌ཅན༌ ཨིན༌།”
LUK 11:28 ཡེ༌ཤུའི༌ ལན༌སལས༌, “དཀོན༌མཆོག༌གི༌ བཀའ༌ ཉན༌ཏེ༌ ཏེ༌གུན༌ནི༌ཀ༌ ལག༌ལེན༌ ཅོ༌ཁན༌གུན༌ མང༌ང༌ ཅིན༌ལབས༌ཅན༌ ཨིན༌།”
LUK 11:29 མི༌ཚོགས༌པོ༌ གྱས༌ཨིན༌ སོང༌པ༌ ཡེ༌ཤུའི༌ མོལས༌, “འི༌ མི༌རབས༌ ངན༌པའེ༌ ངའ༌ ནམ༌ཁའ༌ནེ༌ སྟགས༌ སྟོན༌ ཟེར༌ར༌ནོག༌, ཨིན༌ནའང༌ ལུང༌སྟོན༌པ༌ ཡོ༌ནཱའེ༌ སྟགས༌པོ༌ མ༌ནེ༌ ཁོང༌གུན༌ལ༌, ཡང༌སྟགས༌ཤིག༌ མི༌སྟན༌།
LUK 11:30 ལུང༌སྟོན༌པ༌ ཡོ༌ནཱ༌ ཇུང༌ཁན༌བོ༌ ནི༌ནེ༌ཝ༌པ༌གུན༌ནི༌ ཕིའ༌ དཀོན༌མཆོག༌གི༌ ཁོ༌ ཀལ༌ལ༌ ཛད༌ཁན༌ནི༌ སྟགས༌ཤིག༌ ཨིན༌པིན༌, ཏེན༌ན༌ ཙོགས༌ལ༌ མི༌རིགས༌སི༌བུ༌ ཉམ༌པོ༌ ཇུང༌ཅེས༌ཅན༌བོའང༌ འི༌ མི༌རབས༌སི༌ ཕིའ༌ སྟགས༌ཤིག༌ ཨིན༌།”
LUK 11:31 “ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ལྷོ༌ ཆོགས༌སི༌ གྱལ༌མོའེ༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོ༌ གྱལ༌པོ༌ སོ༌ལོ༌མོན༌ནི༌ ཤེས༌རབས༌སི༌ སྤེ༌ར༌གུན༌ ཉན༌ན༌ལ༌ ས༌ཆ༌ མ༌ ཐག༌རིང༌ནེ༌ ཡོངས༌, ལྟོས༌སའང༌ སོ༌ལོ༌མོན༌ནི༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།
LUK 11:32 དཀོན༌མཆོག༌གི༌ ཁྲིམས༌ཅད༌དི༌ ཞག༌ག༌ ལངས༌ ཟ༌ནེ༌ ནི༌ནེ༌ཝ༌པ༌གུན༌ནིའང༌ འི༌ མི༌རབས༌པོའ༌ ཆད༌པ༌ ཕོག༌ཅེས༌ འོས༌པ༌ ཨིན༌ནོག༌ ཟེར༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ནཱའེ༌ ཆོས༌ཤད༌ཁན༌བོ༌ ཉན༌ཏེ༌, གྱོད༌པ༌ ཅོས༌, ལྟོས༌སའང༌ ཡོ༌ནཱ༌ སང༌ ཀྲག༌ག༌ཞིག༌ དག༌ས༌ འི༌ཀ༌ ཡོད༌།”
LUK 11:33 “སུ༌ཞིག༌གིའང༌ འོད༌ ཏུགས༌ཏེ༌ སྦས༌ཏེ༌ ཡ༌ གོར༌མོའེ༌ ཡོག༌ག༌ མ༌བོར༌ར༌, ནང༌ང༌ ཡོང༌ཁན༌ ཚང༌མའེ༌ ཐོང༌ཅེས༌ལ༌ འོད༌སྟག༌གི༌ཀ༌ བོར༌ཨིན༌།”
LUK 11:34 “ཁྱོ༌ཞའེ༌ མིག༌ ནི༌ ཟུགས༌སི༌ འོད༌པོ༌ ཨིན༌། མིག༌པོ༌ ཁམ༌ཟང༌ ཡོད༌ན༌, ཁྱོ༌ཞའེ༌ ལུས༌ གང༌པོ༌ འོད༌དི༌ གང༌ཨིན༌, ཨིན༌ནའང༌ མིག༌པོ༌ ཁམ༌ཟང༌ མེད༌ན༌, ཁྱོ༌ཞའེ༌ ལུས༌ གང༌པོ༌ མུན༌གྲིག༌གི༌ གང༌ཨིན༌།
LUK 11:35 ཏན༌ཏན༌ ཅོ༌ཤིག༌, ཁྱོ༌ཞ༌རང༌ངི༌ ནང༌ང༌ འོད༌ ཡོད༌ སམ༌ཁན༌བོ༌ ངོས༌པོའ༌ མུན༌གྲིག༌ཏ༌ མན༌ན༌?
LUK 11:36 ཏ༌ ཀལ༌ཏེས༌ ཁྱོ༌ཞའེ༌ ཟུགས༌པོ༌ གང༌པོ༌ འོད༌དི༌ གངས༌ཏེ༌, ཁག༌ཅིག༌གའང༌ མུན༌གྲིག༌གི༌ ནང༌ང༌ མ༌ལུས༌ན༌, ཏེ༌ནེ༌ ཁྱོ༌ཞའེ༌ཀ༌ འོད༌ ཀྲག༌པོ༌ ཕོག༌ཁན༌ ཙོགས༌ལ༌ ཁྱོ༌ཞའེ༌ ཟུགས༌པོ༌ གང༌པོ༌ ལྡང༌ཤན༌ གྱུར༌ཨིན༌།”
LUK 11:37 གཙོ༌བོ༌ ཡེ༌ཤུའི༌ ཞལ༌ཏའ༌ མོལ༌ ཚར༌ར༌ཅིག༌, ཕ༌རུ༌ཤི༌པ༌ཞིག༌གི༌ ཁོང༌ང༌ ཁོ༌རང༌ངི༌ ཁང༌པ༌ དོན༌ཏང༌ང༌ སྐྱོད༌ ཞུས༌པ༌ ཡེ༌ཤུ༌ སྐྱོད༌ཏེ༌ ཅོག༌ཙེ༌ དུན༌ལ༌ ཞུགས༌།
LUK 11:38 ཕ༌མེས༌པོའེ༌ ལུག༌སྲོལ༌ ནང༌ཞིན༌ ཆག༌ མ༌སིལ༌ལ༌ ཁོང༌ དོན༌ཏང༌ དོན༌ན༌ ཞུག༌ཅེས༌པོ༌ ཐོང༌ཏེ༌ ཕ༌རུ༌ཤི༌པ༌ ཧ༌ལས༌།
LUK 11:39 ཏེ༌ནེ༌ གཙོ༌བོའེ༌ ཁོའ༌ མོལས༌, “ཁྱོ༌ཞའ༌ ཕ༌རུ༌ཤི༌པ༌གུན༌ནི༌ ཀོ༌རེ༌ དང༌ ཐལ༌ལི༌ ཕི༌ལོག༌པོ༌ ལག༌མོ༌ ཅོ༌རུག༌, ཨིན༌ནའང༌ ཁྱོ༌ཞའེ༌ ནང༌ཀུག༌པོ༌ ནབ༌སེམས༌ དང༌ རང༌དོད༌དི༌ གངས༌ཏེ༌ དུག༌།
LUK 11:40 ཁྱོ༌ཞའ༌ སམ༌བ༌ མེད༌ཁན༌གུན༌ ཕི༌ལོག༌ ཛད༌ཁན༌བོའེ༌ ནང༌ཀུག༌པོའང༌ ཛད༌ཏེ༌ མ༌ནོག༌ག༌?
LUK 11:41 ཁྱོ༌ཞའེ༌ སྙིང༌ནེ༌ སྒོས༌དོམ༌ ཡོད༌ཁན༌གུན༌ལ༌ ཅིན༌བ༌ ཏོང༌, ཏེ༌ནེ༌ ཁྱོ༌ཞའ༌ ནང༌ཀུག༌ དང༌ ཕི༌ལོག༌ ཉིས༌ཀོ༌ནེ༌ ལག༌མོ༌ ཐེའ༌ ཛད༌ཨིན༌།”
LUK 11:42 “ཕ༌རུ༌ཤི༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞ༌གུན༌ནི༌ ཚ༌མིག༌གི༌ ཚས༌སི༌ ཡོང༌གོ༌ ཆུང༌ཤོག༌གི༌ ནང༌ནེའང༌ རྕུ༌ཁག༌བོ༌ ཕུལ༌དུག༌པ༌, ཨིན༌ནའང༌ འོས༌པའེ༌ ཁྲིམས༌ཅད༌ དང༌ དཀོན༌མཆོག༌ག༌ ཡ༌ཤ༌ ཅོ༌ཅེས༌ གུན༌ལ༌ སྣང༌ང༌ བོར༌ར༌ མི༌དུག༌། ཁྱོ༌ཞའེ༌ ཏེ༌ བཀའ༌ཁྲིམས༌གུན༌ལ༌ སྣང༌ང༌ ཅོ༌ཅེས༌ མ༌ཚད༌ ཡོང༌གོའེ༌ རྕུ༌ཁག༌པོའང༌ དཀོན༌མཆོག༌ག༌ ཕུལ༌གོས༌།”
LUK 11:43 ཡེ༌ཤུའི༌ མོལས༌, “ཕ༌རུ༌ཤི༌པ༌གུན༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ དུ༌ཁང༌ངི༌ ནང༌ང༌ རྩི༌ཝ༌ཅན༌ནི༌ ནས༌ས༌ ཙལ༌ལ༌ནོག༌, ཡང༌ ཁྲོམས༌སི༌ ནང༌ང༌ མི༌གུན༌ནི༌ ཀ༌ནེ༌ རྩི༌ཝ༌ ཐོབ༌ཅེས༌ལ༌ ཐད༌ད༌ནོག༌།
LUK 11:44 ཁྱོ༌ཞ༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌, ཁྱོ༌ཞ༌གུན༌ སྟགས༌ མེད༌ཁན༌ནི༌ རོམ༌ཁང༌ ཙོགས༌ ཨིན༌ནོག༌, ཏེ༌ ནས༌ས༌བོ༌ མ༌ཤེས༌ས༌ ཏེ༌ཀ༌ གྲུལ༌ པ༌སང༌ མི༌གུན༌ ཚི༌ཏུ༌ གྱུར༌ར༌ནོག༌།”
LUK 11:45 ཆོས༌ཁྲིམས༌ལ༌ ཁས༌པ༌གུན༌ནི༌ ཕྲོ༌ནེ༌ཅིག༌གི༌ ཡེ༌ཤུའ༌ ཟེརས༌, “ལོབ༌བོན༌ལེ༌, འི༌ཟུག༌ མོལ༌ཏེ༌ ཉེ༌རང༌ངི༌ ང༌ཞའང༌ ཁྲེལ༌བ༌ ཅོས༌།”
LUK 11:46 ཡེ༌ཤུའི༌ ལན༌སལས༌, “ཆོས༌ཁྲིམས༌ལ༌ ཁས༌པ༌གུན༌ ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌, ཁྱོ༌ཞ༌གུན༌ནི༌ ཁུར༌ མི༌ཉན༌ཅེས༌སི༌ ཁྲིམས༌སི༌ ཁུ༌རུ༌ ལྕིན༌ཏྲེ༌ མི༌གུན༌ལ༌ ཀལ༌ལ༌ནོག༌, ཨིན༌ནའང༌ ཡ༌ཏོ༌ ཅོ༌ཅེས༌ལ༌ ཁོ༌རང༌གུན༌ནི༌ ཛི༌གུའང༌ རྩེའ༌ ཐད༌ད༌ མ༌ནོག༌།
LUK 11:47 ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ ལུང༌སྟོན༌པ༌གུན༌ནི༌ སྤུར༌ཁང༌ རྩིག༌དུག༌ ཀ༌གུན༌ ཁྱོ༌ཞའེ༌ ཕ༌མེས༌པོ༌གུན༌ནི༌ སདས༌།
LUK 11:48 ཁྱོ༌ཞའེ༌ ཁྱོ༌ཞ༌རང༌ངི༌ ཕ༌མེས༌པོ༌གུན༌ནི༌ ཅོས༌ཁན༌གུན༌ལ༌ ཁའ༌ཆམས༌ཏེ༌ སྤང༌པོ༌ ཏང༌དུག༌ ཅིའ༌ཟེར༌ན༌ ཁོང༌གུན༌ནི༌ ལུང༌སྟོན༌པ༌གུན༌ སདས༌ ཡང༌ ཁྱོ༌ཞའེ༌ ཁོང༌གུན༌ནི༌ སྤུར༌ཁང༌ རྩིགས༌།
LUK 11:49 ཏེ༌བོའེ༌ ཞས༌ཏེ༌ དཀོན༌མཆོག༌གི༌ ཤེས༌རབས༌སི༌ ནང༌ང༌ ཁྱོ༌ཞའེ༌ སྐོར༌ལ༌ མོལས༌, ‘ངའེ༌ ཁོང༌གུན༌ནི༌ཀ༌ ལུང༌སྟོན༌པ༌གུན༌ དང༌ སྐུ༌ཚབས༌གུན༌ ཀལ༌ཨིན༌, ཁོང༌གུན༌ནི༌ ཁ༌ཅིག༌ སད༌ཨིན༌ ཡང༌ ཁ༌ཅིག༌ག༌ ནགས༌བར༌དོ༌ སྟན༌ཨིན༌།’”
LUK 11:50 “ཏེ༌བོའེ༌ཕིའ༌ ཇིག༌རྟེན༌ ཆགས༌པ༌ནེ༌ ཕར༌ལ༌ ལུང༌སྟོན༌པ༌ ཚང༌མའེ༌ སྲོག༌ ལེན༌ཁན༌ནི༌ ཉད༌གལ༌བོ༌ འིན༌ན༌ མི༌རབས༌པོའེ༌ཀ༌ ཕོག༌ཨིན༌,
LUK 11:51 ཨ༌བེལ༌ སད༌ཁན༌ནེ༌ ཏངས༌ཏེ༌ ཆོད༌ཁང༌ དང༌ ཆོད༌ཁྲིའི༌ པར༌ལ༌ སད༌ཁན༌ནི༌ བ༌རག༌ཡཱའི༌ བུ༌ཚ༌ ཟ༌ཀ༌རི༌ཡཱའེ༌ ཚག༌པ༌། ངའེ༌ དེན༌བ༌ ཟེར༌རད༌, ཏེ༌ ཇུང༌ཁན༌ ཚང༌མའེ༌ ཆད༌པ༌བོ༌ འི༌ མི༌རབས༌པོའེ༌ཀ༌ ཕོག༌ཨིན༌།”
LUK 11:52 “ཆོས༌ཁྲིམས༌ལ༌ ཁས༌པ༌, ཁྱོ༌ཞའ༌ ཙམ༌ཤིག༌གི༌ ཇིགས༌པ༌ མི༌ཡོང༌། ཁྱོ༌ཞའེ༌ དཀོན༌མཆོག༌ ཤེ༌ཤེས༌སི༌ ལམ༌བོ༌ སྦས༌ཏེ༌ བོར༌དུག༌, ཁྱོ༌ཞ༌རང༌གུན༌ ཏེ༌ནང༌ང༌ ཆ༌ མི༌དུག༌ མ༌ཚད༌ ཏེ༌ནང༌ང༌ ཆེན༌ ཡོད༌ཁན༌གུན༌ལ༌ སྒག༌སྐྱིལ༌ ཏང༌དུག༌།”
LUK 11:53 ཡེ༌ཤུ༌ ཏེ༌ཀ༌ནེ༌ བིང༌ཏེ༌ སྐྱོད༌ ཟ༌ནེ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ ཚང༌མའ༌ སྲོ༌ ཡོངས༌ པ༌སང༌ ཁོང༌ང༌ ཏྲི༌ཝ༌ མང༌པོ༌ ཏྲིས༌ཏེ༌ ཁོང༌ ཁད༌ཅུག༌ཅེས༌སི༌ རྩོན༌གྲུས༌ ཅོས༌།
LUK 12:1 ཏེ༌ཏུས༌ལ༌ སྟོང༌ཕྲག༌ མང༌པོའེ༌ མི༌ཚོགས༌ ཛོམ༌ཅེས༌པོའེ༌ ཅིག༌ དང༌ ཅིག༌ ནན༌ནད༌པིན༌, ཡེ༌ཤུའི༌ སྔུན༌ལ༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཟིགས༌ཏེ༌ མོལས༌, “ཕ༌རུ༌ཤི༌པའེ༌ སྐྱུར༌ནེ༌ ཤང༌ ཅོས༌ ཀ༌བོ༌ ཁོང༌ངི༌ ཁ༌ཆོས༌པོ༌ ཨིན༌ནོག༌།
LUK 12:2 ཀབས༌ཏེ༌ བོར༌ཁན༌ ཚང༌མ༌ ཕིང༌ང༌ ཛད༌ཨིན༌ ཡང༌ སྦས༌ཏེ༌ བོར༌ཁན༌ ཚང༌མ༌ མི༌གུན༌ལ༌ སྔོན༌ ཅུག༌ག༌ ཛད༌ཨིན༌།
LUK 12:3 ཁྱོ༌ཞའེ༌ མུན༌གྲིག༌གི༌ ནང༌ང༌ ཟེར༌ཁན༌གུན༌ ཉི༌མའེ༌ འོད༌དི༌ ནང༌ང༌ ཚོར༌ཨིན༌, ཡང༌ ཁྱོ༌ཞའེ༌ ཁང༌པའེ༌ ནང༌ཀུག༌ག༌ ནམ༌ཅོག༌གི༌ ནང༌ང༌ ཤུབས༌ཏེ༌ ཟེར༌ཁན༌གུན༌ ཁང༌པའེ༌ ཁེ༌ཐོག༌ནེ༌ ཀུ༌ཅོ༌ ཏངས༌ཏེ༌ ཤད༌ཨིན༌།”
LUK 12:4 “ངའེ༌ ཛ༌འོ༌གུན༌ ཁྱོ༌ཞའ༌ ཟེར༌རད༌, ལུས༌ ཅིག༌པོ༌ སད༌ ཉན༌ཁན༌གུན༌ལ༌ མ༌ཇིགས༌ ཏེ༌སང༌ མང༌ང༌ ཁོང༌ང༌ ཅའང༌ ཅོ༌མི༌ཉན༌།
LUK 12:5 ཨིན༌ནའང༌ ཇིགས༌གོ༌ཤེས༌ཅན༌བོ༌ ངའེ༌ ཁྱོ༌ཞ༌གུན༌ལ༌ ཤད༌ཨིན༌, ལུས༌ སད༌ཏེ༌ སྟིང༌ནེ༌ ཉལ༌ཝའེ༌ ནང༌ང༌ ཕང༌ང༌ ཛད༌ཅེས༌སི༌ ཝང༌ཆ༌ ཡོད༌ཁན༌ནི༌ དཀོན༌མཆོག༌ག༌ ཇིགས༌། འོ༌ན༌ ངའེ༌ ཁྱོ༌ཞའ༌ ཟེར༌རད༌, ཁོང༌ང༌ ཇིགས༌།”
LUK 12:6 “པེ༌ནེ༌ ཉིས༌ལ༌ ཅི༌པ༌ ལྔ༌ ཙོང༌ང༌ མི༌དུག༌ག༌? ཨིན༌ནའང༌ དཀོན༌མཆོག༌གི༌ ཏེ༌གུན༌ནི༌ ནང༌ནེ༌ ཅིག༌གའང༌ རྗེད༌ད༌ ཛད༌ད༌ མི༌དུག༌།
LUK 12:7 ཁྱོ༌ཞའེ༌ གོའེ༌ཀ༌ ཡོད༌ཁན༌ནི༌ སྲའེ༌ ཀྲངས༌ཀའང༌ ཁོང༌ངི༌ ཁྱེན༌ན༌ ཛད༌ད༌ནོག༌། ཏེན༌ན༌བོའེ༌ཕིའ༌ ཇིགས༌ མ༌ཇིགས༌, དཀོན༌མཆོག༌གི༌ སྐུན༌དུན༌ལ༌ ཅི༌པ༌ མང༌པོའེ༌ སང༌ ཁྱོ༌ཞའ༌ ཅིག༌ མང༌ང༌ རིན༌ཆེའ༌ ཨིན༌ནོག༌།”
LUK 12:8 “ངའེ༌ ཁྱོ༌ཞའ༌ ཟེར༌རད༌, མི༌གུན༌ནི༌ དུན༌ལ༌, ཡེ༌ཤུ༌ ངའེ༌ གཙོ༌བོ༌ ཨིན༌ ཟེར༌ཁན༌ ཚང༌མའ༌ མི༌རིགས༌སི༌བུའིང༌ དཀོན༌མཆོག༌གི༌ ཕོ༌ཉ༌གུན༌ནི༌ དུན༌ལ༌ ཁོང༌གུན༌ ཁོའེ༌ དེན༌བའེ༌ ལོབ༌ཕྲུགས༌ ཨིན༌ ཟེར༌ཨིན༌།
LUK 12:9 ཨིན༌ནའང༌ མི༌གུན༌ནི༌ དུན༌ལ༌ ངའ༌ མི༌ཤེས༌ཟུན༌ ཏང༌ཁན༌ ཚང༌མའ༌, ངེའང༌ དཀོན༌མཆོག༌གི༌ ཕོ༌ཉ༌གུན༌ནི༌ དུན༌ལ༌ ཁོང༌གུན༌ མི༌ཤེས༌ ཟེར༌ཨིན༌།
LUK 12:10 མི༌རིགས༌སི༌བུའི༌ གྱབ༌གལ༌ལ༌ ཟེར༌ཁན༌ ཚང༌མའ༌ ཤགས༌པ༌ སལ༌ལ༌ ཛད༌ཨིན༌, ཨིན༌ནའང༌ ཏམ༌པའེ༌ ཐུག༌ཉིད༌དི༌ གྱབ༌གལ༌ལ༌ ཟེར༌ཁན༌གུན༌ལ༌ ཤགས༌པ༌ མ༌ནེ༌ མི༌སལ༌།”
LUK 12:11 “ཁོང༌གུན༌ནི༌ ཁྱོ༌ཞའ༌ དུ༌ཁང༌, ཝང༌སྲུལ༌པ༌ དང༌ ཝང༌ཆ༌ ཡོད༌ཁན༌ གུན༌ནི༌ དུན༌ལ༌ ཁྱོང༌ང༌ཅིག༌ རང༌ ནོངས༌མེད༌ ཀ༌ཟུག༌གི༌ སྟན༌ཨིན༌ ཡ༌ ཅི༌ ཟེར༌ཨིན༌ སམ༌ཏེ༌ ཚེར༌ མ༌ཚེར༌།
LUK 12:12 ཅིའ༌ཟེར༌ན༌ ཏེན༌ན༌ ཏུས༌ལ༌ ཟེར༌གོ༌ཤེས༌པོ༌ ཏམ༌པའེ༌ ཐུག༌ཉིད༌དི༌ ཁྱོ༌ཞའ༌ སལ༌ལ༌ ཛད༌ཨིན༌།”
LUK 12:13 ཏེ༌ནེ༌ མི༌ཚོགས༌སི༌ ཕྲོ༌ནེ༌ མི༌ཞིག༌གི༌ གཙོ༌བོ༌ ཡེ༌ཤུའ༌ ཟེརས༌, “ལོབ༌བོན༌ལེ༌, ང༌ཞའ༌ ནོར༌སྐལ༌ ཐོབ༌ཁན༌བོ༌ ང༌ ཉམ༌པོ༌ བགོ༌ཅེས༌ལ༌ ངའེ༌ ཨ༌ཅོ༌ མོལ༌ལའང༌།”
LUK 12:14 ཡེ༌ཤུའི༌ ཁོའ༌ མོལས༌, “ཛ༌འོ༌ ཁྱོ༌ཞའེ༌ ནོར༌སྐལ༌ བགོས༌ཁན༌ནི༌ ཁྲིམ༌སྤོན༌ ཡ༌ བར༌མིའ༌ ངའ༌ སུའི༌ སྐོས༌?”
LUK 12:15 ཏེ༌ནེ༌ ཁོང༌ངི༌ མི༌ཚོགས༌ལ༌ མོལས༌, “ཤང༌ ཅོས༌, ནབ༌སེམས༌སི༌ རིགས༌ ཚང༌མ༌ནེ༌ ཐག༌རིང༌ང༌ ཁྱོ༌ཞའེ༌ རང༌ སྐྱོབས༌ཏེ༌ བོར༌ ཅིའ༌ཟེར༌ན༌ མི༌ཞིག༌གི༌ མི༌ཚེ༌ རིན༌བོ༌ ཁོའ༌ ཡོད༌ཁན༌ནི༌ ནོར༌རི༌ཀ༌ རག༌ལས༌ས༌ མ༌ནོག༌།”
LUK 12:16 ཏེ༌ནེ༌ ཡེ༌ཤུའི༌ རུངས༌ཤིག༌ ཤད༌ད༌ ཛདས༌, “མི༌ ཆུག༌པོ༌ཞིག༌གི༌ ས༌ཀྱད༌ལ༌ སྟོན༌ཐོག༌ གྱལ༌ལ༌ མ༌ མང༌པོ༌ སྨིན༌།
LUK 12:17 ཁོའེ༌ སམ༌ ‘ཏ༌ ངའེ༌ ཅི༌ ཅོ༌ཨིན༌? འི༌ སྟོན༌ཐོག༌ ཚང༌མ༌ ཆུད༌ཅེས༌སི༌ བང༌ང༌ ངའ༌ མེད༌།’
LUK 12:18 ཏེ༌ནེ༌ ཁོའེ༌ ཁོ༌རང༌ང༌ ཟེརས༌, ‘ངའེ༌ བང༌ང༌གུན༌ དང༌ ཅ༌ལག༌ བོར༌ས༌ ཤིགས༌ཏེ༌ ཆེན༌མོ༌ རིག༌ རྩིག༌ཨིན༌ ཡང༌ ཏེ༌གུན༌ནི༌ ནང༌ང༌ ངའེ༌ ཀྲོ༌ནས༌ དང༌ ནོར༌ ཚང༌མ༌ བོར༌ཨིན༌།
LUK 12:19 ངའེ༌ ང༌རང༌ང༌ ཟེར༌ཨིན༌, “ངའ༌ སོ༌དེ༌ཅན༌, ཏ༌ ལོ༌ མང༌པོའེ༌ ཕིའ༌ ནོར༌ དུག༌། ངལ༌ཚོས༌ཏེ༌ ཟོ༌ཐུང༌, སྐྱིད༌པོ༌ དང༌ ཐད༌པོ༌ ཅོས༌།”’”
LUK 12:20 “ཨིན༌ནའང༌ དཀོན༌མཆོག༌གི༌ ཁོའ༌ མོལས༌, ‘སམ༌མེད༌ ཁྱོ༌རང༌, དི༌རིང༌ ཚན༌ལ༌ ཁྱོ༌རང༌ངི༌ སྲོག༌ ངའེ༌ ཁྱེར༌ཨིན༌། རང༌ངི༌ ཕིའ༌ སགས༌ཁན༌ནི༌ ནོར༌གུན༌ སུའ༌ ཕན༌ཨིན༌?’”
LUK 12:21 “དཀོན༌མཆོག༌གི༌ དུན༌ལ༌ ཆུག༌པོ༌ མ༌གྱུར༌ར༌ རང༌ངི༌ ཕིའ༌ ཇིག༌རྟེན༌ནི༌ཀ༌ ནོར༌ སག༌ཁན༌གུན༌ལ༌ ཏེན༌ན༌ ཙོགས༌ ཆེན༌།”
LUK 12:22 ཏེ༌ནེ༌ ཡེ༌ཤུའི༌ རང༌ངི༌ ལོབ༌ཕྲུགས༌གུན༌ལ༌ མོལས༌, “ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཟེར༌རད༌, ཅི༌ ཟེན༌, ཡ༌ ཟུགས༌ལ༌ ཅི༌ གོན༌ཨིན༌ སམས༌ཏེ༌ རང༌ངི༌ མི༌ཚེའེ༌ ཕིའ༌ ཚེར༌ མ༌ཚེར༌།
LUK 12:23 ཟན༌ནི༌ སང༌ སྲོག༌པོ༌ ཡང༌ ཀོས༌སི༌ སང༌ ལུས༌པོ༌ ཁག༌ཆེའ༌ མ༌ནོག༌ག༌?
LUK 12:24 ཕོ༌རོག༌གུན༌ལ༌ ལྟོས༌, ཏེ༌གུན༌ནི༌ ཞིང༌ ཏབ༌བ༌ ཡ༌ ཞིང༌ རྔའ༌ མི༌དུག༌, ཏེ༌གུན༌ལ༌ ཛོད༌ ཡ༌ བང༌ང༌ མི༌དུག༌, ཨིན༌ནའང༌ དཀོན༌མཆོག༌གི༌ ཏེ༌གུན༌ལ༌ ཟན༌ སལ༌ལ༌ ཛད༌དུག༌། ཅ༌གུན༌ནི༌ སང༌ ཁྱོ༌ཞའ༌ མང༌ང༌ རིན༌ མི༌ཆེའ༌།
LUK 12:25 ཁྱོ༌ཞའ༌ སུ༌ཞིག༌གི༌ ཚེར༌ཁ༌ ཅོས༌ཏེ༌ ཁྱོ༌ཞའེ༌ མི༌ཚེ༌ ནང༌ང༌ ཆུ༌ཚོད༌ ཅིག༌ སྐྱེད༌ ཐུབ༌ཨིན༌ན༌?
LUK 12:26 ཁྱོ༌ཞའེ༌ ཚེར༌ཁ༌ ཅོས༌ཏེ༌ ཏེ༌ཙོགས༌ ཆུ༌ངུན༌ ལས༌ཤིག༌ ཅོ༌ མ༌ཉན༌ན༌, ཏེ༌ནེ༌ ཞན༌ ལུས༌ཁན༌གུན༌ནི༌ ཕིའ༌ ཅིའ༌ ཚེར༌ཁ༌ ཅོའད༌?”
LUK 12:27 “སྤང༌ཐང༌ངི༌ མེན༌ཏོག༌གུན༌ ཀ༌ཟུག༌གི༌ ལྡན༌དུག༌ ལྟོས༌ཤིག༌, ཏེ༌གུན༌ནི༌ ལས༌ ཅོའ༌ ཡ༌ བལ༌ ཁལ༌ཏེ༌ ཀོས༌ ཐག༌ག༌ མི༌དུག༌། ཨིན༌ནའང༌ ངའེ༌ ཁྱོ༌ཞའ༌ ཟེར༌རད༌, གྱལ༌པོ༌ སོ༌ལོ༌མོན༌, ཁོ༌རང༌ངི༌ སྤལ༌ལི༌ ནང༌ང༌ མ༌ཀྲག༌པོ༌ ཀོས༌ལག༌ གོན༌ནའང༌ ཏེ༌ མེན༌ཏོག༌གུན༌ ཙོགས༌ ལྡེ༌མོ༌ དང༌ ཛེས༌པོ༌ ཐོང༌ང༌ མེད༌པིན༌།
LUK 12:28 ཀལ༌ཏེས༌ དཀོན༌མཆོག༌གི༌ དི༌རིང༌ ཡོད༌ཁན༌ ཐོ༌རེ༌ མེའ༌ སྲག༌ག༌ ཕང༌ཅེས༌ཅན༌ནི༌ སྤང༌ཐང༌ངི༌ མེན༌ཏོག༌གུན༌ལ༌ ཏེ༌ཙོགས༌སི༌ ཀོས༌ལག༌ སྐོན༌ ཐུབ༌བད༌ན༌, ཏད༌ཆུང༌ཅན༌གུན༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཏེ༌གུན༌ནི༌ སང༌ ཀོས༌ལག༌ ཀྲག༌པོ༌ སྐོན༌ན༌ མི༌ཛད༌ད༌?”
LUK 12:29 “ཏེ༌བོའེ༌ཕིའ༌ ཏུས༌གྱུན༌ ཁྱོ༌ཞའེ༌ ཅི༌ ཟེན༌ ཡ༌ ཐུང༌ཨིན༌ མ༌སམ༌, ཏེ༌གུན༌ནི༌ ཕིའ༌ ཚེར༌ཁ༌ མ༌ཅོ༌།
LUK 12:30 ཇིག༌རྟེན༌ནི༌ ཞན༌ ཆོས༌ལུག༌གི༌ མི༌གུན༌ ཏེ༌ ཚང༌མའེ༌ སྟིང༌རང༌ནེ༌ བང༌ཏང༌ང༌ནོག༌, ཡང༌ ཁྱོ༌ཞའེ༌ ནམ༌ཁའེ༌ ཡབ༌བི༌, ཁྱོ༌ཞའེ༌ ཏེ༌ཙོགས༌ སྒོས༌དོམ༌གུན༌ ཁྱེན༌ན༌ ཛད༌ད༌ནོག༌།
LUK 12:31 ཨིན༌ནའང༌ ཁྱོ༌ཞ༌གུན༌ དཀོན༌མཆོག༌གི༌ གྱལ༌སྲིད༌དི༌ སྟིང༌རང༌ནེ༌ བང༌ཏོང༌, ཏེ༌ནེ༌ ཁོང༌ངི༌ ཏེ༌ཀ༌ ནན༌ཏེ༌ ཁྱོ༌ཞའེ༌ ཞན༌ སྒོས༌དོམ༌གུན༌ནའང༌ སལ༌ལ༌ ཛད༌ཨིན༌།”
LUK 12:32 “ངའེ༌ ལུག༌ ཁྱུ༌ ཆུ༌ངུན༌, ཇིགས༌ མ༌ཇིགས༌། ཁྱོ༌ཞའེ༌ ནམ༌ཁའེ༌ ཡབ༌ ཁྱོ༌ཞ༌གུན༌ལ༌ ཁོང༌རང༌ངི༌ གྱལ༌སྲིད༌ སལ༌ལ༌ ཐུགས༌ཐད༌ད༌ནོག༌།
LUK 12:33 རང༌ངི༌ ནོར༌གུན༌ ཙོངས༌ཏེ༌ ཉལ༌བ༌ཅན༌གུན༌ལ༌ ཅིན༌བ༌ ཏོང༌། ཏེ༌ཟུག༌ ཅོ༌ན༌ ཁྱོ༌ཞའེ༌ ཁྱོ༌ཞ༌རང༌ངི༌ ཕིའ༌ མ༌ནེ༌ མི༌ཆད༌ཅེས༌སི༌ ཁོ༌མགས༌ དང༌ ནམ༌ཁའེ༌ ནང༌ང༌ མི༌ཚར༌ཅེས༌སི༌ ནོར༌ ཐོབ༌ཨིན༌, ཏེ༌རུ༌ རྐུན༌མ༌ མི༌ཡོང༌ ཡ༌ མུག༌པའེ༌ མི༌ཟའ༌།
LUK 12:34 ཁྱོ༌ཞའེ༌ ནོར༌ ཡོད༌ས༌ ཁྱོ༌ཞའེ༌ སྙིང༌ངའང༌ ཆགས༌ཨིན༌།”
LUK 12:35 “ཞབས༌ཏོག༌ ཞུ༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཁྱོ༌ཞ༌རང༌ངི༌ འོད༌ སྤར༌ཏེ༌ བོར༌,
LUK 12:36 ཀ༌ཟུག༌ སྤོན༌བོ༌ བག༌སྟོན༌ནི༌ གྲོན༌ནེ༌ ལོག༌ཏེ༌ ལེབ༌ཅེས༌ལ༌ སྲུངས༌ཏེ༌ དུག༌ཁན༌ནི༌ ཡོག༌པོ༌གུན༌ནི༌ ཅོའད༌། སྒོ༌ རྡུང༌ང༌ཅིག༌ ཁོང༌གུན༌ནི༌ གོར༌ མ༌ཅུག༌ག༌ སྤོན༌བོའ༌ སྒོ༌ ཕེས༌།
LUK 12:37 སྤོན༌བོ༌ ཡོང༌ང༌ཅིག༌ སྲུངས༌ཏེ༌ ཉིད༌ མ༌ཏང༌ང༌ ཐོང༌ཁན༌ནི༌ ཡོག༌པོ༌གུན༌ནི༌ཀ༌ ཐད༌པོ༌ ཆེན༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, སྤོན༌བོའེ༌ ཞབས༌ཏོག༌པའེ༌ ཀོས༌ལག༌ གོན༌ཏེ༌ ཁོང༌གུན༌ ཟན༌ ཟའ༌སའེ༌ ཅོག༌ཙེ༌ དུན༌ལ༌ དུག༌ཅུགས༌ཏེ༌, ཁོང༌གུན༌ལ༌ ཞབས༌ཏོག༌ ཞུ༌ཨིན༌།
LUK 12:38 སྤོན༌བོ༌ ཚན༌ཕེད༌ལ༌ ཡ༌ ནམ༌ལང༌སྐྱིའ༌ ཡོངས༌ཏེའང༌ ཁོང༌གུན༌ ཉིད༌ མ༌ཏང༌ང༌ ཤང༌ ཅོས༌ཏེ༌ ཐོང༌ན༌, ཁོང༌གུན༌ལ༌ སོལ༌རས༌ ཏང༌ཨིན༌།”
LUK 12:39 “ཨིན༌ནའང༌ འི༌བོ༌ ཧ༌གོ༌ཤིག༌, ཀལ༌ཏེས༌ ཚན༌ལ༌ རྐུན༌མ༌ ཡོང༌ཅེས༌སི༌ ཏུས༌ཚོད༌པོ༌ ཁང༌དག༌ག༌ གྱུས༌ཡོད༌པིན༌ན༌, ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ རྐུན༌མ༌ ཞུགས༌ མི༌ཅུག༌།
LUK 12:40 ཏེ༌བོའེ༌ཕིའ༌ ཁྱོ༌ཞའ༌ ཏུས༌གྱུན༌ གྲལ༌གྲིག༌ དུག༌གོས༌ ཅིའ༌ཟེར༌ན༌ ཁྱོ༌ཞ༌གུན༌ནི༌ རེ༌ཝ༌ མེད༌དི༌ ཏུས༌ལ༌ མི༌རིགས༌སི༌བུ༌ ཡོང༌སྲིད༌ཅེས༌ ཨིན༌ནོག༌།”
LUK 12:41 པི༌ཏྲར༌རི༌ ཏྲིས༌, “གཙོ༌བོ༌, འི༌ རུངས༌སི༌ སྤེ༌བོ༌ ང༌ཞའེ༌ ཕིའ༌ ཨིན༌ན༌ ཡ༌ མི༌ཚང༌མའེ༌ ཕིའ༌ ཨིན༌?”
LUK 12:42 གཙོ༌བོའེ༌ ཡང༌ རུངས༌ཤིག༌ གྱུད༌ཏེ༌ ལན༌སལས༌, “སྤོན༌བོའེ༌ ཁོ༌རང༌ངི༌ ཁང༌པའེ༌ སྟ༌སྟོག༌ དང༌ ཞན༌ ཡོག༌པོ༌གུན༌ལ༌ ཏུས༌སི༌ཀ༌ ཞག༌ཏང༌ངི༌ ཁར༌ཇི༌ ཏང༌ཅེས༌སི༌ ཕིའ༌ སྐོས༌ཁན༌ ཨིད༌ཤེས༌ཅན༌ དང༌ ཤེས༌རབས༌ཅན༌ནི༌ ཆག༌ཟོད༌ སུ༌ ཨིན༌ནོག༌?
LUK 12:43 སྤོན༌བོ༌ ལོགས༌ཏེ༌ ཡོང༌ང༌ཅིག༌ ཡོག༌པོ༌བོའེ༌ ཁོའེ༌ སྐོས༌ཁན༌ནི༌ ལས༌པོ༌ ཅོ༌ཨིན༌ ཐོང༌ན༌ ཁོའ༌ སོལ༌རས༌ ཏང༌ཨིན༌།
LUK 12:44 ངའེ༌ ཁྱོ༌ཞའ༌ དེན༌བ༌ ཟེར༌རད༌, སྤོན༌བོའེ༌, ཁོ༌རང༌ངི༌ ནོར༌ ཚང༌མ༌ སྟ༌སྟོག༌ ཅོ༌ཅེས༌སི༌ ཁག༌པོ༌ ཁོའ༌ ཏང༌ཨིན༌།
LUK 12:45 ཨིན༌ནའང༌ ཀལ༌ཏེས༌ ཡོག༌པོ༌བོའེ༌, ངའེ༌ སྤོན༌བོ༌ ཏུས༌ཡུན༌རིང༌ ལོགས༌ཏེ༌ མི༌ཡོང༌ སམས༌ཏེ༌ ཞན༌ ཡོག༌པོ༌ དང༌ ཡོག༌མོ༌ གུན༌ལ༌ རྡུང༌ཅེས༌ གོ༌ཟུག༌ ཅོས༌ཏེ༌ ཟེན༌ ཆང༌ ཐུང༌ཨིན༌ ར༌རོས༌ན༌,
LUK 12:46 ཁོའེ༌ རེ༌ཝ༌ མི༌ཅོའེ༌ ཞག༌ག༌ ཡང༌ ཁོའ༌ གྱུས༌མེད༌དི༌ ཏུས༌ཚོད༌པོའེ༌ཀ༌ སྤོན༌བོ༌ ཡོངས༌ཏེ༌ ཁོ༌ ཏུམ༌པ༌ཏུམ༌པའེ༌ ནང༌ང༌ སྟུབས༌ཏེ༌ ཏད༌པ༌ མེད༌ཁན༌གུན༌ ཕང༌སའེ༌ ནས༌སའེ༌ ནང༌ང༌ ཕང༌ཨིན༌།”
LUK 12:47 “སྤོན༌བོའེ༌ ཐུགས༌དོད༌པོ༌ གྱུས༌ཡོད༌ཏེའང༌ གྲལ༌གྲིག༌ ཡ༌ ཏེ༌གུན༌ ལག༌ལེན༌ མ༌ཅོ༌ཁན༌ནི༌ ཡོག༌པོ༌གུན༌ལ༌ ཆད༌པ༌ སྲན༌ཏྲེ༌ ཏང༌ཨིན༌།
LUK 12:48 ཨིན༌ནའང༌ སྤོན༌བོའེ༌ ཐུགས༌དོད༌པོ༌ མ༌ཤེས༌ས༌ ཆད༌པ༌ ཕོག༌ཅེས༌སི༌ ལས༌ ཅོ༌ཁན༌ནི༌ ཡོག༌པོ༌གུན༌ལ༌ ཆད༌པ༌ ཉུ༌ངུན༌ ཕོག༌ཨིན༌། ཁག༌ མང༌ང༌ ཀལ༌ཁན༌གུན༌ནི༌ ཀ༌ནེ༌ ཞབས༌ཏོག༌ མང༌ང༌ ཐོབ༌ཅེས༌སི༌ རེ༌ཝ༌ བོར༌ཨིན༌, ཡང༌ མང༌ང༌ སྟད༌ཁན༌གུན༌ནི༌ ཀ༌ནེ༌ མང༌ང༌ རྩོད༌ཨིན༌།”
LUK 12:49 “ང༌ འི༌ ཇིག༌རྟེན༌པ༌གུན༌ནི༌ སེམས༌སི༌ ནང༌ང༌ མེ༌ སྤར༌ར༌ ཡོངས༌པིན༌, ཡང༌ ངའེ༌ དོད༌པ༌ ནི༌ སྤར༌ ཚར༌ཏེ༌ བར༌ཨིན༌ ཡོད༌ཅེས༌པོ༌ ཨིན༌།
LUK 12:50 ཨིན༌ནའང༌ ངའེ༌ རྡུག༌ངལ༌ལི༌ ཁྲུས༌ཤིག༌ ལེན༌ཅེས༌ ཨིན༌, ཏེ༌བོ༌ དྲན༌དྲ༌ གྲུབ༌གྲུབ༌ ཚག༌པ༌ ངའ༌ སེམས༌ལྡོམ༌ སྲན༌ཏྲེ༌ རག༌།
LUK 12:51 ཁྱོ༌ཞའེ༌ ང༌ ཇིག༌རྟེན༌ནི༌ཀ༌ ཞི༌དེ༌ ཁྱོང༌ང༌ ཡོངས༌ཏེ༌ ཨིན༌ནོག༌ སམ༌མ༌ རག༌ག༌? མན༌, ངའེ༌ ཁྱོ༌ཞའ༌ ཟེར༌རད༌, ངའ༌ པོ༌ པུད༌ད༌ལ༌ ཡོངས༌ཏེ༌ ཨིན༌།
LUK 12:52 ཏ༌ནེ༌ཕར༌ལ༌, སྤེར༌ན༌ ནང༌མི༌ ལྔའེ༌ ནང༌ཚངས༌སི༌ ནང༌ང༌ པོ༌ བུད༌ཨིན༌, སུམ༌བོའེ༌ ཉིས༌སི༌ གྱབ༌གལ༌ ཡ༌ ཉིས༌པོའེ༌ སུམ༌མི༌ གྱབ༌གལ༌ ཅོ༌ཨིན༌,
LUK 12:53 ངའེ༌ཀ༌ ཏད༌པ༌ ཅོ༌ཅེས༌པོའེ༌, ཨ༌བའེ༌ རང༌ངི༌ བུ༌ཚ༌ ངོ༌ལོག༌ ཡང༌ བུ༌ཚའེ༌ རང༌ངི༌ ཨ༌བའ༌ ངོ༌ལོག༌ ཅོ༌ཨིན༌། ཨ༌མའེ༌ རང༌ངི༌ བུ༌མོའ༌ ངོ༌ལོག༌ ཡང༌ བུ༌མོའེ༌ རང༌ངི༌ ཨ༌མའ༌ ངོ༌ལོག༌ ཅོ༌ཨིན༌། བུ༌ཚའེ༌ ཨ༌མའེ༌ བུ༌ཚའེ༌ ན༌མའ༌ ངོ༌ལོག༌ ཡང༌ བུ༌ཚའེ༌ ན༌མའེ༌ རང༌ངི༌ མག༌པའེ༌ ཨ༌མའ༌ ངོ༌ལོག༌ ཅོ༌ཨིན༌།”
LUK 12:54 གཙོ༌བོ༌ ཡེ༌ཤུའི༌ མི༌ཚོགས༌ལ༌ མོལས༌, “ཁྱོ༌ཞའེ༌ ནུབ༌ ཆོགས༌ནེ༌ སྲིན༌ ལང༌ང༌ ཐོང༌ང༌ཅིག༌, ཆར༌པ༌ ཏང༌ཅེས༌ ཨིན༌ནོག༌ ཟེར༌དུག༌, ཡང༌ ཆར༌པ༌ ཏང༌དུག༌།
LUK 12:55 ཡང༌ ལྷོ༌ ཆོགས༌ནེ༌ ལུངས༌པོ༌ གྱུག༌ག༌ཅིག༌, ཁྱོ༌ཞའེ༌ ཚད༌ ཡོང༌ཅེས༌ ཨིན༌ནོག༌ ཟེར༌དུག༌, ཡང༌ ཚད༌ ཡོང༌དུག༌།
LUK 12:56 ཝ༌ ཁ༌ཆོས༌པ༌གུན༌, ཁྱོ༌ཞའེ༌ ནམ༌ཁའ༌ དང༌ སའེ༌ཀ༌ ཇུང༌ཁན༌ནི༌ ནམ༌ལའེ༌ སྟགས༌གུན༌ ཤད༌ཉན༌དུག༌, ཨིན༌ནའང༌ ཁྱོ༌ཞ༌གུན༌ནི༌ འི༌ཏུས༌སི༌ སྟགས༌གུན༌ ཅིའ༌ ཤད༌ཉན༌ན༌ མེ༌རག༌?”
LUK 12:57 “ཀྲང༌པོ༌ ཅི༌ ཨིན༌ ཁྱོ༌ཞ༌རང༌ངི༌ ཐག༌ཅད༌ ཅིའ༌ ཉན༌ན༌ མེ༌རག༌?
LUK 12:58 ཁྱོ༌རང༌ངི༌ ཉད༌གལ༌པ༌ ཉམ༌པོ༌ ཁྲིམ༌སྤོན༌ནི༌ དུན༌ལ༌ ལེབ༌བི༌ སང༌ སྔུན༌ལ༌ ལམ༌མ༌ ནང༌གྲིག༌ ཅོ༌ཅེས༌སི༌ རྩོན༌གྲུས༌ ཅོས༌, ཏེ༌ མན༌ན༌ ཁོའེ༌ ཁྱོ༌རང༌ ཁྲིམ༌སྤོན༌ནི༌ དུན༌ལ༌ ཁྱེར༌སྲིད༌ཅེས༌ ཨིན༌ནོག༌, ཡང༌ ཁྲིམ༌སྤོན༌ནི༌ ཁྲིམས༌ཁུང༌ངི༌ མག༌སྤོན༌ལ༌ སྟད༌ཏེ༌, ཁྱོ༌རང༌ ཙོན༌ཁང༌ང༌ ཀག༌ཨིན༌།
LUK 12:59 ངའེ༌ ཁྱོ༌ཞའ༌ ཟེར༌རད༌, ཁྱོ༌རང༌ ཙོན༌ཁང༌ནེ༌ ཏེ༌ཏེ༌ཚོག༌པ༌ མི༌ཕུད༌ ནམ༌ཚོག༌པ༌ ཁྱོ༌རང༌ངི༌ ཆད༌པའེ༌ པེ༌ནེ༌ ཚང༌མ༌ མི༌ཤལ༌།”
LUK 13:1 མི༌ ཁ༌ཅིག༌གི༌ གཙོ༌བོ༌ ཡེ༌ཤུའ༌ རོམ༌མི༌ ཀའ༌ལོན༌ པི༌ལ༌ཏུའི༌ གཱ༌ལིལ༌ལི༌པ༌ ཁ༌ཅིག༌ ཆོད༌ཁང༌ང༌ ཆོད༌པ༌ ཕུལ༌ ཟ༌ནེ༌ སད༌ཁན༌བོའེ༌ སྐོར༌ལ༌ ཤདས༌།
LUK 13:2 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ནི༌ ཏེ༌ གཱ༌ལིལ༌ལི༌པ༌གུན༌ལ༌ ཏེ༌ཟུག༌ རྡུག༌ངལ༌ ཐོང༌པ༌, ཞན༌ གཱ༌ལིལ༌ལི༌པ༌ ཚང༌མའེ༌ སང༌ མང༌ང༌ སྡིག༌ཅན༌ ཨིན༌གྲོ༌ སམ༌མ༌ རག༌ག༌?
LUK 13:3 ངའེ༌ ཁྱོ༌ཞའ༌ ཟེར༌རད༌, ཏེ༌བོ༌ དེན༌བ༌ མ༌ནོག༌, ཨིན༌ནའང༌ གྱོད༌པ༌ མ༌ཅོ༌ན༌, ཁྱོ༌ཞ༌གུན༌ནའང༌ མེད༌ཁན༌ ཅོའ༌ ཛད༌ཨིན༌།
LUK 13:4 ཡ༌ སི༌ལོམ༌མི༌ རྩིག༌པ༌ རྡིབས༌ཏེ༌ ཤི༌ཁན༌ནི༌ མི༌ ཅོབ༌རྒྱད༌པོ༌ ཡེ༌རུ༌ཤ༌ལེམ༌པ༌ ཚང༌མའེ༌སང༌ མང༌ང༌ སྡིག༌ཅན༌ ཨིན༌གྲོ༌ སམ༌མ༌ རག༌ག༌?
LUK 13:5 ངའེ༌ ཁྱོ༌ཞའ༌ ཟེར༌རད༌, ཏེ༌བོ༌ དེན༌བ༌ མ༌ནོག༌, ཨིན༌ནའང༌ ཁྱོ༌ཞའེ༌ གྱོད༌པ༌ མ༌ཅོ༌ན༌, ཁྱོ༌ཞ༌གུན༌ནའང༌ མེད༌ཁན༌ ཅོའ༌ ཛད༌ཨིན༌།”
LUK 13:6 ཏེ༌ནེ༌ ཡེ༌ཤུའི༌ འི༌ རུངས༌པོ༌ ཤད༌ད༌ ཛདས༌, “མི༌ཞིག༌གི༌ ཁོ༌རང༌ངི༌ རྒུན༌ཚས༌སི༌ ནང༌ང༌ ཕིག༌གི༌ ཁ༌ཟས༌སི༌ ལྕང༌མ༌ ཙུགས༌ཏེ༌, བྲས༌བུ༌ ཙལ༌ལ༌ སོང༌ ཨིན༌ནའང༌ བྲས༌བུ༌ མ༌ཐོབ༌།
LUK 13:7 ཁོའེ༌ ཚས༌ཁན༌ལ༌ ཟེརས༌, ‘ལོ༌ སུམ༌ སོང༌ འི༌ ལྕང༌མའེ༌ ཀ༌ནེ༌ ང༌ བྲས༌བུ༌ ཅིག༌གའང༌ མ༌ཐོབ༌། ཅད༌ཏེ༌ ཕངས༌ཏོང༌, ཏོན༌མེད༌ལ༌ ནས༌ས༌ སྒགས༌ཏེ༌ བོར༌དུག༌།’”
LUK 13:8 “ཚས༌ཁན༌ནི༌ ལན༌ཏངས༌, ‘སྤོན༌བོ༌, ཏ༌རུང༌ ལོ༌ ཅིག༌ བོར༌ར༌ ཛད༌, ངའེ༌ ཀྱིར༌སྐོར༌ཏེ༌ ས༌ སྐོས༌ཏེ༌ ལུད༌ ཏང༌ཨིན༌།
LUK 13:9 ཀལ༌ཏེས༌ སྟིང༌མ༌ ལོ༌ བྲས༌བུ༌ ཆགས༌ན༌ གྱལ༌ལ༌ སོང༌, ཨིན༌ནའང༌ མ༌ཆགས༌ན༌ ཅད༌ཨིན༌།’”
LUK 13:10 ཤབ༌བད༌དི༌ ངལ༌ཚོའེ༌ ཞག༌ག༌ གཙོ༌བོ༌ ཡེ༌ཤུའི༌ ཡ༌ཧུ༌དཱ༌པའེ༌ དུ༌ཁང༌ཞིག༌གི༌ ནང༌ང༌ ལབ༌ཞ༌ སལ༌ ཟ༌ནེ༌
LUK 13:11 བུད༌ཁན༌ནི༌ ལོ༌ ཅོབ༌རྒྱད༌ནེ༌ ཕར༌ལ༌ གོང༌པོའེ༌ ཁོངས༌ཅུག༌ཁན༌ནི༌ བུ༌མོ༌ཞིག༌ ཡོད༌པིན༌, ཁོ༌ གུ༌རུ༌ སོང༌ཏེ༌ ཀྲང༌པོའ༌ ལངས༌ ཉན༌ན༌ མེད༌པིན༌།
LUK 13:12 ཡེ༌ཤུའི༌ ཁོ༌ ཟིགས༌ས༌ཅིག༌ དུན༌ལ༌ བོད༌ད༌ ཛད༌ཏེ༌ མོལས༌, “བུ༌མོ༌, ཁྱོ༌རང༌ འི༌ ཟུ༌མོ༌ནེ༌ ཐར༌ཨིན༌།”
LUK 13:13 ཁོང༌ངི༌ ཁོའེ༌ཀ༌ ཆག༌ བོར༌ར༌ ཛད༌ད༌ཅིག༌, ཏེན༌ན༌མལ༌ལ༌ ཁོ༌ ཀྲང༌པོའ༌ ལང༌ཉན༌ཏེ༌ དཀོན༌མཆོག༌ག༌ སྟོད༌པ༌ ཕུལས༌།
LUK 13:14 ཨིན༌ནའང༌ དུ༌ཁང༌ངི༌ འུ༌སྐྱོང༌ངི༌ ཤབ༌བད༌དི༌ ཞག༌ག༌ ཡེ༌ཤུའི༌ ནད༌ ཕན༌ཅུག༌ག༌ ཛད༌ པ༌སང༌, སྲོ༌ ཡོངས༌ཏེ༌ མི༌ཚོགས༌ལ༌ ཟེརས༌, “ཞག༌ དྲུག༌ ལས༌ ཅོ༌ ཆོགས༌ཏེ༌ ཨིན༌ནོག༌། ཏེན༌ན༌ ཞག༌ དྲུག༌གི༌ ནང༌ང༌ ནད༌ནེ༌ ཕན༌ཅུག༌ཅེས༌ལ༌ ཡོང༌, ཨིན༌ནའང༌ ཤབ༌བད༌དི༌ ཞག༌ག༌ ཕན༌ཅུག༌ མི༌ཉན༌།”
LUK 13:15 གཙོ༌བོའེ༌ ཁོའ༌ མོལས༌, “ཁ༌ཆོས༌པ༌ ཁྱོ༌ཞའེ༌ ལང༌ཏོ༌ དང༌ བུང༌བུ༌ ཤབ༌བད༌དི༌ ཞག༌ག༌ བྲེས༌ནེ༌ ཀྲོལ༌ཏེ༌ ཆུ༌ ཏང༌ང༌ ཁྱེར༌ར༌ མེད༌ད༌?
LUK 13:16 ཏེ༌ནེ༌ བུད༌ཁན༌ནི༌ ལོ༌ ཅོབ༌རྒྱད༌ནེ༌ ཕར༌ལ༌ ཤེ༌ཏན༌ནི༌ ལྡམས༌ཏེ༌ བོར༌ཁན༌ནི༌ ཨབ༌ར༌ཧམ༌མི༌ པུར༌གྱུད༌ འི༌ བུ༌མོ༌བོ༌ ཤབ༌བད༌དི༌ ཞག༌ག༌ ཐར༌ཅུག༌ མ༌གོས༌ས༌?”
LUK 13:17 ཡེ༌ཤུའི༌ ཏེ༌གུན༌ མོལ༌ལ༌ཅིག༌, ཁོང༌ངི༌ གྲ༌འོ༌གུན༌ ཁྲེལ༌བ༌ སོང༌, ཨིན༌ནའང༌ མི༌ཚོགས༌ གང༌པོ༌ ཡེ༌ཤུའི༌ ཛད༌ཁན༌ནི༌ ཧ༌ལས༌ཤེས༌སི༌ ཆག༌ལས༌གུན༌ ཐོངས༌ཏེ༌ མ༌ ཐད༌པོ༌ སོང༌།
LUK 13:18 ཏེ༌ནེ༌ གཙོ༌བོ༌ ཡེ༌ཤུའི༌ མོལས༌, “དཀོན༌མཆོག༌གི༌ གྱལ༌སྲིད༌པོ༌ ཅི༌ ཙོགས༌ ཨིན༌ནོག༌? ངའེ༌ ཏེ༌བོ༌ ཅི༌ཞིག༌ ཉམ༌པོ༌ ལྡུར༌?
LUK 13:19 ཏེ༌བོ༌ ནི༌ ཉུང༌སྐར༌རི༌ ས༌འོན༌ ཙོགས༌ ཨིན༌ནོག༌ ཀ༌བོ༌ མི༌ཞིག༌གི༌ ཁོ༌རང༌ངི༌ ཚས༌སི༌ ནང༌ང༌ ཏབ༌བ༌ལ༌ ཁྱེརས༌, ཏེ༌བོ༌ སྐྱེས༌ཏེ༌ ལྕང༌མའ༌ ལྡན༌, ཡང༌ ནམ༌ཁའེ༌ ཅ༌གུན༌ནི༌ ཏེ༌བོའེ༌ ཡལ༌གེ༌ཀ༌ ཚངས༌ ཅོས༌།”
LUK 13:20 ཡེ༌ཤུའི༌ ཡང༌སྐྱར༌ ཏྲིའ༌ ཛདས༌, “ངའེ༌ དཀོན༌མཆོག༌གི༌ གྱལ༌སྲིད༌པོ༌ ཅི༌ཞིག༌ ཉམ༌པོ༌ ལྡུར༌?
LUK 13:21 ཏེ༌བོ༌ སྐྱུར༌ ཙོགས༌ ཨིན༌, ཀ༌བོ༌ བུ༌མོའེ༌, ཕེ༌ མང༌པོའེ༌ ནང༌ང༌ སྲེས༌ཏེ༌ རུས༌པ༌ སྐྱུར༌བོ༌ པག༌པའེ༌ གང༌པོའེ༌ ནང༌ང༌ ཁྱེད༌།”
LUK 13:22 གཙོ༌བོ༌ ཡེ༌ཤུ༌ གྲོང༌ཁྱེར༌ དང༌ གམ༌ཡུལ༌ གུན༌ གྱུད༌ཏེ༌ ཡེ༌རུ༌ཤ༌ལེམ༌ ཆོགས༌ལ༌ སྐྱོད༌ ཟ༌ནེ༌ ཁོང༌ངི༌ ལབ༌ཞ༌ སལ༌ལ༌ ཛདས༌།
LUK 13:23 མི༌ཞིག༌གི༌ ཡེ༌ཤུའ༌ ཏྲིས༌, “གཙོ༌བོ༌ལེ༌ མི༌ ཉུ༌ངུན༌ཞིག༌ག༌ མ༌ནེ༌ ཐར༌པ༌ མི༌ཐོབ༌བ༌?” ཁོང༌ངི༌ ལན༌སལས༌,
LUK 13:24 “སྒོ༌ ཕྲ༌མོ༌ནེ༌ ཞུགས༌ཤེས༌སི༌ རྩོན༌གྲུས༌ སྲན༌ཏྲེ༌ ཅོས༌, ཅིའ༌ཟེར༌ན༌ ངའེ༌ ཁྱོ༌ཞའ༌ ཟེར༌རད༌, མི༌ མང༌པོའེ༌ ཏེ༌ནང༌ནེ༌ ཞུགས༌ཤེས༌སི༌ རྩོན༌གྲུས༌ ཅོ༌ཨིན༌, ཨིན༌ནའང༌ ཞུགས༌ མི༌ཉན༌།
LUK 13:25 ཁང༌དག༌ ལངས༌ཏེ༌ སྒོ༌ ཅུག༌ཚར༌ར༌ཅིག༌, ཁྱོ༌ཞ༌གུན༌ ཕི༌ལོག༌ག༌ ལུས༌ཏེ༌ སྒོ༌ རྡུང༌ཨིན༌ ཇུ༌ཇུ༌, ‘གཙོ༌བོ༌ལེ༌ ང༌ཞའེ༌ ཕིའ༌ སྒོ༌ ཕེའ༌ཛད༌’ ཟེར༌ཨིན༌། ཁོའེ༌ ལན༌ཏང༌ཨིན༌, ‘ངའེ༌ ཁྱོ༌ཞའ༌ ཤེས༌ས༌མེད༌ ཡ༌ ཁྱོ༌ཞའ༌ ཀ༌ནེ༌ ཡོངས༌ཏེ༌ ཨིན༌ ངའ༌ གྱུས༌མེད༌།’
LUK 13:26 ཏེ༌ནེ༌ ཁྱོ༌ཞའེ༌ ཟེར༌ཨིན༌, ‘ང༌ཞའེ༌ ཉེ༌རང༌ ཉམ༌པོ༌ ཟོས༌པིན༌ ཐུངས༌པིན༌, ང༌ཞའེ༌ གྲོང༌ཁྱེར༌རི༌ ལམ༌གུན༌ནི༌ཀ༌ ཉེ༌རང༌ངི༌ ལབ༌ཞ༌ སལ༌ལ༌ ཛདས༌།’
LUK 13:27 ཨིན༌ནའང༌ ཁོའེ༌ ལན༌ཏང༌ཨིན༌, ‘ངའེ༌ ཁྱོ༌ཞའ༌ ཤེས༌ས༌མེད༌ ཡ༌ ཁྱོ༌ཞའ༌ ཀ༌ནེ༌ ཡོངས༌ཏེ༌ ཨིན༌ ངའ༌ གྱུས༌མེད༌, ལས༌ ངན༌པ༌ ཅོ༌ཁན༌གུན༌ ངའེ༌ ཀ༌ནེ༌ ཐག༌རིང༌ང༌ སོང༌།’”
LUK 13:28 “ཨབ༌ར༌ཧམ༌, ཨི༌སཱག༌, ཡ༌ཀོབ༌ དང༌ ལུང༌སྟོན༌པ༌ ཚང༌མ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཡང༌ ཁྱོ༌ཞ༌གུན༌ ཕི༌ལོག༌ག༌ ཕངས༌ཁན༌བོ༌ ཁྱོ༌ཞའེ༌ ཐོང༌ང༌ཅིག༌, ཁྱོ༌ཞའ༌ ངུ༌ཅེས༌ དང༌ སོ༌ སྲིག༌ཅེས༌ ཡོང༌ཨིན༌།
LUK 13:29 མི༌གུན༌ ཤར༌, ལྷོ༌, ནུབ༌, བྱང༌ནེ༌ ཡོངས༌ཏེ༌, དཀོན༌མཆོག༌གི༌ གྱལ༌སྲིད༌དི༌ ནང༌ང༌ དོན༌ཏང༌ངི༌ ཕིའ༌ རང༌ངི༌ ནས༌སའེ༌ཀ༌ དུག༌ཨིན༌།
LUK 13:30 ཏན༌ཏན༌, སྟིང༌ཇུག༌ག༌ ཡོད༌ཁན༌གུན༌ གོའ༌ ལེབ༌ཨིན༌ ཡང༌ གོའ༌ ཡོད༌ཁན༌གུན༌ སྟིང༌ཇུག༌ག༌ ལུས༌ཨིན༌།”
LUK 13:31 ཏེན༌ན༌ ཏུས༌ལ༌ ཕ༌རུ༌ཤི༌པ༌ ཁ༌ཅིག༌ ཡོངས༌ཏེ༌ ཁོང༌ང༌ ཟེརས༌, “འི༌ཀ༌ནེ༌ ཞན༌ ནས༌ས༌ཞིག༌ག༌ སྐྱོད༌ ཅིའ༌ཟེར༌ན༌ གྱལ༌པོ༌ ཧེ༌རོད༌དི༌ ཉེ༌རང༌ སད༌ཅེས༌སི༌ སྐབས༌ ཙལ༌དུག༌།”
LUK 13:32 གཙོ༌བོ༌ ཡེ༌ཤུའི༌ ཁོང༌གུན༌ལ༌ མོལས༌, “སོང༌ ཡང༌ ཏེ༌ ཝ༌ཙེའ༌ ཟེར༌, ‘དི༌རིང༌ དང༌ ཐོ༌རེ༌ ངའེ༌ རྡུད༌གུན༌ ཕིང༌ཅེས༌ དང༌ ནད༌པ༌གུན༌ ཕན༌ཅུག༌གད༌ ཡང༌ ཞག༌ སུམ༌པའེ༌ ཞག༌ག༌ ང༌ ཅོའ༌ ཡོང༌ཁན༌ནི༌ ལས༌པོ༌ གྲུབ༌ཨིན༌།’
LUK 13:33 འོ༌ན༌, དི༌རིང༌, ཐོ༌རེ༌ དང༌ ནངས༌ གུན༌ ངའེ༌ ཡེ༌རུ༌ཤ༌ལེམ༌མ༌ ཆ༌ཅེས༌སི༌ ང༌རང༌ངི༌ བེས༌པོ༌ སྒག༌ མ༌གོས༌, ཅིའ༌ཟེར༌ན༌ ཏན༌ཏན༌ ལུང༌སྟོན༌པ༌ཞིག༌ ཡེ༌རུ༌ཤ༌ལེམ༌མི༌ ཕི༌ལོག༌ག༌ མི༌སད༌།”
LUK 13:34 “ཡེ༌རུ༌ཤ༌ལེམ༌པ༌, ཡེ༌རུ༌ཤ༌ལེམ༌པ༌, ལུང༌སྟོན༌པ༌གུན༌ སད༌ཁན༌ ཡང༌ ཁྱོ༌ཞའེ༌ཀ༌ ལམ༌ཅུག༌ག༌ ཛད༌ཁན༌གུན༌ལ༌ རྡོའ༌ གྱབས༌ཏེ༌ སད༌ཁན༌ གུན༌, ཅ༌མོའེ༌ རང༌ངི༌ ཅབ༌ཕྲུག༌གུན༌ སྐྱོབ༌ཅེས༌ལ༌ ཤོག༌པའེ༌ ཡོག༌ག༌ ལྡུའ༌ ཙོགས༌ལ༌, ངེའང༌ ཁྱོ༌ཞའ༌ ལན༌ མང༌པོ༌ ལྡུ༌ཅེས༌སི༌ དོད༌པ༌ ཅོས༌པིན༌, ཨིན༌ནའང༌ ཁྱོ༌ཞའེ༌ ངའ༌ ཅོ༌ མ༌ཅུགས༌།
LUK 13:35 ཏ༌ ལྟོས༌, ཁྱོ༌ཞའེ༌ ཆོད༌ཁང༌ངི༌ ནང༌ང༌ ནས༌ཏེ༌ ཡོད༌ཁན༌བོ༌ བིང༌ཏེ༌ སྐྱོདས༌། ངའེ༌ ཁྱོ༌ཞའ༌ དེན༌བ༌ ཟེར༌རད༌, ཁྱོ༌ཞའ༌ ང༌ ཡང༌སྐྱར༌ མི༌ཐོང༌ ནམ༌ཚོག༌པ༌ ཁྱོ༌ཞའེ༌, ‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌ ཨིན༌’ མི༌ཟེར༌། ”
LUK 14:1 ཤབ༌བད༌དི༌ ངལ༌ཚོའེ༌ ཞག༌ཤིག༌ག༌ ཡེ༌ཤུ༌ ཕ༌རུ༌ཤི༌པའེ༌ སྤོན༌བོ༌ཞིག༌གི༌ ཁང༌པ༌ དོན༌ཏང༌ང༌ སྐྱོདས༌, ཕ༌རུ༌ཤི༌པ༌གུན༌ནི༌ ཁོང༌ང༌ ཞིབ༌ཅ༌ ཅོས༌ཏེ༌ སྟེན༌དུགས༌།
LUK 14:2 ཡེ༌ཤུའི༌ དུན༌ལ༌ རྐང༌ལག༌ག༌ ཆུ༌ ཞུགས༌ཁན༌ནི༌ ནད༌པ༌ཞིག༌ ཡོད༌པིན༌།
LUK 14:3 ཡེ༌ཤུའི༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ལ༌ མོལས༌, “ཤབ༌བད༌དི༌ ཞག༌ག༌ ཆོས༌ཁྲིམས༌ ནང༌ཞིན༌ ནད༌ནེ༌ ཕན༌ཅུག༌ན༌ གྲིགས༌ཏེ༌ ཨིན༌ནོག༌ག༌ ཡ༌ མ༌ནོག༌?”
LUK 14:4 ཨིན༌ནའང༌ ཁོང༌གུན༌ནི༌ ཅའང༌ ལན༌ མ༌ཏངས༌། ཁོང༌ངི༌ ཁོའ༌ ཆག༌རྩེའ༌ ཛད༌ཏེ༌ ཕན༌ཅུག༌ག༌ ཛདས༌, ཡང༌ ཁོ༌ ཁོ༌རང༌ངི༌ ཁང༌པ༌ ལམ༌ཅུག༌ག༌ ཛདས༌།
LUK 14:5 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ཀལ༌ཏེས༌ ཤབ༌བད༌དི༌ ཞག༌ག༌ ཁྱོ༌ཞའ༌ ཅིག༌གི༌ ཕྲུ༌གུ༌ ཡ༌ ལང༌ཏོ༌ ཆུ༌དོང༌ངི༌ ནང༌ང༌ བུད༌ན༌, ཁྱོ༌ཞའེ༌ ཏེན༌ན༌མལ༌ལ༌ ཁོ༌ ཕིང༌ མི༌ ཕིང༌ང༌?”
LUK 14:6 ཡང༌སྐྱར༌ ཁོང༌གུན༌ནི༌ ལན༌ ཏང༌ མ༌ཉན༌།
LUK 14:7 གྲོན༌པོ༌གུན༌ནི༌ གྲལ༌གོའ༌ ཙལ༌ཁན༌བོ༌ ཡེ༌ཤུའི༌ ཟིགས༌ས༌ཅིག༌ ཁོང༌ངི༌ འི༌ རུངས༌པོ༌ ཤད༌ད༌ ཛདས༌,
LUK 14:8 “མི༌ཞིག༌གི༌ ཁྱོ༌རང༌ང༌ བག༌སྟོན༌ནི༌ གྲོན༌ལ༌ བོད༌ན༌, གྲལ༌གོའེ༌ཀ༌ མ༌དུག༌, ཅི༌ གྱུས༌, གྲོན༌ ཏང༌ཁན༌བོའེ༌ ཁྱོ༌རང༌ངི༌ སང༌ ཁག༌ཅན༌ གྲོན༌པོ༌ཞིག༌ བོད༌ཏེ༌ ཡོད༌གྲོ༌།
LUK 14:9 ཀལ༌ཏེས༌ ཡོད༌ན༌ ཁྱོ༌ཞའ༌ ཉིས༌ཀོའ༌ གྲོན༌ ཏང༌ཁན༌བོ༌ ཡོངས༌ཏེ༌ ཁྱོ༌རང༌ང༌ ‘ཁྱོ༌རང༌ དུག༌ཁན༌ནི༌ ནས༌ས༌ འི༌ མི༌བོའ༌ ཏོང༌’ ཟེར༌ན༌ ཁྱོ༌རང༌ ཁྲེལ༌བ༌ ཆེན༌ ཡང༌ ཁྱོ༌རང༌ གྲལ༌ལི༌ ཇུག༌ག༌ ཆ༌གོས༌ཨིན༌།”
LUK 14:10 “ཨིན༌ནའང༌ ཁྱོ༌རང༌ང༌ གྲོན༌ལ༌ བོད༌ན༌ སོང༌ཏེ༌ གྲལ༌ལི༌ ཇུག༌ག༌ དུག༌། གྲོན༌ལ༌ བོད༌ཁན༌བོ༌ ཡོངས༌ཏེ༌ ཁྱོ༌རང༌ང༌, ‘ཛ༌འོ༌ གྲལ༌གོའ༌ སྐྱོད༌’ ཟེར༌ཨིན༌། ཏེ༌ནེ༌ ཞན༌མ༌ གྲོན༌པོ༌ ཚང༌མའེ༌ དུན༌ལ༌ ཁྱོ༌རང༌ང༌ རྩི༌ཝ༌ ཐོབ༌ཨིན༌།
LUK 14:11 ཀྲག༌པོ༌ སྟན༌ཁན༌ ཚང༌མ༌ པས༌མོ༌ ཅོའ༌ ཛད༌ཨིན༌ ཡང༌ ཁོ༌རང༌ པས༌མོ༌ བོར༌ཁན༌བོའ༌ རྩི༌ཝ༌ སལ༌ལ༌ ཛད༌ཨིན༌།”
LUK 14:12 ཏེ༌ནེ༌ ཡེ༌ཤུའི༌ གྲོན༌ ཏང༌ཁན༌བོའ༌ མོལས༌, “ཁྱོ༌རང༌ངི༌ ཛ༌ར༌ ཡ༌ གོང༌ཟན༌ ཏང༌ ཟ༌ནེ༌ རང༌ངི༌ ཛ༌འོ༌གུན༌, ཡ༌ ཨ༌ཅོ༌ ཡ༌ ནོ༌, ཡ༌ ཉེན༌གྲུང༌ ཡ༌ ཁྱིམ༌ཚེས༌ ཆུག༌པོ༌གུན༌ལ༌ མ༌བོད༌། ཀལ༌ཏེས༌ བོད༌ན༌, ཁོང༌གུན༌ནི༌ ཁྱོ༌རང༌ང༌ གྲོན༌ ལན༌ཏངས༌ཏེ༌ ཁྱོ༌རང༌ངི༌ ཀྲིན༌ལན༌ ལོག༌སྲིད༌ཅེས༌ ཨིན༌ནོག༌།
LUK 14:13 ཨིན༌ནའང༌ ཁྱོ༌རང༌ངི༌ གྲོན༌ ཏང༌ ཟ༌ནེ༌ ཉལ༌བ༌ཅན༌, ལུས༌སྐྱོན༌བ༌, ཞ༌འོ༌ དང༌ ཞ༌ར༌ གུན༌ལ༌ བོད༌།
LUK 14:14 ཏེ༌ནེ༌ ཁྱོ༌རང༌ང༌ ཅིན༌ལབས༌ ཐོབ༌ཨིན༌། ཁོང༌གུན༌ནི༌ གྲོན༌ལན༌ ཏང༌ མ༌ཐུབ༌ནའང༌ དཀོན༌མཆོག༌གི༌ མི༌ ཀྲང༌པོ༌གུན༌ སོན༌ཏེའ༌ ལང༌ཅུག༌ག༌ ཛད༌ ཟ༌ནེ༌ ཁྱོ༌རང༌ང༌ སོལ༌རས༌ སལ༌ཨིན༌།”
LUK 14:15 ཏེ༌བོ༌ ཚོར༌ཏེ༌ གྲོན༌པོ༌ ཅིག༌གི༌ ཡེ༌ཤུའ༌ ཟེརས༌, “དཀོན༌མཆོག༌གི༌ གྱལ༌སྲིད༌དི༌ ནང༌ང༌ གྲོན༌ ཟའ༌ཁན༌གུན༌ ཅིན༌ལབས༌ཅན༌ ཨིན༌ནོག༌།”
LUK 14:16 ཨིན༌ནའང༌ ཡེ༌ཤུའི༌ ལན༌སལས༌, “མི༌ཞིག༌གི༌ གྲོན༌ ཆེན༌མོ༌ ཏང༌ཅེས༌ གྲལ༌གྲིག༌ ཅོས༌ཏེ༌ གྲོན༌པོ༌ མང༌པོའ༌ བོདས༌།
LUK 14:17 དོན༌ཏང༌ གྲུབ༌བ༌ཅིག༌ བོད༌ཏེ༌ ཡོད༌ཁན༌གུན༌ལ༌, ‘ཡོང༌ཤིག༌, དོན༌ཏང༌ གྲུབ༌ཏེ༌ ཡོད༌’ ཟེར༌ཏེ༌ བོད༌ད༌ ཁོ༌རང༌ངི༌ ཡོག༌པོ༌གུན༌ ལམ༌ཅུགས༌།
LUK 14:18 ཨིན༌ནའང༌ ཁོང༌ ཚང༌མའེ༌ ཉད༌ཏག༌ཅེས༌ གོ༌ཟུགས༌ཏེ༌ ཏང༌པོ༌ མི༌བོའེ༌ ཟེརས༌, ‘ངའེ༌ དག༌ས༌རང༌ ཞིང༌ཞིག༌ ཉོས༌པིན༌, ཏེ༌བོའ༌ ལྟའ༌ལ༌ ཆ༌གོས༌སད༌, ཇུ༌ཇུ༌ ང༌ གོངས༌པ༌ སལ༌།’
LUK 14:19 ཞན༌ཞིག༌གི༌ ཟེརས༌, ‘ངའེ༌ ལང༌ཏོ༌ ཆ༌ལྔ༌ ཉོས༌པིན༌, ཏེ༌གུན༌ ཞིང༌ངི༌ཀ༌ ཀོལ༌ཏེ༌ ལྟའ༌ལ༌ ཆ༌གོས༌སད༌, ཇུ༌ཇུ༌ ང༌ གོངས༌པ༌ སལ༌།’
LUK 14:20 ཞན༌ཞིག༌གི༌ ཟེརས༌, ‘ངའེ༌ དག༌ས༌རང༌ ན༌མ༌ ཅོས༌པིན༌ ང༌ ཡོང༌ཉན༌ཅེས༌ མེ༌རག༌།’”
LUK 14:21 “ཏེ༌ནེ༌ ཡོག༌པོ༌བོ༌ ལོག༌ཏེ༌ ཡོངས༌ཏེ༌ སྤོན༌བོའ༌ ཏེ༌གུན༌ ཤད༌། སྤོན༌བོའ༌ སྲོ༌ མ༌སྲན༌ཏྲེ༌ ཡོངས༌ ཡང༌ ཡོག༌པོའ༌ ཟེརས༌, ‘གྱོགས༌པ༌ གྲོང༌ཁྱེར༌རི༌ ལམ༌ དང༌ སྲང༌ གུན༌ལ༌ སོང༌ཏེ༌ ཉལ༌བ༌ཅན༌, ལུས༌སྐྱོན༌བ༌, ཞ༌ར༌ དང༌ ཞ༌འོ༌ གུན༌ ཁྱོང༌།’
LUK 14:22 ཡོག༌པོའེ༌ ཟེརས༌, ‘སྤོན༌བོ༌ལེ༌, ཉེ༌རང༌ངི༌ མོལ༌ཁན༌ ནང༌ཞིན༌ ཅོས༌པིན༌, ཨིན༌ནའང༌ ཏ༌རུང༌ངའང༌ ནས༌ས༌ སྟོང༌པ༌ དུག༌།’
LUK 14:23 ཏེ༌ནེ༌ སྤོན༌བོའེ༌ ཡོག༌པོ༌བོའ༌ ཟེརས༌, ‘ངའེ༌ ཁང༌པ༌ གང༌ཅུག༌ཅེས༌ལ༌ གྲོང༌ཁྱེར༌ནེ༌ ཕི༌ལོག༌གི༌ ལམ༌ དང༌ སྲང༌ གུན༌ལ༌ སོང༌ཏེ༌ ཏེ༌རུ༌ ཡོད༌ཁན༌གུན༌ བོད༌ཏེ༌ ཁྱོང༌།
LUK 14:24 ངའེ༌ ཁྱོ༌རང༌ང༌ ཟེར༌རད༌, གྲོན༌ལ༌ བོད༌ཁན༌གུན༌ནི༌ ནང༌ནེ༌ ཅིག༌གའང༌ ངའེ༌ གྲལ༌གྲིག༌ ཅོས༌ཁན༌ནི༌ གྲོན༌ནི༌ ཁར༌ཇི༌ ཉང༌ཅེས༌སི༌ སྐབས༌ མི༌ཐོབ༌།’”
LUK 14:25 མི༌ཚོགས༌ ཆེན༌མོ༌ཞིག༌ ཡེ༌ཤུའི༌ སྟིང༌རང༌ནེ༌ ཡོངས༌, ཡང༌ ཁོང༌གུན༌ནི༌ ཆོགས༌ལ༌ གྱུར༌ཏེ༌ ཁོང༌ངི༌ མོལས༌,
LUK 14:26 “ངའེ༌ སྟིང༌རང༌ནེ༌ ཡོང༌དུག༌ ཨིན༌ནའང༌ རང༌ངི༌ ཨ༌བ༌, ཨ༌མ༌, ན༌མ༌, ཕྲུ༌གུ༌, མིང༌སྲིང༌ མ༌ཚད༌ རང༌ངི༌ སྲོག༌གའང༌ ངའེ༌ སང༌ མང༌ང༌ ཡ༌ཤ༌ ཅོ༌ཁན༌བོ༌ ངའེ༌ ལོབ༌ཕྲུགས༌ གྱུར༌ མི༌ཉན༌།
LUK 14:27 ཡང༌ རང༌ངི༌ རྡུག༌ངལ༌ལི༌ རྐྱང༌ཤིང༌ ཁུར༌ཏེ༌ ངའེ༌ སྟིང༌ནེ༌ མ༌བྲངས༌ཁན༌བོ༌ ངའེ༌ ལོབ༌ཕྲུགས༌ གྱུར༌ མི༌ཉན༌།”
LUK 14:28 “ཀལ༌ཏེས༌ ཁྱོ༌ཞ༌ ཅིག༌གི༌ ཁང༌པ༌ ཀྲག༌པོ༌ཞིག༌ རྩིག༌ཨིན༌ སམ༌ན༌, སྔུན༌ལ༌ དུགས༌ཏེ༌ ཏེ༌བོ༌ རྩིག༌ཅེས༌སི༌ སྒོས༌དོམ༌མི༌ པེ༌ནེ༌ ཁོ༌རང༌ངི༌ ལག༌ག༌ དུག༌ག༌ མི༌དུག༌ མི༌ལྟའ༌?
LUK 14:29 ཏེ༌ མན༌ན༌ མག༌ལྡན༌ ཏིངས༌ཏེ༌ ཁང༌པ༌ གང༌པོ༌ གྲུབ༌ མི༌ཐུབ༌, ཏེ༌ནེ༌ ཏེ༌བོ༌ ཐོང༌ཁན༌ ཚང༌མའེ༌ ཧབ༌གོད༌ ཏངས༌ཏེ༌
LUK 14:30 ཟེར༌ཨིན༌ ‘འི༌ མི༌བོའེ༌ ཁར༌ རྩིག༌ཅེས༌ ཅོས༌པ༌ ཨིན༌ནའང༌ གྲུབ༌ མ༌ཐུབ༌།’”
LUK 14:31 “ཡ༌ མག༌མི༌ སྟོང༌ཅུ༌ ཡོད༌ཁན༌ནི༌ གྱལ༌པོའེ༌, མག༌མི༌ སྟོང༌ཉི༌ཤུ༌ ཁྲིད༌ཏེ༌ ཡོང༌ཁན༌ནི༌ གྱལ༌པོའེ༌ གྱབ༌གལ༌ལ༌ མག༌ཏང༌ང༌ ཆའེ༌ སང༌ སྔུན༌ལ༌ ཁོའེ༌ ལག༌ག༌ ཏེ༌ གྱལ༌པོ༌བོའ༌ ཕམ༌ཀལ༌ཅེས༌སི༌ ཁྱུད༌ དུག༌ག༌ མི༌དུག༌ ལྟའ༌ མི༌ལྟའ༌?
LUK 14:32 ཀལ༌ཏེས༌ ཁྱུད༌ མེད༌ན༌ ཁོའེ༌ ཏ༌རུང༌ ཐག༌རིང༌ང༌ ཡོད༌ཁན༌ནི༌ གྲ༌འོའ༌ ཞི༌དེ༌ ཕིའ༌ ནང༌གྲིག༌ ཅོ༌ཅེས༌ལ༌ ཐུས༌མི༌གུན༌ ཀལ༌ཨིན༌།
LUK 14:33 ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཡོད༌ཁན༌ ཚང༌མ༌ ཕང༌ མ༌ཕང༌ན༌ ཁྱོ༌ཞའ༌ ངའེ༌ ལོབ༌ཕྲུགས༌ གྱུར༌ མི༌ཉན༌།”
LUK 14:34 “ཚཱ༌ ཕན༌ཐོགས༌ཅན༌ ཨིན༌ནོག༌, ཨིན༌ནའང༌ ཀལ༌ཏེས༌ ཚཱའེ༌ བྲོད༌པོ༌ ཡོལ༌ན༌ ཏེ༌བོ༌ ཀ༌ཟུག༌གི༌ ལོགས༌ཏེ༌ ཁྱོང༌ཨིན༌?
LUK 14:35 ཏེ༌ ཚཱའ༌ ཞིང༌ངི༌ ནང༌ང༌ ཡ༌ ལུད༌ལའང༌ མི༌ཕན༌, ཏེ༌བོ༌ ཕི༌ལོག༌ག༌ ཕང༌ཨིན༌། ནམ༌ཅོག༌ ཡོད༌ཁན༌གུན༌ནི༌ ངའེ༌ ཟེར༌ཁན༌ལ༌ ཉོན༌ཤིག༌།”
LUK 15:1 ཁྲལ༌ནེན༌ཁན༌གུན༌ དང༌ སྡིག༌ཅན༌གུན༌ ཡེ༌ཤུའི༌ ལབ༌ཞ༌གུན༌ ཉན༌ན༌ལ༌ ཡོངས༌།
LUK 15:2 ཨིན༌ནའང༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ བ༌ག༌བོ༌གེ༌ ཤད༌ཨིན༌ ཟེརས༌, “འི༌ མི༌བོའེ༌ སྡིག༌ཅན༌གུན༌ལ༌ གའ༌སུས༌ ཞུས༌ཏེ༌ ཁོང༌གུན༌ ཉམ༌པོ༌ ཟན༌ ཟའ༌དུག༌།”
LUK 15:3 ཏེ༌ནེ༌ ཡེ༌ཤུའི༌ ཁོང༌གུན༌ལ༌ འི༌ རུངས༌པོ༌ ཤད༌ད༌ ཛདས༌,
LUK 15:4 “ཁྱོ༌ཞ༌ ཅིག༌ག༌ ལུག༌ གྱ༌ ཡོད༌ཁན༌བོའེ༌ ནང༌ནེ༌ ལུག༌ ཅིག༌ སྟོར༌ན༌, ཞན༌ གུབ༌ཅུ༌ གོར༌གུ༌བོ༌ ཐང༌སྟོང༌ང༌ བོར༌ཏེ༌ སྟོར༌ཁན༌བོ༌ ཐོབ༌ཐོབ༌ ཚག༌པ༌ ཙལ༌ལ༌ མི༌ཆའ༌?
LUK 15:5 ཐོབ༌བ༌ཅིག༌, གའ༌མོ༌ ཉམ༌པོ༌ ཇིང༌བའེ༌ཀ༌ ཁུར༌ཏེ༌
LUK 15:6 ཁང༌པ༌ ཁྱེར༌ཨིན༌། ཏེ༌ནེ༌ ཁོའེ༌ ཁོ༌རང༌ངི༌ ཛ༌འོ༌ དང༌ ཁྱིམ༌ཚེས༌ གུན༌ བོད༌ཏེ༌ ཟེར༌ཨིན༌, ‘ང༌ ཉམ༌པོ༌ གའ༌མོ༌ སྐྱིད༌པོ༌ ཅོས༌ ཅིའ༌ཟེར༌ན༌ ངའེ༌ ལུག༌ སྟོར༌ཁན༌བོ༌ ཐོབ༌།’
LUK 15:7 ངའེ༌ ཁྱོ༌ཞའ༌ ཟེར༌རད༌, ཏེན༌ན༌ ཙོགས༌ལ༌ ནམ༌ཁའེ༌ ནང༌ང༌ མི༌ ཀྲང༌པོ༌ སྡིག༌པའེ༌ ཀ༌ནེ༌ གྱོད༌པ༌ ཅོ༌གོས༌མེད༌ སམ༌ཁན༌ གུབ༌ཅུ༌ གོར༌གུ༌ སང༌ གྱོད༌པ༌ ཅོ༌ཁན༌ནི༌ སྡིག༌ཅན༌ ཅིག༌གི༌ ཕིའ༌ མང༌ང༌ གའ༌མོ༌ ཅོ༌ཨིན༌།”
LUK 15:8 “བུ༌མོ༌ཞིག༌ག༌ མུལ༌ལི༌ པེ༌ནེ༌ རྕུ༌ ཡོད༌ཁན༌བོའེ༌ ནང༌ནེ༌ ཅིག༌ སྟོར༌ན༌, ཁོའེ༌ འོད༌ དུགས༌ཏེ༌ ཁང༌པ༌ ལྡུས༌ཏེ༌ པེ༌ནེ༌ སྟོར༌ཁན༌བོ༌ ཐོབ༌ཐོབ༌ ཚག༌པ༌ གྱལ༌ལ༌ ཅོས༌ཏེ༌ མི༌ཙལ༌ལ༌?
LUK 15:9 ཐོབ༌བ༌ཅིག༌, ཁྱིམ༌ཚེས༌ དང༌ ཛ༌འོ༌ གུན༌ བོད༌ཏེ༌ ཟེར༌ཨིན༌, ‘ང༌ ཉམ༌པོ༌ སྐྱིད༌པོ༌ ཅོས༌ ཅིའ༌ཟེར༌ན༌ ངའེ༌ པེ༌ནེ༌ སྟོར༌ཁན༌བོ༌ ཐོབ༌།’
LUK 15:10 ངའེ༌ ཁྱོ༌ཞའ༌ ཟེར༌རད༌, ཏེན༌ན༌ ཙོགས༌ལ༌ གྱོད༌པ༌ ཅོ༌ཁན༌ནི༌ སྡིག༌ཅན༌ ཅིག༌གི༌ ཕིའ༌ དཀོན༌མཆོག༌གི༌ ཕོ༌ཉ༌གུན༌ནིའང༌ གའ༌མོ༌ ཅོ༌ཨིན༌།”
LUK 15:11 གཙོ༌བོ༌ ཡེ༌ཤུའི༌ ཏ༌རུང༌ངའང༌ མོལས༌, “མི༌ཞིག༌ག༌ བུ༌ཚ༌ ཉིས༌ ཡོད༌པིན༌།
LUK 15:12 བུ༌ཚ༌ ཆུ༌ངུན༌བོའེ༌ ཨ༌བ༌ ཟེརས༌, ‘ཨ༌བ༌ ངའེ༌ སྐལ༌ལེ༌ ནོར༌སྐལ༌བོ༌ སལ༌།’ ཏེ༌ནེ༌ ཨ༌བའེ༌ ཁོ༌རང༌ངི༌ ནོར༌བོ༌ བུ༌ཚ༌ ཉིས༌ཀོའེ༌ ནང༌ང༌ བགོས༌།”
LUK 15:13 “ཞག༌ ཁ༌ཅིག༌གི༌ སྟིང༌ནེ༌, བུ༌ཚ༌ ཆུ༌ངུན༌བོ༌ ནོར༌ ཚང༌མ༌ ཁུར༌ཏེ༌, ཐག༌རིང༌ངི༌ ཡུལ༌ཞིག༌ག༌ སོང༌། ཁོའེ༌ ནོར༌ ཚང༌མ༌ སམ༌བ༌ མ༌ཏང༌ང༌ སྕོད༌པ༌ ངན༌པའེ༌ ནང༌ང༌ གོད༌ལ༌ ཏངས༌།
LUK 15:14 ནོར༌ ཡོད༌ཁན༌ ཚང༌མ༌ སྐྱག༌ ཚར༌ར༌ཅིག༌, ཏེ༌ ཡུལ༌ལ༌ མུ༌གེ༌ ཀྲག༌པོ༌ ལངས༌, ཡང༌ ཁོའ༌ སྟོག༌རི༌ དང༌ ཁྱག༌རི༌ ཐོང༌།
LUK 15:15 ཏེ༌ནེ༌ ཁོ༌ ལས༌ ཙལ༌ལ༌ ཏེ༌ ཡུལ༌ལི༌ མི༌ཞིག༌གི༌ཀ༌ སོང༌, ཡང༌ ཁོའེ༌ ཞིང༌ངི༌ཀ༌ ཕག༌གུན༌ལ༌ ཟན༌ ཏང༌ང༌ ཁོ༌ ལམ༌ཅུགས༌།
LUK 15:16 ཁོའེ༌ ཕག༌གི༌ ཟན༌བོ༌ ཟོས༌ཏེ༌ ཁོ༌རང༌ངི༌ གྲོད༌པ༌ གྲང༌ཅུག༌ཅེས༌སི༌ དོད༌པ༌ ཅོས༌, ཨིན༌ནའང༌ ཁོའ༌ སུའིང༌ ཅའང༌ མ༌ཏངས༌།”
LUK 15:17 “ཏེ༌ནེ༌ ཁོའ༌ སམ༌བ༌ ཡོངས༌ཏེ༌ ཟེརས༌, ‘ངའེ༌ ཨ༌བའེ༌ ལ༌པ༌ མང༌པོའེ༌ བྲང༌བྲངས༌ ཟོས༌ཏེ༌ ལག༌ལུས༌ བོར༌རད༌པིན༌, ཨིན༌ནའང༌ ང༌ འི༌ཀ༌ སྟོག༌རི༌ ཐོང༌ཏེ༌ ཤི༌ཀྱིས༌ རག༌།
LUK 15:18 ང༌ ང༌རང༌ངི༌ ཨ༌བའེ༌ཀ༌ ལོགས༌ཏེ༌ སོང༌ཏེ༌ ཟེར༌ཨིན༌, “ངའེ༌ དཀོན༌མཆོག༌ དང༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌།
LUK 15:19 ངའ༌ ཉེ༌རང༌ངི༌ བུ༌ཚ༌ ཨིན༌ ཟེར༌ཅེས༌སི༌ འོས༌པ༌ མན༌, ཉེ༌རང༌ངི༌ ལ༌པ༌ཞིག༌ ཙོགས༌ལ༌ ངའ༌ བོར༌ར༌ ཛད༌།”’
LUK 15:20 ཏེ༌ནེ༌ ཁོ༌ ལངས༌ཏེ༌ ཁོ༌རང༌ངི༌ ཨ༌བ༌ ཡོད༌ས༌ སོང༌།” “ཁོ༌ ཨ༌བ༌ནེ༌ ཏ༌རུང༌ ཐག༌རིང༌ང༌ ཡོད༌ཏེའང༌ ཁོའེ༌ བུ༌ཚའ༌ ཡོང༌ང༌ ཐོང༌ཏེ༌ ཨ༌བའེ༌ སེམས༌ སྙིང༌རྗེ༌ གངས༌། ཨ༌བ༌ བང༌ཏངས༌ཏེ༌ སོང༌ ཡང༌ བུ༌ཚའ༌ ཁྲིལ༌ཏེ༌ པུག༌ ཏངས༌།
LUK 15:21 བུ༌ཚའེ༌ ཁོའ༌ ཟེརས༌, ‘ཨ༌བ༌ལེ༌, ངའེ༌ དཀོན༌མཆོག༌ དང༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌། ངའ༌ ཉེ༌རང༌ངི༌ བུ༌ཚ༌ ཨིན༌ ཟེར༌ཅེས༌སི༌ འོས༌པ༌ མན༌།’”
LUK 15:22 “ཨིན༌ནའང༌ ཨ༌བའེ༌ ཡོག༌པོ༌གུན༌ བོད༌ཏེ༌ ཟེརས༌, ‘གྱོགས༌པ༌ ཅོས༌, ཚང༌མའེ༌སང༌ རིན༌ཅན༌ ཀོས༌ ཁྱོངས༌ཏེ༌ ཁོའ༌ སྐོན༌, ལག༌པ༌ སེར༌རི༌ སེར༌དུབ༌ དང༌ རྐང༌པ༌ པ༌བུ༌ སྐོན༌།
LUK 15:23 བེ༌ཙོ༌ གྱགས༌པ༌ ཁྱོངས༌ཏེ༌ སོད༌, ང༌དང༌གུན༌ནི༌ གྲོན༌ ཏངས༌ཏེ༌ གའ༌མོ༌ སྐྱིད༌པོ༌ ཅོ༌ཨིན༌,
LUK 15:24 ཅིའ༌ཟེར༌ན༌ ངའེ༌ འི༌ བུ༌ཚ༌བོ༌ ཤི༌ཏེ༌ ཨིན༌པིན༌, ཏ༌ སོན༌ཏེ༌ ཨིན༌ནོག༌། སྟོར༌ཏེ༌ ཨིན༌པིན༌, ཏ༌ ཐོབ༌ཏེ༌ ཨིན༌ནོག༌།’ ཡང༌ ཁོང༌གུན༌ནི༌ གའ༌མོ༌ སྐྱིད༌པོ༌ ཅོ༌ཅེས༌ གོ༌ཟུག༌།”
LUK 15:25 “ཏེན༌ན༌ ཏུས༌ལ༌ བུ༌ཚའ༌ ཆེན༌མོ༌བོ༌ ཞིང༌ནེ༌ ལོག༌ཏེ༌ ཁང༌པའེ༌ ཉེ༌མོ༌ ལེབ༌བ༌ཅིག༌, ཁོའ༌ ལུ༌ དང༌ རྩེས༌ ཏང༌ཁན༌ ཚོར༌།
LUK 15:26 ཁོའེ༌ ཡོག༌པོ༌ཞིག༌ བོད༌ཏེ༌ ཅི༌ ཨིན༌ནོག༌ ཟེར༌ཏེ༌ ཏྲིས༌,
LUK 15:27 ཡོག༌པོ༌བོའེ༌ ལན༌ཏངས༌, ‘ཉེ༌རང༌ངི༌ ནོ༌ ལོགས༌ཏེ༌ ཡོངས༌ ཡང༌ ཁོ༌ ཁམ༌ཟང༌ ཁྲངས༌པོ༌ ལེབ༌ པ༌སང༌ ཉེ༌རང༌ངི༌ ཨ༌བའེ༌ པེ༌ཙེ༌ གྱགས༌པ༌བོ༌ སད༌ཏེ༌ གའ༌མོ༌ སྐྱིད༌པོ༌ ཅོ༌ཨིན༌ ཨིན༌ནོག༌།’”
LUK 15:28 “ཨ༌ཅོའ༌ སྲོ༌ ཡོངས༌ཏེ༌ ནང༌ཀུག༌ག༌ མ༌སོང༌། ཏེ༌ནེ༌ ཨ༌བ༌ ཕི༌ལོག༌ག༌ ཡོངས༌ཏེ༌ ཁོའ༌ ཇུ༌ཇུ༌ ནང༌ང༌ ཡོང༌ ཟེརས༌།
LUK 15:29 ཨིན༌ནའང༌ བུ༌ཚའེ༌ ཨ༌བའ༌ ཟེརས༌, ‘ངའེ༌ འི༌ཟམ༌ ལོ༌ མང༌པོ༌ ཉེ༌རང༌ང༌ ཡོག༌པོ༌ ཙོགས༌ལ༌ ཞབས༌ཏོག༌ ཞུས༌པིན༌ ཡང༌ ཉེ༌རང༌ངི༌ ཁའ༌ ནམ༌ མ༌ཉནས༌? ངའ༌ ང༌རང༌ངི༌ ཛ༌འོ༌གུན༌ ཉམ༌པོ༌ གའ༌མོ༌ ཅོའ༌ལ༌ ཉེ༌རང༌ངི༌ རེ༌གུ༌ཞིག༌གའང༌ མ༌ཏངས༌།
LUK 15:30 ཨིན༌ནའང༌ ཉེ༌རང༌ངི༌ འི༌ བུ༌ཚ༌ ཀ༌བོའེ༌ ཟུགས༌ཙོང༌མ༌གུན༌ ཉམ༌པོ༌ ཉེ༌རང༌ངི༌ ནོར༌ ཚང༌མ༌ གོད༌ལ༌ ཏངས༌ཏེ༌ ལོགས༌ཏེ༌ ཡོང༌ང༌ཅིག༌, ཉེ༌རང༌ངི༌ ཁོའེ༌ ཕིའ༌ པེ༌ཙེ༌ གྱགས༌པ༌བོ༌ སདས༌།’”
LUK 15:31 “ཏེ༌ནེ༌ ཨ༌བའེ༌ ཁོའ༌ ཟེརས༌, ‘ངའེ༌ བུ༌ཚ༌ ཁྱོ༌རང༌ ཏུས༌གྱུན༌ ང༌ ཉམ༌པོ༌ ཨིན༌ནོག༌, ཡང༌ ངའེ༌ ཨིན༌ཁན༌ ཚང༌མ༌ ཁྱོ༌རང༌ངི༌ ཨིན༌ནོག༌།
LUK 15:32 ཨིན༌ནའང༌ ང༌དང༌གུན༌ནི༌ གའ༌མོ༌ སྐྱིད༌པོ༌ ཅོ༌གོས༌ ཅིའ༌ཟེར༌ན༌ འི༌ ཁྱོ༌རང༌ངི༌ ནོ༌ ཤི༌ཏེ༌ ཨིན༌པིན༌, ཏ༌ སོན༌ཏེ༌ ཨིན༌ནོག༌། ཁོ༌ སྟོར༌ཏེ༌ ཨིན༌པིན༌, ཏ༌ ཐོབ༌ཏེ༌ ཨིན༌ནོག༌།’”
LUK 16:1 གཙོ༌བོ༌ ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “མི༌ ཆུག༌པོ༌ཞིག༌ག༌ ཁོའེ༌ ཆག༌ཟོད༌པོའེ༌ ནོར༌ གོད༌ལ༌ ཏང༌དུག༌ ཟེར༌ཏེ༌ སྤེ༌ར༌ ཚོར༌པ༌
LUK 16:2 ཁོའེ༌ ཆག༌ཟོད༌པོ༌ བོད༌ཏེ༌ ཟེརས༌, ‘ཁྱོ༌རང༌ངི༌ སྐོར༌ལ༌ ངའེ༌ ཅི༌ ཚོར༌ར༌ནོག༌? ཁྱོ༌རང༌ང༌ ཀལ༌ཁན༌ནི༌ ཁག༌ དང༌ པེ༌ནེ༌ རྩི༌རུག༌གུན༌ ཏོང༌, ཏ༌ནེ༌ཕར༌ལ༌ ངའེ༌ ཁྱོ༌རང༌ ཆག༌ཟོད༌དི༌ ཀོ༌སའེ༌ཀ༌ བོར༌ར༌མེད༌།’”
LUK 16:3 “ཆག༌ཟོད༌པོའེ༌ ཁོ༌རང༌ང༌ ཟེརས༌, ‘ཏ༌ ངའེ༌ ཅི༌ ཅོ༌གོས༌? སྤོན༌བོའེ༌ ངའ༌ ལས༌ནེ༌ ཕིངས༌། ས༌ སྐོ༌ཅེས༌སི༌ ཁྱུད༌ ངའ༌ མེ༌རག༌, ལྩང༌ང༌ལ༌ ངའ༌ ཁྲེལ༌ཅེས༌རག༌།
LUK 16:4 ལས༌ནེ༌ ཕིངས༌ཏེ༌ སྟིང༌ནེ༌ མི༌གུན༌ནི༌ ང༌ ཁོང༌གུན༌ནི༌ ཁང༌པའེ༌ ནང༌ང༌ དུག༌ས༌ དང༌ ཟན༌ ཏང༌ཅེས༌སི༌ ཕིའ༌ ཅི༌ ཅོ༌གོ༌ཤེས༌པོ༌ ང༌ ཧ༌གོ༌།’”
LUK 16:5 “ཏེ༌ནེ༌ ཁོའེ༌ སྤོན༌བོའེ༌ བུ༌ལོན༌ ཏངས༌ཏེ༌ ཡོད༌ཁན༌ ཚང༌མ༌ རེ༌རེ༌ ཅོས༌ཏེ༌ བོདས༌། ཏང༌པོ༌བོའ༌ ཏྲིས༌, ‘ཁྱོ༌རང༌ང༌ ངའེ༌ སྤོན༌བོའ༌ ཤལ༌གོ༌ཤེས༌སི༌ བུ༌ལོན༌ ཙམ༌ ཡོད༌?’
LUK 16:6 ཁོའེ༌ ལན༌ཏངས༌, ‘ཨོ༌ལིཝ༌ཝི༌ མར༌ནག༌ ལི༌ཀྲར༌ སྟོང༌སུམ༌།’ ཁོའེ༌ ཟེརས༌, ‘གྱོགས༌པ༌ ཁྱོ༌རང༌ངི༌ བུ༌ལོན༌ནི༌ ཐོ༌ ཁྱོངས༌ཏེ༌ སྟོང༌ ཅིག༌ནང༌ཕེད༌ བྲིས༌།’”
LUK 16:7 “ཏེ༌ནེ༌ ཁོའེ༌ ཡང༌ཅིག༌ག༌ ཏྲིས༌, ‘ཁྱོ༌རང༌ང༌ བུ༌ལོན༌ ཤལ༌གོ༌ཤེས༌ ཙམ༌ ཡོད༌?’ ཁོའེ༌ ལན༌ཏངས༌, ‘ཀྲོ༌ ཀྱི༌ལོ༌ག༌རམ༌ སྟོན༌ ཉི༌ཤུ༌’, ཡང༌ ཁོའེ༌ ཟེརས༌, ‘ཁྱོ༌རང༌ངི༌ བུ༌ལོན༌ནི༌ ཐོ༌ ཁྱོངས༌ཏེ༌ སྟོན༌ ཅུ༌རུག༌ བྲིས༌།’”
LUK 16:8 “སྤོན༌བོའེ༌ ཀྲང༌པོ༌ མེད༌ཁན༌ནི༌ ཆག༌ཟོད༌པོའ༌, སམ༌བ༌ཅན༌ནི༌ ལས༌ ཅོས༌ཁན༌བོའེ༌ ཕིའ༌ སྟོད༌པ༌ ཏངས༌། འི༌ ཇིག༌རྟེན༌པ༌གུན༌ ཁོ༌རང༌གུན༌ནི༌ ཕྲོ༌པ༌གུན༌ ཉམ༌པོ༌ བྲེལ༌ ཅོ༌ཅེས༌སི༌ ནང༌ང༌, དཀོན༌མཆོག༌གི༌ འོད༌དི༌ ནང༌ང༌ དུག༌ཁན༌ མི༌གུན༌ནི༌ སང༌ མང༌ང༌ ཤང༌པོ༌ ཡོད༌ཏེ༌ ཨིན༌ནོག༌།
LUK 16:9 ངའེ༌ ཁྱོ༌ཞ༌གུན༌ལ༌ ཟེར༌རད༌, ཁྱོ༌ཞའེ༌ ཇིག༌རྟེན༌ནི༌ ནོར༌གུན༌ ཞན༌མ༌ ཕན༌ཐོགས༌ ཏང༌ཅེས༌ དང༌ ཁོང༌གུན༌ ཉམ༌པོ༌ ཛ༌འོ༌ ཅོ༌ཅེས༌ལ༌ ཀོལ༌། ཏེ༌ནེ༌ ནོར༌བོ༌ མེད༌ཁན༌ ཆའ༌ཅིག༌, ནམ༌ཁའེ༌ ཁང༌པའེ༌ ནང༌ང༌ ཁྱོ༌ཞ༌གུན༌ལ༌ གའ༌སུས༌ ཞུ༌ཨིན༌།”
LUK 16:10 “ཉུ༌ངུན༌ཞིག༌གི༌ ནང༌ང༌ ལོ༌ཁྱེལ༌ཅན༌གུན༌, མང༌པོའེ༌ ནང༌ངའང༌ ལོ༌ཁྱེལ༌ཅན༌ ལུས༌ཨིན༌། ཉུ༌ངུན༌ཞིག༌གི༌ ནང༌ང༌ ཀྲང༌པོ༌ མ༌ཅོ༌ཁན༌གུན༌ནི༌ མང༌པོའེ༌ ནང༌ངའང༌ ཀྲང༌པོ༌ མི༌ཅོ༌།
LUK 16:11 ཀལ༌ཏེས༌ ཁྱོ༌ཞ༌ ཇིག༌རྟེན༌ནི༌ ནོར༌རི༌ ལག༌ལེན༌ ཅོ༌ཅེས༌སི༌ ནང༌ང༌ ལོ༌ཁྱེལ༌ཅན༌ མེད༌ན༌ ཏེ༌ནེ༌ སུའི༌ ཁྱོ༌ཞའ༌ ནམ༌ཁའེ༌ དེན༌བའེ༌ ནོར༌ སྟད༌ཨིན༌།
LUK 16:12 ཀལ༌ཏེས༌ ཁྱོ༌ཞའ༌ ཞན༌མའེ༌ ནོར༌རི༌ ནང༌ང༌ ལོ༌ཁྱེལ༌ཅན༌ མེད༌ན༌, ཏེ༌ནེ༌ ཁྱོ༌ཞ༌རང༌ངི༌ ཨིན༌ཁན༌བོ༌ སུའི༌ ཁྱོ༌ཞའ༌ ཏང༌ཨིན༌།”
LUK 16:13 “ཡོག༌པོ༌ཞིག༌གི༌ སྤོན༌བོ༌ ཉིས༌སི༌ ཞབས༌ཏོག༌ ཅོ༌ མི༌ཉན༌, ཅིག༌པོའ༌ ནཕ༌རད༌ ཡང༌ ཅིག༌པོའ༌ ཅེས༌པ༌ ཅོ༌ཨིན༌, ཡ༌ ཅིག༌པོའ༌ སྙིང༌ནེ༌ ཞབས༌ཏོག༌ ཡང༌ ཅིག༌པོའ༌ མ༌ཐད༌ད༌ ཞབས༌ཏོག༌ ཞུའ༌ནོག༌། ཏེན༌ན༌ ཙོགས༌ལ༌ དཀོན༌མཆོག༌ དང༌ ནོར༌ ཉིས༌ཀོའ༌ ཞབས༌ཏོག༌ ཞུ༌ མི༌ཉན༌།”
LUK 16:14 ཏེ༌ ཚང༌མ༌ ཏེ༌ཀ༌ ཡོད༌ཁན༌ནི༌ ནོར༌དོད༌ཅན༌ ཕ༌རུ༌ཤི༌པ༌གུན༌ནི༌ ཚོར༌པ༌, ཁོང༌གུན༌ནི༌ ཡེ༌ཤུའ༌ ཁྲེལ༌གོད༌ ཏངས༌།
LUK 16:15 ཡེ༌ཤུའི༌ ཁོང༌གུན༌ལ༌ མོལས༌, “མི༌གུན༌ནི༌ དུན༌ལ༌ ཁྱོ༌ཞ༌གུན༌ནི༌ ཁྱོ༌ཞ༌རང༌ ཀྲང༌པོ༌ ཨིན༌ཁན༌ སྟན༌ཅེས༌ལ༌ ཐད༌དུག༌, ཨིན༌ནའང༌ ཁྱོ༌ཞའེ༌ སྙིང༌གུན༌ དཀོན༌མཆོག༌གི༌ ཁྱེན༌ན༌ནོག༌། མི༌གུན༌ནི༌ མ༌ རིན༌ཅན༌ ཐེ༌ཁན༌བོ༌, དཀོན༌མཆོག༌གི༌ སྐུན༌དུན༌ལ༌ ཏེ༌བོ༌ ཁམ༌ལོག༌ ཐེ༌ཨིན༌།”
LUK 16:16 གཙོ༌བོ༌ ཡེ༌ཤུའི༌ མོལས༌, “བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ བྲིའ༌ ཛད༌ཁན༌གུན༌ ཡོ༌ཧཱ༌ནན༌ནི༌ ཏུས༌ ཚག༌པ༌ ཤད༌ད༌ ཛདས༌། ཏེ༌ཏུས༌ནེ༌ ཕར༌ལ༌ དཀོན༌མཆོག༌གི༌ གྱལ༌སྲིད༌དི༌ གའ༌མོའེ༌ ནས༌ཚུལ༌ ཤད༌ཨིན༌ ཨིན༌ནོག༌, ཡང༌ ཏེ༌ནང༌ང༌ ཆ༌ཅེས༌སི༌ རྩོན༌གྲུས༌ ཚང༌མའེ༌ ཅོ༌ཨིན༌ ཨིན༌ནོག༌།
LUK 16:17 ཨིན༌ནའང༌ དཀོན༌མཆོག༌གི༌ བཀའ༌ཁྲིམས༌སི༌ ཨི༌གེ༌ ཡ༌ ཙག༌ཅིག༌ སྟོར༌རི༌ སང༌, ནམ༌ཁའ༌ དང༌ ས༌ ཉིས༌ཀོ༌ སྟོར༌ཅེས༌པོ༌ ལ༌མོ༌ ཨིན༌།”
LUK 16:18 “ཁོ༌རང༌ངི༌ ན༌མ༌ ཅད༌ཏེ༌ ཞན༌ བུ༌མོ༌ཞིག༌ ཉམ༌པོ༌ ན༌མ༌ ཅོ༌ཁན༌བོའེ༌ ལོག༌ཡེམ༌ ཅོས༌ཏེ༌ ཨིན༌ནོག༌, ཡང༌ ཅད༌ཁན༌ནི༌ བུ༌མོ༌ ཉམ༌པོ༌ ན༌མ༌ ཅོ༌ཁན༌བོའེང༌ ལོག༌ཡེམ༌ ཅོས༌ཏེ༌ ཨིན༌ནོག༌།”
LUK 16:19 “ཆུག༌པོ༌ མི༌ཞིག༌ ཀོ༌ཤེན༌ དང༌ རི༌ཤེམ༌མི༌ ཀོས༌ལག༌ རིན༌ཅན༌ གོན༌ཏེ༌, ཞག༌ཏང༌ གྲོན༌ཏང༌ཨིན༌ སྐྱིད༌པོ༌ ཅོ༌ཨིན༌ དུག༌གད༌པིན༌།
LUK 16:20 ཁོའེ༌ སྒོའེ༌ དུན༌ལ༌ ཟུགས༌པོ༌ གང༌པོའ༌ ཤོའ༌ བིང༌ཏེ༌ ཡོད༌ཁན༌ ལ༌ཟར༌རས༌ ཟེར༌ཁན༌ནི༌ ལྩང༌ཁན༌ཞིག༌ དུག༌གད༌པིན༌།
LUK 16:21 ཁོའེ༌ མི༌ ཆུག༌པོ༌བོའེ༌ ཅོག༌ཙེ༌ ཀ༌ནེ༌ བུད༌ཁན༌གུན༌ ཟའ༌ཅེས༌སི༌ དོད༌པ༌ ཅོའད༌པིན༌, ཏེ༌ཀ༌ ནན༌མ༌ ཁྱི༌གུན༌ ཡོངས༌ཏེ༌ ཁོའེ༌ མ༌ཁའ༌གུན༌ ལྡག༌གད༌པིན༌།”
LUK 16:22 “ཞག༌ཤིག༌ ལྩང༌ཁན༌བོ༌ ཤི༌, ཡང༌ དཀོན༌མཆོག༌གི༌ ཕོ༌ཉ༌གུན༌ སྐྱོད༌ཏེ༌ ཁོ༌ ཨབ༌ར༌ཧམ༌ ཡོད༌ས༌ ཁུར༌ཏེ༌ ཁྱེར༌ར༌ ཛདས༌། མི༌ ཆུག༌པོ༌བོའང༌ ཤི༌ ཡང༌ སུབས༌།
LUK 16:23 ཉལ༌ཝའེ༌ ནང༌ང༌ རྡུག༌ངལ༌ སྲན༌ཏྲེ༌ ཐོང༌ཨིན༌, ཁོའེ༌ ནམ༌ཁའ༌ ལྟས༌པ༌ ཐག༌རིང༌ཞིག༌ནེ༌ ཨབ༌ར༌ཧམ༌ དང༌ ཁོང༌ངི༌ དུན༌ལ༌ ལ༌ཟར༌རས༌ ཐོང༌།”
LUK 16:24 “ཁོའེ༌ སྐད༌ ཆེན༌མོ༌ ཉམ༌པོ༌ ཟེརས༌, ‘ཨ༌བ༌ ཨབ༌ར༌ཧམ༌, ངའེ༌ཀ༌ སྙིང༌རྗེ༌ ཛདས༌ཏེ༌ ལ༌ཟར༌རས༌སི༌ ཛི༌གུ༌བོ༌ ཆུའི༌ ནང༌ང༌ ཅུགས༌ཏེ༌ ངའེ༌ ལྕེ༌བོ༌ ཀྲང༌མོ༌ ཅོ༌ ཅུག༌ག༌ ཀལ༌ལ༌ ཛད༌དའང༌, ཅིའ༌ཟེར༌ན༌ ང༌ འི༌ མེ༌ ནང༌ང༌ རྡུག༌ངལ༌ ཆེན༌མོ༌ ཐོང༌ང༌རག༌།’”
LUK 16:25 “ཨིན༌ནའང༌ ཨབ༌ར༌ཧམ༌མི༌ ལན༌ཏངས༌, ‘བུ༌ཚ༌ ཨིད༌ཏུ༌ ཅོས༌, ཁྱོ༌རང༌ང༌ རང༌ངི༌ མི༌ཚེ༌ ནང༌ང༌ སྐྱིད༌པོ༌གུན༌ ཐོབ༌ ཟ༌ནེ༌ ལ༌ཟར༌རས༌ལ༌ རྡུག༌ངལ༌གུན༌ ཐོང༌ཏེ༌ ཨིན༌པིན༌། ཏ༌ འི༌ཀ༌ ལ༌ཟར༌རས༌ལ༌ སྐྱིད༌པོ༌ ཡང༌ ཁྱོ༌རང༌ང༌ རྡུག༌ངལ༌ ཐོང༌དུག༌,
LUK 16:26 ཏེ༌ ཚང༌མ༌ མ༌ཚད༌ ང༌ཞའ༌ དང༌ ཁྱོ༌རང༌ངི༌ པར༌ལ༌ ལུང༌པ༌ ཆེན༌མོ༌ཞིག༌ ཡོད༌། འི༌ཀ༌ནེ༌ ཁྱོ༌རང༌ ཆོགས༌ལ༌ ཆའ༌ ཐད༌ནའང༌ ཆའ༌ མི༌ཉན༌, ཡང༌ ཏེ༌ཀ༌ནེ༌ སུ༌ཞིག༌གའང༌ ང༌ཞའ༌ ཡོད༌ས༌ ཡོང༌ མི༌ཉན༌།’”
LUK 16:27 “ཁོའེ༌ ཟེརས༌, ‘ཇུ༌ཇུ༌ ཡབ༌ ཨབ༌ར༌ཧམ༌, ལ༌ཟར༌རས༌ ངའེ༌ ཨ༌བའེ༌ ཁང༌པ༌ ཀལ༌ལ༌ ཛད༌ཏེ༌
LUK 16:28 ངའེ༌ ཨ༌ཅོ༌ནོ༌ ལྔ༌ཀོའ༌ སྡིག༌པའེ༌ མི༌ཚེ༌ ཕུད༌ཅེས༌ མ༌ཕང༌ན༌ ཁོང༌གུན༌ནའང༌ འི༌ བར༌དོ༌ཅན༌ནི༌ ནས༌སའེ༌ ནང༌ང༌ ལེབ༌ཨིན༌ མོལ༌ཏེ༌ སྤང༌པུད༌ ཅུག༌ག༌ ཛད༌དའང༌།’”
LUK 16:29 “ཨིན༌ནའང༌ ཨབ༌ར༌ཧམ༌མི༌ ལན༌ཏངས༌, ‘མོ༌ཟེས༌ དང༌ ཞན༌ ལུང༌སྟོན༌པ༌གུན༌ནི༌ བྲི༌ཁན༌གུན༌ ཁོང༌གུན༌ནི༌ ལག༌ག༌ ཡོད༌ཏེ༌ ཨིན༌ནོག༌, ཏེ༌གུན༌ལ༌ ཉན༌གོས༌།’”
LUK 16:30 “ཁོའེ༌ ཟེརས༌, ‘ཡབ༌ ཨབ༌ར༌ཧམ༌ ཏེ༌ཟུག༌ མ༌མོལ༌། ཀལ༌ཏེས༌ ཤི༌ཁན༌གུན༌ནེ༌ ཕྲོ༌ནེ༌ ཅིག༌ ཁོང༌གུན༌ནི༌ཀ༌ ཆ༌ན༌, ཁོང༌གུན༌ནི༌ གྱོད༌པ༌ ཅོས༌ཏེ༌ སེམས༌ གྱུར༌ཨིན༌།’”
LUK 16:31 “ཨབ༌ར༌ཧམ༌མི༌ ཁོའ༌ ཟེརས༌, ‘ཀལ༌ཏེས༌ ཁོང༌གུན༌ནི༌ མོ༌ཟེས༌ དང༌ ལུང༌སྟོན༌པ༌གུན༌ནི༌ བྲིས༌ཁན༌གུན༌ ཁའ༌ མ༌ཉན༌ན༌, ཤི༌ཁན༌གུན༌ནི༌ ཕྲོ༌ནེ༌ ལངས༌ཏེ༌ ཆའ༌ཁན༌བོའེ༌ ཁའང༌ ཁོང༌གུན༌ནི༌ མི༌ཉན༌།’”
LUK 17:1 གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “སྡིག༌པའེ༌ ནང༌ང༌ གྱེལ༌ཅུག༌ཁན༌ ཏན༌ཏན༌ ཇུང༌ཨིན༌, ཨིན༌ནའང༌ ཏེ༌བོ༌ ཇུང༌ཅུག༌ཁན༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌།
LUK 17:2 འི༌ ཆུ༌ངུན༌གུན༌ནི༌ ནང༌ནེ༌ ཅིག༌ག༌ སྡིག༌པ༌ ཅོ༌ཅུག༌གི༌ སང༌ ཁོ༌རང༌ངི༌ སྐྱེའ༌ རན༌ཐག༌གི༌ རྡོའ༌ ཏགས༌ཏེ༌ གྱ༌ཚོའེ༌ ནང༌ང༌ ཕང༌ན༌ གྱལ༌།
LUK 17:3 ཏེ༌ནེ༌ ཁྱོ༌ཞའེ༌ ཞས༌ཏེ༌ སུ༌ཞིག༌གའང༌ སྡིག༌པའེ༌ ནང༌ང༌ མི༌གྱེལ༌ཅེས༌ལ༌ ཏན༌ཏན༌ ཅོས༌།” “ཀལ༌ཏེས༌ ཁྱོ༌ཞའེ༌ སྤུན༌ཞིག༌གི༌ སྡིག༌པ༌ ཅོ༌ན༌, ཁོའ༌ ཁའ༌སྐྱེས༌ཏེ༌ སྐྱོང༌, ཡང༌ ཀལ༌ཏེས༌ ཁོའེ༌ གྱོད༌པ༌ ཅོ༌ན༌ ཤགས༌པ༌ ཏོང༌།
LUK 17:4 ཀལ༌ཏེས༌ ཁོའེ༌ ཉི༌མ༌ ཅིག༌གི༌ ནང༌ང༌ ལན༌ རྡུན༌ ཁྱོ༌ཞའེ༌ གྱབ༌གལ༌ལ༌ སྡིག༌པ༌ ཅོས༌ཏེ༌ ལན༌ རྡུན༌ ཁྱོ༌ཞའེ༌ཀ༌ ཡོངས༌ཏེ༌ གྱོད༌པ༌ ཅོ༌ན༌, ཁྱོ༌ཞའེ༌ ཁོའ༌ ཤགས༌པ༌ ཏོང༌།”
LUK 17:5 སྐུ༌ཚབས༌གུན༌ནི༌ གཙོ༌བོའ༌ ཟེརས༌, “ང༌ཞའ༌ ཏད༌པའེ༌ ནང༌ང༌ ལྡན༌ ཅུག༌ག༌ ཛད༌།”
LUK 17:6 གཙོ༌བོའེ༌ ལན༌སལས༌, “ཀལ༌ཏེས༌ ཁྱོ༌རང༌ང༌ ཉུང༌སྐར༌རི༌ ས༌འོན༌ ཆུ༌ངུན༌ ཟམ༌ཤིག༌གི༌ ཏད༌པ༌ ཡོད༌ན༌ ཁྱོ༌རང༌ངི༌ འོ༌སེ༌ ལྕང༌མའ༌ ཟེར༌, ‘པ༌ཀྲག༌ནེ༌ པུད༌ཏེ༌ ཚོའེ༌ ནང༌ང༌ སོང༌’ ཡང༌ ཏེ༌བོའེ༌ ཁྱོ༌རང༌ངི༌ ཁའ༌ ཉན༌ཨིན༌།”
LUK 17:7 “ཁྱོ༌རང༌ངི༌ ཡོག༌པོ༌ཞིག༌ ཞིང༌སྔོའ༌ ཡ༌ ལུག༌ ཚོའ༌ སོང༌ཏེ༌ ཁང༌པ༌ ལོག༌ཏེ༌ ཡོང༌ང༌ཅིག༌, ཁྱོ༌རང༌ངི༌ ཁོའ༌ ཟེར༌ཨིན༌ན༌, ‘ཡོང༌, འི༌ཀ༌ དུགས༌ཏེ༌ ཁར༌ཇི༌ ཟོ༌’?
LUK 17:8 ཁྱོ༌རང༌ངི༌ ཁོའ༌ མི༌ཟེར༌ར༌, ‘གོང༌ཟན༌ནི༌ གྲལ༌གྲིག༌ ཅོས༌, ཡང༌ ང༌ ཟའ༌ དང༌ ཐུང༌ ཚར༌ཚར༌ ཚག༌པ༌ སྐྱེ༌རགས༌ ཅིངས༌ཏེ༌ ཞབས༌ཏོག༌ ཅོས༌, ཏེ༌ སྟིང༌ནེ༌ ཁྱོ༌རང༌ ཟ༌ཐུང༌ནའང༌ གྲིག༌’
LUK 17:9 ཟེར༌ཁན༌ ནང༌ཞིན༌ ཡོག༌པོ༌བོའེ༌ ཅོས༌པ༌, ཁྱོ༌རང༌ངི༌ ཁོའ༌ ཐུག༌རྗེ༌ཆེ༌ ཟེར༌ཨིན༌ན༌? ཏན༌ཏན༌ལ༌ མི༌ཟེར༌།
LUK 17:10 ཏེན༌ན༌ ཙོགས༌ལ༌ མོལ༌ཁན༌ ནང༌ཞིན༌ ཁྱོ༌ཞའེ༌, ཅི༌ཚང༌མ༌ ཅོ༌ཚར༌ཏེ༌, ཁྱོ༌ཞའེ༌ ཟེར༌གོས༌, ‘ང༌ཞའ༌ རྩི༌ཝའེ༌ འོས༌པ༌ མན༌ཁན༌ ཡོག༌པོ༌ ཨིན༌, ཁག༌ ཀལ༌ཁན༌ནི༌ ལས༌པོ༌ ང༌ཞའེ༌ ཅོས༌པིན༌།’”
LUK 17:11 གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མི༌ གྱལ༌ས༌ ཆོགས༌ལ༌ སྐྱོད༌ ཟ༌ནེ༌ ས༌མར༌རི༌ཡཱ༌ དང༌ གཱ༌ལིལ༌ལིའི༌ ཡུལ༌ཇོངས༌སི༌ པར༌ཚམས༌ནེ༌ སྐྱོདས༌།
LUK 17:12 ཁོང༌ གམ༌ཡུལ༌ཞིག༌གི༌ ནང༌ང༌ སྐྱོད༌ ཟ༌ནེ༌ ཛེ༌ནད༌ ཡོང༌ཁན༌ རྕུའི༌ ཡེ༌ཤུ༌ ཐོང༌ ཡང༌ ཐག༌རིང༌ང༌ དུགས༌ཏེ༌
LUK 17:13 ཀུ༌ཅོ༌ ཏང༌ཨིན༌ ཁོང༌གུན༌ནི༌ ཟེརས༌, “ཡེ༌ཤུ༌ སྤོན༌བོ༌ལེ༌, ང༌ཞའེ༌ཀ༌ སྙིང༌རྗེ༌ ཛད༌དའང༌།”
LUK 17:14 ཁོང༌གུན༌ ཟིགས༌ས༌ཅིག༌ ཁོང༌ངི༌ མོལས༌, “སོང༌, ཁྱོ༌ཞ༌རང༌ངི༌ ཟུགས༌པོ༌ བླ༌མ༌གུན༌ལ༌ སྟོན༌།” ལམ༌ནེ༌ ཆེན༌ ཡོད༌ ཟ༌ནེ༌ ཁོང༌གུན༌ ཛེ༌ནད༌ནེ༌ ཕན༌།
LUK 17:15 ཁོང༌གུན༌ནི༌ ཕྲོ༌ནེ༌ ཅིག༌གི༌ ནད༌ གྱལ༌ཁན༌བོ༌ ཐོང༌ཏེ༌ སྐད༌ ཆེན༌མོའེ༌ ནང༌ང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ལོགས༌ཏེ༌ སོང༌།
LUK 17:16 ཡང༌ ཡེ༌ཤུའི༌ ཞབས༌སི༌ དུན༌ལ༌ གྱེལ༌ཏེ༌ ཁོང༌ང༌ ཐུག༌རྗེ༌ཆེ༌ ཞུས༌། ཁོ༌ ས༌མར༌རི༌ཡཱ༌པ༌ཞིག༌ ཨིན༌པིན༌།
LUK 17:17 ཡེ༌ཤུའི༌ མོལས༌, “ཁྱོ༌ཞ༌ རྕུ༌ ནད༌ནེ༌ ཕན༌ མ༌ཕན༌ས༌? ཞན༌ རྒུ༌བོ༌ ཀ༌རེ༌?
LUK 17:18 ཡ༌ཧུ༌དཱ༌པ༌ མན༌ཁན༌ ཁྱོ༌རང༌ ཅིག༌པོ༌ མ༌ནེ༌, ཞན༌ ཚང༌མ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ལ༌ ལོགས༌ཏེ༌ མ༌ཡོངས༌ས༌?”
LUK 17:19 ཏེ༌ནེ༌ ཁོང༌ངི༌ ཁོའ༌ མོལས༌, “ལོངས༌ ཡང༌ སོང༌, ཁྱོ༌རང༌ངི༌ ཏད༌པའེ༌ ཁྱོ༌རང༌ གྱལ༌ཅུགས༌ཏེ༌ ཨིན༌།”
LUK 17:20 ཞག༌ཤིག༌ ཕ༌རུ༌ཤི༌པ༌གུན༌ནི༌ དཀོན༌མཆོག༌གི༌ གྱལ༌སྲིད༌ ནམ༌ ལེབ༌ཨིན༌ ཟེར༌ཏེ༌ ཏྲི༌ཁན༌བོའ༌ གཙོ༌བོ༌ ཡེ༌ཤུའི༌ ལན༌སལས༌, “ཞིབ༌ཅ༌ ཅོས༌ཏེ༌ ལྟེན༌ དུག༌ནའང༌ དཀོན༌མཆོག༌གི༌ གྱལ༌སྲིད༌པོ༌ ལེབ༌བ༌ མི༌ཐོང༌,
LUK 17:21 ཡ༌ མི༌གུན༌ནི༌ ‘འི༌ཀ༌ནེ༌ ཡ༌ འ༌ཀ༌ནེ༌ དུག༌’ མི༌ཟེར༌ ཅིའ༌ཟེར༌ན༌ དཀོན༌མཆོག༌གི༌ གྱལ༌སྲིད༌ ནི༌ ཁྱོ༌ཞ༌གུན༌ནི༌ ཕྲོའ༌ ཡོད༌ཏེ༌ ཨིན༌ནོག༌།”
LUK 17:22 ཏེ༌ནེ༌ ཁོང༌ངི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ཏུས༌པོ༌ ལེབ༌ཨིན༌ ནམ༌ ཁྱོ༌ཞ༌གུན༌ནི༌ མི༌རིགས༌སི༌བུ༌ ལོགས༌ཏེ༌ ཡོང༌ཅེས༌སི༌ ཞག༌པོ༌ ཐོང༌ཅེས༌སི༌ དོད༌པ༌ བོར༌ཨིན༌ ཨིན༌ནའང༌ ཐོང༌ མི༌ཐུབ༌།
LUK 17:23 མི༌གུན༌ནི༌ ཁྱོ༌ཞའ༌ ཟེར༌ཨིན༌, ‘ལྟོས༌, ཁོང༌ འི༌ཀ༌ནེ༌ ཡ༌ འ༌ཀ༌ནེ༌ དུག༌’, ཁོང༌གུན༌ནི༌ སྟིང༌རང༌ནེ༌ བང༌ཏངས༌ཏེ༌ མ༌ཆ༌།
LUK 17:24 སྐམ༌ལག༌གི༌ འོད༌ ནམ༌ཁའེ༌ ཆོགས༌ ཅིག༌ནེ༌ ཞན༌ཆོགས༌ ཅིག༌ག༌ ཁྱེབས༌ས༌ ཙོགས༌ མི༌རིགས༌སི༌བུ༌ ལོགས༌ཏེ༌ ཡོང༌ ཟ༌ནེའང༌ ཆེན༌།
LUK 17:25 ཨིན༌ནའང༌ ཏེ༌ཏུས༌སི༌ སང༌ སྔུན༌ལ༌ ཁོའ༌ རྡུག༌ངལ༌ མང༌པོ༌ ཐོངས༌ཏེ༌ འི༌ མི༌རབས༌པོའེ༌ ཁོ༌ སུ༌ ཨིན༌ཁན༌བོའེ༌ཀ༌ ཏད༌པ༌ མ༌ཅོའ༌ ཕང༌ཨིན༌།”
LUK 17:26 “མི༌ ཀྲང༌པོ༌ ནོ༌ཨའེ༌ ཏུས༌ལ༌ ཇུང༌ཁན༌ ཙོགས༌ མི༌རིགས༌སི༌བུ༌ ཡོང༌ངི༌ ཏུས༌ལའང༌ ཇུང༌ཨིན༌
LUK 17:27 ནོ༌ཨ༌ གྲུ༌ཟིང༌ངི༌ ནང༌ང༌ ཞུགས༌སི༌ ཞག༌ ཚོག༌པ༌ མི༌གུན༌ ཟེན༌, ཐུང༌ཨིན༌, ན༌མ༌ ཅོ༌ཨིན༌ དང༌ བག༌མ༌ ཏང༌ཨིན༌ དུགས༌། ཏེ༌ནེ༌ ཇིག༌རྟེན༌ནི༌ཀ༌ ཆུ༌ལོག༌ ཡོངས༌ཏེ༌ མི༌ཚང༌མ༌ ཆུའི༌ ནང༌ང༌ ནུབ༌ཏེ༌ ཤི༌།”
LUK 17:28 “ཏེན༌ན༌ ཙོགས༌ལ༌ ལོད༌ ཟེར༌ཁན༌ནི༌ ཏུས༌ལའང༌ སོང༌པིན༌, མི༌གུན༌ ཟེན༌, ཐུང༌ཨིན༌, ཉོ༌ཨིན༌, ཚོང༌ཏང༌ཨིན༌, ཞིང༌ ཏབ༌ཨིན༌ དང༌ ཁང༌པ༌ རྩིག༌ཨིན༌ ཡོད༌པིན༌,
LUK 17:29 ཨིན༌ནའང༌ ལོད༌ སོ༌དོམ༌མི༌ གྱལ༌ས༌ནེ༌ བིང༌ང༌ཅིག༌, ནམ༌ཁའ༌ནེ༌ མེ༌ དང༌ མུ༌ཟི༌ ཞེན༌ཨིན༌ ཡོད༌ཁན༌གུན༌ བབས༌ཏེ༌ ཚང༌མ༌ མེད༌ཁན༌ སོང༌།
LUK 17:30 ཏེན༌ན༌ ཙོགས༌ མི༌རིགས༌སི༌བུ༌ ཡང༌སྐྱར༌ སྐྱོད༌དི༌ ཏུས༌ལ༌ ཇུང༌ཨིན༌།
LUK 17:31 ཏེ༌ ཞག༌ག༌ ཁང༌པའེ༌ ཁེ༌ཐོག༌ག༌ ཡོད༌ཁན༌གུན༌ ཡོག༌ག༌ བབས༌ཏེ༌ ཁང༌པའེ༌ ནང༌ང༌ ནོར༌གུན༌ ལེན༌ན༌ལ༌ མ༌ཆ༌། ཏེན༌ན༌ ཙོགས༌ལ༌ ཞིང༌ངི༌ཀ༌ ལས༌ ཅོ༌ཨིན༌ ཡོད༌ཁན༌གུན༌ ལོགས༌ཏེ༌ ཁང༌པའ༌ ཅི༌ཏོང༌ ལེན༌ན༌ལ༌ མ༌ཆ༌།
LUK 17:32 ལོད༌དི༌ ན༌མའ༌ ཇུང༌ཁན༌བོ༌ ཨིད༌ཏུ༌ ཅོས༌།
LUK 17:33 རང༌སྲོག༌ ཐམས༌ཏེ༌ དུག༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ ངའེ༌ ཕིའ༌ ཁོ༌རང༌ངི༌ སྲོག༌ སྐྱལ༌ཁན༌གུན༌ནི༌ དེན༌བའེ༌ མི༌ཚེ༌བོ༌ སྐྱོབ༌ཨིན༌།
LUK 17:34 ངའེ༌ ཁྱོ༌ཞ༌གུན༌ལ༌ ཟེར༌རད༌, ཏེ༌ ཚན༌ལ༌ མི༌ ཉིས༌ མལ༌ཙ༌ ཅིག༌གི༌ཀ༌ ཉིད༌ ཏངས༌ཏེ༌ ཡོད༌ཁན༌གུན༌ནི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌།
LUK 17:35 རང༌ཐག༌གི༌ཀ༌ ཀྲོ༌ ཐག༌ཨིན༌ ཡོད༌ཁན༌ བུ༌མོ༌ ཉིས༌སི༌ ནང༌ནེ༌ ཅིག༌པོ༌ ནམ༌ཁའ༌ ཁྱེར༌ར༌ ཛད༌ཨིན༌ ཡང༌ ཅིག༌པོ༌ བོར༌ཨིན༌།”
LUK 17:36 
LUK 17:37 ཁོང༌གུན༌ནི༌ ཏྲིས༌, “གཙོ༌བོ༌, འི༌ ཚང༌མ༌ ཀ༌རུ༌ ཇུང༌ཨིན༌?” ཁོང༌ངི༌ ལན༌སལས༌, “རོ༌ ཡོད༌ས༌ ཤ༌ ཟའ༌ཁན༌ནི༌ ཅ༌གུན༌ ཁོར༌ར༌ནོག༌། ༼ཁྱོ༌ཞའེ༌ ཏེ༌ སྟགས༌གུན༌ ཇུང༌ང༌ ཐོང༌ང༌ཅིག༌ ཐའ༌མའེ༌ ཏུས༌ ལེབ༌ཅེས༌པོ༌ ཁྱོ༌ཞའ༌ ཧ༌གོ༌གོས༌།༽”
LUK 18:1 ཞག༌ཤིག༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ སུན༌ མ༌སུན༌ན༌ ཏུས༌གྱུན༌ མོས༌ལམ༌ ཞུ༌གོ༌ཤེས༌ལ༌ ལབ༌ཞ༌ སལ༌ཨིན༌ རུངས༌ཤིག༌ ཤད༌ད༌ ཛདས༌།
LUK 18:2 “གྱལ༌ས༌ཞིག༌གི༌ ནང༌ང༌ དཀོན༌མཆོག༌ག༌ མི༌ཇིགས༌ཁན༌ ཡང༌ མི༌གུན༌ལ༌ རྩི༌ཝ༌ མེད༌ཁན༌ནི༌ ཁྲིམ༌སྤོན༌ཞིག༌ ཡོད༌པིན༌།
LUK 18:3 ཏེན༌ན༌ གྱལ༌སའེ༌ ནང༌ང༌ ཨ༌ནེ༌མ༌རང༌མོ༌ཞིག༌ ཞག༌ཏང༌ ཁོའེ༌ཀ༌ ཡོངས༌ཏེ༌ ‘ང༌ ངའེ༌ གྲ༌འོའེ༌ ཀ༌ནེ༌ འོས༌པའེ༌ ཁྲིམས༌ཅད༌ ཅོའ༌ ཛད༌’ ཟེར༌ཨིན༌ ཞུ༌ཝའ༌ ཕུལ༌ལད༌པིན༌།
LUK 18:4 ཁྲིམ༌སྤོན༌ནི༌ ལན༌ མང༌པོ༌ ཁོའེ༌ ཞུ༌ཝའ༌ སྣང༌ང༌ མ༌ཏངས༌ ཨིན༌ནའང༌ སྟིང༌ཇུག༌ག༌ ཁོའེ༌ སམ༌, ‘ང༌ དཀོན༌མཆོག༌ག༌ མི༌ཇིགས༌ཁན༌ ཡང༌ མི༌གུན༌ལ༌ རྩི༌ཝ༌ མེད༌ཁན༌
LUK 18:5 ཨིན༌ནའང༌ འི༌ ཨ༌ནེ༌མ༌རང༌མོ༌བོའེ༌ ངའ༌ སྣང༌ང༌ ཚེར༌ཅུགས༌པ༌, ངའེ༌ ཁོའ༌ འོས༌པའེ༌ ཁྲིམས༌ཅད༌ ཏང༌ཨིན༌, ཏེ༌ མ༌ནེ༌ ཁོ༌ ཞག༌ཏང༌ ཡོངས༌ཏེ༌ ང༌ འུན༌ལ༌ ཐུག༌ཅུག༌གོག༌།’”
LUK 18:6 གཙོ༌བོའེ༌ མོལས༌, “ཁྲིམ༌སྤོན༌, འོས༌པ༌ མ༌ཅོ༌ཁན༌ནི༌ རུངས༌པོའེ༌ ཀ༌ནེ༌ ལབ༌ཞའ༌ ལེན༌།
LUK 18:7 དཀོན༌མཆོག༌གི༌ ཉིན༌ཚན༌ མེད༌པ༌ ཁོང༌ང༌ མོས༌ལམ༌ ཞུ༌ཁན༌, ཁོང༌ངི༌ ལྡམ༌མ༌ ཛད༌ཁན༌གུན༌ལ༌ འོས༌པའེ༌ ཁྲིམས༌ཅད༌ མི༌ཛད༌ད༌? ཅི༌ དཀོན༌མཆོག༌གི༌ ཁོང༌གུན༌ལ༌ རོགས༌ ཅོའ༌ལ༌ གོར༌ཅུག༌ག༌ ཛད༌ཨིན༌ན༌?
LUK 18:8 ངའེ༌ ཁྱོ༌ཞའ༌ ཟེར༌རད༌, གྱོགས༌པ༌ ཁོང༌གུན༌ལ༌ འོས༌པའེ༌ ཁྲིམས༌ཅད༌ སལ༌ཨིན༌། ཨིན༌ནའང༌ མི༌རིགས༌སི༌བུ༌ ཡོང༌ངི༌ ཏུས༌ལ༌ ཁོའ༌ ཇིག༌རྟེན༌ནི༌ཀ༌ ཏད༌པ༌ཅན༌ ཐོབ༌ཨིན༌ན༌?”
LUK 18:9 རང༌ ཀྲང༌པོ༌ ཨིན༌ཁན༌བོའེ༌ཀ༌ ལོ༌ཁྱེལ༌ ཡང༌ ཞན༌ ཚང༌མ༌ ཐུ༌ཤོག༌ སམ༌ཁན༌ ཁ༌ཅིག༌ག༌, གཙོ༌བོ༌ ཡེ༌ཤུའི༌ འི༌ རུངས༌པོ༌ ཤད༌ད༌ ཛདས༌,
LUK 18:10 “མི༌ ཉིས༌ ཆོད༌ཁང༌ང༌ མོས༌ལམ༌ ཞུའ༌ལ༌ སོང༌, ཅིག༌པོ༌ ཕ༌རུ༌ཤི༌པ༌ ཡང༌ ཅིག༌པོ༌ ཁྲལ༌ནེན༌ཁན༌,
LUK 18:11 ཕ༌རུ༌ཤི༌པ༌བོ༌ ལངས༌ཏེ༌ ཁོ༌རང༌ངི༌ སྐོར༌ལ༌ མོས༌ལམ༌ ཞུས༌, ‘དཀོན༌མཆོག༌, ང༌ ཉེ༌རང༌ངི༌ ཞན༌ མི༌གུན༌ ཡང༌ན༌ ཅག༌པ༌, མི༌ངན༌པ༌, ལོག༌ཡེམ༌ ཅོ༌ཁན༌, ཡ༌ འི༌ ཁྲལ༌ནེན༌ཁན༌བོ༌ ཙོགས༌ མི༌ཛད༌ཅེས༌ལ༌ ངའེ༌ ཐུག༌རྗེ༌ཆེ༌ ཞུའད༌།
LUK 18:12 ངའ༌ རྡུན༌ཞག༌གི༌ ནང༌ང༌ ལན༌ ཉིས༌ རོ༌ཟཱ༌ དུག༌གད༌, ཡང༌ ངའེ༌ ཡོང༌གོ༌ ཚང༌མའེ༌ རྕུ༌ ཁག༌པོ༌ ཉེ༌རང༌ང༌ ཕུལ༌ལད༌།’”
LUK 18:13 “ཨིན༌ནའང༌ ཁྲལ༌ནེན༌ཁན༌བོ༌ ཞན༌གུན༌ནི༌ སང༌ ཐག༌རིང༌ང༌ ལངས༌ཏེ༌ གོ༌ སྒུས༌ཏེ༌ ནམ༌ཁའ༌ མ༌ལྟའ༌, ཀྲང༌ རྡུང༌ཨིན༌ མོས༌ལམ༌ ཞུས༌, ‘ཀྱེ༌ དཀོན༌མཆོག༌, ང༌ སྡིག༌ཅན༌ལ༌ སྙིང༌རྗེ༌ ཛད༌།’”
LUK 18:14 “ངའེ༌ ཁྱོ༌ཞའ༌ ཟེར༌རད༌, དཀོན༌མཆོག༌གི༌ སྐུན༌དུན༌ལ༌ ཕ༌རུ༌ཤི༌པ༌བོ༌ མན༌པ༌ འི༌ མི༌བོའ༌ ཤགས༌པ༌ ཐོབ༌ཏེ༌ ཁོ༌རང༌ངི༌ ཁང༌པ༌ ལོགས༌ཏེ༌ སོང༌ ཅིའ༌ཟེར༌ན༌ ཀྲག༌པོ༌ སྟན༌ཁན༌ ཚང༌མ༌ པས༌མོ༌ ཅོའ༌ ཛད༌ཨིན༌ ཡང༌ ཁོ༌རང༌ པས༌མོ༌ བོར༌ཁན༌བོའ༌ རྩི༌ཝ༌ སལ༌ལ༌ ཛད༌ཨིན༌།”
LUK 18:15 ཞག༌ཤིག༌ ཕ༌མ༌གུན༌ནི༌ ཕྲུ༌གུ༌ ཆུ༌ངུན༌གུན༌ གཙོ༌བོ༌ ཡེ༌ཤུའི༌ ཆག༌རྩེའ༌ ཛད༌ཏེ༌ ཅིན༌ལབས༌ སལ༌ཅེས༌ལ༌ ཁྱོངས༌། ཏེ༌བོ༌ ཐོང༌ང༌ཅིག༌ ལོབ༌ཕྲུགས༌གུན༌ནི༌ ཕ༌མ༌གུན༌ལ༌ ཡེ༌ཤུའ༌ འོབ༌གྱལ༌ སྟན༌ པ༌སང༌ ཁའ༌སྐྱེས༌།
LUK 18:16 ཨིན༌ནའང༌ ཡེ༌ཤུའི༌ ཕྲུ༌གུ༌གུན༌ ཁོང༌རང༌ ཡོད༌ས༌ བོད༌ད༌ ཛད༌ཏེ༌ མོལས༌, “ཕྲུ༌གུ༌ ཆུ༌ངུན༌གུན༌ སྒག༌ མ༌སྒག༌ག༌ ང༌ ཡོད༌ས༌ ཡོང༌ཅུག༌, འི༌ཙོགས༌གུན༌ནི༌ ཕིའ༌ དཀོན༌མཆོག༌གི༌ གྱལ༌སྲིད༌པོ༌ ཨིན༌།
LUK 18:17 ངའེ༌ ཁྱོ༌ཞའ༌ དེན༌བ༌ ཟེར༌རད༌, དཀོན༌མཆོག༌གི༌ གྱལ༌སྲིད༌ ཕྲུ༌གུ༌ ཆུ༌ངུན༌གུན༌ ཙོགས༌ལ༌ ལེན༌ཏེ༌ མ༌ནེ༌ ཏེ༌ནང༌ང༌ ཞུགས༌ མི༌ཉན༌།”
LUK 18:18 ཡ༌ཧུ༌དཱ༌པའེ༌ སྤོན༌བོ༌ཞིག༌གི༌ གཙོ༌བོ༌ ཡེ༌ཤུའ༌ ཏྲིས༌, “ལོབ༌བོན༌ ཟང༌པོ༌ལེ༌, ཐའ༌མེད༌པའེ༌ མི༌ཚེ༌ ནོར༌སྐལ༌ལ༌ ཐོབ༌ཅེས༌སི༌ ཕིའ༌ ཅི༌ ཅོ༌གོས༌?”
LUK 18:19 ཡེ༌ཤུའི༌ ཁོའ༌ ཏྲིའ༌ ཛདས༌, “ཅི༌ཕིའ༌ ཁྱོ༌རང༌ངི༌ ངའ༌ ཟང༌པོ༌ ཟེར༌རད༌? དཀོན༌མཆོག༌ ཅིག༌པོ༌ མ༌སྟོག༌ སུའང༌ ཟང༌པོ༌ མན༌།
LUK 18:20 ཁྱོ༌རང༌ངི༌ བཀའ༌རྒྱ༌གུན༌ ཤེས༌ས༌ནོག༌: ‘རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌, མི༌ མ༌སད༌, རྐུ༌མ༌རྐུ༌, སྤང༌པོ༌ ཟུན༌བ༌ མ༌ཏང༌, རང༌ངི༌ ཨ༌བ༌ དང༌ ཨ༌མའ༌ རྩི༌ཝ༌ ཅོས༌།’”
LUK 18:21 ཁོའེ༌ ཡེ༌ཤུའ༌ ཟེརས༌, “ཏེ༌ ཚང༌མ༌ ངའེ༌ ཆུང༌ཏུས༌ནེ༌ ཕར༌ལ༌ སྲུངས༌ཏེ༌ ཨིན༌།”
LUK 18:22 ཏེ༌བོ༌ སན༌ན༌ཅིག༌ ཡེ༌ཤུའི༌ ཁོའ༌ མོལས༌, “ཏ༌རུང༌ ཁྱོ༌རང༌ང༌ ཅོ༌གོ༌ཤེས༌ ཅིག༌ ལུས༌ཏེ༌ དུག༌། སོང༌ ཡང༌ ཁྱོ༌རང༌ངི༌ གྱུ༌ནོར༌ ཚང༌མ༌ ཙོངས༌ཏེ༌ པེ༌ནེ༌བོ༌ ཉལ༌བ༌ཅན༌གུན༌ལ༌ ཏོང༌, ནམ༌ཁའེ༌ ནང༌ང༌ ཁྱོ༌རང༌ང༌ བང༌ཛོད༌ ཐོབ༌ཨིན༌། ཏེ༌ནེ༌ ཡོངས༌ཏེ༌ ངའེ༌ གྱབ༌ནེ༌ བྲོངས༌།”
LUK 18:23 ཏེ༌བོ༌ ཚོར༌ར༌ཅིག༌, ཁོའ༌ ཚེར༌ཁ༌ སྲན༌ཏྲེ༌ ཡོངས༌ ཅིའ༌ཟེར༌ན༌ ཁོ༌ མ༌ཆུག༌པོ༌ ཡོད༌པིན༌།
LUK 18:24 ཡེ༌ཤུའི༌ ཁོའ༌ ཟིགས༌ཏེ༌ མོལས༌, “ཆུག༌པོ༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌ ཙམ༌ཤིག༌གི༌ ཀགས༌པོ༌ མ༌ནོག༌།
LUK 18:25 ཏན༌ཏན༌, མི༌ ཆུག༌པོ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌ཅེས༌སི༌ སང༌ ཁབ༌བི༌ མིག༌ནེ༌ རྔ༌བོང༌ བིང༌ཅེས༌པོ༌ ལ༌མོ༌ ཆེན༌།”
LUK 18:26 ཏེ༌བོ༌ ཚོར༌ཁན༌གུན༌ནི༌ ཁོང༌ང༌ ཏྲིས༌, “ཏེ༌ནེ༌ སུའ༌ ཐར༌པ༌ ཐོབ༌ཨིན༌།”
LUK 18:27 ཡེ༌ཤུའི༌ ལན༌སལས༌, “མིའ༌ ཅོ༌ མི༌ཉན༌ཅེས༌པོ༌ དཀོན༌མཆོག༌ག༌ ཛད༌ ཉན༌ན༌ནོག༌།”
LUK 18:28 པི༌ཏྲར༌རི༌ ཡེ༌ཤུའ༌ ཟེརས༌, “ཟིགས༌སའང༌ ང༌ཞའེ༌ ཅི༌ཚང༌མ༌ ཕངས༌ཏེ༌ ཉེ༌རང༌ང༌ བྲངས༌པིན༌།”
LUK 18:29 ཁོང༌ངི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, དཀོན༌མཆོག༌གི༌ གྱལ༌སྲིད༌དི༌ ཕིའ༌ ཁང༌པ༌ ཡ༌ ན༌མའ༌ ཡ༌ ཨ༌ཅོ༌ནོ༌ ཡ༌ ཕ༌མ༌ ཡ༌ ཕྲུ༌གུ༌ ཕངས༌ཁན༌ ཚང༌མ༌ལ༌,
LUK 18:30 འིན༌ན༌ མི༌ཚེ༌ ནང༌ང༌, ཏེ༌གུན༌ནི༌ ལྡབ༌ མང༌པོ༌ མ༌ཚད༌ དཀོན༌མཆོག༌གི༌ གྱལ༌སྲིད༌དི༌ ཏུས༌ལ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།”
LUK 18:31 གཙོ༌བོ༌ ཡེ༌ཤུའི༌ ཁོང༌ངི༌ ལོབ༌ཕྲུགས༌ རྕུག༌ཉིས༌པོ༌ སོ༌སོ༌ ཁྱེར༌ཏེ༌ མོལས༌, “ང༌དང༌གུན༌ ཀེན༌ལ༌ ཡེ༌རུ༌ཤ༌ལེམ༌མ༌ ཆ༌ཅེས༌ ཨིན༌ནོག༌, ཡང༌ ལུང༌སྟོན༌པ༌གུན༌ནི༌ མི༌རིགས༌སི༌བུའི༌ སྐོར༌ལ༌ བྲིས༌ཁན༌ ཚང༌མ༌ དྲན༌དྲ༌ གྲུབ༌ཨིན༌།
LUK 18:32 ཁོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ལག༌ག༌ སྟད༌ཨིན༌ ཡང༌ ཁོང༌གུན༌ནི༌ ཁོའ༌ ཁྲེལ༌བ༌ སྟན༌ཏེ༌, ཆིལ༌མག༌ དང༌ རྟལ༌ལྕག༌ གྱབས༌ཏེ༌ སད༌ཨིན༌།
LUK 18:33 ཡང༌ ཞག༌ སུམ༌པའེ༌ ཞག༌ག༌ ཡང༌སྐྱར༌ སོན༌ཏེའ༌ ལང༌ཨིན༌།”
LUK 18:34 ཨིན༌ནའང༌ ལོབ༌ཕྲུགས༌གུན༌ལ༌ ཁོང༌ངི༌ མོལ༌ཁན༌གུན༌ ཅའང༌ ཧ༌མ༌གོ༌། ཏེ༌ སྤེ༌རའེ༌ ཏོན༌གུན༌ སང༌ཝའེ༌ ནང༌ང༌ བོར༌པ༌ ཁོང༌གུན༌ལ༌ ཧ༌གོ༌ མ༌ཐུབ༌།
LUK 18:35 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌, ཡེ༌རི༌ཀོའེ༌ ཉེ༌མོའ༌ ལེབ༌ཨིན༌ ཡོད༌ ཟ༌ནེ༌, ཞ༌ར༌ཞིག༌ ལམ༌མི༌ ཐའ༌མ༌ ལྩང༌ཨིན༌ དུགས༌ཏེ༌ ཡོད༌པིན༌།
LUK 18:36 ཏེ༌ཀ༌ནེ༌ མི༌ཚོགས༌ ཆེན༌ ཡོད༌ཁན༌བོ༌ ཚོར༌ཏེ༌ ཁོའེ༌ ཁོང༌གུན༌ལ༌ ཅི༌ ཨིན༌ནོག༌ ཟེར༌ཏེ༌ ཏྲིས༌?
LUK 18:37 ཁོང༌གུན༌ནི༌ ཟེརས༌, “ན༌ཙ༌རེད༌པ༌ ཡེ༌ཤུ༌ སྐྱོད༌ཨིན༌ ཨིན༌ནོག༌།”
LUK 18:38 ཏེ༌ནེ༌ ཁོའེ༌ ཀུ༌ཅོ༌ ཏང༌ཨིན༌ ཟེརས༌, “ཡེ༌ཤུ༌, གྱལ༌པོ༌ དཱ༌བིད༌དི༌ པུར༌གྱུད༌ ངའེ༌ཀ༌ སྙིང༌རྗེ༌ ཛད༌།”
LUK 18:39 སྔུན༌ལ༌ ཆའ༌ཁན༌གུན༌ནི༌ ཁོའ༌ ཁའ༌སྐྱེས༌ཏེ༌ ཅུབ༌ཅོད༌ ཟེརས༌, ཨིན༌ནའང༌ ཁོའེ༌ མང༌ང༌ ཀུ༌ཅོ༌ ཏངས༌ཏེ༌ ཟེརས༌, “གྱལ༌པོ༌ དཱ༌བིད༌དི༌ པུར༌གྱུད༌, ངའེ༌ཀ༌ སྙིང༌རྗེ༌ ཛད༌དའང༌།”
LUK 18:40 ཡེ༌ཤུ༌ སྲུང༌ང༌ ཛད༌ཏེ༌ ཞ༌ར༌བོ༌ ཁོང༌ངི༌ དུན༌ལ༌ ཁྱོང༌ཅེས༌ལ༌ མོལས༌། ཁོ༌ ཡེ༌ཤུའི༌ དུན༌ལ༌ ལེབ༌བ༌ཅིག༌, ཁོང༌ངི༌ ཁོའ༌ ཏྲིའ༌ ཛདས༌,
LUK 18:41 “ངའེ༌ ཁྱོ༌རང༌ངི༌ ཕིའ༌ ཅི༌ ཅོ༌།” ཁོའེ༌ ཟེརས༌, “གཙོ༌བོ༌ལེ༌, ངའ༌ ཡང༌སྐྱར༌ ཐོང༌ ཅུག༌ག༌ ཛད༌།”
LUK 18:42 ཡེ༌ཤུའི༌ ཁོའ༌ མོལས༌, “ཐོང༌ཅེས༌སི༌ ཁྱུད༌པོ༌ ལེན༌, ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌།”
LUK 18:43 ཏེན༌ན༌མལ༌ལ༌ ཁོའ༌ ཐོང༌ཐུབ༌, དཀོན༌མཆོག༌ག༌ སྟོད༌པ༌ ཕུལ༌ཨིན༌ ཡེ༌ཤུའ༌ བྲངས༌ཏེ༌ སོང༌། མི༌ཚང༌མའེ༌ ཏེ༌བོ༌ ཐོང༌ང༌ཅིག༌ ཁོང༌གུན༌ནིའང༌ དཀོན༌མཆོག༌ག༌ སྟོད༌པ༌ ཕུལས༌།
LUK 19:1 གཙོ༌བོ༌ ཡེ༌ཤུ༌ ཡེ༌རི༌ཀོ༌ གྲོང༌ཁྱེར༌ གྱུད༌ཏེ༌ སྐྱོད༌ ཟ༌ནེ༌,
LUK 19:2 ཏེ༌རུ༌ ཁྲལ༌ནེན༌ཁན༌ནི༌ སྤོན༌བོ༌ ཟཀ༌ཀཱ༌འེས༌ ཟེར༌ཁན༌ མི༌ ཆུག༌པོ༌ཞིག༌ ཡོད༌པིན༌།
LUK 19:3 ཁོའ༌ ཡེ༌ཤུ༌ ཇལ༌ཅེས༌སི༌ དོད༌པ༌ ཡོད༌པིན༌, ཨིན༌ནའང༌ མི༌ཚོགས༌ དང༌ ཁོའེ༌ གོ༌བོ༌ ཆུ༌ངུན༌ ཡོད༌ཅེས༌པོའེ༌ ཡེ༌ཤུ༌ ཇལ༌ མ༌ཉན༌།
LUK 19:4 ཁོ༌ སྔུན༌ལ༌ བང༌ཏངས༌ཏེ༌ ཡེ༌ཤུའ༌ ལྟ༌ཅེས༌ལ༌ ཁོང༌ སྐྱོད༌ཅེས༌ཅན༌ནི༌ ལམ༌མི༌ཀ༌ ཡོད༌ཁན༌ནི༌ སི༌ཀ༌མོར༌རི༌ ལྕང༌མའེ༌ཀ༌ ཛགས༌།
LUK 19:5 ཡེ༌ཤུ༌ ཏེ༌ ནས༌སའེ༌ཀ༌ ལེབ༌བ༌ཅིག༌, ཀེན༌ལ༌ ཟིགས༌ཏེ༌ ཁོའ༌ མོལས༌, “ཟཀ༌ཀཱ༌འེས༌, ཡོག༌ག༌ གྱོགས༌པ༌ བབས༌ཏེ༌ ཡོང༌། དི༌རིང༌ ངའ༌ ཁྱོ༌རང༌ངི༌ ཁང༌པ༌ བྲང༌ས༌ དུག༌གོས༌།”
LUK 19:6 ཏེ༌ནེ༌ ཁོ༌ གྱོགས༌པ༌ བབས༌ཏེ༌, མ༌ ཐད༌པོ༌ ཉམ༌པོ༌ ཡེ༌ཤུའ༌ ཁོ༌རང༌ངི༌ ཁང༌པ༌ གའ༌སུས༌ ཞུས༌།
LUK 19:7 ཏེ༌རུ༌ ཡོད༌ཁན༌ནི༌ མི༌ཚང༌མའེ༌ ཏེ༌བོ༌ ཐོང༌ཏེ༌ བ༌ག༌བོ༌གེ༌ ཤད༌ཨིན༌ ཟེརས༌, “ཁོང༌ མི༌ སྡིག༌ཅན༌ ཉམ༌པོ༌ ཞུགས༌ས༌ སྐྱོད༌།”
LUK 19:8 ཟཀ༌ཀཱ༌འེས༌ ལངས༌ཏེ༌ གཙོ༌བོའ༌ ཟེརས༌, “གཙོ༌བོ༌ལེ༌ ཟིགས༌སའང༌ ངའ༌ ཡོད༌ཁན༌ནི༌ ནོར༌ ཕེད༌པོ༌ ངའེ༌ ཉལ༌བ༌ཅན༌གུན༌ལ༌ ཏང༌ཨིན༌ ཡང༌ ཀལ༌ཏེས༌ ངའེ༌ སུ༌ཞིག༌ག༌ གོབ༌སྐོར༌ཏེ༌ པེ༌ནེ༌ ལེན༌ཏེ༌ ཡོད༌ན༌, ཏེ༌བོའེ༌ ཞི༌ལྡབ༌ ངའེ༌ ལོགས༌ཏེ༌ ཏང༌ཨིན༌།”
LUK 19:9 ཡེ༌ཤུའི༌ ཁོའ༌ མོལས༌, “དི༌རིང༌ འི༌ ཁང༌པའེ༌ ནང༌ང༌ ཐར༌པ༌ ལེབས༌ཏེ༌ ཨིན༌ ཅིའ༌ཟེར༌ན༌ ཁོའང༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌།
LUK 19:10 མི༌རིགས༌སི༌བུ༌ སྟོར༌ཁན༌གུན༌ ཙལ༌ཅེས༌ དང༌ སྐྱོབ༌ཅེས༌ལ༌ ཡོངས༌ཏེ༌ ཨིན༌།”
LUK 19:11 མི༌གུན༌ནི༌ ཉན༌ཨིན༌ ཡོད༌ ཟ༌ནེ༌, གཙོ༌བོ༌ ཡེ༌ཤུའི༌ ཁོང༌གུན༌ལ༌ རུངས༌ཤིག༌ ཤད༌ད༌ ཛདས༌ ཅིའ༌ཟེར༌ན༌ ཁོང༌ ཡེ༌རུ༌ཤ༌ལེམ༌ གྱལ༌སའེ༌ ཉེ༌མོའ༌ ཡོད༌པིན༌ ཡང༌ མི༌གུན༌ནི༌ དཀོན༌མཆོག༌གི༌ གྱལ༌སྲིད༌ ཏེན༌ན༌ ཟ༌ནེ༌ སྔོན༌ཅེས༌ ཨིན༌ནོག༌ སམ༌མད༌པིན༌།
LUK 19:12 ཁོང༌ངི༌ མོལས༌, “སྐུ༌ཁྲག༌ཞིག༌ ཡུལ༌ ཐག༌རིང༌ཞིག༌ག༌ གྱལ༌པོའེ༌ ཀོ༌ས༌ ལེན༌ཏེ༌ ལོགས༌ཏེ༌ ཡོང༌ཅེས༌ལ༌ སོང༌།
LUK 19:13 ཁོ༌ ཆའེ༌ སང༌ སྔུན༌ལ༌ ཁོ༌རང༌ངི༌ ཡོག༌པོ༌ རྕུ༌ བོད༌ཏེ༌, ཁོང༌ རེ༌རེའ༌ ཟླ༌ཝ༌ སུམ༌མི༌ ལ༌ཆའ༌ དྲན༌དྲའེ༌ པེ༌ནེ༌ ཏངས༌ཏེ༌ ཟེརས༌, ‘ང༌ ལོགས༌ཏེ༌ ཡོང༌ཡོང༌ ཚག༌པ༌ འི༌ པེ༌ནེ༌བོའ༌ ཚོང༌ལེན༌ ཅོས༌།’
LUK 19:14 ཨིན༌ནའང༌ ཏེ༌ ཡུལ༌ལི༌ མི༌ཚང༌མའེ༌ ཁོའ༌ ནཕ༌རད༌ ཅོས༌པ༌, ཁོའེ༌ སྟིང༌རང༌ནེ༌ མི༌ ཁ༌ཅིག༌, ‘འི༌ མི༌བོ༌ ང༌ཞའེ༌ གྱལ༌པོ༌ ཅོའ༌ལ༌ ང༌ཞ༌གུན༌ ཐད༌ད༌ མེ༌རག༌ ཟེར༌ར༌ལ༌ ཀལས༌།’”
LUK 19:15 “ཨིན༌ནའང༌ ཁོ༌ གྱལ༌པོ༌ གྱུར༌ཏེ༌ ལོག༌ཏེ༌ ཡོངས༌། ཏེ༌ནེ༌ ཚོང༌ ཏངས༌ཏེ༌ ཙམ༌ ཁྱེ༌ ཐོབ༌ཏོག༌ ལྟ༌ཅེས༌ལ༌ ཁོའེ༌ པེ༌ནེ༌ ཏངས༌ཁན༌ནི༌ ཡོག༌པོ༌གུན༌ བོདས༌།
LUK 19:16 ཡོག༌པོ༌ ཏང༌པོ༌ ཡོངས༌ཏེ༌ ཟེརས༌, ‘སྤོན༌བོ༌ལེ༌, ཉེ༌རང༌ངི༌ པེ༌ནེ༌ ཏང༌ཁན༌བོའེ༌ རྕུ༌ལྡབ༌པོ༌ ངའ༌ ཇོར༌།’”
LUK 19:17 “སྤོན༌བོའེ༌ ཁོའ༌ ཟེརས༌, ‘གྱལ༌ལ༌ ཅོས༌, ཡོག༌པོ༌ ཟང༌པོ༌, ཁྱོ༌རང༌ ཉུ༌ངུན༌ཞིག༌གི༌ ནང༌ང༌ ཨིད༌ཤེས༌ཅན༌ ལུས༌པ༌, ཁྱོ༌རང༌ང༌ ངའེ༌ གྱལ༌ས༌ རྕུའི༌ཀ༌ ཝང༌ཆ༌ ཏང༌ངད༌།’”
LUK 19:18 “ཡོག༌པོ༌ ཉིས༌པ༌བོ༌ ཡོངས༌ཏེ༌ ཟེརས༌, ‘སྤོན༌བོ༌ལེ༌, ཉེ༌རང༌ངི༌ པེ༌ནེ༌ ཏང༌ཁན༌བོའེ༌ ལྔ༌ལྡབ༌པོ༌ ངའ༌ ཇོར༌།’”
LUK 19:19 “སྤོན༌བོའེ༌ ཁོའ༌ ཟེརས༌, ‘ཁྱོ༌རང༌ང༌ གྱལ༌ས༌ ལྔའེ༌ཀ༌ ཝང༌ཆ༌ ཏང༌ངད༌།’”
LUK 19:20 “ཏེ༌ནེ༌ ཡོག༌པོ༌ སུམ༌པ༌ ཡོངས༌ཏེ༌ ཟེརས༌, ‘སྤོན༌བོ༌, ཉེ༌རང༌ངི༌ པེ༌ནེ༌ ངའེ༌ ལག༌ཕིས༌སི༌ ནང༌ང༌ ཏུམས༌ཏེ༌ སྦས༌ཏེ༌ བོར༌པིན༌, ཏ༌ ལོགས༌ཏེ༌ ནམས༌།
LUK 19:21 ང༌ ཉེ༌རང༌ང༌ ཇིགས༌ ཅིའ༌ཟེར༌ན༌ ཉེ༌རང༌ སྤོན༌བོ༌ སྙིང༌རྗེ༌ མེད༌ཁན༌, མ༌ཏང༌ང༌ ལེན༌ཁན༌ དང༌ མ༌ཏབ༌ཁན༌ནི༌ ཀ༌ནེ༌ རྔ༌ཁན༌ ཨིན༌ནོག༌།’”
LUK 19:22 “སྤོན༌བོའེ༌ ཁོའ༌ ཟེརས༌, ‘ཡོག༌པོ༌ ངན༌པ༌, ཁྱོ༌རང༌ངི༌ ཟེར༌ཁན༌གུན༌ གྱུད༌ཏེ༌ ངའེ༌ ཁྱོ༌རང༌ང༌ ཁྲིམས༌ཅད༌ཨིན༌། ང༌ སྙིང༌རྗེ༌ མེད༌ཁན༌ ཡང༌ ང༌ མ༌ཏང༌ང༌ ལེན༌ཁན༌ དང༌ མ༌ཏབ༌ཁན༌ནི༌ ཀ༌ནེ༌ རྔ༌ཁན༌ ཨིན༌ཁན༌བོ༌ གྱུས༌ཡོད༌ཏེའང༌,
LUK 19:23 ཁྱོ༌རང༌ངི༌ ངའེ༌ པེ༌ནེ༌བོ༌ མུལ༌ཛོད༌ཁང༌ངི༌ ནང༌ང༌ ཅི༌ཕིའ༌ མ༌ཏངས༌པིན༌? ཀལ༌ཏེས༌ ཏངས༌པིན༌ན༌, ང༌ ཡོངས༌ཏེ༌ ཕར༌ཉམ༌པོ༌ ང༌རི༌ པེ༌ནེ༌ ལེན༌ཏེ༌ ཡོད༌གྲོ༌།’”
LUK 19:24 “ཏེ༌ནེ༌ སྤོན༌བོའེ༌ ཏེ༌ཀ༌ ལངས༌ཏེ༌ ཡོད༌ཁན༌གུན༌ལ༌ ཟེརས༌, ‘ཁོའེ༌ ཀ༌ནེ༌ པེ༌ནེ༌བོ༌ ལེན༌ཏེ༌ རྕུ༌ལྡབ༌ ཇོར༌ཁན༌བོའ༌ ཏོང༌།’”
LUK 19:25 “ཁོང༌གུན༌ནི༌ ཟེརས༌, ‘སྤོན༌བོ༌, ཁོའེ༌ ལག༌ག༌ རྕུ༌ལྡབ༌ མང༌ང༌ པེ༌ནེ༌ ཡོད༌ཏེ༌ ཨིན༌ནོག༌།’”
LUK 19:26 “སྤོན༌བོའེ༌ ལན༌ཏངས༌, ‘འོ༌ན༌, ཏངས༌ཁན༌བོ༌ གྱལ༌ལ༌ ཅོས༌ཏེ༌ ཀོལ༌ཁན༌གུན༌ལ༌ མང༌ང༌ ཏང༌ཨིན༌, ཨིན༌ནའང༌ མ༌ཀོལ༌ཁན༌གུན༌ནི༌ ཀ༌ནེ༌ ཉུ༌ངུན༌ ཡོད༌ཁན༌བོའང༌ ཁྱེར༌ཨིན༌།
LUK 19:27 ཏ༌ ངའ༌ གྱལ༌པོ༌ གྱུར༌ཏེ༌ ཁོང༌གུན༌ནི༌ཀ༌ ཝང༌སྲུལ༌ མ༌ཐད༌ཁན༌ནི༌ ངའེ༌ གྲ༌འོ༌གུན༌ ངའེ༌ དུན༌ལ༌ ཁྱོངས༌ཏེ༌ སོད༌།’”
LUK 19:28 ཏེ༌གུན༌ མོལ༌ ཚར༌ར༌ཅིག༌ གཙོ༌བོ༌ ཡེ༌ཤུ༌ ལོབ༌ཕྲུགས༌གུན༌ནི༌ སྔུན༌སྔུན༌ལ༌ ཡེ༌རུ༌ཤ༌ལེམ༌མ༌ སྐྱོད༌།
LUK 19:29 ཁོང༌ ཨོ༌ལིཝ༌ཝི༌ རི༌ཀ༌ ཡོད༌ཁན༌ བེད༌ཕ༌གེ༌ དང༌ བེད༌ཐཱ༌ནི༌ གྲོང༌སེབ༌གུན༌ལ༌ ལེབ༌ཀྱིས༌ ཡོད༌ད༌ཅིག༌, ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌ ཉིས༌ སྔུན༌ལ༌ ལམ༌ཅུག༌ག༌ ཛད༌ཏེ༌,
LUK 19:30 མོལས༌, “འ༌ གྲོང༌སེབ༌བི༌ ནང༌ང༌ སོང༌, ཏེ༌རུ༌ ལེབ༌བ༌ཅིག༌, སུའང༌ མ༌ཞོན༌ཁན༌ནི༌ བུང༌སར༌ཞིག༌ ཏགས༌ཏེ༌ ཐོང༌ཅེན༌, ཏེ༌བོ༌ ཀྲོལ༌ཏེ༌ འི༌རུ༌ ཁྱོང༌།
LUK 19:31 ཀལ༌ཏེས༌ སུ༌ཞིག༌གི༌, ‘ཁྱོ༌ཞའེ༌ བུང༌སར༌བོ༌ ཅི༌ཕིའ༌ ཀྲོལ༌ལད༌’ ཟེར༌ན༌, ‘གཙོ༌བོའ༌ སྒོས༌དོམ༌ དུག༌’ ཟེར༌།”
LUK 19:32 སྔུན༌ལ༌ ཀལ༌ཁན༌ནི༌ ལོབ༌ཕྲུགས༌གུན༌ སོང༌ཏེ༌ ཡེ༌ཤུའི༌ མོལ༌ཁན༌ ནང༌ཞིན༌ ཐོང༌།
LUK 19:33 བུང༌སར༌བོ༌ ཀྲོལ༌ ཟ༌ནེ༌ ཏེ༌བོའེ༌ དག༌པོ༌གུན༌ནི༌ ཁོང༌གུན༌ལ༌ ཏྲིས༌, “བུང༌སར༌བོ༌ ཅི༌ཕིའ༌ ཀྲོལ༌ལད༌?”
LUK 19:34 ཁོང༌གུན༌ནི༌ ལན༌ཏངས༌, “གཙོ༌བོའ༌ སྒོས༌དོམ༌ དུག༌།”
LUK 19:35 ཏེ༌ནེ༌ ཁོང༌གུན༌ནི༌ བུང༌སར༌བོ༌ ཡེ༌ཤུ༌ ཡོད༌ས༌ ཁྱོངས༌ཏེ༌ ཁོང༌རང༌གུན༌ནི༌ ཀོས༌ ཏེ༌བོའ༌ སྟདས༌ ཡང༌ ཡེ༌ཤུ༌ ཏེ༌བོའེ༌ཀ༌ ཞོནས༌།
LUK 19:36 ཡེ༌ཤུ༌ སྐྱོད༌ ཟ༌ནེ༌, མི༌གུན༌ནི༌ རང༌རང༌ངི༌ ཀོས༌ ཁོང༌ སྐྱོད༌སའེ༌ ལམ༌མི༌ཀ༌ ཏིངས༌།
LUK 19:37 ཁོང༌ ཨོ༌ལིཝ༌ཝི༌ རི༌ནེ༌ ཐུར༌ལ༌ ཆའ༌ཁན༌ནི༌ ལམ༌མི༌ ནས༌སའེ༌ ཉེ༌མོའ༌ ལེབ༌བ༌ཅིག༌, ཁོང༌ང༌ བྲངས༌ཏེ༌ ཡོང༌ཁན༌ ཚང༌མའེ༌, ཁོང༌ངི༌ ཧ༌ལས༌ཤེས༌སི༌ ཛད༌པ༌གུན༌ ཐོང༌ པ༌སང༌ གའ༌མོ༌ ཉམ༌པོ༌ དཀོན༌མཆོག༌ག༌ སྟོད༌པ༌ ཕུལ༌ཅེས༌ གོ༌ཟུགས༌ཏེ༌ ཟེརས༌,
LUK 19:38 “‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌ནི༌ གྱལ༌པོ༌ ཅིན༌ལབས༌ཅན༌།’ ནམ༌ཁའེ༌ ནང༌ང༌ ཞི༌དེ༌ དང༌ ནམ༌ཁའེ༌ ཐོ༌ཤོག༌ག༌ ཞུགས༌ཁན༌ནི༌ དཀོན༌མཆོག༌ག༌ སྤལ༌ ཁྱོང༌ཨིན༌།”
LUK 19:39 ཏེ༌ མི༌ཚོགས༌སི༌ ཕྲོ༌ནེ༌ ཕ༌རུ༌ཤི༌པ༌ ཁ༌ཅིག༌གི༌ ཡེ༌ཤུའ༌ ཟེརས༌, “ལོབ༌བོན༌ལེ༌, ཉེ༌རང༌ངི༌ ལོབ༌ཕྲུགས༌གུན༌ལ༌ ཁའ༌སྐྱེའ༌ ཛད༌ཏེ༌ ཏེ༌ཟུག༌ ཟེར༌ཅེས༌ནེ༌ སྒག༌ག༌ ཛད༌དའང༌།”
LUK 19:40 ཁོང༌ངི༌ ལན༌སལས༌, “ངའེ༌ ཁྱོ༌ཞའ༌ ཟེར༌རད༌, ཀལ༌ཏེས༌ ཁོང༌གུན༌ ཅུབ༌ཅད༌ན༌, འི༌ རྡོའ༌གུན༌ནི༌ ཀུ༌ཅོ༌ ཏང༌ཏེ༌ སྟོད༌པ༌ ཕུལ༌ཨིན༌།”
LUK 19:41 ཡེ༌རུ༌ཤ༌ལེམ༌ གྱལ༌སའེ༌ ཉེ༌མོ༌ ལེབ༌བ༌ཅིག༌ གྱལ༌སའ༌ ཟིགས༌ཏེ༌ གཙོ༌བོ༌ ཡེ༌ཤུ༌ ཤུམ༌ས༌ ཛདས༌
LUK 19:42 ཡང༌ ཁོང༌ངི༌ མོལས༌, “ཀལ༌ཏེས༌ ཁྱོ༌ཞའ༌ ཡེ༌རུ༌ཤ༌ལེམ༌པ༌གུན༌ནི༌ དི༌རིང༌ངི༌ ཞག༌ག༌ ཞི༌དེ༌ ཐོབ༌ཅེས༌སི༌ ལམ༌བོ༌ ཤེས༌པིན༌ན༌, ཁྱོ༌ཞའ༌ ཐོབ༌ཏེ༌ ཡོད༌གྲོ༌ ཨིན༌ནའང༌ དག༌ས༌ ཏེ༌བོ༌ ཁྱོ༌ཞ༌གུན༌ནི༌ མིག༌ནེ༌ སྦས༌ཏེ༌ བོར༌ཏེ༌ ཨིན༌ནོག༌།
LUK 19:43 ཁྱོ༌ཞ༌གུན༌ནི༌ཀ༌ ཏེ༌ ཞག༌པོ༌ ལེབ༌ཨིན༌ ནམ༌ ཁྱོ༌ཞའེ༌ གྲ༌འོ༌གུན༌ནི༌ ཁྱོ༌ཞའེ༌ གྱལ༌ས༌ ཀྱིར༌སྐོར༌ཏེ༌ རྩིག༌པ༌ རྩིགས༌ཏེ༌ ཆོགས༌ ཚང༌མ༌ནེ༌ ཁྱོ༌ཞའེ༌ཀ༌ སྤུང༌གོལ༌ ཅོ༌ཨིན༌།
LUK 19:44 གྱལ༌ས༌བོ༌ ཁྲེས༌ཏོར༌ ཅོས༌ཏེ༌ མི༌གུན༌ སད༌ཏེ༌ མེད༌ཁན༌ ཅོ༌ཨིན༌། རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌ ཅིའ༌ཟེར༌ན༌ དཀོན༌མཆོག༌ ཁྱོ༌ཞའ༌ སྐྱོབ༌བ༌ ཡོང༌ཁན༌ནི༌ ཏུས༌པོ༌ ཁྱོ༌ཞ༌གུན༌ནི༌ ངོ༌ མ༌ཤེས༌།”
LUK 19:45 ཏེ༌ནེ༌ གཙོ༌བོ༌ ཡེ༌ཤུ༌ ཆོད༌ཁང༌ང༌ སྐྱོད༌ཏེ༌ སྲོག༌ཆོད༌ལ༌ ཕུལ༌ཅེས༌སི༌ སེམས༌ཅན༌ ཙོང༌ཁན༌གུན༌ ཕིང༌ཅེས༌ གོ༌ཟུག༌ ཛདས༌།
LUK 19:46 ཡེ༌ཤུའི༌ ཁོང༌གུན༌ལ༌ མོལས༌, “ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌, ‘ངའེ༌ ཁང༌པའ༌ མོས༌ལམ༌ ཞུས༌སའེ༌ ཁང༌པ༌ ཟེར༌ཨིན༌’, ཨིན༌ནའང༌ ‘ཁྱོ༌ཞ༌གུན༌ནི༌ འི༌བོ༌ ཅག༌པ༌གུན༌ནི༌ བའོ༌ ཅོས༌ཏེ༌ དུག༌།’ ”
LUK 19:47 ཞག༌ཏང༌ ཁོང༌ངི༌ ཆོད༌ཁང༌ངི༌ ནང༌ང༌ ལབ༌ཞ༌ སལ༌ལ༌ ཛད༌དད༌པིན༌། བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡུལ༌མིའི༌ འུ༌སྐྱོང༌གུན༌ནི༌ ཁོང༌ སད༌ཅེས༌སི༌ ཐབས༌ ཙལ༌ཅེས༌ གོ༌ཟུག༌།
LUK 19:48 ཨིན༌ནའང༌ ཁོང༌གུན༌ལ༌ སྐབས༌ མ༌ཐོབ༌ ཅིའ༌ཟེར༌ན༌ ཡེ༌ཤུའི༌ ལབ༌ཞ༌ ཆུ༌ངུན༌ཞིག༌གའང༌ བུད༌ མ༌ཅུག༌ག༌ ཉན༌ཅེས༌ལ༌ མི༌ཚང༌མའ༌ ཐད༌དད༌པིན༌།
LUK 20:1 ཞག༌ཤིག༌ གཙོ༌བོ༌ ཡེ༌ཤུའི༌ མི༌གུན༌ལ༌ ཆོད༌ཁང༌ངི༌ ནང༌ང༌ ལབ༌ཞ༌ སལ༌ཨིན༌ གའ༌མོའེ༌ ནས༌ཚུལ༌ ཤད༌ད༌ ཛད༌ཨིན༌ ཡོད༌ ཟ༌ནེ༌, བླ༌མ༌ འུ༌སྐྱོང༌གུན༌, ཆོས༌ཁྲིམས༌ལ༌ ཁས༌པ༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཁོང༌ ཡོད༌ས༌ ཡོངས༌ཏེ༌
LUK 20:2 ཏྲིས༌, “ང༌ཞའ༌ ཤོད༌དའང༌, ཀ༌ ཝང༌ཆ༌ ཉམ༌པོ༌ ཁྱོ༌རང༌ངི༌ འི༌གུན༌ ཅོའད༌ ཡང༌ ཁྱོ༌རང༌ང༌ འི༌ ཝང༌ཆ༌ སུའི༌ ཏངས༌?”
LUK 20:3 ཡེ༌ཤུའི༌ ཁོང༌གུན༌ལ༌ མོལས༌, “ངེའང༌ ཁྱོ༌ཞ༌གུན༌ལ༌ ཏྲི༌ཝ༌ཞིག༌ ཏྲི༌ཨིན༌, ཤོད༌དའང༌,
LUK 20:4 ཡོ༌ཧཱ༌ནན༌ལ༌ ཁྲུས༌སལ༌ཅེས༌སི༌ ཝང༌ཆ༌ དཀོན༌མཆོག༌གི༌ ཆོགས༌ནེ༌ ཐོབ༌ཏེ༌ ཨིན༌ནོག༌ག༌ ཡ༌ མི༌ ཆོགས༌ནེ༌?”
LUK 20:5 ཁོང༌གུན༌ནི༌ ཁོ༌རང༌གུན༌ནི༌ ཕྲོའ༌ སྤེ༌ར༌ ཏངས༌ཏེ༌ ཟེརས༌, “ཀལ༌ཏེས༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ ཟེར༌ན༌ ཁོའེ༌ ང༌དང༌ང༌, ‘ཁྱོ༌ཞའེ༌ ཁོའེ༌ཀ༌ ཨིད༌ཤེས༌ ཅིའ༌ མ༌ཅོས༌པིན༌’ ཟེར༌ཨིན༌།
LUK 20:6 ཨིན༌ནའང༌ ཀལ༌ཏེས༌ ‘མིའི༌ ཆོགས༌ནེ༌ ཨིན༌ནོག༌’ ཟེར༌ན༌, མི༌ཚང༌མའེ༌ ང༌དང༌ང༌ རྡོའ༌ གྱབས༌ཏེ༌ སད༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡོ༌ཧཱ༌ནན༌ ལུང༌སྟོན༌པ༌ ཨིན༌ཁན༌བོའ༌ ཏད༌པ༌ ཅོའ༌ནོག༌།”
LUK 20:7 ཏེ༌བོའེ༌ཕིའ༌ ཁོང༌གུན༌ནི༌ ཡེ༌ཤུའ༌ ལན༌ཏངས༌, “ཀ༌ནེ༌ ཐོབ༌ཏེ༌ ཨིན༌ ང༌ཞའ༌ གྱུས༌མེད༌།”
LUK 20:8 ཡེ༌ཤུའི༌ ཁོང༌གུན༌ལ༌ མོལས༌, “ངེའང༌ མི༌ཤད༌, སུའི༌ ཝང༌ཆའེ༌ ནང༌ང༌ ངའེ༌ འི༌གུན༌ ཅོའད༌།”
LUK 20:9 གཙོ༌བོ༌ ཡེ༌ཤུའི༌ མི༌གུན༌ལ༌ འི༌ རུངས༌པོ༌ ཤད༌ད༌ ཛདས༌, “མི༌ཞིག༌གི༌ ཁོ༌རང༌ངི༌ ཞིང༌ང༌ རྒུན༌ ཙུགས༌ཏེ༌ ཞན༌ ཞིང༌བད༌པ༌གུན༌ལ༌ ཤས༌ལ༌ ཏངས༌ ཡང༌ ལོ༌ ཁ༌ཅིག༌ ཁོ༌རང༌ ཞན༌ཡུལ༌ཞིག༌ག༌ དུག༌ག༌ སོང༌།
LUK 20:10 སྟོན༌ཐོག༌གི༌ ཏུས༌ལ༌ ཤིང༌ཏོག༌གི༌ སྐལ༌ལ༌ ལེན༌ན༌ལ༌ ཁོའེ༌ ཁོ༌རང༌ངི༌ ཡོག༌པོ༌ཞིག༌ ཤས༌ལ༌ ཏང༌ཁན༌གུན༌ནི༌ཀ༌ ལམ༌ཅུགས༌། ཨིན༌ནའང༌ ཁོང༌གུན༌ནི༌ ཡོག༌པོ༌བོའ༌ རྡུངས༌ཏེ༌, ཁོ༌ ལག༌སྟོང༌ང༌ ལོགས༌ཏེ༌ ལམ༌ཅུགས༌།
LUK 20:11 ཞིང༌ངི༌ དག༌པོའེ༌ ཞན༌ཡང༌ ཡོག༌པོ༌ཞིག༌ ལམ༌ཅུགས༌, ཨིན༌ནའང༌ ཁོང༌གུན༌ནི༌ ཁོའང༌ རྡུངས༌ ཡང༌ ཁྲེལ༌བ༌ སྟན༌ཏེ༌ ལག༌སྟོང༌ང༌ ལོགས༌ཏེ༌ ལམ༌ཅུགས༌།
LUK 20:12 ཁོའེ༌ ཡོག༌པོ༌ སུམ༌པ༌བོ༌ ལམ༌ཅུགས༌པ༌ ཁོང༌གུན༌ནི༌ ཁོའ༌ རྡུངས༌ཏེ༌ མ༌ཁའ༌ ཕིངས༌ཏེ༌ ཕི༌ལོག༌ག༌ ཕངས༌ཏངས༌།”
LUK 20:13 “ཏེ༌ནེ༌ རྒུན༌ཚས༌སི༌ དག༌པོའེ༌ སམ༌, ‘ངའེ༌ ཅི༌ ཅོ༌གོས༌? ངའེ༌ ཅེས༌པ༌ ཅོ༌ཁན༌ནི༌ བུ༌ཚ༌ ལམ༌ཅུག༌ན༌ ཁོའ༌ རྩི༌ཝ༌ ཅོ༌ མི༌ཅོའ༌ཧེ༌།’”
LUK 20:14 “ཨིན༌ནའང༌ ཤས༌པ༌གུན༌ནི༌ བུ༌ཚ༌ ཐོང༌ང༌ཅིག༌, ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, ‘འི༌ ཞིང༌ ནོར༌སྐལ༌ལ༌ ཐོབ༌ཅེས༌ཅན༌བོ༌ ཡོང༌ང༌ལ༌། ཡོང༌ཤིག༌, ཁོ༌ སད༌ཨིན༌ ཏེ༌ནེ༌ ཁོའེ༌ ནོར༌སྐལ༌བོ༌ ང༌དང༌ང༌ ཐོབ༌ཨིན༌།’
LUK 20:15 ཏེ༌བོའེ༌ཕིའ༌ ཁོང༌གུན༌ནི༌ ཁོ༌ རྒུན༌ཚས༌ནེ༌ ཕི༌ལོག༌ག༌ ཕིངས༌ཏེ༌ སདས༌།” ཡེ༌ཤུའི༌ ཏྲིའ༌ ཛདས༌, “ཏེ༌ནེ༌ ཁོང༌གུན༌ལ༌ རྒུན༌ཚས༌སི༌ དག༌པོའེ༌ ཅི༌ ཅོ༌ཨིན༌?
LUK 20:16 ཁོ༌ ཡོངས༌ཏེ༌, ཤས༌པ༌གུན༌ སད༌ཨིན༌, ཡང༌ རྒུན༌ཚས༌པོ༌ ཞན༌ ཞིང༌བད༌པ༌ རིག༌ག༌ ཤས༌ལ༌ ཏང༌ཨིན༌།” མི༌གུན༌ནི༌ ཏེ༌ རུངས༌པོ༌ ཚོར༌ར༌ཅིག༌ ཟེརས༌, “ཏེ༌ཙོགས༌ ངན༌པ༌ མ༌ནེ༌ མ༌ཇུང༌ཤིག༌།”
LUK 20:17 ཨིན༌ནའང༌ ཁོང༌ངི༌ ཁོང༌གུན༌ལ༌ ཟིགས༌ཏེ༌ མོལས༌, “ཏེ༌ནེ༌ ཏམ༌པའེ༌ སུང༌རབས༌སི༌ ནང༌ང༌ འི༌ བྲིས༌ཁན༌བོའེ༌ ཏོན༌ཏག༌པོ༌ ཅི༌ ཨིན༌ནོག༌, ‘ཀ༌ རྡོའ༌བོ༌ ཁང༌པ༌ རྩིག༌ཁན༌གུན༌ནི༌ ཕན༌མི༌ཐོགས༌ ཐེས༌, ཏེན༌ན༌ རྡོའ༌བོ༌ ཁང༌པའེ༌ ཀྲུ༌རྡོའ༌བོ༌ གྱུར༌ ཀ༌བོ༌ ཚང༌མའེ༌སང༌ ཁག༌ཅན༌ རྡོའ༌བོ༌ ཨིན༌ནོག༌།’
LUK 20:18 ཏེ༌ རྡོའེ༌ཀ༌ སྒག༌གྱབ༌ཁན༌ ཚང༌མ༌ ཏུམ༌པ༌ཏུམ༌པའེ༌ ནང༌ང༌ ཆག༌ཨིན༌, ཨིན༌ནའང༌ ཏེ༌ རྡོའ༌བོ༌ ཁོང༌གུན༌ནི༌ཀ༌ བུད༌ན༌, ཁོང༌གུན༌ མེད༌ཁན༌ ཆེན༌།”
LUK 20:19 ཆོས༌ཁྲིམས༌ལ༌ ཁས༌པ༌གུན༌ དང༌ བླ༌མ༌ འུ༌སྐྱོང༌གུན༌ནི༌ ཏེན༌ན༌མལ༌ལ༌ ཡེ༌ཤུ༌ ཟུམ༌ཅེས༌སི༌ དོད༌པ༌ ཡོད༌པིན༌, ཅིའ༌ཟེར༌ན༌ ཏེ༌ རུངས༌པོ༌ ཁོང༌གུན༌ནི༌ གྱབ༌གལ༌ལ༌ ཤད༌ཏེ༌ ཨིན༌ཁན༌བོ༌ ཧ༌གོ༌། ཨིན༌ནའང༌ ཁོང༌གུན༌ མི༌གུན༌ལ༌ ཇིགས༌།
LUK 20:20 ཁོང༌གུན༌ནི༌ མི༌ ཀྲང༌པོ༌ ཨིན༌ཟུན༌ ཏངས༌ཏེ༌ སང༌ཝའེ༌ ཐོག༌ནེ༌ གཙོ༌བོ༌ ཡེ༌ཤུའི༌ཀ༌ ནང༌སྟག༌ བོར༌ཁན༌གུན༌ ཀལས༌། ཁོང༌གུན༌ནི༌ ཡེ༌ཤུའི༌ མོལ༌ཁན༌ནི༌ སྤེ༌རའེ༌ ནང༌ང༌ ཁོང༌ ཁད༌ཅུགས༌ཏེ༌ རོམ༌མི༌ ཀའ༌ལོན༌ནི༌ ལག༌ག༌ སྟད༌ཅེས༌སི༌ དོད༌པ༌ ཅོའད༌པིན༌།
LUK 20:21 ཏེ༌ མི༌གུན༌ནི༌ ཡེ༌ཤུའ༌ ཏྲིས༌, “ལོབ༌བོན༌ལེ༌, ཉེ༌རང༌ངི༌ མོལ༌ཁན༌ དང༌ ལབ༌ཞ༌ སལ༌ཁན༌བོ༌ ཀྲང༌པོ༌ ཡང༌ མི༌ ནང༌ང༌ ཡ༌ཕེས༌ མ༌ཛད༌ད༌ ཀྲང༌པོ༌ ཉམ༌པོ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌ ལབ༌བ༌ ཛད༌ཁན༌བོ༌ ང༌ཞའ༌ གྱུས༌ཡོད༌།
LUK 20:22 མོལ༌ལ༌ ཛད༌དའང༌, རོམ༌མི༌ གྱལ༌པོའ༌ ཁྲལ༌ ཤལ༌ཅེས༌པོ༌ འོས༌པ༌ ཨིན༌ནོག༌ག༌ ཡ༌ མ༌ནོག༌?”
LUK 20:23 ཡེ༌ཤུའི༌ ཁོང༌གུན༌ནི༌ ཅུས༌ངན༌ ཁྱེན༌ཏེ༌, ཁོང༌གུན༌ལ༌ མོལས༌
LUK 20:24 “རོམ༌པའེ༌ མུལ༌ལི༌ པེ༌ནེ༌ཞིག༌ ངའ༌ སྟོན༌ནའང༌། འི༌ པེ༌ནེ༌ཀ༌ ཡོད༌ཁན༌ནི༌ པར༌ དང༌ མིང༌ སུའི༌ ཨིན༌ནོག༌?” ཁོང༌གུན༌ནི༌ ལན༌ཏངས༌, “རོམ༌མི༌ གྱལ༌པོའེ༌།”
LUK 20:25 ཁོང༌ངི༌ ཁོང༌གུན༌ལ༌ མོལས༌, “གྱལ༌པོའེ༌ ཨིན༌ཁན༌བོ༌ གྱལ༌པོའ༌ ཏོང༌ ཡང༌ དཀོན༌མཆོག༌གི༌ ཨིན༌ཁན༌བོ༌ དཀོན༌མཆོག༌ག༌ ཕུལ༌།”
LUK 20:26 མི༌གུན༌ནི༌ དུན༌ལ༌ ཁོང༌ངི༌ མོལ༌ཁན༌བོ༌ གྱུད༌ཏེ༌ ཡེ༌ཤུ༌ ཁད༌ཅུག༌ མ༌ཉན༌ ཡང༌ ཁོང༌ངི༌ ལན༌སལ༌ཁན༌བོའ༌ ཧ༌ལས༌ཏེ༌ ཁོང༌གུན༌ ཧན༌གྲང༌ སོང༌།
LUK 20:27 ཏེ༌ནེ༌ ཤི༌ཁན༌གུན༌ སོན༌ཏེའ༌ ལང༌ང༌ མ༌ནོག༌ ཟེར༌ཁན༌ནི༌ སད༌དུ༌ཀི༌པ༌ ཁ༌ཅིག༌ གཙོ༌བོ༌ ཡེ༌ཤུ༌ ཡོད༌ས༌ ཏྲི༌ཝ༌ཞིག༌ ཏྲིའ༌ལ༌ ཡོངས༌,
LUK 20:28 ཁོང༌གུན༌ནི༌ ཟེརས༌, “ལོབ༌བོན༌ལེ༌ མོ༌ཟེས༌སི༌ ང༌དང༌གུན༌ལ༌ ཁྲིམས༌ཤིག༌ སལ༌ལ༌ ཛད༌ཏེ༌ དུག༌, ‘ཀལ༌ཏེས༌ བུ༌ཚ༌ཞིག༌ ཕྲུ༌གུ༌ མེད༌པ༌ ཤི༌ན༌, ཨ༌ཅོ༌ ཡ༌ ནོའེ༌ ཁོའེ༌ མིར༌གྱུད༌ ལུས༌ཤེས༌སི༌ ཕིའ༌ ཤི༌ཁན༌ནི༌ ན༌མ༌ ཉམ༌པོ༌ བག༌སྟོན༌ ཅོས༌ཏེ༌ ཕྲུ༌གུ༌ ཇོར༌ཅུག༌ གོས༌།’
LUK 20:29 ཏ༌ ཨ༌ཅོ༌ནོ༌ རྡུན༌ ཡོད༌པིན༌, ཏང༌པོ༌བོའེ༌ ན༌མ༌ ཅོས༌ ཡང༌ ཕྲུ༌གུ༌ མེད༌པ༌ ཤི༌།,
LUK 20:30 ཏེན༌ན༌ ཙོགས༌ ཉིས༌པ༌
LUK 20:31 དང༌ སུམ༌པ༌བོ༌ མ༌ཚད༌ རྡུན༌ཀོའེ༌ ཏེན༌ན༌ བུ༌མོ༌ ཉམ༌པོ༌ ན༌མ༌ ཅོས༌ ཨིན༌ནའང༌ ཕྲུ༌གུ༌ མེད༌པ༌ ཤི༌,
LUK 20:32 ཡང༌ སྟིང༌ཇུག༌ག༌ བུ༌མོ༌བོའང༌ ཤི༌།
LUK 20:33 བུ༌མོ༌བོའེ༌ ཁོང༌ རྡུན༌ཀོ༌ ཉམ༌པོ༌ ན༌མ༌ ཅོས༌པ༌, ཤི༌ཁན༌གུན༌ སོན༌ཏེའ༌ ལང༌ངི༌ ཏུས༌ལ༌ ཁོ༌ ཁོང༌གུན༌ནི༌ ནང༌ནེ༌ སུའི༌ ན༌མ༌ གྱུར༌ཨིན༌?”
LUK 20:34 ཡེ༌ཤུའི༌ ལན༌སལས༌, “འི༌ ཇིག༌རྟེན༌ནི༌ མི༌གུན༌ནི༌ བག༌མ༌ ཅོའ༌ནོག༌།
LUK 20:35 ཨིན༌ནའང༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ཅེས༌སི༌ འོས༌པ༌ ཡོད༌ཁན༌གུན༌ནི༌ ན༌མ༌ མི༌ཅོ༌ ཡ༌ བག༌མ༌ མི༌ཏང༌,
LUK 20:36 ཡང༌ ཁོང༌གུན༌ ཡང༌སྐྱར༌ མ༌ནེ༌ མི༌ཤི༌ ཅིའ༌ཟེར༌ན༌ ཁོང༌གུན༌ ནམ༌ཁའེ༌ ཕོ༌ཉ༌ ཙོགས༌ ཨིན༌ནོག༌། ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌ ཁོང༌གུན༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ནོག༌།”
LUK 20:37 “ཆུ༌ངུན༌ ལྕང༌མ༌ མེའ༌ བར༌ཁན༌ནི༌ སྐོར༌ལ༌ བྲིའ༌ ཛད༌ཁན༌བོའེ༌ ནང༌ང༌ མོ༌ཟེས༌སིའང༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཅེས༌པོ༌ སྟན༌ན༌ནོག༌, ཅིའ༌ཟེར༌ན༌ ཁོའེ༌ གཙོ༌བོ༌ དཀོན༌མཆོག༌ག༌ ‘ཨབ༌ར༌ཧམ༌མི༌ དཀོན༌མཆོག༌, ཨི༌སཱག༌གི༌ དཀོན༌མཆོག༌ དང༌ ཡ༌ཀོབ༌བི༌ དཀོན༌མཆོག༌’ ཟེརས༌།
LUK 20:38 ཏེ༌བོའེ༌ ཁོང༌ ནི༌ ཤི༌ཁན༌གུན༌ནི༌ དཀོན༌མཆོག༌ མན༌པ༌, སོན༌པོ༌གུན༌ནི༌ དཀོན༌མཆོག༌ ཞུགས༌ཏེ༌ ཨིན༌ཁན༌བོ༌ སྟན༌ན༌ནོག༌, ཅིའ༌ཟེར༌ན༌ ཁོང༌ ཚང༌མ༌ དཀོན༌མཆོག༌གི༌ དུན༌ལ༌ སོན༌ཏེའ༌ ཨིན༌ནོག༌།”
LUK 20:39 ཆོས༌ཁྲིམས༌ལ༌ ཁས༌པའེ༌ མི༌ ཁ༌ཅིག༌གི༌ ཁོང༌ང༌ ཟེརས༌, “ལོབ༌བོན༌ལེ༌, ཉེ༌རང༌ངི༌ ལན༌ གྱལ༌ལ༌ སལས༌།”
LUK 20:40 ཏེ༌ནེ༌ ཕར༌ལ༌ སུ༌ཞིག༌གིའང༌ ཁོང༌ང༌ ཏྲི༌ཝ༌ ཏྲི༌ཅེས༌སི༌ ཧམ༌པ༌ མ༌ཅོས༌།
LUK 20:41 ཏེ༌ནེ༌ གཙོ༌བོ༌ ཡེ༌ཤུའི༌ ཁོང༌གུན༌ལ༌ མོལས༌, “དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, གྱལ༌པོ༌ དཱ༌བིད༌དི༌ པུར༌གྱུད༌ ཨིན༌ནོག༌ ཀ༌ཟུག༌གི༌ ཟེར༌ར༌ནོག༌།
LUK 20:42 སུང༌གུར༌རི༌ སྤེ༌ཆའེ༌ ནང༌ང༌ དཱ༌བིད༌དི༌ བྲིས༌ཏེ༌ དུག༌, ‘དཀོན༌མཆོག༌གི༌ ངའེ༌ གཙོ༌བོའ༌ མོལས༌, “ངའེ༌ ཁྱོ༌རང༌ངི༌ གྲ༌འོ༌ ཚང༌མ༌, ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌, ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།”’
LUK 20:44 ཀལ༌ཏེས༌ དཱ༌བིད༌དི༌ མ༌ཤི༌ཀའ༌ ‘གཙོ༌བོ༌’ ཟེར༌རད༌ན༌, ཏེ༌ནེ༌ ཀ༌ཟུག༌གི༌ མ༌ཤི༌ཀ༌ ཁོའེ༌ པུར༌གྱུད༌ ཨིན༌ནོག༌?”
LUK 20:45 མི༌ཚང༌མ༌ ཉན༌ཨིན༌ ཡོད༌ ཟ༌ནེ༌ གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌,
LUK 20:46 “ཆོས༌ཁྲིམས༌ལ༌ ཁས༌པ༌གུན༌ནི༌ ཀ༌ནེ༌ ཤང༌ ཅོས༌། ཁོང༌གུན༌ ཆོས༌སི༌ ཀོས༌ལག༌ ཐུལ༌ཅན༌ གོན༌ཏེ༌ གྲུལ༌ལ༌ལ༌, ཡང༌ ཁྲོམས༌སི༌ ནང༌ང༌ མི༌གུན༌ནི༌ ཀ༌ནེ༌ རྩི༌ཝ༌ ཐོབ༌ཅེས༌ལ༌ ཐད༌ད༌ནོག༌། དུ༌ཁང༌ངི༌ ནང༌ང༌ རྩི༌ཝ༌ཅན༌ནི༌ ནས༌སའེ༌ཀ༌ ཡང༌ གྲོན༌ནི༌ ནང༌ང༌ གྲལ༌གོའ༌ དུག༌ག༌ལ༌ ཐད༌ད༌ནོག༌།
LUK 20:47 ཨ༌ནེ༌མ༌རང༌མོ༌གུན༌ལ༌ གོབ༌སྐོར༌ཏེ༌ ཁོང༌ངི༌ ཁང༌པ༌གུན༌ ཁྱེར༌ཅེས༌, ཡང༌ མི༌གུན༌ལ༌ སྟན༌ཅེས༌སི༌ ཕིའ༌ མོས༌ལམ༌ རིང༌མོ༌ ཞུ༌དུག༌། ཏེ༌བོའེ༌ ཞས༌ཏེ༌ ཁོང༌གུན༌ལ༌ ཆད༌པ༌ སྲན༌ཏྲེ༌ ཕོག༌ཨིན༌།”
LUK 21:1 གཙོ༌བོ༌ ཡེ༌ཤུའི༌ ཆོད༌ཁང༌ངི༌ ནང༌ང༌ ཡོད༌ཏུས༌ མི༌ ཆུག༌པོ༌གུན༌ནི༌ བུལ༌ལྡུས༌སི༌ སྒམ༌མི༌ ནང༌ང༌ ཁོ༌རང༌གུན༌ནི༌ བུལ༌ལྡུས༌ ཕུལ༌ཨིན༌ ཟིགས༌།
LUK 21:2 ཁོང༌ངི༌ ཉལ༌བ༌ཅན༌ ཨ༌ནེ༌མ༌རང༌མོ༌ ཞིག༌གི༌ ཟངས༌སི༌ པེ༌ནེ༌ ཉིས༌ ཕུལ༌ཁན༌བོའང༌ ཟིགས༌།
LUK 21:3 ཁོང༌ངི༌ མོལས༌, “ངའེ༌ ཁྱོ༌ཞའ༌ དེན༌བ༌ ཟེར༌རད༌, ཞན༌ ཚང༌མའེ༌ སང༌ འི༌ ཨ༌ནེ༌མ༌རང༌མོ༌ ཉལ༌བ༌ཅན༌བོའེ༌ མང༌ང༌ ཕུལས༌,
LUK 21:4 ཅིའ༌ཟེར༌ན༌ མི༌ཚང༌མའེ༌ ཁོ༌རང༌གུན༌ལ༌ མང༌པོ༌ ཡོད༌ཁན༌ནི༌ ནང༌ནེ༌ ཉུ༌ངུན༌ཞིག༌ ཏངས༌, ཨིན༌ནའང༌ འི༌ ཨ༌ནེ༌མ༌རང༌མོ༌བོའེ༌ ཉལ༌བ༌ཅན༌ ཨིན༌ཏེའང༌ ཁོ༌ སོན༌ཏེའ༌ ལུས༌ཤེས༌སི༌ སྒོས༌དོམ༌ ཡོད༌ཁན༌ ཚང༌མ༌ ཏངས༌།”
LUK 21:5 གཙོ༌བོ༌ ཡེ༌ཤུའི༌ ལོབ༌ཕྲུགས༌ ཁ༌ཅིག༌གི༌ ཆོད༌ཁང༌ ཧ༌ལས༌ཤེས༌ རྩིགས༌ཏེ༌ རིན༌ཅན༌ རྡོའ༌གུན༌ ཡང༌ མི༌གུན༌ནི༌ དཀོན༌མཆོག༌ག༌ ཕུལ༌ཁན༌ནི༌ སྟགས༌གུན༌ ཉམ༌པོ༌ མ༌ ལྡེ༌མོ༌ ཅོས༌ཏེ༌ ཡོད༌ཁན༌བོའེ༌ སྐོར༌ལ༌ སྤེ༌ར༌ ཏང༌ཨིན༌ ཡོད༌ ཟ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌,
LUK 21:6 “ཁྱོ༌ཞ༌གུན༌ནི༌ འི༌བོ༌ ཐོང༌དུག༌ག༌? ཏེ༌ཏུས༌པོའང༌ ལེབ༌ཨིན༌ ནམ༌ འི༌ རྡོའ༌ ཅིག༌གའང༌ ཅིག༌གི༌ཀ༌ རྩགས༌ཏེ༌ མི༌ལུས༌, ཚང༌མ༌ ཤིག༌ཨིན༌།”
LUK 21:7 ཁོང༌གུན༌ནི༌ ཁོང༌ང༌ ཏྲིས༌, “ལོབ༌བོན༌ལེ༌, ཏེ༌བོ༌ ནམ༌ ཇུང༌ཨིན༌, ཡང༌ ཏེ༌གུན༌ དྲན༌དྲ༌ གྲུབ༌ཅེས༌སི༌ སྟགས༌ ཀ༌ཟུག༌ རིག༌ ཡོང༌ཨིན༌?”
LUK 21:8 ཡེ༌ཤུའི༌ ལན༌སལས༌, “སུ༌ཞིག༌གིའང༌ ཁྱོ༌ཞའ༌ གོབ༌སྐོར༌ ཏང༌མི༌ཅུག༌ཅེས༌ལ༌ ཤང༌ ཅོས༌, ཅིའ༌ཟེར༌ན༌ ངའེ༌ མིང༌ ཁུར༌ཏེ༌ ‘ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ ཡང༌ ཏུས༌པོ༌ ཉེ༌མོ༌ དུག༌’ ཟེར༌ཁན༌ མང༌པོ༌ ཡོང༌ཅེན༌། ཁོང༌གུན༌ནི༌ སྟིང༌རང༌ནེ༌ མ༌ཆ༌།
LUK 21:9 མག༌ དང༌ ཝང༌སྲུལ༌པ༌ ངོ༌ལོག༌ ཅོ༌ཅེས༌གུན༌ ཚོར༌ར༌ཅིག༌ ཇིགས༌ མ༌ཇིགས༌། གོ༌མ༌ ཏེ༌གུན༌ ཇུང༌གོས༌ ཨིན༌ནའང༌ ཐའ༌མའེ༌ ཏུས༌ ཏ༌རུང༌ མི༌ལེབ༌།”
LUK 21:10 ཏེ༌ནེ༌ ཁོང༌ངི༌ ཁོང༌གུན༌ལ༌ མོལས༌, “གྱལ༌ཁམས༌ ཅིག༌ དང༌ ཅིག༌གི༌ ཡང༌ གྱལ༌སྲིད༌ ཅིག༌ དང༌ ཅིག༌གི༌ གྱབ༌གལ༌ལ༌ མག༌ ཏང༌ཨིན༌།
LUK 21:11 ནས༌ས༌ མང༌པོའེ༌ ནང༌ང༌ མུ༌གེ༌, སང༌གུལ༌ དང༌ ཇར༌ནད༌ གུན༌ ཡོང༌ཨིན༌, ཡང༌ ནམ༌ཁའེ༌ ནང༌ང༌ ཇིགས༌ནང༌ཅན༌ནི༌ ལྟས༌གུན༌ དང༌ ཀྲག༌པོ༌ སྟགས༌གུན༌ ཇུང༌ཨིན༌།”
LUK 21:12 “ཨིན༌ནའང༌ ཏེ༌གུན༌ ཇུང༌ངི༌ སང༌ སྔུན༌ལ༌ ངའེ༌ཀ༌ ཏད༌པ༌ ཅོ༌ཅེས༌པོའེ༌ ཁོང༌གུན༌ནི༌ ཁྱོ༌ཞའ༌ ཟུམས༌ཏེ༌ ནགས༌ སྟན༌ཨིན༌, དུ༌ཁང༌གུན༌ནི༌ ནང༌ང༌ ཁྱེར༌ཏེ༌ ཙོན༌ཁང༌ང༌ ཀག༌ཨིན༌ ཡང༌ ཁྲིམས༌ཅད༌ད༌ལ༌ ཀའ༌ལོན༌ དང༌ གྱལ༌པོ༌ གུན༌ནི༌ཀ༌ ཁྱེར༌ཨིན༌།
LUK 21:13 ཏེ༌ཏུས༌ ཁྱོ༌ཞའ༌, ངའ༌ སུ༌ ཨིན༌ཁན༌བོའེ༌ སྤང༌པོ༌ ཁོང༌གུན༌ལ༌ ཏང༌ཅེས༌སི༌ སྐབས༌ ཐོབ༌ཨིན༌།
LUK 21:14 ཨིན༌ནའང༌ ཁོང༌གུན༌ནི༌ དུན༌ལ༌ ཁྱོ༌ཞའ༌ ནོངས༌མེད༌ ཀ༌ཟུག༌གི༌ སྟན༌ཨིན༌ སམས༌ཏེ༌ སྔུན༌ལ༌ ཚེར༌ མ༌ཚེར༌།
LUK 21:15 ཅིའ༌ཟེར༌ན༌ ངའེ༌ ཁྱོ༌ཞ༌གུན༌ལ༌ ཏེ༌ཟུག༌ སྤེ༌ར༌ དང༌ ཤེས༌རབས༌ ཏང༌ཨིན༌, ཁྱོ༌ཞའེ༌ གྲ༌འོ༌ སུ༌ཞིག༌གའང༌ ཏེ༌བོའ༌ གྱབ༌གལ༌ ཡ༌ ལན༌ ཏང༌ མི༌ཉན༌།
LUK 21:16 ཕ༌མ༌, ཨ༌ཅོ༌ནོ༌, ཉེན༌ དང༌ ཛ༌འོ༌ གུན༌ནིའང༌ ཁྱོ༌ཞའ༌ ངོ༌ལོག༌ ཅོས༌ཏེ༌ ཁྱོ༌ཞ༌ ཁ༌ཅིག༌ སད༌ཅུག༌ཨིན༌།
LUK 21:17 ཁྱོ༌ཞའ༌ ངའེ༌ཀ༌ ཏད༌པ༌ ཅོ༌ཅེས༌པོའེ༌ མི༌ཚང༌མའེ༌ ཁྱོ༌ཞའ༌ ནཕ༌རད༌ ཅོ༌ཨིན༌།
LUK 21:18 ཇིག༌ མ༌ཇིག༌ཤིག༌ ཁྱོ༌ཞ༌གུན༌ནི༌ གོའི༌ སྲ༌ཉག༌ ཅིག༌གའང༌ མེད༌ཁན༌ ཆ༌ཅུག༌ག༌ མི༌ཛད༌།
LUK 21:19 ངའེ༌ ནང༌ང༌ སྟན༌པོ༌ དུག༌ན༌ ཁྱོ༌ཞའ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།”
LUK 21:20 “ཁྱོ༌ཞའེ༌, ཡེ༌རུ༌ཤ༌ལེམ༌མི༌ གྱལ༌ས༌ མག༌མི༌གུན༌ནི༌ སྐོར༌ཏེ༌ ཐོང༌ང༌ཅིག༌, ཏེ༌བོ༌ མེད༌ཁན༌ ཆ༌ཅེས༌སི༌ ཏུས༌ ཉེ༌མོ༌ ལེབས༌ཏེ༌ ཨིན༌ཁན༌བོ༌ ཤེས༌གོས༌།
LUK 21:21 ཏེ༌ནེ༌ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ དུག༌ཁན༌གུན༌ རི༌གུན༌ལ༌ ཤོར༌གོས༌, ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌གུན༌ ཕི༌ལོག༌ག༌ བིང༌གོས༌, ཡང༌ ཕི༌ལོག༌ག༌ ཡོད༌ཁན༌གུན༌ གྱལ༌སའེ༌ ནང༌ང༌ ལོགས༌ཏེ༌ ཆ༌ མ༌གོས༌
LUK 21:22 འི༌ཏུས༌པོ༌ ནི༌ དཀོན༌མཆོག༌གི༌ ཆད༌པའེ༌ ཏུས༌ ཨིན༌, ཏེ༌བོའེ༌ ཏམ༌པའེ༌ སུང༌རབས༌སི༌ ནང༌ང༌ བྲིས༌ཁན༌ ཚང༌མ༌ གྲུབ༌ཨིན༌།
LUK 21:23 ཏེ༌ཏུས༌ལ༌ སྐྱེ༌ཅེས༌མ༌ དང༌ ཕྲུ༌གུའ༌ པི༌བི༌ ཏང༌ཁན༌ནི༌ ཨ༌མ༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌, འི༌ ནས༌སའེ༌ ནང༌ང༌ རྡུག༌ངལ༌ ཀྲག༌པོ༌ ཇུང༌ཨིན༌, ཡང༌ འི༌ མི༌གུན༌ནི༌ཀ༌ ཐུགས༌སྲོ༌ ཀྲག༌པོ༌ བབས༌ཨིན༌།
LUK 21:24 གྲ༌འོའེ༌ མག༌མི༌གུན༌ནི༌ ཁོང༌གུན༌ སད༌ཨིན༌ ཡང༌ ཞན༌ གྱལ༌ཁམས༌ ཚང༌མའེ༌ ནང༌ང༌ ཙོན༌པ༌ ཅོས༌ཏེ༌ ཁྱེར༌ཨིན༌, ཡང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཡེ༌རུ༌ཤ༌ལེམ༌པ༌གུན༌ ཝང༌ངི༌ ཡོག༌ག༌ ནན༌ཏེ༌ བོར༌ཨིན༌ ནམ༌ ཚག༌པ༌ ཁོང༌གུན༌ནི༌ ཏུས༌པོ༌ ཚང༌ མི༌ཚང༌།”
LUK 21:25 “ཉི༌མ༌, ཟླ༌ཝ༌ དང༌ སྐར༌མ༌ གུན༌ནི༌ ནང༌ང༌ སྟགས༌གུན༌ ཐོང༌ཨིན༌། གྱ༌ཚོའེ༌ སྐད༌ ཀྲག༌པོ༌ དང༌ ཆུལ༌བག༌ ཆེན༌མོ༌ ལང༌ཅེས༌པོའེ༌ ཇིག༌རྟེན༌ནི༌ཀ༌ གྱལ༌ཁམས༌ ཚང༌མའེ༌ མི༌གུན༌ ཇིགས༌ཏེ༌ ཅིག༌ ནང༌ ཅིག༌ག༌ ཅི༌ ཇུངས༌ཏེ༌ ཨིན༌ནོག༌ ཟེར༌ཏེ༌ ཏྲི༌ཨིན༌།
LUK 21:26 དཀོན༌མཆོག༌གི༌ ནམ༌ཁའེ༌ ཝང༌གུན༌ སྲུག༌ག༌ ཛད༌ཁན༌བོ༌ ཐོང༌ང༌ཅིག༌ ཇིག༌རྟེན༌ནི༌ཀ༌ ཅི༌ ཇུང༌ཨིན༌ སམས༌ཏེ༌ ཇིགས༌ནང༌ངི༌ ནང༌ང༌ མི༌གུན༌ མུན༌ཨིན༌།
LUK 21:27 ཏེ༌ནེ༌ ཁོང༌གུན༌ནི༌ མི༌རིགས༌སི༌བུ༌ ཝང༌ དང༌ ཟིར༌རྗིད༌ ཀྲག༌པོ༌ ཉམ༌པོ༌, སྲིན༌ནི༌ཀ༌ ཞོན༌ཏེ༌ ཡོང༌ང༌ ཐོང༌ཨིན༌།
LUK 21:28 ཏེ༌གུན༌ ཇུང༌ང༌ ཐོང༌ང༌ཅིག༌, ལངས༌ཏེ༌ གོ༌ སྟོགས༌ཏེ༌ ཀེན༌ལ༌ ལྟོས༌ ཅིའ༌ཟེར༌ན༌ ཁྱོ༌ཞའེ༌ ཐར༌པ༌ ཉེ༌མོ༌ ལེབས༌ཏེ༌ ཨིན༌ནོག༌།”
LUK 21:29 ཏེ༌ནེ༌ ཡེ༌ཤུའི༌ ཁོང༌གུན༌ལ༌ འི༌ རུངས༌པོ༌ ཤད༌ད༌ ཛདས༌, “ཕིག༌ ཁ༌ཟས༌སི༌ ལྕང༌མ༌ དང༌ ལྕང༌མ༌ ཚང༌མ༌ ལྟོས༌།
LUK 21:30 ཏེ༌གུན༌ལ༌ ལོ༌མ༌ བིང༌ང༌ཅིག༌, ཁྱོ༌ཞའ༌ ཡར༌ ཉེ༌མོ༌ ལེབ༌ཁན༌བོ༌ ཤེས༌ས༌ནོག༌།
LUK 21:31 ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཏེ༌ སྟགས༌གུན༌ ཐོང༌ང༌ཅིག༌, ཁྱོ༌ཞའེ༌ དཀོན༌མཆོག༌གི༌ གྱལ༌སྲིད༌ ཉེ༌མོའ༌ ལེབས༌ཏེ༌ ཡོད༌ཁན༌བོ༌ ཤེས༌ཨིན༌།
LUK 21:32 ངའེ༌ ཁྱོ༌ཞའ༌ དེན༌བ༌ ཟེར༌རད༌, འི༌ མི༌རབས༌པོ༌ མེད༌ཁན༌ ཆེ༌ སང༌ སྔུན༌ལ༌ ཏེ༌ ཚང༌མ༌ ཇུང༌ཨིན༌།
LUK 21:33 ནམ༌ཁའ༌ དང༌ ཇིག༌རྟེན༌ ཉིས༌ཀོ༌ མེད༌ཁན༌ ཆེན༌, ཨིན༌ནའང༌ ངའེ༌ ཟེར༌ཁན༌གུན༌ མེད༌ཁན༌ མ༌ནེ༌ མི༌ཆ༌།”
LUK 21:34 “གྲོན༌ ཏང༌ཅེས༌ དང༌ ར༌རོས༌ཤེས༌ དང༌ འི༌ མི༌ཚེའེ༌ ཚེར༌ཁ༌གུན༌ནི༌ ཁྱོ༌ཞ༌གུན༌ནི༌ སེམས༌ དཀོན༌མཆོག༌ནེ༌ ཐག༌རིང༌ང༌ མི༌ཁྱེར༌ཅེས༌ལ༌ ཤང༌ ཅོས༌། ཏེ༌ཟུག༌ མ༌ཅོ༌ན༌, ཏེ༌ ཞག༌པོ༌ ལེབས༌ཏེ༌ ཧུན༌མེད༌ལ༌ ཁྱོ༌ཞ༌གུན༌ ཁད༌ཨིན༌,
LUK 21:35 ཏེ༌ ཞག༌པོ༌ ཇིག༌རྟེན༌ནི༌ཀ༌ མི༌ཚེ༌ ཕུད༌ཁན༌ ཚང༌མའེ༌ཀ༌ བབས༌ཨིན༌།
LUK 21:36 ཏུས༌གྱུན༌ ཤང༌ ཅོས༌ཏེ༌ དུག༌ ཡང༌ འི༌ ཇུང༌ཅེས༌ཅན༌ནི༌ ནས༌ལུག༌ ཚང༌མ༌ནེ༌ ཐར༌ཅེས༌ དང༌ མི༌རིགས༌སི༌བུའི༌ དུན༌ལ༌ ཇིགས༌ མ༌ཇིགས༌ས༌ ལངས༌ཏེ༌ དུག༌ ཐུབ༌ཅེས༌ལ༌ མོས༌ལམ༌ ཞུས༌།”
LUK 21:37 ཡེ༌ཤུའི༌ ཞག༌ཏང༌ ཆོད༌ཁང༌ང༌ ལབ༌ཞ༌ སལ༌ལ༌ ཛདས༌ ཡང༌ ཕི༌ཏོག༌ བིང༌ཏེ༌ ཨོ༌ལིཝ༌ཝི༌ རི༌ ཟེརས༌སའེ༌ ནས༌ས༌ སྐྱོད༌ཏེ༌ ཚན༌ལ༌ ཞུགས༌ས༌ ཛད༌དད༌པིན༌།
LUK 21:38 ཡང༌ མི༌ཚོགས༌ ཞག༌ཏང༌ མ༌ ང༌མོ༌ནེ༌ ཁོང༌ངི༌ ལབ༌ཞ༌ ཉན༌ན༌ལ༌ ཆོད༌ཁང༌ང༌ ཡོང༌ངད༌པིན༌།
LUK 22:1 ཏ༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ ཀ༌བོའ༌ པེ༌སག༌གི༌ ཏུས༌ཆེན༌ ཟེར༌རད༌ ཉེ༌མོ༌ ཡོད༌པིན༌,
LUK 22:2 བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ སང༌ཝའེ༌ ཐོག༌ནེ༌ ཡེ༌ཤུ༌ སད༌ཅེས༌སི༌ ཐབས༌ ཙལས༌ ཅིའ༌ཟེར༌ན༌ མི༌ཚོགས༌སི༌ ཏེ༌བོའ༌ གྱབ༌གལ༌ ཅོའ༌ནོག༌ སམ༌ཏེ༌ ཁོང༌གུན༌ ཇིགས༌སད༌པིན༌།
LUK 22:3 ཏེ༌ནེ༌ ལོབ༌ཕྲུགས༌ རྕུག༌ཉིས༌སི༌ ནང༌ནེ༌ ཅིག༌, ཀར༌ཡོད༌པ༌ ཟེར༌ཁན༌ནི༌ ཡུ༌དཱའེ༌ ནང༌ང༌ ཤེ༌ཏན༌ ཞུགས༌,
LUK 22:4 ཡང༌ ཁོ༌ བླ༌མ༌ འུ༌སྐྱོང༌གུན༌ དང༌ ཆོད༌ཁང༌ སྲུང༌ཁན༌ནི༌ མག༌མི༌ འུ༌སྐྱོང༌གུན༌ ཡོད༌ས༌ སོང༌ཏེ༌ ཡེ༌ཤུའ༌ ངོ༌ལོག༌ ཅོས༌ཏེ༌ ཀ༌ཟུག༌གི༌ ཁོང༌གུན༌ནི༌ ལག༌ག༌ སྟད༌ཨིན༌ ཟེར༌ཏེ༌ གྲབས༌ ཅོས༌།
LUK 22:5 ཁོང༌གུན༌ མ༌སྲན༌ཏྲེ༌ ཐད༌ཏེ༌ ཁོའ༌ པེ༌ནེ༌ ཏང༌ཅེས༌ལ༌ ཁའ༌ཆམས༌།
LUK 22:6 ཁོའང༌ ཏེ༌བོའ༌ ཁའ༌ཆམས༌ཏེ༌ མི༌ཚོགས༌ མེད༌ ཟ༌ནེ༌ ཡེ༌ཤུ༌ ཁོང༌གུན༌ནི༌ ལག༌ག༌ སྟད༌ཅེས༌སི༌ སྐབས༌ ཙལ༌ཅེས༌ གོ༌ཟུག༌།
LUK 22:7 ཏེ༌ནེ༌ སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ ལེབ༌, ཏེ༌ ཞག༌ག༌ པེ༌སག༌གི༌ ལུ༌གུ༌བོ༌ སྲོག༌ཆོད༌ལ༌ ཕུལ༌ལད༌པིན༌,
LUK 22:8 གཙོ༌བོ༌ ཡེ༌ཤུའི༌ པི༌ཏྲར༌ དང༌ ཡོ༌ཧཱ༌ནན༌ ལམ༌ཅུག༌ག༌ ཛད༌ཨིན༌ མོལས༌, “སོང༌ཏེ༌ ང༌དང༌གུན༌ ཟའ༌ཅེས༌ལ༌ པེ༌སག༌གི༌ དོན༌ཏང༌ གྲལ༌གྲིག༌ ཅོས༌།”
LUK 22:9 ཁོང༌གུན༌ནི༌ ཡེ༌ཤུའ༌ ཏྲིས༌, “ང༌ཞའེ༌ པེ༌སག༌གི༌ དོན༌ཏང༌ ཀ༌རུ༌ གྲལ༌གྲིག༌ ཅོ༌ལེ༌?”
LUK 22:10 ཡེ༌ཤུའི༌ ཁོང༌གུན༌ལ༌ མོལས༌, “གྱལ༌སའེ༌ ནང༌ང༌ ཞུགས༌ ཟ༌ནེ༌, ཏེ༌རུ༌ ཆུ༌ཀར༌ ཁུར༌ཁན༌ནི༌ མི༌ཞིག༌ ཁྱོ༌ཞ༌གུན༌ལ༌ ཐུག༌ཅེན༌, ཁོའེ༌ སྟིང༌རང༌ནེ༌ སོང༌། ཁོ༌ ཞུགས༌ཏེ༌ ཆ༌སའེ༌ ཁང༌པའེ༌
LUK 22:11 ཁང༌དག༌པོའ༌ ཟེར༌ ‘ལོབ༌བོན༌ནི༌ ཏྲིའ༌རག༌, “གྲོན༌པོ༌ ཞུག༌སའེ༌ ནང༌བོ༌ ཀ༌ནེ༌ ཡོད༌, ཏེ༌རུ༌ ངའེ༌ ང༌རང༌ངི༌ ལོབ༌ཕྲུགས༌གུན༌ ཉམ༌པོ༌ པེ༌སག༌གི༌ དོན༌ཏང༌ ཟེན༌?”’
LUK 22:12 ཁོའེ༌ ཁྱོ༌ཞའ༌ སྟང༌ཐོག༌ག༌ གྲལ༌གྲིག༌ ཅོས༌ཁན༌ནི༌ ནང༌ ཆེན༌མོ༌ཞིག༌ སྟན༌ཅེན༌, ཏེ༌རུ༌ དོན༌ཏང༌ངི༌ གྲལ༌ ཅོས༌།”
LUK 22:13 ཏེ༌ནེ༌ ཁོང༌གུན༌ སོང༌ ཡང༌ ཅི༌ཚང༌མ༌ ཡེ༌ཤུའི༌ མོལ༌ཁན༌ ནང༌ཞིན༌ ཐོང༌། ཁོང༌གུན༌ནི༌ ཏེ༌རུ༌ པེ༌སག༌གི༌ དོན༌ཏང༌ངི༌ གྲལ༌གྲིག༌ ཅོས༌།
LUK 22:14 ཏུས༌ཚོད༌ ལེབ༌བ༌ཅིག༌ ཡེ༌ཤུ༌ ཁོང༌རང༌ངི༌ སྐུ༌ཚབས༌གུན༌ ཉམ༌པོ༌ ཅོག༌ཙེ༌ཀ༌ སྟེན༌ཏེ༌ ཞུགས༌
LUK 22:15 ཡང༌ ཁོང༌ངི༌ སྐུ༌ཚབས༌གུན༌ལ༌ མོལས༌, “ང༌ རྡུག༌ངལ༌ ཉུང༌ངི༌ སང༌ སྔུན༌ལ༌ འི༌ པེ༌སག༌གི༌ དོན༌ཏང༌ ཁྱོ༌ཞའ༌ ཉམ༌པོ༌ དུགས༌ཏེ༌ ཟའ༌ཅེས༌སི༌ དོད༌པ༌ ཆེན༌མོ༌ ཡོད༌པིན༌,
LUK 22:16 ཅིའ༌ཟེར༌ན༌ ངའེ༌ ཁྱོ༌ཞ༌གུན༌ལ༌ ཟེར༌རད༌, ངའེ༌ འི༌བོ༌ ཡང༌སྐྱར༌ མ༌ནེ༌ མི༌ཟ༌ ནམ༌ཚོག༌པ༌ འི༌བོའེ༌ ཏོན༌ཏག༌པོ༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ དྲན༌དྲ༌ མི༌གྲུབ༌།”
LUK 22:17 ཏེ༌ནེ༌ ཡེ༌ཤུའི༌ དོན༌སྐྱོག༌པོ༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ ཡང༌ ཁོང༌གུན༌ལ༌ མོལས༌, “འི༌བོ༌ ལེན༌ཏེ༌ ཁྱོ༌ཞ༌རང༌གུན༌ནི༌ ནང༌ང༌ བགོས༌།
LUK 22:18 ངའེ༌ ཁྱོ༌ཞའ༌ ཟེར༌རད༌, འི༌ རྒུན༌ཆང༌བོ༌ ངའེ༌ ཡང༌སྐྱར༌ མི༌ཐུང༌ ནམ༌ཚོག༌པ༌ དཀོན༌མཆོག༌གི༌ གྱལ༌སྲིད༌ མི༌ལེབ༌།”
LUK 22:19 ཏེ༌ནེ༌ དོན༌ཀྱིར༌ ནམས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ ཡང༌ ཅག༌ག༌ ཛད༌ཏེ༌ ལོབ༌ཕྲུགས༌གུན༌ལ༌ སལས༌ ཡང༌ མོལས༌, “འི༌བོ༌ ཁྱོ༌ཞ༌གུན༌ནི༌ ཕིའ༌ ཏངས༌ཁན༌ནི༌ ངའེ༌ ཟུགས༌པོ༌ ཨིན༌། ང༌ ཨིད༌ཏུ༌ ཅོ༌ཅེས༌ལ༌ འི༌བོ༌ ཅོས༌།”
LUK 22:20 ཏེན༌ན༌ ཙོགས༌ལ༌ ཁར༌ཇི༌ སྟིང༌ནེ༌ ཡང༌སྐྱར༌ རྒུན༌ཆང༌ངི༌ དོན༌སྐྱོག༌པོ༌ ནམས༌ ཡང༌ མོལས༌, “འི༌ ཀོ༌རེ༌བོ༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ ངའེ༌ ཁྲག༌ ཉམ༌པོ༌ ཅོས༌ཁན༌ནི༌ ཆད༌དོན༌ སོ༌མ༌ ཨིན༌།
LUK 22:21 ཨིན༌ནའང༌ ལྟོས༌, ང༌ གྲ༌འོའེ༌ ལག༌ག༌ སྟད༌ཁན༌ནི༌ ལག༌པ༌ འི༌ ཅོག༌ཙེ༌ཀ༌ ང༌ ཉམ༌པོ༌ དུག༌།
LUK 22:22 ཐག༌ཅད༌ད༌ ཛད༌ཁན༌ ནང༌ཞིན༌ མི༌རིགས༌སི༌བུ༌ ཤི༌གོས༌, ཨིན༌ནའང༌ ཁོ༌ གྲ༌འོའེ༌ ལག༌ག༌ སྟད༌ཁན༌ནི༌ མི༌བོའ༌ ཙམ༌ཤིག༌གི༌ ཇིགས༌པ༌ མི༌ཡོང༌།”
LUK 22:23 ཏེ༌བོ༌ སུའི༌ ཅོ༌ཨིན༌ ཟེར༌ཏེ༌ ལོབ༌ཕྲུགས༌གུན༌ནི༌ ཁོ༌རང༌ ཅིག༌ དང༌ ཅིག༌ག༌ ཏྲི༌ཅེས༌ གོ༌ཟུག༌།
LUK 22:24 ཏེ༌ནེ༌ ལོབ༌ཕྲུགས༌གུན༌ནི༌ ནང༌ང༌ ཁོ༌རང༌གུན༌ནི༌ ཕྲོ༌ནེ༌ ཀྲག༌ཤོག༌ སུ༌ ཨིན༌ ཟེར༌ཨིན༌ ཟེར༌ཟེར༌ སོང༌།
LUK 22:25 ཡེ༌ཤུའི༌ ཁོང༌གུན༌ལ༌ མོལས༌, “ཡ༌ཧུ༌དཱ༌པ༌ མན༌ཁན༌ནི༌ གྱལ༌པོ༌གུན༌ནི༌ མི༌གུན༌ནི༌ཀ༌ སྙིང༌རྗེ༌ མེད༌པ༌ ཝང༌སྲུལ༌ལ༌ནོག༌, ཡང༌ མི༌གུན༌ནི༌ཀ༌ ཝང༌ཆ༌ ཡོད༌ཁན༌གུན༌ནི༌ ཁོ༌རང༌གུན༌ལ༌ ‘མི༌གུན༌ལ༌ ཕན༌ཐོགས༌ ཏང༌ཁན༌’ ཟེར༌ར༌ནོག༌།
LUK 22:26 ཁྱོ༌ཞའེ༌ ནང༌ང༌ ཏེ༌ཙོགས༌ ཡོང༌ མ༌གོས༌། ཁྱོ༌ཞའེ༌ ཕྲོ༌ནེ༌ ཀྲག༌པོ༌ ཨིན༌ཁན༌བོ༌ ཆུང༌ཤོག༌ གྱུར༌གོས༌ ཡང༌ ཝང༌སྲུལ༌ཁན༌བོ༌ ཞབས༌ཏོག༌ ཞུ༌ཁན༌ གྱུར༌གོས༌།
LUK 22:27 ཅོག༌ཙེ༌ཀ༌ ཟན༌ཟའ༌ལ༌ དུག༌ཁན༌བོ༌ ཆེའ༌ ཨིན༌ནོག༌ག༌ ཡ༌ ཞབ༌ཤི༌ ཞུ༌ཁན༌བོ༌? ཅོག༌ཙེ༌ཀ༌ ཟན༌ཟའ༌ལ༌ དུག༌ཁན༌བོ༌ མི༌ཆེའ༌? ཨིན༌ནའང༌ ངའེ༌ ཞབ༌ཤི༌ ཞུ༌ཁན༌ནི༌ ཚུལ༌ལ༌ ཁྱོ༌ཞ༌གུན༌ནི༌ ཕྲོའ༌ མི༌ཚེ༌ ཕུད༌དད༌།”
LUK 22:28 “ང༌ ཀགས༌པོ༌ ཐོང༌ངི༌ ཏུས༌ལ༌ ཁྱོ༌ཞའ༌ ང༌ ཉམ༌པོ༌ དུག༌ཁན༌གུན༌ ཨིན༌ནོག༌།
LUK 22:29 ཀ༌ཟུག༌ ངའེ༌ ཡབ༌བི༌ ངའ༌ གྱལ༌སྲིད༌ཞིག༌ ཝང༌སྲུལ༌ལ༌ སལས༌ ཏེན༌ན༌ ཙོགས༌ ངེའང༌ ཁྱོ༌ཞ༌གུན༌ལ༌ གྱལ༌སྲིད༌ཞིག༌ ཝང༌སྲུལ༌ལ༌ ཏང༌ཨིན༌།
LUK 22:30 ཁྱོ༌ཞ༌ ངའེ༌ གྱལ༌སྲིད༌དི༌ ནང༌ང༌ ང༌ ཉམ༌པོ༌ ངའེ༌ ཅོག༌ཙེ༌ ཀ༌ནེ༌ ཟེན༌, ཐུང༌ཨིན༌ ཡང༌ ཨིས༌ར༌ཨེལ༌ལི༌ སྡེ༌ རྕུག༌ཉིས༌སི༌ཀ༌ ཝང༌སྲུལ༌ཅེས༌ལ༌ ཁྲིས༌སི༌ཀ༌ དུག༌ཨིན༌།”
LUK 22:31 གཙོ༌བོའེ༌ ཡེ༌ཤུའི༌ མོལས༌, “ཤི༌མོན༌, ཤི༌མོན༌, ཁྱོ༌ཞ༌གུན༌ ཚོད༌ལྟའེ༌ ནང༌ང༌ ཀྲོ༌ སིག༌ག༌ ཙོགས༌ལ༌ སིག༌ཅུག༌ཅེས༌ལ༌ ཤེ༌ཏན༌ནི༌ དཀོན༌མཆོག༌ག༌ ཞུ༌ཝ༌ ཕུལས༌།
LUK 22:32 ཨིན༌ནའང༌ ཁྱོ༌རང༌ངི༌ ཏད༌པ༌ མི༌ཕང༌ཅེས༌ ཡང༌ གྱོད༌པ༌ ཅོས༌ཏེ༌ ཡང༌སྐྱར༌ ངའེ༌ཀ༌ ཏད༌པ༌ ཅོའ༌ཅིག༌, ཁྱོ༌རང༌ངི༌ སྤུན༌གུན༌ལ༌ སྤོས༌པ༌ ཏང༌ཅེས༌ལ༌ མོས༌ལམ༌ ཞུས༌པིན༌།”
LUK 22:33 པི༌ཏྲར༌རི༌ ལན༌ཏངས༌, “གཙོ༌བོ༌, ང༌ ཉེ༌རང༌ ཉམ༌པོ༌ ཙོན༌ལ༌ ཆ༌ཅེས༌ མ༌ཚད༌ ཤི༌ཅེས༌ལའང༌ གྲལ༌གྲིག༌ ཨིན༌།”
LUK 22:34 ཡེ༌ཤུའི༌ པི༌ཏྲར༌ལ༌ མོལས༌, “ངའེ༌ ཁྱོ༌རང༌ང༌ ཟེར༌རད༌, དི༌རིང༌ ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌ ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།”
LUK 22:35 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ ཁོ༌མགས༌, ཇོ༌ལ༌ དང༌ པ༌བུ༌ མེད༌པ༌ ཀལ༌ ཟ༌ནེ༌ ཁྱོ༌ཞ༌གུན༌ལ༌ སྒོས༌དོམ༌གུན༌ དྲན༌དྲ༌ མ༌སོང༌ང༌?” ཁོང༌གུན༌ནི༌ ཟེརས༌, “དྲན༌དྲ༌ སོང༌ལེ༌།”
LUK 22:36 “ཨིན༌ནའང༌ ཁོ༌མགས༌ ཡོད༌ཁན༌གུན༌ནི༌ ཏེ༌བོ༌ ཁུར༌གོས༌ ཏེན༌ན༌ ཙོགས༌ལ༌ ཇོ༌ལའང༌། ར༌འི༌ མེད༌ཁན༌གུན༌ནི༌ རང༌ངི༌ ཀོས༌ ཙོངས༌ཏེ༌ ར༌འི༌ ཉོ༌གོས༌།
LUK 22:37 ངའེ༌ ཁྱོ༌ཞའ༌ ཟེར༌རད༌, ཏམ༌པའེ༌ སུང༌རབས༌སི༌ ནང༌ང༌ ‘ཁོ༌ ཁྲིམས༌ ཅག༌ཁན༌གུན༌ནི༌ ཕྲོའ༌ རྩི༌ཨིན༌’ བྲིས༌ཁན༌བོ༌ ངའེ༌ ནང༌ང༌ གྲུབ༌གོས༌། ཏན༌ཏན༌ ངའེ༌ སྐོར༌ལ༌ ཏེ༌ བྲིས༌ཁན༌བོ༌ གྲུབ༌ཨིན༌ ཨིན༌ནོག༌།”
LUK 22:38 ཁོང༌གུན༌ནི༌ ཟེརས༌, “གཙོ༌བོ༌ལེ༌, ང༌ཞའེ༌ ལག༌ག༌ ར༌འི༌ ཉིས༌ ཡོད༌།” ཡེ༌ཤུའི༌ མོལས༌, “ར༌འི༌ སྐོར༌ལ༌ མང༌པོ༌ ཟེརས༌, ཏ༌ བྲའོག༌།”
LUK 22:39 གཙོ༌བོ༌ ཡེ༌ཤུ༌ ལོབས༌ ནང༌ཞིན༌ གྱལ༌ས༌ནེ༌ ཕི༌ལོག༌ག༌ བིངས༌ཏེ༌ ཨོ༌ལིཝ༌ཝི༌ རི༌ཀ༌ སྐྱོདས༌ ཡང༌ ཁོང༌ངི༌ ལོབ༌ཕྲུགས༌གུན༌ ཁོང༌ངི༌ སྟིང༌རང༌ནེ༌ སོང༌།
LUK 22:40 ཏེ༌ ནས༌སའེ༌ཀ༌ ལེབ༌བ༌ཅིག༌ ཁོང༌ངི༌ ཁོང༌གུན༌ལ༌ མོལས༌, “ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ མོས༌ལམ༌ ཞུས༌།”
LUK 22:41 ཏེ༌ནེ༌ རྡོའ༌ ཕངས༌ཏེ༌ ལེབ༌ཚད༌ ཟམ༌ཤིག༌ ཁོང༌གུན༌ནེ༌ ཐག༌རིང༌ང༌ སྐྱོད༌ཏེ༌ པིག༌དོང༌ ཙུགས༌ཏེ༌ མོས༌ལམ༌ ཞུས༌,
LUK 22:42 “ཡབ༌ལེ༌ ཀལ༌ཏེས༌ ཉེ༌རང༌ ཐུགས༌ཐད༌ན༌ འི༌ རྡུག༌ངལ༌ལི༌ ཀོ༌རེ༌བོ༌ ངའེ༌ ཀ༌ནེ༌ ཐེན༌ན༌ ཛད༌, ཨིན༌ནའང༌ ངའེ༌ དོད༌པ༌ ནང༌ཞིན༌ མན༌པ༌, ཉེ༌རང༌ངི༌ ཐུག༌གོངས༌ ནང༌ཞིན༌ ཅོའ༌ ཛད༌།”
LUK 22:43 ཏེ༌ནེ༌ ནམ༌ཁའ༌ནེ༌ ཕོ༌ཉ༌ཞིག༌ སྐྱོད༌ཏེ༌ ཁོང༌ང༌ སྟོབས༌ ཅུག༌ག༌ ཛདས༌།
LUK 22:44 རྡུག༌ངལ༌ སྲན༌ཏྲེ༌ ནང༌ང༌ སྙིང༌ངི༌ ཐིལ༌ནེ༌ མོས༌ལམ༌ ཞུའ༌ ཛདས༌, ཡང༌ ཁོང༌ངི༌ ཞལ༌དོང༌ནེ༌ བིང༌ཁན༌ནི༌ མུལ༌ཆུ༌ ཁྲག༌གི༌ ཐིགས༌པ༌ ཙོགས༌ལ༌ སའེ༌ཀ༌ བུད༌།
LUK 22:45 མོས༌ལམ༌ ཞུ༌ ཚར༌ར༌ཅིག༌, ཁོང༌ ཞངས༌ཏེ༌ ལོབ༌ཕྲུགས༌གུན༌ ཡོད༌ས༌ ལོགས༌ཏེ༌ སྐྱོདས༌། ཁོང༌གུན༌ ཉིད༌ལ༌ སོང༌ཏེ༌ ཟིགས༌, ཚེར༌ཁའེ༌ ཞས༌ཏེ༌ ཁོང༌གུན༌ སྲན༌ཏེ༌ ངལ༌ཏེ༌ ཡོད༌པིན༌།
LUK 22:46 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “ཁྱོ༌ཞའ༌ ཅིའ༌ ཉིད༌ལོགས༌ཏེ༌ ཨིན༌། ལོང༌ཤིག༌, ཁྱོ༌ཞའ༌ སྡིག༌པའེ༌ ནང༌ང༌ མི༌གྱེལ༌ཅེས༌སི༌ ཕིའ༌ མོས༌ལམ༌ ཞུས༌།”
LUK 22:47 གཙོ༌བོ༌ ཡེ༌ཤུའི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌ ལོབ༌ཕྲུགས༌ རྕུག༌ཉིས༌པོའེ༌ ནང༌ནེ༌ ཅིག༌, ཡུ༌དཱ༌ ཟེར༌ཁན༌བོའེ༌ མི༌ཚོགས༌ལ༌ གོ༌ ཅོས༌ཏེ༌ ཡེ༌ཤུའ༌ པུག༌ ཏང༌ང༌ལ༌ ཁོང༌ ཡོད༌ས༌ ཡོངས༌།
LUK 22:48 ཨིན༌ནའང༌ ཡེ༌ཤུའི༌ ཁོའ༌ མོལས༌, “ཡུ༌དཱ༌, ཁྱོ༌རང༌ངི༌ པུག༌ ཏངས༌ཏེ༌ མི༌རིགས༌སི༌བུའ༌ ངོ༌ལོག༌ ཅོའ༌དའ༌?”
LUK 22:49 ཁོང༌ངི༌ ལོབ༌ཕྲུགས༌གུན༌ནི༌ ཇུང༌ཅེས༌ཅན༌བོ༌ ཐོང༌ང༌ཅིག༌ ཁོང༌གུན༌ནི༌ ཟེརས༌, “གཙོ༌བོ༌ལེ༌, ང༌ཞའེ༌ ར༌འི༌ གྱབ༌བ༌?”
LUK 22:50 ཡང༌ ཁོང༌ ཅིག༌ཅིག༌གི༌ བླ༌མ༌ ཆེན༌མོའེ༌ ཡོག༌པོའ༌ ར༌འི༌ གྱབས༌ཏེ༌ ཁོའེ༌ ནམ༌ཅོག༌ ཡས༌པ༌ ཅད༌ཏངས༌།
LUK 22:51 ཨིན༌ནའང༌ ཡེ༌ཤུའི༌ མོལས༌, “ཏ༌ བྲའོག༌, འི༌ཙོགས༌ མ༌ཅོ༌” ཡང༌ ཏེ༌ མི༌བོའེ༌ ནམ༌ཅོག༌པོའ༌ ཆག༌ རྩེས༌ཏེ༌ ཕན༌ཅུག༌ག༌ ཛདས༌།
LUK 22:52 ཏེ༌ནེ༌ ཡེ༌ཤུའི༌ བླ༌མ༌ འུ༌སྐྱོང༌, ཆོད༌ཁང༌ སྲུང༌ཁན༌ནི༌ མག༌མི༌ འུ༌སྐྱོང༌ དང༌ ཡ༌ཧུ༌དཱ༌པའེ༌ འུ༌སྐྱོང༌ ཁོང༌ ཟུམ༌མ༌ ཡོང༌ཁན༌གུན༌ལ༌ མོལས༌, “ར༌འི༌ དང༌ བེར༌ཀ༌ ཁུར༌ཏེ༌ ང༌ ཟུམ༌མ༌ ཡོངས༌ཏེ༌ ཅི༌ ང༌ ཅག༌པ༌ ཨིན༌ནོག༌ག༌?
LUK 22:53 ཆོད༌ཁང༌ངི༌ ནང༌ང༌ ཞག༌ཏང༌ ངའེ༌ ལབ༌ཞ༌ ཏང༌ ཟ༌ནེ༌ ཁྱོ༌ཞའེ༌ ང༌ ཅིའ༌ མ༌ཟུམས༌པིན༌?, ཨིན༌ནའང༌ འི༌བོ༌ ནི༌ ཁྱོ༌ཞ༌གུན༌ནི༌ ཏུས༌ཚོད༌, མུན༌གྲིག༌གི༌ ཝང༌སྲུལ༌ལི༌ ཏུས༌ ཨིན༌ནོག༌།”
LUK 22:54 ཏེ༌ནེ༌ ཆོད༌ཁང༌ སྲུང༌ཁན༌གུན༌ནི༌ ཁོང༌ ཟུམས༌ཏེ༌, བླ༌མ༌ ཆེན༌མོའེ༌ ཕོ༌གྲང༌ང༌ ཁྱེརས༌ ཡང༌ པི༌ཏྲར༌ ཐག༌རིང༌ཞིག༌ནེ༌ ཁོང༌ངི༌ གྱབ༌ནེ༌ སོང༌།
LUK 22:55 ཁོང༌གུན༌ནི༌ ཕོ༌གྲང༌ངི༌ གྱང༌སྐོར༌རི༌ ཞུང༌ང༌ མེའ༌ ཏངས༌ཏེ༌ ཏེ༌བོའ༌ ཁོར༌ཏེ༌ དུགས༌, པི༌ཏྲར༌རའང༌ ཁོང༌གུན༌ ཉམ༌པོ༌ དུགས༌།
LUK 22:56 ཏེ༌ནེ༌ ཡོག༌མོ༌ཞིག༌གི༌ པི༌ཏྲར༌ མེའ༌ དུགས༌ཏེ༌ ཐོང༌པ༌ ཁོའ༌ ཞིབ༌ཅ༌ ཅོས༌ཏེ༌ ལྟས༌ ཡང༌ ཟེརས༌, “འི༌ མི༌བོའང༌ ཡེ༌ཤུ༌ ཉམ༌པོ༌ དུག༌པིན༌།”
LUK 22:57 ཨིན༌ནའང༌ པི༌ཏྲར༌རི༌ ཟུན༌ ཏངས༌ཏེ༌ ཟེརས༌, “བུ༌མོ༌, ངའེ༌ ཁོ༌ ཤེས༌ས༌མེད༌།”
LUK 22:58 ཙ༌པིག༌ སྟིང༌ནེ༌ ཡང༌ མི༌ཞིག༌གི༌ ཁོ༌ ཐོང༌ཏེ༌ ཟེརས༌, “ཁྱོ༌རང༌ངའང༌ ཁོང༌གུན༌ནི༌ ཕྲོ༌པ༌ ཅིག༌ ཨིན༌ནོག༌།” པི༌ཏྲར༌རི༌ ཁོའ༌ ཟེརས༌, “ཛ༌འོ༌, ངའ༌ མན༌།”
LUK 22:59 ཆུ༌ཚོད༌ ཅིག༌ ཛོད༌ ཅིག༌གི༌ སྟིང༌ནེ༌ ཞན༌ མི༌ཞིག༌གི༌ ཟེརས༌, “ཏན༌ཏན༌ འི༌ མི༌བོའང༌ ཁོའེ༌ ཕྲོ༌པ༌གུན༌ནི༌ ནང༌ནེ༌ ཅིག༌ ཨིན༌ནོག༌ ཅིའ༌ཟེར༌ན༌ ཁོ༌ གཱ༌ལིལ༌ལི༌པ༌ ཨིན༌ནོག༌།”
LUK 22:60 ཨིན༌ནའང༌ པི༌ཏྲར༌རི༌ ལན༌ཏངས༌, “ཁྱོ༌རང༌ངི༌ ཅི༌ ཟེར༌ཏེ༌ ཨིན༌ ང༌ ཧ༌གོའ༌ མེ༌རག༌།” ཁོའེ༌ ཏེ༌བོ༌ ཟེར༌ཨིན༌ ཡོད༌ ཟ༌ནེ༌, ཅ༌པོའེ༌ ཅ༌སྐད༌ ཏངས༌།
LUK 22:61 གཙོ༌བོའེ༌ གྱུར༌ཏེ༌ པི༌ཏྲར༌ལ༌ ཟིགས༌། ཏེ༌ནེ༌ པི༌ཏྲར༌ལ༌ གཙོ༌བོའེ༌, “ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌ ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌” མོལ༌ཁན༌བོ༌ ཨིད༌ཏུ༌ ཡོངས༌,
LUK 22:62 ཡང༌ ཁོ༌ ཕི༌ལོག༌ག༌ སོང༌ཏེ༌ མ༌སྲན༌ཏྲེ༌ ངུས༌།
LUK 22:63 ཡེ༌ཤུ༌ སྲུང༌ཁན༌གུན༌ནི༌ ཁོང༌ང༌ ཚིག༌ ཏང༌ཨིན༌ རྡུང༌ཅེས༌ གོ༌ཟུག༌།
LUK 22:64 ཁོང༌གུན༌ནི༌ ཁོང༌ངི༌ མིག༌ ལག༌ཕིས༌ ཉམ༌པོ༌ ཀབས༌ ཡང༌ ལྡབས༌ཏེ༌ ཟེརས༌, “ལུང༌སྟན༌ སལ༌ལའང༌ ཁྱོ༌རང༌ང༌ རྡུང༌ཁན༌བོ༌ སུ༌ ཨིན༌ནོག༌?”
LUK 22:65 ཡང༌ སྤེ༌ར༌ རྩོག༌པོ༌ མང༌པོ༌ ཟེར༌ཏེ༌ ཁོང༌ང༌ ཁྲེལ༌བ༌ སྟནས༌།
LUK 22:66 ནམ༌ལངས༌ས༌ཅིག༌ ཡ༌ཧུ༌དཱ༌པའེ༌ འུ༌སྐྱོང༌གུན༌, བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ ཚོགས༌དུ༌ ཚོགས༌ཏེ༌ གཙོ༌བོ༌ ཡེ༌ཤུ༌ ཁོང༌གུན༌ནི༌ དུན༌ལ༌ ཁྱོང༌ཅུགས༌།
LUK 22:67 ཁོང༌གུན༌ནི༌ ཟེརས༌, “ང༌ཞའ༌ ཤོད༌དའང༌, ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌ ཨིན༌ན༌?” ཁོང༌ངི༌ ལན༌སལས༌, “ཀལ༌ཏེས༌ ངའེ༌ ཁྱོ༌ཞའ༌ ཟེར༌ན༌ ཁྱོ༌ཞའ༌ དེན༌ མི༌ཤེས༌,
LUK 22:68 ཡང༌ ཀལ༌ཏེས༌ ངའེ༌ ཏྲི༌ཝ༌ཞིག༌ ཏྲི༌ན༌ ཁྱོ༌ཞའེ༌ ལན༌ མི༌ཏང༌།
LUK 22:69 ཨིན༌ནའང༌ ཏ༌ནེ༌ཕར༌ལ༌ མི༌རིགས༌སི༌བུ༌ ཀུན༌ཝང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ དུག༌ཨིན༌།”
LUK 22:70 ཁོང༌ ཚང༌མའེ༌ ཟེརས༌, “ཁྱོ༌རང༌ དཀོན༌མཆོག༌གི༌ སྲས༌ ཨིན༌ན༌?” ཁོང༌ངི༌ ལན༌སལས༌ “ཁྱོ༌ཞའེ༌ ཟེར༌ཁན༌བོ༌ ང༌ ཨིན༌།”
LUK 22:71 ཏེ༌ནེ༌ ཁོང༌གུན༌ནི༌ ཟེརས༌, “ང༌དང༌ང༌ འི༌ སང༌ མང༌ང༌ སྤང༌པོ༌ ཅི༌ གོས༌ཨིན༌? ཁོའེ༌ ཟེར༌ཁན༌བོ༌ ང༌དང༌གུན༌ནི༌ ཚོར༌།”
LUK 23:1 ཏེ༌ནེ༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ གང༌པོ༌ ལངས༌ཏེ༌ གཙོ༌བོ༌ ཡེ༌ཤུ༌ རོམ༌པའེ༌ ཀའ༌ལོན༌ པི༌ལ༌ཏུའི༌ཀ༌ ཁྱེརས༌།
LUK 23:2 ཁོང༌གུན༌ནི༌ ཡེ༌ཤུའ༌ སྐྱོན༌ ཀལ༌ཨིན༌ ཟེརས༌, “འི༌ མི༌བོའེ༌ མི༌གུན༌ལ༌ རོམ༌མི༌ གྱལ༌པོའ༌ ངོ༌ལོག༌ ཅོ༌ཅུགས༌ཏེ༌ ཁྲལ༌ མ༌ཤལ༌ ཡང༌ ཁོ༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, གྱལ༌པོ༌ ཨིན༌ ཟེར༌དུག༌།”
LUK 23:3 ཏེ༌ནེ༌ ཀའ༌ལོན༌ པི༌ལ༌ཏུའི༌ ཡེ༌ཤུའ༌ ཏྲིས༌, “ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌?” ཁོང༌ངི༌ ལན༌སལས༌, “ཨིན༌, ཉེ༌རང༌ངི༌ ཟེར༌ཁན༌བོ༌ ཨིན༌།”
LUK 23:4 ཨིན༌ནའང༌ པི༌ལ༌ཏུའི༌ བླ༌མ༌ འུ༌སྐྱོང༌གུན༌ དང༌ མི༌ཚོགས༌གུན༌ལ༌ ཟེརས༌, “ངའ༌ འི༌ མི༌བོའེ༌ ནང༌ང༌ སྐྱོན༌ ཅའང༌ ཐོབ༌བ༌ མི༌དུག༌།”
LUK 23:5 ཁོང༌གུན༌ནི༌ འུ༌ཙུག༌ ཏངས༌ཏེ༌ ཟེརས༌, “འི༌ མི༌བོའེ༌ ཁོ༌རང༌ངི༌ ལབ༌ཞ༌ གྱུད༌ཏེ༌ ཡ༌ཧུ༌དཱའེ༌ ཡུལ༌ཇོངས༌ གང༌པོའེ༌ མི༌གུན༌ ཁྲུགས༌ ཤུགས༌, གཱ༌ལིལ༌ལིའི༌ ཡུལ༌ནེ༌ གོ༌ཟུགས༌ཏེ༌ འི༌ ཚག༌པ༌ ལེབ༌།”
LUK 23:6 ཏེ༌བོ༌ ཚར༌ཏེ༌ པི༌ལ༌ཏུའི༌, ཁོ༌ གཱ༌ལིལ༌ལི༌པ༌ ཨིན༌ནོག༌ག༌ ཟེར༌ཏེ༌ ཏྲིས༌།
LUK 23:7 ཁོང༌ ཧེ༌རོད༌དི༌ ཝང༌ངི༌ ཡོག༌ག༌ ཨིན༌ཁན༌བོ༌ ཁོའ༌ གྱུས༌ ཆའ༌ཅིག༌ ཁོའེ༌ ཡེ༌ཤུ༌ ཧེ༌རོད༌ ཡོད༌ས༌ ཀལས༌, ཏེ༌ཏུས༌ལ༌ ཧེ༌རོད༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌པིན༌།
LUK 23:8 ཧེ༌རོད༌ལ༌ གཙོ༌བོ༌ ཡེ༌ཤུའ༌ ཐུག༌ཅེས༌སི༌ སྐབས༌ ཐོབ༌པ༌ མ༌སྲན༌ཏྲེ༌ ཐད༌ ཅིའ༌ཟེར༌ན༌ ཁོའ༌ ཁོང༌ངི༌ སྐོར༌ལ༌ ཚོར༌ཏེ༌ ཏུས༌ མང༌པོ༌ཞིག༌ནེ༌ ཕར༌ལ༌ ཡེ༌ཤུ༌ ཇལ༌ཏེ༌ ཁོང༌ནེ༌ ལྟས༌ཤིག༌ ལྟ༌ཅེས༌སི༌ དོད༌པ༌ ཆེན༌མོ༌ ཡོད༌པིན༌།
LUK 23:9 ཁོའེ༌ ཡེ༌ཤུའ༌ ཏྲི༌ཝ༌ མང༌པོ༌ ཏྲིས༌ ཨིན༌ནའང༌ ཁོང༌ངི༌ ལན༌ ཅིག༌གའང༌ མ༌སལས༌།
LUK 23:10 ཏེ༌ཀ༌ ཡོད༌ཁན༌ནི༌ བླ༌མ༌ འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ནི༌ སྲོའེ༌ ནང༌ང༌ ཀུ༌ཅོ༌ ཏངས༌ཏེ༌ ཁོང༌ང༌ ཉད༌གལ༌ ཀལ༌ཨིན༌ དུགས༌།
LUK 23:11 ཧེ༌རོད༌ དང༌ ཁོའེ༌ མག༌མི༌གུན༌ནི༌ ཡེ༌ཤུའ༌ ཁྲེལ༌བ༌ སྟན༌ཏེ༌ ཧབ༌གོད༌ ཏངས༌, ཏེ༌ནེ༌ ཁོང༌ང༌ ནམ༌ཟའ༌ ཀྲག༌པོ༌ སྐོན༌ཏེ༌ པི༌ལ༌ཏུ༌ ཡོད༌ས༌ ལོགས༌ཏེ༌ ཀལས༌།
LUK 23:12 ཏེ༌ ཞག༌ག༌ པི༌ལ༌ཏུ༌ དང༌ ཧེ༌རོད༌ ཛ༌འོ༌ གྱུར༌, སྔུན༌ལ༌ ཁོང༌ ཉིས༌ཀ༌ ཐུན༌ན༌ མེད༌པིན༌།
LUK 23:13 ཏེ༌ནེ༌ པི༌ལ༌ཏུའི༌ བླ༌མ༌ འུ༌སྐྱོང༌གུན༌, ཡ༌ཧུ༌དཱ༌པའེ༌ འུ༌སྐྱོང༌གུན༌ དང༌ མི༌གུན༌ བོད༌ཏེ༌,
LUK 23:14 ཁོང༌གུན༌ལ༌ ཟེརས༌, “ཁྱོ༌ཞ༌གུན༌ནི༌ འི༌ མི༌བོའེ༌ མི༌གུན༌ལ༌ རོམ༌མི༌ གྱལ༌པོའ༌ ངོ༌ལོག༌ ཅོ༌ཅུག༌ཁན༌ནི༌ ཉད༌གལ༌ ཀལ༌ཏེ༌ ངའེ༌ དུན༌ལ༌ ཁྱོངས༌། ངའེ༌ ཁྱོ༌ཞའེ༌ དུན༌ལ༌ ཁོའ༌ རྩར༌ཅོད༌ ཏངས༌ཏེའང༌, ཁོའེ༌ ནང༌ང༌ ཁྱོ༌ཞ༌གུན༌ནི༌ ཀལ༌ཁན༌ནི༌ སྐྱོན༌ ཅའང༌ མ༌ཐོབ༌།
LUK 23:15 ཧེ༌རོད༌དའང༌ ཅའང༌ སྐྱོན༌ མ༌ཐོབ༌བ༌, ངའེ༌ཀ༌ ལོགས༌ཏེ༌ ཀལ༌ཁན༌བོ༌ ཁྱོ༌ཞའེ༌ ཐོང༌ཨིན༌ ཨིན༌ནོག༌, ཁོ༌ སད༌གོ༌ཤེས༌སི༌ སྐྱོན༌ཞིག༌ ཅའང༌ ཐོབ༌བ༌ མི༌དུག༌།
LUK 23:16 ཏེན༌ན༌བོའེ༌ཕིའ༌ ཁོའ༌ རྟལ༌ལྕག༌ གྱབ༌ཅུགས༌ཏེ༌ ཕུད༌ཨིན༌།”
LUK 23:17 
LUK 23:18 ཁོང༌ ཚང༌མ༌ ཅིག༌ སོང༌ཏེ༌ ཀུ༌ཅོ༌ ཏང༌ཨིན༌ ཟེརས༌, “འི༌ མི༌བོ༌ སད༌ད༌ ཁྱེར༌ ཡང༌ བཱ༌ར༌བས༌ ང༌ཞའེ༌ ཕིའ༌ ཕུད༌ད༌ ཛད༌།”
LUK 23:19 ༼ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ རོམ༌མི༌ ཝང༌སྲུལ༌པའེ༌ ངོ༌ལོག༌ ཅོས༌ཏེ༌ མི༌ སད༌ཅེས༌པོའེ༌ བཱ༌ར༌བས༌ ཙོན༌ལ༌ ཀགས༌ཏེ༌ ཡོད༌པིན༌།༽
LUK 23:20 པི༌ལ༌ཏུའ༌ ཡེ༌ཤུ༌ ཕུད༌ཅེས༌སི༌ དོད༌པ༌ ཡོད༌པ༌ ཡང༌སྐྱར༌ མི༌ཚོགས༌ལ༌ ཏྲིས༌,
LUK 23:21 ཨིན༌ནའང༌ ཁོང༌གུན༌ནི༌ མང༌ང༌ ཀུ༌ཅོ༌ ཏང༌ཨིན༌ ཟེརས༌, “ཁོ༌ རྐྱང༌ཤིང༌ང༌ རྐྱོང༌, རྐྱང༌ཤིང༌ང༌ རྐྱོང༌།”
LUK 23:22 པི༌ལ༌ཏུའི༌ ལན༌ སུམ༌པ༌ ཁོང༌གུན༌ལ༌ ཟེརས༌, “ཅི༌ཕིའ༌, ཁོའེ༌ ཁྲིམས༌སི༌ གྱབ༌གལ༌ ཅི༌ ཅོས༌ཏོག༌། སད༌གོ༌ཤེས༌སི༌ སྐྱོན༌ཞིག༌ ཁོའེ༌ ནང༌ང༌ ངའ༌ ཅའང༌ མ༌ཐོབ༌། ཏེ༌བོའེ༌ཕིའ༌ ངའེ༌ ཁོའ༌ རྟལ༌ལྕག༌ གྱབ༌ཅུགས༌ཏེ༌ ཕུད༌ཨིན༌།”
LUK 23:23 ཁོང༌ ཚང༌མའེ༌ ཆད༌མེད༌ལ༌ སྐད༌ ཆེན༌མོའེ༌ ནང༌ང༌ ཁོ༌ རྐྱང༌ཤིང༌ང༌ རྐྱོང༌ ཟེར༌ཏེ༌ ཀུ༌ཅོ༌ ཏངས༌, ཡང༌ ཁོང༌གུན༌ནི༌ ཀུ༌ཅོ༌ ཏང༌ཁན༌བོ༌ ཁྲངས༌པོ༌ ལུས༌།
LUK 23:24 པི༌ལ༌ཏུའི༌ ཁོང༌གུན༌ནི༌ ཟེར༌ཁན༌ ནང༌ཞིན༌ ཅོས༌།
LUK 23:25 ངོ༌ལོག༌ ཅོས༌ཏེ༌ མི༌ སད༌ཅེས༌པོའེ༌ ཙོན༌ལ༌ ཀགས༌ཁན༌ནི༌ མི༌ ཁོང༌གུན༌ནི༌ ཕུད༌ ཟེར༌ཁན༌བོ༌ ཕུདས༌ ཡང༌ ཁོང༌གུན༌ནི༌ དོད༌པ༌ ནང༌ཞིན༌ ཡེ༌ཤུ༌ རྐྱང༌ཤིང༌ང༌ རྐྱང༌ཅེས༌ལ༌ སྟདས༌།
LUK 23:26 གཙོ༌བོ༌ ཡེ༌ཤུ༌ ཁྲིད༌ཏེ༌ ཁྱེར༌ ཟ༌ནེ༌ མག༌མི༌གུན༌ནི༌ གམ༌ཡུལ༌ནེ༌ ཡོང༌ཁན༌ནི༌ ཀི༌རིན༌པ༌ ཤི༌མོན༌ ཟུམས༌ ཡང༌ རྐྱང༌ཤིང༌བོ༌ ཀལ༌ཏེ༌ ཡེ༌ཤུའི༌ སྟིང༌རང༌ནེ༌ གྲུལ༌ཅུགས༌།
LUK 23:27 མི༌ཚོགས༌ ཆེན༌མོ༌ཞིག༌ ཡེ༌ཤུའི༌ གྱབ༌ནེ༌ ཡོངས༌, ཁོང༌གུན༌ནི༌ ཕྲོའ༌ ཡེ༌ཤུའི༌ ཕིའ༌ རྡུག༌པོ༌ ཅོས༌ཏེ༌ ངུ༌ཨིན༌ ཡོད༌ཁན༌ནི༌ བུ༌མོ༌གུན༌ནའང༌ ཨིན༌ནོག༌།
LUK 23:28 ཡེ༌ཤུའི༌ གྱབ༌བ༌ ཟིགས༌ཏེ༌ ཁོང༌གུན༌ལ༌ མོལས༌, “ཡེ༌རུ༌ཤ༌ལེམ༌མི༌ བུ༌མོ༌གུན༌ ངའེ༌ ཕིའ༌ མ༌ངུ༌, ཁྱོ༌ཞ༌རང༌ དང༌ ཁྱོ༌ཞའེ༌ ཕྲུ༌གུ༌གུན༌ནི༌ ཕིའ༌ ངུས༌།
LUK 23:29 ཏུས༌པོ༌ ལེབ༌ཨིན༌, ནམ༌ ཁྱོ༌ཞ༌གུན༌ནི༌ ཟེར༌ཨིན༌, ‘ཕྲུ༌གུ༌ མ༌ཇོར༌ཁན༌, ཅང༌ཁོག༌ག༌ ཕྲུ༌གུ༌ མ༌ཁུར༌ཁན༌ དང༌ འོ༌མ༌ མ༌སྟེར༌ཁན༌ནི༌ པི༌བི༌, ཅིན༌ལབས༌ཅན༌ ཨིན༌།’
LUK 23:30 ཏེ༌ཏུས༌ལ༌ མི༌གུན༌ནི༌ རི༌གུན༌ལ༌ ཟེར༌ཨིན༌, ‘ང༌ཞའེ༌ཀའ༌ དིབ༌ཤིག༌གའང༌’, ཡང༌ བྲག༌གུན༌ལ༌ ‘ང༌ཞའ༌ ཀོབ༌ཤིག༌གའང༌། ’
LUK 23:31 ཀལ༌ཏེས༌ ལྕང༌མ༌ སྔོན༌པོའ༌ ཡོད༌ ཟ༌ནེ༌ མི༌གུན༌ནི༌ འི༌ཟུག༌ ཅོ༌ན༌, ཏེ༌ནེ༌ ལྕང༌མ༌ སྐམས༌ཏེ༌ སྟིང༌ནེ༌ ཁོང༌གུན༌ནི༌ ཅི༌ མི༌ཅོ༌?”
LUK 23:32 ཁྲིམས༌ ཅག༌ཁན༌ནི༌ ཞན༌མི༌ ཉིས༌སའང༌ སད༌ཅེས༌ལ༌ ཡེ༌ཤུ༌ ཉམ༌པོ༌ ཁྲིད༌ཏེ༌ ཁྱེརས༌།
LUK 23:33 གོའི༌ རུས༌པ༌ ཟེར༌ཁན༌ནི༌ ནས༌སའེ༌ཀ༌ ལེབ༌བ༌ཅིག༌, མག༌མི༌གུན༌ནི༌ ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌, ཁོང༌ ཉམ༌པོ༌ ཁྲིམས༌ ཅག༌ཁན༌ནི༌ མི༌ ཉིས༌ཀོའང༌ རྐྱང༌ཤིང༌ངི༌ཀ༌ རྐྱངས༌, ཅིག༌པོ༌ ཁོང༌ངི༌ ཡས༌པ༌ ཡང༌ ཅིག༌པོ༌ ཡོ༌མའ༌།
LUK 23:34 ཡེ༌ཤུའི༌ མོལས༌, “ཡབ༌ལེ༌, ཁོང༌གུན༌ལ༌ ཤགས༌པ༌ སལ༌ ཅིའ༌ཟེར༌ན༌ ཁོང༌གུན༌ནི༌ ཅི༌ ཅོ༌ཨིན༌ ཡོད༌ཁན༌བོ༌ མ༌ཤེས༌ས༌ ཅོས༌ཏེ༌ ཨིན༌ནོག༌།” མག༌མི༌གུན༌ནི༌ ཁོང༌ངི༌ ནམ༌ཟའ༌ བགོ༌ཅེས༌ལ༌ གྱན༌ གྱབས༌།
LUK 23:35 མི༌གུན༌ནི༌ ཇུང༌ཁན༌ ཚང༌མ༌ ལྟེན༌ དུགས༌ ཨིན༌ནའང༌ འུ༌སྐྱོང༌གུན༌ནི༌ ཚིགས༌ ཏང༌ཨིན༌ ཟེརས༌, “ཁོའེ༌ ཞན༌མ༌གུན༌ སྐྱོབས༌, ཀལ༌ཏེས༌ ཁོ༌ དཀོན༌མཆོག༌གི༌ མ༌ཤི༌ཀ༌ ལྡམ༌མ༌ ཛད༌ཁན༌བོ༌ ཨིན༌ན༌ ཁོ༌རང༌ སྐྱོབ༌ཅུག༌གའང༌།”
LUK 23:36 ཡང༌ མག༌མི༌གུན༌ནིའང༌ ཚིགས༌ ཏང༌ཨིན༌ ཁོང༌ངི༌ དུན༌ལ༌ ཡོངས༌ཏེ༌ ཁོང༌ང༌ རྒུན༌ཆང༌ སྐྱུར༌མོ༌ ཏངས༌
LUK 23:37 ཡང༌ ཟེརས༌, “ཀལ༌ཏེས༌ ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌, རང༌ སྐྱོབ༌བའང༌།”
LUK 23:38 ཁོང༌ངི༌ ཨུའི༌ སྟག༌ག༌ “འི༌ མི༌བོ༌ ཡ༌ཧུ༌དཱ༌པའེ༌ གྱལ༌པོ༌ ཨིན༌” བྲིས༌ཏེ༌ ཡོད༌པིན༌།
LUK 23:39 རྐྱང༌ཤིང༌ངི༌ཀ༌ རྐྱངས༌ཁན༌ནི༌ ཁྲིམས༌ཅག༌ཁན༌ ཅིག༌པོའེ༌ ཁོང༌ང༌ ཚིགས༌ ཏངས༌ཏེ༌ ཟེརས༌, “ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མན༌ན༌? ཁྱོ༌རང༌ དང༌ ང༌ཞའ༌ སྐྱོབ༌བའང༌།”
LUK 23:40 ཞན༌ ཅིག༌པོའེ༌ ཁོའ༌ ཁའ༌སྐྱེས༌ཏེ༌ ཟེརས༌, “ཁོང༌ ཙོགས༌ ཁྱོ༌རང༌ང༌ ཤི༌ཅེས༌སི༌ ཆད༌པ༌ ཕོག༌ཏེའང༌ དཀོན༌མཆོག༌གི༌ ཁྲིམས༌ཅད༌ལ༌ ཇིགས༌ས༌ མེ༌རག༌ག༌?
LUK 23:41 ང༌དང༌ ཉིས༌ཀོའ༌ ང༌དང༌ངི༌ ལས༌ ངན༌པ༌ ཅོ༌ཁན༌ནི༌ འོས༌པའེ༌ ཆད༌པ༌ ཕོག༌ཏེ༌ ཨིན༌ནོག༌, ཨིན༌ནའང༌ འི༌ མི༌བོའེ༌ ངན༌པ༌ ལས༌ ཅའང༌ ཅོའ༌ མ༌ཛདས༌།”
LUK 23:42 ཏེ༌ནེ༌ ཁོའེ༌ ཡེ༌ཤུའ༌ ཟེརས༌, “གཙོ༌བོ༌ལེ༌, ཉེ༌རང༌ ཉེ༌རང༌ངི༌ གྱལ༌སྲིད༌དི༌ ནང༌ང༌ སྐྱོད༌ད༌ཅིག༌, ང༌ ཨིད༌ཏུ༌ བོར༌ར༌ ཛད༌།”
LUK 23:43 ཡེ༌ཤུའི༌ ལན༌སལས༌, “ངའེ༌ ཁྱོ༌རང༌ང༌ དེན༌བ༌ ཟེར༌རད༌, དི༌རིང༌ ཁྱོ༌རང༌ ང༌ ཉམ༌པོ༌ ནམ༌ཁའེ༌ ནང༌ང༌ ལེབ༌ཨིན༌།”
LUK 23:44 ཉིང༌གུང༌ ཟམ༌ཤིག༌ནེ༌ ཆུ༌ཚོད༌ སུམ༌པ༌ ཚག༌པ༌ ཡུལ༌ གང༌པོ༌ མུན༌གྲིག༌ སོང༌།
LUK 23:45 ཉི༌མའེ༌ འོད༌ མེད༌ཁན༌ སོང༌ ཡང༌ ཆོད༌ཁང༌ངི༌ ཡོ༌ལ༌ གོ༌ནེ༌ ཇུག༌ ཚོག༌པ༌ ཁག༌ཉིས༌སི༌ ནང༌ང༌ ཆད༌།
LUK 23:46 ཏེ༌ནེ༌ ཡེ༌ཤུའི༌ སྐད༌ ཆེན༌མོའེ༌ ནང༌ང༌ མོལས༌, “ཀྱེ༌ ཡབ༌, ངའེ༌ སེམས༌ཉིད༌ ཉེ༌རང༌ངི༌ ཆག༌ག༌ སྟད༌དད༌” ཏེ༌ཟུག༌ མོལ༌ ཚར༌ར༌ཅིག༌ ཁོང༌ ཀྲོངས༌།
LUK 23:47 མག༌མི༌གྱའེ༌ སྤོན༌བོའེ༌ ཇུང༌ཁན༌གུན༌ ཐོང༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌, “འི༌ མི༌བོ༌ ཀྲང༌པོ༌ མི༌ཞིག༌ ཨིན༌ཁན༌བོ༌ ཏན༌ཏན༌ ཨིན༌ནོག༌།”
LUK 23:48 ཏེ༌རུ༌ རྐྱང༌ཤིང༌ང༌ རྐྱང༌ཅེས༌ ལྟའ༌ལ༌ ཡོང༌ཁན༌ནི༌ མི༌ཚང༌མའེ༌ ཇུང༌ཁན༌ ཚང༌མ༌ ཐོང༌ང༌ཅིག༌ ཀྲང༌ རྡུང༌ཏང༌ཨིན༌ ལོགས༌ཏེ༌ སོང༌
LUK 23:49 ཨིན༌ནའང༌ གཱ༌ལིལ༌ལིའི༌ ཡུལ༌ནེ༌ ཡེ༌ཤུའི༌ སྟིང༌རང༌ནེ༌ ཡོངས༌ཁན༌ནི༌ བུ༌མོ༌གུན༌ ཐེས༌ཏེ༌ ཁོང༌ ཤེས༌ཁན༌ ཚང༌མའེ༌ ཐག༌རིང༌ང༌ དུགས༌ཏེ༌ ཇུང༌ཁན༌གུན༌ ལྟས༌།
LUK 23:50 ཏ༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཡོ༌སེབ༌ ཟེར༌ཁན༌ནི༌ ཀྲང༌པོ༌ དང༌ ཟང༌པོ༌ མི༌ཞིག༌ ཡོད༌པིན༌,
LUK 23:51 ཁོང༌གུན༌ནི༌ ཐབ༌ལྡིངས༌ དང༌ ལས༌གུན༌ལ༌ ཁོའེ༌ ཁའ༌མ༌ཆམས༌། ཁོ༌ ཡ༌ཧུ༌དཱའེ༌ གྲོང༌ཁྱེར༌ ཨ༌རི༌མ༌ཐཱ༌པ༌, དཀོན༌མཆོག༌གི༌ གྱལ༌སྲིད༌ ལེབ༌ཅེས༌ལ༌ སྲུངས༌ཏེ༌ ཡོད༌པིན༌།
LUK 23:52 ཁོ༌ པི༌ལ༌ཏུའི༌ཀ༌ སོང༌ཏེ༌ གཙོ༌བོ༌ ཡེ༌ཤུའི༌ སྤུར༌ ཁོའ༌ སལ༌ ཟེར༌ཏེ༌ ཞུ༌ཝ༌ ཕུལས༌།
LUK 23:53 སྤུར༌ རྐྱང༌ཤིང༌ངི༌ ཀ༌ནེ༌ བབས༌ཏེ༌ རས༌ ཀུས༌པོའེ༌ ནང༌ང༌ ཏུམས༌ ཡང༌ བྲག༌གི༌ ནང༌ང༌ སྐོས༌ཁན༌ནི༌ སྤུར༌ཁང༌ རོ༌ མ༌ནེ༌ མ༌བོར༌ཁན༌ཞིག༌གི༌ ནང༌ང༌ ཁོང༌ངི༌ སྤུར༌བོ༌ བོརས༌།
LUK 23:54 ཏེ༌ ཞག༌པོ༌ ཤབ༌བད༌དི༌ ཕིའ༌ གྲལ༌ཅོ༌ཅེས༌ ཡང༌ ཤབ༌བད༌དི༌ ཞག༌པོ༌ གོ༌ཟུག༌ ཆ༌ཀྱིས༌ ཡོད༌པིན༌།
LUK 23:55 གཱ༌ལིལ༌ལིའི༌ ཡུལ༌ཇོངས༌ནེ༌ ཡེ༌ཤུ༌ ཉམ༌པོ༌ ཡོངས༌ཁན༌ནི༌ བུ༌མོ༌གུན༌ ཡོ༌སེབ༌བི༌ གྱབ༌གྱབ༌ནེ༌ སོང༌ ཡང༌ ཡེ༌ཤུའི༌ སྤུར༌ བོར༌ར༌ ཛད༌ཁན༌ནི༌ སྤུར༌ཁང༌བོ༌ ཐོང༌།
LUK 23:56 ཏེ༌ནེ༌ ཁོང༌གུན༌ ཁང༌པ༌ ལོགས༌ཏེ༌ ཡོངས༌ ཡང༌ སྤུར༌ལ༌ སྐུ༌ཅེས༌སི༌ ཕིའ༌ ཏྲི༌ཞིམ༌ཅན༌ནི༌ མར༌ དང༌ མར༌ནག༌ གྲལ༌གྲིག༌ ཅོས༌། བཀའ༌ཁྲིམས༌ ནང༌ཞིན༌ ཁོང༌གུན༌ ཤབ༌བད༌དི༌ ངལ༌ཚོའེ༌ ཞག༌ག༌ ངལ༌ཚོས༌ཏེ༌ དུགས༌།
LUK 24:1 ཟ༌ཉི༌མའེ༌ ཞག༌ག༌ ང༌མོ༌ ཟང༌ཟིང༌ནེ༌ བུ༌མོ༌གུན༌ གྲལ༌གྲིག༌ ཅོས༌ཁན༌ནི༌ ཏྲི༌ཞིམ༌ཅན༌ མར༌ དང༌ མར༌ནག༌ ཁུར༌ཏེ༌ སྤུར༌ཁང༌ངི༌ དུན༌ལ༌ ལེབ༌བ༌ཅིག༌,
LUK 24:2 སྤུར༌ཁང༌ང༌ ཀབས༌ཏེ༌ ཡོད༌ཁན༌ནི༌ ཁར༌རྡོ༌བོ༌ ཐེན༌ཏེ༌ ཐོང༌།
LUK 24:3 ཁོང༌གུན༌ སྤུར༌ཁང༌ངི༌ ནང༌ང༌ ཞུགས༌ས༌ཅིག༌ གཙོ༌བོ༌ ཡེ༌ཤུའི༌ སྤུར༌ མ༌ཐོང༌།
LUK 24:4 ཁོང༌ ཧན༌པན༌ སོང༌ཏེ༌ འི༌ སྐོར༌ལ༌ སམ༌ཨིན༌ ཡོད༌ཏུས༌ ཧུན༌མེད༌ལ༌ མ༌ ལྡང༌ཤན༌ ཀོས༌ལག༌ གོན༌ཁན༌ནི༌ མི༌ ཉིས༌ ཁོང༌གུན༌ནི༌ དུན༌ལ༌ ཞངས༌ཏེ༌ ཞུགས༌།
LUK 24:5 སྲན༌ཏྲེ༌ ཇིགས༌པ༌ བུ༌མོ༌གུན༌ནི༌ གོ༌ སྒུས༌ཏེ༌ སའ༌ ལྟས༌, ཨིན༌ནའང༌ ཁོང༌ ཉིས༌ཀོའེ༌ ཁོང༌གུན༌ལ༌ མོལས༌, “ཁྱོ༌ཞའེ༌ ཤི༌ཁན༌གུན༌ནི༌ ཕྲོའ༌ སོན༌ཏེ༌ ཅིའ༌ ཙལ༌ལད༌?
LUK 24:6 ཁོང༌ འི༌ཀ༌ མེད༌, ཁོང༌ སོན༌ཏེའ༌ ཞངས༌ཏེ༌ ཨིན༌། གཱ༌ལིལ༌ལིའི༌ ཡུལ༌ཇོངས༌སི༌ ནང༌ང༌ ཡོད༌ ཟ༌ནེ༌ ཁོང༌ངི༌ ཁྱོ༌ཞའ༌, ‘མི༌རིགས༌སི༌བུ༌ སྡིག༌ཅན༌གུན༌ནི༌ ལག༌ག༌ སྟད༌ཏེ༌, རྐྱང༌ཤིང༌ངི༌ཀ༌ རྐྱང༌ཨིན༌ ཡང༌ ཞག༌ སུམ༌པའེ༌ ཞག༌ག༌ སོན༌ཏེའ༌ ལང༌ང༌ ཛད༌ཨིན༌’ མོལ༌ཁན༌བོ༌ ཨིད༌ཏུ༌ ཅོས༌།’”
LUK 24:8 ཏེ༌ནེ༌ ཁོང༌གུན༌ལ༌ ཁོང༌ངི༌ མོལ༌ཁན༌གུན༌ ཨིད༌ཏུ༌ ཡོངས༌།
LUK 24:9 སྤུར༌ཁང༌ནེ༌ ལོགས༌ཏེ༌ ལེབ༌བ༌ཅིག༌ སྐུ༌ཚབས༌ ཅུག༌ཤིག༌ དང༌ ཞན༌ ཚང༌མ༌ལ༌ ཇུང༌ཁན༌ ཚང༌མ༌ ཤདས༌།
LUK 24:10 སྐུ༌ཚབས༌གུན༌ལ༌ ཏེ༌ ལོན༌ ཁྱོང༌ཁན༌གུན༌ མིར༌ཡམ༌ མག༌དལ༌ལ༌མ༌, ཡོ༌འན༌ནཱ༌ དང༌ ཡ༌ཀོབ༌བི༌ ཨ༌མ༌ མིར༌ཡམ༌ དང༌ ཁོང༌ངི༌ ཕྲོ༌པ༌ བུ༌མོ༌གུན༌ ཨིན༌པིན༌།
LUK 24:11 ཏེ༌ སྤེ༌ར༌གུན༌ ཏོན༌མེད༌ ཚོར༌པ༌ ཁོང༌གུན༌ནི༌ ཨིད༌ཤེས༌ མ༌ཅོས༌།
LUK 24:12 ཨིན༌ནའང༌ པི༌ཏྲར༌ ལངས༌ཏེ༌ སྤུར༌ཁང༌ང༌ གྱུགས༌ཏེ༌ སོང༌, སྒུས༌ཏེ༌ ལྟས༌པ༌ སྤུར༌རས༌པོ༌ ཅིག༌པོ༌ བོར༌ཏེ༌ ཐོང༌། ཏེ༌གུན༌ ཅི༌ ཇུངས༌ཏེ༌ ཨིན༌ སམ༌ཨིན༌ ཁོ༌ ཧན༌པན༌ སོང༌ཏེ༌ ཁང༌པ༌ ལོགས༌ཏེ༌ སོང༌།
LUK 24:13 ཏེན༌ན༌ ཞག༌ག༌ ཁོང༌གུན༌ནི༌ ཕྲོ༌ནེ༌ ལོབ༌ཕྲུགས༌ ཉིས༌ ཡེ༌རུ༌ཤ༌ལེམ༌ནེ༌ ཀི༌ལོ༌མི༌ཀྲར༌ རྕུག༌ཅིག༌ ཐག༌རིང༌ང༌ ཡོད༌ཁན༌ནི༌ ཨེ༌མ༌འུས༌ ཟེར༌ཁན༌ནི༌ གྲོང༌ཁྱེར༌ལ༌ ཆའད༌པིན༌།
LUK 24:14 ཁོང༌ ཉིས༌ཀོའེ༌ ཇུང༌ཁན༌ ཚང༌མའེ༌ སྐོར༌ལ༌ སྤེ༌ར༌ ཏང༌ངད༌པིན༌།
LUK 24:15 སྤེ༌ར༌ ཏང༌ཨིན༌, གྲོས༌དུར༌ ཅོ༌ ཟ༌ནེ༌ གཙོ༌བོ༌ ཡེ༌ཤུ༌ ཁོང༌ངི༌ གྱབ༌ནེ༌ སྐྱོད༌ཏེ༌ ཁོང༌གུན༌ ཉམ༌པོ༌ གྲུལ༌ལ༌ ཛདས༌,
LUK 24:16 ཨིན༌ནའང༌ ཡེ༌ཤུ༌ ཨིན༌ཁན༌བོ༌ ཁོང༌ང༌ ངོ༌ཤེས༌ ཅུག༌ག༌ མ༌ཛད༌།
LUK 24:17 ཁོང༌ངི༌ ཁོང༌གུན༌ལ༌ མོལས༌, “ཁྱོ༌ཞའེ༌ ཆེན༌ནའང༌ ཅི༌ སྐོར༌ལ༌ སྤེ༌ར༌ ཏང༌ངད༌?” ཁོང༌ ཐེན༌ཞིག༌ སྲུངས༌, ཡང༌ ཁོང༌གུན༌ ཚེར༌ཏེ༌ དུག༌པིན༌།
LUK 24:18 ཁོང༌ངི༌ ཕྲོ༌ནེ༌ ཀེལེ༌འོ༌པས༌ ཟེར༌ཁན༌བོའེ༌ ཁོང༌ང༌ ཟེརས༌, “དང༌དི༌རིང༌ང༌ ཡེ༌རུ༌ཤ༌ལེམ༌མི༌ ནང༌ང༌ ཇུང༌ཁན༌གུན༌ གྱུས༌ མེད༌ཁན༌ནི༌ བེས༌པ༌ ཉེ༌རང༌ ཅིག༌པོ༌ ཨིན༌ན༌?”
LUK 24:19 ཁོང༌ངི༌ ཁོང༌གུན༌ལ༌ ཏྲིའ༌ ཛདས༌, “ཅི༌ ཇུང༌ཀྱག༌?” ཁོང༌གུན༌ནི༌ ལན༌ཏངས༌, “ཡེ༌ཤུ༌ ན༌ཙ༌རེད༌པའེ༌ སྐོར༌། ཁོང༌ ནི༌ ལུང༌སྟོན༌པ༌, ཧ༌ལས༌ཤེས༌སི༌ ཛད༌པ༌ ཛད༌ཁན༌ ཡང༌ དཀོན༌མཆོག༌ དང༌ མི༌ཚང༌མའེ༌ དུན༌ལ༌ ཝང༌ཆ༌ ཉམ༌པོ༌ ཧ༌ལས༌ཤེས༌སི༌ ལབ༌ཞ༌ སལ༌ཁན༌བོ༌ ཨིན༌པིན༌།
LUK 24:20 བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཁོང༌ང༌ སྲོག༌གི༌ ཆད༌པ༌ ཏང༌ང༌ལ༌ སྟདས༌ ཡང༌ ཁོང༌ རྐྱང༌ཤིང༌ངི༌ཀ༌ རྐྱངས༌།
LUK 24:21 ཨིན༌ནའང༌ ཁོང༌ ཨིས༌ར༌ཨེལ༌པ༌གུན༌ ཐར༌ ཅུག༌ག༌ ཛད༌ཅེས༌ལ༌ སྐྱོད༌ཏེ༌ ཨིན༌ཁན༌བོ༌ ང༌ཞའེ༌ རེ༌ཝ༌ ཡོད༌པིན༌, ཏེ༌གུན༌ ཇུངས༌ཏེ༌ དི༌རིང༌ ཞག༌ སུམ༌པའེ༌ ཞག༌ག༌,
LUK 24:22 ང༌ཞའེ༌ ཕྲོ༌ནེ༌ བུ༌མོ༌ ཁ༌ཅིག༌གི༌ འི༌ ནས༌ཚུལ༌བོ༌ ཤད༌ཏེ༌ ང༌ཞའ༌ ཧ༌ལས༌ཤུགས༌། ཁོང༌གུན༌ ང༌ཏོག༌ནེ༌ ཁོང༌ངི༌ སྤུར༌ཁང༌ང༌ སོང༌,
LUK 24:23 ཨིན༌ནའང༌ ཏེ༌ནང༌ང༌ ཁོང༌ངི༌ སྤུར༌ མེད༌ པ༌སང༌ ང༌ཞའ༌ ཡོད༌ས༌ ལོགས༌ཏེ༌ ཡོངས༌ཏེ༌ ཁོང༌གུན༌ལ༌ ཞལ༌ཟིགས༌སི༌ ནང༌ང༌ ཕོ༌ཉ༌གུན༌ ཇལ༌ཏེ༌ ཡེ༌ཤུ༌ སོན༌ཏེའ༌ ཞངས༌ཏེ༌ ཡོད༌ མོལ༌ལ༌རག༌ ཟེར༌ཨིན༌ ཤདས༌།
LUK 24:24 ང༌ཞའེ༌ ཕྲོ༌ནེ༌ ཁ༌ཅིག༌ སྤུར༌ཁང༌ང༌ སོང༌ཏེ༌ བུ༌མོ༌གུན༌ནི༌ ཤད༌ཁན༌ ནང༌ཞིན༌ ཡེ༌ཤུའི༌ སྤུར༌ སྤུར༌ཁང༌ངི༌ ནང༌ང༌ མེད༌ཁན༌བོ༌ ཐོང༌ཏོག༌།”
LUK 24:25 ཏེ༌ནེ༌ ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའ༌ ཙམ༌ཤིག༌ སམ༌བ༌ མེད༌ཁན༌ ཡང༌ ཁྱོ༌ཞའེ༌ ཀགས༌པོ༌ ཉམ༌པོ༌ མ༌ནེ༌ ལུང༌སྟོན༌པ༌གུན༌ནི༌ མོལ༌ཁན༌ ཚང༌མའ༌ ཨིད༌ཤེས༌ ཅོའ༌ མི༌དུག༌།
LUK 24:26 མ༌ཤི༌ཀའ༌ ཏེ༌ རྡུག༌ངལ༌གུན༌ ཉུངས༌ཏེ༌ མ༌ནེ༌ སྤལ༌ མི༌ཐོབ༌ མོལ༌ཁན༌བོ༌ གྱུས༌མེད༌ད༌?”
LUK 24:27 ཏེ༌ནེ༌ ཁོང༌ངི༌ ལུང༌སྟོན༌པ༌ མོ༌ཟེས༌ནེ༌ གོ༌ཟུགས༌ཏེ༌ ལུང༌སྟོན༌པ༌ ཚང༌མའེ༌ ཁོང༌ངི༌ སྐོར༌ལ༌ ཏམ༌པའེ༌ སུང༌རབས༌ ཚང༌མའེ༌ ནང༌ང༌ བྲིའ༌ ཛད༌ཁན༌ནི༌ ཏོན༌ ཁོང༌གུན༌ལ༌ ཧ༌གོ༌ཅུག༌ག༌ ཛདས༌།
LUK 24:28 ཁོང༌གུན༌ ཨེ༌མ༌འུས༌ལ༌ ལེབ༌ཅེས༌ དང༌ བེས༌པོ༌ ཚར༌ཅེས༌ ཉེ༌མོ༌ ལེབ༌བ༌ཅིག༌, ཡེ༌ཤུ༌ ཁོང༌གུན༌ནི༌ སང༌ ནས༌ས༌ ཐག༌རིང༌ང༌ སྐྱོད༌ཅེས༌པོ༌ ཐོང༌
LUK 24:29 ཨིན༌ནའང༌ ཁོང༌གུན༌ནི༌ ཁོང༌ང༌ འུ༌ཙུག༌ ཏངས༌ཏེ༌ ཟེརས༌, “ང༌ཞའ༌ ཉམ༌པོ༌ ཞུགས༌ས༌ ཛད༌ ཅིའ༌ཟེར༌ན༌ མུན༌ཅུ༌རུབས༌ཏེ༌ ཚན༌ ཆ༌ཀྱིས༌དུག༌།” ཏེ༌ནེ༌ ཁོང༌ ཁོང༌གུན༌ ཉམ༌པོ༌ ཞུག༌ཅེས༌ལ༌ ནང༌ང༌ སྐྱོདས༌།
LUK 24:30 གོང༌ཟན༌ དོན༌ན༌ ཅོག༌ཙེ༌ དུན༌ལ༌ ཞུགས༌ས༌ཅིག༌ ཡེ༌ཤུའི༌ དོན༌ཀྱིར༌ ཆག༌ག༌ ནམས༌ཏེ༌ ཐུག༌རྗེ༌ཆེ༌ ཞུས༌ཏེ༌ ཅག༌ག༌ ཛདས༌, ཡང༌ ཁོང༌ང༌ སལས༌།
LUK 24:31 ཏེ༌ནེ༌ ཁོང༌གུན༌ནི༌ མིག༌ ཕེད༌ཏེ༌ ཁོང༌ སུ༌ ཨིན༌ཁན༌བོ༌ ངོ༌ཤེས༌ས༌ཅིག༌ ཁོང༌ ཁོང༌གུན༌ནི༌ དུན༌ནེ༌ སྟོར༌།
LUK 24:32 ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “ཁོང༌ངི༌ ལམ༌མ༌ ང༌དང༌ང༌ ཞལ༌ཏ༌ ཛད༌ཨིན༌ ཏམ༌པའེ༌ སུང༌རབས༌སི༌ ནང༌ནེ༌ ཧ༌གོ༌ཅུག༌ག༌ ཛད༌ ཟ༌ནེ༌, ང༌དང༌གུན༌ནི༌ སྙིང༌ངི༌ ནང༌ང༌ མེ༌ བར༌ཁན༌ ཙོགས༌ མ༌ཚོར༌ར༌?”
LUK 24:33 ཏེན༌ན༌མལ༌ལ༌, ཁོང༌གུན༌ ལངས༌ཏེ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སོང༌ ཡང༌ སྐུ༌ཚབས༌ རྕུག༌ཅིག༌པོ༌ ཞན༌ ཕྲོ༌པ༌གུན༌ ཉམ༌པོ༌ ཛོམས༌ཏེ༌ ཡོད༌ཁན༌བོ༌ ཐོང༌།
LUK 24:34 ཁོང༌ ཉིས༌ཀོའ༌ ཁོང༌གུན༌ནི༌, “གཙོ༌བོ༌ དེན༌བ༌ སོན༌ཏེའ༌ ཞངས༌ཏེ༌ ཤི༌མོན༌ནི༌ ཇལ༌ཏོག༌” ཟེར༌ཨིན༌ ཚོར༌།
LUK 24:35 ཏེ༌ནེ༌ ཁོང༌ ཉིས༌ཀོའེང༌ ལམ༌མ༌ ཇུང༌ཁན༌ ཚང༌མའེ༌ སྐོར༌ དང༌ ཁོང༌ངི༌ དོན༌ཀྱིར༌ ཅག༌ག༌ ཛད༌ད༌ཅིག༌ ཁོང༌ ངོ༌ཤེས༌ཁན༌བོ༌ ཤདས༌།
LUK 24:36 ཁོང༌ ཉིས༌ཀོའེ༌ སྤེ༌ར༌གུན༌ ཤད༌ཨིན༌ ཡོད༌ ཟ༌ནེ༌ ཧུན༌མེད༌ལ༌ གཙོ༌བོ༌ ཡེ༌ཤུ༌ ཁོང༌གུན༌ནི༌ སྐྱིལ༌ལ༌ སྐྱོདས༌ ཡང༌ མོལས༌, “དཀོན༌མཆོག༌གི༌ ཞི༌དེ༌ ཁྱོ༌ཞའ༌ ཉམ༌པོ༌ ལུས༌ཤིག༌།”
LUK 24:37 ཨིན༌ནའང༌ ཁོང༌གུན༌ དྲོགས༌ ཡང༌ ཇིགས༌, ཁོང༌ང༌ ཤིན༌དྲེ༌ཞིག༌ ཐོང༌ཏེ༌ ཨིན༌ནོག༌ སམ༌།
LUK 24:38 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའ༌ ཅིའ༌ ཇིགས༌ས༌རག༌ ཡང༌ ཁྱོ༌ཞའེ༌ སྙིང༌ངི༌ ནང༌ང༌ ཐེ༌ཚོམས༌ ཅིའ༌ སྐྱེའ༌རག༌?
LUK 24:39 ངའེ༌ རྐང༌པ༌ ལག༌པ༌ གུན༌ལ༌ ལྟོས༌སའང༌, ང༌རང༌ ཨིན༌། ལག༌པ༌ རྩེས༌ཏེ༌ ངའ༌ ཉུག༌གའང༌, ཤིན༌དྲེའ༌ ཤ༌ དང༌ རུས༌པ༌ ཡོང༌ང༌ མ༌ནོག༌ ཨིན༌ནའང༌ ང༌ ཏེ༌གུན༌ ཡོད༌།”
LUK 24:40 ཏེ༌བོ༌ མོལ༌ཏེ༌ ཁོང༌ངི༌ ཁོང༌རང༌ངི༌ ཆག༌ དང༌ ཞབས༌ གུན༌ ཁོང༌གུན༌ལ༌ སྟན༌ན༌ ཛདས༌།
LUK 24:41 ཐད༌པོ༌ དང༌ གའ༌མོ༌ ཆ༌ནའང༌ ཏ༌རུང༌ ཁོང༌གུན༌ནི༌ ཨིད༌ཤེས༌ མ༌ཅོས༌པ༌ ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའེ༌ ལག༌ག༌ ཟའ༌ཅེས༌ཤིག༌ ཡོད༌ད༌?”
LUK 24:42 ཁོང༌གུན༌ནི༌ ཉ༌ སྲགས༌ཁན༌ནི༌ ཁག༌ཞིག༌ ཁོང༌ང༌ ཏངས༌།
LUK 24:43 ཁོང༌ངི༌ ཏེ༌བོ༌ ནམས༌ཏེ༌ ཁོང༌གུན༌ནི༌ དུན༌ལ༌ དོནས༌།
LUK 24:44 ཏེ༌ནེ༌ ཁོང༌གུན༌ལ༌ མོལས༌, “ང༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌ ངའེ༌ འི༌གུན༌ ཟེར༌པིན༌, ‘མོ༌ཟེས༌སི༌ བཀའ༌ཁྲིམས༌, ལུང༌སྟོན༌པ༌གུན༌ དང༌ སུང༌གུར༌རི༌ སྤེ༌ཆ༌གུན༌ནི༌ ནང༌ང༌ ངའེ༌ སྐོར༌ལ༌ བྲིས༌ཁན༌ ཚང༌མ༌ དྲན༌དྲའ༌ གྲུབ༌གོས༌།’”
LUK 24:45 ཏེ༌ནེ༌ ཡེ༌ཤུའི༌ ཁོང༌གུན༌ལ༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌གུན༌ ཧ༌གོ༌ཅེས༌སི༌ ཁྱུད༌ སལས༌།
LUK 24:46 ཁོང༌ངི༌ ཁོང༌གུན༌ལ༌ མོལས༌, “འི༌བོ༌ བྲིའ༌ ཛད༌ཏེ༌ དུག༌, ‘དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ རྡུག༌ངལ༌ ཉུང༌ཨིན༌ ཡང༌ ཞག༌ སུམ༌པའེ༌ ཞག༌ག༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཨིན༌།
LUK 24:47 ཡེ༌རུ༌ཤ༌ལེམ༌ནེ༌ གོ༌ཟུགས༌ཏེ༌ གྱལ༌ཁམས༌ ཚང༌མའེ༌ ནང༌ང༌ སྡིག༌པ༌ནེ༌ གྱོད༌པ༌ ཅོ༌ཅེས༌ དང༌ སྡིག༌པ༌ སེལ༌ཅེས༌སི༌ ཕིའ༌ ཁོང༌ངི༌ ཚན༌ནི༌ ནང༌ང༌ ཆོས༌ཤད༌ཨིན༌།’
LUK 24:48 ཏེ༌ ཚང༌མའེ༌ སྤང༌པོ༌ ཏང༌ཨིན༌ ཁྱོ༌ཞའེ༌ མི༌ཚང༌མ༌ལ༌ ཤོད༌།
LUK 24:49 ངའེ༌ ཡབ༌བི༌, ཏམ༌པའེ༌ ཐུག༌ཉིད༌དི༌ ཞལ༌ཆད༌ ཛད༌ཁན༌བོ༌ ངའེ༌ ཁྱོ༌ཞ༌གུན༌ལ༌ ཀལ༌ཨིན༌། ཨིན༌ནའང༌ ནམ༌ཁའ༌ནེ༌ ཏམ༌པའེ༌ ཐུག༌ཉིད༌ སྐྱོད༌ཏེ༌ ཁྱོ༌ཞ༌གུན༌ ཁྱུད༌དི༌ སྐང༌སྐང༌ ཚག༌པ༌ ཁྱོ༌ཞའ༌ འིན༌ན༌ གྱལ༌སའེ༌ ནང༌ང༌ དུག༌།”
LUK 24:50 ཏེ༌ནེ༌ གཙོ༌བོ༌ ཡེ༌ཤུའི༌ ཁོང༌གུན༌ ཕི༌ལོག༌ག༌ བེད༌ཐཱ༌ནི༌ གྲོང༌སེབ༌བི༌ ཉེ༌མོ༌ཞིག༌ག༌ ཁྱེར༌ར༌ ཛདས༌, ཡང༌ ནམ༌ཁའ༌ ཆོགས༌ལ༌ ཆག༌ རྐྱང༌ང༌ ཛད༌ཏེ༌ ཁོང༌གུན༌ལ༌ ཅིན༌ལབས༌ སལས༌།
LUK 24:51 ཁོང༌གུན༌ལ༌ ཅིན༌ལབས༌ སལ༌ཨིན༌ ཡོད༌ ཟ༌ནེ༌ ཁོང༌གུན༌ནེ༌ ཕེས༌ཏེ༌ ཡེ༌ཤུ༌ ནམ༌ཁའ༌ ཁྱེར༌ར༌ ཛདས༌།
LUK 24:52 ཁོང༌གུན༌ནི༌ ཁོང༌ང༌ ཅོལ༌ཨིན༌, མ༌ ཐད༌པོ༌ ཉམ༌པོ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སོང༌།
LUK 24:53 ཞག༌ཏང༌ ཁོང༌གུན༌ ཆོད༌ཁང༌ང༌ སྐྱོད༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ལད༌པིན༌།
JOH 1:1 ཇིག༌རྟེན༌ ཆགས༌སི༌ སང༌ སྔུན༌ལ༌ བཀའ༌ ཡོད༌པིན༌། བཀའ༌བོ༌ དཀོན༌མཆོག༌ ཉམ༌པོ༌ ཡོད༌པིན༌, ཡང༌ ཏེན༌ན༌ བཀའ༌བོ༌ ནི༌ དཀོན༌མཆོག༌ ཁོང༌རང༌ ཨིན༌པིན༌།
JOH 1:2 ཁོང༌ གོ༌མ༌ནེ༌ ཕར༌ལ༌ དཀོན༌མཆོག༌ ཉམ༌པོ༌ ཞུགས༌ཏེ༌ ཡོད༌པིན༌།
JOH 1:3 ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཞང༌ང༌ ཛདས༌, ཁོང༌ མེད༌པའ༌ ཅི༌ཞིག༌གའང༌ ཞང༌ང༌ མ༌ཛདས༌།
JOH 1:4 ཁོང༌ ནི༌ སྲོག༌ ཚང༌མའེ༌ ཇུང༌ཁུངས༌པོ༌ ཨིན༌ནོག༌། ཡང༌ ཁོང༌ངི༌ སྐུ༌ཚེ༌, མི༌ཚང༌མའེ༌ ཕིའ༌ འོད༌ ཨིན༌ནོག༌,
JOH 1:5 འི༌ འོད༌པོའེ༌ མུན༌གྲིག༌ ལྡང༌ཤན༌ ཛད༌ད༌ནོག༌, ཡང༌ མུན༌གྲིག༌གི༌ ཏེ༌བོའ༌ ཕམ༌ཀལ༌ མི༌ཉན༌།
JOH 1:6 དཀོན༌མཆོག༌གི༌ མི༌ཞིག༌ ཀལ༌ལ༌ ཛདས༌, ཀ༌བོའ༌ ཡོ༌ཧཱ༌ནན༌ ཁྲུས༌སལ༌ཁན༌ ཟེར༌རད༌པིན༌།
JOH 1:7 ཁོང༌ གྱུད༌ཏེ༌ མི༌ཚང༌མའེ༌ ཏེ༌ འོད༌པོའེ༌ཀ༌ ཏད༌པ༌ ཁྱོང༌ཅེས༌སི༌ ཕིའ༌ ཁོང༌ ཏེ༌བོའེ༌ སྐོར༌ལ༌ སྤང༌པོ༌ ཏང༌ཅེས༌ལ༌ སྐྱོདས༌།
JOH 1:8 ཡོ༌ཧཱ༌ནན༌ ཁོང༌རང༌ ཏེ༌ འོད༌པོ༌ མན༌པིན༌, ཨིན༌ནའང༌ ཁོང༌ ཏེ༌ འོད༌པོའེ༌ སྐོར༌ལ༌ སྤང༌པོ༌ སལ༌ལ༌ སྐྱོདས༌།
JOH 1:9 མི༌ཚང༌མ༌ལ༌ འོད༌ སལ༌ཁན༌ནི༌ ཏེ༌ དེན༌བའེ༌ འོད༌པོ༌ ཇིག༌རྟེན༌ནི༌ ནང༌ང༌ སྐྱོད༌ད༌ ཛད༌ཏེ༌ ཨིན༌ནོག༌།
JOH 1:10 ཇིག༌རྟེན༌ ཛད༌ཁན༌བོ༌ ཇིག༌རྟེན༌ནི༌ ནང༌ང༌ སྐྱོད༌ཏེའང༌, ཇིག༌རྟེན༌པ༌གུན༌ནི༌ ཁོང༌ ངོ༌ མ༌ཤེས༌།
JOH 1:11 ཁོང༌ ཁོང༌རང༌ངི༌ མི༌གུན༌ནི༌ཀ༌ སྐྱོདས༌, ཨིན༌ནའང༌ ཁོང༌གུན༌ནི༌ ཁོང༌ང༌ གའ༌སུས༌ མ༌ཞུས༌།
JOH 1:12 ཁོང༌ང༌ གའ༌སུས༌ ཞུས༌ཁན༌ ཡང༌ ཏད༌པ༌ ཅོས༌ཁན༌གུན༌ལ༌ ཁོང༌ངི༌, དཀོན༌མཆོག༌གི༌ ཕྲུ༌གུ༌ གྱུར༌ཅེས༌སི༌ འོས༌པ༌ ཐེས༌།
JOH 1:13 རང༌ཞིན༌ནི༌ མིར༌གྱུད༌ ཡ༌ མི༌ ཐབས༌ ཡ༌ ཨ༌བའེ༌ དོད༌པའེ༌ ཞས༌ཏེ༌ ཁོང༌གུན༌ དཀོན༌མཆོག༌གི༌ ཕྲུ༌གུ༌ མ༌གྱུར༌ར༌ དཀོན༌མཆོག༌ ཁོང༌རང༌ནེ༌ སྐྱེས༌ཏེ༌ ཨིན༌ནོག༌།
JOH 1:14 ཏེ༌ བཀའ༌བོ༌ སྐུ༌ལུས༌ལ༌ གྱུར༌ར༌ ཛདས༌ ཡང༌ ང༌ཞ༌གུན༌ནི༌ ཕྲོའ༌ ཞུགས༌ས༌ ཛདས༌། ང༌ཞ༌གུན༌ནི༌ ཁོང༌ངི༌ ཟིར༌རྗིད༌པོ༌ ཇལ༌, ཏེ༌ ཟིར༌རྗིད༌པོ༌ ཡབ༌བི༌ སྲས༌ ཅིག༌ཅིག༌པོ༌, ཐུག༌རྗེ༌ དང༌ དེན༌བའེ༌ གངས༌ཁན༌བོ༌ ཨིན༌།
JOH 1:15 ཡོ༌ཧཱ༌ནན༌ནི༌ ཁོང༌ངི༌ སྐོར༌ལ༌ སྤང༌པོ༌ སལ༌ཏེ༌ ཀུ༌ཅོ༌ ཏང༌ཨིན༌ མོལས༌, “ཁོང༌ ནི༌ ངའེ༌ ཟེར༌ཁན༌ ཏེན༌ན༌བོ༌ ཨིན༌, ‘ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཨིན༌, ཅིའ༌ཟེར༌ན༌ ཁོང༌ ངའེ༌ སང༌ སྔུན༌ལ༌ ཞུགས༌ཏེ༌ ཡོད༌པིན༌།’”
JOH 1:16 ཁོང༌ ཐུག༌རྗེ༌ གངས༌ཏེ༌ ཡོད༌ཅེས༌པོའེ༌, ང༌དང༌གུན༌ལ༌ ཐུག༌རྗེ༌ཅན༌ནི༌ ཅིན༌ལབས༌ ཅིག༌གི༌ སྟིང༌ནེ༌ ཅིག༌ ཐོབ༌,
JOH 1:17 ལུང༌སྟོན༌པ༌ མོ༌ཟེས༌ གྱུད༌ཏེ༌ དཀོན༌མཆོག༌གི༌ བཀའ༌ཁྲིམས༌གུན༌ ང༌དང༌གུན༌ལ༌ སལ༌ལ༌ ཛད༌ཏེ༌ ཨིན༌པིན༌, ཡང༌ ཐུག༌རྗེ༌ དང༌ དེན༌བའེ༌ ལམ༌ ང༌དང༌གུན༌ལ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ སལ༌ལ༌ ཛད༌ཏེ༌ ཨིན༌།
JOH 1:18 དཀོན༌མཆོག༌ ནི༌ སུའིང༌ མ༌ཇལ༌ལ༌ ཨིན༌ནོག༌, ཨིན༌ནའང༌ ཡབ༌ དཀོན༌མཆོག༌གི༌ སྙིང༌ནེ༌ ཅེས༌པ༌ ཛད༌ཁན༌ སྲས༌ ཅིག༌ཅིག༌པོ༌, ཀ༌བོ༌ དཀོན༌མཆོག༌ ཨིན༌, ཁོང༌ངི༌ ང༌དང༌ང༌ ཡབ༌ སྔོན༌ ཅུག༌ག༌ ཛདས༌།
JOH 1:19 ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པའེ༌ ཝང༌སྲུལ༌ཁན༌གུན༌ནི༌, བླ༌མ༌གུན༌ དང༌ ལི༌ཝི༌པ༌གུན༌ ཡོ༌ཧཱ༌ནན༌ནི༌ཀ༌ ཁོང༌ སུ༌ ཨིན༌ ཟེར༌ཏེ༌ ཏྲིའ༌ལ༌ ལམ༌ཅུགས༌།
JOH 1:20 ཡོ༌ཧཱ༌ནན༌ནི༌ ཐེ༌ཚོམས༌ མེད༌པ༌ སལ༌པོ༌ དང༌ ཀྲང༌པོ༌ མོལས༌, “ང༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མན༌།”
JOH 1:21 ཁོང༌གུན༌ནི༌ ཏྲིས༌, “ཏེ༌ནེ༌ ཉེ༌རང༌ སུ༌ ཞུགས༌ཏེ༌ ཨིན༌, ཉེ༌རང༌ ལུང༌སྟོན༌པ༌ ཨེ༌ལི༌ཡཱ༌ ཨིན༌ན༌?” ཡོ༌ཧཱ༌ནན༌ནི༌ མོལས༌, “ངའ༌ མན༌།” ཁོང༌གུན༌ནི༌ ཏྲིས༌, “ཏེ༌ནེ༌ ཉེ༌རང༌ དཀོན༌མཆོག༌གི༌ ཀལ༌ལ༌ ཛད༌ཅེས༌སི༌ ཁ༌ཆད༌ ཅོའ༌ ཛད༌ཁན༌ནི༌ ལུང༌སྟོན༌པ༌བོ༌ ཨིན༌ན༌?” ཁོང༌ངི༌ མོལས༌, “མན༌།”
JOH 1:22 སྟིང༌ཇུག༌ག༌ ཏེ༌ མི༌གུན༌ནི༌ ཁོང༌ང༌ ཏྲིས༌, “ཏེ༌ནེ༌ ཉེ༌རང༌ ཨིན༌བོ༌ སུ༌ ཨིན༌, ཤོད༌དའང༌ ཅིའ༌ཟེར༌ན༌ ང༌ཞའ༌, ང༌ཞའ༌ ཀལ༌ཁན༌གུན༌ལ༌ ལན༌ཏང༌གོས༌སད༌། ཉེ༌རང༌ངི༌ རང༌ངི༌ སྐོར༌ལ༌ ཅི༌ མོལ༌ལད༌?”
JOH 1:23 ཡོ༌ཧཱ༌ནན༌ནི༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཁན༌ ནང༌ཞིན༌ལ༌ ལན༌སལས༌, “རི༌སྟོང༌ངི༌ ནང༌ང༌ སྐད༌ ཆེན༌མོ༌ ཏང༌ཁན༌བོ༌ ང༌ ཨིན༌, ‘གཙོ༌བོའེ༌ ཕེབས༌ལམ༌བོ༌ ཀྲང༌པོ༌ ཅོ༌ཤིག༌།’”
JOH 1:24 ཏེ༌ནེ༌ ཀལ༌ཁན༌ནི༌ ཕ༌རུ༌ཤི༌པ༌གུན༌ནི༌
JOH 1:25 ཡོ༌ཧཱ༌ནན༌ལ༌ ཏྲིས༌, “ཀལ༌ཏེས༌ ཉེ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཡ༌ ཨེ༌ལི༌ཡཱ༌ ཡ༌ ཏེ༌ ལུང༌སྟོན༌པ༌བོ༌ མན༌ན༌, ཏེ༌ནེ༌ ཉེ༌རང༌ངི༌ ཁྲུས༌ ཅིའ༌ སལ༌ལད༌?”
JOH 1:26 ཡོ༌ཧཱ༌ནན༌ནི༌ ཁོང༌གུན༌ལ༌ ལན༌སལས༌, “ངའེ༌ མི༌གུན༌ལ༌ ཆུ༌ ཉམ༌པོ༌ ཁྲུས༌ ཏང༌ངད༌, ཨིན༌ནའང༌ ཁྱོ༌ཞ༌གུན༌ནི༌ ཕྲོའ༌ ཁྱོ༌ཞའེ༌ མ༌ཤེས༌ཁན༌ནི༌ མི༌བོ༌ ཞུགས༌ཏེ༌ ཡོད༌།
JOH 1:27 ཁོང༌ ངའེ༌ སྟིང༌ནེ༌ སྐྱོད༌ཨིན༌, ངའ༌ ཁོང༌ངི༌ ཞབ༌ཤི༌ ཙོགས༌ལ༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌།”
JOH 1:28 འི༌ ཚང༌མ༌ ཡོ༌ཧཱ༌ནན༌ནི༌ མི༌གུན༌ལ༌ ཁྲུས༌སལ༌སའེ༌ ཡོར༌དཱན༌ ལྩངས༌པོའེ༌ ཤར༌ ཆོགས༌ལ༌ ཡོད༌ཁན༌ནི༌ བེད༌ཐཱ༌ནི༌ གྲོང༌ཁྱེར༌ལ༌ ཇུང༌།
JOH 1:29 ཐོ༌རེ༌ཟུག༌པོ༌ ཡོ༌ཧཱ༌ནན༌ནི༌ ཡེ༌ཤུ༌ ཁོང༌རང༌ ཆོགས༌ལ༌ སྐྱོད༌ད༌ ཟིགས༌ཏེ༌ མོལས༌, “ལྟོས༌ཤིག༌ ཁོང༌ ནི༌ དཀོན༌མཆོག༌གི༌ ལུ༌གུ༌ , ཇིག༌རྟེན༌པ༌གུན༌ནི༌ སྡིག༌པ༌ མེད༌ཁན༌ ཅོའ༌ ཛད༌ཁན༌བོ༌ ཨིན༌ནོག༌།
JOH 1:30 ཁོང༌ ཏེན༌ན༌བོ༌ ཞུགས༌ཏེ༌ ཨིན༌, ཀ༌བོའེ༌ སྐོར༌ལ༌ ངའེ༌ ཟེར༌པིན༌, ‘ངའེ༌ སྟིང༌ནེ༌ སྐྱོད༌ཅེས༌ཅན༌བོ༌ ངའེ༌ སང༌ ཀྲག༌པོ༌ ཞུགས༌ཏེ༌ ཨིན༌ ཅིའ༌ཟེར༌ན༌ ཁོང༌ ངའེ༌ སང༌ སྔུན༌ལ༌ ཞུགས༌ཏེ༌ ཡོད༌པིན༌།’
JOH 1:31 སྔུན༌ལ༌ ངེའང༌ ཁོང༌ ངོ༌ མ༌ཤེས༌, ཨིན༌ནའང༌ ཨིས༌ར༌ཨེལ༌པ༌གུན༌ལ༌ ཁོང༌ སྔོན༌ཅུག༌ཅེས༌སི༌ ཕིའ༌, ངའེ༌ ཆུ༌ ཉམ༌པོ༌ ཁྲུས༌ ཏང༌ཨིན༌ ཡོངས༌པིན༌།”
JOH 1:32 ཏེ༌ནེ༌ ཡོ༌ཧཱ༌ནན༌ནི༌ སྤང༌པོ༌ སལས༌, “ངའེ༌ ཏམ༌པའེ༌ ཐུག༌ཉིད༌ ཕུར༌གོན༌ཞིག༌གི༌ ཚུལ༌ལ༌ ནམ༌ཁའ༌ནེ༌ བབས༌ཏེ༌ ཁོང༌ངི༌ཀ༌ ཞུགས༌ས༌ལ༌ ཐོང༌།
JOH 1:33 གོ༌མ༌ ངའེ༌ ཁོང༌ སུ༌ ཨིན༌ཁན༌བོ༌ ངོ༌ཤེས༌ས༌ མེད༌པིན༌, ཨིན༌ནའང༌ ང༌ ཆུ༌ ཉམ༌པོ༌ ཁྲུས༌ ཏང༌ང༌ལ༌ ཀལ༌ལ༌ ཛད༌ཁན༌བོའེ༌ མོལས༌, ‘ཁྱོ༌རང༌ངི༌ ཏམ༌པའེ༌ ཐུག༌ཉིད༌ བབས༌ཏེ༌ ཞུགས༌ས༌ལ༌ ཐོང༌ཁན༌བོའེ༌, ཏམ༌པའེ༌ ཐུག༌ཉིད༌ ཉམ༌པོ༌ ཁྲུས༌སལ༌ལ༌ ཛད༌ཨིན༌།’
JOH 1:34 ངའེ༌ ཁོང༌ ཇལ༌པ༌ ངའེ༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ སྤང༌པོ༌ ཏང༌ངད༌།”
JOH 1:35 སྟིང༌མ༌ ཞག༌ག༌ ཡོ༌ཧཱ༌ནན༌ ཡང༌སྐྱར༌ ཁོང༌རང༌ངི༌ ལོབ༌ཕྲུགས༌ ཉིས༌ ཉམ༌པོ༌ ཡོད༌པིན༌,
JOH 1:36 ཁོང༌ངི༌ ཡེ༌ཤུ༌ ཏེ༌ཀ༌ནེ༌ གྲུལ༌ཨིན༌ སྐྱོད༌ད༌ལ༌ ཟིགས༌ཏེ༌ མོལས༌, “ལྟོས༌ཤིག༌, ཁོང༌ དཀོན༌མཆོག༌གི༌ ལུ༌གུ༌ ཨིན༌ནོག༌”,
JOH 1:37 ཡང༌ ཡོ༌ཧཱ༌ནན༌ནི༌ ལོབ༌ཕྲུགས༌ ཉིས༌ཀོའ༌ ཁོང༌ངི༌ ཏེ༌ཟུག༌ མོལ༌ལ༌ ཚོར༌ར༌ཅིག༌, ཁོང༌གུན༌ ཡེ༌ཤུའི༌ སྟིང༌རང༌ནེ༌ སོང༌།
JOH 1:38 ཡེ༌ཤུའི༌ གྱབ༌ ལོགས༌ཏེ༌ ཁོང༌གུན༌ སྟིང༌རང༌ནེ༌ ཡོང༌ང༌ ཟིགས༌པ༌, ཁོང༌གུན༌ལ༌ ཏྲིའ༌ ཛདས༌, “ཁྱོ༌ཞའ༌ ཅི༌ གོས༌སད༌?” ཁོང༌གུན༌ནི༌ ལན༌ཏངས༌, “རབ༌བི༌” ༼ཡང༌ན༌ “ལོབ༌བོན༌ལེ༌”༽ “ཉེ༌རང༌ ཀ༌རུ༌ ཞུགས༌སད༌?”
JOH 1:39 ཡེ༌ཤུའི༌ ཁོང༌གུན༌ལ༌ ལན༌སལས༌, “ང༌ ཉམ༌པོ༌ ཡོངས༌ཏེ༌ ལྟོས༌ཤིག༌།” ཏེ༌ནེ༌ ཁོང༌ ཉིས༌ཀ༌ ཡེ༌ཤུ༌ ཉམ༌པོ༌ སོང༌ཏེ༌ ཁོང༌ ཞུག༌སའེ༌ ནས༌ས༌བོ༌ ཐོང༌། ཏེ༌ ཟ༌ནེ༌ ཕི༌ཏོག༌གི༌ ཆུ༌ཚོད༌ ཞི༌པ༌ ཟོད༌ སོང༌པ༌ ཏེ༌ ཚན༌བོ༌ ཁོང༌གུན༌ ཡེ༌ཤུ༌ ཉམ༌པོ༌ དུགས༌།
JOH 1:40 ཡོ༌ཧཱ༌ནན༌ནི༌ མོལ༌ཁན༌གུན༌ ཚོར༌ཏེ༌, ཡེ༌ཤུའི༌ གྱབ༌ནེ༌ བྲངས༌ཁན༌ ཉིས༌སི༌ ནང༌ནེ༌ ཅིག༌པོ༌ ཤི༌མོན༌ པི༌ཏྲར༌རི༌ ནོ༌ ཨེན༌གྲིའུ༌ ཨིན༌པིན༌།
JOH 1:41 ཚང༌མའེ༌ སང༌ སྔུན༌ལ༌ ཨེན༌གྲིའུ༌འི༌ ཁོའེ༌ ཨ༌ཅོ༌ ཤི༌མོན༌ པི༌ཏྲར༌ ཙལ༌ཏེ༌ ཁོའ༌ ཟེརས༌, “ང༌ཞའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ༼ཡང༌ན༌ སྐོའ༌ ཛད༌ཁན༌བོ༌༽ ཐོབ༌།”
JOH 1:42 ཨེན༌གྲིའུ༌འི༌ ཤི༌མོན༌ ཁྲིད༌ཏེ༌ ཡེ༌ཤུའི༌ཀ༌ ཁྱེརས༌། ཡེ༌ཤུའི༌ ཁོའ༌ ཟིགས༌ཏེ༌ མོལས༌, “ཁྱོ༌རང༌ ཡོ༌ཧཱ༌ནན༌ནི༌ བུ༌ཚ༌ ཤི༌མོན༌ མན༌ན༌? ཏ༌ནེ༌ཕར༌ལ༌ ཁྱོ༌རང༌ངི༌ མིང༌ང༌ ཀྱེ༌ཕས༌ ༼ཡང༌ན༌ པི༌ཏྲར༌༽ ཟེར༌ཨིན༌།”
JOH 1:43 ཐོ༌རེ༌ཟུག༌པོ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ལ༌ སྐྱོད༌ཅེས༌ ཐག༌ཅད༌ད༌ ཛདས༌། ཕི༌ལིབ༌ ཐོབ༌བ༌ཅིག༌ ཁོང༌ངི༌ ཁོའ༌ མོལས༌, “ངའེ༌ སྟིང༌རང༌ནེ༌ ཡོང༌།”
JOH 1:44 ཕི༌ལིབ༌, ཨེན༌གྲིའུ༌ དང༌ པི༌ཏྲར༌རི༌ གྲོང༌ཁྱེར༌ བེད༌སའི༌ད༌ ཨིན༌པིན༌།
JOH 1:45 ན༌ཐན༌ནི༌འེལ༌ ཐོབ༌བ༌ཅིག༌ ཕི༌ལིབ༌བི༌ ཟེརས༌, “མོ༌ཟེས༌ དང༌ ལུང༌སྟོན༌པ༌གུན༌ནི༌ བྲིའ༌ ཛད༌ཁན༌ནི༌ མི༌བོ༌ ང༌ཞའ༌ ཐོབ༌། ཁོང༌ ནི༌ ཡོ༌སེབ༌བི༌ བུ༌ཚ༌ ན༌ཙ༌རེད༌པ༌ ཡེ༌ཤུ༌ ཨིན༌ནོག༌།”
JOH 1:46 ན༌ཐན༌ནི༌འེལ༌ལི༌ ཁོའ༌ ཟེརས༌, “ན༌ཙ༌རེད༌ནེ༌ མི༌ ཟང༌པོ༌ཞིག༌ བིང༌ སྲིད༌ད༌ནོག༌ག༌?” ཕི༌ལིབ༌བི༌ ཁོའ༌ ཟེརས༌, “ཡོངས༌ཏེ༌ ལྟོས༌།”
JOH 1:47 ཡེ༌ཤུའི༌ ན༌ཐན༌ནི༌འེལ༌ ཡོང༌ང༌ ཟིགས༌ཏེ༌ ཁོའེ༌ སྐོར༌ལ༌ མོལས༌, “ལྟོས༌ཤིག༌, འི༌ མི༌བོའ༌ ཨིས༌ར༌ཨེལ༌པ༌ ཟེར༌ཅེས༌ འོས༌པ༌ ཨིན༌ནོག༌, ཅིའ༌ཟེར༌ན༌ ཁོའེ༌ སུ༌ཞིག༌གའང༌ མ༌ནེ༌ གོབས༌མི༌སྐོར༌།”
JOH 1:48 ན༌ཐན༌ནི༌འེལ༌ལི༌ ཡེ༌ཤུའ༌ ཟེརས༌, “ཉེ༌རང༌ངི༌ ང༌ ཀ༌ཟུག༌གི༌ ཁྱེན༌ནད༌།” ཡེ༌ཤུའི༌ ཁོའ༌ མོལས༌, “ཕི༌ལིབ༌བི༌ བོད༌དི༌ སང༌ སྔུན༌ལ༌ ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ ཡོག༌ག༌ དུགས༌ཏེ༌ ཐོང༌།”
JOH 1:49 ན༌ཐན༌ནི༌འེལ༌ལི༌ ཟེརས༌, “ལོབ༌བོན༌ལེ༌, ཉེ༌རང༌ དཀོན༌མཆོག༌གི༌ སྲས༌ དང༌ ཁོང༌ངི༌ ཨིས༌ར༌ཨེལ༌ལི༌ ཕིའ༌ སྐོའ༌ ཛད༌ཁན༌ནི༌ གྱལ༌པོ༌ ཨིན༌ནོག༌།”
JOH 1:50 ཡེ༌ཤུའི༌ ན༌ཐན༌ནི༌འེལ༌ལ༌ མོལས༌, “ངའེ༌ ཁྱོ༌རང༌ ཕིག༌ ཁ༌ཟས༌སི༌ ལྕང༌མའེ༌ ཡོག༌ག༌ དུགས༌ཏེ༌ ཐོང༌ ཟེར༌པ༌ ཁྱོ༌རང༌ངི༌ ཏད༌པ༌ ཅོས༌ཏེ༌ ཨིན༌ན༌? ཁྱོ༌རང༌ངི༌ འི༌ སང༌ ཧ༌ལས༌ཤེས༌སི༌ ལས༌ ཆེའ༌ ཐོང༌ཨིན༌།”
JOH 1:51 ཡེ༌ཤུའི༌ ཏ༌རུང༌ངའང༌ མོལས༌, “ངའེ༌ ཁྱོ༌རང༌ང༌ དེན༌བ༌ ཟེར༌རད༌, ཁྱོ༌རང༌ངི༌ ནམ༌ཁའ༌ བེས༌ཏེ༌ ཡང༌ དཀོན༌མཆོག༌གི༌ ཕོ༌ཉ༌གུན༌, ང༌ མི༌རིགས༌སི༌བུའི༌ཀ༌ ཛགས༌ཨིན༌ ཡང༌ བབས༌ཨིན༌ ཐོང༌ཨིན༌།”
JOH 2:1 ཞག༌ ཉིས༌སི༌ སྟིང༌ནེ༌, གཱ༌ལིལ༌ལིའི༌ ཡུལ༌ཇོངས༌སི༌ ཀ༌ནཱའེ༌ གྲོང༌ཁྱེར༌རི༌ ནང༌ང༌ བག༌སྟོན༌ཞིག༌ ཡོད༌པིན༌, ཡང༌ ཡེ༌ཤུའི༌ ཨ༌མ༌ ཏེ༌རུ༌ སོང༌།
JOH 2:2 ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ནའང༌ ཏེ༌ བག༌སྟོན༌ལ༌ བོད༌ཏེ༌ ཡོད༌པིན༌།
JOH 2:3 ཏེ༌རུ༌ བག༌སྟོན༌ནི༌ གྲོན༌ནི༌ ཏུས༌ལ༌ རྒུན༌ཆང༌ ཚར༌ར༌ཅིག༌, ཡེ༌ཤུའི༌ ཨ༌མའེ༌ ཡེ༌ཤུའ༌ ཟེརས༌, “ཁོང༌གུན༌ལ༌ རྒུན༌ཆང༌ ཚར༌ཏེ༌ མི༌དུག༌།”
JOH 2:4 ཡེ༌ཤུའི༌ ཨ༌མའ༌ མོལས༌, “ཅེས༌པའེ༌ བུ༌མོ༌, ང༌ འི༌ ནང༌ང༌ ཅིའ༌ སྲེའད༌། ཏ༌རུང༌ ངའེ༌ ཏུས༌ མ༌ལེབ༌བ༌ཨིན༌།”
JOH 2:5 ཨ༌མའེ༌ ཡོག༌པོ༌གུན༌ལ༌ ཟེརས༌, “ཁོང༌ངི༌ ཅི༌ མོལ༌ནའང༌ ཏེ༌ཟུག༌ ཅོས༌།”
JOH 2:6 ཏེན༌ན༌ དུན༌ལ༌ ཡ༌ཧུ༌དཱ༌པའེ༌ རྩང༌མ༌ ཅོ༌ཅེས༌སི༌ ལུག༌སྲོལ༌ ནང༌ཞིན༌ ཁྲུ༌ཅེས༌ལ༌ ཆུའི༌ ཟ༌མ༌ དྲུག༌ ཡོད༌པིན༌། འི༌ ཟ༌མ༌ རེ༌རེ༌ ནང༌ང༌ ཧ༌ལམ༌ ཆུ༌ ལི༌ཀྲར༌ 80-120 ཟམ༌ ཆུད༌དད༌པིན༌།
JOH 2:7 ཡེ༌ཤུའི༌ ཡོག༌པོ༌གུན༌ལ༌ མོལས༌, “ཏེ༌ ཛ༌མ༌གུན༌ནི༌ ནང༌ང༌ ཆུ༌ སྐོང༌,” ཡོག༌པོ༌གུན༌ནི༌ ཁོང༌ངི༌ མོལ༌ཁན༌ ནང༌ཞིན༌ ཛ༌མ༌གུན༌ གང༌ཅུགས༌ཏེ༌ ཆུ༌ སྐངས༌།
JOH 2:8 ཏེ༌ སྟིང༌ནེ༌ ཡེ༌ཤུའི༌ ཡོག༌པོ༌གུན༌ལ༌ མོལས༌, “ཏ༌ ཟ༌མའེ༌ ནང༌ནེ༌ ཆུ༌ ཅུས༌ཏེ༌, གྲོན༌ནི༌ ལྡིང༌སྤོན༌ལ༌ ཁྱེར༌,” ཡང༌ ཁོང༌གུན༌ནི༌ ཡེ༌ཤུའི༌ མོལ༌ཁན༌བོ༌ ཅོས༌།
JOH 2:9 རྒུན༌ཆང༌ གྱུར༌ཁན༌ནི༌ ཆུ༌བོ༌ ལྡིང༌སྤོན༌ནི༌ ཉངས༌, ཁོའ༌ འི༌ རྒུན༌ཆང༌བོ༌ ཀ༌ནེ༌ ཁྱོངས༌ གྱུས༌ མེད༌པིན༌, ༼ཨིན༌ནའང༌ ལྡིངས༌སྤོན༌ལ༌ ཆུ༌ ཁྱེར༌ཁན༌ནི༌ ཡོག༌པོ༌གུན༌ལ༌ གྱུས༌ཡོད༌པིན༌༽ ཁོའེ༌ མག༌པའ༌ བོད༌ཏེ༌ ཟེརས༌,
JOH 2:10 “ཚང༌མའེ༌ གྲོན༌པོ༌གུན༌ལ༌ ཆང༌ གྱལ༌ལ༌བོ༌ སྔུན༌ལ༌ ཏངས༌ཏེ༌ གྲོན༌པོ༌གུན༌ ར༌རོས༌ས༌ཅིག༌ ཆང༌ ཐུའ༌བོ༌ ཁྱོང༌ཅེན༌, ཨིན༌ནའང༌ ཁྱོ༌རང༌ངི༌ ཚང༌མའེ༌སང༌ ཆང༌ གྱལ༌ལ༌བོ༌ དག༌ས༌ ཚག༌པ༌ བོར༌ཏེ༌ རག༌།”
JOH 2:11 འི༌བོ༌ ཡེ༌ཤུའི༌ ཧ༌ལས༌ཤེས༌སི༌ ལྟས༌ ཏང༌པོ༌བོ༌ ཨིན༌པིན༌, ཀ༌བོ༌ ཁོང༌ངི༌ གཱ༌ལིལ༌ལི༌ ཡུལ༌ཇོངས༌སི༌ ཀ༌ནཱའེ༌ གྲོང༌ཁྱེར༌ལ༌ སྟན༌ན༌ ཛད༌ཏེ༌ ཁོང༌རང༌ངི༌ ཟིར༌རྗིད༌ སྔོན༌ ཅུག༌ག༌ ཛདས༌, ཡང༌ ཁོང༌ངི༌ ལོབ༌ཕྲུགས༌གུན༌ནི༌ ཁོང༌ངི༌ཀ༌ ཏད༌པ༌ ཅོས༌།
JOH 2:12 ཏེ༌ སྟིང༌ནེ༌ ཡེ༌ཤུ༌, ཁོང༌ངི༌ ཨ༌མ༌, ནོ༌ དང༌ ལོབ༌ཕྲུགས༌ གུན༌ ཀ༌ཕར༌ན༌ཧུམ༌ གྲོང༌ཁྱེར༌ལ༌ སྐྱོདས༌, ཏེ༌རུ༌ ཞག༌ ཁ༌ཅིག༌ ཞུགས༌།
JOH 2:13 ཡ༌ཧུ༌དཱ༌པའེ༌ པེ༌སག༌གི༌ ཏུས༌ཆེན༌ ཉེ༌མོ༌ ལེབ༌བ༌ཅིག༌, ཡེ༌ཤུ༌ ཀེན༌ལ༌ ཡེ༌རུ༌ཤ༌ལེམ༌མ༌ སྐྱོདས༌།
JOH 2:14 ཁོང༌ངི༌ ཏེ༌རུ༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ ལང༌ཏོ༌, ལུག༌ དང༌, ཕུར༌གོན༌ གུན༌ ཙོང༌ཁན༌ ཡང༌ པེ༌ནེ༌ རྡེབ༌ཁན༌ གུན༌ ཁོ༌རང༌གུན༌ནི༌ ཅོག༌ཙེ༌ དུན༌ལ༌ དུག༌ཏེ༌ ཡོད༌ད༌ ཟིགས༌།
JOH 2:15 ཡེ༌ཤུའི༌ ཐག༌པ༌ཞིག༌ག༌ རྟལ༌ལྕག༌ ཛད༌ཏེ༌, ཆོད༌ཁང༌ངི༌ གྱང༌སྐོར༌རི༌ ནང༌ང༌ ཡོད༌ཁན༌ནི༌ ལུག༌, ལང༌ཏོ༌ དང༌ ཕུར༌གོན༌ ཚང༌མ༌ ཕི༌ལོག༌ག༌ ཕིང༌ང༌ ཛདས༌, ཡང༌ པེ༌ནེ༌ རྡེབ༌ཁན༌གུན༌ནི༌ ལྕགས༌སི༌ པེ༌ནེ༌གུན༌ ཁྲེས༌ཏོར༌ ཛད༌ཏེ༌ ཅོག༌ཙེ༌གུན༌ ལོག༌ག༌ ཛདས༌།
JOH 2:16 ཡང༌ ཕུར༌གོན༌ ཙོང༌ཁན༌གུན༌ལ༌ མོལས༌, “འི༌ ཚང༌མ༌ ཕིངས༌ཏེ༌ ཁྱེར༌, ངའེ༌ ཡབ༌བི༌ ཞུགས༌ས༌བོ༌ ཁྲོམས༌ས༌ མ༌ཅོ༌ཤིག༌།”
JOH 2:17 ཡེ༌ཤུའི༌ ལོབ༌ཕྲུགས༌གུན༌ལ༌ ཏམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ ཡོད༌ཁན༌བོ༌ ཨིད༌ཏུ༌ ཡོངས༌, “ངའེ༌ སེམས༌སི༌ ནང༌ང༌ ཉེ༌རང༌ངི༌ ཏམ༌པ༌ ནས༌སའེ༌ ཕིའ༌ ཅམས༌པ༌བོ༌ ནི༌, མེ༌ བར༌ཁན༌ ཙོགས༌ ཨིན༌ ཀ༌བོའེ༌ ང༌ མེད༌ཁན༌ ཅོ༌ཨིན༌།”
JOH 2:18 ཡ༌ཧུ༌དཱ༌པའེ༌ སྤོན༌བོ༌གུན༌ནི༌ ཡེ༌ཤུའ༌ ཟེརས༌, “འི༌གུན༌ ཅོ༌ཅེས༌སི༌ ཝང༌ ཡོད༌ཁན༌བོ༌ སྟན༌ཅེས༌ལ༌ ཁྱོ༌རང༌ངི༌ ཅི༌ ཧ༌ལས༌ཤེས༌སི༌ སྟགས༌ཤིག༌ སྟན༌ཨིན༌།”
JOH 2:19 ཡེ༌ཤུའི༌ ཏེ༌ མི༌གུན༌ལ༌ ལན༌སལ༌ཨིན༌ མོལས༌, “འི༌ ཆོད༌ཁང༌བོ༌ ཤིག༌, ངའེ༌ ཞག༌ སུམ༌མི༌ ནང༌ང༌ ཡང༌ ལང༌ཨིན༌།”
JOH 2:20 ཏེ༌གུན༌ནི༌ ཁོང༌ང༌ ཏྲིས༌, “འི༌ ཆོད༌ཁང༌བོ༌ རྩིག༌ག༌ལ༌ ལོ༌ ཞིབ༌ཅུ༌ ཞ༌རུག༌ གོར༌ཏེ༌ ཨིན༌པིན༌, ཅི༌ ཁྱོ༌རང༌ངི༌ འི༌བོ༌ ཞག༌ སུམ༌མི༌ ནང༌ང༌ ཞང༌ཨིན༌ན༌?”
JOH 2:21 ཨིན༌ནའང༌ ཡེ༌ཤུའི༌ མོལ༌ཁན༌ནི༌ ཆོད༌ཁང༌བོ༌ ནི༌ ཁོང༌རང༌ངི༌ སྐུ༌ཟུགས༌སི༌ སྐོར༌ལ༌ ཨིན༌པིན༌།
JOH 2:22 ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ སྟིང༌ནེ༌ ཁོང༌ངི༌ ལོབ༌ཕྲུགས༌གུན༌ལ༌ ཁོང༌ངི༌ འི༌ ཞལ༌ཏ༌ མོལ༌ཁན༌གུན༌ ཨིད༌ཏུ༌ ཡོངས༌, ཡང༌ ཁོང༌གུན༌ནི༌ ཏམ༌པའེ༌ སུང༌རབས༌ དང༌ ཡེ༌ཤུའི༌ མོལ༌ཁན༌ནི༌ ཞལ༌ཏ༌གུན༌ནི༌ཀ༌ ཏད༌པ༌ ཅོས༌།
JOH 2:23 ཡེ༌ཤུ༌ པེ༌སག༌གི༌ ཏུས༌ཆེན༌ལ༌ ཡེ༌རུ༌ཤ༌ལེམ༌མ༌ ཞུགས༌ཏེ༌ ཡོད༌ ཟ༌ནེ༌, ཏེ༌རུ༌ མི༌ མང༌པོའེ༌ ཁོང༌ངི༌ ཧ༌ལས༌ཤེས༌སི༌ ཛད༌པ༌གུན༌ ཐོང༌ཏེ༌, ཁོང༌ངི༌ཀ༌ ཏད༌པ༌ ཁྱོངས༌།
JOH 2:24 ཨིན༌ནའང༌ ཡེ༌ཤུའ༌ ཏེ༌ མི༌གུན༌ནི༌ཀ༌ ལོ༌མ༌ཁྱེལ༌ ཅིའ༌ཞུ༌ན༌ ཁོང༌ངི༌ ཚང༌མའེ༌ སྙིང༌ ཁྱེན༌ན༌ ཛདས༌།
JOH 2:25 མི༌གུན༌ ཀ༌ཟུག༌ཤིག༌ ཨིན༌ཁན༌བོ༌ ཁོང༌ང༌ སུའིང༌ ཤད༌གོས༌ མེད༌ཀྱག༌ ཅིའ༌ཞུ༌ན༌ ཁོང༌ངི༌ ཁོང༌གུན༌ནི༌ སྙིང༌ངི༌ ནང༌ང༌ ཡོད༌ཁན༌བོ༌ ཁྱེན༌ན༌ ཛད༌ད༌ནོག༌།
JOH 3:1 ནི༌ཀོ༌དེ༌མས༌ ཟེར༌ཁན༌ནི༌ ཕ༌རུ༌ཤི༌པ༌ཞིག༌ ཡོད༌པིན༌, ཁོ༌ ཡ༌ཧུ༌དཱ༌པ༌ ཝང༌སྲུལ༌པའེ༌ ཚོགས༌དུའི༌ ཐུས༌མི༌ཞིག༌ ཨིན༌པིན༌།
JOH 3:2 ཞག༌ཤིག༌ ཁོ༌ ཡེ༌ཤུ༌ ཡོད༌ས༌ ཚན༌ལ༌ ཡོངས༌ཏེ༌ ཟེརས༌, “ལོབ༌བོན༌ལེ༌, ཉེ༌རང༌ དཀོན༌མཆོག༌གི༌ ཆོགས༌ནེ༌ ཕེབས༌ཁན༌ནི༌ ལོབ༌བོན༌ ཨིན༌ཁན༌བོ༌ ང༌ཞའེ༌ ཤེས༌, ཅིའ༌ཞུ༌ན༌ དཀོན༌མཆོག༌ ཉམ༌པོ༌ ཡོད༌ཏེ༌ མ༌ནེ༌ སུ༌ཞིག༌གའང༌, ཉེ༌རང༌ངི༌ སྟན༌ན༌ ཛད༌ཁན༌ནི༌ ཧ༌ལས༌ཤེས༌སི༌ ལྟས༌གུན༌ སྟན༌ མི༌ཉན༌།”
JOH 3:3 ཡེ༌ཤུའི༌ ཁོའ༌ ལན༌སལས༌, “ངའེ༌ ཁྱོ༌རང༌ང༌ དེན༌བ༌ དེན༌བ༌ ཟེར༌རད༌, ནམ༌ཚོག༌པ༌ སུ༌ཞིག༌ ཡང༌སྐྱར༌ མི༌སྐྱེ༌, དཀོན༌མཆོག༌གི༌ གྱལ༌སྲིད༌པོ༌ ཁོའ༌ མི༌ཐོང༌།”
JOH 3:4 ནི༌ཀོ༌དེ༌མས༌སི༌ ཟེརས༌, “མི༌ རྒད༌པོ༌ཞིག༌ ཡང༌སྐྱར༌ ཀ༌ཟུག༌གི༌ སྐྱེའ༌ནོག༌། ཁོ༌རང༌ངི༌ ཨ༌མའེ༌ ཅང༌ཁོག༌གི༌ ནང༌ང༌ ཞུགས༌ཏེ༌ ལན༌ ཉིས༌པ༌ སྐྱེ༌ མི༌ཐུབ༌།”
JOH 3:5 ཡེ༌ཤུའི༌ ལན༌སལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ནམ༌ཚོག༌པ༌ མི༌ཞིག༌ ཆུ༌ དང༌ ཐུག༌ཉིད༌ནེ༌ སྐྱེ༌ མི༌སྐྱེ༌, ཏེ༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཞུགས༌ མི༌ཉན༌།
JOH 3:6 མི༌ཞིག༌ ཟུགས༌པོའེ༌ ཐོག༌ག༌ ཕ༌མ༌ནེ༌ སྐྱེའ༌ནོག༌, ཨིན༌ནའང༌ ཐུག༌ཉིད༌ནེ༌ སྐྱེས༌ཁན༌གུན༌ ནི༌ ཏམ༌པའེ༌ ཐུག༌ཉིད༌ནེ༌ སྐྱེའ༌ནོག༌།
JOH 3:7 ངའེ༌ ‘ཁྱོ༌རང༌ང༌ ཡང༌སྐྱར༌ སྐྱེ༌གོས༌’ ཟེར༌ཁན༌བོའ༌ ཧ༌མ༌ལས༌།
JOH 3:8 ལུངས༌པོ༌ ཀ༌རུ༌ ཐད༌ནའང༌ ཏེན༌ན༌ ཆོགས༌ལ༌ གྱུག༌ག༌ནོག༌། ཁྱོ༌རང༌ང༌ ཏེ༌བོའེ༌ སྐད༌ ཚོར༌ར༌ནོག༌, ཨིན༌ནའང༌ ཏེ༌བོ༌ ཀ༌ནེ༌ ཡོང༌ངད༌ ཡང༌ ཀ༌རུ༌ ཆའད༌ ཤེས༌ས༌ མ༌ནོག༌, ཏེན༌ན༌ ཙོགས༌ ཐུག༌ཉིད༌ནེ༌ སྐྱེས༌ཁན༌ ཚང༌མ༌ ཉམ༌པོ༌ ཨིན༌ནོག༌།”
JOH 3:9 ནི༌ཀོ༌དེ༌མས༌སི༌ ཟེརས༌, “ཀ༌ཟུག༌གི༌ ཏེ༌བོ༌ དེན༌བ༌ ཨིན༌ནོག༌?”
JOH 3:10 ཡེ༌ཤུའི༌ ལན༌སལས༌, “ཁྱོ༌རང༌ ཨིས༌ར༌ཨེལ༌པའེ༌ ཆོས༌སི༌ ལོབ༌བོན༌ཞིག༌ ཨིན༌ཏེའང༌ ཁྱོ༌རང༌ང༌ ཧ༌གོའ༌ མེད༌ད༌?
JOH 3:11 ངའེ༌ ཁྱོ༌རང༌ང༌ དེན༌བ༌ དེན༌བ༌ ཟེར༌རད༌, ང༌ཞའེ༌ གྱུས༌ཡོད༌ཁན༌གུན༌ ཟེར༌རད༌ ཡང༌ ཐོང༌ཏེ༌ ཨིན༌ཁན༌བོའེ༌ སྤང༌པོ༌ ཏང༌ངད༌། ཏེ༌ནེའང༌ ཁྱོ༌ཞ༌གུན༌ནི༌ ང༌ཞའེ༌ སྤང༌པོ༌བོའ༌ དེན༌ཤེས༌ས༌ མི༌དུག༌།
JOH 3:12 ངའེ༌ ཁྱོ༌ཞ༌གུན༌ལ༌ ཇིག༌རྟེན༌ དང༌ བྲེལ༌ཁན༌ནི༌ སྤེ༌ར༌ ཤད༌པིན༌, ཨིན༌ནའང༌ ཏེ༌བོའ༌ ཁྱོ༌ཞའེ༌ དེན༌ མ༌ཤེས༌། ཀལ༌ཏེས༌ ངའེ༌ ནམ༌ཁའ༌ དང༌ བྲེལ༌ཁན༌ནི༌ སྤེ༌ར༌ ཤད༌ན༌, ཁྱོ༌རང༌ངི༌ ཀ༌ཟུག༌ག༌ དེན༌ཤེས༌ཨིན༌།
JOH 3:13 ནམ༌ཁའ༌ནེ༌ ཡོངས༌ཏེ༌ ཨིན༌ཁན༌ མི༌རིགས༌སི༌བུ༌ མན༌པ༌ སུ༌ཞིག༌གའང༌ ནམ༌ཁའ༌ མ༌སོང༌།
JOH 3:14 ཀ༌ཟུག༌ རི༌སྟོང༌ངི༌ ནང༌ང༌ མོ༌ཟེས༌སི༌ ཨིས༌ར༌ཨེལ༌པ༌གུན༌ སྐྱོབ༌ཅེས༌ལ༌ ར༌གན༌ནི༌ རུལ༌ཞིག༌ བེར༌ཀའེ༌ཀ༌ སྟག༌ག༌ ཙོགས༌ལ༌, མི༌རིགས༌སི༌བུའི༌ཀ༌ ཏད༌པ༌ ཁྱོང༌ཁན༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཕིའ༌ ངའང༌ སྟག༌གོས༌ཨིན༌།”
JOH 3:16 “དཀོན༌མཆོག༌གི༌ ཇིག༌རྟེན༌པ༌གུན༌ལ༌ འི༌ཟམ༌ ཅམས༌པ༌ ཛདས༌, ཁོང༌ངི༌ ཁོང༌རང༌ངི༌ སྲས༌ ཅིག༌ཅིག༌པོའང༌ སལ༌ལ༌ ཛདས༌, ཁོང༌ངི༌ སྲས༌སི༌ཀ༌ ཏད༌པ༌ ཅོ༌ཁན༌ ཚང༌མ༌ མེད༌ཁན༌ མ༌ཆའ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།
JOH 3:17 དཀོན༌མཆོག༌གི༌ རང༌ངི༌ སྲས༌ ཇིག༌རྟེན༌པ༌གུན༌ལ༌ ཆད༌པ༌ ཅད༌ཅེས༌ལ༌ མན༌པ༌, ཁོང༌ གྱུད༌ཏེ༌ ཐར༌པ༌ སལ༌ཅེས༌སི༌ ཕིའ༌ ཇིག༌རྟེན༌ནི༌ ནང༌ང༌ ཀལ༌ལ༌ ཛདས༌།”
JOH 3:18 “སྲས༌སི༌ཀ༌ ཏད༌པ༌ ཅོ༌ཁན༌གུན༌ ཉལ༌ཝའེ༌ ནང༌ང༌ མ༌ནེ༌ ཕང༌ང༌ མི༌ཛད༌, ཨིན༌ནའང༌ ཏད༌པ༌ མ༌ཅོ༌ཁན༌གུན༌ལ༌ ཉལ༌ཝའེ༌ ཆད༌པ༌ ཕོག༌ ཚར༌ཏེ༌ ཨིན༌ ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌གི༌ སྲས༌ ཅིག༌ཅིག༌པོའེ༌ཀ༌ ཏད༌པ༌ མ༌ཅོས༌།
JOH 3:19 ཏེ༌ ཆད༌པ༌ སལ༌ཅེས༌སི༌ ཏོན༌བོ༌ ནི༌: དཀོན༌མཆོག༌གི༌ འོད༌ ཇིག༌རྟེན༌ནི༌ ནང༌ང༌ སྐྱོདས༌ ཨིན༌ནའང༌ མི༌གུན༌ འོད༌དི༌ སང༌ མུན༌གྲིག༌པོའ༌ ཐད༌ ཅིའ༌ཟེར༌ན༌ ཁོང༌གུན༌ནི༌ ལས༌གུན༌ ངན༌པ༌ ཡོད༌ཏེ༌ ཨིན༌ནོག༌།
JOH 3:20 ལས༌ ངན༌པ༌ ཅོ༌ཁན༌ ཚང༌མའེ༌ འོད༌ལ༌ ནཕ༌རད༌ ཅོའ༌ནོག༌, ཁོང༌གུན༌ནི༌ ལས༌ངན༌གུན༌ ཞན༌མ༌གུན༌ལ༌ སྔོན༌ཨིན༌ སམ༌ཏེ༌ འོད༌དི༌ ནང༌ང༌ ཡོང༌ང༌ མ༌ནོག༌།
JOH 3:21 ཨིན༌ནའང༌ ཀྲང༌པོའེ༌ ལམ༌མི༌ཀ༌ གྲུལ༌ཨིན༌ ཡོད༌ཁན༌གུན༌, འོད༌དི༌ ནང༌ང༌ ཡོང༌ང༌ ཐད༌ད༌ནོག༌, ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌ ཐུགས༌ཐད༌ད༌ ཛད༌ཁན༌ནི༌ ལས༌ ཅོ༌ཨིན༌ ཡོད༌ཁན༌བོ༌ ཞན༌མ༌གུན༌ནི༌ ཐོང༌ཐུབ༌ཨིན༌།”
JOH 3:22 ཏེ༌བོའེ༌ སྟིང༌ནེ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ གྱལ༌ས༌ནེ༌ བིང༌ཏེ༌ ཡ༌ཧུ༌དཱའེ༌ གྲོང༌སེབ༌གུན༌ལ༌ སྐྱོདས༌, ཡང༌ ཏེ༌རུ༌ ཞག༌བན༌ཤིག༌ ཞུགས༌ཏེ༌ ཁོང༌ངི༌ མི༌གུན༌ལ༌ ཁྲུས༌སལ༌ལ༌ ཛདས༌།
JOH 3:23 ཡོ༌ཧཱ༌ནན༌ནིའང༌ ཤ༌ལིམ༌ གྲོང༌སེབ༌ དང༌ ཉེ༌མོའ༌ ཡོད༌ཁན༌ ཨེ༌ནོན༌ནི༌ ནང༌ང༌ ཁྲུས༌སལ༌ལད༌པིན༌ ཅིའ༌ཟེར༌ན༌ ཏེ༌རུ༌ ཆུ༌ མང༌པོ༌ ཡོད༌པིན༌, ཡང༌ མི༌གུན༌ ཁྲུས༌ ལེན༌ན༌ལ༌ ཡོང༌ཨིན༌ དུག༌གད༌པིན༌།
JOH 3:24 ༼འི༌ ཚང༌མ༌ ཡོ༌ཧཱ༌ནན༌ ཙོན༌ལ༌ ཀག༌གི༌ སང༌ སྔུན༌ལ༌ ཇུངས༌༽
JOH 3:25 ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཡ༌ཧུ༌དཱ༌པ༌ཞིག༌གི༌ ནང༌ང༌ ཆུ༌ ཉམ༌པོ༌ རྩང༌མ༌ ཅོ༌ཅེས༌སི༌ ལུག༌སྲོལ༌ལི༌ སྐོར༌ལ༌ ཟེར༌ཟེར༌ སོང༌།
JOH 3:26 ཏེ༌ནེ༌ ཡོ༌ཧཱ༌ནན༌ནི༌ ལོབ༌ཕྲུགས༌གུན༌ ཁོང༌ ཡོད༌ས༌ ཡོངས༌ཏེ༌ ཡེ༌ཤུའི༌ སྐོར༌ལ༌ ཤདས༌, “ལོབ༌བོན༌ལེ༌, ཡོར༌དཱན༌ནི༌ ལྩངས༌པོའེ༌ ཕར༌ཀ༌ ཉེ༌རང༌ ཉམ༌པོ༌ ཡོད༌ཁན༌ནི༌ མི༌ ཀ༌བོའེ༌ ཕིའ༌ ཉེ༌རང༌ངི༌ སྤང༌པོ༌ སལ༌ལད༌པིན༌, ཁོང༌ངིའང༌ ཁྲུས༌སལ༌དུག༌ ཡང༌ མི༌ཚང༌མ༌ ཁོང༌ངི༌ཀ༌ ཆ༌རུག༌།”
JOH 3:27 ཡོ༌ཧཱ༌ནན༌ནི༌ ལན༌ལ༌ མོལས༌, “ནམ༌ཚོག༌པ༌ དཀོན༌མཆོག༌གི༌ ནམ༌ཁའ༌ནེ༌ གོངས༌པ༌ མི༌སལ༌, སུ༌ཞིག༌གའང༌ ཅའང༌ ཐོབ༌ མི༌ཐུབ༌།
JOH 3:28 ངའེ༌ ཁྱོ༌ཞའ༌ ཟེར༌ཁན༌ ནང༌ཞིན༌, ‘ང༌ ལྡམ༌མ༌ ཛདས༌ཁན༌ནི༌ མ༌ཤི༌ཀ༌ མན༌ ཨིན༌ནའང༌ ཁོང༌ངི༌ སང༌ སྔུན༌ལ༌ ཀལ༌ལ༌ ཛད༌ཁན༌བོ༌ ཨིན༌’, ཏེ༌བོའེ༌ སྤང༌པོ༌ ཁྱོ༌ཞའ༌ ཨིན༌ནོག༌།
JOH 3:29 ན༌མ༌ ནི༌ མག༌པའེ༌ ཕིའ༌ ཨིན༌ནོག༌, ཨིན༌ནའང༌ མག༌རོག༌ ནི༌ མག༌པའེ༌ སྐད༌ ཉན༌ཏེ༌ སྐྱིད༌པོ༌ ཅོའ༌ལ༌ ཐད༌ད༌ནོག༌། ཏེ༌བོའེ༌ཕིའ༌ ཏེ༌ ནས༌ཚུལ༌བོ༌ ཚོར༌ཏེ༌ ངའེ༌ སྙིང༌ངའང༌ ཐད༌པོའེ༌ གང༌།
JOH 3:30 ཁོང༌ མིང༌ཅན༌ ཡང༌ ངའ༌ རིན༌མེད༌ གྱུར༌གོས༌།”
JOH 3:31 “ནམ༌ཁའ༌ནེ༌ སྐྱོད༌ཁན༌བོ༌ ཚང༌མའེ༌སང༌ ཇིགས༌པོ༌ ཨིན༌ནོག༌, ང༌དང༌གུན༌ ནི༌ ཇིག༌རྟེན༌ནི༌ ཨིན༌པ༌ ཇིག༌རྟེན༌པའེ༌ ཚུལ༌ལ༌ སྤེ༌ར༌ ཏང༌ང༌ནོག༌། ཨིན༌ནའང༌ ནམ༌ཁའ༌ནེ༌ སྐྱོད༌ཁན༌བོ༌ ཚང༌མའེ༌སང༌ ཐོ༌ཤོག༌པོ༌ ཨིན༌ནོག༌།
JOH 3:32 ཁོང༌ངི༌ དཀོན༌མཆོག༌ནེ༌ ཚོར༌ཁན༌ ཡང༌ ཟིགས༌ཁན༌གུན༌ནི༌ སྤང༌པོ༌ སལ༌ལ༌ནོག༌, ཨིན༌ནའང༌ སུ༌ཞིག༌གའང༌ ཁོང༌ངི༌ སྤང༌པོའེ༌ཀ༌ ཨིད༌ཤེས༌ མ༌ཅོས༌།
JOH 3:33 ཁོང༌ངི༌ ལོན༌ནི༌ཀ༌ ཨིད༌ཤེས༌ ཅོ༌ཁན༌གུན༌ནི༌ གཙོ༌བོ༌ དཀོན༌མཆོག༌གི༌ ཀྲང༌པོ༌ མོལ༌ཁན༌བོའེ༌ སྤང༌པོ༌ ཏངས༌ཏེ༌ ཨིན༌ནོག༌།
JOH 3:34 དཀོན༌མཆོག༌གི༌ ཀལ༌ལ༌ ཛད༌ཁན༌བོའེ༌ དཀོན༌མཆོག༌གི༌ ཞལ༌ཏ༌ མོལ༌ལ༌ནོག༌ ཅིའ༌ཟེར༌ན༌ དཀོན༌མཆོག༌གི༌ ཁོང༌ང༌ ཏམ༌པའེ༌ ཐུག༌ཉིད༌ ཚད༌མེད༌པ༌ སལ༌ལ༌ ཛད༌དུག༌།
JOH 3:35 ཡབ༌ དཀོན༌མཆོག༌གི༌ སྲས༌ལ༌ ཅམས༌པ༌ ཛད༌པ༌ ཁོང༌ངི༌ ཅི༌ཚང༌མ༌ སྲས༌སི༌ ཆག༌ག༌ སྟད༌ད༌ ཛདས༌།
JOH 3:36 སྲས༌སི༌ཀ༌ ཏད༌པ༌ ཁྱོང༌ཁན༌གུན༌ལ༌ ཐའ༌མེད༌པའེ༌ མི༌ཚེ༌བོ༌ ཐོབ༌ ཚར༌ཏེ༌ ཨིན༌ནོག༌། ཨིན༌ནའང༌ སྲས༌སི༌ཀ༌ ཏད༌པ༌ མ༌ཅོའ༌ ཁའ༌ མ༌ཉན༌ཁན༌གུན༌ལ༌ ཏེ༌ མི༌ཚེ༌བོ༌ མ༌ནེ༌ མི༌ཐོབ༌, ཡང༌ དཀོན༌མཆོག༌གི༌ ཐུགས༌སྲོ༌ ཁོང༌གུན༌ནི༌ཀ༌ ལུས༌ཨིན༌།”
JOH 4:1 གཙོ༌བོ༌ ཡེ༌ཤུའི༌ ཁྲུས༌སལ༌ཨིན༌ ཡོ༌ཧཱ༌ནན༌ནི༌ སང༌ མང༌ང༌ ལོབ༌ཕྲུགས༌ གྱུར༌ཏེ༌ དུག༌ ཟེར༌ཏེ༌ ཕ༌རུ༌ཤི༌པ༌གུན༌ལ༌ ཚོར༌།
JOH 4:2 ༼ངོས༌མ༌བོ༌ ཡེ༌ཤུ༌ མན༌པ༌ ཁོང༌ངི༌ ལོབ༌ཕྲུགས༌གུན༌ནི༌ ཁྲུས༌སལ༌ལད༌པིན༌༽,
JOH 4:3 ཏེ༌བོ༌ ཡེ༌ཤུའ༌ ཐུག༌གྱུས༌ སྐྱོད༌ད༌ཅིག༌ ཁོང༌ ཡ༌ཧུ༌དཱའེ༌ ཡུལ༌ཇོངས༌ནེ༌ བིང༌ཏེ༌ གཱ༌ལིལ༌ལིའི༌ ཡུལ༌ཇོངས༌ལ༌ ལོགས༌ཏེ༌ སྐྱོདས༌།
JOH 4:4 ཡེ༌ཤུ༌ ས༌མར༌རི༌ཡཱའེ༌ ཡུལ༌ཇོངས༌ གྱུད༌ཏེ༌ སྐྱོད༌གོས༌པ༌
JOH 4:5 ཁོང༌ ས༌མར༌རི༌ཡཱ༌ ཡུལ༌ཇོངས༌སི༌ སའི༌ཀར༌ གྲོང༌ཁྱེར༌, ཏུས༌ མང༌པོའེ༌ སྔུན༌ལ༌ ཡ༌ཀོབ༌བི༌ རང༌ངི༌ བུ༌ཚ༌ ཡོ༌སེབ༌བ༌ ཏངས༌ཁན༌ནི༌ ས༌ཀྱད༌དི༌ ཉེ༌མོའ༌ ལེབ༌།
JOH 4:6 ཏེ༌ཀ༌ ཡ༌ཀོབ༌བི༌ ཆུ༌དོང༌ཞིག༌ ཡོད༌པིན༌, ཡེ༌ཤུ༌ ཐག༌རིང༌ནེ༌ ཞབ༌གྲུལ༌ལ༌ སྐྱོད༌པ༌ ཐུག༌ངལ༌ཏེ༌ ཏེ༌ ཆུ༌དོང༌ངི༌ དུན༌ལ༌ ཞུགས༌, ཏེ༌བོ༌ ཉིང༌གུང༌ ཟོད༌ཅིག༌ག༌ ཨིན༌པིན༌།
JOH 4:7 ས༌མར༌རི༌ཡཱ༌མ༌ཞིག༌ ཆུ༌ ཕིང༌ང༌ལ༌ ཡོངས༌, ཡང༌ ཡེ༌ཤུའི༌ ཏེ༌ བུ༌མོ༌བོའ༌ མོལས༌, “ང༌ ཐུང༌ཅེས༌ལ༌ ཆུ༌ ཙ༌པིག༌ སལ༌།”
JOH 4:8 ༼ཅིའ༌ཞུ༌ན༌ ཁོང༌ངི༌ ལོབ༌ཕྲུགས༌གུན༌ ཁྲོམས༌ལ༌ ཟའ༌ཅེས༌ ཉོའ༌ལ༌ སོང༌ཏེ༌ མེད༌པིན༌།༽
JOH 4:9 ས༌མར༌རི༌ཡཱ༌པ༌ བུ༌མོ༌བོའེ༌ ཡེ༌ཤུའ༌ ཟེརས༌, “ཉེ༌རང༌ ཡ༌ཧུ༌དཱ༌པ༌ ཡང༌ ང༌ ས༌མར༌རི༌ཡཱ༌མ༌ཞིག༌, ཀ༌ཟུག༌གི༌ ཉེ༌རང༌ངི༌ ང༌ ཐུང༌ཅིས༌ལ༌ ཆུ༌ ཏོང༌ མོལ༌ཏེ༌ ཨིན༌” ༼ཅིའ༌ཟེར༌ན༌ ཡ༌ཧུ༌དཱ༌པ༌གུན༌ནི༌ ས༌མར༌རི༌ཡཱ༌པ༌གུན༌ ཉམ༌པོ༌ བྲེལ༌ བོར༌ར༌ མ༌ནོག༌།༽
JOH 4:10 ཡེ༌ཤུའི༌ ཏེ༌ བུ༌མོ༌བོའ༌ མོལས༌, “ཀལ༌ཏེས༌ ཁྱོ༌རང༌ངི༌ དཀོན༌མཆོག༌གི༌ སྐྱེས༌པོ༌ དང༌ ཁྱོ༌རང༌ང༌ ཆུ༌ ཏོང༌ ཟེར༌ཁན༌བོ༌ ཤེས༌པིན༌ན༌ ཁྱོ༌རང༌ངི༌ ངའ༌ ཏོང༌ ཟེར༌ཏེ༌ ཡོད༌གྲོ༌, ཡང༌ ངའེ༌ ཁྱོ༌རང༌ང༌ ཚེ༌ ཏང༌ཁན༌ནི༌ ཆུ༌ ཏངས༌ཏེ༌ ཡོད༌གྲོ༌།”
JOH 4:11 བུ༌མོ༌བོའེ༌ ཟེརས༌, “སྤོན༌བོ༌ལེ༌ ཉེ༌རང༌ངི༌ ལག༌ག༌ ཆུ༌ ཅུ༌ཅེས༌ལ༌ ནོད༌ ཅའང༌ མི༌དུག༌, ཡང༌ འི༌ ཆུ༌དོང༌བོ༌ མ༌ ཀོན༌དྲོ༌ ཡོད༌པ༌ ཉེ༌རང༌ང༌ ཚེ༌ ཏང༌ཁན༌ནི༌ ཆུ༌བོ༌ ཀ༌ནེ༌ ཐོབ༌ཨིན༌།
JOH 4:12 ཅི༌ ཉེ༌རང༌ ང༌ཞ༌གུན༌ལ༌ འི༌ ཆུ༌དོང༌ སལ༌ཁན༌ ང༌ཞའེ༌ ཕ༌མེས༌པོ༌ ཡ༌ཀོབ༌བི༌ སང༌ ཇིགས༌ས༌ཞིག༌ ཨིན༌ན༌? ཁོང༌, ཁོང༌ངི༌ ཕྲུ༌གུ༌གུན༌ དང༌ ཁོང༌ངི༌ སེམས༌ཅན༌གུན༌ནི༌ འིན༌ན༌ ཆུ༌དོང༌བོའེ༌ ཆུ༌ ཐུངས༌ཏེ༌ ཨིན༌པིན༌།”
JOH 4:13 ཡེ༌ཤུའི༌ ལན༌སལས༌, “འི༌ ཆུ༌དོང༌ནེ༌ ཆུ༌ ཐུང༌ཁན༌གུན༌ ཡང༌སྐྱར༌ སྐོམས༌ཨིན༌,
JOH 4:14 ཨིན༌ནའང༌ ངའེ༌ ཏང༌ཁན༌ནི༌ ཆུ༌ ཐུང༌ཁན༌གུན༌ ཡང༌སྐྱར༌ མ༌ནེ༌ མི༌སྐོམས༌། ངའེ༌ ཏང༌ཁན༌ནི༌ ཆུ༌བོ༌ ཁོང༌གུན༌ནི༌ ནང༌ང༌ ཐའ༌མེད༌པའེ༌ མི༌ཚེའེ༌ ཏང༌ཁན༌ནི༌ ཆུ༌མིག༌ག༌ གྱུར༌ཨིན༌།”
JOH 4:15 བུ༌མོ༌བོའེ༌ ཟེརས༌, “གཙོ༌བོ༌ ཡང༌སྐྱར༌ མ༌ནེ༌ མི༌སྐོམ༌ཅེས༌ དང༌ འི༌ཀ༌ ཆུ༌ ནེན༌ན༌ལ༌ ཡོང༌ མི༌གོ༌ཤེས༌སི༌ ཕིའ༌ ཇུ༌ཇུ༌ ཏེ༌ ཆུ༌བོ༌ ང༌ སལ༌ལ༌ ཛད༌།”
JOH 4:16 ཡེ༌ཤུའི༌ བུ༌མོ༌བོའ༌ མོལས༌, “སོང༌ཏེ༌ རང༌ངི༌ མག༌པ༌ འི༌ཀ༌ ཁྲིད༌ཏེ༌ ཁྱོང༌།”
JOH 4:17 བུ༌མོ༌བོའེ༌ ལན༌ཏངས༌, “ང༌ མག༌པ༌ མེད༌།” ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ང༌ མག༌པ༌ མེད༌ ཟེར༌ཁན༌བོ༌ ཀྲང༌པོ༌ ཨིན༌ནོག༌།
JOH 4:18 ངོས༌མ༌བོ༌ ཁྱོ༌རང༌ང༌ མག༌པ༌ ལྔ༌ ཡོད༌པིན༌, དག༌ས༌ ཁྱོ༌རང༌ ཉམ༌པོ༌ ཡོད༌ཁན༌བོ༌ ཁྱོ༌རང༌ངི༌ མག༌པ༌ མན༌། ཁྱོ༌རང༌ངི༌ ཟེར༌ཁན༌བོ༌ དེན༌བ༌ ཨིན༌།”
JOH 4:19 བུ༌མོ༌བོའེ༌ ཟེརས༌, “གཙོ༌བོ༌ ཉེ༌རང༌ ལུང༌སྟོན༌པ༌ཞིག༌ ཨིན༌ཅེས༌ དུག༌།
JOH 4:20 ང༌ཞའ༌ ས༌མར༌རི༌ཡཱ༌པ༌གུན༌ནི༌, ང༌ཞའེ༌ ཕ༌མེས༌པོ༌གུན༌ནི༌ ཅོལ༌ཁན༌ནི༌ འི༌ རི༌བོའི༌ཀ༌ དཀོན༌མཆོག༌ག༌ ཅོལ༌ལད༌, ཨིན༌ནའང༌ ཁྱོ༌ཞའ༌ ཡ༌ཧུ༌དཱ༌པ༌གུན༌ནི༌ དཀོན༌མཆོག༌ག༌ ཡེ༌རུ༌ཤ༌ལེམ༌མི༌ ནང༌ང༌ ཅོལ༌གོས༌ ཅིའ༌ ཟེར༌ར༌ནོག༌?”
JOH 4:21 ཡེ༌ཤུའི༌ མོལས༌, “བུ༌མོ༌ ངའེ༌ ཟེར༌ཅེས༌ཅན༌བོའ༌ དེན༌ཤེས༌, ཏུས༌པོ༌ ཉེ༌མོ༌ ཡོད༌, ནམ༌ ཁྱོ༌ཞ༌གུན༌ནི༌ རང༌ངི༌ ཡབ༌ དཀོན༌མཆོག༌ག༌ འི༌ རི༌བོའི༌ཀ༌ ཡ༌ ཡེ༌རུ༌ཤ༌ལེམ༌མི༌ ནང༌ང༌ མི༌ཅོལ༌།
JOH 4:22 ཁྱོ༌ཞའ༌ ས༌མར༌རི༌ཡཱ༌པ༌གུན༌ནི༌ ཅོལ༌ཁན༌བོ༌ ཤེས༌ས༌ མི༌དུག༌, ང༌ཞ༌གུན༌ནི༌ ཅོལ༌ཁན༌བོ༌ ཤེས༌སད༌ ཅིའ༌ཟེར༌ན༌ ཡ༌ཧུ༌དཱ༌པ༌གུན༌ གྱུད༌ཏེ༌ ཐར༌པ༌བོ༌ ལེབས༌ཏེ༌ ཨིན༌།
JOH 4:23 ཨིན༌ནའང༌ ཏུས༌པོ༌ ཉེ༌མོ༌ ཨིན༌ནོག༌, མ༌ཚད༌ ལེབ༌ ཚར༌ཏེ༌ ཨིན༌, ནམ༌ དེན༌བའེ༌ ཅོལ༌ཁན༌གུན༌ནི༌ ཡབ༌ དཀོན༌མཆོག༌ག༌ ཐུག༌ཉིད༌ དང༌ ཀྲང༌པོའེ༌ ཐོག༌ནེ༌ ཅོལ༌ཨིན༌, ཅིའ༌ཟེར༌ན༌ འི༌ཙོགས༌ལ༌ ཅོལ༌ཁན༌གུན༌ ཡབ༌བི༌ ཙལ༌ལ༌ ཛད༌དུག༌།
JOH 4:24 དཀོན༌མཆོག༌ ནི༌ ཐུག༌ཉིད༌ ཨིན༌ནོག༌, ཁོང༌ང༌ ཅོལ༌ཁན༌བོའེ༌ ཁོང༌ང༌ ཐུག༌ཉིད༌ དང༌ དེན༌བའེ༌ ཐོག༌ནེ༌ ཅོལ༌གོས༌།”
JOH 4:25 བུ༌མོ༌བོའེ༌ ཟེརས༌, “དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཕེབ༌ཤེས༌ཅན༌བོ༌ ང༌ གྱུས༌ཡོད༌, ཁོང༌ སྐྱོད༌ད༌ཅིག༌, ང༌ཞའ༌, ཅི༌ཚང༌མ༌ ཧ༌གོ༌ཅུག༌ག༌ ཛད༌ཨིན༌།”
JOH 4:26 ཡེ༌ཤུའི༌ བུ༌མོ༌བོའ༌ མོལས༌, “ཁྱོ༌རང༌ ཉམ༌པོ༌ སྤེ༌ར༌ ཏང༌ཁན༌ ངའ༌ ཏེན༌ན༌བོ༌ ཨིན༌།”
JOH 4:27 གཙོ༌བོ༌ ཡེ༌ཤུའི༌ ཏེ༌ཟུག༌ མོལ༌ ཚར༌ར༌ཅིག༌ ཁོང༌ངི༌ ལོབ༌ཕྲུགས༌གུན༌ ལོགས༌ཏེ༌ ལེབ༌། ཡེ༌ཤུའི༌ བུ༌མོ༌ཞིག༌ ཉམ༌པོ༌ ཞལ༌ཏའ༌ སལ༌ཨིན༌ ཐོང༌པ༌ ཁོང༌གུན༌ ཧ༌ལས༌, ཨིན༌ནའང༌ ཡེ༌ཤུའ༌, “ཉེ༌རང༌ང༌ ཅི༌ གོས༌སད༌?” ཡ༌ “ཅི༌ཕིའ༌ ཉེ༌རང༌ངི༌ ཏེ༌ བུ༌མོ༌བོའ༌ ཞལ༌ཏའ༌ སལ༌ལད༌?” ཟེར༌ཏེ༌ སུའིང༌ མ༌ཏྲིས༌།
JOH 4:28 བུ༌མོའེ༌ ཆུ༌ཁར༌བོ༌ ཏེ༌ནེ༌ཀ༌ བོར༌ཏེ༌ ཁོ༌རང༌ངི༌ གྲོང༌ཁྱེར༌ལ༌ བང༌ཏངས༌ཏེ༌ སོང༌ ཡང༌ མི༌གུན༌ལ༌ ཟེརས༌,
JOH 4:29 “ངའེ༌ མི༌ཚེའེ༌ ནང༌ང༌ ཅོས༌ཁན༌ ཚང༌མའ༌ ཤད༌ད༌ ཛད༌ཁན༌ནི༌ མི༌བོའ༌ ལྟའ༌ལ༌ ཡོང༌ཤིག༌། ཁོང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ན༌ཧེ༌?”
JOH 4:30 མི༌གུན༌ གྲོང༌ཁྱེར༌ནེ༌ བིང༌ཏེ༌ ཡེ༌ཤུ༌ ཡོད༌ས༌ ཆོགས༌ལ༌ ཡོངས༌།
JOH 4:31 ཏེན༌ན༌ ཏུས༌ལ༌ ཡེ༌ཤུའི༌ ལོབ༌ཕྲུགས༌གུན༌ནི༌ ཁོང༌ང༌ ཟེརས༌, “ལོབ༌བོན༌ལེ༌, ཅི༌ཏོང༌ཤིག༌ དོན༌ན༌ ཛད༌།”
JOH 4:32 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, “ངའ༌ ཟའ༌ཅེས༌སི༌ ཁར༌ཇི༌ཞིག༌ ཡོད༌, ཏེ༌བོའེ༌ སྐོར༌ལ༌ ཁྱོ༌ཞའ༌ ཅའང༌ གྱུས༌མེད༌།”
JOH 4:33 ཏེ༌བོ༌ ཚོར༌ར༌ཅིག༌ ལོབ༌ཕྲུགས༌གུན༌ནི༌ ཅིག༌ དང༌ ཅིག༌ག༌ ཟེརས༌, “སུ༌ཞིག༌གི༌ ཁོང༌ང༌ དོན༌ཏང༌ ཁྱོངས༌པིན༌ན༌ ཧེ༌?”
JOH 4:34 ཡེ༌ཤུའི༌ མོལས༌, “ངའེ༌ ཁར༌ཇི༌བོ༌ ནི༌ ང༌ ཀལ༌ལ༌ ཛད༌ཁན༌ནི༌ དཀོན༌མཆོག༌གི༌ ཐུགས༌ཐད༌གུན༌ ཅོ༌ཅེས༌ དང༌ ཁོང༌ངི༌ ཆག༌ལས༌ གུན༌ དྲན༌དྲ༌ གྲུབ༌ཅུག༌ཅེས༌པོ༌ ཨིན༌།
JOH 4:35 ཁྱོ༌ཞའ༌ ཟེར༌ལོ༌ཞིག༌ མེད༌ད༌, ‘སྟོན༌ཐོག༌ སྨིན༌ཅེས༌ལ༌ ཟླ༌ཝ༌ ཞི༌ ལུས༌ཏེ༌ ཨིན༌ནོག༌’? ངའེ༌ ཁྱོ༌ཞ༌གུན༌ལ༌ ཟེར༌རད༌, རང༌རང༌ངི༌ མིག༌ ཕེས༌ཏེ༌ ཞིང༌གུན༌ལ༌ ལྟོས༌ཤིག༌, ཏེ༌ སྟོན༌ཐོག༌གུན༌ ཚོས༌ཏེ༌ རྔབ༌ས༌ རན༌ ཚར༌ཏེ༌ དུག༌།
JOH 4:36 རྔབ༌ས༌ ཏང༌ཁན༌གུན༌ལ༌ ལ༌ཆ༌ གྱལ༌ལ༌ ཐོབ༌ཨིན༌ ཨིན༌ནོག༌, ཡང༌ མི༌གུན༌ ཐའ༌མེད༌པའེ༌ མི༌ཚེའེ༌ ནང༌ང༌ ཁྱོང༌ཅེས༌པོ༌ ཁོང༌ངི༌ རྔ༌ཁན༌ནི༌ ཁ༌ཟས༌པོ༌ ཨིན༌ནོག༌། ཏེ༌ནེ༌ ས༌འོན༌ ཏབ༌ཁན༌ དང༌ རྔབ༌ས༌ ཏང༌ཁན༌ ཉིས༌ཀོའ༌ ཙམ༌ཤིག༌གི༌ སྐྱིད༌པོ༌ མི༌ཡོང༌།
JOH 4:37 འི༌ ཟེར༌ལོ༌བོ༌ དེན༌བ༌ ཨིན༌ནོག༌, ‘ཅིག༌གི༌ ཏབ༌ཨིན༌, ཞན༌ཞིག༌གི༌ རྔ༌ཨེན༌།’
JOH 4:38 ངའེ༌ ཁྱོ༌ཞ༌གུན༌ ཁྱོ༌ཞའེ༌ མ༌ཏབ༌ཁན༌ནི༌ སྟོན༌ཐོག༌པོ༌ རྔའ༌ལ༌ ཀལ༌པིན༌། ཞན༌མ༌གུན༌ནི༌ རྩོན༌གྲུས༌ སྲན༌ཏྲེ༌ ཅོས༌ ཡང༌ ཁྱོ༌ཞ༌གུན༌ནི༌ ཁོང༌ངི༌ རྩོན༌གྲུས༌སི༌ བྲས༌བུ༌གུན༌ རྔས༌།”
JOH 4:39 ཏེ༌ བུ༌མོ༌བོའེ༌, “གཙོ༌བོ༌ ཡེ༌ཤུའི༌ ངའེ༌ མི༌ཚེའེ༌ ནང༌ང༌ ཅོས༌ཁན༌ ཚང༌མའ༌ ཤད༌ད༌ ཛདས༌” ཟེར༌ཨིན༌ སྤང༌པོ༌ ཏངས༌ པ༌སང༌ ས༌མར༌རི༌ཡཱ༌པ༌ མང༌པོ༌ཞིག༌གི༌ ཡེ༌ཤུའི༌ཀ༌ ཏད༌པ༌ ཅོས༌།
JOH 4:40 ཏེ༌ནེ༌ ས༌མར༌རི༌ཡཱ༌པ༌གུན༌ ཡེ༌ཤུ༌ ཡོད༌ས༌ ཡོངས༌ཏེ༌ ཇུ༌ཇུ༌ ཁོང༌གུན༌ ཉམ༌པོ༌ ཞུགས༌ས༌ ཛད༌ ཟེར༌ཏེ༌ ཞུ༌ཝ༌ ཕུལས༌པ༌, ཁོང༌ ཞག༌མ༌ ཉིས༌ ཏེ༌རུ༌ ཞུགས༌།
JOH 4:41 ཁོང༌ངི༌ ལབ༌ཞ༌གུན༌ ཚོར༌ཏེ༌ ཞན༌མི༌ མང༌པོ༌ཞིག༌གི༌ ཏད༌པ༌ ཅོས༌།
JOH 4:42 མི༌གུན༌ནི༌ ཏེ༌ བུ༌མོ༌བོའ༌ ཟེརས༌, “ང༌ཞའེ༌ ཁྱོ༌རང༌ངི༌ ཟེར༌ཁན༌ནི༌ སྤེ༌ར༌ ཚོར༌ཅེས༌ ཅིག༌པོ༌ མན༌པ༌, ང༌ཞ༌རང༌ངི༌ ནམ༌ཅོག༌ནེ༌ ཁོང༌ངི༌ མོལ༌ཁན༌གུན༌ ཚོར༌ཅེས༌པོའེ༌ ཏད༌པ༌ ཅོའད༌, ཡང༌ དེན༌བ༌ འི༌ མི༌བོ༌ ཇིག༌རྟེན༌པ༌གུན༌ནི༌ སྐྱབ༌གོན༌ ཨིན༌ཁན༌བོ༌ ང༌ཞའེ༌ ཤེས༌སད༌།”
JOH 4:43 ཞག༌ ཉིས༌སི༌ སྟིང༌ནེ༌ གཙོ༌བོ༌ ཡེ༌ཤུ༌ ཡང༌ གཱ༌ལིལ༌ལིའི༌ ཡུལ༌ཇོངས༌ ཆོགས༌ལ༌ ལོགས༌ཏེ༌ སྐྱོདས༌།
JOH 4:44 ༼ཡེ༌ཤུའི༌ སྔུན༌ལ༌ ལུང༌སྟོན༌པ༌ སུ༌ཞིག༌གའང༌ ཁོ༌རང༌ངི༌ ཡུལ༌ལི༌ ནང༌ང༌ རྩི༌ཝ༌ མི༌ཐོབ༌ མོལ༌ཏེ༌ ཨིན༌པིན༌༽
JOH 4:45 ཁོང༌ གཱ༌ལིལ༌ལིའ༌ ལེབ༌བ༌ཅིག༌, གཱ༌ལིལ༌ལི༌པ༌གུན༌ནི༌ ཁོང༌ང༌ གའ༌སུས༌ ཞུས༌ ཅིའ༌ཟེར༌ན༌ པེ༌སག༌གི༌ ཏུས༌ཆེན༌ ཟ༌ནེ༌ ཡེ༌རུ༌ཤ༌ལེམ༌མི༌ ནང༌ང༌ ཡེ༌ཤུའི༌ ཛད༌ཁན༌ ཚང༌མ༌ ཁོང༌གུན༌ནི༌ ཐོང༌།
JOH 4:46 ཡེ༌ཤུ༌ ལན༌ ཉིས༌པ༌ གཱ༌ལིལ༌ལིའི༌ ཡུལ༌ཇོངས༌སི༌ ཀ༌ནཱ༌ གྲོང༌ཁྱེར༌ལ༌ སྐྱོདས༌, ཀ༌རུ༌ ཁོང༌ངི༌ ཆུ༌ རྒུན༌ཆང༌ང༌ གྱུར༌ ཅུག༌ག༌ ཛད༌ཏེ༌ ཨིན༌པིན༌། ཀ༌ནཱའེ༌ ཉེ༌མོའ༌ ཀ༌ཕར༌ན༌ཧུམ༌ གྱལ༌སའེ༌ ནང༌ང༌ ལོན༌པོ༌ཞིག༌གི༌ བུ༌ཚའ༌ ཟུ༌མོ༌ ཡོངས༌ཏེ༌ ཡོད༌པིན༌།
JOH 4:47 ལོན༌པོའ༌ ཡེ༌ཤུ༌ ཡ༌ཧུ༌དཱ༌ནེ༌ གཱ༌ལིལ༌ལིའ༌ ལོགས༌ཏེ༌ སྐྱོད༌ཏོག༌ ཟེར༌ཏེ༌ ཚོར༌པ༌ ཁོ༌ ཡེ༌ཤུ༌ ཡོད༌ས༌ སོང༌ ཡང༌ ཇུ༌ཇུ༌ སྐྱོད༌ཏེ༌ ཁོའེ༌ བུ༌ཚ༌ ཤི༌ཀྱིས༌ ཡོད༌ཁན༌བོ༌ ཕན༌ཅུག༌ག༌ ཛད༌ ཟེར༌ཏེ༌ ཞུ༌ཝ༌ ཕུལས༌།
JOH 4:48 ཡེ༌ཤུའི༌ ལོན༌པོ༌བོའ༌ མོལས༌, “ཁྱོ༌ཞ༌གུན༌ནི༌ ཧ༌ལས༌ཤེས༌སི༌ ལྟས༌ དང༌ སྟགས༌ ཐོངས༌ཏེ༌ མ༌ནེ༌ ཏད༌པ༌ མི༌ཅོ༌།”
JOH 4:49 ལོན༌པོ༌བོའེ༌ ཟེརས༌, “གཙོ༌བོ༌ ངའེ༌ ཕྲུ༌གུ༌ ཤིའི༌ སང༌ སྔུན༌ལ༌ སྐྱོད༌ད༌ ཛད༌དའང༌།”
JOH 4:50 ཡེ༌ཤུའི༌ ཁོའ༌ མོལས༌, “ཏ༌ སོང༌ ཁྱོ༌རང༌ངི༌ བུ༌ཚ༌ མི༌ཤི༌།” ཁོའེ༌ ཡེ༌ཤུའི༌ མོལ༌ཁན༌བོའ༌ དེན༌ཤེས༌ ཡང༌ ཁང༌པ༌ ལོགས༌ཏེ༌ ཆ༌ཅེས༌ གོ༌ཟུག༌།
JOH 4:51 ཁོ༌ ལམ༌བར༌ལ༌ ཡོད༌ ཟ༌ནེ༌, ཁོའེ༌ ཡོག༌པོ༌གུན༌ ཁོའེ༌ བུ༌ཚ༌ ཟུ༌མོ༌ ཡོངས༌ཁན༌བོ༌ གྱལ༌ཏེ༌ ཁམ༌ཟང༌ གྱུར༌ཁན༌ནི༌ ནས༌ཚུལ༌ ཤད༌ད༌ལ༌ ཡོངས༌།
JOH 4:52 ལོན༌པོ༌བོའེ༌ ཁོའེ༌ བུ༌ཚ༌བོ༌ ཙམ༌ ཟོད༌ཤིག༌ག༌ གྱལ༌ ཟེར༌ཏེ༌ ཏྲིས༌པ༌ ཁོང༌གུན༌ནི༌ ཟེརས༌, “དའང༌ ཛར༌རེ༌ ཆུ༌ཚོད༌ ཅིག༌པ༌ ཟོད༌ཅིག༌ག༌ ཁོའེ༌ ཚད༌པོ༌ མེད༌ཁན༌ སོང༌།”
JOH 4:53 ཏེ༌ནེ༌ ཨ༌བ༌བོའ༌, ཏེན༌ན༌ ཏུས༌པོའེ༌ཀ༌ ཡེ༌ཤུའི༌ ཁོའ༌, “ཁྱོ༌རང༌ངི༌ བུ༌ཚ༌ མི༌ཤི༌” མོལ༌ཁན༌བོ༌ ཨིད༌ཏུ༌ ཡོངས༌། ཁོ༌ དང༌ ཁོའེ༌ ནང༌ཚང༌ གང༌པོའེ༌ ཡེ༌ཤུའི༌ཀ༌ ཏད༌པ༌ ཅོས༌།
JOH 4:54 ཏེ༌བོ༌ ཡ༌ཧུ༌དཱ༌ནེ༌ གཱ༌ལིལ༌ལིའ༌ སྐྱོད༌ཏེ༌ ཡེ༌ཤུའི༌ ཧ༌ལས༌ཤེས༌སི༌ ཛད༌པ༌ ཉིས༌པ༌བོ༌ ཛད༌ཏེ༌ ཨིན༌པིན༌།
JOH 5:1 ཏེ༌ སྟིང༌ནེ༌ ཡ༌ཧུ༌དཱ༌པ༌གུན༌ནི༌ ཏུས༌ཆེན༌ཞིག༌གི༌ ཏུས༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌ གྱལ༌ས༌ སྐྱོདས༌།
JOH 5:2 ཡེ༌རུ༌ཤ༌ལེམ༌མི༌ ནང༌ང༌ ལུག༌ ཟེར༌ཁན༌ནི༌ གྱས༌སྒོའེ༌ ཉེ༌མོའ༌ ཟིང༌ཞིག༌ ཡོད༌པིན༌, ཀ༌བོའ༌ ཨིབ༌རི༌པའེ༌ སྐད༌ལ༌ བེད༌སའི༌ད༌ ཟེར༌རད༌པིན༌, ཡང༌ ཏེ༌བོའ༌ ཐོག༌ ཡོད༌ཁན༌ནི༌ ཡབས༌ ལྔའེ༌ སྐོར༌ཏེ༌ ཡོད༌པིན༌།
JOH 5:3 ཏེ༌ ཡབས༌གུན༌ནི༌ཀ༌ ནད༌པ༌: ཁོངས༌ཁན༌, ཞ༌ར༌ དང༌ ཞ༌འོ༌ མང༌པོ༌ཞིག༌ ཉལ༌ཏེ༌ ཡོད༌པིན༌།
JOH 5:4 
JOH 5:5 ཏེ༌ཀ༌ ཁོངས༌ཏེ༌ ལོ༌ 38 ཆའ༌ཁན༌ནི༌ མི༌ཞིག༌ ཡོད༌པིན༌།
JOH 5:6 ཡེ༌ཤུའི༌ ཁོ༌ ཟིགས༌ཏེ༌ ལོ༌ མང༌པོ༌ཞིག༌ནེ༌ ཕར༌ལ༌ ཁོངས༌ཏེ༌ ཡོད༌ཁན༌བོ༌ ཁྱེན༌ན༌ ཛད༌པ༌ ཁོང༌ངི༌ ཁོའ༌ ཏྲིའ༌ ཛདས༌, “ཁྱོ༌རང༌ འི༌ ཟུ༌མོ༌བོ༌ནེ༌ ཕན༌ན༌ ཐད༌ད༌ རག༌ག༌?”
JOH 5:7 ཁོའེ༌ ཟེརས༌, “གཙོ༌བོ༌, ཟིང༌ངི༌ ཆུ༌བོ༌ སྲུག༌ ཟ༌ནེ༌ ང༌ འི༌ ནང༌ང༌ ཞུགས༌ཤེས༌ལ རོགས༌ ཅོ༌ཁན༌ སུའང༌ མེད༌, ཡང༌ ང༌ དུན༌ལ༌ ལེབ༌བི༌ སང༌ སྔུན༌ལ༌ ཡང༌སུ༌ཞིག༌ ཏེ༌ནང༌ང༌ ཞུགས༌ ཚར༌དུག༌།”
JOH 5:8 ཡེ༌ཤུའི༌ ཁོའ༌ མོལས༌, “ལོངས༌, རང༌ངི༌ མལ༌ཙ༌ ཁུར༌ ཡང༌ གྲུལ༌།”
JOH 5:9 ཁོ༌ ཏེན༌ན༌མལ༌ལ༌ གྱལ༌, རང༌ངི༌ ཉལ༌སྟན༌ ཁུར༌ཏེ༌ གྲུལ༌ཅེས༌ གོ༌ཟུག༌, ཏེ༌ ཛད༌པ༌བོ༌ ཤབ༌བད༌དི༌ ངལ༌ཚོའེ༌ ཞག༌ག༌ ཇུང༌ཏེ༌ ཨིན༌པིན༌།
JOH 5:10 ཏེན༌ན༌བོའེ༌ཕིའ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ གྱལ༌ཅུག༌ག༌ ཛད༌ཁན༌ནི༌ མི༌བོའ༌ ཟེརས༌, “དི༌རིང༌ ཤབ༌བད༌དི༌ ངལ༌ཚོའེ༌ ཞག༌ག༌ ཁྱོ༌རང༌ངི༌ ལས༌ ཅོ༌མི༌ཆོག༌། ཆོས༌ཁྲིམས༌ ནང༌ཞིན༌ ཁྱོ༌རང༌ང༌ ཉལ༌སྟན༌ ཁུར༌ཅེས༌སི༌ གོངས༌པ༌ མི༌ཏང༌།”
JOH 5:11 ཁོའེ༌ ཁོང༌གུན༌ལ༌ ལན༌ཏངས༌, “ང༌ ཕན༌ཅུག༌ག༌ ཛད༌ཁན༌ནི༌ མི༌བོའེ༌ མོལ༌ལ༌རག༌ ‘རང༌ངི༌ ཉལ༌སྟན༌ ཁུར༌ཏེ༌ གྲུལ༌།’”
JOH 5:12 ཁོང༌གུན༌ནི༌ ཁོའ༌ ཏྲིས༌, “ཁྱོ༌རང༌ང༌ ཉལ༌སྟན༌ ཁུར༌ཏེ༌ གྲུལ༌ ཟེར༌ཁན༌བོ༌ སུ༌ ཨིན༌ནོག༌?”
JOH 5:13 ཁོའ༌ ཁོ༌ ཕན༌ཅུག༌ཁན༌བོ༌ སུ༌ ཨིན༌ གྱུས༌ མེད༌པིན༌, ཅིའ༌ཞུ༌ན༌ ཡེ༌ཤུ༌ ཏེ༌རུ༌ མི༌ཚོགས༌སི༌ ནང༌ང༌ སྟོར༌ སོང༌།
JOH 5:14 སྟིང༌ནེ༌ ཡེ༌ཤུའི༌ ཁོ༌ ཆོད༌ཁང༌ངི༌ ནང༌ང༌ ཟིགས༌ ཡང༌ ཁོའ༌ མོལས༌, “ལྟོས༌ ཏ༌ ཁྱོ༌རང༌ གྱལ༌ཏེ༌ ཨིན༌ནོག༌། སྡིག༌པ༌ ཅོ༌ཅེས༌ ཕོང༌, ཏེ༌ མན༌ན༌ ཁྱོ༌རང༌ང༌ འི༌ སང༌ ཐུའ༌ ཇུང༌སྲིད༌ཅེས༌ ཨིན༌ནོག༌།”
JOH 5:15 ཏེ༌ནེ༌ ཁོ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ཀ༌ སོང༌ཏེ༌ ཟེརས༌, “ང༌ ཕན༌ཅུག༌ག༌ ཛདས༌ཁན༌བོ༌ ནི༌ ཡེ༌ཤུ༌ ཨིན༌ནོག༌།”
JOH 5:16 གཙོ༌བོ༌ ཡེ༌ཤུའི༌ ཏེན༌ན༌ ཙོགས༌སི༌ ཧ༌ལས༌ཤེས༌སི༌ ཛད༌པ༌གུན༌ ཤབ༌བད༌དི༌ ངལ༌ཚོའེ༌ ཞག༌ག༌ ཛད༌ པ༌སང༌, ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཁོང༌ངི༌ མོལ༌ཁན༌ དང༌ ཛད༌ཁན༌ གུན༌ནི༌ གྱབ༌གལ༌ ཅོ༌ཅེས༌ གོ༌ཟུག༌།
JOH 5:17 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཡབ༌ དཀོན༌མཆོག༌གི༌ ཏུས༌གྱུན༌ ཆག༌ལས༌ ཛད༌ཅེས༌པོའེ༌, ངེའང༌ ཅོའད༌།”
JOH 5:18 ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌སི༌ རྩོན༌གྲུས༌ མང༌ང༌ སྲན༌ཏྲེ༌ ཅོས༌, ཅིའ༌ཟེར༌ན༌ ཡེ༌ཤུའི༌ ཡ༌ཧུ༌དཱ༌པོའེ༌ ཤབ༌བད༌དི༌ ཞག༌གི༌ ཁྲིམས༌པོ༌ ཅག༌ཅེས༌, མ༌ཚད༌ ཁོང༌ངི༌ དཀོན༌མཆོག༌ག༌ ཁོང༌རང༌ངི༌ ཡབ༌ མོལ༌ཏེ༌ ཁོང༌རང༌ དཀོན༌མཆོག༌ དྲན༌དྲ༌ ཐེའ༌ཛདས༌།
JOH 5:19 ཡེ༌ཤུའི༌ ཁོང༌གུན༌ལ༌ ལན༌སལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, སྲས༌ ཁོ༌རང༌ ཅིག༌པོའ༌ ཅའང༌ ཅོ༌ཉན༌ན༌ མ༌ནོག༌། ཡབ༌ དཀོན༌མཆོག༌གི༌ ཛད༌ཁན༌ ཁོའེ༌ ཐོང༌ཁན༌བོ༌ མ༌ནེ༌ སྲས༌སི༌ ཅོའ༌ མ༌ནོག༌། ཡབ༌བི༌ ཅི༌ ཅོའ༌ ཛད༌ནའང༌ སྲས༌སིའང༌ ཅོའ༌ནོག༌།
JOH 5:20 ཡབ༌བི༌ སྲས༌ལ༌ ཅམས༌པ༌ ཛད༌ཅེས༌པོའེ༌ ཁོང༌ངི༌ ཆག༌ལས༌ ཚང༌མ༌ སྲས༌ལ༌ སྟན༌ན༌ ཛད༌ད༌ནོག༌། ཡབ༌བི༌ འི༌གུན༌ནི༌ སང༌ ཇིགས༌པོ༌ ལས༌གུན༌ སྲས༌ལ༌ ཅོ༌ཅེས༌ལ༌ སྟན༌ན༌ ཛད༌ཨིན༌, ཏེ༌ནེ༌ ཁྱོ༌ཞ༌གུན༌ མང༌ང༌ ཧ༌ལས༌ཨིན༌།
JOH 5:21 སྤེར༌ན༌ ཀ༌ཟུག༌ ཡབ༌བི༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཏེ༌ སྲོག༌ སལ༌ལད༌, ཏེན༌ན༌ ཙོགས༌ལ༌ སྲས༌སིའང༌ ཁོ༌རང༌ ཐད༌ཁན༌གུན༌ལ༌ མི༌ཚེ༌ ཏང༌ཨིན༌།
JOH 5:22 ཡབ༌བི༌ སུ༌ཞིག༌གའང༌ ཤགས༌ མ༌ཛད༌ད༌, ཤགས༌ ཅད༌ཅེས༌སི༌ ཝང༌ ཚང༌མ༌ སྲས༌ལ༌ སལ༌ལ༌ ཛད༌ཏེ༌ ཨིན༌།
JOH 5:23 ཏེ༌ ཝང༌བོ༌ སལ༌ལ༌ ཛད༌ཅེས༌སི༌ གྱུན༌ཚན༌བོ༌ ནི༌, ཀ༌ཟུག༌གི༌ ཡབ༌བ༌ མི༌ཚང༌མའེ༌ རྩི༌ཝ༌ ཅོའད༌ ཏེན༌ན༌ ཙོགས༌ལ༌ མི༌ཚང༌མའེ༌ སྲས༌ལའང༌ རྩི༌ཝ༌ ཏང༌ཅེས༌པོ༌ ཨིན༌ནོག༌། སྲས༌ལ༌ རྩི༌ཝ༌ མ༌ཅོ༌ཁན༌གུན༌ནི༌ ཏན༌ཏན༌ལ༌ སྲས༌ ཀལ༌ལ༌ ཛད༌ཁན༌ནི༌ ཡབ༌བའང༌ རྩི༌ཝ༌ མ༌ཅོའ༌ ཨིན༌ནོག༌།”
JOH 5:24 “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ ལོན༌གུན༌ལ༌ ཉན༌ཏེ༌ ང༌ ཀལ༌ཁན༌ནི༌ དཀོན༌མཆོག༌གི༌ཀ༌ ཏད༌པ༌ ཁྱོང༌ཁན༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌, ཡང༌ ཁོང༌གུན༌ནི༌ སྡིག༌པ༌གུན༌ལ༌ ཆད༌པ༌ མི༌ཕོག༌། ཁོང༌གུན༌ ཤི༌ཅེས༌ནེ༌ ཐར༌ཏེ༌ ཐའ༌མེད༌པའེ༌ མི༌ཚེ༌ ནང༌ང༌ ལེབས༌ཏེ༌ ཨིན༌ནོག༌།”
JOH 5:25 “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཏུས༌པོ༌ ལེབ༌ཅེས༌ ཡོད༌ མ༌ཚད༌ ལེབ༌ ཚར༌ཏེ༌ ཨིན༌, ནམ༌ སེམས༌ཉིད༌དི༌ ཐོག༌ནེ༌ ཤི༌ཁན༌གུན༌ནི༌, དཀོན༌མཆོག༌གི༌ སྲས༌སི༌ སྐད༌ ཚོར༌ཨིན༌། ཡང༌ ཚོར༌ཏེ༌ ཨིད༌ཤེས༌ ཅོ༌ཁན༌གུན༌ སོན༌ཏེའ༌ ལུས༌ཨིན༌།
JOH 5:26 ཀ༌ཟུག༌གི༌ ཡབ༌བ༌ སྲོག༌ སལ༌ཅེས༌སི༌ ཝང༌ ཡོད༌, ཏེན༌ན༌ ཙོགས༌ལ༌ ཁོང༌ངི༌ སྲས༌ལ༌ སྲོག༌ ཏང༌ཅེས༌སི༌ ཝང༌བོ༌ སལ༌ལ༌ ཛད༌ཏེ༌ ཨིན༌།
JOH 5:27 ཁོ༌ ནི༌ མི༌རིགས༌སི༌བུ༌ ཨིན༌ པ༌སང༌, ཡབ༌བི༌ ཁོའ༌ ཤགས༌ ཅད༌ཅེས༌སི༌ ཝང༌ཆ༌ སྟད༌ད༌ ཛད༌ཏེ༌ ཨིན༌།
JOH 5:28 ངའེ༌ ཟེར༌ཁན༌བོའ༌ ཧ༌ མ༌ལས༌ཤིག༌, ཏེ༌ཏུས༌པོ༌ ལེབ༌ཅེས༌ ཡོད༌, ནམ༌ ཤི༌ཁན༌ ཚང༌མའེ༌ སྤུར༌ཁང༌ངི༌ ནང༌ང༌ དཀོན༌མཆོག༌གི༌ སྲས༌སི༌ སྐད༌པོ༌ ཚོར༌ཏེ༌
JOH 5:29 སྤུར༌ཁང༌གུན༌ནེ༌ བིང༌ཏེ༌ ཡོང༌ཨིན༌། ལས༌ ཟང༌པོ༌ ཅོ༌ཁན༌གུན༌ ཐའ༌མེད༌པའེ༌ མི༌ཚེ༌ ཕིའ༌, ཡང༌ ངན༌པ༌ ཅོ༌ཁན༌གུན༌ ཐའ༌མེད༌པའེ༌ ཆད༌པའེ༌ ཕིའ༌ ལང༌ཨིན༌།
JOH 5:30 ངའ༌ ང༌རང༌ང༌ ཅའང༌ ཅོ༌ མི༌ཉན༌, དཀོན༌མཆོག༌གི༌ མོལ༌ཁན༌ ནང༌ཞིན༌ལ༌ ཤགས༌ ཏང༌ངད༌, ཡང༌ ངའེ༌ ཤགས༌གུན༌ནི༌ ཀྲང༌པོ༌ ཨིན༌ ཅིའ༌ཟེར༌ན༌ ངའེ༌ ང༌རང༌ ཐད༌ཁན༌ ནང༌ཞིན༌ མན༌པ༌, ང༌ ཀལ༌ལ༌ ཛད༌ཁན༌ནི༌ ཡབ༌བི༌ ཐུགས༌ཐད༌ ནང༌ཞིན༌ ཅོའད༌།”
JOH 5:31 གཙོ༌བོ༌ ཡེ༌ཤུའི༌ ཏ༌རུང༌ངའང༌ མོལས༌, “ཀལ༌ཏེས༌ ངའེ༌ ང༌རང༌ངི༌ སྐོར༌ལ༌ སྤང༌པོ༌ ཏང༌ངད༌ན༌ ངའེ༌ སྤང༌པོ༌བོའ༌ ཞན༌མ༌གུན༌ དེན༌ མི༌ཤེས༌།
JOH 5:32 ཞན༌མ༌ཞིག༌གི༌ ངའེ༌ སྐོར༌ལ༌ སྤང༌པོ༌ སལ༌ལད༌, ཡང༌ ང༌ གྱུས༌ཡོད༌ ཁོང༌ངི༌ ངའེ༌ སྐོར༌ལ༌ སལ༌ཁན༌ནི༌ སྤང༌པོ༌ ཀྲང༌པོ༌ ཨིན༌།
JOH 5:33 ཁྱོ༌ཞའེ༌ ཡོ༌ཧཱ༌ནན༌ནི༌ཀ༌ མི༌གུན༌ ཏྲིའ༌ལ༌ ཀལས༌པ༌, ཁོང༌ངི༌ ངའེ༌ སྐོར༌ལ༌ དེན༌བའེ༌ སྤང༌པོ༌ ཏངས༌།
JOH 5:34 ང༌ མི༌གུན༌ནི༌ སྤང༌པོའ༌ རག༌ལས༌ཏེ༌ མེད༌, ཨིན༌ནའང༌ ཁྱོ༌ཞ༌གུན༌ལ༌ ཐར༌པ༌ ཐོབ༌ཅེས༌སི༌ ཕིའ༌ ཡོ༌ཧཱ༌ནན༌ནི༌ སྤང༌པོའེ༌ སྐོར༌ལ༌ ཤད༌དད༌།
JOH 5:35 ཡོ༌ཧཱ༌ནན༌ ནི༌ འོད༌ ལྡང༌ཤན༌ བར༌ཨིན༌ ཡོད༌ཁན༌ཞིག༌ ཨིན༌པིན༌, ཡང༌ ཁྱོ༌ཞ༌གུན༌ སྐབས༌སྟོགས༌ཤིག༌ ཏེ༌ འོད༌པོའེ༌ ལྡངས༌སི༌ ནང༌ང༌ དུགས༌ཏེ༌ ཐད༌པོ༌ ཅོས༌།
JOH 5:36 ངའེ༌ ལག༌ག༌ ཡོ༌ཧཱ༌ནན༌ནི༌ སྤང༌པོའེ༌ སང༌ ཇིགས༌པོ༌ སྤང༌པོ༌ཞིག༌ ཡོད༌, ཡབ༌ དཀོན༌མཆོག༌གི༌ ངའ༌ གྲུབ༌ཅུག༌ཅེས༌ལ༌ སྟད༌ད༌ ཛད༌ཁན༌ནི༌ ལས༌གུན༌ ངའེ༌ ཅོ༌ཨིན༌ ཡོད༌ ཡང༌ ཏེན༌ན༌ ལས༌གུན༌, ང༌ ཡབ༌བི༌ ཀལ༌ལ༌ ཛད༌ཁན༌བོའེ༌ སྤང༌པོ༌ ཨིན༌།
JOH 5:37 ང༌ ཀལ༌ལ༌ ཛད༌ཁན༌ནི༌ ཡབ༌བི༌, ངའེ༌ སྐོར༌ལ༌ སྤང༌པོ༌ སལ༌ཏེ༌ ཨིན༌། ཁྱོ༌ཞ༌གུན༌ནི༌ ཁོང༌ངི༌ སུང༌སྐད༌ མ༌ནེ༌ མ༌ཚོར༌ར༌ ཡ༌ ཁོང༌ངི༌ ཡིབས༌ མ༌ནེ༌ མ༌ཇལ༌ལ༌ ཨིན༌ནོག༌།
JOH 5:38 ཁོང༌ངི༌ ལོན༌ ཁྱོ༌ཞ༌གུན༌ནི༌ སྙིང༌ངི༌ ནང༌ང༌ ལུས༌ས༌ མི༌དུག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ང༌ དཀོན༌མཆོག༌གི༌ ཀལ༌ལ༌ ཛད༌ཁན༌བོའེ༌ཀ༌ དེན༌ མ༌ཤེས༌།”
JOH 5:39 “ཁྱོ༌ཞའེ༌ ཏམ༌པའེ༌ སུང༌རབས༌ལ༌ མ༌ ཞིབ༌སལ༌ ཉམ༌པོ༌ ལོབ༌ཇོང༌ ཅོ༌རུག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཏམ༌པའེ༌ སུང༌རབས༌ གྱུད༌ཏེ༌ ཐའ༌མེད༌པའེ༌ མི༌ཚེ༌ ཐོབ༌བ༌ནོག༌ སམ༌དུག༌། ཏེན༌ན༌ སུང༌རབས༌པོའེ༌ ངའེ༌ སྐོར༌ལ༌ སྤང༌པོ༌ ཏང༌ང༌ནོག༌།
JOH 5:40 ཏེ༌ནེའང༌ ངའེ༌ཀ༌ ཨིད༌ཤེས༌ ཅོས༌ཏེ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌ལ༌ ཁྱོ༌ཞའ༌ ཐད༌ད༌ མི༌དུག༌།”
JOH 5:41 “ང༌ ནི༌ མི༌གུན༌ནི༌ སྟོད༌པ༌ ཏང༌ཅེས༌པོའ༌ ཐད༌ད༌མེད༌,
JOH 5:42 ཨིན༌ནའང༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ དཀོན༌མཆོག༌གི༌ ཕིའ༌ ཅམས༌པ༌ མེད༌ཁན༌བོ༌ ང༌ གྱུས༌ཡོད༌།
JOH 5:43 ང༌ ང༌རང༌ངི༌ ཡབ༌བི༌ ཝང༌ཆའེ༌ ནང༌ང༌ ཡོང༌ནའང༌ ཁྱོ༌ཞ༌གུན༌ནི༌ ང༌ གའ༌སུས༌ མ༌ཅོས༌། ཀལ༌ཏེས༌ ཞན༌ཞིག༌ ཁོ༌རང༌ངི༌ ཝང༌ཆའེ༌ ནང༌ང༌ ཡོང༌ན༌ ཁྱོ༌ཞ༌གུན༌ནི༌ ཁོའ༌ གའ༌སུས༌ ཅོ༌ཨིན༌།
JOH 5:44 ཁྱོ༌ཞ༌གུན༌ནི༌ ཀ༌ཟུག༌གི༌ ངའེ༌ཀ༌ ཏད༌པ༌ ཁྱོང༌ཨིན༌, ནམ༌ ཁྱོ༌ཞ༌གུན༌ ཅིག༌ དང༌ ཅིག༌ནེ༌ སྟོད༌པ༌ ཐོབ༌ཅེས༌ལ༌ ཐད༌དུག༌, ཨིན༌ནའང༌ དཀོན༌མཆོག༌ ཅིག༌ཅིག༌པོའེ༌ སྟོད༌པ༌ ཐོབ༌ཅེས༌པོ༌ ཙལ༌ལ༌ མི༌དུག༌།”
JOH 5:45 “ཁྱོ༌ཞའེ༌ མ༌སམ༌ཤིག༌ ཡབ༌བི༌ སྐུན༌དུན༌ལ༌ ངའེ༌ ཁྱོ༌ཞ༌གུན༌ལ༌ སྐྱོན༌ ཀལ༌ཨིན༌། ཁྱོ༌ཞ༌གུན༌ལ༌ སྐྱོན༌ ཀལ༌ཁན༌བོ༌ ཁྱོ༌ཞ༌རང༌ངི༌ རེ༌ཝ༌ བོར༌ཁན༌ནི༌ མོ༌ཟེས༌ ཨིན༌ནོག༌།
JOH 5:46 ཀལ༌ཏེས༌ ཁྱོ༌ཞ༌གུན༌ནི༌ མོ༌ཟེས༌སི༌ཀ༌ ཏད༌པ༌ ཅོས༌པིན༌ན༌, ངའེ༌ཀའང༌ ཏད༌པ༌ ཅོས༌ཏེ༌ ཡོད༌གྲོ༌, ཅིའ༌ཟེར༌ན༌ ཁོང༌ངི༌ ངའེ༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌།
JOH 5:47 ཁྱོ༌ཞ༌གུན༌ནི༌ མོ༌ཟེས༌སི༌ བྲིའ༌ ཛད༌ཁན༌བོའ༌ ཨིད༌ མ༌ཤེས༌ པ༌སང༌, ངའེ༌ ཟེར༌ཁན༌གུན༌ལ༌ ཁྱོ༌ཞའེ༌ ཀ༌ཟུག༌གི༌ དེན༌ཤེས༌ཨིན༌།”
JOH 6:1 ཞག༌བན༌ཤིག༌གི༌ སྟིང༌ནེ༌ གཙོ༌བོ༌ ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛད༌ཏེ༌, གཱ༌ལིལ༌ལིའི༌ ཚོའེ༌ ཕར༌ཀའ༌ སྐྱོད༌ ཀ༌བོའ༌ ཏི༌བེ༌རི༌ཡཱས༌སི༌ ཚོའང༌ ཟེར༌ར༌ནོག༌།
JOH 6:2 མི༌ཚོགས༌ ཆེན༌མོ༌ཞིག༌ ཁོང༌ང༌ བྲངས༌ཏེ༌ ཡོངས༌, ཅིའ༌ཟེར༌ན༌ ཁོང༌གུན༌ནི༌ ཡེ༌ཤུའི༌ ནད༌པ༌ ཕན༌ཅུག༌ག༌ ཛད༌ཁན༌ནི༌ ལྟས༌གུན༌ ཐོང༌ཏེ༌ ཨིན༌པིན༌།
JOH 6:3 ཡེ༌ཤུ༌ རིའ༌ ཛགས༌ཏེ༌ སྐྱོད༌ཏེ༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ སའེ༌ཀ༌ ཞུགས༌།
JOH 6:4 ཡ༌ཧུ༌དཱ༌པའེ༌ པེ༌སག༌གི༌ ཏུས༌ཆེན༌ ཉེ༌མོ༌ ཡོད༌པིན༌།
JOH 6:5 ཡེ༌ཤུའི༌ ཨུ༌ སྟགས༌པ༌ མི༌ཚོགས༌ ཆེན༌མོ༌ ཁོང༌ ཆོགས༌ལ༌ ཡོང༌ཨིན༌ ཟིགས༌ ཡང༌ ཁོང༌ངི༌ ཕི༌ལིབ༌བ༌ མོལས༌, “འི༌ མི༌ཚང༌མ༌ ཟའ༌ལ༌ ཏང༌ཅེས༌སི༌ ཏ༌གི༌ ང༌དང༌ངི༌ ཀ༌ནེ༌ ཉོ༌ཨིན༌།”
JOH 6:6 ཡེ༌ཤུའི༌ ཁོའེ༌ ཅི༌ ཟེར༌དུག༌ ལྟ༌ཅེས༌ལ༌ ཏེ༌བོ༌ ཏྲིའ༌ ཛདས༌, ཅིའ༌ཟེར༌ན༌ ཁོང༌ངི༌ ཅོའ༌ ཛད༌ཅེས༌པོ༌ ཁོང༌ང༌ ཐུག༌གྱུས༌ ཡོད༌པིན༌།
JOH 6:7 ཕི༌ལིབ༌བི༌ ཁོང༌ང༌ ཟེརས༌, “ཀལ༌ཏེས༌ ཞག༌མ༌ ཉིབ༌གྱའེ༌ ལ༌ཆའེ༌ པེ༌ནེའ༌ ཏ༌གི༌ ཉོ༌ནའང༌ འི༌ མི༌ཚང༌མ༌ལ༌ ཁམ༌བུ༌ རེ༌རེ༌ ཏ༌གི༌ མི༌ཐོབ༌།”
JOH 6:8 ཡེ༌ཤུའི༌ ཡང༌ ལོབ༌ཕྲུགས༌ ཅིག༌, ཤི༌མོན༌ པི༌ཏྲར༌རི༌ ནོ༌ ཨེན༌གྲིའུ༌འི༌ ཁོང༌ང༌ ཟེརས༌,
JOH 6:9 “འི༌ཀ༌ ཕྲུ༌གུ༌ཞིག༌གི༌ ལག༌ག༌ ནས༌སའེ༌ ཏ༌གི༌ ལྔ༌ དང༌ ཉ༌ ཆུ༌ངུན༌ ཉིས༌ དུག༌, ཨིན༌ནའང༌ ཏེ༌བོའེ༌ འི༌ཟམ༌ཤིག༌གི༌ མིའ༌ ཅི༌ ཅོ༌ཨིན༌?”
JOH 6:10 ཡེ༌ཤུའི༌ མོལས༌, “མི༌གུན༌ སའེ༌ཀ༌ དུག༌ཅུག༌།” ཏེ༌རུ༌ སྤང༌ སྔོན༌པོ༌ མང༌པོ༌ ཡོད༌པིན༌ མི༌ཚང༌མ༌ སའེ༌ཀ༌ དུགས༌, ཏེ༌ མི༌ཚོགས༌སི༌ ནང༌ང༌ བུ༌ཚའ༌ ལྡན༌ཁན༌ ཅིག༌པོ༌ སྟོང༌ལྔ༌ ཟམ༌ཤིག༌ ཡོད༌པིན༌།
JOH 6:11 ཡེ༌ཤུའི༌ ཏ༌གི༌གུན༌ ཆག༌ག༌ ནམས༌ ཡང༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌, དུགས༌ཏེ༌ ཡོད༌ཁན༌ ཚང༌མ༌ལ༌ རང༌རང༌ངི༌ སྒོས༌དོམ༌ ནང༌ཞིན༌ བགོས༌ཏེ༌ ཏང༌ང༌ སལས༌, ཏེན༌ན༌ ཙོགས༌ ཉ༌གུན༌ ཉམ༌པོ༌ ཛདས༌།
JOH 6:12 ཁོང༌ ཚང༌མ༌ ཟོས༌ཏེ༌ ཚིམས༌ས༌ཅིག༌, ཡེ༌ཤུའི༌ ལོབ༌ཕྲུགས༌གུན༌ལ༌ མོལས༌, “གོད༌ལ༌ ཅའང༌ མི༌ཆ༌ཅེས༌སི༌ ཕིའ༌ ལག༌མ༌གུན༌ ལྡུས༌ཏེ༌ ཁྱོང༌།”
JOH 6:13 ཏེ༌ནེ༌ མི༌གུན༌ནི༌ ནས༌སི༌ ཏ༌གི༌ ལྔའེ༌ ཀ༌ནེ༌ ཟོས༌ཏེ༌ ལག༌མ༌ བོར༌ཁན༌ ཁོང༌གུན༌ནི༌ ལྡུས༌པ༌ པག༌ཙེ༌ རྕུག༌ཉིས༌ གང༌།
JOH 6:14 མི༌གུན༌ནི༌ ཁོང༌ངི༌ ཧ༌ལས༌ཤེས༌སི༌ ལྟས༌པོ༌ ཐོང༌ང༌ཅིག༌, “ཏན༌ཏན༌ལ༌ ང༌དང༌ སྲུངས༌ཏེ༌ ཡོད༌ཁན༌ནི༌ ལུང༌སྟོན༌པ༌, འིན༌ན༌བོ༌ ཨིན༌ནོག༌” ཟེརས༌།
JOH 6:15 ཁོང༌གུན༌ནི༌ ཡེ༌ཤུ༌ ཟུམས༌ཏེ༌ ཝང༌ ཉམ༌པོ༌ ཁོ༌རང༌གུན༌ནི༌ གྱལ༌པོའ༌ སྐོ༌ཅེས༌པོ༌ ཁོང༌ངི༌ ཁྱེན༌ པ༌སང༌ ཅུབ༌ཅད༌ཏེ༌ མི༌ཚོགས༌སི༌ ནང༌ནེ༌ བིང༌ཏེ༌ ཁོང༌རང༌ ཅིག༌པོ༌ རི༌ཀ༌ ཛགས༌ཏེ༌ སྐྱོདས༌།
JOH 6:16 མུན༌ཅུ༌རུབ༌བ༌ཅིག༌ ཁོང༌ངི༌ ལོབ༌ཕྲུགས༌གུན༌ ཐུར༌ལ༌ བབས༌ཏེ༌ ཚོའེ༌ ཆོགས༌ལ༌ སྐྱོདས༌,
JOH 6:17 ཡང༌ ཚོའེ༌ ཕར༌ཀའ༌ ཀ༌ཕར༌ན༌ཧུམ༌མི༌ གྱལ༌ས༌ ལོགས༌ཏེ༌ ཆ༌ཅེས༌ལ༌ གྲུ༌ཟིང༌ངི༌ ནང༌ང༌ ཞོནས༌། ཏ༌ མུན༌ཅུ༌རུབས༌ཏེ༌ ཡོད༌པིན༌ ཡང༌ གཙོ༌བོ༌ ཡེ༌ཤུ༌ ཁོང༌གུན༌ ཉམ༌པོ༌ མ༌སྐྱོད༌ད༌ ཨིན༌པིན༌།
JOH 6:18 ཧུན༌མེད༌ལ༌ གྱ༌ཚོའེ༌ ནང༌ང༌ ལུང༌རག༌ ཡོངས༌ཏེ༌ ཆུལ༌བག༌ ཀྲག༌པོ༌ ལངས༌།
JOH 6:19 གྲུ༌ཟིང༌བོ༌ ཚོའེ༌ ཐའ༌མ༌ནེ༌ ཀི༌ལོ༌མི༌ཀྲར༌ ལྔ༌ ཡ༌ དྲུག༌ ཟམ༌ཤིག༌ ཐག༌རིང༌ང༌ ལེབས༌ཏེ༌ ཡོད༌ ཟ༌ནེ༌ ལོབ༌ཕྲུགས༌གུན༌ནི༌ ཡེ༌ཤུ༌ གྲུ༌ཟིང༌ ཆོགས༌ལ༌ ཆུའི༌ཀ༌ ཞབ༌གྲུལ༌ལ༌ སྐྱོད༌ད༌ ཐོང༌ཏེ༌ མ༌སྲན༌ཏྲེ༌ ཇིགས༌།
JOH 6:20 ཨིན༌ནའང༌ ཡེ༌ཤུའི༌ ཁོང༌གུན༌ལ༌ བོད༌ད༌ ཛད༌ཏེ༌ མོལས༌, “ཇིགས༌ མ༌ཇིགས༌ ང༌ ཨིན༌།”
JOH 6:21 ཏེ༌ནེ༌ ཁོང༌གུན༌ནི༌ ཡེ༌ཤུ༌ གྲུ༌ཟིང༌ངི༌ ནང༌ང༌ སྐྱོད༌ཅུགས༌, ཁོང༌གུན༌ནི༌ གྲུ༌ཟིང༌བོ༌ ཏེན༌ན༌མལ༌ལ༌ འ༌ངོ༌ལྡོའི༌ ཕར༌ཀ༌ ལེབ༌ ཀ༌རུ༌ ཁོང༌གུན༌ ཆ༌ཅེས༌ ཨིན༌པིན༌།
JOH 6:22 སྟིང༌མ༌ཞག༌པོ༌ ཚོའེ༌ ཕར༌ཀ༌ དུགས༌ཏེ༌ ཡོད༌ཁན༌ནི༌ མི༌ཚོགས༌པོའ༌ ཏེ༌རུ༌ གྲུ༌ཟིང༌ ཅིག༌ཅིག༌ མ༌ནེ༌ མེད༌ཁན༌ ཡང༌ ཡེ༌ཤུ༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཏེ༌ གྲུ༌ཟིང༌ངི༌ ནང༌ང༌ མ༌སྐྱོད༌ཁན༌བོ༌ གྱུས༌སོང༌།
JOH 6:23 ཏེ༌ནེ༌ ཏི༌བེ༌རི༌ཡཱས༌སི༌ གྱལ༌ས༌ནེ༌ ཞན༌ གྲུ༌ཟིང༌ རིག༌ ལེབས༌ཏེ༌ ཏེན༌ན༌ ནས༌ས༌བོའ༌ དུགས༌, ཀ༌རུ༌ གཙོ༌བོའེ༌ དོན༌ཀྱིར༌རི༌ ཕིའ༌ ཐུག༌རྗེ༌ཆེ༌ ཕུལ༌ཏེ༌ ཡང༌ མི༌ཚོགས༌གུན༌ནི༌ ཟོས༌ཏེ༌ ཨིན༌པིན༌།
JOH 6:24 མི༌ཚོགས༌སི༌ ཡེ༌ཤུ༌ ཡ༌ ཁོང༌ངི༌ ལོབ༌ཕྲུགས༌གུན༌ ཏེ༌ཀ༌ མེད༌ཁན༌བོ༌ ཧ༌གོའ༌ཅིག༌, ཁོང༌གུན༌ གྲུ༌ཟིང༌གུན༌ནི༌ ནང༌ང༌ ཞོན༌ཏེ༌, ཀ༌ཕར༌ན༌ཧུམ༌མི༌ གྱལ༌ས༌ ཡེ༌ཤུ༌ ཙལ༌ལ༌ སོང༌།
JOH 6:25 ཚོའེ༌ ཕར༌ཀ༌ མི༌ཚོགས༌ལ༌ གཙོ༌བོ༌ ཡེ༌ཤུ༌ ཐོབ༌བ༌ཅིག༌ ཟེརས༌, “ལོབ༌བོན༌ལེ༌, ཉེ༌རང༌ འི༌ཀ༌ ནམ༌ སྐྱོད༌པིན༌?”
JOH 6:26 ཡེ༌ཤུའི༌ ཁོང༌གུན༌ལ༌ ལན༌སལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཁྱོ༌ཞའེ༌ ངའེ༌ ཧ༌ལས༌ཤེས༌སི༌ ཛད༌པ༌གུན༌ ཧ༌གོ༌ཅེས༌པོའེ༌ མན༌པ༌ ངའེ༌ ཁྱོ༌ཞའ༌ ཟའ༌ཅེས༌ལ༌ ཏ༌གི༌ ཏངས༌ པ༌སང༌ ང༌ ཙལ༌ཏེ༌ ཨིན༌ནོག༌།
JOH 6:27 རུལ༌ཅེས༌ཅན༌ མན༌པ༌, ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཟན༌ ཙལ༌ཅེས༌ལ༌ རྩོན༌གྲུས༌ ཅོ༌ཤིག༌, ཏེ༌བོ༌ མི༌རིགས༌སི༌བུའི༌ ཁྱོ༌ཞ༌གུན༌ལ༌ ཏང༌ཨིན༌ ཅིའ༌ཟེར༌ན༌ ཡབ༌ དཀོན༌མཆོག༌གི༌ ཏེ༌བོ༌ ཏང༌ཅེས༌སི༌ ཝང༌ཆ༌ ངའ༌ སལ༌ལ༌ ཛད༌ཏེ༌ ཨིན༌།”
JOH 6:28 ཁོང༌གུན༌ནི༌ ཡེ༌ཤུའ༌ ཟེརས༌, “དཀོན༌མཆོག༌ ཐུགས༌ཐད༌ ཅུག༌ཅེས༌ལ༌ ང༌ཞའེ༌ ཅི༌ ལས༌ རིག༌ ཅོ༌གོས༌?”
JOH 6:29 ཡེ༌ཤུའི༌ ཁོང༌གུན༌ལ༌ མོལས༌, “དཀོན༌མཆོག༌ ཐུགས༌ཐད༌ཁན༌ནི༌ ལས༌པོ༌ ནི༌ ཁོང༌ངི༌ ཀལ༌ལ༌ ཛད༌ཁན༌བོའེ༌ཀ༌ ཏད༌པ༌ ཅོ༌ཅེས༌པོ༌ ཨིན༌ནོག༌།”
JOH 6:30 ཏེ༌ནེ༌ ཁོང༌གུན༌ནི༌ ཡེ༌ཤུའ༌ ཟེརས༌, “ཉེ༌རང༌ངི༌ ཅི༌ ཅོའ༌ ཛད༌ཨིན༌? ང༌ཞའེ༌ ཉེ༌རང༌ངི༌ཀ༌ ཏད༌པ༌ ཁྱོང༌ཅེས༌ལ༌ ཉེ༌རང༌ངི༌ ང༌ཞའ༌ ཧ༌ལས༌ཤེས༌སི༌ སྟགས༌ ཀ༌ཟུག༌ཤིག༌ སྟན༌ན༌ ཛད༌ཨིན༌?
JOH 6:31 སྤེར༌ན༌ ང༌ཞའེ༌ ཕ༌མེས༌པོ༌གུན༌ནི༌ རི༌སྟོང༌ངི༌ ནང༌ང༌ མན༌ན༌ ཟེར༌ཁན༌ནི༌ ཏ༌གི༌ ཟོས༌, སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, ‘མོ༌ཟེས༌སི༌ ཁོང༌གུན༌ལ༌ ནམ༌ཁའ༌ནེ༌ ཟའ༌ཅེས༌ལ༌ ཏ༌གི༌ སལས༌།’”
JOH 6:32 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཏེ༌ ཏ༌གི༌གུན༌ ནམ༌ཁའ༌ནེ༌ ཁྱོ༌ཞའེ༌ ཕ༌མེས༌པོ༌གུན༌ལ༌ མོ༌ཟེས༌ མན༌པ༌, ངའེ༌ ཡབ༌བི༌ སལ༌ལ༌ ཛད༌ཏེ༌ ཨིན༌པིན༌, ཁོང༌ངི༌ ནམ༌ཁའ༌ནེ༌ དེན༌བའེ༌ ཏ༌གི༌བོ༌ སལ༌ལ༌ ཛད༌ད༌ནོག༌།
JOH 6:33 དཀོན༌མཆོག༌གི༌ ཏ༌གི༌ ནི༌ ནམ༌ཁའ༌ནེ༌ ཡོངས༌ཏེ༌ ཇིག༌རྟེན༌པ༌གུན༌ལ༌ ཚེ༌ སལ༌ཁན༌བོ༌ ཨིན༌།”
JOH 6:34 ཁོང༌གུན༌ནི༌ ཟེརས༌, “གཙོ༌བོ༌ལེ༌, འི༌ ཏ༌གི༌བོ༌ ང༌ཞའ༌ ཏུས༌གྱུན༌ སལ༌ལ༌ ཛད༌།”
JOH 6:35 ཡེ༌ཤུའི༌ ཁོང༌གུན༌ལ༌ མོལས༌, “ང༌ ནི༌ ཚེ༌ ཏང༌ཁན༌ནི༌ ཏ༌གི༌ ཨིན༌། ངའེ༌ཀ༌ ཡོང༌ཁན༌གུན༌ མ༌ནེ༌ མི༌སྟོགས༌, ཡང༌ ངའེ༌ཀ༌ ཏད༌པ༌ ཅོ༌ཁན༌གུན༌ མ༌ནེ༌ མི༌སྐོམས༌།
JOH 6:36 ཨིན༌ནའང༌ ཀ༌ཟུག༌ ངའེ༌ ཁྱོ༌ཞ༌གུན༌ལ༌ ཟེར༌པིན༌, ཁྱོ༌ཞ༌གུན༌ནི༌ ངའེ༌ ལས༌གུན༌ ཐོང༌ཏེའང༌ ཏད༌པ༌ མ༌ཅོས༌།
JOH 6:37 ཡབ༌བི༌ ང༌ སལ༌ལ༌ ཛད༌ཁན༌ ཚང༌མ༌ ངའེ༌ཀ༌ ཡོང༌ཨིན༌, ཡང༌ ངའེ༌ཀ༌ ཡོང༌ཁན༌གུན༌ ངའེ༌ མ༌ནེ༌ མི༌ཕང༌།
JOH 6:38 ང༌རང༌ངི༌ དོད༌པ༌ མན༌པ༌ ང༌ ཀལ༌ལ༌ ཛད༌ཁན༌ ངའེ༌ ཡབ༌བི༌ ཐུག༌གོངས༌གུན༌ གྲུབ༌ཅུག༌ཅེས༌སི༌ ཕིའ༌ ང༌ ནམ༌ཁའ༌ནེ༌ ཡོག༌ག༌ ཡོངས༌པིན༌།
JOH 6:39 ང༌ ཀལ༌ལ༌ ཛད༌ཁན༌བོའེ༌ ཐུག༌གོངས༌ ནི༌, ཁོང༌ངི༌ ངའ༌ སལ༌ལ༌ ཛད༌ཁན༌ ཚང༌མའེ༌ ནང༌ནེ༌ ཅིག༌གའང༌ སྟོར༌ མ༌ཅུག༌ག༌, ཐའ༌མའེ༌ ཞག༌ག༌ ཁོང༌གུན༌ སོན༌ཏེའ༌ ལང༌ཅུག༌ཅེས༌པོ༌ ཨིན༌།
JOH 6:40 འོ༌ན༌ ངའེ༌ ཡབ༌བི༌ ཐུག༌གོངས༌ ནི༌, སྲས༌ ཐོང༌ཏེ༌ ཏད༌པ༌ ཅོ༌ཁན༌ ཚང༌མ༌ལ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌ ཡང༌ ངའེ༌ ཁོང༌གུན༌ ཐའ༌མའེ༌ ཞག༌ག༌ སོན༌ཏེའ༌ ལང༌ཅེས༌པོ༌ ཨིན༌།”
JOH 6:41 “ང༌ ནི༌ ནམ༌ཁའ༌ནེ༌ བབས༌ཁན༌ནི༌ ཏ༌གི༌བོ༌ ཨིན༌” མོལ༌ཅེས༌པོའེ༌ ཡ༌ཧུ༌དཱ༌པ༌གུན༌ནི༌ ཁོང༌ངི༌ སྐོར༌ལ༌ བུག༌ཅེས༌ གོ༌ཟུགས༌།
JOH 6:42 ཁོང༌གུན༌ནི༌ ཟེརས༌, “ཁོ༌ ཅི༌ ཡོ༌སེབ༌བི༌ བུ༌ཚ༌ ཡེ༌ཤུ༌ མ༌ནོག༌ག༌? ཁོའེ༌ ཕ༌མ༌གུན༌ ང༌དང༌གུན༌ནི༌ ཤེས༌ས༌ནོག༌། ཏེ༌ནེ༌ ཁོའེ༌ ཀ༌ཟུག༌ག༌ ཟེར༌ར༌ནོག༌, ‘ང༌ ནམ༌ཁའ༌ནེ༌ བབས༌ཏེ༌ ཨིན༌’?”
JOH 6:43 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཟེར༌ཁན༌གུན༌ནི༌ སྐོར༌ལ༌ ཁྱོ༌ཞ༌གུན༌ནི༌ སྐྱོན༌རྗོད༌ ཅོ༌ཅེས༌ ཕོང༌ཤིག༌།
JOH 6:44 སུ༌ཞིག༌གའང༌ ངའེ༌ཀ༌ ཡོང༌ མི༌ཉན༌ ནམ༌ཚོག༌པ༌ ང༌ ཀལ༌ལ༌ ཛད༌ཁན༌ནི༌ ཡབ༌བི༌ ཁོ༌ ངའེ༌ཀ༌ ཁྱོང༌ང༌ མི༌ཛད༌, ཡང༌ ངའེ༌ ཁོ༌ ཐའ༌མའེ༌ ཞག༌ག༌ སོན༌ཏེའ༌ ལང༌ཨིན༌།
JOH 6:45 ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཏེ༌ དུག༌, ‘དཀོན༌མཆོག༌གི༌ ཁོང༌ ཚང༌མ༌ལ༌ ལབ༌བ༌ ཛད༌ཨིན༌ ’ ཡབ༌བི༌ ལབ༌ཞ༌ ཉན༌ཏེ༌ ཁོང༌ངི༌ ཀ༌ནེ༌ ལོབས༌ཁན༌ནི༌ མི༌གུན༌ ངའེ༌ཀ༌ ཡོང༌ཨིན༌།
JOH 6:46 དཀོན༌མཆོག༌གི༌ ཆོགས༌ནེ༌ ཡོང༌ཁན༌བོ༌ མན༌པ༌ སུ༌ཞིག༌གིའང༌ ཡབ༌ མ༌ཇལ༌, ཁོ༌ ཅིག༌པོའེ༌ ཡབ༌ ཇལ༌ཏེ༌ ཨིན༌།”
JOH 6:47 “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ཀ༌ ཏད༌པ༌ ཁྱོང༌ཁན༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཏེ༌ ཨིན༌།
JOH 6:48 ང༌ ནི༌ སྲོག༌ ཏང༌ཁན༌ནི༌ ཏ༌གི༌བོ༌ ཨིན༌།
JOH 6:49 ཁྱོ༌ཞའེ༌ ཕ༌མེས༌པོ༌གུན༌ནི༌ རི༌སྟོང༌ངི༌ ནང༌ང༌ མན༌ན༌ ཟེར༌ཁན༌ནི༌ ཏ༌གི༌ ཟོས༌ ཨིན༌ནའང༌ ཁོང༌གུན༌ ཤི༌།
JOH 6:50 འི༌ཀ༌ ནམ༌ཁའ༌ནེ༌ བབས༌ཁན༌ནི༌ ཏ༌གི༌བོ༌ ཡོད༌, འི༌ ཏ༌གི༌ ཟའ༌ཁན༌གུན༌ མ༌ནེ༌ མི༌ཤི༌།
JOH 6:51 འོ༌ན༌ ང༌ ནམ༌ཁའ༌ནེ༌ བབས༌ཁན༌ནི༌ ཚེ༌ ཏང༌ཁན༌ནི༌ ཏ༌གི༌བོ༌ ཨིན༌། ཀལ༌ཏེས༌ སུ༌ཞིག༌གི༌ འི༌ ཏ༌གི༌ ཀ༌ནེ༌ ཟའ༌ན༌, ཁོ༌ ཐའ༌མེད༌པ༌ སོན༌ཏེའ༌ ལུས༌ཨིན༌། འི༌ ཏ༌གི༌བོ༌ ངའེ༌ ཤ༌བོ༌ ཨིན༌, ཀ༌བོ༌ ངའེ༌ ཇིག༌རྟེན༌པ༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཕིའ༌ ཆོད༌པ༌ ཏང༌ཨིན༌།”
JOH 6:52 ཡ༌ཧུ༌དཱ༌པ༌གུན༌ནི༌ ཕྲོའ༌ ཟེར༌ཟེར༌ གོ༌ཟུགས༌ ཡང༌ ཁོང༌གུན༌ནི༌ ཟེརས༌, “འི༌ མི༌བོའེ༌ ཀ༌ཟུག༌གི༌ ང༌དང༌གུན༌ལ༌ ཁོའེ༌ ཤ༌ ཟའ༌ ཏང༌ང༌ནོག༌?”
JOH 6:53 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ནམ༌ཚག༌པ༌ ཁྱོ༌ཞ༌གུན༌ནི༌ མི༌རིགས༌སི༌བུའི༌ ཤ༌བོ༌ མི༌ཟའ༌, ཡང༌ ཁོའེ༌ ཁྲག༌པོ༌ མི༌ཐུང༌ ཁྱོ༌ཞ༌གུན༌ནི༌ ནང༌ང༌ དེན༌བའེ༌ མི༌ཚེ༌ མེད༌།
JOH 6:54 ངའེ༌ ཤ༌ ཟོས༌ཏེ༌ ངའེ༌ ཁྲག༌ ཐུང༌ཁན༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌། ཐའ༌མའེ༌ ཞག༌ག༌ ངའེ༌ ཁོང༌གུན༌ སོན༌ཏེའ༌ ལང༌ཨིན༌,
JOH 6:55 ཅིའ༌ཟེར༌ན༌ ངའེ༌ ཤ༌ དེན༌བའེ༌ ཟན༌ ཡང༌ ངའེ༌ ཁྲག༌ དེན༌བའེ༌ ཐུང༌ཅེས༌པོ༌ ཨིན༌།
JOH 6:56 ཡང༌ ངའེ༌ ཤ༌ ཟོས༌ཏེ༌ ངའེ༌ ཁྲག༌ ཐུང༌ཁན༌གུན༌ ངའེ༌ ནང༌ང༌ ཡང༌ ང༌ ཁོང༌གུན༌ནི༌ ནང༌ང༌ ནས༌ཏེ༌ ཡོད༌།
JOH 6:57 སྲོག༌ སལ༌ལ༌ ཛད༌ཁན༌ནི༌ ཡབ༌ ཀ༌བོའེ༌ ང༌ ཀལ༌ལ༌ ཛདས༌ ཁོང༌ངི༌ ཞས༌ཏེ༌ ང༌ སོན༌ཏེའ༌ ཨིན༌, ཏེན༌ན༌ ཙོགས༌ལ༌ སུ༌ཞིག༌གི༌ ངའེ༌ ཀ༌ནེ༌ ཟའ༌ན༌ ངའེ༌ ཞས༌ཏེ༌ ཁོ༌ སོན༌ཏེའ༌ ལུས༌ཨིན༌།
JOH 6:58 ང༌ ནམ༌ཁའ༌ནེ༌ བབས༌ཁན༌ནི༌ ཏ༌གི༌བོ༌ ཨིན༌། ཁྱོ༌ཞའེ༌ ཕ༌མེས༌པོ༌གུན༌ མན༌ན༌ ཟེར༌ཁན༌ནི༌ ཏ༌གི༌ ཟོས༌ཏེ༌ ཤི༌, ཨིན༌ནའང༌ འི༌ ཏ༌གི༌ ཟའ༌ཁན༌གུན༌ ཐའ༌མེད༌པ༌ སོན༌ཏེའ༌ ལུས༌ཨིན༌།”
JOH 6:59 ཡེ༌ཤུའི༌ ཀ༌ཕར༌ན༌ཧུམ༌མི༌ གྱལ༌སའེ༌ དུ༌ཁང༌ངི༌ ནང༌ང༌ ལབ༌ཞའ༌ སལ༌ ཟ༌ནེ༌ ཁོང༌ངི༌ ཏེ༌གུན༌ མོལས༌།
JOH 6:60 གཙོ༌བོ༌ ཡེ༌ཤུའི༌ ཞལ༌ཏ༌གུན༌ ཚོར༌ཏེ༌ ཁོང༌ངི༌ ལོབ༌ཕྲུགས༌ མང༌པོའེ༌ ཟེརས༌, “ཁོང༌ངི༌ ལབ༌ཞ༌གུན༌ མ༌ ཀགས༌པོ༌ དུག༌ སུའི༌ ཉན༌ཏེ༌ ཏེ༌བོའེ༌ཀ༌ གྲུལ༌ ཐུབ༌ཨིན༌?”
JOH 6:61 ལོབ༌ཕྲུགས༌གུན༌ནི༌ ཡེ༌ཤུའི༌ མོལ༌ཁན༌གུན༌ནི༌ གྱབ༌གལ༌ལ༌ ཟེར༌གྱུ༌ ཏང༌ཁན༌བོ༌ ཁོང༌ངི༌ ཁྱེན༌ པ༌སང༌, ཁོང༌གུན༌ལ༌ མོལས༌, “ངའེ༌ སྤེ༌ར༌ ཟེར༌ཁན༌གུན༌ ཁྱོ༌ཞའ༌ ཁམ༌ལོག༌ ཚོར༌ར༌?
JOH 6:62 ཀལ༌ཏེས༌ ཁྱོ༌ཞ༌གུན༌ནི༌ མི༌རིགས༌སི༌བུ༌ ནམ༌ཁའ༌ སྟག༌ག༌ལ༌ ཐོང༌ན༌ ཀ༌རུ༌ ཁོ༌ སྔུན༌ལ༌ ཡོད༌པིན༌, ཏེ༌ནེ༌ ཅི༌ སམ༌ཨིན༌?
JOH 6:63 དཀོན༌མཆོག༌གི༌ ཐུག༌ཉིད༌དི༌ ཐའ༌མེད༌པའེ༌ མི༌ཚེ༌ སལ༌ལ༌ནོག༌, མིའི༌ རྩོན༌གྲུས༌ གྱུད༌ཏེ༌ ཏེ༌བོ༌ ཐོབ༌ཅེས༌ མེད༌ཀྱག༌། ངའེ༌ ཁྱོ༌ཞའ༌ ཟེར༌ཁན༌གུན༌ དཀོན༌མཆོག༌གི༌ ཐུག༌ཉིད༌ནེ༌ ཨིན༌ ཡང༌ ཚེ༌ སལ༌ལ༌ནོག༌།
JOH 6:64 ཏེ༌ནེའང༌ ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ངའེ༌ཀ༌ ཏད༌པ༌ མ༌ཅོས༌།” ༼སུའི༌ ཁོང༌ངི༌ཀ༌ ཏད༌པ༌ མི༌ཅོ༌ ཡང༌ སུའི༌ ཁོང༌ང༌ ངོ༌ལོག༌ ཅོ༌ཅེས༌པོ༌ ཡེ༌ཤུའ༌ གོ༌མ༌ནེ༌ ཕར༌ལ༌ ཐུག༌གྱུས༌ ཡོད༌པིན༌།༽
JOH 6:65 ཡེ༌ཤུའི༌ མོལས༌, “ཏེན༌ན༌བོའེ༌ཕིའ༌ ངའེ༌ ཁྱོ༌ཞ༌གུན༌ལ༌ ཟེར༌པིན༌, སུ༌ཞིག༌གིའང༌ ངའེ༌ཀ༌ ཏད༌པ༌ ཁྱོང༌ མི༌ཉན༌ ནམ༌ཚོག༌པ༌ ངའེ༌ ཡབ༌བི༌ ཁོ༌ ངའ༌ མི༌སལ༌།”
JOH 6:66 ཏེ༌བོ༌ ཚོར༌ར༌ཅིག༌ ཁོང༌ངི༌ ལོབ༌ཕྲུགས༌ མང༌པོའེ༌ ཁོང༌ ཕངས༌ཏེ༌ ཁོང༌ངི༌ སྟིང༌རང༌ནེ༌ མ༌བྲངས༌།
JOH 6:67 ཏེ༌ནེ༌ ཡེ༌ཤུའི༌ ལོབ༌ཕྲུགས༌ རྕུག༌ཉིས༌པོའ༌ མོལས༌, “ཁྱོ༌ཞ༌གུན༌ནའང༌ ང༌ ཕངས༌ཏེ༌ ཆའ༌ ཐད༌ད༌ རག༌ག༌?”
JOH 6:68 ཤི༌མོན༌ པི༌ཏྲར༌རི༌ ཟེརས༌, “གཙོ༌བོ༌ལེ༌, ང༌ཞའ༌ སུའི༌ཀ༌ ཆའ༌? ཐའ༌མེད༌པའེ༌ མི༌ཚེ༌ སལ༌ཁན༌ནི༌ ཞལ༌ཏ༌ ཉེ༌རང༌ང༌ དུག༌།
JOH 6:69 ཉེ༌རང༌ དཀོན༌མཆོག༌གི༌ ཆོགས༌ནེ༌ སྐྱོད༌ཁན༌ནི༌ ཏམ༌པ༌ ཨིན༌ཁན༌བོ༌ ང༌ཞའ༌ ཨིད༌ཤེས༌ ཡང༌ གྱུས༌ཡོད༌།”
JOH 6:70 ཡེ༌ཤུའི༌ ལན༌སལས༌, “ཁྱོ༌ཞའ༌ རྕུག༌ཉིས༌པོ༌ ངའེ༌ ང༌རང༌ངི༌ ལོབ༌ཕྲུགས༌ག༌ མ༌ལྡམས༌ས༌? ཨིན༌ནའང༌ ཁྱོ༌ཞའེ༌ ཕྲོ༌ནེ༌ ཅིག༌ཅིག༌ རྡུད༌གུན༌ནི༌ གོ༌བའེ༌ ཝང༌ངི༌ ཡོག༌ག༌ དུག༌།”
JOH 6:71 ༼ཁོང༌ངི༌ ཤི༌མོན༌ ཀར༌ཡོད༌པའེ༌ བུ༌ཚ༌ ཡུ༌དཱའེ༌ སྐོར༌ལ༌ མོལ༌ཏེ༌ ཨིན༌ནོག༌, ཁོ༌ རྕུག༌ཉིས༌སི༌ ཕྲོ༌ནེ༌ ཅིག༌ ཨིན༌ཏེའང༌ སྟིང༌ནེ༌ ཡེ༌ཤུའ༌ ངོ༌ལོག༌ ཅོས༌ཏེ༌ ཨིན༌པིན༌།༽
JOH 7:1 ཏེ༌ སྟིང༌ནེ༌ གཙོ༌བོ༌ ཡེ༌ཤུ༌ གཱ༌ལིལ༌ལི༌ ཡུལ༌ཇོངས༌སི༌ ནས༌ས༌ མང༌པོའེ༌ ནང༌ང༌ སྐྱོདས༌། ཁོང༌ ཡ༌ཧུ༌དཱའེ༌ ཡུལ༌ཇོངས༌སི༌ ནང༌ང༌ སྐྱོད༌ཉིན༌ མེད༌པིན༌, ཅིའ༌ཞུ༌ན༌ ཏེ༌རུ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཁོང༌ སད༌ཅེས༌སི༌ སྐབས༌ ཙལ༌ལད༌པིན༌།
JOH 7:2 ཚེ༌ལེ༌ ནང༌ང༌ དུག༌ཅེས༌སི༌ ཡ༌ཧུ༌དཱ༌པའེ༌ ཏུས༌ཆེན༌ ཉེ༌མོ༌ ཡོད༌པིན༌།
JOH 7:3 ཡེ༌ཤུའི༌ ནོ༌གུན༌ནི༌ ཡེ༌ཤུའ༌ ཟེརས༌, “འི༌ནེ༌ བིང༌ཏེ༌ ཡ༌ཧུ༌དཱའེ༌ ཡུལ༌ཇོངས༌ལ༌ སྐྱོད༌, ཏེ༌ནེ༌ ཏེ༌རུ༌ ཡོད༌ཁན༌ནི༌ ལོབ༌ཕྲུགས༌གུན༌ནིའང༌ ཉེ༌རང༌ངི༌ ཧ༌ལས༌ཤེས༌སི༌ ཛད༌པ༌གུན༌ ཐོང༌ཉན༌ཨིན༌།
JOH 7:4 མིང༌ཅན༌ གྱུར༌ཅེས༌སི༌ དོད༌པ༌ ཡོད༌ཁན༌གུན༌ནི༌ ཨིབས༌ཏེ༌ ལས༌ ཅོའ༌ མ༌ནོག༌། ཀལ༌ཏེས༌ ཉེ༌རང༌ང༌ འི༌ཟུག༌ ཛད༌པ༌གུན༌ ཛད༌ཉན༌ནད༌ན༌ ཇིག༌རྟེན༌ གང༌པོའ༌ སྔོན༌ ཅུག༌གའང༌།”
JOH 7:5 ཁོང༌ངི༌ ནོ༌གུན༌ནིའང༌ ཁོང༌ངི༌ཀ༌ ཏད༌པ༌ མ༌ཅོས༌།
JOH 7:6 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ ཡེ༌རུ༌ཤ༌ལེམ༌མི༌ ནང༌ང༌ ནམ༌ ཆ༌ནའང༌ གྲིག༌ག༌ནོག༌, ཨིན༌ནའང༌ ངའེ༌ ཏུས༌པོ༌ ཏ༌རུང༌ མ༌ལེབ༌བ༌ཨིན༌།
JOH 7:7 ཁྱོ༌ཞ༌གུན༌ལ༌ ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌ ནཕ༌རད༌ མི༌ཅོ༌, ཨིན༌ནའང༌ ངའ༌ ནཕ༌རད༌ ཅོའ༌ནོག༌, ཅིའ༌ཟེར༌ན༌ ངའེ༌ ཁོང༌གུན༌ནི༌ ལས༌ ངན༌པ༌གུན༌ནི༌ སྐོར༌ལ༌ སྤང༌པོ༌ ཏང༌ངད༌།
JOH 7:8 ཁྱོ༌ཞ༌གུན༌ ཏུས༌ཆེན༌ལ༌ སོང༌ཤིག༌, ང༌ མི༌ཆ༌ ཅིའ༌ཟེར༌ན༌ ངའེ༌ ཏུས༌ ཏ༌རུང༌ མ༌ལེབ༌བ༌ཨིན༌།”
JOH 7:9 ཏེ༌བོ༌ མོལ༌ཏེ༌ ཡེ༌ཤུ༌ གཱ༌ལིལ༌ལིའི༌ ཡུལ༌ཇོངས༌ལ༌ ཞུགས༌ས༌ ཛདས༌།
JOH 7:10 ཨིན༌ནའང༌ ཁོང༌ངི༌ ནོ༌གུན༌ ཏུས༌ཆེན༌ལ༌ སོང༌ཏེ༌ སྟིང༌ནེ༌, སུའང༌ ཤེས༌ མ༌ཤུག༌ག༌ ཨིབས༌ཏེ༌ ཁོང༌ངའང༌ ཡེ༌རུ༌ཤ༌ལེམ༌མི༌ ནང༌ང༌ ཏུས༌ཆེན༌ལ༌ སྐྱོདས༌།
JOH 7:11 ཏེ༌རུ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཏུས༌ཆེན༌ནི༌ ཏུས༌ལ༌, “ཁོ༌ ཀ༌ནེ༌ དུག༌” ཟེར༌ཨིན༌ ཙལ༌ལད༌པིན༌།
JOH 7:12 ཏེ༌རུ༌ མི༌ཚོགས༌སི༌ ནང༌ང༌ ཁོང༌ངི༌ སྐོར༌ལ༌ ཤབ༌ཤུབ༌ ཏངས༌ཏེ༌ ཁ༌ཅིག༌གི༌, “ཁོང༌ ཟང༌པོ༌ ཨིན༌ནོག༌” ཡང༌ ཁ༌ཅིག༌གི༌, “ཁོའེ༌ མི༌གུན༌ལ༌ གོབ༌སྐོར༌ཏེ༌ ཨིན༌ནོག༌” ཟེརས༌།
JOH 7:13 ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཇིགས༌ པ༌སང༌, སུ༌ཞིག༌གིའང༌ ཁོང༌ང༌ སྟོད༌པ༌ ཚང༌མའེ༌ དུན༌ལ༌ ཏང༌ང༌ མེད༌པིན༌།
JOH 7:14 ཏུས༌ཆེན༌ རྩི༌ཅེས༌སི༌ ཏུས༌ ཕེད༌ ཟོད༌ཅིག༌ག༌, གཙོ༌བོ༌ ཡེ༌ཤུ༌ ཀེན༌ལ༌ ཆོད༌ཁང༌ང༌ སྐྱོད༌ཏེ༌ ལབ༌ཞ༌ སལ༌ཅེས༌ གོ༌ཟུག༌ ཛདས༌།
JOH 7:15 ཡ༌ཧུ༌དཱ༌པའེ༌ འུ༌སྐྱོང༌གུན༌ ཧ༌ལས༌ཏེ༌ ཟེརས༌, “ལོབ༌ཇོང༌ མ༌ནེ༌ མ༌ཐོབ༌ཁན༌ འི༌ མི༌བོ༌ འི༌ཟམ༌ ཡོན༌ཏན༌ཅན༌ཞིག༌ ཀ༌ཟུག༌ག༌ ཨིན༌ནོག༌?”
JOH 7:16 ཡེ༌ཤུའི༌ ལན༌སལས༌, “ངའེ༌ ལབ༌ཞ༌གུན༌ ང༌རང༌ངི༌ མན༌, ང༌ ཀལ༌ལ༌ ཛད༌ཁན༌ནི༌ དཀོན༌མཆོག༌གི༌ ཆོགས༌ནེ༌ ཨིན༌།
JOH 7:17 དཀོན༌མཆོག༌གི༌ ཐུག༌གོངས༌ ནང༌ཞིན༌ གྲུལ༌ལ༌ ཐད༌ཁན༌གུན༌ལ༌ ཧ༌གོའ༌ནོག༌, ངའེ༌ ལབ༌ཞ༌གུན༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ག༌ ཡ༌ ང༌ ང༌རང༌ངི༌ ཆོགས༌ནེ༌།
JOH 7:18 ཁོ༌རང༌ངི༌ ཝང༌ཆའེ༌ ནང༌ང༌ ཟེར༌ཁན༌བོའེ༌ རང༌སྟོད༌ ཙལ༌ཏེ༌ ཨིན༌ནོག༌, ཨིན༌ནའང༌ ཁོ༌ ཀལ༌ལ༌ ཛད༌ཁན༌བོའ༌ རྩི༌ཝ༌ ཙལ༌ཁན༌བོའེ༌ ཟུན༌ མ༌ཏང༌ང༌ ཀྲང༌པོ༌ ཟེར༌ར༌ནོག༌།
JOH 7:19 ཁྱོ༌ཞའེ༌ ཕ༌མེས༌པོ༌གུན༌ལ༌ མོ༌ཟེས༌སི༌ བཀའ༌ཁྲིམས༌གུན༌ སལ༌ཏེ༌ མན༌པིན༌ན༌? ཨིན༌ནའང༌ ཁྱོ༌ཞའ༌ སུ༌ཞིག༌གིའང༌ ཏེ༌བོའ༌ ཁའ༌ མ༌ཉནས༌། ཁྱོ༌ཞ༌གུན༌ནི༌ ཅིའ༌ ང༌ སད༌ཅེས༌སི༌ རྩོན༌གྲུས༌ ཅོའད༌?”
JOH 7:20 མི༌ཚོགས༌སི༌ ལན༌ཏངས༌, “ཁྱོ༌རང༌ངི༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌། སུའི༌ ཁྱོ༌རང༌ སད༌ཅེས༌སི༌ རྩོན༌གྲུས༌ ཅོ༌རུག༌?”
JOH 7:21 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཧ༌ལས༌ཤེས༌ ཛད༌པ༌ཞིག༌ ཅོས༌པ༌ ཁྱོ༌ཞ༌གུན༌ ཧ༌ལས༌།
JOH 7:22 ཨིན༌ནའང༌ མོ༌ཟེས༌སི༌ སུན༌ནད༌ ཅོས༌ ཟེར༌ཁན༌ ནང༌ཞིན༌ ༼ངོས༌པོའ༌ ཁྱོ༌ཞའེ༌ ཕ༌མེས༌པོ༌གུན༌ནི༌ མོ༌ཟེས༌སི༌ སང༌ སྔུན༌ལ༌ ཏེ༌ ཚིར༌བོ༌ གོ༌ཟུགས༌ཏེ༌ ཨིན༌པིན༌༽, ཁྱོ༌ཞ༌གུན༌ནི༌ ཤབ༌བད༌དི༌ ངལ༌ཚོའེ༌ ཞག༌ག༌ ཕྲུ༌གུ༌ བུ༌ཚ༌གུན༌ལ༌ སུན༌ནད༌ ཅོ༌རུག༌།
JOH 7:23 ཏ༌ ཁྱོ༌ཞ༌གུན༌ནི༌ མོ༌ཟེས༌སི༌ བཀའ༌ཁྲིམས༌པོ༌ ཅག༌ མི༌ཅག༌ཅེས༌སི༌ ཕིའ༌, ཀལ༌ཏེས༌ ཤབ༌བད༌དི༌ ཞག༌ག༌ ཁྱོ༌ཞ༌གུན༌ནི༌ རང༌རང༌ངི༌ ཕྲུ༌གུ༌ བུ༌ཚའ༌ སུན༌ནད༌ ཅོ༌ཅུག༌ ཉན༌ནད༌ན༌, ཏེ༌ནེ༌ ཤབ༌བད༌དི༌ ངལ༌ཚོའེ༌ ཞག༌ག༌ ངའེ༌ མི༌ཞིག༌ ནད༌ནེ༌ ཕན༌ཅུག༌ན༌ ཁྱོ༌ཞ༌གུན༌ལ༌ ངའེ༌ཀ༌ ཅིའ༌ སྲོ༌ ཡོང༌ང༌རག༌།
JOH 7:24 མིའི༌ སམ༌ཚུལ༌ནེ༌ ཐག༌མ༌ཅད༌ད༌ ཀྲང༌པོའེ༌ ཐག༌ཅད༌ ཅོ༌ཤིག༌།”
JOH 7:25 ཡེ༌རུ༌ཤ༌ལེམ༌པ༌ ཁ༌ཅིག༌གི༌ ཏྲི༌ཅེས༌ གོ༌ཟུགས༌, “ཁོང༌གུན༌ནི༌ སད༌ཅེས༌སི༌ རྩོན༌གྲུས༌ ཅོ༌ཁན༌ནི༌ མི༌བོ༌ འིན༌ན༌བོ༌ མ༌ནོག༌ག༌?
JOH 7:26 ལྟོས༌ཤིག༌གའང༌ ཁོའེ༌ ང༌དང༌ ཚང༌མའེ༌ དུན༌ལ༌ སྔོན༌ཏེ༌ ལབ༌ཞ༌ ཏང༌ང༌ལ༌, ཡང༌ འུ༌སྐྱོང༌གུན༌ནི༌ ཁོང༌ངི༌ གྱབ༌གལ༌ལ༌ ཅའང༌ ཟེར༌ར༌ མི༌དུག༌། ཅི༌ ཁོང༌གུན༌ནི༌ ཁོ༌ མ༌ཤི༌ཀ༌ ཨིན༌ནོག༌ ཟེར༌ཏེ༌ ཏད༌པ༌ ཅོས༌ཏེ༌ ཨིན༌ན༌ཧེ༌?
JOH 7:27 འི༌ མི༌ ཀ༌ནེ༌ ཨིན༌ ང༌ཞའ༌ གྱུས༌ཡོད༌, ཨིན༌ནའང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ སྐྱོད༌ད༌ཅིག༌ ཁོང༌ ཀ༌ནེ༌ ཨིན༌ སུའང༌ གྱུས༌ མི༌ཆ༌།”
JOH 7:28 གཙོ༌བོ༌ ཡེ༌ཤུའི༌ ཆོད༌ཁང༌ངི༌ ནང༌ང༌ ལབ༌ཞ༌ སལ༌ ཟ༌ནེ༌ ཤེད༌ ནང༌ མོལས༌, “ཁྱོ༌ཞ༌གུན༌ནི༌ དེན༌བ༌ ང༌ ཤེས༌སད༌ད༌? ཡང༌ ང༌ ཀ༌ནེ༌ ཨིན༌ དེན༌བ༌ གྱུས༌ཡོད༌ད༌? ངའ༌ ང༌རང༌ངི༌ ཝང༌ཆའེ༌ ནང༌ང༌ འི༌རུ༌ མ༌ཡོངས༌པིན༌ ཨིན༌ནའང༌ ང༌ ཀལ༌ལ༌ ཛད༌ཁན༌བོ༌ ཏན༌ཏན༌ ཨིན༌, ཁྱོ༌ཞ༌གུན༌ནི༌ ཁོང༌ ཤེས༌ས༌ མ༌ནོག༌།
JOH 7:29 ངའེ༌ ཁོང༌ ཤེས༌སད༌ ཅིའ༌ཟེར༌ན༌ ང༌ ཁོང༌ངི༌ ཆོགས༌ནེ༌ ཡོངས༌ཏེ༌ ཨིན༌ ཡང༌ ཁོང༌ངི༌ ང༌ ཀལ༌ལ༌ ཛད༌ཏེ༌ ཨིན༌།”
JOH 7:30 ཏེ༌བོ༌ ཚོར༌ར༌ཅིག༌ འུ༌སྐྱོང༌གུན༌ནི༌ ཁོང༌ ཟུམ༌ཅེས༌སི༌ རྩོན༌གྲུས༌ ཅོས༌, ཨིན༌ནའང༌ སུ༌ཞིག༌གིའང༌ ཁོང༌ང༌ ལག༌པ༌ མ༌རྩེས༌ ཅིའ༌ཟེར༌ན༌ ཁོང༌ངི༌ ཏུས༌པོ༌ ཏ༌རུང༌ མ༌ལེབ༌བ༌ ཨིན༌པིན༌།
JOH 7:31 ཨིན༌ནའང༌ མི༌ཚོགས༌སི༌ ཕྲོ༌ནེ༌ མང༌པོའེ༌ ཁོང༌ངི༌ཀ༌ ཏད༌པ༌ ཅོས༌ཏེ༌ ཟེརས༌, “ཅི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ སྐྱོད༌ད༌ཅིག༌ འི༌ མི༌བོའེ༌ སང༌ མང༌ང༌ ཧ༌ལས༌ཤེས༌སི༌ ལྟས༌གུན༌ སྟན༌ཨིན༌ན༌ཧེ༌?”
JOH 7:32 མི༌ཚོགས༌སི༌ ཡེ༌ཤུའི༌ སྐོར༌ལ༌ ཏེ༌ཟུག༌ ཤབ༌ཤུབ༌ ཏང༌ཅེས༌པོ༌ ཕ༌རུ༌ཤི༌པ༌གུན༌ནི༌ ཚོར༌ར༌ཅིག༌, ཁོང༌གུན༌ དང༌ བླ༌མ༌ འུ༌སྐྱོང༌གུན༌ནི༌ ཆོད༌ཁང༌ སྲུང༌ཁན༌ནི༌ མག༌མི༌གུན༌ ཁོང༌ ཟུམས༌ཏེ༌ ཁྱོང༌ཅེས༌ལ༌ ཀལས༌།
JOH 7:33 ཡེ༌ཤུའི༌ མི༌གུན༌ལ༌ མོལས༌, “ཏུས༌ ཉུ༌ངུན༌ཞིག༌ ང༌ ཁྱོ༌ཞ༌གུན༌ ཉམ༌པོ༌ ཡོད༌, ཏེ༌ནེ༌ ང༌ ཀལ༌ལ༌ ཛད༌ཁན༌ནི༌ཀ༌ ལོགས༌ཏེ༌ ཆའད༌།
JOH 7:34 ཁྱོ༌ཞ༌གུན༌ནི༌ ང༌ ཙལ༌ཨིན༌, ཨིན༌ནའང༌ ང༌ མི༌ཐོབ༌, ཡང༌ ང༌ ཡོད༌ས༌ ཁྱོ༌ཞའ༌ ཡོང༌ མི༌ཉན༌།”
JOH 7:35 ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “ང༌དང༌གུན༌ནི༌ ཙལ༌ མི༌ཉན༌ཅེས༌ འི༌ མི༌བོ༌ ཀ༌རུ༌ ཆེན༌ ཟེར༌ཏེ༌ ཨིན༌ནོག༌། ཅི༌ ཁོ༌ གརིས༌པ༌གུན༌ནི༌ ཕྲོའ༌ ཡན༌ཏེ༌ ཡོད༌ཁན༌ནི༌ ང༌དང༌ངི༌ མི༌གུན༌ ཡོད༌ས༌ སོང༌ཏེ༌ གརིས༌པ༌གུན༌ལ༌ ལབ༌ཞ༌ ཏང༌ཨིན༌ སམ༌ཏེ༌ ཨིན༌ནོག༌ག༌?
JOH 7:36 ཁོའེ༌ ‘ཁྱོ༌ཞ༌གུན༌ནི༌ ང༌ ཙལ༌ཨིན༌, ཨིན༌ནའང༌ ང༌ མི༌ཐོབ༌, ཡང༌ ང༌ ཡོད༌ས༌ ཁྱོ༌ཞའ༌ ཡོང༌ མི༌ཉན༌’ ཟེར༌ཅེས༌སི༌ ཏོན༌བོ༌ ཅི༌ ཨིན༌ཧེ༌?”
JOH 7:37 ཏུས༌ཆེན༌ནི༌ སྟིང༌ཇུག༌གི༌ ཞག༌, ཚང༌མའེ༌ སང༌ རྩད༌ཅན༌ནི༌ ཞག༌ག༌ ཡེ༌ཤུའི༌ ཞངས༌ཏེ༌ ཀུ༌ཅོ༌ སལ༌ཨིན༌ མོལས༌, “སྐོམས༌ཁན༌གུན༌ ངའེ༌ཀ༌ ཡོང༌ཤིག༌,
JOH 7:38 ཡང༌ ངའེ༌ཀ༌ ཏད༌པ༌ ཅོ༌ཁན༌གུན༌ ཡོངས༌ཏེ༌ ཐུང༌ཤིག༌, ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ལ༌ནག༌, ‘ཏད༌པ༌ ཅོ༌ཁན༌ནི༌ སེམས༌སི༌ ནང༌ནེ༌ ཚེ༌ ཏང༌ཁན༌ནི༌ ཆུའི༌ ལྩངས༌པོ༌གུན༌ གྱུག༌ཨིན༌།’”
JOH 7:39 ༼ཚེ༌ ཏང༌ཁན༌ནི༌ ཆུ༌བོ༌ ནི༌ ཏམ༌པའེ༌ ཐུག༌ཉིད༌ ཨིན༌, ཀ༌བོ༌ ཁོང༌ངི༌ཀ༌ ཏད༌པ༌ ཁྱོང༌ཁན༌གུན༌ལ༌ སྟིང༌ནེ༌ ཐོབ༌ཅེས༌ ཨིན༌པིན༌, ཨིན༌ནའང༌ ཏེ༌ཏུས༌ ཚག༌པ༌ ཏམ༌པའེ༌ ཐུག༌ཉིད༌ སལ༌ལ༌ མ༌ཛད༌ད༌ ཨིན༌པིན༌, ཅིའ༌ཟེར༌ན༌ ཏ༌རུང༌ ཡེ༌ཤུ༌ སྟག༌ག༌ ཛད༌ཏེ༌ ཁོང༌ང༌ སྤལ༌ མ༌ཐོབ༌བ༌ ཨིན༌པིན༌།༽
JOH 7:40 ཏེ༌ སྤེ༌ར༌གུན༌ ཚོར༌ཏེ༌ ཁ༌ཅིག༌གི༌ ཟེརས༌, “ཏན༌ཏན༌ འི༌ མི༌བོ༌ དཀོན༌མཆོག༌གི༌ ལུང༌སྟོན༌པ༌ སྐྱོད༌ཅེས༌ཅན༌བོ༌ ཨིན༌ནོག༌ ཀ༌བོའ༌ ང༌དང༌གུན༌ སྲུངས༌ཏེ༌ ཡོད༌པིན༌།”
JOH 7:41 ཡང༌ ཁ༌ཅིག༌གི༌ ཟེརས༌, “ཁོང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ནོག༌” ཞན༌ ཁ༌ཅིག༌གི༌, “གཱ༌ལིལ༌ལི༌པ༌ཞིག༌ མ༌ཤི༌ཀ༌ ཀ༌ཟུག༌གི༌ ཨིན༌ ཐུབ༌ཨིན༌? མ༌ནེ༌ མི༌ཐུབ༌།
JOH 7:42 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ མི༌དུག༌ག༌? མ༌ཤི༌ཀ༌ གྱལ༌པོ༌ དཱ༌བིད༌དི༌ པུར༌གྱུད༌ ཡང༌ གྱལ༌པོ༌ དཱ༌བིད༌ སྐྱེས༌སའེ༌ ཡུལ༌ བེད༌ལེ༌ཧེམ༌མི༌ གྲོང༌ཁྱེར༌ནེ༌ བིང༌ཨིན༌།”
JOH 7:43 ཏེན༌ན༌བོའེ༌ཕིའ༌ ཡེ༌ཤུའི༌ ཞས༌ཏེ༌ མི༌ཚོགས༌སི༌ ནང༌ང༌ པོ༌ མང༌པོ༌ བུད༌།
JOH 7:44 ཁ༌ཅིག༌གི༌ ཁོང༌ ཟུམ༌ཅེས༌སི༌ དོད༌པ༌ བོར༌རད༌པིན༌, ཨིན༌ནའང༌ སུ༌ཞིག༌གིའང༌ ཁོང༌ང༌ ལག༌པ༌ མ༌རྩེས༌།
JOH 7:45 ཆོད༌ཁང༌ སྲུང༌ཁན༌ནི༌ མག༌མི༌གུན༌, ཕ༌རུ༌ཤི༌པ༌ དང༌ བླ༌མ༌ འུ༌སྐྱོང༌ གུན༌ནི༌ཀ༌ ལོགས༌ཏེ༌ ལེབ༌བ༌ཅིག༌, ཁོང༌གུན༌ནི༌ མག༌མི༌གུན༌ལ༌ ཏྲིས༌, “ཁྱོ༌ཞ༌གུན༌ནི༌ ཁོ༌ ཟུམས༌ཏེ༌ ཅིའ༌ མ༌ཁྱོངས༌པིན༌?”
JOH 7:46 མག༌མི༌གུན༌ནི༌ ལན༌ཏངས༌, “ང༌ཞའ༌ འི༌ཙོགས༌སི༌ ལབ༌ཞ༌ སལ༌ཁན༌ཞིག༌ མ༌ནེ༌ མ༌ཐོང༌།”
JOH 7:47 ཏེ༌ནེ༌ ཕ༌རུ༌ཤི༌པ༌གུན༌ནི༌ ཟེརས༌, “ཁྱོ༌རང༌གུན༌ནའང༌ ཁོའེ༌ གོབ༌སྐོར༌རི༌ ནང༌ང༌ ཡོངས༌ཏེ༌ ཨིན༌ན༌?
JOH 7:48 ཝང༌སྲུལ༌པ༌གུན༌ དང༌ ཕ༌རུ༌ཤི༌པ༌གུན༌ནི༌ ནང༌ནེ༌ ཅིག༌གིའང༌ ཁོའེ༌ཀ༌ ཏད༌པ༌ ཅོས༌ས༌?
JOH 7:49 མ༌ཅོས༌། ཨིན༌ནའང༌ བཀའ༌ཁྲིམས༌སི༌ སྐོར༌ལ༌ ཅའང༌ གྱུས༌ མེད༌ཁན༌ནི༌ འི༌ མི༌ཚོགས༌པོའེ༌ ཁོའེ༌ཀ༌ ཏད༌པ༌ ཅོས༌། ཁོང༌གུན༌ལ༌ ངན༌ ཕོག༌ཏེ༌ ཨིན༌ནོག༌།”
JOH 7:50 ཁོང༌གུན༌ནི༌ ཕྲོ༌པ༌ ཕ༌རུ༌ཤི༌པ༌ ནི༌ཀོ༌དེ༌མས༌ ཀ༌བོ༌ སྔུན༌ལ༌ ཡེ༌ཤུའ༌ ཏྲི༌ཝ༌ ཏྲིའ༌ལ༌ སོང༌ཏེ༌ ཨིན༌པིན༌, ཁོའེ༌ ཁོང༌གུན༌ལ༌ ཏྲིས༌,
JOH 7:51 “ང༌དང༌ངི༌ བཀའ༌ཁྲིམས༌ ནང༌ཞིན༌ སྔུན༌ལ༌ མི༌ཞིག༌ག༌ ཁོའེ༌ ཅོས༌ཁན༌ནི༌ སྐོར༌ལ༌ ཉན༌ཏེ༌ མ༌ནེ༌ ཁོའ༌ ཁྲིམས༌ཅད༌ མི༌ཉན༌ ཟེར༌ཏེ༌ མི༌དུག༌ག༌?”
JOH 7:52 ཁོང༌གུན༌ནི༌ ཟེརས༌, “ཅི༌ ཁྱོ༌རང༌ངའང༌ གཱ༌ལིལ༌ལི༌པ༌ ཨིན༌ན༌? ཏམ༌པའེ༌ སུང༌རབས༌སི༌ ནང༌ང༌ ཙལ༌ན༌ ཁྱོ༌རང༌ང༌ གཱ༌ལིལ༌ལི༌ནེ༌ ལུང༌སྟོན༌པ༌ཞིག༌ བིང༌ཁན༌བོ༌ མ༌ནེ༌ མི༌ཐོབ༌།”
JOH 7:53 ༼ཏེ༌ནེ༌ ཁོང༌ ཚང༌མ༌ ལངས༌ཏེ༌ རང༌རང༌ངི༌ ཁང༌པ༌ སོང༌།
JOH 8:1 ཏེ༌ནེ༌ གཙོ༌བོ༌ ཡེ༌ཤུ༌ ཨོ༌ལིཝ༌ཝི༌ རི༌ ཟེརས༌སའེ༌ ནས༌ས༌ སྐྱོད༌ཏེ༌ ཞུགས༌ས༌ ཛདས༌,
JOH 8:2 ནམ༌ལངས༌ས༌ཅིག༌ ཁོང༌ ལོགས༌ཏེ༌ ཆོད༌ཁང༌ང༌ སྐྱོདས༌། མི༌ཚང༌མ༌ ཁོང༌ ཡོད༌ས༌ ཛོམས༌, ཡེ༌ཤུ༌ མི༌ཚོགས༌ལ༌ ལབ༌ཞ༌ སལ༌ཅེས༌ལ༌ སའེ༌ཀ༌ ཞུགས༌།
JOH 8:3 ཏེན༌ན༌ ཏུས༌ལ༌ ཆོས༌ཁྲིམས༌ལ༌ ཁས༌པ༌གུན༌ དང༌ ཕ༌རུ༌ཤི༌པ༌གུན༌ནི༌ བུ༌མོ༌ཞིག༌ ཁྱོངས༌ ཀ༌བོ༌ ཁོ༌རང༌ངི༌ ཞིད༌མད༌ མན༌པ༌ ཡང༌ མི༌ཞིག༌ ཉམ༌པོ༌ ལུས༌བྲེལ༌ ཅོ༌ཨིན༌ ཟུམས༌ཏེ༌ ཨིན༌པིན༌, ཡང༌ ཁོའ༌ མི༌ཚོགས༌སི༌ དུན༌ལ༌ ལང༌ཅུགས༌།
JOH 8:4 ཁོང༌གུན༌ནི༌ ཡེ༌ཤུའ༌ ཟེརས༌, “ལོབ༌བོན༌ལེ༌, འི༌ བུ༌མོ༌བོ༌ ལོག༌ཡེམ༌ ཅོ༌ཨིན༌ ཟུམས༌པིན༌།
JOH 8:5 མོ༌ཟེས༌སི༌ ཁྲིམས༌ ནང༌ཞིན༌ལ༌, འི༌ཙོགས༌སི༌ བུ༌མོའ༌ རྡོའ༌ གྱབས༌ཏེ༌ སད༌ཅེས༌སི༌ ང༌དང༌ང༌ བཀའ༌ ཡོད༌, ཨིན༌ནའང༌ ཉེ༌རང༌ངི༌ ཅི༌ མོལ༌ལད༌?”
JOH 8:6 ཁོང༌གུན༌ནི༌ འི༌ ཏྲི༌ཝ༌བོ༌ ཡེ༌ཤུའ༌ བཀའ༌ཁྲིམས༌ནེ༌ གལ༌ཅེས༌སི༌ ཉད༌གལ༌ ཀལ༌ཅེས༌ལ༌ ཏྲིས༌། ཨིན༌ནའང༌ ཡེ༌ཤུའི༌ ཨུ༌ སྒུས༌ཏེ༌ ཛི༌གུ༌ ཉམ༌པོ༌ སའེ༌ཀ༌ བྲིའ༌ ཛད༌ཅེས༌ གོ༌ཟུག༌།
JOH 8:7 ཁོང༌གུན༌ནི༌ ཡང༌ དང༌ ཡང༌ ཁོང༌ང༌ ཏྲི༌ཨིན༌ དུགས༌པ༌ ཁོང༌ངི༌ ཨུ༌ སྟགས༌ཏེ༌ ཁོང༌གུན༌ལ༌ མོལས༌, “ཁྱོ༌ཞའེ༌ ཕྲོ༌ནེ༌ དག༌ས༌ ཚག༌པ༌ སྡིག༌པ༌ མ༌ནེ༌ མ༌ཅོའ༌ ཡོད༌ཁན༌བོའ༌ གོ༌མ༌ འི༌ བུ༌མོ༌བོའ༌ རྡོའ༌ གྱབ༌ཅུག༌།”
JOH 8:8 ཡང༌སྐྱར༌ ཁོང༌ངི༌ ཨུ༌ སྒུས༌ཏེ༌ སའེ༌ཀ༌ བྲིའ༌ ཛདས༌།
JOH 8:9 ཏེ༌བོ༌ ཚོར༌ར༌ཅིག༌, ཏྲི༌ཝ༌ ཏྲི༌ཁན༌གུན༌ རེ༌རེ༌ ཅོས༌ཏེ༌ ཏེ༌ཀ༌ནེ༌ སོང༌, རྒད༌པོ༌གུན༌ནེ༌ གོ༌ཟུགས༌ཏེ༌ ཏེ༌ཏེ༌ཚོག༌པ༌ ནམ༌ ཡེ༌ཤུ༌ ཅིག༌པོ༌ མ༌ནེ༌ ལངས༌ཏེ༌ ཡོད༌ཁན༌ནི༌ བུ༌མོ༌ ཡོད༌ས༌ མ༌ལུས༌།
JOH 8:10 ཡེ༌ཤུ༌ ཞངས༌ཏེ༌ ཁོའ༌ མོལས༌, “བུ༌མོ༌, ཁོང༌ ཚང༌མ༌ ཀ༌རུ༌ སོང༌? སུ༌ཞིག༌གིའང༌ ཁྱོ༌རང༌ང༌ སྲོག༌གི༌ ཉེས༌ཆད༌ མ༌ཀལ༌ས༌?”
JOH 8:11 ཁོའེ༌ ཟེརས༌, “གཙོ༌བོ༌ལེ༌, སུ༌ཞིག༌གིའང༌ ཅའང༌ མ༌ཅོས༌།” ཏེ༌ནེ༌ ཡེ༌ཤུའི༌ མོལས༌, “ངེའང༌ སྐྱོན༌ མི༌ཀལ༌། སོང༌, ཏ༌ནེ༌ཕར༌ལ༌ སྡིག༌པ༌ མ༌ཅོ༌ ”།༽
JOH 8:12 གཙོ༌བོ༌ ཡེ༌ཤུའི༌ མི༌གུན༌ལ༌ ལབ༌ཞ༌ སལ༌ཨིན༌ མོལས༌, “ང༌ ནི༌ ཇིག༌རྟེན༌པ༌གུན༌ནི༌ ཕིའ༌ འོད༌ ཨིན༌། ངའེ༌ སྟིང༌རང༌ནེ༌ བྲངས༌ཁན༌གུན༌ མུན༌གྲིག༌གི༌ ནང༌ང༌ མི༌གྲུལ༌, ཅིའ༌ཟེར༌ན༌ ཐའ༌མེད༌པའེ༌ མི༌ཚེའེ༌ ཆོགས༌ལ༌ ཁྲིད༌ཁན༌ནི༌ འོད༌ ཁོང༌གུན༌ནི༌ ནང༌ང༌ ཡོད༌ཏེ༌ ཨིན༌ནོག༌།”
JOH 8:13 ཏེ༌བོ༌ ཚོར༌ར༌ཅིག༌ ཕ༌རུ༌ཤི༌པ༌གུན༌ནི༌ ཡེ༌ཤུའ༌ ཟེརས༌, “ཁྱོ༌རང༌ངི༌ རང༌ངི༌ ཕིའ༌ སྤང༌པོ༌ ཏངས༌པ༌ ཁྲིམས༌ ནང༌ཞིན༌ ཁྱོ༌རང༌ངི༌ སྤང༌པོ༌བོ༌ རིན༌མེད༌ ཐེའ༌ནོག༌།”
JOH 8:14 ཡེ༌ཤུའི༌ ཁོང༌གུན༌ལ༌ ལན༌སལས༌, “ངའེ༌ ང༌རང༌ངི༌ སྐོར༌ལ༌ སྤང༌པོ༌ ཏང༌ངད༌ནའང༌ ངའེ༌ སྤང༌པོ༌བོ༌ རིན༌མེད༌ མན༌ ཅིའ༌ཟེར༌ན༌ ང༌ ཀ༌ནེ༌ ཡོངས༌ཏེ༌ ཨིན༌, ཡང༌ ཀ༌རུ༌ ཆ༌ཅེས༌ ཨིན༌ ང༌ གྱུས༌ཡོད༌། ཨིན༌ནའང༌ ཁྱོ༌ཞ༌གུན༌ལ༌ ཏེ༌གུན༌ གྱུས༌མེད༌།
JOH 8:15 ཁྱོ༌ཞ༌གུན༌ནི༌ མིའི༌ སམ༌ཚུལ༌ ནང༌ཞིན༌ ཤགས༌ ཅད༌དུག༌, ཨིན༌ནའང༌ ངའེ༌ སུའང༌ ཤགས༌ ཅད༌ད༌མེད༌།
JOH 8:16 ཀལ༌ཏེས༌ ཁྲིམས༌ཅད༌ན༌ ངའེ༌ ཁྲིམས༌ཅད༌པོ༌ ཀྲང༌པོ༌ ཡོང༌ཨིན༌ ཅིའ༌ཟེར༌ན༌ ཁྲིམས༌ཅད༌ ཟ༌ནེ༌ ང༌ ཅིག༌པོ༌ མེད༌, ང༌ ཀལ༌ལ༌ ཛད༌ཁན༌ནི༌ ཡབ༌ ང༌ ཉམ༌པོ༌ ཡོད༌།
JOH 8:17 ཁྱོ༌ཞའེ༌ ཁྲིམས༌སི༌ ནང༌ང༌ བྲིའ༌ ཛད༌ཏེ༌ དུག༌ ‘མི༌ ཉིས༌སི༌ སྤང༌པོ༌ ཏང༌ན༌, སྐྱོན༌བོ༌ དེན༌བ༌ ཐེན༌’
JOH 8:18 ངའེ༌ ང༌རང༌ངི༌ ཕིའ༌ སྤང༌པོ༌ ཏང༌ངད༌, ཡང༌ ངའེ༌ སྤང༌པོ༌ ཉིས༌པ༌ ནི༌ ང༌ ཀལ༌ལ༌ ཛད༌ཁན༌ནི༌ ཡབ༌ ཨིན༌།”
JOH 8:19 ཏེ༌ནེ༌ ཕ༌རུ༌ཤི༌པ༌གུན༌ནི༌ ཡེ༌ཤུའ༌ ཏྲིས༌, “ཁྱོ༌རང༌ངི༌ ཡབ༌ ཀ༌རེ༌?” ཡེ༌ཤུའི༌ ལན༌སལས༌, “ཁྱོ༌ཞ༌གུན༌ནི༌ ང༌ མ༌ཤེས༌ ཡ༌ ངའེ༌ ཡབ༌བའང༌། ཀལ༌ཏེས༌ ཁྱོ༌ཞའེ༌ ང༌ ཤེས༌པིན༌ན༌ ངའེ༌ ཡབ༌བའང༌ ཤེས༌ཏེ༌ ཡོད༌གྲོ༌།”
JOH 8:20 ཆོད༌ཁང༌ངི༌ བུལ༌ལྡུས༌ ཕུལ༌སའེ༌ སྒམ༌མི༌ དུན༌ལ༌ ལབ༌ཞ༌ སལ༌ཏུས༌ ཁོང༌ངི༌ ཏེ༌ སྤེ༌ར༌གུན༌ མོལ༌ལ༌ ཛདས༌། ཨིན༌ནའང༌ སུ༌ཞིག༌གིའང༌ ཁོང༌ མ༌ཟུམས༌ ཅིའ༌ཟེར༌ན༌ ཁོང༌ངི༌ ཏུས༌པོ༌ ཏ༌རུང༌ མ༌ལེབ༌བ༌ ཨིན༌པིན༌།
JOH 8:21 ཡེ༌ཤུའི༌ ཡང༌སྐྱར༌ ཁོང༌གུན༌ལ༌ མོལས༌, “ང༌ ཆའད༌, ཁྱོ༌ཞའེ༌ ང༌ ཙལ༌ཨིན༌, ཨིན༌ནའང༌ ཁྱོ༌ཞའ༌ ཁྱོ༌ཞའེ༌ སྡིག༌པའེ༌ ནང༌ང༌ ཤི༌ཨིན༌། ཀ༌རུ༌ ང༌ ཆའད༌ ཁྱོ༌ཞ༌ ཏེ༌རུ༌ ཡོང༌ མི༌ཉན༌།”
JOH 8:22 ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཟེརས༌, “ཅི༌ ཁོའེ༌ ཁོ༌རང༌ སད༌ཅེས༌ ཨིན༌ནོག༌ག༌? ཏེ༌བོའེ༌ཕིའ༌ ཁོའེ༌ ‘ཀ༌རུ༌ ང༌ ཆའད༌ ཁྱོ༌ཞའ༌ ཡོང༌ མི༌ཉན༌’ ཟེར༌ཏེ༌ ཨིན༌ནོག༌ག༌?”
JOH 8:23 ཡེ༌ཤུའི༌ ཏ༌རུང༌ངའང༌ མོལས༌, “ཁྱོ༌ཞ༌གུན༌ ཡོག༌ནེ༌ ཨིན༌ནོག༌, ཡང༌ ང༌ སྟག༌ནེ༌ ཨིན༌། ཁྱོ༌ཞ༌གུན༌ འི༌ ཇིག༌རྟེན༌ནེ༌ ཨིན༌ནོག༌, ང༌ འི༌ ཇིག༌རྟེན༌ནེ༌ མན༌།
JOH 8:24 ངའེ༌ ཁྱོ༌ཞ༌གུན༌ལ༌ ཟེར༌པིན༌, ཁྱོ༌ཞའ༌ ཁྱོ༌ཞའེ༌ སྡིག༌པའེ༌ ནང༌ང༌ ཤི༌ཨིན༌། ཀལ༌ཏེས༌ ཁྱོ༌ཞའེ༌ ང༌ ཏེན༌ན༌བོ༌ ཨིན༌ ཟེར༌ཁན༌བོའ༌ དེན༌ མ༌ཤེས༌ན༌, ཁྱོ༌ཞའ༌ ཁྱོ༌ཞའེ༌ སྡིག༌པའེ༌ ནང༌ང༌ ཤི༌ཨིན༌།”
JOH 8:25 ཁོང༌གུན༌ནི༌ ཏྲིས༌, “ཁྱོ༌རང༌ སུ༌ ཨིན༌?” ཡེ༌ཤུའི༌ མོལས༌, “ང༌ ཏེན༌ན༌བོ༌ ཨིན༌ ཀ༌ཟུག༌ གོ༌མ༌ནེ༌ ཕར༌ལ༌ ངའེ༌ ཁྱོ༌ཞ༌གུན༌ལ༌ ཟེར༌རད༌པིན༌།
JOH 8:26 ཁྱོ༌ཞའེ༌ སྐོར༌ལ༌ ང༌ ཟེར༌གྱུ༌ དང༌ ཤགས༌ ཅོ༌གྱུ༌ མང༌པོ༌ ཡོད༌, ཨིན༌ནའང༌ ངའེ༌ མི༌ཅོ༌། ངའེ༌ ང༌ ཀལ༌ལ༌ ཛད༌ཁན༌ནི༌ ཀ༌ནེ༌ ཚོར༌ཁན༌གུན༌ ཇིག༌རྟེན༌པ༌གུན༌ལ༌ ཤད༌དད༌ ཡང༌ ཁོང༌ ནི༌ ཨིད༌ཤེས༌ཅན༌ ཞུགས༌ཏེ༌ ཨིན༌།”
JOH 8:27 ཁོང༌ངི༌ དཀོན༌མཆོག༌ ཡབ༌བི༌ སྐོར༌ལ༌ མོལ༌ཁན༌བོ༌ འུ༌སྐྱོང༌གུན༌ནི༌ ཧ༌ མ༌གོ༌།
JOH 8:28 ཏེ༌ནེ༌ ཡེ༌ཤུའི༌ མོལས༌, “ཁྱོ༌ཞའེ༌ མི༌རིགས༌སི༌བུ༌ རྐྱང༌ཤིང༌ངི༌ཀ༌ སྟག༌ ཟ༌ནེ༌, ཁྱོ༌ཞ༌གུན༌ལ༌ ང༌ ཏེན༌ན༌བོ༌ ཨིན༌ཁན༌ གྱུས༌ཆེན༌། ངའེ༌ ང༌རང༌ངི༌ ཅའང༌ ཅོའ༌མེད༌, ཨིན༌ནའང༌ ཡབ༌བི༌ ང༌ ལབ༌བ༌ ཛད༌ཁན༌བོ༌ ཟེར༌རད༌།
JOH 8:29 ཡང༌ ང༌ ཀལ༌ལ༌ ཛད༌ཁན༌བོ༌ ང༌ ཉམ༌པོ༌ ཡོད༌, ཁོང༌ངི༌ ང༌ ཅིག༌པོ༌ ཕངས༌ཏེ༌ བོར༌ར༌ མ༌ཛདས༌ ཅིའ༌ཞུ༌ན༌ ངའེ༌ ཏུས༌གྱུན༌ ཁོང༌ ཐུགས༌ཐད༌ཁན༌བོ༌ ཅོའད༌།”
JOH 8:30 ཡེ༌ཤུའི༌ ཏེ༌ ཞལ༌ཏ༌གུན༌ མོལ༌ཨིན༌ ཡོད༌ ཟ༌ནེ༌ མི༌ མང༌པོའེ༌ ཁོང༌ངི༌ཀ༌ ཏད༌པ༌ ཅོས༌།
JOH 8:31 གཙོ༌བོ༌ ཡེ༌ཤུའི༌ ཁོང༌ངི༌ཀ༌ ཏད༌པ༌ ཁྱོང༌ཁན༌ནི༌ ཡ༌ཧུ༌དཱ༌པ༌གུན༌ལ༌ མོལས༌, “ཀལ༌ཏེས༌ ཁྱོ༌ཞའ༌ ངའེ༌ ལབ༌ཞ༌གུན༌ནི༌ཀ༌ སྟན༌པོ༌ དུག༌ན༌, ཁྱོ༌ཞའ༌ ངའེ༌ དེན༌བའེ༌ ལོབ༌ཕྲུགས༌གུན༌ ཨིན༌།
JOH 8:32 ཏེ༌ནེ༌ ཁྱོ༌ཞའ༌ དཀོན༌མཆོག༌གི༌ དེན༌བ༌བོ༌ ཧ༌གོ༌ ཐུབ༌ཨིན༌ ཡང༌ ཏེན༌ན༌ དེན༌བ༌བོའེ༌ ཁྱོ༌ཞའ༌ རང༌ཝང༌ ཏང༌ཨིན༌།”
JOH 8:33 ཁོང༌གུན༌ནི༌ ལན༌ཏངས༌, “ང༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ ཡང༌ མ༌ནེ༌ ཚེ༌ཡོག༌ག༌ མ༌ལུས༌ས༌ ཨིན༌པིན༌། ཉེ༌རང༌ངི༌ ང༌ཞའ༌ རང༌ཝང༌ ཐོབ༌ཨིན༌ ཟེར༌ཅེས༌སི༌ ཏོན༌བོ༌ ཅི༌ ཨིན༌།”
JOH 8:34 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, སྡིག༌པ༌ ཅོ༌ཁན༌ ཚང༌མ༌ སྡིག༌པའེ༌ ཚེ༌ཡོག༌ ཨིན༌ནོག༌།
JOH 8:35 ཡང༌ ཚེ༌ཡོག༌ སྤོན༌བོའེ༌ ནང༌མི༌ མ༌ནེ༌ མི༌གྱུར༌, ཨིན༌ནའང༌ བུ༌ཚ༌ ཏུས༌གྱུན༌ ནང༌ཚངས༌སི༌ ཁག༌ཞིག༌ ཨིན༌ནོག༌།
JOH 8:36 ཀལ༌ཏེས༌ སྲས༌སི༌ ཁྱོ༌ཞ༌གུན༌ལ༌ རང༌ཝང༌ ཏང༌ན༌ ཁྱོ༌ཞ༌གུན༌ལ༌ དེན༌བའ༌ རང༌ཝང༌ ཐོབ༌ཨིན༌།
JOH 8:37 ཁྱོ༌ཞའ༌ ཨབ༌ར༌ཧམ༌མི༌ པུར༌གྱུད༌ ཨིན༌ཁན༌བོ༌ ངའེ༌ ཤེས༌སད༌, ཏེ༌ནེའང༌ ཁྱོ༌ཞའེ༌ ང༌ སད༌ཅེས༌སི༌ རྩོན༌གྲུས༌ ཅོ༌རུག༌ ཅིའ༌ཟེར༌ན༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ ངའེ༌ ལབ༌ཞའེ༌ ཕིའ༌ ནས༌ས༌ མེད༌ཏེ༌ ཨིན༌ནོག༌།
JOH 8:38 ཡབ༌བི༌ དུན༌ལ༌ ཡོད༌ ཟ༌ནེ༌ ཐོང༌ཁན༌གུན༌ ངའེ༌ ཁྱོ༌ཞའ༌ ཤད༌དད༌, ཨིན༌ནའང༌ ཁྱོ༌ཞ༌གུན༌ནི༌ ཁྱོ༌ཞའེ༌ ཨ༌བའེ༌ ཀ༌ནེ༌ ཚོར༌ཁན༌གུན༌ ཅོའ༌ནོག༌།”
JOH 8:39 ཁོང༌གུན༌ནི༌ ལན༌ཏངས༌, “ང༌ཞའེ༌ ཨ༌བ༌ ཨབ༌ར༌ཧམ༌ ཨིན༌།” ཡེ༌ཤུའི༌ ཁོང༌གུན༌ལ༌ མོལས༌, “ཀལ༌ཏེས༌ ཁྱོ༌ཞ༌གུན༌ ཨབ༌ར༌ཧམ༌མི༌ པུར༌གྱུད༌ ཨིན༌པིན༌ན༌ ཁྱོ༌ཞེའང༌ ཨབ༌ར༌ཧམ༌ ཙོགས༌སི༌ ལས༌གུན༌ ཅོའད༌གྲོ༌།
JOH 8:40 ངའེ༌ ཁྱོ༌ཞ༌གུན༌ལ༌ དཀོན༌མཆོག༌ནེ༌ ཚོར༌ཁན༌ནི༌ ཀྲང༌པོའེ༌ སྤེ༌ར༌གུན༌ ཤད༌ པ༌སང༌, ཁྱོ༌ཞའེ༌ ང༌ སད༌ཅེས༌སི༌ རྩོན༌གྲུས༌ ཅོ༌རུག༌། ཨབ༌ར༌ཧམ༌མི༌ ཏེ༌ཟུག༌ མ༌ནེ༌ མ༌ཅོས༌།
JOH 8:41 ཁྱོ༌ཞའེ༌ ཨ༌བའེ༌ ཅོ༌ཁན༌ནི༌ ལས༌གུན༌ ཁྱོ༌ཞའེ༌ ཅོའ༌ནོག༌།” ཁོང༌གུན༌ནི༌ ཡེ༌ཤུའ༌ ཟེརས༌, “ང༌ཞ༌གུན༌ ན༌ལུ༌ མན༌, དཀོན༌མཆོག༌ ཁོང༌རང༌ཙ༌ ང༌ཞའེ༌ ཡབ༌ ཨིན༌།”
JOH 8:42 ཡེ༌ཤུའི༌ ཁོང༌གུན༌ལ༌ མོལས༌, “ཀལ༌ཏེས༌ ཁྱོ༌ཞ༌གུན༌ནི༌ ཡབ༌, དཀོན༌མཆོག༌ ཨིན༌པིན༌ན༌, ཁྱོ༌ཞའེ༌ ང༌ ཅམས༌པ༌ ཅོའད༌གྲོ༌, ཅིའ༌ཟེར༌ན༌ ང༌ དཀོན༌མཆོག༌ནེ༌ ཡོངས༌ཏེ༌ དག༌ས༌ འི༌ཀ༌ ཡོད༌། ང༌ འི༌ཀ༌ ང༌རང༌ངི༌ ཝང༌ཆའེ༌ ནང༌ང༌ ཡོངས༌ཏེ༌ མན༌, ཁོང༌ངི༌ ང༌ ཀལ༌ལ༌ ཛད༌ཏེ༌ ཨིན༌།
JOH 8:43 ཅིའ༌, ཁྱོ༌ཞའ༌ ངའེ༌ སྤེ༌ར༌གུན༌ ཧ༌ མ༌གོ༌ ཨིན༌ནོག༌? ཅིའ༌ཟེར༌ན༌ ཁྱོ༌ཞའ༌ ངའེ༌ ལབ༌ཞ༌གུན༌ལ༌ ཏད༌པ༌ ཅོའ༌ལ༌ ཐད༌ད༌ མ༌ནོག༌།
JOH 8:44 ཁྱོ༌ཞ༌གུན༌ནི༌ ཨ༌བ༌ ནི༌ རྡུད༌གུན༌ནི༌ གོ༌བ༌ ཨིན༌ནོག༌, ཡང༌ ཁྱོ༌ཞའ༌ ཁྱོ༌ཞའེ༌ ཨ༌བའེ༌ དོད༌པ༌ ནང༌ཞིན༌ ལས༌གུན༌ ཅོའ༌ ཐད༌ད༌ནོག༌། ཁོ༌ ཇིག༌རྟེན༌ ཆགས༌པ༌ནེ༌ ཕར༌ལ༌ མི༌སད༌ཞིག༌ ཨིན༌, ཡང༌ དཀོན༌མཆོག༌གི༌ དེན༌བའེ༌ ལབ༌ཞ༌གུན༌ལ༌ ནཕ༌རད༌ ཅོའ༌ནོག༌, ཁོའེ༌ ནང༌ང༌ ཀྲང༌པོ༌ ཅའང༌ མེད༌ཏེ༌ ཨིན༌ནོག༌། ཁོའེ༌ ཟུན༌ ཏང༌ ཟ༌ནེ༌ ཁོ༌རང༌ངི༌ སྐད༌ ཏངས༌ཏེ༌ ཨིན༌ནོག༌ ཅིའ༌ཟེར༌ན༌ ཁོ༌ ཟུན༌ཇན༌ ཡང༌ ཟུན༌གུན༌ནི༌ ཨ༌བ༌ ཨིན༌ནོག༌།
JOH 8:45 ཨིན༌ནའང༌ ངའེ༌ དཀོན༌མཆོག༌གི༌ དེན༌བའེ༌ ལབ༌ཞ༌ ཤད༌ཅེས༌པོའེ༌ ཁྱོ༌ཞ༌གུན༌ནི༌ ངའེ༌ཀ༌ དེན༌ཤེས༌ས༌ མ༌ནོག༌།
JOH 8:46 ཁྱོ༌ཞའེ༌ ཕྲོ༌ནེ༌ སུའི༌ ང༌ སྡིག༌པའེ༌ ལས༌ ཅོས༌ཏེ༌ ནོངས༌ཅན༌ ཨིན༌ཁན༌བོ༌ སྟན༌ ཐུབ༌ཨིན༌? ཀལ༌ཏེས༌ དཀོན༌མཆོག༌གི༌ དེན༌བའེ༌ ལབ༌ཞ༌ ངའེ༌ ཁྱོ༌ཞའ༌ ཤད༌དད༌ན༌, ཏེ༌ནེ༌ ཁྱོ༌ཞ༌གུན༌ནི༌ ངའེ༌ཀ༌ ཏད༌པ༌ ཅིའ༌ ཅོའ༌མེད༌?
JOH 8:47 དཀོན༌མཆོག༌གི༌ ཨིན༌ཁན༌གུན༌ནི༌ ཁོང༌ངི༌ མོལ༌ཁན༌ ཚང༌མ༌ ཉན༌ན༌ནོག༌, ཨིན༌ནའང༌ ཁྱོ༌ཞའེ༌ མི༌ཉན༌ཅེས༌སི༌ གྱུན༌ཚན༌བོ༌ ནི༌ ཁྱོ༌ཞ༌གུན༌ དཀོན༌མཆོག༌གི༌ མ༌ནོག༌།”
JOH 8:48 ཡ༌ཧུ༌དཱ༌པ༌གུན༌ནི༌ ལན༌ཏངས༌, “ང༌ཞའེ༌ ཁྱོ༌རང༌ ས༌མར༌རི༌ཡཱ༌པ༌ ཡང༌ ཁྱོ༌རང༌ངི༌ ནང༌ང༌ རྡུད༌ ཞུགས༌ཏེ༌ ཨིན༌ནོག༌ ཟེར༌ཁན༌བོ༌ དེན༌བ༌ མ༌ནོག༌ག༌?”
JOH 8:49 ཡེ༌ཤུའི༌ མོལས༌, “ངའེ༌ ནང༌ང༌ རྡུད༌ ཞུགས༌ཏེ༌ མེད༌། ངའེ༌ ང༌རང༌ངི༌ ཡབ༌བ༌ རྩི༌ཝ༌ ཅོའད༌, ཨིན༌ནའང༌ ཁྱོ༌ཞ༌གུན༌ནི༌ ང༌ རྩི༌ཝ༌ ཅོའ༌ མི༌དུག༌།
JOH 8:50 ངའེ༌ ང༌རང༌ང༌ རྩི༌ཝ༌ ཙལ༌ལ༌ མེད༌། འོ༌ན༌ ངའ༌ རྩི༌ཝ༌ ཙལ༌ལ༌ ཛད༌ཁན༌ཞིག༌ ཡོད༌ ཡང༌ ཁོང༌ ནི༌ ཁྲིམས༌ཅད༌ ཛད༌ཁན༌བོ༌ ཨིན༌།
JOH 8:51 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ ལབ༌ཞ༌གུན༌ལ༌ ཁའ༌ ཉན༌ཁན༌གུན༌ མ༌ནེ༌ མི༌ཤི༌།”
JOH 8:52 ཁོང༌གུན༌ནི༌ ཁོང༌ང༌ ཟེརས༌, “ཏ༌ ང༌ཞའ༌ ཧ༌གོ༌ ཁྱོ༌རང༌ངི༌ ནང༌ང༌ རྡུད༌ ཞུགས༌ཏེ༌ ཡོད༌ཏེ༌ ཨིན༌ནོག༌། ཨབ༌ར༌ཧམ༌ ཀྲོངས༌ ཡང༌ ཏེན༌ན༌ ཙོགས༌ལ༌ ཞན༌ ལུང༌སྟོན༌པ༌གུན༌ནའང༌, ཨིན༌ནའང༌ ཁྱོ༌རང༌ངི༌ ཟེར༌ར༌ནོག༌ ཁྱོ༌རང༌ངི༌ ལབ༌ཞའ༌ ཁའ༌ ཉན༌ཁན༌གུན༌ མ༌ནེ༌ མི༌ཤི༌།
JOH 8:53 ཁྱོ༌རང༌ ཅི༌ ང༌ཞའེ༌ ཕ༌མེས༌པོ༌ ཨབ༌ར༌ཧམ༌མི༌ སང༌ ཇིགས༌པོ༌ ཨིན༌ན༌? ཁོང༌ ཀྲོངས༌ ཡང༌ ལུང༌སྟོན༌པ༌གུན༌ནའང༌, ཁྱོ༌རང༌ རང༌དང༌རང༌ སུ༌ ཨིན༌ སམ༌མ༌རག༌?”
JOH 8:54 ཡེ༌ཤུའི༌ མོལས༌, “ཀལ༌ཏེས༌ ངའེ༌ ང༌རང༌ང༌ རང༌སྟོད༌ ཏང༌ན༌ ཏེ༌ སྟོད༌པ༌བོ༌ ཏོན༌མེད༌ ཨིན༌ནོག༌། ངའེ༌ ཡབ༌བི༌ ངའ༌ སྤལ༌ སལ༌ཨིན༌, ཁྱོ༌ཞའེ༌ ཁོང༌ང༌ ཁྱོ༌ཞའ༌ རང༌ངི༌ དཀོན༌མཆོག༌ ཟེར༌དུག༌།
JOH 8:55 ཁྱོ༌ཞའེ༌ ཁོང༌ ཤེས༌ས༌ མ༌ནོག༌ ཨིན༌ནའང༌ ངའེ༌ ཁོང༌ ཤེས༌སད༌། ཀལ༌ཏེས༌ ངའེ༌ ཤེས༌ས༌མེད༌ ཟེར༌ན༌ ངའང༌ ཁྱོ༌ཞ༌གུན༌ ཙོགས༌ལ༌ ཟུན༌ཇན༌ གྱུར༌ཨིན༌། ཨིན༌ནའང༌ ངའེ༌ ཁོང༌ ཤེས༌སད༌ ཡང༌ ངའེ༌ ཁོང༌ངི༌ བཀའ༌ ཁའ༌ཉན༌ནད༌།
JOH 8:56 ཁྱོ༌ཞའེ༌ ཕ༌མེས༌པོ༌ ཨབ༌ར༌ཧམ༌མི༌ ངའེ༌ ཏུས༌པོ༌ ཐོང༌ཅེས༌སི༌ སྐོར༌ལ༌ སམ༌ ཟ༌ནེ༌ ཁོང༌ མ༌སྲན༌ཏྲེ༌ ཐད༌། ཁོང༌ངི༌ ཏེ༌བོ༌ ཐོང༌ ཡང༌ མ༌ ཐད༌པོ༌ སོང༌།”
JOH 8:57 ཡ༌ཧུ༌དཱ༌པ༌གུན༌ནི༌ ཡེ༌ཤུའ༌ ཟེརས༌, “ཁྱོ༌རང༌ངི༌ ལོ༌ ཏ༌རུང༌ ལྔབ༌ཅུའང༌ མ༌སོང༌, ཁྱོ༌རང༌ངི༌ ཨབ༌ར༌ཧམ༌ ཐོང༌ ཟེར༌ཏེ༌ ཀ༌ཟུག༌གི༌ ཟེར༌རད༌?”
JOH 8:58 ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ང༌ ནི༌ ཨབ༌ར༌ཧམ༌ མ༌སྐྱེའེ༌ སང༌ སྔུན༌ལ༌ ཡོད༌པིན༌། ”
JOH 8:59 ཏེ༌བོ༌ ཚོར༌ར༌ཅིག༌ ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌ལ༌ རྡོའ༌ ཁུརས༌, ཨིན༌ནའང༌ ཡེ༌ཤུ༌ ཁོང༌གུན༌ནེ༌ ཨིབས༌ཏེ༌ ཆོད༌ཁང༌ནེ༌ བིངས༌ཏེ༌ སྐྱོདས༌།
JOH 9:1 གཙོ༌བོ༌ ཡེ༌ཤུ༌ ལམ༌ནེ༌ སྐྱོད༌ ཟ༌ནེ༌ ཁོང༌ངི༌ སྐྱེས༌པ༌ནེ༌ ཕར༌ལ༌ ཞ༌ར༌ ཡོད༌ཁན༌ནི༌ མི༌ཞིག༌ ཟིགས༌།
JOH 9:2 ཁོང༌ངི༌ ལོབ༌ཕྲུགས༌གུན༌ནི༌ ཁོང༌ང༌ ཏྲིས༌, “ལོབ༌བོན༌ལེ༌, སུའི༌ སྡིག༌པའེ༌ ཞས༌ཏེ༌ ཁོ༌ ཞ༌ར༌ སྐྱེས༌ཏེ༌ ཨིན༌ནོག༌, ཁོ༌རང༌ངི༌ ཡ༌ ཁོའེ༌ ཕ༌མ༌གུན༌ནི༌?”
JOH 9:3 ཡེ༌ཤུའི༌ ཁོང༌གུན༌ལ༌ མོལས༌, “ཁོའེ༌ ཡ༌ ཁོའེ༌ ཕ༌མ༌གུན༌ནི༌ སྡིག༌པའེ༌ ཞས༌ཏེ༌ མ༌ནོག༌, ཨིན༌ནའང༌ དཀོན༌མཆོག༌གི༌ ཆག༌ལས༌གུན༌ ཁོའེ༌ མི༌ཚེ༌ ནང༌ང༌ སྔོན༌ ཅུག༌ག༌ ཛད༌ཅེས༌སི༌ ཕིའ༌ ཁོ༌ ཞ༌ར༌ སྐྱེས༌ཏེ༌ ཨིན༌ནོག༌།
JOH 9:4 ཉི༌མའེ༌ འོད༌པོ༌ ཡོད༌ ཟ༌ནེ༌ ང༌དང༌གུན༌ནི༌ ང༌ ཀལ༌ལ༌ ཛད༌ཁན༌ནི༌ ཆག༌ལས༌གུན༌ ཅོ༌གོས༌། ཚན༌ ལེབ༌ཨིན༌ ནམ༌ སུའིང༌ ལས༌ ཅོ༌ མི༌ཉན༌།
JOH 9:5 ནམ༌ཚོག༌པ༌ ང༌ ཇིག༌རྟེན༌ནི༌ ནང༌ང༌ ཡོད༌ ང༌ ཇིག༌རྟེན༌པ༌གུན༌ནི༌ ཕིའ༌ འོད༌ ཨིན༌།”
JOH 9:6 ཏེ༌ཟུག༌ མོལ༌ཏེ༌ སྟིང༌ནེ༌ ཡེ༌ཤུའི༌ སའེ༌ཀ༌ ཐུ༌ ཕང༌ང༌ ཛདས༌, ཡང༌ ཏེ༌བོའ༌ ཀ༌ལག༌ ཅོའ༌ ཛད༌ཏེ༌ ཞ༌ར༌བོའེ༌ མིག༌ག༌ སྐུའ༌ ཛདས༌།
JOH 9:7 ཁོང༌ངི༌ ཁོའ༌ མོལས༌, “སོང༌ཏེ༌ ཁྱོ༌རང༌ངི༌ མིག༌ སི༌ལོམ༌མི༌ ཟིང༌ངི༌ ནང༌ང༌ ཁྲུས༌” ༼སི༌ལོམ༌མི༌ ཏོན༌ ནི༌ ལམ༌ ཅུག༌ཅེས༌ལ༌ ཟེར༌ར༌ནོག༌།༽ ཏེ༌ནེ༌ ཁོ༌ སོང༌ཏེ༌ ཁོ༌རང༌ངི༌ མིག༌ ཟིང༌ངི༌ ནང༌ང༌ ཁྲུས༌ ཡང༌ ཁོའ༌ མིག༌ནེ༌ ཐོང༌ཨིན༌ ཁོ༌རང༌ངི༌ ཁང༌པ༌ ལོགས༌ཏེ༌ སོང༌།
JOH 9:8 ཞ༌ར༌བོའེ༌ ཁྱིམ༌ཚེས༌གུན༌ དང༌ སྔུན༌ལ༌ ཁོ༌ ཞ༌ར༌ ལྩང༌ཨིན༌ ཐོང༌ཁན༌གུན༌ནི༌ ཅིག༌ དང༌ ཅིག༌ག༌ ཏྲིས༌, “ཁོ༌ ལམ༌མི༌ ཐའ༌མ༌ དུགས༌ཏེ༌ ལྩང༌ཁན༌ནི༌ མི༌བོ༌ མ༌ནོག༌ག༌?”
JOH 9:9 ཁ༌ཅིག༌གི༌, “ཏེན༌ན༌བོ༌ ཨིན༌ནོག༌” ཡང༌ ཞན༌གུན༌ནི༌, “མ༌ནོག༌, ཁོ༌ ཏེ༌ མི༌བོ༌ ཙོགས༌ཤིག༌ ཐོང༌དུག༌” ཟེརས༌། ཨིན༌ནའང༌ ཏེ༌ མི༌བོའེ༌ འུ༌ཙུག༌ ཏང༌ཨིན༌ ཟེརས༌, “ང༌ ཏེན༌ན༌ ཞ༌ར༌བོ༌ ཨིན༌།”
JOH 9:10 ཁོང༌གུན༌ནི༌ ཏྲིས༌, “ཏེ༌ནེ༌ ཁྱོ༌རང༌ངི༌ མིག༌ ཀ༌ཟུག༌གི༌ ཕན༌?”
JOH 9:11 ཁོའེ༌ ལན༌ཏངས༌, “ཡེ༌ཤུ༌ ཟེར༌ཁན༌ནི༌ མི༌བོའེ༌ ཀ༌ལག༌ ཅོས༌ཏེ༌ ངའེ༌ མིག༌གི༌ཀ༌ སྐུའ༌ ཛད༌ཏེ༌ ངའ༌ སོང༌ཏེ༌ སི༌ལོམ༌མི༌ ཟིང༌ངི༌ ནང༌ང༌ མིག༌པོ༌ ཁྲུ༌ཅེས༌ལ༌ མོལས༌། ཏེ༌ནེ༌ ང༌ སོང༌ཏེ༌ མིག༌ ཟིང༌ངི༌ ནང༌ང༌ ཁྲུའ༌ཅིག༌ ངའ༌ མིག༌ནེ༌ ཐོང༌།”
JOH 9:12 ཁོང༌གུན༌ནི༌ ཏྲིས༌, “ཡེ༌ཤུ༌ ཀ༌ནེ༌ དུག༌?” ཁོའེ༌ ཟེརས༌, “ང༌ གྱུས༌མེད༌།”
JOH 9:13 ཏེ༌ནེ༌ ཁོང༌གུན༌ནི༌ སྐྱེས༌པ༌ནེ༌ ཕར༌ལ༌ ཞ༌ར༌ ཡོད༌ཁན༌ནི༌ མི༌བོ༌ ཕ༌རུ༌ཤི༌པ༌གུན༌ནི༌ཀ༌ ཁྱོངས༌།
JOH 9:14 གཙོ༌བོ༌ ཡེ༌ཤུའི༌ ཀ༌ལག༌ ཅོའ༌ ཛད༌ཏེ༌ ཞ༌ར༌བོའེ༌ མིག༌ ཕན༌ཅུག༌ག༌ ཛད༌ཁན༌ནི༌ ཞག༌པོ༌ ཤབ༌བད༌དི༌ ངལ༌ཚོའེ༌ ཞག༌ ཨིན༌པིན༌།
JOH 9:15 ཏེན༌ན༌བོའེ༌ཕིའ༌ ཕ༌རུ༌ཤི༌པ༌གུན༌ནིའང༌ ཁོའ༌ ཏྲིས༌, “ཁྱོ༌རང༌ང༌ ཀ༌ཟུག༌གི༌ ཐོང༌ཐུབ༌?” ཁོའེ༌ ལན༌ཏངས༌, “ཡེ༌ཤུའི༌ ངའེ༌ མིག༌གི༌ཀ༌ ཀ༌ལག༌ སྐུའ༌ ཛདས༌ ཡང༌ ངའེ༌ ཁྲུའ༌ཅིག༌ ང༌ མིག༌ནེ༌ ཐོང༌།”
JOH 9:16 ཕ༌རུ༌ཤི༌པ༌ ཁ༌ཅིག༌གི༌ ཟེརས༌, “ཡེ༌ཤུ༌ ཟེར༌ཁན༌ནི༌ མི༌བོ༌ ནི༌ དཀོན༌མཆོག༌གི༌ ཆོགས༌ནེ༌ མ༌ནོག༌ ཅིའ༌ཟེར༌ན༌ ཁོའེ༌ ཤབ༌བད༌དི༌ ཞག༌གི༌ ཁྲིམས༌གུན༌ མ༌སྲུངས༌།” ཞན༌ ཁ༌ཅིག༌གི༌ ཟེརས༌, “སྡིག༌ཅན༌ཞིག༌ག༌ འི༌ཙོགས༌སི༌ ལྟས༌གུན༌ ཀ༌ཟུག༌གི༌ སྟན༌ ཉན༌ཨིན༌?” ཏེ༌བོའེ༌ཕིའ༌ ཁོང༌གུན༌ནི༌ ནང༌ང༌ ཁག༌ བུད༌།
JOH 9:17 ཏེ༌ནེ༌ ཁོང༌གུན༌ནི༌ ཞ༌ར༌བོའ༌ ཡང༌སྐྱར༌ ཏྲིས༌, “ཁྱོ༌རང༌ངི༌ མིག༌ ཕན༌ཅུག༌ཁན༌ནི༌ མི༌བོའེ༌ སྐོར༌ལ༌ ཁྱོ༌རང༌ངི༌ ཅི༌ སམ༌བ༌ ཨིན༌?” ཁོའེ༌ ལན༌ཏངས༌, “ཏན༌ཏན༌ ཁོང༌ ལུང༌སྟོན༌པ༌ཞིག༌ ཨིན༌ནོག༌།”
JOH 9:18 ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ འི༌ མི༌བོ༌ ཞ༌ར༌ ཡོད༌ཁན༌ ཡང༌ དག༌ས༌ ཐོང༌ ཟེར༌ཁན༌བོ༌ ཏ༌རུང༌ངའང༌ དེན༌ མ༌ཤེས༌པ༌ ཁོའེ༌ ཕ༌མ༌གུན༌ བོད༌ཏེ༌ ཁྱོངས༌།
JOH 9:19 ཁོང༌གུན༌ནི༌ ཁོའེ༌ ཕ༌མ༌གུན༌ལ༌ ཏྲིས༌, “འི༌ མི༌བོ༌ ཁྱོ༌ཞའེ༌ བུ༌ཚ༌ ཨིན༌ན༌? ཅི༌ ཁོ༌ ཞ༌ར༌ སྐྱེས༌ས༌? ཏེ༌ནེ༌ ཁོའ༌ དག༌ས༌ ཀ༌ཟུག༌ག༌ ཐོང༌ཏེ༌ ཨིན༌ནོག༌?”
JOH 9:20 ཕ༌མ༌གུན༌ནི༌ ལན༌ཏངས༌, “ཁོ༌ ང༌ཞའེ༌ བུ༌ཚ༌ ཨིན༌ ཡང༌ ཁོ༌ སྐེ༌ ཟ༌ནེ༌ ཞ༌ར༌ ཡོད༌པིན༌།
JOH 9:21 ཨིན༌ནའང༌ ཁོའ༌ ཀ༌ཟུག༌གི༌ དག༌ས༌ ཐོང༌ངད༌ ཡང༌ སུའི༌ ཁོའེ༌ མིག༌ ཕན༌ཅུགས༌ ང༌ཞའ༌ ཅའང༌ གྱུས༌མེད༌, ཁོ༌རང༌ང༌ ཏྲིའ༌ ཛད༌། ཁོ༌ ལྡན༌ཁན༌ཞིག༌ ཨིན༌པ༌ ཁོའེ༌ ཉེ༌ཞའེ༌ ཏྲི༌ཝ༌གུན༌ལ༌ ལན༌ ཏང༌ཉན༌ན༌ནོག༌།”
JOH 9:22 ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཇིགས༌ཤེས༌པའེ༌, ཁོའེ༌ ཕ༌མ༌གུན༌ནི༌ ཏེ༌ཟུག༌ ཟེརས༌ ཅིའ༌ཟེར༌ན༌ འུ༌སྐྱོང༌གུན༌ནི༌, ཡེ༌ཤུའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ནོག༌ ཟེར༌ཁན༌གུན༌ ཆོས༌ཚོགས༌སི༌ ཕྲོ༌ནེ༌ ཕིངས༌ ཏང༌ཨིན༌ ཟེར༌ཏེ༌ ཐག༌ཅད༌ཏེ༌ ཨིན༌པིན༌།
JOH 9:23 ཏེན༌ན༌ གྱུན༌ཚན༌བོའེ༌ ཕིའ༌ ཁོའེ༌ ཕ༌མ༌གུན༌ནི༌ ཟེརས༌, “ཁོ༌ ལྡན༌ཁན༌ཞིག༌ ཨིན༌ནོག༌ ཁོ༌རང༌ང༌ ཏྲིའ༌ ཛད༌།”
JOH 9:24 འུ༌སྐྱོང༌གུན༌ནི༌ སྔུན༌ལ༌ ཞ༌ར༌ ཡོད༌ཁན༌ནི༌ མི༌བོའ༌ ལན༌ ཉིས༌པ༌ བོད༌ཏེ༌ ཏྲིས༌, “དཀོན༌མཆོག༌ག༌ ཇིགས༌ཏེ༌ ཀྲང༌པོ༌ ཟེར༌། ང༌ཞའ༌ གྱུས༌ཡོད༌ ཡེ༌ཤུ༌ ཟེར༌ཁན༌ནི༌ མི༌བོ༌ སྡིག༌ཅན༌ཞིག༌ ཨིན༌ནོག༌།”
JOH 9:25 ཁོའེ༌ ལན༌ཏངས༌, “ཁོང༌ སྡིག༌ཅན༌ ཨིན༌ན༌ མན༌ ང༌ གྱུས༌མེད༌, ཨིན༌ནའང༌ སྤེ༌ར༌ ཅིག༌ ང༌ ཏན༌ཏན༌ ཤེས༌སད༌ ང༌ སྔུན༌ལ༌ ཞ༌ར༌ ཨིན༌པིན༌ དག༌ས༌ ང༌ ཐོང༌ངད༌།”
JOH 9:26 ཁོང༌གུན༌ནི༌ ཁོའ༌ ཡང༌སྐྱར༌ ཏྲིས༌, “ཁོའེ༌ ཁྱོ༌རང༌ང༌ ཅི༌ ཅོས༌? ཁྱོ༌རང༌ངི༌ མིག༌པོ༌ ཁོའེ༌ ཀ༌ཟུག༌ག༌ ཕན༌ཅུགས༌?”
JOH 9:27 ཁོའེ༌ ཟེརས༌, “ངའེ༌ ཁྱོ༌ཞ༌གུན༌ལ༌ སྔུན༌ལ༌ ཟེར༌པིན༌, ཨིན༌ནའང༌ ཁྱོ༌ཞ༌གུན༌ནི༌ ཉན༌ན༌ མི༌དུག༌། ཏ༌ ཏེན༌ན༌ སྤེ༌ར༌བོ༌ ཡང༌སྐྱར༌ ཉན༌ཉིན༌ རག༌ག༌? ཅི༌ ཁྱོ༌ཞ༌གུན༌ནའང༌ ཁོང༌ངི༌ ལོབ༌ཕྲུགས༌ གྱུར༌ཉིན༌ རག༌ག༌?”
JOH 9:28 ཏེ༌ནེ༌ འུ༌སྐྱོང༌གུན༌ནི༌ ཁོའ༌ ཁྲེལ༌བ༌ ཅོ༌ཨིན༌ ཟེརས༌, “ཁྱོ༌རང༌ ཁོའེ༌ ལོབ༌ཕྲུགས༌ ཨིན༌ནོག༌། ང༌ཞའ༌ ནི༌ མོ༌ཟེས༌སི༌ ལོབ༌ཕྲུགས༌ ཨིན༌།
JOH 9:29 དཀོན༌མཆོག༌གི༌ མོ༌ཟེས༌ ཉམ༌པོ༌ ཞལ༌ཏ༌ སལ༌ཏེ༌ ཨིན༌ཁན༌བོ༌ ང༌ཞའ༌ ཤེས༌སད༌, ཨིན༌ནའང༌ འི༌ མི༌བོ༌ ཀ༌ནེ༌ ཡོངས༌ཏེ༌ ཨིན༌ ང༌ཞའ༌ ཅའང༌ གྱུས༌མེད༌།”
JOH 9:30 ཁོའེ༌ ལན༌ཏངས༌, “འི༌བོ༌ མ༌ ཡམ༌ཚན༌ རག༌། ཁྱོ༌ཞ༌གུན༌ནི༌ ཁོང༌ ཀ༌ནེ༌ ཡོངས༌ཏེ༌ ཨིན༌ ཤེས༌ས༌ མེད༌ནའང༌ ཁོང༌ངི༌ ངའེ༌ མིག༌ ཕན༌ཅུག༌ག༌ ཛདས༌།
JOH 9:31 འི༌བོ༌ ཚང༌མའེ༌ ཤེས༌ས༌ནོག༌, དཀོན༌མཆོག༌གི༌ སྡིག༌ཅན༌གུན༌ལ༌ སན༌ན༌ མ༌ནོག༌, ཨིན༌ནའང༌ དཀོན༌མཆོག༌གི༌ རྩི༌ཝ༌ དང༌ ཇིགས༌སི༌ ནང༌ང༌ གྲུལ༌ཏེ༌ ཁོང༌ངི༌ ཐུག༌གོངས༌ ནང༌ཞིན༌ ཅོ༌ཁན༌གུན༌ལ༌ སན༌ན༌ནོག༌།
JOH 9:32 སྐྱེས༌པ༌ནེ༌ ཕར༌ལ༌ ཞ༌ར༌ ཨིན༌ཁན༌ཞིག༌ ཕན༌ཅུག༌ག༌ ཛད༌ཁན༌ནི༌ སྐོར༌ལ༌ སུ༌ཞིག༌གིའང༌ དག༌ས༌ ཚོག༌པ༌ ཚོར༌ཏེ༌ མེད༌གྲོ༌།
JOH 9:33 ཀལ༌ཏེས༌ འི༌ མི༌བོ༌ དཀོན༌མཆོག༌གི༌ ཆོགས༌ནེ༌ མན༌པིན༌ན༌ ཁོང༌ང༌ ཅའང༌ ཅོ༌ཉན༌ཏེ༌ མེད༌གྲོ༌།”
JOH 9:34 ཁོང༌གུན༌ནི༌ ཟེརས༌, “ཁྱོ༌རང༌ སྐྱེས༌པ༌ནེ༌ ཕར༌ལ༌ སྡིག༌པའེ༌ གངས༌ཏེ༌ ཡོད༌ཏེ༌ ཨིན༌ནོག༌། ང༌ཞ༌གུན༌ལ༌ ལབ༌ཅེས༌སི༌ ཧམ༌པ༌ ཀ༌ཟུག༌གི༌ ཡོངས༌།” ཏེ༌ནེ༌ ཁོང༌གུན༌ནི༌ འི༌ མི༌བོ༌ ཆོས༌ཚོགས༌སི༌ ཕྲོ༌ནེ༌ ཕིངས༌།
JOH 9:35 ཡ༌ཧུ༌དཱ༌པའེ༌ ཆོས༌ཚོགས༌སི༌ ཕྲོ༌ནེ༌ ཕིང༌ཁན༌ནི༌ མི༌བོའེ༌ སྐོར༌ལ༌ གཙོ༌བོ༌ ཡེ༌ཤུའི༌ སན༌, ཁོ༌ ཐོབ༌བ༌ཅིག༌ ཁོང༌ངི༌ ཏྲིའ༌ ཛདས༌, “ཁྱོ༌རང༌ངི༌ མི༌རིགས༌སི༌བུའི༌ཀ༌ ཏད༌པ༌ ཅོའད༌ད༌?”
JOH 9:36 ཁོའེ༌ ཟེརས༌, “ཁོང༌ སུ༌ ཨིན༌ནོག༌? ཁོང༌ངི༌ཀ༌ ཏད༌པ༌ ཅོ༌ཉན༌ཅེས༌ལ༌ ངའ༌ ཤད༌ད༌ ཛད༌དའང༌།”
JOH 9:37 ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ཁོ༌ ཐོངས༌ཏེ༌ ཨིན༌, ཡང༌ དག༌ས༌ ཁྱོ༌རང༌ ཉམ༌པོ༌ སྤེ༌ར༌ ཏང༌ཁན༌བོ༌ ཁོ༌ ཨིན༌།”
JOH 9:38 ཁོའེ༌ ཟེརས༌, “ཀྱེ༌ གཙོ༌བོ༌, ངའེ༌ ཉེ༌རང༌ངི༌ཀ༌ ཏད༌པ༌ ཅོའད༌” ཡང༌ ཁོའེ༌ ཡེ༌ཤུའ༌ ཆག༌ ཕུལ༌ཏེ༌ ཅོལས༌།
JOH 9:39 ཡེ༌ཤུའི༌ མོལས༌, “ཞ༌ར༌གུན༌ལ༌ ཐོང༌ཅུག༌ཅེས༌ ཡང༌ ཐོང༌ཁན༌གུན༌ལ༌ ཞ༌ར༌ ཨིན༌ཁན༌བོ༌ སྟན༌ཏེ༌ ཇིག༌རྟེན༌པ༌གུན༌ལ༌ ཁྲིམས༌ཅད༌ ཅོ༌ཅེས༌སི༌ ཕིའ༌ ངའ༌ ཡོངས༌ཏེ༌ ཨིན༌།”
JOH 9:40 ཁོང༌ ཉམ༌པོ༌ ཡོད༌ཁན༌ནི༌ ཕ༌རུ༌ཤི༌པ༌ ཁ༌ཅིག༌གི༌ ཏེ༌བོ༌ ཚོར༌ཏེ༌ ཟེརས༌, “ཅི༌, ང༌ཞ༌གུན༌ནའང༌ ཞ༌ར༌ ཨིན༌ནོག༌ག༌?”
JOH 9:41 ཡེ༌ཤུའི༌ མོལས༌, “ཀལ༌ཏེས༌ ཁྱོ༌ཞ༌གུན༌ ཞ༌ར༌ ཨིན༌པིན༌ན༌ ཁྱོ༌ཞ༌གུན༌ནི༌ ནང༌ང༌ སྡིག༌པ༌ ཅོ༌ཁན༌ནི༌ སྐྱོན༌ ཐོབ༌ཏེ༌ མེད༌གྲོ༌, ཨིན༌ནའང༌ དག༌ས༌ ཁྱོ༌ཞའེ༌ ང༌ཞའ༌ མིག༌ནེ༌ ཐོང༌ངད༌ ཟེར༌པ༌ ཁྱོ༌ཞའེ༌ ནང༌ང༌ སྐྱོན༌ ལུས༌ཏེ༌ ཨིན༌ནོག༌།”
JOH 10:1 གཙོ༌བོ༌ ཡེ༌ཤུའི༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ལུག༌རའེ༌ ནང༌ང༌ སྒོ༌ནེ༌ མ༌ཡོང༌ང༌ རྩིག༌པའེ༌ ཀ༌ནེ༌ ཛགས༌ཏེ༌ ཡོང༌ཁན༌གུན༌ རྐུན༌མ༌ དང༌ ཅག༌པ༌ ཨིན༌ནོག༌།
JOH 10:2 སྒོ༌ནེ༌ ཡོང༌ཁན༌བོ༌ ལུག༌གུན༌ནི༌ ལུག༌རྫི༌ ཨིན༌ནོག༌།
JOH 10:3 སྒོ༌སྲུང༌པའེ༌ ལུག༌རྫིའ༌ སྒོ༌ ཕེའ༌ནོག༌ ཡང༌ ལུག༌གུན༌ནི༌ ལུག༌རྫིའི༌ སྐད༌བོ༌ ངོ༌ཤེས༌ས༌ནོག༌། ལུག༌རྫིའི༌ ཁོ༌རང༌ངི༌ ལུག༌ རེ༌རེའ༌ མིང༌ བོད༌ཨིན༌ ཕི༌ལོག༌ག༌ ཁྲིད༌ཏེ༌ ཁྱེར༌ར༌ནོག༌།
JOH 10:4 ཁོའེ༌ རང༌ངི༌ ལུག༌ ཚང༌མ༌ ཕི༌ལོག༌ག༌ ཕིང༌ ཚར༌ར༌ཅིག༌, ཁོ༌ ལུག༌གུན༌ནི༌ སང༌ སྔུན༌ལ༌ གྲུལ༌ཨིན༌ ཡང༌ ལུག༌གུན༌ ཁོའེ༌ སྟིང༌རང༌ནེ༌ ཡོང༌ཨིན༌ ཅིའ༌ཟེར༌ན༌ ཏེ༌གུན༌ནི༌ ཁོའེ༌ སྐད༌ ངོ༌ཤེས༌ས༌ནོག༌།
JOH 10:5 ལུག༌གུན༌ ཞན༌མ༌ མིའི༌ གྱབ༌ནེ༌ མ༌ཆའ༌ ཐག༌རིང༌ང༌ ཤོར༌ཏེ༌ ཆེན༌, ཅིའ༌ཟེར༌ན༌ ལུག༌གུན༌ནི༌ ཞན༌མ༌ མི༌བོའེ༌ སྐད༌ ངོ༌ཤེས༌ས༌ མ༌ནོག༌།”
JOH 10:6 ཡེ༌ཤུའི༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཏེ༌ སྤེ༌བོ༌ སལ༌ལ༌ ཛདས༌, ཨིན༌ནའང༌ ཁོང༌ངི༌ ཁོང༌གུན༌ལ༌ མོལ༌ཁན༌བོ༌ ཧ༌མ༌གོ༌།
JOH 10:7 ཏེན༌ན༌བོའེ༌ཕིའ༌ ཡེ༌ཤུའི༌ ཡང༌སྐྱར༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ང༌ ནི༌ ལུག༌རའེ༌ སྒོ༌བོ༌ ཨིན༌།
JOH 10:8 ངའེ༌ སང༌ སྔུན༌ལ༌ ཡོངས༌ཁན༌ ཚང༌མ༌ ནི༌ རྐུན༌མ༌ དང༌ ཅག༌པ༌ ཨིན༌པིན༌, ཨིན༌ནའང༌ ངའེ༌ ལུག༌གུན༌ནི༌ ཁོང༌གུན༌ནི༌ ཟེར༌ཁན༌གུན༌ མ༌ཉནས༌།
JOH 10:9 ང༌ ནི༌ སྒོ༌བོ༌ ཨིན༌, ང༌ གྱུད༌ཏེ༌ ལུག༌རའེ༌ ནང༌ཀུག༌ག༌ ཞུགས༌ཁན༌གུན༌ལ༌ ཐར༌པ༌ ཐོབ༌ཨིན༌། སྒག༌ཞའ༌ མེད༌པ༌ ཁོང༌གུན༌ ནང༌ཀུག༌ག༌ ཡོང༌ཅེས༌ དང༌ ཕི༌ལོག༌ག༌ ཆེན༌ ཡང༌ རྩཱ༌ཁའ༌ གྱལ༌ལ༌ ཐོབ༌ཨིན༌།
JOH 10:10 རྐུན༌མ༌ ནི༌ ངའེ༌ ལུག༌གུན༌ རྐུ༌ཅེས༌, སད༌ཅེས༌ དང༌ མེད༌ཁན༌ ཅོ༌ཅེས༌ ཅིག༌པོའེ༌ ཕིའ༌ ཡོང༌ང༌ནོག༌། ཨིན༌ནའང༌ ང༌ ནི༌ ཏེ༌གུན༌ལ༌ གང༌པོ༌ མི༌ཚེ༌ ཚིམས༌པོ༌ཞིག༌ ཏང༌ཅེས༌ལ༌ ཡོངས༌ཏེ༌ ཨིན༌།”
JOH 10:11 “ང༌ ནི༌ ལུག༌རྫི༌ ཟང༌པོ༌བོ༌ ཨིན༌། ལུག༌རྫི༌ ཟང༌པོའེ༌ ལུག༌གུན༌ནི༌ ཕིའ༌ ཁོ༌རང༌ངི༌ སྲོག༌ ཏང༌ང༌ནོག༌།
JOH 10:12 ལ༌པ༌ ལུག༌གུན༌ནི༌ དག༌པོ༌ ཡང༌ ལུག༌རྫི༌ ཟང༌པོ༌ མན༌ པ༌སང༌, ཤང༌ཀུ༌ ཡོང༌ང༌ ཐོང༌ང༌ཅིག༌ ཁོ༌ ལུག༌གུན༌ ཕངས༌ཏེ༌ ཤོར༌ར༌ནོག༌། ཏེ༌ནེ༌ ཤང༌ཀུའི༌ ལུག༌གུན༌ལ༌ ཐམས༌ཏེ༌ ལུག༌ཁྱུ༌ ཡན༌ ཅུག༌ཨིན༌།
JOH 10:13 ཁོ༌ ཤོར༌ཏེ༌ ཆའ༌ནོག༌ ཅིའ༌ཟེར༌ན༌ ཁོ༌ ལ༌པ༌ཞིག༌ ཨིན༌ནོག༌ ཡང༌ ལུག༌གུན༌ལ༌ ཅི༌ཆ༌ནའང༌ ཚེར༌ཁ༌ མེད༌ཀྱག༌།”
JOH 10:14 “ང༌ ལུག༌རྫི༌ ཟང༌པོ༌བོ༌ ཨིན༌། ངའེ༌ ང༌རང༌ངི༌ ལུག༌གུན༌ ཤེས༌སད༌ ཡང༌ ངའེ༌ ལུག༌གུན༌ནི༌ ང༌ ཤེས༌ས༌ནོག༌,
JOH 10:15 ཀ༌ཟུག༌ ཡབ༌བི༌ ང༌ ཤེས༌སད༌, ངེའང༌ ཡབ༌ ཤེས༌སད༌། ཡང༌ ལུག༌གུན༌ནི༌ ཕིའ༌ ངའེ༌ ང༌རང༌ངི༌ སྲོག༌ ཏང༌ཨིན༌།
JOH 10:16 ང༌ འི༌ ལུག༌ཁྱུའི༌ ཕྲོའ༌ མེད༌ཁན༌ནི༌ ཡང༌ ལུག༌ རིག༌གའང༌ ཡོད༌། ངའེ༌ ཏེ༌གུན༌ནའང༌ ཁྱོང༌གོས༌, ཏེ༌གུན༌ནིའང༌ ངའེ༌ སྐད༌ལ༌ ཉན༌ཨིན༌, ཏེ༌ནེ༌ ལུག༌ཁྱུ༌ ཅིག༌ དང༌ ལུག༌རྫི༌ ཅིག༌ གྱུར༌ཨིན༌།”
JOH 10:17 “ངའེ༌ ཡབ༌བི༌ ང༌ ཅམས༌པ༌ ཛད༌ཅེས༌སི༌ གྱུན༌ཚན༌ ནི༌ ངའེ༌ ང༌རང༌ངི༌ སྲོག༌པོ༌ ཆོད༌པའ༌ ཏང༌ཅེས༌པོ༌ ཨིན༌, ཡང༌སྐྱར༌ ལོགས༌ཏེ༌ ཐོབ༌ཅེས༌སི༌ ཕིའ༌ ངའེ༌ ཏེ༌བོ༌ ཅོའད༌།
JOH 10:18 སུ༌ཞིག༌གའང༌ ངའེ༌ སྲོག༌ ངའེ༌ ཀ༌ནེ༌ ལེན༌ མི༌ཉན༌, ང༌ ང༌རང༌ ཐད༌ཏེ༌ ང༌རི༌ སྲོག༌པོ༌ ཏང༌ངད༌། ང༌ འི༌བོ༌ ཏང༌ཅེས༌ ཡང༌ ལོགས༌ཏེ༌ ལེན༌ཅེས༌སི༌ ཝང༌ ཡོད༌ ཅིའ༌ཟེར༌ན༌ ཡབ༌ དཀོན༌མཆོག༌གི༌ ང༌ བཀའ༌ སལ༌ལ༌ ཛད༌ཏེ༌ ཡོད༌།”
JOH 10:19 ཏེ༌ཟུག༌ མོལ༌ཁན༌བོའེ༌ ཞས༌ཏེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ནང༌ང༌ ཁག༌ བུད༌།
JOH 10:20 ཁོང༌ མང༌པོའེ༌ ཟེརས༌, “ཁོའ༌ རྡུད༌ ཞུགས༌ཏེ༌ སྙོས༌ཏེ༌ ཨིན༌ནོག༌, ཁོའ༌ ཅིའ༌ ཉན༌ནད༌?”
JOH 10:21 ཨིན༌ནའང༌ ཞན༌ ཁ༌ཅིག༌གི༌ ཟེརས༌, “འི༌ སྤེ༌ར༌གུན༌ རྡུད༌ ཞུགས༌ཁན༌ཞིག༌གི༌ མ༌ནོག༌། རྡུད༌དི༌ ཞ༌རའ༌ མིག༌ནེ༌ ཐོང༌ཅུག༌ ཉན༌ན༌ནོག༌ག༌? མ༌ནེ༌ ཉན༌ན༌ མ༌ནོག༌།”
JOH 10:22 དགུན༌ཏུས༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཆོད༌ཁང༌ གྲུབ༌ཁན༌ནི༌ ཞག༌ ཨིད༌ཏུ༌ ཅོ༌ཨིན༌ ཏུས༌ཆེན༌ རྩིའི༌ ཏུས༌ལ༌
JOH 10:23 ཡེ༌ཤུ༌ ཆོད༌ཁང༌ངི༌ ནང༌ང༌ སོ༌ལོ༌མོན༌ནི༌ ཡབས༌ ཟེར༌ཁན༌ནི༌ཀ༌ གྲུལ༌ལ༌ ཛད༌དད༌པིན༌།
JOH 10:24 ཡ༌ཧུ༌དཱ༌པ༌གུན༌ ཁོང༌ང༌ སྐོར༌ཏེ༌ དུགས༌ ཡང༌ ཟེརས༌, “ནམ༌ཚོག༌པ༌ ང༌ཞ༌གུན༌ ཐེ༌ཚོམས༌སི༌ ནང༌ང༌ བོར༌རད༌། ང༌ཞའ༌ སལ༌པོ༌ ཤོད༌དའང༌, ཁྱོ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌བོ༌ ཨིན༌ན༌?”
JOH 10:25 ཡེ༌ཤུའི༌ ལན༌སལས༌, “ངའེ༌ ཁྱོ༌ཞ༌གུན༌ལ༌ ཤད༌པིན༌, ཨིན༌ནའང༌ ཁྱོ༌ཞའེ༌ དེན༌ཤེས༌ས༌ མི༌དུག༌། ངའེ༌ ང༌རང༌ངི༌ ཡབ༌བི༌ ཝང༌ངི༌ ནང༌ང༌ ཅོ༌ཁན༌ནི༌ ཧ༌ལས༌ཤེས༌སི༌ ལས༌གུན༌ནི༌ ངའེ༌ ཕིའ༌ སྤང༌པོ༌ ཏང༌ང༌ནོག༌།
JOH 10:26 ཨིན༌ནའང༌ ཁྱོ༌ཞ༌གུན༌ནི༌ དེན༌ཤེས༌ས༌ མི༌དུག༌ ཅིའ༌ཟེར༌ན༌ ཁྱོ༌ཞའ༌ ངའེ༌ ལུག༌ མ༌ནོག༌།
JOH 10:27 ངའེ༌ ལུག༌གུན༌ནི༌ ངའེ༌ སྐད༌ ཉན༌ན༌ནོག༌ ཡང༌ ངའེ༌ ཁོང༌གུན༌ ཤེས༌སད༌། ཁོང༌གུན༌ ངའེ༌ གྱབ༌ནེ༌ ཡོང༌ང༌ནོག༌།
JOH 10:28 ངའེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཏང༌ཨིན༌ ཡང༌ ཁོང༌གུན༌ ཉལ༌ཝའེ༌ ནང༌ང༌ མ༌ནེ༌ མི༌ཕང༌། སུ༌ཞིག༌གིའང༌ ཁོང༌གུན༌ ངའེ༌ ལག༌ནེ༌ ཀོགས༌ཏེ༌ ཁྱེར༌ མི༌ཉན༌།
JOH 10:29 འི༌ ལུག༌གུན༌ ངའེ༌ ལག༌ག༌ སྟད༌ད༌ ཛད༌ཁན༌ནི༌ ངའེ༌ ཡབ༌ ཚང༌མའེ༌སང༌ ཝང༌ཅན༌ ཞུགས༌ཏེ༌ ཨིན༌། སུ༌ཞིག༌གིའང༌ ངའེ༌ ཡབ༌བི༌ ལག༌ནེ༌ ཁོང༌གུན༌ ཀོགས༌ཏེ༌ ཁྱེར༌ མི༌ཉན༌།
JOH 10:30 ང༌ དང༌ ཡབ༌ ཉིས༌ཀོ༌ ཅིག༌ ཨིན༌།”
JOH 10:31 ཡང༌སྐྱར༌ ཡ༌ཧུ༌དཱ༌པ༌གུན༌ནི༌ ཁོང༌ང༌ རྡོའ༌ གྱབས༌ཏེ༌ སད༌ཅེས༌སི༌ ཕིའ༌ རྡོའ༌ ཁུརས༌།
JOH 10:32 ཨིན༌ནའང༌ ཡེ༌ཤུའི༌ ཁོང༌གུན༌ལ༌ མོལས༌, “ངའེ༌ ང༌རང༌ངི༌ ཡབ༌བི༌ ཆོགས༌ནེ༌ ཧ༌ལས༌ཤེས༌སི༌ ལྟས༌ མང༌པོ༌ སྟན༌པིན༌, ཏེ༌གུན༌ནི༌ ནང༌ནེ༌ ཀ༌བོའེ༌ ཕིའ༌ ང༌ རྡོའ༌ གྱབས༌ཏེ༌ སད༌ཅེས༌ ཅོའད༌?”
JOH 10:33 ཡ༌ཧུ༌དཱ༌པ༌གུན༌ནི༌ ཁོང༌ང༌ ཟེརས༌, “ང༌ཞའེ༌ ཁྱོ༌རང༌ངི༌ ཧ༌ལས༌སེས༌སི༌ ལྟས༌གུན༌ནི༌ ཕིའ༌ མན༌པ༌, ཁྱོ༌རང༌ མི༌ ཨིན༌ ཨིན༌ནའང༌ རང༌དང༌རང༌ང༌ དཀོན༌མཆོག༌ ཨིན༌ ཟེར༌ཨིན༌ དཀོན༌མཆོག༌ག༌ དད༌ལོག༌ ཞུས༌ཁན༌བོའེ༌ ཕིའ༌ རྡོའ༌ གྱབས༌ཏེ༌ སད༌ཨིན༌།”
JOH 10:34 ཡེ༌ཤུའི༌ ལན༌སལས༌, “ཁྱོ༌ཞ༌རང༌ངི༌ བཀའ༌ཁྲིམས༌སི༌ སྤེ༌ཆའེ༌ ནང༌ང༌ དཀོན༌མཆོག༌གི༌ འི༌ཟུག༌ མོལ༌ལ༌ ཛད༌ཏེ༌ མི༌དུག༌ག༌? ‘ངའེ༌ ཟེར༌པིན༌, “ཁྱོ༌ཞ༌གུན༌ དཀོན༌མཆོག༌ ཙོགས༌ ཨིན༌།”’
JOH 10:35 ཀལ༌ཏེས༌ དཀོན༌མཆོག༌གི༌ བཀའ༌ ཐོབ༌ཁན༌ནི༌ མི༌གུན༌ལ༌ དཀོན༌མཆོག༌ ཙོགས༌ ཨིན༌ མོལ༌ལད༌ན༌, ༼ཡང༌ ཏམ༌པའེ༌ སུང༌རབས༌ མ༌ནེ༌ གྱུར༌ མི༌ཉན༌ཅེས༌པོ༌ ཁྱོ༌ཞའ༌ གྱུས༌ཨིན༌ནོག༌༽
JOH 10:36 ཏེ༌ནེ༌ ཡབ༌བི༌ ཁོང༌ངི༌ ཆག༌ལས༌ ཅོ༌ཅེས༌ལ༌ སྐོའ༌ ཛད༌ཏེ༌ འི༌ ཇིག༌རྟེན༌ནི༌ ནང༌ང༌ ཀལ༌ལ༌ ཛད༌ཁན༌བོའ༌ ཅི༌ མོལ༌ཨིན༌? ངའེ༌ ‘ང༌ དཀོན༌མཆོག༌གི༌ བུ༌ཚ༌ ཨིན༌’ ཟེར༌ཁན༌བོའ༌, དཀོན༌མཆོག༌གི༌ དད༌ལོག༌ ཞུས༌ཏེ༌ ཨིན༌ནོག༌ ཅིའ༌ ཟེར༌རད༌?
JOH 10:37 ཀལ༌ཏེས༌ ངའེ༌ ང༌རང༌ངི༌ ཡབ༌བི༌ ལས༌པོ༌ མ༌ཅོ༌ན༌ ཏེ༌ནེ༌ ངའེ༌ཀ༌ ཨིད༌ མ༌ཤེས༌ཤིག༌།
JOH 10:38 ཀལ༌ཏེས༌ ངའེ༌ ཏེ༌གུན༌ ཅོས༌ཏེ༌ ཁྱོ༌ཞའེ༌ ངའེ༌ཀ༌ ཨིད༌ མ༌ཤེས༌ནའང༌ ཧ༌ལས༌ཤེས༌སི༌ ལྟས༌གུན༌ནི༌ཀ༌ཏ༌ ཨིད༌ཤེས༌ ཅོས༌སའང༌, ཀ༌བོའེ༌ ཡབ༌ ངའེ༌ ནང༌ང༌ ཡང༌ ང༌ ཡབ༌བི༌ ནང༌ང༌ ཨིན༌ཁན༌བོ༌ ཁྱོ༌ཞའ༌ གྱུས༌སོང༌ཏེ༌ ཧ༌གོ༌ ཐུབ༌ཨིན༌།”
JOH 10:39 ཁོང༌གུན༌ནི༌ ཁོང༌ ཡང༌སྐྱར༌ ཟུམ༌ཅེས༌ ཅོས༌, ཨིན༌ནའང༌ ཁོང༌ ཁོང༌གུན༌ནི༌ ལག༌ནེ༌ ཤོར༌ཉན༌།
JOH 10:40 ཏེ༌ནེ༌ ཡེ༌ཤུ༌ ཡང༌སྐྱར༌ ཡོར༌དཱན༌ནི༌ ལྩངས༌པོའེ༌ ཕར༌ཀ༌ སྔུན༌ལ༌ ཡོ༌ཧཱ༌ནན༌ནི༌ ཁྲུས༌ ཏངས༌ཁན༌ནི༌ ནས༌སའེ༌ཀ༌ ལོགས༌ཏེ༌ སྐྱོདས༌ ཡང༌ ཏེ༌རུ༌ ཞུགས༌།
JOH 10:41 མི༌ མང༌པོ༌ ཁོང༌ ཡོད༌ས༌ ཡོངས༌ཏེ༌ ཅིག༌ དང༌ ཅིག༌ག༌ ཟེརས༌, “ཡོ༌ཧཱ༌ནན༌ནི༌ ཧ༌ལས༌སི༌ ལྟས༌ མ༌ནེ༌ མ༌སྟན༌ནའང༌ ཁོང༌ངི༌ འི༌ མི༌བོའེ༌ སྐོར༌ལ༌ མོལ༌ཁན༌ ཚང༌མ༌ ཀྲང༌པོ༌ ཨིན༌ནོག༌།”
JOH 10:42 ཡང༌ ཏེ༌རུ༌ ཡོད༌ཁན༌ མི༌ མང༌པོའེ༌ ཁོང༌ངི༌ཀ༌ ཏད༌པ༌ ཁྱོངས༌།
JOH 11:1 ཏ༌ ལ༌ཟར༌རས༌ ཟེར༌ཁན༌ནི༌ མི༌ཞིག༌ག༌ ཟུ༌མོ༌ ཡོངས༌ཏེ༌ ཡོད༌པིན༌། ཁོ༌, ཁོའེ༌ ཨ༌ཅེ༌ མིར༌ཡམ༌ དང༌ མར༌ཐཱ༌ གུན༌ བེད༌ཐཱ༌ནི༌ གྲོང༌ཁྱེར༌ནེ༌ ཨིན༌པིན༌།
JOH 11:2 མིར༌ཡམ༌ ཏེན༌ན༌ བུ༌མོ༌བོ༌ ཨིན༌ནོག༌, ཀ༌བོའེ༌ སྟིང༌ནེ༌ གཙོ༌བོ༌ ཡེ༌ཤུའི༌ ཞབས༌ལ༌ ཨ༌ཏིར༌ ལུགས༌ཏེ༌ ཁོ༌རང༌ངི༌ སྲ༌ ཉམ༌པོ༌ ཕིས༌། ཁོའེ༌ མིང༌བོ༌ ལ༌ཟར༌རས༌ལ༌ ཟུ༌མོ༌ ཡོད༌པིན༌།
JOH 11:3 ཏེ༌བོའེ༌ཕིའ༌ སྲིང༌མོ༌ ཉིས༌ཀོའེ༌, “གཙོ༌བོ༌ལེ༌, ཉེ༌རང༌ངི༌ ཅམས༌པ༌ ཛད༌ཁན༌ནི༌ ལ༌ཟར༌རས༌ལ༌ ཟུ༌མོ༌ སྲན༌ཏྲེ༌ དུག༌” ཟེར༌ཏེ༌ ཡེ༌ཤུའ༌ ཞུ༌ལོན༌ ཀལས༌།
JOH 11:4 གཙོ༌བོ༌ ཡེ༌ཤུའི༌ ཏེ༌བོ༌ སན༌ན༌ཅིག༌ མོལས༌, “འི༌ ཟུ༌མོ༌བོ༌ ཁོ༌ ཤི༌ཅུག༌ཅེས༌ལ༌ མ༌ནོག༌། འི༌བོ༌ དཀོན༌མཆོག༌གི༌ སྤལ༌ལི༌ ཕིའ༌ ཨིན༌ནོག༌, ཀ༌བོ༌ གྱུད༌ཏེ༌ ཁོང༌ངི༌ སྲས༌ལའང༌ སྤལ༌ ཐོབ༌ཨིན༌།”
JOH 11:5 ཡེ༌ཤུའི༌ མར༌ཐཱ༌, ཁོའེ༌ ནོ༌མོ༌ མིར༌ཡམ༌ དང༌ ལ༌ཟར༌རས༌ལ༌ ཅམས༌པ༌ ཛད༌དད༌པིན༌།
JOH 11:6 ལ༌ཟར༌རས༌ལ༌ ཟུ༌མོ༌ ཡོད༌ཁན༌ནི༌ ནས༌ཚུལ༌ སན༌ཏེའང༌ ཁོང༌ མ༌སྐྱོད༌ད༌, ཏེན༌ན༌རུ༌ ཡང༌ ཞག༌མ༌ ཉིས༌ ཞུགས༌།
JOH 11:7 ཏེ༌ སྟིང༌ནེ༌ ཁོང༌ངི༌ ལོབ༌ཕྲུགས༌གུན༌ལ༌ མོལས༌, “ང༌དང༌ ལོགས༌ཏེ༌ ཡ༌ཧུ༌དཱ༌ ཆེན༌།”
JOH 11:8 ཨིན༌ནའང༌ ལོབ༌ཕྲུགས༌གུན༌ནི༌ ཟེརས༌, “ལོབ༌བོན༌ལེ༌, ཞག༌ ཁ༌ཅིག༌གི༌ སྔུན༌ལ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཉེ༌རང༌ང༌ རྡོའ༌ གྱབས༌ཏེ༌ སད༌ཅེས༌ ཅོས༌, ཏེ༌ནེའང༌ ཉེ༌རང༌ ཏེ༌རུ༌ སྐྱོད༌དད༌ད༌?”
JOH 11:9 གཙོ༌བོ༌ ཡེ༌ཤུའི༌ ལན༌སལས༌, “ཉི༌མའེ༌ ཆུ༌ཚོད༌ རྕུག༌ཉིས༌པོ༌ འོད༌ མེད༌ཀྱག༌ག༌? ཉི༌མའེ༌ འོད༌དི༌ ནང༌ང༌ གྲུལ༌ཁན༌གུན༌ སྒག༌གྱབས༌ཏེ༌ གྱེལ༌ལ༌ མ༌ནོག༌, ཅིའ༌ཟེར༌ན༌ ཇིག༌རྟེན༌ནི༌ཀ༌ ཕོག༌ཁན༌ནི༌ འོད༌དི༌ ཁོང༌ང༌ ཐོང༌ ཐུབ༌བ༌ནོག༌།
JOH 11:10 ཨིན༌ནའང༌ ཚན༌ནི༌ མུན༌གྲིག༌གི༌ ནང༌ང༌ གྲུལ༌ ཟ༌ནེ༌ ཁོ༌ སྒག༌གྱབས༌ཏེ༌ གྱེལ༌ལ༌ནོག༌, ཅིའ༌ཟེར༌ན༌ འོད༌ མེད༌པ༌ ཨིན༌ནོག༌།”
JOH 11:11 ཏེ༌ཟུག༌ མོལ༌ཏེ༌ སྟིང༌ནེ༌, གཙོ༌བོ༌ ཡེ༌ཤུའི༌ ཁོང༌གུན༌ལ༌ མོལས༌, “ང༌དང༌གུན༌ནི༌ ཛ༌འོ༌ ལ༌ཟར༌རས༌ ཉིད༌ལ༌ སོང༌ཏེ༌ ཨིན༌ནོག༌, ཨིན༌ནའང༌ ང༌ ཏེ༌རུ༌ ཁོའ༌ ཉིད༌ཚད༌ད༌ལ༌ ཆའད༌།”
JOH 11:12 ལོབ༌ཕྲུགས༌གུན༌ནི༌ ཡེ༌ཤུའ༌ ཟེརས༌, “གཙོ༌བོ༌ལེ༌, ཀལ༌ཏེས༌ ཁོ༌ ཉིད༌ལ༌ སོང༌ཏེ༌ ཨིན༌ན༌ ཁོའེ༌ ཟུ༌མོ༌ གྱལ༌ལ༌ནོག༌།”
JOH 11:13 ཡེ༌ཤུའི༌ ཁོ༌ ཤི༌ཏེ༌ ཨིན༌ནོག༌ མོལ༌ཏེ༌ ཨིན༌པིན༌, ཨིན༌ནའང༌ ཁོང༌ངི༌ ལོབ༌ཕྲུགས༌གུན༌ནི༌ ཁོ༌ དེན༌བའ༌ ཉིད༌ལ༌ སོང༌ཏེ༌ ཨིན༌ཀྱག༌ སམ༌།
JOH 11:14 ཡེ༌ཤུའི༌ ཁོང༌གུན༌ལ༌ སལ༌པོ༌ ཤད༌ད༌ ཛདས༌, “ལ༌ཟར༌རས༌ ཤི༌ཏེ༌ ཨིན༌ནོག༌,
JOH 11:15 ཨིན༌ནའང༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཁོ༌ ཤི༌ ཟ༌ནེ༌ ང༌ ཁོ༌ ཉམ༌པོ༌ ཏེ༌རུ༌ མེད༌པ༌ མ༌ ཐད༌པོ༌ རག༌ ཅིའ༌ཟེར༌ན༌ ཏེ༌ནེ༌ ཁྱོ༌ཞའེ༌ དེན༌བ༌ ཏད༌པ༌ ཅོ༌ཨིན༌། ཏ༌ ང༌དང༌གུན༌ ཁོ༌ ཡོད༌ས༌ ཆེན༌།”
JOH 11:16 ཐོ༌མཱས༌སི༌ ༼ཀ༌བོའ༌ ཚག༌ཕྲུག༌གའང༌ ཟེར༌རད༌པིན༌༽ ཞན༌མ༌ ལོབ༌ཕྲུགས༌གུན༌ལ༌ ཟེརས༌, “ཡོང༌ཤིག༌, ང༌དང༌གུན༌ ཤི༌གོས༌ནའང༌ ལོབ༌བོན༌ ཉམ༌པོ༌ ཆེན༌།”
JOH 11:17 གཙོ༌བོ༌ ཡེ༌ཤུ༌ དང༌ ཁོང༌ངི༌ ལོབ༌ཕྲུགས༌གུན༌ བེད༌ཐཱ༌ནི༌ གྲོང༌ཁྱེར༌རི༌ ཉེ༌མོའ༌ ལེབ༌བ༌ཅིག༌, ལ༌ཟར༌རས༌སི༌ སྤུར༌ སྤུར༌ཁང༌ངི༌ ནང༌ང༌ བོར༌ཏེ༌ ཞག༌ ཞི༌ སོང༌ཁན༌བོ༌ ཡེ༌ཤུའ༌ གྱུས༌ སྐྱོད༌།
JOH 11:18 བེད༌ཐཱ༌ནི༌ གྲོང༌ཁྱེར༌, ཡེ༌རུ༌ཤ༌ལེམ༌ནེ༌ ཀི༌ལོ༌མི༌ཀྲར༌ སུམ༌མི༌ ཐག༌རིང༌ང༌ ཡོད༌ཏེ༌ ཨིན༌ནོག༌།
JOH 11:19 ཡང༌ ཡ༌ཧུ༌དཱ༌པ༌ མང༌པོ༌ཞིག༌ མར༌ཐཱ༌ དང༌ མིར༌ཡམ༌མི༌ མིང༌བོ༌ ཤི༌ཅེས༌པོའེ༌ ཁོང༌ང༌ སེམས༌སོ༌ ཏང༌ཅེས༌ལ༌ ཡོངས༌ཏེ༌ ཡོད༌པིན༌།
JOH 11:20 མར༌ཐཱའེ༌ ཡེ༌ཤུ༌ སྐྱོད༌དུག༌ ཟེར༌ཏེ༌ ཚོར༌ར༌ཅིག༌, ཡེ༌ཤུ༌ ཇལ༌ལ༌ལ༌ ཕི༌ལོག༌ག༌ སོང༌, ཨིན༌ནའང༌ མིར༌ཡམ༌ ཁང༌པའེ༌ ནང༌ང༌ དུགས༌།
JOH 11:21 མར༌ཐཱའེ༌ ཡེ༌ཤུའ༌ ཟེརས༌, “གཙོ༌བོ༌ལེ༌, ཀལ༌ཏེས༌ ཉེ༌རང༌ འི༌ཀ༌ ཡོད༌པིན༌ན༌ ངའེ༌ ནོ༌ མ༌ཤིའ༌ ཡོད༌གྲོ༌།
JOH 11:22 ཨིན༌ནའང༌ ང༌ གྱུས༌ཡོད༌, ཉེ༌རང༌ངི༌ ཅི༌ཞིག༌ དཀོན༌མཆོག༌ག༌ ཞུ༌ནའང༌ ཁོང༌ངི༌ སལ༌ལ༌ ཛད༌ད༌ནོག༌།”
JOH 11:23 ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ནོ༌ ཡང༌སྐྱར༌ སོན༌ཏེའ༌ ལང༌ཨིན༌།”
JOH 11:24 མར༌ཐཱའེ༌ ལན༌ཏངས༌, “ང༌ གྱུས༌ཡོད༌ལེ༌, ཐའ༌མའེ༌ ཞག༌ག༌ ཤི༌ཁན༌གུན༌ སོན༌ཏེའ༌ ལང༌ངི༌ ཏུས༌ལ༌, ཁོའང༌ སོན༌ཏེའ༌ ལང༌ཨིན༌།”
JOH 11:25 ཡེ༌ཤུའི༌ ཁོའ༌ མོལས༌, “ང༌ ནི༌ ཤི༌ཁན༌གུན༌ སོན༌ཏེའ༌ ལང༌ཁན༌ དང༌ ཐའ༌མེད༌པའེ༌ མི༌ཚེ༌ ཏང༌ཁན༌བོ༌ ཨིན༌། ངའེ༌ཀ༌ ཏད༌པ༌ ཅོ༌ཁན༌གུན༌ ཤི༌ཏེའང༌ སོན༌ཏེའ༌ ལུས༌ཨིན༌,
JOH 11:26 ཡང༌ ངའེ༌ཀ༌ ཏད༌པ༌ ཅོས༌ཏེ༌ སོན༌ཏེའ༌ ཡོད༌ཁན༌གུན༌ མ༌ནེ༌ མི༌ཤི༌། ཁྱོ༌རང༌ངི༌ ཏེ༌བོའ༌ ཨིད༌ཤེས༌ ཅོའད༌ད༌?”
JOH 11:27 མར༌ཐཱའེ༌ ཟེརས༌, “འོ༌ན༌ གཙོ༌བོ༌ལེ༌, ངའེ༌ ཏད༌པ༌ ཅོའད༌, ཉེ༌རང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, དཀོན༌མཆོག༌གི༌ སྲས༌ འི༌ ཇིག༌རྟེན༌ལ༌ སྐྱོད༌ཁན༌བོ༌ ཨིན༌ནོག༌།”
JOH 11:28 ཏེ༌བོ༌ ཟེར༌ཏེ༌ སྟིང༌ནེ༌ ཁོ༌ ལོགས༌ཏེ༌ སོང༌, ཡང༌ མིར༌ཡམ༌ སོ༌སོའ༌ བོད༌ཏེ༌ ཟེརས༌, “ལོབ༌བོན༌ འི༌རུ༌ སྐྱོད༌ཏེ༌ ཁྱོ༌རང༌ང༌ བོད༌ད༌ ཛད༌དུག༌།”
JOH 11:29 ཏེ༌བོ༌ ཚོར༌ར༌ཅིག༌, མིར༌ཡམ༌ ཀོའག༌ ལངས༌ ཡང༌ གྱུགས༌ཏེ༌ ཡེ༌ཤུ༌ ཡོད༌ས༌ སོང༌།
JOH 11:30 ཡེ༌ཤུ༌ ཏ༌རུང༌ གྲོང༌སེབ༌བི༌ ནང༌ང༌ མ༌ལེབ༌བ༌ ཏེན༌ན༌ ནས༌ས༌བོའེ༌ཀ༌ ཞུགས༌ཏེ༌ ཡོད༌པིན༌, ཀ༌རུ༌ མར༌ཐཱ༌ ཁོང༌ང༌ ཐུག༌ག༌ལ༌ ཡོངས༌།
JOH 11:31 ཁང༌པའེ༌ ནང༌ང༌ མིར༌ཡམ༌མ༌ སེམས༌སོ༌ ཏང༌ང༌ དུགས༌ཏེ༌ ཡོད༌ཁན༌གུན༌ནི༌ མིར༌ཡམ༌ ཀོའག༌ ལངས༌ཏེ༌ ཕི༌ལོག༌ག༌ ཆའ༌ ཐོང༌པ༌, ཁོང༌གུན༌ནའང༌ ལངས༌ཏེ༌ ཁོའེ༌ སྟིང༌རང༌ནེ༌ སོང༌, ཅིའ༌ཟེར༌ན༌ ཁོང༌གུན༌ནི༌ མིར༌ཡམ༌ སྤུར༌ཁང༌ང༌ ངུའ༌ལ༌ སོང༌ཏེ༌ ཨིན༌ནོག༌ སམ༌།
JOH 11:32 མིར༌ཡམ༌ ཡེ༌ཤུ༌ ཞུགས༌ཏེ༌ ཡོད༌ས༌ ལེབ༌བ༌ཅིག༌, ཡེ༌ཤུ༌ ཐོང༌ཏེ༌ ཁོང༌ངི༌ ཞབས༌སི༌ དུན༌ལ༌ གྱེལ༌ཏེ༌ ཟེརས༌, “གཙོ༌བོ༌ལེ༌, ཀལ༌ཏེས༌ ཉེ༌རང༌ འི༌རུ༌ ཞུགས༌ཏེ༌ ཡོད༌པིན༌ན༌ ངའེ༌ ནོ༌ མ༌ཤིའ༌ ཡོད༌གྲོ༌།”
JOH 11:33 ཡེ༌ཤུའི༌ མིར༌ཡམ༌ དང༌ ཁོ༌ ཉམ༌པོ༌ ཡོད༌ཁན༌ནི༌ ཡ༌ཧུ༌དཱ༌པ༌གུན༌ ངུའ༌ ཟིགས༌ཏེ༌ སྙིང༌ངི༌ ཐིལ༌ནེ༌ ཐུགས༌སྐྱོ༌མོ༌ སྐྱོདས༌
JOH 11:34 ཡང༌ ཁོང༌གུན༌ལ༌ མོལས༌, “ལ༌ཟར༌རས༌ ཀ༌རུ༌ བོར༌ཏེ༌ ཡོད༌?” ཁོང༌གུན༌ནི༌ ཟེརས༌, “གཙོ༌བོ༌ལེ༌, སྐྱོད༌ཏེ༌ ཟིགས༌སའང༌།”
JOH 11:35 ཡེ༌ཤུ༌ ཤུམ༌ས༌ ཛདས༌།
JOH 11:36 ཏེ༌ནེ༌ ཡ༌ཧུ༌དཱ༌པ༌གུན༌ནི༌ ཟེརས༌, “ལྟོས༌སའང༌, ཁོང༌ངི༌ ལ༌ཟར༌རས༌ལ༌ ཙམ༌ཤིག༌ ཅེས༌པ༌ ཅོའ༌ ཛད༌དུག༌།”
JOH 11:37 ཨིན༌ནའང༌ ཏེ༌ ཕྲོ༌ནེ༌ ཁ༌ཅིག༌གི༌ ཟེརས༌, “ཁོང༌ངི༌ ཞ༌རའ༌ ཐོང༌ཅུག༌དུག༌, ཅི༌ ལ༌ཟར༌རས༌ ཤི༌ཅེས༌ནེ༌ སྐྱོབ༌ མི༌ཉན༌ན༌?”
JOH 11:38 གཙོ༌བོ༌ ཡེ༌ཤུ༌ སྙིང༌ངི༌ ཐིལ༌ནེ༌ ཐུགས༌སྐྱོ༌མོ༌ སྐྱོད༌ཏེ༌ སྤུར༌ཁང༌ང༌ སྐྱོདས༌, ཏེ༌བོ༌ ཁར༌རྡོ༌ ཀབས༌ཁན༌ནི༌ བྲག༌ཕུག༌ཤིག༌ ཡོད༌པིན༌།
JOH 11:39 ཡེ༌ཤུའི༌ མོལས༌, “ཁར༌རྡོ༌བོ༌ ཐའ༌མའ༌ རིལ༌།” ཤི༌ཁན༌བོའེ༌ སྲིང༌མོ༌ མར༌ཐཱའེ༌ ཡེ༌ཤུའ༌ ཟེརས༌, “གཙོ༌བོ༌ལེ༌, ཁོའེ༌ སྤུར༌བོ༌ ཏེ༌ནང༌ང༌ བོར༌ཏེ༌ ཞག༌མ༌ ཞི༌ སོང༌, ཏྲི༌མ༌ རྩོག༌པོ༌ ཡོངས༌ཏེ༌ ཡོད༌གྲོ༌།”
JOH 11:40 ཡེ༌ཤུའི༌ མོལས༌, “ངའེ༌ ཟེར༌ར༌ མེ༌རག༌ག༌ ཀལ༌ཏེས༌ ཏད༌པ༌ ཅོ༌ན༌ དཀོན༌མཆོག༌གི༌ སྤལ༌ ཁྱོ༌རང༌ང༌ ཐོང༌ཨིན༌།”
JOH 11:41 ཏེ༌ནེ༌ ཁོང༌གུན༌ནི༌ ཁར༌རྡོ༌བོ༌ ཐའ༌མ༌ རིལས༌ ཡང༌ ཡེ༌ཤུའི༌ ནམ༌ཁའ༌ ཟིགས༌ཏེ༌ མོལས༌, “ཀྱེ༌ ངའེ༌ ཡབ༌, ངའ༌ སན༌ན༌ ཛདས༌པའ༌ ངའེ༌ ཉེ༌རང༌ང༌ ཐུག༌རྗེ༌ཆེ༌ ཞུའད༌།
JOH 11:42 ཉེ༌རང༌ངི༌ ཏུས༌གྱུན༌ ངའ༌ སན༌ན༌ ཛད༌ཅེས༌པོ༌ ང༌ གྱུས༌ཡོད༌, ཨིན༌ནའང༌ ངའ༌ ཁོར༌ཏེ༌ ཡོད༌ཁན༌གུན༌ནི༌ ཉེ༌རང༌ངི༌ ངའ༌ ཀལ༌ལ༌ ཛད༌ཁན༌བོ༌ ཏད༌པ༌ ཅོས༌ཏེ༌ ཕན༌ཐོགས༌ ཐོབ༌ཅེས༌ལ༌, ངའེ༌ འིན༌ན༌བོ༌ ཟེར༌རད༌།”
JOH 11:43 ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུའི༌ ཤེད༌ནང༌ མོལས༌, “ལ༌ཟར༌རས༌ ཕི༌ལོག༌ག༌ བིང༌ཏེ༌ ཡོང༌།”
JOH 11:44 ཡང༌ ཤི༌ཁན༌ནི༌ མི༌བོ༌ བིང༌ཏེ༌ ཡོངས༌, ཁོའེ༌ རྐང༌ལག༌ ཚང༌མ༌ རོ༌རས༌ ཉམ༌པོ༌ སྲིལ༌ཏེ༌ ཡང༌ གོའ༌ རས༌ཤིག༌ སྐོན༌ཏེ༌ ཡོད༌པིན༌། ཡེ༌ཤུའི༌ ཁོང༌གུན༌ལ༌ མོལས༌, “སྲིལ༌ཁན༌བོ༌ ཀྲོལ༌ཏེ༌ ཁོ༌ ཆ༌ཅུག༌།”
JOH 11:45 མིར༌ཡམ༌མ༌ ཐུག༌ག༌ ཡོངས༌ཏེ༌ ཡོད༌ཁན༌ནི༌ ཡ༌ཧུ༌དཱ༌པ༌ མང༌པོའེ༌ གཙོ༌བོ༌ ཡེ༌ཤུའི༌ ཛད༌ཁན༌བོ༌ ཐོང༌ཏེ༌ ཁོང༌ངི༌ཀ༌ ཏད༌པ༌ ཅོས༌།
JOH 11:46 ཨིན༌ནའང༌ ཁ༌ཅིག༌ ཕ༌རུ༌ཤི༌པ༌གུན༌ནི༌ཀ༌ སོང༌ཏེ༌ ཡེ༌ཤུའི༌ ཛད༌ཁན༌བོ༌ ཁོང༌གུན༌ལ༌ ཤདས༌།
JOH 11:47 ཏེ༌ནེ༌ བླ༌མ༌ འུ༌སྐྱོང༌གུན༌ དང༌ ཕ༌རུ༌ཤི༌པ༌གུན༌ནི༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌གུན༌ ཛོམ༌ཅེས༌ལ༌ བོད༌ཏེ༌ གྲབས༌ ཅོས༌, “ང༌དང༌གུན༌ནི༌ ཅི༌ ཅོ༌ཨིན༌? འི༌ མི༌བོའེ༌ ཧ༌ལས༌ཤེས༌སི༌ ལྟས༌ མང༌པོ༌ སྟན༌དུག༌།
JOH 11:48 ཀལ༌ཏེས༌ ང༌དང༌གུན༌ནི༌ ཁོ༌ འིན༌ན༌ ཟུག༌ག༌ ཕུད༌ཏང༌ན༌ ཚང༌མའེ༌ ཁོའེ༌ཀ༌ ཏད༌པ༌ ཅོ༌ཨིན༌། ཏེ༌ནེ༌ རོམ༌པ༌ མག༌མི༌གུན༌ ཡོངས༌ཏེ༌ ང༌དང༌ངི༌ ཆོད༌ཁང༌ དང༌ ང༌དང༌ངི༌ གྱལ༌ཁམས༌པོ༌ མེད༌ཁན༌ ཅོའ༌ནོག༌།”
JOH 11:49 ཁོང༌གུན༌ནི༌ ཕྲོ༌ནེ༌ ཏེན༌ན༌ ལོའེ༌ བླ༌མ༌ ཆེན༌མོ༌ ཨིན༌ཁན༌ ཀ༌ཡ༌ཕཱས༌སི༌ ཟེརས༌, “ཁྱོ༌ཞ༌གུན༌ལ༌ ཅའང༌ ཤེས༌ས༌ མི༌དུག༌།
JOH 11:50 ཁྱོ༌ཞ༌གུན༌ལ༌ ཧ༌གོ༌གོས༌ ཁྱོ༌ཞའེ༌ ཕིའ༌ ང༌དང༌ངི༌ གྱལ༌ཁམས༌པོ༌ སྟོར༌རི༌ སང༌ ཏེ༌ ཏོན༌ལ༌ མི༌ ཅིག༌ ཤི༌ན༌ མི༌གྱལ༌ལ༌?”
JOH 11:51 ཏེ༌ སྤེ༌ར༌གུན༌ ཁོའེ༌ རང༌ངི༌ ཆོགས༌ནེ༌ མ༌ཟེར༌ར༌ ཏེ༌ ལོའེ༌ བླ༌མ༌ ཆེན༌མོ༌ ཨིན༌ཅེས༌པོའེ༌, ཁོའེ༌ ཡ༌ཧུ༌དཱ༌པའེ༌ གྱལ༌ཁམས༌སི༌ ཏོན༌ལ༌ ཡེ༌ཤུ༌ ཤི༌ཅེས༌སི༌ ལུང༌སྟན༌ ཤད༌ཏེ༌ ཨིན༌པིན༌།
JOH 11:52 ཡང༌ ཡ༌ཧུ༌དཱ༌པའེ༌ གྱལ༌ཁམས༌ ཅིག༌པོ༌ མ༌ཚད༌, ཁྲེས༌ཏོར༌ སོང༌ཁན༌ནི༌ དཀོན༌མཆོག༌གི༌ མི༌གུན༌ ཀུགས༌ཏེ༌ ཏེ༌བོ༌ ཉམ༌པོ༌ ཅིག༌ གྱུར༌ཅུག༌ཅེས༌སི༌ ཕིའང༌ ཨིན༌པིན༌།
JOH 11:53 ཏེན༌ན༌ ཞག༌ནེ༌ ཕར༌ལ༌ ཁོང༌གུན༌ནི༌ ཡེ༌ཤུ༌ སད༌ཅེས༌སི༌ ཐབ༌ལྡིངས༌།
JOH 11:54 ཏེ༌བོའེ༌ཕིའ༌ ཏེ༌ནེ༌ཕར༌ལ༌ ཡེ༌ཤུ༌ སྔོན༌ཅུགས༌ཏེ༌ ཡ༌ཧུ༌དཱ༌པ༌གུན༌ནི༌ ཕྲོའ༌ སྐྱོད༌ད༌ མ༌ཛད༌ད༌, རི༌སྟོང༌ནེ༌ ཉེ༌མོ༌ ཨེཕ༌ར༌ཡིམ༌ ཟེར༌སའེ༌ གྲོང༌ཁྱེར༌ལ༌ སྐྱོད༌ཏེ༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཞུགས༌།
JOH 11:55 ཡ༌ཧུ༌དཱ༌པའེ༌ པེ༌སག༌གི༌ ཏུས༌ཆེན༌ ཉེ༌མོ༌ ལེབ༌བ༌ཅིག༌, ཡུལ༌ ཆོགས༌ ཚང༌མ༌ནེ༌ མི༌ མང༌པོ༌ པེ༌སག༌ ལེབ༌བི༌ སང༌ སྔུན༌ལ༌ རྩང༌རའེ༌ ཚིར༌གུན༌ དྲན༌དྲ༌ ཅོ༌ཅེས༌ལ༌ ཡེ༌རུ༌ཤ༌ལེམ༌མི༌ གྱལ༌ས༌ ཡོངས༌།
JOH 11:56 ཁོང༌གུན༌ནི༌ ཡེ༌ཤུ༌ ཙལ༌ལད༌པིན༌, ཡང༌ ཆོད༌ཁང༌ངི༌ ནང༌ང༌ ཡོད༌ ཟ༌ནེ༌ ཅིག༌ དང༌ ཅིག༌ག༌ ཏྲིས༌, “ཅི༌ སམ༌མ༌རག༌? ཁོ༌ ཏུས༌ཆེན༌ལ༌ འི༌རུ༌ མི༌ཡོང༌ང༌?”
JOH 11:57 ཏེན༌ན༌ ཏུས༌ལ༌ བླ༌མ༌ འུ༌སྐྱོང༌གུན༌ དང༌ ཕ༌རུ༌ཤི༌པ༌གུན༌ནི༌ ཀལ༌ཏེས༌ སུ༌ཞིག༌ག༌ ཡེ༌ཤུ༌ འི༌རུ༌ ཡོད༌ཁན༌བོ༌ གྱུས༌ཆའ༌ན༌ ལོན༌ ཁྱོང༌གོས༌ ཟེར༌ཏེ༌ བཀའ༌ ཏངས༌, ཅིའ༌ཟེར༌ན༌ ཁོང༌གུན༌ནི༌ ཡེ༌ཤུ༌ ཟུམ༌ཅེས༌ ཨིན༌པིན༌།
JOH 12:1 པེ༌སག༌གི༌ ཏུས༌ཆེན༌ནི༌ སང༌ ཞག༌ དྲུག༌གི༌ སྔུན༌ལ༌ གཙོ༌བོ༌ ཡེ༌ཤུ༌ བེད༌ཐཱ༌ནི༌ གྲོང༌ཁྱེར༌ལ༌ སོན༌ཏེའ༌ ལང༌ང༌ ཛད༌ཁན༌ ལ༌ཟར༌རས༌སི༌ ཁང༌པ༌ སྐྱོདས༌།
JOH 12:2 ཏེ༌རུ༌ གཙོ༌བོ༌ ཡེ༌ཤུའི༌ རྩི༌ཝའེ༌ ནང༌ང༌ གོང༌ཟན༌ནི༌ གྲལ༌གྲིག༌ ཅོས༌ཏེ༌ མར༌ཐཱའེ༌ ཞབས༌ཏོག༌ ཞུའད༌པིན༌, ཡེ༌ཤུ༌ ཉམ༌པོ༌ དོན༌ཏང༌ དོན༌ཁན༌གུན༌ནི༌ ཕྲོའ༌ ལ༌ཟར༌རས༌སའང༌ ཡོད༌པིན༌།
JOH 12:3 ཏེ༌ ཏུས༌ མིར༌ཡམ༌མི༌ མ༌ ཀུས༌པོ༌ ཏྲི༌ཞིམ༌ཅན༌ནི༌ མར༌ནག༌ ལི༌ཀྲར༌ ཕེད༌ ཟམ༌ཤིག༌ ཡེ༌ཤུའི༌ ཞབས༌སི༌ཀ༌ ལུགས༌ཏེ༌ ཁོ༌རང༌ངི༌ སྲ༌ ཉམ༌པོ༌ ཕིས༌, ཏེ༌ནེ༌ ཁང༌པ༌ གང༌པོ༌ ཏྲི༌ཞིམ༌མི༌ གང༌།
JOH 12:4 ཨིན༌ནའང༌ ཁོང༌ངི༌ ལོབ༌ཕྲུགས༌གུན༌ནི༌ ཕྲོ༌ནེ༌ ཡུ༌དཱ༌ ཀར༌ཡོད༌པའེ༌ ༼ཀ༌བོའེ༌ སྟིང༌ནེ༌ ཡེ༌ཤུའ༌ ངོ༌ལོག༌ ཅོས༌༽ མིར༌ཡམ༌མ༌ ཟེརས༌,
JOH 12:5 “འི༌ ཏྲི༌ཞིམ༌མི༌ མར༌བོ༌ ཙོངས༌ཏེ༌ པེ༌ནེ༌ ཉལ༌བ༌ཅན༌གུན༌ལ༌ ཅིའ༌ མ༌ཏང༌ང༌ ཨིན༌ཧེ༌? འི༌བོའ༌ ལོ༌ ཅིག༌གི༌ ལ༌ཆ༌ ཟམ༌ཤིག༌ རི༌ཅེས༌ དུག༌།”
JOH 12:6 ཉལ༌བ༌ཅན༌གུན༌ནི༌ ཕིའ༌ ཚེར༌ཁ༌ ཡོད༌ཏེ༌ མན༌པ༌ ཁོ༌རང༌ རྐུན༌མ༌ ཨིན༌ པ༌སང༌ ཁོའེ༌ ཏེ༌བོ༌ ཟེརས༌། ལོབ༌ཕྲུགས༌གུན༌ནི༌ ཀོལ༌ཅེས༌སི༌ པེ༌ནེ༌ ཁོ༌མགས༌, ཁོའེ༌ ལག༌ག༌ བོར༌ཁན༌བོའེ༌ ནང༌ནེ༌ ཁོའེ༌ རྐུའད༌པིན༌།
JOH 12:7 ཡེ༌ཤུའི༌ མོལས༌, “ཁོ༌ ཚེར༌ཁ༌ མ༌སྟན༌, ཁོའེ༌ འི༌བོ༌ ཅོས༌ཏེ༌ ངའེ༌ ཟུགས༌པོ༌ སྤུར༌ཁང༌ང༌ ཁྱེར༌ཅེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཨིན༌།
JOH 12:8 ཉལ༌བ༌ཅན༌གུན༌ ཏུས༌གྱུན༌ ཁྱོ༌ཞའ༌ ཉམ༌པོ༌ ལུས༌ཨིན༌, ཨིན༌ནའང༌ ང༌ ཁྱོ༌ཞའ༌ ཉམ༌པོ༌ ཏུས༌གྱུན༌ མི༌ལུས༌།”
JOH 12:9 ཏེན༌ན༌ ཏུས༌ལ༌ ཡ༌ཧུ༌དཱ༌པའེ༌ མི༌ཚོགས༌ ཆེན༌མོའ༌ ཡེ༌ཤུ༌ ཏེ༌རུ༌ ཡོད༌ཁན༌བོ༌ གྱུས༌སོང༌པ༌ ཁོང༌གུན༌ ཡོངས༌, ཅིའ༌ཟེར༌ན༌ ཁོང༌གུན༌ལ༌ ཡེ༌ཤུ༌ ཐུག༌ཅེས༌ ཅིག༌པོ༌ མན༌པ༌, ཁོང༌ངི༌ སོན༌ཏེའ༌ ལང༌ང༌ ཛད༌ཁན༌ནི༌ ལ༌ཟར༌རས༌ལའང༌ ལྟ༌ཉིན༌ ཡོད༌པིན༌།
JOH 12:10 ཏེ༌ནེ༌ བླ༌མ༌ འུ༌སྐྱོང༌གུན༌ནི༌ ལ༌ཟར༌རས༌སའང༌ སད༌ཅེས༌སི༌ ཅུས༌ངན༌ ལྡིངས༌
JOH 12:11 ཅིའ༌ཟེར༌ན༌ ལ༌ཟར༌རས༌ལ༌ ཇུང༌ཁན༌བོའེ༌ ཡ༌ཧུ༌དཱ༌པ༌ མང༌པོ༌ཞིག༌གི༌ བླ༌མ༌གུན༌ ཕངས༌ཏེ༌ ཡེ༌ཤུའི༌ཀ༌ ཏད༌པ༌ ཅོའད༌པིན༌།
JOH 12:12 སྟིང༌མ༌ཞག༌པོ༌ ཏུས༌ཆེན༌ལ༌ ཡོངས༌ཁན༌ནི༌ མི༌ཚོགས༌ ཆེན༌མོའེ༌ གཙོ༌བོ༌ ཡེ༌ཤུ༌ ཡེ༌རུ༌ཤ༌ལེམ༌མ༌ སྐྱོད༌དུག༌ ཟེར༌ཏེ༌ ཚོར༌པ༌,
JOH 12:13 ཁོང༌གུན༌ནི༌ ཁ༌སོར༌ ལྕང༌མའེ༌ ཡལ༌ག༌ ཁུར༌ཏེ༌ ཁོང༌ང༌ གའ༌སུས༌ ཞུའ༌ལ༌ བིང༌ཏེ༌ ཀུ༌ཅོ༌ ཏང༌ཨིན༌ ཟེརས༌, “སྟོད༌པ༌ ཕུལ༌ཤིག༌། ‘གཙོ༌བོ༌ དཀོན༌མཆོག༌གི༌ ཝང༌ཆའེ༌ ནང༌ང༌ སྐྱོད༌ཁན༌བོ༌ ཅིན༌ལབས༌ཅན༌། ’ ཨིས༌ར༌ཨེལ༌ལི༌ གྱལ༌པོ༌ ཅིན༌ལབས༌ཅན༌།”
JOH 12:14 ཡེ༌ཤུའི༌ བུང༌སར༌ཞིག༌ ཟིགས༌པ༌ ལུང༌སྟན༌ དྲན༌དྲ༌ གྲུབ༌ཅེས༌སི༌ ཕིའ༌ ཁོང༌ ཏེ༌ཀ༌ ཞོན༌ན༌ ཛདས༌, ཀ༌བོ༌ ནི༌,
JOH 12:15 “ཡེ༌རུ༌ཤ༌ལེམ༌པ༌གུན༌ མ༌ཇིགས༌ཤིག༌། ལྟོས༌སའང༌ ཁྱོ༌ཞའེ༌ གྱལ༌པོ༌, བུང༌སར༌རི༌ཀ༌ ཞོན༌ཏེ༌ སྐྱོད༌ད༌ལ༌།”
JOH 12:16 ཏེ༌ཏུས༌ ལོབ༌ཕྲུགས༌གུན༌ལ༌ ཁོང༌ངི༌ ཛད༌ཁན༌གུན༌ ཅའང༌ ཧ༌མ༌གོ༌, ཨིན༌ནའང༌ ཡེ༌ཤུའ༌ སྤལ༌ ཐོབ༌ཏེ༌ སྟིང༌ནེ༌, ཁོང༌ངི༌ཀ༌ ཏེ༌ ཇུང༌ཁན༌ ཚང༌མ༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཡོད༌ཁན༌བོ༌ ཁོང༌གུན༌ལ༌ ཧ༌གོ༌།
JOH 12:17 ཡེ༌ཤུའི༌ ལ༌ཟར༌རས༌ལ༌ སྤུར༌ཁང༌ནེ༌ བོད༌ད༌ ཛད༌ཏེ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ ཟ༌ནེ༌, ཏེ༌རུ༌ ཡོད༌ཁན༌ནི༌ མི༌ཚོགས༌པོའེ༌ ཏེ༌ ནས༌ཚུལ༌བོ༌ ཀ༌ནེ༌ཀ༌རུ༌ ཁྱེབ༌ཤུག༌གད༌པིན༌།
JOH 12:18 ཡེ༌ཤུའི༌ ཏེ༌ ཧ༌ལས༌ཤེས༌སི༌ ཛད༌པ༌ ཛད༌ཁན༌བོ༌ ཚོར༌ཏེ༌ མི༌ མང༌པོ༌ ཡེ༌རུ༌ཤ༌ལེམ༌ནེ༌ ཁོང༌ང༌ ཐུག༌ག༌ལ༌ ཡོངས༌།
JOH 12:19 ཕ༌རུ༌ཤི༌པ༌གུན༌ནི༌ ཅིག༌ དང༌ ཅིག༌ག༌ ཟེརས༌, “ལྟོས༌ཤིག༌གའང༌ ང༌དང༌གུན༌ནི༌ ཐབས༌པོ༌ ཀ༌རུའང༌ ལེབ༌ མི༌ཅུག༌གོག༌, ཚང༌མ༌ ཁོའེ༌ སྟིང༌རང༌ནེ༌ ཆའ༌ལ༌།”
JOH 12:20 ཏ༌ ཏུས༌ཆེན༌ནི༌ ཏུས༌ དཀོན༌མཆོག༌ག༌ ཅོལ༌ལ༌ ཡོང༌ཁན༌གུན༌ནི༌ ཕྲོའ༌ ཡ༌ཧུ༌དཱ༌པ༌ མན༌ཁན༌ ཁ༌ཅིག༌གའང༌ ཡོད༌པིན༌།
JOH 12:21 གཱ༌ལིལ༌ལིའི༌ ཡུལ༌ཇོངས༌ བེད༌སའི༌ད༌ནེ༌ ཨིན༌ཁན༌གུན༌, ཕི༌ལིབ༌བི༌ཀ༌ ཡོངས༌ཏེ༌ ཁོའ༌ ཞུ༌ཝ༌ ཕུལས༌, “སྤོན༌བོ༌ལེ༌, ང༌ཞ༌གུན༌ལ༌ གཙོ༌བོ༌ ཡེ༌ཤུ༌ ཇལ༌ ཉིན༌རག༌།”
JOH 12:22 ཕི༌ལིབ༌ ཨེན༌གྲིའུ༌ ཤད༌ད༌ལ༌ སོང༌, ཡང༌ ཁོང༌ ཉིས༌ཀོ༌ སོང༌ཏེ༌ ཡེ༌ཤུའ༌ ཤདས༌།
JOH 12:23 ཡེ༌ཤུའི༌ ལན༌སལས༌, “མི༌རིགས༌སི༌བུའ༌ དཀོན༌མཆོག༌གི༌ ཆོགས༌ནེ༌ སྤལ༌ ཐོབ༌ཅེས༌སི༌ ཏུས༌ ལེབ༌ ཚར༌།
JOH 12:24 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ནམ༌ཚོག༌པ༌ ཀྲོའེ༌ ས༌འོན༌ སའེ༌ ནང༌ང༌ བུད༌ཏེ༌ ཤི༌ མི༌ཤི༌ ཏེ༌བོ༌ ཀྲོ༌ ཅིག༌ག༌ ལུས༌ས༌ནོག༌, ཨིན༌ནའང༌ ཤི༌ཏེ༌ སྟིང༌ནེ༌ སྨིན༌ཏེ༌ ཏེ༌བོའ༌ བྲས༌བུ༌ མང༌པོ༌ ཆགས༌ས༌ནོག༌།
JOH 12:25 ང༌ སང༌ མང༌ང༌ རང༌ངི༌ སྲོག༌ག༌ ཡ༌ཤ༌ ཅོ༌ཁན༌གུན༌ནི༌ དེན༌བའེ༌ མི༌ཚེ༌ སྐྱལ༌ཨིན༌, ཨིན༌ནའང༌ རང༌ངི༌ སྲོག༌གི༌ སང༌ མང༌ང༌ ངའ༌ ཡ༌ཤ༌ ཅོ༌ཁན༌གུན༌ནི༌ ཁོ༌རང༌ངི༌ སྲོག༌པོ༌ ཐའ༌མེད༌པའེ༌ མི༌ཚེའེ༌ ཕིའ༌ སྐྱོབ༌ཨིན༌།
JOH 12:26 ངའ༌ ཞབས༌ཏོག༌ ཞུ༌ཁན༌གུན༌ ངའེ༌ གྱབ༌ནེ༌ བྲངས༌གོས༌, ང༌ ཡོད༌ས༌ ངའེ༌ ཡོག༌པོ༌གུན༌ནའང༌ དུག༌ཨིན༌། ངའ༌ ཞབས༌ཏོག༌ ཞུ༌ཁན༌གུན༌ལ༌ ངའེ༌ ནམ༌ཁའ༌ ཞུགས༌ཁན༌ནི༌ ཡབ༌བིའང༌ རྩི༌ཝ༌ ཛད༌ཨིན༌།”
JOH 12:27 “ངའེ༌ སེམས༌ལ༌ མ༌སྲན༌ཏྲེ༌ ནགས༌ རག༌། ཏེ༌ནེ༌ ཅི༌ ངའེ༌ ཟེར༌ར༌, ‘ཀྱེ༌ ངའེ༌ ཡབ༌, ཏ༌ ང༌ འི༌ རྡུག༌ངལ༌ལི༌ ཏུས༌པོ༌ནེ༌ སྐྱོབ༌བ༌ ཛད༌?’ མ༌ནེ༌ མི༌ཟེར༌ ཅིའ༌ཟེར༌ན༌ ང༌ འིན༌ན༌ གྱུན༌ཚན༌བོའེ༌ ཕིའ༌ ཡོངས༌ཏེ༌ ཨིན༌།
JOH 12:28 ཀྱེ༌ ཡབ༌, ཉེ༌རང༌ངི༌ ཚན༌ལ༌ སྤལ༌ ཐོབ༌ ཅུག༌ག༌ ཛད༌།” ཏེ༌ནེ༌ ནམ༌ཁའ༌ནེ༌ སུང༌སྐད༌ཅིག༌ ཚོར༌, “ངའེ༌ སྤལ༌ ཏངས༌ཏེ༌ ཨིན༌, ཏ༌རུང༌ངའང༌ སྤལ༌ ཏང༌ཨིན༌།”
JOH 12:29 ཏེ༌རུ༌ ཡོད༌ཁན༌ མི༌ཚོགས༌ སུང༌སྐད༌ ཚོར༌ཁན༌གུན༌ནི༌ བྲུག༌ལྡིར༌ར༌ རག༌ ཟེརས༌, ཡང༌ ཁ༌ཅིག༌གི༌ ཟེརས༌, “ཕོ༌ཉའེ༌ ཁོང༌ང༌ ཞལ༌ཏ༌ སལ༌ཏེ༌ ཨིན༌ནོག༌།”
JOH 12:30 ཡེ༌ཤུའི༌ མོལས༌, “འི༌ སུང༌སྐད༌པོ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌, ངའེ༌ ཕིའ༌ མན༌།
JOH 12:31 ཏ༌ འི༌ ཇིག༌རྟེན༌པ༌གུན༌ལ༌ ཁྲིམས༌ཅད༌ཅེས༌སི༌ ཏུས༌ ལེབས༌ཏེ༌ ཨིན༌, འི༌ ཇིག༌རྟེན༌ནི༌ ཏད༌པ༌ མེད༌ཁན༌གུན༌ནི༌ ཝང༌སྲུལ༌པ༌ ཤེ༌ཏན༌, ཕི༌ལོག༌ག༌ ཕིང༌ང༌ ཛད༌ཨིན༌།
JOH 12:32 ཡང༌ ང༌ ཀེན༌ལ༌ སྟག༌ ཟ༌ནེ༌ ངའེ༌ མི༌ཚང༌མའེ༌ སེམས༌ ང༌རང༌ ཆོགས༌ལ༌ ཁྱོང༌ཨིན༌།”
JOH 12:33 ཡེ༌ཤུའི༌ ཏེ༌ཟུག༌ མོལ༌ཏེ༌ ཁོང༌ ཀྲོངས༌ཚུལ༌བོ༌ སྔོན༌ ཅུག༌ག༌ ཛདས༌།
JOH 12:34 མི༌ཚོགས༌སི༌ ཟེརས༌, “ང༌ཞའེ༌ ཏམ༌པའེ༌ སུང༌རབས༌སི༌ ནང༌ནེ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཏུས༌གྱུན༌ ཞུགས༌ཨིན༌ ཟེར༌ཏེ༌ ཚོར༌། ཏེ༌ནེ༌ ཉེ༌རང༌ངི༌ ཀ༌ཟུག༌ག༌ མོལ༌ལད༌, ‘མི༌རིགས༌སི༌བུ༌ ཐོན༌པོའ༌ སྟག༌གོས༌?’ འི༌ མི༌རིགས༌སི༌བུ༌ སུ༌ ཨིན༌ནོག༌?”
JOH 12:35 ཡེ༌ཤུའི༌ མོལས༌, “ངའེ༌ འོད༌པོ༌ ཁྱོ༌ཞ༌གུན༌ ཉམ༌པོ༌ ཏུས༌ ཉུ༌ངུན༌ཞིག༌གི༌ ཕིའ༌ ལུས༌ཨིན༌། མུན༌གྲིག༌གི༌ ཁྱོ༌ཞ༌གུན༌ནི༌ཀ༌ ཝང༌ མི༌སྲུལ༌ཅེས༌སི༌ ཕིའ༌ ཏེ༌ འོད༌ ཡོད༌ཡོད༌པོ༌ ཏེ༌ནང༌ང༌ གྲུལ༌ཤིག༌། མུན༌གྲིག༌གི༌ ནང༌ང༌ གྲུལ༌ཁན༌གུན༌ལ༌ ཀ༌རུ༌ ཆ༌ཅེན༌ ཅའང༌ གྱུས༌ མེད༌ཀྱག༌།
JOH 12:36 ཁྱོ༌ཞ༌གུན༌ ཉམ༌པོ༌ འོད༌ ཡོད༌དི༌ ཏུས༌ལ༌ ཁྱོ༌ཞ༌གུན༌ ཏེ༌ འོད༌དི༌ ཕྲུ༌གུ༌ གྱུར༌ཅེས༌སི༌ ཕིའ༌ ཏེ༌ འོད༌པོའེ༌ཀ༌ ཏད༌པ༌ ཁྱོང༌གོས༌།” ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུ༌ ཏེ༌ཀ༌ནེ༌ བིངས༌ཏེ༌ སྐྱོདས༌ ཡང༌ ཁོང༌གུན༌ནེ༌ ཨིབ༌བ༌ ཛདས༌།
JOH 12:37 གཙོ༌བོ༌ ཡེ༌ཤུའི༌ ཧ༌ལས༌ཤེས༌སི༌ ལྟས༌གུན༌ སྟན༌ཏེའང༌ མི༌ མང༌ཆེའ༌ ཁོང༌ངི༌ཀ༌ ཏད༌པ༌ མ༌ཅོས༌།
JOH 12:38 འི༌བོ༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཁན༌བོ༌ དྲན༌དྲ༌ གྲུབ༌ཏེ༌ ཨིན༌, “ཉེ༌རང༌ངི༌ ཁྱུད༌ཅན༌ ཆག༌ལས༌གུན༌ སྔོན༌ཅུགས༌ཏེའང༌, གཙོ༌བོ༌ལེ༌, སུའི༌ ང༌དང༌ངི༌ ལོན༌བོའ༌ ཨིད༌ཤེས༌ ཅོས༌།”
JOH 12:39 ཏེན༌ན༌ གྱུན༌ཚན༌བོའེ༌ ཕིའ༌ ཁོང༌གུན༌ནི༌ ཏད༌པ༌ མ༌ཁྱོངས༌། ཏམ༌པའེ༌ སུང༌རབས༌སི༌ ཡང༌ ཁག༌ཤིག༌གི༌ཀ༌ ལུང༌སྟོན༌པ༌ ཡེ༌ཤ༌ཡཱའེ༌ མོལ༌ཏེ༌ དུག༌,
JOH 12:40 “ཁོང༌ངི༌ ཁོང༌གུན༌ནི༌ མིག༌གུན༌ ཞ༌ར༌ དང༌ སྙིང༌གུན༌ སྐྱོང༌པོ༌ ཅོའ༌ ཛད༌ པ༌སང༌ ཁོང༌གུན༌ནི༌ མིག༌ནེ༌ མི༌ཐོང༌ ཡང༌ སྙིང༌གུན༌ལ༌ ཧ༌གོ༌ མི༌ཐུབ༌, ཏེ༌ མན༌ནེ༌ ཁོང༌གུན༌ནི༌ གྱོད༌པ༌ ཅོས༌ཏེ༌ ངའེ༌ ཁོང༌གུན༌ ཕན༌ཅུགས༌ཏེ༌ ཡོད༌གྲོ༌།”
JOH 12:41 ལུང༌སྟོན༌པ༌ ཡེ༌ཤ༌ཡཱའེ༌ ཡེ༌ཤུའི༌ སྤལ༌བོ༌ ཐོང༌ པ༌སང༌, ཁོང༌ངི༌ སྐོར༌ལ༌ ཏེ༌གུན༌ མོལ༌ཏེ༌ ཨིན༌པིན༌།
JOH 12:42 ཏེ༌ཏུས༌ལ༌ མི༌ མང༌པོ༌ཞིག༌གི༌ ཀ༌བོའེ༌ ཕྲོའ༌ ཡ༌ཧུ༌དཱ༌པའེ༌ འུ༌སྐྱོང༌ ཁ༌ཅིག༌གའང༌ ཡོད༌པིན༌, ཡེ༌ཤུའི༌ ནང༌ང༌ ཏད༌པ༌ ཁྱོངས༌, ཨིན༌ནའང༌ སུའང༌ མ༌ཤདས༌, ཅིའ༌ཟེར༌ན༌ ཕ༌རུ༌ཤི༌པ༌གུན༌ནི༌ ཁོང༌གུན༌ ཆོས༌ཚོགས༌སི༌ ཕྲོ༌ནེ༌ ཕིངས༌ ཏང༌ང༌ནོག༌ སམ༌ཏེ༌ ཇིགས༌སད༌པིན༌།
JOH 12:43 ཁོང༌གུན༌ནི༌ དཀོན༌མཆོག༌གི༌ སྟོད༌པའེ༌ སང༌ མི༌ཆོགས༌སི༌ སྟོད༌པ༌ རིན༌ཆེའ༌ ཚོར༌རད༌པིན༌།
JOH 12:44 ཏེ༌ནེ༌ ཡེ༌ཤུའི༌ ཀུ༌ཅོ༌ སལ༌ཏེ༌ མོལས༌, “ང༌ ཏད༌པ༌ ཅོ༌ཁན༌གུན༌ནི༌ ང༌ ཅིག༌པོ༌ མན༌པ༌ ང༌ ཀལ༌ལ༌ ཛད༌ཁན༌བོའང༌ ཏད༌པ༌ ཅོའ༌ནོག༌།
JOH 12:45 ཡང༌ ང༌ ཐོང༌ཁན༌གུན༌ནི༌ ང༌ ཀལ༌ལ༌ ཛད༌ཁན༌ནི༌ ཡབ༌ ཇལ༌ཏེ༌ ཨིན༌ནོག༌།
JOH 12:46 ངའེ༌ཀ༌ ཏད༌པ༌ ཁྱོང༌ཁན༌གུན༌ མུན༌གྲིག༌གི༌ ནང༌ང༌ མི༌ལུས༌ཤེས༌སི༌ ཕིའ༌ ང༌ ཇིག༌རྟེན༌ནི༌ ནང༌ང༌ འོད༌དི༌ ཚུལ༌ལ༌ ཡོངས༌ཏེ༌ ཨིན༌།”
JOH 12:47 “ངའེ༌ སྤེ༌ར༌གུན༌ ཉན༌ཏེ༌ ལག༌ལེན༌ མ༌ཅོ༌ཁན༌གུན༌ལ༌ ངའེ༌ སྐྱོན༌ མི༌ཀལ༌, ཅིའ༌ཟེར༌ན༌ ང༌ ཇིག༌རྟེན༌པ༌གུན༌ལ༌ སྐྱོན༌ ཀལ༌ལ༌ མན༌པ༌ ཐར༌པ༌ ཏང༌ང༌ ཡོངས༌ཏེ༌ ཨིན༌།
JOH 12:48 ང༌ ཕངས༌ཏེ༌ ངའེ༌ སྤེ༌ར༌གུན༌ མ༌ཉན༌ཁན༌ ཚང༌མའ༌ ངའེ༌ ཟེར༌ཁན༌ ཏེན༌ན༌ སྤེ༌ར༌གུན༌ནི༌ ཐའ༌མའེ༌ ཞག༌ག༌ ཁོང༌གུན༌ལ༌ ཤགས༌ ཅད༌ཨིན༌།
JOH 12:49 ངའེ༌ ང༌རང༌ངི༌ ཝང༌ངི༌ ནང༌ང༌ ཟེར༌ར༌མེད༌, ཨིན༌ནའང༌ ང༌ ཀལ༌ལ༌ ཛད༌ཁན༌ ནམ༌ཁའ༌ ཞུགས༌ཁན༌ནི༌ ཡབ༌བི༌ ང༌ ཅི༌ ཟེར༌ཅེས༌ དང༌ ཀ༌ཟུག༌གི༌ ཟེར༌ཅེས༌ལ༌ བཀའ༌ སལ༌ལ༌ ཛད༌ཏེ༌ ཨིན༌།
JOH 12:50 ཁོང༌ངི༌ བཀའེ༌ ཐའ༌མེད༌པའེ༌ མི༌ཚེའེ༌ ནང༌ང༌ ཁྲིད༌ད༌ ཛད༌ཅེས༌པོ༌ ངའེ༌ ཤེས༌སད༌། ཏེན༌ན༌བོའེ༌ཕིའ༌ ངའེ༌ ཡབ༌བི༌ ངའ༌ ཟེར༌ཅེས༌སི༌ བཀའ༌ སལ༌ཁན༌བོ༌ ངའེ༌ ཟེར༌རད༌།”
JOH 13:1 པེ༌སག༌གི༌ དོན༌ཏང༌ངི༌ སང༌ སྔུན༌ལ༌, གཙོ༌བོ༌ ཡེ༌ཤུའ༌ འི༌ ཇིག༌རྟེན༌བོ༌ ཕངས༌ཏེ༌ ཁོང༌རང༌ངི༌ ཡབ༌བི༌ཀ༌ སྐྱོད༌ཅེས༌སི༌ ཏུས༌ ལེབས༌ཏེ༌ ཨིན༌ཁན༌བོ༌ ཐུག༌གྱུས༌ ཡོད༌པིན༌། ཁོང༌ངི༌ འི༌ ཇིག༌རྟེན༌ནི༌ ནང༌ང༌ ཁོང༌རང༌ངི༌ མི༌གུན༌ལ༌ ཅམས༌པ༌ ཛདས༌, ཏ༌ ཁོང༌ངི༌ ཁོང༌རང༌ངི༌ ཅམས༌པ༌ ཁོང༌གུན༌ལ༌ ཚད༌ གང༌པོ༌ སྟན༌ན༌ ཛདས༌།
JOH 13:2 ཁོང༌གུན༌ ཕི༌ཏོག༌གི༌ དོན༌ཏང༌ དོན༌ཨིན༌ ཡོད༌པིན༌, ཤེ༌ཏན༌ནི༌ ཤི༌མོན༌ནི༌ བུ༌ཚ༌ ཡུ༌དཱ༌ ཀར༌ཡོད༌པའེ༌ སྙིང༌ངི༌ ནང༌ང༌ ཡེ༌ཤུའ༌ ངོ༌ལོག༌ ཅོ༌ཅུག༌ཅེས༌སི༌ སམ༌བ༌ སྐྱེ༌ཅུགས༌ ཚར༌ཏེ༌ ཨིན༌པིན༌།
JOH 13:3 ཡེ༌ཤུའི༌ ཡབ༌བི༌ ཅི༌ཚང༌མ༌ ཁོང༌ངི༌ ཆག༌ག༌ སྟད༌ད༌ ཛད༌ཁན༌ དང༌ ཁོང༌ དཀོན༌མཆོག༌གི༌ ཆོགས༌ནེ༌ སྐྱོད༌ཁན༌ ཡང༌ དཀོན༌མཆོག༌གི༌ སྐུན༌དུན༌ལ༌ ལོགས༌ཏེ༌ སྐྱོད༌ཅེས༌པོ༌ ཁྱེན༌ན༌ ཛད༌དད༌པིན༌།
JOH 13:4 ཏེ༌ནེ༌ ཁོང༌ ཅོག༌ཙེ༌ དུན༌ལ༌ ཞངས༌ ཡང༌ རང༌ངི༌ ཁེ༌ཐོག༌གི༌ ནམ༌ཟའ༌ ཕུད༌ད༌ ཛདས༌ཏེ༌ ལག༌ཕིས༌ ཆེན༌མོ༌ཞིག༌ ཁོང༌རང༌ངི༌ སྐྱེད༌པ༌ སྲིལ༌ལ༌ ཛདས༌།
JOH 13:5 ཏེ༌ སྟིང༌ནེ༌ ཁོང༌ངི༌ ཅི༌ལིམ༌ཅི༌ ནང༌ང༌ ཆུ༌ ལུགས༌ཏེ༌ ཁོང༌རང༌ངི༌ ལོབ༌ཕྲུགས༌གུན༌ནི༌ རྐང༌པ༌ ཁྲུ༌ཅེས༌ གོ༌ཟུག༌ ཛད༌ཏེ༌ སྐྱེད༌པ༌ སྲིལ༌ལ༌ ཛད༌ཁན༌ནི༌ ལག༌ཕིས༌ ཆེན༌མོ༌ ཉམ༌པོ༌ ཕིའ༌ ཛདས༌།
JOH 13:6 ཁོང༌ ཤི༌མོན༌ པི༌ཏྲར༌རི༌ དུན༌ལ༌ ལེབ༌བ༌ཅིག༌, པི༌ཏྲར༌རི༌ ཟེརས༌, “གཙོ༌བོ༌ ཉེ༌རང༌ངི༌ ངའེ༌ རྐང༌པ༌ ཁྲུའ༌ ཛད༌དད༌ད༌?”
JOH 13:7 ཡེ༌ཤུའི༌ ཁོའ༌ ལན༌སལས༌, “ངའེ༌ ཅོ༌ཁན༌བོ༌ དག༌ས༌ ཁྱོ༌རང༌ང༌ ཧ༌མི༌གོ༌, ཨིན༌ནའང༌ སྟིང༌ནེ༌ ཧ༌གོ༌ཨིན༌།”
JOH 13:8 པི༌ཏྲར༌རི༌ ཟེརས༌, “མན༌, ཉེ༌རང༌ངི༌ ངའེ༌ རྐང༌པ༌ མ༌ནེ༌ ཁྲུ༌ མ༌ཛད༌།” ཡེ༌ཤུའི༌ ཁོའ༌ མོལས༌, “ཀལ༌ཏེས༌ ངའེ༌ ཁྱོ༌རང༌ངི༌ རྐང༌པ༌ མ༌ཁྲུ༌ན༌ ཏེ༌ནེ༌ ངའེ༌ ནོར༌སྐལ༌ལི༌ ནང༌ང༌ ཁྱོ༌རང༌ང༌ ཁག༌ མེད༌།”
JOH 13:9 ཤི༌མོན༌ པི༌ཏྲར༌རི༌ ཟེརས༌, “ཏེ༌ཟུག༌ ཨིན༌ན༌, ཏེ༌ནེ༌ གཙོ༌བོ༌ ངའེ༌ རྐང༌པ༌ མ༌ཚད༌, ལག༌ དང༌ གོའང༌ ཁྲུའ༌ཛད༌།”
JOH 13:10 ཡེ༌ཤུའི༌ ཁོའ༌ ལན༌སལས༌, “ཆུའ༌ ཞུགས༌ཁན༌ནི༌ མི༌བོའེ༌ རྐང༌པ༌ཙ༌ མ༌ནེ༌ ཁྲུ༌གོས༌ མེད༌ཏེ༌ ཨིན༌ནོག༌, ཁོའེ༌ ཟུགས༌པོ༌ གང༌པོ༌ ལག༌མོ༌ ཨིན༌ནོག༌། ཅིག༌ཅིག༌ མ༌སྟོགས༌ ཁྱོ༌ཞའ༌ ཚང༌མ༌ རྩང༌མ༌ ཨིན༌།”
JOH 13:11 ཡེ༌ཤུའ༌ ངོ༌ལོག༌ ཅོ༌ཅེས༌ཅན༌ནི༌ མི༌བོ༌ ཐུག༌གྱུས༌ ཡོད༌ པ༌སང༌, “ཅིག༌ཅིག༌ མ༌སྟོགས༌ ཁྱོ༌ཞའ༌ ཚང༌མ༌ རྩང༌མ༌ ཨིན༌” མོལས༌།
JOH 13:12 ཡེ༌ཤུའི༌ ལོབ༌ཕྲུགས༌གུན༌ནི༌ རྐང༌པ༌ ཁྲུ༌ ཚར༌ར༌ཅིག༌ ནམ༌ཟའ༌ ནམས༌ཏེ༌ ཁོང༌རང༌ངི༌ ནས༌སའེ༌ཀ༌ ཞུགས༌, ཡང༌ ཁོང༌ངི༌ ལོབ༌ཕྲུགས༌གུན༌ལ༌ ཏྲིའ༌ ཛདས༌, “ངའེ༌ ཅོས༌ཁན༌ནི༌ ཏོན༌བོ༌ ཁྱོ༌ཞའ༌ ཧ༌གོའ༌?
JOH 13:13 ཁྱོ༌ཞའེ༌ ང༌ ལོབ༌བོན༌ དང༌ གཙོ༌བོ༌ ཟེར༌ར༌ནོག༌, ཏེ༌ཟུག༌ ཟེར༌ཅེས༌པོ༌ ཀྲང༌པོ༌ ཨིན༌ནོག༌, ཅིའ༌ཟེར༌ན༌ ང༌ ཏེ༌བོ༌ ཨིན༌ནའང༌ ཨིན༌།
JOH 13:14 ཏ༌ ང༌ ཁྱོ༌ཞ༌གུན༌ནི༌ ལོབ༌བོན༌ དང༌ གཙོ༌བོ༌ ཨིན༌ཨིན༌ཞིག༌ ཁྱོ༌ཞའེ༌ རྐང༌པ༌ ཁྲུའད༌ན༌, ཁྱོ༌ཞ༌གུན༌ནིའང༌ ཅིག༌ དང༌ ཅིག༌གི༌ རྐང༌པ༌ ཁྲུ༌གོས༌།
JOH 13:15 ངའེ༌ ཅོས༌ཁན༌གུན༌ ཁྱོ༌ཞེའང༌ ཅོ༌ཅེས༌སི༌ ཕིའ༌ ཁྱོ༌ཞ༌གུན༌ལ༌ ངའེ༌ སྤེ༌ཞིག༌ སྟན༌ཏེ༌ ཨིན༌།
JOH 13:16 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཡོག༌པོ༌ སྤོན༌བོའེ༌ སང༌ ཆེའ༌ མ༌ནོག༌, ཡང༌ ལོན༌ ཁྱོང༌ཁན༌བོ༌ ལོན༌ ཀལ༌ཁན༌བོའེ༌ སང༌ ཆེའ༌ མ༌ནོག༌།
JOH 13:17 ཏ༌ ཁྱོ༌ཞ༌གུན༌ལ༌ འི༌གུན༌ ཧ༌གོ༌ཏེ༌ ཨིན༌ནོག༌། འི༌གུན༌ནི༌ཀ༌ ལག༌ལེན༌ ཅོ༌ན༌ ཅིན༌ལབས༌ ཐོབ༌ཨིན༌།”
JOH 13:18 གཙོ༌བོ༌ ཡེ༌ཤུའི༌ མོལས༌, “ངའེ༌ ཁྱོ༌ཞའ༌ ཚང༌མའེ༌ སྐོར༌ལ༌ ཟེར༌ར༌མེད༌, ངའེ༌ ལྡམས༌ཁན༌གུན༌ ང༌ གྱུས༌ཡོད༌། ཨིན༌ནའང༌ ཏམ༌པའེ༌ སུང༌རབས༌སི༌ ནང༌ང༌, ‘ང༌ ཉམ༌པོ༌ ཟའ༌ཁན༌བོའེ༌ ངའ༌ ངོ༌ལོག༌ ཅོ༌ཨིན༌ ’ བྲིས༌ཁན༌བོ༌ དྲན༌དྲ༌ གྲུབ༌གོས༌།
JOH 13:19 འི༌གུན༌ ཇུང༌ ཟ༌ནེ༌ ཁྱོ༌ཞ༌གུན༌ནི༌ ང༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ ཏད༌པ༌ ཅོ༌ཅེས༌སི༌ ཕིའ༌ ངའེ༌ འི༌བོ༌ ཇུང༌ངི༌ སང༌ སྔུན༌ལ༌ དག༌ས༌ ཁྱོ༌ཞ༌གུན༌ལ༌ ཟེར༌རད༌།
JOH 13:20 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ ཀལ༌ཁན༌གུན༌ལ༌ གའ༌སུས༌ ཅོ༌ཁན༌གུན༌ནི༌ ངའ༌ གའ༌སུས༌ ཅོས༌ཏེ༌ ཨིན༌, ཡང༌ ང༌ གའ༌སུས༌ ཅོ༌ཁན༌གུན༌ནི༌ ང༌ ཀལ༌ལ༌ ཛད༌ཁན༌བོའ༌ གའ༌སུས༌ ཞུས༌ཏེ༌ ཨིན༌ནོག༌།”
JOH 13:21 ཏེ༌བོ༌ མོལ༌ཏེ༌ སྟིང༌ནེ༌ ཡེ༌ཤུའི༌ སེམས༌ལ༌ མ༌སྲན༌ཏྲེ༌ ནགས༌ ཐོང༌, ཡང༌ སྤང༌པོ༌ སལ༌ཏེ༌ མོལས༌, “ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཁྱོ༌ཞའེ༌ ཕྲོ༌ནེ༌ ཅིག༌ཅིག༌གི༌ ངའ༌ ངོ༌ལོག༌ ཅོ༌ཨིན༌།”
JOH 13:22 ཏེ༌ནེ༌ ལོབ༌ཕྲུགས༌གུན༌ནི༌ ཅིག༌ དང༌ ཅིག༌ག༌ ལྟས༌, ཅིའ༌ཟེར༌ན༌ ཁོང༌ངི༌ སུའི༌ སྐོར༌ལ༌ མོལ༌ཏེ༌ ཨིན༌ སུའང༌ གྱུས༌ མེད༌པིན༌།
JOH 13:23 ཡེ༌ཤུའི༌ ཅེས༌པ༌ ཛད༌ཁན༌ནི༌ ལོབ༌ཕྲུགས༌པོ༌ ཁོང༌ངི༌ ལྡོའེ༌ཀ༌ དུགས༌ཏེ༌ ཡོད༌པིན༌།
JOH 13:24 ཤི༌མོན༌ པི༌ཏྲར༌རི༌ ཏེ༌ ལོབ༌ཕྲུགས༌པོའ༌, སུའི༌ སྐོར༌ལ༌ མོལ༌ཏེ༌ ཨིན༌ ཡེ༌ཤུའ༌ ཏྲི༌ཅེས༌ལ༌ རྡའ༌ ཏངས༌?
JOH 13:25 ཁོ༌ ཡེ༌ཤུའི༌ ཆོགས༌ལ༌ ཉེས༌ཏེ༌ ཁོང༌ང༌ ཏྲིས༌, “གཙོ༌བོ༌ ཁོ༌ སུ༌ ཨིན༌ནོག༌?”
JOH 13:26 ཡེ༌ཤུའི༌ ལན༌སལས༌, “ངའེ༌ ཏ༌གི༌ ད༌བེན༌ནི༌ ནང༌ང༌ སྤགས༌ཏེ༌ ཏང༌ཅེས༌ཅན༌བོ༌ ཨིན༌།” ཏེ༌ནེ༌ ཡེ༌ཤུའི༌ ཤི༌མོན༌ ཀར༌ཡོད༌པའེ༌ བུ༌ཚ༌ ཡུ༌དཱ༌ ཏ༌གི༌ སྤགས༌ཁན༌བོ༌ སལས༌།
JOH 13:27 ཏ༌གི༌ ཁམ༌བུ༌བོ༌ ཟའ༌ཅིག༌ ཤེ༌ཏན༌ ཁོའེ༌ ནང༌ང༌ ཞུགས༌། ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ཅོ༌ཅེས༌ཅན༌བོ༌ གྱོགས༌པ༌ ཅོས༌།”
JOH 13:28 ཨིན༌ནའང༌ ཁར༌ཇི༌ ཟེན༌ ཡོད༌ཁན༌ ཞན༌ཚང༌མའ༌ ཡེ༌ཤུའི༌ ཁོའ༌ ཏེ༌ཟུག༌ ཅིའ༌ མོལ༌ཏེ༌ ཨིན༌ ཅའང༌ ཧ༌མ༌གོ༌།
JOH 13:29 ཡུ༌དཱ༌ པེ༌ནེ༌ ཁག༌ཁུར༌པ༌ ཨིན༌པ༌, ཁ༌ཅིག༌གི༌ ཡེ༌ཤུའི༌ ཁོའ༌ ཏུས༌ཆེན༌ནི༌ ཕིའ༌ སྒོས༌དོམ༌གུན༌ ཉོ༌ཅེས༌ ཡ༌ ཉལ༌བ༌ཅན༌ གུན༌ལ༌ པེ༌ནེ༌ ཏང༌ཅེས༌སི༌ ཕིའ༌ མོལ༌ཏེ༌ ཨིན༌གྲོ༌ སམ༌།
JOH 13:30 ཡུ༌དཱའེ༌ ཏ༌གི༌ ཁམ༌བུ༌བོ༌ ཟོས༌ཏེ༌ ཁོ༌ ཕི༌ལོག༌ག༌ བིང༌ཏེ༌ སོང༌, ཏེ༌ ཟ༌ནེ༌ ཚན༌ སོང༌ཏེ༌ ཡོད༌པིན༌།
JOH 13:31 ཡུ༌དཱ༌ སོང༌ ཚར༌ར༌ཅིག༌ གཙོ༌བོ༌ ཡེ༌ཤུའི༌ མོལས༌, “ཏ༌ མི༌རིགས༌སི༌བུའ༌ སྤལ༌ ཐོབ༌ཨིན༌, ཡང༌ ཁོ༌ གྱུད༌ཏེ༌ དཀོན༌མཆོག༌ག༌ སྤལ༌ ཐོབ༌ཨིན༌།
JOH 13:32 ཀལ༌ཏེས༌ ཁོའེ༌ ཞས༌ཏེ༌ དཀོན༌མཆོག༌ག༌ སྤལ༌ ཐོབ༌བད༌ན༌, དཀོན༌མཆོག༌གི༌ ཁོང༌རང༌ངི༌ ནང༌ང༌ སྲས༌ལའང༌ སྤལ༌ གྱོགས༌པ༌ སལ༌ལ༌ ཛད༌ཨིན༌།
JOH 13:33 ངའེ༌ ཕྲུ༌གུ༌གུན༌, ཁྱོ༌ཞ༌གུན༌ ཉམ༌པོ༌ ང༌ ཏ༌རུང༌ ཏུས༌ ཉུ༌ངུན༌ཞིག༌ ལུས༌ཨིན༌། ཁྱོ༌ཞའེ༌ ང༌ ཙལ༌ཨིན༌, ཀ༌ཟུག༌ ངའེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཟེར༌པིན༌ དག༌ས༌ ཁྱོ༌ཞ༌གུན༌ལའང༌ ཟེར༌རད༌, ཀ༌རུ༌ ང༌ ཆའད༌ ཁྱོ༌ཞ༌གུན༌ ཏེ༌རུ༌ ཡོང༌ མི༌ཉན༌།
JOH 13:34 ངའེ༌ ཁྱོ༌ཞ༌གུན༌ལ༌ བཀའ༌རྒྱ༌ སོ༌མ༌ཞིག༌ ཏང༌ངད༌, ཅིག༌ དང༌ ཅིག༌ག༌ ཅམས༌པ༌ ཅོས༌། ངའེ༌ ཁྱོ༌ཞའ༌ ཅམས༌པ༌ ཅོའ༌ ཙོགས༌ལ༌, ཁྱོ༌ཞ༌གུན༌ནིའང༌ ཅིག༌ དང༌ ཅིག༌ག༌ ཅམས༌པ༌ ཅོ༌གོས༌།
JOH 13:35 ཏེ༌བོའེ༌ མི༌ཚང༌མ༌ལ༌ ཁྱོ༌ཞ༌གུན༌ ངའེ༌ ལོབ༌ཕྲུགས༌ ཨིན༌ཁན༌བོ༌ ཤེས༌ཨིན༌, ཀལ༌ཏེས༌ ཁྱོ༌ཞའེ༌ ཅིག༌ དང༌ ཅིག༌ག༌ ཅམས༌པ༌ ཅོ༌ན༌།”
JOH 13:36 ཤི༌མོན༌ པི༌ཏྲར༌རི༌ ཡེ༌ཤུའ༌ ཟེརས༌, “གཙོ༌བོ༌ ཉེ༌རང༌ ཀ༌རུ༌ སྐྱོད༌ཅེས༌ ཨིན༌?” ཡེ༌ཤུའི༌ ལན༌སལས༌, “ང༌ ཆ༌སའ༌ དག༌ས༌ ཁྱོ༌རང༌ ཡོང༌ མི༌ཉན༌, ཨིན༌ནའང༌ སྟིང༌ནེ༌ ཁྱོ༌རང༌ ངའ༌ བྲངས༌ཏེ༌ ཡོང༌ཨིན༌།”
JOH 13:37 པི༌ཏྲར༌རི༌ ཏྲིས༌, “ཀྱེ༌ གཙོ༌བོ༌ ང༌ ཉེ༌རང༌ ཉམ༌པོ༌ དག༌ས༌ ཅིའ༌ ཡོང༌ མི༌ཉན༌། ཉེ༌རང༌ངི༌ ཕིའ༌ ངའེ༌ སྲོག༌ ཏང༌ཨིན༌།”
JOH 13:38 ཡེ༌ཤུའི༌ ལན༌སལས༌, “ཁྱོ༌རང༌ངི༌ ངའེ༌ ཏོན༌ལ༌ རང༌ངི༌ སྲོག༌པོ༌ ཏང༌ཨིན༌ན༌? ངའེ༌ ཁྱོ༌རང༌ང༌ དེན༌བ༌ དེན༌བ༌ ཟེར༌རད༌, ཅ༌པོའེ༌ ཅ༌སྐད༌ ཏང༌ངི༌ སང༌ སྔུན༌ལ༌, ཁྱོ༌རང༌ངི༌ ངའ༌ ལན༌ སུམ༌ མི༌ཤེས༌ཟུན༌ ཏང༌ཨིན༌།”
JOH 14:1 གཙོ༌བོ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ མོལས༌, “ཁྱོ༌ཞ༌གུན༌ནི༌ སེམས༌ལ༌ ནགས༌ མ༌སྟན༌། དཀོན༌མཆོག༌གི༌ཀ༌ ཨིད༌ཤེས༌ ཅོས༌ ཡང༌ ངའེ༌ཀའང༌ ཨིད༌ཤེས༌ ཅོས༌།
JOH 14:2 ངའེ༌ ཡབ༌བི༌ ཁང༌པའེ༌ ནང༌ང༌ ནས༌ས༌ མང༌པོ༌ ཡོད༌། ཀལ༌ཏེས༌ མེད༌པིན༌ན༌ ངའེ༌ ཅིའ༌ ཟེར༌ཨིན༌ ང༌ ཁྱོ༌ཞ༌གུན༌ནི༌ ཕིའ༌ ཏེ༌རུ༌ ནས༌ས༌ གྲལ༌གྲིག༌ ཅོའ༌ ཆའད༌།
JOH 14:3 ཀལ༌ཏེས༌ ང༌ སོང༌ཏེ༌ ནས༌ས༌ གྲལ༌གྲིག༌ ཅོ༌ན༌, ང༌ ལོགས༌ཏེ༌ ཡོངས༌ཏེ༌ ཁྱོ༌ཞ༌གུན༌ ང༌རང༌ ཉམ༌པོ༌ ཁྲིད༌ཏེ༌ ཁྱེར༌ཨིན༌, ཏེ༌ནེ༌ ང༌ ཡོད༌ས༌ ཁྱོ༌ཞ༌གུན༌ནའང༌ དུག༌ཨིན༌།
JOH 14:4 ཁྱོ༌ཞ༌གུན༌ལ༌ ང༌ ཆ༌ཅེས༌སི༌ ནས༌སའེ༌ ལམ༌བོ༌ གྱུས༌ཡོད༌།”
JOH 14:5 ཐོ༌མཱས༌སི༌ གཙོ༌བོ༌ ཡེ༌ཤུའ༌ ཟེརས༌, “གཙོ༌བོ༌, ང༌ཞའ༌ ཉེ༌རང༌ ཀ༌རུ༌ སྐྱོད༌ད༌ ཛད༌ཅེས༌པོ༌ གྱུས༌མེད༌, ཏེ༌ནེ༌ ང༌ཞའ༌ ཀ༌ཟུག༌གི༌ ཏེ༌ ལམ༌བོ༌ ཤེས༌ཨིན༌།”
JOH 14:6 ཡེ༌ཤུའི༌ མོལས༌, “ང༌ ནི༌ ལམ༌བོ༌, དེན༌བ༌བོ༌ དང༌ ཚེ༌བོ༌ ཨིན༌, ང༌ ཅིག༌པོ༌ གྱུད༌ཏེ༌ མ༌ནེ༌ སུ༌ཞིག༌གའང༌ ཡབ༌བི༌ སྐུན༌དུན༌ལ༌ མི༌ལེབ༌།
JOH 14:7 ཀལ༌ཏེས༌ ཁྱོ༌ཞ༌གུན༌ནི༌ ང༌ སུ༌ ཨིན༌ཁན༌བོ༌ ཏན༌ཏན༌ ཤེས༌ཏེ༌ ཨིན༌པིན༌ན༌, ཁྱོ༌ཞ༌གུན༌ནི༌ ངའེ༌ ཡབ༌བའང༌ ཤེས༌ཏེ༌ ཡོད༌གྲོ༌། ཏ༌ནེ༌ཕར༌ལ༌ ཁྱོ༌ཞའེ༌ ཁོང༌ ཤེས༌ཏེ༌ ཡང༌ ཇལ༌ཏེ༌ ཨིན༌ནོག༌།”
JOH 14:8 ཕི༌ལིབ༌བི༌ ཟེརས༌, “གཙོ༌བོ༌ ང༌ཞའ༌ ཡབ༌ དཀོན༌མཆོག༌ ཇལ༌ཅུག༌ག༌ ཛད༌དའང༌, ཡང༌ ཏེ༌བོ༌ ང༌ཞའེ༌ ཕིའ༌ ཙམ༌ ཐད༌ཐད༌ ཨིན༌།”
JOH 14:9 ཡེ༌ཤུའི༌ ཕི༌ལིབ༌བ༌ མོལས༌, “ང༌ ཁྱོ༌ཞའ༌ ཉམ༌པོ༌ འི༌ཟམ༌ ཏུས༌ མང༌པོ༌ དུགས༌ཏེའང༌ ཁྱོ༌རང༌ང༌ ཏ༌རུང༌ངའང༌ ང༌ མ༌ཤེས༌ས༌? ང༌ ཐོང༌ཁན༌གུན༌ནི༌ ཡབ༌བའང༌ ཇལ༌ཏེ༌ ཨིན༌། ཏེ༌ནེ༌ ཁྱོ༌རང༌ངི༌ ཀ༌ཟུག༌ག༌ ཟེར༌རད༌ ‘ང༌ཞའ༌ ཡབ༌ ཇལ༌ཅུག༌’ ཟེར༌ཏེ༌?
JOH 14:10 ཁྱོ༌རང༌ང༌ ང༌ ཡབ༌བི༌ ནང༌ང༌ ཡང༌ ཡབ༌ ངའེ༌ ནང༌ང༌ ཡོད༌ཁན༌བོ༌ དེན༌ཤེས༌ས༌ མེ༌རག༌ག༌? ངའེ༌ ཅི༌ སྤེ༌ར༌ཞིག༌ ཁྱོ༌ཞ༌གུན༌ལ༌ ཟེར༌རད༌ ཏེ༌གུན༌ ངའེ༌ ཆོགས༌ནེ༌ མན༌པ༌ ངའེ༌ ཡབ༌བི༌ ཆོགས༌ནེ༌ ཨིན༌, ཁོང༌ ངའེ༌ ནང༌ང༌ ཞུགས༌ཏེ༌ ཁོང༌རང༌ངི༌ ཆག༌ལས༌ ཛད༌དད༌།
JOH 14:11 ངའེ༌ ང༌ ཡབ༌བི༌ ནང༌ང༌ ཡང༌ ཡབ༌ ངའེ༌ ནང༌ང༌ ཨིན༌ ཟེར༌ཁན༌བོའ༌ དེན༌ཤེས༌ཤིག༌། འི༌བོའ༌ དེན༌ མ༌ཤེས༌ནའང༌ ངའེ༌ སྐོར༌ལ༌ སྤང༌པོ༌ ཏང༌ཁན༌ནི༌ ཛད༌པ༌གུན༌ ཐོང༌ཏེ༌ དེན༌ཤེས༌ཤིག༌།
JOH 14:12 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ཀ༌ ཏད༌པ༌ ཅོ༌ཁན༌གུན༌ནི༌ ངའེ༌ ཅོ༌ཁན༌ནི༌ ལས༌གུན༌ ཙོགས༌ ཅོ༌ཨིན༌, མ༌ཚད༌ ཏེ༌སང༌ ཀྲག༌ག༌ ལས༌གུན༌ ཅོ༌ཨིན༌, ཅིའ༌ཟེར༌ན༌ ང༌ ནི༌ ཡབ༌བི༌ཀ༌ ཆའད༌།
JOH 14:13 སྲས༌སི༌ ཡབ༌བ༌ སྤལ༌ ཁྱོང༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ཅི༌ཞིག༌ ངའེ༌ མིང༌ངི༌ ནང༌ང༌ ཞུ༌ཝ༌ ཕུལ༌ནའང༌ ངའེ༌ ཁྱོ༌ཞའ༌ ཏང༌ཨིན༌།
JOH 14:14 ཁྱོ༌ཞའེ༌ ཅི༌ཞིག༌གི༌ ཕིའ༌ ངའེ༌ མིང༌ངི༌ ནང༌ང༌ ངའ༌ ཞུ༌ཝ༌ ཕུལ༌ནའང༌, ངའེ༌ ཏེ༌བོ༌ ཅོ༌ཨིན༌།”
JOH 14:15 གཙོ༌བོ༌ ཡེ༌ཤུའི༌ མོལས༌, “ཀལ༌ཏེས༌ ཁྱོ༌ཞའེ༌ ང༌ ཅམས༌པ༌ ཅོའད༌ན༌ ཁྱོ༌ཞའེ༌ ངའེ༌ བཀའ༌ ཏང༌ཁན༌གུན༌ སྲུང༌ཨིན༌,
JOH 14:16 ངའེ༌ ཡབ༌བ༌ ཞུ༌ཝ༌ ཕུལ༌ཨིན༌ ཡང༌ ཁོང༌ངི༌ ཁྱོ༌ཞ༌གུན༌ལ༌ ཞན༌ རོགས༌ ཛད༌ཁན༌ཞིག༌ སལ༌ལ༌ ཛད༌ཨིན༌, ཁོང༌ ཏུས༌གྱུན༌ ཁྱོ༌ཞའ༌ ཉམ༌པོ༌ ཞུགས༌ཨིན༌།
JOH 14:17 ཁོང༌ ནི༌ མི༌གུན༌ ཀྲང༌པོའེ༌ ཆོགས༌ལ༌ ཁྲིད༌ཁན༌ ཏམ༌པའེ༌ ཐུག༌ཉིད༌བོ༌ ཨིན༌། ཇིག༌རྟེན༌པ༌གུན༌ནི༌ ཁོང༌ངི༌ ནང༌ང༌ ཏད༌པ༌ མི༌ཅོ༌ ཅིའ༌ཟེར༌ན༌ ཁོང༌གུན༌ནི༌ ཁོང༌ ཐོང༌ང༌ མ༌ནོག༌ ཡང༌ ཤེས༌སའང༌ མ༌ནོག༌། ཨིན༌ནའང༌ ཁྱོ༌ཞའེ༌ ཁོང༌ ཤེས༌ས༌ནོག༌ ཅིའ༌ཟེར༌ན༌ ཁོང༌ ཁྱོ༌ཞའེ༌ ནང༌ང༌ ནས༌ཏེ༌ ཁྱོ༌ཞའ༌ ཉམ༌པོ༌ ཞུགས༌ས༌ནོག༌།
JOH 14:18 ངའེ༌ ཁྱོ༌ཞའ༌, ཏཱོ༌ཙེ༌ ཙོགས༌ལ༌ མི༌ཕང༌, ང༌ ཁྱོ༌ཞ༌གུན༌ ཡོད༌ས༌ ཡོང༌ཨིན༌།
JOH 14:19 ཙ༌པིག༌ཤིག༌ནེ༌ ཇིག༌རྟེན༌པ༌གུན༌ནི༌ ང༌ མི༌ཐོང༌, ཨིན༌ནའང༌ ཁྱོ༌ཞའེ༌ ང༌ ཐོང༌ཨིན༌། ང༌ སོན༌ཏེའ༌ ཨིན༌ཅེས༌པོའེ༌ ཁྱོ༌ཞ༌གུན༌ནའང༌ སོན༌ཏེའ༌ ལུས༌ཨིན༌།
JOH 14:20 ང༌ སོན༌ཏེའ༌ ལང༌ངི༌ ཞག༌ག༌, ང༌ ཡབ༌བི༌ ནང༌ང༌ ཡང༌ ཁྱོ༌ཞ༌གུན༌ ངའེ༌ ནང༌ང༌ ཡང༌ ང༌ ཁྱོ༌ཞའེ༌ ནང༌ང༌ ཨིན༌ཁན༌བོ༌ ཁྱོ༌ཞའེ༌ ཧ༌གོ༌ཨིན༌།
JOH 14:21 ངའེ༌ བཀའ༌གུན༌ ཉན༌ཏེ༌ སྲུང༌ཁན༌གུན༌ ནི༌ ངའ༌ ཅམས༌པ༌ ཅོ༌ཁན༌གུན༌ ཨིན༌ནོག༌། ངའ༌ ཅེས༌པ༌ ཅོ༌ཁན༌གུན༌ལ༌ ངའེ༌ ཡབ༌བིའང༌ ཅེས༌པ༌ ཅོའ༌ ཛད༌ཨིན༌, ཡང༌ ངེའང༌ ཁོང༌གུན༌ལ༌ ཅམས༌པ༌ ཅོས༌ཏེ༌, ང༌རང༌ ཁོང༌གུན༌ལ༌ སྔོན༌ཅུག༌ཨིན༌།”
JOH 14:22 ཏེ༌ནེ༌ ཡུ༌དཱའེ༌ ༼ཀར༌ཡོད༌པ༌ མན༌ཁན༌བོའེ༌༽ ཟེརས༌, “ཀྱེ༌ གཙོ༌བོ༌, ཉེ༌རང༌ ང༌ཞ༌གུན༌ལ༌ སྔོན༌ཅུག༌ཅེས༌ ཡང༌ ཇིག༌རྟེན༌པ༌གུན༌ལ༌ སྔོན༌ མི༌ཅུག༌ཅེས༌པོ༌ ཅི༌ཕིའ༌ ཨིན༌?”
JOH 14:23 ཡེ༌ཤུའི༌ ལན༌སལས༌, “ང༌ ཅམས༌པ༌ ཅོ༌ཁན༌གུན༌ནི༌ ངའེ༌ ལབ༌ཞ༌གུན༌ནི༌ཀ༌ ལག༌ལེན༌ ཅོ༌ཨིན༌། ངའེ༌ ཡབ༌བི༌ ཁོང༌གུན༌ལ༌ ཅམས༌པ༌ ཛད༌ཨིན༌ ཡང༌ ང༌ཞའ༌ ཉིས༌ཀོ༌ ཁོང༌གུན༌ནི༌ཀ༌ ཡོངས༌ཏེ༌ ཁོང༌གུན༌ ཉམ༌པོ༌ དུག༌ཨིན༌།
JOH 14:24 ང༌ ཅམས༌པ༌ མ༌ཅོ༌ཁན༌གུན༌ནི༌ ངའེ༌ ལབ༌ཞ༌གུན༌ སྲུང༌ང༌ མ༌ནོག༌། ཁྱོ༌ཞའེ༌ ཚོར༌ཁན༌ནི༌ འི༌ ལོན༌བོ༌ ང༌རང༌ངི༌ མན༌, ང༌ ཀལ༌ལ༌ ཛད༌ཁན༌ནི༌ ངའེ༌ ཡབ༌བི༌ ཆོགས༌ནེ༌ ཨིན༌།
JOH 14:25 ང༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌ ངའེ༌ འི༌ ཚང༌མ༌ ཟེར༌ཏེ༌ ཨིན༌།
JOH 14:26 ཨིན༌ནའང༌ ཡབ༌བི༌ ངའེ༌ ཚབས༌ལ༌ རོགས༌ ཛད༌ཁན༌, ཏམ༌པའེ༌ ཐུག༌ཉིད༌ ཁྱོ༌ཞའ༌ ཀལ༌ལ༌ ཛད༌ཨིན༌། ཁོང༌ངི༌ ཁྱོ༌ཞ༌གུན༌ལ༌ ཅི༌ཚང༌མ༌ ལབ༌བ༌ ཛད༌ཏེ༌ ངའེ༌ ཤད༌ཁན༌ ཚང༌མ༌ ཁྱོ༌ཞ༌གུན༌ལ༌ ཨིད༌ཏུ༌ སྐུལ༌ཨིན༌།
JOH 14:27 ཞི༌དེ༌, ངའེ༌ ཁྱོ༌ཞའ༌ ཉམ༌པོ༌ བོར༌རད༌, ངའེ༌ ཞི༌དེ༌བོ༌ ཁྱོ༌ཞའ༌ ཏང༌ངད༌, ངའེ༌ ཞི༌དེ༌བོ༌ ཇིག༌རྟེན༌པའེ༌ ཞི༌དེ༌ ཙོགས༌ མན༌། ཁྱོ༌ཞ༌གུན༌ནི༌ སེམས༌ལ༌ ནགས༌ མ༌སྟན༌ ཡང༌ ཇིགས༌ མ༌ཇིགས༌།
JOH 14:28 ང༌ ཆའད༌ ཡང༌ ཁྱོ༌ཞའེ༌ཀ༌ ལོགས༌ཏེ༌ ཡོང༌ཨིན༌ ངའེ༌ ཟེར༌ཁན༌བོ༌ ཁྱོ༌ཞའེ༌ ཚོར༌ཏེ༌ ཨིན༌ནོག༌། ཀལ༌ཏེས༌ ཁྱོ༌ཞའེ༌ ང༌ ཅམས༌པ༌ ཅོའད༌ན༌ ང༌ ཡབ༌བི༌ཀ༌ ཆ༌ཅེས༌ལ༌ ཁྱོ༌ཞའ༌ ཐད༌པོ༌ ཡོད༌གྲོ༌, ཅིའ༌ཟེར༌ན༌ ཡབ༌ ངའེ༌ སང༌ ཀྲག༌ག༌ ཨིན༌།
JOH 14:29 ཏེ༌གུན༌ ཇུང༌ང༌ཅིག༌ ཁྱོ༌ཞའེ༌ ངའེ༌ཀ༌ ཏད༌པ༌ ཁྱོང༌ཅེས༌སི༌ ཕིའ༌ འི༌ ཚང༌མ༌ ཇུང༌ངི༌ སང༌ སྔུན༌ལ༌ ངའེ༌ ཁྱོ༌ཞ༌གུན༌ལ༌ ཤད༌ཏེ༌ ཨིན༌།
JOH 14:30 ངའ༌ ཁྱོ༌ཞ༌གུན༌ལ༌ སྤེ༌ར༌ ཏང༌ཅེས༌སི༌ ཏུས༌ མང༌པོ༌ཞིག༌ མེད༌, ཅིའ༌ཟེར༌ན༌ འི༌ ཇིག༌རྟེན༌ནི༌ ཝང༌སྲུལ༌པ༌བོ༌ ཡོང༌དུག༌, ཁོའ༌ ངའེ༌ཀ༌ ཅའང༌ ཝང༌ མེད༌།
JOH 14:31 ཨིན༌ནའང༌ ངའེ༌ ཡབ༌བ༌ ཅམས༌པ༌ དང༌ ཁོང༌ངི༌ ང༌ བཀའ༌ སལ༌ལ༌ ཛད༌ཁན༌གུན༌ དྲན༌དྲ༌ ཅོ༌ཅེས༌པོ༌ ཇིག༌རྟེན༌པ༌གུན༌ལ༌ གྱུས༌ ཡོང༌གོས༌། ཏ༌ ལོངས༌ ང༌དང༌གུན༌ འི༌ཀ༌ནེ༌ ཆེན༌།”
JOH 15:1 གཙོ༌བོ༌ ཡེ༌ཤུའི༌ མོལས༌, “ང༌ ནི༌ རྒུན༌ནི༌ ལྕང༌མ༌ དེན༌བ༌ ཡང༌ ངའེ༌ ཡབ༌ ཚས༌ཁན༌བོ༌ ཨིན༌།
JOH 15:2 བྲས༌བུ༌ མ༌ཆགས༌ཁན༌ནི༌ ཡལ༌ག༌གུན༌ ངའེ༌ ཀ༌ནེ༌ ཅད༌ཏེ༌ ཕང༌ང༌ ཛད༌དུག༌, ཡང༌ བྲས༌བུ༌ ཆགས༌ཁན༌ནི༌ ཡལ༌ག༌གུན༌ལ༌ མང༌ང༌ ཆགས༌ཤེས༌སི༌ ཕིའ༌ གོར༌ར༌ ཛད༌དུག༌།
JOH 15:3 ངའེ༌ ཁྱོ༌ཞའ༌ ཤད༌ཁན༌ནི༌ ལབ༌ཞ༌གུན༌ནི༌ ཁྱོ༌ཞ༌གུན༌ རྩང༌མ༌ ཅོ༌ ཚར༌ཏེ༌ ཨིན༌།
JOH 15:4 ངའེ༌ ནང༌ང༌ དུག༌ཤིག༌ ཡང༌ ང༌ ཁྱོ༌ཞའེ༌ ནང༌ང༌ དུག༌ཨིན༌། ཡལ༌ག༌ ཅིག༌པོའ༌ བྲས༌བུ༌ ཆགས༌ ཉན༌ན༌ མ༌ནོག༌, ཏེ༌བོ༌ རྒུན༌ནི༌ ལྕང༌མའེ༌ ནང༌ང༌ ནས༌ཏེ༌ ལུས༌གོས༌། ཏེན༌ན༌ ཙོགས༌ལ༌ ཀལ༌ཏེས༌ ཁྱོ༌ཞའ༌ ངའེ༌ ནང༌ང༌ མ༌དུག༌ན༌ ཁྱོ༌ཞ༌གུན༌ནའང༌ བྲས༌བུ༌ མི༌ཆགས༌།”
JOH 15:5 “ང༌ ནི༌ རྒུན༌ནི༌ ལྕང༌མ༌ ཡང༌ ཁྱོ༌ཞའ༌ ངའེ༌ ཡལ༌ག༌གུན༌ ཨིན༌། ངའེ༌ ནང༌ང༌ ནས༌ཁན༌ ཡང༌ ང༌ ཁོང༌གུན༌ནི༌ ནང༌ང༌ ནས༌ཁན༌གུན༌ལ༌ བྲས༌བུ༌ མང༌པོ༌ ཆགས༌ཨིན༌, ང༌ནེ༌ བེ༌ཏེ༌ ཁྱོ༌ཞ༌གུན༌ལ༌ ཅའང༌ ཅོ༌ མི༌ཉན༌།
JOH 15:6 ངའེ༌ ནང༌ང༌ མ༌དུག༌ཁན༌གུན༌, སྐམས༌ཁན༌ནི༌ ཡལ༌ག༌ ཐག༌རིང༌ང༌ ཕངས༌ཁན༌ ཙོགས༌ ཨིན༌, ཏེ༌གུན༌ ལྡུས༌ཏེ༌ མེ༌ ནང༌ང༌ ཕངས༌ཏེ༌ སྲག༌ཨིན༌།
JOH 15:7 ཀལ༌ཏེས༌ ཁྱོ༌ཞའ༌ ངའེ༌ ནང༌ང༌ ནས༌ཏེ༌ ངའེ༌ ལབ༌ཞ༌གུན༌ ཁྱོ༌ཞའེ༌ སེམས༌སི༌ ནང༌ང༌ ལུས༌ན༌, ཁྱོ༌ཞའེ༌ དོད༌པ༌ ཅོས༌ཏེ༌ ཅི༌ཞིག༌ ཏོང༌ ཟེར༌ནའང༌ ཁྱོ༌ཞའ༌ སལ༌ཨིན༌།
JOH 15:8 ཁྱོ༌ཞའ༌ བྲས༌བུ༌ མང༌པོ༌ ཆགས༌ཏེ༌ ངའེ༌ དེན༌བའེ༌ ལོབ༌ཕྲུགས༌ ཨིན༌ཁན༌བོ༌ སྟན༌ན༌ཅིག༌ ངའེ༌ ཡབ༌བ༌ སྤལ༌ ཐོབ༌ཨིན༌།”
JOH 15:9 “ཡབ༌བི༌ ང༌ ཅམས༌པ༌ ཛད༌ད༌ ཙོགས༌ལ༌ ངའེ༌ ཁྱོ༌ཞའ༌ ཅམས༌པ༌ ཅོའད༌། ངའེ༌ ཅམས༌པའེ༌ ནང༌ང༌ ནས༌ཏེ༌ དུག༌ཤིག༌།
JOH 15:10 ཀལ༌ཏེས༌ ཁྱོ༌ཞའེ༌ ངའེ༌ བཀའ༌གུན༌ལ༌ ཁའ༌ཉན༌ན༌ ཁྱོ༌ཞ༌གུན༌ ངའེ༌ ཅམས༌པའེ༌ ནང༌ང༌ ལུས༌ཨིན༌ ཀ༌ཟུག༌ ངའེ༌ ང༌རང༌ངི༌ ཡབ༌བི༌ བཀའ༌གུན༌ལ༌ ཁའ༌ཉན༌ཏེ༌ ཁོང༌ངི༌ ཅམས༌པའེ༌ ནང༌ང༌ ལུས༌ཏེ༌ ཨིན༌།
JOH 15:11 ངའེ༌ ཐད༌པོ༌ ཁྱོ༌ཞའེ༌ ནང༌ང༌ ལུས༌ཤེས༌ ཡང༌ ཁྱོ༌ཞ༌གུན༌ལ༌ ཐད༌པོ༌ གང༌པོ༌ ཐོབ༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ ཁྱོ༌ཞའ༌ ཟེར༌ཏེ༌ ཨིན༌།
JOH 15:12 ངའེ༌ བཀའ༌ ནི༌ འི༌བོ༌ ཨིན༌, ངའེ༌ ཁྱོ༌ཞ༌གུན༌ལ༌ ཅམས༌པ༌ ཅོ༌ཁན༌ ཙོགས༌ ཁྱོ༌ཞའེ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌།
JOH 15:13 ཛ༌འོ༌གུན༌ནི༌ ཕིའ༌ ཁོ༌རང༌ངི༌ སྲོག༌པོ༌ ཏང༌ཅེས༌སི༌ སང༌ ཆེའ༌ ཡ༌ཤ༌ཤིག༌ མེད༌།
JOH 15:14 ངའེ༌ བཀའ༌ ཏང༌ཁན༌གུན༌ ཅོ༌ན༌ ཁྱོ༌ཞའ༌ ངའེ༌ ཛ༌འོ༌ ཨིན༌།
JOH 15:15 ཏ༌ནེ༌ཕར༌ལ༌ ངའེ༌ ཁྱོ༌ཞའ༌ ཡོག༌པོ༌ མི༌ཟེར༌ ཅིའ༌ཟེར༌ན༌ ཡོག༌པོའ༌ སྤོན༌བོའེ༌ ལས༌སི༌ སྐོར༌ལ༌ གྱུས༌ ཡོང༌ང༌ མ༌ནོག༌། ཨིན༌ནའང༌ ཁྱོ༌ཞ༌གུན༌ལ༌ ངའེ༌ ཛ༌འོ༌ ཟེར༌རད༌ ཅིའ༌ཟེར༌ན༌ ཡབ༌ནེ༌ ཚོར༌ཁན༌ ཚང༌མ༌ ངའེ༌ ཁྱོ༌ཞའ༌ ཤད༌ཏེ༌ ཨིན༌།
JOH 15:16 ཁྱོ༌ཞའེ༌ ང༌ ལྡམས༌ཏེ༌ མན༌, ངའེ༌ ཁྱོ༌ཞ༌གུན༌ ལྡམས༌ཏེ༌ ཨིན༌། ཁྱོ༌ཞ༌གུན༌ སོང༌ཏེ༌ ཏུས༌གྱུན༌ ལུས༌ཤེས༌སི༌ བྲས༌བུ༌ སྨིན༌ཅུག༌ཅེས༌ལ༌ ངའེ༌ སྐོས༌ཏེ༌ ཨིན༌། ཏེ༌ནེ༌ ངའེ༌ མིང༌ངི༌ ནང༌ང༌ ཁྱོ༌ཞའེ༌ ངའེ༌ ཡབ༌བ༌ ཅི༌ཞིག༌ ཞུ༌ནའང༌ སལ༌ལ༌ ཛད༌ཨིན༌།
JOH 15:17 ངའེ༌ ཁྱོ༌ཞའ༌ འི༌ བཀའ༌བོ༌ ཏང༌ངད༌, ཅིག༌ དང༌ ཅིག༌ག༌ ཅམས༌པ༌ ཅོས༌།”
JOH 15:18 གཙོ༌བོ༌ ཡེ༌ཤུའི༌ མོལས༌, “ཀལ༌ཏེས༌ ཇིག༌རྟེན༌པ༌གུན༌ནི༌ ཁྱོ༌ཞའ༌ ནཕ༌རད༌ ཅོ༌ན༌ ཨིད༌ཏུ༌ ཅོས༌, ཁོང༌གུན༌ནི༌ ནཕ༌རད༌ ཅོ༌ཁན༌ ཏང༌པོ༌བོ༌ ང༌ ཨིན༌པིན༌།
JOH 15:19 ཀལ༌ཏེས༌ ཁྱོ༌ཞའ༌ ཇིག༌རྟེན༌པའེ༌ ཨིན༌པིན༌ན༌, ཁོང༌ངི༌ ཁྱོ༌ཞའ༌ ཁོ༌རང༌གུན༌ནི༌ ཕྲུ༌གུ༌ ཙོགས༌ལ༌ ཅེས༌པ༌ ཅོས༌ཏེ༌ ཡོད༌གྲོ༌། ཨིན༌ནའང༌ ཏ༌ ཁྱོ༌ཞའ༌ ཇིག༌རྟེན༌པའེ༌ ཁག༌ཤིག༌ མ༌ནོག༌། ངའེ༌ ཇིག༌རྟེན༌པའེ༌ ཕྲོ༌ནེ༌ ཁྱོ༌ཞ༌གུན༌ ལྡམས༌ པ༌སང༌, ཁོང༌གུན༌ནི༌ ཁྱོ༌ཞའ༌ ནཕ༌རད༌ ཅོའ༌ནོག༌།
JOH 15:20 ངའེ༌ ཁྱོ༌ཞའ༌ འི༌ སྤེ༌ར༌ ཟེར༌ཁན༌བོ༌ ཨིད༌ཏུའ༌ བོར༌ཤིག༌, ‘ཡོག༌པོ༌ སྤོན༌བོའེ༌ སང༌ ཆེའ༌ མ༌ནོག༌’ ཀལ༌ཏེས༌ ཁོང༌གུན༌ནི༌ ང༌ ནགས༌བར༌དོ༌ སྟན༌ཏེ༌ ཨིན༌ན༌ ཏེ༌ནེ༌ ཁོང༌གུན༌ནི༌ ཁྱོ༌ཞའང༌ ནགས༌བར༌དོ༌ སྟན༌ཨིན༌། ཀལ༌ཏེས༌ ཁོང༌གུན༌ནི༌ ངའེ༌ ལབ༌ཞ༌གུན༌ནི༌ཀ༌ ལག༌ལེན༌ ཅོས༌པིན༌ན༌ ཏེ༌ནེ༌ ཁྱོ༌ཞའེ༌ ལབ༌ཞ༌གུན༌ནི༌ཀའང༌ ལག༌ལེན༌ ཅོ༌ཨིན༌།
JOH 15:21 ཁྱོ༌ཞའ༌ ངའེ༌ ཨིན༌ཅེས༌པོའེ༌ ཁོང༌གུན༌ནི༌ ཁྱོ༌ཞའ༌ ཏེ༌ཟུག༌ ཅོ༌ཨིན༌, ཅིའ༌ཟེར༌ན༌ ཁོང༌གུན༌ནི༌ ང༌ ཀལ༌ལ༌ ཛད༌ཁན༌བོ༌ ཤེས༌ས༌ མ༌ནོག༌།
JOH 15:22 ཀལ༌ཏེས༌ ང༌ ཡོངས༌ཏེ༌ ཁོང༌གུན༌ལ༌ ངའེ༌ ཡབ༌བི༌ ལོན༌བོ༌ མ༌ཤད༌པིན༌ན༌ ཁོང༌གུན༌ ཁོང༌རང༌གུན༌ནི༌ སྡིག༌པའེ༌ ཕིའ༌ ནོངས༌ཅན༌ མན༌གྲོ༌། ཨིན༌ནའང༌ ཏ༌ ཁོང༌གུན༌ནི༌ ཁོ༌རང༌ངི༌ སྡིག༌པའེ༌ ཕིའ༌ ཅའང༌ སྐྱོན༌ ཅོ༌ མི༌ཉན༌།
JOH 15:23 ངའ༌ ནཕ༌རད༌ ཅོ༌ཁན༌གུན༌ནི༌ ངའེ༌ ཡབ༌བའང༌ ནཕ༌རད༌ ཅོའ༌ནོག༌།
JOH 15:24 ཀལ༌ཏེས༌ ངའེ༌ ཁོང༌གུན༌ནི༌ ཕྲོའ༌ ཞན༌ སུའིང༌ མ༌ཅོས༌ཁན༌ནི༌ ཏེ༌ ཧ༌ལས༌ཤེས༌སི༌ ལྟས༌གུན༌ མ༌སྟན༌པིན༌ན༌, ཁོང༌གུན༌ ཁོང༌རང༌གུན༌ནི༌ སྡིག༌པའེ༌ ཕིའ༌ ནོངས༌ཅན༌ མན༌གྲོ༌། ཨིན༌ནའང༌ ཁོང༌གུན༌ནི༌ ཏེ༌གུན༌ ཐོང༌ཏེའང༌ ང༌ དང༌ ངའེ༌ ཡབ༌ ཉིས༌ཀོའ༌ ནཕ༌རད༌ ཅོས༌།
JOH 15:25 ཁོང༌གུན༌ནི༌ བཀའ༌ཁྲིམས༌སི༌ ནང༌ང༌, ‘ཁོང༌གུན༌ནི༌ ངའ༌ ཏོན༌ཏག༌ མེད༌པ༌ ནཕ༌རད༌ ཅོས༌ ’ བྲིས༌ཏེ༌ ཡོད༌ཁན༌བོ༌ དྲན༌དྲ༌ གྲུབ༌དུག༌།”
JOH 15:26 “ཨིན༌ནའང༌ ངའེ༌ རོགས༌ ཛད༌ཁན༌བོ༌ ཁྱོ༌ཞ༌གུན༌ལ༌ ཀལ༌ཨིན༌། ཁོང༌ ནི༌ མི༌གུན༌ ཀྲང༌པོའེ༌ ཆོགས༌ལ༌ ཁྲིད༌ཁན༌ ཏམ༌པའེ༌ ཐུག༌ཉིད༌ ཨིན༌། ཁོང༌ ཡབ༌ དཀོན༌མཆོག༌གི༌ ཆོགས༌ནེ༌ སྐྱོད༌ཏེ༌ ངའེ༌ སྐོར༌ལ༌ སྤང༌པོ༌ སལ༌ཨིན༌།
JOH 15:27 ཁྱོ༌ཞ༌གུན༌ནིའང༌ ངའེ༌ སྐོར༌ལ༌ སྤང༌པོ༌ ཏང༌གོས༌, ཅིའ༌ཟེར༌ན༌ ཁྱོ༌ཞ༌གུན༌ གོ༌མ༌ནེ༌ ཕར༌ལ༌ ང༌ ཉམ༌པོ༌ ཡོད༌ཏེ༌ ཨིན༌ནོག༌།”
JOH 16:1 ཡེ༌ཤུའི༌ མོལས༌, “ཁྱོ༌ཞ༌གུན༌ནི༌ ངའེ༌ཀ༌ ཏད༌པ༌ ཡོད༌ཁན༌བོ༌ ཕང༌ མི༌ཕང༌ཅེས༌ལ༌ ངའེ༌ འི༌ སྤེ༌ར༌ ཚང༌མ༌ ཁྱོ༌ཞ༌གུན༌ལ༌ ཤད༌ཏེ༌ ཨིན༌།
JOH 16:2 ཁོང༌གུན༌ནི༌ ཁྱོ༌ཞའ༌ ཆོས༌ཚོགས༌སི༌ ཕྲོ༌ནེ༌ ཕིངས༌ ཏང༌ཨིན༌། ཏེ༌ཟུག༌ ཏུས༌སང༌ ལེབ༌ཨིན༌, ཁྱོ༌ཞའ༌ སད༌ཁན༌གུན༌ནི༌ སམ༌ཨིན༌ ཁོང༌གུན༌ནི༌ དཀོན༌མཆོག༌ག༌ ཞབས༌ཏོག༌ ཞུས༌ཏེ༌ ཨིན༌།
JOH 16:3 ཁོང༌གུན༌ནི༌ ཏེ༌ཙོགས༌སི༌ ལས༌གུན༌ ཅོ༌ཨིན༌ ཅིའ༌ཟེར༌ན༌ ཁོང༌གུན༌ནི༌ ཡབ༌ མ༌ཤེས༌ ཡ༌ ངའང༌།
JOH 16:4 ཏེ༌ཏུས༌པོ༌ ལེབ༌བ༌ཅིག༌, ངའེ༌ སྔུན༌ལ༌ སྤང༌པུད༌ཁན༌བོ༌ ཁྱོ༌ཞ༌གུན༌ལ༌ ཨིད༌ཏུ༌ ཡོང༌ཅེས༌སི༌ ཕིའ༌ ངའེ༌ འི༌གུན༌ ཁྱོ༌ཞའ༌ ཤད༌ཏེ༌ ཨིན༌། སྔུན༌ལ༌ ངའེ༌ ཁྱོ༌ཞ༌གུན༌ལ༌ འི༌ ཚང༌མ༌ མ༌ཤད༌པིན༌ ཅིའ༌ཟེར༌ན༌ ང༌ ཁྱོ༌ཞ༌གུན༌ ཉམ༌པོ༌ ཡོད༌པིན༌།”
JOH 16:5 གཙོ༌བོ༌ ཡེ༌ཤུའི༌ མོལས༌, “ཏ༌ ང༌, ངའ༌ ཀལ༌ལ༌ ཛད༌ཁན༌ནི༌ ཡབ༌བི༌ སྐུན༌དུན༌ལ༌ ལོགས༌ཏེ༌ ཆའད༌, ཨིན༌ནའང༌ ཁྱོ༌ཞའེ༌ ཕྲོ༌ནེ༌ སུ༌ཞིག༌གིའང༌ ང༌ ‘ཀ༌རུ༌ ཆད༌’ ཟེར༌ཏེ༌ ཏྲིའ༌ མི༌དུག༌,
JOH 16:6 ཅིའ༌ཟེར༌ན༌ ངའེ༌ འི༌ ཚང༌མ༌ ཤད༌པ༌ ཁྱོ༌ཞའ༌ ཚེར༌ཁའེ༌ གངས༌ཏེ༌ ཡོད༌ཏེ༌ ཨིན༌ནོག༌།
JOH 16:7 ཨིན༌ནའང༌ ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ང༌ འི༌ཀ༌ནེ༌ ཆ༌ཅེས༌པོ༌ ཁྱོ༌ཞའེ༌ ཕིའ༌ ཕན༌ཐོགས༌ཅན༌ ཨིན༌, ཅིའ༌ཟེར༌ན༌ ནམ༌ཚོག༌པ༌ ང༌ མི༌ཆའ༌ ཏེ༌ རོགས༌ ཛད༌ཁན༌བོ༌ ཁྱོ༌ཞའེ༌ཀ༌ མི༌སྐྱོད༌, ཨིན༌ནའང༌ ཀལ༌ཏེས༌ ང༌ ཆ༌ན༌ ངའེ༌ ཁོང༌ ཁྱོ༌ཞའེ༌ཀ༌ ཀལ༌ཨིན༌།
JOH 16:8 ཁོང༌ སྐྱོད༌ད༌ཅིག༌, ཁོང༌ངི༌ སྡིག༌པ༌, ཀྲང༌པོ༌ དང༌ དཀོན༌མཆོག༌གི༌ ཁྲིམས༌ཅད༌ གུན༌ནི༌ སྐོར༌ལ༌ ཇིག༌རྟེན༌པ༌གུན༌ནི༌ སམ༌ཚུལ༌ ནོར༌ཏེ༌ ཨིན༌ཁན༌བོ༌ སྟན༌ན༌ ཛད༌ཨིན༌།
JOH 16:9 སྡིག༌པ༌ ནི༌ ཁོང༌གུན༌ནི༌ ངའེ༌ཀ༌ ཏད༌པ༌ མིང༌ནའང༌ མི༌ཅོ༌ཅེས༌པོ༌ ཨིན༌།
JOH 16:10 ཀྲང༌པོ༌ ནི༌ ང༌ ཨིན༌ ཅིའ༌ཟེར༌ན༌ ང༌ ང༌རང༌ངི༌ ཡབ༌བི༌ཀ༌ ལོགས༌ཏེ༌ ཆའད༌ ཡང༌ ཁྱོ༌ཞ༌གུན༌ནི༌ ང༌ མི༌ཐོང༌།
JOH 16:11 དཀོན༌མཆོག༌གི༌ ཁྲིམས༌ཅད༌བོ༌ ནི༌ ཡོང༌ཨིན༌ ཅིའ༌ཟེར༌ན༌ དཀོན༌མཆོག༌གི༌ ཇིག༌རྟེན༌པ༌གུན༌ནི༌ཀ༌ ཝང༌སྲུལ༌ཁན༌ ཤེ༌ཏན༌ལ༌ ཁྲིམས༌ཅད༌ད༌ ཛད༌ ཚར༌ཏེ༌ ཨིན༌།”
JOH 16:12 “ཏ༌རུང༌ ང༌ ཤད༌གྱུ༌ མ༌ མང༌པོ༌ ཡོད༌, ཨིན༌ནའང༌ ཁྱོ༌ཞ༌གུན༌ལ༌ དག༌ས༌ ལྕིད༌པོ༌ ཁུར༌ ཐུབ༌ཅེས༌ མི༌དུག༌།
JOH 16:13 མི༌གུན༌ ཀྲང༌པོའེ༌ ཆོགས༌ལ༌ ཁྲིད༌ཁན༌ ཏམ༌པའེ༌ ཐུག༌ཉིད༌ སྐྱོད༌ད༌ཅིག༌, ཁྱོ༌ཞ༌གུན༌ལ༌ དཀོན༌མཆོག༌གི༌ དེན༌བའེ༌ ལམ༌སྟན༌ན༌ ཛད༌ད༌ནོག༌། ཁོང༌ངི༌ ཁོང༌རང༌ངི༌ ཆོགས༌ནེ༌ མ༌མོལ༌ལ༌ ཡབ༌ནེ༌ ཚོར༌ཁན༌ ཅིག༌པོ༌ མོལ༌ལ༌ནོག༌, ཡང༌ ཁྱོ༌ཞ༌གུན༌ལ༌ ཡོང༌ཅེས༌ཅན༌ནི༌ ཏུས༌སི༌ སྐོར༌ལ༌ ཤད༌ད༌ ཛད༌ཨིན༌།
JOH 16:14 ཁོང༌ངི༌ ངའ༌ སྤལ༌ ཁྱོང༌ཨིན༌ ཅིའ༌ཟེར༌ན༌ ངའེ༌ ཟེར༌ཁན༌གུན༌ ཁྱོ༌ཞ༌གུན༌ལ༌ ཤད༌ད༌ ཛད༌ཨིན༌།
JOH 16:15 ཡབ༌བི༌ ཨིན༌ཁན༌ ཚང༌མ༌ ངའེ༌ ཨིན༌། ཏེན༌ན༌བོའེ༌ཕིའ༌ ངའེ༌ ཟེར༌རད༌ ཏམ༌པའེ༌ ཐུག༌ཉིད༌དི༌ ངའེ༌ ཁའ༌ནེ༌ ཚོར༌ཁན༌ ཚང༌མ༌ ཁྱོ༌ཞ༌གུན༌ལ༌ ཤད༌ད༌ ཛད༌ད༌ནོག༌།”
JOH 16:16 གཙོ༌བོ༌ ཡེ༌ཤུའི༌ མོལས༌, “ཙ༌པིག༌ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡང༌ ཙ༌པིག༌ཤིག༌ སྟིང༌ནེ༌ ཁྱོ༌ཞའེ༌ ང༌ ཡང༌སྐྱར༌ ཐོང༌ཨིན༌།”
JOH 16:17 ཁོང༌ངི༌ ལོབ༌ཕྲུགས༌ ཁ༌ཅིག༌གི༌ ཁོང༌རང༌ ཅིག༌ དང༌ ཅིག༌ག༌ ཏྲིས༌, “ཁོང༌ངི༌ ‘ཙ༌པིག༌ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡང༌ ཙ༌པིག༌ཤིག༌ སྟིང༌ནེ༌ ཁྱོ༌ཞའེ༌ ང༌ ཡང༌སྐྱར༌ ཐོང༌ཨིན༌’ ཡང༌ ‘ཅིའ༌ཟེར༌ན༌ ང༌ ཡབ༌བི༌ཀ༌ ཆའད༌’ མོལ༌ཁན༌གུན༌ནི༌ ཏོན༌བོ༌ ཅི༌ ཨིན༌ནོག༌?”
JOH 16:18 ཁོང༌གུན༌ནི༌ ཅིག༌ དང༌ ཅིག༌ག༌ ཏྲི༌ཨིན༌ དུགས༌, “‘ཙ༌པིག༌ཤིག༌གི༌’ ཏོན༌ཏག༌པོ༌ ཅི༌ ཨིན༌ནོག༌? ཁོང༌ངི༌ མོལ༌ཁན༌བོ༌ ང༌དང༌གུན༌ནི༌ ཧ༌གོའ༌ མེ༌རག༌།”
JOH 16:19 ཡེ༌ཤུའི༌ ཁོང༌གུན༌ནི༌ ཏེ༌བོའེ༌ སྐོར༌ལ༌ ཁོང༌ང༌ ཏྲི༌ཉིན༌ ཡོད༌ཁན༌བོ༌ ཁྱེན༌པ༌, ཁོང༌ངི༌ ལོབ༌ཕྲུགས༌གུན༌ལ༌ མོལས༌, “ཁྱོ༌ཞ༌གུན༌ནི༌ ངའེ༌, ‘ཙ༌པིག༌ཤིག༌གི༌ སྟིང༌ནེ༌ ཁྱོ༌ཞའེ༌ ང༌ མི༌ཐོང༌ ཡང༌ ཙ༌པིག༌ཤིག༌ སྟིང༌ནེ༌ ཁྱོ༌ཞའེ༌ ང༌ ཡང༌སྐྱར༌ ཐོང༌ཨིན༌’ ཟེར༌ཁན༌ནི༌ ཏོན༌བོ༌ ཅིག༌ དང༌ ཅིག༌ག༌ ཏྲིའ༌ད༌?
JOH 16:20 ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ཇིག༌རྟེན༌པ༌གུན༌ནི༌ གའ༌མོ༌ ཅོ༌ ཟ༌ནེ༌ ཁྱོ༌ཞའ༌ ངུ༌ཨིན༌, རྡུག༌པོ༌ ཅོ༌ཨིན༌། ཁྱོ༌ཞ༌གུན༌ནི༌ རྡུག༌པོ༌ ཅོ༌ཨིན༌ ཨིན༌ནའང༌ ཁྱོ༌ཞའེ༌ རྡུག༌པོ༌ ཐད༌པོའེ༌ ནང༌ང༌ གྱུར༌ཨིན༌།
JOH 16:21 བུ༌མོ༌ཞིག༌ག༌ ཕྲུ༌གུ༌ ཇོར༌ ཟ༌ནེ༌ ཟུ༌མོ༌ སྲན༌ཏྲེ༌ ཡོང༌ང༌ནོག༌ ཅིའ༌ཟེར༌ན༌ ཁོའེ༌ ཏུས༌པོ༌ ལེབས༌ཏེ༌ ཨིན༌ནོག༌, ཨིན༌ནའང༌ ཕྲུ༌གུ༌ ཇོར༌ ཚར༌ར༌ཅིག༌, ཁོའ༌ ཟུ༌མོ༌བོ༌ རྗེད༌ཨིན༌ ཅིའ༌ཟེར༌ན༌ ཇིག༌རྟེན༌ནི༌ ནང༌ང༌ ཕྲུ༌གུ༌ སྐྱེས༌ཁན༌བོའེ༌ཀ༌ ཁོ༌ ཐད༌པོ༌ ཆའ༌ནོག༌།
JOH 16:22 ཏེན༌ན༌ ཙོགས༌ལ༌, དག༌ས༌ ཁྱོ༌ཞའེ༌ རྡུག༌པོ༌ ཅོ༌ཨིན༌, ཨིན༌ནའང༌ ང༌ ཁྱོ༌ཞའ༌ ཡང༌སྐྱར༌ ཐུགས༌ པ༌སང༌ ཁྱོ༌ཞ༌གུན༌ལ༌ ཐད༌པོ༌ ཡོང༌ཨིན༌། ཁྱོ༌ཞའེ༌ ཀ༌ནེ༌ ཏེ༌ གའ༌མོ༌བོ༌ སུའིང༌ ཀོགས༌ཏེ༌ ཁྱེར༌ མི༌ཉན༌།
JOH 16:23 ཏེ༌ཏུས༌ལ༌ ཁྱོ༌ཞའེ༌, ང༌ ཅའང༌ ཏྲི༌ཅེས༌སི༌ སྒོས༌དོམ༌ མི༌ཡོང༌། ངའེ༌ ཁྱོ༌ཞའ༌ དེན༌བ༌ དེན༌བ༌ ཟེར༌རད༌, ངའེ༌ མིང༌ངི༌ ནང༌ང༌ ཁྱོ༌ཞའེ༌ ངའེ༌ ཡབ༌བ༌ ཅི༌ཞིག༌ ཞུ༌ནའང༌ སལ༌ལ༌ ཛད༌ཨིན༌།
JOH 16:24 ཁྱོ༌ཞའེ༌ དག༌ས༌ ཚག༌པ༌ ངའེ༌ མིང༌ངི༌ ནང༌ང༌ ངའེ༌ ཡབ༌བ༌ ཅི༌ཞིག༌གི༌ ཕིའང༌ མ༌ཞུས༌། ཞུ༌ན༌ ཁྱོ༌ཞ༌གུན༌ལ༌ ཐོབ༌ཏེ༌ ཐད༌པོའེ༌ གང༌ཨིན༌།”
JOH 16:25 “དག༌ས༌ ངའེ༌ འི༌གུན༌ སྤེ༌ གྱུད༌ཏེ༌ ཤད༌ཏེ༌ ཨིན༌, ཏུས༌པོ༌ ལེབ༌ཨིན༌, ནམ༌ ངའེ༌ ང༌རང༌ངི༌ ཡབ༌བི༌ སྐོར༌ལ༌ ཁྱོ༌ཞ༌གུན༌ལ༌ སྤེ༌ མན༌པ༌ སལ༌པོ༌ སྤེ༌ར༌ གྱུད༌ཏེ༌ ཤད༌ཨིན༌།
JOH 16:26 ཏེ༌ ཞག༌ག༌ ཁྱོ༌ཞའེ༌ ངའེ༌ མིང༌ངི༌ ནང༌ང༌ ཞུ༌ཝ༌ ཕུལ༌ཨིན༌། ངའེ༌ ཁྱོ༌ཞ༌གུན༌ནི༌ ཚབས༌ལ༌ ཡབ༌བ༌ ཞུ༌ཝ༌ ཕུལ༌ཨིན༌ ཟེར༌ཏེ༌ མན༌,
JOH 16:27 ཅིའ༌ཟེར༌ན༌ ཁྱོ༌ཞ༌གུན༌ནི༌ ངའ༌ ཅམས༌པ༌ ཅོ༌ཅེས༌ ཡང༌ ང༌ ཡབ༌བི༌ ཆོགས༌ནེ༌ ཡོང༌ཁན༌བོའ༌ ཏད༌པ༌ ཡོད༌ཅེས༌པོའེ༌ ཡབ༌ ཁོང༌རང༌ངི༌ ཁྱོ༌ཞ༌གུན༌ལ༌ ཅམས༌པ༌ ཛད༌དུག༌།
JOH 16:28 ང༌ ཡབ༌བི༌ ཆོགས༌ནེ༌ ཇིག༌རྟེན༌ནི༌ ནང༌ང༌ ཡོངས༌ཏེ༌ ཨིན༌, ཏ༌ ང༌ ཇིག༌རྟེན༌ བོར༌ཏེ༌ ཡབ༌བི༌ སྐུན༌དུན༌ལ༌ ལོགས༌ཏེ༌ ཆའད༌།”
JOH 16:29 ཏེ༌ནེ༌ ཡེ༌ཤུའི༌ ལོབ༌ཕྲུགས༌གུན༌ནི༌ ཟེརས༌, “ཏ༌ ཉེ༌རང༌ངི༌ ང༌ཞ༌གུན༌ལ༌ སྤེ༌ གྱུད༌ཏེ༌ མ༌མོལ༌ལ༌, ཞལ༌ཏ༌ སལ༌པོ༌ སལ༌པོ༌ མོལ༌ལ༌ ཛད༌དུག༌།
JOH 16:30 ཏ༌ ང༌ཞ༌གུན༌ལ༌ ཧ༌གོ༌, ཉེ༌རང༌ངི༌ ཅི༌ཚང༌མ༌ ཁྱེན༌ན༌ནོག༌, ཉེ༌རང༌ང༌ སུ༌ཞིག༌གིའང༌ ཏྲི༌ཝ༌ ཅོ༌ཅེས༌སི༌ སྒོས༌དོམ༌ མི༌དུག༌, ཅིའ༌ཟེར༌ན༌ ང༌ཞའེ༌ ཏྲི༌ཨིན༌ སམ༌ཁན༌གུན༌ ཉེ༌རང༌ངི༌ སྔུན༌ལ༌ ཁྱེན༌ན༌ ཛད༌དུག༌། ཏེ༌བོའེ༌ ཞས༌ཏེ༌ ཉེ༌རང༌ དཀོན༌མཆོག༌གི༌ ཆོགས༌ནེ༌ སྐྱོད༌ཏེ༌ ཨིན༌ཁན༌བོའ༌ ང༌ཞའེ༌ ཏད༌པ༌ ཅོའད༌།”
JOH 16:31 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ནི༌ དེན༌བ༌ ཨིད༌ཤེས༌ ཅོའད༌ད༌?
JOH 16:32 ཨིན༌ནའང༌ ཏུས༌པོ༌ ལེབ༌ཨིན༌ ཡང༌ ལེབ༌ ཚར༌ཏེ༌ ཨིན༌ ནམ༌ ཁྱོ༌ཞའ༌ ཡན༌ཏེ༌ ང༌ ཅིག༌པོ༌ ཕངས༌ཏེ༌ རང༌རང༌ངི༌ ཁང༌པའ༌ ཤོར༌ཨིན༌། ཏེ༌ནེའང༌ ང༌ ཅིག༌པོ༌ མན༌ ཅིའ༌ཟེར༌ན༌ ངའེ༌ ཡབ༌ ང༌ ཉམ༌པོ༌ ཞུགས༌ཏེ༌ ཡོད༌།”
JOH 16:33 “ངའ༌ ཉམ༌པོ༌ བྲེལ༌ ཡོད༌ཅེས༌པོའེ༌, ཁྱོ༌ཞ༌གུན༌ལ༌ ཞི༌དེ༌ ཐོབ༌ཅེས༌ལ༌ ངའེ༌ འི༌ སྤེ༌ར༌གུན༌ ཟེར༌ཏེ༌ ཨིན༌། འི༌ ཇིག༌རྟེན༌ནི༌ ནང༌ང༌ ཁྱོ༌ཞ༌གུན༌ལ༌ རྡུག༌ངལ༌ ཐོང༌ཨིན༌, ཨིན༌ནའང༌ སྤོས༌པ༌ བོར༌ཤིག༌, ཇིག༌རྟེན༌ནི༌ ཝང༌སྲུལ༌པ༌གུན༌ནི༌ཀ༌ ངའ༌ གྱལ༌ ཐོབ༌ཏེ༌ ཨིན༌།”
JOH 17:1 ཏེ༌གུན༌ མོལ༌ ཚར༌ར༌ཅིག༌, གཙོ༌བོ༌ ཡེ༌ཤུའི༌ ནམ༌ཁའ༌ ཟིགས༌ཏེ༌ མོས༌ལམ༌ ཞུས༌, “ཀྱེ༌ ཡབ༌ལེ༌, ཏ༌ ཏུས༌ ལེབ༌ཚར༌, ཉེ༌རང༌ངི༌ སྲས༌སི༌ ཉེ༌རང༌ང༌ སྤལ༌ ཏང༌ཅེས༌སི༌ ཕིའ༌ ཉེ༌རང༌ངི༌ སྲས༌ལ༌ སྤལ༌ སལ༌ལ༌ ཛད༌།
JOH 17:2 ངའ༌ སལ༌ལ༌ ཛད༌ཁན༌ ཚང༌མའ༌ ཐའ༌མེད༌པའེ༌ མི༌ཚེ༌ ཏང༌ཅེས༌ལ༌ ཉེ༌རང༌ངི༌ ངའ༌ མི༌ཚང༌མའེ༌ཀ༌ ཝང༌ཆ༌ སལ༌ཏེ༌ ཨིན༌།
JOH 17:3 ཐའ༌མེད༌པའེ༌ མི༌ཚེ༌ ནི༌, ཉེ༌རང༌ དེན༌བའེ༌ དཀོན༌མཆོག༌ ཅིག༌པོ༌ དང༌ ཉེ༌རང༌ངི༌ ཀལ༌ལ༌ ཛད༌ཁན༌ནི༌ ཡེ༌ཤུ༌ མ༌ཤི༌ཀའ༌ ཤེ༌ཤེས༌པོ༌ ཨིན༌ནོག༌།
JOH 17:4 ཉེ༌རང༌ངི༌ ང༌ སྟད༌ད༌ ཛད༌ཁན༌ནི༌ ལས༌གུན༌ གྲུབ༌ཅུགས༌ཏེ༌, ཇིག༌རྟེན༌ནི༌ཀ༌ ངའེ༌ ཉེ༌རང༌ང༌ སྤལ༌ ཁྱོངས༌ཏེ༌ ཨིན༌།
JOH 17:5 ཏ༌ ཀྱེ༌ ཡབ༌ལེ༌, ང༌ ཉེ༌རང༌ངི༌ སྐུན༌དུན༌ལ༌ སྤལ༌ སལ༌ལ༌ ཛད༌, ཀ༌སྤལ༌བོ༌ ངའ༌ ཇིག༌རྟེན༌ ཆགས༌སི༌ སང༌ སྔུན༌ལ༌ ཉེ༌རང༌ ཉམ༌པོ༌ ཡོད༌པིན༌།”
JOH 17:6 གཙོ༌བོ༌ ཡེ༌ཤུའི༌ ཏ༌རུང༌ངའང༌ མོས༌ལམ༌ ཞུ༌ཨིན༌ མོལས༌, “ཇིག༌རྟེན༌པ༌གུན༌ནི༌ ཕྲོ༌ནེ༌ ཉེ༌རང༌ངི༌ ལྡམ༌མ༌ ཛད༌ཏེ༌ ང༌ སལ༌ཁན༌གུན༌ལ༌ ངའེ༌ ཉེ༌རང༌ སྔོན༌ཅུགས༌པིན༌། ཁོང༌གུན༌ ཉེ༌རང༌ངི༌ ཨིན༌པིན༌; ཉེ༌རང༌ངི༌ ཁོང༌གུན༌ ང༌ སལ༌ཏེ༌ ཨིན༌, ཡང༌ ཁོང༌གུན༌ནི༌ ཉེ༌རང༌ངི༌ བཀའ༌ ཁའ༌ཉན༌ཏེ༌ ཨིན༌ནོག༌།
JOH 17:7 ཏ༌ ཉེ༌རང༌ངི༌ ངའ༌ སལ༌ཁན༌ ཚང༌མ༌ ཉེ༌རང༌ངི༌ ཆོགས༌ནེ༌ ཨིན༌ཁན༌བོ༌ ཁོང༌གུན༌ལ༌ ཧ༌གོ༌ཏེ༌ ཨིན༌ནོག༌།
JOH 17:8 ཅིའ༌ཟེར༌ན༌ ཉེ༌རང༌ངི༌ ང༌ སལ༌ཁན༌ནི༌ བཀའ༌གུན༌ ངའེ༌ ཁོང༌གུན༌ལ༌ ཏངས༌པིན༌། ཁོང༌གུན༌ནི༌ ཐད༌པོ༌ ཉམ༌པོ༌ ལེན༌ཏེ༌ ང༌ ཉེ༌རང༌ངི༌ ཆོགས༌ནེ༌ ཡོངས༌ཏེ༌ ཨིན༌ཁན༌བོ༌ ཁོང༌གུན༌ལ༌ ཏན༌ཏན༌ ཧ༌གོ༌, ཡང༌ ཁོང༌གུན༌ནི༌ ང༌ ཉེ༌རང༌ངི༌ ཀལ༌ལ༌ ཛད༌ཁན༌བོའ༌ ཨིད༌ཤེས༌།”
JOH 17:9 “ངའེ༌ ཁོང༌གུན༌ནི༌ ཕིའ༌ མོས༌ལམ༌ ཞུའད༌, ངའེ༌ ཇིག༌རྟེན༌པ༌གུན༌ མན༌པ༌ ཉེ༌རང༌ངི༌ ང༌ སལ༌ལ༌ ཛད༌ཁན༌གུན༌ནི༌ ཕིའ༌ མོས༌ལམ༌ ཞུའད༌, ཅིའ༌ཟེར༌ན༌ ཁོང༌གུན༌ ཉེ༌རང༌ངི༌ ཨིན༌ནོག༌།
JOH 17:10 ངའེ༌ ཨིན༌ཁན༌ ཚང༌མ༌ ཉེ༌རང༌ངི༌ ཨིན༌ ཡང༌ ཉེ༌རང༌ངི༌ ཨིན༌ཁན༌གུན༌ ངའེ༌ ཨིན༌། ངའ༌ ཁོང༌གུན༌ གྱུད༌ཏེ༌ སྤལ༌ ཐོབས༌ཏེ༌ ཨིན༌།
JOH 17:11 ང༌ འི༌ ཇིག༌རྟེན༌ནི༌ ནང༌ང༌ མང༌པོ༌ཞིག༌ མི༌ལུས༌, ཁོང༌གུན༌ ཏ༌རུང༌ ཇིག༌རྟེན༌ནི༌ ནང༌ང༌ ལུས༌ཨིན༌, ང༌ ཉེ༌རང༌ངི༌ཀ༌ ཡོང༌ངད༌། ཀྱེ༌ ཡབ༌ ཏམ༌པ༌ལེ༌, ཀ༌ཟུག༌ ང༌དང༌ ཉིས༌ཀོ༌ ཅིག༌ ཨིན༌ ཏེན༌ན༌ ཙོགས༌ལ༌ ཁོང༌གུན༌ནའང༌ ཅིག༌གྲིལ༌ ལུས༌ཤེས༌སི༌ ཕིའ༌ ཉེ༌རང༌ངི༌ ངའ༌ སལ༌ལ༌ ཛད༌ཁན༌ནི༌ ཝང༌ཆའེ༌ ནང༌ང༌ ཁོང༌གུན༌ སྐྱོབས༌ཏེ༌ བོར༌ར༌ ཛད༌།
JOH 17:12 ང༌ ཁོང༌གུན༌ ཉམ༌པོ༌ ཡོད༌ ཟ༌ནེ༌, ངའེ༌ ཁོང༌གུན༌ ཉེ༌རང༌ངི༌ སལ༌ལ༌ ཛད༌ཁན༌ནི༌ ཝང༌ཆ༌ གྱུད༌ཏེ༌ སྐྱོབས༌ཏེ༌ བོར༌པིན༌། ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌བོ༌ གྲུབ༌ཅེས༌ལ༌, ཁོང༌གུན༌ནི༌ ཕྲོ༌ནེ༌ ཉལ༌ཝའེ༌ ནང༌ང༌ ལེབ༌ཅེས༌ སྐལ༌ཏེ༌ ཡོད༌ཁན༌ ཅིག༌ཅིག༌ མ༌སྟོགས༌, སུ༌ཞིག༌གའང༌ མ༌སྟོར༌།”
JOH 17:13 “ང༌ ཉེ༌རང༌ངི༌ཀ༌ ཡོང༌ངད༌, ཨིན༌ནའང༌ ང༌ འི༌ ཇིག༌རྟེན༌ནི༌ ནང༌ང༌ ཡོད༌ ཟ༌ནེ༌ ཁོང༌གུན༌ལ༌ ངའེ༌ ཐད༌པོ༌ གང༌པོ༌ ཐོབ༌ཅེས༌སི༌ ཕིའ༌, ངའེ༌ འི༌གུན༌ ཟེར༌པིན༌།
JOH 17:14 ངའེ༌ ཁོང༌གུན༌ལ༌ ཉེ༌རང༌ངི༌ བཀའ༌ ཏངས༌པིན༌, ཡང༌ ཇིག༌རྟེན༌པ༌གུན༌ནི༌ ཁོང༌གུན༌ལ༌ ནཕ༌རད༌ ཅོས༌, ཅིའ༌ཟེར༌ན༌ ང༌ ཇིག༌རྟེན༌ནེ༌ མན༌ཁན༌ ཙོགས༌ལ༌ ངའེ༌ ལོབ༌ཕྲུགས༌གུན༌ནའང༌ ཇིག༌རྟེན༌ནེ༌ མན༌།
JOH 17:15 ངའེ༌ མོས༌ལམ༌ ཞུ༌ཅེས༌པོ༌ ནི༌, ཉེ༌རང༌ང༌ ཁོང༌གུན༌ འི༌ ཇིག༌རྟེན༌ནེ༌ ཁྱེར༌ཅེས༌སི༌ ཕིའ༌ མན༌པ༌, ཁོང༌གུན༌ ཤེ༌ཏན༌ནེ༌ སྐྱོབས༌ཏེ༌ བོར༌ར༌ ཛད༌ཅེས༌སི༌ ཕིའ༌ ཨིན༌།
JOH 17:16 ང༌ ཇིག༌རྟེན༌ནེ༌ མན༌ཁན༌ ཙོགས༌ལ༌ ངའེ༌ ལོབ༌ཕྲུགས༌གུན༌ནའང༌ ཇིག༌རྟེན༌ནེ༌ མན༌།
JOH 17:17 ཉེ༌རང༌ངི༌ བཀའ༌ དེན༌བ༌ ཨིན༌ནོག༌ ཏེན༌ན༌ དེན༌བ༌བོ༌ ཉམ༌པོ༌ ཁོང༌གུན༌ རྩང༌མ༌ ཅོའ༌ ཛད༌།
JOH 17:18 ཉེ༌རང༌ངི༌ ང༌ འི༌ ཇིག༌རྟེན༌ནི༌ ནང༌ང༌ ཀལ༌ལ༌ ཛད༌ཁན༌ ཙོགས༌ལ༌ ངེའང༌ ཁོང༌གུན༌ ཇིག༌རྟེན༌ནི༌ ནང༌ང༌ ཀལ༌ལད༌།
JOH 17:19 ཉེ༌རང༌ངི༌ དེན༌བ༌ ཉམ༌པོ༌ ཁོང༌གུན༌ ཏམ༌པ༌ ཅོ༌ཅེས༌སི༌ ཕིའ༌ ངའེ༌ ང༌རང༌ ཁོང༌གུན༌ནི༌ ཏོན༌ལ༌ ཏམ༌པ༌ ཆོད༌པའེ༌ ཚུལ༌ལ༌ ཕུལ༌ལད༌།”
JOH 17:20 “ངའེ༌ མོས༌ལམ༌ ཁོང༌གུན༌ ཅིག༌པོ༌ མན༌པ༌, ཁོང༌གུན༌ནི༌ ལོན༌ གྱུད༌ཏེ༌ ངའེ༌ཀ༌ ཏད༌པ༌ ཁྱོང༌ཅེས༌ཅན༌གུན༌ནི༌ ཕིའང༌ ཨིན༌།
JOH 17:21 ངའེ༌ ཁོང༌ ཚང༌མ༌ ཅིག༌ གྱུར༌ཅེས༌སི༌ ཕིའ༌ མོས༌ལམ༌ ཕུལ༌ལད༌། ཀྱེ༌ ཡབ༌, ཀ༌ཟུག༌ ང༌ ཉེ༌རང༌ངི༌ ནང༌ང༌ ཡང༌ ཉེ༌རང༌ ངའེ༌ ནང༌ང༌ ཞུགས༌ཏེ༌ ཨིན༌, ཉེ༌རང༌ངི༌ ང༌ ཀལ༌ལ༌ ཛད༌ཁན༌བོའེ༌ཀ༌ ཇིག༌རྟེན༌པ༌གུན༌ནི༌ ཏད༌པ༌ ཁྱོང༌ཅེས༌སི༌ ཕིའ༌, ཁོང༌གུན༌ནའང༌ ང༌དང༌ ཉིས༌ཀོའེ༌ ནང༌ང༌ དུག༌ ཅུག༌ག༌ ཛད༌།”
JOH 17:22 “ང༌དང༌ ཉིས༌ཀོ༌ ཅིག༌ ཨིན༌ན༌ ཙོགས༌ལ༌ ཁོང༌གུན༌ ཅིག༌ གྱུར༌ཅེས༌སི༌ ཕིའ༌ ངའེ༌ ཉེ༌རང༌ངི༌ ངའ༌ སལ༌ཁན༌ནི༌ སྤལ༌བོ༌ ཁོང༌གུན༌ལ༌ ཏངས༌པིན༌།
JOH 17:23 ང༌ ཁོང༌གུན༌ནི༌ ནང༌ང༌ ཡང༌ ཉེ༌རང༌ ངའེ༌ ནང༌ང༌ ཡོད༌། ཉེ༌རང༌ངི༌ ང༌ ཀལ༌ལ༌ ཛད༌ཁན༌ དང༌ ཉེ༌རང༌ངི༌ ངའ༌ ཅམས༌པ༌ ཛད༌ཁན༌ ཙོགས༌ ཏད༌པ༌ཅན༌གུན༌ལའང༌ ཅམས༌པ༌ ཛད༌ཅེས༌, ཇིག༌རྟེན༌པ༌གུན༌ལ༌ ཧ༌གོ༌ཅེས༌སི༌ ཕིའ༌ ཁོང༌གུན༌ ཅི༌ས༌ཐོག༌ནེ༌ ཅིག༌གྲིལ༌ གྱུར༌ ཅུག༌ག༌ ཛད༌།
JOH 17:24 ཀྱེ༌ ཡབ༌ལེ༌, ཉེ༌རང༌ངི༌ ང༌ སལ༌ཁན༌གུན༌ ང༌ ཆ༌སའེ༌ ནས༌ས༌ ངའ༌ ཉམ༌པོ༌ ཡོང༌ ཅུག༌ག༌ ཛད༌ཅེས༌ལ༌ ངའེ༌ དོད༌པ༌ ཅོའད༌། ཏེ༌ནེ༌ ཁོང༌གུན༌ནི༌ ཉེ༌རང༌ངི༌ ང༌ སལ༌ལ༌ ཛད༌ཁན༌ནི༌ སྤལ༌བོ༌ ཐོང༌ ཐུབ༌ཨིན༌, ཅིའ༌ཞུ༌ན༌ ཉེ༌རང༌ངི༌ ཇིག༌རྟེན༌ ཆགས༌སི༌ སང༌ སྔུན༌ལ༌ ང༌ ཅམས༌པ༌ ཛད༌དད༌པིན༌།”
JOH 17:25 “ཀྲང༌པོ༌ ཡབ༌ལེ༌, ཇིག༌རྟེན༌པ༌གུན༌ནི༌ ཉེ༌རང༌ མ༌ཤེས༌ནའང༌, ངའེ༌ ཉེ༌རང༌ ཤེས༌སད༌, ཡང༌ ངའེ༌ ལོབ༌ཕྲུགས༌གུན༌ནི༌ ཉེ༌རང༌ངི༌ ང༌ ཀལ༌ལ༌ ཛད༌ཁན༌བོ༌ ཤེས༌ས༌ནོག༌།
JOH 17:26 ངའེ༌ ཁོང༌གུན༌ལ༌ ཉེ༌རང༌ སྔོན༌ཅུགས༌པིན༌, ཏ༌རུང༌ངའང༌ སྔོན༌ཅུག༌ཨིན༌ ཨིན༌། ཏེ༌ནེ༌ ཉེ༌རང༌ངི༌ ངའེ༌ ཕིའ༌ ཅམས༌པ༌ ཡོད༌ཁན༌བོ༌ ཁོང༌གུན༌ནི༌ ནང༌ང༌ ཡང༌ ངའང༌ ཁོང༌གུན༌ནི༌ ནང༌ང༌ ལུས༌ཨིན༌།”
JOH 18:1 མོས༌ལམ༌ ཞུ༌ ཚར༌ར༌ཅིག༌, གཙོ༌བོ༌ ཡེ༌ཤུ༌, ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཏེ༌ ནས༌ས༌ནེ༌ བིང༌ཏེ༌ ཀིད༌རོན༌ནི༌ ལུང༌པའེ༌ འ༌ངོ༌ ཆོགས༌ལ༌ ཡོད༌ཁན༌ནི༌ ཨོ༌ལིཝ༌ཝི༌ ཚས༌སི༌ ནང༌ང༌ སྐྱོདས༌།
JOH 18:2 ཁོང༌ང༌ ངོ༌ལོག༌ ཅོ༌ཁན༌ནི༌ ཡུ༌དཱ༌ ཏེ༌ ནས༌ས༌བོ༌ གྱུས༌ཡོད༌པིན༌, ཅིའ༌ཟེར༌ན༌ ཡེ༌ཤུ༌ ལན༌ མང༌པོ༌ ཁོང༌རང༌ངི༌ ལོབ༌ཕྲུགས༌གུན༌ ཉམ༌པོ༌ ཏེ༌རུ༌ སྐྱོད༌ད༌ ཛད༌དད༌པིན༌།
JOH 18:3 ཏེ༌ནེ༌ ཡུ༌དཱ༌ ཕ༌རུ༌ཤི༌པ༌གུན༌ དང༌ བླ༌མ༌ འུ༌སྐྱོང༌གུན༌ནི༌ ཀལ༌ཁན༌ནི༌ རོམ༌པའེ༌ མག༌མི༌ སྡེ༌ཞིག༌ དང༌ ཆོད༌ཁང༌ སྲུང༌ཁན༌ གུན༌ ཁྲིད༌ཏེ༌ ཚས༌སི༌ ནང༌ང༌ ལེབ༌། ཁོང༌གུན༌ནི༌ པམ༌བར༌, ལལ༌ཀྲེན༌ དང༌ ཚོན༌ཆ༌ ཁུར༌ཏེ༌ ཡོད༌པིན༌།
JOH 18:4 ཡེ༌ཤུའ༌ ཁོང༌ངི༌ཀ༌ ཇུང༌ཅེས༌ ཚང༌མ༌ གྱལ༌ལ༌ ཅོས༌ཏེ༌ ཁྱེན༌ནད༌པིན༌, ཏེན༌ན༌བོའེ༌ཕིའ༌ ཁོང༌ ཕི༌ལོག༌ག༌ སྐྱོད༌ཏེ༌ ཁོང༌གུན༌ལ༌ ཏྲིའ༌ ཛདས༌, “ཁྱོ༌ཞའེ༌ སུ༌ ཙལ༌ལད༌?”
JOH 18:5 ཁོང༌གུན༌ནི༌ ལན༌ཏངས༌, “ན༌ཙ༌རེད༌པ༌ ཡེ༌ཤུ༌།” ཡེ༌ཤུའི༌ ཁོང༌གུན༌ལ༌ མོལས༌, “ང༌ ཨིན༌།” ༼ཁོང༌ང༌ ངོ༌ལོག༌ ཅོ༌ཁན༌ནི༌ ཡུ༌དཱའང༌ ཁོང༌གུན༌ ཉམ༌པོ༌ ཡོད༌པིན༌༽
JOH 18:6 ཡེ༌ཤུའི༌, “ང༌ ཨིན༌” མོལ༌ལ༌ཅིག༌, ཁོང༌གུན༌ གྱབ༌ལོག༌ག༌ སོང༌ ཡང༌ སའེ༌ཀ༌ གྱེལ༌།
JOH 18:7 ཡེ༌ཤུའི༌ ཡང༌ ལྡབས༌ཏེ༌ མོལས༌, “ཁྱོ༌ཞའེ༌ སུ༌ ཙལ༌ལད༌?” ཁོང༌གུན༌ནི༌ ཟེརས༌, “ན༌ཙ༌རེད༌པ༌ ཡེ༌ཤུ༌།”
JOH 18:8 ཡེ༌ཤུའི༌ མོལས༌, “ངའེ༌ ཁྱོ༌ཞའ༌ ཟེར༌པིན༌ ‘ཁོ༌ ང༌ ཨིན༌’, ཀལ༌ཏེས༌ ཁྱོ༌ཞའེ༌ ང༌ ཙལ༌ལད༌ན༌ ངའེ༌ ལོབ༌ཕྲུགས༌གུན༌ ཆ༌ཅུག༌།”
JOH 18:9 ཏེ༌བོ༌ ནི༌ ཁོང༌ངི༌ “ཉེ༌རང༌ངི༌ ང༌ སལ༌ཁན༌ནི༌ ཕྲོ༌ནེ༌ ཅིག༌གའང༌ མ༌སྟོར༌” མོལ༌ཁན༌བོ༌ དྲན༌དྲ༌ གྲུབ༌ཅེས༌པོ༌ ཨིན༌པིན༌།
JOH 18:10 ཤི༌མོན༌ པི༌ཏྲར༌རི༌ ཁོའེ༌ ལག༌ག༌ ཡོད༌ཁན༌ནི༌ ར༌འི༌ ཕིངས༌ཏེ༌ བླ༌མ༌ ཆེན༌མོའེ༌ ཡོག༌པོའ༌ གྱབས༌ཏེ༌ ཁོའེ༌ ནམ༌ཅོག༌ ཡས༌པ༌ ཅད༌ཏངས༌ ༼ཏེ༌ ཡོག༌པོའེ༌ མིང༌བོ༌ མལ༌ཁུས༌ ཨིན༌པིན༌།༽
JOH 18:11 ཡེ༌ཤུའི༌ པི༌ཏྲར༌ལ༌ བཀའ༌ སལ༌ཏེ༌ མོལས༌, “ར༌འི༌བོ༌ ཤུབས༌སི༌ ནང༌ང༌ གྱོང༌། ཅི༌ ཡབ༌བི༌ ངའ༌ སལ༌ཁན༌ནི༌ རྡུག༌ངལ༌ལི༌ དོན༌སྐྱོག༌པོ༌ ངའེ༌ མི༌ཐུང༌ང༌?”
JOH 18:12 ཏེ༌ནེ༌ རོམ༌པའེ༌ མག༌མི༌, ཁོང༌གུན༌ནི༌ མག༌སྤོན༌ དང༌ ཆོད༌ཁང༌ སྲུང༌ཁན༌གུན༌ནི༌ གཙོ༌བོ༌ ཡེ༌ཤུ༌ ཟུམས༌ ཡང༌ ཁོང༌ངི༌ ཆག༌ ལྡམས༌ཏེ༌
JOH 18:13 ཨན༌ནཱས༌ ཡོད༌ས༌ ཁྱེརས༌, ཁོ༌ ཀ༌ཡ༌ཕཱས༌སི༌ ན༌མའེ༌ ཨ༌བ༌ ཨིན༌པིན༌, ཡང༌ ཀ༌ཡ༌ཕཱས༌ ཏེ༌ ལོའེ༌ བླ༌མ༌ ཆེན༌མོ༌ ཨིན༌པིན༌།
JOH 18:14 ༼འིན༌ན༌ ཀ༌ཡ༌ཕཱས༌སི༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཁ༌དའ༌ ཏངས༌ཏེ༌ “མི༌གུན༌ནི༌ ཏོན༌ལ༌ མི༌ ཅིག༌ ཤི༌ན༌ གྱལ༌” ཟེར༌ཏེ༌ ཨིན༌པིན༌།༽
JOH 18:15 ཤི༌མོན༌ པི༌ཏྲར༌ དང༌ ཞན༌ ལོབ༌ཕྲུགས༌ ཅིག༌ ཡེ༌ཤུའི༌ གྱབ༌གྱབ༌ནེ༌ སོང༌, ཞན༌ ལོབ༌ཕྲུགས༌པོ༌ བླ༌མ༌ ཆེན༌མོའེ༌ ངོ༌ཤེས༌ཁན༌ ཨིན༌པ༌ ཁོ༌ གཙོ༌བོ༌ ཡེ༌ཤུ༌ ཉམ༌པོ༌ བླ༌མ༌ ཆེན༌མོའེ༌ ཕོ༌གྲང༌ངི༌ གྱང༌སྐོར༌རི༌ ནང༌ང༌ ཡོང༌ཅུགས༌།
JOH 18:16 ཨིན༌ནའང༌ པི༌ཏྲར༌ གྱས༌སྒོའེ༌ ཕི༌ལོག༌ག༌ ལུས༌། བླ༌མ༌ ཆེན༌མོའེ༌ ངོ༌ཤེས༌ཁན༌ནི༌ ལོབ༌ཕྲུགས༌པོ༌ ལོགས༌ཏེ༌ ཡོངས༌ ཡང༌ སྒོ༌ སྲུང༌མ༌བོའ༌ སྤེ༌ར༌ ཏངས༌ཏེ༌ པི༌ཏྲར༌ ནང༌ཀུག༌ག༌ ཁྲིད༌ཏེ༌ ཁྱེརས༌།
JOH 18:17 ཏེ༌ སྒོ༌ སྲུང༌ཁན༌ནི༌ བུ༌མོ༌བོའེ༌ པི༌ཏྲར༌ལ༌ ཏྲིས༌, “ཁྱོ༌རང༌ངའང༌ ཁོང༌ངི༌ ལོབ༌ཕྲུགས༌ ཅིག༌ མན༌ན༌?” པི༌ཏྲར༌རི༌ ཟེརས༌, “ང༌ མན༌།”
JOH 18:18 གྲང༌མོ༌ ཡོད༌ཅེས༌པོའེ༌, ཏེ༌རུ༌ ཡོད༌ཁན༌ནི༌ ཡོག༌པོ༌གུན༌ དང༌ སྲུང༌ཁན༌གུན༌ནི༌ མེ༌ ཏངས༌ཏེ༌ ཚང༌མ༌ ཀྱིར༌ཁོར༌ཏེ༌ མེའ༌ སྲོའད༌པིན༌, ཁོང༌གུན༌ནི༌ ཕྲོའ༌ པི༌ཏྲར༌རིའང༌ མེ༌ སྲོའད༌པིན༌།
JOH 18:19 ཏེ༌ ཟ༌ནེ༌ བླ༌མ༌ ཆེན༌མོའེ༌, གཙོ༌བོ༌ ཡེ༌ཤུའ༌ ཁོང༌ངི༌ ལོབ༌ཕྲུགས༌ དང༌ ལབ༌ཞ༌ གུན༌ནི༌ སྐོར༌ལ༌ ཏྲིས༌།
JOH 18:20 ཡེ༌ཤུའི༌ ལན༌སལས༌, “ངའེ༌ སྦ༌ མ༌སྦའ༌ མི༌ཚང༌མའེ༌ དུན༌ལ༌ ཤད༌པིན༌, ངའེ༌ ཡ༌ཧུ༌དཱ༌པ༌ ཚང༌མ༌ ཛོམས༌སེ༌ དུ༌ཁང༌གུན༌ དང༌ ཆོད༌ཁང༌ངི༌ ནང༌ང༌ ཏུས༌གྱུན༌ ལབ༌ཞ༌ ཏང༌ངད༌པིན༌། ངའེ༌ སང༌ཝའེ༌ ནང༌ང༌ ཅི༌ཞིག༌གའང༌ མ༌ཟེར༌པིན༌།
JOH 18:21 ཉེ༌རང༌ངི༌ ང༌ ཅིའ༌ ཏྲིའད༌། ངའེ༌ ལབ༌ཞ༌ ཚོར༌ཁན༌གུན༌ལ༌ ཏྲིས༌, ངའེ༌ ཟེར༌ཁན༌གུན༌ ཁོང༌གུན༌ལ༌ ཏན༌ཏན༌ གྱུས༌ཨིན༌ནོག༌།”
JOH 18:22 ཡེ༌ཤུའི༌ ཏེ༌བོ༌ མོལ༌ལ༌ཅིག༌, ཆོད༌ཁང༌ སྲུང༌ཁན༌གུན༌ནི༌ ཕྲོ༌ནེ༌ ཡེ༌ཤུའི༌ དུན༌ལ༌ དུགས༌ཏེ༌ ཡོད༌ཁན༌ ཅིག༌གི༌ ཁོང༌ང༌ གྲམ༌ལྕགས༌ ཏངས༌ཏེ༌ ཟེརས༌, “བླ༌མ༌ ཆེན༌མོའ༌ འི༌ཙོགས༌ལ༌ ལན༌ཏང༌ང༌ནོག༌ག༌?”
JOH 18:23 ཡེ༌ཤུའི༌ ཁོའ༌ མོལས༌, “ཀལ༌ཏེས༌ ངའེ༌ རྩོག༌པོ༌ཞིག༌ ཟེར༌ཏེ༌ ཨིན༌ན༌ ཏེ༌བོ༌ སྟན༌ཏེ༌ ཏོང༌། ཨིན༌ནའང༌ དེན༌བ༌ ཟེར༌ཏེ༌ ཨིན༌ན༌ ཏོན༌མེད༌ལ༌ ང༌ ཅིའ༌ རྡུང༌ངད༌?”
JOH 18:24 ཏེ༌ནེ༌ ཨན༌ནཱས༌སི༌ ཆག༌ དམ༌དམས༌པོའེ༌ཀ༌ ཡེ༌ཤུ༌ བླ༌མ༌ ཆེན༌མོ༌ ཀ༌ཡ༌ཕཱས༌སི༌ཀ༌ ཀལས༌།
JOH 18:25 ཤི༌མོན༌ པི༌ཏྲར༌ མེའ༌ སྲོ༌ཨིན༌ ཡོད༌ ཟ༌ནེ༌ ཅིག༌ཅིག༌གི༌ ཁོང༌ང༌ ཏྲིས༌, “ཁྱོ༌རང༌ངའང༌ ཁོང༌ངི༌ ལོབ༌ཕྲུགས༌གུན༌ནི༌ ཕྲོ༌ནེ༌ ཅིག༌ མན༌ན༌?” པི༌ཏྲར༌རི༌ ཟུན༌ ཏངས༌ཏེ༌ ཟེརས༌, “ང༌ མན༌།”
JOH 18:26 བླ༌མ༌ ཆེན༌མོའེ༌ ཡོག༌པོ༌གུན༌ནི༌ ཕྲོ༌ནེ༌ ཅིག༌ པི༌ཏྲར༌རི༌ ར༌འི༌ ཉམ༌པོ༌ ནམ༌ཅོག༌ ཅད༌ཁན༌ནི༌ མི༌བོའེ༌ ཉེན༌ ཨིན༌པིན༌, ཁོའེ༌ པི༌ཏྲར༌ལ༌ ཟེརས༌, “ངའེ༌ ཁྱོ༌རང༌ ཁོ༌ ཉམ༌པོ༌ ཚས༌སི༌ ནང༌ང༌ ཐོང༌ཏེ༌ མན༌པིན༌ན༌?”
JOH 18:27 པི༌ཏྲར༌རི༌ ཡང༌ ལན༌ཅིག༌ མི༌ཤེས༌ཟུན༌ ཏངས༌, ཏེན༌ན༌མལ༌ལ༌ ཅ༌པོའེ༌ ཅ༌སྐད༌ ཏངས༌།
JOH 18:28 ཏེ༌ནེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ང༌མོ༌ ཟང༌ཟིང༌ནེ༌ གཙོ༌བོ༌ ཡེ༌ཤུ༌ ཀ༌ཡ༌ཕཱས༌སི༌ ཀ༌ནེ༌ རོམ༌པའེ༌ ཀའ༌ལོན༌ནི༌ ཁར༌ལ༌ ཁྱེརས༌། ཁོང༌གུན༌ ཚི༌ཏུ༌ སོང༌ཏེ༌ པེ༌སག༌གི༌ དོན༌ཏང༌ ཟའ༌མི༌ཉན༌ སམ༌ཏེ༌ ཇིགས༌པ༌ ཁར༌རི༌ ནང༌ཀུག༌ག༌ མ༌སོང༌།
JOH 18:29 ཏེ༌བོའེ༌ཕིའ༌ པི༌ལ༌ཏུ༌ ཁོང༌གུན༌ནི༌ དུན༌ལ༌ ཕི༌ལོག༌ག༌ བིངས༌ཏེ༌ ཡོངས༌ ཡང༌ ཟེརས༌, “འི༌ མི༌བོའེ༌ཀ༌ ཁྱོ༌ཞ༌གུན༌ནི༌ ཅི༌ ཉད༌ཀལ༌ལད༌?”
JOH 18:30 ཁོང༌གུན༌ནི༌ ཟེརས༌, “ཀལ༌ཏེས༌ ཁོ༌ ཁྲིམས༌ཅག༌ཁན༌ཞིག༌ མན༌པིན༌ན༌ ང༌ཞའེ༌ ཁོ༌ ཉེ༌རང༌ངི༌ ལག༌ག༌ སྟད༌ཏེ༌ མེད༌གྲོ༌།”
JOH 18:31 པི༌ལ༌ཏུའི༌ ཟེརས༌, “ཁྱོ༌ཞའེ༌ ཁྱེར༌ཏེ༌ ཁྱོ༌ཞ༌རང༌ངི༌ བཀའ༌ཁྲིམས༌ ནང༌ཞིན༌ལ༌ ཁོའེ༌ཀ༌ ཁྲིམས༌ཅོད༌།” ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཟེརས༌, “ང༌ཞའ༌ སུ༌ཞིག༌གའང༌ སད༌ཅེས༌སི༌ ཝང༌ མེད༌།”
JOH 18:32 ༼ཡེ༌ཤུའི༌ ཁོང༌ ཀ༌ལུགས༌ལ༌ ཀྲོང༌གོས༌ཨིན༌ མོལ༌ཁན༌བོ༌ དྲན༌དྲ༌ གྲུབ༌ཅེས༌ལ༌ ཏེ༌གུན༌ ཇུང༌།༽
JOH 18:33 ཏེ༌ནེ༌ པི༌ལ༌ཏུ༌ ཁར༌རི༌ ནང༌ཀུག༌ག༌ སོང༌ ཡང༌ ཡེ༌ཤུ༌ བོད༌ཏེ༌ ཁྱོང༌ཅུགས༌ཏེ༌ ཏྲིས༌, “ཅི༌ ཁྱོ༌རང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ན༌?”
JOH 18:34 ཡེ༌ཤུའི༌ ལན༌སལས༌, “འི༌ ཏྲི༌ཝ༌བོ༌ ཉེ༌རང༌ རང༌ངི༌ ཏྲིས༌ཏེ༌ ཨིན༌ན༌ ཡ༌ ཞན༌མ༌གུན༌ནི༌ ངའེ༌ སྐོར༌ལ༌ ཤད༌ད༌རག༌?”
JOH 18:35 པི༌ལ༌ཏུའི༌ ཟེརས༌, “ཅི༌ ང༌ ཡ༌ཧུ༌དཱ༌པ༌ ཨིན༌ནོག༌ག༌? ཁྱོ༌རང༌ རང༌ངི༌ མི༌གུན༌ དང༌ བླ༌མ༌ འུ༌སྐྱོང༌གུན༌ནི༌ ཁྱོ༌རང༌ ངའེ༌ ལག༌ག༌ སྟདས༌། ཁྱོ༌རང༌ངི༌ ཅི༌ ཅོས༌པིན༌?”
JOH 18:36 ཡེ༌ཤུའི༌ ལན༌སལས༌, “ངའེ༌ གྱལ༌སྲིད༌པོ༌ ནི༌, འི༌ ཇིག༌རྟེན༌ནི༌ གྱལ༌སྲིད༌ཞིག༌ མན༌། ཀལ༌ཏེས༌ ཨིན༌པིན༌ན༌ ཏེ༌ནེ༌ ངའེ༌ ཡོག༌པོ༌གུན༌ནི༌ མག༌ ཏངས༌ཏེ༌ ང༌ ཡ༌ཧུ༌དཱ༌པ༌གུན༌ནི༌ ལག༌ག༌ སྟད༌ཅུགས༌ཏེ༌ མེད༌གྲོ༌, ཨིན༌ནའང༌ ངའེ༌ གྱལ༌སྲིད༌པོ༌ ནི༌ འི༌ ཇིག༌རྟེན༌ནེ༌ མན༌།”
JOH 18:37 པི༌ལ༌ཏུའི༌ ཟེརས༌, “ཏེ༌ནེ༌ ཁྱོ༌རང༌ གྱལ༌པོ༌ཞིག༌ ཨིན༌རག༌?” ཡེ༌ཤུའི༌ ཁོའ༌ མོལས༌, “ཉེ༌རང༌ངི༌ ཟེར༌ཁན༌བོ༌ ཀྲང༌པོ༌ ཨིན༌ནོག༌, ང༌ གྱལ༌པོ༌ ཨིན༌། དེན༌བ༌, ང༌ ཏེ༌བོའེ༌ཕིའ༌ སྐྱེས༌ཏེ༌ ཨིན༌ ཡང༌ དཀོན༌མཆོག༌གི༌ དེན༌བའེ༌ ལམ༌མི༌ སྤང༌པོ༌ ཏང༌ཅེས༌སི༌ ཕིའ༌ འི༌ ཇིག༌རྟེན༌ནི༌ ནང༌ང༌ ཡོངས༌ཏེ༌ ཨིན༌། དེན༌བ༌བོའ༌ ཅམས༌པ༌ ཅོ༌ཁན༌ ཚང༌མའེ༌ ངའེ༌ ཟེར༌ཁན༌གུན༌ ཀྲང༌པོ༌ ཨིན༌ཁན༌བོ༌ ཤེས༌ས༌ནོག༌།”
JOH 18:38 པི༌ལ༌ཏུའི༌ ཏྲིས༌, “དེན༌བ༌བོ༌ ཅི༌ ཨིན༌ནོག༌།” ཏེན༌ན༌བོ༌ ཟེར༌ཏེ༌ ཁོ༌ ཡང༌སྐྱར༌ ཕི༌ལོག༌ག༌ མི༌གུན༌ ཡོད༌ས༌ སོང༌ཏེ༌ ཟེརས༌, “ང༌ འི༌ མི༌བོའེ༌ ནང༌ང༌ ཅའང༌ སྐྱོན༌ ཐོབ༌བ༌ མི༌དུག༌།
JOH 18:39 ཨིན༌ནའང༌ ཁྱོ༌ཞའེ༌ ལུག༌སྲོལ༌ ནང༌ཞིན༌, ངའེ༌ པེ༌སག༌གི༌ ཏུས༌ལ༌ ཁྱོ༌ཞ༌གུན༌ནི༌ ཕིའ༌ ཙོན༌པ༌ཞིག༌ ཕུད༌དད༌། ངའེ༌ ཡ༌ཧུ༌དཱ༌པའེ༌ གྱལ༌པོ༌བོ༌ ཕུད༌ད༌?”
JOH 18:40 ཁོང༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, “མན༌ ཁོ༌ མ༌ཕུད༌། ང༌ཞའེ༌ ཕིའ༌ བཱ༌ར༌བས༌ ཕུད༌ད༌ ཛད༌” ༼བཱ༌ར༌བས༌ རོམ༌མི༌ ཝང༌སྲུལ༌པ༌ ངོ༌ལོག༌ ཅོ༌ཁན༌ཞིག༌ ཨིན༌པིན༌།༽
JOH 19:1 ཏེ༌ནེ༌ ཀའ༌ལོན༌ པི༌ལ༌ཏུའི༌ གཙོ༌བོ༌ ཡེ༌ཤུའ༌ རྟལ༌ལྕག༌ གྱབ༌ཅེས༌སི༌ བཀའ༌ ཏངས༌།
JOH 19:2 མག༌མི༌གུན༌ནི༌ ཚེར༌མའེ༌ ཐོར༌ཤོག༌ སླས༌ཏེ༌ ཁོང༌ངི༌ ཨུའ༌ སྐོནས༌ ཡང༌ གྱལ༌པོའེ༌ ནམ༌ཟའ༌ མར༌པོ༌ ཙོགས༌ ཁོང༌ང༌ སྐོནས༌།
JOH 19:3 ཁོང༌གུན༌ ལན༌ མང༌པོ༌ ཁོང༌ངི༌ དུན༌ལ༌ ཡོང༌ཨིན༌, “ཡ༌ཧུ༌དཱ༌པའེ༌ གྱལ༌པོའ༌ ཆག༌ཚལ༌” ཟེར༌ཨིན༌ ཙིག༌པ༌ སྲགས༌ཏེ, ཁོང༌ང༌ གྲམ༌ལྕགས༌ ཏངས༌།
JOH 19:4 པི༌ལ༌ཏུ༌ ཡང༌ ལན༌ཅིག༌ ཕི༌ལོག༌ག༌ ཡོངས༌ཏེ༌ ཡ༌ཧུ༌དཱ༌པ༌གུན༌ལ༌ ཟེརས༌, “ལྟོས༌ཤིག༌ ང༌ ཁོའེ༌ ནང༌ང༌ སྐྱོན༌ ཀལ༌ཅེས༌སི༌ གྱུན༌ཚན༌ཞིག༌ མ༌ཐོབ༌ཁན༌བོ༌ ཁྱོ༌ཞ༌གུན༌ལ༌ ཧ༌གོ༌ཅུག༌ཅེས༌སི༌ ཕིའ༌ ངའེ༌ ཁོ༌ ཕི༌ལོག༌ག༌ ཁྱོ༌ཞའེ༌ དུན༌ལ༌ ཁྱོང༌ངད༌།”
JOH 19:5 ཏེ༌ནེ༌ ཡེ༌ཤུ༌ ཚེར༌མའེ༌ ཐོར༌ཤོག༌ དང༌ ནམ༌ཟའ༌ མར༌པོ༌ ནམས༌ཏེ༌ ཕི༌ལོག༌ག༌ སྐྱོད༌ད༌ཅིག༌, པི༌ལ༌ཏུའི༌ ཡ༌ཧུ༌དཱ༌པ༌གུན༌ལ༌ ཟེརས༌, “ལྟོས༌ཤིག༌ ཏེན༌ན༌ མི༌བོའ༌ འི༌ནེ༌།”
JOH 19:6 བླ༌མ༌ འུ༌སྐྱོང༌གུན༌ དང༌ ཁོང༌ སྲུང༌ཁན༌གུན༌ནི༌ ཡེ༌ཤུ༌ ཐོང༌ང༌ཅིག༌ ཀུ༌ཅོ༌ ཏང༌ཨིན༌ ཟེརས༌, “ཁོ༌ རྐྱང༌ཤིང༌ང༌ རྐྱོང༌, རྐྱང༌ཤིང༌ང༌ རྐྱོང༌” ཏེ༌བོ༌ ཚོར༌ར༌ཅིག༌ པི༌ལ༌ཏུའི༌ ཁོང༌གུན༌ལ༌ ཟེརས༌, “ངའ༌ ཁོ༌ རྐྱང༌ཤིང༌ང༌ རྐྱང༌ཅེས༌སི༌ ཅའང༌ གྱུན༌ཚན༌ཞིག༌ མ༌ཐོབ༌ ཁྱོ༌ཞ༌རང༌ངི༌ ཁྱེར༌ཏེ༌ ཁོ༌ རྐྱང༌ཤིང༌ང༌ རྐྱོང༌ཤིག༌།”
JOH 19:7 ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ འུ༌ཙུག༌ ཏང༌ཨིན༌ ཟེརས༌, “ང༌ཞའ༌ བཀའ༌ཁྲིམས༌ཤིག༌ ཡོད༌, ཏེ༌ ནང༌ཞིན༌ལ༌ ཁོ༌ ཤི༌གོས༌, ཅིའ༌ཟེར༌ན༌ ཁོའེ༌ ཁོ༌རང༌ དཀོན༌མཆོག༌གི༌ སྲས༌ ཨིན༌ ཟེར༌དུག༌།”
JOH 19:8 ཏེ༌བོ༌ ཚོར༌ར༌ཅིག༌ པི༌ལ༌ཏུ༌ སྔུན༌ནི༌ སང༌ མང༌ང༌ ཇིགས༌།
JOH 19:9 ལོགས༌ཏེ༌ ཁར༌རི༌ ནང༌ང༌ སོང༌ ཡང༌ ཁོའེ༌ ཡེ༌ཤུའ༌ ཟེརས༌, “ཁྱོ༌རང༌ ཀ༌ནེ༌ ཨིན༌?” ཨིན༌ནའང༌ ཡེ༌ཤུའི༌ ཁོའ༌ ཅའང༌ ལན༌ མ༌སལས༌།
JOH 19:10 “ཅི༌ ཁྱོ༌རང༌ངི༌ ང༌ ལན༌ཏང༌ང༌ མེད༌ད༌? ང༌ ཁྱོ༌རང༌ ཕུད༌ཏང༌ཅེས༌ ཡ༌ རྐྱང༌ཤིང༌ང༌ རྐྱང༌ཅེས༌སི༌ ཝང༌ ཡོད༌ཁན༌བོ༌ ཁྱོ༌རང༌ང༌ གྱུས༌མེད༌ད༌?”
JOH 19:11 ཡེ༌ཤུའི༌ ཁོའ༌ ལན༌སལས༌, “དཀོན༌མཆོག༌གི༌ མ༌སལ༌པིན༌ན༌ ཁྱོ༌རང༌ང༌ ངའེ༌ཀ༌ འི༌ ཝང༌བོ༌ མ༌ནེ༌ མེད༌གྲོ༌, ཨིན༌ནའང༌ ང༌ ཁྱོ༌རང༌ངི༌ ལག༌ག༌ སྟད༌ཁན༌བོའ༌ ཁྱོ༌རང༌ངི༌ སང༌ ཆེའ༌ སྡིག༌པའེ༌ སྐྱོན༌ ཕོག༌ཏེ༌ ཨིན༌ནོག༌།”
JOH 19:12 ཏེ༌ སྟིང༌ནེ༌ པི༌ལ༌ཏུའི༌ ཡེ༌ཤུ༌ ཕུད༌ཅེས༌སི༌ རྩོན༌གྲུས༌ ཅོས༌, ཨིན༌ནའང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, “ཀལ༌ཏེས༌ ཉེ༌རང༌ངི༌ འི༌ མི༌བོ༌ ཕུད༌ན༌, ཉེ༌རང༌ རོམ༌མི༌ གྱལ༌པོའེ༌ ཛ༌འོ༌ མ༌ནོག༌། ཁོ༌རང༌ གྱལ༌པོ༌ ཨིན༌ ཟེར༌ཁན༌གུན༌ རོམ༌མི༌ གྱལ༌པོའེ༌ གྲ༌འོ༌ ཨིན༌ནོག༌།”
JOH 19:13 ཏེ༌བོ༌ ཚོར༌ར༌ཅིག༌ པི༌ལ༌ཏུའི༌ མག༌མི༌གུན༌ལ༌ བཀའ༌ ཏངས༌ཏེ༌, ཡེ༌ཤུ༌ ཕི༌ལོག༌ག༌ ཁྱོངས༌ ཡང༌ ཀའ༌ལོན༌ ཁོ༌རང༌ ཁྲིམ༌སྤོན༌ནི༌ ཁྲིས༌སི༌ཀ༌ དུགས༌། ཏེ༌ ནས༌ས༌བོའ༌ “རྡོའེ༌ལམ༌” ཟེར༌རད༌པིན༌ ༼ཨིབ༌རི༌པའེ༌ སྐད༌དི༌ ནང༌ང༌ “ག༌བ༌ཐཱ༌” ཟེར༌ར༌ནོག༌།༽
JOH 19:14 ཏེ༌ཏུས༌པོ༌ པེ༌སག༌གི༌ གྲལ༌གྲིག༌ ཅོ༌ཅེས༌སི༌ ཞག༌གི༌ ཉིང༌གུང༌ ཨིན༌པིན༌, པི༌ལ༌ཏུའི༌ ཡ༌ཧུ༌དཱ༌པ༌གུན༌ལ༌ ཟེརས༌, “ལྟོས༌ཤིག༌, ཁྱོ༌ཞའེ༌ གྱལ༌པོ༌།”
JOH 19:15 ཨིན༌ནའང༌ ཁོང༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, “ཁོ༌ ཁྱེར༌, ཁྱེར༌ཏེ༌ ཁོ༌ རྐྱང༌ཤིང༌ང༌ རྐྱོང༌།” པི༌ལ༌ཏུའི༌ ཁོང༌གུན༌ལ༌ ཟེརས༌, “ཁྱོ༌ཞ༌རང༌ངི༌ གྱལ༌པོ༌བོ༌ རྐྱང༌ཤིང༌ང༌ རྐྱང༌ང༌?” བླ༌མ༌ འུ༌སྐྱོང༌གུན༌ནི༌ ཟེརས༌, “ང༌ཞའ༌ རོམ༌མི༌ གྱལ༌པོ༌ མན༌པ༌ ཞན༌ གྱལ༌པོ༌ སུའང༌ མེད༌།”
JOH 19:16 ཏེ༌ནེ༌ པི༌ལ༌ཏུའི༌ ཁོང༌གུན༌ནི༌ དོད༌པ༌ ནང༌ཞིན༌ ཡེ༌ཤུ༌ རྐྱང༌ཤིང༌ངི༌ཀ༌ རྐྱང༌ཅེས༌ལ༌ མག༌མི༌གུན༌ལ༌ སྟདས༌། 19:16-27 མག༌མི༌གུན༌ནི༌ ཁོང༌ ཁྲིད༌ཏེ༌ རྐྱང༌ཤིང༌ང༌ རྐྱང༌ཅེས༌ལ༌ ཁྱེརས༌།
JOH 19:17 གཙོ༌བོ༌ ཡེ༌ཤུའི༌ ཁོང༌རང༌ངི༌ རྐྱང༌ཤིང༌ ནམས༌ཏེ༌ ཡེ༌རུ༌ཤ༌ལེམ༌ནེ༌ ཕི༌ལོག༌ག༌ “གོའི༌ རུས༌པ༌” ཟེར༌ཁན༌ནི༌ ནས༌སའེ༌ཀ༌ སྐྱོདས༌, ཀ༌བོའ༌ ཨིབ༌རི༌པའེ༌ སྐད༌དི༌ ནང༌ང༌ “གོལ༌གོ༌ཐཱ༌” ཟེར༌ར༌ནོག༌།
JOH 19:18 ཏེ༌རུ༌ ཁོང༌གུན༌ནི༌ ཡེ༌ཤུ༌ རྐྱང༌ཤིང༌ང༌ རྐྱངས༌ ཡང༌ ཁོང༌ ཉམ༌པོ༌ ཞན༌ ཉིས༌སའང༌, ལྡ༌ལྡོ༌ ཉིས༌ཀོའ༌ རེ༌རེ༌ ཡང༌ ཡེ༌ཤུ༌ ཞུང༌ང༌།
JOH 19:19 པི༌ལ༌ཏུའི༌ མག༌མི༌གུན༌ལ༌ “ཡེ༌ཤུ༌ ན༌ཙ༌རེད༌པ༌ ཡ༌ཧུ༌དཱ༌པའེ༌ གྱལ༌པོ༌” བྲིས༌ཁན༌ནི༌ ལག༌ཤིང༌ཞིག༌ ཡེ༌ཤུའི༌ སྟག༌ག༌ རྐྱང༌ཤིང༌ངི༌ཀ༌ ཏག༌ཅེས༌ལ༌ བཀའ༌ ཏངས༌།
JOH 19:20 ཡེ༌ཤུ༌ རྐྱང༌ཤིང༌ང༌ རྐྱངས༌ཁན༌ནི༌ ནས༌ས༌བོ༌ གྱལ༌ས༌ནེ༌ ཉེ༌མོའ༌ ཡོད༌པ༌ ཡ༌ཧུ༌དཱ༌པ༌ མང༌པོའེ༌ ཏེ༌ བྲིས༌ཁན༌བོ༌ སིལས༌, ཏེ༌བོ༌ ཨིབ༌རི༌པ༌, རོམ༌པ༌ དང༌ གརིས༌པའེ༌ སྐད༌ སུམ༌ཀོའེ༌ ནང༌ང༌ བྲིས༌ཏེ༌ ཡོད༌པིན༌།
JOH 19:21 ཏེ༌ནེ༌ ཡ༌ཧུ༌དཱ༌པའེ༌ བླ༌མ༌ འུ༌སྐྱོང༌གུན༌ནི༌ པི༌ལ༌ཏུའི༌ བྲིས༌ཁན༌བོའ༌ གྱབ༌གལ༌ ཅོས༌ཏེ༌, “ཡ༌ཧུ༌དཱ༌པའེ༌ གྱལ༌པོ༌ མ༌བྲིའ༌ ཁོ༌རང༌ངི༌ ‘ང༌ ཡ༌ཧུ༌དཱ༌པའེ༌ གྱལ༌པོ༌ ཨིན༌ ཟེར༌རད༌པིན༌’ བྲིའ༌ ཛད༌” ཟེར༌ཏེ༌ ཞུ༌ཝ༌ ཕུལས༌།
JOH 19:22 པི༌ལ༌ཏུའི༌ ལན༌ཏངས༌, “ངའེ༌ ཅི༌ཞིག༌ བྲིས༌ཏེ༌ ཡོད༌ནའང༌ བྲི༌ཚར༌, གྱུར༌ར༌ མེད༌།”
JOH 19:23 མག༌མི༌གུན༌ནི༌ ཡེ༌ཤུ༌ རྐྱང༌ཤིང༌ང༌ རྐྱང༌ ཚར༌ར༌ཅིག༌, ཚང༌མ༌ལ༌ ཐོབ༌ཅེས༌སི༌ ཕིའ༌, ཁོང༌ངི༌ ནམ༌ཟའ༌བོའ༌ པོ༌ཞི༌ ཕུདས༌། ཨིན༌ནའང༌ ཁོང༌ངི༌ ནང༌ཀུག༌གི༌ ནམ༌ཟའ༌ ཚེམ༌པོ༌ མ༌ནེ༌ མེད༌ཁན༌ གོ༌ནེ༌ ཇུག༌ ཚག༌པ༌ སླས༌ཏེ༌ ཡོད༌ པ༌སང༌
JOH 19:24 ཁོང༌རང༌ ཅིག༌ དང༌ ཅིག༌ག༌ ཟེརས༌ “འི༌བོའ༌ པོ༌མི༌བུད༌, ཆོ༌ལོ༌ རིལ༌ཏེ༌ སུའ༌ ཐོབ༌དུག༌ ལྟེན༌།” ཏེ༌བོ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཁན༌ ནང༌ཞིན༌ དྲན༌དྲ༌ གྲུབ༌ཅེས༌སི༌ ཕིའ༌ ཇུང༌, “ཁོང༌གུན༌ནི༌ ངའེ༌ ཀོས༌ལག༌གུན༌ བགོས༌ཏེ༌ ངའེ༌ ཀོས༌པོའ༌ གྱན༌ གྱབས༌།”
JOH 19:25 ཡེ༌ཤུའི༌ རྐྱང༌ཤིང༌ངི༌ དུན༌ལ༌ ཁོང༌ངི༌ ཨ༌མ༌, ཨ༌མའེ༌ ནོ༌མོ༌, ཀོལོ༌ཕཱས༌སི༌ ན༌མ༌ མིར༌ཡམ༌ དང༌ མིར༌ཡམ༌ མག༌དལ༌ལ༌མ༌ གུན༌ ལངས༌ཏེ༌ ཡོད༌པིན༌།
JOH 19:26 ཡེ༌ཤུའི༌ ཁོང༌ངི༌ ཨ༌མ༌ དང༌ ཁོང༌ངི༌ ཅེས༌པ༌ ཅོའ༌ ཛད༌ཁན༌ནི༌ ལོབ༌ཕྲུགས༌པོ༌ དུན༌ལ༌ ལངས༌ཏེ༌ ཟིགས༌པ༌, ཁོང༌ངི༌ ཨ༌མའ༌ མོལས༌, “ཅེས༌པའེ༌ བུ༌མོ༌, ཏ༌ནེ༌ཕར༌ལ༌ ཁོ༌ ཁྱོ༌རང༌ངི༌ བུ༌ཚ༌ ཨིན༌”,
JOH 19:27 ཡང༌ ལོབ༌ཕྲུགས༌པོའ༌ མོལས༌, “ཏ༌ནེ༌ཕར༌ལ༌ ཁོ༌ ཁྱོ༌རང༌ངི༌ ཨ༌མ༌ ཨིན༌།” ཏེན༌ན༌ ཞག༌ནེ༌ ཕར༌ལ༌ ལོབ༌ཕྲུགས༌པོའེ༌ ཡེ༌ཤུའི༌ ཨ༌མ༌ ཁོ༌རང༌ངི༌ ཁང༌པ༌ ཁྱེརས༌།
JOH 19:28 གཙོ༌བོ༌ ཡེ༌ཤུའི༌ ཁོང༌ངི༌ ལས༌ ཅོ༌ཅེས༌ ཚང༌མ༌ གྲུབ༌ཏེ༌ ཨིན༌ཁན༌བོ༌ ཁྱེན༌ཏེ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཁན༌བོ༌ གྲུབ༌ཅེས༌ལ༌ ཁོང༌ངི༌ མོལས༌, “ང༌ སྐོམ༌ས༌རག༌།”
JOH 19:29 ཏེ༌རུ༌ ནོད༌ཞིག༌གི༌ ནང༌ང༌ རྒུན༌ཆང༌ སྐྱུར༌མོ༌ ཡོད༌པ༌, ཁོང༌གུན༌ནི༌ ཆུས༌བལ༌ཞིག༌ ཏེ༌ནང༌ང༌ ཅུགས༌ཏེ༌ ཧི༌སོབ༌བི༌ ཡལ༌ག༌ཞིག༌གི༌ གོའ༌ སྐོན༌ཏེ༌ ཡེ༌ཤུའི༌ ཞལ༌ལི༌ཀ༌ ཕུལས༌།
JOH 19:30 ཡེ༌ཤུའི༌ ཏེ༌བོ༌ ཉང༌ ཚར༌ར༌ཅིག༌, “ཏ༌ གྲུབ༌” མོལས༌ ཡང༌ ཨུ༌ སྒུའ༌ ཛད༌ཏེ༌ ཁོང༌རང༌ངི༌ སེམས༌ཉིད༌པོ༌ དཀོན༌མཆོག༌ག༌ སྟད༌ད༌ ཛདས༌།
JOH 19:31 ཏེ༌ ཞག༌པོ༌ ཤབ༌བད༌དི༌ ཞག༌གི༌ ཕིའ༌ གྲལ༌གྲིག༌ ཅོ༌ཅེས༌ ཡང༌ ཐོ༌རེ༌ཟུག༌པོ༌ མིག༌སལ༌ལི༌ ཤབ༌བད༌དི༌ ཞག༌ ཨིན༌པིན༌། ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཤབ༌བད༌དི༌ ཞག༌ག༌ ཟུགས༌པོ༌ རྐྱང༌ཤིང༌ངི༌ཀ༌ བོར༌ཅེས༌པོ༌ མ༌ཐད༌པ༌, ཁོང༌གུན༌ པི༌ལ༌ཏུའི༌ཀ༌ སོང༌ཏེ༌ གྱོགས༌པ༌ ཤི༌ཅེས༌སི༌ ཕིའ༌ ཏེ༌ མི༌གུན༌ནི༌ རྐང༌པ༌ ཅག༌ཅེས༌ དང༌ ཟུགས༌པོ༌གུན༌ ཕབས༌ཏེ༌ ཁྱེར༌ཅེས༌ལ༌ བཀའ༌ སལ༌ ཟེར༌ཏེ༌ ཞུ༌ཝ༌ ཕུལས༌།
JOH 19:32 ཏེན༌ན༌བོའེ༌ཕིའ༌ མག༌མི༌གུན༌ ཡོངས༌ཏེ༌ ཡེ༌ཤུ༌ ཉམ༌པོ༌ རྐྱང༌ཤིང༌ང༌ རྐྱངས༌ཏེ༌ ཡོད༌ཁན༌ ཉིས༌ཀོའེ༌ རྐང༌པ༌ ཅགས༌།
JOH 19:33 ཨིན༌ནའང༌ ཡེ༌ཤུའི༌ དུན༌ལ༌ ལེབ༌བ༌ཅིག༌, ཁོང༌ ཀྲོངས༌ ཚར༌ཏེ༌ ཐོང༌པ༌, ཁོང༌ངི༌ ཞབས༌ མ༌ཅགས༌།
JOH 19:34 ཏེ༌ མག༌མི༌ ཕྲོ༌ནེ༌ ཅིག༌གི༌ ཁོ༌རང༌ངི༌ རྡུང༌བོ༌ ཡེ༌ཤུའི༌ རྩིབ༌མའེ༌ པར༌ལ༌ ཙུག༌ག༌ཅིག༌, ཁྲག༌ དང༌ ཆུ༌ བིང༌།
JOH 19:35 མིག༌ནེ༌ ངོས༌མ༌ འི༌གུན༌ ཐོང༌ཁན༌ནི༌ མི༌བོའེ༌ སྤང༌པོ༌ ཏང༌ངད༌ ཡང༌ ཁོའེ༌ སྤང༌པོ༌བོ༌ དེན༌བ༌ ཨིན༌། ཁོའེ༌ ཀྲང༌པོ༌ ཟེར༌ཁན༌བོ༌ ཁོའེ༌ ཤེས༌ས༌ནོག༌, ཡང༌ ཁྱོ༌ཞ༌གུན༌ནིའང༌ ཏད༌པ༌ ཅོ༌ཅེས༌སི༌ ཕིའ༌ ཁོའེ༌ སྤང༌པོ༌ ཏང༌ཨིན༌ ཨིན༌།
JOH 19:36 ཏམ༌པའེ༌ སུང༌རབས༌སི༌ ནང༌ང༌ “ཁོང༌ངི༌ རུས༌པ༌ ཅིག༌གའང༌ མི༌ཅག༌” བྲིས༌ཏེ༌ ཡོད༌ཁན༌ ཚང༌མ༌ དྲན༌དྲ༌ གྲུབ༌ཅེས༌སི༌ ཕིའ༌ འི༌ ཚང༌མ༌ ཇུང༌ཏེ༌ ཨིན༌ནོག༌།
JOH 19:37 ཏམ༌པའེ༌ སུང༌རབས༌སི༌ ཡང༌ ནས༌ས༌ཞིག༌གི༌ ནང༌ང༌ མོལ༌ཏེ༌ དུག༌, “ཁོང༌གུན༌ནི༌ ཁོ༌རང༌གུན༌ནི༌ རྡུང༌ ཙུག༌ཁན༌ནི༌ མི༌བོའ༌ ལྟེན༌།”
JOH 19:38 སྟིང༌ནེ༌ ཨ༌རི༌མ༌ཐཱ༌པ༌, ཡོ༌སེབ༌ པི༌ལ༌ཏུའི༌ཀ༌ སོང༌ཏེ༌ ཡེ༌ཤུའི༌ སྤུར༌ ཁྱེར༌ཅེས༌ལ༌ གོངས༌པ༌ སལ༌ ཟེརས༌། ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཇིགས༌ པ༌སང༌, སྔོན༌མ༌ཅུག༌ག༌ ཡོ༌སེབ༌ གཙོ༌བོ༌ ཡེ༌ཤུའི༌ ལོབ༌ཕྲུགས༌ ཅིག༌ ཨིན༌པིན༌། ཁོའེ༌ པི༌ལ༌ཏུའི༌ ཀ༌ནེ༌ གོངས༌པ༌ ལེན༌ཏེ༌ ཡེ༌ཤུའི༌ སྤུར༌བོ༌ ཕབས༌ཏེ༌ ཁྱེརས༌།
JOH 19:39 སྔུན༌མ༌ ཚན༌ཞིག༌ག༌ ཡེ༌ཤུ༌ ཇལ༌ལ༌ ཡོངས༌ཁན༌ནི༌ ནི༌ཀོ༌དེ༌མས༌སའང༌ ཁོ༌ ཉམ༌པོ༌ ཡོངས༌། ཁོའེ༌ མའེར༌ དང༌ འེལ༌ཝ༌ ནེ༌ ཅོ༌ཁན༌ནི༌ ཏྲི༌ཞིམ༌ཅན༌ནི༌ མར༌ རིན༌ཅན༌ ཧ༌ལམ༌ ཀྱི༌ལོ༌ 35 ཞིག༌ ཁྱོངས༌།
JOH 19:40 ཡ༌ཧུ༌དཱ༌པའེ༌ སྤུར༌ སུབ༌ཅེས༌སི༌ ལུག༌སྲོལ༌ ནང༌ཞིན༌, ཁོང༌ ཉིས༌ཀོའེ༌ ཡེ༌ཤུའི༌ སྤུར༌བོ༌ ཁྱེར༌ཏེ༌, ཏྲི༌ཞིམ༌གུན༌ སྐུས༌ཏེ༌ རས༌ ཀུས༌པོའེ༌ ནང༌ང༌ ཏུམས༌།
JOH 19:41 ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ ནས༌སའེ༌ དུན༌ལ༌ ཚས༌ཤིག༌ ཡོད༌པིན༌, ཏེ༌ ཚས༌པོའེ༌ ནང༌ང༌ སྔུན༌ལ༌ རོ༌ མ༌ནེ༌ མ༌བོར༌ཁན༌ནི༌ སྤུར༌ཁང༌ སོ༌མ༌ཞིག༌ ཡོད༌པིན༌།
JOH 19:42 སྤུར༌ཁང༌བོ༌ ཉེ༌མོའ༌ ཡོད༌ཅེས༌ ཡང༌ ཏེ༌ ཞག༌པོ༌ ཡ༌ཧུ༌དཱ༌པའེ༌ མིག༌སལ༌ ཤབ༌བད༌དི༌ གྲལ༌གྲིག༌གི༌ ཞག༌ ཨིན༌ པ༌སང༌, ཁོང༌གུན༌ནི༌ ཡེ༌ཤུའི༌ སྤུར༌ ཏེན༌ན༌ སྤུར༌ཁང༌ངི༌ ནང༌ང༌ བོརས༌།
JOH 20:1 ཟ༌ཉི༌མའེ༌ ཞག༌ག༌ ང༌མོ༌ ཟང༌ཟིང༌ནེ༌ ནམ༌ མ༌ལངས༌ས༌ ཡོད༌ ཟ༌ནེ༌ མིར༌ཡམ༌ མག༌དལ༌ལ༌མ༌ སྤུར༌ཁང༌ང༌ སོང༌, ཡང༌ ཁོའ༌ སྤུར༌ཁང༌ངི༌ ཁར༌རྡོ༌བོ༌ ཐེན༌ཏེ༌ ཐོང༌།
JOH 20:2 ཁོ༌ བང༌ཏང༌ཨིན༌ ཤི༌མོན༌ པི༌ཏྲར༌ དང༌ ཞན༌ ལོབ༌ཕྲུགས༌ གཙོ༌བོ༌ ཡེ༌ཤུའི༌ ཅེས༌པ༌ ཛད༌ཁན༌བོའེ༌ཀ༌ ཡོངས༌ཏེ༌ ཟེརས༌, “ཁོང༌གུན༌ནི༌ གཙོ༌བོ༌ སྤུར༌ཁང༌ནེ༌ ཕིངས༌ཏེ༌ ཁྱེར༌ཏེ༌ མི༌དུག༌ ཡང༌ ཀ༌རུ༌ ཁྱེརས༌ ང༌ཞའ༌ ཅའང༌ གྱུས༌མེད༌།”
JOH 20:3 ཏེ༌ནེ༌ པི༌ཏྲར༌ དང༌ ཞན༌ ལོབ༌ཕྲུགས༌པོ༌ སྤུར༌ཁང༌ང༌ ཆ༌ཅེས༌ གོ༌ཟུག༌,
JOH 20:4 ཁོང༌གུན༌ བང༌ཏང༌ཨིན༌ ཆའད༌པིན༌, ཨིན༌ནའང༌ ཞན༌ ལོབ༌ཕྲུགས༌པོ༌ པི༌ཏྲར༌རི༌ སང༌ གྱགས༌པ༌ བང༌ཏངས༌ཏེ༌ སྔུན༌ལ༌ སྤུར༌ཁང༌ང༌ ལེབ༌།
JOH 20:5 ཁོའེ༌ སྒུས༌ཏེ༌ ལྟས༌, སྤུར༌ལ༌ སྲིལ༌ཁན༌ནི༌ རས༌གུན༌ ཏེ༌ཀ༌ བོར༌ཏེ༌ ཐོང༌ ཨིན༌ནའང༌ ནང༌ཀུག༌ག༌ མ༌སོང༌།
JOH 20:6 ཏེ༌ནེ༌ ཤི༌མོན༌ པི༌ཏྲར༌ ཁོའེ༌ གྱབ༌ནེ༌ ཏེ༌ཀ༌ ལེབས༌ཏེ༌ ཁ༌དྲང༌ང༌ སྤུར༌ཁང༌ངི༌ ནང༌ཀུག༌ག༌ ཞུགས༌ཏེ༌ སོང༌། ཁོའང༌ ཏེ༌རུ༌ སྤུར༌ལ༌ སྲིལ༌ཁན༌ནི༌ རས༌གུན༌ བོར༌ཏེ༌ ཐོང༌,
JOH 20:7 ཡེ༌ཤུའི༌ ཨུའ༌ སྐོན༌ཏེ༌ ཡོད༌ཁན༌ནི༌ རས༌པོ༌ ལྟབས༌ཏེ༌ ཞན༌ སྲིལ༌ཁན༌ནི༌ རས༌སི༌ སང༌ སོ༌སོའ༌ བོར༌ཏེ༌ ཐོང༌།
JOH 20:8 ཏེ༌ནེ༌, སྔུན༌ལ༌ སྤུར༌ཁང༌ང༌ ལེབ༌ཁན༌ནི༌ ཞན༌ ལོབ༌ཕྲུགས༌པོའང༌ ནང༌ཀུག༌ག༌ སོང༌, ཏེ༌གུན༌ ཐོང༌ཏེ༌ ཁོའེ༌ ཏད༌པ༌ ཅོས༌།
JOH 20:9 ༼ཁོང༌གུན༌ལ༌ ཏ༌རུང༌ངའང༌ ཏམ༌པའེ༌ སུང༌རབས༌སི༌ ནང༌ང༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ གོ༌ཤེས༌ ཁག༌ཅན༌ ཨིན༌ བྲིས༌ཁན༌བོ༌ ཧ༌མ༌གོའ༌ ཨིན༌པིན༌༽
JOH 20:10 ཏེ༌ནེ༌ ལོབ༌ཕྲུགས༌གུན༌ ཁོ༌རང༌གུན༌ནི༌ ཁང༌པ༌ ལོགས༌ཏེ༌ སོང༌།
JOH 20:11 ཨིན༌ནའང༌ མིར༌ཡམ༌ སྤུར༌ཁང༌ངི༌ ཕི༌ལོག༌ག༌ ངུ༌ཨིན༌ ཡོད༌པིན༌། ཁོའེ༌ ངུ༌ཨིན༌ སྒུས༌ཏེ༌ སྤུར༌ཁང༌ངི༌ ནང༌ཀུག༌ག༌ ལྟས༌།
JOH 20:12 ཁོའ༌ ཏེ༌རུ༌ ནམ༌ཟའ༌ ཀར༌པོ༌ གོན༌ཁན༌ནི༌ ཕོ༌ཉ༌ ཉིས༌ གཙོ༌བོ༌ ཡེ༌ཤུའི༌ སྤུར༌ བོར༌སའེ༌ཀ༌ ཅིག༌པོ༌ ཨུའི༌ ཆོགས༌ལ༌ ཡང༌ ཅིག༌པོ༌ ཞབས༌སི༌ ཆོགས༌ལ༌ དུགས༌ཏེ༌ ཐོང༌།
JOH 20:13 ཕོ༌ཉ༌གུན༌ནི༌ མིར༌ཡམ༌མ༌ མོལས༌, “བུ༌མོ༌ ཁྱོ༌རང༌ ཅིའ༌ ངུའད༌?” མིར༌ཡམ༌མི༌ ལན༌ཏངས༌, “ཁོང༌གུན༌ནི༌ ངའེ༌ གཙོ༌བོ༌ ཁྱེར༌ཏེ༌ མི༌དུག༌ ཡང༌ ཀ༌རུ༌ ཁྱེརས༌ ང༌ ཅའང༌ གྱུས༌མེད༌།”
JOH 20:14 ཏེ༌བོ༌ ཟེར༌ ཚར༌ར༌ཅིག༌, ཁོ༌ གྱུར༌པ༌ ཏེ༌རུ༌ ཡེ༌ཤུ༌ ཞངས༌ཏེ༌ ཇལ༌, ཨིན༌ནའང༌ ཁོའ༌ ཡེ༌ཤུ༌ ཨིན༌ཁན༌བོ༌ ངོ༌ མ༌ཤེས༌།
JOH 20:15 ཡེ༌ཤུའི༌ མོལས༌, “བུ༌མོ༌ ཁྱོ༌རང༌ ཅིའ༌ ངུའད༌? ཁྱོ༌རང༌ངི༌ སུ༌ ཙལ༌ལད༌?” མིར༌ཡམ༌མི༌ ཁོ༌ ཚས༌ཁན༌ ཨིན༌གྲོ༌ སམ༌ཏེ༌ ཁོང༌ང༌ ཟེརས༌, “ཨ༌ཅོ༌ལེ༌, ཀལ༌ཏེས༌ ཉེ༌རང༌ངི༌ ཁོང༌ངི༌ སྤུར༌བོ༌ ཁྱེར༌ཏེ༌ ཨིན༌ན༌ ངའ༌ ཤོད༌དའང༌ ཀ༌རུ༌ བོར༌ཏེ༌ ཡོད༌, ངའེ༌ ཁོང༌ངི༌ སྤུར༌བོ༌ ཁྱེར༌ཨིན༌།”
JOH 20:16 ཡེ༌ཤུའི༌ མོལས༌, “མིར༌ཡམ༌།” ཏེ༌བོ༌ ཚོར༌ར༌ཅིག༌, ཁོ༌ གྱུར༌ཏེ༌, ཡེ༌ཤུའི༌ ཆོགས༌ལ༌ ལྟས༌ཏེ༌ ཨིབ༌རི༌པའེ༌ སྐད༌དི༌ ནང༌ང༌ ཟེརས༌, “ར༌བོན༌ནི༌” ༼ཡང༌ན༌ “ལོབ༌བོན༌ལེ༌”།༽
JOH 20:17 ཡེ༌ཤུའི༌ ཁོའ༌ མོལས༌, “ང༌ མ༌ཐམས༌ ཅིའ༌ཟེར༌ན༌ ང༌ ཏ༌རུང༌ ང༌རང༌ངི༌ ཡབ༌བི༌ཀ༌ ལོགས༌ཏེ༌ མ༌ཆའ༌ ཨིན༌། ཏེ༌སང༌ སོང༌ཏེ༌ ངའེ༌ སྤུན༌གུན༌ལ༌ ཟེར༌, ‘ང༌ ནི༌ ངའེ༌ ཡབ༌ དང༌ ཁྱོ༌ཞའེ༌ ཡབ༌, ངའེ༌ དཀོན༌མཆོག༌ དང༌ ཁྱོ༌ཞའེ༌ དཀོན༌མཆོག༌ ཡོད༌ས༌ ལོགས༌ཏེ༌ ཆའད༌།’”
JOH 20:18 མིར༌ཡམ༌ མག༌དལ༌ལ༌མ༌ སོང༌ཏེ༌ ལོབ༌ཕྲུགས༌གུན༌ལ༌ ཟེརས༌, “ང༌ གཙོ༌བོ༌ ཇལ༌” ཡང༌ ཁོའེ༌ ཁོང༌གུན༌ལ༌ ཡེ༌ཤུའི༌ ལོན༌ ཀལ༌ལ༌ ཛད༌ཁན༌བོ༌ ཤདས༌།
JOH 20:19 ཟ༌ཉི༌མའེ༌ ཞག༌གི༌ ཕི༌ཏོག༌, ལོབ༌ཕྲུགས༌གུན༌ ཛོམས༌ཏེ༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ ཇིགས༌པ༌ སྒོ༌ སྲན༌ཏྲེ༌ ཅུགས༌ཏེ༌ དུགས༌ཏེ༌ ཡོད༌ ཟ༌ནེ༌, ཧུན༌མེད༌ལ༌ གཙོ༌བོ༌ ཡེ༌ཤུ༌ ཁོང༌གུན༌ནི༌ སྐྱིལ༌ལ༌ སྐྱོདས༌ ཡང༌ མོལས༌, “དཀོན༌མཆོག༌གི༌ ཞི༌དེ༌ ཁྱོ༌ཞའ༌ ཉམ༌པོ༌ ལུས༌ཤིག༌།”
JOH 20:20 ཏེ༌བོ༌ མོལ༌ཏེ༌ ཁོང༌ངི༌ ཁོང༌རང༌ངི༌ ཆག༌ དང༌ རྩིབ༌མའེ༌ མ༌ཁའ༌གུན༌ ཁོང༌གུན༌ལ༌ སྟན༌ན༌ ཛདས༌། གཙོ༌བོ༌ ཇལ༌ པ༌སང༌ ལོབ༌ཕྲུགས༌གུན༌ མ༌སྲན༌ཏྲེ༌ ཐད༌།
JOH 20:21 ཡེ༌ཤུའི༌ ཡང༌སྐྱར༌ ཁོང༌གུན༌ལ༌ མོལས༌, “དཀོན༌མཆོག༌གི༌ ཞི༌དེ༌ ཁྱོ༌ཞའ༌ ཉམ༌པོ༌ ལུས༌ཤིག༌, ཡབ༌བི༌ ང༌ ཀལ༌ལ༌ ཛད༌ཁན༌ ཙོགས༌ལ༌ ངེའང༌ ཁྱོ༌ཞ༌གུན༌ ཀལ༌ལད༌།”
JOH 20:22 ཏེ༌ཟུག༌ མོལ༌ཏེ༌ ཁོང༌གུན༌ནི༌ཀ༌ ཕུ༌ སལ༌ལ༌ ཛད༌ཏེ༌ མོལས༌, “ཏམ༌པའེ༌ ཐུག༌ཉིད༌ ལེན༌ཤིག༌།
JOH 20:23 ཀལ༌ཏེས༌ སུ༌ཞིག༌གི༌ སྡིག༌པའ༌ ཁྱོ༌ཞའེ༌ ཤགས༌པ༌ ཏང༌ན༌ དཀོན༌མཆོག༌གི༌ ཁོང༌གུན༌ནི༌ སྡིག༌པ༌ ཤགས༌པ༌ སལ༌ཨིན༌, ཡང༌ ཀལ༌ཏེས༌ སུ༌ཞིག༌གི༌ སྡིག༌པ༌ ཁྱོ༌ཞའེ༌ ཤགས༌པ༌ མ༌ཏང༌ན༌ དཀོན༌མཆོག༌གི༌ ཁོང༌གུན༌ནི༌ སྡིག༌པ༌ ཤགས༌པ༌ མི༌སལ༌།”
JOH 20:24 ལོབ༌ཕྲུགས༌ རྕུག༌ཉིས༌སི༌ ཕྲོ༌ནེ༌ ཅིག༌ ཐོ༌མཱས༌ ༼ཀ༌བོའ༌ ཚག༌ཕྲུག༌ ཟེར༌རད༌པིན༌༽ གཙོ༌བོ༌ ཡེ༌ཤུ༌ སྐྱོད༌དི༌ ཏུས༌ལ༌ ཞན༌ ལོབ༌ཕྲུགས༌གུན༌ནི༌ ཕྲོའ༌ མེད༌པིན༌།
JOH 20:25 ཞན༌ ལོབ༌ཕྲུགས༌གུན༌ནི༌ ཁོའ༌ ཟེརས༌, “ང༌ཞའེ༌ གཙོ༌བོ༌ ཇལ༌།” ཨིན༌ནའང༌ ཐོ༌མཱས༌སི༌ ཁོང༌གུན༌ལ༌ ཟེརས༌, “ནམ༌ཚོག༌པ༌ ངའེ༌ ཁོང༌ངི༌ ཆག༌གི༌ཀ༌ ཟེ༌རུའི༌ མལ༌གུན༌ མི༌ཐོང༌ ཡང༌ ཏེ༌གུན༌ནི༌ ནང༌ང༌ ང༌རི༌ ཛི༌གུ༌ མི༌ཏང༌, ཡང༌ ང༌རི༌ ལག༌པ༌ ཁོང༌ངི༌ རྩིབ༌མའེ༌ ནང༌ང༌ ཏངས༌ཏེ༌ མ༌ནེ༌ ང༌ དེན༌ཤེ༌ཤེས༌ མེ༌རག༌།”
JOH 20:26 རྡུན༌ཞག༌ཅིག༌གི༌ སྟིང༌ནེ༌ ཡེ༌ཤུའི༌ ལོབ༌ཕྲུགས༌གུན༌ ཡང༌སྐྱར༌ ཏེན༌ན༌ ཁང༌པའེ༌ ནང༌ང༌ ཛོམས༌ཏེ༌ ཐོ༌མཱས༌སའང༌ ཁོང༌གུན༌ ཉམ༌པོ༌ ཡོད༌པིན༌། སྒོ༌ སྲན༌ཏྲེ༌ ཅུགས༌ཏེ༌ ཡོད༌ནའང༌ ཡེ༌ཤུ༌ སྐྱོད༌ཏེ༌ ཁོང༌གུན༌ནི༌ ཕྲོའ༌ ཞངས༌ཏེ༌ མོལས༌, “དཀོན༌མཆོག༌གི༌ ཞི༌དེ༌ ཁྱོ༌ཞའ༌ ཉམ༌པོ༌ ལུས༌ཤིག༌།”
JOH 20:27 ཏེ༌ནེ༌ ཁོང༌ངི༌ ཐོ༌མཱས༌ལ༌ མོལས༌, “ཁྱོ༌རང༌ངི༌ ཛི༌གུ༌ ངའེ༌ ལག༌པའེ༌ མ༌ཁའེ༌ ནང༌ང༌ ཙུག༌ཏེ༌ ལྟོས༌, ཡང༌ ལག༌པ༌ རྐྱངས༌ཏེ༌ ངའེ༌ རྩིབ༌མའེ༌ མ༌ཁའེ༌ ནང༌ང༌ ཅུག༌། ཐེ༌ཚོམས༌ ཕོངས༌ཏེ༌ ཨིད༌ཤེས༌ ཅོས༌།”
JOH 20:28 ཐོ༌མཱས༌སི༌ ཡེ༌ཤུའ༌ ཟེརས༌, “ངའེ༌ གཙོ༌བོ༌ ཡང༌ ངའེ༌ དཀོན༌མཆོག༌ལེ༌།”
JOH 20:29 ཡེ༌ཤུའི༌ ཁོའ༌ མོལས༌, “ཁྱོ༌རང༌ངི༌ ང༌ ཐོངས༌ པ༌སང༌ ཏད༌པ༌ ཅོས༌། ཨིན༌ནའང༌ ང༌ མ༌ཐོང༌ང༌ ཏད༌པ༌ ཅོ༌ཁན༌གུན༌ལ༌ དཀོན༌མཆོག༌གི༌ ཅིན༌ལབས༌ ཐོབ༌ཨིན༌།”
JOH 20:30 ཡེ༌ཤུ༌ ལོབ༌ཕྲུགས༌གུན༌ ཉམ༌པོ༌ ཡོད༌ ཟ༌ནེ༌ ཞན༌ ཧ༌ལས༌ཤེས༌སི༌ ཛད༌པ༌ མང༌པོ༌ ཛདས༌, ཀ༌གུན༌ འི༌ སྤེ༌ཆའེ༌ ནང༌ང༌ བྲིས༌ཏེ༌ མེད༌།
JOH 20:31 ཨིན༌ནའང༌ ཁྱོ༌ཞ༌གུན༌ནི༌ ཡེ༌ཤུ༌ ཁོང༌རང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཡང༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ཀ༌ ཏད༌པ༌ ཅོ༌ཅེས༌སི༌ ཕིའ༌ ངའེ༌ འི༌གུན༌ བྲིས༌ཏེ༌ ཨིན༌, ཡང༌ ཏེ༌བོའ༌ ཏད༌པ༌ ཅོ༌ཅེས༌པོའེ༌ ཁྱོ༌ཞ༌གུན༌ལ༌ ཁོང༌ངི༌ ཝང༌ གྱུད༌ཏེ༌ ཐའ༌མེད༌པའེ༌ མི༌ཚེ༌ ཐོབ༌ཨིན༌།
JOH 21:1 ཏི༌བེ༌རི༌ཡཱས༌སི༌ ཚོའེ༌ ཐའ༌མ༌ ཡང༌ ལན༌ཅིག༌ གཙོ༌བོ༌ ཡེ༌ཤུའི༌ ཁོང༌རང༌ ལོབ༌ཕྲུགས༌གུན༌ལ༌ སྔོན༌ ཅུག༌ག༌ ཛདས༌, ཏེ༌བོ༌ འི༌ཟུག༌གི༌ ཇུངས༌།
JOH 21:2 ཤི༌མོན༌ པི༌ཏྲར༌, ཚག༌ཕྲུག༌ ཟེར༌ཁན༌ནི༌ ཐོ༌མཱས༌, གཱ༌ལིལ༌ལིའི༌ ཡུལ༌ཇོངས༌སི༌ ཀ༌ནཱ༌པ༌ ན༌ཐན༌ནི༌འེལ༌, ཟེ༌བེད༌དིའི༌ བུ༌ཚ༌ ཉིས༌ཀོ༌ དང༌ ཡང༌ ལོབ༌ཕྲུགས༌ ཉིས༌སའང༌ ཏེ༌རུ༌ ཛོམས༌ཏེ༌ ཡོད༌པིན༌།
JOH 21:3 ཏེན༌ན༌ ཏུས༌ལ༌ ཤི༌མོན༌ པི༌ཏྲར༌རི༌ ཁོང༌གུན༌ལ༌ ཟེརས༌, “ང༌ ཉ༌ ཟུམ༌མ༌ ཆའད༌།” ཁོང༌གུན༌ནི༌ ཟེརས༌, “ང༌ཞའང༌ ཉམ༌པོ༌ ཡོང༌ཨིན༌།” ཏེ༌བོ༌ ཟེར༌ཏེ༌ ཁོང༌གུན༌ གྲུ༌ཟིང༌ངི༌ ནང༌ང༌ ཞོན༌ཏེ༌ སོང༌, ཨིན༌ནའང༌ ཏེ༌ ཚན༌ གང༌པོ༌ ཁོང༌གུན༌ལ༌ ཉ༌ མ༌ནེ༌ མ༌ཁད༌།
JOH 21:4 ནམ༌ལངས༌ས༌ཅིག༌ ཡེ༌ཤུ༌ ཚོའེ༌ ཐའ༌མ༌ ཞངས༌ཏེ༌ ཡོད༌པིན༌, ཨིན༌ནའང༌ ལོབ༌ཕྲུགས༌གུན༌ནི༌ ཁོང༌ ཡེ༌ཤུ༌ ཨིན༌ཁན༌བོ༌ ངོ༌ མ༌ཤེས༌།
JOH 21:5 ཡེ༌ཤུའི༌ ཁོང༌གུན༌ལ༌ བོད༌ད༌ ཛད༌ཏེ༌ མོལས༌, “ཛ༌འོ༌གུན༌ ཁྱོ༌ཞའ༌ ཉ༌ མ༌ཐུབ༌བ༌?” ཁོང༌གུན༌ནི༌ ཟེརས༌, “མ༌ཐུབ༌ལེ༌།”
JOH 21:6 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞའེ༌ ཉ༌དོལ༌བོ༌ གྲུ༌ཟིང༌ངི༌ ཡས༌ ཆོགས༌ལ༌ ཕོང༌ཤིག༌, ཏེ༌ནེ༌ ཁྱོ༌ཞའ༌ ཉ༌ ཐུབ༌ཨིན༌།” ཁོང༌གུན༌ནི༌ ཡེ༌ཤུའི༌ མོལ༌ཁན༌བོ༌ ཅོས༌, ཡང༌ འི༌ཟམ༌ ཉ༌ མ༌མང༌པོ༌ ཁད༌, ཉ༌དོལ༌བོ༌ གྲུ༌ཟིང༌ངི༌ ནང༌ང༌ ཐེན༌ཏེ༌ ཁྱོང༌ མ༌ཉན༌།
JOH 21:7 ཏེ༌ནེ༌ ཡེ༌ཤུའི༌ ལོབ༌ཕྲུགས༌ ཅེས༌པ༌བོའེ༌, ཤི༌མོན༌ པི༌ཏྲར༌ལ༌ ཟེརས༌, “ཁོང༌ ནི༌ གཙོ༌བོ༌ལེ༌ ཨིན༌ནོག༌།” ཏེ༌བོ༌ ཚོར༌ར༌ཅིག༌ ཤི༌མོན༌ པི༌ཏྲར༌རི༌ ཁོ༌རང༌ངི༌ ཀོས༌པོ༌ གོནས༌ ༼ཀ༌བོ༌ ཁོའེ༌ སྔུན༌ལ༌ ཉ༌ ཟུམ༌ཅེས༌སི༌ ཕིའ༌ ཕུད༌ཏེ༌ ཡོད༌པིན༌༽ ཡང༌ ཆུའི༌ ནང༌ང༌ ལྕེབས༌ཏེ༌ ཐའ༌མ༌ སོང༌།
JOH 21:8 ཞན༌ ལོབ༌ཕྲུགས༌གུན༌ནི༌ ཉ༌ གངས༌ཁན༌ནི༌ ཉ༌དོལ༌བོ༌ གྲུ༌ཟིང༌ང༌ ཏགས༌ ཡང༌ དྲུད༌ཨིན༌ པི༌ཏྲར༌རི༌ སྟིང༌རང༌ནེ༌ གྲུ༌ཟིང༌བོ༌ ཁྱོངས༌, ཁོང༌གུན༌ ཚོའེ༌ ཐའ༌མ༌ནེ༌ མ༌ ཐག༌རིང༌ང༌ མེད༌པིན༌, ཧ༌ལམ༌ མི༌ཀྲར༌ 92 ཟམ༌ཤིག༌།
JOH 21:9 ཡང༌ ཐའ༌མ༌ ལེབ༌བ༌ཅིག༌, ཁོང༌གུན༌ནི༌ སོལ༌ལེ༌ མེ༌ཀ༌ ཉ༌ དང༌ ཏ༌གི༌ གུན༌ ཐོང༌།
JOH 21:10 ཡེ༌ཤུའི༌ ཁོང༌གུན༌ལ༌ མོལས༌, “ཁྱོ༌ཞ༌གུན༌ནི༌ དག༌ས༌ ཟུམ༌ཁན༌ནི༌ ཉ༌ ཁ༌ཅིག༌ འི༌ཀ༌ ཁྱོང༌།”
JOH 21:11 ཤི༌མོན༌ པི༌ཏྲར༌ གྲུ༌ཟིང༌ངི༌ ནང༌ང༌ སོང༌ཏེ༌ ཉ༌དོལ༌བོ༌ ཆུའི༌ ཐའ༌མ༌ ཚོག༌པ༌ དྲུད༌ཏེ༌ ཁྱོངས༌, ཀ༌བོ༌ ཉ༌ ཆེན༌མོ༌ 153 གངས༌ཏེ༌ ཡོད༌པིན༌, ཉ༌ ཏེ༌ཟམ༌ མང༌པོ༌ ཡོད༌ཏེའང༌ ཉ༌དོལ༌བོ༌ མ༌ཆའད༌།
JOH 21:12 ཡེ༌ཤུའི༌ ཁོང༌གུན༌ལ༌ མོལས༌, “ཆིན༌ནན༌ ཟའ༌ལ༌ ཡོང༌ཤིག༌།” ལོབ༌ཕྲུགས༌གུན༌ནི༌ ཕྲོ༌ནེ༌ སུ༌ཞིག༌གིའང༌ ཁོང༌ང༌ “ཉེ༌རང༌ སུ༌ ཨིན༌?” ཟེར༌ཏེ༌ ཏྲི༌ཅེས༌སི༌ ཧམ༌པ༌ མ༌ཡོངས༌། ཁོང༌གུན༌ལ༌ ཁོང༌ གཙོ༌བོ༌ ཞུགས༌ཏེ༌ ཨིན༌ཁན༌བོ༌ ཤེས༌ཏེ༌ ཨིན༌པིན༌།
JOH 21:13 ཡེ༌ཤུ༌ མེ༌ ཡོད༌ས༌ སྐྱོད༌ཏེ༌ ཏ༌གི༌ ནམས༌ཏེ༌ ཁོང༌གུན༌ལ༌ སལས༌, ཏེན༌ན༌ ཙོགས༌ ཁོང༌ངི༌ ཉ༌ ཉམ༌པོ༌ ཅོའ༌ ཛདས༌།
JOH 21:14 ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལན༌ སུམ༌པ༌ ལོབ༌ཕྲུགས༌གུན༌ལ༌ ཇལ༌ ཅུག༌ག༌ ཛད༌ཏེ༌ ཨིན༌པིན༌།
JOH 21:15 ཁོང༌གུན༌ནི༌ ཆིན༌ནན༌ དོན༌ ཚར༌ར༌ཅིག༌, གཙོ༌བོ༌ ཡེ༌ཤུའི༌ ཤི༌མོན༌ པི༌ཏྲར༌ལ༌ ཏྲིའ༌ ཛདས༌, “ཤི༌མོན༌ ཡོ༌ཧཱ༌ནན༌ནི༌ བུ༌ཚ༌, དེན༌བ༌ ཁྱོ༌རང༌ངི༌ ང༌ ཁོང༌གུན༌ནི༌ སང༌ མང༌ང༌ ཅམས༌པ༌ ཅོའ༌དའ༌?” ཁོའེ༌ ལན༌ཏངས༌, “ཅོའད༌ལེ༌, གཙོ༌བོ༌ ངའེ༌ ཉེ༌རང༌ང༌ ཅམས༌པ༌ ཅོ༌ཁན༌བོ༌ ཉེ༌རང༌ངི༌ ཁྱེན༌ན༌ནོག༌།” ཡེ༌ཤུའི༌ ཁོའ༌ མོལས༌, “ངའེ༌ ལུག༌གུན༌ ཚོས༌།”
JOH 21:16 ཡེ༌ཤུའི༌ ཡང༌སྐྱར༌ ཁོའ༌ ཏྲིའ༌ ཛདས༌, “ཤི༌མོན༌ ཡོ༌ཧཱ༌ནན༌ནི༌ བུ༌ཚའ༌, དེན༌བ༌ ཁྱོ༌རང༌ངི༌ ང༌ ཅམས༌པ༌ ཅོའ༌དའ༌?” ཁོའེ༌ ལན༌ཏངས༌, “ཅོའད༌ལེ༌, ཀྱེ༌ གཙོ༌བོ༌ ངའེ༌ ཉེ༌རང༌ང༌ ཅམས༌པ༌ ཅོ༌ཁན༌བོ༌ ཉེ༌རང༌ངི༌ ཁྱེན༌ན༌ནོག༌།” ཡེ༌ཤུའི༌ ཁོའ༌ མོལས༌, “ཏེ༌ནེ༌ ངའེ༌ ལུག༌གུན༌ ཉ༌ར༌ ཅོས༌།”
JOH 21:17 ཁོང༌ངི༌ ལན༌ སུམ༌པ༌ ཁོའ༌ ཏྲིའ༌ ཛདས༌, “ཡོ༌ཧཱ༌ནན༌ནི༌ བུ༌ཚ༌ ཤི༌མོན༌, ཁྱོ༌རང༌ངི༌ ང༌ ཅམས༌པ༌ ཅོའ༌དའ༌?” ཡེ༌ཤུའི༌ ཁོའ༌ ལན༌ སུམ༌པ༌ “ཁྱོ༌རང༌ངི༌ ང༌ ཅམས༌པ༌ ཅོའ༌དའ༌” མོལ༌ཏེ༌ ཏྲིའ༌ ཛདས༌པ༌ པི༌ཏྲར༌ལ༌ སེམས༌སི༌ ནང༌ང༌ ཕོག༌, པི༌ཏྲར༌རི༌ ཟེརས༌, “གཙོ༌བོ༌ ཉེ༌རང༌ང༌ ཅི༌ཚང༌མ༌ ཁྱེན༌ན༌ནོག༌, ངའེ༌ ཉེ༌རང༌ང༌ ཅམས༌པ༌ ཅོ༌ཁན༌བོ༌ ཉེ༌རང༌ངི༌ ཁྱེན༌ན༌ནོག༌།” ཡེ༌ཤུའི༌ ཁོའ༌ མོལས༌, “ངའེ༌ ལུག༌གུན༌ ཚོས༌།”
JOH 21:18 ཡེ༌ཤུའི༌ མོལས༌, “ངའེ༌ ཁྱོ༌རང༌ང༌ དེན༌བ༌ དེན༌བ༌ ཟེར༌རད༌, ཁྱོ༌རང༌ ཁྱོག༌ཏོང༌ ཡོད༌ ཟ༌ནེ༌, ཁྱོ༌རང༌ རང༌ངི༌ ཀོས༌ལག༌ གོན༌ཏེ༌ ཀ༌རུ༌ ཆེན༌ སམ༌ནའང༌ ཆའད༌པིན༌, ཨིན༌ནའང༌ སྒས༌ས༌ཅིག༌ ཁྱོ༌རང༌ངི༌ ལག༌པ༌ རྐྱང༌ཨིན༌ ཡང༌ ཞན༌མ༌ཞིག༌གི༌ སྐོན༌ཏེ༌ ཁྱོ༌རང༌ མ༌ཐད༌ཁན༌ནི༌ ས༌ཆ༌གུན༌ལ༌ ཁྲིད༌ཏེ༌ ཁྱེར༌ཨིན༌།”
JOH 21:19 ཡེ༌ཤུའི༌ པི༌ཏྲར༌ ཤི༌ཚུལ༌བོ༌ གྱུད༌ཏེ༌ དཀོན༌མཆོག༌ག༌ སྤལ༌ ཁྱོང༌ཅེས༌པོ༌ ཁོའ༌ ཧ༌གོ༌ཅེས༌ལ༌ ཏེ༌བོ༌ མོལས༌། ཏེ༌ནེ༌ ཡེ༌ཤུའི༌ ཁོའ༌ མོལས༌, “ངའེ༌ སྟིང༌རང༌ནེ༌ བྲོངས༌།”
JOH 21:20 པི༌ཏྲར༌རི༌ གྱབ༌ ལོགས༌ཏེ༌ ལྟས༌པ༌ ཡེ༌ཤུའི༌ ཅེས༌པ༌ ཛད༌ཁན༌ནི༌ ལོབ༌ཕྲུགས༌པོ༌ ཁོང༌གུན༌ནི༌ གྱབ༌ནེ༌ ཡོང༌ངད༌པིན༌, ཁོ༌ ཕི༌ཏོག༌གི༌ དོན༌ཏང༌ངི༌ ཏུས༌ལ༌ ཡེ༌ཤུའ༌ ཉེས༌ཏེ༌ “ཀྱེ༌ གཙོ༌བོ༌ ཉེ༌རང༌ང༌ ངོ༌ལོག༌ ཅོ༌ཅེས༌ཅན༌བོ༌ སུ༌ ཨིན༌” ཟེར༌ཏེ༌ ཏྲིས༌ཁན༌ནི༌ ལོབ༌ཕྲུགས༌པོ༌ ཨིན༌།
JOH 21:21 པི༌ཏྲར༌རི༌ ཁོ༌ ཐོང༌ཏེ༌ ཡེ༌ཤུའ༌ ཏྲིས༌, “ཀྱེ༌ གཙོ༌བོ༌ ཁོའ༌ ཅི༌ ཆེན༌?”
JOH 21:22 ཡེ༌ཤུའི༌ ལན༌སལས༌, “ཀལ༌ཏེས༌ ངའེ༌ ང༌ ལོགས༌ཏེ༌ ཡོང༌ཡོང༌ ཚག༌པ༌ ཁོ༌ སོན༌ཏེའ༌ བོར༌ར༌ ཐད༌ན༌ ཁྱོ༌རང༌ང༌ ཅི༌ རག༌? ཁྱོ༌རང༌ ངའེ༌ སྟིང༌རང༌ནེ༌ བྲོངས༌།”
JOH 21:23 ཏེ༌བོའེ༌ཕིའ༌ སྤུན༌གུན༌ནི༌ ནང༌ང༌ འི༌ ལོབ༌ཕྲུགས༌པོ༌ མ༌ནེ༌ མི༌ཤི༌ཅེས༌ ཨིན༌ནོག༌ ཟེར༌ཏེ༌ འུ༌ཡ༌ གྱུག༌། ཨིན༌ནའང༌ ཡེ༌ཤུའི༌ ཁོ༌ མ༌ནེ༌ མི༌ཤི༌ མོལ༌ཏེ༌ མན༌པིན༌, ཁོང༌ངི༌, “ཀལ༌ཏེས༌ ངའེ༌ ང༌ ལོགས༌ཏེ༌ ཡོང༌ཡོང༌ ཚག༌པ༌ ཁོ༌ སོན༌ཏེའ༌ བོར༌ར༌ ཐད༌ན༌ ཁྱོ༌རང༌ང༌ ཅི༌ རག༌?” ཅིག༌པོ༌ མོལ༌ཏེ༌ ཨིན༌པིན༌།
JOH 21:24 ཏེན༌ན༌ ལོབ༌ཕྲུགས༌པོ༌ ནི༌ འི༌ སྤེ༌ཆའེ༌ ནང༌ང༌ འི༌ ཚང༌མའེ༌ སྐོར༌ལ༌ བྲིས༌ཏེ༌ སྤང༌པོ༌ ཏང༌ཁན༌བོ༌ ཨིན༌, ཡང༌ ང༌ཞ༌གུན༌ལ༌ ངའེ༌ སྤང༌པོ༌གུན༌ དེན༌བ༌ ཨིན༌ཁན༌བོ༌ གྱུས༌ཡོད༌།
JOH 21:25 ཡེ༌ཤུའི༌ ཞན༌ མང༌པོ༌ ཆག༌ལས༌སའང༌ ཛད༌ཏེ༌ ཨིན༌ནོག༌། ཀལ༌ཏེས༌ ཏེ༌ ཚང༌མ༌ བྲིས༌ཏེ༌ ཨིན༌པིན༌ན༌, ངའེ༌ སམ༌མ༌རག༌ འི༌ ཇིག༌རྟེན༌ གང༌པོའེ༌ ནང༌ང༌ ཏེ༌ སྤེ༌ཆ༌གུན༌ བོར༌སའེ༌ ནས༌ས༌ མེད༌གྲོ༌།
ACT 1:1 ཅེས༌པའེ༌ ཐེའུ༌ཕེ༌ལུས༌ ངའེ༌ བྲིས༌ཁན༌ནི༌ སྤེ༌ཆ༌ ཏང༌པོའེ༌ ནང༌ང༌, གཙོ༌བོ༌ ཡེ༌ཤུ༌ དཀོན༌མཆོག༌གི༌ ནམ༌ཁའ༌ ལེན༌ལེན༌ ཚོག༌པ༌ ཁོང༌ངི༌ ལབ༌ཞ༌ སལ༌ཁན༌ དང༌ ཆག༌ལས༌ ཛད༌ཁན༌ ཚང༌མའེ༌ སྐོར༌ལ༌ བྲིས༌ཏེ༌ ཡོད༌། ནམ༌ཁའ༌ ལེན༌ན༌ ཛད༌དི༌ སང༌ སྔུན༌ལ༌, ཡེ༌ཤུའི༌ ཁོང༌རང༌ངི༌ ལྡམ༌མ༌ ཛད༌ཁན༌ནི༌ སྐུ༌ཚབས༌གུན༌ལ༌ ཏམ༌པའེ༌ ཐུག༌ཉིད༌ གྱུད༌ཏེ༌ ལབ༌ཞ༌ སལ༌ཏེ༌ ཨིན༌པིན༌།
ACT 1:3 རྡུག༌ངལ༌ ནམས༌ཏེ༌ སྟིང༌ནེ༌ ཡེ༌ཤུའི༌ ཁོང༌ སོན༌ཏེའ༌ ཞངས༌ཁན༌ནི༌ སྟགས༌ མང༌པོ༌ ཁོང༌གུན༌ལ༌ སྟན༌ན༌ ཛད༌ཏེ༌, ཞག༌ 40 ཁོང༌གུན༌ལ༌ ཁོང༌རང༌ སྔོན༌ ཅུག༌ག༌ ཛདས༌ ཡང༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ད༌ ཛདས༌།
ACT 1:4 ལན༌ཅིག༌ ལོབ༌ཕྲུགས༌གུན༌ ཉམ༌པོ༌ དོན༌ཏང༌ དོན༌ནི༌ ཏུས༌ ཡེ༌ཤུའི༌ མོལས༌, “ངའེ༌ ཁྱོ༌ཞ༌གུན༌ལ༌ ཟེར༌ཁན༌ ནང༌ཞིན༌, ངའེ༌ ཡབ༌བི༌ ཞལ༌ཆད༌ ཛད༌ཁན༌བོ༌ ཐོབ༌ཐོབ༌ ཚག༌པ༌ ཁྱོ༌ཞའ༌ ཡེ༌རུ༌ཤ༌ལེམ༌ནེ༌ ཕི༌ལོག༌ག༌ མ༌ཆ༌།
ACT 1:5 ཡོ༌ཧཱ༌ནན༌ནི༌ མི༌གུན༌ལ༌ ཆུའི༌ཁྲུས༌ ཏངས༌ཏེ༌ ཨིན༌པིན༌, ཨིན༌ནའང༌ ཞག༌ ཁ༌ཅིག༌གི༌ ནང༌ང༌ ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌དི༌ ཁྲུས༌ཐོབ༌ཨིན༌།”
ACT 1:6 སྐུ༌ཚབས༌གུན༌ ཡེ༌ཤུ༌ ཉམ༌པོ༌ ཛོམས༌ཏེ༌ ཡོད༌ ཟ༌ནེ༌ ཁོང༌གུན༌ནི༌ ཟེརས༌, “གཙོ༌བོ༌ལེ༌, ཉེ༌རང༌ངི༌ ཨིས༌ར༌ཨེལ༌པ༌གུན༌ལ༌ རོམ༌མི༌ ཝང༌ནེ༌ རང༌ཝང༌ སལ༌ཏེ༌ ང༌དང༌ངི༌ གྱལ༌སྲིད༌པོ༌ ལོགས༌ཏེ༌ ཁྱོང༌ང༌ ཛད༌ཅེས༌སི༌ ཏུས༌པོ༌ ཨིན༌ན༌?”
ACT 1:7 ཡེ༌ཤུའི༌ ཁོང༌གུན༌ལ༌ མོལས༌, “ཏེ༌ ཏུས༌སྐབས༌ དང༌ ནས༌ལུག༌ གུན༌ ལྡམ༌མ༌ ཛད༌ཅེས༌སི༌ ཝང༌བོ༌ ཡབ༌ ཅིག༌པོའ༌ ཡོད༌ཏེ༌ ཨིན༌ནོག༌, ཡང༌ ཁྱོ༌ཞའ༌ ཏེ༌གུན༌ ཤེས༌གོས༌ མེད༌པ༌ ཨིན༌ནོག༌།
ACT 1:8 ཏམ༌པའེ༌ ཐུག༌ཉིད༌ ཁྱོ༌ཞའེ༌ཀ༌ བབས༌སི༌ ཏུས༌, ཁྱོ༌ཞ༌གུན༌ལ༌ སྟོབས༌ ཐོབ༌ཏེ༌ ཁྱོ༌ཞ༌གུན༌ནི༌ ཡེ༌རུ༌ཤ༌ལེམ༌, ཡ༌ཧུ༌དཱ༌ ཡུལ༌ གང༌པོ༌, ས༌མར༌རི༌ཡཱ༌ ཡང༌ ཇིག༌རྟེན༌ གང༌པོའེ༌ ནང༌ང༌ ངའེ༌ སྤང༌པོ༌ ཏང༌ཨིན༌།”
ACT 1:9 ཏེ༌ ཚང༌མ༌ མོལ༌ཏེ༌ སྟིང༌ནེ༌ ཁོང༌གུན༌ནི༌ མིག༌གི༌ དུན༌ལ༌ གཙོ༌བོ༌ ཡེ༌ཤུ༌ ནམ༌ཁའ༌ ཁྱེར༌ར༌ ཛད༌ཏེ༌ སྲིན༌ནི༌ ཀབ༌བ༌ ཛདས༌ ཡང༌ ཁོང༌གུན༌ནི༌ ཁོང༌ ཇལ༌ མ༌ཐུབ༌།
ACT 1:10 ཁོང༌གུན༌ནི༌ ཡེ༌ཤུ༌ ནམ༌ཁའ༌ ལེན༌ན༌ ཛད༌ཁན༌བོའ༌ ལྟེན༌ དུགས༌ཏེ༌ ཡོད༌ ཟ༌ནེ༌, ཧུན༌མེད༌ལ༌ མི༌ ཀོས༌ ཀར༌པོ༌ གོན༌ཁན༌ ཉིས༌ ཁོང༌གུན༌ནི༌ དུན༌ལ༌ ཇལ༌ཏེ༌
ACT 1:11 མོལས༌, “གཱ༌ལིལ༌ལི༌པ༌གུན༌, ཅི༌ཕིའ༌ ནམ༌ཁའ༌ ལྟས༌ཏེ༌ དུག༌གད༌? ཀ༌ཟུག༌ ཁྱོ༌ཞའེ༌ ཡེ༌ཤུ༌ ནམ༌ཁའ༌ ལེན༌ན༌ ཛད༌ཁན༌བོ༌ ཐོང༌, ཏེན༌ན༌ ཙོགས༌ལ༌ ཁོང༌ ཡང༌སྐྱར༌ ལོགས༌ཏེ༌ སྐྱོད༌ཨིན༌།”
ACT 1:12 ཏེ༌ སྟིང༌ནེ༌ ཁོང༌གུན༌ ཨོ༌ལིཝ༌ཝི༌ རི༌ ཀ༌ནེ༌ བབས༌ཏེ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོདས༌, ཀ༌བོ༌ གྱལ༌ས༌ནེ༌ ཀི༌ལོ༌མི༌ཀྲར༌ ཅིག༌ ཐག༌རིང༌ང༌ ཡོད༌པིན༌།
ACT 1:13 ཏེ༌རུ༌ ལེབ༌བ༌ཅིག༌, སྐུ༌ཚབས༌གུན༌ སྔུན༌ལ༌ དུགས༌ཏེ༌ ཡོད༌ཁན༌ནི༌ ཁང༌པའེ༌ སྟང༌ཐོག༌ག༌ སོང༌། ཁོང༌གུན༌ པི༌ཏྲར༌, ཡོ༌ཧཱ༌ནན༌, ཡ༌ཀོབ༌, ཨེན༌གྲིའུ༌, ཕི༌ལིབ༌, ཐོ༌མཱས༌, བར༌ཐོལ༌མཱ༌, མད༌ཐཱ༌, ཨལ༌ཕི༌འུས༌སི༌ བུ༌ཚའ༌ ཡ༌ཀོབ༌, ཤི༌མོན༌ ཡུལ༌དད༌ཅན༌ དང༌ ཡ༌ཀོབ༌བི༌ བུ༌ཚའ༌ ཡུ༌དཱ༌ གུན༌ ཨིན༌པིན༌།
ACT 1:14 ཏེ༌ སྐུ༌ཚབས༌ ཚང༌མ༌ སེམས༌ ཅིག༌ སོང༌ཏེ༌ ཏུས༌གྱུན༌ མོས༌ལམ༌ ཞུའ༌ལ༌ ཛོམ༌མད༌པིན༌, ཞན༌ བུ༌མོ༌ ཁ༌ཅིག༌, ཡེ༌ཤུའི༌ ཨ༌མ༌ མིར༌ཡམ༌ དང༌, ཡེ༌ཤུའི༌ ནོ༌གུན༌ནའང༌, ཁོང༌གུན༌ ཉམ༌པོ༌ ཛོམ༌མད༌པིན༌།
ACT 1:15 ལན༌ ཅིག༌ ནམ༌ ཏད༌པ༌ཅན༌ནི༌ མི༌ 120 ཛོམས༌ཏེ༌ ཡོད༌དི༌ ཏུས༌, པི༌ཏྲར༌ ལངས༌ཏེ༌ མོལས༌,
ACT 1:16 “སྤུན༌གུན༌ ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཁན༌ ནང༌ཞིན༌, ཏམ༌པའེ༌ ཐུག༌ཉིད༌དི༌ གྱལ༌པོ༌ དཱ༌བིད༌ གྱུད༌ཏེ༌ ཡུ༌དཱའེ༌ སྐོར༌ལ༌ ལུང༌སྟན༌ ཤད༌ཁན༌གུན༌ གྲུབ༌གོས༌ཏེ༌ ཨིན༌ནོག༌, ཀ༌བོ༌ ཡུ༌དཱ༌ ནི༌ ཡེ༌ཤུ༌ ཟུམ༌ཁན༌གུན༌ནི༌ ལམ༌སྟན༌པ༌ གྱུར༌།
ACT 1:17 ཁོ༌ ང༌ཞའེ༌ ཕྲོ༌པ༌ ཡང༌ ཁོའེ༌ ང༌ཞའ༌ ཉམ༌པོ༌ ཞབས༌ཏོག༌ ཞུས༌ཏེ༌ ཨིན༌པིན༌།”
ACT 1:18 ༼ཨིན༌ནའང༌ ཁོའེ༌ ལས༌ངན༌བོའེ༌ རིན༌བོའ༌ ཞིང༌ཞིག༌ ཉོས༌, ཤི༌ཏེ༌ སའེ༌ཀ༌ བུད༌, ཁོའེ༌ གྲོད༌པ༌ ཆད༌ཏེ༌ ནང༌ཆ༌ ཚང༌མ༌ བིང༌།
ACT 1:19 ཡང༌ ཏེ༌ཟུག༌ ཇུང༌ཁན༌བོ༌ ཡེ༌རུ༌ཤ༌ལེམ༌པ༌ ཚང༌མའེ༌ ཚོར༌, ཏེ༌ ཞིང༌བོའེ༌ མིང༌ང༌ ཨིབ༌རི༌པའེ༌ སྐད༌དི༌ ནང༌ང༌ ཨ༌ཀེལ༌ད༌མ༌ ཏགས༌, ཀ༌བོའེ༌ ཏོན༌བོ༌ ཁྲག༌གི༌ ཞིང༌ ཨིན༌ནོག༌།༽
ACT 1:20 པི༌ཏྲར༌རི༌ མོལས༌, “སུང༌གུར༌རི༌ སྤེ༌ཆའེ༌ ནང༌ང༌ ‘ཁོའེ༌ ཁང༌པའེ༌ ནང༌ང༌ སུའང༌ མ༌དུག༌ག༌ ནང༌སྟོང༌ ཆ༌ཤིག༌ །’ སུང༌གུར༌རི༌ ཞན༌ཡང༌ ནས༌ས༌ཞིག༌གི༌ཀ༌, ‘ཁོའེ༌ ཝང༌སྲུལ༌ཅེས༌སི༌ ཀོ༌ས༌ ཞན༌ཞིག༌གི༌ ཁྱེར༌ཨིན༌’ བྲིའ༌ ཛད༌ཏེ༌ ཨིན༌ནོག༌།”
ACT 1:21 “ཏེ༌བོའེ༌ཕིའ༌ གཙོ༌བོ༌ ཡེ༌ཤུ༌ ང༌དང༌གུན༌ ཉམ༌པོ༌ ཡོད༌ ཟ༌ནེ༌ ༼ཡོ༌ཧཱ༌ནན༌ནི༌ ཡེ༌ཤུའ༌ ཁྲུས༌སལ༌ལི༌ ཏུས༌ནེ༌ ཁོང༌ ནམ༌ཁའ༌ ལེན༌ལེན༌ ཚག༌པ༌༽ ཏུས༌གྱུན༌ ང༌དང༌ ཉམ༌པོ༌ ཡོད༌ཁན༌གུན༌ནི༌ ཕྲོ༌ནེ༌ ང༌དང༌ངི༌, ཡུ༌དཱའེ༌ ཚབས༌ཤིག༌ ལྡམ༌གོས༌། སུ༌ཞིག༌ ལྡམ༌ནའང༌ ཁོ༌ ང༌དང༌ ཉམ༌པོ༌ ཡེ༌ཤུ༌ སོན༌ཏེའ༌ ཞངས༌ཁན༌ནི༌ སྤང༌པོ༌ གྱུར༌གོས༌།”
ACT 1:23 ཏེ༌ནེ༌ ཁོང༌གུན༌ནི༌ མི༌ ཉིས༌སི༌ མིང༌ ལྡམ༌མ༌ལ༌ ཁྱོངས༌, མིང༌ ཅིག༌པོ༌ ཡོ༌སེབ༌ ཡ༌ བཱར༌ས༌བས༌ ༼ཁོའ༌ ཡུས༌ཏུས༌སའང༌ ཟེར༌རད༌པིན༌༽ ཡང༌ མིང༌ ཅིག༌པོ༌ མད༌ཐི༌ཡས༌ ཨིན༌པིན༌།
ACT 1:24 ཏེ༌ནེ༌ ཁོང༌གུན༌ནི༌ མོས༌ལམ༌ ཞུས༌, “ཀྱེ༌ གཙོ༌བོ༌, ཉེ༌རང༌ངི༌ མི༌ཚང༌མའེ༌ སྙིང༌ ཁྱེན༌ན༌ནོག༌། སྐུ༌ཚབས༌སི༌ ལས༌ ཕངས༌ཏེ༌ འོས༌པ༌ ཨིན༌ཁན༌ནི༌ ཉལ༌ཝའེ༌ ནང༌ང༌ སོང༌ཁན༌ནི༌ ཡུ༌དཱའེ༌ ཚབས༌ལ༌, ཡེ༌ཤུའི༌ སྐུ༌ཚབས༌ དང༌ ཞབས༌ཏོག༌ ཞུ༌ཅེས༌སི༌ ཕིའ༌ འི༌ ཉིས༌ཀོའེ༌ ནང༌ནེ༌ ཉེ༌རང༌ངི༌ ལྡམ༌མ༌ ཛད༌ཁན༌བོ༌ ང༌ཞའ༌ སྟན༌ན༌ ཛད༌།”
ACT 1:26 ཆོ༌ལོ༌ རིལ༌ཏེ༌ གྱན༌ གྱབས༌པ༌ མད༌ཐི༌ཡས༌སི༌ མིང༌ བིང༌, ཡང༌ ཁོ༌ སྐུ༌ཚབས༌ རྕུག༌ཤིག༌གི༌ ཕྲོའ༌ སྲེས༌།
ACT 2:1 པེན༌ཏི༌ཀོས༌སི༌ ཏུས༌ཆེན༌ནི༌ ཞག༌ག༌ ཁོང༌ ཚང༌མ༌ ཁང༌པ༌ཞིག༌གི༌ ནང༌ང༌ ཛོམས༌ཏེ༌ ཡོད༌ ཟ༌ནེ༌
ACT 2:2 ཧུན༌མེད༌ལ༌ ནམ༌ཁའ༌ནེ༌ ལུང༌རག༌ ཀྲག༌པོའེ༌ སྐད༌ ཙོགས༌ཤིག༌ ཡོངས༌ཏེ༌ ཁོང༌ ཚང༌མ༌ ཛོམས༌ཏེ༌ ཡོད༌ཁན༌ནི༌ ཁང༌པ༌བོ༌ གང༌།
ACT 2:3 ཏེ༌ནེ༌ ཁོང༌གུན༌ལ༌ མེ༌ མེ༌ལྡབ༌ ཙོགས༌ མང༌པོ༌ ཐོང༌ ཀ༌གུན༌ སོ༌སོ༌ བེས༌ཏེ༌ ཁོང༌ རེ༌རེ༌ཀ༌ བབས༌།
ACT 2:4 ཁོང༌ ཚང༌མ༌ ཏམ༌པའེ༌ ཐུག༌ཉིད༌དི༌ གངས༌ ཡང༌ ཐུག༌ཉིད༌དི༌ ཁོང༌གུན༌ལ༌ ཁྱུད༌ སལ༌ཅེས༌པོའེ༌, ཁོང༌གུན༌ནི༌ སྐད༌ སོ༌སོའེ༌ ནང༌ང༌ སྤེ༌ར༌ ཏང༌ཅེས༌ གོ༌ཟུག༌།
ACT 2:5 ཏེ༌ཏུས༌ལ༌ དཀོན༌མཆོག༌ག༌ ཏད༌པ༌ ཅོ༌ཁན༌ནི༌ ཡ༌ཧུ༌དཱ༌པ༌གུན༌ ཇིག༌རྟེན༌ནི༌ ཆོགས༌ ཚང༌མ༌ནེ༌ ཡོངས༌ཏེ༌, ཡེ༌རུ༌ཤ༌ལེམ༌མ༌ ཛོམ༌ཏེ༌ ཡོད༌པིན༌།
ACT 2:6 ཏེ༌ སྐད༌གུན༌ ཚོར༌ར༌ཅིག༌ མི༌ མང༌པོ༌ ཛོམ༌, ཡང༌ ཚང༌མ༌ ཧ༌ལས༌ཏེ༌ ཧན༌གྲང༌ སོང༌ ཅིའ༌ཟེར༌ན༌ ཁོང༌ ཚང༌མའེ༌ ཁོ༌རང༌གུན༌ནི༌ སྐད༌དི༌ ནང༌ང༌ ལོབ༌ཕྲུགས༌གུན༌ནི༌ སྤེ༌ར༌ ཏང༌ཨིན༌ ཚོར༌།
ACT 2:7 ཁོང༌གུན༌ མ༌སྲན༌ཏྲེ༌ ཧ༌ལས༌ཏེ༌ ཅིག༌ དང༌ ཅིག༌ག༌ ཟེརས༌, “ཉོན༌ཤིག༌, འི༌ སྤེ༌ར༌ ཏང༌ཁན༌ ཚང༌མ༌ གཱ༌ལིལ༌ལི༌པ༌ མ༌ནོག༌ག༌?
ACT 2:8 ཏེ༌ནེ༌ ཀ༌ཟུག༌གི༌ ཁོང༌གུན༌ནི༌ ང༌དང༌ རེ༌རེ༌ སྐད༌དི༌ ནང༌ང༌ སྤེ༌ར༌ ཏང༌ཨིན༌ ཚོར༌ར༌ནོག༌།
ACT 2:9 ང༌དང༌གུན༌ནི༌ ཕྲོའ༌ པར༌ཐ༌པ༌, མེད༌ཡེའ༌པ༌, ཨེ༌ལམ༌པ༌, མེ༌སོ༌པོ༌ཏོ༌མིའ༌པ༌, ཡ༌ཧུ༌དཱ༌པ༌, ཀ༌པ༌དོ༌ཀི༌ཡཱ༌པ༌, པོན༌ཏུས༌པ༌, ཨ༌སི༌ཨཱ༌པ༌,
ACT 2:10 ཕརིག༌འེ༌ཡཱ༌པ༌, པམ༌ཕིལ༌ཡཱ༌པ༌, ཨི༌ཇིབ༌པ༌, ཀི༌རིན༌ནི༌ ཉེ༌མོ༌ ཡོད༌ཁན༌ནི༌ ལིབ༌ཡཱ༌པ༌, རོམ༌མི༌ གྱལ༌སའེ༌ བེས༌པ༌,
ACT 2:11 ༼ཡ༌ཧུ༌དཱ༌པ༌ དང༌ ཡ༌ཧུ༌དཱ༌པའེ༌ ཆོས༌ལ༌ ཏད༌པ༌ ཁྱོང༌ཁན༌ ཡ༌ཧུ༌དཱ༌པ༌ མན༌ཁན༌གུན༌༽ ཡང༌ ཀརིཏྲ༌པ༌ དང༌ ཨ༌ར༌བིའ༌པ༌ གུན༌ ཡོད༌ཏེ༌ མ༌ནོག༌ག༌? ཨིན༌ནའང༌ ང༌དང༌གུན༌ལ༌ འི༌ མི༌གུན༌ནི༌ ང༌དང༌རང༌ངི༌ སྐད༌དི༌ ནང༌ང༌ དཀོན༌མཆོག༌གི༌ ཧ༌ལས༌ཤེས༌སི༌ ཆག༌ལས༌གུན༌ ཤད༌ཨིན༌ ཚོར༌ཨིན༌ ཨིན༌ནོག༌།”
ACT 2:12 ཁོང༌ ཚང༌མ༌ ཧ༌ལས༌ཏེ༌ ཐེ༌ཚོམས༌ སོང༌ཏེ༌ ཅིག༌ དང༌ ཅིག༌ག༌, “འི༌ ནས༌ལུག༌གི༌ ཏོན༌བོ༌ ཅི༌ ཨིན༌ནོག༌?” ཟེར༌ཨིན༌ ཏྲིས༌།
ACT 2:13 ཞན༌ ཁ༌ཅིག༌གི༌ ཁྲེལ༌གོད༌ ཏང༌ཨིན༌ ཟེརས༌, “འི༌གུན༌ ཆང༌ མང༌པོ༌ ཐུངས༌ཏེ༌ ར༌རོས༌ཏེ༌ ཨིན༌ནོག༌།”
ACT 2:14 ཏེ༌ནེ༌ པི༌ཏྲར༌ སྐུ༌ཚབས༌ རྕུག༌ཅིག༌པོ༌ ཉམ༌པོ༌ མི༌ཚོགས༌སི༌ དུན༌ལ༌ སྐྱོད༌ཏེ༌ སྐད༌ ཆེན༌མོའེ༌ ནང༌ང༌ མོལས༌, “ཡ༌ཧུ༌དཱ༌པ༌ དང༌ ཡེ༌རུ༌ཤ༌ལེམ༌མ༌ དུག༌ཁན༌ གུན༌ ངའེ༌ ཟེར༌ཅེས༌ཅན༌བོའ༌ གྱལ༌ལ༌ ཅོས༌ཏེ༌ ཉོན༌ཤིག༌། འི༌ ཇུང༌ཁན༌གུན༌ ངའེ༌ ཁྱོ༌ཞའ༌ ཧ༌གོ༌ཅུག༌ཨིན༌,
ACT 2:15 ཁྱོ༌ཞའེ༌ འི༌ མི༌གུན༌ ར༌རོས༌ཏེ༌ ཨིན༌ནོག༌ སམ༌ཁན༌བོ༌ ཀྲང༌པོ༌ མ༌ནོག༌, ལྟོས༌ཤིག༌གའང༌ ང༌ཏོག༌གི༌ ཆུ༌ཚོད༌ རྒུ༌པ༌ མ༌ནེ༌ ཆ༌ མི༌དུག༌།
ACT 2:16 ཨིན༌ནའང༌ ཏུས༌ མང༌པོའེ༌ སྔུན༌ལ༌ འི༌བོའེ༌ སྐོར༌ལ༌ ལུང༌སྟོན༌པ༌ ཡོ༌ཨེལ༌ལི༌ མོལས༌,
ACT 2:17 གཙོ༌བོ༌ དཀོན༌མཆོག༌གི༌ མོལས༌, ‘ཐའ༌མའེ༌ ཏུས༌ལ༌ ངའེ༌ ང༌རང༌ངི༌ སེམས༌ཉིད༌ མི༌ཚང༌མའེ༌ཀ༌ ལུག༌ཨིན༌, ཡང༌ ཁྱོ༌ཞའེ༌ བུ༌ཚ༌ དང༌ བུ༌མོ༌ གུན༌ནི༌ ལུང༌སྟན༌ ཏང༌ཨིན༌། ཁྱོ༌ཞའེ༌ ཞུ༌ནུ༌གུན༌ནི༌ ཞལ༌ཟིགས༌ ཐོང༌ཨིན༌, ཡང༌ ཁྱོ༌ཞའེ༌ རྒད༌པོ༌གུན༌ལ༌ ཉི༌ལམ༌ ཐོང༌ཨིན༌།
ACT 2:18 ཡང༌ ངའེ༌ ཏེན༌ན༌ ཏུས༌ལ༌ ངའེ༌ ཡོག༌པོ༌ དང༌ ཡོག༌མོ༌ གུན༌ནི༌ཀའང༌ ང༌རང༌ངི༌ སེམས༌ཉིད༌ ལུག༌ཨིན༌, ཡང༌ ཁོང༌གུན༌ནི༌ ལུང༌སྟན༌ ཏང༌ཨིན༌།
ACT 2:19 ངའེ༌ ནམ༌ཁའེ༌ ནང༌ང༌ ཧ༌ལས༌ཤེས༌སི༌ ལས༌ དང༌ ཇིག༌རྟེན༌ནི༌ཀ༌ སྟགས༌ གུན༌ སྟན༌ཨིན༌, ཏེ༌གུན༌ ཁྲག༌, མེ༌ དང༌ ཏུད༌པ༌ ནག༌པོ༌ གུན༌ ཨིན༌།
ACT 2:20 གཙོ༌བོའེ༌ ཀྲག༌ཅན༌ དང༌ སྤལ༌ཅན༌ ཞག༌པོ༌ ཇུང༌ངི༌ སང༌ སྔུན༌ལ༌ ཉི༌མ༌ མུན༌གྲིག༌ ཆེན༌ ཡང༌ ཟླ༌ཝ༌ ཁྲག༌ ཙོགས༌ མར༌པོ༌ གྱུར༌ཨིན༌།
ACT 2:21 ཨིན༌ནའང༌ གཙོ༌བོའེ༌ ཚན༌ ཁུར༌ཁན༌ ཚང༌མའ༌ ཐར༌པ༌ ཐོབ༌ཨིན༌།’”
ACT 2:22 “ཏ༌ ཁྱོ༌ཞའ༌ ཨིས༌ར༌ཨེལ༌པ༌གུན༌ ངའེ༌ སྤེ༌ར༌ ཉོན༌ཤིག༌། ཁྱོ༌ཞ༌གུན༌ལ༌ གྱུས༌ཨིན༌ནོག༌ དཀོན༌མཆོག༌གི༌ ཡེ༌ཤུ༌ གྱུད༌ཏེ༌ ཧ༌ལས༌ཤེས༌སི༌ ཛད༌པ༌, ལྟས༌ དང༌ སྟགས༌ གུན༌ ཛད༌ཏེ༌ ཁོང༌ངི༌ ན༌ཙ༌རེད༌པ༌ ཡེ༌ཤུ༌ ཀལ༌ལ༌ ཛད༌ཏེ༌ ཨིན༌ཁན༌བོ༌ སྟན༌ན༌ ཛདས༌།
ACT 2:23 དཀོན༌མཆོག༌གི༌ ཇུང༌ཅེས༌ཅན༌གུན༌ ཁྱེན༌ཏེ༌ ཁོང༌རང༌ངི༌ ཐབས༌ ནང༌ཞིན༌ ཡེ༌ཤུ༌ ཁྱོ༌ཞ༌གུན༌ནི༌ ལག༌ག༌ སྟད༌ཅུགས༌ ཡང༌ དཀོན༌མཆོག༌གི༌ ཁྲིམས༌ ཁའ༌ མ༌ཉན༌ཁན༌གུན༌ནི༌ རོགས༌ ཉམ༌པོ༌ ཁྱོ༌ཞ༌གུན༌ནི༌ ཁོང༌ རྐྱང༌ཤིང༌ངི༌ཀ༌ རྐྱང༌ཅུགས༌ཏེ༌ སདས༌།
ACT 2:24 ཨིན༌ནའང༌ དཀོན༌མཆོག༌གི༌ ཁོང༌ ཤི༌ཏེ༌ རྡུག༌ངལ༌ལི༌ ནང༌ང༌ ལུས༌ མ༌ཤུག༌ག༌ སོན༌ཏེའ༌ ལང༌ང༌ ཛདས༌, ཅིའ༌ཞུ༌ན༌ ཤི༌ཅེས༌སི༌ ཝང༌ངི༌ ཁོང༌ ཟུམས༌ཏེ༌ མ༌ནེ༌ བོར༌ མི༌ཉན༌།
ACT 2:25 སུང༌རབས༌སི༌ ནང༌ང༌ གྱལ༌པོ༌ དཱ༌བིད༌དི༌ མ༌ཤི༌ཀའེ༌ སྐོར༌ལ༌ མོལ༌དུག༌, ‘ངའ༌ ཐོང༌, གཙོ༌བོ༌ ངའེ༌ དུན༌ལ༌ ཏུས༌གྱུན༌ ཞུགས༌ཏེ༌ དུག༌། ཁོང༌ ངའ༌ རོགས༌ ཛད༌ད༌ ང༌ ཉམ༌པོ༌ ཞུགས༌ པ༌སང༌ ང༌ ཅའང༌ ཇིགས༌གོས༌ མེད༌།
ACT 2:26 ཏེན༌ན༌བོའེ༌ཕིའ༌ ངའེ༌ སེམས༌ ཐད༌པོ༌ ཨིན༌, ཡང༌ ངའེ༌ ལྕེ༌ ཉེ༌རང༌ང༌ སྟོད༌པ༌ ཕུལ༌ལད༌། མ༌ཚད༌ ཞི༌དེ༌ ཉམ༌པོ༌ ངའེ༌ ཟུགས༌པོའང༌ རེ༌ཝ༌ ཡོད༌,
ACT 2:27 ཅིའ༌ཟེར༌ན༌ ཉེ༌རང༌ངི༌ ངའེ༌ སེམས༌ཉིད༌པོ༌ ཤི༌ཁན༌གུན༌ནི༌ ཕྲོའ༌ ཕངས༌ཏེ༌ བོར༌ར༌ མི༌ཛད༌, ཡ༌ ཉེ༌རང༌ངི༌ ཏམ༌པའེ༌ ཞབས༌ཏོག༌པ༌བོ༌ རུལ༌ ཅུག༌ག༌ མི༌ཛད༌།
ACT 2:28 ཉེ༌རང༌ངི༌ ངའ༌ སོན༌ཏེ༌ ལང༌ཅེས༌སི༌ ལམ༌བོ༌ སྟན༌ན༌ ཛད༌, ཉེ༌རང༌ ང༌ ཉམ༌པོ༌ ཞུག༌ཤེས༌པའེ༌, ངའ༌ གའ༌མོའེ༌ གང༌།’”
ACT 2:29 “ཡ༌ཧུ༌དཱ༌པའེ༌ སྤུན༌གུན༌, ང༌དང༌ངི༌ ཕ༌མེས༌པོ༌ གྱལ༌པོ༌ དཱ༌བིད༌ ཤི༌, སྤུར༌བོ༌ སྤུར༌ཁང༌ང༌ སུབས༌ ཡང༌ ཁོང༌ངི༌ སྤུར༌ཁང༌བོ༌ དག༌སའང༌ ང༌དང༌ངི༌ ཕྲོའ༌ ཡོད༌ཁན༌བོ༌ ངའེ༌ ཏན༌ཏན༌ ཟེར༌ ཐུབ༌ཅེས༌རག༌།
ACT 2:30 ཨིན༌ནའང༌ ཁོང༌ ལུང༌སྟོན༌པ༌ ཨིན༌པིན༌, ཡང༌ དཀོན༌མཆོག༌གི༌ ཁོང༌ ཉམ༌པོ༌ ཞལ༌ཆད༌ ཛད༌ཁན༌ ནང༌ཞིན༌ ཁོང༌ངི༌ པུར༌གྱུད༌ནེ༌ ཅིག༌ ཁོང༌ངི༌ ཞུགས༌ཁྲིས༌སི༌ཀ༌ སྟག༌ག༌ ཛད༌ཅེས༌པོའང༌ གྱུས༌ ཡོད༌པིན༌།
ACT 2:31 གྱལ༌པོ༌ དཱ༌བིད༌དི༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཇུང༌ཅེས༌གུན༌ ཐོང༌ཏེ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཅེས༌པོ༌ ལུང༌སྟན༌ སལ༌ཏེ༌ མོལས༌, ‘ཁོང༌ ཤི༌ཁན༌གུན༌ནི༌ ཕྲོའ༌ ཕངས༌ཏེ༌ བོར༌ར༌ མ༌ཛདས༌ ཡ༌ ཁོང༌ངི༌ སྐུ༌ཤ༌ རུལ༌ ཅུག༌ག༌ མི༌ཛད༌།’”
ACT 2:32 “ཏེན༌ན༌ ཡེ༌ཤུ༌, དཀོན༌མཆོག༌གི༌ སོན༌ཏེའ༌ ལང༌ང༌ ཛདས༌, ང༌ཞ༌གུན༌ནི༌ ཏེ༌བོ༌ སྤང༌པོ༌ ཏང༌ངད༌།
ACT 2:33 ཁོང༌ང༌ དཀོན༌མཆོག༌གི༌ ཆག༌ ཡས༌པའ༌ དུག༌ཅེས༌སི༌ སྤལ༌ ཐོབ༌, ཡང༌ ཡབ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ཏམ༌པའེ༌ ཐུག༌ཉིད༌ སལ༌ལ༌ ཛད༌ཁན༌བོ༌ ཡེ༌ཤུའི༌ ང༌ཞའ༌ ཚང༌མ༌ལའང༌ སལ༌ལ༌ ཛད༌ཨིན༌ ཨིན༌ནོག༌, ཡང༌ ཏེ༌བོ༌ ཁྱོ༌ཞའེ༌ དག༌ས༌ ཐོང༌ཨིན༌ ཡང༌ ཚོར༌ཨིན༌ ཨིན༌ནོག༌།”
ACT 2:34 “གྱལ༌པོ༌ དཱ༌བིད༌ ནམ༌ཁའ༌ མ༌ཁྱེར༌ནའང༌ ཁོའེ༌ མོལས༌, ‘གཙོ༌བོ༌ དཀོན༌མཆོག༌གི༌ ངའེ༌ གཙོ༌བོའ༌ མོལས༌, ངའེ༌ ཁྱོ༌རང༌ངི༌ གྲ༌འོ༌ ཚང༌མ༌, ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌, ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།’”
ACT 2:36 “ཏེན༌ན༌བོའེ༌ཕིའ༌ ཨིས༌ར༌ཨེལ༌པ༌ ཚང༌མ༌ལ༌ ཏན༌ཏན༌ ཧ༌གོ༌གོས༌: ཏེན༌ན༌ ཡེ༌ཤུ༌ ཀ༌བོ༌ ཁྱོ༌ཞ༌གུན༌ནི༌ རྐྱང༌ཤིང༌ང༌ རྐྱངས༌, གཙོ༌བོ༌ དཀོན༌མཆོག༌གི༌ ཁོང༌ ཁོང༌ངི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ དང༌ གཙོ༌བོ༌ ཉིས༌ཀོ༌ ཛདས༌།”
ACT 2:37 པི༌ཏྲར༌རི༌ སྤེ༌ར༌གུན༌ ཚོར༌ར༌ཅིག༌ ཁོང༌གུན༌ སྙིང༌ང༌ དའ༌ ཟུག༌ཁན༌ ཙོགས༌ སྐྱོ༌མོ༌ སོང༌ཏེ༌, ཁོང༌གུན༌ནི༌ པི༌ཏྲར༌ དང༌ ཞན༌ སྐུ༌ཚབས༌གུན༌ལ༌ ཞུས༌, “སྤུན༌གུན༌, ང༌ཞའེ༌ ཅི༌ ཅོ༌གོས༌?”
ACT 2:38 པི༌ཏྲར༌རི༌ ལན༌སལས༌, “ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ ཐོབ༌ཅེས༌སི༌ ཕིའ༌ རང༌རང༌ངི༌ སྡིག༌པའེ༌ཀ༌ གྱོད༌པ༌ ཅོས༌ཏེ༌ ཡེ༌ཤུ༌ མ༌ཤི༌ཀའེ༌ ཚན༌ནི༌ ནང༌ང༌ ཁྲུས༌ལེན༌། ཏེ༌ནེ༌ ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌དི༌ ཅིན༌ལབས༌ ཐོབ༌ཨིན༌།
ACT 2:39 འི༌ ཞལ༌ཆད༌པོ༌ ཁྱོ༌ཞའ༌, ཁྱོ༌ཞའེ༌ པུར༌གྱུད༌ དང༌ ཡ༌ཧུ༌དཱ༌པ༌ མན༌ཁན༌ གུན༌ནི༌ ཕིའ༌ ཨིན༌ནོག༌, ཀ༌གུན༌ལ༌ ང༌དང༌ངི༌ གཙོ༌བོ༌ དཀོན༌མཆོག༌གི༌ ཁོང༌རང༌ངི༌ མི༌གུན༌ གྱུར༌ཅེས༌ལ༌ བོད༌ད༌ ཛདས༌།”
ACT 2:40 ཏེ༌ནེ༌ པི༌ཏྲར༌རི༌ ལབ༌ཞ༌ མང༌པོ༌ སལ༌ཨིན༌ སྤང༌པུད༌ཏེ༌ སྙིང༌ནེ༌ ཞུ༌ཝ༌ ཕུལ༌ཨིན༌ མོལས༌, “འི༌ མི༌རབས༌ ངན༌པའ༌ ཕོག༌ཅེས༌སི༌ ཆད༌པ༌ནེ༌ ཁྱོ༌ཞ༌རང༌གུན༌ སྐྱོབ༌ཤིག༌།”
ACT 2:41 ཁོའེ༌ ཆོས༌ཤད༌ཁན༌བོའ༌ ཏད༌པ༌ ཅོ༌ཁན༌གུན༌ནི༌ ཁྲུས༌ལེནས༌, ཡང༌ ཏེ༌ ཞག༌ག༌ མ༌ཤི༌ཀའེ༌ཀ༌ ཏད༌པ༌ ཅོ༌ཁན༌ སྟོང༌སུམ༌ ཟོད༌ཅིག༌ ཆོས༌ཚོགས༌སི༌ ཕྲོའ༌ ཐེའ༌ ཛདས༌།
ACT 2:42 ཁོང༌གུན༌ སྐུ༌ཚབས༌གུན༌ནེ༌ ལབ༌ཞ༌ ལེན༌ཅེས༌, སྤོས༌པ༌ ཏང༌ཅེས༌, ཁར༌ཇི༌ བགོས༌ཏེ༌ ཟའ༌ཅེས༌ ༼ཀ༌བོའེ༌ ནང༌ང༌ གཙོ༌བོ༌ ཡེ༌ཤུ༌ ཨིད༌ཏུ༌ ཅོ༌ཨིན༌ དོན༌ཏང༌ དོན༌ཅེས༌༽ དང༌ མོས༌ལམ༌ ཞུ༌ཅེས༌ གུན༌ མ༌ ཁག༌ཅན༌ སམས༌ཏེ༌ ཏུས༌གྱུན༌ ཛོམ༌མད༌པིན༌།
ACT 2:43 སྐུ༌ཚབས༌གུན༌ནི༌ ཧ༌ལས༌ཤེས༌སི༌ ཛད༌པ༌ དང༌ ལྟས༌ མང༌པོ༌ སྟན༌ན༌ ཛད༌ཅེས༌པོའེ༌ མི༌ཚང༌མའེ༌, ཇིགས༌སི༌ ནང༌ང༌ དཀོན༌མཆོག༌ག༌ རྩི༌ཝ༌ ཛདས༌།
ACT 2:44 ཏད༌པ༌ཅན༌ ཚང༌མ༌ ལན༌ མང༌པོ༌ ཛོམས༌ཏེ༌, ཅི༌ཚང༌མ༌ ཅིག༌ དང༌ ཅིག༌ ཉམ༌པོ༌ བགོའད༌པིན༌།
ACT 2:45 ཡོད༌ཁན༌ནི༌ ནོར༌གུན༌ ཙོངས༌ཏེ༌ སྒོས༌དོམ༌ ཡོད༌ཁན༌གུན༌ལ༌ བགོས༌ཏེ༌ ཏང༌ངད༌པིན༌།
ACT 2:46 ཁོང༌གུན༌ ཞག༌ཏང༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ ཛོམ༌མད༌པིན༌། ཁང༌པ༌གུན༌ནི༌ ནང༌ང༌ གཙོ༌བོ༌ ཨིད༌ཏུ༌ ཅོ༌ཨིན༌ དོན༌ཀྱིར༌ ཅགས༌ཏེ༌ གའ༌མོ༌ དང༌ ཐད༌པོ༌ ཉམ༌པོ༌ སྙིང༌ ཕེས༌ཏེ༌ ཚང༌མ༌ ཉམ༌པོ༌ བགོས༌ཏེ༌ ཟེན༌,
ACT 2:47 དཀོན༌མཆོག༌ག༌ སྟོད༌པ༌ ཕུལ༌ཨིན༌, མི༌ཚང༌མའེ༌ ཆོགས༌སྐྱོར༌ ཐོབ༌ཅེས༌ལ༌ ཁོང༌གུན༌ནི༌ ཐད༌པོ༌ ཅོས༌། ཐར༌པ༌ ཐོབ༌ཁན༌གུན༌ནི༌ ཀྲངས༌ཀ༌ ཞག༌པ༌སང༌ཞག༌ གཙོ༌བོ༌ ཡེ༌ཤུའི༌ ཕེལ༌ ཅུག༌ག༌ ཛདས༌།
ACT 3:1 ཞག༌ཤིག༌ ཉི༌མའེ༌ ཆུ༌ཚོད༌ སུམ༌པ༌ མོས༌ལམ༌ ཞུ༌ཅེས༌སི༌ ཏུས༌པའེ༌ཀ༌ པི༌ཏྲར༌ དང༌ ཡོ༌ཧཱ༌ནན༌ ཀེན༌ལ༌ ཆོད༌ཁང༌ང༌ སྐྱོདས༌།
ACT 3:2 སྐྱེས༌པ༌ནེ༌ ཕར༌ལ༌ ཞ༌འོ༌ མི༌ཞིག༌ ཆོད༌ཁང༌ངི༌ ལྡེ༌མོ༌ ཟེར༌ཁན༌ནི༌ གྱས༌སྒོའེ༌ཀ༌ ཞག༌ཏང༌ ཆོད༌ཁང༌ང༌ ཆའ༌ཁན༌གུན༌ནི༌ ཀ༌ནེ༌ ལྩང༌ཅེས༌ལ༌ ཁྱོངས༌ཏེ༌ བོར༌རད༌པིན༌།
ACT 3:3 ཁོའེ༌ པི༌ཏྲར༌ དང༌ ཡོ༌ཧཱ༌ནན༌ ཆོད༌ཁང༌ང༌ ཆའ༌ ཐོང༌ཏེ༌ ཁོང༌ང༌ པེ༌ནེ༌ ཏོང༌ ཟེར༌ཨིན༌ ལྩངས༌།
ACT 3:4 པི༌ཏྲར༌ དང༌ ཡོ༌ཧཱ༌ནན༌ནི༌ ཁོ༌ ཆོགས༌ལ༌ མིག༌ གྱངས༌ཏེ༌ ལྟས༌ ཡང༌ པི༌ཏྲར༌རི༌ མོལས༌, “ང༌ཞའ༌ ལྟོས༌།”
ACT 3:5 ཁོའེ༌ པེ༌ནེ༌ ཏང༌ང༌ནོག༌ སམས༌ཏེ༌ ཁོང༌གུན༌ལ༌ ལྟས༌ཏེ༌ དུགས༌།
ACT 3:6 ཏེ༌ནེ༌ པི༌ཏྲར༌རི༌ མོལས༌, “མུལ༌ ཡ༌ སེར༌ ནི༌ ངའ༌ མེད༌, ངའ༌ ཡོད༌ཁན༌བོ༌ ཁྱོ༌རང༌ང༌ ཏང༌ཨིན༌, ན༌ཙ༌རེད༌པ༌ ཡེ༌ཤུ༌ མ༌ཤི༌ཀའེ༌ ཚན༌ནི༌ ནང༌ང༌ ལངས༌ཏེ༌ གྲུལ༌།”
ACT 3:7 པི༌ཏྲར༌རི༌ ཁོའེ༌ ལག༌པ༌ ཡས༌པ༌ ཟུམས༌ཏེ༌ ཁོ༌ ལང༌ང༌ལ༌ རོགས༌ ཅོས༌, ཏེན༌ན༌མལ༌ལ༌ ཁོའེ༌ རྐང༌པ༌ དང༌ རྐང༌ཚིགས༌ ཚང༌མ༌ ཕན༌ཏེ༌ ཤེད༌ཅན༌ གྱུར༌།
ACT 3:8 ཁོ༌ ཆོམས༌ཏེ༌ ཀོའག༌ ལངས༌ ཡང༌ གྲུལ༌ཅེས༌ གོ༌ཟུག༌། ཏེ༌ནེ༌ ཁོ༌ ཆོམས༌ཨིན༌, གྲུལ༌ཨིན༌, དཀོན༌མཆོག༌ག༌ སྟོད༌པ༌ ཕུལ༌ཨིན༌, ཁོང༌གུན༌ ཉམ༌པོ༌ ཆོད༌ཁང༌ང༌ སོང༌།
ACT 3:9 མི༌ཚང༌མའེ༌ ཁོ༌ གྲུལ༌ཨིན༌, དཀོན༌མཆོག༌ག༌ སྟོད༌པ༌ ཕུལ༌ཨིན༌ ཐོང༌ཏེ༌
ACT 3:10 ཆོད༌ཁང༌ངི༌ ལྡེ༌མོ༌ ཟེར༌ཁན༌ནི༌ གྱས༌སྒོའེ༌ དུན༌ལ༌ དུག༌ཁན༌ནི༌ ལྩང༌ཁན༌ ཨིན༌ཁན༌བོ༌ ངོ༌ཤེས༌། ཡང༌ ཁོའེ༌ ཏེ༌ཟུག༌ ཅོ༌ཨིན༌ ཐོང༌པ༌ ཁོང༌གུན༌ ཧ༌ལས༌ཏེ༌ ཧན༌གྲང༌ སོང༌།
ACT 3:11 ཏེ༌ མི༌བོའེ༌ པི༌ཏྲར༌ དང༌ ཡོ༌ཧཱ༌ནན༌ནི༌ ལག༌པ༌ ཐམས༌ཏེ༌ ཡོད༌ ཟ༌ནེ༌, མི༌ཚང༌མ༌ ཧ༌ལས༌ཏེ༌ ཁོང༌གུན༌ ཡོད༌སའེ༌, ཆོད༌ཁང༌ངི༌ ནང༌ང༌ སོ༌ལོ༌མོན༌ནི༌ ཡབས༌ ཟེར༌སའེ༌ ནས༌སའེ༌ཀ༌ གྱུགས༌ཏེ༌ སོང༌།
ACT 3:12 པི༌ཏྲར༌རི༌ མི༌མངས༌གུན༌ ཛོམ༌མ༌ ཐོང༌ཏེ༌ མོལས༌, “ཨིས༌ར༌ཨེལ༌པ༌གུན༌, ཁྱོ༌ཞ༌གུན༌ ཅིའ༌ ཧ༌ལས༌ཏེ༌ ཨིན༌? ང༌ཞ༌རང༌ངི༌ སྟོབས༌ ཡ༌ ང༌ཞའ༌ ཏམ༌པ༌ ཡོད༌ཅེས༌པོའེ༌, འི༌ མི༌བོ༌ གྲུལ༌ཅུག༌ ཉན༌ཏེ༌ ཨིན༌ནོག༌ སམས༌ཏེ༌ ང༌ཞའ༌ ཅིའ༌ ལྟས༌ཏེ༌ དུག༌གད༌།
ACT 3:13 ཨབ༌ར༌ཧམ༌, ཨི༌སཱག༌, ཡ༌ཀོབ༌བི༌ དཀོན༌མཆོག༌, ང༌དང༌ངི༌ ཕ༌མེས༌པོ༌གུན༌ནི༌ དཀོན༌མཆོག༌གི༌ ཁོང༌ངི༌ ཞབས༌ཏོག༌པ༌ ཡེ༌ཤུའ༌ སྤལ༌ སལ༌ལ༌ ཛདས༌། ཨིན༌ནའང༌ ཁྱོ༌ཞ༌གུན༌ནི༌ ཁོང༌ ཟུམས༌ཏེ༌ གྲ༌འོའེ༌ ལག༌ག༌ སད༌ད༌ ཏངས༌, ཡང༌ པི༌ལ༌ཏུའི༌ ཁོང༌ ཕུད༌ཅེས༌སི༌ ཐག༌ཅད༌ནའང༌, ཁྱོ༌ཞ༌གུན༌ནི༌ པི༌ལ༌ཏུའི༌ དུན༌ལ༌ ཁོང༌ ང༌ཞའེ༌ གྱལ༌པོ༌ མན༌ ཟེརས༌།
ACT 3:14 ཁྱོ༌ཞ༌གུན༌ནི༌ ཏམ༌པ༌ དང༌ ཀྲང༌པོ༌ ཨིན༌ཁན༌བོ༌ ཕངས༌ཏེ༌ པི༌ལ༌ཏུའ༌ ཁྱོ༌ཞའེ༌ ཕིའ༌ མི༌སད༌ཞིག༌ ཕུད༌ཅེས༌ལ༌ ཞུ༌ཝ༌ ཕུལས༌།
ACT 3:15 ང༌ཞའེ༌ སྤང༌པོ༌ ཏང༌ངད༌, ཁྱོ༌ཞའེ༌ སྲོག༌ སལ༌ཁན༌བོ༌ སདས༌, ཨིན༌ནའང༌ དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཨིན༌ནོག༌།”
ACT 3:16 “ཡེ༌ཤུའི༌ ཚན༌ནི༌ ནང༌ང༌ ཏད༌པ༌ ཅོ༌ཅེས༌པོའེ༌ ཁྱོ༌ཞའེ༌ ཐོངས༌ཏེ༌ ངོ༌ཤེས༌ཁན༌ནི༌ འི༌ མི༌བོ༌ ཤེད༌ཅན༌ ཅོའ༌ ཛདས༌། ཡེ༌ཤུའི༌ ནང༌ང༌ ཏད༌པ༌ ཅོ༌ཅེས༌པོའེ༌ འི༌ མི༌བོའེ༌ ཟུགས༌པོ༌ གྱལ༌ཏེ༌ ཤེད༌ཅན༌ གྱུར༌ཁན༌བོ༌ ཁྱོ༌ཞའ༌ ཚང༌མའེ༌ ཐོང༌ ཐུབ༌ཏེ༌ ཨིན༌ནོག༌།”
ACT 3:17 “ཏ༌ ངའེ༌ སྤུན༌གུན༌ ང༌ གྱུས༌ཡོད༌, ཁྱོ༌ཞའ༌ དང༌ ཁྱོ༌ཞའེ༌ འུ༌སྐྱོང༌ གུན༌ནི༌ ཡེ༌ཤུ༌ ཉམ༌པོ༌ ཅོ༌ཁན༌གུན༌ ཁོང༌ སུ༌ ཨིན༌ཁན༌བོ༌ མ༌ཤེས༌ས༌ ཅོས༌ཏེ༌ ཨིན༌པིན༌།
ACT 3:18 ཨིན༌ནའང༌ དཀོན༌མཆོག༌གི༌ སྔུན༌མའེ༌ ལུང༌སྟོན༌པ༌ ཚང༌མ༌ གྱུད༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌ རྡུག༌ངལ༌ ཉོང༌གོས༌ཨིན༌ མོལ༌ཁན༌བོ༌ གྲུབ༌ ཅུག༌ག༌ ཛདས༌།
ACT 3:19 སྡིག༌པ༌ སེལ༌ལ༌ ཛད༌ཅེས༌སི༌ ཕིའ༌ ཁྱོ༌ཞའ༌ རང༌ངི༌ སྡིག༌པའེ༌ཀ༌ གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ ལོག༌ཏེ༌ ཡོང༌ཤིག༌།
ACT 3:20 ཏེ༌ནེ༌ ཁྱོ༌ཞའ༌ དང༌ གཙོ༌བོའེ༌ ནང༌ང༌ བྲེལ༌ ཡོད༌ཅེས༌པོའེ༌, ཁྱོ༌ཞའེ༌ སེམས༌ལ༌ སྤོས༌པ༌ ཐོབས༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌, ཡེ༌ཤུ༌ ཡང༌སྐྱར༌ ཁྱོ༌ཞའེ༌ཀ༌ ཀལ༌ལ༌ ཛད༌ཨིན༌།
ACT 3:21 ཏུས༌ མང༌པོའེ༌ སྔུན༌ལ༌ ཏམ༌པའེ༌ ལུང༌སྟོན༌པ༌གུན༌ གྱུད༌ཏེ༌ མོལ༌ལ༌ ཛད༌ཁན༌ ནང༌ཞིན༌ ཡེ༌ཤུ༌ ཏེ༌ཏེ༌ཚོག༌པ༌ ནམ༌ཁའ༌ ཞུགས༌གོས༌ཨིན༌ ནམ༌ཚོག༌པ༌ དཀོན༌མཆོག༌གི༌ ཛད༌ཁན༌ ཚང༌མ༌ ཡང༌སྐྱར༌ སོ༌མ༌ མི༌ཛད༌།
ACT 3:22 ལུང༌སྟོན༌པ༌ མོ༌ཟེས༌སི༌ མོལས༌, ‘གཙོ༌བོ༌ ཁྱོ༌ཞའེ༌ དཀོན༌མཆོག༌གི༌ ཁྱོ༌ཞ༌གུན༌ནི༌ ཕིའ༌ ང༌ ཙོགས༌ལ༌ ཁྱོ༌ཞ༌རང༌ངི༌ སྤུན༌གུན༌ནི༌ ཕྲོ༌ནེ༌ ལུང༌སྟོན༌པ༌ཞིག༌ ཀལ༌ལ༌ ཛད༌ཨིན༌། ཡང༌ ཁྱོ༌ཞ༌གུན༌ནི༌ ཁོང༌ངི༌ མོལ༌ཁན༌ ཚང༌མའ༌ ཁའ༌ཉན༌གོས༌།
ACT 3:23 ཏེ༌ ལུང༌སྟོན༌པའེ༌ ཁ༌ མི༌ཉན༌ཁན༌བོ༌ དཀོན༌མཆོག༌གི༌ མི༌གུན༌ནི༌ ཕྲོ༌ནེ༌ ཕེས༌ཏེ༌ མེད༌ཁན༌ ཅོའ༌ ཛད༌ཨིན༌།’”
ACT 3:24 པི༌ཏྲར༌རི༌ ཏ༌རུང༌ངའང༌ མོལས༌, “ས༌མུ༌འེལ༌ནེ༌ གོ༌ཟུགས༌ཏེ༌ ལུང༌སྟོན༌པ༌ ཚང༌མའེ༌, འི༌ ཞག༌གུན༌ནི༌ སྐོར༌ལ༌ ལུང༌སྟན༌ ཤད༌ད༌ ཛདས༌།
ACT 3:25 ཁྱོ༌ཞ༌ ལུང༌སྟོན༌པ༌གུན༌ནི༌ ཞལ༌ཆད༌གུན༌ ནོར༌སྐལ༌ ཐོབ༌ཅེས༌ཅན༌ ཡང༌ དཀོན༌མཆོག༌གི༌ ཁྱོ༌ཞའེ༌ ཕ༌མེས༌པོ༌གུན༌ ཉམ༌པོ༌ ཆད༌དོན༌ ཛད༌ཁན༌བོའེ༌ ནང༌ང༌ ཁྱོ༌ཞ༌ ཐེས༌ཏེ༌ ཨིན༌ནོག༌, ཀ༌ཟུག༌ དཀོན༌མཆོག༌གི༌ ཨབ༌ར༌ཧམ༌མ༌ མོལ༌ལ༌ ཛདས༌, ‘ངའེ༌ ཁྱོ༌རང༌ངི༌ པུར༌གྱུད༌གུན༌ གྱུད༌ཏེ༌ ཇིག༌རྟེན༌པ༌གུན༌ལ༌ ཅིན༌ལབས༌ ཏང༌ཨིན༌ །’
ACT 3:26 དཀོན༌མཆོག༌གི༌ ཁོང༌རང༌ངི༌ ཞབས༌ཏོག༌པ༌, ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ ཁྱོ༌ཞ༌རང༌ངི༌ ངན༌པའེ༌ ལམ༌གུན༌ ཕང༌ ཐུབ༌ཅེས༌སི༌ ཅིན༌ལབས༌ སལ༌ཅེས༌ལ༌ ཁོང༌ གོ༌མ༌རང༌ ཁྱོ༌ཞ༌གུན༌ནི༌ཀ༌ ཀལ༌ལ༌ ཛདས༌།”
ACT 4:1 པི༌ཏྲར༌ དང༌ ཡོ༌ཧཱ༌ནན༌ནི༌ མི༌མངས༌ལ༌ ལབ༌ཞ༌ སལ༌ཨིན༌ ཡོད༌ ཟ༌ནེ༌ བླ༌མ༌གུན༌, ཆོད༌ཁང༌ སྲུང༌ཁན༌ནི༌ མག༌སྤོན༌ དང༌ སད༌དུ༌ཀི༌པ༌གུན༌ ཏེ༌རུ༌ ཡོངས༌།
ACT 4:2 ཏེ༌ འུ༌སྐྱོང༌གུན༌ལ༌ སྲོ༌ ཡོངས༌ཏེ༌ ཡོད༌པིན༌ ཅིའ༌ཟེར༌ན༌ སྐུ༌ཚབས༌གུན༌ནི༌ མི༌ཚོགས༌ལ༌ ཡེ༌ཤུ༌ གྱུད༌ཏེ༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཅེས༌སི༌ ལབ༌ཞ༌ སལ༌ལད༌པིན༌།
ACT 4:3 ཁོང༌གུན༌ནི༌ པི༌ཏྲར༌ དང༌ ཡོ༌ཧཱ༌ནན༌ ཟུམས༌ཏེ༌ སྟིང༌མ༌ཞག༌ ཚག༌པ༌ ཙོན༌ཁང༌ང༌ ཀག༌ཅུགས༌, ཅིའ༌ཟེར༌ན༌ མུན༌གྲིག༌ སོང༌ ཚར༌ཏེ༌ ཡོད༌པིན༌།
ACT 4:4 ཨིན༌ནའང༌ ཁོང༌ངི༌ ཆོས༌ ཚོར༌ཁན༌ མང༌པོའེ༌ གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོངས༌, ཏད༌པ༌ཅན༌གུན༌ནི༌ ཀྲངས༌ཀ༌ སྟོང༌ལྔ༌ ཟམ༌ཤིག༌ ཡོད༌པིན༌, ཀ༌བོའེ༌ ནང༌ང༌ བུ༌མོ༌ དང༌ ཕྲུ༌གུ༌གུན༌ མ༌ཐེའ༌ ཨིན༌ནོག༌།
ACT 4:5 ཏེ༌ནེ༌ སྟིང༌མ༌ཞག༌ག༌ ཡུལ༌ལི༌ སྤོན༌བོ༌གུན༌, འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ ཡེ༌རུ༌ཤ༌ལེམ༌མ༌ ཛོམ༌།
ACT 4:6 བླ༌མ༌ ཆེན༌མོ༌ ཨན༌ནཱས༌, ཀ༌ཡ༌ཕཱས༌, བླ༌མ༌ ཆེན༌མོའེ༌ ཉེན༌: ཡོ༌ཧཱ༌ནན༌, ཨ༌ལེག༌ཟན༌དེར༌ དང༌ ཞན༌གུན༌ ཏེ༌ཕྲོའ༌ ཡོད༌པིན༌།
ACT 4:7 ཁོང༌གུན༌ནི༌ པི༌ཏྲར༌ དང༌ ཡོ༌ཧཱ༌ནན༌ ཚོགས༌དུའི༌ དུན༌ལ༌ བོད༌ཏེ༌ ཏྲིས༌, “ཁྱོ༌རང༌གུན༌ནི༌ སུའི༌ ཝང༌ངི༌ ནང༌ང༌ ཡ༌ སུའི༌ མིང༌ ཁུར༌ཏེ༌ ཏེ༌ ལས༌གུན༌ ཅོས༌ཏེ༌ ཨིན༌?”
ACT 4:8 ཏེ༌ནེ༌ ཏམ༌པའེ༌ ཐུག༌ཉིད༌དི༌ གངས༌ཏེ༌ པི༌ཏྲར༌རི༌ ལན༌ཏངས༌, “མི༌གུན༌ནི༌ སྤོན༌བོ༌ དང༌ འུ༌སྐྱོང༌ གུན༌,
ACT 4:9 ང༌ཞའེ༌ ཁོངས༌ཁན༌ནི༌ མི༌ ཕན༌ཅུགས༌ཏེ༌ ལས༌ ཟང༌པོ༌ ཅོ༌ཅེས༌པོའེ༌, དི༌རིང༌ ང༌ཞའ༌ ཏྲི༌ཝ༌ ཏྲིའ༌ད༌? ཁོ༌ ཀ༌ཟུག༌གི༌ གྱལ༌, གྱུས༌ཆའ༌ ཉིན༌རག༌ག༌?
ACT 4:10 འི༌བོ༌ ཁྱོ༌ཞའ༌ དང༌ ཨིས༌ར༌ཨེལ༌པ༌ ཚང༌མའེ༌ ཤེས༌གོས༌, ན༌ཙ༌རེད༌པ༌ ཡེ༌ཤུ༌ མ༌ཤི༌ཀ༌ ཁྱོ༌ཞའེ༌ རྐྱང༌ཤིང༌ངི༌ཀ༌ རྐྱངས༌ ཨིན༌ནའང༌ དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌ཁན༌ནི༌ ཚན༌ནི༌ ནང༌ང༌ འི༌ མི༌བོ༌ ཕན༌ཏེ༌ ཁྱོ༌ཞའེ༌ དུན༌ལ༌ ལངས༌ཏེ༌ ཨིན༌ནོག༌།
ACT 4:11 ཁོང༌ངི༌ སྐོར༌ལ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, ‘ཀ༌ རྡོའ༌བོ༌ ཁང༌པ༌ རྩིག༌ཁན༌གུན༌ནི༌ ཕན༌མི༌ཐོགས༌ ཐེས༌, ཏེན༌ན༌ རྡོའ༌བོ༌ ཁང༌པའེ༌ ཀྲུ༌རྡོའ༌བོ༌ གྱུར༌ ཀ༌བོ༌ ཚང༌མའེ༌སང༌ ཁག༌ཅན༌ རྡོའ༌བོ༌ ཨིན༌ནོག༌།’”
ACT 4:12 “ཡེ༌ཤུ༌ མ༌ཤི༌ཀ༌ མ༌སྟོགས༌ ཞན༌ སུ༌ཞིག༌ གྱུད༌ཏེ༌ ང༌དང༌ང༌ ཐར༌པ༌ མི༌ཐོབ༌, ཇིག༌རྟེན༌ གང༌པོའེ༌ ནང༌ང༌ ཞན༌ སུ༌ཞིག༌ག༌ དཀོན༌མཆོག༌གི༌ ཏེ༌ མིང༌བོ༌ སལ༌ལ༌ མ༌ཛདས༌, ཀ༌བོ༌ གྱུད༌ཏེ༌ ང༌དང༌གུན༌ལ༌ ཐར༌པ༌ ཐོབ༌ཨིན༌།”
ACT 4:13 ཏེ༌ནེ༌ ཁོང༌གུན༌ནི༌ པི༌ཏྲར༌ དང༌ ཡོ༌ཧཱ༌ནན༌ མ༌སིལ༌ཁན༌, ཁས༌པ༌ མི༌ མན༌ ཨིན༌ནའང༌ མ༌ སྤོས༌པ༌ ཉམ༌པོ༌ སྤང༌པོ༌ ཏང༌ཅེས༌ ཐོང༌ཏེ༌ ཧ༌ལས༌, ཡང༌ ཁོང༌ ཉིས༌ཀོ༌ ཡེ༌ཤུའི༌ ཕྲོ༌པ༌ ཨིན༌ཁན༌བོ༌ ཧ༌གོ༌།
ACT 4:14 ཁོང༌གུན༌ནི༌ ཕན༌ཅུག༌ཁན༌ནི༌ མི༌བོ༌ ཁོང༌ ཉམ༌པོ༌ ལངས༌ཏེ༌ ཡོད༌པ༌, ཁོང༌གུན༌ལ༌ པི༌ཏྲར༌ དང༌ ཡོ༌ཧཱ༌ནན༌ནི༌ གྱབ༌གལ༌ལ༌ ཅའང༌ ཟེར༌ མ༌ཉན༌།
ACT 4:15 ཏེ༌བོའེ༌ཕིའ༌ ཁོང༌ ཉིས༌ཀོ༌ ཡ༌ཧུ༌དཱ༌པའེ༌ ཚོགས༌དུ༌ནེ༌ ཕི༌ལོག༌ག༌ ཕིངས༌, ཡང༌ ཁོང༌གུན༌ནི༌ གྲབས༌ ཅོས༌ཏེ༌ ཅིག༌ དང༌ ཅིག༌ག༌ ཏྲིས༌,
ACT 4:16 “ང༌དང༌གུན༌ནི༌ འི༌ མི༌ ཉིས༌ཀོའ༌ ཅི༌ ཅོ༌ཨིན༌? ཏེ༌ ལྟས༌པོ༌ མ༌ཇུང༌ ང༌དང༌ངི༌ ཟེར༌ མི༌ཉན༌ ཅིའ༌ཟེར༌ན༌ ཁོང༌གུན༌ནི༌ ཧ༌ལས༌ཤེས༌སི༌ ཛད༌པ༌ སྟན༌ཁན༌བོ༌ ཡེ༌རུ༌ཤ༌ལེམ༌པ༌ ཚང༌མ༌ལ༌ གྱུས༌ཨིན༌ནོག༌།
ACT 4:17 ཨིན༌ནའང༌ ཡེ༌ཤུའི༌ སྐོར༌ལ༌ ལོན༌བོ༌ མི༌མངས༌སི༌ ནང༌ང༌ ཏ༌རུང༌ངའང༌ མི༌ གྱས༌ཅེས༌སི༌ ཕིའ༌ ང༌དང༌ངི༌ ཁོང༌ ཉིས༌ཀོའ༌ ཏ༌ནེ༌ཕར༌ལ༌ ཡེ༌ཤུའི༌ མིང༌ ཁུར༌ཏེ༌ ཆོས༌ཤད༌ མི༌ཆོག༌ ཟེར༌ཏེ༌ བཀའ༌ཏང༌ཨིན༌།”
ACT 4:18 ཏེ༌ནེ༌ ཁོང༌ ཉིས༌ཀོ༌ ནང༌ང༌ བོད༌ཏེ༌ ཡེ༌ཤུའི༌ སྐོར༌ལ༌ སུའང༌ སྤེ༌ར༌ ཡ༌ ཆོས༌ཤད༌ མི༌ཆོག༌ ཟེར༌ཏེ༌ བཀའ༌ ཏངས༌།
ACT 4:19 ཨིན༌ནའང༌ པི༌ཏྲར༌ དང༌ ཡོ༌ཧཱ༌ནན༌ནི༌ ཁོང༌གུན༌ལ༌ མོལས༌, “ཁྱོ༌ཞའེ༌ ཅི༌ སམ༌མ༌རག༌, དཀོན༌མཆོག༌གི༌ སྐུན༌དུན༌ལ༌ ཀ༌བོ༌ ཀྲང༌པོ༌ ཨིན༌ནོག༌, ཁོང༌ངི༌ བཀའ༌ ཁའ༌ ཉན༌ཅེས༌པོ༌ ཨིན༌ནོག༌ག༌ ཡ༌ ཁྱོ༌ཞའེ༌?
ACT 4:20 ང༌ཞའེ༌ ཐོང༌ཁན༌ དང༌ ཚོར༌ཁན༌ གུན༌ མི༌གུན༌ལ༌ མ༌ཤད༌ད༌ དུག༌ཉན༌ཅེས༌ མེད༌།”
ACT 4:21 ཏེ༌ ཇུང༌ཁན༌བོ༌ ཐོང༌ཏེ༌ མི༌ ཚང༌མའེ༌ དཀོན༌མཆོག༌ག༌ སྟོད༌པ༌ ཕུལ༌པ༌, མི༌གུན༌ནི༌ ཧི༌ལིངས༌ མ༌ཕིང༌ང༌ ཡ༌ཧུ༌དཱ༌པའེ༌ ཚོགས༌དུའི༌ ཁོང༌ ཉིས༌ཀོའ༌ ཆད༌པ༌ ཀ༌ཟུག༌ཤིག༌ ཅད༌ཅེས༌པོ༌ ཐག༌ཅད༌ མ༌ཉན༌། ཏེན༌ན༌བོའེ༌ཕིའ༌ ཁོང༌གུན༌ནི༌ སྤང༌པུད༌ཏེ༌ ཁོང༌ ཉིས༌ཀོ༌ ཕུད༌ཏངས༌།
ACT 4:22 ཧ༌ལས༌ཤེས༌སི༌ ཛད༌པ༌ ཛད༌ཏེ༌ ཕན༌ཅུག༌ཁན༌ནི༌ མི༌བོའ༌ ལོ༌ ཞིབ༌ཅུ༌ སང༌ མང༌ང༌ ཆའད༌པིན༌།
ACT 4:23 ཁོང༌ ཉིས༌ཀོ༌ ཕུད༌ཏེ༌ སྟིང༌ནེ༌ ཞན༌ ཏད༌པ༌ཅན༌ སྤུན༌གུན༌ནི༌ ཕྲོའ༌ སོང༌ ཡང༌ བླ༌མ༌ ཆེན༌མོ༌ དང༌ འུ༌སྐྱོང༌ གུན༌ནི༌ ཟེར༌ཁན༌ ཚང༌མ༌ ཁོང༌གུན༌ལ༌ ཤདས༌།
ACT 4:24 ཁོང༌གུན༌ནི༌ ཏེ༌བོ༌ ཚོར༌ར༌ཅིག༌ ཚང༌མའེ༌ སྐད༌ ཆེན༌མོའེ༌ ནང༌ང༌ དཀོན༌མཆོག༌ག༌ མོས༌ལམ༌ ཞུས༌, “ཀྱེ༌ གཙོ༌བོ༌, ཉེ༌རང༌ངི༌ ནམ༌ཁའ༌, ཇིག༌རྟེན༌, གྱ༌ཚོ༌ དང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཛད༌ཏེ༌ ཨིན༌།
ACT 4:25 ཏམ༌པའེ༌ ཐུག༌ཉིད༌ གྱུད༌ཏེ༌ ཉེ༌རང༌ངི༌ ཡོག༌པོ༌ ང༌ཞའེ༌ ཕ༌མེས༌པོ༌ གྱལ༌པོ༌ དཱ༌བིད༌དི༌ ཞལ༌ནེ༌ མོལས༌, ‘གྱལ༌ཁམས༌གུན༌ལ༌ སྲོ༌ སྲན༌ཏྲེ༌ ཅིའ༌ ཡོང༌ང༌ནོག༌། མི༌གུན༌ནི༌ གོ༌མི༌ཆོད༌ཅེས༌སི༌ ཅུས༌ངན༌ ཅིའ༌ ལྡིང༌ང༌ནོག༌།
ACT 4:26 དཀོན༌མཆོག༌ དང༌ ཁོང༌ངི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ གྱབ༌གལ༌ལ༌, ཇིག༌རྟེན༌ནི༌ གྱལ༌པོ༌གུན༌ མག༌གི༌ ཕིའ༌ གྲལ༌གྲིག༌ དུག༌, ཡང༌ ཝང༌སྲུལ༌པ༌གུན༌ ཛོམས༌ཏེ༌ དུག༌།’”
ACT 4:27 “ཏན༌ཏན༌ལ༌ འི༌ གྱལ༌སའེ༌ ནང༌ང༌ གྱལ༌པོ༌ ཧེ༌རོད༌ དང༌ རོམ༌མི༌ ཀའ༌ལོན༌ པོན༌ཏིའུ༌ པི༌ལ༌ཏུ༌, ཡ༌ཧུ༌དཱ༌པ༌ མན༌ཁན༌གུན༌ དང༌ ཨིས༌ར༌ཨེལ༌པ༌གུན༌ ཉམ༌པོ༌ ཛོམས༌ཏེ༌ ཉེ༌རང༌ངི༌ ལྡམ༌མ༌ ཛད༌ཁན༌ ཏམ༌པའེ༌ ཞབས༌ཏོག༌པ༌ ཡེ༌ཤུའི༌ གྱབ༌གལ༌ལ༌ ཅུས༌ངན༌ ལྡིངས༌།
ACT 4:28 ཁོང༌གུན༌ནི༌ མ༌ཤི༌ཀ༌ ཅོས༌ཁན༌བོ༌ ནི༌ ཉེ༌རང༌ངི༌ ཝང༌ དང༌ ཐུག༌གོངས༌ ནང༌ཞིན༌ སྔུན༌ལ༌ ཐག༌ཅད༌ད༌ ཛད༌ཏེ༌ ཨིན༌པིན༌།
ACT 4:29 ཏ༌ ཀྱེ༌ གཙོ༌བོ༌, ཁོང༌གུན༌ནི༌ ལྡམ༌ཞག༌ ཏངས༌ཁན༌བོ༌ སན༌ན༌ ཛད༌ཏེ༌ ང༌ཞའ༌ ཉེ༌རང༌ངི༌ ཡོག༌པོ༌གུན༌ལ༌ ཉེ༌རང༌ངི༌ ཏམ༌པའེ༌ བཀའ༌ ཧམ༌པ༌ ཉམ༌པོ༌ ཤད༌ཅེས༌སི༌ ཤེད༌ སལ༌།
ACT 4:30 ཉེ༌རང༌ངི༌ ཆག༌ རྐྱང༌ང༌ ཛད༌ཏེ༌ གྱལ༌ཅུག༌ཅེས༌, ཉེ༌རང༌ངི༌ ཏམ༌པའེ༌ ཞབས༌ཏོག༌པ༌ ཡེ༌ཤུའི༌ ཚན༌ ཝང༌ཅན༌ནི༌ ནང༌ང༌ ཧ༌ལས༌ཤེས༌སི༌ སྟགས༌ དང༌ ཛད༌པ༌ གུན༌ ཅོའ༌ ཛད༌།”
ACT 4:31 མོས༌ལམ༌ ཏབ༌ ཚར༌ར༌ཅིག༌ ཁོང༌གུན༌ ཛོམས༌ཏེ༌ ཡོད༌ཁན༌ནི༌ ནང༌བོ༌ སྐུལ༌ལ༌ ཛདས༌། ཚང༌མ༌ ཏམ༌པའེ༌ ཐུག༌ཉིད༌དི༌ གངས༌ཏེ༌ དཀོན༌མཆོག༌གི༌ བཀའ༌ ཧམ༌པ༌ ཉམ༌པོ༌ ཤདས༌།
ACT 4:32 ཏད༌པ༌ཅན༌ ཚང༌མ༌ སྙིང༌སེམས༌ ཐུན༌ཏེ༌ སུ༌ཞིག༌གིའང༌ རང༌ངི༌ ནོར༌བོ༌ ང༌རང༌ངི༌ ཨིན༌ མ༌ཟེར༌ར༌ ཅི༌ཚང༌མ༌ ཞན༌མ༌གུན༌ ཉམ༌པོ༌ བགོའད༌པིན༌།
ACT 4:33 སྐུ༌ཚབས༌གུན༌ནི༌ སྟོབས༌ ཆེན༌མོ༌ ཉམ༌པོ༌ གཙོ༌བོ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཁན༌བོའེ༌ སྤང༌པོ༌ ཏངས༌ ཡང༌ ཚང༌མའེ༌ཀ༌ ཐུག༌རྗེ༌ ཆེན༌མོ༌ བབས༌།
ACT 4:34 ཁོང༌གུན༌ནི༌ ཕྲོ༌ནེ༌ སྒོས༌དོམ༌ཅན༌ སུའང༌ མེད༌པིན༌, ཅིའ༌ཟེར༌ན༌ ཞིང༌ ཡ༌ ཁང༌པ༌ ཡོད༌ཁན༌གུན༌ནི༌ ཏེ༌གུན༌ ཙོངས༌ཏེ༌
ACT 4:35 སྐུ༌ཚབས༌གུན༌ནི༌ ཞབས༌སི༌ དུན༌ལ༌ ཏེ༌ པེ༌ནེ༌གུན༌ ཕུལ༌ལད༌པིན༌། ཏེ༌ནེ༌ ཁོང༌གུན༌ནི༌ སྒོས༌དོམ༌ ནང༌ཞིན༌ ཏེ༌བོ༌ ཚང༌མ༌ལ༌ བགོས༌ཏེ༌ སལ༌ལད༌པིན༌།
ACT 4:36 ནོར༌ ཙོང༌ཁན༌གུན༌ནི༌ ནང༌ནེ༌ ཀིབ༌རུས༌སི༌ ཡུལ༌ནེ༌ ཨིས༌ར༌ཨེལ༌ལི༌ སྡེ༌ ལི༌ཝི༌པ༌ ཡོ༌སེབ༌ ཟེར༌ཁན༌ཞིག༌ ཀ༌བོའ༌ སྐུ༌ཚབས༌གུན༌ནི༌ བཱར༌ན༌བས༌ མིང༌ང༌ ཏགས༌ ༼ཏེ༌བོའེ༌ ཏོན༌བོ༌ “སེམ༌སྟོབས༌ཏང༌ཁན༌ནི༌བུ༌” ཨིན༌ནོག༌།༽
ACT 4:37 ཁོའེ༌ རང༌ངི༌ ཞིང༌བོ༌ ཙོངས༌ ཡང༌ པེ༌ནེ༌བོ༌ ཁྱོངས༌ཏེ༌ སྐུ༌ཚབས༌གུན༌ནི༌ ཞབས༌སི༌ དུན༌ལ༌ ཕུལས༌།
ACT 5:1 ཏ༌ ཨ༌ན༌ནི༌ཡཱས༌ དང༌ ཁོའེ༌ ན༌མ༌ སབ༌ཕི༌རའ༌ ཟེར༌ཁན༌ནི༌ ཞིད༌མད༌ཤིག༌གི༌ རང༌ངི༌ ས༌ཀྱད༌དི༌ ཁག༌ཅིག༌ ཙོངས༌,
ACT 5:2 ཡང༌ ཐོབ༌ཁན༌ནི༌ པེ༌ནེ༌བོའེ༌ ནང༌ནེ༌ ཁག༌ཅིག༌ སུའང༌ གྱུས༌ཆའ༌ མ༌ཅུག༌ག༌ བོར༌ཏེ༌ ལུས༌ཁན༌བོ༌ སྐུ༌ཚབས༌གུན༌ནི༌ ཞབས༌སི༌ དུན༌ལ༌ ཕུལས༌། ཁོའེ༌ ན༌མའེ༌ འི༌ ཚང༌མའེ༌ ནང༌ང༌ ཁའ༌ཆམས༌ཏེ༌ ཨིན༌པིན༌།
ACT 5:3 ཏེ༌ནེ༌ པི༌ཏྲར༌རི༌ མོལས༌, “ཨ༌ན༌ནི༌ཡཱས༌, ཅིའ༌ ཁྱོ༌རང༌ངི༌ སྙིང༌ངི༌ ནང༌ང༌ ཤེ༌ཏན༌ ཡོང༌ཅུགས༌ཏེ༌, ས༌ཀྱད༌ ཙོང༌ཁན༌ནི༌ རིན༌ནི༌ ཁག༌ཅིག༌ རང༌ངི༌ ཕིའ༌ བོར༌ཏེ༌ ཏམ༌པའེ༌ ཐུག༌ཉིད༌ལ༌ ཟུན༌ ཏང༌ངད༌།
ACT 5:4 ཏེ༌ ས༌ཀྱད༌པོ༌ ཙོང༌ངི༌ སང༌ སྔུན༌ལའང༌ ཁྱོ༌རང༌ངི༌ མན༌པིན༌ན༌? ཙོངས༌ཏེ༌ སྟིང༌ནེའང༌ ཏེ༌ པེ༌ནེ༌བོའ༌ ཁྱོ༌རང༌ངི༌ ཅི༌ ཅོ༌ནའང༌ མི༌ཐད༌ད༌? ཏེ༌ནེ༌ ཁྱོ༌རང༌ང༌ སྐྱོན༌ ཅོ༌ཅེས༌སི༌ འི༌ སམ༌བ༌བོ༌ ཀ༌ནེ༌ ཡོངས༌། ཁྱོ༌རང༌ངི༌ ང༌ཞ༌གུན༌ལ༌ མན༌པ༌ དཀོན༌མཆོག༌ག༌ ཟུན༌ ཏངས༌ཏེ༌ ཨིན༌ནོག༌།”
ACT 5:5 ཏེ༌གུན༌ ཚོར༌ར༌ཅིག༌ ཨ༌ན༌ནི༌ཡཱས༌ སའེ༌ཀ༌ གྱེལ༌ ཡང༌ ཤི༌། ཏེ༌ ཇུང༌ཁན༌གུན༌ ཚོར༌ཁན༌ ཚང༌མ༌ སྲན༌ཏྲེ༌ ཇིགས༌།
ACT 5:6 ཏེ༌རུ༌ ཡོད༌ཁན༌ནི༌ ཁྱོག༌ཏོང༌ ཁ༌ཅིག༌ ཡོངས༌ཏེ༌ ཁོའེ༌ རོ༌བོ༌ རས༌སི༌ ནང༌ང༌ དུམས༌ ཡང༌ ཕི༌ལོག༌ག༌ སུབ༌བ༌ལ༌ ཁྱེརས༌།
ACT 5:7 ཆུ༌ཚོད༌ སུམ༌ཞིག༌གི༌ སྟིང༌ནེ༌, ཁོའེ༌ ན༌མ༌ ཏེ༌རུ༌ ཡོངས༌, ཏེ༌རུ༌ ཇུངས༌ཁན༌བོ༌ ཁོའ༌ གྱུས༌ མེད༌པིན༌།
ACT 5:8 ཏེ༌ནེ༌ པི༌ཏྲར༌རི༌ ཏེ༌ བུ༌མོ༌བོའ༌ མོལས༌, “ཤོད༌དའང༌! འི༌ པེ༌ནེ༌བོ༌ ཁྱོ༌རང༌ དང༌ ཁྱོ༌རང༌ངི༌ མག༌པའེ༌ ས༌ཀྱད༌ ཙོངས༌ཏེ༌ རིན༌ ཐོབ༌ཁན༌ གང༌པོ༌ ཨིན༌ན༌?” ཁོའེ༌, “རིན༌ གང༌པོ༌ ཨིན༌ལེ༌” ཞུས༌།
ACT 5:9 པི༌ཏྲར༌རི༌ མོལས༌, “ཀ༌ཟུག༌གི༌ ཁྱོ༌རང༌ ཉིས༌ཀོའེ༌ གཙོ༌བོའེ༌ ཐུག༌ཉིད༌ལ༌ ཚོད༌ལྟ༌ཅེས༌སི༌ ཐབས༌ ངན༌པ༌ ལྡིངས༌པིན༌། ཏ༌ ཁྱོ༌རང༌ངི༌ མག༌པ༌ སུབ༌བ༌ ཁྱེར༌ཁན༌གུན༌ སྒོའེ༌ཀ༌ ཡོད༌, ཡང༌ ཁྱོ༌རང༌ངའང༌ ཕི༌ལོག༌ག༌ ཁུར༌ཏེ༌ ཁྱེར༌ཨིན༌།”
ACT 5:10 ཏེན༌ན༌མལ༌ལ༌ ཏེ༌ བུ༌མོ༌བོ༌ ཁོང༌ངི༌ ཞབས༌སི༌ཀ༌ གྱེལ༌ཏེ༌ ཤི༌། ཁྱོག༌ཏོང༌གུན༌ ནང༌ང༌ ཡོངས༌ ཡང༌ བུ༌མོ༌ ཤི༌ཏེ༌ ཐོང༌པ༌, ཁོའང༌ ཕི༌ལོག༌ག༌ ཁྱེར༌ཏེ༌ ཁོ༌རང༌ངི༌ མག༌པ༌ ཉམ༌པོ༌ སུབས༌།
ACT 5:11 མ༌ཤི༌ཀའེ༌ ཆོས༌ཚོགས༌ གང༌པོ༌ ཡང༌ ཏེ༌ སྐོར༌ལ༌ ཚོར༌ཁན༌ ཚང༌མ༌ སྲན༌ཏྲེ༌ ཇིགས༌།
ACT 5:12 སྐུ༌ཚབས༌གུན༌ནི༌ མི༌ཚོགས༌སི༌ ནང༌ང༌ ཧ༌ལས༌ཤེས༌སི༌ ཛད༌པ༌ མང༌པོ༌ སྟན༌ན༌ ཛདས༌, ཡང༌ ཏད༌པ༌ཅན༌ ཚང༌མ༌ ཆོད༌ཁང༌ངི༌ ནང༌ང༌ སོ༌ལོ༌མོན༌ནི༌ ཡབས༌སི༌ཀ༌ ཛོམ༌མད༌པིན༌།
ACT 5:13 ཡུལ༌མི༌ ཚང༌མའེ༌ ཁོང༌གུན༌ལ༌ རྩི༌ཝ༌ མ༌ ཀྲག༌པོ༌ ཅོའད༌པིན༌, ཨིན༌ནའང༌ ཁོང༌གུན༌ནི༌ ཕྲོའ༌ དྲེས༌ཤེས༌སི༌ ཧམ༌པ༌ སུ༌ཞིག༌གའང༌ མ༌ཡོངས༌།
ACT 5:14 ཏེ༌ནེའང༌ བུ༌ཚའ༌ དང༌ བུ༌མོ༌ མང༌པོ༌ཞིག༌གི༌ གཙོ༌བོའེ༌ཀ༌ ཏད༌པ༌ ཁྱོངས༌ ཡང༌ ཏད༌པ༌ཅན༌གུན༌ནི༌ ཀྲངས༌ཀ༌ གྱས༌།
ACT 5:15 པི༌ཏྲར༌རི༌ ཧ༌ལས༌ཤེས༌སི༌ ཛད༌པ༌ སྟན༌ན༌ ཛད༌ཅེས༌པོའེ༌, ཁོང༌ ལམ༌ནེ༌ སྐྱོད༌ ཟ༌ནེ༌ ཁོང༌ངི༌ ཀྲིབ༌ཀྱག༌ ཕོག༌ན༌ གྱལ༌ཨིན༌ སམས༌ཏེ༌ མི༌གུན༌ནི༌ ནད༌པ༌གུན༌ ཁྱོངས༌ཏེ༌ ལམ༌མི༌ཀ༌ ཤག༌སྟན༌ དང༌ ཉལ༌ཁྲི༌ གུན༌ནི༌ཀ༌ བོར༌རད༌པིན༌།
ACT 5:16 ཡེ༌རུ༌ཤ༌ལེམ༌མི༌ ཉེ༌ཁོར༌རི༌ གྲོང༌ཁྱེར༌གུན༌ནེ༌ མི༌མངས༌ མང༌པོ༌ ཛོམས༌, མང༌པོ༌ཞིག༌གི༌ ནད༌པ༌ དང༌ གོང༌པོ༌ ཞུགས༌ཏེ༌ ནགས༌ སྟན༌ཁན༌ གུན༌ ཁྲིད༌ཏེ༌ ཁྱོངས༌, ཡང༌ པི༌ཏྲར༌རི༌ ཚང༌མ༌ ཕན༌ཅུག༌ག༌ ཛདས༌།
ACT 5:17 ཏེ༌བོ༌ ཐོང༌ཏེ༌ བླ༌མ༌ ཆེན༌མོ༌ དང༌ ཁོང༌ངི༌ ཕྲོ༌པ༌ སད༌དུ༌ཀི༌པ༌གུན༌ལ༌ སྲན༌ཏྲེ༌ ཚིག༌ཅེས༌ ཡོངས༌།
ACT 5:18 ཁོང༌གུན༌ནི༌ སྐུ༌ཚབས༌གུན༌ ཟུམ༌ཅུགས༌ཏེ༌ ཁོང༌གུན༌ ཙོན༌ལ༌ ཀགས༌,
ACT 5:19 ཨིན༌ནའང༌ ཚན༌ལ༌ གཙོ༌བོའེ༌ ཕོ༌ཉའེ༌ ཙོན༌ཁང༌ངི༌ སྒོ༌གུན༌ ཕེས༌ཏེ༌ ཁོང༌གུན༌ ཕི༌ལོག༌ག༌ ཕིངས༌ཏེ༌ ཁྱོངས༌ ཡང༌ མོལས༌,
ACT 5:20 “ཏ༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ སོང༌ཏེ༌ མི༌གུན༌ལ༌ མི༌ཚེ༌ སོ༌མ༌ ཐོབ༌ཅེས༌སི༌ ལོན༌བོ༌ གང༌པོ༌ ཤོད༌ཤིག༌།”
ACT 5:21 ནམ༌ ལངས༌ས༌ཅིག༌, ཁོང༌གུན༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ སོང༌ཏེ༌ མོལ༌ཁན༌ ནང༌ཞིན༌ ཆོས༌ཤད༌ད༌ ཛདས༌། བླ༌མ༌ ཆེན༌མོ༌ དང༌ ཁོང༌ངི༌ ཕྲོ༌པ༌གུན༌ ལེབ༌བ༌ཅིག༌, ཡ༌ཧུ༌དཱ༌པའེ༌ ཚོགས༌དུ༌ ༼ཡང༌ན༌ ཨིས༌ར༌ཨེལ༌ལི༌ འུ༌སྐྱོང༌གུན༌ནི༌ ཐུས༌མི༌ ཚང༌མ༌༽ བོད༌ཏེ༌, ཁོང༌གུན༌ནི༌ མག༌མི༌ ཁ༌ཅིག༌ སྐུ༌ཚབས༌གུན༌ ཁྱོང༌ང༌ལ༌ ཙོན༌ཁང༌ང༌ ལམ༌ཅུགས༌།
ACT 5:22 ཨིན༌ནའང༌ ཏེ༌ མག༌མི༌གུན༌ ཙོན༌ཁང༌ང༌ ལེབ༌བ༌ཅིག༌ ཁོང༌གུན༌ལ༌ ཏེ༌རུ༌ སྐུ༌ཚབས༌གུན༌ མ༌ཐོབ༌, ཡང༌ ལོགས༌ཏེ༌ སོང༌ཏེ༌ འི༌ སྐོར༌བོ༌ འུ༌སྐྱོང༌གུན༌ལ༌ ཤདས༌,
ACT 5:23 “ཙོན༌ཁང༌ངི༌ སྒོའ༌ ཀུ༌ལིག༌ ཅུགས༌ཏེ༌ མ༌སྟན༌པོ༌ ཅོས༌ཏེ༌ སྒོ༌ སྲུང༌པ༌གུན༌ སྒོ༌གུན༌ནི༌ཀ༌ སྲུངས༌ཏེ༌ དུག༌པིན༌, ཨིན༌ནའང༌ ང༌ཞའེ༌ སྒོ༌ ཕེས༌ཏེ༌ ནང༌ཀུག༌ག༌ ལྟས༌པ༌ སུའང༌ མི༌དུག༌།”
ACT 5:24 ཏེ༌ སྤེ༌ར༌བོ༌ ཚོར༌ར༌ཅིག༌, ཆོད༌ཁང༌ངི༌ གྱ༌སྤོན༌ དང༌ བླ༌མ༌ འུ༌སྐྱོང༌ ཚང༌མ༌ ཧ༌ལས༌, ཡང༌ ཅི༌ ཆ༌ཅེས༌ ཨིན༌ནོག༌ སམས༌ཏེ༌ ཐེ༌ཚོམས༌ སྐྱེས༌།
ACT 5:25 ཏེ༌རུ༌ མི༌ཞིག༌ ཡོངས༌ཏེ༌ ཟེརས༌, “ལྟོས༌སའང༌, ཁྱོ༌ཞའེ༌ ཙོན༌ལ༌ ཀགས༌ཁན༌ནི༌ མི༌གུན༌ནི༌ ཆོད༌ཁང༌ངི༌ གྱང༌སྐོར༌རི༌ ནང༌ང༌ མི༌གུན༌ལ༌ ཆོས༌ཤད༌དུག༌།”
ACT 5:26 ཏེ༌ནེ༌ གྱ༌སྤོན༌ མག༌མི༌གུན༌ ཉམ༌པོ༌ སོང༌ཏེ༌ སྐུ༌ཚབས༌གུན༌ ཝང༌ མ༌ཅོའ༌ ཁྲིད༌ཏེ༌ ཁྱོངས༌, ཅིའ༌ཟེར༌ན༌ མི༌གུན༌ནི༌ རྡོའ༌ གྱབས༌ཏེ༌ སད༌ཨིན༌ སམས༌ཏེ༌ ཁོང༌གུན༌ ཇིགས༌།
ACT 5:27 ཁོང༌གུན༌ནི༌ སྐུ༌ཚབས༌གུན༌ ཡ༌ཧུ༌དཱ༌པའེ༌ ཐུས༌མི༌གུན༌ནི༌ ཚོགས༌པའེ༌ དུན༌ལ༌ ཁྱོངས༌, ཡང༌ བླ༌མ༌ ཆེན༌མོའེ༌ ཁོང༌གུན༌ལ༌ ཟེརས༌,
ACT 5:28 “ང༌ཞའེ༌ ཁྱོ༌ཞ༌གུན༌ལ༌ ཡེ༌ཤུའི༌ མིང༌ ཁུར༌ཏེ༌ ཆོས༌ མ༌ཤད༌ ཟེར༌ཏེ༌ སལ༌པོ༌ བཀའ༌ ཏངས༌པིན༌, ཨིན༌ནའང༌ ཁྱོ༌ཞ༌གུན༌ནི༌ ཡེ༌རུ༌ཤ༌ལེམ༌ གང༌པོའེ༌ ནང༌ང༌ ཏེ༌ ཆོས༌པོ༌ ཁྱེབས༌ ཅུགས༌ཏོག༌, ཡང༌ ཁོ༌ སད༌ཁན༌ནི༌ ཉད༌པོ༌ ང༌ཞའེ༌ཀ༌ ཀལ༌ཅེས༌སི༌ རྩོན༌གྲུས༌ ཅོ༌རུག༌།”
ACT 5:29 པི༌ཏྲར༌ དང༌ ཞན༌ སྐུ༌ཚབས༌གུན༌ནི༌ ལན༌སལས༌, “ང༌ཞའེ༌ མི༌ སང༌ དཀོན༌མཆོག༌གི༌ ཁའ༌ཉན༌གོས༌།
ACT 5:30 ང༌ཞའེ༌ ཕ༌མེས༌པོའེ༌ དཀོན༌མཆོག༌གི༌ ཁྱོ༌ཞའེ༌ རྐྱང༌ཤིང༌ངི༌ཀ༌ རྐྱངས༌ཏེ༌ སད༌ཁན༌ནི༌ གཙོ༌བོ༌ ཡེ༌ཤུ༌, ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌།
ACT 5:31 ཨིས༌ར༌ཨེལ༌པ༌གུན༌ནི༌ སྡིག༌པ༌ ཅོ༌ཁན༌གུན༌ནི༌ཀ༌ གྱོད༌པ༌ ཅོས༌ཏེ༌ ཤགས༌པ༌ ཐོབ༌ཅེས༌སི༌ ཕིའ༌ དཀོན༌མཆོག༌གི༌ ཡེ༌ཤུའ༌ གྱལ༌ལུ༌ དང༌ སྐྱབ༌གོན༌ ཅོའ༌ ཛད༌ཏེ༌, རྩི༌ཝ༌ཅན༌ནི༌ ཀོ༌ས༌, ཆག༌ ཡས༌པའེ༌ཀ༌ བོར༌ར༌ ཛདས༌།
ACT 5:32 ང༌ཞའ༌ ཏེ༌གུན༌ནི༌ སྤང༌པོ༌ ཨིན༌ ཡང༌ ཏམ༌པའེ༌ ཐུག༌ཉིད༌དའང༌, ཏེན༌ན༌ ཐུག༌ཉིད༌བོ༌ དཀོན༌མཆོག༌གི༌ ཁའ༌ཉན༌ཁན༌གུན༌ལ༌ སལ༌ལ༌ ཛདས༌།”
ACT 5:33 ཏེ༌གུན༌ ཚོར༌པ༌ སྲོ༌ སྲན༌ཏྲེ༌ ཡོངས༌ཏེ༌ ཁོང༌གུན༌ནི༌ སྐུ༌ཚབས༌གུན༌ སད༌ཅེས༌སི༌ སམ༌བ༌ ཏངས༌།
ACT 5:34 ཨིན༌ནའང༌ གཱ༌མ༌ལི༌ཨེལ༌ ཟེར༌ཁན༌ནི༌ ཕ༌རུ༌ཤི༌པ༌ ཆོས༌ཁྲིམས༌ལ༌ ཁས༌པ༌ དང༌ ཡུལ༌མི༌ ཚང༌མའེ༌ རྩི༌ཝ༌ཅན༌ནི༌ མི༌ཞིག༌ ཡ༌ཧུ༌དཱ༌པའེ༌ ཚོགས༌དུའི༌ ཕྲོ༌ནེ༌ ལངས༌ཏེ༌ ཁོང༌གུན༌ ཙ༌པིག༌ཤིག༌གི༌ ཕིའ༌ ཕི༌ལོག༌ག༌ ཁྱེར༌ ཟེར༌ཏེ༌ བཀའ༌ ཏངས༌།
ACT 5:35 ཏེ༌ནེ༌ ཁོའེ༌ ཁོང༌གུན༌ལ༌ ཟེརས༌, “ངའེ༌ ཕྲོ༌པ༌ ཨིས༌ར༌ཨེལ༌པ༌གུན༌ ཁྱོ༌ཞའེ༌ ཏེ༌ མི༌གུན༌ལ༌ ཅི༌ ཅོ༌ནའང༌ སམ༌བ༌ ཏངས༌ཏེ༌ ཅོ༌ཤིག༌,
ACT 5:36 ཅིའ༌ཟེར༌ན༌ འི༌ སང༌ སྔུན༌མ༌ཞིག༌ ཐེའུ༌དཱས༌ ཟེར༌ཁན༌ཞིག༌ བིང༌ཏེ༌ ཁོ༌ མ༌ ཁག༌ཅན༌ མི༌ཞིག༌ ཨིན༌ཟུན༌ ཏངས༌པ༌ མི༌ ཞིབ༌གྱ༌ ཟམ༌ཤིག༌ ཁོའེ༌ གྱབ༌ནེ༌ བྲངས༌ ཨིན༌ནའང༌ ཁོ༌ སདས༌། ཏེ༌ནེ༌ ཁོའ༌ ཆོགས༌ ཅོ༌ཁན༌ ཚང༌མ༌ ཡན༌ཏེ༌ ཁོའེ༌ ལས༌ལ༌ བྲས༌བུ༌ མ༌སྨིན༌།
ACT 5:37 ཏེ༌བོའེ༌ སྟིང༌ནེ༌ མི༌ཀྲངས༌ རྩིའི༌ ཏུས༌ལ༌, གཱ༌ལིལ༌ལི༌པ༌ ཡུ༌དཱ༌ ཟེར༌ཁན༌ཞིག༌ བིང༌པིན༌, ཁོའེ༌ གྱབ༌ནེའང༌ མི༌ མང༌པོ༌ སོང༌, ཁོའང༌ སདས༌, ཡང༌ ཁོའ༌ བྲངས༌ཁན༌ ཚང༌མ༌ ཡན༌ཏེ༌ མེད༌ཁན༌ སོང༌།”
ACT 5:38 “ཏེན༌ན༌བོའེ༌ཕིའ༌ དག༌ས༌ འི༌ ནས༌ལུག༌པོའ༌ ལྟས༌ཏེ༌ ངའེ༌ ཁྱོ༌ཞ༌གུན༌ལ༌ ཟེར༌རད༌, ཏེ༌ མི༌གུན༌ལ༌ ཅའང༌ མ༌ཅོའ༌ ཕུད༌དོང༌, ཀལ༌ཏེས༌ ཁོང༌ངི༌ ལས༌གུན༌ མི༌ ཆོགས༌ནེ༌ ཨིན༌ན༌ ཏེ༌གུན༌ལ༌ བྲས༌བུ༌ མི༌སྨིན༌།
ACT 5:39 ཀལ༌ཏེས༌ ཏེ༌གུན༌ དཀོན༌མཆོག༌ ཆོགས༌ནེ༌ ཨིན༌ན༌, ཁྱོ༌ཞའ༌ ཁོང༌གུན༌ནི༌ ལས༌པོ༌ སྒག༌ མི༌ཉན༌, མ༌ཚད༌ ཁྱོ༌ཞ༌གུན༌ལ༌ ཧ༌གོ༌གོས༌ ཁྱོ༌ཞའེ༌ དཀོན༌མཆོག༌གི༌ གྱབ༌གལ༌ ཅོས༌ཏེ༌ ཨིན༌ནོག༌།” ཁོང༌གུན༌ནི༌ ཁོའེ༌ ཟེར༌ཁན༌བོའ༌ ཁའ༌ཆམས༌།
ACT 5:40 ཏེ༌ནེ༌ སྐུ༌ཚབས༌གུན༌ལ༌ བོདས༌ ཡང༌ རྟལ༌ལྕག༌ གྱབ༌ཅུགས༌ཏེ༌ ཏ༌ནེ༌ཕར༌ལ༌ ཡེ༌ཤུའི༌ ཚན༌ ཁུར༌ཏེ༌ ཆོས༌ཤད༌ མི༌ཆོགས༌ ཟེར༌ཏེ༌ ཁོང༌གུན༌ ཕུད༌ཏངས༌།
ACT 5:41 ཁོང༌གུན༌ལ༌ ཡེ༌ཤུའི༌ ཚན༌ནི༌ ནང༌ང༌ རྡུག༌ངལ༌ ཁུར༌ཅེས༌སི༌ རྩི༌ཝ༌ ཐོབ༌ པ༌སང༌, ཁོང༌གུན༌ ཡ༌ཧུ༌དཱ༌པའེ༌ ཚོགས༌དུ༌ནེ༌ ཕི༌ལོག༌ག༌ ཐད༌ཨིན༌ བིང༌ཏེ༌ སོང༌།
ACT 5:42 ཁོང༌གུན༌ནི༌ ཆོས༌ཤད༌ཅེས༌ མ༌ཕང༌ང༌ ཞག༌ཏང༌ ཆོད༌ཁང༌ དང༌ ཁང༌པ༌གུན༌ལ༌ སོང༌ཏེ༌, ཡེ༌ཤུ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོའེ༌ སྐོར༌ལ༌ ཆད༌མེད༌ལ༌ གའ༌མོའེ༌ ནས༌ཚུལ༌ ཤདས༌།
ACT 6:1 ཏད༌པ༌ཅན༌གུན༌ནི༌ ཀྲངས༌ཀ༌ ཕེལ༌ཨིན༌ ཡོད༌ ཟ༌ནེ༌, གརིས༌པའེ༌ ཨ༌ནེ༌མ༌རང༌མོ༌གུན༌ལ༌ ཞག༌ཏང༌ངི༌ ཟན༌ བགོ༌ཅེས༌སི༌ ནང༌ང༌ ཡ༌ཕེས༌ ཅོ༌ཅེས༌པོ༌ ཐོང༌ཏེ༌ གརིས༌པའེ༌ ཏད༌པ༌ཅན༌གུན༌ནི༌ ཨིབ༌རི༌པའེ༌ ཏད༌པ༌ཅན༌གུན༌ནི༌ གྱབ༌གལ༌ལ༌ སྐྱོན༌རྗོད༌ ཅོས༌།
ACT 6:2 ཏེ༌བོ༌ ཚོར༌ར༌ཅིག༌ སྐུ༌ཚབས༌ རྕུག༌ཉིས༌པོའེ༌ ཞན༌ ལོབ༌ཕྲུགས༌གུན༌ ལྡུས༌ཏེ༌ ཁོང༌གུན༌ལ༌ མོལས༌, “ཀལ༌ཏེས༌ ཁར༌ཇི༌ བགོ༌ཨིན༌ དུགས༌ཏེ༌ དཀོན༌མཆོག༌གི༌ བཀའ༌ ལབ༌ཅེས༌པོའ༌ སྣང༌ང༌ མ༌ཏང༌ན༌ ང༌ཞ༌གུན༌ནི༌ ནོར༌ཁྲུལ༌ ཅོས༌ཏེ༌ ཨིན༌ནོག༌།
ACT 6:3 ཏེན༌ན༌བོའེ༌ཕིའ༌ སྤུན༌གུན༌, ཁྱོ༌ཞ༌རང༌ངི༌ ཕྲོ༌ནེ༌ ཏམ༌པའེ༌ ཐུག༌ཉིད༌ དང༌ ཤེས༌རབས༌ གངས༌ཁན༌ རྩི༌ཝ༌ཅན༌ བུ༌ཚ༌ རྡུན༌ ལྡོམ༌ཤིག༌, ང༌ཞའེ༌ ཁོང༌གུན༌ལ༌ ཏེ༌ ལས༌པོ༌ ཅོ༌ཅེས༌སི༌ ཁག༌ སྟད༌ཨིན༌།
ACT 6:4 ཏེ༌ནེ༌ ང༌ཞ༌གུན༌ནི༌ ཏུས༌ ཚང༌མ༌ མོས༌ལམ༌ ཞུ༌ཅེས༌ དང༌ བཀའ༌ ལབ༌ཅེས༌སི༌ ཞབས༌ཏོག༌གི༌ ནང༌ང༌ ཏང༌ ཐུབ༌ཨིན༌།”
ACT 6:5 ཏེ༌ སྤེ༌ར༌བོ༌ ཚོར༌ཏེ༌ ཏེ༌རུ༌ ཛོམས༌ཁན༌ ཚང༌མ༌ ཐད༌ ཡང༌ ཁོང༌གུན༌ནི༌ ལྡམ༌ཁན༌གུན༌: སྟེ༌ཕན༌ ༼ཏད༌པ༌ དང༌ ཏམ༌པའེ༌ ཐུག༌ཉིད༌དི༌ གངས༌ཁན༌༽, ཕི༌ལིབ༌, པོརོ༌ཀོར༌འུས༌, ནི༌ཀ༌ནོར༌, ཏི༌མོན༌, པར༌མེ༌ནཱས༌, སྔུན༌ལ༌ ཡ༌ཧུ༌དཱ༌པའེ༌ ཆོས༌ལ༌ སྟེན༌ཁན༌ ཨན༌ཏི༌ཡོག༌པ༌ ནི༌ཀོ༌ལཱ༌ རྡུན༌ཀོ༌ ཨིན༌ནོག༌།
ACT 6:6 ཏེ༌ རྡུན༌ཀོ༌ སྐུ༌ཚབས༌གུན༌ནི༌ དུན༌ལ༌ ཁྱེར༌པ༌ ཁོང༌གུན༌ནི༌ ཁོང༌གུན༌ནི༌ གོའེ༌ཀ༌ ཆག༌ བོར༌ཏེ༌ མོས༌ལམ༌ ཞུའ༌ ཛདས༌།
ACT 6:7 དཀོན༌མཆོག༌གི༌ བཀའ༌ མང༌ང༌ གྱས༌ཨིན༌ སོང༌, ཏད༌པ༌ཅན༌གུན༌ནི༌ ཀྲངས༌ཀ༌ ཡེ༌རུ༌ཤ༌ལེམ༌མི༌ ནང༌ང༌ མང༌པོ༌ ཕེལ༌ ཡང༌ ཡ༌ཧུ༌དཱ༌པའེ༌ བླ༌མ༌ མང༌པོ༌ཞིག༌གིའང༌ ཏད༌པ༌ ཅོས༌།
ACT 6:8 དཀོན༌མཆོག༌གི༌ ཐུག༌རྗེ༌ དང༌ སྟོབས༌སི༌ གངས༌ཏེ༌, སྟེ༌ཕན༌ནི༌ མི༌གུན༌ནི༌ ཕྲོའ༌ ཧ༌ལས༌ཤེས༌སི༌ ཛད༌པ༌ དང༌ ལྟས༌ མང༌པོ༌ སྟན༌ནད༌པིན༌།
ACT 6:9 ཚེ༌ཡོག༌ནེ༌ ཐར༌ཁན༌གུན༌ནི༌ དུ༌ཁང༌ངི༌ ཐུས༌མི༌ ཁ༌ཅིག༌གི༌ སྟེ༌ཕན༌ ཉམ༌པོ༌ ཟེར༌ཟེར༌ གོ༌ཟུག༌ ཅོས༌། ཁོང༌གུན༌ ཀི༌རིན༌, ཨ༌ལེག༌ཟན༌དྲིའ༌, ཀཱི༌ལི༌ཀི༌ཡཱ༌ དང༌ ཨ༌སི༌ཨཱ༌ནེ༌ ཡོངས༌ཁན༌ནི༌ ཡ༌ཧུ༌དཱ༌པ༌གུན༌ ཨིན༌པིན༌།
ACT 6:10 ཨིན༌ནའང༌ སྟེ༌ཕན༌ནི༌ ཏམ༌པའེ༌ ཐུག༌ཉིད༌ ཡང༌ ཤེས༌རབས༌ ཉམ༌པོ༌ མོལ༌ཁན༌བོའེ༌ཀ༌ ཁོང༌གུན༌ ལོ༌ མ༌ཐུབ༌།
ACT 6:11 ཏེ༌ནེ༌ ཁོང༌གུན༌ནི༌ སང༌ཝའེ༌ ཐོག༌ནེ༌ ལྕེ༌ ཀོལ༌ཁན༌ནི༌ མི༌ ཁ༌ཅིག༌ག༌, “སྟེ༌ཕན༌ནི༌ ལུང༌སྟོན༌པ༌ མོ༌ཟེས༌ དང༌ དཀོན༌མཆོག༌ག༌ དད༌ལོག༌ ཞུ༌ཅེས༌པོ༌ ང༌ཞའེ༌ ཚོར༌” ཟེར༌ཅུགས༌།
ACT 6:12 ཏེ༌ཟུག༌ ཚོར༌ཅེས༌པོའེ༌ མི༌གུན༌, འུ༌སྐྱོང༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ལ༌ སྟེ༌ཕན༌ནི༌ཀ༌ སྲོ༌ སྲན༌ཏྲེ༌ ལངས༌། ཁོང༌གུན༌ནི༌ སྟེ༌ཕན༌ ཟུམས༌ཏེ༌ ཡ༌ཧུ༌དཱ༌པའེ༌ ཚོགས༌དུའི༌ དུན༌ལ༌ ཁྱེརས༌།
ACT 6:13 ཁོང༌གུན༌ནི༌ ཟུན༌མ༌ སྤང༌པོ༌ མང༌པོ༌ ཕིངས༌ ཡང༌ ཁོང༌གུན༌ལ༌ ཟེར༌ཅུགས༌, “འི༌ མི༌བོའེ༌ ཏུས༌གྱུན༌ ཏམ༌པའེ༌ ཆོད༌ཁང༌ དང༌ བཀའ༌ཁྲིམས༌གུན༌ནི༌ གྱབ༌གལ༌ལ༌ ཟེར༌དུག༌།
ACT 6:14 སྤེར༌ན༌ ན༌ཙ༌རེད༌པ༌ ཡེ༌ཤུའི༌ འི༌ ཆོད༌ཁང༌བོ༌ ཤིག༌ཅེས༌ ཡང༌ ལུང༌སྟོན༌པ༌ མོ༌ཟེས༌སི༌ ང༌དང༌ང༌ སལ༌ཁན༌ནི༌ ལུག༌སྲོལ༌གུན༌ གྱུར༌ཨིན༌ ཟེར༌ཁན༌བོ༌ ང༌ཞའེ༌ ཚོར༌།”
ACT 6:15 ཡ༌ཧུ༌དཱ༌པའེ༌ ཚོགས༌དུའི༌ ནང༌ང༌ ལྡུས༌ཏེ༌ ཡོད༌ཁན༌གུན༌ནི༌ སྟེ༌ཕན༌ལ༌ ཇག༌པོ༌ ཅོས༌ཏེ༌ ལྟས༌, ཅིའ༌ཟེར༌ན༌ ཁོའེ༌ ལྡོང༌བོ༌ དཀོན༌མཆོག༌གི༌ ཕོ༌ཉའེ༌ ཞལ༌དོང༌ ཙོགས༌ ཐོང༌ངད༌པིན༌།
ACT 7:1 ཏེ༌ནེ༌ བླ༌མ༌ ཆེན༌མོའེ༌ སྟེ༌ཕན༌ལ༌ ཏྲིས༌, “ཁྱོ༌རང༌ངི༌ཀ༌ ཀལ༌ཁན༌ནི༌ འི༌ སྐྱོན༌གུན༌ ཀྲང༌པོ༌ ཨིན༌ནོག༌ག༌?”
ACT 7:2 སྟེ༌ཕན༌ནི༌ ལན༌སལས༌, “ངའེ༌ སྤུན༌ དང༌ འུ༌སྐྱོང༌ གུན༌ ཉོན༌ཤིག༌, ང༌དང༌ངི༌ ཕ༌མེས༌པོ༌ ཨབ༌ར༌ཧམ༌ ཧ༌རན༌ ཡུལ༌ལ༌ ནས༌སི༌ སང༌ སྔུན༌ལ༌ མེ༌སོ༌པོ༌ཏོ༌མིའ༌ ཡོད༌ ཟ༌ནེ༌ ཁོང༌ང༌ ཟིར༌རྗིད༌ཅན༌ནི༌ དཀོན༌མཆོག༌ ཇལ༌།
ACT 7:3 ཡང༌ དཀོན༌མཆོག༌གི༌ ཁོང༌ང༌ བཀའ༌ སལས༌, ‘ཁྱོ༌རང༌ངི༌ ཕ༌ཡུལ༌ དང༌ ཉེན༌གུན༌ བོར༌ཏེ༌ ངའེ༌ སྟན༌ཅེས༌ཅན༌ནི༌ ཡུལ༌ལ༌ སོང༌ །’
ACT 7:4 ཨབ༌ར༌ཧམ༌ ཀཱལ༌དིའ༌ ཡུལ༌ནེ༌ བིང༌ཏེ༌, ཧ༌རན༌ ཟེར༌སའེ༌ ཡུལ༌ལ༌ ནས༌ཏེ༌ དུགས༌, ཡང༌ ཁོང༌ངི༌ ཨ༌བ༌ ཀྲོངས༌ཏེ༌ སྟིང༌ནེ༌ དཀོན༌མཆོག༌གི༌ ཁོང༌ ཁྱོ༌ཞའ༌ དུགས༌ཏེ༌ ཡོད༌ཁན༌ནི༌ འི༌ ས༌ཀྱད༌པོའེ༌ཀ༌ ཁྱོངས༌།”
ACT 7:5 “དཀོན༌མཆོག༌གི༌ ནོར༌སྐལ༌ ཅའང༌ མ༌སལས༌, མི༌ཀྲར༌ ཅིག༌གི༌ ས༌ཀྱད༌དང༌། ཏེ༌ཏུས༌ལ༌ ཨབ༌ར༌ཧམ༌མ༌ ཕྲུ༌གུ༌ མེད༌ནའང༌ དཀོན༌མཆོག༌གི༌ འི༌ ས༌ཀྱད༌པོ༌ ཁོང༌ དང༌ ཁོང༌ངི༌ པུར༌གྱུད༌གུན༌ལ༌ ཏང༌ཨིན༌ མོལ༌ཏེ༌ ཨབ༌ར༌ཧམ༌མ༌ ཞལ༌ཆད༌ ཛདས༌།
ACT 7:6 ཡང༌ དཀོན༌མཆོག༌གི༌ ཨབ༌ར༌ཧམ༌མ༌ མོལས༌, ‘ཁྱོ༌རང༌ངི༌ པུར༌གྱུད༌གུན༌ ཞན༌ཡུལ༌ཞིག༌གི༌ ནང༌ང༌ ཁྱམ༌པོ༌ ཙོགས༌ལ༌ དུག༌ཨིན༌། ཏེ༌ ཡུལ༌ལི༌ མི༌གུན༌ནི༌ ཁོང༌གུན༌ ཚེ༌ཡོག༌ ཅོས༌ཏེ༌ ལོ༌ ཞིབ༌གྱ༌ ཟམ༌ཤིག༌ ཁོང༌གུན༌ལ༌ ནགས༌ སྟན༌ཨིན༌།
ACT 7:7 ཨིན༌ནའང༌ ངའེ༌ ཁྱོ༌ཞའ༌ ཚེ༌ཡོག༌ག༌ བོར༌ཁན༌ནི༌ མིར༌གྱུད༌གུན༌ལ༌ ཆད༌པ༌ ཅད༌ཨིན༌, ཡང༌ ཁྱོ༌རང༌ངི༌ པུར༌གྱུད༌གུན༌ ཏེ༌ ཡུལ༌ནེ༌ བིང༌ཏེ༌, ཁོང༌གུན༌ནི༌ འི༌ ཡུལ༌ལི༌ ནང༌ང༌ ངའ༌ ཅོལ༌ཨིན༌ །’”
ACT 7:8 “ཏེ༌ཏུས༌ལ༌ དཀོན༌མཆོག༌གི༌ ཨབ༌ར༌ཧམ༌ ཉམ༌པོ༌ སུན༌ནད༌ ཅོ༌གོ༌ཤེས༌སི༌ ཆད༌དོན༌ ཛདས༌། ཏེ༌ནེ༌ ཨབ༌ར༌ཧམ༌ ཨ༌བ༌ གྱུར༌ཏེ༌ ཞག༌ རྒྱད༌པའེ༌ ཞག༌ག༌ ཁོའེ༌ ཁོ༌རང༌ངི༌ བུ༌ཚའ༌ ཨི༌སཱག༌ག༌ སུན༌ནད༌ ཅོ༌ཅུགས༌། ཏེན༌ན༌ ལོབས༌པོ༌ ཨི༌སཱག༌ ཡ༌ཀོབ༌བི༌ ཨ༌བ༌ གྱུར༌ ཟ༌ནེ༌, ཡང༌ ཡ༌ཀོབ༌ ང༌དང༌ངི༌ ཕ༌མེས༌པོ༌ རྕུག༌ཉིས༌པའེ༌ ཨ༌བ༌ གྱུར༌ ཟ༌ནེའང༌, ཅོས༌།”
ACT 7:9 “ཡ༌ཀོབ༌བི༌ ཞན༌ ཕྲུ༌གུ༌གུན༌ ཡོ༌སེབ༌བི༌ཀ༌ ཚིགས༌ པ༌སང༌, ཁོང༌གུན༌ནི༌ ནོ༌ ཡོ༌སེབ༌ ཨི༌ཇིབ༌པ༌ རིག༌ག༌ ཚེ༌ཡོག༌གི༌ ཕིའ༌ ཙོངས༌, ཨིན༌ནའང༌ དཀོན༌མཆོག༌ ཡོ༌སེབ༌ ཉམ༌པོ༌ ཡོད༌པིན༌།
ACT 7:10 དཀོན༌མཆོག༌གི༌ ཡོ༌སེབ༌ རྡུག༌ངལ༌ ཚང༌མ༌ནེ༌ སྐྱོབས༌ཏེ༌ བོར༌ར༌ ཛདས༌། དཀོན༌མཆོག༌གི༌ ཁོའ༌ ཨི༌ཇིབ༌བི༌ གྱལ༌པོ༌ ཕེ༌རོའེ༌ ཆོགས༌སྐྱོར༌ ཐོབ༌ཅུག༌ག༌ ཛདས༌, ཡང༌ ཤེས༌རབས༌ སལ༌ལ༌ ཛད༌ཅེས༌པོའེ༌ ཁོ༌ ཏེ༌ ཡུལ༌ དང༌ ཁར༌ གང༌པོའེ༌ཀ༌ ཝང༌སྲུལ༌པ༌ སྐོས༌།”
ACT 7:11 “ཏེ༌ནེ༌ ཨི༌ཇིབ༌ དང༌ ཀེ༌ནན༌ ཡུལ༌ གང༌པོའེ༌ ནང༌ང༌ མུ༌གེ༌ ལངས༌ཏེ༌ མ༌ རྡུག༌ངལ༌ ཆེན༌མོ༌ ཐོང༌། ང༌དང༌ངི༌ ཕ༌མེས༌པོ༌གུན༌ལའང༌ ཟ༌གྱུ༌ སྐོན༌མོ༌ སོང༌པིན༌།
ACT 7:12 ཡ༌ཀོབ༌བ༌ ཨི༌ཇིབ༌ ཡུལ༌ལི༌ ནང༌ང༌ ཀྲོ༌ནས༌ ཡོད༌ཁན༌བོ༌ ཚོར༌ཏེ༌, ཁོའེ༌ ང༌དང༌ངི༌ ཕ༌མེས༌པོ༌གུན༌ ཨི༌ཇིབ༌བི༌ ཡུལ༌ལ༌ ཀལས༌, ཏེ༌རུ༌ ཁོང༌གུན༌ གོ༌མ༌རང༌ སོང༌ཏེ༌ ཨིན༌པིན༌།
ACT 7:13 ལན༌ ཉིས༌པ༌ ཡོང༌ ཟ༌ནེ༌ ཡོ༌སེབ༌བི༌ ཁོ༌རང༌ངི༌ ཨ༌ཅོ༌ནོ༌གུན༌ལ༌ ཁོ༌ སུ༌ ཨིན༌ཁན༌བོ༌ ཤདས༌, ཡང༌ ཨི༌ཇིབ༌བི༌ གྱལ༌པོ༌ ཕེ༌རོའང༌ ཡོ༌སེབ༌བི༌ ནང༌ཚངས༌སི༌ སྐོར༌ལ༌ གྱུས༌ སོང༌།
ACT 7:14 ཏེ༌ སྟིང༌ནེ༌ ཡོ༌སེབ༌བི༌ རང༌ངི༌ ཨ༌བ༌ ཡ༌ཀོབ༌ དང༌ ཁོང༌ངི༌ ནང༌མི༌ 75 ཚང༌མ༌ ཨི༌ཇིབ༌བ༌ བོད༌ཏེ༌ ཁྱོངས༌།
ACT 7:15 ཡ༌ཀོབ༌ ཨི༌ཇིབ༌ ཡུལ༌ལ༌ སོང༌ ཡང༌ ཏེ༌རུ༌ ཁོང༌ དང༌ ང༌དང༌ངི༌ ཕ༌མེས༌པོ༌ ཚང༌མ༌ ཀྲོངས༌།
ACT 7:16 ཁོང༌གུན༌ནི༌ སྤུར༌གུན༌ ཤེ༌ཀེམ༌མ༌ ཁྱེར༌ཏེ༌ སྤུར༌ཁང༌ངི༌ ནང༌ང༌ བོརས༌, ཀ༌ ས༌ཀྱད༌པོ༌ ཨབ༌ར༌ཧམ༌མི༌ ཤེ༌ཀེམ༌པ༌ ཧ༌མོར༌རི༌ བུ༌ཚ༌གུན༌ནི༌ ཀ༌ནེ༌ ཉོས༌ཏེ༌ ཨིན༌པིན༌།”
ACT 7:17 “དཀོན༌མཆོག༌གི༌ ཨབ༌ར༌ཧམ༌མ༌ ཞལ༌ཆད༌ ཛད༌ཁན༌བོའེ༌ ཏུས༌ དྲན༌དྲ༌ ཆ༌ཅེས༌ ཉེ༌མོ༌ ལེབ༌བ༌ཅིག༌, ཨི༌ཇིབ༌བི༌ ནང༌ང༌ ང༌དང༌ངི༌ མི༌གུན༌ མང༌པོ༌ ཕེལ༌ཏེ༌ ཡོད༌པིན༌།
ACT 7:18 ཏེ༌ནེ༌ ཨི༌ཇིབ༌བི༌ ནང༌ང༌ གྱལ༌པོ༌ སོ༌མ༌ བིང༌ཁན༌བོའ༌ ཡོ༌སེབ༌བི༌ ཅོས༌ཁན༌ནི༌ སྐོར༌ལ༌ ཅའང༌ གྱུས༌ མེད༌པིན༌།
ACT 7:19 ཏེ༌ གྱལ༌པོ༌བོའེ༌ ང༌དང༌ངི༌ ཕ༌མེས༌པོ༌གུན༌ ཉམ༌པོ༌ སྐྱོན༌ ཀོལ༌ཏེ༌ ཁོང༌གུན༌ལ༌ ནགས༌ སྲན༌ཏྲེ༌ སྟནས༌, སྤེར༌ན༌ ཕ༌མ༌གུན༌ལ༌ ཝང༌ ཀོལ༌ཏེ༌ ཁོང༌ངི༌ ཕྲུ༌གུ༌ སྐྱེས༌ཁན༌གུན༌ ཤི༌ཅེས༌ལ༌ ཕང༌ཅུགས༌།”
ACT 7:20 “ཏེན༌ན༌ ཏུས༌ལ༌ མོ༌ཟེས༌ སྐྱེས༌ ཡང༌ ཁོ༌ ཉམ༌པོ༌ དཀོན༌མཆོག༌ ཐུག༌ཉེས༌ས༌ ཛདས༌། ཟླ༌ཝ༌ སུམ༌ ཚག༌པ༌ ཁོའ༌ ཁོ༌རང༌ངི༌ ཕ༌མའེ༌ སྟ༌སྟོག༌ ཅོས༌།
ACT 7:21 ཡང༌ ཁོའེ༌ ཕ༌མའ༌ ཁོ༌ ཁང༌པ༌ནེ༌ ཕི༌ལོག༌ག༌ བོར༌གོས༌ས༌ཅིག༌, ཨི༌ཇིབ༌བི༌ གྱལ༌པོ༌ ཕེ༌རོའེ༌ བུ༌མོའེ༌ ཁོ༌ སོས༌བུའ༌ ལེན༌ཏེ༌ རང༌ངི༌ ཕྲུ༌གུ༌ ཚོགས༌ལ༌ སྲལ༌ཏེ༌ བོརས༌།
ACT 7:22 མོ༌ཟེས༌སི༌ ཨི༌ཇིབ༌པའེ༌ ཤེས༌རབས༌སི༌ ཡོན༌ཏན༌ ཚང༌མ༌ ཇངས༌ཏེ༌ ཁོ༌ སྤེ༌ར༌ དང༌ ལས༌སི༌ ནང༌ང༌ ཁས༌པ༌ ཡོད༌པིན༌།”
ACT 7:23 “ལོ༌ ཞིབ༌ཅུ༌ ཆའ༌ཅིག༌ མོ༌ཟེས༌སི༌ ཁོ༌རང༌ངི༌ མི༌ ཨིས༌ར༌ཨེལ༌པ༌གུན༌ལ༌ ཐུག༌ཅེས༌ ཐག༌ཅདས༌།
ACT 7:24 ཏེ༌ནེ༌ ཨིས༌ར༌ཨེལ༌པ༌ཞིག༌གི༌ཀ༌ མི༌འོས༌པ༌ ཆ༌ ཐོང༌པ༌ ཁོ༌ སྐྱོབ༌བ༌ལ༌ སོང༌, ཡང༌ ཏེ༌བོའ༌ ལན༌ཏངས༌ཏེ༌ ཁོའེ༌ ཨི༌ཇིབ༌པ༌བོ༌ སད༌དངས༌།
ACT 7:25 མོ༌ཟེས༌སི༌, དཀོན༌མཆོག༌གི༌ ཁོ༌ གྱུད༌ཏེ༌ ཨིས༌ར༌ཨེལ༌པ༌ ཚང༌མ༌ ཨི༌ཇིབ༌པའེ༌ ང༌ཡོག༌ནེ༌ ཕུད༌ཅེས༌པོ༌ ཁོའེ༌ མི༌གུན༌ནི༌ ཧ༌གོ༌ཨིན༌ སམ༌མད༌པིན༌, ཨིན༌ནའང༌ ཁོང༌གུན༌ལ༌ ཧ༌མ༌གོ༌།”
ACT 7:26 “ཐོ༌རེ༌ཟུག༌པོ༌ མོ༌ཟེས༌སི༌ ཨིས༌ར༌ཨེལ༌པ༌ ཉིས༌ ནོལ༌ཨིན༌ ཐོང༌ཏེ༌ ཁོང༌གུན༌ལ༌ ཐུན༌ཅུག༌ཅེས༌སི༌ རྩོན༌གྲུས༌ ཅོ༌ཨིན༌ ཟེརས༌, ‘ཁྱོ༌ཞའ༌ སྤུན༌ ཨིན༌ནོག༌, ཅིའ༌ ཅིག༌ དང༌ ཅིག༌ ནོལ༌ལད༌།’”
ACT 7:27 “ཨིན༌ནའང༌ ཏེ༌ མི༌འོས༌པ༌ ཅོ༌ཁན༌ མི༌བོའེ༌ མོ༌ཟེས༌ འ༌ངོའ༌ རིལ༌ཏངས༌ཏེ༌ ཟེརས༌, ‘ཁྱོ༌རང༌ སུའི༌ ང༌ཞའེ༌ཀ༌ ཝང༌སྲུལ༌པ༌ དང༌ ཁྲིམ༌སྤོན༌ལ༌ སྐོས༌?
ACT 7:28 དའང༌ ཏེ༌ ཨི༌ཇིབ༌པ༌བོ༌ སད༌ད༌ ཙོགས༌ལ༌ ཁྱོ༌རང༌ངི༌ ངའང༌ སད༌ཨིན༌ན༌ ?’
ACT 7:29 ཏེ༌ཟུག༌ ཚོར༌ར༌ཅིག༌ མོ༌ཟེས༌ མི༌དི༌ཡའན༌ ཟེར༌སའེ༌ ཡུལ༌ལ༌ ཤོར༌ཏེ༌ སོང༌, ཡང༌ ཏེ༌རུ༌ ཤོར༌བུ༌ཞིག༌གི༌ ཚུལ༌ལ༌ དུགས༌ཏེ༌ བུ༌ཚ༌ ཉིས༌སི༌ ཨ༌བ༌ གྱུར༌།”
ACT 7:30 “ལོ༌ ཞིབ༌ཅུའི༌ སྟིང༌ནེ༌, སི༌ནཱའི༌ རི༌ ཉེ༌མོ༌ ཡོད༌ཁན༌ནི༌ རི༌སྟོང༌ཞིག༌གི༌ ནང༌ང༌, ལྕང༌མ༌ ཆུ༌ངུན༌ མེ༌ བར༌ཁན༌ཞིག༌གི༌ ནང༌ནེ༌ དཀོན༌མཆོག༌གི༌ ཕོ༌ཉ༌ཞིག༌ ཁོང༌ང༌ ཇལ༌།
ACT 7:31 ཏེ༌བོ༌ ཐོང༌ཏེ༌ མོ༌ཟེས༌ ཧ༌ལས༌, ཡང༌ ཏེ༌ མེ༌བོའ༌ ལྟའ༌ལ༌ ཉེ༌མོའ༌ སོང༌པ༌ ཁོའ༌ ཏེ༌ནང༌ནེ༌ གཙོ༌བོ༌ དཀོན༌མཆོག༌གི༌ སྐད༌ ཚོར༌,
ACT 7:32 ‘ང༌ ནི༌ ཁྱོ༌རང༌ངི༌ ཕ༌མེས༌པོ༌གུན༌ནི༌ དཀོན༌མཆོག༌, ཨབ༌ར༌ཧམ༌, ཨི༌སཱག༌ དང༌ ཡ༌ཀོབ༌བི༌ དཀོན༌མཆོག༌ ཨིན༌ ’, མོལ༌ཁན༌བོ༌ ཚོར༌པ༌ མོ༌ཟེས༌ ཇིགས༌ཏེ༌ དར༌, ཡང༌ ཁོང༌ང༌ ལྟ༌ མ༌ཁྱུད༌།”
ACT 7:33 “ཏེ༌ནེ༌ གཙོ༌བོ༌ དཀོན༌མཆོག༌གི༌ མོ༌ཟེས༌ལ༌ མོལས༌, ‘ཁྱོ༌རང༌ངི༌ པ༌བུ༌ ཕུད༌ ཅིའ༌ཟེར༌ན༌ ཁྱོ༌རང༌ ལངས༌ཏེ༌ ཡོད༌ཁན༌ནི༌ ས༌ཀྱད༌པོ༌ ཏམ༌པ༌ ཨིན༌།
ACT 7:34 ང༌ ཨི༌ཇིབ༌ ཡུལ༌ལ༌ ཡོད༌ཁན༌ནི༌ ངའེ༌ མི༌གུན༌ནི༌ རྡུག༌ངལ༌ བར༌དོ༌གུན༌ ཐོང༌, ཡང༌ ཉ༌ངན༌ནི༌ ཀུ༌ཅོ༌གུན༌ ཚོར༌པ༌ ང༌ ཁོང༌གུན༌ ཐར༌ཅུག༌ཅེས༌ལ༌ བབས༌ཏེ༌ ཡོངས༌ཏེ༌ ཨིན༌། ཏ༌ སོང༌, ཁྱོ༌རང༌ ངའེ༌ ཨི༌ཇིབ༌བ༌ ལོགས༌ཏེ༌ ཀལ༌ལད༌།’”
ACT 7:35 “འི༌བོ༌ ཏེན༌ན༌ མོ༌ཟེས༌ ཨིན༌པིན༌ ཀ༌བོའ༌, ཨིས༌ར༌ཨེལ༌པ༌གུན༌ནི༌ ‘ཁྱོ༌རང༌ སུའི༌ ང༌ཞའེ༌ཀ༌ ཝང༌སྲུལ༌པ༌ དང༌ ཁྲིམ༌སྤོན༌ལ༌ སྐོས༌’ ཟེར༌ཏེ༌ མ༌རྩིའ༌ ཨིན༌པིན༌། ཏེན༌ན༌ མོ༌ཟེས༌ལ༌ ལྕང༌མ༌ ཆུ༌ངུན༌ མེའ༌ བར༌ཁན༌ནི༌ ཕྲོ༌ནེ༌ ཇལ༌ཁན༌ནི༌ ཕོ༌ཉ༌ གྱུད༌ཏེ༌ དཀོན༌མཆོག༌གི༌ ཝང༌སྲུལ༌པ༌ དང༌ ཐར༌ཅུག༌ཁན༌ལ༌ སྐོའ༌ ཛདས༌།
ACT 7:36 ཁོའེ༌ ཨིས༌ར༌ཨེལ༌པ༌ ཚང༌མ༌ ཨི༌ཇིབ༌ནེ༌ ཕི༌ལོག༌ག༌ ཕིངས༌ཏེ༌ ཁྱེརས༌, ཡང༌ ཧ༌ལས༌ཤེས༌སི༌ ལྟས༌གུན༌ ཨི༌ཇིབ༌, གྱ༌ཚོ༌ མར༌པོ༌ དང༌ རི༌སྟོང༌ངི༌ ནང༌ང༌ ལོ༌ ཞིབ༌ཅུ༌ སྟན༌ན༌ ཛདས༌།”
ACT 7:37 “འི༌བོ༌ ཏེན༌ན༌ མོ༌ཟེས༌ ཨིན༌ནོག༌, ཀ༌བོའེ༌ ཨིས༌ར༌ཨེལ༌པ༌གུན༌ལ༌ མོལས༌, ‘དཀོན༌མཆོག༌གི༌ ཁྱོ༌ཞ༌གུན༌ནི༌ ཕྲོ༌ནེ༌ ང༌ ཙོགས༌སི༌ ལུང༌སྟོན༌པ༌ཞིག༌ ལང༌ང༌ ཛད༌ཨིན༌ །’
ACT 7:38 ཁོང༌ རི༌སྟོང༌ངི༌ ནང༌ང༌ ང༌དང༌ངི༌ ཕ༌མེས༌པོ༌གུན༌ ཉམ༌པོ༌ ཡོད༌པིན༌ ནམ༌ ཁོང༌ང༌ རི༌ སི༌ནཱའི༌ཀ༌ ཕོ༌ཉའེ༌ སྤེ༌ར༌ སལས༌, ཡང༌ ཏེ༌རུ༌ མོ༌ཟེས༌ལ༌ ང༌དང༌ ཚང༌མ༌ལ༌ ཏང༌ཅེས༌སི༌ ཕིའ༌ སྲོག༌ སལ༌ཁན༌ནི༌ བཀའ༌གུན༌ ཐོབ༌།”
ACT 7:39 “ཨིན༌ནའང༌ ང༌དང༌ངི༌ ཕ༌མེས༌པོ༌གུན༌ མོ༌ཟེས༌སི༌ ཁའ༌ཉན༌ཅེས༌ལ༌ མ༌ཐད༌། ཁོང༌གུན༌ལ༌ མོ༌ཟེས༌ ཕངས༌ཏེ༌ ཨི༌ཇིབ༌ ཡུལ༌ལ༌ ལོགས༌ཏེ༌ ཆ༌ཅེས༌སི༌ དོད༌པ༌ སྐྱེས༌།
ACT 7:40 ཁོང༌གུན༌ནི༌ ཨ༌རོན༌ལ༌ ཟེརས༌, ‘ཁྱོ༌རང༌ངི༌ ང༌ཞའ༌ ལམ༌སྟན༌ཁན༌ནི༌ སྐུན༌དྲ༌གུན༌ ཅོས༌ ཅིའ༌ཟེར༌ན༌ ཨི༌ཇིབ༌ ཡུལ༌ནེ༌ ཕིངས༌ཏེ༌ ཁྱོང༌ཁན༌ནི༌ མོ༌ཟེས༌ལ༌ ཅི༌ སོང༌ ང༌ཞའ༌ གྱུས༌མེད༌ །’
ACT 7:41 ཏེ༌ཏུས༌ལ༌ ཁོང༌གུན༌ནི༌ བེ༌ཙོ༌ ཙོགས༌སི༌ སྐུན༌དྲ༌ཞིག༌ ཅོས༌, ཡང༌ རང༌ངི༌ ལག༌པ༌ནེ༌ ཅོས༌ཁན༌ནི༌ སྐུན༌དྲའ༌ སྟོད༌པ༌ ཕུལ༌ཨིན༌ གའ༌མོ༌ ཅོས༌།
ACT 7:42 ཨིན༌ནའང༌ དཀོན༌མཆོག༌གི༌ ཁོང༌གུན༌ལ༌ གྱབ༌ གྱུར༌ར༌ ཛད༌ཏེ༌, ནམ༌ཁའེ༌ སྐར༌མ༌གུན༌ལ༌ ཅོལ༌ཅེས༌ལ༌ ཕུད༌ སལས༌, ཀ༌ཟུག༌ ལུང༌སྟོན༌པ༌གུན༌ནི༌ སྤེ༌ཆའེ༌ ནང༌ང༌ བྲིའ༌ ཛད༌ཏེ༌ ཨིན༌ནོག༌, ‘ཁྱོ༌ཞའ༌ ཨིས༌ར༌ཨེལ༌པ༌གུན༌ རི༌སྟོང༌ང༌ ལོ༌ ཞིབ༌ཅུ༌ ཡོད༌དི༌ ཏུས༌ལ༌ ཅི༌ ཁྱོ༌ཞའེ༌ ང༌ སྲོག༌གི༌ ཆོད༌པ༌ དང༌ བུལ༌ལྡུས༌ གུན༌ ཕུལ༌པིན༌ན༌?
ACT 7:43 ཨིན༌ནའང༌ ཁྱོ༌ཞའེ༌ མོ༌ལོག༌གི༌ ཀུར༌ དང༌, རེ༌ཕན༌ ཟེར༌ཁན༌ནི༌ སྐར༌མའེ༌ སྐུན༌དྲ༌ ཉིས༌ཀོ༌ ཁུར༌ཏེ༌ ཁྱེར༌རད༌པིན༌, ཀ༌བོ༌ ཁྱོ༌ཞ༌རང༌ངི༌ ཅོལ༌ཅེས༌ལ༌ ཅོས༌། ཏེ༌བོའེ༌ཕིའ༌ ངའེ༌ ཁྱོ༌ཞའ༌ ཁྱོ༌ཞ༌རང༌ངི༌ ཡུལ༌ནེ༌, བ༌བེ༌ལོན༌ནི༌ སང༌ ཐག༌རིང༌ང༌ ཁྱམས༌ ཅུག༌ཨིན༌།’”
ACT 7:44 “རི༌སྟོང༌ངི༌ ནང༌ང༌ དཀོན༌མཆོག༌ ནས༌ཁན༌ནི༌ སྤང༌པོའེ༌ ཀུར༌བོ༌ ང༌དང༌ངི༌ ཕ༌མེས༌པོ༌གུན༌ ཉམ༌པོ༌ ཡོད༌པིན༌། ཡང༌ ཏེ༌ ཀུར༌བོ༌ དཀོན༌མཆོག༌གི༌ མོ༌ཟེས༌ལ༌ སྟན༌ན༌ ཛད༌ཁན༌ནི༌ སྤེ༌ ནང༌ཞིན༌ ཅོས༌ཏེ༌ ཨིན༌པིན༌།
ACT 7:45 ཏེ༌ སྟིང༌ནེ༌ ང༌དང༌ངི༌ ཕ༌མེས༌པོ༌གུན༌ནི༌ ཏེ༌ ཀུར༌བོ༌ ཁུར༌ཏེ༌ ཡོ༌ཤུའེ༌ ཝང༌ངི༌ ཡོག༌ག༌ འི༌ ས༌ཀྱད༌པོའེ༌ཀ༌ ཁྱོངས༌, ཏེ༌ ཡུལ༌ལི༌ མི༌གུན༌ ང༌དང༌ངི༌ ཕ༌མེས༌པོ༌གུན༌ནི༌ ཕིའ༌ དཀོན༌མཆོག༌གི༌ ཕིང༌ང༌ ཛདས༌། ཡང༌ ཏེ༌ ཀུར༌བོ༌ གྱལ༌པོ༌ དཱ༌བིད༌དི༌ ཏུས༌ ཚག༌པ༌ འི༌ ནས༌སའེ༌ཀ༌ ལུས༌།”
ACT 7:46 “དཀོན༌མཆོག༌གི༌ ཆོགས༌སྐྱོར༌ ཛད༌ཁན༌ནི༌ གྱལ༌པོ༌ དཱ༌བིད༌དི༌ ཨིས༌ར༌ཨེལ༌པའེ༌ ཅོལ༌ཁན༌ནི༌ དཀོན༌མཆོག༌གི༌ ཕིའ༌ ནས༌ཁང༌ཞིག༌ ཞང༌ཅེས༌ལ༌ ཞུ༌ཝ༌ ཕུལས༌།
ACT 7:47 ཨིན༌ནའང༌ དཱ༌བིད༌དི༌ བུ༌ཚ༌ སོ༌ལོ༌མོན༌ནི༌ དཀོན༌མཆོག༌གི༌ ཕིའ༌ ཏེ༌ ནས༌ཁང༌བོ༌ ཞངས༌།
ACT 7:48 ཨིན༌ནའང༌, ཀུན༌ཝང༌ དཀོན༌མཆོག༌ ནི༌ མིའི༌ ལག༌པ༌ནེ༌ རྩིགས༌ཁན༌ནི༌ ནས༌སའེ༌ ནང༌ང༌ ཞུགས༌ས༌ མ༌ནོག༌, ཀ༌ཟུག༌ དཀོན༌མཆོག༌གི༌ ལུང༌སྟོན༌པ༌ གྱུད༌ཏེ༌ མོལས༌,
ACT 7:49 ‘ནམ༌ཁའ༌ ནི༌ ངའེ༌ ཞུགས༌ཁྲིས༌ ཨིན༌ ཡང༌ ཇིག༌རྟེན༌ ནི༌ ངའེ༌ རྐང༌པ༌ བོར༌ས༌། ཁྱོ༌རང༌ངི༌ ངའེ༌ ཕིའ༌ ཀ༌ཟུག༌ ཁང༌པ༌ཞིག༌ རྩིག༌ཨིན༌? ཡ༌ ང༌ ངལ༌ཚོ༌སའེ༌ ནས༌ས༌ ཀ༌རུ༌ ཡོང༌གོས༌?
ACT 7:50 ཅི༌ཚང༌མ༌ ངའེ༌ ལག༌ནེ༌ ཅོས༌ཁན༌ མ༌ནོག༌ག༌?’”
ACT 7:51 “ཁྱོ༌ཞ༌ སྐྱོང༌པོ༌ ཁྲེད༌ཁྲེད༌, ཏད༌པ༌ མེད༌ཁན༌ནི༌ སྙིང༌, ཡང༌ དཀོན༌མཆོག༌གི༌ བཀའ༌ ཉན༌ཅེས༌སི༌ ནང༌ང༌ རྒུད༌གུན༌, ཁྱོ༌ཞའེ༌ ཕ༌མེས༌པོ༌གུན༌ ཙོགས༌ལ༌ ཁྱོ༌རང༌གུན༌ནིའང༌ ཏམ༌པའེ༌ ཐུག༌ཉིད༌ལ༌ ཏུས༌གྱུན༌ གྱབ༌གལ༌ ཅོའ༌ནོག༌།
ACT 7:52 ཁྱོ༌ཞའེ༌ ཕ༌མེས༌པོ༌གུན༌ནི༌ ནགས༌ མ༌སྟན༌ཁན༌ནི༌ ལུང༌སྟོན༌པ༌ཞིག༌ སུ༌ ཡོད༌། ཏེ༌གུན༌ནི༌ ཀྲང༌པོ༌ སྐྱོད༌ཅེས༌ཅན༌ནི༌ སྐོར༌ལ༌ ཤད༌ཁན༌ནི༌ ལུང༌སྟོན༌པ༌གུན༌ནའང༌ སད༌ཏེ༌ ཨིན༌པིན༌, ཁྱོ༌ཞའེ༌ ཏེ༌ ཀྲང༌པོ༌ མི༌བོ༌ གྲ༌འོའེ༌ ལག༌ག༌ སྟད༌ཏེ༌ སད༌ཅུགས༌།
ACT 7:53 དཀོན༌མཆོག༌གི༌ ཕོ༌ཉ༌གུན༌ གྱུད༌ཏེ༌ ཐོབ༌ཁན༌ནི༌ བཀའ༌ཁྲིམས༌གུན༌ལ༌ ཁྱོ༌ཞའེ༌ མ༌སྲུངས༌།”
ACT 7:54 ཏེ༌ སྤེ༌ར༌གུན༌ ཚོར༌ར༌ཅིག༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌ ཚང༌མ༌ལ༌ སྲོ༌ སྲན༌ཏྲེ༌ ཡོངས༌ཏེ༌ སོ༌ སྲིགས༌།
ACT 7:55 ཨིན༌ནའང༌ ཏམ༌པའེ༌ ཐུག༌ཉིད༌དི༌ གངས༌ཏེ༌ སྟེ༌ཕན༌ནི༌ ནམ༌ཁའ༌ ཟིགས༌པ༌, ཁོའ༌ དཀོན༌མཆོག༌གི༌ ཟིར༌རྗིད༌ དང༌ ཁོང༌ངི༌ རྩི༌ཝ༌ཅན༌ནི༌ ཆག༌ ཡས༌པའེ༌ ཆོགས༌ལ༌ ཡེ༌ཤུ༌ ཞངས༌ཏེ༌ ཇལ༌།
ACT 7:56 ཁོའེ༌ ཟེརས༌, “ལྟོས༌ཤིག༌གའང༌! ནམ༌ཁའ༌ བེ༌ཏེ༌ ངའ༌ མི༌རིགས༌སི༌བུ༌ དཀོན༌མཆོག༌གི༌ ཆག༌ ཡས༌པའེ༌ ཆོགས༌ལ༌ ཞངས༌ཏེ༌ ཇལ༌དུག༌།”
ACT 7:57 ཏེ༌ནེ༌ ཁོང༌གུན༌ནི༌ ནམ༌ཅོག༌ ཀབས༌ཏེ༌ ཀུ༌ཅོ༌ སྲན༌ཏྲེ༌ ཏང༌ཨིན༌ སྟེ༌ཕན༌ ཆོགས༌ལ༌ གྱུགས༌།
ACT 7:58 ཁོའ༌ དྲུད༌ཨིན༌ གྱལ༌ས༌ནེ༌ ཕི༌ལོག༌ག༌ ཕིངས༌ཏེ༌ སད༌ད༌ལ༌ རྡོའ༌ གྱབ༌ཅེས༌ གོ༌ཟུག༌, ཡང༌ སྟེ༌ཕན༌ལ༌ སྐྱོན༌ ཀལ༌ཁན༌གུན༌ནི༌ རང༌ངི༌ ཀོས༌གུན༌ ཕུད༌ཏེ༌ ས༌འུལ༌ ཟེར༌ཁན༌ནི༌ ཁྱོག༌ཏོང༌བོའེ༌ དུན༌ལ༌ བོརས༌།
ACT 7:59 རྡོའ༌ གྱབ༌ཨིན༌ ཡོད༌ ཟ༌ནེ༌ སྟེ༌ཕན༌ནི༌, “ཀྱེ༌ གཙོ༌བོ༌ ཡེ༌ཤུ༌ ངའེ༌ སེམས༌ཉིད༌པོ༌ ནམས༌ས༌ ཛད༌” ཟེར༌ཨིན༌ མོས༌ལམ༌ ཞུས༌།
ACT 7:60 ཏེ༌ནེ༌ ཁོའེ༌ པིག༌དོང༌ ཙུགས༌ཏེ༌ སྐད༌ ཆེན༌མོ༌ ཉམ༌པོ༌, “ཀྱེ༌ གཙོ༌བོ༌, ཁོང༌གུན༌ནི༌ གྱབ༌གལ༌ལ༌ འི༌ སྡིག༌པ༌བོ༌ ཨིད༌ཏུ༌ བོར༌ར༌ མ༌ཛད༌” མོལ༌ཏེ༌ ཁོ༌ ཀྲོངས༌།
ACT 8:1 ཡང༌ སྟེ༌ཕན༌ སད༌ཅེས༌སི༌ ནང༌ང༌ ས༌འུལ༌ལིའང༌ ཆོགས༌སྐྱོར༌ ཅོས༌ཏེ༌ ཨིན༌ནོག༌། 8:1-3 ཏེན༌ན༌ ཞག༌ནེ༌ ཕར༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཆོས༌ཚོགས༌ལ༌ སྲན༌ཏྲེ༌ ནགས༌ སྟན༌ཅེས༌ གོ༌ཟུག༌, ཏེ༌བོའེ༌ ཞས༌ཏེ༌ སྐུ༌ཚབས༌གུན༌ མ༌སྟོག༌ ཞན༌ ཏད༌པ༌ཅན༌ ཚང༌མ༌ ཡ༌ཧུ༌དཱ༌ དང༌ ས༌མར༌རི༌ཡཱ༌ ཡུལ༌ཇོངས༌ གང༌པོའེ༌ ནང༌ང༌ བེ༌ཏེ༌ ཤོར༌གོས༌།
ACT 8:2 དཀོན༌མཆོག༌གི༌ སྕོད༌ལམ༌མི༌ཀ༌ གྲུལ༌ཁན༌ ཁ༌ཅིག༌གི༌ སྟེ༌ཕན༌ནི༌ སྤུར༌བོ༌ ཁྱེར༌ཏེ༌ སྤུར༌ཁང༌ངི༌ ནང༌ང༌ བོརས༌, ཡང༌ ཁོང༌ངི༌ ཕིའ༌ རྡུག༌པོ༌ སྲན༌ཏྲེ༌ ཅོས༌།
ACT 8:3 ཨིན༌ནའང༌ ས༌འུལ༌ལི༌, ཆོས༌ཚོགས༌ ཁྲེས༌ཏོར༌ ཅོ༌ཅེས༌ གོ༌ཟུག༌, ཁང༌པ༌ རེ༌རེའེ༌ ནང༌ང༌ སོང༌ཏེ༌ ཁོའེ༌ ཏད༌པ༌ཅན༌ནི༌ བུ༌ཚ༌ དང༌ བུ༌མོ༌ ཚང༌མ༌ དྲུད༌ཏེ༌ ཁྱེར༌ཏེ༌ ཙོན༌ལ༌ ཀག༌གད༌པིན༌།
ACT 8:4 ཏད༌པ༌ཅན༌ ཤོར༌ཁན༌ནི༌ མི༌གུན༌ ཀ༌རུ༌ ལེབ༌ནའང༌ གའ༌མོའེ༌ ནས༌ཚུལ༌ ཤད༌ཨིན༌ སོང༌།
ACT 8:5 ཕི༌ལིབ༌ ས༌མར༌རི༌ཡཱའེ༌ གྱལ༌ས༌ ལེབ༌བ༌ཅིག༌, ཁོའེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའེ༌ སྐོར༌ལ༌ ཤདས༌།
ACT 8:6 ཕི༌ལིབ༌བི༌ སྤེ༌ར༌གུན༌ ཚོར༌ཏེ༌ ཡང༌ ཁོའེ༌ ཧ༌ལས༌ཤེས༌སི༌ ཛད༌པ༌གུན༌ ཐོང༌པ༌, མི༌གུན༌ནི༌ ཁོའེ༌ སྤེ༌ར༌གུན༌ མ༌ ནང༌སྟག༌ ཏངས༌ཏེ༌ ཉན༌ནད༌པིན༌།
ACT 8:7 སྤེར༌ན༌ མི༌ མང༌པོ༌ཞིག༌གི༌ ནང༌ནེ༌ གོང༌པོ༌གུན༌ ཕིངས༌པ༌ ཏེ༌གུན༌ ཀུ༌ཅོ༌ ཏང༌ཨིན༌ བིང༌ཏེ༌ སོང༌, ཡང༌ ཁོངས༌ཁན༌ དང༌ ཞ༌འོ༌ མང༌པོ༌ གྱལ༌།
ACT 8:8 ཏེ༌བོའེ༌ ཞས༌ཏེ༌ ཏེ༌ གྱལ༌སའེ༌ མི༌གུན༌ མང༌པོ༌ ཐད༌།
ACT 8:9 ཏུས༌བན༌ཤིག༌གི༌ སྔུན༌ལ༌ ཤི༌མོན༌ ཟེར༌ཁན༌ནི༌ མི༌ཞིག༌གི༌ ཁོ༌རང༌ངི༌ ཆོས༌ངན༌ ཅོ༌ཅེས༌སི༌ ཁྱུད༌ གྱུད༌ཏེ༌ ས༌མར༌རི༌ཡཱ༌ གྱལ༌སའེ༌ མི༌ཚང༌མ༌ ཧ༌ལས༌ ཅུགས༌ཏེ༌ ཁོའེ༌ ཁོ༌རང༌ མ༌ མི༌ཀྲག༌པོ༌ཞིག༌ ཨིན༌ ཟེར༌རད༌པིན༌།
ACT 8:10 ཏེ༌ ཡུལ༌ལི༌མི༌ ཁག༌ཅན༌ དང༌ ཉམ༌ཤུང༌ ཚང༌མའེ༌, ཁོའེ༌ ཟེར༌ཁན༌གུན༌ལ༌ སྣང༌ང༌ མ༌སྲན༌ཏྲེ༌ ཏངས༌ཏེ༌ ཁོང༌གུན༌ནི༌ ཟེར༌རད༌པིན༌, “འི༌ མི༌བོའེ༌ ནང༌ང༌ དཀོན༌མཆོག༌གི༌ ཤེད༌ ཆེན༌མོ༌ དུག༌།”
ACT 8:11 ཏུས༌བན༌ཤིག༌ནེ༌ ཕར༌ལ༌ ཁོའེ༌ ཆོས༌ངན༌ ཅོ༌ཅེས༌ གྱུད༌ཏེ༌ མི༌ཚང༌མ༌ ཧ༌ལས༌ ཅུགས༌པ༌ མི༌གུན༌ནི༌ ཁོའེ༌ སྤེ༌ར༌གུན༌ལ༌ གྱལ༌ལ༌ ཅོས༌ཏེ༌ ཉན༌ནད༌པིན༌།
ACT 8:12 ཨིན༌ནའང༌ ཕི༌ལིབ༌བི༌ དཀོན༌མཆོག༌གི༌ གྱལ༌སྲིད༌ དང༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ ཆོས༌ཤད༌ཅེས༌པོའེ༌, མི༌གུན༌ནི༌ ཏད༌པ༌ ཅོས༌ཏེ༌ ཁྲུས༌ལེནས༌, བུ༌ཚ༌ དང༌ བུ༌མོ༌ ཉིས༌ཀོའེ༌།
ACT 8:13 ཆོས༌ངན༌ ཅོ༌ཁན༌ ཤི༌མོན༌ནིའང༌ ཏད༌པ༌ ཅོས༌ཏེ༌ ཁྲུས༌ལེནས༌། ཕི༌ལིབ༌ ཀ༌རུ༌ ཆ༌ནའང༌ ཁོ༌ སྟིང༌རང༌ནེ༌ སོང༌ ཡང༌ ཧ༌ལས༌ཤེས༌སི༌ ཛད༌པ༌ དང༌ སྟགས༌ གུན༌ ཐོང༌ཏེ༌ ཁོ༌ ཧན༌གྲང༌ སོང༌།
ACT 8:14 ཏེ༌ནེ༌ ཡེ༌རུ༌ཤ༌ལེམ༌མི༌ ནང༌ང༌ སྐུ༌ཚབས༌གུན༌ལ༌ ས༌མར༌རི༌ཡཱ༌པ༌གུན༌ནི༌ དཀོན༌མཆོག༌གི༌ བཀའེ༌ཀ༌ ཏད༌པ༌ ཁྱོངས༌ཏོག༌ ཟེར༌ཏེ༌ ཚོར༌པ༌, ཁོང༌གུན༌ནི༌ པི༌ཏྲར༌ དང༌ ཡོ༌ཧཱ༌ནན༌ ཉིས༌ཀོ༌ ཏེ༌ ཡུལ༌ལ༌ ཀལས༌།
ACT 8:15 པི༌ཏྲར༌ དང༌ ཡོ༌ཧཱ༌ནན༌ ཏེ༌རུ༌ ལེབ༌བ༌ཅིག༌, ས༌མར༌རི༌ཡཱ༌པ༌ ཏད༌པ༌ཅན༌གུན༌ལ༌ ཐུག༌ཉིད༌ བབས༌ཤེས༌སི༌ ཕིའ༌ མོས༌ལམ༌ ཞུའ༌ ཛདས༌,
ACT 8:16 ཅིའ༌ཟེར༌ན༌ ཁོང༌གུན༌ལ༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ ཁྲུས༌ ཐོབ༌ནའང༌ ཏ༌རུང༌ ཚོག༌པ༌ སུ༌ཞིག༌གི༌ཀའང༌ ཏམ༌པའེ༌ ཐུག༌ཉིད༌ མ༌བབས༌ས༌ ཨིན༌པིན༌།
ACT 8:17 ཏེ༌ནེ༌ ཁོང༌ ཉིས༌ཀོའེ༌ ཁོང༌གུན༌ནི༌ཀ༌ ལག༌པ༌ བོར༌ར༌ ཛད༌ད༌ཅིག༌, ཁོང༌ ཚང༌མའེ༌ཀ༌ ཏམ༌པའེ༌ ཐུག༌ཉིད༌ བབས༌།
ACT 8:18 སྐུ༌ཚབས༌གུན༌ནི༌ ཆག༌ བོར༌ཅེས༌པོའེ༌ ཏམ༌པའེ༌ ཐུག༌ཉིད༌ ཐོབ༌བ༌ ཐོང༌ང༌ཅིག༌, ཤི༌མོན༌ནི༌ ཁོང༌ ཉིས༌ཀོའེ༌ དུན༌ལ༌ པེ༌ནེ༌ ཕུལ༌ཏེ༌ ཟེརས༌
ACT 8:19 “ངའེ༌ ལག༌པ༌ བོར༌ཁན༌གུན༌ལའང༌ ཏམ༌པའེ༌ ཐུག༌ཉིད༌ ཐོབ༌ཅེས༌སི༌ ཁྱུད༌པོ༌ ངའ༌ སལ༌ལ༌ ཛད༌།”
ACT 8:20 ཨིན༌ནའང༌ པི༌ཏྲར༌རི༌ ཁོའ༌ མོལས༌, “ཁྱོ༌རང༌ངི༌ པེ༌ནེ༌ ཏངས༌ཏེ༌ དཀོན༌མཆོག༌གི༌ ཁྱུད༌པོ༌ ཉོ༌ཉན༌ན༌ནོག༌ སམ༌བ༌ ཁྱོ༌རང༌ དང༌ ཁྱོ༌རང༌ངི༌ པེ༌ནེ༌ ཉིས༌ཀོ༌ མེད༌ཁན༌ སོང༌ཤིག༌།
ACT 8:21 ཁྱོ༌རང༌ངི༌ སྙིང༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ མེད༌ཅེས༌པོའེ༌ ཁྱོ༌རང༌ང༌ ང༌ཞའ༌ ཉམ༌པོ༌ འི༌ ལས༌ ཅོ༌ཅེས༌སི༌ ནང༌ང༌ ཅའང༌ ཁག༌ མེད༌པ༌ ཨིན༌ནོག༌།
ACT 8:22 ཁྱོ༌རང༌ངི༌ ནང༌ང༌ ངན༌སེམས༌ སྐྱེ༌ཁན༌བོའེ༌ ཕིའ༌ གྱོད༌པ༌ ཅོས༌ཏེ༌ གཙོ༌བོའ༌ མོས༌ལམ༌ ཞུས༌། ཅི༌ གྱུས༌ ཁོང༌ངི༌ ཁྱོ༌རང༌ངི༌ ཏེ༌ སེམས༌ངན༌ སམ༌ཁན༌བོའ༌ ཤགས༌པ༌ སལ༌སྲིད༌ཨིན༌།
ACT 8:23 ང༌ ཐོང༌ཅེས༌ལ༌ ཁྱོ༌རང༌ངི༌ སྙིང༌ ཚིག༌རི༌ གངས༌ཏེ༌ ཁྱོ༌རང༌ སྡིག༌པའེ༌ ཟུམས༌ཏེ༌ བོར༌ཏེ༌ དུག༌།”
ACT 8:24 ཏེ༌ནེ༌ ཤི༌མོན༌ནི༌ ཟེརས༌, “ཉེ༌རང༌ངི༌ མོལ༌ཁན༌གུན༌ ངའེ༌ཀ༌ མི༌བབས༌ཤེས༌སི༌ ཕིའ༌ ཇུ༌ཇུ༌ གཙོ༌བོའ༌ མོས༌ལམ༌ ཞུའ༌ ཛད༌།”
ACT 8:25 པི༌ཏྲར༌ དང༌ ཡོ༌ཧཱ༌ནན༌ནི༌ གཙོ༌བོའེ༌ བཀའ༌ ཤད༌ད༌ ཛད༌ཅེས༌ དང༌ སྤང༌པོ༌ སལ༌ཏེ༌ སྟིང༌ནེ༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོད༌ ཟ༌ནེ༌ ས༌མར༌རི༌ཡཱའེ༌ གམ༌ཡུལ༌ མང༌པོ༌ཞིག༌གི༌ ནང༌ངའང༌ གའ༌མོའེ༌ ནས༌ཚུལ༌ ཤད༌ད༌ ཛདས༌།
ACT 8:26 གཙོ༌བོའེ༌ ཕོ༌ཉ༌ཞིག༌གི༌ ཕི༌ལིབ༌བ༌ མོལས༌, “ཏ༌ ལྷོ༌ ཆོགས༌ལ༌ ཡེ༌རུ༌ཤ༌ལེམ༌ནེ༌ ག༌ཟ༌ ཆོགས༌ལ༌ ཆའ༌ཁན༌ནི༌ ཐང༌ལམ༌བོའེ༌ཀ༌ སོང༌།”
ACT 8:27 ཏེ༌ནེ༌ ཁོ༌ སོང༌ ཡང༌ ལམ༌མ༌ ཁོའ༌ ཨི༌ཐིའོ༌པིའ༌པ༌ མི༌ཞིག༌ ཐུག༌, ཀ༌བོ༌ ཨི༌ཐིའོ༌པིའ༌པའེ༌ གྱལ༌མོ༌ ཀེན༌གྲས༌སི༌ བང༌ཛོད༌དི༌ ལོན༌པོ༌ མ༌ ཝང༌ཅན༌ཞིག༌ ཨིན༌པིན༌། ཁོ༌ ཡེ༌རུ༌ཤ༌ལེམ༌མི༌ ཆོད༌ཁང༌ང༌ ཅོལ༌ལ༌ སོང༌ཏེ༌
ACT 8:28 རྟ༌རེལ༌ལི༌ཀ༌ ཞོན༌ཏེ༌ རང༌ཡུལ༌ལ༌ ལོགས༌ཏེ༌ ཆའ༌ ཟ༌ནེ༌ ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆ༌ སིལ༌ལད༌པིན༌།
ACT 8:29 ཏེ༌ནེ༌ ཏམ༌པའེ༌ ཐུག༌ཉིད༌དི༌ ཕི༌ལིབ༌བ༌ མོལས༌, “རྟ༌རེལ༌ལི༌ ཉེ༌མོའ༌ སོང༌།”
ACT 8:30 ཕི༌ལིབ༌ གྱུགས༌ཏེ༌ རྟ༌རེལ༌ལི༌ ཉེ༌མོའ༌ སོང༌, ཡང༌ ཏེ༌ཀ༌ ཞོན༌ཏེ༌ ཡོད༌ཁན༌བོའེ༌ ལུང༌སྟོན༌པ༌ ཡེ༌ཤ༌ཡཱའེ༌ སྤེ༌ཆ༌ སིལ༌ཨིན༌ ཡོད༌ཁན༌བོ༌ ཚོར༌། ཕི༌ལིབ༌བི༌ ཁོའ༌ ཏྲིས༌, “ཉེ༌རང༌ངི༌ སིལ༌ཨིན༌ ཡོད༌ཁན༌ནི༌ ཏོན༌བོ༌ ཉེ༌རང༌ང༌ ཧ༌གོའ༌?”
ACT 8:31 ཏེ༌ མི༌བོའེ༌ ལན༌ཏངས༌, “ཧ༌གོ༌ཅུག༌ཁན༌ མེད༌པ༌, ང༌ ཀ༌ཟུག༌གི༌ ཧ༌གོ༌ ཐུབ༌ཨིན༌”, ཡང༌ ཕི༌ལིབ༌བ༌ ཁོ༌ ཉམ༌པོ༌ ཤིང༌རྟའེ༌ ནང༌ང༌ ཞོན༌ན༌ལ༌ ཟེརས༌།
ACT 8:32 ཁོའེ༌ སིལ༌ཨིན༌ ཡོད༌ཁན༌ནི༌ ཏམ༌པའེ༌ སུང༌རབས༌པོ༌ ནི༌, “ཁོང༌ ལུག༌ ཙོགས༌ལ༌ སད༌ད༌ལ༌ ཁྱེརས༌, ཡང༌ ཀ༌ཟུག༌ ལུག༌ རང༌ངི༌ བལ༌ བྲག༌ཁན༌ནི༌ དུན༌ལ༌ ཁའ༌རོགས༌ཏེ༌ དུག༌གད༌, ཏེན༌ན༌ ཙོགས༌ལ༌ ཁོང༌ངིའང༌ རང༌ངི༌ ཞལ༌ མ༌ཕེས༌།
ACT 8:33 ཁྲེལ༌བ༌ ཅོ༌ཨིན༌ནའང༌ ཁོང༌ང༌ ཀྲང༌པོ༌ ཤགས༌ མ༌ཅོས༌། ཁོང༌ངི༌ པུར༌གྱུད༌དི༌ སྐོར༌ལ༌ སུའིང༌ ཤད༌ མི༌ཉན༌, ཇིག༌རྟེན༌ནི༌ ཀ༌ནེ༌ ཁོང༌ངི༌ མི༌ཚེ༌ ཆུ༌ངུན༌ལ༌ ཀོགས༌ཏེ༌ ཁྱེརས༌།”
ACT 8:34 ལོན༌པོ༌བོའེ༌ ཕི༌ལིབ༌བ༌ ཟེརས༌, “ལུང༌སྟོན༌པའེ༌ འི༌ ཚིགས༌པོ༌ ཁོང༌རང༌ངི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌ག༌ ཡ༌ ཞན༌མ༌ཞིག༌གི༌ སྐོར༌ལ༌, ཐུག༌རྗེ༌ ཛད༌ཏེ༌ ང༌ ཧ༌གོ༌ཅུག༌ག༌ཛད༌?”
ACT 8:35 ཏེ༌ནེ༌ ཕི༌ལིབ༌བི༌ སུང༌རབས༌སི༌ ཏེན༌ན༌ ཚིགས༌པོ༌ནེ༌ གོ༌ཟུགས༌ཏེ༌ ཁོའ༌ ཡེ༌ཤུའི༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ད༌ ཛདས༌།
ACT 8:36 ཁོང༌གུན༌ ལམ༌ནེ༌ ཆའ༌ ཟ༌ནེ༌ ཆུ༌ ཡོད༌སའེ༌ ནས༌ས༌ཞིག༌ག༌ ལེབ༌པ༌, ལོན༌པོའེ༌ ཟེརས༌, “ཟིགས༌སའང༌ འི༌ཀ༌ ཆུ༌ དུག༌, ཏ༌ ཅིའ༌ ངའེ༌ ཁྲུས༌ མི༌ལེན༌།”
ACT 8:37 
ACT 8:38 ཁོའེ༌ ཤིང༌རྟ༌བོ༌ སྒོག༌ ཟེར༌ཏེ༌ བཀའ༌ ཏངས༌, ཕི༌ལིབ༌ དང༌ ལོན༌པོ༌ ཉིས༌ཀོ༌ ཆུའི༌ ནང༌ང༌ ཞུགས༌, ཡང༌ ཕི༌ལིབ༌བི༌ ཁོའ༌ ཁྲུས༌ཏངས༌།
ACT 8:39 ཁོང༌གུན༌ ཆུ༌ནེ༌ ཕི༌ལོག༌ག༌ བིང༌ང༌ཅིག༌, དཀོན༌མཆོག༌གི༌ ཐུག༌ཉིད༌དི༌ ཕི༌ལིབ༌ ཁོའེ༌ དུན༌ནེ༌ ཁྱེར༌ར༌ ཛད༌པ༌ ལོན༌པོའེ༌ ཁོང༌ ཡང༌ མ༌ནེ༌ མ༌ཐུག༌, ཡང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཁོ༌རང༌ངི༌ ཡུལ༌ལ༌ ལོགས༌ཏེ༌ སོང༌།
ACT 8:40 ཕི༌ལིབ༌བི༌ ཁོ༌རང༌ ཨ༌ཟོ༌ཏུས༌ གྱལ༌ས༌ ལེབས༌ཏེ༌ ཐོང༌, ཡང༌ ཀཱེ༌སར༌རིའ༌ ལེབ༌ ལེབ༌ ཚག༌པ༌ ཁོང༌ ཆའ༌ཁན༌ནི༌ གྲོང༌ཁྱེར༌ ཚང༌མའེ༌ ནང༌ང༌ གའ༌མོའེ༌ ནས༌ཚུལ༌ ཤད༌ཨིན༌ སོང༌།
ACT 9:1 འིན༌ན༌ ཏུས༌ལ༌ གཙོ༌བོའེ༌ ལོབ༌ཕྲུགས༌ ཚང༌མ༌ སད༌ཨིན༌ ཟེར༌ཁན༌ནི༌ ས༌འུལ༌ བླ༌མ༌ ཆེན༌མོའེ༌ཀ༌ སོང༌ཏེ༌,
ACT 9:2 མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌ནི༌ བུ༌ཚ༌ དང༌ བུ༌མོ༌ ཚང༌མ༌ ཟུམས༌ཏེ༌, ཙོན༌པ༌ ཅོས༌ཏེ༌ ཡེ༌རུ༌ཤ༌ལེམ༌མ༌ ཁྱོང༌ཉན༌ཅེས༌ལ༌ ཁོའ༌ ཆོགས༌སྐྱོར༌ ཅོས༌ ཟེར༌ཏེ༌ དཱ༌མེས༌ཀས༌སི༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ སྟན༌ཅེས༌ལ༌ ཨི༌གེ༌ཞིག༌ བྲིས༌ཏེ༌ ཏོང༌ ཞུས༌།
ACT 9:3 ས༌འུལ༌ དཱ༌མེས༌ཀས༌སི༌ ཉེ༌མོའ༌ ལེབ༌བ༌ཅིག༌, ཧུན༌མེད༌ལ༌ ནམ༌ཁའ༌ནེ༌ བབས༌ཁན༌ནི༌ འོད༌ ལྡང༌ཤན༌ཞིག༌གི༌ ཁོའ༌ སྐོརས༌།
ACT 9:4 ཁོ༌ སའེ༌ཀ༌ གྱེལ༌ ཡང༌ ཁོའ༌ སུང༌སྐད༌ཅིག༌ ཚོར༌, “ས༌འུལ༌ ས༌འུལ༌ ཁྱོ༌རང༌ངི༌ ང༌ ཅིའ༌ ནགས༌བར༌དོ༌ སྟན༌ནད༌?”
ACT 9:5 ས༌འུལ༌ལི༌ ཟེརས༌, “གཙོ༌བོ༌ ཉེ༌རང༌ སུ༌ ཨིན༌།” ཁོང༌ངི༌ ལན༌སལས༌, “ང༌ ནི༌ ཡེ༌ཤུ༌, ཁྱོ༌རང༌ངི༌ ནགས༌བར༌དོ༌ སྟན༌ཁན༌བོ༌ ཨིན༌།
ACT 9:6 ཏ༌ ཁྱོ༌རང༌ གྱལ༌ས༌ སོང༌, ཡང༌ ཏེ༌རུ༌ ཁྱོ༌རང༌ང༌ ཅོ༌གོ༌ཤེས༌པོ༌ ཤད༌ཨིན༌།”
ACT 9:7 ས༌འུལ༌ ཉམ༌པོ༌ ཆའ༌ཁན༌ནི༌ མི༌གུན༌ ཧ༌ལས༌ཏེ༌ ཧན༌གྲང༌ སོང༌ ཅིའ༌ཟེར༌ན༌ ཁོང༌གུན༌ལ༌ སྐད༌ ཚོར༌ ཨིན༌ནའང༌ སུའང༌ མ༌ཐོང༌།
ACT 9:8 ས༌འུལ༌ལི༌ སའེ༌ཀ༌ནེ༌ ལངས༌ཏེ༌ མིག༌ ཕེས༌པ༌ ཁོའ༌ ཅའང༌ མ༌ཐོང༌། ཁོའེ༌ ཕྲོ༌པ༌གུན༌ནི༌ ཁོའ༌ ལག༌པ༌ ཐམས༌ཏེ༌ དཱ༌མེས༌ཀས༌ལ༌ ཁྲིད༌ཏེ༌ ཁྱེརས༌།
ACT 9:9 ཞག༌ སུམ༌ ཚག༌པ༌, ཁོའ༌ མིག༌ནེ༌ མ༌ཐོང༌ ཡང༌ ཏེན༌ན༌ ཏུས༌པོ༌ ཁོའེ༌ ཅའང༌ ཟའང༌ མ༌ཟོས༌, ཅའང༌ ཐུང༌ངའང༌ མ༌ཐུངས༌།
ACT 9:10 དཱ༌མེས༌ཀས༌སི༌ ནང༌ང༌ ཡེ༌ཤུའི༌ཀ༌ ཏད༌པ༌ ཅོ༌ཁན༌ ཨ༌ན༌ནི༌ཡཱས༌ ཟེར༌ཁན༌བོ༌ དུག༌གད༌པིན༌, གཙོ༌བོའེ༌ ཞལ༌ཟིགས༌ཤིག༌གི༌ ནང༌ང༌ ཁོའ༌ མོལས༌, “ཨ༌ན༌ནི༌ཡཱས༌།” ཁོའེ༌ ལན༌ཏངས༌, “གཙོ༌བོ༌ལེ༌།”
ACT 9:11 གཙོ༌བོའེ༌ ཁོའ༌ མོལས༌, “ཁ༌དྲང༌ ཟེར༌ཁན༌ནི༌ སྲང༌ངི༌ ནང༌ང༌ ཡོད༌ཁན༌ནི༌ ཡུ༌དཱའེ༌ ཁང༌པ༌ སོང༌ཏེ༌, ཏར༌སས༌པ༌ ས༌འུལ༌ ཟེར༌ཁན༌ནི༌ མི༌བོའེ༌ སྐོར༌ལ༌ ཏྲིས༌, དག༌ས༌ ཁོའེ༌ མོས༌ལམ༌ ཞུ༌རུག༌།
ACT 9:12 ས༌འུལ༌ལ༌ ཞལ༌ཟིགས༌ཤིག༌གི༌ ནང༌ང༌ ཨ༌ན༌ནི༌ཡཱས༌ ཡོངས༌ཏེ༌ ཡང༌སྐྱར༌ ཐོང༌ཐུབ༌ཅེས༌ལ༌ ཁོའེ༌ གོའེ༌ཀ༌ ལག༌པ༌ བོར༌ར༌ ཐོང༌།”
ACT 9:13 ཨ༌ན༌ནི༌ཡཱས༌སི༌ ཞུས༌, “ཀྱེ༌ གཙོ༌བོ༌, འི༌ མི༌བོའེ༌ ཉེ༌རང༌ངི༌ ཏམ༌པ༌ མི༌གུན༌ ཉམ༌པོ༌ ཡེ༌རུ༌ཤ༌ལེམ༌མི༌ ནང༌ང༌ ཙམ༌ཤིག༌ ནོད༌པ༌ སྐྱལ༌ཁན༌བོའེ༌ སྐོར༌ལ༌ ངའ༌ ཞན༌མི༌ མང༌པོ༌ནེ༌ ཚོར༌།
ACT 9:14 ཁོ༌ འི༌རུའང༌ བླ༌མ༌ འུ༌སྐྱོང༌གུན༌ནི༌ ཆོགས༌ནེ༌ ཝང༌ཆ༌ ཐོབ༌ཏེ༌ ཉེ༌རང༌ངི༌ ཚན༌ ཁུར༌ཁན༌ ཚང༌མ༌ ཟུམས༌ཏེ༌ ཁྱེར༌ཅེས༌སི༌ ཕིའ༌ ཡོངས༌ཏེ༌ ཨིན༌ནོག༌།”
ACT 9:15 ཨིན༌ནའང༌ གཙོ༌བོའེ༌ ཨ༌ན༌ནི༌ཡཱས༌ལ༌ མོལས༌, “ཏ༌ ཁྱོ༌རང༌ སོང༌ ཅིའ༌ཟེར༌ན༌ ཁོ༌ ངའེ༌ ལྡམས༌ཁན༌ནི༌ ཞབས༌ཏོག༌པ༌ ཡ༌ཧུ༌དཱ༌པ༌ མན༌ཁན༌གུན༌, གྱལ༌པོ༌གུན༌ དང༌ ཨིས༌ར༌ཨེལ༌པ༌གུན༌ལ༌ ངའེ༌ སྐོར༌ལ༌ ཤད༌ཁན༌བོ༌ ཨིན༌།
ACT 9:16 ངའེ༌ ཚན༌ ཁུར༌ཅེས༌ལ༌ ཁོའ༌ ཙམ༌ཤིག༌གི༌ ནགས༌ ལེན༌གོ༌ཤེས༌པོ༌ ངའེ༌ ཁོའ༌ སྟན༌ཨིན༌།”
ACT 9:17 ཏེ༌ནེ༌ ཨ༌ན༌ནི༌ཡཱས༌ ས༌འུལ༌ དུགས༌ཏེ༌ ཡོད༌སའེ༌ ཁང༌པ༌ ལེབ༌ ཡང༌ ནང༌ཀུག༌ག༌ སོང༌ཏེ༌ ཁོའེ༌ ལག༌པ༌ ས༌འུལ༌ལི༌ཀ༌ བོར༌ཏེ༌ མོལས༌, “སྤུན༌ ས༌འུལ༌, ཁྱོ༌རང༌ འི༌རུ༌ ཡོང༌ ཟ༌ནེ༌ ལམ༌མ༌ གཙོ༌བོ༌ ཡེ༌ཤུ༌ ཇལ༌ཏེ༌ ཨིན༌པིན༌། ཁོང༌ངི༌ ཁྱོ༌རང༌ང༌ ཡང༌སྐྱར༌ ཐོང༌ཅེས༌ དང༌ ཏམ༌པའེ༌ ཐུག༌ཉིད༌དི༌ གང༌ཅེས༌སི༌ ཕིའ༌ ང༌ འི༌ཀ༌ ཀལ༌ལ༌ ཛདས༌།”
ACT 9:18 ཏེན༌ན༌མལ༌ལ༌ ས༌འུལ༌ལི༌ མིག༌གི༌ ཀ༌ནེ༌ པགས༌པ༌ ཙོགས༌ཤིག༌ བུད༌ཏེ༌ ཁོའ༌ ཡང༌སྐྱར༌ ཐོང༌ཐུབ༌། ཏེ༌ནེ༌ ལངས༌ཏེ༌ ཁོའེ༌ ཁྲུས༌ལེནས༌,
ACT 9:19 ཁར༌ཇི༌ ཟོས༌ཏེ༌ སྟིང༌ནེ༌ ཁོའེ༌ ཟུགས༌པོའེ༌ ནང༌ང༌ སྟོབས༌ སྐྱེས༌། 9:19-31 ཏེ༌ནེ༌ ས༌འུལ༌ ཞག༌བན༌ཤིག༌ ལོབ༌ཕྲུགས༌གུན༌ ཉམ༌པོ༌ དཱ༌མེས༌ཀས༌ལ༌ དུགས༌
ACT 9:20 ཡང༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ ཡེ༌ཤུའི༌ སྐོར༌ལ༌ ཤད༌ཅེས༌ གོ༌ཟུགས༌ཏེ༌ མོལས༌, “ཁོང༌ ནི༌ དཀོན༌མཆོག༌གི༌ སྲས༌ ཏན༌ཏན༌ ཨིན༌ནོག༌།”
ACT 9:21 ཏེ༌རུ༌ ཡོད༌ཁན༌གུན༌ནི༌ ཁོང༌ངི༌ ལབ༌ཞ༌ ཚོར༌ར༌ཅིག༌ ཧ༌ལས༌ཏེ༌ ཅིག༌ དང༌ ཅིག༌ག༌ ཏྲིས༌, “འི༌ མི༌བོ༌ ཡེ༌རུ༌ཤ༌ལེམ༌མི༌ ནང༌ང༌ གཙོ༌བོ༌ ཡེ༌ཤུའི༌ ཚན༌ ཁུར༌ཁན༌གུན༌ ཁྲེས༌ཏོར༌ ཅོ༌ཅེས༌སི༌ རྩོན༌གྲུས༌ སྲན༌ཏྲེ༌ ཅོ༌ཁན༌ ཡང༌ འི༌རུའང༌ ཁོང༌གུན༌ ཟུམས༌ཏེ༌ ཙོན༌པ༌ ཅོས༌ཏེ༌ བླ༌མ༌ འུ༌སྐྱོང༌གུན༌ནི༌ དུན༌ལ༌ ཁྱེར༌ར༌ལ༌ ཡོངས༌ཏེ༌ མ༌ནོག༌ག༌?”
ACT 9:22 ས༌འུལ༌ ཆོས༌ཤད༌ཅེས༌སི༌ ནང༌ང༌ མང༌ང༌ སྟོབས༌ཅན༌ གྱུར༌ཨིན༌ སོང༌, ཡང༌ དཱ༌མེས༌ཀས༌སི༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌གུན༌ནི༌, ས༌འུལ༌ལི༌ ཡེ༌ཤུ༌ ནི༌ ཏན༌ཏན༌ལ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌ སྟན༌ཁན༌བོའེ༌ གྱབ༌གལ༌ལ༌ ཅའང༌ ཟེར༌ མ༌ཉན༌།
ACT 9:23 ཏུས༌བན༌ཤིག༌གི༌ སྟིང༌ནེ༌ ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌སི༌ གྲབས༌ ཏངས༌,
ACT 9:24 ཨིན༌ནའང༌ ས༌འུལ༌ལ༌ ཁོང༌གུན༌ནི༌ ཅུས༌ངན༌གུན༌ གྱུས༌སོང༌། ཏེ༌གུན༌ ཚན༌ཉིན༌ མེད༌པ༌ གྱལ༌སའེ༌ སྒོ༌གུན༌ནི༌ཀ༌ ཁོང༌ སད༌ཅེས༌ལ༌ སྲུངས༌ཏེ༌ དུག༌གད༌པིན༌།
ACT 9:25 ཨིན༌ནའང༌ ས༌འུལ༌ལི༌ ལོབ༌ཕྲུགས༌གུན༌ནི༌ ཁོང༌ ཚན༌ལ༌ ཙེ༌པོ༌ཞིག༌གི༌ ནང༌ང༌ གྱངས༌ཏེ༌ གྱལ༌སའེ༌ རྩིག༌པའེ༌ ནང༌ང༌ ཡོད༌ཁན༌ནི༌ ཀར༌ཁུང༌ཞིག༌ནེ༌ ཐུར༌ལ༌ ཕབས༌།
ACT 9:26 ཁོང༌ ཡེ༌རུ༌ཤ༌ལེམ༌མ༌ ལེབ༌བ༌ཅིག༌, ལོབ༌ཕྲུགས༌གུན༌ ཉམ༌པོ༌ དུག༌ཅེས༌སི༌ རྩོན༌གྲུས༌ ཅོས༌, ཨིན༌ནའང༌ ཁོང༌ ཚང༌མ༌ ཇིགས༌ ཅིའ༌ཟེར༌ན༌, ས༌འུལ༌ དེན༌བ༌ མ༌ཤི༌ཀའེ༌ ལོབ༌ཕྲུགས༌ གྱུར༌ཏེ༌ ཨིན༌ཁན༌བོའེ༌ཀ༌ ཁོང༌གུན༌ དེན༌ མ༌ཤེས༌།
ACT 9:27 ཨིན༌ནའང༌ བཱར༌ན༌བས༌སི༌ ས༌འུལ༌ ཁོང༌རང༌ ཉམ༌པོ༌ སྐུ༌ཚབས༌གུན༌ནི༌ ཕྲོའ༌ ཁྲིད༌ཏེ༌ ཁྱོངས༌། བཱར༌ན༌བས༌སི༌ ཁོང༌གུན༌ལ༌ ཟེརས༌, ས༌འུལ༌ ལམ༌ནེ༌ ཆེན༌ ཡོད༌ ཟ༌ནེ༌ གཙོ༌བོ༌ ཇལ༌ཏེ༌ ཁོ༌ ཉམ༌པོ༌ ཞལ༌ཏའ༌ ཛད༌ཁན༌ ཡང༌ ཀ༌ཟུག༌ ཧམ༌པ༌ ཉམ༌པོ༌ དཱ༌མེས༌ཀས༌སི༌ ནང༌ང༌ ཁོང༌ངི༌ ཡེ༌ཤུའི༌ སྤང༌པོ༌ ཏངས༌ཁན༌གུན༌ནི༌ སྐོར༌ལ༌ ཤདས༌།
ACT 9:28 ས༌འུལ༌ སྐུ༌ཚབས༌གུན༌ ཉམ༌པོ༌ དུགས༌, ཡང༌ ཡེ༌རུ༌ཤ༌ལེམ༌ གང༌པོའེ༌ ནང༌ང༌ ཧམ༌པ༌ ཉམ༌པོ༌ གཙོ༌བོའེ༌ སྐོར༌ལ༌ ཤད༌ཨིན༌ གྲུལས༌།
ACT 9:29 ཁོང༌ངི༌ གརིས༌པའེ༌ སྐད༌ ཏང༌ཁན༌ནི༌ ཡ༌ཧུ༌དཱ༌པ༌གུན༌ ཉམ༌པོའང༌ གྲོས༌དུར༌ ཅོའད༌པིན༌, ཨིན༌ནའང༌ ཏེ༌གུན༌ནི༌ ཁོང༌ སད༌ཅེས༌སི༌ རྩོན༌གྲུས༌ ཅོས༌།
ACT 9:30 ཏད༌པ༌ཅན༌གུན༌ལ༌ ཏེ༌བོ༌ གྱུས༌ཆའ༌ཅིག༌, ཁོང༌གུན༌ ཡོངས༌ཏེ༌ ས༌འུལ༌ ཀཱེ༌སར༌རིའ༌ གྱལ༌ས༌ ཁྱེར༌ཏེ༌ ཏར༌སས༌སི༌ གྲོང༌ཁྱེར༌ལ༌ ལམ༌ཅུགས༌།
ACT 9:31 ཏེ༌ནེ༌ ཡ༌ཧུ༌དཱ༌, གཱ༌ལིལ༌ལི༌ དང༌ ས༌མར༌རི༌ཡཱ༌ ཡུལ༌ གང༌པོའེ༌ ནང༌ང༌ ཡོད༌ཁན༌ནི༌ ཆོས༌ཚོགས༌གུན༌ལ༌ རྡུག༌ངལ༌ མ༌ཐོང༌ང༌ ཞི༌དེ༌ ཡོད༌པིན༌། ཏམ༌པའེ༌ ཐུག༌ཉིད༌ གྱུད༌ཏེ༌ ཁོང༌གུན༌ལ༌ ཤེད༌ དང༌ སྤོས༌པ༌ ཐོབ༌, ཡང༌ གཙོ༌བོའེ༌ ཇིགས༌ དང༌ རྩི༌ཝའེ༌ ནང༌ང༌ མི༌ཚེ༌ ཕུད༌ཅེས༌པོའེ༌ ཁོང༌གུན༌ནི༌ ཀྲངས༌ཀ༌ གྱས༌ཨིན༌ སོང༌།
ACT 9:32 པི༌ཏྲར༌ ནས༌ས༌ ཅིག༌ནེ༌ ཅིག༌ག༌ ཆའ༌ ཟ༌ནེ༌, ཁོང༌ ལིད༌དཱ༌ གྲོང༌ཁྱེར༌རི༌ ནང༌ང༌ དུག༌ཁན༌ནི༌ ཏད༌པ༌ཅན༌གུན༌ནི༌ ཕྲོའ༌ ལེབ༌།
ACT 9:33 ཏེ༌རུ༌ ཁོང༌ང༌ ཨེ༌ནི༌ཡཱས༌ ཟེར༌ཁན༌ནི༌ མི༌ཞིག༌ ཐུག༌ ཀ༌བོའ༌ ཟའ༌ཕོག༌ཏེ༌ གྲུལ༌ མ༌ཉན༌ན༌ མལ༌ཙའེ༌ཀ༌ དུགས༌ཏེ༌ ལོ༌ རྒྱད༌ ཆའད༌པིན༌།
ACT 9:34 ཏེ༌ནེ༌ པི༌ཏྲར༌རི༌ ཁོའ༌, “ཨེ༌ནི༌ཡཱས༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ ཕན༌ཅུག༌ག༌ ཛད༌ཏེ༌ ཨིན༌; ཏ༌ ལོངས༌, རང༌ངི༌ མལ༌ཙ༌ སྲིལ༌” མོལ༌པ༌ ཁོ༌ ཏེན༌ན༌མལ༌ལ༌ ཀོའག༌ ལངས༌།
ACT 9:35 ཏེ༌ མི༌ ཐོང༌ཁན༌ ལིད༌དཱ༌པ༌ དང༌ ཤ༌རོན༌པ༌ ཚང༌མའེ༌ གཙོ༌བོའེ༌ཀ༌ ཏད༌པ༌ ཁྱོངས༌།
ACT 9:36 ཡོཔ༌པའ༌ གྲོང༌ཁྱེར༌རི༌ ནང༌ང༌ ཏ༌བི༌ཏའ༌ ༼གརིས༌པའེ༌ སྐད༌དི༌ ནང༌ང༌ དོར༌ཀས༌༽ ཟེར༌ཁན༌ནི༌ ཏད༌པ༌ཅན༌ནི༌ བུ༌མོ༌ཞིག༌ ཡོད༌པིན༌། ཁོའེ༌ ཏུས༌གྱུན༌ ལས༌ ཟང༌པོ༌ དང༌ ཉལ༌བ༌ཅན༌ གུན༌ལ༌ རོགས༌ ཅོའད༌པིན༌།
ACT 9:37 པི༌ཏྲར༌ ལིད༌དཱའེ༌ ནང༌ང༌ ཡོད༌ཏུས༌, ཏེ༌ བུ༌མོ༌བོའ༌ ཟུ༌མོ༌ སྲན༌ཏྲེ༌ ཡོངས༌ཏེ༌ ཤི༌, ཡང༌ ཁོའེ༌ ཟུགས༌པོ༌ ཁྲུས༌ཏེ༌ སྟང༌ཐོག༌གི༌ ནང༌ཞིག༌གི༌ ནང༌ང༌ བོརས༌།
ACT 9:38 ལིད༌དཱ༌ གྲོང༌ཁྱེར༌བོ༌ ཡོཔ༌པའ༌ནེ༌ ཉེ༌མོ༌ ཡོད༌པ༌, ལོབ༌ཕྲུགས༌གུན༌ལ༌ པི༌ཏྲར༌ ལིད༌དཱ༌ ཡོད༌ཁན༌བོ༌ ཚོར༌ཏེ༌, ཁོང༌གུན༌ནི༌ པི༌ཏྲར༌རི༌ཀ༌ མི༌ ཉིས༌, “ཐུག༌རྗེ༌ ཛད༌ཏེ༌ འི༌རུ༌ གྱོགས༌པ༌ སྐྱོད༌ད༌ ཛད༌” ཞུའ༌ལ༌ ལམ༌ཅུགས༌།
ACT 9:39 པི༌ཏྲར༌ ཏེ༌ མི༌ ཉིས༌ཀོ༌ ཉམ༌པོ༌ སྐྱོདས༌ ཡང༌ ཁོང༌ ཏེ༌རུ༌ ལེབ༌བ༌ཅིག༌, མི༌གུན༌ནི༌ ཁོང༌ སྟང༌ཐོག༌གི༌ ནང༌བོའེ༌ ནང༌ང༌ ཁྱེརས༌། ཏེ༌རུ༌ ཨ༌ནེ༌མ༌རང༌མོ༌ ཚང༌མ༌ ངུ༌ཨིན༌, དོར༌ཀས༌ ཁོང༌གུན༌ ཉམ༌པོ༌ ཡོད༌ ཟ༌ནེ༌ ཁོའེ༌ ཙེམས༌ཁན༌ནི༌ ཀོས༌ལག༌གུན༌ པི༌ཏྲར༌ལ༌ སྟནས༌།
ACT 9:40 པི༌ཏྲར༌རི༌ ཏེ༌ ནང༌ངི༌ ནང༌ང༌ ཡོད༌ཁན༌ ཚང༌མ༌ ཕི༌ལོག༌ག༌ ཕིངས༌, ཡང༌ པིག༌དོང༌ ཙུགས༌ཏེ༌ མོས༌ལམ༌ ཞུའ༌ ཛདས༌། ཏེ༌ནེ༌ ཤི༌ཁན༌ནི༌ ཟུགས༌པོའེ༌ ཆོགས༌ལ༌ ལྟས༌ཏེ༌, “ཏ༌བི༌ཏའ༌ ལོངས༌” མོལས༌། ཏ༌བི༌ཏའེ༌ རང༌ངི༌ མིག༌ ཕེས༌ ཡང༌ པི༌ཏྲར༌ ཐོང༌ཏེ༌ ལངས༌།
ACT 9:41 པི༌ཏྲར༌རི༌ ལག༌པ༌ ཐམས༌ཏེ༌ ཁོ༌ རྐང༌པའེ༌ཀ༌ ལང༌ ཅུག༌ག༌ ཛདས༌། ཏེ༌ནེ༌ ཏད༌པ༌ཅན༌ དང༌ ཨ༌ནེ༌མ༌རང༌མོ༌ གུན༌ བོད༌ཏེ༌ ཏ༌བི༌ཏའ༌ སོན༌ཏེའ༌ ཨིན༌ཁན༌བོ༌ སྟན༌ན༌ ཛདས༌།
ACT 9:42 འི༌ སྐོར༌རི༌ ནས༌ཚུལ༌གུན༌ ཡོཔ༌པའ༌ གྲོང༌ཁྱེར༌ གང༌པོའེ༌ ནང༌ང༌ ཁྱེབས༌, ཡང༌ མི༌ མང༌པོའེ༌ གཙོ༌བོའེ༌ཀ༌ ཏད༌པ༌ ཁྱོངས༌།
ACT 9:43 པི༌ཏྲར༌ ཞག༌བན༌ཤིག༌ ཡོཔ༌པའེ༌ ནང༌ང༌ ཤི༌མོན༌ ཀོའ༌ ཉེ༌ཁན༌ནི༌ ཁང༌པ༌ དུགས༌།
ACT 10:1 ཀཱེ༌སར༌རིའེ༌ ནང༌ང༌ ཨི༌ཏྲི༌ལི༌པའེ༌ མག༌ཚོགས༌སི༌ མག༌མི༌གྱའེ༌ སྤོན༌བོ༌ ཀོར༌ནེ༌ལི༌འུས༌ ཟེར༌ཁན༌ཞིག༌ ཡོད༌པིན༌།
ACT 10:2 ཁོ༌ དང༌ ཁོའེ༌ ནང༌མི༌ ཚང༌མ༌ མ༌ ཏད༌པ༌ཅན༌ དང༌ དཀོན༌མཆོག༌ག༌ རྩི༌ཝ༌ ཅོ༌ཨིན༌ ཁོང༌ངི༌ ཇིགས༌སི༌ ནང༌ང༌ མི༌ཚེ༌ ཕུད༌ཁན༌ ཡོད༌པིན༌། ཁོ༌ ཉལ༌བ༌ཅན༌གུན༌ལ༌ སྙིང༌ ཕེས༌ཏེ༌ ཏང༌ཁན༌ དང༌ ཞག༌ཏང༌ དཀོན༌མཆོག༌ག༌ མོས༌ལམ༌ ཞུ༌ཁན༌ཞིག༌ ཡོད༌པིན༌།
ACT 10:3 ཞག༌ཤིག༌ ཛར༌རེ༌ སྟིང༌ནེ༌ ཧ༌ལམ༌ ཆུ༌ཚོད༌ སུམ༌པ༌ཞིག༌གི༌ཀ༌, ཞལ༌ཟིགས༌ཤིག༌གི༌ ནང༌ང༌ དཀོན༌མཆོག༌གི༌ ཕོ༌ཉ༌ ཁོའེ༌ དུན༌ལ༌ སྐྱོད༌ཏེ༌ སལ༌པོ༌ ཐོང༌ ཡང༌ ཁོང༌ངི༌ མོལས༌, “ཀོར༌ནེ༌ལི༌འུས༌།”
ACT 10:4 ཀོར༌ནེ༌ལི༌འུས༌ ཇིགས༌ཨིན༌ ཕོ༌ཉའེ༌ ཆོགས༌ལ༌ མིག༌ གྱངས༌ཏེ༌ ལྟས༌, ཡང༌ ཁོའེ༌ ཟེརས༌, “ཀྱེ༌ གཙོ༌བོ༌ ཅི༌ ཅོ༌ལེ༌།” ཕོ༌ཉའེ༌ ལན༌སལས༌, “ཁྱོ༌རང༌ངི༌ ཅིན༌བ༌ དང༌ མོས༌ལམ༌ གུན༌ ཆོད༌པའེ༌ ཚུལ༌ལ༌ དཀོན༌མཆོག༌གི༌ ནམས༌ས༌ ཛདས༌།
ACT 10:5 ཏ༌ མི༌ ཁ༌ཅིག༌ ཡོཔ༌པའ༌ ལམ༌ཅུགས༌ཏེ༌ ཤི༌མོན༌ པི༌ཏྲར༌ ཟེར༌ཁན༌ནི༌ མི༌བོ༌ འི༌རུ༌ བོད༌ཏེ༌ ཁྱོང༌།
ACT 10:6 ཁོ༌ ཀོའ༌ ཉེ༌ཁན༌ ཤི༌མོན༌ནི༌ ཁང༌པ༌ དུགས༌ཏེ༌ ཡོད༌, ཁོའེ༌ ཁང༌པ༌ གྱ༌ཚོའེ༌ ཐའ༌མ༌ ཡོད༌།”
ACT 10:7 འི༌གུན༌ མོལ༌ཏེ༌ ཕོ༌ཉའ༌ སྐྱོད༌ ཚར༌ར༌ཅིག༌, ཀོར༌ནེ༌ལི༌འུས༌སི༌ རང༌ངི༌ ཡོག༌པོ༌ ཉིས༌ དང༌ ཁོའེ༌ ཞབས༌ཏོག༌པ༌ ལོ༌ཁྱེལ༌ཅན༌ནི༌ མག༌མི༌བོའ༌ བོདས༌,
ACT 10:8 ཡང༌ ཁོང༌གུན༌ལ༌ ཇུང༌ཁན༌ ཚང༌མ༌ ཤད༌ཏེ༌ ཡོཔ༌པའ༌ ལམ༌ཅུགས༌།
ACT 10:9 སྟིང༌མ༌ ཞག༌པོ༌ ཁོང༌ ཚང༌ཀོ༌ ཕེས༌སི༌ ནང༌ང༌ ཡོཔ༌པའེ༌ ཉེ༌མོའ༌ ལེབ༌བ༌ཅིག༌, ཉིང༌གུང༌ ཟམ༌ཤིག༌ག༌ པི༌ཏྲར༌ ཁང༌པའེ༌ ཁེ༌ཐོག༌ག༌ མོས༌ལམ༌ ཞུའ༌ལ༌ སྐྱོདས༌།
ACT 10:10 ཁོང༌ སྟོགས༌པ༌ ཅི༌ཏོང༌ཤིག༌ ཟེན༌ སམ༌, ཡང༌ ཁར༌ཇི༌ གྲལ༌གྲིག༌ ཅོ༌ཨིན༌ ཡོད༌ ཏུས༌, ཁོང༌ང༌ ཞལ༌ཟིགས༌ཤིག༌ ཐོང༌།
ACT 10:11 ཁོང༌ང༌ ནམ༌ཁའ༌ ཕེ༌ཏེ༌ རས༌ ཆེན༌མོ༌ ཙོགས༌ཤིག༌ ཆོགས༌ཞི༌ ཀ༌ནེ༌ ཐམས༌ཏེ༌ ཇིག༌རྟེན༌ ཆོགས༌ལ༌ ཕབ༌ཨིན༌ ཐོང༌།
ACT 10:12 ཏེ༌ནང༌ང༌ ཇིག༌རྟེན༌ནི༌ཀ༌ ཡོད༌ཁན༌ནི༌ སེམས༌ཅན༌, བུ༌ཙིག༌ དང༌ ཅ༌ཅིའུ༌ ན༌མི༌ན༌ ཚངས༌ གུན༌ དུག༌པིན༌།
ACT 10:13 ཏེ༌ནེ༌ ཁོང༌ང༌ སུང༌སྐད༌ཅིག༌གི༌, “པི༌ཏྲར༌ ལངས༌ཏེ༌ འི༌གུན༌ སད༌ཏེ༌ ཟོ༌” མོལ༌ཨིན༌ ཚོར༌།
ACT 10:14 ཨིན༌ནའང༌ པི༌ཏྲར༌རི༌ ལན༌སལས༌, “ཀྱེ༌ གཙོ༌བོ༌, ཤི༌ནའང༌ འི༌གུན༌ མི༌ཟའ༌, ངའེ༌ དི༌རིང༌ ཚག༌པ༌ ཚི༌ཏུ༌ ཡ༌ ཟའ༌ མི༌ཆོག༌ཅེས༌སི༌ ཟན༌ཞིག༌ མ༌ནེ༌ མ༌ཟོས༌པིན༌།”
ACT 10:15 ཏེ༌ནེ༌ ཁོང༌ང༌ ཏེན༌ན༌ སུང༌སྐད༌པོའེ༌ ལན༌ ཉིས༌པ༌ མོལས༌, “དཀོན༌མཆོག༌གི༌ རྩང༌མ༌ ཛད༌ཁན༌བོའ༌ ཚི༌ཏུ༌ མ༌ཟེར༌།”
ACT 10:16 ལན༌ སུམ༌ ཏེན༌ན༌ ཙོགས༌ སོང༌, ཏེ༌ནེ༌ ཧུན༌མེད༌ལ༌ ཏེ༌ རས༌པོ༌ ནམ༌ཁའ༌ ཐེན༌ཏེ༌ ཁྱེར༌ར༌ ཛདས༌།
ACT 10:17 ཏེ༌ ཞལ༌ཟིགས༌པོའེ༌ ཏོན༌ ཅི༌ ཨིན༌ཧེ༌ སམས༌ཏེ༌ པི༌ཏྲར༌ ཐའ༌མ༌ ཐེ༌ཚོམས༌ སོངས༌ཏེ༌ ཡོད༌ ཟ༌ནེ༌ ཀོར༌ནེ༌ལི༌འུས༌སི༌ པི༌ཏྲར༌ ཁྱོང༌ང༌ ལམ༌ཅུག༌ཁན༌གུན༌ ཤི༌མོན༌ནི༌ ཁང༌པའེ༌ སྒོའེ༌ཀ༌ ལེབ༌།
ACT 10:18 ཏེ༌ མི༌གུན༌ནི༌ བོད༌ཏེ༌ ཤི༌མོན༌ པི༌ཏྲར༌ ཟེར༌ཁན༌བོ༌ ཏེ༌རུ༌ དུགས༌ཏེ༌ ཡོད༌ད༌ ཟེར༌ཏེ༌ ཏྲིས༌།
ACT 10:19 པི༌ཏྲར༌, ཁོའ༌ ཐོང༌ཁན༌ནི༌ ཞལ༌ཟིགས༌པོའེ༌ སྐོར༌ལ༌ སམ༌བ༌ ཏང༌ཨིན༌ ཡོད༌ཏུས༌ ཏམ༌པའེ༌ ཐུག༌ཉིད༌དི༌ ཁོང༌ང༌ མོལས༌, “ཤི༌མོན༌ མི༌ སུམ༌མི༌ ཁྱོ༌རང༌ ཙལ༌དུག༌།
ACT 10:20 ཏ༌ ལངས༌ཏེ༌ ཡོག༌ག༌ སོང༌, ཡང༌ ཁོང༌གུན༌ ཉམ༌པོ༌ ཆ༌ཅེས༌ལ༌ ཐེ༌ཚོམས༌ མ༌ཅོ༌, ཅིའ༌ཟེར༌ན༌ ཁོང༌གུན༌ ངའེ༌ ལམ༌ཅུགས༌ཏེ༌ ཨིན༌།”
ACT 10:21 ཏེ༌ནེ༌ པི༌ཏྲར༌ ཡོག༌ག༌ བབས༌ཏེ༌ སོང༌, ཡང༌ ཁོང༌གུན༌ལ༌, “ཁྱོ༌ཞའེ༌ ཙལ༌ཁན༌ནི༌ མི༌བོ༌ ང༌ ཨིན༌, ཁྱོ༌ཞའ༌ ཅི༌ཕིའ༌ ཡོངས༌པིན༌?” ཟེར༌ཏེ༌ ཏྲིས༌།
ACT 10:22 ཁོང༌གུན༌ནི༌ ལན༌ཏངས༌, “ང༌ཞ༌གུན༌ མག༌མི༌གྱའེ༌ སྤོན༌བོ༌ ཀོར༌ནེ༌ལི༌འུས༌སི༌ ཆོགས༌ནེ༌ ཡོངས༌ཏེ༌ ཨིན༌, ཁོང༌ ཀྲང༌པོ༌ དང༌ དཀོན༌མཆོག༌ག༌ རྩི༌ཝ༌ ཅོ༌ཨིན༌ ཁོང༌ངི༌ ཇིགས༌སི༌ ནང༌ང༌ མི༌ཚེ༌ ཕུད༌ཁན༌ཞིག༌ ཨིན༌, ཡང༌ ཡ༌ཧུ༌དཱ༌པ༌ ཚང༌མའེ༌ ཁོང༌ང༌ རྩི༌ཝ༌ ཅོའད༌། དཀོན༌མཆོག༌གི༌ ཏམ༌པའེ༌ ཕོ༌ཉའེ༌ ཁོང༌ང༌ ཤི༌མོན༌ པི༌ཏྲར༌རི༌ མོལ༌ཁན༌གུན༌ ཉན༌ཐུབ༌ཅེས༌ལ༌ ཉེ༌རང༌ ཁོང༌ངི༌ ཁང༌པ༌ བོད༌ མོལ༌ཏེ༌ བཀའ༌ སལ༌ཏོག༌།”
ACT 10:23 ཏེ༌ནེ༌ པི༌ཏྲར༌རི༌ ཁོང༌གུན༌ ནང༌ང༌ བོད༌ཏེ༌ ཏེ༌རུ༌ དུག༌ ཅུག༌ག༌ ཛདས༌། 10:23-33 སྟིང༌མ༌ཞག༌པོ༌ པི༌ཏྲར༌ ཏེ༌ མི༌གུན༌ ཉམ༌པོ༌ སྐྱོདས༌, ཡང༌ ཁོང༌ ཉམ༌པོ༌ ཡོཔ༌པའ༌ནེ༌ ཞན༌ ཏད༌པ༌ཅན༌གུན༌ནའང༌ སོང༌།
ACT 10:24 སྟིང༌མ༌ཞག༌པོ༌ ཁོང༌གུན༌ ཀཱེ༌སར༌རིའ༌ ལེབ༌། ཀོར༌ནེ༌ལི༌འུས༌ ཁོང༌ སྐྱོད༌ཅེས༌ལ༌ སྲུངས༌ཏེ༌ ཡོད༌པིན༌, ཡང༌ ཁོའེ༌ རང༌ངི༌ ཉེན༌གྲུང༌གུན༌ དང༌ ཛ༌འོ༌ ཉེ༌མོ༌གུན༌ བོད༌ཏེ༌ ཡོད༌པིན༌།
ACT 10:25 པི༌ཏྲར༌ ཁང༌པ༌ ལེབས༌ཏེ༌ ཀོར༌ནེ༌ལི༌འུས༌ ཐུག༌ག༌ཅིག༌, ཁོའེ༌ ཁོང༌ངི༌ ཞབས༌སི༌ཀ༌ གྱེལ༌ཏེ༌ ཆག༌ཕུལས༌།
ACT 10:26 ཨིན༌ནའང༌ པི༌ཏྲར༌རི༌ ཁོའ༌ “ལོང༌” མོལ༌ཏེ༌ ལང༌ང༌ ཛདས༌, “ང༌ ནི༌ ཁྱོ༌རང༌ ཙོགས༌ མི༌ཞིག༌ ཨིན༌ ངའ༌ ཆག༌མ༌ཕུལ༌” མོལས༌།
ACT 10:27 ཏེ༌ནེ༌ པི༌ཏྲར༌ ཀོར༌ནེ༌ལི༌འུས༌ ཉམ༌པོ༌ སྤེ༌ར༌ སལ༌ཨིན༌ ཁང༌པའེ༌ ནང༌ང༌ སྐྱོདས༌, ཡང༌ མི༌ མང༌པོ༌ཞིག༌ ཛོམས༌ཏེ༌ ཡོད༌ཁན༌བོ༌ ཟིགས༌།
ACT 10:28 ཁོང༌ངི༌ ཏེ༌ མི༌གུན༌ལ༌ མོལས༌, “ཡ༌ཧུ༌དཱ༌པ༌ཞིག༌ག༌ ཡ༌ཧུ༌དཱ༌པ༌ མན༌ཁན༌ཞིག༌ ཉམ༌པོ༌ བྲེལ༌ བོར༌ཅེས༌པོ༌ ཡ༌ཧུ༌དཱ༌པའེ༌ ཁྲིམས༌ ནང༌ཞིན༌ གལ༌ཏེ༌ ཨིན༌ཁན༌ ཁྱོ༌ཞ༌གུན༌ལ༌ གྱུས༌ཨིན༌ནོག༌། ཨིན༌ནའང༌ ངའེ༌ སུ༌ཞིག༌གའང༌ རིགས༌ངན༌ ཡ༌ ཚི༌ཏུ༌ ཟེར༌ མི༌ཆོག༌ཅེས༌པོ༌, དཀོན༌མཆོག༌གི༌ ང༌ སྔོན༌ ཅུག༌ག༌ ཛདས༌།
ACT 10:29 ཏེ༌བོའེ༌ཕིའ༌ ཁྱོ༌ཞ༌གུན༌ནི༌ ང༌ འི༌རུ༌ བོད༌ ཟ༌ནེ༌ ངའེ༌ ཅའང༌ གྱབ༌གལ༌ མ༌ཅོའ༌ ཡོངས༌པིན༌། ཏ༌ ཁྱོ༌ཞའེ༌ ང༌ ཅི༌ཕིའ༌ འི༌རུ༌ བོད༌ཏེ༌ ཨིན༌?”
ACT 10:30 ཀོར༌ནེ༌ལི༌འུས༌སི༌ ལན༌ཏངས༌, “དི༌རིང༌ངི༌ སང༌ ཞག༌ ཞིའི༌ སྔུན༌ལ༌ ཛར༌རེ༌ སྟིང༌ནེ༌ ཆུ༌ཚོད༌ སུམ༌པ༌, འིན༌ན༌ ཏུས༌ཚོད༌ ཟམ༌ཤིག༌གི༌ཀ༌, ངའེ༌ ང༌རང༌ངི༌ ཁང༌པའེ༌ ནང༌ང༌ མོས༌ལམ༌ ཞུའད༌པིན༌, ཧུན༌མེད༌ལ༌ ནམ༌ཟའ༌ ལྡང༌ཤན༌ ནམས༌ཁན༌ནི༌ མི༌ཞིག༌ ངའེ༌ དུན༌ལ༌ ཞངས༌ཏེ༌ ཞུགས༌།
ACT 10:31 ཁོང༌ངི༌ ངའ༌ མོལ༌ལ༌རག༌, ‘ཀོར༌ནེ༌ལི༌འུས༌ དཀོན༌མཆོག༌གི༌ ཁྱོ༌རང༌ངི༌ མོས༌ལམ༌གུན༌ སན༌ན༌ ཛདས༌, ཡང༌ ཁྱོ༌རང༌ངི༌ ཅིན༌བ༌ ཏང༌ཁན༌གུན༌ནི༌ཀ༌ སྣང༌ང༌ སལས༌།
ACT 10:32 ཏ༌ སུ༌ཞིག༌ ཡོཔ༌པའ༌ ལམ༌ཅུགས༌ཏེ༌ ཤི༌མོན༌ པི༌ཏྲར༌ ཟེར༌ཁན༌བོ༌ འི༌རུ༌ བོད༌ཏེ༌ ཁྱོང༌། ཁོང༌ ཤི༌མོན༌ ཀོའ༌ ཉེ༌ཁན༌ནི༌ ཁང༌པ༌ དུགས༌ཏེ༌ ཡོད༌, ཁོའེ༌ ཁང༌པ༌ གྱ༌ཚོའེ༌ ཐའ༌མ༌ ཡོད༌།’
ACT 10:33 ཏེན༌ན༌བོའེ༌ཕིའ༌ ཏེན༌ན༌མལ༌ལ༌ ངའེ༌ ཉེ༌རང༌ང༌ བོད༌ད༌ མི༌ ཀལ༌པིན༌ ཡང༌ ཉེ༌རང༌ འི༌ཀ༌ སྐྱོད༌པ༌ ང༌ཞའ༌ མ༌ ཐད༌པོ༌ སོང༌། གཙོ༌བོའེ༌ ཉེ༌རང༌ང༌ མོལ༌ཁན༌གུན༌ ཉན༌ཅེས༌ལ༌ དཀོན༌མཆོག༌གི༌ སྐུན༌དུན༌ལ༌ ང༌ཞའ༌ ཚང༌མ༌ འི༌ཀ༌ ཛོམས༌ཏེ༌ ཨིན༌།”
ACT 10:34 ཏེ༌ནེ༌ པི༌ཏྲར༌རི༌ མོལ༌ཅེས༌ གོ༌ཟུག༌, “དཀོན༌མཆོག༌གི༌ སུའང༌ ཆོགས༌ མི༌ཛད༌ཅེས༌པོ༌ ངའ༌ ཏན༌ཏན༌ ཧ༌གོ༌།
ACT 10:35 ཨིན༌ནའང༌ དཀོན༌མཆོག༌གི༌ གྱལ༌ཁམས༌ ཚང༌མའེ༌ ནང༌ནེ༌ ཁོང༌ངི༌ རྩི༌ཝ༌ དང༌ ཇིགས༌སི༌ ནང༌ང༌ ལམ༌ ཟང༌པོའེ༌ཀ༌ གྲུལ༌ཁན༌གུན༌ལ༌ གའ༌མོའེ༌ ནས༌ཚུལ༌ ཉན༌ཅེས༌ལ༌ གའ༌སུས༌ ཛད༌ད༌ནོག༌།
ACT 10:36 ཨིས༌ར༌ཨེལ༌པ༌གུན༌ནི༌ ཕིའ༌ གའ༌མོའེ༌ ནས༌ཚུལ༌ ནི༌, ཡེ༌ཤུ༌ མ༌ཤི༌ཀ༌ ང༌དང༌ ཚང༌མའེ༌ གཙོ༌བོ༌ ཡང༌ ཁོང༌ གྱུད༌ཏེ༌ དཀོན༌མཆོག༌ ཉམ༌པོ༌ ཐུན༌བྲེལ༌ ཡོད༌ཅེས༌པོ༌ ཨིན༌ནོག༌།
ACT 10:37 ཡོ༌ཧཱ༌ནན༌ནི༌ ཁྲུས༌ལེན༌ཅེས༌སི༌ སྐོར༌ལ༌ ཤད༌ཏེ༌ སྟིང༌ནེ༌, གཱ༌ལིལ༌ལིའི༌ ཡུལ༌ནེ༌ གོ༌ཟུགས༌ཏེ༌ ཡ༌ཧུ༌དཱ༌ གང༌པོའེ༌ ནང༌ང༌ ཇུང༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌:
ACT 10:38 དཀོན༌མཆོག༌གི༌ ན༌ཙ༌རེད༌པ༌ ཡེ༌ཤུ༌ ཏམ༌པའེ༌ ཐུག༌ཉིད༌ དང༌ སྟོབས༌ ཉམ༌པོ༌ སྐོའ༌ ཛདས༌, ཡང༌ ཁོང༌ ནས༌ས༌ མང༌པོའ༌ སྐྱོད༌ཏེ༌ ཆག༌ལས༌ ཟང༌པོ༌ ཛད༌ཅེས༌ དང༌ རྡུད༌གུན༌ནི༌ གོ༌བའེ༌ ཝང༌ངི༌ ཡོག༌ག༌ ཡོད༌ཁན༌གུན༌ ཕན༌ཅུག༌ག༌ ཛདས༌, ཅིའ༌ཞུ༌ན༌ དཀོན༌མཆོག༌ ཁོང༌ ཉམ༌པོ༌ ཞུགས༌ཏེ༌ ཨིན༌པིན༌།”
ACT 10:39 “ཡེ༌ཤུའི༌ ཡ༌ཧུ༌དཱའེ༌ ཡུལ༌ དང༌ ཡེ༌རུ༌ཤ༌ལེམ༌མི༌ ནང༌ང༌ ཛད༌ཁན༌གུན༌ནི༌ སྤང༌པོ༌ ང༌ཞ༌གུན༌ ཨིན༌། ཁོང༌གུན༌ནི༌ ཁོང༌ རྐྱང༌ཤིང༌ང༌ རྐྱངས༌ཏེ༌ སདས༌།
ACT 10:40 ཨིན༌ནའང༌ དཀོན༌མཆོག༌གི༌ ཁོང༌ ཞག༌ སུམ༌པའེ༌ ཞག༌ག༌ སོན༌ཏེའ༌ ལང༌ང༌ ཛད༌ཏེ༌ ང༌ཞ༌གུན༌ལ༌ སྔོན༌ ཅུག༌ག༌ ཛདས༌།
ACT 10:41 ཚང༌མ༌ལ༌ ཁོང༌ མ༌ཇལ༌, ཨིན༌ནའང༌ དཀོན༌མཆོག༌གི༌ སྤང༌པོ༌ ཏང༌ང༌ལ༌ ལྡམ༌མ༌ ཛད༌ཁན༌ ང༌ཞ༌གུན༌ནི༌ ཁོང༌ ཇལ༌། ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ ང༌ཞ༌གུན༌ནི༌ ཁོང༌ ཉམ༌པོ༌ ཟོས༌པིན༌ ཡང༌ ཐུངས༌པིན༌།
ACT 10:42 དཀོན༌མཆོག༌གི༌ ང༌ཞའ༌ མི༌གུན༌ལ༌ ཡེ༌ཤུ༌ ནི༌, ཤི༌སོན༌ ཉིས༌ཀོའེ༌ཀ༌ ཤགས༌ ཛད༌ཅེས༌ལ༌ ཁོང༌ངི༌ སྐོའ༌ ཛད༌ཁན༌བོའེ༌ སྤང༌པོ༌ ཏང༌ཅེས༌ དང༌ ཆོས༌ཤད༌ཅེས༌ལ༌ བཀའ༌ སལས༌།
ACT 10:43 ཡེ༌ཤུའི༌ཀ༌ ཏད༌པ༌ ཅོ༌ཁན༌ ཚང༌མ༌ལ༌ ཁོང༌ངི༌ ཚན༌ གྱུད༌ཏེ༌ སྡིག༌པ༌ ཅོ༌ཁན༌གུན༌ལ༌ ཤགས༌པ༌ ཐོབ༌ཨིན༌ ཟེར༌ཏེ༌ ཁོང༌ངི༌ སྐོར༌ལ༌ ལུང༌སྟོན༌པ༌ ཚང༌མའེ༌ སྤང༌པོ༌ སལ༌ཏེ༌ ཨིན༌ནོག༌།”
ACT 10:44 པི༌ཏྲར༌རི༌ འི༌ སྤེ༌ར༌གུན༌ ཤད༌ཨིན༌ ཡོད༌ ཟ༌ནེ༌, ཁོང༌ངི༌ ལོན༌ ཉན༌ཨིན༌ ཡོད༌ཁན༌ ཚང༌མའེ༌ཀ༌ ཏམ༌པའེ༌ ཐུག༌ཉིད༌ བབས༌།
ACT 10:45 པི༌ཏྲར༌ ཉམ༌པོ༌ ཡོངས༌ཁན༌ནི༌ ཡ༌ཧུ༌དཱ༌པ༌ ཏད༌པ༌ཅན༌གུན༌ནི༌, ཡ༌ཧུ༌དཱ༌པ༌ མན༌ཁན༌གུན༌ནི༌ཀའང༌ ཏམ༌པའེ༌ ཐུག༌ཉིད༌ བབས༌ཁན༌བོ༌ ཐོང༌ཏེ༌ ཧ༌ལས༌,
ACT 10:46 ཅིའ༌ཟེར༌ན༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཞན༌ སྐད༌གུན༌ནི༌ ནང༌ང༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཁོང༌གུན༌ནི༌ ཚོར༌། ཏེ༌ནེ༌ པི༌ཏྲར༌རི༌ མོལས༌,
ACT 10:47 “ཁོང༌གུན༌ལ༌ ཆུའི༌ཁྲུས༌ ལེན༌ཅེས༌ནེ༌ སྒག༌ཅེས༌སི༌ ཧམ༌པ༌ སུའི༌ ཅོ༌ཨིན༌ ཀ༌གུན༌ལ༌ ང༌ཞའ༌ ཐོབ༌ཁན༌ནི༌ ཏེན༌ན༌ ཏམ༌པའེ༌ ཐུག༌ཉིད༌བོ༌ ཐོབ༌ཏེ༌ ཨིན༌ནོག༌།”
ACT 10:48 པི༌ཏྲར༌རི༌ ཁོང༌གུན༌ལ༌ ཡེ༌ཤུ༌ མ༌ཤི༌ཀའེ༌ ཚན༌ནི༌ ནང༌ང༌ ཁྲུས༌ ལེན༌གོས༌ ཟེར༌ཏེ༌ བཀའ༌ སལས༌། ཏེ༌ནེ༌ ཁོང༌གུན༌ནི༌ པི༌ཏྲར༌ལ༌ ཞག༌ ཁ༌ཅིག༌ ཁོང༌ ཉམ༌པོ༌ ཞུག༌ཅེས༌ལ༌ ཞུ༌ཝ༌ ཕུལས༌།
ACT 11:1 ཡ༌ཧུ༌དཱའེ༌ ནང༌ང༌ ཡོད༌ཁན༌ནི༌ སྐུ༌ཚབས༌གུན༌ དང༌ ཞན༌ ཏད༌པ༌ཅན༌གུན༌ལ༌ ཡ༌ཧུ༌དཱ༌པ༌ མན༌ཁན༌གུན༌ནིའང༌ དཀོན༌མཆོག༌གི༌ བཀའེ༌ཀ༌ ཏད༌པ༌ ཁྱོངས༌ཏོག༌ ཟེར༌ཏེ༌ ཚོར༌།
ACT 11:2 པི༌ཏྲར༌ ཡེ༌རུ༌ཤ༌ལེམ༌མ༌ ལོགས༌ཏེ༌ སྐྱོད༌ད༌ཅིག༌, ཡ༌ཧུ༌དཱ༌པ༌ ཏད༌པ༌ཅན༌ ཁ༌ཅིག༌གི༌ ཁོང༌ང༌ སྐྱོན༌རྗོད༌ ཅོས༌ཏེ༌ ཟེརས༌,
ACT 11:3 “ཉེ༌རང༌ ཡ༌ཧུ༌དཱ༌པ༌ མན༌ཁན༌ ཚི༌ཏུ༌གུན༌ནི༌ ཁང༌པ༌ སོང༌ཏེ༌ ཁོང༌གུན༌ ཉམ༌པོ༌ ཟན༌ ཟོས༌ཏོག༌།”
ACT 11:4 ཏེ༌ནེ༌ པི༌ཏྲར༌རི༌ ཇུང༌ཁན༌ ཚང༌མ༌ གོ༌ནེ༌ ཇུག༌ ཚག༌པ༌ ཚིར༌ཚིར༌ ཚིར༌ལ༌ ཁོང༌གུན༌ལ༌ ཤདས༌།
ACT 11:5 “ངའེ༌ ཡོཔ༌པའ༌ གྲོང༌ཁྱེར༌རི༌ ནང༌ང༌ མོས༌ལམ༌ ཞུ༌ཨིན༌ ཡོད༌པིན༌, ཧུན༌མེད༌ལ༌ ང༌ འི༌ ཞལ༌ཟིགས༌པོ༌ ཐོང༌: ནམ༌ཁའ༌ནེ༌ རས༌ ཆེན༌མོ༌ ཙོགས༌ཤིག༌ ཀྲུ༌ ཞི༌ཀོ༌ནེ༌ ཟུམས༌ཏེ༌ ངའེ༌ དུན༌ལ༌ ཕབས༌།
ACT 11:6 ངའེ༌ ཏེ༌བོའ༌ ཏན༌ཏན༌ ཅོས༌ཏེ༌ ལྟས༌པ༌, ཏེ༌ནང༌ང༌ སྲལ༌ཁན༌ དང༌ ནག༌ཚོགས༌སི༌ སེམས༌ཅན༌, བུ༌ཙིག༌ ན༌མི༌ན༌ ཚངས༌ དང༌ ཅ༌ཅིའུ༌ གུན༌ ཐོང༌།
ACT 11:7 ཏེ༌ནེ༌ ང༌ སུང༌སྐད༌ཅིག༌གི༌ ‘པི༌ཏྲར༌, ཏ༌ ལངས༌ཏེ༌ འི༌གུན༌ སད༌ཏེ༌ ཟོ༌’ མོལ༌ཨིན༌ ཚོར༌།”
ACT 11:8 “ངའེ༌ ཟེར༌པིན༌, ‘ཀྱེ༌ གཙོ༌བོ༌ མ༌ནེ༌ མི༌ཟའ༌, དི༌རིང༌ ཚག༌པ༌ ངའེ༌ ཡ༌ཧུ༌དཱ༌པའེ༌ ཁྲིམས༌ སྲུངས༌ཏེ༌ འི༌ཙོགས༌སི༌ ཚི༌ཏུ༌ དང༌ ཁམ༌ལོག༌ ཟན༌གུན༌ མ༌ཟོས༌པིན༌།’”
ACT 11:9 “ནམ༌ཁའ༌ནེ༌ ཏེ༌ སུང༌སྐད༌པོའེ༌ ལན༌ ཉིས༌པ༌ མོལས༌, ‘དཀོན༌མཆོག༌གི༌ རྩང༌མ༌ ཛད༌ཁན༌གུན༌ལ༌ ཁྱོ༌རང༌ངི༌ ཚི༌ཏུ༌ མ༌ཟེར༌།’
ACT 11:10 ཏེན༌ན༌བོ༌ ཚེར༌ སུམ༌ ཇུང༌, ཏེ༌ སྟིང༌ནེ༌ ཏེ༌ ཚང༌མ༌ ལོགས༌ཏེ༌ ནམ༌ཁའ༌ ཐེན༌ན༌ ཛདས༌།”
ACT 11:11 “ཏེན༌ན༌ ཏུས༌ལ༌ ཀཱེ༌སར༌རིའ༌ནེ༌ ང༌ ཡོད༌ས༌ ཀལ༌ཁན༌ནི༌ མིང༌གོ༌ སུམ༌, ང༌ བྲང༌ས༌ དུག༌ཁན༌ནི༌ ཁང༌པ༌བོའེ༌ སྒོའེ༌ཀ༌ ལེབ༌།
ACT 11:12 ཏམ༌པའེ༌ ཐུག༌ཉིད༌དི༌ ང༌ མོལས༌ ‘ཁྱོ༌རང༌ འི༌ མི༌གུན༌ ཉམ༌པོ༌ ཐེ༌ཚོམས༌ མེད༌པ༌ སོང༌།’ འི༌ ཏད༌པ༌ཅན༌ དྲུག༌གའང༌ ང༌ ཉམ༌པོ༌ ཡོངས༌, ཡང༌ ང༌ཞ༌གུན༌ ང༌ བོད༌ད༌ ཀལ༌ཁན༌ནི༌ མི༌བོའེ༌ ཁང༌པའེ༌ ནང༌ང༌ སོང༌པིན༌།
ACT 11:13 ཁོའེ༌ ང༌ཞའ༌ ཤདས༌, ཁོའ༌ ཁོ༌རང༌ངི༌ ཁང༌པའེ༌ ནང༌ང༌ དཀོན༌མཆོག༌གི༌ ཕོ༌ཉ༌ཞིག༌ ཇལ༌ཏེ༌ ‘ཡོཔ༌པའ༌ ཟེར༌ས༌ མི༌གུན༌ ལམ༌ཅུགས༌ཏེ༌ ཤི༌མོན༌ པི༌ཏྲར༌ ཟེར༌ཁན༌ནི༌ མི༌བོ༌ འི༌རུ༌ བོད༌ཏེ༌ ཁྱོང༌།
ACT 11:14 ཁོའེ༌ ཤད༌ཁན༌ནི༌ ལོན༌བོའེ༌ ཁྱོ༌རང༌ དང༌ ཁྱོ༌རང༌ངི༌ ནང༌ཚངས༌ ཚང༌མའ༌ ཐར༌པ༌ ཐོབ༌ཨིན༌ མོལ༌ལ༌ རག༌།’”
ACT 11:15 “ངའེ༌ ཤད༌ཅེས༌ གོ༌ཟུག༌ ཅོའ༌ཅིག༌, ཁོང༌གུན༌ནི༌ཀའང༌ ཏམ༌པའེ༌ ཐུག༌ཉིད༌ བབས༌ ཀ༌ཟུག༌གི༌ ང༌དང༌གུན༌ནི༌ཀ༌ གོ༌མ༌ བབས༌ཏེ༌ ཨིན༌པིན༌།
ACT 11:16 ཏེ༌ནེ༌ ང༌ གཙོ༌བོ༌ ཡེ༌ཤུའི༌ ‘ཡོ༌ཧཱ༌ནན༌ནི༌ ཆུའི༌ ཁྲུས༌སལ༌ཏེ༌ ཨིན༌པིན༌, ཨིན༌ནའང༌ ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌དི༌ ཁྲུས༌ཐོབ༌ཨིན༌’ མོལ༌ཁན༌བོ༌ ཨིད༌ཏུ༌ ཡོངས༌།
ACT 11:17 གཙོ༌བོ༌ ཡེ༌ཤུ༌ མ༌ཤི༌ཀ༌ ཏད༌པ༌ ཅོ༌ཁན༌ ང༌དང༌གུན༌ལ༌ སལ༌ཁན༌ནི༌ ཏེན༌ན༌ ཅིན༌ལབས༌པོ༌ དཀོན༌མཆོག༌གི༌ ཁོང༌གུན༌ལའང༌ སལ༌ཏེ༌ ཨིན༌ན༌, ཏེ༌ནེ༌ དཀོན༌མཆོག༌ག༌ གྱབ༌གལ༌ ཅོ༌ཉན༌ཨིན༌ སམ༌ཁན༌ ང༌ སུ༌ ཨིན༌ནོག༌?”
ACT 11:18 སྐྱོན༌རྗོད༌ ཅོ༌ཁན༌གུན༌ནི༌ ཏེ༌ སྤེ༌ར༌གུན༌ ཚོར༌ར༌ཅིག༌, ཁོང༌གུན༌ནི༌ གྱབ༌གལ༌ ཅོ༌ཅེས༌ ཕངས༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཟེརས༌, “ཏ༌ ཧ༌གོ༌, གྱོད༌པ༌ ཅོ༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ལའང༌ དཀོན༌མཆོག༌གི༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ སྐབས༌ སལ༌ལ༌ ཛད༌ཏེ༌ ཨིན༌ནོག༌།”
ACT 11:19 སྟེ༌ཕན༌ སད༌ཏེ༌ སྟིང༌ནེ༌ ནགས༌ ཐོང༌ཁན༌ནི༌ ཏད༌པ༌ཅན༌གུན༌ ཤོར༌ཏེ༌ ཐག༌རིང༌ངི༌ ཡུལ༌, ཕོ༌ནི༌ཤི༌འ༌, ཀིབ༌རུས༌ དང༌ ཨན༌ཏི༌ཡོག༌ གྱལ༌ས༌ གུན༌ལ༌ ལེབ༌། ཁོང༌གུན༌ནི༌ དཀོན༌མཆོག༌གི༌ བཀའ༌ ཡ༌ཧུ༌དཱ༌པ༌གུན༌ལ༌ མ༌ནེ༌ མ༌ཤདས༌།
ACT 11:20 ཨིན༌ནའང༌ ཁོང༌གུན༌ནི༌ ཕྲོ༌ནེ༌ ཀིབ༌རུས༌ དང༌ ཀི༌རིན༌ ཡུལ༌ནེ༌ ཨིན༌ཁན༌ ཁ༌ཅིག༌ ཨན༌ཏི༌ཡོག༌ གྱལ༌ས༌ སོང༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ལ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ཅེས༌ གོ༌ཟུག༌ ཅོས༌།
ACT 11:21 གཙོ༌བོ༌ དཀོན༌མཆོག༌གི༌ ཁྱུད༌ ཁོང༌གུན༌ ཉམ༌པོ༌ ཡོད༌པིན༌, ཡང༌ མི༌ མང༌པོའེ༌ ལོན༌བོའེ༌ཀ༌ ཏད༌པ༌ ཁྱོངས༌ཏེ༌ གཙོ༌བོ༌ ཡེ༌ཤུའི༌ གྱབ༌ནེ༌ བྲངས༌།
ACT 11:22 ཏེ༌ ནས༌ཚུལ༌བོ༌ ཡེ༌རུ༌ཤ༌ལེམ༌མ༌ ཡོད༌ཁན༌ནི༌ ཆོས༌ཚོགས༌སི༌ ཚོར༌, ཡང༌ ཁོང༌གུན༌ནི༌ བཱར༌ན༌བས༌ ཨན༌ཏི༌ཡོག༌ག༌ ལམ༌ཅུགས༌།
ACT 11:23 བཱར༌ན༌བས༌ ཏེ༌རུ༌ ལེབ༌བ༌ཅིག༌, དཀོན༌མཆོག༌གི༌ ཏེ༌ ཏད༌པ༌ཅན༌གུན༌ནི༌ ནང༌ང༌ ཆག༌ལས༌ ཛད༌ཅེས༌པོ༌ ཐོང༌ཏེ༌ མང༌པོ༌ ཐད༌, ཡང༌ ཁོང༌གུན༌ལ༌ གཙོ༌བོ༌ ཡེ༌ཤུའི༌ ནང༌ང༌ སྟན༌པོ༌ དུག༌ཅེས༌ལ༌ རྩོན༌གྲུས༌ སྲན༌ཏྲེ༌ ཅོ༌ཅེས༌སི༌ སྤོས༌པ༌ སལས༌།
ACT 11:24 བཱར༌ན༌བས༌ ནི༌ མ༌ མི༌ ཟང༌པོ༌ཞིག༌, ཏམ༌པའེ༌ ཐུག༌ཉིད༌དི༌ གངས༌ཏེ༌ ཏད༌པ༌ སྟན༌པོ༌ཅན༌ ཨིན༌པིན༌། ཁོང༌ གྱུད༌ཏེ༌ མི༌ མང༌པོའེ༌ གཙོ༌བོ༌ ཡེ༌ཤུའི༌ ནང༌ང༌ ཏད༌པ༌ ཁྱོངས༌།
ACT 11:25 ཏེ༌ནེ༌ བཱར༌ན༌བས༌ ས༌འུལ༌ ཙལ༌ལ༌ ཏར༌སས༌སི༌ གྱལ༌ས༌ སྐྱོདས༌།
ACT 11:26 ས༌འུལ༌ ཐོབ༌བ༌ཅིག༌, ཁོང༌ ཨན༌ཏི༌ཡོག༌ག༌ ཁོང༌རང༌ ཉམ༌པོ༌ ཁྱོངས༌། ཏེ༌རུ༌ ཁོང༌ ཉིས༌ཀོ༌ ལོ༌ གང༌པོ༌ ཆོས༌ཚོགས༌སི༌ ནང༌ང༌ ཛོམས༌ཏེ༌ མི༌ མ༌ མང༌པོའ༌ ཡེ༌ཤུའི༌ སྐོར༌ལ༌ ལབ༌བ༌ ཛདས༌། ཨན༌ཏི༌ཡོག༌གི༌ ནང༌ང༌ གོ༌མ༌རང༌ མ༌ཤི༌ཀའེ༌ ལོབ༌ཕྲུགས༌གུན༌ལ༌ མ༌ཤི༌ཀ༌པ༌ ཟེརས༌།
ACT 11:27 ཏེན༌ན༌ ཏུས༌ལ༌ ལུང༌སྟོན༌པ༌ ཁ༌ཅིག༌ ཡེ༌རུ༌ཤ༌ལེམ༌ནེ༌ བབས༌ཏེ༌ ཨན༌ཏི༌ཡོག༌ག༌ སྐྱོདས༌།
ACT 11:28 ཁོང༌གུན༌ནི༌ ཕྲོ༌ནེ༌ ཅིག༌ ཨ༌ག༌བས༌ ཟེར༌ཁན༌བོ༌ ལངས༌ཏེ༌ ཏམ༌པའེ༌ ཐུག༌ཉིད༌ གྱུད༌ཏེ༌ རོམ༌མི༌ ངའ༌ཡོག༌ག༌ ཡོད༌ཁན༌ནི༌ ཡུལ༌ གང༌པོའེ༌ ནང༌ང༌ མུ༌གེ༌ སྲན༌ཏྲེ༌ ལང༌ཅེས༌སི༌ ལུང༌སྟན༌བོ༌ སལས༌། ༼འི༌ མུ༌གེ༌བོ༌ རོམ༌མི༌ གྱལ༌པོ༌ ཀོལོ༌དི༌འས༌སི༌ ཏུས༌ལ༌ ཇུངས༌ཏེ༌ ཨིན༌།༽
ACT 11:29 ལོབ༌ཕྲུགས༌གུན༌ནི༌ རང༌རང༌ངི༌ ཁྱུད༌ ནང༌ཞིན༌ ཡ༌ཧུ༌དཱའེ༌ ནང༌ང༌ ཡོད༌ཁན༌ནི༌ ཏད༌པ༌ཅན༌གུན༌ལ༌ པེ༌ནེ༌ རོགས༌ ཅོ༌ཅེས༌ལ༌ ཐག༌ཅདས༌།
ACT 11:30 ཡེ༌རུ༌ཤ༌ལེམ༌མི༌ ཆོས༌ཚོགས༌སི༌ འུ༌སྐྱོང༌གུན༌ནི༌ ལག༌ག༌ ཏང༌ཅེས༌ལ༌ ས༌འུལ༌ དང༌ བཱར༌ན༌བས༌ ཉམ༌པོ༌ ཁོང༌གུན༌ནི༌ པེ༌ནེ༌ ལྡུས༌ཁན༌བོ༌ ཀལས༌།
ACT 12:1 ཧ༌ལམ༌ ཏེན༌ན༌ ཏུས༌ལ༌ གྱལ༌པོ༌ ཧེ༌རོད༌དི༌ ཆོས༌ཚོགས༌སི༌ ཏད༌པ༌ཅན༌ ཁ༌ཅིག༌ག༌ ནགས༌ སྟན༌ཅེས༌ གོ༌ཟུག༌།
ACT 12:2 ཁོའེ༌, ཡོ༌ཧཱ༌ནན༌ནི༌ ཨ༌ཅོ༌ ཡ༌ཀོབ༌ ར༌འི༌ ཉམ༌པོ༌ སད༌ཅུགས༌།
ACT 12:3 ཏེ༌ ལས༌གུན༌ནི༌ ཡ༌ཧུ༌དཱ༌པ༌གུན༌ ཐད༌པོ༌ ཆའ༌ ཐོང༌ཏེ༌ གྱལ༌པོའེ༌ པི༌ཏྲར༌རའང༌ ཟུམ༌ཅུགས༌ ༼ཏེ༌བོ༌ པེ༌སག༌གི༌ ཏུས༌ཆེན༌ནི༌ ཏུས༌ལ༌ ཇུང༌།༽
ACT 12:4 པི༌ཏྲར༌ ཟུམས༌ཏེ༌ སྟིང༌ནེ༌ ཧེ༌རོད༌དི༌ ཁོང༌ ཙོན༌ཁང༌ངི༌ ནང༌ང༌ ཀག༌ཅུགས༌, ཡང༌ སྲུང༌ཅེས༌ལ༌ མག༌མི༌ ཞི༌ཅན༌ནི༌ སྡེ༌ ཞིའ༌ ཁག༌ ཀལས༌། ཧེ༌རོད༌དི༌ པེ༌སག༌གི༌ ཏུས༌ཆེན༌ནི༌ སྟིང༌ནེ༌ པི༌ཏྲར༌ མི༌མངས༌སི༌ དུན༌ལ༌ ཁྱོངས༌ཏེ༌ ཁོང༌ང༌ ཁྲིམས༌ ཆད༌ཨིན༌ སམ༌།
ACT 12:5 པི༌ཏྲར༌ ཙོན༌ནི༌ ནང༌ང༌ ཡོད༌ ཟ༌ནེ༌, ཆོས༌ཚོགས༌པོའེ༌ སྙིང༌ ཐག༌པ༌ནེ༌ དཀོན༌མཆོག༌ག༌ ཁོང༌ངི༌ ཕིའ༌ མོས༌ལམ༌ ཞུའད༌པིན༌།
ACT 12:6 ཧེ༌རོད༌དི༌ པི༌ཏྲར༌ མི༌མངས༌སི༌ དུན༌ལ༌ ཁྲིམས༌ཅད༌དི༌ ཕིའ༌ ཁྱོང༌ངི༌ སང༌ ཚན༌ ཅིག༌གི༌ སྔུན༌ལ༌, ལྕག༌ཐག༌ ཉིས༌ལ༌ ཏགས༌ཏེ༌ ཁོང༌ མག༌མི༌ ཉིས༌སི༌ པར༌ལ༌ ཉིད༌ལ༌ སོང༌ཏེ༌ ཡོད༌པིན༌, ཡང༌ ཙོན༌ཁང༌ངི༌ སྒོའེ༌ཀ༌ མག༌མི༌གུན༌ སྲུངས༌ཏེ༌ ཡོད༌དི༌ ཏུས༌,
ACT 12:7 ཧུན༌མེད༌ལ༌ དཀོན༌མཆོག༌གི༌ ཕོ༌ཉ༌ཞིག༌ ཏེ༌ཀ༌ སྐྱོད༌པ༌, ཏེ༌ནང༌ གང༌པོ༌ འོད༌དི༌ གངས༌། ཏེ༌ ཕོ༌ཉ༌བོའེ༌ པི༌ཏྲར༌ སྐུལ༌ལ༌ ཛད༌ཏེ༌ ཁོང༌ང༌ ཉིད༌ཚད༌ ཡང༌ མོལས༌, “གྱོགས༌པ༌ ལོངས༌” པི༌ཏྲར༌རི༌ ལག༌པའ༌ ཏག༌ཁན༌ནི༌ ལྕག༌ཐག༌པོ༌ བུད༌།
ACT 12:8 ཏེ༌ནེ༌ ཕོ༌ཉའེ༌ པི༌ཏྲར༌ལ༌ མོལས༌, “རང༌ངི༌ སྐྱེ༌རགས༌ ཅིང༌ ཡང༌ པ༌བུ༌ གོན༌།” པི༌ཏྲར༌རི༌ ཏེན༌ན༌བོ༌ ཅོས༌, ཡང༌ ཕོ༌ཉའེ༌ ཁོང༌ང༌ མོལས༌, “རང༌ངི༌ ཙ༌ཟར༌ གོན༌ ཡང༌ ངའེ༌ གྱབ༌ནེ༌ ཡོང༌།”
ACT 12:9 པི༌ཏྲར༌ ཕོ༌ཉའེ༌ སྟིང༌རང༌ནེ༌ ཙོན༌ཁང༌ནེ༌ ཕི༌ལོག༌ག༌ སྐྱོདས༌, ཁོའེ༌ ཕོ༌ཉའེ༌ ཛད༌ཁན༌གུན༌ ཞལ༌ཟིགས༌ཤིག༌ ཨིན༌ནོག༌ སམ༌, ཏེ༌ ཚང༌མ༌ ངོས༌པོའ༌ ཇུང༌ཏེ༌ ཨིན༌ཁན༌བོ༌ དེན༌ མ༌ཤེས༌།
ACT 12:10 ཁོང༌ ཉིས༌ཀོ༌ སྒོ༌སྲུང༌པ༌ ཏང༌པོ༌ དང༌ ཉིས༌པའེ༌ དུན༌ནེ༌ སོང༌ཏེ༌ ལྕགས༌སི༌ གྱས༌སྒོའེ༌ཀ༌ ལེབ༌, ཀ༌བོ༌ གྱལ༌ས༌ ཆོགས༌ལ༌ བེའད༌པིན༌། ཁོང༌གུན༌ནི༌ ཕིའ༌ ཏེ༌ སྒོ༌བོ༌ ཁོ༌རང༌ བེ༌སོང༌, ཁོང༌གུན༌ སྒོ༌ནེ༌ བིང༌ཏེ༌ གྲུལ༌ཨིན༌ སོང༌, ཡང༌ སྲང༌ངི༌ ཇུག༌ག༌ ལེབ༌བ༌ཅིག༌, ཕོ༌ཉ༌བོ༌ ཧུན༌མེད༌ལ༌ ཁོང༌ངི༌ དུན༌ནེ༌ སྟོརས༌།
ACT 12:11 ཏེ༌ནེ༌ པི༌ཏྲར༌ལ༌ ཧ༌གོ༌ཏེ༌ མོལས༌, “ཏ༌ ང༌ ཅའང༌ ཐེ༌ཚོམས༌ མེ༌རག༌, དཀོན༌མཆོག༌གི༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛད༌ཏེ༌ ཧེ༌རོད༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ ཅུས༌ངན༌ནེ༌ ང༌ ཐར༌ ཅུག༌ག༌ ཛདས༌།”
ACT 12:12 པི༌ཏྲར༌རི༌ ཇུང༌ཁན༌གུན༌ ཧ༌གོའ༌ཅིག༌, ཁོང༌ ཡོ༌ཧཱ༌ནན༌ ཀ༌བོའ༌ མར༌ཀུས༌སའང༌ ཟེར༌རད༌པིན༌ ཁོའེ༌ ཨ༌མ༌ མིར༌ཡམ༌མི༌ ཁང༌པ༌ སྐྱོདས༌། ཏེ༌རུ༌ སྤུན༌ མང༌པོ༌ ཛོམས༌ཏེ༌ མོས༌ལམ༌ ཞུའད༌པིན༌།
ACT 12:13 པི༌ཏྲར༌རི༌ ཕི༌ལོག༌གི༌ སྒོ༌ རྡུངས༌པ༌, རོ༌དཱ༌ ཟེར༌ཁན༌ནི༌ ཡ༌ཏོ༌ བུ༌མོ༌, སྒོ༌ ཕེའ༌ལ༌ ཡོངས༌།
ACT 12:14 ཁོའ༌ པི༌ཏྲར༌རི༌ སྐད༌ ཤེས༌པ༌ འི༌ཟམ༌ ཐད༌པོ༌ སོང༌ ཁོའེ༌ སྒོ༌ མ༌ཕེའ༌ གྱུག༌ཨིན༌ ལོགས༌ཏེ༌ སོང༌ཏེ༌, “པི༌ཏྲར༌ ཕི༌ལོག༌ག༌ སྒོའེ༌ཀ༌ ཡོངས༌ཏེ༌ རག༌” ཟེརས༌།
ACT 12:15 སྤུན༌གུན༌ནི༌ ལན༌ཏངས༌, “ཁྱོ༌རང༌ སྙོས༌ཏེ༌ ཨིན༌ནོག༌།” ཨིན༌ནའང༌ ཏེ༌ བུ༌མོ༌བོའེ༌ འུ༌ཙུག༌ ཏངས༌ཏེ༌ དེན༌བ༌ ཁོང༌ པི༌ཏྲར༌ ཨིན༌རག༌ ཟེར༌པ༌ ཁོང༌གུན༌ནི༌ ཟེརས༌, “པི༌ཏྲར༌རི༌ ཕོ༌ཉའ༌ ཨིན༌གྲོ༌།”
ACT 12:16 ཨིན༌ནའང༌ པི༌ཏྲར༌རི༌ སྒོ༌ རྡུང༌ཨིན༌ དུགས༌ ཡང༌ སྒོ༌ ཕེས༌པ༌ པི༌ཏྲར༌ ཐོང༌ཏེ༌ ཁོང༌གུན༌ ཧ༌ལས༌།
ACT 12:17 པི༌ཏྲར༌རི༌ ལག༌པ༌ ཉམ༌པོ༌ ཅུབ༌ཅད༌ཅེས༌ལ༌ སྟགས༌ ཅོས༌, ཡང༌ ཁོང༌ དཀོན༌མཆོག༌གི༌ ཙོན༌ཁང༌ནེ༌ ཕིང༌ང༌ ཛད༌ཁན༌ནི༌ སྐོར༌ ཤད༌ད༌ ཛདས༌། ཡང༌ “ཡ༌ཀོབ༌ དང༌ སྤུན༌གུན༌ལ༌ འི༌གུན༌ ཤོད༌” མོལ༌ཏེ༌ ཁོང༌རང༌ ཞན༌ ནས༌ས༌ཞིག༌ག༌ སྐྱོདས༌།
ACT 12:18 ནམ༌ལངས༌ས༌ཅིག༌ པི༌ཏྲར༌ མེད༌པ༌, ཁོང༌ ཉམ༌པོ༌ ཅི༌ སོང༌ སམ༌ཏེ༌ མག༌མི༌གུན༌ལ༌ ཧི༌ལིངས༌ སྲན༌ཏྲེ༌ ཞུགས༌།
ACT 12:19 ཧེ༌རོད༌དི༌ པི༌ཏྲར༌ ཀ༌རུང༌ས༌ གྱལ༌ལ༌ ཅོས༌ཏེ༌ ཙལ༌ཅུགས༌, ཨིན༌ནའང༌ ཁོང༌ངི༌ སྐོར༌ལ༌ ཅའང༌ གྱུས༌ མ༌སོང༌པ༌ ཁོའེ༌ སྒོ༌ སྲུང༌པ༌གུན༌ལ༌ ཏྲི༌སོ༌ ཏངས༌ཏེ༌ ཁོང༌གུན༌ སད༌ཅེས༌སི༌ བཀའ༌ ཏངས༌། 12:19-25 ཏེ༌ནེ༌ ཧེ༌རོད༌, ཡ༌ཧུ༌དཱ༌ནེ༌ ཀཱེ༌སར༌རིའ༌ སོང༌ཏེ༌ ཏེ༌རུ༌ ཏུས༌བན༌ཤིག༌ དུགས༌།
ACT 12:20 ཏ༌ ཧེ༌རོད༌ལ༌ ཏཱ༌ཡིར༌ དང༌ སི༌དོན༌ནི༌ མི༌གུན༌ ཉམ༌པོ༌ མ༌སྲན༌ཏྲེ༌ སྲོ༌ ཡོད༌པིན༌། ཏེ༌ ཡུལ༌ལི༌ འུ༌སྐྱོང༌གུན༌ སྤེ༌ར༌ ཏང༌ང༌ལ༌ ཡོངས༌, ཡང༌ གྱལ༌པོའེ༌ ལོ༌ཁྱེལ༌ཅན༌ནི༌ ལོན༌པོ༌ བ༌ལས༌ཏུས༌སི༌ ཆོགས༌སྐྱོར༌ ཐོབས༌ཏེ༌ ཞི༌དེ༌ ཁྱོང༌ཅེས༌སི༌ ཕིའ༌ ཞུ༌ཝ༌ ཕུལས༌, ཅིའ༌ཟེར༌ན༌ ཟ༌གྱུ༌ ཉོ༌ཅེས༌ལ༌ ཁོང༌གུན༌ ཧེ༌རོད༌དི༌ ཡུལ༌ལི༌ཀ༌ རག༌ལས༌ཏེ༌ ཡོད༌པིན༌།
ACT 12:21 ལྡམ༌ཁན༌ནི༌ ཞག༌ག༌ ཧེ༌རོད༌དི༌ གྱལ༌པོའེ༌ ཀོས༌ལག༌ གོན༌ཏེ༌ རང༌ངི༌ ཁྲིས༌སི༌ཀ༌ དུགས༌ཏེ༌ མི༌མངས༌ལ༌ སྤེ༌ར༌ ཏངས༌།
ACT 12:22 ཏེ༌ མི༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, “འི༌ སུང༌སྐད༌བོ༌ མི༌ མན༌པ༌ དཀོན༌མཆོག༌གི༌ ཨིན༌ནོག༌།”
ACT 12:23 ཧེ༌རོད༌ མི༌མངས༌གུན༌ནི༌ དཀོན༌མཆོག༌ག༌ སྟོད༌པ༌ མ༌ཕུལ༌ལ༌ ཁོའ༌ སྟོད༌པ༌ ཕུལ༌ཅེས༌པོའ༌ ཐད༌ པ༌སང༌ ཏེན༌ན༌མལ༌ལ༌ དཀོན༌མཆོག༌གི༌ ཕོ༌ཉའེ༌ ཁོའ༌ ཆད༌པ༌ སལས༌, ཡང༌ བུ༌ཙིག༌གི༌ ཁོའེ༌ ཟུགས༌པོ༌ ཀུ༌ལེ༌ ཀུ༌ལེ༌ ཁོ༌ ཤི༌ཤི༌ ཚག༌པ༌ ཟོས༌།
ACT 12:24 ཨིན༌ནའང༌ དཀོན༌མཆོག༌གི༌ བཀའ༌ གྱས༌ཏེ༌ ཕེལ༌ཨིན༌ སོང༌།
ACT 12:25 བཱར༌ན༌བས༌ དང༌ ས༌འུལ༌ལི༌ པེ༌ནེ༌ རོགས༌ ཀལ༌ཁན༌བོ༌ ཆོས༌ཚོགས༌སི༌ འུ༌སྐྱོང༌གུན༌ལ༌ སྟདས༌། ཏེ༌སྟིང༌ནེ༌ ཁོང༌གུན༌ མར༌ཀུས༌ ཟེར༌ཁན༌ནི༌ ཡོ༌ཧཱ༌ནན༌ ཁྲིད༌ཏེ༌ ཡེ༌རུ༌ཤ༌ལེམ༌ནེ༌ ལོགས༌ཏེ༌ སྐྱོདས༌།
ACT 13:1 ཨན༌ཏི༌ཡོག༌གི༌ ཆོས༌ཚོགས༌སི༌ ནང༌ང༌ ལུང༌སྟོན༌པ༌ དང༌ ལོབ༌བོན༌ གུན༌ ཡོད༌པིན༌, ཁོང༌གུན༌ནི༌ ཕྲོའ༌ བཱར༌ན༌བས༌, ཤི༌མི༌འོན༌ མི༌ནག༌ ཟེར༌ཁན༌, ཀི༌རིན༌པ༌ ལུ༌ཀེ༌འུས༌, མ༌ན༌ཧེན༌ ༼གྱལ༌པོ༌ ཧེ༌རོད༌ ཉམ༌པོ༌ ལྡན༌ཁན༌༽ དང༌ ས༌འུལ༌ ཡོད༌པིན༌།
ACT 13:2 ཁོང༌གུན༌ ཉེ༌ནས༌ ཡང༌ན༌ རོ༌ཟཱ༌ དུགས༌ཏེ༌ གཙོ༌བོའ༌ ཅོལ༌ཨིན༌ ཡོད༌ ཟ༌ནེ༌ ཏམ༌པའེ༌ ཐུག༌ཉིད༌དི༌ ཁོང༌གུན༌ལ༌ མོལས༌, “ངའེ༌ བོད༌ཁན༌ནི༌ ལས༌ ཅོ༌ཅེས༌ལ༌ བཱར༌ན༌བས༌ དང༌ ས༌འུལ༌ ཉིས༌ཀོ༌ སྐོས༌།”
ACT 13:3 ཁོང༌གུན༌ ཉེ༌ནས༌ལ༌ དུགས༌ ཡང༌ མོས༌ལམ༌ ཞུས༌ཏེ༌ ཁོང༌ ཉིས༌ཀོའེ༌ཀ༌ ལག༌པ༌ བོར༌ཏེ༌ ཁོང༌གུན༌ ལམ༌ཅུག༌ག༌ ཛདས༌།
ACT 13:4 ཏམ༌པའེ༌ ཐུག༌ཉིད༌ གྱུད༌ཏེ༌ ལམ༌ཅུག༌ག༌ ཛད༌ཁན༌ནི༌ བཱར༌ན༌བས༌ དང༌ ས༌འུལ༌ སེ༌ལུ༌ཀི༌ཡཱ༌ ཟེར༌ས༌ ལེབ༌ ཡང༌ ཏེ༌ཀ༌ནེ༌ ཁོང༌གུན༌ གྲུ༌ཟིང༌ང༌ ཞོན༌ཏེ༌ ཀིབ༌རུས༌ ཟེར༌ས༌ སྐྱོདས༌།
ACT 13:5 ཁོང༌གུན༌ ས༌ལ༌མིས༌ལ༌ ལེབ༌བ༌ཅིག༌, ཏེ༌རུ༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ དཀོན༌མཆོག༌གི༌ བཀའ༌ ཤདས༌། ཡོ༌ཧཱ༌ནན༌ མར༌ཀུས༌ ཁོང༌གུན༌ ཉམ༌པོ༌ རོགས༌ ཅོའ༌ལ༌ ཡོངས༌ཏེ༌ ཡོད༌པིན༌།
ACT 13:6 ཁོང༌གུན༌ ཏེ༌ ཚོ༌ལིང༌ངི༌, གྲོང༌ཁྱེར༌ནེ༌ གྲོང༌ཁྱེར༌ གྱུད༌ཏེ༌ པ༌ཕོས༌ ཟེར༌ས༌ ལེབ༌། ཏེ༌རུ༌ ཁོང༌གུན༌ལ༌ ཡ༌ཧུ༌དཱ༌པའེ༌ ལུང༌སྟོན༌པ༌ ཟུས༌མ༌, བར༌ཡེ༌ཤུ༌ ཟེར༌ཁན༌ནི༌ ཆོས༌ངན༌ ཅོ༌ཁན༌བོ༌ ཐུག༌།
ACT 13:7 ཁོ༌ ཏེ༌ ཡུལ༌ལི༌ ཀའ༌ལོན༌ སེར༌གི༌འུས༌ པ༌འུ༌ལུས༌སི༌ ཡོག༌ག༌ ལས༌ ཅོ༌ཁན༌ཞིག༌ ཨིན༌པིན༌། ཏེ༌ རིག༌པ༌ཅན༌ ཀའ༌ལོན༌བོའེ༌, བཱར༌ན༌བས༌ དང༌ ས༌འུལ༌ བོད༌ཏེ༌ ཁྱོངས༌, ཅིའ༌ཟེར༌ན༌ ཁོའ༌ དཀོན༌མཆོག༌གི༌ བཀའ༌ ཉན༌ཅེས༌སི༌ དོད༌པ༌ ཡོད༌པིན༌།
ACT 13:8 ཨིན༌ནའང༌ ཨེ༌ལི༌མཱའས༌སི༌ ༼གརིས༌པའེ༌ སྐད༌དི༌ ནང༌ང༌ ཆོས༌ངན༌ ཅོ༌ཁན༌ལ༌ ཟེར༌ར༌ནོག༌༽ ཁོང༌གུན༌ནི༌ གྱབ༌གལ༌ ཅོས༌ཏེ༌ ཀའ༌ལོན༌ སེར༌གི༌འུས༌ལ༌ ཏད༌པ༌ ཅོ༌ཅེས༌ནེ༌ སྒག༌ཅེས༌སི༌ རྩོན༌གྲུས༌ ཅོས༌།
ACT 13:9 ཏེ༌ནེ༌ ས༌འུལ༌ ཀ༌བོའ༌ པ༌འུ༌ལུའང༌ ཞུའད༌པིན༌, ཏམ༌པའེ༌ ཐུག༌ཉིད༌དི༌ གངས༌ཏེ༌ ཆོས༌ངན༌ ཅོ༌ཁན༌བོའ༌ མིག༌ གྱངས༌ཏེ༌ ལྟས༌ ཡང༌ མོལས༌,
ACT 13:10 “ཝ༌, རྡུད༌གུན༌ནི༌ གོ༌བའེ༌ གྱུད༌ དང༌ ཀྲང༌པོའེ༌ གྲ༌འོ༌, ཁྱོ༌རང༌ངི༌ ནང༌ང༌ གོབ༌སྐོར༌ཅེས༌ དང༌ ངན༌སེམས༌ ཚང༌མ༌ གངས༌ཏེ༌ དུག༌། ཁྱོ༌རང༌ངི༌ གཙོ༌བོའེ༌ ལམ༌ ཀྲང༌པོ༌ ཨིན༌ཁན༌བོ༌ ཀྲང༌པོ༌ མ༌ནོག༌ ཟེར༌ཅེས༌པོ༌ མི༌ཕང༌ང༌?
ACT 13:11 ཏ༌ ལྟོས༌, དཀོན༌མཆོག༌གི༌ ཆག༌ ཁྱོ༌རང༌ངི༌ གྱབ༌གལ༌ལ༌ ཨིན༌། ཁྱོ༌རང༌ ཞ༌རའ༌ གྱུར༌ཏེ༌ ཏུས༌བན༌ཤིག༌ ཉི༌མ༌ མི༌ཐོང༌” མོལ༌པ༌, ཏེན༌ན༌མལ༌ལ༌ ཁོའེ༌ དུན༌ལ༌ མུན༌གྲིག༌ སོང༌, ཡང༌ སུ༌ཞིག༌གི༌ ཁོའ༌ ལག༌པ༌ ཐམས༌ཏེ༌ ཁྱེར༌ཅེས༌ལ༌ ཁོའེ༌ འི༌ངོ༌ འ༌ངོའ༌ མུན༌ཉུག༌ ཏངས༌།
ACT 13:12 ཀའ༌ལོན༌ནི༌ ཇུང༌ཁན༌བོ༌ ཐོང༌ཏེ༌ ཡེ༌ཤུའི༌ཀ༌ ཏད༌པ༌ ཅོས༌, ཅིའ༌ཟེར༌ན༌ གཙོ༌བོ༌ ཡེ༌ཤུའི༌ སྐོར༌ལ༌ ལབ༌ཞ༌གུན༌ ཚོར༌ཏེ༌ ཁོ༌ ཧ༌ལས༌།
ACT 13:13 ཏེ༌ནེ༌ པ༌ཕོས༌ གྱལ༌ས༌ནེ༌ པ༌འུ༌ལུ༌ ཁོང༌ངི༌ ཕྲོ༌པ༌གུན༌ ཉམ༌པོ༌ གྲུ༌ཟིང༌ང༌ ཞོན༌ཏེ༌ པམ༌ཕིལ༌ཡཱ༌ ཡུལ༌ལི༌ ནང༌ང༌ ཡོད༌ཁན༌ནི༌ པེར༌ག༌ ཟེར༌སའེ༌ ནས༌ས༌ ལེབ༌། ཏེ༌རུ༌ པ༌འུ༌ལུ༌ དང༌ བཱར༌ན༌བས༌ གུན༌ བོར༌ཏེ༌ ཡོ༌ཧཱ༌ནན༌ མར༌ཀུས༌ ཡེ༌རུ༌ཤ༌ལེམ༌མ༌ ལོགས༌ཏེ༌ སོང༌,
ACT 13:14 ཨིན༌ནའང༌ པ༌འུ༌ལུ༌ དང༌ བཱར༌ན༌བས༌ པེར༌ག༌ནེ༌ བིང༌ཏེ༌ པི༌སིད༌ཡཱ༌ ཟེར༌སའེ༌ ཡུལ༌ལི༌ ཨན༌ཏི༌ཡོག༌ གྱལ༌ས༌ སྐྱོདས༌། ཤབ༌བད༌དི༌ ངལ༌ཚོའེ༌ ཞག༌ག༌ ཡ༌ཧུ༌དཱ༌པའེ༌ དུ༌ཁང༌ང༌ སྐྱོད༌ཏེ༌ སའེ༌ཀ༌ ཞུགས༌།
ACT 13:15 ཡང༌ བཀའ༌ཁྲིམས༌ དང༌ ལུང༌སྟོན༌པའེ༌ སྤེ༌ཆ༌ གུན༌ སིལ༌ ཚར༌ར༌ཅིག༌, ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌གུན༌ནི༌ ཁོང༌ ཉིས༌ཀོའ༌ ཟེརས༌, “སྤུན༌གུན༌, ཀལ༌ཏེས༌ ཁྱོ༌ཞ༌གུན༌ནི༌ མི༌ཚོགས༌ལ༌ སྤོས༌པའེ༌ བཀའ༌ ཤད༌ཅེས༌ ཡོད༌ན༌ ཤད༌ད༌ ཛད༌།”
ACT 13:16 ཏེ༌ནེ༌ པ༌འུ༌ལུ༌ ཞངས༌ཏེ༌ མི༌གུན༌ལ༌ ཅུབ༌ཅད༌ཏེ༌ དུག༌ཅེས༌ལ༌ ལག༌པ༌ ཉམ༌པོ༌ སྟགས༌ ཅོས༌ཏེ༌ མོལས༌, “ཨིས༌ར༌ཨེལ༌པ༌གུན༌ དང༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ གྲུལ༌ཁན༌ ཡ༌ཧུ༌དཱ༌པ༌ མན༌ཁན༌གུན༌ ངའེ༌ སྤེ༌ར༌ ཉོན༌ཤིག༌།
ACT 13:17 ཨིས༌ར༌ཨེལ༌པའེ༌ ཅོལ༌ཁན༌ནི༌ དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ ལྡམ༌མ༌ ཛདས༌། ཨི༌ཇིབ༌ ཡུལ༌ལི༌ ནང༌ང༌ ཡོད༌ ཟ༌ནེ༌, ཁོང༌གུན༌ནི༌ ཀྲངས༌ཀ༌ གྱས༌ཏེ༌ ཤེད༌ཅན༌ གྱུར༌, ཡང༌ ཏེ༌ ཡུལ༌ནེ༌ ཁྱུད༌ཅན༌ དཀོན༌མཆོག༌གི༌ ཁོང༌གུན༌ ཕིངས༌ཏེ༌ ཁྱོང༌ང༌ ཛདས༌།
ACT 13:18 རི༌སྟོང༌ངི༌ ནང༌ང༌ ལོ༌ ཞིབ༌ཅུ༌ ཚོག༌པ༌ ཏེ༌ མི༌གུན༌ ཁའ༌ མི༌ཉན༌ ཡོད༌ནའང༌ དཀོན༌མཆོག༌གི༌ ཟོད༌པ༌ ཉམ༌པོ༌ ཐག༌ག༌ ཛདས༌།
ACT 13:19 ཁོང༌ངི༌ ཀེ༌ནན༌ནི༌ གྱལ༌ཁམས༌ རྡུན༌བོ༌ མེད༌ཁན༌ ཛད༌ཏེ༌ ཏེ༌ ས༌ཀྱད༌གུན༌ ཁོང༌རང༌ངི༌ མི༌གུན༌ལ༌ ནོར༌སྐལ༌ལ༌ སལས༌།
ACT 13:20 འི༌ ཚང༌མ༌ གྲུབ༌ཅེས༌ལ༌ ཧ༌ལམ༌ ལོ༌ 450 གོར༌།” “ཏེ༌ སྟིང༌ནེ༌ དཀོན༌མཆོག༌གི༌ ས༌མུ༌འེལ༌ ལུང༌སྟོན༌པའེ༌ ཏུས༌ ཚག༌པ༌ ཁོང༌གུན༌ལ༌ འུ༌སྐྱོང༌གུན༌ སལ༌ལ༌ ཛདས༌།
ACT 13:21 ཏེ༌ནེ༌ མི༌གུན༌ནི༌ དཀོན༌མཆོག༌ག༌ གྱལ༌པོ༌ཞིག༌ སལ༌ཅེས༌ལ༌ ཞུ༌ཝ༌ ཕུལ༌པ༌, དཀོན༌མཆོག༌གི༌ ཨིས༌ར༌ཨེལ༌ལི༌ སྡེ༌ བེན༌ཡཱ༌མིན༌ནི༌ ནང༌ནེ༌ ཁིས༌སི༌ བུ༌ཚ༌ ས༌འུལ༌ སལ༌ལ༌ ཛདས༌, ཡང༌ ཁོའེ༌ ལོ༌ ཞིབ༌ཅུ༌ ཝང༌སྲུལས༌།
ACT 13:22 དཀོན༌མཆོག༌གི༌ ས༌འུལ༌ གྱལ༌པོའེ༌ ཝང༌ནེ༌ ཐེན༌ན༌ ཛད༌ཏེ༌ དཱ༌བིད༌ ཁོང༌གུན༌ནི༌ གྱལ༌པོ༌ ཅོའ༌ ཛདས༌། དཀོན༌མཆོག༌གི༌ དཱ༌བིད༌དི༌ སྐོར༌ལ༌ མོལ༌ཏེ༌ ཨིན༌ནོག༌, ‘ང༌ ཡེ༌ཤེའེ༌ བུ༌ཚ༌ དཱ༌བིད༌ ཐོབ༌, ཁོའེ༌ དོད༌པ༌གུན༌ ང༌ ཙོགས༌ དུག༌། ཁོའེ༌ ཅི༌ཚང༌མ༌ ངའེ༌ དོད༌པ༌ ནང༌ཞིན༌ ཅོ༌ཨིན༌།’”
ACT 13:23 “དཀོན༌མཆོག༌གི༌ རང༌ངི༌ ཞལ༌ཆད༌ ཛད༌ཁན༌ ནང༌ཞིན༌, དཱ༌བིད༌དི༌ པུར༌གྱུད༌ནེ༌ ཨིས༌ར༌ཨེལ༌པ༌གུན༌ནི༌ སྐྱབ༌གོན༌, ཡེ༌ཤུ༌ ཀལ༌ལ༌ ཛདས༌།
ACT 13:24 ཡེ༌ཤུ༌ སྐྱོད༌དི༌ སང༌ སྔུན༌ལ༌, ཡོ༌ཧཱ༌ནན༌ནི༌ ཨིས༌ར༌ཨེལ༌པ༌ ཚང༌མ༌ལ༌ ཆོས༌ཤད༌ཨིན༌, གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ མོལ༌ལ༌ ཛདས༌།
ACT 13:25 ཡོ༌ཧཱ༌ནན༌ནི༌ ལས༌གུན༌ གྲུབ༌ ཚར༌ཀྱིས༌ ཡོད༌ ཟ༌ནེ༌, ཁོང༌ངི༌ མོལས༌, ‘ཁྱོ༌ཞ༌གུན༌ནི༌ ང༌ སུ༌ ཨིན༌ནོག༌ སམ༌མ༌རག༌? ང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མན༌། ཁོང༌ ངའེ༌ སྟིང༌ནེ༌ སྐྱོད༌ཨིན༌, ང༌ ཁོང༌ངི༌ ཞབ༌ཤི༌ ཙོགས༌ལ༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌།’”
ACT 13:26 “ངའེ༌ ཕྲོ༌པ༌ ཨབ༌ར༌ཧམ༌མི༌ པུར༌གྱུད༌ དང༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ མི༌ཚེ༌ ཕུད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌, འི༌ ཐར༌པའེ༌ ལོན༌བོ༌ ང༌དང༌གུན༌ནི༌ ཕིའ༌ ཀལ༌ལ༌ ཛད༌ཏེ༌ ཨིན༌ནོག༌།
ACT 13:27 ཡེ༌རུ༌ཤ༌ལེམ༌པ༌ དང༌ ཁོང༌གུན༌ནི༌ ཝང༌སྲུལ༌པ༌ གུན༌ནི༌ ཡེ༌ཤུ༌ ངོ༌ མ༌ཤེས༌, ཨིན༌ནའང༌ ཁོང༌ང༌ ཀྲོང༌ཤེས༌སི༌ ཁྲིམས༌ཅད༌ཏེ༌ ཤབ༌བད༌ རིམས༌སི༌ སིལ༌ཁན༌ནི༌ ལུང༌སྟོན༌པ༌གུན༌ནི༌ མོལ༌ཁན༌གུན༌ དྲན༌དྲ༌ གྲུབ༌ཅུགས༌།
ACT 13:28 ཁོང༌གུན༌ལ༌ ཡེ༌ཤུའ༌ སྲོག༌གི༌ ཆད༌པ༌ ཕོག༌ཅུག༌ཅེས༌ལ༌ ཅའང༌ སྐྱོན༌ མ༌ཐོབ༌ནའང༌ ཁོང༌གུན༌ནི༌ པི༌ལ༌ཏུའ༌ ཁོང༌ སད༌ཅེས༌ལ༌ ཞུ༌ཝ༌ ཕུལས༌།
ACT 13:29 ཡེ༌ཤུའི༌ སྐོར༌ལ༌ བྲིའ༌ ཛད༌ཏེ༌ ཡོད༌ཁན༌ ཚང༌མ༌ དྲན༌དྲ༌ གྲུབ༌ཅུགས༌ཏེ༌ སྟིང༌ནེ༌ ཁོང༌ངི༌ སྤུར༌བོ༌ རྐྱང༌ཤིང༌ངི༌ ཀ༌ནེ༌ ཕབས༌ཏེ༌ ཁོང༌གུན༌ནི༌ སྤུར༌ཁང༌ངི༌ ནང༌ང༌ ཞུས༌།
ACT 13:30 ཨིན༌ནའང༌ དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌,
ACT 13:31 ཡང༌ ཞག༌ མང༌པོ༌ཞིག༌ གཱ༌ལིལ༌ལིའི༌ ཡུལ༌ནེ༌ ཁོང༌ ཉམ༌པོ༌ ཡེ༌རུ༌ཤ༌ལེམ༌མ༌ ཡོངས༌ཏེ༌ ཡོད༌ཁན༌གུན༌ལ༌ ཁོང༌ ཇལ༌། ཁོང༌གུན༌ནི༌ ཏ༌ ཨིས༌ར༌ཨེལ༌པ༌ ཚང༌མའེ༌ དུན༌ལ༌ ཁོང༌ངི༌ སྤང༌པོ༌ སལ༌ཨིན༌ ཨིན༌ནོག༌།”
ACT 13:32 “ང༌ཞའེ༌ འི༌ གའ༌མོའེ༌ ནས༌ཚུལ༌བོ༌ ཤད༌དད༌: དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ ཉམ༌པོ༌ ཞལ༌ཆད༌པོ༌ ཛདས༌,
ACT 13:33 ཁོང༌གུན༌ནི༌ པུར༌གྱུད༌ ང༌དང༌གུན༌ལ༌, གཙོ༌བོ༌ ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ དཀོན༌མཆོག༌གི༌ ཏེ༌ ཞལ༌ཆད༌པོ༌ གྲུབ༌ ཅུག༌ག༌ ཛདས༌, ཀ༌ཟུག༌ སུང༌གུར༌ ཉིས༌པའེ༌ ནང༌ང༌ ཡེ༌ཤུའི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌, ‘ཁྱོ༌རང༌ ངའེ༌ བུ༌ཚ༌ ཨིན༌། དི༌རིང༌ ང༌ ཁྱོ༌རང༌ངི༌ ཨ༌བའ༌ གྱུར༌ཏེ༌ ཨིན༌།’
ACT 13:34 དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌, ཁོང༌ ཏ༌ མ༌ནེ༌ མི༌རུལ༌། དཀོན༌མཆོག༌གི༌ མོལ༌ལ༌ ཛདས༌, ‘དཱ༌བིད༌ ཉམ༌པོ༌ ཁ༌ཆད༌ ཅོ༌ཁན༌ནི༌ ཏམ༌པ༌ ཅིན༌ལབས༌ ངའེ༌ ཁྱོ༌ཞ༌གུན༌ལ༌ ཏང༌ཨིན༌།’
ACT 13:35 ཞན༌ སུང༌གུར༌ཞིག༌གི༌ ནང༌ང༌ མོལ༌ཏེ༌ ཨིན༌ནོག༌། ‘རང༌ངི༌ ཏམ༌པ༌བོ༌ ཉེ༌རང༌ངི༌ རུལ༌ ཅུག༌ག༌ མི༌ཛད༌།’”
ACT 13:36 “དཱ༌བིད༌དི༌ རང༌ངི༌ མི༌ཚེའེ༌ ནང༌ང༌ དཀོན༌མཆོག༌གི༌ ཐུག༌གོངས༌ ནང༌ཞིན༌ ཁོང༌ང༌ ཞབས༌ཏོག༌ ཞུས༌ཏེ༌ སྟིང༌ནེ༌ ཀྲོངས༌, ཡང༌ ཕ༌མེས༌པོ༌གུན༌ ཉམ༌པོ༌ ཁོང༌ངི༌ ཟུགས༌པོ༌ སྤུར༌ཁང༌ངི༌ ནང༌ང༌ བོར༌པ༌ རུལ༌།
ACT 13:37 ཨིན༌ནའང༌ དཀོན༌མཆོག༌གི༌ སོན༌ཏེའ༌ ལང༌ང༌ ཛད༌ཁན༌བོའ༌ རུལ༌ཅེས༌ ཉོང༌ མ༌ཐུབ༌།
ACT 13:38 སྤུན༌གུན༌ ཉོན༌ཤིག༌, ང༌ཞའ༌ འི༌ཀ༌ ཡེ༌ཤུ༌ གྱུད༌ཏེ༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ ཐོབ༌ཅེས༌པོ༌ ཁྱོ༌ཞ༌གུན༌ལ༌ ཤད༌ད༌ལ༌ ཡོངས༌པིན༌།
ACT 13:39 ཡེ༌ཤུའི༌ཀ༌ ཏད༌པ༌ ཁྱོང༌ཁན༌ ཚང༌མའ༌ སྡིག༌པ༌གུན༌ནེ༌ ཐར༌ཏེ༌ སྐྱོན༌མེད༌ གྱུར༌ཏེ༌ ཨིན༌ནོག༌, ཀ༌བོ༌ ཁྱོ༌ཞ༌གུན༌ལ༌ མོ༌ཟེས༌སི༌ བཀའ༌ཁྲིམས༌ གྱུད༌ཏེ༌ ཐོབ༌ ཉན༌ཅེས༌ མ༌ནེ༌ མེད༌པིན༌།
ACT 13:40 ཤང༌ ཅོས༌, ལུང༌སྟོན༌པ༌གུན༌ནི༌ མོལ༌ཁན༌གུན༌ ཁྱོ༌ཞ༌གུན༌ནི༌ཀ༌ ཇུང༌ མ༌ཅུག༌ཤིག༌,
ACT 13:41 ‘ལྟོས༌ཤིག༌, ངའ༌ ཚིག༌ ཏང༌ཁན༌གུན༌ ཧ༌ལས༌ཨིན༌ ཡང༌ ཤི༌ཨིན༌། ངའེ༌ ཁྱོ༌ཞའེ༌ ཏུས༌སི༌ ནང༌ང༌ ཏེ༌ཟུག༌ ལས༌ཤིག༌ ཅོ༌ཅེས༌ ཨིན༌, ཀ༌བོའེ༌ སྐོར༌ ཁྱོ༌ཞའ༌ ཤད༌ནའང༌ ཁྱོ༌ཞ༌གུན༌ལ༌ མ༌ནེ༌ དེན༌ མ༌ཤེས༌།’”
ACT 13:42 པ༌འུ༌ལུ༌ དང༌ བཱར༌ན༌བས༌ དུ༌ཁང༌ནེ༌ ཕི༌ལོག༌ག༌ བིངས༌ཏེ༌ སྐྱོད༌ ཟ༌ནེ༌ མི༌གུན༌ནི༌ ཁོང༌གུན༌ལ༌, སྟིང༌མ༌ ཤབ༌བད༌དི༌ ངལ༌ཚོའེ༌ ཞག༌ག༌, འི༌ཙོགས༌སི༌ ལབ༌ཞ༌ མང༌ང༌ ཤད༌ད༌ ཛད༌ ཟེར༌ཏེ༌ ཞུ༌ཝ༌ ཕུལས༌།
ACT 13:43 མི༌ཚོགས༌ ཤོལ༌ལ༌ཅིག༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པའེ༌ ཆོས༌ལ༌ ཏད༌པ༌ ཁྱོང༌ཁན༌ མང༌པོ༌ཞིག༌ པ༌འུ༌ལུ༌ དང༌ བཱར༌ན༌བས༌སི༌ གྱབ༌ནེ༌ སོང༌། ཁོང༌ ཉིས༌ཀོའེ༌ ཁོང༌གུན༌ལ༌ སྤེ༌ར༌ ཏང༌ཨིན༌ དཀོན༌མཆོག༌གི༌ ཐུག༌རྗེ༌ཀ༌ སྟེན༌ཏེ༌ དུག༌ཅེས༌ལ༌ མ༌སྲན༌ཏྲེ༌ ཞུ༌ཝ༌ ཕུལས༌།
ACT 13:44 སྟིང༌མ༌ ཤབ༌བད༌དི༌ ཞག༌ག༌, ཧ༌ལམ༌ གྱལ༌ས༌ གང༌པོའེ༌ མི༌གུན༌ གཙོ༌བོ༌ ཡེ༌ཤུའི༌ བཀའ༌ ཉན༌ན༌ལ༌ ཛོམ༌།
ACT 13:45 ཏེ༌ཟུག༌ མི༌ཚོགས༌ ཆེན༌མོ༌ ཐོང༌ཏེ༌ ཡ༌ཧུ༌དཱ༌པ༌གུན༌ལ༌ ཚིག༌ཅེས༌ ཡོངས༌, ཡང༌ པ༌འུ༌ལུའི༌ ལབ༌ཞ༌གུན༌ལ༌ གྱབ༌གལ༌ ཅོས༌ཏེ༌ ཁོང༌ངི༌ སྕོད༌ལམ༌མི༌ སྐོར༌ལ༌ ངན༌པ༌ ཟེརས༌།
ACT 13:46 ཏེ༌ནེ༌ པ༌འུ༌ལུ༌ དང༌ བཱར༌ན༌བས༌སི༌ མ༌ ཧམ༌པ༌ ཉམ༌པོ༌ ཡ༌ཧུ༌དཱ༌པ༌གུན༌ལ༌ ལན༌སལས༌, “ང༌ཞའ༌ དཀོན༌མཆོག༌གི༌ བཀའ༌ གོ༌མ༌ ཁྱོ༌ཞ༌གུན༌ལ༌ ཤད༌གོས༌ཏེ༌ ཨིན༌པིན༌། ཁྱོ༌ཞའེ༌ ཏེ༌བོ༌ ཕངས༌ཏེ༌ ཁྱོ༌ཞ༌རང༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ འོས༌པ༌ མ༌ཐེས༌ པ༌སང༌ ང༌ཞའེ༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཉན༌ཅེས༌སི༌ སྐབས༌ ཏང༌ངད༌,
ACT 13:47 ཅིའ༌ཟེར༌ན༌ དཀོན༌མཆོག༌གི༌ ང༌ཞའ༌ འི༌ བཀའ༌བོ༌ སལས༌, ‘ཇིག༌རྟེན༌ནི༌ ཀྲུ༌ཀྲུའི༌ ནང༌ང༌ ཐར༌པ༌ ཁྱོང༌ཅེས༌ལ༌ ངའེ༌ ཁྱོ༌རང༌གུན༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ འོད༌ ཙོགས༌ལ༌ ཀལ༌ཏེ༌ ཨིན༌།’”
ACT 13:48 ཏེ༌བོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཚོར༌ར༌ཅིག༌, ཁོང༌གུན༌ སྲན༌ཏྲེ༌ ཐད༌ཏེ༌ གཙོ༌བོའེ༌ བཀའ༌ སྟོད༌པ༌ ཕུལས༌, ཡང༌ དཀོན༌མཆོག༌གི༌ ཐའ༌མེད༌པའེ༌ མི༌ཚེ༌ ཕིའ༌ ལྡམ༌མ༌ ཛདས༌ཁན༌གུན༌ནི༌ ཏད༌པ༌ ཁྱོངས༌།
ACT 13:49 གཙོ༌བོའེ༌ བཀའ༌ ཏེ༌ ཡུལ༌ཇོངས༌ གང༌པོའེ༌ ནང༌ང༌ ཕེལ༌།
ACT 13:50 ཨིན༌ནའང༌ ཡ༌ཧུ༌དཱ༌པའེ༌ ནང༌ནེ༌ ཁ༌ཅིག༌གི༌ ཏེ༌ གྱལ༌སའེ༌ ཆོས༌པ༌ བུ༌མོ༌ རྩི༌ཝ༌ཅན༌ དང༌ འུ༌སྐྱོང༌ གུན༌ལ༌ པ༌འུ༌ལུ༌ དང༌ བཱར༌ན༌བས༌སི༌ གྱབ༌གལ༌ལ༌ སྲོ༌ ཡོང༌ཅུགས༌པ༌, ཁོང༌གུན༌ནི༌ མི༌གུན༌ལ༌ ཁོང༌ ཉིས༌ཀོའ༌ ནགས༌ སྟན༌ཅུགས༌ཏེ༌ གྱལ༌ས༌ནེ༌ ཕི༌ལོག༌ག༌ ཕིང༌ཅུགས༌།
ACT 13:51 ཁོང༌ ཉིས༌ཀོའེ༌ ཁོང༌རང༌གུན༌ནི༌ པ༌བུའི༌ ཐལ༌བ༌ སྲུགས༌ཏེ༌ ཁོང༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཁན༌བོ༌ སྟན༌ན༌ ཛདས༌ ཡང༌ ཁོང༌གུན༌ ཏེ༌ཀ༌ནེ༌ ཨི༌ཀོ༌ནི༌འམ༌མ༌ སྐྱོདས༌།
ACT 13:52 ཨན༌ཏི༌ཡོག༌གི༌ ནང༌ང༌ ཡོད༌ཁན༌ནི༌ ལོབ༌ཕྲུགས༌གུན༌ ཐད༌པོ༌ དང༌ ཏམ༌པའེ༌ ཐུག༌ཉིད༌དི༌ གང༌།
ACT 14:1 ཨི༌ཀོ༌ནི༌འམ༌མི༌ ནང༌ངའང༌ པ༌འུ༌ལུ༌ དང༌ བཱར༌ན༌བས༌, ལོབས༌ ནང༌ཞིན༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ སྐྱོད༌ཏེ༌ སེམས༌ ཆག༌ཅེས༌ ཆོས༌ ཀྲག༌པོ༌ ཤད༌པ༌, ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ མང༌པོའེ༌ ཏད༌པ༌ ཅོས༌།
ACT 14:2 ཨིན༌ནའང༌ ཏད༌པ༌ མ༌ཁྱོངས༌ཁན༌ ཡ༌ཧུ༌དཱ༌པ༌གུན༌ནི༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཁོང༌ངི༌ སྕོད༌ལམ༌མི༌ སྐོར༌ལ༌ ངན༌པ༌ ཟེར༌ཏེ༌ སྲོ༌ སྐུལ༌ཏེ༌ ཁོང༌གུན༌ནི༌ ནང༌ང༌ ཏད༌པ༌ཅན༌གུན༌ནི༌ ཆོགས༌ལ༌ སེམས༌ངན༌ སྐྱེ༌ཅུགས༌།
ACT 14:3 ཏེན༌ན༌བོའེ༌ཕིའ༌ པ༌འུ༌ལུ༌ དང༌ བཱར༌ན༌བས༌ ཏེ༌རུ༌ ཏུས༌ མང༌པོ༌ཞིག༌ ཞུགས༌ཏེ༌, མ༌ སེམ༌སྟོབས༌ ཆེན༌མོ༌ ཉམ༌པོ༌ མ༌ཤི༌ཀའེ༌ ཐུག༌རྗེ༌ སྐོར༌ལ༌ ཤད༌ད༌ ཛདས༌, ཡང༌ གཙོ༌བོ༌ ཡེ༌ཤུའི༌ ཁོང༌གུན༌ལ༌ ཧ༌ལས༌ཤེས༌སི༌ ལྟས༌ དང༌ ཛད༌པ༌ གུན༌ ཅོ༌ཅེས༌སི༌ ཁྱུད༌ སལ༌ཏེ༌, ཏེ༌ ལོན༌བོ༌ དེན༌བ༌ ཨིན༌ཁན༌བོའེ༌ སྤང༌པོ༌ སལ༌ལ༌ ཛདས༌།
ACT 14:4 ཨིན༌ནའང༌ གྱལ༌སའེ༌ མི༌གུན༌ནི༌ ནང༌ང༌ པོ༌བུད༌ཏེ༌ ཁ༌ཅིག༌གི༌ ཡ༌ཧུ༌དཱ༌པ༌གུན༌ནི༌ ཡང༌ ཁ༌ཅིག༌གི༌ སྐུ༌ཚབས༌གུན༌ནི༌ ཆོགས༌ ཅོས༌།
ACT 14:5 ཡ༌ཧུ༌དཱ༌པ༌, ཡ༌ཧུ༌དཱ༌པ༌ མན༌ཁན༌ དང༌ ཁོང༌གུན༌ནི༌ འུ༌སྐྱོང༌ ཚང༌མའེ༌ ཛོམས༌ཏེ༌ སྐུ༌ཚབས༌གུན༌ལ༌ ངན༌པ༌ ཅོས༌ཏེ༌ རྡོའ༌ གྱབས༌ཏེ༌ སད༌ཅེས༌སི༌ ཅུས༌ངན༌ ལྡིངས༌།
ACT 14:6 ཨིན༌ནའང༌ པ༌འུ༌ལུ༌ དང༌ བཱར༌ན༌བས༌ལ༌ ཏེ༌ ཅུས༌ངན༌བོའེ༌ སྐོར༌ལ༌ གྱུས༌སོང༌པ༌ ཁོང༌གུན༌ ཏེ༌ཀ༌ནེ༌ ཤོར༌ཏེ༌ ལི༌ཀ༌འོན༌ཡིའ༌ ཡུལ༌ཇོངས༌སི༌ ལིས༌ཏྲའ༌ དང༌ དེར༌བེ༌ གྱལ༌ས༌ ཡང༌ ཏེ༌ ཉེ༌ཁོར༌རི༌ ནས༌ས༌གུན༌ནི༌ ནང༌ང༌ སྐྱོདས༌,
ACT 14:7 ཡང༌ ཁོང༌གུན༌ནི༌ ཏེ༌རུ༌ གའ༌མོའེ༌ ནས༌ཚུལ༌ ཤདས༌།
ACT 14:8 ལིས༌ཏྲའེ༌ ནང༌ང༌ ཞ༌འོ༌ཞིག༌ ཡོད༌པིན༌, ཁོ༌ སྐྱེས༌པ༌ནེ༌ པར༌ལ༌ གྲུལ༌ མ༌ཉན༌ན༌ ཨིན༌པིན༌། ཁོ༌ སའེ༌ཀ༌ དུགས༌ཏེ༌
ACT 14:9 པ༌འུ༌ལུའི༌ མོལ༌ཁན༌གུན༌ལ༌ ཉན༌ནད༌པིན༌། པ༌འུ༌ལུའི༌ ཁོའ༌ ཁ༌དྲང༌ང༌ ཟིགས༌ ཡང༌ ཁོའེ༌ ནང༌ང༌ ཁོ༌ གྱལ༌ཐུབ༌ཅེས༌སི༌ ཏད༌པ༌ ཐོང༌ཏེ༌
ACT 14:10 ཁོང༌ངི༌ ཏེ༌ ཞ༌འོ༌བོའ༌ ཤེད༌ནང༌ མོལས༌, “རང༌ངི༌ རྐང༌པའེ༌ཀ༌ ཀོའག༌ ལོངས༌།” ཁོ༌ ཆོམས༌ ཡང༌ ལངས༌ཏེ༌ གྲུལས༌།
ACT 14:11 མི༌ཚོགས༌སི༌ པ༌འུ༌ལུའི༌ ཆག༌ལས༌པོ༌ ཐོང༌ང༌ཅིག༌, ཁོང༌གུན༌ནི༌ ལི༌ཀ༌འོན༌ཡིའ༌པའེ༌ སྐད༌དི༌ ནང༌ང༌ ཀུ༌ཅོ༌ ཏངས༌, “ལྷ༌གུན༌ མིའ༌ ཟུས༌ཏེ༌ བབས༌ཏེ༌ སྐྱོད༌ཏེ༌ དུག༌།”
ACT 14:12 ཁོང༌གུན༌ནི༌ བཱར༌ན༌བས༌ལ༌ ཟེ༌ཡུས༌ ཡང༌ པ༌འུ༌ལུའ༌ ཧར༌མེས༌ མིང༌ང༌ ཏགས༌ ཅིའ༌ཟེར༌ན༌ པ༌འུ༌ལུ༌ ཆོས༌ཤད༌ཁན༌ གོ༌སྐྱོང༌བོ༌ ཨིན༌པིན༌།
ACT 14:13 ཟེ༌ཡུས༌སི༌ ཆོད༌ཁང༌ གྱལ༌སའེ༌ ཕི༌ལོག༌པོའེ༌ཀ༌ ཡོད༌ཁན༌ནི༌ བླ༌མའེ༌ མེན༌ཏོག༌གི༌ སྐེ༌ཆ༌ དང༌ ལང༌ཏོ༌ཞིག༌ གྱལ༌སའེ༌ གྱས༌སྒོའེ༌ཀ༌ ཁྲིད༌ཏེ༌ ཁྱོངས༌, ཅིའ༌ཟེར༌ན༌ ཁོ༌ དང༌ ཡུལ༌མི༌གུན༌ནི༌ སྐུ༌ཚབས༌ ཉིས༌ཀོའ༌ ཆོད༌པ༌ ཕུལ༌ཨིན༌ སམ༌།
ACT 14:14 ཨིན༌ནའང༌ ཏེ༌བོ༌ པ༌འུ༌ལུ༌ དང༌ བཱར༌ན༌བས༌སི༌ ཚོར༌ར༌ཅིག༌, ཁོང༌ངི༌ རང༌ངི༌ ནམ༌ཟའ༌གུན༌ ཤགས༌ ཡང༌ མི༌ཚོགས༌སི༌ ཕྲོའ༌ གྱུག༌ཨིན༌ སོང༌ཏེ༌ ཀུ༌ཅོ༌ ཏང༌ཨིན༌ མོལས༌,
ACT 14:15 “ཁྱོ༌ཞའེ༌ འི༌ཟུག༌ ཅིའ༌ ཅོའད༌? ང༌ཞའང༌ ཁྱོ༌ཞ༌གུན༌ ཙོགས༌ མི༌ ཨིན༌, ང༌ཞའེ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌སི༌ གྱུན༌ཚན༌བོ༌ ནི༌ འི༌ཙོགས༌སི༌ ཏོན༌མེད༌དི༌ ལས༌གུན༌ ཕངས༌ཏེ༌ སོན༌པོ༌ དཀོན༌མཆོག༌ ཆོགས༌ལ༌ སེམས༌ གྱུར༌ཅེས༌པོ༌ ཨིན༌, ཁོང༌ངི༌ ནམ༌ཁའ༌, ཇིག༌རྟེན༌, གྱ༌ཚོ༌ ཡང༌ ཏེ༌གུན༌ནི༌ ནང༌ང༌ ཡོད༌ཁན༌ ཚང༌མ༌ ཛདས༌ཏེ༌ ཨིན༌ནོག༌།
ACT 14:16 བུད༌ཁན༌ནི༌ མི༌རབས༌གུན༌ནི༌ ནང༌ང༌ དཀོན༌མཆོག༌གི༌ གྱལ༌ཁབ༌ ཚང༌མ༌ རང༌རང༌ ཐད༌སའེ༌ ལམ༌མི༌ཀ༌ གྲུལ༌ ཅུག༌ག༌ ཛདས༌།
ACT 14:17 ཏེ༌ནེའང༌ དཀོན༌མཆོག༌གི༌ ཁོང༌གུན༌ ཉམ༌པོ༌ ཁོང༌ དང༌ ཁོང༌ངི༌ ཐུག༌རྗེ༌ ཡོད༌ཁན༌ནི༌ སྤང༌པོ༌ སལ༌ཨིན༌ ཞུགས༌, སྤེར༌ན༌ ཁྱོ༌ཞའ༌ ཆར༌པ༌ དང༌ སྟོན༌ཐོག༌ གྱལ༌ལ༌, ཟའ༌ཅེས༌ལ༌ ཟན༌ ཡང༌ སེམས༌ཐད༌པོའེ༌ སྐང༌ང༌ ཛདས༌།”
ACT 14:18 ཏེ༌ སྤེ༌ར༌གུན༌ ཤད༌ཏེའང༌, ཁོང༌གུན༌ལ༌ ཆོད༌པ༌ ཕུལ༌ཅེས༌ནེ༌ མི༌ཚོགས༌པོའ༌ སྒག༌ཅེས༌ མ༌ ཀགས༌པོ༌ སོང༌།
ACT 14:19 ཏེ༌ནེ༌ ཨན༌ཏི༌ཡོག༌ དང༌ ཨི༌ཀོ༌ནི༌འམ༌ནེ༌ ཡོངས༌ཁན༌ནི༌ ཡ༌ཧུ༌དཱ༌པ༌ ཁ༌ཅིག༌གི༌ ཏེ༌ ཡུལ༌ལི༌ མི༌གུན༌ ཁོ༌རང༌གུན༌ནི༌ ཆོགས༌ལ༌ ཁྱོངས༌ཏེ༌ པ༌འུ༌ལུའ༌ རྡོའ༌ གྱབས༌, ཡང༌ ཁོང༌ ཤི༌ཏེ༌ ཨིན༌ནོག༌ སམས༌ཏེ༌ གྱལ༌ས༌ནེ༌ ཕི༌ལོག༌ག༌ དྲུད༌ཏེ༌ ཁྱེརས༌།
ACT 14:20 ཨིན༌ནའང༌ ལོབ༌ཕྲུགས༌གུན༌ པ༌འུ༌ལུའི༌ དུན༌ལ༌ ཛོམ༌མ༌ཅིག༌, ཁོང༌ ལངས༌ཏེ༌ གྱལ༌ས༌ ལོགས༌ཏེ༌ སྐྱོདས༌། སྟིང༌མ༌ཞག༌པོ༌ ཁོང༌ བཱར༌ན༌བས༌ ཉམ༌པོ༌ དེར༌བེའ༌ སྐྱོདས༌།
ACT 14:21 པ༌འུ༌ལུ༌ དང༌ བཱར༌ན༌བས༌སི༌ དེར༌བེ༌ གྱལ༌སའེ༌ ནང༌ང༌ གའ༌མོའེ༌ ནས༌ཚུལ༌ ཤད༌པ༌ མི༌ མང༌པོ༌ཞིག༌གི༌ ཏད༌པ༌ ཁྱོངས༌། ཏེ༌ནེ༌ ཁོང༌གུན༌ ལིས༌ཏྲའ༌, ཨི༌ཀོ༌ནི༌འམ༌ དང༌ ཨན༌ཏི༌ཡོག༌གི༌ གྱལ༌ས༌གུན༌ལ༌ ལོགས༌ཏེ༌ སྐྱོདས༌།
ACT 14:22 ཁོང༌གུན༌ནི༌ ལོབ༌ཕྲུགས༌གུན༌ལ༌ ཏད༌པའེ༌ ནང༌ང༌ སྟན༌པོ༌ དུག༌ཅེས༌ལ༌ སྤོས༌པ༌ ཏང༌ཨིན༌ མོལས༌, “དཀོན༌མཆོག༌གི༌ གྱལ༌སྲིད༌དི༌ ནང༌ང༌ ལེབ༌བ༌ལ༌ ང༌དང༌ང༌ སྐ༌ལས༌ མང༌པོའེ༌ དོང༌ལེན༌ ཅོ༌གོས༌ཨིན༌།”
ACT 14:23 ཁོང༌ ཉིས༌ཀོའེ༌ ཆོས༌ཚོགས༌ ཚང༌མའེ༌ ནང༌ང༌ ཏད༌པ༌ཅན༌གུན༌ནི༌ ཕིའ༌ འུ༌སྐྱོང༌གུན༌ ལྡམ༌མ༌ ཛདས༌, ཡང༌ ཉེ༌ནས༌ ཡང༌ན༌ རོ༌ཟཱ༌ དུགས༌ཏེ༌ མོས༌ལམ༌ ཞུས༌ཏེ༌ ཁོང༌གུན༌ གཙོ༌བོ༌ ཡེ༌ཤུའི༌ ཆག༌ག༌ སྟད༌ད༌ ཛདས༌ ཀ༌བོའེ༌ ནང༌ང༌ ཁོང༌གུན༌ནི༌ ཏད༌པ༌ ཁྱོངས༌།
ACT 14:24 ཏེ༌ནེ༌ ཁོང༌ ཉིས༌ཀོ༌ པི༌སིད༌ཡཱ༌ གྱུད༌ཏེ༌ པམ༌ཕིལ༌ཡཱའེ༌ ཡུལ༌ལ༌ སྐྱོདས༌།
ACT 14:25 ཁོང༌གུན༌ནི༌ པེར༌ག༌ གྲོང༌ཁྱེར༌རི༌ ནང༌ང༌ གའ༌མོའེ༌ ནས༌ཚུལ༌ ཤད༌ད༌ ཛད༌ཏེ༌ སྟིང༌ནེ༌ ཨ༌ཏ༌ལིཡཱ༌ ཆོགས༌ལ༌ སྐྱོདས༌།
ACT 14:26 ཏེ༌ཀ༌ནེ༌ པ༌འུ༌ལུ༌ དང༌ བཱར༌ན༌བས༌ གྲུ༌ཟིང༌ང༌ ཞོན༌ཏེ༌ ཨན༌ཏི༌ཡོག༌ གྱལ༌ས༌ ལོགས༌ཏེ༌ སྐྱོདས༌, ཀ༌རུ༌ ཏད༌པ༌ཅན༌གུན༌ནི༌ ཁོང༌ ཉིས༌ཀོའ༌ ལས༌ ཅོ༌ཅེས༌ལ༌ དཀོན༌མཆོག༌གི༌ ཐུག༌རྗེའེ༌ ཆག༌ག༌ སྟད༌ད༌ ཛད༌ཏེ༌ ཨིན༌པིན༌, ཀ༌བོ༌ ཁོང༌གུན༌ནི༌ གྲུབ༌ཅུག༌ ཚར༌ཏེ༌ ཨིན༌ནོག༌།
ACT 14:27 ཨན༌ཏི༌ཡོག༌ག༌ ལེབས༌ཏེ༌ ཁོང༌གུན༌ནི༌ ཆོས༌ཚོགས༌པོ༌ ཛོམས༌ ཅུགས༌ཏེ༌, དཀོན༌མཆོག༌གི༌ ཁོང༌ གྱུད༌ཏེ༌ ཛད༌ཁན༌ནི༌ ལས༌གུན༌ དང༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཏད༌པ༌ ཅོ༌ཅུག༌ག༌ ཛད༌ཁན༌ནི༌ སྐོར༌གུན༌ ཤདས༌།
ACT 14:28 ཡང༌ ཁོང༌གུན༌ ཏེ༌རུ༌ ལོབ༌ཕྲུགས༌གུན༌ ཉམ༌པོ༌ ཏུས༌བན༌ཤིག༌ ཞུགས༌།
ACT 15:1 ཡ༌ཧུ༌དཱ༌ ཡུལ༌ནེ༌ ཨན༌ཏི༌ཡོག༌ག༌ ཡོང༌ཁན༌ནི༌ མི༌ ཁ༌ཅིག༌གི༌ ཏད༌པ༌ཅན༌གུན༌ལ༌, “ཀལ༌ཏེས༌ ལུང༌སྟོན༌པ༌ མོ༌ཟེས༌སི༌ བཀའ༌ཁྲིམས༌ ནང༌ཞིན༌ ཁྱོ༌ཞའེ༌ བུ༌ཚ༌གུན༌ལ༌ སུན༌ནད༌ མ༌ཅོ༌ན༌ ཁྱོ༌ཞ༌གུན༌ལ༌ ཐར༌པ༌ མི༌ཐོབ༌” ཟེར༌ཨིན༌ ལབ༌ཞའ༌ ཏངས༌།
ACT 15:2 ཡང༌ པ༌འུ༌ལུ༌ དང༌ བཱར༌ན༌བས༌སི༌ ཁོང༌གུན༌ནི༌ ལབ༌ཞའེ༌ གྱབ༌གལ༌ ཅོ༌ཅེས༌པོའེ༌ ཁོང༌གུན༌ ཉམ༌པོ༌ སྲན༌ཏྲེ༌ ཟེར༌ཟེར༌ སོང༌། ཏེ༌ ཆོས༌ཚོགས༌སི༌, པ༌འུ༌ལུ༌, བཱར༌ན༌བས༌ ཡང༌ ཏད༌པ༌ཅན༌ ཁ༌ཅིག༌ ཡེ༌རུ༌ཤ༌ལེམ༌མ༌ སྐུ༌ཚབས༌ དང༌ འུ༌སྐྱོང༌ གུན༌ནི༌ དུན༌ལ༌ ཏེ༌ ལབ༌ཞའེ༌ སྐོར༌ལ༌ སྤེ༌ར༌ ཏང༌ང༌ ཆ༌ཅེས༌ལ༌ ལྡམས༌།
ACT 15:3 ཆོས༌ཚོགས༌སི༌ ཁོང༌གུན༌ ལམ༌ཅུགས༌, ཡང༌ ཁོང༌གུན༌ ཕོ༌ནི༌ཤི༌འ༌ དང༌ ས༌མར༌རི༌ཡཱ༌ ཡུལ༌གུན༌ གྱུད༌ཏེ༌ ཆའ༌ ཟ༌ནེ༌ ཁོང༌གུན༌ནི༌ ཏད༌པ༌ཅན༌གུན༌ལ༌ ཡ༌ཧུ༌དཱ༌པ༌ མན༌ཁན༌གུན༌ནི༌ མ༌ཤི༌ཀའེ༌ཀ༌ ཏད༌པ༌ ཁྱོང༌ཨིན༌ ཡོད༌ཁན༌བོ༌ ཤདས༌, ཏེ༌བོ༌ ཚོར༌ཏེ༌ སྤུན༌ ཚང༌མ༌ མང༌པོ༌ ཐད༌།
ACT 15:4 ཡེ༌རུ༌ཤ༌ལེམ༌མ༌ ལེབ༌བ༌ཅིག༌, ཏེ༌རུ༌ ཡོད༌ཁན༌ནི༌ ཆོས༌ཚོགས༌, སྐུ༌ཚབས༌གུན༌ དང༌ འུ༌སྐྱོང༌གུན༌ནི༌ ཁོང༌གུན༌ལ༌ གའ༌སུས༌ ཞུས༌། དཀོན༌མཆོག༌གི༌ ཁོང༌གུན༌ གྱུད༌ཏེ༌ ཛད༌ཁན༌ནི༌ ཆག༌ལས༌གུན༌ནི༌ སྐོར༌ལ༌ ཁོང༌ངི༌ ཤད༌ད༌ ཛདས༌།
ACT 15:5 ཨིན༌ནའང༌ ཕ༌རུ༌ཤི༌པའེ༌ སྡེ༌ ནང༌ནེ༌ ཨིན༌ཁན༌ ཏད༌པ༌ཅན༌ ཁ༌ཅིག༌ ལངས༌ཏེ༌ ཟེརས༌, “ཏད༌པ༌ཅན༌ ཡ༌ཧུ༌དཱ༌པ༌ མན༌ཁན༌ བུ༌ཚ༌གུན༌ལ༌ སུན༌ནད༌ ཅོ༌གོས༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ཁྲིམས༌གུན༌ ཁའ༌ཉན༌གོས༌།”
ACT 15:6 ཏེན༌ན༌བོའེ༌ཕིའ༌ སྐུ༌ཚབས༌ དང༌ འུ༌སྐྱོང༌ གུན༌ ཏེ༌ ལབ༌ཞའེ༌ སྐོར༌ལ༌ གྲབས༌ ཛད༌ཅེས༌ལ༌ ཛོམས༌།
ACT 15:7 མ༌མང༌པོ༌ གྲབས༌ ཅོས༌ཏེ༌ སྟིང༌ནེ༌ པི༌ཏྲར༌ ལངས༌ཏེ༌ ཁོང༌གུན༌ལ༌ མོལས༌, “སྤུན༌གུན༌ ཁྱོ༌ཞ༌གུན༌ལ༌ གྱུས༌ཨིན༌ནོག༌, ཏུས༌བན༌ཤིག༌གི༌ སྔུན༌ལ༌, གོ༌མ༌རང༌ ཡ༌ཧུ༌དཱ༌པ༌ མན༌ཁན༌གུན༌ནི༌ གའ༌མོའེ༌ ནས༌ཚུལ༌ ཚོར༌ཏེ༌ ཏད༌པ༌ ཁྱོང༌ཅེས༌སི༌ ཕིའ༌ དཀོན༌མཆོག༌གི༌ ཁྱོ༌ཞའེ༌ ཕྲོ༌ནེ༌ ངའ༌ ཁོང༌གུན༌ལ༌ ཆོས༌ཤད༌ཅེས༌ལ༌ ལྡམ༌མ༌ ཛདས༌།
ACT 15:8 ང༌དང༌གུན༌ནི༌ སེམས༌སི༌ ནང༌ང༌ ཡོད༌ཁན༌ ཚང༌མ༌ ཁྱེན༌ན༌ ཛད༌ཁན༌ནི༌ དཀོན༌མཆོག༌གི༌ ང༌དང༌གུན༌ ཙོགས༌ལ༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཏམ༌པའེ༌ ཐུག༌ཉིད༌ སལ༌ལ༌ ཛད༌ཏེ༌ ཁོང༌གུན༌ནའང༌ དཀོན༌མཆོག༌གི༌ ཨིན༌ཁན༌བོའེ༌ སྤང༌པོ༌ སལས༌།
ACT 15:9 དཀོན༌མཆོག༌གི༌ ང༌དང༌ དང༌ ཁོང༌གུན༌ནི༌ ནང༌ང༌ ཅའང༌ ཁྱད༌ བོར༌ར༌ མ༌ཛདས༌, ཅིའ༌ཟེར༌ན༌ ཏད༌པ༌ ཁྱོང༌ཅེས༌པོའེ༌ ཁོང༌གུན༌ནི༌ སེམས༌ ལག༌མོ༌ ཛདས༌།
ACT 15:10 ཏ༌ ཡ༌ཧུ༌དཱ༌ མན༌ཁན༌ ཏད༌པ༌ཅན༌གུན༌ནི༌ སྤུང༌པའེ༌ཀ༌, ང༌དང༌ ཡ༌ ང༌དང༌ངི༌ ཕ༌མེས༌པོ༌གུན༌ནི༌ ཁུར༌ མ༌ཉན༌ཁན༌ནི༌ ཁུ༌རུ༌ ལྕིན༌ཏྲེ༌ ཀལ༌ཏེ༌ ཁྱོ༌ཞ༌གུན༌ནི༌ ཅིའ༌ དཀོན༌མཆོག༌ག༌ ཐུགས༌སྲོ༌ སྐྱོད༌ཅུག༌གད༌?
ACT 15:11 མན༌, གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ གྱུད༌ཏེ༌ ང༌དང༌ང༌ ཐར༌པ༌ ཐོབ༌ཁན༌ ཙོགས༌ལ༌ ཁོང༌གུན༌ལའང༌ ཐོབ༌ཏེ༌ ཨིན༌ཁན༌བོའ༌ ང༌དང༌ངི༌ ཏད༌པ༌ ཅོའ༌ནོག༌།”
ACT 15:12 ཏེ༌ནེ༌ ཏེ༌རུ༌ ཛོམས༌ཁན༌ནི༌ མི༌ཚང༌མ༌ ཅུབ༌ཅད༌ཏེ༌ བཱར༌ན༌བས༌ དང༌ པ༌འུ༌ལུ༌ གྱུད༌ཏེ༌ དཀོན༌མཆོག༌གི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཀ༌ཟུག༌ ཧ༌ལས༌ཤེས༌སི༌ ཆག༌ལས༌ དང༌ ཛད༌པ༌ ཛད༌ཁན༌ནི༌ སྐོར༌ལ༌ ཤད༌ཁན༌གུན༌ ཉནས༌།
ACT 15:13 ཁོང༌གུན༌ནི༌ མོལ༌ ཚར༌ཏེ༌ སྟིང༌ནེ༌ ཡ༌ཀོབ༌བི༌ མོལས༌, “སྤུན༌གུན༌ ངའེ༌ སྤེ༌རའ༌ ཉན༌ན༌ ཛད༌།
ACT 15:14 དཀོན༌མཆོག༌གི༌ གོ༌མ༌རང༌ ཡ༌ཧུ༌དཱ༌པ༌ མན༌ཁན༌གུན༌ནི༌ཀ༌ སྙིང༌རྗེ༌ སྐྱེས༌ཏེ༌ ཁོང༌གུན༌ནི༌ ཕྲོ༌ནེ༌ ཁོང༌རང༌ངི༌ ཕིའ༌ མི༌གུན༌ ལྡམ༌མ༌ ཛད༌ཁན༌བོའེ༌ སྐོར༌ལ༌ ཤི༌མོན༌ པི༌ཏྲར༌རི༌ ང༌དང༌ང༌ ཤད༌ད༌ ཛདས༌།
ACT 15:15 ལུང༌སྟོན༌པ༌གུན༌ནི༌ ལུང༌སྟན༌བོ༌ ཏེ༌བོ༌ གྱུད༌ཏེ༌ དྲན༌དྲའ༌ གྲུབ༌ཏེ༌ ཨིན༌ནོག༌, ཀ༌ཟུག༌ སུང༌རབས༌སི༌ ནང༌ང༌ བྲིའ༌ ཛད༌ཏེ༌ ཨིན༌ནོག༌,
ACT 15:16 ‘ཏེ༌བོའེ༌ སྟིང༌ནེ༌ ང༌ ལོགས༌ཏེ༌ ཡོང༌ཨིན༌ ཡང༌ གྱལ༌པོ༌ དཱ༌བིད༌དི༌ གྱལ༌སྲིད༌ ཞིག༌ཁན༌བོ༌ ཡང༌སྐྱར༌ ལང༌ཨིན༌ ཞིག༌ཁན༌གུན༌ རྩིགས༌ཏེ༌ ཡང༌སྐྱར༌ སོ༌མ༌ ཅོ༌ཨིན༌
ACT 15:17 ཏེ༌གུན༌ ཅོ༌ཅེས༌སི༌ གྱུན༌ཚན༌བོ༌ ནི༌ ལུས༌ཁན༌ནི༌ ཇིག༌རྟེན༌པ༌གུན༌ནི༌ གཙོ༌བོ༌ ཙལ༌ཐུབ༌ཅེས༌ ཡང༌ ངའེ༌ མིང༌ ཁུར༌ཁན༌ནི༌ ཡ༌ཧུ༌དཱ༌པ༌ མན༌ཁན༌ ཚང༌མེའང༌ །
ACT 15:18 ངའེ༌ གོ༌མ༌ནེ༌ ཕར༌ལ༌ ཏེ༌ ཚང༌མ༌ སྔོན༌ ཅུགས༌ཏེ༌ ཨིན༌།’”
ACT 15:19 “ཏེན༌ན༌བོའེ༌ཕིའ༌ ངའེ༌ ཐག༌ཅད༌བོ༌ ནི༌, ང༌དང༌གུན༌ནི༌ དཀོན༌མཆོག༌ ཆོགས༌ལ༌ སེམས༌ གྱུར༌ཨིན༌ ཡོད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཀགས༌པོ༌ ཐོང༌ཅུག༌ མ༌གོས༌།
ACT 15:20 ཨིན༌ནའང༌ ཨི༌གེ༌ བྲིས༌ཏེ༌ ཁོང༌གུན༌ལ༌ སྐུན༌དྲ༌གུན༌ལ༌ ཆོད༌པ༌ ཕུལ༌ཏེ༌ ཚི༌ཏུ༌ ཆའ༌ཁན༌ནི༌ ཟན༌ མི༌ཟའ༌ཅེས༌, ལུས༌བྲེལ༌ ངན༌པ༌གུན༌ནེ༌ ཐག༌རིང༌ང༌ དུག༌ཅེས༌, སྐྱེ༌ཀྱིགས༌ཏེ༌ སད༌ཁན༌ནི༌ སེམས༌ཅན༌གུན༌ནི༌ ཤ༌ ཡང༌ ཁྲག༌ཅན༌ནི༌ ཤ༌ མི༌ཟའ༌ཅེས༌སི༌ སྐོར༌ལ༌ སལ༌པོ༌ ཅོས༌ཏེ༌ ཤད༌གོས༌།
ACT 15:21 ཅིའ༌ཟེར༌ན༌ མོ༌ཟེས༌སི༌ བཀའ༌ཁྲིམས༌སི༌ ནང༌ང༌ ཏེ༌གུན༌ སྔུན༌ མ༌ནེ༌ ཕར༌ལ༌ གྱལ༌ས༌ ཚང༌མའེ༌ དུ༌ཁང༌གུན༌ནི༌ ནང༌ང༌ ཤབ༌བད༌ རིམས༌སི༌ མི༌གུན༌ནི༌ ཕིའ༌ སིལ༌ཨིན༌ ཨིན༌ནོག༌།”
ACT 15:22 ཏེ༌ནེ༌ སྐུ༌ཚབས༌གུན༌, འུ༌སྐྱོང༌གུན༌ དང༌ ཆོས༌ཚོགས༌ གང༌པོ༌ ཛོམས༌ཏེ༌ ཁོང༌གུན༌ནི༌ ཕྲོ༌ནེ༌ མི༌ ཉིས༌ ལྡམས༌ཏེ༌ པ༌འུ༌ལུ༌ དང༌ བཱར༌ན༌བས༌ ཉམ༌པོ༌ ཨན༌ཏི༌ཡོག༌ག༌ ལམ༌ཅུག༌ཅེས༌ལ༌ ཐག༌ཅདས༌། ཏེ༌ ལྡམས༌ཁན༌གུན༌ ཆོས༌ཚོགས༌སི༌ འུ༌སྐྱོང༌ བཱར༌ས༌བས༌ ཟེར༌ཁན༌ནི༌ ཡུ༌དཱ༌ དང༌ སི༌ལས༌ ཉིས༌ཀོ༌ ཨིན༌པིན༌།
ACT 15:23 ཁོང༌གུན༌ ཉམ༌པོ༌ འི༌ ཆག༌བྲིས༌པོ༌ ཀལས༌, “སྐུ༌ཚབས༌ དང༌ འུ༌སྐྱོང༌ གུན༌ནི༌ ཆོགས༌ནེ༌, ཨན༌ཏི༌ཡོག༌, སི༌རི༌ཡཱའ༌, ཀཱི༌ལི༌ཀི༌ཡཱའེ༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌ མན༌ཁན༌ནི༌ སྤུན༌གུན༌ལ༌ ཇུ༌ལེ༌།”
ACT 15:24 “ང༌ཞའེ༌ ཕྲོ༌ནེ༌ ང༌ཞའེ༌ མ༌ཀལ༌ཁན༌ནི༌ མི༌ ཁ༌ཅིག༌ ཁྱོ༌ཞའེ༌ ཕྲོའ༌ ལེབས༌ཏེ༌ སྤེ༌ར༌ རིག༌ ཟེར༌ཏེ༌ ཁྱོ༌ཞའེ༌ སེམས༌ལ༌ ཐེ༌ཚོམས༌ སྐྱེ༌ཅུག༌ཁན༌བོ༌ ང༌ཞའེ༌ ཚོར༌།
ACT 15:25 ཏེན༌ན༌བོའེ༌ཕིའ༌ ང༌ཞ༌གུན༌ནི༌ ང༌ཞའེ༌ ཕྲོ༌ནེ༌ མི༌ ཉིས༌ ལྡམས༌ཏེ༌ ང༌ཞའེ༌ ཅེས༌པ༌ པ༌འུ༌ལུ༌ དང༌ བཱར༌ན༌བས༌ ཉམ༌པོ༌ ཁྱོ༌ཞ༌གུན༌ནི༌ཀ༌ ཀལ༌ཅེས༌ལ༌ གྲབས༌ སོང༌།
ACT 15:26 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཕིའ༌ བཱར༌ན༌བས༌ དང༌ པ༌འུ༌ལུ༌ སྲོག༌ སལ༌ཅེས༌ལ༌ མ༌ཇིགས༌།
ACT 15:27 ང༌ཞའེ༌ འི༌ ཨི༌གེ༌ ནང༌ང༌ བྲིས༌ཁན༌བོའེ༌ སྤང༌པོ༌ ཏང༌ཅེས༌ལ༌ ཡུ༌དཱ༌ དང༌ སི༌ལས༌, ཁོང༌གུན༌ ཉམ༌པོ༌ ཀལ༌ལད༌།”
ACT 15:28 “འི༌ སྤེ༌ར༌ ཁག༌ཅན༌གུན༌ མན༌པ༌ ཞན༌ཡང༌ ལྕིད༌ཅིག༌ ཁྱོ༌ཞ༌གུན༌ནི༌ཀ༌ མི༌ ཀལ༌ཅེས༌ལ༌ ཏམ༌པའེ༌ ཐུག༌ཉིད༌ དང༌ ང༌ཞ༌གུན༌ནི༌ ཐག༌ཅདས༌།
ACT 15:29 ཁྱོ༌ཞའེ༌ སྐུན༌དྲ༌གུན༌ལ༌ ཆོད༌པ༌ ཕུལ༌ཁན༌ནི༌ ཟན༌, ཡང༌ ཁྲག༌ ཡོད༌ཁན༌ནི༌ ཤ༌, དང༌ སེམས༌ཅན༌ སྐྱེ༌ཀྱིགས༌ཏེ༌ སད༌ཁན༌ནི༌ ཤ༌ མ༌ཟའ༌, ཡང༌ ལུས༌བྲེལ༌ ངན༌པ༌གུན༌ནེ༌ ཐག༌རིང༌ང༌ དུག༌ཤིག༌། འི༌གུན༌ ཁའ༌ཉན༌ན༌ ཁྱོ༌ཞའ༌ གྱལ༌ལ༌ ཆེན༌, ཇུ༌ལེ༌།”
ACT 15:30 ཏེ༌ནེ༌ ལམ༌ཅུགས༌པ༌ ཁོང༌གུན༌ ཨན༌ཏི༌ཡོག༌ག༌ སོང༌ ཡང༌ ཏེ༌རུ༌ ཆོས༌ཚོགས༌ གང༌པོའ༌ བོད༌ཏེ༌ ཆག༌བྲིས༌པོ༌ ཁོང༌གུན༌ནི༌ ལག༌ག༌ ཏངས༌།
ACT 15:31 ཏེ༌ སྤོས༌པ༌ཅན༌ནི༌ ཨི༌གེ༌ སིལ༌པ༌ མི༌གུན༌ ཐད༌པོ༌ སོང༌།
ACT 15:32 ལུང༌སྟོན༌པ༌ ཨིན༌ཁན༌ ཡུ༌དཱ༌ དང༌ སི༌ལས༌ གུན༌ནི༌ ཏད༌པ༌ཅན༌གུན༌ལ༌ སྤོས༌པ༌ཅན༌ནི༌ ལབ༌ཞའ༌ མང༌པོ༌ སལ༌ཏེ༌ ཁོང༌གུན༌ ཏད༌པའེ༌ ནང༌ང༌ སྟན༌པོ༌ གྱུར༌ ཅུག༌ག༌ ཛདས༌།
ACT 15:33 ཞག༌ ཁ༌ཅིག༌གི༌ སྟིང༌ནེ༌ སྤུན༌གུན༌ནི༌ སི༌ལས༌ དང༌ ཡུ༌དཱ༌ ཁོང༌ ཀལ༌ཁན༌ནི༌ ཕྲོ༌པ༌གུན༌ ཡོད༌ས༌ ཁམ༌ཟང༌ ལེབ༌ཅེས༌ལ༌ མོས༌ལམ༌ ཞུས༌ཏེ༌ ཁོང༌གུན༌ ལོགས༌ཏེ༌ ལམ༌ཅུགས༌།
ACT 15:34 
ACT 15:35 ཨིན༌ནའང༌ པ༌འུ༌ལུ༌ དང༌ བཱར༌ན༌བས༌ ཨན༌ཏི༌ཡོག༌གི༌ ནང༌ང༌ ཞུགས༌, ཏེ༌རུ༌ ཁོང༌གུན༌ དང༌ ཞན༌མ༌ མང༌པོའེ༌, གཙོ༌བོ༌ ཡེ༌ཤུའི༌ བཀའ༌གུན༌ ཤད༌ཨིན༌ ལབ༌ཞའ༌ སལ༌ལ༌ ཛདས༌།
ACT 15:36 ཏུས༌བན༌ཤིག༌གི༌ སྟིང༌ནེ༌ པ༌འུ༌ལུའི༌ བཱར༌ན༌བས༌ལ༌ མོལས༌, “ང༌དང༌ངི༌ གཙོ༌བོའེ༌ བཀའ༌ ཤད༌ཁན༌ནི༌ གྲོང༌ཁྱེར༌གུན༌ལ༌ ང༌དང༌ ཡང༌སྐྱར༌ སོང༌ཏེ༌ ཏད༌པ༌ཅན༌གུན༌ནི༌ ཏད༌པའེ༌ ནས༌ལུག༌པོ༌ ཀ༌ཟུག༌ཤིག༌ དུག༌ ལྟེན༌ན༌?”
ACT 15:37 བཱར༌ན༌བས༌སི༌ ཡོ༌ཧཱ༌ནན༌ ཀ༌བོའ༌ མར༌ཀུས༌སའང༌ ཟེར༌རད༌པིན༌, ཁོང༌གུན༌ ཉམ༌པོ༌ ཁྱེར༌ཉིན༌ ཡོད༌པིན༌།
ACT 15:38 ཨིན༌ནའང༌ པ༌འུ༌ལུའི༌, མར༌ཀུས༌ ཁོང༌གུན༌ ཉམ༌པོ༌ ཁྱེར༌ཅེས༌པོ༌ སམ༌བ༌ཅན༌ནི༌ ལས༌ མ༌ནོག༌ སམ༌, ཅིའ༌ཟེར༌ན༌ ཁོའེ༌ པམ༌ཕིལ༌ཡཱའེ༌ ནང༌ང༌ ཁོང༌གུན༌ ཉམ༌པོ༌ ལས༌ ཅོ༌ཨིན༌ མ༌དུག༌ག༌ ཕངས༌ཏེ༌ སོང༌ཏེ༌ ཨིན༌པིན༌།
ACT 15:39 པ༌འུ༌ལུ༌ དང༌ བཱར༌ན༌བས༌སི༌ ནང༌ང༌ སྲན༌ཏྲེ༌ ཟེར༌ཟེར༌ སོང༌པ༌ ཁོང༌གུན༌ སོ༌སོ༌ བེ༌གོས༌, བཱར༌ན༌བས༌ མར༌ཀུས༌ ཁྲིད༌ཏེ༌ གྲུ༌ཟིང༌ང༌ ཞོན༌ཏེ༌ ཀིབ༌རུས༌ལ༌ སོང༌།
ACT 15:40 ཨིན༌ནའང༌ པ༌འུ༌ལུའི༌ སི༌ལས༌ ཁོང༌ ཉམ༌པོ༌ ཁྱེར༌ཅེས༌ལ༌ ལྡམས༌, ཡང༌ ཏད༌པ༌ཅན༌གུན༌ནི༌ ཁོང༌གུན༌ དཀོན༌མཆོག༌གི༌ ཐུག༌རྗེ༌ ཆག༌ག༌ སྟདས༌།
ACT 15:41 པ༌འུ༌ལུ༌ སི༌རི༌ཡཱ༌ དང༌ ཀཱི༌ལི༌ཀི༌ཡཱ༌ གྱུད༌ཏེ༌ ཆོས༌ཚོགས༌གུན༌ སྟན༌པོ༌ ཛད༌ཨིན༌ སྐྱོདས༌།
ACT 16:1 པ༌འུ༌ལུ༌ དང༌ སི༌ལས༌ དེར༌བེ༌ སྟིང༌ནེ༌ ལིས༌ཏྲའ༌ སྐྱོདས༌, ཏེ༌རུ༌ ཏི༌མོ༌ཐི༌ ཟེར༌ཁན༌ནི༌ ལོབ༌ཕྲུགས༌པོ༌ དུག༌གད༌པིན༌། ཁོའེ༌ ཨ༌མ༌ ཏད༌པ༌ཅན༌ ཡ༌ཧུ༌དཱ༌མ༌ ཡང༌ ཨ༌བ༌ གརིས༌པ༌ ཨིན༌པིན༌།
ACT 16:2 ལིས༌ཏྲའ༌ དང༌ ཨི༌ཀོ༌ནི༌འམ༌མི༌ ནང༌ང༌ ཡོད༌ཁན༌ ཏད༌པ༌ཅན༌གུན༌ནི༌ ཏི༌མོ༌ཐི༌ སྕོད༌ལམ༌གུན༌ལ༌ སྟོད༌དད༌པིན༌།
ACT 16:3 པ༌འུ༌ལུའ༌ ཏི༌མོ༌ཐི༌ ཁོང༌ ཉམ༌པོ༌ ཁྱེར༌ཅེས༌ལ༌ དོད༌པ༌ ཡོད༌པ༌, ཁོང༌ངི༌ ཏི༌མོ༌ཐིའ༌ སུན༌ནད༌ ཅོ༌ ཅུགས༌, ཅིའ༌ཟེར༌ན༌ ཏེ༌ ཡུལ༌ལི༌ ཉེ༌ཁོར༌ལ༌ ཡོད༌ཁན༌ནི༌ ཡ༌ཧུ༌དཱ༌པ༌གུན༌ལ༌ ཁོའེ༌ ཨ༌བ༌ གརིས༌པ༌ ཨིན༌ཁན༌བོ༌ གྱུས༌ཡོད༌པིན༌།
ACT 16:4 ཁོང༌གུན༌ གྲོང༌ཁྱེར༌ ཅིག༌ནེ༌ ཅིག༌ག༌ སྐྱོད༌ ཟ༌ནེ༌, ཏེ༌ ཡུལ༌ལི༌ ཏད༌པ༌ཅན༌གུན༌ལ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ སྐུ༌ཚབས༌ དང༌ འུ༌སྐྱོང༌ གུན༌ནི༌ ཐག༌ཅད༌ཁན༌གུན༌ སིལ༌ཏེ༌ ཤད༌ཨིན༌, ཡང༌ ཏེ༌གུན༌ ཁའ༌ཉན༌ཅེས༌ལ༌ སྤོས༌པ༌ སལ༌ཨིན༌ སྐྱོདས༌།
ACT 16:5 ཏེ༌ཟུག༌ ཛད༌ཅེས༌པོའེ༌ ཆོས༌ཚོགས༌གུན༌ ཏད༌པའེ༌ ནང༌ང༌ སྟན༌པོ༌ སོང༌ ཡང༌ ཏད༌པ༌ཅན༌གུན༌ནི༌ ཀྲངས༌ཀ༌ ཞག༌ཏང༌ གྱས༌ཨིན༌ སོང༌།
ACT 16:6 པ༌འུ༌ལུ༌ དང༌ ཁོང༌ངི༌ ཕྲོ༌པ༌གུན༌ལ༌ ཏམ༌པའེ༌ ཐུག༌ཉིད༌དི༌ ཨ༌སི༌ཨཱ༌ ནང༌ང༌ ཆོས༌ཤད༌ཅེས༌ནེ༌ སྒག༌ག༌ ཛདས༌པ༌ ཁོང༌གུན༌ ཕརིག༌འེ༌ཡཱ༌ དང༌ གཱ༌ལ༌ཏི༌ཡ༌ ཡུལ༌གུན༌ གྱུད༌ཏེ༌ སྐྱོདས༌།
ACT 16:7 ཁོང༌གུན༌ མི༌སི༌འ༌ ཡུལ༌ལི༌ སན༌ཚམས༌ལ༌ ལེབ༌བ༌ཅིག༌, ཁོང༌གུན༌ནི༌ བི༌ཏི༌ནི༌ཡཱ༌ ནང༌ང༌ སྐྱོད༌ཅེས༌ ཅོས༌ ཨིན༌ནའང༌ ཡེ༌ཤུའི༌ ཐུག༌ཉིད༌དི༌ ཁོང༌གུན༌ ཏེ༌རུ༌ སྐྱོད༌ མ༌ཅུགས༌།
ACT 16:8 ཏེ༌བོའེ༌ཕིའ༌ ཁོང༌གུན༌ མི༌སི༌འ༌ ཡུལ༌ གྱུད༌ཏེ༌ ཏྲོ༌འེས༌ གྱལ༌ས༌ སྐྱོདས༌།
ACT 16:9 ཏེན༌ན༌ ཚན༌ལ༌ ཞལ༌ཟིགས༌ཤིག༌གི༌ ནང༌ང༌ པ༌འུ༌ལུའ༌ མ༌ཀེ༌དོ༌ནི༌ཡཱ༌པ༌ ཞིག༌ ཁོང༌ངི༌ དུན༌ལ༌ ལངས༌ཏེ༌, “ཇུ༌ཇུ༌ མ༌ཀེ༌དོ༌ནི༌ཡཱ༌ སྐྱོད༌ཏེ༌ ང༌ཞའ༌ རོགས༌ ཛད༌” ཟེར༌ཨིན༌ ཞུ༌ཝ༌ ཕུལ༌ལ༌ ཐོང༌།
ACT 16:10 པ༌འུ༌ལུའི༌ ཞལ༌ཟིགས༌པོ༌ ཟིགས༌ཏེ༌ སྟིང༌ནེ༌ ཏེན༌ན༌མལ༌ལ༌ ང༌ཞའེ༌ མ༌ཀེ༌དོ༌ནི༌ཡཱ༌ ཆ༌ཅེས༌སི༌ གྲལ༌ ཅོས༌, ཅིའ༌ཟེར༌ན༌ དཀོན༌མཆོག༌གི༌ ང༌ཞའ༌, ཁོང༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌ལ༌ བོད༌ད༌ ཛད༌ཁན༌བོ༌ ཧ༌གོ༌།
ACT 16:11 ཏྲོ༌འེས༌ནེ༌ ང༌ཞ༌གུན༌ གྲུ༌ཟིང༌ང༌ ཞོན༌ཏེ༌ སུ༌མོ༌ཏྲ༌ཀེའ༌ ལེབ༌, ཡང༌ སྟིང༌མ༌ཞག༌པོའ༌ ནེ༌ཡཱ༌པོ༌ལུས༌ལ༌ ལེབ༌།
ACT 16:12 ཏེ༌ཀ༌ནེ༌ ང༌ཞ༌གུན༌ མ༌ཀེ༌དོ༌ནི༌ཡཱ༌ ཡུལ༌ཇོངས༌སི༌ གྱལ༌ས༌ མ༌ རྩད༌ཅན༌ ཕི༌ལི༌པིའ༌ སོང༌པིན༌, ཀ༌བོའེ༌ ནང༌ང༌ རོམ༌པ༌ མང༌པོ༌ཞིག༌ དུག༌གད༌པིན༌། ཏེ༌རུ༌ ང༌ཞ༌གུན༌ ཞག༌བན༌ཤིག༌ དུགས༌པིན༌།
ACT 16:13 ཤབ༌བད༌དི༌ ངལ༌ཚོའེ༌ ཞག༌ག༌ མོས༌ལམ༌ ཞུས༌སའེ༌ ནས༌ས༌ཞིག༌ ཐོབ༌ཨིན༌ སམ༌ཏེ༌ ང༌ཞ༌གུན༌ གྱལ༌སའེ༌ སྒོ༌ནེ༌ བིངས༌ཏེ༌ ལྩངས༌པོ༌ ཆོགས༌ལ༌ སོང༌པིན༌། ཏེ༌རུ༌ ཛོམས༌ཏེ༌ ཡོད༌ཁན༌ནི༌ བུ༌མོ༌གུན༌ ཡོད༌ས༌ དུགས༌ཏེ༌ ཁོང༌གུན༌ ཉམ༌པོ༌ སྤེ༌ར༌ ཏངས༌པིན༌།
ACT 16:14 སྤེ༌ར༌ ཉན༌ཁན༌གུན༌ནི༌ ཕྲོའ༌ ལི༌དི༌ཡཱ༌ ཟེར༌ཁན༌ བུ༌མོ༌ཞིག༌ དུག༌པིན༌, ཁོ༌ ཐི༌འ༌ཏི༌རཱ༌ གྱལ༌ས༌ནེ༌ གྱལ༌པོའེ༌ ཀོས༌ལག༌ ཙོགས༌ རས༌ རིན༌ཅན༌ནི༌ ཚོང༌ ཅོ༌ཁན༌ དང༌ དཀོན༌མཆོག༌ག༌ ཅོལ༌ཁན༌ཞིག༌ ཨིན༌པིན༌། གཙོ༌བོའེ༌, ཁོའེ༌ སེམས༌ པ༌འུ༌ལུའི༌ མོལ༌ཁན༌གུན༌ལ༌ ཏད༌པ༌ ཁྱོང༌ཅེས༌སི༌ ཕིའ༌ ཕེའ༌ཛདས༌།
ACT 16:15 ཁོ༌ དང༌ ཁོའེ༌ ནང༌མི༌ གུན༌ནི༌ ཁྲུས༌ལེནས༌ ཡང༌ ཁོའེ༌ ང༌ཞའ༌ ཞུ༌ཝ༌ ཕུལས༌, “ཀལ༌ཏེས༌ ཉེ༌ཞའེ༌ ང༌ གཙོ༌བོ༌ ཡེ༌ཤུའི༌ ནང༌ང༌ ཏད༌པ༌ཅན༌ཞིག༌ ཨིན༌ནོག༌ སམ༌མད༌ན༌, སྐྱོད༌ཏེ༌ ངའེ༌ ཁང༌པ༌ ཞུགས༌ས༌ ཛད༌།” ཁོའེ༌ ང༌ཞའ༌ ཞུ༌ཝ༌ ཕུལ༌ཨིན༌ དུགས༌པ༌ ང༌ཞ༌གུན༌ ཁོའེ༌ ཁང༌པ༌ དུགས༌པིན༌།
ACT 16:16 ཞག༌ཤིག༌ ང༌ཞའ༌ མོས༌ལམ༌ ཞུས༌སའེ༌ ནས༌ས༌ ཆོགས༌ལ༌ ཆེན༌ ཡོད༌ ཟ༌ནེ༌, ང༌ཞ༌གུན༌ལ༌ ཚེ༌ཡོག༌ བུ༌མོ༌ཞིག༌ ཐུག༌, ཁོའེ༌ ནང༌ང༌ ལྷའ༌ ཞུགས༌ཏེ༌ མི༌གུན༌ལ༌ ཡོང༌ཅེས༌ཅན༌ནི༌ ཏུས༌སི༌ སྐོར༌ལ༌ སྔུན༌ཁྱེན༌ ཏངས༌ཏེ༌ ཁོའེ༌ དག༌པོ༌གུན༌ནི༌ ཕིའ༌ པེ༌ནེ༌ མང༌པོ༌ ཅོའད༌པིན༌།
ACT 16:17 བུ༌མོ༌བོ༌ པ༌འུ༌ལུ༌ དང༌ ང༌ཞའེ༌ སྟིང༌རང༌ནེ༌ ཡོངས༌ཏེ༌ ཀུ༌ཅོ༌ ཏང༌ཨིན༌ ཟེརས༌, “ཀུན༌ཝང༌ དཀོན༌མཆོག༌གི༌ ཞབས༌ཏོག༌པ༌ ཨིན༌ཁན༌ནི༌ འི༌ མི༌གུན༌ནི༌ ཁྱོ༌ཞ༌གུན༌ལ༌ ཐར༌པའེ༌ ལམ༌མི༌ སྐོར༌ལ༌ ཤད༌ད༌ནོག༌།”
ACT 16:18 ཁོའེ༌ ཞག༌ཏང༌ ཏེན༌ན༌ ཙོགས༌ ཅོ༌ཨིན༌ དུགས༌པ༌, སྟིང༌ཇུག༌ག༌ མ༌སྲན༌ཏྲེ༌ སྣང༌ང༌ ཚེར༌ཏེ༌ པ༌འུ༌ལུའི༌ གྱབ༌ལོག༌ག༌ ཟིགས༌ ཡང༌ སེམས༌ཉིད༌ ངན༌པ༌བོའ༌ མོལས༌, “ངའེ༌ ཁྱོ༌རང༌ང༌ ཡེ༌ཤུ༌ མ༌ཤི༌ཀའེ༌ ཚན༌ནི༌ ནང༌ང༌ ཁོའེ༌ ནང༌ནེ༌ བིངས༌ཏེ༌ ཡོང༌ཅེས༌ལ༌ བཀའ༌ ཏང༌ངད༌།” ཏེན༌ན༌མལ༌ལ༌ ཏེ༌ སེམས༌ཉིད༌ ངན༌པ༌བོ༌ ཁོའེ༌ ནང༌ནེ༌ བིངས༌ཏེ༌ སོང༌།
ACT 16:19 ཁོའེ༌ དག༌པོ༌གུན༌ནི༌ པེ༌ནེ༌ ཅོ༌ཅེས༌སི༌ སྐབས༌ མེད༌ཁན༌ ཆའ༌ཁན༌བོ༌ ཧ༌གོའ༌ཅིག༌, ཁོང༌གུན༌ནི༌ པ༌འུ༌ལུ༌ དང༌ སི༌ལས༌ ཟུམས༌ཏེ༌ ཁྲོམས༌སི༌ ནང༌ང༌ ཝང༌སྲུལ༌པ༌གུན༌ནི༌ དུན༌ལ༌ དྲུད༌ཨིན༌ ཁྱེརས༌།
ACT 16:20 ཁོང༌གུན༌ ཁྲིམ༌སྤོན༌གུན༌ནི༌ དུན༌ལ༌ ལེབ༌བ༌ཅིག༌, “འི༌ ཡ༌ཧུ༌དཱ༌པ༌གུན༌ ང༌དང༌ངི༌ གྱལ༌སའེ༌ ནང༌ང༌ ཡོངས༌ཏེ༌ ཧི༌ལིངས༌ ཕིང༌དུག༌,
ACT 16:21 ཡང༌ ང༌དང༌ངི༌ རོམ༌པའེ༌ བཀའ༌ཁྲིམས༌ནེ༌ གལ༌ཁན༌ནི༌ ལམ༌ ལུག༌སྲོལ༌ རིག༌ ང༌དང༌ང༌ ལབ༌དུག༌” ཟེརས༌།
ACT 16:22 ཏེ༌བོ༌ ཚོར༌ར༌ཅིག༌ མི༌ཚོགས༌སིའང༌ པ༌འུ༌ལུ༌ དང༌ སི༌ལས༌སི༌ གྱབ༌གལ༌ ཅོས༌, ཡང༌ ཁྲིམ༌སྤོན༌གུན༌ནི༌ ཁོང༌ ཉིས༌ཀོའ༌ ལྗེར༌ཉལ༌ ཕུད༌ཏེ༌ བེར༌ཀ༌ ཏང༌ཅེས༌སི༌ བཀའ༌ ཏངས༌།
ACT 16:23 ཁོང༌གུན༌ལ༌ བེར༌ཀ༌ ཉམ༌པོ༌ མ༌སྲན༌ཏྲེ༌ རྡུངས༌ ཡང༌ ཙོན༌ལ༌ ཀགས༌ཏེ༌ ཙོན༌ཁང༌ངི༌ སྤོན༌བོའ༌ གྱལ༌ལ༌ ཅོས༌ཏེ༌, སྲུང༌ཅུག༌ཅེས༌ལ༌ བཀའ༌ ཏངས༌།
ACT 16:24 བཀའ༌ ཏངས༌ཁན༌བོ༌ ཐོབ༌བ༌ཅིག༌, ཁོའེ༌ ཁོང༌ ཉིས༌ཀོ༌ ཚང༌མའེ༌སང༌ ནང༌ཀུག༌ག༌ ཡོད༌ཁན༌ནི༌ ཙོན༌ཁང༌ངི༌ ནང༌ང༌ རྐང༌པ༌གུན༌ ཤིང༌ངི༌ ནང༌ང༌ ཅུགས༌ཏེ༌ ལྡམས༌ཏེ༌ བོརས༌།
ACT 16:25 ཚན༌ཕེད༌ལ༌ པ༌འུ༌ལུ༌ དང༌ སི༌ལས༌ ཉིས༌ཀོའེ༌ དཀོན༌མཆོག༌ག༌ མོས༌ལམ༌ ཞུ༌ཨིན༌, གུར༌མ༌ ཏང༌ངད༌པིན༌, ཡང༌ ཞན༌ ཙོན༌པ༌གུན༌ནི༌ ཁོང༌ང༌ ཉན༌ཏེ༌ ཡོད༌པིན༌།
ACT 16:26 ཧུན༌མེད༌ལ༌ སང༌གུལ༌ ཀྲག༌པོ༌ ཡོངས༌ཏེ༌ ཙོན༌ཁང༌ངི༌ མག༌ལྡན༌གུན༌ སྐུལས༌། ཏེན༌ན༌མལ༌ལ༌ སྒོ༌ ཚང༌མ༌ བེ༌, ཡང༌ ཏེ༌རུ༌ ཡོད༌ཁན༌ནི༌ ཙོན༌པ༌ ཚང༌མའེ༌ ལྕག༌ཐག༌གུན༌ བྲོལ༌ཏེ༌ བུད༌།
ACT 16:27 ཙོན༌ཁང༌ངི༌ སྤོན༌བོའ༌ ཉིད༌ཚད༌ ཡང༌ ཁོའེ༌ ཙོན༌ཁང༌ངི༌ སྒོ༌གུན༌ ཕེས༌ཏེ༌ ཐོང༌། ཙོན༌པ༌ ཚང༌མ༌ ཤོར༌ཏེ༌ མེད༌ཀྱག༌ སམ༌ཏེ༌, ཁོའེ༌ རང༌ངི༌ ར༌འི༌ ཕིངས༌ཏེ༌ རང༌སྲོག༌ ཅད༌ཅེས༌ ཅོས༌།
ACT 16:28 པ༌འུ༌ལུའི༌ ཀུ༌ཅོ༌ ཏངས༌ཏེ༌ ཁོའ༌ མོལས༌, “རང༌ངི༌ སྲོག༌ མ༌ཅད༌, ང༌ཞའ༌ ཚང༌མ༌ འི༌ནེ༌ཀ༌ནེ༌ ཡོད༌།”
ACT 16:29 ཙོན༌ཁང༌ངི༌ སྤོན༌བོའེ༌ འོད༌ ཁྱོང༌ ཟེར༌ཏེ༌ བོདས༌ ཡང༌ ཁོ༌ ནང༌ཀུག༌ག༌ བང༌ཏངས༌ཏེ༌ སོང༌ ཡང༌ དར༌ཨིན༌ཞིག༌ པ༌འུ༌ལུ༌ དང༌ སི༌ལས༌སི༌ དུན༌ལ༌ གྱེལ༌།
ACT 16:30 ཁོའེ༌ ཁོང༌གུན༌ ཕི༌ལོག༌ག༌ ཁྱོངས༌ཏེ༌ ཟེརས༌, “སྤོན༌བོ༌ལེ༌ ངའེ༌ ཐར༌པ༌ ཐོབ༌ཅེས༌ལ༌ ཅི༌ ཅོ༌གོས༌?”
ACT 16:31 ཁོང༌གུན༌ནི༌ ལན༌སལས༌, “གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོང༌, ཏེ༌ནེ༌ ཁོ༌རང༌ང༌ ཐར༌པ༌ ཐོབ༌ཨིན༌, མ༌ཚད༌ ཁྱོ༌རང༌ངི༌ ཁང༌པའེ༌ ནང༌ང༌ དུག༌ཁན༌གུན༌ནའང༌།”
ACT 16:32 ཁོང༌གུན༌ནི༌ ཙོན༌ཁང༌ངི༌ སྤོན༌བོ༌ དང༌ ཁོའེ༌ ནང༌མི༌ གུན༌ལ༌ གཙོ༌བོ༌ ཡེ༌ཤུའི༌ སྐོར༌ལ༌ ཤད༌ད༌ ཛདས༌།
ACT 16:33 ཚན༌ནི༌ ཏེན༌ན༌ ཏུས༌ལ༌ ཙོན༌ཁང༌ངི༌ སྤོན༌བོ༌བོའེ༌ ཁོང༌གུན༌ ཁྱེར༌ཏེ༌ ཁོང༌གུན༌ནི༌ མ༌ཁའ༌གུན༌ ཁྲུས༌, ཡང༌ ཏེན༌ན༌ ཏུས༌ལ༌ ཁོ༌ དང༌ ཁོའེ༌ ནང༌མི༌ ཚང༌མའེ༌ ཁྲུས༌ལེནས༌།
ACT 16:34 ཁོའེ༌ པ༌འུ༌ལུ༌ དང༌ སི༌ལས༌ ཁོ༌རང༌ངི༌ ཁང༌པ༌ ཁྱེར༌ཏེ༌ དོན༌ཏང༌ ཕུལས༌, ཁོ༌ དང༌ ཁོའེ༌ ནང༌མི༌ ཚང༌མའ༌ སྐྱིད༌པོ༌ སོང༌ ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌གི༌ཀ༌ ཏད༌པ༌ ཁྱོངས༌།
ACT 16:35 ནམ༌ལངས༌ས༌ཅིག༌, ཁྲིམ༌སྤོན༌གུན༌ནི༌ ཙོན༌ཁང༌ངི༌ སྤོན༌བོའེ༌ཀ༌ མག༌མི༌གུན༌ ཀལ༌ཏེ༌, “ཁོང༌གུན༌ ཕུད༌དོང༌” ཟེར༌ཏེ༌ བཀའ༌ ཏངས༌།
ACT 16:36 ཙོན༌ཁང༌ངི༌ སྤོན༌བོ༌བོའེ༌ པ༌འུ༌ལུ༌ ཞུས༌, “ཁྲིམ༌སྤོན༌གུན༌ནི༌ ཉེ༌ཞའ༌ ཕུད༌ ཟེར༌ཏེ༌ བཀའ༌ ཏངས༌ཏོག༌། ཏ༌ ཉེ༌ཞའ༌གུན༌ ཞི༌དེ༌ ཉམ༌པོ༌ སྐྱོད༌།”
ACT 16:37 ཨིན༌ནའང༌ པ༌འུ༌ལུའི༌ ལན༌སལས༌, “ང༌ཞའ༌ རོམ༌པ༌ ཨིན༌ཏེའང༌ ཁྲིམ༌སྤོན༌གུན༌ནི༌ ང༌ཞའེ༌ཀ༌ ཁྲིམས༌ མ༌སྲུལ༌ལ༌ མི༌གུན༌ནི༌ དུན༌ལ༌ ང༌ཞའ༌ རྡུངས༌ཏེ༌ ཙོན༌ཁང༌ང༌ ཀགས༌། ཏ༌ ཅི༌ ཁོང༌གུན༌ནི༌ ང༌ཞའ༌ སུའང༌ གྱུས༌ ཆ༌ མ༌ཅུག༌ག༌ ཕུད༌ཏང༌ཨིན༌ སམ༌མ༌ནོག༌ག༌? ང༌ཞའ༌ མི༌ཆའ༌། ཁོ༌རང༌གུན༌ འི༌ཀ༌ ཡོངས༌ཏེ༌, ང༌ཞའ༌ ཙོན༌ནེ༌ ཕིངས༌ཏེ༌ ཁྱེར༌གོས༌།”
ACT 16:38 མག༌མི༌གུན༌ སོང༌ཏེ༌ སྤེ༌ར༌གུན༌ ཤདས༌ ཡང༌ པ༌འུ༌ལུ༌ དང༌ སི༌ལས༌ གུན༌ རོམ༌པ༌ ཨིན༌ཁན༌བོ༌ ཚོར༌ཏེ༌ ཁྲིམ༌སྤོན༌གུན༌ སྲན༌ཏྲེ༌ ཇིགས༌།
ACT 16:39 ཁྲིམ༌སྤོན༌གུན༌ ཙོན༌ཁང༌ང༌ ཡོངས༌ ཡང༌ པ༌འུ༌ལུ༌ དང༌ སི༌ལས༌ལ༌ གོངས༌པ༌ སལ༌ཅེས༌ལ༌ ཞུས༌། ཁོང༌གུན༌ ཙོན༌ནེ༌ ཕི༌ལོག༌ག༌ ཁྱེར༌ཏེ༌ ཁོང༌གུན༌ལ༌ གྱལ༌ས༌ནེ༌ བིངས༌ཏེ༌ ཆ༌ཅེས༌ལ༌ ཞུ༌ཝ༌ ཕུལས༌།
ACT 16:40 པ༌འུ༌ལུ༌ དང༌ སི༌ལས༌ ཙོན༌ཁང༌ནེ༌ བིང༌ཏེ༌ ལི༌དི༌ཡཱའེ༌ ཁང༌པ༌ སྐྱོདས༌, ཏེ༌རུ༌ ཁོང༌གུན༌ སྤུན༌གུན༌ ཉམ༌པོ༌ ཐུག༌ཏེ༌ ཁོང༌གུན༌ལ༌ སྤོས༌པ༌ སལ༌ལ༌ ཛདས༌, ཡང༌ ཏེ༌ ཡུལ༌ནེ༌ སྐྱོདས༌།
ACT 17:1 ཏེ༌ སྟིང༌ནེ༌ པ༌འུ༌ལུ༌ དང༌ སི༌ལས༌ ཉིས༌ཀོ༌ ཨམ༌ཕི༌པོ༌ལིས༌ དང༌ ཨ༌པོ༌ལོ༌ནི༌ཡཱ༌ གྲོང༌ཁྱེར༌ གུན༌ གྱུད༌ཏེ༌ ཐེ༌ས༌ལོ༌ནི༌ཀའེ༌ གྱལ༌ས༌ ལེབ༌, ཏེ༌རུ༌ ཡ༌ཧུ༌དཱ༌པའེ༌ དུ༌ཁང༌ཞིག༌ ཡོད༌པིན༌།
ACT 17:2 པ༌འུ༌ལུ༌, ཁོང༌རང༌ངི༌ ལོབས༌ ནང༌ཞིན༌ དུ༌ཁང༌ངི༌ ནང༌ང༌ སྐྱོདས༌, ཡང༌ ཤབ༌བད༌ སུམ༌མི༌ ཞག༌གུན༌ལ༌ ཏེ༌རུ༌ ཡོད༌ཁན༌གུན༌ ཉམ༌པོ༌ ཏམ༌པའེ༌ སུང༌རབས༌སི༌ སྐོར༌ལ༌ གྲོས༌དུར༌ ཛདས༌།
ACT 17:3 ཁོང༌ངི༌ སུང༌རབས༌སི༌ ནང༌ནེ༌ མ༌ཤི༌ཀ༌ རྡུག༌ངལ༌ ཉུང༌གོ༌ཤེས༌ དང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌གོ༌ཤེས༌པོ༌ ཧ༌གོ༌ཅུགས༌ཏེ༌ ཏན༌ཏན༌ ཨིན༌ཁན༌བོ༌ སྟན༌ན༌ ཛདས༌ ཡང༌ མོལས༌, “ངའེ༌ སྤང༌པོ༌ ཏང༌ཁན༌ནི༌ ཡེ༌ཤུ༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ནོག༌།”
ACT 17:4 ཡ༌ཧུ༌དཱ༌པ༌ ཁ༌ཅིག༌, གརིས༌པ༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ གྲུལ༌ཁན༌ མང༌པོ༌ དང༌ ཏེ༌ ཡུལ༌ལི༌ རྩི༌ཝ༌ཅན༌ བུ༌མོ༌ བན༌ཤིག༌གིའང༌ ཁོང༌ངི༌ ཆོས༌ཤད༌ཁན༌བོ༌ དེན༌བ༌ ཨིན༌ཁན༌བོ༌ ཧ༌གོ༌ཏེ༌ པ༌འུ༌ལུ༌ དང༌ སི༌ལས༌ གུན༌ནི༌ ཕྲོའ༌ དྲེས༌།
ACT 17:5 ཨིན༌ནའང༌ ཡ༌ཧུ༌དཱ༌པ༌གུན༌ལ༌ ཚིག༌ཅེས༌ ཡོངས༌ཏེ༌ ཁྲོམས༌སི༌ ནང༌ང༌ ཁོར༌ཨིན༌ དུག༌ཁན༌ནི༌ མི༌ རྩོག༌པོ༌ བན༌ཤིག༌ ལྡུས༌ཏེ༌ ཁྱོངས༌, ཡང༌ གྱལ༌སའེ༌ ནང༌ང༌ ཧི༌ལིངས༌ ཕིང༌ཅུགས༌། ཁོང༌གུན༌ནི༌ མི༌ཚོགས༌སི༌ ཕྲོའ༌ ཁྱོང༌ཅེས༌ལ༌ པ༌འུ༌ལུ༌ དང༌ སི༌ལས༌ གུན༌ ཙལ༌ཨིན༌ ཡ༌སོན༌ནི༌ ཁང༌པའ༌ སྤུང༌གོལ༌ ཅོས༌།
ACT 17:6 ཁོང༌གུན༌ མ༌ཐོབ༌པ༌, ཁོང༌གུན༌ནི༌ ཡ༌སོན༌ དང༌ ཞན༌ མ༌ཤི༌ཀ༌པ༌ ཁ༌ཅིག༌ གྱལ༌སའེ༌ ཝང༌སྲུལ༌པ༌གུན༌ནི༌ དུན༌ལ༌ དྲུད༌ཨིན༌ ཁྱེརས༌, ཡང༌ ཀུ༌ཅོ༌ ཏང༌ཨིན༌ ཟེརས༌ “མི༌ ཉིས༌སི༌ ཇིག༌རྟེན༌ གང༌པོའེ༌ ནང༌ང༌ ཧི༌ལིངས༌ ཕིངས༌ཏེ༌, ཏ༌ འི༌རུ༌ ང༌དང༌ངི༌ གྱལ༌ས༌ ལེབས༌ཏེ༌ ཨིན༌ནོག༌།
ACT 17:7 ཡ༌སོན༌ནི༌ ཁོང༌གུན༌ ཁོ༌རང༌ངི༌ ཁང༌པའེ༌ ནང༌ང༌ དུག༌ཅུགས༌, ཡང༌ ཡེ༌ཤུ༌ ཟེར༌ཁན༌ནི༌ ཞན༌ཡང༌ གྱལ༌པོ༌ཞིག༌ ཡོད༌ ཟེར༌ཏེ༌ ཁོང༌གུན༌ནི༌ རོམ༌མི༌ གྱལ༌པོའེ༌ ཁྲིམས༌སི༌ གྱབ༌གལ༌ ཅོས༌ཏེ༌ ཨིན༌ནོག༌།”
ACT 17:8 ཏེ༌ སྤེ༌ར༌བོ༌ ཚོར༌ར༌ཅིག༌ མི༌མངས༌ དང༌ ཡུལ༌ལི༌ ཝང༌སྲུལ༌པ༌གུན༌ནི༌ ནང༌ང༌ ཧི༌ལིངས༌ ཤོར༌།
ACT 17:9 ཡང༌ ཝང༌སྲུལ༌པ༌གུན༌ནི༌ ཡ༌སོན༌ དང༌ ཁོའེ༌ ཕྲོ༌པ༌ ཏད༌པ༌ཅན༌གུན༌ལ༌ པེ༌ནེ༌ ཆད༌པ༌ ཅད༌ཏེ༌ ཕུད༌ཏངས༌།
ACT 17:10 ཏེན༌ན༌ ཚན༌ལ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ནི༌ པ༌འུ༌ལུ༌ དང༌ སི༌ལས༌ བེ༌རེ༌ཨཱ༌ ཟེར༌སའེ༌ ནས༌ས༌ ལམ༌ཅུགས༌། ཏེ༌རུ༌ ལེབ༌བ༌ཅིག༌ ཁོང༌གུན༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ སྐྱོདས༌།
ACT 17:11 བེ༌རེ༌ཨཱ༌པ༌གུན༌ ཐེ༌ས༌ལོ༌ནི༌ཀ༌པ༌གུན༌ ཙོགས༌ སྙིང༌སྐྱོང༌པོ༌ མི༌དུག༌པིན༌, ཅིའ༌ཟེར༌ན༌ ཁོང༌གུན༌ནི༌ པ༌འུ༌ལུའི༌ ལབ༌ཞའ༌ མ༌ཐད༌པོ༌ ཉམ༌པོ༌ ཉནས༌། ཡང༌ ཏམ༌པའེ༌ སུང༌རབས༌གུན༌ ཞག༌ཏང༌ སིལ༌ཏེ༌ ཁོང༌ངི༌ མོལ༌ཁན༌གུན༌ ཏན༌ཏན༌ ཨིན༌ནོག༌ག༌ མ༌ནོག༌ ལྟ༌ཅེས༌ལ༌ རྩར༌ཅོད༌ ཅོའད༌པིན༌།
ACT 17:12 ཡ༌ཧུ༌དཱ༌པ༌ མང༌པོ༌ མ༌ཚད༌ གརིས༌པ༌ བུ༌ཚ༌ དང༌ བུ༌མོ༌ ཀྲག༌ཞན༌ མང༌པོ༌ཞིག༌གིའང༌ ཏད༌པ༌ ཁྱོངས༌།
ACT 17:13 ཨིན༌ནའང༌ ཐེ༌ས༌ལོ༌ནི༌ཀའེ༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌གུན༌ལ༌ པ༌འུ༌ལུའི༌ དཀོན༌མཆོག༌གི༌ བཀའ༌ བེ༌རེ༌ཨཱ༌ ཟེར༌སའེ༌ ཡུལ༌ལི༌ ནང༌ང༌ ཤད༌དུག༌ ཟེར༌ཏེ༌ ཚོར༌ར༌ཅིག༌, ཁོང༌གུན༌ ཏེ༌རུའང༌ སོང༌ཏེ༌, པ༌འུ༌ལུའི༌ གྱབ༌གལ༌ལ༌ ཟེར༌ཏེ༌ མི༌མངས༌སི༌ ནང༌ང༌ ཧི༌ལིངས༌ བིང༌ཅུགས༌།
ACT 17:14 ཏེན༌ན༌མལ༌ལ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ནི༌ པ༌འུ༌ལུ༌ གྱ༌ཚོ༌ ཐའ༌མའེ༌ ནས༌སའ༌ ལམ༌ཅུག༌ག༌ ཁྱེརས༌, ཨིན༌ནའང༌ སི༌ལས༌ དང༌ ཏི༌མོ༌ཐི༌ བེ༌རེ༌ཨཱའེ༌ ནང༌ང༌ ཞུགས༌།
ACT 17:15 པ༌འུ༌ལུ༌ ལམ༌ཅུག༌ག༌ ཆའ༌ཁན༌གུན༌ ཨེ༌ཐེན༌ གྱལ༌ས༌ ཚག༌པ༌ ཁོང༌ ལམ༌ཅུག༌ག༌ སོང༌, ཡང༌ སི༌ལས༌ དང༌ ཏི༌མོ༌ཐི༌ ཉིས༌ཀོའ༌ ཙམ༌ཐུབ༌ གྱོགས༌པ༌ པ༌འུ༌ལུ༌ ཡོད༌ས༌ ཡོང༌ཅེས༌ལ༌ ལོན༌ ཁུར༌ཏེ༌ ལོགས༌ཏེ༌ ཡོངས༌།
ACT 17:16 པ༌འུ༌ལུ༌ ཨེ༌ཐེན༌ནི༌ ནང༌ང༌ སི༌ལས༌ དང༌ ཏི༌མོ༌ཐི༌ ཕིའ༌ སྲུངས༌ཏེ༌ ཡོད༌ ཟ༌ནེ༌ ཏེ༌ གྱལ༌ས༌བོ༌ སྐུན༌དྲའེ༌ གངས༌ཏེ༌ ཟིགས༌པ༌ ཁོང༌ ཐུགས༌སྐྱོ༌མོ༌ སོང༌།
ACT 17:17 ཏེ༌བོའེ༌ཕིའ༌ ཞག༌ཏང༌ ཁོང༌ངི༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ ཡ༌ཧུ༌དཱ༌པ༌གུན༌ དང༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ གྲུལ༌ཁན༌ནི༌ གརིས༌པ༌གུན༌ ཉམ༌པོ༌ གྲོས༌དུར༌ ཡང༌ ཁྲོམས༌སི༌ ནང༌ང༌ ཡོད༌ཁན༌ནི༌ མི༌གུན༌ལ༌ ཆོས༌ཤད༌ད༌ ཛདས༌།
ACT 17:18 ཏེ༌རུ༌ ཨེ༌པི༌ཀུར༌ དང༌ སྟྲོ༌འིཀ༌ ཚན༌ཉིད༌པ༌གུན༌ནི༌ པ༌འུ༌ལུ༌ ཉམ༌པོ༌ གྲོས༌དུར༌ ཅོ༌ཅེས༌ གོ༌ཟུག༌ ཅོས༌ཏེ༌ ཁ༌ཅིག༌གི༌, “ཁོའེ༌ ཅི༌ ཆོལ༌བེ༌ སྤེ༌ར༌ ཟེར༌ར༌ནོག༌” ཡང༌ ཁ༌ཅིག༌གི༌, “ཁོའེ༌ ཞན༌ ལྷ༌ལྷ༌མོ༌ གུན༌ནི༌ སྐོར༌ལ༌ ཤད༌ཏེ༌ ཨིན༌ཏིག༌དུག༌” ཟེརས༌, ༼ཅིའ༌ཟེར༌ན༌ པ༌འུ༌ལུའི༌ ཡེ༌ཤུ༌ དང༌ ཤི༌ཁན༌གུན༌ སོན༌ཏེའ༌ ལང༌ཅེས༌སི༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ད༌ ཛདས༌།༽
ACT 17:19 ཏེ༌ནེ༌ ཁོང༌གུན༌ནི༌ པ༌འུ༌ལུ༌ གརིས༌པའེ༌ དུ༌ཁང༌ ཨ༌རི༌འོ༌པ༌གོས ཟེར༌ས༌ ཁྲིད༌ཏེ༌ ཁྱེརས༌, ཡང༌ ཁོང༌ང༌ ཟེརས༌, “ཏ༌ ང༌ཞའ༌, ཁྱོ༌རང༌ངི༌ ཤད༌ཁན༌ནི༌ ལབ༌ཞའ༌ སོ༌མ༌བོའེ༌ སྐོར༌ལ༌ ཤད༌ད༌ ཛད༌།
ACT 17:20 ཁྱོ༌རང༌ངི༌ ཟེར༌ཁན༌གུན༌ ཡམ༌ཚན༌ སྤེ༌ར༌ རིག༌ རག༌, ཏེ༌གུན༌ནི༌ ཏོན༌བོ༌ ང༌ཞའ༌ ཧ༌གོ༌ཉིན༌ རག༌།”
ACT 17:21 ༼ཨེ༌ཐེན༌ནི༌ ཡུལ༌པ༌ དང༌ ཕི༌ལོག༌ནེ༌ ཡོངས༌ཏེ༌ ཏེ༌རུ༌ དུག༌ཁན༌ ཚང༌མའེ༌ རང༌ངི༌ ཏུས༌ མང༌ཆེའ༌བོ༌ སམ༌བ༌ སོ༌མ༌ ཤད༌ཅེས༌ དང༌ ཉན༌ཅེས༌སི༌ ནང༌ང༌ ཕུད༌དད༌ཀྱག༌།༽
ACT 17:22 ཏེ༌ནེ༌ པ༌འུ༌ལུ༌ ཨ༌རི༌འོ༌པ༌གོས དུ༌ཁང༌ངི༌ ཞུང༌ང༌ ཞངས༌ཏེ༌ མོལས༌, “ཨེ༌ཐེན༌པ༌གུན༌, ངའེ༌ ཐོང༌ཅེས༌ལ༌ ཁྱོ༌ཞའ༌ ཅི༌ས༌ཐོག༌ནེ༌ མ༌ ཆོས༌པ༌ དུག༌།
ACT 17:23 ཁྱོ༌ཞའེ༌ གྱལ༌སའེ༌ ནང༌ང༌ གྲུལ༌ ཟ༌ནེ༌ ངའ༌ གྱལ༌ས༌ གང༌པོ༌བོ༌ སྐུན༌དྲ༌ དང༌ ཆོད༌པ༌ ཕུལ༌ཅེས༌སི༌ ཆོད༌ཁྲི༌ གུན༌ གངས༌ཏེ༌ ཐོང༌, ཡང༌ ཆོད༌ཁྲི༌ ཅིག༌ཅིག༌གི༌ཀ༌, ‘གྱུས༌མེད༌ དཀོན༌མཆོག༌ག༌’ ཟེར༌ཏེ༌ བྲིས༌ཁན༌ཞིག༌ ངའ༌ ཐོང༌། ཁྱོ༌ཞ༌གུན༌ནི༌ མ༌ཤེས༌ས༌ ཅོལ༌ཁན༌ནི༌ ཏེན༌ན༌ དཀོན༌མཆོག༌གི༌ སྐོར༌ལ༌ ངའེ༌ ཤད༌ཨིན༌།”
ACT 17:24 “འི༌ ཇིག༌རྟེན༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ ཛད༌ཁན༌ནི༌ དཀོན༌མཆོག༌, ཁོང༌ ས༌ དང༌ ནམ༌ཁའེ༌ གཙོ༌བོ༌ ཞུགས༌ཏེ༌ ཨིན༌ནོག༌། ཁོང༌ མིའི༌ རྩིགས༌ཁན༌ནི༌ ཆོད༌ཁང༌ གུན༌ནི༌ ནང༌ང༌ ཞུགས༌ས༌ མ༌ནོག༌།
ACT 17:25 ཀལ༌ཏེས༌ མིའི༌, ཁོང༌ང༌ སྒོས༌དོམ༌མི༌ ནང༌ང༌ ཞབས༌ཏོག༌ ཞུ༌ཨིན༌ སམ༌ན༌, ཞུ༌ མི༌ཉན༌ ཅིའ༌ཟེར༌ན༌ ཁོང༌ང༌ སྒོས༌དོམ༌ མ༌ནེ༌ མེད༌ཀྱག༌། ཁོང༌ངི༌ ཚང༌མ༌ལ༌ སྲོག༌ དང༌ མི༌ཚེ༌ མ༌ཚད༌ ཅི༌ཚང༌མ༌ སལ༌ལ༌ ཛད༌ད༌ནོག༌།
ACT 17:26 ཁོང༌ངི༌ ཁོང༌རང༌ངི༌ ཆག༌ནེ༌ ཛད༌ཁན༌ནི༌ མི༌ ཅིག༌ནེ༌, འི༌ ཇིག༌རྟེན༌ གང༌པོའེ༌ མིར༌གྱུད༌ ཚང༌མ༌ ཇུང༌ ཅུག༌ག༌ ཛདས༌, མ༌ཚད༌པའེ༌ ཏེ༌གུན༌ ཝང༌ངི༌ ནང༌ང༌ བུབ༌ཤེས༌ དང༌ ལང༌ཅེས༌སི༌ ཏུས༌, ཡང༌ དུགས༌སའེ༌ ནས༌སའེ༌ སན༌ཚམས༌ གུན༌ ལྡམ༌མ༌ ཛདས༌།”
ACT 17:27 “མི༌གུན༌ནི༌ དཀོན༌མཆོག༌ ཙལ༌ན༌ ཐོབ༌ཅེས༌ལ༌ ཁོང༌ངི༌ ཏེ༌ ཚང༌མ༌ ཅོའ༌ ཛདས༌, ཨིན༌ནའང༌ དཀོན༌མཆོག༌ ནི༌ ཏན༌ཏན༌ལ༌ ང༌དང༌ རེ༌རེ༌ནེ༌ ཐག༌རིང༌ང༌ མེད༌པ༌ ཨིན༌ནོག༌,
ACT 17:28 ཅིའ༌ཞུ༌ན༌ ང༌དང༌གུན༌ ཁོང༌ངི༌ ནང༌ང༌ གྲུལ༌ཨིན༌, མི༌ཚེ༌ ཕུད༌ཨིན༌, སོན༌ཏེའ༌ ལུས༌ཏེ༌ ཨིན༌ནོག༌, ཀ༌ཟུག༌ ཁྱོ༌ཞའེ༌ རྩོམ༌པ༌པོ༌ ཁ༌ཅིག༌གི༌ ཟེར༌དུག༌, ‘ང༌དང༌གུན༌ ཁོང༌ངི༌ ཕྲུ༌གུ༌ ཨིན༌ནོག༌།’
ACT 17:29 ང༌དང༌གུན༌ དཀོན༌མཆོག༌གི༌ ཕྲུ༌གུ༌ ཨིན༌ པ༌སང༌ ང༌དང༌གུན༌ནི༌ དཀོན༌མཆོག༌, མི༌ ཁྱུད༌ དང༌ སམ༌བ༌ གྱུད༌ཏེ༌ ཅོས༌ཁན༌ནི༌ སེར༌ ཡ༌ མུལ༌ ཡ༌ རྡོའེ༌ སྐུན༌དྲ༌ ཨིན༌ནོག༌ སམ༌ མ༌གོས༌།”
ACT 17:30 “སྔུན༌མའེ༌ ཏུས༌ལ༌ དཀོན༌མཆོག༌གི༌ ཏེ༌ སམ༌བ༌ མེད༌ཁན༌ནི༌ ལས༌གུན༌ལ༌ སྣང༌མེད༌ ཛདས༌, ཨིན༌ནའང༌ ཏ༌ ཁོང༌ངི༌ ཀ༌རུང༌ས༌ ཡོད༌ཁན༌ནི༌ མི༌ཚང༌མ༌ལ༌ སྡིག༌པ༌ སྤངས༌ཏེ༌ གྱོད༌པ༌ ཅོ༌ཅེས༌ལ༌ བཀའ༌ སལ༌ལ༌ ཛདས༌།
ACT 17:31 དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཞག༌ག༌ ཁོང༌ངི༌ ལྡམ༌མ༌ ཛད༌ཁན༌ནི༌ མི༌ ཡེ༌ཤུ༌ གྱུད༌ཏེ༌ ཇིག༌རྟེན༌པ༌ ཚང༌མའེ༌ཀ༌ ཤགས༌ ཅད༌ཨིན༌, ཡང༌ ཤི༌ཁན༌གུན༌ནི༌ ཕྲོ༌ནེ༌ ཁོང༌ སོན༌ཏེའ༌ ལང༌ང༌ ཛད༌ཏེ༌ མི༌ཚང༌མ༌ལ༌ ཏེ༌བོ༌ ཀྲང༌པོ༌ ཨིན༌ཁན༌བོ༌ སྟན༌ན༌ ཛདས༌།”
ACT 17:32 ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ཅེས༌སི༌ སྐོར༌ལ༌ ཚོར༌ར༌ཅིག༌, ཁ༌ཅིག༌གི༌ ཧབ༌གོད༌ ཏངས༌, ཨིན༌ནའང༌ ཁ༌ཅིག༌གི༌, “སྟིང༌མ༌ཞིག༌ འི༌ སྐོར༌ལ༌ ང༌ཞའ༌ ཏ༌རུང༌ངའང༌ ཉན༌ཉིན༌རག༌” ཟེརས༌།
ACT 17:33 ཏེ༌ སྟིང༌ནེ༌ པ༌འུ༌ལུ༌ ཁོང༌གུན༌ནི༌ ཕྲོ༌ནེ༌ བིངས༌ཏེ༌ སྐྱོདས༌།
ACT 17:34 མི༌ ཁ༌ཅིག༌གི༌ ཁོང༌ངི༌ ལབ༌ཞ༌ ཨིད༌ཤེས༌ཏེ༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཁྱོངས༌། ཏེ༌ཕྲོའ༌ ཨ༌རི༌འོ༌པ༌གོས༌སི༌ ཚོགས༌པའེ༌ ཐུས༌མི༌ དི༌འོ༌ནི༌སི༌འུས༌ ཟེར༌ཁན༌, དཱ༌མ༌རི༌ ཟེར༌ཁན༌ནི༌ བུ༌མོ༌ དང༌ ཞན༌མ༌གུན༌ ཡོད༌པིན༌།
ACT 18:1 ཏེ༌ སྟིང༌ནེ༌ པ༌འུ༌ལུ༌ ཨེ༌ཐེན༌ གྱལ༌ས༌ནེ༌ ཀོ༌རིན༌ཐི༌ གྱལ༌ས༌ སྐྱོདས༌།
ACT 18:2 ཏེ༌རུ༌ པ༌འུ༌ལུའ༌ པོན༌ཏུས༌སི༌ ནང༌ང༌ སྐྱེས༌ཁན༌, ཨ༌ཀུའི༌ལ༌ ཟེར༌ཁན༌ནི༌ ཡ༌ཧུ༌དཱ༌པ༌ཞིག༌ ཐུག༌, ཁོ༌ ཁོ༌རང༌ངི༌ ན༌མ༌ པརི༌སི༌ལ༌ ཉམ༌པོ༌ ངེ༌ཐུབ༌ཅིག༌རང༌ ཨི༌ཏྲི༌ལི༌ ཡུལ༌ནེ༌ ཀོ༌རིན༌ཐི༌ གྱལ༌ས༌ ཡོངས༌ཏེ༌ ཨིན༌པིན༌, ཅིའ༌ཟེར༌ན༌ རོམ༌མི༌ གྱལ༌པོ༌ ཀོལོ༌དི༌འས༌སི༌ ཡ༌ཧུ༌དཱ༌པ༌ ཚང༌མ༌ རོམ༌ གྱལ༌ས༌ནེ༌ བིང༌ཏེ༌ ཆ༌གོས༌ ཟེར༌ཏེ༌ བཀའ༌ ཏངས༌ཏེ༌ ཨིན༌པིན༌།
ACT 18:3 ཨ༌ཀུའི༌ལའ༌ དང༌ པརི༌སི༌ལ༌ གུན༌ ཙོགས༌ལ༌ པ༌འུ༌ལུའང༌ ཀུར༌ ཙེམས༌ཅེས༌སི༌ ལས༌ ཛད༌ཁན༌ ཨིན༌པ༌, པ༌འུ༌ལུ༌ ཁོང༌གུན༌ནི༌ ཁང༌པ༌ ཞུགས༌ཏེ༌ ཁོང༌གུན༌ ཉམ༌པོ༌ ལས༌ ཅོས༌།
ACT 18:4 ཤབ༌བད༌ རིམས༌སི༌ ཁོང༌ ཡ༌ཧུ༌དཱ༌པའེ༌ དུ༌ཁང༌ང༌ སྐྱོད༌ཏེ༌ ཡ༌ཧུ༌དཱ༌པ༌ དང༌ གརིས༌པ༌ གུན༌ལ༌ ཁོང༌ངི༌ ལོན༌བོའི༌ཀ༌ ཏད༌པ༌ ཁྱོང༌ཅུག༌ཅེས༌སི༌ རྩོན༌གྲུས༌ ཅོ༌ཨིན༌ ཁོང༌གུན༌ ཉམ༌པོ༌ གྲོས༌དུར༌ ཛད༌དད༌པིན༌།
ACT 18:5 སི༌ལས༌ དང༌ ཏི༌མོ༌ཐི༌ མ༌ཀེ༌དོ༌ནི༌ཡཱ༌ནེ༌ ལེབ༌བ༌ཅིག༌, པ༌འུ༌ལུའི༌ རང༌ངི༌ ཏུས༌ གང༌པོ༌ ཆོས༌ཤད༌ཨིན༌ ཡ༌ཧུ༌དཱ༌པ༌གུན༌ལ༌ ཡེ༌ཤུ༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོའེ༌ སྤང༌པོ༌ ཏང༌ཅེས༌སི༌ ནང༌ང༌ ཕུདས༌།
ACT 18:6 ཨིན༌ནའང༌ ཡ༌ཧུ༌དཱ༌པ༌གུན༌ནི༌ པ༌འུ༌ལུའ༌ གྱབ༌གལ༌ ཅོས༌ཏེ༌ ཁོང༌ངི༌ སྐོར༌ལ༌ ངན༌པ༌ ཟེར༌པ༌ ཁོང༌ངི༌ ཁོང༌རང༌ངི༌ ནམ༌ཟའ༌བོ༌ སྲུགས༌ཏེ༌ ཁོང༌གུན༌ལ༌ སྤང༌པུད༌ཨིན༌ མོལས༌, “སྡིག༌པ༌ ཅོ༌ཅེས༌པོའེ༌ ཁྱོ༌ཞའ༌ ཆད༌པ༌ ཕོག༌ན༌ ཁྱོ༌ཞ༌རང༌ངི༌ སྐྱོན༌ ཨིན༌, ངའེ༌ མན༌། ཏ༌ནེ༌ཕར༌ལ༌ ང༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཆོས༌ཤད༌ད༌ ཆའད༌།”
ACT 18:7 ཏེ༌ནེ༌ ཁོང༌ ཡ༌ཧུ༌དཱ༌པའེ༌ དུ༌ཁང༌ནེ༌ བིང༌ཏེ༌ དཀོན༌མཆོག༌ག༌ ཅོལ༌ཁན༌ནི༌ མི༌ ཏི༌ཏུས༌ ཡུས༌ཏུས༌ ཟེར༌ཁན༌ནི༌ ཁང༌པ༌ སྐྱོདས༌, ཀ༌བོ༌ དུ༌ཁང༌ངི༌ ལྡོའེ༌ཀ༌ ཡོད༌པིན༌།
ACT 18:8 ཏེ༌ དུ༌ཁང༌ངི༌ འུ༌སྐྱོང༌ ཀརིས༌པུས༌ ཟེར༌ཁན༌ དང༌ ཁོའེ༌ ནང༌ཚངས༌ གང༌པོའེ༌ གཙོ༌བོའེ༌ཀ༌ ཏད༌པ༌ ཁྱོངས༌, ཁོང༌གུན༌ མན༌པ༌ ཀོ༌རིན༌ཐི༌པ༌ མང༌པོ༌ཞིག༌གིའང༌ པ༌འུ༌ལུའི༌ ཆོས༌ ཚོར༌ཏེ༌ ཏད༌པ༌ ཁྱོངས༌, ཡང༌ ཁྲུས༌ལེནས༌།
ACT 18:9 ཞག༌ཤིག༌ ཚན༌ལ༌ ཞལ༌ཟིགས༌ཤིག༌གི༌ ནང༌ང༌ གཙོ༌བོ༌ ཡེ༌ཤུའི༌ པ༌འུ༌ལུའ༌ མོལས༌, “ཇིགས༌ མ༌ཇིགས༌, ཅུབ༌ཅད༌ཏེ༌ མ༌དུག༌ག༌ ཆོས༌ ཤོད༌།
ACT 18:10 ང༌ ཁྱོ༌རང༌ ཉམ༌པོ༌ ཡོད༌ ཡང༌ སུ༌ཞིག༌གིའང༌ ཁྱོ༌རང༌ང༌ ནོད༌སྐྱལ༌ མི༌ཉན༌, ཅིའ༌ཟེར༌ན༌ འི༌ གྱལ༌སའེ༌ ནང༌ང༌ ངའེ༌ཀ༌ ཏད༌པ༌ ཅོ༌ཅེས༌ལ༌ ངའེ༌ མི༌ མང༌པོ༌ཞིག༌ ལྡམས༌ཏེ༌ ཡོད༌།”
ACT 18:11 ཏེ༌བོའེ༌ཕིའ༌ པ༌འུ༌ལུ༌ ཏེ༌རུ༌ ལོ༌ ཅིག༌ ནང༌ ཕེད༌ དཀོན༌མཆོག༌གི༌ བཀའ༌ ཤད༌ཨིན༌ ཞུགས༌།
ACT 18:12 གལ༌ལི༌འོ༌ ཟེར༌ཁན༌བོ༌ ཨ༌ཀ༌ཡཱ༌ ཡུལ༌ཇོངས༌སི༌ ཀའ༌ལོན༌ འིན༌ནི༌ ཏུས༌ལ༌, པ༌འུ༌ལུའི༌ གྱབ༌གལ༌ལ༌ ཡ༌ཧུ༌དཱ༌པ༌གུན༌ ཅིག༌ སོང༌ཏེ༌ ཁོང༌ ཟུམས༌ཏེ༌ ཁྲིམས༌ཁུང༌ང༌ ཁྱེརས༌།
ACT 18:13 ཁོང༌གུན༌ནི༌ ཉད༌ཀལ༌ཏེ༌ ཟེརས༌, “འི༌ མི༌བོའེ༌ མི༌གུན༌ལ༌ དཀོན༌མཆོག༌ག༌ ཅོལ༌ཅེས༌སི༌ ཏེ༌ཟུག༌ ཚུལ༌ རིག༌གི༌ ལབ༌ཞའ༌ ཏང༌དུག༌, ཀ༌བོ༌ ང༌ཞའེ༌ བཀའ༌ཁྲིམས༌སི༌ གྱབ༌གལ༌ ཨིན༌ནོག༌།”
ACT 18:14 པ༌འུ༌ལུའི༌ མོལ༌ཅེས༌ ཅོའ༌ཅིག༌, གལ༌ལི༌འོའེ༌ ཡ༌ཧུ༌དཱ༌པ༌གུན༌ལ༌ ཟེརས༌, “ཀལ༌ཏེས༌ འི༌ མི༌བོའེ༌ རོམ༌པའེ༌ བཀའ༌ཁྲིམས༌ དང༌ གལ༌ཁན༌ནི༌ མི༌འོས༌པ༌ ཆུ༌ངུན༌ ཡ༌ ཆེན༌མོ༌ཞིག༌ ཅོས༌ཏེ༌ ཡོད༌པིན༌ན༌ ངའེ༌ ཁྱོ༌ཞའེ༌ སྐྱོན༌རྗོད༌ ཅོ༌ཁན༌བོ༌ ཉན༌ཅེས༌རག༌པ༌,
ACT 18:15 ཨིན༌ནའང༌ ཁྱོ༌ཞའེ༌ ཉད༌གལ༌བོ༌ ནི༌ ཁྱོ༌ཞ༌རང༌ངི༌ བཀའ༌ཁྲིམས༌, མིང༌ དང༌ སྤེ༌ར༌ གུན༌ནི༌ སྐོར༌ལ༌ ཨིན༌ནོག༌, ཏེ༌གུན༌ ཁྱོ༌ཞ༌རང༌གུན༌ནི༌ ཐག༌ཅོད༌། ངའེ༌ ཏེ༌ ཙོགས༌གུན༌ནི༌ཀ༌ ཁྲིམས༌ཅད༌ ཏང༌ང༌མེད༌།”
ACT 18:16 ཏེ༌ཟུག༌ ཟེར༌ཏེ༌ ཁོའེ༌ ཁོང༌གུན༌ ཁྲིམས༌ཁུང༌ནེ༌ ཕིངས༌ཏེ༌ ཏངས༌།
ACT 18:17 ཏེ༌ནེ༌ ཁོང༌གུན༌ནི༌ དུ༌ཁང༌ངི༌ འུ༌སྐྱོང༌ སོས༌ཐེ༌ནེས༌ ཟེར༌ཁན༌བོ༌ ཟུམས༌ཏེ༌ ཁྲིམས༌ཁུང༌ངི༌ སྣང༌ང༌ སྲན༌ཏྲེ༌ རྡུངས༌, ཨིན༌ནའང༌ གལ༌ལི༌འོའེ༌ ཏེ༌བོའེ༌ཀ༌ སྣང༌ང༌ མ༌ཏངས༌།
ACT 18:18 ཏུས༌བན༌ཤིག༌ ཀོ༌རིན༌ཐིའ༌ ཞུགས༌ཏེ༌ སྟིང༌ནེ༌ པ༌འུ༌ལུའི༌ ཏད༌པ༌ཅན༌གུན༌ལ༌ སྟིང༌ཇུག༌གི༌ ཇུ༌ ཞུས༌ཏེ༌ གྲུ༌ཟིང༌ངི༌ ནང༌ང༌ ཞོན༌ཏེ༌ སི༌རི༌ཡཱའེ༌ ཡུལ༌ཇོངས༌ལ༌ སྐྱོདས༌, ཁོང༌ ཉམ༌པོ༌ པརི༌སི༌ལ༌ དང༌ ཨ༌ཀུའི༌ལ༌ ཡོད༌པིན༌། གྲུ༌ཟིང༌ངི༌ ནང༌ང༌ ཆའེ༌སང༌ སྔུན༌ལ༌ དཀོན༌མཆོག༌ག༌ ཁ༌ཆད༌ ཛད༌ཏེ༌ ཡོད༌ཁན༌བོའེ༌ ཞས༌ཏེ༌ པ༌འུ༌ལུའི༌ ཀེན༌ཅརེ༌འ༌ ཟེར༌སའེ༌ ནང༌ང༌ ཁོང༌རང༌ངི༌ སྲ༌ བྲགས༌།
ACT 18:19 ཁོང༌གུན༌ ཨེ༌ཕེ༌སས༌ལ༌ ལེབ༌བ༌ཅིག༌ པ༌འུ༌ལུའི༌, ཨ༌ཀུའི༌ལའ༌ དང༌ པརི༌སི༌ལ༌ ཚོའེ༌ ཐའ༌མ༌ བོརས༌ ཡང༌ ཁོང༌ ཡ༌ཧུ༌དཱ༌པའེ༌ དུ༌ཁང༌ང༌ སྐྱོད༌ཏེ༌ ཡ༌ཧུ༌དཱ༌པ༌གུན༌ ཉམ༌པོ༌ སུང༌རབས༌སི༌ སྐོར༌ལ༌ གྲོས༌དུར༌ ཛདས༌།
ACT 18:20 ཁོང༌གུན༌ནི༌ པ༌འུ༌ལུའ༌ ཏ༌རུང༌ མང༌ང༌ ཞུགས༌ ཟེར༌ཏེ༌ ཞུ༌ཝ༌ ཕུལས༌པ༌, ཁོང༌ མ༌ཞུགས༌།
ACT 18:21 ཨིན༌ནའང༌ ཁོང༌ དུ༌ཁང༌ནེ༌ བིང༌ཏེ༌ སྐྱོད༌ ཟ༌ནེ༌ མོལས༌, “ཀལ༌ཏེས༌ དཀོན༌མཆོག༌གི༌ ཐུག༌གོངས༌ ཡོད༌ན༌ ང༌ ཁྱོ༌ཞ༌གུན༌ ཡོད༌ས༌ ཡང༌སྐྱར༌ ཡོང༌ཨིན༌།” ཏེ༌ནེ༌ ཁོང༌ གྲུ༌ཟིང༌ང༌ ཞོན༌ན༌ ཛད༌ཏེ༌ ཨེ༌ཕེ༌སས༌ནེ༌ སྐྱོདས༌།
ACT 18:22 ཚོའེ༌ ཐའ༌མའེ༌ གྱལ༌ས༌ ཀཱེ༌སར༌རིའ༌ ལེབ༌བ༌ཅིག༌, ཁོང༌ ཡེ༌རུ༌ཤ༌ལེམ༌མ༌ སྐྱོད༌ཏེ༌, ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ལ༌ ཐུག༌། ཏེ༌ནེ༌ ཨན༌ཏི༌ཡོག༌ གྱལ༌ས༌ ཆོགས༌ལ༌ སྐྱོདས༌།
ACT 18:23 ཨན༌ཏི༌ཡོག༌ག༌ ཏུས༌བན༌ཤིག༌ ཞུགས༌ཏེ༌ སྟིང༌ནེ༌, ཁོང༌ གཱ༌ལ༌ཏི༌ཡ༌ དང༌ ཕརིག༌འེ༌ཡཱ༌ གྱལ༌ཁག༌གི༌ ཡུལ༌ ཚང༌མ༌ལ༌ སྐྱོད༌ཏེ༌, ལོབ༌ཕྲུགས༌གུན༌ནི༌ ཏད༌པ༌ སྟན༌པོ༌ ཅོའ༌ ཛདས༌།
ACT 18:24 ཏེན༌ན༌ ཏུས༌ལ༌ ཨ༌ལེག༌ཟན༌དྲིའ༌པ༌ ཨ༌པོ༌ལོས༌ ཟེར༌ཁན༌ནི༌ ཡ༌ཧུ༌དཱ༌པ༌ཞིག༌, ཨེ༌ཕེ༌སས༌ལ༌ ལེབ༌, ཁོ༌ གྱལ༌ལ༌ སིལ༌ཁན༌ སྤེ༌ར༌ ཏང༌ང༌ ཁས༌པ༌ ཡང༌ ཁོའ༌ ཡ༌ཧུ༌དཱ༌པའེ༌ སུང༌རབས༌སི༌ ནང༌ང༌ ཧ༌གོ༌ ཐར༌ཁྱེལ༌ ཡོད༌པིན༌།
ACT 18:25 ཁོའ༌ གཙོ༌བོའེ༌ ཐར༌པའེ༌ ལམ༌མི༌ སྐོར༌ལ༌ ལབ༌ཞའ༌ ཐོབ༌ཏེ༌ སེམས༌ཤུགས༌ དང༌ སྟོབས༌ ཆེན༌མོ༌ ཉམ༌པོ༌ ཡེ༌ཤུའི༌ སྐོར༌ལ༌ ཤད༌ཁན༌གུན༌ དེན༌བ༌ ཨིན༌པིན༌, ཨིན༌ནའང༌ ཁོའ༌ ཡོ༌ཧཱ༌ནན༌ནི༌ སལ༌ཁན༌ནི༌ ཁྲུས༌ ཅིག༌པོའེ༌ སྐོར༌ མ༌ནེ༌ གྱུས༌མེད༌པིན༌།
ACT 18:26 ཁོའེ༌ དུ༌ཁང༌ངི༌ ནང༌ང༌ དཀོན༌མཆོག༌གི༌ བཀའ༌ མ༌ སྟོབས༌ཤུགས༌ ཉམ༌པོ༌ ཤད༌ཅེས༌ གོ༌ཟུགས༌། པརི༌སི༌ལ༌ དང༌ ཨ༌ཀུའི༌ལའ༌, ཨ༌པོ༌ལོས༌སི༌ ཆོས༌ཤད༌ཁན༌བོ༌ ཚོར༌ར༌ཅིག༌, ཁོང༌གུན༌ནི༌ ཁོ༌ འ༌ཟམ༌ཤིག༌ག༌ ཁྱེར༌ཏེ༌ དཀོན༌མཆོག༌གི༌ ཐར༌པའེ༌ ལམ༌མི༌ སྐོར༌ གང༌པོ༌ དང༌ མང༌ང༌ སལ༌པོ༌ ཅོས༌ཏེ༌ ཧ༌གོ༌ཅུགས༌།
ACT 18:27 ཨ༌པོ༌ལོས༌སི༌ ཨ༌ཀ༌ཡཱ༌ སྐྱོད༌ཅེས༌སི༌ དོད༌པ༌ སྔོན༌ ཅུགས༌པ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ནི༌ ཁོའ༌ ཆ༌ཅེས༌ལ༌ སྤོས༌པ༌ ཏངས༌ཏེ༌ ཨ༌ཀ༌ཡཱ༌ ཡོད༌ཁན༌ནི༌ ལོབ༌ཕྲུགས༌གུན༌ལ༌ ཨ༌པོ༌ལོས༌ལ༌ གའ༌སུས༌ ཞུ༌ཅེས༌ལ༌ ཨི༌གེ༌ བྲིས༌། ཏེ༌རུ༌ ལེབ༌བ༌ཅིག༌, གཙོ༌བོའེ༌ ཐུག༌རྗེ༌ གྱུད༌ཏེ༌ ཏད༌པ༌ ཁྱོངས༌ཁན༌གུན༌ལ༌ ཁོང༌ མ༌ ཕན༌ཐོགས༌ཅན༌ གྱུར༌།
ACT 18:28 ཁོང༌ངི༌ མི༌མངས༌སི༌ དུན༌ལ༌ ཡ༌ཧུ༌དཱ༌པ༌གུན༌ལ༌, ཡེ༌ཤུ༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ ཏམ༌པའེ༌ སུང༌རབས༌ གྱུད༌ཏེ༌ སྟན༌ཨིན༌, ཁོང༌གུན༌ལ༌ ཕམས༌ཀལ༌ལད༌པིན༌།
ACT 19:1 ཨ༌པོ༌ལོས༌ ཀོ༌རིན༌ཐི༌ གྱལ༌སའེ༌ ནང༌ང༌ ཡོད༌ ཟ༌ནེ༌, པ༌འུ༌ལུ༌ ཨ༌སི༌ཨཱ༌ ཡུལ༌ཇོངས༌སི༌ ནང༌ཀུག༌གི༌ ལམ༌གུན༌ གྱུད༌ཏེ༌ ཨེ༌ཕེ༌སས༌ལ༌ ལེབ༌, ཏེ༌རུ༌ ཁོང༌ང༌ ལོབ༌ཕྲུགས༌ ཁ༌ཅིག༌ ཐུག༌།
ACT 19:2 པ༌འུ༌ལུའི༌ ཁོང༌གུན༌ལ༌ ཏྲིས༌, “ཁྱོ༌ཞའེ༌ ཏད༌པ༌ ཅོའ༌ཅིག༌ ཁྱོ༌ཞའེ༌ཀ༌ ཏམ༌པའེ༌ ཐུག༌ཉིད༌ བབས༌ས༌?” ཁོང༌གུན༌ནི༌ ལན༌ཏངས༌, “ང༌ཞའ༌ མ༌ཐོབ༌ལེ༌, ང༌ཞའ༌ ཏམ༌པའེ༌ ཐུག༌ཉིད༌དི༌ སྐོར༌ལ༌ ཚོར༌ ཁོ༌རང༌ མ༌ཚོར༌ལེ༌།”
ACT 19:3 ཏེ༌ནེ༌ པ༌འུ༌ལུའི༌ ཏྲིས༌, “ཁྱོ༌ཞ༌གུན༌ནི༌ ཀ༌ཟུག༌ ཁྲུས༌ཤིག༌ ལེན༌པིན༌?” ཁོང༌གུན༌ནི༌ ལན༌ཏངས༌, “ཡོ༌ཧཱ༌ནན༌ནི༌ ཁྲུས༌།”
ACT 19:4 པ༌འུ༌ལུའི༌ མོལས༌, “ཡོ༌ཧཱ༌ནན༌ནི༌ ཁྲུས༌སལ༌ཁན༌བོ༌ ནི༌ གྱོད༌པ༌ ཅོ༌ཅེས༌སི༌ ཕིའ༌ ཨིན༌ནོག༌, ཁོང༌ངི༌ མི༌གུན༌ལ༌, ཁོང༌ངི༌ སྟིང༌ནེ༌ སྐྱོད༌ཅེས༌ཅན༌བོའེ༌ཀ༌ ཏད༌པ༌ ཅོ༌ཅེས༌ལ༌ མོལས༌, ཀ༌བོ༌ ནི༌ ཡེ༌ཤུ༌ ཨིན༌ནོག༌།”
ACT 19:5 ཏེ༌བོ༌ ཚོར༌ཏེ༌ ཁོང༌གུན༌ནི༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ ཁྲུས༌ལེནས༌།
ACT 19:6 པ༌འུ༌ལུའི༌ ཁོང༌གུན༌ནི༌ གོའེ༌ཀ༌ ཆག༌ བོར༌ར༌ཅིག༌, ཁོང༌ ཚང༌མའེ༌ཀ༌ ཏམ༌པའེ༌ ཐུག༌ཉིད༌ བབས༌། ཁོང༌གུན༌ནི༌ སྐད༌ སོ༌སོའེ༌ ནང༌ང༌ སྤེ༌ར༌ ཏངས༌ ཡང༌ ལུང༌སྟན༌ ཤདས༌།
ACT 19:7 ཁོང༌གུན༌ནི༌ ཀྲངས༌ཀ༌ ཧ༌ལམ༌ རྕུག༌ཉིས༌ ཡོད༌པིན༌།
ACT 19:8 པ༌འུ༌ལུ༌ ཡ༌ཧུ༌དཱ༌པའེ༌ དུ༌ཁང༌ངི༌ ནང༌ང༌ སྐྱོད༌ཏེ༌ ཧ༌ལམ༌ ཟླ༌ཝ༌ སུམ༌, མ༌ ཧམ༌པ༌ ཉམ༌པོ༌ ཆོས༌ཤད༌ཏེ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཉན༌ཁན༌གུན༌ནི༌ ཏད༌པ༌ ཅོ༌ཅེས༌སི༌ མ༌ ཤེས༌རབས༌ཅན༌ གྲོས༌དུར༌ ཅོའ༌ ཛདས༌།
ACT 19:9 ཨིན༌ནའང༌ ཁ༌ཅིག༌གི༌ སེམས༌ མ༌སྐྱོང༌པོ༌ ཅོས༌ཏེ༌ ཏད༌པ༌ ཁྱོང༌ཅེས༌ལ༌ མ༌ཐད༌, ཡང༌ མི༌མངས༌སི༌ དུན༌ལ༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌གུན༌ནི༌ སྐོར༌ལ༌ སྤེ༌ར༌ ངན༌པ༌ མང༌པོ༌ ཟེརས༌། ཏེ༌བོའེ༌ཕིའ༌ པ༌འུ༌ལུའི༌ ཁོང༌གུན༌ བོར༌ཏེ༌ ལོབ༌ཕྲུགས༌གུན༌ ཁོང༌རང༌ ཉམ༌པོ༌ ཁྲིད༌ཏེ༌ ཁྱེརས༌, ཡང༌ ཏྲེ༌ར༌ནས༌, ལོབ༌ཇོང༌ ཅོ༌སའེ༌ ནས༌སའེ༌ ནང༌ང༌ ཞག༌ཏང༌ གྲོས༌དུར༌ ཛད༌དད༌པིན༌།
ACT 19:10 ཏེ༌ གྲོས༌དུར༌རི༌ ཚིར༌ཀ༌བོ༌ ཧ༌ལམ༌ ལོ༌ ཉིས༌ ཚག༌པ༌ གྲུལ༌པ༌, ཨ༌སི༌ཨཱ༌ ཡུལ༌ཇོངས༌སི༌ ནང༌ང༌ དུག༌ཁན༌ནི༌ ཡ༌ཧུ༌དཱ༌པ༌ དང༌ གརིས༌པ༌ གུན༌ལ༌ གཙོ༌བོའེ༌ བཀའ༌ ཚོར༌།
ACT 19:11 དཀོན༌མཆོག༌གི༌ པ༌འུ༌ལུ༌ གྱུད༌ཏེ༌ མ༌ ཧ༌ལས༌ཤེས༌སི༌ ཛད༌པ༌གུན༌ ཛད༌དད༌པིན༌།
ACT 19:12 སྤེར༌ན༌ པ༌འུ༌ལུའི༌ ཆག༌ ཐུག༌ཁན༌ནི༌ ཆག༌ཕིས༌ ཡ༌ ཀོས༌ལག༌ མི༌ ཟུ༌མོ༌ ཡོང༌ཁན༌གུན༌ནི༌ ཐུག༌ན༌ ཟུ༌མོ༌ གྱལ༌ཅེས༌ ཡང༌ རྡུད༌ ཞུགས༌ཏེ༌ ཡོད༌ཁན༌གུན༌ བིང༌ཏེ༌ ཆའད༌པིན༌།
ACT 19:13 གྲོང༌ཁྱེར༌ནེ༌ གྲོང༌ཁྱེར༌ལ༌ རྡུད༌ ཞུགས༌ཁན༌གུན༌ ཕིང༌ང༌ལ༌ ཆའ༌ཁན༌ནི༌ ཡ༌ཧུ༌དཱ༌པ༌ ཁ༌ཅིག༌གི༌ ཡེ༌ཤུའི༌ ཚན༌ ཀོལ༌ཏེ༌ རྡུད༌གུན༌ ཕིང༌ཅེས༌སི༌ རྩོན༌གྲུས༌ ཅོས༌ཏེ༌ ཟེརས༌, “པ༌འུ༌ལུའི༌ ཆོས༌ཤད༌ཁན༌ནི༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ བིང༌ཏེ༌ ཆ༌ཅེས༌ལ༌ ངའེ༌ བཀའ༌ ཏང༌ངད༌།”
ACT 19:14 ཡ༌ཧུ༌དཱ༌པའེ༌ བླ༌མ༌ འུ༌སྐྱོང༌ སྐེ༌ཝཱ༌ ཟེར༌ཁན༌ནི༌ བུ༌ཚ༌ རྡུན༌ཀོའེ༌ ཏེ༌ཟུག༌ ཅོའད༌པིན༌།
ACT 19:15 ཨིན༌ནའང༌ ཞག༌ཤིག༌ རྡུད༌པོའེ༌ ཁོང༌གུན༌ལ༌ ཟེརས༌, “ང༌ ཡེ༌ཤུ༌ ཤེས༌སད༌, ཡང༌ པ༌འུ༌ལུའང༌, ཨིན༌ནའང༌ ཁྱོ༌རང༌གུན༌ སུ༌ ཨིན༌?”
ACT 19:16 ཏེ༌ནེ༌ ཏེ༌ རྡུད༌ ཞུགས༌ཁན༌ནི༌ མི༌བོ༌ ཁོང༌གུན༌ནི༌ཀ༌ ལྕེབས༌, ཁོང༌གུན༌ནི༌ སང༌ ཤེད༌ཆེའ༌ སོང༌ཏེ༌ ཁོང༌གུན༌ལ༌ སྲན༌ཏྲེ༌ རྡུངས༌པ༌ ཁོང༌གུན༌ ཁྲག༌ བིང༌ཨིན༌ ལྗེར༌ཉལ༌ལ༌ ཏེ༌ ཁང༌པ༌ནེ༌ ཤོར༌།
ACT 19:17 ཏེ༌ ནས༌ཚུལ༌བོ༌ ཨེ༌ཕེ༌སས༌སི༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌ དང༌ གརིས༌པ༌ གུན༌ལ༌ གྱུས༌ཆའ༌ཅིག༌, ཁོང༌གུན༌ནི༌ གཙོ༌བོ༌ ཡེ༌ཤུའི༌ ཇིགས༌སི༌ ནང༌ང༌, ཁོང༌ངི༌ ཚན༌ལ༌ རྩི༌ཝ༌ ཀྲག༌པོ༌ ཏངས༌།
ACT 19:18 ཏད༌པ༌ ཁྱོང༌ཁན༌ནི༌ མི༌ མང༌པོ༌ ཡོངས༌ཏེ༌ རང༌རང༌ངི༌ ལས༌ ངན༌པ༌གུན༌ མི༌ཚང༌མའེ༌ དུན༌ལ༌ ཤད༌ཏེ༌ གྱོད༌པ༌ ཅོས༌།
ACT 19:19 ཡང༌ ཆོས༌ངན༌ ཅོ༌ཁན༌གུན༌ནི༌ རང༌ངི༌ ཆོས༌ངན༌ནི༌ སྤེ༌ཆ༌གུན༌ ཁྱོངས༌ཏེ༌ མི༌ཚང༌མའེ༌ དུན༌ལ༌ མེའ༌ ཏུགས༌, ཏེ༌ སྤེ༌ཆ༌གུན༌ནི༌ རིན༌ཚད༌པོ༌ རྩིས༌པ༌, མུལ༌ལི༌ གྱིར༌མོ༌ སྟོང༌ ལྔབ༌ཅུ༌ བིང༌།
ACT 19:20 ཏེ༌བོའེ༌ ཞས༌ཏེ༌ གཙོ༌བོའེ༌ བཀའ༌ ཀ༌རུང༌ས༌ ཕེལ༌ ཡང༌ བྲས༌བུ༌ ཀྲག༌པོ༌ སྨིན༌།
ACT 19:21 ཏེ༌ ཚང༌མ༌ ཇུངས༌ཏེ༌ སྟིང༌ནེ༌ པ༌འུ༌ལུའི༌ མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱ༌ ཡུལ༌གུན༌ གྱུད༌ཏེ༌ ཡེ༌རུ༌ཤ༌ལེམ༌མ༌ ཆ༌ཅེས༌ལ༌ ཐག༌ཅདས༌, ཡང༌ ཁོང༌ངི༌ མོལས༌, “ཏེ༌རུ༌ དུགས༌ཏེ༌ སྟིང༌ནེ༌ ང༌ རོམ༌མའང༌ ཆ༌གོས༌།”
ACT 19:22 པ༌འུ༌ལུའི༌ ཁོང༌ངི༌ ཕྲོ༌པ༌ ཏི༌མོ༌ཐི༌ དང༌ ཨེ༌རས༌ཏུས༌ གུན༌ མ༌ཀེ༌དོ༌ནི༌ཡཱ༌ ལམ༌ཅུགས༌ ཡང༌ ཁོང༌རང༌ ཨ༌སི༌ཨཱ༌ ནང༌ང༌ ཏུས༌བན༌ཤིག༌ ཞུགས༌།
ACT 19:23 ཏེན༌ན༌ ཏུས༌ལ༌ ཨེ༌ཕེ༌སས༌སི༌ ནང༌ང༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌ནི༌ གྱབ༌གལ༌ལ༌ མ༌ ཧི༌ལིངས༌ སྲན༌ཏྲེ༌ ཕིངས༌།
ACT 19:24 དེ༌མེ༌ཏྲི༌འུས༌ ཟེར༌ཁན༌ནི༌ སེར༌གར༌ ཀ༌བོའེ༌ ཨར༌ཏི༌མིས༌ ཆོད༌ཁང༌ངི༌ ཟོ༌གུན༌ མུལ༌ལ༌ ཅོས༌ཏེ༌ ཙོང༌ངད༌པིན༌། ཁོའེ༌ ཚོང༌བོ༌ གྱལ༌ལ༌ གྲུལ༌པ༌, ལས༌མི༌ ཟོ༌པ༌ མང༌པོ༌ཞིག༌ ལས༌སི༌ ཕིའ༌ བོར༌ཏེ༌ ཡོད༌པིན༌།
ACT 19:25 ཁོའེ༌ རང༌ངི༌ ཕྲོ༌པ༌ ཟོ༌པ༌ ཚང༌མ༌ ཡང༌ ཚོང༌ དང༌ བྲེལ༌ཏེ༌ ཡོད༌ཁན༌ནི༌ མི༌གུན༌ བོད༌ཏེ༌ ཟེརས༌, “ལས༌ཅེད༌པ༌ ཕྲོ༌པ༌གུན༌, འི༌ ལས༌པོ༌ གྱུད༌ཏེ༌ ང༌དང༌ང༌ ཡོང༌གོ༌ མང༌པོ༌ ཡོད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
ACT 19:26 ཨིན༌ནའང༌ ཁྱོ༌ཞ༌གུན༌ནི༌ ཐོང༌ཨིན༌ ཡང༌ ཚོར༌ཨིན༌ ཨིན༌ནོག༌, ཏེ༌ མི༌ པ༌འུ༌ལུའི༌ ཨེ༌ཕེ༌སས༌ མ༌ཚད༌ ཨ༌སི༌ཨཱའེ༌ ཡུལ༌ གང༌པོའེ༌ ནང༌ང༌ མི༌ ལག༌པ༌ནེ༌ ཅོས༌ཁན༌ནི༌ སྐུན༌དྲ༌གུན༌ དེན༌བའེ༌ ལྷ༌ལྷ༌མོ༌ གུན༌ མ༌ནོག༌ ཟེར༌ཏེ༌ མི༌ མང༌པོའ༌ ཁོའེ༌ ཤད༌ཁན༌བོའེ༌ཀ༌ ཏད༌པ༌ ཁྱོང༌ཅུགས༌།
ACT 19:27 མི༌གུན༌ནི༌ ང༌དང༌ངི༌ ཟོ༌ལས༌པོའ༌ ཀུས༌པ༌ ཅོ༌ཅེས༌པོ༌ ཕང༌ཅེས༌སི༌ ཇིགས༌པ༌ མ༌ཚད༌, ཇིགས༌པོ༌ ཨར༌ཏི༌མིས༌ ལྷ༌མོའེ༌ ཆོད༌ཁང༌ངི༌ སྐོར༌ལའང༌ སྤེ༌ར༌ རྩོག༌པོ༌གུན༌ ཟེར༌ཨིན༌། ཡང༌ འི༌ ཡུལ༌ གང༌པོ༌ མན༌པ༌, ཇིག༌རྟེན༌ གང༌པོའེ༌ ནང༌ང༌ འི༌ ལྷ༌མོའ༌ ཅོལ༌ཁན༌གུན༌ནིའང༌ ཁོང༌ང༌ ལྷ༌མོ༌ ཙོགས༌ལ༌ རྩི༌ཝ༌ མི༌ཏང༌།”
ACT 19:28 ཏེ༌ ཚང༌མ༌ ཚོར༌ར༌ཅིག༌ ཟོ༌ལས༌པ༌གུན༌ལ༌ མ༌སྲན༌ཏྲེ༌ སྲོ༌ ཡོངས༌ཏེ༌ ཀུ༌ཅོ༌ ཏང༌ཨིན༌ ཟེརས༌, “ཨེ༌ཕེ༌སས༌པའེ༌ ལྷ༌མོ༌ ཨར༌ཏི༌མིས༌ མ༌ ཇིགས༌པོ༌ ཨིན༌།”
ACT 19:29 ཐོང༌ཨིན༌ ཐོང༌ཨིན༌ དང༌ གྱལ༌ས༌ གང༌པོའེ༌ ནང༌ང༌ ནས༌ལུག༌ རྩོག༌པོ༌ སོང༌, མི༌གུན༌ནི༌ མ༌ཀེ༌དོ༌ནི༌ཡཱ༌པ༌ པ༌འུ༌ལུའི༌ བེས༌སི༌ ཕྲོ༌པ༌ གཱ༌ཡུས༌ དང༌ ཨ༌རིས༌ཏར༌ཀུས༌ ཟུམས༌ཏེ༌ དྲུད༌ཨིན༌ མི༌གུན༌ ཛོམས༌སེ༌ ནས༌ས༌ ཁྱེརས༌།
ACT 19:30 པ༌འུ༌ལུའང༌ མི༌ཚོགས༌སི༌ ཕྲོའ༌ སྐྱོད༌ཉིན༌ ཡོད༌པིན༌, ཨིན༌ནའང༌ ལོབ༌ཕྲུགས༌གུན༌ནི༌ སྒགས༌ཏེ༌ སྐྱོད༌ མ༌ཅུགས༌།
ACT 19:31 ཡང༌ པ༌འུ༌ལུའི༌ ཛ༌འོ༌ ཏེ༌ གྱལ༌ཁག༌གི༌ སྤོན༌བོ༌ ཁ༌ཅིག༌གིའང༌ ཁོང༌ང༌ མི༌ཚོགས༌ ཛོམས༌ས༌ མ༌སྐྱོད༌ ཟེར༌ཏེ༌ ཞུ༌ཝ༌ ཕུལ༌ཨིན༌ ལོན༌ ཀལས༌།
ACT 19:32 མི༌ཚོགས༌སི༌ ནང༌ང༌ ཧི༌ལིངས༌ ཆེན༌མོ༌ བིང༌, མི༌ སོ༌སོའེ༌ སྤེ༌ར༌ སོ༌སོ༌ ཟེར༌ཨིན༌ ཀུ༌ཅོ༌ ཏང༌ངད༌པིན༌, ཡང༌ མང༌ཆེའ༌བོའ༌ ཁོང༌གུན༌ ཏེ༌རུ༌ ཅི༌ཕིའ༌ ཡོངས༌ཏེ༌ ཨིན༌ཁན༌བོའང༌ གྱུས༌ མེད༌པིན༌།
ACT 19:33 ཏེ༌ ནས༌ལུག༌པོ༌ ཧ༌གོ༌ཅུག༌ཅེས༌ལ༌ ཡ༌ཧུ༌དཱ༌པ༌གུན༌ནི༌ ཨ༌ལེག༌ཟན༌དེར༌ མི༌ཚོགས༌སི༌ དུན༌ལ༌ རིལས༌། ཁོའེ༌ མི༌གུན༌ལ༌ ཅུབ༌ཅད༌ཅེས༌ལ༌ སྟགས༌ ཅོས༌ཏེ༌ སྤེ༌ར༌ ཟེར༌ཅེས༌སི༌ རྩོན༌གྲུས༌ ཅོས༌།
ACT 19:34 ཨིན༌ནའང༌ མི༌གུན༌ནི༌ ཁོ༌ ཡ༌ཧུ༌དཱ༌པ༌, ཨར༌ཏི༌མིས༌ལ༌ མ༌རྩི༌ཁན༌ ཨིན༌ཁན༌བོ༌ ཤེས༌ས༌ཅིག༌, མི༌ཚང༌མའེ༌ ཅིག༌ སོང༌ཏེ༌ ཆུ༌ཚོད༌ ཉིས༌ ཟམ༌ ཀུ༌ཅོ༌ ཏང༌ཨིན༌ ཟེརས༌, “ཨེ༌ཕེ༌སས༌པའེ༌ ལྷ༌མོ༌ ཨར༌ཏི༌མིས༌ ཇིགས༌པོ༌ ཨིན༌།”
ACT 19:35 ཨིན༌ནའང༌ གྱལ༌སའེ༌ སྤོན༌བོ༌བོའེ༌, མི༌ཚོགས༌པོའ༌ ཅུབ༌ཅད༌ཅུག༌ཉན༌ ཡང༌ ཟེརས༌, “ཨེ༌ཕེ༌སས༌པ༌གུན༌, ཨེ༌ཕེ༌སས༌སི༌ གྱལ༌སའ༌, ལྷ༌མོ༌ ཨར༌ཏི༌མིས༌སི༌ ཆོད༌ཁང༌ དང༌ ནམ༌ཁའ༌ནེ༌ བབས༌ཁན༌ནི༌ ཁོང༌ངི༌ སྐུན༌དྲའ༌ སྲུང༌ཁན༌ ཨིན༌ཁན༌བོ༌ ཚང༌མ༌ལ༌ གྱུས༌ཨིན༌ནོག༌།
ACT 19:36 ཏེ༌ དེན༌བ༌གུན༌ལ༌ སུ༌ཞིག༌གིའང༌ གྱབ༌གལ༌ ཅོ༌མི༌ཉན༌ཅེས༌པོའེ༌, ཁྱོ༌ཞའ༌ ཚང༌མ༌ ཅུབ༌ཅད༌ཏེ༌ དུག༌ཤིག༌ ཡང༌ རིང༌གྱོགས༌སི༌ ནང༌ང༌ སམ༌བ༌ མེད༌ཁན༌ནི༌ ལས༌ མ༌ཅོ༌ཤིག༌།
ACT 19:37 ཁྱོ༌ཞའེ༌ ཟུམས༌ཏེ༌ འི༌ཀ༌ ཁྱོང༌ཁན༌གུན༌ནི༌ ང༌ཏི༌ ལྷ༌མོའ༌ དད༌ལོག༌ མ༌ ཅོས༌ཏོག༌ ཡ༌ ཁོང༌ངི༌ ཆོད༌ཁང༌ མ༌ ཅོམས༌ཏོག༌།”
ACT 19:38 “ཀལ༌ཏེས༌ སེར༌གར༌ དེ༌མེ༌ཏྲི༌འུས༌ དང༌ ཁོའེ༌ ཕྲོ༌པ༌ ཟོ༌པ༌གུན༌ནི༌ ཁོང༌གུན༌ནི༌ ཁྲིམས༌ ཅགས༌ཏོག༌ སམ༌མད༌ན༌, ཁྲིམས༌ཁུང༌ ཕེས༌ཏེ༌ ཁྲིམ༌སྤོན༌གུན༌ ཡོད༌ཏེ༌ ཨིན༌ནོག༌, ཏེ༌རུ༌ ཁོང༌གུན༌ནི༌ གྱབ༌གལ༌ལ༌ ཤགས༌ ཏང༌ཉན༌ཅེས༌ ཨིན༌ནོག༌།
ACT 19:39 ཀལ༌ཏེས༌ ཁྱོ༌ཞ༌གུན༌ལ༌ ཁོང༌གུན༌ནི༌ གྱབ༌གལ༌ལ༌ ཞན༌ཡང༌ སྐྱོན༌རྗོད༌ ཡོད༌ན༌ ཏེ༌གུན༌ནའང༌ ཏེ༌ ཁྲིམ༌སྤོན༌གུན༌ནི༌ ཐག༌ཅད༌ ཉན༌ཅེས༌ ཨིན༌ནོག༌།
ACT 19:40 དི༌རིང༌ ཇུང༌ཁན༌ ཚང༌མའེ༌ སྟིང༌ནེ༌ རོམ༌པའེ༌ ཝང༌སྲུལ༌པའེ༌ ང༌དང༌ང༌ ཧི༌ལིངས༌ བིང༌ཅུག༌ཅེས༌ལ༌ ཉད༌གལ༌ ཀལ༌ཅེས༌སི༌ ཇིགས༌པ༌ ཨིན༌ནོག༌། འི༌ ཧི༌ལིངས༌ ཕིང༌ཅེས༌པོའེ༌ ཕིའ༌ ཅའང༌ གྱུན༌ཚན༌ གྱལ༌ལ༌ཞིག༌ མེད༌པ༌ ང༌དང༌ངི༌ ཅི༌ ལན༌ཏང༌ཨིན༌།”
ACT 19:41 ཏེ༌ཟུག༌ ཟེར༌ཏེ༌ སྟིང༌ནེ༌ ཁོའེ༌ ཏེ༌ མི༌ཚོགས༌པོ༌ ཤོལ༌ཅུགས༌།
ACT 20:1 ཧི༌ལིངས༌ ཚང༌མ༌ མེད༌ཁན༌ ཆའ༌ཅིག༌, པ༌འུ༌ལུའི༌ ལོབ༌ཕྲུགས༌གུན༌ བོད༌ད༌ ཛད༌ཏེ༌ ཁོང༌གུན༌ལ༌ སྤོས༌པ༌ སལས༌, ཡང༌ སྟིང༌ཇུག༌གི༌ ཇུ༌ མོལ༌ཏེ༌ ཁོང༌ མ༌ཀེ༌དོ༌ནི༌ཡཱ༌ སྐྱོདས༌།
ACT 20:2 བེས༌སི༌ ཏུས༌ལ༌ ཁོང༌ ལེབས༌སེ༌ ནས༌ས༌གུན༌ནི༌ ནང༌ང༌ ཏད༌པ༌ཅན༌གུན༌ལ༌ སྤོས༌པ༌ སལ༌ཨིན༌ སྐྱོདས༌, གརིས༌སི༌ ཡུལ༌ཇོངས༌ལ༌ ལེབས༌ཏེ༌ སྟིང༌ནེ༌
ACT 20:3 ཏེ༌རུ༌ ཁོང༌ ཟླ༌ཝ༌ སུམ༌ ཞུགས༌། ཁོང༌ གྲུ༌ཟིང༌ངི༌ ནང༌ང༌ སི༌རི༌ཡཱ༌ སྐྱོད༌ཅེས༌སི༌ གྲལ༌གྲིག༌ ཅོའ༌ ཟ༌ནེ༌, ཡ༌ཧུ༌དཱ༌པ༌གུན༌ནི༌ ཁོང༌ སད༌ཅེས༌སི༌ ཅུས༌ངན༌ ལྡིངས༌ཁན༌བོ༌ ཚོར༌པ༌, ཁོང༌ངི༌ ལོགས༌ཏེ༌ མ༌ཀེ༌དོ༌ནི༌ཡཱ༌ གྱུད༌ཏེ༌ ཆ༌ཅེས༌ལ༌ ཐག༌ཅདས༌།
ACT 20:4 ཁོང༌ ཉམ༌པོ༌ བེ༌རེ༌ཨཱ༌ནེ༌ པིར༌རུའི༌ བུ༌ཚའ༌ སོ༌པ༌ཏེར༌, ཐེ༌ས༌ལོ༌ནི༌ཀ༌ནེ༌ ཨ༌རིས༌ཏར༌ཀུས༌ དང༌ སེ༌ཀུན༌དུས༌, དེར༌བེ༌ནེ༌ གཱ༌ཡུས༌, ཨ༌སི༌ཨཱའེ༌ ཡུལ༌ཇོངས༌ནེ༌ ཏི༌ཁི༌ཀུས༌ དང༌ ཏྲོ༌ཕི༌མུས༌ ཡང༌ ཏི༌མོ༌ཐི༌ གུན༌ ཆ༌ཅེས༌ ཡོད༌པིན༌།
ACT 20:5 ཁོང༌གུན༌ པ༌འུ༌ལུའི༌ སང༌ སྔུན༌ལ༌ སོང༌ཏེ༌ ཏྲོ༌འེས༌ གྱལ༌སའེ༌ ནང༌ང༌ ང༌ཞའེ༌ ཕིའ༌ སྲུངས༌ཏེ༌ དུགས༌།
ACT 20:6 སྐྱུར༌ མེད༌ཁན༌ནི༌ ཏ༌གི༌ ཏུས༌ཆེན༌ནི༌ སྟིང༌ནེ༌ ང༌ཞ༌གུན༌ ཕི༌ལི༌པི༌ནེ༌ གྲུ༌ཟིང༌ང༌ ཞོན༌ཏེ༌ སོང༌པིན༌, ཡང༌ ཞག༌ ལྔའེ༌ སྟིང༌ནེ༌ ཏྲོ༌འེས༌ གྱལ༌སའ༌ ལེབས༌ཏེ༌ ཞན༌མ༌ ཕྲོ༌པ༌གུན༌ ཐུག༌, ང༌ཞའ༌ ཏེ༌རུ༌ ཞག༌པོ༌ རྡུན༌ དུགས༌པིན༌།
ACT 20:7 ཟ༌ཉི༌མའེ༌ ཞག༌ག༌, གཙོ༌བོའེ༌ དོན༌ཏང༌ ཟའ༌ཅེས༌ལ༌ ང༌ཞའ༌ ཏེ༌རུ༌ ཡོད༌ཁན༌ནི༌ ཆོས༌ཚོགས༌ ཉམ༌པོ༌ ཛོམས༌, སྟིང༌མ༌ཞག༌པོ༌ པ༌འུ༌ལུ༌ ཆ༌ཅེས༌ ཨིན༌པ༌ ཁོང༌ ཚན༌ཕེད༌ ཚག༌པ༌ ཆོས༌ཤད༌ཨིན༌ ཞུགས༌།
ACT 20:8 སྟང༌ཐོག༌ག༌ ང༌ཞ༌གུན༌ ཛོམས༌ཏེ༌ ཡོད༌ཁན༌ནི༌ ནང༌བོའེ༌ ནང༌ང༌ འོད༌ མང༌པོ༌ ཏུགས༌ཏེ༌ ཡོད༌པིན༌།
ACT 20:9 ཁོང༌གུན༌ནི༌ ཕྲོའ༌ ཨེའུ༌ཏི༌ཀུས༌ ཟེར༌ཁན༌ནི༌ ཁྱོག༌ཏོང༌ཞིག༌ ཀར༌ཁུང༌ངི༌ཀ༌ དུགས༌ཏེ༌ ཡོད༌པིན༌, པ༌འུ༌ལུའི༌ གོར༌གོར༌ ཚག༌པ༌ གྲོས༌དུར༌ ཛད༌ཅེས༌པོའེ༌ ཁོའ༌ ཉིད༌ ལྕིན༌ཏྲེ༌ ཡོངས༌, ཡང༌ ཐོག༌ཚད༌ སུམ༌ནེ༌ ཐུར༌ལ༌ བུད༌ཏེ༌ ཤི༌།
ACT 20:10 པ༌འུ༌ལུ༌ ཡོག༌ག༌ སྐྱོད༌ཏེ༌ ཁྱོག༌ཏོང༌བོའེ༌ ཟུགས༌པོའ༌ ཁྲིལ༌ཏེ༌, “ཇིག༌ མ༌ཇིག༌, ཁོ༌ སོན༌ཏེ༌ ཨིན༌ནོག༌” མོལས༌།
ACT 20:11 ཏེ༌ནེ༌ པ༌འུ༌ལུ༌ ཁེ༌ཐོག༌ག༌ ལོགས༌ཏེ༌ སྐྱོད༌ཏེ༌ དོན༌ཀྱིར༌ ཅག༌ཏེ༌ ཚང༌མ༌ ཛོམས༌ཏེ༌ ཟོས༌, ཡང༌ ནམ༌ལངས༌ ཚག༌པ༌ གྲོས༌དུར༌ ཛདས༌, ཏེ༌ནེ༌ ཁོང༌ ཏེ༌ཀ༌ནེ༌ སྐྱོདས༌།
ACT 20:12 ཁོང༌གུན༌ནི༌ ཏེ༌ བུ༌ཚ༌བོ༌ སོན༌ཏེའ༌ ཁོའེ༌ ཁང༌པ༌ ཁྱེར༌ཉན༌པ༌ ཁོང༌གུན༌ལ༌ ཞི༌དེ༌ ཐོབ༌།
ACT 20:13 པ༌འུ༌ལུ༌ ཨ༌སོས༌ གྲོང༌ཁྱེར༌ལ༌ ཞབ༌གྲུལ༌ལ༌ སྐྱོད༌ཅེས༌ ཡང༌ ང༌ཞའ༌ ཏེ༌རུ༌ གྲུ༌ཟིང༌ངི༌ ནང༌ང༌ སོང༌ཏེ༌ ཁོང༌ ཉམ༌པོ༌ ཛོམ༌ཅེས༌ལ༌ ཁོང༌ངི༌ ཐབ༌ལྡིངས༌།
ACT 20:14 ཨ༌སོས༌ལ༌ ཁོང༌ ང༌ཞ༌གུན༌ ཉམ༌པོ༌ ཐུག༌ག༌ཅིག༌, ང༌ཞའེ༌ ཁོང༌ གྲུ༌ཟིང༌ང༌ སྐྱོན༌ཏེ༌ མི༌ཏི༌ལེ༌ནེ༌ གྲོང༌ཁྱེར༌ལ༌ སོང༌པིན༌།
ACT 20:15 ཐོ༌རེ༌ཟུག༌པོ༌ ཏེ༌ཀ༌ནེ༌ གྲུ༌ཟིང༌ང༌ ཞོན༌ཏེ༌ ང༌ཞ༌གུན༌ ཀི༌འུས༌ ཚོ༌ལིང༌ང༌ ལེབ༌, ཡང༌ སྟིང༌མ༌ཞག༌པོ༌ ས༌མོས༌ ཚོ༌ལིང༌ང༌ ལེབ༌། ཏེ༌ སང༌ སྟིང༌མ༌ཞག༌པོ༌ ང༌ཞ༌གུན༌ མི༌ལི༌ཏུས༌ གྲོང༌ཁྱེར༌ལ༌ ལེབ༌།
ACT 20:16 པ༌འུ༌ལུ༌ ཨེ༌ཕེ༌སས༌སི༌ ནང༌ང༌ དུག༌ག༌ མ༌ཛདས༌, ཅིའ༌ཟེར༌ན༌ ཨ༌སི༌ཨཱའེ༌ ནང༌ང༌ ཞུགས༌ཏེ༌ ཏུས༌ གོད༌ལ༌ མ༌ཏང༌ང༌ ཙམ༌ ཐུབ༌ཉན༌ནའང༌ ཡེ༌རུ༌ཤ༌ལེམ༌མ༌ གྱོགས༌པ༌ སྐྱོད༌ཅེས༌སི༌ དོད༌པ༌ ཛདས༌། ཀལ༌ཏེས༌ ཉན༌ན༌ པེན༌ཏི༌ཀོས༌སི༌ ཏུས༌ཆེན༌ནི༌ ཞག༌ཚག༌པ༌ ཏེ༌རུ༌ ལེབ༌ཅེས༌ལ༌ ཐད༌དད༌པིན༌།
ACT 20:17 མི༌ལི༌ཏུས༌ནེ༌ པ༌འུ༌ལུའི༌ ཨེ༌ཕེ༌སས༌སི༌ ཆོས༌ཚོགས༌སི༌ འུ༌སྐྱོང༌གུན༌ལ༌ ཁོང༌ང༌ ཐུག༌ག༌ལ༌ ཡོང༌ མོལ༌ཏེ༌ ལོན༌ ཀལས༌།
ACT 20:18 འུ༌སྐྱོང༌གུན༌ ལེབ༌བ༌ཅིག༌, པ༌འུ༌ལུའི༌ ཁོང༌གུན༌ལ༌ མོལས༌, “ཨ༌སི༌ཨཱ༌ ནང༌ང༌ གོ༌མ༌རང༌ ལེབ༌བི༌ ཞག༌ནེ༌ དག༌ས༌ ཚག༌པ༌ ངའེ༌ ཁྱོ༌ཞ༌གུན༌ ཉམ༌པོ༌ མི༌ཚེ༌ ཀ༌ཟུག༌ཤིག༌ག༌ ཕུདས༌, ཁྱོ༌ཞ༌གུན༌ལ༌ གྱུས༌ཨིན༌ནོག༌།
ACT 20:19 ང༌ ཡ༌ཧུ༌དཱ༌པ༌གུན༌ནི༌ ཅུས༌ངན༌ མང༌པོའེ༌ དོང༌ལེན༌ ཅོ༌གོས༌ནའང༌, ངའེ༌ ང༌རང༌ངི༌ མི༌ཚེའེ༌ ནང༌ང༌ མ༌ ཉམ༌ཤུང༌ དང༌ ཆི༌མ༌ ཉམ༌པོ༌ གཙོ༌བོའེ༌ ཞབས༌ཏོག༌ ཞུས༌པིན༌།
ACT 20:20 ཁྱོ༌ཞའེ༌ ཁང༌པའེ༌ ནང༌ང༌ ཨིན༌གྲོ༌ ཡ༌ ཕི༌ལོག༌ག༌ མི༌མངས༌སི༌ དུན༌ལ༌ ཁྱོ༌ཞ༌གུན༌ལ༌ ཕན༌ཐོགས༌ཅན༌ནི༌ ལབ༌ཞ༌ ཏང༌ཅེས༌ལ༌ ངའེ༌ ཐེ༌ཚོམས༌ མ༌ནེ༌ མ༌ཅོས༌པིན༌།
ACT 20:21 དཀོན༌མཆོག༌གི༌ སྐུན༌དུན༌ལ༌ ཤགས༌པ༌ ཟུམས༌ཏེ༌ ང༌དང༌ངི༌ གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོང༌གོ༌ཤེས༌སི༌ སྤང༌པོ༌ ངའེ༌ ཡ༌ཧུ༌དཱ༌པ༌ དང༌ གརིས༌པ༌ གུན༌ལ༌ ཏངས༌པིན༌།”
ACT 20:22 “ཏ༌ ཏམ༌པའེ༌ ཐུག༌ཉིད༌དི༌ ངའེ༌ སེམས༌ ཁྲིད༌ཏེ༌ ཁྱེར༌ར༌ ཛད༌ཅེས༌པོའེ༌ ང༌ ཡེ༌རུ༌ཤ༌ལེམ༌མ༌ ཆ༌གོས༌། ང༌ གྱུས༌མེད༌ ཏེ༌རུ༌ ང༌ ཉམ༌པོ༌ ཅི༌ ཆེན༌།
ACT 20:23 ང༌ གྱུས༌ཡོད༌, ཏམ༌པའེ༌ ཐུག༌ཉིད༌དི༌ གྱལ༌ས༌ ཚང༌མའེ༌ ནང༌ང༌ ངའེ༌ ཕིའ༌ ཙོན༌ དང༌ རྡུག༌ངལ༌ གུན༌ སྲུངས༌ཏེ༌ ཡོད༌ཁན༌བོའེ༌ སྤང༌པུད༌ད༌ ཛད༌དད༌།
ACT 20:24 ཀལ༌ཏེས༌ དཀོན༌མཆོག༌གི༌ ཐུག༌རྗེ༌ སྐོར༌རི༌ གའ༌མོའེ༌ ནས༌ཚུལ༌ ཤད༌ཅེས༌སི༌ ཁག༌ ཀ༌བོ༌ གཙོ༌བོ༌ ཡེ༌ཤུའི༌ ངའ༌ སྟད༌ད༌ ཛདས༌, ཏེ༌བོ༌ གྲུབ༌ཅུག༌ མ༌ཐུབ༌ན༌ ངའེ༌ སྲོག༌པོ༌ ངའེ༌ ཕིའ༌ རིན༌མེད༌ ཨིན༌།”
ACT 20:25 “དག༌ས༌ ཚག༌པ༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌པིན༌, ཨིན༌ནའང༌ ང༌ གྱུས༌ཡོད༌ ཏ༌ནེ༌ཕར༌ལ༌ ཁྱོ༌ཞའེ༌ ཕྲོ༌ནེ༌ སུ༌ཞིག༌གིའང༌ ང༌ ཡང༌སྐྱར༌ མ༌ནེ༌ མི༌ ཐོང༌།
ACT 20:26 དི༌རིང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, སུ༌ཞིག༌ ཏད༌པ༌ མེད༌པ༌ ཤི༌ཏེ༌ དཀོན༌མཆོག༌གི༌ ཐའ༌མེད༌ཁན༌ནི༌ ཆད༌པ༌ ཕོག༌ན༌ ཏེ༌བོ༌ ངའེ༌ སྐྱོན༌ མན༌,
ACT 20:27 ཅིའ༌ཟེར༌ན༌ ངའེ༌ ཁྱོ༌ཞ༌གུན༌ལ༌ ཐེ༌ཚོམས༌ མེད༌པ༌ དཀོན༌མཆོག༌གི༌ ང༌དང༌གུན༌ནི༌ ཕིའ༌ ཛད༌ཁན༌ནི༌ ཐབ༌ལྡིངས༌ ཚང༌མའེ༌ སྐོར༌ལ༌ སྤང༌པོ༌ ཏངས༌པིན༌།
ACT 20:28 ཁྱོ༌ཞ༌རང༌ དང༌ དཀོན༌མཆོག༌གི༌ ལུག༌ ཚང༌མ༌ སྐྱོབ༌ཏེ༌ བོར༌ཤིག༌, ཀ༌བོའེ༌ཀ༌ ཁྱོ༌ཞ༌གུན༌ ཏམ༌པའེ༌ ཐུག༌ཉིད༌དི༌ འུ༌སྐྱོང༌ང༌ ལྡམ༌མ༌ ཛད༌ཏེ༌ ཨིན༌, གཙོ༌བོའེ༌ རང༌ངི༌ སྐུ༌ཁྲག༌ ཤལ༌ལ༌ ཛད༌ཏེ༌ ཉོའ༌ ཛད༌ཁན༌ནི༌ ཆོས༌ཚོགས༌པོའ༌ ལུག༌རྫི༌ ཙོགས༌ལ༌ སྟ༌སྟོག༌ ཅོ༌ཤིག༌།
ACT 20:29 ང༌ སོང༌ཏེ༌ སྟིང༌ནེ༌ ཁྱོ༌ཞ༌གུན༌ནི༌ ཕྲོའ༌ ནོད༌པ༌ སྐྱལ༌ཁན༌ནི༌ ཤང༌ཀུ༌གུན༌ ཡོངས༌ཏེ༌ ཆོས༌ཚོགས༌སི༌ ནང༌ང༌ ནོད༌པ༌ སྐྱལ༌ཅེས༌པོ༌ ང༌ གྱུས༌ཡོད༌།
ACT 20:30 ཁྱོ༌ཞ༌རང༌ངི༌ ཕྲོ༌ནེ༌ དཀོན༌མཆོག༌གི༌ དེན༌བའེ༌ ལོན༌བོ༌ གྱུར༌ཏེ༌ ཟུན༌ ཏང༌ཁན༌གུན༌ བིངས༌ཏེ༌ མ༌ཤི༌ཀའེ༌ ལོབ༌ཕྲུགས༌གུན༌ ཁོ༌རང༌གུན༌ནི༌ གྱབ༌ནེ༌ ཁྲིད༌ཏེ༌ ཁྱེར༌ཅེས༌སི༌ རྩོན༌གྲུས༌ ཅོ༌ཨིན༌།
ACT 20:31 ཤང༌ ཅོ༌ཤིག༌, ཁྱོ༌ཞ༌གུན༌ ཉམ༌པོ༌ ལོ༌ སུམ༌ ཡོད༌ ཟ༌ནེ༌, ཚན༌ཉིན༌ མེད༌པ༌ ངའེ༌ ཆི༌མ༌ ཉམ༌པོ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ལམ༌མི༌ ཀ༌ནེ༌ ཐག༌རིང༌ང༌ མི༌ཆ༌ཅེས༌ལ༌ ཏུས༌གྱུན༌ སྤང༌པུད༌ཁན༌བོ༌ ཨིད༌ཏུ༌ ཅོ༌ཤིག༌།”
ACT 20:32 “ཏ༌ ངའེ༌ དཀོན༌མཆོག༌ དང༌ ཁོང༌ངི༌ ཐུག༌རྗེ༌ སྐོར༌རི༌ ལོན༌བོ༌ ཁྱོ༌ཞ༌གུན༌ནི༌ ལག༌ག༌ སྟད༌དད༌, ཏེ༌ ལོན༌བོའེ༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ ཅུག༌ག༌ ཛད༌ཅེས༌, ཡང༌ ཏམ༌པ༌ ཛད༌ཁན༌ ཚང༌མའེ༌ ཕྲོའ༌ ཁྱོ༌ཞ༌གུན༌ལ༌ ནོར༌སྐལ༌ སལ༌ལ༌ ཛད༌ཉན༌ཨིན༌།
ACT 20:33 ཞན༌མའེ༌ སེར༌ ཡ༌ མུལ༌ ཡ༌ ཀོས༌ལག༌གི༌ དོད༌པ༌ ངའེ༌ མ༌ཅོས༌པིན༌།
ACT 20:34 ངའེ༌ རང༌ངི༌ ལག༌པ༌ བད༌ཏེ༌ ང༌རང༌ དང༌ ངའེ༌ ཕྲོ༌པ༌གུན༌ནི༌ སྒོས༌དོམ༌ དྲན༌དྲ༌ ཅོས༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌།
ACT 20:35 ངའེ༌ ཅོ༌ཁན༌ ཚང༌མའེ༌ ནང༌ང༌ ཁྱོ༌ཞ༌གུན༌ལ༌ རྩོན༌གྲུས༌ ཉམ༌པོ༌ ལས༌ ཅོས༌ཏེ༌ ང༌དང༌གུན༌ནི༌ ཉམ༌ཤུང༌གུན༌ལ༌ རོགས༌ ཅོ༌གོ༌ཤེས༌པོ༌ སྟན༌པིན༌། ང༌དང༌གུན༌ནི༌ གཙོ༌བོ༌ ཡེ༌ཤུའི༌ མོལ༌ཁན༌བོ༌ ཨིད༌ཏུའ༌ བོར༌ཤིག༌, ‘ལེན༌ཅེས༌སི༌ སང༌ ཏང༌ཅེས༌པོ༌ མང༌ང༌ ཅིན༌ལབས༌ཅན༌ ཨིན༌།’”
ACT 20:36 ཏེ༌ ཞལ༌ཏ༌གུན༌ མོལ༌ཏེ༌ སྟིང༌ནེ༌ པ༌འུ༌ལུའི༌ ཚང༌མ༌ ཉམ༌པོ༌ པིག༌དོང༌ ཙུགས༌ཏེ༌ མོས༌ལམ༌ ཞུས༌།
ACT 20:37 ཁོང༌ ཚང༌མའེ༌ པ༌འུ༌ལུའ༌ ཁྲིལ༌ཨིན༌ ཕུག༌ཏང༌ཨིན༌ སྟིང༌ཇུག༌གི༌ ཇུ༌ ཞུ༌ཨིན༌ ངུས༌།
ACT 20:38 ཁོང༌གུན༌ནི༌ ཕིའ༌ ཚང༌མའེ༌ སང༌ ཚེར༌ཁ༌ ཆེན༌མོ༌བོ༌ ནི༌ པ༌འུ༌ལུའི༌ ཏ༌ནེ༌ཕར༌ལ༌ ཁོང༌གུན༌ནི༌ ཁོང༌ ཡང༌སྐྱར༌ མི༌ཐོང༌ མོལ༌ཅེས༌པོ༌ ཨིན༌པིན༌། ཏེ༌ནེ༌ ཁོང༌ ཚང༌མ༌ གྲུ༌ཟིང༌ ཚག༌པ༌ པ༌འུ༌ལུ༌ སྐྱལ༌ལ༌ སོང༌།
ACT 21:1 ཨེ༌ཕེ༌སས༌པའེ༌ འུ༌སྐྱོང༌གུན༌ལ༌ སྟིང༌ཇུག༌གི༌ ཇུ༌ ཟེར༌ཏེ༌ ང༌ཞའ༌ གྲུ༌ཟིང༌ངི༌ ནང༌ང༌ ཀོས༌ ཚོ༌ལིང༌ང༌ ཁ༌དྲང༌ང༌ སོང༌པིན༌། སྟིང༌མ༌ཞག༌པོ༌ རོ༌དུས༌ ཚོ༌ལིང༌ང༌ ལེབ༌, ཡང༌ ཏེ༌སྟིང༌ནེ༌ པ༌ཏ༌ར༌ གྲོང༌ཁྱེར༌ལ༌།
ACT 21:2 ཏེ༌རུ༌ ང༌ཞ༌གུན༌ལ༌ ཕོ༌ནི༌ཤི༌འ༌ ཡུལ༌ཇོངས༌ལ༌ ཆའ༌ཁན༌ནི༌ གྲུ༌ཟིང༌ཞིག༌ ཐོབ༌པ༌ ང༌ཞའ༌ ཏེ༌ནང༌ང༌ ཞོན༌ཏེ༌ སོང༌པིན༌།
ACT 21:3 གྲུ༌ཟིང༌ངི༌ ཀ༌ནེ༌ ང༌ཞའེ༌ ཀིབ༌རུས༌ ཚོ༌ལིང༌ ཐོང༌ ཡང༌ ང༌ཞའ༌ ཏེ༌ ཚོ༌ལིང༌ ཡོ༌མ༌ ཆོགས༌ལ༌ བོར༌ཏེ༌ སི༌རི༌ཡཱ༌ ཆོགས༌ལ༌ སོང༌པིན༌། ཏཱ༌ཡིར༌ གྱལ༌ས༌ ཅ༌ལག༌ ཕབ༌གོ༌ཤེས༌ ཡོད༌པ༌ གྲུ༌ཟིང༌བོ༌ ཏེ༌རུ༌ བོརས༌།
ACT 21:4 ང༌ཞའང༌ གྲུ༌ཟིང༌ནེ༌ བབས༌ཏེ༌ ཏད༌པ༌ཅན༌གུན༌ ཙལ༌པ༌ ཐོབ༌ཏེ༌ ཁོང༌གུན༌ ཉམ༌པོ༌ ཞག༌པོ༌ རྡུན༌ དུགས༌པིན༌། ཏམ༌པའེ༌ ཐུག༌ཉིད༌ གྱུད༌ཏེ༌ ཁོང༌གུན༌ནི༌ པ༌འུ༌ལུའ༌ ཡེ༌རུ༌ཤ༌ལེམ༌མ༌ མི༌སྐྱོད༌ཅེས༌ལ༌ ཞུ༌ཝ༌ ཕུལས༌།
ACT 21:5 ཞག༌མ༌ རྡུན༌ནི༌ སྟིང༌ནེ༌ ང༌ཞའ༌ གྲུ༌ཟིང༌ང༌ ཞོན༌ན༌ ཆའ༌ཅིག༌, ན༌མ༌ དང༌ ཕྲུ༌གུ༌ ཐེས༌ཏེ༌ ཆོས༌ཚོགས༌ གང༌པོ༌ གྱལ༌ས༌ནེ༌ བིང༌ཏེ༌ ང༌ཞའ༌ ལམ༌ཅུག༌ག༌ལ༌ གྱ༌ཚོའེ༌ ཐའ༌མ༌ ཚག༌པ༌ ཡོངས༌། ཏེ༌ཀ༌ ང༌ཞའ༌ ཚང༌མའེ༌ པིག༌དོང༌ ཙུགས༌ཏེ༌ མོས༌ལམ༌ ཞུས༌པིན༌།
ACT 21:6 ཁོང༌གུན༌ལ༌ སྟིང༌ཇུག༌གི༌ ཇུ༌ ཞུས༌ཏེ༌ ང༌ཞ༌གུན༌ གྲུ༌ཟིང༌ང༌ ཞོནས༌, ཡང༌ ཁོང༌གུན༌ རང༌རང༌ངི༌ ཁང༌པ༌ ལོགས༌ཏེ༌ སོང༌།
ACT 21:7 ཏཱ༌ཡིར༌ནེ༌ ང༌ཞའ༌ པེ༌ཏོ༌ལེ༌མཱ༌འིས༌ གྱལ༌ས༌ ལེབ༌, ཏེ༌རུ༌ མ༌ཤི༌ཀ༌པའེ༌ སྤུན༌གུན༌ལ༌ ཐུག༌ག༌ སོང༌ཏེ༌ ཁོང༌གུན༌ ཉམ༌པོ༌ ཞག༌ཅིག༌ དུགས༌པིན༌།
ACT 21:8 སྟིང༌མ༌ཞག༌པོ༌ ཏེ༌ཀ༌ནེ༌ བིང༌ཏེ༌ ང༌ཞ༌གུན༌ ཀཱེ༌སར༌རིའ༌ གྱལ༌ས༌ ལེབ༌, ཏེ༌རུ༌ གའ༌མོའེ༌ ནས༌ཚུལ༌ ཤད༌ཁན༌, ཕི༌ལིབ༌བི༌ ཁང༌པ༌ ང༌ཞའ༌ དུགས༌པིན༌, ཁོ༌ ཡེ༌རུ༌ཤ༌ལེམ༌མི༌ ནང༌ང༌ ཆོས༌ཚོགས༌ལ༌ ཞབས༌ཏོག༌ ཞུའ༌ལ༌ ལྡམས༌ཁན༌ རྡུན༌ནི༌ ཕྲོ༌ནེ༌ ཅིག༌ ཨིན༌པིན༌།
ACT 21:9 ན༌མ༌ མ༌ཅོ༌ཁན༌ནི༌ བུ༌མོ༌ ཞི༌ ཁོའ༌ ཡོད༌པིན༌, ཀ༌གུན༌ལ༌ ལུང༌སྟན༌ ཤད༌ཅེས༌སི༌ ཁྱུད༌ ཐོབ༌ཏེ༌ ཡོད༌པིན༌།
ACT 21:10 ང༌ཞའ༌ ཏེ༌རུ༌ དུགས༌ཏེ༌ ཞག༌ ཁ༌ཅིག༌ ཆའ༌ཅིག༌, ཡ༌ཧུ༌དཱ༌ནེ༌ ཨ༌ག༌བས༌ ཟེར༌ཁན༌ནི༌ ལུང༌སྟོན༌པ༌ཞིག༌ སྐྱོདས༌།
ACT 21:11 ང༌ཞའེ༌ དུན༌ལ༌ སྐྱོད༌ཏེ༌ པ༌འུ༌ལུའི༌ སྐྱེ༌རག༌པོ༌ ཉམ༌པོ༌ ཁོ༌རང༌ངི༌ རྐང༌ལག༌གུན༌ ལྡམས༌ཏེ༌ ལུང༌སྟན༌ སལས༌, “ཏམ༌པའེ༌ ཐུག༌ཉིད༌དི༌ མོལ༌དུག༌, ‘ཡེ༌རུ༌ཤ༌ལེམ༌མི༌ ནང༌ང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ འི༌ སྐྱེ༌རག༌གི༌ དག༌པོ༌བོ༌ འི༌ཙོགས༌ལ༌ ལྡམས༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ལག༌ག༌ སྟད༌ཨིན༌།’”
ACT 21:12 ཏེ༌བོ༌ ཚོར༌ར༌ཅིག༌, ང༌ཞའ༌ དང༌ ཏེ༌རུ༌ ཡོད༌ཁན༌ནི༌ མི༌གུན༌ནི༌ པ༌འུ༌ལུའ༌ ཇུ༌ཇུ༌ ཡེ༌རུ༌ཤ༌ལེམ༌མ༌ མ༌སྐྱོད༌ ཞུས༌ཏེ༌ ཞུ༌ཝ༌ ཕུལ༌པིན༌།
ACT 21:13 ཨིན༌ནའང༌ པ༌འུ༌ལུའི༌ མོལས༌, “ཁྱོ༌ཞའ༌ ཅིའ༌ ངུ༌ཨིན༌, ངའེ༌ སེམས༌ ཆག༌ཅུག༌གད༌? ང༌ ཡེ༌རུ༌ཤ༌ལེམ༌མི༌ ནང༌ང༌ གཙོ༌བོ༌ ཡེ༌ཤུའི༌ ཚན༌ནི༌ ཕིའ༌ ལྕག༌ཐག༌ག༌ ལྡམ༌ཅེས༌ མ༌ཚད༌ ཤི༌ཅེས༌ལའང༌ གྲལ༌གྲིག༌ ཨིན༌།”
ACT 21:14 ང༌ཞའེ༌ ཞུ༌ཝ༌གུན༌ ཁོང༌ངི༌ མི༌ཉན༌ཅེས༌ ཧ༌གོའ༌ཅིག༌, ང༌ཞའེ༌ ཞུ༌ཝ༌ ཕུལ༌ཅེས༌ ཕངས༌ཏེ༌ ཟེརས༌, “གཙོ༌བོའེ༌ ཐུག༌གོངས༌ གྲུབ༌ཤིག༌།”
ACT 21:15 ཏེ༌ སྟིང༌ནེ༌ ང༌ཞའེ༌ བེས༌སི༌ ཕིའ༌ གྲལ༌གྲིག༌ ཅོས༌ཏེ༌ ཡེ༌རུ༌ཤ༌ལེམ༌ ཆོགས༌ལ༌ ཆ༌ཅེས༌ གོ༌ཟུག༌།
ACT 21:16 ཀཱེ༌སར༌རིའ༌ ཡོད༌ཁན༌ནི༌ ལོབ༌ཕྲུགས༌ ཁ༌ཅིག༌གའང༌ ང༌ཞའ༌ ཉམ༌པོ༌ ཡོངས༌། ཁོང༌གུན༌ནི༌ ང༌ཞའ༌ ཀིབ༌རུས༌པ༌ མན༌ན༌སོན༌ནི༌ ཁང༌པ༌ དུག༌ག༌ལ༌ ཁྱེརས༌, ཁོ༌ ཏུས༌ མང༌པོའེ༌ སྔུན༌ལ༌ ཡེ༌ཤུའི༌ ལོབ༌ཕྲུགས༌ གྱུར༌ཏེ༌ ཨིན༌པིན༌།
ACT 21:17 ང༌ཞ༌གུན༌ ཡེ༌རུ༌ཤ༌ལེམ༌མ༌ ལེབ༌བ༌ཅིག༌, མ༌ཤི༌ཀ༌པའེ༌ སྤུན༌གུན༌ནི༌ མ༌ ཐད༌པོ༌ ཉམ༌པོ༌ གའ༌སུས༌ ཞུས༌།
ACT 21:18 ཐོ༌རེ༌ཟུག༌པོ༌ པ༌འུ༌ལུ༌ དང༌ ང༌ཞ༌གུན༌ ཡ༌ཀོབ༌བ༌ ཐུག༌ག༌ སོང༌པིན༌, ཏེ༌རུ༌ ཆོས༌ཚོགས༌སི༌ འུ༌སྐྱོང༌ ཚང༌མ༌ ཛོམས༌ཏེ༌ དུག༌པིན༌།
ACT 21:19 པ༌འུ༌ལུའི༌ ཁོང༌ ཚང༌མ༌ལ༌ ཇུ༌ ཞུས༌ཏེ༌ དཀོན༌མཆོག༌གི༌ ཁོང༌ གྱུད༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཆག༌ལས༌ ཛད༌ཁན༌གུན༌ནི༌ སྐོར༌ ཁོང༌གུན༌ལ༌ ཞིབ༌སལ༌ ཤད༌ད༌ ཛདས༌།
ACT 21:20 ཏེ༌གུན༌ ཚོར༌ར༌ཅིག༌ ཁོང༌གུན༌ནི༌ དཀོན༌མཆོག༌ག༌ སྟོད༌པ༌ ཕུལས༌, ཏེ༌ནེ༌ པ༌འུ༌ལུའ༌ མོལས༌, “ཅེས༌པའེ༌ སྤུན༌ ལྟོས༌སའང༌, ཡ༌ཧུ༌དཱ༌པ༌ སྟོང༌ མང༌པོ༌ཞིག༌གི༌ ཏད༌པ༌ ཁྱོངས༌, ཡང༌ ཁོང༌ ཚང༌མའེ༌ མོ༌ཟེས༌སི༌ བཀའ༌ཁྲིམས༌གུན༌ལ༌ སྙིང༌ངི༌ ཐིལ༌ནེ༌ ཅེས༌པ༌ ཅོ༌རུག༌།
ACT 21:21 ཁོང༌གུན༌ནི༌, ཉེ༌རང༌ངི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ དུག༌ཁན༌ནི༌ ཡ༌ཧུ༌དཱ༌པ༌ ཚང༌མ༌ལ༌ མོ༌ཟེས༌སི༌ ཁྲིམས༌གུན༌ མི༌སྲུང༌ཅེས༌ ཡང༌ བུ༌ཚ༌གུན༌ལ༌ སུན༌ནད༌ མི༌ཅོ༌ཅེས༌ ཡ༌ ཡ༌ཧུ༌དཱ༌པའེ༌ ལུག༌སྲོལ༌གུན༌ ཁའ༌ མི༌ཉན༌ཅེས༌ གུན༌ ལབ༌དུག༌ ཟེར༌ཏེ༌ ཚོར༌ཏོག༌།
ACT 21:22 ཏ༌ ང༌དང༌གུན༌ནི༌ ཅི༌ ཅོ༌ཨིན༌? ཉེ༌རང༌ འི༌རུ༌ སྐྱོད༌ཁན༌བོ༌ ཁོང༌གུན༌ནི༌ ཚོར༌ཅེས༌ ཏན༌ཏན༌ ཨིན༌ནོག༌།
ACT 21:23 ང༌ཞའེ༌ སམ༌མ༌རག༌ ཉེ༌རང༌ངི༌ འི༌བོ༌ ཅོ༌གོས༌། འི༌ཀ༌ ང༌ཞའ༌ ཉམ༌པོ༌ དཀོན༌མཆོག༌གི༌ དུན༌ལ༌ དམ༌ཆ༌ ཅོ༌ཁན༌ནི༌ མི༌ ཞི༌ ཡོད༌།
ACT 21:24 ཉེ༌རང༌ ཁོང༌གུན༌ ཉམ༌པོ༌ ཆོད༌ཁང༌ང༌ སྐྱོད༌ཏེ༌ རྩང༌མ༌ ཅོ༌ཅེས༌སི༌ ལུག༌སྲོལ༌ལི༌ ནང༌ང༌ ཐུས༌, ཡང༌ གོ༌རིལ༌ ཅོས༌ཏེ༌ སྲ༌ བྲགས༌ཅེས༌སི༌ རིན༌ རང༌ མ༌ཚད༌ ཁོང༌གུན༌ནི༌ ཕིའང༌ ཤོལ༌། ཏེ༌ནེ༌ ཉེ༌རང༌ངི༌ གྱབ༌གལ༌ལ༌ ཟེར༌ཁན༌གུན༌ དེན༌བ༌ མན༌ཁན༌ ཡང༌ ཉེ༌རང༌ངི༌ ཡ༌ཧུ༌དཱ༌པའེ༌ བཀའ༌ཁྲིམས༌གུན༌ སྲུང༌དུག༌ ཟེར༌ཏེ༌ ཚང༌མ༌ལ༌ གྱུས༌ཆེན༌།
ACT 21:25 ཏད༌པ༌ཅན༌ནི༌ ཡ༌ཧུ༌དཱ༌པ༌ མན༌ཁན༌གུན༌ལ༌ ང༌ཞའེ༌ ཐག༌ཅད༌དི༌ སྐོར༌ལ༌ ཨི༌གེ༌ བྲིས༌ཏེ༌ ཀལ༌པིན༌། ཏེ༌ ཨི༌གེ༌བོའེ༌ ནང༌ང༌ སྐུན༌དྲ༌གུན༌ལ༌ ཆོད༌པ༌ ཕུལ༌ཁན༌གུན༌, ཁྲག༌ ཡོད༌ཁན༌ ཡ༌ སྐྱེ༌ཀྱིགས༌ཏེ༌ སད༌ཁན༌ནི༌ ཤ༌ ཟའ༌ མ༌གོས༌, ཡང༌ ལུས༌བྲེལ༌ ངན༌པ༌གུན༌ནེ༌ ཐག༌རིང༌ དུག༌གོས༌ ཟེར༌ཏེ༌ བྲིས༌ཏེ༌ ཡོད༌།”
ACT 21:26 སྟིང༌མ༌ཞག༌ག༌ པ༌འུ༌ལུ༌ དང༌ ཏེ༌ མི༌གུན༌ནི༌ ལུག༌སྲོལ༌ ནང༌ཞིན༌ལ༌ རྩང༌མ༌ ཅོས༌ཏེ༌ སྟིང༌ནེ༌ པ༌འུ༌ལུ༌ ཁོང༌གུན༌ ཉམ༌པོ༌ ཆོད༌ཁང༌ངི༌ ནང༌ང༌ སྐྱོད༌ཏེ༌ རྩང༌མ༌ ཅོ༌ཅེས༌ ཚར༌ཏེ༌ ཁོང༌གུན༌ནི༌ རང༌རང༌ངི༌ ཕིའ༌ ཆོད༌པ༌ ཕུལ༌ཉན༌ཅེས༌སི༌ ཞག༌པོ༌ བླ༌མ༌གུན༌ལ༌ ཤད༌ད༌ ཛདས༌།
ACT 21:27 རྩང༌མ༌ ཅོ༌ཅེས༌སི༌ ཞག༌ རྡུན༌ ཚང༌ཀིས༌ ཡོད༌ ཟ༌ནེ༌ པ༌འུ༌ལུ༌ ཆོད༌ཁང༌ང༌ ཐོང༌ཁན༌ནི༌ ཨ༌སི༌ཨཱ༌པའེ༌ ཡ༌ཧུ༌དཱ༌པ༌ ཁ༌ཅིག༌གི༌ མི༌མངས༌སི༌ ནང༌ང༌ ཧི༌ལིངས༌ ཕིངས༌ཏེ༌ ཁོང༌ ཟུམས༌།
ACT 21:28 ཏེ༌ ཨ༌སི༌ཨཱ༌པ༌གུན༌ནི༌ ཀུ༌ཅོ༌ ཏངས༌ཏེ༌ ཟེརས༌, “ཨིས༌ར༌ཨེལ༌པ༌གུན༌ ང༌ཞའ༌ རོགས༌ ཅོས༌། འིན༌ན༌ མི༌བོའེ༌ ཀ༌རུང༌ས༌ ཚང༌མ༌ལ༌ ང༌དང༌གུན༌, ང༌དང༌ངི༌ བཀའ༌ཁྲིམས༌ དང༌ འི༌ ཆོད༌ཁང༌ངི༌ གྱབ༌གལ༌ལ༌ ལབ༌ཞ༌ ཏང༌ཅེས༌, མ༌ཚད༌ ཡ༌ཧུ༌དཱ༌པ༌ མན༌ཁན༌གུན༌ ང༌དང༌ངི༌ ཆོད༌ཁང༌ང༌ ཁྱོངས༌ཏེ༌ འི༌ ཏམ༌པའེ༌ ནས༌ས༌བོ༌ ཚི༌ཏུ༌ ཅོས༌།”
ACT 21:29 ༼ཁོང༌གུན༌ནི༌ སྔུན༌ལ༌ གྱལ༌སའེ༌ ནང༌ང༌ པ༌འུ༌ལུ༌ ཨེ༌ཕེ༌སས༌པ༌ ཏྲོ༌ཕི༌མུས༌ ཡ༌ཧུ༌དཱ༌པ༌ མན༌ཁན༌བོ༌ ཉམ༌པོ༌ ཐོང༌ཏེ༌, ཁོའེ༌ ཏན༌ཏན༌ འི༌ མི༌བོ༌ ཆོད༌ཁང༌ང༌ ཁྱེར༌ཏེ༌ ཡོད༌གྲོ༌ སམ༌ པ༌སང༌ ཏེ༌ཟུག༌ ཟེརས༌།༽
ACT 21:30 ཏེ༌ནེ༌ གྱལ༌ས༌ གང༌པོའེ༌ ནང༌ང༌ ཧི༌ལིངས༌ ཞུགས༌, ཡང༌ མི༌ཚང༌མ༌ གྱུགས༌ཏེ༌ ཡོངས༌ཏེ༌ ཛོམས༌། ཁོང༌གུན༌ནི༌ པ༌འུ༌ལུ༌ ཟུམས༌ཏེ༌ ཆོད༌ཁང༌ངི༌ ནང༌ནེ༌ དྲུད༌ཨིན༌ ཕི༌ལོག༌ག༌ ཁྱེར༌ཏེ༌, ཏེན༌ན༌མལ༌ལ༌ ཆོད༌ཁང༌ངི༌ སྒོ༌གུན༌ ཅུགས༌།
ACT 21:31 ཁོང༌གུན༌ནི༌ པ༌འུ༌ལུ༌ སད༌ཅེས༌ ཅོ༌ཨིན༌ ཡོད༌ ཟ༌ནེ༌, རོམ༌མི༌ མག༌སྟོང༌ངི༌ སྤོན༌བོའ༌ གྱལ༌ས༌ གང༌པོའེ༌ ནང༌ང༌ ཧི༌ལིངས༌ བིང༌ཏོག༌ ཟེར༌ཏེ༌ ཚོར༌།
ACT 21:32 ཁོ༌ ཏེན༌ན༌མལ༌ལ༌ མག༌མི༌ དང༌ གྱ༌སྤོན༌ གུན༌ ཁྲིད༌ཏེ༌ མི༌ཚོགས༌ ཡོད༌ས༌ གྱུགས༌ཏེ༌ སོང༌། ཏེ༌ མག༌སྟོང༌ངི༌ སྤོན༌བོ༌ དང༌ མག༌མི༌གུན༌ ཡོང༌ང༌ ཐོང༌ཏེ༌, མི༌ཚོགས༌སི༌ པ༌འུ༌ལུའ༌ རྡུང༌ཅེས༌ བན༌ ཅོས༌།
ACT 21:33 མག༌སྟོང༌ངི༌ སྤོན༌བོ༌ པ༌འུ༌ལུའི༌ དུན༌ལ༌ ཡོངས༌, ཡང༌ ཁོང༌ ཟུམས༌ཏེ༌ ལྕག༌ཐག༌ ཉིས༌ ཉམ༌པོ༌ ལྡམ༌ཅེས༌ལ༌ བཀའ༌ ཏངས༌། ཡང༌ ཁོའེ༌ འི༌ མི༌བོ༌ སུ༌ ཨིན༌ནོག༌ ཅི༌ སྐྱོན༌ ཅོས༌ཏོག༌? ཟེར༌ཏེ༌ ཏྲིས༌།
ACT 21:34 མི༌ཚོགས༌སི༌ ནང༌ནེ༌ ཁ༌ཅིག༌གི༌ སྤེ༌ར༌ ཅིག༌ ཡང༌ ཁ༌ཅིག༌གི༌ ཡང༌སྤེ༌ར༌ ཅིག༌ ཟེརས༌། ཧི༌ལིངས༌སི༌ ཞས༌ཏེ༌ མག༌སྟོང༌ངི༌ སྤོན༌བོའ༌ དེན༌བ༌ གང༌པོ༌ ཧ༌གོ༌ མ༌ཐུབ༌པ༌, པ༌འུ༌ལུ༌ མག༌མི༌ ཀི༌ལའེ༌ ནང༌ང༌ ཁྱེར༌ ཟེར༌ཏེ༌ བཀའ༌ ཏངས༌།
ACT 21:35 པ༌འུ༌ལུ༌ སྲེས༌ཀེ༌ཀ༌ ལེབ༌བ༌ཅིག༌, མི༌ཚོགས༌ལ༌ སྲོ༌ མ༌སྲན༌ཏྲེ༌ ཡོང༌ང༌ ཐོང༌ཏེ༌ མག༌མི༌གུན༌ནི༌ ཁོང༌ ཁུར༌ཏེ༌ ཁྱེརས༌།
ACT 21:36 པ༌འུ༌ལུའི༌ གྱབ༌ནེ༌ ཡོངས༌ཁན༌ནི༌ མི༌མངས༌སི༌ ཀུ༌ཅོ༌ ཏང༌ཨིན༌, “ཁོ༌ སོད༌, ཁོ༌ སོད༌” ཟེརས༌།
ACT 21:37 པ༌འུ༌ལུ༌ ཀི༌ལའེ༌ ནང༌ཀུག༌ག༌ ཁྱེར༌ཨིན༌ ཡོད༌ ཟ༌ནེ༌ ཁོང༌ངི༌ མག༌སྟོང༌ངི༌ སྤོན༌བོའ༌ མོལས༌, “ངའེ༌ ཉེ༌རང༌ང༌ སྤེ༌ར༌ཞིག༌ ཟེར༌ན༌ གྲིག༌ག༌?” མག༌སྟོང༌ངི༌ སྤོན༌བོའེ༌ པ༌འུ༌ལུའ༌ ཏྲིས༌, “ཁྱོ༌རང༌ང༌ གརིས༌པའེ༌ སྐད༌ ཤེས༌སད༌ད༌?
ACT 21:38 ཏུས༌བན༌ཤིག༌གི༌ སྔུན༌ལ༌ རོམ༌མི༌ གྱལ༌པོའ༌ ངོ༌ལོག༌ ཅོས༌ཏེ༌ སྟན༌ཤིག༌ སྟོང༌ཞི༌ རི༌སྟོང༌ང༌ ཁྲིད༌ཏེ༌ ཁྱེར༌ཁན༌ནི༌ ཨི༌ཇིབ༌པ༌བོ༌ ཁོ༌རང༌ མན༌ན༌?”
ACT 21:39 པ༌འུ༌ལུའི༌ མོལས༌, “མན༌, ང༌ ཡ༌ཧུ༌དཱ༌པ༌ ཀཱི༌ལི༌ཀི༌ཡཱའེ༌ ཡུལ༌ཇོངས༌སི༌ མ༌ ཁག༌ཅན༌ གྱལ༌ས༌ ཏར༌སས༌སི༌ ཡུལ༌མི༌ཞིག༌ ཨིན༌། ཇུ༌ཇུ༌ ང༌ འི༌ མི༌གུན༌ལ༌ སྤེ༌ར༌ ཟེར༌ཅེས༌སི༌ གོངས༌པ༌ སལ༌།”
ACT 21:40 མག༌སྤོན༌ནེ༌ གོངས༌པ༌ ཐོབས༌ཏེ༌ ཁོང༌ངི༌ སྲེས༌ཀེ༌ཀ༌ ལངས༌ཏེ༌ མི༌ཚོགས༌ལ༌ ཅུབ༌ཅད༌ཅེས༌ལ༌ ལག༌པ༌ ཉམ༌པོ༌ སྟགས༌ ཅོས༌། མི༌ཚོགས༌ ཅུབ༌ཅད༌ད༌ཅིག༌, ཁོང༌ངི༌ ཨིབ༌རི༌པའེ༌ སྐད༌དི༌ ནང༌ང༌ མོལ༌ཅེས༌ གོ༌ཟུག༌།
ACT 22:1 “ཡ༌ཧུ༌དཱ༌པའེ༌ སྤུན༌ དང༌ འུ༌སྐྱོང༌ གུན༌, ངའ༌ སྐྱོན༌ཀལ༌ཁན༌གུན༌ལ༌ ངའེ༌ ལན༌ཏང༌ཅེས༌ཅན༌བོ༌ ཉོན༌ཤིག༌།”
ACT 22:2 མི༌ཚོགས༌སི༌ ཁོང༌ངི༌ ཨིབ༌རི༌པའེ༌ སྐད༌དི༌ ནང༌ང༌ མོལ༌ལ༌ ཚོར༌ར༌ཅིག༌, ཁོང༌གུན༌ མང༌ང༌ ཅུབ༌ཅདས༌། ཏེ༌ནེ༌ པ༌འུ༌ལུའི༌ མོལས༌,
ACT 22:3 “ང༌ ཀཱི༌ལི༌ཀི༌ཡཱ༌ ཡུལ༌ཇོངས༌སི༌ ཏར༌སས༌ གྱལ༌ས༌ སྐྱེས༌ཁན༌ནི༌ ཡ༌ཧུ༌དཱ༌པ༌ཞིག༌ ཨིན༌, ཨིན༌ནའང༌ འིན༌ན༌ གྱལ༌སའེ༌ ནང༌ང༌ ལོབ༌བོན༌ གཱ༌མ༌ལི༌ཨེལ༌ནེ༌ ངའ༌ ལོབ༌ཇོང༌ ཐོབ༌ཏེ༌ ཨིན༌། ཁོང༌ངི༌ ལོབ༌ཕྲུགས༌ ཨིན༌པ༌ ང༌ ཡ༌ཧུ༌དཱ༌པའེ༌ ཆོས༌ཁྲིམས༌ དང༌ ལུགས༌སྲོལ༌ གུན༌ སྲུང༌ཅེས༌སི༌ ལོབ༌ཇོང༌ གྱལ༌ལ༌ ཐོབ༌། དཀོན༌མཆོག༌ག༌ ངའེ༌ སྙིང༌ངི༌ ཐིལ༌ནེ༌ ཅེས༌པ༌ ཅོས༌ཁན༌བོ༌ ལག༌ལེན༌ལ༌ ཁྱོངས༌པིན༌, ཀ༌ཟུག༌ དི༌རིང༌ ཁྱོ༌ཞའ༌ ཚང༌མའེ༌ ཅོ༌ཨིན༌ ཨིན༌ནོག༌།
ACT 22:4 ངའེ༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌གུན༌ལ༌ ནགས༌ སྲན༌ཏྲེ༌ སྟན༌པིན༌ ཡང༌ ཁ༌ཅིག༌ ཤིའང༌ ཤི༌། བུ༌ཚ༌ ཨིན༌གྲོ༌ ཡ༌ བུ༌མོ༌ ངའེ༌ ཚང༌མ༌ ཟུམས༌ཏེ༌ ཙོན༌ཁང༌ང༌ ཀགས༌པིན༌།
ACT 22:5 ཏེ༌བོའེ༌ སྤང༌པོ༌ བླ༌མ༌ ཆེན༌མོ༌ དང༌ ཚོགས༌དུའི༌ འུ༌སྐྱོང༌ ཚང༌མ༌ ཨིན༌། ཁོང༌གུན༌ནི༌ ཆོགས༌ནེ༌ དཱ༌མེས༌ཀས༌སི༌ ཚོགས༌དུའི༌ ལས༌ ཅོ༌ཁན༌ ཕྲོ༌པ༌གུན༌ལ༌, ངའ༌ ཝང༌ཆ༌ ཏང༌ཁན༌ནི༌ ཨི༌གེ༌ ཁུར༌ཏེ༌, མ༌ཤི༌ཀའེ༌ཀ༌ ཏད༌པ༌ ཅོ༌ཁན༌གུན༌ ཏགས༌ཏེ༌ ཡེ༌རུ༌ཤ༌ལེམ༌མ༌ ཆད༌པ༌ ཅད༌ཅེས༌ལ༌ ཁྱོང༌ཅེས༌སི༌ ཕིའ༌ སོང༌པིན༌།”
ACT 22:6 “ཉིང༌གུང༌ ཟམ༌ཤིག༌ག༌, ང༌ དཱ༌མེས༌ཀས༌སི༌ ཉེ༌མོའ༌ ལེབ༌བ༌ཅིག༌, ཧུན༌མེད༌ལ༌ ནམ༌ཁའ༌ནེ༌ འོད༌དི༌ ཟེར༌ ཀྲག༌པོ༌ཞིག༌ བབས༌ཏེ༌ ངའ༌ སྐོར༌ ཏངས༌།
ACT 22:7 ང༌ སའེ༌ཀ༌ གྱེལ༌, ཡང༌ ངའ༌ སུང༌སྐད༌ཅིག༌ ཚོར༌, ‘ས༌འུལ༌! ས༌འུལ༌! ཁྱོ༌རང༌ངི༌ ང༌ ཅིའ༌ ནགས༌ སྟན༌ནད༌?’”
ACT 22:8 “ངའེ༌ ཏྲིས༌པིན༌, ‘གཙོ༌བོ༌ ཉེ༌རང༌ སུ༌ ཞུགས༌ཏེ༌ ཨིན༌།’” “ཁོང༌ངི༌ མོལ༌ལ༌རག༌, ‘ང༌ ཁྱོ༌རང༌ངི༌ ནགས༌ སྟན༌ཁན༌ ན༌ཙ༌རེད༌པ༌ ཡེ༌ཤུ༌ ཨིན༌།’
ACT 22:9 ངའེ༌ ཕྲོ༌པ༌གུན༌ནི༌ ཏེ༌ འོད༌པོ༌ ཐོང༌, ཨིན༌ནའང༌ ཁོང༌གུན༌ནི༌ ང༌ མོལ༌ཁན༌ནི༌ སྐད༌པོ༌ ཧ༌མ༌གོ༌།”
ACT 22:10 “ངའེ༌ ཏྲིས༌པིན༌, ‘ཀྱེ༌ གཙོ༌བོ༌ ངའེ༌ ཅི༌ ཅོ༌?’” “གཙོ༌བོའེ༌ ངའ༌ མོལ༌ལ༌རག༌, ‘ལོངས༌, དཱ༌མེས༌ཀས༌ལ༌ སོང༌, ཏེ༌རུ༌ ཁྱོ༌རང༌ང༌ ཅི༌ ཅོ༌གོ༌ཤེས༌ ཚང༌མ༌ ཤད༌ཨིན༌།’
ACT 22:11 ངའེ༌ ཕྲོ༌པ༌གུན༌ནི༌ ང༌ ལག༌པ༌ ཐམས༌ཏེ༌ དཱ༌མེས༌ཀས༌ལ༌ ཁྲིད༌ཏེ༌ ཁྱེརས༌ ཅིའ༌ཟེར༌ན༌ འོད༌དི༌ ལྡངས༌ ཀྲག༌པོའེ༌, ངའེ༌ མིག༌པོ༌ ཞར༌ ཅུགས༌།”
ACT 22:12 “ཏེ༌རུ༌ ཨ༌ན༌ནི༌ཡཱས༌ ཞུ༌ཁན༌ནི༌ མི༌ཞིག༌ ང༌ ལྟའ༌ལ༌ ཡོངས༌། ཁོང༌ དཀོན༌མཆོག༌གི༌ སྕོད༌ལམ༌མི༌ཀ༌ གྲུལ༌ཁན༌ དང༌ བཀའ༌ཁྲིམས༌གུན༌ སྲུང༌ཁན༌, ཡང༌ ཏེ༌རུ༌ དུག༌ཁན༌ནི༌ ཡ༌ཧུ༌དཱ༌པ༌གུན༌ནི༌ ཁོང༌ང༌ མ༌ རྩི༌ཝ༌ ཅོའད༌པིན༌།
ACT 22:13 ཁོང༌ ངའེ༌ དུན༌ལ༌ ཡོངས༌ཏེ༌ མོལ༌ལ༌རག༌, ‘སྤུན༌ ས༌འུལ༌, ཁྱོ༌རང༌ང༌ ཡང༌སྐྱར༌ ཐོང༌ཤིག༌,’ ཏེན༌ན༌མལ༌ལ༌ ངའ༌ ཁོང༌ ཐོང༌ཐུབ༌།”
ACT 22:14 “ཏེ༌ནེ༌ ཁོང༌ངི༌ མོལས༌, ‘ང༌དང༌ངི༌ ཕ༌མེས༌པོའེ༌ དཀོན༌མཆོག༌གི༌ ཁྱོ༌རང༌ང༌ ཁོང༌ངི༌ ཐུག༌གོངས༌ ཤེས༌ཤེས༌, ཀྲང༌པོ༌ ཨིན༌ཁན༌བོ༌ ཇལ༌ཅེས༌ དང༌ ཁོང༌ངི༌ ཞལ༌ཏ༌ ཚོར༌ཅེས༌ལ༌ ལྡམ༌མ༌ ཛད༌ཏེ༌ ཨིན༌།
ACT 22:15 ཁྱོ༌རང༌ངི༌ ཚང༌མ༌ལ༌ ཁྱོ༌རང༌ང༌ ཐོང༌ཁན༌ དང༌ ཚོར༌ཁན༌ གུན༌ནི༌ སྤང༌པོ༌ ཏང༌ཨིན༌།
ACT 22:16 ཏ༌ ཅི༌ཕིའ༌ སྲུངས༌ཏེ༌ ཨིན༌, ལངས༌ཏེ༌ ཁྲུས༌ལེན༌ ཡང༌ རང༌ངི༌ སྡིག༌པ༌གུན༌ སེལ༌ཅེས༌ལ༌ གཙོ༌བོ༌ ཡེ༌ཤུའ༌ མོས༌ལམ༌ ཞུས༌།’”
ACT 22:17 “ང༌ ཡེ༌རུ༌ཤ༌ལེམ༌མ༌ ལོགས༌ཏེ༌ ཡོངས༌ཏེ༌ སྟིང༌ནེ༌ ཆོད༌ཁང༌ངི༌ ནང༌ང༌ མོས༌ལམ༌ ཞུ༌ ཟ༌ནེ༌, ངའེ༌ ཞལ༌ཟིགས༌ཤིག༌ ཐོང༌།
ACT 22:18 ཏེ༌ནང༌ང༌ གཙོ༌བོའེ༌ ངའ༌ མོལ༌ལ༌རག༌, ‘གྱོགས༌པ༌ ཅོས༌, ཡེ༌རུ༌ཤ༌ལེམ༌ནེ༌ དག༌ས༌རང༌ བིང༌ཏེ༌ སོང༌, ཅིའ༌ཟེར༌ན༌ ཁྱོ༌རང༌ངི༌ ངའེ༌ སྐོར༌ལ༌ སྤང༌པོ༌ ཏང༌ཅེས༌པོའ༌ འི༌ མི༌གུན༌ནི༌ མི༌ཉན༌།’”
ACT 22:19 “ངའེ༌ གཙོ༌བོའ༌ ཟེར༌པིན༌, ‘ཀྱེ༌ གཙོ༌བོ༌ ངའེ༌ དུ༌ཁང༌ ཚང༌མའེ༌ ནང༌ནེ༌ ཉེ༌རང༌ང༌ ཏད༌པ༌ ཅོ༌ཁན༌གུན༌ ཟུམས༌ཏེ༌ ཙོན༌ལ༌ ཀགས༌ཏེ༌ རྡུང༌ཁན༌བོ༌ འི༌ མི༌གུན༌ལ༌ གྱུས༌ཡོད༌།
ACT 22:20 ཡང༌ ཉེ༌རང༌ངི༌ སྤང༌པོ༌ ཏང༌ཁན༌ སྟེ༌ཕན༌ སད༌ ཟ༌ནེ༌ ང༌རང༌ ཏེ༌རུ༌ ཁོང༌ སད༌ཁན༌གུན༌ནི༌ ཀོས༌ལག༌གུན༌ སྲུང༌ཨིན༌ ཁོང༌གུན༌ནི༌ ཅོ༌ཁན༌ནི༌ ལས༌པོའེ༌ ནང༌ང༌ ངའང༌ ཁའ༌ཆམས༌ཏེ༌ ཨིན༌།’”
ACT 22:21 “ཏེ༌ནེ༌ གཙོ༌བོའེ༌ ང༌ མོལས༌, ‘སོང༌ ངའེ༌ ཁྱོ༌རང༌ ཐག༌རིང༌ང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཀལ༌ཨིན༌།’”
ACT 22:22 ཏེ༌ སྤེ༌ར༌བོ༌ ཟེར༌ཟེར༌ ཚག༌པ༌ མི༌ཚོགས༌ གང༌པོ༌ པ༌འུ༌ལུའི༌ ཞལ༌ཏ༌གུན༌ ཞིབ༌ཅ༌ ཉམ༌པོ༌ ཉན༌ཏེ༌ དུགས༌། ཏེ༌བོ༌ ཚོར༌ར༌ཅིག༌, ཁོང༌གུན༌ནི༌ ཀུ༌ཅོ༌ ཏང༌ཨིན༌ ཟེརས༌, “འི༌ མི༌བོ༌ ཇིག༌རྟེན༌ནི༌ ཀ༌ནེ༌ མེད༌ཁན༌ ཅོས༌། ཁོ༌ སོན༌ཏེ༌ དུག༌ཅེས༌སི༌ འོས༌པ༌ མི༌དུག༌།”
ACT 22:23 མི༌གུན༌ནི༌ ཆད༌མེད༌ལ༌ ཀུ༌ཅོ༌ ཏང༌ཨིན༌ རང༌རང༌ངི༌ ཁེ༌ཐོག༌གི༌ ཀོས༌གུན༌ ཕུད༌ཏེ༌ ཕངས༌, ཡང༌ ལག༌པའེ༌ ནང༌ང༌ ཐལ༌བ༌ ཁུར༌ཏེ༌ ཡོགས༌།
ACT 22:24 མག༌སྟོང༌ངི༌ སྤོན༌བོའེ༌ པ༌འུ༌ལུ༌ ཀི༌ལའེ༌ ནང༌ང༌ ཁྱེར༌ཅེས༌ལ༌ བཀའ༌ ཏངས༌, ཡང༌ རྟལ༌ལྕག༌ གྱབ༌ཏེ༌ མི༌གུན༌ནི༌ ཅི༌ཕིའ༌ ཁོའེ༌ གྱབ༌གལ༌ལ༌ ཀུ༌ཅོ༌ ཏངས༌ཏེ༌ ཨིན༌ནོག༌ ཏེ༌བོ༌ གྱུས༌ ཅོ༌ཅེས༌ལ༌ ཟེརས༌།
ACT 22:25 རྟལ༌ལྕག༌ གྱབ༌ཅེས༌ལ༌ ཁོང༌གུན༌ནི༌ པ༌འུ༌ལུའི༌ རྐང༌ལག༌ ཅིང༌ང༌ཅིག༌, དུན༌ལ༌ ཡོད༌ཁན༌ནི༌ མག༌མི༌གྱའེ༌ སྤོན༌བོ༌ཞིག༌ག༌ པ༌འུ༌ལུའི༌ མོལས༌, “རོམ༌པ༌ཞིག༌ག༌ ཁོའེ༌ སྐྱོན༌ གྱུས༌ མ༌ཅོའ༌ རྟལ༌ལྕག༌ གྱབ༌ཅེས༌པོ༌ འོས༌པ༌ ཨིན༌ནོག༌ག༌?”
ACT 22:26 ཏེ༌བོ༌ ཚོར༌ར༌ཅིག༌, ཁོ༌ མག༌སྟོང༌ངི༌ སྤོན༌བོའེ༌ཀ༌ སོང༌ཏེ༌ ཟེརས༌, “ཉེ༌རང༌ངི༌ ཅི༌ ཛད༌ཏེ༌ ཨིན༌? འི༌ མི༌བོ༌ རོམ༌པ༌ ཨིན༌ནོག༌།”
ACT 22:27 མག༌སྟོང༌ངི༌ སྤོན༌བོ༌ ཡོངས༌ཏེ༌ པ༌འུ༌ལུའ༌ ཏྲིས༌, “ངའ༌ ཤོད༌དའང༌, ཁྱོ༌རང༌ རོམ༌པ༌ ཨིན༌ན༌?” ཁོང༌ངི༌ མོལས༌, “ང༌ ཨིན༌།”
ACT 22:28 མག༌སྟོང༌ངི༌ སྤོན༌བོའེ༌ ཟེརས༌, “པེ༌ནེ༌ མང༌པོ༌ ཏངས༌ཏེ༌ མ༌ནེ༌ ངའ༌ རོམ༌པ༌ མ༌གྱུར༌།” པ༌འུ༌ལུའི༌ མོལས༌, “ང༌ སྐྱེས༌ ཟ༌ནེ༌ རོམ༌པ༌ ཨིན༌།”
ACT 22:29 པ༌འུ༌ལུའ༌ ཏྲི༌སོ༌ ཏང༌ཅེས༌ལ༌ དུགས༌ཏེ༌ ཡོད༌ཁན༌གུན༌, ཏེན༌ན༌མལ༌ལ༌ བིང༌ཏེ༌ སོང༌། རོམ༌པ༌ ཨིན༌ཁན༌ནི༌ པ༌འུ༌ལུ༌ ལྕག༌ཐག༌ག༌ ཏག༌ཅེས༌ལ༌ བཀའ༌ ཏངས༌ཅེས༌པོ༌ ནོར༌ཏེ༌ ཨིན༌ཁན༌ ཧ༌གོའ༌ཅིག༌, མག༌སྟོང༌ངི༌ སྤོན༌བོ༌ སྲན༌ཏྲེ༌ ཇིགས༌།
ACT 22:30 སྟིང༌མ༌ཞག༌པོ༌ མག༌སྟོང༌ངི༌ སྤོན༌བོའེ༌ ཡ༌ཧུ༌དཱ༌པ༌གུན༌ནི༌ པ༌འུ༌ལུའ༌ སྐྱོན༌ ཅིའ༌ ཀལ༌ཏེ༌ ཨིན༌ནོག༌ གྱུས༌ ཅོ༌ཅེས༌ལ༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌གུན༌ དང༌ བླ༌མ༌ འུ༌སྐྱོང༌གུན༌ བོད༌ཏེ༌ ཁྱོངས༌། ཏེ༌ནེ༌ ཁོའེ༌ པ༌འུ༌ལུ༌ ཁྱོང༌ཅུགས༌ཏེ༌ ཁོང༌གུན༌ནི༌ དུན༌ལ༌ ལངས༌ཏེ༌ དུག༌ཅུགས༌།
ACT 23:1 པ༌འུ༌ལུའི༌ ཡ༌ཧུ༌དཱ༌པའེ༌ ཚོགས༌དུའི༌ ཐུས༌མི༌གུན༌ལ༌ ཟིགས༌ཏེ༌ མོལས༌, “ཡ༌ཧུ༌དཱ༌པའེ༌ སྤུན༌གུན༌, དི༌རིང༌ ཚག༌པ༌ ངའེ༌ དཀོན༌མཆོག༌གི༌ སྐུན༌དུན༌ལ༌ སེམས༌ ལག༌མོ༌ ཉམ༌པོ༌ མི༌ཚེ༌ ཕུད༌པིན༌།”
ACT 23:2 ཏེ༌བོ༌ ཚོར༌ར༌ཅིག༌, བླ༌མ༌ ཆེན༌མོ༌ ཨ༌ན༌ནི༌ཡཱས༌སི༌ པ༌འུ༌ལུའི༌ དུན༌ལ༌ ལངས༌ཏེ༌ ཡོད༌ཁན༌ནི༌ མི༌གུན༌ལ༌ ཁོང༌ང༌ གྲམ༌ལྕགས༌ ཏོང༌ ཟེརས༌།
ACT 23:3 ཏེ༌ནེ༌ པ༌འུ༌ལུའི༌ ཁོའ༌ མོལས༌, “ཁ༌ཆོས༌པ༌, ཀར༌ཙི༌ སྐུས༌ཁན༌ནི༌ རྩིག༌པ༌, འི༌བོའེ༌ ལན༌ ཁྱོ༌རང༌ང༌ དཀོན༌མཆོག༌གི༌ སལ༌ཨིན༌། བཀའ༌ཁྲིམས༌ ནང༌ཞིན༌ ངའ༌ ཁྲིམས༌ཅད༌ད༌ལ༌ ཁྱོ༌རང༌ ཏེ༌ཀ༌ དུགས༌ཏེ༌ མན༌ན༌, ཁྱོ༌རང༌ངི༌ ང༌ རྡུང༌ཅེས༌ལ༌ བཀའ༌ ཏངས༌ཏེ༌ བཀའ༌ཁྲིམས༌པོ༌ ཅག༌དུག༌།”
ACT 23:4 པ༌འུ༌ལུའི༌ དུན༌ལ༌ ཡོད༌ཁན༌གུན༌ནི༌ ཁོང༌ང༌ ཟེརས༌, “ཁྱོ༌རང༌ངི༌ དཀོན༌མཆོག༌གི༌ བླ༌མ༌ ཆེན༌མོའ༌ ངན༌པ༌ ཟེར༌ཅེས༌སི༌ ཧམ༌པ༌ ཅོའ༌དའ༌།”
ACT 23:5 པ༌འུ༌ལུའི༌ ལན༌སལས༌, “ཡ༌ཧུ༌དཱ༌པ༌ སྤུན༌གུན༌ ང༌ ཁོང༌ བླ༌མ༌ ཆེན༌མོ༌ ཨིན༌ཁན༌བོ༌ གྱུས༌ མེད༌པིན༌། སུང༌རབས༌སི༌ ནང༌ང༌ ‘ཁྱོ༌ཞའེ༌ ཁྱོ༌ཞ༌རང༌ངི༌ ཝང༌སྲུལ༌པ༌ ངན༌པ༌ ཟེར༌ མ༌གོས༌’ བྲིའ༌ ཛད༌ཏེ༌ དུག༌།”
ACT 23:6 པ༌འུ༌ལུའ༌ ཚོགས༌དུའི༌ ནང༌ང༌ ཁ༌ཅིག༌ སད༌དུ༌ཀི༌པ༌ ཡང༌ ཁ༌ཅིག༌ ཕ༌རུ༌ཤི༌པ༌ ཨིན༌ཁན༌བོ༌ གྱུས༌ཡོད༌པིན༌། ཁོང༌ངི༌ ཀུ༌ཅོ༌ སལ༌ཏེ༌ མོལས༌, “ཡ༌ཧུ༌དཱ༌པའེ༌ སྤུན༌གུན༌, ང༌ ཕ༌རུ༌ཤི༌པ༌ ཨིན༌, ཡང༌ ངའེ༌ ཨ༌བའང༌། ངའེ༌ ཤི༌ཁན༌གུན༌ སོན༌ཏེའ༌ ལང༌ཅེས༌སི༌ ནང༌ང༌ རེ༌ཝ༌ བོར༌ཅེས༌པོའེ༌ ང༌ འི༌ཀ༌ ཁྲིམས༌ཅད༌ད༌ལ༌ ཁྱོངས༌ཏེ༌ ཨིན༌ནོག༌།”
ACT 23:7 ཏེ༌གུན༌ མོལ༌ལ༌ཅིག༌, ཕ༌རུ༌ཤི༌པ༌ དང༌ སད༌དུ༌ཀི༌པ༌ མི༌མངས༌སི༌ ནང༌ང༌ ཟེར༌ཟེར༌ སྲན༌ཏྲེ༌ སོང༌, ཡང༌ ཚོགས༌དུའི༌ ནང༌ང༌ ཁག༌ཉིས༌ བུད༌
ACT 23:8 ༼ཕ༌རུ༌ཤི༌པ༌གུན༌ནི༌ ཤི༌ཁན༌གུན༌ སོན༌ཏེའ༌ ལང༌ཅེས༌, ཕོ༌ཉ༌ དང༌ སེམས༌ཉིད༌ གུན༌ ཡོད༌ཀྱག༌ ཟེར༌ར༌ནོག༌, ཨིན༌ནའང༌ སད༌དུ༌ཀི༌པ༌གུན༌ནི༌ ཏེ༌གུན༌ནི༌ཀ༌ ཏད༌པ༌ ཅོའ༌ མ༌ནོག༌༽
ACT 23:9 ཚོགས༌དུའི༌ ནང༌ང༌ ཧི༌ལིངས༌ སྲན༌ཏྲེ༌ ཞུགས༌, ཡང༌ ཕ༌རུ༌ཤི༌པའེ༌ ཆོས༌ཁྲིམས༌ལ༌ ཁས༌པའེ༌ མི༌ ཁ༌ཅིག༌ ལངས༌ཏེ༌ སད༌དུ༌ཀི༌པ༌གུན༌ནི༌ གྱབ༌གལ༌ སྲན༌ཏྲེ༌ ཅོས༌ཏེ༌ ཟེརས༌, “ང༌ཞའ༌ འི༌ མི༌བོའེ༌ ནང༌ང༌ ཅའང༌ སྐྱོན༌ མ༌ཐོབ༌, ཀལ༌ཏེས༌ ཕོ༌ཉ༌ཞིག༌ ཡ༌ སེམས༌ཉིད༌ ཅིག༌གི༌ ཁོང༌ང༌ སྤེ༌ར༌ ཏངས༌ཏེ༌ ཡོད༌ན༌ ཅི༌ སོང༌?”
ACT 23:10 ཛིང༌མོ༌ མ༌ རྩོག༌པོ༌ སོང༌པ༌, མག༌སྟོང༌ངི༌ སྤོན༌བོའེ༌ ཏེ༌གུན༌ནི༌ པ༌འུ༌ལུ༌ ཚེད༌ཚེད༌ ཅོས༌ མི༌ཏང༌ང༌ སམས༌ཏེ༌ ཇིགས༌། ཁོའེ༌ མག༌མི༌གུན༌ལ༌ ཡོག༌ག༌ སོང༌, ཡང༌ ཝང༌ ཏངས༌ཏེ༌ ཚོགས༌དུའི༌ ཕྲོ༌ནེ༌ པ༌འུ༌ལུ༌ སྐྱོབས༌ཏེ༌ ཀི༌ལའེ༌ ནང༌ང༌ ཁྱེར༌ ཟེར༌ཏེ༌ བཀའ༌ ཏངས༌།
ACT 23:11 ཏེན༌ན༌ ཚན༌ལ༌ གཙོ༌བོ༌ ཡེ༌ཤུ༌ པ༌འུ༌ལུའི༌ དུན༌ལ༌ ཇལ༌ཏེ༌ མོལས༌, “ཧམ༌པ༌ ཅོས༌, ཡེ༌རུ༌ཤ༌ལེམ༌མི༌ ནང༌ང༌ ངའེ༌ ཕིའ༌ སྤང༌པོ༌ ཏང༌ཁན༌ ཙོགས༌ལ༌ ཁྱོ༌རང༌ངི༌ རོམ༌མི༌ གྱལ༌སའེ༌ ནང༌ངའང༌ ངའེ༌ ཕིའ༌ སྤང༌པོ༌ ཏང༌གོས༌།”
ACT 23:12 སྟིང༌མ༌ཞག༌པོ༌ ང༌ཏོག༌ནེ༌ ཡ༌ཧུ༌དཱ༌པ༌གུན༌ ཅུས༌ངན༌ ལྡིང༌ཅེས༌ལ༌ ཛོམས༌ ཡང༌ ནའ༌ ཁུར༌ཏེ༌ ནམ༌ཚོག༌པ༌ པ༌འུ༌ལུ༌ མི༌སད༌ ཏེ༌ཏེ༌ཚོག༌པ༌ ཁོང༌གུན༌ནི༌ མི༌ཟའ༌ ཡ༌ མི༌ཐུང༌ ཟེརས༌།
ACT 23:13 ཏེ༌ ཅུས༌ངན༌བོའེ༌ ནང༌ང༌ ཧ༌ལམ༌ མི༌ ཞིབ༌ཅུ༌ སང༌ མང༌ང༌ ཐུས༌།
ACT 23:14 ཁོང༌གུན༌ བླ༌མ༌ ཆེན༌མོ༌ དང༌ ཡ༌ཧུ༌དཱ༌པའེ༌ འུ༌སྐྱོང༌ གུན༌ ཡོད༌ས༌ སོང༌ཏེ༌ ཟེརས༌, “ནམ༌ཚོག༌པ༌ པ༌འུ༌ལུ༌ སད༌ མི༌སད༌ ཏེ༌ཏེ༌ཚོག༌པ༌ ང༌ཞའེ༌ ཅའང༌ མི༌ཟ༌ ཟེར༌ཏེ༌ དཀོན༌མཆོག༌གི༌ སྐུན༌དུན༌ལ༌ ནའ༌ སྲན༌ཏྲེ༌ ཁུར༌ཏེ༌ ཨིན༌།
ACT 23:15 ཏ༌ ཉེ༌རང༌ དང༌ ཡ༌ཧུ༌དཱ༌པའེ༌ ཚོགས༌དུའི༌, མག༌སྟོང༌ངི༌ སྤོན༌བོའ༌ པ༌འུ༌ལུའི༌ ཤགས༌པོའ༌ ཡང༌སྐྱར༌ སྔོན༌ནི༌ སང༌ གྱལ༌ལ༌ ཅོས༌ཏེ༌ རྩར༌ཅོད༌ ཏང༌ཅེས༌ལ༌ ཁོ༌ ཉེ༌ཞའ༌ ཡོད༌ས༌ ཁྱོང༌ མོལ༌། ང༌ཞའེ༌ ཁོ༌ ལམ༌བར༌ལ༌ སད༌ཨིན༌།”
ACT 23:16 ཨིན༌ནའང༌ ཏེ༌ ཅུས༌ངན༌བོ༌ པ༌འུ༌ལུའི༌ སྲིང༌མོའེ༌ བུ༌ཚ༌ ཚོར༌པ༌ ཁོ༌ གྱུགས༌ཏེ༌ ཀི༌ལའེ༌ ནང༌ང༌ སོང༌ཏེ༌ པ༌འུ༌ལུའ༌ ཤདས༌།
ACT 23:17 ཏེ༌ནེ༌ པ༌འུ༌ལུའི༌ ཏེ༌ཀ༌ ཡོད༌ཁན༌ནི༌ མག༌མི༌གྱའེ༌ སྤོན༌བོ༌ཞིག༌ག༌ བོད༌ཏེ༌, “འི༌ ཁྱོག༌ཏོང༌བོ༌ མག༌སྟོང༌ངི༌ སྤོན༌བོའེ༌ཀ༌ ཁྱེར༌, ཁོའ༌ སྤེ༌ར༌ ཁག༌ཅན༌ཞིག༌ ཤད༌གོ༌ཤེས༌ དུག༌” མོལས༌།
ACT 23:18 ཁོའེ༌ ཏེ༌ ཁྱོག༌ཏོང༌བོ༌ མག༌སྟོང༌ངི༌ སྤོན༌བོའེ༌ཀ༌ ཁྱེར༌ཏེ༌ ཞུས༌, “ཙོན༌པ༌ པ༌འུ༌ལུའི༌ ང༌ བོད༌ཏེ༌ འི༌ ཁྱོག༌ཏོང༌བོ༌ ཉེ༌རང༌ངི༌ཀ༌ ཁྱེར༌, ཟེར༌ར༌རག༌, ཅིའ༌ཟེར༌ན༌ ཁོའ༌ ཉེ༌རང༌ང༌ སྤེ༌ར༌ཞིག༌ ཤད༌ཅེས༌ དུག༌།”
ACT 23:19 ཏེ༌ནེ༌ མག༌སྟོང༌ངི༌ སྤོན༌བོའེ༌, ཁྱོག༌ཏོང༌བོ༌ ལག༌པ༌ ཐམས༌ཏེ༌ འ༌ཟམ༌ཤིག༌ག༌ ཁྱེར༌ཏེ༌ ཏྲིས༌, “ཁྱོ༌རང༌ངི༌ ང༌ ཅི༌ ཤད༌ཅེས༌ཡོད༌?”
ACT 23:20 ཁོའེ༌ ཟེརས༌, “ཡ༌ཧུ༌དཱ༌པ༌གུན༌ནི༌ སྐྱོན༌ ཀོལ༌ཏེ༌ པ༌འུ༌ལུའི༌ ཤགས༌པོའ༌ སྔོན༌ནི༌ སང༌ གྱལ༌ལ༌ ཅོས༌ཏེ༌ རྩར༌ཅོད༌ ཏང༌ཅེས༌ལ༌ ཐོ༌རེ༌ ཁོང༌ ཚོགས༌དུའི༌ དུན༌ལ༌ ཁྱོང༌ ཟེར༌ཏེ༌ ཉེ༌རང༌ང༌ ཞུ༌ཝ༌ ཕུལ༌ཅེས༌ལ༌ ཁའ༌ཆམས༌།
ACT 23:21 ཁོང༌ངི༌ ཞུ༌ཝ༌བོ༌ ཉན༌ན༌ མ༌ཛད༌ ཅིའ༌ཟེར༌ན༌ ཡ༌ཧུ༌དཱ༌པ༌ ཞིབ༌ཅུའི༌ སང༌ མང༌ང༌ཞིག༌ པ༌འུ༌ལུའ༌ སྤུང༌གོལ༌ ཅོ༌ཅེས༌ལ༌ སྲུངས༌ཏེ༌, ནམ༌ཚོག༌པ༌ ཁོང༌ མི༌སད༌ ཏེ༌ཏེ༌ཚོག༌པ༌ མི༌ཟ༌ ཡ༌ མི༌ཐུང༌ ཟེར༌ཏེ༌ ཁོང༌གུན༌ནི༌ ནའ༌ ཁུར༌ཏེ༌ དུག༌། ཁོང༌གུན༌ གྲལ༌གྲིག༌ ཅོས༌ཏེ༌ ཉེ༌རང༌ངི༌ ཁོང༌ངི༌ ཞུ༌ཝ༌ ལག༌ལེན༌ལ༌ ཁྱོང༌ཅེས༌ལ༌ སྲུངས༌ཏེ༌ དུག༌།”
ACT 23:22 མག༌སྟོང༌ངི༌ སྤོན༌བོའེ༌ ཁྱོག༌ཏོང༌ ལོགས༌ཏེ༌ ཀལ༌ཨིན༌ བཀའ༌ ཏངས༌, “ཁྱོ༌རང༌ངི༌ ང༌ འི༌ ལོན༌བོ༌ ཁྱོངས༌པིན༌ ཟེར༌ཏེ༌ སུའང༌ མ༌ཤད༌།”
ACT 23:23 ཏེ༌ནེ༌ ཁོའེ༌ མག༌མི༌གྱའེ༌ སྤོན༌བོ༌ ཉིས༌ལ༌ བོད༌ཏེ༌ ཟེརས༌, “ར༌འི༌ ཁུར༌ཁན༌ ཉིབ༌གྱ༌, རྟ༌ ཞོན༌ཁན༌ རྡུན༌ཅུ༌ དང༌ རྡུང༌ ཁུར༌ཁན༌ ཉིབ༌གྱའེ༌ མག༌མི༌ གུན༌ དི༌རིང༌ ཚན༌ནི༌ ཆུ༌ཚོད༌ རྒུ༌པའེ༌ཀ༌ ཀཱེ༌སར༌རིའ༌ ཆ༌ཅེས༌ལ༌ གྲལ༌གྲིག༌ ཅོས༌།
ACT 23:24 པ༌འུ༌ལུའང༌ ཞོན༌ཅེས༌ལ༌ རྟ༌ཞིག༌ ཏོང༌ ཡང༌ ཁོ༌ ཀའ༌ལོན༌ ཕེ༌ལིགས༌སི༌ཀ༌ ཁམ༌ཟང༌ ལེབ༌ཅུག༌།”
ACT 23:25 ཁོའེ༌ འི༌ ཨི༌གེ༌བོའང༌ ཀལས༌,
ACT 23:26 “ངའ༌ ཀོལོ༌དི༌འས༌ ལི༌སི༌འས༌སི༌, རྩི༌ཝ༌ཅན༌ ཀའ༌ལོན༌ ཕེ༌ལིགས༌ལ༌ ཇུ༌ ཞུའད༌།”
ACT 23:27 “འི༌ མི༌བོ༌ ཡ༌ཧུ༌དཱ༌པ༌གུན༌ནི༌ ཟུམས༌ཏེ༌ སད༌ཅེས༌ དུག༌པིན༌, ཨིན༌ནའང༌ ཁོ༌ རོམ༌པ༌ ཨིན༌ཁན༌བོ༌ གྱུས༌ཆའ༌ཅིག༌, ང༌ མག༌མི༌གུན༌ ཉམ༌པོ༌ སོང༌ཏེ༌ ཁོ༌ སྐྱོབས༌པིན༌།
ACT 23:28 ཁོའེ༌ཀ༌ ཅི༌ ཉད༌གལ༌ ཀལ༌དུག༌ ལྟ༌ཅེས༌ལ༌ ངའེ༌ ཁོ༌ ཡ༌ཧུ༌དཱ༌པའེ༌ ཚོགས༌དུའི༌ དུན༌ལ༌ ཁྱེར༌པིན༌།
ACT 23:29 པ༌འུ༌ལུའི༌ཀ༌ ཉད༌གལ༌བོ༌ ཁོ༌རང༌གུན༌ནི༌ བཀའ༌ཁྲིམས༌སི༌ སྐོར༌ལ༌ ཨིན༌ཁན༌བོ༌ ང༌ ཧ༌གོ༌, ཨིན༌ནའང༌ ཉད༌གལ༌བོ༌, ཁོ༌ ཙོན༌ཁང༌ང༌ ཀག༌ཅེས༌ ཡ༌ སད༌ཅེས༌སི༌ འོས༌པ༌ མི༌དུག༌།
ACT 23:30 ང༌ འི༌ མི༌བོའེ༌ གྱབ༌གལ༌ལ༌ ཅུས༌ངན༌ ལྡིང༌དུག༌ ཟེར༌ཏེ༌ གྱུས༌ཆའ༌ཅིག༌, ངའེ༌ ཏེན༌ན༌མལ༌ལ༌ ཁོ༌ ཉེ༌རང༌ངི༌ཀ༌ ཀལ༌པིན༌, ཡང༌ ཁོའ༌ ཉད༌གལ༌ ཀལ༌ཁན༌གུན༌ལའང༌ ཁོའེ༌ གྱབ༌གལ༌ལ༌ ཟེར༌ཁན༌གུན༌ ཉེ༌རང༌ངི༌ཀ༌ སོང༌ཏེ༌ ཤོད༌ ཟེར༌ཏེ༌ བཀའ༌ ཏངས༌པིན༌།”
ACT 23:31 ཏེ༌ནེ༌ བཀའ༌ ཏང༌ཁན༌ ནང༌ཞིན༌ མག༌མི༌གུན༌ནི༌ པ༌འུ༌ལུ༌ ཚན༌ལ༌ ཨན༌ཏི༌པ༌ཏྲིས༌ གྱལ༌ས༌ ཚག༌པ༌ ཁྱེརས༌།
ACT 23:32 སྟིང༌མ༌ཞག༌པོ༌ པ༌འུ༌ལུ༌ རྟ༌ ཞོན༌ཁན༌ མག༌མི༌གུན༌ལ༌ སྟད༌ཏེ༌ ཞན༌ མག༌མི༌གུན༌ ལོགས༌ཏེ༌ ཀི༌ལའ༌ སོང༌།
ACT 23:33 རྟ༌པ༌ མག༌མི༌གུན༌ ཀཱེ༌སར༌རིའ༌ ལེབ༌བ༌ཅིག༌, ཁོང༌གུན༌ནི༌ ཨི༌གེ༌བོ༌ ཀའ༌ལོན༌ལ༌ ཏངས༌ཏེ༌ པ༌འུ༌ལུ༌ ཁོའ༌ སྟདས༌།
ACT 23:34 ཀའ༌ལོན༌ནི༌ ཨི༌གེ༌བོ༌ སིལ༌ཏེ༌ པ༌འུ༌ལུའ༌ ཀ༌ཡུལ༌ནེ༌ ཨིན༌ ཟེར༌ཏེ༌ ཏྲིས༌། ཁོའ༌ ཁོང༌ ཀཱི༌ལི༌ཀི༌ཡཱ༌ནེ༌ ཨིན༌ཁན༌བོ༌ གྱུས༌ཆའ༌ཅིག༌,
ACT 23:35 ཁོའེ༌ ཟེརས༌, “ཁྱོ༌རང༌ང༌ ཉད༌གལ༌ ཀལ༌ཁན༌གུན༌ ལེབ༌བ༌ཅིག༌, ངའེ༌ ཁྱོ༌རང༌ངི༌ ཤགས༌པོ༌ ཉན༌ཨིན༌།” ཡང༌ ཁོའེ༌ པ༌འུ༌ལུ༌ ཧེ༌རོད༌དི༌ ཁར༌རི༌ ནང༌ང༌ བོར༌ཏེ༌ མག༌མི༌ སྲུང༌ཁན༌གུན༌ ཏང༌ཅེས༌ལ༌ བཀའ༌ ཏངས༌།
ACT 24:1 ཞག༌པོ༌ ལྔའེ༌ སྟིང༌ནེ༌ བླ༌མ༌ ཆེན༌མོ༌ ཨ༌ན༌ནི༌ཡཱས༌, འུ༌སྐྱོང༌ ཁ༌ཅིག༌ དང༌ ཏེར༌ཏུལ༌ལུས༌ ཟེར༌ཁན༌ནི༌ ཝ༌ཀྱིལ༌ ཉམ༌པོ༌ ཀའ༌ལོན༌ ཕེ༌ལིགས༌སི༌ཀ༌ པ༌འུ༌ལུའི༌ གྱབ༌གལ༌ལ༌ ཉད༌གལ༌ ཀལ༌ཁན༌གུན༌ ཤད༌ད༌ ཡོངས༌།
ACT 24:2 པ༌འུ༌ལུ༌ ཁྱོང༌ང༌ཅིག༌, ཝ༌ཀྱིལ༌ ཏེར༌ཏུལ༌ལུས༌སི༌ པ༌འུ༌ལུའི༌ཀ༌ ཉད༌ཀལ༌ཨིན༌ ཟེརས༌, “ཀྱེ༌ སྤོན༌བོ༌ ཕེ༌ལིགས༌ ཉེ༌རང༌ངི༌ ཝང༌ངི༌ ཡོག༌ག༌, ང༌ཞའེ༌ ཏུས༌ རིང༌མོ༌ཞིག༌ ཞི༌དེ༌ ཉོངས༌, ཡང༌ ཉེ༌རང༌ངི༌ ཤེས༌རབས༌ གྱུད༌ཏེ༌ འི༌ ཡུལ༌ལི༌ ནང༌ང༌ ཕན༌ཐོགས༌ཅན༌ནི༌ གྱུར༌ཇ༌ མང༌པོ༌ ཁྱོངས༌།
ACT 24:3 སྤོན༌བོ༌ ཕེ༌ལིགས༌, ཏེ༌ ཚང༌མའེ༌ ཕིའ༌ ང༌ཞའེ༌ ཉེ༌རང༌ང༌ ཐུག༌རྗེ༌ཆེ༌ ཞུའད༌།
ACT 24:4 ཨིན༌ནའང༌ ཉེ༌རང༌ངི༌ ཏུས༌ རིན༌ཅན༌བོ༌ གོད༌ལ༌ མ༌ཏང༌ང༌ ང༌ཞའེ༌ དོར༌ལྡུས༌ཏེ༌ ཤད༌ཅེས༌ཅན༌བོ༌ སན༌ན༌ ཛད༌།
ACT 24:5 ང༌ཞའ༌ འི༌ མི༌བོ༌ ཕ༌སད༌ཕིང༌ཁན༌ཞིག༌ ཨིན༌ཁན༌ གྱུས༌སོང༌, ཁོའེ༌ ཇིག༌རྟེན༌ གང༌པོའེ༌ ནང༌ང༌ ཡ༌ཧུ༌དཱ༌པ༌གུན༌ནི༌ ཕྲོའ༌ ཧི༌ལིངས༌ ཕིང༌ཨིན༌ དུག༌དུག༌, ཡང༌ ཁོ༌ ན༌ཙ༌རེད༌པའེ༌ ཡམ༌ཚན༌ སྡེ༌ཞིག༌གི༌ གོ༌སྐྱོང༌ ཨིན༌ནོག༌།
ACT 24:6 ང༌ཞའེ༌ ཆོད༌ཁང༌ངའང༌ ཚི༌ཏུ༌ ཅོ༌ཅེས༌སི༌ རྩོན༌གྲུས༌ ཅོས༌པ༌ ང༌ཞའེ༌ ཁོ༌ ཟུམས༌པིན༌།
ACT 24:7 
ACT 24:8 ཀལ༌ཏེས༌ ཁོའ༌ རྩར༌ཅོད༌ ཏང༌ན༌ ང༌ཞའེ༌ ཁོའེ༌ཀ༌ ཀལ༌ཁན༌ནི༌ སྐྱོན༌ ཚང༌མ༌ ཏན༌ཏན༌ ཨིན༌ཁན༌བོ༌ ཉེ༌རང༌ང༌ ཧ༌གོ༌ཨིན༌།”
ACT 24:9 ཡ༌ཧུ༌དཱ༌པ༌གུན༌ནིའང༌ ཅིག༌ སོང༌ཏེ༌ ཏེར༌ཏུལ༌ལུས༌སི༌ སྐྱོན༌ ཀལ༌ཁན༌ ཚང༌མ༌ དེན༌བ༌ ཨིན༌ནོག༌ ཟེརས༌།
ACT 24:10 ཀའ༌ལོན༌ནི༌ པ༌འུ༌ལུའ༌ ཟེར༌ཅེས༌ལ༌ རྡོའ༌ ཏང༌ང༌ཅིག༌, ཁོང༌ངི༌ ལན༌ཏང༌ཨིན༌ མོལས༌, “ལོ༌ མང༌པོ༌ཞིག༌ནེ༌ ཉེ༌རང༌ འི༌ གྱལ༌ཁམས༌སི༌ ཁྲིམ༌སྤོན༌ ཨིན༌ཁན༌བོ༌ ང༌ གྱུས༌ཡོད༌པ༌ ངའེ༌ ང༌རང༌ ནོངས༌མེད༌ ཨིན༌ཁན༌ནི༌ སྐོར༌ ཉེ༌རང༌ངི༌ དུན༌ལ༌ ཤད༌ད༌ ཐད༌ད༌རག༌།
ACT 24:11 ཞག༌ རྕུག༌ཉིས༌སི༌ སྔུན༌ལ༌, ང༌ ཡེ༌རུ༌ཤ༌ལེམ༌མི༌ ཆོད༌ཁང༌ང༌ དཀོན༌མཆོག༌ག༌ ཅོལ༌ལ༌ སོང༌ཁན༌བོ༌ ཉེ༌རང༌ངི༌ ལ༌མོ༌ ཉམ༌པོ༌ གྱུས༌ཅོ༌ཉན༌ཅེས༌ ཨིན༌ནོག༌,
ACT 24:12 མ༌ཚད༌ ངའེ༌ཀ༌ ཉད༌གལ༌ ཀལ༌ཁན༌གུན༌ནི༌ ང༌ ཆོད༌ཁང༌ངི༌ ནང༌ང༌ སུ༌ཞིག༌ ཉམ༌པོ༌ ཛིང༌མོ༌ ཏང༌ཨིན༌ ཡ༌ དུ༌ཁང༌གུན༌ ཡ༌ གྱལ༌སའེ༌ ནང༌ང༌ མི༌ཚོགས༌སི༌ ཕྲོའ༌ ཧི༌ལིངས༌ ཕིང༌ཨིན༌ མ༌ཐོང༌ང༌ ཨིན༌ནོག༌།
ACT 24:13 ཁོང༌གུན༌ནི༌ ངའེ༌ཀ༌ ཀལ༌ཁན༌ནི༌ ཉད༌གལ༌གུན༌ དེན༌བ༌ ཨིན༌ ཟེར༌ཏེ༌ ཉེ༌རང༌ང༌ སྟན༌ མི༌ཐུབ༌།”
ACT 24:14 “ངའེ༌ མ༌ཤི༌ཀའེ༌ ལམ༌མི༌ཀ༌ གྲུལ༌ཏེ༌ ང༌ཞའེ༌ ཕ༌མེས༌པོ༌གུན༌ནི༌ དཀོན༌མཆོག༌ག༌ ཅོལ༌ཁན༌བོ༌ དེན༌བ༌ ཡང༌ ལུང༌སྟོན༌པ༌ དང༌ བཀའ༌ཁྲིམས༌སི༌ སྤེ༌ཆ༌གུན༌ནི༌ ནང༌ང༌ བྲིས༌ཏེ༌ ཡོད༌ཁན༌ ཚང༌མའེ༌ཀ༌ ཏད༌པ༌ ཅོའད༌, ཨིན༌ནའང༌ ཁོང༌གུན༌ནི༌ ཏེ༌བོའ༌ མི༌ཐུན༌པའེ༌ ཆོས༌ སྡེ༌ ཟེར༌དུག༌།
ACT 24:15 ཁོང༌གུན༌ནི༌ ནང༌ང༌, དཀོན༌མཆོག༌གི༌ མི༌ ཀྲང༌པོ༌ དང༌ ངན༌པ༌ ཉིས༌ཀོ༌ སོན༌ཏེའ༌ ལང༌ང༌ ཛད༌ཅེས༌སི༌ རེ༌ཝ༌ ཡོད༌ཁན༌བོ༌ ངའེ༌ ནང༌ངའང༌ ཡོད༌།
ACT 24:16 ཏེ༌བོའེ༌ཕིའ༌ ངའེ༌ མི༌ ཚང༌མ༌ དང༌ དཀོན༌མཆོག༌གི༌ སྐུན༌དུན༌ལ༌ ང༌རང༌ངི༌ སེམས༌ ལག༌མོ༌ བོར༌ཅེས༌སི༌ རྩོན༌གྲུས༌ ཅོའད༌།”
ACT 24:17 “ལོ༌ མང༌པོ༌ཞིག༌གི༌ སྟིང༌ནེ༌, ང༌ ངའེ༌ ཡུལ༌པ༌ ཉལ༌བ༌ཅན༌གུན༌ལ༌ རོགས༌སི༌ པེ༌ནེ༌ ཁྱོང༌ཅེས༌ དང༌ དཀོན༌མཆོག༌ག༌ ཆོད༌པ༌གུན༌ ཕུལ༌ཅེས༌ལ༌ ཡེ༌རུ༌ཤ༌ལེམ༌མ༌ ལོགས༌ཏེ༌ ཡོངས༌པིན༌།
ACT 24:18 ཁོང༌གུན༌ནི༌ ང༌ ཆོད༌ཁང༌ངི༌ ནང༌ང༌ ཐོང༌ ཟ༌ནེ༌ ང༌ ང༌ཞའེ༌ ཆོས༌སི༌ བཀའ༌ཁྲིམས༌ ནང༌ཞིན༌ལ༌ རྩང༌མ༌ སོང༌ཏེ༌ ཨིན༌པིན༌, ཡང༌ ངའེ༌ ངའེ༌ཁོར༌ལ༌ མི༌ཚོགས༌ ཡ༌ ཧི༌ལིངས༌ མེད༌པིན༌།
ACT 24:19 ཨིན༌ནའང༌ ཏེ༌རུ༌ ཨ༌སི༌ཨཱ༌པའེ༌ ཡ༌ཧུ༌དཱ༌པ༌ ཁ༌ཅིག༌ དུག༌པིན༌, ཀལ༌ཏེས༌ ངའེ༌ གྱབ༌གལ༌ལ༌ ཟེར༌ཅེས༌ ཡོད༌ན༌, ཏེ༌ནེ༌ ཁོང༌གུན༌ ཉེ༌རང༌ངི༌ དུན༌ལ༌ ང༌ སྐྱོན༌ ཀལ༌ལ༌ ཡོང༌གོས༌།
ACT 24:20 འི༌ཀ༌ ཡོད༌ཁན༌གུན༌ནི༌, ང༌ ཡ༌ཧུ༌དཱ༌པའེ༌ ཚོགས༌དུའི༌ དུན༌ལ༌ ཡོད༌ ཟ༌ནེ༌ ཁོང༌གུན༌ལ༌ ངའེ༌ ནང༌ང༌ སྐྱོན༌ ཐོབ༌ཁན༌གུན༌ ཤད༌གོས༌།
ACT 24:21 ‘ངའེ༌ ཤི༌ཁན༌གུན༌ སོན༌ཏེའ༌ ལང༌ཅེས༌པོའེ༌ཀ༌ ཏད༌པ༌ ཅོས༌པ༌, དི༌རིང༌ ངའེ༌ཀ༌ ཤགས༌ ཏང༌ང༌ད༌’ ཟེར༌ཏེ༌ ཀུ༌ཅོ༌ ཏངས༌ཅེས༌པོ༌ ཅིག༌པོ༌ ནི༌, ངའེ༌ སྐྱོན༌ ཨིན༌པིན༌།”
ACT 24:22 ཏེ༌ནེ༌ མ༌ཤི༌ཀའེ༌ ལམ༌མི༌ཀ༌ གྲུལ༌ཁན༌གུན༌ནི༌ སྐོར༌ལ༌ གྱལ༌ལ༌ གྱུས༌ཡོད༌ཁན༌ནི༌ ཕེ༌ལིགས༌སི༌, “མག༌སྟོང༌ངི༌ སྤོན༌བོ༌ ལི༌སི༌འས༌ ལེབ༌བ༌ཅིག༌, ཁྱོ༌རང༌ངི༌ ཤགས༌པོའ༌ ཐག༌ཅད༌ ཏང༌ཨིན༌” ཟེར༌ཏེ༌ མི༌ཚོགས༌ ཤོལ༌ཅུགས༌།
ACT 24:23 ཁོའེ༌ མག༌མི༌གྱའེ༌ སྤོན༌བོའ༌, པ༌འུ༌ལུའ༌ སྲུང༌ཁན༌ བོར༌ ཨིན༌ནའང༌ ཁར༌རི༌ ནང༌ གྲུལ༌ཅེས༌སི༌ རང༌ཝང༌ ཏོང༌ ཡང༌ ཁོང༌ངི༌ ཕྲོ༌པ༌གུན༌ལ༌ ཁོང༌ངི༌ སྒོས༌དོམ༌ ཁྱོང༌ཅེས༌ལ༌ སྒག༌ མ༌གོས༌ ཟེར༌ཏེ༌ བཀའ༌ ཏངས༌།
ACT 24:24 ཞག༌ ཁ༌ཅིག༌གི༌ སྟིང༌ནེ༌, ཕེ༌ལིགས༌ རང༌ངི༌ ན༌མ༌ གྲུརུ༌སིལ༌ལཱ༌ ཉམ༌པོ༌ ཡོངས༌, ཁོ༌ ཡ༌ཧུ༌དཱ༌མ༌ཞིག༌ ཨིན༌པིན༌། ཕེ༌ལིགས༌སི༌ པ༌འུ༌ལུའ༌ བོད༌ཁན༌ ཏངས༌ཏེ༌ མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པའེ༌ སྐོར༌ལ༌ པ༌འུ༌ལུའི༌ ཀ༌ནེ༌ ཉནས༌།
ACT 24:25 པ༌འུ༌ལུའི༌ ལས༌ ཀྲང༌པོ༌ ཅོ༌ཅེས༌, རང༌སེམས༌ ཅུན༌ཅེས༌ དང༌ ཡོང༌ཅེས༌ཅན༌ནི༌ དཀོན༌མཆོག༌གི༌ ཁྲིམས༌ཅད༌དི༌ སྐོར༌ལ༌ ཤད༌ད༌ ཛད༌པ༌, ཕེ༌ལིགས༌ ཇིགས༌ཏེ༌ ཟེརས༌, “ཏ༌ བྲའོག༌, ཁྱོ༌རང༌ སོང༌, ཡང༌ ཞག༌ཤིག༌ ང༌ ལོང༌ ཡོད༌ ཟ༌ནེ༌ ངའེ༌ བོད༌ཨིན༌།”
ACT 24:26 པ༌འུ༌ལུའི༌ ཆོགས༌ནེ༌ ཕག༌སུབ༌བི༌ པེ༌ནེ༌ ཐོབ༌ཅེས༌སི༌ རེ༌ཝ༌ ཅོས༌པ༌ ཁོའེ༌ པ༌འུ༌ལུའ༌ སྤེ༌ར༌ ཏང༌ཅེས༌ལ༌ ལན༌ མང༌པོ༌ བོདས༌།
ACT 24:27 ལོ༌ ཉིས༌སི༌ སྟིང༌ནེ༌, ཕེ༌ལིགས༌སི༌ ཚབས༌ལ༌, ཕེས༌ཏུས༌ པོར༌ཀི༌འུས༌ ཟེར༌ཁན༌ནི༌ མི༌ཞིག༌ ཀའ༌ལོན༌ལ༌ སྐོས༌། ཕེ༌ལིགས༌ལ༌ ཡ༌ཧུ༌དཱ༌པ༌གུན༌ནི༌ ཆོགས༌སྐྱོར༌ གོས༌ པ༌སང༌ ཁོའེ༌ པ༌འུ༌ལུ༌ ཙོན༌ཁང༌ངི༌ ནང༌ང༌ བོརས༌།
ACT 25:1 ཀཱེ༌སར༌རིའེ༌ གྱལ༌ས༌ ཀའ༌ལོན༌ ཕེས༌ཏུས༌ ལེབས༌ཏེ༌ ཞག༌ སུམ༌མི༌ སྟིང༌ནེ༌ ཁོ༌ ཡེ༌རུ༌ཤ༌ལེམ༌མ༌ སོང༌།
ACT 25:2 ཏེ༌རུ༌ བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ ཁོའ༌ ཐུག༌ག༌ ཡོངས༌ཏེ༌, པ༌འུ༌ལུའི༌ གྱབ༌གལ༌ལ༌ སྐྱོན༌གུན༌ ཀལས༌།
ACT 25:3 པ༌འུ༌ལུའ༌ ཤགས༌པོ༌ ཡེ༌རུ༌ཤ༌ལེམ༌མ༌ ཅོ༌ཅེས༌སི༌ ཕིའ༌, ཁོང༌ ཏེ༌རུ༌ ཀལ༌ཅེས༌ལ༌ བཀའ༌ ཏངས༌ཏེ༌ ཀའ༌ཀྲིན༌ ཅོ༌ཅེས༌ལ༌ ཁོང༌གུན༌ནི༌ ཕེས༌ཏུས༌ལ༌ ཞུ༌ཝ༌ ཕུལས༌ ༼ཁོང༌གུན༌ནི༌ སྤུང༌གོལ༌ ཅོས༌ཏེ༌ པ༌འུ༌ལུ༌ ལམ༌བར༌ལ༌ སད༌ཅེས༌སི༌ ཅུས༌ངན༌ ལྡིངས༌།༽
ACT 25:4 ཨིན༌ནའང༌ ཕེས༌ཏུས༌སི༌ ལན༌ཏངས༌, “པ༌འུ༌ལུ༌ ཀཱེ༌སར༌རིའེ༌ ནང༌ང༌ བོར༌ཏེ༌ ཡོད༌, ང༌ ཏེ༌རུ༌ གྱོགས༌པ༌ ལོགས༌ཏེ༌ ཆ༌ཅེས༌ ཨིན༌།
ACT 25:5 ཁྱོ༌ཞའེ༌ འུ༌སྐྱོང༌ ཁ༌ཅིག༌ ང༌ ཉམ༌པོ༌ ལམ༌ཅུག༌, ཀལ༌ཏེས༌ ཁོའེ༌ ནོར༌ཁྲུལ༌ ཅོས༌ཏེ༌ ཡོད༌ན༌ ཏེན༌ན༌རུ༌ ཁོའེ༌ གྱབ༌གལ༌ལ༌ སྐྱོན༌རྗོད༌ ཅོས༌།”
ACT 25:6 ཡེ༌རུ༌ཤ༌ལེམ༌མི༌ ནང༌ང༌ ཁོང༌གུན༌ ཉམ༌པོ༌ ཞག༌ རྒྱད༌ ཡ༌ རྕུ༌ དུགས༌ཏེ༌ སྟིང༌ནེ༌, ཕེས༌ཏུས༌ ཀཱེ༌སར༌རིའ༌ ལོགས༌ཏེ༌ སོང༌། ལེབས༌ཏེ༌ སྟིང༌མ༌ཞག༌པོ༌ ཁྲིམས༌ཁུང༌ངི༌ ནང༌ང༌ ཁྲིས༌སི༌ཀ༌ དུགས༌ཏེ༌ ཁོའེ༌ པ༌འུ༌ལུ༌ ཁྱོང༌ཅེས༌ལ༌ བཀའ༌ ཏངས༌།
ACT 25:7 པ༌འུ༌ལུ༌ ཁྱོང༌ང༌ཅིག༌, ཡེ༌རུ༌ཤ༌ལེམ༌ནེ༌ ཡོངས༌ཁན༌ནི༌ ཡ༌ཧུ༌དཱ༌པ༌གུན༌ ཁོང༌ང༌ ཀིར༌ སྐོར༌ཏེ༌ དུགས༌ཏེ༌ ཉད༌གལ༌ སྲན༌ཏྲེ༌ མང༌པོ༌ ཀལས༌, ཨིན༌ནའང༌ ཅིག༌གའང༌ དེན༌བ༌ ཨིན༌ཁན༌བོ༌ ཏན༌ཏན༌ ཅོ༌ མ༌ཉན༌།
ACT 25:8 ཏེ༌ནེ༌ པ༌འུ༌ལུའི༌ ཁོང༌རང༌ ནོངས༌མེད༌ ཨིན༌ཁན༌ སྟན༌ཏེ༌ ཞུས༌, “ངའེ༌ ཡ༌ཧུ༌དཱ༌པའེ༌ བཀའ༌ཁྲིམས༌ ཡ༌ ཆོད༌ཁང༌ ཡ༌ རོམ༌མི༌ གྱལ༌པོའེ༌ གྱབ༌གལ༌ལ༌ མན༌ཁན༌ ཅའང༌ མ༌ཅོས༌པིན༌།”
ACT 25:9 ཨིན༌ནའང༌ ཕེས༌ཏུས༌སི༌ ཡ༌ཧུ༌དཱ༌པ༌གུན༌ལ༌ ཀའ༌ཀྲིན༌ སྟན༌ཅེས༌སི༌ དོད༌པ༌ ཅོས༌ཏེ༌ ཁོའེ༌ པ༌འུ༌ལུའ༌ ཟེརས༌, “ཁྱོ༌རང༌ ཡེ༌རུ༌ཤ༌ལེམ༌མི༌ ནང༌ང༌ ངའེ༌ དུན༌ལ༌ འི༌ ཤགས༌པོའ༌ ཁྲིམས༌ཅད༌ཅེས༌ལ༌ ཆའ༌ ཐད༌ད༌རག༌ག༌?”
ACT 25:10 ཨིན༌ནའང༌ པ༌འུ༌ལུའི༌ མོལས༌, “ང༌ རོམ༌མི༌ གྱལ༌པོའེ༌ ཁག༌ཁུར༌པའེ༌ ཁྲིམས༌ཁུང༌ང༌ ཨིན༌, ངའེ༌ ཤགས༌སི༌ ཁྲིམས༌ཅད༌ འིན༌ན༌རུ༌ ཆ༌གོས༌། ངའེ༌ ཡ༌ཧུ༌དཱ༌པ༌གུན༌ནི༌ གྱབ༌གལ༌ལ༌ སྐྱོན༌ ཅའང༌ མ༌ཅོས༌ཁན༌བོ༌ ཉེ༌རང༌ང༌ གྱལ༌ལ༌ ཅོས༌ཏེ༌ གྱུས༌ཨིན༌ནོག༌།
ACT 25:11 ཀལ༌ཏེས༌ ང༌ གལ༌ཏེ༌ ཤི༌ཅེས༌སི༌ ཆད༌པ༌ ཕོག༌ནའང༌, ང༌ ཤི༌ཅེས༌སི༌ ཕིའ༌ ཇིགས༌ས༌ མེ༌རག༌། ཨིན༌ནའང༌ ཀལ༌ཏེས༌ འི༌ ཡ༌ཧུ༌དཱ༌པ༌གུན༌ནི༌ ངའེ༌ཀ༌ ཉད༌གལ༌ ཀལ༌ཁན༌གུན༌ དེན༌བ༌ མ༌བིང༌ན༌ ཏེ༌ནེ༌ ང༌ འི༌ མི༌གུན༌ནི༌ ལག༌ག༌ སྟད༌ཅེས༌སི༌ ཝང༌ སུ༌ཞིག༌གའང༌ མེད༌། ངའེ༌ རོམ༌མི༌ གྱལ༌པོའ༌ འི༌ ཤགས༌སི༌ ཁྲིམས༌ཅད༌ ཛད༌ཅེས༌ལ༌ ཞུ༌ཝ༌ ཕུལ༌ལད༌།”
ACT 25:12 ཕེས༌ཏུས༌སི༌ ཁོ༌རང༌ངི༌ ཁས༌པ༌ ཁད༌ད༌ ཏང༌ཁན༌གུན༌ ཉམ༌པོ༌ གྲབས༌ ཅོས༌ཏེ༌ ཟེརས༌, “ཁྱོ༌རང༌ངི༌ རོམ༌མི༌ གྱལ༌པོའ༌ ཞུ༌ཝ༌ ཕུལ༌པ༌, རོམ༌མི༌ གྱལ༌པོའེ༌ཀ༌ ཀལ༌ཨིན༌།”
ACT 25:13 ཞག༌ ཁ༌ཅིག༌གི༌ སྟིང༌ནེ༌ གྱལ༌པོ༌ ཨག༌རི༌པ༌ དང༌ ཁོའེ༌ ནོ༌མོ༌ བེར༌ནི༌ཀཱ༌ ཀཱེ༌སར༌རིའ༌ ཕེས༌ཏུས༌ལ༌ གའ༌སུས༌ ཅོས༌ཏེ༌ ཀུས༌པ༌ སྟན༌ན༌ལ༌ ཡོངས༌།
ACT 25:14 ཁོང༌གུན༌ ཞག༌བན༌ཤིག༌ ཏེ༌རུ༌ དུགས༌པ༌, ཕེས༌ཏུས༌སི༌ པ༌འུ༌ལུའི༌ ཤགས༌པོའེ༌ སྐོར༌ལ༌ གྱལ༌པོའ༌ ཤདས༌, “འི༌རུ༌ ཕེ༌ལིགས༌སི༌ ཙོན༌ལ༌ ཀགས༌ཁན༌ནི༌ མི༌ཞིག༌ དུག༌།
ACT 25:15 ང༌ ཡེ༌རུ༌ཤ༌ལེམ༌མ༌ ཡོད༌ ཟ༌ནེ༌, བླ༌མ༌ འུ༌སྐྱོང༌གུན༌ དང༌ ཡ༌ཧུ༌དཱ༌པའེ༌ འུ༌སྐྱོང༌གུན༌ནི༌ འི༌ མི༌བོའེ༌ གྱབ༌གལ༌ལ༌ སྐྱོན༌ ཀལ༌ཏེ༌ ཁོའ༌ ཤི༌ཅེས༌སི༌ ཆད༌པ༌ ཏང༌ཅེས༌ལ༌ ང༌ ཟེར༌ར༌རག༌།
ACT 25:16 ངའེ༌ ཁོང༌གུན༌ལ༌ རོམ༌པའེ༌ ཁྲིམས༌ ནང༌ཞིན༌, ནམ༌ཚོག༌པ༌ མི༌ཞིག༌ག༌ ཁོའ༌ སྐྱོན༌ ཀལ༌ཁན༌གུན༌ནི༌ དུན༌ལ༌ ཁོ༌རང༌ སྐྱོབ༌ཅེས༌ལ༌ སྐབས༌ མ༌ཏང༌ང༌ སུ༌ཞིག༌གི༌ ལག༌ག༌ ཆད༌པ༌ ཅད༌ཅེས༌ལ༌ སྟད༌ཆོག༌ག༌ མ༌ནོག༌ ཟེར༌པིན༌།”
ACT 25:17 “ཁོང༌གུན༌ འི༌རུ༌ ལེབ༌བ༌ཅིག༌, ངའེ༌ གོར༌ མ༌ཅུག༌ག༌ ཐོ༌རེ༌ཟུག༌པོ༌ ཁོ༌ ཁྲིམས༌ཅད༌ད༌ལ༌ ཁྱོང༌ཅེས༌སི༌ བཀའ༌ ཏངས༌པིན༌།
ACT 25:18 ཁོང༌གུན༌ནི༌ ཀལ༌ཁན༌ནི༌ ཉད༌གལ༌གུན༌, སད༌ཅེས༌སི༌ ཆད༌པ༌ ཕོག༌ཅེས༌སི༌ འོས༌པ༌ མི༌དུག༌པིན༌ ཀ༌ཟུག༌ ངའེ༌ སམ༌ཏེ༌ ཡོད༌པིན༌།
ACT 25:19 ཁོང༌གུན༌ནི༌ ཛིང༌མོ༌བོ༌ ཁོང༌རང༌གུན༌ནི༌ ཆོས༌སི༌ ལབ༌ཞ༌ ཁ༌ཅིག༌གི༌ཀ༌ ཁའ༌མི༌ཆམས༌ཅེས༌ དང༌ ཤི༌ཁན༌ནི༌ མི༌ ཡེ༌ཤུ༌ ཟེར༌ཁན༌བོའེ༌ སྐོར༌ལ༌ ཨིན༌ནོག༌, ཀ༌བོ༌ པ༌འུ༌ལུའི༌ སོན༌པོ༌ ཨིན༌ ཟེར༌དུག༌།
ACT 25:20 འི༌ཙོགས༌སི༌ ནས༌ལུག༌གི༌ རྩར༌ཅོད༌ ཏང༌ཅེས༌ ངའ༌ ཧ༌མ༌གོ༌པ༌, ངའེ༌ ཁོའ༌ ཁྱོ༌རང༌ ཡེ༌རུ༌ཤ༌ལེམ༌མ༌ ཏེ༌ ཤགས༌པོའ༌ ཁྲིམས༌ཅད༌ ཅུག༌ཅེས༌ལ༌ ཆའ༌ལ༌ ཐད༌ད༌ རག༌ག༌ ཟེར༌ཏེ༌ ཏྲིས༌པིན༌།
ACT 25:21 ཨིན༌ནའང༌ པ༌འུ༌ལུའི༌ རོམ༌མི༌ གྱལ༌པོའ༌ ཏེ༌ ཤགས༌པོ༌ ཐག༌ཅད༌ཅུག༌ཅེས༌སི༌ ཕིའ༌ ཞུ༌ཝ༌ ཕུལས༌, ཏེ༌བོའེ༌ཕིའ༌ ངའེ༌ ཁོ༌ རོམ༌མི༌ གྱལ༌པོའེ༌ཀ༌ ཀལ༌ཅེས༌སི༌ གྲལ༌གྲིག༌ ཆ༌ཆ༌ ཚག༌པ༌ འི༌རུ༌ བོར༌ཅེས༌ལ༌ བཀའ༌ ཏངས༌པིན༌།”
ACT 25:22 ཏེ༌ནེ༌ གྱལ༌པོ༌ ཨག༌རི༌པའེ༌ ཕེས༌ཏུས༌ལ༌ ཟེརས༌, “ང༌ ཏེ༌ སྤེ༌ར༌གུན༌ ཏེན༌ན༌ མི༌བོའེ༌ ཁའ༌ནེ༌ ཚོར༌ཉིན༌ རག༌།” ཕེས༌ཏུས༌སི༌ ཟེརས༌, “ཉེ༌རང༌ངི༌ ཁོའ༌ ཐོ༌རེ༌ ཉན༌ཐུབ༌ཨིན༌།”
ACT 25:23 སྟིང༌མ༌ཞག༌པོ༌ གྱལ༌པོ༌ ཨག༌རི༌པ༌ དང༌ བེར༌ནི༌ཀཱ༌ མ༌ སྟབས༌ ཆེན༌མོ༌ ཉམ༌པོ༌ ཏེ༌ གྲོང༌ཁྱེར༌རི༌ མི༌ རྩི༌ཝ༌ཅན༌ དང༌ མག༌མི༌ སྤོན༌བོ༌ ཆེན༌མོ༌ གུན༌ ཁྲིད༌ཏེ༌ ཚོགས༌ཁང༌ངི༌ ནང༌ང༌ ཡོངས༌། ཕེས༌ཏུས༌སི༌ བཀའ༌ ཏངས༌པ༌ པ༌འུ༌ལུ༌ ཚོགས༌ཁང༌ངི༌ ནང༌ང༌ ཁྱོངས༌།
ACT 25:24 ཕེས༌ཏུས༌སི༌ ཟེརས༌, “གྱལ༌པོ༌ ཨག༌རི༌པ༌ དང༌ འི༌ཀ༌ ང༌ཞའ༌ ཉམ༌པོ༌ ཡོད༌ཁན༌ནི༌ མི༌མངས༌, འི༌ མི༌བོའ༌ ལྟོས༌, ཁོའེ༌ གྱབ༌གལ༌ལ༌ ཡ༌ཧུ༌དཱ༌པ༌ ཚང༌མའེ༌ ཡེ༌རུ༌ཤ༌ལེམ༌མི༌ ནང༌ང༌ མ༌ཚད༌ འི༌རུའང༌ ཀུ༌ཅོ༌ ཏང༌ཨིན༌ ངའ༌ ཟེརས༌, ‘འི༌ མི༌བོའ༌ སད༌ཅེས༌སི༌ ཆད༌པ༌ ཕོག༌ཅེས༌སི༌ འོས༌པ༌ ཨིན༌ནོག༌།’
ACT 25:25 ཨིན༌ནའང༌ ངའ༌ གྱུས༌སོང༌, སད༌གོ༌ཤེས༌སི༌ ཆད༌པ༌ ཕོག༌ཅེས༌སི༌ ལས༌ ཁོའེ༌ ཅའང༌ མ༌ཅོས༌ཏོག༌། ཁོའེ༌ རོམ༌མི༌ གྱལ༌པོའ༌ ཁོའེ༌ ཤགས༌པོའ༌ ཐག༌ཅད༌ཅེས༌སི༌ ཞུ༌ཝ༌ ཕུལ༌པ༌ ངའེ༌ ཁོ༌ རོམ༌མི༌ གྱལ༌པོའེ༌ཀ༌ ཀལ༌ཅེས༌ ཐག༌ཅད༌པིན༌།”
ACT 25:26 “ཨིན༌ནའང༌ རོམ༌མི༌ གྱལ༌པོའ༌ ཁོའེ༌ གྱབ༌གལ༌ལ༌ ཏན༌ཏན༌ ཅའང༌ བྲི༌ཅེས༌ མེད༌ པ༌སང༌, ངའེ༌ ཁོ༌ ཁྱོ༌ཞའ༌ ཚང༌མ༌ དང༌ མིག༌སལ༌ ཅོས༌ཏེ༌ གྱལ༌པོ༌ ཨག༌རི༌པའེ༌ སྐུན༌དུན༌ལ༌ ཁྱོངས༌ཏེ༌ ཨིན༌། ཡང༌ ང༌དང༌ངི༌ ཁོའ༌ རྩར༌ཅོད༌ ཏང༌ཏེ༌ སྟིང༌ནེ༌ ང༌ ཁོའེ༌ ཤགས༌སི༌ སྐོར༌ལ༌ སྤེ༌ར༌ རིག༌ རོམ༌མི༌ གྱལ༌པོའ༌ བྲི༌ཅེས༌ལ༌ ཐོབ༌ཨིན༌།
ACT 25:27 ཅིའ༌ཟེར༌ན༌ ཙོན༌པ༌ཞིག༌གི༌ སྐྱོན༌གུན༌ ལག༌མོ༌ མ༌ཤད༌ད༌ རོམ༌མི༌ གྱལ༌པོའེ༌ཀ༌ ཀལ༌ཅེས༌པོ༌ འོས༌པ༌ མ༌ནོག༌ སམ༌མ༌རག༌།”
ACT 26:1 ཏེ༌ནེ༌ གྱལ༌པོ༌ ཨག༌རི༌པའེ༌ པ༌འུ༌ལུའ༌ ཟེརས༌, “ངའེ༌ ཁྱོ༌རང༌ང༌ ཁྱོ༌རང༌ ནོངས༌མེད༌ ཨིན༌ཁན༌ནི༌ སྐོར༌ ཤད༌ཅེས༌སི༌ སྐབས༌ ཏང༌ངད༌།” པ༌འུ༌ལུའི༌ ལག༌པ༌ ཅིངས༌ཏེ༌ ཐུག༌རྗེ༌ཆེ༌ ཞུ༌ཨིན༌ མོལས༌,
ACT 26:2 “གྱལ༌པོ༌ ཨག༌རི༌པ༌, དི༌རིང༌ ཉེ༌རང༌ངི༌ སྐུན༌དུན༌ལ༌ ཡ༌ཧུ༌དཱ༌པ༌གུན༌ནི༌ ཀལ༌ཁན༌ནི༌ ཉད༌གལ༌ ཚང༌མའེ༌ གྱབ༌གལ༌ལ༌ ང༌རང༌ ནོངས༌མེད༌ ཨིན༌ཁན༌བོ༌ ཤད༌ཉན༌པ༌, ངའ༌ མ༌ སོ༌དེ༌ཅན༌ ཚོར༌ར༌རག༌,
ACT 26:3 ཅིའ༌ཟེར༌ན༌ ཉེ༌རང༌ང༌ ཡ༌ཧུ༌དཱ༌པ༌གུན༌ནི༌ ལམ༌ ལུག༌སྲོལ༌ དང༌ མི༌ཐུན༌པའེ༌ སྤེ༌ར༌ ཚང༌མའེ༌ སྐོར༌ལ༌ ཐུག༌གྱུས༌ ཨིན༌ནོག༌། ཇུ༌ཇུ༌ ཉེ༌རང༌ངི༌ ངའེ༌ ཟེར༌ཅེས༌ཅན༌གུན༌ལ༌ ཟོད༌པ༌ ཉམ༌པོ༌ ཉན༌ན༌ ཛད༌།”
ACT 26:4 “ང༌རང༌ངི༌ ཡུལ༌ མ༌ཚད༌ ཡེ༌རུ༌ཤ༌ལེམ༌མི༌ ནང༌ངའང༌, ངའེ༌ ཆུང༌ཏུས༌ནེ༌ ཕར༌ལ༌ ང༌རང༌ངི༌ མི༌ཚེ༌ ཀ༌ཟུག༌ ཚུལ༌ལ༌ ཕུད༌ཁན༌བོ༌ ཡ༌ཧུ༌དཱ༌པ༌ ཚང༌མ༌ གྱལ༌ལ༌ ཅོས༌ཏེ༌ གྱུས༌ཡོད༌།
ACT 26:5 ཁོང༌གུན༌ནི༌ ང༌ ཏུས༌ཡུན༌རིང༌ནེ༌ པར༌ལ༌ ཤེས༌ཤེས༌པའེ༌, ཀལ༌ཏེས༌ ཐད༌དད༌ན༌, ཁོང༌གུན༌ནི༌ ངའེ༌ ང༌དང༌ངི༌ ཆོས༌སི༌ ཚང༌མའེ༌སང༌ སྲན༌ཏྲེ༌ ཁྲིམས༌ སྲུང༌ཁན༌ནི༌ སྡེ༌, ཕ༌རུ༌ཤི༌པའེ༌ མི༌ཚེ༌ ཕུད༌ཁན༌ནི༌ སྤང༌པོ༌ ཏང༌ཉན༌ཅེས༌ ཨིན༌ནོག༌།
ACT 26:6 དཀོན༌མཆོག༌གི༌ ང༌དང༌གུན༌ནི༌ ཕ༌མེས༌པོ༌གུན༌ལ༌ ཛད༌ཁན༌ནི༌ ཞལ༌ཆད༌དི༌ ནང༌ང༌ ངའ༌ རེ༌ཝ༌ ཡོད༌ཅེས༌པོའེ༌, དི༌རིང༌ ང༌ འི༌ཀ༌ ཤགས༌ ཅོའ༌ ཁྱོངས༌ཏེ༌ ཨིན༌ནོག༌།
ACT 26:7 ང༌དང༌ངི༌ སྡེ༌ རྕུག༌ཉིས༌པོའེ༌, ཏེན༌ན༌ ཞལ༌ཆད༌པོ༌ དྲན༌དྲ༌ གྲུབ༌ཅེས༌སི༌ རེ༌ཝ༌ བོར༌ཏེ༌ ཚན༌ཉིན༌, སྙིང༌ ཏངས༌ཏེ༌ དཀོན༌མཆོག༌ག༌ ཞབས༌ཏོག༌ ཞུ༌ཨིན༌ ཨིན༌ནོག༌། ཀྱེ༌ གྱལ༌པོ༌, ཏེན༌ན༌ རེ༌ཝ༌ བོར༌ཅེས༌པོའེ༌ ངའ༌ ཡ༌ཧུ༌དཱ༌པ༌གུན༌ནི༌ ཉད༌གལ༌ ཀལ༌ཏེ༌ ཨིན༌ནོག༌།
ACT 26:8 དཀོན༌མཆོག༌གི༌ ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཉན༌ཅེས༌པོའེ༌ཀ༌ ཁྱོ༌ཞ༌གུན༌ ཡམ༌ཚན༌ ཅིའ༌ ཆའ༌རག༌?”
ACT 26:9 “སྔུན༌ལ༌ ངེའང༌ དཀོན༌མཆོག༌ ཐུགས༌ཐད༌ད༌ནོག༌ སམས༌ཏེ༌ ན༌ཙ༌རེད༌པ༌ ཡེ༌ཤུའ༌ ཏད༌པ༌ ཅོ༌ཁན༌གུན༌ནི༌ གྱབ༌གལ༌ལ༌ ཅི༌ ཅོ༌ཉན༌ནའང༌ ཅོས༌པིན༌།
ACT 26:10 ཡེ༌རུ༌ཤ༌ལེམ༌མི༌ ནང༌ང༌ ངའེ༌ ཏེན༌ན༌ ཙོགས༌ ཅོས༌པིན༌, ངའེ༌ བླ༌མ༌ འུ༌སྐྱོང༌གུན༌ནི༌ ཀ༌ནེ༌ ཝང༌ཆ༌ ལེན༌ཏེ༌ ཏད༌པ༌ཅན༌ མང༌པོ༌ ཙོན༌ལ༌ ཀགས༌པིན༌, ཡང༌ སྲོག༌གི༌ ཆད༌པ༌ ཕོག༌ཁན༌གུན༌ནི༌ ཐག༌ཅད༌བོའེ༌ ནང༌ང༌ ངེའང༌ ཆོགས༌སྐྱོར༌ ཅོས༌པིན༌།
ACT 26:11 ང༌ ཡ༌ཧུ༌དཱ༌པའེ༌ དུ༌ཁང༌ རེ༌རེ༌ ནང༌ང༌ སོང༌ཏེ༌ ཁོང༌གུན༌ལ༌ ཆད༌པ༌ ཅད༌ཏེ༌ དད༌ལོག༌ ཅོ༌ཅུག༌ཅེས༌སི༌ རྩོན༌གྲུས༌ ཅོའད༌པིན༌། ཁོང༌གུན༌ནི༌ གྱབ༌གལ༌ལ༌ སྲོ༌ སྲན༌ཏྲེ༌ དང༌ ནཕ༌རད༌ ཡོད༌ཅེས༌པོའེ༌, ང༌ ཡུལ༌ ཐག༌རིང༌གུན༌ལའང༌ སོང༌ཏེ༌ ཁོང༌གུན༌ལ༌ ནགས༌ སྲན༌ཏྲེ༌ སྟན༌པིན༌།”
ACT 26:12 “ལན༌ཅིག༌ བླ༌མ༌ འུ༌སྐྱོང༌གུན༌ནི༌ ཀ༌ནེ༌ ཝང༌ཆའ༌ ཁུར༌ཏེ༌ ང༌ ཏེན༌ན༌ ལས༌པོའེ༌ ཕིའ༌ དཱ༌མེས༌ཀས༌ ཆོགས༌ལ༌ ཆའད༌པིན༌,
ACT 26:13 ལམ༌མ༌ ཡོད༌ ཟ༌ནེ༌ ཉིང༌གུང༌ཞིག༌ག༌, ཀྱེ༌ གྱལ༌པོ༌, ང༌ ནམ༌ཁའ༌ནེ༌ ཉི༌མའེ༌ འོད༌དི༌ སང༌ མང༌ང༌ ལྡང༌ཤན༌ འོད༌ཤིག༌ བབ༌ཨིན༌ ཐོང༌, ཀ༌བོ༌ ང༌ དང༌ ངའེ༌ ཕྲོ༌པ༌གུན༌ལ༌ ཁོར༌ཏེ༌ དུགས༌།
ACT 26:14 ང༌ཞའ༌ ཚང༌མ༌ སའེ༌ཀ༌ གྱེལ༌, ཡང༌ ངའེ༌ སུང༌སྐད༌ཅིག༌ ཚོར༌, ཀ༌བོའེ༌ ང༌ ཨིབ༌རི༌པའེ༌ སྐད༌དི༌ ནང༌ང༌ མོལ༌ལ༌རག༌, ‘ས༌འུལ༌, ས༌འུལ༌, ཁྱོ༌རང༌ངི༌ ང༌ ཅིའ༌ ནགས༌བར༌དོ༌ སྟན༌ནད༌། ངའེ༌ དོད༌པའེ༌ གྱབ༌གལ༌ལ༌ ནོལ༌ཅེས༌པོ༌ ནི༌ ཁྱོ༌རང༌ངི༌ ཁྱོ༌རང༌ང༌ ནོད༌སྐྱལ༌ཏེ༌ ཨིན༌ནོག༌།’”
ACT 26:15 “ཏེ༌ནེ༌ ངའེ༌, ‘གཙོ༌བོ༌ ཉེ༌རང༌ སུ༌ ཨིན༌’ ཞུས༌པིན༌།” “གཙོ༌བོའེ༌ ལན༌སལས༌, ‘ང༌ ཁྱོ༌རང༌ངི༌ ནགས༌བར༌དོ༌ སྟན༌ཁན༌, ཡེ༌ཤུ༌ ཨིན༌།
ACT 26:16 ཏ༌ རང༌ངི༌ རྐང༌པའེ༌ཀ༌ ལོངས༌། ཁྱོ༌རང༌ ངའ༌ ཞབས༌ཏོག༌ ཞུ༌ཅེས༌ དང༌ སྤང༌པོ༌ ཏང༌ཅེས༌ལ༌ སྐོ༌ཅེས༌སི༌ ཕིའ༌ ངའ༌ ཁྱོ༌རང༌ང༌ སྔོན༌ཏེ༌ ཨིན༌། ཁྱོ༌རང༌ངི༌ དག༌ས༌ ཐོང༌ཁན༌ ཡང༌ ཡོང༌ཅེས༌སི༌ ཏུས༌སི༌ ནང༌ང༌ ངའེ༌ ཁྱོ༌རང༌ང༌ སྟན༌ཅེས༌ཅན༌གུན༌ ཇིག༌རྟེན༌པ༌གུན༌ལ༌ ཤོད༌།
ACT 26:17 ངའེ༌ ཁྱོ༌རང༌ ཁྱོ༌རང༌ངི༌ མི༌གུན༌ དང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཀ༌ནེ༌ ཏུས༌གྱུན༌ སྐྱོབ༌ཨིན༌། ཁོང༌གུན༌ མུན༌གྲིག༌ནེ༌ འོད༌དི༌ ནང༌ང༌ ཡོང༌ཅེས༌ དང༌ ཤེ༌ཏན༌ནི༌ ཝང༌ནེ༌ ཕིངས༌ཏེ༌ དཀོན༌མཆོག༌ ཆོགས༌ལ༌ ཁྲིད༌ཅེས༌སི༌ ཕིའ༌ ངའེ༌ ཁྱོ༌རང༌ ཁོང༌གུན༌ནི༌ མིག༌ ཕེ༌ཅེས༌ལ༌ ཁོང༌གུན༌ནི༌ ཕྲོའ༌ ཀལ༌ལད༌། ཏེ༌ནེ༌ ཁོང༌གུན༌ལ༌ སྡིག༌པ༌གུན༌ནེ༌ ཤགས༌པ༌ ཡང༌ ངའེ༌ ནང༌ང༌ ཏད༌པའེ༌ ཞས༌ཏེ༌ རྩང༌མ༌ གྱུར༌ཁན༌གུན༌ནི༌ ཕྲོའ༌ ནས༌ས༌ ཐོབ༌ཨིན༌།’”
ACT 26:19 “ཏེན༌ན༌བོའེ༌ཕིའ༌, ཀྱེ༌ གྱལ༌པོ༌ ཨག༌རི༌པའ༌, ནམ༌ཁའ༌ནེ༌ ཇུང༌ཁན༌ནི༌ ཞལ༌ཟིགས༌སི༌ ནང༌ང༌ མོལ༌ཁན༌གུན༌ ངའེ༌ ཁའ༌ཉན༌པིན༌།
ACT 26:20 གོ༌མ༌ ངའེ༌ དཱ༌མེས༌ཀས༌, ཏེ༌ནེ༌ ཡེ༌རུ༌ཤ༌ལེམ༌ དང༌ ཡ༌ཧུ༌དཱའེ༌ གང༌པོའེ༌ ནང༌ང༌ ཡོད༌ཁན༌གུན༌ལ༌, ཏེ༌སྟིང༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལ༌, ཁོང༌རང༌ངི༌ སྡིག༌པའེ༌ ཀ༌ནེ༌ གྱོད༌པ༌ ཅོས༌ཏེ༌ དཀོན༌མཆོག༌གི༌ ཆོགས༌ལ༌ སེམས༌ གྱུར༌གོས༌ ཟེར༌ཏེ༌ ཆོས༌ཤད༌པིན༌, ཡང༌ གྱོད༌པ༌ ཅོ༌ཁན༌བོ༌ ལག༌ལེན༌ གྱུད༌ཏེ༌ སྟན༌ཅེས༌ལ༌ ཟེར༌པིན༌།
ACT 26:21 ཏེ༌ གྱུན༌ཚན༌བོའེ༌ ཕིའ༌ ཡ༌ཧུ༌དཱ༌པ༌གུན༌ནི༌ ང༌ ཆོད༌ཁང༌ངི༌ ནང༌ང༌ ཟུམས༌ཏེ༌ སད༌ཅེས༌སི༌ རྩོན༌གྲུས༌ ཅོས༌།
ACT 26:22 ཨིན༌ནའང༌ དཀོན༌མཆོག༌གི༌ ང༌ དི༌རིང༌ ཚག༌པ༌ སྐྱོབ༌བ༌ ཛད༌ པ༌སང༌, འི༌ཀ༌ ལངས༌ཏེ༌ ཉམ༌ཤུང༌ དང༌ ཁག༌ཅན༌ ཚང༌མའེ༌ དུན༌ལ༌ ངའེ༌ སྤང༌པོ༌ ཏང༌ངད༌། ངའེ༌ མོ༌ཟེས༌ དང༌ ཞན༌ ལུང༌སྟོན༌པ༌གུན༌ནི༌ ཇུང༌ཅེས༌ཅན༌གུན༌ མོལ༌ཁན༌བོའེ༌ སང༌ ཐེ༌བ༌ཞིག༌ ཅའང༌ མ༌ཟེར༌པིན༌,
ACT 26:23 ཏེ༌བོ༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀའ༌ རྡུག༌ངལ༌ ཐོང༌ཅེས༌ ཡང༌ ཤི༌ཁན༌གུན༌ནི༌ ཕྲོ༌ནེ༌ གོ༌མ༌རང༌ སོན༌ཏེའ༌ ཞངས༌ཁན༌བོ༌ ཨིན༌ནོག༌། ཏེན༌ན༌ ལོན༌བོ༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཐར༌པ༌ ཐོབ༌ཅེས༌སི༌ འོད༌པོ༌ ཨིན༌།”
ACT 26:24 ཧུན༌མེད༌ལ༌ ཕེས༌ཏུས༌སི༌ ཀུ༌ཅོ༌ ཏངས༌ཏེ༌ ཟེརས༌, “པ༌འུ༌ལུ༌ ཁྱོ༌རང༌ ཆལ༌ཆོལ༌ སོང༌ཏེ༌ ཨིན༌ནོག༌, ལོབ༌ཇོང༌ མང༌པོ༌ ཅོ༌ཅེས༌པོའེ༌ ཁྱོ༌རང༌ སྙོ༌ཅུགས༌ཏེ༌ ཨིན༌ནོག༌།”
ACT 26:25 པ༌འུ༌ལུའི༌ ལན༌སལས༌, “ཕེས༌ཏུས༌ སྐུན༌དུན༌, ང༌ སྙོས༌ཏེ༌ མན༌། ངའེ༌ ཟེར༌ཁན༌གུན༌ ཀྲང༌པོ༌ ཨིན༌ ཆལ༌ཆོལ༌ མན༌།
ACT 26:26 གྱལ༌པོའ༌ འི༌གུན༌ནི༌ སྐོར༌ལ༌ ཐུག༌གྱུས༌ ཡོད༌པ༌ ངའེ༌ ཁོང༌ང༌ ཅི༌ཚང༌མ༌ ཤད༌ནའང༌ གྲིགས༌ཏེ༌ ཨིན༌ནོག༌། ཏེ༌ ནས༌སྐབས༌ ཚང༌མའེ༌ སྐོར༌ལ༌ ཁོང༌ང༌ གྱུས༌ཡོད༌ཅེས༌པོ༌ ང༌ ཏན༌ཏན༌ རག༌ ཅིའ༌ཟེར༌ན༌ ཏེ༌གུན༌ སང༌ཝའེ༌ ནང༌ང༌ མ༌ཅོའ༌ ཨིན༌ནོག༌།
ACT 26:27 ཨག༌རི༌པ༌ གྱལ༌པོ༌ ཉེ༌རང༌ངི༌ ལུང༌སྟོན༌པ༌གུན༌ནི༌ མོལ༌ཁན༌གུན༌ལ༌ ཨིད༌ཤེས༌སད༌ད༌? ང༌ གྱུས༌ཡོད༌ ཉེ༌རང༌ངི༌ ཨིད༌ཤེས༌ ཅོའ༌ནོག༌།”
ACT 26:28 གྱལ༌པོ༌ ཨག༌རི༌པའེ༌ པ༌འུ༌ལུའ༌ ཟེརས༌, “ཅི༌ ཁྱོ༌རང༌ངི༌ འི༌ཟུག༌ ཏུས༌ ཉུ༌ངུན༌ཞིག༌གི༌ ནང༌ང༌ ང༌ མ༌ཤི༌ཀའེ༌ཀ༌ ཏད༌པ༌ ཅོ༌ཅུག༌ཉན༌ཨིན༌ སམ༌མ༌རག༌ག༌?”
ACT 26:29 པ༌འུ༌ལུའི༌ མོལས༌, “ཏུས༌ ཐུ༌ངུན༌ ཡོད༌གྲོ༌ ཡ༌ རིང༌མོ༌, ངའེ༌ དཀོན༌མཆོག༌ག༌ མོས༌ལམ༌ ཞུའད༌, ཉེ༌རང༌ ཅིག༌པོ༌ མན༌པ༌ འི༌ཀ༌ ཛོམས༌ཏེ༌ ངའེ༌ སྤེ༌ར༌ ཉན༌ཁན༌ ཚང༌མའང༌, འི༌ ལག༌ལྕག༌བོ༌ མེད༌པ༌ ང༌ ཙོགས༌ གྱུར༌ཤིག༌།”
ACT 26:30 ཏེ༌ནེ༌ གྱལ༌པོ༌ ལངས༌ ཡང༌ ཁོ༌ ཉམ༌པོ༌ ཀའ༌ལོན༌, བེར༌ནི༌ཀཱ༌ དང༌ ཞན༌མ༌ ཚང༌མ༌ ལངས༌ཏེ༌ སོང༌།
ACT 26:31 ཆེན༌ ཡོད༌ ཟ༌ནེ༌ ཁོང༌གུན༌ནི༌ ཅིག༌ དང༌ ཅིག༌ག༌ ཟེརས༌, “ཙོན༌ལ༌ བོར༌ཅེས༌ ཡ༌ སྲོག༌གི༌ ཆད༌པ༌ ཏང༌གོ༌ཤེས༌སི༌ ལས༌ཤིག༌ འི༌ མི༌བོའེ༌ ཅའང༌ མ༌ཅོས༌ཏོག༌།”
ACT 26:32 གྱལ༌པོ༌ ཨག༌རི༌པའེ༌ ཕེས༌ཏུས༌ལ༌ ཟེརས༌, “ཀལ༌ཏེས༌ འི༌ མི༌བོའེ༌ རོམ༌མི༌ གྱལ༌པོའ༌ ཁོའེ༌ ཤགས༌པོའ༌ ཁྲིམས༌ཅད༌ ཅོ༌ཅེས༌ལ༌ ཞུ༌ཝ༌ མ༌ཕུལ༌པིན༌ན༌, ཁོ༌ ཕུད༌ནའང༌ གྲིག༌ཅེས༌ དུག༌།”
ACT 27:1 ང༌ཞ༌གུན༌ གྲུ༌ཟིང༌ངི༌ ནང༌ང༌ ཨི༌ཏྲི༌ལི༌ ཡུལ༌ལ༌ ཀལ༌ཅེས༌ ཐག༌ཅད༌ད༌ཅིག༌, ཀའ༌ལོན༌ནི༌ པ༌འུ༌ལུ༌ དང༌ ཞན༌ ཙོན༌པ༌ ཁ༌ཅིག༌ མག༌མི༌གྱའེ༌ སྤོན༌བོ༌ ཡུ༌ལི༌འུས༌ ཟེར༌ཁན༌ནི༌ ལག༌ག༌ སྟདས༌, ཁོ༌ རོམ༌མི༌ གྱལ༌པོའེ༌ མིག༌སལ༌ལི༌ མག༌མིའི༌ ནང༌ནེ༌ ཨིན༌པིན༌།
ACT 27:2 ང༌ཞ༌གུན༌ ཨ༌དྲ༌མི༌དིམ༌ནེ༌ ལེབ༌ཁན༌ནི༌ གྲུ༌ཟིང༌ཞིག༌ག༌ ཞོན༌ཏེ༌ སོང༌པིན༌, ཀ༌བོ༌ ཨ༌སི༌ཨཱའེ༌ ཡུལ༌ཇོངས༌སི༌ ཚོའེ༌ ཐའ༌མའ༌ ཡོད༌ཁན༌ནི༌ ནས༌ས༌གུན༌ གྱུད༌ཏེ༌ ཆ༌ཅེས༌ ཨིན༌པིན༌, ཡང༌ མ༌ཀེ༌དོ༌ནི༌ཡཱ༌ ཡུལ༌ཇོངས༌སི༌ ཐེ༌ས༌ལོ༌ནི༌ཀ༌ གྱལ༌ས༌ནེ༌ ཨིན༌ཁན༌ནི༌ ཨ༌རིས༌ཏར༌ཀུས༌ ང༌ཞའ༌ ཉམ༌པོ༌ ཡོད༌པིན༌།
ACT 27:3 སྟིང༌མ༌ཞག༌པོ༌ སི༌དོན༌ གྱལ༌ས༌ ལེབ༌བ༌ཅིག༌, སྒོས༌དོམ༌གུན༌ ཐོབ༌ཅེས༌སི༌ ཕིའ༌ ཡུ༌ལི༌འུས༌སི༌ ཐུག༌རྗེ༌ ཅོས༌ཏེ༌ པ༌འུ༌ལུའ༌ ཁོང༌ངི༌ ཛ༌འོ༌གུན༌ ཉམ༌པོ༌ ཐུག༌ཅེས༌ལ༌ གོངས༌པ༌ ཏངས༌།
ACT 27:4 ཏེ༌ཀ༌ནེ༌ ང༌ཞ༌གུན༌ གྲུ༌ཟིང༌ང༌ ཞོནས༌ ཡང༌ ལུངས༌པོ༌ ང༌ཞའ༌ ཆེན༌ ཡོད༌སའེ༌ གོ༌ལོག༌པོའ༌ ཡོངས༌པ༌, ང༌ཞའ༌ ལུངས༌པོ༌ མེད༌ས༌ ཀིབ༌རུས༌ ཚོ༌ལིང༌, ཡོ༌མ༌ ཆོགས༌ལ༌ བོར༌ཏེ༌ སོང༌པིན༌།
ACT 27:5 ཏེ༌ནེ༌ ང༌ཞ༌གུན༌ ཀཱི༌ལི༌ཀི༌ཡཱ༌ དང༌ པམ༌ཕིལ༌ཡཱའེ༌ ཉེ༌མོའ༌ ཡོད༌ཁན༌ནི༌ གྱ༌ཚོ༌ གྱུད༌ཏེ༌ ལིག༌ཡཱ༌ ཡུལ༌ཇོངས༌སི༌ མི༌ར༌ གྱལ༌ས༌ བབས༌པིན༌།
ACT 27:6 ཏེ༌རུ༌ མག༌མི༌གྱའེ༌ སྤོན༌བོའ༌ ཨ༌ལེག༌ཟན༌དྲིའ༌ གྱལ༌ས༌ནེ༌ ཨིན༌ཁན༌ནི༌ གྲུ༌ཟིང༌, ཨི༌ཏྲི༌ལི༌ ཡུལ༌ལ༌ ཆའ༌ཁན༌ཞིག༌ ཐོབ༌པ༌ ང༌ཞ༌གུན༌ ཏེ༌བོའེ༌ ནང༌ང༌ སྐྱོནས༌།
ACT 27:7 ང༌ཞའ༌ ཡོད༌ཁན༌ནི༌ གྲུ༌ཟིང༌, ཞག༌ མང༌པོ༌ ཀུ༌ལེའ༌ མ༌ནེ༌ སྲུལ༌ མ༌ཉན༌, ཡང༌ ཀགས༌པོ༌ ཉམ༌པོ༌ ང༌ཞའ༌ ཀནེ༌དུས༌ གྱལ༌ས༌ ལེབ༌། ལུང༌རག༌ ཡོད༌ཅེས༌པོའེ༌, ང༌ཞའ༌ ཆེན༌ ཡོད༌ཁན༌ནི༌ ལམ༌མི༌ཀ༌ ཆའ༌ མ༌ཉན༌པ༌, ང༌ཞ༌གུན༌ སལ༌མོ༌ནེ༌ ཆོགས༌ནེ༌ ལུངས༌པོ༌ སྒག༌ཅེས༌ལ༌ ཀརིཏྲ༌ ཚོ༌ལིང༌ ཡས༌པ༌ ཆོགས༌ལ༌ བོར༌ཏེ༌ སོང༌པིན༌།
ACT 27:8 ཡང༌ གྱ༌ཚོའེ༌ ཐའ༌མ༌ ཐའ༌མ༌ནེ༌ མ༌ ཀགས༌པོ༌ ཉམ༌པོ༌ ང༌ཞ༌གུན༌ ཇིགས༌པ༌ མེད༌ ཟེར༌ཁན༌ནི༌ ནས༌ས༌ ལེབ༌, ཀ༌བོ༌ ལ༌སེའ༌ གྱལ༌སའེ༌ ཉེ༌མོའ༌ ཡོད༌པིན༌།
ACT 27:9 ཏེ༌རུ༌ ལེབ༌ཅེས༌ལ༌ མ༌ ཞག༌ མང༌པོ༌ གོར༌, ཡང༌ ནམ༌ཟ༌ རྩོག༌པོ༌ ལུས༌ཤེས༌སི༌ ཏུས༌པོ༌ ལེབ༌པ༌ གྱ༌ཚོའེ༌ ནང༌ང༌ གྲུ༌ཟིང༌ སྲུལ༌ཅེས༌པོ༌ མ༌ ཇིགས༌པ༌ཅན༌ གྱུར༌རད༌པིན༌། པ༌འུ༌ལུའི༌ ཁོང༌གུན༌ལ༌ ཁ༌དའ༌ སལ༌ཨིན༌ མོལས༌,
ACT 27:10 “ཕྲོ༌པ༌གུན༌ ངའེ༌ སམ༌བའེ༌ ནང༌ང༌ ང༌དང༌གུན༌ནི༌ བེས༌པོ༌ མ༌ ཇིགས༌ནང༌ཅན༌ གྱུར༌ཅེས༌དུག༌ སམ༌མ༌རག༌, ནོར༌ དང༌ གྲུ༌ཟིང༌ངི༌ ཀོད༌ཀ༌ མ༌ཚད༌ ང༌དང༌གུན༌ནི༌ སྲོག༌གའང༌ སྐྱལ༌ཅེས༌སི༌ ཇིགས༌པ༌ དུག༌།”
ACT 27:11 ཨིན༌ནའང༌ མག༌མི༌གྱའེ༌ སྤོན༌བོའེ༌, པ༌འུ༌ལུའི༌ མོལ༌ཁན༌ནི༌ སང༌ གྲུ༌ཟིང༌ སྲུལ༌ཁན༌ནི༌ སྤོན༌བོ༌ དང༌ གྲུ༌ཟིང༌ངི༌ དག༌པོའེ༌ ཟེར༌ཁན༌བོའ༌ ཉན༌ཅེས༌ སམ༌བ༌ཅན༌ ཚོར༌།
ACT 27:12 ཏེ༌ ནས༌ས༌བོ༌ དགུན༌ལ༌ དུག༌ཅེས༌སི༌ ཕིའ༌ གྱལ༌ལ༌ མན༌པ༌, མི༌ མང༌ཆེའ༌བོའེ༌ ཕོ༌ནིགས༌སི༌ གྱལ༌ས༌ ལེབ༌ཅེས༌སི༌ རེ༌ཝ༌ བོར༌ཏེ༌ ཆ༌ཅེས༌ལ༌ ཐག༌ཅདས༌། ཕོ༌ནིགས༌ ཀརིཏྲ༌ ཚོ༌ལིང༌ངི༌ གྲུ༌ཟིང༌ བོར༌སའེ༌ ནས༌ས༌, ཀ༌བོ༌ ལྷོ༌ནུབ༌ དང༌ བྱང༌ནུབ༌ ཅིག༌པོ༌ནེ༌ གྱ༌ཚོའེ༌ ཆོགས༌ལ༌ བེ༌ཏེ༌ ཡོད༌ཅེས༌པོའེ༌ ལུངས༌པོ༌ སྲན༌ཏྲེ༌ ཡོང༌ང༌ མེད༌པིན༌།
ACT 27:13 ལྷོ༌ ཆོགས༌ནེ༌ ལུངས༌པོ༌ ཇམ༌པོ༌ ཡོང༌ཅེས༌ གོ༌ཟུག༌ ཆའ༌ཅིག༌, གྲུ༌ཟིང༌ སྲུལ༌ཁན༌གུན༌ནི༌ ཕོ༌ནིགས༌ལ༌ ཁམ༌ཟང༌ ལེབ༌ཅེས༌ སོང༌ སམས༌ཏེ༌ ཁོང༌གུན༌ནི༌ གྲུ༌ཟིང༌བོ༌ ཀྲོལ༌ཏེ༌ ཀརིཏྲ༌ཏྲི༌ ཐའ༌མ༌ནེ༌ སྲུལ༌ཏེ༌ ཁྱེརས༌།
ACT 27:14 བིང༌ཏེ༌ ཏུས༌ མང༌པོ༌ཞིག༌ མ༌ཆའ༌ ཀརིཏྲ༌ ཆོགས༌ནེ༌ ལུང༌རག༌ ཀྲག༌པོ༌ ཡོངས༌, ཀ༌བོའ༌ བྱང༌ཤར༌རི༌ ལུངས༌པོ༌ ཟེར༌རད༌པིན༌།
ACT 27:15 ལུང༌རག༌ ཀྲག༌པོའེ༌ ཞས༌ཏེ༌ གྲུ༌ཟིང༌བོ༌ ཕོ༌ནིགས༌སི༌ ཆོགས༌ལ༌ ཁྱེར༌ མ༌ཉན༌པ༌, ཁོང༌གུན༌ནི༌ གྲུ༌ཟིང༌བོ༌ ལུངས༌པོའེ༌ ཁྱེར༌ས༌ ཆོགས༌ལ༌ ཕུད༌ཏངས༌།
ACT 27:16 ཀཱའུ༌ད༌ ཚོ༌ལིང༌ངི༌ ལུངས༌པོ༌ མེད༌ས༌ ཆོགས༌ནེ༌ ང༌ཞ༌གུན༌ ཆའ༌ ཟ༌ནེ༌, སྲོག༌ སྐྱོབ༌བི༌ གྲུ༌ཟིང༌ ཆུ༌ངུན༌བོ༌ ང༌ཞའ༌ མ༌ ཀགས༌པོ༌ ཉམ༌པོ༌ སྐྱོབ༌ཉན༌ཏེ༌ གྲུ༌ཟིང༌ ཆེན༌མོའེ༌ཀ༌ སྟགས༌།
ACT 27:17 ཏེ༌ནེ༌ གྲུ༌ཟིང༌ ཆེན༌མོ༌བོ༌ ཆག༌ཅེས༌ནེ༌ སྐྱོབ༌ཅེས༌ལ༌ ཁོང༌གུན༌ནི༌ སྟག༌ནེ༌ ཡོག༌ ཚག༌པ༌ ཐག༌པ༌ ཉམ༌པོ༌ ལྡམས༌, ཡང༌ གྲུ༌ཟིང༌བོ༌ སིར༌ཏིས༌སི༌ ནས༌སའེ༌ ཁོར༌ལ༌ པེ༌མའེ༌ ནང༌ང༌ ནེར༌ཅེས༌སི༌ ཇིགས༌པ༌ ཡོད༌པ༌ ཁོང༌གུན༌ནི༌ གྲུ༌ཟིང༌ ཀུ༌ལེའ༌ གྲུལ༌ཅུག༌ཁན༌ནི༌ ཡོ༌ལ༌བོ༌ ཆུའི༌ ནང༌ང༌ ཕབས༌, ཡང༌ ལུངས༌པོའེ༌ གྲུ༌ཟིང༌བོ༌ སྲུལ༌ཏེ༌ ཁྱེརས༌།
ACT 27:18 ལུང༌རག༌ དང༌ ཆུལ༌བག༌ སྲན༌ཏྲེ༌ གྲུ༌ཟིང༌བོའ༌ ཕོགས༌པ༌, སྟིང༌མ༌ཞག༌པོ༌ གྲུ༌ཟིང༌ ཡང༌མོ༌ ཅོ༌ཅེས༌ལ༌ ཁོང༌གུན༌ནི༌ ཏེ༌ནང༌ང༌ ཡོད༌ཁན༌ནི༌ ཅ༌ལག༌གུན༌ ཆུའི༌ ནང༌ང༌ ཕང༌ཅེས༌ གོ༌ཟུགས༌།
ACT 27:19 ཞག༌ སུམ༌པའེ༌ ཞག༌ག༌ གྲུ༌ཟིང༌ སྲུལ༌ཁན༌གུན༌ནི༌ གྲུ༌ཟིང༌ སྲུལ༌ཅེས༌སི༌ ལག༌ཆ༌ ཚང༌མའང༌ ཕངས༌།
ACT 27:20 གྱ༌ཚོའེ༌ ནང༌ང༌ ལུང༌རག༌ དང༌ ཆུལ༌བག༌ མ༌ཅད༌ད༌ ཞག༌ མང༌པོ༌ ཉི༌མ༌ ཡ༌ སྐར༌མ༌ མ༌ཐོང༌ པ༌སང༌, ང༌ཞའ༌ ཐར༌ཅེས༌སི༌ རེ༌ཝ༌ མ༌ལུས༌།
ACT 27:21 མི༌གུན༌ནི༌ ཟན༌ མ༌ཟའ༌ ཞག༌ མང༌པོ༌ སོང༌པ༌, པ༌འུ༌ལུ༌ ཁོང༌གུན༌ནི༌ ཕྲོའ༌ ལངས༌ཏེ༌ མོལས༌, “ཕྲོ༌པ༌གུན༌, ཀལ༌ཏེས༌ ཁྱོ༌ཞ༌གུན༌ནི༌ ངའེ༌ ཟེར༌ཁན༌བོའ༌ ཉན༌ཏེ༌ ཀརིཏྲ༌ནེ༌ མ༌ བིང༌པིན༌ན༌ འི༌ཙོགས༌སི༌ ནོད༌སྐྱལ༌ དང༌ ཀོད༌ཀ༌ སོང༌ཏེ༌ མེད༌གྲོ༌།
ACT 27:22 ཨིན༌ནའང༌ ངའེ༌ ཁྱོ༌ཞ༌གུན༌ལ༌ ཏ༌རུང༌ངའང༌ རེ༌ཝ༌ སྟན༌པོ༌ བོར༌ཅེས༌ལ༌ ཟེར༌རད༌, ཅིའ༌ཟེར༌ན༌ ཁྱོ༌ཞའེ༌ ཕྲོ༌ནེ༌ སུའང༌ མི༌ཤི༌, གྲུ༌ཟིང༌ ཅིག༌པོ༌ ཁྲེས༌ཏོར༌ ཆེན༌།
ACT 27:23 ངའེ༌ ཞབས༌ཏོག༌ ཞུ༌ཁན༌ དཀོན༌མཆོག༌ ཀ༌བོའེ༌ ང༌ ཨིན༌, ཁོང༌ངི༌ ཕོ༌ཉ༌, དའང༌ ཚན༌ལ༌ ང༌ ཡོད༌ས༌ སྐྱོད༌ཏེ༌
ACT 27:24 མོལས༌, ‘པ༌འུ༌ལུ༌ ཇིགས༌ མ༌ཇིགས༌, ཁྱོ༌རང༌ རོམ༌མི༌ གྱལ༌པོའེ༌ དུན༌ལ༌ ཤགས༌ ཅད༌དི༌ ཕིའ༌ ཏན༌ཏན༌ ལེབ༌ཨིན༌, ཡང༌ དཀོན༌མཆོག༌གི༌ ཁྱོ༌རང༌ ཉམ༌པོ༌ གྲུ༌ཟིང༌ངི༌ ནང༌ང༌ ཡོད༌ཁན༌ ཚང༌མའང༌ སྐྱོབ༌ཨིན༌།’
ACT 27:25 ཏེན༌ན༌བོའེ༌ཕིའ༌ ཕྲོ༌པ༌གུན༌ རེ༌ཝ༌ ཐོན༌པོ༌ བོར༌, ངའེ༌ ཨིད༌ཤེས༌ ཅོའད༌ དཀོན༌མཆོག༌གི༌ མོལ༌ཁན༌བོ༌ དྲན༌དྲ༌ གྲུབ༌ཨིན༌།
ACT 27:26 ཨིན༌ནའང༌ ང༌དང༌ངི༌ གྲུ༌ཟིང༌ ཚོ༌ལིང༌ཞིག༌གི༌ ཉེ༌མོའ༌ ཏན༌ཏན༌ ཁད༌ཨིན༌།”
ACT 27:27 ཚན༌ 14 ཞག༌ག༌ ང༌ཞ༌གུན༌ ཨ༌དྲི༌ཡཱ༌ གྱ༌ཚོའེ༌ འ༌ངོ༌ ཆོགས༌ལ༌ ལུངས༌པོའེ༌ རིལ༌ཏེ༌ ཁྱེར༌ ཟ༌ནེ༌ ཚན༌ཕེད༌ ཟོད༌ཅིག༌ག༌ གྲུ༌ཟིང༌ སྲུལ༌ཁན༌གུན༌ནི༌ ས༌ཀྱད༌དི༌ ཉེ༌མོའ༌ ལེབ༌ཏིག༌རག༌ ཟེར༌ཨིན༌ ཚོར༌།
ACT 27:28 ཏེ༌ནེ༌ ཁོང༌གུན༌ནི༌ ཆུ༌ ཙམ༌ཤིག༌ ཀོན༌དྲོ༌ དུག༌ ཏབས༌པ༌, མི༌ཀྲར༌ 37 བིང༌, ཡང༌ ཙ༌པིག༌ཞིག༌ སྟིང༌ནེ༌ ཏབས༌པ༌, ཚད༌པོ༌ མི༌ཀྲར༌ 28 བིང༌།
ACT 27:29 གྲུ༌ཟིང༌བོ༌ བྲག༌ག༌ ཕོག༌ཅེས༌སི༌ ཇིགས༌པའེ༌ ནང༌ང༌ ཁོང༌གུན༌ནི༌ གྲུ༌ཟིང༌ སྒག༌ཅེས༌སི༌ ཕིའ༌ གྲུ༌ཟིང༌ངི༌ ཇུག༌ནེ༌ ལྕིན༌ཏྲེ༌ ལྕགས༌ ཏགས༌ཁན༌ནི༌ ཐག༌པ༌ ཞི༌ ཆུའི༌ ནང༌ང༌ ཕབས༌, ཡང༌ ནམ༌ལང༌ཅེས༌སི༌ ཕིའ༌ མོས༌ལམ༌ ཞུས༌།
ACT 27:30 ཏེ༌ནེ༌ གྲུ༌ཟིང༌ སྲུལ༌ཁན༌གུན༌ནི༌ གྲུ༌ཟིང༌ངི༌ གོ༌ནེ༌ ལྕིན༌ཏྲེ༌ ལྕགས༌ ཏགས༌ཁན༌ནི༌ ཐག༌པ༌ ཕབས༌ཟུན༌ ཏངས༌ཏེ༌ ཤོར༌ཅེས༌སི༌ ཕིའ༌ གྲུ༌ཟིང༌ ཆུ༌ངུན༌བོ༌ ཕབས༌།
ACT 27:31 པ༌འུ༌ལུའི༌ མག༌མི༌གྱའེ༌ སྤོན༌བོ༌ དང༌ མག༌མི༌གུན༌ལ༌ མོལས༌, “ཀལ༌ཏེས༌ འི༌ མི༌གུན༌ གྲུ༌ཟིང༌ངི༌ ནང༌ང༌ མ༌དུག༌ན༌ ཁྱོ༌ཞའེ༌ སྲོག༌ མི༌ཐར༌།”
ACT 27:32 ཏེ༌ནེ༌ མག༌མི༌གུན༌ནི༌ གྲུ༌ཟིང༌ ཆུ༌ངུན༌ ཅིངས༌ཏེ༌ ཡོད༌ཁན༌ནི༌ ཐག༌པ༌ ཅད༌ཏེ༌ གྱ༌ཚོའེ༌ ནང༌ང༌ བུད༌ཅུགས༌།
ACT 27:33 ནམ༌ལངས༌ས༌ཅིག༌ པ༌འུ༌ལུའི༌ མི༌གུན༌ལ༌ ཁར༌ཇི༌ ཟའ༌ཅུག༌ཅེས༌ལ༌ རྩོན༌གྲུས༌ ཅོ༌ཨིན༌ མོལས༌, “ཁྱོ༌ཞའེ༌ ཞག༌ ཅུབ༌ཞི༌ནེ༌ ཕར༌ལ༌ ཇིགས༌པ༌ དང༌ ཐེ༌ཚོམས༌སི༌ ནང༌ང༌ ཁར༌ཇིའ༌ ལག༌པ༌ མ༌རྩེས༌།
ACT 27:34 ཇུ༌ཇུ༌ ངའེ༌ ཁྱོ༌ཞ༌གུན༌ལ༌ སོན༌ཏེའ༌ ལུས༌ཤེས༌སི༌ ཕིའ༌ ཁར༌ཇི༌ ཟའ༌ཅེས༌ལ༌ ཞུ༌ཝ༌ ཕུལ༌ལད༌། ཁྱོ༌ཞའ༌ ཅིག༌གིའང༌ གོའི༌ སྲ༌ཉག༌ ཅིག༌ མི༌ སྟོར༌།”
ACT 27:35 ཏེ༌བོ༌ མོལ༌ཏེ༌ སྟིང༌ནེ༌ ཁོང༌ངི༌ ཏ༌གི༌ཞིག༌ ལེན༌ཏེ༌ ཁོང༌ ཚང༌མའེ༌ དུན༌ལ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཏེ༌ ཅགས༌ཏེ༌ ཟོས༌།
ACT 27:36 ཏེ༌ནེ༌ ཚང༌མ༌ལ༌ ཧམ༌པ༌ སྐྱེས༌ཏེ༌ ཟན༌ ཟོས༌།
ACT 27:37 གྲུ༌ཟིང༌ངི༌ ནང༌ང༌ ཡོད༌ཁན༌གུན༌ནི༌ ཀྲངས༌ཀ༌ 276 ཡོད༌པིན༌།
ACT 27:38 ཁོང༌གུན༌ ཟན༌ ཟོས༌ཏེ༌ གྲངས༌ས༌ཅིག༌, གྲུ༌ཟིང༌ ཡང༌མོ༌ ཆ༌ཅེས༌སི༌ ཕིའ༌ ཁོང༌གུན༌ནི༌ གྲུ༌ཟིང༌ངི༌ ནང༌ང༌ ཡོད༌ཁན༌ནི༌ ཀྲོ༌ནས༌ ཚང༌མ༌ ཆུའི༌ ནང༌ང༌ ཕངས༌།
ACT 27:39 ནམ༌ལངས༌ས༌ཅིག༌ གྱ༌ཚོའེ༌ ཐའ༌མའེ༌ ས༌ཀྱད༌ཞིག༌ ཐོང༌, ཨིན༌ནའང༌ ཀ༌ནས༌ས༌ ཨིན༌ གྱུས༌ མ༌སོང༌། ཉན༌ན༌ གྲུ༌ཟིང༌ ཏེ༌ ས༌ཀྱད༌དི༌ ཉེ༌མོའེ༌ པེ༌མའེ༌ ནང༌ང༌ ཁད༌ཅུག༌ཅེས༌ལ༌ ཁོང༌གུན༌ནི༌ ཐག༌ཅདས༌།
ACT 27:40 ཁོང༌གུན༌ནི༌ ལྕིན༌ཏྲེ༌ ལྕགས༌ ཏགས༌ཁན༌ནི༌ ཐག༌པ༌གུན༌ ཅད༌ཏེ༌ གྱ༌ཚོའེ༌ ནང༌ང༌ ཕངས༌, ཏེན༌ན༌ ཏུས༌ལ༌ གྲུ༌ཟིང༌ ཀྱོག༌ཅེས༌སི༌ ཤིང༌ང༌ ལྡམས༌ཁན༌ནི༌ ཐག༌པ༌གུན༌ ཀྲོལས༌, ཏེ༌ནེ༌ གྲུ༌ཟིང༌ངི༌ དུན༌ནི༌ ཡོ༌ལ༌བོ༌ སྟགས༌ཏེ༌ ལུངས༌པོའ༌ གྲུ༌ཟིང༌བོ༌ ཐའ༌མ༌ ཆོགས༌ལ༌ ཁྱེར༌ཅུགས༌།
ACT 27:41 ཨིན༌ནའང༌ སམ༌ཁན༌ནི༌ སང༌ སྔུན༌ལ༌ གྲུ༌ཟིང༌ངི༌ དུན༌བོ༌ པེ༌མའེ༌ ནང༌ང༌ ཁད༌, ཡང༌ གྱབ༌བོ༌ ཆུལ༌བག༌ ཤེད༌ཅན༌ནི༌ ཞས༌ཏེ༌ ཆག༌ཅེས༌ གོ༌ཟུག༌།
ACT 27:42 ཙོན༌པ༌གུན༌ ཆུའ༌ སྐྱལ༌ཏེ༌ ཤོར༌ཏེ༌ མི༌ཆ༌ཅེས༌སི༌ ཕིའ༌ མག༌མི༌གུན༌ནི༌ ཁོང༌གུན༌ སད༌ཅེས༌སི༌ ཐབས༌ལྡིང༌ངད༌པིན༌།
ACT 27:43 ཨིན༌ནའང༌ མག༌མི༌གྱའེ༌ སྤོན༌བོའ༌ པ༌འུ༌ལུ༌ སྐྱོབ༌ཅེས༌སི༌ དོད༌པ༌ ཡོད༌པ༌, ཁོང༌གུན༌ལ༌ ཏེ༌ ཐབ༌ལྡིངས༌ ནང༌ཞིན༌ ཅོ༌ མ༌ཅུགས༌། ཁོའེ༌ བཀའ༌ ཏངས༌, “གོ༌མ༌ སྐྱལ༌ཉན༌ཁན༌གུན༌ ས༌ཀྱད༌ ཆོགས༌ལ༌ ཆ༌ཅེས༌ལ༌ ཆུའི༌ ནང༌ང༌ ཆོམས༌,
ACT 27:44 ཡང༌ ལུས༌ཁན༌གུན༌ནི༌ སྤང༌ལེབ༌ དང༌ གྲུ༌ཟིང༌ ཆགས༌ཁན༌ནི༌ ཤིང༌གུན༌ནི༌ རོགས༌ ལེན༌།” ཏེ༌ཟུག༌ ཅོས༌ པ༌སང༌ ཚང༌མ༌ ས༌སྐམ༌པོའེ༌ཀ༌ ཁམ༌ཟང༌ བིང༌ཉན༌།
ACT 28:1 ཁམ༌ཟང༌ ཉམ༌པོ༌ ས༌ སྐམ༌པོའེ༌ཀ༌ བིངས༌ཏེ༌ སྟིང༌ནེ༌ ང༌ཞའ༌ ཏེ༌ ཚོ༌ལིང༌བོའ༌ མལ༌ཏྲ༌ ཟེར༌ཁན༌ གྱུས༌སོང༌།
ACT 28:2 ཏེ༌ ཡུལ༌མི༌གུན༌ནི༌ ང༌ཞའ༌ མ༌སྲན༌ཏྲེ༌ སྙིང༌རྗེ༌ སྟནས༌། ཆར༌པ༌ ཏང༌ཅེས༌པོའེ༌ ཀྲང༌མོ༌ སྲན༌ཏྲེ༌ ཡོད༌པ༌, ཏེ༌ མི༌གུན༌ནི༌ མེ༌ ཏངས༌ཏེ༌ ང༌ཞའ༌ གའ༌སུས༌ གྱལ༌ལ༌ ཅོས༌།
ACT 28:3 པ༌འུ༌ལུའི༌ ཤིང༌ བན༌ཤིག༌ རུགས༌ཏེ༌ མེའ༌ ཏབ༌ཅེས༌ ཅོའ༌ཅིག༌, མེ༌ ཚད༌དི༌ ཞས༌ཏེ༌ ཏེ༌ ཤིང༌ངི༌ ཕྲོ༌ནེ༌ ཏུག༌རུལ༌ཞིག༌ བིང༌ཏེ༌ པ༌འུ༌ལུའི༌ ལག༌པ༌ སོ༌ག༌ ཏབས༌ཏེ༌ དུགས༌།
ACT 28:4 ཚོ༌ལིང༌ངི༌ མི༌གུན༌ལ༌ རུལ༌བོའེ༌ པ༌འུ༌ལུའི༌ ལག༌པ༌ སོ༌ག༌ ཏབས༌ཏེ༌ ཐོང༌ང༌ཅིག༌, ཅིག༌ དང༌ ཅིག༌ག༌ ཟེརས༌, “འི༌ མི༌བོ༌ ཏན༌ཏན༌ལ༌ མི༌སད༌ཞིག༌ ཨིན༌ནོག༌། ཁོ༌ གྱ༌ཚོའེ༌ ནང༌ནེ༌ ཐར༌ཏེ༌ ཨིན༌ནའང༌ ཁྲིམས༌ཅད༌ ཛད༌ཁན༌ནི༌ དཀོན༌མཆོག༌གི༌ ཁོ༌ སོན༌ཏེའ༌ ལུས༌ ཅུག༌ག༌ མ༌ཛད༌ད༌ ཨིན༌ནོག༌།”
ACT 28:5 པ༌འུ༌ལུའི༌ རུལ༌བོ༌ སྲུགས༌ཏེ༌ མེ༌ ནང༌ང༌ ཕངས༌ སལ༌པ༌ ཁོང༌ང༌ ཅའང༌ མ༌སོང༌།
ACT 28:6 ཏེ༌ མི༌གུན༌ནི༌ པ༌འུ༌ལུའི༌ ཟུགས༌པོ༌བོ༌ སྲངས༌ཨིན༌ ཡ༌ ཧུན༌མེད༌ལ༌ སའེ༌ཀ༌ གྱེལ༌ཏེ༌ ཤིའ༌ནོག༌ སམ༌། ཏུས༌ མང༌པོ༌ཞིག༌ སྲུངས༌ཏེ༌ སྟིང༌ནེའང༌ པ༌འུ༌ལུའ༌ ཅའང༌ མ༌སོང༌པ༌ ཁོང༌གུན༌ནི༌ སམ༌ཁན༌བོ༌ གྱུར༌ཏེ༌ འི༌ མི༌བོ༌ དཀོན༌མཆོག༌ཤིག༌ ཨིན༌ནོག༌ ཟེརས༌།
ACT 28:7 པུབ༌ལི༌འུས༌ ཟེར༌ཁན༌བོ༌ ཏེ༌ ཚོ༌ལིང༌ངི༌ ནང༌ང༌ ས༌ཀྱད༌ མ༌ ཆེན༌མོ༌ཞིག༌གི༌ དག༌པོ༌ དང༌ ཏེ༌ ཡུལ༌ལི༌ ཀའ༌ལོན༌ ཨིན༌པིན༌། ཁོའེ༌ ང༌ཞའ༌ ཁོ༌རང༌ངི༌ ཁང༌པའེ༌ ནང༌ང༌ གའ༌སུས༌ ཞུས༌ཏེ༌ ཞག༌ སུམ༌ ཚག༌པ༌ ང༌ཞའ༌ སྟ༌སྟོག༌ ཅོས༌ཏེ༌ ཐུག༌རྗེ༌ ཛདས༌།
ACT 28:8 པུབ༌ལི༌འུས༌སི༌ ཨ༌བའ༌ ཚད༌ དང༌ ཁྲོལ༌ཅེས༌སི༌ ཟུ༌མོ༌ ཡོངས༌ཏེ༌ མལ༌ཙའེ༌ ནང༌ང༌ དུག༌པིན༌, པ༌འུ༌ལུ༌ ཁོའ༌ ཐུག༌ག༌ལ༌ སྐྱོདས༌། མོས༌ལམ༌ ཞུས༌ ཡང༌ ཁོང༌རང༌ངི༌ ཆག༌ ཁོའེ༌ གོའེ༌ཀ༌ བོར༌ར༌ ཛད༌ཏེ༌ ཁོ༌ ཕན༌ཅུག༌ག༌ ཛདས༌།
ACT 28:9 ཏེ༌བོ༌ ཐོང༌ང༌ཅིག༌ ཏེ༌ ཚོ༌ལིང༌ངི༌ ཞན༌ ནད༌པ༌ ཚང༌མ༌ ཁོང༌ངི༌ དུན༌ལ༌ ཁྱོངས༌, ཡང༌ པ༌འུ༌ལུའི༌ ཁོང༌གུན༌ནའང༌ ཕན༌ཅུག༌ག༌ ཛདས༌།
ACT 28:10 ཏེ༌བོའེ༌ ཞས༌ཏེ༌ ཁོང༌གུན༌ནི༌ ང༌ཞ༌གུན༌ལ༌ མ༌ རྩི༌ཝ༌ ཅོས༌, ཡང༌ ང༌ཞའ༌ ཏེ༌ཀ༌ནེ༌ བིང༌ཅེས༌སི༌ གྲལ༌ ཅོའ༌ཅིག༌, ཁོང༌གུན༌ནི༌ ང༌ཞའ༌ སྒོས༌དོམ༌ ཡོད༌ཁན༌ ཚང༌མ༌ གྲུ༌ཟིང༌ངི༌ ནང༌ང༌ སྐངས༌།
ACT 28:11 ཟླ༌ཝ༌ སུམ༌མི༌ སྟིང༌ནེ༌ ང༌ཞ༌གུན༌, དགུན༌ཏུས༌ ཕུད༌ཅེས༌ལ༌ ཏེ༌ ཚོ༌ལིང༌བོའེ༌ཀ༌ དུགས༌ཏེ༌ ཡོད༌ཁན༌ནི༌ གྲུ༌ཟིང༌ཞིག༌ག༌ ཞོན༌ཏེ༌ སོང༌པིན༌, ཀ༌བོ༌ ཨ༌ལེག༌ཟན༌དྲིའ༌ནེ༌ ཨིན༌ནོག༌། ཏེ༌ གྲུ༌ཟིང༌ངི༌ གོ༌བོ༌ གརིས༌པའེ༌ ཚག༌ཕྲུག༌ ལྷ༌ ཀས༌ཏྲར༌ དང༌ པོ༌ལགས༌ ཟེར༌ཁན༌ནི༌ གོའེ༌ ཟོས༌ཏེ༌ ནང༌ང༌ སྐོས༌ཏེ༌ དུག༌པིན༌།
ACT 28:12 ང༌ཞ༌གུན༌ སི༌ར༌ཀུས༌ གྱལ༌ས༌ ལེབ༌, ཡང༌ ཏེ༌རུ༌ ཞག༌ སུམ༌ དུགས༌།
ACT 28:13 ཏེ༌ཀ༌ནེ༌ གྲུ༌ཟིང༌ངི༌ ནང༌ང༌ སོང༌ཏེ༌ ང༌ཞ༌གུན༌ རེ༌གི༌འུམ༌ གྱལ༌ས༌ ལེབ༌, ཡང༌ སྟིང༌མ༌ཞག༌པོ༌ ལྷོ༌ ཆོགས༌ནེ༌ ལུངས༌པོ༌ ཡོངས༌པ༌ ཞག༌ཅིག༌གི༌ སྟིང༌ནེ༌ ང༌ཞ༌གུན༌ པུ༌ཏེའོ༌ལི༌ གྲོང༌ཁྱེར༌ལ༌ ལེབ༌།
ACT 28:14 ཏེ༌རུ༌ ང༌ཞ༌གུན༌ལ༌ ཏད༌པ༌ཅན༌ ཁ༌ཅིག༌ ཐུག༌, ཁོང༌གུན༌ནི༌ ང༌ཞའ༌ ཞག༌པོ༌ རྡུན༌ ཁོང༌གུན༌ ཉམ༌པོ༌ དུགས༌ཅེས༌ལ༌ ཞུས༌། ཏེ༌ སྟིང༌ནེ༌ ང༌ཞའ༌ གྲུལ༌ཏེ༌ རོམ༌མི༌ གྱལ༌ས༌ ལེབ༌།
ACT 28:15 རོམ༌མི༌ ནང༌ང༌ ཡོད༌ཁན༌ནི༌ སྤུན༌གུན༌ལ༌ ང༌ཞའ༌ ཡོང༌དུག༌ ཟེར༌ཏེ༌ གྱུས༌སོང༌ཏེ༌ ཨབ༌པིའུས༌སི༌ ཁྲོམས༌ དང༌, བེས༌ཁང༌ སུམ༌ ཟེར༌ཁན༌ནི༌ གྲོང༌ཁྱེར༌ ཚག༌པ༌ ང༌ཞའ༌ སུས༌ཏེ༌ ཡོངས༌། ཁོང༌གུན༌ ཐོང༌ང༌ཅིག༌ པ༌འུ༌ལུའི༌ སེམས༌ལ༌ སྤོས༌པ༌ སྐྱེས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌།
ACT 28:16 རོམ༌མི༌ གྱལ༌ས༌ ལེབས༌ཏེ༌ སྟིང༌ནེ༌ པ༌འུ༌ལུའ༌ ཅིག༌པོ༌ ཁང༌པ༌ཞིག༌གི༌ ནང༌ང༌ དུག༌ཅེས༌ལ༌ གོངས༌པ༌ ཏངས༌ཏེ༌ མག༌མི༌ ཅིག༌ སྲུང༌ང༌ བོརས༌།
ACT 28:17 ཞག༌ སུམ༌ ཆའ༌ཅིག༌ པ༌འུ༌ལུའི༌ ཡ༌ཧུ༌དཱ༌པའེ༌ འུ༌སྐྱོང༌གུན༌ལ༌ བོདས༌། ཁོང༌གུན༌ ལྡུས༌ས༌ཅིག༌ པ༌འུ༌ལུའི༌ མོལས༌, “ཡ༌ཧུ༌དཱ༌པའེ༌ སྤུན༌གུན༌, ངའེ༌, ང༌དང༌ངི༌ མི༌གུན༌ ཡ༌ ཕ༌མེས༌པོའེ༌ ལུག༌སྲོལ༌གུན༌ནི༌ གྱབ༌གལ༌ མ༌ནེ༌ མ༌ཅོས༌པིན༌, ཏེ༌ནེའང༌ ང༌ ཡེ༌རུ༌ཤ༌ལེམ༌མི༌ ནང༌ང༌ ཟུམས༌ཏེ༌ རོམ༌པའེ༌ ལག༌ག༌ སྟདས༌།
ACT 28:18 རོམ༌པ༌གུན༌ནི༌ ང༌ རྩར༌ཅོད༌ ཏངས༌ཏེ༌ སྟིང༌ནེ༌ ཕུད༌ཅེས༌ལ༌ ཐད༌ ཅིའ༌ཟེར༌ན༌ སྲོག༌གི༌ ཆད༌པ༌ ཕོག༌ཅེས༌སི༌ ལས༌ཤིག༌ ངའེ༌ མ༌ནེ༌ མ༌ཅོས༌པིན༌།
ACT 28:19 ཨིན༌ནའང༌ ཡ༌ཧུ༌དཱ༌པ༌གུན༌ནི༌ ཏེ༌ ཐག༌ཅད༌བོའ༌ གྱབ༌གལ༌ ཅོས༌པ༌, ངའ༌ རོམ༌མི༌ གྱལ༌པོའེ༌ཀ༌ ཁྲིམས༌ཅད༌དི༌ ཕིའ༌ ཞུ༌ཝ༌ ཕུལ༌གོས༌, ངའེ༌ ང༌རང༌ངི༌ མི༌གུན༌ནི༌ཀ༌ སྐྱོན༌ ཀལ༌ཅེས༌ལ༌ ཏེ༌ ཞུ༌ཝ༌ མ༌ཕུལ༌པིན༌།
ACT 28:20 ཨིས༌ར༌ཨེལ༌པ༌གུན༌ནི༌ རེ༌ཝ༌, ཀ༌བོ༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌, ཁོང༌ སྐྱོད༌ཚར༌ཁན༌བོའེ༌ ནང༌ང༌ ཏད༌པ༌ ཅོས༌པ༌ ངའ༌ འི༌ ལྕག༌ཐག༌ ཉམ༌པོ༌ ཅིངས༌ཏེ༌ ཨིན༌ཁན༌བོ༌ ཧ༌གོ༌ཅུག༌ཅེས༌སི༌ ཕིའ༌ ངའེ༌ ཁྱོ༌ཞའ༌ སྤེ༌ར༌ ཏང༌ང༌ བོད༌ཏེ༌ ཨིན༌།”
ACT 28:21 ཁོང༌གུན༌ནི༌ ལན༌ཏངས༌, “ང༌ཞའ༌ ཉེ༌རང༌ངི༌ སྐོར༌ལ༌ ཡ༌ཧུ༌དཱ༌ནེ༌ ཨི༌གེ༌ མ༌ལེབ༌, ཡང༌ ཡ༌ཧུ༌དཱ༌ནེ༌ ཡོང༌ཁན༌ནི༌ སྤུན༌གུན༌ནི༌ ཉེ༌རང༌ངི༌ སྐོར༌ལ༌ ཅའང༌ ངན༌པ༌ ཤད༌ད༌ ཡ༌ ཟེར༌ར༌ མེ༌རག༌།
ACT 28:22 ཨིན༌ནའང༌ ཀ༌རུང༌ས༌ མི༌གུན༌ནི༌ འི༌ ཆོས༌ སྡེ༌ གྱབ༌གལ༌ལ༌ སྤེ༌ར༌ ཏང༌ཁན༌བོ༌ ང༌ཞའ༌ གྱུས༌ཡོད༌། འི༌བོའེ༌ སྐོར༌ལ༌ ཤད༌ད༌ཛད༌ ང༌ཞའ༌ ཉན༌ཅེས༌ལ༌ ཐད༌ད༌རག༌།”
ACT 28:23 པ༌འུ༌ལུའི༌ སྤེ༌ར༌ ཉན༌ཅེས༌ལ༌ ཁོང༌གུན༌ནི༌ ཞག༌ཤིག༌ ལྡམས༌། ཏེ༌ ཞག༌པོ༌ ལེབ༌བ༌ཅིག༌, པ༌འུ༌ལུ༌ ཞུག༌སའེ༌ ཁང༌པའ༌ སྔུན༌ནི༌ སང༌ མང༌ང༌ མི༌གུན༌ ཛོམས༌། པ༌འུ༌ལུའི༌ ང༌ཏོག༌ནེ༌ ཕི༌ཏོག༌ ཚག༌པ༌ ཁོང༌གུན༌ལ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ སྤང༌པོ༌ སལ༌ཨིན༌ ཧ༌གོ༌ཅུགས༌། ཡང༌ མོ༌ཟེས༌སི༌ བཀའ༌ཁྲིམས༌ དང༌ ལུང༌སྟོན༌པ༌གུན༌ནི༌ སྤེ༌ཆ༌གུན༌ གྱུད༌ཏེ༌ ཡེ༌ཤུ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོ༌ ཧ༌གོ༌ཅུག༌ཅེས༌སི༌ རྩོན༌གྲུས༌ ཅོས༌།
ACT 28:24 ཁ༌ཅིག༌གི༌ ཁོང༌ངི༌ མོལ༌ཁན༌གུན༌ ཚོར༌ཏེ༌ ཏད༌པ༌ ཅོས༌, ཨིན༌ནའང༌ ཁ༌ཅིག༌གི༌ མ༌ཅོས༌།
ACT 28:25 སམ༌ཚུལ༌ སོ༌སོའེ༌ ཞས༌ཏེ༌ ཁོང༌གུན༌ནི༌ ནང༌ང༌ མི༌གྲིག༌ཅེས༌ སོང༌ ཡང༌ ཁོང༌གུན༌ ཏེ༌ཀ༌ནེ༌ བིང༌ཏེ༌ ཆེན༌ ཡོད༌ ཟ༌ནེ༌ པ༌འུ༌ལུའི༌ མོལས༌, “ཡེ༌ཤ༌ཡཱ༌ ལུང༌སྟོན༌པ༌ གྱུད༌ཏེ༌ ཏམ༌པའེ༌ ཐུག༌ཉིད༌དི༌ ཁྱོ༌ཞའེ༌ ཕ༌མེས༌པོ༌གུན༌ལ༌ དེན༌བ༌ མོལ༌ཏེ༌ ཨིན༌ནོག༌,
ACT 28:26 ‘འི༌ མི༌རབས༌པོའེ༌ཀ༌ སོང༌ཏེ༌ ཟེར༌, “ཁོང༌གུན༌ནི༌ ངའེ༌ ཤད༌ཁན༌གུན༌ ཚོར༌ནའང༌ ཧ༌གོ༌ཐུབ༌བ༌ མི༌དུག༌, ཁོང༌གུན༌ནི༌ ངའེ༌ ཅོ༌ཁན༌གུན༌ ཐོང༌ནའང༌ ང༌ སུ༌ ཨིན༌ཁན༌བོ༌ ངོ༌ཤེས༌ས༌ མི༌དུག༌”
ACT 28:27 ཅིའ༌ཟེར༌ན༌ འི༌ མི༌རབས༌པོའེ༌ སྙིང༌བོ༌ སྐྱོང༌པོ༌ གྱུར༌ཏེ༌ དུག༌, ཁོང༌གུན༌ལ༌ ཀགས༌པོ༌ ཉམ༌པོ༌ མ༌ ཉུ༌ངུན༌ ཚོར༌དུག༌། ཡང༌ མིག༌གུན༌ ཙུམས༌ཏེ༌ ཡོད༌པ༌ ཁོང༌གུན༌ནི༌ མིག༌ནེ༌ མི༌ཐོང༌, ནམ༌ཅོག༌ནེ༌ མི༌ཚོར༌, ཡང༌ སེམས༌ལ༌ ཧ༌མི༌གོ༌ ཏེ༌ མ༌ནེ༌ ཁོང༌གུན༌ ང༌ ཆོགས༌ལ༌ གྱུར༌ཏེ༌ ངའེ༌ ཁོང༌གུན༌ གྱལ༌ཅུགས༌ཏེ༌ ཡོད༌གྲོ༌།’”
ACT 28:28 “ཏེན༌ན༌བོའེ༌ཕིའ༌ དཀོན༌མཆོག༌གི༌ ཐར༌ལམ༌མི༌ ལོན༌བོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ཀ༌ ཀལ༌ཏེ༌ ཁོང༌གུན༌ནི༌ ཉན༌ཅེས༌པོ༌ ཁྱོ༌ཞ༌གུན༌ནི༌ ཧ༌གོ༌གོས༌།”
ACT 28:29 
ACT 28:30 པ༌འུ༌ལུ༌ ལོ༌ ཉིས༌ ཁང༌ལ༌ ཤལ༌ཁན༌ནི༌ ཁང༌པའེ༌ ནང༌ང༌ ཞུགས༌, ཡང༌ ཁོང༌ངི༌ ཐུག༌ག༌ ཡོང༌ཁན༌ ཚང༌མ༌ལ༌ གའ༌སུས༌ ཞུའད༌པིན༌།
ACT 28:31 ཁོང༌ངི༌ མ༌ སྤོས༌པ༌ དང༌ ཅའང༌ སྒག༌ཞའ༌ མེད༌པ༌ དཀོན༌མཆོག༌གི༌ གྱལ༌སྲིད༌དི༌ སྐོར༌ལ༌ ཤད༌ཏེ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ ལབ༌ཞ༌ སལས༌།
ROM 1:1 འི༌ ཨི༌གེ༌བོ༌ ང༌ པ༌འུ༌ལུ༌, མ༌ཤི༌ཀ༌ ཡེ༌ཤུའི༌ ཚེ༌ཡོག༌, དཀོན༌མཆོག༌གི༌ ལྡམ༌མ༌ ཛད༌ཁན༌ སྐུ༌ཚབས༌, གའ༌མོའེ༌ ནས༌ཚུལ༌ ཤད༌ད༌ལ༌ ལམ༌ཅུག༌ག༌ ཛད༌ཁན༌ནི༌ ཆོགས༌ནེ༌ ཨིན༌།
ROM 1:2 དཀོན༌མཆོག༌གི༌ འི༌ གའ༌མོའེ༌ ནས༌ཚུལ༌བོ༌ ཏུས༌ མང༌པོའེ༌ སྔུན༌ལ༌ ཁོང༌རང༌ངི༌ ལུང༌སྟོན༌པ༌གུན༌ གྱུད༌ཏེ༌, ཏམ༌པའེ༌ སུང༌རབས༌སི༌ ནང༌ང༌ ཞལ༌ཆད༌ ཛད༌ཏེ༌ ཨིན༌པིན༌།
ROM 1:3 གའ༌མོའེ༌ ནས༌ཚུལ༌བོ༌ ནི༌ ཁོང༌རང༌ངི༌ སྲས༌སི༌ སྐོར༌ལ༌ ཨིན༌ནོག༌། ཇིག༌རྟེན༌ནི༌ མི༌ཚེའེ༌ ནང༌ང༌ ཁོང༌, གྱལ༌པོ༌ དཱ༌བིད༌དི༌ གྱུད༌ནེ༌ སྐྱེའ༌ ཛད༌ཏེ༌
ROM 1:4 ཏམ༌པའེ༌ ཐུག༌ཉིད༌དི༌ ཤེད༌ གྱུད༌ཏེ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོ༌ སྟན༌ན༌ ཛདས༌། ཁོང༌ ནི༌ ཡེ༌ཤུ༌ མ༌ཤི༌ཀ༌, ང༌དང༌ངི༌ གཙོ༌བོ༌ ཨིན༌།
ROM 1:5 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ང༌ཞ༌གུན༌ལ༌ སྐུ༌ཚབས༌སི༌ ཚུལ༌ལ༌, ཀ༌རུང༌ས༌ ཡ༌ཧུ༌དཱ༌པ༌ མན༌ཁན༌གུན༌ལ༌ དཀོན༌མཆོག༌གི༌ ཅོའ༌ ཛད༌ཁན༌གུན༌ ཤད༌ཅེས༌སི༌ ཝང༌ཆ༌ དང༌ རྩི༌ཝ༌ གུན༌ སལ༌ལ༌ ཛདས༌། ཁོང༌ངི༌ ཏེ༌ཟུག༌ ཅོའ༌ ཛད༌ཅེས༌སི༌ གྱུན༌ཚན༌ ནི༌, ཡ༌ཧུ༌དཱ༌པ༌ མན༌ཁན༌གུན༌ནི༌ ཁོང༌ངི༌ ཁའ༌ཉན༌ཅེས༌ དང༌ ཏད༌པ༌ ཅོས༌ཏེ༌ ཁོང༌ངི༌ ཚན༌ལ༌ རྩི༌ཝ༌ ཁྱོང༌ཅེས༌པོ༌ ཨིན༌ནོག༌།
ROM 1:6 ཡང༌ ཁྱོ༌ཞ༌གུན༌ནའང༌, ཡེ༌ཤུ༌ མ༌ཤི༌ཀའེ༌ ཁོང༌རང༌ངི༌ མི༌ ལྡམ༌མ༌ ཛད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཨིན༌ནོག༌།
ROM 1:7 ངའེ༌, དཀོན༌མཆོག༌གི༌ ཅེས༌པ༌ ཅོའ༌ ཛད༌ཏེ༌ ཁོང༌ངི༌ མི༌ ཏམ༌པ༌གུན༌ གྱུར༌ཅེས༌ལ༌ བོད༌ད༌ ཛད༌ཁན༌ནི༌ ཁྱོ༌ཞའ༌ རོམ༌པ༌ ཚང༌མ༌ལ༌ བྲིའད༌། དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ སེམས༌དེ༌ ཁྱོ༌ཞ༌གུན༌ལ༌ སལ༌ལ༌ ཛད༌ཤིག༌།
ROM 1:8 ཚང༌མའེ༌སང༌ སྔུན༌ལ༌, ངའེ༌ ཁྱོ༌ཞའ༌ ཚང༌མའེ༌ ཕིའ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཅིའ༌ཟེར༌ན༌ མ༌ཤི༌ཀའེ༌ ནང༌ང༌ ཡོད༌ཁན༌ནི༌ ཁྱོ༌ཞའེ༌ ཏད༌པའེ༌ སྐོར༌ལ༌ ཇིག༌རྟེན༌ གང༌པོའེ༌ མི༌གུན༌ནི༌ སྤེ༌ར༌ ཏང༌དུག༌།
ROM 1:9 ངའེ༌ མོས༌ལམ༌ ཞུ༌ ཟ༌ནེ༌ ཁྱོ༌ཞ༌གུན༌ ཏུས༌གྱུན༌ ཨིད༌ཏུ༌ ཅོའད༌, ཏེ༌བོའེ༌ སྤང༌པོ༌ དཀོན༌མཆོག༌ ཨིན༌, ཁོང༌ངི༌ སྲས༌སི༌ གའ༌མོའེ༌ ནས༌ཚུལ༌བོ༌ ཕེལ༌ཅུག༌ཅེས༌ལ༌ ངའེ༌ ང༌རང༌ངི༌ སྙིང༌ངི༌ ཐིལ༌ནེ༌ ཞབས༌ཏོག༌ ཞུའད༌།
ROM 1:10 ངའེ༌ མོས༌ལམ༌ ཚང༌མའེ༌ ནང༌ང༌, ཀལ༌ཏེས༌ དཀོན༌མཆོག༌ ཐུག༌གོངས༌སད༌ན༌, ང༌ ཁྱོ༌ཞ༌གུན༌ ཉམ༌པོ༌ ཐུག༌ཅེས༌ལ༌ སྐབས༌ཤིག༌ སལ༌ ཟེར༌ཨིན༌ ཞུ༌ཝ༌ ཕུལ༌ལད༌།
ROM 1:11 གཙོ༌བོའེ༌ ནང༌ང༌ ཤེད༌ཅན༌ གྱུར༌ཅེས༌ལ༌ རོགས༌ ཅོ༌ཁན༌ནི༌ ཐུག༌ཉིད༌དི༌ ཁྱུད༌རིག༌ ཁྱོ༌ཞ༌གུན༌ལ༌ ཁྱོང༌ཅེས༌སི༌ ཕིའ༌ ངའ༌ ཁྱོ༌ཞའ༌ ཉམ༌པོ༌ ཐུག༌ཅེས༌ལ༌ དོད༌པ༌ སྲན༌ཏྲེ༌ རག༌།
ROM 1:12 ཏེ༌བོའེ༌, ངའེ༌ ཁྱོ༌ཞ༌གུན༌ལ༌, ཡང༌ ཁྱོ༌ཞའེ༌ ངའ༌ ཏད༌པའེ༌ ནང༌ང༌ སྤོས༌པ༌ སྐྱེ༌ཅུག༌ ཐུབ༌ཨིན༌།
ROM 1:13 ཅེས༌པའེ༌ སྤུན༌གུན༌, ངའེ༌ ལན༌ མང༌པོ༌ ཁྱོ༌ཞ༌གུན༌ལ༌ ཐུག༌ཅེས༌སི༌ ཐབས༌ ཅོས༌པིན༌, ཨིན༌ནའང༌ དག༌ས༌ ཚོག༌པ༌ སྒགས༌ཏེ༌ བོར༌ཁན༌བོ༌ ཁྱོ༌ཞ༌གུན༌ལ༌ གྱུས༌ ཆ༌གོས༌ སམ༌མ༌རག༌། ངའ༌ ཁྱོ༌ཞ༌གུན༌ནི༌ ཕྲོའ༌ ལས༌ ཅོ༌ཅེས༌ དང༌ ཐུག༌ཉིད༌དི༌ བྲས༌བུ༌ གུན༌ ལྟ༌ཅེས༌སི༌ དོད༌པ༌ རག༌, ཀ༌ཟུག༌ ངའེ༌ ཞན༌ཡང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཐོང༌།
ROM 1:14 གརིས༌པའེ༌ ལབ༌ཞའེ༌ ནང༌ང༌ ཡོན༌ཏན༌ ཡོད༌ཁན༌ དང༌ མེད༌ཁན༌ ཉིས༌ཀོའ༌ ཡ༌ ཤེས༌རབས༌ཅན༌ དང༌ སམ༌བ༌ མེད༌ཁན༌ ཉིས༌ཀོའ༌, གའ༌མོའེ༌ ནས༌ཚུལ༌ ཤད༌ཅེས༌སི༌ ཁག༌ ངའ༌ ཕོག༌ཏེ༌ ཨིན༌
ROM 1:15 པ༌སང༌, ཁྱོ༌ཞའ༌ རོམ༌མི༌ གྱལ༌སའེ༌ ནང༌ང༌ ཡོད༌ཁན༌གུན༌ལའང༌ གའ༌མོའེ༌ ནས༌ཚུལ༌ ཤད༌ཅེས༌ལ༌ ངའ༌ རིངས༌ས༌རག༌།
ROM 1:16 འི༌ གའ༌མོའེ༌ ནས༌ཚུལ༌བོའ༌ ངའ༌ ཁྲེལ༌ལ༌ མེ༌རག༌, ཅིའ༌ཟེར༌ན༌ འི༌བོ༌ ནི༌ ཏད༌པ༌ཅན༌ནི༌ མི༌ཚང༌མ༌ སྐྱོབ༌ཐུབ༌ཅེས༌སི༌ དཀོན༌མཆོག༌གི༌ སྟོབས༌པོ༌ ཨིན༌ནོག༌, ཏང༌པོ༌ ཡ༌ཧུ༌དཱ༌པ༌གུན༌ལ༌ ཏེ༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལ༌།
ROM 1:17 འི༌ གའ༌མོའེ༌ ནས༌ཚུལ༌བོའེ༌ ང༌དང༌ དཀོན༌མཆོག༌གི༌ སྐུན༌དུན༌ལ༌ ཀ༌ཟུག༌གི༌ ཀྲང༌པོ༌ གྱུར༌ཅེས༌པོ༌ སྟན༌ན༌ནོག༌, ཀ༌བོ༌ གོ༌མ༌ནེ༌ ཇུག༌མ༌ ཚོག༌པ༌ ཏད༌པ༌ གྱུད༌ཏེ༌ གྲུབ༌བ༌ནོག༌། ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཡོད༌ཏེ༌ ཨིན༌ནོག༌, “ཏད༌པ༌ གྱུད༌ཏེ༌ མི༌ ཀྲང༌པོ༌ཞིག༌ག༌ མི༌ཚེ༌ ཐོབ༌བ༌ནོག༌།”
ROM 1:18 ཨིན༌ནའང༌ ཁོ༌རང༌གུན༌ནི༌ ངན༌པའེ༌ ལས༌གུན༌ནི༌ གྱབ༌བ༌, དེན༌བ༌བོ༌ ཀབས༌ཏེ༌ བོར༌ཁན༌ནི༌ མི༌, ངན༌པ༌ དང༌ སྡིག༌ཅན༌ ཚང༌མའེ༌ གྱབ༌གལ༌ལ༌, དཀོན༌མཆོག༌གི༌ ཐུགས༌སྲོ༌ ནམ༌ཁའ༌ནེ༌ སྟན༌ན༌ ཛད༌ཨིན༌ ཨིན༌ནོག༌།
ROM 1:19 ཁོང༌གུན༌ལ༌ དཀོན༌མཆོག༌གི༌ དེན༌བའེ༌ སྐོར༌ལ༌ གྱུས༌ཡོད༌ཏེ༌ ཨིན༌ནོག༌, ཅིའ༌ཟེར༌ན༌ ཁོང༌ངི༌ ཏེ༌གུན༌ ཁོང༌གུན༌ལ༌ སལ༌པོ༌ ཛད༌ཏེ༌ སྟན༌ན༌ ཛད༌ཏེ༌ ཨིན༌པིན༌།
ROM 1:20 ཇིག༌རྟེན༌ ཛད༌པ༌ནེ༌ ཕར༌ལ༌ མི༌གུན༌ནི༌, དཀོན༌མཆོག༌གི༌ ཛད༌ཁན༌ ཚང༌མ༌ གྱུད༌ཏེ༌, སལ༌པོ༌ ཅོས༌ཏེ༌, མ༌ཐོང༌ཁན༌ནི༌ ཁོང༌ངི༌ ཁྱུད༌གུན༌ ཐོངས༌ཏེ༌ ཨིན༌ནོག༌, ཀ༌གུན༌ ཁོང༌ངི༌ ཐའ༌མེད༌པའེ༌ ཝང༌ དང༌ དཀོན༌མཆོག༌གི༌ ཤིས༌པོ༌ ཨིན༌ནོག༌། ཏེན༌ན༌བོའེ༌ཕིའ༌ ཁོང༌གུན༌ནི༌ ཅའང༌ སྐྱོན༌ ཅོ༌མི༌ཉན༌།
ROM 1:21 ཁོང༌གུན༌ནི༌ དཀོན༌མཆོག༌ ཤེས༌ཨིན༌ ཡོད༌ཏེའང༌, ཁོང༌ང༌ འོས༌པའེ༌ རྩི༌ཝ༌ མ༌ཏངས༌ ཡ༌ ཐུག༌རྗེ༌ཆེའང༌ མ༌ཞུས༌། ཨིན༌ནའང༌ དཀོན༌མཆོག༌ ཀ༌ཟུག༌ཤིག༌ ཨིན༌, ཏེ༌ སྐོར༌ལ༌ སམ༌བ༌ མེད༌ཁན༌གུན༌ ཙོགས༌ལ༌ སམ༌བ༌ ཏང༌ཅེས༌ གོ༌ཟུགས༌, ཀ༌བོའེ༌ ཞས༌ཏེ༌ ཁོང༌གུན༌ ལྡད༌པ༌ མེད༌ཁན༌ ཙོགས༌ གྱུར༌ཏེ༌ ལག༌མོ༌ སམ༌བ༌ ཏང༌ མ༌ཉན༌།
ROM 1:22 ཁོང༌གུན༌ནི༌ ཁོ༌རང༌གུན༌ སམ༌བ༌ཅན༌ ཨིན༌ ཟེར༌ནའང༌, ཁོང༌གུན༌ བུང༌བུ༌ ཙོགས༌ གྱུར༌ཏེ༌ ཨིན༌ནོག༌།
ROM 1:23 ཡང༌ ཁོང༌གུན༌ནི༌ ཟིར༌རྗིད༌ཅན༌ དང༌ ཏུས༌གྱུན༌ སོན༌པོ༌ ཨིན༌ཁན༌ནི༌ དཀོན༌མཆོག༌ག༌ མ༌ཅོལ༌ལ༌ ཤི༌ཅེས༌ཅན༌ནི༌ མི༌, ཡ༌ ཅི༌པ༌, ཡ༌ སེམས༌ཅན༌, ཡ༌ རྒལ༌ཅིག༌གི༌ རིགས༌ གུན༌ནི༌ ཟོས༌ཏེ༌ ནང༌ང༌ ཅོ༌ཁན༌ནི༌ སྐུན༌དྲའ༌ ཅོལ༌ལ༌ནོག༌།
ROM 1:24 ཏེ༌བོའེ༌ཕིའ༌ དཀོན༌མཆོག༌གི༌ ཏེ༌ མི༌གུན༌ ཁོ༌རང༌གུན༌ནི༌ སྡིག༌པའེ༌ དོད༌པ༌ ནང༌ཞིན༌ ཅོ༌ཅེས༌ལ༌ ཕང༌ང༌ ཛདས༌། ཏེ༌བོའེ༌ ཞས༌ཏེ༌ ཁོང༌གུན༌ནི༌ ཁོ༌རང༌ ཅིག༌ དང༌ ཅིག༌གི༌ ཟུགས༌པོ༌ ཉམ༌པོ༌ ཁམ༌ལོག༌ དང༌ ཚི༌ཏུ༌ ལས༌གུན༌ ཅོས༌།
ROM 1:25 ཁོང༌གུན༌ནི༌ དཀོན༌མཆོག༌གི༌ དེན༌བའེ༌ ཚབས༌ལ༌ ཟུས༌མའེ༌ ལབ༌ཞ༌གུན༌ ཀོལས༌, ཡང༌ ཇིག༌རྟེན༌ ཛད༌ཁན༌ དཀོན༌མཆོག༌ ཀ༌བོའ༌ ཏུས༌གྱུན༌ སྟོད༌པའེ༌ འོས༌པ༌ ཨིན༌, ཨ༌མེན༌། ཁོང༌ང༌ མ༌ཅོལ༌ལ༌ ཁོང༌ངི༌ ཚབས༌ལ༌ ཁོང༌ངི༌ ཛད༌ཁན༌གུན༌ལ༌ ཅོལ༌ཅེས༌ དང༌ ཞབས༌ཏོག༌ ཞུས༌།
ROM 1:26 ཏེན༌ན༌བོའེ༌ཕིའ༌ དཀོན༌མཆོག༌གི༌ ཁོང༌གུན༌ ཁོ༌རང༌གུན༌ནི༌ ཁྲེལ༌མེད༌དི༌ དོད༌པ༌གུན༌ ཅོ༌ཅེས༌ལ༌ ཕང༌ང༌ ཛདས༌། བུ༌མོ༌གུན༌ནིའང༌ རང༌ཞིན༌ནི༌ ལུས༌བྲེལ༌ལི༌ ཚབས༌ལ༌ ཁོ༌རང༌ ཅིག༌ དང༌ ཅིག༌གི༌ པར༌ལ༌ ལུས༌བྲེལ༌ བོརས༌།
ROM 1:27 ཏེན༌ན༌ ཙོགས༌ལ༌ བུ༌ཚ༌གུན༌ནིའང༌ རང༌ཞིན༌ནི༌ ལུས༌བྲེལ༌བོ༌ ཕངས༌ཏེ༌, ཁོ༌རང༌ བུ༌ཚ༌གུན༌ནི༌ པར༌ལ༌ ལུས༌བྲེལ༌ལི༌ དོད༌པ༌ སྲན༌ཏྲེ༌ ཅོས༌། ཡང༌ བུ༌ཚ༌གུན༌ནི༌ ཞན༌ བུ༌ཚའ༌ ཉམ༌པོ༌ ཁྲེལ༌མེད༌དི༌ ལས༌ ཅོས༌པ༌, ཁོང༌གུན༌ལ༌ ཁོ༌རང༌གུན༌ནི༌ ཟུགས༌པའེ༌ ནང༌ང༌ ཏེ༌ ལས༌ངན༌བོའེ༌ ཆད༌པ༌ ཕོག༌།
ROM 1:28 ཁོང༌གུན༌ནི༌ དཀོན༌མཆོག༌ ཤེས༌གོ༌ཤེས༌པོ༌ ནི༌ ཕན༌མི༌ཐོགས༌ཤིག༌ ཨིན༌ སམ༌ པ༌སང༌, དཀོན༌མཆོག༌གི༌ ཁོང༌གུན༌ སམ༌བ༌ མེད༌ཁན༌གུན༌ ཙོགས༌ལ༌ སམ༌བ༌ ཏང༌ཅེས༌ལ༌ ཕང༌ང༌ ཛདས༌། ཏེ༌ཟུག༌ ཅོའ༌ ཛད༌ཅེས༌པོའེ༌, ཁོང༌གུན༌ནི༌ ཅོ༌ མི༌གོ༌ཤེས༌སི༌ ལས༌ངན༌གུན༌ ཅོས༌།
ROM 1:29 ཁོང༌གུན༌ནི༌ མི༌ཚེ༌བོ༌ ངན༌པ༌ ཚང༌མའེ༌ གངས༌, སྤེར༌ན༌ སྡིག༌པ༌, ནབས༌, ནཕ༌རད༌, སེམས༌སི༌ ནང༌ང༌ ཚིག༌ཅེས༌, མི༌སད༌, ཛིང༌མོ༌ ཏང༌ཅེས༌, གོབ༌སྐོར༌ཅེས༌, མིང༌ནའང༌ ཞན༌མ༌གུན༌ལ༌ སེམས༌སི༌ ནང༌ང༌ ཕོག༌ཅུག༌ཅེས༌ དང༌ སྤེར༌མེན༌ ཏང༌ཅེས༌།
ROM 1:30 ཏེ༌ མི༌གུན༌ནི༌ ཞན༌མ༌གུན༌ནི༌ སྐོར༌ལ༌ སྤེ༌ར༌ རྩོག༌པོ༌ ཟེར༌ཁན༌, དཀོན༌མཆོག༌ག༌ ནཕ༌རད༌ ཅོ༌ཁན༌, ཞན༌ལ༌ རྩི༌ཝ༌ མ༌ཅོ༌ཁན༌, ཕོ༌སོ༌ཅན༌ དང༌ རང༌སྟོད༌ ཏང༌ཁན༌གུན༌ ཨིན༌ནོག༌། ཏེ༌གུན༌ སྡིག༌པ༌ ཅོ༌ཅེས༌སི༌ ལམ༌ སོ༌མའེ༌ སྐོར༌ལ༌ སམ༌བ༌ ཏང༌ཁན༌ དང༌ ཁོ༌རང༌གུན༌ནི༌ ཕ༌མའེ༌ ཁའ༌ མ༌ཉན༌ཁན༌,
ROM 1:31 ཧ༌གོ༌ཉིན༌ མེད༌ཁན༌, ཁ༌ཆད༌ ཅག༌ཁན༌, ཅམས༌པ༌ དང༌ སྙིང༌རྗེ༌ མེད༌ཁན༌ གུན༌ ཨིན༌ནོག༌།
ROM 1:32 དཀོན༌མཆོག༌གི༌ བཀའ༌རྒྱ༌ ནང༌ཞིན༌ ཏེ༌ཟུག༌ ལས༌ ཅོ༌ཁན༌གུན༌ལ༌ ཤི༌གོ༌ཤེས༌ འོས༌པ༌ ཨིན༌ཁན༌བོ༌ གྱུས༌ཡོད༌ཏེའང༌, ཏེན༌ན༌ ལས༌ངན༌གུན༌ ཅོ༌ཅེས༌ མ༌ཚད༌, ཞན༌མ༌ ཏེ༌ཙོགས༌ ཅོ༌ཁན༌གུན༌ལ༌ སྟོད༌པ༌ ཏང༌དུག༌།
ROM 2:1 ཁྱོ༌ཞའེ༌ སྡིག༌པ༌ ཅོ༌ཁན༌ནི༌ མི༌གུན༌ལ༌ སྐྱོན༌རྗོད༌ ཅོ༌ ཉན༌ན༌ནོག༌ སམ༌མ༌ནོག༌, ཨིན༌ནའང༌ ཁྱོ༌ཞའང༌ ཁོང༌གུན༌ ཙོགས༌ སྡིག༌ཅན༌ ཨིན༌ནོག༌, ཡང༌ དཀོན༌མཆོག༌གི༌ ཁྲིམས༌ཅད༌ནེ༌ ཐར༌མི༌ཐུབ༌། ཁྱོ༌ཞའེ༌ ཞན༌མ༌གུན༌ལ༌ ཁྲིམས༌ཅད༌ ཏང༌ ཟ༌ནེ༌ ཁྱོ༌ཞའེ༌ ཁྱོ༌ཞ༌རང༌ང༌ སྐྱོན༌རྗོད༌ ཅོས༌ཏེ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞེའང༌ ཏེན༌ན༌ ཙོགས༌ ལས༌ ཅོས༌ཏེ༌ ཨིན༌ནོག༌།
ROM 2:2 དཀོན༌མཆོག༌གི༌ ཀྲང༌པོ༌ ཁྲིམས༌ཅད༌དི༌ ནང༌ང༌, ཏེ༌ཙོགས༌ ལས༌ ཅོ༌ཁན༌གུན༌ལ༌ ཆད༌པ༌ སལ༌ལ༌ ཛད༌ཅེས༌པོ༌ ང༌དང༌གུན༌ལ༌ གྱུས༌ཨིན༌ནོག༌།
ROM 2:3 ཞན༌མ༌ ཏེ༌ཟུག༌ ལས༌ ཅོ༌ཁན༌གུན༌ལ༌ སྐྱོན༌རྗོད༌ ཅོ༌ཁན༌, ཁྱོ༌ཞ༌གུན༌ནི༌ཀ༌ དཀོན༌མཆོག༌གི༌ ཁྲིམས༌ཅད༌ མི༌བབས༌ ཅིའ༌ སམ༌མ༌རག༌, ནམ༌ ཁྱོ༌ཞེའང༌ ཏེན༌ན༌ ཙོགས༌ ལས༌ ཅོའད༌?
ROM 2:4 དཀོན༌མཆོག༌ ནི༌, ཁྱོ༌ཞ༌གུན༌ ཉམ༌པོ༌ ཙམ༌ཤིག༌ ཀའ༌ཀྲིན༌ཅན༌, ཟོད༌སེམས༌ཅན༌ དང༌ ཟོད༌པ༌ཅན༌ ཨིན༌ཁན༌བོ༌ ཁྱོ༌ཞ༌གུན༌ལ༌ ཐོང༌ང༌ མི༌དུག༌ག༌? ཁོང༌ངི༌ ཀའ༌ཀྲིན༌ནི༌ གྱུན༌ཚན༌བོ༌ ནི༌, ཁྱོ༌ཞའ༌ སྡིག༌པ༌གུན༌ནི༌ ཀ༌ནེ༌ གྱུར༌ཏེ༌ གྱོད༌པ༌ ཅོ༌ཅེས༌ལ༌ ཁྲིད༌ཅེས༌པོ༌, ཁྱོ༌ཞ༌གུན༌ལ༌ ཧ༌གོའ༌མེ༌རག༌ག༌?
ROM 2:5 ཨིན༌ནའང༌ ཁྱོ༌ཞའ༌ སྐྱོང༌པོ༌ དང༌ ཁྱོ༌ཞ༌རང༌ངི༌ སྡིག༌པའེ༌ ཀ༌ནེ༌ གྱུར༌ཏེ༌ གྱོད༌པ༌ མི༌ཅོ༌ཅེས༌པོའེ༌, ཁྱོ༌ཞའེ༌ ཁྱོ༌ཞ༌རང༌ངི༌ཀ༌ ཇིགས༌ནང༌ཅན༌ནི༌ ཆད༌པ༌གུན༌ སག༌ཨིན༌ ཨིན༌ནོག༌། དཀོན༌མཆོག༌གི༌ ཐུགས༌སྲོའེ༌ ཞག༌པོ༌ ལེབ༌ཨིན༌ ནམ༌ དཀོན༌མཆོག༌གི༌ ཀྲང༌པོའེ༌ ཁྲིམས༌ཅད༌པོ༌ སྔོན༌ཨིན༌།
ROM 2:6 དཀོན༌མཆོག༌གི༌ “མི༌ རེ༌རེའ༌ རང༌རང༌ངི༌ ལས༌ ནང༌ཞིན༌ ཁྲིམས༌ཅད༌ ཛད༌ཨིན༌།”
ROM 2:7 དཀོན༌མཆོག༌གི༌ སལ༌ལ༌ ཛད༌ཅེས༌སི༌ སྤལ༌, རྩི༌ཝ༌ དང༌ མ༌ནེ༌ མི༌ཤི༌ཅེས༌སི༌ ཟུགས༌པོ༌, ཟོད༌པ༌ ཉམ༌པོ༌ ལས༌ ཟང༌པོ༌ ཅོ༌ཨིན༌, ཙལ༌ཁན༌གུན༌ལ༌ ཁོང༌ངི༌ ཐའ༌མེད༌པའེ༌ མི༌ཚེ༌བོ༌ སལ༌ལ༌ ཛད༌ཨིན༌།
ROM 2:8 ཨིན༌ནའང༌ རང༌ངི༌ ཕིའ༌ མི༌ཚེ༌ ཕུད༌ཨིན༌, དེན༌བ༌བོ༌ ཕངས༌ཏེ༌, ངན༌པའེ༌ གྱབ༌ནེ༌ གྲུལ༌ཁན༌གུན༌ལ༌, དཀོན༌མཆོག༌གི༌ ཐུགས༌སྲོ༌ དང༌ ཆད༌པ༌ གུན༌ ཕོག༌ཨིན༌།
ROM 2:9 ངན༌པ༌ ཅོ༌ཨིན༌ དུག༌ཁན༌གུན༌ལ༌, ནགས༌ དང༌ རྡུག༌ངལ༌ལི༌ ཆད༌པ༌ ཕོག༌ཨིན༌, སྔུན༌ལ༌ ཡ༌ཧུ༌དཱ༌པ༌གུན༌ལ༌ ཏེ༌སྟིང༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལའང༌།
ROM 2:10 ཨིན༌ནའང༌ ཟང༌པོ༌ ཅོ༌ཁན༌ ཚང༌མ༌ལ༌ དཀོན༌མཆོག༌གི༌ ཆོགས༌ནེ༌ སྤལ༌, རྩི༌ཝ༌ དང༌ ཞི༌དེ༌ གུན༌ ཐོབ༌ཨིན༌, སྔུན༌ལ༌ ཡ༌ཧུ༌དཱ༌པ༌གུན༌ལ༌ ཏེ༌སྟིང༌ནེ༌ ཡ༌ཧུ༌དཱ༌པ༌ མན༌ཁན༌གུན༌ལའང༌,
ROM 2:11 ཅིའ༌ཟེར༌ན༌ དཀོན༌མཆོག༌གི༌ སུའང༌ ཆོགས༌རིས༌ ཅོའ༌ ཛད༌ད༌ མ༌ནོག༌།
ROM 2:12 མོ༌ཟེས༌སི༌ ཁྲིམས༌སི༌ ཡོག༌ག༌ མེད༌ཁན༌ ཡ༌ཧུ༌དཱ༌པ༌ མན༌ཁན༌ སྡིག༌པ༌ ཅོ༌ཁན༌ ཚང༌མ༌ དཀོན༌མཆོག༌གི༌ ཆད༌པ༌ སལ༌ལ༌ ཛད༌ཨིན༌། ཡང༌ མོ༌ཟེས༌སི༌ ཁྲིམས༌སི༌ ཡོག༌ག༌ ཡོད༌ཁན༌ ཡ༌ཧུ༌དཱ༌པ༌ སྡིག༌པ༌ ཅོ༌ཁན༌ ཚང༌མའང༌ ཁྲིམས༌ ནང༌ཞིན༌ ཁོང༌ངི༌ ཁྲིམས༌ཅད༌ སལ༌ལ༌ ཛད༌ཨིན༌།
ROM 2:13 ཁྲིམས༌ ཉན༌ཅེས༌ ཅིག༌པོ༌ མན༌པ༌, ཏེ༌གུན༌ནི༌ཀ༌ ལག༌ལེན༌ ཅོ༌ཁན༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའ༌ ཛད༌ཨིན༌།
ROM 2:14 དཀོན༌མཆོག༌གི༌ ཁྲིམས༌ མེད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ རང༌ཞིན༌ལ༌ ཁྲིམས༌ ནང༌ཞིན༌ སྒོས༌དོམ༌མི༌ ལས༌གུན༌ ཅོ༌ ཟ༌ནེ༌, ཞན༌ ཁོང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཁྲིམས༌པོ༌ མ༌ཐོབ༌བ༌ ཨིན༌ནའང༌, ཏེ༌གུན༌, ཁོང༌གུན༌ནི༌ ཕིའ༌ ཁྲིམས༌ཤིག༌ ཨིན༌ནོག༌།
ROM 2:15 ཁོང༌གུན༌ནི༌ སྙིང༌ངི༌ ནང༌ང༌ དཀོན༌མཆོག༌གི༌ ཁྲིམས༌པོ༌ བྲིས༌ཏེ༌ ཡོད༌ཁན༌ སྟན༌ན༌ནོག༌, ཅིའ༌ཟེར༌ན༌ ཁོ༌རང༌གུན༌ནི༌ སེམས༌ དང༌ སམ༌ཚུལ༌ གུན༌ནི༌ ཁོང༌གུན༌ལ༌ སྐྱོན༌ཇན༌ ཡ༌ སྐྱོན༌མེད༌ ཨིན༌ཁན༌བོ༌ སྟན༌ན༌ནོག༌།
ROM 2:16 ཡང༌ འི༌ ལོན༌བོ༌ ངའེ༌ ཤད༌དད༌, ཏེ༌ ཞག༌པོ༌ ལེབ༌ཨིན༌, ནམ༌ དཀོན༌མཆོག༌གི༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ མི༌ཚང༌མའེ༌, སང༌ཝའེ༌ སམ༌ཚུལ༌གུན༌ལ༌ ཁྲིམས༌ཅད༌ ཛད༌ཨིན༌།
ROM 2:17 ཁྱོ༌ཞ༌རང༌ང༌ ཡ༌ཧུ༌དཱ༌པ༌ ཟེར༌ཁན༌གུན༌ནི༌, དཀོན༌མཆོག༌གི༌ ཁྲིམས༌པོའེ༌ཀ༌ ཨིད༌ཤེས༌ ཅོས༌ཏེ༌ དཀོན༌མཆོག༌ ཉམ༌པོ༌ མིག༌སལ༌ལི༌ བྲེལ༌ཡོད༌ ཟེར༌ཏེ༌ ཕོ༌སོ༌ ཅོའ༌ནོག༌།
ROM 2:18 ཁོང༌ངི༌ ཐུག༌གོངས༌གུན༌ ཡང༌ འོས༌པ༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌ཡོད༌ ཟེར༌ཏེ༌ ཕོ༌སོ༌ ཅོའ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ལ༌ ཁོང༌ངི༌ ཁྲིམས༌པོ༌ ལབས༌ཏེ༌ ཨིན༌ནོག༌།
ROM 2:19 ཁྱོ༌ཞའེ༌ ཏན༌ཏན༌ལ༌ ཁྱོ༌ཞའ༌ ཞ༌ར༌གུན༌ལ༌ ལམ༌སྟན༌ཁན༌, མུན༌གྲིག༌གི༌ ནང༌ང༌ ཡོད༌ཁན༌གུན༌ལ༌ འོད༌ ཨིན༌, སམ༌མ༌ནོག༌།
ROM 2:20 ཁྱོ༌ཞའེ༌ སམ༌བ༌ མེད༌ཁན༌ བུང༌བུ༌གུན༌ལ༌ ལབ༌ཞ༌ ཏང༌ཁན༌, ཕྲུ༌གུ༌ ཙོགས༌ ཅོ༌ཁན༌གུན༌ནི༌ ཕིའ༌ གེར༌གན༌ ཨིན༌ སམ༌མ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ མོ༌ཟེས༌སི༌ ཁྲིམས༌པོ༌ གྱུད༌ཏེ༌ ཁྱོ༌ཞ༌གུན༌ལ༌ ཡོན༌ཏན༌ དང༌ ཀྲང༌པོ༌ ཚང༌མ༌ ཡོད༌ཏེ༌ ཨིན༌ སམ༌མ༌ནོག༌།
ROM 2:21 ཏེ༌ནེ༌ ཞན༌མའ༌ ལབ༌ཁན༌, ཁྱོ༌ཞ༌གུན༌ནི༌, ཁྱོ༌ཞ༌རང༌ངི༌ ལབ༌ཞ༌གུན༌ ཅིའ༌ ཉན༌ན༌མེད༌? ཞན༌མ༌གུན༌ལ༌ རྐུ༌མ༌རྐུ༌ ཟེར༌ཏེ༌ ལབ༌དུག༌, ཅི༌ ཁྱོ༌ཞ༌རང༌གུན༌ནི༌ རྐུའ༌ད༌?
ROM 2:22 ཁྱོ༌ཞའེ༌ ཟེར༌ར༌ནོག༌, མི༌གུན༌ནི༌ རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ བོར༌ མ༌གོས༌, ཅི༌ ཁྱོ༌ཞ༌གུན༌ནི༌ ཞན༌མ༌ ཉམ༌པོ༌ ལུས༌བྲེལ༌ བོར༌ར༌ད༌? ཁྱོ༌ཞ༌གུན༌ནི༌ སྐུན༌དྲ༌ ཅོལ༌ཅེས༌ལ༌ ནཕ༌རད༌ ཅོའ༌ནོག༌, ཅི༌ ཁྱོ༌ཞའེ༌ ཏེ༌ སྐུན༌དྲའ༌ བོར༌སའེ༌ ཆོད༌ཁང༌གུན༌ནེ༌ རྐུའ༌ད༌?
ROM 2:23 ཁྲིམས༌ ཤེས༌སད༌ ཟེར༌ཏེ༌ མངས༌ཏེའང༌ ཕོ༌སོ༌ ཅོ༌ཁན༌ ཁྱོ༌ཞ༌གུན༌ནི༌ ཁྲིམས༌པོ༌ ཅག༌ཅེས༌ གྱུད༌ཏེ༌ དཀོན༌མཆོག༌ག༌ རྩི༌ཝ༌ མ༌ཅོའ༌ ཨིན༌ནོག༌།
ROM 2:24 ཏམ༌པའེ༌ སུང༌རབས༌སི༌ ནང༌ང༌, “ཁྱོ༌ཞའེ༌ ཞས༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ དཀོན༌མཆོག༌ག༌ དད༌ལོག༌ ཞུས༌ཏེ༌ ཨིན༌ནོག༌” མོལ༌ཏེ༌ ཡོད༌ཁན༌བོའ༌ ངའ༌ ཧ༌ལས༌ས༌ མེ༌རག༌།
ROM 2:25 ཡ༌ཧུ༌དཱ༌པའེ༌ ལུག༌སྲོལ༌ ནང༌ཞིན༌ སུན༌ནད༌ ཅོ༌ཅེས༌པོའེ༌ ཕན༌ཐོགས༌ མེད༌ཏེ༌ ཨིན༌ནོག༌ ནམ༌ཚོག༌པ༌ དཀོན༌མཆོག༌གི༌ ཁྲིམས༌གུན༌ ཁའ༌ མི༌ཉན༌། ཨིན༌ནའང༌ ཀལ༌ཏེས༌ ཁྱོ༌ཞའེ༌ ཁྲིམས༌པོ༌ ཅག༌གད༌ན༌, ཁྱོ༌ཞའ༌ དང༌ སུན༌ནད༌ མ༌ཅོ༌ཁན༌ནི༌ ཡ༌ཧུ༌དཱ༌པ༌ མན༌ཁན༌ གུན༌ནི༌ པར༌ལ༌ ཅའང༌ ཁྱད༌ མེད༌ཏེ༌ ཨིན༌ནོག༌།
ROM 2:26 ཡང༌ ཀལ༌ཏེས༌ སུན༌ནད༌ མ༌ཅོ༌ཁན༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཁྲིམས༌པོ༌ ཁའ༌ཉན༌ནད༌ན༌, ཅི༌ དཀོན༌མཆོག༌གི༌ ཁོང༌གུན༌ ཁོང༌རང༌ངི༌ མི༌ ཨིན༌ མི༌མོལ༌ལ༌?
ROM 2:27 ཏན༌ཏན༌ལ༌, སུན༌ནད༌ མ༌ཅོ༌ཁན༌ ཡ༌ཧུ༌དཱ༌པ༌ མན༌ཁན༌གུན༌ནི༌, ཁྲིམས༌ལ༌ ཁའ༌ཉན༌ཅེས༌པོའེ༌, ཁྱོ༌ཞ༌གུན༌ལ༌ སྐྱོན༌རྗོད༌ ཅོས༌ཏེ༌ ཨིན༌ནོག༌, ཀ༌གུན༌ལ༌ ཁྲིམས༌ ཐོབ༌, ཨིན༌ནའང༌ ཁའ༌ མ༌ཉནས༌།
ROM 2:28 ཁྱོ༌ཞའ༌ ཟུགས༌སི༌ ཐོག༌ནེ༌ ཡ༌ཧུ༌དཱ༌པའེ༌ ཕ༌མ༌ནེ༌ སྐྱེས༌ཏེ༌ ཨིན༌ཅེས༌, ཡ༌ ཁྱོ༌ཞ༌གུན༌ལ༌ ཡ༌ཧུ༌དཱ༌པའེ༌ ལུག༌སྲོལ༌ ནང༌ཞིན༌ སུན༌ནད༌ ཅོ༌ཅེས༌པོའེ༌, ཁྱོ༌ཞ༌གུན༌ དེན༌བའེ༌ ཡ༌ཧུ༌དཱ༌པ༌ རིག༌ གྱུར༌ར༌ མ༌ནོག༌།
ROM 2:29 ཨིན༌ནའང༌ དཀོན༌མཆོག༌ ཉམ༌པོ༌ ཀྲང༌པོ༌ བྲེལ༌ ཡོད༌ཁན༌བོ༌ ནི༌, དེན༌བའེ༌ ཡ༌ཧུ༌དཱ༌པ༌ཞིག༌ ཨིན༌ནོག༌། ཡང༌ དེན༌བའེ༌ སུན༌ནད༌ ཅོ༌ཅེས༌ ནི༌, ཁྲིམས༌ལ༌ ཁའ༌ཉན༌ཅེས༌པོ༌ མན༌པ༌, རང༌ངི༌ སྙིང༌ངི༌ ནང༌ང༌ གྱུར༌ཇ༌ ཁྱོང༌ཅེས༌པོ༌ ཨིན༌ནོག༌། ཡང༌ གྱུར༌ཇ༌ ཡོང༌ཁན༌ནི༌ མི༌ཞིག༌གི༌, མི༌གུན༌ནེ༌ མན༌པ༌, དཀོན༌མཆོག༌གི༌ སྟོད༌པ༌ ཙལ༌ལ༌ནོག༌།
ROM 3:1 ཅི༌ ཏེ༌ནེ༌ ཡ༌ཧུ༌དཱ༌པ༌ཞིག༌ ཨིན༌ཅེས༌པོའེ༌ ཕན༌ཐོགས༌ ཡོད༌ཏེ༌ ཨིན༌ནོག༌ག༌ ཡ༌ སུན༌ནད༌ ཅོ༌ཅེས༌པོའ༌ ཅི༌ རིན༌ ཡོད༌ཏེ༌ ཨིན༌ནོག༌?
ROM 3:2 འོ༌ན༌, ཕན༌ཐོགས༌ མང༌པོ༌ ཡོད༌ཏེ༌ ཨིན༌ནོག༌། ཏང༌པོ༌རང༌ དཀོན༌མཆོག༌གི༌ ཁོང༌རང༌ངི༌ བཀའ༌གུན༌ ཡ༌ཧུ༌དཱ༌པ༌གུན༌ལ༌ སྟད༌ད༌ ཛདས༌།
ROM 3:3 ཀལ༌ཏེས༌ ཁོང༌གུན༌ནི༌ ཕྲོ༌ནེ༌ ཁ༌ཅིག༌ག༌ ཏད༌པ༌ མེད༌ན༌ ཅི༌ ཁོང༌གུན༌ལ༌ ཏད༌པ༌ མེད༌ཅེས༌པོའེ༌, དཀོན༌མཆོག༌གའང༌ ཨིད༌ཤེས༌ མེད༌ཁན༌ གྱུར༌ར༌ནོག༌ག༌?
ROM 3:4 མ༌ནེ༌ གྱུར༌ར༌ མ༌ནོག༌། ཚང༌མ༌ ཟུན༌ཇན༌ ཨིན༌ནའང༌, དཀོན༌མཆོག༌ ཁོང༌རང༌ངི༌ ཞལ༌ཆད༌གུན༌ནི༌ཀ༌ ཀྲང༌པོ༌ ཞུགས༌ས༌ནོག༌, ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ ཨིན༌ནོག༌, “ཉེ༌རང༌ངི༌ མོལ༌ཁན༌ ཚང༌མ༌ ཀྲང༌པོ༌ ཨིན༌ཁན༌ སྟན༌ཨིན༌, ཡང༌ ཉེ༌རང༌ང༌ ཁྲིམས༌ཁུང༌ངི༌ ནང༌ང༌ གྱལ༌ ཐོབ༌ཨིན༌།”
ROM 3:5 ཨིན༌ནའང༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, “ང༌དང༌ངི༌ སྡིག༌པའེ༌ ལས༌གུན༌ནི༌ དཀོན༌མཆོག༌ ཀྲང༌པོ༌ ཨིན༌ཁན༌བོ༌ མང༌ང༌ སལ༌པོ༌ ཅོས༌ཏེ༌ སྟན༌ནད༌ན༌, ཏེ༌ནེ༌ ཁོང༌ངི༌ ང༌དང༌གུན༌ལ༌ ཆད༌པ༌ སལ༌ཅེས༌པོ༌ མི༌འོས༌པ༌ཞིག༌ མ༌ནོག༌ག༌?” ༼ཏེ༌གུན༌, མི༌ཞིག༌གི༌ སམ༌ཚུལ༌ ནང༌ཞིན༌ ཟེར༌ཏེ༌ ཨིན༌ནོག༌༽
ROM 3:6 ཏན༌ཏན༌ མ༌ནོག༌། ཀལ༌ཏེས༌ མི༌འོས༌པ༌ ཨིན༌པིན༌ན༌, ཏེ༌ནེ༌ དཀོན༌མཆོག༌གི༌ ཇིག༌རྟེན༌པ༌གུན༌ལ༌ ཁྲིམས༌ཅད༌ ཀ༌ཟུག༌གི༌ ཛད༌ཨིན༌?
ROM 3:7 ཁ༌ཅིག༌གི༌ ཟེར༌གྱུ༌ ཏངས༌ཏེ༌ ཟེར༌སྲིད༌ཅེས༌ ཨིན༌ནོག༌, “ཀལ༌ཏེས༌ ངའེ༌ ངན༌པ༌ ཅོ༌ཅེས༌པོའེ༌, དཀོན༌མཆོག༌ ཀྲང༌པོ༌ ཨིན༌ཁན༌བོ༌ མང༌ང༌ སལ༌པོ༌ ཐོང༌ཏེ༌, ཁོང༌ང༌ སྤལ༌ ཐོབ༌བད༌ན༌, ཏེ༌ནེ༌ ཅིའ༌ དཀོན༌མཆོག༌གི༌ ངའ༌ སྡིག༌ཅན༌ ཨིན༌ཁན༌བོའེ༌ ཕིའ༌ ཤི༌ཅེས༌སི༌ ཁྲིམས༌ཅད༌ ཛད༌ད༌ནོག༌?”
ROM 3:8 ཡང༌ ཁ༌ཅིག༌གི༌, “ཟང༌པོ༌ མང༌ང༌ ཇུང༌ཅེས༌སི༌ ཕིའ༌ ངན༌པ༌ རིག༌ ཅོ༌ཤིག༌” ཟེར༌དུག༌ ཟེར༌ཏེ༌ ང༌ཞའེ༌ གྱབ༌གལ༌ལ༌ ཟུན༌ ཏང༌ང༌ནོག༌། ཏེ༌ཟུག༌ ཟེར༌ཁན༌གུན༌ལ༌ དཀོན༌མཆོག༌གི༌ ཆོགས༌ནེ༌ ཤི༌ཅེས༌སི༌ ཆད༌པ༌ ཐོབ༌ཅེས༌པོ༌ འོས༌པ༌ ཨིན༌ནོག༌།
ROM 3:9 ཏེ༌ནེ༌ དོར༌ལྡུས༌ཏེ༌ ཅི༌ ང༌དང༌ ཡ༌ཧུ༌དཱ༌པ༌གུན༌ ཞན༌མ༌གུན༌ནི༌ སང༌ གྱལ༌ལ༌ ཨིན༌ ཟེར༌ ཐུབ༌ཨིན༌ན༌? མན༌, མ༌ནེ༌ ཟེར༌ མི༌ཐུབ༌། ཅིའ༌ཟེར༌ན༌ ང༌ཞའེ༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ ཚང༌མའ༌, སྡིག༌པའེ༌ ཝང༌ངི༌ ཡོག༌ག༌ ཡོད༌ཁན༌བོ༌ སྟན༌ཚར༌ཏེ༌ ཨིན༌།
ROM 3:10 ཀ༌ཟུག༌གི༌ ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛདས༌, “སུ༌ཞིག༌གའང༌ ཀྲང༌པོ༌ མ༌ནོག༌, ཅིག༌ཅིག༌གའང༌།
ROM 3:11 སུ༌ཞིག༌གིའང༌ ཧ༌གོ༌ཅེས༌སི༌ རྩོན༌གྲུས༌ མ༌ཅོའ༌ ཨིན༌ནོག༌, སུ༌ཞིག༌གིའང༌ དཀོན༌མཆོག༌ ཀྲང༌པོ༌ ཤེས༌ཉིན༌ མེད༌ཏེ༌ ཨིན༌ནོག༌།
ROM 3:12 ཚང༌མའེ༌ དཀོན༌མཆོག༌ག༌ གྱབ༌གྱུར༌ཅེས༌པོའེ༌ ཚང༌མ༌ རིན༌མེད༌ གྱུར༌ཏེ༌ ཨིན༌ནོག༌། སུ༌ཞིག༌གིའང༌ ཟང༌པོ༌ ཅོའ༌ མ༌ནོག༌, ཅིག༌ཅིག༌གིའང༌།”
ROM 3:13 “ཁོང༌གུན༌ནི༌ སྤེ༌ར༌གུན༌, བེ༌ཏེ༌ ཡོད༌ཁན༌ནི༌ རོམ༌ཁང༌ངི༌ ནང༌ནེ༌ ཡོང༌ཁན༌ནི༌ ཏྲི༌ངན༌ ཙོགས༌ ཨིན༌ནོག༌། ཁོང༌གུན༌ནི༌ ལྕེ༌གུན༌ ཟུན༌ནི༌ གངས༌ཏེ༌ ཡོད༌ཏེ༌ ཨིན༌ནོག༌།” “ཏུག༌རུལ༌ལི༌ ཁལ༌པག༌ནེ༌ ཏུག༌ བུད༌ད༌ནོག༌།”
ROM 3:14 “ཁོང༌གུན༌ནི༌ ཁའ༌, ངན༌ ཏབ༌ཅེས༌ དང༌ ཕོག༌ཅེས༌སི༌ སྤེ༌རའེ༌ གངས༌ཏེ༌ ཨིན༌ནོག༌།”
ROM 3:15 “ཁོང༌གུན༌ མི༌སད༌ཅེས༌ལ༌ རིངས༌ས༌ནོག༌།
ROM 3:16 ཁྲེས༌ཏོར༌ ཅོ༌ཅེས༌ དང༌ རྡུག༌པོ༌ ཏང༌ཅེས༌ གུན༌ ཁོང༌གུན༌ནི༌ སྟིང༌རང༌ནེ༌ གྲུལ༌ལ༌ནོག༌།
ROM 3:17 ཁོང༌གུན༌ལ༌ ཞི༌དེ༌ ལམ༌བོ༌ ཤེས༌ས༌ མ༌ནོག༌།”
ROM 3:18 “དཀོན༌མཆོག༌གི༌ ཇིགས༌ ཁོང༌གུན༌ནི༌ ནང༌ང༌ མ༌ནེ༌ མེད༌ཏེ༌ ཨིན༌ནོག༌།”
ROM 3:19 ཏན༌ཏན༌ལ༌ ཁྲིམས༌པོ༌, ཁྲིམས༌ ཐོབ༌ཁན༌ནི༌ མི༌གུན༌ནི༌ ཕིའ༌ ཨིན༌ནོག༌། ཁྲིམས༌ སལ༌ཅེས༌སི༌ གྱུན༌ཚན༌བོ༌ ནི༌ མི༌གུན༌ལ༌ སྐྱོན༌ ཅོ༌ཅེས༌ནེ༌ སྒག༌ཅེས༌, ཡང༌ ཇིག༌རྟེན༌ གང༌མ༌ དཀོན༌མཆོག༌གི༌ སྐུན༌དུན༌ལ༌ ནོངས༌ཅན༌ ཨིན༌ཁན༌བོ༌ སྟན༌ཅེས༌པོ༌ ཨིན༌ནོག༌།
ROM 3:20 ཅིའ༌ཟེར༌ན༌ སུ༌ཞིག༌གའང༌ ཁྲིམས༌སི༌ བཀའ༌ ནང༌ཞིན༌ ཅོ༌ཅེས༌ ཅིག༌པོ༌ནེ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ར༌ མ༌ནོག༌། ཁྲིམས༌སི༌ ང༌དང༌གུན༌ ཙམ༌ཤིག༌ སྡིག༌ཅན༌ ཨིན༌ཁན༌བོ༌ སལ༌པོ༌ ཅོས༌ཏེ༌ སྟན༌ན༌ནོག༌།
ROM 3:21 ཨིན༌ནའང༌ ཏ༌ དཀོན༌མཆོག༌གི༌ ང༌དང༌གུན༌ལ༌ ཁོང༌ངི༌ སྐུན༌དུན༌ལ༌ ཁྲིམས༌ གྱུད༌ཏེ༌ མན༌པ༌, ཀྲང༌པོ༌ གྱུར༌ཅེས༌སི༌ ཞན༌ལམ༌བོ༌ སྟན༌ན༌ ཛདས༌, ཀ༌ཟུག༌ མོ༌ཟེས༌ དང༌ ལུང༌སྟོན༌པ༌གུན༌ནི༌ སྤེ༌ཆ༌གུན༌ནི༌ ནང༌ང༌ ཞལ༌ཆད༌ ཛད༌ཏེ༌ ཨིན༌ནོག༌།
ROM 3:22 ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ གྱུད༌ཏེ༌, ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའ༌ཛད༌ཏེ༌ ཨིན༌ནོག༌། ཡང༌ ང༌དང༌ སུ༌རིག༌ ཨིན༌ནའང༌ ཅའང༌ ཁྱད༌ མེད༌པ༌ ཨིན༌ནོག༌།
ROM 3:23 མི༌ཚང༌མའེ༌ སྡིག༌པ༌ ཅོས༌ཏེ༌ ཨིན༌ནོག༌, ཡང༌ དཀོན༌མཆོག༌གི༌ ང༌དང༌ངི༌ ཕིའ༌ ཟིར༌རྗིད༌དི༌ ཐུགས༌དོད༌ ཡོད༌ཁན༌ནི༌ ཚད༌ ཚོག༌པ༌ ང༌དང༌ ལེབ༌ མ༌ཐུབ༌བ༌ ཨིན༌ནོག༌།
ROM 3:24 ཨིན༌ནའང༌ དཀོན༌མཆོག༌གི༌, ང༌དང༌གུན༌ལ༌ འོས༌པ༌ མན༌ཁན༌ནི༌ ཐུག༌རྗེ༌ གྱུད༌ཏེ༌ ཀྲང༌པོ༌ ཐེའ༌ ཛདས༌། ཁོང༌ངི༌ ཏེ༌བོ༌ ཅོའ༌ ཛདས༌, ནམ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ང༌དང༌གུན༌ ང༌དང༌ངི༌ སྡིག༌པའེ༌ ཚེ༌ཡོག༌ནེ༌ ཐར༌ ཅུག༌ག༌ ཛདས༌།
ROM 3:25 དཀོན༌མཆོག༌གི༌ ཡེ༌ཤུ༌ སྡིག༌པའེ༌ ཏོན༌ལ༌ ཆོད༌པའེ༌ ཚུལ༌ལ༌ ཕུལ༌ལ༌ ཛདས༌། ཡེ༌ཤུའི༌ སྐུ༌སྲོག༌ ཆོད༌པ༌ ཕུལ༌ཏེ༌ ཁྲག༌ཕོའ༌ ཛད༌ཁན༌བོའེ༌ཀ༌ ཨིད༌ཤེས༌ ཅོ༌ཁན༌ནི༌ མི༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའ༌ ཛད༌ད༌ནོག༌། འི༌ ཆོད༌པ༌བོའེ༌ དཀོན༌མཆོག༌ འོས༌པ༌ ཛད༌ཁན༌བོ༌ སྟན༌ན༌ནོག༌, ནམ༌ ཁོང༌ངི༌ སྔུན༌ལ༌ སྡིག༌པ༌ ཅོ༌ཁན༌གུན༌ལ༌ ཆད༌པ༌ མ༌སལ༌ལ༌ སྲན༌ཏེ༌ ཞུགས༌།
ROM 3:26 ཟོད༌པ༌ སྲན༌ཏྲེ༌ ཞས༌ཏེ༌ དཀོན༌མཆོག༌གི༌ ཏེ༌བོ༌ ཅོའ༌ ཛདས༌, ཨིན༌ནའང༌ ཏ༌ དག༌ས༌ ཁོང༌ངི༌ ང༌དང༌གུན༌ནི༌ སྡིག༌པའེ༌ ཏོན༌ལ༌ ཡེ༌ཤུ༌ སྲོག༌ཆོད༌ལ༌ ཕུལ༌ལ༌ ཛདས༌། ཏེ༌ཟུག༌ ཅོའ༌ ཛད༌ཅེས༌པོའེ༌, དཀོན༌མཆོག༌གི༌ ཁོང༌རང༌ ཀྲང༌པོ༌ ཨིན༌ཁན༌ དང༌ ཡེ༌ཤུའི༌ ནང༌ང༌ ཏད༌པ༌ ཅོ༌ཁན༌གུན༌ ཀྲང༌པོ༌ ཅོའ༌ ཛད༌ཁན༌བོ༌ སྟན༌ན༌ ཛདས༌།
ROM 3:27 ཏེ༌ནེ༌ ཅི༌ གྱུན༌ཚན༌བོའེ༌ ཕིའ༌, ང༌དང༌ངི༌ ཕོ༌སོ༌ ཅོ༌ཨིན༌? ཅའང༌ངི༌ ཕིའང༌ ཅོ༌ མི༌ཉན༌, ཅིའ༌ཟེར༌ན༌ ང༌དང༌ སྡིག༌པ༌ མེད༌ཁན༌ ཐེའ༌ ཛད༌ཅེས༌པོ༌ ནི༌ ཁྲིམས༌ལ༌ ཁའ༌ཉན༌ཅེས༌ མན༌པ༌, ཏད༌པ༌ ཅོ༌ཅེས༌པོའེ༌ཀ༌ རག༌ལས༌ཏེ༌ ཨིན༌ནོག༌།
ROM 3:28 སོང༌པ༌སང༌ ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཁྲིམས༌ ཁའ༌ཉན༌ཅེས༌པོའེ༌ ཀྲང༌པོ༌ ཐེའ༌ མ༌ཛད༌ད༌, ཏད༌པ༌ ཅོ༌ཅེས༌པོའེ༌ ཀྲང༌པོ༌ ཐེའ༌ ཛདས༌།
ROM 3:29 ཅི༌, དཀོན༌མཆོག༌ ཡ༌ཧུ༌དཱ༌པ༌ ཅིག༌པོའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌ག༌? ཁོང༌ ཡ༌ཧུ༌དཱ༌པ༌ མན༌ཁན༌གུན༌ནིའང༌ དཀོན༌མཆོག༌ ཞུགས༌ཏེ༌ མ༌ནོག༌ག༌? འོ༌ན༌, ཁོང༌ ཨིན༌ནོག༌།
ROM 3:30 དཀོན༌མཆོག༌ ཅིག༌ ཞུགས༌ཏེ༌ ཨིན༌ནོག༌, ཡང༌ ཁོང༌ངི༌ མི༌གུན༌ ཏད༌པ༌ ཅིག༌པོ༌ གྱུད༌ཏེ༌ ཁོང༌རང༌ངི༌ སྐུན༌དུན༌ལ༌ ཀྲང༌པོ༌ ཐེའ༌ ཛད༌ད༌ནོག༌, ཡ༌ཧུ༌དཱ༌པ༌ ཨིན༌གྲོ༌ ཡ༌ ཡ༌ཧུ༌དཱ༌པ༌ མན༌གྲོ༌།
ROM 3:31 ཅི༌ ཏེ༌ནེ༌ ང༌དང༌གུན༌ནི༌ ཏད༌པ༌བོ༌ ཁག༌ཅན༌ རྩིས༌པ༌, ཁྲིམས༌པོ༌ རྗེད༌ནའང༌ གྲིག༌ཏེ༌ ཨིན༌ནོག༌ག༌? མ༌ནེ༌ མ༌ནོག༌། ངོས༌པོའ༌ ཏད༌པ༌ ཡོད༌ པ༌སང༌, ང༌དང༌ངི༌ རང༌ཞིན༌ལ༌, ཁྲིམས༌པོ༌ དྲན༌དྲའ༌ གྲུབ༌ ཅུག༌ག༌ནོག༌།
ROM 4:1 དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ སྐོར༌ལ༌ ང༌དང༌གུན༌ནི༌ ཕ༌མེས༌པོ༌, ཨབ༌ར༌ཧམ༌མི༌ ལོབས༌ཁན༌བོའ༌ ང༌ཏི༌ ཅི༌ ཟེར༌གོས༌?
ROM 4:2 ཀལ༌ཏེས༌ ཁོའེ༌ ལས༌ ཟང༌པོ༌གུན༌ནི༌ ཁོ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའད༌ན༌, ཏེ༌ནེ༌ ཁོའ༌ ཕོ༌སོ༌ ཅོ༌ཅེས༌སི༌ ཏོན༌ཞིག༌ ཡོད༌གྲོ༌། ཨིན༌ནའང༌ དཀོན༌མཆོག༌གི༌ ཐབས༌པོ༌ ཏེ༌ཟུག༌ མ༌ནོག༌།
ROM 4:3 ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ མོལ༌དུག༌, “ཨབ༌ར༌ཧམ༌མི༌ དཀོན༌མཆོག༌གི༌ ཞལ༌ཆད༌ ཛད༌ཁན༌བོའེ༌ཀ༌ ཏད༌པ༌ ཅོས༌པ༌, ཁོའ༌ དཀོན༌མཆོག༌གི༌ མི༌ ཀྲང༌པོ༌ཞིག༌ ཐེའ༌ ཛདས༌།”
ROM 4:4 ལས༌ ཅོ༌ཁན༌ནི༌ མི༌ཞིག༌ག༌ ཐོབ༌ཁན༌ནི༌ ལ༌ཆ༌བོ༌ སྐྱེས༌ཤིག༌ མན༌པ༌, ཁོའེ༌ ལས༌ ཅོ༌ཁན༌ནི༌ ཐོབ༌ཏང༌བོ༌ ཨིན༌ནོག༌།
ROM 4:5 ཨིན༌ནའང༌ མི༌གུན༌ ཁོ༌རང༌གུན༌ནི༌ ལས༌སི༌ ཞས༌ཏེ༌ མན༌པ༌, ཁོང༌གུན༌ལ༌ ཀྲང༌པོ༌ ཅོའ༌ ཛད༌ཁན༌ དཀོན༌མཆོག༌གི༌ ནང༌ང༌ ཏད༌པ༌ ཅོ༌ཅེས༌པོའེ༌ ཀྲང༌པོ༌ ཐེའ༌ ཛད༌ད༌ནོག༌།
ROM 4:6 ཏེན༌ན༌ ཙོགས༌ལ༌ གྱལ༌པོ༌ དཱ༌བིད༌དིའང༌, ལས༌ མ༌ཅོའ༌, དཀོན༌མཆོག༌གི༌, ཀྲང༌པོ༌ ཐེའ༌ ཛད༌ཁན༌ ཅིན༌ལབས༌ཅན༌གུན༌ནི༌ སྐོར༌ལ༌ མོལས༌,
ROM 4:7 “ཁའ༌ མི༌ཉན༌ཅེས༌ལ༌ ཤགས༌པ༌ ཐོབ༌ཁན༌གུན༌ དང༌ སྡིག༌པ༌ ཀབ༌བ༌ ཛད༌ཁན༌གུན༌, ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།
ROM 4:8 གཙོ༌བོའེ༌, སྡིག༌པ༌གུན༌ རྩིའ༌ མ༌ཛད༌ཁན༌ནི༌ མི༌བོ༌ ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།”
ROM 4:9 ཏ༌ ཅི༌, འི༌ ཅིན༌ལབས༌པོ༌ ཡ༌ཧུ༌དཱ༌པ༌ ཅིག༌པོའེ༌ ཕིའ༌ ཨིན༌ནོག༌ག༌ ཡ༌ སུན༌ནད༌ མ༌ཅོ༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌? ང༌ཞའེ༌ ཟེར༌རད༌, ཁོའེ༌ ཏད༌པའེ༌ ཞས༌ཏེ༌ ཨབ༌ར༌ཧམ༌མ༌ དཀོན༌མཆོག༌གི༌ ཀྲང༌པོ༌ ཐེའ༌ ཛདས༌།
ROM 4:10 ཨིན༌ནའང༌ ཏེ༌བོ༌ ནམ༌ ཇུང༌? ཁོ༌ ཀྲང༌པོ༌ ཐེའ༌ ཛད༌ཅེས༌པོ༌, ཁོའ༌ སུན༌ནད༌ མ༌ཅོའེ༌ སྔུན༌ལ༌ ཇུངས༌ས༌ ཡ༌ སུན༌ནད༌ ཅོས༌ཏེ༌ སྟིང༌ནེ༌ ཇུང༌? ཏེ༌བོ༌ ཁོའ༌ སུན༌ནད༌ ཅོས༌ཏེ༌ སྟིང༌ནེ༌ མན༌པ༌, སྔུན༌ལ༌ ཇུང༌།
ROM 4:11 སུན༌ནད༌ ཅོའེ༌ སང༌ སྔུན༌ལ༌, ཨབ༌ར༌ཧམ༌མ༌ ཏད༌པ༌ ཡོད༌ཅེས༌ ཡང༌ དཀོན༌མཆོག༌གི༌ ཁོའ༌ ཀྲང༌པོ༌ ཨིན༌ཁན༌, ཁོང༌རང༌ངི༌ ཞལ༌ནེ༌ མོལ༌ལ༌ ཛད༌ཅེས༌པོ༌, སུན༌ནད༌ ཅོ༌ཁན༌ནི༌ སྟགས༌པོ༌ ཨིན༌པིན༌། ཏེན༌ན༌བོའེ༌ཕིའ༌ ཨབ༌ར༌ཧམ༌ ནི༌ སུན༌ནད༌ མ༌ཅོའ༌ ཏད༌པ༌ ཅོ༌ཁན༌གུན༌ནི༌ ཨ༌བ༌ ཙོགས༌ ཨིན༌ནོག༌ ཡང༌ ཏེ༌གུན༌ ཁོང༌རང༌གུན༌ནི༌ ཏད༌པའེ༌ ཞས༌ཏེ༌ ཀྲང༌པོ༌ ཐེའ༌ ཛད༌ད༌ནོག༌།
ROM 4:12 ཨབ༌ར༌ཧམ༌ སུན༌ནད༌ ཅོ༌ཁན༌གུན༌ནིའང༌ ཨ༌བ༌ ཙོགས༌ ཨིན༌ནོག༌, ཨིན༌ནའང༌ སུན༌ནད༌ ཅོའེ༌ སང༌ སྔུན༌ལ༌ ཨབ༌ར༌ཧམ༌མ༌ ཡོད༌ཁན༌ནི༌ ཏད༌པ༌ ཙོགས༌ ཁོང༌གུན༌ལའང༌ ཡོང༌གོས༌།
ROM 4:13 དཀོན༌མཆོག༌གི༌ ཨབ༌ར༌ཧམ༌ དང༌ ཁོའེ༌ པུར༌གྱུད༌གུན༌ལ༌ ཇིག༌རྟེན༌ གང༌པོ༌ སལ༌ཅེས༌ལ༌ ཞལ༌ཆད༌ ཛདས༌། ཨིན༌ནའང༌ ཏེ༌བོ༌ ཨབ༌ར༌ཧམ༌མ༌ ཁྲིམས༌ ཁའ༌ཉན༌ཅེས༌པོའེ༌ ཞས༌ཏེ༌ མན༌པ༌, ཏད༌པ༌ གྱུད༌ཏེ༌ དཀོན༌མཆོག༌ ཉམ༌པོ༌ ཀྲང༌པོ༌ བྲེལ༌ ཡོད༌ཅེས༌པོའེ༌ ཐོབ༌ཏེ༌ ཨིན༌ནོག༌།
ROM 4:14 ཀལ༌ཏེས༌ དཀོན༌མཆོག༌གི༌ ཞལ༌ཆད༌པོ༌ ཁྲིམས༌ ཁའ༌ཉན༌ཁན༌ ཅིག༌པོའེ༌ ཕིའ༌ ཨིན༌པིན༌ན༌, ཏེ༌ནེ༌ ཏད༌པའེ༌ སྒོས༌དོམ༌ མེད༌གྲོ༌ ཡང༌ དཀོན༌མཆོག༌གི༌ ཞལ༌ཆད༌པོ༌ ཏོན༌མེད༌ ཨིན༌གྲོ༌།
ROM 4:15 དཀོན༌མཆོག༌གི༌ ཐུགས༌སྲོ༌, ཁྲིམས༌ ཅག༌ཅེས༌པོའེ༌ ཞས༌ཏེ༌ བབས༌ས༌ནོག༌། ཨིན༌ནའང༌ ཀལ༌ཏེས༌ ཁྲིམས༌ མེད༌ན༌ ཏེ༌བོ༌ ཀ༌ཟུག༌གི༌ ཅག༌ཨིན༌?
ROM 4:16 ཏེན༌ན༌བོའེ༌ཕིའ༌ ཞལ༌ཆད༌པོ༌ ཏད༌པ༌ གྱུད༌ཏེ༌ ཐོབ༌བ༌ནོག༌། འི༌བོ༌ རིན༌ མ༌ཏང༌ཁན༌ནི༌ སྐྱེས༌ཤིག༌ ཨིན༌ནོག༌། ཡང༌ ཁྲིམས༌པོ༌ ཁའ༌ཉན༌ནད༌གྲོ༌ ཡ༌ མེད༌གྲོ༌, ཀལ༌ཏེས༌ ང༌དང༌ང༌ ཨབ༌ར༌ཧམ༌ ཙོགས༌ལ༌ ཏད༌པ༌ ཡོད༌ན༌, ང༌དང༌ ཚང༌མ༌ལ༌ ཏེ༌ སྐྱེས༌པོ༌ ཐོབ༌ཅེས༌ ཏན༌ཏན༌ ཨིན༌ནོག༌, ཅིའ༌ཟེར༌ན༌ ཨབ༌ར༌ཧམ༌ ནི༌ ཏད༌པ༌ ཅོ༌ཁན༌ ཚང༌མའེ༌ ཨ༌བ༌ ཨིན༌ནོག༌།
ROM 4:17 ཏེན༌ན༌བོའེ༌ཕིའ༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ ཨབ༌ར༌ཧམ༌མ༌ མོལས༌, “ངའེ༌ ཁྱོ༌རང༌ང༌ མིར༌གྱུད༌ མང༌པོའེ༌ ཨ༌བ༌ ཅོའད༌། ” འི༌བོ༌ ཇུང༌ ཅིའ༌ཟེར༌ན༌ ཨབ༌ར༌ཧམ༌མི༌ ཤི༌ཁན༌གུན༌ སོན༌པོའ༌ ལང༌ང༌ ཛད༌ཁན༌ ཡང༌ ཅའང༌ མེད༌ཁན༌ནི༌ ནང༌ནེ༌ སོ༌མ༌ ཇུང༌ ཅུག༌ག༌ ཛད༌ཁན༌ནི༌ དཀོན༌མཆོག༌གི༌ ནང༌ང༌ ཏད༌པ༌ ཅོས༌།
ROM 4:18 རེ༌ཝ༌ བོར༌ཅེས༌སི༌ གྱུན༌ཚན༌ མེད༌ ཟ༌ནེའང༌, ཨབ༌ར༌ཧམ༌མི༌ རེ༌ཝ༌ ཅོ༌ཨིན༌ དུགས༌ པ༌སང༌, ཁོ༌ མིར༌གྱུད༌ མང༌པོའེ༌ ཨ༌བ༌ གྱུར༌, ཀ༌ཟུག༌ དཀོན༌མཆོག༌གི༌ ཁོའ༌ མོལས༌, “ཁྱོ༌རང༌ང༌ པུར༌གྱུད༌ མ༌ མང༌པོ༌ཞིག༌ ཡོང༌ཨིན༌།”
ROM 4:19 ཡང༌ ཨབ༌ར༌ཧམ༌མི༌ ལོ༌ ཧ༌ལམ༌ གྱ༌ ཟམ༌ཤིག༌ སོན༌ཏེ༌ ཁོའེ༌ ཟུགས༌པོ༌ སྒས༌ཏེ༌ ཤི༌ཅེས༌ ཙོགས༌ ཡང༌, ཁོའེ༌ ན༌མ༌ སཱ༌ར༌ ཕྲུ༌གུ༌ ཇོར༌ཅེས༌སི༌ ཁྱུད༌ནེ༌ ཐལ༌ནའང༌, ཨབ༌ར༌ཧམ༌མི༌ ཏད༌པ༌ ཡོལ༌ མ༌ཡོལ༌ལ༌ སྟན༌པོ༌ ལུས༌།
ROM 4:20 ཨབ༌ར༌ཧམ༌མི༌ དཀོན༌མཆོག༌གི༌ ཞལ༌ཆད༌པོའེ༌ཀ༌ ཐེ༌ཚོམས༌ མ༌ནེ༌ མ༌ཅོས༌, མ༌ཚད༌ ཁོའེ༌ ཏད༌པ༌བོ༌ མང༌ང༌ ཤེད༌ཅན༌ གྱུར༌ཏེ༌ ཁོའེ༌ དཀོན༌མཆོག༌ག༌ སྤལ༌ ཁྱོངས༌།
ROM 4:21 དཀོན༌མཆོག༌ག༌ ཞལ༌ཆད༌ ཛད༌ཁན༌བོ༌ དྲན༌དྲ༌ གྲུབ༌ཅུག༌ཉན༌ན༌ ཛད༌ཅེས༌པོའེ༌ཀ༌ ཁོའ༌ ཏན༌ཏན༌ ལོ༌ཁྱེལ༌ ཡོད༌པིན༌།
ROM 4:22 ཡང༌ “ཨབ༌ར༌ཧམ༌མི༌ ཏད༌པའེ༌ ཞས༌ཏེ༌ དཀོན༌མཆོག༌གི༌ ཁོའ༌ ཀྲང༌པོ༌ ཐེའ༌ ཛདས༌།”
ROM 4:23 དཀོན༌མཆོག༌གི༌ ཁོའ༌ ཀྲང༌པོ༌ ཐེའ༌ ཛད༌ཁན༌ བྲིའ༌ཛད༌ཅེས༌པོ༌, ཨབ༌ར༌ཧམ༌ ཅིག༌པོའེ༌ ཕན༌ཐོགས༌སི༌ ཕིའ༌ མན༌པ༌,
ROM 4:24 ང༌དང༌ངི༌ ཕན༌ཐོགས༌སི༌ ཕིའང༌ ཨིན༌པིན༌། ཀལ༌ཏེས༌ ཡེ༌ཤུ༌ ང༌དང༌གུན༌ནི༌ གཙོ༌བོ༌, ཤི༌ཁན༌གུན༌ནི༌ ཕྲོ༌ནེ༌ ལང༌ང༌ ཛདས༌ཁན༌ དཀོན༌མཆོག༌གི༌ ནང༌ང༌ ང༌ཏི༌ ཏད༌པ༌ ཅོ༌ན༌, ཁོང༌ངི༌ ང༌དང༌གུན༌ནའང༌ ཀྲང༌པོ༌ ཐེའ༌ ཛད༌ཅེས༌པོ༌ ནི༌, ང༌དང༌ངི༌ ཕན༌ཐོགས༌པོ༌ ཨིན༌ནོག༌།
ROM 4:25 དཀོན༌མཆོག༌གི༌ ཡེ༌ཤུ༌, ང༌དང༌གུན༌ནི༌ སྡིག༌པའེ༌ ཏོན༌ལ༌, ཀྲོངས༌ས༌ལ༌ སྟད༌ད༌ ཛདས༌། ཡང༌ ང༌དང༌གུན༌ ཀྲང༌པོ༌ གྱུར༌ཅེས༌ལ༌ ཁོང༌ངི༌ ཡེ༌ཤུ༌ སོན༌པོའ༌ ལང༌ང༌ ཛདས༌།
ROM 5:1 ཏ༌ ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཏད༌པའེ༌ ཞས༌ཏེ༌ ཀྲང༌པོ༌ ཐེའ༌ ཛད༌པ༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌, ང༌དང༌གུན༌ལ༌ དཀོན༌མཆོག༌ ཉམ༌པོ༌ ཐུན༌བྲེལ༌ ཡོད༌ཏེ༌ ཨིན༌ནོག༌།
ROM 5:2 ང༌དང༌གུན༌ནི༌ ཏད༌པའེ༌ ཞས༌ཏེ༌ མ༌ཤི༌ཀའེ༌ ང༌དང༌གུན༌ལ༌ འོས༌པ༌ མེད༌ཁན༌ནི༌ ཏེ༌ ནས༌ས༌བོའེ༌ ནང༌ང༌ དུག༌ཅེས༌ལ༌ ཁྱོང༌ང༌ ཛདས༌། ཡང༌ ང༌དང༌གུན༌ ལོ༌ཁྱེལ༌ དང༌ ཐད༌པོ༌ ཉམ༌པོ༌ དཀོན༌མཆོག༌གི༌ ཟིར༌རྗིད༌པོའེ༌ ནང༌ང༌ དྲེས༌ ཐུབ༌ཨིན༌།
ROM 5:3 ཏེ༌ནང༌ང༌ མ༌ཚད༌, ང༌དང༌གུན༌ནི༌ ནགས༌བར༌དོའེ༌ ནང༌ངའང༌ སྟོད༌པ༌ ཕུལ༌ལ༌ནོག༌, ཅིའ༌ཟེར༌ན༌ ང༌དང༌ང༌ གྱུས༌ཨིན༌ནོག༌ ནགས༌བར༌དོའེ༌ ཟོད༌སེམས༌ སྐྱེ༌ཅུག༌ཅེས༌,
ROM 5:4 ཟོད༌སེམས༌སི༌ སྕོད༌ལམ༌ ཟང༌པོ༌ ལྡན༌ཅུག༌ཅེས༌, ཡང༌ སྕོད༌ལམ༌ ཟང༌པོའེ༌ ང༌དང༌གུན༌ལ༌ ཐར༌པའེ༌ རེ༌ཝའེ༌ ལོ༌ཁྱེལ༌ ཏང༌ང༌ནོག༌།
ROM 5:5 ཡང༌ འི༌ རེ༌ཝ༌ ཡོད༌ཅེས༌པོའེ༌ ང༌དང༌གུན༌ནི༌ སྤོས༌པ༌ ཆག༌ག༌ མ༌ནོག༌, ཅིའ༌ཟེར༌ན༌ དཀོན༌མཆོག༌གི༌ ང༌དང༌གུན༌ནི༌ སེམས༌པོ༌ ང༌དང༌ང༌ སལ༌ཁན༌ནི༌ ཏམ༌པའེ༌ ཐུག༌ཉིད༌ གྱུད༌ཏེ༌, ཁོང༌རང༌ངི༌ ཡ༌ཤའེ༌ སྐང༌ང༌ ཛད༌ཏེ༌ ཨིན༌ནོག༌།
ROM 5:6 དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌, ང༌དང༌གུན༌ནི༌ སྟོབས༌ ཚར༌ཏེ༌ ང༌དང༌གུན༌ནི༌ ནང༌ང༌ ཁྱུད༌མེད༌ ཟ༌ནེ༌, མ༌ཤི༌ཀ༌ ང༌དང༌ སྡིག༌ཅན༌གུན༌ནི༌ ཕིའ༌ ཀྲོངས༌ས༌ ཛདས༌།
ROM 5:7 མི༌ མང༌ཆེའ༌གུན༌ མི༌ཀྲང༌པོ༌ཞིག༌གི༌ ཏོན༌ལ༌ ཤིའ༌ མ༌ནོག༌, ཅི༌པ༌ཏ༌ ཅིག༌ཅིག༌ ཡོད༌གྲོ༌ ཀ༌བོའེ༌ ངའ༌ མི༌ ཟང༌པོའེ༌ ཏོན༌ལ༌ ཤི༌ཉན༌ཅེས༌རག༌ ཟེར༌སྲིད༌ཨིན༌།
ROM 5:8 ཨིན༌ནའང༌ ང༌དང༌གུན༌ སྡིག༌ཅན༌ ཨིན༌ ཟ༌ནེ༌, དཀོན༌མཆོག༌གི༌ མ༌ཤི༌ཀ༌ ང༌དང༌གུན༌ནི༌ ཏོན༌ལ༌ ཀྲོངས༌ས༌ ལམ༌ཅུག༌ག༌ ཛད༌ཏེ༌, ཁོང༌ངི༌ ང༌དང༌ང༌ ཅེས༌པ༌ ཆེན༌མོ༌ ཛད༌ཁན༌བོ༌ སྟན༌ན༌ ཛདས༌།
ROM 5:9 ཡང༌ མ༌ཤི༌ཀའེ༌ སྐུ༌ཁྲག༌ གྱུད༌ཏེ༌, ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཛད༌ པ༌སང༌, ཁོང༌ངི༌ ང༌དང༌གུན༌ ཏན༌ཏན༌ དཀོན༌མཆོག༌གི༌ ཐུགས༌སྲོའེ༌ ཀ༌ནེ༌ སྐྱོབ༌ཅེས༌པོའ༌ ལོ༌ཁྱེལ༌ ཡོང༌གོས༌།
ROM 5:10 ང༌དང༌གུན༌ དཀོན༌མཆོག༌གི༌ གྲ༌འོ༌ ཨིན༌ ཟ༌ནེ༌, ཁོང༌རང༌ངི༌ སྲས༌ ཀྲོང༌ཤེས༌པོ༌ གྱུད༌ཏེ༌, ཁོང༌ངི༌ ང༌དང༌གུན༌ ཁོང༌ ཉམ༌པོ༌ ཐུན༌བྲེལ༌ ཛདས༌། ཏེན༌ན༌ ཐུན༌བྲེལ༌བོའེ༌, ཁོང༌རང༌ངི༌ སྲས༌སི༌ སྲོག༌ གྱུད༌ཏེ༌, ཁོང༌ངི༌ ང༌དང༌གུན༌ སྐྱོབ༌བ༌ ཛད༌ཅེས༌པོའ༌ ལོ༌ཁྱེལ༌ སྲན༌ཏྲེ༌ རག༌།
ROM 5:11 ཏ༌ ང༌དང༌གུན༌ནི༌ དཀོན༌མཆོག༌ ཉམ༌པོ༌ བྲེལ༌ སོ༌མ༌བོའེ༌ ནང༌ང༌ གའ༌མོ༌ ཅོ༌ཨིན༌, ཅིའ༌ཟེར༌ན༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌, ང༌དང༌གུན༌ དཀོན༌མཆོག༌གི༌ ཛ༌འོ༌ གྱུར༌ ཅུག༌ག༌ ཛདས༌།
ROM 5:12 ནམ༌ ཨ༌དམ༌མི༌ སྡིག༌པ༌ ཅོས༌, ཏེ༌ མི༌ ཅིག༌པོ༌ གྱུད༌ཏེ༌ ཇིག༌རྟེན༌ནི༌ ནང༌ང༌ སྡིག༌པ༌ གོ༌ཟུགས༌། ཨ༌དམ༌མི༌ སྡིག༌པའེ༌ ཤི༌ཅེས༌ ཁྱོངས༌པ༌, ཤི༌ཅེས༌པོ༌ མི༌ཚང༌མའེ༌ཀ༌ ཕེལ༌, ཅིའ༌ཟེར༌ན༌ མི༌ཚང༌མའེ༌ སྡིག༌པ༌ ཅོས༌།
ROM 5:13 ཁྲིམས༌ ཐོབ༌བི༌ སང༌ སྔུན༌ལའང༌ སྡིག༌པ༌ ཇིག༌རྟེན༌ནི༌ ནང༌ང༌ ཡོད༌པིན༌། ཨིན༌ནའང༌ ཏེ༌བོ༌ སྡིག༌པ༌ ཐེའ༌ མ༌ཛདས༌, ཅིའ༌ཟེར༌ན༌ ཏེ༌ཏེ༌ཚོག༌པ༌ ཅག༌ཅེས༌ལ༌ ཁྲིམས༌ཤིག༌ མ༌ནེ༌ མེད༌པིན༌།
ROM 5:14 ཨིན༌ནའང༌ ཨ༌དམ༌མི༌ ཏུས༌ནེ༌ ཏངས༌ཏེ༌ མོ༌ཟེས༌སི༌ ཏུས༌ ཚོག༌པ༌, མི༌གུན༌ནི༌ ཨ༌དམ༌ ཙོགས༌ལ༌ བཀའ༌ ཅགས༌ཏེ༌ སྡིག༌པ༌ མ༌ཅོ༌ནའང༌, ཁོང༌གུན༌ ཤི༌། ཨ༌དམ༌ ནི༌ སྐྱོད༌ཅེས༌ཅན༌བོའེ༌, སྟགས༌པོ༌ ཨིན༌པིན༌།
ROM 5:15 ཨིན༌ནའང༌ ཨ༌དམ༌མི༌ སྡིག༌པ༌ དང༌ དཀོན༌མཆོག༌གི༌ ཐུག༌རྗེའེ༌ སོལ༌རས༌པོའེ༌ ནང༌ང༌ མ༌ཁྱད༌པར༌ ཆེན༌མོ༌ཞིག༌ ཡོད༌ཏེ༌ ཨིན༌ནོག༌, ཅིའ༌ཟེར༌ན༌ ཨ༌དམ༌, འི༌ མི༌ ཅིག༌པོའེ༌ སྡིག༌པའེ༌, མང༌པོ༌ཞིག༌གི༌ཀ༌ ཤི༌ཅེས༌ ཁྱོངས༌། ཨིན༌ནའང༌ ཏེ༌སང༌ ཀྲག༌པོ༌ ནི༌ དཀོན༌མཆོག༌གི༌ ཧ༌ལས༌ཤེས༌སི༌ ཐུག༌རྗེ༌ དང༌ མང༌པོ༌ཞིག༌ག༌ ཤགས༌པའེ༌ སོལ༌རས༌པོ༌ ཨིན༌པིན༌, ཀ༌བོ༌ མི༌ ཉིས༌པ༌ ཡེ༌ཤུ༌ མ༌ཤི༌ཀ༌, གྱུད༌ཏེ༌ སལས༌།
ROM 5:16 ཡང༌ དཀོན༌མཆོག༌གི༌ ཐུག༌རྗེའེ༌ སོལ༌རས༌པོའེ༌ བྲས༌བུ༌ ནི༌, ཏེ༌ མི༌ ཅིག༌པོའེ༌ སྡིག༌པའེ༌ བྲས༌བུ༌ དང༌ཙོགས༌ མེད༌པ༌ ཨིན༌ནོག༌། ཨ༌དམ༌མི༌ སྡིག༌པའེ༌ ཞས༌ཏེ༌ དཀོན༌མཆོག༌གི༌ ཤི༌ཅེས༌སི༌ ཆད༌པའེ༌ ཁྲིམས༌ཅད༌ སལས༌། ཨིན༌ནའང༌ དཀོན༌མཆོག༌གི༌ རིན༌ མ༌ཤལ༌ཁན༌ནི༌ སོལ༌རས༌པོའེ༌, ང༌དང༌གུན༌ནི༌ཀ༌ སྡིག༌པ༌ མང༌པོའེ༌ སྐྱོན༌ ཡོད༌ནའང༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོ༌ཅེས༌ལ༌ ཁྲིད༌ད༌ནོག༌།
ROM 5:17 འི༌ ཨ༌དམ༌, མི༌ ཅིག༌པོའེ༌ སྡིག༌པའེ༌ ཞས༌ཏེ༌ ཤི༌ཅེས༌སི༌ ཝང༌ མི༌ མང༌པོ༌ཞིག༌གི༌ཀ༌ སྲུལས༌། ཨིན༌ནའང༌ ཡེ༌ཤུ༌ མ༌ཤི༌ཀ༌, མི༌ ཅིག༌པོ༌ གྱུད༌ཏེ༌, དཀོན༌མཆོག༌གི༌ ཧ༌ལས༌ཤེས༌སི༌ ཐུག༌རྗེ༌ དང༌ ཀྲང༌པོ༌ གྱུར༌ཅེས༌སི༌ སོལ༌རས༌ ཐོབ༌ཁན༌ ཚང༌མའེ༌ ནང༌ང༌ ཙམ༌ཤིག༌གི༌ མང༌ང༌ ཀྲག༌པོ༌ ཝང༌ མི༌སྲུལ༌།
ROM 5:18 འོ༌ན༌, ཨ༌དམ༌མི༌ སྡིག༌པ༌ ཅིག༌ཅིག༌པོའེ༌, མི༌ཚང༌མའེ༌ཀ༌ ཤི༌ཅེས༌སི༌ ཆད༌པ༌ ཕོག༌། ཨིན༌ནའང༌ མ༌ཤི༌ཀའེ༌ ཆག༌ལས༌ ཀྲང༌པོ༌ ཅིག༌ཅིག༌གི༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོའ༌ ཛད༌ཏེ༌ མི༌ཚང༌མ༌ལ༌ མི༌ཚེའེ༌ སོ༌མ༌ཞིག༌ སལ༌ལ༌ ཛདས༌།
ROM 5:19 མི༌ ཅིག༌གི༌ དཀོན༌མཆོག༌གི༌ ཁའ༌ མི༌ཉན༌ཅེས༌པོའེ༌, མང༌པོ༌ཞིག༌ སྡིག༌ཅན༌ གྱུར༌ཅུགས༌། ཨིན༌ནའང༌ ཞན༌ཡང༌ མི༌ ཅིག༌གི༌ དཀོན༌མཆོག༌གི༌ ཁའ༌ཉན༌ཅེས༌པོའེ༌, མང༌པོ༌ཞིག༌ མི༌ ཀྲང༌པོ༌ གྱུར༌ ཅུག༌ག༌ ཛད༌ཨིན༌།
ROM 5:20 མི༌གུན༌ ཙམ༌ཤིག༌ སྡིག༌ཅན༌ ཨིན༌ཁན༌བོ༌ སྟན༌ཅེས༌སི༌ ཕིའ༌ དཀོན༌མཆོག༌གི༌ ཁྲིམས༌པོ༌ སལ༌ལ༌ ཛདས༌། ཨིན༌ནའང༌ ཁྲིམས༌པོའེ༌ སྡིག༌པ༌ ངན༌པ༌ ཨིན༌ཁན༌བོ༌ མང༌ང༌ སལ༌པོ༌ ཅོའད༌ནའང༌, དཀོན༌མཆོག༌གི༌ ཧ༌ལས༌ཤེས༌སི༌ ཐུག༌རྗེ༌བོ༌ ཏེ༌སང༌ མང༌ང༌ ཀྲག༌ག༌ ཨིན༌ནོག༌།
ROM 5:21 ཀ༌ཟུག༌ སྡིག༌པའེ༌ མི༌ཚང༌མའེ༌ཀ༌ ཝང༌སྲུལ༌ཏེ༌ ཤི༌ཅེས༌པོ༌ ཁྱོངས༌, ཏེ༌བོའེ༌ ཚབས༌ལ༌ དཀོན༌མཆོག༌གི༌ ཧ༌ལས༌ཤེས༌སི༌ ཐུག༌རྗེའེ༌ སོལ༌རས༌པོའེ༌ ཝང༌སྲུལ༌ལ༌ ཛད༌ཏེ༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ ང༌དང༌གུན༌ ཀྲང༌པོ༌ ཅོའ༌ ཛད༌ཨིན༌། ཡང༌ ང༌དང༌གུན༌ ཐའ༌མེད༌པའེ༌ མི༌ཚེ༌ ཆོགས༌ལ༌ ཁྲིད༌ད༌ ཛད༌ཨིན༌།
ROM 6:1 ཏེ༌ནེ༌ ང༌ཏི༌ ཅི༌ ཟེར༌གོས༌, དཀོན༌མཆོག༌གི༌ ཐུག༌རྗེའེ༌ གྱས༌ཤུག༌ཅེས༌ལ༌, ཅི༌ ང༌དང༌གུན༌ནི༌ སྡིག༌པ༌ ཅོ༌ཨིན༌ ཆ༌གོས༌ས༌?
ROM 6:2 མ༌ནེ༌ མ༌གོས༌། ང༌དང༌གུན༌ སྡིག༌པའེ༌ ཕིའ༌ ཤི༌ཏེ༌ ཨིན༌ པ༌སང༌, ཏེ༌ནེ༌ ང༌དང༌གུན༌ནི༌ ཏེ༌ནང༌ང༌ མི༌ཚེ༌ ཀ༌ཟུག༌གི༌ ཕུད༌ཨིན༌?
ROM 6:3 མ༌ཤི༌ཀ༌ ཡེ༌ཤུའི༌ ཁྲུས༌སི༌ ནང༌ང༌ དྲེས༌ཁན༌གུན༌ ཁོང༌ངི༌ ཤི༌ཅེས༌སི༌ ནང༌ངའང༌ དྲེས༌ཏེ༌ ཨིན༌ཁན༌བོ༌, ཅི༌ ཁྱོ༌ཞ༌གུན༌ལ༌ གྱུས༌མེད༌ད༌?
ROM 6:4 ཁྲུས༌ལེན༌ཅེས༌ གྱུད༌ཏེ༌, ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ཏེ༌ སུབས༌ཁན༌ ཙོགས༌ ཨིན༌ནོག༌། ཡང༌ ཀ༌ཟུག༌ དཀོན༌མཆོག༌ ཡབ༌བི༌ ཟིར༌རྗིད༌དི༌ ཁྱུད༌ གྱུད༌ཏེ༌, མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ ལང༌ང༌ ཛད༌པ༌, ཏ༌ ང༌དང༌གུན༌ནིའང༌ མི༌ཚེ༌ སོ༌མ༌ཞིག༌ ཕུད༌ཐུབ༌ཅེས༌ ཨིན༌ནོག༌།
ROM 6:5 ཀལ༌ཏེས༌ ཁྲུས༌ལེན༌ཅེས༌པོའེ༌, ང༌དང༌གུན༌ ཡེ༌ཤུ༌ ཀྲོང༌ཤེས༌པོའེ༌ ནང༌ང༌ དྲེས༌ན༌, ཏེ༌ནེ༌ ང༌དང༌གུན༌ ཁོང༌ ཉམ༌པོ༌ སོན༌ཏེའ༌ ལང༌ཅེས༌པོའེ༌ ནང༌ངའང༌ དྲེ༌ཤེས༌པོ༌ ཏན༌ཏན༌ ཨིན༌ནོག༌།
ROM 6:6 ང༌དང༌གུན༌ལ༌ གྱུས༌ཨིན༌ནོག༌, སྡིག༌པའེ༌ ཝང༌བོ༌ ང༌དང༌ངི༌ མི༌ཚེའེ༌ ནང༌ང༌ མི༌ལུས༌ཤེས༌སི༌ ཕིའ༌, ང༌དང༌གུན༌ནི༌ སྙིང༌པ༌ སྡིག༌ཅན༌ ཟུགས༌པོ༌བོ༌ མ༌ཤི༌ཀ༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌ཏེ༌ ཨིན༌པིན༌། ཏ༌ ང༌དང༌གུན༌ སྡིག༌པའེ༌ ཚེ༌ཡོག༌ག༌ ལུས༌གོ༌ཤེས༌ མ༌ནོག༌།
ROM 6:7 ཅིའ༌ཟེར༌ན༌ ནམ༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌, ང༌དང༌གུན༌ལ༌ སྡིག༌པའེ༌ ཝང༌ནེ༌ ཐར༌པ༌ ཐོབ༌ཏེ༌ ཨིན༌ནོག༌།
ROM 6:8 ཡང༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ པ༌སང༌, ཁོང༌ ཉམ༌པོ༌ མི༌ཚེ༌ ཕུད༌ཅེས༌པོའང༌ ང༌དང༌གུན༌ལ༌ གྱུས༌ཨིན༌ནོག༌།
ROM 6:9 ཏེ༌གུན༌ ཏན༌ཏན༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌, ཅིའ༌ཟེར༌ན༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌, ཁོང༌ ཡང༌སྐྱར༌ མ༌ནེ༌ མི༌ཤི༌, ཏ༌ ཁོང༌ངི༌ཀ༌ ཤི༌ཅེས༌པོའ༌ ཝང༌ མེད༌པ༌ ཨིན༌ནོག༌།
ROM 6:10 ནམ༌ མ༌ཤི༌ཀ༌ ཀྲོངས༌, སྡིག༌པའེ༌ ཝང༌བོ༌ ཅག༌ཅེས༌ལ༌ ཁོང༌ ལན༌ཕོག༌ ཅིག༌ ཀྲོངས༌། ཨིན༌ནའང༌ ཏ༌ ཁོང༌ སོན༌པོ༌ ཞུགས༌ཏེ༌, ཡང༌ ཁོང༌ངི༌ དཀོན༌མཆོག༌གི༌ སྤལ༌ལི༌ ཕིའ༌ མི༌ཚེ༌ ཕུད༌ད༌ ཛད༌ད༌ནོག༌།
ROM 6:11 ཏེན༌ན༌ ཙོགས༌ལ༌ ཁྱོ༌ཞ༌གུན༌ནའང༌ སྡིག༌པའེ༌ ཝང༌ངི༌ ཕིའ༌ ཤི༌ཏེ༌ ཡང༌ མ༌ཤི༌ཀ༌ ཡེ༌ཤུ༌ གྱུད༌ཏེ༌, དཀོན༌མཆོག༌གི༌ སྤལ༌ལི༌ ཕིའ༌ མི༌ཚེ༌ ཕུད༌ཨིན༌ ཨིན༌ཁན༌བོ༌ སམ༌གོས༌།
ROM 6:12 ཏེ༌ནེ༌ ངན༌པའེ༌ དོད༌པ༌གུན༌ནི༌ ཁའ༌ མི༌ཉན༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ཤི༌ཅེས༌ཅན༌ནི༌ ཟུགས༌པའེ༌ཀ༌ སྡིག༌པ༌ ཝང༌སྲུལ༌ མ༌ཅུག༌ཤིག༌།
ROM 6:13 ཁྱོ༌ཞ༌གུན༌ནི༌ ཟུགས༌པོའེ༌ ཁག༌ཅིག༌གའང༌, སྡིག༌པའེ༌ ཡོག༌པོ༌ ཅོ༌ཨིན༌ ངན༌པའེ༌ ལག༌ཆ༌ རིག༌ག༌ གྱུར༌ མ༌ཅུག༌ག༌, ཁྱོ༌ཞ༌རང༌གུན༌ ཅི༌ས༌ཐོག༌ནེ༌ དཀོན༌མཆོག༌ག༌ ཕུལ༌ཤིག༌། ཅིའ༌ཟེར༌ན༌ ཁྱོ༌ཞ༌གུན༌ ཤི༌ཏེ༌ ཨིན༌པིན༌, ཨིན༌ནའང༌ ཏ༌ ཁྱོ༌ཞ༌གུན༌ལ༌ མི༌ཚེ༌ སོ༌མ༌ཞིག༌ ཡོད༌ཏེ༌ ཨིན༌ནོག༌། ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ ཟུགས༌པོ༌བོ༌ དཀོན༌མཆོག༌ག༌ སྤལ༌ ཐོབ༌ཅེས༌ལ༌ འོས༌པའེ༌ ལས༌གུན༌ ཅོ༌ཅེས༌སི༌ ལག༌ཆ༌ ཙོགས༌ལ༌ ཀོལ༌ཤིག༌།
ROM 6:14 ཏ༌ སྡིག༌པ༌བོ༌ ཁྱོ༌ཞ༌གུན༌ནི༌ སྤོན༌བོ༌ མ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཁྲིམས༌སི༌ ངའ༌ཡོག༌ག༌ མི༌ཚེ༌ མ༌ཕུད༌ད༌, དཀོན༌མཆོག༌གི༌ ཐུག༌རྗེའེ༌ རང༌ཝང༌ངི༌ ངའ༌ཡོག༌ག༌ མི༌ཚེ༌ ཕུད༌ད༌ནོག༌།
ROM 6:15 ཏེ༌ནེ༌ ཅི༌, ང༌དང༌གུན༌ ཁྲིམས༌སི༌ ངའ༌ཡོག༌ག༌ མན༌པ༌, ཐུག༌རྗེ༌ ངའ༌ཡོག༌ག༌ ཨིན༌ཅེས༌པོའེ༌ སྡིག༌པ༌ ཅོ༌གོས༌ས༌? མ༌ནེ༌ མ༌གོས༌།
ROM 6:16 ཁྱོ༌ཞའེ༌ ཁའ༌ ཉན༌ཅེས༌ལ༌ ལྡམས༌ཁན༌བོའེ༌, ཁྱོ༌ཞའ༌ ཡོག༌པོ༌ གྱུར༌ཅེས༌པོ༌, ཧ༌གོའ༌ མེ༌རག༌ག༌? ཀལ༌ཏེས༌ སྡིག༌པའེ༌ ཡོག༌པོ༌ གྱུར༌ཅུག༌ན༌, ཏེ༌བོའེ༌ ཁྱོ༌ཞ༌གུན༌ ཉལ༌ཝའེ༌ ནང༌ང༌ ཁྲིད༌ཨིན༌, ཨིན༌ནའང༌ དཀོན༌མཆོག༌གི༌ ཁའ༌ཉན༌ན༌, ཏེ༌བོའེ༌ ཁྱོ༌ཞ༌གུན༌ མི༌ཚེ༌ ཀྲང༌པོ༌ཞིག༌གི༌ ནང༌ང༌ ཁྲིད༌ཨིན༌།
ROM 6:17 ཁྱོ༌ཞའ༌ སྡིག༌པའེ༌ ཚེ༌ཡོག༌ ཨིན༌པིན༌, ཨིན༌ནའང༌ ཏ༌ ཁྱོ༌ཞ༌གུན༌ནི༌ ང༌ཞའེ༌ ལབ༌ཞ༌ ཏང༌ཁན༌གུན༌ནི༌ཀ༌ སེམས༌ གང༌པོ༌ནེ༌ ཁའ༌ཉན༌ཅེས༌པོའེ༌ཀ༌ ངའེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
ROM 6:18 ཏ༌ ཁྱོ༌ཞ༌གུན༌ སྡིག༌པའེ༌ ཀ༌ནེ༌ ཐར༌ཏེ༌ ཀྲང༌པོ༌ མི༌ཚེ༌ཞིག༌ ཕུད༌ཅེས༌སི༌ ཚེ༌ཡོག༌ གྱུར༌ཏེ༌ ཨིན༌ནོག༌།
ROM 6:19 སེམས༌ཤུགས༌ མེད༌ཁན༌ནི༌ མི༌ ཨིན༌ཅེས༌པོའེ༌, ཁྱོ༌ཞ༌གུན༌ལ༌ འི༌ ཚང༌མ༌ ཧ༌གོ༌ཅུག༌ཅེས༌ལ༌ ངའེ༌ ཚེ༌ཡོག༌གི༌ སྤེ༌བོ༌ ཀོལ༌ལད༌། སྔུན༌ལ༌ ཁྱོ༌ཞའེ༌, ཁྱོ༌ཞ༌རང༌གུན༌ མང༌ངི༌ སང༌ མང༌ང༌ ངན༌པ༌ དང༌ ཚི༌ཏུ༌ ལས༌ ཉིས༌ཀོའེ༌ ཚེ༌ཡོག༌ གྱུར༌ཅུགས༌། ཏ༌ ཏམ༌པ༌ གྱུར༌ཅེས༌སི༌ ཕིའ༌ ཁྱོ༌ཞའེ༌ རང༌དང༌རང༌ མི༌ཚེ༌ ཀྲང༌པོ༌ཞིག༌གི༌ ཚེ༌ཡོག༌ གྱུར༌ཅུག༌གོས༌།
ROM 6:20 ཁྱོ༌ཞ༌གུན༌ སྡིག༌པའེ༌ ཚེ༌ཡོག༌ ཨིན༌ ཟ༌ནེ༌, ཁྱོ༌ཞ༌གུན༌ལ༌ མི༌ཚེ༌ ཀྲང༌པོ༌ཞིག༌ ཕུད༌ཅེས༌སི༌ ཚེར༌ཁའ༌ མ༌ནེ༌ མེད༌པིན༌།
ROM 6:21 ཡང༌ ཏེ༌བོའེ༌ བྲས༌བུ༌ ཀ༌ཟུག༌ཤིག༌ ཡོངས༌? ཏ༌ ཁྱོ༌ཞ༌གུན༌ ཏེ༌ཟུག༌ ཅོ༌ཁན༌གུན༌ནི༌ཀ༌ ཙམ༌ཤིག༌གི༌ ཁྲེལ༌བ༌ ཚོར༌ར༌ནོག༌, ཀ༌བོའེ༌ བྲས༌བུ༌ ཐའ༌མེད༌པའེ༌ ཤི༌ཅེས༌པོ༌ ཨིན༌ནོག༌།
ROM 6:22 ཨིན༌ནའང༌ ཁྱོ༌ཞ༌གུན༌ སྡིག༌པའེ༌ ཝང༌ངི༌ ཡོག༌ནེ༌ ཐར༌ཏེ༌, དཀོན༌མཆོག༌གི༌ ཚེ༌ཡོག༌ གྱུར༌ཏེ༌ ཨིན༌ནོག༌། ཏ༌ ཁྱོ༌ཞ༌གུན༌ནི༌ ཏམ༌པ༌ ཆོགས༌ལ༌ ཁྲིད༌ཁན༌ནི༌ ལས༌གུན༌ ཅོ༌ཨིན༌ ཨིན༌ནོག༌, ཀ༌བོའེ༌ བྲས༌བུ༌ ནི༌ ཐའ༌མེད༌པའེ༌ མི༌ཚེ༌བོ༌ ཨིན༌།
ROM 6:23 སྡིག༌པའེ༌ ལ༌ཆ༌བོ༌ ནི༌ ཤི༌ཅེས༌པོ༌ ཨིན༌ནོག༌། ཨིན༌ནའང༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ དཀོན༌མཆོག༌གི༌ ཆོན༌ལ༌ སལ༌ལ༌ ཛད༌ཁན༌ནི༌ སོལ༌རས༌པོ༌ ནི༌, ཐའ༌མེད༌པའེ༌ མི༌ཚེ༌བོ༌ ཨིན༌།
ROM 7:1 ཏ༌ ཁྲིམས༌ ཤེས༌ཁན༌ ངའེ༌ སྤུན༌, ཁྱོ༌ཞ༌གུན༌ལ༌ ཅི༌ གྱུས༌མེད༌ད༌? ཁྲིམས༌སི༌ ཝང༌བོ༌ མི༌ཞིག༌གི༌ཀ༌ ཁོ༌ སོན༌ཏེའ༌ ཡོད༌ཡོད༌ ཚོག༌པ༌, གྲུལ༌ལ༌ནོག༌།
ROM 7:2 སྤེར༌ན༌, ཁྲིམས༌ ནང༌ཞིན༌ ན༌མ༌ ཅོ༌ཁན༌ནི༌ བུ༌མོ༌བོའེ༌ ཁོ༌རང༌ངི༌ མག༌པ༌ སོན༌ཏེའ༌ ཡོད༌ཡོད༌ ཚོག༌པ༌ ཁོ༌ ཉམ༌པོ༌ ཨིད༌ཤེས༌ཅན༌ནི༌ བྲེལ༌ བོར༌གོས༌། ཨིན༌ནའང༌ ཀལ༌ཏེས༌ ཁོའེ༌ མག༌པ༌ ཤི༌ན༌, ཁོ༌ མག༌པ༌ ཉམ༌པོ༌ ཨིད༌ཤེས༌ཅན༌ དུག༌ཅེས༌སི༌ ཁྲིམས༌པོ༌ སྲུང༌ཅེས༌ནེ༌ བུད༌ཏེ༌ ཨིན༌ནོག༌།
ROM 7:3 ཀལ༌ཏེས༌ མག༌པ༌བོ༌ སོན༌ཏེའ༌ ཡོད༌ ཟ༌ནེ༌, ཏེ༌ བུ༌མོ༌བོའེ༌ ཞན༌ཞིག༌ག༌ ན༌མ༌ ཅོ༌ན༌, ཁོའེ༌ ཞིད༌མད༌ མན༌པ༌ ཞན༌མི༌ཞིག༌ ཉམ༌པོ༌ ལུས༌བྲེལ༌ ཅོ༌ཁན༌ནི༌ སྡིག༌པ༌ ཅོས༌ཏེ༌ ཨིན༌ནོག༌། ཨིན༌ནའང༌ ཀལ༌ཏེས༌ ཁོའེ༌ མག༌པ༌བོ༌ ཤི༌ཏེ༌ སྟིང༌ནེ༌, ཡང༌ ན༌མ༌ ཅོ༌ན༌, ཁོ༌ ཁྲིམས༌ ནང༌ཞིན༌ ལོག༌ཡེམ༌མི༌ སྡིག༌པ༌ ཅོ༌ཅེས༌ནེ༌ མ༌གལ༌ལ༌ ཨིན༌ནོག༌།
ROM 7:4 ཏེན༌ན༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ ཤི༌ ཟ༌ནེ༌, ཁྱོ༌ཞ༌གུན༌ ཁྲིམས༌སི༌ ཝང༌ངི༌ ཀ༌ནེའང༌ ཤི༌ཏེ༌ ཨིན༌ནོག༌། ཏ༌ ཁྱོ༌ཞ༌གུན༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཁན༌བོ༌ ཉམ༌པོ༌ ཅིག༌གྲིལ༌ སོང༌ཏེ༌ ཨིན༌ནོག༌། ཏེ༌བོའེ༌ ཞས༌ཏེ༌ ང༌དང༌གུན༌ནི༌ དཀོན༌མཆོག༌གི༌ ཕིའ༌ ལས༌ ཟང༌པོའེ༌ བྲས༌བུ༌ སྨིན༌ཅུག༌ཐུབ༌ཨིན༌།
ROM 7:5 ང༌དང༌གུན༌ སྔུན༌མའེ༌ སྕོད༌པའེ༌ ཝང༌ངི༌ ནང༌ང༌ ཡོད༌ ཟ༌ནེ༌, ང༌དང༌གུན༌ནི༌ ནང༌ང༌ སྡིག༌པའེ༌ དོད༌པ༌གུན༌ནི༌ ལས༌ ཅོའད༌པིན༌། ཡང༌ ཁྲིམས༌སི༌, ཏེ༌ དོད༌པ༌ ངན༌པ༌གུན༌ ལང༌ཅུགས༌ཏེ༌ སྡིག༌པའེ༌ ལས༌སི༌ སྟོན༌ཐོག༌ སྨིན༌ ཅུག༌ག༌ནོག༌, ཀ༌བོའེ༌ བྲས༌བུ༌ ཤི༌ཅེས༌པོ༌ ཨིན༌ནོག༌།
ROM 7:6 ཨིན༌ནའང༌ ཏ༌ ང༌དང༌གུན༌ ཁྲིམས༌སི༌ ཀ༌ནེ༌ བུད༌ཏེ༌ ཨིན༌ནོག༌, ཅིའ༌ཟེར༌ན༌ ང༌དང༌གུན༌ ལྡམས༌ཏེ༌ བོར༌ཁན༌ནི༌ ཁྲིམས༌པོའེ༌ ཕིའ༌ ཤི༌ཏེ༌ ཨིན༌ནོག༌། ཏ༌ བྲིས༌ཁན༌ནི༌ ཁྲིམས༌པོའེ༌ ཞབས༌ཏོག༌ མ༌ཅོའ༌, ཏམ༌པའེ༌ ཐུག༌ཉིད༌དི༌ ནང༌ང༌ མི༌ཚེ༌ སོ༌མ༌ཞིག༌ ཕུད༌ཨིན༌, ང༌དང༌གུན༌ནི༌ དཀོན༌མཆོག༌ག༌ ཞབས༌ཏོག༌ ཞུ༌ཨིན༌།
ROM 7:7 ཅི༌ ཏེ༌ནེ༌, ངའེ༌ དཀོན༌མཆོག༌གི༌ ཁྲིམས༌པོ༌ ངན༌པ༌ ཨིན༌ནོག༌ ཟེར༌ཏེ༌ ཨིན༌ནོག༌ག༌? མ༌ནེ༌ མན༌། ངོས༌པོའ༌ ངའ༌, ང༌རང༌ངི༌ སྡིག༌པ༌གུན༌ སྟན༌ཁན༌བོ༌ ཏེན༌ན༌ ཁྲིམས༌པོ༌ ཨིན༌པིན༌། ཀལ༌ཏེས༌ ཁྲིམས༌པོའེ༌ “ཞན༌མའེ༌ ཨིན༌ཁན༌བོའ༌ དོད༌པ༌ མ༌ཅོ༌” མ༌ཟེར༌པིན༌ན༌, ཞན༌མའེ༌ ཨིན༌ཁན༌ལ༌ དོད༌པ༌ ཅོ༌ཅེས༌པོ༌ སྡིག༌པ༌ ཨིན༌ཁན༌ ངའ༌ གྱུས༌ མ༌ཆའ༌ ཡོད༌གྲོ༌།
ROM 7:8 ཨིན༌ནའང༌ སྡིག༌པའེ༌, ཏེ༌ བཀའ༌བོ༌ ཀོལ༌ཏེ༌ ངའེ༌ ནང༌ང༌ ཞན༌མའེ༌ ཨིན༌ཁན༌བོའ༌ དོད༌པ༌ ཅོ༌ཅེས༌སི༌ རིགས༌ ཚང༌མ༌ སྐྱེ༌ཅུགས༌། ཀལ༌ཏེས༌ ཁྲིམས༌ མེད༌པིན༌ན༌, སྡིག༌པའ༌, ཏེ༌ ཝང༌བོ༌ མེད༌གྲོ༌།
ROM 7:9 ཏུས༌ཤིག༌ག༌ ངའེ༌ ཁྲིམས༌སི༌ ཧ༌གོ༌མེད༌པ༌ མི༌ཚེ༌ ཕུད༌དད༌པིན༌, ཨིན༌ནའང༌ ངའ༌ དཀོན༌མཆོག༌གི༌ བཀའ༌བོ༌ ཧ༌གོའ༌ནའང༌, ངའེ༌ མི༌ཚེའེ༌ ནང༌ང༌ སྡིག༌པའེ༌ ལས༌ ཅོ༌ཅེས༌ གོ༌ཟུག༌, ཡང༌ ང༌ ཤི༌།
ROM 7:10 ཏེ༌ནེ༌ ངའེ༌ ཐོང༌, ཏེན༌ན༌ ཁྲིམས༌སི༌ བཀའ༌བོའེ༌, ངའ༌ མི༌ཚེ༌ ཁྱོང༌ཅེས༌སི༌ ཚབས༌ལ༌, ངའེ༌ ཕིའ༌ ཤི༌ཅེས༌སི༌ ཁྲིམས༌ཅད༌པོ༌ ཁྱོངས༌།
ROM 7:11 སྡིག༌པའེ༌ ཏེ༌ བཀའ༌བོའེ༌ ཕན༌ཐོགས༌ ལེན༌ཏེ༌ ངའ༌ གོབ༌སྐོརས༌, ཡང༌ ཏེན༌ན༌ བཀའ༌བོ༌ ཀོལ༌ཏེ༌ ངའེ༌ཀ༌ ཤི༌ཅེས༌སི༌ ཁྲིམས༌ཅད༌པོ༌ ཁྱོངས༌།
ROM 7:12 ཨིན༌ནའང༌ ཁྲིམས༌པོ༌ དག༌སའང༌ ཏམ༌པ༌ ཨིན༌ནོག༌, ཡང༌ ཏེ༌བོའེ༌ བཀའ༌གུན༌ ཏམ༌པ༌, ཀྲང༌པོ༌ དང༌ ཟང༌པོ༌ ཨིན༌ནོག༌།
ROM 7:13 ཏེ༌ནེ༌ ཅི༌, ཟང༌པོ༌ ཨིན༌ཁན༌ནི༌ ཁྲིམས༌པོའེ༌, ངའ༌ ཤི༌ཅེས༌པོ༌ ཁྱོངས༌ས༌? མ༌ནེ༌ མ༌ཁྱོངས༌། སྡིག༌པའེ༌, ཟང༌པོ༌ ཨིན༌ཁན༌བོའེ༌ ཕན༌ཐོགས༌ ལེན༌ཏེ༌ ངའེ༌ཀ༌ ཤི༌ཅེས༌སི༌ ཁྲིམས༌ཅད༌པོ༌ ཁྱོངས༌། འོ༌ན༌ དཀོན༌མཆོག༌གི༌ བཀའ༌ གྱུད༌ཏེ༌ ང༌དང༌ང༌ སྡིག༌པ༌ མངས༌ཏེའང༌ ངན༌པ༌ ཨིན༌ཁན༌བོ༌ ཧ༌གོའ༌ནོག༌།
ROM 7:14 ང༌དང༌གུན༌ལ༌ གྱུས༌ཨིན༌ནོག༌, དཀོན༌མཆོག༌གི༌ ཁྲིམས༌པོའེ༌ མི༌ཚེ༌ ཀྲང༌པོ༌ ཕུད༌ཅེས༌ལ༌ ཁྲིད༌ད༌ནོག༌, ཨིན༌ནའང༌ ང༌ ང༌རང༌ངི༌ སྡིག༌ཅན༌ དོད༌པ༌གུན༌ནི༌ ཁྲིད༌དུག༌། ཏེ༌བོ༌ ནི༌ ང༌ སྡིག༌པའེ༌ ཚེ༌ཡོག༌ག༌ ཙོངས༌ཁན༌ ཙོགས༌ ཨིན༌ནོག༌།
ROM 7:15 ངའེ༌ ཅོ༌ཨིན༌ ཡོད༌ཁན༌བོ༌ ང༌ ཧ༌གོའ༌ མེ༌རག༌, ཅིའ༌ཟེར༌ན༌ ངའ༌ ཀྲང༌པོ༌ ཅོ༌ཉིན༌ ཡོད༌ནའང༌ ངའེ༌ ཅོའ༌ མི༌དུག༌, མ༌ཚད༌ ངའེ༌ ཏེ༌བོ༌ ཅོ༌རུག༌ ཀ༌བོའ༌ ངའེ༌ ནཕ༌རད༌ ཅོའད༌།
ROM 7:16 ཡང༌ ཀལ༌ཏེས༌ ངའེ༌ མི༌ཅོ༌ སམ༌ཁན༌ནི༌ ལས༌པོ༌ ཅོ༌ན༌, ཏེ༌ནེ༌ ཁྲིམས༌ ཟང༌པོ༌ ཨིན༌ཁན༌བོའ༌ ངའེ༌ སེམས༌སི༌ ཆོགས༌སྐྱོར༌ ཅོས༌ཏེ༌ ཨིན༌ནོག༌།
ROM 7:17 ཏེ༌ནེ༌ ངན༌པ༌ ཅོ༌ཁན༌བོ༌ ངའ༌ མན༌པ༌ ངའེ༌ ནང༌ང༌ ནས༌ཏེ༌ ཡོད༌ཁན༌ནི༌ སྡིག༌པ༌བོ༌ ཨིན༌ནོག༌།
ROM 7:18 ཡང༌ ངའ༌ གྱུས༌ཡོད༌, ངའེ༌ ནང༌ང༌ ཟང༌པོ༌ ཅིག༌གའང༌ ནས༌ས༌ མེད༌, ཏེ༌བོ༌ ངའེ༌ སྡིག༌ཅན༌ སྕོད༌པ༌བོ༌ ཨིན༌། ངའ༌ ཀྲང༌པོ༌ ཅོ༌ཉིན༌ ཡོད༌ནའང༌ ངའ༌ ཅོ༌ཉན༌ན༌ མི༌དུག༌།
ROM 7:19 ངའེ༌ ཟང༌པོ༌ ཅོ༌ཉིན༌ ཡོད༌ནའང༌ ཅོའ༌ མི༌དུག༌། ངའེ༌ ངན༌པ༌ ཅོ༌ཉིན༌ མེད༌ནའང༌ ཏེ༌བོ༌ ཅོ༌དུག༌།
ROM 7:20 ཏ༌ ཀལ༌ཏེས༌ ངའེ༌ ཅོ༌ཉིན༌ མེད༌ཁན༌བོ༌ ཅོ༌ན༌, ཏེ༌ནེ༌ ཏན༌ཏན༌ལ༌ ངན༌པ༌ ཅོ༌ཁན༌བོ༌ ང༌ མན༌པ༌, ངའེ༌ ནང༌ང༌ ནས༌ཏེ༌ ཡོད༌ཁན༌ནི༌ སྡིག༌པ༌བོ༌ ཨིན༌ནོག༌།
ROM 7:21 ཏ༌ ང༌དང༌ངི༌ ནང༌ང༌ ཝང༌ཞིག༌གི༌ ལས༌ ཅོ༌ཁན༌བོ༌ ངའ༌ ཧ༌གོ༌, ངའེ༌ ཀྲང༌པོ༌ ཅོ༌ཉིན༌ ཡོད༌ ཟ༌ནེ༌, ངན༌པ༌ ངའ༌ ཉམ༌པོ༌ དུགས༌ཏེ༌ ཡོང༌དུག༌།
ROM 7:22 ངའེ༌ སེམས༌ གང༌པོ༌ནེ༌ དཀོན༌མཆོག༌གི༌ ཁྲིམས༌ལ༌ ཅམས༌པ༌ ཅོའད༌།
ROM 7:23 ཨིན༌ནའང༌ ངའེ༌ ནང༌ང༌, ཏེ༌ ཝང༌བོའེ༌ ངའེ༌ ཁྲིམས༌ ཁའ༌ཉན༌ཅེས༌སི༌ དོད༌པའེ༌ གྱབ༌གལ༌ལ༌ ནོལ༌ལ༌རག༌། ཏེ༌ ཝང༌བོའེ༌, ངའ༌, ངའེ༌ ནང༌ང༌ ཡོད༌ཁན༌ནི༌ སྡིག༌པའེ༌ ཚེ༌ཡོག༌ གྱུར༌ཅུག༌དུག༌།
ROM 7:24 ང༌ ཙམ༌ཤིག༌གི༌ རྡུག༌པོ༌ མི༌ཞིག༌ མ༌ནོག༌! སུའི༌ ངའ༌ ཤི༌ཅེས༌ ཁྱོང༌ཁན༌ནི༌ འི༌ ཟུགས༌པའེ༌ ནང༌ནེ༌ ཐར༌ཅུག༌ཨིན༌?
ROM 7:25 དཀོན༌མཆོག༌ག༌ ཐུག༌རྗེ༌ཆེ༌! ང༌ ཐར༌ཅུག༌ཁན༌བོ༌ ནི༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ཨིན༌ནོག༌། སོང༌པ༌སང༌ ཐོང༌དུག༌ག༌, འི༌བོ༌ ཀ༌ཟུག༌གི༌ ཨིན༌ནོག༌? ང༌རང༌ངི༌ སེམས༌སི༌ ནང༌ང༌ ངའེ༌ དེན༌བ༌ དཀོན༌མཆོག༌གི༌ ཁྲིམས༌པོ༌ ཁའ༌ཉན༌ཉིན༌རག༌, ཨིན༌ནའང༌ ངའེ༌ སྡིག༌པའེ༌ སྕོད༌པའེ༌ ཞས༌ཏེ༌ ང༌ སྡིག༌པའེ༌ ཡོག༌པོ༌ ཨིན༌།
ROM 8:1 ཏེ༌བོའེ༌ཕིའ༌ ཏ༌ མ༌ཤི༌ཀ༌ ཡེ༌ཤུའི༌ ཨིན༌ཁན༌གུན༌ལ༌ ཤི༌ཅེས༌སི༌ ཁྲིམས༌ཅད༌ མེད༌པ༌ ཨིན༌ནོག༌།
ROM 8:2 ཅིའ༌ཟེར༌ན༌ མ༌ཤི༌ཀ༌ ཡེ༌ཤུ༌ གྱུད༌ཏེ༌, མི༌ཚེ༌ སལ༌ཁན༌ནི༌ ཐུག༌ཉིད༌དི༌ ཁྱུད༌པོའེ༌ ཁྱོ༌ཞའ༌, ཤི༌ཅེས༌ ཆོགས༌ལ༌ ཁྲིད༌ཁན༌ནི༌ སྡིག༌པའེ༌ ཝང༌ནེ༌ ཐར༌ ཅུག༌ག༌ ཛདས༌།
ROM 8:3 ང༌དང༌གུན༌ནི༌ སྡིག༌པའེ༌ སྕོད༌པའེ༌, མོ༌ཟེས༌སི༌ ཁྲིམས༌པོ༌ ཤུགས༌མེད༌ ཅོས༌ པ༌སང༌, ཏེ༌བོའ༌ ང༌དང༌གུན༌ སྐྱོབ༌ མ༌ཉན༌ན༌ ཨིན༌ནོག༌, ཏེ༌བོའེ༌ཕིའ༌ ཁྲིམས༌ལ༌ ཅོ༌ མ༌ཉན༌ཁན༌བོ༌ དཀོན༌མཆོག༌གི༌ ཛདས༌། ང༌དང༌ སྡིག༌ཅན༌གུན༌ལ༌ ཡོད༌ཁན༌ ཙོགས༌ ཟུགས༌པོའེ༌ ནང༌ང༌ ཁོང༌ངི༌ ཁོང༌རང༌ངི༌ སྲས༌ ཇིག༌རྟེན༌ནི༌ཀ༌ ཀལ༌ལ༌ ཛད༌ཏེ༌ ང༌དང༌ངི༌ སྡིག༌པའེ༌ ཕིའ༌ ཆོད༌པ༌ ཕུལ༌ལ༌ ཛདས༌། ཏེ༌ཟུག༌ ཛད༌ཏེ༌ ཁོང༌ངི༌ ང༌དང༌གུན༌ནི༌ཀ༌ སྡིག༌པའེ༌ ཝང༌བོ༌ མེད༌ཁན༌ ཛདས༌།
ROM 8:4 ཁོང༌ངི༌ ཏེ༌བོ༌ ཅོའ༌ ཛད༌ཅེས༌སི༌ གྱུན༌ཚན༌ ནི༌, ཁྲིམས༌སི༌ འོས༌པའེ༌ སྒོས༌དོམ༌གུན༌, སྡིག༌པའེ༌ སྕོད༌པའེ༌ ནང༌ང༌ མི༌ཚེ༌ མ༌ཕུད༌ད༌, ཐུག༌ཉིད༌དི༌ ནང༌ང༌ མི༌ཚེ༌ ཕུད༌ཁན༌ ང༌དང༌གུན༌ནི༌ ནང༌ང༌, དྲན༌དྲའ༌ གྲུབ༌ཅེས༌པོ༌ ཨིན༌ནོག༌།
ROM 8:5 སྡིག༌པའེ༌ སྕོད༌པའེ༌ ཝང༌ངི༌ ཡོག༌ག༌ ལུས༌ཁན༌གུན༌ནི༌, ཏུས༌གྱུན༌ སྡིག༌པའེ༌ ལས༌ ཅོ༌ཨིན༌ སམ༌མ༌ནོག༌། ཨིན༌ནའང༌ ཏམ༌པའེ༌ ཐུག༌ཉིད༌དི༌ ཝང༌ངི༌ ཡོག༌ག༌ ཡོད༌ཁན༌གུན༌ནི༌, ཏུས༌གྱུན༌ ཐུག༌ཉིད༌ ཐུག༌ཉེས༌ཤིས༌སི༌ ལས༌ ཅོ༌ཨིན༌ སམ༌མ༌ནོག༌།
ROM 8:6 སྡིག༌ཅན༌ མི༌གུན༌ནི༌ སམ༌བ༌བོའེ༌, ཤི༌ཅེས༌ ཆོགས༌ལ༌ ཁྲིད༌ད༌ནོག༌། ཨིན༌ནའང༌ ཐུག༌ཉིད༌དི༌ ཝང༌ངི༌ ཡོག༌ག༌ ཡོད༌ཁན༌ནི༌ སམ༌བ༌བོའེ༌, མི༌ཚེ༌ དང༌ ཞི༌དེ༌ ཆོགས༌ལ༌ ཁྲིད༌ད༌ནོག༌།
ROM 8:7 སྡིག༌པའེ༌ སྕོད༌པའེ༌ ཏུས༌གྱུན༌ དཀོན༌མཆོག༌གི༌ གྱབ༌གལ༌ ཅོའ༌ནོག༌, ཅིའ༌ཟེར༌ན༌ ཏེ༌བོའེ༌ དཀོན༌མཆོག༌གི༌ ཁྲིམས༌ལ༌ ཁའ༌ མ༌ཉནས༌, ཡང༌ ཁའ༌ མ༌ནེ༌ མི༌ཉན༌།
ROM 8:8 ཏེན༌ན༌བོའེ༌ཕིའ༌ སྡིག༌པའེ༌ སྕོད༌པའེ༌ ཝང༌ངི༌ ཡོག༌ག༌ དུག༌ཁན༌གུན༌ནི༌, དཀོན༌མཆོག༌ ཐུག༌ཉེས༌ཅུག༌ མ༌ནེ༌ ཉན༌ན༌ མ༌ནོག༌།
ROM 8:9 ཀལ༌ཏེས༌ དཀོན༌མཆོག༌གི༌ ཐུག༌ཉིད༌ ཁྱོ༌ཞའེ༌ ནང༌ང༌ ཞུགས༌སད༌ན༌, ཁྱོ༌ཞ༌གུན༌ སྡིག༌པའེ༌ སྕོད༌པའེ༌ ཝང༌ངི༌ ཡོག༌ག༌ མེད༌པ༌, ཐུག༌ཉིད༌དི༌ ཝང༌ངི༌ ཡོག༌ག༌ ཡོད༌ཏེ༌ ཨིན༌ནོག༌། ཡང༌ སུ༌ཞིག༌གི༌ ནང༌ང༌ མ༌ཤི༌ཀའེ༌ ཐུག༌ཉིད༌ མེད༌, ཏེ༌ མི༌བོ༌ མ༌ཤི༌ཀའེ༌ མ༌ནོག༌།
ROM 8:10 མ༌ཤི༌ཀ༌ ཁྱོ༌ཞ༌གུན༌ནི༌ ནང༌ང༌ ཞུགས༌ས༌ནོག༌, སྡིག༌པའེ༌ ཞས༌ཏེ༌ ཁྱོ༌ཞའ༌ ཟུགས༌སི༌ ཐོག༌ནེ༌ ཤིའ༌ནོག༌ ཨིན༌ནའང༌, ཐུག༌ཉིད༌དི༌ ཁྱོ༌ཞའ༌ མི༌ཚེ༌ སལ༌ལ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོའ༌ ཛདས༌།
ROM 8:11 ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞང༌ཤུག༌ག༌ ཛད༌ཁན༌ནི༌ དཀོན༌མཆོག༌གི༌ ཐུག༌ཉིད༌ ཁྱོ༌ཞ༌གུན༌ནི༌ ནང༌ང༌ ནས༌ས༌ནོག༌། ཡང༌ ཀ༌ཟུག༌ དཀོན༌མཆོག༌གི༌ མ༌ཤི༌ཀ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞང༌ཤུག༌ག༌ ཛདས༌, ཁྱོ༌ཞའེ༌ ནང༌ང༌ ཡོད༌ཁན༌ནི༌ ཏེན༌ན༌ ཐུག༌ཉིད༌བོ༌ གྱུད༌ཏེ༌, ཁོང༌ངི༌, ཁྱོ༌ཞའེ༌ ཤི༌ཅེས༌ཅན༌ནི༌ ཟུགས༌པོའང༌ སྲོག༌ སལ༌ལ༌ ཛད༌ཨིན༌།
ROM 8:12 ཏེ༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ལ༌ སྡིག༌པའེ༌ སྕོད༌པའེ༌ ཅོས༌ ཟེར༌ཁན༌བོའ༌ ཁའ༌ཉན༌གོས༌ མེད༌པ༌ ཨིན༌ནོག༌།
ROM 8:13 ཀལ༌ཏེས༌ ཁྱོ༌ཞ༌གུན༌ནི༌ ཏེ༌བོའེ༌ ཟེར༌ཁན༌ ནང༌ཞིན༌ མི༌ཚེ༌ ཕུད༌ན༌, ཁྱོ༌ཞ༌གུན༌ ཤི༌ཨིན༌། ཨིན༌ནའང༌ ཀལ༌ཏེས༌ ཏམ༌པའེ༌ ཐུག༌ཉིད༌དི༌ ཁྱུད༌ གྱུད༌ཏེ༌ ཁྱོ༌ཞའེ༌ སྡིག༌པའེ༌ སྕོད༌པའེ༌ ལས༌གུན༌ ཤི༌ཅུག༌ན༌, ཁྱོ༌ཞ༌གུན༌ནི༌ དེན༌བའེ༌ མི༌ཚེ༌ ཕུད༌ད༌ནོག༌།
ROM 8:14 ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌དི༌ ཁྲིད༌ཁན༌གུན༌ དཀོན༌མཆོག༌གི༌ ཕྲུ༌གུ༌ ཨིན༌ནོག༌།
ROM 8:15 ཁྱོ༌ཞ༌གུན༌ལ༌ ཇིགས༌ཤེས༌སི༌ ཚེ༌ཡོག༌ གྱུར༌ཅུག༌ཁན༌ནི༌ ཐུག༌ཉིད༌བོ༌ ཐོབས༌ཏེ༌ མ༌ནོག༌། ཨིན༌ནའང༌ དཀོན༌མཆོག༌གི༌, ཕྲུ༌གུའི༌ ཚུལ༌ལ༌ སོས༌བུའ༌ ལེན༌ན༌ ཛད༌ཁན༌ནི༌ ཐུག༌ཉིད༌བོ༌ ཐོབས༌ཏེ༌ ཨིན༌ནོག༌། ཏ༌ ང༌དང༌གུན༌ནི༌ ཁོང༌ང༌ “ཨ༌བ༌, ཡབ༌ལེ༌,” མོལ༌ཨིན༌།
ROM 8:16 དཀོན༌མཆོག༌གི༌ ཐུག༌ཉིད༌དི༌, ང༌ཏི༌ ཐུག༌ཉིད༌ ཉམ༌པོ༌ ང༌དང༌ དཀོན༌མཆོག༌གི༌ ཕྲུ༌གུ༌ ཨིན༌ཁན༌བོའེ༌ སྤང༌པོ༌ སལ༌ལ༌ནོག༌།
ROM 8:17 ཡང༌ ང༌དང༌གུན༌ ཁོང༌ངི༌ ཕྲུ༌གུ༌ ཨིན༌ པ༌སང༌, ཁོང༌ངི༌ ནོར༌སྐལ༌ ལེན༌ཁན༌ མ༌ཚད༌, མ༌ཤི༌ཀ༌ ཉམ༌པོ༌ དཀོན༌མཆོག༌གི༌ ཟིར༌རྗིད༌, ལེན༌ཁན༌བོའང༌ ཨིན༌ནོག༌། ཨིན༌ནའང༌ ཀལ༌ཏེས༌ ང༌དང༌གུན༌ ཁོང༌ངི༌ ཟིར༌རྗིད༌པོའེ༌ ནང༌ང༌ དྲེས༌སད༌ན༌, ཏེ༌ནེ༌ ང༌དང༌གུན༌ ཁོང༌ངི༌ རྡུག༌ངལ༌ལི༌ ནང༌ངའང༌ དྲེས༌གོས༌།
ROM 8:18 དག༌ས༌ ང༌དང༌གུན༌ལ༌ ཇུང༌ཁན༌ནི༌ རྡུག༌ངལ༌བོ༌, སྟིང༌ཞིན༌ ཁོང༌ངི༌ ང༌དང༌གུན༌ལ༌ སལ༌ཅེས༌ཅན༌ནི༌ ཟིར༌རྗིད༌ ཉམ༌པོ༌ ལྡུར༌ན༌, ཏེ༌ནེ༌ ཏེ༌ རྡུག༌ངལ༌བོ༌ ཅའང༌ མེད༌པ༌ ཨིན༌ནོག༌།
ROM 8:19 དཀོན༌མཆོག༌གི༌ ཛད༌ཁན༌ ཚང༌མ༌, ཁོང༌ངི༌ དེན༌བའེ༌ ཕྲུ༌གུ༌གུན༌ སྔོན༌ ཅུག༌ག༌ ཛད༌ཅེས༌སི༌ ཏེ༌ ཞག༌པོའ༌, རིངས༌ཨིན༌ཞིག༌ སྲུངས༌ཏེ༌ ཨིན༌ནོག༌།
ROM 8:20 མི༌གུན༌ནི༌ ཕིའ༌ ཨིན༌ཁན༌ དཀོན༌མཆོག༌གི༌ ངན༌བོ༌, ཁོང༌ངི༌ ཛད༌ཁན༌ ཞན༌ ཚང༌མའེ༌ཀའང༌ ཕོག༌, ཀ༌བོ༌ ཏེ༌གུན༌ནི༌ དོད༌པ༌ མན༌པ༌ ཏེ༌གུན༌ ཛད༌ཁན༌ དཀོན༌མཆོག༌གི༌ ཐུག༌གོངས༌ ཨིན༌པིན༌། ཨིན༌ནའང༌ རེ༌ཝ༌ སྲན༌ཏྲེ༌ ཉམ༌པོ༌
ROM 8:21 ཁོང༌ངི༌ ཛད༌ཁན༌ ཚང༌མའེ༌ ཡོང༌ཅེས༌ཅན༌ནི༌ ཞག༌པོའ༌ སྲུངས༌, ནམ༌ ཏེ༌གུན༌ དཀོན༌མཆོག༌གི༌ ཕྲུ༌གུ༌གུན༌ ཉམ༌པོ༌, ཤི༌ཅེས༌ དང༌ རུལ༌ཅེས༌ མེད༌ཁན༌ནི༌, ཟིར༌རྗིད༌ཅན༌ནི༌ ཐར༌པའེ༌ ནང༌ང༌ ཛོམ༌ཨིན༌།
ROM 8:22 ང༌དང༌ང༌ གྱུས༌ཨིན༌ནོག༌, ཁོང༌ངི༌ ཛད༌ཁན༌ ཚང༌མའ༌ དག༌ས༌ ཚོག༌པའང༌, ཕྲུ༌གུ༌ སྐྱེ༌ ཟ༌ནེ༌ སྐྱེ༌ཟེར༌ ཡོང༌ང༌ ཙོགས༌ལ༌ བར༌དོ༌ ཇུང༌ཨིན༌ ཨིན༌ནོག༌།
ROM 8:23 ཡང༌ ཏམ༌པའེ༌ ཐུག༌ཉིད༌ ཀ༌བོ༌ ཡོང༌ཅེས༌ཅན༌ནི༌ ཅིན༌ལབས༌ གང༌པོའེ༌ ཁག༌ཤིག༌ ཨིན༌, ཏེ༌བོ༌ ཐོབ༌ཁན༌ ང༌དང༌གུན༌ནིའང༌ བར༌དོ༌ ཁུར༌ཨིན༌ ཏེ༌ ཞག༌པོའ༌ རིངས༌ཨིན༌ སྲུང༌ང༌ནོག༌། ཡང༌ དཀོན༌མཆོག༌གི༌ སོས༌བུའ༌ ལེན༌ན༌ ཛད༌ཁན༌ནི༌ ཕྲུ༌གུ༌གུན༌ ཙོགས༌ལ༌, ཁོང༌ངི༌ ང༌དང༌ང༌ ཐོབ༌ཏང༌ གང༌པོ༌ སལ༌ཅེས༌, མ༌ཚད༌ ཟུགས༌པོ༌ སོ༌མ༌ཞིག༌གི༌ ཞལ༌ཆད༌ ཛད༌ཁན༌ནི༌ ཞག༌པོའེ༌ ཕིའ༌ རེ༌ཝ༌ སྲན༌ཏྲེ༌ ཉམ༌པོ༌ སྲུང༌ང༌ནོག༌།
ROM 8:24 ང༌དང༌གུན༌ སྐྱོབ༌བ༌ ཛད༌ ཟ༌ནེ༌, ང༌དང༌གུན༌ལ༌ ཏེ༌ རེ༌ཝ༌བོ༌ སལ༌ལ༌ ཛདས༌། ༼ཀལ༌ཏེས༌ རེ༌ཝ༌ བོར༌ཁན༌བོ༌ ང༌ཏི༌ ལག༌ག༌ ཡོད༌པིན༌ན༌, ཏེ༌ནེ༌ ང༌དང༌གུན༌ལ༌ ཏེ༌བོའེ༌ཕིའ༌ རེ༌ཝ༌ ཅོ༌གོས༌ མེད༌པ༌ ཨིན༌ནོག༌།
ROM 8:25 ཨིན༌ནའང༌ ཀལ༌ཏེས༌ ང༌དང༌གུན༌ནི༌ དག༌ས༌ ང༌ཏི༌ ལག༌ག༌ མེད༌ཁན༌བོའེ༌ རེ༌ཝ༌ ཅོའད༌ན༌, ང༌དང༌གུན༌ནི༌ ཏེ༌བོའ༌ ཟོད༌པ༌ དང༌ ལོ༌ཁྱེལ༌ ཉམ༌པོ༌ སྲུང༌གོས༌།༽
ROM 8:26 ཡང༌ ང༌དང༌གུན༌ནི༌ འུ༌ཐུགས༌སི༌ ནང༌ང༌, ཏམ༌པའེ༌ ཐུག༌ཉིད༌དི༌ ང༌དང༌གུན༌ལ༌ རོགས༌ ཅོའ༌ ཛད༌ད༌ནོག༌། སྤེར༌ན༌, དཀོན༌མཆོག༌གི༌ ཐུག༌གོངས༌ ནང༌ཞིན༌ ང༌དང༌ངི༌ མོས༌ལམ༌ ཀ༌ཟུག༌ཤིག༌ ཡོང༌གོ༌ཤེས༌པོ༌ ང༌དང༌གུན༌ལ༌ གྱུས༌ མེད༌པ༌ ཨིན༌ནོག༌། ཨིན༌ནའང༌ ཏམ༌པའེ༌ ཐུག༌ཉིད༌དི༌, ང༌དང༌གུན༌ནི༌ ཕིའ༌ སྙིང༌ཤུགས༌ ཉམ༌པོ༌ མོས༌ལམ༌ ཕུལ༌ལ༌ནོག༌, ཀ༌བོ༌ ང༌དང༌ང༌ ཚིགས༌ ཀོལ༌ཏེ༌ ཤད༌ མ༌ཉན༌ན༌ ཨིན༌ནོག༌།
ROM 8:27 ཡང༌ སྙིང༌ ཚང༌མ༌ ཁྱེན༌ན༌ ཛད༌ཁན༌ནི༌ ཡབ༌བི༌, ཐུག༌ཉིད༌དི༌ མོལ༌ཁན༌བོའང༌ ཁྱེན༌ན༌ ཛད༌ད༌ནོག༌། ཅིའ༌ཞུ༌ན༌ ཐུག༌ཉིད༌དི༌, དཀོན༌མཆོག༌ག༌ ང༌དང༌ ཏད༌པ༌ཅན༌གུན༌ནི༌ ཕིའ༌ ཁོང༌ངི༌ ཐུག༌གོངས༌ ནང༌ཞིན༌ལ༌ ཞུ༌ཝ༌ ཕུལ༌ལ༌ ཛད༌ད༌ནོག༌།
ROM 8:28 དཀོན༌མཆོག༌ག༌ ཅེས༌པ༌ ཅོ༌ཁན༌ དང༌ ཁོང༌ངི༌ གྱུན༌ཚན༌ གྲུབ༌ཅེས༌ལ༌ བོད༌ད༌ ཛད༌ཁན༌ ང༌དང༌གུན༌ནི༌ ཕན༌ཐོགས༌སི༌ ཕིའ༌, ཁོང༌ངི༌ ང༌དང༌གུན༌ནི༌ མི༌ཚེའེ༌ ནང༌ང༌ ཇུང༌ཁན༌ ཚང༌མ༌ ཀོལ༌ལ༌ ཛད༌ཅེས༌པོ༌, ང༌དང༌གུན༌ལ༌ གྱུས༌ཨིན༌ནོག༌།
ROM 8:29 དཀོན༌མཆོག༌གི༌ ཁོང༌རང༌ངི༌ མི༌གུན༌ གོ༌ཟུག༌ནེ༌ ཕར༌ལ༌ ཁྱེན༌ན༌ ཛད༌ཏེ༌ ཁོང༌གུན༌ལ༌ ཁོང༌རང༌ངི༌ སྲས༌ ཙོགས༌ གྱུར༌ཅེས༌ལ༌ ལྡམ༌མ༌ ཛདས༌། ཡང༌ ནང༌ཚངས༌ ཆེན༌མོའེ༌ ནང༌ང༌ ཁོང༌ངི༌ སྲས༌ གོ༌སྐྱེས༌པོ༌ གྱུར༌ཨིན༌།
ROM 8:30 ཡང༌ ལྡམ༌མ༌ ཛད༌ཁན༌གུན༌, ཁོང༌རང༌ ཡོད༌ས༌ བོད༌ད༌ ཛདས༌། ཡང༌ བོད༌ད༌ ཛད༌ཁན༌གུན༌, ཁོང༌རང༌ངི༌ སྐུན༌དུན༌ལ༌ ཀྲང༌པོ༌ ཅོའ༌ ཛདས༌། ཡང༌ ཀྲང༌པོ༌ ཅོའ༌ ཛད༌ཁན༌གུན༌ ཉམ༌པོ༌ ཁོང༌རང༌ངི༌ ཟིར༌རྗིད༌བོའང༌ བགོའ༌ཛདས༌།
ROM 8:31 ཏེ༌ ཧ༌ལས༌ཤེས༌སི༌ ཅིན༌ལབས༌གུན༌ནི༌ སྐོར༌ལ༌ ཏ༌ ང༌དང༌གུན༌ནི༌ ཅི༌ ཟེར༌གོས༌? ཀལ༌ཏེས༌ དཀོན༌མཆོག༌ ང༌དང༌གུན༌ནི༌ ཆོགས༌ལ༌ ཨིན༌ན༌, ཏེ༌ནེ༌ ང༌དང༌གུན༌ནི༌ གྱབ༌གལ༌ལ༌ སུའ༌ གྱལ༌ ཐོབ༌ཨིན༌།
ROM 8:32 དཀོན༌མཆོག༌གི༌ ཁོང༌ངི༌ སྲས༌པོའང༌ མ༌ཕུད༌ད༌, ང༌དང༌ ཚང༌མའེ༌ ཏོན༌ལ༌ སལ༌ལ༌ ཛདས༌། ཏེ༌ནེ༌ ཅི༌ ཁོང༌ངི༌ ང༌དང༌གུན༌ལ༌ ཡང༌ སྒོས༌དོམ༌ ཚང༌མ༌ སལ༌ལ༌ མི༌ཛད༌ད༌?
ROM 8:33 དཀོན༌མཆོག༌གི༌ ལྡམ༌མ༌ ཛད༌ཁན༌ ང༌དང༌གུན༌ནི༌ གྱབ༌གལ༌ལ༌ སྐྱོན༌ སུའ༌ ཀལ༌ཉན༌ཨིན༌? དཀོན༌མཆོག༌གི༌ ང༌དང༌གུན༌ ཁོང༌རང༌ངི༌ སྐུན༌དུན༌ལ༌ ཀྲང༌པོ༌ ཅོའ༌ ཛདས༌།
ROM 8:34 ཏེ༌ནེ༌ སུའི༌ ང༌དང༌གུན༌ ཤི༌ཅེས༌ལ༌ འོས༌པའ༌ ཨིན༌ཁན༌བོའེ༌ ཁྲིམས༌ཅད༌ ཏང༌ཨིན༌? སུ༌ཞིག༌གིའང༌ མི༌ཏང༌, ཅིའ༌ཞུ༌ན༌ མ༌ཤི༌ཀ༌ ཡེ༌ཤུ༌ ང༌དང༌གུན༌ནི༌ ཏོན༌ལ༌ ཀྲོངས༌ཏེ༌, སོན༌ཏེའ༌ ཞངས༌ས༌ ཛདས༌། ཡང༌ ཁོང༌ངི༌ དཀོན༌མཆོག༌གི༌ ཆག༌ ཡས༌པའེ༌ རྩི༌ཝ༌ཅན༌ནི༌ ཞུགས༌ཁྲིས༌སི༌ཀ༌ ཞུགས༌ཏེ༌ ང༌དང༌གུན༌ནི༌ ཕིའ༌ མོས༌ལམ༌ ཕུལ༌ལ༌ནོག༌།
ROM 8:35 ཏེ༌ནེ༌ སུའི༌ ང༌དང༌གུན༌ མ༌ཤི༌ཀའེ༌ ཅེས༌པ༌ནེ༌ ཕེ༌ཉན༌ཨིན༌? ནགས༌, ཀགས༌པོ༌, རྡུག༌ངལ༌, མུ༌གེ༌, ལྗེར༌ཉལ༌, ཇིགས༌པ༌, ཡ༌ ར༌འི༌ ཀ༌ནེ༌ ཤི༌ཅེས༌།
ROM 8:36 ཏམ༌པའེ༌ སུང༌རབས༌སི༌ ནང༌ང༌ གྱལ༌པོ༌ དཱ༌བིད༌དི༌ མོལ༌ཏེ༌ ཨིན༌ནོག༌, “ཉེ༌རང༌ངི༌ ཕིའ༌ ང༌ཞ༌གུན༌ ཞག༌ཏང༌ སད༌དུག༌། ང༌ཞ༌གུན༌ ལུག༌ ཙོགས༌ལ༌ སྐྱེ༌ ཅད༌ཏེ༌ སད༌དུག༌།”
ROM 8:37 མི༌ཉན༌, ང༌དང༌གུན༌ མ༌ཤི༌ཀའེ༌ ཅེས༌པ༌ནེ༌ མ༌ནེ༌ ཕེ༌མི༌ཉན༌། ང༌དང༌ང༌ ཅེས༌པ༌ ཛད༌ཁན༌ མ༌ཤི༌ཀ༌ གྱུད༌ཏེ༌, ཏེ༌ ཚང༌མའེ༌ ནང༌ང༌ ང༌དང༌གུན༌ གྱལ༌ཁའ༌ ཐོབ༌ཁན༌ནི༌ སང༌ ཀྲག༌ག༌ཞིག༌ ཨིན༌ནོག༌།
ROM 8:38 ང༌ ཏན༌ཏན༌ ལོ༌ཁྱེལ༌ རག༌, འི༌ ཝང༌གུན༌ནི༌ ང༌དང༌ དཀོན༌མཆོག༌གི༌ ཅེས༌པ༌ནེ༌ ཕེ༌མི༌ཉན༌: སྤེར༌ན༌, ཤི༌ཅེས༌ ཡ༌ མི༌ཚེའེ༌, ཕོ༌ཉ༌གུན༌ ཡ༌ རྡུད༌གུན༌ནི༌, འི༌ཏུས༌ ཡ༌ ཡོང༌ཅེས༌ཅན༌ནི༌ ཏུས༌སི༌, ཡ༌ ཉལ༌ཝའེ༌,
ROM 8:39 ནམ༌མི༌ ནང༌ང༌ ཡོད༌ཁན༌ ཡ༌ སའེ༌ ཡོག༌ག༌, ཏན༌ཏན༌ལ༌ དཀོན༌མཆོག༌གི༌ ཛད༌ཁན༌ ཚང༌མའེ༌ ནང༌ནེ༌ ཅིག༌གིའང༌ ང༌དང༌གུན༌ དཀོན༌མཆོག༌གི༌ ཅེས༌པ༌ནེ༌ ཕེ༌མི༌ཉན༌, ཀ༌བོ༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌།
ROM 9:1 ངའེ༌ ཟེར༌ཁན༌བོ༌ ཀྲང༌པོ༌ ཡང༌ ཟུན༌ ཏངས༌ཏེ༌ མན༌ཁན༌བོའེ༌ སྤང༌པོ༌ མ༌ཤི༌ཀ༌ ཨིན༌། ངའེ༌ སེམས༌ དང༌ ཏམ༌པའེ༌ ཐུག༌ཉིད༌དི༌ ཏེ༌བོ༌ ཏན༌ཏན༌ ཅོའ༌ནོག༌།
ROM 9:2 ང༌རང༌ངི༌ མི༌, ཡ༌ཧུ༌དཱ༌པའེ༌ སྤུན༌གུན༌ནི༌ ཕིའ༌ ངའེ༌ སྙིང༌བོ༌ རྡུག༌ངལ༌ ཆེན༌མོ༌ དང༌ ཐའ༌མེད༌པའེ༌ ཚེར༌ཁའེ༌ གངས༌ཏེ༌ རག༌། ཀལ༌ཏེས༌ མ༌ཤི༌ཀ༌ ཉམ༌པོ༌ ངའེ༌ བྲེལ༌ ཆད༌ཏེ༌ ང༌ ཏུས༌གྱུན༌ནི༌ ཕིའ༌ ངན༌ ཕོག༌ཅེས༌པོའེ༌, ཁོང༌གུན༌ སྐྱོབ༌ཐུབ༌བད༌ན༌, ང༌ ཏེ༌གུན༌ ལེན༌ཅེས༌ལ༌ ཐད༌ད༌རག༌།
ROM 9:4 ཁོང༌གུན༌ ཨིས༌ར༌ཨེལ༌པ༌, དཀོན༌མཆོག༌གི༌ སོས༌བུའ༌ ལྡམ༌མ༌ ཛད༌ཁན༌ནི༌ ཕྲུ༌གུ༌གུན༌ ཨིན༌ནོག༌། དཀོན༌མཆོག༌གི༌ ཟིར༌རྗིད༌པོ༌ ཁོང༌གུན༌ལ༌ ཇལ༌ ཅུག༌ག༌ ཛདས༌, ཡང༌ ཁོང༌གུན༌ ཉམ༌པོ༌ ཆད༌དོན༌ ཅོའ༌ ཛད༌ཏེ༌ ཁོང༌གུན༌ལ༌ ཁོང༌རང༌ངི༌ ཁྲིམས༌ སལ༌ལ༌ ཛདས༌། དཀོན༌མཆོག༌གི༌ ཁོང༌གུན༌ལ༌ ཁོང༌ངི༌ ཧ༌ལས༌ཤེས༌སི༌ ཞལ༌ཆད༌གུན༌ ཐོབ༌ཅེས༌ དང༌ ཁོང༌ང༌ ཅོལ༌ཅེས༌སི༌ རྩི༌ཝ༌ སལ༌ལ༌ ཛདས༌།
ROM 9:5 ཨབ༌ར༌ཧམ༌, ཨི༌སཱག༌ དང༌, ཡ༌ཀོབ༌ གུན༌, ཁོང༌གུན༌ནི༌ ཕ༌མེས༌པོ༌ ཨིན༌ནོག༌། མ༌ཤི༌ཀ༌ མིའི༌ ཚུལ༌ལ༌ ལྟམས༌ ཟ༌ནེ༌, ཁོང༌ ཨིས༌ར༌ཨེལ༌པ༌ཞིག༌ ཞུགས༌ཏེ༌ ཨིན༌པིན༌། ཡང༌ ཁོང༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌། ཁོང༌ ནི༌ ཅི༌ཚང༌མའེ༌ཀ༌ ཝང༌སྲུལ༌ ཛད༌ཁན༌ དང༌ ཏུས༌གྱུན༌ སྟོད༌པ༌ ཐོབ༌ཅེས༌སི༌ འོས༌པ༌ ཨིན༌ནོག༌, ཨ༌མེན༌།
ROM 9:6 ཏེ༌ནེ༌ ཅི༌? དཀོན༌མཆོག༌གི༌ ཨིས༌ར༌ཨེལ༌པ༌གུན༌ལ༌ ཛད༌ཁན༌ནི༌ ཞལ༌ཆད༌པོ༌ དྲན༌དྲའ༌ མ༌གྲུབ༌བ༌ ཨིན༌ནོག༌ག༌? མ༌ནེ༌ མ༌ནོག༌། ཨིས༌ར༌ཨེལ༌ལི༌ ཡུལ༌ལ༌ སྐྱེས༌ཁན༌གུན༌ནི༌ ནང༌ནེའང༌ ཚང༌མ༌, དཀོན༌མཆོག༌གི༌ མི༌གུན༌ནི༌ ནང༌ང༌ ཐེའ༌ མ༌ཛདས༌།
ROM 9:7 ཨབ༌ར༌ཧམ༌མི༌ པུར༌གྱུད༌ ཨིན༌ཁན༌གུན༌ནི༌ ནང༌ནེའང༌ ཚང༌མ༌, ཨབ༌ར༌ཧམ༌མི༌ དེན༌བའེ༌ ཕྲུ༌གུ༌ མ༌ནོག༌, ཅིའ༌ཞུ༌ན༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཨི༌སཱག༌ ནི༌ ཏེན༌ན༌ བུ༌ཚ༌བོ༌ ཨིན༌, ཀ༌བོ༌ གྱུད༌ཏེ༌ ཁྱོ༌རང༌ངི༌ པུར༌གྱུད༌གུན༌ ཇུང༌ཨིན༌།”
ROM 9:8 ཏེ༌བོའེ༌ ཏོན༌ ནི༌, ཟུགས༌སི༌ ཐོག༌ནེ༌ ཨབ༌ར༌ཧམ༌མི༌ པུར༌གྱུད༌གུན༌ དཀོན༌མཆོག༌གི༌ ཕྲུ༌གུ༌ མ༌ཐེའ༌, ཞལ༌ཆད༌ ཛད༌ཁན༌ནི༌ པུར༌གྱུད༌གུན༌, ཨབ༌ར༌ཧམ༌མི༌ ཕྲུ༌གུ༌ ཐེའ༌ ཛད༌ཨིན༌,
ROM 9:9 ཅིའ༌ཟེར༌ན༌ དཀོན༌མཆོག༌གི༌ ཞལ༌ཆད༌ ཛདས༌, “སྟིང༌མ༌ ལོ༌, ཧ༌ལམ༌ འིན༌ན༌ཏུས༌ཤིག༌ག༌ ང༌ ལོགས༌ཏེ༌ ཡོང༌ ཟ༌ནེ༌ སཱ༌ར༌, བུ༌ཚ༌ཞིག༌ སྐྱེས༌ཏེ༌ ཡོང༌ཨིན༌།”
ROM 9:10 འི༌ བུ༌ཚ༌བོ༌ ང༌དང༌གུན༌ནི༌ ཕ༌མེས༌པོ༌ ཨི༌སཱག༌ ཨིན༌པིན༌། ཁོའེ༌ ར༌བེ༌ཀ༌ ན༌མ༌ ཅོས༌ ཡང༌ ར༌བེ༌ཀ༌ བུ༌ཚ༌ ཚག༌ཕྲུག༌ ཇོར༌།
ROM 9:11 ཨིན༌ནའང༌ ཁོང༌གུན༌ སྐྱེ༌ སང༌ སྔུན༌ལ༌, ཡང༌ ཁོང༌གུན༌ནི༌ ཟང༌པོ༌ ཡ༌ ངན༌པ༌ ཅོའེ༌ སང༌ སྔུན༌ལ༌, ར༌བེ༌ཀ༌ དཀོན༌མཆོག༌གི༌ ཆོགས༌ནེ༌ ལོན༌ཞིག༌ ཐོབ༌། ༼འི༌ ལོན༌བོའེ༌ ཏོན༌ ནི༌, དཀོན༌མཆོག༌གི༌ མི༌གུན༌ ཁོང༌རང༌ངི༌ གྱུན༌ཚན༌ཞིག༌གི༌ ཕིའ༌ ལྡམ༌མ༌ ཛདས༌,
ROM 9:12 ཁོང༌ངི༌ མི༌གུན༌ བོད༌ད༌ ཛདས༌, ཨིན༌ནའང༌ ཁོང༌གུན༌ནི༌ ལས༌ ཟང༌པོ༌ ཡ༌ ངན༌པ༌ གུན༌ནི༌ཀ༌ རག༌ལས༌ཏེ༌ མ༌ནོག༌།༽ ཁོང༌ངི༌ ར༌བེ༌ཀ༌ མོལས༌, “ཁྱོ༌རང༌ངི༌ བུ༌ཚ༌ ཆེའ༌བོའེ༌ ཆུང༌ང༌བོའ༌ ཞབས༌ཏོག༌ ཞུ༌ཨིན༌།”
ROM 9:13 ཏེ༌ཟུག༌ གྲུབ༌ཅེས༌ལ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ངའེ༌ ཡ༌ཀོབ༌བ༌ ཅེས༌པ༌ ཅོའད༌ ཨིན༌ནའང༌ ཨི༌སུ༌ གྱབ༌ གྱུར༌རད༌།”
ROM 9:14 ཏེ༌ནེ༌ ང༌དང༌གུན༌ནི༌, དཀོན༌མཆོག༌ མི༌འོས༌པ༌ ཛད༌ཁན༌ཞིག༌ ཞུགས༌ཏེ༌ ཨིན༌ནོག༌ ཟེར༌ཨིན༌ན༌? མ༌ནེ༌ མ༌ནོག༌།
ROM 9:15 དཀོན༌མཆོག༌གི༌ མོ༌ཟེས༌ལ༌ མོལ༌ལ༌ ཛདས༌, “ངའེ༌ ལྡམ༌ཁན༌གུན༌ནི༌ཀ༌ སྙིང༌རྗེ༌ སྟན༌ཨིན༌, ཡང༌ ངའེ༌ ལྡམ༌ཁན༌གུན༌ནི༌ཀ༌ ཅམས༌པ༌ སྟན༌ཨིན༌།”
ROM 9:16 ཏེན༌ན༌བོའེ༌ཕིའ༌ ཏེ༌བོ༌ མི༌ དོད༌པ༌ ཡ༌ རྩོན༌གྲུས༌སི༌ཀ༌ མན༌པ༌, དཀོན༌མཆོག༌གི༌ སྙིང༌རྗེ༌ཀ༌ རག༌ལས༌ཏེ༌ ཨིན༌ནོག༌།
ROM 9:17 དཀོན༌མཆོག༌གི༌ ཨི༌ཇིབ༌བི༌ གྱལ༌པོ༌ ཕེ༌རོའ༌ མོལ༌ཁན༌བོ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཨིན༌ནོག༌, “ཁྱོ༌རང༌ངི༌ ནང༌ང༌ ངའེ༌ ཤེད༌པོ༌ སྟན༌ཅེས༌ དང༌ ངའེ༌ མིང༌བོ༌ ཇིག༌རྟེན༌ གང༌པོའེ༌ ནང༌ང༌ ཕེལ༌ཅུག༌ཅེས༌སི༌ ཕིའ༌ ངའེ༌ ཁྱོ༌རང༌ ལྡམས༌ཏེ༌ ཨིན༌།”
ROM 9:18 ཏེན༌ན༌བོའེ༌ཕིའ༌ དཀོན༌མཆོག༌གི༌ སྙིང༌རྗེ༌ སྟན༌ཅེས༌སི༌ ཐུགས༌དོད༌ ཡོད༌ཁན༌གུན༌ནི༌ཀ༌ སྙིང༌རྗེ༌ སྟན༌ན༌ ཛད༌ཨིན༌, ཡང༌ ཁོང༌ངི༌ སྙིང༌ སྐྱོང༌པོ༌ ཅོའ༌ ཛད༌ཅེས༌སི༌ ཐུགས༌དོད༌ ཡོད༌ཁན༌གུན༌ནི༌ སྙིང༌གུན༌ སྐྱོང༌པོ༌ ཛད༌ཨིན༌།
ROM 9:19 ཁྱོ༌ཞ༌གུན༌ནི༌ ཟེར༌སྲིད༌ཅེས༌ ཨིན༌ནོག༌, “སེམས༌ གྱུར༌ཏེ༌ གྱོད༌པ༌ མ༌ཅོ༌ཁན༌གུན༌ལ༌ ཅིའ༌ དཀོན༌མཆོག༌གི༌ སྐྱོན༌ ཀལ༌ལ༌ ཛད༌ད༌ནོག༌? དཀོན༌མཆོག༌གི༌ ཁོང༌གུན༌ལ༌ ཅོ༌ ཅུག༌ག༌ ཛད༌ཁན༌བོ༌ ཁོང༌གུན༌ནི༌ ཅོས༌ཏེ༌ མ༌ནོག༌ག༌?
ROM 9:20 ཨིན༌ནའང༌ དཀོན༌མཆོག༌གི༌ གྱབ༌གལ༌ལ༌ སྤེ༌ར༌ ཟེར༌ཁན༌ ཁྱོ༌རང༌ མི༌ སུ༌ ཨིན༌? ཅོ༌ཁན༌བོའེ༌ ཅོའ༌ ཛད༌ཁན༌བོའ༌ ཟེར༌གོས༌ས༌, ‘ཅིའ༌ ཉེ༌རང༌ངི༌ ང༌ འི༌ཙོགས༌ ཅོའ༌ ཛད༌ཏེ༌ ཨིན༌?’”
ROM 9:21 ཟ༌མ༌ ཅོ༌ཁན༌ཞིག༌གི༌ ཏེན༌ན༌ ཀ༌ལག༌པོའེ༌ ཀ༌ནེ༌ ཟ༌མ༌ ཅིག༌, རྩི༌ཝ༌ཅན༌ནི༌ ལས༌ལ༌ ཀོལ༌ཅེས༌, ཡང༌ ཅིག༌ ཞག༌ཏང༌ངི༌ ལས༌ལ༌ ཀོལ༌ཅེས༌སི༌ ཕིའ༌, ཅོ༌ཅེས༌སི༌ ཐོབ༌ཏང༌ ཁོའ༌ མེད༌པ༌ ཨིན༌ནོག༌ག༌?
ROM 9:22 ཏེན༌ན༌ ཙོགས༌ལ༌, ཞན༌ དཀོན༌མཆོག༌ག༌ ཁོང༌རང༌ངི༌ ཐུགས༌སྲོ༌ དང༌ ཤེད༌པོ༌ སྟན༌ཅེས༌སི༌ ཐོབ༌ཏང༌ ཡོད༌ནའང༌, ཁོང༌ངི༌ ཐུགས༌སྲོ༌ བབས༌ཤེས༌ དང༌ ཁྲེས༌ཏོར༌ ཆ༌ཅེས༌ ཆོགས༌ལ༌ ཆའ༌ཁན༌གུན༌ནི༌ཀ༌ མ༌སྲན༌ཏྲེ༌ ཟོད༌པ༌ སྒོམ༌མ༌ ཛད༌ད༌ནོག༌།
ROM 9:23 ཁོང༌ངི༌ སྙིང༌རྗེ༌ སྟན༌ན༌ ཛད༌ཁན༌གུན༌ནི༌ཀ༌ ཁོང༌ངི༌ ཐུག༌རྗེ༌ ཙམ༌ཤིག༌གི༌ གྱས༌པ༌ ཨིན༌ཁན༌བོ༌ སྟན༌ཅེས༌ལ༌ ཁོང༌ངི༌ ཏེ༌བོ༌ ཅོའ༌ ཛདས༌། ཡང༌ ཁོང༌ངི༌ ཁོང༌གུན༌ སྔུན༌ནེ༌ ཕར༌ལ༌ ནམ༌ཁའེ༌ ནང༌ང༌ ཟིར༌རྗིད༌ཅན༌ནི༌ ནས༌སའེ༌ ཕིའ༌ གྲལ༌གྲིག༌ ཅོའ༌ ཛད༌ཏེ༌ ཨིན༌པིན༌།
ROM 9:24 ཁོང༌ངི༌ ལྡམ༌མ༌ ཛད༌ཁན༌གུན༌ནི༌ ནང༌ང༌ ང༌དང༌གུན༌ནའང༌ ཨིན༌ནོག༌, ཡ༌ཧུ༌དཱ༌པ༌གུན༌ ཅིག༌པོའེ༌ ཕིའ༌ མན༌པ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌ ཨིན༌ནོག༌།
ROM 9:25 ཀ༌ཟུག༌ ཡ༌ཧུ༌དཱ༌པ༌ མན༌ཁན༌གུན༌ནི༌ སྐོར༌ལ༌ ལུང༌སྟོན༌པ༌ ཧོ༌ཤཱ༌ཡི༌ སྤེ༌ཆའེ༌ ནང༌ང༌ དཀོན༌མཆོག༌གི༌ མོལ༌ལ༌ ཛདས༌, “ངའེ༌ མན༌ཁན༌ནི༌ མི༌གུན༌ལ༌ ངའེ༌ ང༌རང༌ངི༌ མི༌ ཟེར༌ཨིན༌། ཡང༌ ངའེ༌ ཅེས༌པ༌ མ༌ཅོ༌ཁན༌གུན༌ལ༌ ངའེ༌ ཅེས༌པ༌ ཅོ༌ཨིན༌། ”
ROM 9:26 ཡང༌ “‘ཁྱོ༌རང༌གུན༌ ངའེ༌ མི༌གུན༌ མན༌’ མོལ༌ཁན༌ནི༌ ཏེན༌ན༌ ནས༌ས༌བོའེ༌ཀ༌ ཁོང༌གུན༌ལ༌, ‘སོན༌པོ༌ དཀོན༌མཆོག༌གི༌ ཕྲུ༌གུ༌གུན༌’ མོལ༌ཨིན༌།”
ROM 9:27 ཡང༌ ཨིས༌ར༌ཨེལ༌པ༌གུན༌ནི༌ སྐོར༌ལ༌ ལུང༌སྟོན༌པ༌ ཡེ༌ཤ༌ཡཱའེ༌ ཀུ༌ཅོ༌ ཏང༌ཨིན༌ ཟེརས༌, “ཞན༌ ཨིས༌ར༌ཨེལ༌ལི༌ མི༌གུན༌ གྱ༌ཚོའེ༌ ཐའ༌མ༌ ཡོད༌ཁན༌ནི༌ པེ༌མ༌ ཙོགས༌ མང༌པོ༌ ཡོད༌ཏེའང༌, ཁ༌ཅིག༌ མ༌ནེ༌ མི༌སྐྱོབ༌།
ROM 9:28 ཅིའ༌ཟེར༌ན༌ གཙོ༌བོའེ༌, ཁོང༌རང༌ངི༌ ཆད༌པ༌བོ༌ འི༌ ཇིག༌རྟེན༌ནི༌ཀ༌ གྱོགས༌པ༌ དང༌ གང༌པོ༌ ཁྱོང༌ང༌ ཛད༌ཨིན༌།”
ROM 9:29 ཏམ༌པའེ༌ སུང༌རབས༌སི༌ ཞན༌ཡང༌ ནས༌ས༌ཞིག༌གི༌ ནང༌ང༌ ཡེ༌ཤ༌ཡཱའེ༌ འིན༌ན༌ སྤེ༌ར༌བོ༌ བྲིའ༌ ཛད༌ཏེ༌ ཨིན༌ནོག༌, “ཀལ༌ཏེས༌ ནམ༌ཁའེ༌ མག༌མི༌གུན༌ནི༌ གཙོ༌བོའེ༌, ང༌ཏི༌ ཕྲུ༌གུ༌ ཉུ༌ངུན༌ཞིག༌ ཕུད༌ད༌ མ༌ཛད༌པིན༌ན༌, ཏེ༌ནེ༌ ང༌དང༌གུན༌ སོ༌དོམ༌པ༌ ཙོགས༌ལ༌ མེད༌ཁན༌ ཡང༌ ག༌མོ༌ར༌པ༌ ཙོགས༌ལ༌ ཁྲེས༌ཏོར༌ ཅོའ༌ ཛད༌ཏེ༌ ཡོད༌གྲོ༌།”
ROM 9:30 ཏེ༌ ཚང༌མའེ༌ ཏོན༌བོ༌ ཏེ༌ནེ༌ ཅི༌ ཨིན༌ནོག༌? ཞན༌ ཡ༌ཧུ༌དཱ༌པ༌ མན༌ཁན༌གུན༌ནི༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ རྩོན༌གྲུས༌ མ༌ཅོ༌ནའང༌, ཁོང༌གུན༌ནི༌ ཏད༌པ༌ ཅོ༌ཅེས༌པོའེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌།
ROM 9:31 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཁྲིམས༌གུན༌ ཁའ༌ཉན༌ཏེ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ མ༌སྲན༌ཏྲེ༌ རྩོན༌གྲུས༌ ཅོ༌ནའང༌, ཁྲངས༌པོ༌ མ༌ནེ༌ མ༌ལུས༌།
ROM 9:32 ཅིའ༌ ཁྲངས༌པོ༌ མ༌ལུས༌? ཅིའ༌ཟེར༌ན༌ ཁོང༌གུན༌ནི༌ ཏད༌པ༌ མན༌པ༌, ཁྲིམས༌ ཁའ༌ཉན༌ཏེ༌ ལས༌ ཅོ༌ཅེས༌པོ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ རྩོན༌གྲུས༌ ཅོས༌། ཁོང༌གུན༌ ཁོང༌རང༌གུན༌ནི༌ ལམ༌མི༌ཀ༌ ཡོད༌ཁན༌ནི༌ རྡོའ༌ ཆེན༌མོའེ༌ཀ༌ སྒག༌གྱབས༌ཏེ༌ ཨིན༌ནོག༌།
ROM 9:33 དཀོན༌མཆོག༌གི༌ ཡ༌ཧུ༌དཱ༌པ༌གུན༌ལ༌ ཏེ༌བོའེ༌ སྐོར༌ལ༌ སྤང༌པུད༌ད༌ ཛདས༌, ནམ༌ ཁོང༌ངི༌ ཏམ༌པའེ༌ སུང༌རབས༌སི༌ ནང༌ང༌ མོལས༌, “ངའེ༌ ཡེ༌རུ༌ཤ༌ལེམ༌མི༌ ནང༌ང༌ མི༌གུན༌ལ༌ སྒག༌གྱབ༌ཅུག༌ཁན༌ནི༌ རྡོའ༌ཞིག༌ བོར༌རད༌, གྱེལ༌ཅུག༌ཁན༌ནི༌ ཕོ༌ལོངས༌ཞིག༌། ཨིན༌ནའང༌ ཁོང༌ངི༌ ནང༌ང༌ ཨིད༌ཤེས༌ ཅོ༌ཁན༌ནི༌, རེ༌ཝ༌བོ༌ མ༌ནེ༌ ཅག༌ག༌ མི༌ཛད༌།”
ROM 10:1 ཅེས༌པའེ༌ སྤུན༌གུན༌, ངའེ༌ སྙིང༌ངི༌ དོད༌པ༌ དང༌ དཀོན༌མཆོག༌ག༌ མོས༌ལམ༌ ཕུལ༌ཅེས༌པོ༌ ནི༌ ཨིས༌ར༌ཨེལ༌པ༌གུན༌ སྐྱོབ༌ཅེས༌སི༌ ཕིའ༌ ཨིན༌།
ROM 10:2 ཁོང༌གུན༌ནི༌ དཀོན༌མཆོག༌ ཐུགས༌ཐད༌ ཅུག༌ཅེས༌སི༌ དོད༌པའེ༌ ནང༌ང༌ རྩོན༌གྲུས༌ སྲན༌ཏྲེ༌ ཅོ༌ཁན༌བོའ༌ ངའེ༌ སྤང༌པོ༌ ཏང༌ངད༌, ཨིན༌ནའང༌ ཁོང༌གུན༌ནི༌ དཀོན༌མཆོག༌ ཙལ༌ཅེས༌སི༌ ལམ༌བོ༌ ནོར༌ཏེ༌ ཨིན༌ནོག༌།
ROM 10:3 ཁོང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཡོང༌ཁན༌ནི༌ ཀྲང༌པོའེ༌ སྐོར༌ལ༌ གྱུས༌ མེད༌པ༌ ཨིན༌ནོག༌། ཁོང༌གུན༌ དཀོན༌མཆོག༌གི༌ ཀྲང༌པོའེ༌ ལམ༌མི༌ཀ༌ གྲུལ༌ཅེས༌ལ༌ མ༌ཐད༌ད༌, ཁོ༌རང༌གུན༌ནི༌ རྩོན༌གྲུས༌ གྱུད༌ཏེ༌, ཀྲང༌པོ༌ གྱུར༌ཅེས༌ལ༌ ཐད༌ད༌ནོག༌།
ROM 10:4 མ༌ཤི༌ཀའེ༌ ནང༌ང༌ ཁྲིམས༌སི༌ སྒོས༌དོམ༌ ཚང༌མ༌ གྲུབ༌བ༌ ཛད༌ཏེ༌ ཨིན༌ནོག༌, ཏེ༌བོའེ༌ བྲས༌བུ༌ ཁོང༌ངི༌ ནང༌ང༌ ཏད༌པ༌ ཅོ༌ཁན༌ ཚང༌མ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོའ༌ ཛད༌ད༌ནོག༌།
ROM 10:5 མོ༌ཟེས༌སི༌ བྲིའ༌ཛདས༌, ཁྲིམས༌ ནང༌ཞིན༌ མི༌ཞིག༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ སྒོས༌དོམ༌བོ༌ ནི༌ “ཁྲིམས༌ ཚང༌མ༌ ཁའ༌ཉན༌གོ༌ཤེས༌ ཨིན༌ནོག༌།”
ROM 10:6 ཨིན༌ནའང༌ ཏད༌པ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ཅེས༌སི༌ ལབ༌ཞ༌བོའེ༌ མོལས༌, “ཁྱོ༌ཞའེ༌ སྙིང༌ངི༌ ནང༌ང༌, ‘སུ༌ ནམ༌ཁའ༌ ཆེན༌’ ཅིའ༌ སམ༌མད༌?” ༼ཡང༌ན༌ ཐུར༌ལ༌ སྐྱོད༌ཏེ༌ ཐར༌པའེ༌ ལོན༌བོ༌ ང༌དང༌གུན༌ལ༌ ཤད༌ད༌ ཛད༌ཅེས༌སི༌ ཕིའ༌ མ༌ཤི༌ཀའ༌ བོད༌ད༌ལ༌།༽
ROM 10:7 “ཡ༌ ཅིའ༌ སམ༌མད༌, ‘ཡོག༌ག༌ ཤི༌ཁན༌གུན༌ནི༌ ནས༌སའེ༌ ནང༌ང༌ སུ༌ ཆེན༌?’” ༼ཡང༌ན༌ ཏེ༌ནང༌ནེ༌ མ༌ཤི༌ཀ༌ བིངས༌ཏེ༌ སྐྱོད༌ཏེ༌ ཐར༌པའེ༌ ལོན༌བོ༌ ང༌དང༌གུན༌ལ༌ ཤད༌ད༌ ཛད༌ ཟེར༌ཅེས༌ལ༌།༽
ROM 10:8 ཨིན༌ནའང༌ ཏད༌པའེ༌ སྐོར༌ལ༌ ལབ༌ཞའེ༌ ཅི༌ མོལ༌དུག༌?, “ལོན༌བོ༌ ཁྱོ༌ཞའེ༌ ལག༌ག༌ ཡོད༌ཏེ༌ ཨིན༌ནོག༌ ཏེ༌བོ༌ ཁྱོ༌ཞའེ༌ ཁལ༌པག༌ དང༌ སྙིང༌ གུན༌ནི༌ ནང༌ང༌ ཡོད༌ཏེ༌ ཨིན༌ནོག༌།” ཡང༌ ཏེན༌ན༌ ལོན༌བོ༌ ནི༌, མ༌ཤི༌ཀའེ༌ ནང༌ང༌ ཏད༌པ༌ ཅོ༌ཅེས༌ལ༌ ང༌ཞའེ༌ ཆོས༌ཤད༌ཁན༌ནི༌ ལོན༌བོ༌ ཨིན༌།
ROM 10:9 ཀལ༌ཏེས༌ ཁྱོ༌ཞའེ༌ རང༌ངི༌ ཁའ༌ནེ༌, “ཡེ༌ཤུ༌ གཙོ༌བོ༌ ཨིན༌ཁན༌བོ༌” ཟེར༌ཅེས༌ དང༌ དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌པོའ༌ ལང༌ང༌ ཛད༌ཏེ༌ ཨིན༌ཁན༌བོའ༌ ཏད༌པ༌ ཅོ༌ན༌, ཁྱོ༌ཞ༌གུན༌ སྐྱོབ༌བ༌ ཛད༌ཨིན༌།
ROM 10:10 ཁྱོ༌ཞ༌གུན༌ནི༌ སྙིང༌ངི༌ ནང༌ང༌ ཏད༌པ༌ ཡོད༌ཅེས༌པོའེ༌, ཁྱོ༌ཞ༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོའ༌ ཛདས༌, ཡང༌ ཁའ༌ནེ༌ ཤད༌ཅེས༌པོའེ༌, ཁྱོ༌ཞ༌གུན༌ སྐྱོབ༌བ༌ ཛདས༌།
ROM 10:11 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཁོང༌ངི༌ ནང༌ང༌ ཨིད༌ཤེས༌ ཅོ༌ཁན༌གུན༌ནི༌ རེ༌ཝ༌བོ༌ མ༌ནེ༌ ཅག༌ག༌ མི༌ཛད༌།”
ROM 10:12 ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ གུན༌ནི༌ ནང༌ང༌ ཅའང༌ ཁྱད༌ མེད༌པ༌ ཨིན༌ནོག༌། ཏེན༌ན༌ གཙོ༌བོ༌བོ༌ ཚང༌མའེ༌ གཙོ༌བོ༌ ཨིན༌ནོག༌, ཡང༌ ཁོང༌ང༌ ཞུ༌ཝ༌ ཕུལ༌ཁན༌གུན༌ལ༌ སྙིང༌ ཕེས༌ཏེ༌ སལ༌ལ༌ ཛད༌ད༌ནོག༌།
ROM 10:13 ཅིའ༌ཞུ༌ན༌ “གཙོ༌བོའ༌ སྐྱོབ༌ཅེས༌ལ༌ ཞུ༌ཝ༌ ཕུལ༌ཁན༌ ཚང༌མ༌ ཁོང༌ངི༌ སྐྱོབ༌བ༌ ཛད༌ཨིན༌།”
ROM 10:14 ཏེ༌ནེ༌ ཁོང༌གུན༌ནི༌ ཀ༌ཟུག༌གི༌ ཞུ༌ཝ༌ ཕུལ༌ཨིན༌, ཀལ༌ཏེས༌ ཁོང༌གུན༌ནི༌ ཁོང༌ང༌ ཏད༌པ༌ མ༌ཅོ༌ན༌? ཡང༌ ཁོང༌གུན༌ནི༌ ཀ༌ཟུག༌གི༌ ཏད༌པ༌ ཅོ༌ཨིན༌, ཀལ༌ཏེས༌ ཁོང༌གུན༌ནི༌ ཁོང༌ངི༌ སྐོར༌ལ༌ མ༌ནེ༌ མ༌ཚོར༌ར༌ ཡོད༌ན༌? ཡང༌ ཁོང༌གུན༌ལ༌ ཀ༌ཟུག༌གི༌ ཚོར༌ཨིན༌ ཀལ༌ཏེས༌ སུ༌ཞིག༌གིའང༌ ཁོང༌ངི༌ སྐོར༌ལ༌ མ༌ཤད༌ན༌?
ROM 10:15 ཡང༌ ཀལ༌ཏེས༌ ཀལ༌ཏེ༌ མན༌པིན༌ན༌, ཁོང༌གུན༌ ཡོད༌ས༌ སོང༌ཏེ༌ ཆོས༌ ཀ༌ཟུག༌གི༌ ཤད༌ཨིན༌? ཏེན༌ན༌བོའེ༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “གའ༌མོའེ༌ ནས༌ཚུལ༌ ཁྱོང༌ཁན༌གུན༌ནི༌ རྐང༌པ༌ ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།”
ROM 10:16 ཨིན༌ནའང༌ སུ༌ཚང༌མའེ༌ གའ༌མོའེ༌ ནས༌ཚུལ༌ལ༌ གའ༌སུས༌ ཞུའ༌མ༌ནོག༌, ཅིའ༌ཟེར༌ན༌ ལུང༌སྟོན༌པ༌ ཡེ༌ཤ༌ཡཱའེ༌ ཟེརས༌, “གཙོ༌བོ༌ལེ༌, སུའི༌ ང༌དང༌ངི༌ ལོན༌བོའ༌ ཨིད༌ཤེས༌ ཅོས༌?”
ROM 10:17 སོང༌པ༌སང༌ ལོན༌བོ༌ ཉན༌ཅེས༌ ཅིག༌པོ༌ གྱུད༌ཏེ༌ ཏད༌པ༌བོ༌ ཡོང༌ང༌ནོག༌, ཡང༌ ཏེ༌ ལོན༌བོ༌ ནི༌ མ༌ཤི༌ཀའེ༌ སྐོར༌རི༌ གའ༌མོའེ༌ ནས༌ཚུལ༌བོ༌ ཨིན༌ནོག༌།
ROM 10:18 ཨིན༌ནའང༌ ངའེ༌ ཏྲིའད༌, ཅི༌ ཨིས༌ར༌ཨེལ༌པ༌གུན༌ལ༌ ལོན༌བོ༌ མ༌ཚོར༌ར༌ ཨིན༌ནོག༌ག༌? འོ༌ན༌, ཁོང༌གུན༌ནི༌ ཚོར༌ཏེ༌ ཨིན༌ནོག༌, “ལོན༌བོ༌ ཇིག༌རྟེན༌ གང༌པོའེ༌ ནང༌ང༌ ཕེལ༌ཏེ༌ ཨིན༌ནོག༌, ཡང༌ བཀའ༌བོ༌ ཇིག༌རྟེན༌ནི༌ ཐའ༌མ༌ ཚོག༌པའང༌ ལེབས༌ཏེ༌ ཨིན༌ནོག༌།”
ROM 10:19 ཨིན༌ནའང༌ ངའེ༌ ཡང༌སྐྱར༌ ཏྲིའད༌, ཅི༌ ཨིས༌ར༌ཨེལ༌པ༌གུན༌ལ༌ ཧ༌མ༌གོའ༌ ཨིན༌ནོག༌ག༌? ཁོང༌གུན༌ནི༌ ཧ༌གོ༌ཏེ༌ ཨིན༌ནོག༌, ཅིའ༌ཟེར༌ན༌ མོ༌ཟེས༌སི༌ ཏུས༌ལའང༌ དཀོན༌མཆོག༌གི༌ མོལ༌ལ༌ ཛདས༌, “གྱལ༌ཁམས༌ མན༌ཁན༌ནི༌ མི༌གུན༌ གྱུད༌ཏེ༌, ངའེ༌ ཁྱོ༌ཞ༌གུན༌ནི༌ ནང༌ང༌ ཚིག༌ཅེས༌ སྐྱེ༌ཅུག༌ཨིན༌, སམ༌བ༌ མེད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ གྱུད༌ཏེ༌, ངའེ༌ ཁྱོ༌ཞ༌གུན༌ནི༌ ནང༌ང༌ སྲོ༌ སྐྱེ༌ཅུག༌ཨིན༌།”
ROM 10:20 ཡང༌ སྟིང༌ནེ༌ དཀོན༌མཆོག༌གི༌ ཆོགས༌ནེ༌ ཡེ༌ཤ༌ཡཱའེ༌ ཧམ༌པ༌ ཉམ༌པོ༌ མོལས༌, “ངའ༌ མ༌ཙལ༌ཁན༌ནི༌ མི༌གུན༌ནི༌ ངའེ༌ ནང༌ང༌ ཏད༌པ༌ ཅོས༌། ངའ༌ ཤེས༌ཉིན༌ མ༌གྲོ༌ཁན༌གུན༌ལ༌, ངའེ༌ ང༌རང༌ སྔོན༌ཅུགས༌པིན༌།”
ROM 10:21 ཨིན༌ནའང༌ ཨིས༌ར༌ཨེལ༌པ༌གུན༌ནི༌ སྐོར༌ལ༌ དཀོན༌མཆོག༌གི༌ མོལས༌, “ཉི༌མ༌ གང༌པོ༌ ངའེ༌ ང༌རང༌ངི༌ ལག༌པ༌ ཁོང༌གུན༌ལ༌ གའ༌སུས༌ ཞུའ༌ལ༌ རྐྱངས༌ཏེ༌ བོར༌པིན༌, ཨིན༌ནའང༌ ཁོང༌གུན༌ ཁའ༌མི༌ཉན༌ དང༌ ངོ༌ལོག༌ ཅོ༌ཁན༌ ཡོད༌པིན༌།”
ROM 11:1 ཏེ༌ནེ༌ ངའེ༌ ཏྲིའད༌, ཅི༌ དཀོན༌མཆོག༌གི༌ ཁོང༌རང༌ངི༌ མི༌ ཨིས༌ར༌ཨེལ༌པ༌གུན༌ ཕང༌ང༌ ཛདས༌ས༌? མ༌ནེ༌ ཕང༌ང༌ མ༌ཛདས༌། ང༌ ང༌རང༌ ཨིས༌ར༌ཨེལ༌པ༌ཞིག༌, ཨབ༌ར༌ཧམ༌མི༌ པུར༌གྱུད༌, བེན༌ཡཱ༌མིན༌ སྡེ༌ནེ༌ ཨིན༌།
ROM 11:2 དཀོན༌མཆོག༌གི༌ གོ༌ཟུག༌ནེ༌ ཕར༌ལ༌ ལྡམ༌མ༌ ཛད༌ཁན༌ནི༌ ཁོང༌རང༌ངི༌ མི༌གུན༌ ཕང༌ང༌ མ༌ཛདས༌། ཅི༌ ཏེ༌བོའེ༌ སྐོར༌ལ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཁན༌བོ༌ ཁྱོ༌ཞ༌གུན༌ལ༌ གྱུས༌མེད༌ད༌? ལུང༌སྟོན༌པ༌ ཨེ༌ལི༌ཡཱའེ༌ ཨིས༌ར༌ཨེལ༌པ༌གུན༌ནི༌ གྱབ༌གལ༌ལ༌ དཀོན༌མཆོག༌ག༌ ཞུ༌ཝ༌ ཕུལས༌,
ROM 11:3 “གཙོ༌བོ༌ལེ༌ ཁོང༌གུན༌ནི༌ ཉེ༌རང༌ངི༌ ལུང༌སྟོན༌པ༌གུན༌ སད༌ཏེ༌ ཉེ༌རང༌ངི༌ ཆོད༌ཁྲི༌གུན༌ ཤིགས༌། ང༌རང༌ ཅིག༌པོ༌ ལུས༌ཏེ༌ ཡོད༌, ཡང༌ ཁོང༌གུན༌ནི༌ ངའང༌ སད༌ཅེས༌སི༌ རྩོན༌གྲུས༌ ཅོ༌རུག༌།”
ROM 11:4 ཡང༌ དཀོན༌མཆོག༌གི༌ ལན༌སལ༌ལ༌ ཛད༌ཁན༌བོ༌ ཁྱོ༌ཞ༌གུན༌ལ༌ ཨིད༌ཏུ༌ མེ༌རག༌ག༌? “ངའེ༌ ང༌རང༌ངི༌ ཕིའ༌ བའལ༌ ཟེར༌ཁན༌ནི༌ སྐུན༌དྲའེ༌ དུན༌ལ༌ ཆག༌ མ༌ཕུལ༌ཁན༌ སྟོང༌རྡུན༌ སྐྱོབས༌ཏེ༌ བོར༌ཏེ༌ ཡོད༌།”
ROM 11:5 ཏེ༌ཙོགས༌ དི༌རིང༌ངའང༌ ཨིན༌ནོག༌, དཀོན༌མཆོག༌གི༌ ཐུག༌རྗེའེ༌ ཞས༌ཏེ༌, ཨིས༌ར༌ཨེལ༌པ༌ ཉུ༌ངུན༌ཞིག༌ དཀོན༌མཆོག༌ག༌ ཨིད༌ཤེས༌ཅན༌ ལུས༌ཏེ༌ ཨིན༌ནོག༌།
ROM 11:6 ཡང༌ ཀལ༌ཏེས༌ ཐུག༌རྗེའེ༌ ཞས༌ཏེ༌ ཨིན༌ན༌, ཏེ༌ནེ༌ ཏེ༌བོ༌ ཁོང༌གུན༌ནི༌ ལས༌ ཟང༌པོའེ༌ ཞས༌ཏེ༌ མ༌ནོག༌། ཀལ༌ཏེས༌ ཨིན༌པིན༌ན༌ ཏེ༌ནེ༌ ཁོང༌ངི༌ ཐུག༌རྗེ༌བོ༌, རིན༌ མ༌ཤལ༌ལ༌ ཡང༌ འོས༌པ༌ མེད༌པ༌ ཐོབ༌ཏེ༌ མེད༌གྲོ༌།
ROM 11:7 ཏེ༌ནེ༌ ཅི༌? དཀོན༌མཆོག༌གི༌ ཆོགས༌སྐྱོར༌ ཐོབ༌ཅེས༌ལ༌ རྩོན༌གྲུས༌ ཅོས༌ཏེ༌ ཙལ༌ཨིན༌ ཡོད༌ཁན༌ ཨིས༌ར༌ཨེལ༌པ༌ མང༌ཆེའ༌བོའ༌ མ༌ཐོབ༌བ༌ ཨིན༌ནོག༌ག༌? དཀོན༌མཆོག༌གི༌ ལྡམ༌མ༌ ཛད༌ཁན༌ ཁ༌ཅིག༌ག༌ ཐོབ༌ཏེ༌ ཨིན༌ནོག༌, ཨིན༌ནའང༌ ལུས༌ཁན༌གུན༌ནི༌ ཁོ༌རང༌གུན༌ནི༌ སྙིང༌ སྐྱོང༌པོ༌ ཅོས༌།
ROM 11:8 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “དཀོན༌མཆོག༌གི༌ ཁོང༌གུན༌ནི༌ སམ༌བ༌གུན༌ ཁྱོར༌ཅུག༌ག༌ ཛདས༌, ཁོང༌གུན༌ལ༌ མིག༌ ཡོད༌ཏེའང༌ མ༌ཐོང༌ང༌ ཨིན༌ནོག༌ ཡང༌ ནམ༌ཅོག༌ ཡོད༌ཏེའང༌ མ༌ཚོར༌ར༌ ཨིན༌ནོག༌།”
ROM 11:9 ཏེན༌ན༌ ཙོགས༌ལ༌ དཱ༌བིད༌དི༌ མོལས༌, “ཁར༌ཇི༌ གངས༌ཏེ༌ ཡོད༌ཁན༌ནི༌ ཁོང༌གུན༌ནི༌ ཅོག༌ཙེ༌བོ༌ ཁད༌ཅེས༌སི༌ པིལ༌ལྡེམ༌ གྱུར༌ཤིག༌། ཁོང༌གུན༌ནི༌ གྱུ༌ནོར༌རི༌ ཁོང༌གུན༌ལ༌ སྒག༌གྱབ༌ཅུག༌ཤིག༌། ཡང༌ འོས༌པ༌ ཨིན༌ཁན༌བོ༌ ཁོང༌གུན༌ལ༌ ཐོབ༌ཤིག༌།
ROM 11:10 ཁོང༌གུན༌ལ༌ མི༌ཐོང༌ཅེས༌སི༌ ཕིའ༌ ཁོང༌གུན༌ནི༌ མིག༌ ཞར༌ ཅུག༌ཤིག༌། ཡང༌ ལྕིན༌ཏྲེ༌ ཁུར༌ཅེས༌པོའེ༌, ཁོང༌གུན༌ ཏུས༌གྱུན༌ནི༌ ཕིའ༌ གུ༌རུ༌ གྱུར༌ཤིག༌།”
ROM 11:11 ཅི༌ ཨིས༌ར༌ཨེལ༌པ༌གུན༌ སྒག༌གྱབས༌ཏེ༌ ལང༌ མ༌ནེ༌ མི༌ཉན༌ཅེས༌, ཏེ༌ཟམ༌ སྲན༌ཏྲེ༌ གྱེལ༌ལ༌? མ༌ནེ༌ མ༌གྱེལ༌། ཨིན༌ནའང༌ ཁོང༌ངི༌ ཁའ༌ མི༌ཉན༌ཅེས༌པོའེ༌, དཀོན༌མཆོག༌གི༌ ཐར༌པ༌བོ༌ ཡ༌ཧུ༌དཱ༌པ༌ མན༌ཁན༌གུན༌ལ༌ སལ༌ལ༌ ཛདས༌། ཁོང༌ངི༌ ཏེ༌བོ༌ ཅོའ༌ ཛད༌ཅེས༌སི༌ གྱུན༌ཚན༌བོ༌ ནི༌ ཨིས༌ར༌ཨེལ༌པ༌གུན༌ལ༌ ཚིག༌ཅེས༌ ཡོངས༌ཏེ༌, ཁོ༌རང༌གུན༌ནི༌ ཕིའ༌ ཐར༌པ༌བོ༌ ལེན༌ཅེས༌ལ༌ ཨིན༌ནོག༌།
ROM 11:12 ཨིན༌ནའང༌ ཁོང༌གུན༌ནི༌ སྡིག༌པ༌ ཅོ༌ཅེས༌པོའེ༌, ཇིག༌རྟེན༌ གང༌པོའེ༌ མི༌གུན༌ནི༌ ཕིའ༌ ཅིན༌ལབས༌, ཡང༌ ཁོང༌གུན༌ལ༌ དཀོན༌མཆོག༌གི༌ ཆོགས༌སྐྱོར༌ མི༌ཐོབ༌ཅེས༌པོའེ༌, ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ ཅིན༌ལབས༌ ཁྱོང༌ངད༌ན༌, ཏེ༌ནེ༌ ཡ༌ཧུ༌དཱ༌པ༌ ཚང༌མའེ༌ མ༌ཤི༌ཀའེ༌ ནང༌ང༌ ཏད༌པ༌ ཅོ༌ ཟ༌ནེ༌, ཏད༌པ༌ཅན༌ ཚང༌མ༌ལ༌ ཙམ༌ཤིག༌གི༌ ཆེན༌མོ༌ ཅིན༌ལབས༌ མི༌ཐོབ༌།
ROM 11:13 ངའེ༌ འི༌ ཚང༌མ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཟེར༌རད༌, དཀོན༌མཆོག༌གི༌ ང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ སྐུ༌ཚབས༌ལ༌ སྐོའ༌ ཛད༌ཅེས༌པོའ༌ ཕོ༌སོ༌ ཚོར༌ར༌རག༌།
ROM 11:14 ཨིན༌ནའང༌ ངའེ༌ ལས༌པོའེ༌, ཨིས༌ར༌ཨེལ༌པ༌གུན༌ལ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཡོད༌ཁན༌བོའེ༌ཀ༌ ཚིག༌ཅེས༌ ཡོང༌ཅུགས༌ཏེ༌ ཁོང༌ ཁ༌ཅིག༌གའང༌ སྐྱོབ༌ཉན༌ཅེས༌སི༌ ངའེ༌ རེ༌ཝ༌ ཨིན༌།
ROM 11:15 ཀལ༌ཏེས༌ ཁོང༌གུན༌ནི༌ ཕང༌ཅེས༌པོའེ༌, དཀོན༌མཆོག༌གི༌ ཐར༌པ༌བོ༌ ཞན༌ཡང༌ ཇིག༌རྟེན༌པ༌གུན༌ལ༌ སལ༌ལ༌ ཛད༌དད༌ན༌, ཏེ༌ནེ༌ ཨིས༌ར༌ཨེལ༌པ༌གུན༌ནིའང༌ ཏེ༌ ཐར༌པ༌བོ༌ ལེན༌ ཟ༌ནེ༌, ཙམ༌ཤིག༌གི༌ མང༌ང༌ ཐད༌པོ༌ མི༌ཡོང༌། ཏེ༌བོ༌ ཤི༌ཁན༌གུན༌ནི༌ ཕིའ༌ མི༌ཚེ༌ གྱུར༌ཨིན༌།
ROM 11:16 ཀལ༌ཏེས༌ གོ༌མའེ༌ ཁ༌ཟས༌ ཙོགས༌ལ༌ པག༌པའེ༌ ཁག༌ཅིག༌ ཕུལ༌ཁན༌བོ༌ ཏམ༌པ༌ ཨིན༌ན༌, ཏེ༌ནེ༌ པག༌པའེ༌ གང༌པོ༌ ཏམ༌པ༌ ཨིན༌ནོག༌། ཏེན༌ན༌ ཙོགས༌ལ༌ ང༌དང༌ ཡ༌ཧུ༌དཱ༌པ༌གུན༌ནི༌ ཕ༌མེས༌པོ༌གུན༌ ཏམ༌པ༌ ཨིན༌ན༌, ཏེ༌ནེ༌ ཁོང༌གུན༌ནི༌ པུར༌གྱུད༌གུན༌ནའང༌ ཏམ༌པ༌ ཨིན༌ནོག༌། ཀལ༌ཏེས༌ ཨོ༌ལིཝ༌ཝི༌ ལྕང༌མའེ༌ པ༌ཀྲག༌པོ༌ ཏམ༌པ༌ ཨིན༌ན༌, ཏེ༌ནེ༌ ཏེ༌ ལྕང༌མའེ༌ ཡལ༌ག༌གུན༌ནའང༌ ཏམ༌པ༌ ཨིན༌ནོག༌།
ROM 11:17 ཨིན༌ནའང༌ ཏེ༌ ཨོ༌ལིཝ༌ཝི༌ ལྕང༌མའེ༌ ཡལ༌ག༌ ཁ༌ཅིག༌ ཅགས༌ཏེ༌, མ༌ཏབ༌བ༌ སྐྱེ༌ཁན༌ནི༌ ཨོ༌ལིཝ༌ཝི༌ ལྕང༌མའེ༌ ཁོལ༌གུན༌, ཏེ༌ཚབས༌ལ༌ པེ༌ཝན༌ལ༌ ཏངས༌ པ༌སང༌, ཏ༌ ཁྱོ༌ཞ༌གུན༌ནིའང༌ ཏེ༌ ཨོ༌ལིཝ༌ཝི༌ ལྕང༌མའེ༌ སྟོབས༌ཅན༌ པ༌ཀྲག༌གི༌ ཁུའ༌བོ༌ བགོས༌ཏེ༌ ཐུང༌ང༌ནོག༌།
ROM 11:18 ཏེ༌ ཡལ༌ག༌ ཅག༌ཁན༌གུན༌ནི༌ ཚབས༌ལ༌ ཁྱོ༌ཞའ༌ པེ༌ཝན༌ལ༌ ཏང༌ཁན༌བོའེ༌ཀ༌ ཕོ༌སོ༌ མ༌ཅོ༌ཤིག༌། ཁྱོ༌ཞ༌གུན༌ ཏེ༌ ལྕང༌མའེ༌ པ༌ཀྲག༌པོ༌ མན༌པ༌ ཡལ༌ག༌ཞིག༌ ཨིན༌ནོག༌།
ROM 11:19 ཏེ༌ནེ༌ ཁྱོ༌ཞའེ༌ ཟེར༌སྲིད༌ཨིན༌, “ངའ༌ པེ༌ཝན༌ལ༌ ཏང༌ཅེས༌སི༌ ཕིའ༌ ཏེ༌ ཡལ༌ག༌གུན༌ ཅག༌ག༌ ཛདས༌།”
ROM 11:20 ཏེ༌བོ༌ དེན༌བ༌ ཨིན༌ནོག༌, ཨིན༌ནའང༌ མ༌ཤི༌ཀའེ༌ ནང༌ང༌ ཏད༌པ༌ མ༌ཅོས༌པ༌, ཏེ༌ ཡལ༌ག༌གུན༌ ཅག༌ག༌ ཛདས༌, ཡང༌ ཁྱོ༌ཞའེ༌ ཏད༌པ༌ ཅོ༌ཅེས༌པོའེ༌, ཁྱོ༌ཞ༌གུན༌ ཏེ༌ ལྕང༌མའེ༌ ཁག༌ཤིག༌ ཨིན༌ནོག༌། ཕོ༌སོ༌ མ༌ཅོ༌ཤིག༌, ཨིན༌ནའང༌ ཅི༌ ཇུང༌ཨིན༌ སམས༌ཏེ༌ ཇིགས༌ཤིག༌།
ROM 11:21 ཀལ༌ཏེས༌ དཀོན༌མཆོག༌གི༌ ངོས༌མའེ༌ ཡལ༌ག༌གུན༌ མ༌ཕུད༌ད༌ ཨིན༌ན༌, ཁོང༌ངི༌ ཁྱོ༌ཞ༌གུན༌ནའང༌ ཕུད༌ད༌ མི༌ཛད༌།
ROM 11:22 དཀོན༌མཆོག༌ ཐུག༌རྗེ༌ཅན༌ དང༌ ཁྲིམས༌ཅད༌ སྲན༌ཏྲེ༌ ཛད༌ཁན༌ ཨིན༌ཁན༌བོ༌ ཧ༌གོ༌གོས༌། ཁའ༌ མི༌ཉན༌ཁན༌གུན༌ནི༌ ཕིའ༌ ཁྲིམས༌ཅད༌ སྲན༌ཏྲེ༌, ཨིན༌ནའང༌ ཁྱོ༌ཞའེ༌ ཕིའ༌ ཐུག༌རྗེ༌ཅན༌། ཀལ༌ཏེས༌ ཁྱོ༌ཞའེ༌ ཁོང༌ངི༌ ཐུག༌རྗེའེ༌ ནང༌ང༌ ཨིད༌ཤེས༌ ཅོ༌ཨིན༌ དུག༌ མ༌དུག༌ན༌, ཁྱོ༌ཞ༌གུན༌ནའང༌ ཁོང༌ངི༌ ཅད༌ཏེ༌ ཕང༌ང༌ ཛད༌ཨིན༌།
ROM 11:23 ཡང༌ ཀལ༌ཏེས༌ ཨིས༌ར༌ཨེལ༌པ༌གུན༌ནི༌ ཏད༌པ༌ མེད༌ཅེས༌པོ༌ ཕང༌ན༌, ཁོང༌གུན༌ནའང༌ ཡང༌སྐྱར༌ ཏེ༌ ལྕང༌མའེ༌ ནང༌ང༌ པེ༌ཝན༌ལ༌ ཏང༌ང༌ ཛད༌ཨིན༌, ཅིའ༌ཞུ༌ན༌ དཀོན༌མཆོག༌ག༌ ཏེ༌ཟུག༌ ཛད༌ཅེས༌སི༌ ཝང༌བོ༌ ཡོད༌ཏེ༌ ཨིན༌ནོག༌།
ROM 11:24 ཀལ༌ཏེས༌ ཁྱོ༌ཞའ༌, མ༌ཏབ༌བ༌ སྐྱེ༌ཁན༌ ཨོ༌ལིཝ༌ཝི༌ ལྕང༌མའེ༌ ཡལ༌ག༌ ཨིན༌ཏེའང༌, དཀོན༌མཆོག༌གི༌ ཁྱོ༌ཞའ༌ ཏབ༌ཁན༌ནི༌ ཨོ༌ལིཝ༌ཝི༌ ལྕང༌མའེ༌ཀ༌ པེ༌ཝན༌ལ༌ ཏང༌ཅེས༌ལ༌ ཐད༌ད༌ ཛད༌དད༌ན༌, ཀ༌བོ༌ རང༌ཞིན༌ ཨིན༌ཁན༌ནི༌ གོ༌ལོག༌པོ༌ ཨིན༌ནོག༌, ཏེ༌ནེ༌ ངོས༌པོའེ༌ ལྕང༌མའེ༌ ཁོལ༌བོ༌ ཏེན༌ན༌ ངོས༌མ༌ ལྕང༌མའེ༌ ནང༌ང༌ པེ༌ཝན༌ལ༌ ཏང༌ང༌ ཛད༌ཅེས༌ལ༌ དཀོན༌མཆོག༌ ཙམ༌ཤིག༌ མང༌ང༌ ཐད༌ད༌ མི༌ཛད༌།
ROM 11:25 སྤུན༌གུན༌, ཁྱོ༌ཞ༌གུན༌ ཕོ༌སོ༌ མི༌ཚོར༌ཅེས༌སི༌ ཕིའ༌ ངའེ༌, འི༌ ཀྲང༌པོའེ༌ སང༌ཝ༌བོ༌ ཁྱོ༌ཞ༌གུན༌ལ༌ ཧ༌གོ༌གོས༌ སམ༌མ༌རག༌། ཨིས༌ར༌ཨེལ༌པ༌ མང༌པོ༌ཞིག༌གི༌ སྙིང༌ སྐྱོང༌པོ༌ ལུས༌ཨིན༌, ནམ༌ཚོག༌པ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཡ༌ཧུ༌དཱ༌པ༌ མན༌ཁན༌ ཚང༌མའེ༌, མ༌ཤི༌ཀའེ༌ ནང༌ང༌ ཏད༌པ༌ མི༌ཅོ༌།
ROM 11:26 ཏེ༌ནེ༌ ཨིས༌ར༌ཨེལ༌པ༌ ཚང༌མའ༌ སྐྱོབ༌བ༌ ཛད༌ཨིན༌, ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “སྐྱོབ༌བ༌ ཛད༌ཁན༌བོ༌ ཡེ༌རུ༌ཤ༌ལེམ༌ནེ༌ བིང༌ཨིན༌, ཡང༌ ཁོང༌ངི༌ ཨིས༌ར༌ཨེལ༌པ༌གུན༌ ངན༌པའེ༌ ལས༌གུན༌ ཅོ༌ཅེས༌ནེ༌ གྱུར༌ ཅུག༌ག༌ ཛད༌ཨིན༌།
ROM 11:27 ཡང༌ ཁོང༌གུན༌ ཉམ༌པོ༌ ངའེ༌ ཆད༌དོན༌བོ༌ ནི༌, ངའེ༌ ཁོང༌ངི༌ སྡིག༌པ༌གུན༌ མེད༌ཁན༌ ཅོ༌ཨིན༌། ”
ROM 11:28 ཨིས༌ར༌ཨེལ༌པ༌ མང༌པོ༌ཞིག༌ ཏ༌ གའ༌མོའེ༌ ནས༌ཚུལ༌ལི༌ གྲ༌འོ༌ ཨིན༌ནོག༌། ཏེ༌ནེའང༌ ཁོང༌གུན༌ལ༌ ཏ༌རུང༌ངའང༌ དཀོན༌མཆོག༌གི༌ ཅམས༌པ༌ ཛད༌ད༌ནོག༌, ཅིའ༌ཟེར༌ན༌ ཁོང༌ངི༌ ཁོང༌གུན༌ནི༌ ཕ༌མེས༌པོ༌ ཨབ༌ར༌ཧམ༌, ཨི༌སཱག༌ དང༌, ཡ༌ཀོབ༌ གུན༌ ལྡམ༌མ༌ ཛདས༌།
ROM 11:29 ངའེ༌ ཏེ༌བོ༌ ཟེར༌རད༌ ཅིའ༌ཟེར༌ན༌, ཁོང༌ངི༌ སོལ༌རས༌ སལ༌ལ༌ ཛད༌ཁན༌ དང༌ ལྡམ༌མ༌ ཛད༌ཁན༌ནི༌ ཐག༌ཅད༌བོའེ༌ ནང༌ང༌ གྱུར༌ཇ༌ མ༌ནེ༌ ཁྱོང༌ང༌ ཛད༌ད༌ མ༌ནོག༌།
ROM 11:30 ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནའང༌ ཏུས༌ཤིག༌ག༌ དཀོན༌མཆོག༌གི༌ ཁའ༌ མ༌ཉན༌ཁན༌ ཨིན༌པིན༌, ཨིན༌ནའང༌ ཏ༌ ཡ༌ཧུ༌དཱ༌པ༌གུན༌ནི༌ ཁའ༌ མི༌ཉན༌ཅེས༌སི༌ བྲས༌བུ༌བོའེ༌, ཁྱོ༌ཞ༌གུན༌ལ༌ ཁོང༌ངི༌ སྙིང༌རྗེ༌ ཐོབ༌ཏེ༌ ཨིན༌ནོག༌།
ROM 11:31 ཏ༌ ཁོང༌གུན༌ ཁའ༌ མི༌ཉན༌ཁན༌ ཨིན༌ནོག༌, ཡང༌ དཀོན༌མཆོག༌གི༌ སྙིང༌རྗེའེ༌ ནང༌ང༌ ཁོང༌གུན༌ནའང༌ དྲེ༌ཤེས༌སི༌ ཕིའ༌, ཁྱོ༌ཞ༌གུན༌ལ༌ དཀོན༌མཆོག༌གི༌ སྙིང༌རྗེ༌ ཐོབ༌ཏེ༌ ཨིན༌ནོག༌།
ROM 11:32 དཀོན༌མཆོག༌གི༌ མི༌ཚང༌མ༌ལ༌ སྙིང༌རྗེ༌ སྟན༌ན༌ ཛད༌ཅེས༌སི༌ ཕིའ༌ ཁོང༌ངི༌ མི༌ཚང༌མ༌ ཁའ༌ མི༌ཉན༌ཅེས༌སི༌ ལག༌ག༌ སྟད༌ད༌ ཛདས༌།
ROM 11:33 འོ༌, དཀོན༌མཆོག༌གི༌ གྱུ༌ནོར༌ དང༌ ཤེས༌རབས༌ དང༌ ཡོན༌ཏན༌ གུན༌ ཙམ༌ཤིག༌གི༌ ཇིགས༌པོ༌ མ༌ནོག༌། ཁོང༌ངི༌ ཁྲིམས༌ཅད༌ དང༌ ཆག༌ལས༌ ཛད༌ཅེས༌སི༌ ཚུལ༌ གུན༌ ང༌དང༌གུན༌ལ༌ མ༌ནེ༌ ཧ༌གོ༌ཐུབ༌ཅེས༌ མེད༌པ༌ ཨིན༌ནོག༌།
ROM 11:34 “སུའི༌ གཙོ༌བོའེ༌ ཐུགས༌སམ༌གུན༌ ཤེས༌ཨིན༌? ཁོང༌ང༌ ཁ༌དའ༌ ཏང༌ཅེས༌སི༌ ཧ༌གོ༌ སུའ༌ ཡོད༌?”
ROM 11:35 “སུའི༌ ཁོང༌ང༌ ཏེ༌ཟམ༌ མང༌པོ༌ཞིག༌ ཏངས༌ཏེ༌ ཡོད༌, ཀ༌བོ༌ ཁོང༌ང༌ ལོགས༌ཏེ༌ ཕུལ༌གོ༌ཤེས༌ སྒོས༌དོམ༌ སྐྱོདས༌།”
ROM 11:36 ཁོང༌ངི༌ ཆོགས༌ནེ༌ ཅི༌ཚང༌མ༌ ཇུངས༌ཏེ༌, ཁོང༌ངི༌ ཝང༌ངི༌ ཞས༌ཏེ༌, ཏེ༌གུན༌ ལུས༌ཏེ༌ ཨིན༌ནོག༌། ཡང༌ ཏེ༌གུན༌ ཁོང༌ངི༌ སྤལ༌ལི༌ ཕིའ༌ ཨིན༌ནོག༌། དཀོན༌མཆོག༌ག༌ སྤལ༌ ཚང༌མ༌ ཏུས༌གྱུན༌ ཐོབ༌ཤིག༌, ཨ༌མེན༌།
ROM 12:1 ངའེ༌ ཅེས༌པའེ༌ སྤུན༌གུན༌, དཀོན༌མཆོག༌གི༌ ཁྱོ༌ཞ༌གུན༌ལ༌ སྙིང༌རྗེ༌ ཛད༌ཅེས༌པོའེ༌, ཁྱོ༌ཞའེ༌ ཟུགས༌པོ༌ ཁོང༌ང༌ ཆོད༌པ༌ ཕུལ༌ཅེས༌ལ༌, ངའེ༌ ཇུ༌ཇུ༌ ཞུ༌ཨིན༌ ཞུ༌ཝ༌ ཕུལ༌ལད༌, ཏེ༌ ཟུགས༌གུན༌ སོན༌པོ༌ དང༌ ཏམ༌པ༌ ཆོད༌པ༌ ཡོང༌གོས༌, ཀ༌བོའེ༌ ཁོང༌ ཐུགས༌ཐད༌ད༌ ཛད༌ཅུག༌ཨིན༌། ཏེན༌ན༌བོ༌ དེན༌བའེ༌ ཁོང༌ང༌ ཅོལ༌ཅེས༌པོ༌ ཨིན༌ནོག༌།
ROM 12:2 འི༌ ཇིག༌རྟེན༌ནི༌ སྕོད༌ལམ༌ དང༌ ལུག༌སྲོལ༌ གུན༌ནི༌ ལན༌མོ༌ མ༌ཅོ༌ཤིག༌། ཨིན༌ནའང༌ དཀོན༌མཆོག༌ག༌ ཁྱོ༌ཞ༌རང༌ངི༌ སམ༌ཚུལ༌ལི༌ ནང༌ང༌ གྱུར༌ཇ༌ ཁྱོང༌ཅུག༌ག༌ ཛད༌ཏེ༌ ཁྱོ༌ཞ༌རང༌གུན༌ མི༌ སོ༌མ༌ རིག༌ག༌ གྱུར༌ར༌ ཛད༌ཅུག༌ཤིག༌། ཏེ༌ནེ༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌གི༌ ཐུག༌གོངས༌པོ༌ གྱུས༌ཆེན༌, ཀ༌བོ༌ ཟང༌པོ༌, ཐད༌པོ༌ དང༌ སྐྱོན༌མེད༌ ཨིན༌ནོག༌།
ROM 12:3 ངའ༌ སལ༌ལ༌ ཛད༌ཁན༌ནི༌ ཐུག༌རྗེའེ༌ གྱུད༌ཏེ༌, ངའེ༌ ཁྱོ༌ཞའ༌ རེ༌རེ༌ ཟེར༌རད༌, ཁྱོ༌ཞ༌རང༌ དེན༌བ༌ ཨིན༌ཁན༌བོའེ༌ སང༌ གྱས༌པ༌ རིག༌ ཨིན༌ སམ༌ མ༌གོས༌། ཁྱོ༌ཞ༌གུན༌ནི༌ དཀོན༌མཆོག༌གི༌ སལ༌ཁན༌ནི༌ ཏད༌པའེ༌ ཏབ༌ཅེས༌སི༌ ཚད༌པོ༌ ཀོལ༌ཏེ༌, ཁྱོ༌ཞ༌རང༌ང༌ ཁྲིམས༌ཅད༌ ཟ༌ནེ༌, ཀྲང༌པོ༌ ཟེར༌ཤིག༌།
ROM 12:4 ཀ༌ཟུག༌གི༌ ང༌དང༌གུན༌ནི༌ ཟུགས༌པོའ༌ ཡན༌ལག༌ མང༌པོ༌ཞིག༌ ཡོད༌, ཡང༌ རེ༌རེའེ༌ སོ༌སོ༌ ལས༌ རིག༌ ཅོའ༌ནོག༌།
ROM 12:5 ཏེན༌ན༌ ཙོགས༌པོ༌ མ༌ཤི༌ཀའེ༌ སྐུ༌ཟུགས༌, ང༌དང༌ངི༌ ཆོས༌ཚོགས༌པོ༌ ཨིན༌ནོག༌། ང༌དང༌གུན༌ ཟུགས༌པོ༌ ཅིག༌གི༌ ཡན༌ལག༌ མང༌པོ༌ཞིག༌ ཨིན༌ནོག༌, ཡང༌ ང༌དང༌ ཚང༌མ༌ ཅིག༌ དང༌ ཅིག༌གི༌ ཨིན༌ནོག༌།
ROM 12:6 དཀོན༌མཆོག༌གི༌ ཁོང༌རང༌ངི༌ ཐུག༌རྗེ༌ ནང༌ཞིན༌ ང༌དང༌གུན༌ལ༌ ཁྱུད༌ སྣ༌ཚོགས༌ རིག༌ སལ༌ལ༌ ཛད༌ཏེ༌ ཨིན༌ནོག༌། ཀལ༌ཏེས༌ མི༌ཞིག༌ག༌ ལུང༌སྟན༌ ཤད༌ཅེས༌སི༌ ཁྱུད༌ ཡོད༌ན༌, ཏེ༌བོ༌ ཁོའ༌, ཁོ༌རང༌ངི༌ ཏད༌པ༌ དང༌ སྟུན༌ཏེ༌ ཀོལ༌ཅུག༌།
ROM 12:7 ཀལ༌ཏེས༌ ཏེ༌བོ༌ ཞབས༌ཏོག༌ ཞུ༌ཅེས༌ ཨིན༌ན༌, ཁོའ༌ ཞབས༌ཏོག༌ ཞུ༌ཅུག༌། ཀལ༌ཏེས༌ ཏེ༌བོ༌ ལབ༌ཞ༌ ཏང༌ཅེས༌ ཨིན༌ན༌, ཁོའ༌ ལབ༌ཞ༌ ཏང༌ཅུག༌།
ROM 12:8 ཀལ༌ཏེས༌ ཏེ༌བོ༌ སྤོས༌པ༌ ཏང༌ཅེས༌ ཨིན༌ན༌, ཁོའ༌ སྤོས༌པ༌ ཏང༌ཅུག༌། ཀལ༌ཏེས༌ ཏེ༌བོ༌ ཞན༌མ༌གུན༌ལ༌ རོགས༌ ཅོ༌ཅེས༌ ཨིན༌ན༌, ཁོའ༌ སྙིང༌ ཕེས༌ཏེ༌ ཅོ༌ཅུག༌། ཀལ༌ཏེས༌ ཏེ༌བོ༌ ཆོས༌ཚོགས༌ལ༌ གོ༌ཁྲིད༌ ཅོ༌ཅེས༌ ཨིན༌ན༌, ཁོའ༌ ཏེ༌ ཁག༌པོ༌ མ༌ རྩོན༌གྲུས༌ ཉམ༌པོ༌ ཅོ༌ཅུག༌། ཀལ༌ཏེས༌ ཏེ༌བོ༌ སྙིང༌རྗེ༌ སྟན༌ཅེས༌ ཨིན༌ན༌, ཁོའ༌ ཐད༌པོ༌ ཉམ༌པོ༌ ཅོ༌ཅུག༌།
ROM 12:9 ཞན༌མ༌གུན༌ལ༌ ཅེས༌པ༌ ཅོ༌ཟུན༌ མ༌ཏང༌ང༌, དེན༌བ༌ ཅེས༌པ༌ ཅོ༌ཤིག༌། ངན༌པ༌ ཚང༌མ༌ལ༌ ནཕ༌རད༌ ཅོ༌ཤིག༌། ཟང༌པོ༌ ཨིན༌ཁན༌བོའ༌ ཐམས༌ཏེ༌ དུག༌ཤིག༌།
ROM 12:10 ཅིག༌ དང༌ ཅིག༌ག༌ ངོས༌མའེ༌ མིང༌སྲིང༌ ཙོགས༌ ཅེས༌པ༌ ཅོ༌ཤིག༌། ཅིག༌ དང༌ ཅིག༌ག༌ རང༌ངི༌ སང༌ མང༌ང༌ རྩི༌ཝ༌ ཅོ༌ཤིག༌།
ROM 12:11 ལས༌མི༌ལམ༌ མ༌གྱུར༌ར༌, རྩོན༌གྲུས༌ སྲན༌ཏྲེ༌ ཅོ༌ཨིན༌, གཙོ༌བོའ༌ ཞབས༌ཏོག༌, དོད༌པ༌ ཆེན༌མོ༌ ཉམ༌པོ༌ ཞུ༌ཤིག༌།
ROM 12:12 རེ༌ཝའེ༌ ནང༌ང༌ གའ༌མོ༌ ཅོ༌ཤིག༌། ནགས༌སི༌ ནང༌ང༌ ཟོད༌པ༌ སྒོམ༌ཤིག༌། མོས༌ལམ༌ ཞུ༌ཅེས༌ མ༌ནེ༌ མ༌ཕང༌ཤིག༌།
ROM 12:13 དཀོན༌མཆོག༌གི༌ མི༌གུན༌ སྒོས༌དོམ༌མི༌ ནང༌ང༌ ཡོད༌ ཟ༌ནེ༌, ཁོང༌གུན༌ལ༌ རོགས༌ ཅོ༌ཅེས༌ལ༌ གྲལ༌གྲིག༌ དུག༌ཤིག༌། རང༌ངི༌ ཁང༌པ༌ ཏུས༌གྱུན༌ བེས༌པ༌གུན༌ནི༌ ཕིའ༌ ཕེས༌ཏེ༌ བོར༌ཤིག༌།
ROM 12:14 ཁྱོ༌ཞའ༌ རྡུག༌ངལ༌ སྟན༌ཁན༌གུན༌ལ༌ ཅིན༌ལབས༌ ཏོང༌ཤིག༌, ཏེ༌གུན༌ལ༌ ངན༌ མ༌ཏབ༌ཤིག༌། དཀོན༌མཆོག༌གི༌ ཁོང༌གུན༌ལ༌ ཅིན༌ལབས༌ སལ༌ལ༌ ཛད༌ཅེས༌ལ༌ མོས༌ལམ༌ ཕུལ༌ཤིག༌།
ROM 12:15 སྐྱིད༌པོ༌ ཅོ༌ཁན༌གུན༌ ཉམ༌པོ༌ སྐྱིད༌པོ༌ ཅོ༌ཤིག༌། རྡུག༌པོ༌ ཅོ༌ཁན༌གུན༌ ཉམ༌པོ༌ རྡུག༌པོ༌ ཅོ༌ཤིག༌།
ROM 12:16 ཅིག༌ དང༌ ཅིག༌ ཉམ༌པོ༌ ཐུན༌ཏེ༌ དུག༌ཤིག༌། ཕོ༌སོ༌ མ༌ཚོར༌ར༌ མི༌ ཉམ༌ཤུང༌གུན༌ ཉམ༌པོ༌ དྲེ༌ཤེས༌ལ༌ ཐད༌གོས༌། ཡང༌ ཁྱོ༌ཞ༌གུན༌ལ༌ ཅི༌ཚང༌མ༌ ཤེས༌སད༌ མ༌སམ༌ཤིག༌།
ROM 12:17 ངན༌པ༌ ཅོ༌ཁན༌ཞིག༌གི༌ ལན༌ལ༌ ངན༌པ༌ མ༌ཅོ༌ཤིག༌། ཞན༌མ༌ ཚང༌མའེ༌ རྩི༌ཝ༌ཅན༌ ཐེ༌ཁན༌ནི༌ ལས༌ རིག༌ ཅོ༌ཤིག༌།
ROM 12:18 ཚང༌མ༌ ཉམ༌པོ༌ ཞི༌དེའེ༌ ནང༌ང༌ དུག༌ཅེས༌ལ༌ ཁྱོ༌ཞའེ༌ རྩོན༌གྲུས༌ སྲན༌ཏྲེ༌ ཅོ༌ཤིག༌།
ROM 12:19 ཅེས༌པའེ༌ ཛ༌འོ༌གུན༌, ངན༌པ༌ ལན༌ མ༌ཏང༌ང༌, ཏེ༌བོ༌ དཀོན༌མཆོག༌གི༌ ཐུགས༌སྲོའེ༌ ཕིའ༌ བོར༌ཤིག༌, ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ངའེ༌ ལན༌ཏང༌ཨིན༌། ངའེ༌ ཁོང༌གུན༌ལ༌ ལོགས༌ཏེ༌ ལན༌ཏང༌ཨིན༌།” གཙོ༌བོའེ༌ མོལས༌།
ROM 12:20 མ༌ཚད༌ ལན༌ནི༌ ཚབས༌ལ༌, “ཀལ༌ཏེས༌ ཁྱོ༌ཞའེ༌ གྲ༌འོ༌གུན༌ སྟོགས༌སད༌ན༌, ཁོང༌གུན༌ལ༌ ཟའ༌ཅེས༌ ཏོང༌ཤིག༌། ཀལ༌ཏེས༌ ཁོང༌གུན༌ སྐོམས༌སད༌ན༌, ཁོང༌གུན༌ལ༌ ཐུང༌ཅེས༌ལ༌ ཆུ༌ ཏོང༌ཤིག༌། ཏེ༌ཟུག༌ ཅོ༌ཅེས༌ནེ༌, ཁྱོ༌ཞའེ༌ ཁོང༌གུན༌ནི༌ སེམས༌སི༌ ནང༌ང༌ ཁྲེལ༌བའེ༌ བར༌ཨིན༌ ཡོད༌ཁན༌ནི༌ སོལ༌ལ༌བོ༌ སྤུངས༌ཏེ༌ ཨིན༌ནོག༌།”
ROM 12:21 ཁྱོ༌ཞའེ༌ཀ༌ ངན༌པའ༌ གྱལ༌ཐོབ༌ མ༌ཅུག༌ཤིག༌, ཨིན༌ནའང༌ ལས༌ ཟང༌པོ༌ གྱུད༌ཏེ༌ ཁྱོ༌ཞའེ༌ ཁྱོ༌ཞ༌རང༌ང༌ ངན༌པའེ༌ ཀ༌ནེ༌ གྱལ༌ཐོབ༌ ཅུག༌ཤིག༌།
ROM 13:1 ཁྱོ༌ཞའ༌ ཚང༌མ༌ ཝང༌སྲུལ༌པ༌གུན༌ནི༌ ཝང༌ངི༌ ཡོག༌ག༌ དུག༌གོས༌། དཀོན༌མཆོག༌གི༌ ལྡམ༌མ༌ ཛད༌ཁན༌བོ༌ མན༌པ༌, ཡང༌ ཝང༌ཞིག༌ མེད༌ཏེ༌ ཨིན༌ནོག༌། དག༌ས༌ ཝང༌སྲུལ༌ཨིན༌ ཡོད༌ཁན༌གུན༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཨིན༌ནོག༌།
ROM 13:2 ཏེ༌བོའེ༌ཕིའ༌ སུ༌ཞིག༌གི༌ ཝང༌སྲུལ༌པ༌གུན༌ནི༌ གྱབ༌གལ༌ ཅོའད༌ན༌, ཁོང༌གུན༌ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌བོའེ༌ གྱབ༌གལ༌ ཅོས༌ཏེ༌ ཨིན༌ནོག༌, ཡང༌ ཏེ༌ཟུག༌ ཅོ༌ཁན༌གུན༌ལ༌ ཆད༌པ༌ ཕོག༌ཨིན༌།
ROM 13:3 ཝང༌སྲུལ༌ཁན༌གུན༌ནི༌ ཟང༌པོ༌ ཅོ༌ཁན༌གུན༌ནི༌ ནང༌ང༌ མན༌པ༌, ངན༌པ༌ ཅོ༌ཁན༌གུན༌ནི༌ ནང༌ང༌ ཇིགས༌ནང༌ ཁྱོང༌ང༌ནོག༌། ཁྱོ༌ཞའ༌ ཝང༌སྲུལ༌ཁན༌གུན༌ནི༌ ཀ༌ནེ༌ ཇིགས༌ནང༌ མེད༌པ༌ དུག༌ཉིན༌ རག༌ག༌? ཟང༌པོ༌ ཨིན༌ཁན༌བོ༌ ཅོ༌ཤིག༌, ཏེ༌ནེ༌ ཁོང༌གུན༌ནི༌ ཁྱོ༌ཞ༌གུན༌ལ༌ རྩི༌ཝ༌ ཅོ༌ཨིན༌།
ROM 13:4 ཁོང༌གུན༌ དཀོན༌མཆོག༌གི༌ ཞབས༌ཏོག༌པ༌ ཁྱོ༌ཞ༌གུན༌ལ༌ ཕན༌ཐོགས༌ ཅོ༌ཅེས༌ལ༌ ཀལ༌ལ༌ ཛད༌ཁན༌གུན༌ ཨིན༌ནོག༌། ཀལ༌ཏེས༌ ཁྱོ༌ཞ༌གུན༌ནི༌ ངན༌པ༌ ལས༌ ཅོའད༌ན༌ ཇིགས༌གོས༌, ཅིའ༌ཟེར༌ན༌ ཁོང༌གུན༌ལ༌ ཆད༌པ༌ ཏང༌ཅེས༌སི༌ ཝང༌ ཡོད༌ཏེ༌ ཨིན༌ནོག༌། ཁོང༌གུན༌ དཀོན༌མཆོག༌གི༌ ཞབས༌ཏོག༌པ༌, ངན༌པ༌ ཅོ༌ཁན༌གུན༌ལ༌ ཆད༌པ༌ ཏང༌ང༌ལ༌ ལམ༌ཅུག༌ཁན༌གུན༌ ཨིན༌ནོག༌།
ROM 13:5 ཏེ༌བོའེ༌ཕིའ༌ ཁྱོ༌ཞ༌གུན༌ནི༌ ཆད༌པ༌ནེ༌ ཐར༌ཅེས༌ ཅིག༌པོ༌ མན༌པ༌, རང༌ངི༌ སེམས༌སི༌ ནང༌ང༌ ནོངས༌ མེད༌ཅེས༌སི༌ ཕིའ༌ ཁོང༌གུན༌ནི༌ ཝང༌ངི༌ ཡོག༌ག༌ དུག༌གོས༌།
ROM 13:6 ཏེན༌ན༌ གྱུན༌ཚན༌བོའེ༌ ཕིའ༌ ཁྱོ༌ཞ༌གུན༌ནི༌ ཁྲལ༌གུན༌ ཤལ༌ལ༌ནོག༌, ཅིའ༌ཟེར༌ན༌ ཝང༌སྲུལ༌ཁན༌གུན༌ དཀོན༌མཆོག༌གི༌ ཞབས༌ཏོག༌པ༌ ཨིན༌ནོག༌, ཡང༌ ཁོང༌གུན༌ནི༌ ཏུས༌ གང༌པོ༌ མི༌གུན༌ནི༌ ཞབས༌ཏོག༌གི༌ ཕིའ༌ ཏང༌ང༌ནོག༌།
ROM 13:7 ཝང༌སྲུལ༌ཁན༌ ཚང༌མའ༌ ཏང༌གོ༌ཤེས༌སི༌ འོས༌པ༌ ཨིན༌ཁན༌བོ༌ ཏོང༌ཤིག༌, སྤེར༌ན༌ ཁྲལ༌ ཤལ༌གོས༌ ཡོད༌ན༌ ཤོལ༌ཤིག༌, ཞན༌ཡང༌ པེ༌ནེ༌ ཤལ༌གོ༌ཤེས༌གུན༌ ཡོད༌ན༌ ཤོལ༌ཤིག༌, རྩི༌ཝ༌ དང༌ ཀུས༌པ༌ ཏང༌གོ༌ཤེས༌ཅན༌གུན༌ལ༌ རྩི༌ཝ༌ དང༌ ཀུས༌པ༌ ཏོང༌ཤིག༌།
ROM 13:8 ཅིག༌ དང༌ ཅིག༌གི༌ པར༌ལ༌ ཅེས༌པ༌ ཅོ༌ཅེས༌པོ༌ མན༌པ༌, ཞན༌ཡང༌ བུ༌ལོན༌ཞིག༌ ལུས༌ མ༌གོས༌, ཅིའ༌ཟེར༌ན༌ ཞན༌མ༌གུན༌ལ༌ ཅེས༌པ༌ ཅོ༌ཁན༌ནི༌ མི༌བོའེ༌ ཁྲིམས༌གུན༌ དྲན༌དྲ༌ གྲུབ༌ཅུགས༌ཏེ༌ ཨིན༌ནོག༌།
ROM 13:9 བཀའ༌རྒྱ༌གུན༌ ནི༌: “རང༌ངི༌ ཞིད༌མད༌ མན༌པ༌ ཞན༌མ༌ ཉམ༌པོ༌ ལུས༌བྲེལ༌ མ༌ཅོ༌”, “མི༌སད༌ མ༌གོས༌”, “རྐུ༌ མ༌གོས༌”, “ཞན༌མའ༌ ཡོད༌ཁན༌བོའེ༌ དོད༌པ༌ ཅོ༌ མ༌གོས༌,” ཏེ༌གུན༌ དང༌ ཞན༌ཡང༌ བཀའ༌རྒྱ༌ ཚང༌མའ༌ འི༌ བཀའ༌རྒྱ༌ ཅིག༌པོའེ༌ ནང༌ང༌ དོར༌ལྡུས༌ཏེ༌ ཨིན༌ནོག༌, “རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌།”
ROM 13:10 ཅམས༌པའེ༌, ཞན༌མ༌ ནོད༌པ༌ སྐྱལ༌ལ༌ མ༌ནོག༌ སོང༌པ༌སང༌, ཅམས༌པའེ༌ དཀོན༌མཆོག༌གི༌ ཁྲིམས༌སི༌ སྒོས༌དོམ༌གུན༌ དྲན༌དྲ༌ གྲུབ༌ ཅུག༌ག༌ནོག༌།
ROM 13:11 ཏེ༌ཟུག༌ ཅོ༌ཅེས༌པོ༌ མང༌ང༌ ཁག༌ཅན༌ ཨིན༌ནོག༌། ཏུས༌པོ༌ བུད༌ཨིན༌ ཆའ༌ཁན༌ ཡང༌ ཁྱོ༌ཞའ༌ གོར༌ཏེ༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌། ཉིད༌ནེ༌ ལོང༌ཤིག༌, ཅིའ༌ཟེར༌ན༌ གོ༌མ༌ ང༌ཏི༌ ཏད༌པ༌ ཅོ༌ཁན༌ནི༌ ཏུས༌པོའེ༌ སང༌, དག༌ས༌ ང༌དང༌གུན༌ ཐར༌པ༌བོའེ༌ མང༌ང༌ ཉེ༌མོའ༌ ལེབས༌ཏེ༌ ཨིན༌ནོག༌།
ROM 13:12 ཚན༌བོ༌ བུད༌ ཚར༌ཀྱིས༌ སོང༌ཏེ༌ ཐར༌པའེ༌ ཞག༌པོ༌ གྱོགས༌པ༌ ལེབ༌ཅེས༌ ཡོད༌ པ༌སང༌, ཁྱོ༌ཞ༌གུན༌ནི༌ མུན༌གྲིག༌གི༌ ལས༌གུན༌ ཕངས༌ཏེ༌ འོད༌དི༌ ལྡང༌ཤན༌ མག༌ཆ༌གུན༌ གོན༌ཤིག༌།
ROM 13:13 ང༌དང༌གུན༌ ཉི༌མ༌ ལྡང༌ཤན༌ནི༌ ཨིན༌ཅེས༌པོའེ༌, ང༌དང༌གུན༌ནི༌ མི༌ཚེ༌ ལག༌མོ༌ཞིག༌ ཕུད༌ཤིག༌། སྤེར༌ན༌ གྲོན༌ཏང༌ཨིན༌ ར༌རོས༌ཤེས༌སི༌ ཟས༌གུན༌ ལེན༌ཏེ༌ ཀྲན༌བ༌ སྟོར༌ མི༌ཅུག༌ཅེས༌ དང༌ ཆང༌ མང༌པོ༌ ཐུངས༌ཏེ༌ ར༌ མི༌རོས༌ཤེས༌, ལུས༌བྲེལ༌ ངན༌པ༌ དང༌ འོས༌པའེ༌ ལུས༌བྲེལ༌ལི༌ ཚད༌ནེ༌ ཐལ༌ཏེ༌ མི༌ཅོ༌ཅེས༌, ཛིང༌མོ༌ མི༌ཏང༌ཅེས༌ དང༌ རྩིག༌ མི༌རྩིག༌ཅེས༌།
ROM 13:14 ཏེ༌བོའེ༌ ཚབས༌ལ༌, ཁྱོ༌ཞའ༌ རང༌དང༌རང༌ང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྕོད༌ལམ༌གུན༌ ཀོས༌ལག༌ ཙོགས༌ལ༌ གོན༌ཤིག༌, ཡང༌ སྡིག༌པའེ༌ དོད༌པ༌གུན༌ ཀ༌ཟུག༌གི༌ དྲན༌དྲའ༌ གྲུབ༌ཅུག༌ཅེས༌སི༌ སམ༌བ༌ ཁྱོ༌ཞའེ༌ ནང༌ང༌ ཡོང༌ མ༌ཅུག༌ཤིག༌།
ROM 14:1 ཏད༌པའེ༌ ནང༌ང༌ འུ༌ཐུགས༌ ཡོད༌ཁན༌གུན༌ ཁྱོ༌ཞ༌གུན༌ནི༌ ཕྲོའ༌ སྲེས༌, ཨིན༌ནའང༌ ཁོང༌གུན༌ནི༌ སམ༌ཚུལ༌ ཀ༌བོ༌ སེམས༌ཉིད༌དི༌ ཐོག༌ནེ༌ ཁག༌ཅན༌ མན༌ ཏེ༌གུན༌ནི༌ སྐོར༌ལ༌ ཛིང༌མོ༌ མ༌ཏང༌ཤིག༌།
ROM 14:2 སྤེར༌ན༌ མི༌ ཅིག༌གི༌ ཏད༌པའེ༌ ཁོའ༌ ཅི༌ཚང༌མ༌ ཟའ༌ནའང༌ ཆོགས༌ ཟེར༌ར༌ནོག༌, ཨིན༌ནའང༌ ཏད༌པ༌ འུ༌ཐུགས༌ ཡོད༌ཁན༌ ཡང༌མི༌ཞིག༌གི༌, ཚོད༌མ༌ མ༌ནེ༌ ཟའ༌ མ༌ནོག༌།
ROM 14:3 ཅི༌ཚང༌མ༌ ཟའ༌ཁན༌གུན༌ནི༌ ཚོད༌མ༌ མ༌ནེ༌ མ༌ཟའ༌ཁན༌གུན༌ལ༌ ཉམ༌ཤུང༌ རྩི༌ཝ༌ མེད༌ཁན༌ ཙོགས༌ལ༌ ལྟའ༌ མ༌གོས༌། ཡང༌ ཤ༌ མ༌ཟའ༌ཁན༌གུན༌ནི༌, ཟའ༌ཁན༌གུན༌ལ༌ སྡིག༌པ༌ ཅོས༌ཏེ༌ ཨིན༌ནོག༌ ཟེར༌ཏེ༌ ཉད༌གལ༌ ཀལ༌ མ༌གོས༌, ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ གའ༌སུས༌ ཞུའ༌ ཛད༌ཏེ༌ ཨིན༌ནོག༌།
ROM 14:4 ཞན༌མ༌ཞིག༌གི༌ ཞབས༌ཏོག༌པ༌ ཞིག༌ག༌ ཁྲིམས༌ཅད༌ ཏང༌ཁན༌ ཁྱོ༌རང༌ སུ༌ ཨིན༌། ཁོང༌གུན༌ ནོངས༌མེད༌ ཨིན༌ན༌ མན༌, ཏེ༌བོ༌ ཁོ༌རང༌གུན༌ནི༌ སྤོན༌བོའེ༌ ཐག༌ཅད༌ སལ༌ཨིན༌། ཡང༌ ཁོང༌གུན༌ ནོངས༌མེད༌ ལུས༌ཨིན༌, ཅིའ༌ཟེར༌ན༌ གཙོ༌བོའེ༌, ཁོང༌གུན༌ ནོངས༌མེད༌ ཅོ༌ཉན༌ན༌ ཛད༌ད༌ནོག༌།
ROM 14:5 མི༌ ཅིག༌གི༌, ཞག༌ཅིག༌ ཡང༌ཞག༌གུན༌ནི༌ སང༌ མང༌ང༌ ཏམ༌པ༌ ཐེའ༌ནོག༌། ཞན༌ཡང༌ མི༌ ཅིག༌གི༌, ཞག༌ ཚང༌མ༌ ཙོགས༌ ཐེའ༌ནོག༌། ཁྱོ༌ཞའ༌ རེ༌རེའེ༌ རང༌རང༌ངི༌ སམ༌ཁན༌བོའེ༌ཀ༌ སྟན༌པོ༌ ཡོང༌གོས༌།
ROM 14:6 ཞག༌ཅིག༌ ཁག༌ཅན༌ ཐེས༌ཏེ༌ གཙོ༌བོའ༌ ཅོལ༌ཁན༌གུན༌ནི༌ ཏེ༌བོ༌ ཁོང༌ང༌ རྩི༌ཝ༌ ཕུལ༌ཅེས༌ལ༌ ཅོའ༌ནོག༌། ཤ༌ ཟའ༌ཁན༌གུན༌ནི༌ གཙོ༌བོའེ༌ རྩི༌ཝའེ༌ ནང༌ང༌ ཟའ༌ནོག༌, ཅིའ༌ཟེར༌ན༌ ཁོང༌གུན༌ནི༌ ཟའེ༌ སང༌ སྔུན༌ལ༌ དཀོན༌མཆོག༌ག༌ ཐུག༌རྗེ༌ཆེ༌ ཞུས༌ཏེ༌ ཨིན༌ནོག༌། ཡང༌ ཤ༌ མ༌ཟའ༌ཁན༌གུན༌ནིའང༌ གཙོ༌བོའེ༌ རྩི༌ཝའེ༌ ནང༌ང༌ ཤ༌ ཟའ༌ མ༌ནོག༌ ཡང༌ ཁོང༌གུན༌ནི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ནོག༌།
ROM 14:7 ང༌དང༌གུན༌ ང༌དང༌རང༌ངི༌ ཕིའ༌ སོན༌ཏེའ༌ དུག༌ག༌ མ༌ནོག༌, ཡ༌ ང༌དང༌རང༌ངི༌ ཕིའ༌ ཤིའ༌ མ༌ནོག༌།
ROM 14:8 ཀལ༌ཏེས༌ ང༌དང༌གུན༌ སོན༌ཏེ༌ མི༌ཚེ༌ ཕུད༌དད༌ན༌, ཏེ༌བོ༌ གཙོ༌བོའ༌ རྩི༌ཝའེ༌ ཕིའ༌ ཨིན༌ནོག༌། ཡ༌ ང༌ ཀལ༌ཏེས༌ ང༌དང༌གུན༌ ཤི༌ན༌ ཏེ༌བོའང༌ གཙོ༌བོའེ༌ རྩི༌ཝའེ༌ ཕིའ༌ ཨིན༌ནོག༌། ཏེ༌བོའེ༌ཕིའ༌ ང༌དང༌གུན༌ སོན༌ཏེའ༌ ཡོད༌གྲོ༌ ཡ༌ ཤི༌ཏེ༌, ང༌དང༌གུན༌ གཙོ༌བོའེ༌ ཨིན༌ནོག༌།
ROM 14:9 ཤི༌ཁན༌ དང༌ སོན༌ཏེ༌ ཉིས༌ཀོའེ༌ གཙོ༌བོ༌ གྱུར༌ཅེས༌སི༌ གྱུན༌ཚན༌བོའེ༌ ཕིའ༌, མ༌ཤི༌ཀ༌ ཀྲོངས༌ས༌ ཛད༌ཏེ༌ ཡང༌སྐྱར༌ སོན༌ཏེའ༌ ཞངས༌ས༌ ཛདས༌།
ROM 14:10 ཏེ༌ནེ༌ ཅི༌ཕིའ༌ ཁྱོ༌རང༌ངི༌ སྤུན༌ཞིག༌ག༌ སྐྱོན༌ ཀལ༌ལད༌། ཡང༌ ཁོང༌གུན༌ལ༌ ཉམ༌ཤུང༌ རྩི༌ཝ༌ མེད༌ཁན༌ ཙོགས༌ལ༌ ཅིའ༌ ལྟའད༌། ཨིད༌ཏུ༌ ཅོ༌ཤིག༌, ང༌དང༌ ཚང༌མ༌ དཀོན༌མཆོག༌གི༌ ཁྲིམས༌ཅད༌དི༌ ཞུགས༌ཁྲིས༌སི༌ དུན༌ལ༌ ལང༌གོས༌ས༌ནོག༌།
ROM 14:11 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “གཙོ༌བོའེ༌ མོལས༌, ‘ཀ༌ཟུག༌ ང༌ སོན༌ཏེའ༌ ཡོད༌ཁན༌བོ༌ དེན༌བ༌ ཨིན༌, པིག༌མོ༌ ཚུགས༌ཏེ༌ ཚང༌མའེ༌ ངའ༌ ཆག༌ཕུལ༌ཨིན༌། ལྕེ༌ ཚང༌མའེ༌ སྟོད༌པ༌ ཕུལ༌ཨིན༌ ང༌ དཀོན༌མཆོག༌ ཨིན༌ཁན༌བོའེ༌ སྤང༌པོ༌ ཏང༌ཨིན༌།’”
ROM 14:12 ཏེན༌ན༌བོའེ༌ཕིའ༌ ང༌དང༌ རེ༌རེའ༌ དཀོན༌མཆོག༌གི༌ སྐུན༌དུན༌ལ༌ རང༌རང༌ངི༌ ཅོ༌ཁན༌ ཚང༌མ༌ ཤད༌གོས༌ས༌ནོག༌, ཏེ༌ནེ༌ ཁོང༌ངི༌ ཁྲིམས༌ཅད༌ ཛད༌ཨིན༌།
ROM 14:13 སོང༌པ༌སང༌ ཅིག༌ དང༌ ཅིག༌ག༌ སྐྱོན༌རྗོད༌ མ༌ཅོ༌ཤིག༌། ཏེ༌བོའེ༌ ཚབས༌ལ༌, ཞན༌མ༌ ཏད༌པ༌ཅན༌ཞིག༌ སྒག༌གྱབས༌ཏེ༌ གྱེལ༌ མི༌ཅུག༌ཅེས༌སི༌ མི༌ཚེ༌ཞིག༌ ཕུད༌ཤིག༌།
ROM 14:14 ང༌ གྱུས༌ཡོད༌, ཡང༌ གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌ ཟའ༌ཅེས༌སི༌ རིགས༌ ཚང༌མ༌ ཚི༌ཏུ༌ མན༌ཁན༌བོ༌ ང༌ ཏན༌ཏན༌ལ༌ ལོ༌ཁྱེལ༌ རག༌། ཨིན༌ནའང༌ ཀལ༌ཏེས༌ སུ༌ཞིག༌གི༌ ཏེ༌བོ༌ རྩང༌མ༌ མ༌ནོག༌ སམ༌ན༌, ཏེ༌ནེ༌ ཁོའེ༌ ཕིའ༌ ཏེ༌བོ༌ རྩང༌མ༌ མ༌ནོག༌།
ROM 14:15 ཀལ༌ཏེས༌ ཁྱོ༌ཞའེ༌ ཟའ༌ཅེས༌པོའེ༌, ཞན༌ཡང༌ སྤུན༌ཞིག༌ག༌ སེམ༌ཕམས༌ ཆ༌ཅུག༌ན༌, ཏེ༌ནེ༌ ཁྱོ༌ཞའེ༌ ཅེས༌པའེ༌ ནང༌ང༌ ལས༌ མ༌ཅོའ༌ ཨིན༌ནོག༌། ཁྱོ༌ཞ༌གུན༌ནི༌ ཟའ༌ཅེས༌པོའེ༌, ཁྱོ༌ཞ༌རང༌ངི༌ སྤུན༌ཞིག༌གི༌ ཏད༌པ༌ མེད༌ཁན༌ མ༌ཅོ༌ཤིག༌, ཀ༌བོའེ༌ ཏོན༌ལ༌ མ༌ཤི༌ཀ༌ ཀྲོངས༌ས༌ ཛདས༌།
ROM 14:16 ཁྱོ༌ཞའེ༌ གྱལ༌ལ༌ ཨིན༌ནོག༌ སམས༌ཏེ༌ ཅོ༌ཁན༌བོའ༌ སུ༌ཞིག༌གིའང༌ སྐྱོན༌རྗོད༌ ཅོ༌ མ༌ཅུག༌ཤིག༌།
ROM 14:17 དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཁག༌ཅན༌བོ༌ ནི༌, ཟའ༌ཅེས༌ དང༌ ཐུང༌ཅེས༌ མན༌པ༌, ཏམ༌པའེ༌ ཐུག༌ཉིད༌དི༌ ནང༌ང༌ ཞི༌དེ༌ དང༌ སྐྱིད༌པོའེ༌ མི༌ཚེ༌ ཀྲང༌པོ༌ཞིག༌ ཕུད༌ཅེས༌པོ༌ ཨིན༌ནོག༌།
ROM 14:18 ཀལ༌ཏེས༌ ཁྱོ༌ཞ༌གུན༌ནི༌ ཏེ༌ཟུག༌ མི༌ཚེ༌ ཕུད༌ཨིན༌ མ༌ཤི༌ཀ༌ ཞབས༌ཏོག༌ ཞུ༌ན༌, ཁྱོ༌ཞ༌གུན༌ནི༌ དཀོན༌མཆོག༌ ཐུགས༌ཐད༌ ཅུག༌ག༌ནོག༌, ཡང༌ ཞན༌མ༌གུན༌ནི༌ ཁྱོ༌ཞ༌གུན༌ལ༌ རྩི༌ཝ༌ ཅོ༌ཨིན༌།
ROM 14:19 ང༌དང༌གུན༌ནི༌ ཆོས༌ཚོགས༌སི༌ ནང༌ང༌ ཞི༌དེ༌ ཁྱོང༌ཅེས༌ དང༌ གཙོ༌བོའེ༌ ནང༌ང༌ ཅིག༌ དང༌ ཅིག༌ ལྡན༌ཅུག༌ཅེས༌སི༌ ནང༌ང༌ སྲན༌ཏྲེ༌ རྩོན༌གྲུས༌ ཅོ༌ཨིན༌།
ROM 14:20 ཟའ༌ཅེས༌ཤིག༌གི༌ ཏོན༌ལ༌ དཀོན༌མཆོག༌གི༌ ཆག༌ལས༌པོ༌ མེད༌ཁན༌ མ༌ཅོ༌། ཟའ༌ཅེས༌ ཚང༌མ༌ རྩང༌མ༌ ཨིན༌ནོག༌། ཨིན༌ནའང༌ ཁྱོ༌ཞའེ༌ ཟའ༌ཅེས༌པོའེ༌ ཞན༌མི༌ཞིག༌ ཏད༌པའེ༌ ནང༌ང༌ སྒག༌གྱབ༌ཅུག༌གད༌ན༌, ཏེ༌ནེ༌ ཏེ༌བོ༌ གྱལ༌ལ༌ཞིག༌ ཅོས༌ཏེ༌ མ༌ནོག༌།
ROM 14:21 ཤ༌ ཟའ༌ཅེས༌ ཡ༌ ཆང༌ ཐུང༌ཅེས༌ ཡ༌ ཞན༌ཡང༌ ལས༌གུན༌ནི༌, ཁྱོ༌ཞ༌རང༌ངི༌ སྤུན༌ཞིག༌ག༌ ཏད༌པའེ༌ ནང༌ང༌ སྒག༌གྱབ༌ཅུག༌གད༌ན༌, ཏེ༌ནེ༌ ཏེ༌གུན༌ མ༌ཅོ༌ན༌ མང༌ང༌ གྱལ༌ལ༌ ཨིན༌ནོག༌།
ROM 14:22 ཏེ༌ ཚང༌མའེ༌ སྐོར༌ལ༌ ཁྱོ༌ཞ༌གུན༌ནི༌ ཏད༌པ༌ ཅོ༌ཁན༌བོ༌ དཀོན༌མཆོག༌ དང༌ ཁྱོ༌ཞ༌རང༌གུན༌ནི༌ པར༌ལ༌ བོར༌ཤིག༌། ཟང༌པོ༌ ཨིན༌ སམས༌ཏེ༌ ཅོ༌ཁན༌ནི༌ ལས༌པོའེ༌ཀ༌ ནོངས༌ཅན༌ མ༌ཚོར༌ཁན༌གུན༌, ཙམ༌ཤིག༌གི༌ ཅིན༌ལབས༌ཅན༌ མ༌ནོག༌།
ROM 14:23 ཨིན༌ནའང༌ ཐེ༌ཚོམས༌ ཡོད༌ཏེ༌ ཟའ༌ཁན༌ནི༌ མི༌བོའེ༌ སྡིག༌པ༌ ཅོས༌ཏེ༌ ཨིན༌ནོག༌, ཅིའ༌ཟེར༌ན༌ ཁོའེ༌ ཏེ༌ ཟན༌བོ༌ ཏད༌པ༌ ཅོས༌ཏེ༌ མ༌ཟའ༌ ཨིན༌ནོག༌། ཡང༌ ཁྱོ༌ཞའེ༌ ཅོས༌ཁན༌ ཚང༌མ༌ ཏད༌པ༌ གྱུད༌ཏེ༌ མན༌ན༌, ཁྱོ༌ཞ༌གུན༌ནི༌ སྡིག༌པ༌ ཅོས༌ཏེ༌ ཨིན༌ནོག༌།
ROM 15:1 ང༌དང༌ ཏད༌པའེ༌ ནང༌ང༌ ཤུགས༌ཅན༌ ཡོད༌ཁན༌གུན༌ནི༌, ང༌དང༌རང༌གུན༌ ཐད༌ཅུག༌ཅེས༌ མན༌པ༌, ཏད༌པའེ༌ ནང༌ང༌ འུ༌ཐུགས༌ ཡོད༌ཁན༌གུན༌ནི༌ སྒོས༌དོམ༌མི༌ སྐོར༌ལ༌ སམ༌བ༌ ཏང༌གོ༌ཤེས༌ ཨིན༌ནོག༌།
ROM 15:2 ང༌དང༌གུན༌ནི༌ ཞན༌ སྤུན༌གུན༌ནི༌ ཕན༌ཐོགས༌སི༌ ཕིའ༌ རོགས༌ ཅོས༌ཏེ༌ ཁོང༌གུན༌ གཙོ༌བོའ༌ ཏད༌པ༌ ཅོ༌ཅེས༌སི༌ ནང༌ང༌ ལྡན༌ཅུག༌གོས༌།
ROM 15:3 ཨིད༌ཏུ༌ ཅོ༌ཤིག༌གའང༌, མ༌ཤི༌ཀེའང༌ ཁོང༌རང༌ ཐད༌ཅུག༌ཅེས༌ལ༌ མི༌ཚེ༌ ཕུད༌ད༌ མ༌ཛདས༌། ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཏེ༌ ཚིགས༌, ཀ༌གུན༌ དཀོན༌མཆོག༌ག༌ ཏམ༌ངན༌ ཏང༌ང༌ ཀོལས༌, ཏེ༌གུན༌ ངའེ༌ཀ༌ བབས༌ཏེ༌ ཨིན༌ནོག༌།”
ROM 15:4 ང༌དང༌གུན༌ལ༌ ལབ༌ཅེས༌སི༌ ཕིའ༌ ཏེ༌ ཚང༌མ༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཏེ༌ ཨིན༌ནོག༌། དཀོན༌མཆོག༌གི༌ ཞལ༌ཆད༌གུན༌ གྲུབ༌ཅེས༌ལ༌ ང༌དང༌ ཟོད༌པ༌ ཉམ༌པོ༌ སྲུངས༌ཏེ༌ ཡོད༌ ཟ༌ནེ༌, ཏམ༌པའེ༌ སུང༌རབས༌སི༌ ང༌དང༌ང༌ རེ༌ཝ༌ དང༌ སྤོས༌པ༌ ཏང༌ང༌ནོག༌།
ROM 15:5 སྙིང༌རུས༌ དང༌ སྤོས༌པ༌ སལ༌ལ༌ ཛད༌ཁན༌ནི༌ ཏེན༌ན༌ དཀོན༌མཆོག༌པོའེ༌ ཁྱོ༌ཞ༌གུན༌ ཅིག༌ དང༌ ཅིག༌ ཉམ༌པོ༌ ཐུན༌ཏེ༌ དུག༌ཅེས༌ལ༌ རོགས༌ ཛད༌ཤིག༌, ཀ༌ཟུག༌ མ༌ཤི༌ཀ༌ ཡེ༌ཤུའི༌ གྱབ༌ནེ༌ གྲུལ༌ཁན༌གུན༌ ཡོང༌གོ༌ཤེས༌ ཨིན༌ནོག༌།
ROM 15:6 ཏེ༌ནེ༌ ཁྱོ༌ཞའ༌ ཚང༌མ༌ ཅིག༌གྲིལ༌ སོང༌ཏེ༌ སྐད༌ཅིག༌གི༌ ནང༌ང༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དཀོན༌མཆོག༌ག༌ སྟོད༌པ༌ དང༌ སྤལ༌ གུན༌ ཕུལ༌ཉན༌ཨིན༌།
ROM 15:7 མ༌ཤི༌ཀའེ༌ ཁྱོ༌ཞ༌གུན༌ལ༌ གའ༌སུས༌ ཞུའ༌ ཙོགས༌ལ༌, དཀོན༌མཆོག༌གི༌ སྤལ༌ལི༌ ཕིའ༌ ཁྱོ༌ཞ༌གུན༌ནི༌ སྤུན༌ ཚང༌མའ༌ ཡ༌ཕེས༌ མེད༌པ༌ གའ༌སུས༌ ཞུ༌ཤིག༌།
ROM 15:8 ཨིད༌ཏུ༌ ཅོ༌ཤིག༌, དཀོན༌མཆོག༌ ཡ༌ཧུ༌དཱ༌པ༌གུན༌ནི༌ ཕ༌མེས༌པོ༌གུན༌ལ༌ ཞལ༌ཆད༌ ཛད༌ཁན༌བོའེ༌ ནང༌ང༌ ཨིད༌ཤེས༌ཅན༌ ཞུགས༌ཏེ༌ ཨིན༌ཁན༌བོ༌ སྟན༌ན༌ ཛད༌ཅེས༌ལ༌, མ༌ཤི༌ཀ༌ ཡ༌ཧུ༌དཱ༌པ༌གུན༌ནི༌ ཞབས༌ཏོག༌པ༌ ཞིག༌གི༌ ཚུལ༌ལ༌ སྐྱོད༌ད༌ ཛདས༌།
ROM 15:9 ཡ༌ཧུ༌དཱ༌པ༌ མན༌ཁན༌གུན༌ལ༌ སྙིང༌རྗེའེ༌ ཛད༌ཅེས༌པོའེ༌ ཁོང༌གུན༌ནིའང༌ དཀོན༌མཆོག༌ག༌ སྤལ༌ ཕུལ༌ཨིན༌། ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཨིན༌ནོག༌, “ཏེ༌བོའེ༌ཕིའ༌, ངའེ༌ ཉེ༌རང༌ང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ སྟོད༌པ༌ ཕུལ༌ཨིན༌། ངའེ༌ ཉེ༌རང༌ངི༌ ཚན༌ལ༌ སྟོད༌པའེ༌ ལུ༌ ཕུལ༌ཨིན༌།”
ROM 15:10 ཏམ༌པའེ༌ སུང༌རབས༌སི༌ ཞན༌ ནས༌ས༌ཞིག༌གི༌ཀ༌ མོལ༌ཏེ༌ དུག༌། “ཡ༌ཧུ༌དཱ༌པ༌ མན༌ཁན༌, ཁྱོ༌ཞ༌གུན༌ནི༌ ཁོང༌ངི༌ མི༌གུན༌ ཉམ༌པོ༌ གའ༌མོ༌ ཅོ༌ཤིག༌།”
ROM 15:11 ཡང༌ ཞན༌ ནས༌ས༌ཞིག༌གི༌ཀ༌ མོལ༌ཏེ༌ དུག༌། “ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌ ཚང༌མའེ༌ གཙོ༌བོའ༌ སྟོད༌པ༌ ཕུལ༌ཤིག༌། ཡང༌ ཇིག༌རྟེན༌པ༌ ཚང༌མའེ༌ ཁོང༌ང༌ སྟོད༌པ༌ ཕུལ༌ཤིག༌།”
ROM 15:12 ཡང༌ ཞན༌ ནས༌ས༌ཞིག༌གི༌ཀ༌ ལུང༌སྟོན༌པ༌ ཡེ༌ཤ༌ཡཱའེ༌ མོལས༌, “དཱ༌བིད༌དི༌ ཁྲིས༌ ནོར༌སྐལ༌ལ༌ ཐོབ༌ཅེས༌ཅན༌བོ༌ སྐྱོད༌ཨིན༌ ཡང༌ ཁོང༌ངི༌ ཡ༌ཧུ༌དཱ༌པ༌ མན༌ཁན༌གུན༌ནི༌ཀ༌ ཝང༌སྲུལ༌ཨིན༌། ཏེ༌གུན༌ནི༌ ཁོང༌ངི༌ཀ༌ རེ༌ཝ༌བོ༌ བོར༌ཨིན༌།”
ROM 15:13 རེ༌ཝ༌ སལ༌ཁན༌ནི༌ དཀོན༌མཆོག༌གི༌ ཁྱོ༌ཞ༌གུན༌ནི༌ ནང༌ང༌ གའ༌མོ༌ དང༌ ཞི༌དེ༌ སྐང༌ང༌ ཛད༌ཤིག༌, ཅིའ༌ཟེར༌ན༌ ཁྱོ༌ཞའེ༌ ཁོང༌ངི༌ཀ༌ ཨིད༌ཤེས༌ ཅོས༌། ཏེ༌ནེ༌ ཏམ༌པའེ༌ ཐུག༌ཉིད༌ གྱུད༌ཏེ༌, ཁྱོ༌ཞ༌གུན༌ནི༌ ནང༌ང༌ རེ༌ཝ༌བོ༌ ལུད༌ཏེ༌ ཆེན༌།
ROM 15:14 ངའེ༌ ཅེས༌པའེ༌ སྤུན༌གུན༌, ཁྱོ༌ཞའ༌ ཟང༌པོའེ༌ གངས༌ཏེ༌ ཡོད༌ཁན༌བོའེ༌ཀ༌ ང༌ ཏན༌ཏན༌ལ༌ ལོ༌ཁྱེལ༌ རག༌། ཁྱོ༌ཞ༌གུན༌ལ༌ ཏེ༌གུན༌ མ༌ གྱལ༌ལ༌ ཅོས༌ཏེ༌ ཤེས༌ པ༌སང༌, ཁྱོ༌ཞ༌གུན༌ནི༌ ཅིག༌ དང༌ ཅིག༌ག༌ ཏེ༌བོའེ༌ སྐོར༌ལ༌ ལབ༌ཉན༌ཨིན༌།
ROM 15:15 ཏེ༌ནེའང༌ ཁྱོ༌ཞའ༌ ཨིད༌ཏུ༌ སྐུལ༌ཅེས༌སི༌ ཕིའ༌, ངའེ༌ སྤེ༌ར༌ ཁ༌ཅིག༌གི༌ སྐོར༌ལ༌ མ༌ ཧམ༌པ༌ ཉམ༌པོ༌ བྲིས༌ཏེ༌ ཨིན༌། ཅིའ༌ཞུ༌ན༌ དཀོན༌མཆོག༌གི༌ ཐུག༌རྗེའེ༌ གྱུད༌ཏེ༌
ROM 15:16 ང༌, མ༌ཤི༌ཀ༌ ཡེ༌ཤུའི༌ ཞབས༌ཏོག༌པ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ ཏམ༌པའེ༌ ལོན༌ ཁྱོང༌ཁན༌བོ༌ ཨིན༌། ཁྱོ༌ཞ༌གུན༌, དཀོན༌མཆོག༌གི༌ ཐུགས༌ཐད༌ད༌ ཛད༌ཁན༌ནི༌ ཆོད༌པ༌ ཐེའ༌ ཛད༌ཅེས༌ལ༌ གའ༌མོའེ༌ ནས༌ཚུལ༌བོ༌ ཁྱོངས༌པིན༌, ཀ༌གུན༌ ཏམ༌པའེ༌ ཐུག༌ཉིད༌ གྱུད༌ཏེ༌ ཏམ༌པ༌ ཅོའ༌ ཛད༌ཏེ༌ ཨིན༌།
ROM 15:17 དཀོན༌མཆོག༌གི༌ ཞབས༌ཏོག༌གི༌ ནང༌ང༌ མ༌ཤི༌ཀ༌ ཡེ༌ཤུའི༌, ང༌ གྱུད༌ཏེ༌, ཛད༌ཁན༌ ཚང༌མའེ༌ ཕིའ༌ ང༌ མ༌ ཐད༌པོ༌ རག༌།
ROM 15:18 ཏེ༌ནེའང༌ མ༌ཤི༌ཀའེ༌, ང༌ གྱུད༌ཏེ༌, ཅོའ༌ ཛད༌ཁན༌གུན༌ནི༌ ཕིའ༌ མན༌པ༌, ཡང༌ ཅི༌ཞིག༌གའང༌ ཕོ༌སོ༌ ཅོ༌ཅེས༌སི༌ ཧམ༌པ༌ ཅོའ༌མེད༌, ཀ༌བོ༌ ངའེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ལོན༌ དང༌ ལས༌ ཅོ༌ཚུལ༌ གུན༌ གྱུད༌ཏེ༌, ཁོང༌གུན༌ལ༌ དཀོན༌མཆོག༌གི༌ ནང༌ང༌ ཏད༌པ༌ ཅོ༌ཅུག༌ཅེས༌པོ༌ ཨིན༌།
ROM 15:19 ཧ༌ལས༌ཤེས༌སི༌ ལྟས༌གུན༌ དང༌ སྟགས༌གུན༌ནི༌ ཤུགས༌ ཡང༌ ཏམ༌པའེ༌ ཐུག༌ཉིད༌དི༌ ཤུགས༌ གྱུད༌ཏེ༌, ཁོང༌གུན༌ནི༌ ངའེ༌ ལོན༌ ཀྲང༌པོ༌ ཨིན༌ཁན༌བོའེ༌ཀ༌ ལོ༌ཁྱེལས༌། ཏེན༌ན༌ ཚུལ༌ལ༌ ངའེ༌ མ༌ཤི༌ཀའེ༌ གའ༌མོའེ༌ ནས༌ཚུལ༌ གང༌པོ༌ ཡེ༌རུ༌ཤ༌ལེམ༌མི༌ གྱལ༌ས༌ནེ༌ ཨི༌ལི༌རི༌ཀམ༌མི༌ གྱལ༌ས༌ ཚོག༌པ༌ ཤད༌པིན༌།
ROM 15:20 ཞན༌མ༌ཞིག༌གི༌ མག༌ལྡན༌ ཏངས༌ཁན༌བོའེ༌ཀ༌ མི༌རྩིག༌ཅེས༌སི༌ ཕིའ༌ ངའེ༌ མ༌ཤི༌ཀའེ༌ ཚན༌ མ༌ནེ༌ མི༌ཚོར༌སའེ༌ ནས༌ས༌གུན༌ནི༌ ནང༌ང༌ གའ༌མོའེ༌ ནས༌ཚུལ༌ ཤད༌ཅེས༌པོ༌ ནི༌, ཏུས༌གྱུན༌ ངའེ༌ མིག༌ཞི༌ ཨིན༌པིན༌།
ROM 15:21 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, “ཀ༌གུན༌ལ༌ ཁོང༌ངི༌ སྐོར༌ལ༌ མ༌ནེ༌ མ༌ཤདས༌ ཏེ༌གུན༌ནི༌ ཁོང༌ ཇལ༌ཨིན༌ ཡང༌ ཁོང༌ངི༌ སྐོར༌ལ༌ མ༌ནེ༌ མ༌ཚོར༌ཁན༌གུན༌ནི༌ ཧ༌གོ༌ཨིན༌། ”
ROM 15:22 ཏེན༌ན༌བོའེ༌ཕིའ༌ ང༌ ཁྱོ༌ཞ༌གུན༌ ཡོད༌ས༌ ཡོང༌ཅེས༌པོ༌ གོར༌ཏེ༌ ཨིན༌ནོག༌, ཅིའ༌ཟེར༌ན༌ ང༌ ཏེ༌ ནས༌ས༌གུན༌ནི༌ ནང༌ངའང༌ ཆོས༌ ཤད༌གོས༌ཏེ༌ ཨིན༌ནོག༌།
ROM 15:23 ཨིན༌ནའང༌ ཏ༌ ངའེ༌ འི༌ ཡུལ༌ཇོངས༌གུན༌ནི༌ ནང༌ང༌ ལས༌གུན༌ ཅོ༌ཚར༌། ཡང༌ ལོ༌ མང༌པོ༌ཞིག༌ནེ༌ ཕར༌ལ༌ ཁྱོ༌ཞའ༌ ཐུག༌ཅེས༌ལ༌ རིངས༌ཨིན༌ ཡོད༌པ༌,
ROM 15:24 ང༌ སྤེན༌ནི༌ ཡུལ༌ལ༌ ཆ༌ ཟ༌ནེ༌, ཁྱོ༌ཞའ༌ ཐུག༌ག༌ ཡོང༌ཨིན༌། ཏེ༌རུ༌ ཆ༌ ཟ༌ནེ༌ ང༌ ཁྱོ༌ཞའ༌ ཡོད༌ས༌ དུགས༌ཏེ༌ ཁྱོ༌ཞ༌གུན༌ ཉམ༌པོ༌ སྐྱིད༌པོའེ༌ ཏུས༌ཤིག༌ ཕུད༌ཨིན༌། ཡང༌ ངའེ༌ སྤེན༌ལ༌ ཆ༌ཅེས༌སི༌ བེས༌སི༌ སྒོས༌དོམ༌གུན༌ནི༌ ནང༌ང༌ ཁྱོ༌ཞའེ༌ རོགས༌ ཅོ༌ཉན༌ཨིན༌།
ROM 15:25 ཨིན༌ནའང༌ ང༌ ཡོང༌ངི༌ སང༌ སྔུན༌ལ༌, ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཏད༌པ༌ཅན༌གུན༌ལ༌ རོགས༌པོ༌ ཁྱེར༌ར༌ལ༌ ཆ༌གོ༌ཤེས༌ ཡོད༌།
ROM 15:26 མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱའེ༌ ཏད༌པ༌ཅན༌གུན༌, ཡེ༌རུ༌ཤ༌ལེམ༌མི༌ ཏད༌པ༌ཅན༌གུན༌ནི༌ ཕྲོའ༌ ཡོད༌ཁན༌ནི༌ ཉལ༌བ༌ཅན༌གུན༌ལ༌, རོགས༌ ཅོས༌ཏེ༌ པེ༌ནེ༌ ཀལ༌ཅེས༌ལ༌ ཐད༌པོ༌ ཡོད༌ཏེ༌ ཨིན༌ནོག༌།
ROM 15:27 ཁོང༌གུན༌ ཏེ༌ ཅོས༌ཁན༌བོའེ༌ཀ༌ མ༌སྲན༌ཏྲེ༌ ཐད༌པོ༌ ཨིན༌ནོག༌, ངོས༌པོའ༌ ཁོང༌གུན༌ནི༌ ཏེ༌བོ༌ བུ༌ལོན༌ཞིག༌ ཤལ༌གོས༌ཏེ༌ ཨིན༌ནོག༌། ཀལ༌ཏེས༌ ཡ༌ཧུ༌དཱ༌པ༌ མན༌ཁན༌གུན༌ནི༌, ཡ༌ཧུ༌དཱ༌པ༌གུན༌ལ༌ དཀོན༌མཆོག༌གི༌ ཅིན༌ལབས༌ ཐོབ༌ཁན༌གུན༌ བགོའད༌ན༌, ཏེ༌ནེ༌ ཁོང༌གུན༌ལ༌ ཡོད༌ཁན༌ནི༌ ནོར༌གུན༌ནའང༌ ཡ༌ཧུ༌དཱ༌པའེ༌ ཏད༌པ༌ཅན༌གུན༌ ཉམ༌པོ༌ བགོ༌གོས༌།
ROM 15:28 ངའེ༌ འི༌ པེ༌ནེ༌ ལྡུས༌ཁན༌བོ༌ ཁོང༌གུན༌ལ༌ ཏངས༌ཏེ༌ ང༌རང༌ངི༌ ཁག༌པོ༌ དྲན༌དྲའ༌ གྲུབ༌ཅུགས༌ཏེ༌ སྟིང༌ནེ༌, སྤེན༌ལ༌ ཆ༌ ཟ༌ནེ༌, ང༌ ཁྱོ༌ཞའ༌ ཐུགས༌ཏེ༌ ཆེན༌།
ROM 15:29 ཡང༌ ངའ༌ ཏན༌ཏན༌ རག༌, ང༌ ཁྱོ༌ཞའ༌ ཡོད༌ས༌ ལེབས༌ཏེ༌ ང༌དང༌གུན༌ ཉམ༌པོ༌ ཡོད༌ཁན༌ནི༌ ཏུས༌པོའ༌ མ༌ཤི༌ཀའེ༌, ཅིན༌ལབས༌ མང༌པོ༌ སལ༌ལ༌ ཛད༌ཨིན༌།
ROM 15:30 ཅེས༌པའེ༌ སྤུན༌གུན༌, ངའེ༌ ཁྱོ༌ཞ༌གུན༌ལ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ནང༌ང༌ སྤོས༌པ༌ ཏང༌ཨིན༌, ངའེ༌ བར༌དོའེ༌ ཏུས༌ལ༌ ངའེ༌ ཕིའ༌ དཀོན༌མཆོག༌ག༌ མོས༌ལམ༌ ཕུལ༌ཅེས༌ལ༌ ཞུ༌ཝ༌ ཕུལ༌ལད༌། ཏམ༌པའེ༌ ཐུག༌ཉིད༌དི༌ སལ༌ལ༌ ཛད༌ཁན༌ནི༌ ཁྱོ༌ཞ༌གུན༌ནི༌ ཅེས༌པ༌, ངའེ༌ ཕིའ༌ ཡོད༌ཅེས༌པོའེ༌ ཏེ༌བོ༌ ཅོ༌ཤིག༌།
ROM 15:31 ཡ༌ཧུ༌དཱའེ༌ ནང༌ང༌ ཡོད༌ཁན༌ནི༌ ཡ༌ཧུ༌དཱ༌པ༌ ཏད༌པ༌ མེད༌ཁན༌གུན༌ནི༌ ཀ༌ནེ༌ ང༌ སྐྱོབ༌ཅེས༌ལ༌ དཀོན༌མཆོག༌ག༌ མོས༌ལམ༌ ཞུ༌ཤིག༌། ཡང༌ ངའེ༌ ཡེ༌རུ༌ཤ༌ལེམ༌མ༌ ཁྱེར༌ཅེས༌ཅན༌ནི༌ རོགས༌སི༌ པེ༌ནེ༌བོ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌གུན༌ནི༌ ཐད༌པོ༌ ཉམ༌པོ༌ ལེན༌ཅེས༌ལའང༌ མོས༌ལམ༌ ཞུ༌ཤིག༌།
ROM 15:32 ཏེ༌ནེ༌ དཀོན༌མཆོག༌གི༌ ཐུག༌གོངས༌ ཡོད༌ན༌, ང༌ ཁྱོ༌ཞ༌གུན༌ ཡོད༌ས༌ སེམས༌ཐད༌པོ༌ ཉམ༌པོ༌ ཡོང༌ཨིན༌, ཡང༌ ང༌དང༌གུན༌ནི༌ ཅིག༌ དང༌ ཅིག༌ག༌ སྤོས༌པ༌ ཏང༌ ཐུབ༌ཨིན༌།
ROM 15:33 ཞི༌དེའེ༌ དཀོན༌མཆོག༌ ཁྱོ༌ཞའ༌ ཚང༌མ༌ ཉམ༌པོ༌ ཞུགས༌ཤིག༌, ཨ༌མེན༌།
ROM 16:1 ངའེ༌ ང༌དང༌གུན༌ནི༌ སྤུན༌མོ༌ ཕོ༌བི༌ སྐོར༌ལ༌ ཤད༌དད༌། ཁོ༌ ཀེན༌ཅརེ༌འེ༌ ཆོས༌ཚོགས༌སི༌ ནང༌ང༌ ཞབས༌ཏོག༌མ༌ ཞིག༌ ཨིན༌ནོག༌།
ROM 16:2 དཀོན༌མཆོག༌གི༌ མི༌གུན༌ནི༌ ཕྲོའ༌ རྩི༌ཝའེ༌ འོས༌པ༌ཅན༌, ཏེ༌ བུ༌མོ༌བོ༌ གཙོ༌བོའེ༌ ཨིན༌ཅེས༌པོའེ༌ གའ༌སུས༌ ཞུས༌། ཁོའ༌ སྒོས༌དོམ༌ ཡོད༌ཁན༌གུན༌ནི༌ ནང༌ང༌ རོགས༌ ཅོ༌ཤིག༌, ཅིའ༌ཟེར༌ན༌ ཁོའེ༌ མང༌པོ༌ཞིག༌ག༌ རོགས༌ ཅོས༌ཏེ༌ ཨིན༌ནོག༌, མིག༌སལ༌ལི༌ ངའ༌།
ROM 16:3 པརི༌སི༌ལ༌ དང༌ ཁོའེ༌ མག༌པ༌ ཨ༌ཀུའི༌ལའང༌, ངའེ༌ ཕྲོ༌པ༌ མ༌ཤི༌ཀ༌ ཡེ༌ཤུའི༌ ལས༌ ཅོ༌ཁན༌གུན༌ལ༌ ཇུ༌ ཞུས༌།
ROM 16:4 ཁོང༌གུན༌ནི༌ ངའེ༌ ཕིའ༌ ཁོ༌རང༌གུན༌ནི༌ སྲོག༌པོའང༌ ཇིགས༌པའེ༌ ནང༌ང༌ ཏངས༌། ང༌ མ༌ཚད༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཆོས༌ཚོགས༌ ཚང༌མེའང༌ ཁོང༌གུན༌ལ༌ ཐུག༌རྗེ༌ཆེ༌ ཞུ༌དུག༌།
ROM 16:5 ཁོང༌གུན༌ནི༌ ཁང༌པའེ༌ ནང༌ང༌ ཛོམ༌ཨིན༌ ཡོད༌ཁན༌ནི༌ ཆོས༌ཚོགས༌ལའང༌ ངའེ༌ ཇུ༌ ཞུས༌། ངའེ༌ ཅེས༌པའེ༌ ཛ༌འོ༌ ཨེ༌ཕི༌ནེ༌ཀྲུས༌ལའང༌ ཇུ༌ ཞུས༌། ཁོ༌ ནི༌ ཨ༌སི༌ཨཱའེ༌ ཡུལ༌ཇོངས༌སི༌ ནང༌ནེ༌ མ༌ཤི༌ཀའེ༌ གྱབ༌ནེ༌ གྲུལ༌ཁན༌ ཏང༌པོ༌རང༌ ཨིན༌།
ROM 16:6 ཁྱོ༌ཞ༌གུན༌ནི༌ ཕིའ༌ མ༌སྲན༌ཏྲེ༌ ལས༌ ཅོས༌ཁན༌ སྤུན༌མོ༌ མིར༌ཡམ༌མ༌ ངའེ༌ ཇུ༌ ཞུས༌།
ROM 16:7 ངའེ༌ ཕྲོ༌པ༌ ཡ༌ཧུ༌དཱ༌པ༌ ཨེན༌གྲོ༌ནི༌ཀས༌ དང༌ ཡུ༌ནིའ༌ གུན༌ལ༌ ཇུ༌ ཞུས༌, ཀ༌གུན༌ ང༌ ཉམ༌པོ༌ ཙོན༌ཁང༌ངི༌ ནང༌ང༌ ཡོད༌པིན༌། མ༌ཤི༌ཀའེ༌ སྐུ༌ཚབས༌གུན༌ནི༌ ཁོང༌གུན༌ལ༌ མ༌ རྩི༌ཝ༌ ཅོའ༌ནོག༌, ཁོང༌གུན༌ ངའེ༌ སང༌ སྔུན༌ལ༌ མ༌ཤི༌ཀའེ༌ གྱབ༌ནེ༌ གྲུལ༌ཁན༌ རིག༌ གྱུར༌ཏེ༌ ཨིན༌པིན༌།
ROM 16:8 གཙོ༌བོའེ༌ ཨིན༌ཁན༌ ངའེ༌ ཅེས༌པའེ༌ ཛ༌འོ༌ ཨེམ༌པི༌ལིའ༌ཀྲུས༌ལའང༌ ཇུ༌ ཞུས༌།
ROM 16:9 མ༌ཤི༌ཀའེ༌ ནང༌ང༌ ལས༌ ཅོ༌ཁན༌ ང༌ཞའེ༌ ཕྲོ༌པ༌ སྤུན༌ འུར༌བ༌ནུས༌ དང༌ ངའེ༌ ཅེས༌པའེ༌ ཛ༌འོ༌ སྟག༌འིས༌ལའང༌ ཇུ༌ ཞུས༌།
ROM 16:10 ངའེ༌ མ༌ཤི༌ཀའེ༌ ཞབས༌ཏོག༌གི༌ ནང༌ང༌ ཨིད༌ཤེས༌ཅན༌ ཐེའ༌ཁན༌ ཨ༌པི༌ལེས༌ལ༌ ཇུ༌ ཞུས༌། ཡང༌ ཨ༌རིས༌ཏོ༌བུ༌ལུས༌སི༌ ཁང༌པའེ༌ ནང༌ང༌ དུག༌ཁན༌ནི༌ ཏད༌པ༌ཅན༌གུན༌ལའང༌ ཇུ༌ ཞུས༌།
ROM 16:11 ངའེ༌ ཡ༌ཧུ༌དཱ༌པ༌ ཕྲོ༌པ༌ ཧེ༌རོ༌དིའོན༌ལའང༌ ཇུ༌ ཞུས༌། ནར༌སི༌སུས༌སི༌ ཁང༌པའེ༌ ནང༌ང༌ དུག༌ཁན༌ནི༌ གཙོ༌བོའེ༌ མི༌གུན༌ལའང༌ ཇུ༌ ཞུས༌།
ROM 16:12 གཙོ༌བོའེ༌ ཕིའ༌ ལས༌ སྲན༌ཏྲེ༌ ཅོ༌ཁན༌ སྤུན༌མོ༌ ཀྲེ༌ཕི༌ན༌ དང༌ ཀྲེ༌ཕོ༌ས༌ གུན༌ལ༌ ཡང༌ གཙོ༌བོའེ༌ ཕིའ༌ མ༌སྲན༌ཏྲེ༌ ལས༌ ཅོས༌ཁན༌ སྤུན༌མོ༌ ཅེས༌པའེ༌ པར༌སིས༌ལའང༌ ཇུ༌ ཞུས༌།
ROM 16:13 ཧ༌ལས༌ཤེས༌ཅན༌ མ༌ཤི༌ཀ༌པ༌, སྤུན༌ རུ༌ཕུས༌ དང༌ ཁོའེ༌ ཨ༌མ༌, ཀ༌བོའེ༌ ང༌ བུ༌ཚའ༌ ཙོགས༌ ཐེའད༌པིན༌, ཁོང༌གུན༌ལའང༌ ཇུ༌ ཞུས༌།
ROM 16:14 ཨ༌སིན༌ཀྲི༌ཀྲུས༌, ཕི༌ལི༌གོན༌, ཧར༌མེས༌, པེ༌ཀྲོ༌བས༌, ཧར༌མས༌, ཡང༌ ཁོང༌གུན༌ ཉམ༌པོ༌ ཛོམ༌ཁན༌ནི༌ སྤུན༌གུན༌ལ༌ ཇུ༌ ཞུས༌།
ROM 16:15 ཕི༌ལོ༌ལོ༌གུས༌, ཡུ༌ལིའ༌, ནི༌རུས༌ དང༌ ཁོའེ༌ སྲིང༌མོ༌ ཡང༌ ཨོ༌ལིམ༌པས༌ དང༌ ཁོང༌གུན༌ ཉམ༌པོ༌ ཛོམ༌ཁན༌ནི༌ ཏད༌པ༌ཅན༌ ཚང༌མ༌ལའང༌ ཇུ༌ ཞུས༌།
ROM 16:16 ཅིག༌ དང༌ ཅིག༌ག༌ ཅམས༌པ༌ ཉམ༌པོ༌ ཇུ༌ ཞུས༌། མ༌ཤི༌ཀའེ༌ ཆོས༌ཚོགས༌ ཚང༌མའེ༌ ཁྱོ༌ཞ༌གུན༌ལ༌ ཇུ༌ ཞུ༌རུག༌།
ROM 16:17 ཡང༌ ངའེ༌ ཅེས༌པའེ༌ སྤུན༌གུན༌, འི༌ ཞུ༌ཝ༌བོ༌ ཉན༌ཅེས༌ལ༌ ངའེ༌ སྤོས༌པ༌ ཏང༌དང༌། ཆོས༌ཚོགས༌སི༌ ནང༌ང༌ པོ༌པུད༌ཁན༌ དང༌ ཁྱོ༌ཞའེ༌ ལོབས༌ཁན༌ནི༌ ལབ༌ཞའེ༌ གོ༌ལོག༌པོ༌ ལབ༌ཁན༌གུན༌ནི༌ ཀ༌ནེ༌ ཤང༌ ཅོ༌ཤིག༌། ཁོང༌གུན༌ནེ༌ ཐག༌རིང༌ང༌ དུག༌ཤིག༌།
ROM 16:18 ཏེ༌ མི༌གུན༌ནི༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཞབས༌ཏོག༌ མ༌ཞུའ༌, ཁོང༌རང༌གུན༌ནི༌ ཕན༌ཐོགས༌སི༌ ཕིའ༌ ལས༌ ཅོས༌ཏེ༌ ཨིན༌ནོག༌, སྤེར༌ན༌ ཁས༌པ༌ སྤེ༌ར༌ དང༌ ལྕེ༌ ཀོལ༌ཏེ༌ ཁོང༌གུན༌ནི༌ ནོངས༌མེད༌ མི༌གུན༌ལ༌ གོབ༌སྐོར༌ ཏང༌ང༌ནོག༌།
ROM 16:19 ཨིན༌ནའང༌ ཁྱོ༌ཞ༌གུན༌ གཙོ༌བོའེ༌ ཁའ༌ཉན༌ཁན༌ ཨིན༌ཁན༌བོ༌ ཚང༌མ༌ལ༌ གྱུས༌ཨིན༌ནོག༌, ཏེ༌བོའེ༌ ང༌ མ༌ཐད༌པོ༌ ཡོང༌ཅུགས༌། ཁྱོ༌ཞ༌གུན༌ ཟང༌པོ༌ ཅོ༌ཅེས༌སི༌ ནང༌ང༌ ཤེས༌རབས༌ཅན༌ དང༌ ངན༌པའེ༌ ཐོག༌ནེ༌ ནོངས༌མེད༌ ཡོང༌གོ༌ཤེས༌པོ༌ ངའེ༌ དོད༌པ༌ ཨིན༌།
ROM 16:20 ཞི༌དེའེ༌ དཀོན༌མཆོག༌གི༌ གྱོགས༌པ༌ ཤེ༌ཏན༌ ཁྱོ༌ཞའེ༌ རྐང༌པའེ༌ ཡོག༌ག༌ ཁྲེས༌ཏོར༌ ཅོའ༌ ཛད༌ཨིན༌། ང༌དང༌གུན༌ནི༌ གཙོ༌བོ༌ ཡེ༌ཤུའི༌ ཐུག༌རྗེ༌བོ༌ ཁྱོ༌ཞ༌གུན༌ ཉམ༌པོ༌ ལུས༌ཤིག༌།
ROM 16:21 ངའེ༌ ཕྲོ༌པ༌ ལས༌ ཅོ༌ཁན༌ ཏི༌མོ༌ཐིའི༌ ཁྱོ༌ཞ༌གུན༌ལ༌ ཇུ༌ ཀལ༌དུག༌, ཏེན༌ན༌ ཙོགས༌ལ༌ ལུ༌ཀེ༌འུས༌, ཡ༌སོན༌ དང༌, སོ༌སི༌པ༌ཏར༌ ངའེ༌ ཕྲོ༌པ༌ ཡ༌ཧུ༌དཱ༌པ༌ སྤུན༌གུན༌ནིའང༌ ཇུ༌ ཀལ༌དུག༌།
ROM 16:22 པ༌འུ༌ལུའི༌ ཕིའ༌ འི༌ ཨི༌གེ༌ བྲི༌ཁན༌ ང༌, ཏར༌ཏི༌འུས༌ གཙོ༌བོའེ༌ གྱབ༌ནེ༌ གྲུལ༌ཁན༌བོའེང༌ ཇུ༌ ཀལ༌ལད༌།
ROM 16:23 གཱ༌ཡུས༌སི༌ ཁྱོ༌ཞ༌གུན༌ལ༌ ཇུ༌ ཞུ༌རུག༌། ཁོའེ༌ ང༌ ཁོ༌རང༌ངི༌ ཁང༌པའ༌ དུག༌ཅུག༌ཨིན༌ ཨིན༌ནོག༌, ཡང༌ འི༌རུ༌ ཡོད༌ཁན༌ནི༌ ཆོས༌ཚོགས༌ གང༌པོའང༌ ཁོ༌རང༌ངི༌ ཁང༌པའེ༌ ནང༌ང༌ ཛོམ༌ཅུག༌ཨིན༌ ཨིན༌ནོག༌། ཨེ༌རས༌ཏུས༌, གྱལ༌སའེ༌ བང༌ཛོད༌དི༌ ཁག༌ཁུར༌པ༌ དང༌ ང༌དང༌གུན༌ནི༌ སྤུན༌ ཀྱོར༌ཀྲུས༌ གུན༌ནི༌ ཇུ༌ ཀལ༌དུག༌།
ROM 16:24 
ROM 16:25 ཏ༌ དཀོན༌མཆོག༌ག༌ སྟོད༌པ༌ ཕུལ༌ཤིག༌། ཁོང༌ ནི༌ ཁྱོ༌ཞ༌གུན༌ ཏད༌པའེ༌ ནང༌ང༌ ཤེད༌ཅན༌ ཛད༌ཐུབ༌ཁན༌ ཨིན༌, ཀ༌ཟུག༌ ངའེ༌ གའ༌མོའེ༌ ནས༌ཚུལ༌ལི༌ ནང༌ང༌ ཤདས༌། ཡེ༌ཤུ༌ མ༌ཤི༌ཀའེ༌ སྐོར༌ལ༌ འི༌ ལོན༌བོའེ༌, ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌ ཁོང༌ངི༌ ཐབ༌ལྡིངས༌པོ༌ སྔོན༌ ཅུག༌ག༌ ཛདས༌, ཀ༌བོ༌ ཏུས༌སི༌ གོ༌ཟུག༌ནེ༌ ཕར༌ལ༌ སང༌ཝའེ༌ ནང༌ང༌ བོར༌ར༌ ཛད༌ཏེ༌ ཡོད༌པིན༌།
ROM 16:26 ཨིན༌ནའང༌ ཡ༌ཧུ༌དཱ༌པ༌ མན༌ཁན༌ ཚང༌མའེ༌ ཏད༌པ༌ ཅོས༌ཏེ༌ ཁའ༌ཉན༌ཅེས༌སི༌ ཕིའ༌ དག༌ས༌ ཐའ༌མེད༌པའེ༌ དཀོན༌མཆོག༌གི༌ བཀའ༌ སལ༌ཏེ༌, ལུང༌སྟོན༌པ༌གུན༌ནི༌ ལུང༌སྟན༌གུན༌ གྱུད༌ཏེ༌, ཁོང༌གུན༌ལ༌ ཏེ༌ ལོན༌བོ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌།
ROM 16:27 ཡེ༌ཤུ༌ མ༌ཤི༌ཀ༌ གྱུད༌ཏེ༌ ཤེས༌རབས༌ཅན༌ནི༌ དཀོན༌མཆོག༌ ཅིག༌པོའ༌ ཏུས༌གྱུན༌ སྤལ༌ ཐོབ༌ཤིག༌, ཨ༌མེན༌།
1CO 1:1 འི༌ ཨི༌གེ༌བོ༌ ང༌ པ༌འུ༌ལུ༌ དཀོན༌མཆོག༌གི༌ ཐུག༌གོངས༌ ནང༌ཞིན༌, མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛད༌ཁན༌ནི༌ ཆོགས༌ནེ༌ ཨིན༌། ང༌དང༌ངི༌ སྤུན༌ སོས༌ཐེ༌ནེས༌སིའང༌ ཇུ༌ ཀལ༌དུག༌།
1CO 1:2 ངའེ༌ འི༌ ཨི༌གེ༌བོ༌, ཀོ༌རིན༌ཐི༌ གྱལ༌སའེ༌ དཀོན༌མཆོག༌གི༌ ཆོས༌ཚོགས༌གུན༌ལ༌ ཀལ༌ལད༌། དཀོན༌མཆོག༌གི༌ ཁྱོ༌ཞའ༌ ཁོང༌ངི༌ མི༌ ཏམ༌པ༌གུན༌ གྱུར༌ཅེས༌ལ༌ བོད༌ད༌ ཛདས༌, ཡང༌ མ༌ཤི༌ཀ༌ གྱུད༌ཏེ༌ ཁྱོ༌ཞ༌གུན༌ རྩང༌མ༌ ཅོའ༌ ཛདས༌, ཀ༌ཟུག༌ ཁོང༌ངི༌ ཇིག༌རྟེན༌ གང༌པོའེ༌ ནང༌ང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཁྱོང༌ཁན༌ ཚང༌མ༌ ཉམ༌པོ༌ ཅོའ༌ ཛད༌ཏེ༌ ཨིན༌ནོག༌། ཁོང༌ ནི༌, ང༌དང༌གུན༌ དང༌ ཁོང༌གུན༌ནི༌ གཙོ༌བོ༌ ཞུགས༌ཏེ༌ ཨིན༌ནོག༌།
1CO 1:3 དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཞི༌དེ༌ ཁྱོ༌ཞ༌གུན༌ལ༌ སལ༌ཤིག༌།
1CO 1:4 ཁྱོ༌ཞ༌གུན༌ནི༌ ཕིའ༌ ངའེ༌ ཏུས༌གྱུན༌ ང༌རང༌ངི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌, ཅིའ༌ཞུ༌ན༌ ཁོང༌ངི༌ མ༌ཤི༌ཀའེ༌ ནང༌ང༌ ཁྱོ༌ཞ༌གུན༌ལ༌ ཁོང༌རང༌ངི༌ ཐུག༌རྗེ༌ སལ༌ལ༌ ཛད༌ཏེ༌ ཨིན༌ནོག༌།
1CO 1:5 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ཁྱོ༌ཞའེ༌ ཆོས༌ཚོགས༌གུན༌ལ༌ ཅི༌ས༌ཐོག༌ནེ༌ ཅིན༌ལབས༌ སལ༌ལ༌ ཛད༌ཏེ༌ ཨིན༌ནོག༌, མིག༌སལ༌ལི༌ གའ༌མོའེ༌ ནས༌ཚུལ༌ ཤད༌ཅེས༌ དང༌ ཁོང༌ངི༌ ལབ༌ཞ༌ ཚང༌མ༌ ཧ༌གོ༌ཅེས༌སི༌ ནང༌ང༌།
1CO 1:6 ཏེ༌བོའེ༌, ང༌ཞ༌གུན༌ནི༌ ཁྱོ༌ཞ༌གུན༌ལ༌ མ༌ཤི༌ཀའེ༌ སྐོར༌ལ༌ ཤད༌ཁན༌གུན༌ ཀྲང༌པོ༌ ཨིན༌ཁན༌བོ༌ སྟན༌ན༌ནོག༌།
1CO 1:7 ཏེན༌ན༌བོའེ༌ཕིའ༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཤེས༌སི༌ ཕིའ༌ ཁྱོ༌ཞ༌གུན༌ རིངས༌ཨིན༌ སྲུང༌ ཟ༌ནེ༌, ཁྱོ༌ཞ༌གུན༌ནི༌ ལག༌ག༌ སྒོས༌དོམ༌ ཡོད༌ཁན༌ནི༌ སེམས༌ཉིད༌དི༌ ཁྱུད༌ ཚང༌མ༌ ཡོད༌ཏེ༌ ཨིན༌ནོག༌།
1CO 1:8 ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཞག༌ག༌, སྐྱོན༌མེད༌ཁན༌ ཐེ༌ཅེས༌སི༌ ཕིའ༌, དཀོན༌མཆོག༌གི༌ ཁྱོ༌ཞ༌ ཤི༌ཤི༌ ཚོག༌པ༌, ཏད༌པའེ༌ ནང༌ང༌ སྟན༌པོ༌ བོར༌ར༌ ཛད༌ཨིན༌།
1CO 1:9 དཀོན༌མཆོག༌གི༌ ཏེ༌བོ༌ ཅོའ༌ ཛད༌ཨིན༌, ཅིའ༌ཟེར༌ན༌ ཁོང༌ ནི༌ ཨིད༌ཤེས༌ཅན༌ཞིག༌ ཞུགས༌ཏེ༌ ཨིན༌ནོག༌། ཁོང༌ངི༌ ཁྱོ༌ཞ༌གུན༌ ང༌དང༌གུན༌ནི༌ གཙོ༌བོ༌ ཁོང༌རང༌ངི༌ སྲས༌ ཡེ༌ཤུ༌ མ༌ཤི༌ཀ༌ ཉམ༌པོ༌ བྲེལ༌ བོར༌ཅེས༌ལ༌, བོད༌ད༌ ཛད༌ཏེ༌ ཨིན༌ནོག༌།
1CO 1:10 ངའེ༌ སྤུན༌གུན༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ངའ༌ ཝང༌ སལ༌ལ༌ ཛད༌ཁན༌ གྱུད༌ཏེ༌ ཁྱོ༌ཞ༌གུན༌ ཐུན༌བྲེལ༌ ཉམ༌པོ༌ དུག༌ཅེས༌, ཆོས༌ཚོགས༌སི༌ ནང༌ང༌ པོ༌བུད༌ཏེ༌ ཚོགས༌ཆུང༌ སོ༌སོ༌ མེད༌ཅེས༌ ཡང༌ སམ༌ཚུལ༌ དང༌ ཐག༌ཅད༌གུན༌ནའང༌ ཅིག༌ ཡོང༌ཅེས༌ལ༌ ངའེ༌ མ༌སྲན༌ཏྲེ༌ ཞུ༌ཝ༌ ཕུལ༌ལད༌།
1CO 1:11 སྤུན༌གུན༌, ངའེ༌ འི༌གུན༌ ཟེར༌རད༌, ཅིའ༌ཟེར༌ན༌ ཁ༌ལོའི༌ ཟེར༌ཁན༌ནི༌ སྤུན༌མོ༌བོའེ༌ ནང༌མི༌ ཁ༌ཅིག༌གི༌, ཁྱོ༌ཞ༌གུན༌ནི༌ ཕྲོའ༌ ཛིང༌མོ༌ ཡོད༌ཁན༌ནི༌ སྐོར༌ལ༌ ཤད༌ད༌རག༌།
1CO 1:12 ཀ༌ཟུག༌ ཁྱོ༌ཞའ༌ ཁ༌ཅིག༌གི༌ “ངའ༌ པ༌འུ༌ལུའི༌ ལབ༌ཞའེ༌ གྱབ༌ནེ༌” ཁ༌ཅིག༌གི༌ “ངའ༌ ཨ༌པོ༌ལོས༌སི༌ ལབ༌ཞའེ༌ གྱབ༌ནེ༌”, ཡ༌ “ངའ༌ པི༌ཏྲར༌རི༌ ལབ༌ཞའེ༌ གྱབ༌ནེ༌”, ཡ༌ “ངའ༌ མ༌ཤི༌ཀ༌ ཅིག༌པོའེ༌ གྱབ༌ནེ༌ གྲུལ༌ལད༌” ཟེར༌ཨིན༌ ཨིན༌ནོག༌།
1CO 1:13 ཅི༌ མ༌ཤི༌ཀ༌ ཚོགས༌པ༌ སོ༌སོ༌ རིག༌གི༌ ནང༌ང༌ བགོའ༌ ཛད༌ཏེ༌ ཨིན༌ནོག༌ག༌? ཅི༌ ང༌ པ༌འུ༌ལུ༌ ཁྱོ༌ཞ༌གུན༌ནི༌ ཕིའ༌ རྐྱང༌ཤིང༌ངི༌ཀ༌ རྐྱངས༌ས༌? ཅི༌ ཁྱོ༌ཞ༌གུན༌ནི༌ ཕྲོ༌ནེ༌ སུ༌ཞིག༌ག༌ པ༌འུ༌ལུའི༌ མིང༌ངི༌ ནང༌ང༌ ཁྲུས༌ཏང༌ས༌? ཏན༌ཏན༌ལ༌ མ༌ཏངས༌།
1CO 1:14 ངའེ༌ ཁྱོ༌ཞ༌གུན༌ནི༌ ཕྲོ༌ནེ༌ སྤུན༌ ཀརིས༌པུས༌ དང༌ གཱ༌ཡུས༌ གུན༌ལ༌ མ༌སྟོགས༌, ཞན༌སུ༌ཞིག༌གའང༌ ཁྲུས༌ མ༌ཏངས༌ཁན༌བོའེ༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
1CO 1:15 ཅིའ༌ཟེར༌ན༌ ལོབ༌ཕྲུགས༌ གྱུར༌ཅེས༌སི༌ ཕིའ༌ ངའེ༌ ཁོང༌གུན༌ལ༌ ཁྲུས༌ ཏངས༌ཏེ༌ ཨིན༌ སུ༌ཞིག༌གིའང༌ ཟེར༌ མི༌ཉན༌།
1CO 1:16 ༼འོ༌ན༌ སྤུན༌ སྟེ༌ཕན༌ནས༌སི༌ ནང༌མི༌གུན༌ལའང༌, ངའེ༌ ཁྲུས༌ ཏངས༌པིན༌, ཏེན༌ན༌བོ༌ མ༌ནེ༌ ཞན༌སུ༌ཞིག༌གའང༌ ཁྲུས༌ ཏང༌ཁན༌ ངའ༌ ཨིད༌ཏུ༌ མེ༌རག༌།༽
1CO 1:17 མ༌ཤི༌ཀའེ༌ ངའ༌ ཁྲུས༌ ཏང༌ཅེས༌ལ༌ མན༌པ༌, གའ༌མོའེ༌ ནས༌ཚུལ༌ ཤད༌ཅེས༌ལ༌ ལམ༌ཅུག༌ག༌ ཛདས༌། མ༌ཤི༌ཀའེ༌ རྐྱང༌ཤིང༌ངི༌ ཁྱུད༌པོ༌ མི༌སྟོར༌ཅེས༌སི༌ ཕིའ༌ ངའེ༌ གའ༌མོའེ༌ ནས༌ཚུལ༌ ཤད༌ ཟ༌ནེ༌ ཤེས༌རབས༌ཅན༌ནི༌ སྤེ༌ར༌ ཀོལ༌ལ༌མེད༌།
1CO 1:18 ཁྲེས༌ཏོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཁན༌ མི༌གུན༌ནི༌ ཕིའ༌ རྐྱང༌ཤིང༌ངི༌ཀ༌ མ༌ཤི༌ཀ༌ རྐྱངས༌ཁན༌ནི༌ ལོན༌བོ༌ ཏོན༌མེད༌ཞིག༌ ཨིན༌ནོག༌། ཨིན༌ནའང༌ ང༌དང༌ སྐྱོབ༌བ༌ ཛད༌ཨིན༌ ཡོད༌ཁན༌གུན༌ལ༌ ཏེན༌ན༌ ལོན༌བོ༌ དཀོན༌མཆོག༌གི༌ ཁྱུད༌ཅན༌ སྟོབས༌པོ༌ ཨིན༌ནོག༌།
1CO 1:19 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌དུག༌། “མི༌ ཁས༌པའེ༌ ཤེས༌རབས༌གུན༌ ཡང༌ ཁོ༌རང༌ རིག༌པ༌ཅན༌ ཨིན༌ སམ༌ཁན༌གུན༌ནི༌ སམ༌ཚུལ༌གུན༌ལ༌ ཅའང༌ རིན༌ མེད༌ཁན༌བོ༌ ངའེ༌ སྟན༌ཨིན༌། ”
1CO 1:20 ཏེ༌ནེ༌ ཤེས༌རབས༌ཅན༌གུན༌ ཡ༌ ཡོན༌ཏན༌ཅན༌ ཁས༌པ༌གུན༌ ཡ༌ སྤེ༌ར༌ ཤད༌ཁན༌ ཁས༌པ༌གུན༌ ཀ༌རུ༌ སོང༌? དཀོན༌མཆོག༌གི༌ འི༌ ཇིག༌རྟེན༌པའེ༌ ཤེས༌རབས༌གུན༌ ཏོན༌མེད༌ ཨིན༌ཁན༌བོ༌ སྟན༌ན༌ ཛད༌ཏེ༌ མ༌ནོག༌ག༌?
1CO 1:21 ཇིག༌རྟེན༌པ༌གུན༌ལ༌ ཁོ༌རང༌ངི༌ ཤེས༌རབས༌གུན༌ གྱུད༌ཏེ༌ དཀོན༌མཆོག༌ ཤེས༌ མི༌ཉན༌ཅེས༌པོ༌ ཁོང༌ངི༌ ཐག༌ཅད༌ད༌ ཛདས༌པ༌, དཀོན༌མཆོག༌གི༌ ང༌ཞའེ༌ ཏོན༌མེད༌དི༌ ལོན༌ ཤད༌ཁན༌བོའེ༌ ནང༌ང༌, ཨིད༌ཤེས༌ ཅོ༌ཁན༌གུན༌ སྐྱོབ༌བ༌ ཛད༌ཅེས༌ལ༌ ཐབ༌ལྡིངས༌ ཛདས༌།
1CO 1:22 ནམ༌ཁའ༌ནེ༌ སྟགས༌རིག༌ ཐོང༌ཏེ༌ མ༌ནེ༌, ཨིད༌ཤེས༌ མི༌ཅོ༌ ཟེར༌ཁན༌ནི༌ ཡ༌ཧུ༌དཱ༌པ༌གུན༌ནི༌ ཕིའ༌, ཏེ༌ ལོན༌བོ༌ ཏོན༌མེད༌ ཨིན༌ནོག༌, ཡང༌ ཇིག༌རྟེན༌ནི༌ ཤེས༌རབས༌ ཙལ༌ཨིན༌ གྲུལ༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌, ཏོན༌མེད༌ ཨིན༌ནོག༌།
1CO 1:23 ང༌ཞའེ༌ མ༌ཤི༌ཀ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ སྐོར༌ལ༌ ཆོས༌ཤད༌ཁན༌བོ༌ ཡ༌ཧུ༌དཱ༌པ༌གུན༌ནི༌ ཕིའ༌ ཏད༌པ༌ ཅོ༌ཅེས༌ལ༌ སྒག༌གྱབ༌ཁན༌ནི༌ རྡོའ༌ ཡང༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ འི༌བོ༌ ཏོན༌མེད༌ ཨིན༌ནོག༌།
1CO 1:24 ཨིན༌ནའང༌ དཀོན༌མཆོག༌གི༌ ཐར༌པ༌ ཐོབ༌ཅེས༌ལ༌ བོད༌ད༌ ཛད༌ཁན༌ནི༌, ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ ཉིས༌ཀོའེ༌ ཕིའ༌, མ༌ཤི༌ཀའེ༌ ལོན༌བོ༌ ནི༌, དཀོན༌མཆོག༌གི༌ ཤེས༌རབས༌ དང༌ ཤེད༌ གུན༌ ཨིན༌ནོག༌།
1CO 1:25 ཞན༌ དཀོན༌མཆོག༌གི༌ ཐར༌པའེ༌ ཐབས༌པོ༌ ཏོན༌མེད༌ ཐེ༌ནའང༌, ཏེ༌བོ༌ ནི༌ མིའི༌ ཐབས༌ ཆེ༌ཤོག༌གུན༌ནི༌ སང༌ མང༌ང༌ ཤེས༌རབས༌ཅན༌ ཡང༌ དཀོན༌མཆོག༌གི༌ འུ༌ཐུགས༌པོའང༌, མིའི༌ ཁྱུད༌ ཤེད༌ཤོག༌པོའེ༌ སང༌ མང༌ང༌ ཤེད༌ཅན༌ཞིག༌ ཨིན༌ནོག༌།
1CO 1:26 སྤུན༌གུན༌ ཨིད༌ཏུ༌ ཅོ༌ཤིག༌, དཀོན༌མཆོག༌གི༌ ཁྱོ༌ཞ༌གུན༌ བོད༌ད༌ ཛད༌ ཟ༌ནེ༌, ཁྱོ༌ཞ༌ མང༌ཆེའ༌བོ༌, ཇིག༌རྟེན༌པའེ༌ ཐོག༌ནེ༌ ཁས༌པ༌ ཡ༌ སྟོབས༌ཅན༌ ཡ༌ རྩི༌ཝ༌ཅན༌ མན༌པིན༌།
1CO 1:27 མ༌ཚད༌, ཁོ༌རང༌ ཁས༌པ༌ རིག༌ ཨིན༌ སམ༌ཁན༌གུན༌, ཁྲེལ༌བ༌ ཅོ༌ཅེས༌སི༌ ཕིའ༌, དཀོན༌མཆོག༌གི༌ ཇིག༌རྟེན༌པ༌གུན༌ནི༌ ཏོན༌མེད༌ སམ༌ཁན༌ནི༌ ཏེན༌ན༌ མི༌གུན༌ ལྡམ༌མ༌ ཛད༌ཏེ༌ ཨིན༌པིན༌། ཡང༌ ཁོང༌ངི༌ ཝང༌ཅན༌གུན༌ལ༌ ཁྲེལ༌བ༌ ཅོའ༌ ཛད༌ཅེས༌སི༌ ཕིའ༌ ཤེད༌མེད༌ ཡོད༌ཁན༌ ཏེན༌ན༌ མི༌གུན༌ ལྡམ༌མ༌ ཛད༌ཏེ༌ ཨིན༌པིན༌།
1CO 1:28 ཇིག༌རྟེན༌པ༌གུན༌ནི༌ ཁག༌ཅན༌ ཨིན༌ནོག༌ སམ༌ཁན༌གུན༌ མེད༌ཁན༌ ཅོའ༌ ཛད༌ཅེས༌ལ༌ ཁོང༌ངི༌ ཇིག༌རྟེན༌པའེ༌ ཐོག༌ནེ༌ རིན༌མེད༌, རྩི༌ཝ༌ མེད༌ཁན༌ དང༌ ཁག༌ཅན༌ མན༌ཁན༌ ཐེའ༌ཁན༌ནི༌ མི༌གུན༌, ལྡམ༌མ༌ ཛད༌ཏེ༌ ཨིན༌པིན༌།
1CO 1:29 ཏེ༌བོའེ༌ ཞས༌ཏེ༌, དཀོན༌མཆོག༌གི༌ སྐུན༌དུན༌ལ༌ ཕོ༌སོ༌ སུ༌ཞིག༌གིའང༌ ཅོ༌ མི༌ཉན༌།
1CO 1:30 ཁྱོ༌ཞ༌གུན༌ནི༌ མ༌ཤི༌ཀ༌ ཡེ༌ཤུ༌ ཉམ༌པོ༌ ཐུན༌བྲེལ༌བོ༌ ནི༌ དཀོན༌མཆོག༌གི༌ ཞས༌ཏེ༌ ཨིན༌, མ༌ཤི༌ཀ༌ ནི༌ ང༌དང༌ངི༌ ཕིའ༌ ཤེས༌རབས༌, ཀྲང༌པོ༌, རྩང༌མ༌ དང༌ རིན༌ ཤལ༌ཁན༌བོ༌ གྱུར༌ར༌ ཛདས༌།
1CO 1:31 ཀ༌ཟུག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, “ཀལ༌ཏེས༌ ཁྱོ༌ཞ༌གུན༌ ཕོ༌སོ༌ ཅོ༌ཉིན༌ ཡོད༌ན༌ ཏེ༌ནེ༌ གཙོ༌བོ༌ དཀོན༌མཆོག༌ ཅིག༌པོའེ༌ཀ༌ ཕོ༌སོ༌ ཚོར༌ཤིག༌།”
1CO 2:1 སྤུན༌གུན༌ ཁྱོ༌ཞའ༌ དཀོན༌མཆོག༌གི༌ སང༌ཝའེ༌ ཐབས༌པོ༌ ཤད༌ཅེས༌ལ༌ ངའ༌ གོ༌མ༌རང༌ ཡོང༌ ཟ༌ནེ༌, ངའེ༌ ཀྲག༌པོ༌ ཤེས༌རབས༌ ཡ༌ ཧ༌ལས༌ཤེས༌སི༌ ཚིགས༌ མ༌ཀོལ༌པིན༌།
1CO 2:2 ཅིའ༌ཟེར༌ན༌ ང༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌, ངའེ༌ ཁྱོ༌ཞ༌གུན༌ལ༌ རྐྱང༌ཤིང༌ངི༌ཀ༌ རྐྱངས༌ཁན༌ནི༌ ཡེ༌ཤུ༌ མ༌ཤི༌ཀ༌ ཅིག༌པོ༌ མ༌སྟོགས༌ ཞན༌ཡང༌ ཅི༌ཞིག༌གི༌ སྐོར༌ལ༌ མི༌ཤད༌ཅེས༌ ཐག༌ཅད༌པིན༌།
1CO 2:3 ཁྱོ༌ཞ༌གུན༌ ཉམ༌པོ༌ ཡོད༌ཏུས༌, མ༌ཤི༌ཀའེ༌ ཆག༌ལས༌ ཅོ༌ཅེས༌སི༌ ནང༌ང༌ ང༌ འུ༌ཐུགས༌, ཁྲེལ༌ཁན༌ དང༌ ཇིགས༌ཁན༌ཞིག༌ ཚོར༌ར༌ རག༌པིན༌།
1CO 2:4 ངའེ༌ ལབ༌ཞ༌ དང༌ ཆོས༌ཤད༌ཅེས༌ གུན༌ ཧ༌གོའ༌ལ༌ ལ༌མོ༌ ཡང༌ ཁྲུལ༌ཅེས༌ དང༌ ཁས༌པ༌ སྤེ༌ར༌གུན༌ནི༌ཀ༌ རག༌ མ༌ལས༌ས༌, ངའེ༌ ཏམ༌པའེ༌ ཐུག༌ཉིད༌དི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཛད༌ཅེས༌པོའེ༌ཀ༌ ཨིད༌ཤེས༌ ཅོས༌ཏེ༌ ལབ༌ཞ༌ ཏངས༌པིན༌།
1CO 2:5 ངའེ༌ ཏེ༌བོ༌ ཁྱོ༌ཞ༌གུན༌ནི༌, མིའི༌ ཤེས༌རབས༌སི༌ཀ༌ མན༌པ༌, དཀོན༌མཆོག༌གི༌ ཤེད༌དི༌ ནང༌ང༌ ཨིད༌ཤེས༌ ཅོ༌ཅེས༌སི༌ ཕིའ༌ ཅོས༌པིན༌།
1CO 2:6 ཏད༌པའེ༌ ནང༌ང༌ ལྡན༌ཁན༌གུན༌ནི༌ ཕྲོའ༌ ཡོད༌ ཟ༌ནེ༌, ངའེ༌ ཤེས༌རབས༌ཅན༌ནི༌ ཚིགས༌གུན༌ ཉམ༌པོ༌ སྤེ༌ར༌ ཏང༌ངད༌། ཨིན༌ནའང༌ ཏེ༌ ཤེས༌རབས༌གུན༌, གྱོགས༌པ༌ མེད༌ཁན༌ ཆ༌ཅེས༌ཅན༌ནི༌ འི༌ ཇིག༌རྟེན༌པ༌ ཡ༌ འི༌ ཇིག༌རྟེན༌ནི༌ ཝང༌སྲུལ༌པ༌ གུན༌ནི༌ མ༌ནོག༌།
1CO 2:7 ང༌ཞའེ༌ སྤེ༌ར༌ ཏང༌ཁན༌ནི༌ ཤེས༌རབས༌པོ༌ ནི༌, དཀོན༌མཆོག༌གི༌ སང༌ཝའེ༌ ཐབས༌པོ༌ ཨིན༌ནོག༌, ཀ༌བོ༌ ཁོང༌ངི༌ སྦས༌ཏེ༌ བོར༌ར༌ ཛད༌ཏེ༌ ཨིན༌། ཨིན༌ནའང༌ ང༌དང༌གུན༌ལ༌ ཟིར༌རྗིད༌ ཐོབ༌ཅེས༌སི༌ ཕིའ༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌, ཁོང༌ངི༌ འི༌ ཐབས༌པོ༌ ཅོའ༌ ཛད༌ཏེ༌ ཨིན༌པིན༌།
1CO 2:8 འི༌ ཇིག༌རྟེན༌ནི༌ ཝང༌སྲུལ༌པ༌གུན༌ནི༌ ཏེ༌ སང༌ཝའེ༌ ཐབས༌པོ༌, ཧ༌མ༌གོའ༌ ཨིན༌ནོག༌། ཀལ༌ཏེས༌ ཧ༌གོ༌པིན༌ན༌, ཁོང༌གུན༌ནི༌ ང༌དང༌ངི༌ ཟིར༌རྗིད༌ཅན༌ནི༌ གཙོ༌བོ༌བོ༌ རྐྱང༌ཤིང༌ངི༌ཀ༌ རྐྱངས༌ཏེ༌ མེད༌གྲོ༌།
1CO 2:9 ཏེན༌ན༌བོའེ༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌ “སུ༌ཞིག༌གིའང༌ མ༌ཐོང༌ཁན༌ ཡ༌ མ༌ཚོར༌ཁན༌ ཡ༌ སམ༌བའེ༌ ནང༌ང༌ མེད༌ཁན༌ཞིག༌ དཀོན༌མཆོག༌ག༌ ཅེས༌པ༌ ཅོ༌ཁན༌གུན༌ནི༌ ཕིའ༌ གྲལ༌གྲིག༌ ཅོའ༌ ཛད༌ཏེ༌ ཡོད༌ཏེ༌ ཨིན༌ནོག༌།”
1CO 2:10 ཨིན༌ནའང༌ ཏེ༌གུན༌ དཀོན༌མཆོག༌ ཁོང༌རང༌ངི༌ ཐུག༌ཉིད༌བོའེ༌, ང༌དང༌གུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌། ཏམ༌པའེ༌ ཐུག༌ཉིད༌ལ༌ ཅི༌ཚང༌མ༌ ཐུག༌གྱུས༌ ཨིན༌ནོག༌, དཀོན༌མཆོག༌གི༌ སང༌ཝ༌གུན༌ནའང༌།
1CO 2:11 མི༌ཞིག༌གི༌ སམ༌ཁན༌གུན༌ ཏེན༌ན༌ མི༌བོའེ༌ སེམས༌ཉིད༌ མ༌སྟོགས༌ ཞན༌ སུ༌ཞིག༌གའང༌ གྱུས༌ ཆ༌མ༌ནོག༌། ཏེན༌ན༌ ཙོགས༌ལ༌ དཀོན༌མཆོག༌གི༌ ཐུགས༌སམ༌གུན༌ ཁོང༌ངི༌ ཐུག༌ཉིད༌ ཅིག༌པོ༌ མ༌སྟོགས༌, ཞན༌སུ༌ཞིག༌གའང༌ གྱུས༌ཆའ༌ མ༌ནོག༌།
1CO 2:12 ཡང༌ ང༌དང༌གུན༌ལ༌ ཇིག༌རྟེན༌པའེ༌ སེམས༌ཉིད༌ མན༌པ༌, དཀོན༌མཆོག༌གི༌ ཐུག༌ཉིད༌ ཐོབས༌ཏེ༌ ཨིན༌ཅེས༌པོའེ༌, ང༌དང༌གུན༌ལ༌ དཀོན༌མཆོག༌གི༌ ཧ༌ལས༌ཤེས༌སི༌ སྐྱེས༌གུན༌ རིན༌ མེད༌པ༌ སལ༌ལ༌ ཛད༌ཁན༌བོ༌ ཧ༌གོ༌ ཐུབས༌ཏེ༌ ཨིན༌ནོག༌།
1CO 2:13 ཁྱོ༌ཞ༌གུན༌ལ༌ ཏེ༌ ཚང༌མའེ༌ སྐོར༌ལ༌ ཤད༌ ཟ༌ནེ༌, ང༌ཞའེ༌ མིའི༌ ཤེས༌རབས༌ནེ༌ ཇུང༌ཁན༌ནི༌ ཚིགས༌གུན༌ མ༌ཀོལ༌ལ༌, ཐུག༌ཉིད༌དི༌ སལ༌ཁན༌ནི༌ ཚིགས༌གུན༌ གྱུད༌ཏེ༌, སྤེ༌ར༌ ཏང༌ངད༌། ཐུག༌ཉིད༌དི༌ དེན༌བ༌གུན༌ ལབ༌ཅེས༌ལ༌ ཐུག༌ཉིད༌ཅན༌ནི༌ ཚིགས༌གུན༌ ཀོལ༌ལད༌།
1CO 2:14 ཨིན༌ནའང༌ ཐུག༌ཉིད༌ མེད༌ཁན༌ནི༌ མི༌བོའེ༌, དཀོན༌མཆོག༌གི༌ ཐུག༌ཉིད༌ནེ༌ ཡོངས༌ཁན༌ནི༌ དེན༌བ༌གུན༌ནི༌ཀ༌ ཨིད༌ཤེས༌ ཅོའ༌ མ༌ནོག༌། ཏེ༌ མི༌བོའ༌ འི༌གུན༌ ཏོན༌མེད༌ ཚོར༌ར༌ནོག༌, ཡང༌ ཁོའ༌ ཧ༌གོའ༌ མ༌ནོག༌, ཅིའ༌ཟེར༌ན༌ ཐུག༌ཉིད༌ ཡོད༌ཁན༌གུན༌ལ༌ མ༌སྟོགས༌, ཡང༌སུའང༌ ཏེ༌གུན༌ ཧ༌གོ༌ ཐུབ༌བ༌ མ༌ནོག༌།
1CO 2:15 ཐུག༌ཉིད༌ ཡོད༌ཁན༌གུན༌ནི༌ ཅི༌ཚང༌མའེ༌ སྐོར༌ལ༌ སྟག༌ཅད༌ ཅོས༌ཏེ༌ ཧ༌གོ༌ཉན༌ན༌ནོག༌, ཨིན༌ནའང༌ ཐུག༌ཉིད༌ མེད༌ཁན༌གུན༌ནི༌ ཐུག༌ཉིད༌ ཡོད༌ཁན༌གུན༌ནི༌ ཅོ༌ཟོ༌ དང༌ སམ༌ཟོ༌ གུན༌ ཧ༌གོ༌ ཐུབ༌བ༌ མ༌ནོག༌།
1CO 2:16 ཅིའ༌ཟེར༌ན༌ “སུའ༌ གཙོ༌བོའེ༌ ཐུགས༌སམ༌གུན༌ གྱུས༌ ཆེན༌? སུའི༌ ལག༌ག༌, ཁོང༌ང༌ ལབ༌ཞ༌ ཏང༌ཅེས༌སི༌ ཤེས༌རབས༌ ཡོད༌?” ཨིན༌ནའང༌ ང༌དང༌གུན༌ནི༌ ནང༌ང༌ མ༌ཤི༌ཀའེ༌ ཐུགས༌སམ༌གུན༌ ཡོད༌ པ༌སང༌, ང༌དང༌གུན༌ལ༌ ཏེ༌གུན༌ ཧ༌གོ༌ཐུབ༌བ༌ནོག༌།
1CO 3:1 སྤུན༌གུན༌ ང༌ ཁྱོ༌ཞ༌གུན༌ ཉམ༌པོ༌ ཡོད༌ཏུས༌, ངའེ༌ ཁྱོ༌ཞའ༌ ལབ༌ ཟ༌ནེ༌, ཐུག༌ཉིད༌དི༌ ནང༌ང༌ ལྡན༌ཁན༌ནི༌ མི༌གུན༌ ཙོགས༌ལ༌ ལབ༌ མ༌ཉན༌ན༌, འི༌ ཇིག༌རྟེན༌པ༌ ཡ༌ མ༌ཤི༌ཀའེ༌ ཏད༌པའེ༌ ནང༌ང༌ ཕྲུ༌གུ༌ ཆུ༌ངུན༌ གུན༌ ཙོགས༌ལ༌ ལབ༌གོས༌།
1CO 3:2 ངའེ༌ ཁྱོ༌ཞ༌གུན༌ལ༌ ཟན༌ མན༌པ༌, འོ༌མ༌ སྟེར༌གོས༌, ཅིའ༌ཟེར༌ན༌ ཁྱོ༌ཞ༌གུན༌ ཟན༌ ཟའ༌ཅེས༌ལ༌ གྲལ༌གྲིག༌ མི༌དུག༌པིན༌, ཡང༌ ཏ༌རུང༌ངའང༌ ཁྱོ༌ཞ༌གུན༌ གྲལ༌གྲིག༌ མེད༌པ༌ ཨིན༌ནོག༌།
1CO 3:3 ཏ༌རུང༌ངའང༌ འི༌ ཇིག༌རྟེན༌པའེ༌ ཕུད༌ཁན༌ ཙོགས༌སི༌ མི༌ཚེ༌, ཁྱོ༌ཞ༌གུན༌ནིའང༌ ཕུད༌དུག༌། ཁྱོ༌ཞ༌གུན༌ནི༌ ནང༌ང༌ ཅིག༌ དང༌ ཅིག༌གི༌ ཕིའ༌ ཚིག༌ཅེས༌ དང༌ ཛིང༌མོ༌ ཡོད༌ཏེ༌ ཨིན༌ནོག༌། ཅི༌ ཏེ༌བོ༌ ཁྱོ༌ཞ༌གུན༌ནི༌ཀ༌ ཁྱོ༌ཞ༌རང༌ངི༌ སྡིག༌པའེ༌ དོད༌པ༌གུན༌ནི༌ ཝང༌སྲུལ༌ཏེ༌ མ༌ནོག༌ག༌? ཅི༌ ཁྱོ༌ཞ༌གུན༌ནི༌, ཇིག༌རྟེན༌པ༌གུན༌ ཙོགས༌ལ༌ མི༌ཚེ༌ ཕུད༌ཨིན༌ཞིག༌ མེད༌ད༌?
1CO 3:4 ནམ༌ ཁྱོ༌ཞའེ༌ ཕྲོ༌ནེ༌ ཅིག༌གི༌, “ང༌ ནི༌ པ༌འུ༌ལུའི༌ གྱབ༌ནེ༌ གྲུལ༌ལད༌” ཡང༌ཅིག༌གི༌, “ང༌ ནི༌ ཨ༌པོ༌ལོས༌སི༌ གྱབ༌ནེ༌ གྲུལ༌ལད༌” ཟེར༌ན༌, ཅི༌ ཁྱོ༌ཞ༌གུན༌ནི༌ འི༌ ཇིག༌རྟེན༌པ༌གུན༌ ཙོགས༌ ཅོས༌ཏེ༌ མ༌ནོག༌ག༌?
1CO 3:5 སུ༌ ཨིན༌ནོག༌ ཨ༌པོ༌ལོས༌? སུ༌ ཨིན༌ནོག༌ པ༌འུ༌ལུ༌? ང༌ཞའ༌ ནི༌ དཀོན༌མཆོག༌གི༌ ཞབས༌ཏོག༌པ༌ ཞིག༌ ཨིན༌, ཀ༌གུན༌ གྱུད༌ཏེ༌, ཁྱོ༌ཞ༌གུན༌ནི༌ གའ༌མོའེ༌ ནས༌ཚུལ༌ལི༌ ནང༌ང༌ ཨིད༌ཤེས༌ ཅོས༌ཏེ༌ ཨིན༌ནོག༌། གཙོ༌བོའེ༌ སལ༌ལ༌ ཛད༌ཁན༌ནི༌ རང༌རང༌ངི༌ ལས༌གུན༌ ང༌ཞའེ༌ ཅོས༌ཏེ༌ ཨིན༌ནོག༌།
1CO 3:6 ངའེ༌ ཁྱོ༌ཞའེ༌ སྙིང༌གུན༌ནི༌ ནང༌ང༌ ས༌འོན༌ ཏབས༌ཏེ༌, ཨ༌པོ༌ལོས༌སི༌ ཏེ༌བོའ༌ ཆུ༌ ཏངས༌ཏེ༌ ཨིན༌ནོག༌, ཨིན༌ནའང༌ ཏེ༌བོ༌ ལྡན༌ ཅུག༌ག༌ ཛད༌ཁན༌བོ༌ ནི༌, དཀོན༌མཆོག༌ ཞུགས༌ཏེ༌ ཨིན༌ནོག༌།
1CO 3:7 ས༌འོན༌ ཏབ༌ཁན༌ ཡ༌ ཆུ༌ ཏང༌ཁན༌བོ༌ ཁག༌ཅན༌ མ༌ནོག༌, ཁག༌ཅན༌ ནི༌ ས༌འོན༌ ལྡན༌ ཅུག༌ག༌ ཛད༌ཁན༌ནི༌ དཀོན༌མཆོག༌པོ༌ ཨིན༌ནོག༌།
1CO 3:8 ས༌འོན༌ ཏབ༌ཁན༌ དང༌ ཆུ༌ ཏངས༌ཁན༌གུན༌ནི༌ ཉམ༌པོ༌ དོད༌པ༌ ཅིག༌ བོར༌ཏེ༌ ལས༌ ཅོས༌ཏེ༌ ཨིན༌ནོག༌། ཡང༌ ཁོང༌ ཉིས༌ཀོའ༌ ཞབས༌ཏོག༌ ཞུ༌ཁན༌ ནང༌ཞིན༌ལ༌ སོལ༌རས༌ ཐོབ༌ཨིན༌།
1CO 3:9 ང༌ཞའ༌ ཉིས༌ཀོ༌ དཀོན༌མཆོག༌གི༌ ཞབས༌ཏོག༌པ༌ ཡང༌ ཁྱོ༌ཞ༌གུན༌ ཁོང༌ངི༌ ཞིང༌ དང༌ ཕོ༌གྲང༌ གུན༌ ཨིན༌ནོག༌།
1CO 3:10 དཀོན༌མཆོག༌གི༌ ཐུག༌རྗེ༌ ངའེ༌ ནང༌ང༌ ཡོད༌ཅེས༌པོའེ༌ ཞས༌ཏེ༌ ངའེ༌ རྩིག༌སྤོན༌ ཁས༌པ༌ཞིག༌ ཙོགས༌ལ༌, དཀོན༌མཆོག༌གི༌ ཕོ༌གྲང༌ངི༌ མག༌ལྡན༌བོ༌ ཏངས༌པིན༌། ཏ༌ ཞན༌མ༌གུན༌ནི༌ ཏེ༌ཀ༌ རྩིག༌ཨིན༌ ཨིན༌ནོག༌། ཏེ༌ཀ༌ རྩིག༌ཁན༌གུན༌ནི༌ མ༌སྲན༌ཏྲེ༌ སྣང༌ང༌ ཏངས༌ཏེ༌ རྩིག༌གོས༌།
1CO 3:11 ཅིའ༌ཟེར༌ན༌ ང༌ཞའེ༌ རྩིགས༌ཏེ༌ ཡོད༌ཁན༌ ཡེ༌ཤུ༌ མ༌ཤི༌ཀའེ༌ མག༌ལྡན༌ ཅིག༌པོ༌ མ༌སྟོགས༌, སུ༌ཞིག༌གིའང༌ ཡང༌ མག༌ལྡན༌ཞིག༌ ཏང༌ མི༌ཉན༌།
1CO 3:12 ཏེ༌ མག༌ལྡན༌བོའི༌ཀ༌ རྩིག༌ཁན༌གུན༌ནི༌ རིན༌ཐང༌ སོ༌སོའེ༌ གྱུ༌ སྣ༌ཚོགས༌ རིག༌ ཀོལ༌སྲིད༌ཅེས༌ ཨིན༌ནོག༌, སྤེར༌ན༌, ཁ༌ཅིག༌གི༌ སེར༌, མུལ༌ དང༌, རིན༌ཅན༌ རྡོའ༌ གུན༌ ཡང༌ ཁ༌ཅིག༌གི༌ ཤིང༌, ཕུག༌མ༌, ཡ༌ ཙ༌སྐམ༌པོ༌ གུན༌།
1CO 3:13 ཨིན༌ནའང༌ ཁྲིམས༌ཅད༌དི༌ ཞག༌ག༌, ཏེ༌ རྩིག༌སྤོན༌ རེ༌རེ༌ ལས༌ ཅོ༌ཁན༌བོ༌, མེ༌ གྱུད༌ཏེ༌ སྔོན༌ཨིན༌། ཏེན༌ན༌ མེ༌བོའེ༌ སྟག༌ཅད༌ ཅོས༌ཏེ༌ མི༌ རེ༌རེའེ༌ ལས༌གུན༌ནི༌ རིན༌ཐང༌ སྟན༌ཨིན༌།
1CO 3:14 ཀལ༌ཏེས༌ མེའེ༌ ནང༌ང༌ སོང༌ཏེའང༌ ལས༌པོ༌ མེད༌ཁན༌ མ༌ཆའ༌ན༌, ཏེ༌ རྩིག༌སྤོན༌བོའ༌ སོལ༌རས༌ ཐོབ༌ཨིན༌།
1CO 3:15 ཀལ༌ཏེས༌ ལས༌པོ༌ མེའ༌ ཞེན༌ན༌, ཏེ༌ རྩིག༌སྤོན༌བོའེ༌ ཅི༌ཚང༌མ༌ མེད༌ཁན༌ ཆེན༌, ཨིན༌ནའང༌ མེ༌ ནང༌ནེ༌ མི༌ཞིག༌ ཀགས༌པོ༌ ཉམ༌པོ༌ སྐྱོབ༌བ༌ ཙོགས༌ལ༌ ཁོ༌ སྐྱོབ༌ཨིན༌།
1CO 3:16 ཅི༌ ཁྱོ༌ཞའ༌, ཆོས༌ཚོགས༌པོ༌ དཀོན༌མཆོག༌གི༌ ཆོད༌ཁང༌ ཡང༌ དཀོན༌མཆོག༌གི༌ ཐུག༌ཉིད༌ ཁྱོ༌ཞ༌གུན༌ནི༌ ནང༌ང༌ ཞུགས༌ཁན༌བོ༌, གྱུས༌ཆའ༌ མེ༌རག༌ག༌?
1CO 3:17 ཀལ༌ཏེས༌ སུ༌ཞིག༌གི༌ འི༌ ཆོད༌ཁང༌བོ༌ ཤིག༌ཅེས༌ ཅོ༌ན༌, ཁོའ༌ དཀོན༌མཆོག༌གི༌ མེད༌ཁན༌ ཛད༌ཨིན༌, ཅིའ༌ཟེར༌ན༌ དཀོན༌མཆོག༌གི༌ ཆོད༌ཁང༌ ཏམ༌པ༌ ཨིན༌ནོག༌, ཡང༌ ཁྱོ༌ཞ༌གུན༌ ཏེན༌ན༌ ཆོད༌ཁང༌བོ༌ ཨིན༌ནོག༌།
1CO 3:18 རང༌དང༌རང༌ང༌ གོབ༌མ༌སྐོར༌ཤིག༌། ཀལ༌ཏེས༌ འི༌ ཇིག༌རྟེན༌པའེ༌ སམ༌ཁན༌ ཙོགས༌ལ༌ ཁྱོ༌ཞེའང༌ ཁྱོ༌ཞ༌རང༌ ཤེས༌རབས༌ཅན༌ ཨིན༌ སམ༌མད༌ན༌, ཏེ༌ནེ༌ ཁྱོ༌ཞ༌གུན༌ དེན༌བའ༌ ཤེས༌རབས༌ཅན༌ གྱུར༌ཅེས༌སི༌ ཕིའ༌ སམ༌མེད༌ རིག༌ གྱུར༌གོས༌།
1CO 3:19 ཅིའ༌ཟེར༌ན༌ དཀོན༌མཆོག༌གི༌ ཐོག༌ནེ༌, འི༌ ཇིག༌རྟེན༌ནི༌ ཤེས༌རབས༌པོ༌ ནི༌ སམ༌མེད༌ཅིག༌ ཨིན༌ནོག༌, ཀ༌ཟུག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌ “ཁོ༌རང༌ངི༌ སྐྱོན༌ཇན༌ནི༌ ཐབས༌གུན༌ ཀོལ༌ཏེ༌ དཀོན༌མཆོག༌གི༌ ཤེས༌རབས༌ཅན༌གུན༌ ཟུམ༌མ༌ ཛདས༌།”
1CO 3:20 ཡང༌ འི༌བོའང༌ མོལ༌ཏེ༌ ཡོད༌ཏེ༌ ཨིན༌ནོག༌, “ཇིག༌རྟེན༌ནི༌ ཤེས༌རབས༌ཅན༌ནི༌ སམ༌བ༌གུན༌ གཙོ༌བོའེ༌ ཁྱེན༌ན༌ ཛད༌ད༌ནོག༌, ཡང༌ ཏེ༌གུན༌ རིན༌མེད༌ ཨིན༌ཁན༌བོ༌ ཁོང༌ང༌ ཐུག༌གྱུས༌ ཨིན༌ནོག༌།”
1CO 3:21 ཏེན༌ན༌བོའེ༌ཕིའ༌ ཆོས༌ཚོགས༌སི༌ སྤོན༌བོའེ༌ གྱབ༌ནེ༌, གྲུལ༌ཅེས༌སི༌ ནང༌ང༌ ཕོ༌སོ༌ མ༌ཅོ༌ཤིག༌, ཅིའ༌ཟེར༌ན༌ ཅི༌ཚང༌མ༌ ཁྱོ༌ཞ༌གུན༌ནི༌ ཨིན༌ནོག༌། དེན༌བ༌ པ༌འུ༌ལུ༌, ཨ༌པོ༌ལོས༌, པི༌ཏྲར༌, ཇིག༌རྟེན༌, མི༌ཚེ༌, ཤི༌ཅེས༌, དག༌ས༌ དང༌ ཡོང༌ཅེས༌ཅན༌ ཚང༌མ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌ནོག༌།
1CO 3:23 ཡང༌ ཁྱོ༌ཞ༌གུན༌ མ༌ཤི༌ཀའེ༌ ཨིན༌ནོག༌ ཡང༌ མ༌ཤི༌ཀ༌ དཀོན༌མཆོག༌གི༌ ཨིན༌ནོག༌།
1CO 4:1 ཏེ༌བོའེ༌ཕིའ༌ ཨ༌པོ༌ལོས༌ དང༌ ངའ༌, དཀོན༌མཆོག༌གི༌ སང༌ཝའེ༌ ཐབས༌སི༌ སྐོར༌ལ༌, ཧ༌གོ༌ཅུག༌ཅེས༌སི༌ ཁག༌ ཀལ༌ལ༌ ཛད༌ཁན༌ནི༌ མ༌ཤི༌ཀའེ༌ ཡོག༌པོ༌ ཙོགས༌ སམ༌གོས༌ཅེས༌ ཨིན༌ནོག༌།
1CO 4:2 ཏ༌ ཏེ༌ཟུག༌ ཁག༌ཅན༌ ཁག༌ ཀལ༌ཁན༌ནི༌ མི༌བོ༌ ཨིད༌ཤེས༌ཅན༌ཞིག༌ ཡོང༌གོས༌།
1CO 4:3 ཁྲིམ༌སྤོན༌ ཡ༌ ཁྱོ༌ཞའེ༌ ངའེ༌ ལས༌སི༌ སྐོར༌ལ༌ ཐག༌ཅད༌ ཏང༌ན༌, ངའ༌ ཅའང༌ ཚེར༌ཅེས༌ མེ༌རག༌, ངའེ༌ ང༌རང༌ངེའང༌ ཏེ༌ སྐོར༌ལ༌ ཐག༌ཅད༌ ཏང༌ང༌མེད༌།
1CO 4:4 ངའེ༌ སེམས༌པོ༌ ལག༌མོ༌ ཨིན༌, ཨིན༌ནའང༌ ཏེ༌བོའེ༌ ང༌ ནོངས༌མེད༌ ཨིན༌ཁན༌ སྟན༌ན༌ མ༌ནོག༌། གཙོ༌བོ༌ ཅིག༌པོའེ༌, ངའ༌ སྟག༌ཅད༌ ཅོའ༌ ཛད༌ཏེ༌ ཐག༌ཅད༌ ཛད༌ཨིན༌།
1CO 4:5 ཏེ༌བོའེ༌ཕིའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌ ཡང༌ན༌ མ༌ཤི༌ཀ༌ ལོགས༌ཏེ༌ ཕེབས༌སི༌ སང༌ སྔུན༌ལ༌, སུ༌ཞིག༌གི༌ སྐོར༌ལའང༌ ཐག༌ཅད༌ མ༌ཏང༌ཤིག༌, ཅིའ༌ཟེར༌ན༌ ཁོང༌ངི༌ ང༌དང༌གུན༌ནི༌ མུན༌ནག༌གི༌ ནང༌ང༌ སྦས༌ཏེ༌ ཡོད༌ཁན༌གུན༌ འོད༌དི༌ ནང༌ང༌ ཁྱོང༌ང༌ ཛད༌ཏེ༌ ང༌དང༌ རང༌རང༌ སོ༌སོའེ༌ ལས༌ ཅོ༌ཁན༌ནི༌ གྱུན༌ཚན༌ སྔོན༌ ཅུག༌ག༌ ཛད༌ཨིན༌། ཏེ༌ནེ༌ དཀོན༌མཆོག༌གི༌ མི༌ རེ༌རེའ༌ འོས༌པ༌ ནང༌ཞིན༌ སྟོད༌པ༌ སལ༌ལ༌ ཛད༌ཨིན༌།
1CO 4:6 སྤུན༌གུན༌ ཁྱོ༌ཞའེ༌ ཕན༌ཐོགས༌སི༌ ཕིའ༌ ངའེ༌ ལབ༌ཞ༌ ཏངས༌ཁན༌གུན༌ནི༌ ནང༌ང༌ ཨ༌པོ༌ལོས༌ དང༌ ང༌རང༌ སྤེ༌ ཚུལ༌ལ༌ ཀོལ༌པིན༌། ཀལ༌ཏེས༌ ཏམ༌པའེ༌ སུང༌རབས༌སི༌ ནང༌ང༌ “བྲིས༌ཁན༌ནི༌ སང༌ ཐལ༌ཏེ༌ མ༌ཆའ༌” མོལ༌ཁན༌བོའེ༌ཀ༌ སྣང༌ང༌ ཅོའད༌ན༌, ཏེ༌ནེ༌ ཁྱོ༌ཞའ༌ ལོབ༌བོན༌ ཅིག༌, ཞན༌གུན༌ནི༌ སང༌ ཀྲག༌པོ༌ རྩིས༌ཏེ༌ ཁོའེ༌ གྱབ༌ནེ༌ གྲུལ༌ཅེས༌ལ༌ ཕོ༌སོ༌ མི༌ཚོར༌།
1CO 4:7 ཁྱོ༌ཞ༌གུན༌ལ༌ ཏེ༌ཟུག༌ ཐག༌ཅད༌ ཏང༌ཅེས༌སི༌ ཐོབ༌ཏང༌ སུའི༌ ཏངས༌? ཁྱོ༌ཞ༌གུན༌ནི༌ ལག༌ག༌ ཡོད༌ཁན༌ ཚང༌མ༌ དཀོན༌མཆོག༌གི༌ སལ༌ལ༌ ཛད༌ཏེ༌ མ༌ནོག༌ག༌? ཀལ༌ཏེས༌ དཀོན༌མཆོག༌གི༌ སལ༌ལ༌ ཛད༌ཏེ༌ ཨིན༌ན༌, ཏེ༌ནེ༌ ཁྱོ༌ཞའེ༌ མན༌ཁན༌, དཀོན༌མཆོག༌གི༌ སལ༌ཁན༌ནི༌ ཁྱུད༌གུན༌ནི༌ཀ༌ ཀ༌ཟུག༌གི༌ ཕོ༌སོ༌ ཅོའད༌?
1CO 4:8 ཁྱོ༌ཞ༌གུན༌ནི༌ ལག༌ག༌ སྒོས༌དོམ༌ ཚང༌མ༌ ཡོད༌, ཡང༌ ཆུག༌པོ༌ ཨིན༌ སམ༌མ༌ རག༌ག༌? ཅི༌ ཁྱོ༌ཞ༌གུན༌ནི༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ང༌ཞ༌གུན༌ མེད༌པ༌ ཝང༌སྲུལ༌ཅེས༌ གོ༌ཟུག༌ ཅོ༌ ཚར༌ཏེ༌ ཨིན༌ན༌? ངའེ༌ དོད༌པ༌ ཅོའད༌ དེན༌བའ༌ ཁྱོ༌ཞ༌གུན༌ནི༌ ཝང༌སྲུལ༌ཨིན༌ ཡོད༌ཤིག༌ཕིའང༌, ཏེ༌ནེ༌ ང༌དང༌གུན༌ནི༌ ཉམ༌པོ༌ ཝང༌སྲུལ༌ལད༌གྲོ༌།
1CO 4:9 པར༌པར༌རི༌ག༌ ངའེ༌ སམ༌མ༌རག༌, དཀོན༌མཆོག༌གི༌ ང༌ཞའ༌ མ༌ཤི༌ཀའེ༌ སྐུ༌ཚབས༌གུན༌ ཇིག༌རྟེན༌པ༌ གང༌པོ༌ དང༌ ཕོ༌ཉ༌ གུན༌ནི༌ དུན༌ལ༌ སྟན༌མོ༌ སྟན༌ན༌ བོར༌ཁན༌ ཙོགས༌ཤིག༌ དུག༌, ཀ༌ཟུག༌གི༌ སད༌ཅེས༌ལ༌ ཁྲིམས༌ཅད༌ ཏང༌ཁན༌ནི༌ མག༌གི༌ ཙོན༌པ༌གུན༌ གྱལ༌ཁའ༌ ཐོབ༌ཁན༌ནི༌ ཁྲོམས༌སྐོར༌རི༌ སྟིང༌ཇུག༌ག༌ བོར༌རད༌།
1CO 4:10 ང༌ཞ༌གུན༌ནི༌ མ༌ཤི༌ཀའེ༌ ཕིའ༌ ཞབས༌ཏོག༌ ཞུ༌ཅེས༌པོའེ༌, ང༌ཞ༌གུན༌ སམ༌མེད༌ ཙོགས༌ཤིག༌ ཐོང༌དུག༌, ཨིན༌ནའང༌ ཁྱོ༌ཞ༌གུན༌ནི༌ མ༌ཤི༌ཀའེ༌ ནང༌ང༌ མངས༌ཏེའང༌ ཁས༌པ༌ རིག༌ ཨིན༌ སམ༌དུག༌། ང༌ཞ༌གུན༌ འུ༌ཐུགས༌ རིག༌, ཁྱོ༌ཞ༌གུན༌ ཤེད༌ཅན༌ རིག༌། ཁྱོ༌ཞ༌གུན༌ལ༌ རྩི༌ཝ༌ དང༌ ང༌ཞ༌གུན༌ནི༌ཀ༌ ཧབ༌གོད༌ ཏངས༌།
1CO 4:11 དག༌སའང༌ ང༌ཞ༌གུན༌ལ༌ སྟོག༌ཤེས༌ དང༌ སྐོམ༌ཤེས༌ ཡོང༌དུག༌, ཡང༌ ང༌ཞ༌གུན༌ ཀོས༌ལག༌ སྙིང༌པ༌ ཅད༌པོ༌ གོན༌ནད༌། ང༌ཞ༌གུན༌ལ༌ རྡུང༌གྱབ༌ ཏངས༌, ཡང༌ དུག༌སའེ༌ ཁང༌པའང༌ མེད༌།
1CO 4:12 མི༌ཚེའེ༌ སྒོས༌དོམ༌གུན༌ རིག༌ཅེས༌སི༌ ཕིའ༌ ང༌ཞ༌གུན༌ནི༌ སྲན༌ཏྲེ༌ ངལ༌ངལ༌ ཚོག༌པ༌ལ༌, ང༌ཞ༌རང༌ངི༌ ལག༌པ༌ནེ༌ ལས༌ ཅོའད༌། ང༌ཞའ༌ ངན༌ ཏབ༌ཁན༌གུན༌ལ༌ ང༌ཞ༌གུན༌ནི༌ ཅིན༌ལབས༌ ཏང༌ངད༌། ནགས༌ སྟན༌ ཟ༌ནེ༌, ང༌ཞའེ༌ ཟོད༌པ༌ ཉམ༌པོ༌ ཁུར༌རད༌།
1CO 4:13 ང༌ཞའ༌ ངན༌ ཏབ༌ཁན༌གུན༌ལ༌ ང༌ཞ༌གུན༌ནི༌ སྤེ༌ར༌ ཟང༌པོ༌ ཉམ༌པོ༌ ལན༌ཏང༌ངད༌། དག༌སའང༌ ང༌ཞ༌གུན༌ལ༌, ཇིག༌རྟེན༌ གང༌པོའེ༌ ཐུག༌ཤོག༌ རིགས༌ངན༌ མི༌གུན༌ མ༌ཚད༌, ཁྱིམ༌ས༌ ཁམ༌ལོག༌ ཙོགས༌ ཐེ༌རུག༌།
1CO 4:14 ངའེ༌ འི༌ ཟེར༌ཁན༌ ཚང༌མ༌ ཁྱོ༌ཞ༌གུན༌ལ༌ ཁྲེལ༌བ༌ ཅོ༌ཅེས༌སི༌ ཕིའ༌ བྲིའ༌མེད༌, ཨིན༌ནའང༌ ང༌རང༌ངི༌ ཅེས༌པའེ༌ ཕྲུ༌གུ༌གུན༌ ཙོགས༌ལ༌ སྤང༌པུད༌དད༌།
1CO 4:15 ཁྱོ༌ཞ༌གུན༌ལ༌ མ༌ཤི༌ཀའེ༌ སྐོར༌ལ༌ ལབ༌ཁན༌ སྟོང༌ཅུ༌ ཡོད༌ནའང༌, ཁྱོ༌ཞ༌གུན༌ལ༌ སེམས༌ཉིད༌དི༌ ཐོག༌ནེ༌, ཨ༌བ༌ ཅིག༌ ཡོད༌ཏེ༌ ཨིན༌ནོག༌། ཅིའ༌ཟེར༌ན༌ ནམ༌ ངའེ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤདས༌, ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཁྱོ༌ཞ༌གུན༌ནི༌ ཨ༌བ༌ གྱུར༌ཏེ༌ ཨིན༌པིན༌།
1CO 4:16 ངའེ༌ ཁྱོ༌ཞ༌གུན༌ལ༌, ང༌ ཙོགས༌སི༌ མི༌ཚེ༌ ཕུད༌ཅེས༌ལ༌ སྙིང༌ནེ༌ ཞུ༌ཝ༌ ཕུལ༌ལད༌།
1CO 4:17 ཏེན༌ན༌བོའེ༌ཕིའ༌ གཙོ༌བོའེ༌ ནང༌ང༌ ངའེ༌ ང༌རང༌ངི༌ ཅེས༌པ༌ དང༌ ཨིད༌ཤེས༌ཅན༌ནི༌ བུ༌ཚ༌ ཏི༌མོ༌ཐི༌ ཁྱོ༌ཞ༌གུན༌ ཡོད༌ས༌ ལམ༌ཅུགས༌པིན༌། མི༌ཚེ༌ ཕུད༌ཅེས༌སི༌ སྐོར༌ལ༌ ཀ༌རུང༌ས༌ ཆོས༌ཚོགས༌ ཚང༌མའེ༌ ནང༌ང༌ ངའེ༌ ལབ༌ཁན༌ ཙོགས༌སི༌ མི༌ཚེ༌, ངའེ༌ མ༌ཤི༌ཀ༌ ཡེ༌ཤུའི༌ གྱབ༌ནེ༌ གྲུལ༌ཨིན༌ ཕུད༌ཁན༌བོའེ༌ སྐོར༌ལ༌ ཏི༌མོ༌ཐིའི༌ ཁྱོ༌ཞ༌གུན༌ལ༌ ཨིད༌ཏུ༌ སྐུལ༌ཨིན༌།
1CO 4:18 ང༌ ཁྱོ༌ཞ༌གུན༌ ཡོད༌ས༌ ཡང༌སྐྱར༌ ཐུག༌ག༌ལ༌ ཡོང༌ང༌ མ༌ནོག༌ སམས༌ཏེ༌, ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌ ཕོ༌སོ༌ཅན༌ གྱུར༌ཏེ༌ ཡོད༌ཏིག༌རག༌།
1CO 4:19 དཀོན༌མཆོག༌གི༌ ཐུག༌གོངས༌ ཡོད༌ན༌, ང༌ གྱོགས༌པ༌ ཡོང༌ཨིན༌། ཏེ༌ནེ༌ ངའེ༌ ཏེ༌ ཕོ༌སོ༌ཅན༌གུན༌ནི༌ སམ༌བ༌ མེད༌ཁན༌ནི༌ སྤེ༌ར༌, ཡ༌ ཁོང༌གུན༌ནི༌ ནང༌ང༌ དཀོན༌མཆོག༌གི༌ དེན༌བའེ༌ ཝང༌ཆ༌གུན༌ ཡོད༌ཁན༌བོ༌ ལྟ༌ ཐུབ༌ཨིན༌།
1CO 4:20 ཅིའ༌ཟེར༌ན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ དུག༌ཁན༌གུན༌ནི༌, སྤེ༌ར༌ ཅིག༌པོ༌ མན༌པ༌ དཀོན༌མཆོག༌གི༌ ཝང༌ཆའེ༌ ནང༌ང༌ མི༌ཚེའེ༌ ཕུད༌ད༌ནོག༌།
1CO 4:21 ཁྱོ༌ཞ༌གུན༌ནི༌ ཀ༌བོ༌ ལྡམ༌མད༌? ང༌ ཁྱོ༌ཞ༌གུན༌ ཡོད༌ས༌ བེར༌ཀ༌ ཁུར༌ཏེ༌ ཆད༌པ༌ ཅད༌ད༌ལ༌ ཡོང༌ང༌ ཡ༌ ཅེས༌པ༌ དང༌ སེམས༌ཉིད༌ པས༌མོ༌ ཉམ༌པོ༌ ཡོང༌?
1CO 5:1 ཁྱོ༌ཞ༌གུན༌ནི༌ ཕྲོའ༌ ཏེ༌ཟུག༌ ལུས༌བྲེལ༌ ངན༌པ༌ རིག༌ དུག༌ ཟེར༌ཏེ༌ ཚོར༌, ཀ༌བོ༌ ཏད༌པ༌ མེད༌ཁན༌གུན༌ནིའང༌ ཅོའ༌ མ༌ནོག༌, ཁྱོ༌ཞའེ༌ ཆོས༌ཚོགས༌སི༌ ནང༌ང༌ བུ༌ཚ༌ཞིག༌གི༌ ཁོ༌རང༌ངི༌ མ༌ཚབས༌ ཉམ༌པོ༌ ལུས༌བྲེལ༌ བོར༌དུག༌ ཟེར༌ཏེ༌ ངའ༌ ཤད༌ད༌རག༌།
1CO 5:2 ཁྱོ༌ཞ༌གུན༌ནི༌ རྡུག༌པོ༌ དང༌ ཁྲེལ༌བའེ༌ ནང༌ང༌ ཉ༌ངན༌ ཅོས༌ཏེ༌, ཏེ༌ མི༌བོ༌ ཆོས༌ཚོགས༌སི༌ ཕྲོ༌ནེ༌ ཕིང༌གོ༌ཤེས༌ ཨིན༌ནོག༌། ཨིན༌ནའང༌ ཁྱོ༌ཞ༌གུན༌ནི༌ ཏེ༌བོའེ༌ཀ༌ ཕོ༌སོ༌ ཚོར༌དུག༌།
1CO 5:3 ཞན༌ ང༌ ང༌རང༌ ཁྱོ༌ཞ༌གུན༌ནི༌ ཕྲོའ༌ མེད༌ནའང༌, སེམས༌ཉིད༌དི༌ ཐོག༌ནེ༌ ང༌ ཁྱོ༌ཞའ༌ ཉམ༌པོ༌ ཨིན༌། ཡང༌ ང༌ ཏེ༌རུ༌ ཁྱོ༌ཞའ༌ ཉམ༌པོ༌ ཡོད༌ཁན༌ ཙོགས༌ལ༌, ངའེ༌ གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌, ཏེ༌ མི༌བོའེ༌ཀ༌ ཁྲིམས༌ཅད༌ ཏང༌ ཚར༌ཏེ༌ ཨིན༌། ཁྱོ༌ཞའ༌ ཆོས༌ཚོགས༌ གང༌པོ༌ ཛོམ༌ ཟ༌ནེ༌, ངའེ༌ སེམས༌ ཡང༌ གཙོ༌བོ༌ ཡེ༌ཤུའི༌ ཁྱུད༌, ཁྱོ༌ཞ༌གུན༌ ཉམ༌པོ༌ ཡོང༌ཨིན༌།
1CO 5:5 ཏེ༌ནེ༌ ཁོའ༌ རྡུག༌ངལ༌ ཐོང༌ཏེ༌ དོད༌པ༌ ངན༌པ༌གུན༌ནི༌ ཀ༌ནེ༌ གྱོད༌པ༌ སྐྱེས༌ཏེ༌, གཙོ༌བོ༌ ལོགས༌ཏེ༌ ཕེབ༌ཤེས༌སི༌ ཞག༌ག༌, ཁོ༌ སྐྱོབ༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ཏེ༌ མི༌བོ༌ ཆོས༌ཚོགས༌ནེ༌ ཕི༌ལོག༌ག༌ ཕིངས༌ཏེ༌ རྡུད༌གུན༌ནི༌ གོ༌བ༌ ཤེ༌ཏན༌ནི༌ ལག༌ག༌ སྟད༌གོས༌།
1CO 5:6 ཁྱོ༌ཞ༌གུན༌ནི༌ ཏེ༌བོའེ༌ཀ༌ ཕོ༌སོ༌ ཅོ༌ཅེས༌པོ༌ ནི༌ ཇིགས༌ནང༌ཅན༌ ཞིག༌ དུག༌། ཅི༌ འི༌ སྡིག༌པ༌བོ༌ པག༌པའེ༌ གང༌པོའེ༌ ནང༌ང༌, ཕེལ༌ཁན༌ནི༌ སྐྱུར༌ ཆུ༌ངུན༌ ཙོགས༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཆའ༌ མེ༌རག༌ག༌?
1CO 5:7 ཁྱོ༌ཞ༌གུན༌ནི༌ ཕྲོ༌ནེ༌ སྐྱུར༌ སྙིང༌པ༌བོ༌ ཕིངས༌ཏེ༌ མེད༌ཁན༌ ཅོ༌གོས༌། ཏེ༌ནེ༌ སྐྱུར༌ མེད༌ཁན༌ནི༌ པག༌པའེ༌ སོ༌མ༌ རུས༌ཁན༌ ཙོགས༌, ཁྱོ༌ཞ༌གུན༌ ཏམ༌པ༌ གྱུར༌ཨིན༌, ཀ༌བོ༌ ཁྱོ༌ཞ༌གུན༌ དེན༌བ༌ ཨིན༌ནོག༌, ཅིའ༌ཟེར༌ན༌ པེ༌སག༌གི༌ ལུ༌གུ༌ མ༌ཤི༌ཀ༌ ང༌དང༌ངི༌ སྡིག༌པ༌གུན༌ནི༌ ཕིའ༌ ཆོད༌པ༌ ཕུལ༌ལ༌ ཛདས༌།
1CO 5:8 ཏེ༌བོའེ༌ཕིའ༌ ང༌དང༌གུན༌ནི༌ ངན༌སེམས༌ དང༌ ངན༌པ༌ སྐྱུར༌ སྙིང༌པའེ༌ ཏ༌གི༌ ཉམ༌པོ༌ གའ༌སྟོན༌ མ༌ཅོའ༌, རྩང༌མ༌ དང༌ ཀྲང༌པོའེ༌ སྐྱུར༌ མེད༌ཁན༌ནི༌ ཏ༌གི༌བོ༌ ཉམ༌པོ༌ གའ༌སྟོན༌ ཅོ༌ཨིན༌།
1CO 5:9 ངའེ༌ ཁྱོ༌ཞ༌གུན༌ལ༌ སྔུན༌ལ༌ བྲི༌ ཟ༌ནེ༌, ལུས༌བྲེལ༌ ངན༌པ༌ བོར༌ཁན༌ནི༌ མི༌གུན༌ ཉམ༌པོ༌ མི༌དྲེས༌ཤེས༌སི༌ ཕིའ༌ ཟེར༌པིན༌།
1CO 5:10 ཨིན༌ནའང༌ ཏད༌པ༌ མེད༌ཁན༌ ཀ༌གུན༌ ལུས༌བྲེལ༌ ངན༌པ༌གུན༌ནི༌ ནང༌ང༌ དྲེས༌སད༌ ཡ༌ ནོར༌ནབས༌ཅན༌ ཡ༌ གོབ༌སྐོར༌ཁན༌ ཡ༌ སྐུན༌དྲ༌ གུན༌ལ༌ ཆོས༌ཅོ༌ཁན༌ གུན༌ནི༌ སྐོར༌ལ༌ ངའེ༌ ཟེར༌ཏེ༌ མན༌, ཀལ༌ཏེས༌ ཨིན༌པིན༌ན༌ ཏེ༌ནེ༌ ཁྱོ༌ཞ༌གུན༌ལ༌ འི༌ ཇིག༌རྟེན༌ ཕང༌གོས༌ཏེ༌ ཡོད༌གྲོ༌།
1CO 5:11 ངའེ༌ བྲི༌ཅེས༌སི༌ ཏོན༌ཏག༌པོ༌ ནི༌ ཁྱོ༌ཞ༌གུན༌, ཏད༌པ༌ཅན༌ ཨིན༌ ཟེར༌ཨིན༌ནའང༌, ལུས༌བྲེལ༌ ངན༌པའེ༌ ནང༌ང༌ དྲེས༌ཁན༌ ཡ༌ ནོར༌ནབས༌ ཡོད༌ཁན༌, ཡ༌ སྐུན༌དྲ༌ ཅོལ༌ཁན༌, ཞན༌མའེ༌ སྐོར༌ལ༌ རྩོག༌པོ༌ ཟེར༌ཁན༌, ཡ༌ ར༌རོས༌ཁན༌, ཡ༌ མི༌གུན༌ལ༌ གོབ༌སྐོར༌ ཏང༌ཁན༌ གུན༌ ཉམ༌པོ༌ བྲེལ༌ མི༌ཅོ༌ཅེས༌པོ༌ ཨིན༌། ཏེ༌ཙོགས༌སི༌ མི༌གུན༌ ཉམ༌པོ༌ ཟན༌ནའང༌ མ༌ཟ༌ཤིག༌།
1CO 5:12 ཆོས༌ཚོགས༌སི༌ ཕི༌ལོག༌ག༌ ཡོད༌ཁན༌ནི༌ ཏད༌པ༌ མེད༌ཁན༌གུན༌ལ༌ ཁྲིམས༌ཅད༌ ཏང༌ཅེས༌པོ༌ ངའེ༌ ཁག༌ མན༌། ཨིན༌ནའང༌ ཆོས༌ཚོགས༌སི༌ ཨིན༌ཨིན༌ཞིག༌ སྡིག༌པ༌ ཅོ༌ཁན༌གུན༌ལ༌ ཁྲིམས༌ཅད༌ ཏང༌ཅེས༌པོ༌ ཏན༌ཏན༌ལ༌ ཁྱོ༌ཞ༌གུན༌ནི༌ ཁག༌ ཨིན༌ནོག༌།
1CO 5:13 དཀོན༌མཆོག༌གི༌ ཏད༌པ༌ མེད༌ཁན༌གུན༌ལ༌ ཁྲིམས༌ཅད༌ད༌ ཛད༌ཨིན༌། ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, “ཁྱོ༌ཞ༌གུན༌ནི༌ ཕྲོ༌ནེ༌ མི༌ ངན༌བོ༌ ཕིང༌གོས༌།”
1CO 6:1 ཀལ༌ཏེས༌ ཁྱོ༌ཞ༌ སུ༌ཞིག༌ག༌ ཞན༌ཡང༌ ཏད༌པ༌ཅན༌ཞིག༌ ཉམ༌པོ༌ ཛིང༌མོ༌ ཆ༌ན༌, ཀ༌ཟུག༌གི༌ ཁྱོ༌ཞའེ༌ ཏེ༌ མི༌བོ༌ ཞན༌ཡང༌ ཏད༌པ༌ཅན༌གུན༌ནི༌ དུན༌ལ༌ མ༌ཁྱེར༌ར༌, ཞུང༌ངི༌ ཁྲིམས༌ཁུང༌ང༌ ཁྱེར༌ཅེས༌སི༌ ཧམ༌པ༌ ཅོའད༌?
1CO 6:2 ཅི༌ ང༌དང༌ ཏད༌པ༌ཅན༌གུན༌ནི༌ ཇིག༌རྟེན༌པ༌གུན༌ལ༌ ཁྲིམས༌ཅད༌ ཏང༌ཅེས༌པོ༌ ཁྱོ༌ཞ༌གུན༌ལ༌ གྱུས༌མེད༌ད༌? ཡང༌ ཀལ༌ཏེས༌ ཁྱོ༌ཞ༌གུན༌ནི༌ ཇིག༌རྟེན༌པ༌གུན༌ལ༌ ཁྲིམས༌ཅད༌དད༌ན༌, ཅི༌ ཁྱོ༌ཞ༌གུན༌ནི༌ ཕྲོའ༌ འི༌ ནས༌ལུག༌ ཆུ༌ངུན༌བོའ༌ ཁྲིམས༌ཅད༌ ཏང༌ཅེས༌སི༌ ཁྱུད༌ མེད༌ད༌?
1CO 6:3 ང༌དང༌གུན༌ནི༌ ཕོ༌ཉ༌གུན༌ལ༌ ཁྲིམས༌ཅད༌ ཏང༌ཅེས༌པོ༌, ཁྱོ༌ཞ༌གུན༌ལ༌ གྱུས༌མེད༌ད༌? ཏེན༌ན༌བོའེ༌ཕིའ༌ མི༌ཚེའེ༌ ནང༌ང༌ ཇུང༌ཁན༌ནི༌ ཛིང༌མོ༌གུན༌ ཏན༌ཏན༌ལ༌ ཁྱོ༌ཞ༌གུན༌ནི༌ སེལ༌ ཉན༌གོས༌།
1CO 6:4 ཀལ༌ཏེས༌ ཁྱོ༌ཞ༌གུན༌ནི༌ ནང༌ང༌ ཛིང༌མོ༌ རིག༌ ཆའད༌ན༌, ཏེ༌ནེ༌ ཅིའ༌ ཆོས༌ཚོགས༌ནེ༌ ཕི༌ལོག༌ག༌ ཆོས༌ཚོགས༌སི༌ ནང༌ང༌ ཅའང༌ ཁག༌ མེད༌ཁན༌ནི༌ ཁྲིམ༌སྤོན༌གུན༌ནི༌ཀ༌ ཆའད༌།
1CO 6:5 ངའེ༌ འི༌བོ༌ ཁྱོ༌ཞ༌གུན༌ ཁྲེལ༌ཅུག༌ཅེས༌ལ༌ ཟེར༌རད༌, ཅི༌ ཆོས༌ཚོགས༌སི༌ ནང༌ང༌ འི༌ ནས༌ལུག༌གུན༌ལ༌ ཁྲིམས༌ཅད༌ ཉན༌ཅེས༌སི༌ ཕིའ༌, མི༌ ཤེས༌རབས༌ཅན༌ ཅིག༌གའང༌ མི༌རུག༌ག༌?
1CO 6:6 ཅིའ༌ ཁྱོ༌ཞའེ༌ ཕྲོ༌ནེ༌ ཅིག༌གི༌ ཞན༌ཡང༌ མི༌ཞིག༌ ཁྲིམས༌ཁུང༌ང༌ ཏད༌པ༌ མེད༌ཁན༌གུན༌ནི༌ ལག༌ག༌ ཤགས༌ ཅོའ༌ལ༌ ཁྱེར༌རད༌?
1CO 6:7 ཁྱོ༌ཞ༌གུན༌ནི༌ འི༌ ཛིང༌མོ༌གུན༌ ཁྲིམས༌ཁུང༌ང༌ ཁྱེར༌ར༌ཅིག༌, ཁྱོ༌ཞའ༌ ཕམས༌ ཚར༌ཏེ༌ ཨིན༌ནོག༌། ཏེ༌སང༌ཏ༌ མི༌འོས༌པ༌ ཆ༌ཅུག༌ན༌ མི༌གྱལ༌ལ༌? གོབ༌སྐོར༌ཅུག༌ན༌ མི༌གྱལ༌ལ༌?
1CO 6:8 ཨིན༌ནའང༌ ཁྱོ༌ཞ༌གུན༌ནིའང༌ ནོར༌ཁྲུལ༌ དང༌ གོབ༌སྐོར༌ ཏང༌དུག༌, རང༌ངི༌ ཏད༌པ༌ཅན༌ནི༌ སྤུན༌གུན༌ལའང༌།
1CO 6:9 ཅི༌, ལས༌ངན༌ ཅོ༌ཁན༌གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཞུགས༌ མི༌ཉན༌ཅེས༌པོ༌ ཁྱོ༌ཞ༌གུན༌ལ༌ གྱུས༌མེད༌ད༌? རང༌དང༌རང༌ང༌ གོབ༌མ༌སྐོར༌ཤིག༌། ལུས༌བྲེལ༌ ངན༌པ༌, སྐུན༌དྲ༌ ཅོལ༌ཁན༌, རང༌ངི༌ ཞིད༌མད༌ མན༌པ༌ ཞན༌ཡང༌ཞིག༌ ཉམ༌པོ༌ ལུས༌བྲེལ༌ ཅོ༌ཁན༌, བུ༌ཚ༌ ཟུགས༌ཙོང༌ཁན༌, བུ༌ཚ༌ དང༌ བུ༌ཚ༌ གུན༌ནི༌ པར༌ལ༌ ཡ༌ བུ༌མོ༌ དང༌ བུ༌མོ༌ གུན༌ནི༌ པར༌ལ༌ ལུས༌བྲེལ༌ ཅོ༌ཁན༌,
1CO 6:10 རྐུན༌མ༌ རྐུ༌ཁན༌, ནོར༌ནབས༌ཅན༌, ར༌རོས༌ཁན༌, ཞན༌མའ༌ ངན༌ ཏབ༌ཁན༌ དང༌ མི༌གུན༌ལ༌ གོབ༌སྐོར༌ཁན༌ གུན༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཆ༌ མི༌ཉན༌།
1CO 6:11 ཏུས༌ཤིག༌ག༌ ཁྱོ༌ཞའ༌ ཁ༌ཅིག༌གའང༌ ཏེ༌ མི༌གུན༌ ཙོགས༌ ཡོད༌པིན༌། ཨིན༌ནའང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཁྱོང༌ཅེས༌ ཡང༌ ང༌དང༌ངི༌ དཀོན༌མཆོག༌གི༌ ཐུག༌ཉིད༌དི༌ ཁྱོ༌ཞ༌གུན༌ རྩང༌མ༌ དང༌ ཏམ༌པ༌ ཅོའ༌ ཛད༌ཏེ༌ དཀོན༌མཆོག༌གི༌ སྐུན༌དུན༌ལ༌ མི༌ ཀྲང༌པོ༌ རིག༌ ཐེའ༌ཛད༌ཏེ༌ ཨིན༌ནོག༌།
1CO 6:12 ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཟེར༌ར༌ནོག༌ “ངའ༌ ཅི༌ཚང༌མ༌ ཅོ༌ཆོགས༌ཨིན༌།” ཨིན༌ནའང༌ ངའེ༌ ཟེར༌རད༌ “ཅི༌ཚང༌མ༌ ཁྱོ༌ཞ༌གུན༌ནི༌ ཕིའ༌ གྱལ༌ལ༌ཞིག༌ མན༌།” ངེའང༌ ཟེར༌ཉན༌ཅེས༌ ཨིན༌ནོག༌ “ངའ༌ ཅི༌ཞིག༌ ཅོ༌ནའང༌ ཅོ༌ཆོགས༌ཨིན༌” ཨིན༌ནའང༌ ངའེ༌ ང༌རང༌ ཅི༌ཞིག༌གིའང༌ ཡོག༌པོ༌ མ༌ནེ༌ གྱུར༌ མི༌ཅུག༌།
1CO 6:13 ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཟེར༌ར༌ནོག༌ “ཟན༌བོ༌ གྲོད༌པའེ༌ ཕིའ༌ ཅོས༌ཏེ༌ ཨིན༌ནོག༌ ཡང༌ གྲོད༌པ༌བོ༌ ཟན༌ནི༌ ཕིའ༌།” ཨིན༌ནའང༌ ཞག༌ཤིག༌ དཀོན༌མཆོག༌གི༌ ཏེ༌ ཉིས༌ཀོ༌ མེད༌ཁན༌ ཅོའ༌ ཛད༌ཅེས༌པོ༌ ཀྲང༌པོ༌ མ༌ནོག༌ག༌? ང༌དང༌གུན༌ནི༌ ཟུགས༌པོ༌བོ༌ ལུས༌བྲེལ༌ ངན༌པ༌ མན༌པ༌, གཙོ༌བོའ༌ ཞབས༌ཏོག༌ ཞུ༌ཅེས༌སི༌ ཕིའ༌ ཛད༌ཏེ༌ ཨིན༌ནོག༌, ཡང༌ གཙོ༌བོའེ༌ ང༌དང༌གུན༌ནི༌ ཟུགས༌པོའ༌ སྟ༌སྟོག༌ ཛད༌ད༌ནོག༌།
1CO 6:14 ཅིའ༌ཟེར༌ན༌ དཀོན༌མཆོག༌གི༌ ང༌དང༌གུན༌ ཁོང༌རང༌ངི༌ ཤེད༌ གྱུད༌ཏེ༌, ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཨིན༌, ཀ༌ཟུག༌གི༌ ཁོང༌ངི༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌།
1CO 6:15 ཅི༌ ངོས༌པོའ༌ ཁྱོ༌ཞའེ༌ ཟུགས༌པོ༌ མ༌ཤི༌ཀའེ༌ ཁག༌ཅིག༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌མེད༌ད༌? ཏེ༌ནེ༌ མི༌ཞིག༌གི༌ མ༌ཤི༌ཀའེ༌ ཁག༌ ཨིན༌ཁན༌ནི༌ ཏེ༌ ཟུགས༌པོ༌བོ༌, ཟུགས༌ཙོང༌མ༌ཞིག༌ ཉམ༌པོ༌ དྲེས༌ས༌ལ༌ ཁྱེར༌གོས༌ས༌? མ༌ནེ༌ མ༌གོས༌།
1CO 6:16 ཟུགས༌ཙོང༌མ༌ ཉམ༌པོ༌ དྲེས༌ཁན༌ནི༌ མི༌བོ༌ ཏེ༌ བུ༌མོ༌ ཉམ༌པོ༌ ཟུགས༌པོ༌ ཅིག༌ གྱུར༌ཁན༌བོ༌, ཁྱོ༌ཞ༌གུན༌ལ༌ གྱུས༌མེད༌ད༌? ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌ “བུ༌ཚ༌ དང༌ བུ༌མོ༌ ཉིས༌ཀོ༌ བྲེལ༌ཏེ༌ ཟུགས༌པོ༌ ཅིག༌ གྱུར༌ཨིན༌།”
1CO 6:17 ཨིན༌ནའང༌ ཀལ༌ཏེས༌ མི༌ཞིག༌ གཙོ༌བོ༌ ཡེ༌ཤུ༌ ཉམ༌པོ༌ བྲེལ༌ན༌, ཁོ༌ ཁོང༌ ཉམ༌པོ༌ ཐུག༌ཉིད༌དི༌ ནང༌ང༌ ཅིག༌ གྱུར༌ཨིན༌།
1CO 6:18 ལུས༌བྲེལ༌ ངན༌པའེ༌ ཀ༌ནེ༌ ཤོར༌ཏེ༌ སོང༌ཤིག༌། འི༌ སྡིག༌པའེ༌ ཟུགས༌པོའ༌ ནོད༌སྐྱལ༌ཁན༌ ཙོགས༌, ཞན༌ཡང༌ སྡིག༌པ༌ཞིག༌གི༌ ནོད༌སྐྱལ༌ མི༌ཉན༌, ཅིའ༌ཟེར༌ན༌ ལུས༌བྲེལ༌ ངན༌པའེ༌ སྡིག༌པ༌བོ༌ རང༌ངི༌ ཟུགས༌པོའེ༌ གྱབ༌གལ༌ལ༌ ཨིན༌ནོག༌།
1CO 6:19 ཁྱོ༌ཞ༌གུན༌ནི༌ ཟུགས༌པོ༌ ཏམ༌པའེ༌ ཐུག༌ཉིད༌དི༌ ཆོད༌ཁང༌ ཨིན༌ཁན༌བོ༌, ཅི༌ ཁྱོ༌ཞ༌གུན༌ལ༌ གྱུས༌ཆའ༌ མེ༌རག༌ག༌? ཁོང༌ ཁྱོ༌ཞ༌གུན༌ནི༌ ནང༌ང༌ ཞུགས༌སད༌ ཡང༌ ཁྱོ༌ཞ༌གུན༌ལ༌ དཀོན༌མཆོག༌གི༌ སལ༌ལ༌ ཛད༌ཏེ༌ ཨིན༌། ཏ༌ ཁྱོ༌ཞའ༌ ཁྱོ༌ཞ༌རང༌ངི༌ མ༌ནོག༌,
1CO 6:20 ཅིའ༌ཟེར༌ན༌ དཀོན༌མཆོག༌གི༌ ཁྱོ༌ཞ༌གུན༌ རིན༌ ཆེན༌མོ༌ཞིག༌ ཤལ༌ལ༌ ཛད༌ཏེ༌ ཉོའ༌ ཛད༌ཏེ༌ ཨིན༌། ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ ཁྱོ༌ཞ༌རང༌ངི༌ ཟུགས༌པོ༌ ཉམ༌པོ༌ དཀོན༌མཆོག༌ག༌ རྩི༌ཝ༌ ཅོ༌གོས༌།
1CO 7:1 ཏ༌ ཁྱོ༌ཞ༌གུན༌ནི༌ ཨི༌གེའི༌ ནང༌ང༌ ཏྲི༌ཝ༌ ཏྲིས༌ཏེ༌ ཡོད༌ཁན༌ནི༌ ལན༌ལ༌, འོ༌ན༌, བུ༌ཚ༌ ཡ༌ བུ༌མོ༌ གུན༌ནི༌ ན༌མ༌ མ༌ཅོ༌ན༌ གྱལ༌ལ༌ ཨིན༌ནོག༌།
1CO 7:2 ཨིན༌ནའང༌ ཇིག༌རྟེན༌ནི༌ ནང༌ང༌ ལུས༌བྲེལ༌ ངན༌པ༌ མངས༌ཏེའང༌ ཡོད༌ པ༌སང༌, བུ༌ཚ༌ རེ༌རེའ༌ ན༌མ༌ ཅིག༌ ཡང༌ བུ༌མོ༌ རེ༌རེའ༌ མག༌པ༌ ཅིག༌ ཡོང༌གོ༌ཤེས༌ ཨིན༌ནོག༌།
1CO 7:3 མག༌པའེ༌ ཁོ༌རང༌ངི༌ ན༌མའེ༌ ལུས༌བྲེལ༌ལི༌ སྒོས༌དོམ༌གུན༌ གྲུབ༌ཅུག༌གོས༌, ཡང༌ ན༌མའེ༌ ཁོ༌རང༌ངི༌ མག༌པའེ༌ ལུས༌བྲེལ༌ལི༌ སྒོས༌དོམ༌གུན༌ གྲུབ༌ཅུག༌གོས༌།
1CO 7:4 ཏེ༌བོ༌ ནི༌ ན༌མའེ༌ ཁོ༌རང༌ངི༌ ཟུགས༌པོའེ༌ཀ༌ ཁོ༌རང༌ངི༌ མག༌པའ༌ ཝང༌ཆ༌ ཡང༌ མག༌པའེ༌ ཁོ༌རང༌ངི༌ ཟུགས༌པོའེ༌ཀ༌ ཁོ༌རང༌ངི༌ ན༌མའ༌ ཝང༌ཆ༌ ཏང༌ང༌ནོག༌།
1CO 7:5 ཁྱོ༌ཞ༌རང༌ མང༌ང༌ མོས༌ལམ༌མི༌ ནང༌ང༌ ཏང༌ ཉན༌ཅེས༌སི༌ ཕིའ༌ ཁྱོ༌ཞའ༌ ཉིས༌ཀོའེ༌ ཁའ༌ཆམས༌ཏེ༌, ཏུས༌ ཉུ༌ངུན༌ཞིག༌ ལུས༌བྲེལ༌ མི༌ཅོ༌ སམ༌ན༌ མ༌སྟོགས༌, ཁྱོ༌ཞའ༌ ཉིས༌ཀོའེ༌ པར༌ལ༌ ཟུགས༌པོའེ༌ སྒོས༌དོམ༌གུན༌ མ༌ཅོའ༌ མ༌དུག༌ཤིག༌། ཏེ༌ཏུས༌པོའེ༌ སྟིང༌ནེ༌, ཉིས༌ཀོ༌ ཡང༌སྐྱར༌ ཉམ༌པོ༌ ཛོམ༌གོས༌, ཅིའ༌ཟེར༌ན༌ ཁྱོ༌ཞའ༌ རང༌སེམས༌ ཅུན༌ཅེས༌སི༌ ནང༌ང༌ ཤེད༌མེད༌ ཡོད༌ པ༌སང༌, ཤེ༌ཏན༌ནི༌ སྡིག༌པའེ༌ ནང༌ང༌ གྱེལ༌ ཅུག༌སྲིད༌ཅེས༌ ཨིན༌ནོག༌།
1CO 7:6 ངའེ༌ ཏེ༌བོ༌ ཅོ༌ཅེས༌ལ༌ བཀའ༌ ཏངས༌ཏེ༌ ཟེར༌ར༌མེད༌, ཨིན༌ནའང༌ གོངས༌པ༌ ཏང༌ངད༌།
1CO 7:7 ང༌ ཙོགས༌ལ༌ ཚང༌མ༌ ན༌མ༌ མ༌ཅོའ༌ དུགས༌ཏེ༌ ཡོད༌ཅེས༌པོ༌, ངའེ༌ དོད༌པ༌ ཅོའད༌། ཨིན༌ནའང༌ དཀོན༌མཆོག༌གི༌ ཆོགས༌ནེ༌ མི༌ རེ༌རེའ༌ མིག༌སལ༌ལི༌ ཁྱུད༌རིག༌ སལ༌ཏེ༌ ཡོད༌ཏེ༌ ཨིན༌ནོག༌, མི༌ ཅིག༌ག༌ ཁྱུད༌དི༌ རིག༌ ཅིག༌ ཡང༌ མི༌ཞིག༌ག༌ ཡང༌ ཁྱུད༌དི༌ རིག༌ཞིག༌།
1CO 7:8 ཏ༌ ངའེ༌ ན༌མ༌ མ༌ཅོ༌ཁན༌ དང༌ ཨ༌ནེ༌མ༌རང༌མོ༌ ཡ༌ ན༌མ༌ ཀྲོང༌ཁན༌ནི༌ མག༌པ༌ གུན༌ལ༌ ཟེར༌རད༌། ན༌མ༌ མ༌ཅོའ༌ དུག༌ན༌, གྱལ༌ལ༌ ཨིན༌ནོག༌ ཀ༌ཟུག༌གི༌ ངའ༌ དུགས༌ཏེ༌ ཡོད༌།
1CO 7:9 ཨིན༌ནའང༌ ཀལ༌ཏེས༌ ཁོང༌གུན༌ནི༌ རང༌དང༌རང༌ང༌ ཅུན༌ མ༌ཐུབ༌ན༌, ན༌མ༌ ཅོ༌གོ༌ཤེས༌ ཨིན༌ནོག༌། ལུས༌བྲེལ༌ ཅོ༌ཅེས༌སི༌ དོད༌པའེ༌ ནང༌ང༌ མེ༌ བར༌རི༌ སང༌ ན༌མ༌ ཅོ༌ན༌ གྱལ༌།
1CO 7:10 ཏ༌ ན༌མ༌ ཅོ༌ཁན༌གུན༌ལ༌ ངའེ༌ བཀའ༌ ཏང༌ངད༌, ཀ༌བོ༌ ང༌རང༌ངི༌ མན༌པ༌ གཙོ༌བོ༌ ཡེ༌ཤུའི༌ ཆོགས༌ནེ༌ ཨིན༌། ན༌མའེ༌ རང༌ངི༌ མག༌པ༌ ཕང༌ མ༌གོས༌།
1CO 7:11 ཨིན༌ནའང༌ ཀལ༌ཏེས༌ ཁོའེ༌ ཁོ༌རང༌ངི༌ མག༌པ༌ ཕང༌ན༌, ཏེ༌ བུ༌མོ༌བོ༌ ཅིག༌པོ༌ དུག༌གོས༌ ཡ༌ ཁོ༌རང༌ངི༌ མག༌པ༌ ཉམ༌པོ༌ ཡང༌སྐྱར༌ ཛོམ༌གོས༌། ཏེན༌ན༌ ཙོགས༌ལ༌ མག༌པའེ༌ ཁོ༌རང༌ངི༌ ན༌མ༌ ཅད༌ མ༌གོས༌།
1CO 7:12 ཏ༌ ཞན༌ ང༌ གཙོ༌བོའེ༌ ཆོགས༌ནེ༌ ཁ༌དྲང༌ང༌ བཀའ༌ཞིག༌ མེད༌ནའང༌, ངའེ༌ འི༌བོ༌ ཁྱོ༌ཞའ༌ ལུས༌ཏེ༌ ཡོད༌ཁན༌གུན༌ལ༌ ཟེར༌རད༌, ཀལ༌ཏེས༌ མ༌ཤི༌ཀ༌པ༌ བུ༌ཚ༌ཞིག༌ག༌ ཏད༌པ༌ མེད༌ཁན༌ནི༌ ན༌མ༌ཞིག༌ ཡོད༌ན༌ ཡང༌ ཏེ༌ བུ༌མོ༌བོ༌ ཁོ༌ ཉམ༌པོ༌ དུག༌ཅེས༌ལ༌ ཐད༌དད༌ན༌, ཏེ༌ བུ༌ཚའེ༌ ཁོ༌ ཅད༌ མ༌གོས༌།
1CO 7:13 ཡང༌ ཀལ༌ཏེས༌ མ༌ཤི༌ཀ༌པ༌ བུ༌མོ༌ཞིག༌ག༌ ཏད༌པ༌ མེད༌ཁན༌ནི༌ མག༌པ༌ཞིག༌ ཡོད༌ན༌, ཡང༌ ཁོ༌ ཏེ༌ བུ༌མོ༌ ཉམ༌པོ༌ དུག༌ཅེས༌ལ༌ ཐད༌དད༌ན༌, ཏེ༌ བུ༌མོ༌བོའེ༌ ཁོ༌ ཕང༌ མ༌གོས༌།
1CO 7:14 ཏེ༌ མ༌ཤི༌ཀ༌པའེ༌ ན༌མའེ༌, ཁོ༌རང༌ངི༌ ཏད༌པ༌ མེད༌ཁན༌ནི༌ མག༌པ༌བོ༌ རྩང༌མ༌ ཅོའ༌ནོག༌། ཡང༌ ཏེ༌ མ༌ཤི༌ཀ༌པའེ༌ མག༌པའེ༌, ཁོ༌རང༌ངི༌ ཏད༌པ༌ མེད༌ཁན༌ནི༌ ན༌མ༌བོ༌ རྩང༌མ༌ ཅོའ༌ནོག༌། ཀལ༌ཏེས༌ ཏེ༌ཟུག༌ མན༌པིན༌ན༌ དཀོན༌མཆོག༌གི༌ སྐུན༌དུན༌ལ༌ ཁོང༌ངི༌ ཕྲུ༌གུ༌གུན༌ ཏམ༌པ༌ཞིག༌ མེད༌གྲོ༌། ཨིན༌ནའང༌ ཁོང༌གུན༌ དཀོན༌མཆོག༌གི༌ སྐུན༌དུན༌ལ༌ ཏམ༌པ༌ རིག༌ ཨིན༌ནོག༌།
1CO 7:15 ཀལ༌ཏེས༌ ཏད༌པ༌ མེད༌ཁན༌ནི༌ མག༌པ༌ ཡ༌ ན༌མ༌ གུན༌ རང༌ངི༌ ཞིད༌མད༌ ཉམ༌པོ༌ དུག༌ག༌ལ༌ ཐད༌ད༌ མེད༌ན༌, ཏེ༌ནེ༌ ཆ༌ཅུག༌ཤིག༌། ཏེ༌ཙོགས༌སི༌ ནས༌ལུག༌གི༌ ནང༌ང༌ མ༌ཤི༌ཀ༌པ༌ མག༌པ༌ ཡ༌ ན༌མ༌ གུན༌ནི༌ ཉམ༌པོ༌ དུག༌ཅེས༌སི༌ ཕིའ༌, ནའ༌ ཁུར༌ཁན༌གུན༌ལ༌ སྟེན༌ཏེ༌ དུག༌གོས༌ མེད༌པ༌ ཨིན༌ནོག༌། དཀོན༌མཆོག༌གི༌ ཁྱོ༌ཞ༌གུན༌ ཞི༌དེའེ༌ ནང༌ང༌ དུག༌ཅེས༌སི༌ ཕིའ༌, བོད༌ད༌ ཛད༌ཏེ༌ ཨིན༌ནོག༌།
1CO 7:16 ན༌མ༌གུན༌, ཁྱོ༌ཞའེ༌ ཞས༌ཏེ༌ ཁྱོ༌ཞའེ༌ མག༌པ༌གུན༌ ཏད༌པའེ༌ ནང༌ང༌ ཡོང༌སྲིད༌ཅེས༌པོ༌ གྱུས༌ཆའ༌ མེ༌རག༌ག༌? ཡང༌ མག༌པ༌གུན༌ ཁྱོ༌ཞའེ༌ ཞས༌ཏེ༌, ཁྱོ༌ཞའེ༌ ན༌མ༌གུན༌ ཏད༌པའེ༌ ནང༌ང༌ ཡོང༌སྲིད༌ཅེས༌པོ༌ གྱུས༌ཆའ༌ མེ༌རག༌ག༌?
1CO 7:17 གཙོ༌བོའེ༌ ཁྱོ༌ཞ༌གུན༌ ཀ༌ཟུག༌ ནས༌ལུག༌ ཤིག༌གི༌ ནང༌ང༌ བོར༌ར༌ ཛད༌ཏེ༌ ཡོད༌ནའང༌, ཁྱོ༌ཞའ༌ རེ༌རེ༌ ཏེ༌ནང༌ང༌ དུག༌གོ༌ཤེས༌ ཨིན༌ནོག༌། ཡང༌ ཀ༌ཟུག༌ ནས༌ལུག༌གི༌ ནང༌ང༌ ཁྱོ༌ཞའ༌, དཀོན༌མཆོག༌གི༌ གོ༌མ༌རང༌ ཏད༌པའེ༌ ནང༌ང༌ བོད༌ད༌ ཛད༌ ཟ༌ནེ༌ ཡོད༌པིན༌, ཏེན༌ན༌ ནས༌ལུག༌ ཙོགས༌སི༌ ནང༌ང༌ དུག༌གོས༌། འི༌བོ༌ ཆོས༌ཚོགས༌ ཚང༌མའེ༌ ཕིའ༌ ངའེ༌ ཁྲིམས༌པོ༌ ཨིན༌།
1CO 7:18 སྤེར༌ན༌ ཡ༌ཧུ༌དཱ༌པ༌ཞིག༌གི༌ ཏད༌པ༌ཅན༌ གྱུར༌རི༌ སང༌ སྔུན༌ལ༌, ཁོ༌རང༌ང༌ སུན༌ནད༌ ཅོས༌ཏེ༌ ཡོད༌ན༌, ཏེ༌བོ༌ གྱུར༌ཅེས༌སི༌ རྩོན༌གྲུས༌ མ༌ཅོ༌ཤིག༌། ཡང༌ སུན༌ནད༌ མ༌ཅོ༌ཁན༌ནི༌ མི༌ཞིག༌ ཏད༌པ༌ཅན༌ གྱུར༌ན༌, ཁོའེ༌ ཁོ༌རང༌ང༌ སུན༌ནད༌ ཅོ༌གོས༌ མེད༌པ༌ ཨིན༌ནོག༌།
1CO 7:19 ཅིའ༌ཟེར༌ན༌ དཀོན༌མཆོག༌གི༌ སྐུན༌དུན༌ལ༌ སུན༌ནད༌ ཅོ༌ཁན༌ ཡ༌ མ༌ཅོ༌ཁན༌བོའེ༌ ནང༌ང༌ ཅའང༌ ཁྱད༌ མེད༌ཏེ༌ ཨིན༌ནོག༌། ཁག༌ཅན༌བོ༌ ནི༌ དཀོན༌མཆོག༌གི༌ བཀའ༌རྒྱ༌གུན༌ སྲུང༌ཅེས༌པོ༌ ཨིན༌ནོག༌།
1CO 7:20 འོ༌ན༌ དཀོན༌མཆོག༌གི༌ ཁྱོ༌ཞ༌གུན༌ལ༌ བོད༌ད༌ ཛད༌ ཟ༌ནེ༌ ཡོད༌ཁན༌ནི༌ ནས༌ལུག༌པོའེ༌ ནང༌ང༌ ཁྱོ༌ཞའ༌ རེ༌རེ༌ དུག༌གོ༌ཤེས༌ ཨིན༌ནོག༌།
1CO 7:21 དཀོན༌མཆོག༌གི༌ བོད༌ད༌ ཛད༌ ཟ༌ནེ༌, ཁྱོ༌ཞ༌ ཚེ༌ཡོག༌ ཨིན༌པིན༌ན༌? ཀལ༌ཏེས༌ ཨིན༌ན༌ ཚེར༌ཁ༌ མ༌ཅོ༌ཤིག༌, ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ལ༌ ཚེ༌ཡོག༌ནེ༌ ཐར༌ཅེས༌སི༌ སྐབས༌ ཐོབ༌ན༌, ཏེ༌ སྐབས༌པོ༌ ལེན༌ཤིག༌།
1CO 7:22 ཡང༌ ཀལ༌ཏེས༌ ཁྱོ༌ཞའ༌ གཙོ༌བོའེ༌ བོད༌ད༌ ཛད༌ ཟ༌ནེ༌ ཚེ༌ཡོག༌ ཨིན༌ན༌, ཏ༌ ཁྱོ༌ཞ༌གུན༌ གཙོ༌བོའེ༌ ནང༌ང༌ སྡིག༌པའེ༌ ཚེ༌ཡོག༌ནེ༌ ཐར༌ཏེ༌ ཨིན༌ནོག༌། ཡང༌ ཀལ༌ཏེས༌ ཁྱོ༌ཞ༌གུན༌ གཙོ༌བོའེ༌ བོད༌ད༌ ཛད༌ ཟ༌ནེ༌ ཚེ༌ཡོག༌ མན༌པིན༌ན༌ ཏ༌ ཁྱོ༌ཞ༌གུན༌ མ༌ཤི༌ཀའེ༌ ཚེ༌ཡོག༌ གྱུར༌ཏེ༌ ཨིན༌ནོག༌།
1CO 7:23 དཀོན༌མཆོག༌གི༌ རིན༌ ཆེན༌མོ༌ཞིག༌ ཤལ༌ལ༌ ཛད༌ཏེ༌ ཉོའ༌ ཛད༌པ༌, ཁྱོ༌ཞའ༌ ཟུས༌མའེ༌ ལོབ༌བོན༌གུན༌ནི༌ ཚེ༌ཡོག༌ གྱུར༌ མ༌ཅུག༌ཤིག༌།
1CO 7:24 སྤུན༌གུན༌ ཁྱོ༌ཞའ༌ རེ༌རེ༌ ཏེན༌ན༌ ཙོགས༌ ལུས༌གོས༌ ནམ༌ ཁྱོ༌ཞ༌གུན༌ དཀོན༌མཆོག༌གི༌ བོད༌ད༌ ཛད༌ ཟ༌ནེ༌ ཡོད༌པིན༌།
1CO 7:25 ཏ༌ ཁྱོ༌ཞའེ༌ ན༌མ༌ མ༌ཅོ༌ཁན༌གུན༌ནི༌ སྐོར༌ལ༌ ཏྲི༌ཝ༌ ཏྲི༌ཁན༌བོའ༌, ཏེ༌གུན༌ལ༌ ཏང༌ཅེས༌ལ༌ གཙོ༌བོའེ༌ ངའ༌ བཀའ༌ཞིག༌ སལ༌ལ༌ མ༌ཛདས༌, ཨིན༌ནའང༌ གཙོ༌བོའེ༌ ཁོང༌རང༌ངི༌ སྙིང༌རྗེའེ༌ ནང༌ང༌ ཨིད༌ཤེས༌ ཅོ༌ཉན༌ཅེས༌སི༌ ངའ༌ ཤེས༌རབས༌ སལ༌ལ༌ ཛདས༌, ཡང༌ ངའེ༌ ཏེ༌བོ༌ ཁྱོ༌ཞ༌གུན༌ ཉམ༌པོ༌ བགོའད༌།
1CO 7:26 དག༌ས༌ ང༌དང༌གུན༌ ཏུས༌ སྐྱོ༌མོའེ༌ ནང༌ང༌ ཡོད༌ཅེས༌པོའེ༌, ངའེ༌ སམ༌མ༌རག༌ ཁྱོ༌ཞ༌གུན༌ ཀ༌ཟུག༌ ནས༌ལུག༌ཤིག༌གི༌ ནང༌ང༌ ཡོད༌ནའང༌, ཏེན༌ནེ༌ ནང༌ང༌ དུག༌གོ༌ཤེས༌ ཨིན༌ནོག༌།
1CO 7:27 ཀལ༌ཏེས༌ ཁྱོ༌ཞ༌གུན༌ལ༌ ན༌མ༌ ཡོད༌ན༌, ན༌མ༌ ཅད༌ཅེས༌ ཡང༌ ཀལ༌ཏེས༌ ན༌མ༌ མེད༌ན༌, ན༌མ༌ ཅོ༌ཅེས༌སི༌ རྩོན༌གྲུས༌ མ༌ཅོ༌ཤིག༌།
1CO 7:28 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ན༌མ༌ ཅོ༌ན༌, ཏེ༌བོ༌ སྡིག༌པ༌ཞིག༌ མ༌ནོག༌། ཡང༌ ཀལ༌ཏེས༌ བུ༌མོ༌ ན༌ཆུང༌ཞིག༌གི༌ ན༌མ༌ ཅོ༌ན༌, ཏེ༌བོའང༌ སྡིག༌པ༌ཞིག༌ མ༌ནོག༌། ཅི༌ཨིན༌ནའང༌ འི༌ སྐྱོ༌མོའི༌ ཏུས༌ལ༌, ན༌མ༌ ཅོ༌ཁན༌གུན༌ལ༌ མང༌ང༌ ནགས༌ ཐོང༌ཨིན༌, ཡང༌ ངའེ༌ ཁྱོ༌ཞ༌གུན༌ འི༌ ནགས༌གུན༌ནེ༌ ཐར༌ཅུག༌ཅེས༌སི༌ རྩོན༌གྲུས༌ ཅོའད༌།
1CO 7:29 ངའེ༌ སྤུན༌གུན༌ ངའེ༌ ཟེར༌ཅེས༌སི༌ ཏོན༌བོ༌ ནི༌, མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཏུས༌པོ༌ ཉུ༌ངུན༌ཞིག༌ མ༌ནེ༌ ལུས༌ཏེ༌ མེད༌ པ༌སང༌, དག༌ས༌ནེ༌ ཕར༌ལ༌ ན༌མ༌ ཅོ༌ཁན༌གུན༌ནི༌ དཀོན༌མཆོག༌གི༌ ཞབས༌ཏོག༌གི༌ ནང༌ང༌ ན༌མ༌ ཅོའེ༌ སང༌ སྔུན༌ལ༌ ཏང༌ཁན༌ནི༌ ཏེན༌ན༌ ཏུས༌པོ༌ དག༌སའང༌ ཏང༌གོས༌།
1CO 7:30 སྐྱོ༌མོ༌ ཡོད༌ཁན༌ ཡ༌ སྐྱིད༌པོ༌ ཡོད༌ཁན༌ ཡ༌ ཉོབ༌ཚོང༌ ཏང༌ཨིན༌ དུག༌ཁན༌ ཡ༌ ནོར༌ མང༌པོ༌ ཡོད༌ཁན༌ གུན༌ནི༌ ཏེ༌གུན༌ནི༌ སྐོར༌ལ༌ ཏུས༌གྱུན༌ སམ༌ཨིན༌ མ༌དུག༌ཤིག༌, ཅིའ༌ཟེར༌ན༌ འི༌ ཇིག༌རྟེན༌ནི༌ ནང༌ང༌ ཡོད༌ཁན༌ ཚང༌མ༌ གྱོགས༌པ༌ མེད༌ཁན༌ ཆ༌ཅེས༌ ཨིན༌ནོག༌།
1CO 7:32 ཁྱོ༌ཞ༌གུན༌ ཏེ༌ མི༌ཚེའེ༌ ཚེར༌ཁ༌གུན༌ནེ༌ ཐར༌གོ༌ཤེས༌པོ༌ ངའེ༌ དོད༌པ༌ ཨིན༌། སྤེར༌ན༌, ན༌མ༌ མ༌ཅོ༌ཁན༌ནི༌ བུ༌ཚ༌ཞིག༌གི༌ ཁོ༌རང༌ངི༌ ཏུས༌པོ༌ གཙོ༌བོའ༌ ཞབས༌ཏོག༌ ཞུ༌ཅེས༌སི༌ ནང༌ང༌ ཕུད༌ཉན༌ན༌ནོག༌ ཡང༌ ཁོང༌ ཐུག༌ཉེས༌ཤུག༌ཅེས༌སི༌ སྐོར༌ལ༌ སམ༌བ༌ ཏང༌ང༌ནོག༌།
1CO 7:33 ཨིན༌ནའང༌ ན༌མ༌ ཅོ༌ཁན༌ནི༌ བུ༌ཚའེ༌ ཁོ༌རང༌ངི༌ ཇིག༌རྟེན༌ནི༌ ཁག༌ དང༌ རང༌ངི༌ ན༌མ༌ ཐད༌ཅུག༌ཅེས༌སི༌ སྐོར༌ལ༌ སམ༌མ༌ནོག༌,
1CO 7:34 ཡང༌ ཁོའེ༌ སེམས༌པོ༌ ཁག༌ཉིས༌སི༌ ནང༌ང༌ བགོ༌གོས༌ས༌ནོག༌། ཏེན༌ན༌ ཙོགས༌ལ༌ མག༌པ༌ ཤི༌ཁན༌ ཡ༌ ན༌མ༌ མ༌ནེ༌ མ༌ཅོའ༌ དུག༌ཁན༌ནི༌ བུ༌མོ༌ གུན༌ནི༌, ཟུགས༌པོ༌ དང༌ སེམས༌ཉིད༌ ཉིས༌ཀོ༌ ཉམ༌པོ༌ ཏུས༌ གང༌པོ༌ གཙོ༌བོའ༌ ཞབས༌ཏོག༌ ཞུ༌ཉན༌ན༌ནོག༌། ཨིན༌ནའང༌ ན༌མ༌ ཅོ༌ཁན༌ནི༌ བུ༌མོ༌ཞིག༌གི༌ ཁོ༌རང༌ངི༌ ཇིག༌རྟེན༌ནི༌ ཁག༌གུན༌ དང༌ ཁོ༌རང༌ངི༌ མག༌པ༌ ཐད༌ཅུག༌ཅེས༌སི༌ སྐོར༌ལ༌ སམ༌མ༌ནོག༌།
1CO 7:35 ངའེ༌ འི༌བོ༌ སྒག༌སྐྱིལ༌ ཏང༌ཅེས༌སི༌ ཕིའ༌ མན༌པ༌, ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌, ཟེར༌རད༌། ངའེ༌ དོད༌པ༌བོ༌ ནི༌, ཅི༌ས༌ཐོག༌ནེ༌ ཁྱོ༌ཞ༌གུན༌ནི༌ སེམས༌པོ༌ ཡན༌ མ༌ཡན༌ན༌ གཙོ༌བོའ༌ ཞབས༌ཏོག༌ གྱལ༌ལ༌ ཅོས༌ཏེ༌ ཞུ༌ཅུག༌ཅེས༌པོ༌ ཨིན༌།
1CO 7:36 ཨིན༌ནའང༌ ཀལ༌ཏེས༌ བུ༌ཚ༌ཞིག༌གི༌ ཁོ༌རང༌ངི༌ ན༌མ༌ ཅོ༌ཅེས༌ཅན༌བོ༌ ཉམ༌པོ༌ མི༌འོས༌པ༌ ཅོས༌ཏེ༌ ཨིན༌ནོག༌ སམ༌ཅེས༌, མ༌ཚད༌ ཁོའ༌ ལུས༌བྲེལ༌ལི༌ དོད༌པ༌ སྲན༌ཏྲེ༌ ཡོད༌ན༌, ཏེ༌ བུ༌ཚའེ༌ ཁོ༌རང༌ངི༌ དོད༌པ༌ ནང༌ཞིན༌ ཏེ༌ བུ༌མོ༌ ཉམ༌པོ༌ ན༌མ༌ ཅོ༌གོས༌། ཁོའེ༌ སྡིག༌པ༌ ཅོས༌ཏེ༌ མ༌ནོག༌།
1CO 7:37 ཨིན༌ནའང༌ ཞན༌མའེ༌ ཝང༌ ཏངས༌ཏེ༌ མན༌པ༌ ཀལ༌ཏེས༌ ཁོའེ༌ ཁོ༌རང༌ངི༌ དོད༌པ༌བོ༌ ཅུན༌ཉན༌ཏེ༌ ཏེ༌ བུ༌མོ༌ ཉམ༌པོ༌ ན༌མ༌ མི༌ཅོ༌ཅེས༌ ཏན༌ཏན༌ ཐག༌ཅད༌ན༌, གྱལ༌ལ༌ ཨིན༌ནོག༌།
1CO 7:38 ཏེ༌ནེ༌ ན༌མ༌ ཅོ༌ཁན༌བོའེ༌ གྱལ༌ལ༌ ཅོས༌ཏེ༌ ཨིན༌ནོག༌, ཡང༌ ན༌མ༌ མ༌ཅོ༌ཁན༌བོའེ༌ ཏེ༌སང༌ གྱལ༌ལ༌ ཅོས༌ཏེ༌ ཨིན༌ནོག༌།
1CO 7:39 མག༌པ༌ སོན༌ཏེའ༌ ཡོད༌ཏུས༌ ན༌མ༌ ཁོ༌རང༌ངི༌ མག༌པ༌ ཉམ༌པོ༌ དུག༌གོས༌། ཀལ༌ཏེས༌ ཁོའེ༌ མག༌པ༌ ཀྲོངས༌ན༌, ཏེ༌ བུ༌མོ༌བོའེ༌ ཁོ༌རང༌ ཐད༌ཁན༌ནི༌ བུ༌ཚ༌ ཉམ༌པོ༌ ན༌མ༌ ཅོ༌ནའང༌, གྲིགས༌ཏེ༌ ཨིན༌ནོག༌, ཨིན༌ནའང༌ ཏེ༌ བུ༌ཚ༌བོ༌ གཙོ༌བོའེ༌ཀ༌ ཏད༌པ༌ ཅོ༌ཁན༌ཞིག༌ ཡོང༌གོས༌།
1CO 7:40 ངའེ༌ སམ༌བའེ༌ ནང༌ང༌, ཏེ༌ བུ༌མོ༌བོའ༌ ཅིག༌པོ༌ དུག༌ན༌ མང༌ང༌ ཅིན༌ལབས༌ ཐོབ༌ཨིན༌། ཡང༌ ངའེ༌ སམ༌མ༌རག༌, ངེའང༌ དཀོན༌མཆོག༌གི༌ ཐུག༌ཉིད༌དི༌ གྱུད༌ཏེ༌ ཁ༌དའ༌ ཏངས༌ཏེ༌ ཨིན༌།
1CO 8:1 ཏ༌ ཁྱོ༌ཞའེ༌ སྐུན༌དྲ༌གུན༌ལ༌ ཕུལ༌ཁན༌ནི༌ ཁར༌ཇིའི༌ སྐོར༌ལ༌ ཏྲི༌ཝ༌ ཏྲི༌ཁན༌བོའ༌, འོ༌ན༌ “ང༌དང༌ ཚང༌མ༌ལ༌ ཏེ༌བོའེ༌ སྐོར༌ལ༌ ཡོན༌ཏན༌ ཡོད༌ཏེ༌ ཨིན༌ནོག༌།” ཡོན༌ཏན༌ནི༌ ང༌དང༌གུན༌ལ༌ ཕོ༌སོ༌ ཚོར༌ ཅུག༌ག༌ནོག༌, ཨིན༌ནའང༌ ཆོས༌ཚོགས༌ ཤེད༌ཅན༌ ཆ༌ཅུག༌ཁན༌ ནི༌ ཅེས༌པ༌བོ༌ ཨིན༌ནོག༌།
1CO 8:2 “ང༌ ཅི༌ཚང༌མ༌ ཤེས༌སད༌” ཟེར༌ཁན༌གུན༌ལ༌ ངོས༌པོའ༌ ཏ༌རུང༌ མ༌མང༌པོ༌ ཤེས༌གོ༌ཤེས༌ ཡོད༌ཏེ༌ ཨིན༌ནོག༌།
1CO 8:3 ཨིན༌ནའང༌ དཀོན༌མཆོག༌ག༌ ཅེས༌པ༌ ཅོ༌ཁན༌གུན༌ ཉམ༌པོ༌ ཁོང༌ངི༌ བྲེལ༌ བོར༌ར༌ ཛད༌ཏེ༌ ཁྱེན༌ན༌ ཛད༌ད༌ནོག༌།
1CO 8:4 ཏ༌ སྐུན༌དྲ༌ ཆོད༌པ༌ ཕུལ༌ཁན༌ནི༌ ཁར༌ཇི༌ ཟའ༌ཅེས༌སི༌ སྐོར༌ལ༌ ཟེར༌ན༌, སྐུན༌དྲ༌གུན༌ ཅའང༌ མན༌ཁན༌ ཡང༌ དཀོན༌མཆོག༌ ཅིག༌ཅིག༌ ཞུགས༌ཏེ༌ ཡོད༌ཁན༌བོ༌ ང༌དང༌ ཚང༌མ༌ལ༌ གྱུས༌ཨིན༌ནོག༌།
1CO 8:5 ནམ༌ཁའ༌ ཡ༌ ཇིག༌རྟེན༌ནི༌ ནང༌ང༌ མང༌པོ༌ཞིག༌ག༌ ལྷ༌ དང༌ ལྷ༌མོ༌ ཟེར༌ར༌ནོག༌, ༼ཏན༌ཏན༌ལ༌ མི༌ མང༌པོའེ༌ ལྷ༌ལྷ༌མོ༌ དང༌ གཙོ༌བོ༌ མང༌པོ༌ཞིག༌ག༌ ཅོལ༌ལ༌ནོག༌།༽
1CO 8:6 ཨིན༌ནའང༌ ཅི༌ཚང༌མ༌ ཞང༌ང༌ ཛད༌ཁན༌ནི༌ ཡབ༌ དཀོན༌མཆོག༌ ཅིག༌ཙ༌ ཨིན༌ནོག༌ ཡང༌ ང༌དང༌གུན༌ནི༌ ཁོང༌ངི༌ ཕིའ༌ མི༌ཚེ༌ ཕུད༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌། ཡང༌ ཡེ༌ཤུ༌ མ༌ཤི༌ཀ༌ གཙོ༌བོ༌ ཅིག༌, ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཅོའ༌ ཛད༌ཁན༌ དང༌ ང༌དང༌གུན༌ལ༌ མི༌ཚེ༌ སལ༌ལ༌ ཛད༌ཁན༌བོའང༌ གྱུས༌ཨིན༌ནོག༌།
1CO 8:7 ཅི༌ཨིན༌ནའང༌ ཏད༌པ༌ཅན༌ ཁ༌ཅིག༌ག༌ ཏེ༌ ཚང༌མ༌ གྱུས༌ མེད༌པ༌ ཨིན༌ནོག༌། ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཏ༌རུང༌ངའང༌ སྐུན༌དྲ༌གུན༌ སོན༌ཏེའ༌ ཨིན༌ནོག༌ སམ༌དུག༌། ཏེན༌ན༌བོའེ༌ཕིའ༌ ཁོང༌གུན༌ནི༌ སེམས༌སི༌ ནང༌ང༌ སྐུན༌དྲ༌གུན༌ལ༌ ཕུལ༌ཁན༌ནི༌ ཟན༌ ཟའ༌ན༌, སྡིག༌པ༌ ཅོས༌ཏེ༌ ཨིན༌ སམ༌མ༌ནོག༌།
1CO 8:8 ཟན༌ནི༌ ང༌དང༌གུན༌ དཀོན༌མཆོག༌ ཉམ༌པོ༌ ཉེ༌མོ༌ གྱུར༌ ཅུག༌ག༌ མ༌ནོག༌། ང༌དང༌གུན༌ནི༌ ཟའ༌ནའང༌ ཡ༌ མ༌ཟན༌ནའང༌, དཀོན༌མཆོག༌གི༌ སྐུན༌དུན༌ལ༌ ཅའང༌ སྟོར༌ཅེས༌ ཡ༌ ཐོབ༌ཅེས༌ མེད༌ཀྱག༌།
1CO 8:9 ཨིན༌ནའང༌ ཁྱོ༌ཞ༌གུན༌ལ༌ ཏེ༌བོའེ༌ ནང༌ང༌ རང༌ཝང༌ ཡོད༌ཅེས༌པོའེ༌, ཁྱོ༌ཞ༌གུན༌ནི༌ ཏད༌པའེ༌ ནང༌ང༌ འུ༌ཐུགས༌ཅན༌ནི༌ སྤུན༌ཞིག༌ སྡིག༌པའེ༌ ནང༌ང༌ གྱེལ༌ མི༌ཅུག༌ཅེས༌ལ༌ ཤང༌ ཅོ༌ཤིག༌།
1CO 8:10 སྤེར༌ན༌ ཀལ༌ཏེས༌ ཁྱོ༌རང༌ ཡོན༌ཏན༌ཅན༌བོའེ༌ ཏེ༌ སྐུན༌དྲའེ༌ ཆོད༌ཁང༌ངི༌ ནང༌ནེ༌ ཟན༌ ཟའ༌ ཐོངས༌ཏེ༌, ཏད༌པ༌ འུ༌ཐུགས༌ཅན༌ནི༌ སྐུན༌དྲ༌ ཕུལ༌ཁན༌ནི༌ ཏེ༌ ཟན༌ ཟའ༌ཅེས༌ལ༌ ཧམ༌པ༌ སྐྱེ༌ཏེ༌ ཁོ༌རང༌ངི༌ སམ༌ཁན༌བོའེ༌ གྱབ༌གལ༌ ཅོས༌ཏེ༌ མ༌ནོག༌ག༌?
1CO 8:11 ཏེ༌ནེ༌ ཁྱོ༌ཞ༌གུན༌ནི༌ ལག༌ག༌ ཡོད༌ཁན༌ནི༌ ཡོན༌ཏན༌བོའེ༌, ཏེ༌ ཏད༌པ༌ འུ༌ཐུགས༌ཅན༌ སྤུན༌ནི༌ ཏད༌པ༌བོ༌ མེད༌ཁན༌ ཅོའ༌ནོག༌, ཀ༌བོའེ༌ ཕིའ༌ མ༌ཤི༌ཀ༌ ཀྲོངས༌ས༌ ཛདས༌།
1CO 8:12 ཏེ༌ཟུག༌ ཅོ༌ན༌, ཁྱོ༌ཞའེ༌ སྡིག༌པ༌ ཅོས༌ཏེ༌ ཨིན༌ནོག༌ སམ༌ཁན༌ནི༌ སྤུན༌བོའ༌ ཏེ༌བོ༌ ཅོ༌ཅེས༌ལ༌ སྤོས༌པ༌ ཏངས༌ཏེ༌, ཁྱོ༌ཞའེ༌ མ༌ཤི༌ཀའེ༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌།
1CO 8:13 ཏེ༌བོའེ༌ཕིའ༌ ཀལ༌ཏེས༌ ཤ༌ ཟའ༌ཅེས༌པོའེ༌, ངའེ༌ ང༌རང༌ངི༌ སྤུན༌ཞིག༌ག༌ སྡིག༌པ༌ ཅོ༌ཅུག༌གད༌ན༌, ཏེ༌ནེ༌ ངའེ༌ ཤི༌ཤི༌ ཚོག༌པ༌ལ༌ ཤ༌ མ༌ནེ༌ མི༌ཟ༌, ཅིའ༌ཟེར༌ན༌ ངའེ༌ ང༌རང༌ངི༌ སྤུན༌ཞིག༌ག༌ སྒག༌གྱབ༌ཅུག༌ཉིན༌ མེ༌རག༌།
1CO 9:1 ཅི༌ ངའང༌ ཞན༌གུན༌ ཙོགས༌ལ༌ རང༌ཝང༌ མེད༌ཀྱག༌ག༌? ཅི༌ ང༌ མ༌ཤི༌ཀའེ༌ སྐུ༌ཚབས༌ མ༌ནོག༌ག༌? ཅི༌ ངའེ༌ ང༌རང༌ངི༌ མིག༌ནེ༌ ཡེ༌ཤུ༌ ང༌དང༌གུན༌ནི༌ གཙོ༌བོ༌ མ༌ཇལ༌ཏོག༌ག༌? ཅི༌ ངའེ༌ མ༌ཤི༌ཀའེ༌ ཕིའ༌ ལས༌གུན༌ནི༌ ཞས༌ཏེ༌ ཁྱོ༌ཞ༌གུན༌ གཙོ༌བོའེ༌ གྱུར༌ཏེ༌ མན༌ན༌?
1CO 9:2 ཞན༌མ༌གུན༌ནི༌ ང༌ མ༌ཤི༌ཀའེ༌ སྐུ༌ཚབས༌ མ༌ནོག༌ སམ༌ནའང༌, ཏན༌ཏན༌ལ༌ ཁྱོ༌ཞ༌གུན༌ནི༌ ཕིའ༌ ང༌ ཨིན༌། ཁྱོ༌ཞའེ༌ མི༌ཚེ༌ ཕུད༌ཚུལ༌བོའེ༌ ང༌ གཙོ༌བོའེ༌ སྐུ༌ཚབས༌ ཨིན༌ཁན༌བོ༌ སྟན༌ན༌ནོག༌།
1CO 9:3 འི༌བོ༌ ངའེ༌ ཝང༌ཆའེ༌ སྐོར༌ལ༌ ཏྲི༌ཝ༌ ཏྲི༌ཁན༌གུན༌ནི༌ ཕིའ༌ ལན༌བོ༌ ཨིན༌།
1CO 9:4 ཅི༌ ང༌ཞ༌གུན༌ལ༌ ཁྱོ༌ཞའེ༌ ཟའ༌ཅེས༌ དང༌ ཐུང༌ཅེས༌ གུན༌ བགོས༌ཏེ༌ ཟའ༌ཅེས༌ དང༌ ཐུང༌ཅེས༌སི༌ ཐོབ༌ཏང༌ མེད༌པ༌ ཨིན༌ནོག༌ག༌?
1CO 9:5 ཞན༌ཡང༌ སྐུ༌ཚབས༌, གཙོ༌བོའེ༌ ནོ༌གུན༌ དང༌ པི༌ཏྲར༌རི༌ ཅོ༌ཁན༌ ཙོགས༌ལ༌, ང༌ཞ༌གུན༌ལ༌ ང༌ཞ༌རང༌ངི༌ ཏད༌པ༌ཅན༌ནི༌ ན༌མ༌གུན༌ ཉམ༌པོ༌ ཁྲིད༌ཏེ༌ ཁྱེར༌ཅེས༌སི༌ ཐོབ༌ཏང༌ མེད༌པ༌ ཨིན༌ནོག༌ག༌?
1CO 9:6 ཡ༌ རང༌ངི༌ སྒོས༌དོམ༌གུན༌ རིག༌ཅེས༌སི༌ ཕིའ༌ ལས༌ ཅོ༌གོས༌ཁན༌གུན༌ བཱར༌ན༌བས༌ དང༌ ང༌རང༌ ཅིག༌པོ༌ ཨིན༌ནོག༌ག༌?
1CO 9:7 ཅི༌ མག༌མི༌ཞིག༌ག༌ ཁོ༌རང༌ངི༌ བུད༌གོ༌གུན༌ ཤལ༌གོས༌ས༌ནོག༌ག༌? ཅི༌ རྒུན༌ཚས༌ ཏབ༌ཁན༌ཞིག༌ག༌ ཁོང༌རང༌ངི༌ བད༌ཁན༌ནི༌ ཁ༌ཟས༌ ཟའ༌ཅེས༌སི༌ ཐོབ༌ཏང༌ མེད༌པ༌ ཨིན༌ནོག༌ག༌? ཅི༌ ལུག༌ཁྱུའ༌, སྟ༌སྟོག༌ ཅོ༌ཁན༌ནི༌ མི༌བོའ༌ ཏེ༌གུན༌ནི༌ འོ༌མ༌ ཐུང༌ཆོག༌ག༌ མ༌ནོག༌ག༌?
1CO 9:8 ཅི༌ ངའེ༌ མིའི༌ སམ༌ཚུལ༌ལི༌ ནང༌ང༌ ཤད༌དུག༌ག༌? དཀོན༌མཆོག༌གི༌ ཁྲིམས༌སིའང༌ འིན༌ན༌ ཙོགས༌ མོལ༌ཏེ༌ མི༌རུག༌ག༌?
1CO 9:9 ལྟོས༌སའང༌ ལུང༌སྟོན༌པ༌ མོ༌ཟེས༌སི༌ ཁྲིམས༌སི༌ ནང༌ང༌ “ཁྱོ༌ཞ༌གུན༌ནི༌ ཁུ༌ཡུས༌ སྐོར༌ ཟ༌ནེ༌ ལང༌ཏོའེ༌ ཁའ༌ ལྡམས༌ཏེ༌ མ༌བོར༌ཤིག༌” མོལ༌ཏེ༌ ཡོད༌ཏེ༌ ཨིན༌ནོག༌། དཀོན༌མཆོག༌གི༌ ཏེ༌བོ༌ མོལ༌ ཟ༌ནེ༌, ཅི༌ ཁོང༌ངི༌ ལང༌ཏོ༌ ཅིག༌པོའེ༌ སྐོར༌ལ༌ ཐུགས༌སམ༌ སལ༌ལ༌ ཛད༌ཏེ༌ ཨིན༌ནོག༌ག༌?
1CO 9:10 ཅི༌ ངོས༌པོའ༌, ཁོང༌ངི༌ ང༌དང༌གུན༌ནི༌ ཕན༌ཐོགས༌སི༌ ཕིའ༌ མོལ༌ཏེ༌ མ༌ནོག༌ག༌? འོ༌ན༌ ང༌དང༌གུན༌ནི༌ ཕན༌ཐོགས༌སི༌ ཕིའ༌, བྲིའ༌ ཛད༌ཏེ༌ ཨིན༌ནོག༌, ཅིའ༌ཟེར༌ན༌ སྟོན༌ཐོག༌གི༌ ཀ༌ནེ༌ བགོས༌ཏེ༌ ཐོབ༌ཅེས༌སི༌ རེ༌ཝའེ༌ ནང༌ང༌, རྔ༌ཁན༌ དང༌ ཁུ༌ཡུས༌ སྐོར༌ཁན༌ ཉིས༌ཀོའེ༌ ལས༌གུན༌ ཅོའ༌ནོག༌།
1CO 9:11 ཏ༌ ང༌ཞ༌གུན༌ནི༌ སེམས༌ཉིད༌དི༌ ས༌འོན༌, ཁྱོ༌ཞ༌གུན༌ནི༌ ནང༌ང༌ ཏབས༌ པ༌སང༌, ཅི༌ ཁྱོ༌ཞའེ༌ སྟོན༌ཐོག༌པོ༌ ང༌ཞའ༌ ཉམ༌པོ༌ བགོ༌ཅེས༌ལ༌ ཀགས༌པོ༌ ཆ༌རག༌ག༌?
1CO 9:12 ཀལ༌ཏེས༌ ཁྱོ༌ཞ༌གུན༌ནི༌ ཞན༌ཡང༌ ཆོས༌ཤད༌ཁན༌གུན༌ལ༌ རོགས༌ ཅོའད༌ན༌, ཅི༌ ཁྱོ༌ཞའེ༌ ང༌ཞ༌གུན༌ལ༌ ཏེ༌ མི༌གུན༌ནི༌ སང༌ མང༌ང༌ རོགས༌ ཅོ༌གོ༌ཤེས༌ མ༌ནོག༌ག༌? ཨིན༌ནའང༌ ང༌ཞ༌གུན༌ནི༌ འི༌ ཐོབ༌ཏང༌བོ༌ མ༌ནེ༌ མ༌ཀོལ༌པིན༌, ཅིའ༌ཟེར༌ན༌ མ༌ཤི༌ཀའེ༌ གའ༌མོའེ༌ ནས༌ཚུལ༌ལི༌ ནང༌ང༌ སྒག༌སྐྱིལ༌ ཁྱོང༌ངི༌ སང༌ ང༌ཞའ༌ ནགས༌བར༌དོ༌ ཁུར༌ཅེས༌ལ༌ ཐད༌པོ༌ ཨིན༌།
1CO 9:13 ཅི༌ ཆོད༌ཁང༌ངི༌ ནང༌ང༌ ལས༌ ཅོ༌ཁན༌གུན༌ལ༌ ཟན༌, ཆོད༌ཁང༌ངི༌ ནང༌ང༌ ཆོད༌པ༌ ཕུལ༌ཁན༌གུན༌ནི༌ ཀ༌ནེ༌ ཐོབ༌ཅེས༌པོ༌, ཁྱོ༌ཞ༌གུན༌ལ༌ ཧ༌གོ༌ ཐུབ༌བ༌ མེ༌རག༌ག༌? ཡང༌ ཆོད༌ཁྲི༌ཀ༌ ལས༌ ཅོ༌ཁན༌གུན༌ལ༌, སྲོག༌ཆོད༌ ཕུལ༌ཁན༌གུན༌ནི༌ ཀ༌ནེ༌ བགོས༌ཏེ༌ ཐོབ༌བ༌ མི༌རུག༌ག༌?
1CO 9:14 འིན༌ན༌ ཙོགས༌ལ༌ གཙོ༌བོའེ༌ བཀའ༌ སལ༌ལ༌ ཛད༌ཏེ༌ ཨིན༌ནོག༌, གའ༌མོའེ༌ ནས༌ཚུལ༌ ཤད༌ཁན༌གུན༌ལ༌ ཏེ༌ཀ༌ནེ༌ ཕན༌ཐོགས༌ ཐོབ༌ཁན༌གུན༌ནི༌ རོགས༌ ཅོ༌གོས༌།
1CO 9:15 ཏེ༌ནེའང༌ ངའེ༌ འི༌ ཐོབ༌ཏང༌ ཚང༌མའེ༌ ནང༌ནེ༌ ཅི༌གའང༌ མ༌ཀོལ༌པིན༌, ཡང༌ ངའེ༌ ཕིའ༌ ཁྱོ༌ཞ༌གུན༌ནི༌ འི༌ཙོགས༌སི༌ ལས༌གུན༌ ཅོ༌ཅེས༌སི༌ རེ༌ཝ༌ ཅོས༌ཏེ༌ བྲིའ༌མེད༌། ངའེ༌ ཁྱོ༌ཞ༌གུན༌ལ༌ རིན༌ མེད༌པ༌ ཆོས༌ཤད༌ཅེས༌པོའེ༌ཀ༌ ཕོ༌སོ༌ ཅོ༌ཉན༌ཅེས༌སི༌ ཐོབ༌ཏང༌བོ༌ མེད༌ཁན༌ ཆ༌ཅུག༌གི༌ སང༌ ང༌ ཤི༌ན༌ གྱལ༌།
1CO 9:16 ཅི༌ཨིན༌ནའང༌ གའ༌མོའེ༌ ནས༌ཚུལ༌ ཤད༌ཅེས༌པོའེ༌ཀ༌ ངའེ༌ ཕོ༌སོ༌ ཅོ༌ མི༌ཉན༌, ཅིའ༌ཟེར༌ན༌ ཏམ༌པའེ༌ ཐུག༌ཉིད༌དི༌ ངའ༌ འི༌ ལས༌པོ༌ ཅོ༌ཅུག༌དུག༌། ཀལ༌ཏེས༌ ངའེ༌ གའ༌མོའེ༌ ནས༌ཚུལ༌བོ༌ མ༌ཤད༌ན༌, ངའ༌ ཙམ༌ཤིག༌གི༌ ཇིགས༌པ༌ མ༌ནོག༌།
1CO 9:17 ཀལ༌ཏེས༌ ངའེ༌ ང༌རང༌ ཐད༌ཏེ༌ འི༌ ལས༌པོ༌ ཅོ༌ན༌, ངའ༌ སོལ༌རས༌ ཐོབ༌ཨིན༌། ཨིན༌ནའང༌ ངའེ༌ ལག༌ནེ༌ མེད༌, དཀོན༌མཆོག༌གི༌ ང༌ འི༌ ཁག༌པོ༌ ཀལ༌ལ༌ ཛད༌ཏེ༌ ཨིན༌ནོག༌།
1CO 9:18 ཏེ༌ནེ༌ ང༌ ཀ༌ཟུག༌ སོལ༌རས༌ཤིག༌ ཐོབ༌ཨིན༌? ཏེ༌བོ༌ ནི༌ རིན༌ མེད༌པ༌ གའ༌མོའེ༌ ནས༌ཚུལ༌ ཤད༌ཅེས༌སི༌ སྐབས༌པོ༌ ཨིན༌ནོག༌། ཏེན༌ན༌བོའེ༌ཕིའ༌ གའ༌མོའེ༌ ནས༌ཚུལ༌ ཤད༌ ཟ༌ནེ༌, ངའེ༌ ང༌རང༌ངི༌ ཐོབ༌ཏང༌ངི༌ སྐོར༌ལ༌ སམ༌བ༌ ཏང༌ང༌མེད༌།
1CO 9:19 ཞན༌ ང༌ སྤོན༌བོ༌ མེད༌ཁན༌ནི༌ རང༌ཝང༌ཅན༌ཞིག༌ ཨིན༌ནའང༌, མི༌ མང༌པོ༌ མ༌ཤི༌ཀའེ༌ ནང༌ང༌ ཁྱོང༌ཅེས༌ལ༌ ངའེ༌ ང༌རང༌ ཚང༌མའེ༌ ཚེ༌ཡོག༌ གྱུར༌ཅུགས༌པིན༌།
1CO 9:20 ང༌ ཡ༌ཧུ༌དཱ༌པ༌གུན༌ ཉམ༌པོ༌ ཡོད༌ ཟ༌ནེ༌, ངའེ༌ ཡ༌ཧུ༌དཱ༌པ༌གུན༌ མ༌ཤི༌ཀའེ༌ ནང༌ང༌ ཁྱོང༌ཅེས༌སི༌ ཕིའ༌, ཡ༌ཧུ༌དཱ༌པ༌གུན༌ ཙོགས༌ལ༌ མི༌ཚེ༌ ཕུད༌དད༌། ང༌ ཡ༌ཧུ༌དཱ༌པའེ༌ ཁྲིམས༌སི༌ ནང༌ང༌ གྲུལ༌ཁན༌གུན༌ ཉམ༌པོ༌ ཡོད༌ ཟ༌ནེ༌, ང༌ ཏེ༌ ཁྲིམས༌སི༌ ནང༌ཞིན༌ དུག༌གད༌། ཞན༌ ང༌ ཏེ༌ ཁྲིམས༌སི༌ ཡོག༌ག༌ མེད༌ནའང༌, ཏེ༌ ཁྲིམས༌སི༌ ཡོག༌ག༌ དུག༌ཁན༌གུན༌ མ༌ཤི༌ཀའེ༌ ནང༌ང༌ ཁྱོང༌ཅེས༌སི༌ ཕིའ༌ ངའེ༌ ཏེ༌བོ༌ ཅོའད༌།
1CO 9:21 ང༌ ཡ༌ཧུ༌དཱ༌པའེ༌ ཁྲིམས༌གུན༌ནི༌ཀ༌ མ༌ གྲུལ༌ཁན༌གུན༌ ཉམ༌པོ༌ ཡོད༌ ཟ༌ནེ༌, ཁོང༌གུན༌ མ༌ཤི༌ཀའེ༌ ནང༌ང༌ ཁྱོང༌ཅེས༌སི༌ ཕིའ༌ ངའང༌ ཏེ༌ ཁྲིམས༌སི༌ ཡོག༌ག༌ དུག༌ག༌ མེད༌། ཨིན༌ནའང༌ ངའེ༌ དཀོན༌མཆོག༌གི༌ ཁྲིམས༌གུན༌ལ༌ སྣང༌མེད༌ ཅོའ༌མེད༌, ངའེ༌ མ༌ཤི༌ཀའེ༌ ཁྲིམས༌གུན༌ལ༌ ཁའ༌ཉན༌ནད༌།
1CO 9:22 ང༌ ཏད༌པའེ༌ ནང༌ང༌ འུ༌ཐུགས༌ ཡོད༌ཁན༌གུན༌ ཉམ༌པོ༌ ཡོད༌ ཟ༌ནེ༌, འུ༌ཐུགས༌གུན༌ མ༌ཤི༌ཀའེ༌ ནང༌ང༌ ཁྱོང༌ཅེས༌སི༌ ཕིའ༌, ང༌ ཁོང༌གུན༌ནི༌ འུ༌ཐུགས༌སི༌ ནང༌ང༌ དྲེས༌སད༌། མི༌གུན༌ སྐྱོབ༌ཅེས༌སི༌ ཕིའ༌, ངའ༌ མི༌ ཀ༌ཟུག༌ཤིག༌ ཡོད༌ནའང༌ ཏེན༌ན༌ ཙོགས༌ གྱུར༌རད༌།
1CO 9:23 ངའེ༌ ཏེ༌ ཚང༌མ༌ གའ༌མོའེ༌ ནས༌ཚུལ༌ ཕེལ༌ཅུག༌ཅེས༌ དང༌ ཏེ༌བོའེ༌ ཅིན༌ལབས༌སི༌ ནང༌ང༌ དྲེས༌ཤེས༌སི༌ ཕིའ༌ ཅོའད༌།
1CO 9:24 བང༌གྱུགས༌སི༌ ནང༌ང༌ ཚང༌མ༌ བང༌ཏང༌ང༌ནོག༌, ཨིན༌ནའང༌ ཅིག༌ག༌ སོལ༌རས༌ ཐོབ༌ཅེས༌པོ༌ ཅི༌ ཁྱོ༌ཞ༌གུན༌ལ༌ ཧ༌གོ༌ ཐུབ༌བ༌ མེ༌རག༌ག༌? ཏེ༌ནེ༌ གྱལ༌ཁའ༌ ཐོབ༌ཅེས༌སི༌ མིག༌ཞི༌ ཉམ༌པོ༌ བང༌ཏོང༌ཤིག༌།
1CO 9:25 མེད༌ཁན༌ ཆ༌ཅེས༌སི༌ སོལ༌རས༌ ཐོབ༌ཅེས༌ལ༌ བང༌གྱུགས༌ ཏང༌ཁན༌ ཚང༌མའེ༌ ཁོ༌རང༌གུན༌ ལོབ༌ཇོང༌ངི༌ སྕོད༌ལམ༌མི༌ ནང༌ང༌ སྟན༌པོ༌ བོར༌ར༌ནོག༌, ཨིན༌ནའང༌ ང༌ཞ༌གུན༌ནི༌ འི༌བོ༌ ཐའ༌མེད༌པའེ༌ སོལ༌རས༌ ཐོབ༌ཅེས༌སི༌ ཕིའ༌ ཅོའད༌།
1CO 9:26 ཏེ༌བོའེ༌ཕིའ༌ ངའེ༌ བང༌ཏང༌ ཟ༌ནེ༌, མིག༌ཞི༌ ཉམ༌པོ༌ ཀོམ༌པ༌ རེ༌རེའེ༌ གྱབ༌བད༌། ང༌ ཏོན༌ཏག༌ མེད༌པ༌ ལུངས༌པོའེ༌ ནང༌ང༌ མུལ༌ཁྲུག༌ ཏང༌ཁན༌ནི༌ མི༌ ཙོགས༌ མན༌།
1CO 9:27 ངའེ༌ ང༌རང༌ངི༌ ཟུགས༌པོ༌ ང༌རང༌ངི༌ ཝང༌ངི༌ ཡོག༌ག༌ ལུས༌ཤེས༌སི༌ ཕིའ༌ རྩལ༌ཡངས༌ རྩེ༌ཁན༌གུན༌ ཙོགས༌ལ༌ ལོབ༌ཇོང༌ ཏང༌ངད༌། ཏེ༌ མན༌ན༌ ངའེ༌ ཞན༌མ༌གུན༌ལ༌ དཀོན༌མཆོག༌གི༌ གའ༌མོའེ༌ ནས༌ཚུལ༌བོ༌ ཤད༌ཏེ༌ སྟིང༌ནེ༌, ངའ༌ ཐའ༌མེད༌པའེ༌ སོལ༌རས༌ ཐོབ༌ཅེས༌སི༌ འོས༌པ༌ མི༌དུག༌ མོལ༌སྲིད༌ཅེས༌ལ༌ ཇིགས༌ས༌རག༌།
1CO 10:1 སྤུན༌གུན༌ ཏུས༌ མང༌པོའེ༌ སྔུན༌ལ༌ ང༌ཞའེ༌ ཕ༌མེས༌པོ༌གུན༌ རི༌སྟོང༌ངི༌ ནང༌ང༌ ཁོར༌ཨིན༌ དུག༌ཁན༌ནི༌ སྐོར༌གུན༌ ཁྱོ༌ཞའེ༌ རྗེད༌ མི༌རྗེད༌ཅེས༌པོ༌ ངའེ༌ དོད༌པ༌ ཨིན༌། ཁོང༌ ཚང༌མའ༌ སྲིན༌ནི༌ ལམ༌སྟན༌ཏེ༌ ཚོའེ༌ སྐྱིལ༌ནེ༌ ས༌སྐམ༌མི༌ཀ༌ གྲུལ༌ཏེ༌ ཨིན༌པིན༌།
1CO 10:2 སྲིན༌ནི༌ ཡོག༌ག༌ ཡང༌ གྱ༌ཚོའེ༌ ནང༌ནེ༌ གྲུལ༌ཁན༌, ཁོང༌གུན༌ལ༌ མོ༌ཟེས༌སི༌ གྱབ༌ནེ༌ གྲུལ༌ཅེས༌ལ༌ ཁྲུས༌ སལ༌ལ༌ ཛད༌ཏེ༌ ཨིན༌པིན༌།
1CO 10:3 ཁོང༌ ཚང༌མའེ༌ དཀོན༌མཆོག༌གི༌ ཛད༌པ༌ གྱུད༌ཏེ༌ སལ༌ལ༌ ཛད༌ཁན༌ནི༌ ཏ༌གི༌ མན༌ན༌ ཟེར༌ཁན༌བོ༌ ཟོས༌།
1CO 10:4 ཁོང༌ ཚང༌མའེ༌ བྲག༌གི༌ ཀ༌ནེ༌ བིང༌ ཅུག༌ག༌ ཛད༌ཁན༌ ཐུག༌ཉིད༌དི༌ ཆུ༌བོ༌ ཐུངས༌། ཁོང༌ ཚང༌མའེ༌ ཁོང༌གུན༌ ཉམ༌པོ༌ སྐྱོད༌ཁན༌ནི༌ ཐུག༌ཉིད༌དི༌ བྲག༌བོའེ༌ ཀ༌ནེ༌ ཐུངས༌ ཀ༌བོ༌ ནི༌ མ༌ཤི༌ཀ༌ ཨིན༌པིན༌།
1CO 10:5 ཏེ༌ནེའང༌ ཁོང༌ མང༌ཆེའ༌ ཉམ༌པོ༌ དཀོན༌མཆོག༌ ཐུག༌ཉེས༌ས༌ མ༌ཛད༌, ཡང༌ ཁོང༌གུན༌ནི༌ ཟུགས༌པོ༌ རི༌སྟོང༌ངི༌ ནང༌ང༌ ཁྲེས༌ཏོར༌ སོང༌ཏེ༌ ཨིན༌པིན༌།
1CO 10:6 ང༌དང༌གུན༌ནི༌ ནང༌ང༌ ཁོང༌གུན༌ནི༌ ཅོས༌ཁན༌ ཙོགས༌སི༌ དོད༌པ༌ ངན༌པ༌གུན༌ མི༌ཡོང༌ཅེས༌སི༌ ཕིའ༌, ང༌དང༌གུན༌ལ༌ སྤང༌པུད༌ད༌ ཏེ༌གུན༌ ཇུང༌ ཅུག༌ག༌ ཛད༌ཏེ༌ ཨིན༌ནོག༌།
1CO 10:7 ཏེ༌བོའེ༌ཕིའ༌ ཁོང༌གུན༌ནི༌ ཅོས༌ཁན༌ ཙོགས༌ལ༌ སྐུན༌དྲ༌གུན༌ལ༌ ཆོས༌ མ༌ཅོ༌ཤིག༌, ཀ༌ཟུག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌ “ཁོང༌གུན༌ནི༌ ཅོས༌ཁན༌ནི༌ སྐུན༌དྲ༌, སེར༌རི༌ བ༌ལང༌བོའ༌ རྩི༌ཝ༌ ཅོ༌ཅེས༌སི༌ ཕིའ༌, མི༌གུན༌ སའེ༌ཀ༌ དུགས༌ཏེ༌ ཟའ༌ཅེས༌ དང༌ ཆང༌ ཐུང༌ཅེས༌ གོ༌ཟུགས༌, ཡང༌ ཁོང༌གུན༌ ལངས༌ཏེ༌ སྕོད༌པ༌ ངན༌པའེ༌ རྩེས༌གུན༌ ཏང༌ཨིན༌ སྐྱིད༌པོ༌ ཅོས༌།”
1CO 10:8 ང༌དང༌གུན༌ ལུས༌བྲེལ༌ ངན༌པའེ༌ ནང༌ང༌ དྲེས༌ མ༌གོས༌, ཀ༌ཟུག༌ ཁོང༌ ཁ༌ཅིག༌གི༌ ཅོས༌, ཀ༌བོའེ༌ ཁོ༌རང༌གུན༌ནི༌ ཕྲོ༌པ༌ 23,000 ཏེན༌ན༌ ཞག༌ག༌ ཤི༌ཅུགས༌།
1CO 10:9 ང༌དང༌གུན༌ནི༌ མ༌ཤི༌ཀའ༌ ཚོད༌ལྟ༌ མ༌གོས༌, ཀ༌ཟུག༌གི༌ ཁོང༌ ཁ༌ཅིག༌གི༌ ཅོས༌ ཡང༌ བྲས༌བུ༌བོ༌ ཏུག༌རུལ༌གུན༌ནི༌ ཐམས༌ཏེ༌ ཁོང༌གུན༌ ཤི༌ཏེ༌ ཨིན༌པིན༌།
1CO 10:10 ཡང༌ ཁོང༌ ཁ༌ཅིག༌གི༌ ཅོས༌ཁན༌ ཙོགས༌ལ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ འུ༌སྐྱོང༌གུན༌ནི༌ གྱབ༌གལ༌ལ༌ བ༌ག༌བོ༌གེ༌ ཤད༌ མ༌གོས༌, ཅིའ༌ཟེར༌ན༌ སྲོག༌ ལེན༌ཁན༌ནི༌ ཕོ༌ཉའེ༌ ཁོང༌གུན༌ མེད༌ཁན༌ ཅོས༌ཏེ༌ ཨིན༌པིན༌།
1CO 10:11 ང༌དང༌གུན༌ནི༌ ཕིའ༌ སྤེ༌ཞིག༌གི༌ ཚུལ༌ལ༌ ཏེ༌ ཚང༌མ༌ ཁོང༌གུན༌ལ༌ ཇུངས༌ཏེ༌ ཨིན༌པིན༌། ཐའ༌མའེ༌ ཏུས༌སི༌ ནང༌ང༌ དུག༌ཁན༌ནི༌ ང༌དང༌གུན༌ལ༌ སྤང༌པུད༌ཅེས༌སི༌ ཕིའ༌, ཏེ༌གུན༌ བྲིས༌ཏེ༌ ཨིན༌ནོག༌།
1CO 10:12 ཀལ༌ཏེས༌ ཁྱོ༌ཞ༌ ཏད༌པའེ༌ ནང༌ང༌ སྟན༌པོ༌ ཡོད༌ སམ༌མད༌ན༌, གྱེལ༌ མི༌གྱེལ༌ཅེས༌སི༌ ཕིའ༌ ཤང༌ ཅོ༌ཤིག༌།
1CO 10:13 ཨིད༌ཏུ༌ ཅོ༌ཤིག༌ ཁྱོ༌ཞ༌གུན༌ནི༌ སྡིག༌པ༌ ཅོ༌ཅེས༌སི༌ དོད༌པ༌བོ༌ ཞན༌ མི༌གུན༌ལ༌ ཡོད༌ཁན༌བོའེ༌ སང༌ སོ༌སོ༌ཞིག༌ མ༌ནོག༌། ཡང༌ དཀོན༌མཆོག༌ ནི༌ ཨིད༌ཤེས༌ཅན༌ ཞུགས༌ཏེ༌ ཨིན༌ནོག༌, ཁོང༌ངི༌ ཁྱོ༌ཞ༌གུན༌ལ༌ ཚོད༌ལྟའེ༌ ཁུ༌རུ༌བོ༌ ཁྱོ༌ཞ༌གུན༌ནི༌ ཁྱུད༌དི༌ སང༌ མང༌ང༌ཞིག༌ ཁུར༌ ཅུག༌ག༌ མི༌ཛད༌། ཁྱོ༌ཞ༌གུན༌ ཚོད༌ལྟའེ༌ ནང༌ང༌ ཆ༌ ཟ༌ནེ༌, ཁོང༌ངི༌ ཟོད༌པ༌ ཉམ༌པོ༌ ཏེ༌བོ༌ ཁུར༌ཉན༌ཅེས༌སི༌ ལམ༌ ཁྱོ༌ཞའ༌ སྟན༌ན༌ ཛད༌ཨིན༌།
1CO 10:14 ཏེ༌བོའེ༌ཕིའ༌ ངའེ༌ སྤུན༌གུན༌, སྐུན༌དྲ༌གུན༌ལ༌ ཅོལ༌ཅེས༌ནེ༌ ཤོར༌ཏེ༌ སོང༌ཤིག༌།
1CO 10:15 ཁྱོ༌ཞ༌གུན༌ སམ༌བ༌ཅན༌ནི༌ མི༌གུན༌ ཨིན༌ནོག༌། ངའེ༌ ཟེར༌ཁན༌གུན༌ ཀྲང༌པོ༌ ཨིན༌ནོག༌ག༌ ཡ༌ མ༌ནོག༌ ཁྱོ༌ཞ༌རང༌ངི༌ ཐག༌ཅོད༌ཤིག༌།
1CO 10:16 ཏང༌པོ༌, ཏམ༌པའེ༌ སོལ༌རས༌སི༌ ཏུས༌ལ༌ དོན༌སྐྱོག༌གི༌ ནང༌ང༌ ཡོད༌ཁན༌ནི༌ རྒུན༌ཆང༌བོའ༌ ཅིན༌ལབས༌སི༌ ཕིའ༌ ཞུས༌ཏེ༌ ཐུང༌ང༌ཅིག༌, མ༌ཤི༌ཀའེ༌ སྐུ༌ཁྲག༌གི༌ ནང༌ང༌ དྲེས༌ཏེ༌ མ༌ནོག༌ག༌? ཡང༌ ཏ༌གི༌བོ༌ ཅག༌ག༌ཅིག༌, ང༌དང༌གུན༌ མ༌ཤི༌ཀའེ༌ སྐུ༌ཟུགས༌སི༌ ནང༌ང༌ དྲེས༌ཏེ༌ མ༌ནོག༌ག༌?
1CO 10:17 ང༌དང༌གུན༌ མང༌པོ༌ཞིག༌ ཡོད༌ནའང༌, ང༌དང༌ ཚང༌མའེ༌ ཏ༌གི༌ ཅིག༌གི༌ ཀ༌ནེ༌ ཟའ༌ནོག༌, ཀ༌བོའེ༌ ང༌དང༌གུན༌ ཟུགས༌པོ༌ ཅིག༌ ཨིན༌ཁན༌བོ༌ སྟན༌ན༌ནོག༌།
1CO 10:18 ཉིས༌པ༌, ཨིས༌ར༌ཨེལ༌པ༌གུན༌ནི༌ སྐོར༌ལ༌ སམ༌བ༌ ཏོང༌ཤིག༌། ཁོང༌གུན༌ ཆོད༌ཁྲི༌ཀ༌ སྲོག༌ཆོད༌ལ༌ ཕུལ༌ཏེ༌ ཡོད༌ཁན༌གུན༌ ཟོས༌ཏེ༌ ཅི༌ ཁོང༌གུན༌ ཅིག༌གྲིལ༌ མི༌རུག༌ག༌?
1CO 10:19 ཅི༌ ངའེ༌ སྐུན༌དྲ༌གུན༌ལ༌ སྲོག༌ཆོད༌ལ༌ ཕུལ༌ཁན༌ནི༌ ཟན༌གུན༌ནི༌ ནང༌ང༌ རིན༌ ཡོད༌, ཡ༌ ཏེ༌ སྐུན༌དྲ༌གུན༌ ངོས༌པོ༌ དཀོན༌མཆོག༌ ཨིན༌ནོག༌ ཟེར༌ཏེ༌ ཨིན༌ནོག༌ག༌?
1CO 10:20 མན༌ མ༌ནེ༌ མན༌། ངའེ༌ ཟེར༌རད༌ འི༌ སྲོག༌ཆོད༌གུན༌ རྡུད༌གུན༌ལ༌ ཏངས༌ཏེ༌ ཨིན༌ནོག༌, དཀོན༌མཆོག༌ག༌ མ༌ནོག༌། ཡང༌ ངའེ༌ ཁྱོ༌ཞ༌གུན༌ རྡུད༌གུན༌ནི༌ ཕྲོའ༌ དྲེས༌ མི༌དྲེས༌ཤེས༌སི༌ དོད༌པ༌ བོར༌རད༌།
1CO 10:21 ཁྱོ༌ཞའེ༌ གཙོ༌བོ༌ ཡེ༌ཤུའི༌ དོན༌སྐྱོག༌ དང༌ རྡུད༌གུན༌ནི༌ ཀོ༌རེ༌ ཉིས༌ཀོའེ༌ ནང༌ནེ༌ ཀ༌ཟུག༌གི༌ ཐུང༌ཨིན༌? ཁྱོ༌ཞ༌གུན༌ནི༌ གཙོ༌བོ༌ ཡེ༌ཤུའི༌ དོན༌ཏང༌ དང༌ རྡུད༌གུན༌ནི༌ ཁར༌ཇི༌ ཉིས༌ཀོ༌ ཀ༌ཟུག༌གི༌ ཟེན༌?
1CO 10:22 ཅི༌ ཏེ༌ཟུག༌ ཅོ༌ཅེས༌པོ༌ནེ༌ ཁྱོ༌ཞ༌གུན༌ནི༌ གཙོ༌བོའ༌ ཐུགས༌སྲོ༌ ཞངས༌ཤུགས༌ཏེ༌ མ༌ནོག༌ག༌? ཅི༌ ང༌དང༌གུན༌ ཁོང༌ངི༌ སང༌ ཤེད༌ ཆེའ༌ ཨིན༌ནོག༌ག༌?
1CO 10:23 ཁྱོ༌ཞའེ༌ ཕྲོ༌ནེ༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, “ངའེ༌ ཅི༌ཞིག༌ ཅོ༌ནའང༌ གྲིག༌ག༌ནོག༌”, ཨིན༌ནའང༌ ཅི༌ཚང༌མ༌ ཁྱོ༌ཞའེ༌ ཕིའ༌ ཟང༌པོ༌ཞིག༌ མ༌ནོག༌། ཡང༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, “ངའེ༌ ཅི༌ཞིག༌ ཅོ༌ནའང༌ གྲིག༌ག༌ནོག༌”, ཨིན༌ནའང༌ ཅི༌ཚང༌མ༌ ཕན༌ཐོགས༌ཅན༌ཞིག༌ མ༌ནོག༌།
1CO 10:24 ཁྱོ༌ཞ༌རང༌ ཅིག༌པོའེ༌ ཕན༌ཐོགས༌སི༌ ཕིའ༌ མ༌སམ༌མ༌ ཞན༌ཡང༌ སྤུན༌གུན༌ནི༌ ཕན༌ཐོགས༌སི༌ ཕིའ༌ སམ༌བ༌ ཏོང༌ཤིག༌།
1CO 10:25 ཁྱོ༌ཞ༌གུན༌ནི༌ ཁྲོམས༌སི༌ ནང༌ང༌ ཤ༌ ཀ༌ཟུག༌ཤིག༌ ཐོབ༌བད༌ནའང༌ ཟོ༌ཤིག༌, ཏེ༌གུན༌ སྐུན༌དྲ༌གུན༌ལ༌ ཆོད༌པ༌ ཕུལ༌ཏེ༌ ཨིན༌ན༌ མན༌ སམས༌ཏེ༌ སྙིང༌ངི༌ ནང༌ང༌ ཐེ༌ཚོམས༌ ཅོས༌ཏེ༌ ཏྲི༌ཝ༌ མ༌ཏྲི༌ཤིག༌།
1CO 10:26 ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཇིག༌རྟེན༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ གཙོ༌བོའེ༌ ཨིན༌།”
1CO 10:27 ཏད༌པ༌ མེད༌ཁན༌ནི༌ མི༌ཞིག༌གི༌ ཁྱོ༌ཞ༌གུན༌ལ༌ གོང༌ཟན༌ལ༌ ཡོང༌ ཟེར༌ན༌, ཀལ༌ཏེས༌ ཁྱོ༌ཞ༌གུན༌ ཆ༌ཉིན༌ ཡོད༌ན༌, གྲོན༌ཤོག༌པོ༌ ལེན༌ཤིག༌། ཁྱོ༌ཞ༌གུན༌ལ༌ ཅི༌ཞིག༌ ཏང༌ནའང༌ ཟོ༌ཤིག༌། ཏེ༌གུན༌ སྐུན༌དྲ༌ ཆོད༌པ༌ ཕུལ༌ཏེ༌ ཨིན༌ན༌ མན༌ ཟེར༌ཏེ༌ ཏྲི༌ཝ༌ མ༌ཏྲི༌ཤིག༌།
1CO 10:28 ཨིན༌ནའང༌ ཀལ༌ཏེས༌ སུ༌ཞིག༌གི༌, “འི༌ ཤ༌བོ༌ སྐུན༌དྲ༌ ཕུལ༌ཏེ༌ ཨིན༌” ཟེར༌ཏེ༌ ཤད༌ན༌, ཏེ༌ནེ༌ ཤད༌ཁན༌ དང༌ ཁོའེ༌ སེམས༌སི༌ ནང༌ང༌ ཐེ༌ཚོམས༌ མི༌སྐྱེ༌ཅེས༌སི༌ ཕིའ༌ ཏེ༌བོ༌ མ༌ཟ༌ཤིག༌།
1CO 10:29 ངའེ༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ སམ༌ཁན༌ མན༌པ༌, ཏེ༌ ཤད༌ཁན༌ནི༌ སེམས༌སི༌ ནང༌ང༌ སམ༌ཁན༌བོའེ༌ ཕིའ༌ ཟེར༌ཏེ༌ ཨིན༌། ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌ ཟེར༌སྲིད༌ཅེས༌ ཨིན༌ནོག༌, “ཞན༌མ༌ཞིག༌གི༌ སམ༌ཅེས༌པོའེ༌ ཞས༌ཏེ༌ ཅི༌ཕིའ༌ ངའེ༌ ང༌རང༌ངི༌ རང༌ཝང༌ངི༌ ནང༌ང༌ སྒག༌སྐྱིལ༌ ཡོང༌ཅུག༌ཨིན༌།
1CO 10:30 ཡང༌ ཀལ༌ཏེས༌ ངའེ༌ དཀོན༌མཆོག༌ག༌ ཟའ༌ཅེས༌སི༌ ཕིའ༌ ཐུག༌རྗེ༌ཆེ༌ ཞུ༌ན༌, ཏེ༌ནེ༌ ཅིའ༌ ངའེ༌ ཐུག༌རྗེ༌ཆེ༌ ཕུལ༌ཁན༌ནི༌ ཟན༌བོའི༌ཀ༌ སུ༌ཞིག༌གི༌ ང༌ སྐྱོན༌རྗོད༌ ཅོ༌ཨིན༌?”
1CO 10:31 ཏེ༌ནེ༌ ཏེ༌བོའེ༌ ལན༌ལ༌, ཁྱོ༌ཞ༌གུན༌ ཟའ༌ནའང༌, ཡ༌ ཐུང༌ནའང༌, ཡ༌ ཅི༌ཞིག༌ ཅོ༌ནའང༌, ཏེ༌ ཚང༌མ༌ གཙོ༌བོའེ༌ ཟིར༌རྗིད༌དི༌ ཕིའ༌ ཅོ༌ཤིག༌།
1CO 10:32 ཁྱོ༌ཞ༌གུན༌ནི༌ ཅི༌རིག༌ ཅོའད༌ནའང༌, ཏེ༌བོའེ༌ ཡ༌ཧུ༌དཱ༌པ༌ ཡ༌ ཡ༌ཧུ༌དཱ༌པ༌ མན༌ཁན༌གུན༌ ཏད༌པའེ༌ ནང༌ང༌ ཡོང༌ཅེས༌སི༌ ནང༌ང༌ སྒག༌སྐྱིལ༌ མ༌གྱུར༌ཤིག༌, ཡ༌ དཀོན༌མཆོག༌གི༌ ཆོས༌ཚོགས༌སི༌ ནང༌ང༌ ཡོད༌ཁན༌གུན༌ལ༌ སྡིག༌པ༌ ཅོ༌ མ༌ཅུག༌ཤིག༌།
1CO 10:33 ངེའང༌ ང༌རང༌ངི༌ ཅི༌ཞིག༌ ཅོ༌ནའང༌, ཚང༌མ༌ལ༌ ཐད༌ཅུག༌ཅེས༌སི༌ རྩོན༌གྲུས༌ ཅོའད༌། ངའེ༌ ང༌རང༌ངི༌ ཕན༌ཐོགས༌སི༌ ཕིའ༌ མན༌པ༌, ཞན༌མ༌ མང༌པོའེ༌ ཕན༌ཐོགས༌སི༌ ཕིའ༌ ཅོའད༌། ཁོང༌གུན༌ ཏད༌པའེ༌ ནང༌ང༌ ཡོང༌ཅེས༌སི༌ རེ༌ཝ༌ བོར༌ཏེ༌ ངའེ༌ ཏེ༌གུན༌ ཅོའད༌།
1CO 11:1 ཡང༌ ང༌ མ༌ཤི༌ཀའེ༌ སྤེའེ༌ཀ༌ གྲུལ༌ཁན༌ ཙོགས༌ལ༌, ཁྱོ༌ཞ༌གུན༌ ངའེ༌ སྤེའེ༌ཀ༌ གྲུལ༌གོ༌ཤེས༌ ཨིན༌ནོག༌།
1CO 11:2 ཁྱོ༌ཞ༌གུན༌ནི༌ ཏུས༌གྱུན༌ ང༌ ཨིད༌ཏུ༌ བོར༌ཏེ༌ ངའེ༌ ཏངས༌ཁན༌ནི༌ ལབ༌ཞ༌གུན༌ནི༌ཀ༌ གྲུལ༌ཅེས༌པོའེ༌, ངའེ༌ ཁྱོ༌ཞའ༌ སྟོད༌པ༌ ཏང༌ངད༌།
1CO 11:3 ཨིན༌ནའང༌ ཁྱོ༌ཞ༌གུན༌ལ༌ འི༌གུན༌ ཧ༌གོ༌ ཅུག༌ཉིན༌རག༌, ཏད༌པ༌ཅན༌ནི༌ བུ༌ཚ༌ ཚང༌མའེ༌ གོ༌བོ༌ ནི༌, མ༌ཤི༌ཀ༌ ཞུགས༌ཏེ༌ ཨིན༌ནོག༌། ཏད༌པ༌ཅན༌ནི༌ བུ༌མོ༌ ཚང༌མའེ༌ གོ༌བོ༌ ནི༌, ཁོ༌རང༌གུན༌ནི༌ མག༌པ༌ ཨིན༌ནོག༌, ཡང༌ མ༌ཤི༌ཀའེ༌ གོ༌བོ༌ ནི༌, དཀོན༌མཆོག༌ ཞུགས༌ཏེ༌ ཨིན༌ནོག༌།
1CO 11:4 ཀལ༌ཏེས༌ བུ༌ཚ༌ཞིག༌གི༌ མོས༌ལམ༌ ཕུལ༌ ཟ༌ནེ༌, ཡ༌ ལུང༌སྟན༌ ཤད༌ ཟ༌ནེ༌, ཁོ༌རང༌ངི༌ གོ༌བོ༌ ཀབས༌ཏེ༌ ཡོད༌ན༌, ཁོའེ༌ ཁོ༌རང༌ངི༌ གོ༌, ཡང༌ན༌ མ༌ཤི༌ཀ༌ ཁྲེལ༌བ༌ ཁྱོངས༌ཏེ༌ ཨིན༌ནོག༌།
1CO 11:5 ཨིན༌ནའང༌ ཀལ༌ཏེས༌ བུ༌མོ༌ཞིག༌གི༌ ཁོ༌རང༌ངི༌ གོ༌བོ༌ ཀབ༌ མ༌ཀབ༌བ༌ མོས༌ལམ༌ ཕུལ༌ན༌, ཡ༌ ལུང༌སྟན༌ ཤད༌ན༌, ཏེ༌ནེ༌ ཁོའེ༌ ཁོ༌རང༌ངི༌ གོ༌, ཡང༌ན༌ ཁོ༌རང༌ངི༌ མག༌པ༌, ཁྲེལ༌བ༌ ཁྱོངས༌ཏེ༌ ཨིན༌ནོག༌། ཏེ༌ཟུག༌ ཅོ༌ན༌, ཏེ༌ བུ༌མོ༌བོའེ༌ ཁོ༌རང༌ངི༌ སྲ༌ བྲགས༌ཏེ༌ གོ༌ལག༌ ཅོས༌ཁན༌ ཙོགས༌ ཨིན༌ནོག༌།
1CO 11:6 འོ༌ན༌ ཀལ༌ཏེས༌ བུ༌མོ༌བོ༌ གོ༌ ཀབ༌ཅེས༌སི༌ ཕིའ༌ ཐད༌ད༌ མེད༌ན༌, ཏེ༌ནེ༌ ཁོའེ༌ ཁོ༌རང༌ངི༌ སྲ༌ ཚང༌མ༌ བྲག༌གོ༌ཤེས༌ ཨིན༌ནོག༌། ཨིན༌ནའང༌ བུ༌མོ༌ཞིག༌ག༌ གོ༌ལག༌ ཅོ༌ཅེས༌ ཡ༌ སྲ༌ བད༌ཆུང༌ ཅད༌ཅེས༌པོ༌, ཁྲེལ༌བ༌ཞིག༌ ཨིན༌ པ༌སང༌, བུ༌མོའེ༌ གོ༌ ཀབ༌གོ༌ཤེས༌ ཨིན༌ནོག༌།
1CO 11:7 བུ༌ཚ༌ དཀོན༌མཆོག༌གི༌ ཡིབས༌ ཡང༌ ཁོང༌ངི༌ སྤལ༌ལི༌ ནང༌ང༌ ཅོའ༌ ཛད༌ པ༌སང༌, དཀོན༌མཆོག༌ག༌ ཅོལ༌ ཟ༌ནེ༌, ཁོའེ༌ ཁོ༌རང༌ངི༌ གོ༌ ཀབ༌ མ༌གོས༌། ཨིན༌ནའང༌ ན༌མ༌གུན༌ ཁོ༌རང༌ངི༌ མག༌པའེ༌ སྤལ༌བོ༌ ཨིན༌ནོག༌།
1CO 11:8 ཨ༌དམ༌ བུ༌ཚ༌ ཏང༌པོ༌, བུ༌མོ༌ནེ༌ ཇུངས༌ཏེ༌ མ༌ནོག༌, ཨིན༌ནའང༌ ཧ༌ཝ༌ བུ༌མོ༌ ཏང༌པོ༌ བུ༌ཚ༌ནེ༌ ཇུངས༌ཏེ༌ ཨིན༌ནོག༌།
1CO 11:9 ཡང༌ བུ༌ཚ༌ བུ༌མོའེ༌ ཕིའ༌ ཅོའ༌ མ༌ཛད༌ད༌, བུ༌མོ༌ བུ༌ཚའེ༌ ཕིའ༌ ཅོའ༌ ཛད༌ཏེ༌ ཨིན༌པིན༌།
1CO 11:10 ཏེན༌ན༌ གྱུན༌ཚན༌ དང༌ དཀོན༌མཆོག༌གི༌ ཕོ༌ཉ༌གུན༌ནི༌ ཟིགས༌ཨིན༌ ཡོད༌ཅེས༌པོའེ༌, བུ༌མོའེ༌ ཁོ༌རང༌ མག༌པའེ༌ ཝང༌ངི༌ ཡོག༌ག༌ ཡོད༌ཁན༌བོ༌ སྟན༌ཅེས༌ལ༌, ཁོ༌རང༌ངི༌ གོ༌ ཀབ༌གོ༌ཤེས༌ ཨིན༌ནོག༌།
1CO 11:11 གཙོ༌བོའེ༌ ནང༌ང༌ ཏད༌པ༌ཅན༌ནི༌ བུ༌ཚ༌ཞིག༌གི༌ ང༌ བུ༌མོའེ༌ཀ༌ རག༌ལས༌ཏེ༌ ཡ༌ ཏད༌པ༌ཅན༌ནི༌ བུ༌མོ༌ཞིག༌གི༌ ང༌ བུ༌ཚའེ༌ཀ༌ རག༌ལས༌ཏེ༌ དུག༌གོ༌ཤེས༌མེད༌ ཟེར༌ མི༌ཉན༌།
1CO 11:12 ཅིའ༌ཟེར༌ན༌ ཏང༌པོ༌, བུ༌མོ༌ བུ༌ཚའེ༌ ཀ༌ནེ༌ ཇུངས༌ཏེ༌ ཨིན༌ནའང༌, དག༌ས༌ བུ༌མོའེ༌ ཀ༌ནེ༌ བུ༌ཚ༌ སྐྱེའ༌ནོག༌། ཨིན༌ནའང༌ ཅི༌ཚང༌མ༌ དཀོན༌མཆོག༌ནེ༌ ཡོངས༌ཏེ༌ ཨིན༌ནོག༌།
1CO 11:13 ཁྱོ༌ཞ༌རང༌ངི༌ ཐག༌ཅོད༌ཤིག༌, ཅི༌ མི༌གུན༌ནི༌ ཕྲོའ༌ བུ༌མོའེ༌ རང༌ངི༌ གོ༌ མ༌ཀབ༌བ༌ དཀོན༌མཆོག༌ག༌ མོས༌ལམ༌ ཕུལ༌ཅེས༌པོ༌, འོས༌པ༌ ཨིན༌ནོག༌ག༌?
1CO 11:14 ཅི༌ བུ༌ཚའེ༌ བུ༌མོ༌ ཙོགས༌ལ༌ སྲ༌ རིང༌མོ༌ བོར༌ན༌, ཏེ༌བོ༌ རང༌ཞིན༌ མན༌ཁན༌ ཡང༌ ཁྲེལ༌བ༌ཞིག༌ མ༌ནོག༌ག༌?
1CO 11:15 ཡང༌ སྲ༌ རིང༌མོ༌ ཡོད༌ཅེས༌པོ༌ བུ༌མོའེ༌ ཕིའ༌ སྤལ༌ཞིག༌ ཨིན༌ནོག༌, ཅིའ༌ཟེར༌ན༌ ཏེ༌བོ༌ ཁོའ༌ ཀབ༌ཅེས༌ལ༌ སལ༌ལ༌ ཛད༌ཏེ༌ ཨིན༌ནོག༌།
1CO 11:16 ཨིན༌ནའང༌ འི༌བོའེ༌ སྐོར༌ལ༌ གྱབ༌གལ༌ ཅོ༌ཉིན༌ ཡོད༌ཁན༌གུན༌ནི༌ ཕིའ༌ ངའེ༌ འིན༌ན༌བོ༌ ཟེར༌ཨིན༌, ང༌ཞ༌གུན༌ལ༌ འིན༌ན༌བོ༌ མ༌ནེ༌, ཞན༌ཡང༌ ལུག༌སྲོལ༌ཞིག༌ མེད༌, ཡང༌ དཀོན༌མཆོག༌གི༌ ཆོས༌ཚོགས༌གུན༌ནི༌ ནང༌ངའང༌ མེད༌པ༌ ཨིན༌ནོག༌།
1CO 11:17 ཏ༌ ངའེ༌ ཟེར༌ཅེས༌ཅན༌བོའེ༌ ནང༌ང༌, ཁྱོ༌ཞ༌གུན༌ལ༌ སྟོད༌པ༌ ཏང༌ཉན༌ཅེས༌ མེ༌རག༌, ཅིའ༌ཟེར༌ན༌ ཁྱོ༌ཞ༌གུན༌ ཛོམ༌ཅེས༌པོའེ༌, ཕན༌ཐོགས༌སི༌ སང༌ མང༌ང༌ ནོད༌སྐྱལ༌ ཁྱོང༌དུག༌།
1CO 11:18 ཏང༌པོ༌, ཁྱོ༌ཞ༌གུན༌ ཆོས༌ཚོགས༌སི༌ ཚུལ༌ལ༌ ཛོམ༌ ཟ༌ནེ༌, ཁྱོ༌ཞ༌གུན༌ནི༌ ཕྲོའ༌ པོ༌མང༌པོ༌ ཕུད༌ཏེ༌ ཡོད༌ཁན༌བོ༌ ཚོར༌། ཡང༌ ངའེ༌ སམ༌མ༌རག༌ ཏེ༌ སྤེ༌ར༌ ཚོར༌ཁན༌ མང༌ཆེའ༌བོ༌ དེན༌བ༌ ཨིན༌ནོག༌།
1CO 11:19 ཏན༌ཏན༌ལ༌ དཀོན༌མཆོག༌གི༌ མི༌གུན༌ ངོ༌སྟག༌ ཆ༌ཅེས༌སི༌ ཕིའ༌ ཁོང༌ངི༌ ཁྱོ༌ཞ༌གུན༌ནི༌ ཕྲོའ༌ ཁག༌ སོ༌སོ༌གུན༌ ཇུང༌ ཅུག༌ག༌ ཛད༌ཏེ༌ ཨིན༌ནོག༌།
1CO 11:20 གཙོ༌བོའེ༌ དོན༌ཏང༌ངི༌ ནང༌ང༌ ཟའ༌ཅེས༌ལ༌ ཁྱོ༌ཞ༌གུན༌ ཛོམ༌ ཟ༌ནེ༌ དེན༌བ༌, ཁྱོ༌ཞ༌གུན༌ མ༌ཤི༌ཀའེ༌ ཀྲོང༌ཤེས༌པོ༌ ཨིད༌ཏུ༌ ཅོ༌ཅེས༌ལ༌ ཐད༌ད༌ མི༌དུག༌།
1CO 11:21 ཅིའ༌ཟེར༌ན༌ ཁྱོ༌ཞའ༌ ཁ༌ཅིག༌གི༌, རང༌ངི༌ ཁར༌ཇི༌གུན༌ ཞན༌མ༌གུན༌ལ༌ བགོས༌ཏེ༌ མ༌ཏང༌ང༌ ཟའ༌ཅེས༌ལ༌ རིངས༌དུག༌, ཀ༌བོའེ༌ ཞས༌ཏེ༌ ཁ༌ཅིག༌ སྟོག༌རིའ༌ ལུས༌དུག༌, ཡང༌ ཁ༌ཅིག༌ ར༌རོས༌ དུག༌།
1CO 11:22 ཅི༌ ཁྱོ༌ཞ༌གུན༌ལ༌ ཟའ༌ཅེས༌ དང༌ ཐུང༌ཅེས༌སི༌ ཕིའ༌, རང༌རང༌ངི༌ ཁང༌པ༌ མེད༌ད༌? ཡ༌ ཅི༌ དཀོན༌མཆོག༌གི༌ ཆོས༌ཚོགས༌ལ༌ ནཕ༌རད༌ ཅོ༌ཅེས༌ དང༌ ཉལ༌བ༌ཅན༌གུན༌ལ༌ ཁྲེལ༌བ༌ ཁྱོང༌ང༌ལ༌, ཐད༌ད༌ རག༌ག༌? ངའེ༌ ཁྱོ༌ཞ༌གུན༌ལ༌ ཅི༌ ཟེར༌གོས༌, ཅི༌ ངའེ༌ འི༌བོའེ༌ ཕིའ༌ ཁྱོ༌ཞ༌གུན༌ལ༌ སྟོད༌པ༌ ཏང༌གོས༌ས༌? འོ༌ན༌ ཏན༌ཏན༌ འི༌བོའེ༌ ཕིའ༌ ངའེ༌ ཁྱོ༌ཞ༌གུན༌ལ༌ སྟོད༌པ༌ མི༌ཏང༌།
1CO 11:23 ངའ༌ གཙོ༌བོའེ༌ ཆོགས༌ནེ༌ ལབ༌ཞ༌ ཐོབ༌ཁན༌བོ༌ ཁྱོ༌ཞ༌གུན༌ལ༌ ཏངས༌པིན༌། ཏེན༌ན༌ ཚན༌ལ༌ ནམ༌ ཡུ༌དཱའེ༌ གཙོ༌བོ༌ ཡེ༌ཤུའ༌ ངོ༌ལོག༌ ཅོས༌, གཙོ༌བོའེ༌ ཏ༌གི༌བོ༌ ལེན༌ན༌ ཛདས༌,
1CO 11:24 ཡང༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཏེ༌ ཁོང༌ངི༌ ཏེ༌བོ༌ ཅག༌ག༌ ཛདས༌, ཡང༌ མོལས༌, “འི༌བོ༌ ཁྱོ༌ཞ༌གུན༌ནི༌ ཕིའ༌ ཏངས༌ཁན༌ནི༌ ངའེ༌ ཟུགས༌པོ༌ ཨིན༌། ང༌ ཨིད༌ཏུ༌ ཅོ༌ཅེས༌ལ༌ འི༌བོ༌ ཅོ༌ཤིག༌།”
1CO 11:25 ཏེན༌ན༌ ཙོགས༌ལ༌ ཁར༌ཇི༌ སྟིང༌ནེ༌ ཁོང༌ངི༌ རྒུན༌ཆང༌ངི༌ དོན༌སྐྱོག༌པོ༌ ནམས༌ ཡང༌ མོལས༌, “འི༌ ཀོ༌རེ༌བོ༌ དཀོན༌མཆོག༌ དང༌ ཁོང༌ངི༌ མི༌གུན༌ནི༌ པར༌ལ༌ ཞལ༌ཆད༌ སོ༌མ༌ཞིག༌ ཨིན༌ནོག༌, ཀ༌བོ༌ ངའེ༌ ཁྲག༌ ཉམ༌པོ༌ ཅོས༌ཏེ༌ ཨིན༌, ཁྱོ༌ཞ༌གུན༌ནི༌ འི༌བོ༌ ཐུང༌ ཟ༌ནེ༌ ང༌ ཨིད༌ཏུ༌ ཅོ༌ཤིག༌།”
1CO 11:26 ནམ༌ ཁྱོ༌ཞ༌གུན༌ནི༌ འི༌ ཏ༌གི༌བོ༌ ཟེན༌ ཡང༌ འི༌ ཀོ༌རེ༌བོ༌ནེ༌ ཐུང༌ཨིན༌, མ༌ཤི༌ཀ༌ ཡང༌སྐྱར༌ ལོགས༌ཏེ༌ སྐྱོད༌སྐྱོད༌ ཚོག༌པ༌, ཁྱོ༌ཞ༌གུན༌ནི༌ ཏོན༌ལ༌ གཙོ༌བོ༌ ཀྲོངས༌ས༌ ཛད༌ཁན༌བོ༌ མི༌གུན༌ལ༌ ཁྱོ༌ཞའེ༌ སྤང༌པོ༌ ཏང༌ང༌ནོག༌།
1CO 11:27 ཏེ༌བོའེ༌ཕིའ༌ སུ༌ཞིག༌གི༌ རྩི༌ཝ༌ མ༌ཅོའ༌ འི༌ ཏ༌གི༌བོའེ༌ ཀ༌ནེ༌ ཟའ༌ན༌ ཡ༌ འི༌ ཀོ༌རེ༌ ནང༌ནེ༌ ཐུང༌ན༌, གཙོ༌བོའེ༌ སྐུ༌ཟུགས༌ དང༌ སྐུ༌ཁྲག༌ གུན༌ནི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ནོངས༌ཅན༌ གྱུར༌ཏེ༌ ཨིན༌ནོག༌།
1CO 11:28 ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ ཏ༌གི༌ ཟའེ༌ སང༌ ཡང༌ ཀོ༌རེ༌བོ༌ནེ༌ ཐུང༌ངི༌ སང༌ སྔུན༌ལ༌, ཁྱོ༌ཞ༌རང༌ང༌ སྟག༌ཅད༌ ཅོ༌གོ༌ཤེས༌ ཨིན༌ནོག༌།
1CO 11:29 ཀལ༌ཏེས༌ ཁྱོ༌ཞ༌གུན༌ནི༌ མ༌ཤི༌ཀའེ༌ སྐུ༌ཟུགས༌པོའ༌ རྩི༌ཝ༌ མ༌ཕུལ༌ལ༌ ཏ༌གི༌བོ༌ ཟའ༌ན༌ ཡ༌ ཀོ༌རེ༌བོ༌ནེ༌ ཐུང༌ན༌, ཏེ༌ནེ༌ ཁྱོ༌ཞ༌གུན༌ནི༌ ཁྱོ༌ཞ༌རང༌ངི༌ ཕིའ༌ དཀོན༌མཆོག༌གི༌ ཁྲིམས༌ཅད༌པོ༌ ཟོས༌ཏེ༌ ཡང༌ ཐུངས༌ཏེ༌ ཨིན༌ནོག༌།
1CO 11:30 ཏེན༌ན༌བོའེ༌ ཕིའ༌ ཁྱོ༌ཞའ༌ མང༌པོ༌ཞིག༌ འུ༌ཐུགས༌ དང༌ ཟུ༌མོ༌ཅན༌ ཡང༌ ཁ༌ཅིག༌ ཤི༌ཏེའང༌ ཨིན༌ནོག༌།
1CO 11:31 ཨིན༌ནའང༌ ཀལ༌ཏེས༌ ང༌དང༌གུན༌ནི༌ ང༌དང༌ རང༌ང༌ སྟག༌ཅད༌ ཅོས༌པིན༌ན༌, ང༌དང༌གུན༌ འི༌ཙོགས༌སི༌ ཁྲིམས༌ཅད༌དི༌ ནང༌ང༌ ཡོངས༌ཏེ༌ མེད༌གྲོ༌།
1CO 11:32 ཏེ༌ནེའང༌ ང༌དང༌ང༌ ཇིག༌རྟེན༌པ༌གུན༌ ཉམ༌པོ༌ ཆད༌པ༌ མི༌ཕོག༌ཅེས༌སི༌ ཕིའ༌, ང༌དང༌གུན༌ལ༌ གཙོ༌བོའེ༌ ཁྲིམས༌ཅད༌ སལ༌ལ༌ ཛད༌ ཟ༌ནེ༌, ཁོང༌ངི༌ ང༌དང༌གུན༌ སྐྱོང༌ང༌ ཛད༌ཏེ༌ ཨིན༌ནོག༌།
1CO 11:33 ཏེ༌ནེ༌ ངའེ༌ སྤུན༌གུན༌, ཁྱོ༌ཞ༌གུན༌ གཙོ༌བོའེ༌ དོན༌ཏང༌ངི༌ ཕིའ༌ ཛོམ༌ ཟ༌ནེ༌ ཅིག༌ དང༌ ཅིག༌ག༌ སྲུངས༌ཏེ༌ དུག༌ཤིག༌།
1CO 11:34 ཀལ༌ཏེས༌ ཁྱོ༌ཞ༌གུན༌ སྟོགས༌སད༌ན༌, ཏེ༌ནེ༌ ཁྱོ༌ཞ༌གུན༌ ཛོམ༌ ཟ༌ནེ༌ ཁྱོ༌ཞའེ༌ཀ༌ ཁྲིམས༌ཅད༌ མི༌ཡོང༌ཅེས༌སི༌ ཕིའ༌ རང༌ངི༌ ཁང༌པའ༌ ཁར༌ཇི༌ ཟོས༌ཏེ༌ ཡོང༌ཤིག༌། ང༌ ལེབས༌ཏེ༌ སྟིང༌ནེ༌, ཁྱོ༌ཞ༌གུན༌ལ༌ འི༌ སྐོར༌ལ༌ ཞན༌ཡང༌ ལབ༌ཞ༌གུན༌ ཏང༌ཨིན༌།
1CO 12:1 ཏ༌ ངའེ༌ སྤུན༌གུན༌ ཏམ༌པའེ༌ ཐུག༌ཉིད༌དི༌ ང༌དང༌གུན༌ལ༌ སལ༌ལ༌ ཛད༌ཁན༌ནི༌ ཁྱུད༌གུན༌ནི༌ སྐོར༌ལ༌, ཁྱོ༌ཞའེ༌ ཧ༌གོ༌བོ༌ ནོར༌ཁྲུལ༌ཅན༌ཞིག༌ མི༌ཡོང༌ཅེས༌སི༌ དོད༌པ༌ ཅོའད༌།
1CO 12:2 ཏད༌པ༌ མེད༌ཁན༌ ཨིན༌ ཟ༌ནེ༌, ཁྱོ༌ཞ༌གུན༌ སྤེ༌ར༌ ཏང༌ མ༌ཉན༌ཁན༌ནི༌ སྐུན༌དྲ༌གུན༌ནི༌ ལམ༌ ནོར༌ཁན༌ནི༌ཀ༌ ཁྲིད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
1CO 12:3 ཏེ༌བོའེ༌ཕིའ༌ སུ༌ཞིག༌གིའང༌ དཀོན༌མཆོག༌གི༌ ཐུག༌ཉིད༌དི༌ ནང༌ང༌ ཡེ༌ཤུའ༌ ངན༌ ཏབ༌ མི༌ཉན༌ ཡང༌ ཏམ༌པའེ༌ ཐུག༌ཉིད༌ ཅིག༌པོ༌ གྱུད༌ཏེ༌ མ༌སྟོགས༌, སུ༌ཞིག༌གིའང༌ “ཡེ༌ཤུ༌ ཚང༌མའེ༌ གཙོ༌བོ༌ ཞུགས༌ཏེ༌ ཨིན༌ནོག༌” ཟེར༌ མི༌ཉན༌ཅེས༌པོ༌ ངའེ༌ ཁྱོ༌ཞ༌གུན༌ལ༌ གྱུས༌ ཆ༌ཅུག༌ཉིན༌རག༌།
1CO 12:4 ཐུག༌ཉིད༌དི༌ ཁྱུད༌ སྣ༌ཚོགས༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཨིན༌ནའང༌ ཏེ༌ ཚང༌མའེ༌ ཇུང༌ས༌བོ༌ ཐུག༌ཉིད༌ ཁོ༌རང༌ ཨིན༌ནོག༌།
1CO 12:5 ཞབས༌ཏོག༌ སྣ༌ཚོགས༌ཤིག༌ ཡོད༌ཏེ༌ ཨིན༌ནོག༌, ཨིན༌ནའང༌ ང༌དང༌གུན༌ནི༌ གཙོ༌བོ༌ ཅིག༌གི༌ ཞབས༌ཏོག༌ ཞུའ༌ནོག༌།
1CO 12:6 དཀོན༌མཆོག༌གི༌ ཕིའ༌ ང༌དང༌ངི༌ ལས༌ སྣ༌ཚོགས༌སི༌ ཅོའ༌ནོག༌, ཨིན༌ནའང༌ ང༌དང༌ངི༌ ཅོ༌ཁན༌ནི༌ ལས༌ ཚང༌མའེ༌ ནང༌ང༌ ཏེན༌ན༌ དཀོན༌མཆོག༌པོའེ༌ ཆག༌ལས༌ ཛད༌ད༌ནོག༌།
1CO 12:7 ཅིག༌ དང༌ ཅིག༌ག༌ རོགས༌ ཅོ༌ཉན༌ཅེས༌ལ༌, ཐུག༌ཉིད༌དི༌ ཁྱུད༌ ང༌དང༌ རེ༌རེའ༌ དཀོན༌མཆོག༌གི༌ སལ༌ལ༌ ཛད༌ད༌ནོག༌།
1CO 12:8 ཏེན༌ན༌ ཐུག༌ཉིད༌བོ༌ གྱུད༌ཏེ༌, མི༌ཞིག༌ག༌ ཁ༌དའ༌ ཤེས༌རབས༌ཅན༌ ཏང༌ ཉན༌ཅེས༌སི༌ ཁྱུད༌, ཡང༌ཞིག༌ག༌ མིག༌སལ༌ལི༌ ཡོན༌ཏན༌ནི༌ ལོན༌བོ༌ སལ༌ལ༌ ཛད༌ད༌ནོག༌།
1CO 12:9 ཏེན༌ན༌ ཐུག༌ཉིད༌བོའེ༌ ཅིག༌ག༌, ཨིད༌ཤེས༌ ཆེན༌མོ༌ དང༌ ཞན༌ཞིག༌ག༌, ཕན༌ཅུག༌ཅེས༌སི༌ ཁྱུད༌གུན༌ སལ༌ལ༌ནོག༌།
1CO 12:10 ཁོང༌ངི༌ མི༌ཞིག༌ག༌ ཧ༌ལས༌ཤེས༌སི༌ ལྟས༌གུན༌ སྟན༌ཅེས༌སི༌ ཁྱུད༌, ཞན༌ཞིག༌ག༌ ལུང༌སྟན༌ ཏང༌ཅེས༌སི༌ ཁྱུད༌, ཞན༌ཞིག༌ག༌ ལོན༌བོ༌ དཀོན༌མཆོག༌གི༌ ཐུག༌ཉིད༌དི༌ ཆོགས༌ནེ༌ ཨིན༌ནོག༌ག༌ མ༌ནོག༌ ལྟ༌ཉན༌ཅེས༌སི༌ ཁྱུད༌པོ༌, ཞན༌ཞིག༌ག༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌སི༌ ཁྱུད༌ དང༌ ཞན༌ཞིག༌ག༌ ཏེ༌ སྐད༌གུན༌ གྱུར༌ཅེས༌སི༌ ཁྱུད༌གུན༌ སལ༌ལ༌ ཛད༌ད༌ནོག༌།
1CO 12:11 ཨིན༌ནའང༌ ཏེ༌ ཁྱུད༌གུན༌ ཏེན༌ན༌ ཐུག༌ཉིད༌ ཅིག༌ཅིག༌པོའེ༌ སལ༌ལ༌ ཛད༌ད༌ནོག༌། མི༌ རེ༌རེའ༌ ཀ༌ཟུག༌ ཁྱུད༌རིག༌ ཐོབ༌ཨིན༌, ཏེ༌བོ༌ ཁོང༌ ཅིག༌པོའེ༌ ཐག༌ཅད༌ད༌ ཛད༌ད༌ནོག༌།
1CO 12:12 ཞན༌ མིའི༌ ཟུགས༌པོའ༌ ཡན༌ལག༌ མང༌པོ༌ཞིག༌ ཡོད༌ནའང༌, ཁག༌ ཚང༌མའེ༌ ཟུགས༌པོ༌ ཆ༌ཚང༌ཞིག༌ གྲུབ༌བ༌ནོག༌། ཏེན༌ན༌ ཙོགས༌ལ༌ ཆོས༌ཚོགས༌གུན༌ མ༌ཤི༌ཀའེ༌ སྐུ༌ཟུགས༌ ཨིན༌ནོག༌།
1CO 12:13 ང༌དང༌ ཁ༌ཅིག༌ ཡ༌ཧུ༌དཱ༌པ༌ ཡང༌ ཁ༌ཅིག༌ ཡ༌ཧུ༌དཱ༌པ༌ མ༌ནོག༌། ཁ༌ཅིག༌ ཚེ༌ཡོག༌ ཡང༌ ཁ༌ཅིག༌ རང༌ཝང༌ཅན༌ ཨིན༌ནོག༌། ཨིན༌ནའང༌ ཏམ༌པའེ༌ ཐུག༌ཉིད༌དི༌ ནང༌ང༌ ང༌དང༌ རེ༌རེའ༌ ཁྲུས༌སལ༌ལ༌ ཛད༌ཅེས༌པོའེ༌ ང༌དང༌གུན༌ ཟུགས༌པོ༌ ཅིག༌ ཨིན༌ནོག༌། ཏ༌ ང༌དང༌ རེ༌རེའེ༌ ཏེན༌ན༌ ཐུག༌ཉིད༌ ཅིག༌པོའེ༌ ཀ༌ནེ༌ ཐུང༌ཨིན༌ ཨིན༌ནོག༌།
1CO 12:14 འོ༌ན༌, ཟུགས༌པོ༌བོའ༌ ཡན༌ལག༌ ཅིག༌ མན༌པ༌ མང༌པོ༌, སོ༌སོ༌ རིག༌ ཡོད༌ཏེ༌ ཨིན༌ནོག༌།
1CO 12:15 ཀལ༌ཏེས༌ རྐང༌པའེ༌ ཟེར༌ན༌, “ང༌ ཟུགས༌པོའེ༌ ཡན༌ལག༌ མན༌ ཅིའ༌ཟེར༌ན༌ ང༌ ལག༌པ༌ མན༌།” ཅི༌ ཏེ༌བོའེ༌ རྐང༌པ༌ ཟུགས༌པོའེ༌ ཁག༌ཤིག༌ ལུས༌ས༌ མ༌ནོག༌ག༌?
1CO 12:16 ཡང༌ ཀལ༌ཏེས༌ ནམ༌ཅོག༌གི༌ ཟེར༌ན༌, “ང༌ ཟུགས༌པོའེ༌ ཡན༌ལག༌ མན༌ ཅིའ༌ཟེར༌ན༌ ང༌ མིག༌ མན༌”, ཅི༌ ཏེ༌བོའེ༌ ནམ༌ཅོག༌པོ༌ ཟུགས༌པོའེ༌ ཁག༌ཤིག༌ ལུས༌ས༌ མ༌ནོག༌ག༌?
1CO 12:17 ཀལ༌ཏེས༌ ཟུགས༌པོ༌ གང༌མ༌ མིག༌ ཨིན༌པིན༌ན༌, ཀ༌ཟུག༌གི༌ ཁྱོ༌ཞ༌གུན༌ནི༌ ཚོར༌ཨིན༌། ཡ༌ ཀལ༌ཏེས༌ ཁྱོ༌ཞ༌གུན༌ནི༌ ཟུགས༌པོ༌ གང༌མ༌ ནམ༌ཅོག༌ ཨིན༌པིན༌ན༌, ཏེ༌ནེ༌ ཀ༌ཟུག༌གི༌ ཁྱོ༌ཞ༌གུན༌ནི༌ ཏྲི༌མ༌ ཚོར༌ཨིན༌།
1CO 12:18 ཨིན༌ནའང༌ ང༌དང༌གུན༌ནི༌ ཟུགས༌པོ༌བོའ༌ ཏན༌ཏན༌ལ༌ ཡན༌ལག༌ མང༌པོ༌ཞིག༌ ཡོད༌ཏེ༌ ཨིན༌ནོག༌། ཡང༌ དཀོན༌མཆོག༌གི༌ ཏེ༌ ཡན༌ལག༌གུན༌ ཁོང༌ངི༌ ཐུག༌གོངས༌ ནང༌ཞིན༌ལ༌, རང༌རང༌ངི༌ ནས༌སའེ༌ཀ༌ བོར༌ར༌ ཛད༌ཏེ༌ ཨིན༌ནོག༌།
1CO 12:19 ཀལ༌ཏེས༌ ཟུགས༌པོ༌བོའ༌ ཡན༌ལག༌ ཅིག༌ མ༌ནེ༌ མེད༌པིན༌ན༌, ཏེ༌ནེ༌ ཀ༌ཟུག༌ ཡམ༌ཚན༌ཞིག༌ མེད༌གྲོ༌།
1CO 12:20 འོ༌ན༌, ཡན༌ལག༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཨིན༌ནའང༌ ཟུགས༌པོ༌ ཅིག༌།
1CO 12:21 མིག༌གི༌ ལག༌པའ༌ མ༌ནེ༌ མི༌ཟེར༌, “ང༌ ཁྱོ༌རང༌ གོ༌ཤེས༌ མེ༌རག༌།” གོའི༌ རྐང༌པའ༌ མ༌ནེ༌ མི༌ཟེར༌, “ང༌ ཁྱོ༌རང༌ངི༌ སྒོས༌དོམ༌ མེད༌།”
1CO 12:22 ངོས༌པོ༌བོ༌ ནི༌ འུ༌ཐུགས༌ ཐོང༌ཁན༌ དང༌ ཁག༌ཅན༌ མན༌ཁན༌ནི༌ ཟུགས༌པོའེ༌ ཡན༌ལག༌གུན༌ ཚང༌མའེ༌སང༌ སྒོས༌དོམ༌ཅན༌བོ༌ ཨིན༌ནོག༌།
1CO 12:23 ཡང༌ རྩི༌ཝ༌ ཉུ༌ངུན༌ཅན༌ དང༌ སྟན༌ མི༌གོ༌ཤེས༌ཅན༌ནི༌ ཟུགས༌པོའེ༌ ཁག༌གུན༌ལ༌ ང༌དང༌གུན༌ནི༌ ནང༌སྟག༌ ཆེན༌མོ༌ ཉམ༌པོ༌ ཀོས༌ལག༌ སྐོན༌ཏེ༌ གྱལ༌ལ༌ ནང༌སྟག༌ ཅོས༌ཏེ༌ སྐྱོབས༌ཏེ༌ བོར༌ར༌ནོག༌།
1CO 12:24 སྟན༌ནའང༌ གྲིག༌ཅེས༌ཅན༌ནི༌ ཞན༌ ཡན༌ལག༌གུན༌ལ༌, ཏེ༌ཙོགས༌སི༌ མིག༌སལ༌ལི༌ ནང༌སྟག༌ གོས༌ས༌ མ༌ནོག༌། ཏེ༌ནེ༌ དཀོན༌མཆོག༌གི༌ རྩི༌ཝ༌ ཉུ༌ངུན༌ཅན༌ནི༌ ཡན༌ལག༌གུན༌ལ༌ མང༌ང༌ རྩི༌ཝ༌ དང༌ སྟ༌སྟོག༌ ཏང༌ཅུགས༌ཏེ༌ ཟུགས༌པོ༌ གང༌མ༌ ཉམ༌པོ༌ ཁྲངས༌པོ༌ བོར༌ར༌ ཛད༌ཏེ༌ ཨིན༌ནོག༌།
1CO 12:25 ཏེ༌བོ༌ ཅིག༌ དང༌ ཅིག༌ག༌ སྟ༌སྟོག༌ ཅོ༌ཅེས༌ མ༌ཚད༌, ཐུས༌མི༌ ཚང༌མའེ༌ ནང༌ང༌ ཐུན༌བྲེལ༌ ཡོང༌ཅེས༌ལ༌ ཅོའ༌ ཛད༌ཏེ༌ ཨིན༌ནོག༌།
1CO 12:26 ཀལ༌ཏེས༌ ཡན༌ལག༌ ཅིག༌ག༌ ཟུ༌མོ༌ ཡོང༌ན༌, ཞན༌ ཡན༌ལག༌ ཚང༌མའང༌ ཏེ༌བོ༌ ཉམ༌པོ༌ རྡུག༌ངལ༌ ཐོང༌ང༌ནོག༌, ཡང༌ ཀལ༌ཏེས༌ ཡན༌ལག༌ ཅིག༌ག༌ རྩི༌ཝ༌ ཐོབ༌ན༌, ཏེ༌བོ༌ ཉམ༌པོ༌ ཞན༌ ཡན༌ལག༌ ཚང༌མེའང༌ ཐད༌པོ༌ ཅོའ༌ནོག༌།
1CO 12:27 ཏ༌ ཁྱོ༌ཞའ༌ ཚང༌མ༌ ཛོམས༌ཏེ༌, མ༌ཤི༌ཀའེ༌ སྐུ༌ཟུགས༌པོ༌ ཨིན༌ནོག༌, ཡང༌ ཁྱོ༌ཞའ༌ རེ༌རེ༌ ཏེ༌བོའེ༌ ཡན༌ལག༌གུན༌ ཨིན༌ནོག༌།
1CO 12:28 དཀོན༌མཆོག༌གི༌ ཆོས༌ཚོགས༌སི༌ ཕིའ༌, ལྡམ༌མ༌ ཛད༌ཁན༌ནི༌ ཡན༌ལག༌ ཁ༌ཅིག༌ འི༌གུན༌ ཨིན༌ནོག༌། ཏང༌པོ༌བོ༌, མ༌ཤི༌ཀའེ༌ སྐུ༌ཚབས༌གུན༌, ཉིས༌པ༌བོ༌, ལུང༌སྟོན༌པ༌གུན༌, སུམ༌པ༌བོ༌, ལོབ༌བོན༌གུན༌, ཏེ༌ནེ༌ ཧ༌ལས༌སི༌ ལྟས༌ སྟན༌ཁན༌གུན༌, ཏེ༌ནེ༌ ཕན༌ཅུག༌ ཉན༌ཅེས༌སི༌ ཁྱུད༌ ཡོད༌ཁན༌གུན༌, ཏེ༌ནེ༌ ཅིག༌ དང༌ ཅིག༌ག༌ རོགས༌ ཅོ༌ཁན༌གུན༌, ཏེ༌ནེ༌ ཆོས༌ཚོགས༌ གོ༌སྐྱོང༌ཅེས༌སི༌ ཁྱུད༌ ཡོད༌ཁན༌གུན༌, ཏེ༌ནེ༌ མ༌ཤེས༌ཁན༌ནི༌ སྐད༌གུན༌ནི༌ ནང༌ང༌ སྤེ༌ར༌ ཏང༌ ཉན༌ཅེས༌སི༌ ཁྱུད༌ ཡོད༌ཁན༌གུན༌།
1CO 12:29 ཅི༌ ང༌དང༌ ཚང༌མ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌གུན༌ ཨིན༌ན༌? ཅི༌ ང༌དང༌ ཚང༌མ༌ ལུང༌སྟོན༌པ༌གུན༌ ཨིན༌ན༌? ཅི༌ ང༌དང༌ ཚང༌མ༌ ལོབ༌བོན༌གུན༌ ཨིན༌ན༌? ཅི༌ ང༌དང༌ ཚང༌མ༌ལ༌ ཧ༌ལས༌ཤེས༌སི༌ ལྟས༌ ཅོ༌ཅེས༌སི༌ ཝང༌ ཡོད༌ད༌?
1CO 12:30 ཅི༌ ང༌དང༌ ཚང༌མ༌ལ༌ ཕན༌ཅུག༌ ཉན༌ཅེས༌སི༌ ཁྱུད༌ ཡོད༌ད༌? ཅི༌ ང༌དང༌ ཚང༌མ༌ལ༌ མ༌ཤེས༌ཁན༌ནི༌ སྐད༌གུན༌ནི༌ ནང༌ང༌ སྤེ༌ར༌ ཏང༌ ཉན༌ཅེས༌སི༌ ཁྱུད༌ ཡོད༌ད༌? ཅི༌ ང༌དང༌ ཚང༌མ༌ལ༌ མ༌ཤེས༌ཁན༌ནི༌ སྐད༌དི༌ སྐད༌གྱུར༌ ཅོ༌ཐུབ༌ཅེས༌སི༌ ཁྱུད༌ ཡོད༌ད༌?
1CO 12:31 ཆོས༌ཚོགས༌ལ༌ ཚང༌མའེ༌སང༌ ཕན༌ཐོགས༌ མང༌ང༌ ཏང༌ཉན༌ཅེས༌སི༌ ཁྱུད༌གུན༌ ཁྱོ༌ཞའ༌ ཐོབ༌ཅེས༌སི༌ དོད༌པ༌ བོར༌གོ༌ཤེས༌ ཨིན༌ནོག༌། ཨིན༌ནའང༌ ཏ༌ ངའེ༌ ཁྱོ༌ཞ༌གུན༌ལ༌ མི༌ཚེ༌ ཕུད༌ཚུལ༌ ཚང༌མའེ༌ ནང༌ནེ༌ གྱལ༌ཤོག༌ ཨིན༌ཁན༌བོ༌ སྟན༌ཨིན༌།
1CO 13:1 ཀལ༌ཏེས༌ ངའ༌ ཇིག༌རྟེན༌པ༌ དང༌ ཕོ༌ཉ༌ གུན༌ནི༌ སྐད༌ ཚང༌མའེ༌ ནང༌ང༌ སྤེ༌ར༌ ཏང༌ ཉན༌ཏེའང༌, ངའེ༌ ནང༌ང༌ ཞན༌མའ༌ ཅམས༌པ༌ མེད༌ན༌, ཏེ༌ནེ༌ ང༌ སྐད༌ངན༌ཅན༌ནི༌ དྲེན༌ཇང༌ ཡ༌ ཚིམ༌ཚིམ༌ ཙོགས༌ ཨིན༌ནོག༌།
1CO 13:2 ཀལ༌ཏེས༌ ང༌ ལུང༌སྟན༌ ཤད༌ཅེས༌སི༌ ཁྱུད༌, ཡང༌ དཀོན༌མཆོག༌གི༌ སང༌ཝའེ༌ ཐབས༌ ཚང༌མ༌ གྱུས༌ ཡང༌ ཅི༌ཚང༌མའེ༌ སྐོར༌ལ༌ ཡོན༌ཏན༌, ཡང༌ ངའེ༌ ལག༌ག༌ རི༌ སྐུལ༌ཉན༌ཅེས༌སི༌ ཏད༌པ༌ ཡོད༌ན༌, ཨིན༌ནའང༌ ངའེ༌ ནང༌ང༌ ཞན༌མའ༌ ཅམས༌པ༌ མེད༌ན༌, ང༌ ཅའང༌ མ༌ནོག༌།
1CO 13:3 ཀལ༌ཏེས༌ ང༌ ཡོད༌ཁན༌ ཚང༌མ༌ ཉལ༌བ༌ཅན༌གུན༌ལ༌ མ༌ཚད༌ ང༌རང༌ངི༌ ཟུགས༌པོ༌བོའང༌ སྲོག༌ཆོད༌ལ༌ ཏང༌ན༌, ངའེ༌ ཏེ༌བོའེ༌ཀ༌ ཕོ༌སོ༌ ཅོ༌སྲིད༌ཅེས༌ ཨིན༌ནོག༌, ཨིན༌ནའང༌ ཀལ༌ཏེས༌ ངའེ༌ ནང༌ང༌ ཞན༌མའེ༌ ཕིའ༌ ཅམས༌པ༌ མེད༌ན༌, ང༌ ཅའང༌ ཕན༌ཐོགས༌ མི༌ཐོབ༌།
1CO 13:4 ཅམས༌པ༌ ནི༌ ཟོད༌པ༌ དང༌ ཟང༌པོ༌ ཨིན༌ནོག༌། ཅམས༌པ༌ ནི༌ ཚིག༌ཅེས༌ ཡ༌ རང༌སྟོད༌ ཡ༌ ཕོ༌སོ༌
1CO 13:5 ཡ༌ རྩི༌ཝ༌ མ༌ཅོའ༌ སྤེ༌ར༌ ཏང༌ཅེས༌ གུན༌ མ༌ནོག༌། ཅམས༌པ༌ ནི༌ ཞན༌མའ༌ ཝང༌ ཏངས༌ཏེ༌ རང༌ ཐད༌ཁན༌ ཅོ༌ མི༌ཅུག༌ཅེས༌, སྲོ༌ གྱོགས༌པ༌ མི༌ཡོང༌ཅེས༌, ཞན༌མའེ༌ ནོད༌སྐྱལ༌ཁན༌བོའེ༌ ཐོ༌ ཅོས༌ཏེ༌ མི༌བོར༌ཅེས༌ གུན༌ ཨིན༌ནོག༌།
1CO 13:6 ཅམས༌པ༌ ནི༌ མི༌འོས༌པ༌ ཆའ༌ཁན༌གུན༌ནི༌ཀ༌ སྐྱིད༌པོ༌ མ༌ཅོའ༌, ཀྲང༌པོའ༌ གྱལ༌ཁའ༌ ཐོབ༌ཅེས༌སི༌ཀ༌ སྐྱིད༌པོ༌ ཅོ༌ཅེས༌པོ༌ ཨིན༌ནོག༌།
1CO 13:7 ཅམས༌པ༌ ཅོ༌ཁན༌ནི༌ མ༌ནེ༌ རེ༌ཝ༌ ཕང༌ང༌ མ༌ནོག༌། ཁོའེ༌ ཏུས༌གྱུན༌ དཀོན༌མཆོག༌གི༌ རོགས༌ ཅོའ༌ ཛད༌ཅེས༌སི༌ རེ༌ཝ༌ ཅོའ༌ནོག༌, ཡང༌ ནས༌ལུག༌ ཚང༌མའེ༌ ནང༌ང༌ སྙིང༌རུས༌ བོར༌ར༌ནོག༌།
1CO 13:8 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌, ལུང༌སྟན༌ ཤད༌ཅེས༌ དང༌ མིག༌སལ༌ལི༌ ཡོན༌ཏན༌ ཡོད༌ཁན༌ནི༌ ཁྱུད༌གུན༌, ཞག༌ཤིག༌ ཕན༌མི༌ཐོགས༌ གྱུར༌ཅེས༌ ཨིན༌ནོག༌, ཨིན༌ནའང༌ ཅམས༌པ༌ ཏུས༌གྱུན༌ ལུས༌ས༌ནོག༌།
1CO 13:9 ཏ༌ ང༌དང༌གུན༌ནི༌ ཡོན༌ཏན༌བོ༌ ནི༌ ཚང༌རིག༌ མེད༌པ༌ ཨིན༌ནོག༌, ཡང༌ ཡོང༌ཅེས༌ཅན༌ནི༌ ཏུས༌གུན༌ནི༌ སྐོར༌ལ༌ ལུང༌སྟན༌ ཤད༌ཁན༌བོའང༌ གང༌པོ༌ མན༌པ༌ ཁག༌ཅིག༌ ཨིན༌ནོག༌།
1CO 13:10 ཨིན༌ནའང༌ དཀོན༌མཆོག༌གི༌ ཐབ༌ལྡིངས༌ ཚང༌མ༌ གྲུབ༌བ༌ཅིག༌, ཏེ༌ ཁྱུད༌ ཚང༌མ༌ ཕན༌མི༌ཐོགས༌ཤིག༌ གྱུར༌ཨིན༌།
1CO 13:11 ང༌ ཕྲུ༌གུ༌ ཨིན༌ ཟ༌ནེ༌ སྤེ༌ར༌ ཏང༌ཅེས༌, སམ༌བ༌ དང༌ སམ༌ཚུལ༌ གུན༌ ངའེ༌ ཕྲུ༌གུའི༌ ཚུལ༌ལ༌ ཅོས༌པིན༌། ཨིན༌ནའང༌ ལྡན༌ཏེ༌ སྟིང༌ནེ༌ ངའེ༌ ཕྲུ༌གུའི༌ ཅོ༌ཚུལ༌གུན༌ ཕངས༌པིན༌།
1CO 13:12 ལག༌མོ༌ མེད༌ཁན༌ནི༌ མེ༌ལོང༌ཞིག༌གི༌ ནང༌ང༌ ཟིམ༌ཟིམ༌ ཐོང༌ང༌ ཙོགས༌ལ༌, དག༌ས༌ ང༌དང༌གུན༌ནི༌ སལ༌པོ༌ ཅོས༌ཏེ༌ མ༌ཐོང༌ང༌ ཨིན༌ནོག༌། ཨིན༌ནའང༌ ཏེ༌ཏུས༌ལ༌ ང༌དང༌ང༌ ཅི༌ཚང༌མ༌ སལ༌པོ༌ ཅོས༌ཏེ༌ ཐོང༌ ཐུབ༌ཨིན༌, ཀ༌ཟུག༌ མི༌ཞིག༌ག༌ དུན༌ལ༌ ཐུགས༌ཏེ༌ སྤེ༌ར༌ ཏང༌ངད༌། དག༌ས༌ ང༌ གྱུས༌ཡོད༌ཁན༌ ཚང༌མ༌ ཚང༌རིག༌ མེད༌པ༌ ཨིན༌ནོག༌, ཨིན༌ནའང༌ ཏེ༌ཏུས༌ལ༌ ང༌ ཅི༌ཚང༌མ༌ སལ༌པོ༌ ཅོས༌ཏེ༌ གྱུས༌ཆེན༌, ཀ༌ཟུག༌གི༌ དག༌ས༌ དཀོན༌མཆོག༌གི༌ ང༌ སལ༌པོ༌ ཅོས༌ཏེ༌ ཁྱེན༌ན༌ ཛད༌དད༌།
1CO 13:13 ཏད༌པ༌, རེ༌ཝ༌ དང༌, ཅམས༌པ༌ འི༌ སུམ༌ཀོ༌ ཏུས༌གྱུན༌ ལུས༌ཤེས༌ ཨིན༌ནོག༌, ཡང༌ འི༌གུན༌ནི༌ ནང༌ནེ༌ ཀྲག༌ཤོག༌པོ༌ ནི༌ ཅམས༌པ༌བོ༌ ཨིན༌ནོག༌།
1CO 14:1 ཅེས༌པའེ༌ ལམ༌མི༌ ནང༌ང༌ གྲུལ༌ཨིན༌ཞིག༌, ཐུག༌ཉིད༌དི༌ སལ༌ལ༌ ཛད༌ཁན༌ནི༌ ཁྱུད༌གུན༌ནིའང༌ དོད༌པ༌ བོར༌གོ༌ཤེས༌ ཨིན༌ནོག༌, མིག༌སལ༌ ཅོས༌ཏེ༌ ལུང༌སྟན༌ ཤད༌ཅེས༌སི༌ ཁྱུད༌།
1CO 14:2 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌སི༌ ཁྱུད༌ ཡོད༌ཁན༌གུན༌ནི༌, དཀོན༌མཆོག༌ ཅིག༌པོའ༌ སྤེ༌ར༌ ཏངས༌ཏེ༌ ཨིན༌ནོག༌། ཡང༌ ཐུག༌ཉིད༌ གྱུད༌ཏེ༌ སང༌ཝའེ༌ ནང༌ང༌ སྦས༌ཏེ༌ ཡོད༌ཁན༌གུན༌ ཤད༌ པ༌སང༌, མི༌གུན༌ནི༌ ཁོང༌གུན༌ནི༌ ཟེར༌ཁན༌གུན༌ ཧ༌གོའ༌ མ༌ནོག༌།
1CO 14:3 ཨིན༌ནའང༌ ལུང༌སྟན༌ ཤད༌ཁན༌གུན༌ནི༌ ཞན༌མ༌ ཏད༌པ༌ཅན༌གུན༌ལ༌ ཤེད༌ཅན༌, སྤོས༌པ༌ དང༌ སེམས༌སི༌ ནང༌ང༌ ཞི༌དེ༌ གུན༌ ཁྱོང༌ང༌ནོག༌།
1CO 14:4 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌བོའེ༌ ཁོ༌རང༌ ཅིག༌པོའེ༌ སེམས༌པོ༌ ཤེད༌ཅན༌ ཅོའ༌ནོག༌, ཨིན༌ནའང༌ ལུང༌སྟན༌ ཤད༌ཁན༌བོའེ༌ ཆོས༌ཚོགས༌ གང༌པོ༌ ཤེད༌ཅན༌ ཆའ༌ ཅུག༌ག༌ནོག༌།
1CO 14:5 ཁྱོ༌ཞའ༌ ཚང༌མའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཉན༌ཅེས༌ ཨིན༌ནའང༌ ཏེ༌སང༌ མང༌ང༌ ལུང༌སྟན༌ ཤད༌ཉན༌ཅེས༌ལ༌ ངའེ༌ དོད༌པ༌ ཅོའད༌། ཆོས༌ཚོགས༌ གང༌པོ༌ ཤེད༌ཅན༌ ཅོ༌ཅེས༌སི༌ ཕིའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌བོའེ༌ སང༌ ལུང༌སྟན༌ ཤད༌ཁན༌བོ༌ མང༌ང༌ ཀྲག༌པོ༌ ཨིན༌ནོག༌, ནམ༌ཚོག༌པ༌ མ༌ཤེས༌ཁན༌ནི༌ སྐད༌བོ༌ སུ༌ཞིག༌གི༌ སྐད༌གྱུར༌ ཅོས༌ཏེ༌ མི༌ཤད༌།
1CO 14:6 སྤུན༌གུན༌ ཀལ༌ཏེས༌ ང༌ ཡོངས༌ཏེ༌ ཁྱོ༌ཞའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ན༌, ཁྱོ༌ཞ༌གུན༌ལ༌ ཅི༌ ཕན༌ཐོགས༌ ཐོབ༌ཨིན༌། ཨིན༌ནའང༌ ཀལ༌ཏེས༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ངའ༌ སྔོན༌ ཅུག༌ག༌ ཛད༌ཁན༌གུན༌ ཡ༌ མིག༌སལ༌ལི༌ ཡོན༌ཏན༌ ཡ༌ ལུང༌སྟན༌ ཡ༌ ལབ༌ཞ༌ ཤད༌ན༌, ཏེ༌བོ༌ ཁྱོ༌ཞ༌གུན༌ནི༌ ཏད༌པའེ༌ ཕིའ༌ ཕན༌ཐོགས༌ཅན༌ཞིག༌ ཨིན༌ནོག༌།
1CO 14:7 ཏེན༌ན༌ ཙོགས༌ལ༌ སྲོག༌ མེད༌ཁན༌ནི༌ རོལ༌མོ༌, ལིང༌བུ༌ ཡ༌ ཧརྦ༌ ཟེར༌ཁན༌གུན༌ སལ༌པོ༌ ཅོས༌ཏེ༌ མ༌སྲོག༌ན༌, སུ༌ཞིག༌གིའང༌ ཏེ༌བོའེ༌ ཡངས༌པོ༌ ཧ༌གོ༌ མི༌ཐུབ༌།
1CO 14:8 ཡང༌ ཀལ༌ཏེས༌ ཏུང༌བོ༌ སལ༌པོ༌ ཅོས༌ཏེ༌ མ༌ཕུ༌ན༌ ཏེ༌ནེ༌ མག༌མི༌གུན༌ལ༌ མག༌གི༌ ཕིའ༌ བོད༌ཁན༌བོ༌ ཀ༌ཟུག༌གི༌ ཧ༌གོ༌ཨིན༌?
1CO 14:9 ཏེན༌ན༌ ཙོགས༌ལ༌, ཀལ༌ཏེས༌ ཁྱོ༌ཞ༌གུན༌ནི༌ མི༌གུན༌ལ༌ ཧ༌མི༌གོ༌ཅེས༌སི༌ ཚིགས༌གུན༌ནི༌ ནང༌ང༌ སྤེ༌ར༌ ཏང༌ན༌ ཏེ༌ནེ༌ ཁྱོ༌ཞ༌གུན༌ནི༌ ཟེར༌ཁན༌བོ༌ ཁོང༌གུན༌ནི༌ ཀ༌ཟུག༌གི༌ ཧ༌གོ༌ ཐུབ༌ཨིན༌? ཏེ༌བོ༌ ཁྱོ༌ཞ༌གུན༌ནི༌ ལུངས༌པའེ༌ ནང༌ང༌ སྤེ༌ར༌ ཏང༌ཁན༌ ཙོགས༌ ཨིན༌ནོག༌།
1CO 14:10 ཇིག༌རྟེན༌ནི༌ ནང༌ང༌ སྐད༌ སྣ༌ཚོགས༌ མང༌པོ༌ ཡོད༌ཏེ༌ ཨིན༌ནོག༌, ཡང༌ སྐད༌ ཚང༌མ༌ལ༌ ཏོན༌ཏག༌ ཡོད༌ཏེ༌ ཨིན༌ནོག༌།
1CO 14:11 ཨིན༌ནའང༌ ཀལ༌ཏེས༌ ང༌ སྐད༌ཞིག༌ ཧ༌གོའ༌ མེད༌ན༌, ཏེ༌བོའེ༌ ནང༌ང༌ སྤེ༌ར༌ ཏང༌ཁན༌བོའེ༌ དུན༌ལ༌ ང༌ ཞན༌ཡུལ༌ལི༌ མི༌ཞིག༌ ཙོགས༌, ཡང༌ ཏེ༌ སྤེ༌ར༌ ཏང༌ཁན༌བོ༌ ངའེ༌ དུན༌ལ༌ ཞན༌ཡུལ༌ལི༌ མི༌ཞིག༌ ཙོགས༌ ཨིན༌ནོག༌།
1CO 14:12 ཡང༌ ཁྱོ༌ཞ༌གུན༌ནི༌ ཕིའང༌ ཏེ༌བོ༌ ཙོགས༌ ཨིན༌ནོག༌། ཁྱོ༌ཞ༌གུན༌ལ༌ ཐུག༌ཉིད༌དི༌ སལ༌ཁན༌ནི༌ ཁྱུད༌ གོས༌ཉིན༌ ཡོད༌ པ༌སང༌, ཆོས༌ཚོགས༌ གང༌པོ༌ ཤེད༌ཅན༌ ཅོ༌ཁན༌ནི༌ ཁྱུད༌རིག༌ ཙོལ༌ཤིག༌།
1CO 14:13 ཏེ༌བོའེ༌ཕིའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌གུན༌ནི༌, ཏེ༌ ཟེར༌ཁན༌གུན༌ སྐད༌གྱུར༌ ཅོ༌ཅེས༌སི༌ ཁྱུད༌དི༌ ཕིའ༌ མོས༌ལམ༌ ཕུལ༌གོ༌ཤེས༌ ཨིན༌ནོག༌།
1CO 14:14 ཀལ༌ཏེས༌ ངའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ མོས༌ལམ༌ ཕུལ༌ན༌, མོས༌ལམ༌བོ༌ ངའེ༌ སེམས༌ཉིད༌དི༌ ཕུལ༌ཏེ༌ ཨིན༌ནོག༌, ཨིན༌ནའང༌ ངའེ༌ ཟེར༌ཁན༌བོ༌ ང༌ ཧ༌གོའ༌ མ༌ནོག༌།
1CO 14:15 ཏ༌ ཏེ༌ནེ༌ ངའེ༌ ཅི༌ ཅོ༌? ངའེ༌ སེམས༌ཉིད༌ དང༌ ང༌ ཧ༌གོ༌ཁན༌ནི༌ ཚིགས༌ ཉིས༌ཀོ༌ ཉམ༌པོ༌ མོས༌ལམ༌ ཕུལ༌ཨིན༌། ངའེ༌ སེམས༌ཉིད༌ ཉམ༌པོ༌ མ༌ཚད༌ ང༌ ཧ༌གོ༌ཁན༌ནི༌ ཚིགས༌གུན༌ནི༌ ནང༌ངའང༌ དཀོན༌མཆོག༌ག༌ སྟོད༌པའེ༌ ལུ༌ ཏང༌ཨིན༌།
1CO 14:16 ཀལ༌ཏེས༌ ཁྱོ༌རང༌ངི༌ དཀོན༌མཆོག༌ག༌ སེམས༌ཉིད༌ ཅིག༌པོ༌ནེ༌ སྟོད༌པ༌ ཕུལ༌ན༌, ཏེ༌ནེ༌ ཁྱོ༌རང༌ངི༌ སྐད༌ ཧ༌མ༌གོ༌ཁན༌གུན༌ ཏེ༌ནང༌ང༌ ཀ༌ཟུག༌གི༌ དྲེས༌ཨིན༌, ཅིའ༌ཟེར༌ན༌ ཁོང༌གུན༌ལ༌ ཁྱོ༌རང༌ངི༌ ཟེར༌ཁན༌གུན༌ ཧ༌གོའ༌ མ༌ནོག༌།
1CO 14:17 ཏན༌ཏན༌ལ༌ ཁྱོ༌རང༌ངི༌ ཐུག༌རྗེ༌ཆེ༌ ཕུལ༌ལ༌ནོག༌, ཨིན༌ནའང༌ ཏེ༌བོའེ༌, ཉན༌ཁན༌གུན༌ནི༌ སེམས༌པོ༌ ཤེད༌ཅན༌ ཅོའ༌ མ༌ནོག༌།
1CO 14:18 ངའ༌ ཁྱོ༌ཞ༌གུན༌ནི༌ སང༌ མང༌ང༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ ཉན༌ཅེས༌སི༌ ཕིའ༌ ངའེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
1CO 14:19 ཨིན༌ནའང༌ ཆོས༌ཚོགས༌སི༌ ནང༌ང༌, ཞན༌མ༌གུན༌ལ༌ ལབ༌ཞ༌ ཏང༌ཅེས༌སི༌ ཕིའ༌ ངའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ ཚིགས༌ སྟོང༌ཅུ༌ ཤད༌དི༌ སང༌ ཧ༌གོ༌ཅེས༌ཅན༌ནི༌ ཚིགས༌ ལྔ༌ ཤད༌ཅེས༌རག༌།
1CO 14:20 སྤུན༌གུན༌ ཏེ༌གུན༌ ཧ༌གོ༌ཅེས༌སི༌ ནང༌ང༌ ཁྱོ༌ཞའེ༌ སམ༌བ༌ ཕྲུ༌གུ༌ ཙོགས༌ ཡོང༌ མ༌གོས༌། ཁྱོ༌ཞའ༌ ངན༌པ༌ ཅོ༌ཅེས༌སི༌ ནང༌ང༌ སྐྱོན༌མེད༌ཁན༌ནི༌ ཕྲུ༌གུ༌ ཆུ༌ངུན༌, ཨིན༌ནའང༌ ཏེ༌ ལབ༌ཞ༌གུན༌ ཧ༌གོ༌ཅེས༌སི༌ ནང༌ང༌ ལྡན༌ཁན༌ ཙོགས༌ གྱུར༌ཤིག༌།
1CO 14:21 དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, “ངའེ༌ ང༌རང༌ངི༌ མི༌གུན༌ལ༌ སྐད༌རིག༌ སོ༌སོ༌ དང༌ ཞན༌ཡུལ༌ལི༌ མི༌གུན༌ གྱུད༌ཏེ༌ སྤེ༌ར༌ ཏང༌ཨིན༌, ཏེ༌ནེའང༌ ཁོང༌གུན༌ནི༌ ངའེ༌ ཁའ༌ མི༌ཉན༌།”
1CO 14:22 མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌པོ༌ ནི༌, ཏད༌པ༌ཅན༌ མན༌པ༌, ཏད༌པ༌ མེད༌ཁན༌ གུན༌ནི༌ ཕིའ༌ སྟགས༌ཤིག༌ ཨིན༌ནོག༌། ཨིན༌ནའང༌ ལུང༌སྟན༌ ནི༌, ཏད༌པ༌ མེད༌ཁན༌ མན༌པ༌, ཏད༌པ༌ཅན༌ གུན༌ནི༌ ཕན༌ཐོགས༌སི༌ ཕིའ༌ ཨིན༌ནོག༌།
1CO 14:23 ཀལ༌ཏེས༌ ཆོས༌ཚོགས༌ གང༌པོ༌ ཛོམས༌ཏེ༌ ཡོད༌ཏུས༌, ཏད༌པ༌ མེད༌ཁན༌, ཡ༌ ཏེ༌ཙོགས༌ ཁྱུད༌དི༌ སྐོར༌ལ༌ ཧ༌མ༌གོ༌ཁན༌ རིག༌ ཡོངས༌ཏེ༌ ཁྱོ༌ཞའ༌ ཚང༌མའེ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཨིན༌ ཚོར༌ན༌ ཁོང༌གུན༌ནི༌ ཁྱོ༌ཞ༌གུན༌ སྙོས༌ཏེ༌ ཨིན༌ནོག༌ ཟེར༌ར༌ མ༌ནོག༌ག༌?
1CO 14:24 ཨིན༌ནའང༌ ཀལ༌ཏེས༌ ཁྱོ༌ཞའ༌ ཚང༌མའེ༌ ཛོམས༌ཏེ༌ ལུང༌སྟན༌ ཤད༌ཨིན༌ ཡོད༌ ཏུས༌, ཏད༌པ༌ མེད༌ཁན༌, ཡ༌ ཏེ༌ཙོགས༌ ཁྱུད༌དི༌ སྐོར༌ལ༌ ཧ༌མ༌གོ༌ཁན༌ནི༌ མི༌རིག༌ ཡོང༌ན༌, ཁྱོ༌ཞའེ༌ ཤད༌ཁན༌གུན༌ གྱུད༌ཏེ༌ ཁོང༌གུན༌ སྡིག༌ཅན༌ ཨིན༌ཁན༌ ཡང༌ དཀོན༌མཆོག༌གི༌ ཁྲིམས༌ཅད༌ ཛད༌ཅེས༌པོ༌ ཧ༌གོ༌ཐུབ༌བ༌ནོག༌།
1CO 14:25 ཁོང༌གུན༌ནི༌ སྙིང༌ངི༌ ནང༌ང༌ སྦས༌ཏེ༌ ཡོད༌ཁན༌གུན༌ སྔོན༌ པ༌སང༌ ཁོང༌གུན༌ནི༌ པིག༌དོང༌ ཙུགས༌ཏེ༌ དཀོན༌མཆོག༌ག༌ ཅོལ༌ཏེ༌ ཟེར༌ཨིན༌, “དཀོན༌མཆོག༌ ཁྱོ༌ཞ༌གུན༌ནི༌ ཕྲོའ༌ དེན༌བའ༌ ཞུགས༌ཏེ༌ དུག༌།”
1CO 14:26 འོ༌ན༌ ངའེ༌ སྤུན༌གུན༌ དོར༌ལྡུས༌ཏེ༌, ཁྱོ༌ཞ༌གུན༌ ཉམ༌པོ༌ ཛོམ༌ ཟ༌ནེ༌ ཚིར༌ ནང༌ཞིན༌ལ༌, ཅིག༌གི༌ ཆོས༌ལུ༌ ཏང༌ཅེས༌, ཅིག༌གི༌ ལབ༌ཞ༌ ཏང༌ཅེས༌, ཅིག༌གི༌ ཁྱོ༌ཞ༌གུན༌ལ༌ དཀོན༌མཆོག༌གི༌ སྔོན༌ ཅུག༌ག༌ ཛད༌ཁན༌གུན༌ནི༌ སྐོར༌ལ༌ ཤད༌ཅེས༌, ཅིག༌གི༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཅེས༌, ཡང༌ཅིག༌གི༌ ཁོའེ༌ ཟེར༌ཁན༌གུན༌ སྐད༌གྱུར༌ ཅོ༌གོ༌ཤེས༌ ཨིན༌ནོག༌། འི༌ ཚང༌མ༌ ཁྱོ༌ཞ༌གུན༌ ཤེད༌ཅན༌ ཅོ༌ཅེས༌སི༌ ཕིའ༌ ཅོས༌ཏེ༌ ཨིན༌ནོག༌།
1CO 14:27 མི༌ ཉིས༌ ཡ༌ སུམ༌མི༌ མ༌ནེ༌, མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ མ༌གོས༌། ཁོང༌གུན༌ནི༌ ཅིག༌གི༌ སྟིང༌ནེ༌ ཅིག༌ ཚིར༌ཀ༌ ཅོས༌ཏེ༌ སྤེ༌ར༌ ཏང༌གོས༌, ཡང༌ཅིག༌གི༌ ཁོང༌གུན༌ནི༌ ཟེར༌ཁན༌གུན༌ སྐད༌གྱུར༌ ཅོ༌གོས༌།
1CO 14:28 ཨིན༌ནའང༌ ཀལ༌ཏེས༌ སྐད༌གྱུར༌ཁན༌ སུ༌ཞིག༌གའང༌ མེད༌ན༌, ཏེ༌ནེ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ཁན༌བོའེ༌, ཆོས༌ཚོགས༌སི༌ ནང༌ང༌ ཅུབ༌ཅད༌ཏེ༌ དུགས༌ཏེ༌ སང༌ཝའེ༌ ཐོག༌ནེ༌ ཁོ༌རང༌ དང༌ དཀོན༌མཆོག༌ག༌ སྤེ༌ར༌ ཏང༌གོས༌།
1CO 14:29 མི༌ ཉིས༌ ཡ༌ སུམ༌ཞིག༌ག༌ ལུང༌སྟན༌ ཤད༌ཅུག༌ཤིག༌, ཡང༌ ཞན༌མ༌གུན༌ལ༌ ཏེ༌གུན༌ནི༌ ཟེར༌ཁན༌བོ༌ དེན༌བའ༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ག༌ ཡ༌ མ༌ནོག༌, ཐག༌ཅད༌ ཅུག༌ཤིག༌།
1CO 14:30 ཨིན༌ནའང༌ ཀལ༌ཏེས༌ སུ༌ཞིག༌གི༌ ལུང༌སྟན༌ ཤད༌དི༌ ཏུས༌ལ༌, ཞན༌མི༌ཞིག༌ག༌ གཙོ༌བོའེ༌ ཆོགས༌ནེ༌ ལོན༌ སོ༌མ༌ཞིག༌ ཐོབ༌ན༌, ཏེ༌ནེ༌ ལུང༌སྟན༌ ཏང༌ཨིན༌ ཡོད༌ཁན༌ནི༌ མི༌བོའེ༌ ལུང༌སྟན༌ ཤད༌ཅེས༌པོ༌ སྒག༌གོས༌།
1CO 14:31 ཏེ༌ཟུག༌ ཅོ༌ཅེས༌པོའེ༌ ལུང༌སྟོན༌པ༌ ཚང༌མ༌ལ༌ ལུང༌སྟན༌ ཤད༌ཅེས༌སི༌ སྐབས༌ ཐོབས༌ཏེ༌ ཆོས༌ཚོགས༌ གང༌པོའ༌ ལོབ༌ཤེས༌ དང༌ སྤོས༌པ༌ སྐྱེ༌ཡིན༌།
1CO 14:32 ཨིད༌ཏུ༌ བོར༌ཤིག༌, ལུང༌སྟན༌ ཤད༌ཁན༌གུན༌ལ༌ ཁོང༌རང༌གུན༌ནི༌ སེམས༌ཉིད༌གུན༌ ཅུན༌ཏེ༌ བོར༌ ཉན༌ན༌ནོག༌།
1CO 14:33 ཅིའ༌ཟེར༌ན༌ དཀོན༌མཆོག༌ ནི༌, ཚིར༌ཀ༌ མེད༌ཁན༌ མན༌པ༌, ཞི༌དེའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌, ཀ༌ཟུག༌ ཞན༌ ཆོས༌ཚོགས༌ ཚང༌མ༌ ཛོམ༌ ཟ༌ནེ༌ ཡོད༌ཏེ༌ ཨིན༌ནོག༌།
1CO 14:34 ཆོས༌ཚོགས༌སི༌ ནང༌ང༌ ཛོམ༌ ཟ༌ནེ༌, བུ༌མོ༌གུན༌ནི༌ སྤེ༌ར༌ མ༌ཏང༌ང༌ དུག༌གོ༌ཤེས༌ ཨིན༌ནོག༌། ཁོང༌གུན༌ནི༌ སྤེ༌ར༌ ཏང༌ཅེས༌པོ༌ འོས༌པ༌ མ༌ནོག༌, ཀ༌ཟུག༌ ལུང༌སྟོན༌པ༌ མོ༌ཟེས༌སི༌ ཁྲིམས༌སི༌ ནང༌ང༌ མོལ༌ཁན༌ ནང༌ཞིན༌, ཁོང༌གུན༌ རང༌ངི༌ མག༌པ༌གུན༌ནི༌ ཝང༌ངི༌ ཡོག༌ག༌ དུག༌གོ༌ཤེས༌ ཨིན༌ནོག༌།
1CO 14:35 ཀལ༌ཏེས༌ ཁོང༌གུན༌ལ༌ ཏྲི༌ཝ༌ རིག༌ ཡོད༌ན༌, ཁང༌པའ༌ ཁོ༌རང༌གུན༌ནི༌ མག༌པ༌གུན༌ལ༌ ཏྲི༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ཆོས༌ཚོགས༌ ཛོམས༌ཏེ༌ ཡོད༌སའ༌ བུ༌མོ༌གུན༌ནི༌ སྤེ༌ར༌ ཏང༌ཅེས༌པོ༌ ཁྲེལ༌བ༌ཞིག༌ ཨིན༌ནོག༌།
1CO 14:36 ཅི༌ དཀོན༌མཆོག༌གི༌ བཀའ༌བོ༌, ཁྱོ༌ཞའ༌ ཀོ༌རིན༌ཐི༌པ༌གུན༌ནི༌ ཀ༌ནེ༌ གོ༌མ༌རང༌ ཇུངས༌ཏེ༌ ཨིན༌ནོག༌ སམ༌མ༌ རག༌ག༌? ཅི༌ ཁྱོ༌ཞ༌རང༌ ཅིག༌པོའ༌, ཏེ༌བོ༌ སལ༌ལ༌ ཛདས༌ས༌?
1CO 14:37 ཀལ༌ཏེས༌ སུ༌ཞིག༌གི༌ ཁོ༌རང༌ ལུང༌སྟོན༌པ༌ ཡ༌ སེམས༌ཉིད༌དི༌ ཁྱུད༌ ཡོད༌ཁན༌ཞིག༌ ཨིན༌ སམ༌མད༌ན༌, ཏེ༌ནེ༌ ངའེ༌ ཟེར༌ཁན༌གུན༌ གཙོ༌བོའེ༌ བཀའ༌ སལ༌ཏེ༌ ཨིན༌ཁན༌བོ༌ ཁྱོ༌རང༌ང༌ ཧ༌གོ༌གོས༌།
1CO 14:38 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཏེ༌བོའ༌ སྣང༌མེད༌ ཅོ༌ན༌, ཏེ༌ནེ༌ དཀོན༌མཆོག༌གི༌ ཁྱོ༌ཞ༌གུན༌ལ༌ སྣང༌མེད༌ ཅོའ༌ ཛད༌ཨིན༌།
1CO 14:39 ཏེ༌བོའེ༌ཕིའ༌ ངའེ༌ སྤུན༌གུན༌ ལུང༌སྟན༌ ཤད༌ཅེས༌ལ༌ རིངས༌ཤིག༌, ཡང༌ ཞན༌མའ༌ མ༌ཤེས༌ཁན༌ནི༌ སྐད༌དི༌ ནང༌ང༌ སྤེ༌ར༌ ཏང༌ མ༌གོས༌ མ༌ཟེར༌ཤིག༌།
1CO 14:40 ཨིན༌ནའང༌ ཅི༌ཚང༌མ༌ ཚིར༌ཀ༌ ནང༌ཞིན༌ལ༌ ཅོ༌ཅེས༌སི༌ ནང༌ང༌ ཏན༌ཏན༌ ཅོ༌ཤིག༌།
1CO 15:1 ངའེ༌ སྤུན༌གུན༌ ཏ༌ ང༌ ཁྱོ༌ཞ༌གུན༌ལ༌ ངའེ༌ སྔུན༌ལ༌ ཤད༌ཁན༌ནི༌ གའ༌མོའེ༌ ནས༌ཚུལ༌ལི༌ སྐོར༌ལ༌ ཨིད༌ཏུ༌ སྐུལ༌ཅུག༌ཤིག༌། ཏེ༌ ཟ༌ནེ༌ ཁྱོ༌ཞ༌གུན༌ནི༌ ཏེ༌ ནས༌ཚུལ༌བོའ༌ གའ༌སུས༌ ཞུས༌ཏེ༌ ཨིན༌པིན༌, ཡང༌ ཏ༌རུང༌ངའང༌ ཏེ༌བོའེ༌ ནང༌ང༌ སྟན༌པོ༌ ཨིན༌ནོག༌།
1CO 15:2 ཀལ༌ཏེས༌ ཁྱོ༌ཞ༌གུན༌ནི༌ ངའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌ ཨིད༌ཤེས༌ ཅོས༌ཁན༌བོའེ༌ ནང༌ང༌ སྟན༌པོ༌ དུག༌ན༌, ཏེ༌ནེ༌ ཏེ༌ ལོན༌བོའེ༌ ཁྱོ༌ཞ༌གུན༌ སྐྱོབ༌ཨིན༌, ཏེ༌ མ༌ནེ༌ ཁྱོ༌ཞ༌གུན༌ནི༌ ཅའང༌ ཕན༌ཐོགས༌ མེད༌ཁན༌ཞིག༌གི༌ ནང༌ང༌ ཏད༌པ༌ ཅོས༌ཏེ༌ ཨིན༌ནོག༌།
1CO 15:3 ངའེ༌ ལག༌ག༌ སྟད༌ད༌ ཛད༌ཁན༌ ཚང༌མའེ༌སང༌ ཁག༌ཅན༌བོ༌, ངའེ༌ ཁྱོ༌ཞ༌གུན༌ལ༌ ཏངས༌ཏེ༌ ཨིན༌པིན༌, ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཡོད༌ཁན༌ ནང༌ཞིན༌ལ༌ ཏེ༌བོ༌ ནི༌ མ༌ཤི༌ཀ༌ ང༌དང༌གུན༌ནི༌ སྡིག༌པའེ༌ ཕིའ༌ ཀྲོངས༌ས༌ ཛདས༌།
1CO 15:4 ཡང༌ ཏམ༌པའེ༌ སུང༌རབས༌ ནང༌ཞིན༌ ཁོང༌ སྤུར༌ཁང༌ངི༌ ནང༌ང༌ བོརས༌ ཡང༌ ཞག༌མ༌ སུམ༌པའེ༌ ཞག༌ག༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌།
1CO 15:5 ཁོང༌ ཏང༌པོ༌ པི༌ཏྲར༌རི༌, ཏེ༌ནེ༌ མ༌ཤི༌ཀའེ༌ སྐུ༌ཚབས༌ རྕུག༌ཉིས༌པོའེ༌ ཇལ༌ཏེ༌ ཨིན༌པིན༌།
1CO 15:6 ཏེ༌བོའེ༌ སྟིང༌ནེ༌ ཏུས༌ཅིག༌གི༌ཀ༌ ཁོང༌རང༌ངི༌ ལོབ༌ཕྲུགས༌ 500 སང༌ མང༌ང༌ཞིག༌གི༌ ཇལས༌, ཏེ༌གུན༌ནི༌ ཕྲོ༌ནེ༌ ཁ༌ཅིག༌ ཀྲོངས༌ ཚར༌ཏེ༌ ཨིན༌ནའང༌ མང༌ཆེའ༌ཞིག༌ ཏ༌རུང༌ངའང༌ སོན༌ཏེའ༌ ཡོད༌ཏེ༌ ཨིན༌ནོག༌།
1CO 15:7 ཏེ༌ནེ༌ ཁོང༌ ཁོང༌རང༌ངི༌ ནོ༌ ཡ༌ཀོབ༌, ཡང༌ སྟིང༌ནེ༌ སྐུ༌ཚབས༌ ཚང༌མའེ༌ ཇལ༌ཏེ༌ ཨིན༌པིན༌།
1CO 15:8 ཨིན༌ནའང༌ སྟིང༌ཇུག༌ག༌ སེམས༌ཉིད༌དི༌ ནང༌ང༌ ཡམ༌ཚན༌ ཚུལ༌ལ༌ སྐྱེས༌ཁན༌ ངེའང༌ ཁོང༌ ཇལ༌།
1CO 15:9 ང༌ སྐུ༌ཚབས༌ ཚང༌མའེ༌ ནང༌ནེ༌ ཐུ༌ཤོག༌པོ༌ ཨིན༌། ངའེ༌ དཀོན༌མཆོག༌གི༌ ཆོས༌ཚོགས༌གུན༌ལ༌ ནགས༌ སྟན༌ པ༌སང༌, ང༌ སྐུ༌ཚབས༌ ཟེར༌ཅེས༌སི༌ འོས༌པའང༌ མེད༌།
1CO 15:10 ཨིན༌ནའང༌ དག༌ས༌ ང༌ ཡོད༌ཁན༌བོ༌ ནི༌, དཀོན༌མཆོག༌གི༌ ངའེ༌ཀ༌ མིག༌སལ༌ལི༌ ཐུག༌རྗེ༌གུན༌ ཕོའ༌ ཛད༌ཅེས༌པོའེ༌ ཨིན༌, ཡང༌ ཏེ༌བོ༌ གོད༌ལ༌ སོང༌ཏེ༌ མ༌ནོག༌། ཅིའ༌ཟེར༌ན༌ ངའེ༌ ཞན༌ཡང༌ སྐུ༌ཚབས༌གུན༌ནི༌ སང༌ རྩོན༌གྲུས༌ མང༌ང༌ ཅོས༌ཏེ༌ ལས༌ ཅོའད༌། ཨིན༌ནའང༌ ཏེ༌བོ༌ ང༌ མན༌པ༌, དཀོན༌མཆོག༌གི༌ ཁོང༌རང༌ངི༌ ཐུག༌རྗེ༌ གྱུད༌ཏེ༌, ངའེ༌ ནང༌ང༌ ཆག༌ལས༌ ཛད༌ཏེ༌ ཨིན༌ནོག༌།
1CO 15:11 ངའེ༌ ཆོས༌ཤད༌དད༌གྲོ༌ ཡ༌ ཁོང༌གུན༌ནི༌, ཅའང༌ ཁྱད༌ མེད༌པ༌ ཨིན༌ནོག༌, ཅིའ༌ཟེར༌ན༌ ང༌ཞའ༌ ཚང༌མའེ༌ ཆོས༌ ཙོགས༌ ཤད༌ད༌ནོག༌, ཀ༌བོའ༌ ཁྱོ༌ཞ༌གུན༌ནི༌ ཏད༌པ༌ ཅོས༌ཏེ༌ ཨིན༌ནོག༌།
1CO 15:12 ཨིན༌ནའང༌ ང༌ འི༌བོ༌ ཤོད༌ཤིག༌, ང༌ཞ༌གུན༌ནི༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཏེ༌ ཨིན༌ནོག༌ ཟེར༌ཏེའང༌, ཁྱོ༌ཞའ༌ ཁ༌ཅིག༌གི༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌ཀྱག༌ ཅིའ༌ ཟེར༌རད༌?
1CO 15:13 ཀལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌པིན༌ན༌, ཏེ༌ནེ༌ མ༌ཤི༌ཀའང༌ སོན༌ཏེའ༌ ཞངས༌ཏེ༌ མེད༌གྲོ༌།
1CO 15:14 ཡང༌ ཀལ༌ཏེས༌ མ༌ཤི༌ཀ༌ མ༌ཞངས༌པིན༌ན༌, ཏེ༌ནེ༌ ང༌ཞ༌གུན༌ནི༌ ཆོས༌ཤད༌ཅེས༌ ཚང༌མ༌ ཕན༌མི༌ཐོགས༌ ཨིན༌ནོག༌, ཡང༌ ཁྱོ༌ཞ༌གུན༌ནི༌ ཏད༌པ༌བོའང༌།
1CO 15:15 མ༌ཚད༌ ང༌ཞའ༌ སྐུ༌ཚབས༌གུན༌ནི༌ དཀོན༌མཆོག༌གི༌ སྤང༌པོ༌ ཟུན༌བ༌ ཏང༌ཏེ༌ ཨིན༌ནོག༌, ཅིའ༌ཟེར༌ན༌ ང༌ཞ༌གུན༌ནི༌ དཀོན༌མཆོག༌གི༌ མ༌ཤི༌ཀ༌ སྤུར༌ཁང༌ངི༌ ནང༌ནེ༌ སོན༌ཏེའ༌ ལང༌ང༌ ཛད༌ཁན༌བོའེ༌ སྤང༌པོ༌ ཏང༌ང༌ནོག༌། ཨིན༌ནའང༌ ཀལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལངས༌ཤེས༌པོ༌ དེན༌བ༌ མན༌པིན༌ན༌, ཏེ༌ནེ༌ དཀོན༌མཆོག༌གི༌ མ༌ཤི༌ཀ༌ སོན༌ཏེའ༌ ལང༌ང༌ མ༌ཛད༌ད༌ ཨིན༌ནོག༌།
1CO 15:16 ཡང༌ ཀལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌ན༌ ཏེ༌ནེ༌ མ༌ཤི༌ཀའང༌ སོན༌ཏེའ༌ མ༌ཞངས༌ས༌ ཨིན༌ནོག༌།
1CO 15:17 ཡང༌ ཀལ༌ཏེས༌ མ༌ཤི༌ཀ༌ སོན༌ཏེའ༌ མ༌ཞངས༌ས༌ ཡོད༌ན༌, ཏེ༌ནེ༌ ཁྱོ༌ཞ༌གུན༌ནི༌ ཏད༌པ༌གུན༌ ཕན༌མི༌ཐོགས༌ཤིག༌ ཨིན༌ནོག༌, ཡང༌ ཁྱོ༌ཞ༌གུན༌ ཏ༌རུང༌ངའང༌ ཁྱོ༌ཞའེ༌ སྡིག༌པའེ༌ ནང༌ང༌ ནོངས༌ཅན༌ ལུས༌ཏེ༌ ཨིན༌ནོག༌།
1CO 15:18 ཏེ༌ནེ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཏེ༌ ཤི༌ཁན༌ ཚང༌མའང༌ ཉལ༌ཝའེ༌ ནང༌ང༌ ལེབས༌ཏེ༌ ཨིན༌ནོག༌།
1CO 15:19 ཡང༌ འི༌ མི༌ཚེ༌ ནང༌ང༌ ཀལ༌ཏེས༌ ང༌དང༌གུན༌ནི༌ མ༌ཤི༌ཀའེ༌ ནང༌ང༌ སོན༌ཏེའ༌ ལང༌ཅེས༌སི༌ རེ༌ཝ༌བོ༌ ཏོན༌མེད༌ ཨིན༌ན༌ ཏེ༌ནེ༌ ང༌དང༌གུན༌ ཚང༌མའེ༌སང༌ སྡིག༌པ༌རིག༌ ཨིན༌ནོག༌།
1CO 15:20 ཨིན༌ནའང༌ ངོས༌པོའ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ས༌ ཛད༌ཏེ༌ ཨིན༌ནོག༌། ཁོང༌ ནི༌ ཤི༌ཁན༌ ཚང༌མའེ༌ སྟོན༌ཐོག༌ ཀྲག༌པོའེ༌ བྲས༌བུ༌ ཏང༌པོ༌བོ༌ ཨིན༌ནོག༌།
1CO 15:21 ཀ༌ཟུག༌གི༌ ཇིག༌རྟེན༌ནི༌ ནང༌ང༌ ཤི༌ཅེས༌པོ༌ ཨ༌དམ༌ མི༌བོ༌ གྱུད༌ཏེ༌ ཡོང༌ང༌ ཙོགས༌ལ༌ ཏ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལངས༌ཤེས༌པོ༌ མ༌ཤི༌ཀ༌ མི༌བོ༌ གྱུད༌ཏེ༌ ཇུངས༌ཏེ༌ ཨིན༌ནོག༌།
1CO 15:22 ང༌དང༌ ཚང༌མ༌ ཨ༌དམ༌མི༌ པུར༌གྱུད༌གུན༌ ཨིན༌ པ༌སང༌, ཤིའ༌ནོག༌། ཏེན༌ན༌ ཙོགས༌ལ༌ མ༌ཤི༌ཀའེ༌ ཨིན༌ཁན༌ ཚང༌མ༌ལ༌ མི༌ཚེ༌ སོ༌མ༌ཞིག༌ སལ༌ལ༌ ཛད༌ད༌ནོག༌།
1CO 15:23 ཨིན༌ནའང༌ ཤི༌ཏེ༌ སྟིང༌ནེ༌ ལངས༌ཅེས༌པོའ༌ ཚིར༌ཀ༌ཞིག༌ ཡོད༌ཏེ༌ ཨིན༌ནོག༌། སྟོན༌ཐོག༌གི༌ གོ༌མའེ༌ བྲས༌བུ༌ མ༌ཤི༌ཀ༌, ལོགས༌ཏེ༌ སྐྱོད༌ ཟ༌ནེ༌, ཁོང༌ངི༌ ཨིན༌ཁན༌ ཚང༌མ༌ སོན༌ཏེའ༌ ལང༌ང༌ ཛད༌ཨིན༌།
1CO 15:24 ཏེ༌བོའེ༌ སྟིང༌ནེ༌ ཐའ༌མ༌བོ༌ ལེབ༌ཨིན༌, ཁོང༌ངི༌ ཝང༌སྲུལ༌པ༌, ཝང༌ དང༌ ཤེད༌ ཡོད༌ཁན༌ ཚང༌མ༌ མེད༌ཁན༌ ཅོའ༌ ཛད༌ཏེ༌ གྱལ༌སྲིད༌པོ༌ ཡབ༌ དཀོན༌མཆོག༌གི༌ ཆག༌ག༌ ཕུལ༌ཨིན༌།
1CO 15:25 དཀོན༌མཆོག༌གི༌ ཁོང༌རང༌ངི༌ གྲ༌འོ༌ ཚང༌མ༌, མ༌ཤི༌ཀའེ༌ ཞབས༌སི༌ ཡོག༌ག༌ ཁྱོང༌ཁྱོང༌ ཚོག༌པ༌ལ༌, ཁོང༌ངི༌ ཝང༌སྲུལ༌ལ༌ ཛད༌གོས༌།
1CO 15:26 ཡང༌ ཤི༌ཅེས༌ ནི༌ སྟིང༌ཇུག༌གི༌ གྲ༌འོ༌ མེད༌ཁན༌ ཅོ༌ཅེས༌ཅན༌བོ༌ ཨིན༌ནོག༌།
1CO 15:27 ཏམ༌པའེ༌ སུང༌རབས༌སི༌ ནང༌ང༌ མ༌ཤི༌ཀའེ༌ སྐོར༌ལ༌ མོལ༌ཏེ༌ ཨིན༌ནོག༌ “དཀོན༌མཆོག༌གི༌ ཅི༌ཚང༌མ༌ ཁོང༌ངི༌ ཝང༌ངི༌ ཡོག༌ག༌ བོར༌ར༌ ཛདས༌” འོ༌ན༌ “ཅི༌ཚང༌མ༌ ཁོང༌ངི༌ ཝང༌ངི༌ ཡོག༌ག༌ བོར༌ར༌ ཛདས༌” མོལ༌ལ༌ ཛད༌ ཟ༌ནེ༌, མ༌ཤི༌ཀའ༌ ཝང༌ཆ༌ སལ༌ལ༌ ཛད༌ཁན༌ དཀོན༌མཆོག༌ ཁོང༌རང༌ ཏེ༌བོའེ༌ ནང༌ང༌ ཐེའ༌ མ༌ཛད༌ད༌ ཨིན༌ནོག༌།
1CO 15:28 ཏེ༌ནེ༌ ཁོང༌ངི༌ ཅི༌ཚང༌མ༌ མ༌ཤི༌ཀའེ༌ ཝང༌ངི༌ ཡོག༌ག༌ ཁྱོང༌ ཚར༌ར༌ཅིག༌, མ༌ཤི༌ཀའེ༌ ཁོང༌རང༌ དཀོན༌མཆོག༌གི༌ ཝང༌ངི༌ ཡོག༌ག༌ བོར༌ར༌ ཛད༌ཨིན༌, ཏེ༌ནེ༌ དཀོན༌མཆོག༌གི༌ ཀ༌རུང༌ས༌ ཅི༌ཚང༌མའེ༌ཀ༌ ཝང༌སྲུལ༌ལ༌ ཛད༌ཨིན༌།
1CO 15:29 ཀལ༌ཏེས༌ ཤི༌ཁན༌ཞིག༌ སོན༌ཏེའ༌ མ༌ལང༌ན༌, ཏེ༌ནེ༌ ཁ༌ཅིག༌གི༌, ཤི༌ཁན༌གུན༌ནི༌ ཚབས༌ལ༌ ཁྲུས༌ལེན༌ཅེས༌པོའ༌ ཅི༌ གྱུན༌ཚན༌ ཡོད༌ཀྱག༌། ཀལ༌ཏེས༌ ཤི༌ཁན༌གུན༌ སོན༌ཏེའ༌ ལང༌ང༌ མེད༌ན༌, ཁོང༌གུན༌ནི༌ ཏེ༌ཟུག༌ ཅི༌ཕིའ༌ ཅོས༌ཏེ༌ ཨིན༌ནོག༌།
1CO 15:30 ཡང༌ སོན༌ཏེའ༌ ལང༌ཅེས༌པོ༌ མེད༌པིན༌ན༌, ཏེ༌ནེ༌ ཅི༌ཕིའ༌ ང༌ཞའེ༌ ང༌ཞ༌རང༌ངི༌ མི༌ཚེ༌ ཇིགས༌པའེ༌ ནང༌ང༌ ཏུས༌གྱུན༌ བོར༌ར༌ནོག༌།
1CO 15:31 སྤུན༌གུན༌ ཏན༌ཏན༌ལ༌ ངའེ༌ ཞག༌ཏང༌ ཤི༌ཅེས༌སི༌ ཇིགས༌པ༌གུན༌ དོང༌ལེན༌ ཅོའད༌། ཡང༌ ང༌དང༌ངི༌ གཙོ༌བོ༌ མ༌ཤི༌ཀ༌ ཡེ༌ཤུའི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཟང༌པོ༌ ཅོའ༌ ཛད༌ཁན༌བོའེ༌ ནང༌ང༌ ངའེ༌ ཕོ༌སོ༌ ཚོར༌ཁན༌བོའང༌, དེན༌བ༌ ཨིན༌ནོག༌།
1CO 15:32 ཡང༌ ཀལ༌ཏེས༌ ཤི༌ཏེ༌ སྟིང༌ནེ༌ སོན༌ཏེའ༌ ལང༌ཅེས༌པོ༌ མེད༌ན༌, རིའི༌ ནང༌ང༌ དུག༌ཁན༌ནི༌ སེམས༌ཅན༌ ཙོགས༌, ཏེ༌ ཨེ༌ཕེ༌སས༌པ༌གུན༌ ཉམ༌པོ༌ ནོལ༌ཁན༌བོའེ༌ ང༌ ཅི༌ ཕན༌ཐོགས༌ ཡོངས༌། ཡང༌ ཏད༌པ༌ མེད༌ཁན༌གུན༌ནི༌ ཟེར༌ཁན༌ ཙོགས༌ལ༌ ང༌དང༌ངིའང༌ ཟེར༌སྲིད༌ཅེས༌ ཨིན༌ནོག༌, “ཡོང༌ཤིག༌, ཟེན༌ ཐུང༌ཨིན༌, ཅིའ༌ཟེར༌ན༌ ཐོ༌རེ༌ ང༌དང༌གུན༌ ཤིའ༌ནོག༌།”
1CO 15:33 “ཤི༌ཏེ༌ སྟིང༌ནེ༌ སོན༌ཏེའ༌ ལང༌ང༌ མ༌ནོག༌” ཟེར༌ཁན༌གུན༌ ཙོགས༌ལ༌ ཁྱོ༌ཞ༌གུན༌ བུང༌བུ༌ མ༌གྱུར༌ཤིག༌། “ཕྲོ༌པ༌ ངན༌པའེ༌ སྕོད༌པ༌ ཟང༌པོ༌ ཤིག༌ག༌ནོག༌” ཟེར༌ཅེས༌པོ༌ ཨིད༌ཏུ༌ ཅོ༌ཤིག༌།
1CO 15:34 ཀྲང༌པོ༌ མན༌ཁན༌ནི༌ སམ༌བ༌ ཕངས༌ཏེ༌ ཤེས༌རབས༌ཅན༌ རིག༌ གྱུར༌ཏེ༌ སྡིག༌པ༌ མ༌ཅོ༌ཤིག༌། ཁྱོ༌ཞ༌གུན༌ ཁྲེལ༌ཅུག༌ཅེས༌ལ༌ ངའེ༌ ཟེར༌རད༌, ཁྱོ༌ཞའ༌ ཁ༌ཅིག༌ག༌ དཀོན༌མཆོག༌ ཤེས༌ ཁོ༌རང༌ ཤེས༌ས༌ མ༌ནོག༌།
1CO 15:35 ཨིན༌ནའང༌ ཁྱོ༌ཞ༌གུན༌ནི༌ ཕྲོ༌ནེ༌ ཁ༌ཅིག༌གི༌, “ཀ༌ཟུག༌གི༌ ཤི༌ཁན༌ཞིག༌ ལངས༌ ཉན༌ན༌ནོག༌? ཁོང༌གུན༌ལ༌ ཟུགས༌པོ༌ ཀ༌ཟུག༌ཤིག༌ ཡོང༌ང༌ནོག༌?” ཟེར༌ཏེ༌ ཏྲི༌སྲིད༌ཅེས༌ ཨིན༌ནོག༌།
1CO 15:36 ཅི༌ སམ༌བ༌ མེད༌ཁན༌ནི༌ ཏྲི༌ཝ༌ཞིག༌ ཨིན༌ནོག༌! ཁྱོ༌ཞ༌གུན༌ནི༌ ས༌འོན༌ ཏབ༌ ཟ༌ནེ༌, ཏེ༌བོ༌ མི༌ ཤི༌ཏེ༌ སའེ༌ ནང༌ང༌ སུབས༌ཁན༌ ཙོགས༌ལ༌ སུབས༌ཏེ༌ མ༌སྟོགས༌, སྐྱེའ༌ མ༌ནོག༌།
1CO 15:37 ཡང༌ ཁྱོ༌ཞ༌གུན༌ནི༌ ཏབ༌ཁན༌བོ༌ སྐྱེ༌ཁན༌ནི༌ སས༌པོས༌ མན༌པ༌ ཁྱོ༌ཞ༌གུན༌ནི༌ ཏབ༌ཁན༌ནི༌ ཀྲོ༌ ཡ༌ ཡང༌རིགས༌སི༌ ས༌འོན༌ཞིག༌ ཨིན༌ནོག༌།
1CO 15:38 ཏེ༌ནེ༌ དཀོན༌མཆོག༌གི༌ ཏེ༌བོའ༌ ཁོང༌རང༌ངི༌ ཐུགས༌དོད༌ ནང༌ཞིན༌ལ༌, ཟུགས༌པོ༌ སོ༌མ༌ཞིག༌ སལ༌ལ༌ ཛད༌ད༌ནོག༌། ས༌འོན༌ རེ༌རེ༌ ཏེན༌ན༌ རིགས༌སི༌ ཟུགས༌པོའེ༌ ནང༌ང༌ ལྡན༌ན༌ནོག༌།
1CO 15:39 ཏེན༌ན༌ ཙོགས༌ལ༌ ཤ༌ རིགས༌ མང༌པོ༌ ཡོད༌ཏེ༌ ཨིན༌ནོག༌, རིགས༌ ཅིག༌ ནི༌ མི༌, ཡང༌ཅིག༌ སེམས༌ཅན༌, ཡང༌ཅིག༌ ཅ༌ཅིའུ༌, ཡང༌ཅིག༌ ཉ༌ ཨིན༌ནོག༌།
1CO 15:40 ནམ༌ཁའེ༌ ཟུགས༌ དང༌ ཇིག༌རྟེན༌ནི༌ ཟུགས༌ ཉིས༌ ཡོད༌ཏེ༌ ཨིན༌ནོག༌། ནམ༌ཁའེ༌ ཟུགས༌གུན༌ནི༌ ཟིལ༌བོ༌ ནི༌ ཇིག༌རྟེན༌ནི༌ ཟུགས༌གུན༌ནི༌ སང༌ སོ༌སོ༌ རིག༌ ཡོད༌ཏེ༌ ཨིན༌ནོག༌།
1CO 15:41 ཉི༌མ༌ ཁོ༌རང༌ང༌ ཟིལ༌ རིགས༌ ཅིག༌, ཡང༌ ཟླ༌ཝ༌ དང༌ སྐར༌མ༌གུན༌ལ༌ ཞན༌ཡང༌ ཟིལ༌ རིགས༌ ཅིག༌ ཡོད༌ཏེ༌ ཨིན༌ནོག༌, སྐར༌མ༌ ཚང༌མའེ༌ ནང༌ངའང༌ ཁོ༌རང༌ ཅིག༌ དང༌ ཅིག༌གི༌ ནང༌ང༌ ཟིལ༌ སོ༌སོ༌ རིག༌ ཡོད༌ཏེ༌ ཨིན༌ནོག༌།
1CO 15:42 ཏེན༌ན༌ ཙོགས༌, ཤི༌ཏེ༌ སྟིང༌ནེ༌ སོན༌ཏེའ༌ ལངས༌ཤེས༌པོའང༌ ཨིན༌ནོག༌། ང༌དང༌གུན༌ ཤི༌ ཟ༌ནེ༌, ང༌དང༌ངི༌ ཇིག༌རྟེན༌ནི༌ ཟུགས༌པོ༌གུན༌ སའེ༌ ནང༌ང༌ སུབ༌བ༌ནོག༌, ཨིན༌ནའང༌ ཏེ༌གུན༌ ཏུས༌གྱུན༌ ལུས༌ཤེས༌སི༌ ཕིའ༌ སོན༌ཏེའ༌ ལང༌ང༌ ཛད༌ཅེས༌ ཨིན༌ནོག༌།
1CO 15:43 ཞན༌ ཏེ༌གུན༌ སྤལ༌ མེད༌ཏེ༌ སུབ༌ནའང༌, ཏེ༌གུན༌ ཟིལ༌ལི༌ ནང༌ང༌ ལངས༌ས༌ནོག༌། ཏེ༌གུན༌ ཤེད༌མེད༌ཁན༌ནི༌ ནང༌ང༌ སུབ༌བ༌ནོག༌, ཨིན༌ནའང༌ ཏེ༌གུན༌ ཤེད༌ཅན༌ གྱུར༌ཏེ༌ ལང༌ང༌ ཛད༌ཅེས༌ ཨིན༌ནོག༌།
1CO 15:44 ཏེ༌གུན༌ མིའི༌ ཟུགས༌པོའེ༌ ཚུལ༌ལ༌ སུབ༌བ༌ནོག༌, ཨིན༌ནའང༌ སེམས༌ཉིད༌དི༌ ཟུགས༌པོ༌གུན༌ནི༌ ཚུལ༌ལ༌ ལང༌ང༌ ཛད༌ཨིན༌, ཀ༌ཟུག༌ རང༌ཞིན༌ནི༌ ཟུགས༌པོ༌གུན༌ ཡོད༌ད༌ ཙོགས༌ལ༌, སེམས༌ཉིད༌དི༌ ཟུགས༌པོ༌གུན༌ནའང༌ ཡོད༌ཏེ༌ ཨིན༌ནོག༌།
1CO 15:45 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌ “ཨ༌དམ༌ མི༌ ཏང༌པོ༌བོ༌, སྲོག༌ ཡོད༌ཁན༌ནི༌ མི༌ཞིག༌ ཛད༌ཏེ༌ ཨིན༌པིན༌” ཨིན༌ནའང༌ ཐའ༌མའེ༌ ཨ༌དམ༌, ཀ༌བོ༌ མ༌ཤི༌ཀ༌ ཞུགས༌ཏེ༌ ཨིན༌, ཁོང༌ ནི༌ ང༌དང༌ང༌ ཐུག༌ཉིད༌དི༌ མི༌ཚེ༌ སལ༌ཁན༌ ཞུགས༌ཏེ༌ ཨིན༌ནོག༌།
1CO 15:46 ཏང༌པོ༌བོ༌ ནི༌ ཐུག༌ཉིད༌དི༌ ཟུགས༌པོ༌ མན༌པ༌, རང༌ཞིན༌ནི༌ ཟུགས༌པོ༌ཞིག༌ ཨིན༌པིན༌, ཏེ༌ སྟིང༌ནེ༌ ཐུག༌ཉིད༌དི༌ ཟུགས༌པོ༌བོ༌ ཇུངས༌ཏེ༌ ཨིན༌ནོག༌།
1CO 15:47 ཨ༌དམ༌ ཟེར༌ཁན༌ནི༌ མི༌ ཏང༌པོ༌བོ༌, ཇིག༌རྟེན༌ནི༌ སའེ༌ ཀ༌ནེ༌ ཅོའ༌ ཛད༌ཏེ༌ ཨིན༌པིན༌, ཨིན༌ནའང༌ མི༌ ཉིས༌པ༌ མ༌ཤི༌ཀའ༌ ནམ༌ཁའ༌ནེ༌ ཕེབས༌ཏེ༌ ཨིན༌པིན༌།
1CO 15:48 ཇིག༌རྟེན༌ནི༌ མི༌གུན༌ ཇིག༌རྟེན༌ནི༌ མི༌བོ༌ ཙོགས༌, ཡང༌ ནམ༌ཁའེ༌ མི༌གུན༌ ནམ༌ཁའེ༌ མི༌ ཙོགས༌ ཡོང༌ང༌ནོག༌།
1CO 15:49 ཀ༌ཟུག༌ དག༌ས༌ ང༌དང༌གུན༌ ཇིག༌རྟེན༌ནི༌ མི༌བོ༌ ཙོགས༌ ཨིན༌, ཞག༌ཤིག༌ ང༌དང༌གུན༌ ནམ༌ཁའེ༌ མི༌བོ༌ ཙོགས༌ གྱུར༌ཅེས༌ ཨིན༌ནོག༌།
1CO 15:50 སྤུན༌གུན༌ ངའེ༌ ཟེར༌ཅེས༌སི༌ ཏོན༌ཏག༌པོ༌ ནི༌, ང༌དང༌གུན༌ནི༌ འི༌ ཟུགས༌པོ༌བོའ༌ དཀོན༌མཆོག༌གི༌ གྱལ༌སྲིད༌ ནོར༌སྐལ༌ལ༌ ཐོབ༌བ༌ མ༌ནོག༌། ཤི༌ཅེས༌ཅན༌ནི༌ འི༌ ཟུགས༌པོའ༌ ཏུས༌གྱུན༌ ལུས༌ཤེས༌ཅན༌ནི༌ དཀོན༌མཆོག༌གི༌ གྱལ༌སྲིད༌པོ༌ ནོར༌སྐལ༌ལ༌ མི༌ཐོབ༌།
1CO 15:51 ཨིན༌ནའང༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ སང༌ཝའེ༌ ཐབ༌ལྡིངས༌པོ༌ སྔོན༌ཅུག༌ཨིན༌། ང༌དང༌གུན༌ནི༌ ནང༌ནེ༌ ཚང༌མ༌ མི༌ཤི༌, ཨིན༌ནའང༌ ང༌དང༌ ཚང༌མའེ༌ ནང༌ང༌ གྱུར༌ཇ༌ ཁྱོང༌ང༌ ཛད༌ཨིན༌།
1CO 15:52 ཏེ༌གུན༌ མིག༌ ཀྲབ༌ཁན༌ ཙོགས༌ལ༌ ཧུན༌མེད༌ལ༌ ཇུང༌ཅེས༌ ཨིན༌ནོག༌ ནམ༌ དཀོན༌མཆོག༌གི༌ ཕོ༌ཉ༌གུན༌ནི༌ ཐའ༌མའེ༌ ཏུང༌བོ༌ ཕུ༌ཨིན༌། ཏུང༌བོ༌ ཕུའ༌ཅིག༌, ཤི༌ཏེ༌ ཡོད༌ཁན༌ ཚང༌མ༌ ཏུས༌གྱུན༌ནི༌ ཕིའ༌ སོན༌ཏེའ༌ ལང༌ང༌ ཛད༌ཅེས༌ དང༌ ང༌དང༌ སོན༌ཏེའ༌ ལུས༌ཁན༌གུན༌ནི༌ ནང༌ང༌ གྱུར༌ཇ༌ ཁྱོང༌ང༌ ཛད༌ཨིན༌།
1CO 15:53 ང༌དང༌གུན༌ནི༌ རུལ༌ཅེས༌ཅན༌ནི༌ ཟུགས༌པོ༌ མི༌རུལ༌ཅེས༌ ཡང༌ ཤི༌ཅེས༌ཅན༌ནི༌ ཟུགས༌པོ༌ ཏུས༌གྱུན༌ སོན༌ཏེའ༌ ལུས༌ཁན༌ གྱུར༌གོས༌།
1CO 15:54 ང༌དང༌གུན༌ནི༌ ཤི༌ཅེས༌ཅན༌ནི༌ ཟུགས༌པོ༌གུན༌ མ༌ནེ༌ མི༌ཤི༌ཅེས༌ཅན༌ནི༌ ཟུགས༌པོའེ༌ ནང༌ང༌ གྱུར༌ར༌ཅིག༌, འི༌ ཏམ༌པའེ༌ སུང༌རབས༌པོ༌ དྲན༌དྲ༌ གྲུབ༌ཅེས༌ ཨིན༌ནོག༌, “དཀོན༌མཆོག༌གི༌ གྱལ༌ཁའེ༌ ཤི༌ཅེས༌པོ༌ མེད༌ཁན༌ ཛདས༌།”
1CO 15:55 “ཝ༌ ཤི༌ཅེས༌, ཏ༌ ཁྱོ༌རང༌ངི༌ གྱལ༌ཁ༌བོ༌ ཀ༌རེ༌། ཝ༌ ཤི༌ཅེས༌, ཏ༌ ཁྱོ༌རང༌ངི༌ ཟུག༌ཟེར༌བོ༌ ཀ༌རེ༌?”
1CO 15:56 སྡིག༌པའེ༌ ཞས༌ཏེ༌ མི༌གུན༌ནི༌ཀ༌ ཤི༌ཅེས༌ ཇུང༌ང༌ནོག༌, ཡང༌ ཁྲིམས༌ གྱུད༌ཏེ༌ ང༌དང༌ང༌ སྡིག༌པའེ༌, མ༌ ཇིགས༌པ༌ ཁྲེས༌ཏོར༌ ཅོ༌ཁན༌ནི༌ ཝང༌བོ༌ ཧ༌གོའ༌ནོག༌།
1CO 15:57 ཨིན༌ནའང༌ དཀོན༌མཆོག༌ག༌ ཐུག༌རྗེ༌ཆེ༌, ཁོང༌ངི༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ ང༌དང༌གུན༌ལ༌ སྡིག༌པ༌ དང༌ ཤི༌ཅེས༌སི༌ཀ༌ གྱལ༌ཁའ༌ སལ༌ལ༌ ཛད༌ཏེ༌ ཨིན༌ནོག༌།
1CO 15:58 ཏེ༌བོའེ༌ཕིའ༌ ངའེ༌ སྤུན༌གུན༌ ཏད༌པའེ༌ ནང༌ང༌ ཤེད༌ཅན༌ དང༌ སྟན༌པོ༌ གྱུར༌ཤིག༌། ཏུས༌གྱུན༌ གཙོ༌བོའེ༌ ཕིའ༌ རིངས༌ཨིན༌ཞིག༌ ཞབས༌ཏོག༌ ཞུ༌ཤིག༌, ཅིའ༌ཟེར༌ན༌ གཙོ༌བོའེ༌ ཕིའ༌ ཅི༌ཞིག༌ ཅོ༌ནའང༌, གོད༌ལ༌ མི༌ཆ༌ཅེས༌པོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
1CO 16:1 ཏ༌ ཡེ༌རུ༌ཤ༌ལེམ༌མི༌ ནང༌ང༌ དཀོན༌མཆོག༌གི༌ མི༌གུན༌ནི༌ ཕིའ༌ ལྡུ༌ཨིན༌ ཡོད༌ཁན༌ནི༌ པེ༌ནེ༌ སྐོར༌ལ༌ ཁྱོ༌ཞའེ༌ ཏྲི༌ཝ༌ ཏྲི༌ཁན༌ནི༌ ལན༌ལ༌, གཱ༌ལ༌ཏི༌ཡའེ༌ ཆོས༌ཚོགས༌གུན༌ལ༌ ངའེ༌ ཏང༌ཁན༌ནི༌ ལབ༌ཞའེ༌ ནང༌ང༌ ཁྱོ༌ཞ༌གུན༌ནའང༌ གྲུལ༌གོ༌ཤེས༌ ཨིན༌ནོག༌།
1CO 16:2 ཟ༌ཉི༌མ༌ རིམས༌སི༌ ཁྱོ༌ཞ༌གུན༌ནི༌ རང༌རང༌ངི༌ ལས༌ ཅོས༌ཏེ༌ ཐོབ༌ཁན༌ནི༌ པེ༌ནེའི༌ ནང༌ནེ༌ ཁག༌ཞིག༌ ཐེན༌ཏེ༌, བོར༌གོ༌ཤེས༌ ཨིན༌ནོག༌། ང༌ ཏེ༌རུ༌ ཡོང༌ཡོང༌ ཚག༌པ༌ སྲུངས༌ཏེ༌ མ༌དུག༌ག༌, ཏེ༌བོ༌ དག༌ས༌ནེ༌ ཕར༌ལ༌ ཅོ༌ཤིག༌།
1CO 16:3 ང༌ ཏེ༌རུ༌ ལེབས༌ཏེ༌ སྐྱེས༌གུན༌ ཡེ༌རུ༌ཤ༌ལེམ༌མི༌ ནང༌ང༌ ཁྱེར༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ལྡམ༌ཁན༌ནི༌ ལོན༌ཁྱེར༌ཁན༌གུན༌ལ༌, ངའེ༌ གྱབ༌ཤེད༌དི༌ ཨི༌གེ༌ རིག༌ བྲི༌ཨིན༌།
1CO 16:4 ཡང༌ ཀལ༌ཏེས༌ ཁྱོ༌ཞ༌གུན༌ནི༌ ངའ༌ ཁོང༌གུན༌ ཉམ༌པོ༌ ཆ༌ཅེས༌པོ༌ ཕན༌ཐོགས༌ཅན༌ དུག༌ སམ༌ན༌, ཁོང༌གུན༌ ང༌ ཉམ༌པོ༌ ཡོང༌ནའང༌ གྲིགས༌ཏེ༌ ཨིན༌ནོག༌།
1CO 16:5 ང༌ མ༌ཀེ༌དོ༌ནི༌ཡཱའེ༌ ཡུལ༌ལ༌ སོང༌ཏེ༌ སྟིང༌ནེ༌, ཁྱོ༌ཞ༌གུན༌ ཡོད༌ས༌ ཐུག༌ག༌ལ༌ ཡོང༌ཨིན༌, ཅིའ༌ཟེར༌ན༌ ངའེ༌ མ༌ཀེ༌དོ༌ནི༌ཡཱའ༌ གྱུད༌ཏེ༌ བེས༌ལ༌ ཆ༌ཅེས༌སི༌ ཐབ༌ལྡིངས༌ཏེ༌ ཨིན༌།
1CO 16:6 ཅི༌གྱུས༌ ང༌ ཁྱོ༌ཞ༌གུན༌ ཉམ༌པོ༌ བན༌ཤིག༌ དུག༌ཨིན༌ ཡ༌ དགུན༌ གང༌པོའང༌, ཏེ༌ནེ༌ ཁྱོ༌ཞ༌གུན༌ནི༌ ང༌ ཀ༌ཡུལ༌ལ༌ ཆ༌ནའང༌, ཏེ༌རུ༌ ངའ༌ སྒོས༌དོམ༌གུན༌ ཏངས༌ཏེ༌ ལམ༌ཅུག༌ ཉན༌ཅེས༌ ཨིན༌ནོག༌།
1CO 16:7 འི༌ ལན༌ ང༌ ཙ༌པིག༌ཞིག༌ ཐུག༌ག༌ ཡོངས༌ཏེ༌ ཆ༌ཅེས༌སི༌ དོད༌པ༌ མེ༌རག༌, ཀལ༌ཏེས༌ གཙོ༌བོའེ༌ ང༌ གོངས༌པ༌ སལ༌ལ༌ ཛད༌ན༌, ང༌ ཡོངས༌ཏེ༌ ཏུས༌བན༌ཤིག༌ དུག༌ཉིན༌རག༌།
1CO 16:8 ཨིན༌ནའང༌ པེན༌ཏི༌ཀོས༌སི༌ གའ༌སྟོན༌ ལེབ༌ལེབ༌ ཚོག༌པ༌ལ༌, ང༌ འི༌རུ༌ ཨེ༌ཕེ༌སས༌སི༌ གྱལ༌སའེ༌ ནང༌ང༌ དུག༌ཨིན༌།
1CO 16:9 ཞན༌ འི༌རུ༌ མང༌པོ༌ཞིག༌གི༌ ངའེ༌ གྱབ༌གལ༌ ཅོ༌ནའང༌, ང༌ བྲས༌བུ༌ ཟང༌པོ༌ སྨིན༌སྲིད༌ཅེས༌ཅན༌ནི༌ ལས༌ གྱལ༌ལ༌ ཅོ༌ཅེས༌སི༌ སྐབས༌ ཟང༌པོ༌ རིག༌ ཐོབས༌ཏེ༌ ཡོད༌།
1CO 16:10 ངའེ༌ སྤུན༌ ཏི༌མོ༌ཐི༌ ལེབ༌ ཟ༌ནེ༌, ཁྱོ༌ཞའེ༌ ཕྲོའ༌ ཁོའ༌ ཇིགས༌ནང༌ ཡོང༌ མ༌ཅུག༌ཤིག༌ ཅིའ༌ཟེར༌ན༌ ངའེ༌ ཅོ༌ཁན༌ ཙོགས༌ལ༌ ཁོའེང༌ གཙོ༌བོའེ༌ ལས༌གུན༌ ཅོ༌ཨིན༌ ཨིན༌ནོག༌།
1CO 16:11 སུ༌ཞིག༌གའང༌ ཁོའ༌ རིན༌མེད༌ ཅོ༌ མ༌ཅུག༌ཤིག༌། ཁོ༌ ང༌ ཡོད༌ས༌ ལོགས༌ཏེ༌ ཡོང༌ ཟ༌ནེ༌ ཁྱོ༌ཞ༌གུན༌ནི༌, ཅིན༌ལབས༌ ཉམ༌པོ༌ ཁོ༌ ལམ༌ཅུག༌ཤིག༌། ཁོ༌ ཞན༌ཡང༌ ཏད༌པ༌ཅན༌གུན༌ ཉམ༌པོ༌ ཡོང༌ཅེས༌སི༌ ངའེ༌ རེ༌ཝ༌ ཅོའད༌།
1CO 16:12 ཏ༌ ང༌དང༌གུན༌ནི༌ སྤུན༌ ཨ༌པོ༌ལོས༌སི༌ སྐོར༌ལ༌ ཞུ༌ན༌, ངའེ༌ ཁོའ༌ ཁྱོ༌ཞ༌གུན༌ནི༌ཀ༌ ཞན༌ཡང༌ ཏད༌པ༌ཅན༌གུན༌ ཉམ༌པོ༌ ཆ༌ཅེས༌ལ༌ སྤོས༌པ༌ ཏང༌ཨིན༌ ཞུ༌ཝ༌ ཕུལ༌པིན༌, ཨིན༌ནའང༌ ཁོའ༌ དག༌ས༌ ཆ༌ཅེས༌སི༌ དོད༌པ༌ མི༌རུག༌། ཡང༌ སྐབས༌ ཐོབ༌ ཟ༌ནེ༌ ཁོ༌ ཁྱོ༌ཞ༌གུན༌ལ༌ ཐུག༌ག༌ ཡོང༌ཨིན༌།
1CO 16:13 ཤང༌ ཅོ༌ཤིག༌; ཏད༌པའེ༌ ནང༌ང༌ སྟན༌པོ༌ དུག༌ཤིག༌; སེམས༌ཤུགས༌ཅན༌ ཡང༌ ཏད༌པའེ༌ ནང༌ང༌ ཤེད༌ཅན༌ གྱུར༌ཏེ༌ དུག༌ཤིག༌།
1CO 16:14 ཅི༌ཚང༌མ༌ ཅེས༌པ༌ ཉམ༌པོ༌ ཅོ༌ཤིག༌།
1CO 16:15 ཁྱོ༌ཞ༌གུན༌ལ༌ གྱུས༌ཨིན༌ནོག༌, སྟེ༌ཕན༌ནས༌ དང༌ ཁོའེ༌ ནང༌མི༌ ཚང༌མ༌ གརིས༌སི༌ ནང༌ང༌ ཏད༌པ༌ཅན༌ ཏང༌པོ༌རང༌ ཨིན༌པིན༌། ཡང༌ ཁོང༌གུན༌ནི༌ དཀོན༌མཆོག༌གི༌ མི༌གུན༌ནི༌ ཕིའ༌ ཞབས༌ཏོག༌ ཞུ༌ཅེས༌སི༌ ནང༌ང༌ ཏུས༌ ཕུད༌ཨིན༌ ཨིན༌ནོག༌། སྤུན༌གུན༌ལ༌ ངའེ༌ སྤོས༌པ༌ ཏང༌ཨིན༌ ཞུ༌ཝ༌ ཨིན༌, ཁྱོ༌ཞ༌རང༌གུན༌ ཁོང༌གུན༌ དང༌ ཞན༌ཡང༌ འི༌ཙོགས༌སི༌ དོད༌པ༌ ཉམ༌པོ༌ ཞབས༌ཏོག༌ ཞུ༌ཁན༌གུན༌ནི༌ ཝང༌ངི༌ ཡོག༌ག༌ བོར༌ཤིག༌།
1CO 16:17 ང༌དང༌ངི༌ སྤུན༌ སྟེ༌ཕན༌ནས༌, ཕོར༌ཅུན༌ན༌ཏུས༌ དང༌, ཨ༌ཁའི༌ཀས༌ གུན༌ འི༌རུ༌ ལེབ༌ཅེས༌པོའེ༌ ང༌ མ༌ ཐད༌པོ༌ རག༌, ཅིའ༌ཟེར༌ན༌ ཁོང༌གུན༌ནི༌ ཁྱོ༌ཞའེ༌ ཚབས༌ ཅོས༌ཏེ༌ ང༌ རོགས༌ ཅོ༌རུག༌།
1CO 16:18 ཁྱོ༌ཞ༌གུན༌ལ༌ ཡོད༌ད༌ ཙོགས༌ལ༌ ཁོང༌གུན༌ ངའེ༌ ཕིའང༌ ཧ༌ལས༌སི༌ སྤོས༌པ༌ རིག༌ གྱུར༌ཏེ༌ ཨིན༌། ཁོང༌ ཙོགས༌སི༌ མི༌, གྱལ༌ལ༌ ཅོས༌ཏེ༌ ཞབས༌ཏོག༌ ཞུ༌ཁན༌གུན༌ལ༌ ཁྱོ༌ཞ༌གུན༌ནི༌ སྟོད༌པ༌ ཕུལ༌གོས༌།
1CO 16:19 ཨ༌སི༌ཨཱའེ༌ གྱལ༌ཁག༌གི༌ ནང༌ང༌ ཡོད༌ཁན༌ནི༌ ཆོས༌ཚོགས༌གུན༌ནི༌ གཙོ༌བོའེ༌ ཚན༌ནི༌ ནང༌ང༌ ཇུ༌ ཀལ༌དུག༌། སྤུན༌ ཨ༌ཀུའི༌ལའ༌ དང༌ ཁོའེ༌ ན༌མ༌ པརི༌སི༌ལ༌ ཡང༌ ཁོང༌ངི༌ ཁང༌པའེ༌ ནང༌ང༌ ཚོགས༌ཁན༌ནི༌ ཆོས༌ཚོགས༌སིའང༌ ཇུ༌ ཀལ༌དུག༌།
1CO 16:20 འི༌རུ༌ ཡོད༌ཁན༌ནི༌ སྤུན༌ ཚང༌མའེ༌ ཁྱོ༌ཞ༌གུན༌ལ༌ ཇུ༌ ཀལ༌དུག༌། ཅིག༌ དང༌ ཅིག༌ག༌ ཅམས༌པ༌ ཉམ༌པོ༌ ཇུ༌ ཞུས༌།
1CO 16:21 ཏ༌ ང༌ པ༌འུ༌ལུའི༌ ཨི༌གེ༌ བྲི༌ཁན༌བོའེ༌ ཀ༌ནེ༌ ཉི༌གུ༌ ཁྱོངས༌ཏེ༌ ང༌རང༌ངི༌ ལག༌བྲིས༌སི༌ ནང༌ང༌ ཇུ༌ ཀལ༌ལད༌།
1CO 16:22 ཀལ༌ཏེས༌ སུ༌ཞིག༌གི༌ གཙོ༌བོའ༌ ཅེས༌པ༌ ཅོའ༌ མེད༌ན༌, ཏེ༌ མི༌བོའ༌ ངན༌ ཕོག༌ག༌ནོག༌། ང༌དང༌གུན༌ནི༌ གཙོ༌བོ༌ གྱོགས༌པ༌ སྐྱོད༌ཤིག༌།
1CO 16:23 གཙོ༌བོ༌ ཡེ༌ཤུའི༌ ཐུག༌རྗེ༌ ཁྱོ༌ཞ༌གུན༌ ཉམ༌པོ༌ ལུས༌ཤིག༌།
1CO 16:24 མ༌ཤི༌ཀ༌ ཡེ༌ཤུའི༌ ཨིན༌ཁན༌ ཚང༌མ༌ལ༌ ངའེ༌ ཅེས༌པ༌ ཀལ༌ལད༌།
2CO 1:1 འི༌ ཨི༌གེ༌བོ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌, མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛདས༌ཁན༌ནི༌ པ༌འུ༌ལུའི༌ ཆོགས༌ནེ༌ ཨིན༌། ང༌དང༌ངི༌ སྤུན༌ ཏི༌མོ༌ཐིའི༌ ང༌ ཉམ༌པོ༌ ཡོད༌, ཡང༌ ངའེ༌ འི༌ ཨི༌གེ༌བོ༌ ཀོ༌རིན༌ཐི༌ དཀོན༌མཆོག༌གི༌ ཆོས༌ཚོགས༌ མ༌ཚད༌, ཨ༌ཀ༌ཡཱའེ༌ ཡུལ༌ལི༌ ནང༌ང༌ ཡོད༌ཁན༌ནི༌ དཀོན༌མཆོག༌གི༌ མི༌ ཏམ༌པ༌ ཚང༌མ༌ལའང༌ ཀལ༌ལད༌།
2CO 1:2 དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ལ༌ ཛད༌ཤིག༌།
2CO 1:3 ང༌དང༌གུན༌ནི༌, གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དཀོན༌མཆོག༌ག༌ སྟོད༌པ༌ ཕུལ༌ཤིག༌། ཁོང༌ ནི༌, སྙིང༌རྗེའེ༌ ཨ༌བ༌ དང༌ སེམས༌དེ༌ ཚང༌མའེ༌ དཀོན༌མཆོག༌ ཞུགས༌ཏེ༌ ཨིན༌ནོག༌།
2CO 1:4 ང༌དང༌གུན༌ནིའང༌ ཞན༌མ༌གུན༌ལ༌ སེམས༌སི༌ ནང༌ང༌ ཞི༌དེ༌ ཏང༌ཉན༌ཅེས༌སི༌ ཕིའ༌, དཀོན༌མཆོག༌གི༌ ང༌དང༌གུན༌ལ༌ བར༌དོ༌ ཚང༌མའེ༌ ནང༌ང༌ སེམས༌དེ༌ སལ༌ལ༌ ཛད༌ད༌ནོག༌། དཀོན༌མཆོག༌གི༌ ང༌དང༌གུན༌ལ༌ སལ༌ལ༌ ཛད༌ཁན༌ནི༌ ཏེན༌ན༌ ཙོགས༌ ཞི༌དེ༌ ང༌དང༌གུན༌ནིའང༌ བར༌དོའེ༌ ནང༌ང༌ ཡོད༌ཁན༌གུན༌ལ༌ ཏང༌ཉན༌ཨིན༌།
2CO 1:5 མ༌ཤི༌ཀའེ༌ ནང༌ང༌ ང༌དང༌གུན༌ནི༌ རྡུག༌ངལ༌གུན༌ གྱས༌ཨིན༌ ཆ༌ ཟ༌ནེ༌, ང༌དང༌ངི༌ སེམས༌སི༌ ནང༌ང༌ ཞི༌དེའང༌ མ༌ཤི༌ཀ༌ གྱུད༌ཏེ༌ གྱས༌ཨིན༌།
2CO 1:6 ཀལ༌ཏེས༌ ང༌ཞ༌གུན༌ བར༌དོའེ༌ ལྕིད༌དི༌ ནན༌ཏེ༌ ཡོད༌ན༌, ཏེ༌བོ༌ ཁྱོ༌ཞ༌གུན༌ལ༌ ཐར༌པ༌ དང༌ ཁྱོ༌ཞའེ༌ ནང༌ང༌ ཞི༌དེའེ༌ ཕིའ༌ ཨིན༌། ཡང༌ ཀལ༌ཏེས༌ ང༌ཞ༌གུན༌ལ༌ ཞི༌དེ༌ སལ༌ལ༌ ཛད༌ན༌, ཏེ༌བོའང༌ ཁྱོ༌ཞ༌གུན༌ནི༌ སེམས༌དེ༌ ཕིའ༌ ཨིན༌། ཏེ༌ནེ༌ ང༌ཞ༌གུན༌ནི༌ ཁུར༌ཨིན༌ ཡོད༌ཁན༌ ཙོགས༌ རྡུག༌ངལ༌བོ༌ ཁྱོ༌ཞ༌གུན༌ནིའང༌ ཟོད༌པ༌ དང༌ སྙིང༌རུས༌ ཉམ༌པོ༌ ཁུར༌ཨིན༌།
2CO 1:7 ང༌ཞ༌གུན༌ལ༌ ལོ༌ཁྱེལ༌ རག༌, ཁྱོ༌ཞ༌གུན༌ ང༌ཞའེ༌ རྡུག༌ངལ༌གུན༌ནི༌ ནང༌ང༌ དྲེས༌ པ༌སང༌, ཁྱོ༌ཞ༌གུན༌ ང༌ཞའེ༌ སེམས༌དེའེ༌ ནང༌ངའང༌ དྲེས༌ཨིན༌།
2CO 1:8 སྤུན༌གུན༌ ཁྱོ༌ཞ༌གུན༌ལ༌ ང༌ཞའེ༌ ཨ༌སི༌ཨཱའེ༌ ཡུལ༌ལི༌ ནང༌ང༌ བར༌དོ༌ ཁུར༌ཁན༌གུན༌ ཧ༌གོ༌གོ༌ཤེས༌ ཨིན༌ནོག༌, ཏེ༌ ཁུ༌རུའི༌ ལྕིད༌པོ༌ ང༌ཞ༌གུན༌ནི༌ ཁྱུད༌དི༌ སང༌ མང༌ང༌ ཐལ༌ཏེ༌ ཡོད༌ པ༌སང༌, ང༌ཞའེ༌ སོན༌ཏེའ༌ ལུས༌ཤེས༌སི༌ རེ༌ཝ༌བོ༌ མེད༌ཁན༌ སོང༌།
2CO 1:9 དེན༌བའ༌, ང༌ཞ༌གུན༌ ཤིའ༌ནོག༌ སམ༌། ཨིན༌ནའང༌ ང༌ཞ༌གུན༌ལ༌ ང༌ཞ༌རང༌ངི༌ ཁྱུད༌གུན༌ནི༌ཀ༌ རག༌ལས༌ཏེ༌ མ༌དུག༌ག༌, ཤི༌ཁན༌གུན༌ སོན༌ཏེའ༌ ལང༌ང༌ ཛད༌ཁན༌ དཀོན༌མཆོག༌གི༌ཀ༌ རག༌ལས༌ཏེ༌ དུག༌གོ༌ཤེས༌སི༌ ཕིའ༌, ཏེ༌གུན༌ ཇུངས༌ཏེ༌ ཨིན༌ནོག༌།
2CO 1:10 ཁོང༌ངི༌ ང༌ཞ༌གུན༌ ཤི༌ཅེས༌སི༌ ཇིགས༌པ༌གུན༌ནི༌ ཀ༌ནེ༌ ཐར༌ ཅུག༌ག༌ ཛད༌ཏེ༌ ཨིན༌ནོག༌, ཡང༌ ཡང༌སྐྱར༌ ཐར༌ ཅུག༌ག༌ ཛད༌ཨིན༌། ཁོང༌ངི༌ ཡོང༌ཅེས༌ཅན༌ནི༌ ཏུས༌སི༌ ནང༌ངའང༌, ང༌ཞ༌གུན༌ ཐར༌ ཅུག༌ག༌ ཛད༌ཅེས༌པོའེ༌ཀ༌ ང༌ཞ༌གུན༌ནི༌ ལོ༌ཁྱེལ༌ བོར༌རད༌།
2CO 1:11 ཡང༌ ཁྱོ༌ཞ༌གུན༌ནི༌ ང༌ཞའེ༌ ཕིའ༌, མོས༌ལམ༌ ཞུ༌ཅེས༌གུན༌ གྱུད༌ཏེ༌ ང༌ཞ༌གུན༌ལ༌ རོགས༌ ཅོའ༌ནོག༌། ཏེ༌ནེ༌ མི༌ མང༌པོ༌ཞིག༌གི༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཅིའ༌ཟེར༌ན༌ དཀོན༌མཆོག༌གི༌ ཐུག༌རྗེ༌ ཉམ༌པོ༌, མང༌པོ༌ཞིག༌གི༌ ང༌ཞའེ༌ སྲུང༌སྐྱོབ༌བི༌ ཕིའ༌ མོས༌ལམ༌ ཞུ༌ཁན༌གུན༌ལ༌ ལན༌སལ༌ལ༌ ཛད༌ཏེ༌ ཨིན༌ནོག༌།
2CO 1:12 ང༌ཞ༌གུན༌ནི༌ ལོ༌ཁྱེལ༌ དང༌ སེམས༌ ལག༌མོ༌ ཉམ༌པོ༌ ཟེར༌ཉན༌ཨིན༌, ང༌ཞ༌གུན༌ འི༌ ཇིག༌རྟེན༌པ༌ ཡང༌ མིག༌སལ༌ལི༌ ཁྱོ༌ཞ༌གུན༌ ཉམ༌པོ༌ དུག༌ ཟ༌ནེ༌, དཀོན༌མཆོག༌གི༌ སལ༌ཁན༌ནི༌ མི༌ཚེ༌ ཏམ༌པ༌ དང༌ ཀྲང༌པོའེ༌ ཚུལ༌ལ༌ པུད༌པིན༌། ང༌ཞ༌གུན༌ མི༌ཤེས༌རབས༌སི༌ཀ༌ མན༌པ༌, དཀོན༌མཆོག༌གི༌ ཐུག༌རྗེའེ༌ཀ༌ རག༌ལས༌ཏེ༌ དུགས༌པིན༌།
2CO 1:13 ངའེ༌ ཨི༌གེ༌གུན༌ སལ༌པོ༌ ཨིན༌, ཏེ༌གུན༌ནི༌ ནང༌ང༌, ཡང༌ ཏོན༌ཏག༌ ཅའང༌ སྦས༌ཏེ༌ མེད༌, ཡང༌ ཁྱོ༌ཞ༌གུན༌ལ༌ ཧ༌གོ༌ཅེས༌ལའང༌ ལ༌མོ༌ ཡོད༌། ངའེ༌ རེ༌ཝ༌ ཅོའད༌, ཞག༌ཤིག༌ ཁྱོ༌ཞ༌གུན༌ནི༌ ང༌ཞའེ༌ སྙིང༌ངི༌ ནང༌ང༌ ཡོད༌ཁན༌ ཚང༌མ༌ ཧ༌གོ༌ ཐུབ༌ཨིན༌།
2CO 1:14 ཁྱོ༌ཞ༌གུན༌ནི༌ ང༌ཞའ༌ དག༌ས༌ སིང༌ ཧ༌གོ༌ མ༌ཐུབ༌ནའང༌, གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཞག༌ག༌, ཁྱོ༌ཞ༌གུན༌ནི༌ ང༌ཞའ༌, སལ༌པོ༌ ཅོས༌ཏེ༌ ཧ༌གོ༌ པ༌སང༌, ཁྱོ༌ཞ༌གུན༌ལ༌ ང༌ཞའེ༌ཀ༌ ཕོ༌སོ༌ ཚོར༌ཨིན༌ ཀ༌ཟུག༌ ཁྱོ༌ཞའེ༌ཀ༌ ང༌ཞ༌གུན༌ལ༌ ཕོ༌སོ༌ ཚོར༌རད༌།
2CO 1:15 ཁྱོ༌ཞའེ༌ ཧ༌གོའི༌ ནང༌ང༌ ངའ༌ ལོ༌ཁྱེལ༌ ཡོད༌པ༌, ངའེ༌ ཀ༌ནེ༌ ཁྱོ༌ཞའ༌ ཕན༌ཐོགས༌ མང༌ང༌ ཐོབ༌ཅེས༌སི༌ ཕིའ༌, ངའ༌ ཁྱོ༌ཞ༌གུན༌ ཉམ༌པོ༌ ཐུག༌ག༌ ཡོང༌ཅེས༌ལ༌ ལན༌ ཉིས༌ ཐབ༌ལྡིངས༌པིན༌། ཏང༌པོ༌ མ༌ཀེ༌དོ༌ནི༌ཡཱའེ༌ ཡུལ༌ལ༌ ཆའ༌ ཟ༌ནེ༌ ཡང༌ ཉིས༌པ༌ ལོགས༌ཏེ༌ ཡོང༌ ཟ༌ནེ༌, ཏེ༌ནེ༌ ང༌ ཡ༌ཧུ༌དཱའེ༌ ཡུལ༌ལི༌ ནང༌ང༌ བེས༌ལ༌ ཆ༌ ཟ༌ནེ༌, སྒོས༌དོམ༌ ཡོད༌ཁན༌གུན༌ ཁྱོ༌ཞ༌གུན༌ནི༌ ཏང༌ཅེས༌སི༌ རེ༌ཝའང༌ ཨིན༌པིན༌།
2CO 1:17 ཨིན༌ནའང༌ ཁྱོ༌ཞའ༌ ཁ༌ཅིག༌གི༌, ཁོའེ༌ ཐབ༌ལྡིངས༌གུན༌ནི༌ ནང༌ང༌ གྱུར༌ཇ༌ ཅི༌ཕིའ༌ ཁྱོང༌ང༌ནོག༌ ཟེར༌ཏེ༌ ཏྲི༌སྲིད༌ཅེས༌ ཨིན༌ནོག༌། ཅི༌ ཁྱོ༌ཞ༌གུན༌ནི༌, ངའེ༌ ང༌རང༌ངི༌ ཐབ༌ལྡིངས༌གུན༌ སམ༌བ༌ མ༌ཏང༌ང༌ ཅོས༌ཏེ༌ ཨིན༌ནོག༌ སམ༌མ༌ རག༌ག༌? ཅི༌ ཁྱོ༌ཞ༌གུན༌ནི༌, ང༌ ཇིག༌རྟེན༌པ༌གུན༌ ཙོགས༌ ཨིན༌ནོག༌ སམ༌མ༌ རག༌ག༌, ཀ༌གུན༌ནི༌ “ཅོ༌ཨིན༌” ཟེར༌ར༌ནོག༌ ཨིན༌ནའང༌ ཅོའ༌ མ༌ནོག༌?
2CO 1:18 ཨིན༌ནའང༌ ཀ༌ཟུག༌ དཀོན༌མཆོག༌ ཨིད༌ཤེས༌ཅན༌ ཞུགས༌ཏེ༌ ཨིན༌, ངའེ༌ ཁྱོ༌ཞ༌གུན༌ལ༌ “ང༌ ཡོང༌ཨིན༌” ཟེར༌ཁན༌ནི༌ ཁ༌ཆད༌པོའང༌ ཀྲང༌པོ༌ ཨིན༌པིན༌། ངའེ༌ “མན༌” ཟེར༌ཅེས༌པོའ༌ “ཨིན༌” མི༌ཟེར༌།
2CO 1:19 དཀོན༌མཆོག༌གི༌ སྲས༌, ཡེ༌ཤུ༌ མ༌ཤི༌ཀའེ༌ “ཨིན༌” ཡ༌ “མན༌” མོལ༌ཅེས༌སི༌ ནང༌ང༌ ཐའ༌མ༌ ཐེ༌ཚོམས༌ ཅོའ༌ ཛད༌ད༌ མ༌ནོག༌། སྤུན༌ སི༌ལས༌, ཏི༌མོ༌ཐི༌ དང༌ ངའེ༌ ཁྱོ༌ཞ༌གུན༌ལ༌ ཆོས༌ཤད༌ཁན༌བོ༌ ནི༌ ཡེ༌ཤུ༌ མ༌ཤི༌ཀའེ༌ སྐོར༌ལ༌ ཨིན༌, ཡང༌ དཀོན༌མཆོག༌གི༌ མོལ༌ཁན༌བོ༌ ཁོང༌ངི༌ “དྲན༌དྲའ༌ གྲུབ༌ཅུག༌ག༌ནོག༌།”
2CO 1:20 ཅིའ༌ཟེར༌ན༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ ཞལ༌ཆད༌ ཚང༌མ༌ གྲུབ༌ ཅུག༌ག༌ ཛད༌ད༌ནོག༌, ཏེ༌བོའེ༌ཕིའ༌ ང༌ཞ༌གུན༌ནི༌ “ཨ༌མེན༌” ཟེར༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ལད༌།
2CO 1:21 ང༌ཞའ༌ དང༌ ཁྱོ༌ཞའ༌ ཉིས༌ཀོའེ༌ ཏད༌པ༌ མ༌ཤི༌ཀའེ༌ ནང༌ང༌ སྟན༌པོ༌ གྱུར༌ ཅུག༌ག༌ ཛད༌ཁན༌བོ༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌། ཐར༌པའེ༌ ཕིའ༌ ཁོང༌ངི༌ ང༌དང༌གུན༌ ལྡམ༌མ༌ ཛད༌ཏེ༌ ཨིན༌ནོག༌།
2CO 1:22 དཀོན༌མཆོག༌གི༌ ཏམ༌པའེ༌ ཐུག༌ཉིད༌ ང༌དང༌གུན༌ནི༌ སྙིང༌ངི༌ ནང༌ང༌ བོར༌ར༌ ཛད༌ཏེ༌, ང༌དང༌གུན༌ ཁོང༌ངི༌ ཨིན༌ཁན༌བོའེ༌ ཐེ༌ཙེ༌ གྱབ༌བ༌ ཛདས༌, ཡང༌ ཏེ༌ཟུག༌ ཛད༌ཅེས༌པོའེ༌ དཀོན༌མཆོག༌གི༌ ང༌དང༌གུན༌ལ༌ ཛད༌ཁན༌ནི༌ ཞལ༌ཆད༌ ཚང༌མ༌ གྲུབ༌ཅེས༌པོ༌ ཏན༌ཏན༌ ཅོ༌ ཛདས༌།
2CO 1:23 ཏ༌ ངའེ༌ ཟེར༌ཅེས༌ཅན༌གུན༌ ཀྲང༌པོ༌ ཨིན༌ཁན༌ནི༌ སྤང༌པོ༌ དཀོན༌མཆོག༌ ཨིན༌། ང༌ ཀོ༌རིན༌ཐིའ༌ ལོགས༌ཏེ༌ མི༌ཡོང༌ཅེས༌སི༌ གྱུན༌ཚན༌བོ༌ ནི༌, ཁྱོ༌ཞ༌གུན༌ལ༌ ངའེ༌ ཀ༌ནེ༌ ཁའ༌ མ༌སྲན༌ཏྲེ༌ ཕོག༌ཅེས༌ནེ༌ སྐྱོབ༌ཅེས༌པོ༌ ཨིན༌པིན༌།
2CO 1:24 ཏེ༌བོ༌ ནི༌, ཁྱོ༌ཞའེ༌ ཏད༌པ༌ ཅོ༌ཁན༌བོ༌ ལག༌ལེན༌ནི༌ ནང༌ང༌ ཁྱོང༌ ཟེར༌ཏེ༌ ཝང༌ ཏང༌ཅེས༌པོ༌ མན༌, ཨིན༌ནའང༌ ཁྱོ༌ཞ༌གུན༌ སྐྱིད༌པོའེ༌ གང༌ཅེས༌སི༌ ཕིའ༌ ང༌ཞའེ༌ ཁྱོ༌ཞ༌གུན༌ ཉམ༌པོ༌ ལས༌ ཅོ༌ཉིན༌རག༌། ཁྱོ༌ཞ༌རང༌ངི༌ ཏད༌པ༌ ཅིག༌པོ༌ གྱུད༌ཏེ༌ ཁྱོ༌ཞ༌གུན༌ སྟན༌པོ༌ ལུས༌ཨིན༌།
2CO 2:1 ཏེན༌ན༌བོའེ༌ཕིའ༌ ངའེ༌, ཁྱོ༌ཞའ༌ ལན༌ ཉིས༌པ༌ ཐུགས༌ཏེ༌ ཚེར༌ཁ༌ དང༌ རྡུག༌ངལ༌ མི༌སྟན༌ཅེས༌སི༌ ཐག༌ཅད༌པིན༌།
2CO 2:2 ཀལ༌ཏེས༌ ངའེ༌ ཁྱོ༌ཞ༌གུན༌ལ༌ ཚེར༌ཅུག༌ན༌, ཏེ༌ནེ༌ སུའི༌ ངའ༌ ཐད༌པོ༌ ཡོང༌ཅུག༌ཨིན༌, ཏན༌ཏན༌ལ༌ ངའེ༌ ཚེར༌ཁ༌ སྟན༌ཁན༌གུན༌ནི༌ མི༌ཅུག༌།
2CO 2:3 ཏེན༌ན༌བོའེ༌ཕིའ༌ ངའེ༌ ཁྱོ༌ཞ༌གུན༌ལ༌ ཏེ༌ ཨི༌གེ༌བོ༌ བྲིས༌པིན༌, ཅིའ༌ཟེར༌ན༌ ང༌ ཡོང༌ ཟ༌ནེ༌, ངའ༌ སྐྱིད༌པོ༌ ཁྱོང༌གོ༌ཤེས༌ཅན༌གུན༌ནི༌ ཚེར༌ཁ༌ མི༌ཁྱོང༌། ཁྱོ༌ཞ༌གུན༌ནི༌ ཐད༌པོའེ༌ ང༌ ཐད༌པོ༌ ཁྱོང༌ཁན༌བོ༌, ཁྱོ༌ཞ༌གུན༌ལ༌ གྱུས༌མེད༌ད༌?
2CO 2:4 ངའེ༌ ཏེ༌ ཨི༌གེ༌བོ༌ མ༌སྲན༌ཏྲེ༌ ཚེར༌ཁ༌, སྙིང༌ངི༌ ནང༌ང༌ བར༌དོ༌ དང༌ ཆི༌མ༌ མང༌པོ༌ ཉམ༌པོ༌ བྲིས༌པིན༌། ཚེར༌ཁ༌ ཡོང༌ མ༌ཅུག༌ག༌, ངའེ༌ ཁྱོ༌ཞ༌གུན༌ལ༌ ཙམ༌ཤིག༌གི༌ ཅེས༌པ༌ ཅོ༌ཁན༌བོ༌ ཧ༌གོ༌ཅུག༌ཉིན༌ རག༌པིན༌།
2CO 2:5 རྡུག༌པོ༌ ཚང༌མ༌ ཇུང༌ཅུག༌ཁན༌ནི༌ མི༌བོའེ༌ ཁྱོ༌ཞ༌གུན༌ལ༌ ང༌ སང༌ མང༌ང༌ རྡུག༌པོ༌ སྟན༌ཏེ༌ ཨིན༌ནོག༌ ཟེར༌ ཟ༌ནེ༌, ངའེ༌ ཧས༌ ཏངས༌ཏེ༌ མན༌།
2CO 2:6 ཁྱོ༌ཞའ༌ མང༌ཆེའེ༌ ཁོའ༌ ཆད༌པ༌ ཏང༌ཁན༌བོ༌, ཁོའེ༌ ཕིའ༌ ཐད༌ཐད༌ ཨིན༌ནོག༌ ཅིའ༌ཟེར༌ན༌ ཁོའེ༌ གྱོད༌པ༌ ཅོས༌ཏེ༌ ཨིན༌ནོག༌།
2CO 2:7 ཨིན༌ནའང༌ ཏ༌ ཁོའ༌ ཤགས༌པ༌ ཏངས༌ཏེ༌ ཁོའེ༌ སེམས༌ལ༌ ཞི༌དེ༌ ཏང༌གོ༌ཤེས༌ ཨིན༌ནོག༌, ཏེ༌ མན༌ན༌ ཁོའ༌ རྡུག༌པོའེ༌ ལྕིད༌པོ༌ ཁུར༌ མི༌ཉན༌།
2CO 2:8 ངའེ༌ ཁྱོ༌ཞ༌གུན༌ལ༌ ཁོའ༌ ཡང༌སྐྱར༌ ཅེས༌པ༌ ཅོ༌ཅེས༌ལ༌ སྤོས༌པ༌ ཏང༌ཨིན༌ ཞུ༌ཝ༌ ཕུལ༌ལད༌།
2CO 2:9 ཁྱོ༌ཞ༌གུན༌ནི༌ ངའེ༌ ཟེར༌ཁན༌ ཚང༌མ༌ལ༌ ཁའ༌ ཉན༌དུག༌ག༌ མི༌དུག༌ ལྟ༌ཅེས༌སི༌ ཕིའ༌ ངའེ༌ ཁྱོ༌ཞ༌གུན༌ལ༌ སྔུན༌ལ༌ ཨི༌གེ༌ བྲིས༌པིན༌།
2CO 2:10 ཁྱོ༌ཞ༌གུན༌ནི༌ ཏེ༌ མི༌བོའ༌ ཤགས༌པ༌ ཏང༌ང༌ཅིག༌, ངེའང༌ ཁོའ༌ ཤགས༌པ༌ ཏང༌ཨིན༌། ཡང༌ ཤགས༌པ༌ ཏང༌གོ༌ཤེས༌པོའ༌ ཤགས༌པ༌ ཏང༌ཅེས༌པོ༌ ངའེ༌ མ༌ཤི༌ཀའེ༌ ཝང༌ངི༌ ནང༌ང༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཅོའད༌།
2CO 2:11 ཤེ༌ཏན༌ནི༌ ང༌དང༌ངི༌ ནང༌ང༌ ཡོད༌ཁན༌ནི༌ ནས༌ལུག༌པོའེ༌ ཕན༌ཐོགས༌ མི༌ལེན༌ཅེས༌སི༌ ཕིའ༌, ང༌དང༌གུན༌ནི༌ ཏེ༌ མི༌བོའ༌ ཤགས༌པ༌ ཏང༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ང༌དང༌གུན༌ལ༌ ཤེ༌ཏན༌ནི༌ ཐབས༌ངན༌པ༌གུན༌ གྱུས༌ཡོད༌ཏེ༌ ཨིན༌ནོག༌།
2CO 2:12 ང༌ ཏྲོ༌འེས༌སི༌ གྱལ༌སའེ༌ ནང༌ང༌ མ༌ཤི༌ཀའེ༌ གའ༌མོའེ༌ ནས༌ཚུལ༌ ཤད༌ད༌ལ༌ ལེབ༌བ༌ཅིག༌, གཙོ༌བོ༌ ཡེ༌ཤུའི༌ སྒོ༌ ཕེའ༌ ཛད༌ཏེ༌ ངའ༌ ཏེ༌ཟུག༌ ཅོ༌ཅེས༌སི༌ སྐབས༌ སལས༌།
2CO 2:13 ཨིན༌ནའང༌ ངའེ༌ སེམས༌སི༌ ནང༌ང༌ ཞི༌དེ༌ མེ༌རག༌པིན༌, ཅིའ༌ཟེར༌ན༌ ངའེ༌ སྤུན༌ ཏི༌ཏུས༌ ཁྱོ༌ཞ༌གུན༌ནི༌ ཀ༌ནེ༌ ལོན༌གུན༌ ཁུར༌ཏེ༌ ཏ༌རུང༌ ཚོག༌པ༌ མ༌ལེབ༌པ༌ ངའེ༌ ཏྲོ༌འེས༌པ༌གུན༌ལ༌ ཇུ༌ ཞུས༌ཏེ༌ ཁོ༌ ཙལ༌ལ༌ མ༌ཀེ༌དོ༌ནི༌ཡཱའེ༌ གྱལ༌སའ༌ སོང༌པིན༌།
2CO 2:14 ཨིན༌ནའང༌ ངའེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌, ཁོང༌ ནི༌, ང༌ཞ༌གུན༌ལ༌ ཆད༌མེད༌ལ༌ མ༌ཤི༌ཀའེ༌ གྱལ༌ཁའ༌ ཐོབ༌ཁན༌ནི༌ ཁྲོམས༌སྐོར༌རི༌ ནང༌ང༌ གོ༌ཁྲིད༌ ཛད༌ཁན༌བོ༌ ཞུགས༌ཏེ༌ ཨིན༌ནོག༌། ཏ༌ དག༌ས༌ ཁོང༌ངི༌ ང༌ཞ༌གུན༌ མ༌ཤི༌ཀ༌ ཤེས༌ཁན༌ནི༌ ཏྲི༌ཞིམ༌བོ༌, སྤེལ༌ཅེས༌ལ༌ ཀོལ༌ལ༌ ཛད༌ཏེ༌ ཨིན༌ནོག༌།
2CO 2:15 ཅིའ༌ཟེར༌ན༌ ང༌ཞ༌གུན༌ མ༌ཤི༌ཀའེ༌ དཀོན༌མཆོག༌ག༌ ཕུལ༌ལ༌ ཛད༌ཁན༌ནི༌ ཏྲི༌ཞིམ༌ཅན༌ནི༌ སྤོས༌ ཙོགས༌ ཨིན༌ནོག༌། ཨིན༌ནའང༌ སྐྱོབ༌བ༌ ཛད༌ཅེས༌ཅན༌གུན༌ནི༌ ཏེ༌ ཏྲི༌ཞིམ༌བོ༌ ཁྲེས༌ཏོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཁན༌གུན༌ནི༌ སང༌ སོ༌སོ༌ རིག༌ ཚོར༌ར༌ནོག༌།
2CO 2:16 ཁ༌ཅིག༌གི༌ ང༌ཞའ༌ ཤི༌ཁན༌ནི༌ ཏྲི༌མ༌, ཨིན༌ནའང༌ ཞན༌གུན༌ནི༌ སྲོག༌ སལ༌ཁན༌ནི༌ ཏྲི༌ཞིམ༌ ཙོགས༌ ཚོར༌ར༌ནོག༌། ཏེ༌ཙོགས༌སི༌ ལས༌ ཁག༌ཅན༌ ཅོ༌ཅེས༌སི༌ ཁྱུད༌ སུའ༌ ཡོད༌ཀྱག༌?
2CO 2:17 ཁྱོ༌ཞ༌གུན༌ནི༌ ལྟོས༌ཤིག༌, ང༌ཞ༌གུན༌ ཕན༌ཐོགས༌སི༌ ཕིའ༌ ཆོས༌ཤད༌ཁན༌ནི༌ ཏེ༌ སྐྱོན༌ཇན༌ མི༌གུན༌ ཙོགས༌ མན༌ཧེ༌། ཨིན༌ནའང༌ དཀོན༌མཆོག༌གི༌ ཀལ༌ལ༌ ཛད༌ཁན༌ དང༌ ཁོང༌ངི༌ ཟིགས༌ཨིན༌ ཡོད༌ཁན༌བོ༌ གྱུས༌ཡོད༌ཁན༌ནི༌ མི༌གུན༌ ཙོགས༌ལ༌, མ༌ཤི༌ཀའེ༌ ཝང༌ངི༌ ནང༌ང༌, ང༌ཞའེ༌ སེམས༌ ཟང༌པོ༌ ཉམ༌པོ༌ ཆོས༌ཤད༌དད༌།
2CO 3:1 ང༌ཞའེ༌ ཡང༌སྐྱར༌ ང༌ཞ༌རང༌ངི༌ཀ༌ ཕོ༌སོ༌ ཅོ༌ཅེས༌ གོ༌ཟུག༌ ཅོས༌ཏེ༌ ཨིན༌ནོག༌ག༌? ཡ༌ ང༌ཞའ༌ ཞན༌གུན༌ ཙོགས༌ལ༌ ཁྱོ༌ཞའ༌ སྟན༌ཅེས༌ལ༌ ཡ༌ ཁྱོ༌ཞ༌གུན༌ནི༌ ཀ༌ནེ༌ གྱབ༌ཤེད༌དི༌ ཨི༌གེ༌ སྒོས༌དོམ༌ ཡོད༌ཏེ༌ ཨིན༌ནོག༌ག༌? ཏན༌ཏན༌ མི༌གོས༌།
2CO 3:2 ཏེ༌ ཨི༌གེ༌བོ༌ ནི༌ ང༌ཞའེ༌ སྙིང༌ངི༌ཀ༌ བྲི༌ཁན༌ ཁྱོ༌ཞ༌རང༌གུན༌ ཨིན༌, ཀ༌བོ༌ ཚང༌མའེ༌ སིལ༌ཏེ༌ ང༌ཞའེ༌ ཁྱོ༌ཞའེ༌ ཕྲོའ༌ ཅོས༌ཁན༌ནི༌ ལས༌ ཟང༌པོ༌གུན༌ ཧ༌གོ༌ཨིན༌།
2CO 3:3 མ༌ཤི༌ཀའེ༌ ཆོགས༌ནེ༌ ང༌ཞའེ༌ ལས༌གུན༌ནི༌ བྲས༌བུ༌ སྟན༌ཁན༌ནི༌ ཨི༌གེ༌, ཁྱོ༌ཞའ༌ ཨིན༌ནོག༌། ཏེ༌ ཨི༌གེ༌ ཉི༌གུ༌ ཉམ༌པོ༌ མན༌པ༌, དཀོན༌མཆོག༌ སོན༌པོའེ༌ ཐུག༌ཉིད༌ ཉམ༌པོ༌ བྲིས༌ཏེ༌ ཨིན༌ནོག༌། ཏེ༌བོ༌ བཀའ༌རྒྱ༌ རྕུ༌ ཙོགས༌ལ༌ རྡོའེ༌ཀ༌ སྐོས༌ཏེ༌ མེད༌པ༌, མི༌གུན༌ནི༌ སེམས༌སི༌ ནང༌ང༌ ཡོད༌ཏེ༌ ཨིན༌ནོག༌།
2CO 3:4 ཏེ༌ ཚང༌མ༌ ཟེར༌ཅེས༌སི༌ ནང༌ང༌ ང༌ཞ༌གུན༌ལ༌ ལོ༌ཁྱེལ༌ རག༌, ཅིའ༌ཟེར༌ན༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ ནང༌ང༌ ང༌ཞ༌གུན༌ནི༌ ཏད༌པ༌ སྟན༌པོ༌ ཨིན༌།
2CO 3:5 ང༌ཞའེ༌ ཟེར༌ར༌མེད༌, ང༌ཞ༌རང༌ངི༌ ལག༌ག༌ ཞབས༌ཏོག༌ ཞུ༌ཅེས༌སི༌ ཁྱུད༌གུན༌ ཡོད༌, ཨིན༌ནའང༌ དཀོན༌མཆོག༌གི༌ ཆོགས༌ནེ༌ སལ༌ལ༌ ཛད༌ཏེ༌ ཨིན༌།
2CO 3:6 ཁོང༌ངི༌ ང༌ཞ༌གུན༌ལ༌ ཁོང༌རང༌ངི༌ ཆད༌དོན༌ སོ༌མའེ༌ ཞབས༌ཏོག༌ ཞུ༌ཅེས༌སི༌ ཁྱུད༌ སལ༌ལ༌ ཛད༌ཏེ༌ ཨིན༌ནོག༌། འི༌ ཆད༌དོན༌ སོ༌མ༌བོ༌ ནི༌, བྲིས༌ཁན༌ནི༌ ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌, དཀོན༌མཆོག༌ ཁོང༌རང༌ངི༌ ཐུག༌ཉིད༌ སལ༌ལ༌ ཛད༌ཅེས༌པོ༌ ཨིན༌ནོག༌། བྲིས༌ཏེ༌ ཡོད༌ཁན༌ནི༌ ཁྲིམས༌ སྙིང༌པ༌བོའེ༌, ཤི༌ཅེས༌ ཁྱོང༌ང༌ནོག༌, ཨིན༌ནའང༌ ཐུག༌ཉིད༌བོའེ༌, མི༌ཚེ༌ སོ༌མ༌ སལ༌ལ༌ནོག༌།
2CO 3:7 ཞན༌ ཏེ༌ཟུག༌ ནས༌ལུག༌ ཟིར༌རྗིད༌ཅན༌ ཉམ༌པོ༌ གོ༌ཟུགས༌ཏེའང༌, རྡོའེ༌ཀ༌ སྐོས༌ཁན༌ བཀའ༌རྒྱ༌ རྕུ༌བོའེ༌, ཤི༌ཅེས༌སི༌ ཆོགས༌ལ༌ ཁྲིདས༌, ཀ༌བོ༌ ཨིས༌ར༌ཨེལ༌པ༌གུན༌ནི༌ ལུང༌སྟོན༌པ༌ མོ༌ཟེས༌སི༌ ལྡོང༌ང༌ ལྟ༌ མ༌ཉན༌, ཅིའ༌ཟེར༌ན༌ ཁོང༌ངི༌ ལྡོང༌ནེ༌ དཀོན༌མཆོག༌གི༌ ཟིར༌རྗིད༌ ལྡང༌ཤན༌ བིང༌ངད༌པིན༌, ཨིན༌ནའང༌ ལྡངས༌པོ༌ ཀུ༌ལེ༌ ཀུ༌ལེའ༌ ཡོལ༌ཨིན༌ སོང༌།
2CO 3:8 ཏ༌ ཏམ༌པའེ༌ ཐུག༌ཉིད༌དི༌ མི༌ཚེ༌ སལ༌ཅེས༌པོའེ༌ ཅི༌ ང༌དང༌གུན༌ནི༌ འི༌ ཆད༌དོན༌ སོ༌མའེ༌ ནང༌ང༌ མངས༌ཏེའང༌ ཟིར༌རྗིད༌ མང༌པོའེ༌ རེ༌ཝ༌ ཅོ༌ མ༌གོས༌ས༌?
2CO 3:9 ཁྲིམས༌ཅད༌ ཁྱོང༌ཁན༌ནི༌ བཀའ༌རྒྱ༌ རྕུ༌བོ༌ ཟིར༌རྗིད༌ཅན༌ཞིག༌ ཡོད༌ན༌, ཏེ༌ནེ༌ དཀོན༌མཆོག༌གི༌ སྐུན༌དུན༌ལ༌ ང༌དང༌ ཀྲང༌པོ༌ ཛད༌ཁན༌ནི༌ ཆད༌དོན༌ སོ༌མ༌བོའ༌, ཙམ༌ཤིག༌གི༌ ཟིར༌རྗིད༌ མེད༌གྲོ༌།
2CO 3:10 ངོས༌པོའ༌, གོ༌མའེ༌ ཟིར༌རྗིད༌པོ༌ ཆད༌དོན༌ སོ༌མའེ༌ ཧ༌ལས༌ཤེས༌སི༌ ཟིར༌རྗིད༌པོ༌ ཉམ༌པོ༌ ལྡུར༌ན༌, ཟིར༌རྗིད༌ མ༌ནེ༌ མེད༌ཁན༌ ཙོགས༌ ཨིན༌ནོག༌།
2CO 3:11 ཡང༌ ཀལ༌ཏེས༌ ཏེ༌ ཡོལ༌ཨིན༌ ཆའ༌ཁན༌བོ༌ ཟིར༌རྗིད༌ ཉམ༌པོ༌ ཇུངས༌ཏེ༌ ཨིན༌ན༌, ཏེ༌ནེ༌ ཏུས༌གྱུན༌ ལུས༌ཤེས༌སི༌ ཆད༌དོན༌ སོ༌མའ༌, ཙམ༌ཤིག༌གི༌ ཟིར༌རྗིད༌ མང༌ང༌ མེད༌གྲོ༌།
2CO 3:12 ཏེ༌ ཆད༌དོན༌ སོ༌མ༌བོའེ༌ ང༌ཞ༌གུན༌ལ༌ ཏེ༌ཟམ༌ ལོ༌ཁྱེལ༌ ཏངས༌ པ༌སང༌, ང༌ཞ༌གུན༌ ཆོས༌ཤད༌ཅེས༌སི༌ ནང༌ང༌ མང༌ང༌ ཧམ༌པ༌ཅན༌ གྱུར༌།
2CO 3:13 ང༌ཞ༌གུན༌ མོ༌ཟེས༌ ཙོགས༌ མན༌, ཁོའེ༌ ཨིས༌ར༌ཨེལ༌པ༌གུན༌ནི༌ ཁོ༌རང༌ངི༌ ལྡོང༌ངི༌ ཀ༌ནེ༌ ཀུ༌ལེའ༌ ཡོལ༌ཏེ༌ ཆེན༌ ཡོད༌ཁན༌ནི༌ ཟིར༌རྗིད༌པོའ༌ མི༌ལྟ༌ཅེས༌སི༌ ཕིའ༌, ཁོ༌རང༌ངི༌ ལྡོང༌བོ༌ རས༌ ཉམ༌པོ༌ ཀབས༌།
2CO 3:14 ཨིན༌ནའང༌ ཏེ༌གུན༌ནི༌ སྙིང༌གུན༌ སྐྱོང༌པོ༌ གྱུར༌། ཏན༌ཏན༌ལ༌ དག༌སའང༌ ནམ༌ ཆད༌དོན༌ སྙིང༌པ༌བོ༌ སིལ༌ལ༌ཅིག༌, ཁོང༌གུན༌ལ༌ ཧ༌གོ༌ ཐུབ༌བ༌ མ༌ནོག༌ ཀ༌ཟུག༌ མོ༌ཟེས༌སི༌ ལྡོང༌ང༌ ཀབ༌ཁན༌བོ༌ ཙོགས༌། མ༌ཤི༌ཀ༌ ཅིག༌པོའེ༌ ནང༌ང༌ ཏད༌པ༌ ཅོ༌ཅེས༌པོའེ༌, ཏེ༌ ཀབ༌ཁན༌བོ༌ ཐེན༌ན༌ ཛད༌ཨིན༌།
2CO 3:15 འོ༌ན༌, དི༌རིང༌ངའང༌ མོ༌ཟེས༌སི༌ ཁྲིམས༌གུན༌ སིལ༌ ཟ༌ནེ༌, ཁོང༌གུན༌ནི༌ སྙིང༌གུན༌ ཀབས༌ཏེ༌ ཁོང༌གུན༌ལ༌ ཧ༌གོ༌ ཐུབ༌བ༌ མ༌ནོག༌།
2CO 3:16 ཨིན༌ནའང༌ སུ༌ཞིག༌གི༌ གཙོ༌བོའེ༌ ནང༌ང༌ ཏད༌པ༌ ཁྱོང༌ང༌ཅིག༌, ཀབས༌ཏེ༌ ཡོད༌ཁན༌བོ༌ ཐེན༌ན༌ ཛད༌ད༌ནོག༌།
2CO 3:17 ཏ༌ གཙོ༌བོ༌ ནི༌ ཐུག༌ཉིད༌ ཞུགས༌ཏེ༌ ཨིན༌ནོག༌, ཡང༌ ཏམ༌པའེ༌ ཐུག༌ཉིད༌ ཡོད༌ཁན༌གུན༌ལ༌ ཏེ༌ ཁྲིམས༌གུན༌ནི༌ ཀ༌ནེ༌ རང༌ཝང༌ ཡོད༌ཏེ༌ ཨིན༌ནོག༌།
2CO 3:18 ང༌དང༌ ཚང༌མའེ༌ ཀ༌ནེ༌ ཀབས༌ཏེ༌ ཡོད༌ཁན༌བོ༌ ཐེན༌ པ༌སང༌, ང༌དང༌གུན༌ནི༌ ཐོང༌ཏེ༌ གཙོ༌བོའེ༌ ཟིར༌རྗིད༌པོ༌ ཕེལ༌ ཅུག༌ག༌ནོག༌, ཀ༌ཟུག༌གི༌ མེ༌ལོང༌ངི༌ ལྡངས༌ ཁྱབས༌ཤུག༌གད༌། ཡང༌ ཐུག༌ཉིད༌ ཨིན༌ཁན༌ནི༌ གཙོ༌བོའེ༌, ང༌དང༌གུན༌ མང༌ནེ༌ མང༌ང༌ ཁོང༌རང༌ ཙོགས༌ ཅོའ༌ ཛད༌ཏེ༌, ང༌དང༌གུན༌ ཁོང༌ངི༌ ཟིར༌རྗིད༌ཅན༌ནི༌ ཟོབ༌སྟའེ༌ ནང༌ང༌ གྱུར༌ཨིན༌ ཆའ༌ནོག༌།
2CO 4:1 དཀོན༌མཆོག༌གི༌ ཁོང༌རང༌ངི༌ སྙིང༌རྗེའེ༌ ནང༌ང༌, ང༌ཞ༌གུན༌ལ༌ འི༌ ཞབས༌ཏོག༌གི༌ ཆག༌ལས༌པོ༌ སལ༌ལ༌ ཛད༌ པ༌སང༌, ང༌ཞ༌གུན༌ནི༌ མ༌ནེ༌ སྤོས༌པ༌ མི༌ཕང༌།
2CO 4:2 ང༌ཞ༌གུན༌ནི༌ སེམས༌ངན༌ སྦས༌ཏེ༌ ཡོད༌ཁན༌ དང༌ ཁྲེལ༌བའེ༌ ལས༌ ཚང༌མ༌ ཕངས༌ཏེ༌ སུ༌ཞིག༌གའང༌ གོབ༌ མ༌སྐོར༌ར༌ ཡ༌ དཀོན༌མཆོག༌གི༌ བཀའེ༌ ནང༌ང༌ གྱུར༌ཇ༌ མ༌ཁྱོང༌ང༌ ཨིན༌། དཀོན༌མཆོག༌གི༌ ཟིག༌ཤེས༌ ང༌ཞ༌གུན༌ལ༌ གྱུས༌ཡོད༌པ༌ ཁོང༌ངི༌ ལོན༌གུན༌ ང༌ཞའེ༌ ཀྲང༌པོ༌ ཤད༌དད༌, ཡང༌ ང༌ཞའེ༌ ལས༌གུན༌ནི༌ ཞས༌ཏེ༌, སེམས༌ རྩང༌མ༌ ཡོད༌ཁན༌ ཚང༌མའེ༌, ང༌ཞའ༌ ཨིད༌ཤེས༌ཅན༌ ཨིན༌ཁན༌ནི༌ སྤང༌པོ༌ ཏང༌ང༌ནོག༌།
2CO 4:3 ཀལ༌ཏེས༌ ང༌ཞའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌བོ༌ ཀབས༌ཏེ༌ བོར༌རད༌ན༌, ཏེ༌བོ༌ ཁྲེས༌ཏོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཨིན༌ ཡོད༌ཁན༌གུན༌ནི༌ ཀ༌ནེ༌ སྦས༌ཏེ༌ བོར༌ཏེ༌ ཨིན༌ནོག༌།
2CO 4:4 འི༌ ཇིག༌རྟེན༌ནི༌ཀ༌ ཝང༌སྲུལ༌ཁན༌ནི༌ ཤེ༌ཏན༌ནི༌, ཏད༌པ༌ མེད༌ཁན༌ནི༌ སྙིང༌གུན༌ སྐྱོང༌པོ༌ ཅོས༌ཏེ༌ སམ༌བ༌གུན༌ ཞར༌ ཅུག༌ག༌ནོག༌། ཁོང༌གུན༌ལ༌ གའ༌མོའེ༌ ནས༌ཚུལ༌ལི༌ ཟིར༌རྗིད༌ཅན༌ནི༌ དེན༌བའེ༌ འོད༌པོ༌ ཐོང༌ མི༌ཐུབ༌ཅེས༌ལ༌ ཁོའེ༌ ཏེ༌བོ༌ ཅོའ༌ནོག༌། ཁོང༌གུན༌ནི༌ ཅི༌ས༌ ཐོག༌ནེ༌ དཀོན༌མཆོག༌ ཙོགས༌ ཨིན༌ཁན༌ནི༌ མ༌ཤི༌ཀའེ༌ ཟིར༌རྗིད༌དི༌ སྐོར༌ལ༌ གའ༌མོའེ༌ ནས༌ཚུལ༌བོ༌ ཧ༌ མ༌གོའ༌ ཨིན༌ནོག༌།
2CO 4:5 ང༌ཞ༌གུན༌ནི༌ ང༌ཞ༌རང༌ངི༌ སྐོར༌ལ༌ ཆོས༌ཤད༌ད༌མེད༌, ཨིན༌ནའང༌ ཡེ༌ཤུ༌ མ༌ཤི༌ཀ༌ གཙོ༌བོ༌ ཨིན༌ནོག༌ ཟེར༌ཏེ༌ ཆོས༌ཤད༌དད༌། ཡང༌ ཡེ༌ཤུའི༌ ཏོན༌ལ༌, ང༌ཞ༌གུན༌ ཁྱོ༌ཞའེ༌ ཡོག༌པོ༌ ཨིན༌།
2CO 4:6 དཀོན༌མཆོག༌གི༌ མོལས༌, “མུན༌ནག༌གི༌ ནང༌ང༌ འོད༌ ཇུང༌ཤིག༌,” ཏེན༌ན༌ གའ༌མོའེ༌ ནས༌ཚུལ༌བོ༌ གྱུད༌ཏེ༌ ཏེ༌ འོད༌པོ༌ ང༌དང༌གུན༌ནི༌ སྙིང༌ངི༌ ནང༌ང༌ བར༌ཅུག༌ག༌ ཛད༌ཅེས༌པོའེ༌, ང༌དང༌གུན༌ནི༌ ཡེ༌ཤུ༌ མ༌ཤི༌ཀའེ༌ ཞལ༌དོང༌ ཐོང༌ཏེ༌ དཀོན༌མཆོག༌གི༌ ཟིར༌རྗིད༌པོ༌ ཧ༌གོ༌ ཐུབ༌ཨིན༌།
2CO 4:7 ཞན༌ ང༌ཞ༌གུན༌ནི༌ སྙིང༌ངི༌ ནང༌ང༌ ཏེ༌ འོད༌པོ༌ ཁྲ༌ཆེམ༌ཆེམ༌ ཅོ༌ཨིན༌ ཡོད༌ནའང༌, ང༌ཞ༌གུན༌ ཏེ༌ རིན༌ཅན༌ ནོར༌ བོར༌ཁན༌ནི༌ ཆག༌ཅེས༌སི༌ ཟ༌མ༌ ཙོགས༌ ཨིན༌། འི༌བོའེ༌ ཀ༌ནེ༌, ང༌ཞ༌གུན༌ནི༌ ཇིགས༌པོ༌ ཁྱུད༌པོ༌ ང༌ཞ༌རང༌ངི༌ མན༌པ༌, དཀོན༌མཆོག༌གི༌ ཆོགས༌ནེ༌ ཨིན༌ཁན༌བོ༌ སལ༌པོ༌ ཧ༌གོའ༌ནོག༌།
2CO 4:8 ང༌ཞ༌གུན༌ལ༌ ཆོགས༌ ཚང༌མ༌ནེ༌ ནགས༌ དང༌ བར༌དོའེ༌ ནན༌ཏེ༌ ཡོད༌ཏེའང༌, ང༌ཞ༌གུན༌ མ༌ཆག༌ག༌ ཨིན༌ནོག༌། ང༌ཞ༌གུན༌ ཐེ༌ཚོམས༌སི༌ ནང༌ང༌ ཡོད༌ནའང༌, ང༌ཞ༌གུན༌ནི༌ རེ༌ཝ༌ ཆོད༌ཏེ༌ རག༌ ཟེར༌ར༌མེད༌།
2CO 4:9 ང༌ཞའ༌ མི༌གུན༌ནི༌ ནགས༌ སྟན༌ནའང༌, དཀོན༌མཆོག༌གི༌ ཕང༌ང༌ ཛད༌ད༌ མི༌རུག༌། ང༌ཞའ༌ མ༌སྐྱོན༌ མ༌སྲན༌ཏྲེ༌ ཆ༌ནའང༌, ང༌ཞ༌གུན༌ མེད༌ཁན༌ ཅོ༌ ཅུག༌ག༌ ཛད༌ད༌ མི༌རུག༌།
2CO 4:10 མ༌ཤི༌ཀའེ༌ ཐུག༌ཉིད༌ ང༌ཞ༌གུན༌ནི༌ ནང༌ང༌ ཞུགས༌ཁན༌བོ༌, མི༌གུན༌ནི༌ ཐོང༌ ཐུབ༌ཅེས༌སི༌ ཕིའ༌, རྡུག༌ངལ༌གུན༌ གྱུད༌ཏེ༌ ང༌ཞའེ༌ ཟུགས༌པོ༌གུན༌ནིའང༌ ཡེ༌ཤུ༌ ཀྲོང༌ཤེས༌པོའེ༌ ནང༌ང༌ ཁག༌ ནེན༌ཨིན༌ ཨིན༌ནོག༌།
2CO 4:11 འོ༌ན༌ ཡེ༌ཤུའི༌ ཤེད༌པོ༌ ང༌ཞ༌གུན༌ནི༌ ཤི༌ཅེས༌སི༌ ཟུགས༌པོའེ༌ ནང༌ང༌ ཞུགས༌ཏེ༌ ཡོད༌ཁན༌བོ༌ ཐོང༌ ཐུབ༌ཅེས༌སི༌ ཕིའ༌ ཏུས༌གྱུན༌ ང༌ཞ༌གུན༌ ཤི༌ཅེས༌སི༌ ཇིགས༌པའེ༌ ནང༌ང༌ ལུས༌ཏེ༌ ཨིན༌ནོག༌, ཅིའ༌ཟེར༌ན༌ ང༌ཞ༌གུན༌ནི༌ མ༌ཤི༌ཀའེ༌ ཞབས༌ཏོག༌ ཞུས༌ཏེ༌ ཨིན༌ནོག༌།
2CO 4:12 ང༌ཞ༌གུན༌ ཤི༌ཅེས༌སི༌ ཇིགས༌པའེ༌ ནང༌ང༌ དུག༌གད༌, ཨིན༌ནའང༌ ཏེ༌བོའེ༌ བྲས༌བུ༌ ནི༌, ཁྱོ༌ཞ༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཁན༌བོ༌ ཨིན༌ནོག༌།
2CO 4:13 ཀ༌ཟུག༌ སུང༌རབས༌སི༌ ནང༌ང༌ མོལ༌དུག༌, “ངའེ༌ དཀོན༌མཆོག༌གི༌ ནང༌ང༌ ཏད༌པ༌ ཅོས༌ པ༌སང༌, ངའེ༌ ཁོང༌ངི༌ ལོན༌བོ༌ ཤད༌པིན༌” ཏེན༌ན༌ ཙོགས༌ལ༌ ང༌ཞ༌གུན༌ནིའང༌ ཏད༌པ༌ ཅོས༌ཏེ༌ གའ༌མོའེ༌ ནས༌ཚུལ༌བོ༌ ཤད༌དད༌།
2CO 4:14 ང༌ཞའ༌ གྱུས༌ཡོད༌, གཙོ༌བོ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌ནི༌ དཀོན༌མཆོག༌གི༌ ང༌ཞ༌གུན༌ནའང༌ མ༌ཤི༌ཀ༌ ཉམ༌པོ༌ སོན༌ཏེའ༌ ལང༌ང༌ ཛད༌ཨིན༌། ཡང༌ ང༌ཞའ༌ ཁྱོ༌ཞ༌གུན༌ ཉམ༌པོ༌ ཁོང༌རང༌ངི༌ སྐུན༌དུན༌ལ༌ ཁྱོང༌ང༌ ཛད༌ཨིན༌།
2CO 4:15 ང༌ཞ༌གུན༌ལ༌ རྡུག༌ངལ༌ ཐོང༌ཁན༌ ཚང༌མ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌། ཡང༌ དཀོན༌མཆོག༌གི༌ ཐུག༌རྗེ༌བོ༌ མི༌ མང༌ངི༌ སང༌ མང༌ང༌ ཐོབས༌ཏེ༌ ཐུག༌རྗེ༌ཆེ༌ ཞུ༌ཁན༌ མང༌པོ༌ ཡོང༌ཨིན༌, དཀོན༌མཆོག༌ག༌ སྤལ༌ མང༌ངི༌ སང༌ མང༌ང༌ ཐོབ༌བ༌ ཛད༌ཅེས༌ ཨིན༌ནོག༌།
2CO 4:16 ཏེན༌ན༌བོའེ༌ཕིའ༌ ང༌ཞ༌གུན༌ནི༌ རེ༌ཝ༌བོ༌ མ༌ནེ༌ ཕང༌ང༌ མེད༌། ཞན༌ ང༌ཞ༌གུན༌ ཟུགས༌པོའེ༌ ཐོག༌ནེ༌ ཉམས༌ཨིན༌ ཆ༌ནའང༌, ང༌ཞ༌གུན༌ནི༌ སེམས༌ལ༌ དཀོན༌མཆོག༌གི༌ ཞག༌ནེ༌ ཞག༌ག༌ ཁྱུད༌ སལ༌ལ༌ ཛད༌དུག༌།
2CO 4:17 ང༌ཞ༌གུན༌ལ༌ ཐོང༌ཁན༌ནི༌ རྡུག༌ངལ༌གུན༌ ཆུ༌ངུན༌ ཡང༌ ཏུས༌ མང༌པོ༌ཞིག༌ ལུས༌ས༌ མ༌ནོག༌། ཨིན༌ནའང༌ ང༌ཞའེ༌ ཕིའ༌ ཏེ༌གུན༌ནི༌ བྲས༌བུ༌ ཐའ༌མེད༌པའེ༌ ཟིར༌རྗིད༌པོ༌ ཨིན༌, ཀ༌བོ༌ འི༌ རྡུག༌ངལ༌གུན༌ནི༌ སང༌ མངས༌ཏེའང༌ ཇིགས༌པོ༌ ཡོད༌ཏེ༌ ཨིན༌ནོག༌།
2CO 4:18 ཏེན༌ན༌བོའེ༌ཕིའ༌ ང༌ཞ༌གུན༌ནི༌ མིག༌པོ༌ ཐོང༌ཁན༌ནི༌ རྡུག༌ངལ༌གུན༌ནི༌ཀ༌ མ༌བོར༌ར༌, མ༌ཐོང༌ཁན༌ནི༌ ཟིར༌རྗིད༌པོའེ༌ཀ༌ བོར༌རད༌, ཅིའ༌ཟེར༌ན༌ ཐོང༌ཁན༌གུན༌ གྱོགས༌པ༌ མེད༌ཁན༌ ཆའ༌ནོག༌, ཨིན༌ནའང༌ མ༌ཐོང༌ཁན༌བོ༌ ཏུས༌གྱུན༌ ལུས༌ཤེས༌ ཨིན༌ནོག༌།
2CO 5:1 ང༌དང༌གུན༌ལ༌ གྱུས༌ཨིན༌ནོག༌, ང༌དང༌ དུག༌ཁན༌ནི༌ འི༌ ཇིག༌རྟེན༌ནི༌ ཀུར༌བོ༌ མེད༌ཁན༌ ཆ༌ན༌, ང༌དང༌གུན༌ལ༌ ཐའ༌མེད༌ཁན༌ནི༌ ཁང༌པ༌ཞིག༌ ནམ༌ཁའེ༌ ནང༌ང༌ ཡོད༌ཏེ༌ ཨིན༌ནོག༌, ཀ༌བོ༌ མིའི༌ ལག༌པ༌ནེ༌ མ༌ཅོའ༌ དཀོན༌མཆོག༌ ཁོང༌རང༌ངི༌ ང༌དང༌གུན༌ནི༌ ཕིའ༌ ཛད༌ཏེ༌ ཨིན༌ནོག༌།
2CO 5:2 ང༌དང༌གུན༌ དག༌ས༌ ཡོད༌ཁན༌ནི༌ ཟུགས༌པོའེ༌ ནང༌ང༌ འུ༌ཐུགས༌ཏེ༌, ཀོས༌ལག༌ སོ༌མ༌ ཙོགས༌ལ༌ ནམ༌ཁའེ༌ ཟུགས༌པོ༌བོ༌ གོན༌ཅེས༌ལ༌ རིངས༌ཨིན༌ ཨིན༌ནོག༌།
2CO 5:3 ང༌དང༌གུན༌ནི༌ ནམ༌ཁའེ༌ ཟུགས༌པོ༌བོ༌ གོན༌ཅེས༌ ཨིན༌ པ༌སང༌, ལྗེར༌ཉལ༌ལ༌ མི༌ལུས༌།
2CO 5:4 འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ དུག༌ ཟ༌ནེ༌, ང༌དང༌གུན༌ འུ༌ཐུག༌ག༌ནོག༌, ཨིན༌ནའང༌ ང༌དང༌གུན༌ འི༌ ཚང༌མའེ༌ ཀ༌ནེ༌ ཐར༌ཅེས༌ལ༌ ཤི༌ཉིན༌ མ༌གྲོའ༌, འི༌ སྟགས༌པ༌ མེད༌ཁན༌ནི༌ ཟུགས༌པོ༌བོ༌, ཐའ༌མེད༌པའེ༌ མི༌ཚེའེ༌ ནང༌ང༌ གྱུར༌ཅེས༌སི༌ ཕིའ༌, ནམ༌ཁའེ༌ ཟུགས༌པོ༌གུན༌ གོན༌ཉིན༌ གྲོའ༌ནོག༌།
2CO 5:5 ཏེ༌གུན༌ནི༌ ཕིའ༌ དཀོན༌མཆོག༌ ཁོང༌རང༌ངི༌ ང༌དང༌གུན༌ གྲལ༌གྲིག༌ ཅོའ༌ ཛད༌ཏེ༌ ཨིན༌ནོག༌, ཡང༌ ང༌དང༌གུན༌ལ༌ ཏམ༌པའེ༌ ཐུག༌ཉིད༌ སལ༌ལ༌ ཛད༌ཏེ༌, ཁོང༌ངི༌ སལ༌ལ༌ ཛད༌ཅེས༌ ཚང༌མ༌ ཏན༌ཏན༌ ཅོའ༌ ཛད༌ཏེ༌ ཨིན༌ནོག༌།
2CO 5:6 ཏེ༌བོའེ༌ཕིའ༌ ང༌ཞ༌གུན༌ལ༌ ཏུས༌གྱུན༌ ལོ༌ཁྱེལ༌ རག༌, འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ ཡོད༌ ཟ༌ནེ༌, ང༌ཞ༌གུན༌ གཙོ༌བོ༌ ཉམ༌པོ༌ ནམ༌ཁའེ༌ ཁམ༌པའེ༌ ནང༌ང༌ མ༌དུག༌ག༌ ཨིན༌ཁན༌བོ༌ གྱུས༌ཨིན༌ནོག༌།
2CO 5:7 ང༌ཞ༌གུན༌ནི༌ མི༌ཚེ༌ ཐོང༌ཁན༌བོའེ༌ཀ༌ མན༌པ༌, དཀོན༌མཆོག༌གི༌ ནང༌ང༌ ཨིད༌ཤེས༌ ཅོ༌ཨིན༌ཞིག༌ ཕུད༌དད༌།
2CO 5:8 འོ༌ན༌ ང༌ཞ༌གུན༌ལ༌ ཏན༌ཏན༌ ལོ༌ཁྱེལ༌ རག༌, ཡང༌ ངའེ༌ ཟེར༌རད༌ འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ དུག༌ག༌ སང༌, ནམ༌ཁའེ༌ ཁང༌པའེ༌ ནང༌ང༌ གཙོ༌བོ༌ ཡེ༌ཤུ༌ ཉམ༌པོ༌ དུག༌ག༌ལ༌ ཐད༌ད༌རག༌།
2CO 5:9 ཏེ༌བོའེ༌ཕིའ༌ ང༌ཞ༌གུན༌ འི༌ ཟུགས༌པོའེ༌ ནང༌ང༌ དུག༌ཨིན༌ ཡོད༌གྲོ༌ ཡ༌ ཏེ༌བོ༌ནེ༌ ཐག༌རིང༌ང༌, ཡེ༌ཤུ༌ ཐུགས༌ཐད༌ ཅུག༌ཅེས༌པོ༌ ང༌ཞའེ༌ མིག༌ཞི༌ ཨིན༌།
2CO 5:10 ཅིའ༌ཟེར༌ན༌ ཞག༌ཤིག༌ ང༌དང༌ ཚང༌མ༌ མ༌ཤི༌ཀའེ༌ སྐུན༌དུན༌ལ༌, ཁྲིམས༌ཅད༌དི༌ ཕིའ༌, ལང༌གོས༌ས༌ནོག༌, ཏེ༌ནེ༌ འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ ཟང༌པོ༌ ཡ༌ ངན༌པ༌ ཅོ༌ཁན༌གུན༌ནི༌ བྲས༌བུ༌ ང༌དང༌ རེ༌རེའ༌ སྨིན༌ན༌ནོག༌།
2CO 5:11 གཙོ༌བོའེ༌ ཁྲིམས༌ཅད༌ ཙམ༌ཤིག༌ ཀགས༌པོ༌ ཡོད༌ཁན༌བོ༌ ང༌ཞའ༌ གྱུས༌ཡོད༌ པ༌སང༌, ང༌ཞའེ༌ ཞན༌མ༌གུན༌ལ༌ མ༌ཤི༌ཀའེ༌ ནང༌ང༌ ཏད༌པ༌ ཁྱོང༌ཅུག༌ཅེས༌སི༌ རྩོན༌གྲུས༌ གྱལ༌ལ༌ ཅོའད༌། ང༌ཞའེ༌ སྙིང༌ངི༌ ནང༌ང༌ ཡོད༌ཁན༌བོ༌, དཀོན༌མཆོག༌གི༌ སལ༌པོ༌ ཁྱེན༌ན༌ ཛད༌ད༌ནོག༌, ཡང༌ ཁྱོ༌ཞ༌གུན༌ནིའང༌ ཤེ༌ཤེས༌སི༌ རེ༌ཝ༌ ཅོའད༌།
2CO 5:12 ང༌ཞའེ༌ ཡང༌སྐྱར༌ ང༌ཞ༌རང༌ངི༌ སྐོར༌ལ༌ ཕོ༌སོ༌ ཅོ༌རུག༌ག༌? ཅོའ༌མེད༌། ང༌ཞའེ༌ ཁྱོ༌ཞ༌གུན༌ལ༌ ང༌ཞའེ༌ སྐོར༌ལ༌ ཐད༌པོ༌ ཅོ༌ཅེས༌སི༌ སྐབས༌ ཏང༌ངད༌, ཏེ༌ནེ༌ ཁྱོ༌ཞ༌གུན༌ནི༌ སེམས༌ ཀྲང༌པོ༌ ཡོད༌ཅེས༌ལ༌ ཕོ༌སོ༌ མ༌ཅོའ༌, རང༌ངི༌ ལས༌གུན༌ནི༌ཀ༌ ཕོ༌སོ༌ ཅོ༌ཁན༌གུན༌ལ༌ ལན༌ཏང༌ཉན༌ཨིན༌།
2CO 5:13 ཀལ༌ཏེས༌ ང༌ཞའེ༌ མི༌ སྙོན༌བ༌གུན༌ ཙོགས༌ལ༌ སྤེ༌ར༌ ཏང༌དུག༌ སམ༌མད༌ན༌, ཏེ༌བོ༌ དཀོན༌མཆོག༌ག༌ སྤལ༌ ཐོབ༌ཅེས༌ལ༌ ཅོའད༌། ཡང༌ ཀལ༌ཏེས༌ ང༌ཞའེ༌ ཤེས༌རབས༌ཅན༌ནི༌ ལབ༌ཞ༌ ཏང༌དུག༌ སམ༌ན༌, ཏེ༌བོ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌།
2CO 5:14 མ༌ཤི༌ཀའེ༌ ཅམས༌པའེ༌ ང༌ཞའ༌ ཏེ༌གུན༌ ཅོ༌ཅུག༌དུག༌། ང༌དང༌གུན༌ནི༌ མ༌ཤི༌ཀ༌ ང༌དང༌ ཚང༌མའེ༌ ཏོན༌ལ༌ ཀྲོངས༌ཏེ༌ ཨིན༌ཁན༌བོའ༌ ཏད༌པ༌ ཅོས༌པ༌, ང༌དང༌གུན༌ནི༌ ང༌དང༌རང༌ངི༌ སྙིང༌པ༌ མི༌ཚེ༌ ཕུད༌ཚུལ༌བོ༌, ཤི༌ཏེ༌ ཨིན༌ཁན༌བོའེ༌ཀའང༌, ཏད༌པ༌ ཅོའ༌ནོག༌།
2CO 5:15 མ༌ཤི༌ཀ༌ ཚང༌མའེ༌ ཕིའ༌ ཀྲོངས༌། ཁོང༌ངི༌ ཏེ༌བོ༌ ཅོའ༌ ཛདས༌ ཅིའ༌ཟེར༌ན༌, མི༌ཚེ༌ སོ༌མ༌ ཐོབ༌ཁན༌གུན༌ནི༌ ཁོ༌རང༌གུན༌ནི༌ ཕིའ༌, མི༌ཚེ༌ མ༌ཕུད༌ད༌, མ༌ཤི༌ཀ༌ ཀྲོངས༌ཏེ༌ སོན༌ཏེའ༌ ལང༌ང༌ ཛད༌ཁན༌བོའེ༌ ཕིའ༌ མི༌ཚེ༌ ཕུད༌ཅེས༌སི༌ ཐུགས༌དོད༌ ཛད༌ད༌ནོག༌།
2CO 5:16 ཏ༌ ང༌ཞའེ༌ ཇིག༌རྟེན༌པའེ༌ སམ༌ཚུལ༌ ནང༌ཞིན༌ མི༌ཞིག༌ ཟང༌པོ༌ ཡ༌ ངན༌པ༌ ཨིན༌ནོག༌ ཟེར༌ཏེ༌ ཐག༌ཅད༌ད༌ མེད༌། ཏུས༌ཤིག༌ག༌ ང༌ཞ༌གུན༌ནིའང༌ མ༌ཤི༌ཀའ༌ ཏེན༌ན༌ ཙོགས༌ལ༌ སམ༌མད༌པིན༌, ཏ༌ དག༌ས༌ ང༌ཞ༌གུན༌ནི༌ ཏེ༌བོ༌ ཅོའ༌མེད༌།
2CO 5:17 ཏེ༌བོའེ༌ ཏོན༌ཏག༌པོ༌ ནི༌, མ༌ཤི༌ཀའེ༌ ཨིན༌ཁན༌གུན༌ མི༌ སོ༌མ༌ཞིག༌ གྱུར༌ཏེ༌ ཨིན༌ནོག༌། མི༌ཚེ༌ སྙིང༌པ༌བོ༌ མེད༌ཁན༌ ཡང༌ སོ༌མ༌ཞིག༌ གོ༌ཟུག༌ སོང༌ཏེ༌ ཨིན༌ནོག༌།
2CO 5:18 ཏེ༌ ཚང༌མ༌ དཀོན༌མཆོག༌གི༌ ཆོགས༌ནེ༌ སྐྱེས༌ ཨིན༌ནོག༌, ཁོང༌ངི༌ མ༌ཤི༌ཀ༌ གྱུད༌ཏེ༌, ང༌དང༌གུན༌ ཁོང༌རང༌ ཡོད༌ས༌ ལོགས༌ཏེ༌ ཁྱོང༌ང༌ ཛད༌ཏེ༌ ཨིན༌ནོག༌། ཡང༌ དཀོན༌མཆོག༌གི༌ ང༌ཞའ༌, ཁོང༌ དང༌ མི༌གུན༌ནི༌ ནང༌ང༌ ཐུན༌བྲེལ༌ ཅོ༌ཅེས༌སི༌ ཁག༌པོ༌ ཀལ༌ལ༌ ཛད༌ཏེ༌ ཨིན༌ནོག༌།
2CO 5:19 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ འི༌ ཇིག༌རྟེན༌པ༌གུན༌ ཁོང༌རང༌ ཉམ༌པོ༌ ཐུན༌བྲེལ༌ ཅོའ༌ ཛད༌ཏེ༌ ཏེ༌གུན༌ནི༌ སྡིག༌པ༌གུན༌ ཁོ༌རང༌གུན༌ནི༌ གྱབ༌གལ༌ལ༌ རྩིའ༌ མ༌ཛདས༌། ཡང༌ ཁོང༌ངི༌ ང༌ཞ༌གུན༌ལ༌ འི༌ ཐུན༌བྲེལ༌ལི༌ ལོན༌བོ༌ ཞན༌མའ༌ ཤད༌ཅེས༌ལ༌ སལ༌ལ༌ ཛདས༌།
2CO 5:20 ཏེ༌བོའེ༌ཕིའ༌ ང༌ཞ༌གུན༌ མ༌ཤི༌ཀའེ༌ སྐུ༌ཚབས༌ ཨིན༌, ཡང༌ ང༌ཞའ༌ གྱུད༌ཏེ༌ དཀོན༌མཆོག༌གི༌, ཇིག༌རྟེན༌པ༌གུན༌ལ༌ ཞུ༌ཝ༌ ཕུལ༌ལ༌ནོག༌། མ༌ཤི༌ཀའེ༌ ཚབས༌ ཅོས༌ཏེ༌ ང༌ཞའེ༌ ཞུ༌ཝ༌ ཕུལ༌ལད༌ “ཇུ༌ཇུ༌, དཀོན༌མཆོག༌ ཡོད༌ས༌ ལོགས༌ཏེ༌ ཡོང༌ཤིག༌།”
2CO 5:21 དཀོན༌མཆོག༌གི༌ སྡིག༌པ༌ མ༌ནེ༌ མེད༌ཁན༌ནི༌ མ༌ཤི༌ཀ༌ ང༌དང༌གུན༌ནི༌ སྡིག༌པའེ༌ ཕིའ༌ ཆོད༌པའེ༌ ཚུལ༌ལ༌ ལྡམ༌མ༌ ཛདས༌། ང༌དང༌གུན༌ མ༌ཤི༌ཀ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ རྩི༌ཅེས༌ལ༌ ཏེ༌བོ༌ ཅོའ༌ ཛདས༌།
2CO 6:1 ང༌ཞའ༌ དཀོན༌མཆོག༌གི༌ ཕྲོ༌པ༌ ལས༌ ཅོ༌ཁན༌གུན༌ ཨིན༌པ༌, ང༌ཞའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ཐུག༌རྗེ༌བོ༌ སྣང༌མེད༌ ཅོས༌ཏེ༌ ཟུར༌ལ༌ ཕང༌ མི༌ཕང༌ཅེས༌ལ༌ ཞུ༌ཝ༌ ཕུལ༌ལད༌།
2CO 6:2 ཅིའ༌ཟེར༌ན༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ངའེ༌ ལྡམ༌ཁན༌ནི༌ ཏུས༌པའེ༌ཀ༌ ངའ༌ ཁྱོ༌ཞ༌གུན༌ནི༌ མོས༌ལམ༌གུན༌ ཚོར༌, ཐར༌པའེ༌ ཞག༌ག༌, ངའེ༌ ཁྱོ༌ཞ༌གུན༌ལ༌ རོགས༌ ཅོས༌ཏེ༌ ཨིན༌པིན༌།” ལྟོས༌སའང༌, དི༌རིང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌, དི༌རིང༌ ཐར༌པའེ༌ ཏུས༌པོ༌ ཨིན༌ནོག༌།
2CO 6:3 སུ༌ཞིག༌གའང༌ སྒག༌ མི༌གྱབ༌ཅེས༌ ཡང༌ ང༌ཞ༌གུན༌ནི༌ ཞབས༌ཏོག༌ ཞུ༌ཁན༌གུན༌ནི༌ ནང༌ང༌, སྐྱོན༌ ཕིང༌ མི༌ཐུབ༌ཅེས༌སི༌ མི༌ཚེ༌ཞིག༌, ང༌ཞ༌གུན༌ནི༌ ཕུད༌དད༌།
2CO 6:4 ང༌ཞ༌གུན༌ནི༌ རྡུག༌ངལ༌, སྐ༌ལས༌ དང༌, ཧུན༌མེད༌དི༌ ཇིགས༌པའེ༌ རིགས༌ ཚང༌མའེ༌ ནང༌ང༌ ཟོད༌པ༌ ཉམ༌པོ༌ དོང༌ལེན༌ ཅོ༌ཅེས༌ གྱུད༌ཏེ༌, ང༌ཞ༌གུན༌ དཀོན༌མཆོག༌གི༌ དེན༌བའེ༌ ཞབས༌ཏོག༌པ༌ ཨིན༌ཁན༌བོ༌ སྟན༌ན༌ནོག༌།
2CO 6:5 སྤེར༌ན༌, ང༌ཞ༌གུན༌ལ༌ རྡུང༌གྱབ༌ ཏངས༌, ཙོན༌ཁང༌ངི༌ ནང༌ང༌ ཀགས༌, སྲོ༌ཡོང༌ཁན༌ནི༌ མི༌ཚོགས༌གུན༌ལ༌ དོང༌ལེན༌ ཅོ༌གོས༌, ཟུགས༌པོ༌ སིང༌ ངལ༌ངལ༌ ཚོག༌པ༌ ལས༌ ཅོས༌པིན༌, ཚན༌ གང༌པོ༌ ཉིད༌མེད༌པ༌ ཕུད༌གོས༌ ཡང༌ ཟ༌གྱུ༌ མེད༌པ༌ ལུས༌།
2CO 6:6 ང༌ཞ༌གུན༌ནི༌ ནང༌ང༌ ཡོད༌ཁན༌ནི༌ རྩང༌མ༌, ཧ༌གོ༌, ཟོད༌པ༌, ཐུག༌རྗེ༌, ཏམ༌པའེ༌ ཐུག༌ཉིད༌, དེན༌བའེ༌ ཅེས༌པ༌,
2CO 6:7 ཀྲང༌པོ༌ ཤད༌ཅེས༌, དཀོན༌མཆོག༌གི༌ ཤེད༌དི༌ ནང༌ང༌, ལག༌པ༌ ཡས༌པ༌ དང༌ ཡོ༌མ༌ ཉིས༌ཀོའེ༌ ནང༌ང༌ ཀྲང༌པོའེ༌ ནོལ༌ཅེས༌སི༌ ལག༌ཆ༌, ཏེ༌གུན༌ནི༌ ང༌ཞའ༌ དཀོན༌མཆོག༌གི༌ དེན༌བའེ༌ ཞབས༌ཏོག༌པ༌ ཨིན༌ཁན༌བོ༌ སྟན༌ན༌ནོག༌།
2CO 6:8 མི༌གུན༌ནི༌ ང༌ཞ༌གུན༌ལ༌ རྩི༌ཝ༌ ཡ༌ ཁྲེལ༌བ༌, སྨད༌གྲ༌ ཡ༌ སྟོད༌པ༌ ཏང༌ནའང༌, ང༌ཞའེ༌ དཀོན༌མཆོག༌ག༌ ཞབས༌ཏོག༌ ཞུའད༌། ང༌ཞའ༌ ཀྲང༌པོ༌ ཨིན༌ནའང༌, ཁོང༌གུན༌ནི༌ ང༌ཞ༌གུན༌ལ༌ ཟུས༌མའེ༌ ཞབས༌ཏོག༌པ༌གུན༌ ཨིན༌ནོག༌ ཟེར༌དུག༌།
2CO 6:9 ཞན༌ ང༌ཞ༌གུན༌ དཀོན༌མཆོག༌གི༌ ཞབས༌ཏོག༌པ༌ ཨིན༌ཁན༌བོ༌ ཚང༌མའེ༌ ཤེས༌ནའང༌ ཁོང༌གུན༌ནི༌ ང༌ཞ༌གུན༌ལ༌ སྣང༌མེད༌ ཅོ༌རུག༌། ང༌ཞ༌གུན༌ ཤི༌ཅེས༌སི༌ ཉེ༌མོའ༌ ལུས༌ནའང༌ ཏ༌རུང༌ངའང༌ སོན༌ཏེའ༌ ཡོད༌, རྡུང༌གྱབ༌ ཏངས༌ ཨིན༌ནའང༌ སད༌ མ༌སདས༌།
2CO 6:10 སྙིང༌གུན༌ནི༌ ནང༌ང༌ རྡུག༌ངལ༌གུན༌ ཡོད༌ནའང༌, ང༌ཞ༌གུན༌ སྐྱིད༌པོ༌ ཡོད༌། ཉལ༌བ༌ཅན༌ ཨིན༌ནའང༌, སེམས༌ཉིད༌དི༌ ཐོག༌ནེ༌ མང༌པོའ༌ ཆུག༌པོ༌ གྱུར༌ཅུག༌གད༌། ཇིག༌རྟེན༌ནི༌ ཐོག༌ནེ༌ ཅའང༌ མེད༌ནའང༌, སེམས༌ཉིད༌དི༌ ཐོག༌ནེ༌ ང༌ཞ༌གུན༌ནི༌ ལག༌ག༌ ཅི༌ཚང༌མ༌ ཡོད༌།
2CO 6:11 ཀོ༌རིན༌ཐི༌པ༌ ཛ༌འོ༌གུན༌, ང༌ཞའེ༌ ཁྱོ༌ཞ༌གུན༌ལ༌ ཀྲང༌པོ༌ ཟེར༌རད༌, ཏ༌ ང༌ཞའེ༌ སྙིང༌ ཁྱོ༌ཞ༌གུན༌ནི༌ ཕིའ༌ སང༌ ཕེས༌ཏེ༌ ཨིན༌།
2CO 6:12 ང༌ཞ༌གུན༌ནི༌ ཅེས༌པ༌བོ༌ ཁྱོ༌ཞ༌གུན༌ནི༌ ཕིའ༌ སྒགས༌ཏེ༌ བོར༌ར༌ མེད༌, ཨིན༌ནའང༌ ཁྱོ༌ཞ༌གུན༌ནི༌ ཅེས༌པ༌བོ༌ ང༌ཞ༌གུན༌ནི༌ ཕིའ༌ སྒགས༌ཏེ༌ བོར༌དུག༌།
2CO 6:13 ངའེ༌ ཁྱོ༌ཞ༌གུན༌ལ༌ ང༌རང༌ངི༌ ཕྲུ༌གུ༌ ཙོགས༌ལ༌ སྤེ༌ར༌ ཏང༌ངད༌, ཁྱོ༌ཞ༌གུན༌ནིའང༌ སྙིང༌བོ༌ སང༌ ཕེས༌སའང༌།
2CO 6:14 ཁྱོ༌ཞའ༌ ཏད༌པ༌ མེད༌ཁན༌གུན༌ ཉམ༌པོ༌ ཛ༌འོ༌ ཉེ༌མོ༌ མ༌གྱུར༌ཤིག༌། ཀྲང༌པོ༌ ཀ༌ཟུག༌གི༌ ངན༌པའེ༌ ཕྲོ༌པ༌ གྱུར༌ ཉན༌ཨིན༌? འོད༌ ཀ༌ཟུག༌གི༌ མུན༌གྲིག༌ ཉམ༌པོ༌ དྲེས༌ ཉན༌ཨིན༌?
2CO 6:15 མ༌ཤི༌ཀ༌ དང༌ ཤེ༌ཏན༌ནི༌ པར༌ལ༌ ཅི༌ བྲེལ༌ ཡོད༌ཀྱག༌? ཅའང༌ མེད༌ཀྱག༌། ཏད༌པ༌ཅན༌ཞིག༌ ཏད༌པ༌ མེད༌ཁན༌ཞིག༌གི༌ ཏད༌པ༌ ཅོ༌ཁན༌བོའེ༌ ནང༌ང༌ དྲེས༌ཉན༌ཨིན༌ན༌? མ༌ནེ༌ མི༌ཉན༌།
2CO 6:16 དཀོན༌མཆོག༌གི༌ ཆོད༌ཁང༌ དང༌ སྐུན༌དྲ༌ གུན༌ནི༌ པར༌ལ༌ ཅི༌ བྲེལ༌ ཡོད༌ཀྱག༌? ཅའང༌ མེད༌ཀྱག༌། ང༌དང༌གུན༌, སོན༌པོ༌ དཀོན༌མཆོག༌གི༌ ཆོད༌ཁང༌བོ༌ ཨིན༌ནོག༌, ཀ༌ཟུག༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌། “ང༌ ཏེ༌གུན༌ནི༌ ཕྲོའ༌ དུགས༌ཏེ༌ ཁོང༌གུན༌ ཉམ༌པོ༌ གྲུལ༌ཨིན༌། ང༌ ཁོང༌གུན༌ནི༌ དཀོན༌མཆོག༌ ཡང༌ ཁོང༌གུན༌ ངའེ༌ མི༌གུན༌ གྱུར༌ཨིན༌།”
2CO 6:17 “ཏེན༌ན༌བོའེ༌ཕིའ༌ ཏད༌པ༌ མེད༌ཁན༌གུན༌ནི༌ ཕྲོ༌ནེ༌ བིངས༌ཏེ༌ ཁྱོ༌ཞ༌རང༌ ཏེ༌གུན༌ནི༌ ཕྲོ༌ནེ༌ སོ༌སོའ༌ བེ༌ཏེ༌ དུག༌གོས༌། ཁོང༌གུན༌ནི༌ ཁམ༌ལོག༌གི༌ ཅ༌ལག༌གུན༌ལ༌ ལག༌པ༌ མ༌ཐུག༌ཤིག༌, ཏེ༌ནེ༌ ངའེ༌ ཁྱོ༌ཞ༌གུན༌ལ༌ གའ༌སུས༌ ཞུ༌ཨིན༌།”
2CO 6:18 “ཡང༌ ང༌ ཁྱོ༌ཞ༌གུན༌ནི༌ ཨ༌བ༌ དང༌ ཁྱོ༌ཞ༌གུན༌ ངའེ༌ བུ༌ཚ༌ དང༌ བུ༌མོ༌གུན༌ གྱུར༌ཨིན༌།” གཙོ༌བོ༌ ཀུན༌ཝང༌ དཀོན༌མཆོག༌གི༌ མོལས༌།
2CO 7:1 ང༌དང༌གུན༌ལ༌ ཏེ༌ ཞལ༌ཆད༌གུན༌ ཡོད༌ པ༌སང༌, ཛ༌འོ༌གུན༌, ང༌ཏི༌ ཟུགས༌པོ༌ དང༌ སེམས༌ཉིད༌ ཚི༌ཏུ༌ ཅོ༌ཁན༌ ཚང༌མ༌ ཕངས༌ཏེ༌ ང༌དང༌རང༌ རྩང༌མ༌ ཅོ༌ཤིག༌, ཡང༌ དཀོན༌མཆོག༌ག༌ ཀུས༌པ༌ ཅོ༌ཨིན༌ ཁོང༌ངི༌ ཇིགས༌སི༌ ནང༌ང༌ ང༌དང༌རང༌ ཅི༌ས༌ཐོག༌ནེ༌ ཏམ༌པ༌ གྱུར༌ཅུག༌ཅེས༌ལ༌ ལས༌ ཅོ༌ཤིག༌།
2CO 7:2 སྙིང༌ ཤགས༌ཏེ༌ ང༌ཞ༌གུན༌ལ༌ ཅེས༌པ༌ ཅོ༌ཤིག༌གའང༌, ང༌ཞ༌གུན༌ནི༌ སུ༌ཞིག༌གའང༌ ནོར༌ཁྲུལ༌ མ༌ཅོས༌པིན༌, ཡ༌ སུ༌ཞིག༌གའང༌ ལམ༌ ནོར༌ཁན༌ནི༌ཀ༌ ཁྲིད༌ཏེ༌ མ༌ཁྱེར༌པིན༌, ཡ༌ སུ༌ཞིག༌གི༌ ཀ༌ནེའང༌ ཕན༌ཐོགས༌ མ༌ལེན༌པིན༌།
2CO 7:3 ཏེ༌བོ༌ ངའེ༌ ཁྱོ༌ཞ༌གུན༌ལ༌ སྐྱོན༌ ཀལ༌ལ༌ ཟེར༌ར༌མེད༌། ངའེ༌ སྔུན༌ལ༌ ཟེར༌པིན༌, ང༌ཞའེ༌ ཁྱོ༌ཞའ༌ འི༌ཟམ༌ ཅེས༌པ༌ ཅོའད༌, ང༌ཞའ༌ ཁྱོ༌ཞ༌ ཉམ༌པོ༌ སོན༌ཏེའ༌ དུག༌ཅེས༌ ཡ༌ ཤི༌ཅེས༌ལའང༌ གྲལ༌གྲིག༌ ཨིན༌།
2CO 7:4 ངའ༌ ཁྱོ༌ཞ༌གུན༌ནི༌ ནང༌ང༌ ཚང༌མའེ༌སང༌ མང༌ང༌ ལོ༌ཁྱེལ༌ རག༌, ཡང༌ ཁྱོ༌ཞ༌གུན༌ནི༌ ཕིའ༌ ངའ༌ མ༌སྲན༌ཏྲེ༌ ཕོ༌སོ༌ ཚོར༌ར༌རག༌། རྡུག༌ངལ༌ལི༌ ནང༌ངའང༌, ཁྱོ༌ཞ༌གུན༌ནི༌ ངའ༌ མ༌སྲན༌ཏྲེ༌ སྤོས༌པ༌ ཏངས༌ཏེ༌ ཐད༌ཅུགས༌།
2CO 7:5 མ༌ཀེ༌དོ༌ནི༌ཡཱ༌ ནང༌ང༌ ལེབ༌བ༌ཅིག༌, ང༌ཞ༌གུན༌ལ༌ ངལ༌ཚོ༌ཅེས༌སི༌ ཏུས༌ མེད༌པིན༌, ཅིའ༌ཟེར༌ན༌ ང༌ཞ༌གུན༌ལ༌ ཆོགས༌ ཚང༌མ༌ནེ༌ ནགས༌ དང༌ བར༌དོ༌ ཐོང༌, ཏེ༌བོ༌ ནི༌ ཕི༌ལོག༌ནེ༌ གྱབ༌གལ༌ ཅོ༌ཁན༌ དང༌ སེམས༌སི༌ ནང༌ང༌ ཚེར༌ཁ༌ གུན༌ ཨིན༌།
2CO 7:6 ཨིན༌ནའང༌ སྤོས༌པ༌ མེད༌ཁན༌གུན༌ལ༌ སྤོས༌པ༌ སྐྱེ༌ ཅུག༌ག༌ ཛད༌ཁན༌ནི༌ དཀོན༌མཆོག༌གི༌, ཏི༌ཏུས༌ ང༌ཞའ༌ ཡོད༌ས༌ ལེབ༌ ཅུག༌ག༌ ཛད༌ཏེ༌, ང༌ཞ༌གུན༌ལ༌ སྤོས༌པ༌ སྐྱེ༌ ཅུག༌ག༌ ཛདས༌།
2CO 7:7 ཁོ༌ ང༌ཞ༌གུན༌ནི༌ ཕྲོའ༌ ལེབ༌ཅེས༌ མ༌ཚད༌, ཁྱོ༌ཞ༌གུན༌ནི༌ ཁོའ༌ སྤོས༌པ༌ ཏང༌ཅེས༌པོ༌ ཚོར༌ཏེ༌, ངའ༌ མ༌ ཐད༌པོ༌ སོང༌། ཁྱོ༌ཞ༌གུན༌ནི༌ ངའ༌ ཐོང༌ཅེས༌སི༌ སྲན༌ཏྲེ༌ དོད༌པ༌, ངའ༌ ཚེར༌ཁ༌ སྟན༌ཅེས༌སི༌ ཕིའ༌ ཁྱོ༌ཞ༌གུན༌ སྐྱོ༌མོ༌ ཆ༌ཅེས༌, ཡང༌ ངའེ༌ ཏོན༌ལ༌ ཁྱོ༌ཞ༌གུན༌ནི༌ སམ༌བ༌ ཏང༌ཅེས༌གུན༌ ཚོར༌ཏེ༌, ངའ༌ མ༌ ཐད༌པོ༌ སོང༌།
2CO 7:8 ཞན༌ ངའེ༌ སྔུན༌ནི༌ ཨི༌གེ༌བོའེ༌ ཁྱོ༌ཞ༌གུན༌ནི༌ སེམས༌སྐྱོ༌མོ༌ ཅོས༌ཏེ༌ ཡོད༌ནའང༌, དག༌ས༌ ངའ༌ གྱོད༌པ༌ མེ༌རག༌། ཏེ༌བོ༌ ཀལ༌ཏེ༌ སྟིང༌ནེ༌ ངའེ༌ གྱོད༌པ༌ ཅོས༌པིན༌, ཅིའ༌ཟེར༌ན༌ ངའ༌ གྱུས༌སོང༌ ཏེ༌ ཨི༌གེ༌བོའེ༌, ཏུས༌ ཉུ༌ངུན༌ཞིག༌ ཁྱོ༌ཞ༌གུན༌ནི༌ སེམས༌སྐྱོ༌མོ༌ ཅོས༌ཏོག༌།
2CO 7:9 ཅི༌ཨིན༌ནའང༌, ཏེ༌བོ༌ ཀལ༌ཅེས༌པོའ༌ ངའ༌ ཐད༌པོ༌ རག༌, ཏེ༌བོ༌ ཁྱོ༌ཞ༌གུན༌ལ༌ ཚེར༌ཁ༌ ཇུང༌ཅུག༌ཅེས༌ མན༌པ༌, ཏེ༌ ཚེར༌ཁ༌བོའེ༌, ཁྱོ༌ཞ༌གུན༌ལ༌ གྱོད༌པ༌ སྐྱེ༌ཅུགས༌ཏེ༌, ཁྱོ༌ཞའེ༌ མི༌ཚེ༌ ཕུད༌ཚུལ༌བོ༌ སྤོ༌ཅུགས༌། ཏེ༌བོ༌ དཀོན༌མཆོག༌གི༌ ཁོང༌རང༌ངི༌ མི༌གུན༌ལ༌ ཇུང༌ཅུག༌ཅེས༌སི༌ ཐུགས༌དོད༌ ཡོད༌ཁན༌ནི༌ ཚེར༌ཁའེ༌ རིགས༌ཤིག༌ ཨིན༌ནོག༌, སོང༌པ༌སང༌ ང༌ཞའེ༌, ཁྱོ༌ཞ༌གུན༌ལ༌ ཅི༌ཞིག༌གི༌ ཐོག༌ནེའང༌ ནོད༌པ༌ མ༌སྐྱལ༌པིན༌།
2CO 7:10 དཀོན༌མཆོག༌གི༌ ང༌དང༌གུན༌ལ༌ ཐོང༌ངོམས༌ ཆ༌ཅུག༌ག༌ ཛད༌ཅེས༌སི༌ ཚེར༌ཁ༌བོའེ༌, ང༌དང༌གུན༌ སྡིག༌པ༌ནེ༌ ཐག༌རིང༌ང༌ ཁྱེར༌ར༌ ཛད༌ཅེས༌ དང༌ ཐར༌པ༌ ཐོབ༌ ཅུག༌ག༌ ཛད༌ད༌ནོག༌། ཏེ༌ཙོགས༌སི༌ ཚེར༌ཁའེ༌ ཕིའ༌ གྱོད༌པ༌ ཅོ༌གོས༌ མེད༌པ༌ ཨིན༌ནོག༌, ཨིན༌ནའང༌ གྱོད༌པ༌ མེད༌ཁན༌ནི༌ ཇིག༌རྟེན༌ནི༌ ཚེར༌ཁའེ༌ ཐའ༌མེད༌པའེ༌ ཤི༌ཅེས༌ ཁྱོང༌ང༌ནོག༌།
2CO 7:11 ལྟོས༌ཤིག༌, དཀོན༌མཆོག༌ ཐུགས༌ཐད༌ ཅུག༌ཁན༌ནི༌ གྱོད༌པའེ༌, ཁྱོ༌ཞ༌གུན༌ནི༌ ནང༌ང༌ ཀ༌ཟུག༌ ལས༌ ཟང༌པོའེ༌ བྲས༌བུ༌ སྨིན༌དུག༌, སྤེར༌ན༌ སེམས༌སི༌ ནང༌ང༌ ཀྲང༌པོ༌ ཡང༌ སྐྱོན༌ ཕོག༌ཁན༌གུན༌ མེད༌ཁན༌ ཅོ༌ཅེས༌སི༌ དོད༌པ༌, སྡིག༌པ༌ ཅོ༌ཁན༌གུན༌ནི༌ཀ༌ སྲོ༌ སྲན༌ཏྲེ༌, སྡིག༌པའེ༌ ཇིགས༌ནང༌, ང༌ ཐོང༌ཅེས༌སི༌ དོད༌པ༌, ངའེ༌ ལབ༌ཞ༌གུན༌ ཁ༌ ཉན༌ཅེས༌ལ༌ རིང༌ཤེས༌, ནོར༌ཁྲུལ༌ ཅོ༌ཁན༌བོའ༌ གྱོགས༌པ༌ ཆད༌པ༌ ཀལ༌ཅེས༌, ཏེ༌ ཚང༌མ༌ གྱུད༌ཏེ༌, ཁྱོ༌ཞ༌གུན༌ ནོངས༌མེད༌ ཨིན༌ཁན༌བོ༌ ཁྱོ༌ཞ༌རང༌ངི༌ སྟན༌ཏེ༌ ཨིན༌ནོག༌།
2CO 7:12 ངའེ༌ སྔུན༌མའེ༌ ཨི༌གེ༌བོ༌, ནོར༌ཁྲུལ༌ ཅོ༌ཁན༌ ཡ༌ ནོད༌པ༌ ཕོག༌ཁན༌ གུན༌ནི༌ སྐོར༌ལ༌ མ༌བྲིས༌པིན༌, ཨིན༌ནའང༌ དཀོན༌མཆོག༌གི༌ སྐུན༌དུན༌ལ༌, ཁྱོ༌ཞ༌གུན༌, ང༌ཞའེ༌ ཕིའ༌ ཙམ༌ཤིག༌གི༌ དད༌ཅན༌ ཨིན༌ ཏེ༌བོ༌ ཁྱོ༌ཞ༌རང༌ངི༌ ཐོང༌ཉན༌ཅེས༌སི༌ གྱུན༌ཚན༌བོའེ༌ ཕིའ༌ བྲིས༌པིན༌།
2CO 7:13 ཏེ༌བོའེ༌ ཞས༌ཏེ༌ ང༌ཞ༌གུན༌ལ༌ སྤོས༌པ༌ སྐྱེས༌ཏེ༌ རག༌། ང༌ཞའ༌ སྤོས༌པ༌གུན༌ནི༌ ནན༌མའ༌, ཁྱོ༌ཞའེ༌ སྤུན༌ ཏི༌ཏུས༌ལ༌ གའ༌སུས༌ ཡང༌ སེམས༌སི༌ ནང༌ང༌ ཞི༌དེ༌ ཁྱོངས༌ཏེ༌ ཐད༌པོ༌ ཆ༌ཅུག༌ཅེས༌པོའ༌ ང༌ཞ༌གུན༌ མ༌ ཐད༌པོ༌ སོང༌།
2CO 7:14 ཁྱོ༌ཞའེ༌ ཕིའ༌ ང༌ ཙམ༌ཤིག༌གི༌ ཕོ༌སོ༌ ཚོར༌ཁན༌བོ༌ ངའེ༌ ཏི༌ཏུས༌ལ༌ ཤད༌པིན༌, ཡང༌ ཁྱོ༌ཞ༌གུན༌ནི༌ ངའེ༌ རེ༌ཝ༌ མ༌ཅག༌ག༌ ཨིན༌ནོག༌། ཏེ༌བོའེ༌ཕིའ༌ ངའེ༌ ཁྱོ༌ཞ༌གུན༌ལ༌ ཏུས༌གྱུན༌ ཀྲང༌པོ༌ ཤད༌ད༌ ཙོགས༌ལ༌ དག༌སའང༌ ངའེ༌ ཁྱོ༌ཞའེ༌ སྐོར༌ལ༌ སྤུན༌ ཏི༌ཏུས༌སི༌ དུན༌ལ༌ ཕོ༌སོ༌ ཅོ༌ཁན༌བོ༌ དེན༌བ༌ ཨིན༌ཁན༌ སྟན༌ན༌ནོག༌།
2CO 7:15 ཁྱོ༌ཞ༌གུན༌ནི༌ ཁོའེ༌ ཁའ༌ཉན༌ཏེ༌ ཇིགས༌ དང༌ སྙིང༌ངི༌ ཐིལ༌ནེ༌ ཀུས༌པ༌ ཉམ༌པོ༌ གའ༌སུས༌ ཞུ༌ཁན༌གུན༌, ཨིད༌ཏུ༌ ཅོས༌ཏེ༌ ཁོའེ༌ ཁྱོ༌ཞ༌གུན༌ལ༌ སྔུན༌ནི༌ སང༌ མང༌ང༌ ཡ༌ཤ༌ ཅོ༌རུག༌།
2CO 7:16 ང༌ མ༌སྲན༌ཏྲེ༌ ཐད༌པོ༌ རག༌ ཅིའ༌ཟེར༌ན༌ ངའ༌ ཁྱོ༌ཞ༌གུན༌ནི༌ ནང༌ང༌ ཐར༌ཁྱེལ༌པའེ༌ ལོ༌ཁྱེལ༌ རག༌།
2CO 8:1 སྤུན༌གུན༌ དཀོན༌མཆོག༌གི༌ མ༌ཀེ༌དོ༌ནི༌ཡཱའེ༌ ཆོས༌ཚོགས༌གུན༌ནི༌ ནང༌ང༌ ཁོང༌རང༌ངི༌ ཐུག༌རྗེའེ༌ གྱུད༌ཏེ༌ ཛད༌ཁན༌གུན༌, ངའེ༌ ཁྱོ༌ཞ༌གུན༌ལ༌ ཧ༌གོ༌ ཅུག༌ཉིན༌རག༌།
2CO 8:2 ཁོང༌གུན༌ལ༌ ནགས༌ དང༌ བར༌དོ༌ མང༌པོའེ༌ ཚོད༌ལྟ༌ ཡོངས༌ ཡང༌ མངས༌ཏེའང༌ ཉལ༌བ༌ཅན༌ ཨིན༌ཨིན༌ནའང༌ སྐྱིད༌པོ༌ ཁོང༌གུན༌ནི༌ ནང༌ནེ༌ ལུད༌ཏེ༌ ཆ༌ཅེས༌པོའེ༌, ཁོང༌གུན༌ སྙིང༌ སང༌ ཕེས༌ཏེ༌ སལ༌ཁན༌གུན༌ ཨིན༌ནོག༌།
2CO 8:3 ཁོང༌གུན༌ནི༌ ཁྱུད༌ ནང༌ཞིན༌ ཙམ༌ཤིག༌ ཏང༌ཉན༌ནའང༌ ཏངས༌ མ༌ཚད༌, ཏེ༌སང༌ མང༌ང༌ ཏང༌ཁན༌བོའ༌ ངའེ༌ སྤང༌པོ༌ ཏང༌ ཉན༌ཅེས༌རག༌, ཡང༌ ཏེ༌བོ༌ ཁོང༌གུན༌ནི༌ ཐད༌པོ༌ ཉམ༌པོ༌ ཅོ༌རུག༌།
2CO 8:4 ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ཡོད༌ཁན༌ནི༌ ཏད༌པ༌ཅན༌གུན༌ལ༌ རོགས༌ ཅོ༌ཅེས༌སི༌ རྩི༌ཝའེ༌ ནང༌ང༌ ཁོང༌གུན༌ནིའང༌ ཁག༌ ལེན༌ཉན༌ཅེས༌ལ༌, ང༌ཞའ༌ ཡང༌ནེ༌ ཡང༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལ༌དུག༌།
2CO 8:5 ཡང༌ ཁོང༌གུན༌ནི༌ ང༌ཞའེ༌ སམ༌ཁན༌ནི༌ སང༌ མང༌ང༌ ཅོས༌, ཅིའ༌ཟེར༌ན༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌ ཁོང༌རང༌གུན༌ ཏང༌པོ༌, གཙོ༌བོ༌ ཡེ༌ཤུའ༌ ཏེ༌ནེ༌ ང༌ཞ༌གུན༌ལ༌ ཏང༌དུག༌།
2CO 8:6 ཏེན༌ན༌བོའེ༌ཕིའ༌ ང༌ཞ༌གུན༌ནི༌ སྤུན༌ ཏི༌ཏུས༌སི༌, གོ༌མ༌ ཁྱོ༌ཞ༌གུན༌ལ༌ པེ༌ནེ༌ རོགས༌གུན༌ ལྡུས༌ཏེ༌ ཁྱོང༌ཅེས༌ གོ༌ཟུག༌ ཅོ༌ཅེས༌ལ༌ སྤོས༌པ༌ ཏངས༌། ཏེ༌ པེ༌ནེ༌ རོགས༌གུན༌ ལྡུ༌ཅེས༌པོ༌ གྲུབ༌ཅུག༌ཅེས༌ལ༌ སྤོས༌པ༌ ཏང༌ཅེས༌སི༌ ཕིའ༌, ངའེ༌ ཁོའ༌ ཁྱོ༌ཞའེ༌ཀ༌ ལོགས༌ཏེ༌ ཆ༌ཅེས༌ལ༌ ཞུ༌ཝ༌ ཕུལ༌ལད༌།
2CO 8:7 ཁྱོ༌ཞ༌གུན༌ནི༌ ལས༌ མང༌པོའེ༌ ནང༌ང༌ མ༌ གྱལ༌ལ༌ ཅོས༌ཏེ༌ ཨིན༌ནོག༌, སྤེར༌ན༌ ཏད༌པའེ༌ ནང༌ང༌, སྤེ༌ར༌ ཏང༌ཅེས༌སི༌ ནང༌ང༌, ཤེས༌རབས༌སི༌ ནང༌ང༌, ལས༌ ཅོ༌ཅེས༌སི༌ དོད༌པའེ༌ ནང༌ང༌, ཡང༌ ང༌ཞའེ༌ ཕིའ༌ ཁྱོ༌ཞ༌གུན༌ནི༌ ཅེས༌པའེ༌ ནང༌ང༌། ངའེ༌ དོད༌པ༌བོ༌ ནི༌, ཁྱོ༌ཞའེ༌ སྙིང༌ ཕེས༌ཏེ༌ ཏང༌ཅེས༌སི༌ ལས༌པོའེ༌ ནང༌ངའང༌ གྱལ༌ལ༌ ཅོ༌གོ༌ཤེས༌ ཨིན༌ནོག༌ སམ༌མ༌རག༌།
2CO 8:8 ངའེ༌ ཁྱོ༌ཞ༌གུན༌ལ༌ ཏེ༌བོ༌ ཅོས༌ ཟེར༌ཏེ༌ བཀའ༌ ཏང༌ང༌མེད༌, ཨིན༌ནའང༌ ངའེ༌ ཞན༌ཡང༌ ཆོས༌ཚོགས༌སི༌ ཏང༌དོད༌ཅན༌གུན༌ ཉམ༌པོ༌ ལྡུར༌ཏེ༌ ཁྱོ༌ཞ༌གུན༌ནི༌ ཅེས༌པ༌ ཙམ༌ཤིག༌གི༌ ཀྲང༌པོ༌ ཨིན༌ཁན༌བོ༌, ཚོད༌ལྟ༌ ཉིན༌རག༌།
2CO 8:9 ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌བོ༌ ཁྱོ༌ཞ༌གུན༌ལ༌ གྱུས༌ཡོད༌ཏེ༌ ཨིན༌ནོག༌། ཞན༌ ནམ༌ཁའེ༌ ནང༌ང༌ ཁོང༌ ཆུག༌པོ༌ ཨིན༌ནའང༌, ཁྱོ༌ཞ༌གུན༌ནི༌ ཏོན༌ལ༌ ཁོང༌ ཉལ༌བ༌ཅན༌ གྱུར༌ར༌ ཛདས༌། ཁྱོ༌ཞ༌གུན༌ ནམ༌ཁའེ༌ ནང༌ང༌ ཆུག༌པོ༌ གྱུར༌ཅུག༌ཅེས༌སི༌ ཕིའ༌, ཁོང༌ ཉལ༌བ༌ཅན༌ གྱུར༌ར༌ ཛདས༌།
2CO 8:10 འི༌བོ༌ ངའེ༌ ཁ༌དའ༌ ཨིན༌, ལོ༌ ཅིག༌གི༌ སྔུན༌ལ༌ ཁྱོ༌ཞ༌གུན༌ནི༌ གོ༌ཟུག༌ ཅོ༌ཁན༌ནི༌ ལས༌པོ༌, གྲུབ༌ཅུག༌ན༌ གྱལ༌ལ༌ ཆ༌ཅེས༌ ཨིན༌ནོག༌། སྔུན༌མའེ༌ ལོའེ༌ ནང༌ང༌ ཁྱོ༌ཞ༌གུན༌ ཏང༌པོ༌རང༌ ཨིན༌པིན༌, ཀ༌གུན༌ནི༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ མ༌ཤི༌ཀ༌པ༌གུན༌ལ༌ པེ༌ནེ༌ ཏང༌ཅེས༌སི༌ དོད༌པ༌ ཡོད༌ཅེས༌ མ༌ཚད༌ ཏངས༌ཏེའང༌ ཨིན༌པིན༌།
2CO 8:11 ཏ༌ ཁྱོ༌ཞ༌གུན༌ནི༌ ཀ༌ལས༌པོ༌ སྔུན༌ལ༌ གོ༌ཟུག༌ ཅོས༌ ཏེ༌བོ༌ གྲུབ༌ཅུག༌ གོ༌ཤེས༌ ཨིན༌ནོག༌། ཁྱོ༌ཞ༌གུན༌ནི༌ སྔུན༌ལ༌ ཏང༌ཅེས༌སི༌ སེམས༌སི༌ དོད༌པ༌བོ༌, དག༌ས༌ ཏེན༌ན༌ ཙོགས༌ལ༌ ཏང༌ཅེས༌སི༌ ནང༌ང༌ སྟོན༌ཤིག༌, རང༌རང༌ངི༌ ཁྱུད༌ ནང༌ཞིན༌ལ༌ ཏོང༌ཤིག༌།
2CO 8:12 ཁྱོ༌ཞ༌གུན༌ནི༌ ཅི༌ཞིག༌ ཏང༌ཅེས༌སི༌ ཐག༌ཅད༌ ཅོས༌ ཀལ༌ཏེས༌ རིངས༌ཨིན༌ཞིག༌ ཏང༌ན༌, ཏེ༌བོའེ༌ དཀོན༌མཆོག༌ ཐུག༌ཉེས༌ ཤུག༌ག༌ནོག༌, ཡང༌ ཏེ༌བོ༌ ཁྱོ༌ཞ༌གུན༌ནི༌ ཏང༌ཅེས༌སི༌ ཁྱུད༌ནེ༌ ཐལ༌ཏེ༌ མན༌པ༌, ཁྱོ༌ཞ༌རང༌ངི༌ ཁྱུད༌ ནང༌ཞིན༌ ཏང༌གོས༌།
2CO 8:13 འོ༌ན༌ ངའེ༌ དོད༌པ༌ ནི༌, ཁྱོ༌ཞ༌གུན༌ནི༌ ཏང༌ཅེས༌པོའེ༌, ཞན༌མ༌གུན༌ནི༌ མི༌ཚེ༌བོ༌ ལ༌མོ༌ཞིག༌ ཡང༌ ཁྱོ༌ཞ༌རང༌གུན༌ནི༌ མི༌ཚེ༌བོ༌ ཀགས༌པོ༌ཞིག༌ གྱུར༌ཅུག༌ཅེས༌པོ༌ མན༌, ཨིན༌ནའང༌ ཚང༌མའ༌ དྲན༌དྲ༌ ཡོང༌གོ༌ཤེས༌པོ༌ ཨིན༌།
2CO 8:14 དག༌ས༌ ཁྱོ༌ཞ༌གུན༌ནི༌ ལག༌ག༌ མང༌པོ༌ ཡོད༌ པ༌སང༌, སྒོས༌དོམ༌ ཡོད༌ཁན༌གུན༌ལ༌ རོགས༌ ཅོ༌ཉན༌ཨིན༌། ཡོང༌ཅེས༌ཅན༌ནི༌ ཏུས༌སི༌ ནང༌ང༌, ཁོང༌གུན༌ལ༌ མང༌པོ༌ ཇོར༌ཏེ༌ ཁྱོ༌ཞ༌གུན༌ལ༌ སྒོས༌དོམ༌ ཡོད༌ ཟ༌ནེ༌, ཁྱོ༌ཞ༌ ཉམ༌པོ༌ བགོ༌ཨིན༌, ཏེ༌ནེ༌ ཚང༌མ༌ དྲན༌དྲ༌ གྱུར༌ཨིན༌།
2CO 8:15 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌། “མང༌པོ༌ ལྡུས༌ཏེ༌ ཁྱོང༌ཁན༌གུན༌ནི༌ ལག༌ག༌ གོད༌ལ༌ ཏང༌ཅེས༌ལ༌ མ༌ལུས༌ས༌ ཨིན༌ནོག༌། ཡང༌ ཉུ༌ངུན༌ ལྡུས༌ཏེ༌ ཁྱོང༌ཁན༌གུན༌ནི༌ སྒོས༌དོམ༌ དྲན༌དྲ༌ སོང༌ཏེ༌ ཨིན༌ནོག༌།”
2CO 8:16 ཨིན༌ནའང༌ དཀོན༌མཆོག༌ག༌ ཐུག༌རྗེ༌ཆེ༌, ཁོང༌ངི༌ ང༌ཞའེ༌ སྤུན༌ ཏི༌ཏུས༌ལའང༌, ཁྱོ༌ཞ༌གུན༌ནི༌ ཕིའ༌ ངའེ༌ ནང༌ང༌ ཡོད༌ཁན༌ནི༌ དོད༌པ༌གུན༌ ཙོགས༌ སལ༌ལ༌ ཛད༌ཏེ༌ དུག༌།
2CO 8:17 ཏི༌ཏུས༌སི༌, ཁྱོ༌ཞའ༌ ཐུག༌ག༌ལ༌ ཡང༌སྐྱར༌ སོང༌ ཟེར༌ཁན༌ནི༌ ང༌ཞའེ༌ ཞུ༌ཝ༌བོའ༌ ཐད༌པོ༌ ཅོས༌། དེན༌བ༌, ཁོ༌ ཁོ༌རང༌, སོང༌ཏེ༌ ཁྱོ༌ཞ༌གུན༌ལ༌ ཐུག༌ཅེས༌ལ༌, རིངས༌ཏེ༌ ཤི༌རུག༌།
2CO 8:18 ང༌ཞ༌གུན༌ནི༌ ཞན༌ སྤུན༌ཞིག༌གའང༌, ཏི༌ཏུས༌ ཉམ༌པོ༌ ལམ༌ཅུག༌གད༌། ཆོས༌ཚོགས༌ ཚང༌མའེ༌ ཁོའ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ཞབས༌ཏོག༌གི༌ ཕིའ༌ སྟོད༌པ༌ ཕུལ༌དུག༌།
2CO 8:19 ང༌ཞའེ༌ ཡེ༌རུ༌ཤ༌ལེམ༌མི༌ ནང༌ང༌ ཡོད༌ཁན༌ནི༌ ཏད༌པ༌ཅན༌གུན༌ནི༌ ཕིའ༌ པེ༌ནེ༌ རོགས༌གུན༌ ཁྱེར༌ ཟ༌ནེ༌, ང༌ཞ༌གུན༌ལ༌ རོགས༌ ཅོ༌ཅེས༌སི༌ ཕིའ༌, ཆོས༌ཚོགས༌གུན༌ནི༌ ཁོ༌ ལྡམས༌ཏེ༌ ཨིན༌པིན༌, ཏེ༌ ཞབས༌ཏོག༌གུན༌ ནི༌, གཙོ༌བོ༌ ཡེ༌ཤུའ༌ སྤལ༌ ཁྱོང༌ཅེས༌ ཡང༌ ང༌ཞ༌གུན༌ རོགས༌ ཅོ༌ཅེས༌ལ༌ རིངས༌ཨིན༌ ཡོད༌ཁན༌ སྟན༌ན༌ནོག༌།
2CO 8:20 ང༌ཞའ༌ པེ༌ནེ༌ མང༌པོའེ༌ རོགས༌པོ༌ ནོར༌ཏེ༌ ཀོལ༌དུག༌ ཟེར༌ཅེས༌ནེ༌ སྐྱོབ༌ཅེས༌སི༌ ཕིའ༌, ང༌ཞའེ༌ ཁོ༌ དང༌ ཏི༌ཏུས༌ ཉིས༌ཀོ༌ ང༌ཞའ༌ ཉམ༌པོ༌ ཡེ༌རུ༌ཤ༌ལེམ༌མི༌ གྱལ༌ས༌ ཁྱེར༌ཨིན༌།
2CO 8:21 ང༌ཞ༌གུན༌ནི༌ ཅོ༌ཁན༌ ཀྲང༌པོ༌ ཨིན༌ཁན༌བོ༌ གཙོ༌བོའེ༌ ཟིག༌ཤེས༌ མ༌ཚད༌ མི༌གུན༌ནིའང༌ ཐོང༌ཅེས༌ལ༌ རྩོན༌གྲུས༌ ཅོའད༌།
2CO 8:22 ང༌ཞ༌གུན༌ནི༌ ཁོང༌ ཉིས༌ཀོ༌ ཉམ༌པོ༌ ཞན༌ཡང༌ སྤུན༌ཞིག༌གའང༌ ལམ༌ཅུག༌གད༌, ཁོའེ༌ ཏུས༌སྐབས༌ མང༌པོ༌ཞིག༌གི༌ ནང༌ང༌, ཁོ༌རང༌ ཙམ༌ཤིག༌གི༌ གཙོ༌བོའ༌ ཞབས༌ཏོག༌ ཞུ༌ཅེས༌ལ༌ རིངས༌ཨིན༌ ཡོད༌ཁན༌བོ༌, ལན༌ མང༌པོ༌ སྟན༌ཏེ༌ ཏངས༌། ཁྱོ༌ཞ༌གུན༌ནི༌ ནང༌ང༌ མང༌ང༌ ལོ༌ཁྱེལ༌ ཡོད༌ཅེས༌པོའེ༌, ཏ༌ དག༌ས༌ ཁོ༌ མང༌ང༌ རིངས༌ཨིན༌ ཨིན༌ནོག༌།
2CO 8:23 ཏི༌ཏུས༌ ནི༌, ངའེ༌ ཕྲོ༌པ༌ ང༌ ཉམ༌པོ༌ ཁྱོ༌ཞའ༌ རོགས༌ ཅོ༌ཁན༌བོ༌ ཨིན༌, ཡང༌ ཁོ༌ ཉམ༌པོ༌ ཡོད༌ཁན༌ནི༌ སྤུན༌ ཉིས༌ཀོ༌, ཆོས༌ཚོགས༌གུན༌ནི༌ ལམ༌ཅུགས༌ཏེ༌ ཨིན༌, ཡང༌ མ༌ཤི༌ཀའ༌ རྩི༌ཝ༌ ཁྱོང༌ང༌ནོག༌།
2CO 8:24 ཏེན༌ན༌བོའེ༌ཕིའ༌ ཁོང༌ སུམ༌ཀོ༌ དང༌ ཞན༌ ཆོས༌ཚོགས༌གུན༌ནི༌ དུན༌ལ༌ ཁྱོ༌ཞའེ༌ ཅེས༌པ༌ དང༌ ང༌ཞའེ༌ ཁྱོ༌ཞ༌གུན༌ནི༌ སྐོར༌ལ༌ ཕོ༌སོ༌ ཅོ༌ཁན༌བོ༌ ཏན༌ཏན༌ ཨིན༌ཁན༌ སྟོན༌ཤིག༌།
2CO 9:1 ཡེ༌རུ༌ཤ༌ལེམ༌མི༌ ཏད༌པ༌ཅན༌གུན༌ནི༌ ཕིའ༌ ཞབས༌ཏོག༌གི༌ སྐོར༌ལ༌ ངའེ༌ ཁྱོ༌ཞ༌གུན༌ལ༌ བྲི༌གོས༌ མེད༌པ༌ ཨིན༌ནོག༌,
2CO 9:2 ཅིའ༌ཟེར༌ན༌ ཁྱོ༌ཞའ༌ ཀོ༌རིན༌ཐི༌ ཆོས༌ཚོགས༌གུན༌ རོགས༌ ཅོ༌ཅེས༌ལ༌ ཙམ༌ཤིག༌ རིངས༌ཨིན༌ ཡོད༌ཁན༌བོ༌ ངའ༌ གྱུས༌ཡོད༌། ཡང༌ ཁྱོ༌ཞའ༌ ཨ༌ཀ༌ཡཱའེ༌ ནང༌ང༌ ཡོད༌ཁན༌གུན༌ནི༌, ལོ༌ ཅིག༌ནེ༌ པར༌ལ༌ རོགས༌སི༌ པེ༌ནེ༌ ཀལ༌ཆོག༌ཆོག༌ ཡོད༌ཁན༌བོ༌, ངའེ༌ མ༌ཀེ༌དོ༌ནི༌ཡཱའེ༌ ཆོས༌ཚོགས༌གུན༌ནི༌ དུན༌ལ༌ ཕོ༌སོ༌ ཅོས༌ཏེ༌ ཤད༌པིན༌། དེན༌བ༌, ཁྱོ༌ཞ༌གུན༌ནི༌ རོགས༌ ཅོ༌ཅེས༌སི༌ དོད༌པ༌ ཆེན༌མོའེ༌ ཞས༌ཏེ༌, མ༌ཀེ༌དོ༌ནི༌ཡཱའེ༌ ནང༌ང༌ ཡོད༌ཁན༌ནི༌ ཏད༌པ༌ཅན༌ མང༌པོ༌ཞིག༌གིའང༌ ཏང༌ཅེས༌ གོ༌ཟུག༌།
2CO 9:3 ཨིན༌ནའང༌ ཁྱོ༌ཞ༌གུན༌ནི༌ སྐོར༌ལ༌ ངའེ༌ ཕོ༌སོ༌ ཅོ༌ཁན༌བོ༌ ནོར༌ཏེ༌ མན༌ཁན༌ ཡང༌ ངའེ༌ ཟེར༌ཁན༌ ཙོགས༌ལ༌ ཁྱོ༌ཞ༌གུན༌ནི༌ པེ༌ནེ༌ ཚང༌མ༌ ལྡུས༌ཏེ༌ གྲལ༌གྲིག༌ ཅོ༌ཐུབ༌ཅེས༌སི༌ ཕིའ༌, ངའེ༌ ཁྱོ༌ཞ༌གུན༌ནི༌ཀ༌ འི༌ སྤུན༌ སུམ༌ཀོ༌ ཀལ༌ལད༌།
2CO 9:4 ཀལ༌ཏེས༌ མ༌ཀེ༌དོ༌ནི༌ཡཱའེ༌ ཏད༌པ༌ཅན༌ ཁ༌ཅིག༌ ངའ༌ ཉམ༌པོ༌ ཡོངས༌ཏེ༌ ཁྱོ༌ཞ༌གུན༌ གྲལ༌གྲིག༌ མེད༌ཁན༌བོ༌ ཐོང༌ན༌, ཏེ༌ནེ༌ ངའེ༌ ཕོ༌སོ༌ ཅོ༌ཁན༌བོའེ༌ཀ༌ ང༌ ཅིག༌པོ༌ མ༌ཚད༌ ཁྱོ༌ཞ༌གུན༌ནའང༌ ཁྲེལ༌བ༌ ཆ༌ཅེས༌ ཨིན༌ནོག༌།
2CO 9:5 ཏེ༌ནེ༌ ཁྱོ༌ཞ༌གུན༌ནི༌ དམ༌ཆ༌ ཅོས༌ཁན༌ནི༌ པེ༌ནེ༌གུན༌ གྲལ༌གྲིག༌ ཡོད༌ཅེས༌སི༌ ཕིའ༌ ངའེ༌ འི༌ སྤུན༌ ཚང༌ཀོ༌ ངའེ༌ སང༌ སྔུན༌ལ༌ ལམ༌ཅུག༌གད༌། ཨིན༌ནའང༌ ཏེ༌བོ༌ ཏང༌ཉིན༌ མེད༌ཨིན༌ ཏང༌ཁན༌ནི༌ སྐྱེས༌ཤིག༌ མན༌པ༌, ཐད༌ཏེ༌ ཏང༌ཁན༌ནི༌ སྐྱེས༌ཤིག༌ ཡོང༌གོས༌ སམ༌མ༌རག༌།
2CO 9:6 འི༌བོ༌ མ༌རྗེད༌ཤིག༌, ས༌འོན༌ ཉུ༌ངུན༌ ཏབ༌ཁན༌ནི༌ ཞིང༌བད༌པ༌ཞིག༌ག༌ སྟོན༌ཐོག༌གའང༌, ཉུ༌ངུན༌ཞིག༌ མ༌ནེ༌ སྨིན༌ན༌ མ༌ནོག༌། ཨིན༌ནའང༌ སྙིང༌ ཕེས༌ཏེ༌ ས༌འོན༌ ཏབ༌ཁན༌བོའེ༌ སྟོན༌ཐོག༌གའང༌, མང༌པོ༌ རྔ༌ཨེན༌།
2CO 9:7 ཙམ༌ཤིག༌ ཏང༌ཉན༌ཅེས༌རག༌, ཏེ༌བོ༌ ཁྱོ༌ཞའ༌ རེ༌རེའེ༌ རང༌ངི༌ སྙིང༌ངི༌ ནང༌ང༌ ཐག༌ཅད༌གོས༌། སེམས༌ མ༌ཐད༌ད༌ ཡ༌ ཝང༌ངི༌ ནང༌ང༌ མ༌ཏང༌ཤིག༌, ཅིའ༌ཟེར༌ན༌ དཀོན༌མཆོག༌ ཐད༌པོ༌ ཉམ༌པོ༌ ཏང༌ཁན༌བོའ༌ ཐུགས༌ཐད༌ད༌ ཛད༌ད༌ནོག༌།
2CO 9:8 ཡང༌ དཀོན༌མཆོག༌གི༌ ཁྱོ༌ཞ༌གུན༌ལ༌ སྒོས༌དོམ༌གུན༌ སྙིང༌ ཕེས༌ཏེ༌ སལ༌ལ༌ ཛད༌ད༌ནོག༌། ཏེ༌ནེ༌ ཏུས༌གྱུན༌ ཁྱོ༌ཞའེ༌ སྒོས༌དོམ༌ ཚང༌མ༌ གྲུབ༌ཅེས༌ མ༌ཚད༌, ཞན༌མ༌གུན༌ལའང༌ ཡ༌ཏོ༌ ཅོ༌ ཉན༌ཨིན༌།
2CO 9:9 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌། “ཁོང༌ངི༌ སྒོས༌དོམ༌ ཡོད༌ཁན༌ ཚང༌མ༌ལ༌ སྙིང༌ ཕེས༌ཏེ༌ སལ༌ལ༌ནོག༌, ཁོང༌ ཀྲང༌པོ༌ ཨིན༌ཁན༌བོ༌ ཏུས༌གྱུན༌ ལུས༌ཨིན༌།”
2CO 9:10 ཡང༌ ཞིང༌བད༌པའ༌ དཀོན༌མཆོག༌གི༌ ས༌འོན༌ རིག༌ག༌ ཙོགས༌ལ༌ ཏ༌གིའང༌ སལ༌ལ༌ ཛད༌ད༌ནོག༌། ཏེན༌ན༌ ཙོགས༌ལ༌ ཁོང༌ངི༌ ཁྱོ༌ཞ༌གུན༌ནི༌ སྒོས༌དོམ༌གུན༌ རིག༌ག༌ ཛད༌ཏེ༌ ཁྱོ༌ཞ༌གུན༌ལ༌ ཡོད༌ཁན༌གུན༌ ཕེལ༌ ཅུག༌ག༌ ཛད༌ད༌ནོག༌། ཏེ༌ནེ༌ ཁྱོ༌ཞ༌གུན༌ནི༌ ནང༌ང༌ སྙིང༌ ཕེས༌ཏེ༌ མང༌ང༌ ཏང༌ཅེས༌སི༌ སྟོན༌ཐོགས༌ སྨིན༌ཨིན༌།
2CO 9:11 འོ༌ན༌ ཏུས༌གྱུན༌ སྙིང༌ ཕེས༌ཏེ༌ ཏང༌ཅེས༌སི༌ ཕིའ༌, ཁྱོ༌ཞ༌གུན༌ལ༌ ཅི༌ས༌ཐོག༌ནེ༌ ཅིན༌ལབས༌ སལ༌ལ༌ ཛད༌ཨིན༌། ཡང༌ ནམ༌ ང༌ཞའེ༌ ཁྱོ༌ཞ༌གུན༌ནི༌ ཀ༌ནེ༌ ཏེ༌ པེ༌ནེ༌གུན༌ ཁྱེར༌ཏེ༌ སྒོས༌དོམ༌ ཡོད༌ཁན༌གུན༌ལ༌ ཏང༌ང༌ཅིག༌, ཁོང༌གུན༌ནི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའ༌ནོག༌།
2CO 9:12 ཏེ༌ནེ༌ འི༌ ཏང༌ཅེས༌ཅན༌ནི༌ ཞབས༌ཏོག༌པའེ༌ བྲས༌བུ༌ ཟང༌པོ༌ སྨིན༌ན༌ནོག༌, ཏང༌པོ༌ ཡེ༌རུ༌ཤ༌ལེམ༌མི༌ ཏད༌པ༌ཅན༌གུན༌ལ༌ སྒོས༌དོམ༌གུན༌ ཐོབ༌ཅེས༌ ཡང༌ ཉིས༌པ༌ ཁོང༌གུན༌ནི༌ ཐད༌པོ༌ ཉམ༌པོ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཅེས༌གུན༌ ཨིན༌ནོག༌།
2CO 9:13 ཁྱོ༌ཞ༌གུན༌ནི༌ ཞབས༌ཏོག༌གི༌ བྲས༌བུའི༌, ཁོང༌གུན༌ནི༌ དཀོན༌མཆོག༌ག༌ སྤལ༌ ཐོབ༌ ཅུག༌ག༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཁོང༌གུན༌ དང༌ ཏད༌པ༌ ཡོད༌ཁན༌ ཚང༌མ༌ལ༌, སྙིང༌ ཕེས༌ཏེ༌ ཏང༌ཅེས༌པོ༌ གྱུད༌ཏེ༌, ཁྱོ༌ཞ༌གུན༌ མ༌ཤི༌ཀའེ༌ གའ༌མོའེ༌ ནས༌ཚུལ༌ ཁའ༌ཉན༌ཁན༌ ཨིན༌ཁན༌བོ༌, སྟན༌ན༌ནོག༌།
2CO 9:14 ཡང༌ དཀོན༌མཆོག༌གི༌ ཁྱོ༌ཞ༌གུན༌ལ༌ སལ༌ལ༌ ཛད༌ཁན༌ནི༌ ཐུག༌རྗེ༌ ཁྱོ༌ཞ༌གུན༌ནི༌ ནང༌ནེ༌ ལུད༌ཨིན༌ ཡོད༌ཅེས༌པོའེ༌, ཁོང༌གུན༌ནི༌ སྙིང༌ནེ༌ ཁྱོ༌ཞ༌གུན༌ནི༌ ཕིའ༌ མོས༌ལམ༌ ཞུའ༌ནོག༌།
2CO 9:15 ཙམ༌ཤིག༌གི༌ ཧ༌ལས༌ཤེས༌ དང༌ ཚིགས༌ གྱུད༌ཏེ༌ ཤད༌ མི༌ཉན༌ཅེས༌སི༌ དཀོན༌མཆོག༌གི༌ ཐར༌པའེ༌ སྐྱེས༌སི༌ ཕིའ༌, དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཤིག༌།
2CO 10:1 ཏ༌ ང༌ པ༌འུ༌ལུའི༌ ཁྱོ༌ཞ༌གུན༌ལ༌ མ༌ཤི༌ཀའེ༌ པས༌མོ༌ དང༌ ཐུག༌རྗེ༌ ཉམ༌པོ༌ ཞུ༌ཝ༌ ཕུལ༌ལད༌། ཁྱོ༌ཞ༌གུན༌ནི༌ ང༌ ཁྱོ༌ཞའེ༌ ཕྲོའ༌ ཡོད༌ ཟ༌ནེ༌ ངོས༌མིག༌ ཆུ༌ངུན༌, ཨིན༌ནའང༌ ཐག༌རིང༌ནེ༌ ངའེ༌ ཨི༌གེ༌གུན༌ བྲི༌ ཟ༌ནེ༌ མ༌ ཝང༌ཅན༌ ཡོང༌དུག༌ སམ༌མ༌ནོག༌།
2CO 10:2 ངའ༌ ཡོང༌ ཟ༌ནེ༌, ང༌ཞའེ༌ ཇིག༌རྟེན༌པའེ༌ དོད༌པ༌ ནང༌ཞིན༌ ལས༌ ཅོ༌རུག༌ སམ༌ཁན༌གུན༌ ཉམ༌པོ༌ ཝང༌ཆ༌ ཀོལ༌ མི༌གོ༌ཤེས༌སི༌ ཕིའ༌, ངའེ༌ ཁྱོ༌ཞ༌གུན༌ལ༌ དག༌ས༌ ཞུ༌ཝ༌ ཕུལ༌ལད༌།
2CO 10:3 ང༌ཞའ༌ མི༌ ཨིན༌ནའང༌, ང༌ཞ༌གུན༌ནི༌ ཇིག༌རྟེན༌པའེ༌ ཚུལ༌ལ༌ མག༌ ཏང༌ང༌མེད༌།
2CO 10:4 མི༌གུན༌ནི༌ སྲན༌ཏྲེ༌ ཐམས༌ཏེ༌ ཡོད༌ཁན༌ནི༌ ཟུས༌མའེ༌ སམ༌ཚུལ༌ དང༌ ཟེར༌གྱུ༌ གུན༌ མེད༌ཁན༌ ཅོ༌ཅེས༌ལ༌, ང༌ཞ༌གུན༌ནི༌ ཇིག༌རྟེན༌ནི༌ ལག༌ཆ༌གུན༌ མན༌པ༌, དཀོན༌མཆོག༌གི༌ ལག༌ཆ༌ ཀྲག༌པོ༌གུན༌ ཀོལ༌ལད༌།
2CO 10:5 ང༌ཞ༌གུན༌ནི༌ མི༌གུན༌ལ༌ དཀོན༌མཆོག༌ ཤེས༌ མ༌ཤུག༌ག༌ བོར༌ཁན༌ནི༌ ཕོ༌སོ༌ཅན༌ནི༌ སྒག༌སྐྱིལ༌ ཚང༌མ༌ མེད༌ཁན༌ ཅོའད༌, ཡང༌ ཏེ༌ གྱབ༌གལ༌ཅན༌ནི༌ སམ༌ཚུལ༌གུན༌ ཕམ༌ཤུགས༌ཏེ༌, མ༌ཤི༌ཀའེ༌ ཞལ༌ཏ༌གུན༌ ཁའ༌ཉན༌ཅེས༌ ལབ༌བད༌།
2CO 10:6 ཁྱོ༌ཞ༌གུན༌ནི༌ ཅི༌ས༌ཐོག༌ནེ༌ ང༌ཞའེ༌ ཁའ༌ ཉན༌ན༌ཅིག༌, ཏེ༌ནེ༌ ཁའ༌ མ༌ཉན༌ན༌ ལུས༌ཁན༌ ཚང༌མ༌ལ༌ ང༌ཞའེ༌ ཆད༌པ༌ ཅད༌ཨིན༌།
2CO 10:7 དེན༌བའེ༌ ནས༌ལུག༌པོའ༌ ལྟོས༌ཤིག༌, མ༌ ལོ༌ཁྱེལ༌ ཉམ༌པོ༌ ང༌ མ༌ཤི༌ཀའེ༌ ཨིན༌ ཟེར༌ཁན༌གུན༌ནི༌ ང༌ཞ༌གུན༌ནའང༌ མ༌ཤི༌ཀའེ༌ ཨིན༌ཁན༌, ཁོ༌རང༌གུན༌ ཙོགས༌ ལོ༌ཁྱེལ༌ ཡོད༌ཁན༌བོ༌ ཤེས༌གོས༌།
2CO 10:8 ཞན༌ གཙོ༌བོ༌ ཡེ༌ཤུའི༌ ང༌ཞ༌གུན༌ལ༌ སལ༌ལ༌ ཛད༌ཁན༌ནི༌ ཝང༌ཆའེ༌ ནང༌ང༌ ཕོ༌སོ༌ ཅོས༌ཏེ༌, ངའེ༌ སྤེ༌ར༌ ཏངས༌ཏེ༌ ཡོད༌ན༌, ཏེ༌བོ༌ ཁྱོ༌ཞ༌གུན༌ ཏད༌པའེ༌ ནང༌ང༌ བུབས༌ མ༌ཅུག༌ག༌, ཤེད༌ཅན༌ གྱུར༌ཅེས༌ལ༌ ཨིན༌པིན༌། ངའ༌ ང༌རང༌ངི༌ ཝང༌ཆ༌ ཀོལ༌ཁན༌བོའེ༌ཀ༌ ཁྲེལ༌བ༌ མི༌ཚོར༌།
2CO 10:9 ངའེ༌ ང༌རང༌ངི༌ ཨི༌གེ༌གུན༌ གྱུད༌ཏེ༌, ཁྱོ༌ཞ༌གུན༌ ཇིགས༌ཤུག༌ཅེས༌སི༌ རྩོན༌གྲུས༌ ཅོའ༌མེད༌།
2CO 10:10 ཅིའ༌ཟེར༌ན༌ ཁ༌ཅིག༌གི༌, “པ༌འུ༌ལུའི༌ ཨི༌གེ༌གུན༌ ཏོན༌ཏག༌ཅན༌ དང༌ ཝང༌ཅན༌ ཡོང༌དུག༌ ཨིན༌ནའང༌ ང༌དང༌གུན༌ནི༌ ཕྲོའ༌ ཡོད༌ ཟ༌ནེ༌, ཁོ༌ ཧམ༌པ༌ མེད༌ཁན༌ དང༌ ཁོའེ༌ ལྕིད༌ མེད༌ཁན༌ནི༌ སྤེ༌ར༌ ཏང༌དུག༌” ཟེར༌ར༌ནོག༌།
2CO 10:11 ཀ༌ཟུག༌ ཐག༌རིང༌ང༌ ཡོད༌ ཟ༌ནེ༌, ང༌ཞའེ༌ ཨི༌གེ༌གུན༌ བྲིས༌ཏེ༌ ཡོད༌ཁན༌ ཙོགས༌ལ༌ ང༌ཞའ༌ ཡོང༌ ཟ༌ནེ༌, ང༌ཞའེ༌ ཝང༌ཆ༌ སྟན༌ཅེས༌པོ༌, ཏེ༌ མི༌གུན༌ལ༌ ཧ༌གོ༌ གོ༌ཤེས༌ ཨིན༌ནོག༌།
2CO 10:12 ཏེ༌ མི༌ ཀྲག༌པོ༌གུན༌ནི༌ ཁོ༌རང༌གུན༌ མ༌ ཁག༌ཅན༌ ཨིན༌ ཟེར༌ཁན༌ ཙོགས༌ ཟེར༌ཅེས༌སི༌ ང༌ཞའེ༌ ཧམ༌པ༌ ཅོའ༌མེད༌། ཨིན༌ནའང༌ ཁོང༌གུན༌ནི༌ ཁོ༌རང༌ ཅིག༌ དང༌ ཅིག༌གི༌ སྤེ༌ཅེས༌ ཡང༌ ཅིག༌ ཏང༌ ཅིག༌ པར༌ལ༌ རྡུར༌ ཟ༌ནེ༌ ཁོང༌གུན༌ ཙམ༌ཤིག༌གི༌ སམ༌བ༌ མེད༌ཁན༌ ཨིན༌ནོག༌།
2CO 10:13 ཨིན༌ནའང༌ ང༌ཞ༌གུན༌ནི༌ ཝང༌ཆ༌ནེ༌ ཐལ༌ཏེ༌ ཅོས༌ཁན༌ནི༌ ལས༌གུན༌ནི༌ ནང༌ང༌ ཕོ༌སོ༌ ཅོའ༌མེད༌། ང༌ཞ༌གུན༌ལ༌ དཀོན༌མཆོག༌གི༌ སལ༌ལ༌ ཛད༌ཁན༌ནི༌ ལས༌གུན༌ནི༌ ནང༌ནེ༌ གྲུབ༌ཅུག༌ག༌ ཛད༌ཁན༌གུན༌ནི༌ཀ༌ ཕོ༌སོ༌ ཅོའད༌, ཀ༌བོའེ༌ ནང༌ང༌ ཁྱོ༌ཞའ༌ ཉམ༌པོ༌ ལས༌ ཅོ༌ཁན༌གུན༌ནའང༌ ཐེས༌ཏེ༌ ཨིན༌།
2CO 10:14 ཀལ༌ཏེས༌ ཁྱོ༌ཞའ༌ ཡོད༌ས༌ ང༌ཞའ༌ མ༌ནེ༌ མ༌ཡོང༌ང༌ ཨིན༌པིན༌ན༌, ཏེ༌ནེ༌ ང༌ཞ༌གུན༌ནི༌ ཁྱོ༌ཞ༌གུན༌ནི༌ཀ༌ ཝང༌ ཡོད༌ ཟེར༌ ཟ༌ནེ༌, ང༌ཞའ༌ ཟེར༌ཆོགས༌ཤེས༌པོ༌ སང༌ ཐལ༌ཏེ༌ སོང༌ཏེ༌ ཨིན༌ནོག༌། ཨིན༌ནའང༌ ཁྱོ༌ཞའ༌ ཡོད༌ས༌ ཚོག༌པའང༌ ཡོངས༌ཏེ༌ མ༌ཤི༌ཀའེ༌ གའ༌མོའེ༌ ནས༌ཚུལ༌ ཤད༌ཁན༌ ང༌ཞའ༌ ཏང༌པོ༌རང༌ ཨིན༌པིན༌,
2CO 10:15 མ༌ཚད༌ ང༌ཞ༌གུན༌ནི༌ ཞན༌མའེ༌ ཅོས༌ཁན༌ནི༌ ལས༌སི༌ཀ༌ ཕོ༌སོ༌ ཅོས༌ཏེ༌ སྟོད༌པ༌ མ༌ལེན༌པིན༌། ཨིན༌ནའང༌ ཁྱོ༌ཞ༌གུན༌ ཏད༌པའེ༌ ནང༌ང༌ ཡར༌གྱས༌ ཆའ༌ཅིག༌ ཁྱོ༌ཞའེ༌ ཕྲོའ༌ ང༌ཞའེ༌ ལས༌གུན༌ མང༌ང༌ གྱས༌ཨིན༌ ཆ༌ཅེས༌སི༌ ང༌ཞའེ༌ རེ༌ཝ༌ ཨིན༌།
2CO 10:16 ཏེ༌ནེ༌ ང༌ཞའེ༌ ཁྱོ༌ཞ༌གུན༌ནི༌ ནས༌སའེ༌ སང༌ ཐག༌རིང༌ང༌, ཞན༌སུ༌ཞིག༌གའང༌ ལས༌ མ༌ཅོ༌ཁན༌ནི༌ ནས༌ས༌གུན༌ནི༌ ནང༌ང༌ གའ༌མོའེ༌ ནས༌ཚུལ༌བོ༌ ཤད༌ཉན༌ཅེས༌ ཨིན༌ནོག༌, ཅིའ༌ཟེར༌ན༌ ང༌ཞའེ༌ ཏེ༌ ནས༌སའེ༌ཀ༌ ཕོ༌སོ༌ ཅོ༌ཉིན༌ མེ༌རག༌ ཀ༌བོའེ༌ ནང༌ང༌ ཞན༌མ༌གུན༌ནི༌ ལས༌ ཅོ༌ཚར༌ཏེ༌ ཨིན༌།
2CO 10:17 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཀལ༌ཏེས༌ ཁྱོ༌ཞ༌གུན༌ ཕོ༌སོ༌ ཅོ༌ཉིན༌ ཡོད༌ན༌ གཙོ༌བོ༌ དཀོན༌མཆོག༌ ཅིག༌པོའེ༌ཀ༌ ཕོ༌སོ༌ ཅོ༌ཤིག༌།”
2CO 10:18 རང༌ དང༌ རང༌ང༌ སྟོད༌པ༌ ཏང༌ཅེས༌པོའ༌ མན༌པ༌ གཙོ༌བོའེ༌ སྟོད༌པ༌ ཕུལ༌ཅེས༌པོའ༌ རིན༌ ཡོད༌ཏེ༌ ཨིན༌ནོག༌།
2CO 11:1 ཏ༌རུང༌ངའང༌ ངའེ༌ སམ༌བ༌ མ༌ཏང༌ང༌ ཕོ༌སོ༌ ཅོ༌ཁན༌བོའ༌, ཁྱོ༌ཞ༌གུན༌ ཙ༌པིག༌ཤིག༌ སྣང༌ང༌ མ༌ཚེར༌ར༌ ཉན༌ཅེས༌སི༌ རེ༌ཝ༌ ཅོའད༌། ཐུག༌རྗེ༌ ཛད༌ཏེ༌ ང༌ ཉམ༌པོ༌ ཟོད༌པ༌ སྒོམ༌ཤིག༌།
2CO 11:2 དཀོན༌མཆོག༌གི༌ ཁྱོ༌ཞ༌ ཁོང༌རང༌ ཅིག༌པོའེ༌ ཨིན༌ཅེས༌སི༌ ཐུགས༌དོད༌ ཡོད༌ད༌ ཙོགས༌ལ༌, ངའེ༌ ནང༌ངའང༌ ཁྱོ༌ཞ༌གུན༌ནི༌ ཕིའ༌ ཏེན༌ན༌ ཙོགས༌ དོད༌པ༌ རག༌། ཨ༌བའེ༌ ཁོང༌རང༌ངི༌ བུ༌མོ༌བོ༌ ཁོའེ༌ མག༌པའེ༌ ལག༌ག༌ སྟད༌ ཟ༌ནེ༌, རྩང༌མ༌ཞིག༌ ཡོང༌གོ༌ སམ༌མད༌, ཏེན༌ན༌ ཙོགས༌ལ༌ མ༌ཤི༌ཀའེ༌ གྱུར༌ཅེས༌སི༌ ཕིའ༌ ངའེ༌ ཁྱོ༌ཞ༌གུན༌ ཁོང༌ངི༌ ཆག༌ག༌ སྟད༌ ཟ༌ནེ༌, སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ རྩང༌མ༌ ཡོང༌ཅེས༌སི༌ ཁ༌ཆད༌ ཅོས༌པིན༌།
2CO 11:3 ཨིན༌ནའང༌ ཤེ༌ཏན༌ རུལ༌ལ༌ ཟུས༌ཏེ༌ ཧ༌ཝ༌ བུ༌མོ༌བོའ༌ གོབ༌སྐོར༌ ཏང༌ང༌ ཙོགས༌ལ༌, ཁོའེ༌ ཅི༌ ཅོས༌ཏེའང༌ ཁྱོ༌ཞ༌གུན༌ནི༌ སེམས༌ ལག༌མོ༌ དང༌ སྙིང༌ངི༌ ཐིལ༌ནེ༌ མ༌ཤི༌ཀ༌ ཅིག༌པོའེ༌ ཨིན༌ཅེས༌སི༌ དོད༌པའེ༌ ལམ༌ནེ༌ ཐག༌རིང༌ང༌ ཁྱེར༌ར༌ནོག༌ སམས༌ཏེ༌ ངའ༌ ཇིགས༌ས༌རག༌།
2CO 11:4 སུ༌ཞིག༌ ཁྱོ༌ཞ༌གུན༌ ཡོད༌ས༌ ཡོངས༌ཏེ༌ ང༌ཞའེ༌ ལབ༌ཁན༌ནི༌ ཡེ༌ཤུའི༌ སྐོར༌ལ༌ མན༌པ༌ ཡང༌ ཡེ༌ཤུ༌ སོ༌སོ༌ཞིག༌གི༌ སྐོར༌ལ༌ ལབ༌ན༌, ཡ༌ ཁྱོ༌ཞ༌གུན༌ལ༌ ཐོབས༌ཏེ༌ ཡོད༌ཁན༌ནི༌ ཐུག༌ཉིད༌བོ༌ མན༌པ༌ ཡང༌ སེམས༌ཉིད༌ སོ༌སོ༌ཞིག༌ ཐོབ༌ན༌, ཡ༌ ང༌ཞའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌ ཁྱོ༌ཞའེ༌ ཏད༌པ༌ ཅོ༌ཁན༌བོ༌ མན༌པ༌ ཡང༌ གའ༌མོའེ༌ ནས༌ཚུལ༌ སོ༌སོ༌ཞིག༌ ཤད༌ན༌, ཁྱོ༌ཞ༌གུན༌ནི༌ ཐད༌པོ༌ ཉམ༌པོ༌ ཏེ༌གུན༌ ལེན༌དུག༌།
2CO 11:5 ཨིན༌ནའང༌ ཅི༌ས༌ཐོག༌ནེ༌ ང༌ ཏེ༌ མ༌ཤི༌ཀའེ༌ སྐུ༌ཚབས༌ ཀྲག༌པོ༌ རིག༌ ཨིན༌ ཟེར༌ཁན༌གུན༌ནི༌ སང༌ འུ༌ཐུགས༌ མེད༌།
2CO 11:6 སྤེ༌ར༌ ཏང༌ཅེས༌སི༌ ནང༌ང༌ ངའ༌ ཁོང༌གུན༌ ཙོགས༌ལ༌ ཁས༌པ༌ མེད༌གྲོ༌, ཨིན༌ནའང༌ ངའེ༌ ནང༌ང༌ ཡོན༌ཏན༌ མེད༌པ༌ མན༌། ང༌ཞའེ༌ ཅོ༌ཁན༌ དང༌ ལབ༌ཁན༌ ཚང༌མའེ༌ ནང༌ང༌ ཏེ༌བོ༌ སལ༌པོ༌ ཅོས༌ཏེ༌ སྟན༌པིན༌།
2CO 11:7 ཅི༌ ངའེ༌ ང༌རང༌ པས༌མོ༌ དང༌ ཁྱོ༌ཞ༌གུན༌ལ༌ རྩི༌ཝ༌ ཅོས༌ཏེ༌ དཀོན༌མཆོག༌གི༌ གའ༌མོའེ༌ ནས༌ཚུལ༌བོ༌ རིན༌ མེད༌པ༌ ཤད༌ ཟ༌ནེ༌, སྡིག༌པ༌ ཅོས༌ཏེ༌ ཨིན༌ནོག༌ག༌?
2CO 11:8 ངའེ༌ ཞན༌མ༌ ཆོས༌ཚོགས༌གུན༌ནི༌ ཀ༌ནེ༌ པེ༌ནེ༌ རོགས༌གུན༌ ལེན༌ཏེ༌ ཁྱོ༌ཞ༌གུན༌ལ༌ རིན༌ མེད༌པ༌ ཞབས༌ཏོག༌ ཞུ༌ ཟ༌ནེ༌, ཅི༌ ངའེ༌ ཁོང༌གུན༌ ཅོམས༌ཏོག༌ག༌?
2CO 11:9 ཡང༌ ང༌ ཁྱོ༌ཞ༌གུན༌ ཉམ༌པོ༌ ཡོད༌དི༌ ཏུས༌ ངའེ༌ སྒོས༌དོམ༌གུན༌ དྲན༌དྲ༌ མ༌ཆ༌ ཟ༌ནེ༌, ངའེ༌ སུ༌ཞིག༌གའང༌ རོགས༌ ཅོ༌ཅེས༌ལ༌ བར༌དོ༌ མ༌སྟན༌པིན༌, ཅིའ༌ཟེར༌ན༌ མ༌ཀེ༌དོ༌ནི༌ཡཱའེ༌ནེ༌ ཡོང༌ཁན༌ནི༌ སྤུན༌གུན༌ནི༌ ངའ༌ སྒོས༌དོམ༌ ཡོད༌ཁན༌ ཚང༌མ༌ ཁྱོངས༌། ང༌ ཁྱོ༌ཞ༌གུན༌ནི༌ཀ༌ བར༌དོ༌ཞིག༌ མ༌ནེ༌ མ༌གྱུར༌པིན༌, ཡང༌ ང༌ གྱུར༌ཨིན༌ནའང༌ མེ༌རག༌།
2CO 11:10 ཀ༌ཟུག༌ མ༌ཤི༌ཀའེ༌ དེན༌བ༌ ངའེ༌ ནང༌ང༌ ཡོད༌ཁན༌བོ༌ ཏན༌ཏན༌ ཨིན༌, ཨ༌ཀ༌ཡཱའེ༌ ཡུལ༌ལི༌ ནང༌ང༌ སུ༌ཞིག༌གིའང༌ ཏེ༌གུན༌ནི༌ སྐོར༌ལ༌ ཕོ༌སོ༌ ཅོ༌ཅེས༌ནེ༌ ང༌ སྒགས༌ཏེ༌ བོར༌ མི༌ཉན༌།
2CO 11:11 ངའེ༌ ཁྱོ༌ཞ༌གུན༌ནི༌ ཀ༌ནེ༌ ང༌རང༌ངི༌ སྒོས༌དོམ༌མི༌ ཕིའ༌ གྱུ༌ནོར༌རི༌ རོགས༌གུན༌ མ༌ལེན༌ པ༌སང༌, ཅི༌ ངའེ༌ ཁྱོ༌ཞ༌གུན༌ལ༌ ཅེས༌པ༌ མ༌ཅོའ༌ ཨིན༌ནོག༌ག༌? མ༌ནེ༌ མན༌། ངའེ༌ ཁྱོ༌ཞ༌གུན༌ལ༌ ཅེས༌པ༌ ཅོ༌ཁན༌བོ༌ དཀོན༌མཆོག༌གི༌ ཁྱེན༌ན༌ ཛད༌ད༌ནོག༌།
2CO 11:12 འོ༌ན༌ ངའེ༌ ཏ༌རུང༌ངའང༌ ཏེན༌ན༌བོ༌ ཅོ༌ཨིན༌ དུག༌ཨིན༌། ཏེ༌བོའེ༌ ཀྲག༌པོ༌ སྐུ༌ཚབས༌གུན༌ལ༌ ཁོང༌གུན༌ནི༌ ལས༌པོའང༌ ང༌ཞའེ༌ ལས༌ ཙོགས༌ ཨིན༌ ཟེར༌ཏེ༌ ཕོ༌སོ༌ ཅོ༌ཅེས༌སི༌ སྐབས༌ ཐོབ༌ཅེས༌ནེ༌ སྒགས༌ཏེ༌ བོར༌ཨིན༌།
2CO 11:13 ཁོང༌གུན༌ མ༌ཤི༌ཀའེ༌ ཟུས༌མ༌ སྐུ༌ཚབས༌གུན༌ ཨིན༌ནོག༌། ཁོང༌གུན༌ནི༌ སྐྱོན༌ཇན༌ནི༌ ལས༌གུན༌ ཅོ༌ཨིན༌, མ༌ཤི༌ཀའེ༌ སྐུ༌ཚབས༌ ཨིན༌ཟུན༌ ཏང༌ང༌ནོག༌།
2CO 11:14 ཨིན༌ནའང༌ ང༌ ཧ༌ལས༌ས༌ མེ༌རག༌, ཤེ༌ཏན༌ནིའང༌ ཁོ༌རང༌ དཀོན༌མཆོག༌གི༌ ཀལ༌ལ༌ ཛད༌ཁན༌ འོད༌དི༌ ཕོ༌ཉ༌ ཨིན༌ཟུན༌ ཏང༌ང༌ནོག༌།
2CO 11:15 ཏེ༌ནེ༌ ཤེ༌ཏན༌ནི༌ ཡོག༌པོ༌གུན༌ནིའང༌ ཁོ༌རང༌གུན༌ ཀྲང༌པོ༌ ཞབས༌ཏོག༌པ༌ ཨིན༌ཟུན༌ ཏང༌ཁན༌བོའེ༌ཀ༌ ང༌དང༌གུན༌ ཧ༌ལས༌གོ༌ཤེས༌ མ༌ནོག༌། སྟིང༌ཇུག༌ག༌ ཁོང༌གུན༌ལ༌ ཁོ༌རང༌གུན༌ནི༌ ལས༌ ངན༌པ༌ ཅོས༌ཁན༌གུན༌ལ༌ འོས༌པའེ༌ ཆད༌པ༌ ཕོག༌ག༌ནོག༌།
2CO 11:16 ངའེ༌ ཡང༌སྐྱར༌ ཟེར༌རད༌, འི༌ཟུག༌ སྤེ༌ར༌ ཏང༌ཅེས༌པོའེ༌ ངའ༌ སམ༌བ༌ མེད༌ཁན༌ཞིག༌ ཨིན༌ནོག༌ མ༌སམ༌ཤིག༌། ཀལ༌ཏེས༌ ཁྱོ༌ཞ༌གུན༌ནི༌ ཏེ༌ཟུག༌ སམ༌ནའང༌, ངའེ༌ ང༌རང༌ངི༌ སྐོར༌ལ༌ ཙ༌པིག༌ མང༌ང༌ ཕོ༌སོ༌ ཅོ༌ ཟ༌ནེ༌, ངའང༌ ཉོན༌ཤིག༌ ཀ༌ཟུག༌གི༌ ཁྱོ༌ཞ༌གུན༌ནི༌ མི༌ སམ༌བ༌ མེད༌ཁན༌ཞིག༌ག༌ ཉན༌ནད༌།
2CO 11:17 ཞན༌ འི༌ཙོགས༌སི༌ ཕོ༌སོ༌གུན༌ གཙོ༌བོའེ༌ ཆོགས༌ནེ༌ ཡོང༌ང༌ མ༌ནོག༌, ཨིན༌ནའང༌ ངའེ༌ སམ༌བ༌ མེད༌ཁན༌ཞིག༌ ཙོགས༌ལ༌ སྤེ༌ར༌ ཏང༌ངད༌།
2CO 11:18 ཏེ༌གུན༌ནི༌ ཁོ༌རང༌གུན༌ནི༌ ཇིག༌རྟེན༌ནི༌ཀ༌ བྲས༌བུ༌ ཐོབ༌ཁན༌གུན༌ནི༌ སྐོར༌ལ༌ ཕོ༌སོ༌ ཅོས༌ པ༌སང༌ ངེའང༌ ཅོ༌ཨིན༌།
2CO 11:19 ཁྱོ༌ཞའ༌ ཀོ༌རིན༌ཐི༌ མ༌ཤི༌ཀ༌པ༌གུན༌ མ༌ ཤེས༌རབས༌ཅན༌ ཨིན༌ པ༌སང༌ ཁྱོ༌ཞ༌གུན༌ནི༌ ཐད༌པོ༌ ཉམ༌པོ༌ ཏེ༌ སམ༌བ༌ མེད༌ཁན༌ནི༌ ལོབ༌བོན༌གུན༌ ཉམ༌པོ༌ ཆམས༌ཏེ༌ ཨིན༌ན༌?
2CO 11:20 ཁྱོ༌ཞ༌གུན༌ ཝང༌ངི༌ ཡོག༌ག༌ སྲུལ༌ཁན༌, ཡ༌ ཡོད༌ཁན༌ ཚང༌མ༌ ཀོགས༌ཏེ༌ ཁྱེར༌ཁན༌, ཡ༌ ཕན༌ཐོགས༌ ལེན༌ཁན༌, ཡ༌ ཀྲག༌པོ༌ སྟན༌ཁན༌, ཡ༌ གྲམ༌ལྕག༌ ཏང༌ཁན༌ ཚང༌མའང༌ ཁྱོ༌ཞ༌གུན༌ནི༌ སྲན༌ཏེ༌ དུག༌དུག༌།
2CO 11:21 འི༌ཙོགས༌སི༌ ལས༌གུན༌ ཅོ༌ཅེས༌སི༌ ནང༌ང༌ ང༌ཞ༌གུན༌ མངས༌ཏེའང༌ འུ༌ཐུགས༌ ཨིན༌ཁན༌བོ༌ ཤད༌ཅེས༌ལ༌ ང༌རང༌ ཁྲེལ༌ལ༌ རག༌། ཨིན༌ནའང༌ ཀལ༌ཏེས༌ ཏེ༌གུན༌ནི༌ ཁོ༌རང༌གུན༌ནི༌ སྐོར༌ལ༌ ཕོ༌སོ༌ ཅོ༌ཅེས༌སི༌ ཧམ༌པ༌ ཅོ༌ན༌, ངའེ༌ ང༌རང༌ངི༌ སམ༌བ༌ མེད༌ཁན༌ ཙོགས༌ལ༌ སྤེ༌ར༌ ཏང༌ཁན༌བོའེ༌ཀའང༌, ཕོ༌སོ༌ ཅོ༌ཅེས༌སི༌ ཧམ༌པ༌ ཅོ༌ཨིན༌།
2CO 11:22 ཁོང༌གུན༌ ཨིབ༌རི༌པ༌ ཨིན༌ནོག༌ག༌? ངའང༌ ཨིན༌། ཁོང༌གུན༌ ཨིས༌ར༌ཨེལ༌པ༌ ཨིན༌ནོག༌ག༌? ངའང༌ ཨིན༌། ཁོང༌གུན༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌ག༌? ངའང༌ ཨིན༌།
2CO 11:23 ཁོང༌གུན༌ མ༌ཤི༌ཀའེ༌ ཞབས༌ཏོག༌ ཞུ༌ཁན༌ ཨིན༌ནོག༌ག༌? ༼ཏ༌ ངའེ༌ ཟེར༌ཁན༌ དང༌ ཟེར༌ཅེས༌ ཚང༌མ༌ མི༌སྙོན༌པའེ༌ ཟེར༌ཁན༌ ཙོགས༌ ཚོར༌ཅེན༌༽ ཨིན༌ནའང༌ ངའེ༌ མ༌ཤི༌ཀ༌ ཏེ༌གུན༌ནི༌ སང༌ མང༌ང༌ ཞབས༌ཏོག༌ ཞུས༌ཏེ༌ ཨིན༌: ངའེ༌ ཁོང༌གུན༌ནི༌ སང༌ ལས༌ མང༌ང༌ སྲན༌ཏྲེ༌ ཅོས༌པིན༌, ལན༌ མང༌པོ༌ ཙོན༌ཁང༌ངི༌ ནང༌ང༌ ཀགས༌, རྩི༌ མི༌ཉན༌ཅེས༌སི༌ རྟལ༌ལྕག༌ གྱབས༌, ལན༌ མང༌པོ༌ ཤི༌ཅེས༌སི༌ ཉེ༌མོའ༌ ལེབ༌།
2CO 11:24 ལན༌ ལྔ༌ ཏུས༌སྐབས༌ སོ༌སོའེ༌ ནང༌ང༌ ཡ༌ཧུ༌དཱ༌པའེ༌ སྤོན༌བོ༌གུན༌ནི༌ ཆོགས༌ནེ༌ ངའ༌ རྟལ༌ལྕག༌ 39 གྱབ༌ཅེས༌སི༌ ཆད༌པའང༌ ཕོག༌།
2CO 11:25 ལན༌ཕོག༌ སུམ༌ ངའ༌ བེར༌ཀ༌ རོམ༌པོ༌ ཉམ༌པོ༌ རྡུངས༌, ལན༌ཅིག༌ ངའ༌ རྡོའ༌ གྱབས༌ཏེ༌ སད༌ཅེས༌ ཅོས༌, ལན༌ སུམ༌ ངའ༌ ཡོད༌ཁན༌ནི༌ གྲུ༌ཟིང༌བོ༌ ཆགས༌ཏེ༌ ཆུའི༌ ནང༌ང༌ ནུབ༌, ཡང༌ ངའ༌ ཉི༌མ༌ དང༌ ཚན༌ཞིག༌ གྱ༌ཚོའེ༌ ཆུའི༌ ནང༌ང༌ ལུས༌།
2CO 11:26 མ༌ཤི༌ཀའེ༌ ཕིའ༌ ངའེ༌ འི༌ བར༌དོ༌གུན༌ ཁུར༌པིན༌, ལན༌ མང༌པོ༌ མ༌ ཐག༌རིང༌ངི༌ ཡུལ༌གུན༌ལ༌ བེས༌ལ༌ སོང༌པིན༌, ངའ༌ ལྩངས༌པོ༌ དང༌ ཅག༌པ༌ གུན༌ནི༌ ཇིགས༌པ༌ ཇུང༌, ངའ༌ ང༌རང༌ངི༌ མི༌ ཡ༌ཧུ༌དཱ༌པ༌ མ༌ཚད༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཀ༌ནེའང༌ ཇིགས༌པ༌ ཇུང༌། གྱལ༌ས༌, ཐང༌སྟོང༌, ཡང༌ ཚོ༌གུན༌ནི༌ ནང༌ངའང༌ ངའ༌ ཇིགས༌པ༌ མང༌པོ༌ ཇུང༌, ཡང༌ ཟུན༌མ༌ ཏད༌པ༌ཅན༌གུན༌ནི༌ ཀ༌ནེའང༌ ངའ༌ ཇིགས༌པ༌ ཇུང༌།
2CO 11:27 ངའེ༌ ཏུས༌ རིང༌མོ༌ ལས༌ སྲན༌ཏྲེ༌ ཅོས༌པིན༌, ཚན༌ མང༌པོ༌ཞིག༌ ཉིད༌མེད༌པ༌ ལུས༌, ལན༌ མང༌པོ༌ སྟོག༌རི༌ དང༌ སྐོམས༌རིའ༌ ལུས༌ཏེ༌ ཟ༌གྱུ༌ མེད༌པིན༌, ཡང༌ གོན༌གྱུ༌ མང༌པོ༌ མེད༌པ༌ དྲང༌མོའང༌ ཡོངས༌།
2CO 11:28 ཏེ༌གུན༌ནི༌ཀ༌ ནན༌མ༌ ཆོས༌ཚོགས༌ ཚང༌མའ༌ ཏད༌པའེ༌ ནང༌ང༌ ཀ༌ཟུག༌ཤིག༌ ཡོད༌གྲོ༌ སམས༌ཏེ༌, ངའ༌ ཞག༌ཏང༌ ཚེར༌ཁ༌ ཡོངས༌།
2CO 11:29 ཁྱོ༌ཞ༌གུན༌ནི༌ ཕྲོའ༌ ཏད༌པའེ༌ ནང༌ང༌ ཤེད༌མེད༌ ཨིན༌ཁན༌གུན༌, ངའ༌ ཧ༌གོའ༌རག༌། ཏད༌པ༌ཅན༌གུན༌ ཀྲང༌པོ༌ མན༌ཁན༌ནི༌ ལམ༌མི༌ཀ༌ ཁྲིད༌ཁན༌གུན༌ནི༌ཀ༌ ངའ༌ མ༌སྲན༌ཏྲེ༌ སྲོ༌ རག༌།
2CO 11:30 ཀལ༌ཏེས༌ ངའ༌ ཕོ༌སོ༌ ཅོ༌གོས༌ན༌, ཏེ༌ནེ༌ ངའེ༌ ཏན༌ཏན༌ལ༌ ང༌རང༌ འུ༌ཐུགས༌ ཨིན༌ཁན༌བོའེ༌ཀ༌ ཕོ༌སོ༌ ཅོ༌ཨིན༌།
2CO 11:31 ང༌དང༌གུན༌ནི༌ གཙོ༌བོ༌ ཡེ༌ཤུའི༌ ཡབ༌ དཀོན༌མཆོག༌, ཏུས༌གྱུན༌ སྟོད༌པའེ༌ འོས༌པ༌ ཐོབ༌ཅེས༌ ཨིན༌ཁན༌བོའེ༌ ངའེ༌ ཏེ༌གུན༌ ཟུན༌ མ༌ཏང༌ཁན༌བོ༌ ཁྱེན༌ན༌ ཛད༌ད༌ནོག༌།
2CO 11:32 ང༌ དཱ༌མེས༌ཀས༌སི༌ གྱལ༌སའེ༌ ནང༌ང༌ ཡོད༌ ཟ༌ནེ༌, གྱལ༌པོ༌ ཨ༌རི༌ཏས༌སི༌ ཀའ༌ལོན༌ ནི༌, གྱལ༌སའེ༌ སྒོ༌གུན༌ནི༌ཀ༌ ངའ༌ ཟུམ༌ཅེས༌སི༌ ཕིའ༌ སྲུངས༌ཁན༌གུན༌ བོར༌ཏེ༌ དུག༌པིན༌།
2CO 11:33 ཨིན༌ནའང༌ ཁོ༌ དང༌ ཁོའེ༌ སྲུང༌ཁན༌གུན༌ནི༌ ཀ༌ནེ༌ ཤོར༌ཅེས༌ལ༌, ངའ༌ ཙེ༌པོ༌ཞིག༌གི༌ ནང༌ང༌ གྱལ༌སའེ༌ རྩིག༌པའེ༌ ནང༌ང༌ ཡོད༌ཁན༌ནི༌ ཀར༌ཁུང༌ གྱུད༌ཏེ༌, ཐུར༌ལ༌ ཕབས༌།
2CO 12:1 འི༌ ཕོ༌སོ༌ ཅོ༌ཅེས༌པོ༌ ཕན༌ཐོགས༌ཅན༌ཞིག༌ མན༌ནའང༌, ངའེ༌ ཏ༌རུང༌ངའང༌ ཅོ༌གོས༌། ངའེ༌ གཙོ༌བོའེ༌ ཆོགས༌ནེ༌ ཞལ༌ཟིགས༌ དང༌ སྔོན༌ ཅུག༌ག༌ ཛད༌ཁན༌གུན༌ ཁྱོ༌ཞ༌གུན༌ལ༌ ཤད༌དད༌།
2CO 12:2 ལོ༌ 14 སྔུན༌ལ༌, ང༌ དཀོན༌མཆོག༌ ཁོང༌རང༌ ཞུགས༌ས༌ ཛད༌ཁན༌ནི༌ ཚང༌མའེ༌སང༌ ནམ༌ཁའ༌ ཐོ༌ཤོག༌པོའེ༌ ནང༌ང༌ ཁྱེར༌ར༌ ཛདས༌། ཏེ༌བོ༌ ང༌ ཟུགས༌པོའེ༌ ནང༌ང༌ ཨིན༌པིན༌ན༌ ཡ༌ སེམས༌ཉིད༌དི༌ ནང༌ང༌, ངའ༌ ཅའང༌ གྱུས༌མེད༌, དཀོན༌མཆོག༌ ཅིག༌པོའེ༌ ཁྱེན༌ན༌ ཛད༌ད༌ནོག༌།
2CO 12:3 འོ༌ན༌ ཟུགས༌པོའེ༌ ནང༌ང༌ ཨིན༌པིན༌ན༌ ཡ༌ སེམས༌ཉིད༌དི༌ ནང༌ང༌, དཀོན༌མཆོག༌ ཅིག༌པོའེ༌ ཁྱེན༌ན༌ ཛད༌ད༌ནོག༌། ཨིན༌ནའང༌ ངའ༌ འི༌གུན༌ ཏན༌ཏན༌ལ༌ གྱུས༌ཡོད༌,
2CO 12:4 ང༌ ཚང༌མའེ༌སང༌ ནམ༌ཁའ༌ ཐོ༌ཤོག༌པོའེ༌ ནང༌ང༌ ཁྱེར༌ར༌ ཛདས༌, ཡང༌ ཚིགས༌ གྱུད༌ཏེ༌ ཤད༌ མི༌ཉན༌ཅེས༌སི༌ ཧ༌ལས༌ཤེས༌སི༌ ཞལ༌ཏ༌ རིག༌ ཚོར༌, ཀ༌བོ༌ མི༌སུ༌ཞིག༌གའང༌ ཤད༌ཅེས༌ལ༌ གོངས༌པ༌ སལ༌ལ༌ མ༌ཛདས༌།
2CO 12:5 ཞན༌ ཏེན༌ན༌ ཐོང༌ངོམས༌པོའ༌ ཕོ༌སོ༌ ཅོ༌ཅེས༌ འོས༌པ༌ ཨིན༌ནའང༌ ངའེ༌ ཏེ༌བོ༌ མ༌ཅོའ༌, ང༌རང༌ངི༌ འུ༌ཐུགས༌གུན༌ ཅིག༌པོའེ༌ཀ༌ ཕོ༌སོ༌ ཅོ༌ཨིན༌།
2CO 12:6 ཀལ༌ཏེས༌ ངའེ༌ ཏེ༌གུན༌ནི༌ཀ༌ ཕོ༌སོ༌ ཅོས༌པིན༌ན༌, ངའེ༌ ང༌རང༌ སམ༌བ༌ མེད༌ཁན༌ཞིག༌ གྱུར༌ མ༌ཅུག༌ག༌, ངའེ༌ ཤད༌ཁན༌གུན༌ ཟུན༌ མན༌པ༌ དེན༌བའ༌ ཨིན༌གྲོ༌། ཨིན༌ནའང༌ ངའེ༌ ཏེ༌ཟུག༌ མི༌ཅོ༌, ཅིའ༌ཟེར༌ན༌ ངའེ༌ མི༌ཚེའེ༌ ནང༌ང༌ ཐོང༌ཁན༌ ཡ༌ ངའེ༌ ལོན༌གུན༌ནི༌ ནང༌ང༌ ཚོར༌ཁན༌གུན༌ མ༌སྟོག༌, ཞན༌ཡང༌ སྟོད༌པའེ༌ སྒོས༌དོམ༌ མེ༌རག༌།
2CO 12:7 ངའ༌ ཏེ༌ ཧ༌ལས༌ཤེས༌སི༌ ཞལ༌ཟིགས༌ ཐོང༌ཁན༌གུན༌ནི༌ཀ༌, ཕོ༌སོ༌ ཅོ༌ མི༌ཅུག༌ཅེས༌སི༌ ཕིའ༌, ཙེར༌མང༌ ཤའེ༌ ནང༌ང༌ ཟུགས༌ཏེ༌ ཡོད༌ཁན༌ ཙོགས༌ལ༌, དཀོན༌མཆོག༌གི༌ ངའེ༌ ཟུགས༌པོའེ༌ ནང༌ང༌ ཤེ༌ཏན༌ནི༌ ཀལ༌ཁན༌ ཡོག༌པོའ༌ ནགས༌ དང༌ བར༌དོ༌ སྟན༌ ཅུག༌ག༌ ཛདས༌།
2CO 12:8 ལན༌ སུམ༌ ངའེ༌ གཙོ༌བོའ༌ ཏེ༌ བར༌དོ༌གུན༌ ཇུ༌ཇུ༌ ཁྱེར༌ར༌ ཛད༌ ཞུས༌པིན༌།
2CO 12:9 ཨིན༌ནའང༌ ཁོང༌ངི༌ མོལས༌, “ཁྱོ༌རང༌ང༌ ངའེ༌ ཐུག༌རྗེ༌ ཅིག༌པོའེ༌ སྒོས༌དོམ༌ ཡོད༌ཏེ༌ ཨིན༌ནོག༌། འུ༌ཐུགས༌སི༌ ནང༌ང༌ ངའེ༌ ཁྱུད༌པོ༌ མ༌ སྟོབས༌ཅན༌ གྱུར༌རད༌།” ཏེ༌བོའེ༌ཕིའ༌ ངའེ༌ ང༌རང༌ངི༌ འུ༌ཐུགས༌སི༌ ནང༌ང༌ ཐད༌པོ༌ ཉམ༌པོ༌ མང༌ང༌ ཕོ༌སོ༌ ཅོའད༌ ཅིའ༌ཟེར༌ན༌ ངའ༌ གྱུད༌ཏེ༌ མ༌ཤི༌ཀའེ༌ ཁྱུད༌པོའེ༌ ཆག༌ལས༌ ཛད༌ད༌ནོག༌།
2CO 12:10 ཏེན༌ན༌བོའེ༌ཕིའ༌ མ༌ཤི༌ཀའེ༌ ཏོན༌ལ༌, ང༌ ང༌རང༌ངི༌ འུ༌ཐུགས༌, ཁྲེལ༌བ༌ སྟན༌ཅེས༌, ཀགས༌པོ༌ དང༌ བར༌དོའེ༌ ནང༌ང༌ སྐྱིད༌པོ༌ ཚོར༌ར༌རག༌, ཅིའ༌ཟེར༌ན༌ འུ༌ཐུགས༌ ཡོད༌ཏུས༌ ངའ༌ སྟོབས༌ཅན༌ ཨིན༌།
2CO 12:11 ཁྱོ༌ཞའ༌ ཀོ༌རིན༌ཐི༌པ༌གུན༌ནི༌ ངའ༌ ཕོ༌སོ༌ ཅོ༌ཅུགས༌ཏེ༌ སམ༌བ༌ མེད༌ཁན༌ཞིག༌ ཙོགས༌ གྱུར༌ཅུགས༌། ཞན༌ ཁྱོ༌ཞ༌གུན༌ནི༌ ངའེ༌ ཕིའ༌ གྱབ༌ཤེད༌ཅན༌ནི༌ ཨི༌གེ༌གུན༌ བྲི༌གོ༌ཤེས༌ ཡོད༌པིན༌། ངའ༌ ཅའང༌ མན༌ནའང༌ ཏེ༌ ཀྲག༌པོ༌ སྐུ༌ཚབས༌ ཨིན༌ ཟེར༌ཁན༌གུན༌ནི༌ སང༌ ཐུའ༌ མན༌།
2CO 12:12 ངའ༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌, ཟོད༌པ༌ ཉམ༌པོ༌ ངའེ༌ སྟགས༌, ལྟས༌ དང༌ ཧ༌ལས༌ཤེས༌སི༌ ཛད༌པ༌ མང༌པོ༌ ཅོས༌ཏེ༌, ངའེ༌ ཏན༌ཏན༌ལ༌ ངའ༌ མ༌ཤི༌ཀའེ༌ སྐུ༌ཚབས༌ ཨིན༌ཁན༌བོ༌, སྟན༌ཏེ༌ ཏངས༌པིན༌།
2CO 12:13 ངའེ༌ ཁྱོ༌ཞ༌གུན༌ལ༌ ཞན༌ ཆོས༌ཚོགས༌གུན༌ནི༌ སང༌ ཐུའ༌ ཀ༌ཟུག༌གི༌ རྩིས༌ཏོག༌? ཏེ༌བོ༌ ཁྱོ༌ཞ༌གུན༌ལ༌ པེ༌ནེ༌ རོགས༌སི༌ ནང༌ང༌ ལྕིད༌ མི༌ཀལ༌ཅེས༌པོའེ༌ ཨིན༌ན༌? ཐུག༌རྗེ༌ ཛད༌ཏེ༌ ངའེ༌ འི༌ ནོར༌ཁྲུལ༌བོའ༌ གོངས༌པ༌ ཏོང༌ཤིག༌།
2CO 12:14 ང༌ ཁྱོ༌ཞ༌གུན༌ ཡོད༌ས༌ ལན༌ སུམ༌པ༌ ཡོང༌ངད༌, ཡང༌ ངའ༌ ཁྱོ༌ཞ༌གུན༌ནི༌ཀ༌ ལྕིད༌ཞིག༌ མི༌གྱུར༌། ཁྱོ༌ཞ༌གུན༌ནི༌ གྱུ༌ནོར༌ མན༌པ༌, ངའ༌ ཁྱོ༌ཞ༌གུན༌ གོས༌སད༌ ཅིའ༌ཟེར༌ན༌ ཕྲུ༌གུ༌གུན༌ནི༌ ཕ༌མ༌གུན༌ལ༌ སྒོས༌དོམ༌གུན༌ མ༌རིག༌ག༌, ཕ༌མ༌གུན༌ནི༌ ཕྲུ༌གུ༌གུན༌ལ༌ སྒོས༌དོམ༌གུན༌ རིགས༌ཏེ༌ ཏང༌ང༌ནོག༌།
2CO 12:15 ཁྱོ༌ཞ༌གུན༌ནི༌ ཕིའ༌ ངའེ༌ ང༌རང༌ དང༌ ངའ༌ ཡོད༌ཁན༌ ཚང༌མ༌, མ༌ ཐད༌པོ༌ ཉམ༌པོ༌ སྐྱག༌ཨིན༌། ཀལ༌ཏེས༌ ངའེ༌ ཁྱོ༌ཞ༌གུན༌ལ༌ ཅེས༌པ༌ མང༌ང༌ ཅོ༌ན༌, ཁྱོ༌ཞའེ༌ ངའ༌ ཅེས༌པ༌ ཉུ༌ངུན༌ ཅོ༌ཨིན༌ན༌?
2CO 12:16 ང༌ ཁྱོ༌ཞ༌གུན༌ནི༌ ཕིའ༌ བར༌དོ༌ མན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཡོད༌ཏེ༌ ཨིན༌ནོག༌། ཨིན༌ནའང༌ ཁ༌ཅིག༌གི༌ ང༌ སྐྱོན༌ཇན༌ ཨིན༌ པ༌སང༌, ཁྱོ༌ཞ༌གུན༌ནི༌ ཀ༌ནེ༌ སྐྱོན༌ ཅོས༌ཏེ༌ ཕན༌ཐོགས༌ ལེན༌ཏེ༌ ཨིན༌ནོག༌ སམ༌དུག༌།
2CO 12:17 ཨིན༌ནའང༌ ཀ༌ཟུག༌གི༌? ཅི༌ ཁྱོ༌ཞའེ༌ཀ༌ ལམ༌ཅུགས༌ཁན༌ནི༌ ཏེ༌ མི༌གུན༌ གྱུད༌ཏེ༌ ངའེ༌ ཁྱོ༌ཞའེ༌ ཀ༌ནེ༌ ཕན༌ཐོགས༌ ལེན༌ས༌?
2CO 12:18 ཁྱོ༌ཞའ༌ ཐུག༌ག༌ལ༌ ཆ༌ཅེས༌སི༌ ཕིའ༌ ངའེ༌ སྤུན༌ ཏི༌ཏུས༌ལ༌ སྤོས༌པ༌ ཏངས༌ཏེ༌ ཁོ༌ ཉམ༌པོ༌ ཞན༌ཡང༌ སྤུན༌ཞིག༌ ལམ༌ཅུག༌ ཟ༌ནེ༌, ཅི༌ སྤུན༌ ཏི༌ཏུས༌སི༌ ཁྱོ༌ཞ༌གུན༌ནི༌ ཀ༌ནེ༌ ཕན༌ཐོགས༌ ལེན༌ས༌? མ༌ནེ༌ མ༌ལེནས༌། ལམ༌ ཅིག༌ཅིག༌གི༌ཀ༌ གྲུལ༌ཨིན༌, སེམས༌ཉིད༌ ཅིག༌ཅིག༌ ཉམ༌པོ༌ ང༌ཞ༌གུན༌ནི༌ ལས༌གུན༌ ཙོགས༌ ཅོ༌ཨིན༌ མ༌ནོག༌ག༌?
2CO 12:19 ཁྱོ༌ཞ༌གུན༌ནི༌ ང༌ཞའེ༌ ཏེ༌གུན༌ ང༌ཞ༌རང༌ སྐྱོབ༌ཅེས༌སི༌ ཕིའ༌ ཟེར༌ཏེ༌ ཨིན༌ནོག༌ སམ༌མ༌ད༌? མ༌ཤི༌ཀའེ༌ ཞབས༌ཏོག༌པ༌ ཨིན༌ཅེས༌པོའེ༌ ང༌ཞའེ༌ ཏེ༌གུན༌ ཁྱོ༌ཞ༌གུན༌ལ༌ ཤད༌དད༌, ཏེ༌བོའེ༌ སྤང༌པོ༌ དཀོན༌མཆོག༌གི༌ སལ༌ལ༌ ཛད༌ད༌ནོག༌། ཅེས༌པའེ༌ ཛ༌འོ༌གུན༌, ཁྱོ༌ཞའ༌ ཏད༌པའེ༌ ནང༌ང༌ ཤེད༌ཅན༌ གྱུར༌ཅེས༌སི༌ ཕིའ༌ ང༌ཞའེ༌ ཏེ༌ ཚང༌མ༌ ཅོས༌པིན༌།
2CO 12:20 ངའ༌ ཇིགས༌ས༌རག༌ ང༌ ཡོང༌ ཟ༌ནེ༌, ཁྱོ༌ཞ༌གུན༌ནི༌ མི༌ཚེ༌ ཕུད༌ཟོ༌ ཐོང༌ཏེ༌, ངའ༌ ཐད༌པོ༌ མི༌ཆ༌། ཡང༌ ངའེ༌ ཅོ༌ཁན༌བོའེ༌ཀ༌ ཁྱོ༌ཞ༌གུན༌ ཐད༌ མི༌ཐད༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ནང༌ང༌ ཛིང༌མོ༌, ཚིག༌ཅེས༌, སྲོ༌, རང༌དོད༌ཅན༌, སྕོད༌ལམ༌མི༌ སྐོར༌ལ༌ ངན༌པ༌ ཟེར༌ཅེས༌, ཁ༌བད༌ཅེས༌, རང༌སྟོད༌ ཏང༌ཅེས༌ དང༌, ལས༌ ཅོ༌ཅེས༌ལ༌ ཚིར༌ཀ༌ མེད༌ཁན༌, ཏེ༌གུན༌ ཐོང༌ཅེས༌ལ༌ ངའ༌ ཇིགས༌ས༌རག༌།
2CO 12:21 འོ༌ན༌ ང༌ ཇིགས༌ས༌རག༌, ངའ༌ ཁྱོ༌ཞ༌གུན༌ ཡོད༌ས༌ ཡོང༌ ཟ༌ནེ༌ དཀོན༌མཆོག༌གི༌ ངའ༌ ཡང༌སྐྱར༌ ཁྲེལ༌བ༌ ཚོར༌ ཅུག༌ག༌ ཛད༌ཨིན༌, ཅིའ༌ཟེར༌ན༌ ཁྱོ༌ཞའ༌ མང༌པོ༌ཞིག༌གི༌ ཏ༌རུང༌ངའང༌ སྔུན༌ནི༌ སྡིག༌པ༌གུན༌ མ༌ཕང༌ང༌, ཡང༌ན༌ ཚི༌ཏུ༌, ལུས༌བྲེལ༌ ངན༌པ༌ དང༌, འོས༌པའེ༌ ལུས༌བྲེལ༌ལི༌ ཚད༌ནེ༌ ཐལ༌ཏེ༌ ཅོ༌ཁན༌ གུན༌ནི༌ཀ༌ གྱོད༌པ༌ མ༌ཅོའ༌ ཨིན༌ཁན༌བོ༌ ཐོངས༌ཏེ༌ ངའ༌ རྡུག༌པོ༌ ཅོ༌གོས༌ཨིན༌།
2CO 13:1 ཏམ༌པའེ༌ སུང༌རབས༌སི༌ ནང༌ང༌ “སྐྱོན༌རྗོད༌ ཅི༌ཞིག༌ ཡོད༌ནའང༌ སྤང༌པོ༌ ཉིས༌ ཡ༌ སུམ༌ ཡོད༌ཏེ༌ མ༌ནེ༌ ཁྲིམས༌ཅད༌ ཏང༌ མི༌ཉན༌ ” མོལ༌ཏེ༌ ཡོད༌ཁན༌ ཙོགས༌ལ༌ ངའང༌ ལན༌ སུམ༌པ༌ ཁྱོ༌ཞ༌གུན༌ ཐུག༌ག༌ལ༌ ཡོང༌ཨིན༌།
2CO 13:2 ང༌ ཁྱོ༌ཞ༌གུན༌ ཉམ༌པོ༌ ལན༌ ཉིས༌པ༌ ཡོད༌ ཟ༌ནེ༌, ངའེ༌ ཏེ༌ སྡིག༌པ༌ ཅོ༌ཁན༌གུན༌ལ༌ སྤང༌པུད༌ཏེ༌ ཨིན༌པིན༌, ཀ༌ཟུག༌ ངའེ༌ སྔུན༌ལ༌ ཅོའ༌ ཙོགས༌ལ༌, ཏ༌ དག༌ས༌ ཡང༌སྐྱར༌ ངའེ༌ ཁོང༌གུན༌ དང༌ ཞན༌ཡང༌ ཚང༌མ༌ལ༌ སྤང༌པུད༌དད༌, སྟིང༌མ༌ ང༌ ཡོང༌ ཟ༌ནེ༌ སྡིག༌པ༌ ཅོ༌ཁན༌ སུ༌ཞིག༌གའང༌ ངའེ༌ ཆད༌པའེ༌ ཀ༌ནེ༌ མི༌ཐར༌།
2CO 13:3 མ༌ཤི༌ཀའེ༌ ངའ༌ གྱུད༌ཏེ༌ ཞལ༌ཏ༌ སལ༌ལ༌ ཛད༌ཁན༌བོའེ༌ སྤང༌པོ༌ ཁྱོ༌ཞ༌གུན༌ལ༌ གོས༌ པ༌སང༌, ངའེ༌ ཏེ༌གུན༌ སྟན༌ཨིན༌། མ༌ཤི༌ཀའེ༌ ཁྱོ༌ཞའ༌ སྐྱོང༌ཅེས༌ ཡ༌ རོགས༌ ཛད༌ ཟ༌ནེ༌, ཁོང༌ འུ༌ཐུགས༌ མ༌ཞུགས༌ས༌, མ༌ ཤེད༌ཅན༌ ཞུགས༌ས༌ ཛད༌ད༌ནོག༌།
2CO 13:4 ཞན༌ འུ༌ཐུགས༌སི༌ ནང༌ང༌ ཁོང༌ རྐྱང༌ཤིང༌ངི༌ཀ༌ རྐྱངས༌ཏེ༌ ཀྲོངས༌ནའང༌, ཏ༌ དག༌ས༌ དཀོན༌མཆོག༌གི༌ ཤེད༌དི༌ ནང༌ང༌, ཁོང༌ སོན༌ཏེའ༌ ཞུགས༌ཏེ༌ ཨིན༌ནོག༌། ཏེན༌ན༌ ཙོགས༌ལ༌ མ༌ཤི༌ཀའེ༌ ནང༌ང༌ ང༌ཞ༌གུན༌ནའང༌ འུ༌ཐུགས༌ ཨིན༌, ཨིན༌ནའང༌ དཀོན༌མཆོག༌གི༌ ཝང༌ དང༌ མ༌ཤི༌ཀ༌ ང༌ཞའ༌ ཉམ༌པོ༌ ཡོད༌ཅེས༌པོའེ༌ ང༌ཞའེ༌ ཁྱོ༌ཞ༌གུན༌ལ༌ སྐྱོང༌ཨིན༌ ཡ༌ རོགས༌ ཅོ༌ཨིན༌།
2CO 13:5 ཁྱོ༌ཞའ༌ རང༌ངི༌ ཏད༌པ༌ ཀྲང༌པོ༌ ཨིན༌ན༌ མན༌, ཏེ༌བོ༌ སྟག༌ཅད༌ ཅོ༌ཤིག༌། རང༌དང༌རང༌ང༌ སྟག༌ཅད༌ ཅོ༌ཤིག༌། ཡེ༌ཤུ༌ མ༌ཤི༌ཀ༌ ཁྱོ༌ཞ༌གུན༌ནི༌ ནང༌ང༌ ཞུགས༌ཏེ༌ ཨིན༌ཁན༌བོ༌ གྱུས༌མེད༌ད༌? ཏེ༌ མན༌ན༌ ཏད༌པ༌ ཀྲང༌པོའེ༌ སྟག༌ཅད༌དི༌ ནང༌ང༌ ཁྱོ༌ཞ༌གུན༌ ཐར༌ཁྱེལ༌ མ༌ཆའ༌ ཨིན༌ནོག༌།
2CO 13:6 ཡང༌ ང༌ཞའ༌ མ༌ཤི༌ཀའེ༌ དེན༌བའེ༌ སྐུ༌ཚབས༌ ཨིན༌ཁན༌ནི༌ སྟག༌ཅད༌དི༌ ནང༌ང༌ ཁྲངས༌པོ༌ ཨིན༌ཁན༌བོ༌ ཁྱོ༌ཞ༌གུན༌ནི༌ ཧ༌གོ༌ཅེས༌ལ༌ ངའེ༌ རེ༌ཝ༌ ཅོའད༌།
2CO 13:7 ཁྱོ༌ཞ༌གུན༌ནི༌ སྡིག༌པ༌ མི༌ཅོ༌ཅེས༌ལ༌ ང༌ཞའེ༌ དཀོན༌མཆོག༌ག༌ མོས༌ལམ༌ ཕུལ༌ལད༌། ངའེ༌ རེ༌ཝ༌ ཅོའད༌ ང༌ཞའ༌ ཡོང༌ ཟ༌ནེ༌, ཁྱོ༌ཞ༌གུན༌ནི༌ཀ༌ ང༌ཞའེ༌ ཝང༌བོ༌ སྟན༌གོས༌ མི༌ཡོང༌། ང༌ཞའ༌ ཡོང༌ངི༌ སང༌ སྔུན༌ལ༌ ཀྲང༌པོའེ༌ ལས༌གུན༌ ཅོ༌ཤིག༌ ཞན༌ ང༌ཞ༌གུན༌ ང༌ཞའེ༌ ཝང༌བོ༌ སྟན༌ཅེས༌སི༌ ནང༌ང༌ ཐར༌ཁྱེལ༌ མ༌ལུས༌ཁན༌ ཙོགས༌ ཐོང༌སྲིད༌ཅེས༌ ཨིན༌ནོག༌།
2CO 13:8 ང༌ཞ༌གུན༌ནི༌ ཀྲང༌པོའེ༌ ལབ༌ཞའ༌ གྱབ༌གལ༌ ཅོ༌ མི༌ཉན༌, ཨིན༌ནའང༌ ཀྲང༌པོ༌ ཅིག༌པོའེ༌ ཕིའ༌ ལས༌ ཅོའད༌།
2CO 13:9 ཀལ༌ཏེས༌ ཁྱོ༌ཞའེ༌ ཏད༌པ༌ ཤེད༌ཅན༌ ཅོའད༌ན༌ ང༌ཞ༌གུན༌ འུ༌ཐུགས༌ ཐོང༌ཅེས༌ལ༌ ཐད༌པོ༌ རག༌། ཁྱོ༌ཞ༌གུན༌ ཏད༌པའེ༌ ནང༌ང༌ གང༌པོ༌ ལྡན༌ཅེས༌ལ༌ ང༌ཞའེ༌ མོས༌ལམ༌ ཞུའད༌།
2CO 13:10 ངའ༌ ཡོང༌ ཟ༌ནེ༌, ངའེ༌ ཁྱོ༌ཞ༌གུན༌ལ༌ ཆད༌པ༌ སྲན༌ཏྲེ༌ ཏང༌ མི༌གོ༌ཤེས༌སི༌ ཕིའ༌, ངའ༌ ཡོང༌ངི༌ སང༌ སྔུན༌ལ༌, འི༌ ཨི༌གེ༌བོ༌ ཁྱོ༌ཞ༌གུན༌ལ༌ བྲིའད༌, ཅིའ༌ཟེར༌ན༌ གཙོ༌བོའེ༌ ང༌ སལ༌ལ༌ ཛད༌ཁན༌ནི༌ ཝང༌ཆ༌བོ༌ ཁྱོ༌ཞ༌གུན༌ནི༌ ཏད༌པ༌ མེད༌ཁན༌ ཆ༌ཅུག༌ཅེས༌ མན༌པ༌, སྟན༌པོ༌ ཅོ༌ཅེས༌ལ༌ ཀོལ༌ཉིན༌རག༌།
2CO 13:11 སྤུན༌གུན༌ འི༌ སྟིང༌ཇུག༌གི༌ ཚིགས༌པོ༌ ཉམ༌པོ༌ ངའེ༌ ཨི༌གེ༌ བྲི༌ཅེས༌པོ༌ ཚར༌ཅུག༌གད༌། སྐྱིད༌པོ༌ ཅོ༌ཤིག༌, ཏད༌པའེ༌ ནང༌ང༌ གང༌པོ༌ ལྡན༌ཅུག༌ཤིག༌, ཅིག༌ དང༌ ཅིག༌ག༌ སྤོས༌པ༌ ཏོང༌ཤིག༌, ཅིག༌ དང༌ ཅིག༌གི༌ པར༌ལ༌ ཐུན༌བྲེལ༌ དང༌ ཞི༌དེ༌ ཉམ༌པོ༌ དུག༌ཤིག༌, ཏེ༌ནེ༌ ཅེས༌པ༌ དང༌ ཞི༌དེའེ༌ དཀོན༌མཆོག༌ ཁྱོ༌ཞ༌གུན༌ ཉམ༌པོ༌ ཞུགས༌ས༌ ཛད༌ཨིན༌།
2CO 13:12 ཅིག༌ དང༌ ཅིག༌ག༌ ཅམས༌པ༌ ཉམ༌པོ༌ ཇུ༌ ཞུས༌།
2CO 13:13 འི༌རུ༌ ཡོད༌ཁན༌ནི༌ དཀོན༌མཆོག༌གི༌ མི༌ ཏམ༌པ༌གུན༌ནི༌, ཁྱོ༌ཞ༌གུན༌ལ༌ ཇུ༌ ཀལ༌དུག༌།
2CO 13:14 གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌, དཀོན༌མཆོག༌གི༌ ཅེས༌པ༌ དང༌ ཏམ༌པའེ༌ ཐུག༌ཉིད༌དི༌ བྲེལ༌ ཁྱོ༌ཞ༌གུན༌ ཉམ༌པོ༌ ལུས༌ཤིག༌།
GAL 1:1 འི༌ ཨི༌གེ༌བོ༌ ཡེ༌ཤུའི༌ སྐུ༌ཚབས༌ པ༌འུ༌ལུའི༌ ཆོགས༌ནེ༌ ཨིན༌། ང༌ མི༌གུན༌ནི༌ སྡེ༌ཞིག༌ ཡ༌ མིའི༌ ཝང༌ངི༌ མ༌ལྡམ༌མ༌, ཡེ༌ཤུ༌ མ༌ཤི༌ཀ༌ དང༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌ནི༌ ཡབ༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཨིན༌།
GAL 1:2 གཱ༌ལ༌ཏི༌ཡའེ༌ ནང༌ང༌ ཡོད༌ཁན༌ནི༌ ཆོས༌ཚོགས༌གུན༌ལ༌, འི༌ ཨི༌གེ༌བོ༌ ཀལ༌ཅེས༌སི༌ ནང༌ང༌ ང༌ ཉམ༌པོ༌ ཡོད༌ཁན༌ནི༌ སྤུན༌ ཚང༌མ༌ ཐུས༌ཏེ༌ ཨིན༌།
GAL 1:3 ང༌དང༌གུན༌ནི༌ ཡབ༌ དཀོན༌མཆོག༌ དང༌ གཙོ༌བོ༌ ཡེ༌ཤུ༌ མ༌ཤི༌ཀ༌ གུན༌ནི༌, ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ལ༌ ཛད༌ཤིག༌།
GAL 1:4 དཀོན༌མཆོག༌ ང༌དང༌གུན༌ནི༌ ཡབ༌བི༌ ཐུག༌གོངས༌ ནང༌ཞིན༌ ཡེ༌ཤུའི༌, ང༌དང༌གུན༌ དུགས༌ཏེ༌ ཡོད༌ཁན༌ནི༌ ངན༌པ༌ ཇིག༌རྟེན༌ནི༌ ནང༌ནེ༌ ཐར༌ ཅུག༌ག༌ ཛད༌ཅེས༌ དང༌ ང༌དང༌གུན༌ནི༌ སྡིག༌པའེ༌ ཕིའ༌, ཁོང༌རང༌ངི༌ མི༌ཚེ༌ ཆོད༌པའེ༌ ཚུལ༌ལ༌ སལ༌ལ༌ ཛདས༌།
GAL 1:5 ཏེ༌བོའེ༌ ཞས༌ཏེ༌, དཀོན༌མཆོག༌ག༌ ཏུས༌གྱུན༌ནེ༌གྱུན༌ སྤལ༌ ཐོབ༌ཤིག༌, ཨ༌མེན༌།
GAL 1:6 ཁྱོ༌ཞའ༌ འི༌ཟམ༌ གྱོགས༌པ༌ དཀོན༌མཆོག༌ ཕངས༌ཏེ༌ ཆེན༌ ཡོད༌ཅེས༌པོའ༌ ང༌ ཧ༌ལས༌། དཀོན༌མཆོག༌གི༌ མ༌ཤི༌ཀའེ༌ ཐུག༌རྗེའེ༌ གྱུད༌ཏེ༌, ཁྱོ༌ཞ༌གུན༌ ཁོང༌ ཉམ༌པོ༌ བྲེལ༌ ཅོ༌ཅེས༌ལ༌ བོད༌ད༌ ཛད༌ཏེ༌ ཨིན༌པིན༌། ཨིན༌ནའང༌ ཁྱོ༌ཞ༌གུན༌ ཞན༌ཡང༌ སོ༌སོ༌ གའ༌མོའེ༌ ནས༌ཚུལ༌ཞིག༌གི༌ སྟིང༌རང༌ནེ༌ གྲུལ༌དུག༌,
GAL 1:7 ཀ༌བོ༌ ངོས༌པོའ༌ གའ༌མོའེ༌ ནས༌ཚུལ༌ཞིག༌ ཨིན༌ ཁོ༌རང༌ མ༌ནོག༌། ཨིན༌ནའང༌ མ༌ཤི༌ཀའེ༌ གའ༌མོའེ༌ ནས༌ཚུལ༌ལི༌ ཏོན༌ཏག༌གི༌ ནང༌ང༌ མིང༌ནའང༌ གྱུར༌ཇ༌ ཁྱོང༌ཁན༌གུན༌ནི༌, ཁྱོ༌ཞའེ༌ སྙིང༌ངི༌ ནང༌ང༌ ཐེ༌ཚོམས༌ སྐྱེ༌ཅུག༌ཨིན༌ ཡོད༌ཁན༌བོ༌ ངའ༌ ཧ༌གོའ༌རག༌།
GAL 1:8 ཀལ༌ཏེས༌ ང༌ཞའ༌ ཅིག༌གི༌ ཡ༌ ནམ༌ཁའེ༌ ཕོ༌ཉ༌ཞིག༌གི༌, ང༌ཞའེ༌ ཁྱོ༌ཞའ༌ ལབ༌ཁན༌ མན༌པ༌ ཡང༌ སོ༌སོ༌ གའ༌མོའེ༌ ནས༌ཚུལ༌ཞིག༌ ལབ༌བད༌ན༌, དཀོན༌མཆོག༌གི༌ ཏེ༌གུན༌ལ༌ ཐའ༌མེད༌པའེ༌ ཆད༌པ༌ སལ༌ལ༌ ཛད༌ཤིག༌།
GAL 1:9 ངའེ༌ སྔུན༌ལ༌ ཟེར༌ཁན༌བོ༌ ཡང༌སྐྱར༌ ཟེར༌རད༌, སུ༌ཞིག༌གིའང༌ ཁྱོ༌ཞ༌གུན༌ནི༌ སྔུན༌ལ༌ ཏད༌པ༌ ཅོ༌ཁན༌གུན༌ནི༌ སང༌ ཞན༌ཡང༌ སོ༌སོ༌ གའ༌མོའེ༌ ནས༌ཚུལ༌ཞིག༌ ལབ༌བད༌ན༌, དཀོན༌མཆོག༌གི༌ ཏེ༌གུན༌ལ༌ ཐའ༌མེད༌པའེ༌ ཆད༌པ༌ སལ༌ལ༌ ཛད༌ཤིག༌།
GAL 1:10 ལྟོས༌ཤིག༌གའང༌, ངའེ༌ དཀོན༌མཆོག༌ནེ༌ སྟོད༌པ༌ ཐོབ༌ཅེས༌སི༌ རྩོན༌གྲུས༌ ཅོ༌རུག༌ག༌ ཡ༌ མི༌གུན༌ནེ༌? ཀལ༌ཏེས༌ ངའེ༌ མི༌གུན༌ ཐད༌ཅུག༌ཉིན༌ ཡོད༌པིན༌ན༌, ང༌ མ༌ཤི༌ཀའེ༌ ཞབས༌ཏོག༌པ༌ ཞིག༌ མན༌གྲོ༌།
GAL 1:11 ཅེས༌པའེ༌ སྤུན༌གུན༌ ངའེ༌ ཁྱོ༌ཞ༌གུན༌ལ༌ འི༌བོ༌ ཧ༌གོ༌གོས༌ སམ༌མ༌རག༌། ངའེ༌ ལབ༌ཁན༌ནི༌ གའ༌མོའེ༌ ནས༌ཚུལ༌བོ༌, མིའི༌ ཅོ༌ཁན༌ཞིག༌ མན༌།
GAL 1:12 ཏེ༌བོ༌ ངའ༌ མི༌ཞིག༌གི༌ ཀ༌ནེ༌ མ༌ཐོབ༌, ཡ༌ སུ༌ཞིག༌གི༌ ང༌ མ༌ལབས༌, ཨིན༌ནའང༌ ངའ༌ འི༌བོ༌ ཡེ༌ཤུ༌ མ༌ཤི༌ཀའེ༌ ཀ༌ནེ༌ ཁ༌དྲང༌ང༌ སྔོན༌ཏེ༌ ཨིན༌།
GAL 1:13 ཡ༌ཧུ༌དཱ༌པའེ༌ ཆོས༌སི༌ ནང༌ང༌ ཡོད༌ ཟ༌ནེ༌, ང༌ ཀ༌ཟུག༌ཤིག༌ ཡོད༌ཁན༌བོ༌ ཁྱོ༌ཞ༌གུན༌ལ༌ གྱུས༌ ཡོད༌གྲོ༌། ངའེ༌ དཀོན༌མཆོག༌གི༌ ཆོས༌ཚོགས༌གུན༌ལ༌ ནགས༌ སྲན༌ཏྲེ༌ སྟན༌ཏེ༌ ཏེ༌གུན༌ ཁྲེས༌ཏོར༌ ཅོ༌ཅེས༌སི༌ ནང༌ང༌ རྩོན༌གྲུས༌ གྱལ༌ལ༌ ཅོས༌པིན༌།
GAL 1:14 ཡ༌ཧུ༌དཱ༌པའེ༌ ཆོས༌སི༌ ནང༌ང༌, ང༌ དང༌ ལོ༌ཅིག༌པ༌ ཞན༌ཡང༌ ཡ༌ཧུ༌དཱ༌པ༌གུན༌ནི༌ སང༌ ངའ༌ མང༌ང༌ ཁས༌པ༌ དང༌ ཐར༌ཁྱེལ༌ ལུས༌པིན༌། ཡང༌ ངའེ༌ ང༌རང༌ངི༌ ཕ༌མེས༌པོ༌གུན༌ནི༌ ལུག༌སྲོལ༌གུན༌ སྲུང༌ཅེས༌ལ༌ སྙིང༌ནེ༌ རྩོན༌གྲུས༌ ཏེ༌གུན༌ནི༌ སང༌ མང༌ང༌ ཅོས༌པིན༌།
GAL 1:15 ཨིན༌ནའང༌ དཀོན༌མཆོག༌གི༌ ཁོང༌རང༌ངི༌ ཧ༌ལས༌ཤེས༌སི༌ ཐུག༌རྗེའེ༌ ནང༌ང༌, ང༌ སྐྱེ༌ སང༌ སྔུན༌ལ༌ ལྡམ༌མ༌ ཛད༌ཏེ༌ བོད༌ད༌ ཛདས༌། ཡེ༌ཤུའི༌ སྐོར༌ལ༌ གའ༌མོའེ༌ ནས༌ཚུལ༌བོ༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཤད༌ཅེས༌སི༌ ཕིའ༌, ཁོང༌རང༌ངི༌ སྲས༌པོ༌ ངའ༌ སྔོན༌ ཅུག༌ག༌ ཛད༌ཅེས༌ལ༌, དཀོན༌མཆོག༌ ཐུགས༌ཐད༌ད༌ ཛདས༌། འི༌བོའེ༌ སྐོར༌ལ༌ ངའེ༌ སུ༌མི༌ཞིག༌གི༌ ཀ༌ནེའང༌ ཁ༌དའ༌ མ༌ཙལ༌པིན༌,
GAL 1:17 ཡ༌ ངའེ༌ སང༌ སྔུན༌ལ༌ སྐུ༌ཚབས༌ ཨིན༌ཁན༌གུན༌ ཉམ༌པོ༌ ཏེ༌ སྐོར༌ལ༌ གྲབས༌ ཅོའ༌ལ༌, ངའ༌ ཡེ༌རུ༌ཤ༌ལེམ༌མ༌ མ༌སོང༌པིན༌། ཨིན༌ནའང༌ ཏེན༌ན༌མལ༌ལ༌ ང༌ ཨ༌ར༌བིའ༌ སོང༌པིན༌, ཡང༌ ཏེ༌སྟིང༌ནེ༌ ང༌ དཱ༌མེས༌ཀས༌སི༌ གྱལ༌ས༌ ལོགས༌ཏེ༌ ཡོངས༌པིན༌།
GAL 1:18 ཏེ༌ནེ༌ ལོ༌ སུམ༌མི༌ སྟིང༌ནེ༌, ང༌ ཡེ༌རུ༌ཤ༌ལེམ༌མ༌ པི༌ཏྲར༌ལ༌ ཐུག༌ཅེས༌སི༌ ཕིའ༌, སོང༌ཏེ༌ ཞག༌མ༌ 15 ཁོང༌ ཉམ༌པོ༌ དུགས༌པིན༌།
GAL 1:19 ཏེ༌ཏུས༌ལ༌ གཙོ༌བོའེ༌ ནོ༌ ཡ༌ཀོབ༌ ཅིག༌པོ༌ མན༌པ༌, ཞན༌ཡང༌ སྐུ༌ཚབས༌ སུ༌ཞིག༌གའང༌ ང༌ མ༌ཐུག༌།
GAL 1:20 ངའེ༌ ཁྱོ༌ཞའ༌ བྲི༌ཨིན༌ ཡོད༌ཁན༌གུན༌ ཟུན༌མན༌ཁན༌ནི༌ སྤང༌པོ༌, དཀོན༌མཆོག༌ ཨིན༌།
GAL 1:21 ཏེ༌བོའེ༌ སྟིང༌ནེ༌, ང༌ སི༌རི༌ཡཱ༌ དང༌ ཀཱི༌ལི༌ཀི༌ཡཱའེ༌ ཡུལ༌ལ༌ སོང༌པིན༌།
GAL 1:22 ཡང༌ ཏེ༌ཏུས༌ ཚོག༌པ༌, ཡ༌ཧུ༌དཱའེ༌ ཆོས༌ཚོགས༌གུན༌ནི༌ མ༌ཤི༌ཀ༌པ༌གུན༌ ང༌ ཉམ༌པོ༌ མ༌ཐུག༌ག༌ ཨིན༌པིན༌།
GAL 1:23 ཨིན༌ནའང༌ ཁོང༌གུན༌ལ༌ མི༌གུན༌ནི༌ ཀ༌ནེ༌ འིན༌ན༌བོ༌ ཚོར༌ཏེ༌ ཨིན༌ནོག༌, “སྔུན༌ལ༌ ང༌དང༌གུན༌ལ༌ ནགས༌བར༌དོ༌ སྟན༌ཁན༌ནི༌ མི༌བོའེ༌, ཏ༌ དག༌ས༌ ཏེན༌ན༌ ཏད༌པའེ༌ སྐོར༌ལ༌ ཆོས༌ཤད༌དུག༌, ཀ༌བོ༌ ཁོའེ༌ ཏུས༌ཤིག༌ག༌ ཁྲེས༌ཏོར༌ ཅོ༌ཅེས༌སི༌ རྩོན༌གྲུས༌ ཅོའད༌པིན༌།”
GAL 1:24 ཡང༌ ང༌ ཇུང༌ཁན༌བོའེ༌ ཞས༌ཏེ༌, ཁོང༌གུན༌ནི༌ དཀོན༌མཆོག༌ག༌ སྟོད༌པ༌ ཕུལ༌ཏེ༌ ཨིན༌པིན༌།
GAL 2:1 ཏེ༌ནེ༌ ལོ༌ ཅུབ༌ཞིའི༌ སྟིང༌ནེ༌, ང༌ ཡང༌སྐྱར༌ ལོགས༌ཏེ༌ ཡེ༌རུ༌ཤ༌ལེམ༌མ༌ བཱར༌ན༌བས༌ ཉམ༌པོ༌ སོང༌པིན༌། ངའེ༌ ཏི༌ཏུས༌སའང༌ ང༌ཞའ༌ ཉམ༌པོ༌ ཁྲིད༌ཏེ༌ ཁྱེར༌པིན༌།
GAL 2:2 དཀོན༌མཆོག༌གི༌ ངའ༌ སྔོན༌ ཅུག༌ག༌ ཛད༌ཁན༌བོའེ༌ ཞས༌ཏེ༌, ང༌ ཏེ༌རུ༌ སོང༌པིན༌, ཡང༌ ཡེ༌རུ༌ཤ༌ལེམ༌མི༌ ཆོས༌ཚོགས༌སི༌ འུ༌སྐྱོང༌ ཨིན༌ཁན༌གུན༌ ཅིག༌པོ༌ ཡོད༌ ཟ༌ནེ༌, ངའེ༌ ཡ༌ཧུ༌དཱ༌པ༌ མན༌ཁན༌གུན༌ལ༌ གའ༌མོའེ༌ ནས༌ཚུལ༌ ཤད༌ཁན༌བོའེ༌ སྐོར༌ལ༌ ཁོང༌གུན༌ལ༌ ཤད༌པིན༌, ཅིའ༌ཟེར༌ན༌ ངའ༌ ངའེ༌ ཅོ༌ཨིན༌ ཡོད༌ཁན༌ ཡ༌ ཅོ༌ཁན༌ནི༌ ཏེ༌ རྩོན༌གྲུས༌གུན༌ གོད༌ལ༌ སོང༌ཏེ༌ མན༌ན༌ཧེ༌, སམ༌ཏེ༌ ཇིགས༌སད༌པིན༌།
GAL 2:3 ཁོང༌གུན༌ནི༌ ངའ༌ ཆོགས༌སྐྱོར༌ ཅོས༌, ཡང༌ ངའེ༌ ཕྲོ༌པ༌ ཡ༌ཧུ༌དཱ༌པ༌ མན༌ཁན༌ ཏི༌ཏུས༌ལའང༌ སུན༌ནད༌ ཅོ༌གོ༌ཤེས༌པོ༌ ཁག༌ཅན༌ མ༌སམ༌།
GAL 2:4 འི༌ ཏྲི༌ཝ༌བོ༌ ཇུང༌, ཅིའ༌ཟེར༌ན༌ མ༌ཤི༌ཀ༌ ཡེ༌ཤུའི༌ ནང༌ང༌ ང༌ཞ༌གུན༌ལ༌ རང༌ཝང༌ ཡོད༌ཁན༌བོ༌ ལྟ༌ཅེས༌ལ༌, ཟུས༌མའེ༌ སྤུན༌ རིག༌ ང༌ཞ༌གུན༌ནི༌ ཆོས༌ཚོགས༌སི༌ ཕྲོའ༌ སང༌ཝའེ༌ ཐོག༌ནེ༌ དྲེས༌ཏེ༌ ཨིན༌ནོག༌། ཡང༌ རང༌ཝང༌བོ༌ ཀོགས༌ཏེ༌ ཁྱེར༌ཏེ༌, ཡ༌ཧུ༌དཱ༌པའེ༌ ཁྲིམས༌གུན༌ནི༌ ཚེ༌ཡོག༌ གྱུར༌ཅུག༌ཅེས༌ལ༌ ཐད༌དུག༌།
GAL 2:5 ཨིན༌ནའང༌ ང༌ཞའེ༌ ཁོང༌གུན༌ནི༌ ཟེར༌ཁན༌གུན༌ལ༌ སྲིབ༌ཅིག༌གི༌ ཕིའང༌, ཁའ༌ མ༌ཆམས༌པིན༌, ཅིའ༌ཟེར༌ན༌ ང༌ཞའེ༌ གའ༌མོའེ༌ ནས༌ཚུལ༌ལི༌ ཀྲང༌པོ༌བོ༌ ཁྱོ༌ཞ༌གུན༌ནི༌ ཕིའ༌ སྐྱོབས༌ཏེ༌ བོར༌ར༌ལ༌ ཐད༌དད༌པིན༌།
GAL 2:6 ཡང༌ ཡེ༌རུ༌ཤ༌ལེམ༌མི༌ ཆོས༌ཚོགས༌སི༌ འུ༌སྐྱོང༌ ཨིན༌ཁན༌གུན༌ནི༌ ངའེ༌ ལབ༌ཨིན༌ ཡོད༌ཁན༌བོའེ༌ཀ༌ ཅའང༌ ནན༌ཏེ༌ ཟེར༌ཅེས༌ མི༌དུག༌པིན༌ ༼ཏེ༌ཙོགས༌སི༌ ཀོ༌སའེ༌ཀ༌ ཡོད༌ཅེས༌པོའེ༌ ངའེ༌ ཕིའ༌, ཅའང༌ ཁྱད༌ མེད༌, ཅིའ༌ཟེར༌ན༌ དཀོན༌མཆོག༌གི༌ སུ༌ཞིག༌གའང༌ ཆོག༌རིས༌ ཅོའ༌ ཛད༌ད༌ མ༌ནོག༌།༽
GAL 2:7 ཏེ༌བོ༌ མ༌ཚད༌ དཀོན༌མཆོག༌གི༌ པི༌ཏྲར༌ལ༌ ཡ༌ཧུ༌དཱ༌པ༌གུན༌ལ༌, ཆོས༌ཤད༌ཅེས༌སི༌ ཁག༌ ཀལ༌ལ༌ ཛད༌ཁན༌ ཙོགས༌ལ༌, ཡ༌ཧུ༌དཱ༌པ༌ མན༌ཁན༌གུན༌ལ༌, གའ༌མོའེ༌ ནས༌ཚུལ༌ ཤད༌ཅེས༌སི༌ ཁག༌ ངའ༌ སལ༌ལ༌ ཛད༌ཁན༌བོ༌, ཏེ༌ འུ༌སྐྱོང༌གུན༌ནི༌ ཐོངས༌ཏེ༌ ཨིན༌ནོག༌།
GAL 2:8 ཡེ༌ཤུའི༌ སྐུ༌ཚབས༌ པི༌ཏྲར༌ གྱུད༌ཏེ༌, ཡ༌ཧུ༌དཱ༌པ༌གུན༌ནི༌ ནང༌ང༌ ཆག༌ལས༌ ཛད༌ཁན༌ནི༌ ཏེན༌ན༌ དཀོན༌མཆོག༌པོའེ༌, ང༌ ཡེ༌ཤུའི༌ སྐུ༌ཚབས༌ གྱུད༌ཏེ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ནང༌ངའང༌, ཆག༌ལས༌ ཛད༌ཏེ༌ ཨིན༌ནོག༌།
GAL 2:9 ཆོས༌ཚོགས༌སི༌ འུ༌སྐྱོང༌ ཚང༌མའེ༌སང༌ ཁག༌ཅན༌ ཐེའ༌ ཛད༌ཁན༌ ཡ༌ཀོབ༌, པི༌ཏྲར༌ དང༌, ཡོ༌ཧཱ༌ནན༌ གུན༌ནི༌ ངའེ༌ ལས༌གུན༌ནི༌ སྐོར༌ ཚོར༌ཏེ༌, དཀོན༌མཆོག༌གི༌ ངའ༌ ཐུག༌རྗེ༌ སལ༌ལ༌ ཛད༌ཏེ༌ ཨིན༌ཁན༌བོ༌ ཧ༌གོ༌། ཡང༌ བཱར༌ན༌བས༌ དང༌ ངའ༌ ཁོང༌གུན༌ནི༌ ཕྲོ༌པ༌ ལས༌ཅེད༌པ༌ ཐེའ༌ཛད༌ཏེ༌, ང༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ ཆོས༌ཤད༌ཅེས༌, ཡང༌ ཁོང༌གུན༌ནི༌ ཡ༌ཧུ༌དཱ༌པ༌གུན༌ནི༌ ཕྲོའ༌ ལས༌ ཅོ༌ཅེས༌ལ༌ ཁའ༌ཆམས༌ས༌ ཛདས༌།
GAL 2:10 ཉལ༌བ༌ཅན༌གུན༌ལ༌ རོགས༌ ཅོ༌ཅེས༌སི༌ ཞུ༌ཝ༌ ཅིག༌པོ༌བོ༌, ཁོང༌གུན༌ནི༌ ང༌ཞའ༌ ཏངས༌། ཏེན༌ན༌ ལས༌པོ༌ ཅོའ༌ལ༌ ངའ༌ རིངས༌སད༌པིན༌།
GAL 2:11 ཨིན༌ནའང༌ པི༌ཏྲར༌ ཨན༌ཏི༌ཡོག༌གི༌ གྱལ༌སའེ༌ ནང༌ང༌ ཡོད༌ ཟ༌ནེ༌, ཁོང༌ངི༌ ཅོས༌ཁན༌བོ༌ ནོར༌ཁྲུལ༌ ཏན༌ཏན༌ ཨིན༌ པ༌སང༌, ངའ༌ ཁོང༌ང༌ ལྡོང༌ངི༌ཀ༌ གྱབ༌གལ༌ ཅོ༌གོས༌།
GAL 2:12 སྔུན༌ལ༌ ཁོང༌ངི༌ ཡ༌ཧུ༌དཱ༌པ༌ མན༌ཁན༌ནི༌ མ༌ཤི༌ཀ༌པ༌གུན༌ ཉམ༌པོ༌ ཁར༌ཇི༌ ཟའད༌པིན༌། ཨིན༌ནའང༌ ཡ༌ཀོབ༌བི༌ ཛ༌འོ༌ ཁ༌ཅིག༌ ཏེ༌རུ༌ ལེབ༌བ༌ཅིག༌, པི༌ཏྲར༌རི༌ ཏེ༌ སྤུན༌ ཡ༌ཧུ༌དཱ༌པ༌ མན༌ཁན༌གུན༌ ཉམ༌པོ༌ བྲེལ༌ མ༌བོརས༌ ཡང༌ ཟན༌ནའང༌ མ༌ཟོས༌, ཅིའ༌ཟེར༌ན༌ ཁོ༌ སུན༌ནད༌ ཅོ༌གོ༌ཤེས༌ ཁག༌ཅན༌ སམ༌ཁན༌ནི༌ ཡ༌ཀོབ༌བི༌ ཛ༌འོ༌གུན༌ནི༌ སྐྱོན༌རྗོད༌ ཅོ༌ཅེས༌ལ༌ ཇིགས༌སད༌པིན༌།
GAL 2:13 ཏེ༌བོའེ༌ བྲས༌བུ༌, ཞན༌ཡང༌ ཡ༌ཧུ༌དཱ༌པ༌ མ༌ཤི༌ཀ༌པ༌གུན༌ པི༌ཏྲར༌རི༌ ཁ༌ཆོས༌སི༌ ནང༌ང༌ དྲེས༌, མ༌ཚད༌ བཱར༌ན༌བས༌སའང༌ ཁོང༌གུན༌ནི༌ ཁ༌ཆོས༌སི༌ ནང༌ང༌ སོང༌།
GAL 2:14 ཁོང༌གུན༌ གའ༌མོའེ༌ ནས༌ཚུལ༌ལི༌ ངོས༌པོའེ༌ ལོན༌བོའེ༌ གྱབ༌ནེ༌ མ༌གྲུལ༌ཁན༌བོ༌, ངའེ༌ ཐོང༌ང༌ཅིག༌, ངའེ༌ ཚང༌མའེ༌ དུན༌ལ༌ པི༌ཏྲར༌ལ༌ ཟེར༌པིན༌, “ཁྱོ༌རང༌ ཡ༌ཧུ༌དཱ༌པ༌ཞིག༌ག༌ སྐྱེས༌ཏེའང༌, ཡ༌ཧུ༌དཱ༌པའེ༌ ཁྲིམས༌གུན༌ ཕངས༌ཏེ༌, ཡ༌ཧུ༌དཱ༌པ༌ མན༌ཁན༌གུན༌ ཙོགས༌ལ༌ མི༌ཚེ༌ ཕུད༌དུག༌། ཏ༌ ཁྱོ༌རང༌ངི༌ འི༌ ཡ༌ཧུ༌དཱ༌པ༌ མན༌ཁན༌ནི༌ སྤུན༌གུན༌ལ༌, ཅི༌ཕིའ༌ ཡ༌ཧུ༌དཱ༌པའེ༌ ལུག༌སྲོལ༌ལི༌ ནང༌ཞིན༌ གྲུལ༌ཅེས༌ལ༌, ཝང༌ ཏང༌ངད༌།”
GAL 2:15 “ང༌དང༌ ཉིས༌ཀོ༌ ནི༌, སྐྱེས༌པ༌ནེ༌ ཕར༌ལ༌ ཡ༌ཧུ༌དཱ༌པ༌ ཨིན༌ནོག༌། ཞན༌མ༌གུན༌ནི༌ སྡིག༌ཅན༌ ཨིན༌ནོག༌ ཟེར༌ཁན༌ ཡ༌ཧུ༌དཱ༌པ༌ མན༌ཁན༌གུན༌ ཙོགས༌ མ༌ནོག༌།
GAL 2:16 ཨིན༌ནའང༌ ང༌དང༌གུན༌ལ༌ གྱུས༌ཨིན༌ནོག༌, མི༌ཞིག༌ ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌, ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཅེས༌པོའེ༌, དཀོན༌མཆོག༌གི༌ སྐུན༌དུན༌ལ༌, ཀྲང༌པོ༌ ཐེའ༌ ཛད༌ད༌ནོག༌། ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌, མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ ཅོ༌ཅེས༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའ༌ ཛད༌ཅེས༌སི༌ ཕིའ༌, ང༌དང༌གུན༌ནི༌ མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ ཅོས༌ཏེ༌ ཨིན༌ནོག༌། ཅིའ༌ཟེར༌ན༌ སུ༌ཞིག༌གའང༌ ཁྲིམས༌ ཁའ༌ཉན༌ཅེས༌པོའེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའ༌ ཛད༌ད༌ མ༌ནོག༌།”
GAL 2:17 ཀལ༌ཏེས༌ ང༌དང༌གུན༌ནི༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཅེས༌པོ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེ༌ཅེས༌ ཙལ༌ལད༌ན༌, ཨིན༌ནའང༌ ཁྲིམས༌ ཕང༌ཅེས༌པོའེ༌ ང༌དང༌གུན༌ནི༌ ནང༌ང༌ སྐྱོན༌ ཐོང༌ངད༌ན༌, ཅི༌ ཏེ༌བོའེ༌ ཏོན༌བོ༌, མ༌ཤི༌ཀའེ༌ ང༌དང༌གུན༌ སྡིག༌པའེ༌ ནང༌ང༌ ཁྲིད༌ཏེ༌ ཁྱེར༌ར༌ ཛད༌ཏེ༌ ཨིན༌ནོག༌ག༌? མ༌ནེ༌ མ༌ནོག༌།
GAL 2:18 ཨིན༌ནའང༌ ཀལ༌ཏེས༌ ངའེ༌ སྔུན༌ལ༌ ཤིགས༌ཁན༌ནི༌ ཁྲིམས༌པོ༌, ཡང༌སྐྱར༌ རྩིག༌ན༌, ཏེ༌བོའེ༌ ང༌ སྡིག༌ཅན༌ཞིག༌ ཨིན༌ཁན༌བོ༌ སྟན༌ན༌ནོག༌།
GAL 2:19 ངའེ༌ ཁྲིམས༌ ཚང༌མ༌ སྲུང༌ མ༌ཉན༌ པ༌སང༌, ཏེ༌བོའེ༌ ངའ༌ ཤི༌གོ༌ཤེས༌ ཁྲིམས༌ཅདས༌། སོང༌པ༌སང༌ ཁྲིམས༌སི༌ ཕིའ༌ ང༌ ཤི༌ཏེ༌ ཨིན༌ ཡང༌ན༌ དཀོན༌མཆོག༌གི༌ ཏོན༌ལ༌ མི༌ཚེ༌ ཕུད༌ཅེས༌སི༌ ཕིའ༌, ངའེ༌ ཁྲིམས༌ ཚང༌མ༌ སྲུང༌ཅེས༌ ཕངས༌ཏེ༌ མེད༌།
GAL 2:20 མ༌ཤི༌ཀ༌ རྐྱང༌ཤིང༌ངི༌ཀ༌ རྐྱང༌ང༌ ཛད༌ ཟ༌ནེ༌, ངའེ༌ སྔུན༌ནི༌ མི༌ཚེ༌བོའང༌ རྐྱངས༌ཏེ༌ མེད༌། ཏ༌ནེ༌ཕར༌ལ༌ འི༌ མི༌ཚེའེ༌ ངའེ༌ མན༌པ༌, མ༌ཤི༌ཀ༌ འི༌ ནང༌ང༌ ཞུགས༌སད༌། ཏ༌ ངའེ༌ དཀོན༌མཆོག༌གི༌ སྲས༌སི༌ ནང༌ང༌, ཨིད༌ཤེས༌ ཅོས༌ཏེ༌ འི༌ ཇིག༌རྟེན༌ནི༌ ཟུགས༌པོའེ༌ ནང༌ང༌ དུག༌གད༌། ཁོང༌ངི༌ ངའ༌ ཅེས༌པ༌ ཛད༌ཏེ༌ ཁོང༌རང༌ངི༌ སྲོག༌, ངའེ༌ ཕིའ༌ སལ༌ལ༌ ཛདས༌།
GAL 2:21 ངའེ༌ དཀོན༌མཆོག༌གི༌ ཐུག༌རྗེ༌བོ༌ སྣང༌མེད༌ ཅོ༌ཉན༌ཅེས༌ མ༌ནོག༌། ཀལ༌ཏེས༌ ཁྲིམས༌གུན༌ སྲུང༌ཅེས༌པོའེ༌, ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའད༌ན༌, ཏེ༌ནེ༌ མ༌ཤི༌ཀ༌ ཀྲོངས༌ གོ༌ཤེས༌སི༌ སྒོས༌དོམ༌ མེད༌པ༌ ཨིན༌ནོག༌།
GAL 3:1 འོ༌ སམ༌བ༌ མེད༌ཁན༌, གཱ༌ལ༌ཏི༌ཡ༌པ༌གུན༌, སུའི༌ ཆོས༌ངན༌ ཅོས༌ཏེ༌ ཁྱོ༌ཞ༌གུན༌ བུང༌བུ༌ ཙོགས༌ སམ༌མེད༌ གྱུར༌ཅུགས༌? ངའེ༌ ཁྱོ༌ཞ༌གུན༌ལ༌ ཡེ༌ཤུ༌ མ༌ཤི༌ཀ༌ རྐྱང༌ཤིང༌ངི༌ཀ༌ ཀྲོངས༌ཁན༌བོ༌, ཁྱོ༌ཞ༌རང༌ངི༌ མིག༌ནེ༌ ཐོང༌ཁན༌ ཙོགས༌ སལ༌པོ༌ ཅོས༌ཏེ༌ ཤད༌པིན༌།
GAL 3:2 ངའེ༌ ཁྱོ༌ཞ༌གུན༌ལ༌ འིན༌ན༌ ཏྲི༌ཝ༌ ཅིག༌པོ༌ ཏྲི༌ཨིན༌, ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌, མོ༌ཟེས༌སི༌ ཁྲིམས༌གུན༌ སྲུང༌ཅེས༌པོའེ༌ ཐོབས༌ས༌ ཡ༌ མ༌ཤི༌ཀའེ༌ སྐོར༌ལ༌ ལོན༌བོ༌ ཚོར༌ཏེ༌ ཏད༌པ༌ ཅོ༌ཅེས༌པོའེ༌ ཐོབ༌?
GAL 3:3 ཁྱོ༌ཞ༌གུན༌ འི༌ཟུག༌ སམ༌མེད༌ རིག༌ ཀ༌ཟུག༌གི༌ གྱུར༌? ཁྱོ༌ཞ༌གུན༌ནི༌ མ༌ཤི༌ཀའེ༌ ནང༌ང༌ མི༌ཚེ༌བོ༌ ཏམ༌པའེ༌ ཐུག༌ཉིད༌ གྱུད༌ཏེ༌ གོ༌ཟུག༌ ཅོས༌ཏེ༌, སྟིང༌ནེ༌ ཅི༌ཕིའ༌ ཁྱོ༌ཞ༌གུན༌ནི༌ མིའི༌ ཁྱུད༌དི༌ ནང༌ང༌ ཏེ༌བོ༌ གྲུབ༌ཅུག༌ཅེས༌སི༌ རྩོན༌གྲུས༌ ཅོའད༌?
GAL 3:4 ཁྱོ༌ཞ༌གུན༌ནི༌ རྡུག༌ངལ༌ ཚང༌མ༌ ལེན༌ཅེས༌པོ༌ ཕན༌ཐོགས༌ མེད༌པ༌ མན༌གྲོ༌? ཏན༌ཏན༌ལ༌ ཏེ༌གུན༌ ཏོན༌མེད༌ལ༌ སོང༌ཏེ༌ མན༌གྲོ༌, ཨིན༌ན༌?
GAL 3:5 ངའེ༌ ཁྱོ༌ཞ༌གུན༌ལ༌ ཡང༌སྐྱར༌ ཏྲིའད༌, ཁྱོ༌ཞ༌གུན༌ནི༌ ཁྲིམས༌གུན༌ སྲུང༌ཅེས༌པོའེ༌, དཀོན༌མཆོག༌གི༌ ཁྱོ༌ཞ༌གུན༌ལ༌ ཏམ༌པའེ༌ ཐུག༌ཉིད༌ སལ༌ཅེས༌ ཡང༌, ཁྱོ༌ཞའེ༌ ཕྲོའ༌ ཧ༌ལས༌ཤེས༌སི༌ ལྟས༌གུན༌ ཅོའ༌ ཛདས༌ས༌, ཡ༌ མ༌ཤི༌ཀའེ༌ སྐོར༌ལ༌ ཚོར༌ཁན༌ནི༌ ལོན༌བོའེ༌ ནང༌ང༌ ཨིད༌ཤེས༌ ཅོ༌ཅེས༌པོའེ༌ ཛདས༌?
GAL 3:6 ཏེན༌ན༌ ཙོགས༌ལ༌ “ཨབ༌ར༌ཧམ༌མི༌ དཀོན༌མཆོག༌གི༌ ནང༌ང༌ ཨིད༌ཤེས༌ ཅོ༌ཅེས༌པོའེ༌, དཀོན༌མཆོག༌གི༌ ཁོང༌ང༌ ཀྲང༌པོ༌ ཐེའ༌ ཛདས༌།”
GAL 3:7 སོང༌པ༌སང༌ དཀོན༌མཆོག༌གི༌ ནང༌ང༌ ཏད༌པ༌ ཅོ༌ཁན༌གུན༌ ཨབ༌ར༌ཧམ༌མི༌ ངོས༌པོའེ༌ པུར༌གྱུད༌ ཨིན༌ཁན༌གུན༌ ཧ༌གོའ༌ མེ༌རག༌ག༌?
GAL 3:8 མ༌ཡོངས༌པོའེ༌ ཏུས༌སི༌ ནང༌ང༌, དཀོན༌མཆོག༌གི༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཏད༌པ༌ ཅོ༌ཅེས༌ གྱུད༌ཏེ༌, ཀྲང༌པོ༌ ཐེའ༌ ཛད༌ཅེས༌པོ༌, སུང༌རབས༌སི༌ སྔོན༌ཅུགས༌། ཡང༌ “གྱལ༌ཁག༌ ཚང༌མའ༌ ཁྱོ༌རང༌ གྱུད༌ཏེ༌ ཅིན༌ལབས༌ ཐོབ༌ཨིན༌” མོལ༌ཏེ༌ གའ༌མོའེ༌ ནས༌ཚུལ༌བོ༌, ཏུས༌ མང༌པོའེ༌ སྔུན༌ལ༌ ཨབ༌ར༌ཧམ༌མ༌ ཤད༌ད༌ ཛདས༌།
GAL 3:9 ཏེ༌བོའེ༌ཕིའ༌ མ༌ཤི༌ཀའེ༌ ནང༌ང༌ ཏད༌པ༌ ཅོ༌ཁན༌ ཚང༌མ༌ལ༌, ཨབ༌ར༌ཧམ༌ ཏད༌པ༌ཅན༌ མི༌ ཉམ༌པོ༌ ཅིན༌ལབས༌པོ༌ ཐོབ༌ཨིན༌།
GAL 3:10 ཨིན༌ནའང༌ དཀོན༌མཆོག༌གི༌ དུན༌ལ༌ ཀྲང༌པོ༌ ཐེ༌ཅེས༌སི༌ ཕིའ༌, ཁྲིམས༌ ཁའ༌ ཉན༌ཅེས༌སི༌ཀ༌ རག༌ལས༌ཏེ༌ དུག༌ཁན༌གུན༌ལ༌, ཁོང༌ངི༌ ངན༌ ཕོག༌ཨིན༌ ཅིའ༌ཟེར༌ན༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཁྲིམས༌སི༌ སྤེ༌ཆའེ༌ ནང༌ང༌ བྲིའ༌ ཛད༌ཏེ༌ ཡོད༌ཁན༌ ཚང༌མ༌ མ༌སྲུང༌ཁན༌གུན༌ལ༌, ངན༌ ཕོག༌ཨིན༌།”
GAL 3:11 ཏེ༌ནེ༌ ཁྲིམས༌ སྲུང༌ཅེས༌སི༌ རྩོན༌གྲུས༌ ཅོས༌ཏེ༌ སུ༌ཞིག༌གའང༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ མི༌ཐེ༌ཅེས༌པོ༌, སལ༌པོ༌ སོང༌ཏེ༌ ཨིན༌ནོག༌། ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཏད༌པ༌ ཅིག༌པོ༌ གྱུད༌ཏེ༌ མི༌ ཀྲང༌པོ༌ཞིག༌ག༌ མི༌ཚེ༌ ཐོབ༌བ༌ནོག༌།”
GAL 3:12 འི༌ ཏད༌པའེ༌ ལམ༌བོ༌ ནི༌, ཁྲིམས༌སི༌ ལམ༌ ཀ༌བོའེ༌ “ཁྲིམས༌ ནང༌ཞིན༌ གྲུལ༌ཁན༌གུན༌ལ༌ ཏེ༌ ཁྲིམས༌ ཚང༌མ༌ ཁའ༌ཉན༌ཏེ༌ མི༌ཚེ༌ ཕུད༌གོས༌ས༌ནོག༌” ཟེར༌ཁན༌བོའེ༌ སང༌ མ༌ སོ༌སོ༌ཞིག༌ ཡོད༌ཏེ༌ ཨིན༌ནོག༌།
GAL 3:13 ཨིན༌ནའང༌ ང༌དང༌ ཚང༌མའ༌ ཁྲིམས༌སི༌ ངན༌ ཕོག༌ཁན༌ནི༌ ཀ༌ནེ༌ མ༌ཤི༌ཀའེ༌ རིན༌ ཤལ༌ལ༌ ཛད༌ཏེ༌ ཐར༌ ཅུགས༌, ནམ༌ ང༌དང༌ངི༌ ཅོ༌ཁན༌ནི༌ ལས༌ ངན༌པ༌གུན༌ནི༌ ངན༌བོ༌, ཁོང༌ངི༌ ཁོང༌རང༌ངི༌ཀ༌ ཁུར༌ར༌ ཛད༌ཏེ༌ ཁོང༌ རྐྱང༌ཤིང༌ངི༌ཀ༌ རྐྱངས༌། ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཏེ༌ དུག༌, “ལྕང༌མའེ༌ཀ༌ རྐྱངས༌ཁན༌ ཚང༌མ༌ལ༌ ངན༌ ཕོགས༌ཏེ༌ ཨིན༌ནོག༌།”
GAL 3:14 མ༌ཤི༌ཀ༌ ཡེ༌ཤུ༌ གྱུད༌ཏེ༌, དཀོན༌མཆོག༌གི༌ ཡ༌ཧུ༌དཱ༌པ༌ མན༌ཁན༌གུན༌ལ༌, ཨབ༌ར༌ཧམ༌མ༌ ཞལ༌ཆད༌ ཛད༌ཁན༌ནི༌ ཏེན༌ན༌ ཅིན༌ལབས༌པོ༌ སལ༌ལ༌ ཛདས༌། ཁོང༌ངི༌, ང༌དང༌གུན༌ལ༌ ཏད༌པ༌ གྱུད༌ཏེ༌, ཞལ༌ཆད༌ ཛད༌ཁན༌ནི༌ ཏམ༌པའེ༌ ཐུག༌ཉིད༌བོ༌, ཐོབ༌ཅེས༌སི༌ གྱུན༌ཚན༌བོའེ༌ ཕིའ༌, ཏེ༌བོ༌ ཛདས༌།
GAL 3:15 ཅེས༌པའེ༌ སྤུན༌གུན༌ ཏ༌ ངའ༌ ཞག༌ཏང༌ངི༌ མི༌ཚེ༌ དང༌ བྲེལ༌ཁན༌ནི༌ སྤེ༌ཞིག༌ ཏང༌ཅུག༌། མི༌ ཉིས༌སི༌ པར༌ལ༌ ཆད༌དོན༌ བྲིས༌ཏེ༌ སྟིང༌ནེ༌ སུ༌ཞིག༌གིའང༌, ཏེ༌བོའ༌ སྣང༌མེད༌ ཅོ༌ མི༌ཉན༌, ཡ༌ ཏེ༌བོའ༌ ནན༌ཏེ༌ ཐེ༌བ༌ ཟེར༌ མི༌ཉན༌།
GAL 3:16 དཀོན༌མཆོག༌གི༌ ཞལ༌ཆད༌གུན༌ ཨབ༌ར༌ཧམ༌ དང༌ ཁོང༌ངི༌ པུར༌གྱུད༌ལ༌ , ཅོའ༌ ཛད༌ཏེ༌ ཨིན༌ནོག༌། སུང༌རབས༌སི༌ ནང༌ང༌ “པུར༌གྱུད༌གུན༌” མོལ༌ཏེ༌ མི༌དུག༌, ཀ༌བོའེ༌ ཏོན༌བོ༌ མི༌ མང༌པོ༌ཞིག༌, ཨིན༌ནའང༌ “པུར༌གྱུད༌ལ༌” མོལ༌ཏེ༌ དུག༌, ཀ༌བོའེ༌ ཏོན༌བོ༌, མི༌ ཅིག༌ཅིག༌ ཡང༌ན༌ མ༌ཤི༌ཀ༌།
GAL 3:17 ངའེ༌ ཟེར༌ཅེས༌སི༌ ཏོན༌བོ༌ ནི༌, མོ༌ཟེས༌ལ༌ སལ༌ཁན༌ནི༌ ཁྲིམས༌སི༌ སང༌ ལོ༌ ཞིབ༌གྱ༌ སུམ༌ཅུའེ༌ སྔུན༌ལ༌, དཀོན༌མཆོག༌གི༌ ཨབ༌ར༌ཧམ༌ ཉམ༌པོ༌ ཞལ༌ཆད༌ ཛདས༌། མོ༌ཟེས༌སི༌ ཁྲིམས༌པོའེ༌, དཀོན༌མཆོག༌གི༌ ཨབ༌ར༌ཧམ༌ ཉམ༌པོ༌ ཆད༌དོན༌ ཛད༌ཁན༌བོ༌, ཅགས༌ཏེ༌ མེད༌ཁན༌ ཅོ༌ མི༌ཉན༌།
GAL 3:18 ཀལ༌ཏེས༌ ཁྲིམས༌གུན༌ སྲུང༌ཅེས༌པོའེ༌, ང༌དང༌གུན༌ལ༌ དཀོན༌མཆོག༌གི༌ ཐར༌པའེ༌ ནོར༌སྐལ༌བོ༌ ཐོབ༌བད༌ན༌, ཏེ༌ནེ༌ ཐར༌པ༌བོ༌ ཞལ༌ཆད༌ ཛད༌ཁན༌བོའེ༌ཀ༌ རག༌ལས༌ཏེ༌ མེད༌ཏེ༌ ཨིན༌ནོག༌། ཨིན༌ནའང༌ དཀོན༌མཆོག༌གི༌ ཐུག༌རྗེའེ༌ ནང༌ང༌ ཨབ༌ར༌ཧམ༌མ༌ ཁོང༌རང༌ངི༌ ཞལ༌ཆད༌ གྱུད༌ཏེ༌, ཐར༌པའེ༌ ནོར༌སྐལ༌བོ༌ སལ༌ལ༌ ཛདས༌།
GAL 3:19 ཏེ༌ནེ༌ ཅི༌ཕིའ༌ ཁྲིམས༌པོ༌ ཏངས༌ཏེ༌ ཨིན༌ནོག༌? འི༌བོ༌ མི༌གུན༌ལ༌ ཁོང༌གུན༌ནི༌ སྡིག༌པ༌གུན༌ སྟན༌ཅེས༌སི༌ ཕིའ༌ ཞལ༌ཆད༌དི༌ སྟིང༌ནེ༌, ཏེ༌ཀ༌ ནན༌མ༌ སལ༌ལ༌ ཛདས༌། ཨིན༌ནའང༌ ཏེ༌ ཁྲིམས༌པོ༌ ཏེ༌ཏེ༌ཚོག༌པ༌ ལུས༌ཤེས༌ལ༌ ཅོའ༌ ཛདས༌, ནམ༌ཚོག༌པ༌ ཏེ༌ པུར༌གྱུད༌པོ༌ ལེབ༌ མི༌ལེབ༌, ཀ༌བོ༌ དཀོན༌མཆོག༌གི༌ ཞལ༌ཆད༌ ཛད༌ཏེ༌ ཨིན༌པིན༌། དཀོན༌མཆོག༌གི༌ ཏེ༌ ཁྲིམས༌པོ༌ ཕོ༌ཉ༌གུན༌ གྱུད༌ཏེ༌, མོ༌ཟེས༌ལ༌ སལ༌ལ༌ ཛདས༌, ཁོ༌ ནི༌ དཀོན༌མཆོག༌ དང༌ མི༌གུན༌ནི༌ པར༌ལ༌ བར༌མི༌ཞིག༌ ཨིན༌པིན༌།
GAL 3:20 ཏ༌ སྡེ༌ ཅིག༌གི༌ སང༌ མང༌ངི༌ ནང༌ང༌ ཆད༌དོན༌ ཅོ༌ ཟ༌ནེ༌, བར༌མི༌ སྒོས༌དོམ༌ ཆའ༌ནོག༌། ཨིན༌ནའང༌ དཀོན༌མཆོག༌ ཅིག༌ ཞུགས༌ཏེ༌ ཨིན༌ པ༌སང༌, ཁོང༌ངི༌ ཨབ༌ར༌ཧམ༌མ༌ ཁོང༌རང༌ངི༌ ཞལ༌ཆད༌པོ༌ སལ༌ ཟ༌ནེ༌, བར༌མི༌ ཀོལ༌ལ༌ མ༌ཛདས༌།
GAL 3:21 ཏེ༌ནེ༌ ཅི༌, ཁྲིམས༌པོའེ༌ དཀོན༌མཆོག༌གི༌ ཞལ༌ཆད༌ལ༌ གྱབ༌གལ༌ ཅོའ༌ནོག༌ག༌? མ༌ནེ༌ ཅོའ༌ མ༌ནོག༌། ཀལ༌ཏེས༌ ཁྲིམས༌སི༌ ང༌དང༌གུན༌ལ༌ མི༌ཚེ༌ སོ༌མ༌ཞིག༌ ཏང༌ཐུབ༌བད༌པིན༌ན༌, ཏེ༌ནེ༌ ཏེ༌བོ༌ ཁའ༌ ཉན༌ཅེས༌ནེ༌ ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཅོས༌ཏེ༌ ཡོད༌གྲོ༌།
GAL 3:22 ཨིན༌ནའང༌ ཏམ༌པའེ༌ སུང༌རབས༌སི༌, ང༌དང༌ ཚང༌མ༌ སྡིག༌པའེ༌ ཙོན༌པ༌ ཨིན༌ཁན༌བོའེ༌ སྤང༌པོ༌ སལ༌ལ༌ ཛད༌དུག༌། ཏེ༌བོའེ༌ཕིའ༌ ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཅོ༌ཅེས༌ ཅིག༌པོ༌ གྱུད༌ཏེ༌, དཀོན༌མཆོག༌གི༌ ཐར༌པའེ༌ ཞལ༌ཆད༌པོ༌ ཐོབ༌བ༌ནོག༌།
GAL 3:23 འི༌ ཏད༌པ༌བོ༌ ཡོང༌ངི༌ སང༌ སྔུན༌ལ༌, ཁྲིམས༌པོའེ༌ ང༌དང༌གུན༌ ཙོན༌ཁང༌ངི༌ ནང༌ང༌ ཀགས༌ཏེ༌ ཀུ༌ལིག༌ ཅུགས༌ཏེ༌ བོར༌ཏེ༌ ཨིན༌ནོག༌, ནམ༌ཚོག༌པ༌ ཏད༌པ༌བོ༌ སྔོན༌ མ༌སྔོན༌།
GAL 3:24 ཏེ༌ ཁྲིམས༌པོ༌, མ༌ཤི༌ཀ༌ སྔོན༌སྔོན༌ ཚག༌པ༌ ང༌དང༌གུན༌ ཁྲིད༌ཁན༌ནི༌ ཁག༌ཁུར༌པ༌བོ༌ ཅོའ༌ ཛདས༌། ཏེ༌ནེ༌ མ༌ཤི༌ཀའེ༌ ནང༌ང༌ ཏད༌པ༌ ཅོ༌ཅེས༌ གྱུད༌ཏེ༌ ང༌དང༌གུན༌ ཀྲང༌པོ༌ ཐེའ༌ ཛད༌ཨིན༌།
GAL 3:25 ཨིན༌ནའང༌ ཏ༌, ཏེ༌ ཏད༌པའེ༌ ལམ༌བོ༌ སྐྱོད༌ པ༌སང༌, ང༌དང༌གུན༌ལ༌ ཁྲིམས༌སི༌ སྟ༌སྟོག༌གི༌ ཡོག༌ག༌ དུག༌གོས༌ མེད༌པ༌ ཨིན༌ནོག༌།
GAL 3:26 མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ ཡོད༌ཅེས༌པོའེ༌, ཁྱོ༌ཞའ༌ ཚང༌མ༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ནོག༌།
GAL 3:27 ཁྲུས༌ལེན༌ན༌ཅིག༌, ཁྱོ༌ཞའ༌ ཚང༌མ༌ མ༌ཤི༌ཀ༌ ཉམ༌པོ༌ ཅིག༌གྲིལ༌ སོང༌ཏེ༌ མ༌ཤི༌ཀའེ༌ སྕོད༌ལམ༌གུན༌ ཀོས༌ལག༌ སོ༌མ༌ ཙོགས༌ལ༌ གོན༌ཏེ༌ ཨིན༌ནོག༌།
GAL 3:28 ཏ༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌, ཚེ༌ཡོག༌ དང༌ རང༌ཝང༌ཅན༌, བུ༌ཚ༌ དང༌ བུ༌མོ༌ གུན༌ནི༌ པར༌ལ༌ ཅའང༌ ཁྱད༌ མེད༌པ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞའ༌ ཚང༌མ༌ མ༌ཤི༌ཀ༌ ཡེ༌ཤུའི༌ ནང༌ང༌ ཅིག༌ ཨིན༌ནོག༌།
GAL 3:29 ཁྱོ༌ཞའ༌ མ༌ཤི༌ཀའེ༌ ཨིན༌ པ༌སང༌, ཁྱོ༌ཞ༌གུན༌ ཨབ༌ར༌ཧམ༌མི༌ དེན༌བའེ༌ ཕྲུ༌གུ༌གུན༌ ཨིན༌ནོག༌། ཡང༌ དཀོན༌མཆོག༌གི༌ ཞལ༌ཆད༌ ནང༌ཞིན༌, ཁྱོ༌ཞ༌གུན༌ ཨབ༌ར༌ཧམ༌མི༌ ནོར༌སྐལ༌ལི༌ དག༌པོ༌ གྱུར༌ཨིན༌།
GAL 4:1 ངའེ༌ ཟེར༌ཅེས༌པོ༌ ནི༌, ནོར༌སྐལ༌ ལེན༌ཁན༌བོ༌ ཕྲུ༌གུ༌ ཨིན༌ ཟ༌ནེ༌ ཁོ༌ ནོར༌ གང༌པོའེ༌ དག༌པོ༌ ཨིན༌ཏེའང༌, ཁོ༌ ཚེ༌ཡོག༌ ཤིག༌གི༌ སང༌ སོ༌སོ༌ མ༌ནོག༌།
GAL 4:2 ཡང༌ན༌ ཏེ༌ ཕྲུ༌གུ༌བོའ༌ ཏེ༌ཏེ༌ཚོག༌པ༌, ཁོ༌རང༌ དང༌ ཁོའེ༌ ནོར༌ལ༌ སྟ༌སྟོག༌ ཅོ༌ཁན༌གུན༌ནི༌ ཁའ༌ ཉན༌གོས༌ས༌ནོག༌ ནམ༌ཚོག༌པ༌, ཁོའེ༌ ཨ༌བའེ༌ ལྡམ༌ཁན༌ནི༌ ཏུས༌པོ༌ ལེབ༌ མི༌ལེབ༌།
GAL 4:3 མ༌ཤི༌ཀ༌ སྐྱོད༌དི༌ སང༌ སྔུན༌ལ༌ ཏེན༌ན༌ ཙོགས༌པོ༌ ང༌དང༌གུན༌ ཉམ༌པོ༌ ཡོད༌པིན༌། ང༌དང༌གུན༌ ཏེ༌ ཕྲུ༌གུ༌ ཙོགས༌ལ༌, འི༌ ཇིག༌རྟེན༌ནི༌ ཆོས༌སི༌ ལམ༌ ལུག༌སྲོལ༌གུན༌ནི༌ ཚེ༌ཡོག༌ ཨིན༌པིན༌།
GAL 4:4 ཨིན༌ནའང༌ ལྡམ༌མ༌ ཛད༌ཁན༌ནི༌ ཏུས༌པོ༌ ལེབ༌བ༌ཅིག༌, དཀོན༌མཆོག༌གི༌ ཁོང༌རང༌ངི༌ སྲས༌པོ༌ ལམ༌ཅུག༌ག༌ ཛདས༌། ཁོང༌ བུ༌མོ༌ཞིག༌ནེ༌ ལྟམས༌ཏེ༌ ཡ༌ཧུ༌དཱ༌པའེ༌ ཁྲིམས༌སི༌ ཡོག༌ག༌ མི༌ཚེ༌ ཕུད༌ད༌ ཛདས༌།
GAL 4:5 ཁྲིམས༌སི༌ ཡོག༌པོ༌ ཨིན༌ཁན༌གུན༌ནི༌ རང༌ཝང༌བོ༌ ལོགས༌ཏེ༌ ཉོ༌ཅེས༌ལ༌, དཀོན༌མཆོག༌གི༌ ཁོང༌ ལམ༌ཅུག༌ག༌ ཛདས༌, ཅིའ༌ཟེར༌ན༌ ཁོང༌ ང༌དང༌གུན༌ ཁོང༌ངི༌ སོས༌བུའ༌ ལེན༌ཁན༌ནི༌ ཕྲུ༌གུ༌གུན༌ གྱུར༌ཅེས༌ལ༌ ཐད༌ད༌ ཛད༌ད༌ནོག༌།
GAL 4:6 ང༌དང༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ པ༌སང༌, ཁོང༌ངི༌ ཁོང༌རང༌ངི༌ སྲས༌སི༌ ཐུག༌ཉིད༌བོ༌ ང༌དང༌གུན༌ནི༌ སྙིང༌ངི༌ ནང༌ང༌ ལམ༌ཅུག༌ག༌ ཛདས༌, ཡང༌ ཏེན༌ན༌ ཐུག༌ཉིད༌བོའེ༌ “ཨ༌བ༌, ཡབ༌ལེ༌” མོལ༌ཨིན༌ བོད༌ད༌ ཛདས༌།
GAL 4:7 ཏེ༌བོའེ༌ཕིའ༌ ཁྱོ༌ཞ༌གུན༌ ཚེ༌ཡོག༌ག༌ མ༌ལུས༌ས༌, དཀོན༌མཆོག༌ ཁོང༌རང༌ངི༌ ཕྲུ༌གུ༌གུན༌ ཨིན༌ནོག༌། ཁྱོ༌ཞ༌གུན༌ ཁོང༌ངི༌ ཕྲུ༌གུ༌ ཨིན༌ པ༌སང༌, ཁྱོ༌ཞའ༌ ཁོང༌ངི༌ ནོར༌སྐལ༌ ལེན༌ཁན༌གུན༌ནའང༌ ཨིན༌ནོག༌།
GAL 4:8 དཀོན༌མཆོག༌ ཤེས༌སི༌ སང༌ སྔུན༌ལ༌, ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ དཀོན༌མཆོག༌ མན༌ཁན༌ ལྷ༌ལྷ༌མོ༌ གུན༌ནི༌ ཚེ༌ཡོག༌ ཨིན༌པིན༌།
GAL 4:9 ཨིན༌ནའང༌ ཏ༌ ཁྱོ༌ཞ༌གུན༌ནི༌ དཀོན༌མཆོག༌ ཤེས༌ཏེ༌ ཨིན༌ནོག༌, ཡ༌ ངའེ༌ ཟེར༌གོས༌ དཀོན༌མཆོག༌གི༌ ཁྱོ༌ཞ༌གུན༌ ཁྱེན༌ན༌ ཛད༌ད༌ནོག༌། ཏེ༌ནེ༌ ཅི༌ཕིའ༌ ཁྱོ༌ཞ༌གུན༌ ཡང༌སྐྱར༌ ཆོས༌སི༌ འུ༌ཐུགས༌ དང༌ ཕན༌མི༌ཐོགས༌སི༌ ལམ༌ ལུག༌སྲོལ༌གུན༌ནི༌ ཚེ༌ཡོག༌ གྱུར༌ར༌ལ༌, ལོགས༌ཏེ༌ ཆ༌ཉིན༌རག༌།
GAL 4:10 སྤེར༌ན༌, ཁྱོ༌ཞ༌གུན༌ནི༌ མིག༌སལ༌ལི༌ ཞག༌, ཟླ༌ཝ༌, ནམ༌ཟླ༌ དང༌ ལོ༌ གུན༌ རྩི༌རུག༌།
GAL 4:11 ང༌ ཁྱོ༌ཞ༌གུན༌ནི༌ ཕིའ༌ ཇིགས༌ས༌རག༌, ངའེ༌ ཁྱོ༌ཞའེ༌ ཕིའ༌ རྩོན༌གྲུས༌ ཅོས༌ཏེ༌ ལས༌ ཅོ༌ཁན༌གུན༌ གོད༌ལ༌ སོང༌ཏེ༌ ཨིན༌ཏིག༌དུག༌།
GAL 4:12 ཅེས༌པའེ༌ སྤུན༌གུན༌, ང༌ རང༌ཝང༌ངི༌ ནང༌ང༌ དུག༌ག༌ ཙོགས༌ལ༌, ཁྱོ༌ཞ༌གུན༌ནའང༌ དུག༌ཅེས༌ལ༌ ཞུ༌ཝ༌ ཕུལ༌ལད༌ ཅིའ༌ཟེར༌ན༌ སྔུན༌ལ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌ ཁྲིམས༌སི༌ ཀ༌ནེ༌ རང༌ཝང༌ ཡོད༌ཁན༌གུན༌ ཙོགས༌, ང༌ གྱུར༌ཏེ༌ ཨིན༌། ཁྱོ༌ཞ༌གུན༌ནི༌ ངའ༌ ངན༌པ༌ མ༌ནེ༌ མ༌ཅོས༌།
GAL 4:13 ཁྱོ༌ཞ༌གུན༌ལ༌ གྱུས༌ཨིན༌ནོག༌, ངའ༌ ཟུ༌མོ༌ ཡོང༌ཅེས༌པོའེ༌, ཁྱོ༌ཞ༌གུན༌ ཡོད༌ས༌ གོ༌མ༌རང༌ ཡོང༌གོས༌ པ༌སང༌, ངའེ༌ གའ༌མོའེ༌ ནས༌ཚུལ༌ ཁྱོ༌ཞའ༌ ཤད༌པིན༌།
GAL 4:14 ཟུགས༌པོའེ༌ ཐོག༌ནེ༌ ང༌ མ༌ སྐྱོ༌མོ༌ ཡོད༌ པ༌སང༌, ཁྱོ༌ཞ༌གུན༌ནི༌ ངའ༌ ཁམ༌ལོགས༌ཏེ༌ རྩིས༌མེད༌ ཅོ༌ཉན༌ཅེས༌ ཡོད༌པིན༌། ཨིན༌ནའང༌ ཁྱོ༌ཞའེ༌ ང༌ རིན༌མེད༌ མ༌ཅོས༌, ཡ༌ ལོགས༌ཏེ༌ མ༌ཀལས༌། དཀོན༌མཆོག༌གི༌ ཆོགས༌ནེ༌ ཕོ༌ཉ༌, ཡ༌ མ༌ཤི༌ཀ༌ ཡེ༌ཤུ༌ ཁོང༌རང༌ ཙོགས༌ལ༌, གའ༌སུས༌ ཞུས༌ཏེ༌ ངའ༌ སྟ༌སྟོག༌ ཅོས༌།
GAL 4:15 ཁྱོ༌ཞའེ༌ ནང༌ང༌ ཡོད༌ཁན༌ནི༌ ཏེ༌ ཐད༌པོ༌གུན༌ལ༌ ཅི༌ སོང༌? ཀལ༌ཏེས༌ ཉན༌པིན༌ན༌, ཁྱོ༌ཞ༌གུན༌ནི༌ རང༌ངི༌ མིག༌གུན༌ ཕིངས༌ཏེ༌ ངའ༌ ཏང༌ཅེས༌ལ༌ ཐད༌པོ༌ དུག༌པིན༌, ངའེ༌ ཏེ༌བོའ༌ སྤང༌པོ༌ ཏང༌ ཉན༌ཅེས༌རག༌།
GAL 4:16 ཨིན༌ནའང༌ ཏ༌ ངའེ༌ ཁྱོ༌ཞ༌གུན༌ལ༌ ཀྲང༌པོ༌ ཤད༌ཅེས༌པོའེ༌ ང༌ ཁྱོ༌ཞ༌གུན༌ནི༌ གྲ༌འོ༌ གྱུར༌ཏེ༌ ཨིན༌ན༌?
GAL 4:17 ཏེ༌ ཟུས༌མའེ༌ ལོབ༌བོན༌གུན༌ནི༌, ཁྱོ༌ཞའེ༌ ཆོགས༌སྐྱོར༌གུན༌ ཐོབ༌ཅེས༌སི༌ ཕིའ༌ མ༌སྲན༌ཏྲེ༌ དོད༌པ༌ ཅོའ༌ནོག༌, ཨིན༌ནའང༌ ལྟ༌ཝ༌ ངན༌པ༌ ཉམ༌པོ༌། ཁྱོ༌ཞ༌གུན༌ནི༌ ཁོང༌ ཅིག༌པོའ༌ ཆོགས༌སྐྱོར༌ ཅོ༌ཅེས༌སི༌ ཕིའ༌, ཁོང༌གུན༌ནི༌ ཁྱོ༌ཞ༌གུན༌ དང༌ ངའེ༌ ནང༌ང༌ བར༌ ཕེས༌ཏེ༌, བྲེལ༌བོ༌ ཤིག༌ཅེས༌ལ༌ དོད༌པ༌ ཅོའ༌ནོག༌།
GAL 4:18 ཀལ༌ཏེས༌ སམ༌བ༌ ཟང༌པོ༌ ཉམ༌པོ༌ ཨིན༌ན༌, དོད༌པ༌ མ༌སྲན༌ཏྲེ༌ ཅོ༌ནའང༌ གྲིག༌ཏེ༌ ཨིན༌ནོག༌། ཨིན༌ནའང༌ ཏེ༌བོ༌ ང༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌ ཅིག༌པོ༌ མན༌པ༌, ཏུས༌གྱུན༌ ཅོ༌གོ༌ཤེས༌ ཨིན༌ནོག༌།
GAL 4:19 འོ༌, ངའེ༌ ཅེས༌པའེ༌ ཕྲུ༌གུ༌གུན༌, ཀ༌ཟུག༌གི༌ ཨ༌མ༌ཞིག༌ག༌ ཕྲུ༌གུ༌ ཇོར༌ ཟ༌ནེ༌ ཟུ༌མོ༌ ཡོང༌ངད༌, ཏེན༌ན༌ ཙོགས༌སི༌ ཟུ༌མོ༌ ཁྱོ༌ཞ༌གུན༌ནི༌ ཕིའ༌ ཡང༌སྐྱར༌ ངའེ༌ སྙིང༌ངི༌ ནང༌ང༌ རག༌, ནམ༌ཚོག༌པ༌ ཁྱོ༌ཞའེ༌ ནང༌ང༌ མ༌ཤི༌ཀའེ༌ སྕོད༌ལམ༌གུན༌ གང༌པོ༌ ལྡན༌ མི༌ལྡན༌།
GAL 4:20 ང༌ དག༌ས༌ ཁྱོ༌ཞ༌གུན༌ ཉམ༌པོ༌ ཡོད༌ཅེས༌སི༌ མ༌སྲན༌ཏྲེ༌ དོད༌པ༌ ཅོའད༌, ཏེ༌ནེ༌ ངའེ༌ ཁྱོ༌ཞ༌གུན༌ ཉམ༌པོ༌ ང༌རང༌ངི༌ སྤེ༌ར༌ ཏང༌ཚུལ༌བོའེ༌ ནང༌ང༌ གྱུར༌ཇ༌ ཁྱོང༌ཉན༌ཏེ༌ ཡོད༌གྲོ༌། ཨིན༌ནའང༌ ཐག༌རིང༌ང༌ ཡོད༌ཅེས༌པོའེ༌ ང༌ ཧ༌གོའ༌ མེ༌རག༌, ངའེ༌ ཁྱོ༌ཞའ༌ ཀ༌ཟུག༌གི༌ རོགས༌ ཅོ༌ཨིན༌།
GAL 4:21 ཁྲིམས༌སི༌ ཡོག༌ག༌ དུག༌ཉིན༌ ཡོད༌ཁན༌ ཁྱོ༌ཞ༌གུན༌ནི༌ ངའ༌ ཤོད༌དའང༌། ཅི༌ ཁྲིམས༌སི༌ ནང༌ང༌ ཟེར༌ཏེ༌ ཡོད༌ཁན༌བོ༌, ཁྱོ༌ཞ༌གུན༌ལ༌ ཏན༌ཏན༌ གྱུས༌ཡོད༌ད༌?
GAL 4:22 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “ཨབ༌ར༌ཧམ༌མ༌ བུ༌ཚ༌ ཉིས༌ ཡོད༌པིན༌, ཅིག༌པོ༌ ནི༌ ཚེ༌ཡོག༌ ཡང༌ ཅིག༌པོ༌ ནི༌ རང༌ཝང༌ཅན༌ བུ༌མོའེ༌ ཨིན༌པིན༌།”
GAL 4:23 ཚེ༌ཡོག༌ནེ༌ སྐྱེས༌ཁན༌ནི༌ བུ༌ཚ༌བོ༌, མིའི༌ རྩོན༌གྲུས༌ནེ༌ དཀོན༌མཆོག༌གི༌ ཞལ༌ཆད༌ གྲུབ༌ཅུག༌ཅེས༌པོ༌ ཨིན༌པིན༌, ཨིན༌ནའང༌ རང༌ཝང༌ཅན༌ནི༌ བུ༌མོ༌ནེ༌ སྐྱེས༌ཁན༌ནི༌ བུ༌ཚ༌བོ༌, དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ བྲས༌བུ༌ ཨིན༌པིན༌།
GAL 4:24 དཀོན༌མཆོག༌གི༌ ཛད༌ཁན༌ནི༌ ཆད༌དོན༌ ཉིས༌ཀོ༌ འི༌ བུ༌མོ༌ ཉིས༌ཀོ༌ ཉམ༌པོ༌ ལྡུར༌ཉན༌ཅེས༌ ཨིན༌ནོག༌། བུ༌མོ༌ ཏང༌པོ༌, ཧཱ༌གར༌ ནི༌ སི༌ནཱའི༌ རི༌ དང༌ སྤེས༌ཏེ༌ ཨིན༌ནོག༌, ཀ༌རུ༌ མི༌གུན༌ལ༌ ཁོང༌གུན༌ ཚེ༌ཡོག༌ གྱུར༌ཅུག༌ཁན༌ནི༌ ཁྲིམས༌པོ༌ ཐོབ༌ཏེ༌ ཨིན༌པིན༌།
GAL 4:25 ཏ༌ ཧཱ༌གར༌ ཨ༌ར༌བིའི༌ ནང༌ང༌ ཡོད༌ཁན༌ནི༌ རི༌ སི༌ནཱའི༌ ཙོགས༌ ཨིན༌ནོག༌, ཀ༌བོ༌ འི༌ཏུས༌སི༌ ཡེ༌རུ༌ཤ༌ལེམ༌མི༌ གྱལ༌ས༌ ཙོགས༌ ཨིན༌, ཡང༌ ཏེ༌ གྱལ༌སའེ༌ མི༌གུན༌ ཁྲིམས༌སི༌ ཚེ༌ཡོག༌ག༌ དུག༌ཅེས༌ལ༌ ཐད༌ད༌ནོག༌།
GAL 4:26 ཨིན༌ནའང༌ ནམ༌ཁའེ༌ ཡེ༌རུ༌ཤ༌ལེམ༌ ནི༌ རང༌ཝང༌ཅན༌ནི༌ བུ༌མོ༌ སཱ༌ར༌ ཙོགས༌ ཨིན༌ནོག༌, ཁོའེ༌ ཕྲུ༌གུ༌གུན༌ ཚེ༌ཡོག༌ མ༌ནོག༌, ཡང༌ ཁོ༌ ང༌དང༌གུན༌ནི༌ ཨ༌མ༌ ཨིན༌།
GAL 4:27 ཏམ༌པའེ༌ སུང༌རབས༌སི༌ ནང༌ང༌ བྲིའ༌ ཛད༌ཏེ༌ ཨིན༌ནོག༌, “འོ༌ ཕྲུ༌གུ༌ མེད༌ཁན༌ནི༌ བུ༌མོ༌, ཕྲུ༌གུ༌ མ༌ནེ༌ མ༌སྐྱེས༌ཁན༌ སྐྱིད༌པོ༌ ཅོས༌། ཕྲུ༌གུ༌ སྐྱེ༌ཅེས༌སི༌ ཟུ༌མོ༌ མ༌ཕོག༌ཁན༌, ཐད༌པོའེ༌ ནང༌ང༌ ཀུ༌ཅོ༌ ཏོང༌། ཅིའ༌ཟེར༌ན༌ ཏ༌ དག༌ས༌ ནང༌ཚངས༌ མེད༌ཁན༌ནི༌ བུ༌མོའ༌ མག༌པ༌ ཡོད༌ཁན༌ནི༌ བུ༌མོའེ༌ སང༌ མང༌ང༌ ཕྲུ༌གུ༌ མང༌པོ༌ ཡོད༌ཏེ༌ ཨིན༌ནོག༌།”
GAL 4:28 ཅེས༌པའེ༌ སྤུན༌གུན༌, ཏ༌ ཁྱོ༌ཞའ༌ ཨི༌སཱག༌ ཙོགས༌ལ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ཕྲུ༌གུ༌གུན༌ ཨིན༌ནོག༌།
GAL 4:29 ཨིན༌ནའང༌ མི༌ རྩོན༌གྲུས༌ནེ༌ སྐྱེ༌ཁན༌ནི༌ ཕྲུ༌གུའི༌, ཐུག༌ཉིད༌དི༌ ཐོག༌ནེ༌ སྐྱེ༌ཁན༌ནི༌ ཕྲུ༌གུ༌བོའ༌ ནགས༌ སྟན༌ཀྱག༌། ཏེན༌ན༌ ཙོགས༌ ནི༌ དག༌སའང༌ ཇུངས༌ཏེ༌ ཨིན༌ནོག༌།
GAL 4:30 ཨིན༌ནའང༌ སུང༌རབས༌སི༌ ཏེ༌བོའེ༌ སྐོར༌ལ༌ ཅི༌ མོལ༌ཏེ༌ དུག༌, “ཚེ༌ཡོག༌ དང༌ ཁོའེ༌ བུ༌ཚ༌ ཉིས༌ཀོ༌ ཕིང༌, ཅིའ༌ཟེར༌ན༌ རང༌ཝང༌ཅན༌ནི༌ བུ༌མོའེ༌ བུ༌ཚའེ༌ ཨིན༌ཁན༌ནི༌ ནོར༌སྐལ༌བོའེ༌ ནང༌ང༌ ཚེ༌ཡོག༌གི༌ བུ༌མོའེ༌ བུ༌ཚའ༌, སྐྱལ༌ལ༌ མ༌ནེ༌ མི༌ཐོབ༌།”
GAL 4:31 ཏེ༌བོའེ༌ཕིའ༌ ཅེས༌པའེ༌ སྤུན༌གུན༌, ང༌དང༌གུན༌ ཚེ༌ཡོག༌གི༌ བུ༌མོའེ༌ ཕྲུ༌གུ༌ མན༌པ༌, རང༌ཝང༌ཅན༌ནི༌ བུ༌མོའེ༌ ཕྲུ༌གུ༌ ཨིན༌ནོག༌།
GAL 5:1 རང༌ཝང༌ངི༌ ནང༌ང༌ དུག༌ཅེས༌སི༌ ཕིའ༌ མ༌ཤི༌ཀའེ༌ ང༌དང༌གུན༌ ཐར༌ ཅུག༌ག༌ ཛདས༌། ཏ༌ སྟན༌པོ༌ དུག༌ཤིག༌། ཡང༌སྐྱར༌ ལྕིན༌ཏྲེ༌ ཁྲིམས༌སི༌ ཉ༌ཤིང༌བོ༌ ཁུར༌ཏེ༌ ཏེ༌བོའེ༌ ཚེ༌ཡོག༌ གྱུར༌ མ༌ཅུག༌ཤིག༌།
GAL 5:2 ཉོན༌ཤིག༌, ང༌ པ༌འུ༌ལུའི༌ ཁྱོ༌ཞ༌གུན༌ལ༌ འི༌བོ༌ ཤད༌དད༌, ཀལ༌ཏེས༌ ཁྱོ༌ཞ༌གུན༌ནི༌ ཁྱོ༌ཞ༌རང༌ང༌ སུན༌ནད༌ ཅོ༌ཅུག༌གད༌ན༌, ཏེ༌ནེ༌ མ༌ཤི༌ཀའེ༌ ཀ༌ནེ༌ ཡོང༌ཁན༌ནི༌ ཕན༌ཐོགས༌པོ༌ ཁྱོ༌ཞ༌གུན༌ལ༌ མི༌ཐོབ༌།
GAL 5:3 ངའེ༌ ཡང༌སྐྱར༌ སྤང༌པུད༌དད༌, ཀལ༌ཏེས༌ ཁྱོ༌ཞ༌གུན༌ནི༌ སུན༌ནད༌ ཅོ༌ཅུགས༌ཏེ༌ དཀོན༌མཆོག༌གི༌ ཆོགས༌སྐྱོར༌ ཙལ༌ཅེས༌ ཅོའད༌ན༌, ཏེ༌ནེ༌ ཁྱོ༌ཞ༌གུན༌ནི༌ མོ༌ཟེས༌སི༌ ཁྲིམས༌ ཚང༌མ༌ སྲུང༌གོས༌།
GAL 5:4 ཁྲིམས༌པོ༌ སྲུངས༌ཏེ༌ དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ གྱུར༌ ཉན༌ན༌ནོག༌ སམ༌ཁན༌ ཁྱོ༌ཞ༌གུན༌ནི༌, བྲེལ༌བོ༌ མ༌ཤི༌ཀ༌ ཉམ༌པོ༌ ཆད༌ཏེ༌ ཨིན༌ནོག༌། ཁྱོ༌ཞ༌གུན༌ དཀོན༌མཆོག༌གི༌ ཐུག༌རྗེ༌ནེ༌ ཐག༌རིང༌ང༌ སོང༌ཏེ༌ ཨིན༌ནོག༌།
GAL 5:5 ཨིན༌ནའང༌ ཏ༌ ང༌དང༌ ཐུག༌ཉིད༌དི༌ ནང༌ཞིན༌ མི༌ཚེ༌ ཕུད༌ཁན༌གུན༌ནི༌, དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ཀྲང༌པོ༌བོ༌, ཏད༌པ༌ གྱུད༌ཏེ༌ ཐོབ༌ཅེས༌ལ༌ རིངས༌ཨིན༌ཞིག༌ ཨིན༌ནོག༌།
GAL 5:6 ང༌དང༌གུན༌ནི༌ བྲེལ༌ མ༌ཤི༌ཀ༌ ཡེ༌ཤུ༌ ཉམ༌པོ༌ ཡོད༌ པ༌སང༌, སུན༌ནད༌ ཅོ༌ཁན༌ ཡ༌ མ༌ཅོ༌ཁན༌ནི༌ ནང༌ང༌ ཅའང༌ ཁྱད༌ མེད༌པ༌ ཨིན༌ནོག༌། ཁག༌ཅན༌ ནི༌, ཏད༌པ༌བོ༌ ཅེས༌པའེ༌ ནང༌ང༌ སྟན༌ཅེས༌པོ༌ ཨིན༌ནོག༌།
GAL 5:7 ཁྱོ༌ཞ༌གུན༌ནི༌ མི༌ཚེའེ༌ བང༌གྱུགས༌པོ༌ མ༌ གྱལ༌ལ༌ ཅོས༌ཏེ༌ ཏང༌ངད༌པིན༌། ཏ༌ སུའི༌ ཁྱོ༌ཞ༌གུན༌ལ༌ དེན༌བའེ༌ གྱབ༌ནེ༌ གྲུལ༌ཅེས༌སི༌ ནང༌ང༌ སྒག༌ཞའ༌ ཏངས༌།
GAL 5:8 ཏེ༌ ཁའ༌ལྕེ༌ ཏང༌ཅེས༌པོ༌ ནི༌ ཏན༌ཏན༌ལ༌ ཁྱོ༌ཞ༌གུན༌ རང༌ཝང༌ངི༌ ནང༌ང༌ དུག༌ཅེས༌ལ༌ བོད༌ད༌ ཛད༌ཁན༌ དཀོན༌མཆོག༌གི༌ ཆོགས༌ནེ༌ མ༌ནོག༌།
GAL 5:9 འི༌ ཟུས༌མའེ༌ ལབ༌ཞ༌བོ༌ ནི༌, པག༌པའེ༌ གང༌པོའེ༌ ནང༌ང༌ སྐྱུར༌ ཡོང༌ཅུག༌ཁན༌ནི༌ ཏེ༌ སྐྱུར༌ ཆུ༌ངུན༌ ཙོགས༌ ཨིན༌ནོག༌།
GAL 5:10 ངའེ༌ གཙོ༌བོའེ༌ ནང༌ང༌ ཨིད༌ཤེས༌ ཅོའད༌, ཁོང༌ངི༌ ཁྱོ༌ཞ༌གུན༌ལ༌, ང༌ཞའེ༌ ལབ༌ཁན༌ མན༌པ༌, ཞན༌ སོ༌སོ༌ ལབ༌ཞའ༌ ཏད༌པ༌ ཅོ༌ཅེས༌ནེ༌ ཐག༌རིང༌ང༌ བོར༌ར༌ ཛད༌ཨིན༌། ཁྱོ༌ཞའ༌ གོབ༌སྐོར༌ཁན༌བོ༌ སུ༌ཞིག༌ ཨིན༌ནའང༌, དཀོན༌མཆོག༌གི༌ ཁྲིམས༌ཅད༌ སལ༌ལ༌ ཛད༌ཨིན༌།
GAL 5:11 ཅེས༌པའེ༌ སྤུན༌གུན༌, ཀལ༌ཏེས༌ ངའེ༌ སུན༌ནད༌ ཅོ༌གོས༌ ཟེར༌ཏེ༌ ཏ༌རུང༌ངའང༌ ལབ༌བད༌ན༌, ༼ཀ༌ཟུག༌ ཁ༌ཅིག༌གི༌ ངའེ༌ ཅོ༌རུག༌ ཟེར༌ར༌ནོག༌༽, ཏེ༌ནེ༌ ཅི༌ཕིའ༌ ཏ༌རུང༌ངའང༌ ངའ༌ ནགས༌བར༌དོ༌ ཐོང༌ཨིན༌ ཨིན༌ནོག༌? ཀལ༌ཏེས༌ ངའེ༌ མ༌ཤི༌ཀའེ༌ རྐྱང༌ཤིང༌ གྱུད༌ཏེ༌ ཐར༌པ༌བོ༌ མ༌ལབས༌པིན༌ན༌, ཏེ༌ནེ༌ སུ༌ཞིག༌གའང༌ ངའེ༌ཀ༌ སྲོ༌ ཡོངས༌ཏེ༌ མེད༌གྲོ༌།
GAL 5:12 ཁྱོ༌ཞའ༌ ནགས༌ སྟན༌ཁན༌གུན༌ནི༌, ཁོ༌རང༌གུན༌ལ༌ སུན༌ནད༌ ཅོ༌ ཟ༌ནེ༌ ཁོ༌རང༌ བུ༌ཚ༌ ཨིན༌ཁན༌ནི༌ སྟགས༌པོ༌ གང༌པོ༌ ཅད༌ཤིག༌!
GAL 5:13 ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ རང༌ཝང༌ཅན༌ནི༌ མི༌ཚེའེ༌ ཕུད༌ད༌ལ༌ བོད༌ད༌ ཛད༌ཏེ༌ ཨིན༌ནོག༌། ཨིན༌ནའང༌ ཏེ༌ རང༌ཝང༌བོ༌ ཁྱོ༌ཞ༌གུན༌ནི༌ སྡིག༌པའེ༌ དོད༌པ༌གུན༌ དྲན༌དྲ༌ གྲུབ༌ཅེས༌སི༌ སྐབས༌ཤིག༌གི༌ ཚུལ༌ལ༌ མ༌ཀོལ༌ཤིག༌། ཏེ༌ སང༌ཏ༌, ཏེ༌ རང༌ཝང༌བོ༌ ཁྱོ༌ཞ༌གུན༌ནི༌ ཅིག༌ དང༌ ཅིག༌ག༌ ཅེས༌པའེ༌ ནང༌ང༌ ཞབས༌ཏོག༌ ཞུ༌ཅེས༌སི༌ ཕིའ༌ ཀོལ༌ཤིག༌།
GAL 5:14 ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ ཁྲིམས༌ གང༌པོ༌ འི༌ བཀའ༌ ཅིག༌པོའེ༌ ནང༌ང༌ ལྡུས༌ཏེ༌ ཨིན༌ནོག༌, “རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌།”
GAL 5:15 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཤང༌ཀུ༌ ཙོགས༌ལ༌ ཅིག༌ དང༌ ཅིག༌ག༌ མ༌སྐྱོན༌ ཅོ༌ཅེས༌ དང༌ ནོད༌པ༌ སྐྱལ༌ན༌, ཤང༌ ཅོ༌ཤིག༌, ཏེ༌ མ༌ནེ༌ ཁྱོ༌ཞ༌གུན༌ནི༌ ཅིག༌ དང༌ ཅིག༌ ཁྲེས༌ཏོར༌ ཅོ༌ཨིན༌།
GAL 5:16 ངའེ༌ ཟེར༌ཅེས༌པོ༌ ནི༌, ཏམ༌པའེ༌ ཐུག༌ཉིད༌དི༌ སྟན༌ཁན༌ནི༌ མི༌ཚེའེ༌ ལམ༌བོའེ༌ཀ༌ གྲུལ༌ཤིག༌། ཏེ༌ནེ༌ ཁྱོ༌ཞ༌གུན༌ནི༌ སྡིག༌པའེ༌ དོད༌པའེ༌ ཅོ༌ཅུག༌ཁན༌ནི༌ ལས༌གུན༌ དྲན༌དྲ༌ གྲུབ༌ མི༌ཅུག༌།
GAL 5:17 སྡིག༌པའེ༌ དོད༌པའེ༌, ཏམ༌པའེ༌ ཐུག༌ཉིད༌དི༌ དོད༌པའེ༌ གོ༌ལོག༌པོ༌ ཅོའ༌ནོག༌, ཡང༌ ཏམ༌པའེ༌ ཐུག༌ཉིད༌དི༌ དོད༌པའེ༌, སྡིག༌པའེ༌ དོད༌པའེ༌ གོ༌ལོག༌པོ༌ ཛད༌ད༌ནོག༌། འི༌ ཉིས༌ཀོ༌ མ༌ཐུན༌ པ༌སང༌ ཁྱོ༌ཞའ༌ ཐད༌ཁན༌བོ༌ ཅོ༌ཉན༌ན༌ མ༌ནོག༌།
GAL 5:18 ཨིན༌ནའང༌ ཁྱོ༌ཞ༌གུན༌ ཐུག༌ཉིད༌དི༌ ཁྲིད༌ ཟ༌ནེ༌, ཁྱོ༌ཞ༌གུན༌ མོ༌ཟེས༌སི༌ ཁྲིམས༌སི༌ ཡོག༌ག༌ དུག༌གོས༌ མེད༌པ༌ ཨིན༌ནོག༌།
GAL 5:19 སྡིག༌པའེ༌ དོད༌པའེ༌ ལས༌གུན༌ མ༌ སལ༌པོ༌ ཐོང༌ང༌ནོག༌། ཏེ༌གུན༌ ལུས༌བྲེལ༌ ངན༌པ༌ ཅོ༌ཅེས༌, སྕོད༌པ༌ ངན༌པའེ༌ ལས༌གུན༌ ཅོ༌ཅེས༌, ཐའ༌མེད༌པའེ༌ ལུས༌བྲེལ༌ལི༌ དོད༌པ༌,
GAL 5:20 སྐུན༌དྲའ༌ ཅོལ༌ཅེས༌, ཆོས༌ངན༌ ཅོ༌ཅེས༌, ནཕ༌རད༌ ཅོ༌ཅེས༌, ཛིང༌མོ༌ ཏང༌ཅེས༌, ཚིག༌ཅེས༌, མངས༌ཏེའང༌ སྲོ༌ ཡོང༌ཅེས༌, སྟོད༌པ༌ ཡ༌ རྩི༌ཝའེ༌ དོད༌པ༌ བོར༌ཅེས༌, ཁོན༌བོར༌ཅེས༌, པོ༌པུད༌ཅེས༌,
GAL 5:21 ཞན༌མའ༌ ཡོད༌ཁན༌གུན༌ནི༌ དོད༌པ༌ ཅོ༌ཅེས༌, མུན༌ལ༌ ཆང༌ ཐུང༌ཅེས༌, གྲོན༌ཏང༌ཨིན༌ ར༌རོས༌ཤེས༌སི༌ ཟས༌གུན༌ ལེན༌ཏེ༌ ཀྲན༌བ༌ སྟོར༌ཅེས༌ དང༌ ཞན༌ཡང༌ འི༌ཙོགས༌སི༌ སྡིག༌པ༌གུན༌། ངའེ༌ ཁྱོ༌ཞ༌གུན༌ལ༌ ཡང༌སྐྱར༌ སྤང༌པུད༌དད༌, ཏེ༌ཙོགས༌སི༌ མི༌ཚེ༌ ཕུད༌ཁན༌གུན༌ལ༌ དཀོན༌མཆོག༌གི༌ གྱལ༌སྲིད༌པོ༌ ནོར༌སྐལ༌ལ༌ མ༌ནེ༌ མི༌ཐོབ༌།
GAL 5:22 ཨིན༌ནའང༌ ཏམ༌པའེ༌ ཐུག༌ཉིད༌ནེ༌ སྨིན༌ཁན༌ནི༌ བྲས༌བུ༌ ནི༌, ཅེས༌པ༌, སྐྱིད༌པོ༌, ཞི༌དེ༌, ཟོད༌པ༌, ཀའ༌ཀྲིན༌, ཟང༌པོ༌, ཨིད༌ཤེས༌ཅན༌,
GAL 5:23 བོལ༌མོ༌ དང༌ རང༌སེམས༌ ཅུན༌ཅེས༌ གུན༌ ཨིན༌ནོག༌། ཏེ༌ཙོགས༌སི༌ སྕོད༌པ༌གུན༌ནི༌ གྱབ༌གལ༌ལ༌ ཁྲིམས༌ ཅའང༌ མེད༌པ༌ ཨིན༌ནོག༌།
GAL 5:24 མ༌ཤི༌ཀ༌ ཡེ༌ཤུའི༌ ཨིན༌ཁན༌གུན༌ནི༌, སྡིག༌པའེ༌ དོད༌པ༌ དང༌ དོད༌ཆགས༌ ངན༌པ༌ གུན༌ རྐྱང༌ཤིང༌ངི༌ཀ༌ རྐྱངས༌ཏེ༌ མེད༌ཁན༌ ཅོས༌ཏེ༌ ཨིན༌ནོག༌།
GAL 5:25 ཏམ༌པའེ༌ ཐུག༌ཉིད༌དི༌ ང༌དང༌གུན༌ལ༌ མི༌ཚེ༌ ཕུད༌ཅུག༌ག༌ ཛད༌ པ༌སང༌, ཐུག༌ཉིད༌དི༌ གྱབ༌ནེ༌ གྲུལ༌ཨིན༌ཞིག༌, མི༌ཚེ༌ ཁག༌ ཚང༌མ༌ ཁོང༌ང༌ ཁྲིད༌ཅུག༌ཤིག༌།
GAL 5:26 ང༌དང༌གུན༌ ཕོ༌སོ༌ ཚོར༌ མ༌གོས༌, ཡང༌ ཅིག༌ དང༌ ཅིག༌གི༌ ནང༌ང༌ སྲོ༌ ཡ༌ ཚིག༌ཅེས༌ གུན༌ ཡོང༌ཅུག༌ མ༌གོས༌།
GAL 6:1 ཅེས༌པའེ༌ སྤུན༌གུན༌, ཀལ༌ཏེས༌ ཏད༌པ༌ཅན༌ཞིག༌ སྡིག༌པའེ༌ ནང༌ང༌ གྱེལ༌ན༌, ཁྱོ༌ཞའ༌ ཏམ༌པའེ༌ ཐུག༌ཉིད༌དི༌ ནང༌ང༌ ལྡན༌ཁན༌གུན༌ནི༌, ཏེ༌ མི༌བོའ༌ པས༌མོ༌ ཉམ༌པོ༌ ཀྲང༌པོའེ༌ ལམ༌མི༌ཀ༌ ལོགས༌ཏེ༌ ཁྱོང༌གོ༌ཤེས༌ ཨིན༌ནོག༌། ཨིན༌ནའང༌ ཏེན༌ན༌ ཙོགས༌ སྡིག༌པའེ༌ ནང༌ང༌ ཁྱོ༌ཞ༌གུན༌ནའང༌ མི༌གྱེལ༌ཅེས༌ལ༌ ཤང༌ ཅོ༌ཤིག༌།
GAL 6:2 ཅིག༌ དང༌ ཅིག༌གི༌ ཁུ༌རུ༌གུན༌ བགོས༌ཏེ༌ ཁུར༌ཤིག༌། ཏེ༌ཙོགས༌ ཅོ༌ཅེས༌ནེ༌ ཁྱོ༌ཞ༌གུན༌ནི༌ མ༌ཤི༌ཀའེ༌ ཁྲིམས༌པོ༌, གྲུབ༌ཅུགས༌ཏེ༌ ཨིན༌ནོག༌།
GAL 6:3 ཀལ༌ཏེས༌ ཁྱོ༌ཞ༌རང༌ ཅའང༌ མན༌ཨིན༌ནའང༌ མ༌ ཀྲག༌པོ༌ ཚོར༌ཏེ༌ ཞན༌མ༌གུན༌ལ༌ རོགས༌ ཅོའ༌ མེད༌ན༌, ཁྱོ༌ཞ༌རང༌ངི༌ རང༌ང༌ གོབ༌སྐོར༌ཏེ༌ ཨིན༌ནོག༌།
GAL 6:4 ཁྱོ༌ཞ༌རང༌ངི༌ ལས༌ལ༌ གྱལ༌ལ༌ ཅོས༌ཏེ༌ སྟག༌ཅད༌ ཅོ༌ཤིག༌། ཏེ༌ནེ༌ ཁྱོ༌ཞ༌གུན༌ལ༌ ཞན༌མ༌ ཉམ༌པོ༌ ལྡུར༌ཁན༌ནི༌ སྐྱིད༌པོ༌ མན༌པ༌, ཁྱོ༌ཞ༌རང༌ངི༌ ལས༌ གྱལ༌ལ༌ ཅོ༌ཁན༌ནི༌ སྐྱིད༌པོ༌བོ༌ ཡོང༌ཨིན༌།
GAL 6:5 ཡང༌ ཨིད༌ཏུ༌ ཅོ༌ཤིག༌, མི༌ རེ༌རེའ༌ རང༌རང༌ངི༌ ཁུ༌རུ༌གུན༌ ཁུར༌གོས༌ས༌ནོག༌།
GAL 6:6 ཁྱོ༌ཞ༌གུན༌ལ༌ དཀོན༌མཆོག༌གི༌ བཀའ༌ ལབ༌བ༌ ཛད༌ཁན༌གུན༌ ཉམ༌པོ༌, ཁྱོ༌ཞའ༌ ཡོད༌ཁན༌ ཕན༌ཐོགས༌ཅན༌ ཚང༌མ༌ བགོས༌ཤིག༌།
GAL 6:7 ཁྱོ༌ཞ༌གུན༌ནི༌ རང༌དང༌རང༌ང༌ གོབ༌སྐོར༌ཏེ༌ དཀོན༌མཆོག༌གི༌ ཁྲིམས༌ཅད༌ད༌ ཛད༌ཅེས༌པོའ༌ སྣང༌མེད༌ མ༌ཅོ༌ཤིག༌། ཁྱོ༌ཞ༌རང༌ངི༌ ཏབ༌ཁན༌ནི༌ སྟོན༌ཐོག༌གི༌ བྲས༌བུ༌ ཁྱོ༌ཞ༌གུན༌ནི༌ རྔ༌ཨེན༌།
GAL 6:8 སྡིག༌པའེ༌ དོད༌པ༌གུན༌ དྲན༌དྲ༌ གྲུབ༌ཅེས༌ལ༌ མི༌ཚེ༌ ཕུད༌ཁན༌གུན༌ནི༌, ཏེ༌ སྡིག༌པའེ༌ དོད༌པ༌གུན༌ནི༌ ཀ༌ནེ༌, རུལ༌ཅེས༌ དང༌ ཤི༌ཅེས༌ གུན༌ རྔ༌ཨེན༌། ཨིན༌ནའང༌ དཀོན༌མཆོག༌གི༌ ཐུག༌ཉིད༌ ཐུགས༌ཐད༌ཅུག༌ཁན༌ནི༌ མི༌ཚེ༌ ཕུད༌ཁན༌གུན༌ནི༌, ཐུག༌ཉིད༌ནེ༌ ཐའ༌མེད༌པའེ༌ མི༌ཚེ༌ཞིག༌ རྔ༌ཨེན༌།
GAL 6:9 ཏེ༌ནེ༌ ང༌དང༌ ཟང༌པོ༌ ཅོ༌ཅེས༌ལ༌ སྣང༌ང༌ ཚེར༌ གོ༌ཤེས༌ མ༌ནོག༌, ཅིའ༌ཟེར༌ན༌ ཀལ༌ཏེས༌ ཟང༌པོ༌ ཅོ༌ཅེས༌པོ༌ ཕང༌ མ༌ཕང༌ན༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌ ང༌དང༌གུན༌ནི༌ ཅིན༌ལབས༌ཅན༌ནི༌ སྟོན༌ཐོག༌པོ༌ རྔ༌ཨེན༌།
GAL 6:10 ཏེ༌བོའེ༌ཕིའ༌ ནམ༌ སྐབས༌ ཐོབ༌ནའང༌, ང༌དང༌གུན༌ནི༌ ཚང༌མ༌ལ༌ ཟང༌པོ༌ ཅོ༌གོ༌ཤེས༌ ཨིན༌ནོག༌, མིག༌སལ༌ལི༌ ཏད༌པ༌ཅན༌ སྤུན༌གུན༌ལ༌།
GAL 6:11 ཏ༌ ངའེ༌ ང༌རང༌ངི༌ ལག༌པ༌ ཉམ༌པོ༌ བྲིའ༌ཅིག༌, ལྟོས༌སའང༌, ངའེ༌ བྲི༌ཁན༌གུན༌ ཙམ༌ཤིག༌གི༌ ཆེན༌མོ༌ རིག༌ མི༌དུག༌།
GAL 6:12 སུན༌ནད༌ ཅོ༌གོས༌ས༌ནོག༌ ཟེར༌ཏེ༌ ཁྱོ༌ཞ༌གུན༌ལ༌ ཝང༌ ཏང༌ཁན༌གུན༌ནི༌, ཏེ༌བོ༌ ཁོ༌རང༌གུན༌ ཟང༌པོ༌ ཐོང༌ཅེས༌ མ༌ཚད༌, མ༌ཤི༌ཀ༌ རྐྱང༌ཤིང༌ངི༌ཀ༌ ཀྲོངས༌ཤེས༌ གྱུད༌ཏེ༌ ཐར༌པ༌ ཐོབ༌ཅེས༌ ཅིག༌པོ༌ ལབས༌ཏེ༌, ཁོ༌རང༌གུན༌ལ༌ ནགས༌བར༌དོ༌ མི༌ཐོང༌ཅེས༌སི༌ ཕིའང༌ ཅོའ༌ནོག༌།
GAL 6:13 སུན༌ནད༌ ཅོས༌ཏེ༌ ཡོད༌ཁན༌གུན༌ནིའང༌ ཁྲིམས༌ ཚང༌མའ༌ ཁའ༌ཉན༌ན༌ མ༌ནོག༌། ཨིན༌ནའང༌ ཁྱོ༌ཞའེ༌ སུན༌ནད༌ ཅོ༌ཁན༌བོའེ༌ཀ༌ ཁོང༌གུན༌ལ༌ ཕོ༌སོ༌ ཅོ༌ཉན༌ཅེས༌སི༌ དོད༌པའེ༌ ཞས༌ཏེ༌ ཁོང༌གུན༌ནི༌ ཁྱོ༌ཞའ༌ ཏེ༌བོ༌ ཅོ༌ཅུག༌ག༌ནོག༌།
GAL 6:14 ངའེ༌ དོད༌པ༌ ནི༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ རྐྱང༌ཤིང༌ ཅིག༌པོའེ༌ཀ༌ མ༌སྟོགས༌ ཡང༌ ཅི༌ཞིག༌གི༌ཀའང༌ ངའེ༌ ཕོ༌སོ༌ མ༌ནེ༌ མི༌ཅོ༌། མ༌ཤི༌ཀའེ༌ ཏེན༌ན༌ རྐྱང༌ཤིང༌ངི༌ ཞས༌ཏེ༌ ངའེ༌ ཇིག༌རྟེན༌ནི༌ དོད༌པ༌ ཚང༌མ༌ སད༌ཏེ༌ ཨིན༌། ཡང༌ ངའེ༌ ཕིའ༌ རིན༌ཅན༌ ཨིན༌ཁན༌གུན༌ འི༌ ཇིག༌རྟེན༌པ༌གུན༌ནི༌ རིན༌ཅན༌ སམ༌མ༌ མི༌དུག༌།
GAL 6:15 སུན༌ནད༌ ཅོས༌ཏེ༌ ཡོད༌གྲོ༌ ཡ༌ མེད༌གྲོ༌ ཏེ༌བོའེ༌ ཅའང༌ ཕན༌ཐོགས༌ མེད༌པ༌ ཨིན༌ནོག༌། ཁག༌ཅན༌བོ༌ ནི༌, གྱུར༌ཇ༌ ཁྱོངས༌ཏེ༌ མི༌ཚེ༌ སོ༌མ༌ཞིག༌ ཕུད༌ཅེས༌པོ༌ ཨིན༌ནོག༌།
GAL 6:16 མི༌ཚེའེ༌ སོ༌མའེ༌ ལམ༌མི༌ཀ༌ གྲུལ༌ཁན༌གུན༌ལ༌, དཀོན༌མཆོག༌གི༌ ཞི༌དེ༌ དང༌ སྙིང༌རྗེ༌ གུན༌ ཐོབ༌ཨིན༌། ཏེ༌གུན༌ དཀོན༌མཆོག༌གི༌ དེན༌བའེ༌ མི༌གུན༌ ཨིན༌ནོག༌།
GAL 6:17 དོར༌ལྡུས༌ཏེ༌ ཏ༌ནེ༌ཕར༌ལ༌ ཏེ༌གུན༌ནི༌ སྐོར༌ལ༌, སུ༌ཞིག༌གིའང༌ ངའ༌ ནགས༌ མ༌སྟན༌ཤིག༌, ཅིའ༌ཟེར༌ན༌ ངའེ༌ ཟུགས༌པོའེ༌ཀ༌ ཡེ༌ཤུའི༌ གྱབ༌ནེ༌ གྲུལ༌ཁན༌ནི༌ རྡུག༌ངལ༌ལི༌ སྟགས༌གུན༌ ཕོག༌ཏེ༌ ཡོད༌།
GAL 6:18 ཅེས༌པའེ༌ སྤུན༌གུན༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌བོ༌, ཁྱོ༌ཞ༌གུན༌ནི༌ ཐུག༌ཉིད༌ ཉམ༌པོ༌ ཞུགས༌ཤིག༌, ཨ༌མེན༌།
EPH 1:1 ང༌ པ༌འུ༌ལུ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌, མ༌ཤི༌ཀའེ༌ སྐུ༌ཚབས༌ ཨིན༌། ངའེ༌ འི༌ ཨི༌གེ༌བོ༌ ཨེ༌ཕེ༌སས༌སི༌ གྱལ༌སའེ༌ ནང༌ང༌ ཡོད༌ཁན༌ དཀོན༌མཆོག༌གི༌ མི༌ ཏམ༌པ༌གུན༌ དང༌ ཏད༌པ༌ཅན༌ ཡེ༌ཤུ༌ མ༌ཤི༌ཀའེ༌ གྱབ༌ནེ༌ གྲུལ༌ཁན༌གུན༌ལ༌ བྲིའད༌།
EPH 1:2 ང༌དང༌ངི༌ དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཞི༌དེ༌ ཁྱོ༌ཞ༌གུན༌ལ༌ སལ༌ཤིག༌།
EPH 1:3 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌, དཀོན༌མཆོག༌ག༌ སྟོད༌པ༌ ཕུལ༌ཤིག༌། ཁོང༌ངི༌ མ༌ཤི༌ཀ༌ གྱུད༌ཏེ༌ ང༌དང༌གུན༌ལ༌ ནམ༌ཁའེ༌ ཐུག༌ཉིད༌དི༌ ཅིན༌ལབས༌ ཚང༌མ༌ སལ༌ལ༌ ཛད༌ཏེ༌ ཨིན༌ནོག༌།
EPH 1:4 མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ ཏམ༌པ༌ དང༌ སྐྱོན༌མེད༌ ཛད༌ཅེས༌སི༌ ཕིའ༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌ ཁོང༌ངི༌ ང༌དང༌ང༌ ཅེས༌པ༌ ཛད༌ཏེ༌ ལྡམ༌མ༌ ཛདས༌།
EPH 1:5 དཀོན༌མཆོག༌གི༌ ཁོང༌རང༌ངི༌ ཐུག༌གོངས༌ དང༌ ཐུགས༌ཐད༌ ནང༌ཞིན༌, ཡེ༌ཤུ༌ མ༌ཤི༌ཀ༌ གྱུད༌ཏེ༌ ང༌དང༌གུན༌ ཁོང༌ངི༌ སོས༌བུ༌ ལེན༌ན༌ ཛད༌ཅེས༌ལ༌ སྔུན༌ནེ༌ པར༌ལ༌ ཐག༌ཅད༌ད༌ ཛདས༌།
EPH 1:6 ཏེ༌བོའེ༌ཕིའ༌ ཁོང༌ངི༌ ཁོང༌རང༌ངི༌ སྲས༌ ཅེས༌པ༌ གྱུད༌ཏེ༌, ང༌དང༌གུན༌ལ༌ རིན༌ མེད༌པ༌ སལ༌ཁན༌ནི༌ ཏེ༌ སྤལ༌ཅན༌ནི༌ ཐུག༌རྗེ༌བོའ༌ སྟོད༌པ༌ ཕུལ༌ཨིན༌།
EPH 1:7 དཀོན༌མཆོག༌ ནི༌ ཐུག༌རྗེ༌ བང༌ཛོད༌ ཨིན༌ པ༌སང༌, ཁོང༌རང༌ངི༌ སྲས༌སི༌ ཁྲག༌ གྱུད༌ཏེ༌, ང༌དང༌གུན༌ལ༌ རང༌ཝང༌ ཉོའ༌ ཛད༌ཏེ༌ ང༌དང༌ངི༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛདས༌།
EPH 1:8 ཁོང༌ངི༌ ཐུག༌རྗེ༌ མ༌ཚད༌ ཤེས༌རབས༌ དང༌ ཧ༌གོའང༌ ང༌དང༌གུན༌ནི༌ཀ༌ སྙིང༌ ཕེས༌ཏེ༌ ལུག༌ག༌ ཛདས༌།
EPH 1:9 དཀོན༌མཆོག༌གི༌ མ༌ཤི༌ཀ༌ གྱུད༌ཏེ༌ གྲུབ༌ ཅུག༌ག༌ ཛད༌ཅེས༌སི༌ སང༌ཝའེ༌ ཐབ༌ལྡིངས༌པོ༌, ང༌དང༌གུན༌ལ༌ སྔོན༌ ཅུག༌ག༌ ཛདས༌, ཏེ༌ ཐབ༌ལྡིངས༌པོའེ༌ ཁོང༌ངི༌ ཐུག༌གོངས༌ ཟང༌པོ༌ དྲན༌དྲའ༌ གྲུབ༌།
EPH 1:10 ཏེ༌ ཐབ༌ལྡིངས༌པོ༌ ནི༌, ལྡམ༌མ༌ ཛད༌ཁན༌ནི༌ ཏུས༌པོ༌ ལེབ༌བ༌ཅིག༌, ཁོང༌ངི༌ ནམ༌ཁའ༌ དང༌ ཇིག༌རྟེན༌ནི༌ ནང༌ང༌ སྲོག༌ ཡོད༌ཁན༌ ཚང༌མ༌ ཀུགས༌ཏེ༌, མ༌ཤི༌ཀའེ༌ ཝང༌ངི༌ ཡོག༌ག༌ བོར༌ར༌ ཛད༌ཨིན༌།
EPH 1:11 དཀོན༌མཆོག༌གི༌ མ༌ཤི༌ཀ༌ གྱུད༌ཏེ༌ ང༌དང༌གུན༌ ལྡམ༌མ༌ ཛད༌ཏེ༌ ང༌དང༌གུན༌ལ༌ ནམ༌ཁའེ༌ ནང༌ང༌ ནོར༌སྐལ༌གུན༌ ཐོབས༌ཏེ༌ ཨིན༌ནོག༌, ཅིའ༌ཟེར༌ན༌ ཁོང༌ངི༌ སྔུན༌ནེ༌ ཕར༌ལ༌ ཁོང༌ངི༌ ཐུག༌གོངས༌ ནང༌ཞིན༌ ཅི༌ཚང༌མ༌ དྲན༌དྲ༌ གྲུབ༌ཅུག༌ཅེས༌ལ༌ ཐབས༌ ཛད༌ཏེ༌ ཨིན༌པིན༌།
EPH 1:12 དཀོན༌མཆོག༌གི༌ ཐུགས༌དོད༌པོ༌ ནི༌, ང༌ཞའ༌ ཡ༌ཧུ༌དཱ༌པ༌ མ༌ཤི༌ཀའེ༌ཀ༌ ཨིད༌ཤེས༌ ཅོ༌ཁན༌ ཏང༌པོ༌ མི༌གུན༌ནི༌, ཁོང༌ང༌ སྤལ༌ དང༌ སྟོད༌པ༌ ཁྱོང༌ཅེས༌པོ༌ ཨིན༌པིན༌།
EPH 1:13 ཡང༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནིའང༌ ཐར༌པ༌ ཐོབ༌ཅེས༌སི༌ དེན༌བའེ༌ ལོན༌བོ༌ ཚོར༌ཏེ༌, མ༌ཤི༌ཀའེ༌ཀ༌ ཏད༌པ༌ ཅོས༌ པ༌སང༌, དཀོན༌མཆོག༌གི༌ ཁྱོ༌ཞ༌གུན༌ནི༌ཀ༌ ཁོང༌རང༌ངི༌ ཐེ༌ཙེ༌བོ༌ སལས༌, ཀ༌བོ༌ ཁོང༌ངི༌ ཞལ༌ཆད༌ ཛད༌ཁན༌ནི༌ ཏམ༌པའེ༌ ཐུག༌ཉིད༌ ཨིན༌ནོག༌།
EPH 1:14 ཏམ༌པའེ༌ ཐུག༌ཉིད༌བོ༌ ནི༌, དཀོན༌མཆོག༌གི༌ ང༌དང༌ང༌ ནམ༌ཁའེ༌ ནོར༌སྐལ༌ སལ༌ལ༌ ཛད༌ཅེས༌ དང༌ ང༌དང༌གུན༌ ཉོའ༌ ཛད༌ཏེ༌, ཁོང༌རང༌ངི༌ མི༌གུན༌ གྱུར༌ ཅུག༌ག༌ ཛད༌ཅེས༌སི༌, ཁོང༌ངི༌ ཁ༌ཆད༌པོ༌ ཨིན༌ནོག༌། ཁོང༌རང༌ང༌ སྤལ༌ དང༌ སྟོད༌པ༌ ཐོབ༌ཅེས༌སི༌ ཕིའ༌, དཀོན༌མཆོག༌གི༌ ཏེ༌བོ༌ ཅོའ༌ ཛདས༌།
EPH 1:15 ཁྱོ༌ཞ༌གུན༌ནི༌ གཙོ༌བོ༌ ཡེ༌ཤུའི༌ཀ༌ ཏད༌པ༌ ཁྱོང༌ཅེས༌ དང༌ དཀོན༌མཆོག༌གི༌ མི༌ ཏམ༌པ༌ ཚང༌མ༌ལ༌ ཅེས༌པ༌ ཅོ༌རུག༌ ཟེར༌ཏེ༌ ང༌ ཚོར༌པ༌ནེ༌ ཕར༌ལ༌,
EPH 1:16 ངའེ༌ མོས༌ལམ༌གུན༌ནི༌ ནང༌ང༌ ཁྱོ༌ཞ༌གུན༌ ཨིད༌ཏུ༌ ཅོ༌ཨིན༌ ཏུས༌གྱུན༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
EPH 1:17 དཀོན༌མཆོག༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཟིར༌རྗིད༌ཅན༌ནི༌ ཡབ༌བ༌, ཁྱོ༌ཞ༌གུན༌ལ༌ ཁོང༌ མང༌ང༌ གྱལ༌ལ༌ ཤེ༌ཤེས༌སི༌ ཕིའ༌, ཁོང༌ངི༌ ཁྱོ༌ཞ༌གུན༌ལ༌ ཐུག༌ཉིད༌དི༌ ཤེས༌རབས༌ སལ༌ཅེས༌, ཡང༌ ཁོང༌རང༌ ཁྱོ༌ཞ༌གུན༌ལ༌ སྔོན༌ ཅུག༌ག༌ ཛད༌ཅེས༌ལ༌, ངའེ༌ ཏུས༌གྱུན༌ ཞུའ༌ ཕུལ༌ལད༌།
EPH 1:18 དཀོན༌མཆོག༌གི༌ རིན༌ཅན༌ དང༌ སྤལ༌ཅན༌ ནོར༌སྐལ༌ ཨིན༌ཁན༌ནི༌, ཏམ༌པ༌ མི༌ བོད༌ད༌ ཛད༌ཁན༌གུན༌ལ༌, ཁོང༌ངི༌ སལ༌ཁན༌ནི༌ རེ༌ཝ༌ ཧ༌གོ༌ཅེས༌སི༌ ཕིའ༌, ཁྱོ༌ཞ༌གུན༌ནི༌ སེམས༌པོ༌ འོད༌དི༌ གང༌ ཅུག༌ག༌ ཛད༌ཅེས༌ལ༌ ངའེ༌ མོས༌ལམ༌ ཕུལ༌ལད༌།
EPH 1:19 ཡང༌ ང༌དང༌ ཏད༌པ༌ཅན༌གུན༌ནི༌ དཀོན༌མཆོག༌གི༌ ཧ༌ལས༌ཤེས༌སི༌ ཤེད༌པོའེ༌ ང༌དང༌གུན༌ནི༌ ནང༌ང༌ ཆག༌ལས༌ ཛད༌ཅེས༌པོ༌ གྱུས༌ ཆ༌ཐུབ༌ཅེས༌སི༌ ཕིའང༌ ངའེ༌ མོས༌ལམ༌ ཞུའད༌། ཏེན༌ན༌ ཧ༌ལས༌སི༌ ཤེད༌པོའེ༌,
EPH 1:20 མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌, ནམ༌ཁའེ༌ ནང༌ང༌ དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ ཞུག༌ཤུག༌ག༌ ཛདས༌།
EPH 1:21 འི༌ཏུས༌ མ༌ཚད༌ ཡོང༌ཅེས༌ཅན༌ནི༌ ཏུས༌པོའེ༌ ནང༌ངའང༌, མ༌ཤི༌ཀའེ༌ ཝང༌ ནི༌ ནམ༌ཁའ༌ དང༌ སའེ༌ཀ༌ ཡོད༌ཁན༌ནི༌ སྤོན༌བོ༌, ཝང༌སྲུལ༌པ༌, ཝང༌ཆ༌ ཡོད༌ཁན༌ དང༌, འུ༌སྐྱོང༌ གུན༌ནི༌ སང༌ ཐོ༌ཤོག༌པོ༌ ཨིན༌ནོག༌།
EPH 1:22 ཆོས༌ཚོགས༌སི༌ ཕན༌ཐོགས༌སི༌ ཕིའ༌ དཀོན༌མཆོག༌གི༌ ཅི༌ཚང༌མ༌ མ༌ཤི༌ཀའེ༌ ཞབས༌སི༌ ཡོག༌ག༌ སལ༌ཏེ༌, ཁོང༌ ཅི༌ཚང༌མའེ༌ཀ༌ གོ༌སྐྱོང༌ང༌ སྐོའ༌ ཛདས༌།
EPH 1:23 ཆོས༌ཚོགས༌ ནི༌, མ༌ཤི༌ཀའེ༌ སྐུ༌ཟུགས༌ ཨིན༌ནོག༌, ཡང༌ ཁོང༌ ཏེ༌བོའེ༌ ནང༌ང༌ ནས༌ཏེ༌ ཆོས༌ཚོགས༌པོ༌ ཆད༌ལག༌ མེད༌ཁན༌ ཛདས༌། ཁོང༌ངི༌ ཀ༌རུང༌ས༌ ཅི༌ཚང༌མའེ༌ ནང༌ང༌ ཁོང༌རང༌ སྐང༌ང༌ ཛདས༌།
EPH 2:1 དཀོན༌མཆོག༌གི༌ ཁའ༌ མི༌ཉན༌ཅེས༌ དང༌ སྡིག༌པ༌ གུན༌ནི༌ ཞས༌ཏེ༌, ཁྱོ༌ཞ༌གུན༌ སེམས༌ཉིད༌དི༌ ཐོག༌ནེ༌ ཤི༌ཏེ༌ ཨིན༌པིན༌།
EPH 2:2 ཏེ༌ཏུས༌ལ༌ ཁྱོ༌ཞ༌གུན༌ ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌ ལམ༌མི༌ཀ༌ གྲུལ༌ལད༌པིན༌, ཡང༌ ཇིག༌རྟེན༌ནི༌ སེམས༌ཉིད༌ ངན༌པ༌གུན༌ནི༌ ཝང༌སྲུལ༌པ༌ ཤེ༌ཏན༌ནི༌ སྟིང༌རང༌ནེ༌ སོང༌ཏེ༌ ཨིན༌པིན༌། ཁོའེ༌ ཏ༌རུང༌ངའང༌ དཀོན༌མཆོག༌གི༌ ཁའ༌ མི༌ཉན༌ཁན༌གུན༌ནི༌ ནང༌ང༌ ལས༌ ཅོའ༌ནོག༌།
EPH 2:3 སྐབས༌ཤིག༌ག༌, ང༌དང༌གུན༌ནའང༌ ཁོང༌གུན༌ ཙོགས༌ལ༌ སྡིག༌པའེ༌ དོད༌པ༌ ཚང༌མ༌ གྲུབ༌ཅུག༌ཨིན༌, ཏེ༌ སྡིག༌པའེ༌ དོད༌པ༌ དང༌ སམ༌ཚུལ༌ལི༌ ལམ༌མི༌ཀ༌ གྲུལ༌ལད༌པིན༌། ཁོང༌གུན༌ ཙོགས༌ལ༌ ང༌དང༌གུན༌ནི༌ཀའང༌ དཀོན༌མཆོག༌གི༌ ཐུགས༌སྲོ༌ དང༌ ཆད༌པ༌ བབས༌ཤེས༌པོ༌ འོས༌པ༌ ཨིན༌པིན༌།
EPH 2:4 སྡིག༌པ༌གུན༌ནི༌ ཞས༌ཏེ༌ ང༌དང༌གུན༌ སེམས༌ཉིད༌དི༌ ཐོག༌ནེ༌ ཤི༌ཏེ༌ ཨིན༌ཏེའང༌, སྙིང༌རྗེ༌ གངས༌ཏེ༌ ཡོད༌ཁན༌ནི༌ དཀོན༌མཆོག༌གི༌ ང༌དང༌གུན༌ལ༌ ཅམས༌པ༌ ཆེན༌མོ༌ ཛདས༌པ༌, ཁོང༌ངི༌ ང༌དང༌གུན༌ མ༌ཤི༌ཀ༌ ཉམ༌པོ༌ སོན༌ ཅུག༌ག༌ ཛདས༌། ཁོང༌ངི༌ ཐུག༌རྗེ༌ ཅིག༌པོ༌ གྱུད༌ཏེ༌, ཁྱོ༌ཞ༌གུན༌ སྐྱོབ༌བ༌ ཛདས༌།
EPH 2:6 ང༌དང༌གུན༌ནི༌ ཐུན༌བྲེལ༌ མ༌ཤི༌ཀ༌ ཡེ༌ཤུ༌ ཉམ༌པོ༌ ཡོད༌ཅེས༌པོའེ༌, ཁོང༌ངི༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཏེ༌, ནམ༌ཁའེ༌ ནང༌ང༌ ཞུགས༌ཁྲིས༌གུན༌ནི༌ཀ༌ མ༌ཤི༌ཀ༌ ཉམ༌པོ༌ བོར༌ར༌ ཛདས༌།
EPH 2:7 དཀོན༌མཆོག༌གི༌ ཏེ༌བོ༌ ཅོའ༌ ཛདས༌, ཅིའ༌ཟེར༌ན༌ མ༌འོངས༌པའེ༌ ཏུས༌སི༌ ནང༌ང༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ང༌དང༌གུན༌ནི༌ ཕིའ༌ ཁོང༌ངི༌ ཀའ༌ཀྲིན༌ དང༌ ཐུག༌རྗེ༌ ཙམ༌ཤིག༌གི༌ ཧ༌ལས༌ཤེས༌ ཨིན༌ཁན༌བོ༌, ཚང༌མ༌ལ༌ སྟན༌ཅེས༌སི༌ ཐུགས༌དོད༌ ཡོད༌ཏེ༌ ཨིན༌ནོག༌།
EPH 2:8 ཏད༌པ༌ གྱུད༌ཏེ༌ ཐུག༌རྗེ༌ ཞས༌ཏེ༌, ཁྱོ༌ཞ༌གུན༌ལ༌ ཐར༌པ༌ ཐོབ༌ཏེ༌ ཨིན༌པིན༌, ཡང༌ ཏེ༌ ཐར༌པ༌བོ༌ ཁྱོ༌ཞའེ༌ རྩོན༌གྲུས༌ མན༌པ༌, དཀོན༌མཆོག༌གི༌ ཆོགས༌ནེ༌ སལ༌ཁན༌ནི༌ སོལ༌རས༌ ཨིན༌ནོག༌།
EPH 2:9 ཐར༌པ༌བོ༌ ང༌དང༌ངི༌ ལས༌ ཟང༌པོའེ༌ ཞས༌ཏེ༌ མན༌ པ༌སང༌, ང༌དང༌ སུ༌ཞིག༌གིའང༌ ཏེ༌བོའེ༌ཀ༌ ཕོ༌སོ༌ སྟན༌ མི༌ཉན༌།
EPH 2:10 ང༌དང༌ དག༌ས༌ ཡོད༌ཁན༌བོ༌ དཀོན༌མཆོག༌གི༌ ཅོའ༌ ཛད༌ཏེ༌ ཨིན༌ནོག༌། དཀོན༌མཆོག༌གི༌ སྔུན༌ལ༌, གྲལ༌གྲིག༌ ཅོའ༌ ཛད༌ཁན༌ནི༌ ལས༌ ཟང༌པོ༌གུན༌ ཅོ༌ཅེས༌སི༌ ཕིའ༌, ཁོང༌ངི༌ ང༌དང༌གུན༌ མ༌ཤི༌ཀ༌ ཡེ༌ཤུའི༌ ནང༌ང༌, མི༌ སོ༌མ༌ རིག༌ ཅོའ༌ ཛདས༌།
EPH 2:11 ཏ༌ འི༌བོ༌ ཨིད༌ཏུ༌ བོར༌ཤིག༌, ཁྱོ༌ཞའ༌ སྐྱེ༌ ཟ༌ནེ༌ ཡ༌ཧུ༌དཱ༌པ༌ མན༌ཁན༌ ཡང༌ ཡ༌ཧུ༌དཱ༌པ༌གུན༌ནི༌ ཁྱོ༌ཞའ༌ སུན༌ནད༌ མ༌ཅོ༌ཁན༌ ཚི༌ཏུ༌གུན༌ ཟེར༌རད༌པིན༌, ཅིའ༌ཟེར༌ན༌ ཁོང༌གུན༌ སུན༌ནད༌ ཅོ༌ཁན༌ ཨིན༌ཁན༌བོའེ༌ཀ༌ མ༌སྲན༌ཏྲེ༌ ཕོ༌སོ༌ ཅོའད༌པིན༌, ཀ༌བོའེ༌ ཁོང༌ངི༌ སེམས༌གུན༌ལ༌ མན༌པ༌, ཟུགས༌པོ༌ ཅིག༌པོའ༌ གྱུར༌ཇ༌ ཁྱོང༌ང༌ནོག༌།
EPH 2:12 ཏེ༌ ཟ༌ནེ༌ ཁྱོ༌ཞ༌གུན༌ནི༌ མ༌ཤི༌ཀ༌ ཉམ༌པོ༌ ཅའང༌ བྲེལ༌ མེད༌པིན༌། ཁྱོ༌ཞ༌གུན༌ ཨིས༌ར༌ཨེལ༌ལི༌ མིར༌གྱུད༌དི༌ ཕྲོའ༌ ཐེའ༌ མེད༌པིན༌, ཡང༌ དཀོན༌མཆོག༌གི༌ ཁོང༌གུན༌ལ༌ ཛད༌ཁན༌ནི༌ ཞལ༌ཆད༌དི༌ ནང༌ང༌ ཁྱོ༌ཞ༌གུན༌ སྲེའ༌ མ༌ཛདས༌། ཁྱོ༌ཞ༌གུན༌ འི༌ ཇིག༌རྟེན༌ནི༌ ནང༌ང༌ དཀོན༌མཆོག༌ དང༌ རེ༌ཝ༌ མེད༌ཁན༌ནི༌ མི༌གུན༌ ཨིན༌པིན༌།
EPH 2:13 ཨིན༌ནའང༌ སྔུན༌ལ༌ དཀོན༌མཆོག༌ནེ༌ མའ༌ ཐག༌རིང༌ང༌ ཡོད༌ཁན༌གུན༌, མ༌ཤི༌ཀའེ༌ སྐུ༌ཁྲག༌ རྐྱང༌ཤིང༌ངི༌ཀ༌ ཕོའ༌ ཛད༌ཅེས༌པོའེ༌, དག༌ས༌ དཀོན༌མཆོག༌གི༌ མ༌ཤི༌ཀ༌ ཡེ༌ཤུའི༌ ནང༌ང༌ ཁྱོ༌ཞ༌གུན༌ ཁོང༌རང༌ངི༌ ཉེ༌མོའ༌ ཁྱོང༌ང༌ ཛད༌ཏེ༌ ཨིན༌།
EPH 2:14 མ༌ཤི༌ཀ༌ ཁོང༌རང༌ངི༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པ༌ མན༌ཁན༌ གུན༌ནི༌ ནང༌ང༌ ཞི༌དེ༌ ཁྱོང༌ང༌ ཛདས༌། མ༌ཤི༌ཀའེ༌ འི༌ སྡེ༌ ཉིས༌ཀོའེ༌ ནང༌ང༌ ཡོད༌ཁན༌ནི༌ ནཕ༌རད༌དི༌ རྩིག༌པ༌བོ༌ ཤིག༌ག༌ ཛད༌ཏེ༌ ཅིག༌ གྱུར༌ ཅུག༌ག༌ ཛདས༌།
EPH 2:15 ཁོང༌ངི༌ ཡ༌ཧུ༌དཱ༌པ༌གུན༌ནི༌ ཆོས༌སི༌ བཀའ༌ཁྲིམས༌ དང༌ བཀའ༌རྒྱའ༌ གུན༌ མེད༌ཁན༌ ཅོའ༌ ཛད༌ཏེ༌ མ༌ཤི༌ཀའེ༌ འི༌ སྡེ༌ ཉིས༌ཀོ༌, ཁོང༌རང༌ངི༌ ནང༌ང༌ མི༌རིགས༌ སོ༌མ༌ཞིག༌ ཅོའ༌ ཛད༌ཅེས༌པོའེ༌, ཁོང༌གུན༌ནི༌ ནང༌ང༌ ཞི༌དེ༌ ཁྱོང༌ང༌ ཛདས༌།
EPH 2:16 ཁོང༌ རྐྱང༌ཤིང༌ངི༌ཀ༌ ཀྲོངས༌ས༌ ཛད༌ཅེས༌པོའེ༌ ཁོང༌ངི༌ འི༌ མི༌རིགས༌ ཉིས༌ཀོ༌ དཀོན༌མཆོག༌ ཉམ༌པོ༌ ཐུན༌ཅུག༌ག༌ ཛད༌ཏེ༌, འི༌ ཉིས༌ཀོའེ༌ ནང༌ང༌ ཡོད༌ཁན༌ནི༌ ནཕ༌རད༌བོ༌ མེད༌ཁན༌ ཅོའ༌ ཛདས༌།
EPH 2:17 མ༌ཤི༌ཀ༌ ཕེབས༌ཏེ༌ ཁྱོ༌ཞའ༌ དཀོན༌མཆོག༌ནེ༌ མའ༌ ཐག༌རིང༌ང༌ ཡོད༌ཁན༌ དང༌ ང༌ཞའ༌ དཀོན༌མཆོག༌གི༌ ཉེ༌མོའ༌ ཡོད༌ཁན༌ ཉིས༌ཀོའ༌ ཞི༌དེ༌ གའ༌མོའེ༌ ནས༌ཚུལ༌ ཤད༌ད༌ ཛདས༌།
EPH 2:18 ཅིའ༌ཞུ༌ན༌ མ༌ཤི༌ཀ༌ གྱུད༌ཏེ༌, ང༌དང༌གུན༌ནི༌ ཡབ༌ དཀོན༌མཆོག༌ག༌ ཏམ༌པའེ༌ ཐུག༌ཉིད༌ ཅིག༌ གྱུད༌ཏེ༌ མོས༌ལམ༌ ཞུ༌ཐུབ༌ཨིན༌།
EPH 2:19 ཏེན༌ན༌བོའེ༌ཕིའ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌, ཏ༌ནེ༌ཕར༌ལ༌ མ༌ཤེས༌ཁན༌ དང༌ ཞན༌ཡུལ༌ལི༌ མི༌རིག༌ མ༌ནོག༌། དཀོན༌མཆོག༌གི༌ ཏམ༌པའེ༌ མི༌གུན༌ ཉམ༌པོ༌ ཁྱོ༌ཞ༌གུན༌ནའང༌, ཁོང༌ངི༌ གྱལ༌སྲིད༌དི༌ མི༌, ཡང༌ དཀོན༌མཆོག༌ ཁོང༌རང༌ངི༌ ནང༌མི༌གུན༌ ཨིན༌ནོག༌།
EPH 2:20 ང༌དང༌གུན༌ དཀོན༌མཆོག༌གི༌ ཁང༌པ༌ ཨིན༌ནོག༌, ཀ༌བོ༌ སྐུ༌ཚབས༌གུན༌ དང༌ ལུང༌སྟོན༌པ༌གུན༌ནི༌ རྩིགས༌རྨང༌ངི༌ཀ༌ རྩིགས༌ཏེ༌ ཨིན༌, ཡང༌ མ༌ཤི༌ཀ༌ ཡེ༌ཤུ༌ ཁོང༌རང༌ ནི༌, ཏེ༌ ཁང༌པའེ༌ ཀྲུ༌རྡོའ༌ ཁག༌ཅན༌བོ༌ ཨིན༌།
EPH 2:21 མ༌ཤི༌ཀའེ༌ ནང༌ང༌ ཛོམས༌ཏེ༌ ང༌དང༌གུན༌ གཙོ༌བོའེ༌ ཕིའ༌, ཏམ༌པའེ༌ ཆོད༌ཁང༌ཞིག༌ ལྡན༌ཨིན༌ ཨིན༌ནོག༌།
EPH 2:22 ཡང༌ མ༌ཤི༌ཀ༌ གྱུད༌ཏེ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནའང༌, དཀོན༌མཆོག༌གི༌ ཏམ༌པའེ༌ ཐུག༌ཉིད༌ ནས༌ས༌ ཛད༌ཁན༌ནི༌ ནས༌ས༌ གྱུར༌ཨིན༌ ཨིན༌ནོག༌།
EPH 3:1 ཏེན༌ན༌བོའེ༌ཕིའ༌ ང༌ པ༌འུ༌ལུའི༌, མ༌ཤི༌ཀ༌ ཡེ༌ཤུའི༌ ཞབས༌ཏོག༌ ཞུས༌ཏེ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌པོའེ༌, ང༌ ཙོན༌ནི༌ ནང༌ང༌ ཡོད༌།
EPH 3:2 ངའ༌ ཏན༌ཏན༌ རག༌, ཁྱོ༌ཞ༌གུན༌ནི༌ འི༌བོ༌ ཚོར༌ཏེ༌ ཡོད༌གྲོ༌, དཀོན༌མཆོག༌གི༌ ང༌ ཁྱོ༌ཞ༌གུན༌ ཉམ༌པོ༌ ཁོང༌ངི༌ ཐུག༌རྗེ༌ བགོ༌ཅེས༌སི༌ ཁག༌ རྩད༌ཅན༌བོ༌ སལ༌ལ༌ ཛདས༌།
EPH 3:3 དཀོན༌མཆོག༌གི༌ སང༌ཝའེ༌ ཐབས༌ ང༌ སྔོན༌ ཅུག༌ག༌ ཛད༌ཁན༌བོ༌ ངའེ༌ དོར༌ལྡུས༌ཏེ༌ འི༌ ཨི༌གེ༌ ནང༌ང༌ བྲིས༌ཏེ༌ ཨིན༌།
EPH 3:4 ཏེ༌བོ༌ སིལ༌ ཟ༌ནེ༌, མ༌ཤི༌ཀའེ༌ ཕིའ༌ སང༌ཝའེ༌ ཐབས༌ ངའ༌ ཧ༌གོ༌ཁན༌བོ༌ ཁྱོ༌ཞ༌གུན༌ལ༌ གྱུས༌ ཆ༌ཐུབ༌ཨིན༌།
EPH 3:5 སྔུན༌ནི༌ མི༌རབས༌གུན༌ལ༌, ཏེ༌ སང༌ཝའེ༌ ཐབས༌པོ༌ སྔོན༌ ཅུག༌ག༌ མ༌ཛད༌ཀྱག༌། ཨིན༌ནའང༌ ཏ༌ ཏམ༌པའེ༌ ཐུག༌ཉིད༌ གྱུད༌ཏེ༌ དཀོན༌མཆོག༌གི༌ ཁོང༌རང༌ངི༌ ཏམ༌པ༌ སྐུ༌ཚབས༌ དང༌ ལུང༌སྟོན༌པ༌ གུན༌ལ༌, ཏེ༌བོ༌ སྔོན༌ ཅུག༌ག༌ ཛདས༌།
EPH 3:6 ཏེ༌ སང༌ཝའེ༌ ཐབས༌པོ༌ ནི༌ འི༌བོ༌ ཨིན༌ནོག༌, གའ༌མོའེ༌ ནས༌ཚུལ༌ལ༌ ཏད༌པ༌ ཅོ༌ཅེས༌པོའེ༌ ཡ༌ཧུ༌དཱ༌པ༌ མན༌ཁན༌གུན༌ལའང༌ ཡ༌ཧུ༌དཱ༌པ༌གུན༌ ཙོགས༌སི༌ ནོར༌སྐལ༌ ཐོབ༌ཨིན༌། ཡེ༌ཤུ༌ མ༌ཤི༌ཀའེ༌ ནང༌ང༌, ཏེ༌ ཉིས༌ཀོ༌ ཟུགས༌པོ༌ ཅིག༌གི༌ ཡན༌ལག༌ གྱུར༌ཏེ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ནི༌ ནང༌ངའང༌ དྲེས༌ ཐུབ༌ཨིན༌།
EPH 3:7 དཀོན༌མཆོག༌གི༌ ཤེད༌ དང༌ ཁོང༌ངི༌ ཐུག༌རྗེ༌ཅན༌ནི༌ སོལ༌རས༌ གྱུད༌ཏེ༌, ངའ༌ གའ༌མོའེ༌ ནས༌ཚུལ༌ ཤད༌ཁན༌ནི༌ ཞབས༌ཏོག༌པ༌ གྱུར༌ཏེ༌ ཨིན༌།
EPH 3:8 དཀོན༌མཆོག༌གི༌ ཏམ༌པ༌ མི༌ ཚང༌མའེ༌ ནང༌ནེ༌ ངའ༌ ཚང༌མའེ༌སང༌ རྩིས༌མེད༌ ཨིན༌ཨིན༌ཞིག༌ དང༌, ཁོང༌ངི༌ ཡ༌ཧུ༌དཱ༌པ༌ མན༌ཁན༌གུན༌ལ༌ མ༌ཤི༌ཀའེ༌ ཧ༌ལས༌ཤེས༌སི༌ བང༌ཛོད༌དི༌ སྐོར༌ལ༌ ཤད༌ཅེས༌སི༌ ཐུག༌རྗེ༌བོ༌ ང༌ སལ༌ལ༌ ཛདས༌།
EPH 3:9 ཡང༌ ཅི༌ཚང༌མ༌ ཛད༌ཁན༌ནི༌ དཀོན༌མཆོག༌གི༌ དག༌ས༌ ཚོག༌པ༌ སྦས༌ཏེ༌ བོར༌ར༌ ཛད༌ཁན༌ནི༌ ཐབ༌ལྡིངས༌པོ༌, མི༌གུན༌ལ༌ ཧ༌གོ༌ཅུག༌ཅེས༌ལ༌ ང༌ ལྡམ༌མ༌ ཛདས༌།
EPH 3:10 དཀོན༌མཆོག༌གི༌ ཐུགས༌དོད༌པོ༌ ནི༌ ཆོས༌ཚོགས༌གུན༌ གྱུད༌ཏེ༌ ཁོང༌ངི༌ ཤེས༌རབས༌ སྣ༌ཚོགས༌ ཚང༌མ༌ ནམ༌ཁའེ༌ ནང༌ང༌ ཡོད༌ཁན༌ནི༌ ཝང༌སྲུལ༌པ༌ དང༌ ཝང༌ གུན༌ལ༌ སྟན༌ན༌ ཛད༌ཅེས༌པོ༌ ཨིན༌ནོག༌།
EPH 3:11 ཏེན༌ན༌བོ༌ ནི༌ དཀོན༌མཆོག༌གི༌ ཐའ༌མེད༌པའེ༌ ཐབ༌ལྡིངས༌པོ༌ ཨིན༌པིན༌, ཀ༌བོ༌ མ༌ཤི༌ཀ༌ ཡེ༌ཤུ༌ ང༌དང༌ངི༌ གཙོ༌བོའེ༌ ནང༌ང༌ ཁོང༌ངི༌ གྲུབ༌ ཅུག༌ག༌ ཛདས༌།
EPH 3:12 ང༌དང༌གུན༌ནི༌ མ༌ཤི༌ཀའེ༌ཀ༌ ཏད༌པ༌ དང༌ ཁོང༌ ཉམ༌པོ༌ བྲེལ༌ ཡོད༌ཅེས༌པོའེ༌, མོས༌ལམ༌ དང༌ ཅོལ༌ ཟ༌ནེ༌ ང༌དང༌གུན༌ ཇིགས༌ མ༌ཇིགས༌ས༌ སྤོས༌པ༌ ཉམ༌པོ༌ དཀོན༌མཆོག༌གི༌ སྐུན༌དུན༌ལ༌ ཡོང༌ཐུབ༌ཨིན༌།
EPH 3:13 ཏེན༌ན༌བོའེ༌ཕིའ༌ ངའེ༌ ཞུ༌ཝ༌ ཨིན༌, ཁྱོ༌ཞའ༌ གའ༌མོའེ༌ ནས༌ཚུལ༌ ཤད༌ཅེས༌པོའེ༌ ང༌ རྡུག༌ངལ༌ ཐོང༌ཨིན༌ ཡོད༌ཁན༌བོའེ༌ཀ༌ སེམས༌ཤུགས༌ མ༌ཆག༌ག༌, སྤལ༌ངམས༌ ཚོར༌ཤིག༌།
EPH 3:14 ཏེན༌ན༌ གྱུན༌ཚན༌བོའེ༌ ཕིའ༌ ནམ༌ཁའ༌ དང༌ ཇིག༌རྟེན༌ནི༌ ནང༌ང༌ སྲོག༌ ཡོད༌ཁན༌ ཚང༌མའ༌ ཅོའ༌ ཛད༌ཁན༌ནི༌ དཀོན༌མཆོག༌ ང༌དང༌ངི༌ ཡབ༌བ༌ ངའེ༌ པིག༌དོང༌ ཙུག༌ཏེ༌ མོས༌ལམ༌ ཞུའད༌,
EPH 3:16 ངའེ༌ མོས༌ལམ༌ ནི༌, དཀོན༌མཆོག༌གི༌ སྟོབས༌ ཉམ༌པོ༌ ཏམ༌པའེ༌ ཐུག༌ཉིད༌ གྱུད༌ཏེ༌, ཁོང༌ངི༌ ཧ༌ལས༌ཤེས༌སི༌ གྱུ༌ནོར༌རི༌ ཁྱོ༌ཞ༌གུན༌ནི༌ སེམས༌ ཤེད༌ཅན༌ ཛད༌ཤིག༌།
EPH 3:17 ཏེ༌ནེ༌ ཏད༌པའེ༌ ཞས༌ཏེ༌ མ༌ཤི༌ཀ༌ ཁྱོ༌ཞའེ༌ སེམས༌སི༌ ནང༌ང༌ ཞུགས༌ཨིན༌, ཡང༌ ཁྱོ༌ཞ༌གུན༌ དཀོན༌མཆོག༌གི༌ ཅམས༌པའེ༌ ནང༌ང༌ པ༌ཀྲག༌ ཟུམས༌ཏེ༌ གྱས༌ཤེས༌པོ༌ ངའེ༌ མོས༌ལམ༌ ཨིན༌།
EPH 3:18 དཀོན༌མཆོག༌གི༌ མི༌ ཏམ༌པ༌ ཚང༌མ༌ ཉམ༌པོ༌, མ༌ཤི༌ཀའེ༌ ཅམས༌པ༌བོ༌ ཙམ༌ཤིག༌གི༌ ཞང༌ཅན༌, རིང༌མོ༌, ཐོན༌པོ༌ དང༌ ཏིང༌ཟབ༌མོ༌ ཨིན༌ཁན༌བོ༌ ཧ༌གོ༌ཅེས༌སི༌ ཁྱུད༌ ཁྱོ༌ཞ༌གུན༌ལ༌ སལ༌ཤིག༌།
EPH 3:19 ང༌དང༌ང༌ གང༌པོ༌ ཧ༌གོ༌ མ༌ཐུབ༌ཁན༌ནི༌ མ༌ཤི༌ཀའེ༌ ཅམས༌པ༌ ཀྲག༌པོ༌, ཁྱོ༌ཞ༌གུན༌ལ༌ ཐོང༌ངོམས༌ ཆའ༌ཅིག༌, དཀོན༌མཆོག༌གི༌ ཁོང༌རང༌ངི༌ སྕོད༌ལམ༌ གང༌པོ༌ ཁྱོ༌ཞ༌གུན༌ནི༌ ནང༌ང༌ སྐང༌ང༌ ཛད༌ཨིན༌།
EPH 3:20 ང༌དང༌གུན༌ནི༌ དཀོན༌མཆོག༌ག༌ སྟོད༌པ༌ ཕུལ༌ཨིན༌, ཅིའ༌ཞུ༌ན༌ ང༌དང༌ངི༌ ནང༌ང༌ ཆག༌ལས༌ ཛད༌ཁན༌ ཁོང༌ངི༌ སྟོབས༌པོའེ༌, ང༌དང༌གུན༌ནི༌ ཞུ༌ཁན༌ ཡ༌ སམ༌ཁན༌ ཚང༌མའེ༌སང༌ མང༌ང༌ ཛད༌ ཉན༌ན༌ནོག༌།
EPH 3:21 མི༌རབས༌ ཚང༌མའེ༌ ཆོས༌ཚོགས༌ དང༌ མ༌ཤི༌ཀ༌ ཡེ༌ཤུའི༌ ཨིན༌ཁན༌ གུན༌ནེ༌ དཀོན༌མཆོག༌ག༌ ཏུས༌གྱུན༌ནེ༌གྱུན༌ སྤལ༌ ཐོབ༌ཤིག༌, ཨ༌མེན༌།
EPH 4:1 ཏེན༌ན༌བོའེ༌ཕིའ༌ གཙོ༌བོའ༌ ཞབས༌ཏོག༌ ཞུ༌ཅེས༌པོའེ༌ ང༌ ཙོན༌ནི༌ ནང༌ང༌ ཡོད༌ཁན༌ནི༌, ཇུ༌ཇུ༌ དཀོན༌མཆོག༌གི༌ བོད༌ད༌ ཛད༌ཁན༌ནི༌ འོས༌པའེ༌ མི༌ཚེ༌ཞིག༌ ཕུད༌ཅེས༌ལ༌ ཁྱོ༌ཞའ༌ ཞུ༌ཝ༌ ཕུལ༌ལད༌།
EPH 4:2 ཁྱོ༌ཞའ༌ ཏུས༌གྱུན༌ ཉམ༌ཤུང༌ དང༌, པས༌མོ༌, ཟོད༌པ༌ཅན༌ ཡང༌ ཅམས༌པའེ༌ ནང༌ང༌ ཅིག༌ དང༌ ཅིག༌གི༌ སྐྱོན༌གུན༌ལ༌ ཤགས༌པ༌ ཏངས༌ཏེ༌ རོགས༌ ཅོ༌ཤིག༌།
EPH 4:3 ཞི༌དེ༌ ཉམ༌པོ༌ ལྡམས༌ཏེ༌ ཐུག༌ཉིད༌དི༌ ནང༌ང༌ ཁྱོ༌ཞ༌གུན༌ ཅིག༌གྲིལ༌ དུག༌ཅེས༌ལ༌ རྩོན༌གྲུས༌ ཅོ༌ཤིག༌།
EPH 4:4 ང༌དང༌གུན༌ལ༌ ཟུགས༌པོ༌ ཅིག༌ དང༌ ཏམ༌པའེ༌ ཐུག༌ཉིད༌དའང༌ ཅིག༌ཅིག༌ ཡོད༌ཏེ༌ ཨིན༌ནོག༌, ཀ༌ཟུག༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཁྱོ༌ཞ༌གུན༌ རེ༌ཝ༌ ཅིག༌གི༌ ཕིའ༌ བོད༌ད༌ ཛད༌ཏེ༌ ཨིན༌།
EPH 4:5 ང༌དང༌གུན༌ལ༌ གཙོ༌བོ༌ ཅིག༌ཅིག༌, ཨིད༌ཤེས༌ ཅིག༌ཅིག༌, ཁྲུས༌ ལེན༌ཅེས༌ ཅིག༌ཅིག༌,
EPH 4:6 ཚང༌མའེ༌ དཀོན༌མཆོག༌ དང༌ ཡབ༌ ཅིག༌ཅིག༌ ཞུགས༌ཏེ༌ ཨིན༌, ཁོང༌ངི༌ ང༌དང༌ ཚང༌མའེ༌ཀ༌ ཝང༌སྲུལ༌ཅེས༌, ང༌དང༌ ཚང༌མ༌ གྱུད༌ཏེ༌ ཆག༌ལས༌ ཛད༌ཅེས༌ དང༌ ཁོང༌ ང༌དང༌ ཚང༌མའེ༌ ནང༌ང༌ ཞུགས༌ས༌ནོག༌།
EPH 4:7 མ༌ཤི༌ཀའེ༌ ང༌དང༌ རེ༌རེའ༌ ཁྱུད༌ སོ༌སོ༌ རིག༌ སལ༌ཏེ༌ ཨིན༌ནོག༌, ཨིན༌ནའང༌ ཏེ༌ ཁྱུད༌པོ༌ ཀ༌ཟུག༌ཤིག༌ སལ༌ཨིན༌ ཁོང༌ངི༌ ཐག༌ཅད༌ད༌ ཛད༌ད༌ནོག༌།
EPH 4:8 ཏེན༌ན༌བོའེ༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌། “ཁོང༌ ཐོན༌པོའ༌ སྐྱོད༌ ཟ༌ནེ༌, ཁོང༌ངི༌ ཕམ༌ཀལ༌ཁན༌ནི༌ ཙོན༌པ༌ མང༌པོ༌ ཁོང༌རང༌ ཉམ༌པོ༌ ཁྱེར༌ར༌ ཛདས༌། ཡང༌ ཁོང༌རང༌ངི༌ མི༌གུན༌ལ༌ སྟགས༌ སལ༌ལ༌ ཛདས༌།”
EPH 4:9 ༼སུང༌རབས༌སི༌ ནང༌ང༌ “ཁོང༌ ཐོན༌པོའ༌ སྐྱོདས༌” མོལ༌ཅེས༌པོའེ༌ ང༌དང༌ང༌ ཧ༌གོའ༌ནོག༌, མ༌ཤི༌ཀ༌ ནམ༌ཁའ༌ནེ༌ ཐུར༌ལ༌ བབས༌ཏེ༌ མའ༌མོའ༌ སྐྱོདས༌ ཡང༌ན༌ འི༌ ཇིག༌རྟེན༌ནི༌ཀ༌།
EPH 4:10 ཡང༌ ཏེན༌ན༌ ཐུར༌ལ༌ བབས༌ས༌ ཛད༌ཁན༌བོའེ༌ ཁོང༌རང༌ངི༌ ཝང༌ ཛམ༌བུ༌ལིང༌ གང༌པོའེ༌ ནང༌ང༌ སྲུལ༌ལ༌ ཛད༌ཅེས༌ལ༌ ནམ༌ཁའེ༌ ཚང༌མའེ༌སང༌ ནས༌ས༌ ཐོན༌པོའ༌ སྐྱོད༌ད༌ ཛདས༌།༽
EPH 4:11 མ༌ཤི༌ཀའེ༌ ཁ༌ཅིག༌ སྐུ༌ཚབས༌, ཁ༌ཅིག༌ ལུང༌སྟོན༌པ༌, ཁ༌ཅིག༌ གའ༌མོའེ༌ ནས༌ཚུལ༌ ཤད༌ཁན༌, ཁ༌ཅིག༌ ཆོས༌ཚོགས༌ལ༌ སྟ༌སྟོག༌ ཅོ༌ཁན༌ དང༌ ཁ༌ཅིག༌ག༌ ལོབ༌བོན༌ ཅོ༌ཅེས༌སི༌ ཁྱུད༌གུན༌ ཆོས༌ཚོགས༌ལ༌ སལ༌ལ༌ ཛདས༌།
EPH 4:12 ཁོང༌གུན༌ནི༌ ཁག༌པོ༌ ནི༌, མ༌ཤི༌ཀའེ༌ སྐུ༌ཟུགས༌ ཤེད༌ཅན༌ གྱུར༌ཅེས༌སི༌ ཕིའ༌ དཀོན༌མཆོག༌གི༌ མི༌གུན༌ ཁོང༌ང༌ ཞབས༌ཏོག༌ ཞུ༌ཅེས༌ལ༌, གྲལ༌གྲིག༌ ཅོ༌ཅེས༌པོ༌ ཨིན༌ནོག༌།
EPH 4:13 མ༌ཤི༌ཀའེ༌ ཏེ༌བོ༌ ཛད༌ཨིན༌ ཞུགས༌ཨིན༌, ནམ༌ཚོག༌པ༌, ང༌དང༌ ཚང༌མ༌ ཏད༌པ༌ དང༌ དཀོན༌མཆོག༌གི༌ སྲས༌ ཤེ༌ཤེས༌སི༌ ནང༌ང༌ ཅིག༌གྲིལ༌ མི༌ཆའ༌། ཏེ༌ནེ༌ ང༌དང༌ ཏད༌པའེ༌ ནང༌ང༌ ལྡན༌ཏེ༌ མ༌ཤི༌ཀའེ༌ ཚད༌ དང༌ དྲན༌དྲའ༌ ལེབ༌ ཐུབ༌ཨིན༌།
EPH 4:14 ཡང༌ ང༌དང༌ ཕྲུ༌གུ༌ ཆུ༌ངུན༌གུན༌ ཙོགས༌ མི༌ལུས༌, ཀ༌གུན༌ ལབ༌ཞ༌ སོ༌མའེ༌ ལུངས༌རག༌གུན༌ནི༌ འི༌ངོ༌ནེ༌ འ༌ངོའ༌ ཁྲིད༌ཅེས༌, ཡང༌ མི༌ སྐྱོན༌ཇན༌གུན༌ནི༌ ཟུས༌མའེ༌ ཐབས༌གུན༌ གྱུད༌ཏེ༌ གོབ༌སྐོར༌ ཉན༌ན༌ནོག༌།
EPH 4:15 ཨིན༌ནའང༌ ང༌དང༌གུན༌ནི༌ དཀོན༌མཆོག༌གི༌ ཀྲང༌པོ༌བོ༌ ཅམས༌པ༌ ཉམ༌པོ༌ ཤད༌ཨིན༌ནའང༌, ང༌དང༌གུན༌ ཅི༌ས༌ཐོག༌ནེ༌ མ༌ཤི༌ཀའེ༌ ནང༌ང༌ ལྡན༌ཨིན༌, ཀ༌བོ༌ ཆོས༌ཚོགས༌སི༌ གོ༌ ཞུགས༌ཏེ༌ ཨིན༌།
EPH 4:16 མ༌ཤི༌ཀའེ༌ ཁོང༌རང༌ངི༌ མི༌ཚང༌མ༌ ལྡམས༌ཏེ༌ བོར༌ར༌ ཛདས༌ཏེ༌ ཨིན༌ནོག༌, ཀ༌ཟུག༌གི༌ གྱུས༌པའེ༌ ཟུགས༌པོའེ༌ ཡན༌ལག༌ ཚང༌མ༌ ཐུད༌ཏེ༌ བོར༌རད༌། ཀལ༌ཏེས༌ ཟུགས༌པོའེ༌ ཡན༌ལག༌ ཚང༌མའེ༌ ཅོ༌གོས༌ཅེས༌ཅན༌ནི༌ ལས༌གུན༌ ཅོ༌ན༌ ཏེ༌ནེ༌ ཟུགས༌པོ༌ གང༌པོ༌ ཅམས༌པའེ༌ ནང༌ང༌ ལྡན༌ཏེ༌ ཤེད༌ཅན༌ གྱུར༌ཨིན༌།
EPH 4:17 ཏེན༌ན༌བོའེ༌ཕིའ༌ གཙོ༌བོའེ༌ ཝང༌ངི༌ ནང༌ང༌ ངའེ༌ ཁྱོ༌ཞ༌གུན༌ལ༌ ཟེར༌རད༌, ཡང༌ སྤང༌པུད༌དད༌, ཏ༌ ཏད༌པ༌ མེད༌ཁན༌གུན༌ ཙོགས༌ མི༌ཚེ༌ ཕུད༌ཅེས༌ ཕོང༌ཤིག༌, ཅིའ༌ཟེར༌ན༌ ཁོང༌གུན༌ རེ༌ཝའ༌ མེད༌ཁན༌ནི༌ ནང༌ང༌ གོ༌ཁོར༌ཏེ༌ ཨིན༌ནོག༌།
EPH 4:18 ཁོང༌གུན༌ནི༌ སམ༌བ༌, མུན༌གྲིག༌གི༌ གངས༌ཏེ༌ ཁོང༌གུན༌ དཀོན༌མཆོག༌གི༌ སལ༌ཁན༌ནི༌ མི༌ཚེ༌ནེ༌ མ༌ ཐག༌རིང༌ང༌ སོང༌ཏེ༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ མིང༌ནའང༌ དཀོན༌མཆོག༌གི༌ སྐོར༌ལ༌ སམ༌བ༌ ཏང༌ཅེས༌ སྒགས༌ཏེ༌ སྙིང༌གུན༌ སྐྱོང༌པོ༌ ཅོས༌ཏེ༌ ཨིན༌ནོག༌།
EPH 4:19 ཁོང༌གུན༌ མངས༌ཏེའང༌ ཁྲེལ༌མེད༌, ལུས༌བྲེལ༌ ངན༌པའེ༌ སྟིང༌རང༌ནེ༌ བང༌ཏང༌ཁན༌, ཡང༌ ཚི༌ཏུ༌ ལས༌ ཚང༌མ༌ ཅོ༌ཅེས༌ལ༌ རིངས༌ས༌ནོག༌།
EPH 4:20 ཨིན༌ནའང༌ ཁྱོ༌ཞའེ༌ མ༌ཤི༌ཀའེ༌ ནང༌ང༌ མི༌ཚེ༌ པུད༌ཅེས༌ ལོབས༌ཁན༌བོ༌ ཁོང༌གུན༌ནི༌ ཕུད༌ཁན༌ ཙོགས༌ མི༌ཚེ༌ མ༌ནོག༌།
EPH 4:21 ཁྱོ༌ཞ༌གུན༌ནི༌ ཡེ༌ཤུའི༌ སྐོར༌ལ༌ ཚོར༌ཏེ༌ ཡང༌ ཁོང༌ངི༌ ནང༌ནེ༌ ཡོངས༌ཁན༌ནི༌ ཀྲང༌པོའེ༌ སྐོར༌ལ༌ ལོབས༌ཏེ༌ ཨིན༌ པ༌སང༌
EPH 4:22 སྙིང༌པ༌ དང༌ སྔུན༌ནི༌ སྡིག༌ཅན༌ མི༌ཚེ༌ ཕུད༌ཚུལ༌ གུན༌ ཕོང༌ཤིག༌ ཀ༌བོ༌ གོབ༌སྐོར༌རི༌ དོད༌པའེ༌ གངས༌ཏེ༌ ང༌དང༌ ཀྲང༌པོའེ༌ ལམ༌ནེ༌ ཐག༌རིང༌ང༌ ཁྱེར༌རད༌།
EPH 4:23 ཨིན༌ནའང༌ ཏམ༌པའེ༌ ཐུག༌ཉིད༌ལ༌ ཁྱོ༌ཞ༌གུན༌ནི༌ སམ༌ཚུལ༌ལི༌ ནང༌ང༌ གྱུར༌ཇ༌ ཁྱོང༌ཅུགས༌ཏེ༌,
EPH 4:24 དཀོན༌མཆོག༌གི༌ ཁོང༌རང༌ ཙོགས༌ ཛད༌ཁན༌ནི༌ མི༌ཚེ༌ སོ༌མ༌བོ༌ ཀོས༌ལག༌ ཙོགས༌ལ༌ རང༌ང༌ སྐོན༌ཤིག༌, ཀ༌བོ༌ དེན༌བའེ༌ ཀྲང༌པོ༌ དང༌ ཏམ༌པ༌ ཨིན༌།
EPH 4:25 ཏེན༌ན༌བོའེ༌ཕིའ༌ ཟུན༌ ཏང༌ཅེས༌ ཕངས༌ཏེ༌ ཏད༌པ༌ཅན༌གུན༌ལ༌ ཀྲང༌པོ༌ ཟེར༌གོས༌, ཅིའ༌ཟེར༌ན༌ ང༌དང༌གུན༌ ཟུགས༌པོ༌ ཅིག༌གི༌ ཡན༌ལག༌ སོ༌སོ༌ ཨིན༌ནོག༌།
EPH 4:26 “སྲོ༌ ཡོང༌ ཟ༌ནེ༌, ཏེ༌བོའ༌ ཁྱོ༌ཞ༌གུན༌ སྡིག༌པའེ༌ ཆོགས༌ལ༌ ཁྲིད༌ མ༌ཅུག༌ཤིག༌,” ཡང༌ ཏེ༌ སྲོ༌བོ༌ ཏེན༌ན༌ ཞག༌ནེ༌ ཐལ༌ཏེ༌ ཆ༌ཅུག༌ མ༌གོས༌།
EPH 4:27 ཏེ༌བོའེ༌ ཀ༌ནེ༌ ཤེ༌ཏན༌ལ༌ ཕན༌ཐོགས༌ ལེན༌ཅེས༌སི༌ སྐབས༌ མ༌ཏང༌ཤིག༌།
EPH 4:28 རྐུན༌མ༌གུན༌ནི༌ རྐུ༌ཅེས༌ ཕོང༌ཤིག༌། ཨིན༌ནའང༌ ཁྱོ༌ཞ༌རང༌ངི༌ ལག༌པ༌ བད༌ཏེ༌ ཀྲང༌པོ༌ ལས༌ ཅོ༌གོས༌, ཏེ༌ནེ༌ སྒོས༌དོམ༌ ཡོད༌ཁན༌གུན༌ལ༌ ཁྱོ༌ཞའེ༌ རོགས༌ ཅོ༌ཐུབ༌ཨིན༌།
EPH 4:29 ཁྱོ༌ཞའེ༌ ཁའ༌ནེ༌ སྤེ༌ར༌ ངན༌པ༌ མ༌ནེ༌ བིང༌ མ༌ཅུག༌ག༌ ཟང༌པོ༌ དང༌ ཕན༌ཐོགས༌ཅན༌ནི༌ སྤེ༌ར༌ ཏོང༌ཤིག༌, ཏེ༌ནེ༌ ཁྱོ༌ཞའེ༌ སྤེ༌ར༌ ཉན༌ཨིན༌ ཡོད༌ཁན༌གུན༌ལ༌ ཁྱོ༌ཞའེ༌ སྤོས༌པ༌ སྐྱེ༌ཅུག༌ ཐུབ༌ཨིན༌།
EPH 4:30 དཀོན༌མཆོག༌གི༌ ཏམ༌པའེ༌ ཐུག༌ཉིད༌ལ༌ ཐུགས༌ཚེར༌ སྐྱོད༌ མ༌ཅུག༌, ཀ༌བོ༌ ཐའ༌མའེ༌ ཞག༌ག༌ ཁྱོ༌ཞའ༌ རིན༌ ཤལ༌ཏེ༌ ཐར༌ཅུག༌ཅེས༌སི༌ ཐེ༌ཙེ༌བོ༌ ཨིན༌།
EPH 4:31 ཁོན༌བོར༌ཅེས༌, སྲོ༌ ཡོང༌ཅེས༌, ནོལ༌ཅེས༌, ཅིག༌ དང༌ ཅིག༌གི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌ དང༌ སྕོད༌ལམ༌ ངན༌པའེ༌ རིགས༌ ཚང༌མ༌ ཕངས༌ཏེ༌ མེད༌ཁན༌ ཅོ༌ཤིག༌།
EPH 4:32 ཅིག༌ དང༌ ཅིག༌ག༌ སྙིང༌རྗེ༌, ཅམས༌སེམས༌ དང༌ ཤགས༌པ༌ ཏོང༌ཤིག༌, ཀ༌ཟུག༌གི༌ མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ཁྱོ༌ཞའ༌ ཤགས༌པ༌ སལ༌ཏེ༌ ཨིན༌།
EPH 5:1 ཁྱོ༌ཞའ༌ དཀོན༌མཆོག༌གི༌ ཅེས༌པའེ༌ ཕྲུ༌གུ༌གུན༌ ཨིན༌ པ༌སང༌, ཁོང༌ གྲུལ༌ལ༌ ཛད༌ཁན༌ནི༌ ལམ༌མི༌ཀ༌ ཁྱོ༌ཞ༌གུན༌ནའང༌ གྲུལ༌ཤིག༌།
EPH 5:2 ཁྱོ༌ཞ༌གུན༌ནི༌ མི༌ཚེའེ༌ ཅམས༌པའེ༌ ནང༌ང༌ ཕུད༌ཤིག༌, ཀ༌ཟུག༌ མ༌ཤི༌ཀའེ༌ ང༌དང༌གུན༌ལ༌ ཅམས༌པ༌ ཛད༌ཏེ༌ ང༌དང༌གུན༌ནི༌ ཕིའ༌ ཀྲོངས༌ས༌ ཛདས༌, ཁོང༌ ནི༌ དཀོན༌མཆོག༌ག༌ ཏྲི༌ཞིམ༌མི༌ ཆོད༌པ༌ དང༌ སྲོག༌ཆོད༌ ཨིན༌ནོག༌།
EPH 5:3 ཨིན༌ནའང༌ ཁྱོ༌ཞ༌གུན༌ནི༌ ནང༌ང༌ ལུས༌བྲེལ༌ ངན༌པ༌, ཡ༌ ལས༌ངན༌ ཚི༌ཏུ༌ ཡ༌ ནབ༌སེམས༌ ཆུ༌ངུན༌ཞིག༌གའང༌ ཡོང༌ མ༌གོས༌, ཅིའ༌ཟེར༌ན༌ དཀོན༌མཆོག༌གི༌ མི༌ ཏམ༌པ༌གུན༌ནི༌ ནང༌ང༌ ཏེ༌ ཙོགས༌ སྡིག༌པའེ༌ ཕིའ༌ ནས༌ས༌ མེད༌པ༌ ཨིན༌ནོག༌།
EPH 5:4 ཁྱོ༌ཞ༌གུན༌ནི༌ ཁྲེལ༌མེད༌དི༌ རུངས༌, ཏོན༌མེད༌དི༌ སྤེ༌ར༌, དང༌ ཁམ༌ལོག༌ ཧ༌བབས༌ ཏང༌ མ༌གོས༌། ཏེ༌ཙོགས༌ འོས༌པ༌ མན༌ཁན༌ནི༌ སྤེ༌ར༌ ཏང༌ངི༌ སང༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌གོ༌ཤེས༌ ཨིན༌ནོག༌།
EPH 5:5 འི༌བོ༌ ཏན༌ཏན༌ ཨིན༌ནོག༌, སྕོད༌ལམ༌ ངན༌པ༌, ཚི༌ཏུའི༌ ལས༌, ཡ༌ ནབ༌སེམས༌ ༼ནབ༌སེམས༌ཅན༌གུན༌ནི༌ ཇིག༌རྟེན༌ནི༌ ནོར༌ལ༌ ཆག༌ཤེས༌པོ༌ སྐུན༌དྲ༌ ཅོལ༌ཁན༌ ཙོགས༌ ཨིན༌ནོག༌༽ ཏེ༌ཙོགས༌སི༌ མི༌གུན༌ལ༌ མ༌ཤི༌ཀ༌ དང༌ དཀོན༌མཆོག༌གི༌ གྱལ༌སྲིད༌དི༌ ནང༌ང༌ ཅའང༌ ནོར༌སྐལ༌ མི༌ཐོབ༌།
EPH 5:6 ཁོང༌གུན༌ནི༌ ཁོ༌རང༌གུན༌ནི༌ སྡིག༌པའེ༌ ལས༌གུན༌ ཀབ༌ཅེས༌སི༌ སམ༌མེད༌ སྤེ༌ར༌གུན༌ནི༌ཀ༌ དེན༌ མ༌ཤེས༌ཤིག༌, ཅིའ༌ཟེར༌ན༌ ཏེ༌ཙོགས༌སི༌ སྡིག༌པ༌ ཅོ༌ཁན༌ ཁའ༌མི༌ཉན༌གུན༌ནི༌ཀ༌ དཀོན༌མཆོག༌གི༌ ཐུགས༌སྲོ༌ བབས༌ས༌ནོག༌།
EPH 5:7 ཏེ༌བོའེ༌ཕིའ༌ ཏེ༌ཙོགས༌སི༌ མི༌གུན༌ ཉམ༌པོ༌ དྲེས༌ མ༌དྲེས༌།
EPH 5:8 སྐབས༌ཤིག༌ག༌ ཁྱོ༌ཞ༌གུན༌ མུན༌གྲིག༌གི༌ གངས༌ཏེ༌ ཡོད༌པིན༌, ཨིན༌ནའང༌ དག༌ས༌ གཙོ༌བོའེ༌ ནང༌ང༌ ཨིན༌ཅེས༌པོའེ༌ ཁྱོ༌ཞ༌ འོད༌དི༌ གངས༌ཏེ༌ ཨིན༌ནོག༌། ཏེན༌ན༌བོའེ༌ཕིའ༌ འོད༌དི༌ མི༌གུན༌ ཙོགས༌ལ༌ མི༌ཚེ༌ ཕུད༌ཤིག༌།
EPH 5:9 ཏེ༌ འོད༌དི༌ ཟང༌པོ༌, ཀྲང༌པོ༌ དང༌ དེན༌བ༌ བྲས༌བུ༌གུན༌ ཅིག༌པོ༌ སྨིན༌ན༌ནོག༌།
EPH 5:10 གཙོ༌བོ༌ ཐུགས༌ཐད༌ད༌ ཛད༌ཁན༌གུན༌ ཙལ༌ཅེས༌སི༌ རྩོན༌གྲུས༌ ཅོ༌ཤིག༌།
EPH 5:11 མུན༌ནག༌གི༌ ལས༌ བྲས༌བུ༌ མ༌ཆགས༌ཁན༌གུན༌ནི༌ ནང༌ང༌ མ༌དྲེས༌ཤིག༌, ཨིན༌ནའང༌ གྱོད༌པ༌ ཅོ༌ཅེས༌སི༌ ཕིའ༌ ཁོང༌གུན༌ནི༌ སྐྱོན༌གུན༌ སྟོན༌ཤིག༌།
EPH 5:12 ཁོང༌གུན༌ནི༌ སངས༌ཏེ༌ སྡིག༌པའེ༌ ལས༌ ཅོ༌ཁན༌གུན༌ནི༌ སྐོར༌ལ༌ སྤེ༌ར༌ ཏང༌ཅེས༌པོ༌ ཁོ༌རའང༌, ཁྲེལ༌བ༌ཞིག༌ ཨིན༌ནོག༌།
EPH 5:13 ཨིན༌ནའང༌ འོད༌དི༌ ནང༌ང༌ སྦས༌ཏེ༌ བོར༌ཁན༌ ཚང༌མ༌ སལ༌པོ༌ ཅོས༌ཏེ༌ ཐོང༌ང༌ནོག༌།
EPH 5:14 འོད༌ ཕོག༌ཁན༌ ཚང༌མའེ༌ ལྡངས༌ ཏང༌ང༌ནོག༌། ཏེན༌ན༌བོའེ༌ཕིའ༌ ཏམ༌པའེ༌ སུང༌རབས༌སི༌ ནང༌ང༌ མོལ༌དུག༌, “ཉིད༌ལོག༌ཁན༌གུན༌ ཉིད༌ནེ༌ ལོང༌ཤིག༌། ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལོང༌ཤིག༌། ཡང༌ མ༌ཤི༌ཀའེ༌ ལྡངས༌པོ༌ ཁྱོ༌ཞའེ༌ཀ༌ ཕོག༌ཨིན༌།”
EPH 5:15 ཏེ༌བོའེ༌ཕིའ༌ ཁྱོ༌ཞ༌གུན༌ནི༌ མི༌ཚེ༌ ཕུད༌ཅེས༌སི༌ ནང༌ང༌ ཤང༌ ཅོ༌ཤིག༌། སམ༌བ༌ མེད༌ཁན༌གུན༌ ཙོགས༌ལ༌ མ༌ཕུད༌ད༌, ཤེས༌རབས༌ཅན༌གུན༌ ཙོགས༌ལ༌ མི༌ཚེ༌ ཕུད༌ཤིག༌།
EPH 5:16 སྐབས༌ ཐོབ༌ཁན༌ ཚང༌མ༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ ཀོལ༌ཤིག༌, ཅིའ༌ཟེར༌ན༌ འི༌ ཏུས༌གུན༌ ངན༌པ༌ ཨིན༌ནོག༌།
EPH 5:17 སམ༌བ༌ མེད༌ཁན༌ མ༌གྱུར༌ར༌ གཙོ༌བོའེ༌ ཐུག༌གོངས༌ ཨིན༌ཁན༌བོ༌ ཧ༌གོ༌ཅེས༌སི༌ རྩོན༌གྲུས༌ ཅོ༌ཤིག༌།
EPH 5:18 ར༌རོས༌ཏེ༌ མ༌དུག༌ཤིག༌, ཏེ༌བོའེ༌ སྕོད༌པ༌ ངན༌པའེ༌ ལས༌གུན༌ནི༌ ནང༌ང༌ ཁྲིད༌ད༌ནོག༌, ཨིན༌ནའང༌ ཁྱོ༌ཞ༌གུན༌ནི༌ མི༌ཚེ༌བོ༌ ཏམ༌པའེ༌ ཐུག༌ཉིད༌དི༌ སྐོང༌ཤིག༌།
EPH 5:19 ཁྱོ༌ཞ༌གུན༌ནི༌ ཕྲོའ༌ སུང༌གུར༌, གུར༌མ༌ དང༌ ཆོས༌ལུ༌ གུན༌ ཏང༌ཨིན༌, གཙོ༌བོའེ༌ ཕིའ༌, ཁྱོ༌ཞ༌གུན༌ནི༌ སྙིང༌ངི༌ ནང༌ང༌ སྟོད༌པའེ༌ ལུ༌ སྐོང༌ཤིག༌།
EPH 5:20 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ང༌དང༌ངི༌ ཕིའ༌ ཛད༌ཁན༌ ཚང༌མའ༌, ཏུས༌གྱུན༌ ང༌དང༌ངི༌ ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཤིག༌།
EPH 5:21 ཁྱོ༌ཞ༌གུན༌ནི༌ མ༌ཤི༌ཀ༌ རྩི༌ཝ༌ ཅོ༌ཅེས༌པོའེ༌, ཅིག༌ དང༌ ཅིག༌གི༌ ཝང༌ངི༌ ཡོག༌ག༌ བོར༌ཤིག༌།
EPH 5:22 ན༌མ༌ ཁྱོ༌ཞ༌གུན༌ རང༌ངི༌ མག༌པའེ༌ ཝང༌ངི༌ ཡོག༌ག༌ དུག༌ཤིག༌, ཀ༌ཟུག༌ ཁྱོ༌ཞའེ༌ ཁྱོ༌ཞ༌རང༌ གཙོ༌བོའེ༌ ཝང༌ངི༌ ཡོག༌ག༌ བོར༌རད༌།
EPH 5:23 ཅིའ༌ཟེར༌ན༌ མག༌པ༌ ནི༌ ན༌མའེ༌ གོ༌ ཙོགས༌ ཨིན༌ནོག༌, ཀ༌ཟུག༌ མ༌ཤི༌ཀ༌ ཆོས༌ཚོགས༌སི༌ ཨུ༌ ཨིན༌, ཡང༌ ཁོང༌ ཁོང༌ངི༌ སྐུ༌ཟུགས༌ ཆོས༌ཚོགས༌སི༌ སྐྱབ༌གོན༌ ཨིན༌ནོག༌།
EPH 5:24 མ༌ཤི༌ཀའེ༌, ཆོས༌ཚོགས༌ ཁོང༌རང༌ངི༌ ཝང༌ངི༌ ཡོག༌ག༌ བོར༌ར༌ ཙོགས༌ལ༌ ན༌མ༌གུན༌ནིའང༌, ཁོ༌རང༌གུན༌ ཅི༌ས༌ཐོག༌ནེ༌ ཁོ༌རང༌ངི༌ མག༌པའེ༌ ཝང༌ངི༌ ཡོག༌ག༌ བོར༌གོས༌།
EPH 5:25 མག༌པ༌གུན༌, རང༌ངི༌ ན༌མའ༌ ཅེས༌པ༌ ཅོ༌ཤིག༌, ཀ༌ཟུག༌ མ༌ཤི༌ཀའེ༌ རང༌ངི༌ ཆོས༌ཚོགས༌ལ༌ ཅེས༌པ༌ ཛད༌ཏེ༌, ཁོང༌རང༌ངི༌ ཆོས༌ཚོགས༌ ཏམ༌པ༌ ཅོའ༌ ཛད༌ཅེས༌ལ༌ ཀྲོངས༌ས༌ ཛདས༌, ཡང༌ དཀོན༌མཆོག༌གི༌ བཀའ༌ ཉམ༌པོ༌ ལག༌མོ༌ ཛད༌ཏེ༌ ཆུ༌ ཉམ༌པོ༌ ཁྲུའ༌ ཛདས༌།
EPH 5:27 ཏེ༌གུན༌ ཅོའ༌ ཛདས༌ ཅིའ༌ཞུ༌ན༌ ཁོང༌ངི༌ དག༌ ཡ༌ སུལ༌ ཡ༌ མི༌གྲིག༌ཅེས༌ མེད༌ཁན༌, ཨིན༌ནའང༌ ལྡང༌ཤན༌, ཏམ༌པ༌ དང༌ སྐྱོན༌མེད༌ཁན༌ནི༌ ཆོས༌ཚོགས༌ཤིག༌, ཁོང༌རང༌ང༌ སྟད༌ཅེས༌ ཨིན༌ནོག༌།
EPH 5:28 ཏེན༌ན༌ ཙོགས༌ལ༌, མག༌པ༌གུན༌ནི༌ རང༌ངི༌ ཟུགས༌པོའ༌ ཅེས༌པ༌ ཅོའ༌ ཙོགས༌ལ༌, རང༌ངི༌ ན༌མའ༌ ཅེས༌པ༌ ཅོ༌གོ༌ཤེས༌ ཨིན༌ནོག༌། རང༌ངི༌ ན༌མ༌ ཅེས༌པ༌ ཅོ༌ཁན༌གུན༌ནི༌ ཁོ༌རང༌ང༌ ཅེས༌པ༌ ཅོས༌ཏེ༌ ཨིན༌ནོག༌།
EPH 5:29 ང༌དང༌ སུ༌ཞིག༌གིའང༌ རང༌ངི༌ ཟུགས༌པོའ༌ ནཕ༌རད༌ མ༌ཅོའ༌, ཏེ༌བོའ༌ ཁར༌ཇི༌ སྟེར༌ཏེ༌, སྟ༌སྟོག༌ ཅོའ༌ནོག༌, ཀ༌ཟུག༌ མ༌ཤི༌ཀའེ༌ ཆོས༌ཚོགས༌ལ༌ སྟ༌སྟོག༌ ཛད༌དད༌།
EPH 5:30 ཅིའ༌ཟེར༌ན༌ ང༌དང༌གུན༌ མ༌ཤི༌ཀའེ༌ སྐུ༌ཟུགས༌སི༌ ཡན༌ལག༌ ཨིན༌ནོག༌།
EPH 5:31 ཏམ༌པའེ༌ སུང༌རབས༌སི༌ ནང༌ང༌ མོལ༌དུག༌, “ཏེན༌ན༌བོའེ༌ཕིའ༌ བུ༌ཚ༌ ཁོ༌རང༌ངི༌ ཨ༌བ༌ དང༌ ཨ༌མ༌ནེ༌ བེ༌ཏེ༌ ཁོ༌རང༌ངི༌ ན༌མ༌ ཉམ༌པོ༌ ཛོམ༌མ༌ནོག༌ ཡང༌ ཁོང༌ ཉིས༌ཀོ༌ ཟུགས༌པོ༌ ཅིག༌ གྱུར༌ཨིན༌།”
EPH 5:32 ཏེ༌ སྤེ༌ར༌གུན༌ ཧ༌གོ༌ཅེས༌ལ༌ མའ༌ ཀགས༌པོ༌ ཡོད༌ཏེ༌ ཨིན༌ནོག༌, ཨིན༌ནའང༌ དེན༌བ༌, ངའེ༌ མ༌ཤི༌ཀ༌ དང༌ ཆོས༌ཚོགས༌སི༌ ཐུན༌བྲེལ༌ལི༌ སྐོར༌ལ༌ ཤད༌ཏེ༌ ཨིན༌།
EPH 5:33 དོར༌ལྡུས༌ཏེ༌ ཁྱོ༌ཞ༌ རེ༌རེ༌ རང༌ངི༌ ན༌མའ༌ ཅེས༌པ༌ ཅོ༌གོས༌, ཀ༌ཟུག༌ ཁྱོ༌ཞའེ༌ ཁྱོ༌ཞ༌རང༌གུན༌ལ༌ ཅེས༌པ༌ ཅོའད༌, ཡང༌ ན༌མ༌གུན༌ནི༌ རང༌ངི༌ མག༌པ༌ རྩི༌ཝ༌ ཅོ༌གོས༌།
EPH 6:1 ཕྲུ༌གུ༌གུན༌, ཁྱོ༌ཞའ༌ གཙོ༌བོའེ༌ ཨིན༌ པ༌སང༌, རང༌ངི༌ ཕ༌མའེ༌ ཁའ༌ཉོན༌ཤིག༌, ཅིའ༌ཟེར༌ན༌ ཏེ༌ཟུག༌ ཅོ༌ཅེས༌པོ༌ ཀྲང༌པོ༌བོ༌ ཨིན༌ནོག༌།
EPH 6:2 “ཁྱོ༌ཞ༌གུན༌ནི༌ ཨ༌བ༌ དང༌ ཨ༌མའ༌ རྩི༌ཝ༌ ཅོ༌ཤིག༌།” ཏེ༌བོ༌ ནི༌ དཀོན༌མཆོག༌གི༌ བཀའ༌རྒྱ༌ ཏང༌པོ༌, ཀ༌བོ༌ ཉམ༌པོ༌ “ཁྱོ༌ཞ༌གུན༌ལ༌ ཇིག༌རྟེན༌ནི༌ཀ༌ མི༌ཚེ༌ ཁམ༌ཟང༌ དང༌ ཚེ༌ རིང༌མོའེ༌ ཐོང༌ངོམས༌ ཆེན༌” མོལ༌ཁན༌ནི༌ ཞལ༌ཆད༌པོ༌ ཛདས༌།
EPH 6:4 ཨ༌བ༌གུན༌ནི༌ རང༌ངི༌ ཕྲུ༌གུའ༌ མངས༌ཏེའང༌ ལྡམས༌ཏེ༌ སྲོ༌ ཡོང༌ མ༌ཅུག༌ཤིག༌། ཨིན༌ནའང༌ ཁོང༌གུན༌ལ༌ སྐྱོངས༌ཏེ༌ གཙོ༌བོའེ༌ ལབ༌ཞའེ༌ ནང༌ང༌ ལམ༌ ཟང༌པོའེ༌ཀ༌ ཁྲིད༌ཤིག༌།
EPH 6:5 ཁྱོ༌ཞ༌ ཚེ༌ཡོག༌གུན༌ནི༌ འི༌ ཇིག༌རྟེན༌ནི༌ ནང༌ང༌, ཁྱོ༌ཞ༌རང༌ངི༌ སྤོན༌བོའ༌ རྩི༌ཝ༌ དང༌ ཇིགས༌ ཉམ༌པོ༌ སྙིང༌ནེ༌ ཁའ༌ཉོན༌ཤིག༌, ཀ༌ཟུག༌ ཁྱོ༌ཞ༌གུན༌ནི༌ མ༌ཤི༌ཀའེ༌ ཁའ༌ཉན༌ནད༌།
EPH 6:6 ཁོང༌གུན༌ ཐད༌ཅུག༌ཅེས༌ལ༌, ཁོང༌གུན༌ནི༌ ཁྱོ༌ཞའ༌ ལྟ༌ ཟ༌ནེ༌, ཅིག༌པོ༌ ཁའ༌ མ༌ཉན༌ནའ༌, མ༌ཤི༌ཀའེ༌ ཚེ༌ཡོག༌ ཙོགས༌ལ༌ སྙིང༌ནེ༌ དཀོན༌མཆོག༌གི༌ ཐུག༌གོངས༌ ཅོ༌ཨིན༌, ཞབས༌ཏོག༌ ཞུ༌ཤིག༌།
EPH 6:7 མི༌གུན༌ནི༌ ཕིའ༌ མན༌པ༌, གཙོ༌བོ༌ མ༌ཤི༌ཀའེ༌ ཕིའ༌ ཨིན༌ སམས༌ཏེ༌ ཞབས༌ཏོག༌ སྙིང༌ནེ༌ གའ༌མོ༌ ཉམ༌པོ༌ ཞུ༌ཤིག༌།
EPH 6:8 ཨིད༌ཏུ༌ ཅོ༌ཤིག༌, ཚེ༌ཡོག༌ ཨིན༌གྲོ༌ ཡ༌ རང༌ཝང༌ཅན༌, ལས༌ ཟང༌པོ༌ ཅོ༌ཁན༌ ང༌དང༌ རེ༌རེའ༌ གཙོ༌བོའེ༌ སོལ༌རས༌ སལ༌ལ༌ ཛད༌ཨིན༌།
EPH 6:9 ཏེན༌ན༌ ཙོགས༌ལ༌ ཁྱོ༌ཞའ༌ སྤོན༌བོ༌གུན༌ནི༌, རང༌ངི༌ ཚེ༌ཡོག༌གུན༌ལ༌ གྱལ༌ལ༌ ཅོ༌ཤིག༌། ཁོང༌གུན༌ལ༌ ཇིགས༌ནང༌ མ༌སྟན༌ཤིག༌, ཅིའ༌ཟེར༌ན༌ ནམ༌ཁའེ༌ ནང༌ང༌ མ༌ཤི༌ཀ༌ ནི༌, ཁྱོ༌ཞ༌ དང༌ ཁོང༌ ཉིས༌ཀོའེ༌ སྤོན༌བོ༌ ཞུགས༌ཏེ༌ ཨིན༌ཁན༌ ཡང༌ ཁོང༌ངི༌ སུ༌ཞིག༌གའང༌ ཆོགས༌ མ༌ཛད༌ཁན༌བོ༌, ཁྱོ༌ཞའ༌ གྱུས༌ཨིན༌ནོག༌།
EPH 6:10 སྟིང༌ཇུག༌གི༌ ཁ༌དའ༌, ཁྱོ༌ཞ༌གུན༌ གཙོ༌བོ༌ དང༌ ཁོང༌ངི༌ ཧ༌ལས༌ཤེས༌སི༌ སྟོབས༌སི༌ ནང༌ང༌ ཤེད༌ཅན༌ གྱུར༌ཤིག༌།
EPH 6:11 ཤེ༌ཏན༌ནི༌ ཅུས༌ངན༌གུན༌ནི༌ཀ༌ ནོལ༌ ཉན༌ཅེས༌སི༌ ཕིའ༌, ཁྱོ༌ཞའེ༌ དཀོན༌མཆོག༌གི༌ སལ༌ལ༌ ཛད༌ཁན༌ནི༌ མག༌ཆ༌ ཚང༌མ༌ གོན༌ཤིག༌།
EPH 6:12 ཅིའ༌ཟེར༌ན༌ ང༌དང༌ངི༌, མི༌གུན༌ནི༌ གྱབ༌གལ༌ལ༌ མན༌པ༌, མ༌ཐོང༌ཁན༌ནི༌ ཇིག༌རྟེན༌ནི༌ ངན༌པ༌ སེམས༌ཉིད༌དི༌ ཝང༌སྲུལ༌པ༌གུན༌ནི༌ གྱབ༌གལ༌ལ༌ ནོལ༌ཨིན༌ ཨིན༌ནོག༌, ཀ༌གུན༌ འི༌ ཏུས༌ མུན༌གྲིག༌གི༌ ཝང༌སྲུལ༌པ༌, ཝང༌ ཡོད༌ཁན༌ དང༌ བར༌སྣང༌ངི༌ ངན༌པ༌ ཝང༌ གུན༌ ཨིན༌ནོག༌།
EPH 6:13 ཏེན༌ན༌བོའེ༌ཕིའ༌ ངན༌པའེ༌ ཞག༌པོ༌ ལེབ༌ ཟ༌ནེ༌, ཁྱོ༌ཞ༌གུན༌ནི༌ ནོལ༌ ཉན༌ཅེས༌སི༌ ཕིའ༌, དཀོན༌མཆོག༌གི༌ སལ༌ཁན༌ནི༌ ནོལ༌ཅེས༌སི༌ མག༌ཆ༌ ཚང༌མ༌ གོན༌ཤིག༌། ཏེ༌ནེ༌ མག༌གི༌ སྟིང༌ནེའང༌ ཁྱོ༌ཞ༌གུན༌ རང༌རང༌ངི༌ ནས༌སའེ༌ཀ༌ སྟན༌པོ༌ ལངས༌ཏེ༌ ལུས༌ཨིན༌།
EPH 6:14 རང༌རང༌ངི༌ ནས༌ས༌བོ༌ སྟན༌པོ༌ ཟུམས༌ཏེ༌ དཀོན༌མཆོག༌གི༌ བཀའེ༌ དེན༌བའེ༌ སྐྱེ༌རག༌པོ༌ རང༌ངི༌ སྐྱེད༌པའེ༌ཀ༌ སྲིལ༌ཤིག༌, ཡང༌ མི༌ཚེ༌ ཀྲང༌པོ༌ ཕུད༌ཅེས༌སི༌ མག༌ཆ༌བོ༌ ཁྱོ༌ཞ༌རང༌ངི༌ ཀྲང༌ངི༌ཀ༌ གོན༌ཤིག༌།
EPH 6:15 ཁྱོ༌ཞ༌གུན༌ནི༌ རྐང༌པའེ༌ཀ༌ གའ༌མོའེ༌ ནས༌ཚུལ༌ལི༌ ཞི༌དེ༌ པ༌བུ༌བོ༌ གོན༌ཏེ༌ མག༌གི༌ ཕིའ༌ གྲལ༌གྲིག༌ ཅོས༌།
EPH 6:16 ཏེ༌གུན༌ནི༌ཀ༌ ནན༌མའ༌, ཤེ༌ཏན༌ནི༌ མེ༌ཅན༌ནི༌ དའ༌གུན༌ སད༌ཉན༌ཅེས༌སི༌ ཕིའ༌, ཁྱོ༌ཞ༌གུན༌ནི༌ ལག༌པའེ༌ ནང༌ང༌ ཏད༌པའེ༌ ཕ༌ལི༌བོ༌ ཟུམ༌ཤིག༌།
EPH 6:17 ཁྱོ༌ཞ༌གུན༌ནི༌ གོའེ༌ཀ༌ ཐར༌པའེ༌ མག༌གི༌ ཏི༌བི༌བོ༌ གོན༌ཤིག༌། ཡང༌ ཏམ༌པའེ༌ ཐུག༌ཉིད༌དི༌ ར༌འི༌བོ༌ ཁུར༌ཤིག༌, ཀ༌བོ༌ དཀོན༌མཆོག༌གི༌ བཀའ༌ ཨིན༌ནོག༌།
EPH 6:18 ཁྱོ༌ཞ༌གུན༌ནི༌ ཏམ༌པའེ༌ ཐུག༌ཉིད༌དི༌ ནང༌ང༌ ཏུས༌གྱུན༌ ཞུ༌ཝ༌ དང༌ མོས༌ལམ༌ སྣ༌ཚོགས༌ ཚང༌མ༌ ཕུལ༌ཤིག༌། ཤང༌ ཅོས༌ཏེ༌ དཀོན༌མཆོག༌གི༌ ཏམ༌པ༌ མི༌ ཚང༌མའེ༌ ཕིའ༌ མོས༌ལམ༌ ཞུ༌ཅེས༌ མ༌ནེ༌ མ༌ཕང༌ཤིག༌།
EPH 6:19 ངའ༌ ཟེར༌ཅེས༌སི༌ སྐབས༌ ཐོབ༌ ཟ༌ནེ༌, ཇིགས༌ནང༌ མེད༌པ༌, གའ༌མོའེ༌ ནས༌ཚུལ༌ལི༌ སང༌ཝའེ༌ སྐོར༌བོ༌ མ༌ སྤོས༌པ༌ ཉམ༌པོ༌ ཤད༌ ཐུབ༌ཅེས༌ལ༌ ངའེ༌ ཕིའང༌ མོས༌ལམ༌ ཞུས༌ཤིག༌།
EPH 6:20 ངའ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌ མ༌ཤི༌ཀའེ༌ སྐུ༌ཚབས༌ ཨིན༌ཅེས༌པོའེ༌, ཙོན༌ཁང༌ང༌ ཀགས༌། ཏེན༌ན༌བོའེ༌ཕིའ༌ ངའེ༌ སེམ༌སྟོབས༌ ཉམ༌པོ༌ གའ༌མོའེ༌ ནས༌ཚུལ༌བོ༌ ཤད༌ ཐུབ༌ཅེས༌ལ༌, མོས༌ལམ༌ ཞུས༌ཤིག༌, ཀ༌བོ༌ ངའེ༌ ཅོ༌གོས༌།
EPH 6:21 ཏི༌ཁི༌ཀུས༌, མ༌ཤི༌ཀ༌པའེ༌ སྤུན༌ མ༌ ཅེས༌པ༌ དང༌ གཙོ༌བོའེ༌ ཞབས༌ཏོག༌པ༌ མ༌ ཨིད༌ཤེས༌ཅན༌ཞིག༌ ཨིན༌། ཁོའེ༌ ཁྱོ༌ཞ༌གུན༌ལ༌ ངའེ༌ ནས༌ལུག༌ དང༌ ངའེ༌ ཅོ༌ཨིན༌ ཡོད༌ཁན༌ ཚང༌མའེ༌ སྐོར༌ལ༌ ཞིབ༌སལ༌ ཅོས༌ཏེ༌ ཤད༌ཨིན༌།
EPH 6:22 ང༌ཞའེ༌ ནས༌ལུག༌གུན༌ནི༌ སྐོར༌ལ༌ ཧ༌གོ༌ ཅུགས༌ཅེས༌ དང༌ ཁྱོ༌ཞ༌གུན༌ནི༌ སེམས༌ལ༌ སྤོས༌པ༌ སྐྱེ༌ཅུག༌ཅེས༌སི༌ ཕིའ༌, ངའེ༌ ཁོ༌ ཁྱོ༌ཞའ༌ ཡོད༌ས༌ ཀལ༌ལད༌།
EPH 6:23 དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌, ཁྱོ༌ཞའ༌ མ༌ཤི༌ཀ༌པ༌ སྤུན༌གུན༌ལ༌ ཞི༌དེ༌ ཡང༌ ཏད༌པ༌ ཉམ༌པོ༌ ཅམས༌པ༌ སལ༌ཤིག༌།
EPH 6:24 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ཐའ༌མེད༌པའེ༌ ཅམས༌པ༌ ཅོ༌ཁན༌གུན༌ལ༌ དཀོན༌མཆོག༌གི༌ ཐུག༌རྗེ༌ སལ༌ལ༌ ཛད༌ཤིག༌།
PHI 1:1 འི༌ ཨི༌གེ༌བོ༌ ཡེ༌ཤུ༌ མ༌ཤི༌ཀའེ༌ ཞབས༌ཏོག༌པ༌ པ༌འུ༌ལུ༌ དང༌ ཏི༌མོ༌ཐི༌ ཆོགས༌ནེ༌ ཨིན༌། ངའེ༌ ཕི༌ལི༌པི༌ གྲོང༌ཁྱེར༌རི༌ ནང༌ང༌ མ༌ཤི༌ཀ༌ ཡེ༌ཤུའི༌ ཨིན༌ཁན༌ནི༌ མི༌ ཏམ༌པ༌གུན༌, ཆོས༌ཚོགས༌སི༌ འུ༌སྐྱོང༌གུན༌ དང༌ ཞབས༌ཏོག༌ ཞུ༌ཁན༌གུན༌ལ༌ བྲིའད༌།
PHI 1:2 ང༌དང༌ངི༌ དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ལ༌ ཛད༌ཅེས༌ལ༌ ང༌ཞའེ༌ མོས༌ལམ༌ ཞུའད༌།
PHI 1:3 ཁྱོ༌ཞ༌གུན༌ ཨིད༌ཏུ༌ ཅོ༌ ཟ༌ནེ༌, ངའེ༌ ང༌རང༌ངི༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
PHI 1:4 ཡང༌ ཏུས༌གྱུན༌ ངའེ༌ ཁྱོ༌ཞ༌གུན༌ནི༌ ཕིའ༌ ཐད༌པོ༌ ཉམ༌པོ༌ མོས༌ལམ༌ ཕུལ༌ལད༌།
PHI 1:5 ཅིའ༌ཟེར༌ན༌ ཁྱོ༌ཞ༌གུན༌ནི༌ ཏད༌པ༌ ཅོས༌པ༌ནེ༌ ཕར༌ལ༌ དག༌ས༌ ཙུགས༌པ༌, གའ༌མོའེ༌ ནས༌ཚུལ༌ ཕེལ༌ཅེས༌སི༌ ཆག༌ལས༌སི༌ ནང༌ང༌ ངའ༌ རོགས༌ ཅོ༌ཨིན༌ཞིག༌ ཨིན༌།
PHI 1:6 ཡང༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ འི༌ ཆག༌ལས༌ ཟང༌པོ༌བོ༌ གོ༌ཟུག༌ ཛད༌ཁན༌ནི༌ དཀོན༌མཆོག༌གི༌, ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཞག༌ག༌, ཏེ༌ ཆག༌ལས༌པོ༌ དྲན༌དྲ༌ གྲུབ༌ ཅུག༌ག༌ ཛད༌ཅེས༌པོ༌ ང༌ ལོ༌ཁྱེལ༌ རག༌།
PHI 1:7 ཁྱོ༌ཞའ༌ ངའེ༌ སྙིང༌ངི༌ ནང༌ང༌ ལུས༌ པ༌སང༌, ངའེ༌ ཁྱོ༌ཞའ༌ ཚང༌མའེ༌ སྐོར༌ལ༌ ཏེ༌ཟུག༌ སམ༌ཅེས༌པོ༌ རང༌ཞིན༌ ཨིན༌ནོག༌། ང༌ ཙོན༌ནི༌ ནང༌ང༌ ཡ༌ ཁྲིམས༌ཁུང༌ང༌ གའ༌མོའེ༌ ནས༌ཚུལ༌ སྐྱོབ༌ཨིན༌, ཡང༌ ཏེ༌བོ༌ དེན༌བ༌ ཨིན༌ཁན༌བོ༌ སྟན༌ཨིན༌ ཡོད༌གྲོ༌, དཀོན༌མཆོག༌གི༌ ཐུག༌རྗེ༌ གྱུད༌ཏེ༌ ཁྱོ༌ཞ༌གུན༌ནའང༌ ང༌ ཉམ༌པོ༌ ཁོང༌ངི༌ ཞབས༌ཏོག༌གི༌ ནང༌ང༌ དྲེས༌ཏེ༌ ཨིན༌ནོག༌།
PHI 1:8 ངེའང༌ ཁྱོ༌ཞའ༌, མ༌ཤི༌ཀ༌ ཡེ༌ཤུ༌ ཙོགས༌ལ༌ ཅམས༌པ༌ ཅོ༌ཅེས༌པོའེ༌, ངའ༌ ཁྱོ༌ཞའ༌ ཚང༌མ༌ ཡང༌སྐྱར༌ ཐུག༌ཅེས༌ལ༌ རིངས༌ཨིན༌ ཡོད༌ཁན༌བོའེ༌, སྤང༌པོ༌ དཀོན༌མཆོག༌ ཨིན༌།
PHI 1:9 ངའེ༌ མོས༌ལམ༌ ཞུའད༌, དཀོན༌མཆོག༌གི༌ ཁྱོ༌ཞའ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ ནང༌ང༌ ཤེས༌རབས༌ དང༌ ཧ༌གོ༌ མང༌ང༌ སལ༌ལ༌ ཛད༌ཤིག༌།
PHI 1:10 མ༌ཤི༌ཀ༌ ལོགས༌ཏེ༌ ཕེབ༌ཅེས༌སི༌ ཏུས༌ ཚག༌པ༌, སེམས༌ ལག༌མོ༌ དང༌ ནོངས༌མེད༌ ལུས༌ཤེས༌སི༌ ཕིའ༌, ཚང༌མའེ༌སང༌ ཁག༌ཅན༌ ཅི༌ ཨིན༌ཁན༌བོ༌ ཁྱོ༌ཞའ༌ གྱུས༌ ཆ༌ཅེས༌ལ༌, ངའེ༌ དོད༌པ༌ ཅོའད༌།
PHI 1:11 ཡེ༌ཤུ༌ མ༌ཤི༌ཀ༌ གྱུད༌ཏེ༌ ཡོང༌ཁན༌ནི༌ ཀྲང༌པོ༌ བྲས༌བུ༌ ཉམ༌པོ༌ ཁྱོ༌ཞའེ༌ རང༌ངི༌ མི༌ཚེའེ༌ སྐོང༌ཤིག༌, ཏེ༌བོའེ༌ དཀོན༌མཆོག༌ག༌ སྤལ༌ དང༌ སྟོད༌པ༌ ཁྱོང༌ང༌ནོག༌།
PHI 1:12 སྤུན༌གུན༌, ངའེ༌ སམ༌མ༌རག༌ ཁྱོ༌ཞ༌གུན༌ལ༌ འི༌བོ༌ གྱུས༌ ཆ༌གོས༌། ངའ༌ ཇུང༌ཁན༌ ཚང༌མའེ༌ གའ༌མོའེ༌ ནས༌ཚུལ༌ལི༌ ཡར༌གྱས༌སི༌ ནང༌ང༌ རོགས༌ ཅོས༌ཏེ༌ ཨིན༌།
PHI 1:13 གྱལ༌པོའེ༌ ཁར༌རི༌ ནང༌ང༌ ཡོད༌ཁན༌ནི༌ མག༌མི༌ དང༌ ཞན༌མི༌ ཚང༌མའ༌, ཡེ༌ཤུའ༌ ཞབས༌ཏོག༌ ཞུ༌ཅེས༌པོའེ༌, ངའ༌ ཙོན༌ལ༌ ཀགས༌ཁན༌བོ༌ ཧ༌གོ༌ཏེ༌ ཨིན༌ནོག༌།
PHI 1:14 ཡང༌ ང༌ ཙོན༌ལ༌ ཀག༌ཅེས༌པོའེ༌, གཙོ༌བོ༌ ཡེ༌ཤུའི༌ཀ༌ ཏད༌པ༌ བོར༌ཁན༌ སྤུན༌ མང༌པོ༌ཞིག༌གའང༌ སེམ༌སྟོབས༌ སྐྱེས༌ཏེ༌, ཧམ༌པ༌ ཉམ༌པོ༌ ཇིག༌ཤེས༌ མེད༌པ༌, དཀོན༌མཆོག༌གི༌ བཀའ༌ ཞན༌མ༌གུན༌ལ༌ ཤད༌ཨིན༌ ཨིན༌ནོག༌།
PHI 1:15 ཁ༌ཅིག༌གི༌ ངའེ༌ཀ༌ ཚིག༌ཅེས༌ ཡོངས༌ཏེ༌ མིང༌ཅན༌ གྱུར༌ཅེས༌སི༌ དོད༌པ༌ བོར༌ཏེ༌ མ༌ཤི༌ཀའེ༌ སྐོར༌ལ༌ ཤད༌ཅེས༌པོ༌ དེན༌བ༌ ཨིན༌ནོག༌། ཨིན༌ནའང༌ ཞན༌ ཁ༌ཅིག༌གི༌ མ༌ཤི༌ཀའེ༌ སྐོར༌ལ༌ སེམས༌ ཟང༌པོའེ༌ ཐོག༌ནེ༌ ཤད༌ཨིན༌ ཨིན༌ནོག༌།
PHI 1:16 ཡ༌ཤའེ༌ ནང༌ང༌ མ༌ཤི༌ཀའེ༌ སྐོར༌ལ༌ ཤད༌ཁན༌གུན༌ལ༌, དཀོན༌མཆོག༌གི༌ གའ༌མོའེ༌ ནས༌ཚུལ༌ སྐྱོབ༌ཅེས༌ལ༌ ང༌ འི༌རུ༌ བོར༌ར༌ ཛད༌ཁན༌བོ༌ ཧ༌གོ༌ཏེ༌ ཨིན༌ནོག༌།
PHI 1:17 ཨིན༌ནའང༌ ངའེ༌ཀ༌ ཚིག༌ཅེས༌ ཡང༌ མིང༌ཅན༌ གྱུར༌དོད༌ ཡོད༌ཏེ༌ མ༌ཤི༌ཀའེ༌ སྐོར༌ལ༌ ཤད༌ཁན༌གུན༌ནི༌ སེམས༌ ཟང༌པོའེ༌ ཐོག༌ནེ༌ མ༌ཤད༌ད༌, ང༌ ཙོན༌ནི༌ ནང༌ང༌ ཡོད༌ཏུས༌ ནགས༌ མང༌ང༌ ཐོང༌ཅུག༌ཅེས༌སི༌ ཕིའ༌ ཤད༌ཨིན༌ ཨིན༌ནོག༌།
PHI 1:18 གྱུན༌ཚན༌བོ༌ ཟང༌པོ༌ ཨིན༌གྲོ༌ ཡ༌ ངན༌པ༌, ཏེ༌བོ༌ ཁག༌ཅན༌ཞིག༌ མ༌ནོག༌, ཁག༌ཅན༌བོ༌ ནི༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ཨིན༌ ཡོད༌ཁན༌བོ༌ ཨིན༌ནོག༌, ཏེན༌ན༌བོའེ༌ཕིའ༌ ང༌ ཐད༌པོ༌ ཨིན༌། འོ༌ན༌ ངའེ༌ ཏ༌རུང༌ངའང༌ ཐད༌པོ༌ ཅོ༌ཨིན༌།
PHI 1:19 ཁྱོ༌ཞ༌གུན༌ནི༌ མོས༌ལམ༌ དང༌ ཡེ༌ཤུ༌ མ༌ཤི༌ཀའེ༌ ཐུག༌ཉིད༌དི༌ རོགས༌ གྱུད༌ཏེ༌, ངའ༌ ཏེ༌ རྡུག༌ངལ༌གུན༌ནེ༌ ཐར༌པ༌ ཐོབ༌ཅེས༌པོ༌ ང༌ གྱུས༌ཡོད༌།
PHI 1:20 ངའེ༌ སེམས༌སི༌ དོད༌པ༌ དང༌ རེ༌ཝ༌ ཆེན༌མོ༌བོ༌ མ༌ཤི༌ཀའེ༌ སྐོར༌ལ༌ ཤད༌ཅེས༌ལ༌ ཁྲེལ༌ མ༌ཁྲེལ༌ལ༌ སེམ༌སྟོབས༌ ཉམ༌པོ༌ ཤད༌ཅེས༌པོ༌ ཨིན༌, ཀ༌ཟུག༌ ངའེ༌ ཅོ༌ཨིན༌ ཡོངས༌ཏེ༌ ཨིན༌། ཏ༌ ང༌ ཤི༌ན༌ ཡ༌ ང༌ སོན༌ནའང༌, ང༌རང༌ངི༌ མི༌ཚེའེ༌ ནང༌ང༌ མ༌ཤི༌ཀ༌ རྩི༌ཝ༌ ཁྱོང༌ཅེས༌པོ༌ ངའེ༌ དོད༌པ༌ ཨིན༌།
PHI 1:21 ངའ༌ སོན༌ཏེའ༌ དུག༌ཅེས༌པོ༌ ནི༌ མ༌ཤི༌ཀའ༌ རྩི༌ཝ༌ ཁྱོང༌ཅེས༌སི༌ ཕིའ༌ ཨིན༌, ཡང༌ ཤི༌ཅེས༌པོ༌ ནི༌ ངའེ༌ ཕིའ༌ ཏེ༌སང༌ མང༌ང༌ ཕན༌ཐོགས༌ཅན༌ཞིག༌ ཨིན༌, ཅིའ༌ཟེར༌ན༌ ང༌ ཁོང༌ ཉམ༌པོ༌ ལུས༌ཨིན༌།
PHI 1:22 ང༌ འི༌ ཟུགས༌པོའེ༌ ནང༌ང༌ དུག༌ན༌, ངའེ༌ མ༌ཤི༌ཀའེ༌ ཕིའ༌ བྲས༌བུ༌ སྨིན༌ ཅུག༌ཨིན༌, ཨིན༌ནའང༌ ང༌ ཅའང༌ གྱུས༌མེད༌ ཏེ༌ ཉིས༌ཀོའེ༌ ནང༌ནེ༌ ཀ༌བོ༌ གྱལ༌ལ༌ ཨིན༌།
PHI 1:23 ངའེ༌ སེམས༌སི༌ ནང༌ང༌ ཐེ༌ཚོམས༌ རག༌, ཏེ༌ ཉིས༌ཀོའེ༌ ནང༌ནེ༌ ཀ༌བོ༌ ངའེ༌ ལྡམ༌ཨིན༌། ང༌ འི༌ ཇིག༌རྟེན༌བོ༌ ཕངས༌ཏེ༌ མ༌ཤི༌ཀ༌ ཉམ༌པོ༌ ནམ༌ཁའེ༌ ནང༌ང༌ ལུས༌ཤེས༌སི༌ དོད༌པ༌ རག༌, ཀ༌བོ༌ ངའེ༌ ཕིའ༌ མང༌ང༌ གྱལ༌ལ༌ཞིག༌ ཨིན༌།
PHI 1:24 ཨིན༌ནའང༌ ང༌ ཏ༌རུང༌ངའང༌ ཁྱོ༌ཞ༌གུན༌ ཉམ༌པོ༌ ལུས༌ཤེས༌པོ༌, ཁྱོ༌ཞ༌གུན༌ནི༌ ཕིའ༌ མང༌ང༌ ཕན༌ཐོགས༌ ཆེའ༌ ཨིན༌ནོག༌།
PHI 1:25 ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ཅེས༌ དང༌ ཐད༌པོ༌ ཅོ༌ཅེས༌སི༌ ཕིའ༌, ང༌ ཁྱོ༌ཞ༌གུན༌ ཉམ༌པོ༌ དུག༌ཅེས༌ ཡང༌ འི༌ ཟུགས༌པོའེ༌ ནང༌ང༌ ཏ༌རུང༌ངའང༌ ལུས༌ཤེས༌པོ༌, ངའ༌ ཐེ༌ཚོམས༌ མེད༌པ༌ གྱུས༌ཡོད༌།
PHI 1:26 ངའ༌ ཡོང༌ང༌ཅིག༌, ཁྱོ༌ཞ༌གུན༌ནི༌ མ༌ཤི༌ཀ༌ ཡེ༌ཤུའ༌ མང༌ང༌ སྟོད༌པ༌ ཕུལ༌ཨིན༌, ཅིའ༌ཟེར༌ན༌ ཁོང༌ངི༌ ང༌ ཁྱོ༌ཞ༌གུན༌ནི༌ཀ༌ ལོགས༌ཏེ༌ ཁྱོང༌ང༌ ཛདས༌།
PHI 1:27 ཚང༌མའེ༌སང༌ ཁག༌ཅན༌བོ༌, ཁྱོ༌ཞ༌གུན༌ནི༌ མ༌ཤི༌ཀའེ༌ གའ༌མོའེ༌ ནས༌ཚུལ༌ལི༌ ཕིའ༌ འོས༌པ༌ཅན༌ནི༌ མི༌ཚེ༌ཞིག༌ ཕུད༌གོ༌ཤེས༌ ཨིན༌ནོག༌། ང༌ ཁྱོ༌ཞ༌གུན༌ ཡོད༌ས༌ ཡོངས༌ཏེ༌ ཐོང༌ཨིན༌ ཡ༌ ང༌ ཁྱོ༌ཞ༌གུན༌ནི༌ སྐོར༌ལ༌ ཚོར༌ཨིན༌, གའ༌མོའེ༌ ནས༌ཚུལ༌ལི༌ ལོན༌བོའེ༌ ཕིའ༌, ཁྱོ༌ཞ༌གུན༌ སེམས༌སི༌ ནང༌ང༌ ཅིག༌གྲིལ༌ སོང༌ཏེ༌ མག༌མི༌ ཅིག༌གི༌ ཚུལ༌ལ༌ ནོལ༌ཨིན༌ དུག༌ཅེས༌པོ༌ ང༌ གྱུས༌ཆེན༌།
PHI 1:28 ཅི༌ཚང༌མའེ༌ ནང༌ང༌ གྱབ༌གལ༌ ཅོ༌ཁན༌གུན༌ནི༌ ཀ༌ནེ༌ ཇིགས༌ མ༌ཇིགས༌། ཁོང༌གུན༌ལ༌ མི༌ཇིགས༌ཤེས༌པོ༌ ནི༌ ཁོང༌གུན༌ མེད༌ཁན༌ ཅོའ༌ ཛད༌ཅེས༌, ཡང༌ ཁྱོ༌ཞ༌གུན༌ སྐྱོབ༌བ༌ ཛད༌ཅེས༌སི༌ སྟགས༌ཤིག༌ ཨིན༌ནོག༌, དཀོན༌མཆོག༌གི༌ ཏེ༌ ཚང༌མ༌ ཇུང༌ ཅུག༌ག༌ ཛད༌ཨིན༌།
PHI 1:29 དཀོན༌མཆོག༌གི༌ ཁྱོ༌ཞ༌གུན༌ལ༌ མ༌ཤི༌ཀ༌ ཏད༌པ༌ ཅོ༌ཅེས༌ ཅིག༌པོ༌ མན༌པ༌, ཁོང༌ངི༌ ཕིའ༌ ནགས༌བར༌དོ༌ ཐོང༌ཅེས༌སི༌ རྩི༌ཝ༌བོ༌ སལ༌ལ༌ ཛད༌ཏེ༌ ཨིན༌།
PHI 1:30 ཁྱོ༌ཞ༌གུན༌ནའང༌ ངའ༌ ཇུངས༌ཁན༌ནི༌ ནགས༌ ཙོགས༌ ཐོང༌ཨིན༌ ཨིན༌ནོག༌, ངའ༌ ནགས༌ ཐོང༌ཁན༌བོ༌ ཁྱོ༌ཞ༌གུན༌ནི༌ ཐོང༌ཏེ༌ ཨིན༌ནོག༌, ཡང༌ ངའ༌ ཏ༌རུང༌ངའང༌ ཐོང༌ཨིན༌ ཡོད༌ཁན༌བོ༌ ཁྱོ༌ཞའེ༌ ཚོར༌ཨིན༌ ཨིན༌ནོག༌།
PHI 2:1 མ༌ཤི༌ཀའེ༌ ཨིན༌ཅེས༌པོའེ༌ ཁྱོ༌ཞ༌གུན༌ལ༌ སྤོས༌པ༌ མ༌ཐོབ༌བ༌? ཅི༌ མ༌ཤི༌ཀའེ༌ ཅམས༌པའེ༌ ནང༌ང༌ སེམས༌དེ༌ མེ༌རག༌ག༌? ཅི༌ ཁྱོ༌ཞ༌གུན༌ དཀོན༌མཆོག༌གི༌ ཐུག༌ཉིད༌ ཉམ༌པོ༌ བྲེལ༌ཏེ༌ མེད༌ད༌? ཅི༌ ཁྱོ༌ཞ༌གུན༌ལ༌ མ༌ཤི༌ཀའེ༌ ཡ༌ཤ༌ དང༌ སྙིང༌རྗེ༌ མ༌ཐོབ༌བ༌?
PHI 2:2 ཀལ༌ཏེས༌ ཁྱོ༌ཞའེ༌ ནང༌ང༌ ཏེ༌ ཚང༌མ༌ ཡོད༌ན༌, སྙིང༌ ཅིག༌ གྱུར༌ཏེ༌, ཅིག༌ དང༌ ཅིག༌ག༌ ཅམས༌པ༌ ཅོས༌ཏེ༌, སེམས༌ དང༌ དོད༌པའེ༌ ནང༌ང༌ ཅིག༌ གྱུར༌ཏེ༌ ངའེ༌ ཐད༌པོ༌གུན༌ དྲན༌དྲ༌ གྲུབ༌ཅུག༌ཤིག༌།
PHI 2:3 ཅི༌ཞིག༌གའང༌ རང༌དོད༌ ཡ༌ ཞན༌མའེ༌ རྩི༌ཝ༌ ཐོབ༌ཅེས༌སི༌ རེ༌ཝའེ༌ ནང༌ང༌ མ༌ཅོའ༌, སེམས༌ པས༌མོ༌ ཉམ༌པོ༌ ཞན༌མ༌ རང༌ངི༌ སང༌ མང༌ང༌ རིན༌ཅན༌ སམས༌ཏེ༌ ཅོ༌ཤིག༌།
PHI 2:4 ཁྱོ༌ཞའ༌ རེ༌རེ༌ རང༌དོན༌ ཅིག༌པོ༌ མ༌ཅོའ༌, ཞན༌མའེ༌ ཕན༌ཐོགས༌སི༌ ཕིའང༌ སམ༌བ༌ ཏོང༌ཤིག༌།
PHI 2:5 ཁྱོ༌ཞ༌གུན༌ནི༌ སམ༌ཚུལ༌ མ༌ཤི༌ཀ༌ ཡེ༌ཤུའི༌ ཙོགས༌ ཡོང༌གོ༌ཤེས༌ ཨིན༌ནོག༌།
PHI 2:6 ཞན༌ ཁོང༌ ཁོང༌རང༌ དཀོན༌མཆོག༌ ཨིན༌ཏེའང༌, ཁོང༌ངི༌ དཀོན༌མཆོག༌ དྲན༌དྲ༌ ཨིན༌ཁན༌ནི༌ ཀོ༌ས༌བོ༌ ཐམས༌ཏེ༌ བོར༌ཨིན༌ མ༌ནེ༌ སམ༌མ༌ མ༌ཛདས༌།
PHI 2:7 ཨིན༌ནའང༌ ཁོང༌ངི༌ ནམ༌ཁའེ༌ ཐོབ༌ཏང༌ ཚང༌མ༌ ཕང༌ང༌ ཛད༌ཏེ༌, ཡོག༌པོ༌ ཙོགས༌ གྱུར༌ར༌ ཛད༌ཏེ༌, མིའི༌ ཚུལ༌ལ༌ སྐྱེའ༌ ཛདས༌།
PHI 2:8 ཁོང༌རང༌ པས༌མོ༌ ཅོའ༌ ཛད༌ཏེ༌, ཀྲོངས༌ཀྲོངས༌ ཚག༌པའང༌ དཀོན༌མཆོག༌གི༌ ཁའ༌ཉན༌ན༌ ཛདས༌, ཡང༌ན༌ མ༌སྲན༌ཏྲེ༌ རྡུག༌ངལ༌ཅན༌ནི༌ རྐྱང༌ཤིང༌ངི༌ཀ༌ ཀྲོང༌ཤེས༌པོའང༌།
PHI 2:9 ཏེན༌ན༌བོའེ༌ཕིའ༌ དཀོན༌མཆོག༌གི༌ ཁོང༌ང༌ ཚང༌མའེ༌སང༌ རྩི༌ཝ༌ཅན༌ནི༌ ནས༌སའེ༌ཀ༌ སྟག༌ག༌ ཛདས༌། ཡང༌ ཚང༌མའེ༌སང༌ རྩིས༌ཏང༌ཅན༌ནི༌ ཚན༌བོ༌ སལ༌ལ༌ ཛདས༌།
PHI 2:10 ཏེན༌ན༌ གྱུན༌ཚན༌བོའེ༌ ཕིའ༌ ཡེ༌ཤུའི༌ ཚན༌ སྔོན༌ ཟ༌ནེ༌, ནམ༌ཁའེ༌ ནང༌ང༌, ཇིག༌རྟེན༌ནི༌ཀ༌ ཡང༌ སའེ༌ ཡོག༌ག༌, སྲོག༌ ཡོད༌ཁན༌ ཚང༌མའེ༌ པིག༌དོང༌ ཙུགས༌ཏེ༌ ཡེ༌ཤུ༌ མ༌ཤི༌ཀ༌ ནི༌ གཙོ༌བོ༌ ཨིན༌ནོག༌ ཟེར༌ཨིན༌, ཏེ༌བོའེ༌ དཀོན༌མཆོག༌ ཡབ༌བ༌ སྤལ༌ ཁྱོང༌ང༌ ཛད༌ཨིན༌།
PHI 2:12 ངའེ༌ ཅེས༌པའེ༌ ཛ༌འོ༌གུན༌, ང༌ ཁྱོ༌ཞ༌གུན༌ ཉམ༌པོ༌ ཡོད༌ ཟ༌ནེ༌, ཁྱོ༌ཞའེ༌ ཏུས༌གྱུན༌ ངའེ༌ ལབ༌ཞ༌གུན༌ ཁའ༌ཉན༌ཏེ༌ གྲུལ༌ལ༌ ཙོགས༌ལ༌, ང༌ ཁྱོ༌ཞའ༌ ཉམ༌པོ༌ མེད༌ ཟ༌ནེ༌ ཏེ༌སང༌ མང༌ང༌ ཁའ༌ཉོན༌ཤིག༌། ཡང༌ དཀོན༌མཆོག༌ག༌ རྩི༌ཝ༌ དང༌ ཁོང༌ངི༌ ཇིགས༌སི༌ ནང༌ང༌ སྟན༌ན༌ ཛད༌ཁན༌ནི༌ ལམ༌མི༌ཀ༌ གྲུལ༌ཨིན༌ ཐར༌པའེ༌ ཕིའ༌ རྩོན༌གྲུས༌ ཅོ༌ཤིག༌།
PHI 2:13 ཅིའ༌ཟེར༌ན༌ དཀོན༌མཆོག༌ ཁོང༌རང༌ངི༌ ཁྱོ༌ཞ༌གུན༌ནི༌ ནང༌ང༌ ཆག༌ལས༌ ཛད༌ཏེ༌ ཁོང༌ ཐུགས༌ཐད༌ཁན༌ནི༌ ལས༌ ཅོ༌ཅེས༌ལ༌ དོད༌པ༌ དང༌ ཁྱུད༌ སལ༌ལ༌ ཛད༌ད༌ནོག༌།
PHI 2:14 སུ༌ཞིག༌གིའང༌ ཁྱོ༌ཞ༌གུན༌ལ༌ སྐྱོན༌ ཀལ༌ མི༌ཉན༌ཅེས༌སི༌ ཕིའ༌, ཅི༌ཞིག༌ ཅོ༌ནའང༌ ཟེར༌གྱུ༌ མ༌ཏང༌ང༌ ཡ༌ ཟེར༌ལེན༌ མེད༌པ༌ ཅོ༌ཤིག༌། ཡང༌ དཀོན༌མཆོག༌གི༌ ཕྲུ༌གུ༌ ཙོགས༌ལ༌, ཁྱོ༌ཞའེ༌ མི༌ཚེ༌བོ༌ ནོངས༌མེད༌ དང༌, རྩང༌མ༌ཞིག༌ ཕུད༌ཤིག༌། ཏེ༌ནེ༌ གོབ༌སྐོར༌ཁན༌ དང༌ སྡིག༌ཅན༌ གངས༌ཏེ༌ ཡོད༌ཁན༌ནི༌ ཇིག༌རྟེན༌ནི༌ ནང༌ང༌ ཁྱོ༌ཞ༌གུན༌ སྐར༌མ༌ ལྡང༌ཤན༌ ཙོགས༌ལ༌ ཐོང༌ཨིན༌།
PHI 2:16 ཐའ༌མེད༌པའེ༌ མི༌ཚེ༌ ཁྱོང༌ཁན༌ནི༌ བཀའ༌བོ༌ སྟན༌པོ༌ ཐམས༌ཏེ༌ དུག༌ཤིག༌, ཏེ༌ནེ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཅེས༌སི༌ ཞག༌ག༌, ཁྱོ༌ཞ༌གུན༌ནི༌ ཕྲོའ༌ ངའེ༌ རྩོན༌གྲུས༌ ཚང༌མ༌ ཏོན༌མེད༌ལ༌ མ༌ཆའ༌, ང༌ ཁྱོ༌ཞ༌གུན༌ནི༌ཀ༌ ཕོ༌སོ༌ ཚོར༌ཨིན༌།
PHI 2:17 ངའེ༌ མི༌ཚེ༌བོ༌ ཁྱོ༌ཞའེ༌ ཏད༌པ༌ཅན༌ནི༌ ཞབས༌ཏོག༌གི༌ ཆོད༌པ༌ ཕུལ༌ཁན༌ནི༌ཀ༌ ཆུ༌ཕུད༌ ཙོགས༌ལ༌ ཕུལ༌ནའང༌ ང༌ ཐད༌པོ༌ རག༌, ཡང༌ ངའེ༌ ཁྱོ༌ཞ༌གུན༌ ཉམ༌པོ༌ སྐྱིད༌པོ༌ ཅོ༌ཨིན༌།
PHI 2:18 འོ༌ན༌, ཁྱོ༌ཞ༌གུན༌ནིའང༌ ང༌ ཉམ༌པོ༌ ཐད༌པོ༌ དང༌ སྐྱིད༌པོ༌ ཅོ༌གོ༌ཤེས༌ ཨིན༌ནོག༌།
PHI 2:19 ཀལ༌ཏེས༌ གཙོ༌བོ༌ ཡེ༌ཤུའི༌ གོངས༌པ༌ སལ༌ན༌, ངའེ༌ ཏི༌མོ༌ཐི༌ ཁྱོ༌ཞའེ༌ཀ༌ གྱོགས༌པ༌ ལམ༌ཅུག༌ཅེས༌སི༌ རེ༌ཝ༌ བོར༌རད༌། ཏེ༌ནེ༌ ཁོའེ༌ ཁྱོ༌ཞ༌གུན༌ནི༌ སྐོར༌ལ༌ ནས༌ཚུལ༌ ཤད༌ཏེ༌ ངའ༌ ཐད༌པོ༌ ཆ༌ཅུག༌ཨིན༌།
PHI 2:20 འི༌ཀ༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ན༌ད༌ ལྡན༌ན༌ མེད༌ སམས༌ཏེ༌ དེན༌བའེ༌ ཚེར༌ཁ༌ ཅོ༌ཁན༌ ཁོ༌ མ༌ནེ༌ ཡང༌སུ༌ཞིག༌གའང༌ མེད༌།
PHI 2:21 ཅིའ༌ཟེར༌ན༌ ཞན༌མ༌ ཚང༌མའེ༌ རང༌དོན༌ མ༌ནེ༌ མ༌ཤི༌ཀ༌ ཡེ༌ཤུའི༌ ཐུགས༌དོད༌དི༌ ཕིའ༌ ཚེར༌ཁ༌ ཅོའ༌ མི༌དུག༌།
PHI 2:22 ཨིན༌ནའང༌ ཁྱོ༌ཞ༌གུན༌ལ༌ ཏི༌མོ༌ཐིའི༌ ཁོ༌རང༌ ཨིད༌ཤེས༌ཅན༌ སྟན༌ཁན༌བོ༌ གྱུས༌ཨིན༌ནོག༌, ཅིའ༌ཟེར༌ན༌ ཁོའེ༌ བུ༌ཚ༌ཞིག༌གི༌ རང༌ངི༌ ཨ༌བའ༌ ཞབས༌ཏོག༌ ཞུའ༌ ཙོགས༌ལ༌, གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌ ང༌ ཉམ༌པོ༌ ཞབས༌ཏོག༌ ཞུས༌ཏེ༌ ཨིན༌།
PHI 2:23 འི༌ཀ༌ ང༌ ཉམ༌པོ༌ ཇུང༌ཅེས༌པོ༌ ཧ༌གོའ༌ཅིག༌, ངའེ༌ ཁོ༌ ཁྱོ༌ཞའེ༌ཀ༌ ལམ༌ཅུག༌ཅེས༌སི༌ རེ༌ཝ༌ ཨིན༌།
PHI 2:24 ང༌ ལོ༌ཁྱེལ༌ རག༌, གཙོ༌བོའེ༌ ངའང༌ ཁྱོ༌ཞ༌གུན༌ ཡོད༌ས༌ གྱོགས༌པ༌ ཡོང༌ ཅུག༌ག༌ ཛད༌ཨིན༌།
PHI 2:25 ཨིན༌ནའང༌ ངའེ༌ སྤུན༌, ཕྲོ༌པ༌ དང༌ ཕྲོ༌པ༌ མག༌མི༌ ཨིན༌ཁན༌ནི༌ ཨེ༌པ༌ཕོ༌རོ༌གྲི༌ཀྲུས༌ ཁྱོ༌ཞའེ༌ཀ༌ ལོགས༌ཏེ༌ ལམ༌ཅུག༌ཅེས༌པོ༌ ཁག༌ཅན༌ སམ༌། ཁོ༌ ཁྱོ༌ཞའེ༌ ཚབས༌ ཅོས༌ཏེ༌ ངའེ༌ སྒོས༌དོམ༌གུན༌ལ༌ སྟ༌སྟོག༌ ཅོ༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ལམ༌ཅུགས༌ཏེ༌ ཨིན༌པིན༌།
PHI 2:26 ཁོ༌ ཁྱོ༌ཞའ༌ ཚང༌མ༌ སྲན༌ཏྲེ༌ ཐུག༌ཉིན༌ དུག༌, ཡང༌ ཁྱོ༌ཞ༌གུན༌ལ༌ ཁོའ༌ ཟུ༌མོ༌ དུག༌ ཟེར༌ཏེ༌ ཚོར༌ པ༌སང༌, ཁོའེ༌ ཁྱོ༌ཞ༌གུན༌ནི༌ ཕིའ༌ ཚེར༌ཁ༌ ཅོ༌རུག༌།
PHI 2:27 ཏན༌ཏན༌ལ༌ ཁོའ༌ ཟུ༌མོ༌ སྲན༌ཏྲེ༌ ཡོངས༌, ཡང༌ ཤི༌ཅེས༌ ཡོད༌པིན༌། ཨིན༌ནའང༌ དཀོན༌མཆོག༌གི༌ ཁོའེ༌ཀ༌ ཐུག༌རྗེ༌ ཛདས༌, ཁོ༌ ཅིག༌པོའེ༌ཀ༌ མན༌པ༌, ང༌ ཚེར༌ཁའེ༌ཀ༌ ཚེར༌ཁའ༌ མི༌ཇུང༌ཅེས༌སི༌ ཕིའ༌ ངའེ༌ཀའང༌ ཐུག༌རྗེ༌ ཛདས༌།
PHI 2:28 ཁྱོ༌ཞ༌གུན༌ནི༌ ཁོ༌ ཐོངས༌ཏེ༌ ཐད༌པོ༌ ཆ༌ཅེས༌ དང༌ ངའེ༌ སེམས༌སི༌ ནང༌ངའང༌ ཁྱོ༌ཞའེ༌ ཕིའ༌ ཚེར༌ཁ༌བོ༌ ཉུ༌ངུན༌ ཆ༌ཅེས༌ལ༌ ཁོ༌ ཁྱོ༌ཞའེ༌ཀ༌ ལམ༌ཅུག༌ཅེས༌སི༌ ངའ༌ དོད༌པ༌ ཆེན༌མོ༌ རག༌།
PHI 2:29 མ༌སྲན༌ཏྲེ༌ ཐད༌པོ༌ ཉམ༌པོ༌ ཁྱོ༌ཞ༌གུན༌ནི༌ གཙོ༌བོའེ༌ ནང༌ང༌ ཁོའ༌ རང༌ངི༌ སྤུན༌ ཙོགས༌ལ༌ གའ༌སུས༌ ཞུས༌, ཡང༌ ཁོ༌ ཙོགས༌སི༌ མི༌གུན༌ལའང༌ རྩི༌ཝ༌ ཅོས༌།
PHI 2:30 ཅིའ༌ཟེར༌ན༌ མ༌ཤི༌ཀའེ༌ ཞབས༌ཏོག༌གི༌ ནང༌ང༌ ཁོའེ༌ ཁོ༌རང༌ང༌ སྣང༌ང༌ མ༌ཏང༌ང༌, ཁྱོ༌ཞའེ༌ ཚབས༌ལ༌ ངའ༌ རོགས༌ ཅོ༌ཨིན༌ ཁོ༌ ཤི༌ཅེས༌ལ༌ ཐུག༌།
PHI 3:1 སྟིང༌ཇུག༌ག༌, ངའེ༌ སྤུན༌གུན༌, གཙོ༌བོའེ༌ ནང༌ང༌ ཐད༌པོ༌ ཅོ༌ཤིག༌། ཁྱོ༌ཞའ༌ འི༌ སྤེ༌ར༌གུན༌ ལྡབས༌ཏེ༌ ཤད༌ཅེས༌ལ༌ ང༌ སུན༌ཅེས༌ མེ༌རག༌། འི༌བོ༌ ཁྱོ༌ཞ༌གུན༌ནི༌ སྲུང༌སྐྱོབ༌བི༌ ཕིའ༌ ཨིན༌།
PHI 3:2 ཁྱི༌ ཙོགས༌, ངན༌པ༌ ལས༌ ཅོ༌ཁན༌, ཐར༌པ༌ ཐོབ༌ཅེས༌སི༌ ཕིའ༌ སུན༌ནད༌ ཅོ༌གོས༌ ཟེར༌ཁན༌ནི༌ འི༌ ཡ༌ཧུ༌དཱ༌པ༌གུན༌ནི༌ ཀ༌ནེ༌ ཤང༌ ཅོ༌ཤིག༌།
PHI 3:3 ང༌དང༌ ནི༌: སེམས༌ལ༌ སུན༌ནད༌ ཛད༌ཏེ༌ དཀོན༌མཆོག༌གི༌ དེན༌བའེ༌ མི༌གུན༌, ཁོང༌ངི༌ ཐུག༌ཉིད༌ གྱུད༌ཏེ༌ ཅོལ༌ཁན༌, ཡེ༌ཤུ༌ མ༌ཤི༌ཀའེ༌ ང༌དང༌ངི༌ ཕིའ༌ ཛད༌ཁན༌གུན༌ལ༌ སྟོད༌པ༌ ཕུལ༌ཁན༌ དང༌ ཇིག༌རྟེན༌པའེ༌ ལུག༌སྲོལ༌གུན༌ནི༌ཀ༌ ལོ༌ཁྱེལ༌ མ༌ཅོ༌ཁན༌གུན༌ ཨིན༌ནོག༌།
PHI 3:4 ཏེ༌ཙོགས༌སི༌ ཇིག༌རྟེན༌པའེ༌ ལུག༌སྲོལ༌གུན༌ནི༌ཀ༌ ངེའང༌ ལོ༌ཁྱེལ༌ ཅོ༌ཉན༌ཅེས༌ ཡོད༌པིན༌། ཀལ༌ཏེས༌ སུ༌ཞིག༌ག༌ ཏེ༌ ལུག༌སྲོལ༌གུན༌ལ༌ ལོ༌ཁྱེལ༌ ཅོ༌ཅེས༌སི༌ གྱུན༌ཚན༌ ཡོད༌ན༌ ངའང༌ མ༌ མང༌པོ༌ ཡོད༌:
PHI 3:5 སྤེར༌ན༌ སྐྱེས༌ཏེ༌ ཞག༌ རྒྱད༌པའེ༌ ཞག༌ག༌ ངའ༌ སུན༌ནད༌ ཅོས༌, ང༌ ཨིས༌ར༌ཨེལ༌པ༌ ཨིན༌, ང༌ ཨིས༌ར༌ཨེལ༌ལི༌ རྩི༌ཝ༌ཅན༌ནི༌ སྡེ༌ བེན༌ཡཱ༌མིན༌ ཟེར༌ཁན༌ནེ༌ ཨིན༌, ང༌ དང༌ ངའེ༌ ཕ༌མེས༌པོ༌ ཚང༌མ༌ ཨིབ༌རི༌པ༌ ཨིན༌, ཁྲིམས༌ རེ༌རེ༌ གྱལ༌ལ༌ ཅོས༌ཏེ༌ སྲུང༌ཁན༌ནི༌ ཆོས༌སི༌ སྡེ༌ ཕ༌རུ༌ཤི༌པ༌ ཟེར༌ཁན༌བོའེ༌ ནང༌ནེ༌ ངའང༌ ཨིན༌པིན༌,
PHI 3:6 དཀོན༌མཆོག༌གི༌ ཕིའ༌ སེམས༌ཤུགས༌ ཉམ༌པོ༌ ངའེ༌ ཡེ༌ཤུའི༌ ཆོས༌ཚོགས༌གུན༌ལ༌ ནགས༌ སྟན༌པིན༌, ཡ༌ཧུ༌དཱ༌པ༌གུན༌ནི༌ ཁྲིམས༌ ནང༌ཞིན༌ ང༌ སྐྱོན༌མེད༌ཞིག༌ ཨིན༌པིན༌།
PHI 3:7 ཨིན༌ནའང༌ ཀ༌གུན༌ ངའེ༌ སྔུན༌ལ༌ མའ༌ རིན༌ཅན༌ རྩིའད༌པིན༌, ཏ༌ ངའེ༌ དག༌ས༌ རིན༌མེད༌ རྩིའད༌ ཅིའ༌ཟེར༌ན༌ ངའེ༌ ཕིའ༌ མ༌ཤི༌ཀ༌ ཀྲོངས༌ས༌ ཛདས༌།
PHI 3:8 འོ༌ན༌ ནམ༌ ངའེ༌ མ༌ རིན༌ཅན༌ གཙོ༌བོ༌ ཡེ༌ཤུ༌ མ༌ཤི༌ཀ༌ ངོ༌ཤེ༌ཤེས༌པོ༌ ཉམ༌པོ༌ ལྡུར༌ན༌ ཏེ༌ ཚང༌མའ༌ ཅའང༌རིན༌ མེད༌ཏེ༌ ཨིན༌ནོག༌། ཁོང༌ ཉམ༌པོ༌ བྲེལ༌ ཡོད༌ཅེས༌ དང༌ ཁོང༌ངི༌ ཨིན༌ཅེས༌སི༌ ཕིའ༌ ངའེ༌ ཏེ༌ ཚང༌མ༌ ཁྱིམ༌ས༌ ཙོགས༌ རྩིས༌ཏེ༌, ཕང༌ ཚར༌ཏེ༌ ཨིན༌། ཡ༌ཧུ༌དཱ༌པའེ༌ ཁྲིམས༌གུན༌ ཁའ༌ཉན༌ཅེས༌པོ༌ མན༌པ༌ མ༌ཤི༌ཀའེ༌ཀ༌ ཏད༌པ༌ ཁྱོང༌ཅེས༌པོ༌ གྱུད༌ཏེ༌ ང༌ ཀྲང༌པོ༌ ཐེའ༌ཛད༌ཏེ༌ ཨིན༌, ཅིའ༌ཟེར༌ན༌ དཀོན༌མཆོག༌གི༌ དུན༌ལ༌ ང༌དང༌ ཀྲང༌པོ༌ ཨིན༌ཅེས༌པོ༌ ནི༌ ཏད༌པའེ༌ཀ༌ རག༌ལས༌ཏེ༌ ཨིན༌ནོག༌།
PHI 3:10 ང༌ མ༌ཤི༌ཀ༌ ཤེ༌ཤེས༌ ཡང༌ ཤི༌ཁན༌གུན༌ནི༌ ཕྲོ༌ནེ༌ སོན༌པོ༌ ལང༌ང༌ ཛད༌ཁན༌ནི༌ དཀོན༌མཆོག༌གི༌ ཏེ༌ ཝང༌ ཀྲག༌པོའེ༌ ཐོང༌ངོམས༌ ཆ༌ཉིན༌རག༌། མ༌ཤི༌ཀ༌ ཉམ༌པོ༌ རྡུག༌ངལ༌ ཐོང༌ཏེ༌ ཁོང༌ངི༌ ཀྲོང༌ཤེས༌སི༌ ནང༌ང༌ དྲེས༌ ཉིན༌རག༌
PHI 3:11 ངའང༌ ཤི༌ཁན༌གུན༌ནི༌ ཕྲོ༌ནེ༌ སོན༌པོ༌ ལང༌ང༌ ཛད༌ཅེས༌སི༌ རེ༌ཝའེ༌ ནང༌ང༌ ངའེ༌ ཏེ༌གུན༌ ཅོའད༌།
PHI 3:12 ངའེ༌ ང༌རང༌ངི༌ རེ༌ཝ༌བོ༌ གྲུབ༌ ཚར༌ཏེ༌ ཨིན༌, ཡ༌ ང༌ མ༌ཤི༌ཀ༌ ཙོགས༌ གྱུར༌ཏེ༌ ཨིན༌ ཟེར༌ར༌མེད༌། ཨིན༌ནའང༌ ངའེ༌ ཁོང༌ ཙོགས༌ གྱུར༌ཅེས༌ལ༌ རྩོན༌གྲུས༌ མའ༌ གྱལ༌ལ༌ ཅོའད༌, ཅིའ༌ཟེར༌ན༌ ཏེན༌ན༌བོའེ༌ ཏོན༌ལ༌ ཁོང༌ངི༌ ང༌ ལྡམ༌མ༌ ཛད༌ཏེ༌ ཨིན༌པིན༌།
PHI 3:13 ངའེ༌ སྤུན༌གུན༌, ང༌ ཏེ༌ ཙོགས༌སི༌ མི༌ ཏ༌རུང༌ མ༌གྱུར༌ར༌ ཨིན༌། ཨིན༌ནའང༌ ངའེ༌ སྔུན༌མ༌ ཚང༌མ༌ རྗེད༌ཏེ༌ ཡོང༌ཅེས༌ཅན༌ནི༌ ཏུས༌སི༌ ཕིའ༌ རྩོན༌གྲུས༌ སྲན༌ཏྲེ༌ ཅོའད༌།
PHI 3:14 བང༌ལྡུར༌རི༌ ནང༌ང༌ བང༌ཏང༌ཁན༌གུན༌ སྟིང༌ཇུག༌གི༌ ཐིག༌ ཚོག༌པ༌ བང༌གྱུགས༌ ཏང༌ང༌ ཙོགས༌ལ༌, དཀོན༌མཆོག༌གི༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ བོད༌ད༌ ཛད༌ཁན༌ནི༌ ནམ༌ཁའེ༌ སོལ༌རས༌ ཆོགས༌ལ༌ ངེའང༌ བང༌གྱུགས༌ ཏང༌ངད༌།
PHI 3:15 ང༌དང༌ སེམས༌ཉིད༌དི༌ ནང༌ང༌ ལྡན༌ཁན༌ ཚང༌མའེ༌ ངའེ༌ ལབ༌ཁན༌གུན༌ནི༌ཀ༌ ཁའ༌ཆམས༌ གོ༌ཤེས༌ ཨིན༌ནོག༌། ཀལ༌ཏེས༌ ཁྱོ༌ཞའེ༌ ནང༌ནེ༌ སུ༌ཞིག༌གི༌ སམ༌ཚུལ༌ ཏེ༌སང༌ སོ༌སོ༌ ཡོད༌ན༌, དཀོན༌མཆོག༌གི༌ ཁོང༌གུན༌ལ༌ དེན༌བའེ༌ ལམ༌བོ༌ སལ༌པོ༌ ཧ༌གོ༌ཅེས༌ལ༌ རོགས༌ ཛད༌ཨིན༌།
PHI 3:16 ཏ༌ དཀོན༌མཆོག༌གི༌ དག༌ས༌ ཚག༌པ༌ སྔོན༌ཅུག༌ག༌ ཛད༌ཁན༌ ནང༌ཞིན༌ ང༌དང༌གུན༌ནི༌ མི༌ཚེ༌བོ༌ ཕུད༌ཨིན༌།
PHI 3:17 ངའེ༌ སྤུན༌གུན༌, ཁྱོ༌ཞ༌གུན༌ནི༌ མི༌ཚེ༌, ངའེ༌ ཕུད༌ཁན༌ ཙོགས༌ལ༌ ཕུད༌ཤིག༌, ཡང༌ ང༌ཞའེ༌ སྤེའེ༌ཀ༌ གྲུལ༌ཁན༌གུན༌ནི༌ ཀ༌ནེ༌ གྱལ༌ལ༌ ཅོས༌ཏེ༌ ཇོང༌ཤིག༌།
PHI 3:18 ངའེ༌ ཁྱོ༌ཞའ༌ སྔུན༌ལ༌ ལན༌ མང༌པོ༌ ཟེར༌ ཚར༌ཏེ༌ ཨིན༌, ཡང༌ ཏ༌རུང༌ངའང༌ ཆི༌མ༌ ཉམ༌པོ༌ ཟེར༌རད༌, མང༌པོ༌ཞིག༌ མ༌ཤི༌ཀའེ༌ རྐྱང༌ཤིང༌ངི༌ གྱབ༌གལ༌ ཨིན༌ཁན༌ནི༌ ལམ༌མི༌ཀ༌ གྲུལ༌དུག༌།
PHI 3:19 ཁོང༌གུན༌ མེད༌ཁན༌ ཆ༌ཅེས༌སི༌ ཆོགས༌ལ༌ ཆེན༌ ཨིན༌ནོག༌, གྲོད༌པ༌བོ༌ ཁོང༌གུན༌ནི༌ དཀོན༌མཆོག༌ ཨིན༌ནོག༌, ཁོང༌རང༌གུན༌ནི༌ ཁྲེལ༌མེད༌དི༌ ལས༌གུན༌ནི༌ཀ༌ ཕོ༌སོ༌ ཅོའ༌ནོག༌, ཇིག༌རྟེན༌པའེ༌ ཁག༌ཅན༌ ཐེ༌ཁན༌གུན༌ནི༌ སྐོར༌ལ༌ ཁོང༌གུན༌ནི༌ ཏུས༌གྱུན༌ སམ༌བ༌ ཏང༌ང༌ནོག༌།
PHI 3:20 ཨིན༌ནའང༌ ང༌དང༌གུན༌ ནི༌ ནམ༌ཁའེ༌ ཡུལ༌མི༌ ཨིན༌ནོག༌, ཡང༌ སྐྱབ༌གོན༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཤེས༌སི༌ ཕིའ༌ ང༌དང༌གུན༌ནི༌ རིངས༌ཨིན༌ སྲུང༌ང༌ནོག༌།
PHI 3:21 ཁོང༌རང༌ངི༌ ཝང༌ངི༌ ཡོག༌ག༌ ཅི༌ཚང༌མ༌ ཁྱོང༌ཉན༌ན༌ ཛད༌ཁན༌ནི༌ མ༌ཤི༌ཀའེ༌ སྟོབས༌པོའེ༌, ང༌དང༌ངི༌ སྟོབས༌མེད༌ འི༌ ཇིག༌རྟེན༌ནི༌ ཟུགས༌པོ༌བོ༌ ཁོང༌རང༌ ཙོགས༌སི༌ ཟིར༌རྗིད༌ཅན༌ གྱུར༌ ཅུག༌ག༌ ཛད༌ཨིན༌།
PHI 4:1 ཏེན༌ན༌བོའེ༌ཕིའ༌ སྤུན༌གུན༌, ངའེ༌ ཅམས༌པ༌ ཅོ༌ཁན༌ དང༌ ཐུག༌ཅེས༌ལ༌ ངའ༌ རིངས༌ཨིན༌ ཡོད༌, ཁྱོ༌ཞའ༌ ངའེ༌ སྐྱིད༌པོ༌ དང༌ ཐོར༌ཤོག༌ ཨིན༌། ངའེ༌ ཅེས༌པའེ༌ ཛ༌འོ༌གུན༌ གཙོ༌བོ༌ ཡེ༌ཤུའི༌ ནང༌ང༌ སྟན༌པོ༌ དུག༌ཤིག༌།
PHI 4:2 ངའེ༌ སྤུན༌མོ༌ ཨིའུ༌འོ༌དིའ༌ དང༌ སིན༌ཏི༌ཀེ༌, ཁྱོ༌ཞའ༌ ཉིས༌ཀོའེ༌ ནང༌ང༌ མི༌གྲིག༌ཅེས༌ ཡོད༌ཁན༌གུན༌ མེད༌ཁན༌ ཅོས༌ཏེ༌ ཇུ༌ཇུ༌ ཐུན༌ཤིག༌, ཅིའ༌ཟེར༌ན༌ ཁྱོ༌ཞ༌གུན༌ གཙོ༌བོའེ༌ ཨིན༌ནོག༌།
PHI 4:3 ཡང༌ ངའེ༌ ཨིད༌ཤེས༌ཅན༌ ཕྲོ༌པ༌ ཁྱོ༌རང༌ངི༌, ཏེ༌ བུ༌མོ༌ ཉིས༌ཀ༌ ཐུན༌ཅུག༌ཅེས༌སི༌ ནང༌ང༌ རོགས༌ ཅོས༌། ཁོང༌གུན༌ནི༌ ང༌ ཉམ༌པོ༌ ཡེ༌ཤུ༌ མ༌ཤི༌ཀའེ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌ སྲན༌ཏྲེ༌ རྩོན༌གྲུས༌ ཅོས༌, ཡང༌ ཀེལེ༌མེནཏ༌ དང༌ ངའེ༌ ཞན༌ ཕྲོ༌པ༌ གུན༌ ཉམ༌པོའང༌ ལས༌ ཅོས༌ཏེ༌ ཨིན༌པིན༌, ཀ༌གུན༌ནི༌ མིང༌ མི༌ཚེའེ༌ སྤེ༌ཆའེ༌ ནང༌ང༌ དཀོན༌མཆོག༌གི༌ བྲིའ༌ ཛད༌ཏེ༌ ཨིན༌ནོག༌།
PHI 4:4 གཙོ༌བོ༌ ཡེ༌ཤུའི༌ ནང༌ང༌ ཏུས༌གྱུན༌ ཐད༌པོ༌ དུག༌ཤིག༌། ངའེ༌ ཡང༌སྐྱར༌ ཟེར༌རད༌ ཐད༌པོ༌ དུག༌ཤིག༌།
PHI 4:5 ཁྱོ༌ཞའ༌ པས༌མོ༌ ཨིན༌ཁན༌བོ༌ ཁྱོ༌ཞའེ༌ སྕོད༌པ༌ གྱུད༌ཏེ༌ ཚང༌མ༌ལ༌ ཐོང༌ཅུག༌ཤིག༌། རྗེད༌ མ༌རྗེད༌, གཙོ༌བོ༌ གྱོགས༌པ༌ ལོགས༌ཏེ༌ ཕེབས༌ས༌ ཛད༌ཨིན༌།
PHI 4:6 ཅི༌ཞིག༌གི༌ ཕིའང༌ ཚེར༌ མ༌ཚེར༌ཤིག༌, ཨིན༌ནའང༌ ནས༌ལུག༌ ཚང༌མའེ༌ ནང༌ང༌ དཀོན༌མཆོག༌ག༌ མོས༌ལམ༌ ཕུལ༌ཨིན༌ ཁྱོ༌ཞ༌གུན༌ནི༌ སྒོས༌དོམ༌གུན༌ སལ༌ཅེས༌ལ༌ ཞུ༌ཝ༌ ཕུལ༌ ཟ༌ནེ༌ ཐུག༌རྗེ༌ཆེ༌ ཞུ༌ཤིག༌།
PHI 4:7 ཏེ༌ནེ༌ ང༌དང༌གུན༌ལ༌ དཀོན༌མཆོག༌གི༌ ཞི༌དེ༌ ཐོབ༌ཨིན༌, ཀ༌བོ༌ ང༌དང༌གུན༌ནི༌ ཧ༌གོ༌ནེ༌ ཐལ༌ཏེ༌ ཡོད༌, ཡང༌ མ༌ཤི༌ཀ༌ ཡེ༌ཤུའི༌ ནང༌ང༌ ཁོང༌ངི༌ ཞི༌དེའེ༌, ཁྱོ༌ཞའེ༌ སྙིང༌ དང༌ སེམས༌ གུན༌ སྐྱོབས༌ཏེ༌ བོར༌ར༌ ཛད༌ཨིན༌།
PHI 4:8 སྟིང༌ཇུག༌ག༌, སྤུན༌གུན༌, དེན༌བ༌ ཨིན༌ཁན༌, རྩི༌ཝའེ༌ འོས༌པ༌, ཀྲང༌པོ༌ ཅོ༌ཁན༌, རྩང༌མ༌, ཅེས༌པ༌ཅན༌, སྟོད༌པའེ༌ འོས༌པ༌ཅན༌ ཡ༌ ཏེ༌གུན༌ནི༌ སང༌ མང༌ང༌ ཀྲག༌པོ༌ དང༌ སྟོད༌པའེ༌ འོས༌པ༌ ཐོབ༌ཅེས༌ཅན༌ གུན༌ནི༌ཀ༌ ཁྱོ༌ཞའེ༌ སམ༌བ༌བོ༌ སྟན༌པོ༌ བོར༌ཤིག༌།
PHI 4:9 ཁྱོ༌ཞ༌གུན༌ནི༌ ངའེ༌ ཀ༌ནེ༌ ལོབས༌ཁན༌, ཡ༌ ཐོབ༌ཁན༌, ཡ༌ ཚོར༌ཁན༌, ཡ༌ ངའེ༌ ཅོའ༌ལ༌ ཐོང༌ཁན༌གུན༌ ལག༌ལེན༌ནི༌ ནང༌ང༌ ཁྱོང༌ཤིག༌, ཏེ༌ནེ༌ ཞི༌དེ༌ དཀོན༌མཆོག༌ ཁྱོ༌ཞ༌གུན༌ ཉམ༌པོ༌ ཞུགས༌ཨིན༌།
PHI 4:10 ཏ༌ སྟིང༌ཇུག༌ག༌ ཁྱོ༌ཞ༌གུན༌ནི༌ ངའེ༌ ཕིའ༌ ཡང༌སྐྱར༌ སྣང༌ང༌ ཏངས༌ པ༌སང༌, ངའེ༌ གཙོ༌བོ༌ མ༌ཤི༌ཀ༌ སྟོད༌པ༌ ཕུལ༌ལད༌། ཏན༌ཏན༌ལ༌ ཁྱོ༌ཞ༌གུན༌ནི༌ ཏུས༌གྱུན༌ ངའེ༌ ཕིའ༌ ཚེར༌ཁ༌ ཅོའད༌པིན༌, ཨིན༌ནའང༌ ང༌ རོགས༌ ཅོ༌ཅེས༌སི༌ སྐབས༌ ཁྱོ༌ཞ༌གུན༌ལ༌ མ༌ཐོབ༌བ༌ ཨིན༌ནོག༌།
PHI 4:11 ངའེ༌ ཏེ༌བོ༌ ངའ༌ སྒོས༌དོམ༌ ཡོད༌ པ༌སང༌ ཟེར༌ར༌མེད༌། ང༌ ནས༌ལུག༌ ཚང༌མའེ༌ ནང༌ང༌ ཚིམས༌ཏེ༌ སྐྱིད༌པོ༌ དུག༌ཅེས༌པོ༌ ཧ༌གོ༌ཏེ༌ ཨིན༌།
PHI 4:12 སྒོས༌དོམ༌མི༌ ནང༌ང༌ ཡ༌ མངས༌ཏེའང༌ ཡོད༌ཅེས༌པོ༌, ཀ༌ཟུག༌ཤིག༌ ཡོང༌ཅེན༌ ང༌ གྱུས༌ཡོད༌, ཡང༌ ནས༌ལུག༌ ཚང༌མའེ༌ ནང༌ང༌ སྐྱིད༌པོ༌ ཉམ༌པོ༌ དུག༌ཅེས༌སི༌ ཐབས༌པོ༌ ངའ༌ ཧ༌གོ༌ཏེ༌ ཡོད༌, ཡང༌ན༌ ང༌ ཟ༌གྱུ༌ མང༌པོ༌ ཡོད༌གྲོ༌ ཡ༌ སྟོག༌རིའ༌, ངའ༌ མ༌ མང༌པོ༌ ཡོད༌གྲོ༌ ཡ༌ སྒོས༌དོམ༌མི༌ ནང༌ང༌།
PHI 4:13 མ༌ཤི༌ཀའེ༌ ང༌ ཤེད༌ སལ༌ཅེས༌པོའེ༌ ང༌ ནས༌ལུག༌ ཀ༌ཟུག༌ཤིག༌ ཨིན༌ནའང༌ ཁུར༌ ཐུབ༌བད༌།
PHI 4:14 ཏེ༌ནེའང༌ ངའེ༌ རྡུག༌ངལ༌གུན༌ནི༌ ནང༌ང༌ ཐུས༌ཏེ༌ ང༌ རོགས༌ ཅོ༌ཅེས༌པོ༌ ཁྱོ༌ཞའེ༌ ང༌ ཐུག༌རྗེ༌ ཛད༌ཏེ༌ ཨིན༌ནོག༌།
PHI 4:15 ཕི༌ལི༌པི༌ ཆོས༌ཚོགས༌ ཁྱོ༌ཞའ༌ གྱུས༌ཨིན༌ནོག༌, ངའེ༌ གོ༌མ༌རང༌ ཁྱོ༌ཞའ༌ གའ༌མོའེ༌ ནས༌ཚུལ༌ ཁྱོངས༌ཏེ༌, མ༌ཀེ༌དོ༌ནི༌ཡཱའེ༌ ཡུལ༌ནེ༌ ང༌ ཆའ༌ ཟ༌ནེ༌, ཁྱོ༌ཞའ༌ མན༌པ༌ ཡང༌ སུ༌ ཆོས༌ཚོགས༌ཤིག༌གའང༌ ངའེ༌ སྒོས༌དོམ༌མི༌ ནང༌ང༌ རོགས༌ མ༌ཅོས༌།
PHI 4:16 ཡང༌ ང༌ ཐེ༌ས༌ལོ༌ནི༌ཀའེ༌ གྱལ༌སའེ༌ ནང༌ང༌ སྒོས༌དོམ༌ ཡོད༌ ཟ༌ནེའང༌, ཁྱོ༌ཞ༌གུན༌ནི༌ ང༌ ལན༌ མང༌པོ༌ སྐྱེས༌ ཀལས༌།
PHI 4:17 ངའེ༌ ཏེ༌བོ༌ ཁྱོ༌ཞ༌གུན༌ནི༌ ངའ༌ སྐྱེས༌ ཀལ༌ཏེ༌ ལེབ༌ཅེས༌སི༌ ཕིའ༌ ཟེར༌ཏེ༌ མན༌ ཨིན༌ནའང༌ དཀོན༌མཆོག༌གི༌ ཁྱོ༌ཞའ༌ སལ༌ཅེས༌སི༌ སོལ༌རས༌པོའེ༌ཀ༌ ནན༌ཏེ༌ སལ༌ལ༌ ཛད༌ཅེས༌ལ༌ ཟེར༌རད༌།
PHI 4:18 སྤུན༌ ཨེ༌པ༌ཕོ༌རོ༌གྲི༌ཀྲུས༌ ཉམ༌པོ༌ ཁྱོ༌ཞའེ༌ ངའ༌ ཀལ༌ཁན༌ནི༌ སྐྱེས༌གུན༌ ངའེ༌ སྒོས༌དོམ༌མི༌ སང༌ མང༌ང༌ དུག༌པིན༌, ཏ༌ ང༌ ཡང༌ ཅའང༌ སྒོས༌དོམ༌ མེད༌། ཏེ༌གུན༌ ནི༌ ཏྲི༌ཞིམ༌ཅན༌ནི༌ ཆོད༌པ༌, དཀོན༌མཆོག༌ ཐུགས༌ཐད༌ཁན༌ དང༌ འོས༌པ༌ ཨིན༌ནོག༌།
PHI 4:19 ཡང༌ ངའེ༌ དཀོན༌མཆོག༌གི༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ཁོང༌རང༌ངི༌ ཟིར༌རྗིད༌དི༌ བང༌ཛོད༌ནེ༌ ཁྱོ༌ཞ༌གུན༌ལ༌ སྒོས༌དོམ༌ ཡོད༌ཁན༌ ཚང༌མ༌ སལ༌ལ༌ ཛད༌ཨིན༌།
PHI 4:20 ང༌དང༌ངི༌ དཀོན༌མཆོག༌ དང༌ ཡབ༌བ༌ ཏུས༌གྱུན༌ནེ༌གྱུན༌ སྤལ༌ ཐོབ༌ཤིག༌, ཨ༌མེན༌།
PHI 4:21 ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ཁན༌ནི༌ མི༌ ཏམ༌པ༌གུན༌ལ༌ ཇུ༌ ཞུས༌, ཡང༌ ང༌ ཉམ༌པོ༌ ཡོད༌ཁན༌ནི༌ སྤུན༌གུན༌ནིའང༌ ཁྱོ༌ཞ༌གུན༌ལ༌ ཇུ༌ ཞུ༌རུག༌།
PHI 4:22 འི༌རུ༌ ཡོད༌ཁན༌ནི༌ ཞན༌ཡང༌ མི༌ ཏམ༌པ༌, མིག༌སལ༌ལི༌ རོམ༌མི༌ གྱལ༌པོའེ༌ ཁར༌རི༌ ནང༌ང༌ ལས༌ ཅོ༌ཁན༌གུན༌ནིའང༌, ཁྱོ༌ཞ༌གུན༌ལ༌ ཇུ༌ ཞུ༌རུག༌།
PHI 4:23 གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ ཁྱོ༌ཞ༌གུན༌ནི༌ སེམས༌ ཉམ༌པོ༌ ཞུགས༌ཤིག༌, ཨ༌མེན༌།
COL 1:1 དཀོན༌མཆོག༌གི༌ ཐུག༌གོངས༌ ནང༌ཞིན༌, ཡེ༌ཤུ༌ མ༌ཤི༌ཀའེ༌ སྐུ༌ཚབས༌ལ༌ ལྡམ༌མ༌ ཛད༌ཁན༌ པ༌འུ༌ལུ༌ དང༌ ང༌དང༌གུན༌ནི༌ སྤུན༌ ཏི༌མོ༌ཐི༌ གུན༌ནི༌ ཆོགས༌ནེ༌
COL 1:2 འི༌ ཨི༌གེ༌བོ༌ ཀོ༌ལོ༌སི༌ གྱལ༌སའེ༌ ནང༌ང༌ ཡོད༌ཁན༌ནི༌ མ༌ཤི༌ཀའེ༌ ནང༌ང༌ ཨིད༌ཤེས༌ཅན༌ དང༌ ཏམ༌པ༌ སྤུན༌གུན༌ལ༌ བྲིའད༌། ང༌དང༌ངི༌ དཀོན༌མཆོག༌ ཡབ༌བི༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌།
COL 1:3 ཁྱོ༌ཞ༌གུན༌ནི༌ ཕིའ༌ མོས༌ལམ༌ ཞུ༌ ཟ༌ནེ༌, ང༌ཞའེ༌ ཏུས༌གྱུན༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
COL 1:4 ཅིའ༌ཞུ༌ན༌ ཁྱོ༌ཞ༌གུན༌ནི༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ དང༌ དཀོན༌མཆོག༌གི༌ ཏམ༌པ༌ མི༌ཚང༌མ༌ ཉམ༌པོ༌ ཅམས༌པ༌ ཅོ༌ཅེས༌པོ༌ ང༌ཞའེ༌ ཚོར༌།
COL 1:5 ཏེ༌ ཏད༌པ༌ དང༌ ཅམས༌པ༌ གུན༌ ཁྱོ༌ཞ༌གུན༌ལ༌ ནམ༌ཁའེ༌ ནང༌ང༌ དཀོན༌མཆོག༌གི༌ བོར༌ར༌ ཛད༌ཁན༌ནི༌ སོལ༌རས༌སི༌ རེ༌ཝ༌བོའེ༌ ཀ༌ནེ༌ ཡོངས༌ཏེ༌ ཨིན༌ནོག༌། ཡང༌ ཏེ༌ རེ༌ཝ༌བོ༌ ཁྱོ༌ཞ༌གུན༌ནི༌ ནང༌ང༌ ཡོད༌པིན༌ ནམ༌, ཁྱོ༌ཞ༌གུན༌ལ༌ ཏང༌པོ༌རང༌ དེན༌བའེ༌ ལོན༌ གའ༌མོའེ༌ ནས༌ཚུལ༌བོ༌ ཚོར༌།
COL 1:6 ཁྱོ༌ཞ༌གུན༌ལ༌ ཐོབ༌ཁན༌ནི༌ ཏེན༌ན༌ གའ༌མོའེ༌ ནས༌ཚུལ༌བོ༌ ཇིག༌རྟེན༌ གང༌པོའེ༌ ནང༌ང༌ ཚོར༌ཨིན༌, ཡང༌ བྲས༌བུ༌ མང༌པོ༌ཞིག༌ སྨིན༌ཏེ༌ ལྡན༌ཨིན༌ ཨིན༌ནོག༌, ཏེན༌ན༌ ཙོགས༌ ཁྱོ༌ཞ༌གུན༌ནི༌ མི༌ཚེའེ༌ ནང༌ངའང༌ ལས༌ ཅོ༌ཨིན༌ ཨིན༌ནོག༌, ནམ༌ ཁྱོ༌ཞའ༌ ཏང༌པོ༌རང༌ དཀོན༌མཆོག༌གི༌ ཐུག༌རྗེའེ༌ སྐོར༌ལ༌ དེན༌བ༌བོ༌ ཚོར༌ཏེ༌ ཧ༌གོ༌།
COL 1:7 ཁྱོ༌ཞ༌གུན༌ནི༌ ཏེ༌ གའ༌མོའེ༌ ནས༌ཚུལ༌བོ༌ ང༌ཞའེ༌ ཅེས༌པ༌ ཞབས༌ཏོག༌པ༌ ཕྲོ༌པ༌ ཨེ༌པ༌ཕའ༌རས༌སི༌ ཀ༌ནེ༌ ཚོར༌ཏེ༌ ཨིན༌། ཁོ༌ མ༌ཤི༌ཀའེ༌ ཨིད༌ཤེས༌ཅན༌ནི༌ ཞབས༌ཏོག༌པ༌, ང༌ཞའེ༌ ཚབས༌ལ༌ ཁྱོ༌ཞའ༌ རོགས༌ ཅོ༌ཁན༌བོ༌ ཨིན༌།
COL 1:8 ཡང༌ ཏམ༌པའེ༌ ཐུག༌ཉིད༌དི༌ ཁྱོ༌ཞའ༌ ཞན༌གུན༌ལ༌ ཅམས༌པ༌ ཅོ༌ཅེས༌སི༌ ཁྱུད༌ སལ༌ཁན༌བོའང༌ ཁོའེ༌ ང༌ཞའ༌ ཤདས༌།
COL 1:9 ཏེན༌ན༌བོའེ༌ཕིའ༌ ང༌ཞའེ༌ ཁྱོ༌ཞ༌གུན༌ནི༌ སྐོར༌ལ༌ ཚོར༌པ༌ནེ༌ ཕར༌ལ༌, ཆད༌མེད༌ལ༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌ག༌ མོས༌ལམ༌ ཞུའད༌། ཁྱོ༌ཞ༌གུན༌ལ༌ དཀོན༌མཆོག༌གི༌ ཁོང༌ངི༌ ཐུག༌གོངས༌པོ༌ གང༌པོ༌ ཧ༌གོ༌ཅེས༌, ཡང༌ སེམས༌ཉིད༌དི༌ ཐོག༌ནེ༌ ཤེས༌རབས༌ དང༌ ཧ༌གོ༌ སལ༌ལ༌ ཛད༌ཅེས༌ལ༌ ཞུའད༌།
COL 1:10 ཏེ༌ནེ༌ ཁྱོ༌ཞ༌གུན༌ནི༌ ཅི༌ས༌ཐོག༌ནེ༌ གཙོ༌བོའ༌ ཐུགས༌ཐད༌ཅེས༌ དང༌ རྩི༌ཝ༌ ཁྱོང༌ཁན༌ནི༌ མི༌ཚེ༌ཞིག༌ ཕུད༌ཉན༌ཨིན༌། ཁྱོ༌ཞའེ༌ མི༌ཚེའེ༌, བྲས༌བུའི༌ རིགས༌ ཟང༌པོ༌ ཚང༌མ༌ སྨིན༌ཏེ༌ དཀོན༌མཆོག༌ ཤེ༌ཤེས༌སི༌ ནང༌ང༌ མང༌ངི༌ སང༌ མང༌ང༌ ལྡན༌ཨིན༌།
COL 1:11 ང༌ཞའེ༌ མོས༌ལམ༌ ཞུའད༌, ཁྱོ༌ཞ༌གུན༌ལ༌ ཟོད༌པ༌ སྒོམ༌ཅེས༌ ཡང༌ རྡུག༌ངལ༌གུན༌ ཁུར༌ ཐུབ༌ཅེས༌སི༌ ཕིའ༌ དཀོན༌མཆོག༌གི༌ ཁྱོ༌ཞ༌གུན༌ནི༌ སེམས༌པོ༌ ཁོང༌ངི༌ ཧ༌ལས༌ཤེས༌སི༌ ཁྱུད༌ ཉམ༌པོ༌ ཤེད༌ཅན༌ ཅོའ༌ ཛད༌ཤིག༌། ཡང༌ མ༌ ཐད༌པོ༌ ཉམ༌པོ༌,
COL 1:12 ང༌དང༌གུན༌ནི༌ ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཤིག༌། ཁོང༌ངི༌ ཁྱོ༌ཞ༌གུན༌ལ༌, འོད༌དི༌ ནང༌ང༌ དུག༌ཁན༌ནི༌ ཁོང༌ངི༌ ཏམ༌པ༌ མི༌གུན༌ནི༌ ནོར༌སྐལ༌གུན༌ བགོས༌ཏེ༌ ཐོབ༌ཅེས༌ལ༌ ལྡམ༌མ༌ ཛད༌ཏེ༌ ཨིན༌ནོག༌།
COL 1:13 དཀོན༌མཆོག༌གི༌ ང༌དང༌གུན༌ ཤེ༌ཏན༌ནི༌ མུན༌གྲིག༌ ཝང༌ནེ༌ ཐར༌ ཅུག༌ག༌ ཛད༌ཏེ༌, ཁོང༌རང༌ངི༌ ཅེས༌པའེ༌ སྲས༌སི༌ གྱལ༌སྲིད༌དི༌ ནང༌ང༌ ཁྱེར༌ར༌ ཛདས༌།
COL 1:14 ཁོང༌ངི༌ སྲས༌སི༌ ཁོང༌རང༌ངི༌ སྲོག༌ སལ༌ལ༌ ཛད༌ཏེ༌ ང༌དང༌གུན༌ ཤེ༌ཏན༌ནི༌ ཝང༌ངི༌ ཀ༌ནེ༌ ཐར༌ ཅུག༌ག༌ ཛདས༌, ཡང༌ ང༌དང༌གུན༌ནི༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛདས༌།
COL 1:15 མ༌ཤི༌ཀ༌ ལྟས༌ཏེ༌, མ༌ནེ༌ མ༌ཐོང༌ཁན༌ནི༌ དཀོན༌མཆོག༌པོ༌ ཧ༌གོའ༌ནོག༌། ཅི༌ཚང༌མ༌ ཆག༌ཤུག༌གི༌ སང༌ སྔུན༌ལ༌ མ༌ཤི༌ཀ༌ ཞུགས༌ཏེ༌ ཡོད༌པིན༌, ཡང༌ ཁོང༌ང༌ ཅི༌ཚང༌མའེ༌ཀ༌ ཝང༌ ཡོད༌ཏེ༌ ཨིན༌ནོག༌།
COL 1:16 ཁོང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཅོའ༌ ཛདས༌: ནམ༌ཁའ༌ དང༌ ཇིག༌རྟེན༌ནི༌ ནང༌ང༌ ཡོད༌ཁན༌ ཚང༌མ༌, ཐོང༌ཁན༌ དང༌ མི༌ཐོང༌ཁན༌, ཁྲིས༌, ཡ༌ གྱལ༌སྲིད༌, ཡ༌ ཝང༌སྲུལ༌ ཡ༌ ཝང༌ ཡོད༌ཁན༌གུན༌, ཏེ༌ ཚང༌མ༌ ཁོང༌ གྱུད༌ཏེ༌ ཡང༌ ཁོང༌ངི༌ ཕིའ༌ ཅོའ༌ ཛད༌ཏེ༌ ཨིན༌ནོག༌།
COL 1:17 ཁོང༌ ཏེ༌གུན༌ ཆག༌ཤུག༌གི༌ སང༌ སྔུན༌ལ༌ ཞུགས༌ཏེ༌ ཡོད༌པིན༌། ཡང༌ ཁོང༌ངི༌ ཞས༌ཏེ༌ འི༌ ཚང༌མ༌ ལུས༌ཏེ༌ ཨིན༌ནོག༌།
COL 1:18 ཆོས༌ཚོགས༌ ནི༌ ཁོང༌ངི༌ སྐུ༌ཟུགས༌པོ༌ ཨིན༌ནོག༌། ཡང༌ ཁོང༌ ཏེ༌ སྐུ༌ཟུགས༌པོའེ༌ ཨུ༌ ཨིན༌། ཁོང༌ ནི༌ གོ༌ཟུགས༌པོ༌ ཞུགས༌ཏེ༌ ཨིན༌ནོག༌, ཡང༌ ཤི༌ཏེ༌ སོན༌ཏེའ༌ ལངས༌ཁན༌ ཚང༌མའེ༌ ཕྲོ༌ནེ༌ ཁོང༌ ཀྲག༌ཤོག༌པོ༌ ཨིན༌། ཏེ༌བོའེ༌ཕིའ༌ ཁོང༌ ཅི༌ཚང༌མའེ༌ ནང༌ང༌ ཏང༌པོ༌བོ༌ ཞུགས༌ཏེ༌ ཨིན༌།
COL 1:19 མ༌ཤི༌ཀའེ༌ ནང༌ང༌ གང༌པོ༌ ནས༌ས༌ལ༌ དཀོན༌མཆོག༌ ཐུགས༌ཐད༌དད༌པིན༌།
COL 1:20 ཡང༌ མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཁོང༌རང༌ ཉམ༌པོ༌ ཐུན༌བྲེལ༌ལི༌ ནང༌ང༌ ཁྱོང༌ང༌ ཛདས༌། དཀོན༌མཆོག༌གི༌ ཁོང༌རང༌ངི༌ སྲས༌སི༌ ཁྲག༌ རྐྱང༌ཤིང༌ངི༌ཀ༌ ཕོ༌ཅེས༌པོ༌ གྱུད༌ཏེ༌, ཇིག༌རྟེན༌ དང༌ ནམ༌ཁའེ༌ ནང༌ང༌ ཡོད༌ཁན༌ ཚང༌མ༌, ཁོང༌ ཉམ༌པོ༌ ཐུན༌བྲེལ༌ལི༌ ནང༌ང༌ ཁྱོང༌ང༌ ཛདས༌།
COL 1:21 སྐབས༌ཤིག༌ག༌ ཁྱོ༌ཞ༌གུན༌ དཀོན༌མཆོག༌ནེ༌ མ༌ ཐག༌རིང༌ང༌ ཡོད༌པིན༌, ཡང༌ ཁྱོ༌ཞའེ༌ ཅོ༌ཚུལ༌ དང༌ སམ༌ཚུལ༌ ངན༌པ༌ གུན༌ནི༌ ཞས༌ཏེ༌ ཁྱོ༌ཞའ༌ དཀོན༌མཆོག༌གི༌ གྲ༌འོ༌ ཨིན༌པིན༌།
COL 1:22 ཨིན༌ནའང༌ མ༌ཤི༌ཀའ༌ སྐུ༌ཟུགས༌སི༌ ནང༌ང༌ ཀྲོང༌ཤེས༌པོའེ༌ ཞས༌ཏེ༌ ཁྱོ༌ཞ༌གུན༌ དཀོན༌མཆོག༌ ཉམ༌པོ༌ ཐུན༌བྲེལ༌ལི༌ ནང༌ང༌ ཁྱོང༌ང༌ ཛད༌ཏེ༌ ཨིན༌། ཏེན༌ན༌བོའེ༌ ཞས༌ཏེ༌ དཀོན༌མཆོག༌གི༌ ཁྱོ༌ཞ༌གུན༌ ཏམ༌པ༌, རྩང༌མ༌ དང༌ སྐྱོན༌མེད༌ ཅོའ༌ ཛད༌ཏེ༌, ཁོང༌རང༌ངི༌ དུན༌ལ༌ ཁྱོང༌ང༌ ཛདས༌།
COL 1:23 ཨིན༌ནའང༌ ཁྱོ༌ཞ༌གུན༌ འི༌ ནང༌ང༌ སྟན༌པོ༌ དུགས༌ཏེ༌ དེན༌བ༌ ཨིན༌ཁན༌བོ༌ ཏད༌པ༌ ཅོ༌གོས༌། ཁྱོ༌ཞ༌གུན༌ནི༌ གའ༌མོའེ༌ ནས༌ཚུལ༌ ཚོར༌ཏེ༌ ཏད༌པ༌ ཅོས༌ཁན༌བོའེ༌ ཀ༌ནེ༌ ཐག༌རིང༌ང༌ མ༌ཆ༌ཤིག༌, ཡང༌ ཏེ༌ གའ༌མོའེ༌ ནས༌ཚུལ༌བོ༌ ཇིག༌རྟེན༌ གང༌པོའེ༌ ནང༌ང༌ ཤད༌ཏེ༌ ཨིན༌ནོག༌། ང༌, པ༌འུ༌ལུ༌ ཏེ༌ གའ༌མོའེ༌ ནས༌ཚུལ༌ ཤད༌ཅེས༌ལ༌ དཀོན༌མཆོག༌གི༌ ཞབས༌ཏོག༌པ༌ ལྡམ༌མ༌ ཛད༌ཁན༌བོ༌ ཨིན༌།
COL 1:24 ཏ༌ ཁྱོ༌ཞ༌གུན༌ནི༌ ཕིའ༌ ངའ༌ ནགས༌ ཐོང༌ཁན༌བོའ༌ ཐད༌པོ༌ རག༌, ཅིའ༌ཟེར༌ན༌ མ༌ཤི༌ཀའེ༌ ཁོང༌རང༌ངི༌ སྐུ༌ཟུགས༌, ཆོས༌ཚོགས༌སི༌ ཕིའ༌ རྡུག༌ངལ༌ ནམས༌ཁན༌བོའེ༌ ནང༌ང༌, ངེའང༌ ཁག༌ནེན༌ཨིན༌ ཨིན༌ནོག༌།
COL 1:25 དཀོན༌མཆོག༌གི༌ ཁྱོ༌ཞ༌གུན༌ལ༌ ཁོང༌རང༌ངི༌ ལོན༌ གང༌པོ༌ ཤད༌ཏེ༌ ཁོང༌ངི༌ ཆོས༌ཚོགས༌གུན༌ལ༌ ཞབས༌ཏོག༌ ཞུ༌ཅེས༌སི༌ ཁག༌པོ༌ ངའ༌ ཀལ༌ལ༌ ཛདས༌།
COL 1:26 ཏུས༌ཡུན༌རིང༌ དང༌ སྔུན༌མའེ༌ མིར༌གྱུད༌གུན༌ནི༌ ཀ༌ནེ༌ སྦས༌ཏེ༌ བོར༌ར༌ ཛད༌ཁན༌ནི༌ ཏེ༌ ལོན༌བོ༌ དག༌ས༌ དཀོན༌མཆོག༌གི༌ ཁོང༌རང༌ངི༌ མི༌ ཏམ༌པ༌གུན༌ལ༌ སྔོན༌ ཅུག༌ག༌ ཛདས༌།
COL 1:27 དཀོན༌མཆོག༌གི༌ མ༌ཤི༌ཀའེ༌ ནོར༌ དང༌ སྤལ༌བོ༌ ཁྱོ༌ཞའ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌ ཨིན༌ཁན༌བོ༌, ཁོང༌རང༌ངི༌ མི༌གུན༌ལ༌ ཧ༌གོ༌ཅུག༌ཅེས༌ལ༌ ཐུགས༌ཐད༌ད༌ནོག༌། དཀོན༌མཆོག༌གི༌ སང༌ཝའེ༌ ཐབ༌ལྡིངས༌ ནི༌, མ༌ཤི༌ཀ༌ ཁྱོ༌ཞའེ༌ ནང༌ང༌ ཞུགས༌ཏེ༌ ཡོད༌ཁན༌བོ༌ ཨིན༌, ཏེ༌བོའེ༌ ཁྱོ༌ཞ༌གུན༌ལ༌ ཁོང༌ངི༌ སྤལ༌ལི༌ ནང༌ང༌ ཐུ༌ཤེས༌སི༌ རེ༌ཝ༌བོ༌ ཏང༌ང༌ནོག༌།
COL 1:28 དཀོན༌མཆོག༌གི༌ ང༌ཞའ༌ སལ༌ཁན༌ནི༌ ཤེས༌རབས༌ ཚང༌མ༌ ཉམ༌པོ༌ སྤང༌པུད༌ཨིན༌ ཡང༌ ལབ༌ཞ༌ ཏང༌ཨིན༌, ང༌ཞའེ༌ མ༌ཤི༌ཀའེ༌ སྐོར༌ལ༌ ཞན༌མ༌གུན༌ལ༌ ཤད༌དད༌། དཀོན༌མཆོག༌གི༌ དུན༌ལ༌ ཏེ༌གུན༌ མ༌ཤི༌ཀའེ༌ ནང༌ང༌ སམ༌བ༌ཅན༌ རིག༌ གྱུར༌ཏེ༌ ཕུལ༌ ཐུབ༌ཅེས༌ལ༌ ང༌ཞའ༌ དོད༌ད༌རག༌།
COL 1:29 ཏེན༌ན༌བོའེ༌ཕིའ༌ མ༌ཤི༌ཀའེ༌ ངའ༌ སལ༌ལ༌ ཛད༌ཁན༌ནི༌ ཤེད༌ དང༌ ཁྱུད༌ ཚང༌མ༌ ཉམ༌པོ༌, ངའེ༌ ལས༌ མ༌སྲན༌ཏྲེ༌ ཅོའད༌།
COL 2:1 ཁྱོ༌ཞ༌, ལ༌འོ༌དི༌ཀིའི༌ ཆོས༌ཚོགས༌ ཡང༌ ང༌ མ༌ཐུག༌ཁན༌ནི༌ ཏད༌པ༌ཅན༌ ཚང༌མ༌ ཏད༌པའེ༌ ནང༌ང༌ ལྡན༌ཅེས༌སི༌ ཕིའ༌ ངའེ༌ ཚེར༌ཁ༌ ཅོ༌ཨིན༌ སྲན༌ཏྲེ༌ ལས༌ ཅོ༌ཁན༌བོ༌ ཁྱོ༌ཞའ༌ ཧ༌གོ༌ ཅུག༌ཉིན༌རག༌།
COL 2:2 ངའེ༌ ཁོང༌གུན༌ལ༌ སྤོས༌པ༌ སྐྱེ༌ཅུག༌ཅེས༌ དང༌ ཅེས༌པའེ༌ ནང༌ང༌ ཐུན༌བྲེལ༌ ཆ༌ཅེས༌སི༌ དོད༌པ༌ ཅོའད༌། ཁོང༌གུན༌ལ༌ དཀོན༌མཆོག༌གི༌ སང༌ཝའེ༌ ནང༌ང༌ བོར༌ར༌ ཛད༌ཁན༌ནི༌ ཐབས༌, ཀ༌བོ༌ མ༌ཤི༌ཀ༌ ཁོང༌རང༌ ཨིན༌, ཏེ༌བོ༌ ཧ༌གོ༌ཅེས༌སི༌ ནང༌ང༌ ལོ༌ཁྱེལ༌ གང༌པོ༌ ཡོང༌གོ༌ཤེས༌སི༌ ངའེ༌ དོད༌པ༌ རག༌།
COL 2:3 མ༌ཤི༌ཀའེ༌ ནང༌ང༌ དཀོན༌མཆོག༌གི༌ ཤེས༌རབས༌ དང༌ ཡོན༌ཏན༌ནི༌ སྟེར༌ ཚང༌མ༌ སྦས༌ཏེ༌ ཡོད༌ཏེ༌ ཨིན༌ནོག༌།
COL 2:4 སུ༌ཞིག༌གིའང༌ ཁས༌པའེ༌ སྤེ༌ར༌གུན༌ ཏངས༌ཏེ༌ ཁྱོ༌ཞའ༌ གོབ༌སྐོར༌ མི༌ཉན༌ཅེས༌སི༌ ཕིའ༌ ངའེ༌ ཏེ༌གུན༌ ཁྱོ༌ཞའ༌ ཤད༌དད༌།
COL 2:5 ཟུགས༌སི༌ ཐོག༌ནེ༌ ང༌ ཁྱོ༌ཞ༌གུན༌ ཉམ༌པོ༌ མེད༌ནའང༌, སེམས༌ཉིད༌དི༌ ཐོག༌ནེ༌ ང༌ ཁྱོ༌ཞའ༌ ཉམ༌པོ༌ ཨིན༌། ཡང༌ ཁྱོ༌ཞ༌གུན༌ ཐུན༌ཏེ༌ མ༌ཤི༌ཀའེ༌ ཏད༌པའེ༌ ནང༌ང༌ སྟན༌པོ༌ དུགས༌ཏེ༌ ཡོད༌ཁན༌བོ༌ ཚོར༌ཏེ༌ ངའ༌ ཐད༌པོ༌ སོང༌།
COL 2:6 ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ མ༌ཤི༌ཀ༌ ཡེ༌ཤུ༌ ཁྱོ༌ཞ༌རང༌ངི༌ གཙོ༌བོ༌ ཨིན༌ཁན༌བོ༌ ཨིད༌ཤེས༌ ཅོའ༌ ཙོགས༌ལ༌ ཏ༌རུང༌ངའང༌ ཁོང༌ངི༌ ནང༌ང༌ དུག༌ཤིག༌།
COL 2:7 ཁྱོ༌ཞ༌གུན༌ནི༌ མ༌ཤི༌ཀའེ༌ ནང༌ང༌ པ༌ཀྲག༌ རྐྱངས༌ཏེ༌ ཡར༌གྱས༌ ཅོ༌ཨིན༌, ཏད༌པ༌བོ༌ སྟན༌པོ༌ ཅོ༌ཤིག༌ ཀ༌ཟུག༌གི༌ ཁྱོ༌ཞ༌གུན༌ལ༌ ལབས༌ཏེ༌ ཨིན༌པིན༌། ཏེ༌ནེ༌ ཁྱོ༌ཞ༌གུན༌ནི༌ ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌།
COL 2:8 སུ༌ཞིག༌གིའང༌ ཁྱོ༌ཞ༌གུན༌ལ༌ ཏོན༌ཏག༌ མེད༌ཁན༌ དང༌ ཟུས༌མ༌ ལབ༌ཞ༌ གུན༌ གྱུད༌ཏེ༌, གོབ༌སྐོར༌ མི༌ཅུག༌ཅེས༌ལ༌ ཤང༌ ཅོ༌ཤིག༌, ཏེ༌ ལབ༌ཞ༌གུན༌ མ༌ཤི༌ཀའེ༌ མན༌པ༌, མིའི༌ ལུག༌སྲོལ༌ དང༌ ཇིག༌རྟེན༌ནི༌ ངན༌པ༌ སེམས༌ཉིད༌དི༌ ཝང༌གུན༌ནེ༌ ཡོངས༌ཏེ༌ ཨིན༌ནོག༌།
COL 2:9 གོབ༌སྐོར༌ མི༌ཅུག༌ཅེས༌པོ༌ ཏན༌ཏན༌ ཅོ༌ཤིག༌, ཅིའ༌ཟེར༌ན༌ མ༌ཤི༌ཀའེ༌ སྐུ༌ཟུགས༌སི༌ ནང༌ང༌ དཀོན༌མཆོག༌ གང༌པོ༌ ནས༌ཏེ༌ ཨིན༌ནོག༌།
COL 2:10 ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ ཅིག༌གྲིལ༌ ཆ༌ཅེས༌པོའེ༌ ཁྱོ༌ཞའེ༌ ནང༌ང༌ ཡང༌ ཅའང༌ སྒོས༌དོམ༌ ལུས༌ས༌ མ༌ནོག༌། ཁོང༌ ནི༌ ཝང༌ ཡོད༌ཁན༌ དང༌ ཝང༌སྲུལ༌པ༌ ཚང༌མའེ༌སང༌ ཆེ༌ཤོག༌པོ༌ ཞུགས༌ཏེ༌ ཨིན༌ནོག༌།
COL 2:11 ཁྱོ༌ཞའེ༌, མ༌ཤི༌ཀའེ༌ ནང༌ང༌ ཏད༌པ༌ ཅོའ༌ཅིག༌, ཁྱོ༌ཞ༌གུན༌ནི༌ སེམས༌ལ༌ སུན༌ནད༌ ཅོའ༌ ཛད༌ཏེ༌ ཨིན༌ནོག༌, ཏེ༌ སུན༌ནད༌བོ༌ མིའི༌ ལག༌པ༌ནེ༌ མ༌ཅོའ༌, མ༌ཤི༌ཀ༌ ཁོང༌རང༌ངི༌ ཛད༌ཏེ༌ ཁྱོ༌ཞའེ༌ ནང༌ང༌ ཡོད༌ཁན༌ནི༌ སྡིག༌ཅན༌ དོད༌པའེ༌ ཝང༌བོ༌ ཅད༌ད༌ ཛདས༌།
COL 2:12 ཁྱོ༌ཞའེ༌ ཁྲུས༌ལེན༌ན༌ཅིག༌, ཁྱོ༌ཞ༌གུན༌ ཤི༌ཏེ༌ མ༌ཤི༌ཀ༌ ཉམ༌པོ༌ སུབས༌ཏེ༌ ཨིན༌། ཡང༌ ཁོང༌ ཉམ༌པོ༌ སོན༌པོའང༌ ལངས༌ཏེ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ མ༌ཤི༌ཀ༌ ཤི༌ཁན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌ནི༌ དཀོན༌མཆོག༌གི༌, ཏེ༌ ཁྱུད༌པོའེ༌ ནང༌ང༌ ཨིད༌ཤེས༌ ཅོས༌ཏེ༌ ཨིན༌ནོག༌།
COL 2:13 སྡིག༌པ༌ དང༌ སྡིག༌པའེ༌ དོད༌པ༌གུན༌ནི༌ ཀ༌ནེ༌ མི༌ཐར༌ཅེས༌པོའེ༌ ཞས༌ཏེ༌, སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ ཤི༌ཏེ༌ ཨིན༌པིན༌། ཏེ༌ནེའང༌ དཀོན༌མཆོག༌གི༌ ང༌དང༌ངི༌ སྡིག༌པ༌ ཚང༌མའ༌ ཤགས༌པ༌ སལ༌ལ༌ ཛད༌ཏེ༌, མ༌ཤི༌ཀ༌ ཉམ༌པོ༌ ཁྱོ༌ཞ༌གུན༌ སོན༌ཏེའ༌ ལང༌ང༌ ཛདས༌།
COL 2:14 དཀོན༌མཆོག༌གི༌ ང༌དང༌ངི༌ གྱབ༌གལ༌ལ༌ སྤང༌པོ༌ ཏང༌ཁན༌ནི༌ སྡིག༌པའེ༌ ཐོ༌གུན༌ ཤིགས༌ཏེ༌, མ༌ཤི༌ཀའེ༌ རྐྱང༌ཤིང༌ངི༌ཀ༌ ཟེ༌རུ༌ གྱབས༌ཏེ༌ མེད༌ཁན༌ ཅོའ༌ ཛདས༌།
COL 2:15 ཏེ༌ཟུག༌ ཛད༌ཏེ༌ དཀོན༌མཆོག༌གི༌ ཝང༌ དང༌ ཝང༌སྲུལ༌ཁན༌ནི༌ ངན༌པ༌ སེམས༌ཉིད༌ ཚང༌མའེ༌ ཝང༌བོ༌ མེད༌ཁན༌ ཅོའ༌ ཛདས༌། མ༌ཤི༌ཀ༌ རྐྱང༌ཤིང༌ངི༌ཀ༌ ཀྲོངས༌ཏེ༌ སོན༌ཏེའ༌ ཞངས༌ཅེས༌ གྱུད༌ཏེ༌, སྲོག༌ ཡོད༌ཁན༌ ཚང༌མའེ༌ དུན༌ལ༌ ཏེ༌གུན༌ལ༌ ཁྲེལ༌ཅུག༌ག༌ ཛད༌ཏེ༌ གྱལ༌ཁའ༌ ནེན༌ན༌ ཛདས༌།
COL 2:16 ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ ཅི༌རིག༌ ཟའད༌ ཡ༌ ཐུང༌ངད༌, ཆོས༌སི༌ ཡ༌ ནམ༌གང༌ངི༌ ཏུས༌ཆེན༌ ཙི༌ཅེས༌, ཤབ༌བད༌དི༌ ཞག༌གུན༌ མི༌སྲུང༌ཅེས༌ལ༌ སྐྱོན༌ ཕིང༌ཁན༌གུན༌ལ༌ སྣང༌ང༌ མ༌ཏང༌ཤིག༌།
COL 2:17 ཏེ༌ ཁྲིམས༌ ཚང༌མ༌ སྐྱོད༌ཅེས༌ཅན༌ནི༌ ངོས༌མ༌བོའེ༌ ཀྲིབ༌ཀྱག༌ ཨིན༌པིན༌, ཏ༌ མ༌ཤི༌ཀ༌ ནི༌ ཏེན༌ན༌ ངོས༌མ༌བོ༌ ཨིན༌།
COL 2:18 པས༌མོ༌ སྟན༌ཟུན༌ ཡང༌ ཕོ༌ཉ༌ ཅོལ༌ཅེས༌སི༌ ནང༌ང༌ མ༌ ཐད༌པོ༌ ཅོ༌ཁན༌གུན༌ལ༌, ཁྱོ༌ཞ༌གུན༌ དཀོན༌མཆོག༌གི༌ དེན༌བའེ༌ ལམ༌ནེ༌ ཐག༌རིང༌ང༌ ཁྱེར༌ མ༌ཅུག༌ཤིག༌། དཀོན༌མཆོག༌གི༌ ཁོང༌ང༌ ཉི༌ལམ༌ གྱུད༌ཏེ༌ ཏེ༌གུན༌ནི༌ སྐོར༌ལ༌ ཤད༌ད༌ ཛདས༌ ཟེར༌ར༌ནོག༌། ཨིན༌ནའང༌ ཁོང༌ངི༌ སྡིག༌ཅན༌ སམ༌བ༌གུན༌ནི༌ ཁོང༌གུན༌ ཕོ༌སོ༌ཅན༌ གྱུར༌ ཅུགས༌ཏེ༌ ཨིན༌ནོག༌།
COL 2:19 ཏེ༌གུན༌ནི༌ བྲེལ༌བོ༌ མ༌ཤི༌ཀ༌ ཉམ༌པོ༌ ཆད༌ཏེ༌ ཨིན༌ནོག༌, ཀ༌བོ༌ ཁོང༌གུན༌ནི༌ ཨུ༌ ཨིན༌། ཡང༌ མ༌ཤི༌ཀའེ༌ སྐུ༌ཟུགས༌ གང༌པོ༌ ༼ཡང༌ན༌ ཆོས༌ཚོགས༌པོ༌༽ ཤ༌ དང༌ གྱུས༌པ༌ གུན༌ནི༌ ཉམ༌པོ༌ ཟུམས༌ཏེ༌ བོར༌ར༌ ཛད༌ཏེ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌ ལྡན༌ ཅུག༌ག༌ ཛད༌ད༌ནོག༌།
COL 2:20 ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ ཤི༌ཅེས༌པོའེ༌, ཁོང༌ངི༌ ཇིག༌རྟེན༌ནི༌ ངན༌པ༌ སེམས༌ཉིད༌དི༌ ཝང༌སྲུལ༌པ༌གུན༌ནི༌ ཡོག༌ནེ༌ ཁྱོ༌ཞའ༌ ཐར༌ ཅུག༌ག༌ ཛདས༌, ཏེ༌ནེ༌ ཅིའ༌ ཁྱོ༌ཞའེ༌ ཏ༌རུང༌ངའང༌ ཇིག༌རྟེན༌ནི༌ ཁྲིམས༌གུན༌ནི༌ ཁའ༌ཉན༌ནད༌?
COL 2:21 སྤེར༌ན༌ “ལག༌པའ༌ མ༌ཁུར༌, མ༌ཉང༌, ཡང༌ ལག༌པ༌ མ༌རྩེ༌ ཟེར༌ར༌ནོག༌!”
COL 2:22 ཏེ༌ ཚིར༌ཀ༌གུན༌ ཀོལ༌ཏེ༌ སྟིང༌ནེ༌ མེད༌ཁན༌ ཆ༌ཅེས༌པོ༌ དཀོན༌མཆོག༌གི༌ ཐབས༌ལྡིང༌ང༌ ཛདས༌, ཅིའ༌ཟེར༌ན༌ ཏེ༌གུན༌ མིའི༌ ལབ༌ཞ༌ དང༌ བཀའ༌ཏང༌ཁན༌ གུན༌ མ༌ནེ༌ ཡང༌ ཅའང༌ མ༌ནོག༌།
COL 2:23 མི༌གུན༌ལ༌ ཏེ༌ ཁྲིམས༌པོ༌ ཤེས༌རབས༌ཅན༌ ཐོང༌ང༌ནོག༌ ཅིའ༌ཟེར༌ན༌ ཏེ༌ ཁྲིམས༌པོའེ༌ ཁོང༌གུན༌ལ༌ ཅི༌ ཚང༌མའེ༌ སང༌ ཏེ༌བོ༌ ཁག༌ཅན༌ སམ༌ཅེས༌, པས༌མོ༌ ཅོས༌ཏེ༌ ཏམ༌པ༌ ཐོང༌ཅུག༌ཅེས༌, དང༌ རང༌ངི༌ ཟུགས༌པོའ༌ ནགས༌ སྟན༌ཅེས༌ གུན༌ ལབ༌བ༌ནོག༌། ཨིན༌ནའང༌ དེན༌བའ༌ ཁོང༌གུན༌ལ༌ རང༌རང༌ངི༌ དོད༌པ༌ ངན༌པ༌གུན༌ལ༌ ཕམ༌ཀལ༌ཅེས༌སི༌ ནང༌ང༌ ཏེ༌ ཁྲིམས༌གུན༌ནི༌ རོགས༌ ཅོའ༌ མ༌ནོག༌།
COL 3:1 ཏ༌ དཀོན༌མཆོག༌གི༌ ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ མི༌ཚེ༌ སོ༌མ༌ཞིག༌གི༌ ནང༌ང༌ ལང༌ང༌ ཛད༌ པ༌སང༌, ཁྱོ༌ཞའེ༌ ནམ༌ཁའེ༌ ནང༌ང༌ ཡོད༌ཁན༌གུན༌ནི༌ དོད༌པ༌ བོར༌ཤིག༌ ཀ༌རུ༌ མ༌ཤི༌ཀ༌, དཀོན༌མཆོག༌གི༌ ཆག༌ ཡས༌པའེ༌ ཁྲིས༌སི༌ཀ༌ ཞུགས༌ཏེ༌ ཡོད༌།
COL 3:2 ཇིག༌རྟེན༌ནི༌ ནང༌ང༌ ཡོད༌ཁན༌གུན༌ནི༌ སྐོར༌ལ༌ སམ༌བ༌ མ༌ཏང༌ང༌, ནམ༌ཁའེ༌ ནང༌ང༌ ཡོད༌ཁན༌གུན༌ནི༌ སྐོར༌ལ༌ སམ༌བ༌ ཏོང༌ཤིག༌,
COL 3:3 ཅིའ༌ཟེར༌ན༌ ཁྱོ༌ཞ༌གུན༌ སྔུན༌མའེ༌ སྡིག༌ཅན༌ མི༌ཚེ༌ ཕུད༌ཅེས༌སི༌ ནང༌ང༌ ཤི༌ཏེ༌ དཀོན༌མཆོག༌གི༌ ནང༌ང༌ ཁྱོ༌ཞའེ༌ དེན༌བའེ༌ མི༌ཚེ༌བོ༌ མ༌ཤི༌ཀ༌ ཉམ༌པོ༌ སྦས༌ཏེ༌ ཡོད༌།
COL 3:4 ཁྱོ༌ཞ༌གུན༌ལ༌ མི༌ཚེ༌ སོ༌མ༌ སལ༌ཁན༌ནི༌ མ༌ཤི༌ཀ༌ ལོགས༌ཏེ༌ སྐྱོད༌ད༌ཅིག༌, ཁྱོ༌ཞ༌གུན༌ནའང༌ ཟིར༌རྗིད༌དི༌ ནང༌ང༌ ཁོང༌ ཉམ༌པོ༌ སྔོན༌ཨིན༌།
COL 3:5 ཏེ༌བོའེ༌ཕིའ༌ ཁྱོ༌ཞ༌གུན༌ནི༌ སྡིག༌པའེ༌ དོད༌པ༌གུན༌ མེད༌ཁན༌ ཅོ༌ཤིག༌། སྤེར༌ན༌ ངན༌པའེ༌ ལུས༌བྲེལ༌, ཟུགས༌སི༌ ཐོག༌ནེ༌ ཁྲེལ༌མེད༌དི༌ ལས༌, ངན༌པའེ༌ ལུས༌བྲེལ༌ལི༌ དོད༌པ༌, དོད༌པ༌ ངན༌པ༌, ནབ༌སེམས༌ ༼ནབ༌སེམས༌ཅན༌གུན༌ནི༌ ཇིག༌རྟེན༌ནི༌ ནོར༌ལ༌ ཆག༌ཤེས༌པོ༌ སྐུན༌དྲ༌ ཅོལ༌ཁན༌ ཙོགས༌ ཨིན༌ནོག༌།༽
COL 3:6 ཏེན༌ན༌གུན༌ནི༌ ཞས༌ཏེ༌ ཁའ༌ མི༌ཉན༌ཁན༌གུན༌ནི༌ཀ༌ དཀོན༌མཆོག༌གི༌ ཐུགས༌སྲོ༌ བབས༌ཤེས༌ ཨིན༌ནོག༌།
COL 3:7 ཏུས༌ཤིག༌ག༌ ཁྱོ༌ཞ༌གུན༌ནའང༌ ཏེན༌ན༌ ཙོགས༌སི༌ ངན༌པའེ༌ ལམ༌མི༌ཀ༌ གྲུལ༌ལད༌པིན༌,
COL 3:8 ཨིན༌ནའང༌ ཏ༌ སྲོ༌ ཡོང༌ཅེས༌, ཁྲག༌ལུང༌, ངན༌སེམས༌, ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌ དང༌ ཁ༌ངན༌པ༌ ཚང༌མའ༌ ཕང༌གོས༌།
COL 3:9 ཅིག༌ དང༌ ཅིག༌ག༌ ཟུན༌ མ༌ཏང༌ཤིག༌, ཅིའ༌ཟེར༌ན༌ ཁྱོ༌ཞའེ༌ སྔུན༌མའེ༌ སམ༌ཚུལ༌ དང༌ ལས༌ ངན༌པ༌ གུན༌ ཕངས༌ཏེ༌ ཨིན༌།
COL 3:10 ཁྱོ༌ཞ༌རང༌གུན༌ལ༌ སྕོད༌པ༌ སོ༌མའེ༌ ཀོས༌ལག༌ སྐོན༌ཤིག༌, ཡང༌ ཁྱོ༌ཞའ༌ ཛད༌ཁན༌ནི༌ དཀོན༌མཆོག༌ ཤེ༌ཤེས༌སི༌ ནང༌ང༌ ལྡན༌ཨིན༌ སོང༌ཏེ༌ ཁྱོ༌ཞའེ༌ སྕོད༌པ༌ ཁོང༌ངི༌ ཙོགས༌ གྱུར༌ཅུག༌ཤིག༌།
COL 3:11 ཏེ༌ མི༌ཚེ༌ སོ༌མ༌བོའེ༌ ནང༌ང༌ ཁྱོ༌ཞ༌གུན༌ ཡ༌ཧུ༌དཱ༌པ༌ ཡ༌ ཡ༌ཧུ༌དཱ༌པ༌ མན༌ཁན༌, སུན༌ནད༌ ཅོ༌ཁན༌ ཡ༌ མ༌ཅོ༌ཁན༌, ཞན༌ཡུལ༌ལི༌ མི༌, སྕོད༌ལམ༌ མེད༌ཁན༌ནི༌ མི༌, ཚེ༌ཡོག༌ ཡ༌ རང༌ཝང༌ཅན༌ ཨིན༌ཅེས༌པོ༌ ཁག༌ཅན༌ མ༌ནོག༌, ཨིན༌ནའང༌ ཚང༌མའེ༌སང༌ ཁག༌ཅན༌བོ༌ ནི༌ མ༌ཤི༌ཀ༌ ཨིན༌ནོག༌, ཡང༌ ཁོང༌ ང༌དང༌ ཚང༌མའེ༌ ནང༌ང༌ ཞུགས༌ས༌ནོག༌།
COL 3:12 ཁྱོ༌ཞ༌གུན༌ དཀོན༌མཆོག༌གི༌ ལྡམས༌ཁན༌ནི༌ ཏམ༌པ༌ དང༌ ཅེས༌པ༌ གུན༌ ཨིན༌ པ༌སང༌, རང༌དང༌རང༌ང༌ སྙིང༌རྗེ༌, ཀའ༌ཀྲིན༌, པས༌མོ༌, ཉམ༌ཤུང༌ དང༌ ཟོད༌པའེ༌ ཀོས༌གུན༌ སྐོན༌ཤིག༌།
COL 3:13 ཁྱོ༌ཞའ༌ ཞན༌མའེ༌ གྱབ༌གལ༌ལ༌ ཟེར༌གྱུ༌ ཡོད༌ན༌, ཟོད༌པ༌ ཅོས༌ཏེ༌ ཏེ༌གུན༌ལ༌ ཤགས༌པ༌ ཏོང༌ཤིག༌། གཙོ༌བོའེ༌ ཁྱོ༌ཞ༌གུན༌ལ༌ ཤགས༌པ༌ སལ༌ཁན༌ ཙོགས༌ལ༌ ཁྱོ༌ཞ༌གུན༌ནིའང༌ ཅིག༌ དང༌ ཅིག༌ག༌ ཤགས༌པ༌ ཏོང༌ཤིག༌།
COL 3:14 ཚང༌མའེ༌སང༌ ཁག༌ཅན༌ ནི༌, ཁྱོ༌ཞའེ༌ ཁྱོ༌ཞ༌རང༌ང༌ ཅམས༌པའེ༌ ཀོས༌པོ༌ སྐོན༌ཤིག༌, ཀ༌བོའེ༌ ང༌དང༌གུན༌ ཐུན༌བྲེལ༌ སྟན༌པོའེ༌ ནང༌ང༌ བོར༌ར༌ནོག༌།
COL 3:15 ཡང༌ ཁྱོ༌ཞ༌གུན༌ ཟུགས༌ ཅིག༌གི༌ ཡན༌ལག༌ ཙོགས༌ལ༌ ཞི༌དེ༌ ནང༌ང༌ དུག༌ག༌ལ༌ བོད༌ད༌ ཛད༌ པ༌སང༌, མ༌ཤི༌ཀའེ༌ ཞི༌དེའ༌ ཁྱོ༌ཞའེ༌ སྙིང༌གུན༌ནི༌ ནང༌ང༌ ཝང༌སྲུལ༌ ཅུག༌ཤིག༌། ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཤིག༌།
COL 3:16 མ༌ཤི༌ཀའེ༌ སྟོབས༌ཅན༌ ལོན༌གུན༌ ཁྱོ༌ཞ༌གུན༌ནི༌ སྙིང༌ དང༌ སེམས༌སི༌ ནང༌ང༌ ནས༌ཅུག༌ཤིག༌། དཀོན༌མཆོག༌གི༌ སལ༌ཁན༌ནི༌ ཤེས༌རབས༌ ཚང༌མ༌ ཉམ༌པོ༌ ཁྱོ༌ཞ༌གུན༌ནི༌ ཅིག༌ དང༌ ཅིག༌ག༌ ལབ༌ཞ༌ དང༌ ཁ༌དའ༌ ཏོང༌ཤིག༌། དཀོན༌མཆོག༌ག༌ སུང༌གུར༌, གུར༌མ༌ དང༌ སེམས༌ཉིད༌དི༌ ལུ༌གུན༌ ཕུལ༌ ཟ༌ནེ༌, སྙིང༌ནེ༌ ཐུག༌རྗེ༌ཆེ༌ ཞུ༌ཤིག༌།
COL 3:17 ཡང༌ ཁྱོ༌ཞའེ༌ ཅི༌ཞིག༌ ཟེར༌རད༌ ཡ༌ ཅོའད༌, ཡབ༌ དཀོན༌མཆོག༌ག༌ ཐུག༌རྗེ༌ཆེ༌ ཕུལ༌ཨིན༌ ཏེ༌བོ༌ གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌ ཅོ༌ཤིག༌།
COL 3:18 ན༌མ༌གུན༌, ཁྱོ༌ཞའ༌ རང༌ངི༌ མག༌པ༌གུན༌ནི༌ ཝང༌ངི༌ ཡོག༌ག༌ དུག༌ཤིག༌, ཅིའ༌ཟེར༌ན༌ གཙོ༌བོའེ༌ ལོབ༌ཕྲུགས༌ ཨིན༌ཅེས༌པོའེ༌ ཏེ༌ཙོགས༌ ཅོ༌གོ༌ཤེས༌ ཨིན༌ནོག༌།
COL 3:19 མག༌པ༌གུན༌, རང༌ངི༌ ན༌མའ༌ ཅེས༌པ༌ ཅོ༌ཤིག༌, ཡང༌ ཁོང༌གུན༌ལ༌ ནགས༌ མ༌སྟན༌ཤིག༌།
COL 3:20 ཕྲུ༌གུ༌གུན༌, ཕ༌མའེ༌ ཟེར༌ཁན༌ ཚང༌མའ༌ ཁའ༌ཉོན༌ཤིག༌, ཏེ༌བོའ༌ གཙོ༌བོ༌ ཐུགས༌ཐད༌ད༌ནོག༌།
COL 3:21 ཨ༌བ༌གུན༌ རང༌ངི༌ ཕྲུ༌གུའ༌ མངས༌ཏེའང༌ ལྡམས༌ཏེ༌ མ༌བོར༌ཤིག༌, ཏེ༌ཟུག༌ ཅོ༌ན༌ ཁོང༌གུན༌ནི༌ སྤོས༌པ༌ ཆག༌ག༌ནོག༌།
COL 3:22 ཡོག༌པོ༌གུན༌, ཁྱོ༌ཞའེ༌ ཇིག༌རྟེན༌ནི༌ སྤོན༌བོ༌གུན༌ནི༌ ཟེར༌ཁན༌ ཚང༌མའ༌ ཁའ༌ཉོན༌ཤིག༌། ཁྱོ༌ཞ༌གུན༌ནི༌ ཁོང༌ངི༌ སྟོད༌པ༌ ཐོབ༌ཅེས༌ ཡ༌ ཁོང༌གུན༌ནི༌ ལྟའ༌ ཟ༌ནེ༌ ཅིག༌པོ༌ མན༌པ༌, གཙོ༌བོའ༌ ཀུས༌པ༌ ཅོ༌ཅེས༌ དང༌ སེམས༌ ཟང༌པོ༌ ཡོད༌ཅེས༌པོའེ༌ ཏེ༌བོ༌ ཅོ༌ཤིག༌།
COL 3:23 ཅི༌ ལས༌ཤིག༌ ཅོའད༌ནའང༌, སྙིང༌ ཐག༌པ༌ནེ༌ ཅོ༌ཤིག༌། མི༌ མན༌པ༌, གཙོ༌བོའེ༌ ཕིའ༌ ཅོས༌ཏེ༌ ཨིན༌ སོམ༌ཤིག༌།
COL 3:24 ཨིད༌ཏུ༌ ཅོ༌ཤིག༌ གཙོ༌བོའེ༌ ནོར༌སྐལ༌བོ༌ སོལ༌རས༌སི༌ ཚུལ༌ལ༌ ཐོབ༌ཨིན༌, ཅིའ༌ཟེར༌ན༌ ཁྱོ༌ཞའེ༌ ཞབས༌ཏོག༌ ཞུ༌ཁན༌ནི༌ སྤོན༌བོ༌ ནི༌ གཙོ༌བོ༌ མ༌ཤི༌ཀ༌ ཞུགས༌ཏེ༌ ཨིན༌ནོག༌།
COL 3:25 ཀལ༌ཏེས༌ ཁྱོ༌རང༌གུན༌ནི༌ ངན༌པ༌ ཅོ༌ན༌, ངན༌པ༌ ཅོ༌ཁན༌ནི༌ ལན༌བོའ༌ ཆད༌པ༌ ཕོག༌ཨིན༌, ཅིའ༌ཟེར༌ན༌ དཀོན༌མཆོག༌གི༌ སུའང༌ ཆོག༌རིས༌ ཅོའ༌ ཛད༌ད༌ མ༌ནོག༌།
COL 4:1 སྤོན༌བོ༌གུན༌, ཁྱོ༌ཞའེ༌ ཚེ༌ཡོག༌གུན༌ལ༌ འོས༌པ༌ དང༌ གྱལ༌ལ༌ ཅོ༌ཤིག༌, ཅིའ༌ཟེར༌ན༌ ཁྱོ༌ཞ༌གུན༌ལའང༌ ནམ༌ཁའེ༌ ནང༌ང༌ ཞུགས༌ཁན༌ནི༌ སྤོན༌བོ༌ ཡོད༌ཁན༌བོ༌ གྱུས༌ཨིན༌ནོག༌།
COL 4:2 ཁག༌ཅན༌ ཐེས༌ཏེ༌ མོས༌ལམ༌ ཞུ༌ཅེས༌པོ༌ མ༌ནེ༌ ཕང༌ མ༌གོས༌། ཡང༌ མོས༌ལམ༌ ཞུ༌ ཟ༌ནེ༌, ཁྱོ༌ཞའེ༌ སམ༌བ༌ ཅུན༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཤིག༌།
COL 4:3 གཙོ༌བོའེ༌ ལམ༌ ཕེའ༌ ཛད༌ཏེ༌ མ༌ཤི༌ཀའེ༌ སྐོར༌ལ༌ སང༌ཝའེ༌ ཐབ༌ལྡིངས༌པོ༌ ཤད༌ཉན༌ཅེས༌ལ༌ ང༌ཞའེ༌ ཕིའང༌ མོས༌ལམ༌ ཞུས༌ཤིག༌, ཀ༌བོའེ༌ ཞས༌ཏེ༌ ང༌ ཙོན༌ནི༌ ནང༌ང༌ ཨིན༌།
COL 4:4 ཡང༌ ང༌ ཏེ༌ ལོན༌བོ༌ སལ༌པོ༌ ཅོས༌ཏེ༌ ཤད༌ ཐུབ༌ཅེས༌ལ༌ མོས༌ལམ༌ ཞུས༌ཤིག༌, སལ༌པོ༌ ཅོས༌ཏེ༌ ཤད༌ཅེས༌པོ༌ ངའེ༌ ཁག༌ ཨིན༌ནོག༌།
COL 4:5 ཏད༌པ༌ མེད༌ཁན༌གུན༌ ཉམ༌པོ༌ བྲེལ༌ ཅོ༌ ཟ༌ནེ༌ ཁོང༌གུན༌ ཏད༌པའེ༌ ནང༌ང༌ ཁྱོང༌ཅེས༌ལ༌ སྐབས༌ ཐོབ༌ཁན༌ ཚང༌མ༌ ཤེས༌རབས༌ ཉམ༌པོ༌ ཀོལ༌ཤིག༌།
COL 4:6 ཁྱོ༌ཞའེ༌ སྤེ༌ར༌ ལྡེ༌མོ༌ དང༌ ཇམ༌པོ༌ ཉམ༌པོ༌ ཏང༌ན༌ ཁྱོ༌ཞའེ༌ ཁོང༌གུན༌ལ༌ ལན༌ ཚང༌མ༌ གྱལ༌ལ༌ ཅོས༌ཏེ༌ ཏང༌ཉན༌ཨིན༌།
COL 4:7 ཏི༌ཁི༌ཀུས༌སི༌ ངའེ༌ སྐོར༌ལ༌ ནས༌ཚུལ༌ ཚང༌མ༌ ཁྱོ༌ཞ༌གུན༌ལ༌ ཞིབ༌སལ༌ ཅོས༌ཏེ༌ ཤད༌ད༌ནོག༌། ཁོ༌ ནི༌ ངའེ༌ ཅེས༌པ༌ སྤུན༌, ཞབས༌ཏོག༌པ༌ ཡང༌ ངའེ༌ ཕྲོ༌པ༌ གཙོ༌བོའེ༌ ནང༌ང༌ ལོ༌ཁྱེལ༌ཅན༌ ལས༌ ཅོ༌ཁན༌ཞིག༌ ཨིན༌།
COL 4:8 མིག༌སལ༌ལི༌ ཁྱོ༌ཞ༌གུན༌ལ༌ སྤོས༌པ༌ ཏང༌ཅེས༌ དང༌ ང༌ཞའེ༌ ནས༌ལུག༌གུན༌ ཧ༌གོ༌ ཐུབ༌ཅེས༌སི༌ ཕིའ༌, ངའེ༌ ཁོ༌ ཁྱོ༌ཞ༌གུན༌ ཡོད༌ས༌ ཀལ༌ལད༌།
COL 4:9 ཁོ༌ ཉམ༌པོ༌ ཨོ༌ནེ༌སི༌མུས༌སའང༌ ཀལ༌ལད༌, ཨོ༌ནེ༌སི༌མུས༌ མ༌ ཨིད༌ཤེས༌ཅན༌ ཞབས༌ཏོག༌པ༌ དང༌ ཅེས༌པ༌ སྤུན༌, ཁྱོ༌ཞ༌རང༌ངི༌ ཕྲོ༌ནེ༌ ཅིག༌ ཨིན༌ནོག༌། ཁོང༌གུན༌ནི༌ ཁྱོ༌ཞའ༌ འི༌རུ༌ ཇུང༌ཨིན༌ ཡོད༌ཁན༌ ཚང༌མའེ༌ སྐོར༌ལ༌ ཤད༌ཨིན༌།
COL 4:10 ངའེ༌ ཕྲོ༌པ༌ ཙོན༌པ༌ ཨ༌རིས༌ཏར༌ཀུས༌སི༌ ཁྱོ༌ཞ༌གུན༌ལ༌ ཇུ༌ ཞུ༌རུག༌, ཡང༌ མར༌ཀུས༌ བཱར༌ན༌བས༌སི༌ ནོའེང༌ ཇུ༌ ཀལ༌དུག༌། ངའེ༌ ཁྱོ༌ཞ༌གུན༌ལ༌ སྔུན༌ལ༌ ལོན༌ ཀལ༌ཁན༌ ཙོགས༌ལ༌, མར༌ཀུས༌ ཁྱོ༌ཞ༌གུན༌ ཡོད༌ས༌ ཡོང༌ན༌ གའ༌སུས༌ ཞུས༌།
COL 4:11 ཡང༌ ཡེ༌ཤུ༌ ཟེར༌ཁན༌ ཡུས༌ཏུས༌སིའང༌ ཁྱོ༌ཞའ༌ ཇུ༌ ཀལ༌དུག༌། འི༌ཀ༌ ང༌ ཉམ༌པོ༌ དཀོན༌མཆོག༌གི༌ གྱལ༌སྲིད༌དི༌ ཕིའ༌ ལས༌ ཅོ༌ཁན༌གུན༌ནི༌ ཕྲོ༌ནེ༌ ཡ༌ཧུ༌དཱ༌པ༌ ཏད༌པ༌ཅན༌ ཏེན༌ན༌ མི༌ སུམ༌ཀོ༌ མ༌ནེ༌ མེད༌, ཡང༌ ཁོང༌གུན༌ནི༌ ངའ༌ མ༌སྲན༌ཏྲེ༌ སྤོས༌པ༌ ཏང༌དུག༌།
COL 4:12 ཁྱོ༌ཞའེ༌ ཕྲོ༌པ༌ ཡེ༌ཤུ༌ མ༌ཤི༌ཀའེ༌ ཞབས༌ཏོག༌པ༌ ཨེ༌པ༌ཕའ༌རས༌སི༌ ཁྱོ༌ཞ༌གུན༌ལ༌ ཇུ༌ ཀལ༌དུག༌། ཡང༌ ཁོའེ༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ཁན༌ དང༌ ལོ༌ཁྱེལ༌ གང༌པོ༌ ཉམ༌པོ༌ དཀོན༌མཆོག༌གི༌ ཐུག༌གོངས༌ ཚང༌མའེ༌ ནང༌ང༌ སྟན༌པོ༌ དུག༌ཅེས༌སི༌ ཕིའ༌ ཏུས༌གྱུན༌ སྙིང༌ངི༌ ཐིལ༌ནེ༌ མོས༌ལམ༌ ཞུ༌རུག༌།
COL 4:13 ཁྱོ༌ཞའ༌, ལ༌འོ༌དི༌ཀིའ༌ དང༌ ཧི༌ཡར༌རི༌པུ༌ལིས༌སི༌ ཏད༌པ༌ཅན༌ གུན༌ནི༌ ཕིའ༌ ཁོའེ༌ སྲན༌ཏྲེ༌ ལས༌ ཅོ༌ཨིན༌ ཡོད༌ཁན༌བོའ༌ ངའེ༌ སྤང༌པོ༌ ཏང༌ངད༌།
COL 4:14 སྤུན༌ དེ༌མཱས༌ དང༌ ང༌དང༌ངི༌ ཅེས༌པའེ༌ ཨམ༌ཆི༌ ལུ༌ཀ༌ ཉིས༌ཀོའེ༌ ཁྱོ༌ཞ༌གུན༌ལ༌ ཇུ༌ ཀལ༌དུག༌།
COL 4:15 ལ༌འོ༌དི༌ཀིའ༌ ཡོད༌ཁན༌ནི༌ སྤུན༌གུན༌, ང༌དང༌ངི༌ སྤུན༌མོ༌ ནིམ༌ཕ༌ དང༌ ཁོའེ༌ ཁང༌པའེ༌ ནང༌ང༌ ཚོགས༌ཁན༌ནི༌ ཆོས༌ཚོགས༌ལ༌ ཇུ༌ ཞུ༌རུག༌ ཞུས༌།
COL 4:16 འི༌ ཨི༌གེ༌བོ༌ ཁྱོ༌ཞ༌གུན༌ནི༌ སིལ༌ཏེ༌ སྟིང༌ནེ༌, ལ༌འོ༌དི༌ཀིའ༌པའེ༌ ཆོས༌ཚོགས༌ལའང༌ སིལ༌ཅེས༌ལ༌ ཏོང༌ཤིག༌། ཡང༌ ལ༌འོ༌དི༌ཀིའ༌པའེ༌ ཆོས༌ཚོགས༌ལ༌ བྲིས༌ཁན༌ནི༌ ཏེ༌ ཨི༌གེ༌བོ༌ ཁྱོ༌ཞ༌གུན༌ནིའང༌ སིལ༌ཤིག༌།
COL 4:17 “གཙོ༌བོའེ༌ སྤུན༌ ཨར༌ཀིབ༌པུས༌སི༌ ལག༌ག༌ སྟད༌ད༌ ཛད༌ཁན༌ནི༌ ལས༌པོ༌ ཁོའ༌ དྲན༌དྲ༌” གྲུབ༌ཅུག༌ཅེས༌ལ༌ ཟེར༌།
COL 4:18 ཏ༌ ང༌ པ༌འུ༌ལུའི༌ ཨི༌གེ༌ བྲི༌ཁན༌བོའེ༌ ཀ༌ནེ༌ ཉི༌གུ༌ ཁྱོངས༌ཏེ༌ ང༌རང༌ངི༌ ལག༌བྲིས༌སི༌ ནང༌ང༌ ཇུ༌ ཀལ༌ལད༌། ང༌ ཙོན༌ལ༌ ཡོད༌ཁན༌བོ༌ ཨིད༌ཏུ༌ ཅོས༌ཏེ༌ ངའེ༌ ཕིའ༌ མོས༌ལམ༌ ཞུ༌ཤིག༌། དཀོན༌མཆོག༌གི༌ ཐུག༌རྗེ༌ ཁྱོ༌ཞ༌གུན༌ལ༌ ཐོབ༌ཤིག༌།
1TH 1:1 ངའ༌ པ༌འུ༌ལུ༌, སི༌ལས༌ དང༌ ཏི༌མོ༌ཐི༌ ཚང༌ཀོའེ༌ ཆོགས༌ནེ༌ འི༌ ཨི༌གེ༌བོ༌ ཐེ༌ས༌ལོ༌ནི༌ཀའེ༌ གྱལ༌སའེ༌ དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཨིན༌ཁན༌ནི༌ ཆོས༌ཚོགས༌ལ༌ བྲིའད༌། དཀོན༌མཆོག༌གི༌ ཞི༌དེ༌ དང༌ ཐུག༌རྗེ༌ ཁྱོ༌ཞའ༌ ཚང༌མ༌ལ༌ ཐོབ༌ཤིག༌།
1TH 1:2 ང༌ཞའེ༌ མོས༌ལམ༌མི༌ ནང༌ང༌ ཁྱོ༌ཞ༌གུན༌ ཨིད༌ཏུ༌ ཅོ༌ཨིན༌ ཏུས༌གྱུན༌ དཀོན༌མཆོག༌ག༌ ཁྱོ༌ཞའ༌ ཚང༌མའེ༌ ཕིའ༌ ཐུག༌རྗེ༌ཆེ༌ ཞུའད༌།
1TH 1:3 ང༌ཞའེ༌ དཀོན༌མཆོག༌, ང༌དང༌གུན༌ནི༌ ཡབ༌བའ༌ མོས༌ལམ༌ ཞུ༌ ཟ༌ནེ༌, ཁྱོ༌ཞ༌གུན༌ནི༌ ཏད༌པ༌བོ༌ ལག༌ལེན༌ནི༌ ནང༌ང༌ ཁྱོང༌ཅེས༌, ཅམས༌པའེ༌ ནང༌ང༌ ཞན༌མའ༌ ཞབས༌ཏོག༌ ཞུ༌ཅེས༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ནང༌ང༌ རེ༌ཝའ༌ སྟན༌པོ༌ བོར༌ཅེས༌པོའེ༌, སྙིང༌རུས༌ ཅོ༌ཐུབ༌ཅེས༌ གུན༌ ཨིད༌ཏུ༌ ཅོའད༌།
1TH 1:4 ཅེས༌པའེ༌ སྤུན༌གུན༌, དཀོན༌མཆོག༌གི༌ ཁྱོ༌ཞ༌གུན༌ལ༌ ཅམས༌པ༌ ཛད༌ཏེ༌ ཁོང༌རང༌ངི༌ མི༌གུན༌ ལྡམ༌མ༌ ཛད༌ཁན༌བོ༌ ང༌ཞའ༌ གྱུས༌ཡོད༌།
1TH 1:5 ཅིའ༌ཟེར༌ན༌ ང༌ཞའེ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤད༌ ཟ༌ནེ༌, སྤེ༌ར༌ ཅིག༌པོ༌ གྱུད༌ཏེ༌ མན༌པ༌ དཀོན༌མཆོག༌གི༌ སྟོབས༌ ཉམ༌པོ༌ ཤད༌པིན༌, མ༌ཚད༌ ང༌ཞའེ༌ ཤད༌ཁན༌གུན༌ དེན༌བ༌ ཨིན༌ཁན༌བོའ༌ ཏམ༌པའེ༌ ཐུག༌ཉིད༌དི༌ ཁྱོ༌ཞ༌གུན༌ལ༌ སྙིང༌ངི༌ ཐིལ༌ནེ༌ ཨིད༌ཤེས༌ཤུགས༌། ཡང༌ ང༌ཞའེ༌ ཁྱོ༌ཞ༌གུན༌ནི༌ ཕྲོའ༌ མི༌ཚེ༌ ཕུད༌ཚུལ༌བོ༌, ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌ཨིན༌ནོག༌།
1TH 1:6 ང༌ཞའ༌ དང༌ གཙོ༌བོ༌ ཡེ༌ཤུ༌ གྲུལ༌ཁན༌ནི༌ ལམ༌མི༌ཀ༌ ཁྱོ༌ཞ༌གུན༌ གྲུལས༌། ཁྱོ༌ཞ༌གུན༌ལ༌ མ༌སྲན༌ཏྲེ༌ ནགས༌ ཐོང༌ཏེའང༌, ཁྱོ༌ཞ༌གུན༌ནི༌ ཏམ༌པའེ༌ ཐུག༌ཉིད༌དི༌ སལ༌ཁན༌ནི༌ ཐད༌པོ༌ ཉམ༌པོ༌ ཏེ༌ ལོན༌བོ༌ ལེནས༌།
1TH 1:7 ཏེ༌བོའེ༌ ཞས༌ཏེ༌ གརིས༌སི༌ མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱའེ༌ ཡུལ༌གུན༌ནི༌ ནང༌ང༌ སྤུན༌ ཚང༌མའེ༌ ཕིའ༌ ཁྱོ༌རང༌གུན༌ སྤེ༌ཞིག༌ག༌ གྱུར༌ཏེ༌ ཨིན༌ནོག༌།
1TH 1:8 ཁྱོ༌ཞ༌གུན༌ གྱུད༌ཏེ༌ གཙོ༌བོའེ༌ བཀའ༌བོ༌, མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱ༌ ཡུལ༌གུན༌ནི༌ ནང༌ང༌ ཕེལ༌ཅེས༌ མ༌ཚད༌, དཀོན༌མཆོག༌གི༌ཀ༌ ཁྱོ༌ཞའེ༌ ཏད༌པ༌ ཁྱོངས༌ཁན༌ནི༌ ནས༌ཚུལ༌བོ༌ ཀ༌ནེ༌ཀ༌རུ༌ ལེབ༌། ཏེ༌ སྐོར༌ལ༌ ང༌ཞའེ༌ ཅའང༌ ཟེར༌གོས༌ མི༌དུག༌།
1TH 1:9 ཡང༌ ཏེ༌ ཡུལ༌མི༌གུན༌ནི༌ མི༌ཚང༌མ༌ལ༌ ཁྱོ༌ཞ༌གུན༌ནི༌ ང༌ཞའ༌ ཛ༌འོའེ༌ ཚུལ༌ལ༌ གའ༌སུས༌ ཅོ༌ཁན༌ དང༌ ཁྱོ༌ཞའེ༌ སྐུན༌དྲའ༌ ཅོལ༌ཅེས༌ ཕངས༌ཏེ༌ དེན༌བའེ༌ སོན༌པོ༌ དཀོན༌མཆོག༌ག༌ ཞབས༌ཏོག༌ ཞུ༌ཅེས༌ གུན༌ ཤད༌དུག༌།
1TH 1:10 མ༌ཚད༌ དཀོན༌མཆོག༌གི༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌ སྲས༌ ཡེ༌ཤུ༌, ནམ༌ཁའ༌ནེ༌ ལོགས༌ཏེ༌ ཕེབས༌ཤེས༌སི༌ ཕིའ༌, ཁྱོ༌ཞ༌གུན༌ སྲུངས༌ཏེ༌ ཡོད༌ཁན༌བོའེ༌ སྐོར༌ལའང༌ ཤད༌དུག༌། ང༌དང༌གུན༌ དཀོན༌མཆོག༌ནེ༌ ཡོང༌ཅེས༌ཅན༌ནི༌ ཐུགས༌སྲོའེ༌ ཀ༌ནེ༌ སྐྱོབ༌བ༌ ཛད༌ཁན༌བོ༌ ཡེ༌ཤུ༌ ཨིན༌ནོག༌།
1TH 2:1 ངའེ༌ ཅེས༌པའེ༌ སྤུན༌གུན༌, ང༌ཞའེ༌ ཁྱོ༌ཞ༌གུན༌ ཉམ༌པོ༌ ཏུས༌ ཕུད༌ཁན༌བོ༌ ཕན༌མི༌ཐོགས༌ མན༌ཁན༌ ཁྱོ༌ཞ༌རང༌ང༌ གྱུས༌ཨིན༌ནོག༌།
1TH 2:2 ཁྱོ༌ཞའ༌ ཡོད༌ས༌ ཐེ༌ས༌ལོ༌ནི༌ཀ༌ ཡོང༌ངི༌ སང༌ སྔུན༌ལ༌, ཕི༌ལི༌པི༌ གྱལ༌སའེ༌ ནང༌ང༌ ང༌ཞའ༌ ཙམ༌ཤིག༌ ནགས༌ དང༌ ཁྲེལ༌བ༌ སྟན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌། ཨིན༌ནའང༌ ཐེ༌ས༌ལོ༌ནི༌ཀའེ༌ ནང༌ང༌ གྱབ༌གལ༌ སྲན༌ཏྲེ༌ ཐོང༌ནའང༌, ང༌དང༌ངི༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཁོང༌ངི༌ གའ༌མོའེ༌ ནས༌ཚུལ༌ ཇིགས༌ མེད༌པ༌ ཤད༌ཅེས༌ལ༌ ང༌ཞའ༌ སྤོས༌པ༌ སལས༌།
1TH 2:3 ང༌ཞའེ༌ ཆོས༌ཤད༌ཁན༌གུན༌ ང༌ཞའ༌ ནོར༌ཏེ༌ ཡ༌ རང༌དོད༌ ཡ༌ གོབ༌སྐོར༌ ཏང༌ཅེས༌སི༌ དོད༌པའེ༌ ཞས༌ཏེ༌ མན༌པིན༌།
1TH 2:4 ཨིན༌ནའང༌ དཀོན༌མཆོག༌གི༌ གའ༌མོའེ༌ ནས༌ཚུལ༌ སྟད༌ད༌ ཛད༌ཅེས༌ལ༌ འོས༌པ༌ཅན༌ ཐེའ༌ཛད༌ཁན༌ནི༌ མི༌གུན༌ ཙོགས༌ལ༌ ང༌ཞའེ༌ ཤད༌དད༌། ང༌ཞའེ༌ དོད༌པ༌ ནི༌ མི༌གུན༌ ཐད༌ཅུག༌ཅེས༌ མན༌པ༌ དཀོན༌མཆོག༌ ཐུག༌ཉེས༌ ཅུག༌ཅེས༌པོ༌ ཨིན༌, ཁོང༌ངི༌ ང༌དང༌གུན༌ནི༌ སྙིང༌ངི༌ སྟག༌ཅད༌ ཛད༌ད༌ནོག༌།
1TH 2:5 ང༌ཞའེ༌ ནོར༌དོད༌ ཡོད༌ཏེ༌ ཁྱོ༌ཞའ༌ ལྕེ༌ ཀོལ༌ཅེས༌ ཡ༌ ཁྱོ༌ཞའེ༌ ཛ༌འོ༌ ཨིན༌ཟུན༌ མ༌ནེ༌ མ༌ཏང༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌, ཡང༌ དཀོན༌མཆོག༌ ཏེ༌བོའེ༌ སྤང༌པོ༌ ཨིན༌,
1TH 2:6 མ༌ཚད༌ ཁྱོ༌ཞའ༌ ཨིན༌གྲོ༌ ཡ༌ ཞན༌མ༌, ང༌ཞའེ༌ མི༌ ཀ༌ནེ༌ སྟོད༌པ༌ ཐོབ༌ཅེས༌སི༌ རེ༌ཝ༌ མ༌བོར༌པིན༌།
1TH 2:7 མ༌ཤི༌ཀའེ༌ སྐུ༌ཚབས༌ ཨིན༌ཅེས༌པོའེ༌, ང༌ཞའེ༌ ཁྱོ༌ཞའེ༌ ཀ༌ནེ༌ ཐོབ༌ཏང༌གུན༌ རྩོད༌ ཉན༌ཅེས༌ ཡོད༌པིན༌། ཨིན༌ནའང༌ ཨ༌མའེ༌ རང༌ངི༌ ཕྲུ༌གུ༌གུན༌ལ༌ པི༌བི༌ ཏངས༌ཏེ༌ སྟ༌སྟོག༌ ཅོའ༌ ཙོགས༌ལ༌ ང༌ཞའང༌ ཁྱོ༌ཞའ༌ ཉམ༌པོ༌ བུལ༌མོ༌ ཡོད༌པིན༌།
1TH 2:8 ཁྱོ༌ཞ༌གུན༌ལ༌ ང༌ཞའེ༌ ཅམས༌པ༌ སྲན༌ཏྲེ༌ ཅོས༌པ༌, ཁྱོ༌ཞའ༌ ཉམ༌པོ༌ དཀོན༌མཆོག༌གི༌ གའ༌མོའེ༌ ནས༌ཚུལ༌ ཅིག༌པོ༌ མན༌པ༌, ང༌ཞ༌རང༌ངི༌ མི༌ཚེའང༌ བགོ༌ཅེས༌ལ༌ ཐད༌དད༌པིན༌།
1TH 2:9 ཅེས༌པའེ༌ སྤུན༌གུན༌, ང༌ཞའེ༌ བར༌དོ༌ ཁུར༌ཏེ༌ ལས༌ ཅོ༌ཁན༌བོ༌ ཁྱོ༌ཞ༌གུན༌ལ༌ ཏན༌ཏན༌ ཨིད༌ཏུ༌ ཡོད༌གྲོ༌; སྤེར༌ན༌ དཀོན༌མཆོག༌གི༌ གའ༌མོའེ༌ ནས༌ཚུལ༌ ཁྱོ༌ཞ༌གུན༌ལ༌ ཤད༌ ཟ༌ནེ༌, སུ༌ཞིག༌གའང༌ བར༌དོ༌ མི༌ཐོང༌ཅེས༌ལ༌ ང༌ཞ༌རང༌ངི༌ སྒོས༌དོམ༌གུན༌ནི༌ ཕིའ༌ ང༌ཞའེ༌ ཉིན༌ཚན༌ མེད༌པ༌ ལས༌ ཅོས༌པིན༌།
1TH 2:10 ཁྱོ༌ཞའ༌ གཙོ༌བོའེ༌ཀ༌ ཏད༌པ༌ ཅོ༌ཁན༌གུན༌ནི༌ ཕྲོའ༌, ང༌ཞའེ༌ སྕོད༌ལམ༌གུན༌ རྩང༌མ༌, ཀྲང༌པོ༌ དང༌ སྐྱོན༌མེད༌ ཡོད༌ཁན༌བོའེ༌ སྤང༌པོ༌ ཁྱོ༌ཞའ༌ ཚང༌མ༌ དང༌ དཀོན༌མཆོག༌ ཨིན༌ནོག༌།
1TH 2:11 ཡང༌ ཨ༌བའེ༌ རང༌ངི༌ ཕྲུ༌གུའ༌ ཡ༌ཤ༌ ཉམ༌པོ༌ སྟ༌སྟོག༌ ཅོ༌ཁན༌ ཙོགས༌ལ༌ ང༌ཞེའང༌ ཁྱོ༌ཞའ༌ རེ༌རེ༌ སྟ༌སྟོག༌ ཅོ༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌།
1TH 2:12 ང༌ཞའེ༌ ཁྱོ༌ཞ༌གུན༌ལ༌ དཀོན༌མཆོག༌ག༌ རྩི༌ཝ༌ ཐོབ༌ཅེས༌ཅན༌ནི༌ མི༌ཚེ༌ཞིག༌ ཕུད༌ཅེས༌ལ༌ སྤོས༌པ༌ ཏང༌ཨིན༌ ཞུ༌ཝ༌ ཕུལ༌ལད༌, ཅིའ༌ཟེར༌ན༌ ཁོང༌ངི༌ ཁྱོ༌ཞ༌གུན༌ལ༌ ཁོང༌རང༌ངི༌ གྱལ༌སྲིད༌ དང༌ སྤལ༌ལི༌ ནང༌ང༌ དུག༌ག༌ལ༌ བོད༌ད༌ ཛདས༌།
1TH 2:13 ང༌ཞའེ༌ ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌, ཅིའ༌ཟེར༌ན༌ ང༌ཞའེ༌ དཀོན༌མཆོག༌གི༌ བཀའ༌ ཤད༌ ཟ༌ནེ༌, ཁྱོ༌ཞ༌གུན༌ནི༌ ཏེ༌གུན༌ མིའི༌ སྤེ༌ར༌ མན༌པ༌, དཀོན༌མཆོག༌གི༌ བཀའ༌ ཨིན༌ཅེས༌པོའེ༌ ཉནས༌, ཀ༌བོ༌ ཏན༌ཏན༌ ཨིན༌ནོག༌། ཡང༌ ཏད༌པ༌ ཁྱོངས༌ཁན༌གུན༌ནིི༌ མི༌ཚེའེ༌ ནང༌ང༌ ཏེ༌ བཀའ༌བོའེ༌ ཆག༌ལས༌ ཛད༌ཨིན༌ ཨིན༌ནོག༌།
1TH 2:14 ཅེས༌པའེ༌ སྤུན༌གུན༌, ཁྱོ༌ཞའ༌ ཡ༌ཧུ༌དཱའེ༌ ཡུལ༌ལི༌ ནང༌ང༌ དཀོན༌མཆོག༌གི༌ ཆོས༌ཚོགས༌ ཀ༌བོ༌ མ༌ཤི༌ཀ༌ ཡེ༌ཤུའི༌ ཨིན༌, ཏེ༌གུན༌ གྲུལ༌ཁན༌ནི༌ ལམ༌མི༌ཀ༌ གྲུལ༌ཏེ༌ ཨིན༌ནོག༌། ཏེ༌གུན༌ལ༌ ཡ༌ཧུ༌དཱ༌པ༌གུན༌ནི༌ ནགས༌ སྟན༌ན༌ ཙོགས༌ལ༌, ཁྱོ༌ཞ༌གུན༌ལའང༌ རང༌ཡུལ༌ལི༌ མི༌གུན༌ནི༌ ནགས༌ སྟན༌ཏེ༌ ཨིན༌ནོག༌།
1TH 2:15 ཏེན༌ན༌ ཙོགས༌སི༌ ཡ༌ཧུ༌དཱ༌པ༌གུན༌ནི༌ གཙོ༌བོ༌ ཡེ༌ཤུ༌ མ༌ཚད༌, སྔུན༌མའེ༌ ལུང༌སྟོན༌པ༌གུན༌ནའང༌ སད༌ཏེ༌ ཨིན༌པིན༌, ཡང༌ ང༌ཞ༌གུན༌ལའང༌ ནགས༌ སྟནས༌། དཀོན༌མཆོག༌ ཏེ༌གུན༌ནི༌ཀ༌ ཐུགས༌ཐད༌ད༌ མ༌ཛདས༌། ཡང༌ ཏེ༌གུན༌ནི༌ མི༌ཚང༌མའ༌ གྱབ༌གལ༌ ཅོས༌ཏེ༌
1TH 2:16 ཡ༌ཧུ༌དཱ༌པ༌ མན༌ཁན༌གུན༌ལ༌ ཐར༌པ༌ ཐོབ༌ཅེས༌སི༌ གའ༌མོའེ༌ ནས༌ཚུལ༌ ཤད༌ཅེས༌ནེ༌ ང༌ཞའ༌ སྒག༌ཅེས༌སི༌ རྩོན༌གྲུས༌ ཅོས༌། ཏེ༌ཟུག༌ ཅོ༌ཅེས༌ནེ༌, ཁོང༌གུན༌ནི༌ སྡིག༌པ༌བོ༌ རྩག༌ཨིན༌ སོང༌ཏེ༌ ཚད༌ནེ༌ ཐལ༌ཏེ༌ སོང༌ པ༌སང༌, ཏ༌ དཀོན༌མཆོག༌གི༌ ཐུགས༌སྲོ༌ གང༌པོ༌ ཏེ༌གུན༌ནི༌ཀ༌ བབས༌ཏེ༌ ཨིན༌ནོག༌།
1TH 2:17 ཅེས༌པའེ༌ སྤུན༌གུན༌, ང༌ཞ༌གུན༌ སེམས༌ནེ༌ མན༌པ༌, ཟུགས༌སི༌ ཐོག༌ནེ༌ ཁྱོ༌ཞའ༌ ཉམ༌པོ༌ ཏུས༌ ཉུ༌ངུན༌ཞིག༌གི༌ ཕིའ༌ ཐག༌རིང༌ང༌ བེ༌ཏེ༌ ཡོད༌ ཟ༌ནེའང༌, ང༌ཞའེ༌ ཁྱོ༌ཞ༌གུན༌ ཡོད༌ས༌ ལོགས༌ཏེ༌ ཡོང༌ཅེས༌སི༌ རྩོན༌གྲུས༌ སྲན༌ཏྲེ༌ ཅོས༌པིན༌, ཅིའ༌ཟེར༌ན༌ ང༌ཞའ༌, ཁྱོ༌ཞ༌གུན༌ ཐོང༌ཅེས༌སི༌ དོད༌པ༌ སྲན༌ཏྲེ༌ ཡོད༌པིན༌།
1TH 2:18 ང༌ཞ༌གུན༌ ལོགས༌ཏེ༌ ཁྱོ༌ཞའེ༌ཀ༌ ཡོང༌ཉིན༌ ཡོད༌པིན༌, ཏན༌ཏན༌ལ༌ ང༌ པ༌འུ༌ལུའི༌ ལོགས༌ཏེ༌ ཡོང༌ཅེས༌སི༌ རྩོན༌གྲུས༌ ལན༌ མང༌པོ༌ ཅོས༌པིན༌, ཨིན༌ནའང༌ ཤེ༌ཏན༌ནི༌ ང༌ཞའ༌ སྒག༌སྐྱིལ༌ ཏངས༌།
1TH 2:19 ང༌དང༌ངི༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབས༌ཏུས༌, ཁོང༌ངི༌ སྐུ༌དུན༌ལ༌ ང༌ཞའ༌ རེ༌ཝ༌, གའ༌མོ༌ ཡང༌ རྩི༌ཝ༌ ཐོབ༌ཅེས༌སི༌ གྱུན༌ཚན༌ སུ༌ ཨིན༌? ཁྱོ༌ཞའ༌ མན༌ན༌?
1TH 2:20 དེན༌བ༌, ང༌ཞའེ༌ སྤལ༌ དང༌ གའ༌མོའེ༌ གྱུན༌ཚན༌བོ༌ ཁྱོ༌ཞའ༌ ཨིན༌།
1TH 3:1 ཏེ༌བོའེ༌ཕིའ༌ ང༌ཞའ༌ ཁྱོ༌ཞའེ༌ ནས༌ལུག༌གི༌ སྐོར༌ལ༌ གྱུས༌མ༌ཆ༌ དུག༌ མ༌ཐུབ༌ པ༌སང༌, ང༌ཞ༌རང༌ ཨེ༌ཐེན༌ གྱལ༌སའེ༌ ནང༌ང༌ དུག༌ཅེས༌ ཐག༌ཅད༌ཏེ༌,
1TH 3:2 ང༌ཞའ༌ ཉམ༌པོ༌ དཀོན༌མཆོག༌གི༌ ཞབས༌ཏོག༌ ཞུ༌ཨིན༌ མ༌ཤི༌ཀའེ༌ སྐོར༌ལ༌ གའ༌མོའེ༌ ནས༌ཚུལ༌ ཤད༌ཁན༌, ང༌ཞའེ༌ ཅེས༌པ༌ སྤུན༌, ཏི༌མོ༌ཐི༌ ཁྱོ༌ཞ༌གུན༌ནི༌ཀ༌ ཀལ༌པིན༌། ཁོའེ༌ ཁྱོ༌ཞའེ༌ སེམས༌ཉིད༌གུན༌ ཤུགས༌ཅན༌ ཅོ༌ཅེས༌ དང༌ ཏད༌པའེ༌ ནང༌ང༌ སྤོས༌པ༌ ཏངས༌ཏེ༌ ནགས༌བར༌དོ༌ ཐོང༌ངི༌ ཏུས༌ལ༌ ཁྱོ༌ཞའ༌ སུ༌ཞིག༌གིའང༌ རེ༌ཝ༌བོ༌ ཕང༌ མི༌ཅུག༌ཅེས༌སི༌ ང༌ཞའེ༌ དོད༌པ༌ ཅོའད༌། འི༌ཙོགས༌སི༌ ནགས༌བར༌དོ༌གུན༌ ང༌དང༌ངི༌ ཕིའ༌ སྐལ༌ཏེ༌ ཡོད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
1TH 3:4 ཅིའ༌ཟེར༌ན༌ ང༌ཞའ༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེའང༌, ང༌དང༌གུན༌ལ༌ ནགས༌ སྟན༌ཅེན༌ ཟེར༌ཏེ༌ ཁྱོ༌ཞའ༌ ཤང༌ སྐུལ༌ལད༌པིན༌། ཡང༌ ཏེན༌ན༌ དྲན༌དྲ༌ ཇུང༌ཨིན༌ ཡོད༌ཁན༌བོ༌ ཁྱོ༌ཞའ༌ གྱལ༌ལ༌ ཅོས༌ཏེ༌ གྱུས༌ཨིན༌ནོག༌།
1TH 3:5 ཏེ༌བོའེ༌ཕིའ༌ ང༌ སྲན༌ཏེ༌ དུག༌ མ༌ཐུབ༌པ༌, ངའེ༌ ཏི༌མོ༌ཐི༌ ཁྱོ༌ཞ༌གུན༌ནི༌ ཏད༌པ༌ སྟན༌པོ༌ ལུས༌ཏེ༌ དུག༌ག༌ མི༌དུག༌ ལྟའ༌ལ༌ ཀལ༌པིན༌། ཚོད༌ ལྟའ༌ཁན༌ནི༌ ཚོད༌པ༌ ཤེ༌ཏན༌ནི༌ ཁྱོ༌ཞའ༌ ཏད༌པ༌ ཕང༌ཅེས༌སི༌ ཚོད༌ལྟའེ༌ ནང༌ང༌ བུད༌ཅུགས༌ཏེ༌, ང༌ཞའེ༌ ཁྱོ༌ཞའེ༌ ཕྲོའ༌ རྩོན༌གྲུས༌ ཅོ༌ཁན༌གུན༌ ཕན༌མི༌ཐོགས༌ གྱུར༌ཅུག༌སྲིད༌ཅེས༌ ཨིན༌ནོག༌ སམས༌ཏེ༌ ང༌ ཇིགས༌སད༌པིན༌།
1TH 3:6 ཨིན༌ནའང༌ ཁྱོ༌ཞ༌གུན༌ནི༌ ཏད༌པ༌ དང༌ ཅམས༌པའེ༌ སྐོར༌ལ༌ ནས༌ཚུལ༌ ཟང༌པོ༌ ཁུར༌ཏེ༌ ཏི༌མོ༌ཐི༌ དག༌ས༌རང༌ ང༌ཞའེ༌ཀ༌ ལོགས༌ཏེ༌ ལེབ༌། ཁྱོ༌ཞ༌གུན༌ནི༌ ང༌ཞའ༌ ཁྱོ༌ཞའ༌ ཉམ༌པོ༌ ཡོད༌ཁན༌ནི༌ ཏུས༌གུན༌ ཐད༌པོ༌ ཉམ༌པོ༌ ཨིད༌ཏུ༌ ཅོ༌ཅེས༌ ཡང༌, ང༌ཞའ༌ ཁྱོ༌ཞའ༌ ཐུག༌ཅེས༌ལ༌ དོད༌པ༌ སྲན༌ཏྲེ༌ ཡོད༌ཁན༌ ཙོགས༌ལ༌, ཁྱོ༌ཞའང༌ ཐུག༌ཅེས༌ལ༌ དོད༌པ༌ ཡོད༌ཁན༌གུན༌ ཏི༌མོ༌ཐིའི༌ ཤད༌ད༌རག༌།
1TH 3:7 ཏེ༌བོའེ༌ཕིའ༌ ང༌ཞའ༌ ནགས༌ དང༌ བར༌དོ༌ ཐོང༌ཨིན༌ ཡོད༌ནའང༌, ཅེས༌པའེ༌ སྤུན༌གུན༌, ཁྱོ༌ཞའ༌ ཏད༌པའེ༌ ནང༌ང༌ སྟན༌པོ༌ དུག༌ཅེས༌པོ༌ ཚོར༌ཏེ༌, ང༌ཞའ༌ སྤོས༌པ༌ ཐོབ༌།
1TH 3:8 ཁྱོ༌ཞ༌གུན༌ནི༌ གཙོ༌བོའེ༌ ནང༌ང༌ ཏད༌པ༌ སྟན༌པོ༌ བོར༌པ༌, ང༌ཞའེ༌ སེམས༌ལ༌ སོ༌མ༌ མི༌ཚེ༌ ཐོབ༌།
1TH 3:9 ཁྱོ༌ཞའེ༌ ཞས༌ཏེ༌ ཙམ༌ཤིག༌ གའ༌མོ༌ ང༌ཞའ༌ དཀོན༌མཆོག༌གི༌ སྐུ༌དུན༌ལ༌ ཐོབ༌ཁན༌བོའ༌, ང༌ཞའེ༌ དཀོན༌མཆོག༌ག༌ ཐུག༌རྗེ༌ཆེ༌ དྲན༌དྲའ༌ ཀ༌ཟུག༌གི༌ ཞུ༌ཐུབ༌ཨིན༌?
1TH 3:10 ཡང༌ ཁྱོ༌ཞའེ༌ ཏད༌པའེ༌ ནང༌ང༌ སྒོས༌དོམ༌ ལུས༌ཏེ༌ ཡོད༌ཁན༌ ཚང༌མ༌ སྐང༌ཅེས༌ལ༌ ང༌ཞའ༌ ཡང༌སྐྱར༌ ཁྱོ༌ཞ༌གུན༌ དུན༌ལ༌ ཐུག༌ ཅུག༌ག༌ ཛད༌ ཞུ༌ཨིན༌, ང༌ཞའེ༌ ཚན༌ཉིན༌ མེད༌པ༌ དཀོན༌མཆོག༌ག༌ སྙིང༌ངི༌ ཐིལ༌ནེ༌ དོད༌པ༌ སྲན༌ཏྲེ༌ ཉམ༌པོ༌ མོས༌ལམ༌ ཞུའད༌།
1TH 3:11 ཏ༌ དཀོན༌མཆོག༌ ང༌དང༌ངི༌ ཡབ༌ དང༌, ང༌དང༌ངི༌ གཙོ༌བོ༌ ཡེ༌ཤུ༌ ཉིས༌ཀོའེ༌, ང༌ཞའེ༌ ཕིའ༌ ཡང༌སྐྱར༌ ཁྱོ༌ཞ༌གུན༌ ཐུག༌ཅེས༌སི༌ ལམ༌བོ༌ ལག༌མོ༌ ཅོའ༌ ཛད༌ཤིག༌།
1TH 3:12 ཡང༌ གཙོ༌བོའེ༌ ཁྱོ༌ཞ༌གུན༌ནི༌ ཅམས༌པ༌བོ༌ ཁྱོ༌ཞའ༌ ཅིག༌ དང༌ ཅིག༌གི༌ ནང༌ང༌ མ༌ཚད༌, ཞན༌མ༌ ཚང༌མའེ༌ ཕིའང༌ གྱས༌ཤུག༌ག༌ ཛད༌ཤིག༌, ཀ༌ཟུག༌ ཁྱོ༌ཞ༌གུན༌ནི༌ ཕིའ༌ ང༌ཞའེ༌ ཅམས༌པ༌བོ༌ ཡོད༌།
1TH 3:13 ང༌དང༌ངི༌ གཙོ༌བོ༌ ཡེ༌ཤུ༌ ཁོང༌རང༌ངི༌ ཏམ༌པའེ༌ ཕོ༌ཉ༌གུན༌ ཉམ༌པོ༌ ཕེབས༌སི༌ ཏུས༌ལ༌, ཁྱོ༌ཞའ༌ ཚང༌མ༌ དཀོན༌མཆོག༌, ང༌དང༌ངི༌ ཡབ༌བི༌ སྐུ༌དུན༌ལ༌ ཏམ༌པ༌ དང༌ སྐྱོན༌མེད༌ ལུས༌ཤེས༌ལ༌, གཙོ༌བོ༌ ཡེ༌ཤུའི༌ ཁྱོ༌ཞའ༌ སེམ༌སྟོབས༌ཅན༌ ཛད༌ཤིག༌།
1TH 4:1 སྟིང༌ཇུག༌པའེ༌ཀ༌ ཅེས༌པའེ༌ སྤུན༌གུན༌, དཀོན༌མཆོག༌ ཐུགས༌ཐད༌ཅེས༌སི༌ ཕིའ༌ ང༌ཞའེ༌ ཁྱོ༌ཞའ༌ ལབས༌ཁན༌ ནང༌ཞིན༌ མི༌ཚེ༌ ཕུད༌ཅེས༌ལ༌ ཞུའད༌། འོ༌ན༌ ཁྱོ༌ཞའེ༌ ཏེན༌ན༌ ཙོགས༌སི༌ མི༌ཚེ༌ ཕུད༌ཨིན༌ ཨིན༌ནོག༌, ཨིན༌ནའང༌ ཏ༌ ཏ༌རུང༌ངའང༌ མང༌ང༌ ཏེ༌ཙོགས༌སི༌ མི༌ཚེ༌ ཕུད༌ཅེས༌ལ༌ ང༌ཞའེ༌ གཙོ༌བོ༌ ཡེ༌ཤུའི༌ ཚན༌ནི༌ ནང༌ང༌ ཁྱོ༌ཞའ༌ སྤོས༌པ༌ ཏང༌ཨིན༌ ཞུ༌ཝ༌ ཞུའད༌།
1TH 4:2 གཙོ༌བོ༌ ཡེ༌ཤུའི༌ ཝང༌ངི༌ ནང༌ང༌ ང༌ཞའེ༌ ཁྱོ༌ཞའ༌ ཏང༌ཁན༌ནི༌ ལབ༌ཞ༌གུན༌ ཁྱོ༌ཞའ༌ གྱུས༌ཨིན༌ནོག༌།
1TH 4:3 དཀོན༌མཆོག༌གི༌ ཐུགས༌དོད༌པོ༌ ནི༌, ཁྱོ༌ཞའ༌ ཏམ༌པ༌ ཡོང༌གོ༌ཤེས༌པོ༌ ཨིན༌, ཏེ༌བོའེ༌ཕིའ༌ ཁྱོ༌ཞ༌གུན༌ ལུས༌བྲེལ༌ ངན༌པ༌གུན༌ནེ༌ ཐག༌རིང༌ང༌ དུག༌ཤིག༌།
1TH 4:4 ཏེ༌ནེ༌ ཞན༌མ༌ དཀོན༌མཆོག༌ མ༌ཤེས༌ཁན༌ནི༌ ཏད༌པ༌ མེད༌ཁན༌གུན༌ ཙོགས༌ལ༌ ལུས༌བྲེལ༌ ངན༌པའེ༌ དོད༌པ༌ མ༌ཡོང༌ང༌, ཁྱོ༌ཞའ༌ རེ༌རེའ༌ ཏམ༌པ༌ དང༌ རྩི༌ཝ༌ཅན༌ནི༌ མི༌ཚེ༌ཞིག༌གི༌ ནང༌ང༌ རང༌རང༌ངི༌ ཟུགས༌པོ༌གུན༌ ཅུན༌ཏེ༌ བོར༌ཅེས༌ ཤེས༌ཨིན༌།
1TH 4:6 སྤུན༌ནི༌ ཞིད༌མད༌ ཉམ༌པོ༌ ལུས༌བྲེལ༌ བོར༌ཏེ༌, རང༌ངི༌ སྤུན༌ལ༌ ངན༌པ༌ ཡ༌ གོབ༌སྐོར༌ ཏང༌ མ༌གོས༌། ཏེ༌ཙོགས༌སི༌ ལས༌ ཅོ༌ཁན༌གུན༌ལ༌ གཙོ༌བོའེ༌ ཆད༌པ༌ སལ༌ལ༌ ཛད༌ཨིན༌ ཟེར༌ཏེ༌, ཁྱོ༌ཞ༌གུན༌ལ༌ སྔུན༌ལ༌ ང༌ཞའེ༌ སྤང༌པུད༌པིན༌།
1TH 4:7 དཀོན༌མཆོག༌གི༌ ང༌དང༌གུན༌ ཚི༌ཏུ༌ མི༌ཚེ༌ཞིག༌ མན༌པ༌, ཏམ༌པ༌ མི༌ཚེ༌ཞིག༌ ཕུད༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌།
1TH 4:8 ཏེ༌བོའེ༌ཕིའ༌ ཏེ༌ ལབ༌ཞའ༌ ཁའ༌ ཉན༌ན༌མེད༌ ཟེར༌ཁན༌གུན༌ནི༌, མིའི༌ ལབ༌ཞ༌ མན༌པ༌, དཀོན༌མཆོག༌གི༌ ལབ༌ཞའ༌ ཁའ༌ མ༌ཉན༌ན༌ ཨིན༌ནོག༌། དཀོན༌མཆོག༌ ནི༌ ཁྱོ༌ཞའ༌, ཁོང༌རང༌ངི༌ ཏམ༌པའེ༌ ཐུག༌ཉིད༌ སལ༌ལ༌ ཛད༌ཁན༌བོ༌ ཨིན༌ནོག༌།
1TH 4:9 ཏ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ སྐོར༌ལ༌ ཁྱོ༌ཞའ༌ ཅའང༌ བྲི༌གོས༌ མེད༌པ༌ ཨིན༌ནོག༌, ཅིའ༌ཟེར༌ན༌ དཀོན༌མཆོག༌ ཁོང༌རང༌ངི༌ ཁྱོ༌ཞ༌གུན༌ལ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌པོ༌ ལབ༌བ༌ ཛད༌ཏེ༌ ཨིན༌།
1TH 4:10 ཡང༌ དེན༌བའ༌ ཁྱོ༌ཞ༌གུན༌ནི༌ མ༌ཀེ༌དོ༌ནི༌ཡཱའེ༌ ཡུལ༌ གང༌པོའེ༌ ནང༌ང༌ ཡོད༌ཁན༌ནི༌ སྤུན༌ ཚང༌མ༌, ཏེན༌ན༌ ཅམས༌པ༌བོ༌ སྟན༌ཏེ༌ ཨིན༌ནོག༌། ཨིན༌ནའང༌ ང༌ཞའེ༌ ཅེས༌པའེ༌ སྤུན༌གུན༌, ཏ༌ འི༌ སང༌ མང༌ང༌ ཅོ༌ཅེས༌ལ༌, ང༌ཞའེ༌ སྤོས༌པ༌ ཏང༌ཨིན༌ ཞུ༌ཝ༌ ཞུའད༌།
1TH 4:11 ཁྱོ༌ཞའེ༌ མིག༌ཞི༌བོ༌ ནི༌ ཞི༌དེ༌ཅན༌ནི༌ མི༌ཚེ༌ ཕུད༌ཅེས༌, རང༌ངི༌ ལས༌ དང༌ བྲེལ༌ བོར༌ཏེ༌ ཞན༌མའེ༌ ལས༌སི༌ ནང༌ང༌ ཐེས༌སྟོག༌ མི༌ཏང༌ཅེས༌ དང༌, རང༌ངི༌ ལག༌པ༌ བད༌ཏེ༌ མི༌ཚེ༌ ཕུད༌ཁན༌ཞིག༌ ཡོང༌གོ༌ཤེས༌ ཨིན༌ནོག༌, ཀ༌ཟུག༌ ང༌ཞའེ༌ ཁྱོ༌ཞ༌གུན༌ལ༌ ལབས༌ཏེ༌ ཨིན༌པིན༌།
1TH 4:12 ཏེ༌ཟུག༌ ཅོ༌ན༌ ཁྱོ༌ཞ༌གུན༌ནི༌ མི༌ཚེ༌ ཕུད༌ཚུལ༌བོའ༌, ཏད༌པ༌ མེད༌ཁན༌གུན༌ནི༌ མང༌ང༌ རྩི༌ཝ༌ ཐོབ༌ཨིན༌, ཡང༌ ཁྱོ༌ཞ༌གུན༌ལ༌ སྒོས༌དོམ༌གུན༌ནི༌ ཕིའ༌ ཞན༌མའེ༌ཀ༌ སྟེན༌ཏེ༌ དུག༌ མི༌གོས༌།
1TH 4:13 ཏ༌ ཅེས༌པའེ༌ སྤུན༌གུན༌, ཁྱོ༌ཞའ༌ ཤི༌ཁན༌གུན༌ལ༌ ཇུང༌ཅེས༌པོ༌ ཧ༌གོ༌གོ༌ཤེས༌སི༌ ང༌ཞའེ༌ དོད༌པ༌ ཅོའད༌། ཏེ༌ནེ༌ ཁྱོ༌ཞ༌གུན༌ལ༌ སོན༌ཏེའ༌ ལང༌ཅེས༌སི༌ ནང༌ང༌ རེ༌ཝ༌ མེད༌ཁན༌གུན༌ ཙོགས༌སི༌ ཚེར༌ཁ༌ མི༌ཡོང༌།
1TH 4:14 ཡེ༌ཤུ༌ ཀྲོངས༌ཏེ༌ ཡང༌སྐྱར༌ སོན༌ཏེའ༌ ཞངས༌ཁན༌བོའ༌ ང༌དང༌ངི༌ ཏད༌པ༌ ཅོས༌ པ༌སང༌, ཡེ༌ཤུའི༌ཀ༌ ཏད༌པ༌ བོར༌ཏེ༌ ཤི༌ཁན༌གུན༌, དཀོན༌མཆོག༌གི༌ སོན༌ཏེའ༌ ལང༌ང༌ ཛད༌ཏེ༌, ཡེ༌ཤུ༌ ཉམ༌པོ༌ ཁྱོང༌ང༌ ཛད༌ཅེས༌པོའང༌ ང༌དང༌གུན༌ནི༌ ཏད༌པ༌ ཅོའ༌ནོག༌།
1TH 4:15 གཙོ༌བོ༌ ཡེ༌ཤུའི༌ མོལ༌ཁན༌བོ༌ ང༌ཞའེ༌ ཁྱོ༌ཞ༌གུན༌ལ༌ ཤད༌དད༌, གཙོ༌བོ༌ ལོགས༌ཏེ༌ ཕེབས༌སི༌ ཏུས༌ལ༌, ང༌དང༌ སོན༌ཏེའ༌ ཡོད༌ཁན༌གུན༌, ཏན༌ཏན༌ལ༌ ཤི༌ཁན༌གུན༌ནི༌ སང༌ སྔུན༌ལ༌ ཁོང༌ང༌ ཐུག༌ག༌ མི༌ཆའ༌།
1TH 4:16 སྐད༌ ཆེན༌མོའེ༌ ནང༌ང༌ བཀའ༌, ཕོ༌ཉའེ༌ སྤོན༌བོའེ༌ སུང༌སྐད༌ དང༌ དཀོན༌མཆོག༌གི༌ ཏུང༌སྐད༌ ཉམ༌པོ༌, གཙོ༌བོ༌ ཁོང༌རང༌ ནམ༌ཁའ༌ནེ༌ བབས༌ཨིན༌, ཏེ༌ནེ༌ མ༌ཤི༌ཀའེ༌ཀ༌ ཏད༌པ༌ བོར༌ཏེ༌ ཤི༌ཁན༌གུན༌ སྔུན༌ལ༌ སོན༌ཏེའ༌ ལང༌ང༌ ཛད༌ཨིན༌།
1TH 4:17 ཏེ༌ སྟིང༌ནེ༌ ཇིག༌རྟེན༌ནི༌ཀ༌ ང༌དང༌ སོན༌ཏེའ༌ ལུས༌ཏེ༌ ཡོད༌ཁན༌གུན༌ སྲིན༌ནི༌ཀ༌ ཏེ༌གུན༌ ཉམ༌པོ༌ གཙོ༌བོ༌ ཡེ༌ཤུ༌ ཇལ༌ཅེས༌ལ༌ སྟག༌ག༌ ཛད༌ཨིན༌, ཡང༌ ང༌དང༌གུན༌ གཙོ༌བོ༌ ཉམ༌པོ༌ ཏུས༌གྱུན༌ དུག༌ཨིན༌།
1TH 4:18 ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ ཏེ༌ ལབ༌ཞ༌གུན༌ ཅིག༌ དང༌ ཅིག༌ག༌ ཤད༌ཏེ༌ སྤོས༌པ༌ ཏོང༌ཤིག༌།
1TH 5:1 ཅེས༌པའེ༌ སྤུན༌གུན༌, ཏ༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཏུས༌པོ༌, ནམ༌ ཇུང༌ཨིན༌ ཏེ༌བོའེ༌ སྐོར༌ལ༌ ཁྱོ༌ཞ༌གུན༌ལ༌, བྲི༌གོས༌ མེད༌པ༌ ཨིན༌ནོག༌།
1TH 5:2 ཅིའ༌ཟེར༌ན༌ གཙོ༌བོ༌ ཕེབ༌ཤེས༌སི༌ ཞག༌པོ༌ ཚན༌ལ༌ རྐུན༌མ༌ ཡོང༌ཁན༌ ཙོགས༌ལ༌ གྱུས༌ མེད༌པ༌ ཡོང༌ཅེས༌པོ༌ ཁྱོ༌ཞའ༌ སལ༌པོ༌ གྱུས༌ཨིན༌ནོག༌།
1TH 5:3 མི༌གུན༌ནི༌, “འི༌ ཏུས༌པོ༌ ཞི༌དེ༌ཅན༌ དང༌ ཇིགས༌པ༌ མེད༌ཁན༌ དུག༌” ཟེར༌ཨིན༌ ཡོད༌ཏུས༌, ཧུན༌མེད༌ལ༌ ཏེ༌གུན༌ནི༌ཀ༌ རྐྱེན༌ངན༌ ཡོང༌ཨིན༌, ཀ༌ཟུག༌ ཕྲུ༌གུ༌ ཇོར༌ཅེས༌ཅན༌ནི༌ བུ༌མོའ༌ སྐྱེ༌ཟེར༌ ཏང༌ངད༌, ཁོང༌གུན༌ ཏན༌ཏན༌ལ༌ ཏེ༌ཀ༌ནེ༌ མི༌ཐར༌།
1TH 5:4 ཨིན༌ནའང༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ མུན༌གྲིག༌གི༌ ནང༌ང༌ གྱུས༌མེད༌ཁན༌གུན༌ ཙོགས༌ལ༌ དུགས༌ཏེ༌ མན༌ པ༌སང༌, རྐུན༌མ༌ ཙོགས༌ལ༌ ཏེ༌ ཞག༌པོ༌ ལེབ༌ ཟ༌ནེ༌, ཁྱོ༌ཞ༌གུན༌ ཧ༌ མི༌ལས༌།
1TH 5:5 ང༌དང༌གུན༌ ཚན༌ ཡ༌ མུན༌གྲིག༌གི༌ ཕྲུ༌གུ༌ མན༌པ༌, ཁྱོ༌ཞའ༌ ཚང༌མ༌ འོད༌ དང༌ ཉི༌མའེ༌ ཕྲུ༌གུ༌ ཨིན༌ནོག༌།
1TH 5:6 ཏེ༌བོའེ༌ཕིའ༌ ཏ༌ ང༌དང༌གུན༌ ཤང༌ ཅོས༌ཏེ༌ ཞན༌མ༌གུན༌ ཙོགས༌ལ༌ ཉིད༌ལོགས༌ཏེ༌ མ༌དུག༌ག༌, རང༌སེམས༌ ཅུན༌ཐུབ༌ཁན༌ རིག༌ ཡོང༌གོ༌ཤེས༌ ཨིན༌ནོག༌།
1TH 5:7 ཉིད༌ ཏང༌ཁན༌གུན༌ ཚན༌ལ༌ ཉིད༌ ཏང༌ང༌ནོག༌, ཡང༌ ར༌རོས༌ཁན༌གུན༌ ཚན༌ལ༌ ར༌རོས༌ས༌ནོག༌།
1TH 5:8 ཨིན༌ནའང༌ ང༌དང༌གུན༌ འོད༌དི༌ ཨིན༌ པ༌སང༌, ང༌དང༌གུན༌ནི༌ རང༌སེམས༌ ཅུན༌ཤིག༌, ཡང༌ ཏད༌པ༌ དང༌ ཅམས༌པ༌ གུན༌ ཀྲང༌ང༌ ཀབ༌ཅེས༌སི༌ མག༌ཆ༌, ཡང༌ ཐར༌པ༌ ཐོབ༌ཅེས༌སི༌ རེ༌ཝ༌ ཏན༌ཏན༌བོ༌ ལྕགས༌སི༌ ཏི༌བི༌ ཙོགས༌ལ༌ གོན༌ཨིན༌།
1TH 5:9 ཅིའ༌ཟེར༌ན༌ དཀོན༌མཆོག༌གི༌ ང༌དང༌གུན༌ ཆད༌པའེ༌ ཕིའ༌ ལྡམ༌མ༌ མ༌ཛད༌ད༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ ཐར༌པ༌ ཐོབ༌ཅེས༌ལ༌, ལྡམ༌མ༌ ཛད༌ཏེ༌ ཨིན༌ནོག༌།
1TH 5:10 ང༌དང༌ངི༌ ཕིའ༌ ཡེ༌ཤུ༌ ཀྲོངས༌། ང༌དང༌ ཤི༌ཏེ༌ ཡོད༌གྲོ༌ ཡ༌ སོན༌ཏེའ༌ ང༌དང༌ང༌ ཁོང༌ ཉམ༌པོ༌ ཏུས༌གྱུན༌ མི༌ཚེ༌ ཕུད༌ཉན༌ཅེས༌སི༌ གྱུན༌ཚན༌བོའེ༌ ཕིའ༌, ཁོང༌ ཀྲོངས༌།
1TH 5:11 ཏེ༌བོའེ༌ཕིའ༌ ཁྱོ༌ཞའེ༌ ཅིག༌ དང༌ ཅིག༌ག༌ སྤོས༌པ༌ ཏངས༌ཏེ༌, གཙོ༌བོ༌ ཡེ༌ཤུའི༌ ནང༌ང༌ ཁོང༌གུན༌ནི༌ ཏད༌པ༌ སྐྱེད༌ལ༌ ཁྱོང༌, ཀ༌ཟུག༌ ཁྱོ༌ཞའེ༌ ཅོ༌ཨིན༌ཞིག༌ ཨིན༌ནོག༌།
1TH 5:12 ཅེས༌པའེ༌ སྤུན༌གུན༌, གཙོ༌བོ༌ ཡེ༌ཤུའི༌ ཞབས༌ཏོག༌ ཞུ༌ཁན༌ནི༌ འུ༌སྐྱོང༌གུན༌ལ༌ རྩི༌ཝ༌ ཅོ༌ཅེས༌ལ༌ ཞུའད༌, ཀ༌གུན༌ནི༌ ཁྱོ༌ཞའེ༌ ཕྲོའ༌ རྩོན༌གྲུས༌ སྲན༌ཏྲེ༌ ཅོ༌ཨིན༌ ཁྱོ༌ཞའ༌ སྡིག༌པ༌ མི༌ཅོ༌ཅེས༌ལ༌ སྤང༌པུད༌ད༌ནོག༌།
1TH 5:13 འོ༌ན༌, ཁོང༌གུན༌ནི༌ རྩོན༌གྲུས༌སི༌ ལས༌གུན༌ ཐོང༌ཏེ༌ ཁོང༌གུན༌ལ༌ གྱས༌པ༌ རྩི༌ཝ༌ དང༌, སྙིང༌ནེ༌ ཅམས༌པ༌ ཅོ༌ཤིག༌, ཡང༌ ཅིག༌ དང༌ ཅིག༌ ཐུན༌ཏེ༌ དུག༌ཤིག༌།
1TH 5:14 ཅེས༌པའེ༌ སྤུན༌གུན༌ ཁྱོ༌ཞ༌གུན༌ལ༌, ང༌ཞའེ༌ སྤོས༌པ༌ ཏང༌ཨིན༌ ཞུའད༌, ལས༌མི༌ལམ༌ཁན༌གུན༌ལ༌ སྤང༌པུད༌ཤིག༌, སྙིང༌སྟོབས༌ མེད༌ཁན༌གུན༌ལ༌ སྤོས༌པ༌ ཏོང༌ཤིག༌, ཉམས༌ཆུང༌གུན༌ལ༌ རོགས༌ ཅོ༌ཤིག༌, ཡང༌ ཚང༌མ༌ ཉམ༌པོ༌ ཟོད༌པ༌ བོར༌ཤིག༌།
1TH 5:15 སུ༌ཞིག༌གའང༌ ངན༌པའེ༌ ལན༌ལ༌ ངན༌པ༌ ཅོ༌ མ༌ཅུག༌ཤིག༌, ཅིག༌ དང༌ ཅིག༌ག༌ མ༌ཚད༌, ཞན༌ ཚང༌མ༌ ཉམ༌པོའང༌ ཏུས༌གྱུན༌ ཟང༌པོ༌ ཅོ༌ཅེས༌སི༌ རྩོན༌གྲུས༌ ཅོ༌ཤིག༌།
1TH 5:16 ཏུས༌གྱུན༌ གའ༌མོ༌ དུག༌ཤིག༌།
1TH 5:17 ཆད༌མེད༌ལ༌ མོས༌ལམ༌ ཞུ༌ཨིན༌ དུག༌ཤིག༌།
1TH 5:18 ནས༌ལུག༌ ཚང༌མའེ༌ ནང༌ང༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཤིག༌, ཅིའ༌ཟེར༌ན༌ ཁྱོ༌ཞའེ༌ མ༌ཤི༌ཀ༌ ཡེ༌ཤུ༌ ཉམ༌པོ༌ མི༌ཚེའེ༌ ནང༌ང༌, འི༌གུན༌ དཀོན༌མཆོག༌གི༌ ཐུག༌གོངས༌ ཨིན༌ནོག༌།
1TH 5:19 ཁྱོ༌ཞའེ༌ སྙིང༌ངི༌ ནང༌ང༌ ཏམ༌པའེ༌ ཐུག༌ཉིད༌དི༌ ཆག༌ལས༌གུན༌ལ༌ སྒག༌ཞའ༌ མ༌ཏང༌ཤིག༌།
1TH 5:20 ལུང༌སྟན༌གུན༌ལ༌ རྩི༌ཝ༌ མ༌ཏང༌ང༌ སྣང༌མེད༌ མ༌ཅོ༌ཤིག༌།
1TH 5:21 ལུང༌སྟན༌ ཚང༌མ༌ལ༌ སྟག༌ཅད༌ ཅོ༌ཤིག༌། དེན༌བའེ༌ ལུང༌སྟན༌གུན༌ནི༌ཀ༌ སྟན༌པོ༌ ཐམས༌ཏེ༌ དུག༌ཤིག༌།
1TH 5:22 ལས༌ ངན༌པའེ༌ རིགས༌ ཚང༌མ༌ནེ༌ ཐག༌རིང༌ང༌ དུག༌ཤིག༌།
1TH 5:23 ཏ༌ ང༌དང༌ང༌ ཞི༌དེ༌ སལ༌ཁན༌ནི༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཅི༌ས༌ཐོག༌ནེ༌ ཏམ༌པ༌ ཛད༌ཤིག༌། ཡང༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཕེབས༌ ཚོག༌པ༌, ཁྱོ༌ཞའེ༌ སེམས༌ཉིད༌, སེམས༌ དང༌ ཟུགས༌པོ༌ ཚང༌མ༌, སྐྱོན༌མེད༌ བོར༌ར༌ ཛད༌ཤིག༌།
1TH 5:24 ཁྱོ༌ཞའ༌ བོད༌ད༌ ཛད༌ཁན༌ནི༌ དཀོན༌མཆོག༌ ནི༌ ཨིད༌ཤེས༌ཅན༌ ཨིན༌ནོག༌, ཡང༌ ཁོང༌ངི༌ ཏེ༌ ཚང༌མ༌ ཅོའ༌ ཛད༌ཨིན༌།
1TH 5:25 ཅེས༌པའེ༌ སྤུན༌གུན༌, ང༌ཞའེ༌ ཕིའ༌ མོས༌ལམ༌ ཞུས༌ཤིག༌།
1TH 5:26 ཅམས༌པ༌ ཉམ༌པོ༌ ཅེས༌པའེ༌ སྤུན༌ ཚང༌མ༌ལ༌ ཇུ༌ ཞུས༌།
1TH 5:27 ང༌, པ༌འུ༌ལུའི༌ ཁྱོ༌ཞ༌གུན༌ལ༌, གཙོ༌བོའེ༌ ཝང༌ངི༌ ནང༌ང༌ འི༌ ཨི༌གེ༌བོ༌ ཅེས༌པའེ༌ སྤུན༌ ཚང༌མའེ༌ དུན༌ལ༌ སིལ༌ཅེས༌ལ༌ བཀའ༌ ཏང༌ངད༌།
1TH 5:28 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ ཁྱོ༌ཞའ༌ ཉམ༌པོ༌ ལུས༌ཤིག༌།
2TH 1:1 ང༌, པ༌འུ༌ལུ༌ ཡང༌ ངའེ༌ ཕྲོ༌པ༌ སི༌ལས༌ དང༌ ཏི༌མོ༌ཐི༌ གུན༌ནི༌ ཆོགས༌ནེ༌ འི༌ ཨི༌གེ༌བོ༌ དཀོན༌མཆོག༌ ང༌དང༌ངི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཨིན༌ཁན༌ནི༌ ཐེ༌ས༌ལོ༌ནི༌ཀའེ༌ ཆོས༌ཚོགས༌ལ༌ བྲིའད༌།
2TH 1:2 ང༌དང༌གུན༌ནི༌ ཡབ༌ དཀོན༌མཆོག༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཞི༌དེ༌ ཁྱོ༌ཞའ༌ ཚང༌མ༌ལ༌ ཐོབ༌ཤིག༌།
2TH 1:3 ཅེས༌པའེ༌ སྤུན༌གུན༌, ཁྱོ༌ཞའེ༌ ཕིའ༌ ང༌ཞ༌གུན༌ནི༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཅེས༌པོ༌ འོས༌པ༌ཞིག༌ ཨིན༌ནོག༌, ཅིའ༌ཟེར༌ན༌ ཞག༌པ༌སང༌ཞག༌ ཁྱོ༌ཞ༌གུན༌ ཏད༌པའེ༌ ནང༌ང༌ ལྡན༌ཨིན༌ སོང༌ཏེ༌ ཅིག༌ དང༌ ཅིག༌ག༌ ཅེས༌པ༌ ཅོ༌ཅེས༌པོ༌ ཕེལ༌ཨིན༌ ཆ༌དུག༌།
2TH 1:4 ཏེ༌བོའེ༌ཕིའ༌ ང༌ཞའེ༌, ཁྱོ༌ཞ༌གུན༌ལ༌ རྡུག༌ངལ༌ དང༌ བར༌དོ༌ ཐོང༌ནའང༌, ཁྱོ༌ཞ༌གུན༌ནི༌ སྙིང༌རུས༌ དང༌ ཏད༌པའེ༌ ནང༌ང༌ སྟན༌པོ༌ ཡོད༌ཁན༌བོ༌ དཀོན༌མཆོག༌གི༌ ཞན༌ ཆོས༌ཚོགས༌གུན༌ནི༌ ནང༌ང༌ མ༌ སྤལ༌ངམས༌ ཉམ༌པོ༌ ཤད༌དད༌།
2TH 1:5 འི༌ ནས༌ལུག༌པོའེ༌ དཀོན༌མཆོག༌གི༌ སྡིག༌པའེ༌ཀ༌ ཁྲིམས༌ཅད༌ ཅོའ༌ ཛད༌ཅེས༌པོ༌, འོས༌པ༌ ཨིན༌ཁན༌ སྟན༌དུག༌, མ༌ཚད༌ ཁྱོ༌ཞ༌གུན༌ ཁོང༌ངི༌ གྱལ༌སྲིད༌དི༌ ཕིའ༌ འོས༌པ༌ཅན༌ རིག༌ གྱུར༌ ཅུག༌ག༌ནོག༌, ཀ༌བོའེ༌ ཕིའ༌ ཁྱོ༌ཞ༌གུན༌ལ༌ རྡུག༌ངལ༌ ཐོང༌ཨིན༌ ཨིན༌ནོག༌།
2TH 1:6 དཀོན༌མཆོག༌ ནི༌ འོས༌པ༌ ཛད༌ཁན༌ ཞུགས༌ཏེ༌ ཨིན༌། ཁོང༌ངི༌ ཁྱོ༌ཞའ༌ ནགས༌ སྟན༌ཁན༌གུན༌ལ༌ ནགས༌ སྟན༌ན༌ ཛད༌ཨིན༌།
2TH 1:7 གཙོ༌བོ༌ ཡེ༌ཤུ༌ ནམ༌ཁའ༌ནེ༌ རང༌ངི༌ སྟོབས༌ཤུག༌ཅན༌ནི༌ ཕོ༌ཉ༌གུན༌ དང༌ མེ༌ལྗབ༌ ཆེན༌མོ༌ ཉམ༌པོ༌ སྔོན༌ ཟ༌ནེ༌, ཁོང༌ངི༌ ཁྱོ༌ཞའ༌ ནགས༌ ཁུར༌ཁན༌གུན༌ དང༌ ང༌ཞ༌གུན༌ནའང༌ ཐར༌ ཅུག༌ག༌ ཛད༌ཨིན༌།
2TH 1:8 ཡང༌ དཀོན༌མཆོག༌ མ༌ཤེས༌ཁན༌ དང༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ གའ༌མོའེ༌ ནས༌ཚུལ༌ལ༌ ཁའ༌ མ༌ཉན༌ཁན༌གུན༌ལ༌ མེའེ༌ ཆད༌པ༌ ཕོག༌ཨིན༌།
2TH 1:9 ཁོང༌གུན༌ལ༌ ཐའ༌མེད༌པའེ༌ རྡུག༌ངལ༌ལི༌ ཆད༌པ༌ ཕོག༌ཨིན༌, ཡང༌ ཁོང༌གུན༌ གཙོ༌བོ༌ དང༌ ཁོང༌ངི༌ ཟིར༌རྗིད༌ཅན༌ནི༌ ཝང༌གུན༌ནེ༌ སོ༌སོ༌ ཕེས༌ཏེ༌ བོར༌ཨིན༌།
2TH 1:10 ཁོང༌ ཏེ༌ ཞག༌ག༌ ཕེབས༌ས༌ཅིག༌, ཁོང༌ང༌ ཁོང༌ངི༌ ཏམ༌པའེ༌ མི༌གུན༌ནི༌ ཆོགས༌ནེ༌ སྤལ༌ ཐོབ༌ཨིན༌, ཡང༌ ཁོང༌ངི༌ཀ༌ ཏད༌པ༌ ཁྱོང༌ཁན༌ ཚང༌མའེ༌ ཁོང༌ང༌ སྟོད༌པ༌ ཕུལ༌ཨིན༌། ཁྱོ༌ཞ༌གུན༌ནའང༌ ཏེ༌གུན༌ནི༌ ཕྲོའ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ང༌ཞའེ༌ སྤང༌པོ༌ ཏང༌ཁན༌གུན༌ནི༌ཀ༌ ཏད༌པ༌ ཁྱོངས༌ཏེ༌ ཨིན༌ནོག༌།
2TH 1:11 ཏེན༌ན༌བོའེ༌ཕིའ༌ ང༌ཞ༌གུན༌ནི༌ ཏུས༌གྱུན༌ འི༌ མོས༌ལམ༌གུན༌ ཞུའད༌, ཁྱོ༌ཞ༌གུན༌ལ༌ དཀོན༌མཆོག༌གི༌ བོད༌ད༌ ཛད༌ཁན༌ནི༌ འོས༌པའེ༌ མི༌ཚེ༌ རིག༌ ཕུད༌ཅུག༌ག༌ ཛད༌ཤིག༌། ཡང༌ ཁོང༌ངི༌ ཤེད༌ གྱུད༌ཏེ༌ ཁྱོ༌ཞ༌གུན༌ནི༌ ཏད༌པའེ༌ ལས༌ ཟང༌པོ༌ ཅོ༌ཅེས༌སི༌ དོད༌པ༌ ཡོད༌ཁན༌གུན༌ གྲུབ༌ ཅུག༌ག༌ ཛད༌ཤིག༌།
2TH 1:12 ཏེ༌ནེ༌ ཁྱོ༌ཞའེ༌ ཏེ༌ཙོགས༌སི༌ མི༌ཚེ༌ ཕུད༌ཅེས༌སི༌ ཞས༌ཏེ༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཚན༌ལ༌ རྩི༌ཝ༌ ཐོབས༌ཏེ༌, ཁྱོ༌ཞ༌གུན༌ལའང༌ ཁོང༌ ཉམ༌པོ༌ རྩི༌ཝ༌ ཐོབ༌ཨིན༌། འི༌ ཚང༌མ༌ ང༌དང༌གུན༌ནི༌ གཙོ༌བོ༌ དང༌ དཀོན༌མཆོག༌ ཡེ༌ཤུ༌ མ༌ཤི༌ཀའེ༌ ཐུག༌རྗེའེ༌ གྱུད༌ཏེ༌ གྲུབ༌ ཐུབ༌ཨིན༌།
2TH 2:1 སྤུན༌གུན༌ ཏ༌ ཁྱོ༌ཞའ༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབ༌ཤེས༌སི༌ ཏུས༌ དང༌ ཁོང༌ངི༌ སྐུན༌དུན༌ལ༌ ང༌དང༌ ཚང༌མ༌ ཛོམ༌ཅེས༌སི༌ སྐོར༌ལ༌ འི༌ ཞུ༌ཝ༌བོ༌ ཞུའད༌།
2TH 2:2 ང༌ཞའེ༌ ཆོགས༌ནེ༌ ལུང༌སྟན༌ ཡ༌ ལོན༌ ཡ༌ ཨི༌གེ༌ དུག༌ ཟེར༌ཏེ༌, ཀལ༌ཏེས༌ སུ༌ཞིག༌གི༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཏུས༌པོ༌ ལེབ༌ ཚར༌ཏེ༌ ཨིན༌ནོག༌ ཟེར༌ན༌, ཁྱོ༌ཞའེ༌ ཏད༌པ༌ ཡ༌ ཐར༌པའེ༌ཀ༌ ཐེ༌ཚོམས༌ མ༌ཅོ༌ཤིག༌།
2TH 2:3 ཇུ༌ཇུ༌ སུ༌ཞིག༌གིའང༌ ཁྱོ༌ཞ༌གུན༌ལ༌ གོབ༌སྐོར༌ མ༌ཅུག༌ཤིག༌ ཅིའ༌ཟེར༌ན༌ ཏེ༌ ཞག༌པོ༌ ཏེ༌ཏེ༌ཚོག༌པ༌ མི༌ལེབ༌, ནམ༌ཚོག༌པ༌ དཀོན༌མཆོག༌ག༌ ངོ༌ལོག༌ ཅོ༌ཅེས༌སི༌ ཏུས༌པོ༌ མི༌ལེབ༌ ཡང༌ བཀའ༌ཁྲིམས༌ མེད༌ཁན༌ནི༌ མི༌བོ༌ སྔོན༌ མི༌སྔོན༌, ཁོ༌ ཁྲེས༌ཏོར༌ ཆ༌ཅེས༌སི༌ ཆོགས༌ལ༌ ཆེན༌ ཨིན༌ནོག༌།
2TH 2:4 མི༌གུན༌ནི༌ དཀོན༌མཆོག༌ རྩི༌ཁན༌ ཡ༌ ཅོལ༌ཁན༌ ཚང༌མ༌ལ༌ འི༌ མི༌བོའེ༌ གྱབ༌གལ༌ ཅོས༌ཏེ༌ ཁོ༌རང༌ང༌ ཏེ༌གུན༌ནི༌ སང༌ རྩི༌ཝ༌ མང༌ང༌ ཏང༌ང༌ནོག༌། ཁོ༌ དཀོན༌མཆོག༌གི༌ ཆོད༌ཁང༌ངི༌ ནང༌ང༌ ཁྲིས༌སི༌ཀ༌ དུགས༌ཏེ༌ ཁོ༌རང༌ དཀོན༌མཆོག༌ ཨིན༌ ཟེར༌ར༌ནོག༌།
2TH 2:5 ང༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌, ཏེ༌གུན༌ནི༌ སྐོར༌ལ༌ ཁྱོ༌ཞ༌གུན༌ལ༌ ཟེར༌ཁན༌གུན༌ ཨིད༌ཏུ༌ མེ༌རག༌ག༌?
2TH 2:6 བཀའ༌ཁྲིམས༌ མེད༌ཁན༌ནི༌ མི༌, ཏུས༌པོའེ༌ སང༌ སྔུན༌ལ༌ སྔོན༌ མ༌ཅུག༌ག༌ སྒགས༌ཏེ༌ བོར༌ར༌ ཛད༌ཁན༌བོ༌ ཁྱོ༌ཞའ༌ གྱུས༌ཨིན༌ནོག༌།
2TH 2:7 ཤེ༌ཏན༌ནི༌ ཝང༌ངི༌ སང༌ཝའེ༌ ཚུལ༌ལ༌ ལས༌ ཅོ༌ཅེས༌ གོ༌ ཟུག༌ ཚར༌ཏེ༌ ཨིན༌ནོག༌། ཨིན༌ནའང༌ སྒགས༌ཏེ༌ བོར༌ར༌ ཛད༌ཁན༌བོའེ༌, ཁོ༌ ཏེ༌ཏེ༌ཚོག༌པ༌ སྒགས༌ཏེ༌ བོར༌ཨིན༌ ནམ༌ཚོག༌པ༌ དཀོན༌མཆོག༌གི༌ ཁོང༌ ཏེ༌ ལམ༌མི༌ ཀ༌ནེ༌ ཐེན༌ན༌ མི༌ཛད༌།
2TH 2:8 ཏེ༌ནེ༌ ཏེ༌ ཁྲིམས༌ མེད༌ཁན༌བོ༌ ཡོང༌ཨིན༌, ཨིན༌ནའང༌ གཙོ༌བོ༌ ཡེ༌ཤུའི༌ འུགས༌ ཅིག༌ ཉམ༌པོ༌ བཀའ༌ སལ༌ཏེ༌, ཁོའ༌ ཕམ༌ཀལ༌ལ༌ ཛད༌ཨིན༌། ཡང༌ ཁོང༌ ཟིར༌རྗིད༌དི༌ ནང༌ང༌ སྐྱོད༌ཅེས༌པོའེ༌, ཁོ༌ མེད༌ཁན༌ ཛད༌ཨིན༌།
2TH 2:9 ཏེ༌ ཁྲིམས༌ མེད༌ཁན༌བོ༌ ཤེ༌ཏན༌ནི༌ སྟོབས༌ ཉམ༌པོ༌ ཡོང༌ཨིན༌, ཡང༌ ཟུན༌མའེ༌ ལྟས༌ དང༌ སྟགས༌ དང༌ ཁྱུད༌དི༌ རིགས༌ ཚང༌མ༌ སྟན༌ཨིན༌།
2TH 2:10 ཁོའེ༌ ཏེ༌ ཁྲེས༌ཏོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཁན༌ ཚང༌མ༌ལ༌ ངན༌པའེ༌ གོབ༌སྐོར༌ སྣ༌ཚོགས༌སི༌ ནང༌ང༌ ཁྱོང༌ཨིན༌, ཅིའ༌ཟེར༌ན༌ ཁོང༌གུན༌ནི༌ སྐྱོབ༌ཐུབ༌ཁན༌ནི༌ ལོན༌ ཀྲང༌པོའ༌ ཅམས༌པ༌ ཅོའ༌ མི༌རུག༌།
2TH 2:11 ཏེན༌ན༌བོའེ༌ཕིའ༌ དཀོན༌མཆོག༌གི༌ གོབ༌སྐོར༌ ཆེན༌མོ༌ཞིག༌ ཇུང༌ ཅུག༌ག༌ ཛད༌ཨིན༌, ཀ༌བོའེ༌ ཁོང༌གུན༌ལ༌ ཤེ༌ཏན༌ནི༌ ཟུས༌མ༌ ལས༌གུན༌ལ༌ ཨིད༌ཤེས༌ ཅོ༌ཅུག༌ཨིན༌།
2TH 2:12 ཁོང༌གུན༌ནི༌ ལོན༌ ཀྲང༌པོ༌བོའེ༌ཀ༌ ཏད༌པ༌ མ༌ཅོའ༌, ངན༌པ༌བོའ༌ ཐད༌པོ༌ ཅོ༌ཅེས༌པོའེ༌ ཞས༌ཏེ༌, ཁོང༌གུན༌ནི༌ཀ༌ ཤི༌ཅེས༌སི༌ ཐག༌ཅད༌ སལ༌ཨིན༌།
2TH 2:13 གཙོ༌བོའེ༌ ཅེས༌པ༌ ཛད༌ཁན༌ནི༌ སྤུན༌གུན༌, ང༌ཞའེ༌ ཁྱོ༌ཞ༌གུན༌ནི༌ ཕིའ༌ དཀོན༌མཆོག༌ག༌ ཏུས༌གྱུན༌ ཐུག༌རྗེ༌ཆེ༌ ཞུ༌ཅེས༌པོ༌ འོས༌པ༌ ཚོར༌ར༌རག༌། ཅིའ༌ཟེར༌ན༌ དཀོན༌མཆོག༌གི༌ ཁྱོ༌ཞ༌གུན༌ ཐར༌པའེ༌ ཕིའ༌ ཇིག༌རྟེན༌ ཆགས༌སི༌ སང༌ སྔུན༌ལ༌, ཏམ༌པའེ༌ ཐུག༌ཉིད༌དི༌ རྩང༌མ༌ ཛད༌ཅེས༌ དང༌ གཙོ༌བོ༌ ཡེ༌ཤུའི༌ སྐོར༌ལ༌ ཀྲང༌པོའེ༌ ལོན༌བོའེ༌ཀ༌ ཏད༌པ༌ ཅོ༌ཁན༌གུན༌ གྱུད༌ཏེ༌, ལྡམ༌མ༌ ཛད༌ཏེ༌ ཨིན༌ནོག༌།
2TH 2:14 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྤལ༌ལི༌ ནང༌ང༌ དྲེས༌ ཐུབ༌ཅེས༌སི༌ ཕིའ༌ དཀོན༌མཆོག༌གི༌, ཁྱོ༌ཞ༌གུན༌ ང༌ཞའེ༌ གའ༌མོའེ༌ ནས༌ཚུལ༌ ཤད༌ཁན༌གུན༌ གྱུད༌ཏེ༌, ཐར༌པ༌ ཐོབ༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌།
2TH 2:15 ཏེ༌བོའེ༌ཕིའ༌ སྤུན༌གུན༌ ང༌ཞའེ༌ ཁའ༌ནེ༌ ཚོར༌ཁན༌ ཡ༌ ཨི༌གེ༌ ནང༌ང༌ བྲིས༌ཁན༌ནི༌ ལབ༌ཞ༌གུན༌ནི༌ཀ༌ ཐེ༌ཚོམས༌ མ༌ཆའ༌ སྟན༌པོ༌ དུག༌ཤིག༌།
2TH 2:16 ང༌དང༌ང༌ ཅེས༌པ༌ ཛད༌ཏེ༌ ཐུག༌རྗེ༌ ཟིགས༌ཏེ༌ ཐའ༌མེད༌པའེ༌ སེམས༌དེ༌ དང༌ ཧ༌ལས༌སི༌ རེ༌ཝ༌ སལ༌ལ༌ ཛད༌ཁན༌ནི༌, ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ དང༌ དཀོན༌མཆོག༌ ང༌དང༌ངི༌ ཡབ༌ ཉིས༌ཀོའེ༌,
2TH 2:17 ཁྱོ༌ཞའེ༌ སེམས༌ལ༌, ལས༌ དང༌ སྤེ༌ར༌ ཟང༌པོ༌ གུན༌ནི༌ ནང༌ང༌, སྤོས༌པ༌ དང༌ སྟོབས༌ སལ༌ལ༌ ཛད༌ཤིག༌།
2TH 3:1 སྟིང༌ཇུག༌ག༌, ཅེས༌པའེ༌ སྤུན༌གུན༌ གཙོ༌བོ༌ ཡེ༌ཤུའི༌ བཀའ༌, གྱོགས༌པ༌ ཕེལ༌ཅེས༌ དང༌ ཁྱོ༌ཞ༌གུན༌ནི༌ རྩི༌ཝ༌ ཅོའ༌ ཙོགས༌ལ༌, ཞན༌མ༌གུན༌ནི༌ ཀ༌ནེའང༌ རྩི༌ཝ༌ ཐོབ༌ཅེས༌ལ༌ ང༌ཞའེ༌ ཕིའ༌ མོས༌ལམ༌ ཞུས༌ཤིག༌།
2TH 3:2 ཡང༌ ང༌ཞའ༌ མི༌ རྩོག༌པོ༌ དང༌ ངན༌སེམས༌ཅན༌ གུན༌ནི༌ ཀ༌ནེ༌ ཐར༌ཅེས༌ལ༌ མོས༌ལམ༌ ཞུས༌ཤིག༌, ཅིའ༌ཟེར༌ན༌ མི༌ མང༌པོའེ༌ གའ༌མོའེ༌ ནས༌ཚུལ༌ལི༌ཀ༌ ཏད༌པ༌ ཅོའ༌ མ༌ནོག༌།
2TH 3:3 ཨིན༌ནའང༌ གཙོ༌བོ༌ ནི༌ ཨིད༌ཤེས༌ཅན༌ཞིག༌ ཨིན༌ནོག༌, ཁོང༌ངི༌ ཁྱོ༌ཞ༌གུན༌ སྟན༌པོ༌ ཛད༌ཏེ༌ ཤེ༌ཏན༌ནི༌ ལས༌ ངན༌པ༌ནེ༌ སྐྱོབས༌ཏེ༌ བོར༌ར༌ ཛད༌ཨིན༌།
2TH 3:4 གཙོ༌བོའེ༌ ནང༌ང༌ ཁྱོ༌ཞ༌གུན༌ལ༌ ང༌ཞའེ༌ ལས༌ ཅོ༌ཅེས༌ལ༌ བཀའ༌ ཏང༌ཁན༌གུན༌ ལག༌ལེན༌ ཅོས༌ཏེ༌ ཨིན༌ནོག༌, ཡང༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཅོ༌ཨིན༌ དུག༌ཅེས༌སི༌, ང༌ཞ༌གུན༌ལ༌ ལོ༌ཁྱེལ༌ ཡོད༌།
2TH 3:5 གཙོ༌བོ༌ ཡེ༌ཤུའི༌ ཁྱོ༌ཞའེ༌ སྙིང༌གུན༌, དཀོན༌མཆོག༌གི༌ ཙམ༌ཤིག༌གི༌ ཅམས༌པ༌ ཛད༌ཅེས༌ དང༌, མ༌ཤི༌ཀའེ༌ ཀ༌ནེ༌ ཐོབ༌ཁན༌ནི༌ ཟོད༌སེམས༌ཅན༌ནི༌ སྙིང༌རུས༌ གུན༌ མང༌ང༌ ཧ༌གོ༌ཅེས༌སི༌ ནང༌ང༌ ཁྲིད༌ད༌ ཛད༌ཤིག༌།
2TH 3:6 ཅེས༌པའེ༌ སྤུན༌གུན༌, ང༌ཞའེ༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཝང༌ངི༌ ནང༌ང༌ ཁྱོ༌ཞ༌གུན༌ལ༌ འི༌ བཀའ༌བོ༌ ཏང༌ངད༌། ཁྱོ༌ཞ༌གུན༌ ཏད༌པ༌ཅན༌ནི༌ ལས༌མི༌ལམ༌ ཡང༌ ང༌ཞའེ༌ ཏང༌ཁན༌ནི༌ ལབ༌ཞ༌གུན༌ ནང༌ཞིན༌ མ༌གྲུལ༌ཁན༌གུན༌ནེ༌ ཐག༌རིང༌ང༌ དུག༌ཤིག༌།
2TH 3:7 ང༌ཞའ༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེ༌, ང༌ཞའ༌ ལས༌མི༌ལམ༌ མེད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌, ང༌ཞའེ༌ མི༌ཚེ༌ ཕུད༌ཚུལ༌བོ༌ སྤེ༌ ལེན༌གོས༌།
2TH 3:8 རིན༌ མ༌ཤལ༌ལ༌ ང༌ཞའེ༌ སུ༌ཞིག༌གི༌ ཀ༌ནེའང༌ ཟན༌ མ༌ཟོས༌པིན༌, ཨིན༌ནའང༌ ཁྱོ༌ཞའ༌ སུའང༌ བར༌དོ༌ མི༌སྟན༌ཅེས༌སི༌ ཕིའ༌ ཉིན༌ཚན༌ མེད༌པ༌, རྩོན༌གྲུས༌ སྲན༌ཏྲེ༌ ཉམ༌པོ༌ ལས༌ ཅོས༌པིན༌།
2TH 3:9 ང༌ཞ༌གུན༌ལ༌ ང༌ཞའེ༌ སྒོས༌དོམ༌གུན༌ ཏོང༌ ཟེར༌ཅེས༌སི༌ ཝང༌ ཡོད༌ཏེའང༌, ཁྱོ༌ཞ༌གུན༌ ང༌ཞའེ༌ སྤེའེ༌ཀ༌ གྲུལ༌ཅེས༌སི༌ ཕིའ༌ ང༌ཞའེ༌ མི༌ཚེ༌ ཏེ༌ ཚུལ༌ལ༌ ཕུད༌པིན༌།
2TH 3:10 ཡང༌ ང༌ཞའ༌ ཁྱོ༌ཞའ༌ ཉམ༌པོ༌ ཡོད༌ ཟ༌ནེའང༌, ང༌ཞའེ༌ འིན༌ན༌ བཀའ༌བོ༌ ཏངས༌པིན༌, “ཀལ༌ཏེས༌ མི༌ཞིག༌ག༌ ལས༌ ཅོ༌ཅེས༌སི༌ དོད༌པ༌ མེད༌ན༌, ཁོའ༌ ཟའ༌ཅེས༌ལ༌ ཟན༌ མ༌ཏང༌ཤིག༌།”
2TH 3:11 ཁྱོ༌ཞའེ༌ ཕྲོ༌ནེ༌ ཁ༌ཅིག༌ ལས༌ ཅའང༌ མ༌ཅོའ༌ ལས༌མི༌ལམ༌ གྱུར༌ཏེ༌ ཡོད༌ཁན༌ ཡང༌ ཞན༌མ༌གུན༌ནི༌ ལས༌སི༌ ནང༌ང༌ ཐེས༌སྟོག༌ ཏང༌ཨིན༌ དུག༌ཅེས༌པོ༌ ང༌ཞའེ༌ ཚོར༌།
2TH 3:12 ཏེ༌ཙོགས༌སི༌ མི༌གུན༌ལ༌, ཅུབ༌ཅད༌ཏེ༌ རང༌ངི༌ ཁར༌ཇི༌ ཕིའ༌ རྩོན༌གྲུས༌ ཅོས༌ཏེ༌ ལས༌ ཅོ༌གོས༌ཅེས༌ལ༌ ང༌ཞའེ༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཝང༌ངི༌ ནང༌ང༌ སྤོས༌པ༌ དང༌ བཀའ༌ ཏང༌ངད༌།
2TH 3:13 ཏ༌ ཁྱོ༌ཞའ༌ ལུས༌ཁན༌ནི༌ སྤུན༌གུན༌ནི༌ ལས༌ ཟང༌པོ༌ ཅོ༌ཨིན༌ དུག༌ཅེས༌ལ༌ སྣང༌ང༌ མ༌ཚེར༌ཤིག༌།
2TH 3:14 ཀལ༌ཏེས༌ སུ༌ཞིག༌གི༌ འི༌ ཨི༌གེ༌ ནང༌ང༌ བྲིས༌ཁན༌ནི༌ ལབ༌ཞ༌གུན༌ལ༌ མ༌ཉན༌ན༌, ཏེ༌ མི༌བོའེ༌ཀ༌ ནང༌སྟག༌ བོར༌། ཁོའ༌ ཁྲེལ༌བ༌ ཆ༌ཅེས༌སི༌ ཕིའ༌ ཁོ༌ ཉམ༌པོ༌ བྲེལ༌ མ༌ཅོ༌།
2TH 3:15 ཨིན༌ནའང༌ ཁོའ༌ གྲ༌འོ༌ མ༌སམ༌མ༌, རང༌ངི༌ སྤུན༌ཞིག༌ ཙོགས༌ལ༌ སྤང༌ཕུད༌ཏེ༌ ཁ༌དའ༌ ཏོང༌།
2TH 3:16 ཞི༌དེའེ༌ སལ༌ལ༌ ཛད༌ཁན༌ནི༌ གཙོ༌བོ༌ ཡེ༌ཤུའི༌, ཁོང༌རང༌ངི༌ ཞི༌དེ༌ ཁྱོ༌ཞ༌གུན༌ལ༌ ཏུས༌གྱུན༌ དང༌ ནས༌ལུག༌ ཚང༌མའེ༌ ནང༌ང༌ སལ༌ལ༌ ཛད༌ཤིག༌, ཡང༌ གཙོ༌བོ༌ ཁྱོ༌ཞའ༌ ཚང༌མ༌ ཉམ༌པོ༌ ཞུགས༌ཤིག༌།
2TH 3:17 ཏ༌ ངའེ༌ ཨི༌གེ༌ བྲི༌ཁན༌བོའེ༌ ཀ༌ནེ༌ ཉི༌གུ༌བོ༌ ཁྱོངས༌ཏེ༌, ང༌ པ༌འུ༌ལུའི༌ རང༌ངི༌ ལག༌བྲིས༌སི༌ ནང༌ང༌ འི༌ ཇུ༌བོ༌ བྲིའད༌, ཀ༌བོ༌ ཨི༌གེ༌ ཚང༌མའེ༌ ནང༌ང༌ ངའེ༌ ངོ༌སྟགས༌བོ༌ ཨིན༌།
2TH 3:18 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ ཁྱོ༌ཞའ༌ ཚང༌མ༌ལ༌ ཐོབ༌ཤིག༌།
1TI 1:1 ང༌དང༌གུན༌ནི༌ སྐྱབ༌གོན༌ དཀོན༌མཆོག༌ དང༌ ང༌དང༌གུན༌ལ༌ རེ༌ཝ༌ སལ༌ཁན༌ནི༌ མ༌ཤི༌ཀ༌ ཡེ༌ཤུའི༌, ང༌ པ༌འུ༌ལུ༌ མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ སྐོའ༌ ཛདས༌།
1TI 1:2 ངའེ༌ ཏད༌པའེ༌ ནང༌ང༌ དེན༌བའེ༌ བུ༌ཚ༌ ཨིན༌ཁན༌ནི༌ ཏི༌མོ༌ཐི༌ ཁྱོ༌རང༌ང༌ བྲིའད༌། དཀོན༌མཆོག༌ ཡབ༌ དང༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ང༌ ཐུག༌རྗེ༌, སྙིང༌རྗེ༌ དང༌, ཞི༌དེ༌ སལ༌ལ༌ ཛད༌ཤིག༌།
1TI 1:3 ང༌ མ༌ཀེ༌དོ༌ནི༌ཡཱ༌ ཆ༌ ཟ༌ནེ༌, ངའེ༌ ཁྱོ༌རང༌ང༌ ཨེ༌ཕེ༌སས༌སི༌ ནང༌ང༌ དུག༌ཅེས༌ དང༌ དཀོན༌མཆོག༌གི༌ སྐོར༌ལ༌ ཟུས༌མ༌ ལབ༌ཞ༌ ཏང༌ཁན༌གུན༌ སྒག༌ཅེས༌ལ༌ མ༌སྲན༌ཏྲེ༌ སྤོས༌པ༌ ཏངས༌པིན༌།
1TI 1:4 ཡང༌ ཟུས༌མའེ༌ རུངས༌ དང༌ ཁོ༌རང༌གུན༌ནི༌ པུར༌གྱུད༌དི༌ ཐོ༌རིང༌མོ༌ གུན༌ནི༌ སྐོར༌ལ༌ གྲབས༌ ཅོ༌ཨིན༌ ཏུས༌ གོད༌ལ༌ མི༌ཏང༌ཅེས༌ལ༌ བཀའ༌ ཏོང༌། ཏེ༌ ལས༌གུན༌ནི༌ མི༌གུན༌ལ༌ དཀོན༌མཆོག༌གི༌ ཕིའ༌ ཏད༌པ༌ཅན༌ནི༌ མི༌ཚེ༌ཞིག༌ ཕུད༌ཅེས༌སི༌ ནང༌ང༌ རོགས༌ ཅོའ༌ མ༌ནོག༌, ཨིན༌ནའང༌ ཏོན༌མེད༌དི༌ ཛིང༌མོ༌ ཆ༌ཅུག༌ག༌ནོག༌།
1TI 1:5 ངའེ༌ ལབ༌ཞའེ༌ མིག༌ཞི༌བོ༌ ནི༌ ཏད༌པ༌ ཡོད༌ཁན༌ ཚང༌མ༌ སྙིང༌ ཟང༌པོ༌, སེམས༌ ལག༌མོ༌ དང༌ དེན༌བའེ༌ ཏད༌པ༌ གུན༌ནེ༌ ཡོང༌ཁན༌ནི༌ ཡ༌ཤའེ༌ གངས༌ཅེས༌པོ༌ ཨིན༌།
1TI 1:6 ཨིན༌ནའང༌ འི༌ ཟུས༌མའེ༌ ལོབ༌བོན༌གུན༌ནི༌ ཏེ༌ ལབ༌ཞ༌ ཟང༌པོ༌ ཚང༌མ༌ལ༌ གྱབ༌ ལོགས༌ཏེ༌ ཏོན༌མེད༌དི༌ གོར༌གྱན༌གུན༌ནི༌ཀ༌ གྲོས༌དུར༌ ཅོ༌རུག༌།
1TI 1:7 ཆོས༌ཁྲིམས༌ལ༌ ཁས༌པའེ༌ ལོབ༌བོན༌གུན༌ གྱུར༌ཅེས༌སི༌ དོད༌པ༌ ཉམ༌པོ༌, ཁོང༌གུན༌ནི༌ ཏེ༌གུན༌ ཐེ༌ཚོམས༌ མེད༌པ༌ ཤད༌ནའང༌, ངོས༌པོའ༌ ཁོང༌གུན༌ནི༌ ཤད༌ཁན༌བོ༌ ཁོ༌རང༌གུན༌ལ༌ ཧ༌མ༌གོའ༌ ཨིན༌ནོག༌།
1TI 1:8 ཀལ༌ཏེས༌ ཆོས༌ཁྲིམས༌པོ༌ དཀོན༌མཆོག༌གི༌ ཐབས༌ ནང༌ཞིན༌ལ༌ ཀོལ༌ན༌, ཟང༌པོ༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།
1TI 1:9 ཅིའ༌ཟེར༌ན༌ བཀའ༌ཁྲིམས༌པོ༌ ལས༌ ཀྲང༌པོ༌ ཅོ༌ཁན༌གུན༌ནི༌ ཕིའ༌ མ༌ཅོའ༌ ཁྲིམས༌ མེད༌ཁན༌, གྱབ༌གལ༌ ཅོ༌ཁན༌, དཀོན༌མཆོག༌གི༌ ཇིགས༌སི༌ ནང༌ང༌ མ༌གྲུལ༌ཁན༌ དང༌ སྡིག༌ཅན༌ གུན༌ མ༌ཚད༌, ཅའང༌ ཏམ༌པའ༌ མ༌རྩི༌ཁན༌, ཏམ༌པ༌ གུན༌ རྩོག༌པོ༌ ཅོ༌ཁན༌, ཨ༌བ༌ ཡ༌ ཨ༌མ༌ སད༌ཁན༌ ཡང༌ མི༌སད༌ཁན༌གུན༌ནི༌ ཕིའ༌ ཅོས༌ཏེ༌ ཨིན༌ནོག༌།
1TI 1:10 བཀའ༌ཁྲིམས༌པོ༌ ལུས༌བྲེལ༌ ངན༌པ༌ ཅོ༌ཁན༌, བུ༌ཚ༌ དང༌ བུ༌ཚའེ༌ པར༌ལ༌ ཡ༌ བུ༌མོ༌ དང༌ བུ༌མོའེ༌ པར༌ལ༌ ལུས༌བྲེལ༌ ཅོ༌ཁན༌གུན༌, ཚེ༌ཡོག༌གི༌ ཕིའ༌ མི༌གུན༌ ཙོང༌ཁན༌, ཟུན༌ཇན༌, ཁྲིམས༌ཁུང༌ངི༌ ནང༌ང༌ སྤང༌པོ༌ ཟུན༌བ༌ ཏང༌ཁན༌ དང༌ ལབ༌ཞ༌ ཟང༌པོའེ༌ གྱབ༌གལ༌ ཅོ༌ཁན༌གུན༌ནི༌ ཕིའ༌ ཨིན༌ནོག༌།
1TI 1:11 ཁོང༌གུན༌ནི༌ གྱབ༌གལ༌ ཅོ༌ཁན༌ནི༌ ལབ༌ཞ༌ ཟང༌པོ༌གུན༌, ཟིར༌རྗིད༌ཅན༌ནི༌ གའ༌མོའེ༌ ནས༌ཚུལ༌ནེ༌ ཇུང༌ང༌ནོག༌, ཀ༌བོ༌ ཅིན༌ལབས༌ཅན༌ནི༌ དཀོན༌མཆོག༌གི༌ ངའེ༌ ལག༌ག༌ སྟད༌ད༌ ཛད༌ཏེ༌ ཨིན༌།
1TI 1:12 མ༌ཤི༌ཀ༌ ཡེ༌ཤུ༌ ང༌དང༌གུན༌ནི༌ གཙོ༌བོའེ༌ ངའ༌ ཁོང༌རང༌ངི༌ ཆག༌ལས༌གུན༌ ཛད༌ཅེས༌ལ༌ སྟོབས༌ སལ༌ལ༌ ཛདས༌, ཁོང༌ང༌ ངའེ༌ ཐུག༌རྗེ༌ཆེ༌ ཞུའད༌། ཁོང༌ངི༌ ངའ༌ ལོ༌ཁྱེལ༌ཅན༌ནི༌ མི༌ཞིག༌ རྩིའ༌ ཛད༌ཏེ༌ ཁོང༌རང༌ང༌ ཞབས༌ཏོག༌ ཞུ༌ཅེས༌སི༌ ཕིའ༌ སྐོའ༌ ཛདས༌།
1TI 1:13 ཞན༌ ངའ༌ དད༌ལོག༌ ཞུ༌ཁན༌, ཏད༌པ༌ཅན༌གུན༌ལ༌ ནགས༌སྟན༌ཏེ༌ ནོད༌སྐྱལ༌ཁན༌ ཨིན༌ཏེའང༌, དཀོན༌མཆོག༌ག༌ ངའེ༌ཀ༌ སྙིང༌རྗེ༌ སྐྱེའ༌ ཛདས༌, ཅིའ༌ཟེར༌ན༌ ཏེ༌གུན༌ ངའེ༌ མ༌ཤི༌ཀ༌ ཏད༌པ༌ མ༌ཅོ༌ཁན༌ དང༌ དེན༌བའེ༌ ལབ༌ཞ༌ གུན༌ མ༌ཤེས༌ཁན༌ འིན༌ནི༌ ཏུས༌ལ༌ ཅོས༌ཏེ༌ ཨིན༌པིན༌།
1TI 1:14 འོ༌, ང༌དང༌གུན༌ནི༌ གཙོ༌བོ༌, ཙམ༌ཤིག༌གི༌ སྙིང༌ ཕེས༌ཏེ༌ སལ༌ཁན༌ དང༌ ཐུག༌རྗེ༌ཅན༌ཞིག༌ ཞུགས༌ཏེ༌ མི༌རུག༌། ཁོང༌ངི༌, ངའ༌ མ༌ཤི༌ཀ༌ ཡེ༌ཤུ༌ནེ༌ ཇུང༌ཁན༌ནི༌ ཏད༌པ༌ དང༌ ཅེས༌པའེ༌ སྐང༌ང༌ ཛདས༌།
1TI 1:15 འི༌ ཞལ༌ཏ༌གུན༌ དེན༌བ༌ ཨིན༌པ༌, མི༌ཚང༌མའེ༌ ཏེ༌གུན༌ནི༌ཀ༌ ཨིད༌ཤེས༌ ཅོ༌གོས༌ཤེས༌ ཨིན༌ནོག༌, “མ༌ཤི༌ཀ༌ ཡེ༌ཤུ༌ འི༌ ཇིག༌རྟེན༌ནི༌ ནང༌ང༌ སྡིག༌ཅན༌གུན༌ སྐྱོབ༌བ༌ལ༌ སྐྱོདས༌།” ཏེ༌ སྡིག༌ཅན༌གུན༌ནི༌ ཕྲོ༌ནེ༌ ངའ༌ ཚང༌མའེ༌སང༌ ཐུ༌ཤོག༌པོ༌ ཨིན༌པིན༌།
1TI 1:16 ཨིན༌ནའང༌ མ༌ཤི༌ཀ༌ ཡེ༌ཤུའི༌ ཁོང༌རང༌ངི༌ ཟོད༌སེམས༌ ཆེན༌མོའེ༌ སྤེ༌ཞིག༌གི༌ ཚུལ༌ལ༌ ངའ༌, སྡིག༌ཅན༌ ཐུ༌ཤོག༌པོ༌ ཀོལ༌ལ༌ ཛད༌ཅེས༌སི༌ ཕིའ༌ དཀོན༌མཆོག༌གི༌ ངའེ༌ཀ༌ སྙིང༌རྗེ༌ སྐྱེའ༌ ཛདས༌། ཏེ༌ སྤེ༌བོའེ༌ ཡེ༌ཤུའི༌ཀ༌ ཏད༌པ༌ ཅོ༌ན༌, ཐའ༌མེད༌པའེ༌ མི༌ཚེ༌ ཐོབ༌ཐུབ༌ཅེས༌པོ༌ ཞན༌མ༌གུན༌ལ༌ ཧ༌གོ༌ཐུབ༌ཨིན༌།
1TI 1:17 ཁོང༌ ནི༌ ཐའ༌མེད༌པའེ༌ གྱལ༌པོ༌, ཇལ༌ མ༌ཇལ༌ཁན༌, མ༌ནེ༌ མི༌ཀྲོངས༌ཁན༌, ཡང༌ ཁོང༌རང༌ ཅིག༌པོ༌ དཀོན༌མཆོག༌ ཞུགས༌ཏེ༌ ཨིན༌ནོག༌། ཁོང༌ང༌ རྩི༌ཝ༌ དང༌ སྤལ༌ གུན༌, ཏུས༌གྱུན༌ནེ༌གྱུན༌ ཐོབ༌ཤིག༌། ཨ༌མེན༌།
1TI 1:18 ངའེ༌ བུ༌ཚ༌ ཏི༌མོ༌ཐི༌, ཁྱོ༌རང༌ངི༌ སྐོར༌ལ༌ སྔུན༌ལ༌ ལུང༌སྟན༌ ཤད༌ཁན༌ ནང༌ཞིན༌, ངའེ༌ འི༌ ལབ༌ཞ༌གུན༌ ཁྱོ༌རང༌ང༌ ཏང༌ངད༌། འི༌ ལབ༌ཞ༌གུན༌ནི༌, ཁྱོ༌རང༌ང༌ གཙོ༌བོའེ༌ མག༌ཐབས༌སི༌ ནང༌ང༌ གྱལ༌ཁའ༌ ཐོབ༌ཅེས༌ལ༌ རོགས༌ ཐོབ༌ཤིག༌།
1TI 1:19 མ༌ཤི༌ཀའེ༌ ནང༌ང༌ ཁྱོ༌རང༌ངི༌ ཏད༌པ༌བོ༌ སྟན༌པོ༌ ཐམས༌ཏེ༌ དུག༌, ཡང༌ ཁྱོ༌རང༌ངི༌ སེམས༌ ནོངས༌མེད༌ བོར༌, ཅིའ༌ཟེར༌ན༌ མི༌ ཁ༌ཅིག༌གི༌ འི༌ ལབ༌ཞ༌བོ༌ ཕངས༌པ༌, ཁོང༌གུན༌ནི༌ ཏད༌པ༌བོ༌ ཁྲེས༌ཏོར༌ སོང༌ཏེ༌ ཨིན༌ནོག༌།
1TI 1:20 ཧེ༌མི༌ན༌ཡུས༌ དང༌ ཨ༌ལེག༌ཟན༌དེར༌ ཉིས༌ཀོ༌, ཏེ༌བོའེ༌ སྤེ༌ཞིག༌ ཨིན༌ནོག༌། ཁོང༌གུན༌ལ༌ དཀོན༌མཆོག༌ག༌ དད༌ལོག༌ མི༌ཅོ༌ཅེས༌པོ༌ ཧ༌གོ༌ཅེས༌སི༌ ཕིའ༌, ངའེ༌ ཁོང༌གུན༌ ཆོས༌ཚོགས༌སི༌ ཕྲོ༌ནེ༌ ཕིངས༌ཏེ༌ ཤེ༌ཏན༌ནི༌ ལག༌ག༌ སྟད༌པིན༌།
1TI 2:1 ཚང༌མའེ༌སང༌ སྔུན༌ལ༌, མི༌ཚང༌མའེ༌ ཕིའ༌ མོས༌ལམ༌ ཞུ༌ཅེས༌ལ༌ ངའེ༌ ཏད༌པ༌ཅན༌ ཚང༌མ༌ལ༌ མ༌སྲན༌ཏྲེ༌ སྤོས༌པ༌ ཏང༌ངད༌; མོས༌ལམ༌མི༌ ནང༌ང༌ དཀོན༌མཆོག༌ག༌ ཁོང༌གུན༌ལ༌ རོགས༌ ཛད༌ ཟེར༌ཅེས༌, ཁོང༌གུན༌ནི༌ ཏོན༌ལ༌ ཞུ༌ཝ༌ ཕུལ༌ཅེས༌ དང༌ ཐུག༌རྗེ༌ཆེ༌ ཞུ༌ཅེས༌ གུན༌ ཡོང༌གོས༌།
1TI 2:2 ཏེན༌ན༌ ཙོགས༌ལ༌, དཀོན༌མཆོག༌གི༌ སྕོད༌ལམ༌ དང༌ ཏམ༌པའེ༌ ལམ༌མི༌ཀ༌ གྲུལ༌ཨིན༌ ང༌དང༌གུན༌ ཞི༌དེ༌ དང༌ ཁམ༌ཟང༌ངི༌ མི༌ཚེ༌, ཕུད༌ ཉན༌ཅེས༌ལ༌ གྱལ༌པོ༌ དང༌ ཝང༌ ཡོད༌ཁན༌ ཚང༌མའེ༌ ཕིའ༌ མོས༌ལམ༌ ཞུ༌ཤིག༌།
1TI 2:3 འི༌ཙོགས༌ལ༌ མོས༌ལམ༌ ཕུལ༌ཅེས༌པོ༌, གྱལ༌ལ༌ཞིག༌ ཨིན༌ནོག༌, ཡང༌ ང༌དང༌གུན༌ནི༌ སྐྱབ༌གོན༌ དཀོན༌མཆོག༌ ཐུགས༌ཐད༌ད༌ནོག༌།
1TI 2:4 མི༌ཚང༌མ༌ སྐྱོབ༌ཅེས༌ དང༌ དཀོན༌མཆོག༌གི༌ དེན༌བ༌ ཤེ༌ཤེས༌པོ༌ ཁོང༌ངི༌ ཐུགས༌དོད༌ ཨིན༌ནོག༌།
1TI 2:5 དཀོན༌མཆོག༌ ཅིག༌ཅིག༌ ཞུགས༌ཏེ༌ ཨིན༌, ཡང༌ དཀོན༌མཆོག༌ དང༌ མི༌ཚང༌མའེ༌ ཕར༌ལ༌ བར༌མི༌ ཅིག༌པོ༌ ནི༌ མ༌ཤི༌ཀ༌ ཡེ༌ཤུ༌, མི༌བོ༌ ཞུགས༌ཏེ༌ ཨིན༌ནོག༌།
1TI 2:6 ཚང༌མའེ༌ ཕིའ༌ ཐར༌ལམ༌ ཉོའ༌ ཛད༌ཅེས༌ལ༌ ཁོང༌ངི༌ ཁོང༌རང༌ངི༌ མི༌ཚེ༌བོ༌ ཕུལ༌ལ༌ ཛདས༌། འི༌བོ༌ ནི༌ དཀོན༌མཆོག༌གི༌ ཇིག༌རྟེན༌ནི༌ མི༌གུན༌ལ༌ ཁོང༌རང༌ངི༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌ སལ༌ལ༌ ཛད༌ཁན༌ནི༌ ལོན༌བོ༌ ཨིན༌ནོག༌།
1TI 2:7 ཡ༌ཧུ༌དཱ༌པ༌ མན༌ཁན༌གུན༌ལ༌ ཏད༌པ༌ དང༌ དེན༌བའེ༌ སྐོར༌ལ༌ འི༌ ལོན༌གུན༌ ཤད༌ཁན༌ དང༌ སྐུ༌ཚབས༌ལ༌ ང༌ ལྡམ༌མ༌ ཛདས༌། ངའེ༌ ཟུན༌ ཏང༌ང༌མེད༌ དེན༌བ༌ ཟེར༌རད༌།
1TI 2:8 ངའེ༌ དོད༌པ༌བོ༌ ནི༌ ཆོས༌ ཅོ༌སའེ༌ ནས༌ས༌ ཚང༌མའེ༌ ནང༌ང༌ མ༌ཤི༌ཀ༌པ༌གུན༌ནི༌ སྲོ༌ ཡ༌ ཛིང༌མོ༌ མེད༌ཁན༌ནི༌ ཏམ༌པའེ༌ ལག༌པ༌གུན༌ སྟགས༌ཏེ༌ དཀོན༌མཆོག༌ག༌ མོས༌ལམ༌ ཕུལ༌གོས༌ཅེས༌པོ༌ ཨིན༌།
1TI 2:9 ཏེན༌ན༌དང༌ ཙོགས༌ལ༌, བུ༌མོ༌གུན༌ནི༌ ཚུལ༌ཅན༌ནི༌ ཀོས༌ལག༌ གོན༌གོ༌ཤེས༌པོ༌ ངའེ༌ དོད༌པ༌ ཨིན༌། སྲ༌གུན༌ ལྡམ༌ ཚུལ༌ ཡ༌ སེར༌ དང༌ མུ༌ཏིག༌ ཏག༌ཅེས༌ ཡ༌ རིན༌ཅན༌ནི༌ ཀོས༌ལག༌ གུན༌ གོན༌ཏེ༌ ཁོ༌རང༌གུན༌ ཆོགས༌ལ༌ མི༌གུན༌ནི༌ སྣང༌ང༌ ཁྱོང༌ མ༌གོས༌།
1TI 2:10 ཨིན༌ནའང༌ རང༌ ལས༌ ཟང༌པོའེ༌ ཐོག༌ནེ༌ ཟབ༌གོ༌ཤེས༌ ཨིན༌ནོག༌, ཀ༌ཟུག༌ དཀོན༌མཆོག༌ག༌ ཇིགས༌ཏེ༌ གྲུལ༌ཁན༌ནི༌ བུ༌མོ༌གུན༌ལ༌ འོས༌པ༌ ཨིན༌།
1TI 2:11 བུ༌མོ༌གུན༌ནི༌ ཅུབ༌ཅད༌ཏེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ ཡོག༌ག༌ དུགས༌ཏེ༌ ཆོས༌ཤད༌ཁན༌གུན༌, ཇང༌གོ༌ཤེས༌ ཨིན༌ནོག༌།
1TI 2:12 ངའེ༌ བུ༌མོ༌གུན༌ལ༌ བུ༌ཚའ༌ ལབ༌ཅེས༌ ཡ༌ བུ༌ཚའེ༌ཀ༌ ཝང༌གུན༌ ཅོ༌ མི༌ཅུག༌། ཁོང༌གུན༌ནི༌ ཅུབ༌ཅད༌ཏེ༌ ཉན༌གོས༌།
1TI 2:13 ཅིའ༌ཟེར༌ན༌ དཀོན༌མཆོག༌གི༌ ཧ༌ཝའེ༌ སང༌ སྔུན༌ལ༌, ཨ༌དམ༌ ཅོའ༌ ཛད༌ཏེ༌ ཨིན༌པིན༌།
1TI 2:14 ཡང༌ གོབ༌སྐོར༌རི༌ ནང༌ང༌ ཡོང༌ཁན༌བོ༌ ཨ༌དམ༌ མན༌པ༌ ཧ༌ཝ༌ ཨིན༌ནོག༌ ཀ༌བོའ༌ ཤེ༌ཏན༌ནི༌ གོབ༌སྐོར༌ཏེ༌ སྡིག༌ཅན༌ གྱུར༌ཅུགས༌།
1TI 2:15 བུ༌མོ༌གུན༌ནི༌ དཀོན༌མཆོག༌གི༌ ནང༌ང༌ ཏད༌པ༌, ཅིག༌ དང༌ ཅིག༌གི༌ ནང༌ང༌ ཅེས༌པ༌, ཏམ༌པ༌, ཚུམས༌པའེ༌ མི༌ཚེ༌ ཕུད༌ཅེས༌ ཡང༌ ཕྲུ༌གུ༌ ཇོར༌ཅེས༌ གྱུད༌ཏེ༌ སྐྱོབ༌བ༌ ཛད༌ཨིན༌།
1TI 3:1 ངོས༌པོའ༌ འི༌ ཞལ༌ཏ༌གུན༌ དེན༌བ༌ ཨིན༌ནོག༌, “ཀལ༌ཏེས༌ སུ༌ཞིག༌ག༌ ཆོས༌ཚོགས༌སི༌ འུ༌སྐྱོང༌ ཅོ༌ཅེས༌སི༌ དོད༌པ༌ ཡོད༌ན༌, ཁོའ༌ དོད༌པ༌ ཡོད༌ཁན༌ནི༌ ལས༌པོ༌ རྩི༌ཝ༌ཅན༌ ཞིག༌ ཨིན༌ནོག༌།”
1TI 3:2 ཆོས༌ཚོགས༌སི༌ འུ༌སྐྱོང༌ ནི༌, སྐྱོན༌མེད༌ཁན༌, ཁོ༌རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌, སམ༌བ༌ཅན༌, རང༌སེམས༌ ཅུན༌ཉན༌ཁན༌ དང༌ རྩི༌ཝ༌ཅན༌, བེས༌པ༌གུན༌ལ༌ ཁང༌པའེ༌ ནང༌ང༌ གའ༌སུས༌ ཞུ༌ཁན༌, ལབ༌ ཉན༌ཅེས༌སི༌ ཁྱུད༌,
1TI 3:3 མངས༌ཏེའང༌ མང༌པོ༌ ཆང༌ མ༌ཐུང༌ཁན༌, ནོད༌པ༌ མ༌སྐྱལ༌ཁན༌, ཞན༌མ༌གུན༌ ཉམ༌པོ༌ བོལ༌མོ༌, ཛིང༌མོ༌ མ༌ཏང༌ཁན༌, ཡང༌ པེ༌ནེ༌ མང༌པོའེ༌ དོད༌པ༌ མེད༌ཁན༌ནི༌ མི༌ཞིག༌ ཡོང༌གོས༌།
1TI 3:4 ཁོའེ༌ ཁོ༌རང༌ངི༌ ནང༌ཚངས༌ལ༌ གོ༌ཁྲིད༌ དང༌ སྟ༌སྟོག༌ གྱལ༌ལ༌ ཅོས༌ཏེ༌ ཁོའེ༌ ཕྲུ༌གུ༌གུན༌ རྩི༌ཝ༌ ཅོ༌ཁན༌ དང༌ ཁའ༌ཉན༌ཁན༌ རིག༌ ཡོང༌གོས༌།
1TI 3:5 ཀལ༌ཏེས༌ མི༌ཞིག༌ག༌ ཁོ༌རང༌ངི༌ ནང༌ཚངས༌སི༌ གོ༌ཁྲིད༌ དང༌ སྟ༌སྟོག༌ ཅོ༌ མ༌ཉན༌ན༌, ཏེ༌ནེ༌ ཀ༌ཟུག༌གི༌ ཁོའ༌ དཀོན༌མཆོག༌གི༌ ཆོས༌ཚོགས༌སི༌ གོ༌ཁྲིད༌ དང༌ སྟ༌སྟོག༌ ཅོ༌ཉན༌ཨིན༌?
1TI 3:6 འུ༌སྐྱོང༌བོ༌, ཏད༌པ༌ ཅོ༌ཁན༌ སོ༌མ༌ཞིག༌ ཡོང༌ མ༌གོས༌, ཅིའ༌ཟེར༌ན༌ ཁོའེ༌ ནང༌ང༌ ཕོ༌སོ༌ ཡོང༌སྲིད༌ཅེས༌ ཨིན༌ནོག༌ ཀ༌བོའེ༌ ཁོ༌, ཤེ༌ཏན༌ལ༌ ཕོག༌ཁན༌ནི༌ ཁྲིམས༌ཅད༌ ཙོགས༌སི༌ ནང༌ང༌ གྱེལ༌ཅུག༌ཨིན༌།
1TI 3:7 ཁྲེལ༌བ༌ སོང༌ཏེ༌ ཤེ༌ཏན༌ནི༌ ཅུས༌ངན༌ནི༌ ནང༌ང༌ མི༌གྱེལ༌ཅེས༌སི༌ ཕིའ༌, ཁོ༌ ཏད༌པ༌ མེད༌ཁན༌གུན༌ནིའང༌ རྩི༌ཝ༌ ཅོ༌ཁན༌ནི༌ མི༌ཞིག༌ ཡོང༌གོས༌།
1TI 3:8 ཏེན༌ན༌ ཙོགས༌ལ༌, ཆོས༌ཚོགས༌སི༌ ཞབས༌ཏོག༌པ༌ སྐོའ༌ ཛད༌ཁན༌གུན༌ནའང༌ རྩི༌ཝ༌ཅན༌ ཡོང༌གོས༌, དུན༌ལ༌ ཟང༌པོ༌ གྱབ༌ནེ༌ ངན༌པ༌ ཅོ༌ཁན༌, ཆང༌ མང༌པོ༌ ཐུང༌ཁན༌ ཡང༌ པེ༌ནེ༌ ཐོག༌ནེ༌ ནབས༌ཤན༌ ཡོང༌ མ༌གོས༌།
1TI 3:9 ཁོང༌གུན༌ནི༌ སེམས༌སི༌ ནང༌ང༌ ནོངས༌ མེད༌པ༌ ཏད༌པའེ༌ ཁག༌ཅན༌ ཀྲང༌པོ༌གུན༌ལ༌ སྟན༌པོ༌ ཐམས༌ཏེ༌ དུག༌གོས༌།
1TI 3:10 ཞབས༌ཏོག༌པ༌ ཞིག༌ སྐོའི༌ སང༌ སྔུན༌ལ༌ ཁོང༌གུན༌ནི༌ སྕོད༌པ༌གུན༌ལ༌ ཞིབ༌སལ༌ ཅོས༌ཏེ༌ ལྟ༌གོས༌། ཀལ༌ཏེས༌ ཁོང༌གུན༌ སྐྱོན༌མེད༌ཁན༌ཞིག༌ ཐོང༌ན༌, ཁོང༌གུན༌ལ༌ ཞབས༌ཏོག༌པའེ༌ ཚུལ༌ལ༌ ཞབས༌ཏོག༌ ཞུ༌ཅུག༌ཤིག༌།
1TI 3:11 ཏེན༌ན༌ ཙོགས༌ལ༌ ཆོས༌ཚོགས༌སི༌ ཞབས༌ཏོག༌པ༌གུན༌ནི༌ ན༌མ༌གུན༌ནའང༌ ཞན༌མའེ༌ རྩི༌ཝ༌ ཡོད༌ཁན༌ནི༌ བུ༌མོ༌ རིག༌ ཡོང༌གོས༌, ཡང༌ ཞན༌མ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ མ༌གོས༌། ཁོང༌གུན༌ནི༌ རང༌སེམས༌ ཅུན༌ཏེ༌, ཡང༌ ལས༌ ཅོ༌ཁན༌ ཚང༌མའེ༌ ནང༌ང༌ ཨིད༌ཤེས༌ཅན༌ ཡོང༌གོས༌།
1TI 3:12 ཞབས༌ཏོག༌པ༌ རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌ ཡོང༌གོས༌, ཡང༌ ཁོའེ༌ ཁོ༌རང༌ངི༌ ཕྲུ༌གུ༌ དང༌ ཁང༌པའེ༌ ནང༌ང༌ དུག༌ཁན༌ ཚང༌མ༌ལ༌ གྱལ༌ལ༌ ཅོས༌ཏེ༌ སྟ༌སྟོག༌ ཅོ༌གོས༌།
1TI 3:13 གྱལ༌ལ༌ ཅོས༌ཏེ༌ ཞབས༌ཏོག༌ ཞུ༌ཁན༌གུན༌ལ༌, ཞན༌མ༌གུན༌ནི༌ ཀ༌ནེ༌ རྩི༌ཝ༌ ཐོབས༌ཏེ༌ མང༌ང༌ ཧམ༌པ༌ ཉམ༌པོ༌ ཞན༌མ༌གུན༌ལ༌ མ༌ཤི༌ཀ༌ ཡེ༌ཤུའི༌ སྐོར༌ལ༌ ཤད༌ཐུབ༌ཨིན༌།
1TI 3:14 ཞན༌ ང༌ ཁྱོ༌རང༌ ཉམ༌པོ༌ གྱོགས༌པ༌ ཐུག༌ཅེས༌སི༌ རེ༌ཝ༌ ཅོའད༌, ཨིན༌ནའང༌ ཀལ༌ཏེས༌ ངའ༌ ཡོང༌ཅེས༌ལ༌ གོར༌ན༌, མི༌ཞིག༌ དཀོན༌མཆོག༌གི༌ ནང༌ཚངས༌སི༌ ཕྲོའ༌ ཀ༌ཟུག༌གི༌ དུག༌གོ༌ཤེས༌པོ༌, ཁྱོ༌རང༌ང༌ གྱུས༌ ཆ༌ཅེས༌ལ༌ འི༌ ལབ༌ཞ༌གུན༌ བྲིའད༌། ཏེ༌ ནང༌ཚངས༌པོ༌ ནི༌ དཀོན༌མཆོག༌ སོན༌པོའེ༌ ཆོས༌ཚོགས༌པོ༌ ཨིན༌ནོག༌, ཀ༌བོ༌ དཀོན༌མཆོག༌གི༌ བཀའ༌ ཀྲང༌པོའེ༌ ཀ༌ཝ༌ དང༌ མག༌ལྡན༌ ཨིན༌།
1TI 3:16 ཐེ༌ཚོམས༌ མེད༌པ༌ འི༌བོ༌ ནི༌, ང༌དང༌གུན༌ནི༌ ཏད༌པའེ༌ སང༌ཝ༌ ཆེ༌ཤོག༌པོ༌ ཨིན༌ནོག༌། མ༌ཤི༌ཀ༌ མིའི༌ ཟོབ༌སྟའེ༌ ནང༌ང༌ སྔོན༌ཏེ༌ ཁོང༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏམ༌པའེ༌ ཐུག༌ཉིད༌དི༌ སྟན༌ཏེ༌, ཕོ༌ཉ༌གུན༌ནི༌ ཇལ༌། ཡང༌ གྱལ༌ཁམས༌གུན༌ནི༌ ནང༌ང༌ ཤད༌ཏེ༌ ཇིག༌རྟེན༌ གང༌པོའེ༌ ནང༌ང༌ མི༌ མང༌པོ༌ཞིག༌གི༌ ཁོང༌ང༌ ཏད༌པ༌ ཅོས༌། ཡང༌ ནམ༌ཁའེ༌ ནང༌ང༌ ཟིར༌རྗིད༌ ཉམ༌པོ༌ ཁྱེར༌ར༌ ཛད༌ཏེ༌ ཨིན༌།
1TI 4:1 ཏམ༌པའེ༌ ཐུག༌ཉིད༌དི༌ སལ༌པོ༌ ཅོས༌ཏེ༌ མོལ༌ཏེ༌ དུག༌, ཐའ༌མའེ༌ ཏུས༌ལ༌ ཏད༌པ༌ ཅོ༌ཁན༌ ཁ༌ཅིག༌གི༌ ཁོ༌རང༌གུན༌ནི༌ ཏད༌པ༌ སྤངས༌ཏེ༌ གོབ༌སྐོར༌ ཏང༌ཁན༌ནི༌ སེམས༌ཉིད༌ དང༌ རྡུད༌དི༌ ལབ༌ཞ༌གུན༌ནི༌ གྱབ༌ནེ༌ བྲངས༌ཏེ༌ ཆེན༌།
1TI 4:2 ཏེ༌ ལབ༌ཞ༌གུན༌ ཁ༌ཆོས༌ ཅོ༌ཁན༌ དང༌ ཟུན༌ཇན༌ གུན༌ནི༌ ཀ༌ནེ༌ ཡོང༌ང༌ནོག༌, ཀ༌གུན༌ནི༌ སེམས༌པོ༌ ཤི༌ཏེ༌ ཨིན༌ པ༌སང༌, ཁོང༌གུན༌ནི༌ སྡིག༌པ༌གུན༌ལ༌ སྐྱོན༌རྗོད༌ ཅོའ༌ མ༌ནོག༌།
1TI 4:3 ཁོང༌གུན༌ནི༌ ཏད༌པ༌ཅན༌གུན༌ལ༌ བག༌སྟོན༌ ཅོ༌ཅེས༌ དང༌ ཁར༌ཇི༌ རིགས༌ ཁ༌ཅིག༌ ཟའ༌ མི༌ཆོགས༌ ཟེར༌ར༌ནོག༌། ཨིན༌ནའང༌ དཀོན༌མཆོག༌གི༌ དེན༌བ༌ ཤེས༌ཏེ༌ ཏད༌པ༌ ཅོ༌ཁན༌གུན༌ལ༌ ཁོང༌ངི༌ ཟའ༌ཅེས༌སི༌ རིགས༌ ཚང༌མ༌ ཐུག༌རྗེ༌ཆེ༌ ཉམ༌པོ༌, ཟའ༌ལ༌ ཅོའ༌ ཛད༌ཏེ༌ ཨིན༌ནོག༌།
1TI 4:4 དཀོན༌མཆོག༌གི༌ ཅོའ༌ ཛད༌ཁན༌ ཚང༌མ༌ ཟང༌པོ༌ ཨིན༌ པ༌སང༌, ང༌དང༌གུན༌ནི༌ ཏེ༌གུན༌ ཅིག༌གའང༌ ཕང༌ མ༌ཕང༌ང༌ ཐུག༌རྗེ༌ཆེ༌ ཉམ༌པོ༌ ལེན༌གོས༌།
1TI 4:5 ཅིའ༌ཟེར༌ན༌ དཀོན༌མཆོག༌གི༌ བཀའ༌ དང༌ ང༌དང༌གུན༌ནི༌ ཁོང༌ང༌ ཐུག༌རྗེ༌ཆེའེ༌ མོས༌ལམ༌མི༌ ཞས༌ཏེ༌ ཏེ༌གུན༌ རྩང༌མ༌ ཅོའ༌ ཛད༌ཏེ༌ ཨིན༌ནོག༌།
1TI 4:6 ཏི༌མོ༌ཐི༌ ཀལ༌ཏེས༌ ཁྱོ༌རང༌ངི༌ སྤུན༌གུན༌ལ༌ ཏེ༌གུན༌ནི༌ སྐོར༌ལ༌ ཧ༌གོ༌ཅུག༌ན༌, ཁྱོ༌རང༌ མ༌ཤི༌ཀ༌ ཡེ༌ཤུའི༌ ཞབས༌ཏོག༌པ༌ འོས༌པ༌ཅན༌ཞིག༌ གྱུར༌ཨིན༌, ཀ༌བོ༌ ཁྱོ༌རང༌ངི༌ མི༌ཚེའེ༌ ནང༌ང༌ ཏད༌པའེ༌ དེན༌བ༌གུན༌ ལོབས༌ཏེ༌, ལབ༌ཞ༌ ཟང༌པོའེ༌ གྱབ༌ནེ༌ གྲུལ༌ཅེས༌པོའེ༌, ཤེད༌ཅན༌ གྱུར༌ཏེ༌ ཨིན༌།
1TI 4:7 རིན༌ མེད༌ཁན༌ དང༌ དེན༌བ༌ མན༌ཁན༌ནི༌ ཅོས༌མའི༌ རུངས༌གུན༌ནི༌ སྐོར༌ལ༌ ཛིང༌མོ༌ ཏང༌ཨིན༌, ཁྱོ༌རང༌ངི༌ ཏུས༌ ཙ༌པིག༌གའང༌ གོད༌ལ༌ མ༌ཏང༌ང༌, དཀོན༌མཆོག༌གི༌ སྕོད༌ལམ༌མི༌ ནང༌ང༌ རང༌ངི༌ མི༌ཚེ༌ མང༌ང༌ ཡར༌གྱས༌ ཆ༌ཅུག༌ཨིན༌ ཕུད༌།
1TI 4:8 ཁྱོ༌རང༌ང༌ འི༌ ཟེར༌ལོ༌བོ༌ གྱུས༌ཡོད༌ཏེ༌ ཨིན༌ནོག༌། “རྩལ༌ཡངས༌ རྩེས༌ཏེ༌ ཟུགས༌པོའ༌ ཡར༌གྱས༌ ཅོ༌ཅེས༌པོའེ༌, ཕན༌ཐོགས༌ ཙ༌པིག༌ ཡོད༌ཏེ༌ ཨིན༌ནོག༌། ཨིན༌ནའང༌ ཏེ༌སང༌ མང༌ང༌ ཕན༌ཐོགས༌ ནི༌, དཀོན༌མཆོག༌གི༌ སྕོད༌ལམ༌མི༌ ནང༌ང༌ ཡར༌གྱས༌ ཅོ༌ཅེས༌པོ༌ ཨིན༌ནོག༌། ཅིའ༌ཟེར༌ན༌ ཏེ༌བོའེ༌ ང༌དང༌གུན༌ལ༌ འི༌ མི༌ཚེ༌ དང༌ ཤི༌ཏེ༌ སྟིང༌ནེ༌ ཐོབ༌ཅེས༌ཅན༌ནི༌ མི༌ཚེ༌ ཉིས༌ཀོའེ༌ ཕིའ༌ ཕན༌ཐོགས༌ ཅོའ༌ནོག༌།”
1TI 4:9 ཏེ༌ ཟེར༌ལོ༌བོ༌ ཨིད༌ཤེས༌ཅན༌ ཨིན༌ནོག༌, ཡང༌ ཚང༌མའེ༌ ཐེ༌ཚོམས༌ མེད༌ད༌, ཏད༌པ༌ ཅོ༌གོ༌ཤེས༌ ཨིན༌ནོག༌།
1TI 4:10 ཏེན༌ན༌བོའེ༌ཕིའ༌ ང༌དང༌གུན༌ནི༌ རྩོན༌གྲུས༌ ཅོས༌ཏེ༌ བར༌དོ༌ ཁུར༌ར༌ནོག༌, ཅིའ༌ཟེར༌ན༌ ང༌དང༌གུན༌ནི༌ རེ༌ཝ༌བོ༌ ནི༌, སོན༌པོ༌ དཀོན༌མཆོག༌གི༌ ནང༌ང༌ ཡོད༌ཏེ༌ ཨིན༌ནོག༌, ཀ༌བོ༌ མི༌ཚང༌མ༌ དང༌ མིག༌སལ༌ལི༌ ཏད༌པ༌ཅན༌གུན༌ སྐྱོབ༌ཁན༌བོ༌ ཞུགས༌ཏེ༌ ཨིན༌།
1TI 4:11 ཁོང༌གུན༌ལ༌ འི༌ ལབ༌ཞ༌གུན༌ ལོབ༌, ཡང༌ ཏེ༌གུན༌ནི༌ཀ༌ ལག༌ལེན༌ ཅོ༌ཅེས༌སི༌ བཀའ༌ ཏོང༌།
1TI 4:12 ཁྱོ༌རང༌, ཏད༌པ༌ཅན༌གུན༌ནི༌ ཕིའ༌ སྤེ༌ར༌ ཏང༌ཅེས༌, མི༌ཚེ༌ ཕུད༌ཅེས༌, ཅམས༌པ༌ ཅོ༌ཅེས༌, ཏད༌པ༌ ཡང༌ རྩང༌མའེ༌ ཐོག༌ནེ༌ སྤེ༌ཞིག༌ག༌ གྱུར༌། ཀལ༌ཏེས༌ ཏེ༌ཟུག༌ ཅོ༌ན༌ ཁོང༌གུན༌ནི༌ ཞུན༌ནུ༌ ཨིན༌ནོག༌ སམས༌ཏེ༌ ཁོ༌རང༌ང༌ རྩི༌ཝ༌ ཅོ༌ཅེས༌སི༌ ནང༌ང༌ ཐེ༌ཚོམས༌ མི༌ཅོ༌།
1TI 4:13 ང༌ ཡོང༌ཡོང༌ ཚག༌པ༌, ཁྱོ༌རང༌ངི༌ ཏུས༌ མང༌ཆེའ༌ ཆོས༌ཚོགས༌སི༌ དུན༌ལ༌ ཏམ༌པའེ༌ སུང༌རབས༌ སིལ༌ཅེས༌ ཡང༌ ཆོས༌ཤད༌ཅེས༌ དང༌ དཀོན༌མཆོག༌གི༌ དེན༌བའེ༌ སྐོར༌ལ༌ ལབ༌ཅེས༌སི༌ ནང༌ང༌ ཕུད༌།
1TI 4:14 ཁྱོ༌རང༌ང༌ དཀོན༌མཆོག༌གི༌ སལ༌ཁན༌ནི༌ ཁྱུད༌པོ༌ གོད༌ལ༌ ཆ༌ མ༌ཅུག༌, ཀ༌བོ༌ ཁྱོ༌རང༌ང༌ ཆོས༌ཚོགས༌སི༌ འུ༌སྐྱོང༌གུན༌ནི༌ ཁྱོ༌རང༌ངི༌ཀ༌ ཁོང༌རང༌གུན༌ནི༌ ཆག༌གུན༌ བོར༌ཏེ༌, ཁྱོ༌རང༌ངི༌ སྐོར༌ལ༌ ལུང༌སྟན༌གུན༌ སལ༌ ཟ༌ནེ༌ ཐོབ༌།
1TI 4:15 ངའེ༌ ལབ༌ཞ༌གུན༌ལ༌ སྣང༌ང༌ བོར༌ཏེ༌, སྙིང༌ གང༌པོ༌ ཉམ༌པོ༌ ལག༌ལེན༌ ཅོས༌, ཏེ༌ནེ༌ མི༌ཚང༌མའེ༌ ཁྱོ༌རང༌ སེམས༌ཉིད༌དི༌ ཐོག༌ནེ༌ ཡར༌གྱས༌ ཆའ༌ཁན༌བོ༌, ཐོང༌ ཐུབ༌ཨིན༌།
1TI 4:16 ཁྱོ༌རང༌ངི༌ མི༌ཚེ༌ ཕུད༌ཅེས༌ ཡང༌ ཁྱོ༌རང༌ངི༌ ལབ༌ཞ༌གུན༌ལ༌ སྟག༌ཅད༌ ཅོས༌, ཏུས༌གྱུན༌ ཏེ༌ཙོགས༌ ཅོ༌ཨིན༌ དུག༌ཤིག༌། ཀལ༌ཏེས༌ ཏེ༌ཟུག༌ ཅོ༌ན༌, རང༌ངི༌ མི༌ཚེ༌ དང༌ ཁྱོ༌རང༌ངི༌ ལབ༌ཞ༌ ཉན༌ཁན༌གུན༌ནི༌ མི༌ཚེའང༌ སྐྱོབ༌ཨིན༌།
1TI 5:1 མི༌ ཆི༌མི༌ཞིག༌ག༌ ཁའ༌སྐྱེས༌ཏེ༌ སྤེ༌ར༌ མ༌ཏང༌ང༌, ཁོའ༌ རང༌ངི༌ ཨ༌བ༌ ཙོགས༌ སམས༌ཏེ༌ དེན༌བའེ༌ ལམ༌མི༌ཀ༌ གྲུལ༌ཅེས༌ལ༌ སྤོས༌པ༌ ཏོང༌, ཡང༌ ཞུ༌ནུ༌གུན༌ལ༌ རང༌ངི༌ ནོ༌ ཙོགས༌ སོམ༌།
1TI 5:2 ཏེན༌ན༌ ཙོགས༌ལ༌ བུ༌མོ༌ ཆི༌མི༌གུན༌ལ༌ ཁྱོ༌རང༌ངི༌ ཨ༌མ༌ ཡང༌ བུ༌མོ༌ ན༌ཆུང༌གུན༌ལ༌ སེམས༌ རྩང༌མ༌ ཉམ༌པོ༌ རང༌ངི༌ སྲིང༌མོ༌ ཙོགས༌ སོམ༌།
1TI 5:3 ཨ༌ནེ༌མ༌རང༌མོ༌ སྟ༌སྟོག༌ ཅོ༌ཁན༌ མེད༌ཁན༌གུན༌ལ༌, སྟ༌སྟོག༌ ཅོས༌ཏེ༌ རྩི༌ཝ༌ ཏོང༌།
1TI 5:4 ཨིན༌ནའང༌ ཀལ༌ཏེས༌ ཏེ༌ ཨ༌ནེ༌མ༌རང༌མོ༌བོའ༌ ཕྲུ༌གུ༌, ཡ༌ ཚ༌འོ༌, ཚ༌མོ༌ ཡོད༌ན༌, ཁོང༌གུན༌ནི༌ རང༌ངི༌ ནང༌མི༌གུན༌ལ༌ སྟ༌སྟོག༌ ཅོས༌ཏེ༌ གོ༌མ༌ ཁོ༌རང༌གུན༌ནི༌ ཏད༌པ༌བོ༌ ལག༌ལེན༌ནི༌ ནང༌ང༌ ཁྱོང༌ གོ༌ཤེས༌ ཨིན༌ནོག༌། ཕ༌མ༌ ཨ༌བི༌ དང༌ མེ༌མེ༌ གུན༌ལ༌ སྟ༌སྟོག༌ ཅོས༌ཏེ༌ ཁོང༌གུན༌ནི༌ ཀྲིན༌ལན༌ ལོག༌ཁན༌གུན༌ནི༌ ལས༌པོའ༌ དཀོན༌མཆོག༌ ཐུགས༌དད༌ད༌ ཛད༌ད༌ནོག༌།
1TI 5:5 ཏ༌ ནང༌ཚངས༌ མེད༌པ༌ ཅིག༌པོ༌ ལུས༌ཁན༌ནི༌ བུ༌མོ༌, ཁོ༌རང༌ངི༌ རེ༌ཝ༌ དཀོན༌མཆོག༌གི༌ ནང༌ང༌ བོར༌ཏེ༌, ཉིན༌ཚན༌ མེད༌པ༌ རོགས༌ ཅོའ༌ ཛད༌ ཟེར༌ཏེ༌ མོས༌ལམ༌ ཞུ༌ཁན༌བོ༌ ནི༌ ངོས༌མའེ༌ ཨ༌ནེ༌མ༌རང༌མོ༌ ཨིན༌ནོག༌།
1TI 5:6 ཨིན༌ནའང༌ རང༌དོད༌ གྲུབ༌ཅུག༌ཅེས༌སི༌ ནང༌ང༌ མི༌ཚེ༌ ཕུད༌ཁན༌ནི༌ ཨ༌ནེ༌མ༌རང༌མོ༌གུན༌ སོན༌ཏེའ༌ ཡོད༌ཏེའང༌, སེམས༌ཉིད༌དི༌ ཐོག༌ནེ༌ ཤི༌ཏེ༌ ཨིན༌ནོག༌།
1TI 5:7 སུ༌ཞིག༌གིའང༌ ཏད༌པ༌ཅན༌གུན༌ནི༌ གྱབ༌གལ༌ལ༌ སྐྱོན༌ ཀལ༌ མི༌ཉན༌ཅེས༌སི༌ ཕིའ༌, ཏེ༌ ལབ༌ཞ༌གུན༌ ཏོང༌།
1TI 5:8 ཨིན༌ནའང༌ རང༌ངི༌ ཉེན༌གྲུང༌གུན༌ལ༌, མིག༌སལ༌ལི༌ ཁོ༌རང༌གུན༌ནི༌ ནང༌མི༌གུན༌ལ༌ སྟ༌སྟོག༌ མ༌ཅོ༌ཁན༌གུན༌ནི༌ ཁོ༌རང༌ངི༌ ཏད༌པ༌ ཕངས༌ཏེ༌ ཨིན༌ནོག༌། འི༌ཙོགས༌སི༌ མི༌གུན༌, ཏད༌པ༌ མེད༌ཁན༌ནི༌ སང༌ ཐུའ༌ ཨིན༌ནོག༌།
1TI 5:9 རོགས༌ ཅོ༌གོ༌ཤེས༌སི༌ ཐོའེ༌ ནང༌ང༌ མིང༌ ཅུགས༌ཏེ༌ ཡོད༌ཁན༌ནི༌ ཨ༌ནེ༌མ༌རང༌མོ༌བོ༌: ཁོ༌རང༌ངི༌ མག༌པ༌ ཉམ༌པོ༌ ཨིད༌ཤེས༌ཅན༌, ཁོའེ༌ ལོ༌ དྲུག༌ཅུ༌ ཡ༌ མང༌ང༌,
1TI 5:10 ལས༌ ཟང༌པོ༌གུན༌ནི༌ ཞས༌ཏེ༌ མིང༌ཅན༌, སྤེར༌ན༌ ཕྲུ༌གུ༌གུན༌ གྱལ༌ལ༌ ཅོས༌ཏེ༌ ལྡན༌ཅུག༌ཁན༌, བེས༌པ༌གུན༌ལ༌ གའ༌སུས༌ ཞུ༌ཁན༌, ཏད༌པ༌ཅན༌གུན༌ལ༌ པས༌མོ༌ ཉམ༌པོ༌ ཞབས༌ཏོག༌ ཞུ༌ཁན༌, རྡུག༌ངལ༌ལི༌ ནང༌ང༌ ཡོད༌ཁན༌གུན༌ལ༌ རོགས༌ ཅོ༌ཁན༌, ཡང༌ ལས༌ ཟང༌པོའེ༌ རིགས༌ ཚང༌མ༌ ཅོ༌ཅེས༌ལ༌ གྲལ༌གྲིག༌ དུག༌ཁན༌། ཏེ༌ སྕོད༌པ༌ ཚང༌མ༌ ཁོའེ༌ ནང༌ང༌ ཡོང༌གོས༌།
1TI 5:11 ཨིན༌ནའང༌ མིང༌ཐོའེ༌ ནང༌ང༌ ཨ༌ནེ༌མ༌རང༌མོ༌ ན༌ཆུང༌གུན༌ ཡོང༌ མ༌གོས༌, ཅིའ༌ཟེར༌ན༌ ཁོང༌གུན༌ནི༌ ཟུགས༌པོའེ༌ དོད༌པའེ༌ ཡང༌སྐྱར༌ བག༌སྟོན༌ ཅོ༌ཉིན༌གྲོས༌ པ༌སང༌ མ༌ཤི༌ཀའ༌ ཞབས༌ཏོག༌ ཞུ༌ཅེས༌སི༌ ཁ༌ཆད༌དི༌ ནང༌ང༌ སྒག༌སྐྱིལ༌ ཁྱོང༌ང༌ནོག༌།
1TI 5:12 ཏེ༌ནེ༌ ཁོང༌གུན༌ནི༌ སྔུན༌ལ༌ ཁ༌ཆད༌ ཅོས༌ཁན༌བོ༌ ཅགས༌པ༌ ཁོ༌རང༌གུན༌ནི༌ཀ༌ ཁྲིམས༌ཅད༌ ཁྱོང༌ང༌ནོག༌།
1TI 5:13 ཡང༌ ཀལ༌ཏེས༌ ཁོང༌གུན༌ མིང༌ཐོའེ༌ ནང༌ང༌ ཡོད༌ན༌, ཁོང༌གུན༌ ལས༌མི༌ལམ༌ གྱུར༌ཏེ༌ ཁང༌པ༌ ཅིག༌ནེ༌ ཅིག༌གི༌ ནང༌ང༌ སྤེར༌མེན༌ ཏང༌ཨིན༌, ཁོ༌རང༌གུན༌ནི༌ ཏུས༌གུན༌ ཕུད༌ཨིན༌, ཞན༌མ༌ མི༌གུན༌ནི༌ ལས༌སི༌ ནང༌ང༌ ཐེས༌སྟོག༌, ཡང༌ ཏང༌གོས༌ མེད༌ཁན༌ནི༌ སྤེ༌ར༌ རིག༌གའང༌ ཏང༌ཨིན༌།
1TI 5:14 སོང༌པ༌སང༌ ཏེ༌ ཨ༌ནེ༌མ༌རང༌མོ༌ ན༌ཆུང༌གུན༌ལ༌ ཡང༌སྐྱར༌ བག༌མ༌ ཅོས༌ཏེ༌ ཕྲུ༌གུ༌ ཇོར༌ཅུག༌ཅེས༌, ཡང༌ ཁོ༌རང༌གུན༌ནི༌ ཁང༌པའེ༌ སྟ༌སྟོག༌ ཅོ༌ཅེས༌ལ༌ ངའེ༌ ཁ༌དའ༌ ཏང༌ངད༌། ཏེ༌ནེ༌ གྲ༌འོའེ༌, ཁོང༌གུན༌ནི༌ གྱབ༌གལ༌ལ༌ ཅི༌ཞིག༌གའང༌ ཟེར༌ མི༌ཉན༌།
1TI 5:15 ཅིའ༌ཟེར༌ན༌ ཨ༌ནེ༌མ༌རང༌མོ༌ ན༌ཆུང༌ ཁ༌ཅིག༌ དཀོན༌མཆོག༌ག༌ གྱབ༌ གྱུར༌ ཚར༌ཏེ༌ ཤེ༌ཏན༌ནི༌ གྱབ༌ནེ༌ གྲུལ༌དུག༌།
1TI 5:16 ཀལ༌ཏེས༌ བུ༌མོ༌ ཏད༌པ༌ཅན༌ཞིག༌ག༌, ཨ༌ནེ༌མ༌རང༌མོ༌ ཉེན༌གྲུང༌ རིག༌ ཡོད༌ན༌, ཁོའེ༌ ཁོང༌གུན༌ལ༌ སྟ༌སྟོག༌ ཅོ༌གོས༌, ཡང༌ ཏེ༌ ཁག༌པོ༌ ཆོས༌ཚོགས༌སི༌ཀ༌ ཀལ༌ མ༌གོས༌། ཏེ༌ནེ༌ ཆོས༌ཚོགས༌སི༌ ངོས༌པོའ༌ ལྟའ༌ཁན༌ མེད༌ཁན༌ནི༌ ཨ༌ནེ༌མ༌རང༌མོ༌གུན༌ལ༌ སྟ༌སྟོག༌ ཅོ༌ཉན༌ཨིན༌།
1TI 5:17 ཆོས༌ཚོགས༌སི༌ ལས༌ ཅོ༌ཁན༌ནི༌ འུ༌སྐྱོང༌གུན༌ལ༌ རྩི༌ཝ༌ དང༌ རོགས༌ ཅོ༌གོ༌ཤེས༌ ཨིན༌ནོག༌, མིག༌སལ༌ལི༌ ཆོས༌ཤད༌ཅེས༌ དང༌ ལབ༌ཞ༌ ཏང༌ཅེས༌སི༌ ནང༌ང༌ རྩོན༌གྲུས༌ སྲན༌ཏྲེ༌ ཅོ༌ཁན༌གུན༌ལ༌།
1TI 5:18 ཅིའ༌ཟེར༌ན༌ སུང༌རབས༌སི༌ ནང༌ང༌ “ཁྱོ༌རང༌གུན༌ནི༌ ཡུལ༌ཐག༌ག༌ སྐོར༌ཁན༌ནི༌ ལང༌ཏོའ༌ ཟའ༌ཅེས༌ནེ༌ ཁའ༌ ཀག༌ མ༌གོས༌” ཡང༌ “ལས༌ ཅོ༌ཁན༌གུན༌ལ༌ ཕོགས༌སི༌ འོས༌པ༌ ཨིན༌ནོག༌” མོལ༌ཏེ༌ དུག༌།
1TI 5:19 འུ༌སྐྱོང༌ཞིག༌གི༌ གྱབ༌གལ༌ལ༌ སྐྱོན༌རྗོད༌ ཅོའད༌ན༌, ཁོང༌གུན༌ལ༌ ཏེ༌ཏེ༌ཚོག༌པ༌ མ༌ཉན༌, ནམ༌ཚོག༌པ༌ སྤང༌པོ༌ ཉིས༌ ཡ༌ སུམ༌མི༌ ཏེ༌བོའེ༌ སྐོར༌ལ༌ ཏན༌ཏན༌ མི༌ཅོ༌།
1TI 5:20 སྡིག༌པ༌ ཅོ༌ཁན༌ནི༌ འུ༌སྐྱོང༌གུན༌ལ༌ ཆོས༌ཚོགས༌ གང༌པོའེ༌ དུན༌ལ༌ ཁའ༌སྐྱེ༌གོས༌; འི༌བོ༌ ཞན༌མ༌གུན༌ལའང༌ ལྡམ༌ཞག༌ ཆེན༌མོ༌ཞིག༌ གྱུར༌ཨིན༌།
1TI 5:21 ང༌ པ༌འུ༌ལུའི༌ ཏི༌མོ༌ཐི༌ ཁྱོ༌རང༌ང༌ དཀོན༌མཆོག༌, མ༌ཤི༌ཀ༌ ཡེ༌ཤུ༌ དང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཕོ༌ཉ༌གུན༌ནི༌ དུན༌ལ༌ འི༌ ལབ༌ཞ༌གུན༌ལ༌ ཁའ༌ ཉན༌ཏེ༌ སུ༌ཞིག༌གའང༌ ཆོག༌རིས༌ མ༌ཅོའ༌, ལག༌ལེན༌ ཅོ༌ཅེས༌ལ༌ བཀའ༌ ཏང༌ངད༌།
1TI 5:22 ཆོས༌ཚོགས༌སི༌ འུ༌སྐྱོང༌ ལྡམ༌ཅེས༌སི༌ ནང༌ང༌ བང༌གྱུགས༌ མ༌ཏང༌, ཀལ༌ཏེས༌ ཏང༌ན༌ ཏེ༌ནེ༌ ཁོའེ༌ སྡིག༌པའེ༌ ནང༌ང༌ ཁྱོ༌རང༌ངའང༌ དྲེས༌ཨིན༌། ཁྱོ༌རང༌ རང༌དང༌རང༌ རྩང༌མ༌ བོར༌།
1TI 5:23 ཆུ༌ རྐྱང༌ ཐུང༌ཨིན༌ མི༌དུག༌, ཁྱོ༌རང༌ངི༌ གྲོད༌པའེ༌ ཕན༌ཐོགས༌སི༌ ཕིའ༌ རྒུན༌ཆང༌ ཉུ༌ངུན༌ རིག༌གའང༌ ཐུང༌, ཅིའ༌ཟེར༌ན༌ ཁྱོ༌རང༌ང༌ ཟུ༌མོ༌ ཡོང༌ཨིན༌ དུག༌དུག༌།
1TI 5:24 མི༌ ཁ༌ཅིག༌གི༌ སྡིག༌པ༌གུན༌ སལ༌པོ༌ ཐོང༌ང༌ནོག༌, ཁོང༌གུན༌ནི༌ སྡིག༌པ༌གུན༌ དཀོན༌མཆོག༌གི༌ ཁྲིམས༌ཅད༌ ཛད༌སའེ༌ ནས༌ས༌ ཁོང༌གུན༌ནི༌ སང༌ སྔུན༌ལ༌ ལེབ༌ཨིན༌། ཨིན༌ནའང༌ ཞན༌གུན༌ནི༌ སྡིག༌པ༌གུན༌ སྟིང༌ནེ༌ མ༌ནེ༌ མི༌སྔོན༌།
1TI 5:25 ཏེན༌ན༌ ཙོགས༌ལ༌ མི༌ ཁ༌ཅིག༌གི༌ ལས༌ ཟང༌པོ༌གུན༌ སལ༌པོ༌ ཅོས༌ཏེ༌ ཐོང༌དུག༌། ཨིན༌ནའང༌ ཀལ༌ཏེས༌ སང༌ཝའེ༌ ནང༌ང༌ ལས༌ ཟང༌པོ༌ ཅོ༌ན༌, འི༌གུན༌ ཏུས༌གྱུན༌ནི༌ ཕིའ༌ སྦས༌ཏེ༌ བོར༌ མི༌ཉན༌།
1TI 6:1 དཀོན༌མཆོག༌གི༌ ཚན༌ དང༌ ཁོང༌ངི༌ ལབ༌ཞ༌གུན༌ལ༌ ཁྲེལ༌བ༌ མི༌ཁྱོང༌ཅེས༌སི༌ ཕིའ༌, ཏད༌པ༌ཅན༌ ཚེ༌ཡོག༌ ཚང༌མའེ༌ ཁོ༌རང༌གུན༌ནི༌ སྤོན༌བོ༌གུན༌ལ༌ གྱལ༌ལ༌ ཅོས༌ཏེ༌ རྩི༌ཝ༌ ཅོ༌གོ༌ཤེས༌ ཨིན༌ནོག༌།
1TI 6:2 ཀལ༌ཏེས༌ ཁོང༌གུན༌ནི༌ སྤོན༌བོ༌གུན༌ ཏད༌པ༌ཅན༌ རིག༌ ཨིན༌ན༌, ཏེ༌བོ༌ རྩི༌ཝ༌ ཉུ༌ངུན༌ ཅོ༌ཅེས༌སི༌ གྱུ༌ཞིག༌ ཡོང༌ མ༌གོས༌། ཨིན༌ནའང༌ ཏེ༌ ཚེ༌ཡོག༌གུན༌ནི༌ ལས༌ མང༌ང༌ གྱལ༌ལ༌ ཅོ༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ རྩོན༌གྲུས༌སི༌ ཕན༌ཐོགས༌པོ༌ ཁོ༌རང༌གུན༌ནི༌ ཡ༌ཤ༌ ཅོ༌ཁན༌ ཏད༌པ༌ ཡོད༌ཁན༌གུན༌ལ༌ ཐོབ༌ཏེ༌ ཨིན༌ནོག༌། ཏི༌མོ༌ཐི༌, ཏད༌པ༌ཅན༌གུན༌ལ༌ ཏེ༌ ལབ༌ཞ༌གུན༌ ལབས༌ཏེ༌ ཁའ༌ ཉན༌ཅེས༌ལ༌ སྤོས༌པ༌ ཏོང༌།
1TI 6:3 མི༌ ཁ༌ཅིག༌གི༌ ང༌ཏི༌ ལབ༌ཞ༌གུན༌ལ༌ གྱབ༌གལ༌ ཅོ༌སྲིད༌ཅེས༌ ཨིན༌ནོག༌། ཨིན༌ནའང༌ འི༌གུན༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ལབ༌ཞ༌ ཟང༌པོ༌གུན༌ ཨིན༌ནོག༌, ཀ༌བོའེ༌ ང༌དང༌གུན༌ལ༌ དཀོན༌མཆོག༌གི༌ ལམ༌མི༌ ནང༌ང༌ ལྡན༌ ཅུག༌ག༌ནོག༌།
1TI 6:4 ཏེ༌ཙོགས༌སི༌ མི༌གུན༌ ཕོ༌སོ༌ཅན༌ དང༌ ཧ༌མ༌གོ༌ཁན༌ གུན༌ ཨིན༌ནོག༌། ཁོང༌གུན༌ནི༌ ཕན༌མི༌ཐོགས༌སི༌ ལོབས༌པོའེ༌, ཁོང༌གུན༌ནི༌ སྤེ༌རའེ༌ ཏོན༌ཏག༌གི༌ཀ༌ ཛིང༌མོ༌ དང༌ ཕྲབ༌བ༌ནོག༌, ཏེ༌བོའེ༌ ཚིགས༌ཅེས༌, པོ༌པུད༌ཅེས༌, ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌, ཡང༌ ཞན༌མའེ༌ སྐོར༌ལ༌ སམ༌བ༌ ངན༌པ༌ གུན༌ ལྡན༌ ཅུག༌ག༌ནོག༌།
1TI 6:5 ཏེ༌གུན༌ནི༌ ཏུས༌གྱུན༌ མི༌གུན༌ནི༌ ཕྲོའ༌ ཛིང༌མོ༌ ཆའ༌ ཅུག༌ག༌ནོག༌། ཁོང༌གུན༌ལ༌ དེན༌བ༌ དང༌ ཟུན༌བའེ༌ ཁྱད༌ མ༌ཤེས༌པ༌, དེན༌བ༌ ཆོགས༌ལ༌ རང༌ངི༌ གྱབ༌གྱུར༌ཏེ༌ ཨིན༌ནོག༌། ཁོང༌གུན༌ནི༌ ཁོ༌རང༌གུན༌ ཆུག༌པོ༌ གྱུར༌ཅེས༌སི༌ ཕིའ༌ དཀོན༌མཆོག༌གི༌ ལམ༌མི༌ཀ༌ གྲུལ༌ཟུན༌ ཏང༌ང༌ནོག༌།
1TI 6:6 སེམས༌སི༌ ནང༌ང༌ ཞི༌དེ༌ དང༌ དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌སི༌ དོད༌པ༌ ཡོད༌ཅེས༌པོ༌ ཁོ༌རང༌, ཅིན༌ལབས༌ ཆེན༌མོ༌ཞིག༌ ཨིན༌ནོག༌།
1TI 6:7 ཅིའ༌ཟེར༌ན༌ ང༌དང༌ངི༌ འི༌ ཇིག༌རྟེན༌ནི༌ ནང༌ང༌ ཅའང༌ ཁུར༌ཏེ༌ མ༌ཁྱོངས༌, ཡང༌ འི༌ཀ༌ནེ༌ ཅའང༌ ཁུར༌ཏེ༌ ཆའ༌ མི༌ཉན༌།
1TI 6:8 ཏེ༌བོའེ༌ཕིའ༌ ང༌དང༌གུན༌ལ༌ ཟ༌གྱུ༌ དང༌ གོན༌གྱུ༌ ཡོད༌ན༌ ཏེན༌ན༌བོའ༌ ཚིམས༌ གོ༌ཤེས༌ ཨིན༌ནོག༌།
1TI 6:9 ཆུག༌པོ༌ གྱུར༌ར༌ ཐད༌ཁན༌གུན༌ ཚོད༌ལྟའེ༌ ནང༌ང༌ གྱེལ༌ཏེ༌, ཏོན༌མེད༌ དང༌ ནོད༌སྐྱལ༌ཁན༌ནི༌ དོད༌པ༌ གུན༌ནི༌ ནང༌ང༌ ཁད༌ད༌ནོག༌, ཀ༌བོའེ༌ ཁོང༌གུན༌ ཞིག༌ཏེ༌ མེད༌ཁན༌ ཆ༌ཅུག༌ག༌ནོག༌།
1TI 6:10 ཅིའ༌ཟེར༌ན༌ ནོར༌རི༌ དོད༌པ༌ ནི༌ ངན༌པའེ༌ རིགས༌ ཚང༌མའེ༌ རྩའ༌ཝ༌ ཨིན༌ནོག༌། ཡང༌ ནོར༌དོད༌ སྲན༌ཏྲེ༌ ཡོད༌ཁན༌ ཁ༌ཅིག༌ ཏད༌པའེ༌ ཀ༌ནེ༌ མ༌ ཐག༌རིང༌ང༌ ནུར༌ཏེ༌ སོང༌ཏེ༌ ཁོ༌རང༌གུན༌ནི༌ ཕིའ༌ མང༌ང༌ རྡུག༌ངལ༌གུན༌ ཇུངས༌ ཅུགས༌ཏེ༌ ཨིན༌ནོག༌།
1TI 6:11 ཏི༌མོ༌ཐི༌, ཁྱོ༌རང༌ དཀོན༌མཆོག༌ག༌ ཞབས༌ཏོག༌ ཞུ༌ཁན༌ནི༌ མི༌ཞིག༌ ཨིན༌ པ༌སང༌, ཏེ༌ ངན༌པའེ༌ ལས༌ ཚང༌མའེ༌ ཀ༌ནེ༌ ཤོར༌ཏེ༌ སོང༌། ཨིན༌ནའང༌ ཀྲང༌པོ༌, དཀོན༌མཆོག༌གི༌ ལམ༌མི༌ཀ༌ གྲུལ༌ཅེས༌, ཨིད༌ཤེས༌, ཅེས༌པ༌, ཏད༌པའེ༌ ནང༌ང༌ སྟན༌པོ༌ དུག༌ཅེས༌ དང༌ པས༌མོ༌ མི༌ཚེ༌ཞིག༌གི༌ སྟིང༌རང༌ནེ༌ བང༌ཏོང༌།
1TI 6:12 རང༌ངི༌ ཏད༌པ༌ སྐྱོབ༌ཅེས༌སི༌ ཕིའ༌ གྱལ༌ལ༌ ཅོས༌ཏེ༌ ནོལ༌། དཀོན༌མཆོག༌གི༌ ཁྱོ༌རང༌ བོད༌ད༌ ཛད༌ཁན༌ནི༌ ཐའ༌མེད༌པའེ༌ མི༌ཚེ༌བོའ༌ སྲན༌ཏྲེ༌ ཐམས༌ཏེ༌ དུག༌, ཀ༌བོ༌ ཁྱོ༌རང༌ངི༌ ཡེ༌ཤུའི༌ ནང༌ང༌ ཨིད༌ཤེས༌ ཅོ༌ཁན༌ནི༌ སྤང༌པོ༌ ཏད༌པ༌ཅན༌ མང༌པོའེ༌ དུན༌ལ༌ ཏངས༌།
1TI 6:13 ཡང༌ ཚང༌མ༌ལ༌ སྲོག༌ སལ༌ཁན༌ནི༌ དཀོན༌མཆོག༌ དང༌ པོན༌ཏིའུ༌ པི༌ལ༌ཏུའི༌ དུན༌ལ༌ སྤང༌པོ༌ ཟང༌པོ༌ སལ༌ཁན༌ནི༌ མ༌ཤི༌ཀ༌ ཡེ༌ཤུ༌ ཉིས༌ཀོའེ༌ སྐུན༌དུན༌ལ༌ ངའེ༌ ཁྱོ༌རང༌ང༌ འི༌ བཀའ༌ ཏང༌ངད༌།
1TI 6:14 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཕེབས༌ ཚག༌པ༌ ཁྱོ༌རང༌ངི༌ ཁོང༌ངི༌ བཀའ༌ ཐེ༌ཚོམས༌ མེད༌པ༌ སྲུང༌།
1TI 6:15 ཏ༌ ཏེན༌ན༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌ དཀོན༌མཆོག༌, གྱལ༌པོ༌གུན༌ནི༌ གྱལ༌པོ༌ དང༌ གཙོ༌བོ༌གུན༌ནི༌ གཙོ༌བོ༌, ཅིན༌ལབས༌ཅན༌ནི༌ ཀུན༌ཝང༌ ཅིག༌པོའེ༌, མ༌ཤི༌ཀ༌ ནམ༌ཁའ༌ནེ༌ སྔོན༌ ཅུག༌ག༌ ཛད༌ཨིན༌།
1TI 6:16 དཀོན༌མཆོག༌ ཅིག༌པོ༌ ནི༌ མ༌ནེ༌ མི༌ཀྲོངས༌, སུའང༌ ཆ༌ མི༌ཉན༌ཅེས༌སི༌ འོད༌དི༌ ནང༌ང༌ ཁོང༌ ཞུགས༌ཨིན༌, ཁོང༌ སུ༌ཞིག༌གིའང༌ མ༌ནེ༌ མ༌ཇལ༌ཀྱག༌ ཡ༌ ཇལ༌ མི༌ཐུབ༌། ཚང༌མའེ༌ ཁོང༌ང༌ རྩི༌ཝ༌ ཅོ༌ཤིག༌, ཡང༌ ཁོང༌ངི༌ ཝང༌གུན༌ ཏུས༌གྱུན༌ ལུས༌ཤིག༌། ཨ༌མེན༌།
1TI 6:17 འི༌ ཇིག༌རྟེན༌ནི༌ ནང༌ང༌ ཡོད༌ཁན༌ནི༌ ཆུག༌པོ༌གུན༌ལ༌ ཁོ༌རང༌གུན༌ནི༌ ནོར༌གུན༌ནི༌ཀ༌ ཕོ༌སོ༌ དང༌ ཨིད༌ཤེས༌ མ༌ཅོ༌ ཟེར༌ཏེ༌ ལོབ༌, ཀ༌བོ༌ ལ༌མོ༌ ཉམ༌པོ༌ མེད༌ཁན༌ ཆའ༌ ཉན༌ན༌ནོག༌། ང༌དང༌ངི༌ སྐྱིད༌པོའེ༌ ཕིའ༌ སྒོས༌དོམ༌གུན༌ སྙིང༌ ཕེས༌ཏེ༌ སལ༌ལ༌ ཛད༌ཁན༌ནི༌ དཀོན༌མཆོག༌གི༌ ནང༌ང༌ ཁོང༌གུན༌ནི༌ ཨིད༌ཤེས༌ ཡོང༌གོས༌།
1TI 6:18 ཁོང༌གུན༌ནི༌ པེ༌ནེ༌གུན༌ ལས༌ ཟང༌པོའེ༌ ནང༌ང༌ སྐྱག༌ཅེས༌, ལས༌ ཟང༌པོའེ༌ ནང༌ང༌ ཆུག༌པོ༌ གྱུར༌ཅེས༌, སྒོས༌དོམ༌ ཡོད༌ཁན༌གུན༌ནི༌ ཕིའ༌ སྙིང༌ ཕེས༌ཏེ༌ ཏང༌ཅེས༌, ཏུས༌གྱུན༌ ཞན༌མ༌ ཉམ༌པོ༌ བགོ༌ཅེས༌སི༌ ནང༌ང༌ གྲལ༌གྲིག༌ དུག༌ཅེས༌ལ༌ ཟེར༌།
1TI 6:19 ཏེ༌ཟུག༌ ཅོ༌ཅེས༌པོའེ༌, ཁོང༌གུན༌ནི༌ ཡོང༌ཅེས༌ཅན༌ནི༌ ཏུས༌སི༌ ཕིའ༌ ཁོ༌རང༌གུན༌ལ༌ ནམ༌ཁའེ༌ ནང༌ང༌ མག༌ལྡན༌ སྟན༌པོ༌ ཙོགས༌ལ༌ བང༌ཛོད༌ སགས༌ཏེ༌ བོར༌ཨིན༌, ཏེ༌ནེ༌ ཁོང༌གུན༌ནི༌ དེན༌བའེ༌ ངོས༌མའེ༌ མི༌ཚེ༌བོ༌ ཐམས༌ ཐུབ༌ཨིན༌།
1TI 6:20 ཏི༌མོ༌ཐི༌, དཀོན༌མཆོག༌གི༌ ཁྱོ༌རང༌ངི༌ ལག༌ག༌ སྟད༌ད༌ ཛད༌ཁན༌གུན༌ལ༌ གྱལ༌ལ༌ ཅོས༌ཏེ༌ སྲུང༌སྐྱོབ༌ ཅོས༌། ངན༌པའེ༌ སྤེ༌ར༌གུན༌ནི༌ ནང༌ང༌ དྲེས༌ མ༌དྲེས༌, ཀ༌བོའ༌ མི༌ ཁ༌ཅིག༌གི༌ ནོར༌ཏེ༌ ཡོན༌ཏན༌ ཟེར༌རད༌།
1TI 6:21 འི༌ཙོགས༌སི༌ སམ༌བ༌ མེད༌ཁན༌ནི༌ གྲབས༌གུན༌ནི༌ གྱབ༌ནེ༌ གྲུལ༌ཏེ༌ མི༌ ཁ༌ཅིག༌ དེན༌བའེ༌ ཏད༌པའེ༌ ཀ༌ནེ༌ ཐག༌རིང༌ང༌ སོང༌ཏེ༌ ཨིན༌ནོག༌། དཀོན༌མཆོག༌གི༌ ཐུག༌རྗེ༌ ཁྱོ༌ཞ༌གུན༌ལ༌ སལ༌ལ༌ ཛད༌ཤིག༌།
2TI 1:1 འི༌ ཨི༌གེ༌བོ༌ དཀོན༌མཆོག༌གི༌ ཐུག༌གོངས༌ ནང༌ཞིན༌, མ༌ཤི༌ཀ༌ ཡེ༌ཤུའི༌ སྐུ༌ཚབས༌ལ༌ ལྡམ༌མ༌ ཛད༌ཁན༌ནི༌ ང༌ པ༌འུ༌ལུའི༌ ཆོགས༌ནེ༌ ཨིན༌། མ༌ཤི༌ཀ༌ ཡེ༌ཤུའི༌ ནང༌ང༌ ཏད༌པ༌ གྱུད༌ཏེ༌, ཐའ༌མེད༌པའེ༌ མི༌ཚེ༌ སལ༌ཅེས༌སི༌ ཁོང༌ངི༌ ཞལ༌ཆད༌པོའེ༌ སྐོར༌ལ༌ ཤད༌ཅེས༌ལ༌, ང༌ ཀལ༌ལ༌ ཛད༌ཏེ༌ ཨིན༌།
2TI 1:2 འི༌ ཨི༌གེ༌བོ༌ ངའེ༌ ཅེས༌པའེ༌ བུ༌ཚ༌ ཙོགས༌ ཏི༌མོ༌ཐིའ༌ བྲིའད༌། དཀོན༌མཆོག༌ ཡབ༌ དང༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུའི༌, ཁྱོ༌རང༌ང༌ ཐུག༌རྗེ༌, སྙིང༌རྗེ༌ དང༌ ཞི༌དེ༌ སལ༌ཤིག༌།
2TI 1:3 ཏི༌མོ༌ཐི༌, ཁྱོ༌རང༌ངི༌ ཕིའ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌, ཁོང༌ང༌ ངའེ༌ སེམས༌ ལག༌མོ༌ ཉམ༌པོ༌ ཞབས༌ཏོག༌ ཞུའད༌, ཀ༌ཟུག༌ ངའེ༌ ཕ༌མེས༌པོ༌གུན༌ནི༌ ཞུས༌ཏེ༌ ཨིན༌པིན༌, ཉིན༌ཚན༌ མེད༌པ༌ ངའེ༌ མོས༌ལམ༌མི༌ ནང༌ང༌ ཁྱོ༌རང༌ ཨིད༌ཏུ༌ ཅོའད༌།
2TI 1:4 ང༌དང༌གུན༌ བེ༌ཏེ༌ ཆ༌ ཟ༌ནེ༌, ཁྱོ༌རང༌ངི༌ ཆི༌མ༌ ཨིད༌ཏུ༌ ཡོངས༌ཏེ༌, ང༌ ཁྱོ༌རང༌ ཉམ༌པོ༌ ཐུག༌ཅེས༌སི༌ དོད༌པ༌ སྲན༌ཏྲེ༌ རག༌། ང༌དང༌གུན༌ ཡང༌སྐྱར༌ ཉམ༌པོ༌ ཛོམ༌མ༌ཅིག༌, ངའ༌ སྐྱིད༌པོའེ༌ གང༌ཅེས༌ རག༌།
2TI 1:5 ང༌ ཁྱོ༌རང༌ངི༌ དེན༌བའེ༌ ཏད༌པ༌བོ༌ ཨིད༌ཏུའ༌ ཡོངས༌, ཀ༌བོ༌ སྔུན༌ལ༌ ཁྱོ༌རང༌ངི༌ ཨ༌བི༌ ལུ༌འེས༌ དང༌ ཁྱོ༌རང༌ངི༌ ཨ༌མ༌ ཨེའུ༌ནི༌ཀེ༌ གུན༌ནི༌ ཅོའད༌པིན༌། ཏེན༌ན༌ ཏད༌པ༌བོ༌ ཁྱོ༌རང༌ངི༌ ནང༌ང༌ དག༌སའང༌ ཡོད༌ཅེས༌པོ༌ ང༌ ལོ༌ཁྱེལ༌ རག༌།
2TI 1:6 ཏེན༌ན༌ གྱུན༌ཚན༌བོའེ༌ ཕིའ༌ ངའེ༌ ཁྱོ༌རང༌ངི༌ཀ༌ ལག༌པ༌ བོར༌ ཟ༌ནེ༌, དཀོན༌མཆོག༌གི༌ སལ༌ལ༌ ཛད༌ཁན༌ནི༌ ཁྱུད༌པོ༌ སྟན༌པོ༌ དང༌ གྱས༌ ཅུགས༌ཅེས༌ལ༌ ཨིད༌ཏུ༌ སྐུལ༌ལད༌།
2TI 1:7 དཀོན༌མཆོག༌གི༌ ང༌དང༌གུན༌ལ༌ ཇིག༌ཤེས༌ དང༌ སེམས༌ཤུགས༌ མེད༌ཁན༌ནི༌ སེམས༌ཞིག༌ སལ༌ལ༌ མ༌ཛད༌ད༌ སྟོབས༌, ཅེས༌པ༌ དང༌ རང༌སེམས༌ཅུན༌ ཐུབ༌ཁན༌ནི༌ སེམས༌ཞིག༌ སལ༌ལ༌ ཛད༌ཏེ༌ ཨིན༌ནོག༌།
2TI 1:8 ཏེ༌བོའེ༌ཕིའ༌ ང༌དང༌ངི༌ གཙོ༌བོ༌ མ༌ཤི༌ཀའེ༌ སྐོར༌ལ༌ ཞན༌མ༌གུན༌ལ༌ ཤད༌ཅེས༌ ཡང༌ ཁོང༌ངི༌ ཏོན༌ལ༌ ང༌ ཙོན༌ནི༌ ནང༌ང༌ ཡོད༌ཁན༌བོའ༌, ཁྱོ༌རང༌ ཁྲེལ༌ མ༌ཁྲེལ༌། དཀོན༌མཆོག༌གི༌ ཁྱོ༌རང༌ང༌ སལ༌ཁན༌ནི༌ སྟོབས༌ ཉམ༌པོ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ནང༌ང༌, ང༌ ཉམ༌པོ༌ ནགས༌བར༌དོ༌ ཁུར༌ཅེས༌སི༌ ཕིའ༌ གྲལ༌གྲིག༌ ཅོས༌།
2TI 1:9 དཀོན༌མཆོག༌གི༌ ང༌དང༌གུན༌ སྐྱོབ༌བ༌ ཛད༌ཏེ༌ མི༌ཚེ༌ ཏམ༌པ༌ཞིག༌ ཕུད༌ཅེས༌ལ༌ བོད༌ད༌ ཛད༌ཏེ༌ ཨིན༌ནོག༌། འི༌བོ༌ ང༌དང༌རང༌ངི༌ ལས༌ ཅོ༌ཁན༌བོའེ༌ ཞས༌ཏེ༌ མན༌པ༌, ཁོང༌ངི༌ ཐབས༌ དང༌ ཐུག༌རྗེ༌ ཞས༌ཏེ༌ ཨིན༌ནོག༌། ཏུས༌ གོ༌ཟུག༌གི༌ སང༌ སྔུན༌ལ༌, འི༌ ཐུག༌རྗེ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ ཁོང༌ངི༌ ང༌དང༌གུན༌ལ༌ སལ༌ལ༌ ཛད༌ཅེས༌པོ༌ ཨིན༌པིན༌།
2TI 1:10 ཏ༌ མ༌ཤི༌ཀ༌ ཡེ༌ཤུ༌ ང༌དང༌ངི༌ སྐྱབ༌གོན༌ ཕེབ༌ཅེས༌པོའེ༌, དཀོན༌མཆོག༌གི༌ ཏེ༌གུན༌ སལ༌པོ༌ ཅོས༌ཏེ༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌། མ༌ཤི༌ཀ༌ ཡེ༌ཤུའི༌ ཤི༌ཅེས༌སི༌ ཝང༌བོ༌ མེད༌ཁན༌ ཅོའ༌ ཛད༌ཏེ༌, གའ༌མོའེ༌ ནས༌ཚུལ༌ གྱུད༌ཏེ༌ དེན༌བའེ༌ མི༌ཚེ༌ དང༌ ཏུས༌གྱུན༌ སོན༌ཏེའ༌ ལུས༌ཤེས༌སི༌ ལམ༌བོ༌ སྟན༌ན༌ ཛད༌ཏེ༌ ཨིན༌ནོག༌།
2TI 1:11 འི༌ གའ༌མོའེ༌ ནས༌ཚུལ༌ལི༌ ཏོན༌ལ༌ དཀོན༌མཆོག༌གི༌ ངའ༌ ཆོས༌ཤད༌ཁན༌, སྐུ༌ཚབས༌ དང༌ གེར༌གན༌ ཞིག༌ ལྡམ༌མ༌ ཛདས༌།
2TI 1:12 ཏེ༌བོའེ༌ཕིའ༌ ངའ༌ འི༌རུ༌ ཙོན༌ཁང༌ངི༌ ནང༌ང༌ རྡུག༌ངལ༌ ཐོང༌ཨིན༌ ཡོད༌། ཨིན༌ནའང༌ ངའ༌ ཏེ༌བོའེ༌ ཕིའ༌ ཁྲེལ༌ལ༌ མེ༌རག༌, ཅིའ༌ཟེར༌ན༌ ང༌ གྱུས༌ཡོད༌ སུའི༌ཀ༌ ངའེ༌ ཏད༌པ༌ ཅོའད༌, ཡང༌ ངའ༌ ཏན༌ཏན༌ ལོ༌ཁྱེལ༌ རག༌, ཁོང༌ ལོགས༌ཏེ༌ སྐྱོད༌ཅེས༌སི༌ ཞག༌ ཚོག༌པ༌ ཁོང༌ངི༌ ཆག༌ག༌ ངའེ༌ སྟད༌ཁན༌ ཚང༌མ༌ སྐྱོབས༌ཏེ༌ བོར༌ར༌ ཛད༌ཨིན༌།
2TI 1:13 ཁྱོ༌རང༌ངི༌ ངའེ༌ ཀ༌ནེ༌ ཚོར༌ཁན༌ ཚང༌མ༌, ལབ༌ཞ༌ ཟང༌པོའེ༌ སྤེ༌ཞིག༌གི༌ ཚུལ༌ལ༌ ཀོལ༌གོ༌ཤེས༌ ཨིན༌ནོག༌། ཁྱོ༌རང༌ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཡོད༌ཁན༌ནི༌ ཏད༌པ༌ དང༌ ཅེས༌པ༌ ཉམ༌པོ༌ ཏེ༌གུན༌ ཅོས༌།
2TI 1:14 ཡང༌ ང༌དང༌ངི༌ ནང༌ང༌ ཡོད༌ཁན༌ནི༌ ཏམ༌པའེ༌ ཐུག༌ཉིད༌དི༌ རོགས༌ གྱུད༌ཏེ༌, དཀོན༌མཆོག༌གི༌ ཁྱོ༌རང༌ངི༌ ལག༌ག༌ སྟད༌ད༌ ཛད༌ཁན༌ནི༌ རིན༌ཅན༌ དེན༌བ༌གུན༌ལ༌ གྱལ༌ལ༌ ཅོས༌ཏེ༌ སྲུང༌སྐྱོབ༌ ཅོ༌གོས༌།
2TI 1:15 ཨ༌སི༌ཨཱ༌ནེ༌ ཨིན༌ཁན༌ནི༌ མ༌ཤི༌ཀའེ༌ ཞབས༌ཏོག༌པ༌ ངའེ༌ ཕྲོ༌པ༌ ཚང༌མའེ༌ ང༌ ཕངས༌ཏེ༌ ཨིན༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌, པི༌གེ༌ལུས༌ དང༌ ཧེར༌མོ༌གེ༌ནས༌ གུན༌ནིའང༌ ང༌ ཕངས༌ཏེ༌ སོང༌།
2TI 1:16 ཨོ༌ནེས༌སི༌ཕོ༌རུས༌སི༌ ནང༌ཚང༌གུན༌ནི༌ཀ༌ དཀོན༌མཆོག༌གི༌ ཐུག༌རྗེ༌ ཟིགས༌ཤིག༌, ཅིའ༌ཟེར༌ན༌ ང༌ ཙོན༌པ༌ ཨིན༌ ཨིན༌ནའང༌ ཁོ༌ མ༌ནེ༌ མ༌ཁྲེལ༌ལ༌, ལན༌ མང༌པོ༌ ང༌ ཐུག༌ག༌ ཡོངས༌ ཡང༌ སེམས༌སོ༌ ཏངས༌།
2TI 1:17 རོམ༌མི༌ ནང༌ང༌ ལེབས༌ཏེ༌ ཁོའེ༌ ང༌ ཐོབ༌ཐོབ༌ ཚོག༌པ༌ ཀ༌རུང༌ས༌ ཚང༌མ༌ལ༌ ཙལ༌ཏོག༌།
2TI 1:18 མ༌ཤི༌ཀ༌ ལོགས༌ཏེ༌ ཕེབས༌སི༌ ཏུས༌ལ༌, གཙོ༌བོའེ༌ ཁོའ༌ སྙིང༌རྗེ༌ ཛད༌ཤིག༌། ཨེ༌ཕེ༌སས༌སི༌ ནང༌ང༌ ཁོའེ༌ ངའ༌ ཙམ༌ཤིག༌གི༌ ཞབས༌ཏོག༌ གྱལ༌ལ༌ ཅོས༌ཏེ༌ ཞུས༌ཁན༌བོ༌ ཏི༌མོ༌ཐི༌ ཁྱོ༌རང༌ང༌ གྱལ༌ལ༌ ཅོས༌ཏེ༌ གྱུས༌ཨིན༌ནོག༌།
2TI 2:1 ཏི༌མོ༌ཐི༌, ངའེ༌ བུ༌ཚ༌, དཀོན༌མཆོག༌གི༌ ཁྱོ༌རང༌ང༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ སལ༌ལ༌ ཛད༌ཁན༌ནི༌ ཐུག༌རྗེའེ༌ ནང༌ང༌ སྟོབས༌ཅན༌ གྱུར༌།
2TI 2:2 ངའེ༌ མི༌ མང༌པོའེ༌ དུན༌ལ༌ ལབ༌ཞ༌ ཏང༌ཁན༌གུན༌ ཁྱོ༌རང༌ངི༌ ཚོར༌ཏེ༌ ཨིན༌ནོག༌, ཏ༌ ཏེ༌ ལབ༌ཞ༌གུན༌ ཁྱོ༌རང༌ངི༌ ཨིད༌ཤེས༌ཅན༌ནི༌ མི༌གུན༌ལ༌ ལབ༌གོས༌, ཏེ༌ནེ༌ ཞན༌མའ༌ ཤད༌ཅེས༌སི༌ ལོབ༌ཇོང༌ ཁོང༌གུན༌ལ༌ ཐོབ༌ཨིན༌།
2TI 2:3 མ༌ཤི༌ཀ༌ ཡེ༌ཤུའི༌ མག༌མི༌ ཟང༌པོ༌ཞིག༌གི༌ ཚུལ༌ལ༌ ང༌ ཉམ༌པོ༌ བར༌དོ༌གུན༌ ཁུར༌།
2TI 2:4 མག༌མི༌གུན༌ནི༌ མག༌མི༌ མན༌ཁན༌ མི༌གུན༌ནི༌ མི༌ཚེའེ༌ ནང༌ང༌ ཐེས༌སྟོག༌ ཏང༌ང༌ མ༌ནོག༌, ཅིའ༌ཟེར༌ན༌ ཁོང༌གུན༌ནི༌ ཁོ༌རང༌ངི༌ མག༌མི༌ འུ༌སྐྱོང༌ ཐད༌ཅུག༌ཅེས༌སི༌ རྩོན༌གྲུས༌ ཅོའ༌ནོག༌།
2TI 2:5 ཡང༌ རྩལ༌ཡངས༌ རྩེ༌ཁན༌ཞིག༌ག༌ གྱལ༌ཁའེ༌ སོལ༌རས༌ ཐོབ༌བ༌ མ༌ནོག༌, ནམ༌ཚོག༌པ༌ ཁོང༌གུན༌ ཁྲིམས༌སི༌ཀ༌ གྲུལ༌ མི༌གྲུལ༌།
2TI 2:6 ཏེན༌ན༌ ཙོགས༌ལ༌, རྩོན༌གྲུས༌ ཅོ༌ཁན༌ནི༌ ཞིང༌བད༌པ༌, ཁོ༌རང༌ངི༌ ལས༌ ཅོ༌ཁན༌ནི༌ བྲས༌བུ༌ ཉང༌ཁན༌ ཏང༌པོ༌བོ༌ ཨིན༌གོས༌།
2TI 2:7 ངའེ༌ ཅི༌རིག༌ ཟེར༌རད༌, ཏེ༌གུན༌ནི༌ སྐོར༌ལ༌ སམ༌བ༌ ཏོང༌། གཙོ༌བོའེ༌ ཁྱོ༌རང༌ང༌ འི༌ ཚང༌མའ༌ ཧ༌གོ༌ཅེས༌སི༌ ནང༌ང༌ རོགས༌ ཛད༌ཨིན༌།
2TI 2:8 གྱལ༌པོ༌ དཱ༌བིད༌དི༌ པུར༌གྱུད༌, ཡེ༌ཤུ༌ མ༌ཤི༌ཀ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ ཨིན༌ཁན༌བོ༌ ཨིད༌ཏུ༌ ཅོས༌, ཏེ༌བོ༌ ནི༌ ངའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌བོ༌ ཨིན༌,
2TI 2:9 ཀ༌བོའེ༌ ཕིའ༌ ང༌ རྡུག༌ངལ༌ ཐོང༌དུག༌, ཡང༌ ཁྲིམས༌ཅག༌ཁན༌ཞིག༌ ཙོགས༌ལ༌ ལྕག༌ཐག༌ ཉམ༌པོ༌ ཅིངས༌ཏེ༌ བོརས༌། ཨིན༌ནའང༌ དཀོན༌མཆོག༌གི༌ བཀའ༌བོ༌ ལྕག༌ཐག༌ག༌ ལྡམས༌ཏེ༌ བོར༌ མི༌ཉན༌།
2TI 2:10 ཏེ༌བོའེ༌ཕིའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མི༌གུན༌ལ༌ ཐར༌པ༌ ཐོབ༌ཅེས༌ལ༌ ང༌ རྡུག༌ངལ༌ ཅི༌ཞིག༌ ཇུང༌ནའང༌ ཁུར༌ཅེས༌ལ༌ ཐད༌པོ༌ ཨིན༌། ཏེ༌ ཐར༌པ༌བོ༌ མ༌ཤི༌ཀ༌ ཡེ༌ཤུའི༌ ནང༌ང༌ ཐའ༌མེད༌པའེ༌ ཟིར༌རྗིད༌ ཉམ༌པོ༌ དུག༌ཅེས༌པོ༌ ཨིན༌།
2TI 2:11 འི༌གུན༌ ཨིད༌ཤེས༌ཅན༌ནི༌ ཟེར༌ལོ༌ ཨིན༌ནོག༌། “ཀལ༌ཏེས༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ན༌, ང༌དང༌གུན༌ ཁོང༌ ཉམ༌པོ༌ སོན༌ཏེའང༌ ལུས༌ཨིན༌།
2TI 2:12 ཀལ༌ཏེས༌ ང༌དང༌གུན༌ནི༌ རྡུག༌ངལ༌ ཁུར༌ན༌, ཁོང༌ ཉམ༌པོ༌ ང༌དང༌གུན༌ནི༌ ཝང༌ངའང༌ སྲུལ༌ཨིན༌། ཀལ༌ཏེས༌ ང༌དང༌གུན༌ནི༌ ཁོང༌ ཤེས༌ས༌མེད༌ ཟེར༌ན༌, ཁོང༌ངིའང༌ ང༌དང༌གུན༌ ཤེས༌ས༌མེད༌ མོལ༌ཨིན༌།
2TI 2:13 ཀལ༌ཏེས༌ ང༌དང༌གུན༌ ཨིད༌ཤེས༌ཅན༌ མ༌ལུས༌ན༌, ཁོང༌ ཨིད༌ཤེས༌ཅན༌ ཞུགས༌ས༌ནོག༌, ཅིའ༌ཟེར༌ན༌ ཁོང༌ངི༌ ཁོང༌ སུ༌ ཨིན༌ཁན༌བོའེ༌ གྱབ༌གལ༌ མི༌ཛད༌།”
2TI 2:14 ཏེ༌ ལབ༌ཞ༌གུན༌ནི༌ སྐོར༌ལ༌ མི༌ཚང༌མ༌ལ༌ ཨིད༌ཏུ༌ སྐུལ༌, ཡང༌ ཁོང༌གུན༌ལ༌ སྤེ༌ར༌ ཁག༌ཅན༌ མན༌ཁན༌ནི༌ཀ༌ ཁྲབ༌ཅེས༌གུན༌ གོག༌ ཟེར༌ཏེ༌ དཀོན༌མཆོག༌གི༌ སྐུན༌དུན༌ལ༌ ལྡམ༌ཞག༌ ཏོང༌། འི༌ཙོགས༌སི༌ ཛིང༌མོའེ༌ ཀ༌ནེ༌ ཕན༌ཐོགས༌ མེད༌པ༌, ཏེ༌བོ༌ ཉན༌ཁན༌ ཏད༌པ༌ཅན༌གུན༌ནི༌ མི༌ཚེ༌ དོད༌མེད༌ ཅོའ༌ནོག༌།
2TI 2:15 དཀོན༌མཆོག༌གི༌ སྐུན༌དུན༌ལ༌ ཁོང༌ ཐུགས༌ཐད༌ ཅུག༌ཁན༌ཞིག༌ སྟན༌ཅེས༌ལ༌ རྩོན༌གྲུས༌ ཅོས༌། ཁྱོ༌རང༌ ཁྲེལ༌གོས༌ མེད༌ཁན༌ དང༌ དེན༌བའེ༌ བཀའ༌གུན༌ གྱལ༌ལ༌ ཅོས༌ཏེ༌ ཧ༌གོ༌ཅུག༌ ཉན༌ཁན༌ནི༌ ཞབས༌ཏོག༌པ༌ ཟང༌པོ༌ཞིག༌ ཡོང༌གོས༌།
2TI 2:16 ཏོན༌ཏག༌ མེད༌ཁན༌ དང༌ སམ༌བ༌ མེད༌ཁན༌ནི༌ སྤེ༌ར༌ གུན༌ནེ༌ ཐག༌རིང༌ང༌ དུག༌ཤིག༌, ཀ༌གུན༌ནི༌ མང༌ང༌ སྕོད༌པ༌ ངན༌པ༌ ཆོགས༌ལ༌ ཁྲིད༌ཏེ༌ ཁྱེར༌ར༌ནོག༌།
2TI 2:17 ཏེ༌ཙོགས༌སི༌ སྤེ༌ར༌གུན༌ ཤ༌ ཟའ༌ཁན༌ནི༌ མ༌ཁའ༌ ངན༌པ༌ ཙོགས༌ལ༌ གྱས༌ས༌ནོག༌, སྤེར༌ན༌ ཧེ༌མི༌ན༌ཡུས༌ དང༌ པི༌ལི༌དུས༌ གུན༌ ཙོགས༌ ཨིན༌ནོག༌།
2TI 2:18 ཁོང༌གུན༌ནི༌ མ༌ཤི༌ཀའེ༌ ནང༌ང༌ ཏད༌པ༌ཅན༌ ཤི༌ཁན༌གུན༌ སོན༌ཏེའ༌ ལང༌ ཚར༌ཏེ༌ ཨིན༌ནོག༌ ཟེར༌ཏེ༌ དེན༌བའེ༌ ལམ༌བོ༌ ཕངས༌ཏེ༌ ཨིན༌ནོག༌། ཡང༌ ཏེ༌ཟུག༌ ཟེར༌ཏེ༌ ཏད༌པ༌ཅན༌ ཁ༌ཅིག༌གི༌ སོན༌ཏེའ༌ ལང༌ཅེས༌སི༌ རེ༌ཝ༌བོ༌ ཅགས༌ཏེ༌ ཁོང༌གུན༌ནི༌ ཏད༌པ༌ མེད༌ཁན༌ ཅོས༌ཏེ༌ ཨིན༌ནོག༌།
2TI 2:19 ཨིན༌ནའང༌ དཀོན༌མཆོག༌གི༌ དེན༌བ༌བོ༌ རྩིགས༌རྨང༌ ཙོགས༌ལ༌ སྟན༌པོ༌ ལུས༌ཨིན༌ ཀ༌བོའེ༌ཀ༌: “གཙོ༌བོའེ༌ ཁྱེན༌ན༌ནོག༌ ཁོང༌ངི༌ ཨིན༌ཁན༌གུན༌” ཡང༌ “ཡེ༌ཤུ༌, ངའེ༌ གཙོ༌བོ༌ ཨིན༌ ཟེར༌ཁན༌ ཚང༌མ༌, ངན༌པ༌ ཅོ༌ཅེས༌ནེ༌ གྱུར༌གོས༌” བྲིའ༌ ཛད༌ཏེ༌ ཡོད༌ཏེ༌ ཨིན༌ནོག༌།
2TI 2:20 སྤེར༌ན༌ ནང༌ཚངས༌ ཆུག༌པོ༌ཞིག༌གི༌ ཁང༌པའེ༌ ནང༌ང༌ ནོད༌ ཁ༌ཅིག༌ སེར༌ དང༌ མུལ༌ལི༌ ཡང༌ ཁ༌ཅིག༌ ཤིང༌ དང༌ ཀ༌ལག༌ གུན༌ནི༌ ཅོས༌ཏེ༌ ཡོད༌ཏེ༌ ཨིན༌ནོག༌། རིན༌ཅན༌ནི༌ ནོད༌གུན༌ མིག༌སལ༌ལི༌ གའ༌སྟོན༌ནི༌ ཕིའ༌ ཡང༌ ཁྱེ༌མོ༌ ནོད༌གུན༌ ཞག༌ཏང༌ངི༌ སྒོས༌དོམ༌མི༌ ནང༌ང༌ ཀོལ༌ལ༌ནོག༌།
2TI 2:21 ངའེ༌ སྔུན༌ལ༌ ཟེར༌ཁན༌གུན༌ནི༌ ཀ༌ནེ༌ རྩང༌མ༌ བོར༌ཁན༌གུན༌, མིག༌སལ༌ལི༌ རྩི༌ཝའེ༌ ཕིའ༌ ཀོལ༌ལ༌ ཛད༌ཅེས༌སི༌ ལག༌ཆ༌ རིག༌ གྱུར༌ཨིན༌, ཏམ༌པ༌ གྱུད༌ཏེ༌ སྤོན༌བོའེ༌ ཕིའ༌ ཕན༌ཐོགས༌ཅན༌ གྱུར༌ཨིན༌, ཡང༌ ལས༌ ཟང༌པོ༌ ཚང༌མ༌ ཅོ༌ཅེས༌ལ༌ གྲལ༌གྲིག༌ དུག༌ཨིན༌།
2TI 2:22 ཞོན༌ནུའི༌ ལུས༌སི༌ དོད༌པ༌ ངན༌པ༌གུན༌ནེ༌ ཤོར༌ཏེ༌ ཀྲང༌པོ༌ དང༌ ཨིད༌ཤེས༌ཅན༌ནི༌ མི༌ཚེ༌ ཕུད༌ཅེས༌, ཅེས༌པ༌ དང༌, ཞི༌དེ༌ གུན༌ནི༌ གྱབ༌ནེ༌ བང༌ཏོང༌ཤིག༌, ཏེ༌གུན༌ མ༌ཚད༌ ཁྱོ༌ཞའེ༌ བྲེལ༌, སེམས༌ ལག༌མོ༌ ཉམ༌པོ༌ དཀོན༌མཆོག༌ག༌ མོས༌ལམ༌ ཕུལ༌ཁན༌གུན༌ ཉམ༌པོ༌ ལྡན༌ཅུག༌གོ༌ཤེས༌ ཨིན༌ནོག༌།
2TI 2:23 ཡང༌སྐྱར༌ ངའེ༌ ཟེར༌རད༌, སམ༌བ༌ མེད༌ཁན༌ དང༌ ཏོན༌ཏག༌ མེད༌ཁན༌ནི༌ ཛིང༌མོ༌ གུན༌ནི༌ ནང༌ང༌ མ༌དྲེས༌, ཅིའ༌ཟེར༌ན༌ འི༌ཀ༌ནེ༌ ནོལ༌ཅེས༌ ཅིག༌པོ༌ སྨིན༌ན༌ནོག༌།
2TI 2:24 གཙོ༌བོའེ༌ ཞབས༌ཏོག༌པ༌ ཛིང༌མོ༌ མ༌ཏང༌ང༌, མི༌ཚང༌མ༌ལ༌ སྙིང༌རྗེ༌ སྟན༌ཁན༌, མི༌ སྐྱོང༌པོ༌གུན༌ ཉམ༌པོ༌ ཟོད༌པ༌ཅན༌ ཡང༌ གྱལ༌ལ༌ ཅོས༌ཏེ༌ ལབ༌ཉན༌ཁན༌ཞིག༌ ཡོང༌གོས༌།
2TI 2:25 པས༌མོ༌ ཉམ༌པོ༌ གྱབ༌གལ༌ ཅོ༌ཁན༌གུན༌ལ༌ ལབ༌ཞ༌ ཏོང༌། ཅི༌གྱུས༌, དཀོན༌མཆོག༌གི༌ ཁོང༌གུན༌ནི༌ སྙིང༌གུན༌ གྱུར༌ ཅུག༌ག༌ ཛད༌ཏེ༌ དེན༌བའེ༌ ལབ༌ཞའེ༌ གྱབ༌ནེ༌ གྲུལ༌ཅེས༌ལ༌ སྐབས༌ སལ༌སྲིད༌ཅེས༌ ཨིན༌ནོག༌།
2TI 2:26 ཏེ༌ནེ༌ ཁོང༌གུན༌ སམ༌བ༌ཅན༌ གྱུར༌ཏེ༌ རྡུད༌གུན༌ནི༌ གོ༌བའེ༌ ཟུམས༌ཏེ༌ བོར༌ཏེ༌ ཡོད༌ཁན༌བོའེ༌ ནང༌ནེ༌ ཐར༌ཨིན༌, ཀ༌བོའེ༌ ཁོང༌གུན༌ ཁོའེ༌ དོད༌པ༌ ནང༌ཞིན༌ ཅོ༌ཅུག༌ཅེས༌ལ༌ ཟུམས༌ཏེ༌ ཡོད༌པིན༌།
2TI 3:1 ཏི༌མོ༌ཐི༌, ཐའ༌མའེ༌ ཞག༌གུན༌ནི༌ ནང༌ང༌ མ༌སྲན༌ཏྲེ༌ ཇིགས༌ནང༌ཅན༌ནི༌ ཏུས༌ རིག༌གའང༌ ཡོང༌ཅེས༌པོ༌ ཁྱོ༌རང༌ང༌ གྱུས༌ ཡོང༌གོ༌ཤེས༌ ཨིན༌ནོག༌།
2TI 3:2 སྤེར༌ན༌ མི༌གུན༌ ཁོ༌རང༌ དང༌ ཁོ༌རང༌ངི༌ པེ༌ནེ༌ གུན༌ལ༌ ཡ༌ཤ༌ ཅོ༌ཁན༌, རང༌སྟོད༌ ཏང༌ཁན༌ དང༌ ཕོ༌སོ༌ ཅོ༌ཁན༌, ཏམ༌ངན༌ ཏང༌ཁན༌, ཁོང༌རང༌གུན༌ནི༌ ཕ༌མ༌གུན༌ནི༌ ཁའ༌ མ༌ཉན༌ཁན༌, ཀྲིན༌ མི༌ཀྲན༌ཁན༌ དང༌, ཁོང༌གུན༌ནི༌ ཅི༌ཞིག༌གའང༌ ཏམ༌པ༌ ཐེའ༌ མ༌ནོག༌།
2TI 3:3 ཅེས༌པ༌ མེད༌ཁན༌, ཤགས༌པ༌ མ༌ཏང༌ཁན༌, ཞན༌མ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཁན༌, རང༌སེམས༌ཅུན༌ མ༌ཉན༌ཁན༌, ནགས༌ སྟན༌ན༌ ཐད༌ཁན༌ དང༌, ཟང༌པོའེ༌ གྱབ༌གལ༌ ཅོ༌ཁན༌ ཨིན༌ནོག༌།
2TI 3:4 ཛ༌འོ༌གུན༌ལ༌ ངོ༌ལོག༌ ཅོ༌ཁན༌, སམ༌བ༌ མ༌ཏང༌ང༌ གྱོགས༌པ༌ ལས༌ ཅོ༌ཁན༌, མངས༌ཏེའང༌ ཕོ༌སོ༌ ཅོ༌ཁན༌ དང༌, དཀོན༌མཆོག༌གི༌ སང༌ ཇིག༌རྟེན༌ནི༌ སྐྱིད༌པོའ༌ ཡ༌ཤ༌ ཅོ༌ཁན༌ ཡོང༌ཨིན༌།
2TI 3:5 ཁོང༌གུན༌ནི༌ སྟན༌ཅེས༌སི༌ ཕིའ༌ དཀོན༌མཆོག༌གི༌ སྕོད༌ལམ༌མི༌ ནང༌ང༌ གྲུལ༌ཟུན༌ ཏང༌ང༌ནོག༌, ཨིན༌ནའང༌ ཏེ༌བོའེ༌ ཁྱུད༌པོའེ༌ ནང༌ང༌ ཨིད༌ཤེས༌ ཅོའ༌ མ༌ནོག༌། ཏེ༌ཙོགས༌སི༌ མི༌གུན༌ནེ༌ ཐག༌རིང༌ང༌ དུག༌ཤིག༌།
2TI 3:6 ཏེ༌ཙོགས༌སི༌ མི༌གུན༌ནི༌ ཞན༌མ༌གུན༌ནི༌ ནང༌ང༌ ལོ༌ཁྱེལ༌ ཁྱོངས༌ཏེ༌ ཁོང༌གུན༌ནི༌ ཁང༌པ༌ སོང༌ཏེ༌, སྡིག༌པའེ༌ ནོངས༌སི༌ ལྕིད༌ དང༌ ཇིག༌རྟེན༌ནི༌ ཞན༌ཡང༌ དོད༌པའེ༌ ཡོག༌ག༌ ནན༌ཁན༌ནི༌ བུ༌མོ༌ འུ༌ཐུགས༌གུན༌ནི༌ ཀ༌ནེ༌ ཕན༌ཐོགས༌ ལེན༌ཨིན༌།
2TI 3:7 ༼ཏེ༌ཙོགས༌སི༌ བུ༌མོ༌གུན༌ ཏུས༌གྱུན༌ ལབ༌ཞ༌ སོ༌མ༌ རིག༌གི༌ སྟིང༌རང༌ནེ༌ ཆའ༌ནོག༌, ཨིན༌ནའང༌ ཁོང༌གུན༌ལ༌ དེན༌བ༌བོ༌ མ༌ནེ༌ ཧ༌གོ༌ ཐུབ༌བ༌ མ༌ནོག༌།༽
2TI 3:8 ཡ༌ནེས༌ དང༌ ཡམ༌བ༌རེས༌ གུན༌ནི༌ ལུང༌སྟོན༌པ༌ མོ༌ཟེས༌སི༌ གྱབ༌གལ༌ ཅོའ༌ ཙོགས༌ལ༌, ཏེ༌ མི༌གུན༌ནི༌ དེན༌བའེ༌ གྱབ༌གལ༌ ཅོའ༌ནོག༌། ཁོང༌གུན༌ལ༌ སམ༌བ༌ ངན༌པ༌ དང༌ ཟུས༌མའེ༌ ཏད༌པ༌ ཡོད༌ཏེ༌ ཨིན༌ནོག༌།
2TI 3:9 ཨིན༌ནའང༌ ཁོང༌གུན༌ནི༌ མང༌པོ༌ཞིག༌ ཡར༌གྱས༌ མི༌ཅོ༌, ཅིའ༌ཟེར༌ན༌ ཡ༌ནེས༌ དང༌ ཡམ༌བ༌རེས༌ གུན༌ནི༌ ནས༌ལུག༌ ཙོགས༌ལ༌, ཁོང༌གུན༌ནི༌ ལས༌གུན༌ སམ༌བ༌ མེད༌ཁན༌ ཨིན༌ཁན༌བོ༌ མི༌ཚང༌མའེ༌ སལ༌པོ༌ ཅོས༌ཏེ༌ ཐོང༌ཨིན༌།
2TI 3:10 ཨིན༌ནའང༌ ཏི༌མོ༌ཐི༌, ངའེ༌ ཅི༌ ལབ༌བད༌, ངའེ༌ མི༌ཚེ༌ ཕུད༌ཚུལ༌, ཅི༌ ཏོན༌ནི༌ ཕིའ༌ ངའེ༌ མི༌ཚེ༌ ཨིན༌, ངའེ༌ ཏད༌པ༌ ངའེ༌ ཟོད༌པ༌, ངའེ༌ ཅེས༌པ༌, ཡང༌ ངའེ༌ རྡུག༌ངལ༌ ཁུར༌ཅེས༌སི༌ ཁྱུད༌གུན༌ ཁྱོ༌རང༌ང༌ གྱུས༌ཨིན༌ནོག༌།
2TI 3:11 ཨན༌ཏི༌ཡོག༌, ཨི༌ཀོ༌ནི༌འམ༌ དང༌, ལིས༌ཏྲའ༌ གུན༌ནི༌ ནང༌ང༌ ངའ༌ ནགས༌ དང༌ བར༌དོ༌ སྟནས༌། ཏེ༌རུ༌ ཡོད༌ ཟ༌ནེ༌ ངའེ༌ ཙམ༌ཤིག༌གི༌ ནགས༌ དང༌ རྡུག༌ངལ༌ གུན༌ ཁུརས༌, ཨིན༌ནའང༌ གཙོ༌བོའེ༌ ང༌ ཏེ༌ ཚང༌མའེ༌ ནང༌ནེ༌ ཐར༌ ཅུག༌ག༌ ཛད༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌།
2TI 3:12 འོ༌ན༌, མ༌ཤི༌ཀ༌ ཡེ༌ཤུའི༌ ནང༌ང༌ དཀོན༌མཆོག༌གི༌ ལམ༌མི༌ཀ༌ གྲུལ༌ཨིན༌ མི༌ཚེ༌ ཕུད༌ཉིན༌ ཡོད༌ཁན༌ ཚང༌མ༌ ནགས༌ ཐོང༌ཨིན༌།
2TI 3:13 ཨིན༌ནའང༌ མི༌ངན༌ དང༌ གོབ༌སྐོར༌ཁན༌ གུན༌, རྩོག༌པོ༌ནེ༌ ཐུ༌ཤོག༌ ཆོགས༌ལ༌ ཆེན༌། ཁོང༌གུན༌ནི༌ ཞན༌མ༌གུན༌ལ༌ གོབ༌སྐོར༌ཨིན༌, ཡང༌ ཁོ༌རང༌གུན༌ནའང༌ གོབ༌སྐོར༌རི༌ ནང༌ང༌ སོང༌ཏེ༌ ཨིན༌ནོག༌།
2TI 3:14 ཨིན༌ནའང༌ ཁྱོ༌རང༌ང༌ ལབ༌ཞའ༌ ཐོབ༌ཁན༌གུན༌ནི༌ཀ༌ སྟན༌པོ༌ དུགས༌ཏེ༌ ཏེ༌གུན༌ དེན༌བ༌ ཨིན༌ཁན༌བོ༌ ཏད༌པ༌ ཅོས༌, ཅིའ༌ཟེར༌ན༌ ཁྱོ༌རང༌ང༌ ཏེ༌ ལབ༌ཁན༌ནི༌ མི༌གུན༌ ཨིད༌ཤེས༌ཅན༌ ཨིན༌ཁན༌བོ༌ གྱུས༌ཨིན༌ནོག༌།
2TI 3:15 ཁྱོ༌རང༌ང༌ ཕྲུ༌གུའི༌ ཏུས༌ནེ༌ ཕར༌ལ༌ ཏམ༌པའེ༌ སུང༌རབས༌སི༌ ནང༌ནེ༌ ལབས༌ཏེ༌ ཨིན༌པིན༌། ཡང༌ ཏེ༌ ལབ༌ཞ༌གུན༌ནི༌ ཁྱོ༌རང༌ང༌ མ༌ཤི༌ཀ༌ ཡེ༌ཤུའི༌ ནང༌ང༌ ཨིད༌ཤེས༌ ཅོ༌ཅེས༌ གྱུད༌ཏེ༌, ཐར༌པ༌ ཐོབ༌ཅེས༌ལ༌ ཤེས༌རབས༌པོ༌ སལ༌ཏེ༌ ཨིན༌།
2TI 3:16 ཏམ༌པའེ༌ སུང༌རབས༌ ཚང༌མ༌, མི༌ གྱུད༌ཏེ༌ དཀོན༌མཆོག༌གི༌ བྲིའ༌ཛད༌ཏེ༌ ཨིན༌ནོག༌, ཡང༌ ཏེ༌བོ༌ ང༌དང༌གུན༌ལ༌ ལབ༌ཅེས༌, སྐྱོན༌རྗོད༌ ཅོ༌ཅེས༌, ལམ༌ ཀྲང༌པོ༌ སྟན༌ཅེས༌ དང༌ མི༌ཚེ༌ ཀྲང༌པོ༌ཞིག༌ ཕུད༌ཅེས༌ལ༌ ཁྲིད༌ཅེས༌ གུན༌ནི༌ ནང༌ང༌ ཕན༌ཐོགས༌ཅན༌ ཨིན༌ནོག༌།
2TI 3:17 དཀོན༌མཆོག༌གི༌ ཏེ༌བོ༌ ཁོང༌རང༌ངི༌ མི༌གུན༌ལ༌ ལས༌ ཟང༌པོ༌ ཚང༌མ༌ ཅོ༌ཅེས༌སི༌ ཁྱུད༌ སལ༌ཏེ༌ གྲལ༌གྲིག༌ བོར༌ར༌ ཛད༌ཅེས༌ལ༌ ཀོལ༌ལ༌ ཛད༌ད༌ནོག༌།
2TI 4:1 དཀོན༌མཆོག༌ དང༌ མ༌ཤི༌ཀ༌ ཡེ༌ཤུ༌ ཁོང༌རང༌ངི༌ གྱལ༌སྲིད༌ སྐྱོང༌ཅེས༌ལ༌ སྐྱོད༌ ཟ༌ནེ༌, ཁོང༌ངི༌ སོན༌པོ༌ དང༌ ཤི༌ཁན༌ ཉིས༌ཀོའེ༌ ཁྲིམས༌ཅད༌ ཛད༌ཨིན༌། ཁོང༌ ཉིས༌ཀོའེ༌ སྐུན༌དུན༌ལ༌ ངའེ༌ ཁྱོ༌རང༌ང༌ སྙིང༌ནེ༌ སྤང༌པུད༌དད༌:
2TI 4:2 སྐབས༌ ཡོད༌གྲོ༌, ཡ༌ མེད༌གྲོ༌, དཀོན༌མཆོག༌གི༌ བཀའ༌གུན༌ ཤད༌ཅེས༌ལ༌ གྲལ༌གྲིག༌ དུག༌། ཟོད༌པ༌ དང༌ ལབ༌ཞ༌ ཟང༌པོ༌ ཉམ༌པོ༌ ཁྱོ༌རང༌ངི༌ མི༌གུན༌ལ༌ སྐྱོན༌རྗོད༌ ཅོས༌, ལམ༌ ཀྲང༌པོ༌ སྟོན༌, ཡང༌ སྤོས༌པ༌ ཏོང༌།
2TI 4:3 ཏེ༌ཟུག༌ ཏུས༌ཤིག༌ ལེབ༌ཨིན༌, མི༌གུན༌ནི༌ དེན༌བ༌ དང༌ ཟང༌པོའེ༌ ལབ༌ཞ༌ གུན༌ལ༌ མ༌ཉན༌ན༌, ཁོ༌རང༌གུན༌ནི༌ དོད༌པའེ༌ གྱབ༌ནེ༌ གྲུལ༌ཨིན༌ ཡང༌ ཁོང༌ངི༌ ནམ༌ཅོག༌གི༌ ཉན༌ཉིན༌ གྲོ༌ཁན༌གུན༌ ཤད༌ཁན༌ནི༌ གེར༌གན༌ རིག༌ ཙལ༌ཨིན༌།
2TI 4:4 ཁོང༌གུན༌ནི༌ ནམ༌ཅོག༌གུན༌ དེན༌བ༌ནེ༌ ཐག༌རིང༌ང༌ ཁྱེར༌ཏེ༌ ཅོས༌མའི༌ རུངས༌གུན༌ ཆོགས༌ལ༌ གྱུར༌ཨིན༌།
2TI 4:5 ཨིན༌ནའང༌ ཏེ༌ཙོགས༌སི༌ ནས༌ལུག༌ ཚང༌མའེ༌ ནང༌ང༌ ཁྱོ༌རང༌ངི༌ ཤང༌ ཅོས༌ཏེ༌ སལ༌པོ༌ སམ༌བ༌ ཏང༌གོ༌ཤེས༌ ཨིན༌ནོག༌། གཙོ༌བོའེ༌ ཕིའ༌ རྡུག༌ངལ༌ ཁུར༌ཅེས༌ལ༌ ཇིགས༌ མ༌ཇིགས༌, ཞན༌མ༌གུན༌ལ༌ གའ༌མོའེ༌ ནས༌ཚུལ༌ ཤད༌ཅེས༌སི༌ ལས༌གུན༌ ཅོས༌, ཡང༌ ཁྱོ༌རང༌ང༌ དཀོན༌མཆོག༌གི༌ ཅོའ༌ལ༌ སལ༌ཁན༌ནི༌ ཁག༌ ཚང༌མ༌ ཅོས༌།
2TI 4:6 ང༌རང༌ངི༌ སྐོར༌ལ༌ ཟེར༌ན༌ ངའེ༌ མི༌ཚེ༌བོ༌ ནི༌, དཀོན༌མཆོག༌ག༌ ཕུལ༌ཁན༌ནི༌ ཆུའི༌ ཆུ༌ཕུད༌ ཙོགས༌ལ༌ ཕུལ༌ཨིན༌ ཨིན༌, ང༌ ཤི༌ཅེས༌སི༌ ཏུས༌པོ༌ ཉེ༌མོའ༌ ལེབས༌ཏེ༌ དུག༌།
2TI 4:7 རྩལ༌ཡངས༌ རྩེ༌ཁན༌ཞིག༌ ཙོགས༌ལ༌, ངེའང༌ གྲན༌དུར༌ གྱལ༌ལ༌ ཅོས༌ཏེ༌ ཏངས༌པིན༌, ངའེ༌ བང༌གྱུགས༌ ཏང༌ ཚར༌ཏེ༌ ཨིན༌, ཡང༌ ངའེ༌ ཏད༌པ༌ མ༌ཕང༌ང༌ སྟན༌པོ༌ ཡོད༌།
2TI 4:8 ཏ༌ ཀྲང༌པོའེ༌ ཐོར༌ཤོག༌པོ༌ ངའེ༌ ཕིའ༌ སྲུངས༌ཏེ༌ ཡོད༌, ཀ༌བོ༌ ཁྲིམས༌ཅད༌ སལ༌ཁན༌ནི༌ གཙོ༌བོ༌ ཀྲང༌པོའེ༌, ཁོང༌ ལོགས༌ཏེ༌ ཕེབས༌ཤེས༌སི༌ ཞག༌པོའ༌ ངའ༌ སལ༌ལ༌ ཛད༌ཨིན༌། ཡང༌ ཏེ༌ སོལ༌རས༌པོ༌ ང༌རང༌ ཅིག༌པོའ༌ མན༌པ༌, ཁོང༌ ཇལ༌ཅེས༌ལ༌ མ༌སྲན༌ཏྲེ༌ དོད༌པ༌ ཆེན༌མོ༌ བོར༌ཁན༌ ཚང༌མའེ༌ ཕིའང༌།
2TI 4:9 ཏི༌མོ༌ཐི༌, ཇུ༌ཇུ༌ འི༌རུ༌ གྱོགས༌པ༌ ཡོང༌ཅེས༌སི༌ རྩོན༌གྲུས༌ ཅོས༌།
2TI 4:10 སྤུན༌ དེ༌མཱས༌སི༌ འི༌ ཇིག༌རྟེན༌ནི༌ སྐྱིད༌པོ༌གུན༌ལ༌ ཅེས༌པ༌ ཅོ༌ཅེས༌པོའེ༌, ང༌ ཕངས༌ཏེ༌ ཐེ༌ས༌ལོ༌ནི༌ཀའེ༌ གྱལ༌ས༌ སོང༌། ཀརིས༌ཀེན༌ ནི༌ གཱ༌ལ༌ཏི༌ཡ༌ ཡང༌ ཏི༌ཏུས༌ ནི༌ དལ༌མེ༌དིཡ༌ ཡུལ༌གུན༌ལ༌ སོང༌ཏེ༌ མེད༌།
2TI 4:11 ང༌ ཉམ༌པོ༌ ལུ༌ཀ༌ ཅིག༌པོ༌ ཡོད༌། ཁྱོ༌རང༌ ཡོང༌ ཟ༌ནེ༌, མར༌ཀུས༌སའང༌ ཉམ༌པོ༌ ཁྲིད༌ཏེ༌ ཁྱོང༌, ཅིའ༌ཟེར༌ན༌ ངའེ༌ ཞབས༌ཏོག༌གི༌ ལས༌སི༌ ནང༌ང༌ ཁོ༌ མ༌ ཕན༌ཐོགས༌ཅན༌ཞིག༌ ཨིན༌།
2TI 4:12 ཏི༌ཁི༌ཀུས༌ ངའེ༌ ཨེ༌ཕེ༌སས༌སི༌ གྱལ༌ས༌ ལམ༌ཅུགས༌པིན༌།
2TI 4:13 ཁྱོ༌རང༌ ཡོང༌ ཟ༌ནེ༌, ཏྲོ༌འེས༌སི༌ གྲོང༌ཁྱེར༌ལ༌ ཀར༌པུས༌སི༌ ཁང༌པའེ༌ ནང༌ང༌ ངའེ༌ བོར༌ཏེ༌ ཡོད༌ཁན༌ནི༌ ཀོས༌པོ༌ ཁུར༌ཏེ༌ ཁྱོང༌། ངའེ༌ ཤོག༌རིལ༌ ༼ཡང༌ན༌ སྤེ༌ཆ༌༽ ཁུར༌ཏེ༌ ཁྱོང༌, མིག༌སལ༌ལི༌ ར༌མའེ༌ པགས༌པ༌ ཅོས༌ཁན༌གུན༌།
2TI 4:14 ལྕགས༌ལས༌ ཅོ༌ཁན༌ ཨ༌ལེག༌ཟན༌དེར༌རི༌, ང༌ མང༌པོ༌ ནོད༌པ༌ སྐྱལས༌, ཨིན༌ནའང༌ ཁོའེ༌ ཅོ༌ཁན༌གུན༌ལ༌ གཙོ༌བོའེ༌ ཁྲིམས༌ཅད༌ སལ༌ལ༌ ཛད༌ཨིན༌།
2TI 4:15 ཁྱོ༌རང༌ངའང༌ ཁོའེ༌ ཀ༌ནེ༌ ཤང༌ ཅོས༌, ཅིའ༌ཟེར༌ན༌ ང༌ཞའེ༌ ལབ༌ཞ༌གུན༌ལ༌ ཁོའེ༌ མ༌སྲན༌ཏྲེ༌ གྱབ༌གལ༌ ཅོས༌ཏེ༌ ཨིན༌པིན༌།
2TI 4:16 ང༌ ཁྲིམ༌སྤོན༌ནི༌ དུན༌ལ༌ ཏང༌པོ༌རང༌ ཁྲིད༌ཏེ༌ ཁྱེར༌ ཟ༌ནེ༌, སུ༌ཞིག༌གའང༌ ངའ༌ རོགས༌ལ༌ མ༌ཡོངས༌། ཚང༌མའེ༌ ང༌ ཕངས༌ཏེ༌ སོང༌། དཀོན༌མཆོག༌གི༌ ཁོང༌གུན༌ནི༌ཀ༌ སྐྱོན༌ ཀལ༌ལ༌ མ༌ཛད༌ཤིག༌།
2TI 4:17 ཨིན༌ནའང༌ ངའེ༌ གའ༌མོའེ༌ ནས༌ཚུལ༌ གང༌པོ༌ ཤད༌ ཐུབ༌ཏེ༌ ཡ༌ཧུ༌དཱ༌པ༌ མན༌ཁན༌ ཚང༌མའེ༌ ཚོར༌ཅེས༌སི༌ ཕིའ༌, གཙོ༌བོ༌ ང༌ ཉམ༌པོ༌ ཞུགས༌ས༌ ཛད༌ཏེ༌ ངའ༌ ཤེད༌ སལ༌ལ༌ ཛདས༌། ཡང༌ ཁོང༌ངི༌ སིང༌གེ༌གུན༌ལ༌ ཟའ༌ཅུག༌ཅེས༌སི༌ ཆད༌པའེ༌ ཀ༌ནེ༌ ངའ༌ ཐར༌ ཅུག༌ག༌ ཛདས༌།
2TI 4:18 འོ༌ན༌, གཙོ༌བོའེ༌ ངའ༌ ངན༌པའེ༌ སྤུང༌གོལ༌ ཅོ༌ཅེས༌ཅན༌ ཚང༌མའེ༌ ཀ༌ནེ༌ སྐྱོབས༌ཏེ༌ ཁོང༌རང༌ངི༌ ནམ༌ཁའེ༌ གྱལ༌སྲིད༌དི༌ ནང༌ང༌ ངའ༌ ཁམ༌ཟང༌ ཁྲིད༌ཏེ༌ ཁྱེར༌ར༌ ཛད༌ཨིན༌། དཀོན༌མཆོག༌ག༌ ཏུས༌གྱུན༌ནེ༌གྱུན༌ སྲོག༌ ཡོད༌ཁན༌ ཚང༌མའེ༌ ཀ༌ནེ༌ སྤལ༌ ཐོབ༌ཤིག༌, ཨ༌མེན༌།
2TI 4:19 པརི༌སི༌ལ༌ དང༌ ཁོའེ༌ མག༌པ༌ ཨ༌ཀུའི༌ལའ༌ དང༌ སྤུན༌ ཨོ༌ནེས༌སི༌ཕོ༌རུས༌སི༌ ཁང༌པའེ༌ ནང༌ང༌ དུག༌ཁན༌ ཚང༌མ༌ལ༌ ངའེ༌ ཆོགས༌ནེ༌ ཇུ༌ ཟེར༌།
2TI 4:20 ཨེ༌རས༌ཏུས༌ ཀོ༌རིན༌ཐི༌ གྱལ༌ས༌ དུགས༌, ཡང༌ སྤུན༌ ཏྲོ༌ཕི༌མུས༌ལ༌ ཟུ༌མོ༌ ཡོངས༌པ༌, ངའེ༌ མི༌ལི༌ཏུས༌སི༌ གྲོང༌ཁྱེར༌རི༌ ནང༌ང༌ བོར༌ཏེ༌ ཡོངས༌པིན༌།
2TI 4:21 དགུན༌ཏུས༌སི༌ སང༌ སྔུན༌ལ༌, འི༌རུ༌ ཡོང༌ཅེས༌སི༌ རྩོན༌གྲུས༌ སྲན༌ཏྲེ༌ ཅོས༌། སྤུན༌ ཨེའུ༌བུ༌ལུའས༌སི༌ ཁྱོ༌རང༌ང༌ ཇུ༌ ཀལ༌དུག༌, ཡང༌ ཏེན༌ན༌ ཙོགས༌ལ༌ སྤུན༌ པུ༌དེན༌, སྤུན༌ ལི༌ནུས༌, སྤུན༌མོ༌ ཀོལོ༌དི༌ཡ༌ ཡང༌, ཞན༌ སྤུན༌ ཚང༌མེའང༌ ཁྱོ༌རང༌ང༌ ཇུ༌ ཞུ༌རུག༌།
2TI 4:22 གཙོ༌བོ༌ ཁྱོ༌རང༌ངི༌ སེམས༌ཉིད༌ ཉམ༌པོ༌ ཞུགས༌ཤིག༌། ཡང༌ ཁོང༌ངི༌ ཐུག༌རྗེ༌ ཁྱོ༌ཞའ༌ ཚང༌མ༌ ཉམ༌པོ༌ ཞུགས༌ཤིག༌།
TIT 1:1 འི༌ ཨི༌གེ༌བོ༌ ང༌ པ༌འུ༌ལུའི༌ ཆོགས༌ནེ༌ ཨིན༌། ང༌ ནི༌ དཀོན༌མཆོག༌གི༌ ཞབས༌ཏོག༌པ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ ཨིན༌། དཀོན༌མཆོག༌གི༌ ལྡམ༌མ༌ ཛད༌ཁན༌གུན༌ལ༌, མ༌ཤི༌ཀའེ༌ ནང༌ང༌ ཨིད༌ཤེས༌ ཅོ༌ཅེས༌པོ༌ ཤད༌ཅེས༌ དང༌ དཀོན༌མཆོག༌གི༌ ལམ༌མི༌ཀ༌ གྲུལ༌ཨིན༌ མི༌ཚེ༌ ཕུད༌ཅེས༌སི༌ དེན༌བ༌བོ༌, ཤེ༌ཤེས༌ ལབ༌བ༌ལ༌ ང༌ ལམ༌ཅུགས༌།
TIT 1:2 འི༌ དེན༌བ༌བོའེ༌ ཁོང༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌ཁན༌ནི༌ ལོ༌ཁྱེལ༌ ཏང༌ང༌ནོག༌, ཀ༌བོ༌ ཏུས༌གྱུན༌ ཀྲང༌པོ༌ མོལ༌ཁན༌ནི༌ དཀོན༌མཆོག༌གི༌ ཇིག༌རྟེན༌ ཛད༌དི༌ སང༌ སྔུན༌ལ༌ ཞལ༌ཆད༌ ཛད༌ཏེ༌ ཨིན༌པིན༌།
TIT 1:3 ཏ༌ ལྡམ༌མ༌ ཛད༌ཁན༌ནི༌ ཏུས༌པོའེ༌ཀ༌, ངའེ༌ ཚང༌མ༌ལ༌ ཆོས༌ཤད༌ཅེས༌ གྱུད༌ཏེ༌ ཁོང༌ངི༌ འི༌ ལོན༌བོ༌ སྔོན༌ ཅུག༌ཏེ༌ ཨིན༌ནོག༌། དཀོན༌མཆོག༌ ང༌དང༌ངི༌ སྐྱབ༌གོན༌ནི༌ བཀའ༌ སལ༌ཁན༌ ནང༌ཞིན༌ལ༌, ཁོང༌རང༌ངི༌ ཕིའ༌ འི༌ ལས༌པོ༌ ངའེ༌ ལག༌ག༌ སྟད༌ད༌ ཛདས༌།
TIT 1:4 ང༌དང༌གུན༌ནི༌ ཏད༌པའེ༌ ནང༌ང༌, ངའེ༌ དེན༌བའེ༌ བུ༌ཚ༌ ཙོགས༌ ཨིན༌ཁན༌ནི༌ ཅེས༌པའེ༌ སྤུན༌, ཏི༌ཏུས༌ལ༌ བྲིའད༌། དཀོན༌མཆོག༌ ཡབ༌ དང༌ ང༌ཏི༌ སྐྱབ༌གོན༌ མ༌ཤི༌ཀ༌ ཡེ༌ཤུ༌ ཉིས༌ཀོའེ༌ ཁྱོ༌རང༌ང༌ ཐུག༌རྗེ༌ དང༌ ཞི༌དེ༌ སལ༌ཤིག༌།
TIT 1:5 ཁྱོ༌རང༌ངི༌ ང༌དང༌གུན༌ནི༌ ལས༌གུན༌ གྲུབ༌ཅུག༌ཅེས༌ དང༌ ངའེ༌ ལབ༌ཞ༌ ནང༌ཞིན༌, གྲོང༌ཁྱེར༌ རེ༌རེའེ༌ ནང༌ང༌ འུ༌སྐྱོང༌གུན༌ སྐོ༌ཅེས༌སི༌ གྱུན༌ཚན༌བོའེ༌ ཕིའ༌, ངའེ༌ ཁྱོ༌རང༌ ཀརིཏྲ༌ཏྲི༌ ནང༌ང༌ བོར༌པིན༌།
TIT 1:6 འུ༌སྐྱོང༌གུན༌ སྐྱོན༌མེད༌ དང༌ ཁོ༌རང༌ངི༌ ན༌མ༌ ཉམ༌པོ༌ ཨིད༌ཤེས༌ཅན༌ ཡོང༌གོས༌། ཡང༌ ཁོང༌ངི༌ ཕྲུ༌གུ༌གུན༌ ཏད༌པ༌ཅན༌, ཡང༌ སྕོད༌ལམ༌ ངན༌པ༌ དང༌ ཁའ༌མི༌ཉན༌ ཡོད༌ཁན༌ནི༌ སྐྱོན༌ མ༌ཕོག༌ཁན༌ རིག༌ ཡོང༌གོས༌།
TIT 1:7 དཀོན༌མཆོག༌གི༌ ཆག༌ལས༌གུན༌ འུ༌སྐྱོང༌གུན༌ནི༌ ལག༌ག༌ སྟད༌ པ༌སང༌, ཁོང༌ངི༌ མི༌ཚེ༌བོ༌ སྐྱོན༌མེད༌ཁན༌ཞིག༌ ཡོང༌གོས༌། ཁོང༌ ཕོ༌སོ༌ཅན༌ ཡ༌ སྲོ༌དུང༌ཅན༌, ཁོང༌ ཆང༌ མང༌པོ༌ ཐུང༌ཁན༌, སྲོའེ༌ ནང༌ང༌ ནོད༌སྐྱལ༌ཁན༌ ཡ༌ པེ༌ནེ༌ ཕིའ༌ དོད༌པ༌ཅན༌ ཡོང༌ མ༌གོས༌།
TIT 1:8 ཐད༌པོ༌ ཉམ༌པོ༌ ཁོའེ༌ ཁང༌པ༌ ཡོང༌ཁན༌གུན༌ལ༌ གའ༌སུས༌ ཞུ༌ཁན༌, ཡང༌ ཟང༌པོ༌ ལས༌གུན༌ལ༌ ཁོའེ༌ ཅེས༌པ༌ ཅོ༌གོས༌། ཁོའེ༌ མི༌ཚེ༌བོ༌ ཤེས༌རབས༌སི༌ ནང༌ང༌ ཕུད༌གོས༌, ཡང༌ ཐག༌ཅད༌གུན༌ ཆོག༌རིས༌ མེད༌པ༌ ཅོ༌གོས༌། ཁོའེ༌ མི༌ཚེ༌བོ༌ ཏམ༌པ༌ དང༌ རང༌སེམས༌ ཅུན༌ཏེ༌ བོར༌ཉན༌ཁན༌ཞིག༌ ཡོང༌གོས༌།
TIT 1:9 ལབ༌ཁན༌ནི༌ ཨིད༌ཤེས༌ཅན༌ནི༌ ལོན༌ནི༌ཀ༌ ཁོའ༌ མ༌སྲན༌ཏྲེ༌ ཏད༌པ༌ ཡོང༌གོས༌, ཏེ༌ནེ༌ ཁོའེ༌ ཞན༌མ༌གུན༌ལ༌ དེན༌བའེ༌ ལབ༌ཞ༌ ཉམ༌པོ༌ སྤོས༌པ༌ སྐྱེ༌ཅུག༌ ཉན༌ཨིན༌, ཡང༌ ཏེ༌བོའེ༌ གྱབ༌གལ༌ ཅོ༌ཁན༌གུན༌ལ༌ ནོར༌ཏེ༌ ཨིན༌ཁན༌བོ༌ སྟན༌ ཐུབ༌ཨིན༌།
TIT 1:10 ངོ༌ལོག༌ ཅོ༌ཁན༌ནི༌ མི༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཀ༌གུན༌ ཕན༌མི༌ཐོགས༌སི༌ སྤེ༌རའེ༌ ནང༌ང༌ དྲེས༌ཏེ༌ ཞན༌མ༌གུན༌ལ༌ གོབ༌སྐོར༌རད༌, མིག༌སལ༌ལི༌ ཐར༌པ༌ ཐོབ༌ཅེས༌ལ༌, བུ༌ཚ༌གུན༌ལ༌ སུན༌ནད༌ ཅོ༌གོས༌ ཟེར༌ཁན༌གུན༌།
TIT 1:11 ཁྱོ༌རང༌ངི༌ ཁོང༌གུན༌ལ༌ ཏེ༌ཙོགས༌ ཟེར༌ཅེས༌ནེ༌ སྒག༌གོས༌, ཅིའ༌ཟེར༌ན༌ ཁོང༌གུན༌ནི༌ ཟུས༌མའེ༌ ལབ༌ཞ༌གུན༌ནི༌, ནང༌ཚངས༌ གང༌པོ༌ དེན༌བའེ༌ ལབ༌ཞ༌གུན༌ནེ༌ ཐག༌རིང༌ང༌ ཁྲིད༌ཏེ༌ ཁྱེར༌ར༌ནོག༌། ཡང༌ ཁོང༌གུན༌ནི༌ ཏེ༌བོ༌ ཁོ༌རང༌གུན༌ནི༌ ཕན༌ཐོགས༌སི༌ ཕིའ༌ ཅོའ༌ནོག༌།
TIT 1:12 འི༌བོ༌ ནི༌, ཁོ༌རང༌གུན༌ནི༌ ཕྲོ༌ནེ༌ ལུང༌སྟོན༌པ༌ ཅིག༌གི༌, “ཀརིཏྲ༌པ༌གུན༌ ཟུན༌ཇན༌, ཁྱི༌ ཙོགས༌ དང༌ ལས༌མི༌ལམ༌ གྲོད༌ནབས༌ཅན༌” ཟེརས༌ཏེ༌ ཨིན༌ནོག༌།
TIT 1:13 ཁོའེ༌ ཟེར༌ཁན༌བོ༌ ཀྲང༌པོ༌ ཨིན༌པ༌, ཏད༌པའེ༌ ནང༌ང༌ སྟན༌པོ༌ ལུས༌ཤེས༌སི༌ ཕིའ༌, ཁྱོ༌རང༌ངི༌ ཏེ༌ཙོགས༌སི༌ སྤུན༌གུན༌ལ༌ མ༌སྲན༌ཏྲེ༌ ཁའ༌སྐྱེ༌ཏེ༌ སྐྱོང༌གོས༌།
TIT 1:14 ཁོང༌གུན༌ནི༌, ཡ༌ཧུ༌དཱ༌པའེ༌ ཟུས༌མའེ༌ རུངས༌ དང༌ ཀྲང༌པོའ༌ གྱབ༌ ལོགས༌ཏེ༌ ཆའ༌ཁན༌གུན༌ནི༌ བཀའ༌གུན༌ལ༌ ཉན༌ མ༌གོས༌།
TIT 1:15 སེམས༌ ལག༌མོ༌ ཡོད༌ཁན༌གུན༌ནི༌ ཕིའ༌ ཅི༌ཚང༌མ༌ རྩང༌མ༌ ཨིན༌ནོག༌། ཨིན༌ནའང༌ སྙིང༌ངི༌ ནང༌ང༌ རྩང༌མ༌ མེད༌ཁན༌ དང༌, ཡེ༌ཤུའི༌ཀ༌ ཏད༌པ༌ མ༌ཅོ༌ཁན༌གུན༌ནི༌ ཕིའ༌ ཅི༌ཤིག༌གའང༌ རྩང༌མ༌ མེད༌པ༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ སམ༌ཚུལ༌ དང༌ སེམས༌ གུན༌ ངན༌པ༌ ཡོད༌ཏེ༌ ཨིན༌ནོག༌།
TIT 1:16 ཏེ༌ཙོགས༌སི༌ མི༌གུན༌ནི༌ ཟེར༌ར༌ནོག༌, ཁོང༌གུན༌ནི༌ དཀོན༌མཆོག༌ ཤེས༌སད༌། ཨིན༌ནའང༌ ཁོང༌གུན༌ནི༌ ལས༌གུན༌ ཅོ༌ ཚུལ༌ལ༌ ལྟ༌ན༌, དཀོན༌མཆོག༌གི༌ སྟིང༌རང༌ནེ༌ མ༌གྲུལ༌ཁན༌བོ༌, ཤེས༌དུག༌། ཁོང༌གུན༌ ནཕ༌རད༌ཅན༌ དང༌ ཁའ༌མི༌ཉན༌ ཡང༌ ཁོང༌གུན༌ལ༌ ཅའང༌ ལས༌ ཟང༌པོ༌ ཅོ༌ཉན༌ན༌ མ༌ནོག༌།
TIT 2:1 ཨིན༌ནའང༌ ཁྱོ༌རང༌ངི༌ དེན༌བའེ༌ ལབ༌ཞ༌ ནང༌ཞིན༌ལ༌ ལབ༌གོས༌།
TIT 2:2 ལོ༌ ལྔབ༌ཅུའི༌ སང༌ མང༌ང༌ ཆའ༌ཁན༌ནི༌ བུ༌ཚ༌གུན༌ལ༌ རང༌སེམས༌ ཅུན༌ཅེས༌, རྩི༌ཝའེ༌ འོས༌པ༌ཅན༌ གྱུར༌ཅེས༌ དང༌ མི༌ཚེ༌བོ༌ ཤེས༌རབས༌ཅན༌ཞིག༌ ཕུད༌ཅེས༌པོ༌ ལོབ༌། ཁོང༌གུན༌ནི༌ ཏད༌པ༌བོ༌ དཀོན༌མཆོག༌གི༌ དེན༌བའེ༌ཀ༌ སྟན༌པོ༌ ཡང༌ ཅེས༌པ༌ དང༌ ཟོད༌པ༌ ཉིས༌ཀོའེ༌ གངས༌ཏེ༌ ཡོང༌གོས༌།
TIT 2:3 ཏེན༌ན༌ ཙོགས༌ལ༌ ལོ༌ ལྔབ༌ཅུའི༌ སང༌ མང༌ང༌ ཆའ༌ཁན༌ནི༌ བུ༌མོ༌གུན༌ལ༌, དཀོན༌མཆོག༌ག༌ རྩི༌ཝ༌ ཁྱོང༌ཁན༌ནི༌ མི༌ཚེ༌ཞིག༌ ཕུད༌ཅེས༌ ལོབ༌། ཁོང༌གུན༌ ཞན༌མ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཁན༌, ཡ༌ ཆང༌ མང༌པོ༌ ཐུང༌ཁན༌ཞིག༌ ཡོང༌ མ༌གོས༌། ཨིན༌ནའང༌ ཁོང༌གུན༌ནི༌ ཟང༌པོ༌ ཨིན༌ཁན༌བོ༌ ཞན༌མ༌གུན༌ལ༌ ལབ༌གོ༌ཤེས༌ ཨིན༌ནོག༌།
TIT 2:4 ཏེ༌ བུ༌མོ༌གུན༌ནི༌ བུ༌མོ༌ ན༌ཆུང༌གུན༌ལ༌ རང༌ངི༌ མག༌པ༌ དང༌ ཕྲུ༌གུ༌ གུན༌ལ༌, ཅམས༌པ༌ ཅོ༌ཅེས༌སི༌ ནང༌ང༌ སྤོས༌པ༌ ཏང༌གོས༌།
TIT 2:5 མ༌ཚད༌ ཁོང༌གུན༌ རང༌སེམས༌ ཅུན༌ཉན༌ཁན༌ དང༌ སེམས༌ ལག༌མོ༌, ནང༌ཚངས༌སི༌ སྟ༌སྟོག༌ ཅོ༌ཅེས༌, ལས༌ ཟང༌པོ༌ ཅོ༌ཅེས༌, ཡང༌ རང༌དང༌རང༌ ཁོ༌རང༌གུན༌ནི༌ མག༌པའེ༌ ཝང༌ངི༌ ཡོག༌ག༌ བོར༌ཅེས༌ གུན༌ ལབ༌གོས༌། ཏེ༌ནེ༌ དཀོན༌མཆོག༌གི༌ བཀའ༌, སུ༌ཞིག༌གིའང༌ ངན༌པ༌ ཟེར༌ མི༌ཉན༌།
TIT 2:6 ཏེན༌ན༌ ཙོགས༌ལ༌ ཁྱོག༌ཏོང༌གུན༌ནའང༌, རང༌སེམས༌ ཅུན༌ཏེ༌ བོར༌ཅེས༌ལ༌ སྤོས༌པ༌ ཏོང༌།
TIT 2:7 ཡང༌ ཁྱོ༌རང༌ངིའང༌ ལས༌ ཟང༌པོ༌གུན༌ ཅོས༌ཏེ༌ ཁོང༌གུན༌ནི༌ ཕིའ༌ སྤེ༌ཞིག༌ གྱུར༌གོས༌། ཁྱོ༌རང༌ངི༌ ལབ༌ཞ༌བོ༌ ཀྲང༌པོ༌ དང༌ སེམས༌སི༌ ཐིལ༌ནེ༌ ཡོང༌ཁན༌བོ༌ སྟོན༌།
TIT 2:8 ཁྱོ༌རང༌ངི༌ ལབ༌ཁན༌བོའ༌ སྐྱོན༌རྗོད༌ མི༌ཡོང༌ཅེས༌སི༌ ཕིའ༌, དེན༌བ༌བོ༌ ལོབ༌། ཏེ༌ནེ༌ ང༌དང༌གུན༌ལ༌ གྱབ༌གལ༌ ཅོ༌ཁན༌གུན༌ ཁྲེལ༌བ༌ སོང༌ཏེ༌ ང༌དང༌གུན༌ལ༌ ཅའང༌ ངན༌པ༌ ཟེར༌ མི༌ཉན༌།
TIT 2:9 ཏད༌པ༌ཅན༌ ཚེ༌ཡོག༌གུན༌ནི༌ ཏུས༌གྱུན༌ ཁོ༌རང༌གུན༌ནི༌, སྤོན༌བོའེ༌ ཁའ༌ཉན༌ཏེ༌ ཁོང༌གུན༌ ཐད༌ཅུག༌ཅེས༌ལ༌ རྩོན༌གྲུས༌ ཅོ༌ཤིག༌། ཁོང༌གུན༌ལ༌ ལན༌ལོག༌ མ༌ཏང༌ཤིག༌,
TIT 2:10 ཡ༌ རྐུ༌ མ༌རྐུ༌, ཨིན༌ནའང༌ ཁོ༌རང༌གུན༌ ཅི༌ས༌ཐོག༌ནེ༌ ཨིད༌ཤེས༌ཅན༌ དང༌ ཟང༌པོ༌ ཨིན༌ཁན༌བོ༌ སྟན༌གོས༌། ཏེ༌ནེ༌ ཁོང༌གུན༌ལ༌ དཀོན༌མཆོག༌ ང༌དང༌གུན༌ནི༌ སྐྱབ༌གོན༌ནི༌ ལབ༌ཞ༌ ཧ༌གོ༌ཅེས༌སི༌ དོད༌པ༌ སྐྱེ༌ཅུག༌ཨིན༌།
TIT 2:11 མི༌ཚང༌མ༌ལ༌ ཐར༌པའེ༌ ལམ༌ སལ༌ལ༌ ཛད༌ཏེ༌ དཀོན༌མཆོག༌གི༌ ཁོང༌རང༌ངི༌ ཐུག༌རྗེ༌བོ༌ སྔོན༌ ཅུག༌ག༌ ཛདས༌།
TIT 2:12 ཡང༌ ང༌དང༌གུན༌ལ༌ “ངན༌པའེ༌ མི༌ཚེ༌ ཕུད༌ཅེས༌ དང༌, སྡིག༌པའེ༌ དོད༌པ༌གུན༌ལ༌ གྱབ༌གྱུར༌གོས༌” ཟེར༌ཏེ༌ ཤད༌ད༌ ཛདས༌། ང༌དང༌གུན༌ནི༌ འི༌ ཇིག༌རྟེན༌ ངན༌པའེ༌ ནང༌ང༌ རང༌སེམས༌ ཅུན༌ཉན༌ཁན༌, ཀྲང༌པོ༌ དང༌, དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ནི༌ མི༌ཚེ༌ཞིག༌ ཕུད༌གོ༌ཤེས༌ ཨིན༌ནོག༌།
TIT 2:13 འི༌ཙོགས༌སི༌ མི༌ཚེ༌ ཕུད༌ ཟ༌ནེ༌, རེ༌ཝ༌ ཉམ༌པོ༌ ང༌དང༌གུན༌ནི༌ ཀུན༌ཝང༌ དཀོན༌མཆོག༌ དང༌ སྐྱབ༌གོན༌ ཡེ༌ཤུ༌ མ༌ཤི༌ཀའེ༌ ཟིར༌རྗིད༌ སྔོན༌ཅེས༌ཅན༌ནི༌ ཏེ༌ ཧ༌ལས༌ཤེས༌སི༌ ཞག༌པོའ༌ སྲུང༌ཨིན༌།
TIT 2:14 ང༌དང༌གུན༌ རྩང༌མ༌ ཅོ༌ཅེས༌ དང༌ སྡིག༌པའེ༌ རིགས༌ ཚང༌མ༌ནེ༌ ཐར༌ཅུག༌ཅེས༌ མ༌ཚད༌, སྙིང༌ནེ༌ ལས༌ ཟང༌པོ༌ ཅོ༌ཅེས༌ལ༌ རིངས༌ཨིན༌ ཡོད༌ཁན༌ནི༌ ཁོང༌རང༌ངི༌ མི༌གུན༌ ཅོ༌ཅེས༌སི༌ ཕིའ༌ ཁོང༌ངི༌ ཁོང༌རང༌ངི༌ སྲོག༌པོ༌ སལ༌ལ༌ ཛདས༌།
TIT 2:15 ཁྱོ༌རང༌ངི༌ ཏེ༌གུན༌, ཏད༌པ༌ཅན༌གུན༌ལ༌ ལབས༌ཏེ༌ ལག༌ལེན༌ནི༌ ནང༌ང༌ ཁྱོང༌ཅེས༌ལ༌ སྤོས༌པ༌ ཏོང༌། ཁོང༌གུན༌ནི༌ འི༌ ལབ༌ཞ༌གུན༌ནི༌ གྱབ༌གལ༌ ཅོ༌ ཟ༌ནེ༌, ཁྱོ༌རང༌ང༌ ཁོང༌གུན༌ལ༌ སྤོས༌པ༌ ཏངས༌ཏེ༌ སྐྱོང༌ཅེས༌སི༌ ཝང༌ཆ༌ ཡོད༌ཏེ༌ ཨིན༌ནོག༌། ཁྱོ༌རང༌ངི༌ ལབ༌ཁན༌གུན༌ལ༌ སུ༌ཞིག༌གའང༌ སྣང༌མེད༌ ཅོ༌ མ༌ཅུག༌།
TIT 3:1 ཏད༌པ༌ཅན༌གུན༌ལ༌ ཁོ༌རང༌གུན༌ ཝང༌སྲུལ༌པ༌ དང༌ ཝང༌ ཡོད༌ཁན༌གུན༌ནི༌ ལག༌ག༌ སྟད༌ཅེས༌, ཁའ༌ཉན༌ཅེས༌, དང༌ ཏུས༌གྱུན༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ གྲལ༌གྲིག༌ ཅོས༌ཏེ༌ དུག༌ཅེས༌ལ༌, ཨིད༌ཏུ༌ སྐུལ༌།
TIT 3:2 ཁོང༌གུན༌ནི༌ ཞན༌མའེ༌ སྕོད༌པའེ༌ སྐོར༌ལ༌ ངན༌པ༌ མ༌ཟེར༌ར༌, ཛིང༌མོ༌ ཏང༌ཅེས༌ནེ༌ ཐག༌རིང༌ང༌ དུག༌གོས༌། ཨིན༌ནའང༌ ཁོང༌གུན༌ ཞན༌མའེ༌ སྒོས༌དོམ༌གུན༌ སམ༌ཁན༌ ཡང༌ དེན༌བའེ༌ པས༌མོ༌ ཨིན༌ཁན༌བོ༌ ཚང༌མ༌ལ༌ སྟན༌ཁན༌ རིག༌ ཡོང༌གོས༌།
TIT 3:3 ཏུས༌ཤིག༌ག༌ ང༌དང༌གུན༌ནའང༌ སམ༌བ༌ མེད༌ཁན༌ དང༌ ཁའ༌མི༌ཉན༌ རིག༌ ཡོད༌པིན༌། ཞན༌མ༌གུན༌ནི༌ ང༌དང༌གུན༌ ལམ༌ ནོར༌སའི༌ཀ༌ ཁྲིདས༌, ཡང༌ དོད༌པ༌ ངན༌པ༌ མང༌པོ༌ཞིག༌ དང༌, ཇིག༌རྟེན༌ནི༌ སྐྱིད༌པོ༌གུན༌ནི༌ ཚེ༌ཡོག༌ གྱུར༌། ང༌དང༌གུན༌ནི༌ མི༌ཚེ༌བོའེ༌ ནང༌ང༌ ངན༌པ༌ དང༌ ཚིག༌ཅེས༌ གངས༌ཏེ༌, ཞན༌མ༌གུན༌ནི༌ ང༌དང༌གུན༌ལ༌ ནཕ༌རད༌ ཡང༌ ང༌དང༌གུན༌ནིའང༌ ཅིག༌ དང༌ ཅིག༌ག༌ ནཕ༌རད༌ ཅོའད༌པིན༌།
TIT 3:4 ཨིན༌ནའང༌ “དཀོན༌མཆོག༌ ང༌དང༌ངི༌ སྐྱབ༌གོན༌ནི༌ ཐུག༌རྗེ༌ དང༌ ཅེས༌པ༌ གུན༌ སྔོན༌ན༌ ཛད༌ད༌དང༌,
TIT 3:5 ཁོང༌ངི༌ ང༌དང༌གུན༌ སྐྱོབ༌བ༌ ཛདས༌། ཏེ༌བོ༌ ང༌དང༌གུན༌ནི༌ ལས༌ ཀྲང༌པོ༌ ཅོ༌ཅེས༌པོའེ༌ ཞས༌ཏེ༌ མན༌པ༌, ཁོང༌ངི༌ སྙིང༌རྗེའེ༌ ཞས༌ཏེ༌ ཨིན༌ནོག༌། ཁོང༌ངི༌ ང༌དང༌ངི༌ སྡིག༌པ༌གུན༌ ཁྲུའ༌ ཛདས༌, ཡང༌ ཏམ༌པའེ༌ ཐུག༌ཉིད༌ གྱུད༌ཏེ༌ ང༌དང༌གུན༌ ཡང༌སྐྱར༌ སྐྱེས༌ཏེ༌, མི༌ཚེ༌ སོ༌མ༌ཞིག༌ སལས༌།
TIT 3:6 ཡེ༌ཤུ༌ མ༌ཤི༌ཀ༌ ང༌དང༌གུན༌ནི༌ སྐྱབ༌གོན༌ གྱུད༌ཏེ༌ ཏམ༌པའེ༌ ཐུག༌ཉིད༌བོ༌ ཁོང༌ངི༌ སྙིང༌ ཕེས༌ཏེ༌ ང༌དང༌གུན༌ནི༌ཀ༌ ལུག༌ག༌ ཛདས༌།
TIT 3:7 ཁོང༌ངི༌ ཐུག༌རྗེ༌ ཞས༌ཏེ༌ ང༌དང༌གུན༌ ཀྲང༌པོ༌ ཐེའ༌ ཛདས༌ པ༌སང༌, ང༌དང༌གུན༌ལ༌ དཀོན༌མཆོག༌གི༌ ཕྲུ༌གུ༌ གྱུར༌ཏེ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ རེ༌ཝ༌ ཡོད༌ཏེ༌ ཨིན༌ནོག༌།”
TIT 3:8 ཏེ༌ ཞལ༌ཏ༌གུན༌ དེན༌བའེ༌ ལབ༌ཞ༌ ཨིན༌ནོག༌, ཡང༌ ངའེ༌ དོད༌པ༌ ནི༌, ཏད༌པ༌ཅན༌ ཚང༌མའེ༌ ཏུས༌པོ༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ ཕུད༌ཅེས༌སི༌ ཕིའ༌, ཁྱོ༌རང༌ངི༌ ཏེ༌ ལབ༌ཞ༌གུན༌ ཁོང༌གུན༌ནི༌ ནང༌ང༌ ཡོང༌གོ༌ཤེས༌པོ༌ ཏན༌ཏན༌ ཅོ༌ཅེས༌པོ༌ ཨིན༌། ཏེ༌ ལབ༌ཞ༌གུན༌ ཚང༌མའེ༌ ཕིའ༌ ཟང༌པོ༌ དང༌ ཕན༌ཐོགས༌ཅན༌ཞིག༌ ཨིན༌ནོག༌།
TIT 3:9 ཁྱོ༌རང༌ ཁོང༌གུན༌ནི༌ མིར༌གྱུད༌དི༌ མིང༌ཐོའེ༌ སྐོར༌ལ༌ སམ༌བ༌ མེད༌ཁན༌ནི༌ གྲབས༌སི༌ ནང༌ང༌ མ༌དྲེས༌, ཡ༌ ཡ༌ཧུ༌དཱ༌པའེ༌ ཁྲིམས༌གུན༌ སྲུང༌ཅེས༌སི༌ སྐོར༌ལ༌, ཛིང༌མོ༌ དང༌ ནོལ༌ མ༌ནོལ༌། ཏེ༌གུན༌ནི༌ ཕན༌མི༌ཐོགས༌ དང༌ ཏུས༌ གོད༌ལ༌ ཆ༌ཅེས༌ མ༌ནེ༌ ཅའང༌ མ༌ནོག༌།
TIT 3:10 ཀལ༌ཏེས༌ མི༌གུན༌ནི༌ ཁྱོ༌རང༌གུན༌ ཕེ༌ཅེས༌ ཅོ༌ན༌, ལྡམ༌ཞག༌ ཏོང༌ཤིག༌ ཡང༌ ལན༌ ཉིས༌པའང༌, ཏེ༌བོའེ༌ སྟིང༌ནེ༌ ཀལ༌ཏེས༌ སེམས༌ མ༌གྱུར༌ན༌, ཁོང༌གུན༌ ཉམ༌པོ༌ བྲེལ༌ མ༌བོར༌ཤིག༌།
TIT 3:11 ཏེ༌ཙོགས༌སི༌ མི༌གུན༌ དཀོན༌མཆོག༌གི༌ དེན༌བ༌ གྱབ༌ལོག༌ཁན༌ ཡང༌ ཁོ༌རང༌གུན༌ནི༌ སྡིག༌པའེ༌ ཁོ༌རང༌གུན༌ལ༌ སྐྱོན༌ ཀལ༌ལ༌ནོག༌།
TIT 3:12 ངའེ༌ སྤུན༌, ཨར༌ཏི༌མིས༌ ཡ༌ ཏི༌ཁི༌ཀུས༌ ཉིས༌ཀོའེ༌ ནང༌ནེ༌ ཅིག༌པོ༌ ཁྱོ༌རང༌ངི༌ཀ༌ ཀལ༌ལ༌ཅིག༌, ནི༌ཀོ༌པོ༌ལིས༌ གྱལ༌སའེ༌ ནང༌ང༌ ཁྱོ༌རང༌ ངའ༌ ཐུག༌ག༌ ཡོང༌ཅེས༌སི༌ རྩོན༌གྲུས༌ ཅོས༌, ཅིའ༌ཟེར༌ན༌ ང༌ ཏེ༌རུ༌ དགུན༌ལ༌ དུག༌ཅེས༌ ཐག༌ཅད༌ཏེ༌ ཨིན༌།
TIT 3:13 ངའེ༌ སྤུན༌ ཝ༌ཀྱིལ༌ ཟེ༌ནཱས༌ ཡང༌ སྤུན༌ ཨ༌པོ༌ལོས༌ གུན༌ བེས༌ལ༌ ཆ༌ཅེས༌སི༌ ནང༌ང༌ ཁྱོ༌རང༌ངི༌ ཅི༌ས༌ཐོག༌ནེ༌ རོགས༌ ཅོ༌ཅེས༌སི༌ རྩོན༌གྲུས༌ ཅོས༌། ཁོང༌གུན༌ལ༌ སྒོས༌དོམ༌ ཡོད༌ཁན༌ ཚང༌མ༌ ཏངས༌ཏེ༌ དུག༌ག༌ ལྟོས༌།
TIT 3:14 ང༌དང༌ངི༌ སྤུན༌གུན༌ནི༌ ཞན༌མ༌ ཏད༌པ༌ཅན༌གུན༌ནི༌ དེན༌བའེ༌ སྒོས༌དོམ༌གུན༌ རིགས༌ཏེ༌ ཁོ༌རང༌གུན༌ནི༌ ཏུས༌པོ༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ ཕུད༌ཅེས༌ ལོབ༌གོས༌། ཏེ༌ནེ༌ ཁོང༌གུན༌ནི༌, ཏོན༌མེད༌དི༌ མི༌ཚེ༌ཞིག༌ མི༌ཕུད༌།
TIT 3:15 འི༌རུ༌ ཡོད༌ཁན༌ ཚང༌མའེ༌ ཇུ༌ ཞུ༌རུག༌། ཇུ༌ཇུ༌ ཏེ༌རུ༌ ཡོད༌ཁན༌ནི༌ ཏད༌པ༌ཅན༌, ང༌དང༌གུན༌ལ༌ ཅེས༌པ༌ ཅོ༌ཁན༌གུན༌ལ༌ ངའེ༌ ཆོགས༌ནེ༌ ཇུ༌ ཞུས༌། དཀོན༌མཆོག༌གི༌ ཐུག༌རྗེ༌བོ༌ ཁྱོ༌ཞའ༌ ཚང༌མ༌ལ༌ སལ༌ཤིག༌།
PHM 1:1 འི༌ ཨི༌གེ༌བོ༌ མ༌ཤི༌ཀ༌ ཡེ༌ཤུའི༌ ཏོན༌ལ༌ ཙོན༌པ༌ པ༌འུ༌ལུ༌ དང༌ ང༌དང༌ངི༌ སྤུན༌ ཏི༌མོ༌ཐིའི༌ ཆོགས༌ནེ༌ ཨིན༌། ངའེ༌ ང༌ཞའ༌ ཉམ༌པོ༌ ལས༌ ཅོ༌ཁན༌ ཕྲོ༌པ༌ ཅེས༌པ༌ ཕི༌ལི༌མོན༌ལ༌ བྲིའད༌།
PHM 1:2 ཡང༌ ང༌ཞའེ༌ སྤུན༌མོ༌ ཨ༌ཕིའ༌, མ༌ཤི༌ཀའེ༌ ཕིའ༌ མག༌མི༌ ཕྲོ༌པ༌ སྤུན༌ ཨར༌ཀིབ༌པུས༌ དང༌ ཁྱོ༌རང༌ངི༌ ཁང༌པའེ༌ ནང༌ང༌ ཛོམ༌ཨིན༌ ཡོད༌ཁན༌ནི༌ ཆོས༌ཚོགས༌ལའང༌ བྲིའད༌།
PHM 1:3 ང༌ཞའེ༌ མོས༌ལམ༌ ཞུའད༌, དཀོན༌མཆོག༌ ང༌དང༌གུན༌ནི༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀ༌ གུན༌ནི༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌།
PHM 1:4 ཕི༌ལི༌མོན༌ ཁྱོ༌རང༌ངི༌ ཕིའ༌ མོས༌ལམ༌ ཞུ༌ ཟ༌ནེ༌, ངའེ༌ ཏུས༌གྱུན༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌,
PHM 1:5 ཅིའ༌ཟེར༌ན༌ ཁྱོ༌རང༌ངི༌ གཙོ༌བོ༌ ཡེ༌ཤུའི༌ ནང༌ང༌ ཏད༌པ༌ དང༌, དཀོན༌མཆོག༌གི༌ མི༌ ཏམ༌པ༌ ཚང༌མའེ༌ ཕིའ༌ ཅེས༌པ༌ ཡོད༌ཁན༌བོའེ༌ སྐོར༌ལ༌ ཚོར༌།
PHM 1:6 མ༌ཤི༌ཀའེ༌ ང༌དང༌གུན༌ལ༌ སལ༌ལ༌ ཛད༌ཁན༌ ཅིན༌ལབས༌ ཚང༌མ༌ ཁྱོ༌རང༌ང༌ སྙིང༌ངི༌ ཐིལ༌ནེ༌ ཧ༌གོ༌ཏེ༌, ཞན༌མ༌གུན༌ ཉམ༌པོ༌ ཁྱོ༌རང༌ངི༌ ཏད༌པ༌བོ༌ བགོ༌ཉན༌ཅེས༌ལ༌ ངའེ༌ མོས༌ལམ༌ ཕུལ༌ལད༌།
PHM 1:7 ཁྱོ༌རང༌ངི༌ ཅེས༌པའེ༌, ངའ༌ སྤོས༌པ༌ དང༌ གའ༌མོ༌ སྲན༌ཏྲེ༌ ཏངས༌, ཅིའ༌ཟེར༌ན༌ ངའེ༌ སྤུན༌, ཁྱོ༌རང༌ངི༌ དཀོན༌མཆོག༌གི༌ ཏམ༌པའེ༌ མི༌གུན༌ནི༌ སྙིང༌ང༌ སྤོས༌པ༌ ཏང༌ཏེ༌ ཨིན༌ནོག༌།
PHM 1:8 ཏེ༌བོའེ༌ཕིའ༌ ཞན༌ཏ༌ མ༌ཤི༌ཀའེ༌ ནང༌ང༌ ངའེ༌ ཁྱོ༌རང༌ང༌ འོས༌པ༌བོ༌ ཅོས༌ ཟེར༌ཏེ༌ བཀའ༌ཏང༌ཅེས༌སི༌ ཝང༌ ཡོད༌ནའང༌,
PHM 1:9 ང༌དང༌ངི༌ ཅེས༌པའེ༌ ཞས༌ཏེ༌ ངའེ༌ ཁྱོ༌རང༌ང༌ འི༌ ཞུ༌ཝ༌བོ༌ ཨིན༌། ང༌ པ༌འུ༌ལུ༌ མི༌རྒན༌ཞིག༌ དང༌ མ༌ཤི༌ཀ༌ ཡེ༌ཤུའི༌ ཞབས༌ཏོག༌ ཞུ༌ཅེས༌པོའེ༌, དག༌ས༌ ཙོན༌པ༌ཞིག༌ ཨིན༌པ༌,
PHM 1:10 ཁྱོ༌རང༌ང༌, ངའེ༌ བུ༌ཚ༌ ཙོགས༌ ཨོ༌ནེ༌སི༌མུས༌སི༌ ཏོན༌ལ༌ ཞུ༌ཝ༌ ཞུའད༌། འི༌རུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌, ཏད༌པའེ༌ ནང༌ང༌ ང༌ ཁོའེ༌ ཨ༌བ༌ གྱུར༌།
PHM 1:11 སྔུན༌ལ༌ ཨོ༌ནེ༌སི༌མུས༌ ཁྱོ༌རང༌ངི༌ ཕིའ༌ ཕན༌མི༌ཐོགས༌ཤིག༌ ཡོད༌པིན༌, ཨིན༌ནའང༌ ཏ༌ དག༌ས༌ ང༌དང༌ ཉིས༌ཀོའེ༌ ཏོན༌ལ༌, ཁོ༌ སྲན༌ཏྲེ༌ ཕན༌ཐོགས༌ཅན༌ཞིག༌ གྱུར༌ཏེ༌ ཨིན༌ནོག༌།
PHM 1:12 ཞན༌ ཁོ༌ ངའེ༌ སྙིང༌བོ༌ ཨིན༌ནའང༌, ངའེ༌ ཁོ༌ ཁྱོ༌རང༌ ཡོད༌ས༌ ལོགས༌ཏེ༌ ལམ༌ཅུག༌གད༌།
PHM 1:13 གའ༌མོའེ༌ ནས༌ཚུལ༌ ཤད༌ཅེས༌སི༌ ཞས༌ཏེ༌ ངའ༌ འི༌རུ༌ ཙོན༌ཁང༌ངི༌ ནང༌ང༌ ཡོད༌ ཟ༌ནེ༌, ཁོའེ༌ ངའ༌ ཁྱོ༌རང༌ངི༌ ཚབས༌ ཅོས༌ཏེ༌ ཡ༌ཏོ༌ ཅོ༌ཅེས༌སི༌ ཕིའ༌, ཁོ༌ འི༌རུ༌ ང༌རང༌ ཉམ༌པོ༌ བོར༌ཅེས༌སི༌ དོད༌པ༌ རག༌།
PHM 1:14 ཨིན༌ནའང༌ ཁྱོ༌རང༌ངི༌ ཀ༌ནེ༌ གོངས༌པ༌ མེད༌པ༌, ངའེ༌ ཅི༌ཞིག༌གའང༌ ཅོ༌ཉིན༌ མེ༌རག༌། ཁྱོ༌རང༌ང༌ ཝང༌ ཏངས༌ཏེ༌ མན༌པ༌, ཐད༌པོ༌ ཉམ༌པོ༌ ངའ༌ ཡ༌ཏོ༌ ཅོ༌ཅེས༌སི༌ དོད༌པ༌ ཅོའད༌།
PHM 1:15 ཅི༌གྱུས༌, ཁོ༌ ཁྱོ༌རང༌ ཉམ༌པོ༌ ཏུས༌བན༌ཤིག༌ བེས༌ཏེ༌ དུག༌ཅེས༌སི༌ གྱུན༌ཚན༌བོ༌, ཁྱོ༌རང༌ང༌ ཏུས༌གྱུན༌ནི༌ ཕིའ༌ ཁོ༌ ལོགས༌ཏེ༌ ཐོབ༌ཅེས༌པོ༌ མན༌ན༌ཧེ༌?
PHM 1:16 ཏ༌ནེ༌ཕར༌ལ༌ ཁོ༌ ཁྱོ༌རང༌ངི༌ ཚེ༌ཡོག༌ ཙོགས༌ མན༌པ༌, ཚེ༌ཡོག༌གི༌ སང༌ ཁག༌ཅན༌, ཅེས༌པའེ༌ སྤུན༌ཞིག༌ ཨིན༌ནོག༌། ཁོ༌ མིག༌སལ༌ལི༌ ངའེ༌ ཕིའ༌ རིན༌ཅན༌ཞིག༌ ཨིན༌, ཨིན༌ནའང༌ ཁོ༌ མི༌ཞིག༌ ཡང༌ གཙོ༌བོའེ༌ ནང༌ང༌ ཕྲོ༌པ༌ སྤུན༌ཞིག༌ ཨིན༌ཅེས༌པོའེ༌, ཁོ༌ ཁྱོ༌རང༌ངི༌ ཕིའང༌ མང༌ང༌ རིན༌ཅན༌ཞིག༌ ཨིན༌ནོག༌།
PHM 1:17 ཏེ༌ནེ༌ ཀལ༌ཏེས༌ ང༌ ཁྱོ༌རང༌ ཉམ༌པོ༌ དཀོན༌མཆོག༌གི༌ ཆག༌ལས༌སི༌ ནང༌ང༌ ཕྲོ༌པ༌ཞིག༌ ཐེའད༌ན༌, ཁོའ༌ གའ༌སུས༌ ཞུས༌, ཀ༌ཟུག༌ ཁྱོ༌རང༌ངི༌ ངའ༌ གའ༌སུས༌ ཞུས༌ཏེ༌ ཡོད༌གྲོ༌།
PHM 1:18 ཀལ༌ཏེས༌ ཁོའེ༌ ཁྱོ༌རང༌ང༌ ནོར༌ཁྲུལ༌ཞིག༌ ཅོས༌ཏེ༌ ཡོད༌ན༌, ཡ༌ ཁྱོ༌རང༌ངི༌ ཀ༌ནེ༌ ཅི༌ཏོང༌ ཁྱེར༌ཏེ༌ ཡོད༌ན༌, ཏེ༌གུན༌ ངའ༌ བུ༌ལོན༌ལ༌ ཀལ༌ནའང༌ གྲིག༌།
PHM 1:19 ཏ༌ དག༌ས༌ ང༌ པ༌འུ༌ལུའི༌ ང༌རང༌ངི༌ ལག༌པ༌ནེ༌ འི༌བོ༌ བྲིའད༌, ངའེ༌ ཏེ༌ བུ༌ལོན༌བོ༌ ཤལ༌ཨིན༌། ཁྱོ༌རང༌ང༌ ཐའ༌མེད༌པའེ༌ མི༌ཚེ༌ ཐོབ༌ཅུག༌ཅེས༌སི༌ ངའེ༌ བུ༌ལོན༌ ཡོད༌ཁན༌བོ༌, ཨིད༌ཏུ༌ མི༌སྐུལ༌།
PHM 1:20 འོ༌ན༌ ངའེ༌ སྤུན༌ལེ༌, ཇུ༌ཇུ༌ གཙོ༌བོའེ༌ ནང༌ང༌ ངའེ༌ ཕན༌ཐོགས༌སི༌ ཕིའ༌ འི༌བོ༌ ཅོས༌། མ༌ཤི༌ཀའེ༌ ནང༌ང༌ ངའ༌ འི༌ སྤོས༌པ༌བོ༌ ཏོང༌།
PHM 1:21 ཁྱོ༌རང༌ང༌ ངའེ༌ ཅོ༌ཅེས༌ལ༌ ཟེར༌ཏེ༌ ཡོད༌ཁན༌ ཚང༌མ༌ གྲུབ༌ཅུག༌ཅེས༌ མ༌ཚད༌, ཏེ༌སང༌ མང༌ང༌ ཅོས༌སི༌ ལོ༌ཁྱེལ༌ ཉམ༌པོ༌, ངའེ༌ འི༌ ཨི༌གེ༌བོ༌ བྲིའད༌།
PHM 1:22 ཡང༌ སྤེ༌ར༌ཞིག༌, ཇུ༌ཇུ༌ ངའེ༌ ཕིའ༌ ནང༌ཞིག༌ གྲལ༌གྲིག༌ ཅོས༌, ཅིའ༌ཟེར༌ན༌ དཀོན༌མཆོག༌གི༌ ཁྱོ༌རང༌ངི༌ མོས༌ལམ༌མ༌ ལན༌སལ༌ཏེ༌ ང༌ གྱོགས༌པ༌ ཁྱོ༌རང༌ ཡོད༌ས༌ ལོགས༌ཏེ༌ ཡོང༌ ཅུག༌ག༌ ཛད༌ཅེས༌སི༌ རེ༌ཝ༌ རག༌།
PHM 1:23 མ༌ཤི༌ཀ༌ ཡེ༌ཤུའི༌ ཞབས༌ཏོག༌ ཞུ༌ཁན༌ནི༌ ཨེ༌པ༌ཕའ༌རས༌, ངའེ༌ ཕྲོ༌པ༌ ཙོན༌པའེ༌, ཁྱོ༌རང༌ང༌ ཇུ༌ ཞུ༌རུག༌།
PHM 1:24 ཡང༌ ཏེན༌ན༌ ཟུག༌གི༌ ངའེ༌ ལས༌ ཅོ༌ཁན༌ ཕྲོ༌པ༌ མར༌ཀུས༌, ཨ༌རིས༌ཏར༌ཀུས༌, དེ༌མཱས༌ དང༌, ལུ༌ཀ༌ གུན༌ནིའང༌ ཇུ༌ ཞུ༌རུག༌།
PHM 1:25 ངའེ༌ མོས༌ལམ༌ ཞུའད༌, གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌རང༌ང༌ ཐུག༌རྗེ༌ སལ༌ཤིག༌།
HEB 1:1 སྔུན༌མའེ༌ ཏུས༌ལ༌ དཀོན༌མཆོག༌གི༌ ང༌དང༌གུན༌ནི༌ ཕ༌མེས༌པོ༌གུན༌ལ༌, ལན༌ མང༌པོ༌ དང༌ ཚུལ༌ སོ༌སོའེ༌ ནང༌ང༌, ཁོང༌རང༌ངི༌ ལུང༌སྟོན༌པ༌གུན༌ གྱུད༌ཏེ༌ ཞལ༌ཏ༌ སལ༌ལ༌ ཛད༌ཏེ༌ ཨིན༌ནོག༌།
HEB 1:2 ཨིན༌ནའང༌ དག༌ས༌ འི༌ སྟིང༌ཇུག༌གི༌ ཞག༌གུན༌ནི༌ ནང༌ང༌ ཁོང༌ངི༌, ཁོང༌རང༌ངི༌ སྲས༌ གྱུད༌ཏེ༌ ང༌དང༌གུན༌ལ༌ ཞལ༌ཏ༌ སལ༌ལ༌ ཛད༌ཏེ༌ ཨིན༌ནོག༌། དཀོན༌མཆོག༌གི༌ ཁོང༌རང༌ངི༌ སྲས༌, ཅི༌ཚང༌མའེ༌ཀ༌ ནོར༌སྐལ༌ ཐོབ༌ཅེས༌ཅན༌བོ༌ སྐོའ༌ ཛདས༌, ཡང༌ ཁོང༌ གྱུད༌ཏེ༌ དཀོན༌མཆོག༌གི༌ ཛམ༌བུ༌ལིང༌བོ༌ ཞང༌ང༌ ཛད༌ཏེ༌ ཨིན༌ནོག༌།
HEB 1:3 སྲས༌སི༌ ནང༌ནེ༌ དཀོན༌མཆོག༌ ཁོང༌རང༌ངི༌ ཟིར༌རྗིད༌ ཇལ༌ཅེས༌ ཡང༌, དཀོན༌མཆོག༌ ཁོང༌རང༌ ཞུགས༌ཁན༌ ཙོགས༌ སྲས༌སའང༌ ཨིན༌ནོག༌། སྲས༌སི༌ ཁོང༌རང༌ངི༌ བཀའ༌ ཀྲག༌པོ༌ གྱུད༌ཏེ༌ ཅི༌ཚང༌མ༌ སྟན༌པོ༌ བོར༌ར༌ ཛད༌ད༌ནོག༌། ཁོང༌ངི༌ མི༌ཚང༌མ༌, སྡིག༌པ༌གུན༌ནི༌ ཀ༌ནེ༌ རྩང༌མ༌ ཅོའ༌ ཛད༌ཏེ༌ སྟིང༌ནེ༌, ཁོང༌ ནམ༌ཁའེ༌ ནང༌ང༌ ཟིར༌རྗིད༌ཅན༌ནི༌ དཀོན༌མཆོག༌གི༌ རྩི༌ཝ༌ཅན༌ནི༌ ནས༌ས༌ ཡས༌པ༌བོའེ༌ཀ༌ ཞུགས༌ས༌ ཛདས༌།
HEB 1:4 ཏེ༌བོའེ༌ སྲས༌པོ༌ ཕོ༌ཉ༌གུན༌ནི༌ སང༌ མང༌ང༌ ཐོའ༌ ཨིན༌ཁན༌བོ༌ སྟན༌ན༌ནོག༌, ཀ༌ཟུག༌ དཀོན༌མཆོག༌གི༌ ཁོང༌ང༌ སལ༌ལ༌ ཛད༌ཁན༌ནི༌ ཚན༌བོ༌, ཏེ༌གུན༌ནི༌ མིང༌ངི༌ སང༌ ཐོའ༌ ཨིན༌ནོག༌།
HEB 1:5 དཀོན༌མཆོག༌གི༌ ཕོ༌ཉ༌ ཅིག༌གའང༌ འི༌ཟུག༌ མོལ༌ལ༌ མ༌ནེ༌ མ༌ཛདས༌, “ཁྱོ༌རང༌ ནི༌ ངའེ༌ བུ༌ཚ༌བོ༌ ཨིན༌། དི༌རིང༌ ང༌ ཁྱོ༌རང༌ངི༌ ཨ༌བ༌ གྱུར༌ཏེ༌ ཨིན༌།” དཀོན༌མཆོག༌གི༌ འི༌བོའང༌ མོལ༌ལ༌ ཛདས༌, “ང༌ ཁོའེ༌ ཨ༌བ༌ ཡང༌ ཁོ༌ ངའེ༌ སྲས༌ གྱུར༌ཨིན༌།”
HEB 1:6 ཡང༌ དཀོན༌མཆོག༌གི༌ ཁོང༌རང༌ངི༌ བུ༌ཚ༌ རྩི༌ཝ༌ཅན༌བོ༌, ཇིག༌རྟེན༌ནི༌ ནང༌ང༌ ཀལ༌ལ༌ ཛད༌ ཟ༌ནེ༌, ཁོང༌ངི༌ མོལ༌ལ༌ ཛདས༌, “དཀོན༌མཆོག༌གི༌ ཕོ༌ཉ༌ ཚང༌མའེ༌ ཁོང༌ང༌ ཅོལ༌གོས༌།”
HEB 1:7 ཕོ༌ཉ༌གུན༌ནི༌ སྐོར༌ལ༌ ཁོང༌ངི༌ མོལས༌, “ཁོང༌ངི༌ ཁོང༌རང༌ངི༌ ཕོ༌ཉ༌གུན༌ ལུངས༌པོ༌ཞིག༌ ཙོགས༌ལ༌ ལམ༌ཅུག༌ཨིན༌, ཡང༌ ཁོང༌ངི༌ ཞབས༌ཏོག༌པ༌གུན༌ མེ༌ལྡབ༌ ཙོགས༌ལ༌།”
HEB 1:8 ཨིན༌ནའང༌ སྲས༌ལ༌ ཁོང༌ངི༌ མོལས༌, “ཉེ༌རང༌ དཀོན༌མཆོག༌ ཨིན༌, ཉེ༌རང༌ངི༌ ཞུགས༌ཁྲིས༌པོ༌ ཏུས༌གྱུན༌ནེ༌གྱུན༌ལ༌ ལུས༌ཨིན༌། ཉེ༌རང༌ངི༌ ཀྲང༌པོ༌ ཉམ༌པོ༌ ཝང༌སྲུལ༌ལ༌ ཛད༌ཨིན༌།
HEB 1:9 ཀྲང༌པོ༌ ལས༌གུན༌ལ༌ ཉེ༌རང༌ངི༌ ཅེས༌པ༌ ཡང༌ ངན༌པ༌ ལས༌གུན༌ལ༌ ནཕ༌རད༌ ཅོའ༌ ཛད༌ད༌ནོག༌། ཏེ༌བོའེ༌ཕིའ༌ དཀོན༌མཆོག༌, ཉེ༌རང༌ངི༌ དཀོན༌མཆོག༌གི༌ ཉེ༌རང༌ངི༌ཀ༌ གའ༌མོའེ༌ མར༌བོ༌ ཡང༌གུན༌ནི༌ སང༌ མང༌ང༌ ལུག༌ག༌ ཛད༌ཏེ༌ ཉེ༌རང༌ སྐོའ༌ ཛདས༌།”
HEB 1:10 ཁོང༌ངི༌ སྲས༌ལ༌ འི༌བོའང༌ མོལ༌ལ༌ ཛདས༌, “གཙོ༌བོ༌, ཉེ༌རང༌ངི༌ གོ༌ཟུག༌གི༌ཀ༌ ཇིག༌རྟེན༌ནི༌ མག༌ལྡན༌བོ༌ ཏིང༌ང༌ ཛདས༌། ཡང༌ ཉེ༌རང༌ རང༌ངི༌ ཆག༌ནེ༌ ནམ༌ཁའ༌ ཅོའ༌ ཛདས༌།
HEB 1:11 ཏེ༌གུན༌ མེད༌ཁན༌ ཆེན༌, ཨིན༌ནའང༌ ཉེ༌རང༌ ཏུས༌གྱུན༌ ལུས༌ཤེས༌ ཨིན༌ནོག༌། ཏེ༌གུན༌ ཀོས༌ལག༌ སྙིང༌པ༌ ཙོགས༌ལ༌ ཆད༌ཨིན༌།
HEB 1:12 ཉེ༌རང༌ངི༌ ཏེ༌གུན༌ ཀོས༌ ཙོགས༌ལ༌ སྲིལ༌ལ༌ ཛད༌ཨིན༌། ཡང༌ ཀོས༌ལག༌ སྙིང༌པ༌ཞིག༌ ཙོགས༌ལ༌ ཕང༌ང༌ ཛད༌ཨིན༌། ཨིན༌ནའང༌ ཉེ༌རང༌ ཏུས༌གྱུན༌ ཙོགས༌ ལུས༌ཨིན༌། ཉེ༌རང༌ ཏུས༌གྱུན༌ནེ༌གྱུན༌ སོན༌ཏེའ༌ ཞུགས༌ཨིན༌།”
HEB 1:13 ཡང༌ དཀོན༌མཆོག༌གི༌ ཕོ༌ཉ༌ ཅིག༌གའང༌ མ༌ནེ༌ མོལ༌ལ༌ མ༌ཛདས༌, “ངའེ༌ ཁྱོ༌རང༌ངི༌ གྲ༌འོ༌ ཚང༌མ༌, ཁྱོ༌རང༌ངི༌ རྐང༌པའེ༌ ཕོས༌སྟག༌ ཅོ༌ཅོ༌ ཚག༌པ༌, ཁྱོ༌རང༌ ངའེ༌ ལག༌པ༌ ཡས༌པའེ༌ ཁྲིས༌སི༌ཀ༌ དུག༌།”
HEB 1:14 ཏེ༌བོའེ༌ཕིའ༌ ཕོ༌ཉ༌གུན༌, ཐར༌པ༌ ནོར༌སྐལ༌ལ༌ ཐོབ༌ཅེས༌ཅན༌གུན༌ལ༌ ཞབས༌ཏོག༌ ཞུ༌ཅེས༌ལ༌ ཀལ༌ལ༌ ཛད༌ཁན༌ནི༌ སེམས༌ཉིད༌གུན༌ ཨིན༌ནོག༌།
HEB 2:1 ཏེ༌བོའེ༌ཕིའ༌ ང༌དང༌གུན༌ནི༌ ཚོར༌ཁན༌ནི༌ དེན༌བ༌བོའེ༌ཀ༌ སྣང༌ང༌ སྲན༌ཏྲེ༌ ཏང༌གོས༌། ཀལ༌ཏེས༌ མ༌ཏང༌ན༌, ང༌དང༌གུན༌ ཏེ༌བོའེ༌ ཀ༌ནེ༌ ཀུ༌ལེ༌ ཀུ༌ལེའ༌ ཐག༌རིང༌ང༌ ཆ༌སྲིད༌ཅེས༌ ཨིན༌ནོག༌།
HEB 2:2 ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ དཀོན༌མཆོག༌གི༌ ཕོ༌ཉ༌གུན༌ གྱུད༌ཏེ༌ ཁྲིམས༌ སལ༌ལ༌ ཛད༌ཁན༌གུན༌ སྟན༌པོ༌ ཅོའ༌ ཛད༌ཏེ༌ ཨིན༌ནོག༌། ཡང༌ ཁྲིམས༌ཅག༌ཁན༌ དང༌ ཁྲིམས༌ ཁའ༌ མ༌ཉན༌ཁན༌ ཚང༌མ༌ལ༌ འོས༌པའེ༌ ཆད༌པ༌ ཕོགས༌ཏེ༌ ཨིན༌ནོག༌།
HEB 2:3 ཀལ༌ཏེས༌ ང༌དང༌གུན༌ནི༌ ཏེ༌ཙོགས༌སི༌ ཧ༌ལས༌སི༌ ཐར༌པའ༌ ནང༌སྟག༌ མ༌ཏང༌ནའ༌, ཏེ༌ནེ༌ ཀ༌ཟུག༌གི༌ ང༌དང༌གུན༌ ཏེ༌ ཆད༌པའེ༌ ཀ༌ནེ༌ ཤོར༌ཉན༌ཅེས༌སི༌ སམ༌བ༌ ཏང༌ངད༌, ཀ༌ཐར༌པ༌བོ༌ གོ༌མ༌རང༌ གཙོ༌བོ༌ ཡེ༌ཤུ༌ ཁོང༌རང༌ངི༌ ཤད༌ད༌ ཛདས༌, ཏེ༌ནེ༌ ཚོར༌ཁན༌གུན༌ནི༌ ཏེ༌བོ༌ ང༌དང༌གུན༌ལ༌ ཁྱོངས༌ཏེ༌ ཨིན༌པིན༌།
HEB 2:4 དཀོན༌མཆོག༌གི༌ ལྟས༌, ཧ༌ལས༌ཤེས༌སི༌ ལས༌, ཛད༌པ༌ རིགས༌ མང༌པོ༌ དང༌, ཏམ༌པའེ༌ ཐུག༌ཉིད༌དི༌ ཁྱུད༌ གུན༌, ཁོང༌རང༌ངི༌ ཐུག༌གོངས༌ ནང༌ཞིན༌ སལ༌ལ༌ ཛད༌ཏེ༌ ལོན༌བོ༌ ཀྲང༌པོ༌ ཨིན༌ཁན༌ནི༌ སྤང༌པོ༌ སལ༌ལ༌ ཛད༌ད༌ནོག༌།
HEB 2:5 དཀོན༌མཆོག༌གི༌ ཡོང༌ཅེས༌ཅན༌ནི༌ སོ༌མ༌ ཇིག༌རྟེན༌བོ༌ ཕོ༌ཉ༌གུན༌ནི༌ ཝང༌ངི༌ ཡོག༌ག༌ བོར༌ར༌ མ༌ཛད༌ད༌ ཨིན༌ནོག༌, ཀ༌ ཇིག༌རྟེན༌བོའེ༌ སྐོར༌ལ༌ ངའེ༌ བྲིའད༌།
HEB 2:6 ཏམ༌པའེ༌ སུང༌རབས༌སི༌ ཁག༌ ཤིག༌གི༌ ནང༌ང༌ མོལ༌དུག༌། “ཉེ༌རང༌ངི༌ སྣང༌ང༌ སལ༌ལ༌ ཛད༌ཁན༌ནི༌ མི༌གུན༌ལ༌, རིན༌ ཅི༌ ཡོད༌ཏེ༌ ཨིན༌ནོག༌? ཅི༌ མི༌གུན༌ ཏེ༌ཙོགས༌ ནང༌སྟག༌ ཐོབ༌ཅེས༌སི༌ འོས༌པ༌ ཨིན༌ནོག༌ག༌?
HEB 2:7 ཏུས༌ཙ༌པིག༌ཤིག༌གི༌ ཕིའ༌ ཉེ༌རང༌ངི༌ ཁོང༌གུན༌ལ༌ ཀོ༌ས༌ ཕོ༌ཉ༌གུན༌ནི༌ སང༌ ཆུ༌ངུན༌ སལ༌ལ༌ ཛདས༌། ཏེ༌ནེའང༌ ཉེ༌རང༌ངི༌ མི༌གུན༌ལ༌ སྤལ༌ དང༌ རྩི༌ཝ༌ཅན༌ནི༌ ཐོར༌ཤོག༌པོ༌ སྐོན༌ན༌ ཛདས༌།
HEB 2:8 ཉེ༌རང༌ངི༌ ཅི༌ཚང༌མའེ༌ཀ༌ ཁོང༌གུན༌ལ༌ ཝང༌ སལ༌ལ༌ ཛདས༌།” ཏ༌ ཅི༌ཚང༌མའེ༌ཀ༌ ཟེར༌ར༌ཅིག༌, ཅི༌ཞིག༌གའང༌ ཁོང༌གུན༌ནི༌ ཝང༌ནེ༌ ཕི༌ལོག༌ག༌ ལུས༌ཏེ༌ མེད༌པ༌ ཨིན༌ནོག༌། དག༌ས༌ ཚོག༌པ༌ ང༌དང༌གུན༌ནི༌ ཅི༌ཚང༌མ༌ ཁོང༌གུན༌ནི༌ ཝང༌ངི༌ ཡོག༌ག༌ བོར༌ར༌ལ༌ མ༌ཐོང༌ང༌ ཨིན༌ནོག༌།
HEB 2:9 ཨིན༌ནའང༌ ང༌དང༌གུན༌ནི༌ ཡེ༌ཤུ༌ ཐོང༌ང༌ནོག༌ ཀ༌བོའ༌ “ཙ༌པིག༌ཤིག༌གི༌ ཕིའ༌ ཕོ༌ཉ༌གུན༌ནི༌ སང༌ ཆུ༌ངུན༌ ཀོ༌ས༌ སལ༌ལ༌ ཛདས༌།” ཁོང༌ངི༌ ང༌དང༌གུན༌ནི༌ ཕིའ༌ ཤི༌ཅེས༌སི༌ རྡུག༌ངལ༌བོ༌ ཁུར༌ར༌ ཛདས༌, འོ༌ན༌ དཀོན༌མཆོག༌གི༌ ཐུག༌རྗེའེ༌ ཞས༌ཏེ༌ ཡེ༌ཤུའི༌ ཚང༌མའེ༌ ཏོན༌ལ༌ ཤི༌ཅེས༌པོ༌ ཉོང༌ང༌ ཛདས༌ པ༌སང༌, ཁོང༌ང༌ སྤལ༌ དང༌ རྩི༌ཝ༌ཅན༌ནི༌ ཐོར༌ཤོག༌པོ༌ སྐོན༌ན༌ ཛད༌ཏེ༌ ཨིན༌ནོག༌།
HEB 2:10 དཀོན༌མཆོག༌གི༌, ཁོང༌རང༌ངི༌ ཕིའ༌ ཡང༌ ཁོང༌རང༌ གྱུད༌ཏེ༌ ཅི༌ཚང༌མ༌ ཅོའ༌ ཛདས༌། ཁོང༌རང༌ངི༌ ཟིར༌རྗིད༌པོ༌ མི༌ མང༌པོ༌ ཉམ༌པོ༌ བགོའ༌ ཛད༌ཅེས༌ལ༌ ཐབས༌ལྡིང༌ང༌ ཛདས༌། ཁོང༌གུན༌ ཐར༌པའེ༌ ནང༌ང༌ ཁྱོང༌ང༌ ཛད༌ཅེས༌སི༌ ཕིའ༌ ཡེ༌ཤུའི༌ རྡུག༌ངལ༌ གྱུད༌ཏེ༌, ཁོང༌ ཕུན༌སུམ༌ཚོགས༌པ༌ འུ༌སྐྱོང༌ ཛད༌ཅེས༌པོ༌, དཀོན༌མཆོག༌གི༌ ཐག༌ཅད༌ ཀྲང༌པོ༌བོ༌ ཨིན༌པིན༌།
HEB 2:11 སོང༌པ༌སང༌ ཏ༌ ཡེ༌ཤུ༌ དང༌ ཁོང༌ངི༌ ཏམ༌པ༌ ཅོའ༌ ཛད༌ཁན༌ མི༌གུན༌ལ༌ ཡབ༌ ཅིག༌ཅིག༌ ཡོད༌ཏེ༌ ཨིན༌ནོག༌། ཏེན༌ན༌བོའེ༌ཕིའ༌ ཡེ༌ཤུའི༌ ཐུག༌ཁྲེལ༌ལ༌ མ༌ཛད༌ད༌, ཏེ༌གུན༌ལ༌ ཁོང༌རང༌ངི༌ སྤུན༌གུན༌ མོལ༌ལ༌ ཛད༌ཨིན༌ ཨིན༌ནོག༌།
HEB 2:12 ཁོང༌ངི༌ དཀོན༌མཆོག༌ག༌ མོལས༌། “ངའེ༌ ང༌རང༌ངི༌ སྤུན༌གུན༌ལ༌ ཉེ༌རང༌ངི༌ ཚན༌བོ༌ ཤད༌ཨིན༌། ཛོམས༌ཏེ༌ ཡོད༌ཁན༌ནི༌ སྤུན༌གུན༌ནི༌ ཕྲོའ༌, ངའེ༌ ཉེ༌རང༌ང༌ སྟོད༌པ༌ ཕུལ༌ཨིན༌།”
HEB 2:13 ཁོང༌ངི༌ འི༌བོའང༌ མོལ༌ལ༌ ཛདས༌, “ངའེ༌ དཀོན༌མཆོག༌ག༌ ཨིད༌ཤེས༌ ཅོ༌ཨིན༌།” ཡང༌སྐྱར༌ ཁོང༌ངི༌ མོལས༌, “འི༌ཀ༌, ང༌ དང༌ དཀོན༌མཆོག༌གི༌ ངའ༌ སལ༌ལ༌ ཛད༌ཁན༌ནི༌ ཕྲུ༌གུ༌གུན༌ ཡོད༌།”
HEB 2:14 དཀོན༌མཆོག༌གི༌ ཕྲུ༌གུ༌གུན༌ ཤ༌ དང༌ ཁྲག༌ག༌ ཅོ༌ཁན༌ནི༌ མི༌རིགས༌ ཨིན༌ པ༌སང༌, སྲས༌སའང༌ ཤ༌ དང༌ ཁྲག༌གི༌ གྱུར༌ར༌ ཛདས༌། མི༌ གྱུར༌ཅེས༌ ཅིག༌པོ༌ གྱུད༌ཏེ༌ ཁོང༌ ཀྲོངས༌ ཉན༌ན༌ནོག༌, ཡང༌ ཀྲོང༌ཤེས༌ ཅིག༌པོ༌ གྱུད༌ཏེ༌ ཁོང༌ངི༌ རྡུད༌གུན༌ནི༌ གོ༌བའེ༌ ཝང༌ མེད༌ཁན༌ ཅོའ༌ ཛད༌ ཉན༌ན༌ནོག༌, ཏེ༌ ཝང༌བོ༌ ནི༌ ཤི༌ཅེས༌པོ༌ ཨིན༌ནོག༌།
HEB 2:15 མི༌ཚེ༌ གང༌པོ༌ ཤི༌ཅེས༌སི༌ ཇིགས༌སི༌ ཚེ༌ཡོག༌ག༌ ཟུམས༌ཏེ༌ ཡོད༌ཁན༌ ཚང༌མ༌, ཁོང༌ ཀྲོངས༌ཤེས༌ ཅིག༌པོ༌ གྱུད༌ཏེ༌ ཐར༌ ཅུག༌ག༌ ཛདས༌།
HEB 2:16 སྲས༌ ཕོ༌ཉ༌གུན༌ལ༌ མན༌པ༌ ཨབ༌ར༌ཧམ༌མི༌ པུར༌གྱུད༌གུན༌ལ༌ རོགས༌ ཛད༌ཅེས༌ལ༌ སྐྱོད༌ད༌ ཛད༌ཁན༌བོ༌, ང༌དང༌གུན༌ལ༌ སལ༌པོ༌ གྱུས༌ཨིན༌ནོག༌།
HEB 2:17 ཏེ༌བོའེ༌ཕིའ༌ དཀོན༌མཆོག༌གི༌ ཞབས༌ཏོག༌གི༌ ནང༌ང༌, སྙིང༌རྗེ༌ཅན༌ དང༌ ཨིད༌ཤེས༌ཅན༌ནི༌ བླ༌མ༌ ཆེན༌མོ༌ གྱུར༌ཅེས༌སི༌ ཕིའ༌, ཁོང༌ ཅི༌ས༌ཐོག༌ནེ༌ ཁོང༌ངི༌ སྤུན༌གུན༌ ཙོགས༌, གྱུར༌ར༌ ཛད༌ཅེས༌པོ༌ ཁག༌ཅན༌ ཨིན༌པིན༌། ཏེ༌ནེ༌ ཁོང༌ངི༌ མི༌གུན༌ནི༌ སྡིག༌པ༌ མེད༌ཁན༌ ཅོའ༌ ཛད༌ཅེས༌ལ༌ སྲོག༌གི༌ ཆོད༌པ༌ ཕུལ༌ཉན༌།
HEB 2:18 ཁོང༌ང༌ ཚོད༌ལྟའེ༌ ནང༌ང༌ རྡུག༌ངལ༌ ཉོང༌ང༌ ཛད༌ པ༌སང༌, ང༌དང༌གུན༌ལ༌ ཚོད༌ལྟ༌ ཇུང༌ ཟ༌ནེ༌ ཁོང༌ངི༌ རོགས༌ ཛད༌ཐུབ༌ཨིན༌།
HEB 3:1 ཏེ༌བོའེ༌ཕིའ༌ ཏམ༌པ༌ སྤུན༌གུན༌, དཀོན༌མཆོག༌གི༌ གྱལ༌སྲིད༌དི༌ ནང༌ང༌ བོད༌ད༌ ཛད༌ཁན༌ནི༌ ཕྲོ༌པ༌གུན༌, སྲན༌ཏྲེ༌ སྣང༌ང༌ ཏངས༌ཏེ༌ ཡེ༌ཤུའི༌ སྐོར༌ལ༌ སམ༌བ༌ ཏོང༌ཤིག༌། ཁོང༌ དཀོན༌མཆོག༌གི༌ ལོན༌ཁྱོང༌ང༌ ཛད༌ཁན༌ དང༌ བླ༌མ༌ ཆེན༌མོ༌ ཨིན༌ཁན༌ ཏད༌པའེ༌ སྤང༌པོ༌ ང༌ཞའེ༌ ཏངས༌ཏེ༌ ཨིན༌།
HEB 3:2 ཡང༌ ཁོང༌ ནི༌, ཁོང༌ ལྡམ༌མ༌ ཛད༌ཁན༌ནི༌ དཀོན༌མཆོག༌ག༌ ཨིད༌ཤེས༌ཅན༌ ཨིན༌ནོག༌, ཀ༌ཟུག༌གི༌ དཀོན༌མཆོག༌གི༌ མི༌གུན༌ལ༌ ཞབས༌ཏོག༌ ཞུ༌ཅེས༌སི༌ ནང༌ང༌ ལུང༌སྟོན༌པ༌ མོ༌ཟེས༌ ཨིད༌ཤེས༌ཅན༌ཞིག༌ ཡོད༌པིན༌།
HEB 3:3 ཡེ༌ཤུའ༌ མོ༌ཟེས༌སི༌ སང༌ མང༌ང༌ སྤལ༌ ཐོབ༌གོ༌ཤེས༌སི༌ འོས༌པ༌ ཨིན༌ནོག༌, ཀ༌ཟུག༌གི༌ ཁང༌པ༌ རྩིག༌ཁན༌ནི༌ མི༌བོའ༌, ཁང༌པའེ༌ སང༌ མང༌ང༌ རྩི༌ཝའེ༌ འོས༌པ༌ ཡོད༌།
HEB 3:4 ཁང༌པ༌ ཚང༌མ༌, སུ༌ནའང༌ སུ༌ཞིག༌གི༌ རྩིགས༌ཏེ༌ ཨིན༌ནོག༌, ཨིན༌ནའང༌ ཅི༌ཚང༌མ༌ རྩིག༌ག༌ ཛད༌ཁན༌བོ༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌།
HEB 3:5 ཏ༌ མོ༌ཟེས༌ ནི༌, དཀོན༌མཆོག༌གི༌ མི༌གུན༌ལ༌ ཞབས༌ཏོག༌པ༌ ཨིད༌ཤེས༌ཅན༌ཞིག༌ ཨིན༌པིན༌། ཁོང༌ངི༌ ཞབས༌ཏོག༌པོ༌ ནི༌, ཡོང༌ཅེས༌ཅན༌ནི༌ ཏུས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཅེས༌ཅན༌ནི༌ སྤེ༌བོ༌, ནག༌ཤའེ༌ ཚུལ༌ལ༌ ཨིན༌པིན༌།
HEB 3:6 ཨིན༌ནའང༌ མ༌ཤི༌ཀ༌ དཀོན༌མཆོག༌གི༌ སྲས༌ ཨིན༌ པ༌སང༌, ཁོང༌ དཀོན༌མཆོག༌གི༌ ཁང༌པ༌ གང༌པོའེ༌ ཁག༌ཁུར༌བོ༌ ཞུགས༌ཏེ༌ ཨིན༌ནོག༌། ཡང༌ ཀལ༌ཏེས༌ ང༌དང༌གུན༌ནི༌ སྤོས༌པ༌ དང༌ མ༌ཤི༌ཀའེ༌ ནང༌ང༌ རེ༌ཝ༌ གུན༌ སྟན༌པོ༌ བོར༌ན༌, ཏེ༌ནེ༌ ང༌དང༌གུན༌ དཀོན༌མཆོག༌གི༌ ཁང༌པ༌བོ༌ ཨིན༌ནོག༌།
HEB 3:7 ཏེན༌ན༌བོའེ༌ཕིའ༌ ཏམ༌པའེ༌ ཐུག༌ཉིད༌དི༌ མོལས༌, “དི༌རིང༌ ཁྱོ༌ཞ༌གུན༌ལ༌ ཁོང༌ངི༌ སུང༌སྐད༌པོ༌ ཚོར༌ ཟ༌ནེ༌,
HEB 3:8 ཁྱོ༌ཞ༌གུན༌ནི༌ སྙིང༌ སྐྱོང༌པོ༌ གྱུར༌ མ༌ཅུག༌ཤིག༌, ཀ༌ཟུག༌གི༌ ཨིས༌ར༌ཨེལ༌པ༌གུན༌ནི༌ རི༌སྟོང༌ངི༌ ནང༌ང༌ ངའེ༌ ཟོད༌པའ༌ ཚོད༌ ལྟས༌ཏེ༌ ངའ༌ ངོ༌ལོག༌ ཅོ༌ ཟ༌ནེ༌ ཅོས༌,
HEB 3:9 ཞན༌ ལོ༌ ཞིབ༌ཅུ༌, ཁྱོ༌ཞའེ༌ ཕ༌མེས༌པོ༌གུན༌ནི༌ ངའེ༌ ལྟས༌གུན༌ ཐོངས༌ཏེའང༌ ཁོང༌གུན༌ནི༌ ངའེ༌ ཟོད༌པའེ༌ ཚོད༌ ལྟས༌།
HEB 3:10 ཏེན༌ན༌བོའེ༌ཕིའ༌ ང༌ ཏེ༌གུན༌ནི༌ཀ༌ སྲོ༌ ཡོངས༌ ཡང༌ ངའེ༌ ཟེར༌པིན༌ ‘ཁོང༌གུན༌ནི༌ སྙིང༌ ཏུས༌གྱུན༌ ངའེ༌ ཀ༌ནེ༌ གྱུར༌ཏེ༌ ཐག༌རིང༌ང༌ ཆ༌རུག༌། ངའེ༌ ཅོ༌ཅེས༌ལ༌ ཟེར༌ཁན༌གུན༌ ཁོང༌གུན༌ནི༌ ཅོའ༌ མི༌རུག༌།’
HEB 3:11 ང༌ སྲོ༌ ཡོངས༌ཏེ༌ ནའ༌ ཁུར༌ཏེ༌ ཟེར༌པིན༌ ‘ངའེ༌ ངལ༌ཚོ༌སའེ༌ ནས༌སའེ༌ ནང༌ང༌ ཁོང༌གུན༌ མ༌ནེ༌ ཡོང༌ མི༌ཉན༌།’”
HEB 3:12 ཅེས༌པའེ༌ སྤུན༌གུན༌, ཁྱོ༌ཞ༌རང༌ངི༌ སྙིང༌གུན༌ ངན༌པ༌ དང༌ ཏད༌པ༌ མེད༌ཁན༌ མི༌གྱུར༌ཅེས༌ལ༌ ཤང༌ ཅོ༌ཤིག༌, ཀ༌བོའེ༌ ཁྱོ༌ཞ༌གུན༌ སོན༌པོ༌ དཀོན༌མཆོག༌ནེ༌ ཐག༌རིང༌ང༌ ཁྱེར༌ར༌ནོག༌།
HEB 3:13 ཨིན༌ནའང༌ ཁྱོ༌ཞའ༌ ཅིག༌གའང༌ སྡིག༌པའེ༌ གོབ༌སྐོར༌རི༌ ནང༌ང༌ སོང༌ཏེ༌ དཀོན༌མཆོག༌གི༌ གྱབ༌གལ༌ལ༌ སྙིང༌གུན༌ སྐྱོང༌པོ༌ མི༌གྱུར༌ཅེས༌ལ༌, ཁྱོ༌ཞའེ༌ ཞག༌ཏང༌, ཅིག༌ དང༌ ཅིག༌ག༌ སྤོས༌པ༌ ཏང༌གོས༌, ཐོ༌རེ༌ ཕིའ༌ སྲུངས༌ཏེ༌ མི༌དུག༌ དི༌རིང༌རང༌ ཅོས༌།
HEB 3:14 ངའེ༌ ཏེ༌བོ༌ ཟེར༌རད༌, ཅིའ༌ཟེར༌ན༌ ཀ༌ཟུག༌ གོ༌མ༌ ང༌དང༌ངི༌ ཏད༌པ༌བོ༌ དཀོན༌མཆོག༌གི༌ ནང༌ང༌ སྟན༌པོ༌ ཡོད༌ད༌ ཙོགས༌ལ༌, ཀལ༌ཏེས༌ ང༌དང༌ ཐའ༌མའེ༌ ཏུས༌ ཚོག༌པ༌ ཨིད༌ཤེས༌ཅན༌ ལུས༌ན༌, ཏེ༌ནེ༌ ང༌དང༌གུན༌ནའང༌ མ༌ཤི༌ཀའེ༌ ནོར༌སྐལ༌བོ༌ བགོས༌ཏེ༌ ཐོབ༌ཨིན༌།
HEB 3:15 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “དི༌རིང༌, ཁྱོ༌ཞ༌གུན༌ལ༌ ཁོང༌ངི༌ སུང༌སྐད༌པོ༌ ཚོར༌ ཟ༌ནེ༌, ཁྱོ༌ཞ༌གུན༌ནི༌ སྙིང༌ སྐྱོང༌པོ༌ གྱུར༌ མ༌ཅུག༌ཤིག༌, ཀ༌ཟུག༌གི༌ ཨིས༌ར༌ཨེལ༌པ༌གུན༌ནི༌ ངོ༌ལོག༌ ཅོ༌ ཟ༌ནེ༌ ཅོས༌།”
HEB 3:16 ཏ༌ དཀོན༌མཆོག༌གི༌ སུང༌སྐད༌པོ༌ ཚོར༌ཏེའང༌ ཁོང༌ང༌ ངོ༌ལོག༌ ཅོ༌ཁན༌གུན༌ སུ༌ ཨིན༌ནོག༌? ཅི༌! ཏེ༌གུན༌ མོ༌ཟེས༌སི༌ ཨི༌ཇིབ༌བི༌ ཡུལ༌ནེ༌ ཕིངས༌ཏེ༌ ཁྱོང༌ཁན༌ ཚང༌མ༌ མ༌ནོག༌ག༌?
HEB 3:17 ཡང༌ ལོ༌ ཞིབ༌ཅུ༌ དཀོན༌མཆོག༌ག༌ ཐུགས༌སྲོ༌ ཞངས༌ཤུག༌ཁན༌གུན༌ སུ༌ ཨིན༌ནོག༌? ཅི༌! ཏེ༌ མི༌གུན༌ སྡིག༌པ༌ ཅོ༌ཁན༌གུན༌ ཡང༌ ཏེ༌གུན༌ནི༌ རོ༌ རི༌སྟོང༌ངི༌ ནང༌ང༌ ལུས༌ཁན༌གུན༌ མ༌ནོག༌ག༌?
HEB 3:18 ཡང༌ དཀོན༌མཆོག༌གི༌ ཏེ༌གུན༌ ཁོང༌ངི༌ ངལ༌ཚོ༌སའེ༌ ནས༌སའེ༌ ནང༌ང༌ མ༌ནེ༌ ཞུགས༌ མི༌ཉན༌ མོལ༌ཏེ༌ ནའ༌ ཁུར༌ར༌ ཛད༌ ཟ༌ནེ༌, སུ༌ ཉམ༌པོ༌ ཞལ༌ཏ༌ སལ༌ལ༌ ཛད༌ཏེ༌ ཨིན༌ནོག༌? ཅི༌ ཏེ༌ མི༌གུན༌ ཁོང༌ངི༌ ཁའ༌ མ༌ཉན༌ཁན༌གུན༌ མ༌ནོག༌ག༌?
HEB 3:19 ཏེ༌བོའེ༌ཕིའ༌ ང༌དང༌གུན༌ནི༌ ཐོང༌ང༌ནོག༌, ཁོང༌གུན༌ནི༌ ཏད༌པ༌ མི༌ཅོ༌ཅེས༌པོའེ༌ ཞས༌ཏེ༌, ཁོང༌གུན༌ ངལ༌ཚོ༌སའེ༌ ནས༌སའེ༌ ནང༌ང༌ ཞུགས༌ མ༌ཉན༌ན༌ ཨིན༌པིན༌།
HEB 4:1 ངལ༌ཚོ༌སའེ༌ ནས༌སའེ༌ ནང༌ང༌ ཞུག༌ཅེས༌སི༌ དཀོན༌མཆོག༌གི༌ ཞལ༌ཆད༌པོ༌ ཏ༌རུང༌ངའང༌ ལུས༌ཏེ༌ ཡོད༌ པ༌སང༌, ང༌དང༌གུན༌ནི༌ ཕྲོ༌ནེ༌ སུ༌ཞིག༌གའང༌ ཏེ༌ ངལ༌ཚོ༌སའེ༌ ནས༌སའེ༌ ནང༌ང༌ ཞུག༌ མ༌ཞུགས༌ས༌, མི༌ལུས༌ཤེས༌སི༌ ཕིའ༌, ཤང༌ ཅོ༌ཤིག༌།
HEB 4:2 ཅིའ༌ཟེར༌ན༌ དཀོན༌མཆོག༌གི༌ ངལ༌ཚོ༌སའེ༌ ནས༌ས༌ གྲལ༌གྲིག༌ ཅོའ༌ ཛད༌ཁན༌ནི༌ གའ༌མོའེ༌ ནས༌ཚུལ༌བོ༌, ང༌དང༌ངི༌ ཕ༌མེས༌པོ༌གུན༌ལ༌ ཤད༌ཁན༌ ཙོགས༌ལ༌ ང༌དང༌གུན༌ནི༌ ཕིའང༌ ཤད༌ཏེ༌ ཨིན༌ནོག༌། ཨིན༌ནའང༌ འི༌བོ༌ ཁོང༌གུན༌ལ༌ ཕན༌ཐོགས༌ཅན༌ཞིག༌ མ༌གྱུར༌, ཅིའ༌ཟེར༌ན༌ ཁོང༌གུན༌ དཀོན༌མཆོག༌གི༌ ཁའ༌ཉན༌ཏེ༌ ཨིད༌ཤེས༌ ཅོ༌ཁན༌གུན༌ ཙོགས༌ མན༌པིན༌།
HEB 4:3 ང༌དང༌ ཏད༌པ༌ ཅོ༌ཁན༌གུན༌ ཅིག༌པོ༌ ཁོང༌ངི༌ ངལ༌ཚོ༌སའེ༌ ནས༌སའེ༌ ནང༌ང༌ ཆ༌ཉན༌ན༌ནོག༌, ཀ༌ཟུག༌ དཀོན༌མཆོག༌གི༌ མོལ༌ཏེ༌ ཨིན༌ནོག༌, “ངའེ༌ སྲོའེ༌ ནང༌ང༌ ནའ༌ ཁུར༌པིན༌། ‘ངའེ༌ ངལ༌ཚོ༌སའེ༌ ནས༌སའེ༌ ནང༌ང༌ ཁོང༌གུན༌ མ༌ནེ༌ ཞུགས༌ མི༌ཉན༌།’” ཞན༌ དཀོན༌མཆོག༌གི༌ ཇིག༌རྟེན༌ ཛད༌དི༌ ཏུས༌ནེ༌ ཕར༌ལ༌, འི༌ ངལ༌ཚོ༌སའེ༌ ནས༌ས༌བོ༌ གྲལ༌གྲིག༌ ཛད༌ཏེ༌ ཨིན༌པིན༌།
HEB 4:4 ང༌དང༌ང༌ འི༌ ངལ༌ཚོ༌སའེ༌ ནས༌ས༌ གྲལ༌གྲིག༌ ཡོད༌ཁན༌བོ༌ གྱུས༌ཨིན༌ནོག༌, ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནས༌ས༌ཞིག༌གི༌ཀ༌, ཞག༌ རྡུན༌པའེ༌ ཞག༌གི༌ སྐོར༌ལ༌ བྲིའ༌ ཛད༌ཏེ༌ དུག༌, “ཆག༌ལས༌ ཚང༌མ༌ ཛད༌ཏེ༌ སྟིང༌ནེ༌ ཞག༌ རྡུན༌པའེ༌ ཞག༌ག༌ དཀོན༌མཆོག༌ ངལ༌ཚོའ༌ ཛདས༌།”
HEB 4:5 ཨིན༌ནའང༌ སྔུན༌མ༌ ངའེ༌ བྲིས༌ཁན༌ ཙོགས༌ལ༌ དཀོན༌མཆོག༌གི༌ མོལ༌ལ༌ ཛདས༌, “ཁོང༌གུན༌ ངའེ༌ ངལ༌ཚོ༌སའེ༌ ནས༌སའེ༌ ནང༌ང༌ མ༌ནེ༌ ཞུགས༌ མི༌ཉན༌།”
HEB 4:6 དཀོན༌མཆོག༌གི༌ ངལ༌ཚོ༌ས༌བོ༌ ཏ༌རུང༌ངའང༌ མི༌གུན༌ ཡོང༌ཅེས༌ལ༌ ཕེས༌ཏེ༌ ཨིན༌ནོག༌, ཨིན༌ནའང༌ ཁའ༌ མི༌ཉན༌ཅེས༌པོའེ༌ ཞས༌ཏེ༌, གའ༌མོའེ༌ ནས༌ཚུལ༌ གོ༌མ༌རང༌ ཚོར༌ཁན༌གུན༌ ཏེ༌ནང༌ང༌ ཆ༌ མ༌ཉན༌།
HEB 4:7 དཀོན༌མཆོག༌གི༌ ངལ༌ཚོ༌སའེ༌ ནས༌སའེ༌ ནང༌ང༌ ཆ༌ཅེས༌ལ༌ ཡང༌ ཏུས༌ཤིག༌ ལྡམ༌མ༌ ཛདས༌, ཏེ༌ཏུས༌པོ༌ ནི༌ དི༌རིང༌ ཨིན༌ནོག༌། ཏུས༌ མང༌པོའེ༌ སྟིང༌ནེ༌ དཀོན༌མཆོག༌གི༌ གྱལ༌པོ༌ དཱ༌བིད༌ གྱུད༌ཏེ༌ འི༌བོ༌ ཤད༌ད༌ ཛདས༌, ཀ༌ཟུག༌གི༌ ངའེ༌ སྔུན༌ལ༌ བྲིས༌ཏེ༌ ཡོད༌། “དི༌རིང༌ ཁྱོ༌ཞ༌གུན༌ལ༌ ཁོང༌ངི༌ སུང༌སྐད༌པོ༌ ཚོར༌ ཟ༌ནེ༌, ཁྱོ༌ཞ༌གུན༌ནི༌ སྙིང༌ སྐྱོང༌པོ༌ གྱུར༌ མ༌ཅུག༌ཤིག༌།”
HEB 4:8 ཀལ༌ཏེས༌ ཡོ༌ཤུའ༌ ཨིས༌ར༌ཨེལ༌པ༌གུན༌ལ༌ ཏེ༌ ངལ༌ཚོ༌བོ༌ ཏང༌ཅེས༌སི༌ ནང༌ང༌ ཁྲངས༌པོ༌ ལུས༌པིན༌ན༌, ཏེ༌ནེ༌ དཀོན༌མཆོག༌གི༌ ཞན༌ཡང༌ ཞག༌ཤིག༌གི༌ སྐོར༌ལ༌ སྟིང༌ནེ༌ ཞལ༌ཏ༌ མ༌སལ༌ལ༌ ཡོད༌གྲོ༌།
HEB 4:9 ཏེ༌བོའེ༌ཕིའ༌ ངལ༌ཚོའེ༌ ཏུས༌པོ༌ ཏ༌རུང༌ངའང༌ དཀོན༌མཆོག༌གི༌ མི༌གུན༌ནི༌ ཕིའ༌ ལུས༌ཏེ༌ ཨིན༌ནོག༌།
HEB 4:10 དཀོན༌མཆོག༌གི༌ ཇིག༌རྟེན༌ ཛད༌ཏེ༌ སྟིང༌ནེ༌ ངལ༌ཚོའ༌ ཛད༌ད༌ ཙོགས༌ལ༌, ཁོང༌ངི༌ ངལ༌ཚོ༌སའེ༌ ནས༌སའེ༌ ནང༌ང༌ ལེབ༌ཁན༌ ཚང༌མའ༌, ཁོང༌རང༌ངི༌ ལས༌གུན༌ནི༌ ཀ༌ནེ༌ ངལ༌ཚོ༌ ཐོབ༌ཨིན༌།
HEB 4:11 སོང༌པ༌སང༌ ངལ༌ཚོ༌སའེ༌ ནས༌སའེ༌ ནང༌ང༌ ལེབ༌ཅེས༌སི༌ ཕིའ༌, ང༌དང༌གུན༌ནི༌ རྩོན༌གྲུས༌ གྱལ༌ལ༌ ཅོ༌ཨིན༌། ཨིན༌ནའང༌ ཀལ༌ཏེས༌ ང༌དང༌གུན༌ནི༌ དཀོན༌མཆོག༌གི༌ ཁའ༌ མ༌ཉན༌ན༌, ཏེ༌ནེ༌ ང༌དང༌གུན༌ནའང༌ ཨིས༌ར༌ཨེལ༌པ༌གུན༌ ཙོགས༌ལ༌ ཁྲངས༌པོ༌ མི༌ལུས༌།
HEB 4:12 ཏན༌ཏན༌ལ༌ དཀོན༌མཆོག༌གི༌ བཀའ༌གུན༌ སོན༌པོ༌ དང༌ ཤེད༌ཅན༌ ཨིན༌ནོག༌། འི༌བོ༌ ནི༌ ཚང༌མའེ༌སང༌ ཁ༌ ནོན༌པོ༌ཅན༌ནི༌ ཟུར༌ཉིས༌ ཡོད༌ཁན༌ནི༌ ར༌འི༌ སང༌ ནོན༌པོ༌ ཡོད༌ཏེ༌ ཨིན༌ནོག༌, ཏེ༌བོའེ༌ སེམས༌ དང༌ སེམས༌ཉིད༌ ཡང༌ རུས༌པའེ༌ ཐུད༌ དང༌ རུས༌པའེ༌ སྐང༌ གུན༌ ཅད༌ཏེ༌ སོ༌སོ༌ ཛད༌ ཉན༌ན༌ནོག༌། ཏེ༌བོའེ༌ ང༌དང༌གུན༌ནི༌ ནང༌ཀུག༌གི༌ སམ༌ཚུལ༌ དང༌ དོད༌པ༌ གུན༌ ཕི༌ལོག༌ག༌ ཕིང༌ང༌ནོག༌།
HEB 4:13 དཀོན༌མཆོག༌གི༌ ཞངས༌ཁན༌ ཚང༌མའེ༌ ནང༌ནེ༌ ཅི༌ཞིག༌གའང༌ ཁོང༌ནེ༌ སྦས༌ཏེ༌ བོར༌ མི༌ཉན༌། ཁོང༌ངི༌ མིག༌གི༌ དུན༌ལ༌ ཅི༌ཚང༌མ༌ ཀབ༌ མ༌ཀབ༌བ༌ ཕེས༌ཏེ༌ ཡོད༌ཏེ༌ ཨིན༌ནོག༌, ཡང༌ ཁོང༌ངི༌ དུན༌ལ༌ ང༌དང༌གུན༌ནི༌ ལས༌ ཚང༌མའེ༌ རྩི༌རུག༌ ཏང༌གོས༌ཨིན༌།
HEB 4:14 ཏེ༌ནེ༌ ང༌དང༌གུན༌ལ༌ ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌གི༌ སྲས༌ ཡེ༌ཤུ༌, བླ༌མ༌ ཆེན༌མོ༌ ཀྲག༌པོ༌ཞིག༌ ཡོད༌ པ༌སང༌, ང༌དང༌ངི༌ ཏད༌པའེ༌ སྤང༌པོ༌ ཏང༌ཁན༌བོའེ༌ཀ༌ སྟན༌པོ༌ ཐམས༌ཏེ༌ དུག༌ཤིག༌།
HEB 4:15 ང༌དང༌གུན༌ནི༌ འི༌ བླ༌མ༌ ཆེན༌མོའེ༌, ང༌དང༌གུན༌ སེམས༌སི༌ ནང༌ང༌ འུ༌ཐུགས༌ ཨིན༌ཁན༌བོ༌ ཁྱེན༌ན༌ ཛད༌ད༌ནོག༌། ཅིའ༌ཟེར༌ན༌ ང༌དང༌ ཙོགས༌ལ༌ ཁོང༌ངིའང༌ ཏེན༌ན༌ ཙོགས༌སི༌ ཚོད༌ལྟ༌གུན༌ ཉོངས༌, ཨིན༌ནའང༌ ཁོང༌ངི༌ སྡིག༌པ༌ ཅོའ༌ མ༌ཛདས༌།
HEB 4:16 ཏེན༌ན༌བོའེ༌ཕིའ༌ ང༌དང༌གུན༌ སྙིང༌རྗེ༌ཅན༌ནི༌ དཀོན༌མཆོག༌, ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ ཡོད༌ས༌ ཧམ༌པ༌ ཉམ༌པོ༌ ཡོང༌ཤིག༌། ཏེ༌རུ༌ ཁོང༌ང༌ སྙིང༌རྗེ༌ སྐྱེས༌ཏེ༌ ང༌དང༌གུན༌ལ༌ སྒོས༌དོམ༌ ཡོད༌དི༌ ཏུས༌ལ༌ ཁོང༌ངི༌ ཐུག༌རྗེ༌ རོགས༌གུན༌ ཐོབ༌ཨིན༌།
HEB 5:1 མི༌གུན༌ནི༌ ཕྲོ༌ནེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཡ༌ཧུ༌དཱ༌པའེ༌ བླ༌མ༌ ཆེན༌མོ༌ ཚང༌མའེ༌, མི༌གུན༌ནི༌ བྲེལ༌ དཀོན༌མཆོག༌ ཉམ༌པོ༌ ལུས༌ཤུག༌ཅེས༌ལ༌, ཁོང༌གུན༌ནི༌ ཚབས༌ ཅོས༌ཏེ༌ ལས༌ ཅོའ༌ནོག༌། བླ༌མ༌ ཆེན༌མོའེ༌ ཁག༌ ནི༌, མི༌གུན༌ནི༌ སྡིག༌པའེ༌ ཕིའ༌ སེམས༌ཅན༌ནི༌ སྲོག༌གི༌ ཆོད༌པ༌ དང༌ སྐྱེས༌ གུན༌ དཀོན༌མཆོག༌གི༌ སྐུན༌དུན༌ལ༌ ཕུལ༌ཅེས༌པོ༌ ཨིན༌ནོག༌།
HEB 5:2 བླ༌མ༌ ཆེན༌མོ༌ ཁོ༌རང༌གུན༌ནའང༌ སེམས༌སི༌ ནང༌ང༌ འུ༌ཐུགས༌ ཡོད༌ པ༌སང༌, མ༌ཤེས༌ས༌ སྡིག༌པ༌ ཅོ༌ཁན༌གུན༌ ཉམ༌པོ༌ བོལ༌མོ༌ དང༌ ཇམ༌པོ༌ ཉམ༌པོ༌ ལས༌ ཅོ༌ ཉན༌ན༌ནོག༌།
HEB 5:3 ཏེན༌ན༌བོའེ༌ཕིའ༌ ཁོའ༌ ཁོ༌རང༌ངི༌ སྡིག༌པ༌ མ༌ཚད༌, མི༌གུན༌ནི༌ སྡིག༌པའེ༌ ཕིའང༌ སྲོག༌གི༌ ཆོད༌པ༌ ཕུལ༌གོས༌ས༌ནོག༌།
HEB 5:4 བླ༌མ༌ ཆེན༌མོའེ༌ རྩི༌ཝ༌ཅན༌ནི༌ ཀོ༌ས༌ སུ༌ཞིག༌གིའང༌ ལེན༌ཉན༌ན༌ མ༌ནོག༌། འི༌ ཀོ༌སའེ༌ ཕིའ༌ ཁོའ༌ དཀོན༌མཆོག༌གི༌ ལྡམ༌མ༌ ཛད༌གོས༌ས༌ནོག༌, ཀ༌ཟུག༌ ཨ༌རོན༌ ཟེར༌ཁན༌བོ༌ ཨིན༌པིན༌།
HEB 5:5 ཏེན༌ན༌བོའེ༌ཕིའ༌ མ༌ཤི༌ཀའེ༌ ཁོང༌རང༌ངི༌ ཁོང༌རང༌ང༌ རྩི༌ཝ༌ ཐོབ༌ཅེས༌ལ༌, བླ༌མ༌ ཆེན༌མོ༌ ཅོའ༌ མ༌ཛདས༌། ཨིན༌ནའང༌ ཁོང༌ང༌ “ཁྱོ༌རང༌ ངའེ༌ བུ༌ཚ༌ ཨིན༌། དི༌རིང༌ ང༌ ཁྱོ༌རང༌ངི༌ ཨ༌བ༌ གྱུར༌ཏེ༌ ཨིན༌།” མོལ༌ཁན༌ནི༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཨིན༌ནོག༌།
HEB 5:6 ཞན༌ཡང༌ ནས༌ས༌ཞིག༌གི༌ ནང༌ང༌ དཀོན༌མཆོག༌གི༌ ཁོང༌ང༌ མོལ༌ལ༌ ཛདས༌, “མེལ༌ཀ༌ཟེ༌དེག༌ ཙོགས༌ལ༌ ཁྱོ༌རང༌ ནི༌ ཏུས༌གྱུན༌ནི༌ ཕིའ༌ བླ༌མ༌བོ༌ ཨིན༌།”
HEB 5:7 ཡེ༌ཤུ༌ ཇིག༌རྟེན༌ནི༌ཀ༌ ཞུགས༌ཏེ༌ ཡོད༌ ཟ༌ནེ༌, ཁོང༌ངི༌ ཁོང༌ ཤི༌ཅེས༌སི༌ ཀ༌ནེ༌ སྐྱོབ༌བ༌ ཛད༌ཉན༌ཁན༌ནི༌ དཀོན༌མཆོག༌ག༌ ཆི༌མ༌ ཉམ༌པོ༌ ཀུ༌ཅོ༌ ཏང༌ཨིན༌, ཞུ༌ཝ༌ དང༌ མོས༌ལམ༌ ཕུལ༌ལ༌ ཛདས༌། ཁོང༌ངི༌ སྙིང༌ངི༌ ཐིལ༌ནེ༌ དཀོན༌མཆོག༌ག༌ ཀུས༌པ༌ ཛད༌ཏེ༌, ཁོང༌རང༌ དཀོན༌མཆོག༌གི༌ ཝང༌ངི༌ ཡོག༌ག༌ བོར༌ར༌ ཛད༌པ༌, དཀོན༌མཆོག༌གི༌ ཁོང༌ངི༌ མོས༌ལམ༌གུན༌ སན༌ན༌ ཛདས༌།
HEB 5:8 ཞན༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ནའང༌, རྡུག༌ངལ༌ ཇུང༌ང༌ ཛད༌ཅེས༌པོའེ༌ ཀ༌ནེ༌, ཁོང༌ང༌ དཀོན༌མཆོག༌ག༌ ཁའ༌ཉན༌ཅེས༌པོ༌ ལོབས༌།
HEB 5:9 འིན༌ན༌གུན༌ནི༌ ཞས༌ཏེ༌ དཀོན༌མཆོག༌གི༌ ཁོང༌ང༌ ཕུན༌སུམ༌ཚོགས༌པའེ༌ བླ༌མ༌ ཆེན༌མོ༌ ཅོའ༌ ཛདས༌། ཡང༌ ཡེ༌ཤུ༌ ནི༌, ཁོང༌རང༌ངི༌ ཁའ༌ཉན༌ཁན༌གུན༌ལ༌, ཐའ༌མེད༌པའེ༌ ཐར༌པ༌ སལ༌ལ༌ ཛད༌ཁན༌བོ༌ ཨིན༌ནོག༌།
HEB 5:10 འིན༌ན༌བོའེ༌ ཞས༌ཏེ༌ མེལ༌ཀ༌ཟེ༌དེག༌ ཙོགས༌ལ༌ དཀོན༌མཆོག༌གི༌ ཁོང༌ང༌ བླ༌མ༌ ཆེན༌མོའེ༌ ཀོ༌སའེ༌ཀ༌ སྐོའ༌ ཛདས༌།
HEB 5:11 མ༌ཤི༌ཀ༌ བླ༌མ༌ ཆེན༌མོའེ༌ སྐོར༌ལ༌ ཤད༌གྱུ༌ མང༌པོ༌ ཡོད༌ཏེའང༌, ཁྱོ༌ཞ༌གུན༌ལ༌ ཧ༌གོ༌ཅུག༌ཅེས༌ མ༌ ཀགས༌པོ༌ ཆ༌རུག༌, ཅིའ༌ཟེར༌ན༌ སེམས༌ཉིད༌དི༌ ཐོག༌ནེ༌ ཧ༌གོ༌ཅེས༌ལ༌ ཁྱོ༌ཞ༌གུན༌ འུ༌ཐུགས༌ དུག༌།
HEB 5:12 ཁྱོ༌ཞ༌གུན༌ ཏུས༌ མང༌པོ༌ཞིག༌ནེ༌ ཕར༌ལ༌ ཏད༌པ༌ཅན༌ ཨིན༌ པ༌སང༌, ཁྱོ༌ཞ༌གུན༌ནི༌ ཞན༌མ༌གུན༌ལ༌ ལབ༌ཞའ༌ ཏང༌གོ༌ཤེས༌ ཨིན༌ནོག༌། ཨིན༌ནའང༌ ཁྱོ༌ཞ༌གུན༌ལ༌ ཏ༌རུང༌ངའང༌ དཀོན༌མཆོག༌གི༌ བཀའ༌ཀྲང༌པོའེ༌ མག༌ལྡན༌བོ༌, ཡང༌གོ༌མ༌ནེ༌ ལབ༌ཁན༌ཞིག༌གི༌ སྒོས༌དོམ༌ ཡོད༌ཏེ༌ ཨིན༌ནོག༌། ཁྱོ༌ཞ༌གུན༌ལ༌ ཟན༌ མན༌པ༌, འོ༌མའེ༌ སྒོས༌དོམ༌ ཡོད༌ཏེ༌ ཨིན༌ནོག༌།
HEB 5:13 འོ༌མ༌ ཅིག༌པོ༌ ཐུང༌ཁན༌གུན༌ ཏ༌རུང༌ངའང༌ ཕྲུ༌གུ༌ ཆུ༌ངུན༌ ཙོགས༌ ཨིན༌ནོག༌, ཁོང༌གུན༌ལ༌ མི༌ཚེ༌ ཀྲང༌པོ༌ ཕུད༌ཅེས༌སི༌ ལབ༌ཞ༌གུན༌ ཤེས༌ས༌ མ༌ནོག༌།
HEB 5:14 ཁར༌ཇི༌ ནི༌ ལྡན༌ཁན༌གུན༌ནི༌ ཕིའ༌ ཨིན༌ནོག༌, ཀ༌གུན༌ནི༌ རྩོན༌གྲུས༌ ཅོ༌ཅེས༌པོའེ༌, ཀྲང༌པོ༌ དང༌ ངན༌པའེ༌ ཁྱད༌པོ༌ ཧ༌གོ༌ཐུབ༌ཏེ༌ ཨིན༌ནོག༌།
HEB 6:1 ཏེ༌བོའེ༌ཕིའ༌ ང༌དང༌གུན༌ གོ༌ཟུག༌གི༌ཀ༌ མ༌ཤི༌ཀའེ༌ སྐོར༌ལ༌ ལབ༌ཞ༌ ཐོབ༌ཁན༌གུན༌ནི༌ཀ༌ ཡང༌སྐྱར༌ ལོགས༌ཏེ༌ མ༌ཆའ༌, ཨིན༌ནའང༌ ལྡན༌ཏེ༌ སམ༌བ༌ཅན༌ རིག༌ གྱུར༌ཨིན༌། དེན༌བ༌ ང༌དང༌ང༌ ངན༌པའེ༌ ལས༌གུན༌ནི༌ ཀ༌ནེ༌ གྱོད༌པ༌ སྐྱེ༌ཅེས༌ ཡང༌ དཀོན༌མཆོག༌གི༌ ནང༌ང༌ ཏད༌པ༌ ཅོ༌ཅེས༌སི༌ གོ༌མའེ༌ ལབ༌ཞ༌ གུན༌ནེ༌ ཡང༌སྐྱར༌ གོ༌ཟུགས༌ ཅོ༌གོས༌ མེད༌ཏེ༌ ཨིན༌ནོག༌།
HEB 6:2 ཁྱོ༌ཞ༌གུན༌ལ༌ ཁྲུས༌ལེན༌ཅེས༌, ཐུག༌ཉིད༌དི༌ ཁྱུད༌གུན༌ ཐོབ༌ཅེས༌ལ༌ གོའེ༌ཀ༌ ལག༌པ༌ བོར༌ཅེས༌, ཤི༌ཁན༌གུན༌ སོན༌ཏེའ༌ ལང༌ཅེས༌ དང༌ ཐའ༌མེད༌པའེ༌ ཁྲིམས༌ཅད༌ གུན༌ནི༌ སྐོར༌ལ༌ ཏ༌རུང༌ མང༌ང༌ ལབ༌ཞ༌ ལེན༌གོས༌ མེད༌པ༌ ཨིན༌ནོག༌།
HEB 6:3 ཡང༌ དཀོན༌མཆོག༌གི༌ ཐུགས༌དོད༌ ཡོད༌ན༌ ང༌དང༌གུན༌ ལྡན༌ཁན༌ནི༌ ལབ༌ཞའེ༌ ནང༌ང༌ ཀེན༌ལ༌ ཆེན༌།
HEB 6:4 གྱོད༌པ༌ ཅོ༌ཅེས༌སི༌ ཕིའ༌ འི༌ མི༌གུན༌ ལོགས༌ཏེ༌ མ༌ནེ༌ ཁྱོང༌ཉན༌ན༌ མ༌ནོག༌, ཀ༌གུན༌ལ༌ མ༌ཤི༌ཀའེ༌ སྐོར༌ལ༌ ལོན༌བོའེ༌ ཧ༌གོ༌ གང༌པོ༌ ཡོད༌, ནམ༌ཁའེ༌ ཅིན༌ལབས༌གུན༌ནི༌ བྲོད༌ ཉོངས༌, ཡང༌ ཏམ༌པའེ༌ ཐུག༌ཉིད༌དི༌ ནང༌ང༌ དྲེས༌,
HEB 6:5 དཀོན༌མཆོག༌གི༌ བཀའ༌ ཟང༌པོའེ༌ ཡང༌ དཀོན༌མཆོག༌གི༌ གྱལ༌སྲིད༌ ཡོང༌ཅེས༌ཅན༌ནི༌ ཁྱུད༌གུན༌ནི༌ ཐོང༌ངོམས༌ ཡོད༌།
HEB 6:6 ཡང༌ སྟིང༌ནེ༌ ཁོང༌གུན༌ དཀོན༌མཆོག༌ནེ༌ བེ༌ཏེ༌ ཐག༌རིང༌ང༌ སོང༌། འི༌ཙོགས༌སི༌ མི༌གུན༌ གྱོད༌སེམས༌སི༌ ནང༌ང༌ ལོགས༌ཏེ༌ ཁྱོང༌ཉན༌ན༌ མ༌ནོག༌། དཀོན༌མཆོག༌གི༌ སྲས༌ ཕང༌ཅེས༌པོའེ༌, ཁོང༌གུན༌ནི༌ མ༌ཤི༌ཀའ༌ ཡང༌སྐྱར༌ རྐྱང༌ཤིང༌ངི༌ཀ༌ རྐྱང༌ཅེས༌ ཡང༌ མི༌གུན༌ནི༌ དུན༌ལ༌ ཁྲེལ༌བ༌ སྟན༌ཏེ༌ ཨིན༌ནོག༌།
HEB 6:7 ས༌ཀྱད༌དི༌ ནང༌ང༌ ཆར༌པ༌ ཐིམས༌ཏེ༌ ཞིང༌བད༌པ༌གུན༌ལ༌ སྟོན༌ཐོགས༌ གྱལ༌ལ༌ སྨིན༌ཅེས༌པོའེ༌ཀ༌ དཀོན༌མཆོག༌གི༌ ཅིན༌ལབས༌ ཡོད༌ཏེ༌ ཨིན༌ནོག༌།
HEB 6:8 ཨིན༌ནའང༌ ཚེར༌མང༌ དང༌ ལྗང༌ཙེར༌ སྐྱེ༌ཁན༌ནི༌ ཞིང༌, ཕན༌མི༌ཐོགས༌ཤིག༌ ཨིན༌ནོག༌། ཏེ༌ ཞིང༌བོའ༌ ངན༌ ཕོག༌ཏེ༌ མེའ༌ཏུག༌ག༌ ཛད༌ད༌ནོག༌།
HEB 6:9 ཅེས༌པའེ༌ ཛ༌འོ༌གུན༌ ཞན༌ ང༌ཞའེ༌ ཏེ༌ཙོགས༌སི༌ སྤེ༌ར༌ ཏང༌ནའང༌, ཁྱོ༌ཞ༌གུན༌ནི༌ མི༌ཚེ༌ ཕུད༌ཚུལ༌བོ༌ ཐར༌པ༌ ཐོབ༌ཅེས༌ཅན༌གུན༌ ཙོགས༌, ཡོད༌ཅེས༌ལ༌ ང༌ཞའ༌ ལོ༌ཁྱེལ༌ རག༌།
HEB 6:10 དཀོན༌མཆོག༌ ནི༌ མི༌འོས༌པ༌ ཛད༌ཁན༌ཞིག༌ ཞུགས༌ཏེ༌ མ༌ནོག༌། ཁྱོ༌ཞ༌གུན༌ནི༌ ཁོང༌ངི༌ ཏོན༌ལ༌ ཙམ༌ཤིག༌གི༌ རྩོན༌གྲུས༌ དང༌ ཞན༌ཡང༌ ཏད༌པ༌ཅན༌གུན༌ལ༌ རོགས༌ ཅོས༌, ཡང༌ ཏ༌རུང༌ངའང༌ ཅོ༌ཅེས༌པོའེ༌ དཀོན༌མཆོག༌ག༌ ཅེས༌པ༌ སྟན༌ཁན༌བོ༌, ཁོང༌ངི༌ མ༌ནེ༌ རྗེད༌ད༌ མི༌ཛད༌།
HEB 6:11 ཁྱོ༌ཞའ༌ སོན༌ཏེའ༌ ཡོད༌ ཟ༌ནེ༌, ཞན༌མ༌གུན༌ལ༌ ཅེས༌པ༌ ཅོ༌ཅེས༌པོ༌ ང༌ཞའེ༌ དོད༌པ༌ ཆེན༌མོ༌ ཨིན༌། ཏེ༌ཟུག༌ ཅོ༌ཅེས༌པོའེ༌ ཁྱོ༌ཞ༌གུན༌ནི༌ རེ༌ཝ༌ ཅོ༌ཁན༌བོ༌ དྲན༌དྲ༌ གྲུབ༌ ཐུབ༌ཨིན༌།
HEB 6:12 ཁྱོ༌ཞ༌གུན༌ ལས༌མི༌ལམ༌ གྱུར༌ མ༌གོས༌། ཨིན༌ནའང༌ ཏད༌པ༌ དང༌ སྙིང༌རུས༌ གུན༌ནི༌ ཞས༌ཏེ༌, དཀོན༌མཆོག༌གི༌ ཞལ༌ཆད༌ ཛད༌ཁན༌ ནོར༌སྐལ༌ལ༌, ཐོབ༌ཁན༌གུན༌ནི༌ སྤེའེ༌ཀ༌ གྲུལ༌ཅེས༌པོ༌ ང༌ཞའེ༌ དོད༌པ༌ ཨིན༌།
HEB 6:13 དཀོན༌མཆོག༌གི༌ ཨབ༌ར༌ཧམ༌མ༌ ཞལ༌ཆད༌ ཛད༌ ཟ༌ནེ༌, ནའ༌ ཁུར༌ཅེས༌ལ༌ ཞན༌སུ༌ཞིག༌གའང༌ ཁོང༌ངི༌ སང༌ ཀྲག༌ག༌ཞིག༌ མེད༌ པ༌སང༌, དཀོན༌མཆོག༌གི༌ ཁོང༌རང༌ངི༌ ཚན༌ནི༌ ནང༌ང༌ ནའ༌ ཁུར༌ར༌ ཛད༌ཏེ༌ མོལས༌,
HEB 6:14 “ངའེ༌ ཏན༌ཏན༌ལ༌ ཁྱོ༌རང༌ང༌ ཅིན༌ལབས༌ ཏངས༌ཏེ༌ ཁྱོ༌རང༌ངི༌ པུར༌གྱུད༌གུན༌ མ༌མང༌པོ༌ ཕེལ༌ཅུག༌ཨིན༌།”
HEB 6:15 ཡང༌ ཨབ༌ར༌ཧམ༌མི༌ ཟོད༌པ༌ ཉམ༌པོ༌ སྲུངས༌པ༌, ཁོའ༌ དཀོན༌མཆོག༌གི༌ ཞལ༌ཆད༌ ཛད༌ཁན༌བོ༌ ཐོབ༌།
HEB 6:16 ནའ༌ ཁུར༌ ཟ༌ནེ༌, མི༌གུན༌ནི༌ ཁོ༌རང༌གུན༌ནི༌ སང༌ ཀྲག༌ག༌ཞིག༌གི༌ ནའ༌ ཁུར༌ར༌ནོག༌, ཡང༌ ནའ༌ ཁུར༌ཅེས༌པོའེ༌ ཁོང༌གུན༌ནི༌ ཟེར༌ཁན༌བོ༌ སྟན༌པོ༌ ཅོས༌ཏེ༌ ཟེར༌གྱུ༌ མེད༌ཁན༌ ཅོའ༌ནོག༌།
HEB 6:17 ཏེན༌ན༌ ཙོགས༌ལ༌, ཞལ༌ཆད༌ ཐོབ༌ཁན༌གུན༌ལ༌, དཀོན༌མཆོག༌ ཁོང༌རང༌ངི༌ ཐུགས༌སམ༌མི༌ ནང༌ང༌ མ༌ནེ༌ མི༌གྱུར༌ཅེས༌ ཨིན༌ཁན༌བོ༌, ཏན༌ཏན༌ སལ༌པོ༌ ཅོ༌ཅེས༌སི༌ ཕིའ༌ ཁོང༌ངི༌ ནའ༌ ཁུར༌ར༌ ཛདས༌།
HEB 6:18 ཏེ༌བོའེ༌ཕིའ༌ དཀོན༌མཆོག༌གི༌ ཞལ༌ཆད༌ ཛད༌ཁན༌ དང༌ ནའ༌ ཁུར༌ཁན༌ ཉིས༌ཀོའེ༌ ནང༌ང༌ གྱུར༌ཇ༌ མི༌ཛད༌, ཅིའ༌ཟེར༌ན༌ ཁོང༌ང༌ ཟུན༌ སལ༌ ཉན༌ཅེས༌ མ༌ནེ༌ མེད༌ཀྱག༌། ཏེ༌བོའེ༌ཕིའ༌ ང༌དང༌གུན༌ནི༌ ཐོབ༌ཅེས༌ཅན༌ནི༌ ཐར༌པའེ༌ རེ༌ཝ༌བོའ༌ ཐམས༌ཏེ༌, དཀོན༌མཆོག༌གི༌ ཆག༌གི༌ ཡོག༌ག༌ སྐྱོབ༌བ༌ ཛད༌ཅེས༌ལ༌ ཁོང༌ངི༌ ཆོགས༌ལ༌ བང༌ཏང༌ཁན༌ ང༌དང༌གུན༌ལ༌ ལོ༌ཁྱེལ༌ ཆེན༌མོ༌ བོར༌ཐུབ༌བ༌ནོག༌།
HEB 6:19 འི༌ རེ༌ཝ༌བོའེ༌ ང༌དང༌གུན༌ནི༌ སེམས༌པོ༌ སྟན༌པོ༌, མ༌ནེ༌ སྐུལ༌མི༌ཉན༌ཅེས༌སི༌ བྲག༌ དང༌ཙོགས༌ ཅོའ༌ནོག༌, ཡང༌ ང༌དང༌གུན༌ ཡོ༌ལའེ༌ གྱབ༌བ༌, དཀོན༌མཆོག༌གི༌ ཚང༌མའེ༌སང༌ ཏམ༌པའེ༌ ནས༌ས༌བོའེ༌ ནང༌ང༌ ཁྲིད༌ཏེ༌ ཁྱེར༌ཨིན༌།
HEB 6:20 ཡེ༌ཤུ༌ ཏེ༌རུ༌ ང༌དང༌གུན༌ནི༌ ཏོན༌ལ༌ སྔུན༌ལ༌ སྐྱོད༌ ཚར༌ཏེ༌, མེལ༌ཀ༌ཟེ༌དེག༌ ཙོགས༌ལ༌ ཁོང༌ ཏུས༌གྱུན༌ནི༌ ཕིའ༌ ང༌དང༌གུན༌ནི༌ བླ༌མ༌ ཆེན༌མོ༌ གྱུར༌ར༌ ཛད༌ཏེ༌ ཨིན༌ནོག༌།
HEB 7:1 མེལ༌ཀ༌ཟེ༌དེག༌ ནི༌ སེ༌ལམ༌ གྱལ༌སའེ༌ གྱལ༌པོ༌ དང༌ ཚང༌མའེ༌སང༌ ཀྲག༌པོ༌ དཀོན༌མཆོག༌གི༌ བླ༌མ༌ ཨིན༌པིན༌། ཨབ༌ར༌ཧམ༌མི༌ གྱལ༌པོ༌གུན༌ནི༌ གྱབ༌གལ༌ལ༌ མག༌ ཏངས༌ཏེ༌ གྱལ༌ཁའ༌ ཐོབ༌ཏེ༌ ལོགས༌ཏེ༌ ཡོངས༌ ཟ༌ནེ༌, མེལ༌ཀ༌ཟེ༌དེག༌ག༌ ཁོང༌ ཐུག༌, ཡང༌ ཁོང༌ངི༌ ཨབ༌ར༌ཧམ༌མ༌ ཅིན༌ལབས༌ སལས༌།
HEB 7:2 ཏེ༌ནེ༌ ཨབ༌ར༌ཧམ༌མི༌ མག༌གི༌ ནང༌ང༌ ཐོབ༌ཁན༌ ནོར༌ ཚང༌མའེ༌ ནང༌ནེ༌ རྕུ༌ཁག༌ཅིག༌, མེལ༌ཀ༌ཟེ༌དེག༌ག༌ ཕུལས༌། མེལ༌ཀ༌ཟེ༌དེག༌ མིང༌བོའེ༌ ཏོན༌ ཏང༌པོ༌ ནི༌, “གྱལ༌པོ༌ ཀྲང༌པོ༌” ཡང༌ སེ༌ལམ༌མི༌ གྱལ༌པོའེ༌ ཏོན༌བོ༌ ནི༌, “ཞི༌དེའེ༌ གྱལ༌པོ༌” ཨིན༌ནོག༌།
HEB 7:3 ཁོང༌ངི༌ ཨ༌བ༌, ཨ༌མ༌ ཡ༌ ཕ༌མེས༌པོ༌ མ༌ཚད༌, ཁོང༌ སྐྱེ༌ཅེས༌ ཡ༌ ཤི༌ཅེས༌སི༌ སྐོར༌ལ༌ ཅའང༌ ཤད༌གྱུ༌ མེད༌ཏེ༌ ཨིན༌ནོག༌། དཀོན༌མཆོག༌གི༌ སྲས༌ ཙོགས༌ལ༌ ཁོང༌ ཏུས༌གྱུན༌ བླ༌མ༌ཞིག༌ ལུས༌།
HEB 7:4 སམ༌བ༌ ཏོང༌ཤིག༌གའང༌, མེལ༌ཀ༌ཟེ༌དེག༌ ཙམ༌ཤིག༌གི༌ ཀྲག༌པོ༌ ཞུགས༌ཏེ༌ མ༌ནོག༌། ཨིས༌ར༌ཨེལ༌ལི༌ ཕ༌མེས༌པོ༌ མིང༌ཅན༌ ཨབ༌ར༌ཧམ༌མིའང༌ མག༌གི༌ ནང༌ང༌ ཐོབ༌ཁན༌ ཚང༌མའེ༌ ནང༌ནེ༌ རྕུ༌ཁག༌ཅིག༌ ཁོང༌ང༌ ཕུལས༌།
HEB 7:5 ཏ༌ མོ༌ཟེས༌སི༌ ཁྲིམས༌ ནང༌ཞིན༌ལ༌, ལི༌ཝི༌ པུར༌གྱུད༌ནེ༌ ཨིན༌ཁན༌ནི༌ བླ༌མ༌གུན༌ནི༌ ཨིས༌ར༌ཨེལ༌པ༌གུན༌ནི༌ ཀ༌ནེ༌ རྕུ༌ཁག༌ཅིག༌ ལྡུ༌ཆོགས༌སད༌པིན༌, ཀ༌གུན༌ནའང༌ ཨབ༌ར༌ཧམ༌མི༌ པུར༌གྱུད༌ ཨིན༌ནོག༌།
HEB 7:6 ཨིན༌ནའང༌ ལི༌ཝི༌པའེ༌ པུར༌གྱུད༌ནེ༌ མན༌ཁན༌ནི༌ མེལ༌ཀི༌ཟེ༌དེག༌གིའང༌ ཨབ༌ར༌ཧམ༌མི༌ ཀ༌ནེ༌ རྕུ༌ཁག༌ཅིག༌ ལེན༌ཏེ༌ དཀོན༌མཆོག༌གི༌ ཞལ༌ཆད༌ ཐོབ༌ཁན༌ནི༌ ཨབ༌ར༌ཧམ༌མའ༌ ཅིན༌ལབས༌ ཏངས༌།
HEB 7:7 ཡང༌ ཐེ༌ཚོམས༌ མ༌ནེ༌ མེད༌པ༌, ཅིན༌ལབས༌ ཏང༌ཁན༌བོ༌ ཅིན༌ལབས༌ ལེན༌ཁན༌བོའེ༌ སང༌ ཆེའ༌ ཨིན༌ནོག༌།
HEB 7:8 རྕུ༌ཁག༌ཅིག༌ ལེན༌ཁན༌ནི༌ བླ༌མ༌གུན༌, ཤིའ༌ནོག༌, ཨིན༌ནའང༌ མེལ༌ཀ༌ཟེ༌དེག༌ བླ༌མ༌གུན༌ནི༌ སང༌ ཀྲག༌ག༌ ཨིན༌ནོག༌, ཅིའ༌ཟེར༌ན༌ སུང༌རབས༌སི༌ ནང༌ང༌ ཁོང༌ ཤི༌ཁན༌ནི༌ སྐོར༌ལ༌ བྲིས༌ཏེ༌ མེད༌ པ༌སང༌, ཁོང༌ ཏུས༌གྱུན༌ སོན༌ཏེའ༌ ལུས༌ཁན༌ ཐེའ༌ནོག༌།
HEB 7:9 འི༌བོའང༌ ཟེར༌ཉན༌ཅེས༌ ཨིན༌ནོག༌, རྕུ༌ཁག༌ཅིག༌ ལེན༌ཁན༌ནི༌ ལི༌ཝི༌པ༌གུན༌ནི༌ མེལ༌ཀ༌ཟེ༌དེག༌ག༌ རྕུ༌ཁག༌ཅིག༌ ཏངས༌ཏེ༌ ཨིན༌ནོག༌, ནམ༌ ཁོང༌གུན༌ནི༌ ཕ༌མེས༌པོ༌ ཨབ༌ར༌ཧམ༌མི༌ མེལ༌ཀ༌ཟེ༌དེག༌ག༌ རྕུ༌ཁག༌ཅིག༌ ཕུལས༌།
HEB 7:10 ཅིའ༌ཟེར༌ན༌ མེལ༌ཀ༌ཟེ༌དེག༌ ཨབ༌ར༌ཧམ༌མ༌ ཐུག༌ ཟ༌ནེ༌, ལི༌ཝི༌པ༌གུན༌ མ༌སྐྱེའ༌ ཨིན༌པིན༌, ཨིན༌ནའང༌ ཁོང༌གུན༌ནི༌ ཕ༌མེས༌པོ༌, ཨབ༌ར༌ཧམ༌མི༌ ཁྲག༌གི༌ ནང༌ང༌ ཁོང༌གུན༌ ཡོད༌ཏེ༌ ཨིན༌པིན༌།
HEB 7:11 ཀལ༌ཏེས༌ ཁྲིམས༌སི༌ མག༌ལྡན༌ ཨིན༌ཁན༌ནི༌ ལི༌ཝི༌པའེ༌ པུར༌གྱུད༌ བླ༌མའེ༌ ལས༌གུན༌ གྱུད༌ཏེ༌, དཀོན༌མཆོག༌གི༌ དུན༌ལ༌ ཁྲངས༌པོ༌ གྱུར༌ཐུབ༌བད༌པིན༌ན༌, ཏེ༌ནེ༌ ཅི༌ཕིའ༌ དཀོན༌མཆོག༌ག༌ ཡང༌ སོ༌སོ༌ བླ༌མའེ༌ རིག༌ཤིག༌ ཙུག༌ག༌ ཛད༌གོས༌, ཀ༌ བླ༌མ༌བོ༌ ཨ༌རོན༌ནི༌ གྱུད༌ནེ༌ མན༌པ༌ མེལ༌ཀ༌ཟེ༌དེག༌ ཙོགས༌ ཨིན༌པིན༌།
HEB 7:12 ཏ༌ ནམ༌ བླ༌མའེ༌ གྱུད༌བོ༌ གྱུར༌ན༌ ཏེ༌ནེ༌ ཁྲིམས༌སི༌ ནང༌ངའང༌ གྱུར༌ཇ༌ ཡོང༌གོས༌།
HEB 7:13 ངའེ༌ སྤེ༌ར༌ ཏང༌ཁན༌ནི༌ བླ༌མ༌བོ༌ ལི༌ཝི༌ པུར༌གྱུད༌ནེ༌ མན༌པ༌, ཞན༌ཡང༌ པུར༌གྱུད༌ཤིག༌ནེ༌ ཨིན༌ནོག༌, ཀ༌གུན༌ནི༌ ཆོད༌ཁྲི༌ཀ༌ མ༌ནེ༌ ཞབས༌ཏོག༌ མ༌ཞུའ༌ ཨིན༌པིན༌།
HEB 7:14 ངའེ༌ ཟེར༌ཅེས༌སི༌ ཏོན༌བོ༌ ནི༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ ཡ༌ཧུ༌དཱའེ༌ པུར༌གྱུད༌ནེ༌ སྐྱོད༌ད༌ ཛད༌ཏེ༌ ཨིན༌ནོག༌། ཡང༌ མོ༌ཟེས༌སི༌, ཏེ༌ པུར༌གྱུད༌ནེ༌ བླ༌མ༌ སྐྱོད༌ཁན༌ནི༌ སྐོར༌ལ༌ མ༌ནེ༌ མོལ༌ལ༌ ཛད༌ཏེ༌ མི༌དུག༌།
HEB 7:15 མེལ༌ཀ༌ཟེ༌དེག༌ ཙོགས༌ལ༌ བླ༌མ༌ སོ༌སོ༌ཞིག༌ ཇུང༌ཅེས༌པོའེ༌, འི༌ གྱུར༌ཇ༌བོ༌ མ༌ སལ༌པོ༌ སོང༌ཏེ༌ ཨིན༌ནོག༌།
HEB 7:16 ཁྲིམས༌ ནང༌ཞིན༌ ལི༌ཝིའི༌ པུར༌གྱུད༌ནེ༌ ཡིན༌ཅེས༌པོའེ༌, གཙོ༌བོ༌ ཡེ༌ཤུ༌ བླ༌མ༌ གྱུར༌ར༌ མ༌ཛདས༌, ཨིན༌ནའང༌ མ༌ནེ༌ ཤིག༌ མི༌ཉན༌ཅེས༌སི༌ ཁྱུད༌ཅན༌ མི༌ཚེའེ༌ ཞས༌ཏེ༌, ཁོང༌ བླ༌མ༌ གྱུར༌ར༌ ཛདས༌།
HEB 7:17 ཏམ༌པའེ༌ སུང༌རབས༌སི༌ ནང༌ང༌ ཁོང༌ངི༌ སྐོར༌ལ༌, “མེལ༌ཀ༌ཟེ༌དེག༌ ཙོགས༌ལ༌ ཉེ༌རང༌ ཏུས༌གྱུན༌ནི༌ ཕིའ༌ བླ༌མ༌ ཨིན༌” མོལ༌ཏེ༌ ཡོད༌ཏེ༌ ཨིན༌ནོག༌།
HEB 7:18 འོ༌ན༌, བླ༌མ༌ གྱུར༌ཅེས༌ལ༌, སྔུན༌མའེ༌ སྒོས༌དོམ༌གུན༌ ཐེན༌ཏེ༌ མེད༌ཏེ༌ ཨིན༌ནོག༌, ཅིའ༌ཟེར༌ན༌ ཏེ༌བོ༌ འུ༌ཐུགས༌ དང༌ ཕན༌མི༌ཐོགས༌ ཡོད༌པིན༌།
HEB 7:19 ཁྲིམས༌སི༌ ཅི༌ཞིག༌གའང༌ ཕུན༌སུམ༌ཚོགས༌པ༌ ཅོ༌ མ༌ཉན༌། ཨིན༌ནའང༌ ཏ༌ དག༌ས༌ ང༌དང༌གུན༌ལ༌ སྔུན༌ནི༌ སང༌ རེ༌ཝ༌ མང༌ང༌ ཀྲག༌པོ༌ཞིག༌ ཡོད༌ཏེ༌ ཨིན༌ནོག༌, ཀ༌བོའེ༌ ང༌དང༌གུན༌ དཀོན༌མཆོག༌ དང༌ ཉེ༌མོའ༌ ཁྱེར༌ར༌ནོག༌།
HEB 7:20 དཀོན༌མཆོག༌གི༌ ནའ༌ ཁུར༌ར༌ ཛད༌ཏེ༌ འི༌བོ༌ སྟན༌པོ༌ ཛདས༌། ཨ༌རོན༌ནི༌ པུར༌གྱུད༌ ཏེ༌ཙོགས༌སི༌ ནའ༌ མ༌ཁུར༌ར༌ བླ༌མ༌ གྱུར༌ཏེ༌ ཨིན༌ནོག༌།
HEB 7:21 ཨིན༌ནའང༌ ཡེ༌ཤུ༌ ནའ༌ ཉམ༌པོ༌ བླ༌མ༌ གྱུར༌ར༌ ཛདས༌, ནམ༌ ཁོང༌ང༌ དཀོན༌མཆོག༌གི༌ མོལས༌, “གཙོ༌བོ༌ དཀོན༌མཆོག༌གི༌ ནའ༌ ཁུར༌ར༌ ཛདས༌, ཡང༌ ཁོང༌ངི༌ ཏེ༌བོ༌ ཅག༌ག༌ མི༌ཛད༌, ‘ཁྱོ༌རང༌ ཏུས༌གྱུན༌ནི༌ ཕིའ༌ བླ༌མ༌ ཨིན༌།’”
HEB 7:22 ཏེ༌ ནའ༌བོའེ༌ ཞས༌ཏེ༌ དཀོན༌མཆོག༌གི༌ ང༌དང༌གུན༌ལ༌ ཆད༌དོན༌ མ༌ གྱལ༌ལ༌ཞིག༌ ཛད༌ཁན༌བོ༌, ཡེ༌ཤུའི༌ ཏན༌ཏན༌ ཅོའ༌ ཛདས༌།
HEB 7:23 སྔུན༌མའེ༌ ཚིར༌ཀའེ༌ ནང༌ང༌, བླ༌མ༌ མང༌པོ༌ཞིག༌ ཡོད༌ཏེ༌ ཨིན༌ནོག༌, ཅིའ༌ཟེར༌ན༌ ཤི༌ཅེས༌པོའེ༌ ཁོང༌གུན༌ལ༌ བླ༌མའེ༌ ལས༌པོ༌ ཏུས༌གྱུན༌ནི༌ ཕིའ༌ ཅོ༌ མ༌ཉན༌།
HEB 7:24 ཨིན༌ནའང༌ ཡེ༌ཤུ༌ ཏུས༌གྱུན༌ སོན༌ཏེའ༌ ལུས༌ པ༌སང༌, ཁོང༌ངི༌ བླ༌མའེ༌ ཆག༌ལས༌པོ༌ ཏུས༌གྱུན༌ ལུས༌ས༌ ཛད༌ཨིན༌།
HEB 7:25 ཏེ༌བོའེ༌ཕིའ༌ ཁོང༌ གྱུད༌ཏེ༌, དཀོན༌མཆོག༌གི༌ཀ༌ ཡོང༌ཁན༌གུན༌ ཁོང༌ངི༌ ཏུས༌གྱུན༌ནི༌ ཕིའ༌ སྐྱོབ༌ ཐུབ༌ཨིན༌། ཏེ༌ མི༌གུན༌ནི༌ ཕིའ༌ དཀོན༌མཆོག༌ག༌ ཞུ༌ཝ༌ ཕུལ༌ཅེས༌ལ༌, ཁོང༌ ཏུས༌གྱུན༌ ཞུགས༌ས༌ ཛད༌ད༌ནོག༌།
HEB 7:26 ཏེ༌ཙོགས༌སི༌ བླ༌མ༌ ཆེན༌མོའེ༌ ང༌དང༌ངི༌ སྒོས༌དོམ༌གུན༌ གྲུབ༌ ཅུག༌ག༌ནོག༌། ཁོང༌ ནི༌, ཏམ༌པ༌, སྐྱོན༌མེད༌, རྩང༌མ༌, སྡིག༌ཅན༌གུན༌ནེ༌ སོ༌སོ༌ ཕེའ༌ ཛད༌ཁན༌ དང༌ ནམ༌ཁའེ༌ ནང༌ང༌ རྩི༌ཝ༌ ཆེ༌ཤོག༌ཅན༌ནི༌ ཀོ༌ས༌ ཐོབ༌བ༌ ཛད༌ཁན༌བོ༌ ཞུགས༌ཏེ༌ ཨིན༌ནོག༌།
HEB 7:27 ཞན༌ བླ༌མ༌ ཆེན༌མོ༌གུན༌ ཙོགས༌ལ༌ ཁོང༌ང༌ གོ༌མ༌ ཁོ༌རང༌ངི༌ སྡིག༌པ༌, ཏེ༌ནེ༌ ཞན༌མི༌གུན༌ནི༌ སྡིག༌པའེ༌ ཕིའ༌, ཞག༌ཏང༌ སྲོག༌གི༌ ཆོད༌པ༌ ཕུལ༌གོས༌ མེད༌པ༌ ཨིན༌ནོག༌, ཅིའ༌ཟེར༌ན༌ ཡེ༌ཤུའི༌ ཁོང༌རང༌ ལན༌ཅིག༌ མི༌ཚང༌མའེ༌ ཕིའ༌ སྲོག༌གི༌ ཆོད༌པ༌ ཕུལ༌ལ༌ ཛདས༌།
HEB 7:28 ཁྲིམས༌སི༌ འུ༌ཐུགས༌ཅན༌ནི༌ བླ༌མ༌ ཆེན༌མོ༌གུན༌ སྐོའ༌ནོག༌། ཨིན༌ནའང༌ ཁྲིམས༌སི༌ སྟིང༌ནེ༌ དཀོན༌མཆོག༌གི༌ ནའ༌ ཉམ༌པོ༌ ཁོང༌རང༌ངི༌ སྲས༌ ལྡམ༌མ༌ ཛདས༌, ཡང༌ ཁོང༌ངི༌ སྲས༌པོ༌ ཕུན༌སུམ༌ཚོགས༌པའེ༌ བླ༌མ༌ ཆེན༌མོ༌ ཏུས༌གྱུན༌ནི༌ ཕིའ༌ ཅོའ༌ ཛདས༌།
HEB 8:1 ངའེ༌ ཟེར༌ཅེས༌སི༌ ཏོན༌བོ༌ ནི༌, ང༌དང༌གུན༌ལ༌ བླ༌མ༌ ཆེན༌མོ༌ཞིག༌ ཡོད༌ཏེ༌ ཨིན༌ནོག༌། ཁོང༌ ནི༌ ནམ༌ཁའེ༌ ནང༌ང༌ ཟིར༌རྗིད༌ཅན༌ནི༌ དཀོན༌མཆོག༌གི༌ ཞུགས༌ཁྲིས༌སི༌ ཡས༌ ཆོགས༌ལ༌ རྩི༌ཝ༌ཅན༌ནི༌ ནས༌སའེ༌ཀ༌ ཞུགས༌ཁན༌བོ༌ ཨིན༌།
HEB 8:2 ཡང༌ ནམ༌ཁའེ༌ ཀུར༌, ངོས༌པོའེ༌ ཅོལ༌སའེ༌ ནས༌སའེ༌ ནང༌ང༌ བླ༌མའེ༌ ཚུལ༌ལ༌ ཞབས༌ཏོག༌ ཞུའ༌ ཛད༌ད༌ནོག༌, ཀ༌བོ༌ མིའི༌ མ༌ཅོའ༌ གཙོ༌བོ༌ དཀོན༌མཆོག༌གི༌ ཅོའ༌ ཛད༌ཏེ༌ ཨིན༌ནོག༌།
HEB 8:3 བླ༌མ༌ ཆེན༌མོ༌ ཚང༌མ༌, སྐྱེས༌ དང༌ སྲོག༌གི༌ ཆོད༌པ༌ གུན༌ ཕུལ༌ཅེས༌ལ༌ སྐོའ༌ ཛད༌ པ༌སང༌, ང༌དང༌གུན༌ནི༌ ནམ༌ཁའེ༌ བླ༌མ༌ ཆེན༌མོའང༌ ཕུལ༌ཅེས༌ལ༌ ཆོད༌པ༌ཞིག༌ ཡོང༌གོས༌།
HEB 8:4 ཀལ༌ཏེས༌ ཁོང༌, འི༌ ཇིག༌རྟེན༌ནི༌ཀ༌ ཞུགས༌ཏེ༌ ཡོད༌པིན༌ན༌ ཏེ༌ནེ༌ ཁོང༌ བླ༌མ༌ཞིག༌ ཨིན༌ ཁོ༌རང༌ མན༌གྲོ༌, ཅིའ༌ཟེར༌ན༌ འི༌རུ༌ ཁྲིམས༌ ནང༌ཞིན༌ ཆོད༌པ༌ ཕུལ༌ཁན༌ནི༌ བླ༌མ༌གུན༌ ཡོད༌ཏེ༌ ཨིན༌ནོག༌།
HEB 8:5 བླ༌མ༌གུན༌ནི༌ ཞབས༌ཏོག༌ ཞུ༌ཨིན༌ ཅོལ༌སའེ༌ ནས༌ས༌བོ༌ ནམ༌ཁའེ༌ ནང༌ང༌ ཡོད༌ཁན༌ནི༌ ངོས༌མ༌བོའེ༌ ཀྲིབ༌ཀྱག༌ ཙོགས༌ཤིག༌ ཨིན༌ནོག༌། ཏེན༌ན༌བོའེ༌ཕིའ༌ མོ༌ཟེས༌སི༌ ཀུར༌ ཅོ༌ཅེས༌པོ༌ གོ༌ཟུག༌ ཅོ༌ ཟ༌ནེ༌, དཀོན༌མཆོག༌གི༌ ཁོའ༌ སྤང༌པུད༌ད༌ ཛད༌ཏེ༌ མོལས༌, “ངའེ༌ ཁྱོ༌རང༌ང༌ རི༌ཀ༌ ཤད༌ཁན༌ ནང༌ཞིན༌, ཏེ༌ ཀུར༌བོ༌ ཅོ༌ཅེས༌སི༌ ནང༌ང༌ ཚིར༌ དང༌ ཀུར༌རི༌ རིང༌ དང༌ ཞང༌ ཚང༌མ༌ ཏན༌ཏན༌ ཅོ༌གོས༌།”
HEB 8:6 ཨིན༌ནའང༌ ཏ༌ དཀོན༌མཆོག༌གི༌ ང༌དང༌ངི༌ བླ༌མ༌ ཆེན༌མོ༌ ཡེ༌ཤུའ༌, སྔུན༌མའེ༌ བླ༌མ༌གུན༌ནི༌ སང༌ མང༌ང༌ གྱས༌པ༌ ཞབས༌ཏོག༌ ཞུ༌ཅེས༌ཤིག༌ སལ༌ལ༌ ཛད༌ཏེ༌ ཨིན༌ནོག༌། ཏེན༌ན༌ ཙོགས༌ལ༌ ཁོང༌ངི༌ དཀོན༌མཆོག༌ དང༌ ང༌དང༌གུན༌ནི༌ པར༌ལ༌ ཆད༌དོན༌ སོ༌མ༌ ཛད༌ཁན༌བོ༌ སྔུན༌མའེ༌ སང༌ གྱས༌ས༌ ཨིན༌ནོག༌། ཏེ༌བོའེ༌ ནང༌ང༌ དཀོན༌མཆོག༌གི༌ ཀ༌ནེ༌ ང༌དང༌ང༌ ཐོབ༌ཅེས༌ཅན༌ནི༌ ཅིན༌ལབས༌གུན༌, མང༌ང༌ གྱས༌ས༌ ཞལ༌ཆད༌ཞིག༌གི༌ཀ༌ སྟེན༌ཏེ༌ ཨིན༌ནོག༌།
HEB 8:7 ཀལ༌ཏེས༌ གོ༌མའེ༌ ཆད༌དོན༌བོ༌ སྐྱོན༌མེད༌ཤིག༌ ཡོད༌པིན༌ན༌, ཏེ༌ནེ༌ ཏེ༌བོའེ༌ ཚབས༌ལ༌ ཆད༌དོན༌ ཉིས༌པའེ༌ སྒོས༌དོམ༌ མེད༌གྲོ༌།
HEB 8:8 ཨིན༌ནའང༌ དཀོན༌མཆོག༌གི༌ མི༌གུན༌ནི༌ ནང༌ང༌ སྐྱོན༌ ཟིགས༌པ༌ མོལས༌, “ཞག༌པོ༌ ལེབ༌པིན༌ ཨིན༌ནོག༌ གཙོ༌བོ༌ དཀོན༌མཆོག༌གི༌ མོལས༌, ངའེ༌ ཨིས༌ར༌ཨེལ༌ དང༌ ཡ༌ཧུ༌དཱ༌པ༌ མི༌གུན༌ ཉམ༌པོ༌ ཆད༌དོན༌ སོ༌མ༌ཞིག༌ ཅོ༌ཨིན༌།
HEB 8:9 འི༌ ཆད༌དོན༌བོ༌ ངའེ༌ ཁོང༌གུན༌ནི༌ ཕ༌མེས༌པོ༌གུན༌ ཉམ༌པོ༌ ཅོ༌ཁན༌བོ༌ ཙོགས༌ མི༌ཡོང༌, ཀ༌ཟ༌ནེ༌ ངའེ༌ ཁོང༌གུན༌ལ༌ ལག༌པ༌ ཐམས༌ཏེ༌ ཨི༌ཇིབ༌ནེ༌ ཕི༌ལོག༌ག༌ ཁྲིད༌ཏེ༌ ཁྱེར༌པིན༌། ཁོང༌གུན༌ ངའེ༌ ཆད༌དོན༌བོའེ༌ ནང༌ང༌ ཨིད༌ཤེས༌ཅན༌ མ༌ལུས༌པ༌, ངའེ༌ ཁོང༌གུན༌ལ༌ གྱབ༌ གྱུར༌པིན༌, གཙོ༌བོའེ༌ མོལས༌།
HEB 8:10 ཨིན༌ནའང༌ ཏེ༌སྟིང༌ནེ༌ འི༌བོ༌ ནི༌ ཨིས༌ར༌ཨེལ༌པ༌གུན༌ ཉམ༌པོ༌ ཅོ༌ཅེས༌ཅན༌ནི༌ ཆད༌དོན༌ སོ༌མ༌ཞིག༌ ཨིན༌, གཙོ༌བོའེ༌ མོལས༌། ངའེ༌ ང༌རང༌ངི༌ ཁྲིམས༌གུན༌ ཁོང༌གུན༌ནི༌ སམ༌བའེ༌ ནང༌ང༌ ཅུག༌ཨིན༌ ཡང༌ ངའེ༌ ཁོང༌གུན༌ནི༌ སྙིང༌གུན༌ནི༌ ནང༌ང༌ བྲི༌ཨིན༌། ང༌ ཁོང༌གུན༌ནི༌ དཀོན༌མཆོག༌, ཡང༌ ཁོང༌གུན༌ ངའེ༌ མི༌གུན༌ གྱུར༌ཨིན༌།
HEB 8:11 ཡང༌ ཁོང༌གུན༌ནི༌ ཁོ༌རང༌ངི༌ ཁྱིམ༌ཚེས༌པ༌གུན༌ མ༌ཚད༌ ཉེན༌གུན༌ལའང༌ ‘ཁྱོ༌ཞའེ༌ གཙོ༌བོ༌ དཀོན༌མཆོག༌ ཤེས༌གོས༌’ ཟེར༌ཏེ༌ ལབ༌གོས༌ མི༌ཡོང༌། ཅིའ༌ཟེར༌ན༌ ཉམ༌ཤུང༌ནེ༌ ཀྲག༌པོ༌ ཚོག༌པ༌, ཁོང༌ ཚང༌མའེ༌ ངའ༌ ཤེས༌ཨིན༌།
HEB 8:12 ཡང༌ ངའེ༌ ཁོང༌གུན༌ནི༌ ངན༌པ༌གུན༌ལ༌ ཤགས༌པ༌ ཏང༌ཨིན༌ ཡང༌ ངའེ༌ ཁོང༌གུན༌ནི༌ སྡིག༌པ༌གུན༌ མ༌ནེ༌ ཨིད༌ཏུ༌ མི༌བོར༌།”
HEB 8:13 དཀོན༌མཆོག༌གི༌ ཆད༌དོན༌ “སོ༌མའེ༌” ཞལ༌ཏ༌ སལ༌ལ༌ ཛད༌ ཟ༌ནེ༌, ཁོང༌ངི༌ སྔུན༌མའེ༌ ཆད༌དོན༌བོའེ༌ སྒོས༌དོམ༌ མེད༌ཁན༌བོ༌ སྟན༌ན༌ནོག༌། ཡང༌ སྙིང༌པ༌ དང༌ ཕན༌མི༌ཐོགས༌ གུན༌ གྱོགས༌པ༌ མེད༌ཁན༌ ཆའ༌ནོག༌།
HEB 9:1 དཀོན༌མཆོག༌གི༌ ཨིས༌ར༌ཨེལ༌པ༌གུན༌ ཉམ༌པོ༌ ཛད༌ཁན༌ནི༌ ཞལ༌ཆད༌ ཏང༌པོ༌བོའ༌, ཅོལ༌ཅེས༌སི༌ ཁྲིམས༌ དང༌, ཅོལ༌སའེ༌ ནས༌ས༌ ཡོད༌ཏེ༌ ཨིན༌ནོག༌།
HEB 9:2 ཏེ༌ ཅོལ༌ཅེས༌སི༌ ཀུར༌བོའེ༌ ནང༌ང༌ ནང༌མིག༌ ཉིས༌ ཡོད༌པིན༌། ཅིག༌པོའེ༌ ནང༌ང༌ འོད༌སྟགས༌, ཅོག༌ཙེ༌ དང༌, ཅོག༌ཙེ༌ཀ༌ ཏམ༌པའེ༌ ཏ༌གི༌ གུན༌ ཡོད༌པིན༌, ཡང༌ འི༌ ནང༌བོའ༌ ཏམ༌པའེ༌ ནས༌ས༌ ཟེར༌རད༌པིན༌།
HEB 9:3 ཏེ༌རུ༌ ཡོ༌ལ༌ ཞིག༌ ཡོད༌པིན༌ ཡང༌ ཡོ༌ལའེ༌ གྱབ༌ལོག༌པོའ༌ ཉིས༌པ༌ ནང༌མིག༌པོ༌ ཡོད༌པིན༌, ཀ༌བོའ༌ ཚང༌མའེ༌སང༌ ནས༌ས༌ ཏམ༌པ༌བོ༌ ཟེར༌རད༌པིན༌།
HEB 9:4 ཏེ༌ནང༌ང༌ སྤོས༌ ཏུག༌སའེ༌ སེར༌རི༌ ཆོད༌ཁྲི༌ དང༌ ཆད༌དོན༌ནི༌ སྒམ༌ ཟེར༌ཁན༌ནི༌ ཤིང༌ངི༌ སྒམ༌, ཆོགས༌ ཚང༌མ༌ནེ༌ སེར༌རི༌ ཏུམས༌ཁན༌བོ༌ ཡོད༌པིན༌། ཏེ༌ སྒམ༌མི༌ ནང༌ཀུག༌ག༌ མན༌ན༌ ཟེར༌ཁན༌ནི༌ ཏ༌གི༌ གྱངས༌ཁན༌ནི༌ སེར༌རི༌ ནོད༌, ཨ༌རོན༌ནི༌ ཆག༌བེར༌ ལོ༌མ༌ སྐྱེས༌ཁན༌, ཡང༌ ཆད༌དོན༌ བྲི༌ཁན༌ནི༌ རྡོའ༌ ལེབ༌ལེབ༌ གུན༌ ཡོད༌པིན༌།
HEB 9:5 སྒམ༌མི༌ ཁེ༌ཐོག༌པོའེ༌ཀ༌ ཟིར༌རྗིད༌ཅན༌ ཆེ༌ར༌བེམ༌ ཉིས༌སི༌ ཟོ༌ ཅོས༌ཏེ༌ ཡོད༌པིན༌, ཀ༌གུན༌ནི༌ ཤོག༌པའེ༌ དཀོན༌མཆོག༌གི༌ སྙིང༌རྗེ༌ ཐོབ༌སའེ༌ ནས༌ས༌བོ༌ ཀབས༌ཏེ༌ ཡོད༌པིན༌། དག༌ས༌ ཏེ༌གུན༌ནི༌ སྐོར༌ལ༌ ཞིབ༌སལ༌ ཅོས༌ཏེ༌ ཤད༌གོས༌ མེད༌པ༌ ཨིན༌ནོག༌།
HEB 9:6 འི༌ ཚང༌མ༌ རང༌རང༌ངི༌ ནས༌སའེ༌ཀ༌ བོར༌ཅེས༌སི༌ ལས༌པོ༌ ཚར༌ཏེ༌ སྟིང༌ནེ༌, བླ༌མ༌གུན༌ ཁོ༌རང༌གུན༌ནི༌ ཆོས༌སི༌ ཁག༌གུན༌ ཅོ༌ཅེས༌ལ༌ ཏེ༌ ཏང༌པོ༌ ནང༌བོའེ༌ ནང༌ང༌ ཞག༌ཏང༌ ཆའད༌པིན༌།
HEB 9:7 ཨིན༌ནའང༌ ཚང༌མའེ༌སང༌ ནས༌ས༌ ཏམ༌པ༌བོའེ༌ ནང༌ང༌ བླ༌མ༌ ཆེན༌མོ༌ ཅིག༌པོ༌ མ༌ནེ༌, སུ༌ཞིག༌གའང༌ ཆ༌ཆོགས༌ས༌ མེད༌པིན༌, ཏེ༌བོའང༌ ལོ༌ ཅིག༌གི༌ ནང༌ང༌ ལན༌ཕོག༌ ཅིག༌། ཡང༌ ཁོའེ༌ ཁོ༌རང༌ དང༌ མི༌གུན༌ནི༌ གྱུས༌ མེད༌པ༌ ཅོ༌ཁན༌ནི༌ སྡིག༌པ༌གུན༌ནི༌ ཕིའ༌, ཁྲག༌གི༌ ཆོད༌པ༌ ཕུལ༌ལད༌པིན༌།
HEB 9:8 འི༌ ཁྲིམས༌གུན༌ ཅོ༌ཅེས༌པོའེ༌, ཏེ༌ ཚང༌མའེ༌སང༌ ཏམ༌པའེ༌ ནས༌ས༌, ཚང༌མའེ༌ ཕིའ༌ མ༌ཕེའ༌ ཨིན༌ཁན༌བོ༌ ཏམ༌པའེ༌ ཐུག༌ཉིད༌དི༌ སྔོན༌ ཅུག༌ག༌ ཛདས༌, ནམ༌ཚོག༌པ༌ ཏེ༌ ཅོལ༌སའེ༌ ཀུར༌བོ༌ ལུས༌།
HEB 9:9 ཏེ༌ ཅོལ༌ཅེས༌སི༌ ཚིར༌ཀ༌, ཡང༌ན༌ བླ༌མའེ༌ ཆོད༌པའ༌ ཕུལ༌ཁན༌ནི༌ སྐྱེས༌ དང༌ སྲོག༌གི༌ ཆོད༌པ༌ གུན༌ནི༌, ཅོལ༌ཁན༌གུན༌ནི༌ སེམས༌གུན༌ རྩང༌མ༌ ཅོ༌ མ༌ཐུབ༌ཁན༌བོ༌ ནི༌ འི༌ཏུས༌སི༌ སྤེ༌ཞིག༌ ཨིན༌ནོག༌།
HEB 9:10 ཏེ༌ སྙིང༌པ༌ ཚིར༌ཀ༌བོ༌ ཟའ༌ཅེས༌, ཐུང༌ཅེས༌ དང༌ རྩང༌མ༌ ཅོ༌ཅེས༌སི༌ ལུག༌སྲོལ༌གུན༌ ཉམ༌པོ༌ བྲེལ༌ཏེ༌ ཨིན༌ནོག༌, འི༌ཙོགས༌སི༌ ཟུགས༌པའེ༌ ཐོགས༌སི༌ ཚིར༌ཀ༌གུན༌ ཏེ༌ སོ༌མ༌ ཆད༌དོན༌ གོ༌ཟུག༌ ཆ༌ཆ༌ ཚག༌པ༌ ལུས༌པིན༌།
HEB 9:11 ཨིན༌ནའང༌ ཐོབ༌ཁན༌ནི༌ ཅིན༌ལབས༌ ཚང༌མའེ༌, བླ༌མ༌ ཆེན༌མོ༌ གྱུར༌ཏེ༌ སྟིང༌ནེ༌ མ༌ཤི༌ཀ༌, ནམ༌ཁའེ༌ ཕུན༌སུམ༌ཚོགས༌པའེ༌ ཀུར༌རི༌ ནང༌ཀུག༌ག༌ སྐྱོད༌ད༌ ཛདས༌, ཀ༌བོ༌ མི༌ ལག༌པ༌ནེ༌ མ༌ཅོ༌ཁན༌ ཡ༌ འི༌ ཇིག༌རྟེན༌ ཞངས༌ཁན༌བོའེ༌ ཁག༌ཤིག༌ མ༌ནོག༌།
HEB 9:12 ར༌མ༌ དང༌ བེ༌ཙོའེ༌ ཁྲག༌གུན༌ མན༌པ༌, མ༌ཤི༌ཀ༌ ཁོང༌རང༌ངི༌ སྐུ༌ཁྲག༌ གྱུད༌ཏེ༌, ཏུས༌གྱུན༌ནི༌ ཕིའ༌ ལན༌ཅིག༌ ཚང༌མའེ༌སང༌ ནས༌ས༌ ཏམ༌པ༌བོའེ༌ ནང༌ང༌ སྐྱོད༌ད༌ ཛདས༌། ཏེ༌བོའེ༌ ཞས༌ཏེ༌ ཁོང༌ངི༌ ང༌དང༌གུན༌ནི༌ སྡིག༌པའེ༌ རིན༌བོ༌ ཏུས༌གྱུན༌ནི༌ ཕིའ༌ ཤལ༌ལ༌ ཛདས༌།
HEB 9:13 ར༌མ༌ དང༌ ལང༌ཏོ༌ གུན༌ནི༌ ཁྲག༌ ཡང༌ བེ༌ཙོའེ༌ སྲགས༌ཁན༌ནི༌ ཀོག༌ཐལ༌ ལུག༌སྲོལ༌ ནང༌ཞིན༌ ཚི༌ཏུ༌ གྱུར༌ཁན༌གུན༌ནི༌ཀ༌ ཡོག༌ཅེས༌པོའེ༌, ཁོང༌གུན༌ ཟུགས༌པའེ༌ ཐོག༌ནེ༌ རྩང༌མ༌ གྱུར༌ར༌ནོག༌།
HEB 9:14 ཏེ༌ནེ༌ སམ༌བ༌ སལ༌ལའང༌, སོན༌ཏེ༌ དཀོན༌མཆོག༌ག༌ ཅོལ༌ཅེས༌ལ༌ མ༌ཤི༌ཀའེ༌ སྐུ༌ཁྲག༌པོའེ༌, ང༌དང༌ངི༌ སེམས༌པོ༌ ཏེ༌ ངན༌པའེ༌ ལས༌གུན༌ནེ༌ ཙམ༌ཤིག༌ རྩང༌མ༌ མི༌ཛད༌? ཐའ༌མེད༌པའེ༌ ཐུག༌ཉིད༌དི༌ སྟོབས༌ གྱུད༌ཏེ༌, ང༌དང༌ངི༌ སྡིག༌པའེ༌ ཕིའ༌ མ༌ཤི༌ཀའེ༌ ཁོང༌རང༌ ཕུན༌སུམ༌ཚོགས༌པ༌ སྲོག༌གི༌ ཆོད༌པའེ༌ ཚུལ༌ལ༌ དཀོན༌མཆོག༌ག༌ ཕུལ༌ལ༌ ཛདས༌།
HEB 9:15 ཏེན༌ན༌བོའེ༌ཕིའ༌ མ༌ཤི༌ཀ༌, དཀོན༌མཆོག༌ དང༌ མི༌གུན༌ནི༌ པར༌ལ༌ ཆད༌དོན༌ སོ༌མའེ༌ བར༌མི༌བོ༌ ཨིན༌ནོག༌། ཏེ༌བོ༌ གྱུད༌ཏེ༌ དཀོན༌མཆོག༌གི༌ ལྡམ༌མ༌ ཛད༌ཁན༌ མི༌གུན༌ལ༌, ཁོང༌ངི༌ ཞལ༌ཆད༌ ཛད༌ཁན༌ནི༌ ཐའ༌མེད༌པའེ༌ ནོར༌སྐལ༌གུན༌ ཐོབ༌ཐུབ༌ཨིན༌། དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མི༌, ཀ༌གུན༌ནི༌ ཆད༌དོན༌ ཏང༌པོའེ༌ ཡོག༌ག༌ སྡིག༌པ༌ ཅོས༌, ཏེ༌གུན༌ལ༌ ཆད༌པའེ༌ ཀ༌ནེ༌ ཐར༌པ༌ སལ༌ཅེས༌ལ༌ མ༌ཤི༌ཀ༌ ཀྲོངས༌ས༌ ཛདས༌།
HEB 9:16 ནོར༌སྐལ༌ལི༌ ཐོ༌ བྲིས༌ཁན༌ནི༌ ཤུ༌གུའ༌ ལྟ༌ཅེས༌སི༌ ཕིའ༌, ཏེ༌ བྲི༌ཁན༌ནི༌ མི༌ ཤི༌ཏེ༌ ཨིན༌ཁན༌བོ༌ ཏན༌ཏན༌ ཅོ༌གོས༌།
HEB 9:17 མི༌བོ༌ ཤི༌ཏེ༌ སྟིང༌ནེ༌ མ༌ནེ༌, ཏེ༌ བྲིས༌ཁན༌བོ༌ ལག༌ལེན༌ནི༌ ནང༌ང༌ ཡོང༌ང༌ མ༌ནོག༌། ནོར༌སྐལ༌ བྲིས༌ཁན༌ནི༌ མི༌བོ༌ སོན༌ཏེའ༌ ཡོད༌དི༌ ཏུས༌ལ༌ ཏེ༌ བྲི༌ཁན༌བོ༌ ཀོལ༌ཉན༌ན༌ མ༌ནོག༌།
HEB 9:18 ཏེན༌ན༌བོའེ༌ཕིའ༌ ཏང༌པོ༌ ཆད༌དོན༌བོ༌ སེམས༌ཅན༌ནི༌ ཁྲག༌ གྱུད༌ཏེ༌ ལག༌ལེན༌ནི༌ ནང༌ང༌ ཁྱོངས༌།
HEB 9:19 མོ༌ཟེས༌སི༌, མི༌ཚང༌མ༌ལ༌ དཀོན༌མཆོག༌གི༌ བཀའ༌རྒྱ༌ ཚང༌མ༌ སིལ༌ཏེ༌ སྟིང༌ནེ༌, ཁོང༌ངི༌ བེ༌ཙོའེ༌ དང༌ ར༌མ༌ གུན༌ནི༌ ཁྲག༌ ཡང༌ ཆུ༌, མར༌པོ༌ བལ༌ དང༌ ཧི༌སོབ༌ ཟེར༌ཁན༌ནི༌ ལྕང༌མའེ༌ ཡལ༌ག༌གུན༌ ཉམ༌པོ༌, ཁྲིམས༌སི༌ སྤེ༌ཆ༌ དང༌ མི༌ཚང༌མའེ༌ཀ༌ ཡོག༌ག༌ ཛདས༌།
HEB 9:20 ཁོང༌ངི༌ མོལས༌, “འི༌ ཁྲག༌པོའེ༌ དཀོན༌མཆོག༌གི༌ ཁྱོ༌ཞ༌གུན༌ལ༌ ཁའ༌ཉོན༌ མོལ༌ཁན༌ནི༌ ཆད༌དོན༌བོ༌ སྟན༌པོ༌ ཅོའ༌ནོག༌།”
HEB 9:21 ཏེན༌ན༌ ཙོགས༌ལ༌ ཁོང༌ངི༌ ཁྲག༌པོ༌, ཀུར༌ དང༌ ཅོལ༌ཅེས༌ལ༌ ཀོལ༌ཁན༌ནི༌ ནོད༌ ཚང༌མའེ༌ཀ༌ ཡོག༌ག༌ ཛདས༌།
HEB 9:22 འོ༌ན༌, མོ༌ཟེས༌སི༌ ཁྲིམས༌ ནང༌ཞིན༌ ཧ༌ལམ༌ ཅི༌ཚང༌མ༌ ཁྲག༌ གྱུད༌ཏེ༌ རྩང༌མ༌ ཛད༌དད༌ཀྱག༌, ཡང༌ ཁྲག༌ བིངས༌ཏེ༌ མ༌ནེ༌ སྡིག༌པ༌ ཤགས༌པ༌ ཐོབ༌བ༌ མ༌ནོག༌།
HEB 9:23 ཏེན༌ན༌བོའེ༌ཕིའ༌ ཀུར༌ དང༌ ཏེ༌ནང༌ང༌ ཡོད༌ཁན༌ ཚང༌མ༌, ཀ༌གུན༌ ནམ༌ཁའེ༌ ནང༌ང༌ ཡོད༌ཁན༌ནི༌ སྤེ༌གུན༌ ཨིན༌, ཏེ༌གུན༌ སེམས༌ཅན༌ནི༌ ཁྲག༌ གྱུད༌ཏེ༌ རྩང༌མ༌ ཅོ༌གོས༌སད༌པིན༌། ཨིན༌ནའང༌ ནམ༌ཁའེ༌ ནང༌ང༌ ཡོད༌ཁན༌ནི༌ ངོས༌མ༌གུན༌ རྩང༌མ༌ ཅོ༌ཅེས༌ལ༌ སེམས༌ཅན༌ནི༌ ཁྲག༌གི༌ སང༌ མང༌ང༌ ཀྲག༌པོ༌ སྲོག༌གི༌ ཆོད༌པའེ༌ སྒོས༌དོམ༌ ཡོད༌ཏེ༌ ཨིན༌ནོག༌།
HEB 9:24 མ༌ཤི༌ཀ༌ མི༌གུན༌ནི༌ ལག༌པ༌ནེ༌ ཅོ༌ཁན༌ནི༌ ནས༌ས༌ ཏམ༌པ༌བོའེ༌ ནང༌ང༌ མ༌སྐྱོདས༌, ཀ༌བོ༌ ནམ༌ཁའེ༌ ནང༌ང༌ ཡོད༌ཁན༌ནི༌ ངོས༌མ༌བོའེ༌ ཀྲིབ༌ཀྱག༌ཤིག༌ ཨིན༌། དཀོན༌མཆོག༌གི༌ སྐུན༌དུན༌ལ༌ ང༌དང༌གུན༌ནི༌ ཚབས༌ ཅོའ༌ ཛད༌ཅེས༌སི༌ ཕིའ༌, ཁོང༌ ནམ༌ཁའེ༌ ནང༌ང༌ སྐྱོད༌ད༌ ཛདས༌།
HEB 9:25 ཁོང༌ ནམ༌ཁའེ༌ ནང༌ང༌ ཡང༌ནེ༌ ཡང༌ ཁོང༌རང༌ ཆོད༌པ༌ ཕུལ༌ཅེས༌ལ༌ མ༌སྐྱོདས༌, ཀ༌ཟུག༌ ཇིག༌རྟེན༌ནི༌ བླ༌མ༌ ཆེན༌མོའེ༌ ཁོ༌རང༌ངི༌ ཁྲག༌ མན༌པ༌, སེམས༌ཅན༌ནི༌ ཁྲག༌ ཁུར༌ཏེ༌ ལོ༌ཞུང༌ ཚང༌མའེ༌སང༌ ནས༌ས༌ ཏམ༌པ༌བོའེ༌ ནང༌ང༌ ཆའ༌ནོག༌།
HEB 9:26 ཀལ༌ཏེས༌ ཏེ༌བོ༌ ཅོ༌གོས༌པིན༌ན༌ ཏེ༌ནེ༌ ཇིག༌རྟེན༌ ཆགས༌པ༌ནེ༌ ཕར༌ལ༌ མ༌ཤི༌ཀ༌ ལན༌ མང༌པོ༌ ཀྲོང༌གོས༌ས༌ ཛད༌ཏེ༌ ཡོད༌གྲོ༌། ཨིན༌ནའང༌ ཏ༌, འི༌ སྟིང༌ཇུག༌གི༌ ཏུས༌སི༌ ནང༌ང༌ ཁོང༌ ཇལ༌ཏེ༌ ཏུས༌གྱུན༌ནི༌ ཕིའ༌ ལན༌ཅིག༌, སྡིག༌པ༌ ཚང༌མ༌ མེད༌ཁན༌ ཛད༌ཅེས༌ལ༌ ཁོང༌རང༌ངི༌ སྲོག༌པོ༌ ཆོད༌པ༌ ཕུལ༌ལ༌ ཛདས༌།
HEB 9:27 ཀ༌ཟུག༌གི༌ མི༌ཚང༌མ༌ ལན༌ཅིག༌ ཀ༌ནེ༌ མེད༌ ཤི༌གོས༌ས༌ནོག༌, ཡང༌ ཏེ༌བོའེ༌ སྟིང༌ནེ༌ དཀོན༌མཆོག༌གི༌ ཁྲིམས༌ཅད༌བོ༌ ཉོང༌གོས༌།
HEB 9:28 ཏེན༌ན༌ ཙོགས༌ལ༌ མ༌ཤི༌ཀ༌ ལན༌ཅིག༌ མི༌ མང༌པོའེ༌ སྡིག༌པ༌གུན༌ནི༌ ཆད༌པ༌བོ༌ ནམས༌ཏེ༌ ཀྲོངས༌ས༌ ཛདས༌། ང༌དང༌གུན༌ནི༌ སྡིག༌པའེ༌ ཆད༌པ༌ ནམས༌ཤེས༌ལ༌ མན༌པ༌, ཁོང༌ང༌ སྲུངས༌ཏེ༌ ཡོད༌ཁན༌གུན༌ སྐྱོབ༌ཅེས༌ལ༌ ཁོང༌ ཡང༌སྐྱར༌ སྐྱོད༌ད༌ ཛད༌ཨིན༌།
HEB 10:1 མོ༌ཟེས༌སི༌ ཁྲིམས༌ ནི༌ ཡོང༌ཅེས༌ཅན༌ནི༌ ཟང༌པོའེ༌ ཀྲིབ༌ཀྱག༌པོ༌ ཨིན༌ནོག༌ ངོས༌པོ༌བོ༌ མ༌ནོག༌། ཏེན༌ན༌བོའེ༌ཕིའ༌ ཁྲིམས༌པོའེ༌, ལོ༌ཞུང༌ ཙོགས༌ སྲོག༌གི༌ ཆོད༌པ༌གུན༌ ཕུལ༌ཅེས༌ གྱུད༌ཏེ༌ ཅོལ༌ལ༌ ཡོང༌ཁན༌གུན༌, ཅི༌ས༌ཐོག༌ནེ༌ རྩང༌མ༌ ཅོ༌ མ༌ནེ༌ མ༌ཉན༌ན༌ ཨིན༌ནོག༌།
HEB 10:2 ཀལ༌ཏེས༌ རྩང༌མ༌ ཅོ༌ཉན༌པིན༌ན༌, ཏེ༌ནེ༌ སྲོག༌གི༌ ཆོད༌པ༌ ཕུལ༌ཅེས༌པོ༌ ཚར༌ཏེ༌ མེད༌གྲོ༌། ཅིའ༌ཟེར༌ན༌ སྲོག༌གི༌ ཆོད༌པ༌ ལན༌ཅིག༌ ཕུལ༌ཅེས༌པོའེ༌ ཅོལ༌ཁན༌གུན༌ ཏུས༌གྱུན༌ནི༌ ཕིའ༌ རྩང༌མ༌ སོང༌ཏེ༌ ཡོད༌གྲོ༌། ཡང༌ ཁོང༌གུན༌ནི༌ ནང༌ང༌ ཁོང༌རང༌གུན༌ནི༌ སྡིག༌པའེ༌ ནོངས༌པོ༌ ལུས༌ཏེ༌ མེད༌གྲོ༌།
HEB 10:3 ཨིན༌ནའང༌ ཏེ༌ སྲོག༌གི༌ ཆོད༌པ༌གུན༌ནི༌ ཁོང༌གུན༌ལ༌ ལོ༌ཞུང༌ ཁོ༌རང༌གུན༌ནི༌ སྡིག༌པའེ༌ ཨིད༌ཏུ༌ སྐུལ༌ལ༌ནོག༌།
HEB 10:4 ཅིའ༌ཟེར༌ན༌ ལང༌ཏོ༌ དང༌ ར༌མ༌ གུན༌ནི༌ ཁྲག༌གི༌, སྡིག༌པ༌ མེད༌ཁན༌ མ༌ནེ༌ ཅོ༌ཉན༌ན༌ མ༌ནོག༌།
HEB 10:5 ཏེན༌ན༌བོའེ༌ཕིའ༌ ནམ༌ མ༌ཤི༌ཀ༌ ཇིག༌རྟེན༌ནི༌ ནང༌ང༌ སྐྱོདས༌, ཁོང༌ངི༌ དཀོན༌མཆོག༌ག༌ མོལས༌, “ཉེ༌རང༌ང༌ སེམས༌ཅན༌ནི༌ སྲོག༌གི༌ ཆོད༌པ༌ ཡ༌ སྡིག༌པའེ༌ ཆོད༌པ༌ གུན༌ནི༌ ཐུགས༌དོད༌ མེད༌ཏེ༌ ཨིན༌ནོག༌། ཨིན༌ནའང༌ ཉེ༌རང༌ངི༌ ངའ༌, ཆོད༌པའ༌ ཕུལ༌ཅེས༌ལ༌ ཟུགས༌པོ༌ཞིག༌ སལས༌།
HEB 10:6 ཉེ༌རང༌ མེའེ༌ ནང༌ང༌ སྲག༌ཁན༌ནི༌ ཆོད༌པ༌ ཡ༌, ཞན༌ སྡིག༌པའེ༌ ཆོད༌པ༌ གུན༌ལ༌ ཐུག༌ཉེས༌ས༌ མ༌ཛདས༌།
HEB 10:7 ཏེ༌ནེ༌ ངའེ༌ ཟེར༌པིན༌ ‘ཟིགས༌སའང༌, ཀྱེ༌ དཀོན༌མཆོག༌, ང༌ ཉེ༌རང༌ངི༌ ཐུག༌གོངས༌ ཅོའ༌ལ༌ ཡོངས༌པིན༌, ཀ༌ཟུག༌ ངའེ༌ སྐོར༌ལ༌ ཏམ༌པའེ༌ སུང༌རབས༌སི༌ ནང༌ང༌ བྲིས༌ཏེ༌ དུག༌།’”
HEB 10:8 ཏང༌པོ༌ མ༌ཤི༌ཀའེ༌ མོལས༌, “ཉེ༌རང༌ང༌ སེམས༌ཅན༌ནི༌ སྲོག༌གི༌ ཆོད༌པ༌, ཡ༌ སྡིག༌པའེ༌ ཆོད༌པ༌ གུན༌, ཡ༌ མེའེ༌ ནང༌ང༌ སྲག༌ཁན༌ནི༌ ཆོད༌པ༌, ཡ༌ ཞན༌ སྡིག༌པའེ༌ ཆོད༌པ༌ གུན༌ནི༌ ཐུགས༌དོད༌ མེད༌, ཡ༌ ཏེ༌གུན༌ལ༌ ཐུག༌ཉེས༌ས༌ མ༌ཛདས༌” ༼ཞན༌ ཏེ༌གུན༌ མོ༌ཟེས༌སི༌ ཁྲིམས༌ ནང༌ཞིན༌ ཕུལ༌གོས༌ནའང༌།༽
HEB 10:9 ཏེ༌ནེ༌ ཁོང༌ངི༌ མོལས༌, “ཟིགས༌སའང༌, ང༌ ཉེ༌རང༌ངི༌ ཐུག༌གོངས༌ ཅོའ༌ལ༌ ཡོངས༌པིན༌།” ཁོང༌ངི༌ ཆད༌དོན༌ ཉིས༌པ༌བོ༌ ལག༌ལེན༌ནི༌ ནང༌ང༌ ཁྱོང༌ང༌ ཛད༌ཅེས༌སི༌ ཕིའ༌ ཆད༌དོན༌ ཏང༌པོ༌བོ༌ མེད༌ཁན༌ ཛདས༌།
HEB 10:10 ཅིའ༌ཟེར༌ན༌ དཀོན༌མཆོག༌གི༌ ཐུག༌གོངས༌པོ༌ ནི༌, ལན༌ཅིག༌ ཏུས༌གྱུན༌ནི༌ ཕིའ༌ ཡེ༌ཤུ༌ མ༌ཤི༌ཀའེ༌ སྐུ༌ཟུགས༌པོ༌ སྲོག༌གི༌ ཆོད༌པ༌ ཕུལ༌ཏེ༌, ང༌དང༌གུན༌ རྩང༌མ༌ ཅོའ༌ ཛད༌ཅེས༌པོ༌ ཨིན༌ནོག༌།
HEB 10:11 ཆད༌དོན༌ སྙིང༌པའེ༌ ནང༌ང༌, བླ༌མའེ༌ ཞག༌ཏང༌ ཆོད༌ཁྲི༌ དུན༌ལ༌ ཆོད༌པ༌གུན༌ ཕུལ༌ཨིན༌ ཞབས༌ཏོག༌ ཞུའ༌ནོག༌, ཀ༌བོའེ༌ སྡིག༌པ༌ མེད༌ཁན༌ མ༌ནེ༌ ཅོ༌ཉན༌ན༌ མ༌ནོག༌།
HEB 10:12 ཨིན༌ནའང༌ ང༌དང༌གུན༌ནི༌ བླ༌མ༌ ཆེན༌མོའེ༌, ཁོང༌རང༌ ལན༌ཅིག༌ ཆོད༌པ༌ ཕུལ༌ཏེ༌ ཏུས༌གྱུན༌ནི༌ ཕིའ༌ སྡིག༌པ༌གུན༌ མེད༌ཁན༌ ཅོའ༌ ཛདས༌། ཏེ༌ནེ༌ ཁོང༌ དཀོན༌མཆོག༌གི༌ ཡས༌པ༌ ཆོགས༌ལ༌ རྩི༌ཝ༌ཅན༌ནི༌ ནས༌སའེ༌ཀ༌ ཞུགས༌ས༌ ཛདས༌།
HEB 10:13 ཁོང༌ ཏེ༌རུ༌ ཏེ༌ཏེ༌ཚོག༌པ༌ ཞུགས༌ཨིན༌ ནམ༌ཚོག༌པ༌ ཁོང༌ངི༌ གྲ༌འོ༌གུན༌ ཁོང༌རང༌ངི༌ ཞབས༌སི༌ ཡོག༌ག༌ བོར༌ར༌ མི༌ཛད༌།
HEB 10:14 ཁོང༌རང༌ངི༌ སྲོག༌, ལན༌ཅིག༌ ཆོད༌པ༌ ཕུལ༌ཅེས༌པོའེ༌, ཁོང༌ངི༌ ཏམ༌པ༌ ཅོའ༌ ཛད༌ཅེས༌ཅན༌གུན༌ལ༌ ཏུས༌གྱུན༌ནི༌ ཕིའ༌ ཕུན༌སུམ༌ཚོགས༌པའེ༌ མི༌ ཅོའ༌ ཛདས༌།
HEB 10:15 ཡང༌ ཏམ༌པའེ༌ ཐུག༌ཉིད༌དིའང༌ ཏེ༌བོའེ༌ སྐོར༌ལ༌ སྤང༌པོ༌ སལས༌, ཏང༌པོ༌ ནི༌,
HEB 10:16 “ཏེ༌ ཞག༌ག༌ ངའེ༌ ང༌རང༌ངི༌ མི༌གུན༌ ཉམ༌པོ༌ ཆད༌དོན༌ སོ༌མ༌ཞིག༌ ཅོ༌ཨིན༌། ང༌ གཙོ༌བོའེ༌ ཟེར༌རད༌, ངའེ༌ ང༌རང༌ངི༌ ཁྲིམས༌གུན༌ ཁོང༌གུན༌ནི༌ སེམས༌སི༌ ནང༌ང༌ ཅུག༌ཨིན༌, ཡང༌ ཏེ༌གུན༌ ཁོང༌གུན༌ནི༌ སམ༌བའེ༌ ནང༌ང༌ བྲི༌ཨིན༌།”
HEB 10:17 ཏེ༌ནེ༌ ཁོང༌ངི༌ མོལས༌, “ངའེ༌ ཁོང༌གུན༌ནི༌ སྡིག༌པ༌གུན༌ རྗེད༌ཨིན༌, ཡང༌ ཁོང༌གུན༌ནི༌ ཁྲིམས༌ ཅག༌ཁན༌ནི༌ ལས༌གུན༌ ཨིད༌ཏུ༌ མི༌བོར༌།”
HEB 10:18 སྡིག༌པ༌གུན༌ལ༌ དཀོན༌མཆོག༌ནེ༌ ཤགས༌པ༌ ཐོབས༌ཏེ༌ སྟིང༌ནེ༌, ཡང༌སྐྱར༌ སྲོག༌གི༌ ཆོད༌པ༌ ཕུལ༌གོ༌ཤེས༌སི༌ སྒོས༌དོམ༌ མེད༌པ༌ ཨིན༌ནོག༌།
HEB 10:19 ཏེན༌ན༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཡེ༌ཤུའི༌ སྐུ༌ཁྲག༌ གྱུད༌ཏེ༌, ང༌དང༌གུན༌ ནམ༌ཁའེ༌ ཚང༌མའེ༌སང༌ ནས༌ས༌ ཏམ༌པ༌བོའེ༌ ནང༌ང༌ ཧམ༌པ༌ ཉམ༌པོ༌ ཞུགས༌ཉན༌ན༌ནོག༌།
HEB 10:20 ཁོང༌ ཀྲོང༌ཤེས༌པོའེ༌ ཡེ༌ཤུའི༌ མི༌ཚེ༌ སལ༌ཁན༌ནི༌ སོ༌མ༌ ལམ༌ཤིག༌ ཕེའ༌ ཛདས༌པ༌, ང༌དང༌གུན༌ ཏེ༌ ཡོ༌ལ༌ གལ༌ཏེ༌ ཚང༌མའེ༌སང༌ ནས༌ས༌ ཏམ༌པ༌བོའེ༌ ནང༌ང༌ ཆ༌ཉན༌ན༌ནོག༌།
HEB 10:21 དཀོན༌མཆོག༌གི༌ ནང༌ཚངས༌, ང༌དང༌གུན༌ནི༌ཀ༌ ཝང༌སྲུལ༌ལ༌ ཛད༌ཁན༌ནི༌ བླ༌མ༌ ཆེན༌མོ༌ ཀྲག༌པོ༌ཞིག༌ ཞུགས༌ཏེ༌ ཡོད༌པ༌,
HEB 10:22 ང༌དང༌གུན༌ ཀྲང༌པོ༌ སྙིང༌ དང༌ ཨིད༌ཤེས༌ གང༌པོ༌ ཉམ༌པོ༌ དཀོན༌མཆོག༌གི༌ སྐུན༌དུན༌ལ༌ ཆེན༌། ཅིའ༌ཟེར༌ན༌ ང༌དང༌གུན༌ནི༌ སེམས༌སི༌ ནང༌ང༌ ཡོད༌ཁན༌ནི༌ ནོངས༌གུན༌ མ༌ཤི༌ཀའེ༌ སྐུ༌ཁྲག༌ ཉམ༌པོ༌ རྩང༌མ༌ ཡང༌ ང༌དང༌ངི༌ ཟུགས༌པོ༌གུན༌ ཆུ༌ རྩང༌མ༌ ཉམ༌པོ༌ ཁྲུའ༌ ཛད༌ཏེ༌ ཨིན༌ནོག༌།
HEB 10:23 ཏེ༌ནེ༌ སྤང༌པོ༌ ཏང༌ཁན༌ནི༌ ང༌དང༌ངི༌ རེ༌ཝ༌བོའེ༌ཀ༌ ཐེ༌ཚོམས༌ མེད༌པ༌ སྟན༌པོ༌ ཐམས༌ཏེ༌ དུག༌ཨིན༌། ཅིའ༌ཞུ༌ན༌ དཀོན༌མཆོག༌ ནི༌, ཞལ༌ཆད༌ ཛད༌ཁན༌བོ༌ གྲུབ༌ ཅུག༌ག༌ ཛད༌ཅེས༌སི༌ ནང༌ང༌ ཨིད༌ཤེས༌ཅན༌ ཞུགས༌ཏེ༌ ཨིན༌ནོག༌།
HEB 10:24 ཏེ༌ནེ༌ ཡོང༌ཤིག༌, ཡ༌ཤ༌ དང༌ ལས༌ ཟང༌པོ༌ ཅོ༌ཅེས༌སི༌ ནང༌ང༌ ཅིག༌ དང༌ ཅིག༌ག༌ སྤོས༌པ༌ ཀ༌ཟུག༌གི༌ ཏང༌ཅེས༌ལ༌ ང༌དང༌གུན༌ནི༌ སམ༌བ༌ ཏང༌ཨིན༌།
HEB 10:25 ཡང༌ ཀ༌ཟུག༌ ཁ༌ཅིག༌ག༌ ཛོམ༌ཅེས༌སི༌ ལོབས༌ མེད༌ཁན༌ ཙོགས༌ལ༌ ང༌དང༌གུན༌, ཉམ༌པོ༌ ཛོམ༌ཅེས༌པོ༌ ཕང༌ མ༌ཕང༌ང༌, ཅིག༌ དང༌ ཅིག༌ག༌ སྤོས༌པ༌ ཏོང༌ཤིག༌། མིག༌སལ༌ལི༌ ནམ༌ ཁོང༌ ལོགས༌ཏེ༌ སྐྱོད༌ཅེས༌སི༌ ཞག༌པོ༌ ཉེ༌མོའ༌ ལེབ༌ཨིན༌ ཡོད༌།
HEB 10:26 ཅེས༌པའེ༌ ཛ༌འོ༌གུན༌, ཀལ༌ཏེས༌ ང༌དང༌གུན༌ལ༌ དེན༌བའེ༌ ཡོན༌ཏན༌ ཐོབས༌ཏེ༌ སྟིང༌ནེ༌, མིང༌ནའང༌ སྡིག༌པ༌གུན༌ ཅོ༌ཨིན༌ དུག༌ན༌, ཏེ༌ནེ༌ ཏེ༌གུན༌ལ༌ ཤགས༌པ༌ ཐོབ༌ཅེས༌ལ༌ ཕུལ༌ཅེས༌སི༌ སྲོག༌གི༌ ཆོད༌པ༌ཞིག༌ མེད༌པ༌ ཨིན༌ནོག༌།
HEB 10:27 ཏེ༌ཙོགས༌སི༌ མི༌གུན༌ལ༌ དཀོན༌མཆོག༌གི༌ ཇིགས༌ནང༌ཅན༌ནི༌ ཁྲིམས༌ཅད༌ དང༌ ཀྲག༌པོ༌ བར༌ཨིན༌ ཡོད༌ཁན༌ནི༌ མེ༌, ཀ༌བོའེ༌ ཁོང༌ངི༌ གྲ༌འོ༌གུན༌ མེད༌ཁན༌ ཅོ༌ཨིན༌, ཏེན༌ན༌ རེ༌ཝ༌བོ༌ ཅིག༌པོ༌ ལུས༌ཏེ༌ ཨིན༌ནོག༌།
HEB 10:28 མོ༌ཟེས༌སི༌ ཁྲིམས༌ ཁའ༌ མ༌ཉན༌ཁན༌ནི༌ མི༌གུན༌, སྤང༌པོ༌ ཉིས༌ ཡ༌ སུམ༌མི༌ སྟིང༌ནེ༌, སྙིང༌རྗེ༌ མ༌ནེ༌ མེད༌པ༌ སད༌དད༌པིན༌།
HEB 10:29 ཏེ༌ནེ༌ སམ༌བ༌ སལ༌ལའང༌! དཀོན༌མཆོག༌གི༌ སྲས༌ རྐང༌པའེ༌ ཡོག༌ག༌ ནན༌ཏེ༌ གྲུལ༌ཁན༌ ཡང༌ ཆད༌དོན༌ ཛད༌ཁན༌ནི༌ ཡེ༌ཤུའི༌ སྐུ༌ཁྲག༌པོའ༌, ཏམ༌པ༌ མ༌རྩིའ༌, ཡང༌ ཏམ༌པའེ༌ ཐུག༌ཉིད༌ལ༌ མ༌བེབས༌ ཅོ༌ཁན༌གུན༌ལ༌ མང༌ང༌ ཇིགས༌ནང༌ཅན༌ནི༌ ཆད༌པ༌ ཕོག༌གོ༌ཤེས༌སི༌ འོས༌པ༌ མ༌ནོག༌ག༌?
HEB 10:30 འི༌ མོལ༌ཁན༌བོ༌ ང༌དང༌གུན༌ནི༌ ཤེས༌ས༌ནོག༌, “ངའེ༌ གྲ༌ ཅོ༌ཁན༌གུན༌ལ༌ ལན༌ཏང༌ཨིན༌། ངའེ༌ ཁོང༌གུན༌ལ༌ འོས༌པའེ༌ ཆད༌པ༌ ཏང༌ཨིན༌།” ཁོང༌ངི༌ འི༌བོའང༌ མོལས༌, “གཙོ༌བོ༌ དཀོན༌མཆོག༌གི༌ ཁོང༌རང༌ངི༌ མི༌གུན༌ལ༌ ཁྲིམས༌ཅད༌ ཛད༌ཨིན༌།”
HEB 10:31 སོན༌པོ༌ དཀོན༌མཆོག༌གི༌ ཁྲིམས༌ཅད༌དི༌ ཡོག༌ག༌ ལེབ༌ཅེས༌པོ༌ ནི༌ ཇིགས༌ནང༌ཅན༌ཞིག༌ ཨིན༌ནོག༌།
HEB 10:32 དཀོན༌མཆོག༌གི༌ འོད༌པོ༌ ཁྱོ༌ཞའེ༌ཀ༌ བབས༌ཏེ༌ ཁྱོ༌ཞ༌གུན༌ནི༌ མ༌ཤི༌ཀ༌ ཏད༌པ༌ ཅོ༌ཁན༌ནི༌ ཏེ༌ སྔུན༌མའེ༌ ཞག༌གུན༌ ཨིད༌ཏུ༌ ཅོ༌ཤིག༌། མ༌ ཀགས༌པོ༌ ཐོངས༌ཏེའང༌ ཁྱོ༌ཞ༌གུན༌ ཏད༌པའེ༌ ནང༌ང༌ སྟན༌པོ༌ དུགས༌ཏེ༌ ཨིན༌པིན༌།
HEB 10:33 ལན༌ མང༌པོ༌, ཁྱོ༌ཞའ༌, མི༌གུན༌ནི༌ ཕྲོའ༌ ནགས༌བར༌དོ༌ སྟན༌ཏེ༌ མ༌བེབས༌ ཅོས༌, ཡང༌ ལན༌ མང༌པོ༌ ཁྱོ༌ཞ༌གུན༌ནི༌ ཏེ༌ཙོགས༌ ནགས༌བར༌དོ༌ ཐོང༌ཁན༌གུན༌ལ༌ རོགས༌ ཅོའད༌པིན༌།
HEB 10:34 ཙོན༌ཁང༌ངི༌ ནང༌ང༌ ཀགས༌ཁན༌གུན༌ ཉམ༌པོ༌ ཁྱོ༌ཞ༌གུན༌ནི༌ སྙིང༌རྗེ༌ སྟནས༌, ཡང༌ ཁྱོ༌ཞའེ༌ ནོར༌ ཀོགས༌ཏེ༌ ཁྱེར༌ཁན༌གུན༌ལ༌ ཐད༌པོ༌ ཉམ༌པོ༌ ཁྱེར༌ཅུགས༌, ཅིའ༌ཟེར༌ན༌ ཏེ༌སང༌ ཀྲག༌ག༌ ཏུས༌གྱུན༌ ལུས༌ཤེས༌ཅན༌ནི༌ གྱུ༌ནོར༌གུན༌ ཁྱོ༌ཞའེ༌ ཕིའ༌ ནམ༌ཁའེ༌ ནང༌ང༌ ཡོད༌ཁན༌བོ༌ ཁྱོ༌ཞ༌གུན༌ལ༌ གྱུས༌ཨིན༌ནོག༌།
HEB 10:35 ཏེན༌ན༌བོའེ༌ཕིའ༌ གཙོ༌བོ༌ ཡེ༌ཤུའི༌ ནང༌ང༌ ཡོད༌ཁན༌ནི༌ ཨིད༌ཤེས༌པོ༌ ཕང༌ མ༌ཕང༌ཤིག༌། འི༌བོའེ༌ ཁྱོ༌ཞ༌གུན༌ལ༌ སོལ༌རས༌ ཀྲག༌པོ༌ ཁྱོང༌ཅེས༌པོ༌ ཨིད༌ཏུ༌ ཅོ༌ཤིག༌།
HEB 10:36 ཁྱོ༌ཞ༌གུན༌ནི༌ ཏད༌པའེ༌ ནང༌ང༌ སྙིང༌རུས༌ བོར༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ཁྱོ༌ཞའེ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ ཅོ༌ ཚར༌ར༌ཅིག༌, ཁྱོ༌ཞ༌གུན༌ལ༌ ཁོང༌ངི༌ ཞལ༌ཆད༌ ཛད༌ཁན༌བོ༌ ཐོབ༌ཨིན༌།
HEB 10:37 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, “མ༌ ཏུས༌ ཉུ༌ངུན༌ཞིག༌གི༌ ནང༌ང༌, ཕེབས༌ཤེས༌ཅན༌བོ༌ ཕེབས༌ཨིན༌, ཡང༌ གོར༌ཅུག༌ག༌ མི༌ཛད༌།
HEB 10:38 ཨིན༌ནའང༌ ངའེ༌ མི༌ ཀྲང༌པོ༌གུན༌ནི༌, ཏད༌པའེ༌ ནང༌ང༌ མི༌ཚེ༌ པུད༌ཨིན༌། ཡང༌ གྱབ༌གྱུར༌ཁན༌གུན༌ ཉམ༌པོ༌ ང༌ མ༌ནེ༌ མི༌ཐད༌།”
HEB 10:39 ང༌དང༌གུན༌ དཀོན༌མཆོག༌ག༌ གྱབ༌གྱུར༌ཏེ༌ ཁྲེས༌ཏོར༌ ཆོགས༌ལ༌ ཆའ༌ཁན༌གུན༌ ཙོགས༌ མ༌ནོག༌། ང༌དང༌གུན༌, སེམས༌ཉིད༌ སྐྱོབ༌བ༌ ཛད༌ཅེས༌ཅན༌ནི༌ ཏད༌པ༌ཅན༌གུན༌ ཨིན༌ནོག༌།
HEB 11:1 ཏད༌པ༌ ནི༌, རེ༌ཝ༌ ཅོ༌ཁན༌བོ༌ དྲན༌དྲའ༌ གྲུབ༌ཅེས༌སི༌ ལོ༌ཁྱེལ༌ ཡོད༌ཅེས༌པོ༌ ཨིན༌ནོག༌། ཡང༌ ཏེ༌བོའེ༌ ང༌དང༌ང༌ མ༌ཐོང༌ཁན༌གུན༌ དེན༌བ༌ ཨིན༌ཁན༌བོ༌ ཏན༌ཏན༌ ཅོའ༌ནོག༌།
HEB 11:2 ཏེན༌ན༌ ཏད༌པ༌བོ༌ གྱུད༌ཏེ༌, ང༌དང༌ངི༌ ཕ༌མེས༌པོ༌གུན༌ལ༌ དཀོན༌མཆོག༌གི༌ ཆོགས༌སྐྱོར༌ ཐོབ༌།
HEB 11:3 ཛམ༌བུ༌ལིང༌ གང༌པོ༌ དཀོན༌མཆོག༌གི༌ བཀའ༌ ནང༌ཞིན༌ལ༌ ཆགས༌, དག༌ས༌ ང༌དང༌གུན༌ལ༌ ཐོང༌ཨིན༌ ཡོད༌ཁན༌ནི༌ ཛམ༌བུ༌ལིང༌བོ༌, སྔུན༌ལ༌ ཡོད༌ཁན༌ རིག༌གི༌ ཀ༌ནེ༌ མ༌ཞངས༌ཁན༌བོ༌, ང༌དང༌གུན༌ནི༌ ཏད༌པ༌ ཅོ༌ཅེས༌པོ༌ གྱུད༌ཏེ༌ ཧ༌གོའ༌ནོག༌།
HEB 11:4 ཏད༌པ༌ ཡོད༌ཅེས༌པོའེ༌, ཨ༌བེལ༌ལི༌ དཀོན༌མཆོག༌ག༌ ཁོ༌རང༌ངི༌ ཨ༌ཅོ༌ ཀ༌ཡིན༌ནི༌ སང༌ ཆོད༌པ༌ མང༌ང༌ གྱལ༌ལ༌ ཕུལས༌། ཏེན༌ན༌བོའེ༌ ཞས༌ཏེ༌ ཨ༌བེལ༌ལི༌ ཆོད༌པ༌གུན༌ལ༌ ཆོགས༌སྐྱོར༌ ཛད༌ཏེ༌ དཀོན༌མཆོག༌གི༌ ཁོའ༌ མི༌ ཀྲང༌པོ༌ ཐེའ༌ ཛདས༌། ཨ༌བེལ༌ མ༌ ཏུས༌ མང༌པོའེ༌ སྔུན༌ལ༌ ཤི༌ཏེ༌ མེད༌ནའང༌, ཁོའེ༌ ཏད༌པ༌བོ༌ ང༌དང༌གུན༌ནི༌ ཕིའ༌ ཏ༌རུང༌ངའང༌ སྤེ༌ཞིག༌ ཨིན༌ནོག༌།
HEB 11:5 ཏད༌པ༌ ཡོད༌ཅེས༌པོའེ༌, ཨེ༌ནོག༌ ཟེར༌ཁན༌ནི༌ བུ༌ཚ༌བོ༌ ཤི༌ མ༌ཤིའ༌, ནམ༌ཁའ༌ ཁྱེར༌ར༌ ཛདས༌ “ཁོ༌ ཇིག༌རྟེན༌ནི༌ ནང༌ང༌ མ༌ཐོབ༌ ཅིའ༌ཟེར༌ན༌ དཀོན༌མཆོག༌གི༌ ཁོ༌ ཁྱེར༌ར༌ ཛདས༌,” ནམ༌ཁའ༌ ཁྱེར༌རི༌ སང༌ སྔུན༌ལ༌ ཁོའ༌ དཀོན༌མཆོག༌ ཐུགས༌ཐད༌ཅུག༌ག༌ ཛད༌ཁན༌ནི༌ མི༌ཞིག༌ ཐེའད༌པིན༌།
HEB 11:6 ཡང༌ ཏད༌པ༌ མེད༌པ༌ དཀོན༌མཆོག༌ ཐུགས༌ཐད༌ ཅུག༌ཉན༌ན༌ མ༌ནོག༌། ཁོང༌ ཡོད༌ས༌ ཡོང༌ཉིན༌ ཡོད༌ཁན༌གུན༌ནི༌, དཀོན༌མཆོག༌ ཞུགས༌ཏེ༌ ཡོད༌ཁན༌ དང༌ སྙིང༌ནེ༌ ཙལ༌ཁན༌གུན༌ལ༌ སོལ༌རས༌ སལ༌ཅེས༌པོའ༌ ཏད༌པ༌ ཅོ༌གོས༌།
HEB 11:7 ཏད༌པ༌ ཡོད༌ཅེས༌པོའེ༌, ནོ༌ཨའེ༌ ཁོ༌རང༌ངི༌ ནང༌ཚངས༌གུན༌ ཆུ༌ལོག༌ནེ༌ སྐྱོབ༌ཅེས༌སི༌ ཕིའ༌ གྲུ༌ཟིང༌ ཆེན༌མོ༌ཞིག༌ རྩིགས༌། ཁོའེ༌ ཡོང༌ཅེས༌ཅན༌ནི༌ ཇིགས༌པ༌གུན༌ནི༌ སྐོར༌ལ༌ སྤང༌པུད༌ད༌ ཛད༌ཁན༌ནི༌ དཀོན༌མཆོག༌གི༌ ཁའ༌ཉནས༌། ཏད༌པའེ༌ ཞས༌ཏེ༌ ནོ༌ཨའེ༌ གྲུ༌ཟིང༌ངི༌ ནང༌ང༌ མ༌ཞོན༌ཁན༌ནི༌ ཇིག༌རྟེན༌པ༌གུན༌ནི༌ཀ༌ དཀོན༌མཆོག༌གི༌ ཁྲིམས༌ཅད༌ ཁྱོངས༌། ཡང༌ ཏད༌པ༌ གྱུད༌ཏེ༌, དཀོན༌མཆོག༌གི༌ ནོ༌ཨ༌ མི༌ ཀྲང༌པོ༌ཞིག༌ ཐེའ༌ ཛདས༌།
HEB 11:8 ཏད༌པ༌ ཡོད༌ཅེས༌པོའེ༌, ཨབ༌ར༌ཧམ༌མི༌ དཀོན༌མཆོག༌གི༌ ཁའ༌ཉནས༌, ནམ༌ དཀོན༌མཆོག༌གི༌ ཁོའ༌ རང༌ངི༌ ཕ༌ཡུལ༌ ཕངས༌ཏེ༌, ཁོང༌ངི༌ ཁོའ༌ ནོར༌སྐལ༌ལ༌ སལ༌ལ༌ ཛད༌ཅེས༌སི༌ ཏེ༌ ཡུལ༌བོའ༌ སོང༌ མོལས༌, ཡང༌ ཀ༌རུ༌ ཆ༌ཅེས༌པོ༌ གྱུས༌མེད༌ཏེའང༌ ཁོ༌ སོང༌།
HEB 11:9 ཏད༌པ༌ ཡོད༌ཅེས༌པོའེ༌ ཨབ༌ར༌ཧམ༌, ཞལ༌ཆད༌ ཛད༌ཁན༌ནི༌ ཡུལ༌བོའ༌ ལེབ༌བ༌ཅིག༌, ཞན༌ཡུལ༌ལི༌ མི༌ ཙོགས༌ལ༌ ཁོ༌ ཀུར༌རི༌ ནང༌ང༌ དུགས༌། ཏེན༌ན༌ ཙོགས༌ ཨི༌སཱག༌ དང༌ ཡ༌ཀོབ༌བིའང༌ ཅོས༌, ཀ༌གུན༌ལ༌ ཏེན༌ན༌ ཞལ༌ཆད༌པོ༌ ནོར༌སྐལ༌ལ༌ ཐོབ༌ཏེ༌ ཨིན༌ནོག༌།
HEB 11:10 ཨབ༌ར༌ཧམ༌མི༌ ལོ༌ཁྱེལ༌ ཉམ༌པོ༌ ཏུས༌གྱུན༌ ལུས༌ཤེས༌ཅན༌ནི༌ མག༌ལྡན༌ ཡོད༌ཁན༌ནི༌ གྱལ༌ས༌, དཀོན༌མཆོག༌གི༌ ཁོང༌རང༌ངི༌ ཐབས༌ ནང༌ཞིན༌ རྩིག༌ག༌ ཛད༌ཁན༌བོ༌ ཐོབ༌ཅེས༌ལ༌ ལྟའད༌པིན༌།
HEB 11:11 ཏད༌པ༌ ཡོད༌ཅེས༌པོའེ༌, ཨབ༌ར༌ཧམ༌, མ༌རྒད༌པོ༌ སོང༌ཏེ༌ ཡང༌ སཱ༌ར༌ མ༌ནེ༌ ཕྲུ༌གུ༌ མ༌ཇོར༌ར༌ ཨིན༌ཏེའང༌, དཀོན༌མཆོག༌གི༌ ཨབ༌ར༌ཧམ༌ ཨ༌བ༌ གྱུར༌ཅུག༌ག༌ ཛདས༌, ཅིའ༌ཟེར༌ན༌ ཁོའེ༌ ཞལ༌ཆད༌ ཛད༌ཁན༌ནི༌ དཀོན༌མཆོག༌ ཨིད༌ཤེས༌ཅན༌ ཞུགས༌ཏེ༌ ཨིན༌ཁན༌བོ༌ ཐེས༌།
HEB 11:12 སོང༌པ༌སང༌ ཨབ༌ར༌ཧམ༌ རྒད༌པོ༌ ཤི༌ཅེས༌སི༌ ཉེ༌མོའ༌ ལེབས༌ཏེའང༌, ཁོའེ༌ པུར༌གྱུད༌གུན༌ ནམ༌མི༌ སྐར༌མ༌ ཙོགས༌ལ༌ མང༌པོ༌ དང༌ གྱ༌ཚོའེ༌ ཐའ༌མའེ༌ པེ༌མ༌ ཙོགས༌ རྩི༌ མི༌ཉན༌ཅེས༌ ཕེལ༌།
HEB 11:13 ཤི༌ཅེས༌སི༌ ཞག༌ ཚག༌པའང༌, ཏེ༌ མི༌ཚང༌མའེ༌ དཀོན༌མཆོག༌གི༌ ཞལ༌ཆད༌ ཛད༌ཁན༌བོའེ༌ ནང༌ང༌ ཏད༌པ༌ ཅོའད༌པིན༌། ཁོང༌གུན༌ལ༌ ཏེ༌ ཞལ༌ཆད༌ ཛད༌ཁན༌བོ༌ མ༌ཐོབ༌བ༌ ཨིན༌ནའང༌ ཁོང༌གུན༌ནི༌ ཏེ༌བོ༌ ཐག༌རིང༌ཞིག༌ནེ༌ ཐོང༌ཏེ༌ གའ༌སུས༌ ཞུས༌། ཡང༌ ཁོང༌རང༌གུན༌ལ༌ འི༌ ཇིག༌རྟེན༌ནི༌ཀ༌ ཞན༌མའེ༌ ཡུལ༌ལི༌མི༌ དང༌ རེ༌བོ༌པ༌ གུན༌ ཟེར༌རད༌པིན༌།
HEB 11:14 ཏེ༌ཟུག༌ ཟེར༌ཁན༌གུན༌ནི༌, ཁོ༌རང༌གུན༌ནི༌ ཨིན༌ ཟེར༌ཉན༌ཅེས༌ཅན༌ནི༌ ཡུལ༌ཞིག༌ ཙལ༌ལ༌ནོག༌།
HEB 11:15 ཀལ༌ཏེས༌ ཁོང༌གུན༌ནི༌ ཕངས༌ཏེ༌ ཡོངས༌ཁན༌ནི༌ ཕ༌ཡུལ༌བོ༌ སམ༌མད༌པིན༌ན༌, ཏེ༌ནེ༌ ཁོང༌གུན༌ལ༌ ལོགས༌ཏེ༌ ཆ༌ཅེས༌སི༌ སྐབས༌ ཐོབ༌ཏེ༌ ཡོད༌གྲོ༌།
HEB 11:16 ཨིན༌ནའང༌ ཁོང༌གུན༌ནི༌ མང༌ང༌ གྱལ༌ལ༌ ཡུལ༌ཞིག༌གི༌ ཕིའ༌ དོད༌པ༌ ཅོའད༌པིན༌, ནམ༌ཁའེ༌ ནང༌ང༌ ཡོད༌ཁན༌བོའ༌། ཏེན༌ན༌བོའེ༌ཕིའ༌ དཀོན༌མཆོག༌, ཁོང༌གུན༌ནི༌ དཀོན༌མཆོག༌ ཞུ༌ཅེས༌ལ༌, ཁྲེལ༌ལ༌ མ༌ཛད༌, མ༌ཚད༌ ཁོང༌ངི༌ ཁོང༌གུན༌ནི༌ ཕིའ༌ གྱལ༌ས༌ཞིག༌གའང༌ རྩིག༌ག༌ ཛདས༌།
HEB 11:17 ཏད༌པ༌ ཡོད༌ཅེས༌པོའེ༌, དཀོན༌མཆོག༌གི༌ ཨབ༌ར༌ཧམ༌མ༌ ཚོད༌ལྟའ༌ ཛད༌ ཟ༌ནེ༌, ཁོའེ༌ ཨི༌སཱག༌གའང༌ སྲོག༌གི༌ ཆོད༌པ༌ ཕུལས༌། དཀོན༌མཆོག༌གི༌ ཞལ༌ཆད༌ ཐོབ༌ཁན༌ནི༌ ཨབ༌ར༌ཧམ༌, ཁོ༌རང༌ངི༌ བུ༌ཚའ༌ ཅིག༌ཅིག༌པོའང༌ སྲོག༌གི༌ ཆོད༌པ༌ ཕུལ༌ཅེས༌ལ༌ གྲལ༌གྲིག༌ ཡོད༌པིན༌།
HEB 11:18 ཞན༌ དཀོན༌མཆོག༌གི༌ ཁོའ༌ མོལ༌ལ༌ ཛད༌ནའང༌, “ཨི༌སཱག༌ གྱུད༌ཏེ༌ ཁྱོ༌རང༌ངི༌ པུར༌གྱུད༌གུན༌ ཕེལ༌ཨིན༌།”
HEB 11:19 ཨབ༌ར༌ཧམ༌མི༌ སམ༌, ཨི༌སཱག༌ ཤི༌ནའང༌ དཀོན༌མཆོག༌གི༌ ཁོ༌ ཡང༌སྐྱར༌ སོན༌ཏེའ༌ ལང༌ང༌ ཛད༌ཉན༌ཨིན༌། ཡང༌ ལྟས༌ཏེ༌ ཁྱེར༌ན༌ ཏེ༌བོ༌ ཇུང༌, ཨབ༌ར༌ཧམ༌མ༌ ཁོ༌རང༌ངི༌ བུ༌ཚ༌ ཤི༌ཏེ༌ སྟིང༌ནེ༌ ལོགས༌ཏེ༌ ཐོབ༌ཁན༌ ཙོགས༌ ཨིན༌ནོག༌།
HEB 11:20 ཏད༌པ༌ ཡོད༌ཅེས༌པོའེ༌, ཨི༌སཱག༌གི༌ ཁོ༌རང༌ངི༌ བུ༌ཚ༌ ཡ༌ཀོབ༌ དང༌ ཨི༌སུ༌ ཉིས༌ཀོའ༌ ཁོང༌གུན༌ནི༌ ཡོང༌ཅེས༌ཅན༌ནི༌ ཏུས༌སི༌ ཕིའ༌ ཅིན༌ལབས༌ སལས༌།
HEB 11:21 ཏད༌པ༌ ཡོད༌ཅེས༌པོའེ༌, ཡ༌ཀོབ༌ ཤི༌ ཟ༌ནེ༌, ཁོའེ༌ ཡོ༌སེབ༌བི༌ ཕྲུ༌གུ༌ ཉིས༌ཀོའ༌ ཅིན༌ལབས༌ སལས༌, ཡང༌ ཁོ༌ རྒད༌པོ༌ ཆ༌ནའང༌ ཁོ༌རང༌ངི༌ གྲུལ༌ཅེས༌སི༌ བེར༌ཀ༌ སྟེན༌ཏེ༌ དཀོན༌མཆོག༌ག༌ ཅོལས༌།
HEB 11:22 ཏད༌པ༌ ཡོད༌ཅེས༌པོའེ༌, ཡོ༌སེབ༌ ཤི༌ཨིན༌ ཡོད༌དི༌ ཏུས༌ལ༌, ཁོའེ༌ ཨིས༌ར༌ཨེལ༌པ༌གུན༌ ཨི༌ཇིབ༌བི༌ ཡུལ༌ནེ༌ བིངས༌ཏེ༌ ཆ༌ཅེས༌སི༌ སྐོར༌ལ༌ ཟེརས༌། ཡང༌ ཁོང༌གུན༌ ཆ༌ ཟ༌ནེ༌ ཁོའེ༌ རུས༌པ༌གུན༌ ཉམ༌པོ༌ ཁྱེར༌ཅེས༌སི༌ ལབ༌ཞའ༌ ཏངས༌།
HEB 11:23 ཏད༌པ༌ ཡོད༌ཅེས༌པོའེ༌, མོ༌ཟེས༌སི༌ ཕ༌མ༌གུན༌ནི༌ ཁོ༌ སྐྱེས༌ཏེ༌ སྟིང༌ནེ༌ ཟླ༌ཝ༌ སུམ༌ ཚག༌པ༌ སྦས༌ཏེ༌ བོརས༌, ཅིའ༌ཟེར༌ན༌ ཁོའེ༌ ཕ༌མ༌གུན༌ནི༌ ཁོ༌ ཞན༌ ཕྲུ༌གུ༌གུན༌ནི༌ སང༌ ཁྱད༌པར༌ཅན༌ཞིག༌ ཐོང༌། ཡང༌ ཨི༌ཇིབ༌བི༌ གྱལ༌པོའེ༌ ཁའ༌ མི༌ཉན༌ཅེས༌ལ༌ ཁོང༌གུན༌ མ༌ཇིགས༌།
HEB 11:24 ཏད༌པ༌ ཡོད༌ཅེས༌པོའེ༌, མོ༌ཟེས༌ ལྡན༌ཏེ༌ སྟིང༌ནེ༌ ཁོའེ༌ ཁོ༌རང༌ང༌ གྱལ༌པོ༌ ཕེ༌རོའེ༌ ཚ༌འོ༌ ཟེར༌ མ༌ཅུགས༌།
HEB 11:25 ཏུས༌ ཉུ༌ངུན༌ཞིག༌, སྡིག༌པའེ༌ སྐྱིད༌པོ༌གུན༌ནི༌ ནང༌ང༌ ཐད༌པོ༌ ཅོའེ༌ སང༌ ཨིས༌ར༌ཨེལ༌པ༌གུན༌ ཉམ༌པོ༌ ནགས༌བར༌དོ༌ ཁུར༌ཅེས༌པོ༌ མོ༌ཟེས༌སི༌ ལྡམས༌།
HEB 11:26 མོ༌ཟེས༌སི༌ ཨི༌ཇིབ༌བི༌ གྱུར༌ནོར༌གུན༌ནི༌ སང༌ མ༌ཤི༌ཀའེ༌ ཏོན༌ལ༌ རྡུག༌ངལ༌ ཉོང༌ཅེས༌པོ༌ མང༌ང༌ རིན༌ཅན༌ ཨིན༌ཁན༌བོ༌ ཧ༌གོ༌, ཅིའ༌ཟེར༌ན༌ ཁོའེ༌ ཐོབ༌ཅེས༌ཅན༌ནི༌ ཏེ༌ ཀྲག༌པོ༌ སོལ༌རས༌པོའ༌ ལྟའད༌པིན༌།
HEB 11:27 ཏད༌པ༌ ཡོད༌ཅེས༌པོའེ༌, གྱལ༌པོའེ༌ སྲོའ༌ མ༌ཇིགས༌ས༌, ཁོ༌ ཨི༌ཇིབ༌བི༌ ཡུལ༌ ཕངས༌ཏེ༌ སོང༌། ཁོའེ༌ སྙིང༌རུས༌ ཉམ༌པོ༌ ཏེ༌གུན༌ ཅོས༌ཏེ༌ ཨིན༌པིན༌, ཅིའ༌ཟེར༌ན༌ ཁོའེ༌ ཁོ༌རང༌ངི༌ མིག༌པོ༌ མ༌ཐོང༌ཁན༌ དཀོན༌མཆོག༌ ཆོགས༌ལ༌ བོརས༌།
HEB 11:28 ཏད༌པ༌ ཡོད༌ཅེས༌པོའེ༌, གོ༌མ༌ སྐྱེ༌ཁན༌ནི༌ བུ༌ཚ༌གུན༌ སད༌ད༌ལ༌ ཡོང༌ཁན༌ནི༌ ཕོ༌ཉའེ༌ ཀ༌ནེ༌ སྐྱོབ༌ཅེས༌སི༌ ཕིའ༌, མོ༌ཟེས༌སི༌ ཨིས༌ར༌ཨེལ༌པ༌གུན༌ལ༌ པེ༌སག༌གི༌ ཏུས༌ རྩི༌ཅེས༌ དང༌ ལུ༌གུའི༌ ཁྲག༌གུན༌ སྒོའེ༌སྟག༌གི༌ཀ༌ སྐུ༌ཅེས༌ལ༌ བཀའ༌ ཏངས༌།
HEB 11:29 ཏད༌པ༌ ཡོད༌ཅེས༌པོའེ༌, ཨིས༌ར༌ཨེལ༌པ༌གུན༌ ཚོ༌ མར༌པོའེ༌ ཞུང༌ནེ༌ ས༌ཀྱད༌ སྐམ༌པོ༌ གྱུད༌ཏེ༌ གྲུལས༌། ཨིན༌ནའང༌ ཨི༌ཇིབ༌པ༌གུན༌ནི༌ ཁོང༌གུན༌ནི༌ གྱབ༌ནེ༌ ཡོང༌ཅེས༌སི༌ རྩོན༌གྲུས༌ ཅོའ༌ཅིག༌, ཁོང༌གུན༌ ཆུའི༌ ནང༌ང༌ ནུབ༌ཏེ༌ ཤི༌།
HEB 11:30 ཏད༌པ༌ ཡོད༌ཅེས༌པོའེ༌, ཨིས༌ར༌ཨེལ༌པ༌གུན༌ དཀོན༌མཆོག༌གི༌ ཁའ༌ཉན༌ཏེ༌, ཡེ༌རི༌ཀོའེ༌ གྲོང༌ཁྱེར༌ལ༌ ཞག༌པོ༌ རྡུན༌ སྐོར༌ར༌ ཏངས༌པ༌, གྲོང༌ཁྱེར༌ལ༌ སྐོར༌ཏེ༌ ཡོད༌ཁན༌ནི༌ རྩིག༌པ༌བོ༌ ཞིག༌།
HEB 11:31 ཏད༌པ༌ ཡོད༌ཅེས༌པོའེ༌, ཟུགས༌ཙོང༌མ༌ ར༌ཧབ༌, ཁའ༌ མ༌ཉན༌ཁན༌ ཁོའེ༌ གྲོང༌ཁྱེར༌པ༌གུན༌ ཉམ༌པོ༌ ཤི༌ མ༌ཤི༌, ཅིའ༌ཟེར༌ན༌ ཁོའེ༌ ཁོ༌རང༌ངི༌ ཁང༌པའེ༌ ནང༌ང༌ ཨིབས༌ཏེ༌ ཡོང༌ཁན༌ནི༌ ཨིས༌ར༌ཨེལ༌པ༌ ཉིས༌ཀོའ༌ གའ༌སུས༌ ཞུས༌།
HEB 11:32 ཏ༌རུང༌ ཙམ༌ཤིག༌ མང༌པོ༌ ངའ༌ ཟེར༌གོས༌? གི༌དི༌འོན༌, བ༌རག༌, སམ༌སོན༌, ཡེཕ༌ཐཧ༌, དཱ༌བིད༌, ས༌མུ༌འེལ༌ དང༌ ལུང༌སྟོན༌པ༌གུན༌ནི༌ སྐོར༌ལ༌ ཤད༌ཅེས༌སི༌ ཏུས༌ ངའ༌ མེད༌།
HEB 11:33 ཀ༌གུན༌ནི༌ ཏད༌པ༌ ཡོད༌ཅེས༌པོའེ༌, གྱལ༌ཁབ༌གུན༌ ངའ༌ཡོག༌ག༌ ཁྱོངས༌, ཀྲང༌པོའེ༌ ཐག༌ཅད༌གུན༌ ཏངས༌, ཞལ༌ཆད༌ ཛད༌ཁན༌གུན༌ ཐོབ༌, དཀོན༌མཆོག༌གི༌ སིང༌གེའེ༌ ཁ༌གུན༌ ཀག༌ག༌ ཛདས༌,
HEB 11:34 མེ༌ ཀྲག༌པོ༌ བར༌ཁན༌ནི༌ ནང༌ནེ༌ ཐར༌, ར༌འི༌ ཉམ༌པོ༌ ཤི༌ཅེས༌ནེ༌ ཐར༌, འུ༌ཐུགས༌ ཡོད༌ཁན༌གུན༌ ཤེད༌ཅན༌ གྱུར༌ ཡང༌ མག༌གི༌ ནང༌ང༌ ཤེད༌ཅན༌ གྱུར༌ཏེ༌ གྲ༌འོའེ༌ མག༌མི༌གུན༌ ཤོར༌ཅུགས༌,
HEB 11:35 བུ༌མོ༌གུན༌ལ༌ ཁོང༌རང༌གུན༌ནི༌ ཅེས༌པ༌ ཤི༌ཁན༌གུན༌ སོན༌ཏེའ༌ ལངས༌ཏེ༌ ཐོབ༌, ཞན༌གུན༌ལ༌ ནགས༌ སྲན༌ཏྲེ༌ ཐོང༌, ཏེ༌ཀ༌ནེ༌ ཐར༌ཅེས༌ལ༌ ཁོང༌གུན༌ནི༌ དཀོན༌མཆོག༌ མ༌ཕངས༌། ཁོང༌གུན༌ནི༌ ཤི༌ཏེ༌ སོན༌ཏེའ༌ ལངས༌ཏེ༌ སྟིང༌ནེ༌, མི༌ཚེ༌ གྱལ༌ལ༌ཞིག༌ ཐོབ༌ཅེས༌པོའེ༌ ནང༌ང༌ རེ༌ཝ༌ བོར༌རད༌པིན༌།
HEB 11:36 ཞན༌གུན༌ལ༌ ཁྲེལ༌བ༌ ཅོས༌ཏེ༌ རྟལ༌ལྕག༌ མང༌པོ༌ ཕོག༌, ཡང༌ ཞན༌གུན༌ལ༌ ལྕག༌ཐག༌ ཏགས༌ཏེ༌ ཙོན༌ཁང༌ངི༌ ནང༌ང༌ ཀགས༌།
HEB 11:37 ཁ༌ཅིག༌ག༌ རྡོའ༌ གྱབས༌ཏེ༌ སདས༌, ཁ༌ཅིག༌གི༌ ཟུགས༌པོ༌ ཁག༌ཉིས༌སི༌ ནང༌ང༌ ཤགས༌, ཞན༌གུན༌ ར༌འི༌ ཉམ༌པོ༌ སདས༌, ཁ༌ཅིག༌ག༌ གོན༌གྱུ༌ ཅའང༌ མེད༌པ༌, ལུག༌ དང༌ ར༌མའེ༌ པགས༌པ༌གུན༌ གོན༌ཏེ༌ གྲུལས༌། ཁོང༌གུན༌ལ༌ ཡོད༌ཁན༌ནི༌ རང༌ཝང༌བོ༌ ཀོགས༌ཏེ༌ མི༌འོས༌པ༌ ཅོའད༌པིན༌།
HEB 11:38 ཇིག༌རྟེན༌པ༌གུན༌ལ༌ ཏེ༌ ཏད༌པ༌ཅན༌གུན༌ ཉམ༌པོ༌ མི༌ཚེ༌ ཕུད༌ཅེས༌སི༌ འོས༌པ༌ མེད༌པ༌ ཨིན༌ནོག༌། ཏེ༌ ཏད༌པ༌ཅན༌གུན༌ནི༌ ནང༌ནེ༌ ཁ༌ཅིག༌ ཐང༌སྟོང༌ དང༌ རི༌ གུན༌ལ༌ ཁོར༌ཨིན༌ དུགས༌, ཁ༌ཅིག༌ བྲག༌ཕུགས༌ དང༌ ས༌དོང༌ གུན༌ནི༌ ནང༌ང༌ ཨིབ༌ཨིན༌ཞིག༌ དུགས༌།
HEB 11:39 ཞན༌ ཁོང༌ ཚང༌མ༌ལ༌ ཏད༌པ༌ ཡོད༌ཅེས༌པོའེ༌ དཀོན༌མཆོག༌གི༌ སྟོད༌པ༌ ཐོབ༌ནའང༌, ཏེ༌གུན༌ནི༌ ཕྲོ༌ནེ༌ ཅིག༌གའང༌ ཞལ༌ཆད༌ ཛད༌ཁན༌ ཚང༌མ༌ མ༌ཐོབ༌།
HEB 11:40 དཀོན༌མཆོག༌གི༌ ཐུགས༌སམ༌མི༌ ནང༌ང༌, ང༌དང༌ ཚང༌མའེ༌ ཕིའ༌ མང༌ང༌ གྱལ༌ལ༌ སམ༌བ༌ཞིག༌ ཡོད༌ པ༌སང༌, ཏེ༌ ཏད༌པ༌ཅན༌གུན༌ལའང༌ ང༌དང༌ ཉམ༌པོ༌ མ༌ནེ༌ ཕུན༌སུམ༌ཚོགས༌པ༌ ཅོའ༌ མི༌ཛད༌།
HEB 12:1 ཏེ༌བོའེ༌ཕིའ༌ ང༌དང༌གུན༌ལ༌ ཏད༌པའེ༌ ནང༌ང༌ མི༌ཚེ༌ པུད༌ཁན༌ནི༌ མི༌ཚོགས༌ ཆེན༌མོ༌ཞིག༌གི༌ སྐོར༌ཏེ༌ ཡོད༌པ༌, ང༌དང༌ངི༌ ཏད༌པའེ༌ ནང༌ང༌ གྲུལ༌ མ༌ཅུག༌ཁན༌ དང༌ ལ༌མོ༌ ཉམ༌པོ༌ ཁྲིལ༌ཁན༌ནི༌ སྡིག༌པ༌ གུན༌ ཕངས༌ཏེ༌ དཀོན༌མཆོག༌གི༌ གྲལ༌གྲིག༌ ཅོའ༌ ཛད༌ཁན༌ནི༌ བང༌གྱུགས༌པོ༌ ང༌དང༌གུན༌ནི༌ སྙིང༌རུས༌ ཉམ༌པོ༌ ཏང༌ཨིན༌།
HEB 12:2 ང༌དང༌གུན༌ནི༌ མིག༌གུན༌ ཡེ༌ཤུའི༌ཀ༌ བོར༌ཨིན༌, ཀ༌བོའེ༌ ང༌དང༌གུན༌ལ༌ གོ༌ཁྲིད༌ ཛད༌ཏེ༌ ང༌དང༌གུན༌ནི༌ ཏད༌པ༌བོ༌ ཕུན༌སུམ༌ཚོགས༌པ༌ གྱུར༌ཅུག༌ག༌ ཛད༌དད༌། ཁོང༌ང༌ སྲུངས༌ཏེ༌ ཡོད༌ཁན༌ནི༌ སྐྱིད༌པོའེ༌ ཐུག༌གྱུས༌ ཡོད༌ པ༌སང༌, ཁྲེལ༌བ༌ མ༌སམ༌མ༌ སྙིང༌རུས༌ ཉམ༌པོ༌ ཁོང༌ངི༌ རྐྱང༌ཤིང༌ངི༌ རྡུག༌ངལ༌བོ༌ ནམས༌ས༌ ཛདས༌། དག༌ས༌ ཁོང༌ དཀོན༌མཆོག༌གི༌ ཞུགས༌ཁྲིས༌སི༌ ཡས༌པ༌ ཆོགས༌ལ༌ རྩི༌ཝ༌ཅན༌ནི༌ ནས༌ས༌བོའེ༌ཀ༌ ཞུགས༌ཏེ༌ ཡོད༌ཏེ༌ ཨིན༌ནོག༌།
HEB 12:3 སམ༌བ༌ སལ༌ལའང༌ སྡིག༌ཅན༌ མི༌གུན༌ནི༌ ནགས༌ སྟན༌ཁན༌གུན༌ སྙིང༌རུས༌ ཉམ༌པོ༌ སྲན༌ན༌ ཛད༌ཁན༌ནི༌ ཡེ༌ཤུའི༌ སྐོར༌ལ༌, ཏེ༌ནེ༌ ཁྱོ༌ཞ༌གུན༌ སྲན༌ཏྲེ༌ ངལ༌མི༌ངལ༌ ཡང༌ ཁྱོ༌ཞའེ༌ རེ༌ཝ༌བོ༌ ཕང༌མི༌ཕང༌!
HEB 12:4 སྡིག༌པའེ༌ གྱབ༌གལ༌ལ༌ ནོལ༌ཨིན༌, ཁྱོ༌ཞ༌གུན༌ལ༌ ཏ༌རུང༌ ཚག༌པ༌ ཤི༌ཅེས༌སི༌ རྡུག༌ངལ༌བོ༌ མ༌ཇུང༌ང༌ ཨིན༌ནོག༌།
HEB 12:5 ཁོང༌རང༌ངི༌ ཕྲུ༌གུ༌གུན༌ལ༌ སྤོས༌པ༌ སལ༌ཨིན༌ དཀོན༌མཆོག༌གི༌ མོལ༌ཁན༌བོ༌ ཁྱོ༌ཞ༌གུན༌ནི༌ རྗེད༌དའ༌?, “ངའེ༌ ཕྲུ༌གུ༌, གཙོ༌བོའེ༌ སྐྱོང༌ང༌ ཛད༌ཅེས༌པོའ༌ སྣང༌མེད༌ མ༌ཅོ༌ཤིག༌ ཡང༌ ཁོང༌ངི༌ ཆད༌པ༌ སལ༌ལ༌ ཛད༌ ཟ༌ནེ༌, སེམས༌ ཆགས༌ཏེ༌ རེ༌ཝ༌བོ༌ མ༌ཕང༌ཤིག༌།
HEB 12:6 ཅིའ༌ཟེར༌ན༌ གཙོ༌བོའེ༌ ཅེས༌པ༌ ཛད༌ཁན༌གུན༌ལ༌ སྐྱོང༌ང༌ ཛད༌ད༌ནོག༌ ཡང༌ ཁོང༌རང༌ངི༌ ཕྲུ༌གུ༌ ཐེ༌ཁན༌གུན༌ལ༌ ཆད༌པ༌ སལ༌ལ༌ ཛད༌ད༌ནོག༌།”
HEB 12:7 དཀོན༌མཆོག༌གི༌ སྐྱོང༌ཅེས༌པོའ༌, ཁྱོ༌ཞ༌གུན༌ནི༌ སྙིང༌རུས༌ ཅོ༌ ཟ༌ནེ༌, ཁོང༌ངི༌ ཁྱོ༌ཞའ༌ ཁོང༌རང༌ངི༌ ཕྲུ༌གུ༌ ཙོགས༌ ཐེའ༌ ཛད༌ཁན༌བོ༌ ཨིད༌ཏུ༌ ཅོ༌ཤིག༌། ཨ༌བའེ༌ མ༌སྐྱོང༌ཁན༌ནི༌ ཕྲུ༌གུ༌ཞིག༌ སུ༌ ཡོད༌ཀྱག༌?
HEB 12:8 སྐྱོང༌ཅེས༌པོ༌ ཚང༌མའེ༌ཀ༌ ཇུང༌ང༌ནོག༌། དཀོན༌མཆོག༌གི༌ མ༌སྐྱོང༌ཁན༌གུན༌ ཁོང༌ངི༌ དེན༌བའེ༌ ཕྲུ༌གུ༌གུན༌ མན༌པ༌, ན༌ལུ༌གུན༌ ཨིན༌ནོག༌།
HEB 12:9 ཞན༌ ང༌དང༌གུན༌ སྐྱོང༌ཁན༌ ཇིག༌རྟེན༌ནི༌ ཨ༌བ༌གུན༌ལ༌ ང༌ཏི༌ རྩི༌ཝ༌ ཅོའ༌ནོག༌, ཏེ༌ནེ༌ ཙམ༌ཤིག༌ མང༌ང༌ ང༌དང༌གུན༌ ང༌དང༌རང༌ངི༌ ཐུག༌ཉིད༌དི༌ ཡབ༌བ༌ སྟད༌ མ༌གོས༌? ཏེ༌ཟུག༌ ཅོ༌ན༌ ཏུས༌གྱུན༌ སོན༌ཏེའ༌ ལུས༌ཨིན༌།
HEB 12:10 ཇིག༌རྟེན༌ནི༌ ཨ༌བ༌གུན༌ནི༌ ཏུས༌ ཉུ༌ངུན༌ཞིག༌གི༌ ཕིའ༌ ང༌དང༌གུན༌ལ༌ སམ༌བ༌ གྱལ༌ལ༌ ཉམ༌པོ༌ སྐྱོང༌ང༌ནོག༌། ཨིན༌ནའང༌ དཀོན༌མཆོག༌གི༌ ང༌དང༌རང༌ངི༌ ཕན༌ཐོགས༌སི༌ ཕིའ༌ ང༌དང༌གུན༌ སྐྱོང༌ང༌ ཛད༌ད༌ནོག༌, ཏེ༌བོ༌ ཛད༌ཅེས༌སི༌ གྱུན༌ཚན༌ ནི༌, ཁོང༌ ཏམ༌པ༌ ཨིན༌ཁན༌བོ༌ ང༌དང༌ ཉམ༌པོ༌ བགོའ༌ ཛད༌ཅེས༌པོ༌ ཨིན༌ནོག༌།
HEB 12:11 སྐྱོང༌ཅེས༌སི༌ ཏུས༌པོ༌ སྐྱིད༌པོ༌ མན༌པ༌ རྡུག༌ངལ༌ཅན༌ཞིག༌ ཡོང༌ང༌ནོག༌། ཨིན༌ནའང༌ སྟིང༌ནེ༌ འི༌ཙོགས༌སི༌ ལམ༌མི༌ ནང༌ང༌ ལོབ༌ཇོང༌ ཐོབ༌ཁན༌གུན༌ལ༌ ཀྲང༌པོ༌ དང༌ ཞི༌དེའེ༌ བྲས༌བུ༌གུན༌ སྨིན༌ཨིན༌།
HEB 12:12 ཏེན༌ན༌བོའེ༌ཕིའ༌ ངལ༌ཁན༌ནི༌ ལག༌པ༌ དང༌ འུ༌ཐུགས༌ པིག༌མོ༌ གུན༌ ཤེད༌ཅན༌ ཅོ༌ཤིག༌།
HEB 12:13 འུ༌ཐུགས༌ དང༌ ཞ༌འོ༌ གུན༌ ཐུའ༌ མ༌ཆའ༌ ཤེད༌ཅན༌ གྱུར༌ཅེས༌སི༌ ཕིའ༌ ལམ༌ ཀྲང༌པོའེ༌ཀ༌ གྲུལ༌ཤིག༌།
HEB 12:14 མི༌ཚང༌མ༌ ཉམ༌པོ༌ ཞི༌དེ༌ ནང༌ང༌ དུག༌ཅེས༌སི༌ རྩོན༌གྲུས༌ ཅོ༌ཤིག༌, ཏམ༌པ༌ མི༌ཚེ༌ཞིག༌ ཕུད༌ཤིག༌། ཏམ༌པ༌ མ༌དུག༌ཁན༌གུན༌ལ༌ གཙོ༌བོ༌ ཇལ༌ཐུབ༌བ༌ མ༌ནོག༌།
HEB 12:15 དཀོན༌མཆོག༌གི༌ ཐུག༌རྗེ༌ མ༌ཐོབ༌བ༌ སུ༌ཞིག༌གའང༌ ལུས༌ མི༌ལུས༌ཤེས༌ལ༌ ནང༌སྟག༌ ཅོ༌ཤིག༌། ཡང༌ ཏུག༌གི༌ པ༌ཀྲག༌ ངན༌པ༌ གྱས༌ཏེ༌ ནགས༌ སྟན༌ཅེས༌ དང༌ མང༌པོའ༌ ལས༌ངན༌གུན༌ ཅོ༌ མི༌ཅུག༌ཅེས༌ལ༌ ཤང༌ ཅོ༌ཤིག༌།
HEB 12:16 སུ༌ཞིག༌གིའང༌ ལུས༌བྲེལ༌ ངན༌པའེ༌ སྕོད༌ལམ༌ ཡ༌ ཨི༌སུ༌ ཙོགས༌ལ༌ ཏད༌པ༌ མེད༌ཁན༌ནི༌ མི༌ཚེ༌ མི༌ཕུད༌ཅེས༌ལ༌ ཏན༌ཏན༌ ཅོ༌ཤིག༌, ཀ༌བོའེ༌ ཁོ༌རང༌ངི༌ གོ༌མ༌ སྐྱེས༌ཁན༌ནི༌ ཐོབ༌ཏང༌གུན༌ ཚེན༌དར༌ ཅིག༌གི༌ ཁར༌ཇིའི༌ ཕིའ༌ ཙོངས༌།
HEB 12:17 ཁྱོ༌ཞ༌གུན༌ལ༌ གྱུས༌ཡོད༌ཏེ༌ ཨིན༌ནོག༌, སྟིང༌ནེ༌ ཨི༌སུའ༌ ཁོ༌རང༌ངི༌ ཨ༌བའེ༌ ཅིན༌ལབས༌པོ༌ གོས༌ ཟ༌ནེ༌ ཨ༌བའེ༌ ཁོའ༌ མ༌ཏངས༌། ཞན༌ ཁོའེ༌ གྱོད༌པ༌ ཅོས༌ཏེ༌ མ༌སྲན༌ཏྲེ༌ ངུ༌ཨིན༌ ཞུ༌ཝ༌ ཕུལ༌ནའང༌, ཁོའ༌ ཁོ༌རང༌ངི༌ ཨ༌བའེ༌ ཐག༌ཅད༌དི༌ ནང༌ང༌ གྱུར༌ཇ༌ ཁྱོང༌ མ༌ཉན༌།
HEB 12:18 ཁྱོ༌ཞ༌གུན༌ ཏེ༌ རི༌བོའི༌ཀ༌ ལེབས༌ཏེ༌ མ༌ནོག༌ ཀ༌ཟུག༌ ཨིས༌ར༌ཨེལ༌པ༌གུན༌ སི༌ནཱའི༌ ཟེར༌ཁན༌ནི༌ རི༌, མེ༌ བར༌ཨིན༌, མུན༌ནག༌ དང༌ ཐིབ༌ཐིབ༌ ཇིག༌ཤེས༌ ཡང༌ ལུང༌ཚུབ༌ གུན༌ནི༌ ཀབས༌ཁན༌བོའེ༌ཀ༌ ལེབ༌།
HEB 12:19 ཏེན༌ན༌ ནས༌ས༌བོའེ༌ཀ༌ ཨིས༌ར༌ཨེལ༌པ༌གུན༌ལ༌ ཏུང༌སྐད༌ ཀྲག༌པོ༌ དང༌, མ༌ ཇིགས༌ནང༌ཅན༌ནི༌ སུང༌སྐད༌ཅིག༌ ཚོར༌པ༌, ཁོང༌གུན༌ནི༌ དཀོན༌མཆོག༌ག༌ ཡང༌སྐྱར༌ མི༌མོལ༌ཅེས༌ལ༌ ཇུ༌ཇུ༌ ཞུས༌།
HEB 12:20 ཅིའ༌ཞུ༌ན༌ དཀོན༌མཆོག༌གི༌ བཀའ༌, “ཀལ༌ཏེས༌ སེམས༌ཅན༌ཞིག༌གིའང༌ འི༌ རི༌བོའ༌ ཐུག༌ན༌, ཏེ༌ སེམས༌ཅན༌བོའ༌ རྡོའ༌ གྱབས༌ཏེ༌ སད༌གོས༌,” མོལ༌ཁན༌བོ༌ ཁོང༌གུན༌ནི༌ ལེན༌མ༌ཐུབ༌།
HEB 12:21 རི༌བོའི༌ཀ༌ ཇིགས༌ནང༌ཅན༌ ཇུང༌ཁན༌གུན༌ ཐོང༌ཏེ༌, མོ༌ཟེས༌སི༌ མོལས༌ “ངའ༌ མ༌སྲན༌ཏྲེ༌ ཇིགས༌ཏེ༌ དར༌ར༌རག༌།”
HEB 12:22 ཨིན༌ནའང༌ ཁྱོ༌ཞའ༌ ཟི༌ཡོན༌ ཟེར༌ཁན༌ནི༌ རི༌, ནམ༌ཁའེ༌ ཡེ༌རུ༌ཤ༌ལེམ༌མི༌ ནང༌ང༌ ལེབས༌ཏེ༌ ཨིན༌ནོག༌, ཀ༌བོ༌ སོན༌པོ༌ དཀོན༌མཆོག༌ ཞུག༌སའེ༌ གྱལ༌ས༌བོ༌ ཨིན༌, ཀ༌རུ༌ ཀྲངས༌ཀ༌ མེད༌ཁན༌ནི༌ ཕོ༌ཉ༌གུན༌ སྐྱིད༌པོ༌ ཅོ༌ཅེས༌ལ༌ ཛོམ༌ཨིན༌ ཨིན༌ནོག༌།
HEB 12:23 ཁྱོ༌ཞ༌གུན༌ དཀོན༌མཆོག༌གི༌ གོ༌མ༌ སྐྱེས༌ཁན༌ནི༌ ཕྲུ༌གུ༌གུན༌ ཛོམས༌སེ༌ ནང༌ང༌ ལེབས༌ཏེ༌ ཨིན༌ནོག༌, ཀ༌གུན༌ནི༌ མིང༌གུན༌ ནམ༌ཁའེ༌ ནང༌ང༌ བྲིས༌ཏེ༌ ཡོད༌ཏེ༌ ཨིན༌ནོག༌། ཁྱོ༌ཞའ༌, མི༌ཚང༌མའེ༌ཀ༌ ཁྲིམས༌ཅད༌ད༌ ཛད༌ཁན༌ དཀོན༌མཆོག༌ ཁོང༌རང༌ ཡོད༌ས༌, ཡང༌ ཀྲང༌པོ༌ མི༌གུན༌ནི༌ སེམས༌ཉིད༌ ཡོད༌ས༌ ལེབས༌ཏེ༌ ཨིན༌ནོག༌, ཀ༌གུན༌ལ༌ ཕུན༌སུམ༌ཚོགས༌པ༌ ཛདས༌།
HEB 12:24 ཁྱོ༌ཞ༌གུན༌ དཀོན༌མཆོག༌ དང༌ མི༌གུན༌ནི༌ པར༌ལ༌ ཆད༌དོན༌ སོ༌མའེ༌ བར༌མི༌, ཡེ༌ཤུའི༌ སྐུན༌དུན༌ལ༌ ལེབ༌, ཁོང༌ངི༌ སྐུ༌ཁྲག༌ ཕོས༌ཁན༌བོའེ༌, ཨ༌བེལ༌ལི༌ ཁྲག༌ ཙོགས༌ལ༌ སྲོག༌གི༌ ཚབས༌ལ༌ སྲོག༌ལེན༌ཅེས༌ མན༌པ༌, ཤགས༌པ༌ ཛད༌ཅེས༌སི༌ ཕིའ༌ མོལ༌ལ༌ ཛདས༌།
HEB 12:25 དཀོན༌མཆོག༌གི༌ མོལ༌ལ༌ ཛད༌ཁན༌བོའ༌ མིང༌ནའང༌ མི༌ཉན༌ཅེས༌ནེ༌ ཤང༌ ཅོ༌ཤིག༌། ཀལ༌ཏེས༌ ཨིས༌ར༌ཨེལ༌པ༌གུན༌ནི༌ ཇིག༌རྟེན༌པའ༌ ལོན༌ཁྱོང༌ཁན༌, མོ༌ཟེས༌སི༌ སྤང༌པུད༌ཁན༌གུན༌ལ༌ སྣང༌མེད༌ ཅོ༌ཅེས༌པོའེ༌, ཁོང༌གུན༌ ཏེ༌ ཁྲིམས༌ཅད༌ནེ༌ ཤོར༌ མ༌ཉན༌ན༌ ཨིན༌ན༌, ཏེ༌ནེ༌ ཀལ༌ཏེས༌ ང༌དང༌ངི༌ ནམ༌ཁའ༌ནེ༌ ཞལ༌ཏ༌ སལ༌ཁན༌བོའ༌ སྣང༌མེད༌ ཅོ༌ན༌, ང༌དང༌གུན༌ ཀ༌ཟུག༌གི༌ ཐར༌ཐུབ༌ཨིན༌།
HEB 12:26 དཀོན༌མཆོག༌གི༌ རི༌ སི༌ནཱའི༌ ཀ༌ནེ༌ མོལ༌ ཟ༌ནེ༌, ཁོང༌ངི༌ སུང༌སྐད༌དི༌ ཇིག༌རྟེན༌བོ༌ སྐུལ༌ལ༌ ཛདས༌། ཨིན༌ནའང༌ དག༌ས༌ ཁོང༌ངི༌ ཞལ༌ཆད༌ཞིག༌ ཅོའ༌ ཛདས༌, “ཡང༌ ལན༌ཅིག༌ ངའེ༌ ཇིག༌རྟེན༌ ཅིག༌པོ༌ མན༌པ༌ ནམ༌ཁའེ༌ ནང༌ང༌ ཡོད༌ཁན༌གུན༌ནའང༌ སྐུལ༌ཨིན༌།”
HEB 12:27 “ཡང༌ ལན༌ཅིག༌” མོལ༌ཁན༌ནི༌ ཏོན༌བོ༌ ནི༌, སྐུལ༌ཉན༌ཁན༌གུན༌ མེད༌ཁན༌ ཛད༌ཨིན༌, ཡང༌ན༌ དཀོན༌མཆོག༌གི༌ ཛད༌ཁན༌ ཚང༌མ༌། ཏེན༌ན༌བོའེ༌ཕིའ༌ སྐུལ༌མ༌ཉན༌ཁན༌གུན༌ ཅིག༌པོ༌ ལུས༌ཨིན༌།
HEB 12:28 ང༌དང༌གུན༌ལ༌ མ༌ནེ༌ སྐུལ༌མི༌ཉན༌ཁན༌ནི༌ གྱལ༌སྲིད༌ཞིག༌ ཐོབ༌ཨིན༌ ཡོད༌ པ༌སང༌, ང༌དང༌གུན༌ནི༌ ཐུག༌རྗེ༌ཆེ༌ ཞུ༌ཨིན༌, ཡང༌ ཇིགས༌ དང༌ རྩི༌ཝ༌ ཆེན༌མོ༌ ཉམ༌པོ༌ ཅོལ༌ཏེ༌ དཀོན༌མཆོག༌ ཐུག༌ཉེས༌ ཤུག༌ཨིན༌།
HEB 12:29 ཅིའ༌ཟེར༌ན༌ ང༌དང༌གུན༌ནི༌ “དཀོན༌མཆོག༌པོ༌ ནི༌, མེད༌ཁན༌ ཅོ༌ཁན༌ནི༌ མེ༌ ཙོགས༌ ཨིན༌ནོག༌། ”
HEB 13:1 ཅིག༌ དང༌ ཅིག༌ག༌ མིང༌སྲིང༌ ཙོགས༌ལ༌ ཅེས༌པ༌ ཅོ༌ཅེས༌པོ༌ མ༌ནེ༌ མ༌ཕང༌ཤིག༌།
HEB 13:2 མ༌ཤེས༌ཁན༌གུན༌ལ༌ རང༌ངི༌ ཁང༌པའ༌ གའ༌སུས༌ ཞུ༌ཅེས༌ལ༌ སྣང༌མེད༌ མ༌ཅོ༌ཤིག༌། གའ༌སུས༌ ཞུ༌ཅེས༌པོའེ༌, ཁ༌ཅིག༌གི༌ མ༌ཤེས༌ས༌ ཕོ༌ཉ༌གུན༌ལ༌ གའ༌སུས༌ ཞུས༌ཏེ༌ ཨིན༌པིན༌།
HEB 13:3 ཁྱོ༌ཞ༌རང༌གུན༌ ཙོན༌ཁང༌ང༌ ཡོད༌ཁན༌ ཙོགས༌ལ༌, ཏེ༌ནང༌ང༌ ཡོད༌ཁན༌ ཏད༌པ༌ཅན༌གུན༌ ཨིད༌ཏུ༌ ཅོ༌ཤིག༌, མ༌ཚད༌ ཁྱོ༌ཞ༌རང༌གུན༌ལ༌ ཇུང༌ཁན༌ ཙོགས༌ལ༌, རྡུག༌ངལ༌ ཇུང༌ཁན༌ནི༌ ཏད༌པ༌ཅན༌གུན༌ནའང༌ ཨིད༌ཏུ༌ ཅོ༌ཤིག༌།
HEB 13:4 བག༌སྟོན༌ལ༌ ཚང༌མའེ༌ རྩི༌ཝ༌ ཅོ༌གོས༌, ཡང༌ མག༌པ༌ དང༌ ན༌མ༌ ཉིས༌ཀོ༌, ཅིག༌ དང༌ ཅིག༌ ཉམ༌པོ༌ ཨིད༌ཤེས༌ཅན༌ ཡོང༌གོས༌, ཅིའ༌ཟེར༌ན༌ དཀོན༌མཆོག༌གི༌ ངན༌པ༌ ལུས༌བྲེལ༌ ཡང༌ ཞིད༌མད༌ མན༌ཁན༌ ཉམ༌པོ༌ ལུས༌བྲེལ༌ བོར༌ཁན༌ གུན༌ལ༌ ཁྲིམས༌ཅད༌ སལ༌ལ༌ ཛད༌ཨིན༌།
HEB 13:5 པེ༌ནེའ༌ ཅེས༌པ༌ མ༌ཅོ༌ཤིག༌། རང༌ང༌ ཡོད༌ཁན༌བོའེ༌ཀ༌ ཚིམས༌ཏེ༌ དུག༌ཤིག༌། ཅིའ༌ཞུ༌ན༌ དཀོན༌མཆོག༌གི༌ མོལ༌ལ༌ ཛདས༌, “ངའེ༌ ཁྱོ༌ཞ༌གུན༌ མ༌ནེ༌ མི༌ཕང༌ ཡང༌ ཁྱོ༌ཞ༌གུན༌ སྒོས༌དོམ༌མི༌ ནང༌ང༌ མ༌ནེ༌ མི༌བོར༌།”
HEB 13:6 ཏེ༌བོའེ༌ཕིའ༌ ང༌དང༌གུན༌ནི༌ ལོ༌ཁྱེལ༌ ཉམ༌པོ༌ ཟེར༌ ཐུབ༌ཨིན༌, “གཙོ༌བོ༌ ནི༌ ངའེ༌ རོགས༌ ཛད༌ཁན༌བོ༌ ཨིན༌པ༌, ངའ༌ ཇིགས༌གོས༌ མ༌ནེ༌ མེད༌, ཡང༌ མི༌གུན༌ནི༌ ངའ༌ ཅི༌ ཅོ༌ཉན༌ཨིན༌?”
HEB 13:7 ཁྱོ༌ཞ༌གུན༌ལ༌, དཀོན༌མཆོག༌གི༌ བཀའ༌ ལབ༌བ༌ ཛད༌ཁན༌ནི༌ འུ༌སྐྱོང༌གུན༌ ཨིད༌ཏུ༌ ཅོ༌ཤིག༌། ཁོང༌གུན༌ནི༌ མི༌ཚེ༌ ཕུད༌ཚུལ༌ལི༌ བྲས༌བུ༌ ཟང༌པོ༌གུན༌ནི༌ སྐོར༌ལ༌ སམ༌བ༌ ཏོང༌ཤིག༌, ཡང༌ ཁོང༌གུན༌ནི༌ ཏད༌པའེ༌ སྤེའེ༌ཀ༌ གྲུལ༌ཤིག༌།
HEB 13:8 ཡེ༌ཤུ༌ མ༌ཤི༌ཀ༌ ནི༌ སྔུན༌ལ༌, དག༌ས༌ ཡང༌ ཏུས༌གྱུན༌ གྱུར༌ཇ༌ མེད༌པ༌ ཙོགས༌ ཞུགས༌ཏེ༌ ཨིན༌ནོག༌།
HEB 13:9 མིན༌དྲ༌ མིན༌དྲ༌ ལབ༌ཞ༌གུན༌ནི༌ སྟིང༌རང༌ནེ༌ མ༌ཆ༌ཤིག༌། ཁར༌ཇི༌ ཟའ༌ཅེས༌སི༌ ཁྲིམས༌ སྲུང༌ཁན༌གུན༌ལ༌ ཅའང༌ ཕན༌ཐོགས༌ ཐོབ༌བ༌ མ༌ནོག༌། ཏེ༌བོའེ༌ཕིའ༌ ཏེ༌ ཁྲིམས༌གུན༌ མན༌པ༌ དཀོན༌མཆོག༌གི༌ ཐུག༌རྗེའེ༌ གྱུད༌ཏེ༌, ཁྱོ༌ཞའེ༌ སེམས༌གུན༌ ཤེད༌ཅན༌ ཅོ༌ཤིག༌།
HEB 13:10 ང༌དང༌གུན༌ལ༌ ཆོད༌ཁྲི༌ཞིག༌ ཡོད༌ཏེ༌ ཨིན༌ནོག༌, ཀ༌བོའེ༌ ཀ༌ནེ༌ ཀུར༌རི༌ ནང༌ང༌ ཆོད༌པ༌ ཕུལ༌ཁན༌ནི༌ བླ༌མ༌གུན༌ལ༌ ཟའ༌ཅེས༌སི༌ ཐོབ༌ཏང༌ མེད༌པ༌ ཨིན༌ནོག༌།
HEB 13:11 ཚིར༌ སྙིང༌པའེ༌ ནང༌ང༌ བླ༌མ༌ ཆེན༌མོའེ༌ སེམས༌ཅན༌གུན༌ནི༌ ཁྲག༌པོ༌, ནས༌ས༌ ཏམ༌པ༌བོའེ༌ ནང༌ང༌ སྡིག༌པའེ༌ ཕིའ༌ སྲོག༌གི༌ ཆོད༌པའེ༌ ཚུལ༌ལ༌ ཁྱོང༌ངད༌པིན༌། ཡང༌ སེམས༌ཅན༌ནི༌ ཟུགས༌པོ༌གུན༌ ཨིས༌ར༌ཨེལ༌པ༌གུན༌ དུག༌སའེ༌ ཕི༌ལོག༌ག༌ མེའ༌ སྲག༌གད༌པིན༌།
HEB 13:12 ཏེ༌བོའེ༌ཕིའ༌ ཡེ༌ཤུའིང༌ ཁོང༌རང༌ངི༌ སྐུ༌ཁྲག༌ གྱུད༌ཏེ༌ མི༌གུན༌ ཏམ༌པ༌ ཅོ༌ཅེས༌ལ༌, ཡེ༌རུ༌ཤ༌ལེམ༌མི༌ གྱལ༌སའེ༌ གྱས༌སྒོའེ༌ ཕི༌ལོག༌ག༌ རྡུག༌ངལ༌ ནམས༌།
HEB 13:13 ཏེན༌ན༌ ཙོགས༌ལ༌ ང༌དང༌གུན༌ནའང༌ ཕི༌ལོག༌ག༌ ཡེ༌ཤུ༌ ཞུག༌ས༌ ཆེན༌, ཡང༌ ཁོང༌ངི༌ ཁྲེལ༌བའེ༌ ནང༌ང༌ དྲེས༌ཨིན༌།
HEB 13:14 འི༌ ཇིག༌རྟེན༌ནི༌ཀ༌ ང༌དང༌ང༌ ཏུས༌གྱུན༌ དུགས༌སའེ༌ གྱལ༌ས༌ཞིག༌ མེད༌པ༌ ཨིན༌ནོག༌། ཨིན༌ནའང༌ ང༌དང༌གུན༌ ཏེ༌ ཡོང༌ཅེས༌ཅན༌ནི༌ གྱལ༌ས༌བོའ༌ སྲུངས༌ཏེ༌ ཨིན༌ནོག༌།
HEB 13:15 ཏེ༌བོའེ༌ཕིའ༌ ང༌དང༌གུན༌ནི༌ ཏུས༌གྱུན༌ ཡེ༌ཤུ༌ གྱུད༌ཏེ༌ དཀོན༌མཆོག༌ག༌ སྟོད༌པའེ༌ ཆོད༌པ༌ ཕུལ༌ཨིན༌, ཚང༌མའེ༌ དུན༌ལ༌ ཡེ༌ཤུའི༌ གྱབ༌ནེ༌ བྲངས༌ཁན༌བོ༌ ཤད༌ཨིན༌།
HEB 13:16 ལས༌ ཟང༌པོ༌ ཅོ༌ཅེས༌ དང༌ སྒོས༌དོམ༌ ཡོད༌ཁན༌གུན༌ལ༌ བགོས༌ཏེ༌ ཏང༌ཅེས༌གུན༌ རྗེད༌ མ༌རྗེད༌ཤིག༌, ཅིའ༌ཟེར༌ན༌ འི༌ཙོགས༌སི༌ ཆོད༌པ༌གུན༌ལ༌ དཀོན༌མཆོག༌ ཐུག༌ཉེས༌ས༌ ཛད༌ད༌ནོག༌།
HEB 13:17 ཆོས༌ཚོགས༌སི༌ འུ༌སྐྱོང༌གུན༌ནི༌ ཁའ༌ཉན༌ཏེ༌ ཁོང༌གུན༌ནི༌ ཝང༌ངི༌ ཡོག༌ག༌ དུག༌ཤིག༌། ཁྱོ༌ཞ༌གུན༌ནི༌ ཏད༌པའེ༌ མི༌ཚེ༌ སྟ༌སྟོག༌ ཅོ༌ཅེས༌པོ༌ ནི༌ ཁོང༌གུན༌ནི༌ ཁག༌ ཨིན༌ པ༌སང༌, ཁོང༌གུན༌ལ༌ དཀོན༌མཆོག༌ག༌ རྩི༌རུག༌ ཏང༌ གོས༌ས༌ནོག༌། ཁོང༌གུན༌ལ༌ འི༌གུན༌ རྡུག༌པོ༌ ཉམ༌པོ༌ ཅོ༌ མ༌ཅུག༌ག༌, སྐྱིད༌པོ༌ ཉམ༌པོ༌ ཅོ༌ཅུག༌ཅེས༌ལ༌ ཁོང༌གུན༌ནི༌ ཁའ༌ཉོན༌ཤིག༌, ཏེ༌བོ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌ནོག༌།
HEB 13:18 ང༌ཞ༌གུན༌ནི༌ ཕིའ༌ མོས༌ལམ༌ ཞུ༌ཤིག༌། ང༌ཞ༌གུན༌ནི༌ སེམས༌ ནོངས༌མེད༌ ཨིན༌ཅེས༌པོ༌ ང༌ཞའ༌ ཏན༌ཏན༌ རག༌། ཡང༌ ང༌ཞའེ༌ དོད༌པ༌ ནི༌, ཅི༌ས༌ཐོག༌ནེ༌ རྩི༌ཝ༌ཅན༌ནི༌ མི༌ཚེ༌ཞིག༌ ཕུད༌ཅེས༌པོ༌ ཨིན༌།
HEB 13:19 མིག༌སལ༌ལི༌ ང༌ ཁྱོ༌ཞ༌གུན༌ ཡོད༌ས༌ གྱོགས༌པ༌ ལོགས༌ཏེ༌ ཡོང༌ ཉན༌ཅེས༌ལ༌ མོས༌ལམ༌ ཞུ༌ཤིག༌།
HEB 13:20 ཏ༌ ཞི༌དེ༌ དཀོན༌མཆོག༌, ལུག༌གུན༌ནི༌ ལུག༌རྫི༌ ཀྲག༌པོ༌, གཙོ༌བོ༌ ཡེ༌ཤུ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌, ཀ༌བོའེ༌ སྐུ༌ཁྲག༌པོའེ༌ ཐའ༌མེད༌པའེ༌ ཆད༌དོན༌བོའ༌ ཐེ༌ཙེ༌ གྱབ༌བ༌ ཛདས༌།
HEB 13:21 དཀོན༌མཆོག༌གི༌ ཐུག༌གོངས༌གུན༌ ཅོ༌ཅེས༌ལ༌, སྒོས༌དོམ༌ ཚང༌མ༌ ཁྱོ༌ཞ༌གུན༌ལ༌ སལ༌ལ༌ ཛད༌ཤིག༌། ཡེ༌ཤུ༌ མ༌ཤི༌ཀ༌ གྱུད༌ཏེ༌ དཀོན༌མཆོག༌ ཐུགས༌ཐད༌ཁན༌གུན༌ ཅོ༌ཅེས༌ལ༌, ཁོང༌ངི༌ ང༌དང༌ངི༌ ནང༌ང༌ ཆག༌ལས༌ ཛད༌ཤིག༌། ཏུས༌གྱུན༌ནེ༌གྱུན༌ མ༌ཤི༌ཀ༌ སྤལ༌ ཐོབ༌ཤིག༌། ཨ༌མེན༌།
HEB 13:22 ངའེ༌ ཛ༌འོ༌གུན༌ ཇུ༌ཇུ༌, ངའེ༌ སྤོས༌པ༌ ཏང༌ཨིན༌, འི༌ ཨི༌གེ༌ ཆུ༌ངུན༌བོའེ༌ ནང༌ང༌ བྲི༌ཁན༌གུན༌ལ༌ ཟོད༌པ༌ ཉམ༌པོ༌ ཉན༌ཅེས༌ལ༌ ཞུ༌ཝ༌ ཕུལ༌ལད༌།
HEB 13:23 ང༌དང༌གུན༌ནི༌ སྤུན༌ ཏི༌མོ༌ཐི༌, ཙོན༌ཁང༌ངི༌ ནང༌ནེ༌ ཕུད༌ཁན༌བོ༌, ཁྱོ༌ཞ༌གུན༌ལ༌ གྱུས༌ ཆ༌གོས༌ སམ༌མ༌རག༌། ཀལ༌ཏེས༌ ཁོ༌ འི༌རུ༌ གྱོགས༌པ༌ ལེབ༌ན༌ ང༌ ཁོ༌ ཉམ༌པོ༌ ཁྱོ༌ཞའ༌ ཐུག༌ག༌ལ༌ ཡོང༌ཨིན༌།
HEB 13:24 ཁྱོ༌ཞ༌གུན༌ནི༌ འུ༌སྐྱོང༌གུན༌ དང༌ དཀོན༌མཆོག༌གི༌ མི༌ཚང༌མ༌ལ༌ ངའེ༌ ཇུ༌ ཞུ༌རུག༌ མོལ༌། ཨི༌ཏྲི༌ལི༌པ༌ ཏད༌པ༌ཅན༌གུན༌ནི༌ ཁྱོ༌ཞ༌གུན༌ལ༌ ཇུ༌ ཀལ༌དུག༌།
HEB 13:25 དཀོན༌མཆོག༌གི༌ ཐུག༌རྗེ༌བོ༌ ཁྱོ༌ཞའ༌ ཚང༌མ༌ ཉམ༌པོ༌ ལུས༌ཤིག༌།
JAM 1:1 ང༌ ཡ༌ཀོབ༌, དཀོན༌མཆོག༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཞབས༌ཏོག༌པ༌ ཞིག༌ ཨིན༌། ངའེ༌ འི༌ ཨི༌གེ༌བོ༌, ཇིག༌རྟེན༌ གང༌པོའེ༌ ནང༌ང༌ ཁྱེབས༌ཏེ༌ ཡོད༌ཁན༌ དཀོན༌མཆོག༌གི༌ མི༌རིགས༌ རྕུག༌ཉིས༌གུན༌ལ༌ བྲིའད༌། ཁྱོ༌ཞ༌གུན༌ལ༌ ངའེ༌ ཇུ༌ ཞུའད༌།
JAM 1:2 ངའེ༌ སྤུན༌གུན༌, ཁྱོ༌ཞའ༌ ནགས༌བར༌དོ༌ ཐོང༌ང༌ཅིག༌, འི༌བོ༌ མ༌ སྐྱིད༌པོ༌ ཡོང༌ཅེས༌སི༌ སྐབས༌ཤིག༌ ཨིན༌ནོག༌ སམ༌གོས༌།
JAM 1:3 ཅིའ༌ཟེར༌ན༌ ཁྱོ༌ཞ༌གུན༌ནི༌ ཏད༌པའ༌ ཚོད༌ལྟ༌ ཇུང༌ ཟ༌ནེ༌, ཁྱོ༌ཞ༌གུན༌ནི༌ སྙིང༌རུས༌གུན༌ལ༌ ལྡན༌ཅེས༌སི༌ སྐབས༌ ཐོབ༌ཅེས༌པོ༌ གྱུས༌ཨིན༌ནོག༌།
JAM 1:4 ཏེ༌ནེ༌ འི༌བོ༌ ལྡན༌ཅུག༌ཤིག༌ ཅིའ༌ཟེར༌ན༌ ནམ༌ ཁྱོ༌ཞ༌གུན༌ནི༌ སྙིང༌རུས༌གུན༌ གང༌པོ༌ ལྡན༌ན༌ ཁྱོ༌ཞ༌གུན༌ ཏད༌པའེ༌ ནང༌ང༌ ཆ༌ཚང༌ ལྡན༌ཏེ༌, ཅའང༌ སྒོས༌དོམ༌ མེད༌ཁན༌ རིག༌ གྱུར༌ཨིན༌།
JAM 1:5 ཀལ༌ཏེས༌ ཁྱོ༌ཞའ༌ སུ༌ཞིག༌ག༌ ཤེས༌རབས༌ གོས༌ན༌, སྙིང༌ ཕེས༌ཏེ༌ སལ༌ཁན༌ནི༌ ང༌དང༌གུན༌ནི༌ དཀོན༌མཆོག༌ག༌ ཞུས༌། ཁོང༌ངི༌ ཏེ༌བོ༌ ཁྱོ༌རང༌ང༌ སལ༌ལ༌ ཛད༌ཨིན༌། ཁོང༌ངི༌ ཁྱོ༌རང༌ང༌ ཞུ༌ཝ༌ ཕུལ༌ཅེས༌སི༌ ཕིའ༌ ཁའ༌སྐྱེའ༌ མི༌ཛད༌།
JAM 1:6 ཨིན༌ནའང༌ ཁྱོ༌རང༌ངི༌ ཞུ༌ཝ༌ ཕུལ༌ ཟ༌ནེ༌, ཐེ༌ཚོམས༌ མ༌ཅོའ༌ ཐོབ༌བ༌ནོག༌ སམས༌ཏེ༌ ཨིད༌ཤེས༌ ཅོ༌གོས༌, ཅིའ༌ཟེར༌ན༌ ཐེ༌ཚོམས༌ ཅོ༌ཁན༌ནི༌ མི༌བོ༌ ཚོའེ༌ ཆུལ༌བག༌ ཙོགས༌ཤིག༌ ཨིན༌ནོག༌, ཀ༌བོ༌ ལུངས༌ཚུབས༌སི༌ འི༌ངོའ༌ འ༌ངོ༌ ཁྲིད༌ཏེ༌ ཁྱེར༌ར༌ནོག༌།
JAM 1:7 ཐེ༌ཚོམས༌ཅན༌ནི༌ མི༌བོའེ༌ གཙོ༌བོའེ༌ ཀ༌ནེ༌ ཅའང༌ ཐོབ༌ཅེས༌སི༌ རེ༌ཝ༌ བོར༌ མ༌གོས༌
JAM 1:8 ཅིའ༌ཟེར༌ན༌ ཁོའེ༌ སེམས༌པོ༌ དཀོན༌མཆོག༌ དང༌ ཇིག༌རྟེན༌ ཉིས༌ཀོའེ༌ ཆོགས༌ལ༌ ཡོད༌ཏེ༌ ཨིན༌ནོག༌, ཡང༌ ལས༌ ཚང༌མའེ༌ ནང༌ང༌ སྟན༌པོ༌ མེད༌ཏེ༌ ཨིན༌ནོག༌།
JAM 1:9 ཏད༌པ༌ ཡོད༌ཁན༌ ཉམ༌ཤུང༌ ཉལ༌བ༌ཅན༌གུན༌ནི༌, ཐད༌པོ༌ ཅོ༌གོ༌ཤེས༌ ཨིན༌ནོག༌ ཅིའ༌ཟེར༌ན༌ དཀོན༌མཆོག༌གི༌ ཁོང༌གུན༌ལ༌ རྩི༌ཝ༌ ཅོའ༌ ཛད༌ཏེ༌ ཨིན༌ནོག༌།
JAM 1:10 ཨིན༌ནའང༌ ཆུག༌པོ༌གུན༌ནིའང༌, དཀོན༌མཆོག༌གི༌ ཁོང༌གུན༌ པས༌མོ༌ ཅོའ༌ ཛད༌ཅེས༌པོའེ༌ཀ༌ ཐད༌པོ༌ ཅོ༌གོ༌ཤེས༌ ཨིན༌ནོག༌, ཁོང༌གུན༌ ཞིང༌ངི༌ མེན༌ཏོག༌ ཡོལ༌ཏེ༌ ཆའ༌ ཙོགས༌ལ༌, མེད༌ཁན༌ ཆེན༌།
JAM 1:11 ཉི༌མ༌ ཚན༌ཏེ༌ ཤར༌ཏེ༌ རྩཱ༌གུན༌ མེའ༌ སྲག༌ཏེ༌, མེན༌ཏོག༌ ཆུ༌ངུན༌བོ༌ བུད༌ཏེ༌, ཡང༌ ཏེ༌བོའེ༌ ཛེས༌པོ༌བོ༌ མེད༌ཁན༌ ཆའ༌ནོག༌། ཏེན༌ན༌ ཙོགས༌ལ༌ ནོར༌རི༌ གྱབ༌ནེ༌ བང༌ཏང༌ཨིན༌ ཡོད༌དི༌ ཏུས༌ལ༌, ཆུག༌པོ༌གུན༌ནའང༌ མེད༌ཁན༌ ཆེན༌།
JAM 1:12 སྙིང༌རུས༌ ཉམ༌པོ༌ རྡུག༌ངལ༌ ཁུར༌ཁན༌གུན༌ལ༌, ཅིན༌ལབས༌ སལ༌ཨིན༌, ཅིའ༌ཟེར༌ན༌ ཚོད༌ལྟའེ༌ ནང༌ང༌ ཐར༌ཁྱེལ༌ ཆའ༌ཁན༌གུན༌ལ༌, དཀོན༌མཆོག༌གི༌ ཐའ༌མེད༌པའེ༌ མི༌ཚེའེ༌ ཐོར༌ཤོག༌པོ༌ སལ༌ལ༌ ཛད༌ཨིན༌, ཀ༌བོ༌ དཀོན༌མཆོག༌གི༌ ཁོང༌ང༌ ཅེས༌པ༌ ཅོ༌ཁན༌གུན༌ལ༌ སལ༌ཅེས༌སི༌ ཞལ༌ཆད༌ ཛད༌ཏེ༌ ཨིན༌།
JAM 1:13 ནམ༌ཞིག༌ ཁྱོ༌རང༌ང༌ སྡིག༌པ༌ ཅོ༌ཅེས༌སི༌ དོད༌པ༌ སྐྱེ༌ན༌ “དཀོན༌མཆོག༌གི༌ ངའ༌ སྡིག༌པའེ༌ ནང༌ང༌ གྱེལ༌ཅུག༌ཅེས༌སི༌ རྩོན༌གྲུས༌ ཛད༌ཏེ༌ ཨིན༌ནོག༌” མ༌ཟེར༌ཤིག༌། དཀོན༌མཆོག༌གི༌ ཐུགས༌དོད༌དི༌ ནང༌ང༌ ངན༌པ༌ ཅོ༌ཅེས༌པོ༌ མ༌ནེ༌ མེད༌ཀྱག༌, མ༌ཚད༌ ཁོང༌ངི༌ སུ༌ཞིག༌གའང༌ སྡིག༌པ༌ ཅོ༌ཅེས༌སི༌ དོད༌པའེ༌ ནང༌ང༌ གྱེལ༌ ཅུག༌ག༌ མ༌ནེ༌ ཛད༌ད༌ མ༌ནོག༌།
JAM 1:14 སྡིག༌པ༌ ཅོ༌ཅེས༌སི༌ དོད༌པ༌གུན༌ ང༌དང༌རང༌ངི༌ སེམས༌ ངན༌པའེ༌ ནང༌ནེ༌ ཡོང༌ང༌ནོག༌, ཀ༌བོའེ༌ ང༌དང༌གུན༌ལ༌ གོབ༌སྐོར༌ཏེ༌ དཀོན༌མཆོག༌ནེ༌ ཐག༌རིང༌ང༌ ཁྲིད༌ཏེ༌ ཁྱེར༌ར༌ནོག༌།
JAM 1:15 འི༌ དོད༌པ༌གུན༌ནི༌ སྡིག༌པའེ༌ ལས༌གུན༌ སྐྱེ༌ ཅུག༌ག༌ནོག༌, ཡང༌ སྡིག༌པ༌བོ༌ ལྡན༌ཅུག༌ན༌, ཏེ༌བོའེ༌ ཤི༌ཅེས༌པོ༌ སྐྱེ༌ ཅུག༌ག༌ནོག༌།
JAM 1:16 ངའེ༌ ཅེས༌པའེ༌ སྤུན༌གུན༌, གོབ༌སྐོར༌ ཏང༌ མ༌ཅུག༌ཤིག༌།
JAM 1:17 ཟང༌པོ༌ དང༌ པུན༌སུམ༌ཚོགས༌པའེ༌ རྟགས༌གུན༌, ནམ༌ཁའེ༌ འོད༌ ཚང༌མ༌ ཅོའ༌ ཛད༌ཁན༌ནི༌, ང༌དང༌གུན༌ནི༌ ཡབ༌ དཀོན༌མཆོག༌ནེ༌ ཡོང༌ང༌ནོག༌། ཏེ༌ འོད༌གུན༌ ཡ༌ ཏེ༌གུན༌ནི༌ ཀྲིབ༌ཀྱག༌ ཙོགས༌ལ༌ ཁོང༌ངི༌ ནང༌ང༌ གྱུར༌ཇ༌ ཡོང༌ང༌ མ༌ནོག༌།
JAM 1:18 ཁོང༌རང༌ངི༌ དེན༌བའེ༌ བཀའ༌ གྱུད༌ཏེ༌, ཁོང༌ངི༌ ང༌དང༌གུན༌ལ༌ མི༌ཚེ༌ སོ༌མ༌ཞིག༌ སལ༌ཅེས༌ལ༌ ལྡམ༌མ༌ ཛད༌ཏེ༌, ང༌དང༌གུན༌ ཁོང༌ངི༌ ཛད༌པ༌གུན༌ནི༌ ཕྲོ༌ནེ༌ ཚང༌མའེ༌སང༌ རིན༌ཅན༌ ཐེའ༌ ཛདས༌།
JAM 1:19 ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ནི༌ ཞན༌མ༌གུན༌ལ༌ གྱལ༌ལ༌ ཅོས༌ཏེ༌ ཉོན༌ཤིག༌, སམ༌བ༌ ཏངས༌ཏེ༌ སྤེ༌ར༌ ཏོང༌ཤིག༌, ཡང༌ གྱོགས༌པ༌ སྲོ༌ ཡོང༌ མ༌གོས༌།
JAM 1:20 ཅིའ༌ཟེར༌ན༌ སྲོའེ༌ མི༌ཞིག༌གི༌ ནང༌ང༌ དཀོན༌མཆོག༌ ཐུགས༌ཐད༌ཁན༌ནི༌ ཀྲང༌པོ༌ ལས༌གུན༌ སྨིན༌ཅུག༌ག༌ མ༌ནོག༌།
JAM 1:21 ཏེ༌བོའེ༌ཕིའ༌ ཁྱོ༌ཞ༌གུན༌ནི༌ མི༌ཚེའེ༌ ནང༌ང༌ ཡོད༌ཁན༌ནི༌ རྩོག༌པོ༌ དང༌ ངན༌པ༌ ཚང༌མ༌ ཕོང༌ཤིག༌། ཡང༌ པས༌མོ༌ ཅོས༌ཏེ༌ དཀོན༌མཆོག༌གི༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ བོར༌ར༌ ཛད༌ཁན༌ནི༌ བཀའ༌གུན༌ལ༌ ཁའ༌ཉོན༌ཤིག༌, ཀ༌བོའ༌ ཁྱོ༌ཞ༌གུན༌ ཐར༌ཅུག༌ཅེས༌སི༌ ཁྱུད༌ ཡོད༌ཏེ༌ ཨིན༌ནོག༌།
JAM 1:22 ཨིན༌ནའང༌ དཀོན༌མཆོག༌གི༌ བཀའ༌གུན༌ལ༌ ཉན༌ཅེས༌ ཅིག༌པོ༌ མན༌པ༌, ཏེ༌གུན༌ནི༌ཀ༌ ལག༌ལེན༌ ཅོ༌ཤིག༌། ཏེ༌ མན༌ན༌, ཁྱོ༌ཞ༌གུན༌ནི༌ རང༌དང༌རང༌ང༌ གོབ༌སྐོར༌ཏེ༌ ཨིན༌ནོག༌།
JAM 1:23 ཀལ༌ཏེས༌ ཁྱོ༌ཞའེ༌ དཀོན༌མཆོག༌གི༌ བཀའ༌གུན༌ ཉན༌ཏེ༌ ལག༌ལེན༌ནི༌ ནང༌ང༌ མ༌ཁྱོང༌ན༌, ཏེ༌ མི༌བོ༌ ཙོགས༌ ཨིན༌ནོག༌, ཀ༌བོའེ༌ མེ༌ལོང༌ངི༌ ནང༌ང༌ ཁོ༌རང༌ངི༌ ལྡོང༌ང༌ ལྟའད༌,
JAM 1:24 ཡང༌ ཐོང༌ཏེ༌ སྟིང༌ནེ༌ ཏེ༌ཀ༌ནེ༌ སོང༌ཏེ༌ ཏེན༌ན༌མལ༌ལ༌ ཁོ༌རང༌ ཀ༌ཟུག༌ཤིག༌ ཐོང༌ཁན༌བོ༌ རྗེད༌ད༌ནོག༌།
JAM 1:25 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཕུན༌སུམ༌ཚོགས༌པ༌ ཁྲིམས༌པོ༌ སལ༌པོ༌ ཅོས༌ཏེ༌ ཧ༌གོ༌ཅེས༌སི༌ རྩོན༌གྲུས༌ ཅོ༌ན༌, ཀ༌བོའེ༌ རང༌ཝང༌ ཏང༌ངད༌ ཡང༌ ཟེར༌ཏེ༌ ཡོད༌ཁན༌གུན༌ ཅོས༌ཏེ༌ ཚོར༌ཁན༌གུན༌ རྗེད༌ མ༌རྗེད༌ན༌, དཀོན༌མཆོག༌གི༌ ཁྱོ༌ཞ༌གུན༌ལ༌ ཏེ༌ཟུག༌ ཅོ༌ཅེས༌སི༌ ཕིའ༌ ཅིན༌ལབས༌ སལ༌ལ༌ ཛད༌ཨིན༌།
JAM 1:26 ཀལ༌ཏེས༌ ཁྱོ༌ཞ༌གུན༌ ཆོས༌པ༌ཞིག༌ ཨིན༌ ཟེར༌རད༌ན༌ ཨིན༌ནའང༌ རང༌ངི༌ ལྕེ༌བོའི༌ཀ༌ ཉ༌ར༌ གྱབས༌ཏེ༌ བོར༌ར༌ མེད༌ན༌, ཁྱོ༌ཞ༌གུན༌ནི༌ རང༌དང༌རང༌ང༌ གོབ༌སྐོར༌ཏེ༌, ཁྱོ༌ཞ༌གུན༌ནི༌ ཆོས༌པོ༌ རིན༌མེད༌ཞིག༌ གྱུར༌ཏེ༌ ཨིན༌ནོག༌།
JAM 1:27 དཀོན༌མཆོག༌ ཡབ༌བི༌ སྐུན༌དུན༌ལ༌ རྩང༌མ༌ དང༌ ངོས༌པོའེ༌ ཆོས༌སི༌ ཏོན༌ཏག༌པོ༌ ནི༌, ཕ༌མ༌ མེད༌ཁན༌ནི༌ ཕྲུ༌གུ༌གུན༌ དང༌ ཨ༌ནེ༌མ༌རང༌མོ༌ གུན༌ལ༌, ནགས༌བར༌དོའེ༌ ཏུས༌ལ༌ སྟ༌སྟོག༌ ཅོ༌ཅེས༌, ཡང༌ ཇིག༌རྟེན༌ནི༌ ལས༌ ངན༌པ༌གུན༌ནི༌ ནང༌ང༌ མ༌དྲེས༌ས༌ རང༌དང༌རང༌ སྐྱོབས༌ཏེ༌ བོར༌ཅེས༌པོ༌ ཨིན༌ནོག༌།
JAM 2:1 ངའེ༌ སྤུན༌གུན༌, ཀལ༌ཏེས༌ ཁྱོ༌ཞ༌གུན༌ནི༌ ཆོག༌རིས༌ ཅོའད༌ན༌, ཁྱོ༌ཞའེ༌ ང༌དང༌གུན༌ནི༌ ཟིར༌རྗིད༌ཅན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ནང༌ང༌ ཏད༌པ༌ ཡོད༌ ཟེར༌ཏེ༌ ཀ༌ཟུག༌གི༌ ཟེར༌ ཐུབ༌ཨིན༌།
JAM 2:2 སྤེར༌ན༌ མི༌ཞིག༌ སེར༌རི༌ སེར༌དུབ༌ ཏགས༌ཏེ༌ རིན༌ཅན༌ ཀོས༌ལག༌ གོན༌ཏེ༌, ཡང༌ མི༌ ཉལ༌བ༌ཅན༌ཞིག༌ སྙིང༌པ༌ ཀོས༌ལག༌ ཆད༌ཁན༌ གོན༌ཏེ༌ ཁྱོ༌ཞ༌གུན༌ནི༌ ཆོས༌ཚོགས༌སི༌ ནང༌ང༌ ཡོང༌ན༌,
JAM 2:3 ཁྱོ༌ཞ༌གུན༌ནི༌ མི༌ ཆུག༌པོ༌བོའ༌ མིག༌སལ༌ལི༌ སྣང༌ང༌ ཏངས༌ཏེ༌ ཁོའ༌, “ཇུ༌ཇུ༌ འི༌ རྩི༌ཝ༌ཅན༌ནི༌ ནས༌སའེ༌ཀ༌ ཞུགས༌ས༌ ཛད༌”, ཨིན༌ནའང༌ མི༌ ཉལ༌བ༌ཅན༌བོའ༌, “ཁྱོ༌རང༌ འི༌ཀ༌ ལངས༌ཏེ༌ དུག༌” ཡ༌ “ངའེ༌ རྐང༌པའེ༌ དུན༌ལ༌ སའེ༌ཀ༌ དུག༌” ཟེར༌ན༌,
JAM 2:4 ཏེ༌ནེ༌ ཅི༌ འི༌ ཆོགས༌རིས༌པོའེ༌, ཁྱོ༌ཞའ༌ ཁྱོ༌ཞ༌རང༌ངི༌ དོད༌པ༌ ངན༌པ༌གུན༌ནི༌ ཁྲིད༌ཏེ༌ མ༌ནོག༌ག༌?
JAM 2:5 ངའེ༌ ཅེས༌པའེ༌ སྤུན༌གུན༌ ཉོན༌ཤིག༌, ཅི༌ དཀོན༌མཆོག༌གི༌ འི༌ ཇིག༌རྟེན༌ནི༌ ནང༌ང༌ ཉལ༌བ༌ཅན༌གུན༌ ཏད༌པའེ༌ ནང༌ང༌ ཆུག༌པོ༌ གྱུར༌ཅེས༌སི༌ ཕིའ༌ ལྡམ༌མ༌ ཛད༌ཏེ༌ མ༌ནོག༌ག༌? ཡང༌ ཁོང༌གུན༌ལ༌ དཀོན༌མཆོག༌གི༌ གྱལ༌སྲིད༌པོ༌ མི༌ཐོབ༌བ༌, ཀ༌བོ༌ དཀོན༌མཆོག༌གི༌ ཁོང༌ང༌ ཅེས༌པ༌ ཅོ༌ཁན༌གུན༌ལ༌ སལ༌ཅེས༌ལ༌ ཞལ༌ཆད༌ ཛད༌ཏེ༌ ཨིན༌?
JAM 2:6 ཨིན༌ནའང༌ ཁྱོ༌ཞ༌གུན༌ནི༌ ཉལ༌བ༌ཅན༌གུན༌ལ༌ རྩི༌ཝ༌ མ༌ཅོའ༌ ཨིན༌ནོག༌། ཅི༌ ཁྱོ༌ཞ༌གུན༌ལ༌ གོབ༌ནོན༌ ཏངས༌ཏེ༌ ཁྲིམས༌ཁུང༌ང༌ ཁྱེར༌ཁན༌གུན༌, ཏེ༌ ཆུག༌པོ༌གུན༌ མན༌ན༌?
JAM 2:7 ཅི༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཚན༌ ཟང༌པོའ༌ ངན༌པ༌ ཟེར༌ཁན༌ ཏེན༌ན༌གུན༌ མན༌ན༌?
JAM 2:8 ཀལ༌ཏེས༌ ཁྱོ༌ཞ༌གུན༌ནི༌ ཏམ༌པའེ༌ སུང༌རབས༌སི༌ ནང༌ང༌ ཡོད༌ཁན༌ནི༌ གྱལ༌ཁྲིམས༌ “རང༌ང༌ ཅམས༌པ༌ ཅོ༌ཁན༌ ཙོགས༌ ཁྱོ༌རང༌ངི༌ ཁྱིམ༌ཚེས༌པའང༌ ཅམས༌པ༌ ཅོས༌” མོལ༌ཁན༌བོའ༌ དེན༌བའ༌ ཁའ༌ཉན༌ན༌, ཏེ༌ནེ༌ ཁྱོ༌ཞ༌གུན༌ནི༌ ཀྲང༌པོ༌ ཅོས༌ཏེ༌ ཨིན༌ནོག༌།
JAM 2:9 ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཆོགས༌ ཅོ༌ན༌ སྡིག༌པ༌ ཅོས༌ཏེ༌, ཁྱོ༌ཞའ༌ དཀོན༌མཆོག༌གི༌ ཁྲིམས༌པོ༌ ཅག༌ཅེས༌ལ༌ ནོངས༌ཅན༌ ཨིན༌ནོག༌།
JAM 2:10 མི༌ཞིག༌གི༌ ཁྲིམས༌ ཅིག༌ཅིག༌ ཅགས༌ཏེ༌ ཞན༌ཚང༌མ༌ ཁའ༌ ཉན༌ནའང༌ ཁོའེ༌ དཀོན༌མཆོག༌གི༌ ཁྲིམས༌ ཚང༌མ༌ ཅག༌ཁན༌ དང༌ཙོགས༌ ཨིན༌ནོག༌།
JAM 2:11 སྤེར༌ན༌ དཀོན༌མཆོག༌གི༌ མོལ༌ཏེ༌ ཨིན༌ནོག༌ “ཞན༌མའེ༌ ཞིད༌མད༌ཞིག༌ ཉམ༌པོ༌ ལུས༌བྲེལ༌ མ༌ཅོ༌” ཡང༌ “མི༌ མ༌སད༌” ཀལ༌ཏེས༌ ཁྱོ༌རང༌ངི༌ ཞན༌མའེ༌ ཞིད༌མད༌ ཉམ༌པོ༌ ལུས༌བྲེལ༌ ཅོའ༌ མེད༌གྲོ༌, ཨིན༌ནའང༌ མི༌ཞིག༌ སད༌ན༌, ཏེ༌ནེ༌ དཀོན༌མཆོག༌གི༌ ཁྲིམས༌ ཅགས༌ཏེ༌ ཁྱོ༌རང༌ ནོངས༌ཅན༌ གྱུར༌ཏེ༌ ཨིན༌ནོག༌།
JAM 2:12 ཏེ༌ནེ༌ ཟེར༌ཁན༌ ཡ༌ ཅོ༌ཁན༌གུན༌ལ༌ རང༌ཝང༌ སལ༌ཁན༌ནི༌ ཁྲིམས༌པོའེ༌ ཁྱོ༌ཞའ༌ ཁྲིམས༌ཅད༌ ཏང༌ཅེས༌པོ༌ ཨིད༌ཏུ༌ ཅོ༌ཤིག༌།
JAM 2:13 སྙིང༌རྗེ༌ མ༌སྟན༌ཁན༌ནི༌ མི༌གུན༌ལ༌ སྙིང༌རྗེ༌ མི༌ཐོབ༌། ཨིན༌ནའང༌ ཀལ༌ཏེས༌ ཁྱོ༌ཞ༌གུན༌ནི༌ ཞན༌མ༌གུན༌ལ༌ སྙིང༌རྗེ༌ སྟན༌ཏེ༌ ཡོད༌ན༌, དཀོན༌མཆོག༌གི༌ ཁྱོ༌ཞ༌གུན༌ལའང༌, ཁྲིམས༌ཅད༌དི༌ ཞག༌ག༌ སྙིང༌རྗེ༌ སྟན༌ན༌ ཛད༌ཨིན༌།
JAM 2:14 ངའེ༌ སྤུན༌གུན༌, ཀལ༌ཏེས༌ ཁྱོ༌ཞའེ༌ ཟེར༌ན༌ ངའེ༌ ཏད༌པ༌ ཅོའད༌ ཨིན༌ནའང༌ ཏེ༌བོ༌ ལག༌ལེན༌ནི༌ ནང༌ང༌ ཁྱོང༌ང༌ མེད༌ན༌, ཅི༌ ཕན༌ཐོགས༌? ཅི༌ ཏེ༌ཙོགས༌སི༌ ཏད༌པའེ༌ ཁྱོ༌ཞ༌གུན༌ སྐྱོབ༌ཨིན༌ན༌? མི༌སྐྱོབ༌།
JAM 2:15 སྤེར༌ན༌ ཁྱོ༌ཞ༌གུན༌ནི༌ ཟ༌གྱུ༌ ཡ༌ གོན༌གྱུ༌ མེད༌ཁན༌ནི༌ སྤུན༌ ཡ༌ སྤུན༌མོ༌ཞིག༌ ཐོངས༌ཏེ༌,
JAM 2:16 ཁྱོ༌ཞའ༌ ཅིག༌གི༌ ཁོའ༌ ཟེར༌ཨིན༌, “ཇུ༌ཧེ༌ ཀྲོན༌མོ༌ ཅོས༌ཏེ༌ གྲང༌གྲང༌ ཟོས༌ཏེ༌ ཁམ༌ཟང༌ ཞི༌དེ༌ ཉམ༌པོ༌ ཞུགས༌”, ཨིན༌ནའང༌ ཁོའ༌ ཟ༌གྱུ༌ ཡ༌ གོན༌གྱུ༌ མ༌ཏང༌ན༌, ཁྱོ༌རང༌ངི༌ ཁོའེ༌ ཕིའ༌ ཅི༌ ཟང༌པོ༌ ཅོས༌ཏེ༌ ཨིན༌?
JAM 2:17 ཏེན༌ན༌ ཙོགས༌ལ༌ ལག༌ལེན༌ མེད༌ཁན༌ནི༌ ཏད༌པ༌ ཅིག༌པོ༌ ཤི༌ཏེ༌ ཨིན༌ནོག༌།
JAM 2:18 ཏ༌ ཁ༌ཅིག༌གི༌ འི༌ ལབ༌ཞའེ༌ གྱབ༌གལ༌ ཅོས༌ཏེ༌ ཟེར༌སྲིད༌ཅེས༌ ཨིན༌ནོག༌, “མི༌ ཁ༌ཅིག༌ག༌ ཏད༌པ༌ ཡང༌ ཁ༌ཅིག༌ག༌ ལས༌ ཟང༌པོ༌ ཅོ༌ཅེས༌པོ༌ ཡོད༌ཀྱག༌།” ཨིན༌ནའང༌ ངའེ༌ ཟེར༌ཨིན༌, “ཀལ༌ཏེས༌ ཁྱོ༌རང༌ངི༌ ལག༌ལེན༌ མ༌ཅོ༌ན༌, ཀ༌ཟུག༌གི༌ ཁྱོ༌རང༌ང༌ ཏད༌པ༌ ཡོད༌ཁན༌བོ༌ ངའ༌ སྟན༌ ཐུབ༌ཨིན༌? ང༌རང༌ངི༌ ལག༌ལེན༌ གྱུད༌ཏེ༌ ངའེ༌ ཏད༌པ༌བོ༌ ཁྱོ༌རང༌ང༌ སྟན༌ཨིན༌།”
JAM 2:19 ཁྱོ༌རང༌ངི༌ ཟེར༌ཨིན༌, ཁྱོ༌རང༌ང༌ ཏད༌པ༌ ཡོད༌, ཅིའ༌ཟེར༌ན༌ དཀོན༌མཆོག༌ ཅིག༌ ཞུགས༌ཏེ༌ ཨིན༌ཁན༌བོ༌ ཁྱོ༌རང༌ངི༌ ཨིད༌ཤེས༌ ཅོའ༌ནོག༌། གྱལ༌ལ༌ རག༌! རྡུད༌གུན༌ནིའང༌, ཏེ༌བོའ༌ ཏད༌པ༌ ཅོའ༌ནོག༌ ཡང༌ ཁོང༌ང༌ ཇིགས༌ཏེ༌ དར༌ར༌ནོག༌།
JAM 2:20 ཁྱོ༌རང༌ ཙམ༌ཤིག༌གི༌ སམ༌བ༌ མེད༌ཁན༌ཞིག༌ ཨིན༌། ཅི༌ ལག༌ལེན༌ མ༌ཅོ༌ཁན༌ནི༌ ཏད༌པ༌ ཕན༌མི༌ཐོགས༌ ཨིན༌ཁན༌བོ༌ ཁྱོ༌རང༌ང༌ ཐོང༌ང༌ མི༌དུག༌ག༌?
JAM 2:21 ང༌དང༌གུན༌ནི༌ ཕ༌མེས༌པོ༌ ཨབ༌ར༌ཧམ༌མ༌, དཀོན༌མཆོག༌གི༌ ཁོ༌རང༌ངི༌ ཏད༌པ༌ ལག༌ལེན༌ནི༌ ནང༌ང༌ ཁྱོང༌ཅེས༌པོའེ༌ མི༌ ཀྲང༌པོ༌ཞིག༌ ཐེའ༌ མ༌ཛད༌ས༌, ནམ༌ ཁོའེ༌ ཁོ༌རང༌ངི༌ བུ༌ཚ༌ ཨི༌སཱག༌ ཆོད༌ཁྲི༌ཀ༌ ཆོད༌པ༌ ཕུལ༌ཀྱིས༌ ཡོད༌པིན༌?
JAM 2:22 ཅི༌ ཏད༌པ༌ དང༌ ལག༌ལེན༌ གུན༌ནི༌ ཉམ༌པོ༌ ལས༌ ཅོ༌ཅེས༌པོ༌ ཨབ༌ར༌ཧམ༌ གྱུད༌ཏེ༌, ཁྱོ༌ཞའེ༌ མ༌ཐོང༌ང༌? ཁོའེ༌ ལག༌ལེན༌བོའེ༌, ཁོའེ༌ ཏད༌པ༌བོ༌ དྲན༌དྲ༌ གྲུབ༌ཅུགས༌ཏེ༌ ཨིན༌ནོག༌།
JAM 2:23 ཏམ༌པའེ༌ སུང༌རབས༌སི༌ ནང༌ང༌ “ཨབ༌ར༌ཧམ༌མི༌ དཀོན༌མཆོག༌གི༌ཀ༌ ཨིད༌ཤེས༌ ཅོས༌པ༌, ཁོང༌ངི༌ ཁོའ༌ མི༌ ཀྲང༌པོ༌ཞིག༌ ཐེའ༌ ཛདས༌” མོལ༌ཁན༌ ནང༌ཞིན༌ལ༌ ཇུངས༌ཏེ༌ ཨིན༌ནོག༌, མ༌ཚད༌ ཁོའ༌ དཀོན༌མཆོག༌གི༌ ཛ༌འོའང༌ ཞུའད༌པིན༌།
JAM 2:24 ཁྱོ༌ཞའེ༌ ང༌དང༌གུན༌ དཀོན༌མཆོག༌གི༌ སྐུན༌དུན༌ལ༌ ཏད༌པ༌ ཅིག༌པོ༌ མན༌པ༌, ཏད༌པ༌ དང༌ ལག༌ལེན༌ ཉིས༌ཀོ༌ གྱུད༌ཏེ༌ ཀྲང༌པོ༌ ཐེའ༌ཛད༌ཅེས༌པོ༌ མ༌ཐོང༌ང༌?
JAM 2:25 ཏེན༌ན༌ ཙོགས༌ལ༌ ཟུགས༌ཙོང༌མ༌ ར༌ཧབ༌ ཟེར༌ཁན༌བོའང༌, ཁོ༌རང༌ངི༌ ལག༌ལེན༌གུན༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ ཀྲང༌པོ༌ ཐེའ༌ མ༌ཛདས༌ས༌, ནམ༌ ཁོའེ༌ ཨིས༌ར༌ཨེལ༌ལི༌ མག༌མི༌ ཉིས༌ཀོ༌ ཁོང༌ངི༌ གྲ༌འོ༌གུན༌ནི༌ ཀ༌ནེ༌ སྦས༌ཏེ༌ ཞན༌ཡང༌ ལམ༌ སོ༌སོ༌ཞིག༌ནེ༌ ཁམ༌ཟང༌ ལམ༌ཅུགས༌།
JAM 2:26 འུགས༌ མེད༌ཁན༌ནི༌ ཟུགས༌པོ༌ ཤི༌ཏེ༌ ཨིན༌ཁན༌ ཙོགས༌ལ༌ ལག༌ལེན༌ མེད༌ཁན༌ནི༌ ཏད༌པ༌བོའང༌, ཤི༌ཁན༌ ཙོགས༌ ཨིན༌ནོག༌།
JAM 3:1 ངའེ༌ སྤུན༌གུན༌, ཁྱོ༌ཞའ༌ མང༌པོའེ༌ ཆོས༌ཚོགས༌སི༌ ནང༌ང༌ གེར༌གན༌ གྱུར༌ཨིན༌ སམ༌ཏེ༌ རེ༌ཝ༌ ཅོ༌ མ༌གོས༌, ཅིའ༌ཟེར༌ན༌ དཀོན༌མཆོག༌གི༌ ང༌དང༌ ལབ༌ཞའ༌ ཏང༌ཁན༌གུན༌ལ༌ ཀྲག༌ག༌ ཁྲིམས༌ཅད༌ ཕོག༌ཅེས༌པོ༌, ཁྱོ༌ཞའ༌ གྱུས༌ཨིན༌ནོག༌།
JAM 3:2 འོ༌ན༌, ང༌དང༌ ཚང༌མའེ༌ སྐྱོན༌ མང༌པོ༌ཞིག༌ ཅོའ༌ནོག༌། ཀལ༌ཏེས༌ མི༌ཞིག༌གི༌ ཟེར༌ཁན༌ ཚང༌མ༌ སྐྱོན༌མེད༌ ཡོད༌པིན༌ན༌, ཁོ༌ ཕུན༌སུམ༌ཚོགས༌པ༌ཞིག༌ ཡོད༌གྲོ༌, ཡང༌ ཁོའེ༌ ལུས༌ གང༌པོ༌ ཅུན༌ཏེ༌ བོར༌ཐུབ༌བ༌ནོག༌།
JAM 3:3 རྟའེ༌ ཁའེ༌ ནང༌ང༌ ཡོད༌ཁན༌ནི༌ སྲབས༌པོ༌ གྱུད༌ཏེ༌ ང༌དང༌གུན༌ ཀ༌རུ༌ ཆེན༌ སམ༌ནའང༌, ཏེ༌རུ༌ རྟ༌བོ༌ ཁྲིད༌ཏེ༌ ཁྱེར༌ ཉན༌ན༌ནོག༌།
JAM 3:4 ཏེན༌ན༌ ཙོགས༌ལ༌ ཤེད༌ཅན༌ ལུངས༌པོའེ༌ རིལ༌ཨིན༌ ཡོད༌ཁན༌ ཏེ༌ གྲུ༌ཟིང༌ ཆེན༌མོ༌བོའང༌ གྲུ༌ཟིང༌ངི༌ ཇུག༌ག༌ ཡོད༌ཁན༌ནི༌ ཤིང༌ལེབ༌ ཆུ༌ངུན༌བོ༌ ཉམ༌པོ༌, གྲུ༌ཟིང༌ སྲུལ༌ཁན༌བོའེ༌ ཀ༌རུ༌ སྲུལ༌ཏེ༌ ཁྱེར༌ཨིན༌ སམ༌ནའང༌, ཁྱེར༌ ཉན༌ན༌ནོག༌།
JAM 3:5 ཏེན༌ན༌ ཙོགས༌ལ༌ ལྕེ༌བོ༌ ང༌དང༌ངི༌ ཟུགས༌པོའེ༌ ཁག༌ ཆུ༌ངུན༌ཞིག༌ ཨིན༌ནའང༌, འི༌བོའེ༌ ཕོ༌སོ༌ཅན༌ནི༌ སྤེ༌རའེ༌ མི༌ མང༌པོ༌ཞིག༌ག༌ ནོད༌སྐྱལ༌ ཉན༌ན༌ནོག༌, ཀ༌ཟུག༌ མེ༌ཙག༌ ཆུ༌ངུན༌ཞིག༌གི༌ ནག༌ཚོགས༌ ཆེན༌མོ༌ཞིག༌ མེའ༌ སྤར༌ཉན༌ཨིན༌།
JAM 3:6 ལྕེ༌བོ༌ ནི༌ མེ༌ ཙོགས༌ ཨིན༌ནོག༌། ཟུགས༌པོའེ༌ ཡན༌ལག༌གུན༌ནི༌ ཕྲོ༌ནེ༌ ལྕེ༌བོ༌ ནི༌, ངན༌པ༌ གངས༌ཁན༌ནི༌ ནས༌ས༌ཤིག༌ ཨིན༌ནོག༌། འི༌བོའེ༌ ཟུགས༌པོ༌ གང༌པོ༌ ཚི༌ཏུ༌ གྱུར༌ ཅུགས༌ཏེ༌, ཁོའེ༌ མི༌ཚེ༌ གང༌པོའ༌ མེ༌ བར༌ ཅུག༌ག༌ནོག༌, ཅིའ༌ཟེར༌ན༌ ལྕེའ༌ མེ༌ སྤར༌ཁན༌བོ༌ ཉལ༌ཝའེ༌ མེ༌ ཨིན༌ནོག༌།
JAM 3:7 མིའ༌ སེམས༌ཅན༌, ཅ༌, རྒལ༌ཅིག༌གི༌ རིགས༌ དང༌, ཚོའེ༌ ནང༌ང༌ ཉ༌ ཆེན༌མོ༌ སྣ༌ཚོགས༌ གུན༌, ཁོ༌རང༌གུན༌ནི༌ ཝང༌ངི༌ ཡོག༌ག༌ ཁྱོང༌ ཉན༌ན༌ནོག༌།
JAM 3:8 ཨིན༌ནའང༌ སུ༌ཞིག༌གའང༌ ལྕེ༌བོ༌, ཁོ༌རང༌ངི༌ ཝང༌ངི༌ ཡོག༌ག༌ ཁྱོང༌ མ༌ཉན༌ན༌ ཨིན༌ནོག༌། འི༌བོ༌ ནི༌ དུག༌ མ༌ནེ༌ མ༌ཉན༌ཁན༌ནི༌ ངན༌པ༌, ཤི༌ཅུག༌ཁན༌ནི༌ ཏུག༌གི༌ གངས༌ཏེ༌ ཡོད༌ཏེ༌ ཨིན༌ནོག༌།
JAM 3:9 ང༌དང༌གུན༌ནི༌ འིན༌ན༌ ལྕེ༌ ཉམ༌པོ༌ ང༌དང༌ངི༌ གཙོ༌བོ༌, ཡབ༌ དཀོན༌མཆོག༌ག༌ སྟོད༌པ༌ ཕུལ༌ལ༌ནོག༌། ཨིན༌ནའང༌ ཏེན༌ན༌ ལྕེ༌ ཉམ༌པོ༌ དཀོན༌མཆོག༌གི༌ ཁོང༌རང༌ ཙོགས༌ ཅོའ༌ ཛད༌ཁན༌ནི༌ མི༌གུན༌ལ༌ རྔན༌ ཏབ༌བ༌ནོག༌།
JAM 3:10 ཡང༌ སྟོད༌པ༌ དང༌ རྔན༌ ཏབ༌ཅེས༌ ཉིས༌ཀོ༌, ཏེན༌ན༌ ཁའེ༌ ནང༌ནེ༌ བིང༌ང༌ནོག༌། དེན༌བ༌ ངའེ༌ སྤུན༌གུན༌, ཏེ༌ཙོགས༌ ཆ༌ མ༌གོས༌།
JAM 3:11 ཅི༌ ཆུ༌མིག༌ཤིག༌གི༌ ནང༌ནེ༌ ཆུ༌ ལག༌མོ༌ དང༌ ཚཱ༌ཀུ༌ ཉིས༌ཀོ༌ བིང༌ཨིན༌ན༌?
JAM 3:12 ངའེ༌ སྤུན༌གུན༌, ཅི༌ ཕིག༌གི༌ ཁ༌ཟས༌སི༌ ལྕང༌མའེ༌ ཀ༌ནེ༌ ཨོ༌ལིཝ༌ ཡ༌ རྒུན༌ནི༌ ཁ༌ཟས༌སི༌ ལྕང༌མའེ༌ ཀ༌ནེ༌ ཕིག༌ སྨིན༌ཨིན༌ན༌? མ༌ནེ༌ མི༌སྨིན༌། ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཆུ༌མིག༌གི༌ ཆུ༌ ཚཱ༌ཀུའི༌ ནང༌ནེ༌ ཆུ༌ ལག༌མོ༌ ཕིང༌ མི༌ཉན༌།
JAM 3:13 ཁྱོ༌ཞ༌གུན༌ནི༌ ཕྲོ༌ནེ༌ ཤེས༌རབས༌ཅན༌ དང༌ ཧ༌གོ༌ཅན༌བོ༌ སུ༌ ཨིན༌? ཏེ༌ཙོགས༌སི༌ མི༌བོའེ༌, ཤེས༌རབས༌ནེ༌ ཡོང༌ཁན༌ནི༌ པས༌མོ༌ ཉམ༌པོ༌ ལས༌ ཅོས༌ཏེ༌ མི༌ཚེ༌ ཟང༌པོ༌ཞིག༌ ཕུད༌ཏེ༌ སྟོན༌།
JAM 3:14 ཨིན༌ནའང༌ ཀལ༌ཏེས༌ ཁྱོ༌ཞའེ༌ སེམས༌སི༌ ནང༌ང༌ སྲན༌ཏྲེ༌ ཚིགས༌ཅེས༌ དང༌ རང༌དོད༌ ཡོད༌ན༌, ཤེས༌རབས༌ཅན༌ སྟན༌ཨིན༌ རང༌སྟོད༌ ཏངས༌ཏེ༌ དཀོན༌མཆོག༌གི༌ དེན༌བའེ༌ ལབ༌ཞའེ༌ གྱབ༌གལ༌ མ༌ཅོ༌།
JAM 3:15 ཏེ༌ཙོགས༌སི༌ ཤེས༌རབས༌ དཀོན༌མཆོག༌གི༌ ཆོགས༌ནེ༌ མ༌ཡོང༌ང༌, ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌ སམ༌ཚུལ༌ དང༌ རྡུད༌ གུན༌ནེ༌ ཡོང༌ང༌ནོག༌།
JAM 3:16 ཀ༌རུ༌ ཚིག༌ཅེས༌ དང༌ རང༌དོད༌ ཡོད༌, ཏེ༌རུ༌ ཧི༌ལིངས༌ དང༌ ཚིར༌ཀ༌ མེད༌ཁན༌ ཡང༌ ངན༌པའེ༌ རིགས༌ ཚང༌མ༌ ཡོད༌ཏེ༌ ཨིན༌ནོག༌།
JAM 3:17 ཨིན༌ནའང༌ དཀོན༌མཆོག༌ནེ༌ ཡོང༌ཁན༌ནི༌ ཤེས༌རབས༌པོ༌ ནི༌, ཏང༌པོ༌རང༌ སེམས༌ ལག༌མོ༌, ཏེ༌ནེ༌ ཞི༌དེའ༌ ཐད༌ཁན༌, སེམས༌ བོལ༌མོ༌ ཡོད༌ཁན༌, ཝང༌ངི༌ ཡོག༌ག༌ དུག༌ག༌ལ༌ ཐད༌ཁན༌, སྙིང༌རྗེའེ༌ གངས༌ཁན༌, ལས༌ ཟང༌པོ༌ ཅོ༌ཁན༌, ཆོག༌རིས༌ མ༌ཅོ༌ཁན༌ དང༌ ཁ༌ཆོས༌ མ༌ཅོ༌ཁན༌ གུན༌ ཨིན༌ནོག༌།
JAM 3:18 མི༌ པར༌ལ༌ ཞི༌དེ༌ ཁྱོང༌ཁན༌གུན༌ནི༌ ཞན༌མ༌གུན༌ནི༌ སེམས༌སི༌ ནང༌ང༌ ཞི༌དེའེ༌ ས༌འོན༌ ཏབ༌བ༌ནོག༌, ཡང༌ ཀྲང༌པོའེ༌ སྟོན༌ཐོག༌ རྔའ༌ནོག༌།
JAM 4:1 ཁྱོ༌ཞ༌གུན༌ནི༌ ཕྲོའ༌ ཛིང༌མོ༌ དང༌ ནོལ༌ཅེས༌ གུན༌ ཅིའི༌ ཞས༌ཏེ༌ ཡོང༌དུག༌? ཅི༌ ཏེ༌གུན༌ ཁྱོ༌ཞ༌གུན༌ནི༌ དོད༌པ༌གུན༌ནི༌ ཀ༌ནེ༌ ཡོང༌ང༌ མ༌ནོག༌ག༌, ཀ༌གུན༌ ཁྱོ༌ཞའེ༌ གྱབ༌གལ༌ལ༌ ནོལ༌ཨིན༌ ཡོད༌?
JAM 4:2 མེད༌ཁན༌གུན༌ ཁྱོ༌རང༌ང༌ གོས༌པ༌, ཏེ༌བོ༌ ཐོབ༌ཅེས༌སི༌ ཕིའ༌ སད༌ད༌ནོག༌། ཞན༌མ༌གུན༌ལ༌ ཡོད༌ཁན༌བོའེ༌ཀ༌ ཁྱོ༌རང༌ང༌ དོད༌པ༌ སྲན༌ཏྲེ༌ ཡོད༌ཏེ༌ ཏེ༌བོ༌ མ༌ཐོབ༌ པ༌སང༌, ཁྱོ༌རང༌ངི༌ ཁོང༌གུན༌ ཉམ༌པོ༌ ཛིང༌མོ༌ ཏངས༌ཏེ༌ ནོལ༌ལ༌ནོག༌། ཁྱོ༌རང༌ངི༌ དོད༌པ༌ ཡོད༌ཁན༌གུན༌ ཁྱོ༌རང༌ང༌ མེད༌པ༌ ཨིན༌ནོག༌, ཅིའ༌ཟེར༌ན༌ ཁྱོ༌རང༌ངི༌ ཏེ༌བོའེ༌ཕིའ༌ དཀོན༌མཆོག༌ག༌ ཞུ༌ཝ༌ མ༌ཕུལ༌ལ༌ ཨིན༌ནོག༌།
JAM 4:3 ཡང༌ ཁྱོ༌རང༌ངི༌ ཞུ༌ ཟ༌ནེ༌, ཁྱོ༌རང༌ང༌ ཐོབ༌བ༌ མ༌ནོག༌ ཅིའ༌ཟེར༌ན༌ ཁྱོ༌རང༌ངི༌ ཏོན༌ ངན༌པ༌ ཉམ༌པོ༌ ཞུས༌ཏེ༌ ཨིན༌ནོག༌, ཀ༌བོ༌ ཁྱོ༌རང༌ངི༌ རང༌ང༌ སྐྱིད༌པོ༌ ཐོབ༌ཅེས༌སི༌ ནང༌ང༌ ཀོལ༌ལ༌ནོག༌།
JAM 4:4 ཏད༌པ༌ མེད༌ཁན༌ནི༌ མི༌གུན༌, ཇིག༌རྟེན༌ནི༌ ཨིན༌ཁན༌གུན༌ལ༌ ཡ༌ཤ༌ ཅོ༌ཅེས༌པོ༌ དཀོན༌མཆོག༌ག༌ ནཕ༌རད༌ ཅོས༌ཏེ༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌མེད༌ད༌? ཡང༌སྐྱར༌ ཟེར༌རད༌, ཇིག༌རྟེན༌ ཉམ༌པོ༌ ཛ༌འོ༌ ཅོ༌ཅེས༌ལ༌ ཐད༌ཁན༌གུན༌, དཀོན༌མཆོག༌གི༌ གྲ༌འོ༌ གྱུར༌ཏེ༌ ཨིན༌ནོག༌།
JAM 4:5 ཁྱོ༌ཞ༌གུན༌ནི༌ ཏམ༌པའེ༌ སུང༌རབས༌སི༌ ནང༌ང༌ “དཀོན༌མཆོག༌གི༌ ང༌དང༌གུན༌ནི༌ ནང༌ང༌ སེམས༌ཉིད༌པོ༌ སལ༌ལ༌ ཛད༌ པ༌སང༌, ཁོང༌ངི༌ ང༌དང༌གུན༌ ཁོང༌ ཅིག༌པོའེ༌ ཨིན༌ཅེས༌པོའ༌ མ༌སྲན༌ཏྲེ༌ ཐུགས༌དོད༌ ཛད༌ད༌ནོག༌” མོལ༌ཁན༌བོའ༌ ཏོན༌ཏག༌ མེད༌ཀྱག༌ སམ༌མ༌ རག༌ག༌?
JAM 4:6 ཨིན༌ནའང༌ ཏེ༌ཙོགས༌སི༌ དོད༌པ༌ ངན༌པའེ༌ གྱབ༌གལ༌ ཅོ༌ཐུབ༌ཅེས༌ལ༌ ཁོང༌ངི༌ ང༌དང༌གུན༌ལ༌ ཐུག༌རྗེ༌ མང༌ང༌ སལ༌ཏེ༌ ཨིན༌ནོག༌, ཀ༌ཟུག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌། “དཀོན༌མཆོག༌གི༌ ཕོ༌སོ༌ ཅོ༌ཁན༌གུན༌ལ༌ གྱབ༌གལ༌ ཅོའ༌ ཛད༌ད༌ནོག༌, ཨིན༌ནའང༌ པས༌མོ༌ ཡོད༌ཁན༌གུན༌ལ༌ ཐུག༌རྗེ༌ སལ༌ལ༌ ཛད༌ད༌ནོག༌།”
JAM 4:7 དཀོན༌མཆོག༌གི༌ སྐུན༌དུན༌ལ༌ རང༌དང༌རང༌ ཁོང༌ངི༌ ཝང༌ངི༌ ཡོག༌ག༌ བོར༌ཤིག༌, ཡང༌ རྡུད༌གུན༌ནི༌ གོ༌བའེ༌ གྱབ༌གལ༌ལ༌ ནོལ༌ཤིག༌, ཏེ༌ནེ༌ ཁོ༌ ཁྱོ༌ཞའེ༌ ཀ༌ནེ༌ ཤོར༌ཏེ༌ ཆེན༌།
JAM 4:8 ཀལ༌ཏེས༌ ཁྱོ༌ཞའ༌ དཀོན༌མཆོག༌གི༌ ཉེ༌མོའ༌ ཡོང༌ན༌, ཏེ༌ནེ༌ དཀོན༌མཆོག༌ ཁྱོ༌ཞ༌གུན༌ནི༌ ཉེ༌མོའ༌ སྐྱོད༌ཨིན༌། ཁྱོ༌ཞའ༌ སྡིག༌ཅན༌གུན༌ནི༌ རང༌ངི༌ ལག༌པ༌ ཁྲུས༌ཤིག༌, ཡང༌ ཇིག༌རྟེན༌ དང༌ དཀོན༌མཆོག༌ ཉིས༌ཀོའེ༌ གྱབ༌ནེ༌ གྲུལ༌ཁན༌གུན༌, ཁྱོ༌ཞའེ༌ སེམས༌ རྩང༌མ༌ ཅོ༌ཤིག༌།
JAM 4:9 སེམས༌ སྐྱོ༌མོ༌ ཅོས༌ཏེ༌, རྡུག༌པོ༌ ཅོ༌ཨིན༌ ངུ༌ཤིག༌། ཧབ༌གོད༌དི༌ ཚབས༌ལ༌ རྡུག༌པོ༌ ཡང༌ སྐྱིད༌པོའེ༌ ཚབས༌ལ༌ སྐྱོ༌མོ༌ ཅོ༌ཤིག༌།
JAM 4:10 རང༌དང༌རང༌ གཙོ༌བོའེ༌ སྐུན༌དུན༌ལ༌ པས༌མོ༌ ཅོས༌, ཏེ༌ནེ༌ ཁོང༌ངི༌ ཁྱོ༌རང༌ང༌ རྩི༌ཝ༌ ཀྲག༌པོ༌ སལ༌ལ༌ ཛད༌ཨིན༌།
JAM 4:11 ཅེས༌པའེ༌ སྤུན༌གུན༌, ཅིག༌ དང༌ ཅིག༌གི༌ གྱབ༌གལ༌ལ༌ སྤེ༌ར༌ ངན༌པ༌ མ༌ཏང༌ཤིག༌། ཀལ༌ཏེས༌ ཁྱོ༌ཞ༌གུན༌ནི༌ ཅིག༌ དང༌ ཅིག༌གི༌ གྱབ༌གལ༌ལ༌ སྤེ༌ར༌, ཡ༌ ཁྲིམས༌ཅད༌ ཏང༌ན༌, ཁྱོ༌ཞ༌གུན༌ནི༌ ཞན༌མ༌ ཅེས༌པ༌ ཅོ༌ཅེས༌སི༌ ཁྲིམས༌པོའེ༌ གྱབ༌གལ༌ལ༌ སྤེ༌ར༌ དང༌ ཁྲིམས༌ཅད༌ ཏངས༌ཏེ༌ ཨིན༌ནོག༌། ཁྱོ༌ཞ༌གུན༌ནི༌ ཁྲིམས༌ཅད༌ ཏང༌ན༌, ཁྱོ༌ཞ༌རང༌གུན༌ ཁྲིམ༌སྤོན༌ གྱུར༌ཏེ༌ ཁྱོ༌ཞ༌གུན༌ནི༌ ཁྲིམས༌པོའེ༌ ཁའ༌ མ༌ཉན༌ན༌ ཨིན༌ནོག༌།
JAM 4:12 དཀོན༌མཆོག༌ ཅིག༌པོ༌ ནི༌, ཁྲིམས༌ སལ༌ཁན༌ དང༌ ཁྲིམ༌སྤོན༌ ཞུགས༌ཏེ༌ ཨིན༌ནོག༌། ཁོང༌ ཅིག༌པོའ༌ སྐྱོབ༌ཅེས༌ ཡ༌ མི༌གུན༌ ཉལ༌ཝའེ༌ ནང༌ང༌ ཕང༌ང༌ ཛད༌ཅེས༌སི༌ ཝང༌ ཡོད༌ཏེ༌ ཨིན༌ནོག༌། ཏེ༌ནེ༌ ཞན༌མའ༌ ཁྲིམས༌ཅད༌ ཏང༌ཁན༌ ཁྱོ༌ཞའ༌ སུ༌ ཨིན༌?
JAM 4:13 “མ༌ གྱོགས༌པ༌, ང༌ཞ༌གུན༌ གྱལ༌ས༌ སོང༌ཏེ༌ ཏུས༌བན༌ཤིག༌ དུགས༌ཏེ༌ ཚོང༌ ཅོས༌ཏེ༌ པེ༌ནེ༌ མང༌པོ༌ ཅོ༌ཨིན༌” ཟེར༌ཁན༌གུན༌ནི༌ ཉོན༌ཤིག༌།
JAM 4:14 ཁྱོ༌ཞའེ༌ མི༌ཚེའེ༌ ནང༌ང༌ ཐོ༌རེ༌ ཅི༌ ཇུང༌ཨིན༌, ཁྱོ༌ཞའ༌ ཅི༌ གྱུས༌ཡོད༌? ངའེ༌ ཁྱོ༌ཞ༌གུན༌ནི༌ མི༌ཚེ༌བོ༌ ཅི༌ ཉམ༌པོ༌ ལྡུར༌? འི༌བོ༌ ནི༌ ང༌ཏོག༌གི༌ མ༌མུན༌ ཙོགས༌ ཨིན༌ནོག༌ ཀ༌བོ༌ ཏུས༌ ཉུ༌ངུན༌ཞིག༌ མ༌ནེ༌ ལུས༌ས༌ མ༌ནོག༌།
JAM 4:15 ཁྱོ༌ཞ༌གུན༌ནི༌ ཟེར༌གོས༌, “ཀལ༌ཏེས༌ གཙོ༌བོའེ༌ ཐུག༌གོངས༌ ཡོད༌ན༌, ང༌དང༌གུན༌ནི༌ མི༌ཚེའེ༌ ནང༌ང༌ འི༌བོ༌ ཡ༌ ཏེ༌བོ༌ ཅོ༌ཨིན༌།”
JAM 4:16 ཏེ༌ མན༌ན༌, ཁྱོ༌ཞ༌གུན༌ནི༌ རང༌དང༌རང༌ངི༌ ཐབ༌ལྡིངས༌གུན༌ནི༌ ནང༌ང༌ ཕོ༌སོ༌ ཅོས༌ཏེ༌ ཨིན༌ནོག༌, ཡང༌ ཏེ༌ཙོགས༌སི༌ ཕོ༌སོ༌གུན༌ ངན༌པ༌ ཨིན༌ནོག༌།
JAM 4:17 ཀལ༌ཏེས༌ སུ༌ཞིག༌ག༌ ཁོ༌རང༌ངི༌ ཅོ༌གོ༌ཤེས༌སི༌ ལས༌ ཟང༌པོ༌གུན༌ གྱུས༌ཡོད༌ཏེའང༌ མ༌ཅོ༌ན༌, ཁོའེ༌ སྡིག༌པ༌ ཅོས༌ཏེ༌ ཨིན༌ནོག༌།
JAM 5:1 མི༌ ཆུག༌པོ༌གུན༌ ཉོན༌ཤིག༌, ཆི༌མ༌ ཏང༌ཨིན༌ ངུས༌མང༌ ཏོང༌ཤིག༌, ཅིའ༌ཟེར༌ན༌ ཁྱོ༌ཞ༌གུན༌ལ༌ སྲན༌ཏྲེ༌ ནགས༌ དང༌ བར༌དོ༌ ཐོང༌ཨིན༌།
JAM 5:2 ཁྱོ༌ཞ༌གུན༌ནི༌ གྱུ༌ནོར༌གུན༌ རུལ༌ཏེ༌, ཡང༌ ཁྱོ༌ཞའེ༌ རིན༌ཅན༌ ཀོས༌གུན༌ལ༌ མུག༌པ༌ ཏབས༌ཏེ༌ ཨིན༌ནོག༌།
JAM 5:3 ཁྱོ༌ཞ༌གུན༌ནི༌ སེར༌ དང༌ མུལ༌ གུན༌ རིན༌མེད༌ གྱུར༌ཏེ༌ ཨིན༌ནོག༌། ཁྱོ༌ཞའེ༌ རེ༌ཝ༌ བོར༌ཁན༌ནི༌ ཏེན༌ན༌ གྱུ༌ནོར༌བོའེ༌, མེ༌ ནང༌ང༌ ཚིག༌ག༌ ཙོགས༌ལ༌ ཁྱོ༌ཞའེ༌ ཤ༌གུན༌ ཟོས༌ཏེ༌ མེད༌ཁན༌ ཅོ༌ཨིན༌། ཁྲིམས༌ཅད༌དི༌ ཞག༌ག༌, ཁྱོ༌ཞའེ༌ སགས༌ཏེ༌ བོར༌ཁན༌ནི༌ ཏེན༌ན༌ གྱུ༌ནོར༌གུན༌ནི༌ ཁྱོ༌ཞའེ༌ སྡིག༌པའེ༌ སྤང༌པོ༌ ཏང༌ཨིན༌།
JAM 5:4 ཏ༌ ཞིང༌ངི༌ཀ༌ ལས༌ ཅོ༌ཁན༌ནི༌ ལ༌ཆའེ༌ ནང༌ང༌ ཁྱོ༌ཞའེ༌ གོབ༌སྐོར༌ ཏང༌ཁན༌གུན༌ནི༌ ཀུ༌ཅོ༌ དང༌ ངུ༌ཅེས༌ གུན༌ ཉོན༌ཤིག༌, ཁྱོ༌ཞའེ༌ མ༌ཏང༌ང༌ བོར༌ཁན༌ནི༌ ཏེ༌ ལ༌ཆ༌གུན༌ནི༌, ཁྱོ༌ཞ༌རང༌ངི༌ གྱབ༌གལ༌ལ༌ སྤང༌པོ༌ ཏང༌ཨིན༌ ཨིན༌ནོག༌། ཁྱོ༌ཞའེ༌ ཞིང༌རྔ༌ཁན༌གུན༌ནི༌ ཀུ༌ཅོ༌ དང༌ ངུ༌ཅེས༌ གུན༌, གཙོ༌བོ༌ དཀོན༌མཆོག༌གི༌ སན༌ན༌ ཛད༌ཏེ༌ ཨིན༌ནོག༌།
JAM 5:5 ཁྱོ༌ཞ༌གུན༌ནི༌ འི༌ ཇིག༌རྟེན༌ནི༌ཀ༌ ནོར༌ མང༌པོ༌ དང༌ རང༌རང༌ངི༌ དོད༌པ༌ ཡོད༌ཁན༌ ཚང༌མ༌ དྲན༌དྲ༌ གྲུབ༌ཅུག༌ཨིན༌ མི༌ཚེ༌ ཕུད༌ཏེ༌ ཨིན༌ནོག༌། ར༌མ༌ དང༌ ལུག༌ གུན༌ སད༌ཅེས༌སི༌ ཕིའ༌ གྱགས༌པ༌ ཆ༌ཅུག༌ཅེས༌ ཙོགས༌ལ༌ ཁྱོ༌ཞ༌གུན༌ནིའང༌ སད༌ཅེས༌ལ༌ ཁྱོ༌ཞ༌རང༌ གྱགས༌པ༌ ཆ༌ཅུགས༌ཏེ༌ ཨིན༌ནོག༌།
JAM 5:6 ཁྱོ༌ཞ༌གུན༌ནི༌ ནོངས༌མེད༌ཁན༌ནི༌ མི༌གུན༌ སད༌ཅེས༌སི༌ ཁྲིམས༌ཅད༌ ཏངས༌ཏེ༌ སད༌ད༌ནོག༌, ཀ༌གུན༌ནི༌ ཁྱོ༌ཞའེ༌ གྱབ༌གལ༌ མ༌ཅོས༌།
JAM 5:7 ངའེ༌ ཅེས༌པའེ༌ སྤུན༌གུན༌ ཁྱོ༌ཞ༌གུན༌ གཙོ༌བོ༌ ཡེ༌ཤུ༌ ལོགས༌ཏེ༌ སྐྱོད༌ཅེས༌ ཚག༌པ༌ ཟོད༌པ༌ ཉམ༌པོ༌ སྲུངས༌ཏེ༌ དུག༌ཤིག༌། ཞིང༌བད༌པ༌ ལྟོས༌ཤིག༌, ཀ༌བོ༌ སྟོན༌ དང༌ སྤིད༌ ཉིས༌ཀོ༌ ཟོད༌པ༌ ཉམ༌པོ༌ ཆར༌པའ༌ སྲུངས༌ཏེ༌ ཁོ༌རང༌ངི༌ རིན༌ཅན༌ སྟོན༌ཐོག༌གུན༌ ཚོས༌ཏེ༌ རྔའ༌ལ༌ རིངས༌སད༌།
JAM 5:8 ཁྱོ༌ཞ༌གུན༌ནིའང༌ ཟོད༌པ༌ ཅོས༌ཏེ༌ སྙིང༌གུན༌ལ༌ སྤོས༌པ༌ སྐྱེ༌ཅུག༌ཤིག༌, ཅིའ༌ཟེར༌ན༌ གཙོ༌བོ༌ ཡེ༌ཤུ༌ ལོགས༌ཏེ༌ ཕེབ༌ཤེས༌སི༌ ཏུས༌པོ༌ ཉེ༌མོའ༌ ལེབས༌ཏེ༌ ཨིན༌ནོག༌།
JAM 5:9 སྤུན༌གུན༌ ཅིག༌ དང༌ ཅིག༌གི༌ གྱབ༌གལ༌ལ༌ ཟེར༌གྱུ༌ མ༌ཏང༌ཤིག༌། ཀལ༌ཏེས༌ ཏང༌ན༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཁྱོ༌ཞ༌གུན༌ལ༌ ཁྲིམས༌ཅད༌ སལ༌ལ༌ ཛད༌ཨིན༌། ལྟོས༌ཤིག༌གའང༌ ཁྲིམས༌ཅད༌ཁན༌བོ༌ སྒོའེ༌ དུན༌ལ༌ ཞངས༌ཏེ༌ དུག༌།
JAM 5:10 སྤུན༌གུན༌ རྡུག༌ངལ༌ལི༌ ནང༌ངའང༌ ཟོད༌པ༌ ཉམ༌པོ༌ གཙོ༌བོ༌ དཀོན༌མཆོག༌གི༌ ཝང༌ངི༌ ནང༌ང༌ སྤེ༌ར༌ སལ༌ཁན༌ནི༌ ལུང༌སྟོན༌པ༌གུན༌ སྤེ༌ཞིག༌གི༌ ཚུལ༌ལ༌ ལྟོས༌ཤིག༌།
JAM 5:11 ཁྱོ༌ཞ༌གུན༌ལ༌ གྱུས༌ ཨིན༌ནོག༌, དཀོན༌མཆོག༌གི༌ ཟོད༌པ༌ ཉམ༌པོ༌ རྡུག༌ངལ༌ ཁུར༌ཁན༌གུན༌ལ༌ ཅིན༌ལབས༌ སལ༌ལ༌ ཛད༌ཏེ༌ ཨིན༌ནོག༌། སྤེར༌ན༌ སྙིང༌རུས༌ཅན༌ནི༌ མི༌ ཡོབ༌བ༌, གཙོ༌བོ༌ དཀོན༌མཆོག༌གི༌ སྟིང༌ཇུག༌པོའེ༌ཀ༌ སྔུན༌ནི༌ སང༌ མ༌མང༌པོ༌ སལ༌ལ༌ ཛདས༌ཁན༌བོའེ༌ སྐོར༌ལ༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌། གཙོ༌བོ༌ ནི༌ ཐུག༌རྗེ༌ དང༌ སྙིང༌རྗེ༌ གངས༌ཏེ༌ ཨིན༌ནོག༌།
JAM 5:12 ཨིན༌ནའང༌ ངའེ༌ སྤུན༌གུན༌, ཚང༌མའེ༌སང༌ ཁག༌ཅན༌བོ༌, ནམ༌ཁའ༌ ཡ༌ ཇིག༌རྟེན༌ ཡ༌ ཞན༌ ཅི༌ཞིག༌གིའང༌ ནའ༌ མ༌ནེ༌ མ༌ཁུར༌ཤིག༌། ཏེ༌བོའེ༌ ཚབས༌ལ༌ ཁྱོ༌ཞ༌གུན༌ནི༌ ཨིན༌ན༌ ཨིན༌, ཡ༌ མན༌ན༌ མན༌ ཟེར༌ཤིག༌, ཏེ༌ མ༌ནེ༌ ཁྱོ༌ཞ༌གུན༌ལ༌ ཁྲིམས༌ཅད༌ ཕོག༌ཨིན༌།
JAM 5:13 ཅི༌ ཁྱོ༌ཞའེ༌ ཕྲོ༌ནེ༌ སུ༌ཞིག༌ རྡུག༌པོའེ༌ ནང༌ང༌ ཡོད༌ད༌? ཏེ༌ནེ༌ དཀོན༌མཆོག༌ག༌ མོས༌ལམ༌ ཞུ༌ཤིག༌། ཅི༌ ཁྱོ༌ཞ༌གུན༌ ཐད༌པོ༌ ཨིན༌ན༌? ཏེ༌ནེ༌ དཀོན༌མཆོག༌ག༌ སྟོད༌པའེ༌ ལུ༌ ཕུལ༌ཤིག༌།
JAM 5:14 ཅི༌ ཁྱོ༌ཞའེ༌ ཕྲོ༌ནེ༌ སུ༌ཞིག༌ག༌ ཟུ༌མོ༌ ཡོད༌ད༌? ཏེ༌ནེ༌ ཁྱོ༌ཞ༌གུན༌ནི༌ ཆོས༌ཚོགས༌སི༌ འུ༌སྐྱོང༌གུན༌ལ༌ བོད༌, ཡང༌ ཁོང༌གུན༌ལ༌ ཁྱོ༌རང༌ང༌ གཙོ༌བོའེ༌ ཚན༌ ཝང༌ཅན༌ནི༌ ནང༌ང༌ མར༌ ལུགས༌ཏེ༌ མོས༌ལམ༌ ཞུ༌ཅུག༌ཤིག༌།
JAM 5:15 ཏེ༌ཙོགས༌སི༌ མོས༌ལམ༌ ཏད༌པ༌ ཉམ༌པོ༌ ཕུལ༌ཁན༌བོའེ༌ ནད༌པོ༌ གྱལ༌ཏེ༌ གཙོ༌བོའེ༌ ཁྱོ༌རང༌ ཕན༌ཅུག༌ག༌ ཛད༌ཨིན༌། ཀལ༌ཏེས༌ ཁྱོ༌རང༌ངི༌ སྡིག༌པ༌ ཅོས༌ཏེ༌ ཡོད༌ནའང༌ ཁྱོ༌རང༌ང༌ ཤགས༌པ༌ སལ༌ལ༌ ཛད༌ཨིན༌།
JAM 5:16 ཁྱོ༌ཞ༌གུན༌ གྱལ༌ཅེས༌སི༌ ཕིའ༌ ཁྱོ༌ཞའེ༌ སྡིག༌པ༌གུན༌ ཤད༌ཏེ༌ ཅིག༌ དང༌ ཅིག༌གི༌ ཕིའ༌ མོས༌ལམ༌ ཞུ༌ཤིག༌། མི༌ ཀྲང༌པོའེ༌ མོས༌ལམ༌ ཕུལ༌ཁན༌བོའ༌ མ༌སྲན༌ཏྲེ༌ ཁྱུད༌ ཡོད༌ཏེ༌ བྲས༌བུ༌ ཧ༌ལས༌ཤེས༌ སྨིན༌ན༌ནོག༌།
JAM 5:17 ལུང༌སྟོན༌པ༌ ཨེ༌ལི༌ཡཱ༌ ཨིད༌ཏུ༌ ཅོ༌ཤིག༌, ཁོང༌ ནི༌ ང༌དང༌ ཙོགས༌ལ༌ མི༌ཞིག༌ ཞུགས༌ཏེ༌ ཨིན༌པིན༌། ནམ༌ ཁོང༌ངི༌ སྙིང༌ནེ༌ དཀོན༌མཆོག༌ག༌ ཨིས༌ར༌ཨེལ༌ལི༌ ནང༌ང༌ ཆར༌པ༌ མི༌བབས༌ཤེས༌ལ༌ མོས༌ལམ༌ ཞུས༌པ༌, ལོ༌ སུམ༌ ནང༌ ཕེད༌ ཆར༌པ༌ མ༌བབས༌།
JAM 5:18 ཏེ༌ནེ༌ ཡང༌སྐྱར༌ ཁོང༌ངི༌ ཆར༌པ༌ ཕབ༌ཅེས༌ལ༌ མོས༌ལམ༌ ཕུལ༌ལ༌ཅིག༌, ཆར༌པ༌ བབས༌ཏེ༌ སའེ༌ཀ༌ སྟོན༌ཐོགས༌ སྨིན༌།
JAM 5:19 ངའེ༌ སྤུན༌གུན༌, ཀལ༌ཏེས༌ ཁྱོ༌ཞ༌གུན༌ནི༌ ཕྲོ༌ནེ༌ སུ༌ཞིག༌ དཀོན༌མཆོག༌གི༌ དེན༌བའེ༌ ལམ༌མི༌ ཀ༌ནེ༌ ནུར༌ཏེ༌ སོང༌ཏེ༌, ཞན༌མ༌ཞིག༌གི༌ ཁོ༌ ཏད༌པའེ༌ ནང༌ང༌ ལོགས༌ཏེ༌ ཁྱོངས༌ཏེ༌ ཡོད༌ན༌,
JAM 5:20 ལོགས༌ཏེ༌ ཁྱོང༌ཁན༌བོའེ༌ ཏེ༌ སྡིག༌ཅན༌བོ༌ ཉལ༌ཝའེ༌ ནང༌ནེ༌ ཐར༌ཅུགས༌ཏེ༌ སྡིག༌པ༌ མང༌པོ༌ཞིག༌གི༌ ཀ༌ནེ༌ ཤགས༌པ༌ ཐོབ༌ཅུགས༌ཁན༌བོ༌ ཁྱོ༌ཞ༌གུན༌ལ༌ ཏན༌ཏན༌ གྱུས༌ ཡོང༌གོས༌།
1PE 1:1 གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌ ང༌ པི༌ཏྲར༌རི༌ ཁྱོ༌ཞའ༌ དཀོན༌མཆོག༌གི༌ ལྡམ༌མ༌ ཛད༌ཁན༌ པོན༌ཏུས༌, གཱ༌ལ༌ཏི༌ཡ༌, ཀ༌པ༌དོ༌ཀི༌ཡཱ༌, ཨ༌སི༌ཨཱ༌ དང༌ བི༌ཏི༌ནི༌ཡཱ༌ ཡུལ༌གུན༌ནི༌ ནང༌ང༌ ཁྱེབས༌ཏེ༌ ཡོད༌ཁན༌གུན༌ནི༌ ཕིའ༌ བྲིའད༌།
1PE 1:2 ཇིག༌རྟེན༌ ཛད༌དི༌ སང༌ སྔུན༌ལ༌, དཀོན༌མཆོག༌ ཡབ༌བི༌ ཁྱོ༌ཞ༌གུན༌ ཤེས༌ཏེ༌ ལྡམ༌མ༌ ཛད༌ཏེ༌, ཏམ༌པའེ༌ ཐུག༌ཉིད༌ གྱུད༌ཏེ༌ ཏམ༌པ༌ ཅོའ༌ ཛདས༌། ཏེ༌བོའེ༌ ཞས༌ཏེ༌ ཁྱོ༌ཞ༌གུན༌ནི༌ ཡེ༌ཤུའི༌ ཁའ༌ཉནས༌, ཡང༌ མ༌ཤི༌ཀའེ༌ སྐུ༌ཁྲག༌ ཕོའ༌ ཛད༌ཅེས༌པོའེ༌ ཁྱོ༌ཞ༌གུན༌ རྩང༌མ༌ ཅོའ༌ ཛདས༌། ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ མང༌མི༌ སང༌ མང༌ང༌ ཐོབ༌ཤིག༌།
1PE 1:3 ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཡབ༌ དང༌ དཀོན༌མཆོག༌ག༌ སྟོད༌པ༌ ཕུལ༌ཤིག༌། ང༌དང༌གུན༌ལ༌ ཁོང༌ངི༌ སྙིང༌རྗེ༌ ཆེན༌མོ༌ ཛད༌ཏེ༌, མི༌ཚེ༌ སོ༌མ༌ཞིག༌ སལ༌ལ༌ ཛདས༌, ཅིའ༌ཟེར༌ན༌ དཀོན༌མཆོག༌གི༌ ཡེ༌ཤུ༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌། ཏ༌ ང༌དང༌གུན༌ནིའང༌ རེ༌ཝ༌ ཆེན༌མོ༌ ཉམ༌པོ༌ མི༌ཚེ༌ ཕུད༌ད༌ནོག༌།
1PE 1:4 ཏེ༌བོ༌ ནི༌ ནོར༌སྐལ༌ མ༌ནེ༌ མི༌རུལ༌ཁན༌, མ༌ནེ༌ ཚི༌ཏུ༌ མི༌ཆའ༌ཁན༌ དང༌ ལྡངས༌ མ༌ནེ༌ མི༌ཡོལ༌ཁན༌ ཀ༌བོ༌ ང༌དང༌གུན༌ནི༌ ཕིའ༌ ནམ༌ཁའེ༌ ནང༌ང༌ བོར༌ར༌ ཛད༌ཏེ༌ ཡོད༌།
1PE 1:5 ཁྱོ༌ཞ༌གུན༌ནི༌ ཏད༌པ༌ གྱུད༌ཏེ༌ དཀོན༌མཆོག༌གི༌ སྟོབས༌པོའེ༌ ཁྱོ༌ཞ༌གུན༌ལ༌ ཏེ༌ ཐར༌པ༌ ཐོབ༌ཐོབ༌ ཚོག༌པ༌ སྲུང༌སྐྱོབ༌ ཛད༌དུག༌, ཀ༌བོ༌ སྟིང༌ཇུག༌གི༌ ཏུས༌ལ༌, སྔོན༌ ཅུག༌ག༌ ཛད༌ཅེས༌ལ༌ གྲལ༌གྲིག༌ ཡོད༌།
1PE 1:6 ཏེན༌ན༌བོའེ༌ཕིའ༌ གའ༌མོ༌ ཅོ༌ཤིག༌། ཞན༌ དག༌ས༌ ཏུས༌ ཉུ༌ངུན༌ཞིག༌, ཁྱོ༌ཞ༌གུན༌ལ༌ ཚོད༌ལྟ༌ སོ༌སོའེ༌ ནང༌ང༌ རྡུག༌ངལ༌ ཐོང༌ནའང༌, ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཧ༌ལས༌ཤེས༌སི༌ ཐད༌པོ༌ ང༌ཏི༌ ཕིའ༌ སྲུངས༌ཏེ༌ ཡོད༌།
1PE 1:7 ཏེ༌ ཚོད༌ལྟ༌གུན༌ནི༌ ཁྱོ༌ཞའེ༌ ཏད༌པ༌ དེན༌བ༌ ཨིན༌ཁན༌བོ༌ སྟན༌ན༌ནོག༌, ཀ༌ཟུག༌གི༌ སེར༌ལ༌ སྟག༌ཅད༌ མེ༌ གྱུད༌ཏེ༌ ཅོས༌ཏེ༌ ལག༌མོ༌ ཅོའ༌ནོག༌, ཨིན༌ནའང༌ ཁྱོ༌ཞའེ༌ ཏད༌པ༌གུན༌ སེར༌རི༌ སང༌ མང༌ང༌ རིན༌ཅན༌ ཨིན༌ནོག༌། ཀལ༌ཏེས༌ ཁྱོ༌ཞ༌གུན༌ནི༌ ཏད༌པ༌བོ༌, ཚོད༌ལྟ༌གུན༌ནི༌ ནང༌ང༌ སྟན༌པོ༌ ལུས༌ན༌, གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌, ཁྱོ༌ཞ༌གུན༌ལ༌ སྟོད༌པ༌, སྤལ༌ དང༌ རྩི༌ཝ༌ ཐོབ༌ཨིན༌།
1PE 1:8 ཁྱོ༌ཞ༌གུན༌ནི༌ ཡེ༌ཤུ༌ མ༌ཇལ༌ནའང༌ ཁོང༌ང༌ ཅམས༌པ༌ ཅོའ༌ནོག༌, ཡང༌ དག༌ས༌ རང༌ངི༌ མིག༌ནེ༌ མ༌ཐོང༌ནའང༌, ཁོང༌ང༌ ཏད༌པ༌ ཅོས༌ཏེ༌ ཧ༌ལས༌ཤེས༌ དང༌ ཤད༌ མི༌ཉན༌ཅེས༌སི༌ ཐད༌པོ༌ ཅོའ༌ནོག༌།
1PE 1:9 ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཅོ༌ཅེས༌སི༌ སོལ༌རས༌པོ༌ ནི༌, ཁྱོ༌ཞ༌གུན༌ལ༌ ཐར༌པ༌ ཐོབ༌ཅེས༌པོ༌ ཨིན༌།
1PE 1:10 ཁྱོ༌ཞ༌གུན༌ནི༌ཀ༌ སྔོན༌ཅུག༌ཅེས༌སི༌ ཐུག༌རྗེའེ༌ ཐར༌པའེ༌ སྐོར༌ལ༌ ལུང༌སྟན༌ ཛད༌ཁན༌ནི༌ ལུང༌སྟོན༌པ༌གུན༌ནི༌, གྱལ༌ལ༌ ཅོས༌ཏེ༌ རྩར༌ཅོད༌ ཅོའ༌ ཛདས༌།
1PE 1:11 ཏེ༌གུན༌ལ༌ མ༌ཤི༌ཀའ༌ རྡུག༌ངལ༌ ཇུངས༌ཏེ༌ སྤལ༌ ཐོབ༌ཅེས༌སི༌ ཏུས༌ དང༌ ནས༌ལུགས༌ གུན༌ནི༌ སྐོར༌ལ༌ ཧ༌གོ༌ཅེས༌སི༌ དོད༌པ༌ ཡོད༌པིན༌, ཀ༌བོ༌ ཁོང༌གུན༌ནི༌ ནང༌ང༌ ཡོད༌ཁན༌ནི༌ མ༌ཤི༌ཀའེ༌ ཐུག༌ཉིད༌དི༌ ཁོང༌གུན༌ལ༌, ཏེ༌གུན༌ ཇུང༌ངི༌ སང༌ སྔུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌པིན༌།
1PE 1:12 ཏེ༌ ལུང༌སྟོན༌པ༌གུན༌ནི༌ ཞབས༌ཏོག༌པོ༌, ཁོང༌རང༌གུན༌ནི༌ ཕིའ༌ མན༌པ༌, ཁྱོ༌ཞ༌གུན༌ནི༌ ཕིའ༌ ཨིན༌ཁན༌བོ༌ ཁོང༌གུན༌ལ༌ སྔོན༌ ཅུག༌ག༌ ཛད༌ཏེ༌ ཨིན༌པིན༌། ཏ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤད༌ཁན༌གུན༌ནི༌, ནམ༌ཁའ༌ནེ༌ བབས༌ཁན༌ནི༌ ཏམ༌པའེ༌ ཐུག༌ཉིད༌དི༌ རོགས༌ ཉམ༌པོ༌ ཤད༌ད༌ནོག༌, ཡང༌ ཕོ༌ཉ༌གུན༌ལའང༌, འི༌གུན༌ནི༌ སྐོར༌ལ༌ ཧ༌གོ༌ཅེས༌སི༌ དོད༌པ༌ ཆེན༌མོ༌ ཡོད༌པིན༌།
1PE 1:13 ཏེན༌ན༌བོའེ༌ཕིའ༌ ཇིག༌རྟེན༌ནི༌ ནང༌ང༌ ཡོད༌ཁན༌གུན༌ནི༌ ཆོགས༌ལ༌ སམ༌བ༌ མ༌ཏང༌ང༌, རང༌སེམས༌ ཅུན༌ཏེ༌ ཡེ༌ཤུ༌ མ༌ཤི༌ཀ༌ སྔོན༌ནི༌ ཏུས༌ལ༌ ཐོབ༌ཅེས༌ཅན༌ནི༌ ཐུག༌རྗེ༌ ཐར༌པ༌བོའེ༌ཀ༌ སྟན༌པོ༌ རེ༌ཝ༌ བོར༌ཤིག༌།
1PE 1:14 ཁྱོ༌ཞའེ༌ ནང༌ང༌ དཀོན༌མཆོག༌ མ༌ཤེས༌སི༌ སང༌ སྔུན༌ལ༌ ཡོད༌ཁན༌ནི༌ དོད༌པ༌ ངན༌པ༌གུན༌ནི༌ གྱབ༌ནེ༌ མ༌གྲུལ༌ལ༌, དཀོན༌མཆོག༌གི༌ ཁའ༌ ཉན༌ཁན༌ནི༌ ཕྲུ༌གུ༌གུན༌ ཙོགས༌ གྱུར༌ཤིག༌།
1PE 1:15 མ༌ཚད༌ ཁྱོ༌ཞ༌གུན༌ བོད༌ད༌ ཛད༌ཁན༌ དཀོན༌མཆོག༌ ཁོང༌རང༌ ཏམ༌པ༌ ཨིན༌ཁན༌ ཙོགས༌ལ༌ ཅི༌ས༌ཐོག༌ནེ༌ ཁྱོ༌ཞ༌རང༌ངི༌ མི༌ཚེ༌ ཏམ༌པ༌ཞིག༌ པུད༌ཤིག༌།
1PE 1:16 ཅིའ༌ཟེར༌ན༌ ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌, “ང༌ ཏམ༌པ༌ ཨིན༌པ༌ ཁྱོ༌ཞ༌གུན༌ནའང༌ ཏམ༌པ༌ གྱུར༌གོས༌ ” མོལ༌ཏེ༌ དུག༌།
1PE 1:17 ཡང༌ འི༌གུན༌ ཨིད༌ཏུ༌ བོར༌ཤིག༌, ཁྱོ༌ཞ༌གུན༌ནི༌ མོས༌ལམ༌ ཕུལ༌ཁན༌, ནམ༌ཁའེ༌ ཡབ༌བི༌ ཆོགས༌རིས༌ ཛད༌ད༌ མ༌ནོག༌། ཁྱོ༌ཞ༌གུན༌ནི༌ ཅོ༌ཁན༌ ནང༌ཞིན༌ལ༌ ཁོང༌ངི༌ ཁྲིམས༌ཅད༌ ཡ༌ སོལ༌རས༌ སལ༌ཅེས༌ ཨིན༌ པ༌སང༌, ཇིག༌རྟེན༌ནི༌ཀ༌ མི༌ཚེ༌བོ༌ བེས༌པ༌ཞིག༌ ཙོགས༌ལ༌ དཀོན༌མཆོག༌ག༌ རྩི༌ཝ༌ དང༌ ཁོང༌ངི༌ ཇིགས༌སི༌ ནང༌ང༌ ཕུད༌ཤིག༌།
1PE 1:18 ཁྱོ༌ཞ༌གུན༌ལ༌ གྱུས༌ཨིན༌ནོག༌, ཁྱོ༌ཞ༌གུན༌ ཁྱོ༌ཞའེ༌ ཕ༌མེས༌པོ༌གུན༌ནེ༌ ཐོབ༌ཁན༌ནི༌ ཕན༌མི༌ཐོགས༌སི༌ མི༌ཚེ༌ནེ༌ ཐར༌ཏེ༌ ཨིན༌, ཨིན༌ནའང༌ ཏེ༌བོ༌ མེད༌ཁན༌ ཆ༌ཉན༌ཅེས༌སི༌ སེར༌ ཡ༌ མུལ༌ གུན༌ གྱུད༌ཏེ༌ མན༌པ༌, སྡིག༌པ༌ ཡ༌ སྐྱོན༌མེད༌ཁན༌ནི༌ ལུ༌གུ༌, མ༌ཤི༌ཀའེ༌ སྐུ༌ཁྲག༌ རིན༌ཅན༌ ཤལ༌ཏེ༌, ཉོའ༌ཛད༌ཏེ༌ ཨིན༌ནོག༌།
1PE 1:20 ཁོང༌ ཇིག༌རྟེན༌ མ༌ཆགས༌སི༌ སང༌ སྔུན༌ལ༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཨིན༌པིན༌། ཨིན༌ནའང༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ འི༌ སྟིང༌ཇུག༌གི༌ ཞག༌གུན༌ནི༌ ནང༌ང༌ ཁོང༌ སྔོན༌ ཅུག༌ག༌ ཛད༌ཏེ༌ ཨིན༌།
1PE 1:21 གཙོ༌བོ༌ ཡེ༌ཤུ༌ གྱུད༌ཏེ༌, ཁྱོ༌ཞ༌གུན༌ནི༌ དཀོན༌མཆོག༌གི༌ ནང༌ང༌ ཨིད༌ཤེས༌ ཅོའ༌ནོག༌། དཀོན༌མཆོག༌གི༌ ནང༌ང༌ ཁྱོ༌ཞ༌གུན༌ནི༌ ཏད༌པ༌ དང༌ རེ༌ཝ༌ བོར༌ར༌ནོག༌, ཅིའ༌ཟེར༌ན༌ ཁོང༌ངི༌ ཤི༌ཁན༌གུན༌ནི༌ ཕྲོ༌ནེ༌, ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ སྤལ༌ སལ༌ལ༌ ཛདས༌།
1PE 1:22 ཏ༌ ཁྱོ༌ཞ༌གུན༌ནི༌ དེན༌བ༌བོའ༌ ཁའ༌ཉན༌ཅེས༌པོའེ༌, ཁྱོ༌ཞའ༌ རྩང༌མ༌ གྱུར༌ཏེ༌ ཨིན༌ནོག༌། ཏེ༌བོའེ༌ཕིའ༌ མིང༌སྲིང༌ ཙོགས༌ལ༌ ཁྱོ༌ཞའ༌ ཅིག༌ དང༌ ཅིག༌གི༌ ནང༌ང༌ དེན༌བའེ༌ ཅམས༌པ༌ ཡོང༌གོས༌། ཏ༌ སྙིང༌ངི༌ ཐིལ༌ནེ༌ ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌།
1PE 1:23 ཁྱོ༌ཞ༌གུན༌ རུལ༌ཅེས༌ཅན༌ནི༌ ས༌འོན༌ནེ༌ མ༌སྐྱེའ༌, སོན༌པོ༌ དང༌ ཏུས༌གྱུན༌ ཞུགས༌ཁན༌ དཀོན༌མཆོག༌གི༌ བཀའ༌ གྱུད༌ཏེ༌ མ༌ནེ༌ མི༌རུལ༌ཅེས༌ཅན༌ནི༌ ས༌འོན༌ནེ༌ ཡང༌སྐྱར༌ སྐྱེས༌ཏེ༌ ཨིན༌།
1PE 1:24 ཏམ༌པའེ༌ སུང༌རབས༌སི༌ མོལ༌དུག༌, “མི༌ཚང༌མ༌ ནི༌ རྩཱ༌ ཙོགས༌ ཨིན༌། ཁོང༌གུན༌ནི༌ སྤལ༌ ཚང༌མ༌ རྩཱའེ༌ མེན༌ཏོག༌ ཙོགས༌ ཨིན༌། རྩཱ༌ སྐམས༌ཏེ༌ མེན༌ཏོག༌ ཡོལ༌ལ༌ནོག༌།
1PE 1:25 ཨིན༌ནའང༌ དཀོན༌མཆོག༌གི༌ བཀའ༌ ཏུས༌གྱུན༌ ལུས༌ཨིན༌།” ཏེ༌ བཀའ༌བོ༌ ནི༌, ཁྱོ༌ཞ༌གུན༌ལ༌ ཤད༌ཁན༌ནི༌ གའ༌མོའེ༌ ནས༌ཚུལ༌བོ༌ ཨིན༌ནོག༌།
1PE 2:1 ཏེན༌ན༌བོའེ༌ཕིའ༌ ཟུན༌ ཏང༌ཅེས༌, ཁ༌ཆོས༌ ཅོ༌ཅེས༌, ཚིག༌ཅེས༌, མིའི༌ སྕོད༌པའེ༌ སྐོར༌ལ༌ སྤེ༌ར༌ རྩོག༌པོ༌ ཟེར༌ཅེས༌སི༌ སྕོད༌པ༌ ངན༌པ༌ ཚང༌མ༌ ཕང༌གོས༌།
1PE 2:2 ཐར༌པའེ༌ ཅིན༌ལབས༌ གང༌པོ༌ ཐོབ༌ཅེས༌སི༌ ཕིའ༌ ཕྲུ༌གུ༌ ཆུ༌ངུན༌ སྐྱེས༌ཁན༌ ཙོགས༌ལ༌ ཐུག༌ཉིད༌དི༌ འོ༌མ༌ ལག༌མོ༌ ཐུང༌ཅེས༌ལ༌ སྲན༌ཏྲེ༌ དོད༌པ༌ ཅོ༌ཤིག༌།
1PE 2:3 ཏ༌ གཙོ༌བོ༌ ཟང༌པོ༌ ཨིན༌ཁན༌ནི༌ བྲོད༌པོ༌ ཁྱོ༌ཞའེ༌ ཉངས༌ཏེ༌ ཨིན༌ནོག༌།
1PE 2:4 སོན༌པོ༌ ཀྲུ༌རྡོ༌ ཞུགས༌ཁན༌ གཙོ༌བོའེ༌ཀ༌ ཁྱོ༌ཞ༌གུན༌ ཡོང༌ཤིག༌, ཀ༌བོ༌ མི༌གུན༌ནི༌ ཕང༌ནའང༌ དཀོན༌མཆོག༌གི༌ ལྡམ༌མ༌ ཛད༌ཏེ༌ ཁོང༌ངི༌ ཕིའ༌ རིན༌ཅན༌ ཨིན༌།
1PE 2:5 ཁྱོ༌ཞའ༌ རྡོའ༌ སོན༌པོ༌ དཀོན༌མཆོག༌གི༌ ཐུག༌ཉིད༌དི༌ ཆོད༌ཁང༌ རྩིག༌ཅེས༌ལ༌ ཀོལ༌ལ༌ ཛད༌ཁན༌གུན༌ ཨིན༌ནོག༌, ཡང༌ ཁྱོ༌ཞའ༌ ཁོང༌ངི༌ བླ༌མ༌ ཏམ༌པ༌, ཀ༌གུན༌ནི༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ དཀོན༌མཆོག༌གི༌ སྐུན༌དུན༌ལ༌ འོས༌པ༌ ཨིན༌ཁན༌ནི༌ སེམས༌ཉིད༌དི༌ ཆོད༌པ༌ ཕུལ༌ལ༌ནོག༌།
1PE 2:6 ཏམ༌པའེ༌ སུང༌རབས༌སི༌ ནང༌ང༌ དཀོན༌མཆོག༌གི༌ མོལ༌ལ༌ ཛད༌ཏེ༌ དུག༌། “ལྟོས༌ཤིག༌ ཡེ༌རུ༌ཤ༌ལེམ༌མི༌ གྱལ༌སའེ༌ ནང༌ང༌ ངའེ༌ ལྡམས༌ཁན༌ནི༌ ཀྲུ༌རྡོ༌ རིན༌ཅན༌ཞིག༌ བོར༌རད༌, སུ༌ཞིག༌གི༌ ཁོང༌ངི༌ཀ༌ ཏད༌པ༌ ཅོ༌ཨིན༌ ཏེ༌ མི༌བོ༌ མ༌ནེ༌ ཁྲེལ༌བ༌ མི༌ཆ༌།”
1PE 2:7 ཏ༌ ཁྱོ༌ཞའ༌ ཏད༌པ༌ ཅོ༌ཁན༌གུན༌ནི༌ ཕིའ༌ ཏེ༌ རྡོའ༌བོ༌, མ༌ རིན༌ཅན༌ཞིག༌ ཨིན༌། ཨིན༌ནའང༌ ཏད༌པ༌ མ༌ཅོ༌ཁན༌གུན༌ནི༌ ཕིའ༌, “ཀ༌ རྡོའ༌བོ༌ ཁང༌པ༌ རྩིག༌ཁན༌གུན༌ནི༌ ཕན༌མི༌ཐོགས༌ ཐེས༌, ཏེན༌ན༌ རྡོའ༌བོ༌ ཁང༌པའེ༌ ཀྲུ༌རྡོའ༌བོ༌ གྱུར༌ ཀ༌བོ༌ ཚང༌མའེ༌སང༌ ཁག༌ཅན༌ རྡོའ༌བོ༌ ཨིན༌ནོག༌།”
1PE 2:8 ཡང༌ “ཁོང༌ ནི༌ མི༌གུན༌ སྒག༌གྱབས༌ ཅུག༌ཁན༌ནི༌ རྡོའ༌ དང༌ ཏེ༌གུན༌ གྱེལ༌ཅུག༌ཁན༌ནི༌ ཕོ༌ལོངས༌ ཙོགས༌ ཨིན༌ནོག༌།” ཁོང༌གུན༌ནི༌ དཀོན༌མཆོག༌གི༌ བཀའ༌ ཁའ༌ མི༌ཉན༌ཅེས༌པོའེ༌, སྒག༌གྱབ༌བ༌ནོག༌, ཏེན༌ན༌བོ༌, ཁོང༌གུན༌ནི༌ ཕིའ༌ དཀོན༌མཆོག༌གི༌ ཐུག༌གོངས༌ ཨིན༌པིན༌།
1PE 2:9 ཨིན༌ནའང༌ ཁྱོ༌ཞ༌གུན༌ ནི༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མི༌གུན༌, གྱལ༌རིགས༌སི༌ བླ༌མ༌, གྱལ༌ཁབ༌ ཏམ༌པ༌ དང༌ དཀོན༌མཆོག༌ ཁོང༌རང༌ངི༌ མི༌གུན༌ ཨིན༌ནོག༌, ཏེན༌ན༌བོའེ༌ ཞས༌ཏེ༌ ཁྱོ༌ཞ༌གུན༌ལ༌ མུན༌གྲིག༌ནེ༌ ཁོང༌ངི༌ ཧ༌ལས༌ཤེས༌སི༌ འོད༌དི༌ ནང༌ང༌ བོད༌ད༌ ཛད༌ཁན༌ནི༌ དཀོན༌མཆོག༌གི༌ ཆག༌ལས༌ ཟང༌པོ༌གུན༌ལ༌ ཁྱོ༌ཞའེ༌ སྟོད༌པ༌ ཕུལ༌ ཉན༌ཨིན༌།
1PE 2:10 “སྔུན༌ལ༌ ཁྱོ༌ཞའ༌ དཀོན༌མཆོག༌གི༌ མི༌ མན༌པིན༌, ཏ༌ དཀོན༌མཆོག༌གི༌ མི༌གུན༌ གྱུར༌ཏེ༌ ཨིན༌ནོག༌། སྔུན༌ལ༌ ཁྱོ༌ཞའ༌ སྙིང༌རྗེ༌ མ༌ཐོབ༌བ༌ ཨིན༌པིན༌, ཏ༌ སྙིང༌རྗེ༌ ཐོབ༌ཏེ༌ ཨིན༌ནོག༌།”
1PE 2:11 ཅེས༌པའེ༌ སྤུན༌གུན༌, ཁྱོ༌ཞ༌རང༌གུན༌ སེམས༌ཉིད༌དི༌ གྱབ༌གལ༌ལ༌ ནོལ༌ཨིན༌ དུག༌ཁན༌ནི༌ སྡིག༌པའེ༌ དོད༌པ༌གུན༌ནེ༌ ཐག༌རིང༌ང༌ བོར༌ཏེ༌ འི༌ ཇིག༌རྟེན༌ནི༌ ནང༌ང༌ གྲོན༌པོ༌ དང༌ བེས༌པ༌ གུན༌ ཙོགས༌ལ༌ མི༌ཚེ༌ ཕུད༌ཅེས༌ལ༌ སྤོས༌པ༌ ཏང༌ངད༌།
1PE 2:12 ཏད༌པ༌ མེད༌ཁན༌ནི༌ ཁྱིམ༌ཚེས༌པ༌གུན༌ནི༌ ཕྲོའ༌, ཁྱོ༌ཞ༌གུན༌ནི༌ མི༌ཚེ༌ ཟང༌པོ༌ཞིག༌ ཕུད༌ཤིག༌, ཞན༌ ཁོང༌གུན༌ནི༌ ཁྱོ༌ཞ༌གུན༌ལ༌ ངན༌པ༌ ཅོས༌ཏེ༌ ཨིན༌ནོག༌ ཟེར༌ཏེ༌ ཉད༌གལ༌ ཏང༌ནའང༌, ཁོང༌གུན༌ནི༌ ཁྱོ༌ཞ༌གུན༌ནི༌ ལས༌ ཟང༌པོ༌གུན༌ ཐོང༌ཅེས༌པོའེ༌, དཀོན༌མཆོག༌ག༌ སྟོད༌པ༌ ཕུལ༌ཨིན༌, ནམ༌ ཁོང༌ ཇིག༌རྟེན༌ནི༌ཀ༌ ཁྲིམས༌ཅད༌ ཛད༌ད༌ལ༌ སྐྱོད༌ཨིན༌།
1PE 2:13 དཀོན༌མཆོག༌གི༌ རྩི༌ཝའེ༌ ཕིའ༌ ཁྱོ༌ཞ༌གུན༌ འི༌ ཇིག༌རྟེན༌ནི༌ཀ༌ ཝང༌ ཡོད༌ཁན༌གུན༌ནི༌ ཡོག༌ག༌ དུག༌ཤིག༌: ཚང༌མའེ༌སང༌ ཝང༌ ཆེ༌ཤོག༌ ཡོད༌ཁན༌ གྱལ༌པོ༌,
1PE 2:14 ཡ༌ གྱལ༌པོའེ༌ ཀའ༌ལོན༌, ཀ༌གུན༌ མི༌འོས༌པ༌ ཅོ༌ཁན༌གུན༌ལ༌ ཆད༌པ༌ ཅད༌ཅེས༌ དང༌, འོས༌པ༌ ཅོ༌ཁན༌གུན༌ལ༌ སྟོད༌པ༌ ཏང༌ཅེས༌སི༌ ཕིའ༌ ཁྱོ༌ཞའ༌ ཡོད༌ས༌ ཀལ༌ཏེ༌ ཨིན༌།
1PE 2:15 དཀོན༌མཆོག༌གི༌ ཐུག༌གོངས༌པོ༌ ཁྱོ༌ཞ༌གུན༌ནི༌ ལས༌ ཟང༌པོ༌ ཅོས༌ཏེ༌, སམ༌བ༌ མེད༌ཁན༌གུན༌ནི༌ ཏོན༌ཏག༌ མེད༌ཁན༌ནི༌ སྤེ༌ར༌གུན༌ སྒག༌ཅེས༌པོ༌ ཨིན༌ནོག༌།
1PE 2:16 ཁྱོ༌ཞའེ༌ རང༌ཝང༌ཅན༌ནི༌ མི༌གུན༌ ཙོགས༌ལ༌ མི༌ཚེ༌ ཕུད༌ཤིག༌, ཨིན༌ནའང༌ དཀོན༌མཆོག༌གི༌ ཞབས༌ཏོག༌པ༌ ཨིན༌ པ༌སང༌, ཁྱོ༌ཞ༌གུན༌ནི༌ རང༌ཝང༌བོ༌ ངན༌པ༌ ཅོ༌ཅེས༌སི༌ ནང༌ང༌ མ༌ཀོལ༌ཤིག༌།
1PE 2:17 ཚང༌མ༌ལ༌ ཀུས༌པ༌, སྤུན༌གུན༌ལ༌ ཡ༌ཤ༌, དཀོན༌མཆོག༌ག༌ ཇིགས༌ཤེས༌ དང༌ གྱལ༌པོའ༌ རྩི༌ཝ༌ ཅོ༌ཤིག༌།
1PE 2:18 དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ ཁྱོ༌ཞའ༌ ཚེ༌ཡོག༌གུན༌ནི༌ སྤོན༌བོ༌ ཟང༌པོ༌ དང༌ བོལ༌མོ༌ ཡོད༌ཁན༌ ཅིག༌པོ༌ མན༌པ༌ ངན༌པ༌ སྤོན༌པོ༌གུན༌ནི༌ ཝང༌ངི༌ ཡོག༌གའང༌ དུག༌ཤིག༌།
1PE 2:19 ཀལ༌ཏེས༌ འོས༌པ༌ མན༌ཁན༌ནི༌ ནགས༌ དང༌ བར༌དོ༌ གུན༌ ཟོད༌པ༌ ཉམ༌པོ༌ ཁུར༌ཨིན༌ ཁྱོ༌ཞ༌གུན༌ནི༌ འོས༌པའེ༌ ལས༌པོ༌ ཅོའད༌ན༌, དཀོན༌མཆོག༌ ཐུགས༌ཐད༌ད༌ ཛད༌ད༌ནོག༌།
1PE 2:20 ཨིན༌ནའང༌ ཀལ༌ཏེས༌ ཁྱོ༌ཞའེ༌ ངན༌པ༌ ཅོས༌ཏེ༌ ཁྱོ༌ཞའ༌ རྡུངས༌ཁན༌བོ༌ ཟོད༌པ༌ ཉམ༌པོ༌ ཁུར༌ན༌, ཏེ༌ནེ༌ ཁྱོ༌ཞའ༌ སྟོད༌པ༌ ཅིའ༌ ཐོབ༌ཨིན༌? ཏ༌ ཟང༌པོ༌ ཅོས༌ཏེ༌ ནགས༌ ཁུར༌ཏེ༌ ཟོད༌པ༌ བོར༌རད༌ན༌, ཏེ༌བོའ༌ དཀོན༌མཆོག༌གི༌ སྟོད༌པ༌ སལ༌ལ༌ ཛད༌ཨིན༌།
1PE 2:21 ཁྱོ༌ཞ༌གུན༌ ཏེན༌ན༌ ཙོགས༌སི༌ མི༌ཚེ༌ ཕུད༌ཅེས༌ལ༌ དཀོན༌མཆོག༌གི༌ བོད༌ད༌ ཛད༌ཏེ༌ ཨིན༌ནོག༌, ཅིའ༌ཞུ༌ན༌ ཁྱོ༌ཞ༌གུན༌ནི༌ ཕིའ༌ མ༌ཤི༌ཀའེ༌ རྡུག༌ངལ༌ ནམས༌། ཁོང༌, ཁྱོ༌ཞ༌གུན༌ནི༌ ཕིའ༌ སྤེ༌ཞིག༌ ཨིན༌, ཀ༌བོའེ༌ཀ༌ ཁྱོ༌ཞའ༌ གྲུལ༌གོ༌ཤེས༌ ཨིན༌ནོག༌།
1PE 2:22 “ཁོང༌ངི༌ ཅའང༌ སྡིག༌པ༌ མ༌ཛདས༌, ཡང༌ ཁོང༌ངི༌ སུ༌ཞིག༌གའང༌ གོབ༌སྐོར༌ར༌ མ༌ཛདས༌། ”
1PE 2:23 ཁོང༌ང༌ ངན༌པ༌ ཟེར༌ཁན༌གུན༌ནི༌ ལན༌ལ༌, ཁོང༌ངི༌ ཏེན༌ན༌ ཙོགས༌ ཅོའ༌ མ༌ཛདས༌། ཡང༌ ཁོང༌ང༌ རྡུག༌ངལ༌ ཐོང༌ ཟ༌ནེ༌ སུ༌ཞིག༌གའང༌ ལན༌ཏང༌ཨིན༌ མ༌མོལས༌། ཨིན༌ནའང༌ ཁོང༌ངི༌ ཁོང༌རང༌ དཀོན༌མཆོག༌གི༌ ཆག༌ག༌ སྟད༌ད༌ ཛདས༌, ཀ༌བོའེ༌ འོས༌པའེ༌ ཁྲིམས༌ཅད༌ ཛད༌ད༌ནོག༌།
1PE 2:24 ང༌དང༌གུན༌ནི༌ སྡིག༌པའེ༌ དོད༌པ༌གུན༌ མེད༌ཁན༌ དང༌ མི༌ཚེ༌ ཀྲང༌པོ༌ཞིག༌ ཕུད༌ཅེས༌སི༌ ཕིའ༌, ཁོང༌ངི༌ ཁོང༌རང༌ངི༌ སྐུ༌ཟུགས༌སི༌ཀ༌ ང༌དང༌གུན༌ནི༌ སྡིག༌པའེ༌ ཁུ༌རུ༌བོ༌ ནམས༌ཏེ༌, རྐྱང༌ཤིང༌ངི༌ཀ༌ ཀྲོངས༌། ཡང༌ མ༌ཤི༌ཀའེ༌ མ༌ཁའ༌ གྱུད༌ཏེ༌ ང༌དང༌གུན༌ ཕན༌ཅུག༌ག༌ ཛདས༌།
1PE 2:25 ཏུས༌ཤིག༌ག༌, ཁྱོ༌ཞ༌གུན༌ ལམ༌ སྟོར༌ཁན༌ནི༌ ལུག༌ ཙོགས༌ ཨིན༌པིན༌། ཨིན༌ནའང༌ དག༌ས༌ ཁྱོ༌ཞ༌གུན༌ནི༌ སེམས༌སི༌ དག༌པོ༌, རང༌ངི༌ ལུག༌རྫི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ དུན༌ལ༌ ལོགས༌ཏེ༌ ཡོངས༌ཏེ༌ ཨིན༌།
1PE 3:1 ཏེན༌ན༌ ཙོགས༌ལ༌ ན༌མ༌གུན༌ རང༌ངི༌ མག༌པའེ༌ ཝང༌ངི༌ ཡོག༌ག༌ དུག༌ཤིག༌། ཀལ༌ཏེས༌ ཁ༌ཅིག༌གི༌ གའ༌མོའེ༌ ནས༌ཚུལ༌ལ༌ ཨིད༌ཤེས༌ མ༌ཅོ༌ནའང༌, ཁྱོ༌ཞ༌གུན༌ནི༌ མི༌ཚེ༌ ཕུད༌ཚུལ༌བོའེ༌ ཞས༌ཏེ༌ ཁྱོ༌ཞའ༌ ཤད༌གོས༌ མེད༌པ༌ ཁོང༌གུན༌ནི༌ སྙིང༌ངི༌ ནང༌ང༌ གྱུར༌ཇ༌ ཡོངས༌ཏེ༌ ཏད༌པ༌ ཅོ༌ཨིན༌།
1PE 3:2 ཁྱོ༌ཞ༌གུན༌ནི༌ སེམས༌ ལག༌མོ༌ དང༌ རང༌ངི༌ མག༌པའ༌ རྩི༌ཝ༌ ཅོ༌ཅེས༌པོ༌ ཐོང༌ཏེ༌, ཁོང༌གུན༌ནི༌ མ༌ཤི༌ཀའེ༌ཀ༌ ཏད༌པ༌ ཁྱོང༌ཨིན༌།
1PE 3:3 ཕི༌ལོག༌གི༌ ཟུགས༌སི༌ ཐོག༌ནེ༌ ཛེས༌མོ༌ ཅོ༌ཅེས༌སི༌ རྩོན༌གྲུས༌ མ༌ཅོ༌ཤིག༌, སྤེར༌ན༌ སྲ༌གུན༌ ཞིལ༌ཞིལ༌ལ༌ ཕུད༌ཅེས༌, སེར༌རི༌ གྱན༌ཆ༌ ཏག༌ཅེས༌ ཡང༌ ཀོས༌ རིན༌ཅན༌ གོན༌ཅེས༌གུན༌།
1PE 3:4 ཨིན༌ནའང༌ སེམས༌ པས༌མོ༌ དང༌ བོལ༌མོ༌ ཅོས༌ཏེ༌ ཁྱོ༌ཞ༌རང༌ སེམས༌སི༌ ནང༌ང༌ ཛེས༌མོ༌ ཅོ༌ཤིག༌, འི༌ཙོགས༌སི༌ སྕོད༌ལམ༌གུན༌ དཀོན༌མཆོག༌གི༌ སྐུན༌དུན༌ལ༌ མ༌ རིན༌ཅན༌ ཨིན༌ནོག༌།
1PE 3:5 ཅིའ༌ཟེར༌ན༌ སྔུན༌མའེ༌ ཏུས༌ལའང༌, དཀོན༌མཆོག༌གི༌ཀ༌ ཏད༌པ༌ བོར༌ཁན༌ནི༌ བུ༌མོ༌ ཏམ༌པ༌གུན༌ནི༌, ཏེན༌ན༌ ཙོགས༌ལ༌ ཟབ༌བད༌པིན༌, ཡང༌ ཁོ༌རང༌གུན༌ རང༌ངི༌ མག༌པའེ༌ ཝང༌ངི༌ ཡོག༌ག༌ སྟད༌དད༌པིན༌།
1PE 3:6 སྤེར༌ན༌ སཱ༌རའེ༌ མག༌པ༌ ཨབ༌ར༌ཧམ༌མི༌ ཁའ༌ཉན༌ཏེ༌ ཁོང༌ང༌ རང༌ངི༌ སྤོན༌བོ༌ ཐེའད༌པིན༌། ཀལ༌ཏེས༌ ཁྱོ༌ཞའེ༌ མག༌པ༌གུན༌ནི༌ ཅི༌ ཅོས༌ ཏང༌ཨིན༌ སམས༌ཏེ༌ ཇིགས༌ མ༌ཇིགས༌ས༌ འོས༌པ༌ ཨིན༌ཁན༌བོ༌ ཅོ༌ན༌, ཁྱོ༌ཞ༌གུན༌ནའང༌ སཱ༌རའེ༌ བུ༌མོ༌གུན༌ ཐེའ༌ ཛད༌ཨིན༌།
1PE 3:7 ཏེན༌ན༌ ཙོགས༌ལ༌ ཁྱོ༌ཞའ༌ མག༌པ༌གུན༌ནི༌ རང༌ངི༌ ན༌མ༌ ཉམ༌པོ༌ མི༌ཚེ༌ ཕུད༌ ཟ༌ནེ༌, བུ༌མོ༌གུན༌ ཁྱོ༌ཞའེ༌ སང༌ ཤེད༌མེད༌ ཨིན༌ པ༌སང༌, ཁོང༌གུན༌ ཉམ༌པོ༌ བོལ༌མོ༌ ཡང༌ དཀོན༌མཆོག༌གི༌ མི༌ཚེ༌ སོ༌མའེ༌ སོལ༌རས༌སི༌ ནང༌ང༌, ཁོང༌གུན༌ནའང༌ དྲན༌དྲ༌ ཁག༌ ཡོད༌ཅེས༌པོའེ༌ ཀུས༌པ༌ ཅོ༌ཤིག༌། ཏེ༌ཟུག༌ ཅོ༌ན༌ དཀོན༌མཆོག༌གི༌ ཁྱོ༌ཞའེ༌ མོས༌ལམ༌གུན༌ སན༌ན༌ ཛད༌ཨིན༌།
1PE 3:8 སྟིང༌ཇུག༌ག༌, ཁྱོ༌ཞའ༌ ཚང༌མ༌ སེམས༌ ཅིག༌ སོང༌ཏེ༌ དུག༌ཤིག༌, ཅིག༌ དང༌ ཅིག༌ག༌ སྣང༌ང༌ བོར༌, ཅམས༌པ༌, སྙིང༌རྗེ༌, དང༌ སེམས༌ པས༌མོ༌ ཅོ༌ཤིག༌།
1PE 3:9 ངན༌པའེ༌ ལན༌ལ༌ ངན༌པ༌ མ༌ཅོ༌ཤིག༌, ཡང༌ སུ༌ཞིག༌གི༌ ཁྱོ༌ཞའེ༌ སྐོར༌ལ༌ སྤེ༌ར༌ རྩོག༌པོ༌ ཟེར༌ན༌ ཏེ༌བོའེ༌ ལན༌ལ༌ ཁྱོ༌ཞེའང༌ ཏེ༌ཙོགས༌ མ༌ཅོའ༌, ཏེ༌བོའེ༌ ཚབས༌ལ༌ ཏེ༌གུན༌ལ༌ ཅིན༌ལབས༌ ཏོང༌ཤིག༌། ཅིའ༌ཞུ༌ན༌ དཀོན༌མཆོག༌གི༌ ཁྱོ༌ཞ༌གུན༌ ཏེན༌ན༌བོའེ༌ ཕིའ༌ བོད༌ད༌ ཛད༌ཏེ༌ ཨིན༌ནོག༌, ཡང༌ ཏེ༌ཟུག༌ ཅོ༌ན༌ ཁོང༌ངི༌ ཁྱོ༌ཞ༌གུན༌ལ༌ ཅིན༌ལབས༌ སལ༌ལ༌ ཛད༌ཨིན༌།
1PE 3:10 ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌། “ཀལ༌ཏེས༌ ཁྱོ༌ཞའ༌ མི༌ཚེ༌ ནང༌ང༌ སྐྱིད༌པོ༌ ཡང༌ ཞག༌ ཟང༌པོ༌ མང༌པོ༌ ཐོང༌ཅེས༌སི༌ དོད༌པ༌ ཡོད༌ན༌, ཁྱོ༌ཞ༌གུན༌ནི༌ ལྕེའ༌ སྤེ༌ར༌ ངན༌པ༌ ཡང༌ ཁལ༌པག༌ག༌ ཟུན༌ ཏང༌མ༌ཅུག༌ཤིག༌།
1PE 3:11 ངན༌པའ༌ ཕངས༌ཏེ༌ ཟང༌པོ༌ ཅོ༌ཤིག༌། སྙིང༌ནེ༌ ཞི༌དེ༌ ཙལ༌ཏེ༌ ཏེ༌བོའེ༌ གྱབ༌ནེ༌ བང༌ཏོང༌ཤིག༌།
1PE 3:12 ཅིའ༌ཞུ༌ན༌ དཀོན༌མཆོག༌གི༌ མི༌ ཀྲང༌པོ༌གུན༌ལ༌ ཟིགས༌ཏེ༌ ཏེ༌གུན༌ནི༌ མོས༌ལམ༌གུན༌ སན༌ན༌ ཛད༌ད༌ནོག༌། ཨིན༌ནའང༌ ངན༌པ༌ ཅོ༌ཁན༌གུན༌ནེ༌, ཁོང༌ངི༌ ཞལ༌ གྱུར༌ར༌ ཛད༌དུག༌།”
1PE 3:13 ཏ༌ ཀལ༌ཏེས༌ ཟང༌པོ༌ ཅོའ༌ལ༌ རིངས༌སད༌ན༌, སུའི༌ ཁྱོ༌ཞ༌གུན༌ལ༌ ནོད༌པ༌ སྐྱལ༌ཨིན༌།
1PE 3:14 ཀལ༌ཏེས༌ ཁྱོ༌ཞའ༌ ལས༌ ཟང༌པོ༌ ཅོ༌ཅེས༌པོའེ༌ རྡུག༌ངལ༌ ཐོང༌ནའང༌, དཀོན༌མཆོག༌གི༌ ཅིན༌ལབས༌ སལ༌ལ༌ ཛད༌ཨིན༌། “ཏེ༌ ཇིགས༌ནང༌ སྟན༌ཁན༌གུན༌ལ༌ མ༌ཇིགས༌ཤིག༌ ཡང༌ མ༌ཚེར༌ཤིག༌། ”
1PE 3:15 རང༌ངི༌ སེམས༌སི༌ ནང༌ང༌ མ༌ཤི༌ཀ༌ ནི༌, གཙོ༌བོ༌ ཨིན༌ཁན༌བོ༌ རྩི༌གོས༌། ཡང༌ ཀལ༌ཏེས༌ སུ༌ཞིག༌གི༌ ཁྱོ༌ཞའེ༌ མ༌ཤི༌ཀའེ༌ ནང༌ང༌ རེ༌ཝ༌ ཡོད༌ཁན༌ནི༌ སྐོར༌ལ༌ ཧ༌གོ༌ཅེས༌ལ༌ རྩར༌ཅོད༌ ཏང༌ན༌, ཏེ༌གུན༌ལ༌ ལན༌ཏང༌ཅེས༌ལ༌ ཏུས༌གྱུན༌ གྲལ༌གྲིག༌ དུག༌ཤིག༌།
1PE 3:16 ཨིན༌ནའང༌ ཏེ༌གུན༌ སེམས༌ པས༌མོ༌ དང༌ ཀུས༌པ༌ ཉམ༌པོ༌ ཅོ༌ཤིག༌། མ༌ཤི༌ཀའེ༌ ནང༌ང༌ ཁྱོ༌ཞའེ༌ ཟང༌པོ༌ སྕོད༌པའེ༌ སྐོར༌ལ༌ སྤེ༌ར༌ རྩོག༌པོ༌ ཟེར༌ཁན༌གུན༌, ཁོང༌རང༌གུན༌ནི༌ ཟེར༌ཁན༌ནི༌ཀ༌ ཁྲེལ༌བ༌ ཆ༌ཅེས༌སི༌ ཕིའ༌ སེམས༌ ནོངས༌མེད༌ བོར༌ཤིག༌།
1PE 3:17 ཀལ༌ཏེས༌ དཀོན༌མཆོག༌གི༌ ཐུག༌གོངས༌ འིན༌ན༌བོ༌ ཨིན༌ན༌, ཁྱོ༌ཞ༌གུན༌ལ༌ ངན༌པ༌ ཅོའེ༌ སང༌ཏ༌ ཟང༌པོ༌ ཅོས༌ཏེ༌ རྡུག༌ངལ༌ ཐོང༌ན༌ གྱལ༌།
1PE 3:18 མ༌ཤི༌ཀ༌ ང༌དང༌གུན༌ནི༌ སྡིག༌པའེ༌ ཏོན༌ལ༌ རྡུག༌ངལ༌ ནམས༌ཏེ༌ ཏུས༌གྱུན༌ནི༌ ཕིའ༌ ལན༌ཅིག༌ ཀྲོངས༌ས༌ ཛདས༌། མ༌ཤི༌ཀ༌ ཀྲང༌པོ༌ ཞུགས༌ཏེ༌ ཨིན༌ནའང༌ ཁོང༌ སྡིག༌ཅན༌གུན༌ནི༌ ཕིའ༌ ཀྲོངས༌ས༌ ཛད༌ཏེ༌ ང༌དང༌གུན༌ དཀོན༌མཆོག༌ དང༌ ཉེ༌མོ༌ ཁྱོང༌ང༌ ཛདས༌། ཟུགས༌སི༌ ཐོག༌ནེ༌ ཁོང༌ ཀྲོངས༌ཏེ༌ ཨིན༌པིན༌, ཨིན༌ནའང༌ ཐུག༌ཉིད༌ གྱུད༌ཏེ༌ སོན༌ཏེའ༌ ལང༌ང༌ ཛད༌ཏེ༌ ཨིན༌།
1PE 3:19 ཏེ༌སྟིང༌ནེ༌ ཁོང༌ སྐྱོད༌ཏེ༌ ཙོན༌དོང༌ངི༌ ནང༌ང༌ ཡོད༌ཁན༌ནི༌ ཏེ༌ སེམ༌ཉིད༌གུན༌ལ༌ ཆོས༌ཤད༌ད༌ ཛདས༌།
1PE 3:20 ཏེ༌གུན༌ ཏུས༌ མང༌པོ༌ཞིག༌གི༌ སྔུན༌ལ༌ ནོ༌ཨའེ༌ གྲུ༌ཟིང༌ ཆེན༌མོ༌ རྩིག༌གི༌ ཏུས༌, དཀོན༌མཆོག༌གི༌ ཐུགས༌ཟོད༌ ཉམ༌པོ༌ སྲུང༌ང༌ ཛད༌ ཟ༌ནེ༌ ཁོང༌ངི༌ ཁའ༌ མ༌ཉན༌ཁན༌གུན༌ ཨིན༌པིན༌། མི༌ ཁ༌ཅིག༌ ཡང༌ན༌ མིང༌གོ༌ རྒྱད༌ཙ༌ ཇིགས༌ནང༌ཅན༌ནི༌ ཆུ༌ལོག༌ནེ༌ ཐར༌ཏེ༌ ཨིན༌པིན༌།
1PE 3:21 ཏེ༌ ཆུ༌ལོག༌པོ༌ ནི༌, ང༌དང༌གུན༌ལ༌ ཁྲུས༌ལེན༌ཅེས༌སི༌ སྤེ༌ཞིག༌ ཨིན༌ནོག༌, ཀ༌བོའེ༌ དག༌ས༌ ཁྱོ༌ཞ༌གུན༌ལ༌ ཐར༌པ༌ ཐོབས༌ཏེ༌ ཨིན༌ནོག༌། ཁྲུས༌ལེན༌ཅེས༌པོའེ༌ ཟུགས༌པོའེ༌ ཏྲི༌མ༌ ཁྲུ༌ཅེས༌ མན༌པ༌, སེམས༌ ལག༌མོ༌ ཉམ༌པོ༌ དཀོན༌མཆོག༌ག༌ ཞལ༌ཆད༌ ཅོ༌ཅུག༌ག༌ནོག༌, ཏེ༌ ཐར༌པ༌བོ༌ ཡེ༌ཤུ༌ མ༌ཤི༌ཀ༌ སྐུ༌ སོན༌ཏེའ༌ ཞངས༌ཤེས༌ གྱུད༌ཏེ༌ ཐོབ༌ཏེ༌ ཨིན༌ནོག༌།
1PE 3:22 ཡེ༌ཤུ༌ ཁོང༌རང༌ ནམ༌ཁའ༌ སྐྱོད༌ཏེ༌ དཀོན༌མཆོག༌གི༌ ཆག༌ ཡས༌པ༌ ཆོགས༌ལ༌ ཞུགས༌ཁྲིས༌སི༌ཀ༌ ཞུགས༌ས༌ ཛད༌ཏེ༌ ཕོ༌ཉ༌ དང༌ སྟོབས༌ དང༌ ཝང༌ ཡོད༌ཁན༌ ཚང༌མའེ༌ཀ༌ ཁོང༌ངི༌ ཝང༌སྲུལ༌ལ༌ ཛད༌ད༌ནོག༌།
1PE 4:1 ཟུགས༌སི༌ ཐོག༌ནེ༌ མ༌ཤི༌ཀའེ༌ ནགས༌ དང༌ བར༌དོ༌ ཉོའ༌ ཛད༌ པ༌སང༌, ཁྱོ༌ཞ༌གུན༌ནི༌ སམ༌ཚུལ༌ལའང༌ ཁོང༌ ཙོགས༌ ཡོང༌ཅེས༌ལ༌ གྲལ༌གྲིག༌ ཅོ༌ཤིག༌, ཅིའ༌ཟེར༌ན༌ མ༌ཤི༌ཀའེ༌ ཕིའ༌ ཟུགས༌སི༌ ཐོག༌ནེ༌ རྡུག༌ངལ༌ ཉོང༌ཁན༌གུན༌ནི༌ སྡིག༌པ༌ ཅོ༌ཅེས༌སི༌ དོད༌པ༌ ཕངས༌ཏེ༌ ཨིན༌ནོག༌།
1PE 4:2 ཏེ༌བོའེ༌ ཞས༌ཏེ༌ ཁྱོ༌ཞ༌གུན༌ནི༌ ཇིག༌རྟེན༌ནི༌ ནང༌ང༌ ལུས༌ཁན༌ནི༌ མི༌ཚེ༌བོ༌, ཇིག༌རྟེན༌ནི༌ དོད༌པ༌ ནང༌ཞིན༌ མ༌ཕུད༌ད༌, དཀོན༌མཆོག༌གི༌ ཐུགས༌ཐད༌ ནང༌ཞིན༌ ཕུད༌ད༌ནོག༌།
1PE 4:3 ཁྱོ༌ཞའེ༌ རང༌ངི༌ མི༌ཚེ༌ ཏད༌པ༌ མེད༌ཁན༌གུན༌ ཙོགས༌ལ༌ ཕུད༌ཅེས༌པོ༌ ཏ༌ ཕང༌གོས༌, སྤེར༌ན༌ ཐའ༌མེད༌པའེ༌ ལུས༌བྲེལ༌ལི༌ དོད༌པ༌, ལུས༌བྲེལ༌ལི༌ དོད༌པ༌ སྲན༌ཏྲེ༌ ཅོ༌ཅེས༌, ར༌རོས༌རོས༌ ཆང༌ ཐུང༌ཅེས༌, གྲོན༌ཏང༌ཨིན༌ ར༌རོས༌ཤེས༌སི༌ ཟས༌གུན༌ ལེན༌ཏེ༌ ཀྲན༌བ༌ སྟོར༌ཅེས༌ དང༌, སྐུན༌དྲ༌ གུན༌ལ༌ ཅོལ༌ཅེས༌སི༌ ཁམ༌ལོག༌ ལས༌གུན༌།
1PE 4:4 ཁྱོ༌ཞའ༌ སྔུན༌མའེ༌ ཛ༌འོ༌གུན༌ནི༌ ལོབས༌ ངན༌པ༌གུན༌ནི༌ སྟིང༌རང༌ནེ༌ བང༌ མི༌ཏང༌ཅེས༌པོའེ༌ ཁོང༌གུན༌ ཧ༌ལས༌ཏེ༌ ཁྱོ༌ཞ༌གུན༌ནི༌ སྐོར༌ལ༌ སྤེ༌ར༌ ངན༌པ༌ ཟེར༌ར༌ནོག༌།
1PE 4:5 ཨིན༌ནའང༌ ཤི༌ཁན༌ དང༌ སོན༌ཏེ༌ ཉིས༌ཀོའེ༌ཀ༌ ཤགས༌ ཛད༌ད༌ལ༌ གྲལ༌གྲིག༌ ཡོད༌ཁན༌ནི༌ དཀོན༌མཆོག༌གི༌ དུན༌ལ༌ ཁོང༌གུན༌ལ༌ རྩི༌རུག༌ ཏང༌གོས༌ཨིན༌།
1PE 4:6 ཏེན༌ན༌བོའེ༌ཕིའ༌ ཤི༌ཁན༌གུན༌ལའང༌, གའ༌མོའེ༌ ནས༌ཚུལ༌བོ༌ ཤད༌ཏེ༌ ཨིན༌པིན༌, ཞན༌ མིའི༌ ཚུལ༌ལ༌ ཏེ༌གུན༌ལ༌ ཤི༌ཅེས༌སི༌ ཁྲིམས༌ ཕོག༌ཏེ༌ ཨིན༌ནའང༌, ཐུག༌ཉིད༌དི༌ ནང༌ང༌ ཁོང༌གུན༌ དཀོན༌མཆོག༌ ཉམ༌པོ༌ སོན༌ཏེའ༌ ལུས༌ཏེ༌ ཨིན༌ནོག༌།
1PE 4:7 ཇིག༌རྟེན༌ནི༌ ནང༌ང༌ ཡོད༌ཁན༌ ཚང༌མ༌ མེད༌ཁན༌ ཆ༌ཅེས༌སི༌ ཏུས༌ ཉེ༌མོའ༌ ལེབས༌ཏེ༌ ཨིན༌པ༌, མོས༌ལམ༌ ཞུ༌ཅེས༌ལ༌ སྣང༌ང༌ སྟན༌པོ༌ ཏངས༌ཏེ༌ རང༌སེམས༌ ཅུན༌ཏེ༌ བོར༌ཤིག༌།
1PE 4:8 ཚང༌མའེ༌སང༌ ཁག༌ཅན༌ སྤེ༌ར༌བོ༌ ནི༌, ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌, ཅིའ༌ཟེར༌ན༌ ཅམས༌པའེ༌ སྡིག༌པ༌ མང༌པོ༌ཞིག༌ ཀབ༌བ༌ནོག༌།
1PE 4:9 ཁྱོ༌ཞའེ༌ ཁང༌པའེ༌ ནང༌ང༌ ཡོང༌ཁན༌གུན༌ལ༌ སྙིང༌ ཕེས༌ཏེ༌ གའ༌སུས༌ ཞུ༌ཤིག༌།
1PE 4:10 དཀོན༌མཆོག༌གི༌ ཐུག༌རྗེ༌ མང༌པོའེ༌ ནང༌ནེ༌, ཁྱོ༌ཞའ༌ ཁྱུད༌ སལ༌ཁན༌བོ༌ ཁྱོ༌ཞའ༌ རེ༌རེ༌ གྱལ༌ལ༌ ཅོས༌ཏེ༌ ཅིག༌ དང༌ ཅིག༌ག༌ ཞབས༌ཏོག༌ ཅོ༌ཅེས༌སི༌ ནང༌ང༌ ཀོལ༌ཤིག༌།
1PE 4:11 ཆོས༌ཤད༌ཅེས༌སི༌ ཁྱུད༌ ཡོད༌ཁན༌གུན༌ནི༌, དཀོན༌མཆོག༌ ཁོང༌རང༌ངི༌ བཀའ༌ ཁྱོ༌ཞའ༌ གྱུད༌ཏེ༌ ཤད༌ད༌ ཛད༌ད༌ ཙོགས༌ལ༌ ཤོད༌ཤིག༌། ཡང༌ ཞབས༌ཏོག༌ ཞུ༌ན༌, དཀོན༌མཆོག༌གི༌ སལ༌ཁན༌ནི༌ སྟོབས༌པོ༌ ཉམ༌པོ༌ ཞུ༌ཤིག༌། ཏེ༌ནེ༌ ཁྱོ༌ཞའེ༌ ཅོ༌ཁན༌ ཚང༌མའེ༌ དཀོན༌མཆོག༌ག༌ ཡེ༌ཤུ༌ མ༌ཤི༌ཀ༌ གྱུད༌ཏེ༌ སྟོད༌པ༌ ཁྱོང༌ཨིན༌། ཁོང༌ང༌ སྤལ༌ དང༌ ཝང༌ ཚང༌མ༌ ཏུས༌གྱུན༌ནེ༌གྱུན༌ ཐོབ༌ཤིག༌, ཨ༌མེན༌།
1PE 4:12 ཅེས༌པའེ༌ ཛ༌འོ༌གུན༌, ཁྱོ༌ཞ༌གུན༌ལ༌ མེའེ༌ ནང༌ང༌ བུད༌ཁན༌ ཙོགས༌ རྡུག༌ངལ༌ལི༌ ཚོད༌ལྟ༌ ཐོང༌ཁན༌བོའ༌, ཡམ༌ཚན༌ ཨིན༌ནོག༌ སམས༌ཏེ༌ ཁྱོ༌ཞའ༌ ཧ༌ མ༌ལས༌ཤིག༌།
1PE 4:13 ཨིན༌ནའང༌ གའ༌མོ༌ ཅོ༌ཤིག༌, ཏེ༌ ཚོད༌ལྟའེ༌ ཁྱོ༌ཞ༌གུན༌ མ༌ཤི༌ཀའེ༌ རྡུག༌ངལ༌ལི༌ ནང༌ང༌ དྲེས༌ཅུག༌ག༌ནོག, ཏེ༌བོའེ༌ ཞས༌ཏེ༌ ཁོང༌ངི༌ ཟིར༌རྗིད༌ ཇིག༌རྟེན༌ གང༌པོའ༌ སྔོན༌ ཅུག༌ག༌ ཛད༌ ཟ༌ནེ༌, ཁྱོ༌ཞ༌གུན༌ ཧ༌ལས༌ཤེས༌སི༌ ཐད༌པོ༌ ཆེན༌།
1PE 4:14 ཀལ༌ཏེས༌ མ༌ཤི༌ཀའེ༌ཀ༌ ཨིད༌ཤེས༌ ཅོ༌ཅེས༌པོའེ༌, སྤེ༌ར༌ རྩོག༌པོ༌ ཟེར༌ཏེ༌ ཁྲེལ༌པ༌ ཅོ༌ན༌, ཁྱོ༌ཞའ༌ ཅིན༌ལབས༌ཅན༌ ཨིན༌, ཅིའ༌ཟེར༌ན༌ དཀོན༌མཆོག༌གི༌ སྤལ༌ཅན༌ནི༌ ཐུག༌ཉིད༌བོ༌ ཁྱོ༌ཞ༌གུན༌ ཉམ༌པོ༌ ཞུགས༌ཏེ༌ ཨིན༌ནོག༌།
1PE 4:15 ཁྱོ༌ཞ༌གུན༌ལ༌ རྡུག༌ངལ༌ ཇུང༌ཁན༌བོ༌, མི༌ སད༌ཏེ༌, རྐུན༌མ༌ རྐུས༌ཏེ༌, ཁྲིམས༌ ཅགས༌ཏེ༌, ཡ༌ ཞན༌མའེ༌ ལས༌སི༌ ནང༌ང༌ ཐེས༌སྟོག༌ ཏང༌ཅེས༌པོའེ༌ ཡོང༌ མ༌གོས༌།
1PE 4:16 ཀལ༌ཏེས༌ ཁྱོ༌ཞའ༌ མ༌ཤི༌ཀ༌པ༌ ཨིན༌ཅེས༌པོའེ༌ རྡུག༌ངལ༌ ཇུང༌ན༌, ཁྲེལ༌བ༌ མ༌ཚོར༌, ཨིན༌ནའང༌ མི༌ཚང༌མའེ༌ ཁྱོ༌ཞའ༌ མ༌ཤི༌ཀའེ༌ ཨིན༌ཁན༌ ཤེས༌ཤེས༌པོའ༌, དཀོན༌མཆོག༌ག༌ སྟོད༌པ༌ ཕུལ༌ཤིག༌།
1PE 4:17 ཏ༌ དཀོན༌མཆོག༌གི༌ རང༌ངི༌ མི༌གུན༌ནི༌ ཀ༌ནེ༌ གོ༌ཟུག༌ ཛད༌ཏེ༌ ཁྲིམས༌ཅད༌ ཛད༌ཅེས༌སི༌ ཞག༌པོ༌ ལེབས༌ཏེ༌ ཨིན༌ནོག༌། ཀལ༌ཏེས༌ ང༌དང༌ མ༌ཤི༌ཀ༌པ༌གུན༌ནེ༌ གོ༌ཟུག༌ན༌, དཀོན༌མཆོག༌གི༌ གའ༌མོའེ༌ ནས༌ཚུལ༌ལ༌ ཁའ༌ མ༌ཉན༌ཁན༌གུན༌ནི༌ ནས༌ལུག༌པོ༌ ཀ༌ཟུག༌ཤིག༌ ཡོང༌ཨིན༌?
1PE 4:18 ཀ༌ཟུག༌ ཏམ༌པའེ༌ སུང༌རབས༌སི༌ ནང༌ང༌ མོལ༌ལ༌ ཛད༌ཏེ༌ དུག༌། “ཏ༌ ཀྲང༌པོ༌གུན༌ལ༌ མ༌ ཀགས༌པོ༌ ཉམ༌པོ༌ ཐར༌པ༌ ཐོབ༌ན༌, སྡིག༌ཅན༌ དང༌ དཀོན༌མཆོག༌ག༌ མ༌ཇིགས༌ཁན༌ གུན༌ལ༌ ཅི༌ མི༌ཆའ༌།”
1PE 4:19 ཏེན༌ན༌བོའེ༌ཕིའ༌ དཀོན༌མཆོག༌གི༌ ཐུག༌གོངས༌ ནང༌ཞིན༌ རྡུག༌ངལ༌ དང༌ བར༌དོ༌ ཁུར༌ཁན༌གུན༌ནི༌ ལས༌ ཟང༌པོ༌ ཅོ༌ཨིན༌ རང༌ངི༌ སྲོག༌པོ༌ ཨིད༌ཤེས༌ཅན༌ ཛམ༌བུ༌ལིང༌ ཞངས༌ཁན༌, དཀོན༌མཆོག༌གི༌ ཆག༌ག༌ སྟད༌གོ༌ཤེས༌ ཨིན༌ནོག༌།
1PE 5:1 མ༌ཤི༌ཀའེ༌ ཆོས༌ཚོགས༌སི༌ གོ༌ཁྲིད༌, ཁོང༌ངི༌ རྡུག༌ངལ༌ལི༌ སྤང༌པོ༌ ཡང༌ ཁོང༌ སྔོན༌ ཟ༌ནེ༌, ཁོང༌ངི༌ སྤལ༌ལི༌ ནང༌ང༌ དྲེས༌ཤེས༌ཅན༌ནི༌, ཁྱོ༌ཞའེ༌ ཕྲོའ༌ ཆོས༌ཚོགས༌སི༌ འུ༌སྐྱོང༌གུན༌ལ༌ ངའང༌ ཞུ༌ཝ༌ རིག༌ ཡོད༌:
1PE 5:2 ལུག༌རྫི༌ ཙོགས༌ལ༌ ཁྱོ༌ཞའེ༌ ལག༌ག༌ དཀོན༌མཆོག༌གི༌ སྟད༌ད༌ ཛད༌ཁན༌ནི༌ ལུག༌གུན༌ལ༌, གྱལ༌ལ༌ ཅོས༌ཏེ༌ སྟ༌སྟོག༌ ཅོ༌ཤིག༌། ཁྱོ༌ཞ༌གུན༌ནི༌ ཏེ༌བོ༌ ཝང༌ ཏངས༌ཏེ༌ ཅོ༌ཅུག༌ཁན༌ ཙོགས༌ལ༌ མ༌ཅོའ༌, འུ༌སྐྱོང༌ཞིག༌གི༌ ཚུལ༌ལ༌ རང༌ ཐད༌ཏེ༌ ཅོ༌ཤིག༌། འི༌ ལས༌གུན༌ ནོར༌ ཡ༌ པེ༌ནེའ༌ ལྟས༌ཏེ༌ མ༌ཅོ༌, ཨིན༌ནའང༌ དཀོན༌མཆོག༌ག༌ ཞབས༌ཏོག༌གི༌ ཆག༌ལས༌ ཨིན༌ སམ༌ཏེ༌ ཅོ༌ཤིག༌།
1PE 5:3 ཁྱོ༌ཞའེ༌ ལག༌ག༌ སྟད༌ཁན༌ནི༌ ཆོས༌ཚོགས༌པོ༌ ཝང༌ ཉམ༌པོ༌ ཁྲིད༌ མ༌ཁྲིད༌ད༌, ཁོང༌གུན༌ནི༌ ཕིའ༌ སྤེ༌ཞིག༌ག༌ གྱུར༌ཤིག༌།
1PE 5:4 ལུག༌རྫི༌ ཚང༌མའེ༌ སྤོན༌བོ༌, ཡེ༌ཤུ༌ སྐྱོད༌ ཟ༌ནེ༌, ཁྱོ༌ཞ༌གུན༌ལ༌ དཀོན༌མཆོག༌གི༌ ཆོགས༌ནེ༌ ཏུས༌གྱུན༌ ལུས༌ཤེས༌སི༌ སྤལ༌ལི༌ ཐོར༌ཤོག༌པོ༌ ཐོབ༌ཨིན༌།
1PE 5:5 ཏེན༌ན༌ ཙོགས༌ལ༌ ཁྱོག༌ཏོང༌གུན༌ནི༌, ཁྱོ༌ཞ༌རང༌ འུ༌སྐྱོང༌གུན༌ནི༌ ཝང༌ངི༌ ཡོག༌ག༌ བོར༌ཏེ༌ ཁའ༌ཉོན༌ཤིག༌། ཡང༌ པས༌མོ༌ ཉམ༌པོ༌ ཅིག༌ དང༌ ཅིག༌ག༌ ཞབས༌ཏོག༌ ཞུ༌ཤིག༌, ཅིའ༌ཟེར༌ན༌ དཀོན༌མཆོག༌གི༌ ཏམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ དུག༌, “ངའེ༌ ཕོ༌སོ༌ཅན༌གུན༌ལ༌ གྱབ༌གལ༌ ཅོའད༌། ཨིན༌ནའང༌ ཉམ༌ཤུང༌གུན༌ལ༌ ཐུག༌རྗེ༌ ཏང༌ངད༌།”
1PE 5:6 ཏེ༌བོའེ༌ཕིའ༌ དཀོན༌མཆོག༌གི༌ སྟོབས༌ཅན༌ ཆག༌གི༌ ཡོག༌ག༌ སེམས༌ པས༌མོ༌ ཉམ༌པོ༌ དུག༌ཤིག༌, ཏེ༌ནེ༌ ཏུས༌རན༌ན༌དང༌, ཁྱོ༌ཞ༌གུན༌ལ༌ དཀོན༌མཆོག༌གི༌ རྩི༌ཝ༌ སལ༌ལ༌ ཛད༌ཨིན༌།
1PE 5:7 རང༌ངི༌ ཚེར༌ཁ༌ དང༌ རྡུག༌ངལ༌ ཚང༌མ༌ དཀོན༌མཆོག༌གི༌ ཆག༌ག༌ སྟོད༌, ཅིའ༌ཞུ༌ན༌ ཁོང༌ངི༌ ཁྱོ༌ཞའ༌ སྟ༌སྟོག༌ ཛད༌ད༌ནོག༌།
1PE 5:8 ཁྱོ༌ཞ༌གུན༌ནི༌ ཤང༌ ཅོས༌ཏེ༌, རང༌སེམས༌ ཅུན༌ཏེ༌ བོར༌ཤིག༌, ཅིའ༌ཟེར༌ན༌ རྡུད༌གུན༌ནི༌ གོ༌བ༌ ཁྱོ༌ཞའེ༌ གྲ༌འོ༌ ནི༌ ཀུ༌ཅོ༌ ཏང༌ཁན༌ནི༌ སིང༌གེ༌ ཙོགས༌ལ༌, མི༌གུན༌ ཁྲེས༌ཏོར༌ ཅོས༌ཏེ༌ ཟའ༌ཅེས༌སི༌ ཕིའ༌ ཙལ༌ཨིན༌ གྲུལ༌དུག༌།
1PE 5:9 ཏད༌པ༌ སྟན༌པོ༌ ཉམ༌པོ༌ ཁོའེ༌ གྱབ༌གལ༌ལ༌ ནོལ༌ཤིག༌, ཅིའ༌ཟེར༌ན༌ ཇིག༌རྟེན༌ གང༌པོའེ༌ ནང༌ང༌ ཁྱོ༌ཞའེ༌ སྤུན༌གུན༌ལའང༌, ཏེན༌ན༌ ཙོགས༌སི༌ རྡུག༌ངལ༌ ཐོང༌ཨིན༌ ཡོད༌ཁན༌བོ༌, ཁྱོ༌ཞའ༌ གྱུས༌ ཨིན༌ནོག༌།
1PE 5:10 ཐུག༌རྗེ༌ དང༌ ལྡན༌ཁན༌ནི༌ དཀོན༌མཆོག༌གི༌, མ༌ཤི༌ཀ༌ གྱུད༌ཏེ༌, ཁྱོ༌ཞ༌གུན༌ ཁོང༌ངི༌ ཐའ༌མེད༌པའེ༌ སྤལ༌ལི༌ ནང༌ང༌ དྲེས༌ཤེས༌ལ༌ བོད༌ད༌ ཛདས༌། ཏ༌ ཁྱོ༌ཞ༌གུན༌ལ༌ སྐབས༌སྟོགས༌ཤིག༌ རྡུག༌ངལ༌ ཉུངས༌ཏེ༌ སྟིང༌ནེ༌ དཀོན༌མཆོག༌ ཁོང༌རང༌ངི༌ ཁྱོ༌ཞ༌གུན༌ལ༌ ཅི༌ཚང༌མ༌ ལོགས༌ཏེ༌ སལ༌ལ༌ ཛད༌ཨིན༌, ཡང༌ སྟོབས༌ཅན༌, སྟན༌པོ༌ སྐུལ༌མི༌ཉན༌ཅེས༌ ཅོའ༌ ཛད༌ཨིན༌།
1PE 5:11 ཏུས༌གྱུན༌ནེ༌གྱུན༌ལ༌ ཝང༌ ཚང༌མ༌ ཁོང༌ངི༌ ཆག༌ག༌ ལུས༌ཤིག༌། ཨ༌མེན༌།
1PE 5:12 ངའེ༌ ལོ༌ཁྱེལ༌ཅན༌ ཐེ༌ཁན༌ནི༌ སྤུན༌ སི༌ལས༌སི༌ རོགས༌ ཉམ༌པོ༌ འི༌ ཨི༌གེ༌ ཐུ༌ངུན༌བོ༌ བྲིའད༌། འི༌ ཨི༌གེ༌ བྲི༌ཅེས༌སི༌ གྱུན༌ཚན༌བོ༌, ཁྱོ༌ཞ༌གུན༌ལ༌ སྤོས༌པ༌ ཏང༌ཅེས༌ དང༌ ཁྱོ༌ཞ༌གུན༌ལ༌ ཇུང༌ཨིན༌ ཡོད༌ཁན༌གུན༌, དཀོན༌མཆོག༌གི༌ ཐུག༌རྗེ༌ ཁག༌ཞིག༌ ཨིན༌ཁན༌བོའེ༌ སྤང༌པོ༌ ཏང༌ཅེས༌པོ༌ ཨིན༌། འི༌ ཐུག༌རྗེའེ༌ ནང༌ང༌ སྟན༌པོ༌ དུག༌ཤིག༌།
1PE 5:13 ཁྱོ༌ཞའ༌ ཉམ༌པོ༌ ལྡམས༌ཁན༌ནི༌ བ༌བེ༌ལོན༌ནི༌ ཆོས༌ཚོགས༌སི༌ ཁྱོ༌ཞ༌གུན༌ལ༌ ཇུ༌ ཀལ༌དུག༌། ངའེ༌ བུ༌ཚ༌ ཙོགས༌ མར༌ཀུས༌སིའང༌ ཁྱོ༌ཞའ༌ ཇུ༌ ཞུ༌རུག༌།
1PE 5:14 ཅིག༌ དང༌ ཅིག༌ག༌, མ༌ཤི༌ཀ༌པའེ༌ ཅམས༌པ༌ ཉམ༌པོ༌ ཇུ༌ ཞུ༌ཤིག༌། མ༌ཤི༌ཀའེ༌ ནང༌ང༌ ཨིན༌ཁན༌ ཚང༌མ༌ལ༌ ཞི༌དེ༌ ཐོབ༌ཤིག༌། ཨ༌མེན༌།
2PE 1:1 ང༌ ཤི༌མོན༌ པི༌ཏྲར༌, ཡེ༌ཤུ༌ མ༌ཤི༌ཀའེ༌ ཡོག༌པོ༌ དང༌ སྐུ༌ཚབས༌ ཨིན༌། ངའེ༌ ང༌དང༌ངི༌ དཀོན༌མཆོག༌ དང༌ སྐྱབ༌གོན༌ ཡེ༌ཤུ༌ མ༌ཤི༌ཀ༌ གུན༌ནི༌ ཀྲང༌པོ༌ ཛད༌ཅེས༌པོའེ༌, ང༌ཞའ༌ ཙོགས༌ལ༌ ཏེན༌ན༌ རིན༌ཅན༌ ཏད༌པ༌ ཐོབ༌ཁན༌གུན༌ལ༌ འི༌ ཨི༌གེ༌བོ༌ བྲིའད༌།
2PE 1:2 ཁྱོ༌ཞ༌གུན༌ནི༌ བྲེལ༌བོ༌ དཀོན༌མཆོག༌ དང༌ ང༌དང༌ངི༌ གཙོ༌བོ༌ ཡེ༌ཤུའི༌ ནང༌ང༌ ལྡན༌ཨིན༌ ཆ༌ ཟ༌ནེ༌, ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ མང༌ངི༌ སང༌ མང༌ང༌ ཐོབ༌ཤིག༌།
2PE 1:3 ང༌དང༌ངི༌ དཀོན༌མཆོག༌གི༌ ལམ༌མི༌ ནང༌ང༌ གྲུལ༌ཨིན༌ མི༌ཚེ༌ ཕུད༌ཅེས༌སི༌ ཕིའ༌, དཀོན༌མཆོག༌གི༌ ཧ༌ལས༌ཤེས༌སི༌ ཤེད༌དི༌, ང༌དང༌གུན༌ལ༌ སྒོས༌དོམ༌ ཚང༌མ༌ སལ༌ལ༌ ཛདས༌། ང༌དང༌གུན༌ལ༌ ཏེ༌ ཚང༌མ༌ ཁོང༌ ཤེ༌ཤེས༌པོའེ༌ ཐོབ༌ཏེ༌ ཨིན༌ནོག༌, ཁོང༌ངི༌ ང༌དང༌ང༌ ཁོང༌རང༌ངི༌ ཟང༌པོ༌ དང༌ ཧ༌ལས༌ཤེས༌སི༌ སྤལ༌ གྱུད༌ཏེ༌, བོད༌ད༌ ཛདས༌།
2PE 1:4 ཏེ༌གུན༌ནི༌ ཞས༌ཏེ༌, ཁོང༌ངི༌ ང༌དང༌གུན༌ལ༌ ཞལ༌ཆད༌ མ༌ ཆེན༌མོ༌ དང༌ རིན༌ཅན༌ གུན༌ སལ༌ལ༌ ཛདས༌། ཏེ༌ ཞལ༌ཆད༌གུན༌ནི༌, ང༌དང༌ང༌ ཇིག༌རྟེན༌ནི༌ ནང༌ང༌ ཡོད༌ཁན༌ནི༌ དོད༌པ༌ ངན༌པ༌གུན༌ནེ༌ ཐར༌ཅེས༌ དང༌ དཀོན༌མཆོག༌གི༌ ཐུགས༌དོད༌ ཏམ༌པའེ༌ ནང༌ང༌ ཁག༌ནེན༌ ཅུག༌ག༌ ཛདས༌།
2PE 1:5 དཀོན༌མཆོག༌གི༌ ཏེ༌ ཚང༌མ༌ ཅོའ༌ ཛད༌ པ༌སང༌, ཁྱོ༌ཞ༌གུན༌ནི༌ ཏད༌པའེ༌ ནང༌ངའང༌ འི༌ ཁྱུད༌ ཚང༌མ༌ ཁྱོང༌ཅེས༌སི༌ མ༌ རྩོན༌གྲུས༌ ཅོ༌ཤིག༌། ཁྱོ༌ཞའེ༌ ཏད༌པ༌ ཉམ༌པོ༌ སྕོད༌པ༌ ཟང༌པོ༌, སྕོད༌པ༌ ཟང༌པོ༌ ཉམ༌པོ༌ དཀོན༌མཆོག༌གི༌ ཐུགས༌ཐད༌ ཤེ༌ཤེས༌སི༌ ཡོན༌ཏན༌,
2PE 1:6 དཀོན༌མཆོག༌གི༌ ཐུགས༌ཐད༌ ཤེ༌ཤེས༌སི༌ ཡོན༌ཏན༌ ཉམ༌པོ༌ རང༌སེམས༌ ཅུན༌ཉན༌ཁན༌, རང༌སེམས༌ ཅུན༌ཉན༌ཁན༌ ཉམ༌པོ༌ སྙིང༌རུས༌, སྙིང༌རུས༌ ཉམ༌པོ༌ དཀོན༌མཆོག༌གི༌ སྕོད༌ལམ༌མི༌ཀ༌ གྲུལ༌ཁན༌ནི༌ མི༌ཚེ༌ཞིག༌ ཕུད༌ཉན༌ཁན༌,
2PE 1:7 དཀོན༌མཆོག༌གི༌ སྕོད༌ལམ༌མི༌ཀ༌ གྲུལ༌ཁན༌ནི༌ མི༌ཚེ༌ ཉམ༌པོ༌ སྤུན༌གུན༌ལ༌ ཅམས༌པ༌, ཡང༌ ཏེ༌ ཅམས༌པ༌ ཉམ༌པོ༌ ཚང༌མ༌ལ༌ སྙིང༌ནེ༌ ཅམས༌པ༌ ཡོང༌གོ༌ཤེས༌ ཨིན༌ནོག༌།
2PE 1:8 ཏ༌ ཀལ༌ཏེས༌ ཏེ༌ ཁྱུད༌ ཚང༌མ༌ ཁྱོ༌ཞའེ༌ ནང༌ང༌ གྱས༌ཨིན༌ ཆའད༌ན༌, ཏེ༌བོའེ༌ ཁྱོ༌ཞ༌གུན༌ནི༌ མི༌ཚེ༌ ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ཤེ༌ཤེས༌སི༌ ནང༌ང༌ མང༌ང༌ བྲས༌བུ༌ སྨིན༌ཁན༌ དང༌ ཕན༌ཐོགས༌ཅན༌ གྱུར༌ཅུག༌ཨིན༌།
2PE 1:9 ཨིན༌ནའང༌ ཏེ༌ཙོགས༌སི༌ ཁྱུད༌ མེད༌ཁན༌གུན༌ གྱལ༌ལ༌ ཅོས༌ཏེ༌ མ༌ཐོང༌ཁན༌ དང༌ ཞ༌ར༌ ཙོགས༌ ཨིན༌ནོག༌། ཡང༌ ཁོའེ༌ སྔུན༌ལ༌ ཅོས༌ཁན༌ནི༌ སྡིག༌པ༌གུན༌ དག༌ཅུག༌ག༌ ཛད༌ཁན༌བོ༌ རྗེད༌ཏེ༌ ཨིན༌ནོག༌།
2PE 1:10 ཏེ༌བོའེ༌ཕིའ༌ ཁྱོ༌ཞའ༌ སྤུན༌གུན༌ནིའང༌, དཀོན༌མཆོག༌གི༌ བོད༌ད༌ ཛད༌ཁན༌ དང༌ ལྡམ༌མ༌ ཛད༌ཁན༌ གུན༌ནི༌ ཕྲོ༌ནེ༌ ཨིན༌ཁན༌བོ༌, སྟན༌ཅེས༌ལ༌ རྩོན༌གྲུས༌ ཅོ༌ཤིག༌། ཏེ༌ཟུག༌ ཅོ༌ན༌, དཀོན༌མཆོག༌གི༌ ནང༌ང༌ ཡོད༌ཁན༌ནི༌ ཏད༌པའེ༌ ཀ༌ནེ༌ ཁྱོ༌ཞ༌གུན༌ མ༌ནེ༌ མི༌གྱེལ༌།
2PE 1:11 ཏེ༌ནེ༌ ང༌དང༌གུན༌ནི༌ གཙོ༌བོ༌ དཀོན༌མཆོག༌ དང༌ སྐྱབ༌གོན༌ ཞུགས༌ཁན༌ནི༌ ཡེ༌ཤུ༌ མ༌ཤི༌ཀའེ༌, ཐའ༌མེད༌པའེ༌ གྱལ༌སྲིད༌དི༌ ནང༌ང༌ ཁྱོ༌ཞ༌གུན༌ལ༌ ཧ༌ལས༌ཤེས༌སི༌ གའ༌སུས༌ ཛད༌ཨིན༌།
2PE 1:12 ཏེ༌བོའེ༌ཕིའ༌ ཞན༌ ཁྱོ༌ཞ༌གུན༌ལ༌ ཏེ༌ ལབ༌ཞ༌གུན༌ ཧ༌གོ༌ཏེ༌ ཏེ༌ དེན༌བ༌གུན༌ནི༌ཀ༌ སྟན༌པོ༌ དུགས༌ཏེ༌ ཨིན༌ནའང༌, ངའེ༌ ཁྱོ༌ཞ༌གུན༌ལ༌ འི༌ ལབ༌ཞ༌གུན༌ ཏུས༌གྱུན༌ ཨིད༌ཏུ༌ སྐུལ༌ཨིན༌།
2PE 1:13 ང༌ སོན༌ཏེའ༌ ཡོད༌ཡོད༌པོ༌, ཏེ༌གུན༌ ཨིད༌ཏུ༌ སྐུལ༌ཅེས༌ ངའེ༌ འོས༌པ༌ སམ༌མ༌རག༌།
2PE 1:14 ཨིན༌ནའང༌ ང༌ གྱོགས༌པ༌ འི༌ ཇིག༌རྟེན༌ནེ༌ ཆ༌གོ༌ཤེས༌པོ༌ གྱུས༌ཡོད༌, ཅིའ༌ཟེར༌ན༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ང༌ འི༌བོ༌ སྔོན༌ ཅུག༌ག༌ ཛདས༌།
2PE 1:15 ང༌ ཤི༌ཏེ༌ སྟིང༌ནེའང༌, ཁྱོ༌ཞ༌གུན༌ནི༌ འི༌ ལབ༌ཞ༌གུན༌ ཨིད༌ཏུ༌ བོར༌ཅེས༌སི༌ ཕིའ༌ ངའེ༌ རྩོན༌གྲུས༌ ཅོའད༌།
2PE 1:16 ང༌ཞའེ༌ ང༌དང༌ངི༌ གཙོ༌བོ༌ ཡེ༌ཤུ༌ མ༌ཤི༌ཀ༌ ཝང༌ ཉམ༌པོ༌ ཡང༌སྐྱར༌ ལོགས༌ཏེ༌ སྐྱོད༌ཅེས༌སི༌ སྐོར༌གུན༌ ཤད༌ ཟ༌ནེ༌, སྐྱོན༌ཇན༌ རུངས༌གུན༌ མ༌ཅོའ༌, ཡེ༌ཤུའི༌ ཟིར༌རྗིད༌ ང༌ཞ༌རང༌ངི༌ མིག༌ནེ༌ ཇལ༌ཏེ༌ ཨིན༌པིན༌།
2PE 1:17 དཀོན༌མཆོག༌ ཡབ༌བི༌ ཆོགས༌ནེ༌ མ༌ཤི༌ཀའ༌ རྩི༌ཝ༌ དང༌ སྤལ༌ སལ༌ལ༌ ཛད༌ ཟ༌ནེ༌, ང༌ཞའང༌ ཁོང༌ ཉམ༌པོ༌ ཏམ༌པའེ༌ རི༌ཀ༌ ཡོད༌པིན༌། ཏེ༌ ཟིར༌རྗིད༌པོའེ༌ ནང༌ང༌, ནམ༌ཁའ༌ནེ༌ དཀོན༌མཆོག༌གི༌ སུང༌སྐད༌པོའེ༌, “འི༌བོ༌ ནི༌ ངའེ༌ ཅེས༌པའེ༌ བུ༌ཚ༌ ཨིན༌, ཁོ༌ ཉམ༌པོ༌ ང༌ མ༌སྲན༌ཏྲེ༌ ཐད༌པོ༌ ཨིན༌” མོལ༌ཨིན༌ ང༌ཞའེ༌ ཚོར༌།
2PE 1:19 ཏེ༌བོའེ༌ ཞས༌ཏེ༌ ང༌ཞ༌གུན༌ལ༌ ལུང༌སྟོན༌པ༌གུན༌ནི༌, གཙོ༌བོ༌ ཡེ༌ཤུའི༌ སྐོར༌ལ༌ བྲི༌ཁན༌གུན༌ནི༌ སྣང༌ང༌ མང༌ང༌ ལོ༌ཁྱེལ༌ རག༌། ཡང༌ ཁྱོ༌ཞ༌གུན༌ནིའང༌ ཏེ༌གུན༌ནི༌ཀ༌ ནང༌ང༌ མང༌ང༌ ཏང༌གོ༌ཤེས༌ ཨིན༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཕིའ༌ ཏེ༌གུན༌ ཉི༌མ༌ ཤར༌ཤར༌ ཚོག༌པ༌ལ༌ མུན༌གྲིག༌གི༌ ནང༌ང༌, འོད༌ ལྡང༌ཤན༌ཞིག༌ ཙོགས༌ ཨིན༌ནོག༌། ཏེ༌ནེ༌ ཁྱོ༌ཞ༌གུན༌ནི༌ སེམས༌སི༌ ནང༌ང༌ ནམ༌ལངས༌སི༌ སྐར༌ཆེན༌ མ༌ཤི༌ཀ༌ ཤར༌ར༌ ཛད༌ཨིན༌།
2PE 1:20 ཨིན༌ནའང༌ སྔུན༌ལ༌ ཁྱོ༌ཞ༌གུན༌ལ༌ འི༌བོ༌ ཧ༌གོ༌གོ༌ཤེས༌པོ༌ ཁག༌ཅན༌ ཨིན༌ནོག༌། ཏམ༌པའེ༌ སུང༌རབས༌སི༌ ལུང༌སྟན༌ནི༌ ཚིགས༌ ཅིག༌གའང༌ ལུང༌སྟོན༌པ༌ཞིག༌གི༌ རང༌ངི༌ སམ༌བ༌ ནང༌ཞིན༌ བྲིས༌ཏེ༌ མ༌ནོག༌,
2PE 1:21 ཅིའ༌ཟེར༌ན༌ ལུང༌སྟན༌ནི༌ ཚིགས༌ ཅིག༌གའང༌ མིའི༌ སམ༌བ༌ནེ༌ མ༌ཡོང༌ང༌, ཏམ༌པའེ༌ ཐུག༌ཉིད༌ གྱུད༌ཏེ༌ ལུང༌སྟོན༌པ༌གུན༌ནི༌ དཀོན༌མཆོག༌གི༌ ཞལ༌ཏ༌གུན༌ ཤད༌ཏེ༌ ཨིན༌ནོག༌།
2PE 2:1 ཀ༌ཟུག༌ སྔུན༌མ༌ ཨིས༌ར༌ཨེལ༌ལི༌ མིར༌གྱུད༌དི༌ ནང༌ང༌, ཟུས༌མའེ༌ ལུང༌སྟོན༌པ༌ མང༌པོ༌ཞིག༌ ཡོད༌པིན༌, ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཆོས༌ཚོགས༌སི༌ ཕྲོའང༌ ཟུས༌མའེ༌ ལོབ༌བོན༌ མང༌པོ༌ རིག༌ ཐོང༌ཨིན༌, ཀ༌གུན༌ནི༌ སང༌ཝའེ༌ ནང༌ང༌ ཟུས༌མའེ༌ ལབ༌ཞ༌གུན༌ ཏངས༌ཏེ༌ ཁྲེས༌ཏོར༌ ཆོགས༌ལ༌ ཁྲིད༌ཨིན༌། ཡང༌ རང༌ངི༌ སྤོན༌བོ༌ གཙོ༌བོ༌ མ༌ཤི༌ཀའེ༌ ཁོང༌གུན༌ ཁོང༌རང༌ངི༌ ཁྲག༌གི༌ རིན༌ ཤལ༌ཏེ༌ ཉོའ༌ ཛད༌ཁན༌བོའང༌ ཕང༌ཨིན༌། ཏེ༌ཟུག༌ ཅོ༌ཅེས༌པོའེ༌, ཁོང༌གུན༌ནི༌ ཁོང༌རང༌གུན༌ གྱོགས༌པ༌ མེད༌ཁན༌ ཆ༌ཅེས༌པོ༌ ཇུང༌ ཅུགས༌ཏེ༌ ཨིན༌ནོག༌།
2PE 2:2 མི༌ མང༌པོ༌ཞིག༌གི༌ ཁོང༌གུན༌ནི༌ སྕོད༌པ༌ ངན༌པའེ༌ ལམ༌གུན༌ནི༌ཀ༌ གྲུལ༌ཏེ༌, དེན༌བའེ༌ ལམ༌བོ༌ རྩིས༌མེད༌ཞིག༌ གྱུར༌ཅུག༌ཨིན༌།
2PE 2:3 ཡང༌ ཁོང༌གུན༌ནི༌ ནབ༌སེམས༌སི༌ ནང༌ང༌ རུངས༌ ཅོས༌མ༌གུན༌ གྱུད༌ཏེ༌, ཁྱོ༌ཞ༌གུན༌ལ༌ གོབ༌སྐོར༌ ཏངས༌ཏེ༌ ཕན༌ཐོགས༌ ལེན༌ཨིན༌། ཨིན༌ནའང༌ ཏུས༌ཡུན༌རིང༌ ཞིག༌ནེ༌ ཁོང༌གུན༌ལ༌ ཤི༌ཅེས༌སི༌ ཆད༌པ༌ ཕོག༌ཁན༌བོ༌, ཉེ༌ཁོར༌ལ༌ ཁོར༌ཨིན༌ ཡོད༌། ཡང༌ ཁོང༌གུན༌ ཁྲེས༌ཏོར༌ ཆ༌ཅེས༌པོ༌ གོར༌ མི༌ཅུག༌།
2PE 2:4 དཀོན༌མཆོག༌གི༌ སྡིག༌པ༌ ཅོ༌ཁན༌ནི༌ ཕོ༌ཉ༌གུན༌ནའང༌ ཕུད༌ད༌ མ༌ཛད༌ད༌, མུན༌ནག༌གི༌ ནང༌ང༌ ལྕག༌རོག༌ ཏངས༌ཏེ༌ ཁྲིམས༌ཅད༌དི༌ ཞག༌ ཚག༌པ༌ ཉལ༌ཝའེ༌ ནང༌ང༌ ཕང༌ང༌ ཛད༌ཏེ༌ ཨིན༌ནོག༌།
2PE 2:5 ཡང༌ སྔུན༌མའེ༌ མིར༌གྱུད༌གུན༌ནའང༌, ཕུད༌ད༌ མ༌ཛད༌ད༌, དཀོན༌མཆོག༌ག༌ མ༌ཇིགས༌ཁན༌གུན༌ནི༌ ཕིའ༌ ཇིག༌རྟེན༌ནི༌ཀ༌ ཆུ༌ལོག༌ ཀལ༌ལ༌ ཛདས༌། ཨིན༌ནའང༌ ལམ༌ ཀྲང༌པོའེ༌ སྐོར༌ལ༌ ཆོས༌ཤད༌ཁན༌ ཁོང༌ངི༌ ཞབས༌ཏོག༌པ༌, ནོ༌ཨ༌ དང༌ ཁོའེ༌ ནང༌མི༌ རྡུན༌བོ༌ སྐྱོབ༌བ༌ ཛདས༌།
2PE 2:6 སོ༌དོམ༌ དང༌ ག༌མོ༌ར༌ གྱལ༌ས༌ ངན༌པ༌ ཉིས༌ཀོའ༌ དཀོན༌མཆོག༌གི༌ ཤི༌ཅེས༌སི༌ ཁྲིམས༌ཅད༌ད༌ ཛད༌ཏེ༌ མེའ༌ སྲགས༌ཏེ༌ ཀོག༌ཐལ༌ལ༌ གྱུར༌ ཅུག༌ག༌ ཛདས༌། ཏེ༌བོ༌ ནི༌ ཡོང༌ཅེས༌ཅན༌ནི༌ དཀོན༌མཆོག༌ག༌ མ༌ཇིགས༌ཁན༌ནི༌ མིར༌གྱུད༌གུན༌ནི༌ཀ༌ ཇུང༌ཅེས༌པོ༌ སྤེ༌ཞིག༌གི༌ ཚུལ༌ལ༌ སལ༌ལ༌ ཛདས༌།
2PE 2:7 ཡང༌ སོ༌དོམ༌མི༌ གྱལ༌སའེ༌ ཏེ༌ ཁྲིམས༌མེད༌དི༌ མི༌གུན༌ནི༌ ལུས༌བྲེལ༌ ངན༌པའེ༌ སྕོད༌པ༌གུན༌ནི༌ ཞས༌ཏེ༌, མ༌སྲན༌ཏྲེ༌ སེམས༌ སྐྱོ༌མོ༌ སོང༌ཏེ༌ ཡོད༌ཁན༌ ཀྲང༌པོ༌ དཀོན༌མཆོག༌གི༌ ཞབས༌ཏོག༌པ༌ ལོད༌ སྐྱོབ༌བ༌ ཛདས༌།
2PE 2:8 ༼ཏེ༌ མི༌ ཀྲང༌པོ༌བོ༌ ཁོང༌གུན༌ནི༌ སྐྱིལ༌ལ༌ དུགས༌ཏེ༌ ཞག༌ཏང༌ ཁོང༌གུན༌ནི༌ ངན༌པ༌ ལས༌གུན༌ ཐོང༌ཅེས༌ དང༌ ཚོར༌ཅེས༌པོའེ༌, ཁོའེ༌ སེམས༌ ཀྲང༌པོ༌བོའ༌ རྡུག༌ངལ༌ ཐོང༌ངད༌པིན༌།༽
2PE 2:9 ཏེ༌ནེ༌ ཀ༌ཟུག༌གི༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌གུན༌ ཚོད༌ལྟ༌གུན༌ནེ༌ སྐྱོབ༌ཅེས༌ དང༌ མི༌ངན༌གུན༌ལ༌ ཁྲིམས༌ཅད༌དི༌ ཞག༌ ཚོག༌པ༌ ཆད༌མེད༌ལ༌ ཆད༌པ༌ ཀལ༌ཨིན༌ བོར༌ཅེས༌ གུན༌ ཁོང༌ངི༌ ཁྱེན༌ན༌ ཛད༌ད༌ནོག༌།
2PE 2:10 མིག༌སལ༌ལི༌ ཝང༌ ཡོད༌ཁན༌གུན༌ལ༌ རྩིས༌མེད༌ ཅོས༌ཏེ༌ ལུས༌བྲེལ༌ ངན༌པའེ༌ དོད༌པའེ༌ ལམ༌མི༌ཀ༌ གྲུལ༌ཁན༌གུན༌ལ༌ དཀོན༌མཆོག༌གི༌ ཆད༌པ༌ སལ༌ལ༌ ཛད༌ཨིན༌། ཏེ༌གུན༌ རང༌གྱལ༌ཅན༌ དང༌ ཕོ༌སོ༌ཅན༌ ཡོང༌ང༌ནོག༌, ཡང༌ ཟིར༌རྗིད༌ཅན༌གུན༌ནི༌ སྐོར༌ལ༌ ངན༌པ༌ ཟེར༌ཅེས༌ལ༌ ཚབ༌ས༌ མ༌ནོག༌།
2PE 2:11 དཀོན༌མཆོག༌གི༌ ཕོ༌ཉ༌གུན༌ ཝང༌ དང༌ སྟོབས༌སི༌ ནང༌ང༌ ཏེ༌ ཟུས༌མའེ༌ ལོབ༌བོན༌གུན༌ནི༌ སང༌ ཀྲག༌པོ༌ ཡོད༌ནའང༌, དཀོན༌མཆོག༌གི༌ དུན༌ལ༌ ཁོང༌གུན༌ནིའང༌ ཏེ༌གུན༌ནི༌ གྱབ༌གལ༌ལ༌ ངན༌པ༌ མོལ༌ལ༌ ཛད༌ད༌ མི༌དུག༌།
2PE 2:12 ཏེ༌ ཟུས༌མའེ༌ ལོབ༌བོན༌གུན༌ སམ༌བ༌ མ༌ཏང༌ང༌ ལས༌ ཅོ༌ཁན༌ནི༌ ནག༌ཚོགས༌སི༌ སེམས༌ཅན༌གུན༌ ཙོགས༌ ཨིན༌ནོག༌, ཀ༌གུན༌ ཟུམས༌ཏེ༌ ཁྲེས༌ཏོར༌ ཅོ༌ཅེས༌ལ༌ སྐྱེས༌ཏེ༌ ཨིན༌། ཁོང༌གུན༌ལ༌ ཧ༌མ༌གོ༌ཁན༌གུན༌ནི༌ སྐོར༌ལ༌ ཁོང༌གུན༌ནི༌ ཁྲེལ༌གོད༌ ཏང༌ང༌ནོག༌, ནག༌ཚོགས༌སི༌ སེམས༌ཅན༌གུན༌ ཙོགས༌ལ༌ ཏེ༌གུན༌ནའང༌ ཁྲེས༌ཏོར༌ ཆེན༌།
2PE 2:13 ཁོང༌གུན༌ལ༌ རང༌ངི༌ ལས༌ ངན༌པའེ༌ བྲས༌བུ༌ ངན༌པ༌ ཐོབ༌ཨིན༌། ཁོང༌གུན༌ ཉི༌མའེ༌ འོད༌དི༌ ནང༌ང༌ ཁོ༌རང༌གུན༌ནི༌ དོད༌པ༌ ངན༌པའེ༌ ལས༌ ཅོ༌ཅེས༌ལ༌ ཐད༌ད༌ནོག༌, ཡང༌ ཁོང༌གུན༌ ཁྱོ༌ཞའེ༌ ཀོས༌ལག༌ དང༌ ལྡོང༌ངི༌ཀ༌ ནག༌ཐིག༌ ཕོག༌ཁན༌ ཙོགས༌ ཨིན༌ནོག༌། ཁྱོ༌ཞའ༌ ཉམ༌པོ༌ ཡེ༌ཤུ༌ ཀྲོང༌ཤེས༌པོ༌ ཨིད༌ཏུ༌ ཅོ༌ཨིན༌ ཁར༌ཇི༌ ཟའ༌ ཟ༌ནེའང༌, ཁོང༌གུན༌ནི༌ ཁྱོ༌ཞ༌ གོབ༌སྐོར༌ ཏང༌ཅེས༌ལ༌ ཐད༌ད༌ནོག༌།
2PE 2:14 ཁོང༌གུན༌ནི༌ ཏུས༌གྱུན༌ ལུས༌བྲེལ༌ལི༌ ཕིའ༌ དོད༌པ༌ ཅོའ༌ནོག༌, ཡང༌ སྡིག༌པ༌ མ༌ཅོའ༌ མ༌ནེ༌ དུག༌ཉན༌ན༌ མ༌ནོག༌, ཏད༌པ༌ སྟན༌པོ༌ མེད༌ཁན༌གུན༌ལ༌ སྡིག༌པ༌ ཅོ༌ཅེས༌སི༌ ཚོད༌ལྟའེ༌ ནང༌ང༌ ཁྱེར༌ར༌ནོག༌། ཁོང༌གུན༌ ནབ༌སེམས༌སི༌ ནང༌ང༌ ཁས༌པ༌ ཡང༌ རྔན༌ ཕོག༌ཁན༌ནི༌ པུར༌གྱུད༌ ཨིན༌ནོག༌།
2PE 2:15 ཁོང༌གུན༌ནི༌ ལམ༌ ཀྲང༌པོ༌ ཕངས༌ཏེ༌, བེ༌འོར༌རི༌ བུ༌ཚ༌ ལུང༌སྟོན༌པ༌ བ༌ལའམ༌མི༌ ལམ༌ ངན༌པའེ༌ཀ༌ གྲུལ༌ཏེ༌ ཨིན༌ནོག༌, པེ༌ནེ༌ ཅོ༌ཅེས༌སི༌ དོད༌པའེ༌, ཁོའ༌ ངན༌པ༌ ཅོ༌ཅུགས༌ཏེ༌ ཨིན༌པིན༌།
2PE 2:16 ཨིན༌ནའང༌ ཏེ༌ ཞག༌ག༌, སྤེ༌ར༌ ཟེར༌ མི༌ཤེས༌ཁན༌ནི༌ བུང༌བུའང༌ སྤེ༌ར༌ ཏང༌ཉན༌ཏེ༌ ཁོའེ༌ ལས༌ངན༌གུན༌ནི༌ ཕིའ༌ ཁོའ༌ ཁའ༌སྐྱེས༌ཏེ༌, ཁོའ༌ ཆལ༌ཆོལ༌ལི༌ ལས༌ ཅོ༌ཅེས༌ནེ༌ སྒགས༌།
2PE 2:17 ཏེ༌ ཟུས༌མའེ༌ ལོབ༌བོན༌གུན༌ ནི༌, ཆུ༌ མེད༌ཁན༌ནི༌ ཆུ༌མིག༌ དང༌, ལུང༌རག༌ ཀྲག༌པོའེ༌ མ༌མུན༌ ཏེད༌ཏེ༌ ཁྱེར༌ར༌ ཙོགས༌ ཨིན༌། ཁོང༌གུན༌ནི༌ ཕིའ༌ མུན༌ནག༌ ཚང༌མའེ༌སང༌ ཏིང༌ཅན༌བོ༌ ལྡམ༌མ༌ ཛད༌ཏེ༌ ཡོད༌།
2PE 2:18 ཁོང༌གུན༌ནི༌ ཏོན༌མེད༌དི༌ སྤེ༌ར༌ ཏང༌ཨིན༌ རང༌སྟོད༌ ཏང༌ང༌ནོག༌། ཉེ༌ཐུབ༌ཤིག༌རང༌ སྡིག༌པའེ༌ མི༌ཚེ༌ ཕུད༌ཅེས༌ནེ༌ ཤོར༌ཐུབ༌ཁན༌ནི༌ མི༌གུན༌ལ༌ ཁོང༌གུན༌ནི༌ ཟུགས༌པོའེ༌ དོད༌པ༌ ངན༌པ༌ ནང༌ཞིན༌ ཅོ༌ཅེས༌ལ༌, ཚོད༌ལྟའེ༌ ནང༌ང༌ ཏང༌དུག༌།
2PE 2:19 ཁོང༌གུན༌ནི༌ ཞན༌མ༌གུན༌ལ༌ རང༌ཝང༌ ཏང༌ཅེས༌སི༌ ཁ༌ཆད༌ ཅོ༌རུག༌, ཨིན༌ནའང༌ ཁོ༌རང༌གུན༌ ངན༌པའེ༌ ཚེ༌ཡོག༌ གྱུར༌ཏེ༌ དུག༌, ཅིའ༌ཟེར༌ན༌ མི༌ཞིག༌ ཁོའེ༌ཀ༌ ཝང༌སྲུལ༌ཁན༌བོའེ༌ ཚེ༌ཡོག༌ གྱུར༌ར༌ནོག༌།
2PE 2:20 ཀལ༌ཏེས༌ ང༌དང༌ངི༌ གཙོ༌བོ༌ དང༌ སྐྱབ༌གོན༌, ཡེ༌ཤུ༌ མ༌ཤི༌ཀ༌ ཤེ༌ཤེས༌པོའེ༌ ཇིག༌རྟེན༌ནི༌ དོད༌པ༌ ངན༌པ༌གུན༌ནེ༌ ཤོར༌ཐུབ༌ཁན༌གུན༌ནི༌ ཡང༌སྐྱར༌ སྡིག༌པའ༌ ཁོ༌རང༌གུན༌ནི༌ ནང༌ང༌ ཁྲིལ༌ཅུགས༌ཏེ༌ ཝང༌སྲུལ༌ཅུག༌གད༌ན༌, ཏེ༌ནེ༌ ཏེ༌གུན༌ནི༌ ནས༌ལུག༌པོ༌ སྔུན༌ནི༌ སང༌ མང༌ང༌ ཐུའ༌ཆེན༌།
2PE 2:21 ཁོང༌གུན༌ནི༌ ཏམ༌པ༌ མི༌ཚེ༌ ཕུད༌ཅེས༌སི༌ བཀའ༌ སལ༌ཁན༌བོ༌ ཧ༌གོ༌ཏེ༌ སྟིང༌ནེ༌ ངོ༌ལོག༌ ཅོའེ༌ སང༌, ཁོང༌གུན༌ལ༌ ཀྲང༌པོ༌ མི༌ཚེ༌ ཕུད༌ཅེས༌སི༌ ལམ༌བོ༌ མ༌ནེ༌ གྱུས༌ མ༌སོང༌པིན༌ན༌, གྱལ༌ལ༌ ཡོད༌གྲོ༌།
2PE 2:22 ཁོང༌གུན༌ནི༌ ཕིའ༌ ཏ༌ འི༌ ཏམ༌སྤེ༌བོ༌ ཁྲོད༌ད༌ནོག༌, “ཁྱི༌ཞིག༌ རང༌ངི༌ སྐྱུགས༌པ༌ ཟའ༌ལ༌ ལོགས༌ཏེ༌ ཆའ༌ནོག༌།” ཡང༌ “ཕག༌ ཁྲུས༌ཏེ༌ སྟིང༌ནེ༌ ལྡམ༌པ༌ལག༌གི༌ ནང༌ང༌ དྲེས༌ས༌ལ༌ ལོགས༌ཏེ༌ ཆའ༌ནོག༌།”
2PE 3:1 ཅེས༌པའེ༌ སྤུན༌གུན༌, འི༌བོ༌ ངའེ༌ ཁྱོ༌ཞ༌གུན༌ལ༌ ཨི༌གེ༌ ཉིས༌པ༌བོ༌ ཨིན༌། འི༌ ཨི༌གེ༌གུན༌ གྱུད༌ཏེ༌ སམ༌བ༌ ལག༌མོ༌ དང༌ ཟང༌པོ༌ ཏང༌ཅེས༌སི༌ ཕིའ༌ ཁྱོ༌ཞ༌གུན༌ནི༌ སྔུན༌ལ༌ ལོབས༌ཏེ༌ ཡོད༌ཁན༌ནི༌ ལབ༌ཞ༌གུན༌ ཨིད༌ཏུ༌ སྐུལ༌ལད༌།
2PE 3:2 ཁྱོ༌ཞ༌གུན༌ནི༌ སྔུན༌མའེ༌ ཏམ༌པའེ༌ ལུང༌སྟོན༌པ༌གུན༌ནི༌ མོལ༌ཁན༌གུན༌ དང༌ ཡེ༌ཤུའི༌ སྐུ༌ཚབས༌གུན༌ གྱུད༌ཏེ༌, ང༌དང༌ངི༌ གཙོ༌བོ༌ དང༌ སྐྱབ༌གོན༌ ཡེ༌ཤུའི༌, བཀའ༌ སལ༌ཁན༌གུན༌ ཨིད༌ཏུའ༌ བོར༌གོ༌ཤེས༌པོ༌ ངའེ༌ དོད༌པ༌ ཨིན༌།
2PE 3:3 ཚང༌མའེ༌སང༌ སྔུན༌ལ༌ ཁྱོ༌ཞ༌གུན༌ལ༌ འི༌བོ༌ ཧ༌གོ༌གོས༌, ཐའ༌མའེ༌ ཏུས༌ལ༌ སྡིག༌པའེ༌ དོད༌པ༌ ནང༌ཞིན༌ རང༌ངི༌ མི༌ཚེ༌ ཕུད༌ཨིན༌, ཁྱོ༌ཞའེ༌ ཏད༌པའེ༌ཀ༌ ཁྲེལ༌གོད༌ ཏང༌ཁན༌ནི༌ མི༌རིག༌ ཡོང༌ཨིན༌།
2PE 3:4 ཁོང༌གུན༌ནི༌ ཟེར༌ཨིན༌, “མ༌ཤི༌ཀ༌ ལོགས༌ཏེ༌ སྐྱོད༌ཅེས༌སི༌ ཞལ༌ཆད༌པོ༌ ཀ༌རུ༌ སོང༌” ཡང༌ “ང༌ཞའེ༌ ཕ༌མེས༌པོ༌གུན༌ ཤི༌ ཚར༌པ༌ནེ༌ ཕར༌ལ༌ དག༌ས༌ ཚག༌པ༌ འི༌ ཇིག༌རྟེན༌ནི༌ ཚིར༌གུན༌, ཏེན༌ན༌ ཟུག༌ག༌ གྲུལ༌དུག༌ ཀ༌ཟུག༌ གོ༌མ༌ ཇིག༌རྟེན༌ ཛད༌ ཟ༌ནེ༌ ཡོད༌པིན༌།”
2PE 3:5 ཁོང༌གུན༌ནི༌ མིང༌ནའང༌ འི༌གུན༌ལ༌ སྣང༌མེད༌ ཅོས༌ཏེ༌ ཨིན༌ནོག༌, ཏང༌པོ༌, ཏུས༌ མང༌པོ༌ཞིག༌གི༌ སྔུན༌ལ༌ དཀོན༌མཆོག༌གི༌ བཀའ༌ ནང༌ཞིན༌ལ༌ ནམ༌ཁའ༌བོ༌ ཅོའ༌ ཛད༌ཏེ༌, ས༌ཞི༌བོ༌ ཆུའི༌ ཕྲོ༌ནེ༌ ཕི༌ལོག༌ག༌ ཕིང༌ང༌ ཛད༌ཏེ༌ ཏེ༌བོའ༌ ཆུའི༌ སྐོར༌ཅུག༌ག༌ ཛདས༌།
2PE 3:6 ཉིས༌པ༌, དཀོན༌མཆོག༌གི༌ ཞབས༌ཏོག༌པ༌ ནོ༌ཨའེ༌ ཏུས༌ལ༌ དཀོན༌མཆོག༌གི༌ བཀའ༌ ནང༌ཞིན༌ ཆུ༌ལོག༌གི༌ ཞས༌ཏེ༌, ཏེ༌ཏུས༌སི༌ ཇིག༌རྟེན༌པ༌གུན༌ མེད༌ཁན༌ སོང༌ཏེ༌ ཨིན༌པིན༌།
2PE 3:7 ཏེན༌ན༌ དཀོན༌མཆོག༌གི༌ བཀའ༌ གྱུད༌ཏེ༌, ནམ༌ཁའ༌ དང༌ ས༌ ཉིས༌ཀོ༌, མེའེ༌ ནང༌ང༌ སྲག༌ཅེས༌ལ༌ ལུས༌ཤུག༌ག༌ ཛད༌ཏེ༌ ཨིན༌ནོག༌། ཡང༌ ཏེ༌གུན༌ ཏེ༌ཏེ༌ཚོག༌པ༌ ཐེན༌ཏེ༌ བོར༌ར༌ ཛད༌ཏེ༌ ཨིན༌ནོག༌ ནམ༌ཚོག༌པ༌ འི༌ ཇིག༌རྟེན༌ནི༌ ཏད༌པ༌ མེད༌ཁན༌ནི༌ མི༌གུན༌ལ༌, ཁོང༌ངི༌ ཤགས༌ ཅད༌ཏེ༌ མེད༌ཁན༌ ཅོའ༌ མི༌ཛད༌།
2PE 3:8 ཨིན༌ནའང༌ ངའེ༌ ཅེས༌པའེ༌ སྤུན༌གུན༌, འི༌ སྤེ༌ར༌བོ༌ མ༌ནེ༌ མ༌རྗེད༌ཤིག༌, གཙོ༌བོ༌ དཀོན༌མཆོག༌གི༌ སྐུན༌དུན༌ལ༌ ཞག༌ཅིག༌པོ༌ ནི༌ ལོ༌ སྟོང༌ ཅིག༌ ཡང༌ ལོ༌ སྟོང༌ཅིག༌པོ༌ ནི༌ ཞག༌ཅིག༌ དང༌ དྲན༌དྲ༌ ཨིན༌ནོག༌།
2PE 3:9 མི༌ ཁ༌ཅིག༌གི༌ གཙོ༌བོ༌ ཁོང༌རང༌ ལོགས༌ཏེ༌ ཕེབ༌ཅེས༌སི༌ ཞལ༌ཆད༌པོ༌, གོར༌ཏེ༌ ཨིན༌ནོག༌ སམ༌དུག༌, ཨིན༌ནའང༌ ངོས༌པོའ༌ ཁོང༌ གོར༌ཏེ༌ མ༌ནོག༌, ཅིའ༌ཟེར༌ན༌ ཁོང༌ངི༌ ཁྱོ༌ཞ༌གུན༌ནི༌ ཕིའ༌ ཟོད༌པ༌ ཛད༌ཏེ༌ ཨིན༌ནོག༌། ཁོང༌ངི༌ སུ༌ཞིག༌གའང༌ མེད༌ཁན༌ ཅོའ༌ མ༌ཛད༌ད༌, མི༌ཚང༌མའེ༌ གྱོད༌པ༌ ཅོ༌ཅེས༌སི༌ དོད༌པ༌ ཛད༌ད༌ནོག༌།
2PE 3:10 ཨིན༌ནའང༌ གཙོ༌བོ༌ ཡེ༌ཤུ༌ མ༌ཤི༌ཀ༌ ལོགས༌ཏེ༌ ཕེབས༌ཅེས༌སི༌ ཞག༌པོ༌ ནི༌, སང༌ཝའེ༌ ནང༌ང༌ རྐུན༌མ༌ ཙོགས༌ལ༌ ལེབ༌ཨིན༌། ཏེ༌ ཞག༌ག༌ ནམ༌ཁའེ༌ བར༌ནང༌བོ༌ མ༌ ཀུ༌ཅོ༌ ཀྲག༌པོ༌ ཉམ༌པོ༌ མེད༌ཁན༌ ཆེན༌, ཡང༌ ནམ༌ཁའེ༌ ནང༌ང༌ ཡོད༌ཁན༌ ཚང༌མ༌ ཚད༌ ཀྲག༌པོའེ༌ ཞུ༌ཏེ༌ ཆེན༌། ཡང༌ ས༌ཞི༌ཀ༌ ཡོད༌ཁན༌ ཚང༌མ༌ ཚིག༌ཏེ༌ མེད༌ཁན༌ ཆེན༌།
2PE 3:11 ཏ༌ ཀལ༌ཏེས༌ འི༌ ཚང༌མ༌ མེད༌ཁན༌ ཆའད༌ན༌, ཁྱོ༌ཞ༌གུན༌ནི༌ མི༌ཚེ༌བོ༌ ཀ༌ཟུག༌ག༌ ཕུད༌གོས༌། དཀོན༌མཆོག༌གི༌ ཞག༌པོའ༌ སྲུང༌ཏེ༌ གྱོགས༌པ༌ ལེབ༌ཅུག༌ཅེས༌ལ༌ རྩོན༌གྲུས༌ ཅོ༌ཨིན༌, ཁྱོ༌ཞ༌གུན༌ནི༌ དཀོན༌མཆོག༌གི༌ ལམ༌མི༌ཀ༌ གྲུལ༌ཁན༌ དང༌ ཏམ༌པ༌ མི༌ཚེ༌ཞིག༌ ཕུད༌གོ༌ཤེས༌ ཨིན༌ནོག༌། ཏེ༌ ཞག༌ག༌ ནམ༌ཁའེ༌ བར༌ནང༌ མེའ༌ ཚིག༌ཏེ༌, ཡང༌ ཏེ༌ནང༌ང༌ ཡོད༌ཁན༌ ཚང༌མ༌ ཞུ༌ཏེ༌ མེད༌ཁན༌ ཆེན༌།
2PE 3:13 ཨིན༌ནའང༌ ང༌དང༌གུན༌ དཀོན༌མཆོག༌གི༌ ཞལ༌ཆད༌ ནང༌ཞིན༌ལ༌ ནམ༌ཁའ༌ སོ༌མ༌ཞིག༌ དང༌ ས༌ཞི༌ སོ༌མ༌ཞིག༌གི༌ ཕིའ༌, སྲུངས༌ཏེ༌ དུག༌ཨིན༌, ཀ༌བོ༌ ཀྲང༌པོའེ༌ ལམ༌མི༌ཀ༌ གྲུལ༌ཁན༌གུན༌ ནི༌, ཁང༌པ༌ ཨིན༌ནོག༌།
2PE 3:14 ཏེ༌བོའེ༌ཕིའ༌ ངའེ༌ ཅེས༌པའེ༌ སྤུན༌གུན༌, ཁྱོ༌ཞ༌གུན༌ འི༌ ཚང༌མ༌ ཇུང༌ཅེས༌སི༌ ཕིའ༌ སྲུངས༌ཏེ༌ ཡོད༌ ཟ༌ནེ༌, ཁྱོ༌ཞ༌རང༌ དཀོན༌མཆོག༌གི༌ སྐུན༌དུན༌ལ༌ རྩང༌མ༌, སྐྱོན༌མེད༌ཁན༌ དང༌ ཞི༌དེ༌ ཉམ༌པོ༌ མི༌ཚེ༌ ཕུད༌ཁན༌ཞིག༌ སྟན༌ ཐུབ༌ཅེས༌སི༌ ཕིའ༌ མ༌ རྩོན༌གྲུས༌ ཅོ༌ཤིག༌།
2PE 3:15 ཡང༌ དཀོན༌མཆོག༌གི༌ ཟོད༌སེམས༌ ཉམ༌པོ༌ ང༌དང༌གུན༌ལ༌ ཐར༌པ༌ ཐོབ༌ཅེས༌སི༌ སྐབས༌ སལ༌ལ༌ ཛད༌ཁན༌བོ༌ ཧ༌གོ༌ གོ༌ཤེས༌པོ༌, མ༌ ཁག༌ཅན༌ཞིག༌ ཨིན༌ནོག༌། ང༌དང༌ངི༌ ཅེས༌པའེ༌ སྤུན༌ པ༌འུ༌ལུའིང༌, དཀོན༌མཆོག༌གི༌ སལ༌ལ༌ ཛད༌ཁན༌ནི༌ ཤེས༌རབས༌ ནང༌ཞིན༌ལ༌, ཁྱོ༌ཞ༌གུན༌ལ༌ བྲིའ༌ ཛད༌ཏེ༌ ཨིན༌ནོག༌།
2PE 3:16 ཁོང༌ངི༌ རང༌ངི༌ ཆག༌བྲིས༌ ཚང༌མའེ༌ ནང༌ང༌, འིན༌ན༌ ཙོགས༌སི༌ གོར༌གྱན༌གུན༌ནི༌ སྐོར༌ལ༌ བྲིའ༌ ཛད༌ཏེ༌ དུག༌། ཁོང༌ངི༌ ཆག༌བྲིས༌ ཁ༌ཅིག༌གི༌ ནང༌ང༌ ཧ༌གོ༌ཅེས༌ལ༌ མ༌ ཀགས༌པོ༌ ཆའ༌ཁན༌ནི༌ ལབ༌ཞ༌ རིག༌གའང༌ ཡོད༌ཏེ༌ ཨིན༌ནོག༌། ཡང༌ སམ༌བ༌ མེད༌ཁན༌ དང༌ སྟན༌ཞི༌ མེད༌ཁན༌ནི༌ མི༌ ཁ༌ཅིག༌གི༌, པ༌འུ༌ལུའི༌ ཆག༌བྲིས༌གུན༌ནི༌ ཏོན༌ཏག༌པོ༌ མིང༌ནའང༌ གྱུར༌ཏེ༌ ཨིན༌ནོག༌, ཀ༌ཟུག༌ ཁོང༌གུན༌ནི༌ ཞན༌ ཏམ༌པའེ༌ སུང༌རབས༌གུན༌ལ༌ ཅོའད༌, ཀ༌བོའེ༌ ཁོ༌རང༌གུན༌ནི༌ ཕིའ༌ ནོད༌སྐྱལ༌ ཁྱོང༌དུག༌།
2PE 3:17 ཏུས༌ ལེབ༌བི༌ སང༌ སྔུན༌ལ༌ ངའེ༌ ཁྱོ༌ཞ༌གུན༌ལ༌ སྤང༌པུད༌དད༌། ཁྲིམས༌མེད༌དི༌ མི༌གུན༌ནི༌ གོབ༌སྐོར༌རི༌ ནང༌ང༌ ཡོངས༌ཏེ༌ ཁྱོ༌ཞ༌རང༌ ཏད༌པའེ༌ ནང༌ང༌ སྟན༌པོ༌ མེད༌ཁན༌ མི༌གྱུར༌ཅེས༌ལ༌ ཤང༌ ཅོས༌ཏེ༌ དུག༌ཤིག༌།
2PE 3:18 མ༌ཚད༌པའེ༌ ང༌དང༌ངི༌ གཙོ༌བོ༌ དང༌ སྐྱབ༌གོན༌ ཡེ༌ཤུ༌ མ༌ཤི༌ཀའེ༌ ཐུག༌རྗེ༌ དང༌ ཁོང༌ ཤེ༌ཤེས༌སི༌ ནང༌ང༌ ཡར༌གྱས༌ ཅོ༌ཨིན༌ སོང༌ཤིག༌། ཡང༌ ཁོང༌ང༌ དག༌ས༌ དང༌ ཏུས༌གྱུན༌ སྤལ༌ ཐོབ༌ཤིག༌། ཨ༌མེན༌།
1JO 1:1 ང༌ཞའེ༌ ཁྱོ༌ཞ༌གུན༌ལ༌, གོ༌ཟུག༌ནེ༌ ཕར༌ལ༌ ཡོད༌ཁན༌ནི༌ མི༌ཚེའེ༌ བཀའེ༌ སྐོར༌ལ༌ ཤད༌ཅེས༌ཨིན༌, ཁོང༌ངི༌ མོལ༌ཁན༌གུན༌ ང༌ཞ༌གུན༌ནི༌ ཚོར༌ ཡང༌ ཇལ༌། འོ༌ན༌ རང༌ངི༌ མིག༌ནེ༌ ཞིབ༌སལ༌ ཅོས༌ཏེ༌ ཇལ༌, མ༌ཚད༌ ཁོང༌ང༌ ང༌ཞ༌རང༌ངི༌ ལག༌པ༌ རྩེས༌པིན༌།
1JO 1:2 དཀོན༌མཆོག༌གི༌ ཏེ༌ མི༌ཚེ༌བོ༌ སྔོན༌ཅུག༌ག༌ ཛདས༌, ཡང༌ ང༌ཞ༌གུན༌ནི༌ ཁོང༌ ཇལ༌། ང༌ཞ༌གུན༌ ཏེ༌ མི༌ཚེའེ༌ སྤང༌པོ༌ ཨིན༌ནོག༌, ཡང༌ ཁྱོ༌ཞ༌གུན༌ལ༌ ཏེན༌ན༌ ཐའ༌མེད༌པའེ༌ མི༌ཚེ༌ སྐོར༌ལ༌ ཤད༌དད༌, ཀ༌བོ༌ དཀོན༌མཆོག༌ ཡབ༌ ཉམ༌པོ༌ ཡོད༌པིན༌, ཡང༌ ང༌ཞ༌གུན༌ནི༌ཀ༌ སྔོན༌ཅུག༌ག༌ ཛདས༌།
1JO 1:3 ཁྱོ༌ཞ༌གུན༌ནའང༌ ང༌ཞ༌གུན༌ ཉམ༌པོ༌ དྲེ༌ཤེས༌སི༌ ཕིའ༌ ང༌ཞའེ༌ ཁོང༌ངི༌ སྐོར༌ལ༌ ཚོར༌ཁན༌ དང༌ ཐོང༌ཁན༌ གུན༌ ཁྱོ༌ཞའ༌ ཤད༌དད༌, ཡང༌ ང༌ཞ༌གུན༌ དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀ༌ ཉམ༌པོ༌ དྲེས༌ཏེ༌ ཨིན༌།
1JO 1:4 ང༌ཞའེ༌ ཐད༌པོ༌གུན༌ དྲན༌དྲ༌ ཁྱོ༌ཞ༌གུན༌ ཉམ༌པོ༌ བགོ༌ཅེས༌སི༌ ཕིའ༌ འི༌ ཨི༌གེ༌བོ༌ ང༌ཞའེ༌ བྲིའད༌།
1JO 1:5 འི༌ ལོན༌བོ༌ ང༌ཞ༌གུན༌ལ༌ ཡེ༌ཤུའི༌ ཀ༌ནེ༌ ཚོར༌, ཡང༌ ཏ༌ དག༌ས༌ ཁྱོ༌ཞ༌གུན༌ལ༌ ཤད༌ཅེས༌ཨིན༌། དཀོན༌མཆོག༌ ནི༌ འོད༌ ཨིན༌ནོག༌, ཡང༌ ཁོང༌ངི༌ ནང༌ང༌ མུན༌གྲིག༌ མ༌ནེ༌ མེད༌ཀྱག༌།
1JO 1:6 ཀལ༌ཏེས༌ ང༌དང༌གུན༌ནི༌ དཀོན༌མཆོག༌ ཉམ༌པོ༌ བྲེལ༌ བོར༌རད༌ ཟེར༌ཨིན༌ ཏ༌རུང༌ངའང༌ ངན༌སེམས༌ཅན༌ནི༌ མུན༌གྲིག༌གི༌ ནང༌ང༌ གྲུལ༌ལད༌ན༌, ཏེ༌ནེ༌ ང༌དང༌གུན༌ནི༌ ཟུན༌ ཏངས༌ཏེ༌ ཀྲང༌པོའེ༌ ལམ༌མི༌ཀ༌ མི༌ཚེ༌ མ༌ཕུད༌ད༌ ཨིན༌ནོག༌།
1JO 1:7 ཨིན༌ནའང༌ ཀལ༌ཏེས༌ ང༌དང༌གུན༌ འོད༌དི༌ ནང༌ང༌ གྲུལ༌ལད༌ན༌, ཀ༌ཟུག༌ དཀོན༌མཆོག༌ འོད༌དི༌ ནང༌ང༌ ཞུགས༌ཏེ༌ ཨིན༌, ཏེ༌ནེ༌ ང༌དང༌གུན༌ ཅིག༌ དང༌ ཅིག༌ ཉམ༌པོ༌ བྲེལ༌ཏེ༌ ཨིན༌ནོག༌, ཡང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀའེ༌ སྐུ༌ཁྲག༌གི༌, ང༌དང༌གུན༌ སྡིག༌པ༌ ཚང༌མ༌ནེ༌ རྩང༌མ༌ ཛད༌ཨིན༌།
1JO 1:8 ཏ༌ ཀལ༌ཏེས༌ ང༌དང༌གུན༌ནི༌ སྡིག༌པ༌ མ༌ནེ༌ མ༌ཅོས༌པིན༌ ཟེར༌ན༌, ང༌དང༌ངི༌ རང༌དང༌རང༌ང༌ གོབ༌སྐོར༌ཏེ༌ ཨིན༌ནོག༌, ཡང༌ དེན༌བ༌ ང༌དང༌གུན༌ནི༌ ནང༌ང༌ མེད༌པ༌ ཨིན༌ནོག༌།
1JO 1:9 ཨིན༌ནའང༌ ཀལ༌ཏེས༌ ང༌དང༌གུན༌ནི༌ དཀོན༌མཆོག༌ག༌ ངའེ༌ སྡིག༌པ༌ ཅོས༌པིན༌ ཟེར༌ན༌, ཨིད༌ཤེས༌ཅན༌ དང༌ ཀྲང༌པོ༌ ཐག༌ཅད༌ ཛད༌ཁན༌, དཀོན༌མཆོག༌གི༌ ང༌དང༌གུན༌ནི༌ སྡིག༌པ༌གུན༌ལ༌ ཤགས༌པ༌ སལ༌ཏེ༌, ང༌དང༌གུན༌ ང༌དང༌ངི༌ ལས༌ ངན༌པ༌གུན༌ནེ༌ རྩང༌མ༌ ཛད༌ཨིན༌།
1JO 1:10 ཀལ༌ཏེས༌ ང༌དང༌གུན༌ནི༌ ངའེ༌ སྡིག༌པ༌ མ༌ནེ༌ མ༌ཅོས༌པིན༌ ཟེར༌ན༌, ང༌དང༌ངི༌ དཀོན༌མཆོག༌ ཟུན༌ཇན༌ ཐེ༌ཅེས༌ མ༌ཚད༌, ང༌དང༌གུན༌ནི༌ སྙིང༌ངི༌ ནང༌ང༌ དཀོན༌མཆོག༌གི༌ བཀའེ༌ ཕིའ༌ ནས༌ས༌ མེད༌པ༌ ཨིན༌ནོག༌།
1JO 2:1 ངའེ༌ ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ཁྱོ༌ཞ༌གུན༌ནི༌ སྡིག༌པ༌ མི༌ཅོ༌ཅེས༌སི༌ ཕིའ༌ ངའེ༌ འི༌ སྤེ༌ར༌གུན༌ བྲིའད༌། ཨིན༌ནའང༌ ཀལ༌ཏེས༌ སུ༌ཞིག༌གི༌ སྡིག༌པ༌ ཅོ༌ན༌, དཀོན༌མཆོག༌ ཡབ༌བི༌ སྐུན༌དུན༌ལ༌ ང༌དང༌གུན༌ནི༌ ཕིའ༌ ཞུ༌ཝ༌ ཞུས༌ཏེ༌ ཆད༌པའེ༌ ཀ༌ནེ༌ སྐྱོབ༌བ༌ ཛད༌ཁན༌ཞིག༌ ཡོད༌ཏེ༌ ཨིན༌ནོག༌, ཁོང༌ ནི༌ ཡེ༌ཤུ༌ མ༌ཤི༌ཀ༌ ཀྲང༌པོ༌བོ༌ ཞུགས༌ཏེ༌ ཨིན༌།
1JO 2:2 ཁོང༌ ནི༌, ཏེན༌ན༌བོ༌ ཞུགས༌ཏེ༌ ཨིན༌, ཀ༌བོའེ༌ ང༌དང༌གུན༌ནི༌ སྡིག༌པ༌གུན༌ སེལ༌ལ༌ ཛད༌ཅེས༌སི༌ ཕིའ༌ ཁོང༌རང༌ངི༌ སྲོག༌པོ༌ སལ༌ལ༌ ཛདས༌, ཡང༌ ང༌དང༌ ཅིག༌པོའེ༌ ཕིའ༌ མན༌པ༌, ཇིག༌རྟེན༌པ༌ ཚང༌མའེ༌ སྡིག༌པ༌གུན༌ནི༌ ཕིའང༌།
1JO 2:3 ཏ༌ ཀལ༌ཏེས༌ ང༌དང༌གུན༌ནི༌ དཀོན༌མཆོག༌གི༌ བཀའ༌རྒྱ༌གུན༌ ཁའ༌ཉན༌ན༌, ཏེ༌ནེ༌ ང༌དང༌གུན༌ལ༌ ཁོང༌ ཤེས༌ཁན༌བོ༌ ཏན༌ཏན༌ གྱུས༌ ཨིན༌ནོག༌།
1JO 2:4 སུ༌ཞིག༌གི༌ “ང༌ དཀོན༌མཆོག༌ ཤེས༌སད༌” ཟེར༌ཏེ༌, ཁོང༌ངི༌ བཀའ༌གུན༌ལ༌ ཁའ༌ཉན༌ན༌ མེད༌ན༌, ཁོ༌ ཟུན༌ཇན༌ ཨིན༌ནོག༌, ཡང༌ ཏེ༌ མི༌བོའེ༌ ནང༌ང༌ དཀོན༌མཆོག༌གི༌ ཀྲང༌པོའེ༌ བཀའ༌ མེད༌པ༌ ཨིན༌ནོག༌།
1JO 2:5 ཨིན༌ནའང༌ སུ༌ཞིག༌གི༌ ཁོང༌ངི༌ བཀའ༌གུན༌ནི༌ཀ༌ ལག༌ལེན༌ ཅོའད༌ན༌, ཏན༌ཏན༌ ཁོང༌གུན༌ནི༌ ནང༌ང༌ དཀོན༌མཆོག༌གི༌ ཅམས༌པ༌ གང༌པོ༌ ཡོད༌ཁན༌བོ༌ ཐོང༌ང༌ནོག༌, ཏེ༌བོའེ༌ ང༌དང༌གུན༌ དཀོན༌མཆོག༌ ཉམ༌པོ༌ བྲེལ༌ཏེ༌ ཡོད༌ཁན༌བོ༌ ང༌དང༌གུན༌ལ༌ ཧ༌གོའ༌ནོག༌།
1JO 2:6 སུ༌ཞིག༌གི༌ “ང༌, དཀོན༌མཆོག༌ ཉམ༌པོ༌ བྲེལ༌ཏེ༌ ཨིན༌” ཟེར༌རད༌ན༌, ཏེ༌ནེ༌ ཡེ༌ཤུའི༌ མི༌ཚེ༌ ཕུད༌ད༌ ཛད༌ཁན༌ ཙོགས༌སི༌ མི༌ཚེ༌ཞིག༌, ཁོང༌གུན༌ནིའང༌ ཕུད༌གོ༌ཤེས༌ ཨིན༌ནོག༌།
1JO 2:7 ཅེས༌པའེ༌ ཛ༌འོ༌གུན༌, ངའེ༌ ཁྱོ༌ཞ༌གུན༌ལ༌ བྲི༌ཁན༌ནི༌ བཀའ༌རྒྱ༌བོ༌ སོ༌མ༌ མན༌པ༌ སྙིང༌པ༌ཞིག༌ ཨིན༌, ཀ༌བོ༌ ཁྱོ༌ཞ༌གུན༌ལ༌ གོ༌མ༌ནེ༌ ཕར༌ལ༌ ཐོབ༌ཏེ༌ ཨིན༌ནོག༌། ཅིག༌ དང༌ ཅིག༌ག༌ ཅམས༌པ༌ ཅོ༌ཅེས༌སི༌ ཏེ༌ བཀའ༌རྒྱ༌ སྙིང༌པ༌བོ༌, ཁྱོ༌ཞ༌གུན༌ནི༌ སྔུན༌ལ༌ ཚོར༌ཏེ༌ ཨིན༌ནོག༌།
1JO 2:8 ཨིན༌ནའང༌ ཏེ༌ བཀའ༌རྒྱ༌བོ༌ སོ༌མ༌ཞིག༌གའང༌ ཨིན༌ནོག༌། ཡེ༌ཤུའི༌ ཁོང༌རང༌ངི༌ མི༌ཚེའེ༌བོ༌ ཏེན༌ན༌ བཀའ༌རྒྱ༌ དྲན༌དྲ༌ ཕུད༌ད༌ ཛདས༌, ཡང༌ ཁྱོ༌ཞ༌གུན༌ནིའང༌ ཕུད༌དུག༌, ཅིའ༌ཟེར༌ན༌ ཁྱོ༌ཞའེ༌ ནང༌ང༌ མུན༌གྲིག༌པོ༌ མེད༌ཁན༌ ཆེན༌ སོང༌ཏེ༌ དཀོན༌མཆོག༌གི༌ དེན༌བའེ༌ འོད༌དི༌ ལྡངས༌པོ༌ ཁྱེབ༌ཨིན༌ ཆ༌རུག༌།
1JO 2:9 ཡང༌ སུ༌ཞིག༌གི༌ “ང༌ འོད༌དི༌ ནང༌ང༌ ཨིན༌” ཟེར༌ཨིན༌, ཨིན༌ནའང༌ རང༌ངི༌ སྤུན༌ ཡ༌ སྤུན༌མོ༌ ཉམ༌པོ༌ ནཕ༌རད༌ ཅོ༌ན༌, ཏེ༌གུན༌ ཏ༌རུང༌ངའང༌ མུན༌གྲིག༌གི༌ ནང༌ང༌ དུགས༌ཏེ༌ ཨིན༌ནོག༌།
1JO 2:10 ཡང༌ སུ༌ཞིག༌གི༌ རང༌ངི༌ སྤུན༌ ཡ༌ སྤུན༌མོ༌ ཉམ༌པོ༌ ཅམས༌པ༌ བོར༌རད༌ན༌, ཁོ༌ འོད༌དི༌ ནང༌ང༌ ནས༌ཏེ༌ ཨིན༌ནོག༌, ཁོའེ༌ ནང༌ང༌, ཁོ༌ སྡིག༌པའེ༌ ནང༌ང༌ གྱེལ༌ཅུག༌ཁན༌ ཅའང༌ མེད༌ཏེ༌ ཨིན༌ནོག༌།
1JO 2:11 ཨིན༌ནའང༌ སུ༌ཞིག༌གི༌ རང༌ངི༌ སྤུན༌ཞིག༌ག༌ ནཕ༌རད༌ ཅོའད༌ན༌, ཁོ༌ མུན༌གྲིག༌གི༌ ནང༌ང༌ ལུས༌ཏེ༌ ཏེ༌ནང༌ང༌ གྲུལ༌ཨིན༌ ཨིན༌ནོག༌། ཁོ༌ ཀ༌རུ༌ ཆའད༌ ཁོའ༌ གྱུས༌ མེད༌ཀྱག༌, ཅིའ༌ཟེར༌ན༌ མུན༌གྲིག༌གི༌ ཁོ༌ ཞ༌ར༌ གྱུར༌ཅུག༌ཏེ༌ ཨིན༌ནོག༌།
1JO 2:12 ངའེ༌ ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ངའེ༌ ཁྱོ༌ཞའ༌ བྲིའད༌, ཅིའ༌ཟེར༌ན༌ གཙོ༌བོ༌ ཡེ༌ཤུ༌ གྱུད༌ཏེ༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ སལ༌ལ༌ ཛད༌ཏེ༌ ཨིན༌།
1JO 2:13 ཏད༌པའེ༌ ནང༌ང༌ ལྡན༌ཁན༌གུན༌, ཁྱོ༌ཞའ༌ ངའེ༌ བྲིའད༌, ཅིའ༌ཟེར༌ན༌ གོ༌ཟུག༌ནེ༌ ཕར༌ལ༌ ཞུགས༌ཏེ༌ ཡོད༌ཁན༌ནི༌ མ༌ཤི༌ཀ༌ ཁྱོ༌ཞའེ༌ ཤེས༌ཏེ༌ ཨིན༌། ཏད༌པའེ༌ ནང༌ང༌ ཁྱོག༌ཏོང༌གུན༌, ངའེ༌ ཁྱོ༌ཞའ༌ བྲིའད༌, ཅིའ༌ཟེར༌ན༌ ངན༌པ༌ ཤེ༌ཏན༌ནི༌ཀ༌ ཁྱོ༌ཞའ༌ གྱལ༌ཁའ༌ ཐོབ༌ཏེ༌ ཨིན༌།
1JO 2:14 ཏད༌པའེ༌ ནང༌ང༌ ཕྲུ༌གུ༌གུན༌, ཁྱོ༌ཞའ༌ བྲིའད༌, ཅིའ༌ཟེར༌ན༌ ཁྱོ༌ཞའེ༌, དཀོན༌མཆོག༌ ཡབ༌ ཤེས༌ཏེ༌ ཨིན༌། ཏད༌པའེ༌ ནང༌ང༌ ལྡན༌ཁན༌གུན༌, ངའེ༌ ཁྱོ༌ཞའ༌ བྲིའད༌, ཅིའ༌ཟེར༌ན༌ ཁྱོ༌ཞའེ༌ གོ༌ཟུག༌ནེ༌ ཕར༌ལ༌ ཞུགས༌ཏེ༌ ཡོད༌ཁན༌ནི༌ མ༌ཤི༌ཀ༌ ཤེས༌ཏེ༌ ཨིན༌། ཏད༌པའེ༌ ནང༌ང༌ ཁྱོག༌ཏོང༌གུན༌, ངའེ༌ ཁྱོ༌ཞའ༌ བྲིའད༌, ཅིའ༌ཟེར༌ན༌ ཁྱོ༌ཞའེ༌ མ༌ཤི༌ཀའེ༌ ནང༌ང༌ ཏད༌པ༌བོ༌ སྟན༌པོ༌, ཡང༌ དཀོན༌མཆོག༌གི༌ བཀའ༌ ཁྱོ༌ཞའེ༌ སྙིང༌གུན༌ནི༌ ནང༌ང༌ ནས༌ཏེ༌ ཁྱོ༌ཞའ༌ ངན༌པ༌ ཤེ༌ཏན༌ནི༌ཀ༌ གྱལ༌ཁའ༌ ཐོབ༌ཏེ༌ ཨིན༌།
1JO 2:15 ཇིག༌རྟེན༌ དང༌ ཇིག༌རྟེན༌ནི༌ ནང༌ང༌ ཡོད༌ཁན༌གུན༌ནི༌ཀ༌ སེམས༌ མ༌ཆགས༌ཤིག༌། ཀལ༌ཏེས༌ མི༌ཞིག༌ ཇིག༌རྟེན༌ དང༌, ཏེ༌ནང༌ང༌ ཡོད༌ཁན༌གུན༌ལ༌ ཆགས༌ན༌, ཁོའེ༌ ནང༌ང༌ ཡབ༌ དཀོན༌མཆོག༌གི༌ ཕིའ༌ ཅམས༌པ༌ མེད༌པ༌ ཨིན༌ནོག༌།
1JO 2:16 ཅིའ༌ཟེར༌ན༌ ཇིག༌རྟེན༌ནི༌ ལས༌ ཚང༌མའེ༌ ནང༌ང༌, སྡིག༌པའེ༌ དོད༌པ༌, མིག༌ནེ༌ ཐོང༌ཁན༌ ཚང༌མའེ༌ དོད༌པ༌ དང༌ རང༌ང༌ ཡོད༌ཁན༌ དང༌ ཅོ༌ཁན༌གུན༌ནི༌ཀ༌ ཕོ༌སོ༌ ཡོང༌ང༌ནོག༌། ཏེ༌གུན༌ ཡབ༌ དཀོན༌མཆོག༌གི༌ ཆོགས༌ནེ༌ མན༌པ༌, ཇིག༌རྟེན༌ནི༌ ཆོགས༌ནེ༌ ཨིན༌ནོག༌།
1JO 2:17 ཇིག༌རྟེན༌ དང༌ ཇིག༌རྟེན༌ནི༌ མི༌གུན༌ནི༌ དོད༌པ༌གུན༌ མེད༌ཁན༌ ཆེན༌, ཨིན༌ནའང༌ དཀོན༌མཆོག༌གི༌ ཐུགས༌ཐད༌ ནང༌ཞིན༌ གྲུལ༌ཁན༌གུན༌ ཏུས༌གྱུན༌ སོན༌ཏེའ༌ ལུས༌ཨིན༌།
1JO 2:18 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ཏ༌ ཐའ༌མའེ༌ ཞག༌པོ༌ ཉེ༌མོ༌ ལེབས༌ཏེ༌ ཨིན༌ནོག༌། མ༌ཤི༌ཀའེ༌ གྲ༌འོ༌ ཡོང༌ཅེས༌པོ༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌, ཡང༌ དག༌སའང༌ མ༌ཤི༌ཀའེ༌ གྲ༌འོ༌ མང༌པོ༌ཞིག༌ ཡོངས༌ཏེ༌ ཡོད༌ཅེས༌པའེ༌ ང༌དང༌ང༌ ཐའ༌མའེ༌ ཏུས༌ ཉེ༌མོའ༌ ལེབས༌ཏེ༌ ཨིན༌ཁན༌བོ༌ ཧ༌གོའ༌ནོག༌།
1JO 2:19 ཏེ༌གུན༌ ང༌དང༌གུན༌ནི༌ ཕྲོ༌ནེ༌ བིངས༌ཏེ༌ སོང༌, ཨིན༌ནའང༌ དེན༌བ༌ ཁོང༌གུན༌ ང༌དང༌ངི༌ སྤུན༌ མན༌པིན༌, ཀལ༌ཏེས༌ ཨིན༌པིན༌ན༌, ང༌དང༌གུན༌ ཉམ༌པོ༌ དུགས༌ཏེ༌ ཡོད༌གྲོ༌། ཏ༌ ཁོང༌གུན༌ ང༌དང༌གུན༌ནི༌ ཕྲོ༌ནེ༌ བིངས༌ཏེ༌ སོང༌ པ༌སང༌, ཁོང༌གུན༌ ང༌དང༌གུན༌ནི༌ སྤུན༌ མན༌ཁན༌བོ༌ ཏན༌ཏན༌ སོང༌ཏེ༌ ཨིན༌ནོག༌།
1JO 2:20 ཨིན༌ནའང༌ ཁྱོ༌ཞ༌གུན༌ལ༌ དཀོན༌མཆོག༌གི༌ ཏམ༌པའེ༌ ཐུག༌ཉིད༌ སལ༌ལ༌ ཛད༌པ༌, ཁྱོ༌ཞའ༌ ཚང༌མའ༌ དེན༌བ༌བོ༌ ཧ༌གོའ༌ནོག༌།
1JO 2:21 ངའེ༌ ཁྱོ༌ཞ༌གུན༌ལ༌ དེན༌བ༌ གྱུས༌ མེད༌ཀྱག༌ སམ༌ཏེ༌ མན༌པ༌, ཁྱོ༌ཞ༌གུན༌ལ༌ ཏན༌ཏན༌ ཤེས༌ཏེ༌ ཡང༌ ཟུན༌བོ༌ དེན༌བའེ༌ ཆོགས༌ནེ༌ མི༌ཡོང༌ཅེས༌པོ༌ གྱུས༌ཡོད༌ པ༌སང༌ བྲིས༌ཏེ༌ ཨིན༌།
1JO 2:22 ཏེ༌ནེ༌ ཟུན༌ཇན༌ སུ༌ ཨིན༌ནོག༌? “ཡེ༌ཤུ༌ ནི༌ མ༌ཤི༌ཀ༌ མ༌ནོག༌” ཟེར༌ཁན༌བོ༌ མ༌ཤི༌ཀའེ༌ གྲ༌འོ༌ ཨིན༌ནོག༌, ཁོའེ༌, ཡབ༌ དང༌ སྲས༌ ཉིས༌ཀོའ༌ ཁོ༌རང༌ངི༌ གཙོ༌བོ༌ མ༌རྩིའ༌ ཨིན༌ནོག༌།
1JO 2:23 སུ༌ཞིག༌གི༌ ཡེ༌ཤུ༌, དཀོན༌མཆོག༌གི༌ སྲས༌ ཨིན༌ཁན༌བོ༌ ཐེའ༌མེད༌ན༌, ཏེ༌ མི༌བོའེ༌ ཡབ༌ ཉམ༌པོའང༌ བྲེལ༌ མེད༌ཏེ༌ ཨིན༌ནོག༌ ཡང༌ སུ༌ཞིག༌གི༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ཁན༌བོའེ༌ སྤང༌པོ༌ ཏང༌ན༌, ཁོའེ༌ བྲེལ༌ ཡབ༌ ཉམ༌པོའང༌ ཡོད༌ཏེ༌ ཨིན༌ནོག༌།
1JO 2:24 གོ༌མ༌ནེ༌ ཕར༌ལ༌ ཚོར༌ཁན༌ནི༌ ཏེ༌ ལོན༌ ཟང༌པོ༌བོ༌ ཁྱོ༌ཞ༌གུན༌ནི༌ སྙིང༌ངི༌ ནང༌ང༌ ལུས༌གོས༌། ཀལ༌ཏེས༌ ཏེ༌བོ༌ ཁྱོ༌ཞ༌གུན༌ནི༌ ནང༌ང༌ ལུས༌ན༌, ཁྱོ༌ཞ༌གུན༌ནི༌ བྲེལ༌བོ༌ ཡབ༌ དང༌ སྲས༌ ཉམ༌པོའང༌ ལུས༌ཨིན༌།
1JO 2:25 ཏེ༌བོའེ༌ བྲས༌བུ༌ ནི༌, ང༌དང༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཁོང༌ངི༌ ཞལ༌ཆད༌ ཛད༌ཁན༌བོ༌ ཨིན༌ནོག༌།
1JO 2:26 ངའེ༌ ཏེ༌ སྤེ༌ར༌གུན༌, ཁྱོ༌ཞ༌གུན༌ གོབ༌སྐོར༌རི༌ ནང༌ང༌ ཁྱོང༌ཅེས༌སི༌ རྩོན༌གྲུས༌ ཅོ༌ཁན༌གུན༌ནི༌ སྐོར༌ལ༌ སྤང༌པུད༌ཅེས༌ལ༌ བྲིས༌ཏེ༌ ཨིན༌།
1JO 2:27 ཨིན༌ནའང༌ དཀོན༌མཆོག༌གི༌ ཀ༌ནེ༌ ཐོབ༌ཁན༌ནི༌ ཏམ༌པའེ༌ ཐུག༌ཉིད༌བོ༌ ཁྱོ༌ཞའེ༌ ནང༌ང༌ ལུས༌ པ༌སང༌, ཁྱོ༌ཞ༌གུན༌ལ༌ སུ༌ཞིག༌གིའང༌ ལབ༌གོས༌ མེད༌ཀྱག༌། ཐུག༌ཉིད༌ ཁོང༌རང༌ངི༌ ཁྱོ༌ཞ༌གུན༌ལ༌ ཅི༌ཚང༌མ༌ ལབ༌བ༌ ཛད༌ད༌ནོག༌། ཏེ༌ ལབ༌ཞ༌གུན༌ དེན༌བ༌ ཨིན༌ནོག༌, ཟུན༌ མ༌ནོག༌། ཏེ༌ནེ༌ ཀ༌ཟུག༌ ཁོང༌ངི༌ ལབ༌བ༌ ཛདས༌, ཁྱོ༌ཞ༌གུན༌ མ༌ཤི༌ཀ༌ ཉམ༌པོ༌ བྲེལ༌ཏེ༌ དུག༌ཤིག༌།
1JO 2:28 ཏེན༌ན༌བོའེ༌ཕིའ༌ ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌, ཁྲེལ༌བ༌ མ༌ཆའ༌ ཡང༌ ང༌དང༌གུན༌ ཇིགས༌ མ༌ཇིགས༌ས༌, ཁོང༌ངི༌ དུན༌ལ༌ ལང༌ཅེས༌སི༌ ཕིའ༌ ཁོང༌ངི༌ ནང༌ང༌ བྲེལ༌བོ༌ ཆད༌མེད༌ལ༌ བོར༌ཤིག༌།
1JO 2:29 མ༌ཤི༌ཀ༌ ཀྲང༌པོ༌ ཨིན༌ཁན༌བོ༌ ཁྱོ༌ཞ༌གུན༌ལ༌ གྱུས༌ཡོད༌ པ༌སང༌ ལས༌ ཀྲང༌པོ༌ ཅོ༌ཁན༌གུན༌ ཁོང༌ནེ༌ སྐྱེས༌ཏེ༌ ཨིན༌ཁན༌བོའང༌ གྱུས༌ཨིན༌ནོག༌།
1JO 3:1 ལྟོས༌ཤིག༌གའང༌, ཡབ༌ དཀོན༌མཆོག༌གི༌ ང༌དང༌གུན༌ལ༌ ཙམ༌ཤིག༌གི༌ ཅམས༌པ༌ ཛད༌ཏེ༌ ཨིན༌ནོག༌, ཁོང༌ངི༌ ང༌དང༌གུན༌ལ༌ ཁོང༌རང༌ངི༌ ཕྲུ༌གུ༌གུན༌ མོལ༌དུག༌, ཡང༌ ང༌དང༌ ཏེ༌བོ༌ ཨིན༌ནའང༌ ཨིན༌ནོག༌། ཨིན༌ནའང༌ ཇིག༌རྟེན༌ནི༌ ཏད༌པ༌ མེད༌ཁན༌གུན༌ནི༌ ང༌དང༌གུན༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ཁན༌བོ༌ ངོ༌ཤེས༌ས༌ མ༌ནོག༌, ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌ ངོ༌ མ༌ཤེས༌།
1JO 3:2 ཅེས༌པའེ༌ ཛ༌འོ༌གུན༌, དག༌ས༌ ང༌དང༌ དཀོན༌མཆོག༌གི༌ ཕྲུ༌གུ༌གུན༌ ཨིན༌ནོག༌། ང༌དང༌གུན༌ ཀ༌ཟུག༌ རིག༌ གྱུར༌ཨིན༌, དག༌ས༌ ཚོག༌པ༌ ང༌དང༌གུན༌ལ༌ སྔོན༌ཅུག༌ག༌ མ༌ཛད༌ད༌ ཨིན༌ནོག༌། ཨིན༌ནའང༌ མ༌ཤི༌ཀ༌ ལོགས༌ཏེ༌ སྐྱོད༌ ཟ༌ནེ༌, ང༌དང༌གུན༌ ཁོང༌ ཙོགས༌ གྱུར༌ཅེས༌པོ༌ ང༌དང༌ང༌ གྱུས༌ཨིན༌ནོག༌, ཅིའ༌ཟེར༌ན༌ ང༌དང༌གུན༌ནི༌ ཁོང༌ ཁོང༌རང༌ངི༌ དེན༌བའེ༌ ཟིར༌རྗིད༌དི༌ ཡིབས༌སི༌ ནང༌ང༌ ཇལ༌ཨིན༌།
1JO 3:3 ཡང༌ ཏེ༌བོ༌ ཐོང༌ཅེས༌སི༌ དོད༌པ༌ བོར༌ཁན༌གུན༌ནི༌, ཁོ༌རང༌ རྩང༌མ༌ བོར༌ར༌ནོག༌, ཀ༌ཟུག༌ མ༌ཤི༌ཀ༌ རྩང༌མ༌ ཨིན༌།
1JO 3:4 ཡང༌ སྡིག༌པ༌ ཅོ༌ཁན༌གུན༌ནི༌ དཀོན༌མཆོག༌གི༌ བཀའ༌ཁྲིམས༌པོ༌ ཅགས༌ཏེ༌ ཨིན༌ནོག༌, ངོས༌པོའ༌ བཀའ༌ཁྲིམས༌ ཅག༌ཅེས༌པོ༌ ཁོ༌རང༌ སྡིག༌པ༌ ཨིན༌ནོག༌།
1JO 3:5 ཡང༌ ཁྱོ༌ཞ༌གུན༌ལ༌ གྱུས༌ཨིན༌ནོག༌, ང༌དང༌ངི༌ སྡིག༌པ༌གུན༌ མེད༌ཁན༌ ཅོ༌ཅེས༌སི༌ ཕིའ༌ མ༌ཤི༌ཀ༌ སྐྱོད༌ད༌ ཛདས༌། ཁོང༌ངི༌ ནང༌ང༌ སྡིག༌པ༌ མེད༌པིན༌།
1JO 3:6 ཡེ༌ཤུའི༌ ནང༌ང༌ ནས༌ཁན༌གུན༌ནི༌ སྡིག༌པ༌ ཅོ༌ཨིན༌ མི༌དུག༌, ཡང༌ སྡིག༌པ༌ ཅོ༌ཨིན༌ དུག༌ཁན༌གུན༌ལ༌ མ༌ཤི༌ཀ༌ མ༌ཇལ༌ལ༌, ཡ༌ ངོའང༌ མ༌ཤེས༌ས༌ ཨིན༌ནོག༌།
1JO 3:7 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, སུ༌ཞིག༌གའང༌ ཁྱོ༌ཞ༌གུན༌ལ༌ གོབ༌སྐོར༌ ཏང༌ མ༌ཅུག༌ཤིག༌། འོས༌པའེ༌ ལས༌ ཅོ༌ཁན༌ནི༌ མི༌བོ༌ ཀྲང༌པོ༌ ཨིན༌ནོག༌, ཀ༌ཟུག༌གི༌ མ༌ཤི༌ཀ༌ ཨིན༌།
1JO 3:8 སྡིག༌པ༌ ཅོ༌ཨིན༌ དུག༌ཁན༌གུན༌ ཤེ༌ཏན༌ནི༌ ཨིན༌ནོག༌, ཅིའ༌ཟེར༌ན༌, ཤེ༌ཏན༌ནི༌ ཇིག༌རྟེན༌ ཆགས༌པ༌ནེ༌ ཕར༌ལ༌ སྡིག༌པ༌ ཅོ༌ཨིན༌ ཡོངས༌ཏེ༌ ཨིན༌། དཀོན༌མཆོག༌གི༌ སྲས༌, ཤེ༌ཏན༌ནི༌ ལས༌གུན༌ མེད༌ཁན༌ ཛད༌ཅེས༌སི༌ ཕིའ༌ སྐྱོད༌ད༌ ཛདས༌།
1JO 3:9 དཀོན༌མཆོག༌ནེ༌ སྐྱེས༌ཁན༌གུན༌ནི༌ སྡིག༌པ༌ ཅོ༌ཨིན༌ དུག༌ག༌ མ༌ནོག༌, ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌ ཁོང༌གུན༌ནི༌ ནང༌ང༌ ནས༌ས༌ནོག༌། ཁོང༌གུན༌ལ༌ སྡིག༌པ༌ ཅོ༌ཨིན༌ དུག༌ཉན༌ན༌ མ༌ནོག༌, ཅིའ༌ཟེར༌ན༌ ཁོང༌གུན༌ དཀོན༌མཆོག༌ནེ༌ སྐྱེས༌ཏེ༌ ཨིན༌ནོག༌།
1JO 3:10 ཏེ༌བོའེ༌ཕིའ༌ ང༌དང༌གུན༌ལ༌ སུ༌ དཀོན༌མཆོག༌གི༌ ཕྲུ༌གུ༌གུན༌ ཡང༌ སུ༌ ཤེ༌ཏན༌ནི༌ ཕྲུ༌གུ༌གུན༌ ཨིན༌ཁན༌བོ༌ ཤེས༌ས༌ནོག༌། ལས༌ ཟང༌པོ༌ ཡ༌ རང༌ངི༌ སྤུན༌ལ༌ ཅམས༌པ༌ མ༌ཅོ༌ཁན༌གུན༌ དཀོན༌མཆོག༌གི༌ ཕྲུ༌གུ༌ མ༌ནོག༌།
1JO 3:11 ཁྱོ༌ཞ༌གུན༌ནི༌ གོ༌མ༌ནེ༌ ཕར༌ལ༌ ཚོར༌ཁན༌ནི༌ ལོན༌བོ༌ འི༌བོ༌ ཨིན༌, “ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌གོ༌ཤེས༌ ཨིན༌ནོག༌།”
1JO 3:12 ཨ༌དམ༌མི༌ བུ༌ཚ༌, ཤེ༌ཏན༌ནི༌ ཨིན༌ཁན༌ ཀ༌ཡིན༌ ཙོགས༌ མ༌གྱུར༌ཤིག༌། ཁོའེ༌ རང༌ངི༌ ནོ༌བོ༌ སདས༌། ཅི༌ཕིའ༌ སདས༌? ཅིའ༌ཟེར༌ན༌ ཀ༌ཡིན༌ནི༌ ལས༌གུན༌ ངན༌པ༌ ཡང༌ ཁོའེ༌ ནོའེ༌ ལས༌གུན༌ ཀྲང༌པོ༌ ཡོད༌པིན༌།
1JO 3:13 སྤུན༌གུན༌ ཀལ༌ཏེས༌ ཇིག༌རྟེན༌པའེ༌ ཁྱོ༌ཞ༌གུན༌ལ༌ ནཕ༌རད༌ ཅོའད༌ན༌, ཏེ༌བོའ༌ ཡམ༌ཚན༌ མ༌ཚོར༌ཤིག༌།
1JO 3:14 ང༌དང༌གུན༌ ཤི༌ཅེས༌ནེ༌ ཐར༌ཏེ༌ སོན༌པོའེ༌ ནང༌ང༌ དུགས༌ཏེ༌ ཨིན༌ཁན༌བོ༌ ང༌དང༌གུན༌ལ༌ ཤེས༌ས༌ནོག༌, ཅིའ༌ཟེར༌ན༌ ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོའ༌ནོག༌། ཡང༌ ཅམས༌པ༌ མ༌ཅོ༌ཁན༌གུན༌ ཏ༌རུང༌ངའང༌ ཤི༌ཏེ༌ ཨིན༌ནོག༌།
1JO 3:15 རང༌ངི༌ སྤུན༌ ཡ༌ སྤུན༌མོ༌ ཞིག༌ག༌ ནཕ༌རད༌ ཅོ༌ཁན༌གུན༌ དཀོན༌མཆོག༌གི༌ སྐུན༌དུན༌ལ༌ མི༌སད༌ ཙོགས༌ ཨིན༌ནོག༌། ཡང༌ མི༌སད༌ཅིག༌གི༌ ནང༌ང༌ ཐའ༌མེད༌པའེ༌ མི༌ཚེ༌ མེད༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།
1JO 3:16 ཅམས༌པ༌བོ༌ ང༌དང༌གུན༌ནི༌ འི༌ཀ༌ནེ༌ ཧ༌གོའ༌ནོག༌, གཙོ༌བོ༌ ཡེ༌ཤུའི༌ ང༌དང༌གུན༌ནི༌ ཕིའ༌, ཁོང༌རང༌ངི༌ སྲོག༌ སལ༌ལ༌ ཛདས༌། ང༌དང༌གུན༌ནིའང༌ རང༌ངི༌ སྤུན༌གུན༌ནི༌ ཕིའ༌ སྲོག༌པོ༌ ཏང༌གོས༌།
1JO 3:17 ཀལ༌ཏེས༌ ནོར༌ ཡོད༌ཁན༌གུན༌ནི༌, རང༌ངི༌ སྤུན༌ ཡ༌ སྤུན༌མོ༌ ཞིག༌ག༌ མི༌ཚེ༌ ཕུད༌ཅེས༌སི༌ སྒོས༌དོམ༌ ཡོད༌ཁན༌བོ༌ ཤེས༌ཏེའང༌, ཁོའ༌ རོགས༌ ཅོའ༌ མེད༌ན༌, ཁོའེ༌ ནང༌ང༌ དཀོན༌མཆོག༌གི༌ ཅམས༌པ༌ ཀ༌ཟུག༌གི༌ ནས༌ཨིན༌?
1JO 3:18 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ང༌དང༌གུན༌ནི༌ ཁའ༌ ཅིག༌པོ༌ནེ༌ ཅེས༌པ༌ ཅོའད༌ མ༌ཟེར༌ར༌, དེན༌བའ༌ རང༌ངི༌ ལས༌གུན༌ ལག༌ལེན༌ ཅོས༌ཏེ༌ སྟན༌ན༌, མི༌གྱལ༌ལ༌?
1JO 3:19 ཏེ༌བོའེ༌ ང༌དང༌གུན༌ དེན༌བའེ༌ ནང༌ནེ༌ སྐྱེས༌ཁན༌ནི༌ ཕྲུ༌གུ༌ ཨིན༌ཁན༌བོ༌ གྱུས༌ ཆའ༌ནོག༌། ཏེ༌ནེ༌ དཀོན༌མཆོག༌གི༌ སྐུན༌དུན༌ལ༌ ང༌དང༌གུན༌ནི༌ སེམས༌སི༌ ནང༌ང༌ ཞི༌དེ༌ ཡོང༌ཨིན༌།
1JO 3:20 ཀལ༌ཏེས༌ ང༌དང༌ངི༌ སྙིང༌ངི༌, ང༌དང༌ རང༌ང༌ སྐྱོན༌ ཀལ༌ལད༌ན༌, ཇིགས༌ མ༌ཇིག༌ཤིག༌, ཅིའ༌ཟེར༌ན༌, དཀོན༌མཆོག༌ ང༌དང༌ངི༌ སྙིང༌ངི༌ སང༌ ཝང༌ཅན༌ ཞུགས༌ཏེ༌ ཨིན༌ནོག༌། ཁོང༌ངི༌ ཅི༌ཚང༌མ༌ ཁྱེན༌ན༌ ཛད༌ད༌ནོག༌།
1JO 3:21 ཅེས༌པའེ༌ ཛ༌འོ༌གུན༌, ཀལ༌ཏེས༌ ང༌དང༌རང༌ངི༌ སྙིང༌ངི༌, ང༌དང༌གུན༌ལ༌ སྐྱོན༌ ཀལ༌ལ༌མེད༌ན༌, ང༌དང༌གུན༌ནི༌ དཀོན༌མཆོག༌ག༌ མོས༌ལམ༌ ལོ༌ཁྱེལ༌ ཉམ༌པོ༌ ཞུ༌ཉན༌ན༌ནོག༌།
1JO 3:22 ཡང༌ ཅི༌ཞིག༌ ཁོང༌ང༌ ཞུ༌ན༌, ཏེ༌བོ༌ ང༌དང༌གུན༌ལ༌ དཀོན༌མཆོག༌གི༌ ཆོགས༌ནེ༌ ཐོབ༌དུག༌, ཅིའ༌ཟེར༌ན༌ ང༌དང༌གུན༌ནི༌ ཁོང༌ངི༌ བཀའ༌གུན༌ལ༌, ཁའ༌ཉན༌ཏེ༌ ཁོང༌ ཐུགས༌ཐད༌ཅེས༌སི༌ ལས༌གུན༌ ཅོའ༌ནོག༌།
1JO 3:23 ཁོང༌ངི༌ བཀའ༌བོ༌ འི༌བོ༌ ཨིན༌, ང༌དང༌གུན༌ནི༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀའེ༌ ཚན༌ནི༌ཀ༌ ཏད༌པ༌ ཁྱོང༌གོས༌, ཡང༌ ཁོང༌ངི༌ བཀའ༌ ནང༌ཞིན༌ ཅིག༌ དང༌ ཅིག༌ག༌ ཅམས༌པ༌ ཅོ༌གོས༌།
1JO 3:24 ཁོང༌ངི༌ བཀའ༌གུན༌ལ༌ ཁའ༌ཉན༌ཁན༌གུན༌ དཀོན༌མཆོག༌གི༌ ནང༌ང༌ ནས༌ཏེ༌ ཡང༌ དཀོན༌མཆོག༌ ཁོང༌གུན༌ནི༌ ནང༌ང༌ ནས༌ས༌ ཛད༌ད༌ནོག༌། དཀོན༌མཆོག༌གི༌ ང༌དང༌གུན༌ལ༌ ཏམ༌པའེ༌ ཐུག༌ཉིད༌ སལ༌ལ༌ ཛད༌ པ༌སང༌, དཀོན༌མཆོག༌ ང༌དང༌གུན༌ནི༌ ནང༌ང༌ ནས༌ས༌ ཛད༌ཏེ༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།
1JO 4:1 ཅེས༌པའེ༌ ཛ༌འོ༌གུན༌, སུ༌ཚང༌མའེ༌ སྤེ༌ར༌གུན༌ལ༌ དེན༌ མ༌ཤེས༌ཤིག༌, ཨིན༌ནའང༌ རྩར༌ཅོད༌ ཏངས༌ཏེ༌ ཏེ༌ མི༌གུན༌ནི༌ ནང༌ང༌ ཡོད༌ཁན༌ནི༌ སེམས༌ཉིད༌གུན༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌ག༌ ཡ༌ མ༌ནོག༌ ལྟ༌གོས༌, ཅིའ༌ཟེར༌ན༌ ཟུས༌མའེ༌ ལུང༌སྟོན༌པ༌ མང༌པོ༌, འི༌ ཇིག༌རྟེན༌ནི༌ ནང༌ང༌ བིང༌ ཚར༌ཏེ༌ ཨིན༌ནོག༌།
1JO 4:2 ཁྱོ༌ཞ༌གུན༌ནི༌ དཀོན༌མཆོག༌གི༌ ཏམ༌པའེ༌ ཐུག༌ཉིད༌གུན༌ འི༌ཟུག༌གི༌ ཕེ༌ཤེ༌ཤེས༌ ཨིན༌ནོག༌། ཡེ༌ཤུ༌ མ༌ཤི༌ཀ༌ འི༌ ཇིག༌རྟེན༌ནི༌ ནང༌ང༌ མིའི༌ ཚུལ༌ལ༌ ལྟམས༌ཏེ༌ ཨིན༌ཁན༌བོའ༌ སྤང༌པོ༌ ཏང༌ཁན༌ནི༌ སེམས༌ཉིད༌པོ༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌།
1JO 4:3 ཨིན༌ནའང༌ ཡེ༌ཤུའི༌ སྐོར༌ལ༌ ཏེ༌ཙོགས༌ སྤང༌པོ༌ མ༌ཏང༌ཁན༌ནི༌ སེམས༌ཉིད༌པོ༌ དཀོན༌མཆོག༌གི༌ ཆོགས༌ནེ༌ མན༌པ༌, མ༌ཤི༌ཀའེ༌ གྲ༌འོའེ༌ སེམས༌ཉིད༌ ཨིན༌ནོག༌, ཀ༌བོ༌ ཡོང༌ཅེས༌ཅན༌ ཨིན༌ནོག༌, མ༌ཚད༌ དག༌སའང༌ འི༌ ཇིག༌རྟེན༌ནི༌ ནང༌ང༌ ཡོད༌ཁན༌བོའེ༌ སྐོར༌ལ༌ ཁྱོ༌ཞ༌གུན༌ནི༌ ཚོར༌ཏེ༌ ཨིན༌ནོག༌།
1JO 4:4 ཅེས༌པའེ༌ ཏད༌པའེ༌ ནང༌ང༌ ཕྲུ༌གུ༌གུན༌, ཁྱོ༌ཞ༌གུན༌ དཀོན༌མཆོག༌ནེ༌ ཨིན༌ནོག༌, ཡང༌ ཏེ༌ཙོགས༌སི༌ མི༌གུན༌ནི༌ཀ༌ གྱལ༌ཁའ༌ ཐོབས༌ཏེ༌ ཨིན༌ནོག༌, ཅིའ༌ཟེར༌ན༌ ཁྱོ༌ཞའེ༌ ནང༌ང༌ ཡོད༌ཁན༌ནི༌ ཐུག༌ཉིད༌བོ༌, ཇིག༌རྟེན༌པ༌གུན༌ནི༌ ནང༌ང༌ ཡོད༌ཁན༌བོའེ༌ སང༌ ཇིགས༌ས༌ཞིག༌ ཡོད༌ཏེ༌ ཨིན༌ནོག༌།
1JO 4:5 ཁོང༌གུན༌ ཇིག༌རྟེན༌ནེ༌ ཨིན༌ པ༌སང༌, ཇིག༌རྟེན༌ནི༌ ཐོག༌ནེ༌ ལབ༌ཞ༌ ཏང༌ང༌ནོག༌, ཡང༌ ཇིག༌རྟེན༌པ༌གུན༌ནི༌ ཁོང༌ངི༌ ཟེར༌ཁན༌གུན༌ ཉན༌ན༌ནོག༌།
1JO 4:6 ང༌དང༌གུན༌ དཀོན༌མཆོག༌ནེ༌ ཨིན༌ནོག༌། དཀོན༌མཆོག༌ ཤེས༌ཁན༌གུན༌ནི༌ ང༌དང༌ངི༌ ཟེར༌ཁན༌བོའ༌ ཉན༌ན༌ནོག༌, ཨིན༌ནའང༌ དཀོན༌མཆོག༌ནེ༌ མན༌ཁན༌གུན༌ནི༌ ང༌དང༌ངི༌ ཟེར༌ཁན༌བོའ༌ ཉན༌ན༌ མ༌ནོག༌། ཏེ༌གུན༌ གྱུད༌ཏེ༌ ང༌དང༌གུན༌ནི༌ ཀྲང༌པོ༌ ཐུག༌ཉིད༌ དང༌ ཟུས༌མ༌ སེམས༌ཉིད༌ ཤེས༌ས༌ནོག༌།
1JO 4:7 ཅེས༌པའེ༌ སྤུན༌གུན༌, ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌ཤིག༌, ཅིའ༌ཟེར༌ན༌ ཅམས༌པ༌བོ༌ ནི༌ དཀོན༌མཆོག༌གི༌ ཆོགས༌ནེ༌ ཨིན༌ནོག༌། ཅམས༌པ༌ ཅོ༌ཁན༌ ཚང༌མ༌ དཀོན༌མཆོག༌ནེ༌ སྐྱེས༌ཏེ༌ དཀོན༌མཆོག༌ ངོ༌ཤེས༌ས༌ནོག༌།
1JO 4:8 ཨིན༌ནའང༌ ཅམས༌པ༌ མ༌ཅོ༌ཁན༌བོའེ༌, དཀོན༌མཆོག༌ ངོ༌ མ༌ཤེས༌ས༌ ཨིན༌ནོག༌, ཅིའ༌ཟེར༌ན༌ དཀོན༌མཆོག༌ ཅམས༌པ༌ ཨིན༌ནོག༌།
1JO 4:9 དཀོན༌མཆོག༌གི༌ ང༌དང༌གུན༌ལ༌ འི༌ཟམ༌ ཅམས༌པ༌ ཛདས༌, ཁོང༌ངི༌ སྲས༌ གྱུད༌ཏེ༌ ང༌དང༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ ཕིའ༌ ཁོང༌རང༌ངི༌ སྲས༌ ཅིག༌ཅིག༌པོའང༌, འི༌ ཇིག༌རྟེན༌ནི༌ ནང༌ང༌ ཀལ༌ལ༌ ཛདས༌།
1JO 4:10 ཅམས༌པ༌བོ༌ ནི༌, ང༌དང༌ངི༌ དཀོན༌མཆོག༌ག༌ ཅམས༌པ༌ ཅོས༌ཁན༌བོ༌ མན༌པ༌, ཁོང༌ངི༌ ང༌དང༌གུན༌ལ༌ ཅམས༌པ༌ ཛད༌ཏེ༌, ང༌དང༌ངི༌ སྡིག༌པའེ༌ ཕིའ༌ ཁོང༌རང༌ངི༌ སྲས༌ ཆོད༌པའེ༌ ཚུལ༌ལ༌ ཀལ༌ལ༌ ཛད༌ཁན༌བོ༌ ཨིན༌ནོག༌།
1JO 4:11 ཅེས༌པའེ༌ ཛ༌འོ༌གུན༌, དཀོན༌མཆོག༌གི༌ ང༌དང༌གུན༌ལ༌ ཏེ༌ཟམ༌ ཅམས༌པ༌ ཛད༌ པ༌སང༌, ང༌དང༌གུན༌ནིའང༌ ཅིག༌ དང༌ ཅིག༌ག༌ ཅམས༌པ༌ ཅོ༌གོ༌ཤེས༌ ཨིན༌ནོག༌།
1JO 4:12 དཀོན༌མཆོག༌ ནི༌ སུ༌ཞིག༌གའང༌ མ༌ནེ༌ མ༌ཇལ༌ཀྱག༌། ཨིན༌ནའང༌ ཀལ༌ཏེས༌ ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌ན༌, ཏེ༌ནེ༌ དཀོན༌མཆོག༌ ང༌དང༌ངི༌ ནང༌ང༌ ཞུགས༌ས༌ནོག༌, ཡང༌ ང༌དང༌གུན༌ནི༌ མི༌ཚེའེ༌ ནང༌ང༌ དཀོན༌མཆོག༌གི༌ ཅམས༌པ༌བོ༌ དྲན༌དྲ༌ གྲུབ༌ཏེ༌ ཨིན༌ནོག༌།
1JO 4:13 ཁོང༌ ང༌དང༌ངི༌ ནང༌ང༌ ཡང༌ ང༌དང༌གུན༌ ཁོང༌ངི༌ ནང༌ང༌ ཞུགས༌ཏེ༌ ཡོད༌ཁན༌བོ༌ ང༌དང༌གུན༌ལ༌ ཧ༌གོའ༌ནོག༌, ཅིའ༌ཞུ༌ན༌ ཁོང༌ངི༌ ཁོང༌རང༌ངི༌ ཐུག༌ཉིད༌, ང༌དང༌གུན༌ལ༌ སལ༌ལ༌ ཛདས༌།
1JO 4:14 ཡབ༌བི༌ རང༌ངི༌ སྲས༌པོ༌, ཇིག༌རྟེན༌པ༌གུན༌ནི༌ སྐྱབ༌གོན༌ ཛད༌ཏེ༌ ཀལ༌ལ༌ ཛད༌ཁན༌བོ༌ ང༌ཞ༌གུན༌ནི༌ ཐོང༌ཏེ༌ སྤང༌པོའང༌ ཏང༌ངད༌།
1JO 4:15 ཡེ༌ཤུ༌ དཀོན༌མཆོག༌གི༌ སྲས༌ ཨིན༌ནོག༌ ཟེར༌ཏེ༌ སྤང༌པོ༌ ཏང༌ཁན༌ ཚང༌མའེ༌ ནང༌ང༌ དཀོན༌མཆོག༌ ཞུགས༌ས༌ནོག༌, ཡང༌ དཀོན༌མཆོག༌གི༌ ནང༌ང༌ ཁོང༌གུན༌ ནས༌ས༌ནོག༌།
1JO 4:16 ང༌དང༌གུན༌ལ༌ དཀོན༌མཆོག༌གི༌ ཅམས༌པ༌ ཛད༌ཁན༌, ང༌དང༌གུན༌ལ༌ གྱུས༌ཨིན༌ནོག༌ ཡང༌ ཏེ༌བོའེ༌ཀ༌ ཨིད༌ཤེས༌ ཅོའ༌ནོག༌། དཀོན༌མཆོག༌ ནི༌ ཅམས༌པ༌ ཨིན༌ནོག༌, ཡང༌ ཅམས༌པའེ༌ ནང༌ང༌ ནས༌ཁན༌གུན༌ དཀོན༌མཆོག༌གི༌ ནང༌ང༌ ནས༌ས༌ནོག༌, ཡང༌ དཀོན༌མཆོག༌ ཁོང༌གུན༌ནི༌ ནང༌ང༌ ཞུགས༌ས༌ ཛད༌ད༌ནོག༌།
1JO 4:17 དཀོན༌མཆོག༌གི༌ ནང༌ང༌ ནས༌ཏེ༌ ཡོད༌ ཟ༌ནེ༌, ཅམས༌པ༌ ང༌ཏི༌ ནང༌ང༌ ལྡན༌ཨིན༌ སོང༌ཏེ༌ ཐར༌ཁྱེལ༌པ༌ གྱུར༌ཨིན༌། ཏེ༌བོའེ༌ཕིའ༌ ང༌དང༌གུན༌ ཐའ༌མའེ༌ ཏུས༌སི༌ ཁྲིམས༌ཅད༌ལ༌ མ༌ཇིགས༌ས༌, སྤོས༌པ༌ ཉམ༌པོ༌ ཁོང༌ངི༌ དུན༌ལ༌ ལང༌ཐུབ༌ཨིན༌, ཅིའ༌ཟེར༌ན༌ འི༌ ཇིག༌རྟེན༌ནི༌ ནང༌ང༌ ང༌ཏི༌ མི༌ཚེ༌ ཡེ༌ཤུའ༌ ཙོགས༌ལ༌ ཕུད༌ཨིན༌ ཨིན༌ནོག༌།
1JO 4:18 དཀོན༌མཆོག༌གི༌ ཅམས༌པའེ༌ ནང༌ང༌ ཇིགས༌གོས༌ མེད༌ཀྱག༌, ཨིན༌ནའང༌ པུན༌སུམ༌ཚོགས༌པའེ༌ ཅམས༌པ༌ ཡོད༌ན༌, ཏེན༌ན༌བོའེ༌ ང༌དང༌གུན༌ནི༌ ཇིགས༌ཤེས༌གུན༌ མེད༌ཁན༌ ཅོའ༌ནོག༌། ཀལ༌ཏེས༌ ང༌དང༌གུན༌ ཇིགས༌སད༌ན༌, ང༌དང༌གུན༌ ཆད༌པའ༌ ཇིགས༌ཏེ༌ ཨིན༌ནོག༌། ཇིགས༌ཁན༌གུན༌ནི༌ ཁོ༌རང༌གུན༌ནི༌ ནང༌ང༌ ཅམས༌པ༌ ཕུན༌སུམ༌ཚོགས༌པ༌ཞིག༌ ལྡན༌ མ༌ཅུག༌ག༌ ཨིན༌ནོག༌།
1JO 4:19 ང༌དང༌གུན༌ནི༌ ཅམས༌པ༌ ཅོའ༌ནོག༌ ཅིའ༌ཟེར༌ན༌ གོ༌མ༌ དཀོན༌མཆོག༌གི༌ ང༌དང༌ང༌ ཅམས༌པ༌ ཛདས༌།
1JO 4:20 ཏ༌ ཀལ༌ཏེས༌ སུ༌ཞིག༌གི༌ ཟེར༌ན༌, “ངའེ༌ དཀོན༌མཆོག༌ག༌ ཅམས༌པ༌ ཅོའད༌” ཨིན༌ནའང༌ རང༌ངི༌ སྤུན༌ ཡ༌ སྤུན༌མོ༌ ཞིག༌ག༌ ནཕ༌རད༌ ཅོའད༌ན༌, ཁོའེ༌ ཟུན༌ ཏངས༌ཏེ༌ ཨིན༌ནོག༌, ཅིའ༌ཟེར༌ན༌ མིག༌ནེ༌ ཐོང༌ཁན༌ནི༌ ཏེ༌ སྤུན༌ ཡ༌ སྤུན༌མོ༌བོའ༌ ཅམས༌པ༌ མ༌ཅོ༌ན༌, ཏེ༌ནེ༌ ཁོའེ༌ མ༌ནེ༌ མ༌ཇལ༌ཁན༌ནི༌ དཀོན༌མཆོག༌ག༌ ཅམས༌པ༌ ཀ༌ཟུག༌གི༌ ཅོ༌ཨིན༌?
1JO 4:21 ང༌དང༌ང༌ དཀོན༌མཆོག༌གི༌ ཆོགས༌ནེ༌ འིན༌ན༌ བཀའ༌བོ༌ ཐོབ༌ཏེ༌ ཨིན༌, “དཀོན༌མཆོག༌ག༌ ཅམས༌པ༌ ཅོ༌ཁན༌བོའེ༌, ཁོ༌རང༌ངི༌ སྤུན༌གུན༌ལའང༌ ཅམས༌པ༌ ཅོ༌གོས༌།”
1JO 5:1 ཡེ༌ཤུ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ ཨིན༌ཁན༌བོའ༌ ཏད༌པ༌ ཅོ༌ཁན༌ ཚང༌མ༌, དཀོན༌མཆོག༌ནེ༌ སྐྱེས༌ཏེ༌ ཨིན༌ནོག༌, ཡང༌ ཡབ༌ དཀོན༌མཆོག༌ག༌ ཅམས༌པ༌ ཅོ༌ཁན༌ ཚང༌མའེ༌, དཀོན༌མཆོག༌གི༌ ཕྲུ༌གུ༌གུན༌ལའང༌ ཅམས༌པ༌ ཅོའ༌ནོག༌།
1JO 5:2 ཀལ༌ཏེས༌ ང༌དང༌གུན༌ནི༌ དཀོན༌མཆོག༌ག༌ ཅམས༌པ༌ ཅོས༌ཏེ༌, ཁོང༌ངི༌ བཀའ༌རྒྱ༌གུན༌ལ༌ ཁའ༌ཉན༌ནད༌ན༌, ཏེ༌ནེ༌ ང༌དང༌གུན༌ནི༌ དཀོན༌མཆོག༌གི༌ ཕྲུ༌གུ༌གུན༌ལའང༌ ཅམས༌པ༌ ཅོ༌ཁན༌བོ༌ གྱུས༌ཨིན༌ནོག༌།
1JO 5:3 དཀོན༌མཆོག༌གི༌ ཕིའ༌ ཅམས༌པ༌བོ༌ ནི༌, ང༌དང༌གུན༌ནི༌ ཁོང༌ངི༌ བཀའ༌གུན༌ལ༌ ཁའ༌ཉན༌ཅེས༌པོ༌ ཨིན༌ནོག༌, ཡང༌ ཁོང༌ངི༌ བཀའ༌གུན༌ བར༌དོ༌ཅན༌ མེད༌པ༌ ཨིན༌ནོག༌།
1JO 5:4 དཀོན༌མཆོག༌ནེ༌ སྐྱེས༌ཁན༌ ཚང༌མའ༌, ཇིག༌རྟེན༌ནི༌ ངན༌པ༌ ཚང༌མའེ༌ཀ༌ གྱལ༌ཁའ༌ ཐོབ༌ཏེ༌ ཨིན༌ནོག༌། ཡང༌ ང༌དང༌གུན༌ལ༌ མ༌ཤི༌ཀའེ༌ཀ༌ ཏད༌པ༌ ཡོད༌ཅེས༌པོའེ༌, འི༌ གྱལ༌ཁ༌བོ༌ ཐོབ༌ཏེ༌ ཨིན༌ནོག༌།
1JO 5:5 ཇིག༌རྟེན༌ནི༌ཀ༌ སུའ༌ གྱལ༌ཁའ༌ ཐོབ༌ཏེ༌ ཨིན༌ནོག༌? ཏེན༌ན༌གུན༌ལ༌ ཀ༌གུན༌ནི༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ཁན༌བོ༌ ཏད༌པ༌ ཅོའད༌།
1JO 5:6 ཆུའི༌ཁྲུས༌ ལེན༌ན༌ ཛད༌ཁན༌ དང༌ རྐྱང༌ཤིང༌ངི༌ཀ༌ སྐུ༌ཁྲག༌ཕོའ༌ ཛད༌ཁན༌ གུན༌ གྱུད༌ཏེ༌, ཡེ༌ཤུ༌ མ༌ཤི༌ཀ༌ ནི༌, དཀོན༌མཆོག༌གི༌ སྲས༌ ཨིན༌ཁན༌བོ༌ སྔོན༌ན༌ ཛདས༌། ཆུ༌ ཅིག༌པོ༌ མན༌པ༌, ཆུ༌ དང༌ ཁྲག༌ ཉིས༌ཀོ༌ གྱུད༌ཏེ༌། ཡང༌ ཀྲང༌པོ༌ མོལ༌ཁན༌ནི༌ ཏམ༌པའེ༌ ཐུག༌ཉིད༌དི༌, ཏེན༌ན༌བོའེ༌ སྤང༌པོ༌ སལ༌ལ༌ནོག༌།
1JO 5:7 སྤང༌པོ༌ ཏང༌ཁན༌ སུམ༌ ཡོད༌ཏེ༌ ཨིན༌ནོག༌།
1JO 5:8 ཏེ༌གུན༌ ནི༌, ཏམ༌པའེ༌ ཐུག༌ཉིད༌, ཆུའི༌ཁྲུས༌ དང༌ ཁྲག༌ཕོའ༌ ཛད༌ཁན༌ གུན༌ ཨིན༌ནོག༌, ཡང༌ ཏེ༌ སུམ༌ཀོའེ༌ ཡེ༌ཤུ༌ དཀོན༌མཆོག༌གི༌ སྲས༌ ཨིན༌ཁན༌བོའ༌ ཁའ༌ཆམས༌།
1JO 5:9 ཏ༌ ང༌དང༌གུན༌ནི༌ མི༌ སྤང༌པོ༌བོའ༌ ཨིད༌ཤེས༌ ཅོའད༌ན༌, ཏེ༌ནེ༌ དཀོན༌མཆོག༌གི༌ སྤང༌པོ༌བོ༌ མང༌ང༌ ཀྲག༌པོ༌ ཨིན༌ནོག༌, ཅིའ༌ཟེར༌ན༌ འི༌བོ༌ དཀོན༌མཆོག༌གི༌ སྤང༌པོ༌ ཁོང༌རང༌ངི༌ སྲས༌སི༌ སྐོར༌ལ༌ སལ༌ཁན༌བོ༌ ཨིན༌ནོག༌།
1JO 5:10 དཀོན༌མཆོག༌གི༌ སྲས༌སི༌ཀ༌ ཏད༌པ༌ ཅོ༌ཁན༌གུན༌ནི༌ སྙིང༌ངི༌ ནང༌ང༌ ཏེ༌ སྤང༌པོ༌བོ༌ ཡོད༌ཏེ༌ ཏེ༌བོ༌ ཀྲང༌པོ༌ ཨིན༌ཁན༌བོའ༌ ཨིད༌ཤེས༌ ཅོའ༌ནོག༌། ཡང༌ འི༌ སྤང༌པོ༌བོའི༌ཀ༌ ཨིད༌ཤེས༌ མ༌ཅོ༌ཁན༌ ཚང༌མའེ༌, དཀོན༌མཆོག༌ ཟུན༌བ༌ ཐེའ༌ནོག༌, ཅིའ༌ཟེར༌ན༌ ཁོང༌གུན༌ནི༌ དཀོན༌མཆོག༌གི༌ རང༌ངི༌ སྲས༌སི༌ སྐོར༌ལ༌ སལ༌ཁན༌ནི༌ སྤང༌པོ༌བོའི༌ཀ༌ ཏད༌པ༌ མ༌ཅོའ༌ ཨིན༌ནོག༌།
1JO 5:11 ཡང༌ ཏེ༌ སྤང༌པོ༌བོ༌ ནི༌, དཀོན༌མཆོག༌གི༌ ང༌དང༌གུན༌ལ༌ ཐའ༌མེད༌པའེ༌ སྲོག༌ སལ༌ལ༌ ཛདས༌, ཡང༌ ཏེ༌ སྲོག༌པོ༌ ཁོང༌ངི༌ སྲས༌སི༌ ནང༌ང༌ ཡོད༌ཏེ༌ ཨིན༌ནོག༌།
1JO 5:12 སྲས༌ ཡོད༌ཁན༌གུན༌ནི༌ ལག༌ག༌ ཏེ༌ ཐའ༌མེད༌པའེ༌ མི༌ཚེ༌ ཡོད༌, ཡང༌ དཀོན༌མཆོག༌གི༌ སྲས༌ མེད༌ཁན༌གུན༌ནི༌ ནང༌ང༌ མི༌ཚེའང༌ མེད༌།
1JO 5:13 དཀོན༌མཆོག༌གི༌ སྲས༌སི༌ ནང༌ང༌ ཏད༌པ༌ ཅོ༌ཁན༌གུན༌ལ༌ ཐའ༌མེད༌པའེ༌ མི༌ཚེ༌ ཡོད༌ཁན༌བོ༌ གྱུས༌ ཆ༌ཅེས༌སི༌ ཕིའ༌ ངའེ༌ འི༌ ཨི༌གེ༌བོ༌ བྲིའད༌།
1JO 5:14 ཡང༌ དཀོན༌མཆོག༌གི༌ ཐུག༌གོངས༌ ནང༌ཞིན༌ལ༌ ཀལ༌ཏེས༌ ང༌དང༌གུན༌ནི༌ མོས༌ལམ༌ ཞུ༌ན༌, ཁོང༌ངི༌ སན༌ན༌ ཛད༌ཅེས༌པོ༌ ང༌དང༌ངི༌ སྙིང༌ངི༌ ནང༌ང༌ ལོ༌ཁྱེལ༌ ཏན༌ཏན༌ ཨིན༌ནོག༌།
1JO 5:15 ང༌དང༌ངི༌ ཞུ༌ཁན༌གུན༌ ཁོང༌ངི༌ སན༌ན༌ ཛད༌ཅེས༌པོ༌ ང༌དང༌གུན༌ལ༌ གྱུས༌ཡོད༌ པ༌སང༌, ང༌དང༌ངི༌ ཞུས༌ཁན༌གུན༌ ཐོབ༌ཁན༌ དང༌ཙོགས༌ ཨིན༌ནོག༌།
1JO 5:16 ཀལ༌ཏེས༌ སུ༌ཞིག༌ག༌ ཁོའེ༌ སྤུན༌ ཡ༌ སྤུན༌མོ༌ ཞིག༌གི༌, ཉལ༌ཝའེ༌ ནང༌ང༌ མི༌ལེབ༌ཅེས༌སི༌ སྡིག༌པ༌ཞིག༌ ཅོའ༌ ཐོང༌ན༌, ཁོའེ༌ ཕིའ༌ མོས༌ལམ༌ ཞུ༌གོ༌ཤེས༌ ཨིན༌ནོག༌། ཏེ༌ནེ༌ དཀོན༌མཆོག༌གི༌ ཉལ༌ཝའེ༌ ནང༌ང༌ ལེབ༌ མི༌ལེབ༌ཅེས༌སི༌ སྡིག༌པ༌ ཅོ༌ཁན༌བོའ༌ ཤགས༌པ༌ སལ༌ཏེ༌ ཐར༌པའེ༌ མི༌ཚེ༌ སལ༌ལ༌ ཛད༌ཨིན༌། ཨིན༌ནའང༌ ཉལ༌ཝའེ༌ ནང༌ང༌ ལེབ༌ཅེས༌སི༌ སྡིག༌པ༌ཞིག༌ ཡོད༌ཏེ༌ ཨིན༌ནོག༌། ངའེ༌ ཏེ༌ཙོགས༌སི༌ མི༌གུན༌ནི༌ ཕིའ༌ མོས༌ལམ༌ ཞུ༌ཅེས༌ལ༌ ཟེར༌ར༌མེད༌།
1JO 5:17 འི༌ཟུག༌གི༌ ཏ༌, ལས༌ ངན༌པ༌ ཚང༌མ༌ སྡིག༌པ༌ ཨིན༌ནོག༌, ཨིན༌ནའང༌ ཉལ༌ཝའེ༌ ནང༌ང༌ མི༌ལེབ༌ཅེས༌སིའང༌ སྡིག༌པ༌ རིག༌ ཡོད༌ཏེ༌ ཨིན༌ནོག༌།
1JO 5:18 ང༌དང༌ང༌ གྱུས༌ཨིན༌ནོག༌, དཀོན༌མཆོག༌ནེ༌ སྐྱེས༌ཁན༌གུན༌ནི༌ སྡིག༌པ༌ ཅོ༌ཨིན༌ མི༌དུག༌, ཅིའ༌ཟེར༌ན༌ དཀོན༌མཆོག༌གི༌ སྲས༌སི༌ ཁོང༌གུན༌ སྐྱོབ༌བ༌ ཛད༌ད༌ནོག༌ ཡང༌ ངན༌པ༌ ཤེ༌ཏན༌ནི༌ ཁོང༌གུན༌ལ༌ ནོད༌སྐྱལ༌ ཉན༌ན༌ མ༌ནོག༌།
1JO 5:19 ང༌དང༌གུན༌ དཀོན༌མཆོག༌གི༌ ཕྲུ༌གུ༌གུན༌ ཡང༌ ཇིག༌རྟེན༌ གང༌པོ༌ ངན༌པ༌ ཤེ༌ཏན༌ནི༌ ཡོག༌ག༌ ཡོད༌ཏེ༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌།
1JO 5:20 ང༌དང༌གུན༌ལ༌ འི༌བོའང༌ གྱུས༌ཨིན༌ནོག༌, དཀོན༌མཆོག༌གི༌ སྲས༌ སྐྱོད༌ཏེ༌ ང༌དང༌གུན༌ལ༌ དེན༌བའེ༌ དཀོན༌མཆོག༌ སུ༌ ཨིན༌ཁན༌བོ༌ ཧ༌གོ༌ཅེས༌སི༌ ཤེས༌རབས༌ སལ༌ལ༌ ཛདས༌། ཏ༌ ང༌དང༌གུན༌ནི༌ བྲེལ༌ དེན༌བའེ༌ དཀོན༌མཆོག༌ ཉམ༌པོ༌ ཡོད༌ཏེ༌ ཨིན༌ནོག༌, ཅིའ༌ཟེར༌ན༌ ང༌དང༌གུན༌ནི༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀ༌ ཉམ༌པོ༌ བྲེལ༌ ཡོད༌ཏེ༌ ཨིན༌ནོག༌། ཁོང༌ ནི༌ དེན༌བའེ༌ དཀོན༌མཆོག༌ དང༌ ཐའ༌མེད༌པའེ༌ སྲོག༌པོ༌ ཨིན༌།
1JO 5:21 ཅེས༌པའེ༌ ཕྲུ༌གུ༌གུན༌, ཁྱོ༌ཞའ༌ སྐུན༌དྲ༌གུན༌ནེ༌ ཐག༌རིང༌ང༌ དུག༌ཤིག༌།
2JO 1:1 ང༌ ཆོས༌ཚོགས༌སི༌ ལམ༌སྟོན༌པའེ༌, དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ བུ༌མོ༌ དང༌ ཁོའེ༌ ཕྲུ༌གུ༌གུན༌ལ༌ བྲིའད༌། ཁྱོ༌རང༌གུན༌ལ༌ ངའེ༌ དེན༌བའ༌ ཅེས༌པ༌ ཅོའད༌, ཡང༌ ང༌ ཅིག༌པོ༌ མན༌པ༌ དེན༌བའེ༌ ལབ༌ཞ༌གུན༌ གྱུས༌ཡོད༌ཁན༌ནི༌ སྤུན༌གུན༌ནིའང༌,
2JO 1:2 ཅིའ༌ཟེར༌ན༌ དཀོན༌མཆོག༌གི༌ དེན༌བ༌བོ༌ ང༌དང༌གུན༌ནི༌ ནང༌ང༌ ནས༌ཏེ༌ ཡང༌ ཏུས༌གྱུན༌ ང༌དང༌གུན༌ ཉམ༌པོ༌ ལུས༌ཨིན༌།
2JO 1:3 དེན༌བ༌ དང༌ ཅམས༌པའེ༌ ནང༌ང༌ མི༌ཚེ༌ ཕུད༌ ཟ༌ནེ༌, དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཡེ༌ཤུ༌ མ༌ཤི༌ཀ༌ གུན༌ནི༌ ཆོགས༌ནེ༌, ཐུག༌རྗེ༌, སྙིང༌རྗེ༌ དང༌ ཞི༌དེ༌ ང༌དང༌གུན༌ལ༌ ཐོབ༌ཤིག༌།
2JO 1:4 ཁྱོ༌རང༌ངི༌ ཕྲུ༌གུ༌ ཁ༌ཅིག༌, ཡབ༌ དཀོན༌མཆོག༌གི༌ ང༌དང༌གུན༌ལ༌ བཀའ༌ སལ༌ཁན༌ ནང༌ཞིན༌, ཁོང༌ངི༌ དེན༌བའེ༌ཀ༌ གྲུལ༌དུག༌ ཟེར༌ཏེ༌ ཚོར༌ར༌ཅིག༌, ངའ༌ སྲན༌ཏྲེ༌ ཐད༌།
2JO 1:5 ཏ༌ ངའེ༌ བཀའ༌ སོ༌མ༌ཞིག༌གི༌ སྐོར༌ལ༌ མ༌བྲིའ༌, གོ༌མ༌ནེ༌ ཕར༌ལ༌ ང༌དང༌གུན༌ ཉམ༌པོ༌ ཡོད༌ཁན༌བོའེ༌ སྐོར༌ལ༌ བྲིའད༌། ང༌དང༌གུན༌ནི༌ ཅིག༌ དང༌ ཅིག༌ག༌ ཅམས༌པ༌ ཅོ༌གོ༌ཤེས༌ ཨིན༌ནོག༌།
2JO 1:6 ཡང༌ ཅམས༌པ༌བོ༌ ནི༌, ང༌དང༌གུན༌ དཀོན༌མཆོག༌གི༌ བཀའ༌གུན༌ལ༌ ཁའ༌ཉན༌ཏེ༌ གྲུལ༌ཅེས༌པོ༌ ཨིན༌ནོག༌། ཁྱོ༌ཞ༌གུན༌ནི༌ གོ༌མ༌ནེ༌ ཕར༌ལ༌ ཚོར༌ཁན༌ནི༌ བཀའ༌བོ༌ ནི༌, ཁྱོ༌ཞ༌གུན༌ ཏེ༌ ཅམས༌པའེ༌ ནང༌ང༌ གྲུལ༌གོ༌ཤེས༌པོ༌ ཨིན༌ནོག༌།
2JO 1:7 གཙོ༌བོ༌ ཡེ༌ཤུ༌ ངོས༌པོའ༌ ཟུགས༌སི༌ ནང༌ང༌ ཕེབས༌ཁན༌བོའ༌ ཏད༌པ༌ མ༌ཅོ༌ཁན༌ནི༌ གོབ༌སྐོར༌ཁན༌ མང༌པོ༌ཞིག༌, འི༌ ཇིག༌རྟེན༌ནི༌ ནང༌ང༌ བིང༌ཏེ༌ ཨིན༌ནོག༌། ཏེ༌ཙོགས༌སི༌ མི༌གུན༌ མི༌ཚང༌མ༌ གོབ༌སྐོར༌ཁན༌ དང༌ མ༌ཤི༌ཀའེ༌ གྲ༌འོ༌གུན༌ ཨིན༌ནོག༌།
2JO 1:8 དཀོན༌མཆོག༌གི༌ ཕིའ༌ ཁྱོ༌ཞའེ༌ ཞབས༌ཏོག༌ ཞུ༌ཁན༌གུན༌, ཏོན༌མེད༌ལ༌ མ༌ཆའ༌, དཀོན༌མཆོག༌གི༌ ཆོགས༌ནེ༌ ཚང༌རིག༌ སོལ༌རས༌ ཐོབ༌ཅེས༌སི༌ ཕིའ༌ ཁྱོ༌ཞ༌གུན༌ ཤང༌ ཅོ༌ཤིག༌།
2JO 1:9 མ༌ཤི༌ཀའེ༌ ལབ༌ཞ༌གུན༌ནི༌ སང༌ ཐལ༌ཏེ༌ སོང༌ཏེ༌, ཁོང༌ངི༌ ལབ༌ཞའེ༌ ནང༌ང༌ མ༌ལུས༌ཁན༌གུན༌ནི༌ བྲེལ༌བོ༌ དཀོན༌མཆོག༌ ཉམ༌པོ༌ མེད༌པ༌ ཨིན༌ནོག༌། མ༌ཤི༌ཀའེ༌ ལབ༌ཞའེ༌ ནང༌ང༌ ལུས༌ཁན༌གུན༌ནི༌ བྲེལ༌ དཀོན༌མཆོག༌ ཡབ༌ དང༌ ཁོང༌ངི༌ སྲས༌ ཉིས༌ཀོ༌ ཉམ༌པོ༌ ཡོད༌ཏེ༌ ཨིན༌ནོག༌།
2JO 1:10 ཀལ༌ཏེས༌ སུ༌ཞིག༌ ཁྱོ༌ཞ༌གུན༌ནི༌ཀ༌ ཡོངས༌ཏེ༌ མ༌ཤི༌ཀའེ༌ ལབ༌ཞ༌ མན༌པ༌, ཡང༌ ལབ༌ཞ༌ སོ༌སོ༌ རིག༌ ལབ༌ན༌, ཁོང༌གུན༌ རང༌ངི༌ ཁང༌པའེ༌ ནང༌ང༌ མ༌ཉེན༌, མ༌ཚད༌ ཁོང༌གུན༌ལ༌ ཇུའང༌ མ༌ཅོ༌ཤིག༌།
2JO 1:11 སུ༌ཞིག༌གི༌ འི༌ཙོགས༌སི༌ མི༌གུན༌ལ༌ གའ༌སུས༌ ཞུ༌ན༌, ཏེ༌ མི༌བོ༌, ཁོའེ༌ ལས༌ ངན༌པའེ༌ ནང༌ང༌ དྲེས༌ཏེ༌ ཨིན༌ནོག༌།
2JO 1:12 ང༌ ཟེར༌ཅེས༌ ཏ༌ མང༌པོ༌ རག༌, ཨིན༌ནའང༌ ང༌ ནག༌ཙ༌ དང༌ ཉི༌གུ༌ ཉམ༌པོ༌ བྲི༌ཅེས༌པོ༌ ལྡེ༌མོ༌ཞིག༌ ཚོར༌ར༌ མེ༌རག༌། ཁྱོ༌ཞ༌གུན༌ནི༌ ཕྲོའ༌ ཡོངས༌ཏེ༌ དུན༌ལ༌ སྤེ༌ར༌ ཏང༌ཅེས༌སི༌ རེ༌ཝ༌ ཅོའད༌། ཏེ༌ནེ༌ ང༌དང༌གུན༌ནི༌ ཐད༌པོ༌ དྲན༌དྲ༌ གྲུབ༌ཨིན༌།
2JO 1:13 དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ ཁྱོ༌རང༌ངི༌ སྲིང༌མོའེ༌ ཕྲུ༌གུ༌གུན༌ནི༌ ཁྱོ༌ཞ༌གུན༌ལ༌ ཇུ༌ ཞུ༌རུག༌།
3JO 1:1 ཆོས༌ཚོགས༌སི༌ ལམ༌སྟོན༌པའེ༌ ཆོགས༌ནེ༌, འི༌ ཨི༌གེ༌བོ༌ ངའེ༌ ཅེས༌པའེ༌ ཛ༌འོ༌ གཱ༌ཡུས༌ལ༌ བྲིའད༌, ཀ༌བོའ༌ ངའེ༌ དེན༌བའ༌ ཅེས༌པ༌ ཅོའད༌།
3JO 1:2 ཅེས༌པའེ༌ ཛ༌འོ༌, ངའེ༌ མོས༌ལམ༌ ཨིན༌, ཁྱོ༌རང༌ ཅི༌ཚང༌མའེ༌ ནང༌ང༌ ཡར༌གྱས༌ ཅོ༌ཅེས༌ ཡང༌ ཁྱོ༌རང༌ མ༌ཤི༌ཀའེ༌ ནང༌ང༌ ཐུག༌ཉིད༌དི༌ ཐོག༌ནེ༌ ཁམ༌ཟང༌ ལུས༌ས༌ ཙོགས༌ལ༌ ཟུགས༌པའེ༌ ཐོག༌ནེའང༌ ཁམ༌ཟང༌ ལུས༌ཤིག༌།
3JO 1:3 མ༌ཤི༌ཀ༌པའེ༌ སྤུན༌ རིག༌ ངའེ༌ཀ༌ ཡོངས༌ཏེ༌ ཁྱོ༌རང༌ ནི༌, དཀོན༌མཆོག༌གི༌ བཀའེ༌ ནང༌ང༌ ཨིད༌ཤེས༌ཅན༌ དང༌ དཀོན༌མཆོག༌གི༌ དེན༌བ༌ ནང༌ཞིན༌ ཁྱོ༌རང༌ངི༌ མི༌ཚེ༌ ཕུད༌དུག༌ ཟེར༌ཏེ༌ སྤང༌པོ༌ ཏངས༌པ༌, ང༌ མང༌པོ༌ ཐད༌།
3JO 1:4 ངའེ༌ ཕྲུ༌གུ༌གུན༌ནི༌ མི༌ཚེ༌ དཀོན༌མཆོག༌གི༌ དེན༌བ༌ ནང༌ཞིན༌ ཕུད༌དུག༌ ཟེར༌ཏེ༌ ཚོར༌ཁན༌བོའེ༌ སང༌ ཐད༌པོ༌ཞིག༌ ངའེ༌ ཕིའ༌ ཅི༌ ཡོང༌ཨིན༌།
3JO 1:5 ངའེ༌ ཅེས༌པའེ༌ ཛ༌འོ༌, ཁྱོ༌རང༌ངི༌ ངོའང༌ མ༌ཤེས༌ཁན༌ནི༌ སྤུན༌, ཞབས༌ཏོག༌ ཞུ༌ཁན༌གུན༌ལ༌, རོགས༌ གྱལ༌ལ༌ ཅོས༌ཏེ༌, ཁྱོ༌རང༌ དཀོན༌མཆོག༌ག༌ ཨིད༌ཤེས༌ཅན༌ཞིག༌ ཨིན༌ཁན༌བོ༌ སྟན༌ཏེ༌ ཨིན༌ནོག༌།
3JO 1:6 ཁོང༌གུན༌ནི༌ ཆོས༌ཚོགས༌སི༌ དུན༌ལ༌, ཁྱོ༌རང༌ངི༌ ཡ༌ཤའེ༌ སྐོར༌ལ༌ སྤང༌པོ༌ ཏངས༌། ཐུག༌རྗེ༌ ཛད༌ཏེ༌ དཀོན༌མཆོག༌ ཐུག༌ཉེས༌ཤེས༌ཅན༌ནི༌ ཚུལ༌ལ༌, བེས༌སི༌ ནང༌ང༌ ཡོད༌ཁན༌ནི༌ ཞན༌མ༌ མ༌ཤི༌ཀ༌པ༌ ཞབས༌ཏོག༌པ༌གུན༌ལའང༌ རོགས༌ ཅོ༌ཤིག༌
3JO 1:7 ཅིའ༌ཟེར༌ན༌, ཁོང༌གུན༌ མ༌ཤི༌ཀའེ༌ ཚན༌ནི༌ ཕིའ༌ ཞབས༌ཏོག༌ ཞུའ༌ལ༌ བིང༌ཏེ༌ ཨིན༌ནོག༌། ཡང༌ ཏད༌པ༌ མེད༌ཁན༌གུན༌ནི༌ ཀ༌ནེ༌ རོགས༌སི༌ རེ༌ཝའང༌ ཅོའ༌ མ༌ནོག༌།
3JO 1:8 ཏེ༌ནེ༌ ང༌དང༌གུན༌ནའང༌ གའ༌མོའེ༌ ནས༌ཚུལ༌ ཁྱེབས༌ཤུག༌ཅེས༌སི༌ ནང༌ང༌ ཁོང༌གུན༌ ཉམ༌པོ༌ དྲེས༌ཅེས༌སི༌ ཕིའ༌ ང༌དང༌ མ༌ཤི༌ཀ༌པ༌གུན༌ནི༌ ཀ༌ནེ༌ མེད༌, ཏེ༌ མི༌གུན༌ལ༌ རོགས༌ ཅོ༌གོ༌ཤེས༌ ཨིན༌ནོག༌།
3JO 1:9 ངའེ༌ ཁྱོ༌རང༌ངི༌ ཆོས༌ཚོགས༌ལའང༌ བྲིས༌པིན༌, ཨིན༌ནའང༌ ཆོས༌ཚོགས༌སི༌ གོ༌བ༌ གྱུར༌ར༌ ཐད༌ཁན༌ དི༌འོ༌ཏྲེ༌ཕེས༌སི༌, ང༌ཞའེ༌ ཝང༌གུན༌ལ༌ སྣང༌མེད༌ ཅོ༌རུག༌ ཟེར༌ཏེ༌ ཚོར༌།
3JO 1:10 ཏ༌ ང༌ ཡོང༌ང༌ཅིག༌, ངའེ༌ ཁོའེ༌ ཅོས༌ཁན༌ནི༌ ལས༌ ཁྱོ༌ཞའ༌ ཚང༌མ༌ལ༌ ཤད༌ཨིན༌, ཀ༌བོ༌ ང༌ཞའེ༌ སྐོར༌ལ༌ ཟུན༌ ཏངས༌ཏེ༌ སྤེ༌ར༌ ངན༌པ༌ ཟེར༌ཁན༌ ཡང༌ ང༌ཞའེ༌ སྤུན༌གུན༌ ཡོང༌ ཟ༌ནེ༌, གའ༌སུས༌ མི༌ཅོ༌ཅེས༌, མ༌ཚད༌ གའ༌སུས༌ ཅོའ༌ ཐད༌ཁན༌གུན༌ སྒགས༌ཏེ༌ ཁོང༌གུན༌ལ༌ ཆོས༌ཚོགས༌སི༌ ཕྲོ༌ནེ༌ ཕིངས༌ཏངས༌ཏོག༌།
3JO 1:11 ངའེ༌ ཅེས༌པའེ༌ ཛ༌འོ༌, ཏེ༌ མི༌ ངན༌པའེ༌ སྤེའེ༌ཀ༌ མ༌གྲུལ༌ལ༌, ཟང༌པོ༌ མི༌གུན༌ནི༌ སྤེའེ༌ཀ༌ གྲུལ༌གོ༌ཤེས༌ ཨིན༌ནོག༌། ལས༌ ཟང༌པོ༌ ཅོ༌ཁན༌གུན༌ ནི༌ དཀོན༌མཆོག༌ནེ༌ ཨིན༌ནོག༌, ཡང༌ ལས༌ ངན༌པ༌ ཅོ༌ཁན༌གུན༌ ནི༌ དཀོན༌མཆོག༌ མ༌ནེ༌ མ༌ཤེས༌ས༌ ཨིན༌ནོག༌།
3JO 1:12 ང༌ཏི༌ སྤུན༌, དེ༌མེ༌ཏྲི༌འུས༌ལ༌ ང༌དང༌ངི༌ སྤུན༌ ཚང༌མའེ༌ སྟོད༌དུག༌། ཁོའེ༌ རང༌ངི༌ མི༌ཚེ༌བོ༌ དཀོན༌མཆོག༌གི༌ བཀའ༌ ནང༌ཞིན༌ ཕུད༌ པ༌སང༌, ཁོ༌ ཏེ༌ སྟོད༌པ༌བོའེ༌ འོས༌པའང༌ ཨིན༌ནོག༌། ང༌ཞེའང༌ འིན༌ན༌བོའེ༌ སྤང༌པོ༌ ཏང༌ངད༌། ང༌ཞའེ༌ སྤང༌པོ༌གུན༌ ཀྲང༌པོ༌ ཨིན༌ཁན༌བོ༌ ཁྱོ༌རང༌ང༌ གྱུས༌ཨིན༌ནོག༌།
3JO 1:13 ང༌ ཟེར༌ཅེས༌ ཏ༌ མ༌མང༌པོ༌ རག༌, ཨིན༌ནའང༌ ང༌ ནག༌ཙ༌ དང༌ ཉི༌གུ༌ ཉམ༌པོ༌ བྲི༌ཅེས༌པོ༌ ལྡེ༌མོ༌ཞིག༌ ཚོར༌ར༌ མེ༌རག༌།
3JO 1:14 ང༌ ཁྱོ༌རང༌ དང༌ གྱོགས༌པ༌ ཐུག༌ཅེས༌སི༌ རེ༌ཝ༌ ཨིན༌, ཏེ༌ནེ༌ ང༌དང༌གུན༌ནི༌ དུན༌ལ༌ དུགས༌ཏེ༌ སྤེ༌ར༌ ཏང༌ཨིན༌།
3JO 1:15 ཁྱོ༌རང༌ང༌ དཀོན༌མཆོག༌གི༌ ཞི༌དེ༌ ཐོབ༌ཤིག༌། ཡང༌ འི༌རུ༌ ཡོད༌ཁན༌ནི༌ ཛ༌འོ༌གུན༌ནི༌ ཁྱོ༌རང༌ང༌ ཇུ༌ ཀལ༌དུག༌། ཏེ༌རུ༌ ཡོད༌ཁན༌ནི༌ ཛ༌འོ༌ ཚང༌མའ༌ ཅིག༌གའང༌ ལུས༌ མ༌ཅུག༌ག༌ ང༌ཞའེ༌ ཆོགས༌ནེ༌ ཇུ༌ ཞུས༌།
JUD 1:1 ཇུ༌ལེ༌, ང༌ ཡུ༌དཱ༌ ཡེ༌ཤུ༌ མ༌ཤི༌ཀའེ༌ ཞབས༌ཏོག༌པ༌ དང༌ ཡ༌ཀོབ༌བི༌ ནོ༌ ཨིན༌། ངའེ༌ འི༌ ཨི༌གེ༌བོ༌, བོད༌ད༌ ཛད༌ཁན༌, དཀོན༌མཆོག༌ ཡབ༌བི༌ སྙིང༌ནེ༌ ཅེས༌པ༌ ཛད༌ཁན༌ ཡང༌ ཡེ༌ཤུ༌ མ༌ཤི༌ཀའེ༌ ཕིའ༌ སྐྱོབས༌ཏེ༌ བོར༌ར༌ ཛད༌ཁན༌ གུན༌ལ༌ བྲིའད༌།
JUD 1:2 ངའེ༌ མོས༌ལམ༌ ཞུའད༌, དཀོན༌མཆོག༌གི༌ ཁྱོ༌ཞ༌གུན༌ལ༌ སྙིང༌རྗེ༌, ཞི༌དེ༌ དང༌ ཅམས༌པ༌ གུན༌, མང༌ནེ༌ མང༌ང༌ སལ༌ཤིག༌།
JUD 1:3 ཅེས༌པའེ༌ སྤུན༌གུན༌, ཞན༌ཏ༌ ང༌ ཁྱོ༌ཞ༌གུན༌ལ༌ ང༌དང༌ ཚང༌མའ༌ ཐོབ༌ཅེས༌སི༌ ཐར༌པའེ༌ སྐོར༌ལ༌ བྲི༌ཅེས༌ལ༌ རིངས༌ཨིན༌ ཡོད༌, ཨིན༌ནའང༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ ལན༌ཅིག༌ ཏུས༌གྱུན༌ནི༌ ཕིའ༌ ཁོང༌ངི༌ ཏམ༌པ༌ མི༌གུན༌ནི༌ ལག༌ག༌ སྟད༌ད༌ ཛད༌ཁན༌ནི༌ ཏད༌པའེ༌ ནང༌ང༌ སྟན༌པོ༌ དུག༌ཅེས༌ལ༌ སྤོས༌པ༌ ཏང༌ཨིན༌ བྲི༌གོ༌ཤེས༌པོ༌ ཁག༌ཅན༌ སམ༌མ༌རག༌།
JUD 1:4 ངའེ༌ ཏེ༌བོ༌ ཁྱོ༌ཞ༌གུན༌ལ༌ ཟེར༌རད༌, ཅིའ༌ཟེར༌ན༌ ངན༌པ༌ མི༌ ཁ༌ཅིག༌ ཁྱོ༌ཞ༌གུན༌ནི༌ ཆོས༌ཚོགས༌སི༌ ནང༌ང༌ སང༌ཝའེ༌ ཐོག༌ནེ༌ དྲེས༌ ཚར༌ཏེ༌ ཨིན༌། ཏེ༌གུན༌ནི༌ དཀོན༌མཆོག༌གི༌ ཐུག༌རྗེའེ༌ ཏོན༌བོ༌ གྱུར༌ཏེ༌ ང༌དང༌གུན༌ལ༌ ངན༌པའེ༌ མི༌ཚེ༌ ཕུད༌ཅེས༌སི༌ རང༌ཝང༌ ཡོད༌ཏེ༌ ཨིན༌ནོག༌ ཟེར༌ར༌ནོག༌། ཏུས༌ མང༌པོ༌ཞིག༌གི༌ སྔུན༌ལ༌ ཏེ༌ཟུག༌ མི༌གུན༌ལ༌ ཆད༌པ༌ ཕོག༌ཅེས༌སི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ ང༌དང༌གུན༌ནི༌ གྱལ༌པོ༌ དང༌ གཙོ༌བོ༌ ཅིག༌པོ༌ ཞུགས༌ཁན༌ནི༌ ཡེ༌ཤུ༌ མ༌ཤི༌ཀའ༌ ངོ༌ལོག༌ ཅོ༌རུག༌།
JUD 1:5 ཞན༌ཏ༌ ཁྱོ༌ཞ༌གུན༌ལ༌ འི༌གུན༌ནི༌ སྐོར༌ལ༌ ལན༌ མང༌པོ༌ ཚོར༌ཏེ༌ ཨིན༌ནོག༌། ངའེ༌ ཁྱོ༌ཞ༌གུན༌ལ༌ གཙོ༌བོ༌ དཀོན༌མཆོག༌གི༌ ཨིས༌ར༌ཨེལ༌པ༌གུན༌ ཨི༌ཇིབ༌ ཡུལ༌ལི༌ ཚེ༌ཡོག༌ནེ༌ ཐར༌ ཅུག༌ག༌ ཛད༌ཏེའང༌, སྟིང༌ནེ༌ ཁོང༌ངི༌ཀ༌ ཨིད༌ཤེས༌ མ༌ཅོས༌ཁན༌གུན༌, མེད༌ཁན༌ ཅོའ༌ ཛད༌ཁན༌བོ༌ ཨིད༌ཏུ༌ སྐུལ༌ཉིན༌རག༌།
JUD 1:6 ཡང༌ ཝང༌ཆའེ༌ ཚད༌ སལ༌ལ༌ ཛད༌ཁན༌བོའ༌ མ༌ཐད༌ཁན༌ནི༌ ཕོ༌ཉ༌གུན༌ནི༌ ཏེ༌ ཀོ༌ས༌བོ༌ ཕངས༌། དཀོན༌མཆོག༌གི༌ ཏེ༌གུན༌ མུན༌གྲིག༌གི༌ ནང༌ང༌ མ༌ནེ༌ མི༌ཆད༌ཅེས༌སི༌ ལྕག༌ཐག༌ག༌ ལྡམས༌ཏེ༌ ཁྲིམས༌ཅད༌དི༌ ཏེ༌ ཞག༌ ཀྲག༌པོའེ༌ ཕིའ༌ བོར༌ར༌ ཛདས༌།
JUD 1:7 སོ༌དོམ༌ དང༌ ག༌མོ༌ར༌ གྱལ༌ས༌ ཡང༌ ཉེ༌ཁོར༌རི༌ གྲོང༌ཁྱེར༌པ༌ གུན༌ ཨིད༌ཏུ༌ ཅོ༌ཤིག༌, ཀ༌གུན༌ནི༌ མི༌ཚེ༌ ལུས༌བྲེལ༌ ངན༌པ༌ དང༌ དོད༌པ༌ ངན༌པའེ༌ ནང༌ང༌ ཕུདས༌པ༌, དཀོན༌མཆོག༌གི༌ མེ༌ ཉམ༌པོ༌ མེད༌ཁན༌ ཅོའ༌ ཛདས༌། ཏེ༌གུན༌, ཐའ༌མེད༌པའེ༌ མེའེ༌ ཆད༌པ༌ ཕོག༌ཅེས༌ཅན༌གུན༌ནི༌ ཕིའ༌, སྤེ༌ཞིག༌ ཨིན༌ནོག༌།
JUD 1:8 ཏེན༌ན༌ ཙོགས༌ ཏེ༌ ཟུས༌མའེ༌ ལོབ༌བོན༌གུན༌ནི༌, དཀོན༌མཆོག༌གི༌ ཁོང༌གུན༌ལ༌ ཉི༌ལམ༌མི༌ ནང༌ང༌ སྕོད༌ལམ༌ ངན༌པའེ༌ མི༌ཚེ༌ ཕུད༌ཅེས༌སི༌ རང༌ཝང༌ སལ༌ཏེ༌ ཨིན༌ ཟེར༌ར༌ནོག༌། ཁོང༌གུན༌ནི༌ ཝང༌ ཡོད༌ཁན༌གུན༌ལ༌ གྱབ༌གལ༌ ཅོས༌ཏེ༌ ནམ༌ཁའེ༌ ནང༌ང༌ ཞུགས༌ཁན༌ནི༌ ཟིར༌རྗིད༌ཅན༌གུན༌ལ༌ ངན༌པ༌ ཟེར༌ཏེ༌ ཨིན༌ནོག༌།
JUD 1:9 ཨིན༌ནའང༌ ཕོ༌ཉ༌གུན༌ནི༌ འུ༌སྐྱོང༌, མེ༌ཀཱ༌འེལ༌ལིའང༌, ལུང༌སྟོན༌པ༌ མོ༌ཟེས༌སི༌ སྤུར༌རི༌ སྐོར༌ལ༌ རྡུད༌གུན༌ནི༌ གོ༌བ༌ ཉམ༌པོ༌ ཁྲབ༌པ༌ ཛད༌ཏུས༌, ཁོང༌ང༌ ཁོའེ༌ སྕོད༌པའེ༌ སྐོར༌ལ༌ ངན༌པ༌ ཟེར༌ཅེས༌སི༌ ཧམ༌པ༌ མ༌ཡོངས༌, ཨིན༌ནའང༌ ཁོང༌ངི༌ མོལས༌, “གཙོ༌བོའེ༌ ཁྱོད༌ལ༌ ཁྲིམས༌ཅད༌ ཛད༌ཤིག༌།”
JUD 1:10 ཨིན༌ནའང༌ འི༌ ཟུས༌མའེ༌ ལོབ༌བོན༌གུན༌ནི༌, ཧ༌མ༌གོ༌ཁན༌ ཚང༌མའེ༌ གྱབ༌གལ༌ལ༌ སྤེ༌ར༌ ངན༌པ༌ ཏང༌ང༌ནོག༌། ཡང༌ སམ༌བ༌ མེད༌ཁན༌ནི༌ རིའི༌ སེམས༌ཅན༌ ཙོགས༌ལ༌, ཁོང༌གུན༌ནི༌ དོད༌པ༌ ནང༌ཞིན༌ ཅོ༌ཅེས༌པོའེ༌, ཁོ༌རང༌གུན༌ མེད༌ཁན༌ ཆ༌ཅུག༌ག༌ནོག༌།
JUD 1:11 ཁོང༌གུན༌ལ༌ ཙམ༌ཤིག༌གི༌ ཇིགས༌པ༌ མི༌ཡོང༌, ཅིའ༌ཟེར༌ན༌ ཁོང༌གུན༌, ཨ༌དམ༌མི༌ བུ༌ཚ༌ ཀ༌ཡིན༌ནི༌ ལམ༌ ངན༌པའེ༌ཀ༌ གྲུལ༌ཏེ༌ ཨིན༌ནོག༌ ཡང༌ ཁོང༌གུན༌ནི༌ ནོར༌རི༌ ཕིའ༌ ལུང༌སྟོན༌པ༌ སྡིག༌ཅན༌ བ༌ལའམ༌ ཙོགས༌སི༌ ནོར༌ཁྲུལ༌ ཅོས༌ཏེ༌ ཨིན༌ནོག༌། དཀོན༌མཆོག༌ག༌ ངོ༌ལོག༌ ཅོ༌ཁན༌ ཀོ༌ར༌ ཙོགས༌ལ༌, ཁོང༌གུན༌ལ༌ ཏན༌ཏན༌ ཆད༌པ༌ ཕོག༌ཨིན༌།
JUD 1:12 ཆད༌པའ༌ མ༌ཇིགས༌ཁན༌ནི༌ ཏེ༌ ཟུས༌མའེ༌ ལོབ༌བོན༌གུན༌ནི༌, ཁྱོ༌ཞའ༌ ཉམ༌པོ༌ ཏམ༌པའེ༌ སོལ༌རས༌སི༌ ནང༌ང༌, ཁག༌ ལེན༌ཏེ༌ ཏེ༌བོའ༌ ཁྲེལ༌བ༌ ཁྱོངས༌ཏེ༌ ཨིན༌ནོག༌། ཁོང༌གུན༌ ཁོ༌རང༌ ཅིག༌པོའ༌ སྟ༌སྟོག༌ ཅོ༌ཁན༌ནི༌ ཁྲེལ༌མེད༌དི༌ ལུག༌རྫི༌གུན༌ ཨིན༌ནོག༌། ཁོང༌གུན༌ ཆུ༌ མེད༌ཁན༌ ཕན༌མི༌ཐོགས༌སི༌ སྲིན༌ ལུངས༌པོའེ༌ ཁྲིད༌ཏེ༌ ཁྱེར༌ཁན༌གུན༌ ཙོགས༌ ཨིན༌ནོག༌, ཡང༌ ཁོང༌གུན༌ ཤིང༌ཏོག༌ མ༌ནེ༌ མ༌ཆགས༌ཁན༌ནི༌ ལྕང༌མ༌ ཙོགས༌ ཨིན༌, ཀ༌བོ༌ པ༌ཀྲག༌ནེ༌ ཕར༌ལ༌ ཕུད༌པ༌ ཤིའད༌།
JUD 1:13 ཁོང༌གུན༌ ཝང༌སྲུལ༌ མ༌ཉན༌ཁན༌ནི༌ གྱ༌ཚོའེ༌ ཆུལ༌བག༌ ཙོགས༌ ཨིན༌ནོག༌, ཀ༌གུན༌ནི༌ ཁྲེལ༌མེད༌དི༌ སྦོའ༌གུན༌ ཀེན༌ལ༌ ཕང༌ང༌ནོག༌། ཏེ༌གུན༌ སྐར༌མ༌ ཏོན༌ཏག༌ མེད༌པ༌ གྲུལ༌ཁན༌གུན༌ ཙོགས༌ ཨིན༌ནོག༌། དཀོན༌མཆོག༌གི༌ ཁོང༌གུན༌ ཏུས༌གྱུན༌ དུག༌ཅེས༌སི༌ ཕིའ༌, མུན༌གྲིག༌གི༌ ནས༌ས༌ ཚང༌མའེ༌སང༌ ཏིང༌ཅན༌བོ༌ ལྡམ༌མ༌ ཛད༌ཏེ༌ ཨིན༌ནོག༌།
JUD 1:14 ཨ༌དམ༌ནེ༌ མི༌རབས༌ རྡུན༌པ༌ ཨིན༌ཁན༌ནི༌ ཨེ༌ནོག༌གི༌ ཏེ༌གུན༌ནི༌ སྐོར༌ལ༌ མ༌འོང༌ ལུང༌སྟན༌ སལ༌ཏེ༌ ཨིན༌པིན༌, “ལྟོས༌ཤིག༌ གཙོ༌བོ༌, ཁོང༌རང༌ངི༌ ཏམ༌པའེ༌ ཕོ༌ཉ༌ སྟོང༌ཁྲག༌ མང༌པོ༌ ཉམ༌པོ༌,
JUD 1:15 སྕོད༌ལམ༌ ངན༌པ༌ ཚང༌མ༌ ཅོས༌ཏེ༌ དཀོན༌མཆོག༌གི༌ གྱབ༌གལ༌ལ༌ སྤེ༌ར༌ ངན༌པ༌ ཟེར༌ཏེ༌ ཁོང༌ང༌ མ༌ཇིགས༌ཁན༌ ཚང༌མ༌ལ༌, ཁོ༌རང༌གུན༌ནི༌ སྙིང༌ངི༌ ནང༌ང༌ ཁྲེལ༌བ༌ ཚོར༌ཅུག༌ཅེས༌ དང༌ ཤགས༌ ཛད༌ཅེས༌ལ༌ སྐྱོད༌དུག༌།”
JUD 1:16 འི༌ ཟུས༌མའེ༌ ལོབ༌བོན༌གུན༌ ཏུས༌གྱུན༌ བར༌ཁན༌, ཞན༌མའེ༌ ནང༌ང༌ སྐྱོན༌ ཙལ༌ཁན༌, ཁོང༌རང༌ངི༌ དོད༌པ༌ ངན༌པའེ༌ ལམ༌མི༌ཀ༌ གྲུལ༌ཁན༌, ཁོ༌རང༌ དང༌ རང༌ངི༌ སྐོར༌ལ༌ ཕོ༌སོ༌ ཅོ༌ཁན༌ དང༌ རང༌ངི༌ ཕན༌ཐོགས༌སི༌ ཕིའ༌ ཞན༌མ༌གུན༌ལ༌ སྟོད༌པ༌ ཏང༌ང༌ནོག༌།
JUD 1:17 ཨིན༌ནའང༌ ཅེས༌པ༌གུན༌, ང༌དང༌གུན༌ནི༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ སྐུ༌ཚབས༌གུན༌ནི༌ ལུང༌སྟན༌ སལ༌ཁན༌གུན༌ ཨིད༌ཏུ༌ ཅོ༌ཤིག༌།
JUD 1:18 ཁོང༌གུན༌ནི༌ ཁྱོ༌ཞའ༌ ཤད༌ད༌ ཛདས༌, “ཐའ༌མའེ༌ ཏུས༌ལ༌ གཙོ༌བོའ༌ ཁྲེལ༌བ༌ ཅོ༌ཨིན༌, སྤེ༌ར༌ ཏང༌ཁན༌ནི༌ མི༌གུན༌ ཡོངས༌ཏེ༌ ཁོ༌རང༌གུན༌ནི༌ དོད༌པ༌ ངན༌པའེ༌ ལམ༌མི༌ཀ༌ གྲུལ༌ཨིན༌།”
JUD 1:19 ཏེ༌ ཟུས༌མའེ༌ ལོབ༌བོན༌གུན༌ནི༌, ཁྱོ༌ཞ༌གུན༌ནི༌ ཕྲོའ༌ ནང༌ཕྲུགས༌ ཆ༌ཅུག༌ཨིན༌། ཁོང༌གུན༌ལ༌ ཏམ༌པའེ༌ ཐུག༌ཉིད༌ མེད༌ པ༌སང༌, ཁོ༌རང༌གུན༌ནི༌ སྡིག༌པའེ༌ དོད༌པ༌ ནང༌ཞིན༌ལ༌ མི༌ཚེ༌ ཕུད༌ད༌ནོག༌།
JUD 1:20 ཨིན༌ནའང༌ ཁྱོ༌ཞའ༌ ཅེས༌པ༌གུན༌, ཁྱོ༌ཞའེ༌ ཏམ༌པའེ༌ ཏད༌པའེ༌ ནང༌ང༌ ཁྱོ༌ཞ༌རང༌གུན༌ ཤུགས༌ཅན༌ ཅོ༌ཤིག༌། ཡང༌ ཏམ༌པའེ༌ ཐུག༌ཉིད༌དི༌ ནང༌ང༌ མོས༌ལམ༌ ཏོབ༌ཤིག༌།
JUD 1:21 གཙོ༌བོ༌ ཡེ༌ཤུ༌ མ༌ཤི༌ཀའེ༌ སྙིང༌རྗེའེ༌ ནང༌ང༌ ཐའ༌མེད༌པའེ༌ མི༌ཚེའ༌ ཁྱོང༌ཅེས༌ལ༌ སྲུང༌ ཟ༌ནེ༌ དཀོན༌མཆོག༌གི༌ ཅམས༌པའེ༌ ནང༌ང༌ དུག༌ཤིག༌།
JUD 1:22 ཏད༌པའེ༌ ནང༌ང༌ ཐེ༌ཚོམས༌ ཡོད༌ཁན༌གུན༌ལ༌ སྙིང༌རྗེ༌ སྟོན༌ཤིག༌།
JUD 1:23 ཉལ༌ཝའེ༌ མེ༌ ཆོགས༌ལ༌ ཆའ༌ཁན༌གུན༌ ཀོགས༌ཏེ༌ ཁྱོང༌ཤིག༌། ཡང༌ ཞན༌མ༌གུན༌ལ༌ སྙིང༌རྗེ༌ སྟོན༌ཤིག༌, ཨིན༌ནའང༌ ཁྱོ༌ཞ༌གུན༌ ཏེན༌ན༌ སྡིག༌པའེ༌ ནང༌ང༌ གྱེལ༌ མི༌གྱེལ༌ཅེས༌ལ༌ ཤང༌ ཅོ༌ཤིག༌, མ༌ཚད༌ ཁོང༌གུན༌ནི༌ སྡིག༌པའེ༌ ལས༌གུན༌ནི༌ ཞས༌ཏེ༌ ཚི༌ཏུ༌ ཆའ༌ཁན༌ནི༌ ཀོས༌ལག༌པོའང༌ ནཕ༌རད༌ ཅོས༌།
JUD 1:24 ཁྱོ༌ཞའ༌ སྡིག༌པའེ༌ ནང༌ང༌ གྱེལ༌ཅེས༌ནེ༌ སྐྱོབ༌ཏེ༌ བོར༌ར༌ ཛད༌ཐུབ༌ཁན༌ནི༌ དཀོན༌མཆོག༌གི༌, ཁྱོ༌ཞ༌གུན༌ནི༌ སྐྱོན༌ ཚང༌མ༌ མེད༌ཁན༌ ཅོའ༌ ཛད༌ཏེ༌, གའ༌མོ༌ ཉམ༌པོ༌ ཁོང༌རང༌ངི༌ ཟིར༌རྗིད༌དི༌ ནང༌ང༌ ཁོང༌ངི༌ སྐུན༌དུན༌ལ༌ ཁྱོང༌ང༌ ཛད༌ཨིན༌།
JUD 1:25 ཡེ༌ཤུ༌ མ༌ཤི༌ཀ༌ ང༌དང༌གུན༌ནི༌ གཙོ༌བོ༌ གྱུད༌ཏེ༌, ང༌དང༌གུན༌ནི༌ དཀོན༌མཆོག༌ དང༌ སྐྱབ༌གོན༌ ཅིག༌པོའ༌, སྤལ༌ དང༌ ཟིར༌རྗིད༌ དང༌ ཤེད༌ དང༌ ཝང༌ གུན༌, ཇིག༌རྟེན༌ ཆགས༌སི༌ སང༌ སྔུན༌ནེ༌ དག༌ས༌ ཚོག༌པ༌, ཡང༌ སྟིང༌ཞིན༌ནའང༌ ཏུས༌གྱུན༌ ཐོབ༌ཤིག༌, ཨ༌མེན༌།
REV 1:1 འི༌ ཨི༌གེ༌, ཡེ༌ཤུ༌ མ༌ཤི༌ཀའེ༌ མ༌འོང༌ ལུང༌སྟན༌ ཛད༌ཁན༌བོ༌ ཨིན༌ནོག༌, ཀ༌བོ༌ དཀོན༌མཆོག༌གི༌ གྱོགས༌པ༌ ཇུང༌གོ༌ཤེས༌ཅན༌གུན༌ མ༌ཤི༌ཀའེ༌ ཞབས༌ཏོག༌པ༌གུན༌ལ༌ ཤད༌ཅེས༌ལ༌ ཡོ༌ཧཱ༌ནན༌ལ༌ སལ༌ལ༌ ཛད༌ཏེ༌ ཨིན༌། ཡེ༌ཤུའི༌ འི༌ མ༌འོང༌ ལུང༌སྟན༌བོ༌, ཁོང༌ངི༌ ཞབས༌ཏོག༌པ༌ ཡོ༌ཧཱ༌ནན༌ལ༌ སྟན༌ན༌ ཛད༌ཅེས༌ལ༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛདས༌།
REV 1:2 ང༌ ཡོ༌ཧཱ༌ནན༌ནི༌ འི༌ ཐོང༌ཁན༌ ཚང༌མའ༌ སྤང༌པོ༌ ཏང༌ངད༌, ཡང༌ ངའེ༌ ཁྱོ༌ཞ༌གུན༌ལ༌ དཀོན༌མཆོག༌གི༌ བཀའ༌ དང༌ ཡེ༌ཤུ༌ མ༌ཤི༌ཀའེ༌ སྤང༌པོ༌ སལ༌ལ༌ ཛད༌ཁན༌ གུན༌ནི༌ སྐོར༌ ཤད༌དད༌།
REV 1:3 འི༌ མ༌འོང༌ ལུང༌སྟན༌ནི༌ བཀའ༌ སིལ༌ཏེ༌ ཤད༌ཁན༌གུན༌ ཅིན༌ལབས༌ཅན༌ ཡང༌ ལོན༌བོའ༌ ཉན༌ཏེ༌ ཏེ༌ནང༌ང༌ ཟེར༌ཏེ༌ ཡོད༌ཁན༌བོའེ༌ཀ༌ ལག༌ལེན༌ ཅོ༌ཁན༌ ཚང༌མའང༌ ཅིན༌ལབས༌ཅན༌ ཨིན༌, ཅིའ༌ཟེར༌ན༌ ཡོང༌ཅེས༌ཅན༌ནི༌ འི༌ ཏུས༌པོ༌ མ༌ ཉེ༌མོའ༌ ལེབས༌ཏེ༌ ཨིན༌ནོག༌།
REV 1:4 ང༌ ཡོ༌ཧཱ༌ནན༌ནི༌ འི༌ ཨི༌གེ༌བོ༌ ཨ༌སི༌ཨཱ༌ ནང༌ང༌ ཡོད༌ཁན༌ནི༌ ཆོས༌ཚོགས༌ དུན༌ལ༌ བྲིའད༌། དཀོན༌མཆོག༌ དག༌ས༌ ཞུགས༌ཏེ༌ ཡོད༌ཁན༌, སྔུན༌ལ༌ ཞུགས༌ཏེ༌ ཡོད༌པིན༌, ཡང༌ སྐྱོད༌ཅེས༌ཅན༌ དང༌ ཁོང༌རང༌ངི༌ ཞུགས༌ཁྲིས༌སི༌ དུན༌ལ༌ ཡོད༌ཁན༌ནི༌ ཐུག༌ཉིད༌ རྡུན༌ གུན༌ནི༌ ཆོགས༌ནེ༌ ཁྱོ༌ཞ༌གུན༌ལ༌ ཐུག༌རྗེ༌ དང༌ ཞི༌དེ༌ སལ༌ཤིག༌,
REV 1:5 ཡང༌ ཡེ༌ཤུ༌ མ༌ཤི༌ཀའེ༌ ཆོགས༌ནེའང༌། ཁོང༌ ནི༌ ལོ༌ཁྱེལ༌ཅན༌ནི༌ སྤང༌པོ༌, ཏང༌པོ༌རང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ཞངས༌ཁན༌, ཡང༌ ཇིག༌རྟེན༌ནི༌ གྱལ༌པོ༌གུན༌ནི༌ ཝང༌སྲུལ༌པ༌ ཞུགས༌ཏེ༌ ཨིན༌ནོག༌། ང༌དང༌གུན༌ལ༌ ཅམས༌པ༌ ཅོའ༌ ཛད༌ཁན༌, ཡང༌ ཁོང༌རང༌ངི༌ སྲོག༌པོ༌ ཅིན༌བ༌ སལ༌ཏེ༌ ང༌དང༌གུན༌ ང༌དང༌གུན༌ནི༌ སྡིག༌པ༌ནེ༌ ཐར༌ ཅུག༌ག༌ ཛད༌ཁན༌,
REV 1:6 ང༌དང༌གུན༌ ཁོང༌རང༌ངི༌ དཀོན༌མཆོག༌ དང༌ ཡབ༌བ༌ ཞབས༌ཏོག༌ ཞུ༌ཅེས༌སི༌ ཕིའ༌ བླ༌མ༌ དང༌ གྱལ༌ཁག༌གི༌ མི༌གུན༌ ཅོའ༌ ཛད༌ཁན༌ནི༌ ཡེ༌ཤུ༌ མ༌ཤི༌ཀའ༌ སྤལ༌ དང༌ ཝང༌གུན༌ ཏུས༌གྱུན༌ནེ༌གྱུན༌ ཐོབ༌ཤིག༌, ཨ༌མེན༌།
REV 1:7 ལྟོས༌ཤིག༌, ཁོང༌ སྲིན༌ནི༌ཀ༌ ཞུགས༌ཏེ༌ ཕེབས༌དུག༌། མི༌ཚང༌མའེ༌ ཁོང༌ ཇལ༌ཨིན༌, ཡང༌ ཁོང༌ང༌ རྡུང༌ ཙུག༌ཁན༌གུན༌ནིའང༌། ཁོང༌ངི༌ ཞས༌ཏེ༌ ཇིག༌རྟེན༌པ༌ ཚང༌མའེ༌ རྡུག༌པོ༌ ཅོ༌ཨིན༌། ཏེ༌བོ༌ ཏན༌ཏན༌ གྲུབ༌ཨིན༌, ཨ༌མེན༌།
REV 1:8 གཙོ༌བོ༌ དཀོན༌མཆོག༌གི༌ མོལ༌དུག༌, “ང༌ ནི༌ ཨལ༌ཕ༌ དང༌ ཨོ༌མེ༌ག༌: གོ༌ཟུག༌ དང༌ སྟིང༌ཇུག༌བོ༌ ཨིན༌། ང༌ ནི༌ དག༌ས༌ ཡོད༌, སྔུན༌ལ༌ ཡོད༌པིན༌ ཡང༌ ཡོང༌ཅེས༌ཅན༌ དང༌ ཀུན༌ཝང༌ དཀོན༌མཆོག༌ ཨིན༌།”
REV 1:9 ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཡོད༌ཅེས༌པོའེ༌, ཁྱོ༌ཞ༌གུན༌ནི༌ རྡུག༌ངལ༌, དཀོན༌མཆོག༌གི༌ གྱལ༌སྲིད༌ དང༌ ཟོད༌སེམས༌ ཉམ༌པོ༌ རྡུག༌ངལ༌ ཁུར༌ཅེས༌སི༌ ནང༌ང༌ ང༌ ཡོ༌ཧཱ༌ནན༌ ཁྱོ༌ཞའེ༌ སྤུན༌ དང༌ ཕྲོ༌པ༌ ཨིན༌། ངའེ༌ དཀོན༌མཆོག༌གི༌ བཀའ༌ ཤད༌ཅེས༌ དང༌ ཡེ༌ཤུའི༌ སྐོར༌ལ༌ སྤང༌པོ༌ ཏང༌ཅེས༌པོའེ༌, ངའ༌ ཆད༌པ༌ ཏངས༌ཏེ༌ ཚོ༌ལིང༌ པད༌མོས༌ ཟེར༌ཁན༌ནི༌ཀ༌ ཁྱེར༌ཏེ༌ བོརས༌།
REV 1:10 ཟ༌ཉི༌མ༌ ཀ༌བོ༌ གཙོ༌བོའེ༌ ཞག༌ ཨིན༌ ཏེ༌ ཞག༌ག༌ ངའེ༌ཀ༌ དཀོན༌མཆོག༌གི༌ ཏམ༌པའེ༌ ཐུག༌ཉིད༌ བབས༌ས༌ ཛད༌ཏེ༌ ངའེ༌ ང༌རང༌ངི༌ གྱབ༌ནེ༌ ཏུང༌སྐད༌ ཙོགས༌ སྐད༌ ཀྲག༌པོ༌ཞིག༌ ཚོར༌།
REV 1:11 ཡང༌ ཏེ༌ སྐད༌པོའེ༌ ངའ༌ མོལ༌ལ༌རག༌, “ཁྱོ༌རང༌ངི༌ ཐོང༌ཅེས༌ཅན༌གུན༌ ཤོག༌རིལ༌ལི༌ཀ༌ བྲིས༌ཏེ༌ ཨེ༌ཕེ༌སས༌, སྨིར༌ནཱ༌, པེར༌ག༌མུམ༌, ཐི༌འ༌ཏི༌རཱ༌, སཱར༌དིས༌, ཕི༌ལ༌དེལ༌ཕི༌ཨཱ༌ དང༌ ལ༌འོ༌དི༌ཀིའི༌ ཆོས༌ཚོགས༌ རྡུན༌ཀོའ༌ ཀོལ༌།”
REV 1:12 ངའེ༌ ངའ༌ ཞལ༌ཏ༌ སལ༌ཁན༌བོའ༌ ལྟ༌ཅེས༌ལ༌ གྱུར༌ར༌ཅིག༌, ངའ༌ སེར༌རི༌ འོད༌སྟགས༌ རྡུན༌ ཐོང༌།
REV 1:13 ཡང༌ ངའེ༌ ཏེ༌ འོད༌སྟག༌གུན༌ནི༌ ཕྲོ༌ནེ༌ “མི༌རིགས༌སི༌བུ༌ ཙོགས༌ཤིག༌,” ཞངས༌ཏེ༌ ཇལ༌། ཁོང༌ངི༌ ནམ༌ཟའ༌ མ༌ རིང༌མོ༌ ཞབ༌ ཚོག༌པ༌ ལེབ༌ཁན༌ ཡང༌ སེར༌ཀུད༌ལ༌ ལས༌ཁན༌ནི༌ ཤལ༌ ཁོང༌ངི༌ ཤང༌གག༌ག༌ སལ༌ལ༌ ཛད༌ཏེ༌ དུག༌།
REV 1:14 ཁོང༌ངི༌ ཨུ༌ དང༌ ཨུ༌སྲ༌བོ༌, བལ༌ ཡ༌ ཁ༌ ཀར༌པོ༌ ཙོགས༌, ཡང༌ ཁོང༌ངི༌ སྕན༌བོ༌ མེ༌ ཀྲག༌པོ༌ བར༌ཁན༌ ཙོགས༌ དུག༌།
REV 1:15 ཁོང༌ངི༌ ཞབས༌པོ༌, མེ༌ ནང༌ང༌ སྲག༌ཁན༌ནི༌ ར༌གན༌ ཙོགས༌ ལྡང༌ཤན༌ ཐོང༌དུག༌, ཡང༌ ཁོང༌ངི༌ སུང༌སྐད༌པོ༌ ཆུ༌ ཀྲག༌པོ༌ གྱུག༌ཁན༌ནི༌ སྐད༌ ཙོགས༌ རག༌།
REV 1:16 ཁོང༌ངི༌ ཆག༌ ཡས༌པའེ༌ ནང༌ང༌ སྐར༌མ༌ རྡུན༌ ནམས༌ཏེ༌ དུག༌, ཡང༌ ཁོང༌ངི༌ ཞལ༌ནེ༌ ཁའ༌ ཉིས༌ཅན༌ནི༌ ར༌འི༌ ནོན༌པོ༌ བིང༌དུག༌། ཁོང༌ངི༌ ཞལ༌དོང༌བོ༌ ཉིང༌གུང༌ངི༌ ཉི༌མའེ༌ འོད༌ཟེར༌ ཙོགས༌ དུག༌།
REV 1:17 ཁོང༌ ཇལ༌ལ༌ཅིག༌, ང༌ ཁོང༌ངི༌ ཞབས༌སི༌ དུན༌ལ༌ ཤི༌ཁན༌ ཙོགས༌ལ༌ གྱེལ༌སོང༌། ཨིན༌ནའང༌ ཁོང༌ངི༌ ཁོང༌རང༌ངི༌ ཆག༌ ཡས༌པ༌བོ༌ ངའེ༌ཀ༌ བོར༌ར༌ ཛད༌ཏེ༌ མོལས༌, “ཇིགས༌ མ༌ཇིགས༌! ང༌ ནི༌ ཏང༌པོ༌ དང༌ སྟིང༌ཇུག༌པོ༌ ཨིན༌།
REV 1:18 ང༌ སྲོག༌ སལ༌ཁན༌བོ༌ ཨིན༌, ང༌ ཤི༌ཏེ༌ མེད༌པིན༌, ཏ༌ ལྟོས༌, ང༌ ཏུས༌ གྱུན༌ནེ༌གྱུན༌ནི༌ ཕིའ༌ སོན༌ཏེའ༌ ལུས༌ཨིན༌; ཡང༌ ཤི༌ཅེས༌ དང༌ ཤི༌ཁན༌གུན༌ནི༌ ནས༌སའེ༌ཀ༌ ངའ༌ ཝང༌ ཡོད༌།”
REV 1:19 “ཁྱོ༌རང༌ངི༌ ཐོང༌ཁན༌, དག༌ས༌ ཇུང༌ཨིན༌ ཡོད༌ཁན༌ དང༌ སྟིང༌ནེ༌ ཇུང༌ཅེས༌ཅན༌ གུན༌ བྲིས༌།
REV 1:20 ཁྱོ༌རང༌ངི༌ ངའེ༌ ལག༌པ༌ ཡས༌པའེ༌ ནང༌ང༌ ཡོད༌ཁན༌ནི༌ སྐར༌མ༌ རྡུན༌ ཐོང༌ཁན༌ དང༌ སེར༌རི༌ འོད༌སྟགས༌ རྡུན༌ནི༌ སང༌ཝ༌བོ༌ འི༌བོ༌ ཨིན༌: སྐར༌མ༌ རྡུན༌ཀོ༌ ནི༌, ཏེ༌ ཆོས༌ཚོགས༌ རྡུན༌ནི༌ ཕོ༌ཉ༌གུན༌ ཡང༌ འོད༌སྟགས༌ རྡུན༌ཀོ༌ ནི༌, ཏེ༌ ཆོས༌ཚོགས༌ རྡུན༌བོ༌ ཨིན༌།”
REV 2:1 “ཨེ༌ཕེ༌སས༌སི༌ ནང༌ང༌ ཡོད༌ཁན༌ནི༌ ཆོས༌ཚོགས༌སི༌ ཕོ༌ཉའ༌ འི༌བོ༌ བྲིས༌།” “འི༌ ལོན༌བོ༌ ལག༌པ༌ ཡས༌པའེ༌ ནང༌ང༌ སྐར༌མ༌ རྡུན༌ ཁུར༌ཏེ༌ སེར༌རི༌ འོད༌སྟགས༌ རྡུན༌ནི༌ ཕྲོའ༌ གྲུལ༌ཨིན༌ ཡོད༌ཁན༌ནི༌ ཆོགས༌ནེ༌ ཨིན༌།
REV 2:2 ཁྱོ༌ཞའེ༌ ཀགས༌པོའེ༌ སྐབས༌ལ༌ རྩོན༌གྲུས༌ སྲན༌ཏྲེ༌ ཡང༌ སྙིང༌རུས༌ ཉམ༌པོ༌ ལས༌ ཅོ༌ཅེས༌གུན༌ ངའ༌ གྱུས༌ཡོད༌། ཁྱོ༌ཞའེ༌ མི༌ངན༌གུན༌ སྲན༌ མ༌ཐུབ༌ཁན༌བོའང༌ ང༌ གྱུས༌ཡོད༌, ཀ༌གུན༌ནི༌ ཡེ༌ཤུའི༌ སྐུ༌ཚབས༌ ཨིན༌ ཟེར༌རད༌ ཨིན༌ནའང༌ མ༌ནོག༌། ཁྱོ༌ཞའེ༌ སྟག༌ཅད༌ ཅོས༌ཏེ༌ ཏེ༌གུན༌ ཟུན༌བ༌ ཨིན༌ཁན༌བོ༌ ཤེས༌ཏེ༌ ཨིན༌ནོག༌།
REV 2:3 ཁྱོ༌ཞའེ༌ ངའེ༌ ཕིའ༌ ཟོད༌པ༌ ཉམ༌པོ༌ བར༌དོ༌ ཁུར༌ཨིན༌ ཡང༌ ང༌ ཕང༌ མ༌ཕང༌ང༌ ངའེ༌ གྱབ༌ནེ༌ གྲུལས༌།
REV 2:4 ཨིན༌ནའང༌ ཁྱོ༌ཞ༌གུན༌ནི༌ ང༌ གོ༌མ༌ ཙོགས༌སི༌ ཅམས༌པ༌ མི༌ཅོ༌ཅེས༌སི༌ ཕིའ༌ ངའེ༌ ཁྱོ༌ཞུ༌གུན༌ནི༌ གྱབ༌གལ༌ལ༌ སྐྱོན༌ ཀལ༌ལད༌།
REV 2:5 ཁྱོ༌ཞ༌གུན༌ མ༌ ཐོན༌པོ༌ནེ༌ བུད༌ཏེ༌ ཨིན༌ཁན༌བོ༌ ཨིད༌ཏུ༌ ཅོས༌། གྱོད༌པ༌ ཅོ༌ཤིག༌, ཡང༌ སྔུན༌མ༌ ཙོགས༌ལ༌ ལས༌གུན༌ ཅོ༌ཤིག༌། ཀལ༌ཏེས༌ གྱོད༌པ༌ མ༌ཅོ༌ན༌, ང༌ ཡོངས༌ཏེ༌ ཁྱོ༌ཞ༌གུན༌ནི༌ འོད༌སྟག༌པོ༌ ནས༌སའེ༌ ཀ༌ནེ༌ ཐེན༌ཨིན༌།
REV 2:6 ཨིན༌ནའང༌ ཁྱོ༌ཞ༌གུན༌ནི༌ ནི༌ཀོ༌ལ༌འི༌པ༌གུན༌ནི༌ ལས༌ ངན༌པ༌གུན༌ལ༌ ནཕ༌རད༌ ཅོ༌རུག༌, ངེའང༌ ཏེ༌བོའ༌ ནཕ༌རད༌ ཅོའད༌, ཏེ༌ ལས༌པོའ༌ སྟོད༌པ༌ ཐོབ༌ཅེས༌སི༌ འོས༌པ༌ ཨིན༌ནོག༌།”
REV 2:7 “ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌། དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌། གྱལ༌ཁའ༌ ཐོབ༌ཁན༌གུན༌ལ༌ དཀོན༌མཆོག༌གི༌ ཚས༌སི༌ ནང༌ང༌ སྐྱེ༌ཁན༌ནི༌, སྲོག༌གི༌ ལྕང༌མའེ༌ ཤིང༌ཏོག༌ ཟའ༌ཅེས༌ལ༌ ཐོབ༌ཏང༌ ངའེ༌ ཏང༌ཨིན༌།”
REV 2:8 “འི༌ ཨི༌གེ༌བོ༌ སྨིར༌ནཱའེ༌ ནང༌ང༌ ཡོད༌ཁན༌ ཆོས༌ཚོགས༌སི༌ ཕོ༌ཉ༌ བྲིས༌།” “འི༌ ལོན༌བོ༌ ཏང༌པོ༌ དང༌ སྟིང༌ཇུག༌ ཨིན༌ཁན༌ ཡང༌ ཤི༌ཏེ༌ མེད༌པིན༌ ཨིན༌ནའང༌ ཏ༌ དག༌ས༌ སོན༌པོ༌ ཡོད༌ཁན༌བོའེ༌ ཆོགས༌ནེ༌ ཨིན༌།
REV 2:9 ཁྱོ༌ཞ༌གུན༌ལ༌ རྡུག༌ངལ༌ དང༌ རྡུག༌པོ༌ ཡོད༌ཁན༌བོ༌ ང༌ གྱུས༌ཡོད༌, ཨིན༌ནའང༌ སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ ཆུག༌པོ༌ དུག༌། ཁོ༌རང༌གུན༌ལ༌ ཡ༌ཧུ༌དཱ༌པ༌ ཟེར༌ཁན༌གུན༌ནི༌, ཁྱོ༌ཞ༌གུན༌ནི༌ སྕོད༌པའེ༌ སྐོར༌ལ༌ ངན༌པ༌ ཟེར༌ཁན༌བོའང༌ ང༌ གྱུས༌ཡོད༌། ཁོང༌གུན༌ དཀོན༌མཆོག༌གི༌ མན༌པ༌, ཤེ༌ཏན༌ནི༌ ཆོས༌ཚོགས༌ ཨིན༌ནོག༌།
REV 2:10 ཁྱོ༌ཞ༌གུན༌ལ༌ རྡུག༌ངལ༌ ཐོང༌ཅེས༌ཅན༌བོའ༌ མ༌ཇིགས༌ཤིག༌། ངའེ༌ ཟེར༌རད༌, རྡུད༌དི༌ གོ༌བའེ༌ ཁྱོ༌ཞ༌གུན༌ནི༌ ཏད༌པའ༌ སྟག༌ཅད༌ ཅོ༌ཅེས༌སི༌ ཕིའ༌ ཁྱོ༌ཞའ༌ ཙོན༌ཁང༌ངི༌ ནང༌ང༌ ཀག༌ཨིན༌, ཡང༌ ཁྱོ༌ཞའ༌, ཞག༌མ༌ རྕུ༌ ཚག༌པ༌ ནགས༌ སྟན༌ཨིན༌། ཤི༌ཅེས༌ ཡོད༌ནའང༌ ཀལ༌ཏེས༌ ཁྱོ༌ཞ༌གུན༌ ཏད༌པའེ༌ ནང༌ང༌ སྟན༌པོ༌ དུག༌ན༌, ངའེ༌ ཁྱོ༌ཞ༌གུན༌ལ༌ ཐའ༌མེད༌པའེ༌ མི༌ཚེའེ༌ ཐོར༌ཤོག༌པོ༌ ཏང༌ཨིན༌།”
REV 2:11 “ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌བོ༌ ཉོན༌ཤིག༌།” “གྱལ༌ཁའ༌ ཐོབ༌ཁན༌གུན༌ལ༌ ཤི༌ཅེས༌ ཉིས༌པ༌ ཟེར༌ཁན༌ནི༌ ཐའ༌མེད༌པའེ༌ ཆད༌པ༌ ཕོག༌ཅེས༌སི༌ ཐོང༌ངོམས༌ མི༌ཡོང༌།”
REV 2:12 “འི༌ ཨི༌གེ༌བོ༌ པེར༌ག༌མུམ༌མི༌ ཆོས༌ཚོགས༌སི༌ ཕོ༌ཉ༌ བྲིས༌།” “འི༌ ལོན༌བོ༌, ཁའ༌ ཉིས༌ཅན༌ནི༌ ར༌འི༌ ནོན༌པོ༌ ཨིན༌ཁན༌བོའེ༌ ཆོགས༌ནེ༌ ཨིན༌།
REV 2:13 ཁྱོ༌ཞའ༌ དུགས༌ཏེ༌ ཡོད༌སའེ༌ ནས༌སའ༌ ཤེ༌ཏན༌ནི༌ ཁྲིས༌སི༌ ས༌ཀྱད༌ ཨིན༌ཁན༌བོ༌ ང༌ གྱུས༌ཡོད༌། ཨིན༌ནའང༌ ཁྱོ༌ཞའེ༌ ཏད༌པ༌ མ༌ཕང༌ང༌ ངའེ༌ མིང༌ངི༌ ནང༌ང༌ ཀྲང༌པོ༌ དུགས༌ ནམ༌ ངའེ༌ ལོ༌ཁྱེལ༌ཅན༌ནི༌ སྤང༌པོ༌ ཨན༌ཏི༌པས༌སའང༌ ཁྱོ༌ཞའེ༌ གྱལ༌སའེ༌ ནང༌ང༌ སདས༌, ཀ༌རུ༌ ཤེ༌ཏན༌ནི༌ ཝང༌སྲུལ༌ལད༌པིན༌།
REV 2:14 ཨིན༌ནའང༌ ངའ༌ ཁྱོ༌ཞའེ༌ གྱབ༌གལ༌ལ༌ སྐྱོན༌ ཀལ༌ཅེས༌ ཁ༌ཅིག༌ ཡོད༌། ཁྱོ༌ཞའེ༌, ལུང༌སྟོན༌པ༌ བ༌ལའམ༌མི༌ ལབ༌ཞ༌ ཏང༌ཁན༌ ཕྲོ༌པ༌ ཁ༌ཅིག༌གི༌ གྱབ༌གལ༌ ཅོའ༌ མི༌རུག༌། བ༌ལའམ༌མི༌ གྱལ༌པོ༌ བ༌ལག༌ག༌ ཨིས༌ར༌ཨེལ༌པ༌གུན༌ལ༌ སྐུན༌དྲ༌ ཆོད༌པ༌ ཕུལ༌ཁན༌ནི༌ ཟན༌གུན༌ ཟའ༌ཅེས༌ དང༌ ལུས༌བྲེལ༌ ངན༌པ༌ ཅོ༌ཅུགས༌ཏེ༌ སྡིག༌པའེ༌ ནང༌ང༌ གྱེལ༌ ཅུག༌ཅེས༌པོ༌ ལབས༌།
REV 2:15 ཏེན༌ན༌ ཙོགས༌ལ༌, ཁྱོ༌ཞ༌གུན༌ནི༌ ཕྲོའ༌ ནི༌ཀོ༌ལ༌འི༌པ༌གུན༌ནི༌ ལབ༌ཁན༌ནི༌ ལམ༌ ངན༌པའེ༌ཀ༌ གྲུལ༌ཁན༌ རིག༌གའང༌ ཡོད༌ཏེ༌ ཨིན༌ནོག༌།
REV 2:16 གྱོད༌པ༌ ཅོ༌ཤིག༌, ཏེ༌ མན༌ན༌ ང༌ གྱོགས༌པ༌ ཁྱོ༌ཞ༌གུན༌ནི༌ཀ༌ ཡོངས༌ཏེ༌ ངའེ༌ ཁའེ༌ ནང༌ནེ༌ བིང༌ཁན༌ནི༌ ར༌འི༌ ཉམ༌པོ༌ ཏེ༌གུན༌ནི༌ གྱབ༌གལ༌ལ༌ ནོལ༌ཨིན༌།”
REV 2:17 “ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌། གྱལ༌ཁའ༌ ཐོབ༌ཁན༌གུན༌ལ༌ ངའེ༌ སང༌ཝའེ༌ ཏ༌གི༌ མན༌ན༌ ཟེར༌ཁན༌ དང༌ མིང༌ སོ༌མ༌ སྐོས༌ཁན༌ནི༌ རྡོའ༌ ཀར༌པོ༌ ཏང༌ཨིན༌, ཏེན༌ན༌ རྡོའ༌ ཐོབ༌ཁན༌བོའ༌ མ༌ནེ༌ ཡང༌སུའང༌ ཏེ༌ མིང༌བོ༌ མི༌ཤེས༌།”
REV 2:18 “འི༌ ཨི༌གེ༌བོ༌ ཐི༌འ༌ཏི༌རཱའི༌ ཆོས༌ཚོགས༌སི༌ ཕོ༌ཉ༌ བྲིས༌།” “འི༌ ལོན༌བོ༌, དཀོན༌མཆོག༌གི༌ བུ༌ཚ༌ ཀ༌བོའེ༌ མིག༌གུན༌ མེ༌ལྡབ༌ ཙོགས༌ ཡང༌ རྐང༌པ༌གུན༌, ལག༌ལག༌ ར༌གན༌ ཙོགས༌ ཡོད༌ཁན༌བོའེ༌ ཆོགས༌ནེ༌ ཨིན༌།
REV 2:19 ཁྱོ༌ཞ༌གུན༌ནི༌ ཅེས༌པ༌, ཏད༌པ༌, ཞབས༌ཏོག༌ ཅོ༌ཅེས༌, ཡང༌ སྙིང༌རུས༌ ཉམ༌པོ༌ ལས༌ ཅོ༌ཁན༌གུན༌ ང༌ གྱུས༌ཡོད༌, ཀ༌གུན༌ ཁྱོ༌ཞ༌གུན༌ནི༌ དག༌ས༌ སྔུན༌ནི༌ སང༌ མང༌ང༌ ཅོ༌ཨིན༌ ཡོད༌ཏེ༌ ཨིན༌ནོག༌།
REV 2:20 ཨིན༌ནའང༌ ངའ༌ ཁྱོ༌ཞ༌གུན༌ནི༌ གྱབ༌གལ༌ལ༌ སྐྱོན༌ ཀལ༌ཅེས༌ རིག༌གའང༌ ཡོད༌: ཁྱོ༌ཞ༌གུན༌ནི༌ ལུང༌སྟོན༌མ༌ ཨིན༌ ཟེར༌ཁན༌ནི༌ བུ༌མོ༌ ཡེ༌ཟི༌བེལ༌ལི༌ གྱབ༌གལ༌ ཅོའ༌ མི༌རུག༌། ཁོ༌རང༌ངི༌ ལབ༌ཞ༌ གྱུད༌ཏེ༌, ཁོའེ༌ ངའེ༌ ཞབས༌ཏོག༌པ༌གུན༌ལ༌ ལུས༌བྲེལ༌ ངན༌པ༌ ཅོ༌ཅེས༌ དང༌ སྐུན༌དྲ༌ ཆོད༌པ༌ ཕུལ༌ཁན༌གུན༌ ཟའ༌ཅེས༌ ལབས༌ཏེ༌, སྡིག༌པའེ༌ ཆོགས༌ལ༌ ཁྲིད༌ཏེ༌ ཁྱེར༌དུག༌།
REV 2:21 ངའེ༌ ཏེ༌ བུ༌མོ༌བོའ༌ གྱོད༌པ༌ ཅོ༌ཅེས༌སི༌ སྐབས༌ ཏངས༌པིན༌, ཨིན༌ནའང༌ ཁོའ༌ གྱོད༌པ༌ ཅོ༌ཉིན༌ མི༌དུག༌པིན༌།
REV 2:22 ཏེན༌ན༌བོའེ༌ཕིའ༌ ངའེ༌ ཏེ༌ བུ༌མོ༌བོའ༌ ཟུ༌མོ༌ ཡོང༌ཅུག༌ཨིན༌, ཡང༌ ཀལ༌ཏེས༌ ཏེ༌ བུ༌མོ༌ ཉམ༌པོ༌ ལུས༌བྲེལ༌ ཅོ༌ཁན༌གུན༌ནི༌ གྱོད༌པ༌ མ༌ཅོ༌ན༌, ཁོང༌གུན༌ནའང༌ སྲན༌ཏྲེ༌ ནགས༌བར༌དོ༌ ཐོང༌ཨིན༌།
REV 2:23 ངའེ༌ ཏེ༌ བུ༌མོའེ༌ ལོབ༌ཕྲུགས༌གུན༌ལ༌ ཆད༌པ༌ ཏངས༌ཏེ༌ ཤི༌ཅུག༌ཨིན༌། ཏེ༌ནེ༌ ང༌, སྙིང༌ དང༌ སམ༌བ༌ གུན༌ལ༌ སྟག༌ཅད༌ ཅོ༌ཁན༌ ཡང༌ ཚང༌མ༌ལ༌ རང༌རང༌ངི༌ ལས༌སི༌ ནང༌ཞིན༌ བྲས༌བུ༌ ཏང༌ཁན༌ ཨིན༌ཁན༌བོ༌ ཆོས༌ཚོགས༌གུན༌ནི༌ ཧ༌གོ༌ ཐུབ༌ཨིན༌།”
REV 2:24 “ཨིན༌ནའང༌ ཐི༌འ༌ཏི༌རཱའི༌ ཆོས༌ཚོགས༌སི༌ ནང༌ང༌ ཡེ༌ཟི༌བེལ༌ལི༌ ལབ༌ཞ༌གུན༌ནི༌ ལམ༌མི༌ཀ༌ མ༌གྲུལ༌ཁན༌ ཡང༌, ཤེ༌ཏན༌ནི༌ སང༌ཝའེ༌ ལབ༌ཞ༌ ཨིན༌ ཟེར༌ཁན༌ནི༌ ཐོང༌ངོམས༌ མ༌ཆའ༌ ལུས༌ཏེ༌ ཡོད༌ཁན༌གུན༌ལ༌ ངའེ༌, ང༌ ཡོང༌ཡོང༌ ཚག༌པ༌ ངའེ༌ ནང༌ང༌ ཏད༌པ༌ སྟན༌པོ༌ བོར༌ཅེས༌སི༌ སང༌ ཐེ༌བ༌ ཅའང༌ ཟེར༌ར༌མེད༌།
REV 2:26 སྟིང༌ཇུག༌ ཚག༌པ༌ ངའེ༌ ལབ༌ཞའ༌ ཁའ༌ཉན༌ཁན༌གུན༌ལ༌ གྱལ༌ཁའ༌ ཐོབ༌ཨིན༌། ངའེ༌ ཏེ༌གུན༌ལ༌ མིར༌གྱུད༌ ཚང༌མའེ༌ཀ༌ ཝང༌ཆ༌ ཏང༌ཨིན༌།
REV 2:27 ཏེ༌གུན༌ནི༌ ལྕགས༌སི༌ བེར༌ཀ༌ ཉམ༌པོ༌ ཝང༌སྲུལ༌ཏེ༌ ཟ༌མ༌ ཙོགས༌ལ༌ ཏུམ༌པ༌ཏུམ༌པའེ༌ ནང༌ང༌ ཅག༌ཨིན༌
REV 2:28 ཁོང༌གུན༌ལ༌ ཏེན༌ན༌ ཙོགས༌སི༌ ཝང༌ཆའ༌ ཐོབ༌ཨིན༌ ཀ༌ཟུག༌གི༌ ངའ༌, ང༌རང༌ངི༌ ཡབ༌བི༌ ཀ༌ནེ༌ ཐོབ༌ཏེ༌ ཨིན༌། ངའེ༌ ཏེ༌གུན༌ལ༌ ནམ༌ལངས༌སི༌ སྐར༌མའང༌ ཏང༌ཨིན༌།”
REV 2:29 “ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌།”
REV 3:1 “འི༌ ཨི༌གེ༌བོ༌ སཱར༌དིས༌སི༌ ཆོས༌ཚོགས༌སི༌ ཕོ༌ཉ༌ བྲིས༌།” “འི༌ ལོན༌བོ༌, དཀོན༌མཆོག༌གི༌ ཐུག༌ཉིད༌ རྡུན༌ དང༌ སྐར༌མ༌ རྡུན༌ནི༌ཀ༌ ཝང༌ ཡོད༌ཁན༌ནི༌ ཆོགས༌ནེ༌ ཨིན༌། ཁྱོ༌ཞ༌གུན༌ནི༌ ཅོ༌ཁན༌ ཚང༌མ༌ ངའ༌ གྱུས༌ཡོད༌, ཞན༌མ༌གུན༌ནི༌ ཁྱོ༌ཞའ༌ ཏད༌པའེ༌ ནང༌ང༌ སོན༌པོ༌ ཨིན༌ཁན༌ ཐེའ༌ནའང༌, སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ ཤི༌ཏེ༌ ཨིན༌ནོག༌།
REV 3:2 ཉིད༌ནེ༌ ལོང༌ཤིག༌, ཁྱོ༌ཞ༌གུན༌ནི༌ ནང༌ང༌ ལུས༌ཏེ༌ ཡོད༌ཁན༌ནི༌ ཏད༌པ༌ ཤི༌ཀྱིས༌ཅན༌བོ༌ སྟན༌པོ༌ ཅོ༌ཤིག༌། ངའེ༌ ཐོང༌ཅེས༌ལ༌ ཁྱོ༌ཞའེ༌ ལས༌ ཅོ༌ཁན༌གུན༌, ངའེ༌ དཀོན༌མཆོག༌ ཐུགས༌ཐད༌ཅེས༌སི༌ ཚད༌ དྲན༌དྲའ༌ ལེབ༌ མ༌ཐུབ༌ཏོག༌།
REV 3:3 ཨིད༌ཏུ༌ ཅོ༌ཤིག༌, ཁྱོ༌ཞ༌གུན༌ལ༌ ཐོབ༌ཏེ༌ ཡང༌ ཚོར༌ཏེ༌ ཨིན༌ཁན༌ནི༌ ལབ༌ཞ༌བོའེ༌ཀ༌ ལག༌ལེན༌ ཅོས༌, ཡང༌ གྱོད༌པ༌ ཅོས༌། ཀལ༌ཏེས༌ ཁྱོ༌ཞ༌གུན༌ ཉིད༌ མ༌ཚད༌ན༌, ང༌ ཧུན༌མེད༌ལ༌ རྐུན༌མ༌ ཙོགས༌ལ༌ ཁྱོ༌ཞའ༌ ཆད༌པ༌ ཅད༌ད༌ ཡོང༌ཨིན༌, ཨིན༌ནའང༌ ཏེ༌ཏུས༌པོ༌ ཁྱོ༌ཞའ༌ གྱུས༌ མི༌ཆའ༌།
REV 3:4 ཅི༌ཨིན༌ནའང༌, ཁྱོ༌ཞའེ༌ ཆོས༌ཚོགས༌སི༌ ནང༌ང༌ ཏ༌རུང༌ངའང༌ ཁོ༌རང༌གུན༌ནི༌ ཀོས༌ལག༌ག༌ ལས༌ ངན༌པའེ༌ ཏྲི༌མ༌ ཕོག༌ མ༌ཅུག༌ཁན༌ནི༌ མི༌ ཉུ༌ངུན༌ཞིག༌ དུག༌། ཏེ༌གུན༌ ཀོས༌ལག༌ ཀར༌པོ༌ གོན༌ཏེ༌ ང༌ ཉམ༌པོ༌ གྲུལ༌ཨིན༌, ཅིའ༌ཟེར༌ན༌ ཏེ༌གུན༌ ཏེ༌ རྩི༌ཝའེ༌ འོས༌པ༌ ཨིན༌ནོག༌།
REV 3:5 གྱལ༌ཁའ༌ ཐོབ༌ཁན༌གུན༌ལའང༌ ཟིར༌རྗིད༌ཅན༌ནི༌ ཀོས༌ལག༌ ཀར༌པོ༌བོ༌ སྐོན༌ཨིན༌། ངའེ༌ ཁོང༌གུན༌ནི༌ མིང༌བོ༌ ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ནེ༌ མ༌ཤིག༌ག༌ ང༌རང༌ངི༌ ཡབ༌ དང༌ ཁོང༌ངི༌ ཕོ༌ཉ༌གུན༌ནི༌ དུན༌ལ༌ འི༌གུན༌ ངའེ༌ ཨིན༌ ཟེར༌ཏེ༌ ཤད༌ཨིན༌།
REV 3:6 ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌།”
REV 3:7 “འི༌ ཨི༌གེ༌བོ༌ ཕི༌ལ༌དེལ༌ཕི༌ཨཱའེ༌ ཆོས༌ཚོགས༌སི༌ ཕོ༌ཉ༌ བྲིས༌།” “འི༌ ལོན༌བོ༌ ཏམ༌པ༌ དང༌ དེན༌བ༌ ཨིན༌ཁན༌བོའེ༌ ཆོགས༌ནེ༌ ཨིན༌, ཀ༌བོའེ༌ ལག༌ག༌ གྱལ༌པོ༌ དཱ༌བིད༌དི༌ གྱལ༌སྲིད༌དི༌ ཀུ༌ལིག༌པོ༌ ཡོད༌། ངའེ༌ ཕེ༌ཁན༌གུན༌ སུའང༌ ཅུག༌ མི༌ཉན༌, ཡང༌ ཅུག༌ཁན༌གུན༌ སུའང༌ ཕེ༌མི༌ཉན༌།
REV 3:8 ང༌ ཁྱོ༌ཞའེ༌ ལས༌གུན༌ གྱུས༌ཡོད༌། ལྟོས༌, ངའེ༌ ཁྱོ༌ཞའེ༌ དུན༌ལ༌ སྒོ༌ཞིག༌ ཕེས༌ཏེ༌ ཡོད༌, ཀ༌བོ༌ སུའང༌ ཅུག༌ མི༌ཉན༌། ཁྱོ༌ཞ༌གུན༌ ཤེད༌མེད༌ ཨིན༌ནའང༌ ཏ༌རུང༌ངའང༌ ངའེ༌ ལབ༌ཞ༌གུན༌ལ༌ ལག༌ལེན༌ ཅོས༌ཏེ༌ ངའེ༌ཀ༌ ཏད༌པ༌ ཅོའ༌མེད༌ མ༌ཟེར༌ཁན༌བོའང༌ ང༌ གྱུས༌ཡོད༌།
REV 3:9 ལྟོས༌ཤིག༌, དཀོན༌མཆོག༌གི༌ མི༌ ཨིན༌ ཟེར༌ཁན༌ནི༌ ཡ༌ཧུ༌དཱ༌པ༌གུན༌ ཟུན༌ཇན༌ ཨིན༌ནོག༌, ཁོང༌གུན༌ དཀོན༌མཆོག༌གི༌ མན༌པ༌, ཤེ༌ཏན༌ནི༌ ཆོས༌ཚོགས༌ནེ༌ ཨིན༌ནོག༌། ངའེ༌ ཁོང༌གུན༌ལ༌ ཁྱོ༌ཞ༌གུན༌ནི༌ རྐང༌པའ༌ ཐམས༌ཏེ༌ ཁྱོ༌ཞ༌གུན༌ ངའེ༌ ཅེས༌པ༌ ཅོ༌ཁན༌ནི༌ མི༌གུན༌ ཨིན༌ ཟེར༌ཅུག༌ཨིན༌།
REV 3:10 ཟོད༌པ༌ ཉམ༌པོ༌ ཁྱོ༌ཞ༌གུན༌ནི༌ རྡུག༌ངལ༌གུན༌ ཁུར༌ཏེ༌ ངའེ༌ བཀའ༌ ཏང༌ཁན༌གུན༌ ཉན༌ པ༌སང༌, ངའེ༌ ཁྱོ༌ཞ༌གུན༌ ཏེ༌ ཚོད༌ལྟའེ༌ ཏུས༌པོའེ༌ ནང༌ནེ༌ སྐྱོབ༌ཨིན༌, ཀ༌བོ༌ ཇིག༌རྟེན༌ གང༌པོའེ༌ ཏད༌པ༌ མེད༌ཁན༌ ཚང༌མའ༌, ཚོད༌ལྟ༌ཅེས༌ལ༌ ཡོང༌ཨིན༌།
REV 3:11 ང༌ མ༌ གྱོགས༌པ༌ ཡོང༌ཨིན༌; ཁྱོ༌ཞ༌གུན༌ནི༌ ཐོར༌ཤོག༌པོ༌ སུ༌ཞིག༌གིའང༌ ཀོགས༌ཏེ༌ ཁྱེར༌ མི༌ཉན༌ཅེས༌ལ༌ རང༌ངི༌ ཏད༌པ༌བོ༌ སྲན༌ཏྲེ༌ ཟུམས༌ཏེ༌ བོར༌ཤིག༌།
REV 3:12 གྱལ༌ཁའ༌ ཐོབ༌ཁན༌གུན༌ དཀོན༌མཆོག༌གི༌ ཆོད༌ཁང༌ངི༌ ནང༌ང༌ ཀ༌ ཙོགས༌ གྱུར༌ཨིན༌, ཡང༌ ཁོང༌གུན༌ ཏེ༌ནང༌ནེ༌ མ༌ནེ༌ བིངས༌ཏེ༌ ཆ༌ མི༌གོས༌། ངའེ༌ དཀོན༌མཆོག༌གི༌ ཚན༌ ཡང༌ དཀོན༌མཆོག༌གི༌ གྱལ༌ས༌, ཡེ༌རུ༌ཤ༌ལེམ༌ སོ༌མའེ༌ མིང༌བོ༌ ཏེ༌གུན༌ནི༌ཀ༌ བྲི༌ཨིན༌, ཀ༌བོ༌ ནམ༌ཁའ༌ནེ༌ ངའེ༌ དཀོན༌མཆོག༌ནེ༌ བབས༌ཤེས༌ ཨིན༌ནོག༌། ངའེ༌ ཁོང༌གུན༌ནི༌ཀ༌ ང༌རང༌ངི༌ མིང༌ སོ༌མ༌བོའང༌ བྲི༌ཨིན༌།”
REV 3:13 “ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌།”
REV 3:14 “འི༌ ཨི༌གེ༌བོ༌ ལ༌འོ༌དི༌ཀིའི༌ ཆོས༌ཚོགས༌སི༌ ཕོ༌ཉ༌ བྲིས༌།” “འི༌ ལོན༌བོ༌ ང༌ ཨ༌མེན༌ ཟེར༌ཁན༌, ཡང༌ན༌ དཀོན༌མཆོག༌གི༌ ཞལ༌ཆད༌གུན༌ གྲུབ༌ཅུག༌ཁན༌ནི༌ ཆོགས༌ནེ༌ ཨིན༌། ང༌ ནི༌ དཀོན༌མཆོག༌གི༌ ཨིད༌ཤེས༌ཅན༌ དང༌ ཀྲང༌པོ༌ སྤང༌པོ༌བོ༌ ཨིན༌, ཡང༌ ང༌ གྱུད༌ཏེ༌ དཀོན༌མཆོག༌གི༌ ཅི༌ཚང༌མ༌ ཅོའ༌ ཛད༌ཏེ༌ ཨིན༌།
REV 3:15 ང༌ ཁྱོ༌ཞའེ༌ ལས༌གུན༌ནི༌ སྐོར༌ གྱུས༌ཡོད༌, སེམས༌ཉིད༌དི༌ ཐོག༌ནེ༌ ཁྱོ༌ཞ༌གུན༌ ཚན༌ཏེ༌ ཡ༌ གྲང༌མོ༌ མི༌དུག༌། ངའེ༌ ཁྱོ༌ཞ༌གུན༌ ཚན༌ཏེ༌ ཡ༌ གྲང༌མོ༌ ཅིག༌ཅིག༌པོ༌ ཨིན༌ཅེས༌སི༌ དོད༌པ༌ ཅོའད༌།
REV 3:16 ཁྱོ༌ཞ༌གུན༌ མ༌ལ༌མུ༌ལེ༌ ཨིན༌ཅེས༌པོའེ༌ ༼ཚན༌ཏེ༌ ཡ༌ གྲང༌མོ༌ མེད༌ཁན༌༽ ངའེ༌ ཁྱོ༌ཞ༌གུན༌ ང༌རང༌ངི༌ ཁའ༌ནེ༌ སྐྱུག༌ཨིན༌།
REV 3:17 ཁྱོ༌ཞའེ༌ ཟེར༌ར༌ནོག༌, ‘ང༌ ཆུག༌པོ༌ ཨིན༌, ངའེ༌ ནོར༌ མང༌པོ༌ སགས༌ཏེ༌ ཡོད༌ པ༌སང༌, ངའ༌ ཅའང༌ སྒོས༌དོམ༌ མེད༌’, ཨིན༌ནའང༌ ཁྱོ༌ཞ༌གུན༌ ནགས༌ཅན༌ ནས༌ལུག༌གི༌ ནང༌ང༌, སྡིག༌པ༌རིག༌, ཞ༌ར༌ དང༌, ལྗེར༌ཉལ༌ ཨིན༌ཁན༌བོ༌ གྱུས༌ མེད༌པ༌ ཨིན༌ནོག༌།
REV 3:18 ངའེ༌ ཁྱོ༌ཞ༌གུན༌ལ༌ ཁ༌དའ༌ ཏང༌ངད༌, དཀོན༌མཆོག༌གི༌ སྐུན༌དུན༌ལ༌ ཁྱོ༌ཞ༌གུན༌ དེན༌བའ༌ ཆུག༌པོ༌ གྱུར༌ཅེས༌སི༌ ཕིའ༌ ངའེ༌ ཀ༌ནེ༌ མེའེ༌ ནང༌ང༌ ལག༌མོ༌ ཅོ༌ཁན༌ནི༌ སེར༌པོ༌ ཉོས༌། རང༌ ལྗེར༌ཉལ༌ལ༌ ལུས༌ཏེ༌ ཁྲེལ༌བ༌ མི༌ཆ༌ཅེས༌སི༌ ཕིའ༌, ཟིར༌རྗིད༌ཅན༌ནི༌ རས༌ ཀར༌པོ༌ གོན༌ཅེས༌ལ༌ ཡང༌ ཐོང༌ ཐུབ༌ཅེས༌སི༌ ཕིའ༌ མིག༌གི༌ ནང༌ང༌ ལུག༌ཅེས༌སི༌ སྨན༌བོ༌ ངའེ༌ ཀ༌ནེ༌ ཉོས༌ཤིག༌།
REV 3:19 ངའེ༌ ཡ༌ཤ༌ ཅོ༌ཁན༌གུན༌ལ༌ ཁའ༌སྐྱེས༌ཏེ༌ སྐྱོང༌ངད༌། ཏེན༌ན༌བོའེ༌ཕིའ༌ ཁྱོ༌ཞ༌གུན༌ནི༌ སྡིག༌པ༌གུན༌ལ༌ སྙིང༌ངི༌ ཐིལ༌ནེ༌ གྱོད༌པ༌ ཅོ༌ཤིག༌།
REV 3:20 ལྟོས༌ཤིག༌, ང༌ སྒོའེ༌ཀ༌ དུགས༌ཏེ༌ སྒོ༌ རྡུང༌ཨིན༌ ཡོད༌། ཀལ༌ཏེས༌ ངའེ༌ སྐད༌ ཚོར༌ཏེ༌ སུ༌ཞིག༌གི༌ སྒོ༌ ཕེ༌ན༌, ང༌ ནང༌ཀུག༌ག༌ ཡོངས༌ཏེ༌ ཁོ༌ ཉམ༌པོ༌ ཟའ༌ཅེས༌ ཟེན༌ ཡང༌ ཁོ༌ ང༌ ཉམ༌པོ༌།
REV 3:21 གྱལ༌ཁའ༌ ཐོབ༌ཁན༌གུན༌ལ༌ ང༌རང༌ ཉམ༌པོ༌ ངའེ༌ ཁྲིས༌སི༌ཀ༌ དུག༌ཅེས༌སི༌ རྩི༌ཝ༌ ཏང༌ཨིན༌, ཀ༌ཟུག༌གི༌ ང༌ གྱལ༌ཁའ༌ ཐོབ༌ཏེ༌ ངའེ༌ ཡབ༌བི༌ ཞུགས༌ཁྲིས༌སི༌ཀ༌ ཁོང༌ ཉམ༌པོ༌ དུགས༌ཏེ༌ ཡོད༌།”
REV 3:22 “ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌, དཀོན༌མཆོག༌གི༌ ཐུག༌ཉིད༌དི༌ ཆོས༌ཚོགས༌གུན༌ལ༌ མོལ༌ཁན༌གུན༌ ཉོན༌ཤིག༌།”
REV 4:1 ཏེ༌བོའེ༌ སྟིང༌ནེ༌ ངའེ༌ ནམ༌ཁའེ༌ ནང༌ང༌ ཕེས༌ཏེ༌ ཡོད༌ཁན༌ནི༌ སྒོ༌ཞིག༌ ཐོང༌, ཡང༌ སྔུན༌ལ༌ ཚོར༌ཁན༌ནི༌ ཏུང༌ ཙོགས༌སི༌ སྐད༌པོའེ༌ ངའ༌, “ཀེན༌ལ༌ ཡོང༌, ངའེ༌ ཁྱོ༌རང༌ང༌ སྟིང༌ནེ༌ ཇུང༌གོ༌ཤེས༌ཅན༌གུན༌ སྟན༌ཨིན༌” མོལ༌ལ༌རག༌།
REV 4:2 ཏེན༌ན༌མལ༌ལ༌ དཀོན༌མཆོག༌གི༌ ཐུག༌ཉིད༌ ངའེ༌ཀ༌ བབས༌ཏེ༌ ངའེ༌ ནམ༌ཁའེ༌ ནང༌ང༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌བོ༌ ཐོང༌།
REV 4:3 ཏེ༌ཀ༌ ཞུགས༌ཏེ༌ ཡོད༌ཁན༌བོ༌ མ༌ ལྡང༌ཤན༌: རིན༌ཅན༌ ཡུ༌ དང༌ ཆུ༌རུ༌ ཙོགས༌ དུག༌, ཡང༌ ཏེ༌ ཞུགས༌ཁྲིས༌པོ༌, རྡོའ༌ རིན༌ཅན༌ ལྗང༌ཁུ༌ ཙོགས༌ ལྡང༌ཤན༌ ཟའ༌ཆུ༌ཐུང༌ངི༌ སྐོར༌ཏེ༌ དུག༌།
REV 4:4 ཏེ༌ ཞུགས༌ཁྲིས༌པོ༌ ཞན༌ ཁྲིས༌ 24 སྐོར༌ཏེ༌ དུག༌, ཏེ༌གུན༌ནི༌ཀ༌ འུ༌སྐྱོང༌ 24 ཞུགས༌ཏེ༌ ཡོད༌ཁན༌གུན༌ནི༌ ནམ༌ཟའ༌ ཀར༌པོ༌ ཡང༌ ཁོང༌གུན༌ནི༌ གོའེ༌ཀ༌ སེར༌རི༌ ཐོར༌ཤོག༌ ནམས༌ཏེ༌ ཐོང༌།
REV 4:5 ཡང༌ ཏེ༌ ཞུགས༌ཁྲིས༌པོའེ༌ ཀ༌ནེ༌ སྐམ༌ལག༌གི༌ འོད༌ དང༌ བྲུག༌ལྡིར༌ཁན༌ནི༌ སྐད༌ གུན༌ བིང༌དུག༌། ཞུགས༌ཁྲིས༌སི༌ དུན༌ལ༌ ངད༌ཅན༌ བར༌ཨིན༌ ཡོད༌ཁན༌ནི༌ མར༌མེ༌ རྡུན༌ནའང༌ དུག༌, ཀ༌གུན༌ དཀོན༌མཆོག༌གི༌ ཐུག༌ཉིད༌ རྡུན༌བོ༌ ཞུགས༌ཏེ༌ ཨིན༌ནོག༌།
REV 4:6 ཡང༌ ཏེ༌བོའེ༌ དུན༌ལ༌ ཤེལ༌ལི༌ གྱ༌ཚོ༌ཤིག༌ དུག༌, ཀ༌བོ༌ སལ༌པོ༌ ཁྲ༌སལ༌སལ༌ ཐོང༌དུག༌། ཏེ༌ ཞུགས༌ཁྲིས༌པོའ༌ སྲོག༌ ཡོད༌ཁན༌ ཞིའི༌ སྐོར༌ཏེ༌ དུག༌, ཏེ༌གུན༌ནི༌ གྱབ༌དུན༌ ཉིས༌ཀོ༌ མིག༌གི༌ གངས༌ཏེ༌ དུག༌།
REV 4:7 ཏེ༌ སྲོག༌ ཡོད༌ཁན༌ ཏང༌པོ༌བོ༌ སིང༌གེ༌ ཙོགས༌, ཉིས༌པ༌བོ༌ ལང༌ཏོ༌ ཙོགས༌, སུམ༌པ༌བོའེ༌ ལྡོང༌བོ༌ མི༌ ཙོགས༌, ཡང༌ ཞི༌པ༌བོ༌ འུར༌ཁན༌ནི༌ ལག༌ ཙོགས༌ དུག༌།
REV 4:8 སྲོག༌ ཡོད༌ཁན༌ ཞི༌ཀོའ༌ ཤོག༌པ༌ དྲུག༌དྲུག༌ དུག༌, ཏེ༌ ཤོག༌པ༌གུན༌ནི༌ སྟག༌ཡོག༌ ཚང༌མའ༌ མིག༌གི༌ གངས༌ཏེ༌ དུག༌། ཡང༌ ཉིན༌ཚན༌ མེད༌པ༌ ཆད༌མེད༌ལ༌ ཏེ༌གུན༌ནི༌ ཞུ༌རུག༌, “ཏམ༌པ༌, ཏམ༌པ༌, ཏམ༌པ༌ གཙོ༌བོ༌ དཀོན༌མཆོག༌ ཀུན༌ཝང༌ ཨིན༌། སྔུན༌ལ༌ ཞུགས༌ཏེ༌ ཡོད༌ཁན༌, དག༌སའང༌ ཞུགས༌ཏེ༌, ཡང༌ སྐྱོད༌ཅེས༌ཅན༌ ཨིན༌།”
REV 4:9 ནམ༌ སྲོག༌ ཡོད༌ཁན༌གུན༌ནི༌ ཞུགས༌ཁྲིས༌སི༌ཀ༌ ཞུགས༌ཁན༌ ཀ༌བོ༌ ཏུས༌གྱུན༌ནེ༌གྱུན༌ ཞུགས༌ས༌ནོག༌ ཁོང༌ང༌ སྟོད༌པ༌, རྩི༌ཝ༌ དང༌, ཐུག༌རྗེ༌ཆེ༌ ཕུལ༌ ཟ༌ནེ༌,
REV 4:10 འུ༌སྐྱོང༌ 24 བོའེང༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ ཀ༌བོ༌ ཏུས༌གྱུན༌ནེ༌གྱུན༌ ཞུགས༌ས༌ནོག༌ ཁོང༌ངི༌ དུན༌ལ༌ ཆག༌ཕུལ༌ཨིན༌ ཁོང༌ང༌ ཅོལས༌། ཁོང༌གུན༌ནི༌ རང༌རང༌ངི༌ ཐོར༌ཤོག༌པོ༌ ཞུགས༌ཁྲིས༌སི༌ དུན༌ལ༌ བོར༌ཏེ༌ མོལས༌,
REV 4:11 “ང༌ཞའེ༌ གཙོ༌བོ༌ དང༌ ང༌ཞའེ༌ དཀོན༌མཆོག༌, ཉེ༌རང༌ ནི༌ སྤལ༌, རྩི༌ཝ༌ དང༌ ཝང༌ ཐོབ༌ཅེས༌སི༌ འོས༌པ༌, ཅིའ༌ཟེར༌ན༌ ཉེ༌རང༌ངི༌ ཅི༌ཚང༌མ༌ ཅོའ༌ ཛད༌ཏེ༌ ཉེ༌རང༌ངི༌ ཐུག༌གོངས༌ ནང༌ཞིན༌ ཏེ༌གུན༌ སོན༌པོ༌ ནས༌ཤུག༌ག༌ ཛདས༌།”
REV 5:1 ངའེ༌ ཏེ༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌བོའེ༌ ཆག༌ ཡས༌པའེ༌ ནང༌ང༌, ཤོག༌རིལ༌ གྱབ༌དུན༌ ཉིས༌ཀོའེ༌ཀ༌ བྲིས༌ཏེ༌ ཐེ༌ཙེ༌ རྡུན༌ གྱབས༌ཏེ༌ ཡོད༌ཁན༌བོ༌ ཐོང༌།
REV 5:2 ཡང༌ ངའེ༌ སྟོབས༌ཅན༌ ཕོ༌ཉ༌ ཞིག༌གི༌ སྐད༌ ཆེན༌མོའེ༌ ནང༌ང༌ མོལ༌ཨིན༌ ཚོར༌, “འི༌ ཤོག༌རིལ༌ལི༌ ཐེ༌ཙེ༌གུན༌ ཅགས༌ཏེ༌ ཕེ༌ཅེས༌སི༌ འོས༌པ༌ སུ༌ ཨིན༌?”
REV 5:3 ཨིན༌ནའང༌ ནམ༌ཁའ༌, ཡ༌ ཇིག༌རྟེན༌ནི༌ཀ༌ དུག༌ཁན༌, ཡ༌ སའེ༌ ཡོག༌ག༌ ཡོད༌ཁན༌ སུ༌ཞིག༌གའང༌ ཏེ༌ ཤོག༌རིལ༌བོ༌ ཕེ༌ ཡ༌ ལྟའ༌ མ༌ཉན༌།
REV 5:4 ང༌ སྲན༌ཏྲེ༌ ངུས༌པིན༌ ཅིའ༌ཟེར༌ན༌ སུ༌ཞིག༌གའང༌, ཏེ༌ ཤོག༌རིལ༌ ཕེ༌ཅེས༌, ཡ༌ སིལ༌ཅེས༌སི༌ འོས༌པ༌ མ༌བིང༌།
REV 5:5 ཏེ༌ནེ༌ འུ༌སྐྱོང༌གུན༌ནི༌ ཕྲོ༌ནེ༌ ཅིག༌གི༌ ང༌ མོལས༌, “མ༌ངུ༌, ལྟོས༌ ཡ༌ཧུ༌དཱ༌པའེ༌ སྡེ༌ ནང༌ནེ༌ སིང༌གེ༌ ཟེར༌ཁན༌, གྱལ༌པོ༌ དཱ༌བིད༌དི༌ པུར༌གྱུད༌, གྱལ༌ཁའ༌ ཐོབ༌ཁན༌, ཁོང༌ ནི༌ ཐེ༌ཙེ༌ རྡུན༌ཀོ༌ ཅགས༌ཏེ༌ སྤེ༌ཆ༌ ཕེ༌ཅེས༌སི༌ འོས༌པ༌ཅན༌བོ༌ ཞུགས༌ཏེ༌ ཨིན༌ནོག༌།”
REV 5:6 ཏེ༌ནེ༌ ང༌ སད༌ཏེ༌ ཡོད༌ཁན༌ ཙོགས༌སི༌ ལུ༌གུ༌ཞིག༌ ཐོང༌, ཁོང༌ ཏེ༌ སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌ 24 ཐའ༌ནེ༌ སྐོར༌ཏེ༌ ཡོད༌ཁན༌ནི༌ ཞུགས༌ཁྲིས༌སི༌ དུན༌ལ༌ ཞངས༌ཏེ༌ དུག༌། ཏེ༌ ལུ༌གུ༌བོའ༌ རཱ༌ཅོ༌ རྡུན༌ དང༌ མིག༌ རྡུན༌ དུག༌, ཀ༌བོ༌ དཀོན༌མཆོག༌གི༌ ཇིག༌རྟེན༌ གང༌པོའེ༌ ནང༌ང༌ ཀལ༌ལ༌ ཛད༌ཁན༌ནི༌ ཐུག༌ཉིད༌ རྡུན༌བོ༌ ཨིན༌ནོག༌།
REV 5:7 ཏེ༌ ལུ༌གུ༌བོ༌ སྐྱོད༌ཏེ༌ ཞུགས༌ཁྲིས༌སི༌ཀ༌ ཞུགས༌ཁན༌ནི༌ ཆག༌ ཡས༌པ༌ནེ༌, ཏེ༌ སྤེ༌ཆ༌བོ༌ ལེནས༌།
REV 5:8 ཁོང༌ངི༌ སྤེ༌ཆ༌བོ༌ ཁོང༌རང༌ངི༌ ཆག༌ག༌ ནམས༌ས༌ཅིག༌, སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌ 24 གུན༌ནི༌ ལུ༌གུའི༌ དུན༌ལ༌ ཆག༌ཕུལས༌། ཡང༌ ཁོང༌ ཚང༌མའེ༌ ལག༌ག༌ ཏར༌ ཡོད༌ཁན༌ནི༌ རོལ༌མོ༌ ཡང༌ སྤོས༌ སྐངས༌ཁན༌ནི༌ སེར༌རི༌ གོར༌མོ༌ རིག༌ དུག༌, ཏེ༌ སྤོས༌གུན༌ དཀོན༌མཆོག༌གི༌ མི༌གུན༌ནི༌ མོས༌ལམ༌གུན༌ ཨིན༌ནོག༌།
REV 5:9 ཏེ༌གུན༌ནི༌ ལུ༌ སོ༌མ༌ཞིག༌ ཏངས༌, “ཉེ༌རང༌, ཏེ༌ ཤོག༌རིལ༌བོ༌ ལེན༌ཏེ༌ ཐེ༌ཙེ༌གུན༌ ཅག༌ཅེས༌སི༌ འོས༌པ༌ ཨིན༌ནོག༌། ཅིའ༌ཞུ༌ན༌ ཉེ༌རང༌ ཀྲོངས༌ཏེ༌, ཉེ༌རང༌ངི༌ སྐུ༌ཁྲག༌ རིན༌ལ༌ ཤལ༌ལ༌ ཛད༌ཏེ༌, རིགས༌ ཚང༌མ༌, སྐད༌རིགས༌ ཚང༌མ༌ དང༌, གྱལ༌ཁག༌ ཚང༌མའེ༌ མིར༌གྱུད༌གུན༌ནེ༌ དཀོན༌མཆོག༌གི༌ ཕིའ༌ མི༌གུན༌ ཉོའ༌ ཛད༌ཏེ༌ ཨིན༌ནོག༌།
REV 5:10 ཉེ༌རང༌ངི༌ ཏེ༌ མི༌གུན༌ ང༌དང༌གུན༌ནི༌ དཀོན༌མཆོག༌ག༌ ཞབ༌ཤི༌ ཞུ༌ཅེས༌སི༌ ཕིའ༌, གྱལ༌སྲིད༌ དང༌ བླ༌མ༌ གུན༌ ཅོའ༌ ཛདས༌། ཡང༌ ཏེ༌གུན༌ནི༌ ཇིག༌རྟེན༌ནི༌ཀ༌ ཝང༌སྲུལ༌ཨིན༌།”
REV 5:11 ཏེ༌ནེ༌ ངའེ༌ ལྟའ༌ཅིག༌, ཕོ༌ཉའ༌ སྟོང༌ཕྲག༌ ཕྲི༌ཕྲག༌ མང༌པོའེ༌ སྐད༌ ཚོར༌, ཏེ༌གུན༌ནི༌ ཞུགས༌ཁྲིས༌, སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌ 24 གུན༌ལ༌ ཐའ༌ནེ༌ སྐོར༌ཏེ༌ དུག༌པིན༌།
REV 5:12 སྐད༌ ཆེན༌མོའེ༌ ནང༌ང༌ ཏེ༌གུན༌ནི༌ ལུ༌ ཏང༌དུག༌པིན༌, “ཏེ༌ སད༌ཁན༌ནི༌ ལུ༌གུ༌བོའ༌ ཝང༌, ནོར༌, ཤེས༌རབས༌, ཤེད༌, རྩི༌ཝ༌, སྤལ༌ དང༌ སྟོད༌པ༌ ཐོབ༌ཅེས༌སི༌ འོས༌པ༌ ཨིན༌།”
REV 5:13 ཏེ༌ནེ༌ ངའེ༌ ནམ༌ཁའ༌, ཇིག༌རྟེན༌, སའེ༌ ཡོག༌ག༌ ཡོད༌ཁན༌ དང༌, གྱ༌ཚོའེ༌ ནང༌ང༌ ཡོད༌ཁན༌ནི༌ སྲོག༌ཅན༌ ཚང༌མའེ༌, “ཞུགས༌ཁྲིས༌སི༌ཀ༌ ཞུགས༌ཁན༌ དང༌ ལུ༌གུའ༌ སྟོད༌པ༌, རྩི༌ཝ༌, སྤལ༌ དང༌ ཝང༌ གུན༌ ཏུས༌གྱུན༌ནེ༌གྱུན༌ ཐོབ༌ཤིག༌” ཟེར༌ཨིན༌ ལུ༌ ཏང༌ཨིན༌ ཚོར༌།
REV 5:14 ཏེ༌ནེ༌ ཏེ༌ སྲོག༌ ཡོད༌ཁན༌ ཞི༌ཀོའེ༌ ཞུས༌ “ཨ༌མེན༌,” ཡང༌ ཏེ༌ འུ༌སྐྱོང༌གུན༌ནི༌ ཆག༌ཕུལ༌ཨིན༌ ཁོང༌གུན༌ལ༌ ཅོལས༌།
REV 6:1 ཏེ༌ནེ༌ ངའེ༌ ལུ༌གུའི༌ ཏེ༌ ཐེ༌ཙེ༌ རྡུན༌ནི༌ ནང༌ནེ༌ ཏང༌པོ༌བོ༌ ཅགས༌ཏེ༌ ཕེའ༌ ཛད༌ད༌ལ༌ ཐོང༌། ཏེ༌ སྲོག༌ ཡོད༌ཁན༌ ཞི༌ཀོའེ༌ ཕྲོ༌ནེ༌ ཅིག༌གི༌ བྲུག༌ལྡིར༌ཁན༌ ཙོགས༌སི༌ སྐད༌དི༌ ནང༌ང༌ “ཡོང༌” མོལ༌ལ༌རག༌།
REV 6:2 ངའེ༌ ཀེན༌ལ༌ ལྟས༌པ༌, ང༌ རྟ༌ ཀར༌པོ༌ཞིག༌ ཐོང༌, ཏེ༌བོའེ༌ཀ༌ ཞོན༌ཁན༌བོའེ༌ ཞུ༌ཞིག༌ ཁུར༌ཏེ༌ ཡང༌ ཁོའེ༌ གོའེ༌ཀ༌ ཐོར༌ཤོག༌ སྐོན༌ན༌ ཛད༌ཏེ༌ དུག༌། ཁོ༌ གྱལ༌ཁའ༌ ཐོབ༌ཚར༌ཁན༌ ཙོགས༌ལ༌ གྱལ༌ཁའ༌ ལེན༌ན༌ལ༌ བིངས༌།
REV 6:3 ལུ༌གུའི༌ ཐེ༌ཙེ༌ ཉིས༌པ༌བོ༌ ཅགས༌ཏེ༌ ཕེའ༌ཅིག༌, སྲོག༌ ཡོད༌ཁན༌ ཉིས༌པ༌བོའེ༌, “ཡོང༌” མོལ༌ཨིན༌ཞིག༌ ཚོར༌།
REV 6:4 ཏེ༌ནེ༌ ཡང༌ རྟ༌ མེ༌ ཙོགས༌ མར༌པོ༌ཞིག༌ བིང༌ཨིན༌ ཐོང༌, ཏེ༌ཀ༌ ཞོན༌ཁན༌བོའ༌ ར༌འི༌ ཆེན༌མོ༌ཞིག༌ དང༌ ཇིག༌རྟེན༌ནི༌ ཀ༌ནེ༌ ཞི༌དེ༌ མེད༌ཁན༌ ཅོ༌ཅེས༌སི༌ ཝང༌ཆ༌ སལས༌། ཏེ༌ནེ༌ ནོལ༌ཅེས༌ གོ༌ཟུགས༌ཏེ༌ མི༌གུན༌ནི༌ མ༌ ཚུལ༌ ངན༌པ༌ ཉམ༌པོ༌ ཅིག༌ དང༌ ཅིག༌ སདས༌།
REV 6:5 ལུ༌གུའི༌ ཐེ༌ཙེ༌ སུམ༌པ༌བོ༌ ཅགས༌ཏེ༌ ཕེའ༌ཅིག༌, སྲོག༌ ཡོད༌ཁན༌ སུམ༌པ༌བོའེ༌ “ཡོང༌” མོལ༌ཨིན༌ཞིག༌ ཚོར༌། ངའེ༌ ཀེན༌ལ༌ ལྟས༌པིན༌ ཡང༌ རྟ༌ ནག༌པོ༌ཞིག༌ ཐོང༌, ཏེ༌ཀ༌ ཞོན༌ཁན༌བོའེ༌ ལག༌པའེ༌ ནང༌ང༌ ཏ༌ཀ༌རི༌ཞིག༌ དུག༌།
REV 6:6 ཏེ༌ནེ༌ ངའེ༌ ཏེ༌ སྲོག༌ ཡོད༌ཁན༌ ཞི༌ཀོའེ༌ ཕྲོ༌ནེ༌ སྐད༌ཅིག༌གི༌, “ཞག༌ཅིག༌གི༌ ལ༌ཆའ༌ ཀྱི༌ལོ༌ག༌རམ༌ ཅིག༌གི༌ ཀྲོ༌ ཡ༌ ཀྱི༌ལོ༌ག༌རམ༌ སུམ༌མི༌ ནས༌སི༌ ཕེ༌ མ༌ནེ༌ ཉོ༌མི༌ཉན༌། ཨིན༌ནའང༌ མར༌ནག༌ དང༌ རྒུན༌ཆང༌ གུན༌ སྐོན༌མོ༌ ཆ༌ མ༌ཅུག༌ཤིག༌” མོལ༌ཨིན༌ཞིག༌ ཚོར༌།
REV 6:7 ལུ༌གུའི༌ ཐེ༌ཙེ༌ ཞི༌པ༌བོ༌ ཅགས༌ཏེ༌ ཕེའ༌ཅིག༌, ངའེ༌ ཏེ༌ སྲོག༌ ཡོད༌ཁན༌ ཞི༌པ༌བོའི༌, “ཡོང༌” མོལ༌ཨིན༌ཞིག༌ ཚོར༌།
REV 6:8 ངའེ༌ ལྟས༌པ༌ ང༌ ཀོག༌ཐལ༌ ཙོགས༌ དོག༌ ཡོད༌ཁན༌ནི༌ རྟ༌ཞིག༌ ཐོང༌, ཏེ༌ཀ༌ ཞོན༌ཁན༌བོའ༌ ཤི༌ཅེས༌ ཡང༌ ཏེ༌བོའེ༌ སྟིང༌རང༌ནེ༌, ཡོང༌ཁན༌ནི༌ ཕྲོ༌པ༌བོའ༌ ཤི༌ཁན༌གུན༌ནི༌ ས༌ཆ༌ ཟེར༌དུག༌། ཏེ༌ ཉིས༌ཀོའ༌ ཇིག༌རྟེན༌ནི༌ ཁག༌ཞིའི༌ ནང༌ནེ༌ ཁག༌ཅིག༌ག༌ ར༌འི༌, མུ༌གེ༌, ནད༌ དང༌, རིའི༌ སེམས༌ཅན༌གུན༌ གྱུད༌ཏེ༌ མི༌གུན༌ སད༌ཅེས༌སི༌ ཝང༌ཆ༌ སལ༌ལ༌ ཛདས༌།
REV 6:9 ལུ༌གུའི༌ ཐེ༌ཙེ༌ ལྔ༌པ༌ ཅགས༌ཏེ༌ ཕེའ༌ཅིག༌, ཆོད༌ཁྲིའི༌ ཡོག༌ག༌, དཀོན༌མཆོག༌གི༌ བཀའ༌ ཁའ༌ཉན༌ཏེ༌ མ༌ཤི༌ཀའེ༌ཀ༌ ཨིད༌ཤེས༌ ཅོ༌ཁན༌ནི༌ སྤང༌པོ༌ ཏང༌ཅེས༌པོའེ༌ སད༌ཁན༌ནི༌ སེམས༌ཉིད༌གུན༌ ངའེ༌ ཐོང༌།
REV 6:10 ཏེ༌གུན༌ནི༌ གཙོ༌བོའ༌ ཀུ༌ཅོ༌ ཏང༌ཨིན༌ ཟེརས༌, “ཀུན༌ཝང༌ གཙོ༌བོ༌ལེ༌, ཏམ༌པ༌ དང༌ ཀྲང༌པོ༌, ཉེ༌རང༌ངི༌ འི༌ ཇིག༌རྟེན༌པ༌ ཏད༌པ༌ མེད༌ཁན༌ མི༌གུན༌ལ༌, ཤགས༌ མ༌ཛད༌ད༌ ཡང༌ ང༌ཞའེ༌ ཁྲག༌གི༌ ལན༌ མ༌སལ༌ལ༌ ནམ༌ཚོག༌པ༌ སྲུངས༌ཏེ༌ ཞུག༌ཤེན༌ ལེ༌”
REV 6:11 ཏེ༌ནེ༌ ཁོང༌ ཚང༌མ༌ལ༌ ཀོས༌ ཀར༌པོ༌ སལ༌ལ༌ ཛདས༌, ཡང༌ ཁོང༌ ཙོགས༌ལ༌ ཁོང༌གུན༌ནི༌ ཕྲོ༌པ༌ སྤུན༌ ཡེ༌ཤུའི༌ ཞབས༌ཏོག༌པ༌ སད༌ཅེས༌ཅན༌གུན༌ནི༌ ཀྲངས༌ཀ༌ དྲན༌དྲའ༌ ཆ༌ཆ༌ ཚག༌པའ༌, ཁོང༌གུན༌ལ༌ ཙ༌པིག༌ ངལ༌ཚོས༌ ཅེས༌ལ༌ མོལས༌།
REV 6:12 ལུ༌གུའི༌ ཐེ༌ཙེ༌ དྲུག༌པ༌བོ༌ ཅགས༌ཏེ༌ ཕེའ༌ཅིག༌, སང༌གུལ༌ ཀྲག༌པོ༌ཞིག༌ ཡོངས༌། ཉི༌མ༌བོ༌ རས༌ ནག༌པོ༌ ཙོགས༌ མུན༌གྲིག༌ ཡང༌ ཟླ༌ཝ༌ ནི༌ ཁྲག༌ ཙོགས༌ མར༌པོ༌ གྱུར༌།
REV 6:13 ཏེ༌ནེ༌ ལུང༌རག༌ ཀྲག༌པོའེ༌ སྐུལ༌ཅེས༌པོའེ༌ ལྕང༌མའེ༌ ཀ༌ནེ༌ སྨིན༌ མ༌སྨིན༌ཁན༌ནི༌ ཕིག༌གི༌ ཁ༌ཟས༌ བུད༌ད༌ ཙོགས༌ལ༌ ནམ༌ཁའེ༌ ནང༌ང༌ ཡོད༌ཁན༌ནི༌ སྐར༌མ༌གུན༌ ཇིག༌རྟེན༌ནི༌ཀ༌ བུད༌།
REV 6:14 ཡང༌ ནམ༌ཁའ༌བོ༌ ཤོག༌རིལ༌ སྲིལ༌ལ༌ ཙོགས༌ལ༌ མེད༌ཁན༌ སོང༌། རི༌ ཚང༌མ༌ དང༌ ཚོ༌ལིང༌གུན༌, ཡོད༌སའེ༌ ནས༌སའེ༌ ཀ༌ནེ༌ ཐེན༌ཏེ༌ མི༌དུག༌།
REV 6:15 ཏེ༌ནེ༌ ཇིག༌རྟེན༌ནི༌ གྱལ༌པོ༌གུན༌, གྱལ༌ལུ༌གུན༌, མག༌མི༌ སྤོན༌བོ༌ ཇིགས༌པོ༌གུན༌, ཆུག༌པོ༌གུན༌, ཝང༌ཅན༌གུན༌, ཚེ༌ཡོག༌ དང༌ རང༌ཝང༌ཅན༌ནི༌ མི༌ཚང༌མ༌, བྲག༌ཕུགས༌ དང༌ རིའི༌ ཕོ༌ལོངས༌སི༌ ཕྲོའ༌ ཨིབ༌དུག༌།
REV 6:16 ཡང༌ ཏེ༌ མི༌གུན༌ནི༌ རི༌ ཐོན༌པོ༌གུན༌ དང༌ བྲག༌གུན༌ལ༌, “ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ ཡང༌ ལུ༌གུའི༌ ཐུགས༌སྲོ༌ནེ༌ ཨིབ༌ཅེས༌སི༌ ཕིའ༌ དིབས༌ཏེ༌ ང༌ཞ༌གུན༌ ཀོབ༌ཤིག༌གའང༌།
REV 6:17 ཅིའ༌ཟེར༌ན༌ ཁོང༌ངི༌ ཐུགས༌སྲོའེ༌ ཇིགས༌ནང༌ཅན༌ནི༌ ཞག༌པོ༌ ལེབ༌ ཚར༌ཏེ༌ ཨིན༌ནོག༌, སུའ༌ ཏེ༌གུན༌ ཁུར༌ ཐུབ༌ཨིན༌” ཟེརས༌།
REV 7:1 ཏེ༌ སྟིང༌ནེ༌ ང༌ ཐོང༌, ཇིག༌རྟེན༌ནི༌ ཀྲུ༌ཞི༌ཀའེ༌ཀ༌ ཕོ༌ཉ༌ ཞི༌ ལངས༌ཏེ༌ ས༌ཀྱད༌ ཡ༌ གྱ༌ཚོ༌ ཡ༌ ལྕང༌མ༌ གུན༌ནི༌ཀ༌ གྱུག༌ མི༌གྱུག༌ཅེས༌ལ༌, ཇིག༌རྟེན༌ནི༌ ལུངས༌པོ༌ ཞི༌ཀོ༌ སྒགས༌ཏེ༌ བོར༌ར༌ ཛད༌ཏེ༌ དུག༌།
REV 7:2 ཏེ༌ནེ༌ ངའེ༌, ལག༌པའེ༌ ནང༌ང༌ སོན༌པོ༌ དཀོན༌མཆོག༌གི༌ ཐེ༌ཙེ༌ ཁུར༌ཁན༌ནི༌ ཕོ༌ཉ༌ ལྔ༌པ༌བོ༌ ཤར༌ ཆོགས༌ནེ༌ བིང༌ང༌ ཐོང༌། འི༌ ཕོ༌ཉའེ༌, ས༌ཀྱད༌ དང༌ གྱ༌ཚོ༌ གུན༌ལ༌ ནོད༌པ༌ ཏང༌ཅེས༌སི༌ ཝང༌ སལ༌ལ༌ ཛད༌ཁན༌ནི༌ ཕོ༌ཉ༌ ཇིག༌རྟེན༌ནི༌ ཀྲུ༌ཞི༌ཀའེ༌ཀ༌ ལངས༌ཏེ༌ ཡོད༌ཁན༌གུན༌ལ༌, སྐད༌ ཆེན༌མོའེ༌ ནང༌ང༌ མོལས༌,
REV 7:3 “ང༌དང༌ངི༌ ང༌ཏི༌ དཀོན༌མཆོག༌གི༌ ཡོག༌པོ༌གུན༌ནི༌ ཐོད༌པའེ༌ཀ༌ ཐེ༌ཙེ༌ ཏང༌ཏང༌ ཚག༌པ༌ ས༌ཀྱད༌, ཡ༌ གྱ༌ཚོ༌, ཡ༌ ལྕང༌མ༌ གུན༌ལ༌ ནོད༌པ༌ མ༌ཏང༌ཤིག༌།”
REV 7:4 ཏེ༌ནེ༌ ང༌ ཐེ༌ཙེ༌ ཏང༌ཚར༌ཁན༌གུན༌ནི༌ ཀྲངས༌ཀ༌བོ༌ ཚོར༌, ཀ༌བོ༌ ལག༌ཅིག༌ དང༌ སྟོང༌ཞིབ༌ཅུ༌ ཞབ༌ཞི༌ དུག༌, ཀ༌གུན༌ ཨིས༌ར༌ཨེལ༌ལི༌ སྡེ༌ ཚང༌མའེ༌ ནང༌ནེ༌
REV 7:5 ཡུ༌དཱའེ༌ སྡེ༌ནེ༌ སྟོང༌ཅུག༌ཉིས༌, རུ༌བེན༌ནི༌ སྡེ༌ནེ༌ སྟོང༌ཅུག༌ཉིས༌, གཱད༌དི༌ སྡེ༌ནེ༌ སྟོང༌ཅུག༌ཉིས༌,
REV 7:6 ཨ༌ཤེར༌རི༌ སྡེ༌ནེ༌ སྟོང༌ཅུག༌ཉིས༌, ནབ༌ཐལ༌ལིའི༌ སྡེ༌ནེ༌ སྟོང༌ཅུག༌ཉིས༌, མ༌ན༌ཤེའེ༌ སྡེ༌ནེ༌ སྟོང༌ཅུག༌ཉིས༌,
REV 7:7 ཤི༌མི༌འོན༌ནི༌ སྡེ༌ནེ༌ སྟོང༌ཅུག༌ཉིས༌, ལི༌ཝིའི༌ སྡེ༌ནེ༌ སྟོང༌ཅུག༌ཉིས༌, ཨིས༌ས༌ཁར༌རི༌ སྡེ༌ནེ༌ སྟོང༌ཅུག༌ཉིས༌,
REV 7:8 ཟེ༌བུ༌ལོན༌ནི༌ སྡེ༌ནེ༌ སྟོང༌ཅུག༌ཉིས༌, ཡོ༌སེབ༌བི༌ སྡེ༌ནེ༌ སྟོང༌ཅུག༌ཉིས༌, ཡང༌ བེན༌ཡཱ༌མིན༌ནི༌ སྡེ༌ནེ༌ སྟོང༌ཅུག༌ཉིས༌ ཨིན༌ནོག༌།
REV 7:9 ཏེ༌ སྟིང༌ནེ༌ ངའེ༌ སུ༌ཞིག༌གིའང༌ རྩི༌ མི༌ཉན༌ཅེས༌སི༌ མི༌ཚོགས༌ ཆེན༌མོ༌ཞིག༌ ཐོང༌, ཀ༌གུན༌ གྱལ༌ཁག༌, རིགས༌, མི༌ དང༌ སྐད༌རིག༌ ཚང༌མ༌ནེ༌ ཞུགས༌ཁྲིས༌ དང༌ ལུ༌གུའི༌ དུན༌ལ༌ ལངས༌ཏེ༌ དུག༌པིན༌། ཁོང༌གུན༌ནི༌ ཀོས༌ ཀར༌པོ༌ གོན༌ཏེ༌, ཁ༌སོར༌ ལྕང༌མའེ༌ ཡལ༌ག༌གུན༌ ལག༌པའེ༌ ནང༌ང༌ ཁུར༌ཏེ༌,
REV 7:10 སྐད༌ ཆེན༌མོའེ༌ ནང༌ང༌ ཟེརས༌, “ཐར༌པ༌ ནི༌ ཞུགས༌ཁྲིས༌སི༌ཀ༌ ཞུགས༌ཁན༌ དཀོན༌མཆོག༌ དང༌ ལུ༌གུ༌ ཉིས༌ཀོ༌ནེ༌ ཐོབ༌བ༌ནོག༌།”
REV 7:11 ཞུགས༌ཁྲིས༌, འུ༌སྐྱོང༌ གུན༌ དང༌ སྲོག༌ ཡོད༌ཁན༌ ཞི༌ཀོའ༌ ཐའ༌ནེ༌ སྐོར༌ཏེ༌ ཕོ༌ཉ༌ ཚང༌མ༌ ཞངས༌ཏེ༌ དུག༌། ཁོང༌ ཚང༌མའེ༌ ཞུགས༌ཁྲིས༌སི༌ དུན༌ལ༌ ཆག༌ཕུལ༌ཨིན༌ དཀོན༌མཆོག༌ག༌ ཅོལས༌།
REV 7:12 ཁོང༌གུན༌ནི༌ མོལས༌, “ཨ༌མེན༌། སྟོད༌པ༌, སྤལ༌, ཤེས༌རབས༌, ཐུག༌རྗེ༌, རྩི༌ཝ༌, ཝང༌ དང༌, ཤེད༌ གུན༌ ཏུས༌གྱུན༌ནེ༌གྱུན༌, ང༌དང༌གུན༌ནི༌ དཀོན༌མཆོག༌གི༌ ཨིན༌ནོག༌, ཨ༌མེན༌།”
REV 7:13 ཏེ༌ནེ༌ འུ༌སྐྱོང༌ ཅིག༌གི༌ ངའ༌ ཏྲིའ༌རག༌, “འི༌ ཀོས༌ ཀར༌པོ༌ གོན༌ཁན༌གུན༌ སུ༌ ཨིན༌ནོག༌? ཡང༌ ཀ༌ནེ༌ ཡོངས༌ཏེ༌ ཨིན༌ནོག༌?”
REV 7:14 ངའེ༌ ཁོང༌ང༌, “སྤོན༌བོ༌ལེ༌, ངའ༌ གྱུས༌མེད༌ ཨིན༌ནའང༌ ཉེ༌རང༌ངི༌ ཁྱེན༌ན༌ནོག༌” ཞུས༌པིན༌། ཁོང༌ངི༌ མོལ༌ལ༌རག༌, “འི༌གུན༌ རྡུག༌ངལ༌ མ༌ ཆེན༌མོ༌ནེ༌ བིངས༌ཏེ༌ ཡོང༌ཁན༌གུན༌ ཨིན༌ནོག༌། ཁོང༌གུན༌ནི༌ ཁོ༌རང༌གུན༌ནི༌ ཀོས༌གུན༌ ལུ༌གུའི༌ སྐུ༌ཁྲག༌གི༌ ནང༌ང༌ ཁྲུས༌ཏེ༌ ཀར༌པོ༌ ཅོས༌ཏེ༌ ཨིན༌ནོག༌།”
REV 7:15 “ཏེན༌ན༌བོའེ༌ཕིའ༌ ཁོང༌གུན༌ནི༌ དཀོན༌མཆོག༌གི༌ ཞུགས༌ཁྲིས༌སི༌ དུན༌ལ༌ ལངས༌ཏེ༌ དཀོན༌མཆོག༌གི༌ ཆོད༌ཁང༌ངི༌ ནང༌ང༌ ཉིན༌ཚན༌ མེད༌པ༌ ཁོང༌ང༌ ཞབས༌ཏོག༌ ཞུའ༌ནོག༌། ཡང༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌བོའེ༌, ཀུར༌ ཙོགས༌ལ༌ ཁོང༌གུན༌ ཀབས༌ཏེ༌ སྐྱོབ༌བ༌ ཛད༌ཨིན༌།
REV 7:16 ཁོང༌གུན༌ མ༌ནེ༌ མི༌སྟོགས༌, ཡ༌ མི༌སྐོམས༌, མ༌ཚད༌ ཉི༌མའེ༌ ཚད༌, ཡ༌ ཚད༌ ཀྲག༌པོའེ༌ ཞས༌ཏེ༌ ཁོང༌གུན༌ ཚིག༌ མི༌ཚིག༌།
REV 7:17 ཅིའ༌ཟེར༌ན༌ ཞུགས༌ཁྲིས༌སི༌ སྐྱིལ༌ལ༌ ལངས༌ཏེ༌ ཡོད༌ཁན༌ནི༌ ལུ༌གུ༌ ནི༌, ཁོང༌གུན༌ སྐྱོབ༌ཁན༌ནི༌ ལུག༌རྫི༌ ཨིན༌ནོག༌། ཁོང༌ངི༌, ཁོང༌གུན༌ སྲོག༌ སལ༌ལ༌ ཛད༌ཁན༌ནི༌ ཆུ༌མིག༌གུན༌ནི༌ དུན༌ལ༌ ཁྲིད༌ཏེ༌ ཁྱེར༌ར༌ ཛད༌ཨིན༌། ཡང༌ དཀོན༌མཆོག༌གི༌ ཁོང༌གུན༌ནི༌ ཆི༌མ༌ ཕིའ༌ ཛད༌ཨིན༌།”
REV 8:1 ལུ༌གུའི༌ ཐེ༌ཙེ༌ རྡུན༌པ༌བོ༌ ཅགས༌ཏེ༌ ཕེའ༌ཅིག༌, ནམ༌ཁའེ༌ ནང༌ང༌ ཆུ༌ཚོད༌ ཕེད༌ ཟམ༌ཤིག༌ ཅའང༌ སྐད༌ མེད༌པ༌ ཇམ༌ཐིང༌ངེ༌ ལུས༌།
REV 8:2 ཏེ༌ནེ༌ ངའེ༌ དཀོན༌མཆོག༌གི༌ སྐུན༌དུན༌ལ༌ ལངས༌ཏེ༌ ཞུགས༌ཁན༌ནི༌ ཕོ༌ཉ༌ རྡུན༌ ཐོང༌, ཡང༌ ཁོང༌གུན༌ལ༌ ཏུང༌ རེ༌རེ༌ སལ༌ལ༌ ཛདས༌།
REV 8:3 སེར༌རི༌ སྤོས༌སི༌ ནོད༌ ནམས༌ཁན༌ནི༌ ཞན༌ ཕོ༌ཉ༌ཞིག༌ སྐྱོད༌ཏེ༌ ཆོད༌ཁྲིའི༌ དུན༌ལ༌ ལངས༌ཏེ༌ ཞུགས༌། ཁོའ༌ སྤོས༌ མང༌པོ༌ཞིག༌ དཀོན༌མཆོག༌གི༌ མི༌གུན༌ནི༌ མོས༌ལམ༌མི༌ ནང༌ང༌ སྲེས༌ཏེ༌ ཞུགས༌ཁྲིས༌སི༌ དུན༌ལ༌ ཡོད༌ཁན༌ནི༌ སེར༌རི༌ ཆོད༌ཁྲི༌ཀ༌ ཕུལ༌ལ༌ སལས༌།
REV 8:4 སྤོས༌སི༌ ཏྲི༌ཞིམ༌ཅན༌ནི༌ ཏུད༌པ༌བོ༌ དཀོན༌མཆོག༌གི༌ མི༌གུན༌ནི༌ མོས༌ལམ༌ དང༌ སྲེས༌ཏེ༌ ཕོ༌ཉའེ༌ ཕུལ༌ཁན༌ནི༌ ཆོད༌ཁྲིའི༌ ཀ༌ནེ༌ དཀོན༌མཆོག༌ ཆོགས༌ལ༌ ཀེན༌ལ༌ སོང༌།
REV 8:5 ཏེ༌ནེ༌ ཏེ༌ ཕོ༌ཉ༌བོའེ༌ སེར༌རི༌ སྤོས༌སི༌ ནོད༌པོ༌ ནམས༌ཏེ༌ ཆོད༌ཁྲི༌ ཀ༌ནེ༌ སོ༌ལའེ༌ མེ༌ སྐངས༌ཏེ༌ ཇིག༌རྟེན༌ནི༌ཀ༌ ཕངས༌པ༌, ཇིག༌རྟེན༌ནི༌ཀ༌ སྐམ༌ལག༌གི༌ འོད༌, བྲུག༌ལྡིར༌ཁན༌ནི༌ སྐད༌ དང༌ སང༌གུལ༌ ཡོངས༌།
REV 8:6 ཏེ༌ སྟིང༌ནེ༌ ཏུང༌ རྡུན༌ ཡོད༌ཁན༌ནི༌ ཕོ༌ཉ༌ རྡུན༌ཀོའེ༌ ཏེ༌གུན༌ ཕུ༌ཅེས༌ལ༌ གྲལ༌གྲིག༌ ཅོས༌།
REV 8:7 ཕོ༌ཉ༌ ཏང༌པོ༌བོའེ༌ ཏུང༌ ཕུའ༌ཅིག༌, ཁྲག༌ དྲེས༌ཁན༌ནི༌ སེ༌ར༌རུ༌ དང༌ མེ༌ ཇིག༌རྟེན༌ནི༌ཀ༌ བབས༌, ཀ༌བོའེ༌ ཇིག༌རྟེན༌ནི༌ ཁག༌ སུམ༌མི༌ ནང༌ནེ༌ ཁག༌ ཅིག༌གི༌ ནང༌ང༌ ཡོད༌ཁན༌ནི༌ སྤང༌ སྔོན༌པོ༌ དང༌ ལྕང༌མ༌ ཚང༌མ༌ མེའ༌ སྲགས༌ཏངས༌།
REV 8:8 ཕོ༌ཉ༌ ཉིས༌པའེ༌ ཏུང༌ ཕུའ༌ཅིག༌, མེའ༌ བར༌ཨིན༌ ཡོད༌ཁན༌ནི༌ རི༌ ཆེན༌མོ༌ ཙོགས༌ཤིག༌ གྱ༌ཚོའེ༌ ནང༌ང༌ ཕངས༌ཏངས༌, ཀ༌བོའེ༌ གྱ༌ཚོའེ༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ ཁྲག༌ག༌ གྱུར༌།
REV 8:9 ཏེ༌ གྱ༌ཚོའེ༌ ནང༌ང༌ ཡོད༌ཁན༌ནི༌ སེམས༌ཅན༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ ཤི༌, ཡང༌ ཏེ༌ གྱ༌ཚོའེ༌ ནང༌ང༌ ཡོད༌ཁན༌ནི༌ གྲུ༌ཟིང༌ ཁག༌ སུམ༌མི༌ ནང༌ནེ༌ ཁག༌ཅིག༌ མེད༌ཁན༌ སོང༌།
REV 8:10 ཏེ༌ནེ༌ ཕོ༌ཉ༌ སུམ༌པ༌བོའེ༌ ཏུང༌ ཕུའ༌ཅིག༌, ནམ༌ཁའ༌ནེ༌ པམ༌བར༌རི༌ མེ༌ ཙོགས༌ ཡོད༌ཁན༌ནི༌ སྐར༌མ༌ ཆེན༌མོ༌ཞིག༌, ལྩངས༌པོ༌ དང༌ ཆུ༌མིག༌ ཁག༌ སུམ༌མི༌ ནང༌ནེ༌ ཁག༌ ཅིག༌གི༌ཀ༌ བུད༌།
REV 8:11 ཏེ༌ སྐར༌མ༌བོའེ༌ མིང༌ང༌ ཁན༌ཀྲེ༌ ཟེར༌དུག༌, ཀ༌བོའེ༌ ཆུ༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ ཁན༌ཀྲེ༌ གྱུར༌ཅུགས༌, ཡང༌ ཁན༌ཀྲེ༌ གྱུར༌ཁན༌ནི༌ ཆུ༌བོ༌ ཐུངས༌ཏེ༌ མི༌ མང༌པོ༌ཞིག༌ ཤི༌།
REV 8:12 ཏེ༌ནེ༌ ཕོ༌ཉ༌ ཞི༌པའེ༌ ཏུང༌ ཕུའ༌ཅིག༌, ཉི༌མའ༌, ཟླ༌ཝའ༌ དང༌ སྐར༌མའེ༌ ཁག༌ སུམ༌མི༌ ནང༌ནེ༌ ཁག༌ཅིག༌ ཀབས༌ ཏངས༌, ཡང༌ མུན༌གྲིག༌ གྱུར༌། ཉི༌མའ༌ དང༌ ཚན༌ནི༌ ཁག༌ སུམ༌མི༌ ནང༌ནེ༌ ཁག༌ ཅིག༌པོ༌ འོད༌ མེད༌པ༌ ལུས༌།
REV 8:13 ཏེ༌ནེ༌ ངའེ༌ ལྟས༌པ༌ ནམ༌ཁའེ༌ སྐྱིལ༌ལ༌ འུར༌ཨིན༌ ཡོད༌ཁན༌ནི༌ ལག༌གི༌, སྐད༌ ཆེན༌མོའེ༌ ནང༌ང༌ ཟེར༌ཨིན༌ ཚོར༌, “ཇིག༌རྟེན༌ནི༌ ནང༌ང༌ ཏད༌པ༌ མེད༌ཁན༌ནི༌ མི༌གུན༌ལ༌ ཇིགས༌པ༌, ཇིགས༌པ༌, ཇིགས༌པ༌, ལུས༌ཁན༌ནི༌ ཕོ༌ཉ༌ སུམ༌ཀོའེ༌ ཏུང༌བོ༌ ཕུའ༌ཅིག༌, ཅི༌ མི༌ཆའ༌!”
REV 9:1 ཕོ༌ཉ༌ ལྔ༌པ༌བོའེ༌ ཏུང༌ ཕུའ༌ཅིག༌, ངའེ༌ ནམ༌ཁའ༌ནེ༌ ཇིག༌རྟེན༌ནི༌ཀ༌ བུད༌ཏེ༌ ཡོད༌ཁན༌ནི༌ སྐར༌མ༌ ཞིག༌ ཐོང༌, ཀ༌བོའ༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ཕེ༌ཀུ༌ལིག༌པོ༌ སལ༌ལ༌ ཛད༌ཏེ༌ དུག༌།
REV 9:2 ཁོའེ༌ ཏེ༌བོ༌ ཕེའ༌ཅིག༌, ཏེ༌ནང༌ནེ༌ མེ༌ མ༌ གྱ༌ཤན༌ ཞེན༌ཁན༌ ཙོགས༌སི༌ ཏུད༌པ༌ བིང༌, ཏེ༌ ཏུད༌པ༌བོའེ༌ ཉི༌མའེ༌ འོད༌ དང༌ ནམ༌བོ༌ ཀབས༌པ༌ མུན༌གྲིག༌ སོང༌།
REV 9:3 ཏེ༌ ཏུད༌པའེ༌ ནང༌ནེ༌ པར༌པར༌ཙེ༌ མང༌པོ༌ བིང༌ཏེ༌ ཇིག༌རྟེན༌ནི༌ཀ༌ བུད༌, ཏེ༌གུན༌ལ༌ སྡིག༌པ༌རཱ༌ཙེ༌ ༼ཡང༌ན༌ བིད༌ཆུ༌༽ ཙོགས༌ ཐམ༌ཤེས༌སི༌ ཁྱུད༌ སལ༌ཏེ༌ དུག༌།
REV 9:4 ཡང༌ ཏེ༌གུན༌ལ༌, “རྩཱ༌ ཡ༌ སྔོན༌པོ༌, ཡ༌ ལྕང༌མ༌ གུན༌ལ༌ ནོད༌པ༌ མ༌སྐྱལ༌, ཨིན༌ནའང༌ ཐོད༌པའེ༌ཀ༌ དཀོན༌མཆོག༌གི༌ ཐེ༌ཙེ༌ མེད༌ཁན༌ནི༌ མི༌གུན༌ལ༌ ནགས༌ སྟོན༌”, མོལ༌ཏེ༌ བཀའ༌ སལས༌།
REV 9:5 ཏེ༌གུན༌ལ༌ ཁོང༌གུན༌ སད༌ མ༌སད༌ད༌, ཟླ༌ཝ༌ ལྔ༌, རྡུག༌ངལ༌ མང༌པོ༌ ཏངས༌ཏེ༌ ནགས༌ སྟན༌ཅེས༌སི༌ ཝང༌ སལས༌, ཀ༌བོ༌ སྡིག༌པ༌རཱ༌ཙེའེ༌ ཐམས༌ཏེ༌ ནགས༌ ཐོང༌ཁན༌ ཙོགས༌ ཡོང༌ཨིན༌།
REV 9:6 ཏེ༌ཏུས༌ལ༌ མི༌གུན༌ནི༌ ཤི༌ཅེས༌ ཙལ༌ཨིན༌, ཨིན༌ནའང༌ ཁོང༌གུན༌ལ༌ མ༌ནེ༌ མི༌ཐོབ༌། ཤི༌ཅེས༌སི༌ དོད༌པ༌ ཅོ༌ཨིན༌, ཨིན༌ནའང༌ ཤི༌ཅེས༌པོ༌ ཁོང༌གུན༌ནེ༌ ཐག༌རིང༌ང༌ ཤོར༌ཏེ༌ ཆེན༌།
REV 9:7 ཏེ༌ པར༌པར༌ཙེ༌གུན༌ མག༌གི༌ ཕིའ༌ གྲལ༌གྲིག༌ ཡོད༌ཁན༌ནི༌ རྟ༌ ཙོགས༌ དུག༌, ཏེ༌གུན༌ནི༌ གོའེ༌ཀ༌ གོན༌ཁན༌བོ༌ སེར༌རི༌ ཐོར༌ཤོག༌ ཙོགས༌ ཡང༌ ལྡོང༌ གུན༌ མི༌ ལྡོང༌ ཙོགས༌ དུག༌།
REV 9:8 ཏེ༌གུན༌ལ༌ བུ༌མོ༌ ཙོགས༌ སྲ༌ ཡང༌ སོ༌གུན༌ སིང༌གེ༌ སོ༌ ཙོགས༌ དུག༌།
REV 9:9 ཏེ༌གུན༌ནི༌ སྲན༌ཏྲེ༌ ལྕགས༌སི༌ མག༌ཆ༌ ཀྲང༌ངི༌ཀ༌ གོན༌ཏེ༌ ཁོང༌ངི༌ ཤོག༌པ༌གུན༌ནི༌ སྐད༌བོ༌ མག༌གི༌ ཏུས༌ལ༌ ཤིང༌ངི༌ རྟ༌རེལ༌ མང༌པོའེ༌ སྐད༌ ཙོགས༌ རག༌།
REV 9:10 ཏེ༌གུན༌ནི༌ རྔ༌མའི༌ ཐམ༌ཤེས༌པོ༌ ནི༌, སྡིག༌པ༌རཱ༌ཙེ༌ ཐམས༌ཁན༌ ཙོགས༌ ཀ༌བོའ༌ ཟླ༌ཝ༌ ལྔ༌ མི༌གུན༌ལ༌ ནགས༌ སྟན༌ཅེས༌སི༌ ཁྱུད༌ དུག༌།
REV 9:11 ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ཕོ༌ཉ༌ ནི༌, ཏེ༌གུན༌ནི༌ གྱལ༌པོ༌, ཀ༌བོའེ༌ མིང༌བོའ༌ ཨིབ༌རི༌པའེ༌ སྐད༌དི༌ ནང༌ང༌ “ཨ༌བད༌དོན༌” དང༌ གརིས༌པའེ༌ སྐད༌དི༌ ནང༌ང༌ “ཨ༌པོལ༌ལི༌ཨོན༌” ཡང༌ན༌ ཁྲེས༌ཏོར༌ ཅོ༌ཁན༌ ཟེར༌ར༌ནོག༌།
REV 9:12 ཇིགས༌པ༌ ཏང༌པོ༌བོ༌ ནི༌ བུད༌ཚར༌, ཨིན༌ནའང༌ ལྟོས༌སའང༌ ཡང༌ ཇིགས༌པ༌ ཉིས༌ ལེབ༌ཅེས༌དུག༌།
REV 9:13 ཕོ༌ཉ༌ དྲུག༌པའེ༌ ཏུང༌ ཕུའ༌ཅིག༌, ངའ༌ དཀོན༌མཆོག༌གི༌ དུན༌ལ༌ ཡོད༌ཁན༌ནི༌ སེར༌རི༌ ཆོད༌ཁྲི༌ རཱ༌ཅོ༌ ཞི༌ཀོའེ༌ ཀ༌ནེ༌ སྐད༌ཞིག༌ ཚོར༌།
REV 9:14 ཡང༌ ཏེ༌ སྐད༌པོའེ༌ ཏུང༌ ཐམས༌ཏེ༌ ཡོད༌ཁན༌ནི༌ ཕོ༌ཉ༌ དྲུག༌པ༌བོའ༌ མོལས༌, “ལྩངས༌པོ༌ ཆེན༌མོ༌ ཡུཕ༌རེ༌ཀྲས༌ གྱུག༌སའེ༌ ནས༌སའེ༌ཀ༌ ཅིངས༌ཏེ༌ ཡོད༌ཁན༌ནི༌ ཕོ༌ཉ༌ ཞི༌ཀོ༌ ཕུད༌།”
REV 9:15 ཏེ༌ ཕོ༌ཉ༌ ཞི༌ཀོ༌, ཏེན༌ན༌ ཏུས༌, ཞག༌, ཟླ༌ཝ༌ དང༌ ལོའེ༌ ཕིའ༌ གྲལ༌གྲིག༌ ཛད༌ཏེ༌ ཇིག༌རྟེན༌པ༌གུན༌ནི༌ ཁག༌ སུམ༌མི༌ ནང༌ནེ༌ ཁག༌ཅིག༌ སད༌ཅེས༌ལ༌ ཕུད༌ཏེ༌ ཨིན༌།
REV 9:16 ཡང༌ རྟའེ༌ཀ༌ ཞོན༌ཁན༌ནི༌ མག༌མི༌གུན༌ནི༌ ཀྲངས༌ཀ༌ ནི༌, ངའེ༌ ཚོར༌ཅེས༌ལ༌ ཅེ༌ཝ༌ཉི༌ཤུ༌ རག༌ ཡང༌ན༌ ཀ༌རོར༌ ཉི༌ཤུ༌།
REV 9:17 ཡང༌ ངའེ༌ ཞལ༌ཟིགས༌སི༌ ནང༌ང༌ རྟ༌ དང༌ ཏེ༌ཀ༌ ཞོན༌ཁན༌ གུན༌ ཐོང༌, ཁོང༌གུན༌ནི༌ མག༌ཆ༌གུན༌ མེའེ༌ ཙོགས༌ མར༌པོ༌, སྔོན༌པོ༌ དང༌, སེར༌པོ༌, ཡང༌ རྟ༌གུན༌ནི༌ གོ༌ སིང༌གེ༌ གོ༌ ཙོགས༌ དུག༌། ཏེ༌གུན༌ནི༌ ཁའ༌ནེ༌ མེ༌, ཏུད༌པ༌ དང༌ མུ༌ཟི༌ གུན༌ བིང༌དུག༌།
REV 9:18 ཏེ༌ རྟ༌གུན༌ནི༌ ཁའེ༌ ནང༌ནེ༌ བིང༌ཁན༌ནི༌ ཇིགས༌ནང༌ཅན༌ནི༌ ནས༌ལུག༌ སུམ༌ཀོ༌, ཀ༌བོ༌ མེ༌, ཏུད༌པ༌ དང༌ མུ༌ཟི༌ གུན༌ནི༌ ཇིག༌རྟེན༌ནི༌ ཁག༌ སུམ༌མི༌ ནང༌ནེ༌ ཁག༌ ཅིག༌གི༌ མི༌གུན༌ སད༌ཏེ༌ མེད༌ཁན༌ ཅོས༌།
REV 9:19 ཏེ༌ རྟ༌གུན༌ནི༌ ཁྱུད༌པོ༌ ནི༌, ཁོང༌གུན༌ནི༌ ཁའ༌ དང༌ རྔ༌མ༌ གུན༌ནི༌ ནང༌ང༌ དུག༌། ཏེ༌གུན༌ནི༌ རྔ༌མ༌ རུལ༌ལི༌ གོ༌ ཙོགས༌ དུག༌, ཀ༌བོ༌ མི༌གུན༌ལ༌ མ༌སྐྱོན༌ ཅོ༌ཅེས༌སི༌ ཕིའ༌ ཀོལ༌དུག༌།
REV 9:20 ཨིན༌ནའང༌ ཏེ༌ ནས༌ལུག༌ ཇིགས༌པ༌གུན༌ནི༌ ནང༌ང༌ མ༌ཤི༌ཁན༌ ཇིག༌རྟེན༌པ༌གུན༌ནི༌ རང༌ངི༌ ལས༌ ངན༌པ༌གུན༌ནེ༌ གྱོད༌པ༌ མ༌ཅོའ༌, ཏ༌རུང༌ངའང༌ རྡུད༌ ཡང༌ སེར༌, མུལ༌, ར༌གན༌, རྡོའ༌ དང༌ ཤིང༌ གུན༌ནེ༌ ཅོ༌ཁན༌ནི༌ སྐུན༌དྲ༌གུན༌ལ༌ ཅོལ༌དུག༌, ཀ༌གུན༌ལ༌ ཐོང༌ང༌མེད༌, ཡ༌ ཚོར༌ར༌མེད༌, ཡ༌ གྲུལ༌ལའང༌ ཉན༌ན༌མེད༌།
REV 9:21 ཁོང༌གུན༌ནི༌ མི༌ སད༌ཅེས༌ ཡ༌ ཆོས༌ངན༌ ཅོ༌ཅེས༌, ཡ༌ ལུས༌བྲེལ༌ ངན༌པ༌ བོར༌ཅེས༌, ཡ༌ རྐུ༌ཅེས༌ གུན༌ནེ༌ གྱོད༌པ༌ ཅོའ༌ མི༌རུག༌།
REV 10:1 ཏེ༌ནེ༌ ངའེ༌ ཡང༌ ཕོ༌ཉ༌ མ༌ཇིགས༌པོ༌ཞིག༌ ནམ༌ཁའ༌ནེ༌ བབས༌ཨིན༌ ཐོང༌། ཁོང༌ངི༌ སྲིན༌ནི༌ ཀོས༌ལག༌ གོན༌ཏེ༌ ཁོང༌ངི༌ གོ༌བོ༌ ཟའ༌ཆུ༌ཐུང༌ངི༌ སྐོར༌ཏེ༌ དུག༌། ཁོང༌ངི༌ ཞལ༌དོང༌ ནི༌, ཉི༌མ༌ ཙོགས༌ལ༌ ལྡང༌ཤན༌ ཡང༌ ཞབས༌གུན༌ མེ༌ བར༌ཨིན༌ ཡོད༌ཁན༌ནི༌ རྡུང༌མ༌ ཙོགས༌ དུག༌།
REV 10:2 ཁོང༌ངི༌ ཆག༌ག༌ ཕེས༌ཁན༌ནི༌ ཤོག༌རིལ༌ ཆུ༌ངུན༌ཞིག༌ ནམས༌ཏེ༌ དུག༌། ཁོང༌ངི༌ ཞབས༌ ཡས༌པ༌བོ༌ གྱ༌ཚོའེ༌ཀ༌ ཡང༌ ཡོ༌མ༌བོ༌ ས༌ སྐམ༌པོའེ༌ཀ༌ བོར༌ར༌ ཛད༌ཏེ༌ དུག༌།
REV 10:3 ཏེ༌ ཕོ༌ཉ༌བོའེ༌ སིང༌གེ༌ ཙོགས༌ལ༌ ཀུ༌ཅོ༌ སྲན༌ཏྲེ༌ སལས༌, ཡང༌ ཁོང༌ངི༌ ཀུ༌ཅོ༌ སལ༌ལ༌ཅིག༌, བྲུག༌ལྡིར༌ཁན༌ རྡུན༌ཀོའེ༌ ལན༌སལས༌།
REV 10:4 བྲུག༌ལྡིར༌ རྡུན༌ནི༌ མོལ༌ཁན༌གུན༌ ངའེ༌ བྲི༌ཅེས༌ ཡོད༌པིན༌, ཨིན༌ནའང༌ ངའེ༌ ནམ༌ཁའ༌ནེ༌ སྐད༌ཅིག༌གི༌, “ཏེ༌ བྲུག༌ལྡིར༌ རྡུན༌ནི༌ མོལ༌ཁན༌ ཚང༌མ༌ སང༌ཝའེ༌ ནང༌ང༌ བོར༌, ཏེ༌གུན༌ བྲི༌ མ༌བྲི༌” མོལ༌ཨིན༌ ཚོར༌།
REV 10:5 ཏེ༌ནེ༌ གྱ༌ཚོ༌ དང༌ ས༌ སྐམ༌པོའེ༌ཀ༌ ཞངས༌ཏེ༌ ཡོད༌ཁན༌ནི༌ ཕོ༌ཉའེ༌, རང༌ངི༌ ཆག༌ ཡས༌པ༌བོ༌ ནམ༌ཁའ༌ ཆོགས༌ལ༌ ཐོན༌པོའ༌ རྐྱངས༌།
REV 10:6 ཡང༌ ཁོའེ༌ ཏུས༌གྱུན༌ནེ༌གྱུན༌ ཞུགས༌ཁན༌ནི༌ དཀོན༌མཆོག༌གི༌ ནའ༌ ཁུརས༌, ཁོང༌ངི༌ ནམ༌ཁའ༌ དང༌ ཏེ༌ནང༌ང༌ ཡོད༌ཁན༌ ཚང༌མ༌, ཇིག༌རྟེན༌ དང༌ ཏེ༌ནང༌ང༌ ཡོད༌ཁན༌ ཚང༌མ༌, ཡང༌ ཚོ༌ དང༌ ཏེ༌ནང༌ང༌ ཡོད༌ཁན༌ ཚང༌མ༌ ཅོའ༌ ཛད༌ཏེ༌ ཨིན༌། ཏེ༌ ཕོ༌ཉའེ༌ མོལས༌, “ཏ༌ ཁོང༌ སྲུངས༌ཏེ༌ དུག༌ག༌ མི༌ཛད༌།
REV 10:7 ཨིན༌ནའང༌ ཕོ༌ཉ༌ རྡུན༌པ༌བོའེ༌ ཁོ༌རང༌ངི༌ ཏུང༌ ཕུའ༌ཅིག༌, དཀོན༌མཆོག༌གི༌ སང༌ཝའེ༌ ཐབས༌པོ༌ དྲན༌དྲ༌ གྲུབ༌ཨིན༌, ཀ༌ཟུག༌ ཁོང༌ངི༌ ཁོང༌རང༌ངི༌ ཞབས༌ཏོག༌པ༌ ལུང༌སྟོན༌པ༌གུན༌ལ༌ མོལ༌ཏེ༌ ཨིན༌པིན༌།”
REV 10:8 ཏེ༌ནེ༌ ནམ༌ཁའ༌ནེ༌ ཚོར༌ཁན༌ནི༌ སྐད༌པོའེ༌, ང༌ ཡང༌ མོལ༌ལ༌རག༌, “དུན༌ལ༌ སོང༌ཏེ༌ གྱ༌ཚོ༌ དང༌ ས༌ སྐམ༌པོའེ༌ཀ༌ ལངས༌ཏེ༌ ཡོད༌ཁན༌ནི༌ ཕོ༌ཉ༌བོའེ༌ ལག༌ནེ༌ ཏེ༌ ཤོག༌རིལ༌ ཕེས༌ཏེ༌ ཡོད༌ཁན༌བོ༌ ལེན༌།”
REV 10:9 ཏེ༌ནེ༌ ང༌ ཏེ༌ ཕོ༌ཉ༌བོའེ༌ དུན༌ལ༌ སོང༌ཏེ༌ ཁོང༌ང༌ ཏེ༌ ཤོག༌རིལ༌ ཆུ༌ངུན༌ ཕེས༌ཁན༌བོ༌ སལ༌ ཟེར༌ཏེ༌ ཞུ༌ཝ༌ ཕུལ༌པིན༌། ཁོང༌ངི༌ མོལ༌ལ༌རག༌, “འི༌བོ༌ ལེན༌ ཡང༌ ཟོས༌ཏོང༌, ཏེ༌བོ༌ ཁྱོ༌རང༌ངི༌ ཁའེ༌ ནང༌ང༌ རང༌རྩི༌ ཙོགས༌ ངར༌མོ༌, ཨིན༌ནའང༌ གྲོད༌པའེ༌ ནང༌ང༌ ཁན༌ཀྲེ༌ གྱུར༌ཨིན༌།”
REV 10:10 ངའེ༌ ཏེ༌ ཕོ༌ཉ༌བོའེ༌ ཆག༌ནེ༌ ཤོག༌རིལ༌བོ༌ ལེན༌ཏེ༌ ཟོས༌པ༌, ངའེ༌ ཁའེ༌ ནང༌ང༌ ཏེ༌བོ༌ ངར༌མོ༌ རག༌པིན༌, ཨིན༌ནའང༌ སྨིད༌ད༌ཅིག༌, ཁན༌ཀྲེ༌ གྱུར༌ཏེ༌ ངའེ༌ གྲོད༌པ༌ ནགས༌ སྟནས༌།
REV 10:11 ཏེ༌ནེ༌ ངའ༌ མོལ༌ལ༌རག༌, “མི༌གུན༌, མིར༌གྱུད༌གུན༌, སྐད༌རིགས༌གུན༌ དང༌, གྱལ༌པོ༌གུན༌ནི༌ སྐོར༌ལ༌ ཁྱོ༌རང༌ངི༌ ཡང༌སྐྱར༌ ལུང༌སྟན༌ ཏང༌གོས༌།”
REV 11:1 ཏེ༌ནེ༌ ཚད༌ ཏབ༌བ༌ ཀོལ༌ཁན༌ནི༌ བེར༌ཀ༌ཞིག༌ སལ༌ཏེ༌ ངའ༌ མོལ༌ལ༌རག༌, “སོང༌ཏེ༌ དཀོན༌མཆོག༌གི༌ ཆོད༌ཁང༌ དང༌ ཆོད༌ཁྲི༌ ཚད༌པོ༌ ལེན༌, ཡང༌ ཏེ༌རུ༌ ཅོལ༌ཨིན༌ ཡོད༌ཁན༌ ཚང༌མའེ༌ ཀྲངས༌ཀ༌གུན༌ ལེན༌།
REV 11:2 ཨིན༌ནའང༌ ཆོད༌ཁང༌ངི༌ ཕི༌ལོག༌ག༌ ཡོད༌ཁན༌ནི༌ ནས༌ས༌བོ༌ ཏབ༌ མ༌ཏབ༌, ཅིའ༌ཟེར༌ན༌ ངའེ༌ ཏེ༌བོ༌ ཏེ༌ གྱལ༌ཁམས༌གུན༌ལ༌ སྟད༌ཏེ༌ ཨིན༌, ཀ༌བོའེ༌ ཡེ༌རུ༌ཤ༌ལེམ༌མི༌ ཏམ༌པའེ༌ གྱལ༌ས༌བོ༌ ཟླ༌ཝ༌ 42 ཚག༌པ༌ ཝང༌ངི༌ ཡོག༌ག༌ ནན༌ཏེ༌ བོར༌ཨིན༌།
REV 11:3 ངའེ༌ ང༌རང༌ངི༌ སྤང༌པོ༌ ཉིས༌ལ༌ ཝང༌ཆ༌ ཏང༌ཨིན༌, ཁོང༌གུན༌ནི༌ རྡུག༌གོས༌ གོན༌ཏེ༌ ཞག༌ 1,260 ལུང༌སྟན༌ ཤད༌ཨིན༌།”
REV 11:4 འི༌ སྤང༌པོ༌ ཉིས༌ཀོ༌ ནི༌, ཇིག༌རྟེན༌ནི༌ ཝང༌སྲུལ༌པ༌ གཙོ༌བོའེ༌ དུན༌ལ༌ ཡོད༌ཁན༌ནི༌ ཨོ༌ལིཝ༌ཝི༌ ལྕང༌མ༌ ཉིས༌ དང༌ འོད༌སྟགས༌ ཉིས༌ཀོ༌ ཨིན༌ནོག༌།
REV 11:5 ཀལ༌ཏེས༌ སུ༌ཞིག༌གི༌ ཏེ༌ ཉིས༌ཀོའ༌ ནོད༌པ༌ ཏང༌ཅེས༌ ཅོ༌ན༌, ཏེ༌ ཉིས༌ཀོའེ༌ ཁའ༌ནེ༌ མེ༌ བིངས༌ཏེ༌ གྲ༌འོ༌གུན༌ མེད༌ཁན༌ ཅོ༌ཨིན༌, ཡང༌ ཏེ༌ ཉིས༌ཀོའ༌ ནོད༌པ༌ ཅོ༌ཅེས༌སི༌ རྩོན༌གྲུས༌ ཅོ༌ཁན༌གུན༌ ཏེན༌ན༌ ཚུལ༌ལ༌ ཤི༌ཨིན༌།
REV 11:6 ཁོང༌གུན༌ནི༌ ལུང༌སྟན༌ ཤད༌དི༌ ཏུས༌ གང༌པོ༌ ཆར༌པ༌ མི༌བབས༌ཤེས༌སི༌ ཕིའ༌ ནམ༌ཁའ༌ ཀབ༌ཅེས༌སི༌ ཝང༌ཆ༌ ཁོང༌གུན༌ལ༌ སལ༌ལ༌ ཛདས༌། ཡང༌ ཆུ༌ ཚང༌མ༌ ཁྲག༌ག༌ གྱུར༌ཅུག༌ཅེས༌ དང༌ ནམ༌ ཁོང༌གུན༌ ཐད༌ནའང༌, ཇིག༌རྟེན༌ནི༌ ཏད༌པ༌ མེད༌ཁན༌ནི༌ མི༌གུན༌ལ༌ རྡུག༌ངལ༌ སྣ༌ ཚང༌མ༌ ཡོང༌ཅུག༌ཅེས༌སི༌ ཝང༌ཆ༌ སལས༌།
REV 11:7 ཁོང༌ ཉིས༌ཀོའེ༌ དཀོན༌མཆོག༌གི༌ བཀའ༌ ཤད༌ཅེས༌གུན༌ དྲན༌དྲ༌ གྲུབ༌ ཚར༌ར༌ཅིག༌, ཇིགས༌ནང༌ཅན༌ནི༌ སེམས༌ཅན༌བོ༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ནེ༌ བིངས༌ཏེ༌, ཁོང༌ ཉིས༌ཀོའེ༌ཀ༌ སྤུང༌གོལ༌ ཅོ༌ཨིན༌, ཡང༌ ཕམ༌ཀལ༌ཏེ༌ སད༌ཨིན༌།
REV 11:8 ཁོང༌ ཉིས༌ཀོའེ༌ རོ༌གུན༌ འི༌ གྱལ༌ས༌ མིང༌ཅན༌བོའེ༌ སྲང༌གུན༌ནི༌ ནང༌ང༌ ལུས༌ཨིན༌, ཀ༌བོའ༌ དཀོན༌མཆོག༌གི༌ སོ༌དོམ༌ དང༌ ཨི༌ཇིབ༌ ནས༌ས༌ ཙོགས༌ ཐེའ༌ ཛདས༌། ཏེ༌ ནས༌སའེ༌ ནང༌ང༌ གཙོ༌བོ༌ ཡེ༌ཤུ༌ རྐྱང༌ཤིང༌ངི༌ཀ༌ རྐྱངས༌ཏེ༌ ཨིན༌པིན༌།
REV 11:9 ཡང༌ ཞག༌ སུམ༌ནང༌ཕེད༌ ཚག༌པ༌ མི༌རིགས༌, སྐད༌རིགས༌ དང༌ གྱལ༌ཁམས༌ ཚང༌མའེ༌ མི༌གུན༌ནི༌, ཁོང༌ ཉིས༌ཀོའེ༌ རོ༌གུན༌ལ༌ ལྟས༌ཏེ༌ དུག༌ཨིན༌, ཡང༌ ཏེ༌གུན༌ནི༌ སུ༌ཞིག༌གའང༌ ཏེ༌ རོ༌གུན༌ སྤུར༌ཁང༌ངི༌ ནང༌ང༌ སུབ༌ མི༌ཅུག༌།
REV 11:10 ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌, ཁོང༌ ཉིས༌ཀོ༌ ཤི༌ཁན༌བོའེ༌ཀ༌ ཐད༌པོ༌ ཅོ༌ཨིན༌, ཅིག༌ དང༌ ཅིག༌ག༌ སྐྱེས༌གུན༌ ཏངས༌ཏེ༌ གའ༌སྟོན༌ ཅོ༌ཨིན༌, ཅིའ༌ཟེར༌ན༌ ཏེ༌ ལུང༌སྟོན༌པ༌ ཉིས༌ཀོའེ༌ ཇིག༌རྟེན༌པ༌གུན༌ལ༌ ནགས༌ སྟན༌ཏེ༌ ཨིན༌པིན༌།
REV 11:11 ཨིན༌ནའང༌ ཞག༌ སུམ༌ནང༌ཕེད༌དི༌ སྟིང༌ནེ༌ དཀོན༌མཆོག༌གི༌ སལ༌ཁན༌ནི༌ སྲོག༌གི༌ འུགས༌པོ༌ ཁོང༌གུན༌ནི༌ ནང༌ང༌ ཞུགས༌ཏེ༌ ཁོང༌ ཉིས༌ཀོ༌ ཀོའག༌ ལངས༌, ཡང༌ ཁོང༌ ཉིས༌ཀོ༌ ཐོང༌ཁན༌ ཚང༌མ༌ མ༌སྲན༌ཏྲེ༌ ཇིགས༌།
REV 11:12 ཏེ༌ནེ༌ ནམ༌ཁའ༌ནེ༌ སྐད༌ ཆེན༌མོ༌ཞིག༌གི༌ ཁོང༌ ཉིས༌ཀོའ༌ མོལས༌, “འི༌རུ༌ ཀེན༌ལ༌ ཡོང༌།” ཁོང༌ ཉིས༌ཀོ༌ ནམ༌ཁའེ༌ ནང༌ང༌ སྲིན༌ནི༌ཀ༌ ཞོན༌ཏེ༌ སྐྱོདས༌, ནམ༌ ཁོང༌ ཉིས༌ཀོའེ༌ གྲ༌འོ༌གུན༌ ལྟེན༌ ཡོད༌པིན༌།
REV 11:13 ཏེན༌ན༌མལ༌ལ༌ སང༌གུལ༌ སྲན༌ཏྲེ༌ཞིག༌ ཡོངས༌ཏེ༌ གྱལ༌སའེ༌ ཁག༌ རྕུའི༌ ནང༌ནེ༌ ཁག༌ཅིག༌ ཟམ༌ཤིག༌ ཁྲེས༌ཏོར༌ སོང༌། མི༌ སྟོང༌རྡུན༌ ཤི༌། སོན༌ཏེའ༌ ལུས༌ཁན༌གུན༌ མ༌སྲན༌ཏྲེ༌ ཇིགས༌, ཡང༌ ནམ༌ཁའེ༌ ནང༌ང༌ ཞུགས༌ཁན༌ དཀོན༌མཆོག༌ ནི༌ ཀུན༌ཝང༌ ཨིན༌ཁན༌བོ༌ ཁའ༌ རྟོར༌ཏེ༌ ཟེརས༌།
REV 11:14 ཇིགས༌པ༌ ཉིས༌པ༌བོ༌ བུད༌ཚར༌, ཨིན༌ནའང༌ ལྟོས༌སའང༌, ཇིགས༌པ༌ སུམ༌པ༌བོ༌ གྱོགས༌པ༌ ལེབ༌ཅེས༌དུག༌།
REV 11:15 ཕོ༌ཉ༌ རྡུན༌པའེ༌ ཏུང༌ ཕུའ༌ཅིག༌, ངའ༌ ནམ༌ཁའ༌ནེ༌ སྐད༌ ཆེན༌མོ༌ཞིག༌གི༌ མོལ༌ལ༌ རག༌, “ཇིག༌རྟེན༌ནི༌ གྱལ༌སྲིད༌པོ༌ ཏ༌ གཙོ༌བོ༌ དཀོན༌མཆོག༌ དང༌ ཁོང༌ངི༌ མ༌ཤི༌ཀའེ༌ གྱལ༌སྲིད༌ གྱུར༌ཏེ༌ ཨིན༌ནོག༌, ཡང༌ ཁོང༌ངི༌ ཏུས༌གྱུན༌ནེ༌གྱུན༌ ཝང༌སྲུལ༌ལ༌ ཛད༌ཨིན༌།”
REV 11:16 དཀོན༌མཆོག༌གི༌ སྐུན༌དུན༌ལ༌ ཁོ༌རང༌གུན༌ནི༌ ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ནི༌ འུ༌སྐྱོང༌ 24 བོའེ༌ དཀོན༌མཆོག༌ག༌ ཆག༌ཕུལ༌ཨིན༌ ཁོང༌ང༌ ཅོལས༌།
REV 11:17 ཁོང༌གུན༌ནི༌ མོལས༌, “ཀྱེ༌ གཙོ༌བོ༌ དཀོན༌མཆོག༌ ཀུན༌ཝང༌, ཉེ༌རང༌ དག༌ས༌ ཞུགས༌ཁན༌ དང༌ སྔུན༌ལ༌ ཞུགས༌ཏེ༌ ཡོད༌ཁན༌ ཨིན༌ནོག༌, ང༌ཞ༌གུན༌ནི༌ ཉེ༌རང༌ང༌ ཐུག༌རྗེ༌ཆེ༌ ཞུའད༌, ཅིའ༌ཟེར༌ན༌ ཉེ༌རང༌ངི༌ རང༌ངི༌ ཝང༌ ཀྲག༌པོ༌ ཀོལ༌ཏེ༌ ཉེ༌རང༌ངི༌ ཝང༌སྲུལ༌བོ༌ གོ༌ཟུག༌ག༌ ཛད༌ཏེ༌ ཨིན༌ནོག༌།
REV 11:18 ཏད༌པ༌ མེད༌ཁན༌ནི༌ གྱལ༌ཁམས༌གུན༌ སྲོའེ༌ གངས༌ཏེ༌ ཨིན༌ནོག༌། ཨིན༌ནའང༌ ཏ༌ ཉེ༌རང༌ངི༌ ཐུགས༌སྲོའེ༌ ཏུས༌པོ༌ ལེབས༌ཏེ༌ ཨིན༌ནོག༌, ཡང༌ ཤི༌ཁན༌གུན༌ལ༌ ཤགས༌ ཅད༌ཅེས༌, ཉེ༌རང༌ངི༌ ཞབས༌ཏོག༌པ༌གུན༌, ལུང༌སྟོན༌པ༌གུན༌, ཏམ༌པ༌ མི༌གུན༌, འུ༌ཐུགས༌ དང༌ ཇིགས༌པོ༌ ཉེ༌རང༌ང༌ ཇིགས༌ཁན༌ ཚང༌མ༌ལ༌, སོལ༌རས༌ སལ༌ཅེས༌ ཡང༌ ཇིག༌རྟེན༌ ཁྲེས༌ཏོར༌ ཅོ༌ཁན༌གུན༌ ཁྲེས༌ཏོར༌ ཛད༌ཅེས༌སི༌ ཏུས༌པོ༌ ལེབས༌ཏེ༌ ཨིན༌ནོག༌།”
REV 11:19 ཡང༌ ངའེ༌ ནམ༌ཁའེ༌ ནང༌ང༌ དཀོན༌མཆོག༌གི༌ ཆོད༌ཁང༌ ཕེས༌ཏེ༌ ཡོད༌ཁན༌ནི༌ ནང༌ང༌ ཁོང༌ངི༌ ཆད༌དོན༌ནི༌ སྒམ༌བོ༌ ཇལ༌། ཡང༌ སྐམ༌ལག༌གི༌ འོད༌, ཇིགས༌ཤེས༌ཅན༌ནི༌ སྐད༌, ཆད༌མེད༌ལ༌ བྲུག༌ཀྲག༌པོ༌ལྡིར༌, སང༌གུལ༌ ཡོངས༌, ཡང༌ ཇིགས༌ནང༌ཅན༌ནི༌ སེར༌ར༌རུ༌ ཆེན༌མོ༌ བབས༌།
REV 12:1 ཡང༌ ནམ༌ཁའེ༌ ནང༌ང༌ ཧ༌ལས༌ཤེས༌སི༌ ལྟས༌ ཆེན༌མོ༌ཞིག༌ ཇུང༌, ཏེ༌ནང༌ང༌ ཉི༌མ༌ ཀོས༌ ཙོགས༌ལ༌ གོན༌ཏེ༌, རྐང༌པའེ༌ ཡོག༌ག༌ ཟླ༌ཝ༌ དང༌ གོའེ༌ཀ༌ སྐར༌མ༌ རྕུག༌ཉིས༌སི༌ ཐོར༌ཤོག༌ གོན༌ཁན༌ནི༌ བུ༌མོ༌ཞིག༌ ཐོང༌།
REV 12:2 ཏེ༌ བུ༌མོ༌བོའ༌ ཕྲུ༌གུ༌ ཇོར༌ཅེས༌ དུག༌, ཡང༌ ཁོའ༌ ཕྲུ༌གུ༌ ཇོར༌ཅེས༌སི༌ ཟུ༌མོ༌ དང༌ རྡུག༌ངལ༌ ཡོད༌ཅེས༌པོའེ༌, ཁོའེ༌ སྲན༌ཏྲེ༌ ཀུ༌ཅོ༌ ཏང༌དུག༌།
REV 12:3 ཏེ༌ནེ༌ ངའེ༌ ནམ༌ཁའེ༌ ནང༌ང༌ ཡང༌ ལྟས༌ཤིག༌གི༌ ནང༌ང༌, གོ༌ རྡུན༌ དང༌ རཱ༌ཅོ༌ རྕུ༌ ཡང༌ གོ༌ རེ༌རེ༌ཀ༌ ཐོར༌ཤོག༌ ཡོད༌ཁན༌ནི༌ བྲུག༌ ཆེན༌མོ༌ མར༌པོ༌ཞིག༌ ཐོང༌།
REV 12:4 ཁོའེ༌ རྔ༌མ༌བོ༌ ནམ༌ཁའེ༌ ནང༌ང༌ སྐར༌མ༌ ཁག༌ སུམ༌མི༌ ནང༌ནེ༌ ཁག༌ ཅིག༌ག༌ གྱབས༌ཏེ༌ ཇིག༌རྟེན༌ནི༌ཀ༌ ཕངས༌, ཡང༌ ཕྲུ༌གུ༌བོ༌ ཟའ༌ཅེས༌སི༌ ཕིའ༌ ཏེ༌ བུ༌མོ༌ ཕྲུ༌གུ༌ ཇོར༌ཅེས༌ཅན༌ནི༌ དུན༌ལ༌ སོང༌ཏེ༌ དུགས༌།
REV 12:5 ཏེ༌ བུ༌མོ༌བོའ༌ བུ༌ཚ༌ཞིག༌ ཇོར༌, ཁོང༌ངི༌ གྱལ༌ཁམས༌ ཚང༌མའེ༌ཀ༌ ཝང༌ཆ༌ ཚང༌མ༌ ཉམ༌པོ༌ ཝང༌སྲུལ༌ལ༌ ཛད༌ཨིན༌། བྲུག༌ག༌ ཟའ༌ མ༌ཅུག༌ག༌ ཧུན༌མེད༌ལ༌ ཏེ༌ བུ༌མོའེ༌ ཕྲུ༌གུ༌བོ༌ ཁོང༌རང༌ངི༌ ཁྲིས༌སི༌ཀ༌ དཀོན༌མཆོག༌གི༌ སྐུན༌དུན༌ལ༌ ཁྱེར༌ར༌ ཛདས༌།
REV 12:6 ཡང༌ ཏེ༌ བུ༌མོ༌བོ༌ རི༌སྟོང༌ངི༌ ནང༌ང༌ ཤོར༌ཏེ༌ སོང༌, ཀ༌བོའེ༌ ནང༌ང༌ གཙོ༌བོ༌ དཀོན༌མཆོག༌གི༌ ནས༌ས༌ཞིག༌ གྲལ༌གྲིག༌ ཛད༌ཏེ༌ ཡོད༌པིན༌, ཀ༌རུ༌ ཞག༌ 1,260 ཚག༌པ༌ ཁོའ༌ སྟ༌སྟོག༌ ཅོའ༌ ཛད༌ཨིན༌།
REV 12:7 ཡང༌ ནམ༌ཁའེ༌ ནང༌ང༌ མག༌ ཏང༌ཅེས༌ གོ༌ཟུགས༌། ཕོ༌ཉ༌ མེ༌ཀཱ༌འེལ༌ དང༌ ཁོང༌ངི༌ ཕོ༌ཉ༌གུན༌ནི༌, ཏེ༌ བྲུག༌ དང༌ ཁོའེ༌ ཕྲོ༌པ༌ ཕོ༌ཉ༌གུན༌ལ༌ ནོལས༌, ཡང༌ བྲུག༌ དང༌ ཁོའེ༌ ཕྲོ༌པ༌གུན༌ནི༌ ལོགས༌ཏེ༌ ནོལས༌།
REV 12:8 ཨིན༌ནའང༌ མག༌གི༌ ནང༌ང༌ བྲུག༌ ཕམས༌ པ༌སང༌, ཁོ༌ དང༌ ཁོའེ༌ ཕྲོ༌པ༌གུན༌ ནམ༌ཁའེ༌ ནང༌ནེ༌ ཕིང༌ང༌ ཛདས༌།
REV 12:9 ཏེ༌ ཇིགས༌ནང༌ཅན༌ནི༌ བྲུག༌, རྡུད༌གུན༌ནི༌ གོ༌བ༌ ཤེ༌ཏན༌ ཟེར༌ཁན༌བོ༌ ནི༌, སྔུན༌མའེ༌ ཏུས༌སི༌ རུལ༌བོ༌ ཨིན༌ནོག༌། ཁོའེ༌ ཇིག༌རྟེན༌ གང༌པོའེ༌ མི༌གུན༌ལ༌ གོབ༌སྐོར༌ ཏངས༌ཏེ༌ ཨིན༌པིན༌། ཁོ༌ དང༌ ཁོའེ༌ ཕྲོ༌པ༌གུན༌ ཇིག༌རྟེན༌ནི༌ཀ༌ ཐུར༌ལ༌ ཕང༌ང༌ ཛདས༌།
REV 12:10 ཏེ༌ནེ༌ ཡང༌ ང༌ ནམ༌ཁའ༌ནེ༌ སྐད༌ ཆེན༌མོ༌ཞིག༌ ཚོར༌, “ཏ༌ ང༌དང༌ངི༌ དཀོན༌མཆོག༌གི༌ ཐར༌པ༌, ཝང༌ དང༌ གྱལ༌སྲིད༌ དང༌ ཁོང༌ངི༌ མ༌ཤི༌ཀའེ༌ ཝང༌སྲུལ༌བོ༌ ལེབ༌ ཚར༌ཏེ༌ ཨིན༌ནོག༌། ཏ༌ དཀོན༌མཆོག༌གི༌ སྐུན༌དུན༌ལ༌ ང༌དང༌ངི༌ སྤུན༌གུན༌ལ༌ ཉིན༌ཚན༌ མེད༌པ༌ སྐྱོན༌ ཀལ༌ཁན༌ནི༌ ཤེ༌ཏན༌བོ༌, ཐུར༌ལ༌ ཇིག༌རྟེན༌ནི༌ཀ༌ ཕང༌ང༌ ཛད༌ཏེ༌ ཨིན༌།
REV 12:11 ཡང༌ ང༌དང༌ངི༌ སྤུན༌གུན༌ནི༌ ལུ༌གུའི༌ སྐུ༌ཁྲག༌ དང༌ གའ༌མོའེ༌ ནས༌ཚུལ༌ལི༌ སྤང༌པོ༌ ཏང༌ཅེས༌པོའེ༌, ཤེ༌ཏན༌ལ༌ ཕམ༌ཀལས༌། ཏེ༌ སྤང༌པོ༌ ཏང༌ཅེས༌ལ༌ ཁོང༌གུན༌ སྲོག༌ ཏང༌ཅེས༌ དང༌ ཤི༌ཅེས༌ལའང༌ ཇིགས༌ མ༌ཇིགས༌།
REV 12:12 ཏེ༌བོའེ༌ཕིའ༌ ནམ༌ཁའ༌ དང༌ ཏེ༌ནང༌ང༌ ཞུགས༌ཁན༌གུན༌ནི༌ སྐྱིད༌པོ༌ ཅོ༌ཤིག༌། ཨིན༌ནའང༌ ས༌ཀྱད༌ དང༌ གྱ༌ཚོའེ༌ཀ༌ དུག༌ཁན༌གུན༌ལ༌ ཙམ༌ཤིག༌གི༌ ཇིགས༌ནང༌ མ༌ནོག༌, ཅིའ༌ཟེར༌ན༌ རྡུད༌གུན༌ནི༌ གོ༌བ༌ ཁྱོ༌ཞ༌གུན༌ ཡོད༌ས༌ ཐུར༌ལ༌ ཡོང༌དུག༌། ཁོ༌ སྲོའེ༌ གངས༌ཏེ༌ དུག༌ ཅིའ༌ཟེར༌ན༌ ཁོའེ༌ ལག༌ག༌ ཇིག༌རྟེན༌པ༌གུན༌ལ༌ གོབ༌སྐོར༌ཅེས༌སི༌ ཏུས༌, ཉུ༌ངུན༌ཞིག༌ མ༌ནེ༌ མེད༌ཁན༌བོ༌ ཁོའ༌ གྱུས༌ཨིན༌ནོག༌།”
REV 12:13 བྲུག༌པོའ༌ ཁོ༌རང༌ ཐུར༌ལ༌ ཇིག༌རྟེན༌ནི༌ཀ༌ ཕངས༌ཏེ༌ ཨིན༌ཁན༌བོ༌ གྱུས༌ཆའ༌ཅིག༌, ཁོའེ༌, སྲས༌ ལྟམས༌ཁན༌ནི༌ བུ༌མོ༌བོའ༌ ཏེད༌ཏེ༌ ཁྱེརས༌།
REV 12:14 ཨིན༌ནའང༌ ཏེ༌ བུ༌མོ༌བོའ༌ རི༌སྟོང༌ངི༌ ནང༌ང༌ གྲལ༌གྲིག༌ ཅོའ༌ ཛད༌ཁན༌ནི༌ ནས༌ས༌བོའེ༌ཀ༌ འུར༌ཏེ༌ ཆ༌ཉན༌ཅེས༌ལ༌ ལག༌ ཆེན༌མོའེ༌ ཤོག༌པ༌ ཙོགས༌ ཉིས༌ སལ༌ཏེ༌ དུག༌, ཀ༌རུ༌ དཀོན༌མཆོག༌གི༌ ལོ༌ སུམ༌ནང༌ཕེད༌ ཚག༌པ༌, ཏེ༌ བུ༌མོ༌བོའ༌ བྲུག༌གི༌ ཀ༌ནེ༌ སྐྱོབ༌བ༌ ཛད༌ཏེ༌ སྟ༌སྟོག༌ ཛད༌ཨིན༌།
REV 12:15 ཏེ༌ནེ༌ ཏེ༌ བྲུག༌གི༌ ཁོའེ༌ ཁའ༌ནེ༌ བིང༌ཁན༌ནི༌ ཆུ༌ལོག༌ ཙོགས༌སི༌ ཆུའི༌ ནང༌ང༌ ཏེ༌ བུ༌མོ༌བོ༌ ནུབ༌ཅུགས༌ཏེ༌ སད༌ཅེས༌ ཅོས༌།
REV 12:16 ཨིན༌ནའང༌ ཏེ༌ བུ༌མོའ༌ རོགས༌ ཅོ༌ཅེས༌ལ༌ ས༌ཀྱད༌པོ༌ ཕེས༌ཏེ༌ བྲུག༌གི༌ ཁའ༌ནེ༌ བིང༌ཁན༌ནི༌ ལྩངས༌པོའེ༌ ཆུ༌བོ༌ སྨིད༌ ཏངས༌།
REV 12:17 ཏེ༌ནེ༌ བྲུག༌པོའ༌ ཏེ༌ བུ༌མོ༌བོའེ༌ཀ༌ མ༌སྲན༌ཏྲེ༌ སྲོ༌ ཡོངས༌, ཡང༌ བུ༌མོའེ༌ ལུས༌ཏེ༌ ཡོད༌ཁན༌ནི༌ པུར༌གྱུད༌, དཀོན༌མཆོག༌གི༌ བཀའ༌རྒྱ༌ ཁའ༌ཉན༌ཏེ༌ ཡེ༌ཤུའི༌ ལབ༌ཞ༌ གུན༌ལ༌ སྟན༌པོ༌ ཐམས༌ཏེ༌ དུག༌ཁན༌གུན༌ནི༌ གྱབ༌གལ༌ལ༌ མག༌ ཏང༌ཅེས༌ ཐག༌ཅདས༌།
REV 12:18 ཏེ༌ནེ༌ བྲུག༌ གྱ༌ཚོའེ༌ ཐའ༌མའེ༌ པེ༌མའེ༌ཀ༌ ལངས༌ཏེ༌ དུགས༌།
REV 13:1 ཏེ༌ནེ༌ ངའེ༌ ཇིགས༌ནང༌ཅན༌ནི༌ སེམས༌ཅན༌ཞིག༌ གྱ༌ཚོའེ༌ ནང༌ནེ༌ བིང༌ང༌ ཐོང༌། ཏེ༌ སེམས༌ཅན༌བོའ༌ གོ༌ རྡུན༌ དང༌ རཱ༌ཅོ༌ རྕུ༌ དུག༌། རཱ༌ཅོ༌ རེ༌རེ༌ཀ༌ ཐོར༌ཤོག༌ ཡང༌ གོ༌ རེ༌རེ༌ཀ༌ དཀོན༌མཆོག༌གི༌ གྱབ༌གལ༌ལ༌ དད༌ལོག༌ ཞུས༌ཁན༌ནི༌ མིང༌ བྲིས༌ཏེ༌ དུག༌།
REV 13:2 ཏེ༌ ཇིགས༌ནང༌ཅན༌ནི༌ སེམས༌ཅན༌བོ༌ ཤན༌ ཙོགས༌, རྐང༌པ༌གུན༌ དྲེན༌མོ༌ ༼ཡང༌ན༌ བ༌ལུའི༌༽ རྐང༌པ༌ དང༌ ཁའ༌བོ༌ སིང༌གེའེ༌ ཁའ༌ ཙོགས༌ དུག༌། བྲུག༌པོའེ༌ ཁོ༌རང༌ངི༌ སྟོབས༌, ཁྲིས༌ དང༌ ཝང༌ ཆེན༌མོ༌ ཚང༌མ༌ ཏེ༌ སེམས༌ཅན༌བོའ༌ ཏངས༌།
REV 13:3 ཏེ༌ སེམས༌ཅན༌ནི༌ གོ༌ ཅིག༌གི༌ཀ༌ སྲོག༌ནའང༌ ཆ༌ཅེས༌སི༌ མ༌ཁའ༌ཞིག༌ ཐོང༌, ཨིན༌ནའང༌ ཏེ༌ མ༌ཁའ༌བོ༌ སོབས༌ཏེ༌ གྱལ༌, ཡང༌ ཇིག༌རྟེན༌པ༌ ཏད༌པ༌ མེད༌ཁན༌ ཚང༌མའེ༌ ཏེ༌བོ༌ ཐོང༌ཏེ༌ ཧ༌ལས༌ཨིན༌ ཏེ༌ སེམས༌ཅན༌བོའེ༌ སྟིང༌རང༌ནེ༌ སོང༌།
REV 13:4 བྲུག༌པོའེ༌ རང༌ངི༌ ཝང༌ཆ༌བོ༌ ཏེ༌ སེམས༌ཅན༌ལ༌ ཏངས༌ པ༌སང༌, མི༌གུན༌ནི༌ ཏེ༌ བྲུག༌པོའ༌ ཅོལས༌། མི༌གུན༌ནི༌ སེམས༌ཅན༌ལའང༌ ཅོལ༌ཨིན༌ ཟེརས༌, “སུ༌ འི༌ སེམས༌ཅན༌ ཙོགས༌ ཀྲག༌པོ༌ ཨིན༌? ཁོའེ༌ གྱབ༌གལ༌ལ༌ ནོལ༌ཅེས༌སི༌ ཁྱུད༌ སུའ༌ ཡོད༌?”
REV 13:5 ཏེ༌ སེམས༌ཅན༌བོའ༌ དཀོན༌མཆོག༌གི༌ གྱབ༌གལ༌ལ༌ དད༌ལོག༌ ཞུ༌ཅེས༌སི༌ གོངས༌པ༌ ཡང༌ ཟླ༌ཝ༌ 42 ཚག༌པ༌ ཁོའེ༌ ཅི༌ཞིག༌ ཅོ༌ཨིན༌ སམ༌ནའང༌ ཅོ༌ཅེས༌སི༌ ཝང༌ཆ༌ སལས༌།
REV 13:6 ཁོའེ༌ དཀོན༌མཆོག༌གི༌ ཚན༌, ཁོང༌ ཞུག༌སའེ༌ ནས༌ས༌ དང༌ ཁོང༌ ཉམ༌པོ༌ ནམ༌ཁའེ༌ ནང༌ང༌ ཞུགས༌ཁན༌ ཚང༌མའེ༌ གྱབ༌གལ༌ལ༌ དད༌ལོག༌གི༌ སྤེ༌ར༌ ཟེརས༌།
REV 13:7 ཁོའ༌ དཀོན༌མཆོག༌གི༌ མི༌གུན༌ ཉམ༌པོ༌ མག༌ ཏང༌ཅེས༌ དང༌ ཏེ༌གུན༌ནི༌ཀ༌ གྱལ༌ཁའ༌ ཐོབ༌ཅེས༌སི༌ ཁྱུད༌ ཏངས༌ཏེ༌ དུག༌། ཡང༌ ཁོའ༌ མི༌རིགས༌, མི༌གུན༌, སྐད༌རིགས༌ དང༌ གྱལ༌ཁམས༌ ཚང༌མའེ༌ཀ༌ ཝང༌སྲུལ༌ཅེས༌སི༌ ཝང༌ཆ༌ ཏངས༌ཏེ༌ དུག༌།
REV 13:8 ཇིག༌རྟེན༌ མ༌ཆགས༌སི༌ སང༌ སྔུན༌ལ༌, སད༌ཁན༌ནི༌ ལུ༌གུའི༌ ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ང༌ མིང༌ བྲིས༌ཏེ༌ མེད༌ཁན༌ནི༌ ཇིག༌རྟེན༌པ༌གུན༌ནི༌ ཏེ༌ སེམས༌ཅན༌བོའ༌ ཅོལ༌ཨིན༌,
REV 13:9 ནམ༌ཅོག༌ ཡོད༌ཁན༌གུན༌ནི༌ ཉོན༌ཤིག༌།
REV 13:10 ཙོན༌ལ༌ ཀག༌ཅུག༌ག༌ ཛད༌ཅེས༌ཅན༌གུན༌ ཙོན༌ལ༌ ཀག༌ཨིན༌། ཡང༌ ར༌འི༌ ཉམ༌པོ༌ སད༌ཅེས༌ཅན༌གུན༌ ར༌འི༌ ཉམ༌པོ༌ སད༌ཨིན༌། ཏེན༌ན༌བོའེ༌ཕིའ༌ དཀོན༌མཆོག༌གི༌ མི༌གུན༌ ཟོད༌པ༌ ཉམ༌པོ༌ ནགས༌བར༌དོ༌ ཁུར༌ཨིན༌ ཏད༌པའེ༌ ནང༌ང༌ སྟན༌པོ༌ ལུས༌གོས༌ཨིན༌།
REV 13:11 ཏེ༌ནེ༌ ངའེ༌ སའེ༌ ནང༌ནེ༌ ཡང༌ ཇིགས༌ནང༌ཅན༌ནི༌ སེམས༌ཅན༌ཞིག༌ བིང༌ང༌ ཐོང༌, ཁོའ༌ ལུ༌གུའི༌ རཱ༌ཅོ༌ ཙོགས༌ ཉིས༌ དུག༌, ཨིན༌ནའང༌ ཁོའེ༌ སྐད༌པོ༌ བྲུག༌གི༌ སྐད༌ ཙོགས༌ རག༌།
REV 13:12 ཁོའེ༌ ཇིགས༌ནང༌ཅན༌ནི༌ སེམས༌ཅན༌ ཏང༌པོ༌བོའེ༌ ཤེད༌ དང༌ ཝང༌ གུན༌ ཀོལ༌ཏེ༌, ཇིག༌རྟེན༌པ༌གུན༌ལ༌ ཏེན༌ན༌ ཇིགས༌ནང༌ཅན༌ནི༌ སེམས༌ཅན༌ ཏང༌པོ༌, སྲོག༌ནའང༌ ཆ༌ཅེས༌སི༌ མ༌ཁའ༌ ཡོད༌ཏེ༌ གྱལ༌ཁན༌བོའ༌ ཅོལ༌ཅུགས༌།
REV 13:13 ཡང༌ ཇིགས༌ནང༌ཅན༌ནི༌ སེམས༌ཅན༌ ཉིས༌པའེ༌ མིན༌དྲ༌ མིན༌དྲ༌ ཧ༌ལས༌ཤེས༌སི༌ ལྟས༌གུན༌ སྟནས༌, སྤེར༌ན༌ མི༌གུན༌ནི༌ མིག༌གི༌ དུན༌ལ༌ ནམ༌ནེ༌ མེ༌ ཇིག༌རྟེན༌ནི༌ཀ༌ བུད༌ཅུགས༌།
REV 13:14 ཇིགས༌ནང༌ཅན༌ནི༌ སེམས༌ཅན༌ ཏང༌པོའེ༌ ཚབས༌ལ༌ ལྟས༌གུན༌ སྟན༌ཏེ༌, ཁོའེ༌ ཇིག༌རྟེན༌པ༌གུན༌ལ༌ ཁོའ༌ ཆོགས༌ ཅོ༌ཅེས༌ལ༌ གོབ༌སྐོརས༌། ཏེ༌ནེ༌ ཏེ༌གུན༌ལ༌ ར༌འི༌ གྱབས༌ཁན༌ནི༌ མ༌ཁའ༌ ཡོད༌ཏེའང༌ སོན༌ཏེའ༌ ལུས༌ཏེ༌ ཨིན༌ཁན༌ནི༌ ཇིགས༌ནང༌ཅན༌ནི༌ སེམས༌ཅན༌ ཏང༌པོའེ༌ སྐུན༌དྲ༌ ཅོ༌ཅེས༌སི༌ བཀའ༌ ཏངས༌།
REV 13:15 སྤེ༌ར༌ ཏང༌ཉན༌ཅེས༌སི༌ ཕིའ༌ ཁོའ༌ ཏེ༌ སྐུན༌དྲ༌བོའེ༌ ནང༌ང༌ སྲོག༌ ཏང༌ཅེས༌སི༌ ཝང༌ཆ༌ སལས༌, ཏེ༌ནེ༌ ཏེ༌ སྐུན༌དྲ༌བོའེ༌ ཁོའ༌ མ༌ཅོལ༌ཁན༌ ཚང༌མ༌ སད༌ཅེས༌ལ༌ བཀའ༌ ཏངས༌།
REV 13:16 ཁོའེ༌ ཉམ༌ཤུང༌ དང༌ ཇིགས༌པོ༌, ཆུག༌པོ༌ དང༌ ཉལ༌བ༌ཅན༌, རང༌ཝང༌ཅན༌ དང༌ ཚེ༌ཡོག༌, ཚང༌མའེ༌ ཐོད༌པ༌ ཡ༌ ལག༌པ༌ ཡས༌པའེ༌ཀ༌ ཝང༌ ཏངས༌ཏེ༌ སྟགས༌ཤིག༌ ཅོས༌།
REV 13:17 ཏེ༌ སྟགས༌པོ༌ ཡོད༌ཏེ༌ མ༌ནེ༌ སུ༌ཞིག༌གའང༌ ཉོབ༌ཚོང༌ ཏང༌ ཉན༌ན༌ མེད༌པིན༌། ཏེ༌ སྟགས༌པོ༌ ཇིགས༌ནང༌ཅན༌ནི༌ སེམས༌ཅན༌ ཏང༌པོའེ༌ མིང༌ ཡ༌ ཁོའེ༌ མིང༌ངི༌ ཨང༌ཀྲངས༌ ༼ཡང༌ན༌ ནམ༌བར༌བོ༌༽ ཨིན༌ནོག༌།
REV 13:18 ཏེ༌ སྟགས༌པོའེ༌ ཏོན༌ཏག༌ ཧ༌གོ༌ཅེས༌ལ༌ སིལ༌ཁན༌གུན༌ ཤེས༌རབས༌ཅན༌ ཡོང༌གོས༌། འི༌ སྟགས༌པོ༌ མི༌ཞིག༌གི༌ ཨང༌ཀྲངས༌ ཨིན༌ནོག༌། ཡང༌ ཏེ༌ ཨང༌ཀྲངས༌བོ༌ ནི༌ 666 ཨིན༌ནོག༌།
REV 14:1 ཏེ༌ནེ༌ ངའེ༌ ལྟའ༌ཅིག༌ ཟི༌ཡོན༌ ཟེར༌ཁན༌ནི༌ རི༌ཀ༌ ཏེན༌ན༌ ལུ༌གུ༌བོ༌ ཞངས༌ཏེ༌ ཐོང༌, ཡང༌ ཐོད༌པའེ༌ཀ༌ ལུ༌གུ༌ དང༌ ཁོང༌ངི༌ ཡབ༌བི༌ ཚན༌ བྲིའ༌ ཛད༌ཁན༌ནི༌ མི༌ 1,44,000 ཁོང༌ ཉམ༌པོ༌ དུག༌།
REV 14:2 ཡང༌ ང༌ ནམ༌ཁའ༌ནེ༌ སྐད༌ ཀྲག༌པོ༌ཞིག༌ ཚོར༌ ཀ༌བོ༌ ཤེད༌ཅན༌ གྱུག༌ཁན༌ནི༌ ཆུ༌ སྐད༌ ཀྲག༌པོ༌ ཡ༌ ངད༌ཅན༌ བྲུག༌ལྡིར༌ཁན༌ ཙོགས༌ རག༌པིན༌། ཏེ༌ སྐད༌པོ༌ ནི༌ མི༌ མང༌པོ༌ཞིག༌གི༌ ཏར༌ མང༌པོ༌ཅན༌ནི༌ རོལ༌མོ༌ རོལ༌ཁན༌ ཙོགས༌ རག༌པིན༌།
REV 14:3 ཁོང༌གུན༌ནི༌ ཞུགས༌ཁྲིས༌, སྲོག༌ ཡོད༌ཁན༌ ཞི༌ཀོ༌ དང༌ འུ༌སྐྱོང༌གུན༌ནི༌ དུན༌ལ༌ ལུ༌ སོ༌མ༌ཞིག༌ ཏངས༌། ཏེ༌ ལུ༌བོ༌ དཀོན༌མཆོག༌གི༌ སྐྱོབ༌བ༌ ཛད༌ཁན༌ 1,44,000 མི༌གུན༌ མ༌སྟོགས༌, སུའང༌ བྱང༌ ཆོག༌ག༌ མི༌དུག༌།
REV 14:4 ཁོང༌གུན༌ ཏམ༌པ༌, བུ༌མོ༌ ཉམ༌པོ༌ ལུས༌བྲེལ༌ མ༌ནེ༌ མེད༌ཁན༌ དང༌ ལུ༌གུ༌ ཀ༌རུ༌ ཆ༌ནའང༌ ཁོང༌ངི༌ སྟིང༌རང༌ནེ༌ ཆའད༌པིན༌། ཡང༌ ཁོང༌གུན༌ མི༌གུན༌ནི༌ ཕྲོ༌ནེ༌ ཉོའ༌ ཛད༌ཏེ༌ སྟོན༌ཐོག༌གི༌ གྲུ༌ གོ༌མ༌བོ༌ ཙོགས༌ལ༌ དཀོན༌མཆོག༌ དང༌ ལུ༌གུའ༌ ཕུལ༌ལ༌ ཛདས༌།
REV 14:5 ཁོང༌གུན༌ནི༌ ཁའ༌ནེ༌ ཟུན༌ མ༌ནེ༌ མ༌བིང༌, ཡང༌ ཁོང༌གུན༌ སྐྱོན༌མེད༌ཁན༌ ཨིན༌ནོག༌།
REV 14:6 ཏེ༌ནེ༌ ངའེ༌ ནམ༌མི༌ སྐྱིལ༌ལ༌ འུར༌ཨིན༌ ཡོད༌ཁན༌ནི༌ ཞན༌ ཕོ༌ཉ༌ཞིག༌ ཐོང༌། ཁོའེ༌ ཐའ༌ མ༌ནེ༌ མེད༌ཁན༌ནི༌ གའ༌མོའེ༌ ནས༌ཚུལ༌བོ༌, ཇིག༌རྟེན༌པ༌ ཚང༌མའ༌ ཤད༌དུག༌ ཀ༌བོ༌ གྱལ༌ཁམས༌, མི༌རིགས༌, སྐད༌རིགས༌ དང༌ མི༌གུན༌ ཨིན༌ནོག༌།
REV 14:7 ཡང༌ ཏེ༌ ཕོ༌ཉ༌བོའེ༌ སྐད༌ ཆེན༌མོའེ༌ ནང༌ང༌ མོལས༌, “ཏ༌ དཀོན༌མཆོག༌གི༌ ཁྲིམས༌ཅད༌དི༌ ཏུས༌ ལེབས༌པ༌, ཁོང༌ང༌ ཇིགས༌ཤིག༌ ཡང༌ རྩི༌ཝ༌ ཅོ༌ཤིག༌། ནམ༌ཁའ༌, ས༌ཀྱད༌, གྱ༌ཚོ༌ དང༌ ཆུའི༌ ཆུ༌མིག༌ གུན༌ ཛད༌ཁན༌ནི༌ དཀོན༌མཆོག༌ག༌ ཅོལ༌ཤིག༌།”
REV 14:8 ཕོ༌ཉ༌ ཏང༌པོའེ༌ སྟིང༌རང༌ནེ༌ ཞན༌ཡང༌ ཕོ༌ཉ༌ཞིག༌ སྐྱོད༌ཏེ༌ མོལས༌, “བ༌བེ༌ལོན༌ནི༌ གྱལ༌ས༌ མིང༌ཅན༌ ངན༌པ༌བོ༌ ཤིགས༌ཏེ༌ མེད༌, ཀ༌བོའེ༌ ཇིག༌རྟེན༌ནི༌ གྱལ༌ཁམས༌ ཚང༌མའེ༌ མི༌གུན༌ལ༌, ཁོའེ༌ ལུས༌བྲེལ༌ལི༌ དོད༌པ༌ ངན༌པའེ༌ ཆང༌བོ༌ ཐུང༌ཅུགས༌།”
REV 14:9 ཁོང༌གུན༌ནི༌ སྟིང༌རང༌ནེ༌ ཕོ༌ཉ༌ སུམ༌པ༌བོ༌ སྐྱོད༌ཏེ༌ མ༌ སྐད༌ ཆེན༌མོ༌ ཉམ༌པོ༌ མོལས༌, “སུ༌ཞིག༌གི༌ ཏེ༌ ཇིགས༌ནང༌ཅན༌ནི༌ སེམས༌ཅན༌ དང༌ ཁོའེ༌ སྐུན༌དྲའ༌ ཅོལ༌ན༌, ཡ༌ ཁོའེ༌ སྟགས༌པོ༌ ཁོ༌རང༌གུན༌ནི༌ ཐོད༌པ༌ ཡ༌ ལག༌པའེ༌ཀ༌ ཅོ༌ཅུག༌ན༌,
REV 14:10 ཁོང༌གུན༌ལ༌ དཀོན༌མཆོག༌གི༌ ཐུགས༌སྲོའེ༌ རྒུན༌ཆང༌བོ༌ ཐུང༌གོས༌ཨིན༌, ཀ༌བོ༌ ཁོང༌ངི༌ ཐུགས༌སྲོའེ༌ དོན༌སྐྱོག༌གི༌ ནང༌ང༌ ཅའང༌ མ༌སྲེ༌ཁན༌ ཀར༌བ༌ ལུག༌ག༌ ཛད༌ཏེ༌ ཨིན༌། ཡང༌ ཁོང༌གུན༌ལ༌ དཀོན༌མཆོག༌གི༌ ཏམ༌པའེ༌ ཕོ༌ཉ༌ དང༌ ལུ༌གུའི༌ སྐུན༌དུན༌ལ༌ མེ༌ དང༌ མུ༌ཟི༌ མེ༌ ཞེན༌ཨིན༌ ཡོད༌ཁན༌གུན༌ནི༌ ནང༌ང༌ རྡུག༌ངལ༌ ཐོང༌ཨིན༌།
REV 14:11 ཁོང༌གུན༌ནི༌ ནགས༌སི༌ ཏུད༌པ༌བོ༌ ཏུས༌གྱུན༌ནེ༌གྱུན༌ བིང༌ཨིན༌ དུག༌ཨིན༌། ངལ༌ཚོ༌ མ༌ནེ༌ མེད༌པ༌, ཁོང༌གུན༌ལ༌ ཉིན༌ཚན༌ གང༌པོ༌ བར༌དོ༌ ཐོང༌ཨིན༌, ཅིའ༌ཟེར༌ན༌ ཁོང༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ དང༌ ཏེ༌བོའེ༌ སྐུན༌དྲའ༌ ཅོལས༌, ཡང༌ ཁོའེ༌ མིང༌ངི༌ སྟགས༌པོ༌ ཁོ༌རང༌གུན༌ནི༌ཀ༌ ཅོ༌ཅུགས༌།”
REV 14:12 ཏེན༌ན༌བོའེ༌ཕིའ༌ དཀོན༌མཆོག༌གི༌ མི༌གུན༌ནི༌ ནགས༌བར༌དོ༌གུན༌ ཟོད༌པ༌ ཉམ༌པོ༌ ཁུར༌ཏེ༌ དཀོན༌མཆོག༌གི༌ བཀའ༌གུན༌ ཉན༌ཅེས༌ དང༌ ཏད༌པ༌བོ༌ ཡེ༌ཤུའི༌ ནང༌ང༌ སྟན༌པོ༌ བོར༌གོས༌།
REV 14:13 ཏེ༌ནེ༌ ངའེ༌ ནམ༌ཁའ༌ནེ༌ སྐད༌ཅིག༌གི༌ ཟེར༌ཨིན༌ ཚོར༌, “འི༌བོ༌ བྲིས༌, ཏ༌ནེ༌ཕར༌ལ༌ གཙོ༌བོའེ༌ཀ༌ ཏད༌པ༌ ཅོ༌ཅེས༌པོའེ༌ ཤི༌གོས༌ཁན༌གུན༌ ཅིན༌ལབས༌ཅན༌ ཨིན༌།” ཏམ༌པའེ༌ ཐུག༌ཉིད༌དི༌ མོལས༌, “འོ༌ན༌ དེན༌བའ༌, ཁོང༌གུན༌ལ༌ ཅིན༌ལབས༌ ཏན༌ཏན༌ ཐོབ༌ཨིན༌། ཁོང༌གུན༌ལ༌ ལས༌ ཀགས༌པོ༌གུན༌ནེ༌ ངལ༌ཚོ༌ ཐོབ༌ཨིན༌ ཅིའ༌ཟེར༌ན༌ ཁོ༌རང༌གུན༌ནི༌ ལས༌ ཟང༌པོའེ༌ བྲས༌བུ༌ ནམ༌ཁའེ༌ ནང༌ང༌ ཁོང༌ ཉམ༌པོ༌ ལེབ༌ཨིན༌།”
REV 14:14 ཏེ༌ནེ༌ ངའེ༌ སྲིན༌ ཀར༌པོ༌ཞིག༌ ཐོང༌, ཡང༌ ཏེ༌ སྲིན༌ནི༌ཀ༌ ཞུགས༌ཏེ༌ ཡོད༌ཁན༌བོ༌ མི༌རིགས༌སི༌བུ༌ ཙོགས༌ དུག༌། ཁོང༌ངི༌ ཨུའི༌ཀ༌ སེར༌རི༌ ཐོར༌ཤོག༌ དང༌ ཆག༌ག༌ ཟོར༌ར༌ ནོན༌པོ༌ཞིག༌ ནམས༌ཏེ༌ དུག༌།
REV 14:15 ཏེ༌ནེ༌ ཞན༌ཡང༌ ཕོ༌ཉ༌ཞིག༌གི༌, ནམ༌ཁའེ༌ ཆོད༌ཁང༌ངི༌ ནང༌ནེ༌ བིང༌ཏེ༌ སྐད༌ ཆེན༌མོ༌ ཉམ༌པོ༌ སྲིན༌ནི༌ཀ༌ ཞུགས༌ཁན༌བོའ༌ མོལས༌, “ཉེ༌རང༌ངི༌ ཟོར༌ར༌ ཉམ༌པོ༌ རྔའ༌ ཛད༌, ཅིའ༌ཟེར༌ན༌ ཏུས༌པོ༌ རན༌ཏེ༌ ཇིག༌རྟེན༌ནི༌ཀ༌ སྟོན༌ཐོག༌པོ༌ ཚོས༌ཏེ༌ ཡོད༌ཏེ༌ ཨིན༌ནོག༌།”
REV 14:16 སྲིན༌ནི༌ཀ༌ ཞུགས༌ཁན༌ནི༌ ཁོང༌རང༌ངི༌ ཟོར༌ར༌ ཇིག༌རྟེན༌ནི༌ཀ༌ གྱབས༌པ༌ ཇིག༌རྟེན༌ གང༌པོ༌ རྔས༌ཏངས༌།
REV 14:17 ཏེ༌ སྟིང༌ནེ༌ ཡང༌ ཕོ༌ཉ༌ཞིག༌ ནམ༌ཁའེ༌ ཆོད༌ཁང༌ངི༌ ནང༌ནེ༌ བིང༌ཏེ༌ སྐྱོདས༌, ཁོང༌ངི༌ ལག༌གའང༌ ཟོར༌ར༌ ནོན༌པོ༌ཞིག༌ དུག༌།
REV 14:18 ཏེ༌ནེ༌ མེ༌ཀ༌ ཝང༌ ཡོད༌ཁན༌ ཡང༌ ཕོ༌ཉ༌ཞིག༌ ཆོད༌ཁྲི༌ དུན༌ནེ༌ སྐྱོད༌ཏེ༌ ཟོར༌ར༌ ནོན༌པོ༌ ནམས༌ཏེ༌ ཡོད༌ཁན༌ནི༌ ཕོ༌ཉ༌ མོལས༌, “ཉེ༌རང༌ང༌ ཡོད༌ཁན༌ནི༌ ཟོར༌ར༌ ནོན༌པོ༌བོ༌ ཀོལ༌ཏེ༌ ཇིག༌རྟེན༌ནི༌ རྒུན༌ནི༌ ལྕང༌མ༌གུན༌ནི༌ ཀ༌ནེ༌ རྒུན༌གུན༌ ལྡུས༌, ཅིའ༌ཟེར༌ན༌ ཏེ༌གུན༌ ཚོས༌ཏེ༌ དུག༌།”
REV 14:19 ཡང༌ ཏེ༌ ཕོ༌ཉ༌བོའེ༌ ཁོ༌རང༌ངི༌ ཟོ༌ར༌བོ༌ ཇིག༌རྟེན༌ནི༌ཀ༌ སྲུལ༌ཏེ༌ རྒུན༌གུན༌ ལྡུས༌ཏེ༌, ཁུའ༌ ཕིང༌ང༌ལ༌ དཀོན༌མཆོག༌གི༌ ཐུགས༌སྲོའེ༌ རྒུན༌ ཙིར༌ཅེས༌སི༌ ནས༌ས༌ ཆེན༌མོའེ༌ ནང༌ང༌ ཕངས༌།
REV 14:20 ཏེ༌ རྒུན༌ ཙིར༌སའེ༌ ནས༌ས༌བོ༌ གྱལ༌ས༌ནེ༌ ཕི༌ལོག༌ག༌ ཡོད༌པིན༌། ཁོང༌གུན༌ནི༌ ཁྲག༌པོ༌, རྒུན༌ ཙིར༌སའེ༌ ནས༌ས༌ནེ༌ ཧ༌ལམ༌ ཀི༌ལོ༌མི༌ཀྲར༌ 300 ཚག༌པ༌ གྱུགས༌, ཡང༌ ཁྲག༌གི༌ ཐོན༌པོ༌ རྟའེ༌ སྲབས༌ ཚོག༌པ༌ ལེབ༌།
REV 15:1 ཏེ༌ནེ༌ ང༌ ནམ༌ཁའེ༌ ནང༌ང༌ ཡང༌ ཧ༌ལས༌ཤེས༌སི༌ སྟགས༌ཤིག༌ ཐོང༌, ཕོ༌ཉ༌ རྡུན༌ནི༌ ཡོང༌ཅེས༌ཅན༌ནི༌ རྡུག༌ངལ༌ རྡུན༌ ཁུར༌ཏེ༌ དུག༌, ཏེན༌ན༌གུན༌ དཀོན༌མཆོག༌གི༌ སྟིང༌ཇུག༌གི༌ ཆད༌པ༌བོ༌ ཨིན༌ནོག༌།
REV 15:2 ང༌ མེ༌ ཉམ༌པོ༌ དྲེས༌ཁན༌ནི༌ ཤེལ༌ལི༌ གྱ༌ཚོ༌ ཙོགས༌ཤིག༌ ཐོང༌། ཡང༌ ཏེ༌ ཐའ༌མ༌ ལངས༌ཏེ༌ དུག༌ཁན༌གུན༌ནི༌, ཇིགས༌ནང༌ཅན༌ནི༌ སེམས༌ཅན༌ནི༌ ཀ༌ནེ༌ གྱལ༌ཁའ༌ ཐོབ༌ཁན༌གུན༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ ཏེ༌ སེམས༌ཅན༌, ཡ༌ ཏེ༌བོའེ༌ སྐུན༌དྲ༌ ཆག༌ མ༌ཕུལས༌ ཡ༌ ཏེ༌བོའེ༌ ཨང༌ཀྲངས༌སི༌ སྟགས༌པོ༌ ཁོང༌རང༌གུན༌ནི༌ཀ༌ ཅོ༌ མ༌ཅུགས༌། ཁོང༌གུན༌ནི༌ ལག༌པའེ༌ ནང༌ང༌ དཀོན༌མཆོག༌གི༌ སལ༌ཁན༌ནི༌ ཏར༌ མང༌པོ༌ཅན༌ནི༌ རོལ༌མོ༌ ཁུར༌ཏེ༌ དུག༌།
REV 15:3 ཡང༌ ཁོང༌གུན༌ནི༌ དཀོན༌མཆོག༌གི༌ ཞབས༌ཏོག༌པ༌ མོ༌ཟེས༌ དང༌ ལུ༌གུའི༌ སལ༌ཁན༌ནི༌ ལུ༌ ཏང༌དུག༌, “ཀྱེ༌ གཙོ༌བོ༌ དཀོན༌མཆོག༌ ཀུན༌ཝང༌ ཉེ༌རང༌ངི༌ ཆག༌ལས༌གུན༌ ཀྲག༌པོ༌ དང༌ ཧ༌ལས༌ཤེས༌ ཨིན༌ནོག༌། གྱལ༌ཁམས༌ ཚང༌མའེ༌ གྱལ༌པོ༌། ཉེ༌རང༌ངི༌ ཛད༌ཁན༌གུན༌ འོས༌པ༌ དང༌ དེན༌བ༌ ཨིན༌ནོག༌།
REV 15:4 ཀྱེ༌ གཙོ༌བོ༌, ཉེ༌རང༌ང༌ སུ༌ མི༌ཇིགས༌? ཉེ༌རང༌ངི༌ ཚན༌ལ༌ སུའི༌ སྟོད༌པ༌ མི༌ཕུལ༌? ཉེ༌རང༌ ཅིག༌པོ༌ ཏམ༌པ༌ ཞུགས༌ཏེ༌ ཨིན༌། གྱལ༌ཁམས༌ ཚང༌མ༌ ཡོངས༌ཏེ༌ ཉེ༌རང༌ངི༌ སྐུན༌དུན༌ལ༌ ཅོལ༌ཨིན༌, ཅིའ༌ཟེར༌ན༌ ཉེ༌རང༌ངི༌ རང༌ངི༌ ཆག༌ལས༌ ཀྲང༌པོ༌གུན༌ སྔོན༌ ཅུག༌ག༌ ཛད༌ཏེ༌ ཨིན༌ནོག༌།”
REV 15:5 ཏེ༌ སྟིང༌ནེ༌ ངའེ༌ ནམ༌ཁའེ༌ ནང༌ང༌ ཆོད༌ཁང༌ ཡང༌ན༌, དཀོན༌མཆོག༌གི༌ སྤང༌པོའེ༌ ཀུར༌བོ༌ ཕེས༌ཏེ༌ ཐོང༌།
REV 15:6 རྡུག༌ངལ༌ ཡོང༌ཅུག༌ཅེས༌སི༌ ཝང༌ཆ༌ སལ༌ཏེ༌ ཡོད༌ཁན༌ ཕོ༌ཉ༌ རྡུན༌ཀོ༌ ཆོད༌ཁང༌ནེ༌ བིང༌ཏེ༌ ཡོངས༌། ཏེ༌ ཕོ༌ཉ༌གུན༌ནི༌ ལག༌མོ༌ ཀོས༌ ཀར༌པོ༌ གོན༌ཏེ༌ ཀྲང༌ངི༌ཀ༌ སེར༌རི༌ རས༌ སྲིལ༌ཏེ༌ དུག༌།
REV 15:7 ཏེ༌ནེ༌ ཏེ༌ སྲོག༌ ཡོད༌ཁན༌ ཞི༌ཀོའེ༌ ཕྲོ༌ནེ༌ ཅིག༌གི༌, ཏེ༌ ཕོ༌ཉ༌ རྡུན༌ཀོའ༌ སེར༌རི༌ གོར༌མོ༌ རེ༌རེ༌ ཕུལས༌, ཀ༌བོའེ༌ ནང༌ང༌ ཏུས༌གྱུན༌ནེ༌གྱུན༌ ཞུགས༌ཁན༌ནི༌ དཀོན༌མཆོག༌གི༌ ཐུགས༌སྲོ༌ གངས༌ཏེ༌ དུག༌།
REV 15:8 ཆོད༌ཁང༌བོ༌ དཀོན༌མཆོག༌གི༌ ཧ༌ལས༌ཤེས༌ཅན༌ནི༌ ཟིར༌རྗིད༌ དང༌ ཁྱུད༌དི༌ ཏུད༌པའེ༌ གངས༌ཏེ༌ དུག༌། ཏམ༌པའེ༌ ཆོད༌ཁང༌ངི༌ ནང༌ང༌ སུ༌ཞིག༌གའང༌ ཞུགས༌ མི༌ཉན༌ ནམ༌ཚོག༌པ༌, ཕོ༌ཉ༌ རྡུན༌ཀོའེ༌ རྡུག༌ངལ༌ རྡུན༌ཀོ༌ ཁྱོང༌ཅེས༌སི༌ ལས༌པོ༌ དྲན༌དྲ༌ གྲུབ༌ མི༌གྲུབ༌།
REV 16:1 ཏེ༌ནེ༌ ངའེ༌ ཆོད༌ཁང༌ངི༌ ནང༌ནེ༌ སྐད༌ ཆེན༌མོ༌ཞིག༌གི༌ ཕོ༌ཉ༌ རྡུན༌ཀོའ༌ ཟེར༌ཨིན༌ ཚོར༌, “སོང༌ཏེ༌ དཀོན༌མཆོག༌གི༌ ཐུགས༌སྲོ༌ སྐངས༌ཁན༌ནི༌ གོར༌མོ༌ རྡུན༌ཀ༌ ཇིག༌རྟེན༌ནི༌ཀ༌ ཕོས༌ཏོང།”
REV 16:2 ཏེ༌ནེ༌ ཕོ༌ཉ༌ ཏང༌པོ༌བོ༌ སོང༌ཏེ༌ ཁོ༌རང༌ངི༌ གོར༌མོའེ༌ ནང༌ང༌ ཡོད༌ཁན༌བོ༌ ཇིག༌རྟེན༌ནི༌ཀ༌ ཕོས༌ཏངས༌། ཏེ༌ ཇིགས༌ནང༌ཅན༌ནི༌ སེམས༌ཅན༌ནི༌ སྟགས༌ ཡོད༌ཁན༌ ཡང༌ ཏེ༌བོའེ༌ སྐུན༌དྲའ༌ ཅོལ༌ཁན༌ གུན༌ནི༌ ཟུགས༌པོའེ༌ཀ༌ ཇིགས༌ཤེས༌ དང༌ ཟུག༌ཟེར༌ སྲན༌ཏྲེ༌ཅན༌ནི༌ ཆུར༌གང༌ བིང༌།
REV 16:3 ཏེ༌ནེ༌ ཕོ༌ཉ༌ ཉིས༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ གྱ༌ཚོའེ༌ཀ༌ ལུགས༌པ༌, གྱ༌ཚོ༌ གང༌པོ༌ མི༌ ཤི༌ཁན༌ནི༌ ཁྲག༌ ཙོགས༌ ནག༌པོ༌ གྱུར༌, ཡང༌ གྱ༌ཚོའེ༌ ནང༌ང༌ ཡོད༌ཁན༌ནི༌ སྲོག༌ ཡོད༌ཁན༌ ཚང༌མ༌ ཤི༌།
REV 16:4 ཏེ༌ནེ༌ ཕོ༌ཉ༌ སུམ༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ལྩངས༌པོ༌ དང༌ ཆུ༌མིག༌ གུན༌ནི༌ཀ༌ ལུགས༌པ༌, ཏེ༌ ཆུ༌གུན༌ནའང༌ ཁྲག༌ག༌ གྱུར༌།
REV 16:5 ཡང༌ ངའེ༌ ཆུ༌གུན༌ནི༌ཀ༌ ཝང༌ཆ༌ ཡོད༌ཁན༌ནི༌ ཕོ༌ཉ༌བོའེ༌ ཟེར༌ཨིན༌ ཚོར༌, “ཉེ༌རང༌ངི༌ ཁྲིམས༌ཅད༌གུན༌ ཀྲང༌པོ༌ ཨིན༌། ཉེ༌རང༌ ཞུགས༌ཏེ༌ ཡོད༌, ཡང༌ ཞུགས༌ཏེ༌ ཡོད༌པིན༌, ཡང༌ ཉེ༌རང༌ ཏམ༌པ༌ ཞུགས༌ཏེ༌ ཨིན༌, ཅིའ༌ཞུ༌ན༌ ཉེ༌རང༌ངི༌ འོས༌པའེ༌ ཁྲིམས༌ཅད༌གུན༌ ཛད༌ཏེ༌ ཨིན༌ནོག༌།
REV 16:6 ཁོང༌གུན༌ནི༌ དཀོན༌མཆོག༌གི༌ མི༌ དང༌ ལུང༌སྟོན༌པ༌ གུན༌ནི༌ ཁྲག༌ ཕོས༌ པ༌སང༌, ཉེ༌རང༌ངི༌ ཁོང༌གུན༌ལ༌ ཁྲག༌ ཐུང༌ང༌ སལས༌, ཀ༌བོ༌ འོས༌པ༌ ཨིན༌།”
REV 16:7 ཏེ༌ནེ༌ ངའེ༌ ཆོད༌ཁྲི༌ ཀ༌ནེ༌ སྐད༌ཅིག༌གི༌, “ཀྱེ༌ གཙོ༌བོ༌ དཀོན༌མཆོག༌ ཀུན༌ཝང༌ དེན༌བའ༌ ཉེ༌རང༌ངི༌ ཁྲིམས༌ཅད༌གུན༌ འོས༌པ༌ དང༌ ཀྲང༌པོ༌ ཨིན༌ནོག༌” མོལ༌ཨིན༌ ཚོར༌།
REV 16:8 ཏེ༌ནེ༌ ཕོ༌ཉ༌ ཞི༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ཉི༌མའེ༌ཀ༌ ཕོས༌ པ༌སང༌, ཏེ༌བོའེ༌ ཚད༌པོའེ༌ མི༌ཚང༌མ༌ མེའ༌ ཚིག༌ཅུགས༌།
REV 16:9 ཨིན༌ནའང༌ ཏེ༌ ཚད༌དི༌ ཚིག༌ཁན༌ ཚང༌མའེ༌, ཁོ༌རང༌ངི༌ སྡིག༌པ༌གུན༌ནི༌ཀ༌ གྱོད༌པ༌ ཅོས༌ཏེ༌ འི༌ རྡུག༌ངལ༌ ཚང༌མའེ༌ཀ༌ ཝང༌ཆ༌ ཡོད༌ཁན༌ནི༌ དཀོན༌མཆོག༌ག༌ རྩི༌ཝ༌ མ༌ཅོའ༌, ཁོང༌ངི༌ ཚན༌བོའ༌ རྔན༌ ཏབ༌དུག༌།
REV 16:10 ཏེ༌ནེ༌ ཕོ༌ཉ༌ ལྔ༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ཇིགས༌ནང༌ཅན༌ནི༌ སེམས༌ཅན༌ནི༌ ཁྲིས༌སི༌ཀ༌ ལུགས༌ཏངས༌པ༌ ཁོའེ༌ གྱལ༌སྲིད༌ གང༌པོ༌ མུན༌གྲིག༌གི༌ ཀབས༌ ཏངས༌། ཁོའེ༌ ཁའ༌ཉན༌ཁན༌གུན༌ནི༌ ཟུག༌ཟེར༌ ཆེན༌མོ༌ ཡོང༌ཅེས༌པོའེ༌, རང༌ངི༌ ལྕེ༌གུན༌ལ༌ སོ༌ག༌ ཏབས༌།
REV 16:11 ཡང༌ ཁོང༌གུན༌ལ༌ རྡུག༌ངལ༌ ཆེན༌མོ༌ དང༌ ཆུར༌གང༌ ཡོད༌ཅེས༌པོའེ༌, ཁོང༌གུན༌ནི༌ ནམ༌ཁའ༌ ཞུགས༌ཁན༌ནི༌ དཀོན༌མཆོག༌ག༌ རྔན༌ ཏབས༌, ཨིན༌ནའང༌ ཁོང༌རང༌གུན༌ནི༌ ལས༌ ངན༌པ༌གུན༌ནི༌ཀ༌ གྱོད༌པ༌ ཅོས༌ཏེ༌ དཀོན༌མཆོག༌ ཆོགས༌ལ༌ སེམ༌ མ༌གྱུརས༌།
REV 16:12 ཏེ༌ནེ༌ ཕོ༌ཉ༌ དྲུག༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ཡུཕ༌རེ༌ཀྲས༌སི༌ ལྩངས༌པོ༌ ཆེན༌མོའེ༌ ནང༌ང༌ ཕོས༌ པ༌སང༌, ལྩངས༌པོ༌བོ༌ སྐམས༌, ཏེ༌བོའེ༌ ཞས༌ཏེ༌ ཤར༌ ཆོགས༌སི༌ གྱལ༌པོ༌གུན༌ལ༌ ཁོ༌རང༌གུན༌ནི༌ མག༌མི༌གུན༌ སྒག༌སྐྱིལ༌ མེད༌པ༌, ལྷོ༌ ཆོགས༌ལ༌ ཁྱོང༌ཉན༌།
REV 16:13 ཡང༌ ངའེ༌ བྲུག༌, ཇིགས༌ནང༌ཅན༌ནི༌ སེམས༌ཅན༌ དང༌ ཟུས༌མའེ༌ ལུང༌སྟོན༌པ༌ སུམ༌ཀོའེ༌ ཁའ༌ནེ༌ བལ༌པ༌ ཙོགས༌སི༌ ཚི༌ཏུ༌ སེམས༌ཉིད༌གུན༌ བིང༌ཨིན༌ ཐོང༌།
REV 16:14 ཏེ༌གུན༌ ཧ༌ལས༌ཤེས༌སི༌ སྟགས༌གུན༌ སྟན༌ཅེས༌ལ༌ ཁྱུད༌ ཡོད༌ཁན༌ནི༌ རྡུད༌གུན༌ནི༌ སེམ༌ཉིད༌གུན༌ ཨིན༌ནོག༌, ཡང༌ ཏེ༌གུན༌ ཇིག༌རྟེན༌ནི༌ཀ༌ གྱལ༌པོ༌ ཚང༌མ༌ ཡོད༌ས༌ སོང༌ཏེ༌ གཙོ༌བོ༌ དཀོན༌མཆོག༌གི༌ གྱབ༌གལ༌ལ༌ དཀོན༌མཆོག༌ ཀུན༌ཝང༌ངི༌ ཀྲག༌པོ༌ ཁྲིམས༌ཅད༌དི༌ ཞག༌ག༌, མག༌ ཏང༌ཅེས༌ལ༌ ཛོམ༌ཅུགས༌།
REV 16:15 ཁོང༌གུན༌ནི༌ གྱལ༌པོ༌ ཚང༌མ༌ ཨིབ༌རི༌པའེ༌ སྐད༌དི༌ ནང༌ང༌ ཨར༌མ༌གེ༌དོན༌ ཟེར༌ཁན༌ནི༌ ནས༌ས༌བོའེ༌ཀ༌ ཛོམ༌ཅུགས༌། གཙོ༌བོ༌ ཡེ༌ཤུའི༌ མོལས༌ “ལྟོས༌ཤིག༌, ང༌ ཧུན༌མེད༌ལ༌ རྐུན༌མ༌ ཙོགས༌ལ༌ ཡོང༌ ཟ༌ནེ༌, ལྗེར༌ཉལ༌ལ༌ ཁྲེལ༌བ༌ མི༌ཆ༌ཅེས༌སི༌ ཕིའ༌, ཤང༌ ཅོས༌ཏེ༌ ཀོས༌ལག༌ གྲལ༌གྲིག༌ བོར༌ཁན༌གུན༌ ཅིན༌ལབས༌ཅན༌ ཨིན༌།”
REV 16:17 ཡང༌ ཕོ༌ཉ༌ རྡུན༌པའེ༌ གོར༌མོའེ༌ ནང༌ང༌ ཡོད༌ཁན༌བོ༌ ལུངས༌པོའེ༌ ནང༌ང༌ ཕོས༌པ༌, ཆོད༌ཁང༌ངི༌ ནང༌ནེ༌ དཀོན༌མཆོག༌གི༌ ཞུགས༌ཁྲིས༌སི༌ ཀ༌ནེ༌ སྐད༌ ཆེན༌མོ༌ཞིག༌ ཇུངས༌ཏེ༌ མོལས༌, “ཏ༌ གྲུབ༌ ཚར༌།”
REV 16:18 ཏེ༌ནེ༌ སྐམ༌ལག༌གི༌ འོད༌, བྲུག༌ལྡིར༌ཁན༌ནི༌ སྐད༌ ཡང༌ ཏེ༌ཟུག༌ སང༌གུལ༌ ཇིགས༌པ༌ཞིག༌ ཇིག༌རྟེན༌ནི༌ཀ༌ ཡོངས༌, ཀ༌བོ༌ འི༌ ཇིག༌རྟེན༌ནི༌ཀ༌ མི༌ ཛད༌པ༌ནེ༌ ཕར༌ལ༌ དག༌ས༌ ཚོག༌པ༌ མ༌ནེ༌ མ༌ཡོངས༌ཁན༌ཞིག༌།
REV 16:19 མིང༌ཅན༌ནི༌ བ༌བེ༌ལོན༌ནི༌ གྱལ༌ས༌བོ༌ པོ༌སུམ༌མ༌ བུད༌, ཡང༌ གྱལ༌ཁམས༌ ཚང༌མའེ༌ གྱལ༌ས༌གུན༌ནའང༌ རྡིབས༌ཏེ༌ སོང༌། དཀོན༌མཆོག༌གི༌ བ༌བེ༌ལོན༌པ༌གུན༌ནི༌ སྡིག༌པ༌གུན༌ རྗེད༌ མ༌རྗེད༌ པ༌སང༌, ཁོང༌ངི༌ ཁོང༌གུན༌ལ༌ ཁོང༌ངི༌ མའ༌ ཐུགས༌སྲོ༌ སྲན༌ཏྲེ༌ ཆང༌ངི༌ གངས༌ཏེ༌ ཡོད༌ཁན༌ནི༌ དོན༌སྐྱོག༌པོ༌ ཐུང༌ ཅུག༌ག༌ ཛདས༌།
REV 16:20 ཡང༌ སང༌གུལ༌ལི༌ ཞས༌ཏེ༌ ཚོ༌ལིང༌ ༼ཡང༌ན༌ ཆུའི༌ སྐོར༌ཏེ༌ ཡོད༌ཁན༌ནི༌ ས༌ཆ༌༽ ཚང༌མ༌ ཚོའེ༌ ནང༌ང༌ ནུབ༌ཏེ༌ སོང༌, ཡང༌ རི༌གུན༌ སྟོར༌ཏེ༌ མ༌ནེ༌ མ༌ཐོང༌།
REV 16:21 སེར༌ར༌རུ༌ རེ༌རེ༌ ཧ༌ལམ༌ ཀྱི༌ལོ༌ 45 ལྕིན༌ཏྲེ༌ ཡོད༌ཁན༌, ནམ༌ནེ༌ མི༌གུན༌ནི༌ཀ༌ བབས༌། ཏེ༌ སེར༌ར༌རུའི༌ ཇིགས༌ནང༌ཅན༌ནི༌ རྡུག༌ངལ༌ ཐོང༌ཅེས༌པོའེ༌ ཁོང༌གུན༌ནི༌ དཀོན༌མཆོག༌ག༌ རྔན༌ ཏབས༌།
REV 17:1 གོར༌མོ༌ ཡོད༌ཁན༌ནི༌ ཕོ༌ཉ༌ རྡུན༌ནི༌ ཕྲོ༌ནེ༌ ཅིག༌ ང༌ ཡོད༌ས༌ སྐྱོད༌ཏེ༌ མོལས༌, “འི༌རུ༌ ཡོང༌, ལྩངས༌པོ༌ མང༌པོའེ༌ ཐའ༌མ༌ ཆགས༌ཏེ༌ ཡོད༌ཁན༌ནི༌ མིང༌ཅན༌ བུ༌མོ༌ ཟུགས༌ཙོང༌མའ༌ ཆད༌པ༌ ཕོག༌ཅེས༌པོ༌ ཁྱོ༌རང༌ང༌ ངའེ༌ སྟན༌ཨིན༌།
REV 17:2 ཇིག༌རྟེན༌ནི༌ གྱལ༌པོ༌ ཚང༌མའེ༌, ཏེ༌ བུ༌མོ༌ ཉམ༌པོ༌ ལུས༌བྲེལ༌ ངན༌པ༌ ཅོས༌, ཡང༌ ར༌རོས༌ཁན༌ཞིག༌, སམ༌བ༌ མེད༌ཁན༌ གྱུར༌ར༌ ཙོགས༌ལ༌ ཇིག༌རྟེན༌པ༌ ཏད༌པ༌ མེད༌ཁན༌གུན༌, ཏེ༌ བུ༌མོའེ༌ སྕོད༌པ༌ ངན༌པའེ༌ སྟིང༌རང༌ནེ༌ སོང༌།”
REV 17:3 སེམས༌ཉིད༌དི༌ ནང༌ང༌ ངའ༌ ཏེ༌ ཕོ༌ཉ༌བོའེ༌ རི༌སྟོང༌ཞིག༌ག༌ ཁྲིད༌ཏེ༌ ཁྱེར༌ར༌ ཛདས༌། ཏེ༌རུ༌ ང༌ ཇིགས༌ནང༌ཅན༌ནི༌ སེམས༌ཅན༌ མར༌པོ༌ཞིག༌ག༌ ཞོན༌ཁན༌ནི༌ བུ༌མོ༌ཞིག༌ ཐོང༌, ཏེ༌ སེམས༌ཅན༌བོའ༌ གོ༌ རྡུན༌ དང༌ རཱ༌ཅོ༌ རྕུ༌ དུག༌, ཡང༌ ཟུགས༌པོ༌ གང༌པོའེ༌ཀ༌ དཀོན༌མཆོག༌ག༌ དད༌ལོག༌ ཞུ༌ཁན༌ནི༌ མིང༌གུན༌ བྲིས༌ཏེ༌ དུག༌།
REV 17:4 ཏེ༌ བུ༌མོའེ༌ མར༌པོ༌ དང༌ སྔོན༌པོ༌ དོག༌གི༌ ཀོས༌ མ༌ ལྡེ༌མོ༌ གོན༌ཏེ༌ སེར༌, མུ༌ཏིག༌, རིན༌ཅན༌ ཁྲ༌རྡོ༌ ཡོད༌ཁན༌ནི༌ གྱན༌ཆ༌ ཏགས༌ཏེ༌ ལག༌པའེ༌ ནང༌ང༌ ཁོའེ༌ ལུས༌བྲེལ༌ ངན༌པའེ༌ ཁམ༌ལོག༌ དང༌ ཚི༌ཏུ༌ ལས༌གུན༌ གངས༌ཏེ༌ ཡོད༌ཁན༌ནི༌ སེར༌རི༌ ཀོ༌རེ༌ ཁུར༌ཏེ༌ དུག༌།
REV 17:5 ཏེ༌ བུ༌མོའེ༌ ཐོད༌པའེ༌ཀ༌ ཧ༌གོ༌ཅེས༌ལ༌ མ༌ ཀགས༌པོ༌ ཡོད༌ཁན༌ནི༌, མིང༌ཞིག༌ བྲིས༌ཏེ༌ དུག༌། ཏེ༌བོ༌ ནི༌, “མིང༌ཅན༌ བ༌བེ༌ལོན༌ནི༌ གྱལ༌ས༌ ཇིགས༌པོ༌བོ༌ ནི༌ ཟུགས༌ཙོང༌མ༌ བུ༌མོ༌གུན༌ དང༌ ཇིག༌རྟེན༌པ༌གུན༌ནི༌ ཁམ༌ལོག༌
REV 17:6 ངའེ༌ ཐོང༌, ཏེ༌ བུ༌མོ༌བོ༌ དཀོན༌མཆོག༌གི༌ མི༌གུན༌ནི༌ ཁྲག༌ ཐུངས༌ཏེ༌ ར༌རོས༌ཏེ༌ དུག༌, ཀ༌གུན༌ ཡེ༌ཤུའི༌ སྤང༌པོ༌ ཏང༌ཅེས༌པོའེ༌ སད༌ཏེ༌ ཨིན༌པིན༌། ཏེ༌བོ༌ ཐོང༌ཏེ༌ ངའ༌ ཧ༌ལས༌ ཡང༌ ཧན༌གྲང༌ སོང༌།
REV 17:7 ཕོ༌ཉའེ༌ ང༌ མོལས༌, “ཁྱོ༌རང༌ ཅིའ༌ ཧ༌ལས༌ཏེ༌ ཧན༌གྲང༌ ཆད༌? ངའེ༌ ཁྱོ༌རང༌ང༌ ཏེ༌ བུ༌མོ༌བོ༌ དང༌ ཁོ༌ ཞོན༌ཏེ༌ ཡོད༌ཁན༌ནི༌ གོ༌ རྡུན༌ དང༌ རཱ༌ཅོ༌ རྕུ༌ ཡོད༌ཁན༌ནི༌ ཇིགས༌ནང༌ཅན༌ནི༌ སེམས༌ཅན༌ ཉིས༌ཀོའེ༌ སང༌ཝ༌བོ༌ ཧ༌གོ༌ཅུག༌ཨིན༌།
REV 17:8 ཁྱོ༌རང༌ངི༌ ཐོང༌ཁན༌ ཇིགས༌ནང༌ཅན༌ནི༌ སེམས༌ཅན༌བོ༌ སྔུན༌མ༌ཞིག༌ སོན༌ཏེའ༌ ཡོད༌པིན༌, དག༌ས༌ མེད༌ཏེ༌ ཨིན༌ནོག༌, ཨིན༌ནའང༌ ཁོ༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ནང༌ནེ༌ བིང༌ཨིན༌, ཡང༌ དཀོན༌མཆོག༌གི༌ ཁོ༌ ཏུས༌གྱུན༌ནི༌ ཕིའ༌ ཁྲེས༌ཏོར༌ ཛད༌ཨིན༌། ཇིག༌རྟེན༌ མ༌ཆགས༌སི༌ སང༌ སྔུན༌ལ༌, ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ང༌ མིང༌ བྲིས༌ཏེ༌ མེད༌ཁན༌ ཇིག༌རྟེན༌པ༌གུན༌ནི༌ ཏེ༌ ཇིགས༌ནང༌ཅན༌ནི༌ སེམས༌ཅན༌བོ༌ ཐོང༌ང༌ཅིག༌ ཧ༌ལས༌ཨིན༌, ཅིའ༌ཟེར༌ན༌ ཁོ༌ སྔུན༌མ༌ཞིག༌ ཡོད༌པིན༌, དག༌ས༌ མེད༌ཏེ༌ ཨིན༌ནོག༌, ཨིན༌ནའང༌ ཡང༌སྐྱར༌ ཡོང༌ཨིན༌།”
REV 17:9 ཕོ༌ཉའེ༌ ཏ༌རུང༌ངའང༌ མོལས༌, “འི༌གུན༌ ཧ༌གོ༌ཅེས༌ལ༌ ཁྱོ༌ཞ༌གུན༌ ཤེས༌རབས༌ཅན༌ རིག༌ ཡོང༌གོས༌: ཇིགས༌ནང༌ཅན༌ནི༌ སེམས༌ཅན༌ནི༌ གོ༌ རྡུན༌ཀོ༌ ནི༌ རི༌ ཆུ༌ངུན༌ རྡུན༌ ཨིན༌ནོག༌, ཀ༌བོའེ༌ཀ༌ ཏེ༌ བུ༌མོ༌བོ༌ དུགས༌ཏེ༌ ཝང༌སྲུལ༌ལད༌། ཏེ༌ གོ༌ རྡུན༌ཀོ༌ ནི༌ གྱལ༌པོ༌ རྡུན༌ནའང༌ ཨིན༌ནོག༌།
REV 17:10 གྱལ༌པོ༌ ལྔ༌བོ༌ ཤི༌ཏེ༌ དྲུག༌པ༌བོའེ༌ ཝང༌སྲུལ༌ཨིན༌ ཨིན༌ནོག༌, ཡང༌ རྡུན༌པ༌བོ༌ ནི༌ བིང༌ཅེས༌ ཨིན༌ནོག༌། ཨིན༌ནའང༌ ཁོའེ༌ ཝང༌སྲུལ༌ཅེས༌སི༌ ཏུས༌པོ༌ ཉུ༌ངུན༌ཞིག༌ མ༌ནེ༌ མི༌ཡོང༌།
REV 17:11 སྔུན༌མ༌ཞིག༌ སོན༌ཏེའ༌ ཡོད༌ཁན༌ ཇིགས༌ནང༌ཅན༌ནི༌ སེམས༌ཅན༌ མར༌པོ༌, ཨིན༌ནའང༌ དག༌ས༌ མེད༌ཁན༌བོ༌ ནི༌ གྱལ༌པོ༌ རྒྱད༌པ༌བོ༌ ཨིན༌ནོག༌། ཁོའེ༌ ཞན༌ རྡུན༌ཀོ༌ ཙོགས༌ལ༌ ཝང༌སྲུལ༌ཨིན༌, ཨིན༌ནའང༌ དཀོན༌མཆོག༌གི༌ ཁོའང༌ ཁྲེས༌ཏོར༌ ཅོའ༌ ཛད༌ཨིན༌།
REV 17:12 ཁྱོ༌རང༌ང༌ ཐོང༌ཁན༌ནི༌ རཱ༌ཅོ༌ རྕུ༌བོ༌ ནི༌ ཏ༌རུང༌ ཚོག༌པ༌ ཝང༌ མ༌སྲུལ༌ཁན༌ནི༌ གྱལ༌པོ༌ རྕུ༌ ཨིན༌ནོག༌། ཡང༌ ཏེ༌གུན༌ལ༌ ཇིགས༌ནང༌ཅན༌ནི༌ སེམས༌ཅན༌ ཉམ༌པོ༌ ཏུས༌ ཉུ༌ངུན༌ཞིག༌གི༌ ཕིའ༌ ཝང༌སྲུལ༌ཅེས༌ལ༌ ཝང༌ཆ༌ ཏང༌ཨིན༌།
REV 17:13 ཏེ༌ གྱལ༌པོ༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ལ༌ ཁོ༌རང༌གུན༌ནི༌ ཁྱུད༌ དང༌ ཝང༌ཆ༌ གུན༌ ཏང༌ཅེས༌ལ༌ ཁའ༌ཆམས༌ཨིན༌།”
REV 17:14 ཇིགས༌ནང༌ཅན༌ནི༌ སེམས༌ཅན༌ དང༌ གྱལ༌པོ༌ རྕུ༌ཀོའེ༌ ལུ༌གུ༌ ཉམ༌པོ༌ མག༌ ཏང༌ཨིན༌, ཨིན༌ནའང༌ ལུ༌གུའ༌ ཏེ༌གུན༌ནི༌ཀ༌ གྱལ༌ཁའ༌ ཐོབ༌ཨིན༌། ཅིའ༌ཟེར༌ན༌ ཁོང༌ ནི༌ གཙོ༌བོ༌གུན༌ནི༌ གཙོ༌བོ༌ དང༌ གྱལ༌པོ༌གུན༌ནི༌ གྱལ༌པོ༌ ཞུགས༌ཏེ༌ ཨིན༌ནོག༌། ཁོང༌ངི༌ བོད༌ད༌ ཛད༌ཏེ༌ ལྡམ༌མ༌ ཛད༌ཏེ༌ ཁོང༌ངི༌ ནང༌ང༌ ཨིད༌ཤེས༌ ཅོ༌ཁན༌གུན༌ ཁོང༌ ཉམ༌པོ༌ དུག༌ཨིན༌།
REV 17:15 ཏེ༌ནེ༌ ཏེ༌ ཕོ༌ཉ༌བོའེ༌ ངའ༌ མོལ༌ལ༌རག༌, “ཏེ༌ ཟུགས༌ཙོང༌མ༌ དུགས༌ཏེ༌ ཡོད༌ཁན༌ནི༌ ལྩངས༌པོ༌གུན༌ ནི༌ མི༌གུན༌, མི༌ཚོགས༌གུན༌, གྱལ༌ཁམས༌གུན༌ དང༌ སྐད༌རིགས༌གུན༌ ཨིན༌ནོག༌།
REV 17:16 རཱ༌ཅོ༌ རྕུ༌ དང༌ ཇིགས༌ནང༌ཅན༌ནི༌ སེམས༌ཅན༌ནི༌, ཏེ༌ ཟུགས༌ཙོང༌མའ༌ ནཕ༌རད༌ ཅོ༌ཨིན༌། ཁོང༌གུན༌ནི༌ ཁོའེ༌ ཀ༌ནེ༌ ཅི༌ཚང༌མ༌ ཀོགས༌ཏེ༌ ཁོ༌ ལྗེར༌ཉལ༌ ཅོ༌ཨིན༌, ཡང༌ ཁོའེ༌ ཤ༌གུན༌ ཟོས༌ཏེ༌ ལག༌ལུས༌གུན༌ མེའ༌ སྲག༌ཨིན༌།
REV 17:17 དཀོན༌མཆོག༌གི༌ ཐུགས༌ཐད༌པོ༌ གྲུབ༌ཅེས༌ལ༌, ཁོང༌ངི༌ ཏེ༌ ཝང༌སྲུལ༌པ༌གུན༌ནི༌ སྙིང༌ངི༌ ནང༌ང༌ ཐབ༌ཤིག༌ ལྡིང༌ང༌ ཛདས༌། དཀོན༌མཆོག༌གི༌ བཀའ༌གུན༌ དྲན༌དྲ༌ གྲུབ༌ཅེས༌སི༌ ཕིའ༌ ཁོང༌གུན༌ནི༌ ཝང༌ཆ༌གུན༌ ཇིགས༌ནང༌ཅན༌ནི༌ སེམས༌ཅན༌བོའ༌ ཏང༌ཅེས༌ལ༌ ཁའ༌ཆམས༌ ཅུག༌ག༌ ཛད༌ཨིན༌།
REV 17:18 ཡང༌ ཁྱོ༌རང༌ངི༌ ཐོང༌ཁན༌ནི༌ བུ༌མོ༌བོ༌ ནི༌ ཇིག༌རྟེན༌ནི༌ གྱལ༌པོ༌གུན༌ནི༌ཀ༌ ཝང༌སྲུལ༌ཨིན༌ ཡོད༌ཁན༌ནི༌ གྱལ༌ས༌ ཇིགས༌པོ༌བོ༌ ཨིན༌ནོག༌།”
REV 18:1 ཏེ༌ སྟིང༌ནེ༌ ངའེ༌ ཡང༌ ཕོ༌ཉ༌ཞིག༌ མ༌ ཝང༌ ཆེན༌མོ༌ ཉམ༌པོ༌ ནམ༌ཁའ༌ནེ༌ བབས༌ཨིན༌ ཐོང༌, ཡང༌ ཁོང༌ངི༌ ལྡངས༌སི༌ ཇིག༌རྟེན༌ གང༌པོ༌ འོད༌དི༌ གང༌།
REV 18:2 ཏེ༌ ཕོ༌ཉ༌བོའེ༌ ཀུ༌ཅོ༌ སྲན༌ཏྲེ༌ སལ༌ཨིན༌ མོལས༌, “མིང༌ཅན༌ བ༌བེ༌ལོན༌ནི༌ གྱལ༌ས༌བོ༌ ཁྲེས༌ཏོར༌ སོང༌ཏེ༌ ཏེ༌བོ༌ རྡུད༌གུན༌ དུག༌སའེ༌ ནས༌ས༌, གོང༌ཞུགས༌གུན༌ནི༌ བྲང༌ས༌ ཡང༌ ཚི༌ཏུ༌ དང༌ ཁམ༌ལོག༌ ཅ༌གུན༌ནི༌ ཚངས༌ གྱུར༌།
REV 18:3 ཇིག༌རྟེན༌པ༌ ཚང༌མ༌ ཏེ༌ བུ༌མོའེ༌ ལུས༌བྲེལ༌ ངན༌པའེ༌ ཆང༌ ཐུངས༌ཏེ༌ ར༌རོས༌ཏེ༌ དུག༌། ཇིག༌རྟེན༌ནི༌ གྱལ༌པོ༌ ཚང༌མའེ༌, ཏེ༌ བུ༌མོ༌ ཉམ༌པོ༌ ལུས༌བྲེལ༌ ངན༌པ༌ བོརས༌། ཡང༌ ཏེ༌ བུ༌མོའེ༌ གྱུ༌ནོར༌ མང༌པོའེ༌ ཝང༌བོའེ༌, ཇིག༌རྟེན༌ནི༌ ཚོང༌པ༌གུན༌ ཆུག༌པོ༌ གྱུར༌།”
REV 18:4 ཏེ༌ནེ༌ ང༌ ནམ༌ཁའ༌ནེ༌ ཡང༌ སུང༌སྐད༌ཅིག༌གི༌ མོལ༌ཨིན༌ ཚོར༌, “ངའེ༌ མི༌གུན༌, ཏེ༌ བུ༌མོའེ༌ སྡིག༌པའེ༌ ནང༌ང༌ དྲེས༌ མི༌དྲེས༌ཤེས༌སི༌ ཕིའ༌, ཏེ༌ གྱལ༌སའེ༌ ནང༌ནེ༌ བིང༌ཏེ༌ ཡོང༌ཤིག༌, ཏེ༌ མ༌ནེ༌ ཁྱོ༌ཞ༌གུན༌ནའང༌, ཏེ༌ བུ༌མོ༌ ཉམ༌པོ༌ ཆད༌པ༌ ཕོག༌ཨིན༌།
REV 18:5 ཅིའ༌ཟེར༌ན༌ ཏེ༌ བུ༌མོའེ༌ སྡིག༌པ༌གུན༌ མང༌པོ༌ སོང༌ཏེ༌ ནམ༌ཁའ༌ ཚོག༌པའང༌ ལེབས༌ཏེ༌ ཨིན༌ནོག༌། ཡང༌ དཀོན༌མཆོག༌གི༌ ཁོའེ༌ ལས༌ ངན༌པ༌གུན༌ རྗེད༌ད༌ མ༌ཛདས༌།
REV 18:6 ཁོའེ༌ ཞན༌མ༌གུན༌ལ༌ ངན༌པ༌ ཅོ༌ཁན༌ ཙོགས༌, ཁོ༌ ཉམ༌པོ༌ ཅོས༌། ཁོའེ༌ ཅོ༌ཁན༌ནི༌ ཉི༌ལྡབ༌བོ༌ ཁོ༌ ཉམ༌པོ༌ ཅོས༌། ཡང༌ ཁོའེ༌ ནགས༌སི༌ ཀོ༌རེ༌ ཐུང༌ཅུག༌ཁན༌བོ༌ ཉི༌ལྡབ༌ ཅོས༌ཏེ༌ ཁོའ༌ ཐུང༌ཅུག༌།
REV 18:7 ཏེ༌ བུ༌མོའེ༌ ཁོ༌རང༌ང༌ སྤལ༌ དང༌ གྱུ༌ནོར༌ ཐོབ༌ཁན༌ དྲན༌དྲ༌ ཁོའ༌ བར༌དོ༌ དང༌ རྡུག༌ངལ༌ ཏོང༌, ཅིའ༌ཟེར༌ན༌ ཏེ༌ བུ༌མོའེ༌ ཁོ༌རང༌ངི༌ སྙིང༌ངི༌ ནང༌ང༌ ཕོ༌སོ༌ ཅོས༌ཏེ༌, ‘ང༌ ནི༌ གྱལ༌མོ༌ ཁྲིས༌སི༌ཀ༌ དུགས༌ཏེ༌ ཨིན༌། ང༌ ནི༌ ཨ༌ནེ༌མ༌རང༌མོ༌ མན༌, ཡང༌ ངའ༌ མ༌ནེ༌ ཚེར༌ཁ༌ ཅོ༌ མི༌གོས༌’ ཟེར༌དུག༌།
REV 18:8 ཏེན༌ན༌བོའེ༌ཕིའ༌ ཞག༌ཅིག༌གི༌ ནང༌ང༌ ངའེ༌ ཏེ༌ གྱལ༌སའེ༌ མི༌གུན༌ལ༌ ཟུ༌མོ༌, ཤི༌ཅེས༌, སེམས༌ཚེར༌ དང༌ མུ༌གེ༌ གུན༌ནི༌ ཆད༌པ༌ ཕབ༌ཨིན༌། མེ༌ ཏེ༌ གྱལ༌ས༌བོ༌ སྲག༌ ཏང༌ཨིན༌, ཅིའ༌ཟེར༌ན༌ ཏེ༌ གྱལ༌སའ༌, ཁྲིམས༌ཅད༌ སལ༌ཁན༌ནི༌ གཙོ༌བོ༌ དཀོན༌མཆོག༌ ནི༌ སྟོབས༌ཅན༌ ཨིན༌།”
REV 18:9 ཏེ༌ བུ༌མོ༌ ཉམ༌པོ༌ ལུས༌བྲེལ༌ ངན༌པ༌ དང༌ ཁོའེ༌ གྱུ༌ནོར༌གུན༌ནི༌ཀ༌ ཐད༌པོ༌ ཅོ༌ཁན༌ནི༌ ཇིག༌རྟེན༌ནི༌ གྱལ༌པོ༌གུན༌ནི༌, བ༌བེ༌ལོན༌ནི༌ ཏུད༌པ༌ བིང༌ཨིན༌ ཐོངས༌ཏེ༌ ཁོའེ༌ ཕིའ༌ ཉ༌ངན༌ ཅོས༌ཏེ༌ ངུ༌ཨིན༌།
REV 18:10 ཏེ༌གུན༌ནི༌ ཏེ༌ བུ༌མོ༌བོའེ༌ ཆད༌པ༌ སྲན༌ཏྲེ༌བོ༌ ཐོང༌ཏེ༌ ཇིགས༌ཏེ༌ ཐག༌རིང༌ང༌ དུགས༌ཏེ༌ ངུ༌ཨིན༌ཞིག༌ ཟེརས༌, “ཝ༌ ཀྲག༌པོ༌ གྱལ༌ས༌ ཙམ༌ཤིག༌གི༌ ཇིགས༌ནང༌ ཇིགས༌ནང༌, བ༌བེ༌ལོན༌ གྱལ༌ས༌ ཇིགས༌པོ༌, ཏུས༌ མ༌ ཉུ༌ངུན༌ཞིག༌གི༌ ནང༌ང༌ དཀོན༌མཆོག༌གི༌ ཁྱོ༌རང༌ང༌ ཆད༌པ༌ སལས༌།”
REV 18:11 ཇིག༌རྟེན༌ནི༌ ཚོང༌པ༌གུན༌ནིའང༌ བ༌བེ༌ལོན༌ནི༌ ཕིའ༌ ངུ༌ཨིན༌, ཚེར༌ཁ༌ ཅོ༌ཨིན༌, ཅིའ༌ཟེར༌ན༌ ཏ༌ནེ༌ཕར༌ལ༌ ཁོང༌གུན༌ནི༌ ཅ༌ལག༌ ཉོ༌ཁན༌ སུ༌ཞིག༌གའང༌ མི༌ལུས༌།
REV 18:12 སྤེར༌ན༌ སེར༌, མུལ༌, ཁྲ༌རྡོ༌ རིན༌ཅན༌, མུ༌ཏིག༌, རིན༌ཅན༌ གྱལ༌པོ༌གུན༌ནི༌ ཀོས༌ དང༌ ཀོ༌ཤེན༌, ཏྲི༌ཞིམ༌ ཤིང༌ངི༌ རིགས༌ ཚང༌མ༌, ལང༌པོ༌ཆེ༌ སོའ༌ ཅོ༌ཁན༌ནི༌ ཅ༌ལག༌གུན༌, རིན༌ཅན༌ ཤིང༌གུན༌, ར༌གན༌, ལྕགས༌ དང༌ རྡོའ༌ ཀ༌མ༌རུ༌,
REV 18:13 ཡང༌ དལ༌ཅི༌ནི༌, ཚ༌མིག༌, སྤོས༌, མའེར༌ ཏྲི༌ཞིམ༌ཅན༌ནི༌ མར༌, ཕརང༌ཀེན༌སེནས༌ ཏྲི༌ཞིམ༌ཅན༌ནི༌ སྤོས༌, རྒུན༌ཆང༌ དང༌ ཨོ༌ལིཝ༌ཝི༌ མར༌ནག༌, མེ༌ད༌ དང༌ ཀྲོའེ༌ཕེ༌, བ༌ལང༌, ལུག༌, རྟ༌ དང༌ ཤིང༌རྟ༌ གུན༌ དང༌, ཚེ༌ཡོག༌གུན༌, འི༌ ཚང༌མ༌ གྱལ༌སའེ༌ ནང༌ང༌ ཉོབ༌ཚོང༌ ཏང༌ཅེས༌སི༌ ཕིའ༌ ཁྱོང༌ངད༌པིན༌།
REV 18:14 ཡང༌ ཚོང༌པ༌གུན༌ནི༌ ཏ༌རུང༌ངའང༌ སྐད༌ ཆེན༌མོ༌ ཉམ༌པོ༌ ཟེརས༌, “ཝ༌ བ༌བེ༌ལོན༌, ཁྱོ༌རང༌ངི༌ དོད༌པ༌ ཅོ༌ཁན༌ནི༌ ཤིང༌ཏོག༌གུན༌ མེད༌ཁན༌ སོང༌ཏེ༌ ཨིན༌ནོག༌། ཁྱོ༌རང༌ངི༌ ཆུག༌ངོམས༌ དང༌ གྱུ༌ནོར༌ ཚང༌མ༌ སྟོར༌ ཡང༌ ལོགས༌ཏེ༌ མ༌ནེ༌ མི༌ཐོབ༌།”
REV 18:15 ཏེ༌ གྱལ༌སའེ༌ ནང༌ང༌ ཚོང༌ ཏངས༌ཏེ༌ ཆུག༌པོ༌ གྱུར༌ཁན༌ ཚོང༌པ༌གུན༌, ཇིགས༌ནང༌ཅན༌ནི༌ ཏེ༌ གྱལ༌སའེ༌ ཆད༌པའ༌ ཇིགས༌ པ༌སང༌ ཐག༌རིང༌ང༌ དུགས༌ཏེ༌ ངུ༌ཨིན༌ ཉ༌ངན༌ ཅོ༌ཨིན༌
REV 18:16 ཡང༌ ཚེར༌ཁ༌ ཅོས༌ཏེ༌ ཟེར༌ཨིན༌, “ཝ༌ ཀྲག༌པོ༌ གྱལ༌ས༌ ཙམ༌ཤིག༌གི༌ ཇིགས༌ནང༌ ཇིགས༌ནང༌། ཀོས༌ལག༌ རིན༌ཅན༌ ཀར༌པོ༌, སྔོན༌པོ༌ དང༌ མར༌པོ༌, ཡང༌ སེར༌, རིན༌ཅན༌ ཕྲའེ༌ རིགས༌ དང༌ མུ༌ཏིག༌ ཏགས༌ཁན༌ནི༌ བུ༌མོའེ༌
REV 18:17 གྱུ༌ནོར༌གུན༌ སྲིབ༌ཅིག༌གི༌ ནང༌ང༌, མེད༌ཁན༌ སོང༌།” ཏེ༌ གྲུ༌ཟིང༌གུན༌ནི༌ འུ༌སྐྱོང༌, ཏེ༌ནང༌ང༌ གྲུལ༌ཁན༌ནི༌ མི༌གུན༌, གྲུ༌ཟིང༌ སྲུལ༌ཁན༌ དང༌ ཚོ༌ གྱུད༌ཏེ༌ པེ༌ནེ༌ ཅོ༌ཁན༌ གུན༌, མའ༌ ཐག༌རིང༌ཞིག༌ག༌ ལངས༌ཏེ༌ དུག༌ཨིན༌།
REV 18:18 གྱལ༌ས༌བོ༌ མེའ༌ ཞེན༌ཏེ༌ ཏུད༌པ༌ བིང༌ཨིན༌ ཐོང༌ ཟ༌ནེ༌, ཁོང༌གུན༌ནི༌ ངུ༌ཨིན༌ ཟེར༌ཨིན༌, “འི༌ གྱལ༌ས༌ ཙོགས༌སི༌ ཇིགས༌པོ༌ གྱལ༌ས༌ཞིག༌ མ༌ནེ༌ མེད༌གྲོ༌།”
REV 18:19 ཁོང༌གུན༌ནི༌ ངུ༌ཨིན༌ ཚེར༌ཁ༌ སྟན༌ཅེས༌ལ༌ རང༌ངི༌ གོའེ༌ཀ༌ ཐལ༌བ༌ ཡོགས༌ཏེ༌ ཟེར༌ཨིན༌, “ཝ༌ ཀྲག༌པོ༌ གྱལ༌ས༌ ཙམ༌ཤིག༌གི༌ ཇིགས༌ནང༌ ཇིགས༌ནང༌། གྲུ༌ཟིང༌ངི༌ དག༌པོ༌ ཚང༌མ༌ ཏེ༌ གྱལ༌སའེ༌ གྱུ༌ནོར༌, ཚོ༌ གྱུད༌ཏེ༌ འི༌ངོ༌ འ༌ངོའ༌ སྐྱལ༌ཅེས༌པོའེ༌ ཆུག༌པོ༌ གྱུར༌ཏེ༌ ཨིན༌པིན༌། ཁོའེ༌ ནོར༌གུན༌ སྲིབ༌ཅིག༌གི༌ ནང༌ང༌, མེད༌ཁན༌ ཛདས༌།”
REV 18:20 སྐད༌ཅིག༌གི༌ མོལས༌, “ནམ༌ཁའེ༌ ནང༌ང༌ ཡོད༌ཁན༌གུན༌, ཏེ༌ གྱལ༌ས༌ ཁྲེས༌ཏོར༌ ཆའ༌ཁན༌བོའེ༌ཀ༌ ཐད༌པོ༌ ཅོ༌ཤིག༌། དཀོན༌མཆོག༌གི༌ མི༌གུན༌, སྐུ༌ཚབས༌གུན༌ དང༌ ལུང༌སྟོན༌པ༌གུན༌ ཐད༌པོ༌ ཅོ༌ཤིག༌། ཅིའ༌ཟེར༌ན༌ ཁྱོ༌ཞའ༌ གྱབ༌གལ༌ ཅོ༌ཅེས༌པོའེ༌ དཀོན༌མཆོག༌གི༌ ཁོའ༌ ཁྲིམས༌ཅད༌ ཛད༌ཏེ༌ ཨིན༌ནོག༌།”
REV 18:21 ཏེ༌ནེ༌ ཕོ༌ཉ༌ ཇིགས༌པོ༌ཞིག༌གི༌ རན༌ཐག༌གི༌ རྡོའ༌ ཙོགས༌ཤིག༌ ཁུར༌ཏེ༌, ཏེ༌བོ༌ གྱ༌ཚོའེ༌ ནང༌ང༌ ཕངས༌ཏངས༌ ཡང༌ མོལས༌, “ཏེན༌ན༌ ཙོགས༌སི༌ ཤེད༌ ཉམ༌པོ༌ བ༌བེ༌ལོན༌ནི༌ གྱལ༌ས༌ ཇིགས༌པོ༌བོའང༌ ཐུར༌ལ༌ མ༌ནེ༌ མི༌ཐོབ༌ཅེས༌སི༌ ཕིའ༌ ཕང༌ཨིན༌,
REV 18:22 ཏར༌ ཡོད༌ཁན༌ནི༌ རོལ༌མོའི༌ སྐད༌, ལུ༌ཏང༌ཁན༌, ལིང༌བུ༌ ཕུ༌ཁན༌, ཏུང༌ ཕུ༌ཁན༌ གུན༌ ཏེ༌ གྱལ༌སའེ༌ ནང༌ང༌ ཡང༌སྐྱར༌ མ༌ནེ༌ མི༌ཚོར༌། ལས༌ སྣ༌ཚོགས༌ ཅོ༌ཁན༌ནི༌ མི༌གུན༌ ཡང༌སྐྱར༌ མ༌ནེ༌ མི༌ཐོབ༌། རན༌ཐག༌གི༌ སྐད༌དའང༌ ཡང༌སྐྱར༌ མ༌ནེ༌ མི༌ཚོར༌།
REV 18:23 སྐྱོང༌ཙེ༌ འོད༌པོ༌ ཡང༌སྐྱར༌ མ༌ནེ༌ མི༌ཐོང༌། ཐད༌པོ༌ཅན༌ནི༌ མག༌པ༌ དང༌ བག༌མའི༌ སྐད༌གུན༌ནའང༌ ཡང༌སྐྱར༌ མི༌ཚོར༌། ཁྱོ༌རང༌ངི༌ ཚོང༌པ༌གུན༌ ཇིག༌རྟེན༌ གང༌པོའེ༌ ནང༌ང༌ ཚང༌མའེ༌སང༌ མིང༌ཅན༌ དང༌ ཝང༌ཅན༌ གུན༌ ཨིན༌པིན༌། ཡང༌ ཁྱོ༌རང༌ངི༌ ཆོས༌ངན༌ ཅོས༌ཏེ༌, ཇིག༌རྟེན༌པ༌ ཚང༌མ༌ལ༌ གོབ༌སྐོར༌ ཏངས༌།
REV 18:24 ཁྱོ༌རང༌ངི༌ སྲང༌གུན༌ནི༌ ནང༌ང༌ དཀོན༌མཆོག༌གི༌ ལུང༌སྟོན༌པ༌ དང༌ ཁོང༌ངི༌ཀ༌ ཏད༌པ༌ ཅོ༌ཁན༌གུན༌ནི༌ ཁྲག༌ མ༌ཚད༌ ཇིག༌རྟེན༌ནི༌ཀ༌ མི༌ སད༌ཁན༌ ཚང༌མའེ༌ ཁྲག༌ གྱུག༌དུག༌།”
REV 19:1 ཏེ༌ སྟིང༌ནེ༌ ངའེ༌ ནམ༌ཁའེ༌ ནང༌ང༌ མི༌ཚོགས༌ ཆེན༌མོའེ༌ ཀུ༌ཅོ༌ ཙོགས༌ ཚོར༌ ཀ༌གུན༌ནི༌ ཟེར༌ར༌རག༌, “གཙོ༌བོའ༌ སྟོད༌པ༌ ཕུལ༌ཤིག༌, ཐར༌པ༌, ཟིར༌རྗིད༌ དང༌ ཝང༌ ང༌དང༌ངི༌ དཀོན༌མཆོག༌གི༌ ཨིན༌ནོག༌།
REV 19:2 ཁོང༌ངི༌ ཁྲིམས༌ཅད༌གུན༌ ནི༌ འོས༌པ༌ དང༌ ཀྲང༌པོ༌ ཨིན༌ནོག༌། ཁོང༌ངི༌ ཏེ༌ ཟུགས༌ཙོང༌མ༌ ཇིགས༌པོ༌ གྱལ༌ས༌ བ༌བེ༌ལོན༌ལ༌ ཁྲིམས༌ཅད༌ ཛདས༌, ཀ༌བོའེ༌ ལུས༌བྲེལ༌ ངན༌པའེ༌ ལས༌གུན༌ནི༌ ཇིག༌རྟེན༌པ༌གུན༌ལ༌ སྡིག༌པའེ༌ ལམ༌མི༌ཀ༌ གྲུལ༌ཅུགས༌། དཀོན༌མཆོག༌གི༌ ཏེ༌ བུ༌མོ༌བོའ༌, ཁོང༌ངི༌ ཞབས༌ཏོག༌པ༌གུན༌ སད༌ཅེས༌སི༌ ཚབས༌ལ༌ ལན༌སལ༌ཏེ༌ ཨིན༌ནོག༌།”
REV 19:3 ཁོང༌གུན༌ནི༌ ཡང༌སྐྱར༌ ཤེད༌ དང༌ ཟེརས༌, “གཙོ༌བོའ༌ སྟོད༌པ༌ ཕུལ༌ཤིག༌, ཏེ༌ གྱལ༌སའེ༌ ནང༌ནེ༌ ཏུད༌པ༌ ཏུས༌གྱུན༌ནེ༌གྱུན༌ བིང༌ཨིན༌།”
REV 19:4 ཏེ༌ནེ༌ ཏེ༌ སྤོན༌བོ༌ 24 དང༌ སྲོག༌ ཡོད༌ཁན༌ ཞི༌བོའེ༌ ཞུགས༌ཁྲིས༌སི༌ཀ༌ ཞུགས༌ཁན༌ དཀོན༌མཆོག༌གི༌ སྐུན༌དུན༌ལ༌ ཆག༌ཕུལས༌ ཡང༌ ཁོང༌ང༌ ཅོལ༌ཨིན༌ མོལས༌, “ཨ༌མེན༌, གཙོ༌བོའ༌ སྟོད༌པ༌ ཕུལ༌ཤིག༌།”
REV 19:5 ཏེ༌ནེ༌ གྱལ༌ཁྲིས༌སི༌ ཀ༌ནེ༌ འི༌ སུང༌སྐད༌པོ༌ ཚོར༌, “དཀོན༌མཆོག༌གི༌ ཞབས༌ཏོག༌པ༌, དཀོན༌མཆོག༌ག༌ ཇིགས༌ཁན༌, ཉམ༌ཤུང༌ དང༌ ཇིགས༌པོ༌ ཚང༌མའེ༌ ང༌དང༌ངི༌ དཀོན༌མཆོག༌ག༌ སྟོད༌པ༌ ཕུལ༌ཤིག༌།”
REV 19:6 ཏེ༌ནེ༌ ངའེ༌ མི༌ཚོགས༌ ཆེན༌མོ༌, ཆུ༌ ཀྲག༌པོ༌ གྱུག༌ཁན༌, བྲུག༌ ཀྲག༌པོ༌ ལྡིར༌ཁན༌ནི༌ སྐད༌ ཙོགས༌སི༌ སྐད༌ཞིག༌གི༌ མོལ༌ཨིན༌ ཚོར༌, “གཙོ༌བོའ༌ སྟོད༌པ༌ ཕུལ༌ཤིག༌, གཙོ༌བོ༌ ང༌དང༌ངི༌ དཀོན༌མཆོག༌ ཀུན༌ཝང༌ངི༌ ཝང༌སྲུལ༌ལ༌ ཛད༌དུག༌།
REV 19:7 ཡོང༌ཤིག༌, ང༌དང༌གུན༌ནི༌ ཐད༌པོ༌ དང༌ སྐྱིད༌པོ༌ ཅོ༌ཨིན༌, ཡང༌ ང༌དང༌གུན༌ནི༌ དཀོན༌མཆོག༌ག༌ སྤལ༌ ཏོང༌ཤིག༌། ཅིའ༌ཞུ༌ན༌ ལུ༌གུའི༌ བག༌སྟོན༌ནི༌ ཏུས༌པོ༌ རན༌ ཚར༌ཏེ༌ ཁོང༌ངི༌ བག༌མའེ༌ ཁོང༌རང༌ ཁོང༌ངི༌ ཕིའ༌ གྲལ༌གྲིག༌ ཛད༌ཏེ༌ ཨིན༌ནོག༌།
REV 19:8 བག༌མའ༌ ཀོས༌ལག༌ རིན༌ཅན༌: ཀར༌པོ༌ དང༌ རྩང༌མ༌ གོན༌ན༌ལ༌ སལས༌།” ༼ཀོས༌ལག༌ རིན༌ཅན༌བོ༌ ནི༌, དཀོན༌མཆོག༌གི༌ མི༌གུན༌ནི༌ ཆག༌ལས༌ ཀྲང༌པོ༌གུན༌ ཨིན༌ནོག༌།༽
REV 19:9 ཏེ༌ནེ༌ ཕོ༌ཉའེ༌ ང༌ མོལ༌ལ༌རག༌, “འི༌བོ༌ བྲིས༌, ལུ༌གུའི༌ བག༌སྟོན༌ནི༌ གྲོན༌ལ༌ བོད༌ཁན༌གུན༌ ཅིན༌ལབས༌ཅན༌ ཨིན༌།” ཁོང༌ངི༌ ཡང༌སྐྱར༌ མོལས༌, “ཏེ༌གུན༌ དཀོན༌མཆོག༌གི༌ མོལ༌ཁན༌ནི༌ བཀའ༌གུན༌ ཨིན༌ནོག༌།”
REV 19:10 ཏེ༌ནེ༌ ངའེ༌ ཁོང༌ང༌ ཅོལ༌ཅེས༌ལ༌ ཁོང༌ངི༌ ཞབས༌སི༌ཀ༌ གྱེལ༌པིན༌། ཨིན༌ནའང༌ ཁོང༌ངི༌ མོལས༌, “ངའ༌ ཅོལ༌ མ༌ཅོལ༌། ཡེ༌ཤུའི༌ སྐོར༌ལ༌ སྤང༌པོ༌ ཏང༌ཅེས༌སི༌ ནང༌ང༌ སྟན༌པོ༌ དུག༌ཁན༌ ཁྱོ༌རང༌ དང༌ ཁྱོ༌རང༌ངི༌ སྤུན༌གུན༌ ཙོགས༌ ངའང༌ དཀོན༌མཆོག༌གི༌ ཞབས༌ཏོག༌པ༌ ཞིག༌ ཨིན༌། དཀོན༌མཆོག༌ ཅིག༌པོའ༌ ཅོལ༌, ཅིའ༌ཟེར༌ན༌ དཀོན༌མཆོག༌གི༌ ཐུག༌ཉིད༌དི༌ ཡེ༌ཤུའི༌ སྐོར༌ལ༌ སྤང༌པོ༌ ཞན༌མ༌གུན༌ལ༌ ཏང༌ཅེས༌སི༌ ཁྱུད༌ སལ༌ལ༌ནོག༌།”
REV 19:11 ཏེ༌ནེ༌ ངའ༌ ནམ༌ཁའ༌ བེས༌ཏེ༌ ཐོང༌, རྟ༌ ཀར༌པོ༌ ཡང༌ ཏེ༌བོའེ༌ཀ༌ ཞོན༌ཁན༌བོའེ༌ ཚན༌ལ༌ ཨིད༌ཤེས༌ཅན༌ དང༌ ཀྲང༌པོ༌ ཞུ༌རུག༌, ཅིའ༌ཟེར༌ན༌ ཁོང༌ངི༌, འོས༌པ༌ ཉམ༌པོ༌ ཁྲིམས༌ཅད༌ ཛད༌ཏེ༌ ཀྲང༌པོའེ༌ མག༌པོ༌ སལ༌ལ༌ ཛད༌དུག༌།
REV 19:12 ཁོང༌ངི༌ མིག༌ ནི༌, མེའེ༌ མེ༌ལྡབ༌ ཙོགས༌ ཡང༌ ཁོང༌ངི༌ ཨུའི༌ཀ༌ ཐོར༌ཤོག༌ མང༌པོ༌ཞིག༌ དུག༌། ཁོང༌ངི༌ཀ༌ བྲིས༌ཏེ༌ ཡོད༌ཁན༌ནི༌ མིང༌ངི༌ ཏོན༌བོ༌ ཁོང༌རང༌ མན༌པ༌ ཡང༌སུའང༌ ཤེས༌ས༌ མི༌དུག༌།
REV 19:13 ཁོང༌ངི༌ ཁྲག༌གི༌ ནང༌ང༌ ཅུགས༌ཏེ༌ ཡོད༌ཁན༌ནི༌ ནམ༌ཟའ༌ གོན༌ཏེ༌ དུག༌, ཡང༌ ཁོང༌ངི༌ ཚན༌ལ༌ དཀོན༌མཆོག༌གི༌ བཀའ༌ ཞུ༌རུག༌།
REV 19:14 ནམ༌ཁའེ༌ མག༌མི༌, རྟ༌ ཀར༌པོའ༌ ཞོན༌ཏེ༌ ཀོས༌ལག༌ ཀར༌པོ༌ རྩང༌མ༌ རིན༌ཅན༌ གོན༌ཏེ༌ ཡོད༌ཁན༌གུན༌ ཁོང༌ངི༌ སྟིང༌རང༌ནེ༌ ཡོང༌དུག༌།
REV 19:15 ཡང༌ ཨིད༌ཤེས༌ཅན༌ དང༌ ཀྲང༌པོ༌ ཞུ༌ཁན༌བོའེ༌ ཞལ༌ནེ༌ ར༌འི༌ ནོན༌པོ༌ཞིག༌ བིང༌དུག༌, ཀ༌བོ༌ ཁོང༌ངི༌ གྱལ༌ཁམས༌གུན༌ལ༌ ཕམ༌ཀལ༌ཅེས༌སི༌ ཕིའ༌ ཀོལ༌ཨིན༌། ཡང༌ “ཁོང༌ངི༌ ཆ༌ཚང༌ ཝང༌ཆ༌ ཉམ༌པོ༌ ཝང༌སྲུལ༌ལ༌ ཛད༌ཨིན༌།” ཀུན༌ཝང༌ དཀོན༌མཆོག༌གི༌ ཐུགས༌སྲོ༌ ཆེན༌མོའེ༌ ནས༌སའེ༌ ནང༌ང༌ རྟ༌ ཀར༌པོའ༌ ཞོན༌ཁན༌བོའེ༌ ཏེ༌གུན༌ རྒུན༌ ཙོགས༌ལ༌ ཙིར༌ར༌ ཛད༌ཨིན༌།
REV 19:16 ཁོང༌ངི༌ ཤ༌ལྡིག༌ དང༌ ཀོས༌སི༌ཀ༌ འི༌ མིང༌བོ༌ བྲིས༌ཏེ༌ དུག༌, “གྱལ༌པོ༌གུན༌ནི༌ གྱལ༌པོ༌ དང༌ གཙོ༌བོ༌གུན༌ནི༌ གཙོ༌བོ༌།”
REV 19:17 ཏེ༌ནེ༌ ངའེ༌ ཕོ༌ཉ༌ཞིག༌ ཉི༌མའེ༌ཀ༌ ཞངས༌ཏེ༌ ཐོང༌, ཁོང༌ངི༌ ནམ༌ ཐོམ༌པའེ༌ ནང༌ང༌ འུར༌ཨིན༌ ཡོད༌ཁན༌ནི༌ ཅ༌གུན༌ལ༌ སྐད༌ ཆེན༌མོ༌ ཉམ༌པོ༌ བོད༌ད༌ ཛདས༌, “ཡོང༌ དཀོན༌མཆོག༌གི༌ དོན༌ཏང༌ ཆེན༌མོའེ༌ ཕིའ༌ འི༌ཀ༌ ཛོམ༌ཤིག༌།
REV 19:18 གྱལ༌པོ༌, མག༌མི༌ སྤོན༌བོ༌, མག༌མི༌ ཀྲག༌པོ༌, རྟ༌གུན༌ དང༌ ཏེ༌གུན༌ལ༌ ཞོན༌ཁན༌, རང༌ཝང༌ཅན༌ དང༌ ཚེ༌ཡོག༌, ཉམ༌ཤུང༌ དང༌ ཇིགས༌པོ༌ ཚང༌མའེ༌ ཤ༌གུན༌ ཟའ༌ལ༌ ཡོང༌ཤིག༌།”
REV 19:19 ཏེ༌ནེ༌ ངའེ༌ ཏེ༌ ཇིགས༌ནང༌ཅན༌ནི༌ སེམས༌ཅན༌, ཇིག༌རྟེན༌ནི༌ གྱལ༌པོ༌གུན༌ ཡང༌ ཁོང༌གུན༌ནི༌ མག༌མི༌གུན༌, རྟ༌ ཀར༌པོའེ༌ཀ༌ ཞོན༌ཁན༌ དང༌ ཁོང༌ངི༌ མག༌མི༌ གུན༌ནི༌ གྱབ༌གལ༌ལ༌ ནོལ༌ཅེས༌ལ༌ ཛོམ༌ཨིན༌ ཐོང༌།
REV 19:20 ཨིན༌ནའང༌ ཏེ༌ ཇིགས༌ནང༌ཅན༌ནི༌ སེམས༌ཅན༌ དང༌ ཁོའེ༌ ལུང༌སྟོན༌པ༌ ཟུས༌མ༌བོ༌ ཟུམས༌, ཀ༌བོའེ༌ ཇིགས༌ནང༌ཅན༌ནི༌ སེམས༌ཅན༌བོའེ༌ ཚབས༌ལ༌ ཧ༌ལས༌ཤེས༌སི༌ ལྟས༌ མིན༌དྲ༌ མིན༌དྲ༌ སྟན༌ནད༌པིན༌། ཏེ༌ ལྟས༌གུན༌ནི༌ མི༌གུན༌ལ༌ གོབ༌སྐོར༌ ཏངས༌ པ༌སང༌, ཁོང༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ནི༌ སྟགས༌པོ༌ ཅོ༌ཅུགས༌ཏེ༌ ཁོའེ༌ སྐུན༌དྲ༌བོའ༌ ཆག༌ཕུལས༌ ཡང༌ ཅོལས༌། ཇིགས༌ནང༌ཅན༌ནི༌ སེམས༌ཅན༌ དང༌ ཁོའེ༌ ལུང༌སྟོན༌པ༌ ཟུས༌མ༌ ཉིས༌ཀོ༌ སོན༌ཏེའ༌ མུ༌ཟི༌ མེའ༌ ཞེན༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕངས༌།
REV 19:21 ཡང༌ རྟ༌ ཀར༌པོའེ༌ཀ༌ ཞོན༌ཏེ༌ ཡོད༌ཁན༌བོའེ༌ ཞལ༌ནེ༌ བིང༌ཨིན༌ ཡོད༌ཁན༌ནི༌ ར༌འི༌བོ༌ ཉམ༌པོ༌ ཁོའེ༌ མག༌མི༌ ཚང༌མ༌ སདས༌། ཡང༌ ཤ༌ ཟའ༌ཁན༌ནི༌ ཅ༌ ཚང༌མའེ༌ ཁོང༌གུན༌ནི༌ རོ༌གུན༌ ཚིམས༌ཚིམས༌ ཟོས༌།
REV 20:1 ཏེ༌ནེ༌ ང༌ ཡང༌ ཕོ༌ཉ༌ཞིག༌ ནམ༌ཁའ༌ནེ༌ བབས༌ཨིན༌ ཐོང༌, ཁོང༌ངི༌ ཆག༌ག༌ ཐིལ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ཀུ༌ལིག༌ དང༌ ལྕག༌ཐག༌ ལྕིན༌ཏྲེ༌ ཆེན༌མོ༌ཞིག༌ ནམས༌ཏེ༌ དུག༌།
REV 20:2 བྲུག༌ ཀ༌བོའ༌ སྔུན༌མའེ༌ ཏུས༌སི༌ རུལ༌, ཡ༌ རྡུད༌གུན༌ནི༌ གོ༌བ༌, ཡ༌ ཤེ༌ཏན༌ ཟེར༌རད༌, ཁོང༌ངི༌ ཟུམས༌ཏེ༌, ལོ༌ སྟོང༌ཅིག༌གི༌ ཕིའ༌ ཁོའ༌ ལྕག༌ཐག༌ ཉམ༌པོ༌ ཏགས༌།
REV 20:3 ལོ༌ སྟོང༌ཅིག༌པོ༌ ཚར༌ཚར༌ ཚོག༌པ༌ ཤེ༌ཏན༌ནི༌ གྱལ༌ཁམས༌ ཚང༌མའེ༌ མི༌གུན༌ལ༌ གོབ༌སྐོར༌ མི༌ཏང༌ཅེས༌སི༌ ཕིའ༌, ཏེ༌ ཕོ༌ཉའེ༌ ཁོ༌ ཐིལ༌ མ༌ནེ༌ མེད༌ཁན༌ནི༌ ཏིང༌ཅན༌ ས༌དོང༌ངི༌ ནང༌ང༌ ཕངས༌, ཡང༌ ཁའ༌ ཀབས༌ཏེ༌ ཐེ༌ཙེ༌ གྱབས༌། ཏེ༌ ཏུས༌པོ༌ ཚར༌ཏེ༌ སྟིང༌ནེ༌ ཁོ༌ སྲིབ༌ཅིག༌གི༌ ཕིའ༌ ཕི༌ལོག༌ག༌ བིང༌ ཅུག༌ག༌ ཛད༌གོས༌།
REV 20:4 ཏེ༌ནེ༌ ང༌ ནམ༌ཁའེ༌ ནང༌ང༌, ཁྲིམས༌ཅད༌ཅེས༌སི༌ ཝང༌ སལ༌ལ༌ ཛད༌ཁན༌གུན༌ ཞུགས༌ཁྲིས༌གུན༌ནི༌ཀ༌ ཞུགས༌ཏེ༌ ཐོང༌། ཡང༌ ང༌ གོ༌ ཅད༌ཁན༌ མི༌གུན༌ནི༌ སེམས༌ཉིད༌གུན༌ ཐོང༌, ཅིའ༌ཟེར༌ན༌ ཁོང༌གུན༌ནི༌ ཡེ༌ཤུའི༌ སྤང༌པོ༌ ཏངས༌ཏེ༌ དཀོན༌མཆོག༌གི༌ བཀའ༌ ཤད༌ཏེ༌ ཨིན༌པིན༌། ཁོང༌གུན༌ནི༌ ཇིགས༌ནང༌ཅན༌ནི༌ སེམས༌ཅན༌ ཡ༌ ཁོའེ༌ སྐུན༌དྲ༌ ཆག༌ མ༌ཕུལས༌, མ༌ཚད༌ ཁོའེ༌ སྟགས༌པོའང༌ ཁོ༌རང༌གུན༌ནི༌ ཐོད༌པ༌ ཡ༌ ལག༌པའེ༌ཀ༌ ཅོ༌ མ༌ཅུགས༌། ཁོང༌གུན༌ སོན༌ཏེའ༌ ལངས༌, ཡང༌ མ༌ཤི༌ཀ༌ ཉམ༌པོ༌ ལོ༌ སྟོང༌ཅིག༌ ཝང༌སྲུལས༌།
REV 20:5 ཁོང༌གུན༌ ནི༌, ཤི༌ཏེ༌ ལངས༌ཁན༌ ཏང༌པོ༌རང༌ ཨིན༌ནོག༌ ༼ཏེ༌ ལོ༌ སྟོང༌ཅིག༌པོ༌ ཚངས༌ཏེ༌ མ༌ནེ༌ ལུས༌ཏེ༌ ཡོད༌ཁན༌ནི༌ ཤི༌ཁན༌གུན༌ སོན༌ཏེའ༌ མི༌ལངས༌༽
REV 20:6 གོ༌མའེ༌ སོན༌ཏེའ༌ ལང༌ཅེས༌སི༌ ནང༌ང༌ ཐུས༌ཁན༌ནི༌ མི༌གུན༌ ཅིན༌ལབས༌ཅན༌ དང༌ ཏམ༌པ༌ ཨིན༌ནོག༌, ཅིའ༌ཟེར༌ན༌ ཁོང༌གུན༌ནི༌ཀ༌ ལན༌ ཉིས༌པ༌ ཤི༌ཅེས༌པོའ༌ ཝང༌ མ༌ནེ༌ མེད༌ཀྱག༌, མ༌ཚད༌ དཀོན༌མཆོག༌ དང༌ མ༌ཤི༌ཀའེ༌ བླ༌མ༌གུན༌ གྱུར༌ཏེ༌ ལོ༌ སྟོང༌ཅིག༌ ཚག༌པ༌ མ༌ཤི༌ཀ༌ ཉམ༌པོ༌ ཝང༌སྲུལ༌ཨིན༌།
REV 20:7 ལོ༌ སྟོང༌ཅིག༌ ཚང༌ང༌དང༌ ཤེ༌ཏན༌ ཙོན༌ནེ༌ ཕུད༌ཨིན༌།
REV 20:8 ཁོ༌ ཇིག༌རྟེན༌ནི༌ ཆོགས༌ ཚང༌མའེ༌ གྱལ༌ཁམས༌སི༌ མི༌གུན༌ལ༌ གོབ༌སྐོར༌ ཏང༌ང༌ལ༌ གོག༌ དང༌ མ༌གོག༌ ཟེར༌ཁན༌ནི༌ ནས༌སའེ༌ཀ༌ ཆེན༌། ཁོའེ༌ མི༌ཚང༌མ༌ ཆོག༌ཤིག༌ག༌ མག༌གི༌ ཕིའ༌ ཛོམ༌ཅུག༌ཨིན༌, ཀ༌བོ༌ ཚོའེ༌ ཐའ༌མ༌ ཡོད༌ཁན༌ནི༌ པེ༌མ༌ རྩི༌ མི༌ཉན༌ཅེས༌ ཙོགས༌ མང༌པོ༌ ཡོང༌ཨིན༌།
REV 20:9 ཇིག༌རྟེན༌ནི༌ ཆོགས༌ ཚང༌མ༌ནེ༌ ཁོང༌གུན༌ བིངས༌ཏེ༌ དཀོན༌མཆོག༌གི༌ མི༌གུན༌ དང༌ ཁོང༌ ཐུག༌ཉེས༌ས༌ ཛད༌ཁན༌ནི༌ གྱལ༌ས༌བོའ༌ སྐོརས༌, ཨིན༌ནའང༌ ནམ༌ཁའ༌ནེ༌ མེ༌ ཐུར༌ལ༌ བབས༌ཏེ༌, ཏེ༌ མག༌མི༌གུན༌ ཁྲེས༌ཏོར༌ ཅོའ༌ ཛདས༌།
REV 20:10 ཏེ༌ནེ༌ མི༌ཚང༌མ༌ལ༌ གོབ༌སྐོར༌ ཏང༌ཁན༌ནི༌ རྡུད༌གུན༌ནི༌ གོ༌བ༌, མུ༌ཟི༌ མེའ༌ ཞེན༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕངས༌, ཀ༌བོའེ༌ ནང༌ང༌ ཇིགས༌ནང༌ཅན༌ནི༌ སེམས༌ཅན༌ དང༌ ལུང༌སྟོན༌པ༌ ཟུས༌མ༌ གུན༌ ཕངས༌ཏེ༌ ཨིན༌པིན༌། ཡང༌ ཁོང༌གུན༌ལ༌ ཏུས༌གྱུན༌ནེ༌གྱུན༌ ཉིན༌ཚན༌ མེད༌པ༌ རྡུག༌ངལ༌ ཐོང༌ཨིན༌།
REV 20:11 ཏེ༌ནེ༌ ངའེ༌ ཞུགས༌ཁྲིས༌ ཀར༌པོ༌ ཀྲག༌པོ༌ཞིག༌ དང༌ ཏེ༌ཀ༌ ཞུགས༌ཁན༌བོ༌ ཐོང༌། ཁོང༌ ཇལ༌ལ༌ཅིག༌ ཇིག༌རྟེན༌ དང༌ ནམ༌ཁའ༌ གུན༌ ཁོང༌ངི༌ དུན༌ནེ༌ ཤོར༌ཏེ༌ སོང༌, ཡང༌ ཏེ༌ནེ༌ཕར༌ལ༌ སུ༌ཞིག༌གིའང༌ ཏེ༌གུན༌ མ༌ཐོང༌།
REV 20:12 ཏེ༌ནེ༌ ང༌ ཤི༌ཁན༌ ཇིགས༌པོ༌ དང༌ ཉམ༌ཤུང༌ མི༌གུན༌, དཀོན༌མཆོག༌གི༌ ཞུགས༌ཁྲིས༌སི༌ དུན༌ལ༌ ལངས༌ཏེ༌ ཐོང༌། ཡང༌ སྤེ༌ཆ༌ ཕེ༌ཁན༌གུན༌ནི༌ ཕྲོའ༌ ཐའ༌མེད༌པའེ༌ མི༌ཚེའེ༌ སྤེ༌ཆ༌བོའང༌ དུག༌། སྤེ༌ཆ༌གུན༌ནི༌ ནང༌ང༌ ཁོང༌གུན༌ནི༌ ཅོས༌ཁན༌གུན༌ བྲིའ༌ ཛད༌ཏེ༌ ཡོད༌ཁན༌ ནང༌ཞིན༌, ཁོང༌གུན༌ལ༌ ཁྲིམས༌ཅད༌ སལ༌དུག༌།
REV 20:13 གྱ༌ཚོའེ༌ ཏེ༌ནང༌ང༌ ཤི༌ཁན༌ནི༌ མི༌གུན༌ ཕུདས༌, ཡང༌ ཤི༌ཅེས༌ དང༌ ཤི༌ཁན༌གུན༌ནི༌ ནས༌སེའང༌ ཤི༌ཁན༌ནི༌ མི༌གུན༌ ཕུདས༌། ཏེ༌ ཤི༌ཁན༌ ཚང༌མའ༌ ཁོ༌རང༌གུན༌ནི༌ ལས༌ ནང༌ཞིན༌ལ༌ ཁྲིམས༌ཅད༌ སལ༌ལ༌ ཛདས༌།
REV 20:14 ཏེ༌ནེ༌ ཤི༌ཅེས༌ དང༌ ཤི༌ཁན༌ནི༌ ནས༌ས༌ གུན༌ མེ༌ བར༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕངས༌, འི༌ ཚོ༌བོའ༌ ཤི༌ཅེས༌ ཉིས༌པ༌ ཟེར༌ར༌ནོག༌།
REV 20:15 ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ང༌ མིང༌ བྲིས༌ཏེ༌ མེད༌ཁན༌གུན༌, མེ༌ བར༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕང༌ང༌ ཛདས༌།
REV 21:1 ཏེ༌ནེ༌ ང༌ ནམ༌ཁའ༌ སོ༌མ༌ དང༌ ཇིག༌རྟེན༌ སོ༌མ༌ གུན༌ ཐོང༌། སྔུན༌ལ༌ ཡོད༌ཁན༌ནི༌ ནམ༌ཁའ༌ དང༌ ཇིག༌རྟེན༌ མེད༌ཁན༌ སོང༌, ཡང༌ གྱ༌ཚོའང༌ སྟོར༌ཏེ༌ མི༌དུག༌།
REV 21:2 བག༌མ༌ ཁོ༌རང༌ངི༌ མག༌པའེ༌ ཕིའ༌ ཟབས༌ཏེ༌ ལྡེ༌མོ༌ ཅོ༌ཁན༌ ཙོགས༌ལ༌ ངའེ༌ གྱལ༌ས༌ ཏམ༌པ༌, ཡེ༌རུ༌ཤ༌ལེམ༌ སོ༌མ༌ ནམ༌ཁའ༌ནེ༌ དཀོན༌མཆོག༌གི༌ སྐུན༌དུན༌ནེ༌ བབས༌ཨིན༌ ཐོང༌།
REV 21:3 ཡང༌ ང༌ ཞུགས༌ཁྲིས༌སི༌ ཀ༌ནེ༌ སྐད༌ ཆེན༌མོ༌ཞིག༌གི༌ མོལ༌ཨིན༌ ཚོར༌, “ཏ༌ དཀོན༌མཆོག༌གི༌ ཞུག༌སའེ༌ ནས༌ས༌ མི༌གུན༌ནི༌ ཕྲོའ༌ དུག༌, ཡང༌ ཁོང༌ མི༌གུན༌ ཉམ༌པོ༌ ཞུགས༌ཨིན༌། ཁོང༌གུན༌ དཀོན༌མཆོག༌གི༌ མི༌ དང༌ དཀོན༌མཆོག༌ ཁོང༌གུན༌ནི༌ དཀོན༌མཆོག༌ གྱུར༌ཨིན༌, ཡང༌ དཀོན༌མཆོག༌ ཁོང༌རང༌ ཁོང༌གུན༌ ཉམ༌པོ༌ ཞུགས༌ཨིན༌།
REV 21:4 ཁོང༌ངི༌ ཁོང༌གུན༌ནི༌ མིག༌ནེ༌ ཆི༌མ༌གུན༌ ཕིའ༌ ཛད༌ཨིན༌། ཏེ༌རུ༌ ཤི༌ཅེས༌, ཡ༌ རྡུག༌ངལ༌, ཡ༌ ངུ༌ཅེས༌, ཡ༌ ཟུག༌ཟེར༌ མི༌ཡོང༌, ཅིའ༌ཟེར༌ན༌ འི༌ ཚང༌མ༌ མ༌ནེ༌ མེད༌ཁན༌ སོང༌ཏེ༌ ཨིན༌ནོག༌།”
REV 21:5 ཞུགས༌ཁྲིས༌སི༌ཀ༌ ཞུགས༌ཏེ༌ ཡོད༌ཁན༌ དཀོན༌མཆོག༌གི༌ མོལ༌ལ༌ ཛདས༌, “ལྟོས༌ཤིག༌ ངའེ༌ ཅི༌ཚང༌མ༌ སོ༌མ༌ ཅོའད༌།” ཡང༌ ཁོང༌ངི༌ ངའ༌ མོལས༌, “འི༌བོ༌ བྲིས༌ ཅིའ༌ཟེར༌ན༌ འི༌ སྤེ༌ར༌ ཚང༌མ༌ ཨིད༌ཤེས༌ཅན༌ དང༌ ཀྲང༌པོ༌ ཨིན༌ནོག༌།”
REV 21:6 ཁོང༌ངི༌ ངའ༌ ཡང༌ མོལས༌, “ཏ༌ ཅི༌ཚང༌མ༌ གྲུབ༌ ཚར༌། ང༌ ནི༌ ཨལ༌ཕ༌ དང༌ ཨོ༌མེ༌ག༌ ཨིན༌, གོ༌ཟུག༌ནེ༌ ཕར༌ལ༌ ཡོད༌ཁན༌ ཡང༌ ཐའ༌མ༌ ཚོག༌པ༌ ལུས༌ཁན༌། སྐོམས༌ཏེ༌ ཡོད༌ཁན༌གུན༌ལ༌ ངའེ༌ མི༌ཚེ༌ ཏང༌ཁན༌ནི༌ ཆུ༌མིག༌གི༌ ཆུ༌བོ༌ ཆོན༌ལ༌ ཏང༌ཨིན༌།
REV 21:7 གྱལ༌ཁའ༌ ཐོབ༌ཁན༌གུན༌ལ༌ འི༌ ཅིན༌ལབས༌ ཚང༌མ༌ ཐོབ༌ཨིན༌, ཡང༌ ང༌ ཁོང༌ངི༌ དཀོན༌མཆོག༌ དང༌ ཁོང༌གུན༌ ངའེ༌ ཕྲུ༌གུ༌ གྱུར༌ཨིན༌།
REV 21:8 ཨིན༌ནའང༌ ཟུན༌ ཏང༌ཁན༌ ཚང༌མ༌, ཇིགས༌བུད༌, ཏད༌པ༌ མེད༌ཁན༌, ཚི༌ཏུ༌ སྕོད༌པ༌, མི༌སད༌, ལུས༌བྲེལ༌ ངན༌པ༌, ཆོས༌ངན༌ ཅོ༌ཁན༌ དང༌ སྐུན༌དྲ༌ ཅོལ༌ཁན༌ གུན༌ མུ༌ཟི༌ མེའ༌ ཞེན༌ཨིན༌ ཡོད༌ཁན༌ནི༌ ཚོའེ༌ ནང༌ང༌ ཕང༌ཨིན༌, ཀ༌བོའ༌ ཤི༌ཅེས༌ ཉིས༌པ༌ ཟེར༌རད༌།”
REV 21:9 ཡང༌ སྟིང༌ཇུག༌གི༌ རྡུག༌ངལ༌ རྡུན༌ནི༌ གངས༌ཁན༌ གོར༌མོ༌ ཁུར༌ཏེ༌ ཡོད༌ཁན༌ ཕོ༌ཉ༌ རྡུན༌ནི༌ ནང༌ནེ༌ ཅིག༌ ཡོངས༌ཏེ༌ ངའ༌ མོལ༌ལ༌རག༌, “འི༌རུ༌ ཡོང༌! ངའེ༌ ཁྱོ༌རང༌ང༌ བག༌མ༌, ལུ༌གུའི༌ ན༌མ༌བོ༌ སྟན༌ཨིན༌།”
REV 21:10 ཡང༌ ཁོང༌ངི༌ ང༌ ཐུག༌ཉིད༌དི༌ ནང༌ང༌ མའ༌ རི༌ ཐོན༌པོ༌ཞིག༌གི༌ཀ༌ ཁྱེར༌ར༌ ཛད༌ཏེ༌ ང༌ ནམ༌ཁའ༌ནེ༌ དཀོན༌མཆོག༌གི༌ སྐུན༌དུན༌ནེ༌ བབས༌ཨིན༌ ཡོད༌ཁན༌ གྱལ༌ས༌ ཏམ༌པ༌ ཡེ༌རུ༌ཤ༌ལེམ༌བོ༌ སྟན༌ན༌ ཛདས༌།
REV 21:11 ཏེ༌ གྱལ༌ས༌བོ༌, དཀོན༌མཆོག༌གི༌ ཟིར༌རྗིད༌དི༌ ནང༌ང༌ ཁྲ༌ རིན༌ཅན༌ ཙོགས༌ལ༌ ཁྲ༌ཆེམ༌ཆེམ༌ ཅོ༌རུག༌, ཀ༌བོ༌ ཤེལ༌ ཙོགས༌ སལ༌པོ༌ ཡོད༌ཁན༌ ཡ༌ཤབ༌ ཟེར༌ཁན༌ནི༌ ཁྲ༌ ཙོགས༌ དུག༌།
REV 21:12 གྱལ༌སའེ༌ ཀྱང༌ར༌བོ༌ མངས༌ཏེ༌ ཐོན༌པོ༌ དང༌ སྲན༌ཏྲེ༌ དུག༌, ཀ༌བོའེ༌ གྱས༌སྒོ༌ རྕུག༌ཉིས༌པོ༌ ཕོ༌ཉ༌ རྕུག༌ཉིས༌སི༌ སྲུངས༌ཏེ༌ དུག༌། ཨིས༌ར༌ཨེལ༌པའེ༌ མི༌རིགས༌ རྕུག༌ཉིས༌སི༌ མིང༌གུན༌, ཏེ༌ གྱས༌སྒོ༌གུན༌ནི༌ཀ༌ བྲིས༌ཏེ༌ དུག༌།
REV 21:13 ཤར༌ ཆོགས༌ལ༌ གྱས༌སྒོ༌ སུམ༌, བྱང༌ ཆོགས༌ལ༌ གྱས༌སྒོ༌ སུམ༌, ལྷོ༌ ཆོགས༌ལ༌ གྱས༌སྒོ༌ སུམ༌, ཡང༌ ནུབ༌ ཆོགས༌ལ༌ གྱས༌སྒོ༌ སུམ༌ དུག༌།
REV 21:14 ཡང༌ ཏེ༌ གྱལ༌སའེ༌ ཀྱང༌རའ༌, རྩིགས༌རྨང༌ རྕུག༌ཉིས༌ དུག༌, ཏེ༌གུན༌ནི༌ཀ༌ ལུ༌གུའི༌ སྐུ༌ཚབས༌ རྕུག༌ཉིས༌སི༌ མིང༌གུན༌ བྲིས༌ཏེ༌ དུག༌།
REV 21:15 ངའ༌ སྤེ༌ར༌ ཏང༌ཁན༌ནི༌ ཕོ༌ཉ༌བོའེ༌ ཁོ༌རང༌ངི༌ ཆག༌ག༌, གྱལ༌ས༌, ཏེ༌བོའེ༌ གྱས༌སྒོ༌ དང༌ ཀྱང༌རའི༌ ཚད༌གུན༌ ཏབ༌ཅེས༌ལ༌, སེར༌རི༌ ཚད༌ ཏབ༌ཅེས༌སི༌ བེར༌ཀ༌ཞིག༌ ནམས༌ཏེ༌ དུག༌།
REV 21:16 གྱལ༌ས༌བོ༌ ཀྲུབ༌ཞི༌, ཀ༌བོའེ༌ ཞང༌ དང༌ རིང༌ དང༌ ཐོན༌ གུན༌ དྲན༌དྲ༌ དུག༌། ཕོ༌ཉའེ༌ གྱལ༌ས༌བོ༌ ཏབ༌བ༌ཅིག༌, ཏེ༌བོའེ༌ ཞང༌, རིང༌ དང༌ ཐོན༌ གུན༌ དྲན༌དྲ༌, ཀི༌ལོ༌མི༌ཀྲར༌ 2,400 བིང༌།
REV 21:17 ཁོང༌ངི༌ ཀྱང༌ར༌བོ༌ ཏབས༌, ཏེ༌བོ༌ མི༌ཀྲར༌ 70 ཞང༌ཅན༌ དུག༌པིན༌, ཏེ༌གུན༌ ཏབ༌ཅེས༌ལ༌ ཕོ༌ཉའེ༌ མི༌ ཀོལ༌ཁན༌ནི༌ ཚད༌ ཏབ༌ཅེས༌པོ༌ ཀོལ༌ལ༌ ཛད༌དུག༌།
REV 21:18 ཀྱང༌ར༌བོ༌ ཁྲ༌རྡོ༌ རིན༌ཅན༌ ཡ༌ཤབ༌ ཟེར༌ཁན༌, ཡང༌ གྱལ༌ས༌བོ༌ སེར༌ ཀྱང༌ངི༌ རྩིགས༌ཏེ༌ དུག༌ ཀ༌བོ༌ ཤེལ༌ ཙོགས༌ སལ༌པོ༌ དུག༌།
REV 21:19 གྱལ༌སའེ༌ ཀྱང༌རའི༌ རྩིགས༌རྨང༌གུན༌ ཁྲ༌རྡོ༌ རིན༌ཅན༌ སྣ༌ 12 ཉམ༌པོ༌ རྩིགས༌ཏེ༌ ལྡེ༌མོ༌ ཅོའ༌ ཛད༌ཏེ༌ དུག༌། རྩིགས༌རྨངས༌སི༌ ཁྲ༌རྡོ༌གུན༌, ཏང༌པོ༌ ཇས༌པར༌, ཉིས༌པ༌ ནི༌ལིམ༌, སུམ༌པ༌ ཨ༌གེཏ༌, ཞི༌པ༌ ཨེ༌མེ༌རལད༌,
REV 21:20 ལྔ༌པ༌ ཨོ༌ནིགས༌, དྲུག༌པ༌ ཀར༌ནེ༌ལིའན༌, རྡུན༌པ༌ ཀརི༌སོ༌ལཱེཏ༌, རྒྱད༌པ༌ བེ༌རེལ༌, རྒུ༌པ༌ ཏོ༌པཟ༌, རྕུ༌པ༌ ཀརི༌སོ༌པེརེས༌, རྕུག༌ཅིག༌པ༌ ཇེ༌སིནཐ༌ དང༌ རྕུག༌ཉིས༌པ༌ ཨ༌མེ༌ཐིསཏ༌ གུན༌ ཨིན༌ནོག༌།
REV 21:21 ཡང༌ གྱས༌སྒོ༌ རྕུག༌ཉིས༌པོ༌ མུ༌ཏིག༌ རྕུག༌ཉིས༌, ཡང༌ ཏེ༌ གྱས༌སྒོ༌ རེ༌རེ༌ མུ༌ཏིག༌ ཆེན༌མོ༌ ཅིག༌གི༌ ཛད༌ཏེ༌ དུག༌། ཏེ༌ གྱལ༌སའེ༌ ལམ༌ དང༌ སྲང༌ གུན༌ ཤེལ༌ ཙོགས༌སི༌ སལ༌པོ༌ སེར༌རི༌ ཛད༌ཏེ༌ དུག༌།
REV 21:22 ང༌ ཏེ༌ནང༌ང༌ ཆོད༌ཁང༌ཞིག༌ མ༌ནེ༌ མ༌ཐོང༌, ཅིའ༌ཟེར༌ན༌ གཙོ༌བོ༌ དཀོན༌མཆོག༌ ཀུན༌ཝང༌ དང༌ ལུ༌གུ༌ ཁོང༌གུན༌ནི༌ ཆོད༌ཁང༌ ཨིན༌ནོག༌།
REV 21:23 ཏེ༌ གྱལ༌ས༌བོའ༌ ཉི༌མ༌ ཡ༌ ཟླ༌ཝའེ༌ འོད༌དི༌ སྒོས༌དོམ༌ མི༌དུག༌, ཅིའ༌ཟེར༌ན༌ དཀོན༌མཆོག༌གི༌ ཟིར༌རྗིད༌དི༌, ཏེ༌ གྱལ༌ས༌བོ༌ འོད༌ཅན༌ ཛད༌ཏེ༌ ལུ༌གུ༌ ནི༌ ཏེ༌བོའེ༌ སྐྱོང༌ཙེ༌ ཨིན༌ནོག༌།
REV 21:24 ཡང༌ གྱལ༌ཁམས༌སི༌ མི༌གུན༌ ཏེ༌ འོད༌དི༌ ནང༌ང༌ གྲུལ༌ཨིན༌། ཇིག༌རྟེན༌ནི༌ གྱལ༌པོ༌གུན༌ནི༌ ཁོ༌རང༌ངི༌ གྱུ༌ནོར༌རི༌ སྤལ༌གུན༌, ཏེ༌ གྱལ༌སའེ༌ ནང༌ང༌ ཁྱོང༌ཨིན༌།
REV 21:25 ཏེ༌ གྱལ༌སའེ༌ གྱས༌སྒོ༌གུན༌ མ༌ནེ༌ ཅུག༌ག༌ མ༌ནོག༌, ཅིའ༌ཟེར༌ན༌ ཏེ༌རུ༌ ཚན༌ མ༌ནེ༌ མེད༌ཀྱག༌།
REV 21:26 གྱལ༌ཁམས༌ ཁོ༌རང༌གུན༌ནི༌ སྟེར༌ དང༌ གྱུ༌ནོར༌རི༌ སྤལ༌གུན༌, ཏེ༌ གྱལ༌སའེ༌ ནང༌ང༌ ཁྱོང༌ཨིན༌།
REV 21:27 ངན༌པ༌ ཅིག༌གའང༌ ཏེ༌ནང༌ང༌ ཆ༌ མི༌ཅུག༌, མ༌ཚད༌ ཁྲེལ༌བའེ༌ ལས༌ ཅོ༌ཁན༌, ཡ༌ ཟུན༌ ཏང༌ཁན༌གུན༌ནའང༌། ཨིན༌ནའང༌ ལུ༌གུའི༌ ཐའ༌མེད༌པའེ༌ མི༌ཚེའེ༌ སྤེ༌ཆའེ༌ ནང༌ང༌ མིང༌ བྲིས༌ཏེ༌ ཡོད༌ཁན༌ནི༌ མི༌གུན༌ ཏེ༌ནང༌ང༌ ཆ༌ཉན༌ཨིན༌།
REV 22:1 ཏེ༌ནེ༌ ཕོ༌ཉ༌བོའེ༌ ང༌, སྲོག༌ ཏང༌ཁན༌ནི༌ ཆུ༌ གྱུག༌ཁན༌ ལྩངས༌པོ༌, ཤེལ༌ ཙོགས༌སི༌ ལག༌མོ༌, དཀོན༌མཆོག༌ དང༌ ལུ༌གུའི༌ ཞུགས༌ཁྲིས༌སི༌ ཀ༌ནེ༌ བིང༌ཁན༌བོ༌ སྟན༌ན༌ ཛདས༌།
REV 22:2 ཏེ༌བོ༌ ཐུར༌ལ༌ གྱལ༌སའེ༌ གྱ༌ལམ༌མི༌ སྐྱིལ༌ནེ༌ གྱུག༌དུག༌, ཡང༌ ལྩངས༌པོའེ༌ ལྡ༌ལྡོ༌ ཉིས༌ཀོའ༌ སྲོག༌ ཏང༌ཁན༌ནི༌ ལྕང༌མ༌ སྐྱེས༌ཏེ༌ དུག༌, ཀ༌བོའ༌ ལོ༌ ཅིག༌གི༌ ནང༌ང༌ སྟོན༌ཐོག༌ རྕུག༌ཉིས༌ སྨིན༌དུག༌། ཟླ༌ཝ༌ རེ༌རེ༌ ནང༌ང༌ སྟོན༌ཐོག༌ རེ༌རེ༌, ཡང༌ ཏེ༌བོའེ༌ ལོ༌མ༌གུན༌, གྱལ༌ཁམས༌གུན༌ ཕན༌ཅེས༌སི༌ ཕིའ༌ སྨན༌ནི༌ ཚུལ༌ལ༌ ཀོལ༌དུག༌།
REV 22:3 དཀོན༌མཆོག༌གི༌ རྔན༌ཏབ༌བ༌ ཛད༌ཁན༌བོ༌ མེད༌ཁན༌ ཆེན༌, ཅིའ༌ཟེར༌ན༌ དཀོན༌མཆོག༌ དང༌ ལུ༌གུའི༌ ཞུགས༌ཁྲིས༌གུན༌ ཏེ༌རུ༌ ཡོད༌ཏེ༌ ཨིན༌ནོག༌, ཡང༌ ཁོང༌ངི༌ ཞབས༌ཏོག༌པ༌གུན༌ནི༌ ཁོང༌ང༌ ཅོལ༌ཨིན༌།
REV 22:4 ཁོང༌གུན༌ནི༌ དཀོན༌མཆོག༌གི༌ ཞལ༌དོང༌ ཇལ༌ཨིན༌, ཡང༌ ཁོང༌ངི༌ ཚན༌ ཁོང༌གུན༌ནི༌ ཐོད༌པའེ༌ཀ༌ བྲི༌ཨིན༌།
REV 22:5 ཏེ༌རུ༌ ཚན༌ མ༌ནེ༌ མི༌ཡོང༌, ཡང༌ ཁོང༌གུན༌ལ༌ སྐྱོང༌ཙེ༌ ཡ༌ ཉི༌མའེ༌ འོད༌དི༌ སྒོས༌དོམ༌ མི༌ཆའ༌, ཅིའ༌ཟེར༌ན༌ གཙོ༌བོ༌ དཀོན༌མཆོག༌ ཁོང༌གུན༌ནི༌ འོད༌པོ༌ ཨིན༌ནོག༌། ཁོང༌གུན༌ནི༌ གྱལ༌པོ༌གུན༌ ཙོགས༌ལ༌ ཏུས༌གྱུན༌ནེ༌གྱུན༌ ཝང༌སྲུལ༌ཨིན༌།
REV 22:6 ཏེ༌ནེ༌ ཕོ༌ཉ༌བོའེ༌ ང༌ མོལས༌, “ཁྱོ༌རང༌ང༌ ཚོར༌ཁན༌གུན༌ ཨིད༌ཤེས༌ཅན༌ དང༌ ཀྲང༌པོ༌ ཨིན༌། ལུང༌སྟོན༌པ༌གུན༌ལ༌ ཤད༌ཅེས༌སི༌ ལོན༌གུན༌ སལ༌ལ༌ ཛད༌ཁན༌ནི༌ གཙོ༌བོ༌ དཀོན༌མཆོག༌གི༌, གྱོགས༌པ༌ ཇུང༌ཅེས༌ཅན༌གུན༌ ཤད༌ཅེས༌ལ༌ ཁོང༌ངི༌ ཕོ༌ཉ༌བོ༌, ཁོང༌རང༌ངི༌ ཞབས༌ཏོག༌པ༌གུན༌ལ༌ ཀལ༌ལ༌ ཛདས༌།”
REV 22:7 ལུ༌གུའི༌ མོལས༌, “ལྟོས༌ཤིག༌ ང༌ ནི༌ གྱོགས༌པ༌ ཡོང༌ཨིན༌། འི༌ སྤེ༌ཆའེ༌ མ༌ཡོང༌ ལུང༌སྟན༌ ཛད༌ཁན༌གུན༌, ཁའ༌ཉན༌ཁན༌གུན༌ ཅིན༌ལབས༌ཅན༌ ཨིན༌།”
REV 22:8 འི༌ ཚང༌མ༌ ང༌ ཡོ༌ཧཱ༌ནན༌ནི༌ ཚོར༌ ཡང༌ ཐོང༌། ཏེ༌གུན༌ ཚོར༌ར༌ཅིག༌ ཡང༌ ཐོང༌ང༌ཅིག༌, ངའ༌ ཏེ༌གུན༌ སྟན༌ན༌ ཛད༌ཁན༌ནི༌ ཕོ༌ཉ༌བོའེ༌ ཞབས༌སི༌ དུན༌ལ༌ ཆག༌ཕུལ༌ཅེས༌ལ༌ གྱེལ༌པིན༌།
REV 22:9 ཨིན༌ནའང༌ ཁོང༌ངི༌ ང༌ མོལས༌, “མན༌! ངའ༌ ཏེ༌ཟུག༌ མ༌ཅོ༌། ངའང༌ ཁྱོ༌རང༌ དང༌ ཁྱོ༌རང༌ངི༌ སྤུན༌ ལུང༌སྟོན༌པ༌གུན༌ ཙོགས༌ལ༌, དཀོན༌མཆོག༌གི༌ ཞབས༌ཏོག༌པ༌ ཞིག༌ ཨིན༌, མ༌ཚད༌ འི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ སྲུང༌ཁན༌གུན༌ནའང༌, དཀོན༌མཆོག༌ ཅིག༌པོའ༌ ཅོལ༌།”
REV 22:10 ཏེ༌ནེ༌ ཁོང༌ངི༌ ང༌ མོལས༌, “འི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ནི༌ མ༌ཡོང༌ ལུང༌སྟན༌གུན༌ སང༌ཝའེ༌ ནང༌ང༌ མ༌བོར༌ ཅིའ༌ཟེར༌ན༌ འི༌གུན༌ དྲན༌དྲ༌ གྲུབ༌ཅེས༌སི༌ ཏུས༌པོ༌ ཉེ༌མོ༌ དུག༌།
REV 22:11 ངན༌པ༌ ཅོ༌ཁན༌གུན༌ལ༌ ངན༌པ༌ ཅོ༌ཅེས༌ནེ༌ མ༌སྒག༌, ལས༌ རྩོག༌པོ༌ ཅོ༌ཁན༌གུན༌ལ༌ ལས༌ རྩོག༌པོ༌ ཅོ༌ཅེས༌ནེ༌ མ༌སྒག༌, ཀྲང༌པོ༌ ཅོ༌ཁན༌གུན༌ལ༌ ཀྲང༌པོ༌ ཅོ༌ཅེས༌ནེ༌ མ༌སྒག༌, ཏམ༌པ༌ ཨིན༌ཁན༌གུན༌ ཏམ༌པ༌ གྱུར༌ཅེས༌ནེ༌ མ༌སྒག༌།”
REV 22:12 ཡེ༌ཤུའི༌ མོལས༌, “ལྟོས༌ཤིག༌, ང༌ གྱོགས༌པ༌ ཡོང༌ཨིན༌, ཡང༌ མི༌ རེ༌རེའ༌ རང༌རང༌ངི༌ ལས༌ ནང༌ཞིན༌ལ༌ ཏང༌ཅེས༌སི༌ སོལ༌རས༌ ངའེ༌ ལག༌ག༌ ཡོད༌།
REV 22:13 ང༌ ནི༌ ཨལ༌ཕ༌ དང༌ ཨོ༌མེ༌ག༌, ཏང༌པོ༌ དང༌ ཐའ༌མ༌, གོ༌ཟུག༌ དང༌ སྟིང༌ཇུག༌ ཨིན༌།”
REV 22:14 “ཀོས༌གུན༌ ཁྲུས༌ཏེ༌ ཁོ༌རང༌ རྩང༌མ༌ ཅོ༌ཁན༌གུན༌ ཅིན༌ལབས༌ཅན༌ ཨིན༌། ཁོང༌གུན༌ གྱལ༌སའེ༌ ནང༌ང༌ གྱས༌སྒོ༌གུན༌ གྱུད༌ཏེ༌ ཆ༌ཅུག༌ག༌ ཛད༌ཏེ༌ སྲོག༌ སལ༌ཁན༌ནི༌ ལྕང༌མའེ༌ ཀ༌ནེ༌ ཁ༌ཟས༌གུན༌ ཟེན༌།
REV 22:15 ཆོས༌ངན༌ ཅོ༌ཁན༌, ལུས༌བྲེལ༌ ངན༌པ༌ ཅོ༌ཁན༌, མི༌སད༌, སྐུན༌དྲ༌ ཅོལ༌ཁན༌, ཟུན༌མ༌ ཏམ༌པའེ༌ མི༌ཚེ༌ ཕུད༌ཁན༌, ཏེ༌ ཁྱི༌ ཙོགས༌གུན༌ གྱལ༌སའེ༌ ཕི༌ལོག༌ག༌ ལུས༌ཨིན༌།”
REV 22:16 “འི༌ ལོན༌གུན༌ ཆོས༌ཚོགས༌གུན༌ལ༌ ཤད༌ཅེས༌སི༌ ཕིའ༌ ང༌ ཡེ༌ཤུའི༌, ང༌རང༌ངི༌ ཕོ༌ཉ༌ ཁྱོ༌རང༌ངི༌ཀ༌ ཀལ༌པིན༌། ང༌ ནི༌ གྱལ༌པོ༌ དཱ༌བིད༌ དང༌ ཁོའེ༌ པུར༌གྱུད༌ ཇུང༌ཅུག༌ཁན༌, ཡང༌ ནམ༌ལངས༌སི༌ སྐར༌མ༌ ལྡང༌ཤན༌བོ༌ ཨིན༌།”
REV 22:17 ཏམ༌པའེ༌ ཐུག༌ཉིད༌ དང༌ མ༌ཤི༌ཀའེ༌ བག༌མ༌ ༼ཡང༌ན༌ ཁོང༌ངི༌ ཆོས༌ཚོགས༌༽ གུན༌ནི༌ ཟེར༌དུག༌, “ཡོང༌ཤིག༌།” འི༌ ལོན༌ ཚོར༌ཁན༌གུན༌ལའང༌ ཟེར༌ཅུག༌, “ཡོང༌ཤིག༌།” སྐོམས༌ཁན༌གུན༌ ཡོང༌ཅུག༌ཤིག༌, ཡང༌ ཐུང༌ང༌ ཐད༌ཁན༌གུན༌ལ༌ སྲོག༌ ཏང༌ཁན༌ནི༌ ཆུ༌ ཆོན༌ལ༌ ཐུང༌ཅུག༌ཤིག༌།
REV 22:18 འི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ནི༌ མ༌ཡོང༌ ལུང༌སྟན༌ནི༌ སྤེ༌ར༌ ཚོར༌ཁན༌གུན༌ལ༌ ང༌ ཡོ༌ཧཱ༌ནན༌ནི༌ སྤང༌པུད༌ཨིན༌ ཟེར༌རད༌། འི༌ སྤེ༌ཆའེ༌ ནང༌ང༌ བྲིས༌ཁན༌གུན༌ནི༌ཀ༌ ཐེ༌བ༌ སགས༌ཏེ༌ བྲི༌ཁན༌གུན༌ལ༌ དཀོན༌མཆོག༌གི༌ འི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ནི༌ རྡུག༌ངལ༌གུན༌ སལ༌ཨིན༌།
REV 22:19 ཡང༌ འི༌ སྤེ༌ཆའེ༌ ནང༌ང༌ བྲིས༌ཏེ༌ ཡོད༌ཁན༌ནི༌ མ༌ཡོང༌ ལུང༌སྟན༌གུན༌ནི༌ ནང༌ནེ༌ ཐེན༌ཏེ༌ མ༌བྲི༌ཁན༌གུན༌ནི༌ ཀ༌ནེ༌ དཀོན༌མཆོག༌གི༌ འི༌ སྤེ༌ཆའེ༌ ནང༌ང༌ མོལ༌ཁན༌ནི༌ སྲོག༌ ཏང༌ཁན༌ནི༌ ལྕང༌མའེ༌ སྐལ༌ལ༌ དང༌ ཏམ༌པའེ༌ གྱལ༌སའེ༌ ནང༌ང༌ དུག༌ཅེས༌སི༌ ཐོབ༌ཏང༌བོ༌ ཐེན༌ན༌ ཛད༌ཨིན༌།
REV 22:20 འི༌ བྲིས༌ཁན༌ ཚང༌མའེ༌ སྤང༌པོ༌ སལ༌ལ༌ ཛད༌ཁན༌ནི༌ ཡེ༌ཤུའི༌ མོལ༌ལ༌ ཛདས༌, “འོ༌ན༌ ང༌ གྱོགས༌པ༌ ཡོང༌ཨིན༌།” ངའེ༌ ལན༌ཏངས༌པིན༌, “ཨ༌མེན༌, ཀྱེ༌ གཙོ༌བོ༌ ཡེ༌ཤུ༌ སྐྱོད༌ད༌ ཛད༌།”
REV 22:21 གཙོ༌བོ༌ ཡེ༌ཤུའི༌ ཐུག༌རྗེ༌ དཀོན༌མཆོག༌གི༌ མི༌གུན༌ ཉམ༌པོ༌ ལུས༌ཤིག༌, ཨ༌མེན༌།
