﻿Tatatai.
15.
Pa a oroi ning a tnan akinalang ulak saot na langit, pa a kulkulan kol onoi. Mais a angelo la tong pas mais a akadik. Na akadik ne, na araropna, anasa a balakut ane God i bot sot. 
Pa a oroi ning a utna i tai arlar ana tasi di toli ana galas ning di ka suah tamani ana iah. La ning la tolsot pas a rokoio na inagoi pa manarna pa wawas ana risana, la tur ting na ris a tasi ning, pa la tong a gitala ning e God ka saran tari tanla. 
La saken a saksak ane Moses, a tena titol oros ane God, pa saksak ana Nat a Sipsip mang, “Leklek e God u rakrakai kol, anum na titol la itna pa di kulkulan kol onla. U a King ana mangis a tarai rop, anum na toltol la tostos pa la momol. 
Leklek, a taraila rop lar hanrawai u. Pa la rop lar atong aleklek pas a risam. Anasa u ka u totoh. A taraila miting na matanitula rop lar hanot pa lar lotu tetek u, anasa anum na tostos a titol i talapor rop tetek la.” 
Lamur tana, a tai pa a oroi pas a rumai artabar saot na langit i sapang. A rumai ning a rumai a sel ning i apuasa i mang e God i kes taum ana nuna tarai. 
Pa mais a angelo ning la tong pas mais a akadik, la purum misaot na rumai artabar ning. La mermer ana wakak a kaenla ning la totoh pa la talapor kol, pa la dot na malwasinla ana inau a gol. 
Pa ning a halin diat a lalaun a akakes i saran tar mais a besen di toli ana gol tetek mais a angelo ning. Pa mais a besen ana gol ne la bukus ana balakut ane God, esaning i laun tikin bel ir rarop. 
Pa rumai artabar i bukus ana sasawan miting na matatar ane God pa miting na rakrakaina. Pa bel tik ir tolsot pasi suir kas uting na rumai, tuk ning dir tolsot pas mais a akadik ana mais a angelo ning. 
