﻿A Ningnigo na Pas ane Jon.
1.
Mila warwara talapor o esaning a Warwara na Lalaun. Natnating ot ning belot di akes a rakrakan hanua, i laun. Mila ka longor tari, mila ka oroi tari ana matamila, mila oroi momol tari ot, pa mila tong ot a palaona. 
A Warwara na Lalaun i hanot talapor. Mila ka oroi tari, pa onone mila atalapori tetek mulo mang, esaning a lalaun tikin ning nating i kes taum oe Tamana, pa i hanot talapor tetek dala. 
Mila warwara talapor tetek mulo o esaning mila ka oroi tari pa mila ka longor tari, sur dalar baltaum, larning mila baltaum oe Tamandala, pa e Natnalik e Iesu Karisito. 
Pa mila tumus a ututnala ne, sur a gasgas anundala ir itna kol. 
A warwara ne mila longori ta e Iesu Karisito, pa mila atalapori tetek mulo mange: E God a talapor momol, pa bel ta mormorom onoi. 
Ning dala atongi mang dala baltaum oe God, ika dala laun ana mormorom, dala na tena asasongola, pa momolna bel i kes ondala. 
Ning dala laun ana talapor, arlar oe God i kes ana talapor, dalar baltaum artalai dala, pa suluk e Iesu, e Natnalik, ir atotoh dala kusun a toltol laulaula rop. 
Ning dala atongi mang bel al toltol laulau anundala, dala asongo ulak dala ot, pa momolna bel i kes ondala. 
Ning dala atong talapor anundala na toltol laulau, e God i tostos, pa ir tolsot anuna lele pa ir kepsen anundala na toltol laulaula, pa ir atotoh dala kusun a ututnala ning bel i tostos. 
Ning dala atongi mang bel dala tol ta toltol laulau, dala atongi mang e God a tena asasongo, pa nuna warwara bel i kes te na balandala. 
