﻿A Pas tetek a tarai Hibru.
1.
Nating ot e God i warwara ana elngen a propetla tetek na tumtubundala. I warwara larning ana galis a taim ana urmatana ngas. 
Ika ana ararop a pukakiarla ne, i warwara ana elngena e Natnalik tetek dala. E Natnalik ning i aslang pasi sur ir kibas a ututnala rop. Pa ana kuna e Natnalik, e God i akes a rakrakan hanua rop. 
E Natnalik i talapor kol ana matatar ane God, pa i arlar momol ot oe God. Ana nuna warwara ning i rakrakai kol, i tong akes a rakrakan hanua rop sur ir titol taum wakak. I saran tar anuna lalaun, sur ir atotoh dala kusun a toltol laulaula rop. Pa ning ka tol arop tar a titol ne, i kes ting na ris a sot a kuna e God, a tnan King kol, saot na langit. 
I maining e God i aitna pas e Natnalik sur ir itna kol tana angelola. I itna kol, arlar ana risana ning i itna kol tana risana a angelola. A risana ning e Tamana i saran tari tana. 
Anasa e God bel i atongi tetek ta angelo larne, “U a Natuklik, pa onone ia ka hanot e Tamam.” pa bel i atongi otleng on ta angelo mang, “Ar hanot e Tamana, pa i a Natuklik.” 
Pa ning e God i sune sen a ningnigo na Natnalik ute na rakrakan hanua, i atongi ono larne, “I wakak ning a angelola rop ane God lar lotu teteki.” 
Pa i atongi ana nuna angelola larne, “I lingir anuna angelola sur lar arlar ana wuwu, a angelola ning la anuna tena titolla, i lingir la sur lar arlar otleng ana irnga na iah.” 
Ika i atongi oe Natnalik larne, “God, anum a keskes a king ir kes tikin pa bel ir rop. U sira warkurai anum a matanitu ana tostos a toltol. 
U mang kol sur a tostos a toltol, pa u nget a toltol laulau. Ine a kamkamna ning e God, anum a God, i aslang pas u pa i saran tar a gasgas pa hanrawai tam, ning i itna kol tana gasgas pa hanrawai ning i sarani tetek na halalim.” 
Pa e God i atongi otleng tetek e Natnalik larne, “Leklek, ana turturkamna, u, u akes tar a kama rakrakan hanua, pa u akes a langit ana kum. 
Diar rarop oros ka, ika u, ur kes tikin. Diar turai amon arlar ana kaen. 
Ur hin diau arlar ana kaen a polpol, ur keles diau arlar lar tik ning i keles sen a turai a kaen. Ika u, bel ur ries, pa num na rau bel ir rarop.” 
E God bel i atongi otleng tetek ta angelo larne, “Ur kes te na sot a kuk, tuk ning ar tolsot pas anum na hirua sur lar kes nahaim.” 
A angelola rop la na ingun, ning la titol tetek e God. I sune sen la sur lar nangan a tarai, la ning ir alaun la. 
