﻿Matiu.
22.
E Iesu i warwara ulak tetek la ana warwara larlar mang, 
“A matanitu misaot na langit i arlar ana king ning i sang tar a ngasa na tinaulai sur e natna barsan. 
Pa i sune anuna tena titol orosla tetek la, ning di ka atai nigon tar la, sur lar ben pas la sur a ngasa. Ika la rop la ngongoio ka. 
I sune maleng anuna dingla na tena titol oros ana warwara mang, ‘Mulor atai la ning di ka atai nigon tar la mang, “Ia ka sang rop tar a utna na hangan. Ia ka umkol tar na barsan a bulumakau pa na butbut a bulumakau, a ututnala rop ka sang. Mulor han ute na ngasa na tinaulai.” ’ 
“Ika bel la longor, la han masik ka. Takai i han uting na nuna barim, takai otleng uting na nuna rumai a sisiurai. 
Pa dingla na tarai otleng ning di han sur la, la tong akes pas na tena titol oros ning, pa la alaulau la pa la umkol la. 
A king ning, a balana i kut kol, i sune sen anuna tarai a harum, pa la umkol sen na tena umumkol a taraila ning, pa la tun sen anunla a hanua. 
“I atongi tana anuna tena titol orosla mang, ‘Di ka sang tar a ngasa na tinaulai, ika la ning ia ka atai nigon tar la, bel la tostos sur lar kes ana ngasa. 
Mulo han ana ngasla, pa esining mulor pasteki, mulor atai i mang ir han ute sur a ngasa.’ 
Pa na tena titol oros la han uting na ngasla, pa la ben taum la rop ning la pastek la, na laulau a tarai pa wakak a taraila otleng, pa ngasa na tinaulai i bukus ana wasirala. 
“Ika ning a king i kas sur ir oroi a tarai, i oroi tetek pas ning a barsan ning bel i mermer ana ta kaen a ngasa na tinaulai. 
Pa i dekeni mang, ‘Lak, u kas mangmangasa tar ute? Bel anum ta kaen a ngasa na tinaulai.’ A barsan ning bel i kelesi. 
Lamur a king i atai anuna tena titolla mang, ‘Mulor dot pas naur a hana pa naur a kuna pa mulor migen purum seni utumo lapiu na mormorom. Di tangtangis pa di arngingit ngesendi tingia.’ 
“Di ka kabah pas a galis, ika di aslang pas siklik tarai kama.” 
Lamur a Parisaiola la han taum tar, pa la warwara taum pas mang lar toho e Iesu sur ta warwara anunai, ning lar tiwi ono. 
La sune sen anunla na kakak a asaerla pa halalna e Herot tetek e Iesu, pa la atongi mang, “Tena Asaer, mila tasmani mang u a tostos a barsan, pa u asaer a tarai ana ngas ane God ana momol. Bel u nuknuk kol ana saning a tarai la atongi hom, anasa a ginim i arlar ka tetek a tarai rop. 
Ur atai mila, asa a nuknukim? I mangasa, i tostos sur dir lou a totokom tetek a Sisar o bel?” 
Ika, e Iesu i tasmani mang, a nuknukinla i laulau, pa i atai la mang, “Mulo na tena asasongo, sur asaning mulo mang sur mulor toho iau? 
Mulor asangan iau ana ta mani na totokom.” Pa la saran tar a mani tana. 
Pa i deken la mang, “A manar pa tumtumus ne onoi an esi?” 
La kelesi mang, “Anuna Sisar.” Pa i atai la mang, “Asaning anuna Sisar, mulor sarani tetek a Sisar, pa saning ane God, mulor sarani otleng tetek e God.” 
Ning la longori, la kulkulan kol pa la han kusuni. 
Ana pukakiar ot ning a Sadusila, ning la sira puai ka mang bel ta lalaun ulak kusun a minat, la han tetek e Iesu, pa la dekeni mang, 
“Tena Asaer, e Moses i atongi mang, ning ta barsan ir mat pas kusun anuna hane, pa bel ta natundiau, e tasnalik ir ben pasi pa ir taulai i, sur ir aitna tar al kakakla ana risana e tasnalik ning ka mat. 
Ning a kabaitas mais a barsan rop ka, la kes na arpotor tamila. A ningnigona i taulai, pa i mat pas kusun anuna hane, pa bel ta natundiau. Pa murmur tana maleng i taulai a hane ning, pa i le i mat ka kusuni, ika bel ta natna. Lamur a munatol a tasnalik maleng. Pa i arlar larning tetek mais la rop, ning la taulai i. 
Pa lamur a hane maleng i mat. 
“Ana lalaun ulak kusun a minat, a hane ning, anun esi na halinla ma? Anasa la rop la ka taulai tari.” 
E Iesu i keles la mang, “Mulo rongo kol, anasa bel mulo tasman a Buk Tabu pa rakrakai e God otleng. 
Ana lalaun ulak kusun a minat, bel lar taulai ulak, lar arlar kama ana angelola saot na langit. 
Ika ning mulo puai mang a minatla bel lar laun ulak kusun a minat, mangmangasa, belot mulo was a warwara ning e God ka atong tari tamulo? I atongi mang, 
‘Iau a God ane Abaram, a God ane Aisak pa God ane Jekop.’ E God bel a God ana minatla, a God anun la ning la laun.” 
Ning a kunum a tarai la longori, la kulkulan kol ana nuna asaer. 
Ning a Parisaiola la longori mang, e Iesu ka wolot sot pas a Sadusila, la han taum teteki. 
Pa ning a halinla, a tena tastasmai ana warkurai, i tohoi ana kabah mang, 
“Tena Asaer, esi na warkurai ning i itna kol tanla rop?” 
Pa i kelesi mang, “‘Ur mang sur a Leklek anum a God ana balam rop, a ingum rop, pa nuknukim rop.’ 
A warkurai ne i itna kol tanla rop, pa ai a ningnigo na warkurai. 
Pa ine a munaurna, ning i arlar otleng larning, ‘Ur mang sur a halim larning u mang sur u ot.’ 
Naur a warkurai ne, diau a kamkama warkurai rop ane Moses pa asaerla anuna propetla.” 
Ning a Parisaiola la kes taum, e Iesu i deken la mang, 
“Asaning mulo nuki ana Karisito? Ai a nat esi?” La kelesi mang, “A nat e Dewit.” 
E Iesu i atai la mang, “Manglarning, i mangmangasa a Talngan Tabu i nigon e Dewit pa i atong a Karisito mang ‘anuk a Leklek’? Anasa e Dewit i atongi mang, 
‘A Leklek i atongi tetek anuk a Leklek, “Ur kes te na sot a kuk, tuk ning ar tolsot pas anum na hiruala sur lar kes nahaim.” ’ 
Ning e Dewit i atong a Karisito mang anuna Leklek, di tamana mangmangasa?” 
Pa bel tik i nuk pas ta warwara ulak sur ir kelesi ono. Turpasi ana pukakiar ning, bel ulak ma tik i deken e Iesu ana ta kabah, anasa la matmataut. 
