﻿Matiu.
19.
Ning e Iesu ka atong rop tar a warwarala ne, i han mitumo e Galili, utumo na papar Judia, ting na ning a ris a malum Jodan. 
Pa tnan kunum a tarai la muri, pa i alangolango pas na tinsamanla tingia. 
Dingla na Parisaio la han teteki sur lar tohoi. La dekeni mang, “I tostos arlar ana nundala na Warkurai, sur a barsan ir kepsen anuna hane na palai ta utna oros ka, o bel?” 
I keles la mang, “I mangasa, belot mulo was a warwara ting na Buk Tabu? I atongi larne: Ana kamkam a akakes, a Tena Akakes ‘i akes a tarai, sur lar barsan pa lar hane,’ 
pa i atongi mang, ‘Ine a kamna ning a barsan ir han kusun e tamana pa e tana, pa ir kes taum oe nuna hane, pa diar hanot takai ka ana palaondiau.’ 
Pa bel ma dia areur, dia takai ka. Asaning e God ka dot taum tari, gong ulak ma tik i kutusi.” 
La deken ulaki mang, “Sur asaning e Moses i saran a warkurai sur a barsan ir tumus a paka buk na kutus tinaulai pa ir sarani tetek anuna hane, pa ir kepseni?” 
I keles la mang, “E Moses i malmaling sen mulo sur mulor kepsen anumulo a gurarala, anasa a balamulo i rakrakai kol. Ika ana kamkama akakes bel i manglarne. 
A atongi tamulo, ning tik ir kepsen anuna hane ning bel i tol ta toltol laulau taum ana ta barsan masik, pa barsan ning ir taulai ulak ta hane, a barsan ning ka tol a toltol laulau.” 
Pa anuna kakak a asaerla la atongi tana mang, “Ning i manglarning tetek ta barsan pa anuna hane, i wakak sur gong tik i taulai.” 
I keles la mang, “Bel a tarai rop lar tolsoti sur lar kibas a warwara ne. La ka ning e God ka saran tar a rakrakai tanla. 
Urmatana kamkamna ning a tarai bel lar taulai. Dingla na tarai di agon la larotning. Dingla na tarai, a tarai la alaulau la, pa dingla na tarai otleng, bel lar taulai anasa la molot ana titol ana matanitu misaot na langit. Esining i tolsoti, ir mur a warwara ne.” 
Di ben a kakakla tetek e Iesu sur ir suah naur a kuna saot onla pa ir araring onla. Ika anuna kakak a asaerla la sairas la. 
E Iesu i atongi mang, “Mulor noren sen a kakakla sur lar han tetek iau. Gong mulo sairas la, anasa a matanitu misaot na langit anunla ning la manglarne.” 
Ning ka suah tar naur a kuna saot onla, i han mitingia. 
Ning a barman i han tetek e Iesu, pa i dekeni mang, “Tena Asaer, esi na wakak a utna ning ar toli sur ar kibas a lalaun tikin?” 
E Iesu i kelesi mang, “Asa kamkamna ning u deken iau ana saning i wakak? Takai sot ka i wakak. Ning u mang sur ur kibas a lalaun tikin, ur longor ana warkuraila.” 
Pa i dekeni mang, “Esi na warkuraila?” E Iesu i kelesi mang, “‘Gong u umkol tik, gong u tol a toltol laulau ana ta hane anuna tik o ta barsan anuna tik, gong u kinkinau, gong u artitiu asasongo, 
ur hanrawai e tamam pa e tnam,’ pa ‘ur mang sur a halim larning u mang sur u ot.’” 
A barman ning i atai i mang, “A warkuraila rop ning ia ka mur sot pasi. Asa ulak ma ar toli?” 
E Iesu i kelesi mang, “Ning u mang sur ur tostos momol, ur han pa ur siuran sen anum a gongonla rop, pa mani onoi, ur tabar a kapan a tarai ono. Ning ur toli larne, anum a wakak a gongon kanisaot na langit. Lamur ur han ute pa ur mur iau.” 
Ning a barman i longor a warwara ne, i han taum ana balmaris, anasa anuna gongon i galis kol. 
Pa e Iesu i atongi tan anuna kakak a asaerla mang, “A atong momoli tamulo, i ngangaten kol tetek a tena gongon sur ir kas ting na matanitu misaot na langit. 
A atongi otleng tamulo mang, ir ngangaten sur a kamel ir kas ting na mosol a sur a susuk, ika, i ngangaten kol sur a tena gongon ir kas ting na matanitu ane God.” 
Ning anuna kakak a asaerla la longori, la kulkulan kol pa la atongi mang, “Manglarning, esi ma ning dir alauni?” 
E Iesu i tai tetek la pa i atongi mang, “A tarai bel lar tolsot pasi, ika e God ir tolsot pas a ututnala rop.” 
E Pita i kelesi mang, “Oroi, mila ka han kusun anumila na ututnala rop, pa mila mur u. Asaning milar kibasi lamur?” 
E Iesu i atongi tanla mang, “A atong momoli tamulo, ning dir atona a ututnala rop, a Nat a Barsan ir kes na king ana nuna keskes a matatar. Pa mulo ning mulo ka mur iau, mulor kes ana ning a bonot pa pisir naur a keskes a king, pa mulor warkurai ning a bonot pa pisir naur a mangis a tarai Israel. 
Pa la rop ning la ka han kusun anunla na rumai, o kusun a tastasinla taraila pa gurarala, o kusun na tamtamanla, o na kabatnanla, o na natnatunla, o kusun anunla na piu, anasa la anuki, dir saran a marmar a utna larne tanla, pa lar kibas otleng a lalaun tikin. 
Ika a galis ning onone la nigo, lar mur, pa la ning onone la mur, lar nigo.” 
